10-1-0a


                    ༼ཐ༽
༄༅།  །ཀུན་མཁྱེན་གོ་བོ་རབ་འབྱམས་པ་བསོད་ནམས་སེང་གེའི་བཀའ་འབུམ། །
10-1-0b


empty page
10-1-1a


གླེགས་བམ་བཅུ་པ་ལ།  རྗེ་བཙུན་བླ་མ་མུས་པ་ཆེན་པོའི་རྣམ་པར་ཐར་པ་ངོ་མཆར་རྒྱ་མཚོ།  ལྡེབ་༢༧  1-53    དྲིས་ལན་བད་མོ་བཞད་པ།  55-65
ཉི་ཟླ་སེང་གེའི་དྲིས་ལན།  65-76  མདོ་ཁམས་པ་དབང་ཕྱུག་རྒྱལ་མཚན་གྱིས་དྲིས་ལན།  76-68  སྔགས་འཆང་རཏྣ་ཤྲཱིའི་དྲིས་ལན།  55-97  རིན་ཆེན་དཔལ་གྱི་དྲིས་ལན།  97-100
མུས་སྲད་པ་རྡོ་རྗེ་རྒྱལ་མཆན་གྱི་དྲིས་ལན།  100-107  སྒྲུབ་པ་ཚུལ་ཁྲིམས་བཟང་པོའི་དྲིས་ལན།  107-127 ལྡན་མ་ཤེས་རབ་སེང་གེའི་དྲིས་ལན།  127-135  བཀའ་བཅུ་པ་རིན་ཆེན་བྱང་
ཆུབ་ཀྱི་དྲིས་ལན་ཟླ་ཟེར་བྱ་བ།  135-142  ལྡན་མ་ཚེ་རྒྱལ་སྐྱབས་ཀྱི་དྲིས་ལན།  142-143  ལྡེབ་༤༥  རྣལ་འབྱོར་ཆེན་པོའི་སྡོམ་པའི་གནས་བྱེ་བྲག་ཏུ་བཤད་པ་ཟབ་དོན་བདུད་རྩིའི་ཉིང་
ཁུ་འཆི་བ་མེད་པའི་གོ་འཕང་སྦྱིན་པ།  ལྡེབ་༤  145-151  ཟབ་དོན་བདུད་རྩིའི་ཉིང་ཁུ་འཆི་བ་མེད་པའི་གོ་འཕང་སྦྱིན་པའི་རྣམ་བཤག་བདུད་རྩི་སྤེལ་བ་།  ལྡེབ་༤༧  153-246
འཇིག་རྟེན་དབང་ཕྱུག་གི་གཞུང་བཞི་ཉམས་སུ་ལེན་ཚུལ།  ལྡེབ་  ༧  247-259  ཡང་དག་པར་རྫོགས་པའི་སངས་རྒྱས་གཟི་བརྗིད་ཀྱི་རྒྱལ་པོའི་བརྟག་པའི་རྣམ་པར་བཤད་པ་གཞན་ཕན་
10-1-1b


ཀུན་ཁྱབ།  ལྡེབ་༧༠  261-400  ཀུན་རིག་གི་ཞི་བའི་སྦྱིན་སྲེག  །ལྡེབ་༧  401-414   བཅོམ་ལྡན་འདས་ཀུན་རིག་གི་ཆོ་ག་ལག་ཏུ་བླང་བའི་རིམ་པ་གཞན་ཕན་འོད་ཟེར་ལ་རྩོད་པ་སྤོང་
བ་གཞན་ཕན་གནོད་འཇོམས།  ལྡེབ་༢༨  415-469  འཇམ་པའི་རྡོ་རྗེའི་སྒྲུབ་ཐབས་ཀུན་ཏུ་བཟང་པོའི་ཉི་འོད།  ལྡེབ་  19  471-507  འཇམ་པའི་རྡོ་རྗེའི་དཀྱིལ་ཆོག་ཡེ་ཤེས་རྣམ་
རོལ།  509-546  འཇམ་པའི་རྡོ་རྗེ་དང་སྤྱན་རས་གཟིགས་ཀྱི་སྒྲུབ་དཀྱིལ་མི་འདྲ་བའི་ཁྱད་པར།  546-551  འཇམ་པའི་རྡོ་རྗེའི་གཏོར་ཆོག་ཕྲིན་ལས་རྣམ་རོལ།  551-559
ལྡེབ་ ༢༦  དཔལ་གསང་བ་འདུས་པ་འཇམ་པའི་རྡོ་རྗེའི་ཕྱི་རོལ་ཚོགས་བསག་གི་ཆོ་ག་མཎྜལ་ལ་བརྟེན་ཏེ་སྒྲུབ་ཅིང་མཆོད་པ།  ལྡེབ་༦  561-571  གསང་བ་འདུས་པའི་རིམ་པ་
ལྔའི་མན་་ངག་གི་ཁྲིད་ཡིག་ཟུང་འཇུག་གསལ་བའི་སྒྲོན་མེ།  ལྡེབ་༣༢  573-635  རྡོ་རྗེ་ཐེག་པ་ལ་ལོག་སྨྲ་ཆར་གཅོད་པ་རིགས་པའི་མཚོན་ཆ།  ལྡེབ་༣༡  637-698  བསྡོམས་
ལྡེབ་ ༣༤༩ ཡོད།
10-2-1a


༄།  ཨ ཧོས མུ དྲ ནཱ་མ བྷ ཊྚཱ ར ཀ མ ཧཱ གུ རུ ར ཏྣ དྷཱ ཛ བི མོ ཀྵ བི ཧ ར ཏི སྨ། །
༄༅།  །རྗེ་བཙུན་བླ་མ་མུས་པ་ཆེན་པོའི་རྣམ་པར་ཐར་པ་ངོ་མཚར་རྒྱ་མཚོ་ཞེས་བྱ་བ་བཞུགས་སོ། །།
10-2-1b


 ༄༅།  །རྗེ་བཙུན་བླ་མ་མུས་པ་ཆེན་པོའི་རྣམ་པར་ཐར་པ་ངོ་མཚར་རྒྱ་མཚོ་ཞེས་བྱ་བ།  དཔལ་ལྡན་བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །རྒྱལ་བ་རྒྱ་མཚོའི་གསུང་རབ་རྒྱ་མཚོ་བློ་གྲོས་རྒྱ་མཚོས་ཡོངས་བཟུང་སྟེ། །
རྒྱལ་སྲས་རྒྱ་མཚོའི་སྤྱོད་པ་རྒྱ་མཚོ་བརྩོན་པ་རྒྱ་མཚོས་ལེགས་བསྒྲུབས་པས། །མདོ་རྒྱུད་རྒྱ་མཚོའི་དགོངས་པ་རྒྱ་མཚོ་ལག་ལེན་རྒྱ་མཚོའི་ཚོགས་བཅས་ཀྱིས། །སྐལ་ལྡན་རྒྱ་མཚོའི་དད་པ་རྒྱ་མཚོར་གདམས་པ་རྒྱ་
མཚོས་གཏམས་མཛད་རྒྱལ། །སྐྱོན་མེད་ཡོན་ཏན་ཀུན་གྱི་མཛོད་མངའ་ཁྱོད་ཀྱི་རྣམ་ཐར་མ་ལུས་པ། །གྲངས་མེད་ལྕེ་ཡིས་བསྐལ་པར་བརྗོད་ཀྱང་བས་པར་མི་འགྱུར་དེ་ལྟ་ནའང་། །བསླུ་མེད་ངག་གིས་ཐུན་མོང་
གྲགས་པ་ཙམ་ཞིག་འདིར་ནི་བརྗོད་པ་ལ། །ཟོལ་མེད་དད་པའི་ཡིད་ལྡན་དོན་གཉེར་ཚོགས་རྣམས་དགའ་བས་ཉན་པར་གྱིས། །རྒྱལ་བ་ཐམས་ཅད་ཀྱི་མཁྱེན་བརྩེ་གཅིག་ཏུ་བསྡུས་ནས་སྙིགས་མའི་དུས་སུ་གངས་
10-2-2a


རིའི་ཁྲོད་འདིར་མིའི་གཟུགས་སུ་སྤྲུལ་ཏེ།  འགྲོ་བ་རྣམས་ཀྱི་དོན་མཛད་པའི་བདག་ཉིད་ཆེན་པོ་ལྷ་དང་བཅས་པའི་འཇིག་རྟེན་ན།  དཀོན་མཆོག་རྒྱལ་མཚན་ཞེས་མཚན་ཡོངས་སུ་གྲགས་པ་
དེ་ཉིད་ཀྱི་རྣམ་པར་ཐར་པ་ངོ་མཚར་ཆུ་རྒྱུན་ཞེས་བྱ་བ་ཚིགས་སུ་བཅད་པ་བདུན་ཅུ་པ་ཞིག་སྔར་རྣམ་པར་སྤེལ་བ་ལས།  སླར་ཡང་དེ་ཉིད་ཀྱི་དོན་རྣམ་པར་འགྲེལ་པ་ཅིག་གྱིས་ཤིག་ཅེས་ཡུལ་མཆོག་ལ་དད་པ་དང་ལྡན་
པ་དག་གིས་བསྐུལ་བའི་ཕྱིར་ན་ངོ་མཚར་རྒྱ་མཚོ་འདི་འབྲི་བ་ལ་སྐྱོན་མེད་དོ། །འདི་ལ་གསུམ་སྟེ།  རྩོམ་པ་ལ་འཇུག་པ་ཀླད་ཀྱི་དོན།  བརྩམ་པར་བྱ་བ་གཞུང་གི་དོན།  རྩོམ་པ་མཐར་ཕྱིན་པ་མཇུག་གི་དོན་ནོ། །དང་པོ་ལ་
མཚན་གྱི་དོན།  མཆོད་པར་བརྗོད་པ།  བཤད་པར་དམ་བཅའ་བ་དང་གསུམ་ལས།  དང་པོ་ནི།  རྗེ་བཙུན་བླ་མ་དམ་པ་མུས་པ་ཆེན་པོའི་རྣམ་པར་ཐར་པ་ངོ་མཚར་ཆུ་རྒྱུན་ཞེས་བྱ་བ་ཞེས་པ་སྟེ།  རྗེ་བཙུན་དམ་པའི་ཡོན་
10-2-2b


ཏན་མ་དྲོས་པའི་མཚོ་ལས་བྱུང་ཞིང་།  མཐོང་བ་དང་ཐོས་པ་དག་གིས་ངོ་མཚར་གྱི་དཔལ་བསྐྱེད་ལ།  གདུལ་བྱ་རྣམས་ཀྱི་དད་པའི་རྒྱ་མཚོར་འཇུག་པའི་ཕྱིར་ན་དེ་སྐད་ཅེས་བྱའོ། །གཉིས་པ་ལ།  ལམ་སྟོན་པ་པོ་སངས་རྒྱས་ལ་མཆོད་པར་བརྗོད་པ།  
དངོས་གྲུབ་སྟེར་བ་པོ་བླ་མ་ཉིད་ལ་མཆོད་པར་བརྗོད་པ་དང་གཉིས་ལས།  དང་པོ་ནི།  རྒྱལ་བ་རྡོ་རྗེ་འཆང་ལ་ཕྱག་འཚལ་ལོ། །ཞེས་པའོ། །གཉིས་པ་ནི།  དཀོན་མཆོག་མཁྱེན་པའི་ཞེས་སོགས་ཚིགས་བཅད་གཅིག་སྟེ།  འདིའི་མཚན་གྱི་དོན་མཁྱེན་
བརྩེ་ནུས་པ་གསུམ་དང་སྦྱར་ནས།  དེ་ཉིད་ཀྱང་རིགས་གསུམ་གྱི་རྒྱལ་བ་གསུམ་དང་མཚུངས་པར་སྟོན་པའོ། །ནས་ཞེས་པ་ནི་ལྷག་མ་འདྲེན་པའི་ཚིག་གོ།  གསུམ་པ་ནི།  སྐྱེས་ཆེན་དམ་པའི་ཞེས་སོགས་ཚིགས་བཅད་གཅིག་སྟེ།  སྐྱེས་བུ་ཆེན་པོ་
འདི་ཉིད་ངེས་པའི་དོན་དུ་འོག་མིན་སྟུག་པོ་བཀོད་པའི་ཞིང་ཁམས་སུ་ཕྱི་དང་ནང་གི་མངོན་པར་བྱང་ཆུབ་པའི་ཚུལ་གྱིས་མངོན་པར་རྫོགས་པར་སངས་རྒྱས་ནས།  སླར་ཡང་འཇིག་རྟེན་གྱི་ཁམས་གཞལ་དུ་མེད་པ་ན།  སྤྲུལ་པ་དཔག་ཏུ་མེད་པས་
སེམས་ཅན་གྱི་དོན་མཛད་པར་ངེས་པའི་ཕྱིར་ན་རྣམ་པར་ཐར་པ་མ་ལུས་པ་ནི་སུས་ཀྱང་བརྗོད་པར་མི་ནུས་ཏེ།  ཚད་གཟུང་དུ་མེད་པའི་ཕྱིར་རོ། །དེའི་ཆ་ཤས་ཞིང་འདིར་སྐལ་པ་མཉམ་པའི་གདུལ་བྱ་རྣམས་ལ་ཐུན་མོང་དུ་སྣང་བ་རྒྱ་མཚོ་ལྟ་བུ་ལས་དད་
པའི་བློ་གྲོས་ཀྱི་སྙིམ་པས་བཅུས་ཏེ།  བདག་ཉིད་ཀྱང་དམ་པ་འདི་ལྟ་བུ་ལས་གདམས་པ་འདི་ལྟ་བུ་ཐོབ་བོ་སྙམ་དུ་ཡིད་ཚིམ་པ་དང་།  གཞན་དག་ལ་ཡང་དད་པའི་ཆུ་རྒྱུན་མ་སྐྱེས་པ་སྐྱེད་པ་དང་།  སྐྱེས་པ་སྤེལ་བའི་ཕྱིར་དུ་རང་ཉིད་ཀྱིས་མཐོང་བ་དང་།  ཡིད་
10-2-3a


ཆེས་པ་ལས་ཐོས་པ་དང་།  ཡང་དག་པའི་གཏན་ཚིགས་ལས་ངེས་པ་རྙེད་པ་རྣམས་བརྗོད་པར་བྱའོ་ཞེས་པའི་དོན་ཏོ། །གཉིས་པ་ལ་གསུམ་སྟེ།  ཡོན་ཏན་རྟོགས་པའི་ཆེད་དུ་རྣམ་ཐར་བརྗོད་པ།  བསོད་ནམས་སྤེལ་བའི་
ཆེད་དུ་རྒྱུན་བཤགས་བྱ་བ།  འབྲས་བུ་འགྲུབ་བའི་ཆེད་དུ་སྨོན་ལམ་གདབ་པའོ། །དང་པོ་ལ་བརྒྱད་དེ།  རིགས་ཁྱད་པར་ཅན་དུ་འཁྲུངས་པའི་ཚུལ།  ངེས་འབྱུང་གི་བསམ་པས་བསྐུལ་བའི་ཚུལ།  བསྟན་པའི་སྒོར་ཞུགས་པའི་ཚུལ།  ཐོས་བསམ་གྱིས་
རྒྱུད་སྦྱངས་པའི་ཚུལ།  བསྒོམ་པས་ཉམས་སུ་བླང་བའི་ཚུལ།  བླ་མ་ལྷ་ཡིས་རྗེས་སུ་བཟུང་བའི་ཚུལ།  འབྲས་བུས་བསྟན་པ་ལ་བྱ་བ་བྱས་པའི་ཚུལ།  བསམ་གྱིས་མི་ཁྱབ་པའི་རྣམ་ཐར་གཞན་བསྟན་པའོ། །དང་པོ་ནི།  རྒྱ་ཆེན་སྨོན་ལམ་ཞེས་སོགས་
ཚིགས་བཅད་གཅིག་སྟེ།  འགྲོ་བ་མགོན་མེད་པ་རྣམས་ཀྱི་མགོན་དུ་གྱུར་ཅིག་ཅེས་པའི་སྨོན་ལམ་གྱིས་སྔོན་བསགས་པའི་ཚོགས་གཉིས་ཀྱི་ཆུ་གཏེར་བསྲུབས་པ་ལས།  སྡེ་སྣོད་གསུམ་དང་རྒྱུད་སྡེ་བཞིའི་བསྟན་པ་གསེར་གྱི་རི་བོས་བསྐོར་བའི་གངས་
རིའི་ཁྲོད་འདིར་དལ་འབྱོར་གྱི་ལྷུན་པོ་བརྙེས་ཏེ།  དེ་ཡང་དབུས་གཙང་རུ་བཞིར་གྲགས་པའི་གཡས་རུ་བྱང་གི་ཆ་འཕགས་པ་འཇིག་རྟེན་དབང་ཕྱུག་གིས་བྱིན་གྱིས་བརླབས་པའི་སྐྱེས་ཆེན་དུ་མ་བྱོན་པའི་མུས་ཀྱི་ལུང་པའི་སྟོད།  རྟ་མོ་གླིང་སྐྱ་ཞེས་བྱ་བར།  
ཡབ་དཀོན་མཆོག་བཟང་པོ་ལོ་སོ་བཞི་ལོན་པའི་དུས་སུ།  ཡུམ་ནམ་མཁའ་སྐྱོང་ལས།  ས་ཕོ་འབྲུག་གི་ལོ་ལ་རྗེ་འདི་ཉིད་འཁྲུངས་པའི་མཚན་དཀོན་མཆོག་དར་ཞེས་བྱའོ། །དེ་ཡང་འདིའི་རིགས་ཞང་།  རུས་པ་ལྡོང་ཡིན་ལ།  ཡབ་མེས་ཞང་འོད་ལྡན་དེས།  
10-2-3b


མུས་སུ་བྱོན།  དེའི་སྲས་པོ་ཞང་གཡུང་ངེ༷་བཅུ་གཅིག་ཞལ་ལ་ཐུགས་དམ་དུ་མཛད་པས་ལོ་གྱ་དྲུག་ཐུབ།  དེའི་སྲས་དཀོན་མཆོག་བཟང་པོ་སྟེ།  ནམ་མཁའ་བློ་གྲོས་པ་ལ་རབ་བྱུང་ཞུས་པའི་མཚན་དཀོན་མཆོག་དཔལ།  དེ་ནས་ཇོ་ནང་པ་ནམ་ཆོས་པ་ལ་དོན་ཞགས་
དང་།  སྦྱོར་དྲུག་ཞུས།  མུས་ཆེན་ནམ་མཁའི་རྣལ་འབྱོར་པ་ལས་ཁྲིད་ཟབ་མོ་འགའ་ཞིག་ཞུས་ཏེ།  དོན་ཞགས་ཀྱི་གཟུངས་དང་ཡི་གེ་དྲུག་པ་ལ་ཐུགས་དམ་མཛད་པ་ཞིག་སྟེ།  དེས་ན་རྗེ་འདི་ཉིད་ནི་སྐྱེས་བུ་དམ་པའི་རིགས་སུ་འཁྲུངས་པ་ཡིན་ནོ། །གཉིས་
པ་ནི།  གཞོན་ནུ་ཉིད་ནས་ཞེས་སོགས་ཚིགས་བཅད་གཅིག་སྟེ།  རྗེ་འདི་ཉིད་ཆུང་ངུའི་དུས་ནས་ཕྱི་རོལ་གྱི་དངོས་པོའི་འགྱུར་བ་ཙམ་ལ་བརྟེན་ནས་ཀྱང་མི་རྟག་པའི་བློ་སྐྱེས་ཏེ།  འཇིག་རྟེན་ཐམས་ཅད་ལ་ཞེན་པ་ལོག་པ་དང་།  ཕྱོགས་མཐའ་མེད་དུ་མི་
དང་།  བ་གླང་དང་།  རི་དྭགས་སོགས་རབ་ཏུ་མང་པོ་ཡོད་པ་ལ་དཔག་ནས་འཁོར་བ་མཐའ་མེད་དུ་རྟོགས།  ངེས་འབྱུང་གི་བློ་དྲག་པོ་སྐྱེས་པ་དང་།  དགུང་ལོ་གཉིས་གསུམ་ཙམ་ན་ཡབ་ཡུམ་གྱི་རུམ་དུ་གཟིམས་པའི་དུས་སུ་སྣང་བ་བདེན་མེད་
དུ་རྟོགས་པའི་ཏིང་ངེ་འཛིན་སྐྱེས་པ་དང་།  རྩེད་མོ་རྩེ་བའི་དུས་སུ་ཡང་རྡོ་བ་དང་ཚ་ཁང་གི་ལྷ་ལ་སོགས་པ་ཆེ་བ་རྣམས་ལ་ཆུང་བ་རྣམས་བཏུད་ནས་བཙུན་པ་གྱིས།  དབང་བསྐུར་ཞུས་ཞེས་བྱ་བ་ལ་སོགས་པ་ལས་ཐ་མལ་གྱི་རྩེད་མོ་མི་མཛད་པ་དང་།  
བྲག་ཕུག་སོགས་སུ་སླེབ་པའི་ཚེ་སྒོམ་བྱེད་པའི་རྣམ་འགྱུར་མཛད་པ་སོགས་རྣམ་པ་ཐམས་ཅད་དུ་དགེ་བ་བསྒྲུབ་པར་བཞེད་པའི་ངང་ཚུལ་ཅན་ཡིན་པར་གྲག་གོ། །དེ་ནས་དགུང་ལོ་དགུ་ཚུན་ཆད་དུ་བླ་མ་གུ་རུ་པ་ཞེས་བྱ་བ་དང་།  བླ་མ་མཁའ་འགྲོ་བ་ཞེས་བྱ་
10-2-4a


བའི་བུད་མེད་ཅིག་དང་།  བླ་མ་ནམ་མཁའ་བློ་གྲོས་པ་རྣམས་ལ་ཆོས་ཅུང་ཟད་གསན་ནོ། །གསུམ་པ་ནི།  བསྟན་ལ་འཇུག་ཚེ་ཞེས་སོགས་ཚིགས་བཅད་གཅིག་སྟེ།  དགུང་ལོ་དགུ་བཞེས་པའི་དུས་སུ།  མཁན་པོ་རྒྱལ་སྲས་ཐོགས་
པ་མེད་པའི་དངོས་སློབ་དབང་འོད་བཟང་པོ།  སློབ་དཔོན་དཔལ་འོད་པ་ལས་དགེ་ཚུལ་གྱི་སྡོམ་པ་མནོས་ཏེ་མཁན་པོ་ལས།  ཀྱེ་རྡོར་མན་ངག་ལུགས་ཀྱི་དབང་།  ཐེག་པ་ཆེན་པོའི་བློ་སྦྱོང་ཟིན་བྲིས་མ།  འགྲོ་མགོན་དཔལ་ཡེ་བས་མཛད་པའི་རྒྱལ་སྲས་པའི་
རྣམ་ཐར་གྱི་ལུང་རྣམས་གསན་ནོ། །བཞི་པ་ལ་གཉིས་ཏེ།  འདྲེན་པ་གཞན་ལས་ཇི་ལྟར་གསན་པའི་ཚུལ།  འདྲེན་པ་མཆོག་ལས་ཇི་ལྟར་གསན་པའི་ཚུལ་ལོ། །དང་པོ་ནི།  ཐོས་པ་རྒྱ་མཚོའི་ཞེས་སོགས་ཚིགས་བཅད་བདུན་ཏེ།  སྐྱེས་བུ་དམ་པ་རྣམས་ནི་
སྐྱེ་བ་ཐམས་ཅད་དུ་ཡང་དག་པའི་ལམ་ལ་གོམས་པའི་སྟོབས་ཀྱིས།  གཞོན་ནུའི་དུས་ཉིད་ནས་ཐོས་པ་རྒྱ་མཚོའི་གླིང་དུ་འཇུག་པར་མཛད་དོ། །དེ་ཡང་འདི་སྐད་ཐོས་ཏེ།  དགུང་ལོ་བཅུ་གསུམ་བཞེས་པ་ན།  མུས་ཀྱི་ཆོས་སྡེ་གླེ་ལུང་ཞེས་བྱ་བར།  ཆེན་པོ་
བྱང་སེང་བ་སྐུ་མཆེད་ཀྱི་དྲུང་དུ་བྱོན་ཏེ།  ཕར་ཕྱིན་དང་སྤྱོད་འཇུག་ལ་ཐུགས་སྤྱོད་མཛད།  བར་སྐབས་སུ་བླ་མ་ནམ་མཁའ་ཆོས་བཟང་བ་ལ་དུས་འཁོར་ཡོངས་རྫོགས་ཀྱི་དབང་།  འཇིགས་བྱེད་ཀྱི་དབང་གསན་ཅིང་།  བྱང་སེང་བ་ལས་ཕར་ཕྱིན་བུ་ཊཱིཀ་གི་སྐབས་དང་
པོའི་ལུང་དང་།  ཞིང་མོ་ཆེ་བའི་བློ་སྦྱོང་ཡང་གསན་ཏེ།  བཅོ་བརྒྱད་པ་ན་ཆོས་སྡེ་དེ་ཉིད་དུ་བཤད་པ་དང་།  དེའི་དགའ་སྟོན་རྒྱ་ཆེན་པོ་མཛད་དོ། །ཉི་ཤུ་པ་ན་མུས་ཀྱི་གནས་གསར་ཞེས་བྱ་བའི་གཙུག་ལག་ཁང་དུ།  གྲུབ་པའི་དབང་ཕྱུག་ཆེན་པོ་མཉམ་མེད་ནམ་
10-2-4b


མཁའི་རྣལ་འབྱོར་པའི་ཞབས་དྲུང་དུ་བྱོན་ཏེ།  ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་གཅོད་ཀྱི་ཁྲིད་ཞུས་ནས།  སྤྱིར་གཅོད་ཁྲིད་ལ་ཐུན་དྲུག་ཏུ་བྱེད་པ་ཡིན་ནའང་།  ཐུན་གྱི་བྱེ་བྲག་མེད་པར་ཉིན་མཚན་ཁོར་ཡུག་ཏུ་བརྩོན་པ་དྲག་པོས་བསྒོམས་པས་ཐུགས་
དམ་གྱི་གཟིགས་སྣང་མང་པོ་དང་།  བྱམས་པ་དང་སྙིང་རྗེ་ཚད་མེད་པ་ཐུགས་རྒྱུད་ལ་འཁྲུངས།  ཁྱད་པར་དུ་བླ་མའི་རྣལ་འབྱོར་བསྒོམས་ཏེ།  ཡུམ་གྱི་སྐྱེ་བ་ཕྱི་མ་གང་ཡིན་བསྟན་དུ་གསོལ་ཞེས་གསོལ་བ་དྲག་ཏུ་བཏབ་ནས་གཟིགས་པས།  འདི་དང་འདི་ཡིན་
ཞེས་པའི་མཚན་མ་ལན་གཉིས་སུ་བྱུང་བ་སོགས་ཀྱི་ཉམས་རྟོགས་ཁྱད་པར་ཅན་མང་དུ་འཁྲུངས་སོ། །ད་ནས་དེའི་ཆོས་སྐོར་ལ།  སྐྱེ་མེད་དོ་པ་ནས་བརྒྱུད་པའི་གཅོད་ཀྱི་ཁྲིད།  མ་གཅིག་སོགས་ཀྱི་ལོ་རྒྱུས།  གྲྭ་པ་ཧག་གི་ལོ་རྒྱུས།  རྒྱ་ནག་གཅེར་བུའི་
བཀའ་བརྒྱུད།  སྨར་སེར་པོའི་བཀའ་བརྒྱུད།  བཀའ་ཚོམས་ཀྱི་གཞུང་།  བཀའ་ཚོམས་ཀྱི་གཞུང་ལན་སོ་ལྔ་པ།  ཨཱཪྱ་དེ་བའི་ཚིགས་བཅད་ཆེ་ཆུང་གཉིས་འགྲེལ་པ་དང་བཅས་པ་དང་།  ངོ་སྤྲོད་ལྟ་བའི་སྐོར།  ཉམས་ལེན་སྤྱོད་པའི་སྐོར།  བོགས་
འདོན་གེགས་སེལ་གྱི་སྐོར།  ལམ་རིམ་པ་བཅུ་གསུམ་ལ་སོགས་པ་མ་གཅིག་གི་ཆོས་སྐོར་ཡོངས་སུ་རྫོགས་པ་གསན་ནོ། །ཉེར་གཅིག་པ་ལ་ངམ་རིངས་ཀྱི་ཆོས་སྡེ་ཆེན་པོར་སློབ་དཔོན་ཆེན་པོ་བློ་གྲོས་རྒྱལ་མཚན་པ་དང་།  དེའི་སློབ་ཆུང་དགེ་བའི་བཤེས་
གཉེན་སངས་རྒྱས་བློ་གྲོས་བ་དཔོན་སློབ་ཀྱི་དྲུང་དུ་བསྙེན་ཏེ།  གཙོ་བོར་ཕར་ཚད་ལ་ཐུགས་སྦྱོངས།  སངས་རྒྱས་བློ་གྲོས་པ་ལས་ཇོ་བོའི་ཆོས་ཆུང་བརྒྱ་རྩའི་ལུང་རྣམས་གསན་ཏེ།  ཉེར་གསུམ་པ་ལ་ཆོས་གྲྭ་དེ་ཉིད་དུ་གྲྭ་སྐོར་ཡང་མཛད་དོ། །ཉེར་བཞི་པ་
10-2-5a


ལ་བཟང་ལྡན་གྱི་མཁས་པ་ཆེན་པོ་ཐུགས་རྗེ་དཔལ་བ་ལ་སྟོད་ལྷོར་བྱོན་པའི་ཆག་ཕྱིར་བྱོན།  ལོ་གཅིག་ཙམ་བཞུགས་ནས་ལུང་རིགས་ལེགས་པར་སྦྱངས་ནས་དངོས་སྟོབས་རིགས་པའི་དབང་ཕྱུག་ཆེན་པོར་གྱུར་ཏེ།  ཕ་རོལ་གྱི་རྒོལ་
བ་གང་ལ་ཡང་མི་འཇིགས་པའི་སྤོབས་པ་ཐོབ་པར་གྱུར་ཏོ། །ཉེར་ལྔ་པ་ལ་འཛམ་གླིང་མཁས་པའི་དབང་པོ་གཡག་ཕྲུག༷་སངས་རྒྱས་དཔལ་ལ་སྟོད་ལྷོར་ཕེབས་པ་དང་མཇལ་ཏེ།  ཕར་ཕྱིན་གྱི་བཤད་པ་ཚར་ཕྱེད་དང་གཉིས།  མདོ་སྡུད་པ།  མི་གཡོ་བ་དཀར་
པོའི་སྒྲུབ་ཐབས་ཀྱི་ལུང་།  དབུ་མ་ལུགས་ཀྱི་སེམས་བསྐྱེད་རྣམས་གསན་ཏེ།  དེ་ཉིད་ཀྱི་ལོར་གདན་ས་ཆེན་པོ་དཔལ་ལྡན་ས་སྐྱར་གྲྭ་སྐོར་མཛད་དེ་བཤད་པ་དང་སྟོན་པ་ལ་ཀུན་གྱིས་མཐུན་སྣང་དུ་གྲུབ་པར་གྱུར་ཏོ། །ཉེར་དྲུག་པ་ལ་མདོག་གི་ཚ་སྣ་ཞེས་བྱ་བའི་
གཙུག་ལག་ཁང་དུ།  གངས་ཅན་མཁས་པའི་གཙུག་རྒྱན་སེམས་དཔའ་ཆེན་པོ་གཞོན་ནུ་རྒྱལ་མཆོག་པ་དང་མཇལ་ཏེ་འཆག་ཕྱིར་བྱོན།  ལུང་རིགས་ལ་ཐུགས་སྦྱངས་ནས།  ཉེར་བདུན་པ་ལ་གནས་གསར་དུ་ཆོས་རྗེ་ནམ་མཁའི་རྣལ་འབྱོར་པ་ལ་མཇལ་དུ་བྱོན་
པས།  སྔར་གཅོད་ཁྲིད་ཞུས་པའི་དུས་ཀྱི་དགེ་སྦྱོར་གྱི་བརྩོན་པ་དྲག་པོ་དང་།  ཉམས་རྟོགས་ཀྱི་འཁྲུངས་ལུགས་ཁྱད་པར་ཅན་རྣམས་ལ་ཐུགས་དགྱེས་པའི་སྟོབས་ཀྱིས་ད་ནི་གུ་ཅིག་ཞུས་ནས་དགེ་སྦྱོར་ལ་དྲིལ་བ་ཅིག་འཐད་ཅེས་པའི་ཞལ་ད་གནང་བ་ལ།  འདུལ་
མངོན་དང་དབུ་མ་རྩ་འཇུག་སོགས་པུ་སྟི་འགའ་ཡར་ཞིག་ལ་གྲྭ་སྐོར་བྱས་ནས།  དེ་ནས་དགེ་སྦྱོར་ལ་དྲིལ་བ་ཞུ་ཞེས་ཞུས་པས།  ཆོས་ཀྱི་དོན་གོ་ན་གྲྭ་སྐོར་མ་བྱས་ཀྱང་ཉེས་པ་མེད།  དོན་མ་གོ་ན་གྲྭ་སྐོར་བྱས་ཀྱང་དགོས་པ་མེད་པས་ཅིས་ཀྱང་དགེ་སྦྱོར་ལ་
10-2-5b


དྲིལ་བ་དྲག་ཅེས་གསུང་།  འོ་ན་དེ་ལྟར་བྱེད་པ་ཞུ་ཞུས་ནས།  ཐོག་མར་ནི་གུ་ཆོས་དྲུག་གི་ཁྲིད་བྱིན་རླབས་དང་བཅས་པ།  སེམས་འཆི་མེད་རྣམས་ཀྱི་ཁྲིད་ཞུས་ནས།  ཆོས་དྲུག་རྡོ་རྗེའི་ཚིག་རྐང་།  ཚིག་གསལ་ཐེམ་ཡིག །མུས་ཆེན་པས་མཛད་པའི་ཁྲིད་ཡིག །
སྒྱུ་མ་ལམ་རིམ་རྩ་འགྲེལ་སྒྱུ་མ་གཏན་ལ་དབབ་པ།  སྒྱུ་ལུས་འཛིན་པ་རང་གྲོལ།  ལམ་དྲི་མ་མེད་པ་ལ་སོགས་པའི་ནི་གུའི་ཆོས་སྐོར་རྫོགས་པར་ཞུས།  ཡང་ནཱ་རོ་ཆོས་དྲུག་གི་ཁྲིད་ཞུས་ནས་ནཱ་རོའི་ཁྲིད་ཡིག་ཐབས་ལམ་ཚིགས་བཅད་མ་ལ་སོགས་པ་ནཱ་རོ་
ཆོས་དྲུག་གི་ཆོས་སྐོར་རྫོགས་པར་གསན།  ཡང་ཕྱག་རྒྱ་ཆེན་པོ་སྙིང་པོ་དོན་གྱི་ཁྲིད་ཡིག་ལ་སོགས་པ་ཕྱག་རྒྱ་ཆེན་པོའི་ཆོས་སྐོར་རྣམས་དང་།  ཡང་དགོན་པའི་རི་ཆོས་ཡོན་ཏན་ཀུན་འབྱུང་ལ་སོགས་པ་རི་ཆོས་ཀྱི་སྐོར་རྣམས་དང་།  བློ་སྦྱོང་རྩེ་མོ་གཉིས་
པ་ལ་སོགས་པ་བློ་སྦྱོང་གི་སྐོར་འགའ་ཞིག་དང་།  ཞི་བྱེད་སྐམ་ལུགས་ཀྱི་ཁྲིད་ཞུས་ནས་ཞི་བྱེད་བླ་མ་བརྒྱུད་པའི་ལོ་རྒྱུས་ཆེ་ཆུང་གཉིས་ལ་སོགས་པའི་ཞི་བྱེད་ཀྱི་སྐོར་ཡོངས་སུ་རྫོགས་པ་གསན་ཏེ།  དེ་དག་ཀྱང་མིང་རྐྱང་ཙམ་དུ་མ་ལུས་པར་སོ་སོའི་ཉམས་
རྟོགས་རྣམས་རྒྱུད་ལ་སྐྱེས་སྐྱེས་ཀྱི་བར་དུ་བརྩོན་པ་དྲག་པོས་བསྒོམས་པས།  ཆོས་རྗེའི་ཞལ་ནས་ཁྱོད་ལ་ཉམས་རྟོགས་འདི་དང་འདི་འདྲ་བྱུང་འདུག་གོ་ཞེས་ངོ་སྤྲོད་ཀྱང་མཛད།  གཞན་ཡང་དབང་གི་སྐོར་ལ།  ཚེ་དཔག་མེད།  ཀུན་རིག །འཇིགས་བྱེད་
རོ་ལངས་བརྒྱད་སྐོར།  བདེ་མཆོག་དྲིལ་བུ་པ་རྣམས་ཀྱི་དབང་གསན་ནོ། །ཉེར་བརྒྱད་པ་ལ་སླར་ཡང་ཆོས་རྗེ་རྒྱལ་མཆོག་པའི་ཆག་ཕྱིར་བྱོན་ཏེ།  སོ་གཅིག་པའི་བར་དུ་ལུས་དང་གྲིབ་མ་བཞིན་དུ་འབྲལ་བ་མེད་པར་བསྟེན།  སྤྱོད་ལམ་གྱིས་ཀྱང་མཉེས་
10-2-6a


པར་བྱས་ཏེ།  ཕར་ཕྱིན།  ཚད་མ།  དབུ་མ།  མངོན་པ་ཀུན་ལས་བཏུས།  འདུལ་བ་མདོ་རྩ་ལ་སོགས་པའི་ཕ་རོལ་ཏུ་ཕྱིན་པའི་གཞུང་རྣམས་ལེགས་པར་སྦྱངས་པར་མཛད་དོ། །དེའི་ཚེ་ཀུན་བཏུས་ཀྱི་ཊཱི་ཀ་དང་། མཛོད་ཆེན་གྱི་ཊཱི་ཀ་
ཤོག་བུ་བཅུ་བཞི་ཙམ་ཆོས་ཐུན་རེ་ལ་གསུངས་པ་རྣམས་རྗེ་འདི་ཁོ་ནས་བསྐྱོར་བ་དང་།  དབུ་མའི་སྤྱི་དོན་དགག་སྒྲུབ་དང་།  ལུང་རབ་ཏུ་མང་པོ་དང་བཅས་པ་རྣམས་ཀྱང་།  རྗེ་འདི་ཁོ་ནས་བཟུང་ནུས་པས།  ཆོས་རྗེ་རྒྱལ་མཆོག་པས་ཤེས་རབ་ཆེ་བའི་མཚན་གཞི་
གཅིག་ལ་ཕྱོགས་ཀུན་དུ་བསྒྲགས་པར་མཛད་དོ། །ཁྱད་པར་དུ་སུམ་ཅུ་པ་ལ་དངུལ་ཆུའི་ཆོས་རྫོང་དུ།  བླ་མ་གསེར་གླིང་པ་ནས་བརྒྱུད་པའི་ཐེག་པ་ཆེན་པོའི་བློ་སྦྱོང་ཉམས་ཁྲིད་དུ་ཞུས་ནས་བསྒོམས་པས།  བྱང་ཆུབ་ཀྱི་སེམས་གཉིས་ཀྱི་རྟོགས་པ་
སྐྱེས་པའི་ཚུལ་ནི་འོག་ཏུ་བརྗོད་པར་བྱའོ། །སོ་གཅིག་པ་ས་ཕོ་ཁྱི་ལོ་ལ་སྙིགས་དུས་ཀྱི་ཐུབ་དབང་གཉིས་པ་རོང་སྟོན་ཆོས་རྗེ་བཟང་ལྡན་དུ་བཞུགས་པའི་དྲུང་དུ་བྱོན་ཏེ།  ཕར་ཕྱིན་གྱི་སྐབས་བཞི་པ་དང་།  རྣམ་འགྲེལ་གྱི་གཞན་དོན་ལེའུའི་བཤད་པ་དང་།  
རྗེ་དེ་ཉིད་ཀྱིས་མཛད་པའི་དབུ་མའི་སྟོང་ཐུན་རྣམས་གསན་ནོ། །དེའི་སྟོན་རྗེ་དེ་ཉིད་དང་།  ས་བཟང་ན་ཆོས་རྗེ་རྒྱལ་མཆོག་པ་བཞུགས་པ་གཉིས་ཀྱིས།  ཆོས་རྗེ་ནམ་མཁའ་བའི་དྲུང་དུ་གདམས་ངག་ཟབ་མོ་ཞུ་བའི་སྙན་ཞུས་ལ་བཏང་སྟེ།  བླ་མའི་དྲུང་དུ་ཞུས་
ནས།  དམ་པ་དེ་ཉིད་གནས་གསར་དུ་གདན་དྲངས།  རོང་སྟོན་ཆོས་རྗེ་ཟླ་བ་གཉིས་ཙམ་བཞུགས་ཏེ།  ནི་གུ་དང་བདེ་མཆོག་སྙན་བརྒྱུད་སོགས་གདམས་ངག་དུ་མ་གསན་ནས་ལ་སྟོད་ལྷོ་ལ་ཐེགས།  ཆོས་རྗེ་རྒྱལ་མཆོག་པ་དེའི་དགུན།  ཕག་ལོའི་དཔྱིད་
10-2-6b


དབྱར་རྣམས་ལ་དེ་ཉིད་དུ་བཞུགས་ནས།  བོ་དོང་དུ་གདན་དྲངས་པའི་ཆག་ཕྱི་རྗེ་འདི་ཉིད་ཀྱིས་མཛད།  སླར་གནས་གསར་དུ་བྱོན་ཏེ་ནི་གུ་ལ་སོགས་པའི་ཁྲིད་རྣམས་བསྐྱར་མ་ཞུས།  ཆོས་འཕྲོ་རྣམས་ཕལ་ཆེར་རྫོགས་ནས།  བྱི་ལོ་ནག་པ་ཟླ་བའི་ཚེས་བཅུ་དྲུག་ལ་ཆོས་རྗེ་
ནམ་མཁའ་བ་བདེ་བར་གཤེགས་པའི་གསོལ་འདེབས།  གཤེགས་རྫོངས།  གདུང་རུས་སཱཙྪ་བཏབ་པ།  ཕྱི་རྟེན་ཚུན་ཆད་གྲུབ་སྟེ་ཐུགས་དགོངས་རྫོགས་པར་མཛད་དོ། །དེས་ནས་སྔར་ངམ་རིངས་སུ་མཁན་ཆེན་སངས་བློ་བས་གྲྭ་ཚང་གི་བཤད་ཉན་དགོས་གསུངས་པ་
བཟློག་ཀྱང་།  དེའི་གླེང་བསླང་བྱུང་གི་དོགས་ནས་དབྱར་དང་སྟོན་གཉིས་ཕྱི་བ་ཁུང་སོགས་ཀྱི་ལུང་སྟོང་དུ་གཅིག་པུར་བཞུགས་ནས་ཐུགས་དམ་མཛད།  དགུན་རྫིང་ལུང་དུ་བཞུགས་པས།  གླང་ལོའི་དཔྱིད་མཁན་ཆེན་སངས་བློ་བས་ཅིས་ཀྱང་གྲྭ་ཚང་གི་བཤད་
ཉན་གྱིས།  མི་ཀུན་ཁྱོད་བསྟེན་མ་ཤེས་ཞེས་ང་ལ་འཐབ་ཏུ་འོང་བར་འདུག་གསུངས་པ་ལ།  འདོད་བཞེད་མེད་པའི་རྒྱུ་མཚན་ཞུས་ནས།  གླང་ལོའི་མཇུག་ཏུ་ལྷ་སར་བྱོན།  སྟག་ལོའི་ཆོ་འཕྲུལ་ཆེན་པོ་ལ་ཕྱག་དང་བསྐོར་བ་ལ་སོགས་བསགས་སྦྱངས་ཀྱི་རྣལ་
འབྱོར་མཛད།  དེ་ནས་ཉང་སྟོད་དུ་ཆོས་རྗེ་རྒྱལ་མཆོག་པ་བཞུགས་པའི་དྲུང་དུ་བྱོན་ཏེ།  མཁན་པོ་གཞུང་ལུགས་རབ་འབྱམས་སྨྲ་བའི་བཤེས་གཉེན་གངས་ཅན་ཀུན་དགའ་དཔལ།  ལས་ཀྱི་སློབ་དཔོན་དོན་རིན་པ།  གསང་སྟེ་སྟོན་པ་ཆོས་རྗེ་རྒྱལ་ཚབ་པ།  ཆོས་རྗེ་རྒྱལ་
མཆོག་པ་ལ་སོགས་པ་དད་པའི་དགེ་འདུན་ཉི་ཤུ་རྩ་གསུམ་གྱི་དབུས་སུ་སོ་ལྔ་པ་ཆུ་ཕོ་སྟག་གི་ལོ་ཨ་མི་ཡོལ་དུ་བསྙེན་པར་རྫོགས་པར་མཛད་དོ། །དེ་ནས་བོ་དོང་བར་ཆོས་རྗེ་རྒྱལ་མཆོག་པའི་ཆག་ཕྱི་མཛད་ནས།  མུས་སུ་བྱོན་ཏེ།  སོ་དྲུག་པ་ཡོས་ལོ་ལ་
10-2-7a


མུས་སུ་བཞུགས་པའི་ཚེ།  ཤོག་བུ་ཚལ་དུ་བླ་མ་ནམ་ཆོས་པ་བདེ་བར་གཤེགས་པའི་ནུབ་མོར།  རྗེ་འདིའི་མནལ་ལམ་དུ།  བླ་མ་ནམ་ཆོས་པ་བདེ་བ་ཅན་དུ་གཤེགས།  ཁྱོད་ཀྱང་ད་ནས་ལོ་བཞི་བཅུ་ཞེ་གཉིས་ན་བདེ་བ་ཅན་དུ་འགྲོ་བ་ཡོང་
ཅེས་ཟེར་བ་ཅིག་བྱུང་གསུང་ངོ་། །དེའི་སྟོན་ཆོས་རྗེ་རྒྱལ་མཆོག་པ་ཆུ་འདུས་སུ་བཞུགས་པས།  བཤད་ཉན་ལ་ཤོག་གསུངས་པའི་ཕོ་ཉ་ཕྱག་རྟགས་དང་བཅས་པ་ཕེབ།  བཤད་ཉན་མི་བྱེད་ཀྱང་།  དེའི་རྒྱུ་མཚན་དང་།  ས་སྐྱར་བཀའ་ལུང་ཞུ་རུ་འགྲོ་བའི་ཞལ་ད་
ཞུ་བ་ལ་དེ་མ་ཐག་བྱོན་པས།  ཆོས་རྗེ་དགེས་ནས།  སྡེ་དེའི་རིགས་བཟང་བ་དང་།  ནོར་ཕྱུག་པའི་གྲྭ་པ་སྤྲོད་པ་དང་།  འཇིག་རྟེན་གྱི་ཟང་ཟིང་མང་པོ་འོང་བའི་ཞལ་ད་གནང་གིན་འདུག་ཀྱང་།  ཐུགས་ལ་འཕྲོད་པ་ཙམ་མ་བྱུང་བར།  སྔར་ངམ་རིངས་སུ་སློབ་དཔོན་
སངས་བློ་བ་ལ་རིགས་བཟང་བ་ལྷའི་དབང་པོ་བརྒྱ་བྱིན།  ནོར་ཕྱུག་པ་རྣམ་ཐོས་ཀྱི་བུ་བྱུང་ཡང་འདོད་པ་མེད་ཅེས་པའི་ཞུ་ཕོད་ཕུལ་བ་དེ་ཐུགས་ལ་མངའ་བས།  འདི་ལྟ་བུའི་ཞལ་ད་གནང་བའི་སྒོ་མེད་ཅེས་ཞུས་ཏེ།  ཞུ་བ་དཀའ་སེ་བ་ཞིག་ལ་གྲུབ་བོ། །དེ་དག་གི་སྐབས་སུ་
ཡོངས་འཛིན་གཞན་ལས་དམ་པའི་ཆོས་ཇི་ལྟར་གསན་པའི་ཚུལ་ནི།  བྱང་སེང་བའི་གཅུང་པོ་མཁན་ཆེན་བསྟན་བཟང་པ་ལ་བ་རི་བའི་བསྐང་བཟློག་གསན།  བྱང་སེང་བའི་སློབ་ཆུང་བཀྲ་ཤིས་རྒྱལ་བ་ལ་འདུལ་བའི་གླེང་འབུམ་གསན།  མཁན་ཆེན་བསྟན་
རྒྱལ་བ་ལ་བུ་སྟོན་ཆོས་འབྱུང་དང་།  དོན་ཞགས་ལྷ་ལྔའི་དབང་ལ་སོགས་པ་གསན།  བླ་མ་ཀུན་བློ་བ་ལ་སྤྱོད་འཇུག་དང་འདུལ་བ་ལུང་ལ་སོགས་པ་གསན།  གངས་པ་ཀུན་དགའ་བཟང་པོ་པ་ལ་སུམ་པ་ལོ་ཙཱ་བའི་སྙན་བརྒྱུད་གསན།  སྤོས་ཁང་བ་རིན་
10-2-7b


རྒྱལ་བ་ལ་ཆེད་དུ་བརྗོད་པའི་ཚོམས་གསན།  གནས་རྙིང་པ་རིན་རྒྱལ་བ་ལ་ཞི་བྱེད་ཀྱི་སྐོར་པུ་སྟི་དྲུག་ཙམ་གསན།  བདག་ཆེན་གཞི་ཐོག་པ་བློ་གྲོས་རྒྱལ་མཚན་པ་ལ་ཚད་མའི་ཐུན་ཚགས་གསན།  མི་ཉག་ཇོ་གདན་དཔལ་བཟང་བ་ལ་ཆོས་ཅུང་ཟད་དང་།  མངའ་
རིས་པ་བྷ་དྲ་ཤྲཱི་ལ་ཕྱག་དྲུག་པའི་སྐོར་ཁ་ཅིག་དང་།  ཇོ་ནང་དུ་སྒྲུབ་པ་མོ་དབུས་མ་ལ་རྡོ་རྗེ་སེམས་དཔའི་བསྒོམ་བཟླས་གསན།  ཧོར་བཀའ་བཞི་པ་སེང་གེ་རྒྱལ་མཚན་ལ་གྲུབ་ཐོབ་བརྒྱད་ཅུའི་བསྟོད་པ་དང་།  ལམ་འབྲས་བ་བློ་བཟང་བ་ལ་ལམ་ཟབ་དང་བླ་མ་
བཀའ་བཞི་པ་དཔལ་ལྡན་སེང་གེ་ལ་ས་སྡེའི་པུ་སྟི་བཞི་ཙམ་དང་།  བྱང་ཆེན་དུ་བྱ་བྲལ་བ་བསོད་བློ་བ་ལ་མ་ཎིའི་ལུང་རྣམས་གསན།  ཐེག་ཆེན་ཆོས་རྗེའི་དྲུང་དུ་བདེ་མཆོག་ལོ་ཧི་པའི་དབང་།  དབུ་མ་ལུགས་ཀྱི་སེམས་བསྐྱེད་གསན།  བཀའ་ལྔ་བ་དཔལ་འབྱོར་
ཤེས་རབ་ལ་འཇུག་པའི་བཤད་པ་དང་།  རྟེན་འབྲེལ་སྙིང་པོའི་ཁྲིད་རྣམས་གསན།  མདོག་གློ་མཁན་པོ་ཡོན་ཏན་དཔལ་མགོན་པ་ལ་འདུལ་བ་མདོ་རྩ།  རྒྱ་ཆེར་འགྲེལ་འོད་ལྡན་ལ་སོགས་པ་གསན།  གཙང་གཞུང་པ་སློབ་དཔོན་ཚུལ་བཟང་བ་ལ་དཔེ་ཆོས་
རིན་སྤུངས་དང་།  ལྷ་ས་གྲུ་ཁུང་པ་སློབ་དཔོན་སངས་རྒྱས་འཕེལ་བ་ལ་ཕར་ཕྱིན་གཡག་ཊཱི་ཀ་ཆེན་མོའི་ལུང་དང་བཤད་པ་གསན།  ཤར་པ་སློབ་དཔོན་ཀུན་ལེགས་པ་ལ་གཟུངས་གྲྭ་ལྔའི་དབང་དང་།  མཁྱེན་རབ་དབང་ཕྱུག་གྲགས་པ་དཔལ་བཟང་པོ་ལ་མཚན་བརྗོད་
ཀྱི་ལུང་གསན།  བླ་མ་ཕྱི་མ་དྲུག་པོ་འདི་ལས་འདྲེན་པ་མཆོག་ལས་གསན་པའི་རྗེས་སུ་གསན་པ་ཡིན་ནའང་།  ས་བཅད་ཀྱི་ཚོམས་མི་འཁྲུགས་པར་བྱ་བའི་ཕྱིར་དུ་འདིར་ཕྱོགས་གཅིག་ཏུ་བྲིས་སོ། །གཉིས་པ་ལ་གཉིས་ཏེ།  གདམས་པ་ཐོབ་པའི་རྒྱུ།  
10-2-8a


གདམས་པ་གསན་པའི་ཚུལ།  གསང་ཆེན་རྒྱུད་སྡེའི་ཞེས་སོགས་ཚིགས་བཅད་གཅིག་སྟེ།  སྐྱེས་བུ་དམ་པ་རྣམས་ནི་དགེ་བའི་བཤེས་གཉེན་རྒྱ་མཚོ་ལྟ་བུ་བསྟེན་ཀྱང་།  ཚོང་དཔོན་གྱི་བུ་ནོར་བཟང་བཞིན་དུ་སླར་ཡང་
གདམས་པ་ཕྱིན་ཅི་མ་ལོག་པར་སྟོན་པའི་དགེ་བའི་བཤེས་གཉེན་ཚོལ་བ་ལ་ངོམས་པ་མེད་པར་མཛད་དོ། །དེ་ཡང་འདི་སྐད་ཐོས་ཏེ།  ཆོས་རྗེ་ནམ་མཁའི་རྣལ་འབྱོར་པ་དེ་བདེ་མཆོག་ལོ་ནག་དྲིལ་གསུམ་ལ་ཐུགས་དམ་གྱི་གཙོ་བོར་མཛད་ཅིང་།  
བསྔགས་པ་ཡང་ཆེ་བ་དང་།  མཁན་ཆེན་སངས་བློ་བས་ད་བཤད་ཉན་མི་མཛད་ན།  སྔགས་ཀྱི་གྲྭ་ས་ཅིག་ཏུ་སྔགས་ཕྱོགས་ཀྱི་སློབ་གཉེར་རྒྱ་ཆེ་རབ་ཅིག་མཛོད་གསུངས་པ་ལ་བརྟེན་ནས།  རྡོ་རྗེའི་ཐེག་པའི་བཀའ་ལུང་རྒྱ་ཆེན་པོ་གསན་པར་བཞེད་དེ།  
སྔར་ཉང་སྟོད་དུ་ཆོས་རྗེ་རྒྱལ་ཚབ་པ་ལ་ཆག་ཕྱིར་འགྲོ་བའི་སྙན་ཞུས་ཕུལ་ན་ཡང་སྟབས་ཤིག་གིས་མ་ཐོན།  དེ་ནས་ཆོས་རྗེ་རྒྱལ་མཆོག་པའི་ཆག་ཕྱིར་བོ་དོང་དུ་ཕེབས་པའི་ཚེ།  ཤངས་པ་ཀུན་མཁྱེན་པའི་དྲུང་དུ་འབྱོན་པར་བཞེད་དེ།  ཆོས་རྗེ་ལ་ཞུས་པས་
དེ་འཐད་གསུངས་ནས།  རིན་སྤུངས་པའི་གསེར་ཡིག་པ་ཅིག་ལ་སྦྲག་ཡར་མཛད་པ་ཡིན་ནའང་།  དེའི་ནངས་པར་རང་དུ་འབྱོན་མ་བཞེད་པར་དེ་ཉིད་དུ་བཞུགས་སོ། །དེ་རྗེས་ཡུན་མི་རིང་བ་ཞིག་ནས།  ཉག་རེ་གྲགས་པ་སྐམ་པོ་ཟེར་བ་དེ།  ཆོས་རྗེ་རྒྱལ་
མཆོག་པའི་དྲུང་དུ་བསྙེན་རྫོགས་ཞུ་རུ་བྱུང་བ་ལ།  སྤྱིར་ས་སྐྱའི་ལོ་རྒྱུས་དང་།  བྱེ་བྲག་ཏུ་བླ་མ་ཀུན་དགའ་བཟང་པོ་དེ་ཡོན་ཏན་ཆེ་ཞིང་།  སྒལ་ཚིགས་བཟང་བ་ཅིག་ཡིན་པར་གྲགས་པ་ཅི་འདྲ་ཡིན་དྲིས་པས།  ཁོང་ན་རེ།  སྤྱིར་གསུང་རབ་སྤྱི་ལ་མཁས།  ཁྱད་
10-2-8b


པར་བདེ་དགྱེས་ལ་སོགས་པ་ས་སྐྱ་པའི་ཆོས་སྐོར་ལ་ཤིན་ཏུ་མཁས་ཤིང་།  སྒལ་ཚིགས་བཟང་ཟེར་བ་ཡང་སྡེ་དཔོན་སོགས་ལ་བསྟེན་ཕྱོགས་མི་མཛད་པ་མ་གཏོགས།  གྲྭ་པ་ལ་ཤིན་ཏུ་བརྩེ་བས་ཉམ་ཆུང་གི་བླ་མ་ཡང་དག་པ་ཅིག་ཡོད་ཟེར་བ་གསན་མ་ཐག་
ཏུ།  རྟག་ཏུ་ངུས་ཆོས་འཕགས་ཀྱི་གཏམ་ཐོས་པའམ།  སེ་སྟོན་ཀུན་རིག་གིས།  མུ་གུ་ལུང་གི་ཐད་ཀྱི་སྤྲིན་དཀར་པོ་མཐོང་བ་ལྟར།  ཐར་པའི་ལམ་སྟོན་པའི་དགེ་བའི་བཤེས་གཉེན་ཡིན་པར་ངེས་ཤེས་གཏིང་ནས་འཁྲུངས་ཏེ།  དེའི་ཞབས་
དྲུང་དུ་བསྙེན་ནས་བདེ་མཆོག་ལོ་ནག་དྲིལ་གསུམ་གྱི་ཆོས་སྐོར་ཡོངས་སུ་རྫོགས་པར་ཞུས་ཏེ།  གཡེང་བ་ཆེ་ཆུང་གང་གི་ཡང་དབང་དུ་མ་སོང་བར་ཉམས་ལེན་ལ་དྲིལ་བ་ཅིག་བྱ་དགོས་སོ་སྙམ་པའི་གོ་ཆ་དང་རྟག་ཏུ་མ་བྲལ་བར་མཛད་དོ། །དེའི་སྟོབས་ཀྱིས།  
ཡོས་ལོའི་མཇུག་ཏུ་ཆུ་འདུས་ནས་ཚུར་རེས་ས་སྐྱར་བྱོན།  ཤཱཀ་བཟང་སྐུ་འབུམ་ན་དྲུག་པ་རྡོ་རྗེ་འཆང་གི་ངོ་བོ་རྗེ་བཙུན་ཀུན་དགའ་བཟང་པོ་བཞུགས་པའི་དྲུང་དུ།  མཁན་ཆེན་ཤཱཀ་བཟང་བ་བརྒྱུད་དེ།  བདག་ལ་ལོ་ནག་དྲིལ་གསུམ་གྱི་ཆོས་སྐོར་ཡོངས་སུ་རྫོགས་
པ།  རྩ་རྒྱུད་ཀྱི་བཤད་པ་དང་བཅས་པ་ཅིག་སོས་ཀ་ཚུན་ལ་རྫོགས་པར་གནང་དགོས་ཞུས་པས།  ད་ལྟ་མཚམས་དམ་པ་ཅིག་ལ་ཡོད།  འདི་ཚོ་ལ་ལྟ་རྟོག་གྱིས་གསུངས་ནས་བདེ་མཆོག་གི་དཔེ་ཆ་འགའ་ཞིག་གནང་བྱུང་སྟེ།  དེའི་ངང་ལ་ཟླ་བ་གཉིས་
ཙམ་སོང་ནས།  སོ་བདུན་པ་ཤིང་ཕོ་འབྲུག་གི་ལོ་ཤར་བའི་ཚེ།  མཁས་གྲུབ་གཞོན་ནུ་སེང་གེ་བ་ལ་ཞུ་བ་བསྐུར་ཏེ།  དེ་མ་ཐག་ཏུ་མཇལ་ནས།  བླ་མ་ལ་མི་ཕྱེད་པའི་དད་པ་སྐྱེས་ཤིང་།  བླ་མས་ཀྱང་ཐུགས་དགེས་པའི་སྒོ་ནས་རྗེས་སུ་འཛིན་པར་མཛད་དོ། །
10-2-9a


གཉིས་པ་ནི།  བླ་མ་མཆོག་ལས་ཞེས་སོགས་ཚིགས་བཅད་དྲུག་སྟེ།  སྐྱེས་བུ་དམ་པ་རྣམས་ནི་ཡོངས་འཛིན་མཆོག་ལས་གདམས་པ་རྒྱ་མཚོ་ལྟ་བུ་ཐོས་ཤིང་།  ཡོན་ཏན་གྱི་མཛོད་དུ་གྱུར་པ་ནི་ཆོས་ཉིད་དོ། །དེའང་འདི་སྐད་ཐོས་ཏེ།  
ཆོས་རྗེ་བཟང་པོའི་ཞབས་ཀྱི་དྲུང་དུ་མཇལ་མ་ཐག་ནས་བརྩམས་ཏེ།  འབྲུག་ལོའི་སྟོན་ཚུན་ཆད་ལ་བདེ་དགྱེས་གསང་གསུམ་གྱི་སྨིན་བྱེད་ཀྱི་དབང་།  བསྐྱེད་རྫོགས་ཀྱི་མན་ངག །རྒྱུད་ཀྱི་བཤད་པ་དང་བཅས་པ་གསན་ཅིང་།  དེ་ནས་རྡོ་རྗེ་ཕྲེང་བ།  ཀྲྀ་ཡ་ས་
མུཙྪ་དང་བཅས་པ་ལ་སོགས་པའི་ཆོས་ཀྱི་བཀའ་དྲིན་དཔག་ཏུ་མེད་པ་ནོས་པ་མཛད་དོ། །མེ་ཕོ་རྟའི་ལོའི་ནང་དུ།  ཆོས་རྗེ་བཟང་པོའི་ཞབས་བར་ཆད་ཀྱི་མཚན་མ་བསལ་བའི་ཆེད་དུ།  སྐུ་མཚམས་ལ་བཞུགས་ནས།  སྐུ་མཚམས་གྲོལ་བའི་ཞག་
གཅིག་གི་གོང་དུ།  རྗེ་འདི་ཉིད་དང་།  མངའ་རིས་པ་བླ་མ་དཀོན་མཆོག་འོད་ཟེར་གཉིས་སྐུ་མདུན་དུ་བོས་ནས།  སྤྱིར་ཐུགས་དམ་གྱི་གཟིགས་སྣང་དང་།  བར་ཆད་སེལ་ཚུལ་སོགས་མང་དུ་གསུངས་ཏེ།  ད་ལན་སྐྱོན་དུ་སོང་ན་ཡང་གཞན་སེམས་ལ་
འཕྲེང་བ་ཅིག་ཀྱང་མེད།  བྱ་སྤྱོད་གཉིས་ཀྱི་བསྟན་པ་འདི་འདོད་པ་བཞིན་སོས་མ་ཐུབ་པ་འདི་དང་།  ཁྱེད་རང་གིས་ཕན་ཐོགས་མི་ཐོགས་གང་ཡིན་ཀྱང་།  ཁྱོད་སློབ་དཔོན་དཀོན་རྒྱལ་ལ་ལམ་འབྲས་ཚང་མ་ཞིག་མ་འཕྲོད་པ་འདི་འཕྲེང་བར་འདུག་ཅེས་གསུང་ངོ་། །
དེ་ལ་རྗེ་འདི་ཉིད་ཐུགས་བཞེད་པ་ཅིག་ཀྱང་བྱུང་ཞིང་།  བླ་མ་ཐུགས་དགོངས་གང་ལ་གཏད་ཀྱང་ད་ལམ་འབྲས་ཤིག་ཞུས་ནས་དགེ་སྦྱོར་གྱི་མཐིལ་དེ་ལ་བྱེད་དགོས་པ་འདུག་སྙམ་པ་འཁྲུངས་སོ། །དེ་ནས་ཆོས་རྗེའི་དྲུང་ནས་བདག་མུས་སུ་ཕྱིན་ནས།  འཁོར་
10-2-9b


ལོ་བདེ་མཆོག་གི་དགེ་སྦྱོར་ཅིག་བྱེད་པ་ལགས་ཞུས་པས།  ད་དུང་ངེད་ལ་གསུང་ངག་ལམ་འབྲས་ཡོད་པས་དེ་ཉོན་ཅིག་གསུངས་པ་ལ།  ལམ་འབྲས་ཞུ་བ་ལ་འབུལ་བ་མང་པོ་དང་།  དཀའ་སྤྱད་མང་པོ་དགོས་པའི་ལོ་རྒྱུས་འདུག་པས།  བདག་ལ་དེ་ལྟ་བུའི་ནུས་པ་
མེད་ལགས་ཞུས་པས།  ཆོས་རྗེའི་ཞལ་ནས།  སྔོན་གྱི་དུས་ན་བསྟན་པ་ཡར་སོས་དུས་སུ་སོང་བས།  གདུལ་བྱ་རྣམས་ཆོས་ལ་དོན་གཉེར་དང་།  ཆོས་ཕྱོགས་སུ་དཀའ་སྤྱད་དང་།  ལོངས་སྤྱོད་གཏོང་ཕོད་ཆེ་བས་གདུལ་བྱའི་རྒྱུད་ལ་རྟེན་འབྲེལ་ཁྱད་པར་ཅན་
བསྒྲིགས་པའི་ཆེད།  སྔོན་གྱི་བླ་མ་རྣམས་ཀྱིས་ལོངས་སྤྱོད་མང་པོ་འབུལ་བ།  ཞེས་མཛད་པ་ཡིན།  དེང་སང་བསྟན་པ་འགྲིབས་ནས་གསུང་ངག་ལ་སོགས་པའི་བཀའ་ཆད་ལ་ཁད་དུ་སོང་འདུག་པས།  གདུལ་བྱ་སྣོད་ལྡན་བྱུང་ན་གསུང་ངག་དང་དབང་
བསྐུར་ལ་སོགས་པ་བརྡལ་གཏོད་ལྟ་བུ་བྱས་ནས་ཀྱང་།  བསྟན་པའི་རྒྱུན་ལ་ཕན་དུ་རེ་བྱེད་དགོས་པའི་དུས་སུ་སོང་འདུག་པ་ཞེས་གསུངས་སོ། །འདི་ནི་ད་ལྟ་གསུང་ངག་རིན་པོ་ཆེ་ལ་སོགས་པའི་བཀའ་སྲོལ་རྣམས་བཟུང་ནས་འགྲོ་བ་ཡོངས་ཀྱི་
མགོན་སྐྱབས་མཛད་པའི་རྟེན་འབྲེལ་ཁྱད་པར་ཅན་གཟིགས་པ་ཡིན་པར་ངེས་སོ། །དེ་ནས་རྟ་ལོའི་དབྱར་གསུང་ངག་རིན་པོ་ཆེ་གསན་ནས་ཐུགས་ཉམས་སུ་བཞེས་ཏེ།  སྟོན་མུས་སུ་ཕེབས་ནས།  ལུག་ལོ་ལ་མུས་སུ་བཞུགས་པའི་ཚེ།  བླ་མ་ནམ་བློ་བས་སྤྱིར་
སངས་རྒྱས་ཀྱི་བསྟན་པ་ལ་ཕན་པ་དང་།  བྱེ་བྲག་ཏུ་ཕྱོགས་འདིའི་དགེ་འདུན་རྣམས་དང་།  བྱ་ཉ།  རི་དྭགས་རྣམས་ཀྱི་མགོན་སྐྱབས་མཛད་དགོས་ཞུས་ནས་དགོན་པ་ཡང་ཕུལ་ཏེ།  ཁོང་རང་དཔོན་སློབ་རྣམས་ཀྱིས།  ཀྱེ་རྡོར་དང་ཀུན་རིག་ལ་སོགས་པའི་བཀའ་
10-2-10a


མང་དུ་ཞུས་ནས།  དེ་དག་གི་ལག་ལེན་གྱི་སྲོལ་ཡང་འཛུགས་པར་མཛད་དོ། །དེའི་སྟོན་ཆོས་རྗེ་བཟང་པོའི་ཞབས་མངའ་རིས་སུ་དཔོན་པོ་ཨ་མེ་དཔལ་གྱིས་གདན་དྲངས་པའི་རྗེས་སུ།  གསང་སྔགས་དབོན་པོ་གཞོན་ནུ་བཟང་པོ་
སོགས་གྲོགས་མཆེད་བདུན།  ཆོས་རྗེའི་བཀའ་ཞལ་དང་བཅས་ཏེ།  རྗེ་འདི་ཉིད་གདན་འདྲེན་བྱུང་བས།  ཞེ་གཅིག་པ་སྤྲེའུའི་ལོ་ལ་ས་སྐྱར་ཕེབས།  དབྱར་ཤཱཀ་བཟང་སྐུ་འབུམ་དུ་བཞུགས་ནས།  ཁམས་གཙང་གི་གྲྭ་པ་རྣམས་ལ་རང་རང་གི་བློ་དང་འཚམ་
པའི་ཆོས་ཀྱི་འཁོར་ལོ་བསྐོར་བར་མཛད་དོ། །དེའི་སྟོན་ཆོས་རྗེ་མངའ་རིས་ནས་ཕེབས་མ་ཐག་ཏུ།  སླར་ཡང་གསུང་ངག་རིན་པོ་ཆེ་ཟླ་བ་བདུན་གྱི་བར་དུ་ཉམས་ཁྲིད་དུ་ཞུས།  དང་པོར་བདུན་ཅུ་ཙམ་གྱིས་ཞུས་ཀྱང་།  ཕྱིས་རྗེ་འདི་ཉིད་སོགས་བཅུ་བཞི་
ཙམ་ཞིག་གིས་མཐར་ཕྱིན་པར་མཛད་ནས།  གཞིར་གནས་ཀྱི་རྟེན་དཀྱིལ་འཁོར་བཞི་ལ་སྨིན་བྱེད་ཀྱི་དབང་བཞི་བསྐུར་ཞིང་།  གྲོལ་བྱེད་ཀྱི་ལམ་བཞི་བསྒོམས་པས་སོ་སོའི་ལྟ་བ་བཞི་རྒྱུད་ལ་སྐྱེས་ཤིང་།  གྲུབ་མཐའ་བཞི་དང་།  འབྲས་བུ་བཞི་འདྲེན་པའི་སྙན་
བརྒྱུད་བཞིས་གདམས་པར་མཛད་དེ།  རྒྱུ་དུས་དང་ལམ་དུས་ཀྱི་དབང་གི་ཆུ་བོ་མ་ནུབ།  ཉམས་མྱོང་མཚན་ཉིད་པ་སྐྱེས་པས་བྱིན་རླབས་ཀྱི་བརྒྱུད་པ་མ་ཉམས།  གང་ཡང་ཏིང་ངེ་འཛིན་དུ་བསེལ་ཤེས་པས་གདམས་ངག་གི་ས་རྒ་མ་ལོག །དེའི་སྟོབས་ཀྱིས་བླ་མ་
ལ་སངས་རྒྱས་དངོས་ཀྱི་འདུ་ཤེས་སྐྱེས་པས་མོས་གུས་ཀྱི་བསམ་པ་ཚིམ་པར་མཛད་པ་ཡིན་ནོ། །དེའི་ཆོས་སྐོར་ལ་རིང་བརྒྱུད་དང་ཉེ་བརྒྱུད་གཉིས་ལས།  དང་པོ་ནི།  ཞང་དགོན་པ་བ་ནས་བརྒྱུད་པ།  རྗེ་བཙུན་གྱི་གླེགས་བམ་དཀར་ཆག་ཏུ་ཐེབས་པ་རྣམས་ཡིན་ལ།  
10-2-10b


དེ་ཡང་ཚད་མ་བཞི་སྟོན་པ་ལས།  བསྟན་བཅོས་ཚད་མ་ལ་འགྲེལ་པ་གཉགས་མ།  སྐབས་ཀྱི་ཡིག་ཆུང་ཉེར་གཉིས།  དོན་བསྡུས་མའི་ཚིགས་བཅད་དེ་ཉེར་བཞི།  ཉམས་མྱོང་ཚད་མ་ལ་གཞུང་ལས་འཕྲོས་པའི་ཆོས་བཅུ་བདུན།  རྩ་བ་མེད་པའི་ལམ་འབྲིང་པོ།  རང་གི་རྩ་བ་
ཅུང་ཟད་དང་བཅས་པའི་ལམ་བསྡུས་པ།  ཁྲིད་ཀྱི་གཞུང་ཤིང་ཆེན་པོ་བཞི།  རྟོགས་པ་སྐྱེད་པར་བྱེད་པའི་ཆོས་ལྔ།  ལམ་ཟབ་མོའི་ཡིག་ཆ།  མན་ངག་ཕྲ་མོའི་རྐང་གྲངས་གཞན་དུ་ཁ་འཕངས་པ་སྟེ་སུམ་ཅུ།  བླ་མ་ཚད་མ་ལ་བླ་མ་རྒྱ་བོད་ཀྱི་ཡི་གེ་གཉིས།  
ལུང་ཚད་མ་ལ་ལུང་སྦྱོར་ཁ་འཕངས་དང་བཅས་པ་བཞི་སྟེ།  དྲུག་ཅུ་པོ་དེ་དག་ཡོངས་སུ་རྫོགས་པར་གསན་ནོ། །མན་ངག་ཕྲ་མོའི་རྐང་གྲངས་པོད་དམར་མའི་ནང་དུ་བཞུགས་པ་རྣམས་དང་།  ཕྱིས་གསན་པ་གཞུང་བཤད་སྲས་དོན་མ།  གཞན་ཡང་དམར་གྱིས་
མཛད་པའི་བླ་མའི་རྣམ་ཐར་ཞིབ་མོ་རྡོ་རྗེ་དང་།  གཞུང་བཤད་དམར་མ།  བར་སྟོན་གྱི་ཟིན་བྲིས་སོགས་རབ་ཏུ་མང་པོ་དང་།  བླ་མ་དམ་པ་བསོད་ནམས་རྒྱལ་མཚན་དཔལ་བཟང་པོས་མཛད་པའི་ཚད་མ་དང་པོ་གསུམ་སྟོན་པ་པོད་ནག་མར་གྲགས་པ་རྣམས་
ཡོངས་སུ་རྫོགས་པར་གསན་ཏེ།  སོ་སོའི་ཕྱག་ལེན་དང་སྐབས་ཀྱི་གོ་བ་རྣམས་ལ་སྒྲོ་འདོགས་ཆོད་པར་མཛད་པ་ཡིན་ནོ། །གཉིས་པ་ཉེ་བརྒྱུད་ལ་རྣལ་འབྱོར་དབང་ཕྱུག་གིས་ས་ཆེན་ལ་གནང་བ་དང་།  ས་ཆེན་གྱིས་རྗེ་བཙུན་ལ་གནང་བ་གཉིས་ལས།  དང་པོ་ནི།  
ལམ་སྦས་ཏེ་བཤད་པ།  ལམ་ཟབ་བླ་མའི་རྣལ་འབྱོར།  རྣལ་འབྱོར་དབང་ཕྱུག་གི་བསྲུང་བ་གཉིས་ལ་སོགས་པ་ཡིན་ལ།  གཉིས་པ་ནི་བརྡ་དོན་གསལ་བ་སྟེ།  དེ་དག་ཀྱང་ཁྲིད་བྱིན་རླབས་དང་བཅས་པ་རྫོགས་པར་གསན་ནོ། །གཞན་ཡང་ལམ་སྐོར་ལ།  ངག་
10-2-11a


དབང་གྲགས་པའི་ཕྱག་རྒྱ་ཆེན་པོ་ཡི་གེ་མེད་པ།  ཏོག་རྩེ་བའི་བསམ་མི་ཁྱབ།  ཀླུ་སྒྲུབ་ཀྱི་མཆོད་རྟེན་དྲུང་ཐོབ།  ནག་པོ་པའི་ཨོ་ལ་པ་ཏི།  ཡོན་པོ་བསྲང་བ།  པདྨ་བཛྲ་གྱི་ལམ།  ཌོམྦི་པའི་ལྷན་ཅིག་སྐྱེས་གྲུབ།  ཨིནྡྲ་བྷཱུ་ཏིའི་
ཕྱག་རྒྱའི་ལམ་དང་བརྒྱད།  ཞར་བྱུང་ལ་དག་པ་གསུམ་གྱི་ཁྲིད།  གཏུམ་མོའི་དམིགས་པ་ཉི་ཤུ་རྩ་དགུ།  སྒོ་དྲུག་ཆོས་འབྲེལ་ལ་སོགས་བསམ་གྱིས་མི་ཁྱབ་པ་གསན་ཏེ།  མདོར་ན་ལམ་འབྲས་ལམ་སྐོར་ཞར་བྱུང་གི་ཆོས་རྣམས།  ཆོས་རྗེ་བཟང་པོའི་
ཞབས་ཀྱིས།  རྗེ་བུདྡྷ་ཤྲཱི་ལ་གསན་པའི་གསན་ཡིག་ནང་ལྟར་བུམ་པ་གང་བྱོའི་ཚུལ་དུ་བཞུགས་པ་ཡིན་ནོ། །གསུང་ངག་རྫོགས་ནས་ཨེ་ཝཾ་ཆོས་ལྡན་གྱི་གཞི་འཛུགས་པ་ལ།  ཆོས་རྗེའི་ཆག་ཕྱིར་ཞེ་གཉིས་པ་ས་མོ་བྱའི་ལོ་ལ་ངོར་དུ་ཕེབས།  དེའི་སྟོན་
ཆོས་རྗེའི་ཞལ་ནས།  ད་འདི་རུ་སྡོད་ལ་བཤད་ཉན་གྱིས་གསུངས་པ་ལ།  ཕ་རྒན་ཅིག་ཡོད་པ་དེ་ལ་སྔར་ཞབས་ཏོག་ཆེར་མ་འཕྲོད་པས་ཤི་ཁ་སྔས་མགོ་ན་ཡོད་པ་ཙམ་ཞིག་དགོས་པས་ཡར་འགྲོ་བར་བགྱི་ཞུས་ནས།  མུས་སུ་ཕེབས་ཏེ་ལོ་བཞི་བཞུགས།  གླང་
ལོ་ལ་ཡབ་རྒན་གཤེགས་པའི་ཞེ་དགུའི་བར་དུ་ཀུན་རིག་གི་ཆོ་ག་མཛད་པས།  མནལ་ལམ་དུ་ཡབ་རྒན་གད་གཡང་ཞིག་ལ་འཆང་ལ་ཁད་འདུག་པ་ལ།  ལག་པ་ནས་འཐེན་ནས་བདེ་ས་ཞིག་ཏུ་བཞག་པ་རྨིས་གསུངས་སོ། །དེ་ཉིད་ཀྱི་ལོ་ཆོས་རྗེ་རྒྱལ་མཆོག་
པ་ཁྲོ་ཕུར་སྨོན་ལམ་མཛད་པའི་དྲུང་དུ་མཇལ་དུ་བྱོན་ནས།  ཨེ་ཝཾ་ཆོས་ལྡན་དུ་ཡང་བྱོན་པས།  ཆོས་རྗེའི་ཞལ་ནས་སྔར་བཞིན་ཞལ་ད་གནང་བ་ལ།  ད་རུང་རུས་པ་ལ་སཱཙྪ་འདེབས་པ་སོགས་ཀྱི་བྱ་བ་འགའ་ཞིག་དགོས་པས་ཡར་འགྲོ་ཞུས་ནས་མུས་སུ་བྱོན་
10-2-11b


ནས་ལོ་གཅིག་བཞུགས་སོ། །མདོར་ན་ས་སྐྱར་སྔར་ལོ་གསུམ།  ཕྱིས་ཟླ་བ་བདུན།  ཨེ་ཝཾ་ཆོས་ལྡན་དུ་ལན་བརྒྱད་ཕེབས་ནས།  དམ་པའི་ཆོས་གསན་པའི་རྣམ་གྲངས་རྒྱས་པར་ནི་འདིར་བརྗོད་པར་མི་ནུས་ལ།  མདོར་བསྡུས་པ་ཙམ་ཞིག །བསྟན་པའི་གོ་རིམ་
དང་བསྟུན་ནས་བརྗོད་ན།  ཕ་རོལ་ཏུ་ཕྱིན་པའི་ཆོས་སྐོར་ལ།  དབུ་མ་ལུགས་དང་།  སེམས་ཙམ་ལུགས་ཀྱི་སེམས་བསྐྱེད་གཉིས།  རྒྱལ་སྲས་ཐོགས་མེད་པས་ཆོས་རྗེ་བུདྡྷ་བ་ལ་གནང་བའི་བློ་སྦྱོང་དོན་བདུན་མའི་ཁྲིད།  ཆོས་རྗེ་ཤར་པ་ནས་བརྒྱུད་པའི་ཞེན་པ་
བཞི་བྲལ་རྣམས་ཞུས་ནས།  སྐྱེས་ཚོམས་དད་པའི་གཞུང་།  བསླབ་སྤྱོད་ལྟ་བའི་གཞུང་།  ས་རྒྱན་སྤྱོད་པའི་གཞུང་སྟེ་བཀའ་གདམས་གཞུང་དྲུག་དུ་གྲགས་པ་དང་།  མདོ་སིལ་བུ་བ་བཅུ་བདུན།  མཆིམས་ནམ་མཁའ་གྲགས་ཀྱི་ས་བཅད་དང་བཅས་པ་ལ་སོགས་རབ་
ཏུ་མང་པོ་གསན་ནོ། །རྡོ་རྗེ་ཐེག་པའི་སྐོར་ལ་དབང་།  རྒྱུད།  མན་ངག །རྗེས་གནང་།  ལུང་དང་ལྔ་ལས།  དང་པོ་དབང་གི་སྐོར་ལ།  རིགས་གསུམ་སྤྱི་དབང་།  ཚེ་དཔག་མེད་ལྷ་དགུ།  གཙུག་ཏོར་གདུགས་དཀར།  གཟུངས་གྲྭ་ལྔ་ལ་སོགས་པ་བྱ་རྒྱུད་ཀྱི་
དབང་དུ་མ་དང་།  ཨ་ར་པ་ཙ་ན་ལྷ་ལྔ།  མི་འཁྲུགས་པ་ལྷ་དགུ་ལ་སོགས་པ་སྤྱོད་རྒྱུད་ཀྱི་དབང་དང་།  རྡོ་རྗེ་དབྱིངས་དཀྱིལ་ཆོག་ལུགས།  འཇམ་དཔལ་གསང་ལྡན།  ནམ་མཁའ་དྲི་མེད་ཆུང་བ།  གཙུག་དགུ།  རྩ་སྐྱ་བ་ནས་བརྒྱུད་པའི་སྦྱོང་རྒྱུད་དཀྱིལ་
འཁོར་བཅུ་གཉིས།  ས་ལུགས་ཀྱི་ཀུན་རིག་སྟེ།  རྣལ་འབྱོར་རྒྱུད་ཀྱི་དབང་དང་།  གཤེད་དམར་ལྷ་ལྔ་མ།  ལྷ་བཅུ་གསུམ་མ།  དགྲ་ནག །འཇིགས་བྱེད་ཞེ་དགུ་མ།  རོ་ལངས་བརྒྱད་སྐོར།  གསང་བ་འདུས་པ་རིགས་གསུམ་ལ་སོགས་པ་རྣལ་འབྱོར་ཆེན་པོ་ཐབས་
10-2-12a


ཀྱི་རྒྱུད་ཀྱི་དབང་དུ་མ་དང་།  ཀྱེ་རྡོ་རྗེ་བིཪྺ་པའི་ལུགས་གཉིས།  མཚོ་སྐྱེས་ཀྱི་ལུགས།  ནག་པོ་པའི་ལུགས་ཏེ་བཀའ་བབས་བཞིར་གྲགས་པ་དང་།  རྩ་རྒྱུད་ཀྱི་བདག་མེད་མ།  གུར་བསྡུས།  སཾ་བུ་ཊ།  རྡོར་དབྱིངས།  ཀྱེ་རྡོར་
བཅུ་བདུན་མ།  སྒྲོལ་མ་ལུས་དཀྱིལ།  སྒྲོལ་མ་བཅུ་བདུན་མ།  སངས་རྒྱས་ཐོད་པ།  མ་ཧཱ་མཱ་ཡཱ།  འཁོར་ལོ་བདེ་མཆོག་ལོ་ནག་དྲིལ་གསུམ།  རྡོ་རྗེ་མཁའ་འགྲོ།  དྲིལ་བུ་ལྷ་ལྔ།  ལྭ་བ་པའི་བཅུ་གསུམ་མ།  མི་ཏྲི་བཅུ་གསུམ་མ།  སྡོམ་འབྱུང་སྟེ།  
རྣལ་འབྱོར་ཆེན་པོ་ཤེས་རབ་ཀྱི་རྒྱུད་ཀྱི་དབང་བསྐུར་བ་རྣམས་གསན་ནོ། །གཉིས་པ་ལ་བྱ་བ་སྤྱིའི་རྒྱུད་ཆེན་བཞི་དང་།  སོ་སོའི་རྒྱུད་རྣམས་ཀྱི་དོན་ཕྱོགས་གཅིག་ཏུ་སྟོན་པ།  བྱ་རྒྱུད་སྤྱིའི་རྣམ་པར་གཞག་པ་དང་།  སྤྱོད་པའི་རྒྱུད་ཐམས་ཅད་ཀྱི་དོན་
ཕྱོགས་གཅིག་ཏུ་བསྡུས་པ་སྤྱོད་རྒྱུད་སྤྱིའི་རྣམ་པར་གཞག་པ་དང་།  པཎྜི་ཏ་དྷརྨཱ་ཕ་ལ་ནས་བརྒྱུད་པའི་ངན་སོང་སྦྱོང་རྒྱུད་ཀྱི་མན་ངག་གི་བཤད་པ་དང་།  ནཱ་རོ་པ་ནས་བརྒྱུད་པའི་རྟོག་བདུན་གྱི་མན་ངག་གི་བཤད་པ་དང་།  གསང་འདུས་རྩ་རྒྱུད་འགྲེལ་ཆེན་སྒྲོན་
མེ་གསལ་བ་དང་བཅས་པའི་བཤད་པ་དང་།  མར་པ་ནས་བརྒྱུད་པའི་མ་ཧཱ་མཱ་ཡཱའི་བཤད་པ་དང་།  བིཪྺ་པ་ནས་བརྒྱུད་པའི་ཀྱེ་རྡོ་རྗེའི་རྒྱུད་གསུམ་གྱི་བཤད་པ།  བླ་མ་གོང་མའི་ཆོས་སྣ་བཅུ་གསུམ་དང་བཅས་པ་དང་།  ནཱ་རོ་པ་ནས་བརྒྱུད་པའི་བདེ་མཆོག་རྩ་
བའི་རྒྱུད་དང་།  རྣལ་འབྱོར་མ་ཀུན་སྤྱོད་ཀྱི་བཤད་པ་རྣམས་གསན་ཏེ།  ཐོས་བསམ་གྱི་མཐར་ཕྱིན་པར་མཛད་ནས།  བཀའ་སྲོལ་གང་གི་ལུགས་ཡིན་པ་དང་།  བཀའ་སྲོལ་དེའི་འཆད་ཚུལ་ཇི་ལྟར་ཡིན་པ་དང་།  བཤད་ཚུལ་དེས་བཤད་པས་ལམ་གྱི་
10-2-12b


སྲོལ་ཇི་ལྟར་ཐོན་པའི་ཚུལ་རྣམས་ལ་འཁྲུལ་བའི་དྲི་མ་ཟད་ཅིང་སྒྲོ་འདོགས་ཆོད་པར་མཛད་པ་ཞིག་གོ།  གསུམ་པ་མན་ངག་ལ།  བསྐྱེད་རིམ།  རྫོགས་རིམ།  ཐུན་མོང་བསྒྲུབ་པའི་མན་ངག་གསུམ་ལས།  དང་པོ་ལ།  ཀྱེའི་རྡོ་རྗེ།  འཁོར་ལོ་བདེ་མཆོག །གསང་བ་འདུས་
པ།  གཤིན་རྗེའི་གཤེད་ལ་སོགས་པའི་བསྐྱེད་པའི་རིམ་པ།  བཀའ་སྲོལ་དེའི་ལུགས་ཐུན་མོང་མ་ཡིན་པ་རྣམས་ནི་ལུགས་གཞན་དང་མ་འདྲེས་པ་རྣམས་དང་།  ཐུན་མོང་བ་སྦྱང་གཞི་སྦྱོང་བའི་ཚུལ་ལ་སོགས་པ་རྣམས་ནང་ཕན་ཚུན་མི་འགལ་ཞིང་།  རྒྱུད་སྡེའི་དགོངས་
པ་གྲུབ་ཐོབ་ཀྱིས་བཀྲལ་བ་ཇི་ལྟ་བ་དང་།  དེ་ལ་ཡང་ཕྱི་ནང་གི་བསྐྱེད་པའི་རིམ་པའི་ཁྱད་པར་དང་།  ནང་བསྐྱེད་པའི་རིམ་པ་ལ་ཡང་།  རྒྱུད་སྡེའི་ཁྱད་པར་གྱིས་ཟབ་ཁྱད་ཀྱི་རིམ་པ་ཇི་ལྟར་ཡོད་པ་དང་།  དེ་ལ་གཞན་དག་གིས་རྟོག་པས་བརྟགས་པའི་ལུགས་རྣམས་ལུང་
རིགས་ཀྱིས་ཅི་ལྟར་དགག་པའི་ཚུལ་རྣམས་ལེགས་པར་གསན་ཅིང་སྒྲོ་འདོགས་ཆོད་པར་མཛད་དེ།  རང་གིས་བསྒོམས་ན་ས་ལམ་ཆོད་ཅིང་།  གཞན་ལ་བསྟན་ན་གདུལ་བྱ་མི་བསླུ་བར་མཛད་པ་ཡིན་ནོ། །གཉིས་པ་རྫོགས་པའི་རིམ་པ་ལ།  རྡོ་རྗེ་འཇིགས་བྱེད་ཀྱི་རྭ་
རྩེ་སེམས་འཛིན།  གཤེད་དམར་གྱི་ཤིན་ཏུ་སྤྲོས་མེད།  གསང་བ་འདུས་པ་འཕགས་ལུགས་ཀྱི་རིམ་པ་ལྔ།  ཀྱེ་རྡོ་རྗེ་སོགས་ལ་བརྟེན་པའི་སྔར་སྨོས་པའི་ལམ་སྐོར་དགུ།  འཁོར་ལོ་བདེ་མཆོག་དྲིལ་བུ་པའི་རིམ་པ་ལྔ།  ནག་པོ་སྤྱོད་པའི་རིམ་པ་བཞི་པ།  
རྩ་དབུ་མ་ལམ་གྱི་ཡན་ལག་དང་བཅས་པ།  བདེ་མཆོག་དཀར་པོའི་ཁྲིད།  བདེ་མཆོག་སྙན་བརྒྱུད།  དུས་ཀྱི་འཁོར་ལོའི་ཟབ་ལམ་རྡོ་རྗེ་རྣལ་འབྱོར།  སྦྱོར་བ་ཡན་ལག་དྲུག་ལ་སོགས་པའི་རྫོགས་རིམ་རྣམས་གསན་ཅིང་ཐུགས་ཉམས་སུ་བཞེས་པར་མཛད་
10-2-13a


དོ། །གསུམ་པ་ཐུན་མོང་སྒྲུབ་པའི་མན་ངག་ལ།  རབ་རིག་འཛིན་མཁའ་སྤྱོད་འཁོར་ལོས་སྒྱུར་བ་སྒྲུབ་པ་སོགས་དང་།  འབྲིང་གྲུབ་པ་ཆེན་པོ་བརྒྱད།  དམན་པ་ཞི་སོགས་ཀྱི་ལས་རབ་འབྱམས་སྒྲུབ་པའི་ཚུལ།  རྒྱུད་སྡེ་ལས་གསུངས་
པ་བརྒྱུད་པའི་མན་ངག་ལས་བྱུང་བ་རྣམས་དང་།  ཁྱད་པར་དུ་དམར་པོ་སྐོར་གསུམ་ལ་བརྟེན་ནས་ལས་སྒྲུབ་ཚུལ་གྱི་བྱེ་བྲག་མང་པོ་དང་།  རྡོ་རྗེ་ནག་པོ་ཆེན་པོ་དང་།  མགོན་པོ་གདོང་བཞི་པ་ལ་བརྟེན་ནས་ལས་སྒྲུབ་ཚུལ་གྱི་བྱེ་བྲག་ཐུན་མོང་དང་ཐུན་མོང་མ་ཡིན་པ་རྣམས་
གསན་ནོ། །བཞི་པ་རྗེས་གནང་གི་སྐོར་ལ།  རྡོ་རྗེ་རྣམ་འཇོམས་དང་།  འཕགས་མ་སྒྲོལ་མ་ལ་སོགས་པ་བར་ཆད་ཞི་བའི་ལྷ་རྣམས་དང་།  དོན་ཞགས་ལྷ་ལྔ་མ།  བཅུ་གཅིག་ཞལ་ལ་སོགས་པ་བྱང་ཆུབ་ཀྱི་སེམས་རྒྱས་པའི་ལྷ་རྣམས་དང་།  སྒྲོལ་
མ་དཀར་མོ་དང་།  གཙུག་ཏོར་རྣམ་རྒྱལ་ལ་སོགས་པ་ཚེ་རྒྱས་པའི་ལྷ་རྣམས་དང་།  འཇམ་དཔལ་གྱི་རིགས་རབ་ཏུ་མང་པོ་དང་།  ཤེར་ཕྱིན་དཀར་མོ་མི་གཡོ་བ་དཀར་སྔོན་ལ་སོགས་པ་བློ་གྲོས་རྒྱས་པའི་ལྷ་རྣམས་དང་།  ཛམྦྷ་ལ་དང་།  ནོར་རྒྱུན་མ་ལ་
སོགས་པ་ནོར་རྒྱས་པའི་ལྷ་རྣམས་དང་།  དམར་པོ་སྐོར་གསུམ་ལ་སོགས་པ་འགྲོ་བ་དབང་དུ་སྡུད་པའི་ལྷ་རྣམས་དང་།  ནག་པོ་ཆེན་པོ་ལྕམ་དྲལ་དང་།  མགོན་པོ་གདོང་བཞི་པ་ལ་སོགས་པ་བསྟན་པ་བསྲུང་ཞིང་དྲག་པོའི་ལས་སྒྲུབ་པའི་ལྷ་རྣམས་
ཀྱི་རྗེས་གནང་རབ་ཏུ་མང་པོ་དང་།  སྒྲུབ་ཐབས་རྒྱ་མཚོར་གྲགས་པ་རྗེས་གནང་ཉིས་བརྒྱ་དང་སུམ་ཅུ་རྩ་བགྲངས་པ་དང་།  སྒྲུབ་ཐབས་བརྒྱ་རྩར་གྲགས་པ་རྗེས་གནང་དགུ་བཅུ་གོ་དྲུག་བཞུགས་པའི་རྗེས་གནང་གི་རིགས་རབ་ཏུ་མང་པོ་གསན་ནོ། །གཞན་
10-2-13b


ཡང་བིཪྺ་པའི་ལུགས་ཀྱི་རྡོ་རྗེ་རྣམ་འཇོམས་ཀྱི་བྱིན་རླབས་དང་།  ནཱ་རོ་མཁའ་སྤྱོད་ལ་སོགས་པ་མཁའ་སྤྱོད་ཀྱི་རིགས་མང་པོའི་བྱིན་རླབས་དང་།  བདེ་མཆོག་དཀར་པོའི་བྱིན་རླབས་ལ་སོགས་པ་བྱིན་རླབས་ཀྱི་རིགས་མང་པོ་གསན་ནོ། །ལྔ་པ་ལུང་གི་སྐོར་ལ།  རྒྱུད་འབུམ་
གཟུངས་འདུས།  གཟུངས་འབུམ་རྣམས་དང་།  དེ་དག་གི་དགོངས་འགྲེལ་ལ།  རྒྱུད་སྡེ་འོག་མ་གསུམ་གྱི་རྒྱ་གཞུང་འགའ་ཞིག་དང་།  གཤིན་རྗེའི་གཤེད་ནག་པོའི་སྐོར་འགའ་ཞིག་དང་།  དམར་པོ་ལ་བིཪྺ་པའི་བསྐྱེད་རྫོགས་ཀྱི་གཞུང་དྲུག་ལ་སོགས་པ་དང་།  
གསང་བ་འདུས་པ་འཕགས་པ་ཡབ་སྲས་ཀྱིས་མཛད་པའི་གཞུང་རྣམས་དང་།  དེའི་རྗེས་འབྲང་ནག་པོ་པ་ལ་སོགས་པའི་གཞུང་རྣམས་དང་།  སངས་རྒྱས་ཡེ་ཤེས་ཞབས་ཀྱིས་མཛད་པའི་སྒྲུབ་ཐབས་ཀུན་ཏུ་བཟང་པོ།  རྫོགས་རིམ་གྲོལ་བའི་ཐིག་ལེ་སྟེ་གཉིས་དང་།  
མར་མེ་མཛད་བཟང་པོའི་དཀྱིལ་ཆོག་བཞི་བརྒྱ་ལྔ་བཅུ་པ་ལ་སོགས་པ་འདུས་པའི་རྒྱ་གཞུང་རྣམས་དང་།  ཀྱེའི་རྡོ་རྗེའི་བཀའ་སྲོལ་གསུམ་ལ་གཙོ་ཆེའི་ཆོས་སྣ་སུམ་ཅུ་དགུར་གྲགས་པ་རྣམས་དང་།  འཁོར་ལོ་བདེ་མཆོག་ལ་ལོ་ཧི་པས་མཛད་པའི་དཔལ་
མངོན་པར་རྟོགས་པ་སྨད་ལྔ་དང་བཅས་པ་དང་།  དྲིལ་བུ་སྐོར་གསུམ།  ནག་པོ་གཞུང་དྲུག་ལ་སོགས་པ་གྲུབ་ཆེན་གྱི་གཞུང་དང་།  རྒྱུད་ཀྱི་འགྲེལ་པ་ལ་སོགས་པ་བསམ་གྱིས་མི་ཁྱབ་པ་དང་།  རྗེ་བཙུན་ས་སྐྱ་པ་ཡབ་སྲས་ལྔའི་བཀའ་འབུམ།  
ཆོས་རྗེ་ཉིད་ཀྱི་བཀའ་འབུམ་ལ་སོགས་པ་བོད་ཀྱི་ལེགས་བཤད་ཀྱི་ལུང་རབ་ཏུ་མང་པོ་གསན་ནོ། །དེ་དག་ཀྱང་ཐོས་བསམ་གཙོ་ཆེ་བའི་དབང་དུ་བྱས་པ་ཡིན་གྱི།  ཡང་དག་པར་ན་གོང་དུ་སྨོས་པའི་ཁྲིད་དེ་དག་ཞུས་པའི་དུས་ཉིད་ནས་བསྒོམས་པས་
10-2-14a


ཉམས་མྱོང་རྒྱུད་ལ་སྐྱེས་པར་མཛད་ཅིང་།  བར་སྐབས་སུ་རི་ཁྲོད་དབེན་པ་རྣམས་སུ་བཞུགས་ནས་ཀྱང་ཉམས་ལེན་ལ་དྲིལ་བ་ཡིན་ནོ། །ལྔ་པ་ལ་གཉིས་ཏེ།  སྤྲོས་པ་བཅད་ནས་ཉམས་ལེན་ལ་བཞུགས་པའི་ཚུལ།  ཉམས་ལེན་ཇི་
ལྟར་མཛད་པའི་ཚུལ་གཏན་ལ་དབབ་པའོ། །དང་པོ་ནི།  རྒྱ་ཆེན་ཐོས་པས་ཞེས་སོགས་ཚིགས་བཅད་གཅིག་སྟེ།  སྐྱེས་བུ་དམ་པ་རྣམས་ནི།  ཐོས་བསམ་གྱིས་སྒྲོ་འདོགས་ཆོད་པའི་ཡང་དག་པའི་ལྟ་བའི་དོན་དབེན་པའི་གནས་སུ་རྩེ་གཅིག་ཏུ་ཉམས་སུ་
ལེན་པ་ནི་ཆོས་ཉིད་དོ། །དེ་ཡང་འདི་སྐད་ཐོས་ཏེ།  ཞེ་བདུན་པ་ཤིང་ཕོ་སྟག་གི་ལོ་ལ་ཨེ་ཝཾ་ཆོས་ལྡན་དུ་ཕེབས་པ་ན།  ཆོས་རྗེའི་ཞལ་ནས་ད་འདི་རུ་སྡོད་ལ་བཤད་ཉན་གྱིས།  གདན་སའི་མིང་བཏགས་འདོད་ནའང་བྱེད་པས་ཆོག །བེར་ཐུལ་འདྲ་
གོན་པ་དང་།  མཆོད་ཆ་དང་རྟེན་གསུམ་སོགས་འདོད་ནའང་།  བླ་བྲང་ནས་ལོང་ལ་བེད་གཅོད་གྱིས།  བདག་ཆེན་གྲགས་བློ་བའི་དབོན་པོ་ཞིག་ཡོད་པ་འདི་རབ་བྱུང་བྱེད་པའི་སློབ་དཔོན་ཡང་འཆོལ་བ་ཡིན་གསུངས་པ་ལ།  བདག་ལ་འདི་ལྟ་བུའི་སྤྲོས་པ་མེད་
པའི་རྒྱུ་མཚན་ཐུགས་ལ་མངའ་རྒྱུ་ཡིན།  ཞེ་ལ་འདོད་པ་ཡོད་ཀྱང་ཁ་ལ་འདོད་པ་མེད་པ་སྐད་སྟོན་པའི་སྤྱོད་པ་ནི་ཅི་ཡང་མེད་སྙམ་ནས།  དེ་དག་ལ་འདོད་བཞེད་མེད་པའི་རྒྱུ་མཚན་དང་།  ཚེ་དང་སྒྲུབ་པ་སྙོམས་པར་འདོད་པའི་རྒྱུ་མཚན་རྣམས་རིམ་པར་ཞུས་
ནས།  ཡོས་ལོ་ལ་ཡར་ཕེབས་པར་རྩོམ་པ་ན།  ཆོས་རྗེའི་དྲུང་དུ།  ཡར་སླེབ་ནས་ལོ་གསུམ་དུ་མཚམས་དམ་པ་གཅིག་བྱེད།  དེ་ནས་ཀྱང་ཕལ་ཆེར་མཚམས་ཀ་བྱེད་པར་ཞུ་ཞུས་པས།  ཆོས་རྗེའི་ཞལ་ནས།  སྤྱིར་སངས་རྒྱས་སྒྲུབ་པ་ལ་གནས་ལུགས་
10-2-14b


རྟོགས་པའི་ཤེས་རབ་ཕུན་སུམ་ཚོགས་པ་གཅིག་དགོས།  དེ་ཡང་གསང་སྔགས་ཀྱི་རྫོགས་རིམ་ཟབ་མོ་ལ་བརྟེན་ནས་སྒྲུབ་པའི་ཚུལ་ཡོད་ཀྱང་།  དེ་འགྲུབ་པར་དཀའ་བས།  ཐོས་བསམ་ལ་བརྟེན་ནས་བསྒྲུབ་པ་ཁེ་ཆེ།  དེ་ལ་ཡང་གཞན་ལ་ཉན་པ་བས།  
རང་གིས་ཅུང་ཟད་ཤེས་ནས་འཆད་པ་འདི་ཤེས་རབ་སྐྱེ་ཕུལ་ཆེ་བས།  ཡར་ཕྱོགས་སུ་དོན་གཉེར་བ་རེ་རེ་ཙམ་བྱུང་ན་སྣ་ལེན་མཛོད་གསུངས་པ་ཐུགས་ལ་བཞག་ནས་མུས་སུ་བྱོན་ཏེ།  དེའི་དབྱར་ཆུ་བཟང་དགོན་པར་བཞུགས་ནས་བསག་སྦྱང་གི་རྣལ་འབྱོར་གཙོ་
བོར་མཛད་དོ། །དེའི་སྟོན་བཞུགས་ནས་ཞེ་དགུ་པ་འབྲུག་ལོ་ཚང་མ་ལ་ལྷ་གོང་རི་ཁྲོད་དུ་རྩ་སྔགས་ཨཱཥྚའི་བསྙེན་པ་འབུམ་ཕྲག་བདུན།  ཁ་སྐོང་གི་སྦྱིན་སྲེག་དང་བཅས་པ།  མཇུག་ཏུ་ཤཱ་ས་ན་འབུམ་ཕྲག་བཞི་དང་བཅས་པ་གདན་གཅིག་གི་སྟེང་དུ་
མཛད་དོ། །དེ་ནས་ལྔ་བཅུ་པ་སྦྲུལ་གྱི་ལོ་ལ་ལུང་པ་དེའི་ཉ་དང་རི་དྭགས་སོགས་སྐྱོབ་པ་དང་།  བཤད་སྒྲུབ་ཀྱི་བསྟན་པ་རྒྱུན་མི་འཆད་པའི་རྟེན་འབྲེལ་ཁྱད་པར་ཅན་གཟིགས་ནས།  གླིང་ཁ་བདེ་བ་ཅན་གྱི་དགོན་པ་བཏབ་སྟེ།  དེ་ཉིད་ཀྱི་ལོར་ནི་གུ་ལམ་འབྲས་
ལ་སོགས་པའི་ཟབ་ཆོས་བཙུགས།  དེར་བཞུགས་པའི་དགེ་འདུན་ཐམས་ཅད་གཞི་ཚུལ་ཁྲིམས་རྣམ་པར་དག་པའི་སྟེང་དུ།  ཕ་རོལ་ཏུ་ཕྱིན་པའི་བློ་སྦྱོང་གིས་རྒྱུད་སྦྱངས་ནས།  གསུང་ངག་ལ་ཐུགས་དམ་མཛད་དེ།  རབ་ཚེ་དང་སྒྲུབ་པ་མཉམ་པ་
དང་།  འབྲིང་ཐུན་བཞིའི་རྣལ་འབྱོར།  ཐ་མ་ཐུན་གཉིས་ཀྱི་རྣལ་འབྱོར་ཉམས་སུ་ལེན་པ་ལ་བཀོད་པར་མཛད་ཅིང་།  བདེ་དགེས་གསང་གསུམ་དང་ཀུན་རིག་གི་ཕྱག་ལེན་རྣམ་པར་དག་པའི་སྒྲུབ་མཆོད་ཀྱི་རྒྱུན་ཡང་འཛུགས་པར་མཛད་དོ། །དེ་ནས་
10-2-15a


བཟུང་སྟེ་གཙོ་བོར་སྒྲུབ་པ་ལ་གཞོལ་ཞིང་།  ཆོས་རྗེའི་གསུང་དང་དུ་ལེན་པའི་རྒྱུ་མཚན་གྱིས་སྐབས་སྐབས་སུ་གདུལ་བྱ་སྐལ་ལྡན་རྣམས་ལ་གསུང་ངག་ལ་སོགས་པ་ཟབ་མོའི་ཆོས་ཀྱིས་ཚིམ་པར་མཛད་པའི་ངང་ནས།  ང་གཉིས་པ་ལ་ཨེ་ཝཾ་
ཆོས་ལྡན་དུ་ལན་ཅིག་ཕེབས།  སླར་ང་དགུ་པ་མེ་ཕོ་སྟག་གི་ལོ་ལ་ཨེ་ཝཾ་ཆོས་ལྡན་དུ་ཕེབས་ནས་གསུང་ངག་ཞུས་པའི་ཚེ།  ཆོས་རྗེ་བཟང་པོའི་ཞབས་གསུང་ངག་གི་དམ་ཚིག་གི་བཤད་པ་ཡན་རྫོགས་ནས།  ཡངས་པའི་ས་ཆེན་པོ་ལ་དབང་བསྒྱུར་བ་རིན་
སྤུངས་པ་སྐུ་མཆེད་ཀྱིས་གདན་དྲངས་ཏེ།  རྗེ་འདི་ཉིད་ལ་ལམ་འབྲས་པ་རྣམས་ལ་བདག་མེད་མའི་དབང་བསྐུར་ཞིག་གྱིས་ལ་ལྟ་བ་འཁོར་འདས་དབྱེར་མེད་ཤོད།  འཁར་རྔ་འདི་ས་སྐྱ་པཎྜི་ཏའི་ཆོས་རྔ་ཡིན་པས་ཆོས་བརྡ་ཐོང་གསུངས་ནས་གཤེགས་པའི་རྗེས་
སུ་བཀའ་བཞིན་བསྒྲུབ་པ་ལ་ཟླ་བ་གཉིས་བཞུགས་སོ། །དེ་ནས་དཔལ་ནཱ་ལེནྡྲར་རོང་སྟོན་ཆོས་རྗེའི་སྤྱན་སྔར་མཇལ་དུ་བྱོན་ནས།  ཕར་ཕྱིན་ཁྲིད་ཡིག །མི་གཡོ་བ་དཀར་པོའི་རྗེས་གནང་།  སྒོམ་རིམ་ཐ་མའི་བཤད་པ་རྣམས་གསན་ནས།  དེ་ཕྱོགས་
ཀྱི་དགེ་བའི་བཤེས་གཉེན་ཆེ་བར་གྲགས་པ།  གླང་ཐང་སྤྱན་སྔ་བ་ཀུན་དགའ་རྒྱལ་མཚན་པ་ལ་སོགས་པས་ཆོས་ཞུ་བའི་ཆེད་དུ་ཐབས་ཀྱིས་གདན་འདྲེན་པར་མཛད་ན་ཡང་།  དེར་མ་བཞུགས་པར་མུས་སུ་བྱོན་ནོ། །རེ་གཅིག་པ་ལ་ཆོས་རྗེ་བཟང་པོའི་
ཞབས་མངའ་རིས་སུ་ཐེགས་པའི་རྗེས་སུ།  ཕྱག་རྟགས་དང་བཀའ་ཞལ་ལ་བརྟེན་ནས།  ཨེ་ཝཾ་ཆོས་ལྡན་དུ་གསུངས་ངག་ལ་སོགས་པའི་ཟབ་ཆོས་དུ་མས་དེར་བཞུགས་པའི་དགེ་འདུན་རྣམས་ཚིམ་པར་མཛད་ནས་ལོ་གཅིག་བཞུགས།  སླར་ཡང་རེ་གསུམ་པ་དང་
10-2-15b


རེ་བདུན་པ་ལ་ཨེ་ཝཾ་ཆོས་ལྡན་དུ་ཕེབས་ཤིང་།  ཕྱི་མ་ལ་རྒྱུད་འབུམ་ལ་སོགས་པའི་ཆོས་མང་དུ་གསུངས་སོ། །དེའི་སྟོན་མུས་སུ་ཕེབས་ནས་དབེན་གནས་བསམ་གཏན་ཕུག་བརྩིགས་ཏེ།  རེ་བརྒྱད་པ་ཕག་གི་ལོ་ལ་སྐུ་མཚམས་དམ་པར་མཛད་ནས་ཐུགས་
དམ་ལ་རྩེ་གཅིག་ཏུ་བཞུགས་སོ། །གཉིས་པ་ལ་གཉིས་ཏེ།  ཕ་རོལ་ཏུ་ཕྱིན་པའི་ཉམས་ལེན་མཛད་ཚུལ།  རྡོ་རྗེ་ཐེག་པའི་ཉམས་ལེན་མཛད་ཚུལ་ལོ། །དང་པོ་ལ།  དོན་དམ་བྱང་ཆུབ་ཀྱི་སེམས་ཉམས་སུ་བླང་ཚུལ་ནི།  དབེན་གནས་དངུལ་ཆུར་ཞེས་
སོགས་ཚིགས་བཅད་གཅིག་སྟེ།  དངུལ་ཆུར་བློ་སྦྱོང་ཞུས་ནས་དོན་དམ་བྱང་ཆུབ་ཀྱི་སེམས་བསྒོམ་པའི་ཚེ།  སྣང་བའི་དངོས་པོ་ཐམས་ཅད་དངུལ་ཆུའི་རྒྱ་མཚོ་བཞིན་དུ་ཚུགས་མི་ཐུབ་པར་རྣམ་པར་གཡོ་ཞིང་།  རྩིག་པ་དང་རི་ལ་སོགས་པ་ལ་ཐོགས་མེད་
དུ་འཇུག་ནུས་པའི་ཉམས་མྱོང་རྒྱུད་ལ་སྐྱེས་པར་མཛད་དོ། །ཀུན་རྫོབ་བྱང་ཆུབ་ཀྱི་སེམས་ཉམས་སུ་བླངས་པའི་ཚུལ་ནི།  རྒྱུན་ཆད་མེད་པར་ཞེས་སོགས་ཚིགས་བཅད་བཞི་སྟེ།  ཐེག་པ་ཆེན་པོའི་བློ་སྦྱོང་གི་དོན་བསྒོམ་པའི་གནས་སྐབས་ཐམས་ཅད་དུ་
སྙིང་རྗེ་ཆེན་པོས་ཀུན་ནས་བསླངས་ཏེ།  བདག་གཞན་བརྗེ་བའི་བྱང་ཆུབ་ཀྱི་སེམས་གོམས་པར་མཛད་པའི་སྟོབས་ཀྱིས།  རི་ཁྲོད་དབེན་པ་རྣམས་སུ་བཞུགས་པའི་ཚེ།  གནའ་བ་ལ་སོགས་པའི་རི་དྭགས་འདུས་ནས་ལ་ལ་པང་དུ་ཉལ།  ལ་ལས་རྒྱབ་ནས་
ཕུལ་ཏེ།  བུ་ཆུང་ངུ་བ་མ་ལ་བཏུད་པ་བཞིན་མིག་རིག་རིག་ཞལ་དུ་བལྟས་པར་གྱུར་ཏོ་ཞེས་ཐོས་སོ། །ཡང་རི་ཁྲོད་ཅིག་ཏུ་གནའ་མོ་ཅིག་དང་།  གནའ་ཁྱི་ཅིག་མཉམ་དུ་གསོས་པས་ཕན་ཚུན་བྱམས་སེམས་དང་ལྡན་པར་གྱུར་ཏེ།  ནམ་ཞིག་ཁྱི་ཡུལ་དུ་ཁྲིད་
10-2-16a


པའི་ཚེ།  གནའ་མོས་ཁྱི་ལ་བལྟས་ནས་མར་ལ་འགྲོ།  རྗེ་ལ་བལྟས་ནས་ཡར་འོང་བའི་ཙབ་ཙོབ་ཏུ་གྱུར་ཏོ་ཞེས་གསུངས་སོ། །གཞན་ཡང་སྙིང་རྗེ་ཆེན་པོ་གཡོས་པའི་སྟོབས་ཀྱིས།  མཚན་ཐོག་ཐག་ཏུ་བཤུམས་པ་ལ་སོགས་པའི་
རྣམ་ཐར་བསམ་གྱིས་མི་ཁྱབ་པའི་ཕྱིར་ན།  རེ་གསུམ་པ་ལ་བུ་ལེ་རོང་དུ་ཆོས་རྗེ་སེམས་དཔའ་ཆེན་པོ་གཞོན་ནུ་རྒྱལ་མཆོག་པའི་དྲུང་དུ་མཇལ་དུ་བྱོན་པའི་ཚེ།  བློ་སྦྱོང་དོན་བདུན་མའི་ཁྲིད་དང་།  བློ་སྦྱོང་གི་རྒྱ་གཞུང་དང་།  བོད་གཞུང་གི་ལུང་རབ་ཏུ་མང་པོ་གནང་
ནས།  ད་ཆོས་བདག་པོའི་ལག་ཏུ་འཕྲོད་པས་བློ་བདེ།  ཁྱོད་ཀྱིས་བློ་སྦྱོང་འདིའི་བཀའ་མ་ཆད་པ་གྱིས་གསུངས་ནས་ཆོས་འདིའི་བདག་པོར་དབང་བསྐུར་བར་མཛད་དོ། །གཉིས་པ་ལ་གཉིས་ཏེ།  མཉམ་གཞག་གི་ཉམས་ལེན་དང་།  མཉམ་པར་མ་བཞག་
པའི་ཉམས་ལེན་ནོ། །དང་པོ་ནི།  དབང་གིས་མཚོན་པའི་ཞེས་སོགས་ཚིགས་བཅད་ལྔ་སྟེ།  དང་པོས་ལྟ་བ།  གཉིས་པས་ཕྱི་བསྐྱེད་རིམ།  གསུམ་པས་ནང་བསྐྱེད་རིམ།  བཞི་པས་རྫོགས་རིམ་ཉམས་སུ་བླང་ཚུལ་དང་།  ལྔ་པས་བསྒོམས་པ་ལས་བྱུང་
བའི་དྲོད་རྟགས་བསྟན་ནོ། །དེ་ཡང་བདག་ཉིད་ཆེན་པོ་འདིས་ཉམས་ལེན་ཐམས་ཅད་ལ་དབང་གིས་མཚོན་པའི་ལྟ་བ་བརྗོད་བྲལ་ཟུང་འཇུག་གིས་རྒྱས་བཏབ་ནས་ཉམས་སུ་བླང་བར་མཛད་པའི་སྟོབས་ཀྱིས།  སྲིན་པོ་གདོང་དུ་རི་ཁྲོད་མཛད་པའི་ཚེ།  བྲག་
ཆེན་པོ་རལ་ནས་ཆ་ཐེར་དུམ་བུར་བཏང་ཞིང་།  མཐའ་རྡོ་ཕུང་གིས་ནོན་པའི་ནང་དུ་སྐུ་ལུས་ལ་ཅུང་ཟད་ཙམ་ཡང་གནོད་པ་མེད་པར་བཞུགས་སོ། །ཕྱི་བསྐྱེད་པའི་རིམ་པ་བསྒོམ་པའི་ཚེ།  སྒྲ་ཚུལ་དང་མངོན་བྱང་ལ་སོགས་པའི་བསྐྱེད་ཆོག་ཐམས་ཅད་སྦྱང་
10-2-16b


གཞི་སྦྱོང་བྱེད་སྦྱོར་བ་ལ་གནད་དུ་བསྣུན་ཅིང་།  ནང་བསྐྱེད་རིམ་བསྒོམ་པའི་ཚེ།  འཁོར་ལོ་ལྔ་དང་ཡུལ་ཉི་ཤུ་རྩ་བཞི་ལ་སོགས་པའི་རྩ་ཐིག་རྣམས་ལ་གནད་དུ་བསྣུན་ནས་བསྒོམས་པས་ཐ་མལ་གྱི་སྣང་བ་ཡེ་ཤེས་ལྔར་འཆར།  རྩ་རླུང་རྒྱལ་བས་བྱིན་གྱིས་བརླབས་
པར་མཛད་པ་ཡིན་ནོ། །རྫོགས་རིམ་བསྒོམ་པའི་ཚེ།  རྒྱུད་སྡེ་ནས་གསུངས་པའི་རྩ་རླུང་ཐིག་ལེའི་རྣལ་འབྱོར་དང་།  རྡོ་རྗེ་ལུས་ཀྱི་འཁྲུལ་འཁོར་ལ་སོགས་པས་གཟུང་འཛིན་བསྐྱེད་པའི་རླུང་སེམས་དབུ་མར་བཅུག་ནས་བདེ་སྟོང་མཆོག་གི་ཡེ་ཤེས་མངོན་དུ་
མཛད་དེ།  ཤཱཀ་བཟང་སྐུ་འབུམ་དུ་ཆོས་རྗེའི་དྲུང་དུ་འཁྲུལ་འཁོར་མཛད་པའི་ཚེ།  ཏིང་ངེ་འཛིན་ལ་ཡུན་རིང་པོ་ཅིག་སོང་འདུག །དེའི་སྟོབས་ཀྱིས་ཕྱིས་ཨ་མ་ར་རྒྱབ་པའི་ཚེ།  ཏིང་ངེ་འཛིན་བཟང་པོ་རེ་སྐྱེ་བ་ཡིན་གསུངས་པ་ལྟ་བུའོ། །དེ་ལྟར་རིམ་གཉིས་
ཀྱི་ཏིང་ངེ་འཛིན་བསྒོམས་པའི་སྟོབས་ཀྱིས་ལུས་ཉམས་དང་།  སེམས་ཉམས་དང་།  གཞན་སེམས་ཤེས་པ་ལ་སོགས་པའི་ཡོན་ཏན་མངོན་དུ་མཛད་དེ་ལྷ་གོང་རི་ཁྲོད་དུ་དགེ་བཤེས་སེང་གེ་གྲགས་པ་ལ་ཁམས་ཕྱོགས་ཀྱི་རྣམ་རྟོག་དུ་མ་སྐྱེས་པའི་ནངས་པར།  
དེ་ལྟ་བུའི་རྟོག་པ་འོག་འགྱུ་མ་བྱེད་པར་དགེ་སྦྱོར་གྱིས་གསུངས་པ་དང་།  བླ་མ་དབོན་པོ་ལ་ཆགས་པའི་རྣམ་རྟོག་མངོན་གྱུར་དུ་སྐྱེས་པའི་ཚེ།  གདོང་ལ་ཕྱག་མཛུབ་བཙུགས་ནས།  སྡུག་ཕྲུག་འདི་ལ་རྟོག་ངན་རྒྱུས་བྱུང་ངས་ཨེ་བཤད་གསུངས་པ་ལ།  མི་གསུང་
བར་ཞུ་ཞེས་ཞུས་སོ་ཞེས་ཁོང་རང་གཉིས་ལས་ཐོས་སོ། །གཉིས་པ་ནི།  འཁོར་ལོ་བདེ་མཆོག་ཅེས་སོགས་ཚིགས་བཅད་བཞི་སྟེ།  དང་པོ་གཉིས་ཀྱིས་བཟླས་པའི་རྣལ་འབྱོར།  གསུམ་པས་ཐུན་མཚམས་ཀྱི་བྱ་བ།  བཞི་པས་བཟའ་བ་དང་།  ཉལ་བ་དང་།  
10-2-17a


ལྡང་བའི་རྣལ་འབྱོར་གསུམ་བསྟན་ཏོ། །དེ་ཡང་བདག་ཉིད་ཆེན་པོ་འདིས་འཁོར་ལོ་བདེ་མཆོག་དང་།  འཇམ་དབྱངས་དང་།  གཤིན་རྗེ་གཤེད་དང་།  མ་ཧཱ་ཀཱ་ལ་དང་།  སྤྱན་རས་གཟིགས་ལ་སོགས་པའི་གསང་སྔགས་བྱེ་བ་དུ་མ་རབ་ཏུ་
བཟླས་པར་མཛད་དེ།  ཡིག་དྲུག་བྱེ་བ་བདུན་སོང་གསུངས་ཤིང་།  གཞན་རྣམས་ལ་ཡང་རྒྱུན་དུ་ཐུགས་དམ་མཛད་པར་སྣང་ངོ་། །ཁྱད་པར་རྩ་སྔགས་ཨཱཥྚ་སྔར་འབུམ་ཕྲག་དྲུག །ལྷ་གོང་དུ་འབུམ་ཕྲག་བདུན་བཟླས་པས་མནལ་ལམ་དུ་ཡི་དམ་གྱིས་ལུང་བསྟན་
པར་ངེས་ཏེ།  རྒྱུ་དུས་ཀྱི་དབང་བསྐུར་ཞིག་གི་དུས་སུ།  མཚན་མའི་བསྙེན་པ་ཐ་མ་མིང་གདགས་སུ་རུང་ཙམ་བྱུང་བས་ཞེས་གསུངས་པ་དང་།  ཨེ་ཝཾ་ཆོས་ལྡན་དུ་བཞུགས་པའི་ནུབ་གཅིག་གླིང་སྐྱའི་རྒྱབ་རི་དེ་ན་ག་ཡ་དྷ་རའི་བུམ་ཆུ་ཡིན་ཟེར་བའི་ཆུ་ཆེན་པོ་སྐྱ་ཆིལ་བ་ཅིག་
བརྡོལ་བྱུང་བས།  དེ་མ་ཐག་ཏུ་ཆོས་གོས་ལ་གཤོག་པ་མཛད་ནས་གླིང་སྐྱའི་བྲག་ལ་འཕུར་སོང་བ་རྨིས་གསུངས་པ་དང་།  ཡང་བདེ་མཆོག་གི་བསྙེན་པ་མཛད་པའི་ཚེ།  རི་ངོས་ཆེན་པོ་ཅིག་བདེ་མཆོག་གི་རྡུལ་ཚོན་གྱི་དཀྱིལ་འཁོར་ཆེན་པོ་ཅིག་གིས་ཁེབས་འདུག་པར་
རྨིས་གསུངས་སོ། །ཐུན་མཚམས་ཀྱི་གནས་སྐབས་སུ་མཆོད་གཏོར་ལ་སོགས་པ་དགེ་བའི་བྱ་བ་འབའ་ཞིག་གིས་དུས་འདའ་བར་མཛད་ཅིང་།  སྤྱོད་ལམ་གྱི་ཚེ།  ལྷག་པའི་ལྷའི་ཐབས་ལ་མཁས་པ་དང་།  ལྷ་སོ་སོའི་ཐབས་ལ་མཁས་པ་གང་རུང་གིས་སྣང་བ་ཐ་
མལ་དུ་མ་ལུས་པར་མཛད་ལ།  རྣལ་འབྱོར་གཞན་རྣམས་ཀྱང་ཚུལ་བཞིན་དུ་ཉམས་སུ་ལེན་པར་མཛད་དོ། །ཁྱད་པར་དུ་མནལ་དུ་སོང་བའི་གནས་སྐབས་ཀུན་ཏུ།  ཨོཾ་གསུམ་མམ།  བདེ་མཆོག་གི་སྔགས་གང་རུང་སྒྲ་ལྷང་ལྷང་དང་བཅས་ཏེ་གསུང་བར་
10-2-17b


དྲུང་ན་གནས་པ་དག་གིས་ངེས་པར་གྱུར་ཏོ། །དྲུག་པ་ནི།  ཏིང་ཀྲོལ་གནས་སུ་ཞེས་སོགས་ཚིགས་བཅད་གསུམ་སྟེ།  གཡའ་མ་ཏིང་ཀྲོལ་དུ་རི་ཁྲོད་མཛད་པའི་ཚེ།  ནུབ་གཅིག་མནལ་ལམ་དུ་བུད་མེད་སྨུག་ཚོན་མ་ཅིག་གིས་སྟོན་པའི་གསེར་སྐུ་ཅིག་གཏད་ནས་ས་སྐྱ་
པཎྜི་ཏའི་བསྟན་པ་འདི་ཉམས་འདུག་པས།  ད་ཁྱོད་ཀྱིས་འབད་པ་ཆེན་པོ་གྱིས་ལ་སློངས་ཤིག་ཟེར་བ་རྨིས་ཞེས་ཐོས་སོ། །ཡང་རྫིང་ལུང་དུ་ཐུགས་དམ་མཛད་པའི་ཚེ།  འཕགས་པ་སྤྱན་རས་གཟིགས་མངོན་སུམ་དུ་གཟིགས་ཤིང་།  ལྷོ་ཕུག་ཏུ་བླ་མ་བཟང་
སྐྱོང་བ་དང་ལྷན་ཅིག་རི་ཁྲོད་མཛད་པའི་ཚེ།  ཐོ་རངས་ཤིག་ཁོང་གི་ལུང་པ་འོད་ཀྱིས་ཁེངས་པ་མཐོང་ནས་བལྟས་པས།  རྗེ་འདི་ཉིད་སྤྱན་རས་གཟིགས་ཕྱག་བཞི་པར་གནས་པ་ལ།  ལྷོ་རྩའི་སྤྱན་རས་གཟིགས་དེ་འདྲ་བ་དཔག་ཏུ་མེད་པས་བསྐོར་ནས་ཕྱག་
ཐལ་མོ་སྦྱར་ནས་བཏུད་པར་མཐོང་བ་དང་།  ཡང་བདེ་བ་ཅན་གྱི་གཟིམས་ཁང་རྙིང་པ་ན་བཞུགས་དུས་ཤིག་བུད་མེད་ལས་དག་པ་ཅིག་གིས་སྤྱན་རས་གཟིགས་སུ་མཐོང་བའི་ལོ་རྒྱུས་ཀྱང་སྣང་ངོ་། །ར་ལུང་གི་བྲག་ལ་བཞུགས་པའི་དུས་སུ་ད་ལྟ་བོད་ན་ས་སྐྱ་པཎྜི་ཏའི་
གྲྭ་པ་མང་པོ་མེད།  གང་ཡོད་པ་འདིའི་དཔོན་པོ་ཁྱོད་ཀྱིས་བྱེད་དགོས་ཟེར་བ་ཅིག་རྨིས་གསུངས་སོ། །བསམ་གཏན་ཕུག་ཏུ་སྐུ་མཚམས་མཛད་པའི་དུས་སུ།  རྗེ་ས་ཆེན་བྱོན་ནས།  ཁྱོད་ཀྱིས་སྔོན་དབང་བསྐུར་ཐོབ་པའི་དཀྱིལ་འཁོར་འདི་ཡིན་གསུངས་ནས་གསང་
འདུས་འཇམ་རྡོར་གྱི་དཀྱིལ་འཁོར་ཡིན་སྙམ་པ་ཅིག་བསྟན།  ཡང་ཆོས་ཁྲི་ཆེན་པོ་མང་པོ་འདུག་པ་སུའི་ཡིན་དྲིས་པས།  ས་སྐྱ་པ་ཡབ་སྲས་ཁུ་དབོན་རྣམས་ཀྱི་ཡིན་ཟེར།  དེ་རྣམས་ལས་ཆེ་བ་ཅིག་འདུག་པ་དྲིས་པས།  ཁྱོད་ཀྱི་ཡིན་ཟེར་བ་རྨིས།  ཡང་
10-2-18a


ཞ་ལུའི་ས་ཆ་འདྲ་བ་ཅིག་ན་ཆོས་ཁྲི་ཆེན་པོ་གཉིས་འདུག་པ་དྲིས་པས།  བུ་སྟོན་རིན་པོ་ཆེ་དང་།  སེམས་དཔའ་ཆེན་པོ་གཉིས་ཀྱི་ཡིན་ཟེར།  དེ་གཉིས་ལས་ཆེ་བ་ཅིག་འདུག་པ་དྲིས་པས།  ཁྱོད་ཀྱི་ཡིན་ཟེར་བ་རྨིས།  ཡང་ནུབ་གཅིག་
ཆོས་རྗེ་རིན་པོ་ཆེས་མཆོད་སྟེགས་འདྲ་བ་ཞིག་ཁྲ་ཡལ་ཡལ་ཞིག་གཏད་ནས།  འདི་ན་བཟའ་བྲག་ཕུག་པའི་ཡིན།  ཁྱོད་གཞན་དོན་རྒྱུན་རིང་བའི་རྟེན་འབྲེལ་བྱེད་པ་ཡིན་ཟེར་བ་རྨིས་སོ། །བདུན་པ་ལ་གཉིས་ཏེ།  རྒྱུ་རྒྱལ་ཚབ་ཏུ་དབང་བསྐུར་བའི་ཚུལ།  འབྲས་བུ་
ཕྲིན་ལས་མཛད་པའི་ཚུལ་ལོ། །དང་པོ་ནི།  འདྲེན་པ་མཆོག་གིས་ཞེས་སོགས་ཚིགས་བཅད་གཉིས་ཏེ།  སྐྱེས་བུ་དམ་པ་རྣམས་ནི།  དམ་པ་གོང་མའི་སྲོལ་བཟུང་ནས།  རྗེས་འཇུག་གི་གདུལ་བྱ་རྣམས་ཀྱི་མགོན་སྐྱབས་མཛད་པ་ནི་ཆོས་ཉིད་དོ། །དེ་
ཡང་འདི་ལྟར་བསམ་གཏན་ཕུག་གི་སྐུ་མཚམས་གྲོལ་ནས།  རེ་དགུ་པ་མེ་ཕོ་བྱི་བའི་ལོ་ལ་སྐལ་ལྡན་མང་པོ་ལ་གསུང་ཆོས་མང་པོ་བཙུགས་ཏེ།  འཁོར་ལོ་བདེ་མཆོག་གི་ཆོས་སྐོར་མང་པོ་དང་།  ལམ་འབྲས་ཀྱི༷་སྣང་བ་གསུམ་གྱི་ཁྲིད་སོང་བའི་ཚེ།  
ཨེ་ཝཾ་ཆོས་ལྡན་ནས།  ཆོས་རྗེའི་ཕྱག་རྟགས་དང་བཅས་ཏེ་གདན་འདྲེན་པར་བྱུང་ནས་ས་ག་ཟླ་བའི་ཚེས་བཅུ་ལ་བཏེག་སྟེ།  ཉི་ཤུ་གསུམ་ལ་ཨེ་ཝཾ་ཆོས་ལྡན་དུ་ཕེབས་སོ། །དེ་ཡང་ཆོས་རྗེའི་དགོངས་པ་ལ།  ཚེས་བཅུ་ཙམ་ལ་ཕེབས་སམ་སྙམ་ནས་
བྱ་བྲལ་པ་ཨེ་བྱུང་ལྟོས་ཞེས་ཡང་ཡང་གསུངས་ཤིང་།  ནམ་མཁའ་ལ་འཇའ་འོད་ཀྱི་བྱེ་བྲག་མང་པོ་དང་མེ་ཏོག་གི་ཆར་ཡང་མང་པོ་བྱུང་ངོ་། །བཅུའི་ཉིན་པར་ཡང་དེ་བཞིན་དུ་བྱུང་ཡང་།  ཉི་ཤུ་ལྔའི་བར་བརྟན་པར་བཞུགས་པ་ནི།  རྗེ་འདི་ཉིད་ལ་བསྟན་
10-2-18b


པ་གཏད་པའི་ཆེད་དུ་ཡིན་པར་ངེས་སོ། །དེ་ནས་ཉི་ཤུ་བཞིའི་ཉིན།  ཞོ་བཅོ་བརྒྱད་ཡོད་པའི་གསེར་ཐིག་པོ་ཅིག་གིས་མགོ་བྱས།  གསེར་ཞོ་སུམ་ཅུ་སོ་བགྲང་ཞིག་ཕུལ་ནས་མཇལ་བའི་ཚེ།  ཆོས་རྗེ་ཉིད་ཀྱི་སྐུ་ཆོས་དང་།  རྡོ་རྗེ་དྲིལ་བུ་དང་།  རྗེ་ས་ཆེན་གྱི་ཡིན་
ཐར་རྣམས་གནང་ནས།  རྗེས་ཀྱི་བྱ་བ་འདི་ལྟར་གྱིས་ཀྱི་ཞལ་ད་མདོར་བསྡུས་དང་།  འདི་དང་མུས་གཉིས་ཡར་འབྱོན་མར་འབྱོན་གྱིས་ལ་བསྟན་པའི་བྱ་བ་རྒྱུན་མ་ཆད་པར་མཛོད་གསུངས་ཏེ།  དམ་པའི་ཆོས་ཀྱི་རྒྱལ་ཚབ་ཆེན་པོར་དབང་བསྐུར་བར་མཛད་
དོ། །གཉིས་པ་ལ་གསུམ་སྟེ།  རྗེས་ཀྱི་བྱ་བ་མཛད་ཚུལ།  ཆོས་ཀྱི་འཁོར་ལོ་བསྐོར་ཚུལ།  འབྲས་བུ་བསྟན་འཛིན་བསྐྲུན་ཚུལ་ལོ། །དང་པོ་ནི།  དམ་ཚིག་སྡོམ་ལ་ཞེས་སོགས་ཚིགས་བཅད་གསུམ་སྟེ།  དམ་ཚིག་ལ་ཉེས་པའི་དྲི་མ་མེད་པ་དང་།  བླ་མ་
ལ་ལྷག་པའི་ལྷ་དང་དབྱེར་མེད་དུ་བལྟ་བའི་ཕྱིར་ན།  དེའི་ཐུགས་དགོངས་རྣམས་ཇི་ལྟ་བ་བཞིན་བསྒྲུབ་པར་མཛད་དེ།  ཆོས་རྗེ་ཉིད་ཀྱིས་ཞལ་དའི་ལུགས་བཞིན།  ཕྱག་རྫས་ཀྱི་སྟེང་ནས་རྟེན་གསུམ་གྱི་དྲུང་དུ་མར་མེའི་ཕྲེང་བ་ལ་སོགས་པའི་མཆོད་རྫས་ཆེད་དུ་
བཞག་པར་འོས་པ་རྣམས་ནི་དེ་ལྟར་བཞག །གདན་ས་ཆེན་པོ་དང་།  གསང་ཕུ་དང་།  ནཱ་ལེནྡྲ་ལ་སོགས་པའི་ཆོས་སྡེ་ཆེན་པོ་རྣམས་སུ་དགེ་འདུན་ལ་བསྙེན་བཀུར་བྱ་བར་འོས་པ་རྣམས་ནི་ཕུན་སུམ་ཚོགས་པར་བསྒྲུབས།  ཨེ་ཝཾ་ཆོས་ལྡན་དུ་བཞུགས་པའི་དགེ་
འདུན་རྣམས་ལ་གནང་སྦྱིན་མཛད་པར་འོས་པ་རྣམས་ནི་སྐབས་སུ་བབས་པར་བསྒྲུབས།  གཤེགས་རྗེས་ཀྱི་གསོལ་འདེབས་དང་།  ལོ་དུས་ཀྱི་དུས་ཆེན་རྣམས་ལ་རྣལ་འབྱོར་བླ་ན་མེད་པའི་དཀྱིལ་འཁོར་ཆེན་པོ་རྣམས་ཀྱི་ཕྱག་ལེན་རྣམ་པར་དག་པའི་སྒྲུབ་མཆོད་ཀྱི་
10-2-19a


རྒྱུན་བཙུགས།  ཟླ་བ་བྱུང་ངོ་ཅོག་གི་དུས་མཆོད་ལ་དགེ་འདུན་གྱི་བསྙེན་བཀུར་རྣམ་པར་དག་པ་ཡང་འཛུགས་པར་མཛད་དོ། །གཞན་ཡང་སྐུའི་རྟེན་དུ་ཆོས་རྗེ་ཉིད་ཀྱི་སྐུ་འདྲ་སྐུ་ཚད་མ་དང་།  ཐུབ་པ་ཆོས་འཆད་མ་ཤིན་ཏུ་ཆེ་བ་ཟངས་
གསེར་ལས་གྲུབ་པ་དང་།  གསུང་གི་རྟེན་དུ་རྗེ་བཙུན་ས་སྐྱ་པ་ཡབ་སྲས་ལྔ།  ཆོས་རྗེ་ཉིད་དང་བཅས་པའི་བཀའ་འབུམ་དང་།  ཐུགས་ཀྱི་རྟེན་དུ་གཙང་ཁང་གི་ནང་དུ།  གདུང་ཚ་བཞུགས་པའི་མཆོད་རྟེན་ཤིན་ཏུ་ཆེ་བ་གསེར་གྱིས་སྤྲས་པ་དང་།  ཕྱི་རོལ་དུ་བདེ་
གཤེགས་མཆོད་རྟེན་བརྒྱད།  རེ་རེ་ལ་ཡང་གསེར་གདུགས་གསེར་ཏོག་དང་བཅས་པ་རྣམས་ལོ་གཅིག་ལྷག་ཙམ་གྱི་ནང་དུ་ཡོངས་སུ་རྫོགས་པ་གྲུབ་སྟེ།  ལྷ་བཟོ་བ་ཐམས་ཅད་ཀྱང་བསྙེན་བཀུར་དང་ཡོན་ལ་སོགས་པས་ཡིད་ཚིམ་པར་བྱས།  གཟུངས་གཞུག་
དང་།  ཞབས་བསྡམས་དང་།  རབ་གནས་རྣམས་ནི་རྒྱུད་སྡེ་དང་མཐུན་པར་མཛད་དེ།  བཀྲ་ཤིས་ཀྱི་དཔལ་འབར་བར་བཞུགས་པ་ཡིན་ནོ། །སྐུ་གདུང་ལ་རིང་བསྲེལ་བྱུང་བ་རྣམས་ནི།  གསེར་སྐུ་གཉིས་ཀྱི་ཐུགས་ཀར་བཞུགས་ཤིང་།  ལྷག་མ་གདུང་ཐལ་
དང་བཅས་པ་རྣམས་ལ་སཱཙྪ་ཁྲི་ཚོ་བདུན་བཏབ་ནས།  ཕྱེད་བདེ་གཤེགས་མཆོད་རྟེན་བརྒྱད་དང་།  གཙང་ཁང་གི་འབུམ་པའི་ནང་དུ་བཞུགས།  ཕྱེད་གསེར་ལ་སོགས་པའི་ན་བཟའ་ཅན་དུ་བྱས་ཏེ།  ཕྱོགས་ཕྱོགས་སུ་དད་པའི་རྟེན་དུ་སྦྱིན་པར་མཛད་དོ། །གཉིས་
པ་ལ་གཉིས་ཏེ།  མཛད་པའི་རིམ་པ་སྦྱར་ནས་མདོར་བསྟན་པ།  བསྟན་པའི་རིམ་པ་དང་བསྟུན་ནས་རྒྱས་པར་བཤད་པའོ། །དང་པོ་ནི།  བླ་མ་མཆོག་གི་ཞེས་སོགས་ཚིགས་བཅད་གཅིག་སྟེ།  སྐྱེས་བུ་དམ་པ་རྣམས་ནི་གཞན་ལ་ཕན་པར་འདོད་པའི་ལྷག་
10-2-19b


བསམ་དང་།  གནས་ལུགས་ཚུལ་བཞིན་དུ་ངེས་པའི་ཤེས་རབ་ཀྱི་སྟོབས་ཀྱིས་དམ་པའི་ཆོས་ཇི་ལྟར་བསྟན་པ་ཐམས་ཅད་གདུལ་བྱ་རྣམས་ཀྱི་བློ་དང་འཚམ་པར་དོན་དུ་གཉེར་བ་ནི་ཆོས་ཉིད་དོ། །དེ་ཡང་འདི་ལྟར་ཆོས་རྗེ་བཟང་པོའི་ཞབས་བདེ་བ་ཅན་དུ་གཤེགས་
པའི་རྗེས་དེ་ནས་ལོ་གཉིས་ཀྱི་བར་དུ།  དབང་།  རྒྱུད།  མན་ངག །ལུང་ལ་སོགས་པའི་ཆོས་ཀྱི་འཁོར་ལོ་རྒྱུན་མ་ཆད་པར་བསྐོར་བར་མཛད་ཅིང་།  དེ་ནས་དོན་གཅིག་པ་ས་ཕོ་སྟག་གི་ལོ་ལ་མུས་སུ་ཕེབས་ནས།  བདེ་ལྡན་རི་ཁྲོད་ཀྱི་དགོན་པ་བཏབ།  དེར་ཡང་
གསུང་ངག་ལ་སོགས་པའི་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་བསྐོར་ནས།  སླར་ཡང་དེའི་སྟོན་ཨེ་ཝཾ་ཆོས་ལྡན་དུ་ཕེབས་ཏེ།  སྔར་བཞིན་དུ་གདམས་པ་ཟབ་མོས་གདུལ་བྱ་རྣམས་ཚིམ་པར་མཛད།  དེའི་ཚེ་སྟོབས་ཀྱི་འཁོར་ལོས་སྒྱུར་བའི་
རྒྱལ་པོ་རིན་སྤུངས་པ་སྐུ་མཆེད་ཀྱིས་གདན་དྲངས་ནས།  ཆོས་ཟབ་མོ་ཞུས་ཏེ།  དེའི་སྟོན་ཡང་མུས་སུ་ཕེབས་ནས།  དོན་གསུམ་པ་འབྲུག་གི་ལོ་ལ་བསམ་གཏན་ཕུག་ཏུ་སྐུ་མཚམས་ཤིན་ཏུ་དམ་པར་མཛད།  སྦྲུལ་ལོ་ཤར་མ་ཐག་ཏུ་བདེ་ལྡན་རི་ཁྲོད་དུ་གསུང་ངག་ལ་
སོགས་པའི་གདམས་པ་ཟབ་མོ་རྣམས་བཙུགས་ནས་ཆོས་འཕྲོ་རྣམས་རྫོགས་པའི་ཚེ།  རིགས་ལྡན་པདྨ་དཀར་པོའི་སྤྲུལ་པ་ཏའི་སི་ཏུ་རྣམ་རྒྱལ་གྲགས་པ་དཔལ་བཟང་པོ་ཡབ་སྲས་དང་།  ངམ་རིངས་ཆོས་སྡེའི་བསྟན་འཛིན་གྱི་སྐྱེས་བུ་རྣམས་ཀྱིས་
འབད་པ་ཆེན་པོས་གདན་དྲངས་ཏེ།  ཆོས་སྡེར་ཕེབས་ནས།  བདག་པོ་ཡབ་སྲས་ལ་དབང་བསྐུར་རྣམ་པར་དག་པ་དང་།  ཆོས་སྡེའི་དགེ་བཤེས་རྣམས་ལ་གསུང་ངག་ལ་སོགས་པའི་དམ་པའི་ཆོས་ཀྱི་ཆར་ཆེན་པོ་ཕབ་སྟེ།  རྣམ་གྲོལ་གྱི་ལོ་ཐོག་མ་
10-2-20a


སྐྱེས་པ་རྣམས་བསྐྱེད་པ་དང་།  སྐྱེས་པ་སྤེལ་བར་མཛད་པ་ཡིན་ནོ། །སླར་ཡང་དེའི་སྟོན་ཨེ་ཝཾ་ཆོས་ལྡན་དུ་ཕེབས་ནས།  ཕྱོགས་ཀྱི་དགེ་བའི་བཤེས་གཉེན་སྟོང་ཕྲག་ཙམ་འདུས་པ་ལ།  གསུང་ངག་ལ་སོགས་པའི་གདམས་པ་ཟབ་མོ་
བསྟན།  ཡོ་བྱད་ཀྱི་དངོས་པོ་ཕྱག་ཏུ་བྱུང་བ་རྣམས་ལ།  ལ་ལ་ནི་གསེར་གྱི་གན་ཛིར་བསྒྲུབས་ཏེ།  གཙུག་ལག་ཁང་གི་སྟེང་དུ་བཙུགས།  འགའ་ཞིག་ནི་གཙུག་ལག་ཁང་དུ་མཆོད་རྫས་ཀྱི་རྒྱུ་རུ་བཞག །གཞན་དག་ནི།  ཆེ་འགོ་རྣམས་ལ་གནང་སྦྱིན་དང་།  
དགེ་འདུན་སྤྱི་ལ་བསྙེན་བཀུར་མཛད།  དོན་ལྔ་པ་རྟ་ལོའི་དཔྱིད་མུས་སུ་ཕེབས་ནས།  བདེ་ལྡན་རི་ཁྲོད་དུ་དད་ལྡན་རྣམས་ལ་གདམས་པ་ཟབ་མོས་ཚིམ་པར་མཛད།  དེའི་དགུན་སོ་སླར་ཡང་བྱང་པ་ཡོན་མཆོད་རྣམས་ཀྱིས་གདན་དྲངས་ནས་དཔལ་ངམ་རིངས་སུ་
ཕེབས་ཏེ།  ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་བསྐོར།  སླར་ཡང་བདེ་ལྡན་རི་ཁྲོད་དུ་ལུག་གི་ལོའི་དབྱར་གསུང་ངག་ལ་སོགས་པའི་གདམས་པ་ཟབ་མོ་གནང་ནས།  དེའི་དགུན་སོ་གླེ་ལུང་ཆོས་སྡེར་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བར་མཛད་ཅིང་།  
དོན་བདུན་པ་སྤྲེའུ་ལོའི་དབྱར་ཟླ་བ་ལྔ་པ་དང་དྲུག་པ་རྣམས་ལ་མཚན་མ་བཟློག་པའི་ཆེད་དུ་ཐུགས་དམ་ཟབ་མོ་མཛད་ཅིང་།  སླར་ཡང་བདག་ཆེན་གཞི་ཐོག་པ་ལ་སོགས་པའི་དམ་པ་རྣམས་ལ་ཆོས་ཀྱི་ཆར་གྱིས་ཚིམ་པར་མཛད་དོ། །གཉིས་པ་ལ།  སོ་ཐར།  
བྱང་སེམས།  རིག་འཛིན་སྔགས་ཀྱི་བསྟན་པ་སྤེལ་བའི་ཚུལ་གསུམ་ལས།  དང་པོ་ནི།  ལེགས་གསུངས་འདུལ་བའི་ཞེས་སོགས་ཚིགས་བཅད་གཅིག་སྟེ།  སོ་སོ་ཐར་པའི་སྡོམ་པ་དོན་དུ་གཉེར་བ་རྣམས་བློའི་རིམ་པ་དང་འཚམ་པར།  དགེ་བསྙེན།  དགེ་
10-2-20b


ཚུལ།  དགེ་སློང་གི་སྡོམ་པ་ལ།  དྲི་མ་མེད་པའི་ཆོ་གས་བཀོད་པར་མཛད་དེ།  སྔར་ཆོས་རྗེ་བཟང་པོའི་ཞབས་ཞལ་བཞུགས་པ་ན།  རྗེ་འདི་ཉིད་དང་གདན་འཛོམས་པའི་ཚེ།  ཆོས་རྗེ་ངོར་པ་དང་།  ཆོས་རྗེ་མུས་པ་ལྟ་བུའི་མཁན་སློབ་འཛོམ་པའི་དུས་སུ་
བསྙེན་རྫོགས་ལ་འགྲོ་ཟེར་ནས།  ཕྱོགས་མཐའ་དག་ནས་སྤྲིན་བཞིན་དུ་འདུས་པ་དང་།  ཕྱིས་རང་ཉིད་ཀྱིས་མཁན་པོ་མཛད་པའི་སྒོ་ནས་རབ་བྱུང་དང་བསྙེན་རྫོགས་མཛད་པ་ཡང་བསམ་གྱིས་མི་ཁྱབ་བོ། །གཉིས་པ་ནི།  ཨ་ཏི་ཤའི་ཞེས་སོགས་
ཚིགས་བཅད་གཅིག་སྟེ།  ཆོས་རྗེ་རྒྱལ་མཆོག་པས་ཁྱོད་ཀྱིས་བློ་སྦྱོང་འདིའི་བཀའ་མ་ཆད་པ་གྱིས་གསུངས་པ་ལ་བརྟེན་ནས།  དབྱར་དགུན་རྣམས་སུ་བློ་སྦྱོང་རེ་མ་ཆག་པར་གསུངས་ཤིང་།  དོན་དུ་གཉེར་བ་ནམ་བྱུང་དུས་སུ་གསུངས་པར་མཛད་པས།  
བཀའ་སྲོལ་འདིའི་ཡང་བདག་པོར་གྱུར་ཅིང་།  ཐེག་པ་ཆེན་པོ་ཕ་རོལ་ཏུ་ཕྱིན་པའི་ཉམས་ལེན་རྒྱས་པར་མཛད་པ་ཡིན་ནོ། །གསུམ་པ་ནི།  ཐུན་མོང་ལམ་གྱི་ཞེས་སོགས་ཚིགས་བཅད་དྲུག་སྟེ།  དང་པོས་དབང་བསྐུར་བ།  གཉིས་པས་རྒྱུད་བཤད་པ།  དེ་
ནས་གསུམ་གྱིས་མན་ངག་གནང་བ།  ཐ་མས་ལུང་གི་སྒོ་ནས་བསྟན་པ་སྤེལ་བ་བསྟན་ཏོ། །དེ་ཡང་བདག་ཉིད་ཆེན་པོ་འདིས་དབང་བསྐུར་བའི་ཚེ་ན་ཡང་།  རྡུལ་ཚོན་གྱི་དཀྱིལ་འཁོར་དང་།  ཏིང་ངེ་འཛིན་གྱི་དཀྱིལ་འཁོར་དང་།  སློབ་མ་ལྷར་བསྐྱེད་པ་རྣམས་
གདན་གསུམ་ཚང་བར་དག་བྱ་དག་བྱེད་ངོ་སྤྲད་ནས་བརྒྱུད་པ་བར་མ་ཆད་པའི་ཆོ་ག་རྣམ་པར་དག་པས་དབང་བསྐུར་བས་སྐུ་བཞིའི་ས་བོན་ཐེབས་པར་མཛད་པ་ཞིག་གོ།  རྒྱུད་འཆད་པའི་ཚེ་མཐའ་དྲུག་ཚུལ་བཞི་ལ་སོགས་པ་འཆད་ཚུལ་རྣམ་པར་དག་པའི་
10-2-21a


སྒོ་ནས་ཟབ་དོན་གྱི་ནོར་བུ་སྟོན་པར་མཛད་པ་ཞིག་གོ།  མན་ངག་གནང་བའི་ཚེ་བསྐྱེད་རྫོགས་ཀྱི་མན་ངག་ཟབ་མོ་རྣམས་ལ་རྟོག་གེས་བརྟགས་པའི་གྲུབ་མཐའ་རྣམས་ལུང་རིགས་ཀྱིས་བཀག་ནས་རྒྱུད་སྡེའི་དགོངས་པ་མན་ངག་བཞིན་
སྟོན་པར་མཛད་པ་ཞིག་གོ།  ཁྱད་པར་དུ་སྙན་བརྒྱུད་ཚད་མ་བཞི་ལྡན་གྱི་སྒོ་ནས་གངས་རིའི་ཁྲོད་ཀྱི་དོན་གཉེར་རྣམས་རྣམ་གྲོལ་གྱི་ལམ་ལ་བཀོད་པར་མཛད་དེ།  སྔར་ཕན་ཆད་གསུང་ངག་ཚར་ཉི་ཤུ་རྩ་ལྔ་ཙམ་གསུང་པར་མཛད་དོ། །གཞན་ཡང་རྒྱུད་
འབུམ་དང་།  འདུལ་བ་ལུང་དང་དགོངས་འགྲེལ་གྱི་བསྟན་བཅོས་ཆེན་པོ་རྣམས་དང་།  བླ་མ་བརྒྱུད་བའི་བཀའ་འབུམ་གྱི་ལུང་རྣམས་ཀྱིས་ཀྱང་དྲི་མ་མེད་པའི་བསྟན་པ་སྤེལ་བར་མཛད་དོ། །གསུམ་པ་ནི།  དེ་ལྟར་དྲི་མེད་ཅེས་སོགས་ཚིགས་བཅད་གཉིས་ཏེ།  
སྔར་བཤད་པ་དེ་ལྟར་རང་དོན་མཁྱེན་པ་དང་ཐུགས་རྗེ་ཕུལ་དུ་བྱུང་ཞིང་།  གཞན་དོན་ཕྲིན་ལས་རྨད་དུ་བྱུང་བ་མཛད་པའི་སྟོབས་ཀྱིས་གངས་རིའི་ཁྲོད་ཀྱི་ཆེ་བར་གྲགས་པ་མགོན་པོ་འཇམ་པའི་དབྱངས་ཀྱི་རྣམ་འཕྲུལ་བདག་ཆེན་གཞི་ཐོག་པ་ཀུན་དགའ་དབང་ཕྱུག་
ལེགས་པའི་འབྱུང་གནས་རྒྱལ་མཚན་དཔལ་བཟང་པོ།  བདག་ཆེན་བློ་གྲོས་དབང་ཕྱུག་ལེགས་པའི་འབྱུང་གནས་རྒྱལ་མཚན་དཔལ་བཟང་པོ།  བདག་ཆེན་གྲགས་པ་རྒྱལ་མཚན་དཔལ་བཟང་པོ།  བདག་ཆེན་གཞི་ཐོག་པ་བློ་གྲོས་རྒྱལ་མཚན་དཔལ་བཟང་པོ།  
བདག་ཆེན་ཤར་པ་ཡེ་ཤེས་དབང་ཕྱུག་རྒྱལ་མཚན་དཔལ་བཟང་པོ་ལ་སོགས་པ་སྐྱེ་དགུའི་གཙུག་རྒྱན་རྣམས་ཀྱིས་ཀྱང་ཞབས་ཀྱི་པདྨོ་ལ་གཏུགས་ཤིང་གདམས་པ་ཟབ་མོ་ནོས་ཏེ་སྤྱི་བོའི་ཅོད་པན་དུ་ཁུར་བར་མཛད་དོ། །གཞན་ཡང་ལུང་རིགས་ལ་དབང་བསྒྱུར་
10-2-21b


བའི་མཁས་པ་ཆེན་པོ་བྱམས་ཆེན་མཁན་པོ་བསོད་ནམས་ཆོས་ཀྱི་ཀུན་དགའ་བཀྲ་ཤིས་རྒྱལ་མཚན་དཔལ་བཟང་པོ།  གླང་ཐང་སྤྱན་མངའ་བ་ཀུན་དགའ་རྡོ་རྗེ་སྐུ་མཆེད།  དྲོ་པ་མཁན་པོ་ཆོས་ཀྱི་སྤྱན་ལྡན་ཤེས་རབ་བཟང་པོ།  ངམ་རིངས་མཁན་པོ་ཀུན་དགའ་གྲུབ་དང་། 
མཁས་པ་སངས་རྒྱས་སེང་གེ།  མཁས་པའི་དབང་པོ་དོན་ཡོད་དཔལ་བཟང་པོ།  བསྟན་པའི་རྩ་ལག་ཀུན་མཁྱེན་སངས་རྒྱས་འཕེལ།  མཁྱེན་རབ་ཀྱི་དབང་ཕྱུག་ནམ་མཁའ་བསོད་ནམས་ལ་སོགས་པ་གངས་རིའི་ཁྲོད་ཀྱི་མཁས་པ་དག་གིས་ཁྱོད་ཀྱི་གསུང་ཐུབ་
པའི་གསུང་ལྟར་གུས་པས་བསྟེན་ཅིང་ཕྱོགས་བཅུར་སྤེལ་བར་མཛད་དོ། །བརྒྱད་པ་ནི།  རིས་བསྒྱུར་ཕྱོགས་ནི་ཞེས་སོགས་ཚིགས་བཅད་གསུམ་སྟེ།  དོན་བདུན་པ་ཤིང་ཕོ་སྤྲེའུའི་ལོ་ཐ་སྐར་ཟླ་བའི་ཉི་ཤུ་གསུམ་ནས།  དགུའི་བར་དུ་སྒྲུབ་པའི་གྲོགས་དང་བཅས་
ཏེ།  དབེན་གནས་བསམ་གཏན་ཕུག་ཏུ་བདུད་རྩིའི་རིལ་བུ་ཚུལ་བཞིན་དུ་བསྒྲུབ་པ་བར་ཆད་མེད་པར་མཐར་ཕྱིན་ཏེ།  དྲི་བཟང་པོ་དང་མེ་ཏོག་གི་ཆར་ལ་སོགས་པའི་ལྟས་བཟང་པོ་ཡང་བྱུང་ངོ་། །སླར་ཡང་དབེན་གནས་དེ་ཉིད་དུ་སྐུ་མཚམས་དམ་པར་བཅད་ནས་རིམ་
གཉིས་ཟབ་མོའི་ཏིང་ངེ་འཛིན་ལ་བཞུགས་ཏེ།  ཤིང་མོ་བྱའི་ལོ་ཆོ་འཕྲུལ་ཆེན་པོའི་ཚེས་བཅོ་ལྔ་ལ།  བླ་མ་ནམ་མཁའ་དཔལ་བཟང་སྐུ་མདུན་དུ་མཇལ་བའི་ཚེ།  ན་ནིང་ནས་རྗེ་ས་ཆེན་དང་མཇལ་བ་ལ་དཔེ་མེད་དུ་བྱེད་ན།  ད་ལོ་ནི་རྣལ་འབྱོར་དབང་ཕྱུག་ཡང་མནལ་ལམ་
དུ་བྱུང་གསུངས་པས།  ཁོང་གི་ཞབས་ལ་འཇུས་ཏེ།  ཆོས་རྗེ་རིན་པོ་ཆེ་ལ་དེ་ལྟ་བུ་ལོས་འོང་ཞུས་ཟེར་བ་ཐོས་སོ། །གཞན་ཡང་འདིའི་རྣམ་པར་ཐར་པ་བསམ་གྱིས་མི་ཁྱབ་སྟེ།  མཁས་གྲུབ་གཞོན་ནུ་སེང་གེ་པས་ས་ཆེན་གྱི་དངོས་སློབ།  གཉན་ཕུལ་བྱུང་བའི་སྐྱེ་
10-2-22a


བ་ཡིན་པའི་མཚན་མ་མཐོང་བ་དང་།  སྒོམ་སྡེ་ཕྲ་རལ་ལ་ཆོས་རྗེ་བཟང་པོའི་ཞབས་ཀྱིས་ཐོད་པ་བདུད་རྩིས་གང་བ་གནང་བ་རྗེ་འདི་ཉིད་ཀྱིས་གསོལ་བའི་རྨི་ལམ་བྱུང་བ་དང་།  གྲུབ་ཐོབ་ཆེན་པོས་ཁྱོད་ཁ་རག་སྒོམ་ཆུང་གི་སྐྱེ་བ་ཡིན་ནོ་ཞེས་གསུངས་པ་
ཡང་ཐོས་སོ། །གཞན་ཡང་ཟབ་དོན་འཆད་པའི་ཚེ་བློས་བརྟགས་ཀྱི་གྲུབ་མཐའ་རྣམས་ལུང་རིགས་ཉི་མའི་འོད་ཟེར་གྱིས་བསལ་ནས།  ཟབ་དོན་གྱི་པད་ཚལ་འབྱེད་པ་འདི་ལྟ་བུ་ནི་དུས་མཉམ་པའི་མཁས་པ་སུས་ཀྱང་འགྲན་པར་མི་བཟོད་དོ། །ཕས་རྒོལ་དང་
རྩོད་པའི་ཚེ།  དངོས་སྟོབས་ཀྱི་རིགས་པ་གནམ་ལྕགས་ཀྱི་ཐོག་བབས་ནས་ལོག་རྟོག་གི་བྲག་རི་བསྙིལ་བ་ནི།  འཕགས་ཡུལ་གྱི་ཕྱོགས་གླང་ཆོས་གྲགས་དང་ཚུལ་མཚུངས་ཏེ།  ཉིད་ཀྱི་བླ་མ་རོང་སྟོན་ཆེན་པོ་དང་།  སེམས་དཔའ་ཆེན་པོ་གཉིས་ཀྱིས་ཀྱང་རིགས་
པའི་དབང་ཕྱུག་ཆེན་པོར་བསྔགས་ཤིང་།  རབ་བྱུང་གིས་དབང་གསུམ་པའི་ལམ་བསྒོམ་དུ་མི་རུང་བ་དང་།  མཚོན་བྱེད་དཔེའི་ཡེ་ཤེས་ལ་ལྷག་མཐོང་མེད་པར་འདོད་པ་ལ་བཏང་བའི་རིགས་པ་རྣམས་ནི།  མཁས་རློམ་གཞན་སུ་ལ་ཡང་མ་མཐོང་ངོ་། །ལེགས་བཤད་རྩོམ་
པའི་ཚེ་རྣ་བར་སྙན་ཅིང་འབྲེལ་ཆགས་ལ།  མཁས་པ་དག་གིས་མཐོང་ན་སྔོན་མེད་པའི་རྟོགས་པ་བསྐྱེད་པ་ནི།  རྗེ་ཉིད་ཀྱི་བཀའ་འབུམ་མཐོང་བས་གསལ་ལོ། །ཆོས་བརྒྱད་མགོ་སྙོམས་པ་ནི།  ཀུན་ལ་གྲགས་ཤིང་ཁྱད་པར་དུ།  ས་སྐྱ་འཁོན་གྱི་གདུང་
བརྒྱུད་ལ་སོགས་པ་ཆེ་དགུ་དག་གིས་ཆོས་ཞུས་པས།  སྐུ་ཚེ་ལ་མི་གཟན་ནམ་ཞུས་པས།  དེ་ལ་དགའ་ཚོར་མེད་པས་སྐྱོན་མེད་གསུང་བ་ལྟ་བུའོ། །ཡོ་བྱད་ཀྱི་འཛིན་པ་དང་བྲལ་བ་ནི།  ཡོ་བྱད་ཕྱག་ཏུ་བྱུང་བ་ཐམས་ཅད་ལ་ཡང་ན་བླ་མ་ལ་འབུལ་བ།  ཡང་ན་བླ་མའི་
10-2-22b


དུས་མཆོད།  ཡང་ན་རྟེན་གསུམ་བཞེངས་པ།  ཡང་ན་དགེ་འདུན་གྱི་བསྙེན་བཀུར་མཛད་པ་ལས།  རང་དོན་དུ་ཏིལ་འབྲུ་ཙམ་ཡང་མི་འཆང་བ་མངོན་སུམ་དུ་གྱུར་པ་འདི་ཉིད་དོ། །རྒྱུ་མཚན་དེ་དག་གི་ཕྱིར་ན།  སྙན་པའི་གྲགས་པས་ས་སྟེང་ཐམས་ཅད་ཁྱབ་སྟེ།  དགུང་
ལོ་དོན་བརྒྱད་བཞེས་པ་ན་ཡང་།  ཨེ་ཝཾ་ཆོས་ལྡན་དང་།  ངམ་རིངས་དང་།  མངའ་རིས་གསུམ་ནས་གདན་འདྲེན་པ་ཅིག་ཅར་དུ་བྱུང་སྟེ།  ཐམས་ཅད་ཀྱིས་མགྲིན་གཅིག་ཏུ་བདག་ཅག་རྣམས་ཀྱི་ས་ཕྱོགས་ཞབས་ཀྱིས་བཅགས་ནས།  ཞལ་བསྟན་པ་ཙམ་ཞིག་མཛད་ན་
ཡང་།  འགྲོ་བ་དཔག་ཏུ་མེད་པའི་དོན་དུ་འགྱུར་བ་ཡོད་དོ་ཞེས་ཞུས་སོ། །དེའི་ཚེ་རྒྱུད་སྡེ་འཛིན་པ་ཆེན་པོ་ཀུན་དགའ་དབང་ཕྱུག་པ།  ཆོས་རྗེ་བཟང་པོའི་ཞབས་ཀྱི་བཀའ་བཞིན་དུ།  ཨེ་ཝཾ་ཆོས་ལྡན་གྱི་གདན་སར་བསྐོས་ཏེ།  བཤད་སྒྲུབ་རྒྱུན་མི་འཆད་པར་མཛད་དོ། །
གཉིས་པ་བསོད་ནམས་སྤེལ་བའི་ཕྱིར།  རྒྱུན་བཤགས་བྱ་བ་ལ་བདུན་ལས།  ཕྱག་འཚལ་བའི་ཡན་ལག་ནི།  སྲིད་ན་ཁྱོད་འདྲའི་ཞེས་སོགས་ཚིགས་བཅད་བཞི་སྟེ།  དང་པོ་གཉིས་ཀྱིས་དཀོན་མཆོག་གི་སྒྲ་དོན།  རྒྱུད་བླ་མ་ལས་དྲུག་གསུངས་པ་དང་སྦྱར།  གསུམ་
པས་རྒྱལ་གྱི་སྒྲ་དོན་ཡབ་ཡུམ་སྲས་གསུམ་དང་སྦྱར།  བཞི་པས་མཚན་གྱི་སྒྲ་དོན་སྐུ་གསུང་ཐུགས་དང་སྦྱར་བའོ། །ཡན་ལག་ལྷག་མ་དྲུག་ནི།  ཞིང་འདིར་དཀོན་པའི་ཞེས་སོགས་ཚིགས་བཅད་དྲུག་སྟེ།  རེ་རེ་ཡང་རྗེ་ཉིད་ཀྱི་མཚན་དང་སྤེལ་བའོ། །གསུམ་
པ་འབྲས་བུ་འགྲུབ་པའི་ཆེད་དུ་སྨོན་ལམ་གདབ་པ་ནི།  དེང་ནས་བཟུང་སྟེ་ཞེས་སོགས་ཚིགས་བཅད་བཞི་སྟེ།  དང་པོས་གདམས་པའི་རྒྱུ།  གཉིས་པས་གདམས་པ་དངོས་ལ་ཕ་རོལ་ཏུ་ཕྱིན་པའི་ཉམས་ལེན།  གསུམ་པས་རྡོ་རྗེ་ཐེག་པའི་ཉམས་ལེན།  
10-2-23a


བཞི་པས་དེ་དག་གི་འབྲས་བུ་འགྲུབ་པར་སྨོན་པ་རྩོམ་པ་པོའི་མིང་དང་སྦྱར་བའོ། །གསུམ་པ་ནི།  རྗེ་བཙུན་བླ་མ་ཞེས་སོགས་ཚིགས་བཅད་དྲུག་སྟེ།  ཕྱིས་དྲུག་བསྣན་པ་ནི།  དབེན་གནས་དངུལ་ཆུར་ཞེས་སོགས་ཚིགས་བཅད་གཅིག་
དང་།  ཏིང་ཀྲོལ་གནས་སུ་ཞེས་སོགས་ཚིགས་བཅད་གཉིས་དང་།  རིས་བསྒྱུར་ཕྱོགས་ནི་ཞེས་སོགས་གསུམ་སྟེ་ཤིན་ཏུ་དག་ཅིང་ཡིད་ཆེས་པའི་གནས་སུ་གྱུར་ཏེ།  གདུལ་བྱ་རྣམས་ཀྱི་དད་པའི་ཡིད་མཚོར་ཁྱབ་པར་བྱས་པ་ཡིན་ནོ། །ཡོན་ཏན་རྒྱ་མཚོའི་ཡོན་ཏན་ཆ་
ཙམ་རྣམ་པར་བཤད་པ་ལས་བྱུང་བའི། །བསོད་ནམས་སེང་གེས་བསོད་ནམས་ཇི་སྙེད་བསགས་པ་དེ་ཡིས་ལུས་ཅན་ཀུན། །སྡུག་བསྔལ་རྒྱ་མཚོའི་སྡུག་བསྔལ་ཀུན་ལས་བརྒལ་ཏེ་བདེ་བ་དམ་པའི་གླིང་། །རྣམ་མང་འགྲོ་ལ་རྣམ་མང་ཕན་པ་བསྒྲུབ་པའི་སངས་རྒྱས་
མྱུར་ཐོབ་ཤོག །རྗེ་བཙུན་བླ་མ་མུས་པ་ཆེན་པོའི་རྣམ་པར་ཐར་པ་ངོ་མཚར་རྒྱ་མཚོ་ཞེས་བྱ་བ་འདི་ནི་རྗེ་དེ་ཉིད་ཀྱི་སློབ་མ་དད་པ་བརྟན་པོ་དང་ལྡན་པ་དག་གིས་བསྐུལ་ནས།  རྗེ་དེ་ཉིད་ཀྱི་ཞབས་རྡུལ་སྤྱི་བོས་བླངས་པ་དགེ་སློང་བསོད་ནམས་སེང་གེས་ཤིང་མོ་བྱའི་ལོ་སྣྲོན་གྱི་ཟླ་
བའི་ཡར་ཚེས་བརྒྱད་ལ་གླིང་ཁ་བདེ་བ་ཅན་དུ་སྦྱར་བའོ།།  ༈  །།རྣམ་པར་ཐར་པའི་ཁ་སྐོང་བཞུགས།  ༄༅།  །ན་མོ་གུ་ར་ཝེ།  རྗེ་བཙུན་དམ་པ་དཀོན་མཆོག་རྒྱལ་མཚན་དཔལ་བཟང་པོ་དགུང་ལོ་བདུན་ཅུ་དོན་བརྒྱད་བཞེས་པ་ཡན་ཆད་ཀྱི་རྣམ་པར་ཐར་
པ་རགས་རིམ་སྔར་བསྟན་ཟིན་པ་དེའི་ཁ་སྐོང་གི་ཚུལ་དུ་ཚིགས་སུ་བཅད་པ་སུམ་ཅུ་རྩ་གསུམ་པ་ཅིག་སྦྱར་ཟིན་པའི་དོན་འགྲེལ་འདིར་བརྗོད་པར་བྱའོ། །དེ་ཡང་སྔར་ལྷ་སར་བྱོན་པའི་དུས་སུ་དགུང་ལོ་བདུན་ཅུ་ཐུབ་པའི་མཚན་མ་བྱུང་གསུངས་པ་དང་།  དེ་རྗེས་ལན་ཅིག་
10-2-23b


བདུན་ཅུ་དོན་ལྔ་ཐུབ་པའི་མཚན་མ་བྱུང་གསུངས་པ་དང་།  བླ་མ་ནམ་ཆོས་པ་བདེ་བར་གཤེགས་པའི་ནུབ་མོའི་མནལ་ལམ་དང་བསྟུན་ན།  བདུན་ཅུ་དོན་བདུན་པའི་སྟེང་དུ་བདེ་བ་ཅན་དུ་གཤེགས་རྒྱུར་སྣང་ན་ཡང་།  བརྒྱད་ཅུ་གྱ་གཉིས་སམ།  འདུལ་བ་པའི་ལུགས་ཀྱི་གྱ་གསུམ་
གྱི་བར་དུ་བཞུགས་པ་ནི་གྲུབ་པའི་དབང་ཕྱུག་རྣམས་ཀྱི་མན་ངག་བདུད་རྩི་ལྟ་བུ་སྙིགས་དུས་སུ་མི་ཉམས་པའི་ཆེད་དུ་སྐུ་ཚེའི་འདུ་བྱེད་བྱིན་གྱིས་བརླབས་པར་སྣང་སྟེ།  དགུང་ལོ་དོན་གསུམ་བཞེས་པ་འབྲུག་ལོའི་ནང་དུ་དབེན་གནས་བསམ་གཏན་ཕུག་ཏུ་སྐུ་མཚམས་ལ་
བཞུགས་པའི་ཚེ།  མནལ་ལམ་དུ།  ཆོས་རྗེ་ཀུན་དགའ་བཟང་པོའི་ཞལ་ནས།  ཨོཾ་མ་ཎི་དྷ་རི་བཛྲི་ནི་སྭཱ་ཧཱ།  ཞེས་པའི་སྔགས་གསུངས་ནས་འདིའི་སྔགས་འབྲུའི་གྲངས་དང་མཉམ་པའི་ལོ་གྲངས་ཐུབ་ཅེས་པའི་ལུང་བསྟན་བརྙེས་པར་མཛད་པ་ལས་ཤེས་སོ། །
དེ་ནས་དོན་བརྒྱད་བཞེས་པ་བྱ་ལོའི་དབྱར་གླིང་ཁ་བདེ་བ་ཅན་དུ།  ཆོས་རྗེ་སྐུ་སྐྱེ་བ་ལ་སོགས་པའི་སྐལ་ལྡན་འགའ་ལ་གསུང་ངག་དང་།  འཁོར་ལོ་བདེ་མཆོག་གི་བསྐྱེད་རྫོགས་ལ་སོགས་པའི་གདམས་པ་མང་པོ་གནང་ནས་དེའི་དགུན་སོ་ངམ་རིངས་སུ་ཕེབས་
ཏེ།  དགེ་བའི་བཤེས་གཉེན་ཉིས་སྟོང་ལྷག་པ་ལ་ཐེག་པ་ཆེན་པོའི་བློ་སྦྱོང་ལ་སོགས་པའི་གདམས་པ་དུ་མ་གནང་།  དེའི་ནང་ནས་ཟབ་མོའི་ལམ་གྱི་སྐལ་བ་དང་ལྡན་པ་དགུ་བརྒྱ་ལྷག་པ་ལ་གསུང་ངག་རིན་པོ་ཆེ་ཆ་ལག་དང་བཅས་པས་སྨིན་པར་མཛད་ནས་
ཁྱི་ལོ་ས་ག་ཟླ་བའི་ནང་དུ་མུས་སུ་ཕེབས།  དེ་ནས་བཟུང་སྟེ་བདེ་བར་མ་གཤེགས་ཀྱི་བར་བདེ་བ་ཅན་དང་།  བདེ་ལྡན་རི་ཁྲོད་དང་།  གླེ་ལུང་རྣམས་སུ་བཞུགས་ནས།  བདག་ཆེན་བློ་གྲོས་དབང་ཕྱུག་པ་དང་།  སྲས་ཀྱི་ཐུ་བོ་གུང་རུ་ཤེས་རབ་བཟང་པོ་ལ་སོགས་
10-2-24a


པ།  སྟོད་མངའ་རིས།  སྨད་མདོ་ཁམས།  བར་དབུས་གཙང་གི་དགེ་བའི་བཤེས་གཉེན་མཁས་བཙུན་དད་ལྡན་དཔག་ཏུ་མེད་པ་ཚོགས་པ་རྣམས་ལ་དབང་།  རྒྱུད།  མན་ངག །ལུང་ལ་སོགས་པའི་སྒོ་ནས་རང་རང་གི་སྐལ་བ་དང་འཚམ་པར་སྨིན་གྲོལ་
ལ་བཀོད་པར་མཛད་དེ།  གླང་ལོའི་དཔྱིད་ཞིང་འདིའི་གཞན་དོན་རྫོགས་པས་ཐུགས་རངས་ཏེ།  ཞིང་གཞན་དུ་གཤེགས་པར་བཞེད་ནས།  གསུང་ངག་རྫོགས་པའི་རྗེས་སུ་འདི་ལ་ལམ་འབྲས་ཀྱི་རྗེས་མ་གྱིས་གསུངས།  དེའི་དབྱར་ཁ་ནས་སྐུ་མཚམས་ལ་བཞུགས་
པར་བཞེད་ན་ཡང་།  ཆོས་རྗེ་གླང་ཐང་པ་ཕེབས་པས་སླར་ཡང་གསུང་ངག་ཚར་གཅིག་གནང་བར་མཛད་དོ། །གསུང་ངག་མ་རྫོགས་པའི་གོང་ཙམ་དུ་བཞི་སྡེ་མཁན་ཆེན་པས་གཙོ་མཛད་པ་རྣམས་ལ་ནག་པོ་རིམ་བཞི་གནང་སྟེ།  ཆོས་འཕྲོ་རྣམས་རྫོགས་ནས་
ཟླ་བ་དགུ་པའི་ཚེས་ཉི་ཤུ་ལ་ཆོས་རྗེ་གླང་ཐང་པ་དཔོན་སློབ་རྣམས་ངོར་དུ་ཐེགས།  དེ་རྗེས་བདག་ཆེན་བློ་གྲོས་དབང་ཕྱུག་པ་བཞུགས་པར་བཞེད་ནས་ཞུ་བ་ནན་གྱིས་ཕུལ་བ་ལ།  རྗེའི་ཞལ་ནས་ངེད་ད་ལོ་ལུང་ཕུག་ཡ་གི་དེ་ནར་འཆི་རུ་འགྲོ་བ་ཡིན།  ང་ཤི་བའི་རྗེས་སུ་
གྲྭ་བུ་སློབ་ཀྱི་འདུ་འཚོགས་དང་མཆོད་བསྔོ་ལ་སོགས་པ་འཇིག་རྟེན་གྱི་བརྡ་ཆད་མང་པོ་དང་།  དེ་དག་གི་མགོ་མ་ལ་སློབ་མའི་དྲག་ཤོས་ས་སྐྱ་འཁོན་གྱི་གདུང་བརྒྱུད་བཞུགས་ཞེས་པའི་གཏམ་འདི་ལ་ཞེ་འདོད་དང་པོ་ནས་མེད་པ་ཡིན་པས་ཅིས་ཀྱང་བྱོན་མཛོད་
ཅེས་པའི་ཞལ་ད་ནན་གྱིས་གནང་བས།  བདག་ཆེན་པས་ཀྱང་བླ་མའི་ཐུགས་དགོངས་དང་བསྟུན་པར་མཛད་དེ་ཉི་ཤུ་དྲུག་ལ་བཏེག་པར་མཛད་དོ། །དེ་ནས་སྨིན་དྲུག་ཟླ་བ་སྔ་མའི་ཚེས་གསུམ་གྱི་བར་ཞག་བདུན་ལ།  ལ་སྟོད་ལྷོ་བྱང་སོགས་ནས་རབ་བྱུང་
10-2-24b


བསྙེན་རྫོགས་སོགས་དོན་དུ་གཉེར་བ་མང་དུ་བྱུང་བ་རྣམས་ལ་སྐུ་གཟུགས་ཀྱིས་གང་ལྕོགས་མཛད་ནས།  ཚེས་གསུམ་གྱི་ཉིན་བསམ་གཏན་ཕུག་ལ་བཏེག་སྟེ་དབེན་གནས་སུ་ཕེབས་ནས།  ཇ་སྦྱོར་ཅིག་གི་རིང་ལ་ཞབས་དྲུང་ན་གནས་པ་རྣམས་ལ་ཞལ་ད་མང་དུ་གནང་
ནས།  དང་པོ་ནས་ངེད་ཀྱི་བསམ་པ་ལ།  མི་མེད་ཀྱི་ལུང་སྟོང་ཞིག་ཏུ་འཆི་ས་བྱེད་དགོས་སྙམ་པ་ཡོད་པ་དེ་འགྲུབ་བྱུང་།  ད་ལྟ་ཤི་ཡང་སེམས་ལ་འཕྲེང་བ་གཅིག་ཀྱང་མེད།  སྔར་བྱས་པའི་ལས་ལ་འགྱོད་པ་ཡང་མེད།  འདི་བྱ་དགོས་སྙམ་པ་མ་གྲུབ་པ་ཡང་མེད།  
མི་ཡུལ་དུ་སྡོད་ཡུན་ཡང་རིང་པོ་ཡིན།  གཞན་ལ་འདི་བྱ་འདི་གྱིས་ཀྱི་བཀོད་པ་ཡང་ཕོ་ལོ་བརྒྱད་ཅུ་གྱ་གསུམ་པ་ཞིག་གིས་མི་འོང་གསུངས་ནས་ཐུགས་སྤྲོས་པ་བཅད་པར་མཛད།  ངའི་གན་དུ་དཀོན་བཟང་གཅིག་པུ་སྡོད།  གཞན་སུ་ཡང་མ་སྡོད་གསུངས་པ་ལ་
ཁོང་རྣམས་ཀྱིས་གུང་ཐུན་རན་འདུག་པས་ཐོག་མར་གུང་ཐུན་ཅིག་མཛད་ནས་དེ་རྗེས་གསོལ་ཇ་ཞིག་མཛད་དམ་ཞུས་པས་ཡུད་པ་ཅིག་ཁྱོ་མཚོ་གྱིས་དེ་ནས་ཁྱེད་རང་ཐམས་ཅད་སོང་།  ད་ཉིན་མཚན་ཁོར་ཡུག་ཏུ་དགེ་སྦྱོར་དུ་འགྲོ་བ་ཅིག་བྱེད་པ་མ་གཏོགས་པ་ཐུན་
གྱི་ངེས་པ་མི་འོང་གསུངས།  དེ་ནས་བཟུང་སྟེ་ཟླ་བ་དེའི་ནང་དུ་ཐུགས་དམ་ལ་རྩེ་གཅིག་ཏུ་བཞུགས།  ཚེས་བརྒྱད་ཀྱི་བར་དུ་ཞབས་བསྐོར་སོགས་ཀྱང་མང་དུ་མཛད།  དེ་ནས་སྐུ་ཤེད་ཅུང་ཟད་ཆུང་དུ་སོང་ནས་གླིང་ཁར་སྐུ་རིམ་ཉི་མ་གསུམ་ཙམ་བསྒྲུབས་ཏེ།  སྔར་
སྐུ་རིམ་ཡང་འདི་འདྲ་བསྒྲུབ་ཡོད།  ད་དུང་སྐུ་རིམ་འདྲ་སྒྲུབ།  ལྷ་རྗེ་ཅིག་ལ་ཡང་བསྟན་ན་དྲག་གམ་ཞུས་འདུག་པས།  རིམ་གྲོ་བྱས་པ་ཁྱེད་རང་རྣམས་ལ་ཕན་པས་བྱས་པས་འོང་།  ང་ལ་ནི་དབུས་གཙང་གི་བཙུན་པ་ཐམས་ཅད་འདུས་ནས་རིམ་གྲོ་བྱས་
10-2-25a


སྨན་པ་ཐམས་ཅད་འདུས་ནས་སྨན་བྱས་ཀྱང་།  ད་ལོ་སྡོད་པ་མེད་གསུངས་ནས་མ་གནང་།  ལྟས་ཅི་འདྲ་བྱུང་ཞུས་པས་ཁར་སིང་དབྱར་ཁ་ནས་གླིང་ཁའི་རི་འདི་རྟག་ཏུ་སྨུགས་པའི་རང་བཞིན་དུ་འཆར་བ་ཅིག་བྱུང་།  དེ་ས་ཆུ་ལ་ཐིམ་
པའི་རྟགས་ཡིན་གསུངས་པར་འདུག །ཟླ་བ་དེའི་མཇུག་ཏུ་ཞག་བདུན་ཙམ་ཅིག་སྐོམ་དད་ཆེ་ནས་གསོལ་ཇ་མང་དུ་བཞེས་དགོས་པ་ཅིག་བྱུང་བ་དེ་ཆུ་མེ་ལ་ཐིམ་པའི་རྟགས་ཡིན་གསུང་ཞིང་།  རྟགས་ཕྱི་མ་གཉིས་ལ་འདི་ཡིན་མི་གསུང་།  དེ་ནས་སྨིན་དྲུག་ཟླ་
བ་རྟིང་མའི་ཚེས་གཉིས་ཀྱི་ནུབ་མོ།  ཉི་མ་བརྒལ་ཙམ་གྱི་གོང་ནས་སྐུ་ཆོས་དང་།  སྐུ་ཤམ་ཕུད་ནས་བཞག་པས།  དེའི་ནུབ་མོ་མནལ་ལམ་དུ་ནམ་མཁར་སངས་རྒྱས་འཁོར་དང་བཅས་པ་བཞུགས་འདུག་པ་ཅུང་ཟད་མི་དགྱེས་པའི་རྣམ་པ་ཅན་དུ་འདུག །མདང་
དགོང་ཆོས་གོས་དང་ཤམ་ཐབས་བཞག་སྔས་པས་ལན་པ་འདྲ་གསུངས།  དེ་ནས་མཁན་ཆེན་ཀུན་བློ་པ་སྐུ་མདུན་དུ་སྡོད་པས་ཆོག་པའི་ཞུ་བ་ནན་གྱིས་ཕུལ་བས་གནང་ནས་ཚེས་བཞིའི་ཉིན་པར་མཇལ་བའི་ཚེ།  དེའི་ཉིན་སྐུ་ཁམས་བདེ་ནས་ཞལ་ད་མང་དུ་གནང་།  ངེད་
ལ་བླ་མ་དུ་མ་ཡོད་པའི་ནང་ནས་ཆོས་རྗེ་རིན་པོ་ཆེ་ཀུན་དགའ་བཟང་པོ་པ་དེ་ཤིན་ཏུ་སྐུ་དྲིན་ཆེ་བ་ཅིག་བྱུང་།  དེའི་རྒྱུ་མཚན་བོད་དུ་རྡོ་རྗེ་ཐེག་པའི་ལམ་སྲོལ་ལ་བླ་མ་གོང་མ་ནས་བརྒྱུད་པའི་ལམ་སྲོལ་འདི་དང་།  མར་པ་ནས་བརྒྱུད་པའི་རྔོག་གཞུང་གི་བཀའ་སྲོལ་དང་།  
ཤངས་པ་ནས་བརྒྱུད་པའི་ནི་གུ་སོགས་ཀྱི་བཀའ་སྲོལ་དང་།  བུ་སྟོན་རིན་པོ་ཆེ་ནས་བརྒྱུད་པའི་ཡོ་གའི་བཀའ་སྲོལ་སོགས་མང་དུ་ཡོད་ཀྱང་།  དུས་ཕྱིས་ཆོས་རྗེ་རི་བོ་དགེ་ལྡན་པས།  གསང་སྔགས་ཀྱི་བཀའ་སྲོལ་ལ་གྲུབ་མཐའ་གསར་པ་རྐང་བཙུགས་ནས་
10-2-25b


བཤད་ཉན་གྱིས་གཏན་ལ་ཕབས་པར་མཛད།  དེ་སྔར་གྱི་བཀའ་སྲོལ་དེ་དག་གང་དང་ཡང་མི་མཐུན་པ་འདུག་ཀྱང་།  དབུས་གཙང་གི་དགེ་བའི་བཤེས་གཉེན་ཕལ་ཆེར་དེ་ལ་དད་པ་ཅིག་བྱུང་།  དེ་ལ་ཆོས་རྗེ་རིན་པོ་ཆེས་གྲུབ་མཐའ་སྔ་ཕྱིའི་གནད་གཟིགས་ནས་དགག་
སྒྲུབ་མང་དུ་མཛད།  བླ་མ་གོང་མའི་བཀའ་སྲོལ་གྱི་རྐང་བཙུགས་ཏེ་དེའི་རྗེས་སུ་ཞུགས་པས་ཆོག་པ་ཅིག་བྱུང་བ་ཡིན།  ལམ་འདི་ངེད་རང་གི་རྩོལ་བས་བྱུང་ན་ཚེ་གཅིག་ལུས་གཅིག་ལ་མཆོག་གི་དངོས་གྲུབ་སྒྲུབ་ནུས་པའི་ལམ་དུ་འདུག །ངེད་རང་གི་སློབ་མ་
རྣམས་ཀྱིས་ཀྱང་བཤད་ཉན་ལ་སོགས་པའི་རྩོལ་བས་བཀའ་སྲོལ་འདི་སྤེལ་བའི་ཐབས་ལ་འབད་དགོས་པ་འདུག །བླ་མ་གོང་མའི་གསུང་རབ་འདིའི་སྟེང་དུ་རྟོགས་པ་གཞན་དང་མི་འདྲ་བ་ཞིག་ང་ལ་ཡོད་པ་ཡིན།  བསྟན་པའི་རྒྱུན་ལ་ཕན་དུ་རེ་ནས་བསྐྱེད་རིམ་གྱི་
གྲུབ་མཐའི་ཤན་འབྱེད་འདི་ཡང་བརྩམས་པ་ཡིན།  ངེད་རང་ཡང་ཆོས་རྗེ་རིན་པོ་ཆེའི་དུས་ཐ་མའི་བཀའ་ལུང་དང་དུ་བླངས་ནས་བཤད་ཉན་བྱས་པས་ས་སྐྱ་པའི་བསྟན་པ་ལ་ཕན་པོ་བྱུང་།  བཤད་ཉན་མ་དགོས་པར་ངེད་རང་འདོད་པ་ལྟར་གྱི་སྒྲུབ་པ་ཞིག་བྱེད་རྒྱུ་བྱུང་
ན་ལུས་འདི་མ་སྤངས་པར་འགྲོ་དབང་ཡོད་པ་ཡིན།  གང་ལྟར་ཡང་ཐོག་མ་མེད་པ་ནས་ལུས་ཇི་སྙེད་ཅིག་བླངས་ཀྱང་ད་ལན་གྱི་ལུས་འདི་ལས་དོན་ཆེ་བ་མ་བྱུང་འདུག་གསུངས་པ་སོགས་ཀྱི་ཐུགས་རངས་པའི་ཞལ་ད་མང་དུ་གནང་།  དྲུང་ན་གནས་པ་རྣམས་ཀྱིས་
ད་ལོ་ནག་པོ་རིམ་བཞི་ལ་མི་མང་བ་དང་།  རབ་བྱུང་བསྙེན་རྫོགས་ལ་སོགས་མང་བས་ལན་ནམ་ཞེས་ལྐོག་ཏུ་གླེངས་འདུག་པས་དེ་མ་ཐག་གསན་ནས།  དེ་དག་གང་གིས་ཀྱང་མ་ལན།  ད་ལོ་མི་སྡོད་པར་ཤེས་ནས་བསྟན་པའི་རྒྱུན་ལ་ཕན་དུ་རེ་སྟེ་གང་ལྕོགས་
10-2-26a


བྱས་པ་ཡིན་གསུང་བར་འདུག་གོ།  །དེ་ནས་ཚེས་བརྒྱད་ཀྱི་བར་ཞལ་ད་གཞན་ཆེར་མི་གནང་བར།  རེས་སྤྱན་ནམ་མཁའ་ལ་ཅེར་ཏེ་གཟིགས་ནས་འཛུམ་པ་མཛད།  རེས་ཕྱག་དང་ཞབས་བཤུད་ཅིང་སྤྲུག་པ་འཁྲུལ་འཁོར་
གྱི་རྣམ་པ་མཛད།  རེས་སྐུ་ལུས་གར་སྟབས་ཀྱི་རྣམ་པ་མཛད་པ་སོགས་ཉིན་མཚན་ཁོར་ཡུག་ཏུ་ཉམས་ཀྱི་ངང་ལ་བཞུགས།  ཚེས་བརྒྱད་ཀྱི་དགོངས་མོ་ཉི་མ་རྒས་ཙམ་ན།  སྐུ་ལུས་གནད་བསྲང་།  སྤྱན་བར་སྣང་ལ་གཟིགས།  ཕྱི་རོལ་གྱི་
སྤྲོས་པ་བཅད་ནས་ཏིང་ངེ་འཛིན་འབའ་ཞིག་ལ་བཞུགས།  དེ་ཡང་བདེ་བར་གཤེགས་པའི་ཚུལ་མ་བསྟན་པའི་ཞག་བཞི་ཙམ་གྱི་གོང་ནས་སྐུ་ལུས་བྱིས་པ་ལོ་བཅུ་དྲུག་ལོན་པའི་རྣམ་པ་ཅན།  སྤྱན་དཀར་ནག་འབྱེས་ཤིང་སྤྱན་འབྲས་གནག་པ།  སྙན་
དང་།  ཤངས་དང་།  མཆུ་སྒྲོས་རྣམས་ཤིན་ཏུ་དོད་པ།  ཞལ་གྱི་དཀྱིལ་འཁོར་གཉེར་མ་མེད་ཅིང་།  དཀར་ལ་དམར་བའི་མདངས་ཆགས་པ་ཅིག་བྱུང་འདུག་པ་དེ།  ཚེས་བརྒྱད་ནས་ཉི་ཤུ་ལྔའི་བར་དུ་ཡང་།  སྐུ་མདངས་དེ་ཁོ་ནའི་ངང་དུ་བཞུགས།  
དེའི་སྟོབས་ཀྱི་དྲུང་ན་གནས་པ་རྣམས་ཀྱང་བདེ་བར་གཤེགས་པའི་སྣང་བ་མ་བྱུང་ཞིང་།  བྱ་དང་།  རི་དྭགས་ལ་སོགས་པ་རྣམས་ཀྱང་གནས་གཞན་དུ་མི་འགྲོ་བར་ཉེ་འཁོར་དེ་ཉིད་དུ་གནས་པ་དང་།  སྔར་མེད་པའི་དྲི་བཟང་པོ་ཁྱད་པར་ཅན་གྱིས་
གཟིམས་ཁང་གི་ནང་རྒྱུན་དུ་ཁེངས་པ་བྱུང་འདུག་གོ།  །དེ་ནས་ཉི་ཤུ་ལྔའི་ཉིན་དབུ་ཕྲག་པ་གཡོན་ཕྱོགས་སུ་ཅུང་ཟད་ཡོ།  ཞལ་མདངས་གློ་བུར་བ་དེ་ཡལ་ནས་སྔར་གྱི་སྐུ་བགྲེས་པའི་ཞལ་མདངས་ཙམ་དུ་སོང་།  གནམ་གང་གི་བར་བཞག་
10-2-26b


ཀྱང་ཁྱད་གཞན་མ་བྱུང་ནས།  ན་བཟའ་གཡེངས་པའི་ཚེ་ལུས་གནད་ཞབས་གཉིས་སེམས་དཔའི་སྐྱིལ་ཀྲུང་ལ།  པུས་མོ་གཉིས་གཡོན་ཕྱོགས་སུ་ཅུང་ཟད་བསྣོལ།  རྟིང་པ་གཉིས་ཀྱི་སྟེང་དུ་འཕོངས་ཀྱི་སྣག་པོ་ཆེ་བཞག །ཕྱག་གཡས་པ་རྡོ་རྗེ་
ཁུ་ཚུར་གྱིས་མཆན་ཁུང་གཡོན་ནས་འཁྱུད།  གཡོན་པ་སྡིག་མཛུབ་དང་བཅས་ཏེ།  དེའི་སྟེང་ནས་དཔུང་པ་གཡས་ལ་འཁྱུད།  སྒལ་ཚིགས་དྲང་པོར་བསྲང་བ།  རྒྱ་གར་གྱི་གྲུབ་ཆེན་ཨ་ཝ་དྷཱུ་ཏཱིའི་བཞུགས་སྟངས་སུ་འདུག་ཟེར།  རྣམ་པར་ཐར་པ་
འདི་ལས་དཔགས་ན།  ཐུགས་བཞེད་བཞིན་སྒྲུབ་པ་མཛད་པ་བྱུང་ན་སྐུ་ལུས་མ་སྤངས་པར་མཆོག་གི་དངོས་གྲུབ་བརྙེས་པར་ཞལ་གྱིས་བཞེས་འདུག་ཅིང་།  འོན་ཀྱང་ཐོག་མ་མེད་པ་ནས་ལུས་ཇི་སྙེད་ཅིག་བླངས་ཀྱང་།  ད་ལན་གྱི་ལུས་འདི་ལས་དོན་
ཆེ་བ་མ་བྱུང་ཞེས་གསུངས་པའི་ཤུགས་ཀྱིས་བར་དོར་ཕྱག་ཆེན་མཆོག་གི་དངོས་གྲུབ་བརྙེས་པ་གདོན་མི་ཟ་བར་སྣང་ངོ་། །བདེ་བར་གཤེགས་ཁར་སྐུ་ལུས་ལ་མཚན་དཔེ་ཆ་མཐུན་བྱུང་བ་འདི་ནི།  ཆོས་རྗེ་ས་སྐྱ་པཎྜི་ཏ་བདེ་བར་གཤེགས་ཁར་ལིང་ཆུ་
རྩེར་ཐོ་རངས་ཤིག་དབུས་སུ་རྗེ་བཙུན་ཆེན་པོ།  གཡས་སུ་བིཪྺ་པ།  གཡོན་དུ་ནག་པོ་པ་བྱོན་པ་གཟིགས་ཏེ།  རྗེ་བཙུན་གྱི་ཞལ་ནས་སྐྱེ་བ་གསུམ་པ་ལ་དེ་བཞིན་གཤེགས་པ་དྲི་མ་མེད་པའི་དཔལ་དུ་འགྱུར་བར་ལུང་བསྟན།  བིཪྺ་པ་དང་ནག་པོ་པ་
གཉིས་ཀྱིས་མཐུན་འགྱུར་མཛད།  བིཪྺ་པས་ཐོད་པའི་བདུད་རྩི་ལ་སྲིན་ལག་གིས་རེག་པར་མཛད་དེ།  ཁྱེད་ཀྱི་ལྗགས་རྐྱོངས་གསུངས་ནས་ལྗགས་ལ་ཐིག་ལེ་བྱས་པའི་སྣང་བ་བྱུང་བས།  དེའི་ཚེ་རྟོག་པ་དང་རྟོག་མེད་ཀྱི་མཐའ་ལས་འདས་པ་བདེ་
10-2-27a


གསལ་མི་རྟོག་པའི་ཡེ་ཤེས།  རྒྱལ་བ་རྣམས་ཀྱི་ཐུགས་རྒྱུད་ལ་ཡང་།  འདི་ལས་ལྷག་པ་མེད་སྙམ་པ་འཁྲུངས།  དེའི་ཚེ་གསང་བའི་གནས་སྦུབས་སུ་ནུབ་པ་དང་།  དབུའི་གཙུག་ཏོར་བལྟ་བར་མི་མངོན་པ་སོགས་མཚན་
དཔེ་རྣམས་བརྙེས་གསུངས་པ་དང་མཐུན་པར་འདུག་གོ། ༈ །།ལུས་ངག་ཡིད་གསུམ་ལོངས་སྤྱོད་དང་བཅས་པ། །དོན་ཡོད་རྣམ་བཞིས་བླ་མ་མཉེས་བྱས་ནས། །ཅི་མཛད་རྒྱལ་བའི་མཛད་པར་ལེགས་རྟོགས་ནས། །རྨད་བྱུང་ཕྲིན་ལས་བསྒྲུབ་
ལ་བརྩོན་པར་ཤོག །དགེའོ།།    །།
10-2-27b


empty page
10-3-1a


༄༅།  །དྲིས་ལན་པད་མོ་བཞད་པ་བཞུགས་སོ།།    །།  
10-3-1b


ན་མོ་མཉྫུ་གྷོཥཱ་ཡ།  འཁྲུལ་མེད་གནད་ཀྱི་ལམ་སྟོན་པ། །རྗེ་བཙུན་དམ་པའི་ཞབས་པདྨོར། །བཏུད་ནས་དད་ལྡན་སློབ་མ་ཡིས། །དྲིས་ལན་འགའ་ཞིག་འདིར་བརྗོད་བྱ། །དེ་ལ་དང་
པོར་སྡོམ་གསུམ་ཁ་སྐོང་གི་ཕྱོགས་སྔ་སྨྲ་བ་པོ་རྣམས་ཀྱི་ངོས་འཛིན་གང་ཡིན་ཅེས་པའི་ལན་ནི།  དྲི་བཅས་ཀྱི་སེམས་ལ་རིགས་པས་བདེན་པ་བཀག་ཙམ་བདེར་གཤེགས་སྙིང་པོར་འདོད་པ་ནི་དར་ཊཱིཀ་པ་དང་།  
དེའི་རྗེས་འབྲང་གི་ལུགས་སྨྲ་བ་པོ་རྣམས་སོ། །འདུས་བྱས་རང་བཞིན་གནས་རིགས་དང་འདུས་མ་བྱས་རང་བཞིན་གནས་རིགས་གཉིས་སུ་ཕྱེ་བ་ནི་རོང་ཊཱིཀ་གི་དངོས་བསྟན་ཡིན་ལ་ཆོས་རྗེ་ཉིད་ཀྱི་དགོངས་
པ་ནི་འཁྱོག་པོ་སྲོང་བའི་ཚུལ་གྱིས་གནས་སྐབས་སོ་སོར་བཤད་པ་ཡིན་གྱི།  མཐར་ཐུག་ཟུང་འཇུག་ཉིད་ཡིན་ནོ། །བདེར་གཤེགས་སྙིང་པོ་བདེར་གཤེགས་ཁོ་ན་ལ་ཡོད་ཀྱི་འགྲོ་བ་ལ་མེད་པར་འདོད་པ་
10-3-2a


ནི་སྔར་བྱོན་པའི་བུ་སྟོན་ཁ་ཆེ་དང་།  དེང་སང་དབུས་གཙང་དང་།  མདོ་ཁམས་ན་ཡོད་པའི་མཚན་ཉིད་པ་ཁ་ཅིག་གོ།  རང་བཞིན་རྣམ་དག་གི་ཆོས་དབྱིངས་དང་།  གློ་བུར་དྲི་བྲལ་གྱི་ཆོས་
དབྱིངས་གཉིས་འགལ་བར་འདོད་པ་ནི་དེང་སང་གི་མཚན་ཉིད་པ་ཕལ་ཆེར་རོ། །རྣམ་རིག་པའི་བག་ཆགས་ཀྱིས་བསྒྲིབས་པའི་སྐྱེས་ཆེན་ཤེས་བྱ་ཀུན་ལ་བདེན་པ་གཉིས་དང་།  མཚན་ཉིད་གསུམ་དུ་ཕྱེ་ནས་
ཀུན་བཏགས་དང་གཞན་དབང་ཀུན་རྫོབ་དང་།  ཡོངས་གྲུབ་དོན་དམ་བདེན་པར་བྱས་ཏེ།  དོན་དམ་བདེན་པའི་གཅིག་ཏུ་གྲུབ་པར་འདོད་པ་སོགས་ནི་ཇོ་ནང་ཀུན་མཁྱེན་པའི་ངེས་དོན་རྒྱ་མཚོའི་དགོངས་པ་དཔྱིས་ཕྱིན་
པར་བཀོད་པ་ཡིན་ལ།  ཞར་བྱུང་རྒྱུད་གསུམ་ཀ་ཀྱེ་རྡོར་མཚན་ཉིད་པར་འདོད་པ་ནི་སྔར་བྱོན་པའི་ཀུན་དགའ་རྒྱལ་མཚན་པ་དང་།  ཕྱིས་ཀྱི་རང་ལུགས་ཀྱི་བླ་མ་ཁ་ཅིག་གོ།  གཞིའི་སྐབས་ཀྱི་ཕྱོགས་སྔ་བྱུང་ཚུལ་
10-3-2b


མདོར་བསྡུས་པའོ། །སོ་ཐར་གྱི་སྡོམ་པ་གཟུགས་ཅན་དང་།  གྲངས་རིས་བརྒྱད་ཁོ་ནར་འདོད་པ་དང་།  འཆི་བའི་ཚེ་གཏོང་བས་ཁྱབ་པར་འདོད་པ་ནི་འདུལ་མཛོད་ཁོ་ན་ལ་བརྟེན་པའི་སྡེ་སྣོད་འཛིན་པ་ཕལ་ཆེར་རོ། །སོ་
ཐར་ལ་འཇིགས་སྐྱོབ་ལེགས་སྨོན།  ངེས་འབྱུང་གི་ཚུལ་ཁྲིམས་གསུམ་དུ་དབྱེ་བ་དང་།  སོ་ཐར་གྱི་ངོ་བོ་གཞན་གནོད་གཞིར་བཅས་སྤོང་བ་འཕགས་ཡུལ་གྱི་གཞུང་འགྲེལ་ལ་བཤད་པ་མེད་ཅེས་པ་ནི།  དེང་སང་དྲི་བའི་ཟོལ་གྱིས་
སྡོམ་གསུམ་རབ་དབྱེ་འགོག་པ་ལ་བརྩོན་པ་དེ་ཉིད་དོ། །གཞན་གནོད་གཞིར་བཅས་སྤོང་བ་དགེ་སློང་གི་སྡོམ་པ་ཁོ་ནའི་ངོ་བོ་ཡིན་གྱི་སོ་ཐར་སྤྱིའི་ངོ་བོ་མ་ཡིན་ནོ་ཅེས་པ་ནི་ནམ་མཁའ་བསོད་ནམས་སོ། །སྐྱེས་ཚོགས་ཁོ་ནས་བུད་མེད་
བསྙེན་རྫོགས་བྱེད་པ་ནི་ཐོག་མར་དགེ་ལྡན་པའི་འདུལ་བ་པ་ཞེས་པ་གཅིག་གིས་བྱས་པར་གྲགས་ནས་རིགས་པའི་འུར་རྡོ་འཕངས་པ་ཕྱིས་དེ་དག་གིས་མ་བྱས་སོ་ཞེས་ཟེར་ཞིང་།  ནམ་མཁའ་བསོད་ནམས་ཀྱིས་མཁན་པོ་དང་།  ཤངས་ཀྱི་
ཕུའི་བླ་མ་ཞིག་གིས་ལས་སློབ་བྱས་ནས་ཆུ་དབར་རང་བྱོན་གྱི་དཔོན་མོ་བསྙེན་རྫོགས་བྱས་པ་ལ་ཕོག་སོང་བར་སྣང་ངོ་། །བསྙེན་རྫོགས་བསྒྲུབ་བྱ་གསུམ་ལས་མང་བ་ལ་མི་རུང་ཡང་།  དགེ་ཚུལ་ལ་བསྒྲུབ་བྱ་གསུམ་ལས་མང་བ་འཇུག་ཏུ་
རུང་ཅེས་པ་ཡང་སྔར་གྱི་ཟོལ་ཅན་དེ་ཉིད་དོ། །སོ་ཐར་སྡོམ་པའི་སྐབས་ཀྱི་ཕྱོགས་སྔ་མདོར་བསྡུས་པའོ། །བདག་གཞན་བརྗེ་བའི་དོན་གཅེས་འཛིན་བརྗེ་བ་ཡིན་གྱི།  དགེ་སྡིག་དང་།  བདེ་སྡུག་བརྗེ་བ་མ་ཡིན་ཅེས་པ་ནི་ཙོང་ཁ་
10-3-3a


པའོ། །མཐའ་བཞིའི་སྤྲོས་བྲལ་རྒྱ་ནག་དགེ་སློང་གི་ལྟ་བ་ཡིན་པས་ནོར་བ་ཡིན་ལ།  རིགས་པས་བདེན་པ་བཀག་པའི་རྗེས་སུ་བདེན་མེད་ཉིད་ལ་ཞེན་ནས་འགོག་ཏུ་མི་རུང་ཞེས་སོགས་ཀྱང་།  ཙོང་ཁ་པའི་
དབུ་མའི་ཡིག་ཆ་རྣམས་ཀྱི་འདོད་པ་མཐར་ཐུག་པའོ། །ཐ་སྙད་ཀྱི་རྣམ་གཞག་ལའང་ཡོད་མིན་མེད་མིན་སྨྲ་བ་ནི་ལོ་ཙཱ་བ་སྐྱབས་མཆོག་དཔལ་ལོ། །བདག་དང་གང་ཟག་གཉིས་རྣམ་གྲངས་སུ་སྨྲ་བ་མུ་སྟེགས་པའི་གཞུང་ཡིན་པས་
ཐ་སྙད་དུའང་བདག་མེད་ཅིང་གང་ཟག་ཡོད་པར་འདོད་པ་དང་།  དེར་རྗེས་སུ་ཐ་སྙད་དུ་བདག་ཡོད་པ་བཞིན་དུ་གང་ཟག་གི་བདག་ཀྱང་ཡོད་པར་འདོད་པ་གཉིས་ནི་སྔར་གྱི་ཟོལ་ཅན་དེ་ཉིད་ཀྱི་གྲུབ་མཐའ་སྔ་ཕྱིའོ། །དབུ་མ་ལྟ་ཁྲིད་ཀྱི་ཚེ་ཐོག་
མར་ང་བགྲངས་པའི་སྒོ་ནས་ངར་འཛིན་ལྷན་སྐྱེས་ཀྱི་ཞེན་ཡུལ་བཙལ་ཞིང་དེ་རྙེད་པའི་ཚེ་ང་མེད་ཅེས་བགྲང་བར་འདོད་པ་ནི་ལྕང་ར་མཁན་པོའི་རྗེས་སུ་འབྲང་བའི་དགེ་ལྡན་པ་རྣམས་ཏེ།  འདི་ལ་ཡང་འདུལ་བ་པ་དང་།  དེའི་བླ་མ་དང་།  དེའི་
གདན་ས་པ་གསུམ་གྱིས་རིམ་པ་ལྟར་ང་སྣང་ཚུལ་ལྟར་མེད་ཅེས་བགྲང་དགོས་པ་དང་།  ང་མེད་ཅེས་བགྲངས་པ་ཉིད་ཀྱིས་ཆོག་པ་དང་།  ང་ཞེས་བརྗོད་དུ་མི་རུང་བར་མེད་ཅེས་པའི་ཚིག་ཁོ་ན་བགྲང་དགོས་པར་འདོད་པའི་རིམ་པ་གསུམ་ཡོད་
པར་གྲགས་ཏེ།  གསུམ་ཀའང་སྙིང་རྗེའི་ཡུལ་ལོ། །བྱང་སེམས་ཀྱི་སྡོམ་པའི་སྐབས་ཀྱི་ཕྱོགས་སྔ་མདོར་བསྡུས་པའོ། །རྒྱུད་སྡེ་མཐའ་དག་ལ་རང་བཟོའི་ཆོག་ཁྲིགས་སྦྱར་ནས་དབང་བསྐུར་གཅིག་ཐོབ་པས་ཀུན་ཐོབ་པར་འདོད་
10-3-3b


པ་ནི་བོ་དོང་ཕྱོགས་ལས་རྣམ་རྒྱལ་ལོ། །དབང་གིས་མ་སྨིན་པའི་སོ་སྐྱེ་ལ་གསང་སྒྲོགས་བྱེད་པ་ནི་ངོར་པ་མ་གཏོགས་པའི་དེང་སང་གི་སྔགས་པ་ཐམས་ཅད་དང་།  ད་ནི་ངོར་པའི་ཡང་སློབ་མ་འགའ་ཞིག་གོ།  རྡོ་རྗེ་སྤུན་བླ་མ་གཅིག་ལ།  དཀྱིལ་འཁོར་
གཅིག་ལས་དུས་གཅིག་ཏུ་དབང་བསྐུར་ཐོབ་པ་དགོས་པར་འདོད་པ་ནི་ཙོང་ཁ་པའོ། །ཐེག་པ་གསུམ་ཅར་གྱི་ཚོགས་ལམ་ཆེན་པོ་ཡན་ཆད་གསང་སྔགས་ཁོ་ནས་ཐོབ་པར་འདོད་པ་ནི་བོ་དོང་ཕྱོགས་ལས་རྣམ་རྒྱལ་ལོ། །བྱ་རྒྱུད་ཀྱི་བསྐྱེད་ཆོག་
ལ་བདག་བསྐྱེད་ཡོད་པར་འདོད་པ་ཡང་ཙོང་ཁ་པའོ། །སྦྱོང་རྒྱུད་ལས་གསུངས་པའི་འཇིག་རྟེན་པའི་དཀྱིལ་འཁོར་དྲུག་གི་འཁོར་རྣམས་འཇིག་རྟེན་རང་རྒྱུད་པར་འདོད་པ་ནི་ངོར་པའི་སློབ་མ་བླ་མའི་སྒྲོས་མ་ཟིན་ཀྱང་ཟིན་པར་རློམ་པ་རྣམས་སོ། །རྒྱུད་སྡེ་འོག་
མ་ལ་རིམ་གཉིས་ཡོད་པར་འདོད་པ་ནི་དགའ་གདོང་པ་ཆོས་རྒྱལ་དཔལ་བཟང་ངོ་། །སྣང་བ་ལྷ་རུ་འཆར་བའི་དོན་ཡིད་ངོར་འཆར་བ་ཙམ་ཡིན་གྱི་ཕྱི་རོལ་གྱི་སྣང་བ་ལྷ་རུ་འཆར་བ་མ་ཡིན་ཅེས་པ་ནི་ཙོང་ཁ་པ་དང་།  དེའི་རྗེས་འབྲང་གི་དགེ་ཆུང་རྣམས་སོ། །
ཀུན་བཏགས་དང་གཞན་དབང་ལྷ་རུ་བསྒོམ་པར་བྱ་བ་མ་ཡིན།  ཡོངས་གྲུབ་ཁོ་ན་ལྷར་བསྒོམ་པར་བྱ་བ་ཡིན་ནོ་ཞེས་པ་ནི་ཇོ་ནང་ཀུན་མཁྱེན་ཆེན་པོའོ། །སྦྱིན་སྲེག་ལ་རྫས་སྔགས་བཅུ་ཙམ་གྱི་ཡུན་ཚད་ལ་སྦྱིན་སྲེག་བརྒྱ་ལ་སོགས་པའི་གྲངས་བྱེད་པ་ནི་ངོར་
པ་མ་གཏོགས་པའི་དེང་སང་གི་སྔགས་པ་རྣམས་དང་།  ངོར་པའི་ཡང་སློབ་མ་འགའ་ཞིག་གོ། །གཏོར་མགྲོན་གྱི་དམ་ཚིག་པ་གཤེགས་ནས་ཡེ་ཤེས་པ་བསྡུ་བ་ནི་བོ་དོང་བའི་རྗེས་འབྲང་རྣམས་སོ། །གནམ་རྒྱན་གྱི་དཀྱིལ་འཁོར་ལ་འཁོར་གྱི་ལྷ་དབུ་
10-3-4a


ནང་ལ་བསྟན་པ་ནི་སྤོས་ཁང་པ་རིན་རྒྱལ་གྱི་བཞེད་པ་ཡིན་ཟེར་ནས་ཉང་སྟོད་ཕྱོགས་སུ་དར་རོ། །སྨན་བླའི་ཕོ་བྲང་ནི་ཉང་སྟོད་སྒོམ་ཆེན་གྱི་ཉམས་སྣང་ཡིན་པར་གྲགས་སོ། །ཆོ་ག་མི་བྱེད་པར་མིང་བྱང་སྲེག་པ་ནི་སྒོམ་སྡེའི་ཡུལ་
ལ་དར་བས་དགག་དགོས་སོ་ཞེས་སྒོམ་སྡེ་བསོད་ནམས་རིན་ཆེན་གྱིས་བསྐུལ་ནས་བྲིས་པའོ། །སྨན་བླའི་གནོད་སྦྱིན་བཅུ་གཉིས་འཇིག་རྟེན་པ་ཡིན་པས་ཕྱག་དང་སྐྱབས་འགྲོ་མི་རུང་ཅེས་པ་ནི་ཇོ་གདན་འགའ་ཞིག་གིས་འདོད་ཅིང་།  དེའི་གཡོག་
བདུན་འབུམ་ལ་ཕྱག་མཆོད་བྱེད་པ་ནི་དེང་སང་གཙང་ཕྱོགས་ཀྱི་ཆོས་སྡེ་ཕལ་ཆེར་རོ། །རྟེན་གྱི་ནང་རྫོངས་ཀྱི་གཟུངས་མཐའ་ནས་སྒྲིལ་བ་ནི་ངོར་པ་མ་གཏོགས་པ་གཞན་ཀུན་ནོ། །གནོད་སྦྱིན་ཕོ་མོའི་འཁོར་ལོ་ལ་ཕོ་འཁོར་འོག་དང་མོ་འཁོར་སྟེང་དུ་བྱེད་
པ་ནི་བུ་སྟོན་པའི་གྲུབ་མཐའ་འོ། །སྔགས་སྡོམ་གྱི་སྐབས་ཀྱི་ཕྱོགས་སྔ་མདོར་བསྡུས་པའོ། །རྡོ་རྗེ་ཐེག་པའི་ས་བཅུ་གཅིག་པ་དང་།  བཅུ་གཉིས་པ་གཉིས་ཕ་རོལ་ཏུ་ཕྱིན་པའི་ས་བཅུ་པར་བསྡུ་དགོས་སོ་ཞེས་པ་ནི་ཙོང་ཁ་པ་དང་།  རང་
ལུགས་ཀྱི་བླ་མ་ཕྱི་མ་ཁ་ཅིག་གོ། །ཕ་རོལ་ཏུ་ཕྱིན་པའི་ཐེག་པ་ནས་བཤད་པའི་སྐུ་གསུམ་ཡེ་ཤེས་བཞི་རྡོ་རྗེ་ཐེག་པའི་ས་བཅུ་གཅིག་པ་ཡིན་པས་དེའི་གོང་དུ་ཡང་ས་བཅུ་གཉིས་པ་དང་།  བཅུ་གསུམ་པ་བགྲོད་དགོས་པར་འདོད་པ་ནི་རང་ལུགས་
ཀྱི་ས་བཅུ་གསུམ་བསྒྲུབ་པར་འདོད་ཀྱང་སྒྲུབ་བྱེད་ཐལ་ཆེས་པ་འགའ་ཞིག་གོ། །འབྲས་བུའི་སྐབས་ཀྱི་ཕྱོགས་སྔ་མདོར་བསྡུས་པ་སྟེ་སྡོམ་གསུམ་ཁ་སྐོང་གི་ཕྱོགས་སྔ་ངོས་འཛིན་བསྟན་ཟིན་ཏོ། །ཆོས་དབྱིངས་ཡོད་པའང་མ་ཡིན་ཏེ། །
10-3-4b


ཡོད་ཙམ་མི་རྟག་གིས་ཁྱབ་པར། །ཆོས་ཀྱི་གྲགས་པས་ལེགས་པར་གསུངས། །ཞེས་པའི་དོན་སྒྲ་དྲང་ཐད་དུ་ཁས་ལེན་རྒྱུ་ཡིན་ནམ་ཅེས་པའི་ལན་ནི་གྲུབ་མཐའ་བཞིའི་ཡོད་པའི་དོན་ངོས་བཟུང་བ།  དེ་དག་ལ་མི་རྟག་པས་ཁྱབ་པར་འདོད་མི་འདོད་
དཔྱད་པ།  སྐབས་ཀྱི་དོན་ངོས་གཟུང་བ་དང་གསུམ་གྱིས་རྟོགས་པར་བྱའོ། །དང་པོ་ནི་བྱེ་བྲག་ཏུ་སྨྲ་བའི་ལུགས་ལ་ཀུན་རྫོབ་ཏུ་ཡོད་པ་དང་།  དོན་དམ་དུ་ཡོད་པ་གཉིས་ལས།  དང་པོ་ནི་བཅོམ་པའམ་གཞིགས་པ་ན་དེ་འཛིན་གྱི་བློ་
འདོར་བ་སྟེ།  བུམ་པ་དང་འཇིག་རྟེན་ན་གྲགས་པའི་ཆུ་ལ་སོགས་པའོ། །གཉིས་པ་ནི་བཅོམ་གཞིག་བྱས་པ་ན་དེ་འཛིན་གྱི་བློ་མི་འདོར་བ་སྟེ།  ཤེས་བྱ་གཞི་ལྔའོ། །མདོ་སྡེ་པའི་ལུགས་ལ་ཀུན་རྫོབ་ཏུ་ཡོད་པ་ནི་དོན་དམ་པར་དོན་བྱེད་དེ་མི་ནུས་
པ་སྟེ་སྤྱི་མཚན་རྣམས་སོ། །དོན་དམ་དུ་ཡོད་པ་ནི་དོན་དམ་པར་དོན་བྱེད་ནུས་པ་སྟེ་རང་མཚན་རྣམས་སོ། །སེམས་ཙམ་པའི་ལུགས་ལ་ཀུན་རྫོབ་ཏུ་ཡོད་པ་ནི་གང་ལ་དམིགས་ན་ཀུན་ནས་ཉོན་མོངས་པ་སྐྱེ་བ་སྟེ།  ཀུན་བཏགས་
དང་།  མ་དག་གཞན་དབང་ངོ་། །དོན་དམ་དུ་ཡོད་པ་ནི་གང་ལ་དམིགས་ན་རྣམ་པར་བྱང་བ་སྐྱེ་བ་སྟེ་དག་པ་གཞན་དབང་དང་ཡོངས་གྲུབ་རྣམས་སོ། །དབུ་མ་པའི་ལུགས་ལ་དོན་དམ་དུ་ཡོད་པ་ནི་ཅི་ཡང་མི་འདོད་ཅིང་།  ཀུན་རྫོབ་ཏུ་ཡོད་པ་
ལ་ལོག་པའི་ཀུན་རྫོབ་ཏུ་ཡོད་པ་དང་ཡང་དག་ཀུན་རྫོབ་ཡོད་པ་གཉིས་ལས།  དང་པོ་ནི་ཡང་དག་ཀུན་རྫོབ་མི་བདེན་པར་བསྒྲུབ་པའི་དཔེ་ཙམ་ཡིན་གྱི་འཇིག་རྟེན་གྱི་ཐ་སྙད་དུ་ཡོད་པ་མིན་ནོ། །ཕྱི་མ་ནི་འཇིག་རྟེན་གྱི་ཐ་སྙད་དུ་ཡོད་པ་
10-3-5a


དང་།  ཐ་སྙད་བདེན་པ་དང་།  འཇིག་རྟེན་ཀུན་རྫོབ་བདེན་པ་ཞེས་མིང་གི་རྣམ་གྲངས་གསུམ་དང་ལྡན་པ་སྟེ།  མདོར་ན་སྟོང་ཉིད་ཉི་ཤུའི་སྟོང་གཞིའི་ཆོས་ཅན་རྣམས་ཡིན་ཞིང་།  བསྡུ་ན་ཆོས་དང་གང་ཟག་གཉིས་སུ་
འདུས་སོ། །གཉིས་པ་ནི་འོ་ན་གྲུབ་མཐའ་སྨྲ་བ་བཞི་པོ་དེ་དག་གི་རང་རང་གི་ལུགས་ཀྱི་ཡོད་པ་ལ་མི་རྟག་པས་ཁྱབ་པར་འདོད་དམ་མི་འདོད་ཅེ་ན་དངོས་པོར་སྨྲ་བ་གསུམ་ཅར་གྱིས་ཀུན་རྫོབ་ཏུ་ཡོད་པ་རྣམས་ནི་མ་དཔྱད་པའི་བློ་ངོར་ཡོད་པ་ཙམ་ཡིན་
པས་ཡོད་ན་མི་རྟག་པས་ཁྱབ་མ་ཁྱབ་དཔྱད་པའི་གཞི་མ་ཡིན་པས་དོན་དམ་དུ་ཡོད་པ་ལ་དཔྱད་དགོས་སོ། །དེ་ལ་བྱེ་སྨྲས་དོན་དམ་དུ་ཡོད་པ་ལ་མི་རྟག་པས་ཁྱབ་པ་མི་འདོད་དེ།  འདུས་མ་བྱས་ཀྱི་གཞི་དོན་དམ་དུ་ཡོད་པར་འདོད་
པའི་ཕྱིར་རོ། །མདོ་སྡེ་པས་དོན་དམ་དུ་ཡོད་ན་མི་ག་པས་ཁྱབ་པར་འདོད་དེ།  དོན་དམ་དུ་ཡོད་པའི་དོན་རང་འབྲས་བསྐྱེད་ནུས་ཡིན་ལ།  རྟག་པས་རང་འབྲས་བསྐྱེད་ནུས་ན་འབྲས་བུ་ཐམས་ཅད་ཅིག་ཅར་དུ་བསྐྱེད་པར་ཐལ་
བའི་ཕྱིར་རོ། །རྣམ་འགྲེལ་ལས།  འཇིག་པ་ཡོད་ཙམ་འབྲེལ་པ་ཅན། །ཉིད་ཕྱིར་སྒྲ་ནི་མི་རྟག་ཉིད། །ཅེས་སོགས་ཡོད་ཙམ་ལ་མི་རྟག་པས་ཁྱབ་པར་གསུངས་པའི་གཞུང་ལྔ་ཡོད་པ་ཡང་འདིའི་དབང་དུ་བྱས་པའོ། །སེམས་
ཙམ་པས་ནི་དོན་དམ་དུ་ཡོད་པ་ལ་མི་རྟག་པས་ཁྱབ་པར་འདོད་པ་མ་ཡིན་ཏེ།  ཆོས་དབྱིངས་དོན་དམ་དུ་ཡོད་པའི་ཕྱིར་རོ། །དབུ་མ་པས་ནི་ལོག་པའི་ཀུན་རྫོབ་ཏུ་ཡོད་པ་ལ་མི་རྟག་པས་ཁྱབ་པར་མི་འདོད་ཅིང་།  ཡང་དག་ཀུན་རྫོབ་ཏུ་
10-3-5b


ཡོད་པ་ལ་ཡང་མི་རྟག་པས་ཁྱབ་པར་མི་འདོད་དེ།  སྟོང་གཞིའི་ཆོས་ཅན་ཐམས་ཅད་ཡང་དག་ཀུན་རྫོབ་ཏུ་ཡོད་པར་འདོད་པའི་ཕྱིར་རོ། །དོན་དམ་དུ་ཡོད་པ་ནི་མི་འདོད་པས་དཔྱད་པར་བྱ་བའི་གཞི་མ་ཡིན་ནོ། །གསུམ་པ་ནི་ཆོས་དབྱིངས་
ཡོད་པའང་མ་ཡིན་ཏེ། །ཅེས་སོགས་ཀྱི་གཞུང་གྲུབ་མཐའ་སྨྲ་བ་གང་གི་དབང་དུ་བྱས་སྙམ་ན།  འདི་ནི་དབུ་མ་པའི་དབང་དུ་བྱས་ཏེ།  སྡོམ་གསུམ་རབ་དབྱེ་རང་གི་རང་ལུགས་འཆད་པའི་སྐབས་ཡིན་པའི་ཕྱིར་རོ། །འོ་
ན་ལུགས་དེ་ལ་དོན་དམ་དུ་ཡོད་པ་ནི་དཔྱད་གཞི་མ་ཡིན།  ཀུན་རྫོབ་ཏུ་ཡོད་པ་ལ་མི་རྟག་པས་མ་ཁྱབ་པར་གོང་དུ་སྨྲས་ཟིན་པས་ད་ཇི་ལྟར་བྱ་སྙམ་ན་ཆོས་དབྱིངས།  འགྲོ་ཀུན་དགེ་བ་ཇི་སྙེད་ཡོད་པ་དང་། །ཅེས་པའི་སྐབས་ཀྱི་
དགེ་བ་ཡིན་ན་ཡོད་པ་འདི་ལ་གསུམ་ལས།  དངོས་པོ་སྟོང་པ་ཉིད་ཀྱི་སྟོང་གཞིའི་ཆོས་ཅན་ལྟ་བུ་དངོས་པོ་ལ་ཡོད་པར་གཞག་པ་དང་།  དངོས་པོ་མེད་པ་སྟོང་པ་ཉིད་ཀྱི་སྟོང་གཞིའི་ཆོས་ཅན་ལྟ་བུ་དངོས་མེད་ལ་ཡོད་པར་བཞག་པ་དང་།  རང་
བཞིན་སྟོང་པ་ཉིད་ཀྱི་སྟོང་གཞིའི་ཆོས་ཅན་ལྟ་བུ་གཉིས་ཀ་མ་ཡིན་པའི་སྤྲོས་བྲལ་ལ་ཡོད་པར་བཞག་པ་གང་ཡིན།  དང་པོ་ལྟར་ན་ཆོས་དབྱིངས་སྐབས་དེའི་ཡོད་པ་མ་ཡིན་ཏེ།  སྐབས་དེའི་ཡོད་པ་ལ་མི་རྟག་པས་ཁྱབ་པར་ཆོས་ཀྱི་
གྲགས་པས་མདོ་སྡེ་པའི་སྐབས་སུ་གསུངས་པ་དེ་ཉིད་དབུ་མ་པའི་ལུགས་ལ་ཡང་ཁྱད་པར་མེད་པའི་ཕྱིར་རོ། །སྐབས་དེའི་ཡོད་པ་ནི་དོན་བྱེད་ནུས་པ་ཡིན་པས་རྟག་པས་དོན་བྱེད་ནུས་ན་དོན་ཐམས་ཅད་ཅིག་ཆར་བྱེད་པར་
10-3-6a


ཐལ་བའི་རིགས་པ་དབུ་མ་པས་ཀྱང་ཇ་བུ་རམ་གསོལ་བ་དང་འདྲ་བའི་ཕྱིར་རོ། །གཉིས་པ་ལྟར་ན་དངོས་མེད་ཡིན་ན་བྱ་བྱེད་མེད། །ཅེས་པ་དང་།  གསུམ་པ་ལྟར་ན།  གལ་ཏེ་སེམས་ཅན་ཁམས་དངོས་དང་། །
དངོས་མེད་གཉིས་ཀ་མ་ཡིན་པར། །སྤྲོས་བྲལ་ཡིན་ན་སྔར་བཤད་པའི། །ཆོས་ཀྱི་དབྱིངས་ལས་འདའ་བ་མེད། །ཅེས་པའི་སྐབས་སུ་འཆད་པར་འགྱུར་བ་ལ་དགོངས་ནས་འདིར་མ་སྨོས་པར་དང་པོ་ཁོ་ན་སྨོས་པ་སྟེ་གཞུང་
ལུགས་སྔར་ཤེས་པའམ།  སྔར་མི་ཤེས་ན་ཡང་དཔྱད་པའི་ནུས་པ་ཡོད་པ་རྣམས་ཀྱི་དགའ་སྟོན་མཛོད་ཅིག །རྣམ་དཔྱོད་ཉི་འོད་ཀྱིས་ཕྱེ་བའི། །དྲིས་ལན་པད་མོ་བཞད་པ་འདི། །དོན་གཉེར་རྐང་དྲུག་ལྡན་པ་ཁྱོད། །ཟབ་དོན་
སྦྲང་རྩིའི་འབྱུང་གནས་མཛོད། །རྣམ་དཀར་དགེ་ཚོགས་གང་ཐོབ་དེས། །མཁའ་མཉམ་འགྲོ་བ་མ་ལུས་པའི། །རྨོངས་པའི་མུན་པ་དྲུངས་ཕྱུང་ནས། །ཡེ་ཤེས་ཉི་མ་ཐོབ་པར་ཤོག །ཅེས་པ་འདི་ནི་མང་དུ་ཐོས་པའི་དགེ་སློང་བསོད་
ནམས་སེང་གེས་ཟིལ་གནོན་པ་དཀོན་མཆོག་རྒྱལ་མཚན་ལ་མདོ་ཁམས་ཤར་གྱི་ཕྱོགས་སུ་བསྐུར་བའོ།།  ༈   །།ཉི་ཟླ་སེང་གེའི་དྲིས་ལན་བཞུགས་སོ། །རྗེ་བཙུན་བླ་མ་དམ་པ་དམིགས་པ་མེད་པའི་ཐུགས་རྗེ་དང་།  བསམ་གྱིས་མི་ཁྱབ་པའི་མཁྱེན་
རབ་ཟུང་དུ་འཇུག་པའི་བདག་ཉིད།  དབང་དང་།  བྱིན་རླབས་དང་།  དངོས་གྲུབ་ཐམས་ཅད་ཀྱི་འབྱུང་གནས་སུ་གྱུར་པ་རྣམས་ཀྱི་ཞབས་ཀྱི་པདྨོ་དྲི་མ་མེད་པ་ལ་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་དུས་ཐམས་
10-3-6b


ཅད་དུ་རྗེས་སུ་གཟུང་དུ་གསོལ།  དགེ་བའི་བཤེས་གཉེན་ཉི་ཟླ་སེང་གེའི་དྲི་བ་རྣམས་ཀྱི་ལན་མདོར་བསྡུས་ཙམ་ཞིག་བརྗོད་པ་ནི།  དྲི་བ་དང་པོ་རང་རྒྱལ་གྱིས་ལྟ་བ་བདག་མེད་ཕྱེད་དང་གཉིས་རྟོགས་པའི་དབང་དུ་བྱས་པ་འདི་གྲུབ་
མཐའ་སྨྲ་བ་བཞི་པོ་གང་དུ་སྡུད་ལགས་ཞེས་པའི་ལན་ནི།  འདི་དབུ་མ་པའི་གྲུབ་མཐར་སྡུད་དེ།  རྗེ་བཙུན་རྩེ་མོ་ཉིད་ཀྱིས་མངོན་རྟོགས་རྒྱན་གྱི་ལུང་ཁུངས་སུ་དྲངས་ནས་དེའི་རྣམ་གཞག་མཛད་པའི་ཕྱིར་རོ། །དེ་ལྟ་ན་བླ་མེད་ཀྱི་བསྐྱེད་ཆོག་
དང་སྦྱར་དགོས་པར་འགྱུར་རོ་སྙམ་པའི་དོགས་པ་ཁོང་དུ་བཞག་པ་ཡིན་མཆི།  དེའི་དོན་འདི་ལྟར་ཡིན་ཏེ།  སྤྱིར་སངས་རྒྱས་པའི་མཚན་ཉིད་ཀྱི་གྲུབ་མཐའ་ལ་བརྗོད་དུ་མེད་པའི་གང་ཟག་གི་བདག་ཁས་ལེན་པ་དང་།  གཟུང་བ་ཕྱི་
རོལ་གྱི་དོན་བདེན་གྲུབ་ཁས་ལེན་པ་དང་།  གཟུང་བ་མེད་ཀྱང་འཛིན་པ་ཡོད་པར་ཁས་ལེན་པ་དང་།  གཟུང་བ་མེད་པས་དེ་འཛིན་མེད་པར་ཁས་ལེན་པ་བཞི་ཡོད་པས།  དེ་དང་རྒྱུད་སྡེ་བཞིའི་བསྐྱེད་ཆོག་རིམ་པ་བཞིན་དུ་སྦྱར་ཞེས་པའི་
དོན་ཡིན་གྱི།  གྲུབ་མཐའ་བཞི་པོ་དེ་ལ་གང་བཤད་ཀྱི་རྣམ་གཞག་ཐམས་ཅད་དང་རྒྱུད་སྡེ་བཞིའི་བསྐྱེད་ཆོག་སྦྱར་བ་མ་ཡིན་ཏེ།  དཔེར་ན་མཛོད་ལས་གསུངས་པའི་ཁ་ཆེ་བྱེ་བྲག་ཏུ་སྨྲ་བའི་རྣམ་གཞག་ཐམས་ཅད་སྤྱོད་རྒྱུད་ཀྱི་བསྐྱེད་ཆོག་དང་ཇི་
ལྟར་འགྲིག །དེས་གཞན་རྣམས་ལ་ཡང་སྦྱར་བར་བྱའོ། །དྲི་བ་གཉིས་པ་མཐར་ཐུག་གི་འབྲས་བུ་སྐུ་བཞིར་བཤད་པ་དབང་བཞིའི་ལམ་གྱི་འབྲས་བུར་འདོད་ན།  སྡུད་འགྲེལ་དུ།  སྐུ་བཞིའི་རྣམ་གཞག་གསུངས་པའི་དགོངས་པ་
10-3-7a


ཇི་ལྟར་འཆད་ལགས།  ཞེས་པའི་ལན་ནི་རྗེ་བཙུན་རྩེ་མོས་ཕ་རོལ་ཏུ་ཕྱིན་པའི་ཐེག་པར་སྐུ་གསུམ་དང་ཡེ་ཤེས་བཞི་ལས་མ་བཤད་ལ།  རྡོ་རྗེ་ཐེག་པར་སྐུ་བཞི་དང་།  ཡེ་ཤེས་ལྔ་བཤད་པས་ཁྱད་པར་དུ་འཕགས་
པར་གསུངས་པ་དེ་ཉིད་གསུང་རབ་ཀྱི་དགོངས་པ་ཡིན་མོད།  འགྲེལ་ཚུལ་གྱི་དབང་དུ་བྱས་ན་འཕགས་པ་གྲོལ་སྡེ་སོགས་ཕལ་ཆེར་གྱིས་སྐུ་གསུམ་དུ་འགྲེལ་ཞིང་།  མཁན་པོ་རྣམ་སྣང་མཛད་དང་ཡེ་ཤེས་ཟླ་བ་སོགས་སྐུ་བཞིར་འགྲེལ་པ་དེ་
ཉིད་སློབ་དཔོན་སེང་གེ་བཟང་པོས་མངོན་རྟོགས་རྒྱན་གྱི་སྐབས་བརྒྱད་པའི་འགྲེལ་པར་བཀོད་པ་སོགས་གཉིས་ཡོད་པའི་ནང་ནས་ཕྱི་མ་ཕ་རོལ་ཏུ་ཕྱིན་པའི་གཞུང་ལུགས་འཆད་པ་རྣམས་ཀྱིས་ཀྱང་དགག་སྒྲུབ་ཀྱི་གནས་སུ་བྱེད་དོ། །སྡུད་
འགྲེལ་གྱི་དགོངས་པ་ནི་སྐུ་བཞི་ཡིན་པའི་ངེས་པ་ཡང་མེད་དེ།  སངས་རྒྱས་རྒྱུད་དང་ཞེས་པས་ཆོས་སྐུ།  ཆོས་ཀྱི་རྒྱུད་ཀྱང་ཡོངས་སུ་འཛིན་ཅེས་པས་ལོངས་སྐུ།  དེ་བཞིན་དགེ་འདུན་རྒྱུད་དང་ཞེས་པས་སྤྲུལ་སྐུ་བསྟན་པར་གསུངས་
ཤིང་།  སྐུ་བཞི་ཡིན་ན།  ཆོས་ཀུན་ཡོངས་སུ་འཛིན་ཞེས་པ་ངོ་བོ་ཉིད་སྐུ་ལ་སྦྱར་དགོས་པ་ལས་དེ་མ་སྦྱར་བའི་ཕྱིར་རོ། །དྲི་བ་གསུམ་པ་རྗེ་བཙུན་གྱིས་རྡོ་རྗེ་འབྱུང་བའི་དཀྱིལ་ཆོག་གི་ཊཱི་ཀར།  ཁྲོ་བོའི་དབང་གཅིག་པོ་ལ་དེ་བཞིན་གཤེགས་
པ་དང་ཁྲོ་བོའི་དབང་རྟགས་གཉིས་ཀ་བཤད་མཆིས་པ་དེའི་དགོངས་པ་ཇི་ལྟར་འཆད་ཞེས་པའི་ལན་ནི།  ཁྲོ་བོའི་དབང་རྟགས་ནི་གནས་ལྔར་རྡོ་རྗེ་རྩེ་ལྔ་པ་རེ་རེ་བསྒོམ་པ་ཡིན་ཅིང་དེ་བཞིན་གཤེགས་པའི་དབང་རྟགས་ནི་དེ་བཞིན་
10-3-7b


གཤེགས་པ་ལྔ་ཞལ་ཕྱག་གི་རྣམ་པ་ཅན་བསྒོམ་པ་ཡིན་ལ།  དེས་ན་དེ་བཞིན་གཤེགས་པའི་དབང་ལ་ནི་ཕྱི་མ་འབའ་ཞིག་ལས་མེད་ཅིང་ཁྲོ་བོའི་དབང་ལ་རྡོ་རྗེ་རྩེ་ལྔ་པ་དེ་དག་གི་སྟེང་དུ་ཡང་དེ་བཞིན་གཤེགས་པ་རྣམ་པ་ལྔ་ཞལ་ཕྱག་གི་
རྣམ་པ་ཅན་བསྒོམ་པ་ལ་དགོངས་ཏེ།  ཊཱི་ཀ་དེ་ཉིད་ལས།  རྡོ་རྗེ་ཕྲེང་བའི་དབང་བསྐུར་བ་ཉིད་གནས་ལྔ་པོ་དེར་རྡོ་རྗེ་རྩེ་ལྔ་པ་འགྲེང་བུ་རེ་བསྒོམས་ལ་དེ་རྣམས་ཀྱི་སྟེང་དུ་དེ་བཞིན་གཤེགས་པ་ལྔ་སྐུ་མདོག་དང་ཕྱག་རྒྱ་བཅས་པ་བསྒོམ་མོ།  
ཞེས་གསུངས་པས་སོ། །དེ་ཉིད་ཀྱི་མཚོན་དོན་གང་ཡིན་སྙམ་ན་རྡོ་རྗེ་རིགས་ཀྱི་ཁྲོ་བོར་མཚོན་པའི་ཆེད་དུ་དབང་རྟགས་རྡོ་རྗེ་དང་།  དེ་ཉིད་ཀྱང་དེ་བཞིན་གཤེགས་པ་རིགས་ལྔའི་བདག་ཉིད་ཡིན་ནོ་ཞེས་མཚོན་པའི་ཆེད་དུ་དེ་བཞིན་
གཤེགས་པའི་དབང་རྟགས་འབྱུང་བར་མངོན་ནོ། །དྲི་བ་བཞི་པ་ཞལ་སྔ་ནས་མཛད་པའི་འཇིགས་བྱེད་ཀྱི་སྒྲུབ་དཀྱིལ་འདི་བརྒྱུད་པ་བདེ་མཆོག་དང་མཐུན་པ་དེའི་ལུགས་སུ་མཛད་ནས།  ཡེ་ཤེས་ཞབས་ལུགས་ཀྱི་བརྒྱུད་པ་སྨོས་མཆིས་
པ་དེའི་དགོངས་པ་གང་ཡིན་ལགས་ཞེས་པའི་ལན་ནི།  བརྒྱུད་པ་བདེ་མཆོག་དང་མཐུན་པ་དེའི་ལུགས་སུ་མཛད་ཅེས་པ་ཡང་འདི་རྗེ་བཙུན་ནཱ་རོ་པའི་མན་ངག་ཡིན་པས་བདག་བསྐྱེད་ལ་ཚོགས་བསག་བཅུ་གསུམ་དང་།  རྟེན་བརྟེན་པ་
ཅིག་ཆར་དུ་བསྐྱེད་པ་དང་།  སྔགས་མཆོད་ལ་སོགས་པའི་མཆོད་པ་ལྔ་བྱེད་པ་དང་།  མདུན་བསྐྱེད་ཀྱི་སྐབས་སུ་ཐོག་མར་དཀྱིལ་འཁོར་སྦྱངས་ནས་བསྒྲུབ་པ་སོགས་ནཱ་རོ་ཏ་པའི་བདེ་མཆོག་གི་མན་ངག་དང་མཐུན་ཞེས་པ་ཙམ་ཡིན་གྱི་
10-3-8a


བརྒྱུད་པ་བདེ་མཆོག་གི་ལུགས་སུ་བྱས་པ་ནི་ཅི་ཡང་མེད་དོ། །དེས་ན་ནཱ་རོ་པ་ཡན་ཆད་ཀྱི་བརྒྱུད་པ་ཡེ་ཤེས་ཞབས་ལུགས་ལ་འདེད་པ་འགལ་བ་མེད་དོ། །དྲི་བ་ལྔ་པ་ཡེ་ཤེས་ཞབས་ལུགས་ཀྱི་གསང་འདུས་དང་གཤེད་སྐོར་
གྱི་སྐབས་འགའ་ཞིག་ཏུ་བདག་བསྐྱེད་ཀྱི་ཡེ་ཤེས་པ་གཤེགས་གསོལ་བྱེད་པ་གདའ་མཆིས་པ་དེའི་དགོངས་པ་ཇི་ལྟར་ལགས་ཞེས་པའི་ལན་ནི།  དེ་དག་དང་ཀྱེ་རྡོར་གྱི་ལུགས་འགའ་ཞིག་ཏུ་དེ་ལྟར་འབྱུང་མོད།  བླ་མེད་རྡོ་རྗེ་
སྙིང་པོ་རྒྱན་གྱི་རྒྱུད་ལ་དེ་ལྟར་ཡོད་གསུངས་པས་དེའི་དབང་དུ་བྱས་པའམ།  རྣལ་འབྱོར་རྒྱུད་ཀྱི་ཆོ་གས་རྒྱས་གདབ་པ་གང་རུང་ཡིན་མཆི།  བླ་མ་གོང་མས་རྒྱུད་སྡེ་བཞིའི་བསྐྱེད་ཆོག་གི་ཁྱད་པར་གསུངས་པ་དང་།  དེ་དག་གིས་
བརྟེན་པའི་རྒྱུད་གཞུང་ཁུངས་ཐུབ་རྣམས་དང་མི་མཐུན་པར་སྣང་བས་ལུགས་འདི་ལ་གནོད་སྒྲུབ་གང་ཡང་མེད་དོ། །དྲི་བ་དྲུག་པ་འདུས་པ་འཕགས་ལུགས་སུ་དཔུང་སྐུད་གཡས་ལ་འཆིང་བ་དང་།  རྣམ་སྣང་ཆུ་དབང་དུ་
བྱེད་པ་གང་གི་རྟེན་འབྲེལ་ལ་དགོངས་པ་ཡིན་ལགས་ཞེས་པའི་ལན་ནི།  འདིར་ཐབས་ཀྱི་རྒྱུད་གཙོ་ཆེ་བ་ལ་དགོངས་པ་ཡིན་ནོ། །འོ་ན་གཤིན་རྗེའི་གཤེད་ཀྱི་སྐོར་རྣམས་ལ་ཅིའི་ཕྱིར་དེ་ལྟར་མི་འབྱུང་སྙམ་ན།  རྒྱུད་སྡེ་སྤྱི་རྣམ་
དུ་ཐབས་ཤེས་རབ་ཀྱི་རྒྱུད་ཀྱི་ཁྱད་པར་གསུངས་པ་རྣམས་ཐབས་རྒྱུད་ཀྱི་གཙོ་བོ་གསང་བ་འདུས་པ་དང་།  ཤེས་རབ་ཀྱི་རྒྱུད་ཀྱི་གཙོ་བོ་འཁོར་ལོ་བདེ་མཆོག་ལྟ་བུ་ལ་ཚང་བ་ཡིན་གྱི་མཐའ་གཅིག་ཏུ་མ་ངེས་པ་ལྟར་འདིར་ཡང་སངས་
10-3-8b


རྒྱས་ཐོད་པའི་རྒྱུད་ལས།  བརྟུལ་ཞུགས་མཐར་ཕྱིན་སངས་རྒྱས་ཐོད། །ལས་ཚོགས་མཐར་ཕྱིན་གཤིན་རྗེའི་གཤེད། །རྒྱུད་ཀྱི་མཐར་ཐུག་འདུས་པ་སྟེ། །མ་བྱུང་འབྱུང་བར་མི་འགྱུར་རོ། །ཞེས་གསུངས་པ་ལྟར་ཕ་རྒྱུད་ཀྱི་གཙོ་བོའམ་
མཐར་ཐུག་ཡིན་པས་ཁྱད་པར་དེ་དག་ཚང་བའོ། །ཞེས་གསུངས་པའི་སྒྲོས་ཀྱང་ཡོད་མོད་ཀྱི།  མཚོ་སྐྱེས་ལུགས་ཀྱི་དཀྱིལ་ཆོག་ཏུ་སྐྱེས་པའི་གཡོན་དང་།  བུད་མེད་ཀྱི་གཡས་སུ་འཆིང་བར་བཤད་པས་ཁམས་དཀར་
དམར་གྱི་བར་ཆད་བསྲུང་བའི་ཆེད་ཡིན་ཏེ་སྐྱེས་པ་ལ་ཁམས་དཀར་པོའི་བར་ཆད་དང་།  བུད་མེད་ལ་དམར་པོའི་བར་ཆད་ཤས་ཆེ་བས་དེ་ལ་དགོངས་ནས་གསུངས་པའི་ཕྱིར་རོ། །རིགས་པ་དེས་སྐྱེས་པ་བུད་མེད་གང་
ལ་ཡང་།  གཡས་སུ་འཆིང་བ་ཁམས་དམར་པོའི་བར་ཆད་བསྲུང་བ་དང་།  གཡོན་དུ་འཆིང་བ་ཁམས་དཀར་པོའི་བར་ཆད་བསྲུང་བ་ཡིན་པས་གང་ལ་འཆིང་ཡང་མི་འགལ་བ་ནི་ཁོ་བོའི་རྟོག་པའོ། །འོ་ན་སྔ་མས་ཐབས་
གཙོ་ཆེ་བ་མཚོན་ནུས་ཀྱང་ཕྱི་མས་ཅི་ལྟར་མཚོན་སྙམ་ན།  སྦྱང་གཞི་རགས་པ་གཟུགས་ཕུང་སྦྱོང་བའི་ལྷ་རྣམ་སྣང་དང་།  དབང་རྫས་རགས་པ་བུམ་པའི་ཆུ་སྦྱར་བས་མཚོན་པའོ། །སྤྱིར་ཡང་རྣམ་སྣང་དང་མི་བསྐྱོད་པ་གཉིས་ལ་
མེ་ལོང་ལྟ་བུའི་ཡེ་ཤེས་དང་།  ཆོས་དབྱིངས་ཡེ་ཤེས་གཉིས་ཀ་ལ་གཉིས་ཀ་སྦྱར་བའི་རྣམ་གཞག་མང་དུ་གསུངས་པས་མཐའ་གཅིག་ཏུ་མ་ངེས་པའོ། །དྲི་བ་བདུན་པ་བརྟག་གཉིས་ཀྱི།  ཕྱག་མཚན་ཞལ་སོགས་གོང་མ་བཞིན། །ཅེས་པའི་
10-3-9a


འཕགས་མཆན་དུ་ལེའུ་གཉིས་པ་དང་གསུམ་པ་བཞིན་ཞེས་འབྱུང་བའི་གསུམ་པ་དེ་གང་ལ་སྙེགས་པ་ཡིན་ལགས་ཞེས་པའི་ལན་ནི།  ཁོང་པ་རང་གི་དགོངས་པ་ལེའུ་བརྒྱད་པའི་མཉམ་སྦྱོར་ལས་ཧེ་རུ་ཀ་བཞི་ཆར་
བསྐྱེད་དགོས་པས་ཧེ་རུ་ཀ་དང་པོ་གསུམ་བསྐྱེད་པའི་ཚེ་ཕྱག་མཚན་ཞལ་སོགས་ལེའུ་གསུམ་པ་ནས་འབྱུང་བ་བཞིན་བྱས་ནས་སྐུ་མདོག་དཀར་པོར་བྱེད་དོ་ཞེས་དགོངས་པ་ཡིན་མཆི།  རྗེ་བཙུན་གོང་མའི་དགོངས་པ་ལ་ནི་འདི་མི་དགོས་ཏེ།  
རྩ་རྒྱུད་ཀྱི་ཧེ་རུ་ཀ་གསུམ་ལ་ནི་མཉམ་སྦྱོར་མེད་ཅིང་གུར་གྱི་ཧེ་རུ་ཀ་བཞི་ཀ་ལ་མཉམ་སྦྱོར་སྦྱར་བའི་ཚེ་མཉམ་སྦྱོར་ལས་རྒྱུ་རྡོ་རྗེ་འཛིན་པ་ཞལ་བརྒྱད་ཕྱག་བཅུ་དྲུག་པ་བསྐྱེད་པ་བཞི་ཆར་ལ་འདྲ་ཞིང་།  ཞུ་བ་གླུས་བསྐུལ་ནས་འབྲས་བུ་
རྡོ་རྗེ་འཛིན་པ་ཧེ་རུ་ཀ་བཞི་པོ་སོ་སོར་བཞེངས་པ་གུར་རྒྱན་ཉིད་ལས་གསལ་བར་གསུངས་པའི་ཕྱིར་རོ། །དྲི་བ་བརྒྱད་པ་འགྲེལ་པ་དག་ལྡན་དུ་རྣལ་འབྱོར་སྤྱོད་པའི་དབུ་མ་པ་རྣམས་ནི་ཚོགས་དྲུག་པོ་ཙམ་ལ་འདོད་དོ་ཞེས་འབྱུང་བ་འདིའི་
དོན་ཇི་ལྟར་ལགས་ཞེས་པའི་ལན་ནི་རྣལ་འབྱོར་སྤྱོད་པ་པ་རྣམས་ནི་ཞེས་པ་ཡོད་ཀྱི་དབུ་མ་པ་ཞེས་པའི་ཚིག་མེད།  དེའི་དོན་རྣལ་འབྱོར་སྤྱོད་པ་བས།  རྩ་རྒྱུད་དུ་སེམས་མེད་ཅེས་པའི་བདེན་པར་མེད་རྒྱུའི་སེམས་ཚོགས་དྲུག་ལ་རང་
དུས་སུ་གཟུང་འཛིན་གཉིས་སུ་སྣང་བ་ཙམ་དེ་ཉིད་ཚོགས་དྲུག་གི་ངོ་བོ་ཡིན་ཀྱང་བདེན་པར་མེད་དེ།  གཟུང་བ་མེད་པས་དེ་འཛིན་མེད་པ་སེམས་ཙམ་པའི་གྲུབ་མཐའི་སྙིང་པོ་ཡིན་པའི་ཕྱིར་རོ། །འདིའི་དཔང་པོ་ལ་ཡེ་ཤེས་སྙིང་པོ་ཀུན་
10-3-9b


ལས་བཏུས་ཀྱི་འགྲེལ་པར།  སེམས་ཙམ་རྣམ་བཅས་པས་ཚོགས་དྲུག་ལ་རང་དུས་སུ་གཟུང་བར་སྣང་བ་ཚོགས་དྲུག་གི་ངོ་བོ་ཡིན་ཀྱང་བདེན་པར་མེད་པར་འདོད་པར་གསུངས་པ་དེ་ཉིད་ཡོད་དོ། །དྲི་བ་དགུ་པ་སཾ་བུ་ཊིའི་སིཧླས་ག་པུར་བསྒོས་པ་
ནི་ཞེས་པའི་འགྲེལ་པ་སིཧླ་ལ་སོགས་པ་རྐང་པ་གསུམ་གྱིས་ནི་བསྟེན་པའི་ཚད་དེ།  གཉིས་ཀའི་བྱང་ཆུབ་ཀྱི་སེམས་དབང་བསྐུར་བ་ལ་དགོས་པའི་ཕྱིར་རོ། །ཞེས་གསུངས་པ་འདིའི་དགོངས་པ་ཇི་ལྟར་འཆད་ལགས་ཞེས་པའི་ལན་
ནི་གཉིས་ཀའི་བྱང་ཆུབ་ཀྱི་སེམས་ཀྱི་སྒྲ་དོན་སྔ་རབས་པ་རྣམས་འཆད་ཚུལ་མང་དུ་བྱུང་ཡང་གོང་མའི་གསུང་རབ་འདི་ཉིད་ཀྱིས་འཁྲུལ་མེད་སྟོན་པར་ནུས་ཏེ།  གསང་དབང་གི་ཚེ་ཡབ་ཀྱི་བྱང་སེམས་ཡུམ་གྱི་མཁར་ཕབ་པ་ཙམ་གྱི་སྦྱོར་བ་
ལས་མི་བྱེད་ལ་དེའི་ཚེ་ཡུམ་གྱི་སིཧླས་ཡབ་ཀྱི་ག་པུར་ཅུང་ཟད་བསྒོས་པ་ཡིན་ལ།  དེས་ཁ་དོག་དམར་པོར་བསྒྱུར་མ་ནུས་པར་དཀར་པོ་ཉིད་དུ་གནས་པས་ན་གཉིས་ཀའི་བྱང་སེམས་ཚང་བ་དང་།  དཀར་བ་ཞེས་པའི་དོན་ཚང་བ་དང་།  
བསྟེན་པའི་ཚད་ཅེས་པའི་ནུས་པ་ཐོན་པ་གསུམ་ཆར་འབྱུང་ངོ་། །ཤེས་རབ་ཡེ་ཤེས་ཀྱི་ཚེ་ཡབ་ཀྱི་རིགས་ཀྱི་བདག་པོའི་ཁ་དང་།  ཡུམ་གྱི་རྩ་མཛེས་པའི་སྤྱི་བོར་ཁམས་དཀར་དམར་ཆ་མཉམ་དུ་འབབ་པའི་བར་དུ་བསྟེན་དགོས་པས་
ན་བསྟེན་ཚད་མི་འདྲ་ཞིང་གཉིས་ཀའི་ཁ་དོག་མི་འདྲ་བའི་གནད་དེ་ཉིད་ཡིན་ནོ། །དྲི་བ་བཅུ་པ་རྗེ་བཙུན་རྩེ་མོའི་རྒྱུད་སྡེ་སྤྱི་རྣམ་དུ་མུ་སྟེགས་མཆོག་གི་ལམ་གྱིས་བདེ་འགྲོ་ཐོབ་པར་གསུངས་པའི་དགོངས་པ་ཅི་ལགས་ཞེས་པའི་ལན་ནི་མུ་
10-3-10a


སྟེགས་མཆོག་རྣམས་སྡིག་པ་དོར་བྱ་དང་།  དགེ་བ་བླང་བྱར་བྱེད་པས་དེའི་རྒྱུ་མཚན་དེ་ཡིན་ནོ། །དྲི་བ་བཅུ་གཅིག་པ་གསུང་ངག་གི་གདན་སོགས་ཀྱི་ཡི་གེར་ཕོ་བྲང་ལྔའམ་དྲུག་ཅེས་གསུངས་པའི་ཕོ་
བྲང་དྲུག་པ་དེ་ས་པཎ་ལ་ཁ་འཕངས་པའི་ཁྲིད་ཀྱི་དཀར་ཆག་དེར་བཤད་པ་ལྟར་རམ།  གཞན་ཞིག་ཡོད་ལགས་ཞེས་པའི་ལན་ནི་དེ་ལྟར་བྱས་ཀྱང་འགལ་བ་མེད་དེ་སྤྱིར་བཤད་རྒྱུད་རྡོ་རྗེ་ཕྲེང་བ་དང་།  རྡོ་རྗེ་སྙིང་འགྲེལ་སོགས་ལས།  ཕོ་བྲང་དྲུག་གསུངས་
པ་ལྟར་བརྒྱུད་པ་འདིའི་ལུགས་ཀྱིས་ཀྱང་དེ་བཞིན་གཤེགས་པ་རིགས་དྲུག་གི་ཕོ་བྲང་དྲུག་གམ།  རིགས་དྲུག་པ་སྤྱི་ཁྱབ་ཏུ་བཏང་ནས་ཕོ་བྲང་ལྔའམ།  བདེ་ཆེན་གྱི་ཕོ་བྲང་གཉིས་གཅིག་ཏུ་བསྡུས་ན་ཕོ་བྲང་བཞིར་འགྱུར་བ་དུ་མ་གསུངས་པའི་ཕྱིར་རོ། །ཕོ་
བྲང་དྲུག་ཏུ་བྱེད་པའི་ཚེ་སྤྱི་བོའི་ཕོ་བྲང་རྣམ་སྣང་གི་དང་།  སྤྱི་གཙུག་གི་ཕོ་བྲང་རྡོ་རྗེ་སེམས་དཔའི་ཕོ་བྲང་དུ་བྱེད་པར་སྔར་གྱི་ལུང་ཁུངས་དེ་དག་ལས་བཤད་དོ། །དྲི་བ་བཅུ་གཉིས་པ་མངོན་རྟོགས་ཡན་ལག་དྲུག་པ་རྗེ་བཙུན་གྱིས་མཛད་པ་འདི་ལ་མངོན་བྱང་གསུམ་
པ་འགྲེལ་པ་ལུགས་ལྟར་བྱས་པ་གཅིག་དང་།  ད་ལྟའི་ཉམས་ལེན་ལྟར་བྱས་པ་གཅིག་སྟེ་གཉིས་མཆིས་པ་གང་ལགས་ཞེས་པའི་ལན་ནི་འདི་ལ་དག་མ་དག་གཉིས་ཡོད་ཅིང་མ་དག་པ་དེར་ལྷ་མོ་བརྒྱད་ལྷ་སྣམ་ལ་འགོད་པ་སོགས་ནོར་བ་གཞན་ཡང་
འགའ་ཞིག་ཡོད་དེས་ན་ཕྱི་མ་དག་གོ།  དྲི་བ་བཅུ་གསུམ་པ་ལམ་སྐོར་གྱི་ནང་གི་མཚོ་སྐྱེས་ཀྱི་སྒྲུབ་ཐབས་སུ་དབང་གི་མཐར་ཐུག་རྒྱན་དྲུག་གི་དག་པ་དྲན་པ་སོགས་འབྱུང་བ་ཇི་ལྟར་ལགས་ཞེས་པའི་ལན་ནི།  རྗེ་བཙུན་གྱི་དག་ལྡན་དང་ལམ་འབྲས་ཀྱི་
10-3-10b


ཡིག་ཆུང་དུ་མན་ངག་ལུགས་ཀྱི་ཡན་ལག་བཞི་པ་དང་།  མཚོ་སྐྱེས་ལུགས་གཉིས་མི་འདྲ་བའི་ཁྱད་པར་དབང་གི་མཐར་ཐུག་དྲན་པ་ཡོད་མེད་སོགས་གསུངས་པའི་མཚོ་སྐྱེས་ལུགས་ནི་སྒྲུབ་ཐབས་མཚོ་སྐྱེས་དེ་ཉིད་ཀྱི་སྟེང་དུ།  རྗེ་ས་ཆེན་ཡབ་སྲས་གཉིས་ཀྱི་
འགྲེལ་པ་ལས་ཇི་ལྟར་འབྱུང་བ་ཙམ་ཞིག་ལ་ངོས་འཛིན་དགོས་ཀྱི་མཚོ་སྐྱེས་ཀྱི་ལུགས་ཡིན་ཚད་ལ་དེར་མ་ངེས་སོ། །དེས་ན་མཚོ་སྐྱེས་ལུགས་ལ་ཐུན་མོང་བ་ཚོགས་པ་ལ་བཤད་པར་བྱ་བ་དང་།  ཐུན་མོང་མ་ཡིན་པ་སློབ་མ་ལ་བཤད་པ་གཉིས་ཡོད་པ་ལས་སྔ་མ་ནི་སྔར་
ལྟར་བཤད་པ་དང་།  ཕྱི་མ་ནི་ལམ་སྐོར་གྱི་མཚོ་སྐྱེས་ལུགས་ཏེ་དེ་ལ་སྔར་བཤད་པ་དེ་དག་ཡོད་པས་ཉེས་པ་གང་ཡང་མེད་དོ། །དྲི་བ་བཅུ་བཞི་པ་རྗེ་བཙུན་གྱིས་ལཱུ་ཧི་པའི་སྒྲུབ་ཐབས་སུ་ལྷ་རེ་རེ་ལ་ཡང་དཀྱིལ་འཁོར་གྱི་ལྷ་ཐམས་ཅད་ཚང་བར་གསུངས་ན་དེའི་ཚེ་
རྣམ་དག་གམ་ལུས་དཀྱིལ་དུ་བརྩི་ཕྱི་མ་ལྟར་ན་ཕག་མོ་ལྟ་བུའི་ལུས་ལ་མ་མོ་བཅུ་གཉིས་ཇི་ལྟར་ཚང་ལགས་ཞེས་པའི་ལན་ནི།  རྣམ་དག་དང་ལུས་དཀྱིལ་གཉིས་ཆར་དུ་ཚང་ལ།  ཕག་མོ་ལྟ་བུའི་ལུས་ལ་མ་མོ་བཅུ་གཉིས་ཚང་ཚུལ་ནི་བདེ་མཆོག་སྡོམ་འབྱུང་སོགས་
ཀྱི་དགོངས་པ་མ་མོ་བཅུ་གཉིས་ལུས་ཀྱི་བུ་ག་དགུ་ལ་དགོད་པ་དང་།  རྡོ་རྗེ་མཁའ་འགྲོ་སོགས་ཀྱི་དགོངས་པ་སྙིང་གའི་རྩ་འདབ་ལ་འགོད་པ་དང་།  ཨ་བྷི་དྷ་ནའི་དགོངས་པ་ཕྱག་བཅུ་གཉིས་ལ་འགོད་པ་དང་གསུམ་ཡོད་པ་ལས།  སྔ་མ་ལྟར་ན་ལུས་
དཀྱིལ་དངོས་སུ་འགྱུར་ཞིང་།  ཕྱི་མ་ལྟར་ན་ཐབས་ཤེས་རབ་སྦྱར་བ་ཙམ་ཡིན་གྱི་ལུས་དཀྱིལ་དངོས་སུ་མི་འགྱུར་བས་མ་མོ་བཅུ་གཉིས་ལུས་དཀྱིལ་དུ་ཚང་བ་ལ་ཕྱག་བཅུ་གཉིས་ཡོད་མེད་ཀྱིས་ཕན་གནོད་གང་ཡང་མེད་དོ། །དྲི་བ་བཅོ་ལྔ་པ་བདེ་
10-3-11a


མཆོག་གི་རྩ་རྒྱུད་རྒྱས་པ་ལ་ཚིག་རྐང་འབུམ།  ཤོ་ལོ་ཀ་འབུམ།  ལེའུ་འབུམ་ཡོད་པ་གསུམ་དུ་བཤད་པ་དང་།  ཤོ་ལོ་ཀ་འབུམ་ཕྲག་གསུམ་པ་གཅིག་ཏུ་བཤད་པ་གཉིས་མཆིས་པ་གང་ལགས་ཞེས་པའི་ལན་ནི།  
རྒྱུད་རྒྱས་པ་ལ་གསུམ་དུ་བཤད་པ་མ་མཐོང་།  བཤད་པ་འགའ་ཞིག་ལས་རྒྱས་པ་ལེའུ་འབུམ།  འབྲིང་ཤོ་ལོ་ཀ་འབུམ།  བསྡུས་པ་ཚིག་འབུམ་པ་དང་གསུམ་ཡོད་པ་ལས་བསྡུས་པ་ད་ལྟའི་བདེ་མཆོག་ཉུང་ངུ་ཡིན་ཞེས་དང་།  རྒྱུད་རྒྱས་པ་
འབུམ་ཕྲག་གསུམ་པ་དང་།  བསྡུས་པ་ད་ལྟའི་བདེ་མཆོག་ཉུང་ངུ་ཡིན་ཞེས་པ་གཉིས་ལས།  ཕྱི་མ་ནི་བླ་མ་གོང་མའི་རང་ལུགས་ཡིན་ཏེ།  རྗེ་ས་ཆེན་གྱི་དཀའ་འགྲེལ་དང་།  མུ་ཏིག་ཕྲེང་བ་གཉིས་ཆར་ལས་དེ་ལྟར་འབྱུང་བའི་ཕྱིར་རོ། །དྲི་བ་
བཅུ་དྲུག་པ་མཉམ་སྦྱོར་གྱི་མངོན་བྱང་ལ་ངེས་ཆོས་བསྒྲིགས་པ་འདི་རྣམས་ཀུན་ཏུ་ཡིན་ན།  རྡོ་རྗེ་མཁའ་འགྲོའི་འགྲེལ་པར་ལྷ་ནག་པོ་མཆིས་ཤིང་།  ཀྱེ་རྡོར་ཙམ་ལ་ཡིན་ན།  གུར་རིགས་བསྡུས་སུ་ཕྱག་མཚན་ལྔ་བར་དུ་བསྒོམ་པ་མཆིས་ལ།  རྩ་རྒྱུད་
ཁོ་ནར་ཡིན་ན།  དཀྱིལ་འཁོར་བརྒྱའི་སྒྲུབ་བྱེད་དུ་ཚུལ་བཅུ་བཞི་མཛད་པ་ཇི་ལྟར་ཡིན་ལགས་ཞེས་པའི་ལན་ནི་དང་པོ་གཉིས་ལྟར་མ་ཡིན་ཞིང་།  ཕྱི་མ་ལྟར་ཡིན་ལ་དེ་ལ་ཡང་ཧེ་རུ་ཀ་བཞིའི་ནང་ནས་ཕྱི་མ་ཁོ་ནའི་དབང་དུ་བྱས་པ་ཡིན་ལ།  དེ་ལ་ཡང་
འགྲེལ་པ་ལུགས་དང་།  མན་ངག་ལུགས་གཉིས་ཡོད་པ་ལས།  ཕྱི་མ་ཁོ་ནའི་དབང་དུ་བྱས་པ་སྟེ།  རྩ་རྒྱུད་དང་པོའི་བརྒྱད་པ་དང་།  ཕྱི་མའི་ལྔ་པ་གཉིས་ལ་རྣལ་འབྱོར་དབང་ཕྱུག་གི་མན་ངག་གི་བཤད་པ་ཉིད་ལས་ཚུལ་བཅུ་བཞི་འབྱུང་ཞིང་དེའི་
10-3-11b


ཚེ་ངེས་པའི་ཆོས་འདི་རྣམས་འགྲིག་དགོས་པའི་ཕྱིར་རོ། །དེས་ན་ངེས་པའི་ཆོས་འདི་རྣམས་འགྲིག་པའི་གཞི་ངོས་ཟིན་ན་དོགས་པ་རང་གྲོལ་དུ་འགྱུར་རོ། །གུར་རིགས་བསྡུས་ཀྱི་མཉམ་སྦྱོར་ལ་ཕྱག་མཚན་ལྔ་བར་དུ་བསྒོམ་པ་མི་ཐུབ་ཟླ་བའི་གཞུང་དང་གུར་
རྒྱན་གཉིས་ལས་མ་བཤད་དོ། །དེ་ལྟར་ན་དཀྱིལ་འཁོར་བརྒྱའི་སྒྲུབ་བྱེད་དུ་ཚུལ་བཅུ་བཞི་མཛད་པ་ཇི་ལྟར་ཞེས་པ་ནི།  དེའི་སྒྲུབ་བྱེད་དུ་བཀོད་པ་ཁོ་བོས་སྔར་མ་མཐོང་ཞིང་།  ད་ལྟ་ཡང་འབྲེལ་མ་གོ་སྟེ།  དཀྱིལ་འཁོར་བརྒྱར་བྱེད་པའི་ཚེ་རྩ་རྒྱུད་ལ་
དཀྱིལ་འཁོར་དྲུག་ཁོ་ན་འབྱུང་ལ།  ཚུལ་བཅུ་བཞི་མ་བྱས་ཀྱང་དཀྱིལ་འཁོར་དྲུག་བགྲང་བ་ལ་གེགས་ཅུང་ཟད་ཀྱང་མེད་པའི་ཕྱིར་རོ། །དྲི་བ་བཅུ་བདུན་པ་ལས་བཞིའི་སྦྱིན་སྲེག་གི་ཁ་བལྟ་ཕྱོགས་ལ་བདག་མདུན་གང་གཙོ་ཆེ་ལགས་ཞེས་པའི་
ལན་ནི་འདི་ནི་བདག་བསྐྱེད་ཁོ་ནའི་དབང་དུ་བྱས་པ་སྟེ།  དེང་སང་གི་ཕྱག་ལེན་ལ་ཡང་དེ་ལྟར་ཡོད་ཅིང་།  སྦྱིན་སྲེག་གི་ཡིག་ཆ་ཁུངས་མ་རྣམས་ལས།  སྒྲུབ་པ་པོའི་རྒྱན་གོས་དང་།  ཁ་བལྟ་ཕྱོགས་ཀྱི་ཁྱད་པར་ཞེས་གསལ་བར་འབྱུང་བའི་ཕྱིར་རོ། །
བློ་གྲོས་རབ་གསལ་ཐོས་པ་མང་ལྡན་པ། །དོན་གཉེར་སློབ་མས་ཚུལ་བཞིན་དྲིས་པའི་ལན། །རྒྱུད་གསུམ་སྨྲ་བའི་སེང་གེ་དེ་ཡིས་སྦྱར། །དགེ་བས་འགྲོ་ཀུན་ཆོས་དོན་རྟོགས་པར་ཤོག །ཅེས་པ་འདི་ནི་བྱ་ལོ་ཧོར་ཟླ་བཞི་པའི་ཉེར་གཉིས་ལ་
ཐུབ་བསྟན་རྣམ་རྒྱལ་དུ་སྦྱར་བའོ།།    །།དགེའོ།  ༈  །མདོ་ཁམས་པ་དབང་ཕྱུག་རྒྱལ་མཚན་གྱིས་དྲིས་ལན།  དཔལ་ལྡན་བླ་མའི་དབོན་པོ་སྡེ་སྣོད་འཛིན་པ་ཆེན་པོ་སློབ་དཔོན་དབང་ཕྱུག་རྒྱལ་མཚན་པའི་ཕྱག་ཏུ་ཕུལ་བ།  ཁམས་བཟང་ཞིང་ལྷག་བསམ་
10-3-12a


རྣམ་པར་དག་པས་གཞན་དོན་ལ་བརྩོན་པའི་ཐང་ནས་གསུང་ཡིག་དངུལ་སྲང་གང་གི་རྟེན་དང་བཅས་པ་ཤེས་རབ་རྡོ་རྗེ་དང་།  དགེ་འདུན་དཔལ་གྲོགས་མཆེད་ཀྱིས་འཕྲོད་པས་སེམས་སྤྲོ་ཞིང་རྗེས་སུ་ཡི་རང་།  ཉིད་ཀྱི་དྲི་བ་རྣམས་
ཀྱི་ལན་རིམ་པར་བསྙད་པ་ནི།  དྲི་བ་དང་པོ་རྗེ་བཙུན་གྱིས་གཙོ་ཆེའི་ཆོས་སྣ་སུམ་ཅུ་དགུ། །ཞེས་གསུངས་པའི་ཆོས་སྣ་སོ་དགུ་པོའི་རྣམ་གྲངས་གསལ་པོ་དགོས་གསུང་པ།  རྗེ་བཙུན་གྱིས་བླ་མ་གོང་མའི་ཆོས་ཀྱི་རྣམ་གྲངས་མང་པོ་བགྲངས་པའི་མཇུག་ཏུ།  བིཪྭའི་
རྗེས་འབྲང་ཌོམྦིའི་སྐོར། །ཞེས་པ་ནས་ལམ་སྐོར་དགུ་ནི་ཁྱད་པར་རོ། །ཞེས་པའི་བར་ཚིག་རྐང་ལྔ་གསུངས་པའི་དོན་ལ་ས་སྐྱ་པའི་བླ་མ་ཁ་ཅིག །ཀྱཻ་རྡོར་རྒྱུད་གསུམ།  ཌོམ་བྷི་སོགས་ཀྱི་གཞུང་བཅོ་བརྒྱད།  མཚོ་སྐྱེས་ལུགས་ལ་ལྔ།  ནག་པོ་
ལུགས་ལ་བཅུ་གསུམ་སྟེ།  དེ་རྣམས་དྲིལ་བས་ཆོས་སྣ་སུམ་ཅུ་སོ་དགུའོ་ཞེས་སྨོས་ནས་གོང་གི་སྐོར་གསུམ་དུ་མ་གཏོགས་པའི་མན་ངག་ལུགས་ཁྱད་པར་དུ་བསྟན་པའི་ཕྱིར།  ལམ་སྐོར་དགུ་ནི་ཁྱད་པར་རོ། །ཞེས་གསུངས་ཞེས་འཆད་པ་དང་།  རང་
ཕྱོགས་པའི་ཟིན་བྲིས་འགའ་ཞིག་ལས་ཀྱང་འདི་ལྟར་འབྱུང་བ་ནི་དོན་གཏན་མ་ཡིན་ཏེ།  བཀའ་སྲོལ་གསུམ་གྱི་རྒྱ་གཞུང་གཙོ་ཆེ་ཤོས་ལ་རྒྱུད་གསུམ་བགྲངས་པ་བཞད་གད་ཀྱི་གནས་ཡིན་པའི་ཕྱིར་དང་།  གཞན་རྣམས་ཀྱི་གྲངས་ལ་ཡང་ངེས་པ་མི་སྣང་ཞིང་།  
ལམ་སྐོར་དགུ་ནི་ཁྱད་པར་རོ། །ཞེས་པའི་དོན་ཡང་དེ་ལྟར་མ་ཡིན་པའི་ཕྱིར་རོ། །རྗེ་བཙུན་མུས་པ་ཆེན་པོའི་ཞལ་སྔ་ནས་འགྲེལ་པ་ཀུ་མུ་ཏི།  དཀྱིལ་ཆོག་བཟང་པོ་ཡོངས་གཟུང་།  སྒྲུབ་ཐབས་ཡན་ལག་དྲུག་པ།  བདག་མེད་མའི་སྒྲུབ་ཐབས།  རྡོ་རྗེ་གུར་གྱི་སྒྲུབ་
10-3-12b


ཐབས།  གཏུམ་མོའི་འགྲེལ་ཆུང་།  སྦྱིན་སྲེག །ཕྱག་མཚན་གྱི་དག་པ།  གཏོར་མ་།  སྔགས་དོན་གཅིག །ཡང་སྔགས་དོན་གཅིག །བདུད་རྩི་འོད།  ལྷན་ཅིག་སྐྱེས་གྲུབ།  ལམ་གྱི་ཡན་ལག་ལ་དེ་ཉིད་བཅུ་པ།  ཚོགས་ཀྱི་འཁོར་ལོ།  དྲན་པ་གཅིག་
པ།  དཔའ་མོ་གཅིག་པ།  ཡང་དཔའ་མོ་གཅིག་པ།  རིན་ཆེན་འབར་བ།  མན་ངག་གི་རོ་སྲེག་སྟེ་དེ་རྣམས་ཌོམ་བྷི་བའི་སྐོར་རོ། །འགྲེལ་པ་པད་མ་ཅན།  དཀྱིལ་ཆོག་ནས་གླིང་མ།  སྒྲུབ་ཐབས་མཚོ་སྐྱེས།  ཚོགས་འཁོར་དམ་ཚིག་ལྔ་པ།  བསྟོད་པ།  
དེ་རྣམས་པད་མའི་སྐོར་རོ། །འགྲེལ་པ་རྣལ་འབྱོར་རིན་པོ་ཆེའི་སྦྱོར་བའི་ཕྲེང་བ།  དཀྱིལ་འཁོར་གྱི་ཆོ་ག་གཞུང་འགྲེལ།  སྒྲུབ་ཐབས་དེ་ཉིད་གསལ་བ།  ཕྱག་བཅུ་དྲུག་པ་དཔའ་གཅིག །ཕྱག་གཉིས་པ་དཔའ་གཅིག །ལམ་གྱི་ཡན་ལག་རབ་གནས་ཚུལ་ཟབ་
མོ།  སྦྱིན་སྲེག །རོ་སྲེག །ཚོགས་འཁོར།  བསྟོད་པ།  བདག་མེད་མའི་སྒྲུབ་ཐབས་ཆེ་ཆུང་གཉིས།  རྫོགས་རིམ་གྱི་གཞུང་།  དེ་རྣམས་ནག་ཆུང་གིས་འགོས་ཁུག་པ་ལ་བརྒྱུད་པའོ་ཞེས་པ་འདི་རྣམས་ལ་ཆོས་ཀྱི་རྣམ་གྲངས་སུམ་ཅུ་སོ་བརྒྱད་གདའ་ཞིང་།  
གཅིག་མ་ཚང་བ་དེ་ཌོམ་བྷི་བས་མཛད་པའི་ཚོགས་ཀྱི་འཁོར་ལོའི་བསླབ་བྱ་སྟོན་པ་འདུ་བ་སྒྲག་པ་ཞེས་བྱ་བ་གཅིག་ཟུར་ན་འདུག་པ་དེ་ཡིན་ནམ་སྙམ་ཞེས་གསུངས་པ་འདི་ཉིད་གསལ་ཁ་ཆེ་བས་དེ་བཞིན་དུ་བཟུང་བས་བཏུབ་ཁོ་བོའི་རྟོག་པ་ལ་ཀྱཻ་རྡོར་རྣམ་བཤད་ཀྱི་
དགོངས་པ་འགྲེལ་པ་ལུགས་ཀྱི་ཆོས་སྐོར་ལ་མི་ཐུབ་ཟླ་བ་ཡན་ཆད་ཀྱི་གཞུང་བཅུ་བཞི།  དཔའ་བོ་རྡོ་རྗེའི་རིན་ཆེན་འབར་བ་བསྟན་བཅོས་ཀྱི་ངོས་ནས་གཅིག་ཡིན་ཀྱང་ལེའུ་རེ་རེའི་བརྗོད་བྱའི་ངོས་ནས་གཞུང་གཞན་རྣམས་དང་དོད་མཉམ་དུ་ཡོད་པས་དགུར་
10-3-13a


བགྲངས་འདུག་པས་ཉི་ཤུ་རྩ་གསུམ།  མཚོ་སྐྱེས་ལུགས་ལ་བདུན།  ནག་པོ་ལུགས་ལ་བཅུ་གཉིས་ཏེ།  བཞི་བཅུ་ཞེ་གཉིས་ལས།  ཌོམ་བྷི་བའི་ལྷན་ཅིག་སྐྱེས་གྲུབ་དང་།  མཚོ་སྐྱེས་ལུགས་ཀྱི་བསྐྱེད་རིམ་སྒྲུབ་ཐབས་མཚོ་སྐྱེས་
དང་།  རྫོགས་རིམ་མར་མེའི་རྩེ་མོ་ལྟ་བུའི་གདམས་ངག་སྟེ་གསུམ་པོ་ལམ་སྐོར་དགུ་ནི་ཁྱད་པར་རོ། །ཞེས་པའི་ཁོངས་སུ་གཏོགས་པས་ལྷག་མ་སུམ་ཅུ་སོ་དགུ་པོ་ཡིན་ནམ་སྙམ་སྟེ།  རྣམ་བཤད་ཉིད་ཀྱིས་བགྲང་ཚུལ་དང་།  གཙོ་ཆེའི་ཆོས་ཞེས་
དང་།  ལམ་སྐོར་དགུ་ནི་ཁྱད་པར་རོ། །ཞེས་པའི་ཚིག་གི་ནུས་པ་ལས་ཤེས་སོ། །དྲི་བ་གཉིས་པ་རྗེ་བཙུན་གྱིས་ལྗོན་ཤིང་ལས་མངོན་པ་ཀུན་ལས་བཏུས་མདོ་སྡེ་པའི་གྲུབ་མཐའ་ཡིན་ཅེས་གསུངས་ན་ཀུན་གཞི་དང་ཉོན་ཡིད་རང་ལུགས་ལ་ཁས་ལེན་པའི་
མདོ་སྡེ་པ་ཇི་ལྟར་ལགས་ཞེས་པ་ལ་སྤྱིར་རྗེ་བཙུན་གྱིས་གྲུབ་མཐའ་བཞིའི་རྣམ་གཞག་མདོར་བསྡུས་བཤད་ནས་ཞིབ་པར་གཞུང་སོ་སོ་ལ་བསླབ་པར་བཤད་པའི་སྐབས་སུ་མདོ་སྡེ་པའི་གྲུབ་མཐའ་ཞིབ་པར་མངོན་པ་ཀུན་ལས་བཏུས་པ་ལས་ཤེས་པར་
བྱའོ་ཞེས་གསུངས་ཤིང་དེའི་ཤེས་བྱེད་དུ་མཛོད་རང་འགྲེལ་ནས་བཤད་པའི་མདོ་སྡེ་པའི་གྲུབ་མཐའ་དང་།  འདི་ནས་བཤད་པ་དོན་གཅིག་པའི་ཕྱིར་དང་།  རྣམ་པར་རིག་པ་ཙམ་འགའ་ཡང་མ་བསྟན་པའི་ཕྱིར་དང་།  འཆད་པ་པོ་དག་གིས་ཀྱང་ཐེག་པ་
ཐུན་མོང་གི་སྡོམ་ཞེས་འཆད་པའི་ཕྱིར།  ཞེས་གསུངས་པས་དེ་ནས་གསུངས་པའི་ཕུང་ཁམས་སྐྱེ་མཆེད་ཀྱི་རྣམ་གཞག་ཕལ་ཆེ་བ་དང་།  ཕྱི་རོལ་དོན་གྱི་རྣམ་གཞག་དང་།  ལམ་ལྔ་ས་བཅུ།  སྐུ་གསུམ་ལ་སོགས་པ་ཕལ་ཆེར་མདོ་སྡེ་པའི་ལུགས་ཡིན་
10-3-13b


ཅེས་པའི་དོན་ཡིན་གྱི་དེ་ནས་བཤད་ཚད་མདོ་སྡེ་པའི་གྲུབ་མཐར་ཞལ་གྱིས་མི་བཞེས་ཏེ།  ཐེག་པ་ཐུན་མོང་གི་སྡོམ་ཞེས་པ་དེ་ཚད་མར་མཛད་འདུག་པའི་ཕྱིར།  དེས་ན་ཀུན་གཞི་དང་།  ཉོན་ཡིད་རང་ལུགས་ལ་ཁས་ལེན་པའི་མདོ་སྡེ་པ་ཡོད་པར་ཁས་
ལེན་མི་དགོས་སོ། །དྲི་བ་གསུམ་པ་རྒྱུད་སྡེ་སྤྱི་རྣམ་ལས་སངས་རྒྱས་ནས་ཤེས་བྱ་མཁྱེན་ཚུལ་ལ་ཕ་རོལ་ཏུ་ཕྱིན་པའི་ལུགས་ཀྱིས་ཤེས་བྱ་གཞན་སྣང་དུ་མཁྱེན།  གསང་སྔགས་པའི་ལུགས་ཀྱིས་ཤེས་བྱ་རང་སྣང་དུ་མཁྱེན་ཅེས་གསུངས་པའི་མཁྱེན་
ཚུལ་ཇི་ལྟར་ལགས།  དེ་ལྟར་ན་སངས་རྒྱས་ལ་རང་སྣང་དང་གཞན་སྣང་ཇི་ལྟར་མངའ་ལགས་ཞེས་གསུངས་པ་ལ།  སམ་བུ་ཊའི་རྒྱུད་ལས་གང་དག་བསམ་གྱིས་མི་ཁྱབ་པའི་གནས་མངོན་དུ་མ་བྱས་པ་ནི་བདེ་བར་གཤེགས་པ་སྟེ་སངས་
རྒྱས་ཡིན་ལ།  མཚན་གཞི་མཚོན་པ་ནི་རྡོ་རྗེ་འཛིན་པ་ཡང་དག་པའོ་ཞེས་གསུངས་པའི་འགྲེལ་པར།  བསམ་གྱིས་མི་ཁྱབ་པའི་གནས་ནི་ཤེས་བྱ་ཐམས་ཅད་རང་སྣང་གི་ཡེ་ཤེས་ཏེ།  སྣང་བ་ཉིད་ཀྱང་ཡེ་ཤེས།  ཡེ་ཤེས་ཀྱང་སྣང་བ།  དེ་ཡང་
སྟོང་པ།  སྟོང་པ་ཡང་དེ་ཡིན་ཏེ།  དུས་གཅིག་ཏུ་ཅིག་ཅར་འཇུག་པ་ཡིན་ཏེ།  ད་ལྟ་སོ་སོའི་སྐྱེ་བོ་རྣམས་ཀྱིས་རིམ་གྱིས་ཐ་སྙད་ལ་བརྟེན་ཏེ་རྟོག་པའི་ཡུལ་དུ་མོས་པ་བྱ་བ་ཙམ་ལས་དེའི་ཡེ་ཤེས་འདི་ལྟ་བུའོ་ཞེས་མོས་པར་བྱ་བའང་དཀའའོ། །
དེ་བས་ན་བཅུ་གཅིག་པ་དང་བཅུ་གཉིས་པས་ཡེ་ཤེས་དེ་མ་ཐོབ་བོ། །དེ་ནི་བདེ་བར་གཤེགས་པ་སྟེ་ལམ་བདེ་བ་ནས་གཤེགས་པའི་ཕྱིར་རོ། །དེ་ཉིད་ལ་ཕ་རོལ་ཏུ་ཕྱིན་པ་ལས་སངས་རྒྱས་ཞེས་བཤད་དོ། །དེ་མ་ཐོབ་པ་ཅི་ལྟར་ཤེས་རབ་
10-3-14a


ཀྱི་ཕ་རོལ་ཏུ་ཕྱིན་པ་ལས་ཐོབ་པར་བཤད་དོ་ཞེ་ན།  མ་བཤད་དེ།  ཕ་རོལ་ཏུ་ཕྱིན་པ་ཁ་ཅིག་ལས་སངས་རྒྱས་པའི་ཚེ་སེམས་དང་སེམས་བྱུང་གི་འཇུག་པ་ཞིའོ་ཞེས་བཤད་དེ།  སེམས་ཡོད་ན་རྣམ་པར་རྟོག་པར་འགྱུར་
སྙམ་དུ་སེམས་སོ། །ཡང་ཁ་ཅིག་ལས།  སངས་རྒྱས་རྣམས་སེམས་དང་བཅས་ཏེ།  སེམས་དང་བྲལ་བ་ནི་མྱ་ངན་ལས་འདས་པ་ཡིན་ན།  སངས་རྒྱས་ལ་མྱ་ངན་ལས་འདའ་བ་མེད་དོ་ཞེས་བསམ་མོ། །ཡང་ཁ་ཅིག་དེ་གནས་
གྱུར་པའི་ཡེ་ཤེས་ཡིན་ནོ་ཞེས་ཟེར་རོ། །ཡང་ཁ་ཅིག་གནས་གྱུར་པར་མི་འདོད་དོ་ཞེས་ཟེར་རོ། །ཡང་ཁ་ཅིག་ནི་མཉམ་གཞག་དང་རྗེས་ཐོབ་ཡོད་ཅེས་ཟེར་རོ། །ཡང་ཁ་ཅིག་ནི་མཉམ་གཞག་དང་རྗེས་ཐོབ་མེད་ཅེས་ཟེར་ཏེ།  དེ་དག་ཐམས་ཅད་འགལ་བ་མེད་དེ།  གཞུང་གཅིག་ལ་ནི་གང་དུ་ཡང་བཤད་པ་མེད་
དོ། །དེ་བས་ན་བསམ་གྱིས་མི་ཁྱབ་པའི་གནས་ཐོབ་པ་དེ་ནི་རྡོ་རྗེ་འཛིན་པ་ཡིན་པར་གསུངས་པ་མཚན་གཞི་མཚོན་པར་བྱེད་པ་ཞེས་བྱ་བ་ལ་སོགས་པ་གསུངས་སོ་ཞེས་བྱ་བ་འདི་ཉིད་འགྲེལ་པའི་ཚིག་རིས་ཡིན་པས་འདི་ལ་དཔྱད་པས་ཁྱབ།  
མདོར་བསྡུ་ན་ཤེས་བྱའི་སྣང་བ་དང་།  སངས་རྒྱས་ཀྱི་ཡེ་ཤེས་དང་།  གནས་ལུགས་སྟོང་པ་གསུམ་དབྱེར་མེད་དུ་མངོན་དུ་གྱུར་པ་ནི་རང་སྣང་གི་ཡེ་ཤེས་ཏེ་ས་བཅུ་གསུམ་པ་ཁོ་ནའོ། །དེ་མངོན་དུ་མ་གྱུར་པ་ནི་གཞན་སྣང་གི་མཁྱེན་ཚུལ་ཏེ།  འདི་ལ་རྗེ་
བཙུན་རྩེ་མོས་སངས་རྒྱས་ཆུང་ངུ་ཉན་ཐོས།  འབྲིང་རང་སངས་རྒྱས།  ཆེན་པོ་ཕ་རོལ་ཏུ་ཕྱིན་པའི་ས་བཅུ་གཅིག་པའམ།  བཅུ་གཉིས་པ་ཞེས་གསུངས་ཤིང་རྗེ་ས་པཎ་གྱིས་བདག་མེད་བསྟོད་འགྲེལ་ལས།  དེ་དག་ལ་སངས་རྒྱས་བཏགས་པ་བ་
10-3-14b


ཞེས་པའི་ཞིབ་ཆ་སྦྱར་བ་མ་གཏོགས་པ་དགོངས་པ་གཅིག་པར་སྣང་ཞིང་འདི་དག་གི་དོན་ཞིབ་པར་རྒྱུད་གསུམ་གྱི་སྟེང་དུ་ཤེས་དགོས་པ་ལས།  འདིར་ནི་མདོར་བསྡུས་པ་ཙམ་མོ། །དེས་ན་སངས་རྒྱས་གཅིག་ཉིད་ལ་རང་སྣང་དང་གཞན་སྣང་གཉིས་ཀ་
ཡོད་པ་མ་ཡིན་ཏེ།  རང་སྣང་ནི་ས་བཅུ་གསུམ་པ་ཁོ་ན་ཡིན་ལ།  གཞན་སྣང་ནི་ས་བཅུ་གཉིས་པ་མན་ཆད་ཡིན་པའི་ཕྱིར་རོ། །དྲི་བ་བཞི་པ་ལུས་དཀྱིལ་གྱི་སྐབས་སུ་ཕོ་བྲང་ལྔའི་ལྷ་རྣམས་རྣལ་འབྱོར་པའི་ལུས་ལ་དང་པོ་ནས་གྲུབ་པ་ཡིན་ན་ཇོ་
ནང་པའི་གྲུབ་མཐའ་དང་ཁྱད་པར་ཇི་ལྟར་ལགས།  སྔགས་དང་ས་བོན་གྱི་སྒོ་ནས་གསར་དུ་ལྷར་བསྐྱེད་པ་ཡིན་ན།  ངོ་བོ་ཉིད་ཀྱིས་གྲུབ་པའི་དཀྱིལ་འཁོར་དུ་ཇི་ལྟར་འགྱུར་ཞེས་པ་ལ་འདིར་རྡུལ་ཚོན་དང་།  རས་བྲིས་ལྟ་བུ་སྐྱེས་བུའི་རྩོལ་བས་གསར་
དུ་བཅོས་པ་མ་ཡིན་པར་བུ་ཚའི་ལུས་གྲུབ་ཙམ་ཉིད་ནས་ལྷའི་ངོ་བོར་གྱུར་པའི་རྩ་ཁམས་གྲུབ་པ་ལ་ལུས་ལ་དང་པོ་ནས་གྲུབ་བོ་ཞེས་པ་ཡིན་ཞིང་ཇོ་ནང་པས་ནི་ལུས་ཀྱི་རྩ་ཁམས་ཉིད་ལ་ཀུན་བཏགས་གཞན་དབང་ཡོངས་གྲུབ་གསུམ་དུ་ཕྱེ་ནས་ཡོངས་གྲུབ་
ཀྱི་རྩ་ཁམས་རིགས་པས་དཔྱད་བཟོད་ཀྱི་བདེན་གྲུབ་ཡིན་པས་ལྷར་བསྒོམ།  ཀུན་བརྟགས་དང་གཞན་དབང་གི་རྩ་ཁམས་ཀུན་རྫོབ་བདེན་པ་ཡིན་པས་ལྷར་མི་བསྒོམ་པར་འདོད་པས་ཁྱད་པར་ཤིན་ཏུ་ཆེའོ། །འདི་ལ་རྩ་ཁམས་དེ་ཉིད་ལྷ་ཡིན་ནམ་མ་
ཡིན་སྙམ་ན་རྗེ་བཙུན་གྱིས་མངོན་བྱང་གི་སྐབས་སུ་འདི་དག་ཡེ་ཤེས་ལྔ་ཡིན་ནས་བསྒོམ་མམ།  མ་ཡིན་ནས་བསྒོམ་ཞེས་པ་ལ་ཡིན་ནས་བསྒོམ།  དེ་ལ་ཡང་ངོ་བོ་དངོས་ཡིན་པ་དང་།  རྣམ་པའམ་ཆོས་ཉིད་ཡིན་པ་གཉིས་ལས།  ངོ་བོ་དངོས་མ་
10-3-15a


ཡིན།  རྣམ་པའམ་ཆོས་ཉིད་ཡིན་ཅེས་གསུངས་པ་ནང་ལུས་དཀྱིལ་གྱི་སྦྱང་གཞི་སྦྱོང་བྱེད་དང་།  ཕྱི་བསྐྱེད་པའི་རིམ་པའི་སྣང་བ་ཐམས་ཅད་ལྷར་བསྒོམ་པའི་སྐབས་ཐམས་ཅད་ལ་ཤིན་དུ་གནད་དུ་ཆེ་བར་སྣང་ཡང་འགའ་
ཞིག་རྟོག་གེའི་དུག་ཆུས་མྱོས་ནས་སྣང་བ་ལྷར་བསྒོམས་པས་ལྷར་འགྱུར་བ་མི་སྲིད་ཅེས་དང་།  ཁ་ཅིག་སྦྱང་གཞི་སྦྱོང་བྱེད་སྦྱར་བའི་གནས་ལུགས་དེ་ཉིད་ཐ་སྙད་ལ་སྦྱར་ནས་སེམས་ཅན་སངས་རྒྱས་ཡིན་ཞེས་པ་ཐ་སྙད་དུ་ཡང་ཁས་ལེན་པ་
སྣང་མོད་རྗེ་བཙུན་གོང་མའི་དགོངས་པ་སེམས་གསལ་སྟོང་ཟུང་འཇུག་གི་སྟེང་དུ་སངས་རྒྱས་ཀྱི་ཡོན་ཏན་ཐམས་ཅད་རང་བཞིན་ལྷུན་གྲུབ་ཀྱིས་ཚང་བས་དེ་ཉིད་གློ་བུར་གྱི་དྲི་མས་བསྒྲིབས་ནས་འཁྲུལ་སྣང་སྣ་ཚོགས་ཤར་བའི་ཚེ་ན་ཡང་འཁྲུལ་སྣང་དེ་དག་
གསལ་སྟོང་ཟུང་འཇུག་གི་འཁྲུལ་སྣང་ཡིན་པས་འཁྲུལ་པ་མ་ཟད་པའི་ཚེ་འཁོར་བ་ཡིན་ཅིང་འཁྲུལ་པ་ཟད་ན་སངས་རྒྱས་ཀྱི་ཡེ་ཤེས་ཀྱི་སྣང་བ་འབའ་ཞིག་པ་ཡིན་པས་འཁྲུལ་པ་ཟད་པའི་ཆེད་དུ་ལྷར་བསྒོམས་པས་དེ་ཉིད་ལྷར་གྱུར་ཅེ?་བཞེད་དེ།  ངོ་
བོ་དངོས་མ་ཡིན་ཡང་རྣམ་པའམ་ཆོས་ཉིད་ཡིན་ཞེས་པའི་དོན་ཡང་འདི་ཉིད་ཡིན་སྣང་བ་ལྷར་བསྒོམ་དགོས་པའི་གནད་ཀྱང་འདི་ཉིད་ཡིན།  འཁོར་འདས་དབྱེར་མེད་ཡིན་ཅེས་པའི་གནད་ཀྱང་འདི་ཉིད་ཡིན།  གསལ་སྟོང་ཟུང་འཇུག་གི་སྟེང་དུ་བག་
ཆགས་བསགས་ཚད་ལུས་ལ་རྩ་ཁམས་ཀྱི་ཚུལ་དུ་ཚང་།  ལུས་ལ་ཚང་ཚད་ཕྱི་རོལ་དུ་སྣང་བ་ཡང་ལྷར་རང་ཤུགས་ཀྱིས་འཆར་བས་ཕྱི་དཀྱིལ་ལས་ལུས་དཀྱིལ་ཟབ་པའི་གནད་ཀྱང་འདི་ཉིད་ཡིན་ལ།  དེ་ལྟ་བུ་ཕན་པར་སྨྲས་ཀྱང་ལུས་ཀྱི་རྩ་ཁམས་ལྷར་བསྒྱུར་ཏུ་མི་རུང་ཞིང་།  
10-3-15b


དེའི་སྟོབས་ཀྱིས་ཕྱི་རོལ་གྱི་སྣང་བ་ལ་སྐྱོན་འབའ་ཞིག་འདོགས་པའི་སྣོད་མིན་ལ་བཤད་དུ་མི་རུང་ཡང་།  ཉིད་དད་པ་དང་བློ་གྲོས་ཀྱིས་དོན་རྟོགས་པ་འབའ་ཞིག་གི་སྒོ་ནས་དྲི་བར་སྣང་བས་སྙིང་བརྩེ་བའི་སྒོ་ནས་གསལ་བར་བཤད་པའོ། །ལུས་
དཀྱིལ་གྱི་ལྷ་སྔགས་དང་ས་བོན་གྱི་སྒོ་ནས་གསར་དུ་ལྷར་བསྐྱེད་པ་མ་ཡིན་ཏེ།  ལུས་ཀྱི་རྩ་ཁམས་སྔགས་དང་ས་བོན་གྱི་རྣམ་པར་དང་པོ་ནས་གྲུབ་པ་དེ་ལྷ་ཞལ་ཕྱག་གི་རྣམ་པར་བསྒྱུར་བ་ཙམ་ཡིན་པའི་ཕྱིར།  དཔེར་ན་འཇིམ་པའི་ཕུང་པོ་བུམ་པའི་
རྣམ་པར་བསྒྱུར་བ་བཞིན་ནོ། །དྲི་བ་ལྔ་པ་རྗེ་བླ་མས།  གཞི་ཡི་གནས་ལུགས་སྐྱེ་འཆི་བར་དོ་གསུམ། །ཇི་ལྟར་ཡོད་བཞིན་བསྐྱེད་རིམ་བསྒོམས་པའི་མཐུས། །འབྲས་བུ་སྐུ་གསུམ་མངོན་དུ་བྱེད་པ་ཡི། །ཤིང་རྟ་ཆེན་པོའི་ལམ་འདི་ཁོ་བོས་
རྟོགས། །ཞེས་གསུངས་ན་ཀྱཻའི་རྡོ་རྗེའི་བསྐྱེད་རིམ་བསྒོམ་པའི་རྣལ་འབྱོར་པས་རང་གི་ཉམས་ལེན་ལ་སྦྱར་ནས་སྦྱོང་བྱེད་བསྐྱེད་རིམ་འཁོར་བཅས་ཀྱིས་སྦྱང་གཞི་སྐྱེ་འཆི་བར་དོ་གསུམ་སྦྱོང་ཚུལ་ངོ་སྤྲོད་མདོར་བསྡུ་ན་འདི་ཡིན་གསུངས་པའི་ཞལ་
གསལ་བ་གཅིག་ཀྱང་དགོས་གསུངས་པ་ལ།  བླ་མ་གོང་མའི་བཞེད་པ་རྡོ་རྗེ་གུར་ལས།  ཕལ་པའི་གནས་སྐབས་གཞོམ་པའི་ཕྱིར། །བསྒོམ་པ་ཡང་དག་རབ་ཏུ་གྲགས། །རང་བཞིན་གནས་སྐབས་གཞོམ་པ་ལ། །སྒོམ་པ་མ་ཡིན་མི་སྒོམ་
མིན། །བྱང་ཆུབ་སེམས་དཔའ་རྣམས་ཀྱི་རྟོག་པ་ནི་དེ་བཞིན་ཏེ།  འོན་ཀྱང་མི་གཙང་བའི་ཚད་མཉམ་པར་སྦྱང་བར་བྱ་བའི་ཕྱིར།  དེ་བཞིན་གཤེགས་པའི་སྐུ་གཟུགས་རབ་ཏུ་བསྒོམ་པར་བྱའོ། །ཞེས་གསུངས་པ་ལ་བརྟེན་ནས་ཕལ་པའི་གནས་སྐབས་
10-3-16a


མི་གཙང་བའི་ཚད་ནི་ཐ་མལ་དུ་འཛིན་པའི་རྣམ་རྟོག་ཡིན་ལ།  དེ་སྦྱང་བའི་ཕྱིར་དུ་བསྐྱེད་རིམ་སྒོམ་དགོས་པ་འདི་ལ་བླ་མེད་སྤྱི་དང་ཐུན་མོང་དུ་མངོན་པར་རྟོགས་པ་ཚར་གཅིག་གིས་འཁོར་བའི་སྐྱེ་འཆི་བར་དོ་ཚར་ཚན་གཅིག་
སྦྱོང་བའི་ཚུལ་དང་།  རྣལ་འབྱོར་དབང་ཕྱུག་གི་མན་ངག་ཐུན་མོང་མ་ཡིན་པ་བསྐྱེད་རིམ་གྱི་གནས་སྐབས་རེ་རེའམ་ཁ་དོག་དང་ཕྱག་མཚན་ལ་སོགས་པ་རེ་རེས་ཀྱང་འཁོར་བ་མ་ལུས་པ་སྦྱོང་ཚུལ་གཉིས་ལས་དང་པོ་ནི་ཐ་མལ་གྱི་རྣམ་རྟོག་
ལ་རྒྱུ་ལས་དང་ཉོན་མོངས་པ་དང་།  འབྲས་བུ་བདག་དང་བདག་གིར་འཛིན་པ་གཉིས་ཡོད་པ་ལས།  དང་པོ་ནི་ཚོགས་གཉིས་བསགས་པས་སྦྱོང་།  གཉིས་པ་ནི་སྣོད་བཅུད་གཉིས་ལས།  སྣོད་སྦྱོང་བ་ནི་འབྱུང་བ་བཞི་ལས་གྲུབ་པའི་གཞལ་
ཡས་ཁང་དང་།  ལྷ་དཔའ་བོ་གཅིག་པའི་དབང་དུ་བྱས་ན་གདན་ནོ། །བཅུད་སྦྱོང་བ་བསྐྱེད་ཆོག་གཅིག་གིས་སྐྱེ་གནས་བཞི་སྦྱོང་ཚུལ་དང་།  ལྷའི་རྣམ་པས་ཉོན་མོངས་པ་སྦྱོང་ཚུལ་གཉིས་ལས།  དང་པོ་ནི་མངོན་བྱང་ལྔ་ལས་རྒྱུ་རྡོ་རྗེ་འཛིན་པ་
བསྐྱེད་པའི་ཉི་མ་དྲོད་དང་།  ཟླ་བ་གཤེར་ཏེ་དྲོད་གཤེར་སྐྱེས་སམ།  ཉི་ཟླ་གཉིས་ཀྱིས་ཁུ་ཁྲག་མཚོན་པས་མངལ་སྐྱེས་ཀྱི་བློ་སྦྱོང་བ་དང་།  ཡང་འཁོར་གྱི་ལྷ་མོ་མངལ་ནས་འབྱིན་པས་མངལ་སྐྱེས་སྦྱོང་།  འབྲས་བུ་རྡོ་རྗེ་འཛིན་པ་ཐིག་ལེའི་གོང་བུ་
ལས་བཞེངས་པས་སྒོང་སྐྱེས་སྦྱོང་།  སྐྱེ་མཆེད་ཀྱི་ལྷ་སྐད་ཅིག་གིས་ས་བོན་ཙམ་ལས་བསྐྱེད་པས་བརྫུས་སྐྱེས་ཀྱི་བློ་སྦྱོང་།  དེ་ནས་དཀྱིལ་འཁོར་བསྡུ་བས་སྣོད་བཅུད་འཇིག་པ་སྦྱོང་ངོ་། །གཉིས་པ་ལྷའི་རྣམ་པས་དུག་གསུམ་སྦྱོང་བའི་ཚུལ་ནི་
10-3-16b


ཤིན་ཏུ་ཟབ་པའི་བསྐྱེད་པའི་རིམ་པས་ནི་དུག་གསུམ་སྦྱོང་སྟེ་ཁྲོ་ཆགས་ཀྱི་རྣམ་པ་སྟེ་ཁྲོ་བོའི་སྐུར་བཞུགས་པས་ནི་ཞེ་སྡང་སྦྱོང་།  བཙུན་མོའི་འཁོར་གྱི་དབུས་ན་བཞུགས་པས་ནི་འདོད་ཆགས་སྦྱོང་།  མཚན་དང་དཔེ་བྱད་ཀྱིས་བརྒྱན་པའི་གཟུགས་
ཀྱི་སྐུར་བསྒོམས་པས་ནི་གཏི་མུག་སྦྱོང་ཞེས་ལྗོན་ཤིང་ལས་གསུངས་ལ་འདི་ནི་འཕགས་པ་ཀླུ་སྒྲུབ་ཀྱི་གསང་བ་འདུས་པའི་བསྐྱེད་པའི་རིམ་པ་ཐོག་མར་སྣོད་བཅུད་ཞིག་དེ་ནས་སྣོད་བཅུད་འཆགས་པ་ནས་བརྩམས་ཏེ་མཐར་མངལ་སྐྱེས་ཀྱི་
སེམས་ཅན་བྱུང་བའི་བར་སྦྱོང་བྱེད་དུ་སྦྱར་བ་དང་།  མངོན་པར་རྟོགས་པའི་རྒྱན་གྱི་ལམ་གྱིས་རིམ་པའི་མཁྱེན་གསུམ་ཤེས་བྱ།  སྦྱོར་བཞི་ཉམས་ལེན།  ཆོས་སྐུ་འབྲས་བུ་ཞེས་སྦྱར་བ་དང་འདྲ་བར།  སྦྱོང་བྱེད་མངོན་པར་རྟོགས་པ་གཅིག་
གིས་སྦྱང་གཞི་འཁོར་བའི་རྒྱུན་གཅིག་སྦྱོང་བའི་དབང་དུ་བྱས་པའོ། །ཀྱེ་རྡོར་རྣམ་བཤད་ལས་སྐྱེ་འཆི་བར་དོ་གསུམ་སྦྱོང་ཚུལ་སྡོམ་འབྱུང་གི་འགྲེལ་པ་སོགས་ནས་འབྱུང་བའི་བཤད་པ་རྒྱ་ཆེར་སྦྱར་ནས་བསོད་ནམས་ཀྱི་ཚོགས་ཀྱིས་ཚེ་སྔ་
མའི་ལས་དང་ཉོན་མོངས་པ་སྦྱོང་།  ཡེ་ཤེས་ཀྱི་ཚོགས་ཀྱིས་འཆི་བ་སྦྱོང་།  སྲུང་འཁོར་ནས་བརྩམས་ཏེ་བར་དོ་དང་སྐྱེ་བ་སྦྱོང་ཚུལ་བཤད་པ་ནི་རྣམ་བཤད་ཉིད་ན་གསལ་བས་འདིར་མ་སྨོས་སོ། །གཉིས་པ་མན་ངག་ཐུན་མོང་མ་ཡིན་པའི་
ལུགས་ནི་རྗེ་བཙུན་ཆེན་པོས་བསྐྱེད་པ་སྔོན་འགྲོ་རྟེན་དང་བསྐྱེད་ཆོག་དང་། །ཁ་དོག་ཕྱག་མཚན་ཡན་ལག་རྣམ་འགྱུར་བཅས། །རེ་རེའང་འཁོར་འདས་དབྱེར་མེད་རང་བཞིན་དུ། །ལེགས་པར་བརྩེ་བའི་བསམས་པས་བཤད་པར་བྱ། །
10-3-17a


ཞེས་བྱ་བའི་འགྲེལ་པར་ཤིན་ཏུ་གསལ་བར་གསུངས་པ་དེ་ཉིད་ཡིན་པས་ཉིད་གསུང་ངག་རིན་པོ་ཆེའི་མན་ངག་རྫོགས་པར་ཐོབ་པ་ཡིན་པས་དེ་ལ་གཟིགས་ནས་བསམ་བློ་གཏང་སྟེ་ཉམས་ལེན་མཛད་པས་ཁྱབ།  འདི་
དག་ཐམས་ཅད་ལ་ཡང་སྦྱང་གཞི་སྦྱོང་བྱེད་སྦྱར་བའི་སྒོམ་ཚུལ་གང་ཡིན་པ་དང་།  མཉམ་གཞག་དང་རྗེས་སྤྱོད་ཀྱི་སྒོམ་ཚུལ་གྱི་ཁྱད་པར་གང་ཡིན་པ་གཉིས་གནད་དུ་ཆེ་བ་ལས།  དང་པོ་ནི།  སྦྱང་གཞི་འཁོར་བའི་ཆོས་གང་ཡིན་པ་དེ་ཉིད་
ཐ་མལ་པ་མ་ཡིན་སངས་རྒྱས་ཀྱི་ཡོན་ཏན་འདི་དང་འདི་ཉིད་ཡིན།  དེ་ཉིད་ཀྱང་བདག་གི་བློ་ལ་སྒོམ་པའི་རྣམ་པ་འདི་ཉིད་ཡིན་སྙམ་དུ་སྒོམ་པ་སྟེ།  དཔེར་ན་མངལ་སྐྱེས་ཀྱི་ཁུ་བ་དང་།  དྲོད་གཤེར་སྐྱེས་ཀྱི་གཤེར་དང་།  སྒོང་སྐྱེས་ཀྱི་ཕ་དང་།  
རྫུས་སྐྱེས་ཀྱི་གསལ་བ་རྣམས་ནི་ཐ་མལ་པ་མ་ཡིན་ཏེ།  མེ་ལོང་ལྟ་བུའི་ཡེ་ཤེས་དངོས་ཡིན།  དེ་ཉིད་ཀྱང་བདག་གི་བློ་ལ་སྣང་བའི་མངོན་བྱང་དང་པོ་ཟླ་བའི་དཀྱིལ་འཁོར་འདི་ཉིད་ཡིན་སྙམ་དུ་བསྒོམ་པ་ལྟ་བུའོ། །དེས་ཀྱང་ཐམས་ཅད་ལ་འགྲེའོ། །
གཉིས་པ་ནི་མཉམ་གཞག་གི་སྐབས་སུ་ཡེ་ཤེས་ཚོགས་བསག་གི་སྣང་བ་ཐམས་ཅད་སྟོང་ཉིད་དུ་སྦྱངས་ནས་སྟོང་པའི་ངང་ལས་ཐ་མལ་གྱི་རྣམ་རྟོག་སྐྱེ་རུ་མི་འཇུག་པས་ཐ་མལ་གྱི་སྣོད་བཅུད་ཀྱི་སྣང་བ་ཐམས་ཅད་དང་པོ་ནས་རྟེན་དང་བརྟེན་པའི་
འཁོར་ལོ་བསྒོམ་པ་ཡིན་ལ།  རྗེས་སྤྱོད་ལམ་གྱི་སྐབས་སུ་གཟུགས་སོགས་ལ་ཐ་མལ་གྱི་རྣམ་རྟོག་ནམ་སྐྱེས་པའི་དུས་སུ་དེ་ཉིད་ཀྱི་རྒྱུན་བཅད་ནས་འདི་ནི་ཐ་མལ་པ་མ་ཡིན་ཏེ་ལྷ་ཡིན་ནོ་སྙམ་དུ་སྦྱང་གཞི་གར་ཡོད་ས་དེ་ཉིད་དུ་བསྒོམ་པའོ། །
10-3-17b


ལྷ་གང་བསྒོམ་སྙམ་ན་འདི་ལ་ལྷག་པའི་ལྷའི་ཐབས་ལ་མཁས་པ་དང་།  ལྷ་སོ་སོའི་ཐབས་ལ་མཁས་པ་གཉིས་གསུངས་པ་ཤེས་དགོས་ཤིང་།  མཉམ་རྗེས་གཉིས་ཆར་གྱི་སྐབས་སུ་ལམ་བྱེད་བཞིའི་སྒོ་ནས་བྱིན་རླབས་མྱུར་དུ་འཇུག་པའི་
ཐབས་ལ་འབད་དགོས་སོ། །སླད་མ་ཁམས་བཟང་ཞིང་རང་དོན་ཚུལ་གནས་ཐོས་བསམ་སྒོམ་པ་ལ་འབད་པ་དང་།  གཞན་དོན་ཟང་ཟིང་མེད་པའི་ཆོས་ཀྱི་སྦྱིན་པའི་སྒོ་ནས་གནས་སྐབས་ཐམས་ཅད་དུ་དལ་འབྱོར་དོན་ཡོད་
པ་མཛད་འཚལ་ཞིང་།  རྗེ་བཙུན་མུས་པ་ཆེན་པོའི་སྐུ་གདུང་ལས་གྲུབ་པའི་གདུང་ཚྭ་གཅིག་ཕུལ་ཡོད་པ་དད་རྟེན་མཛོད།  ཉིད་བླ་མ་འདི་ལ་གསུང་ངག་ཚང་བར་ཐོབ་བླ་མ་འདི་བར་དོར་ཕྱག་ཆེན་མཆོག་གི་དངོས་གྲུབ་མངོན་དུ་མཛད་པ་
གདོན་མི་ཟ་བར་སྣང་བས་ལམ་གྱི་གཙོ་བོ་བླ་མའི་རྣལ་འབྱོར་ལ་འབད་པར་མཛོད་ཅིག །འབྲུག་ལོ་ཧོར་ཟླ་བཅུ་གཉིས་པའི་ཡར་ཚེས་བརྒྱད་ལ་རྟ་ནག་གསེར་གླིང་གི་དགོན་པར་སྦྱར་ཏེ་རྒྱལ་ཁམས་ཤར་གྱི་ཕྱོགས་སུ་ཕུལ་བའི་ཡི་གེ་པ་ནི་
གཞོན་ནུ་བཟང་པོས་བགྱིས་སོ།།    །།དགེའོ།  ༄། །སྔགས་འཆང་རཏྣ་ཤྲཱིའི་དྲིས་ལན་བཞུགས་སོ། །ཨོཾ་སྭ་སྟི།  རང་བཞིན་སྤྲོས་པའི་འཆིང་ཀུན་བྲལ། །ཟུང་འཇུག་སྣ་ཚོགས་སྐུར་སྟོན་པ། །དཔལ་ལྡན་ཧེ་རུ་ཀ་དཔལ་དང་། །དབྱེར་
མེད་བླ་མ་ལ་བཏུད་ནས། །དཔྱོད་ལྡན་སློབ་མས་དྲིས་པའི་ལན། །ལུང་རིགས་ཉི་མའི་འོད་ཟེར་དང་། །མན་ངག་སྦྲང་རྩིའི་བཅུད་འཛིན་པ། །རྒྱུད་གསུམ་སྨྲ་བས་བཤད་པར་བྱ། །དེ་ལ་དྲི་བ་དང་པོ་རྩ་ལྟུང་འཁྲུལ་སྤོང་ལས།  བཅུ་
10-3-18a


གསུམ་པོ་དང་གཉིས་པའི་ཕྱོགས་གཅིག་ནི།  རྡོ་རྗེ་ཐེག་པ་མ་གཏོགས་གཞན་གང་གི་ཡང་རྩ་བར་བཅས་པ་མེད་དོ་གསུངས་པ།  བཅུ་གསུམ་པ་ཡིན་ནམ་པོ་ཡིན།  དང་པོ་ལྟར་ན་གཞན་བཅུ་གཉིས་པོའང་སྡོམ་པ་འོག་
མ་གཉིས་ཀྱི་རྩ་བ་གང་རུང་ལ་བཅས་པ་ལྟར་སྣང་ལ།  ཕྱི་མ་ལྟར་ན་རྩ་ལྟུང་ལྔ་པ་སོགས་བྱང་སེམས་ལ་མ་བཅས་པ་ལྟར་སྣང་བས་ཇི་ལྟར་ལགས།  ཞེས་པའི་ལན་ནི།  བཅུ་གསུམ་པོ་ཞེས་པ་ཡིག་ཆ་དག་པ་རྣམས་ན་ཡོད་ཅིང་།  དོན་ལ་
ཡང་གནས་ཏེ།  རྩ་ལྟུང་གཉིས་པ་ལ་ཉན་ཐོས་དང་ཐུན་མོང་བའི་ཕམ་པ་བཞི།  བྱང་སེམས་དང་ཐུན་མོང་པའི་ཕམ་འདྲ་བཞི་ནི་ཁྱད་གསོད་མེད་ཀྱང་རྩ་བའི་ལྟུང་བར་འགྱུར་བ་ནི་སྡོམ་པ་འོག་མ་གཉིས་ལའང་རྩ་བར་བཅས་ལ།  གཉིས་པའི་
ཕྱོགས་གཅིག་ཡན་ལག་ཕྲ་མོ་རྣམས་ལ་ཁྱད་གསོད་དང་བཅས་ཏེ་སྤྱད་པ་དང་།  ལྟུང་བ་གཞན་བཅུ་གསུམ་པོ་ཐམས་ཅད་རྡོ་རྗེ་ཐེག་པ་མ་གཏོགས་འོག་མ་གཉིས་ལ་རྩ་བར་བཅས་པ་མེད་ཅེས་པའོ། །སྨོན་པ་བྱང་ཆུབ་ཀྱི་སེམས་སྤོང་བ་ཡང་བྱང་
སེམས་ཀྱི་སྡོམ་པའི་རྩ་བར་བཅས་པ་མེད་དེ།  བྱང་སེམས་ཀྱི་སྡོམ་པའི་སྲོལ་ཆེན་གཉིས་ནི་དབུ་མ་ལུགས་དང་།  སེམས་ཙམ་ལུགས་གཉིས་ཡིན་ལ།  དང་པོ་ལ་ནི་ནམ་མཁའི་སྙིང་པོའི་མདོ་དང་།  རྡོ་རྗེ་རྩེ་མོ་ལས་རྩ་བའི་ལྟུང་བ་བཅུ་བཞི་
གསུངས་ཤིང་།  དེ་ཉིད་རྟེན་གྱི་སྒོ་ནས་བཅོ་བརྒྱད་དང་།  མཚམས་མེད་ལྔ་སོ་སོར་ཕྱེ་ན་ཉི་ཤུ་རྩ་གཉིས་སུ་འགྱུར་བ་ལ་ཡང་སྨོན་སེམས་སྤོང་བ་མ་བགྲངས་པའི་ཕྱིར་དང་།  ཕྱི་མ་ལ་བྱང་ས་དང་།  སྡོམ་པ་ཉི་ཤུ་པར་རྩ་བའི་ལྟུང་བ་བཞི་གསུངས་པ་ལ་
10-3-18b


ཡང་སྨོན་སེམས་སྤོང་བ་མ་བགྲངས་པའི་ཕྱིར་རོ། །རིགས་པས་ཀྱང་འཐད་དེ།  རྩ་ལྟུང་དེ་དག་ནི་འཇུག་སྡོམ་ལ་ལྟོས་པའི་རྩ་ལྟུང་ཡིན་པའི་ཕྱིར་རོ། །འོ་ན་བྱང་སེམས་ཀྱི་སྡོམ་པའི་གཏོང་རྒྱུར་བཤད་པ་དང་འགལ་ལོ་སྙམ་ན།  གཏོང་རྒྱུར་བཤད་པ་
ཙམ་གྱིས་རྩ་བའི་ལྟུང་བར་འགྱུར་བ་མ་ཡིན་ཏེ།  སོ་ཐར་ལ་ཡང་།  བསླབ་པ་ཕུལ་དང་ཤི་འཕོས་དང་། །མཚན་གཉིས་དག་ནི་བྱུང་བ་དང་། །རྩ་བ་ཆད་དང་མཚན་འདས་ལས། །ཞེས་པ་རྣམས་གཏོང་རྒྱུར་བཤད་ཀྱང་རྩ་ལྟུང་མ་ཡིན་པ་དང་།  
དགེ་སློང་གི་སྡོམ་པ་ལ།  ཉི་ཤུ་མ་ལོན་ལ་དེར་ཤེས་གཏོང་རྒྱུར་བཤད་ཀྱང་རྩ་ལྟུང་མ་ཡིན་པ་བཞིན་ནོ། །དེས་ན་བྱང་སེམས་ཀྱི་སྡོམ་པ་ལ་བསླབ་པ་ཕུལ་བའི་རྣམ་གཞག་མ་བཤད་ཀྱང་།  འདི་སོ་ཐར་གྱི་བསླབ་པ་ཕུལ་བ་དང་ཆ་འདྲ་བར་སྣང་སྟེ།  དང་
པོར་སེམས་ཅན་གྱི་དོན་དུ་སངས་རྒྱས་ཐོབ་པར་ཁས་བླངས་ནས་ཕྱིས་དེ་མི་ནུས་སྙམ་ནས་བཏང་བ་ཡིན་པའི་ཕྱིར་རོ། །རྗེ་ས་པཎ་གྱིས་དབུ་མ་ལུགས་ལ་སྨོན་སེམས་མ་བཏང་ན་འཇུག་སྡོམ་གྱི་རྩ་ལྟུང་འགའ་ཞིག་བྱུང་ཡང་སྡོམ་པའི་རྩ་བ་མི་གཏོང་ངོ་ཞེས་
གསུངས་པ་ལྟར།  འདི་བཏང་ན་བྱང་སེམས་ཀྱི་སྡོམ་པ་མཐའ་དག་གཏོང་བར་དབུ་སེམས་གཉིས་ཀ་མཐུན་ཏེ།  བྱང་སའི་ཚུལ་ཁྲིམས་ལེའུར་སྡོམ་པ་གཏོང་བའི་རྒྱུ་ལ་སྨོན་སེམས་གཏོང་བ་དང་།  ཀུན་དཀྲིས་དྲག་པོས་རྩ་བའི་ལྟུང་བ་བཞི་པོ་སྤྱད་པ་གཉིས་
ཡིན་པར་གསུངས་པ་ལྟ་བུའོ། །དེས་ན་གཏོང་རྒྱུ་དང་རྩ་ལྟུང་ནོར་བར་མི་བྱའོ། །དྲི་བ་གཉིས་པ་གཞལ་ཡས་ཁང་གི་འོག་གཞི་སྣ་ཚོགས་རྡོ་རྗེ་ཐུན་མོང་བའི་སྲུང་འཁོར་གྱི་སྣ་ཚོགས་རྡོ་རྗེ་ཡིན་པ་ལ།  སྲུང་འཁོར་ཐུན་མོང་བ་ལྟར་ན་ཆོས་འབྱུང་དང་།  
10-3-19a


ཐུན་མོང་མ་ཡིན་པ་དང་།  གཉིས་ཀ་ལྟར་ན་ཆོས་འབྱུང་།  སྲུང་འཁོར་འོག་གི་ཁྲོ་བོ་སོགས་ཆོད་བྱེད་ཡོད་པ་ལྟར་སྣང་བས་བསྒོམ་དོན་ལ་ཇི་ལྟར་ལགས་ཞེས་པའི་ལན་ནི་ཐུན་མོང་བའི་སྲུང་འཁོར་གྱི་ནང་དུ་ཆོས་འབྱུང་
སོགས་མེད་པར་གཞལ་ཡས་ཁང་བསྒོམ་པ་རྣམས་ལ་དེ་གཉིས་གཅིག་པ་ཡིན་གྱི་གཞན་རྣམས་ལ་དེ་ལྟར་མ་ངེས་ཏེ།  ཐུན་མོང་བའི་སྲུང་འཁོར་གྱི་ནང་དུ་ཐུན་མོང་མ་ཡིན་པའི་སྲུང་འཁོར་དང་དེའི་དབུས་ཀྱི་ཁྲོ་བོ་ཞུ་བའམ།  ལྟོ་བའི་ནང་དུ་
ཆོས་འབྱུང་བསྐྱེད་ནས་དེའི་ནང་དུ་གཞལ་ཡས་ཁང་བསྒོམ་པའི་ཚེ་གཞལ་ཡས་ཁང་གར་ཡོད་ས་དེ་ཉིད་དུ་འོག་གཞི་སྣ་ཚོགས་རྡོ་རྗེ་དང་བཅས་ཏེ་གྲུབ་པ་ཡིན་གྱི།  མ་གིའི་སྣ་ཚོགས་རྡོ་རྗེ་ལྟོ་བའི་ནང་དུ་ཡར་ལེན་པ་ཡང་མ་ཡིན།  ལྟོ་བའམ་ཆོས་
འབྱུང་ཐུན་མོང་བའི་སྲུང་འཁོར་གྱི་ཕྱི་རོལ་ཏུ་སོང་བ་ཡང་མ་ཡིན་ནོ། །གདན་གྱི་སྣ་ཚོགས་རྡོ་རྗེ་དུ་མ་ཡོད་པ་བློ་ལ་མི་ཤོང་བ་ཡང་མི་དགོས་ཏེ།  དགྲ་ནག་དུ་གཞལ་ཡས་ཁང་གི་ནང་དུ་ལྷའི་གདན་ལ་ཡང་སྣ་ཚོགས་རྡོ་རྗེ་བཤད་པ་བཞིན་ནོ། །གཞན་དུ་ན་
དབུས་སུ་དཀྱིལ་འཁོར་ལྔ་ལ་ཁྲོ་བོ་གཞན་རྣམས་དང་ལྡན་པའོ་ཞེས་པའི་དོན།  དབུས་ཀྱི་ཁྲོ་བོའི་ལྟོ་བར་གུར་རིགས་བསྡུས་ཀྱི་དཀྱིལ་འཁོར་ལྔ་བསྒོམས་ནས་དེའི་ཕྱི་རོལ་ཏུ་ཁྲོ་བོ་བཅུ་པོ་དང་ལྡན་པར་གསུངས་པའི་དོན་ཡང་ཇི་ལྟར་འཆད།  དེས་ན་
གསང་སྔགས་རྒྱུད་སྡེ་ལས་བཤད་པའི་རྟེན་དང་བརྟེན་པའི་དཀྱིལ་འཁོར་ཐམས་ཅད་ལ།  ལོངས་སྤྱོད་རྫོགས་སྐུའམ།  སྤྲུལ་པ་མཆོག་གི་དཀྱིལ་འཁོར་ལ་དངོས་སུ་གྲུབ་པ་དང་།  དེའི་རྣམ་པ་རྣལ་འབྱོར་པས་བདག་བསྐྱེད་དང་།  མདུན་བསྐྱེད་ཀྱི་
10-3-19b


བློ་སྣང་ལ་བསྒོམ་པ་དང་།  དེའི་དམིགས་པ་གསལ་བའི་ཆེད་དུ་བློས་སློང་དང་།  རས་བྲིས་དང་།  རྡུལ་ཚོན་སོགས་ལ་བྲིས་པ་སྟེ་གསུམ་ལས།  དང་པོ་ལ།  མེ་རིས་ཡན་ཆད་ཀྱི་རྟེན་དང་།  དུར་ཁྲོད་ཀྱི་ཕྱོགས་སྐྱོང་ཞིང་སྐྱོང་ཡན་ཆད་ཀྱི་བརྟེན་པ་
ཐམས་ཅད་ཡེ་ཤེས་ཀྱི་སྣང་བ་ཁོ་ན་དང་།  གཉིས་པ་ལ་རྣལ་འབྱོར་པའི་བློ་སྣང་དང་།  གསུམ་པ་ལ་རྡོ་ཤིང་དང་།  ཚོན་སོགས་ལས་ལག་པའི་འདུ་བྱེད་ཀྱིས་བཟོས་པ་ཡིན་པས་བློས་སློང་ལ་བཞེངས་ཇི་ཙམ་ཐུབ་པ།  ཡེ་ཤེས་ཀྱི་སྣང་བ་དང་།  བློ་སྣང་ལ་
སྦྱར་ག་ལ་ཉན།  འཁོར་གྱི་ལྷ་ལ་འཇིག་རྟེན་པའི་གཟུགས་འཛིན་པ་དང་།  འཇིག་རྟེན་པའི་མིང་གིས་བཏགས་པ་ཐམས་ཅད་འཇིག་རྟེན་པ་ཡིན་ཞེས་སྨྲ་བར་ག་ལ་རུང་སྟེ།  སྔར་གྱི་གསུམ་པོ་གང་ཡིན་དཔྱད་པས་གསལ་ལོ། །དྲི་བ་གསུམ་པ་རྫོགས་
རིམ་འཁོར་ལོ་བཞིའི་སྤྲུལ་པའི་འཁོར་ལོ་དང་།  བདེ་ཆེན་གྱི་འཁོར་ལོའི་རྩ་འདབ་ཀྱི་ཡིག་འབྲུ་བསྲེག་པ་དང་།  གསོ་བ་དགོས་མི་དགོས་གསལ་ཁ་མི་འདུག་པ་ཇི་ལྟར་ལགས་ཞེས་པའི་ལན་ནི།  བདེ་མཆོག་གི་རྫོགས་རིམ་འགའ་ཞིག་ཏུ་བདེ་
ཆེན་གྱི་འཁོར་ལོ་ལ་བསྲེག་གསོ་གསུངས་ཀྱང་གསུང་ངག་གི་སྐབས་སུ་འཁོར་ལོ་གོང་འོག་གཉིས་ལ་མ་གསུངས་པ་ནི་དམིགས་པའི་དངོས་གཞི་འབར་འཛག་ཡིན་ལ།  བདེ་ཆེན་གྱི་འཁོར་ལོ་ནི་བྱང་སེམས་འབབ་པའི་གཞི་དང་།  སྤྲུལ་པའི་
འཁོར་ལོ་ནི་མེ་འབར་བའི་གཞི་ཡིན་པས་དེ་ལས་གཞན་པའི་བསྲེག་པ་དང་།  གསོ་བ་མི་དགོས་པ་ལ་དགོངས་ཏེ།  རྩ་རྒྱུད་ལས།  ལྟེ་བར་གཏུམ་མོ་སྦར་བ་ཡིས། །དེ་བཞིན་གཤེགས་པ་ལྔ་བསྲེགས་ཤིང་། །སྤྱན་ལ་སོགས་པ་ཡང་བསྲེགས་ཏེ། །
10-3-20a


བསྲེགས་པས་རི་བོང་ཅན་ཧཾ་འཛག །ཅེས་པའི་ཚིག་རྐང་བར་པ་གཉིས་ཀྱིས་སྙིང་གའི་ཡིག་འབྲུ་དགུ་བསྲེག་པ་དངོས་སུ་བསྟན་ནས།  ཡང་ཞེས་པས་མགྲིན་པའི་ཡིག་འབྲུ་བསྟན་པར་གསུངས་པ་དང་ཤིན་ཏུ་འགྲིག་སྟེ།  ཚིག་རྐང་
གོང་འོག་གཉིས་བསྲེགས་གསོ་བྱེད་པ་པོའི་བར་འཛག་གཉིས་པོ་དངོས་སུ་གསུངས་པའི་ཕྱིར་རོ། །དྲི་བ་བཞི་པ་ལམ་དུས་ཀྱི་རིག་པའི་དབང་ལྔ་ལ་སོ་སོའི་སྐབས་སུ་ལུས་དཀྱིལ་གྱི་ལྷ་རྣམས་ཁ་དོག་བསྒྱུར་བའི་དམིགས་པ་དགོས་ལགས་སམ་
ཞེས་པའི་ལན་ནི།  དེའི་རྒྱུ་མཚན་ཅི་ཡིན་ཕྱིའི་ཧེ་རུ་ཀའི་ཁ་དོག་དང་མཐུན་པར་དགོས་པས་སོ་སྙམ་ན།  སྙིང་པོ་ཀྱཻ་རྡོ་རྗེའི་ལུས་ལ་ལུས་དཀྱིལ་བཀོད་པའི་ཚེ་ཕོ་བྲང་ལྔའི་ལྷའི་ཁ་དོག་སོ་སོར་འཁྲུལ་ཟད་དག་གིས་གསུངས་པ་རྣམས་དོར་དགོས་
པར་འགྱུར་རོ། །གལ་ཏེ་དབང་ལྔ་སོ་སོའི་མཐར་རིགས་ལྔ་སོ་སོའི་རྒྱས་འདེབས་ཡོད་པས་དེའི་ཁ་དོག་ལྟར་བསྒོམ་དགོས་སོ་སྙམ་ན།  འོ་ན་ཙཽ་རཱི་ཁ་དོག་དཀར་པོ་དང་།  ཙཎྜ་ལཱི་ཁ་དོག་སེར་པོར་བསྒོམ་དགོས་པར་འགྱུར་ཏེ།  དེ་གཉིས་
ལ་རྣམ་སྣང་དང་རིན་འབྱུང་གིས་རྒྱས་བཏབ་པའི་ཕྱིར་རོ། །དེས་ན་རྣམ་རྟོག་བན་བུན་གྱིས་བསླང་བའི་སྒྲོས་ངན་གྱི་རྗེས་སུ་འཇུག་པར་མི་བྱའོ། །དྲི་བ་ལྔ་པ་རྩ་ཡིག་མགོ་ཐུར་བསྟན་ལ་ལྷ་མགོ་ཐུར་བསྟན་བསྒོམ་དགོས་ལགས་སམ་
ཞེས་པའི་ལན་ནི།  དེ་ལྟར་བསྒོམ་དུ་མི་རུང་སྟེ།  ལུས་དཀྱིལ་གྱི་ལྷ་ཐམས་ཅད་ལུས་རང་གི་དཀྱིལ་འཁོར་གྱི་རྣམ་པ་བསྒོམ་དགོས་པའི་ཕྱིར་རོ། །རྩ་ཡིག་མགོ་ཐུར་དུ་བསྟན་པ་ནི་སྦྱང་གཞི་ལ་ཡོད་པ་ལྟར་རྫོགས་རིམ་གྱི་སྐབས་
10-3-20b


སུ་བསྒོམ་དགོས་པ་ཡིན་གྱི།  ལུས་དཀྱིལ་གྱི་སྐབས་སུ་མགོ་བོ་གང་དུ་བསྟན་ཀྱང་འདྲ།  སྦྱང་གཞི་རྩ་དང་ཁམས་ཡོད་པ་ཙམ་གྱིས་ཆོག་སྟེ།  མན་ངག་ཐུན་མོང་མ་ཡིན་པ་འགའ་ཞིག་ཏུ་སྦྱང་གཞི་ལ་སྙིང་མགོ་ཐུར་བསྟན་དུ་ཡོད་ཀྱང་བསྒོམ་
དོན་ལ་མགོ་བོ་གྱེན་དུ་བསྟན་པར་བསྒོམས་ནས་དེའི་ནང་དུ་ཧེ་རུ་ཀ་བསྒོམ་པར་གསུངས་པ་བཞིན་ནོ། །དྲི་བ་དྲུག་པ་སམ་བུ་ཊི་ནས་བཤད་པའི་སྙིང་པོ་ཀྱཻ་རྡོ་རྗེ་ལ་དཀྱིལ་ཆོག་གང་སྦྱར་ཞེས་པའི་ལན་ནི།  སམ་བུ་ཊིའི་བརྟག་པ་གཉིས་
པའི་རབ་བྱེད་དང་པོ་ནས་གསུངས་པའི་དཀྱིལ་ཆོག་སྦྱར་དགོས་ཏེ།  རྒྱུད་འདིར་བརྟགས་པ་དང་པོས་རྒྱུད་དོན་མདོར་བསྟན།  གཉིས་པ་ནས་བཅུ་པའི་བར་གྱིས་མངོན་རྟོགས་ཀྱི་རིམ་པ་བཞིན་རྒྱས་པར་བཤད་པ་ལས་གཉིས་པའི་དང་
པོས་སྨིན་བྱེད་དབང་།  གཉིས་པས་ལྟ་བ།  གསུམ་པ་ནས་བརྟག་པ་གསུམ་པ་དངོས་ཀྱི་བར་རབ་བྱེད་དྲུག་གིས་བསྐྱེད་རིམ་སྟོན་པའི་ལུགས་ཡིན་པས་སྐབས་དེའི་མཆོག་སྒྲུབ་པའི་དཀྱིལ་འཁོར་བཅུ་གཉིས་ལ་གཉིས་པའི་དང་པོ་
ནས་གསུངས་པའི་དབང་ཆོག་སྦྱར་དགོས་སོ་འདི་ཇི་ལྟར་ཤེས་ཞེ་ན་རྒྱུད་འདི་ནས་གསུངས་པའི་གཏུམ་མོའི་དམིགས་པ་ཉེར་དགུ་ལ་རྟེན་དཀྱིལ་འཁོར་བཅུ་གཉིས་པོ་གང་རུང་བསྒོམ་པར་གསུངས་པ་དང་།  ཚོགས་འཁོར་དང་གཏོར་ཆོག་
གི་སྐབས་སུ་ཡང་ཆོས་འབྱུང་གི་ནང་དུ་ལེ་དགུའི་ལེ་ཚེ་བརྒྱད་ལ་ཞིང་སྐྱོང་བཞི་བཅུ་རྩ་བརྒྱད་དང་ལེ་ཚེ་དབུས་མ་ལ་དཀྱིལ་འཁོར་བཅུ་གཉིས་པོ་གང་རུང་བསྒོམ་པར་གསུངས་པས་ཤེས་སོ། །དྲི་བ་བདུན་པ་བདེ་མཆོག་ནག་པོ་པའི་དཀྱིལ་ཆོག་
10-3-21a


གི་སྐབས་སུ།  ལྷ་དང་དཀྱིལ་འཁོར་གྱི་དག་པ་དྲན་ཞེས་པ་ལ་དག་པ་གང་དྲན།  རྡུལ་ཚོན་གྱི་ཡེ་ཤེས་པ་གཤེགས་པར་གསུངས་ཀྱང་ཕྱག་ལེན་དང་གསང་མཐའི་ཟབ་ཁྱད་ཡིན་པས་ལུས་ལ་བསྡུ་ཞེས་པ་
ཡོངས་གྲགས་གཅིག་འདུག་པ་ཅི་ལྟར་ལགས་ཞེས་པའི་ལན་ནི་དཀྱིལ་འཁོར་གྱི་དག་པ་བྱང་ཕྱོགས་སོ་བདུན་དང་སྦྱར་བ་རྡོ་རྗེ་རྩེ་མོ་ལས་གསུངས་པ་དེ་ཉིད་རྒྱུད་སྡེ་གོང་མ་གཉིས་ལ་ཐུན་མོང་དུ་སྦྱར་བར་བྱ་བ་ཡིན་ལ་འདིར་ནི་ལྷའི་དག་པ་ཡང་
རྣལ་འབྱོར་མ་ཀུན་སྤྱོད་ལས་གསུངས་པ་ལྟར་བྱང་ཕྱོགས་སོ་བདུན་དང་སྦྱར་བར་བྱ་བ་ཡིན་ཏེ།  སྒྲུབ་པའི་ཐབས་ཉིད་ན་གསལ་ལོ། །རྗེ་བཙུན་གྱི་ནག་པོ་དཀྱིལ་ཆོག་ལས་རྡུལ་ཚོན་གྱི་ཡེ་ཤེས་པ་གཤེགས་པ་དཀྱིལ་འཁོར་གཞན་དང་འདྲ་བར་
གསུངས་ལ།  རྒྱ་གཞུང་དུ་གཡས་དང་གཡོན་གྱི་ལོགས་སུ་ནི། །བསྐོར་བ་དེ་ནས་འཇུག་པ་དང་། །ལོངས་སྤྱོད་རྫོགས་པ་བཟུང་ནས་ནི། །གཉིས་མེད་ཡེ་ཤེས་ངལ་བསོའོ། །ཚོན་ལ་སོགས་པའི་དངོས་པོ་ཀུན། །ནངས་པར་ཐོ་རངས་བསྡུ་བར་བྱ། །
བསྡུས་ནས་གསེར་གྱི་བུམ་པར་ནི། །བཅུག་ནས་ཆུ་བོ་ཆེན་པོར་དོར། །ཞེས་གསུངས་པའི་ཚིགས་བཅད་དང་པོས་མདུན་གྱི་དཀྱིལ་འཁོར་ཕྱོགས་གཡོན་སྐོར་དང་མཚམས་གཡས་སྐོར་གྱིས་རང་གི་ལུས་ལ་བསྡུས་ནས་ཚིགས་བཅད་ཕྱི་མས་རྡུལ་
ཚོན་ཆུ་བོར་དོར་བ་བསྟན་པས་འདི་དང་གོང་མ་གཉིས་གདམ་ཀ་ཅན་དུ་མངོན་ཏེ།  ལྷ་སྟ་གོན་གྱི་དཀྱིལ་འཁོར་ལུས་ལ་བསྡུ་བ་དང་ནམ་མཁར་བཏེག་པ་གང་རུང་བྱས་པས་ཆོག་པར་གསུངས་པ་བཞིན་ནོ། །དྲི་བ་བརྒྱད་པ་ཀུན་རིག་གི་བསྙེན་པ་རྒྱས་པ་
10-3-21b


དཀྱིལ་འཁོར་ལས་རིམ་ལ་སྦྱར་བའི་ཚེ་བདག་སྐྱེད་ཀྱི་ཡེ་ཤེས་པ་གཤེགས་སམ་བསྟིམ་མམ་ཇི་ལྟར་ལགས།  སྡོམ་གསུམ་རབ་དབྱེར།  ཕྱག་རྒྱ་བཀྲོལ་ནས་སངས་རྒྱས་གཤེགས། །དེ་ནས་རང་ཉིད་ཐ་མལ་གྱུར། །ཅེས་གསུངས་པས།  དམ་ཚིག་པ་དང་
ཡེ་ཤེས་པ་གཉིས་ཀ་གཤེགས་པ་ཡིན་ནམ་ཇི་ལྟར་ལགས་ཞེས་པའི་ལན་ནི།  ཀུན་རིག་གི་བསྙེན་པ་རྒྱས་པ་དཀྱིལ་འཁོར་ལས་རིམ་ལ་སྦྱར་བའི་ཚེ་ཐོག་མར་ཡེ་ཤེས་པ་གཤེགས།  དེ་ནས་དམ་ཚིག་པ་གཞལ་ཡས་ཁང་དང་འཁོར་རྣམས་གཙོ་བོ་ལ་བསྡུས་ཏེ།  གཙོ་
བོ་དམ་ཚིག་པའི་ང་རྒྱལ་གྱིས་མདུན་གྱི་དཀྱིལ་འཁོར་གྱི་བྱ་བ་བྱེད་པ་ལུགས་འདི་ལ་མི་རུང་བ་མ་ཡིན་ནོ། །དེས་ན་སྡོམ་གསུམ་རབ་དབྱེར།  དེ་ནས་རང་ཉིད་ཐ་མལ་གྱུར། །ཅེས་པ་ཡང་ཡེ་ཤེས་པ་གཤེགས་ནས་དམ་ཚིག་པ་རྐྱང་པ་ཙམ་ལ་ཐ་མལ་པའི་
མིང་བཏགས་པ་ཡིན་གྱི་དམ་ཚིག་པའི་ང་རྒྱལ་ཙམ་ཡང་མེད་པར་ཐ་མལ་པར་གནས་པ་ནི་སྤྱོད་རྒྱུད་ཡན་ཆད་ཀྱི་ཉམས་ལེན་ལ་མི་རུང་ངོ་།  ཁ་ཅིག །ཆོ་ག་ཚར་ནས་ཡེ་ཤེས་པ་གཤེགས་ཞེས་པའི་དོན་དུ་བསམས་ནས་བདག་བསྐྱེད་བསྙེན་པ་རྒྱས་པ་དཀྱིལ་
འཁོར་ལས་རིམ་ལ་སྦྱར་བའི་ཚེ་བདག་མདུན་གྱི་ཡེ་ཤེས་པ་མཉམ་དུ་གཤེགས་པར་འདོད་པ་ཡང་མི་འཐད་དེ།  བདག་བསྐྱེད་མ་བསྡུས་པའི་རྣལ་འབྱོར་པ་དེས་སློབ་མ་ལ་དབང་བསྐུར་སོགས་བྱེད་པའི་ཚེ་ན་དབང་རྫས་འགྲིམ་པ་སོགས་དཀྱིལ་འཁོར་མ་
བསྡུས་པའི་གཙོ་བོས་བྱར་མི་རུང་བའི་ཕྱིར་རོ། །སྡོམ་གསུམ་རབ་དབྱེ་ཉིད་ལས་ཀྱང་།  ཕྱག་རྒྱ་བཀྲོལ་ནས་སངས་རྒྱས་གཤེགས། །ཞེས་གསུངས་ཀྱི།  གཉིས་ཀ་གཤེགས་པའམ་དམ་ཚིག་པ་གཤེགས་པ་མ་གསུངས་པའི་གནད་ཀྱང་འདི་ཉིད་ཡིན་ནོ། །དམ་ཆོས་
10-3-22a


རིན་ཆེན་བརྩོན་པས་ལེགས་བསྒྲུབས་ནས། །བྱིན་རླབས་དཔལ་གྱིས་འབྱོར་པའི་སློབ་མ་ཡིས། །ཚུལ་བཞིན་དྲིས་དོན་བཤད་པའི་དགེ་བ་དེས། །འདྲི་པོ་རྡོ་རྗེ་ཐེག་ལ་དབང་འབྱོར་ཤོག །གཟི་རིན་ཆེན་དཔལ་གྱིས་དྲིས་པའི་ལན་མང་དུ་ཐོས་པའི་དགེ་སློང་བསོད་
ནམས་སེང་གེས་བཀོད་པའོ།།    །དགེའོ།།  ༄༅། །རིན་ཆེན་དཔལ་གྱི་དྲིས་ལན་བཞུགས།  མཁྱེན་པའི་ནམ་མཁར་ཐུགས་རྗེ་ཡི། །དཀྱིལ་འཁོར་ཕྲིན་ལས་ཚ་ཟེར་ཅན། །རྗེ་བཙུན་བླ་མའི་ཞབས་བཏུད་དེ། །བློ་ལྡན་དྲིས་པའི་ལན་བརྗོད་བྱ། །དགེ་བའི་བཤེས་གཉེན་གཟི་
རིན་ཆེན་དཔལ་གྱི་གསུང་ཡིག་ཇ་ཞོ་དོའི་རྟེན་དང་བཅས་པ་འཕྲོད་པས་སེམས་སྤྲོ།  དགེ་བའི་རྩ་བ་སངས་རྒྱས་ཀྱི་སར་བསྔོ།  ཕར་ཕྱིན་ཐེག་པ་རང་ལུགས་ལ། །བཅུ་གཅིག་རྫོགས་སངས་སར་བཤད་ཀྱང་། །ས་བཅུ་ལས་བགྲོད་མི་ནུས་ཤིང་། །ས་གསུམ་སྔགས་ལ་
ལྟོས་དགོས་ན། །བདག་མེད་བསྟོད་པའི་འགྲེལ་པ་རུ། །ས་བཅུ་གཉིས་པོ་ཉེ་རྒྱུ་ལ། །མི་ལྟོས་བགྲོད་ནུས་གསུངས་པ་དང་། །འགྲེལ་པ་གནད་ཀྱི་གསལ་བྱེད་ལས། །ཕར་ཕྱིན་ཐེག་པའི་བགྲོད་བྱ་བ། །ས་བཅུ་གཅིག་པའམ་བཅུ་གཉིས་པ། །ཞེས་གསུངས་
དགོངས་པ་ཇི་ལྟར་ལགས། །ཞེས་པའི་ལན་ནི།  ཕར་ཕྱིན་ཐེག་པར་ས་བཅུ་གཅིག་པ་རྫོགས་པའི་སངས་རྒྱས་ཀྱི་སར་བཤད་པ་ནི་ཕར་ཕྱིན་ཐེག་པ་རང་ལུགས་ལ་ལམ་དེས་ས་དེ་ཐོབ་པར་འདོད་ཀྱང་།  གསང་སྔགས་བླ་མེད་ཀྱི་ལུགས་ལ་ཕར་ཕྱིན་ཐེག་པའི་
ལམ་གྱི་སྔགས་ལ་མ་ལྟོས་པར་ས་བཅུ་པ་ཐོབ་ཅིང་།  ས་བཅུ་པ་ནས་ངེས་པར་སྔགས་ལ་ལྟོས་དགོས་པར་བཞེད་པས་འགལ་བ་ཅི་ཡང་ཡོད་པ་མ་ཡིན་ནོ། །བདག་མེད་བསྟོད་འགྲེལ་དུ་ས་བཅུ་གཅིག་པ་དང་བཅུ་གཉིས་པ་ཉེར་རྒྱུ་ལ་མི་
10-3-22b


ལྟོས་པར་བགྲོད་ནུས་པར་གསུངས་པ་དང་ཡང་མི་འགལ་ཏེ།  དེ་གཉིས་ཉེ་རྒྱུ་ལ་མ་ལྟོས་པར་བགྲོད་ནུས་ཀྱང་སྔགས་ལམ་ལ་མ་ལྟོས་པར་བགྲོད་མི་ནུས་པའི་ཕྱིར་རོ། །འགྲེལ་པ་གནད་ཀྱི་གསལ་བྱེད་ལས་ཕར་ཕྱིན་ཐེག་པའི་བགྲོད་པར་བྱ་བ་ས་བཅུ་གཅིག་
པའམ་བཅུ་གཉིས་པ་སྤྱི་དོན་གྱི་མཐར་ཐུག་ཏུ་གསུངས་པ་ནི་ཕ་རོལ་ཏུ་ཕྱིན་པའི་ས་བཅུ་པ་ལས་ནི་འདས།  བཅུ་གསུམ་པ་ནི་མ་ཐོབ་པས་སྤྱི་དོན་གྱི་མཐར་ཐུག་ཏུ་བཞག་པ་ཡིན་གྱི་ཕར་ཕྱིན་ཐེག་པའི་ལམ་གྱིས་སྔགས་ལམ་ལ་མ་ལྟོས་པར་ཐོབ་ནུས་པའི་རྒྱུ་མཚན་གྱིས་
སྤྱི་དོན་དུ་བཞག་པ་ནི་མ་ཡིན་ཏེ།  གཞན་དུ་ན་རྒྱུད་སྡེ་སྤྱི་རྣམ་ལས།  ས་བཅུ་གཉིས་པ་སྦས་དོན་གྱི་མཐར་ཐུག་ཏུ་གསུངས་པ་དང་འགལ་བར་འགྱུར་བའི་ཕྱིར་རོ། །དེས་ན་ཐ་སྙད་ལ་དགོངས་ནས་ས་བཅུ་གཉིས་པ་སྦས་དོན་གྱི་མཐར་ཐུག་ཏུ་བཞག་ཏུ་རུང་སྟེ།  
ཕར་ཕྱིན་ཐེག་པར་ས་བཅུ་གཉིས་པའི་ཐ་སྙད་མ་གསུངས་པའི་ཕྱིར་རོ། །དོན་ལ་དགོངས་ནས་ས་བཅུ་གཉིས་པ་སྤྱི་དོན་གྱི་མཐར་ཐུག་ཏུ་ཡང་བཞག་ཏུ་རུང་སྟེ།  ས་བཅུ་པ་ལས་ནི་འདས།  བཅུ་གསུམ་པ་མ་ཐོབ་པའི་འབྲས་བུའི་ས་ཡིན་པའི་ཕྱིར་རོ། །དེ་
ཉིད་ཀྱིས་ས་བཅུ་གཅིག་པ་དོན་དང་ཐ་སྙད་གཉིས་ཀའི་སྒོ་ནས་སྤྱི་དོན་གྱི་མཐར་ཐུག་ཏུ་བཞག་ཏུ་རུང་བར་གྲུབ་ལ།  སྤྱི་དོན་གྱི་མཐར་ཐུག་གི་དོན་ཡང་ཕ་རོལ་དུ་ཕྱིན་པ་བས་མཐར་ཐུག་འདོད་ཅིང་།  རྡོ་རྗེ་ཐེག་པ་བས་མཐར་ཐུག་ས་བཅུ་གསུམ་པར་འདོད་པ་ཡང་ལེགས་པར་
གྲུབ་བོ། །ཕར་ཕྱིན་ཐེག་པའི་བཅུ་གཅིག་དང་། །རྡོ་རྗེ་ཐེག་པའི་བཅུ་གསུམ་གཉིས། །དོན་གཅིག་མིང་གིས་དབྱེ་མིན་ནམ། །ས་ཆེན་སྒྲོལ་མའི་དཀྱིལ་ཆོག་ལས། །དབང་བཞི་ཐོབ་པའི་འབྲས་བུ་ཡང་། །ས་བཅུ་གཅིག་དང་སྦྱར་བ་དང་། །ཊཱི་ཀ་མུ་ཏིག་ཕྲེང་བ་ལས། །
10-3-23a


བཅུ་གསུམ་གདུལ་བྱ་བྲོད་བསྐྱེད་ཕྱིར། །དངོས་བགྲོད་ས་བཅུ་གཅིག་པོ་ལས། །མེད་གསུངས་དགོངས་པའང་དེ་མིན་ནམ། །ཅེས་པའི་ལན་ནི་ཕར་ཕྱིན་ཐེག་པར་བཤད་པའི་ས་བཅུ་གཅིག་པ་དང་།  རྡོ་རྗེ་ཐེག་པར་བཤད་
པའི་ས་བཅུ་གསུམ་པ་གཉིས་དོན་གཅིག་པར་རྗེ་བླ་མས་བཞེད་པ་དོན་ལ་གནས་ཏེ།  ཕར་ཕྱིན་ཐེག་པར་ཡང་སྤངས་རྟོགས་མཐར་ཐུག་པ་གཅིག་ལ་ས་བཅུ་གཅིག་པར་བཤད།  ས་བཅུ་གསུམ་པ་ལ་ཡང་དེ་བས་ལྷག་པ་མེད་པའི་ཕྱིར་རོ། །འོན་ཀྱང་དེ་ཕར་
ཕྱིན་ཐེག་པ་བ་རང་ལམ་གྱིས་ཐོབ་པར་འདོད་ཀྱང་།  བླ་མེད་ཀྱི་ལུགས་ལ་མི་འདོད་པས་འགལ་བ་ཅི་ཡང་མེད་དོ། །དེ་ཉིད་ཀྱིས་དབང་བཞི་པའི་འབྲས་བུ་ས་བཅུ་གཅིག་པ་དང་སྦྱར་བར་གསུངས་པ་ཡང་ཕར་ཕྱིན་ཐེག་པར་བཤད་པའི་ས་བཅུ་གཅིག་པ་ལ་
དགོངས་པས་མི་འགལ་ལོ། །མུ་ཏིག་ཕྲེང་བའི་དགོངས་པ་རྒྱ་གར་ན་ནཱ་རོ་པ་དོན་ལ་ས་བཅུ་གཅིག་ལས་མི་འདོད་པ་དང་།  གཾ་ག་མེ་ཏྲི་དང་།  རྣལ་འབྱོར་དབང་ཕྱུག་སོགས་དོན་ལ་ས་བཅུ་གསུམ་པ་འདོད་པའི་ལུགས་གཉིས་ཡོད་པ་ལས།  སྔ་མའི་
གསུང་སྒྲོས་བཀོད་པའི་སྐབས་ཡིན་པས།  ལུགས་འདི་དང་བསྲེ་རྒྱུ་མ་ཡིན་ནོ། །རྡོ་རྗེ་ཐེག་པའི་འབྲས་མཐར་ཐུག །ཉེ་རྒྱུ་མ་ལྟོས་མི་གྲུབ་ཅིང་། །འཁོར་ཚོམ་གཅིག་པུ་སངས་རྒྱས་པའང་། །ཆེ་དབྱུང་དོད་བརྩིས་མ་ཡིན་པས། །དོགས་གཅོད་
ཟུར་པ་དགོས་གསུང་ཡང་། །བརྩེ་བའི་ཐུགས་ཀྱིས་གནང་བ་ཞུ། །ཞེས་པའི་ལན་ནི་རྡོ་རྗེ་ཐེག་པའི་མཐར་ཐུག་གི་འབྲས་བུ་རང་གཞན་གང་རུང་གི་ཉེ་རྒྱུའི་སྤྱོད་པ་ལ་ངེས་པར་ལྟོས་དགོས་ཀྱང་།  འཁོར་ཚོམ་བུ་གཅིག་སངས་རྒྱ་བ་མི་འགལ་བའི་
10-3-23b


གནད་ནི།  སྒྲུབ་པ་པོ་རང་གི་ཉེ་རྒྱུའི་སྤྱོད་པ་ལ་ལྟོས་ནས་སངས་རྒྱ་བའི་ཚེ།  བླ་མ་དང་།  སློབ་མ་དང་།  མཁའ་འགྲོ་དང་།  ཕྱག་རྒྱ་བཞི་པོ་གཞན་གྱི་ཉེ་རྒྱུའི་སྤྱོད་པ་ལ་ལྟོས་ནས་སངས་རྒྱ་བ་ཡིན་པའི་ཕྱིར་རོ། །དེ་ལ་ཡང་བཞི་པོ་སྒྲུབ་པ་པོ་རང་དང་
རྟོགས་པ་མཉམ་པ་དང་།  ཐུགས་རྗེས་རྗེས་སུ་བཟུང་བ་དང་།  བཀའ་བཞིན་བསྒྲུབ་པ་དང་།  བར་ཆད་སེལ་བ་དང་།  ཉེ་རྒྱུའི་རྟེན་བྱེད་པ་བཞི་པོ་གང་རུང་གཅིག་དེ་མཚན་ཉིད་གཉིས་ལྡན་དགོས་པས་སྒྲུབ་པ་པོ་གཅིག་པུ་སངས་རྒྱ་བ་དང་།  གཉིས་
ཁོ་ན་སངས་རྒྱ་བ་ནས་ལྔ་ཅིག་ཆར་དུ་ཡང་སངས་རྒྱ་བ་ཡོད་པ་ནི་གནད་ཀྱི་དོན་ནོ། །དྲིས་ལན་ཉི་མའི་འོད་ཟེར་འདིས། །བློ་གྲོས་པདྨོ་ཁ་ཕྱེ་ནས། །དོན་གཉེར་བུང་བ་ཚིམ་པ་དང་། །སྐལ་བཟང་གཞན་ལའང་ཕན་པར་ཤོག །ཡི་གེའི་
རྟེན་མཚོན་པར་སྨན་ཐུམ་བུ་གཅིག་ལ་རྟགས་འབྱར་བ་ཡོད།  འབྲུག་ལོ་ཧོར་ཟླ་བཞི་པའི་གནམ་གང་ལ་ཨེ་ཝཾ་ཆོས་ལྡན་གྱི་དགོན་པ་ནས་དགེ།    །༄། །མུད་སྲད་པ་རྡོ་རྗེ་རྒྱལ་མཚན་གྱི་དྲིས་ལན།  ཨོཾ་སྭསྟི།  གང་ཞིག་ཐོས་ན་མངོན་པར་དང་བའི་རྒྱུ། །
ཚུལ་བཞིན་བསམས་ན་དགའ་བའི་དཔལ་སྟེར་ཞིང་། །སྒོམ་ན་བློ་མཆོག་སངས་རྒྱས་སྩོལ་མཛད་པའི། །བཀའ་སྲོལ་མཚུངས་མེད་འགྲོ་བའི་གཙུག་ན་རྒྱལ། །ཚུལ་ལུགས་རྨད་བྱུང་དེ་ཡི་བཀའ་བའི་གནས། །དཔྱོད་ལྡན་བློ་གྲོས་མཛངས་པས་
དྲིས་པའི་ལན། །བླ་མའི་དྲིན་གྱིས་བློ་མིག་གསལ་ཐོབ་པ། །རྒྱུད་གསུམ་སྨྲ་བ་དེ་ཡིས་འདི་སྐད་ཞུ། །དྲི་བ་དང་པོ་ལྗོན་ཤིང་ལས།  ཟག་བཅས་ཟག་མེད་ཀྱི་སྐབས་དེར།  དེ་ལ་དང་པོ་ཟག་པ་ཞེས་བྱ་བ་ནི་ཉོན་མོངས་པ་ཡིན་ལ།  དེ་གང་དུ་རྒྱས་
10-3-24a


པར་འགྱུར་བ་ནི་ཟག་པ་དང་བཅས་པ་སྟེ།  དེའང་ལམ་གྱི་བདེན་པ་མ་གཏོགས་པའི་འདུས་བྱས་རྣམས་ཏེ།  སྡུག་བསྔལ་དང་།  ཀུན་འབྱུང་དང་ཕུང་པོ་ལྔ་དང་།  སྐྱེ་མཆེད་བཅུ་གཅིག་དང་།  ཁམས་བཅུ་བདུན་དང་།  ཆོས་
ཀྱི་སྐྱེ་མཆེད་དང་།  ཆོས་ཀྱི་ཁམས་ཀྱི་ཕྱོགས་རེ་ནི་ཟག་པ་དང་བཅས་པའོ། །ཟག་པ་མེད་པ་ནི་ཉོན་མོངས་ཉེ་བར་ཞི་བ་དང་།  རྒྱས་པར་མི་འགྱུར་བ་སྟེ་ལམ་གྱི་བདེན་པ་དང་།  ཆོས་ཀྱི་སྐྱེ་མཆེད་དང་།  ཁམས་
ཀྱི་ཕྱོགས་གཅིག་དང་།  ནམ་མཁའ་དང་སོ་སོར་བརྟགས་པས་འགོག་པ་དང་།  སོ་སོར་བརྟགས་མིན་གྱི་འགོག་པ་དང་དྲུག་ནི་ཟག་པ་མེད་པའོ་ཞེས་གསུངས་པའི་དོན་མཛོད་རྩ་འགྲེལ་དང་མཐུན་པའི་ངོས་འཛིན་ལུགས་ཇི་ལྟར་ཡིན།  ཡང་གསུངས་
པ་བཞིན་སྡེ་བདུན་གཞན་ན་འདི་དང་མཐུན་པའི་ངོས་འཛིན་ཡོད་དམ།  འོག་གི་ཁམས་ཀྱི་ཕྱོགས་གཅིག་དང་ཅེས་པའི་དང་སྒྲ་དང་དྲུག་ཅེས་པའི་དྲུག་སྒྲ་ལྷག་པ་ཡིན་ནམ།  མ་ལྷག་ན་སྦྱོར་ཚུལ་ཇི་ལྟར་བྱེད་ཅེས་པའི་ལན་ནི།  ལྗོན་ཤིང་འདིར་
མཛོད་ཀྱི་གནས་བརྒྱད་ཀྱིས་བསྟན་ཚུལ་ཤེས་བྱའི་གནས་དང་།  ཟག་པ་དང་བཅས་པ་དང་།  ཟག་པ་མེད་པ་གསུམ་དུ་བསྡུས་ནས།  ཤེས་བྱའི་གནས།  གནས་དང་པོ་གཉིས་ཀྱིས་བསྟན་པ་འདི་ལ།  རྒྱས་པར་དབྱེ་བ་དང་།  དེ་བསྡུ་བའི་
ཚུལ་གཉིས་ལས།  དང་པོ་ནི།  བདག་འཛིན་གསུམ་གྱི་གཉེན་པོར་ཕུང་པོ་ལྔ་དང་།  སྐྱེ་མཆེད་བཅུ་གཉིས།  ཁམས་བཅོ་བརྒྱད་གསུངས།  ཡང་འཁོར་བ་སྤངས་ནས་མྱང་འདས་ཐོབ་པའི་ཕྱིར།  བདེན་བཞིའི་ཆོས་གསུངས་པར་བཤད་ནས།  
10-3-24b


གཉིས་པ་དེ་བསྡུ་བའི་ཚུལ་ལ།  ཟག་བཅས་ཟག་མེད་གཉིས་སུ་བསྡུ་བ་དང་།  འདུས་བྱས་འདུས་མ་བྱས་གཉིས་སུ་བསྡུ་བ་གཉིས་གསུངས་པའི་དང་པོའི་སྐབས་སུ།  གཞུང་འདི་དག་བྱུང་བས།  ཟག་བཅས་ཟག་མེད་ཀྱི་ངོས་འཛིན་ཆོས་གསུམ་དང་
བདེན་པ་བཞི་ལ་ལྟོས་ནས་འཇོག་དགོས་སོ། །དེ་ལྟར་ན།  ཟག་བཅས་ཀྱི་ངོས་འཛིན་མདོར་བསྡུས་ལམ་བདེན་མ་གཏོགས་པའི་འདུས་བྱས་ཡིན་ཅེས་གསུངས་ནས།  དེ་ཉིད་ཆོས་གསུམ་དང་།  བདེན་པ་བཞི་ལ་ལྟོས་པའི་ཚེ།  སྡུག་བསྔལ་དང་།  
ཀུན་འབྱུང་རིལ་པོ་ཟག་བཅས་ཡིན་ལ།  འདི་ལ་ལམ་བདེན་མ་གཏོགས་པ་ཞེས་པའི་ཚིག་གི་ཁྱད་པར་སྦྱར་མི་དགོས་ཏེ།  དོགས་པའི་གཞི་མེད་པའི་ཕྱིར་རོ། །ཆོས་གསུམ་ལ་ལམ་བདེན་མ་གཏོགས་པའི་ཕུང་པོ་ལྔ།  དེ་མ་གཏོགས་པའི་སྐྱེ་མཆེད་
བཅུ་གཅིག །དེ་མ་གཏོགས་པའི་ཁམས་བཅུ་བདུན་རིལ་པོ་ཟག་བཅས་ཡིན་ཏེ།  སྐྱེ་མཆེད་བཅུ་དང་།  ཁམས་བཅོ་ལྔ་ཟག་བཅས་ཡིན་པ་ནི་མཛོད་ལས་དངོས་སུ་གསུངས་ཤིང་།  གཞན་གསུམ་ལ་ཟག་མེད་ཡོད་པ་རྣམས་ནི་ལམ་བདེན་ཁོ་ན་ཡིན་
པའི་ཕྱིར་རོ། །ཆོས་ཀྱི་སྐྱེ་མཆེད་དང་།  ཆོས་ཀྱི་ཁམས་ལ་ལམ་བདེན་མ་གཏོགས་པ་ཡིན་ཀྱང་མཐའ་གཅིག་ཏུ་ཟག་བཅས་སུ་འཇོག་མི་ནུས་ཏེ།  ལམ་བདེན་མ་ཡིན་པའི་ཟག་མེད་ཀྱང་ཡོད་པའི་ཕྱིར་རོ། །དེའི་ཕྱིར་ཕྱོགས་རེ་ཞེས་སྨོས་སོ། །
དེས་ན་མཛོད་ལས།  དེ་གསུམ་ཟག་བཅས་ཟག་པ་མེད། །ལྷག་མ་རྣམས་ནི་ཟག་བཅས་སོ་ཞེས་དང་།  ཤུགས་ཀྱིས་སྐྱེ་མཆེད་བཅུ་གཉིས་ལ། །དེ་གཉིས་ཟག་བཅས་ཟག་པ་མེད། །ལྷག་མ་རྣམས་ནི་ཟག་བཅས་སོ་ཞེས་ཐོབ་པ་དང་།  ལམ་བདེན་གྱི་
10-3-25a


གཙོ་བོ་ཤེས་རབ་ཡིན་ཀྱང་།  རྗེས་འབྲང་དང་བཅས་ན་ཕུང་པོ་ལྔ་པ་ཅན་དུ་གསུངས་པས།  ཕུང་པོ་ལྔ་ཟག་བཅས་ཟག་མེད་གཉིས་ཀ་ཡོད་པར་གསུངས་པ་དང་།  འདིར་གསུངས་པའི་ཟག་བཅས་ཟག་མེད་ཀྱི་ངོས་འཛིན་སྤྱིར་མཐུན་
ཞིང་།  ཆོས་གསུམ་དང་།  བདེན་པ་བཞི་ལ་ལྟོས་ནས་ཟག་བཅས་ཟག་མེད་ཀྱི་ངོས་འཛིན་ཚུལ་འདི་ཁྱད་པར་དུ་གསལ་བས་ཉིད་ཀྱིས་གསུངས་པ་ལྟར།  བཀའ་སྲོལ་འདི་ལ་གཞན་གྱིས་བརྒལ་བའམ།  དཀའ་བའི་གནས་ལ་དྲིས་པའི་ཚེ་ལྷག་
པར་ཡང་ཡིད་ཆེས་པའི་གནས་སུ་གྱུར་པ་ཡང་ཐོག་ཏུ་བབ་པ་དེ་ལྟར་རོ། །སྡེ་བདུན་གཞན་ནས་གསུངས་པའི་སྦྱོར་ཚུལ་མ་ཡིན་པར་སྣང་སྟེ།  མཛོད་རྩ་འགྲེལ་ནས་ཅི་ལྟར་ཐོན་པ་ཙམ་ཞིག་སྟོན་པའི་སྐབས་སུ་སྣང་བའི་ཕྱིར་རོ། །ཟག་མེད་ཀྱི་ངོས་འཛིན་
ལ་དང་ཅེས་པ་ལྷག་པར་སྣང་ཡང་དྲུག་ཅེས་པ་ལྷག་པ་མ་ཡིན་ཏེ།  འདུས་བྱས་སུ་གྱུར་པའི་ཟག་མེད་ཐམས་ཅད་ལམ་བདེན་ཅེས་པས་བསྟན་ཟིན་ནས།  འདུས་མ་བྱས་སུ་གྱུར་པའི་ཟག་མེད་ལ།  ཆོས་ཀྱི་སྐྱེ་མཆེད་ཀྱི་ཕྱོགས་གཅིག་འདུས་མ་བྱས་གསུམ་
དང་ཆོས་ཀྱི་ཁམས་ཀྱི་ཕྱོགས་གཅིག་འདུས་མ་བྱས་གསུམ་དང་དྲུག་ཅེས་གནང་བའི་ཕྱིར་རོ། །དྲི་བ་གཉིས་པ།  བྱེ་བྲག་ཏུ་སྨྲ་བའི་ལུགས་ཀྱི་བཟོད་ཤེས་ཀྱི་སྐབས་དེར།  རྗེས་བཟོད་རྗེས་ཤེས་གཉིས་ཀྱི་ངོས་འཛིན་མངོན་པ་གོང་མ་དང་མཐུན་པར་བྱུང་
བ་དེ་སྐབས་དེར་ཕྲེང་གཉིས་ཙམ་ཆད་པ་ཡིན་ནམ་ཞེས་པའི་ལན་ནི།  དེ་ལྟར་གཉིས་པོ་དེ་འཕགས་པའི་ཆོས་ཀྱི་རྒྱུར་ཤེས་པས་ལྷག་མ་རྣམས་ཀྱང་དེ་ལྟར་ཤེས་པ་ནི་རྗེས་སུ་ཤེས་པའི་བཟོད་པ།  དེ་ངེས་པར་འཛིན་པ་རྗེས་སུ་ཤེས་པའོ་ཞེས་པ་འདིས་རྗེས་
10-3-25b


བཟོད་རྗེས་ཤེས་གཉིས་པོ་ངོས་འཛིན་ཚུལ་མངོན་པ་གོང་མ་དང་འདྲ་བ་ལྟར་སྣང་ཡང་ལྷག་མ་རྣམས་ཀྱང་དེ་ལྟར་ཤེས་པ་ཞེས་པའི་དོན་འདོད་པའི་སྡུག་བསྔལ་བདེན་པའི་ལྷག་མ་ཁམས་གོང་མ་གཉིས་ཀྱི་སྡུག་བསྔལ་བདེན་པའི་མི་རྟག་སོགས་ཤེས་པ་དང་
དེ་ངེས་པར་འཛིན་པ་ཞེས་པའི་དོན་རྗེས་བཟོད་དེ་ངེས་པར་འཛིན་པ་ཞེས་མི་སྦྱར་བར་དེའི་ཡུལ་ཁམས་གོང་གི་བདེན་པའི་གནས་ཚུལ་དེ་ངེས་པར་འཛིན་པ་ཞེས་སྦྱར་ན་མཛོད་དང་མཐུན་པའི་བཤད་པ་ཡང་རུང་མོད་ཀྱི།  འོན་ཀྱང་སྐབས་དེར་རྗེས་བཟོད་
རྗེས་ཤེས་གཉིས་ཀྱི་ངོས་འཛིན་ཕྲེང་ཆད་བྱུང་བ་གཞན་ཞིག་གིས་མངོན་པ་གོང་མ་དང་མཐུན་པའི་ངོས་འཛིན་བསྣན་པ་ཡིན་པ་འདྲ་སྟེ།  དེ་གཉིས་འཕགས་པའི་ཆོས་ཀྱི་རྒྱུར་ཤེས་པས་ཞེས་པ་མཛོད་རྩ་འགྲེལ་ནས་མི་འབྱུང་ཞིང་།  ལྗོན་ཤིང་འདིར།  
འོག་ཏུ་ཤེས་པ་བཅུའི་སྐབས་སུ་ཆོས་ཤེས་ཞེས་བྱ་བ་ནི།  འདོད་པ་ན་སྤྱོད་པའི་སྡུག་བསྔལ་ལ་སོགས་པའི་བདེན་པ་བཞི་ཤེས་པ་ཡིན་ནོ། །རྗེས་སུ་ཤེས་པ་ཞེས་བྱ་བ་ནི།  གཟུགས་དང་གཟུགས་མེད་པ་ན་སྤྱོད་པའི་བདེན་པ་བཞི་ཤེས་པ་ཡིན་ནོ། །
ཞེས་གསུངས་པས་མཛོད་དང་མཐུན་པར་དགོངས་པ་ཡིན་པར་གདོན་མི་ཟའོ། །དྲི་བ་གསུམ་པ།  ཤེས་པ་ལྡན་ཚུལ་གྱི་སྐབས་སུ།  མཛོད་ལས་ཟག་མེད་སྐད་ཅིག་དང་པོ་ལ། །ཆགས་ཅན་ཤེས་པ་གཅིག་དང་ལྡན། །གཉིས་པ་ལ་གསུམ་ཡན་
ཆད་ནི། །བཞི་ལ་རེ་རེ་འཕེལ་དང་ལྡན། །ཞེས་གསུངས་པའི་ལྡན་ཚུལ་དང་མ་མཐུན་པས་ཅི་ལྟར་ཡིན་ཅེས་པའི་ལན་ནི།  འདིར་སོ་སོའི་སྐྱེ་བོ་ངེས་འབྱེད་ཆ་མཐུན་མན་ཆད་ལ་ནི་ཀུན་རྫོབ་ཤེས་པ་གཅིག་པུ་དང་ལྡན་ནོ། །གལ་ཏེ་སོ་སོ་སྐྱེ་བོ་འདོད་
10-3-26a


ཆགས་དང་བྲལ་བ་ཞིག་ཡིན་ན།  ཕ་རོལ་གྱི་སེམས་ཤེས་པ་དང་ཡང་ལྡན་ནོ། །མཐོང་བའི་ལམ་ནས་ཆོས་ཤེས་པ་དང་ལྡན་ཏེ།  དེའང་སྐད་ཅིག་དང་པོ་ལ་སྡུག་བསྔལ་ལ་ཆོས་ཤེས་པ་དང་།  ཀུན་རྫོབ་ཤེས་པ་དང་ལྡན་ནོ། །
དེ་བཞིན་དུ་རེ་རེ་བསྣན་པས་བདུན་དུ་འགྱུར་ལ་འདོད་ཆགས་དང་བྲལ་བ་ཞིག་ཡིན་ན་ཕ་རོལ་གྱི་སེམས་ཤེས་པ་དང་ལྡན་པས་བརྒྱད་དུ་འགྱུར་རོ་ཞེས་གསུངས་པ་འདི།  སོ་སོ་སྐྱེ་བོ་ཆགས་ཅན་ལ་ཤེས་པ་གཅིག་དང་།  ཆགས་བྲལ་ལ་གཉིས་ལྡན་
པའི་ལྡན་ཚུལ་དང་།  མཐོང་ལམ་སྐད་ཅིག་དང་པོའི་ལྡན་ཚུལ་ཁྱད་པར་མེད་པ་ལ་དགོངས་ནས་འདིར་མ་སྨོས་ལ།  ཆོས་ཤེས་གང་ལ་ལྡན་པ་ནས་ངོས་བཟུང་བ་ནི།  འདིར་ཐ་སྙད་རྟོགས་སླ་བའི་ཆེད་དུ་ཡིན་པར་སྣང་སྟེ།  དེའང་སྐད་ཅིག་དང་
པོ་ལ་སྡུག་བསྔལ་ལ་ཆོས་ཤེས་པ་ཞེས་པ་མ་དག་པས་སྡུག་བསྔལ་ཤེས་པ་དང་།  ཀུན་རྫོབ་ཤེས་པ་དང་ལྡན་ནོ་ཞེས་འབྱུང་བའི་སྐད་ཅིག་དང་པོ་ནི་ཤེས་པས་བསྡུས་པའི་མཐོང་ལམ་སྐད་ཅིག་དང་པོ་ཡིན་ལ་དེའང་མཛོད་ལས།  གཉིས་པ་ལ་གསུམ་ཞེས་འབྱུང་བ་དང་དོན་གཅིག་
སྟེ།  དྲི་མེད་བཟོད་རྣམས་ཤེས་པ་མ་ཡིན་ཅེས་པའི་ཚུལ་གྱིས་སྡུག་བསྔལ་ལ་ཆོས་བཟོད་ཤེས་པར་བསྡུས་པའི་མཐོང་ལམ་དུ་མི་འདོད་པའི་ཕྱིར་རོ། །དེས་ན་འདིར།  སྐད་ཅིག་དང་པོའི་ལྡན་ཚུལ་གྱི་འོག་ཏུ་གཉིས་པ་ལ་གསུམ་ཞེས་མི་འབྱུང་བར་དེ་བཞིན་དུ་རེ་རེ་བསྣན་པས་
བདུན་དུ་འགྱུར་ལ་ཞེས་གསུངས་པའི་གནད་ཀྱང་འདི་ཉིད་དུ་སྣང་སྟེ་ཤིན་ཏུ་འགྲིག་གོ།  དྲི་བ་བཞི་པ།  ལོག་རྟོག་དགག་པའི་སྐབས་སུ་དབང་བསྐུར་ངན་པའི་ལུགས་དགག་པ་དང་།  ཡང་དག་དབང་བསྐུར་མ་ཡིན་པའི་ལུགས་དགག་པ་གཉིས།  དང་པོ་ལ་ནི།  
10-3-26b


ངོ་བོའི་ལོག་རྟོག་ཀྱང་ཡོད་ལ།  གཉིས་པ་ལ་ནི་གོ་རིམ་གྱི་ལོག་རྟོག་ཡོད་དོ་ཞེས་གསུངས་པའི་ལོག་རྟོག་གཉིས་པོ་སྨྲ་བ་པོའི་གང་ཟག་ཀྱང་མ་ཤེས་།  དེ་གཉིས་ཀྱི་ཁྱད་པར་ཡང་མ་ཤེས།  འདི་གོ་རིམ་ལ་ལོག་རྟོག་དགག་པའི་སྐབས་ཡིན་པས།  གོ་རིམ་
ལ་ལོག་རྟོག་ཡོད་དོ་ཞེས་འབུར་དོད་དུ་བརྗོད་པ་ལ་དགོས་པ་ཡང་མེད་དམ་སྙམ་པས་དེ་དག་ཅི་ལྟར་ཡིན་ཅེས་པའི་ལན་ནི།  སྨྲ་བ་པོའི་གང་ཟག་གི་གཙོ་བོ་ནི་རྡོག་གཞུང་པ་ཡིན་ལ།  གཞན་ཡང་ཕྱག་རྒྱ་བ་རབ་ཏུ་མང་པོ་དག་གོ།  དབང་བསྐུར་ངན་པའི་
ལུགས་ནི།  བྱིན་རླབས་སྨིན་བྱེད་དུ་འདོད་པ་དང་།  གཡུང་དྲུང་རིས་དང་།  ནས་འདྲ་རིས་ཀྱི་དཀྱིལ་འཁོར་དུ་དབང་བསྐུར་བར་འདོད་པ་དང་།  ཆོ་ག་མེད་བཞིན་དུ་བླ་མའི་ལུས་ལ་དབང་བཞི་ལེན་པར་འདོད་པ་རྣམས་སོ། །ཡང་དག་དབང་བསྐུར་མ་
ཡིན་པའི་ལུགས་ནི།  མོས་པ་ཆོས་སྒོར་འདོད་པ་དང་།  དབང་བསྐུར་མུ་བཞིར་འདོད་པ་རྣམས་ཀྱང་ཡང་དག་གི་དབང་བསྐུར་སྤོང་བའི་ཆ་ནས་དེར་རུང་མོད་ཀྱི།  འདིར་ནི།  གོ་རིམ་ལ་ལོག་རྟོག་འདོད་པའི་ལུགས་གཅིག་འཇོག་དགོས་པར་སྣང་བས།  
དབང་པོ་གཉིས་བྱུང་བདེ་བ་ནི། །དེ་ཉིད་ཡིན་ཞེས་སྐྱེ་ངན་སྨྲའི། །ཞེས་གསུངས་པ་ལྟར།  རླུང་ལ་དབང་མ་ཐོབ་བཞིན་དུ་གྲོལ་ལམ་བསྟེན་པ་དབང་བསྐུར་མ་ཡིན་པས།  དངོས་དབང་བསྐུར་དགོས་ཞེས་སྨྲ་བ་ཞིག་ལ་འཇོག་པར་སྣང་ངོ་། །གོ་རིམ་
ལ་ལོག་རྟོག་དགག་པའི་སྐབས་ཡིན་པས།  དེ་འབུར་དོད་དུ་བརྗོད་པ་ལ་དགོས་པ་མེད་པ་མ་ཡིན་ཏེ།  དགག་པ་བྱེད་པའི་སྐབས་སུ་ཕྱོགས་སྔ་འབུར་དོད་དུ་བརྗོད་པ་ཚུལ་ལུགས་ཡིན་པའི་ཕྱིར་རོ། །དྲི་མ་མེད་པའི་རྒྱུད་གཞུང་ལ་སྐྱེས་ཐོབ་དང་
10-3-27a


སྦྱངས་པའི་བློ་གྲོས་མི་དམན་པའི་བཤེས་གཉེན་ཆེན་པོ་བྱམས་པ་རྡོ་རྗེ་རྒྱལ་མཚན་པས་ཚུལ་བཞིན་དུ་དྲིས་པའི་ལན།  མང་དུ་ཐོས་པའི་དགེ་སློང་བསོད་ནམས་སེང་གེས་རང་གི་གོ་ཚོད་ཙམ་ཞིག་ཐུབ་བསྟན་རྣམ་རྒྱལ་དུ་བྲིས་ནས་དཔལ་
ལྡན་ས་སྐྱར་ཕུལ་བའོ།།   །། ༄༅། །སྒྲུབ་པ་བ་ཚུལ་ཁྲིམས་བཟང་པོའི་དྲིས་ལན་བཞུགས།  དཔལ་ལྡན་བརྩེ་བའི་དཔུང་ཚོགས་མི་དམན་ཞིང་། །རྒྱ་ཆེན་མཁྱེན་པའི་འབྱོར་པ་དཔག་ཡས་ཀྱིས། །ཐུབ་དབང་བསྟན་པའི་རྒྱལ་ཐབས་ལེགས་འཛིན་པ། །
ཡོངས་འཛིན་འཁོར་ལོས་སྒྱུར་བས་བདག་སྐྱོངས་ཤིག །མགོན་དེས་རྗེས་བཟུང་རྣམ་དཀར་ཚུལ་ཁྲིམས་ལྡན། །བློ་གྲོས་བཟང་པོས་གདམས་པའི་བཅུད་འཛིན་པ། །དཔྱོད་ལྡན་དོན་གཉེར་དེ་ཡིས་དྲིས་པའི་ལན། །ཚུལ་བཞིན་སྨྲ་ལ་ཀུན་གྱིས་
ཉན་པར་གྱིས། །དྲི་བ་དང་པོ་སྤྱི་རྣམ་དུ་མདོ་སྔགས་གཉིས་འབྲས་བུ་ལ་ཁྱད་ཞུགས་པའི་རིགས་པ་ཀོ་ཊ་བ་དང་སཱ་ལུ་བཞིན་བླ་མེད་དང་གཉིས་ཅི་ལྟ་བ་བཞིན་འབྱུང་ནའང་རྒྱུད་སྡེ་འོག་མ་གསུམ་དང་།  མྱུར་བུལ་ཙམ་མ་གཏོགས་འབྲས་བུའི་ངོ་བོ་
ལ་ཁྱད་པར་མེད་པར་འདོད་པ་གདའ་ལགས་པས་ཅི་ལྟར་ལགས།  ཞེས་པའི་ལན་ནི།  སྤྱི་རྣམ་དུ་མདོ་སྔགས་གཉིས་ཀྱི་ལམ་དང་འབྲས་བུའི་ཁྱད་པར་ཕྱེ་བའི་སྔགས་ནི་སྐབས་ཐོབ་ཀྱིས་བླ་མེད་ཉིད་ལ་འཇུག་སྟེ།  དཔེར་ན་སྡོམ་གསུམ་
རབ་དབྱེར།  རྡོ་རྗེ་ཐེག་པའི་ལམ་ཞུགས་ནས། །ཞེས་པའི་སྐབས་ཀྱི་རྡོ་རྗེ་ཐེག་པ་སྐབས་ཐོབ་ཀྱི་བླ་མེད་ལ་འཇུག་པར་བླ་མ་བཙལ་ལ་དབང་བཞི་བླང་ཞེས་པས་བསྟན་པ་བཞིན་ནོ། །དེས་ན་རྒྱུད་སྡེ་འོག་མ་གསུམ་དང་།  འབྲས་བུའི་ངོ་བོ་ལ་ཁྱད་
10-3-27b


པར་མེད་པར་འདོད་པ་མི་འགལ་ལོ། །དྲི་བ་གཉིས་པ་ལུང་གི་སྐབས་སུ་སྐྱེ་བ་འདིར་སངས་རྒྱས་ཉིད་དམ་ཅེས་པ་ཕ་རོལ་ཏུ་ཕྱིན་པའི་འབྲས་བུ་ཐོབ་པའི་ལུང་དུ་གདའ་བས་གཞན་དུ་མྱུར་མཐའ་བསྐལ་པ་གྲངས་མེད་གསུམ་དུ་འགྲུབ་པར་གསུངས་
པ་དང་ཅི་ལྟར་མཐུན་ཅེས་པའི་ལན་ནི།  ལུང་གི་དོན་བླ་མེད་ཀྱི་ལམ་ཉམས་སུ་བླངས་པས་སྐྱེ་བ་འདིར་ཕ་རོལ་ཏུ་ཕྱིན་པས་ཅི་ཙམ་ཐོབ་པའི་འབྲས་བུ་ཡང་ཐོབ་ཅེས་པའི་དོན་ཡིན་ལ།  གཞན་དུ་མྱུར་མཐའ་བསྐལ་པ་གྲངས་མེད་གསུམ་ནས་འགྲུབ་
པར་གསུངས་པ་ནི་ཕ་རོལ་ཏུ་ཕྱིན་པ་རང་གི་ལམ་ལ་དགོངས་པས་འགལ་བ་ཅུང་ཟད་ཀྱང་མེད་དོ། །དྲི་བ་གསུམ་པ་གང་དག་རྟོགས་པ་ལ་ཁྱད་པར་མེད་པ་དེ་ལ་ཡོན་ཏན་ལ་ཁྱད་པར་མེད་པ་ཆོས་ཉིད་དེ་དཔེར་ན་སངས་རྒྱས་བཞིན་ནོ་ཞེས་དང་།  
བདག་མེད་བསྟོད་འགྲེལ་ལས།  རྟོགས་པའི་ཁྱད་པར་ནི་ས་དང་པོ་ནས་བཟུང་སྟེ།  སངས་རྒྱས་ཀྱི་སའི་བར་ལ་ཆོས་ཉིད་ཀྱི་ངོ་བོ་རྟོགས་པ་ཙམ་ལ་ཁྱད་པར་མེད་ཀྱང་ཡོན་ཏན་གྱི་ལྡོག་པ་ལ་ཁྱད་པར་ཆེ་སྟེ་ཞེས་རྟོགས་པ་དང་ཡོན་ཏན་ལ་ཁྱད་པར་
ཡོད་པར་གསུངས་པ་ཅི་ལྟར་ལགས་ཞེས་པའི་ལན་ནི་སྔ་མའི་དོན་གཞན་གྱིས་དབང་གི་ཡེ་ཤེས་དང་།  ཕ་རོལ་ཏུ་ཕྱིན་པའི་མཐོང་ལམ་གཉིས་མཐོང་ལམ་མཚན་ཉིད་པར་མཚུངས་ཀྱང་གླིང་བཞི་བརྒྱ་བསྒུལ་བ་སོགས་ཀྱི་ཡོན་ཏན་ཡོད་མེད་ཀྱི་ཁྱད་པར་འདོད་པ་ལ་རྟོགས་
པ་ལ་ཁྱད་པར་མེད་ན་ཡོན་ཏན་ལ་ཁྱད་པར་མེད་པས་ཁྱབ་པས་དབང་གི་ཡེ་ཤེས་དེ་ལ་ཡང་གླིང་བཞི་བརྒྱ་བསྒུལ་བ་ལ་སོགས་པའི་ཡོན་ཏན་བརྒྱ་ཕྲག་བཅུ་གཉིས་ཡོད་དགོས་སོ་ཞེས་པའི་དོན་ཡིན་ལ་ཕྱི་མའི་དོན་ས་དང་པོ་ནས་སངས་རྒྱས་ཀྱི་སའི་
10-3-28a


བར་དུ་མཉམ་གཞག་ཏུ་རང་བཞིན་རྣམ་དག་གི་ཆོས་དབྱིངས་རྟོགས་པ་ཙམ་ལ་ཁྱད་པར་མེད་ཀྱང་།  གློ་བུར་དྲི་བྲལ་གྱི་ཆོས་ཉིད་རྟོགས་ཚུལ་ལ་ཁྱད་པར་ཡོད་ཅིང་།  རྗེས་ཐོབ་ཏུ་ཆོས་དབྱིངས་ཀུན་ཏུ་འགྲོ་བའི་དོན་དང་།  
མཆོག་གི་དོན་ལ་ངེས་ཤེས་འདྲེན་པ་སོགས་ཀྱི་ཁྱད་པར་ཡོད་པས་ཡོན་ཏན་ལ་ཡང་ཁྱད་པར་ཡོད་ཞེས་པའི་དོན་ཡིན་གྱི་སྔ་མའི་དོན་ས་དང་པོ་ནས་སངས་རྒྱས་ཀྱི་སའི་བར་རྟོགས་པ་ལ་ཁྱད་པར་མེད་པས་ཡོན་ཏན་ལ་ཁྱད་པར་མེད་པར་སྟོན་པ་
ག་ལ་ཡིན།  ཆོས་དབྱིངས་རང་གི་ངོ་བོ་རྟོགས་པ་ཙམ་ལ་ཁྱད་པར་མེད་པས་སྤྱིར་རྟོགས་པ་ལ་ཁྱད་པར་མེད་པར་མི་འགྲུབ་སྟེ།  གྲུབ་མཐའ་སྨྲ་བ་བཞི་ཆར་གྱིས་བུམ་པ་རང་གི་ངོ་བོ་རྟོགས་པ་ཙམ་ལ་ཁྱད་པར་མེད་ཀྱང་བུམ་པའི་གནས་ཚུལ་
རྟོགས་པ་ལ་ཁྱད་པར་ཤིན་ཏུ་ཆེ་བ་བཞིན་ནོ། །དྲི་བ་བཞི་པ་གྲུབ་མཐའ་སྨྲ་བ་བཞི་དང་བསྟུན་ནས་བསྐྱེད་ཆོག་མི་འདྲ་བ་བཞིས་རྒྱུད་སྡེ་བཞིར་བཞག་པ་ལ།  དགེ་ལྡན་པས་རང་རྒྱལ་གྲུབ་མཐའ་སྨྲ་བ་བཞིའི་ཡ་གྱལ་ཀྱང་མ་ཡིན་ཅིང་ཞེས་པ་ལ།  
རྗེ་གོང་མའི་གསུང་རྒྱུན་ལ་སེམས་ཙམ་གྱི་གྲུབ་མཐའ་ཁས་ལེན་པའི་རང་རྒྱལ་གཅིག་ཡོད་ན་དེས་དོན་གྲུབ་ཅེས་སྣང་བ་དང་།  ངེད་རང་གི་བློར་ཡང་རང་རྒྱལ་ལྟ་བའི་སྒོ་ནས་སེམས་ཙམ་པའི་ལྟ་བར་སྡུད་དེ།  ཕྱི་དོན་རང་བཞིན་མེད་པར་
རྟོགས་ཤིང་ནང་སེམས་ལ་འཛིན་པ་དང་བཅས་པའི་ཕྱིར་རོ་སྙམ་པ་བདོག་ནའང་།  ཞལ་སྔ་ནས་རང་རྒྱལ་དབུ་མ་པའི་ནང་དུ་སྡུད་པ་སྤྱི་རྣམ་གྱི་དོན་ཡིན་པ་མཛད་གདའ་ལགས་པ།  དེའི་རྒྱུ་མཚན་ཞིབ་པ་གཅིག་དགོས་ཞེས་པའི་ལན་ནི་སྤྱི་རྣམ་
10-3-28b


ལས་གྲུབ་མཐའ་སྨྲ་བ་བཞི་དང་སྒོ་བསྟུན་ནས་རྒྱུད་སྡེ་བཞིར་བཞག་པ་གཏན་མ་ཡིན་ཏེ།  གསུང་རབ་སྤྱིའི་བརྡའ་ཆད་གྲུབ་མཐའ་སྨྲ་བ་བཞི་ཞེས་པ་བྱེ་མདོ།  དབུ་སེམས་བཞི་ལ་འཇུག་ལ།  སྤྱི་རྣམ་གྱི་དགོངས་པ་ནི།  མཚན་ཉིད་ཀྱི་ཐེག་
པ་ལ་བརྗོད་དུ་མེད་པའི་གང་ཟག་གི་བདག་ཁས་ལེན་པ་དང་།  དེ་ཁས་མི་ལེན་ཀྱང་གཟུང་བ་ཕྱི་རོལ་གྱི་དོན་ཁས་ལེན་པ་དང་།  དེ་ཁས་མི་ལེན་ཀྱང་ཡུལ་ཅན་གྱི་འཛིན་པ་ཁས་ལེན་པ་དང་།  གཟུང་བ་མེད་པས་དེར་འཛིན་མེད་པར་ཁས་ལེན་པ་དང་བཞི་ལས།  
དང་པོ་ནི་ཉན་ཐོས་དམན་པ་གནས་མ་བུ་པའི་སྡེ་པ་དང་འབྲིང་ཉི་འོག་པ་གཉིས་དང་།  གཉིས་པ་ནི་ཉན་ཐོས་མཆོག་ཁ་ཆེ་བ་དང་།  མདོ་སྡེ་པ་གཉིས་དང་།  གསུམ་པ་ནི་འཕགས་པ་རང་སངས་རྒྱས་པ་དང་།  བཞི་པ་ནི་དབུ་སེམས་གཉིས་
ཡིན་པར་གསུངས་པའི་ཕྱིར་རོ། །དེ་དག་ལ་གྲུབ་མཐའ་བཞི་ཡོད་པས་དེ་སྨྲ་བའི་གང་ཟག་ལ་གྲུབ་མཐའ་སྨྲ་བ་བཞི་ཞེས་པའི་ཐ་སྙད་མི་འཐད་པ་ནི་སྔར་བཤད་པ་ལྟར་རོ། །དེས་ན་དགེ་ལྡན་པས་རང་སངས་རྒྱས་གྲུབ་མཐའ་སྨྲ་བ་བཞིའི་ཡ་གྱལ་མ་
ཡིན་ཅེས་པ་ཡང་ཕྱོགས་སྔའི་དོན་མ་རྟོགས་པ་སྟེ།  གྲུབ་མཐའ་གཅིག་སྨྲ་བ་ཙམ་གྱིས་གྲུབ་མཐའ་སྨྲ་བ་བཞིའི་ཡ་གྱལ་དུ་འཇོག་པ་མ་ཡིན་པའི་ཕྱིར་རོ། །ཟིན་བྲིས་འགའ་ཞིག་ལ་སེམས་ཙམ་གྱི་གྲུབ་མཐའ་ཁས་ལེན་པའི་རང་སངས་རྒྱས་ཡོད་
ན་དེས་དོན་གྲུབ་ཅེས་པ་ཡོད་སྲིད་ན་ཡང་ཟིན་བྲིས་འབྲི་བ་པོ་ཡིན་ན་གསུང་སྒྲོས་ཟིན་པས་ཁྱབ་པ་མེད་དེ།  སྤྱི་རྣམ་གྱི་དགོངས་པ་འཕགས་པ་རང་སངས་རྒྱས་པའི་གྲུབ་མཐའ་དང་རྣལ་འབྱོར་གྱི་རྒྱུད་སྦྱར།  སེམས་ཙམ་གྱི་གྲུབ་མཐའ་
10-3-29a


དང་བླ་མེད་སྦྱར་བས་དེས་དོན་གྲུབ་མི་གྲུབ་དཔྱད་པས་གསལ་བའི་ཕྱིར་རོ། །ཕྱི་མ་ཁ་ཅིག་སྤྱི་རྣམ་གྱི་དགོངས་པ་གྲུབ་མཐའ་སྨྲ་བ་བཞི་དང་།  རྒྱུད་སྡེ་བཞི་སྦྱར་བ་ཡིན་པར་བྱས་ནས་བུ་སྟོན་གྱི་ཕར་ཕྱིན་གྱི་
ཊཱི་ཀར།  འཛིན་པ་བདེན་སྨྲའི་རང་རྒྱལ་དང་། །གཟུང་འཛིན་གཉིས་མེད་དོན་དམ་དུ། །སྨྲ་བའི་སེམས་ཙམ་གྲུབ་མཐའ་གཉིས། །མཚུངས་པར་འདོད་པའི་མཁས་པ་མཚར། །ཞེས་པ་སྤྱི་རྣམ་ལ་དགག་པ་བརྗོད་པར་བྱས་ནས་དེའི་ལན་
འདེབས་བློ་བྱེད་པ་ཡང་བཞད་གད་ཀྱི་གནས་ཏེ་བུ་སྟོན་གྱི་ཚིགས་བཅད་དེ་དང་།  སྤྱི་རྣམ་གྱི་དགོངས་པ་དོན་གཅིག་ཏུ་སྣང་བའི་ཕྱིར་རོ། །དོན་མེད་ཀྱི་ཐང་ཁུག་མགོ་ལ་གོན་པར་མི་བྱའོ། །དེས་ན་ཁྱོད་ཀྱི་ཐུགས་ལ་རང་རྒྱལ་ལྟ་བའི་སྒོ་ནས་སེམས་
ཙམ་དུ་སྡུད་པ་བདེ་གསུང་བ་ཡང་།  རྗེ་བཙུན་རྩེ་མོས་རང་རྒྱལ་གཟུང་བ་མེད་ཀྱང་འཛིན་པ་བདེན་གྲུབ་ཏུ་འདོད་པ་མངོན་རྟོགས་རྒྱན་གྱི་ལུང་དང་སྦྱར་ནས་རྣལ་འབྱོར་གྱི་རྒྱུད་ཀྱི་བསྐྱེད་ཆོག་དང་སྦྱར།  དབུ་སེམས་གཉིས་ཆར་གཟུང་བ་མེད་པས་དེར་འཛིན་མེད་
པར་འདོད་པས་བླ་མེད་ཀྱི་བསྐྱེད་ཆོག་དང་སྦྱར་འདུག་པས་ཁྱེད་ཀྱི་ཐུགས་ལ་བདེ་བའི་ཁ་ན་མེད་དོ། །ངེད་ཀྱིས་རང་རྒྱལ་དབུ་མ་པའི་ནང་དུ་སྡུད་པ་ཡང་དབུ་མའི་གྲུབ་མཐའ་ཁས་བླངས་པའི་ཚེ་ཐེག་པ་གསུམ་ཆར་དབུ་མ་པའི་ནང་དུ་སྡུད་དགོས་ཏེ།  
དེའི་ཚེ་དབུ་མའི་ལྟ་བ་ལ་མ་བརྟེན་པར་ཐེག་པ་གསུམ་པོ་གང་གིས་ཀྱང་བྱང་ཆུབ་མི་ཐོབ་པར་ཁས་ལེན་དགོས་པའི་ཕྱིར་རོ། །དེ་བཞིན་དུ་སེམས་ཙམ་པས་ཐེག་པ་གསུམ་ཆར་སེམས་ཙམ་གྱི་ནང་དུ་སྡུད།  མདོ་སྡེ་པས་གསུམ་ཆར་མདོ་སྡེ་པར་སྡུད།  
10-3-29b


བྱེ་སྨྲས་གསུམ་ཆར་བྱེ་བྲག་སྨྲ་བའི་ནང་དུ་སྡུད་པའི་ཚུལ་རྟོགས་ན་འདིའི་དོགས་པ་ཆོད་པར་འགྱུར་རོ། །དེ་ལས་གཞན་སྤྱི་རྣམ་དུ་རྒྱུད་སྡེ་བཞི་དང་གྲུབ་མཐའ་བཞི་སྦྱར་བའི་རང་རྒྱལ་དབུ་མ་པའི་ནང་དུ་སྡུད་པ་ནི་ཁོ་བོས་གར་ཡང་སྨྲས་པ་མེད་དོ། །
དྲི་བ་ལྔ་པ་གསང་སྔགས་དུས་གསུམ་གྱི་སངས་རྒྱས་ཐམས་ཅད་ཀྱིས་གསུངས་པར་བཤད་པ་ངེས་དོན་དང་།  མ་གསུངས་པར་བཤད་པ་གསང་བ་འདུས་པའི་ཆེ་བ་བརྗོད་པ་ཡིན་ཞེས་བཤད་པ་དོན་ལ་གནས་པ་གཅིག་ལ་ཟེར་རམ།  དོན་ལ་མི་གནས་
ཀྱང་ཟེར།  དང་པོ་ལྟར་ན།  དེའི་དོན་རྒྱུད་མཐའ་དྲུག་ཚུལ་བཞིའི་སྒོ་ནས་འཆད་པ་ལ་བྱེད་ན་མཐའ་དྲུག་ཚུལ་བཞི་འདི་རྩ་རྒྱུད་ཀྱི་དངོས་བསྟན་ལ་མི་ཐོན།  བཤད་རྒྱུད་ཡེ་ཤེས་རྡོ་རྗེ་ཀུན་ལས་བཏུས་ཀྱིས་བཀྲལ་བ་ལ་བརྟེན་ནས་ཐོན་པ་ཡིན་མི་གསུང་
ལགས་སམ།  ཕྱི་མ་ལྟར་ན་སངས་རྒྱས་བརྫུན་གསུང་བར་སོང་བས་ཇི་ལྟར་ཡིན་ལགས་ཞེས་པའི་ལན་ནི།  སྤྱིར་སངས་རྒྱས་ཀྱིས་ཆེ་བ་བརྗོད་པ་ལ་ཆེ་བ་བརྗོད་པའི་གཞི་ངེས་པར་ཡོད་པས་བརྫུན་གསུང་བར་མི་འགྱུར་ལ།  ཆེ་བ་བརྗོད་པའི་གཞི་
རྒྱུད་མཐའ་དྲུག་ཚུལ་བཞིའི་སྒོ་ནས་འཆད་པ་ཁོ་ནར་མ་ངེས་ཏེ།  གསང་བ་འདུས་པ་རང་གི་ལམ་སྨིན་གྲོལ་འཁོར་བཅས་ཆེ་བ་བརྗོད་པའི་གཞི་ཡིན་པའི་ཕྱིར།  དཔེར་ན་སྦྱིན་པ་ལ་མཆོག་འཛིན་གྱི་གཉེན་པོར་ཚུལ་ཁྲིམས་ལ་ཆེ་བ་བརྗོད་པ་ན་ཚུལ་ཁྲིམས་ཀྱི་ཡོན་ཏན་
དེ་ཉིད་ཆེ་བ་བརྗོད་པའི་གཞི་ཡིན་པ་བཞིན་ནོ། །གལ་ཏེ་མཐའ་དྲུག་ཚུལ་བཞིའི་སྒོ་ནས་འཆད་པ་ལ་བྱེད་ན་ཡང་རྩ་རྒྱུད་ལ་མཐའ་དྲུག་ཚུལ་བཞིའི་སྒོ་ནས་བཤད་དགོས་པ་དེ་ཉིད་ཆེ་བ་བརྗོད་པའི་གཞི་ཡིན་ཏེ།  རྒྱུད་གཞན་ལས་རྒྱུད་ཀྱི་མཐར་ཐུག་འདུས་པ་སྟེ་
10-3-30a


ཞེས་བསྔགས་པ་ན་ཡང་།  རྩ་རྒྱུད་མཐའ་དྲུག་ཚུལ་བཞིས་བཤད་དགོས་ཤིང་།  བཤད་ཐབས་ཀྱི་མན་ངག་བཤད་པའི་རྒྱུད་ལ་ཡོད་པས་རྩ་བའི་རྒྱུད་ཉིད་ལ་བསྔགས་པ་བཞིན་ནོ། །དྲི་བ་དྲུག་པ་ཕ་རོལ་དུ་ཕྱིན་པ་ལས་ཆོས་
དབྱིངས་ཡེ་ཤེས་ཞེས་བྱ་བའང་མ་བཤད་ལ་གསང་སྔགས་ལས་བཤད་པ་དང་།  ཕ་རོལ་ཏུ་ཕྱིན་པ་ལས་སྐུ་གསུམ་ལས་མ་བཤད་པ་ལ་གསང་སྔགས་ལས་སྐུ་བཞི་བཤད་ཅེས་པ་ཞལ་སྔ་ནས་སྒྲ་དྲང་ཐད་དུ་ཞལ་གྱིས་བཞེས་ཀྱིན་ཡོད་ཟེར་བ་ཐོས་
ན་ཡང་རྗེ་བླ་མའི་ཞལ་ནས་སྤྱི་རྣམ་ནས་བཤད་པའི་ཕ་རོལ་ཏུ་ཕྱིན་པའི་ལམ་རིམ་དེ་རྣལ་འབྱོར་དབང་ཕྱུག་ནས་ས་ཆེན་ལ་བརྒྱུད་པ་མིན།  རྔོག་ལོ་དང་ཕྱ་པ་ནས་བརྒྱུད་པའི་ལམ་རིམ་མདོ་སྡེ་རྒྱན་ལ་བརྟེན་པ་ཡིན་པས་དེ་ནས་སྐུ་གསུམ་ལས་མ་བཤད་པ་
དང་།  ཡེ་ཤེས་ཀྱང་བཞི་ལས་མ་བཤད་ཅེས་ཟེར་བ་ཡིན་གྱི་གཞན་དུ་ན་མངོན་རྟོགས་རྒྱན་ལས་སྐུ་བཞིར་བཤད་པ་དང་།  འཕགས་པ་སངས་རྒྱས་ཀྱི་ས་ལས་ཆོས་དབྱིངས་ཡེ་ཤེས་ཀྱང་བཤད་དོ། །སམ་བྷུ་ཊི་རང་གི་རྒྱུད་གཞིར་བཞག་ན་མཐར་ཐུག་ཐོབ་
པར་བཤད་དམ་མ་བཤད་པ་ལ་སྦྱར་ཡང་མི་འགྲིག་པའི་སྐྱོན་མེད་དེ།  མཐར་ཐུག་གི་འབྲས་བུ་གཅིག་ལས་མེད་པ་དང་།  ཐོབ་བྱེད་ཀྱི་ལམ་གཉིས་ཡིན་པ་དང་།  ཕ་རོལ་དུ་ཕྱིན་པའི་ལམ་རང་རྐང་ལ་བརྟེན་ནས་མཐར་ཐུག་གི་འབྲས་བུ་མི་ཐོབ་
པར་བཤད་པ་རྣམས་སམ་པུ་ཊི་ལ་བརྟེན་ནས་ཞལ་གྱིས་བཞེས་པ་ཡིན་ཅེས་གསུངས་ཀྱིན་གདའ་སྙམ་པ་བདོག་ན་ཡང་བདག་གིས་མ་གོ་བ་སྲིད་ལགས་པས་སྒྲ་དྲང་ཐད་དུ་ཁས་ལེན་རྒྱུ་ཡིན་ལགས་སམ་ཞེས་པའི་ལན་ནི།  རྗེ་བླ་མས་སྤྱི་རྣམ་ནས་
10-3-30b


བཤད་པའི་ཕ་རོལ་དུ་ཕྱིན་པའི་ལམ་རིམ་དེ་རྣལ་འབྱོར་དབང་ཕྱུག་ནས་ས་ཆེན་ལ་བརྒྱུད་པ་མིན་ཞེས་པ་ཡེ་མི་གསུང་སྟེ།  སྤྱི་རྣམ་ཉིད་ལས།  ལམ་རང་གི་ངོ་བོའི་རྣམ་པར་གཞག་པ་འདི་རྗེ་བླ་མ་སྐབས་འདིར་མི་གསུང་ཡང་།  གནས་སྐབས་གཞན་དུ་
གསུངས་པ་ཁོ་བོས་བྲིས་པ་ཡིན་ནོ་ཞེས་གསུངས་པའི་ཤུགས་ཀྱིས་ལམ་སོ་སོའི་རྣམ་གཞག་གཉིས་པོ་རྗེ་བླ་མས་སྐབས་འདིར་གསུངས་པ་བསྟན་ནུས་པའི་ཕྱིར་དང་།  རྗེ་བླ་མ་ནི་ས་ཆེན་ཉིད་ཡིན་པའི་ཕྱིར་རོ། །དེར་མ་ཟད་རྗེ་ས་ཆེན་ཉིད་ཀྱིས་མཛད་
པའི་སྤྱི་རྣམ་ལས་ཕ་རོལ་དུ་ཕྱིན་པའི་ལམ་བགྲོད་ཚུལ་དང་།  རྡོ་རྗེ་ཐེག་པའི་ལམ་བགྲོད་ཚུལ་གཉིས་སྤྱི་རྣམ་ཆེན་པོ་ན་ཅི་ལྟར་ཡོད་པ་བཞིན་དངོས་སུ་གསུངས་པས་ཀྱང་ས་ཆེན་གྱི་གསུང་སྒྲོས་ཡིན་པར་ཤེས་སོ། །རྗེ་སེམས་དཔའ་ཆེན་པོས་རྩེ་མོའི་
སྤྱི་རྣམ་དུ་ཕ་རོལ་དུ་ཕྱིན་པའི་ལམ་གྱི་རིམ་པ་མདོ་སྡེ་རྒྱན་དུ།  རིགས་དང་ཆོས་ལ་མོས་པ་དང་ཞེས་སོགས་ཚིགས་བཅད་གཉིས་དང་སྦྱར་བ་དེ་ཕྱ་པ་ནས་བརྒྱུད་པའི་གྲོ་ལུང་པའི་རྒྱལ་སྲས་འཇུག་ངོགས་ཀྱི་གསུང་སྒྲོས་ལྟར་ཡིན་གསུང་བ་ཤིན་
ཏུ་དོན་ལ་ཡང་གནས་པས་ས་ཆེན་ནས་བརྒྱུད་པའི་ཕ་རོལ་དུ་ཕྱིན་པའི་ལམ་རིམ་ལ་སྐབས་དེ་ཁོ་ན་རྗེ་བཙུན་རྩེ་མོས་རྒྱས་སུ་བཏང་བ་ཙམ་མོ། །དེ་ཙམ་གྱིས་སྤྱི་རྣམ་ནས་བཤད་པའི་ཕ་རོལ་དུ་ཕྱིན་པའི་ལམ་ཐམས་ཅད་ཕྱ་པ་ནས་བརྒྱུད་པར་མི་འགྲུབ་
པས་ཕ་རོལ་དུ་ཕྱིན་པ་ལས་སྐུ་གསུམ་ལས་མ་བཤད་པ་དང་།  ཆོས་དབྱིངས་ཡེ་ཤེས་མ་བཤད་པ་ཡང་མདོ་སྔགས་ཀྱི་འབྲས་བུའི་བཤད་ཚུལ་གྱི་ཁྱད་པར་ཕྱེ་བ་ཡིན་གྱི་ལུགས་གཞན་བཀོད་པ་ཆོས་རྗེ་རིན་པོ་ཆེ་ཡང་མི་བཞེད་དོ། །མངོན་རྟོགས་རྒྱན་གྱི་
10-3-31a


དགོངས་པ་སྐུ་བཞིར་ལྗོན་ཤིང་ནས་བཤད་པ་དང་མ་མཐུན་སྙམ་པའི་དོགས་པ་སྤོང་བ་ལ་ཆོས་རྗེ་རིན་པོ་ཆེའི་གསུང་སྒྲོས་ལྟར་བྱས་ན་འགལ་སྤོང་གི་ཚུལ་ཤིན་ཏུ་ལེགས་པ་ཡོང་བ་འདུག་མོད་ཀྱི་གཞུང་གི་འཆད་ཚུལ་རེ་རེ་
ཙམ་ལ་ཅུང་ཟད་མི་འདྲ་བ་རྗེ་བཙུན་སྐུ་མཆེད་རྣམས་ལ་ཡང་སྣང་སྟེ་བསོད་ནམས་ཚོགས་བསག་བསྡུས་པ་མཆོག་བསྒྲུབ་པ་ལ་སྦྱར་མི་སྦྱར་དང་།  དྲག་ལས་ཀྱི་སྐབས་སུ་ཞིང་ལ་སྡིག་པ་བསྒོ་བ་བྱེད་མི་བྱེད་ཀྱི་ཁྱད་པར་བཞིན་ནོ། །དེས་ན་སྡོམ་
གསུམ་རབ་དབྱེར་ཡང་།  ཁ་ཅིག་དབང་བཞི་མི་འདོད་ཅིང་། །བསྐྱེད་རིམ་ལ་སོགས་ལམ་བཞི་པོའི། །རྣམ་པར་གཞག་པའང་མི་འདོད་པར། །རྡོ་རྗེ་ཐེག་པའི་འབྲས་བུར་ནི། །སྤྲུལ་སྐུ་ལ་སོགས་སྐུ་བཞི་ཞེས། །འདོད་པ་དེ་ཡང་
ལོག་ཤེས་ཡིན། །ཞེས་གསུངས་པ་དང་།  སྤྱི་རྣམ་གྱི་དགོངས་པ་དོན་གཅིག་པར་སྣང་བས་སྒྲ་དྲང་ཐད་ལེགས་སོ་སྙམ་མོ། །དྲི་བ་བདུན་པ་ཞལ་སྔ་ནས་ཞུས་ལན་གཅིག་ལ་མངོན་རྟོགས་རྒྱན་གྱི་དེ་ཡང་ལ་ལ་སྐུ་གསུམ་དུ་འདོད།  
ལ་ལ་བཞིར་འདོད་པ་མ་གཏོགས་མཐའ་གཅིག་ཏུ་བཞི་ཁོ་ནར་མ་ངེས་གསུངས་པ་འདྲ་གཅིག་སྣང་ལགས་ན།  ལྗོན་ཤིང་ལས་དེ་ཡང་གཞུང་ལས་ནི་སྐུ་བཞིར་གསལ་ཏེ་ཅེས་གསུངས་པས་རང་ལུགས་ལ་སྐུ་བཞིར་འདོད་པ་མ་ལགས་སམ་ཞེས་
པའི་ལན་ནི་མངོན་རྟོགས་རྒྱན་གྱི་དགོངས་པ་འཕགས་པ་གྲོལ་སྡེས་སྐུ་གསུམ་དུ་བཀྲལ་ཞིང་།  སློབ་དཔོན་གྱིས་ཀྱང་འགྲེལ་པ་དོན་གསལ་ལས་གསུམ་དུ་འགྲེལ་བ་དང་བཞིར་འགྲེལ་པའི་ཚུལ་སོ་སོར་སྨོས་ནས་བརྒྱད་སྟོང་འགྲེལ་
10-3-31b


ཆེན་དུ་རང་ལུགས་སྐུ་གསུམ་དུ་མཛད་པས་རྒྱ་བོད་ན་སྐུ་གསུམ་དུ་འགྲེལ་མཁན་ཤིན་དུ་མང་ངོ་། །ངོ་བོ་ཉིད་ལོངས་རྫོགས་བཅས་དང་། །དེ་བཞིན་གཞན་པ་སྤྲུལ་པ་ནི། །ཆོས་སྐུ་མཛད་པ་དང་བཅས་པ། །རྣམ་པ་བཞིར་ནི་ཡང་དག་
བརྗོད། །ཅེས་འཕགས་པ་འཇམ་དཔལ་གྱི་རང་གི་ལྟ་བའི་འདོད་པ་མདོར་སྟོན་པའི་མདོར།  ཚིག་གཞན་རྣམས་དེ་དང་འདྲ་བ་ལ་སྤྲུལ་པ་དང་ཞེས་པའི་ཚིག་བྱས་ནས་སྐུར་བཞིར་དབྱེ་བའི་སྐབས་སུ་བཤད་པས་འདིར་སྤྲུལ་པ་ནི་ཞེས་
པའི་ཚིག་བྱས་པའི་ཚེ་སྐུ་གསུམ་དུ་འགྲེལ་པ་ལྟར་དགོངས་པ་ཡིན་ནོ། །དེའི་ཚེ་རྣམ་པ་བཞི་ཞེས་པ་ཆོས་སྐུ་མཚོན་བྱེད་ཀྱི་ཆོས་ལ་མཛད་པ་ཕྲིན་ལས་དང་བཅས་ཏེ་བཞིར་བརྗོད་ཅེས་པའི་དོན་ཡིན་པས་སྐུ་བཞིར་མི་སྟོན་ནོ། །རང་ལུགས་
ལ་འདོད་མི་འདོད་ནི་ལན་སྔ་མ་ཉིད་ཀྱི་ནང་དུ་ཡོད་དོ། །དྲི་བ་བརྒྱད་པ་མངོན་རྟོགས་ལྗོན་ཤིང་ལས།  ཟག་མེད་ཀྱི་ངོས་འཛིན་མངོན་པ་གོང་མ་ལྟར་ན་འདུས་མ་བྱས་ལ་བརྒྱད་དུ་བྱས་གདའ་བས།  ནམ་མཁའ་དང་སོ་སོར་བརྟགས་
པའི་འགོག་པ་དང་།  བརྟགས་མིན་གྱི་འགོག་པ་མ་ཡིན་པའི་ཆོས་ཀྱི་སྐྱེ་མཆེད་དང་།  ཆོས་ཀྱི་ཁམས་ཀྱི་ཕྱོགས་རེ་ཨེ་ཐོན་ལགས་འདིའི་བྱེ་བྲག་ཏུ་སྨྲ་བའི་གྲུབ་མཐའ་མངོན་པ་འོག་མ་ཇི་ལྟ་བ་བཞིན་རང་མིན་པ་འདྲ་ལགས།  འོག་
མ་ནས་སེམས་བྱུང་བཞི་བཅུ་ཞེ་དྲུག་ལས་མ་བཤད།  གོང་མ་ནས་ལྔ་བཅུ་རྩ་གཅིག་བཤད་ཅེས་པ་ཤེས་བྱ་རབ་གསལ་ན་གདའ་ཞིང་།  ལྗོན་ཤིང་བྱིན་པོར་སེམས་ལས་བྱུང་བའི་གཞི་ནི་སེམས་བྱུང་ལྔ་བཅུ་རྩ་གཅིག་གོ་ཞེས་གསུངས་གདའ་
10-3-32a


ལགས་ཞེས་པའི་ལན་ནི།  མངོན་པ་གོང་མར་ནམ་མཁའ་དང་།  འགོག་པ་གཉིས་མ་ཡིན་པའི་འདུས་མ་བྱས་སུ་གྱུར་པའི་ཆོས་ཀྱི་སྐྱེ་མཆེད་དང་།  ཆོས་ཁམས་ཀྱི་ཕྱོགས་རེ་ལེགས་པར་ཐོན་ཏེ།  དགེ་མི་དགེ་ལུང་མ་
བསྟན་གྱི་དེ་བཞིན་ཉིད་གསུམ་དང་།  མི་གཡོ་བ་དང་།  འདུ་ཤེས་དང་ཚོར་བ་འགོག་པ་རྣམས་དེ་ཡིན་པའི་ཕྱིར་རོ། །འདུས་མ་བྱས་ལ་སྔར་གྱི་གསུམ་པོ་དེར་གྲངས་ངེས་པ་ནི་མཛོད་ཀྱི་ལུགས་སོ། །འདིའི་བྱེ་བྲག་སྨྲ་བའི་གྲུབ་མཐའ་མཛོད་ཀྱི་ལུགས་
ཅི་ལྟ་བ་བཞིན་ཡིན་ཏེ།  ཆོས་མངོན་པ་སྡེ་བདུན་གྱི་དགོངས་པ་ཕྱོགས་གཅིག་ཏུ་འགྲེལ་པ་བྱེ་བྲག་བཤད་མཛོད་ཆེན་མོ་ཡིན་ཅིང་།  དེའི་དགོངས་པ་ཅི་ལྟ་བ་བཞིན་འགྲེལ་པ་མཛོད་ཡིན་པས།  དེ་ལས་གཞན་བྱེ་སྨྲའི་གྲུབ་མཐའ་བརྟེན་ས་མེད་
པའི་ཕྱིར་དང་།  རྗེ་བཙུན་ཉིད་ཀྱིས་ཀྱང་འདི་རྟོགས་པར་འདོད་པས་མངོན་པ་མཛོད་བལྟ་བར་བྱའོ་ཞེས་གསུངས་པའི་ཕྱིར་རོ། །འོ་ན་སེམས་བྱུང་གི་གྲངས་ཇི་ལྟར་སྙམ་ན།  མཛོད་ལས།  སེམས་བྱུང་རྫས་ཡོད་ཀྱི་དབང་དུ་བྱས་ནས་
སེམས་ཀྱི་ས་མངས་བཅུ་།  དགེ་བའི་ས་མངས་བཅུ།  ཉོན་མོངས་པའི་ས་མངས་དྲུག །མི་དགེ་བའི་ས་མངས་གཉིས།  ཉོན་མོངས་ཆུང་ངུའི་ས་པ་བཅུ།  མ་ངེས་པའི་སྡེ་ཚན་བརྒྱད་དེ།  བཞི་བཅུ་ཞེ་དྲུག་ལས་མ་གསུངས་ཀྱང་།  གཏི་མུག་
མེད་པ་དང་།  ལྟ་བ་དང་ཤེས་བཞིན་མ་ཡིན་པ་གསུམ་ཤེས་རབ་ཀྱི་རྫས་དང་།  རྣམ་གཡེང་ཏིང་ངེ་འཛིན་ཉོན་མོངས་ཅན་ཡིན་པས་ཏིང་ངེ་འཛིན་གྱི་རྫས་དང་།  བརྗེད་ངས་དྲན་པ་ཉོན་མོངས་ཅན་ཡིན་པས་དྲན་པའི་རྫས་སུ་འདུས་པར་བཞེད་པས་
10-3-32b


སྤྱིར་སེམས་བྱུང་ལྔ་བཅུ་རྩ་གཅིག་མི་རུང་བ་མིན་པའི་ཕྱིར་རོ། །དྲི་བ་དགུ་པ་ཞལ་སྔ་ནས་དྲིས་ལན་གཅིག་ལ།  དེས་ན་ཀུན་གཞི་དང་ཉོན་ཡིད་རང་ལུགས་ལ་ཁས་ལེན་པའི་མདོ་སྡེ་པ་ཡོད་པར་ཁས་ལེན་མི་དགོས་གསུང་བ་གདའ་ན།  
དབྱིག་གཉེན་གྱི་ལས་གྲུབ་པའི་རབ་ཏུ་བྱེད་པ་ལས་འགོག་པའི་སྙོམས་འཇུག་ལ་ཞུགས་པའི་ཚེ་སེམས་དང་བཅས་པར་ཇི་ལྟར་འདོད་པར་བྱ་ཞེ་ན་ཇི་ལྟར་མདོ་སྡེ་པ་ཁ་ཅིག་འདོད་པ་དེ་ལྟར་རོ། །མདོ་སྡེ་པ་ཁ་ཅིག་ཅི་ལྟར་འདོད་ཅེ་ན།  རྣམ་
པར་སྨིན་པའི་རྣམ་པར་ཤེས་པ་ས་བོན་ཐམས་ཅད་པ་ཉིད་མཚམས་སྦྱོར་བ་ནས་བཟུང་སྟེ་ཞེས་ཀུན་གཞི་བཤད་གདའ་བས་ཀུན་ལས་བཏུས་ཁས་ལེན་པའི་མདོ་སྡེ་པ་དེས་ཀུན་གཞི་ཁས་བླངས་ན་གོང་གི་ལུང་དེ་ཤེས་བྱེད་དུ་ཨེ་འབྲེལ་ཞེས་པའི་ལན་ནི།  
མདོ་སྡེ་པས་རྣམ་པར་སྨིན་པའི་རྣམ་པར་ཤེས་པ་ས་བོན་ཐམས་ཅད་པ་ཁས་བླངས་ཀྱང་ཀུན་ལས་བཏུས་ནས་བཤད་པ་ལྟར་གྱི་ཀུན་གཞི་ཁས་ལེན་པ་མ་ཡིན་ཏེ།  ཐེག་བསྡུས་ལས།  དམུས་ལོང་བརྒྱས་གླང་པོ་ཆེ་ལ་འཇུ་བ་དཔེར་བྱས་ནས་ཉན་ཐོས་སྡེ་པ་དག་
གིས་རྣམ་པར་སྨིན་པའི་རྣམ་པར་ཤེས་པ་སོགས་ཀུན་གཞིའི་ཆ་ཤས་རེ་རེ་འདོད་ཀྱང་མིག་ལྡན་གྱིས་གླང་པོ་ཆེ་ལ་བལྟ་བ་ལྟར་གྱི་ཀུན་གཞི་རྣམ་པར་ཤེས་པའི་མཚན་ཉིད་ཡོངས་རྫོགས་མ་རྟོགས་པར་གསུངས་ཤིང་ཐེག་བསྡུས་དང་།  ཀུན་ལས་བཏུས་
དང་།  སུམ་ཅུ་པའི་རབ་བྱེད་གསུམ་སེམས་ཙམ་རང་ལུགས་ཀྱི་ཀུན་གཞིའི་མཚན་ཉིད་ཡོངས་རྫོགས་སྟོན་པར་མཚུངས་པར་སྣང་བའི་ཕྱིར་རོ། །དེས་ན་ཀུན་བཏུས་ཀྱི་ཀུན་གཞིའི་མཚན་ཉིད་ཡོངས་རྫོགས་བཤད་ཟིན་པའི་མཇུག་ཏུ་རྣམ་པར་སྨིན་པའི་རྣམ་པར་ཤེས་
10-3-33a


པ་དང་ལེན་པའི་རྣམ་པར་ཤེས་པ་ཡང་དེ་ཡིན་ནོ་ཞེས་གསུངས་པ་ཡང་མདོ་སྡེ་པས་འགོག་པ་ལ་སྙོམས་པར་ཞུགས་པའི་ཚེ་དེ་གཉིས་ཡོད་པར་འདོད་པ་ཡང་ཀུན་གཞིའི་རྣམ་ཤེས་ཡིན་པ་ཁྱེད་རང་གིས་མ་རྟོགས་པ་ཡིན་གྱི་དོན་ལ་ཀུན་གཞི་ཡིན་ཅེས་པའི་དོན་ཡིན་པས་
སྔར་གྱི་ལུང་དེ་དེའི་ཤེས་བྱེད་དུ་མི་འབྲེལ་ལོ། །དྲི་བ་བཅུ་པ་གོང་དུ་ཀུན་རྫོབ་ཏུ་ཡོད་པ་ནི་བཏགས་པ་ཉིད་ཡིན་པས་ཞེས་ཀུན་རྫོབ་ཡོད་པ་ཀུན་བཏགས་སུ་བཤད་ནས་འོག་ཏུ་ཀུན་གཞི་ལ་སོགས་པ་རྣམ་པར་རིག་པ་ཙམ་དུ་བཤད་པ་དེ་དག་ཀུན་རྫོབ་ཏུ་ཡིན་པ་ཙམ་ལ་
འདོགས་པ་ཡིན་ལ་ཅེས་གསུངས་པས།  ཀུན་གཞི་ཀུན་བཏགས་སུ་ཁས་ལེན་དགོས་སམ་ཞེས་པའི་ལན་ནི་ཀུན་རྫོབ་ཏུ་ཡོད་པ་ནི་ཀུན་གཏགས་པ་ཉིད་ཡིན་པས་ཞེས་པའི་དོན་ཀུན་རྫོབ་ཏུ་ཡོད་པའི་ཚུལ་དེ།  སྒྲོ་བཏགས་པའི་སྒོ་ནས་ཡོད་པ་ཙམ་ཡིན་གྱི།  དོན་
དམ་དུ་ཡོད་པ་མ་ཡིན་ཅེས་པའི་དོན་ཡིན་གྱི།  གཞི་དེ་ཀུན་རྫོབ་ཏུ་ཡོད་ན་གཞི་དེ་ཀུན་བཏགས་ཡིན་པས་ཁྱབ་ཅེས་པའི་དོན་ནི་མ་ཡིན་ཏེ།  འདི་པའི་ལུགས་ཀྱི་ཡང་དག་པ་མ་ཡིན་པའི་ཀུན་ཏུ་རྟོག་པ་དེ་ཡང་ཀུན་རྫོབ་བདེན་པར་བཞེད་པའི་ཕྱིར་རོ། །དྲི་བ་
བཅུ་གཅིག་པ་དབུ་མ་པས་སེམས་ཙམ་པ་ལ་ཡང་ཁྱེད་གནས་གྱུར་པ་ཞེས་བྱ་བ་འདོད་ན་དོན་དམ་པར་གནས་འགྱུར་རམ།  ཀུན་རྫོབ་ཏུ་གནས་འགྱུར་ཞེས་གནོད་བྱེད་གཏོང་བ་གདའ་ན།  དབུ་མ་པ་རང་ཡང་གནས་གྱུར་ཞལ་གྱིས་བཞེས་པའི་ཚེ་སེམས་
ཙམ་པ་དང་མི་འདྲ་བའི་གནས་གྱུར་ཚུལ་ཇི་ལྟར་ལགས་ཞེས་པའི་ལན་ནི།  སེམས་ཙམ་པས་ཀུན་རྫོབ་ཏུ་གནས་གྱུར་ཁས་བླངས་ན་ཁས་བླངས་འགལ་ལ།  དབུ་མ་པས་ཀུན་རྫོབ་ཏུ་གནས་གྱུར་ཁས་བླངས་པ་ཁས་བླངས་ནང་འགལ་བ་
10-3-33b


དང་།  རིགས་པ་དང་འགལ་བའི་སྐྱོན་མེད་པ་ནི་ཁྱད་པར་རོ། །དྲི་བ་བཅུ་གཉིས་པ་སེམས་ཙམ་པས་ཕྱི་རོལ་གྱི་དོན་ཁས་མི་ལེན་ཙ་ན་ཐེག་བསྡུས་སུ་གཟུགས་ཀྱི་ཕུང་པོ་གནས་གྱུར་པའི་ཕྱིར་ཞིང་དང་ལུས་ཅེས་སོགས་གཟུགས་ཕུང་ཁས་ལེན་པ་ཅི་ལྟར་
ལགས་ཞེས་པའི་ལན་ནི།  གཟུགས་ཕུང་དང་།  གཟུགས་ཅན་གྱི་ཁམས་དང་།  སྐྱེ་མཆེད་རྣམས་ཐ་སྙད་དུ་ཁས་ལེན་ལ་དེའི་ཚེ་ཕྱི་རོལ་གྱི་དོན་ཡང་ཐ་སྙད་དུ་ཁས་ལེན་ཅིང་དོན་དམ་པར་གཟུགས་ཕུང་སོགས་ཁས་མི་ལེན་པས་ཁོ་རང་གི་ལུགས་ལ་
འགལ་བ་གང་ཡང་མེད་དོ། །དེ་ལྟར་ན་གཟུགས་ཕུང་ལ་གནས་གྱུར་མི་འཐད་དོ་སྙམ་ན་དེ་ཉིད་ཀྱི་ཕྱིར་དབུ་མ་པས་ཁས་བླངས་ནང་འགལ་སྟོན་པའོ། །དྲི་བ་བཅུ་གསུམ་པ་ཐེག་པ་ཐུན་མོང་མ་ཡིན་པས་ས་དང་ལམ་གྱི་རིམ་པ་འབྲས་བུ་གྲུབ་པ་དང་བཅས་
པ་ནི་ཐེག་པ་ཆེན་པོ་ཐུན་མོང་བ་ཉིད་ལས་ཁྱད་པར་མི་འདོད་ཅེས་པ་དང་།  བླ་མེད་ལ་དབང་བཞི་དང་ནི་རིམ་པ་གཉིས། །རྣལ་འབྱོར་ཆེན་པོའི་ཁྱད་ཆོས་ཡིན། །ཅེས་ལམ་ལ་ཁྱད་པར་ཡོད་པ་བཤད་པ་དང་།  འབྲས་བུ་ལ་ཡང་ས་ཕྱེད་དང་གསུམ་ཐོབ་རྒྱུ་ཡོད་པར་
བཤད་པ་ཅི་ལྟར་ཞེས་པའི་ལན་ནི།  སྤྱིར་ས་བཅུ་དང་།  ལམ་ལྔ་དང་འབྲས་བུ་སྤངས་རྟོགས་མཐར་ཐུག་པ་རྣམས་ལ་ཐེག་པ་ཆེན་པོ་ཐུན་མོང་བ་ནས་བཤད་པ་དེ་ཉིད་ཐུན་མོང་མ་ཡིན་པས་ཀྱང་དེ་ཅི་ལྟ་བ་བཞིན་དུ་འདོད་ཅེས་པའི་དོན་ཡིན་གྱི་ཐུན་མོང་བ་
ལ་མེད་པའི་ཁྱད་ཆོས་མི་འདོད་ཅེས་པའི་དོན་གཏན་མ་ཡིན་ཏེ།  ཅི་སྐད་བཤད་པ་དེ་དག་དང་།  གཞན་ཡང་དོན་གཅིག་ན་ཡང་མ་རྨོངས་དང་། །ཞེས་སོགས་ཀྱི་ཁྱད་པར་མང་དུ་ཡོད་པའི་ཕྱིར་དང་།  ཁྱད་པར་མེད་ན་ཐུན་མོང་མ་ཡིན་པ་ཞེས་པའི་
10-3-34a


སྒྲ་དོན་ཡང་བཤད་དུ་མེད་པའི་ཕྱིར་རོ། །དེས་ན་འདི་གཉིས་སྤྱི་དང་བྱེ་བྲག་ཡིན་ཞེས་པའི་གནད་རྟོགས་ན་འདི་རང་གྲོལ་དུ་འགྱུར་རོ། །དྲི་བ་བཅུ་བཞི་པ་བདེན་པ་གཉིས་སུ་འཇོག་པ་ནི་འཇིག་རྟེན་པའི་བློ་ལ་ལྟོས་ཏེ་འཇོག་
གོ་ཞེས་དང་།  འཇིག་རྟེན་པའི་བློས་ཡོད་པའམ།  མེད་པའམ།  གཉིས་ཀའམ།  གཉིས་ཀ་མ་ཡིན་པ་གཅིག་ལས་འཛིན་མི་ཤེས་པས་དེ་དག་དོན་དམ་པའི་བདེན་པར་ཇི་ལྟར་མི་འགྱུར༷་ལགས་ཞེས་པའི་ལན་ནི།  སངས་རྒྱས་ཀྱི་སར་བདེན་གཉིས་ཟུང་
འཇུག་ཡིན་པས་སོ་སོར་དབྱེར་མེད་པ།  སངས་རྒྱས་བཅོམ་ལྡན་འདས་ཀྱིས་དེ་ཐུགས་སུ་ཆུད་ནས་གདུལ་བྱ་ལ་བསྟན་པའི་ཚེ་འཇིག་རྟེན་པ་རྣམས་མི་བསླུ་བ་ལ་དོན་དམ་པ་དང་།  བསླུ་བ་ལ་ཀུན་རྫོབ་ཡིན་ཅེས་པའི་ཐ་སྙད་ལ་བརྟེན་ནས་བདེན་གཉིས་སོ་
སོར་ཕྱེ་སྟེ་བསྟན་པའི་ཚེ་བློ་འཁྲུལ་མ་འཁྲུལ་གཉིས་སམ།  ཕྱིན་ཅི་ལོག་མ་ལོག་གཉིས་སམ།  མཐོང་བ་བརྫུན་པ་དང་།  མཐོང་བ་ཡང་དག་གཉིས་སམ།  རྨོངས་མ་རྨོངས་གཉིས་ཀྱི་ངོ་བོར་བདེན་པ་ལ།  ཀུན་རྫོབ་བདེན་པ་དང་།  དོན་དམ་བདེན་པར་
བཞག་པའི་ཕྱིར་རོ། །དེའི་ཚེ་འཇིག་རྟེན་པའི་བློ་དོན་དམ་བདེན་པ་ཡུལ་དུ་བྱེད་པ་ནི་བདེན་པ་གཉིས་སུ་ཕྱེ་བའི་ཚེ་བློ་མ་འཁྲུལ་བ་སོགས་བཞི་པོ་དེར་འཇོག་ཀྱང་།  བདེན་གཉིས་ཟུང་འཇུག་ལ་ལྟོས་ནས་བློ་འཁྲུལ་པ་སོགས་བཞིར་འཇོག་པས།  
དེས་དངོས་སུ་བཟུང་བ་ནི་དོན་དམ་པ་མཚན་ཉིད་པ་མ་ཡིན་ཅེས་པའི་དོན་ནོ། །འོན་ཀྱང་དེ་སྐྱེ་བ་དང་རྗེས་སུ་མཐུན་པའི་དོན་དམ་དང་།  རྣམ་གྲངས་པའི་དོན་དམ་དུ་འཇོག་པ་ནི་དབུ་མའི་གཞུང་ལུགས་ཚད་ལྡན་རྣམས་ལས་མང་དུ་གསུངས་
10-3-34b


ཤིང་ལྗོན་ཤིང་ཉིད་ལས་ཀྱང་གསལ་བར་འབྱུང་ངོ་། །འདིའི་མཐའ་ཆོད་པར་འདོད་ན་ཁོ་བོས་བྱས་པའི་ངེས་དོན་རབ་གསལ་བལྟ་བར་བྱའོ། །དྲི་བ་བཅོ་ལྔ་པ་རྩ་རྒྱུད་ཀྱི་བདག་མེད་མའི་སྐབས་ཀྱི་རྒྱུ་རྡོ་རྗེ་འཆང་འདི་ས་ཆེན་གྱིས་ཞལ་
བརྒྱད་ཕྱག་བཅུ་དྲུག་པ་དང་།  ཞལ་གསུམ་ཕྱག་དྲུག་པར་བྱེད་པའི་ལུགས་གཉིས་གསུངས་ནས།  ཕྱི་མ་ལྟར་ན་ཕྱག་མཚན་ཞལ་སོགས་གོང་མ་བཞིན་ཞེས་ཐུགས་རྡོ་རྗེ་ཞལ་གསུམ་ཕྱག་དྲུག་པ་ལ་སྙེགས་པར་གསུངས་གདའ་བ་དང་།  དག་ལྡན་
ལས་ཀྱང་དམ་ཚིག་རྡོ་རྗེ་ལུ་གུ་རྒྱུད་མ་བཞིན་དུའོ་ཞེས་དེའི་ཡུམ་ལ་སྙེག་པར་གསུངས་པ་བཞིན་སམ་བུ་ཊིའི་བདག་མེད་མའི་སྐབས་ཀྱི་དྲུག་པ་རྡོ་རྗེ་འཆང་ཡང་རྡོར་དབྱིངས་ཀྱི་ཚེ་ཞལ་གསུམ་ཕྱག་དྲུག་པ་དང་།  ཀྱེ་རྡོར་ལྷ་བཅུ་བདུན་མའི་ཚེ་ཞལ་
བརྒྱད་ཕྱག་བཅུ་དྲུག་པར་བྱས་ན་གོང་གི་དེ་དེའི་སྒྲུབ་བྱེད་དུ་ཨེ་འབྲེལ་ཞེས་པའི་ལན་ནི།  གོང་གི་དེ་འདྲ་ཡོད་ན་སྒྲུབ་བྱེད་དུ་འབྲེལ་བ་སྲིད་ན་ཡང་ས་ཆེན་གྱི་དཀའ་འགྲེལ་དུ་ནི་སྐུ་མདོག་དཀར་པོ་ཞལ་བརྒྱད་ཕྱག་བཅུ་དྲུག་པ་ཁོ་ནར་གསུངས་ལ་དེ་ལས་
གཞན་ས་ཆེན་གྱིས་ཞལ་གསུམ་ཕྱག་དྲུག་པར་གསུངས་པ་ནི་མ་མཐོང་ངོ་། །དག་ལྡན་ལས།  དམ་ཚིག་རྡོ་རྗེ་ལུ་གུ་རྒྱུད་མ་ལ་སྙེགས་པར་གསུངས་པ་ནི་ཕྱོགས་སྔ་བརྗོད་པའི་སྐབས་ཡིན་གྱི་རང་ལུགས་མ་ཡིན་ནོ། །དྲི་བ་བཅུ་དྲུག་པ་ལྗོན་ཤིང་དུ་མན་ངག་
ལུགས་དང་།  འགྲེལ་པ་ལུགས་གཉིས་བཤད་ཐབས་ཀྱི་མན་ངག་དང་།  མངོན་པར་རྟོགས་པའི་ཆིང་མི་འདྲ་བར་གསུངས་པ་དང་།  ཀྱེ་རྡོར་རྣམ་བཤད་དུ་དེ་གཉིས་ངོ་བོ་གཅིག་ཏུ་བསྒྲུབས་གདའ་ལགས་པའི་དགོངས་པ་ཅི་ལྟར་ཞེས་པའི་ལན་ནི།  
10-3-35a


ལྗོན་ཤིང་དུ་དེ་གཉིས་མངོན་རྟོགས་ཀྱི་ཆིང་མི་འདྲ་བར་བཤད་པ་མེད་དེ།  ལམ་གྱི་རིམ་པ་ཐམས་ཅད་བརྒྱུད་པ་གཉིས་ཀ་ནས་འོངས་པའི་ལམ་རིམ་ཐུན་མོང་བ་ལ་མན་ངག་ལུགས་གཙོ་ཆེ་བ་ཡིན་པར་དབུ་ཞབས་གཉིས་ཀ་
ལས་གསུངས་པའི་ཕྱིར་རོ། །དག་ལྡན་ལས་རྒྱུད་འཆད་པའི་ཚེ་ག་ཡ་དྷ་རས་བརྟག་པ་དང་པོ་སྤྱི་དོན་དང་།  སྦས་དོན་གཉིས་གཉིས་ཀྱི་མཚམས་སྦྱར་གསུངས་པ་དང་།  མི་ཐུབ་ཟླ་བས་འཇིག་རྟེན་གྱི་རྒྱལ་པོའི་དཔེས་ལེའུ་གོང་འོག་རྣམས་
ཀྱི་མཚམས་སྦྱར་ཕྱོགས་གཅིག་ཏུ་གསུངས་པའི་ཁྱད་པར་ཙམ་ཞིག་གསུངས་ཀྱང་དེ་ཙམ་གྱིས་ལམ་གྱི་ངོ་བོ་མི་གཅིག་པར་མི་འགྱུར་ཏེ།  ལམ་གྱི་ངོ་བོ་ནི་གཙོ་བོ་སྨིན་གྲོལ་གཉིས་ལ་འཇོག་དགོས་པའི་ཕྱིར་རོ། །སྨིན་གྲོལ་གྱི་སྐབས་སུ་སྤྲོས་
པ་ཆེ་ཆུང་གི་ཁྱད་པར་འབྱུང་བ་ཙམ་གྱིས་ངོ་བོ་མི་གཅིག་པར་མི་འགྱུར་བ་ནི་རྣམ་བཤད་ཉིད་ལས་དཔེ་དང་བཅས་ཏེ་གསུངས་པ་ལས་ཤེས་པར་བྱའོ། །དྲི་བ་བཅུ་བདུན་པ་རྗེ་སེམས་དཔའ་ཆེན་པོ་ལོ་ནག་གཉིས་ལ་ཁྱད་པར་མེད་པར་མ་མོ་བཅུ་གཉིས་
ལུས་དཀྱིལ་དུ་ཞལ་གྱིས་བཞེས་ཤིང་དེའི་རྒྱུ་མཚན་རྗེ་བཙུན་གྱིས་ལོ་ཧི་པའི་སྒྲུབ་ཐབས་སུ་ལུས་ཀྱི་དཀྱིལ་འཁོར་སྔགས་ཀྱིས་བྱིན་གྱིས་རླབས་པ་དང་བཅས་པ་ནི་ཞེས་དེ་མན་ཆད་ལུས་དཀྱིལ་དུ་མཛད་པ་དང་།  རྣལ་འབྱོར་མ་ཀུན་སྤྱོད་ཀྱི་ཊཱི་ཀར་ཡང་ལུས་དཀྱིལ་གྱི་
ལྷ་སུམ་ཅུ་སོ་བདུན་ཅེས་དང་།  གཉན་ཕུལ་བྱུང་བའི་འབྲུ་འབུམ་དུ་ཡང་ཕྱི་ནང་གཉིས་ཀ་ལ་ལྷ་སུམ་ཅུ་སོ་བདུན་བཞུགས་པས་ཞེས་གསུངས་འདུག་པས་སྙིང་གའི་ཕྱི་ནང་གི་རྩ་འདབ་རྣམས་ལ་བསྐྱེད་ནས་ཕྱག་ལ་བཀོད་པ་གོང་གི་ལུང་དེ་
10-3-35b


རྣམས་དང་རྗེ་ས་ཆེན་གྱི་ཊཱིཀ་ཆུང་གི་དོན་ལ་ཡོད་པར་འདུག །དེས་ན་བསྐྱེད་གཞི་གང་ཡིན་པ་དེ་དང་དེ་ལྷ་དེ་དང་དེ་རུ་བསྐྱེད་པས་ཁྱབ།  བསྐྱེད་ནས་དེ་རུ་བཞུགས་པས་མ་ཁྱབ་ཅེས་པ་གཅིག་ཁས་བླངས་དགོས་སྔར་རྗེ་རྡོ་རྗེ་འཆང་གི་གསུང་རྒྱུན་
ལ་ལུས་དཀྱིལ་གྱི་ལྷ་ཡིན་ན་སྦྱང་གཞི་གང་ཡོད་ས་དེར་ཡོད་དགོས་གསུང་པ་གཅིག་ཡོད་དེ་དང་འགལ་བ་ཙམ་མ་གཏོགས་གཞན་གང་དང་ཡང་འགལ་བ་མེད།  ས་སྐྱ་པའི་དགེ་བཤེས་ཡིན་ན་ལུང་དེ་རྣམས་ཀྱི་འབྲུ་གནོན་དགོས་གསུང་པ་གཅིག་
བདོག་སྟེ།  འདི་རྣམས་ལུས་དཀྱིལ་དུ་ཞལ་གྱིས་བཞེས་བཏུབ་ལགས་སམ་མི་བཏུབ་ལགས་ཞེས་པའི་ལན་ནི།  དེ་དག་རྗེ་སེམས་དཔའ་ཆེན་པོའི་སྐུ་ཚེའི་མཇུག་གི་གསུང་སྒྲོས་ཡིན་པར་འདུག །ངེད་གླེ་ལུང་དུ་མཇལ་དུས་སུ་ཡང་ཐོ་ཙམ་
ཅིག་གསུངས།  སྔར་གྱི་ལུང་གསུམ་པོ་དེ་ལ་བརྟེན་ནས་མ་མོ་བཅུ་གཉིས་ཕྱག་ལ་བཀོད་པ་ཡང་ལུས་དཀྱིལ་དུ་བྱ་དགོས་པས་འབུར་དོད་དུ་བྱུང་བ་ནི་ངོ་མཚར་རྨད་དུ་བྱུང་བའི་གསུང་སྒྲོས་སུ་སྣང་སྟེ།  ལུས་དཀྱིལ་དུ་དངོས་སུ་གསུངས་འདུག་པའི་
ཕྱིར་རོ། །དེ་ལྟ་ན་ཡང་སྙིང་གའི་རྩ་འདབ་ལ་བསྐྱེད་ནས་ཕྱིར་སྤྲོས་པ་འདི་མཛད་ན་རྡོ་རྗེ་འཆང་གི་སྔར་གྱི་གསུང་སྒྲོས་དང་འགལ་བ་ཙམ་དུ་མ་ཟད།  རྗེ་སེམས་དཔའ་ཆེན་པོ་ཉིད་ཀྱི་དྲིལ་བུ་ལུས་དཀྱིལ་གྱི་སྐབས་སུ།  དགེ་ལྡན་པས་ལུས་
རྒྱུར་སོང་བའི་ཕྱིའི་གཞལ་ཡས་ཁང་ལུས་དཀྱིལ་དུ་འདོད་པ་ལ་བརྗོད་པའི་སྐྱོན་ཐམས་ཅད་ཚུར་ལོག་གམ་སྙམ།  འོ་ན་དེ་དག་ལུས་དཀྱིལ་དུ་ཇི་ལྟར་འགྱུར་ན།  མངོན་པ་གོང་མར་ལུས་ཅེས་པ་དབང་པོ་ལྔའི་ནང་ཚན་དུ་གྱུར་པའི་ལུས་དབང་དང་དབང་པོ་
10-3-36a


གཟུགས་ཅན་ལྔ་ཆར་དང་།  ཉེར་ལེན་གྱི་ཕུང་པོ་ལྔ་ཆར་དང་།  རྫས་ཡོད་ཙམ་ལ་འཇུག་པའི་ཚུལ་བཞི་གསུངས་པ་ལྟར།  གསང་སྔགས་ཀྱི་རྒྱུད་སྡེ་འདིར་ཡང་ལུས་ཅེས་པ་རྡོ་རྗེའི་ལུས་སྐྱོན་མེད་དང་།  རྟེན་དཀྱིལ་འཁོར་བཞི་དང་།  
དེའི་ནང་ནས་རྩ་ཁོ་ན་དང་།  སྦྱང་གཞི་སྒྲུབ་པ་པོའི་ཕུང་ཁམས་སྐྱེ་མཆེད་ཐམས་ཅད་དང་།  དཀྱིལ་འཁོར་གྱི་གཙོ་བོའི་ལུས་ལ་འཇུག་པ་སོགས་དུ་མ་ཡོད་པའི་ནང་ནས་ལོ་ནག་དྲིལ་གསུམ་གསུམ་ཆར་ལ་ལྷ་ཉི་ཤུ་རྩ་ལྔ་དཔའ་བོ་རྣམས་ནི་བྱང་ཆུབ་ཀྱི་སེམས་
དང་།  དཔའ་མོ་རྣམས་ནི་རྩ་རྒྱུར་སོང་བའི་ལུས་དཀྱིལ་དུ་མཚུངས་ལ་མ་མོ་བཅུ་གཉིས་དྲིལ་བུ་པའི་སྐབས་སུ་རྩ་རྒྱུར་སོང་བའི་ལུས་དཀྱིལ་དང་།  ལོ་ནག་གཉིས་ཀྱི་སྐབས་སུ་སྦྱང་གཞིའི་ལུས་རྒྱུར་མ་སོང་ཡང་།  གཙོ་བོའི་ལུས་ལ་བཀོད་པའི་ཆ་ནས་
ལུས་དཀྱིལ་དུ་འཇོག་པ་ཡིན་པར་མངོན་ནོ། །དྲི་བ་བཅོ་བརྒྱད་པ་ཆོས་རྗེ་གུང་རུ་པའི་གསུང་ལས།  བསྟན་པ་འདི་ཤཱཀྱ་ཐུབ་པའི་བསྟན་པ་ཡིན་པས།  དཀྱིལ་འཁོར་གྱི་དབུས་སུ་ཁོང་རང་བཞུགས་དགོས།  ཁོང་གི་འཁོར་དུ་ཁོང་གི་སློབ་དཔོན་རྣམས་
བཞག་ན་རྗེ་འབངས་གོ་ལོག་པར་འགྱུར་བས།  མཁའ་འགྲོ་རྒྱ་མཚོ་སོགས་སེམས་དཔའ་སྟོང་དཀྱིལ་འཁོར་ལ་བཀོད་པའི་ཚེ།  དང་པོ་གསུམ་པོ་འཁོར་དུ་མི་ཡོང་བའི་རྒྱུ་མཚན་དེ་ཡིན་གསུངས་པ་གཅིག་བདོག་ནའང་།  སྦྱོང་རྒྱུད་ཀྱི་དཀྱིལ་འཁོར་འགའ་
རེ་ལ་སངས་རྒྱས་རབས་བདུན་འཁོར་དུ་བཀོད་པ་མང་པོ་ཡོང་བར་གདའ་བས་ཅི་ལྟར་ལགས་ཞེས་པའི་ལན་ནི།  མཁའ་འགྲོ་རྒྱ་མཚོའི་རྒྱུད་ལས།  ཇི་ལྟར་བསྐལ་བཟང་རྒྱལ་བ་ནི། །བཞི་ཡིས་དམན་པའི་སྟོང་ཕྲག་གཅིག །ཅེས་དངོས་སུ་གསུངས་པའི་
10-3-36b


དོན་ལ་ཤཱཀྱ་ཐུབ་པ་ནི་གཙོ་བོ་ཡིན་ཞིང་།  གཞན་གསུམ་པོ་དེའི་སློབ་དཔོན་ཡིན་པས་འཁོར་དུ་མི་བཀོད་པ་མཁའ་འགྲོ་རྒྱ་མཚོ་རང་གི་སྐབས་སུ་གོ་དོན་དེ་ལྟར་ཡིན་པར་པདྨ་བཛྲ་སོགས་འཆད་ལ།  དེ་དག་འཁོར་དུ་བཀོད་ན་རྗེ་འབངས་གོ་
ལོག་པའི་སྐྱོན་དུ་འགྱུར་ཞེས་པའི་ཁྱབ་པ་འཆའ་ན་སྦྱོང་རྒྱུད་སོགས་དང་འགལ་བ་ཡོང་ཉེན་ཡོད་དོ། །དྲི་བ་བཅུ་དགུ་པ་ལྗོན་ཤིང་དུ་འདི་ལའང་མཐུན་པའི་དོན་དམ་དེ་ལ་དོན་དམ་པ་ཉིད་དུ་གོལ་བར་མི་བྱའོ་ཞེས་པ་འདི་གང་ལ་ངོས་འཛིན་ཞེས་པའི་
ལན་ནི།  སྔར་གྱི་དྲི་བ་བཅུ་བཞི་པའི་ནང་ན་ཡང་ཅུང་ཟད་ཡོད་ཅིང་།  རྒྱས་པར་འདོད་ན་ཁུངས་སྟོན་པ་དེར་ཡོད་དོ། །དྲི་བ་ཉི་ཤུ་པ་བདེན་པ་གཉིས་ཀྱི་མཚན་ཉིད་གྲུབ་མཐའ་སྨྲ་བ་བཞི་ཆར་མཐུན་པའི་ཚུལ་ཇི་ལྟར་ལགས་ཞེས་པའི་ལན་ནི་རྗེ་བཙུན་
གྱིས་དེ་ལྟར་གསུངས་པ་ནི་གྲུབ་མཐའ་སྨྲ་བ་བཞི་པོ་རང་རང་གི་མཐར་ཐུག་པའི་རིགས་པས་དཔྱད་པ་ན་དེ་མི་ཞིག་པ་ནི་དོན་དམ་བདེན་པའི་མཚན་ཉིད་དང་།  དེ་ལྟར་དཔྱད་ན་དེ་ཞིག་པ་ནི་ཀུན་རྫོབ་བདེན་པའི་མཚན་ཉིད་དུ་འདོད་པ་འདྲ་ཞེས་པའི་དོན་ཏེ།  
གསུང་རབ་ཀྱི་གནད་སྟོན་ཚུལ་ཚིག་ཉུང་ལ་དོན་རྒྱས་པའོ། །དེ་ལྟར་ཟབ་མོའི་དོན་ལ་ཚུལ་བཞིན་དྲིས་པའི་ལན་དུ་ནི། །འཁྲུལ་མེད་གོ་བདེའི་ངག་གིས་གནས་ལུགས་ཇི་བཞིན་སྨྲས་པ་འདི། །ཚུལ་ལུགས་བཟང་པོའི་དཔྱོད་ལྡན་ཁྱོད་ཀྱི་རེ་བ་
བསྐང་བ་དང་། །གཟུར་གནས་བློ་ལྡན་དོན་གཉེར་གཞན་ལའང་ཕན་པ་ཉིད་དུ་འགྱུར། །རྗེ་བཙུན་བླ་མ་མུས་པ་ཆེན་པོའི་གདམས་པ་ཟབ་མོ་ཐོབ་ནས་ཚུལ་བཞིན་དུ་ཉམས་སུ་ལེན་པའི་སྐལ་བ་དང་ལྡན་པ་ཚུལ་ཁྲིམས་བཟང་པོས་དྲིས་པའི་ལན་མང་
10-3-37a


དུ་ཐོས་ཤིང་ཚུལ་བཞིན་དཔྱོད་པར་ནུས་པའི་བློ་གྲོས་དང་ལྡན་པ་བསོད་ནམས་སེང་གེས་ལྕགས་མོ་གླང་གི་ལོ་དབོའི་ཟླ་བ་ལ་ཐུབ་བསྟན་རྣམ་རྒྱལ་དུ་བྲིས་པའོ། །དགེའོ།།    ༄༅།   །ལྡན་མ་ཤེས་རབ་སེང་གེའི་དྲིས་ལན།  
ཨཾོ་སྭསྟི།  མཁྱེན་པའི་ཁོར་ཡུག་ཆེར་ཡངས་ཤིང་། །མན་ངག་རིན་ཆེན་དུ་མས་གཏམས། །བྱིན་རླབས་ཆུ་རྒྱུན་འབྱུང་བའི་གཞི། །ཡོན་ཏན་རྒྱ་མཚོ་བླ་མ་རྒྱལ། །ཤེས་རབ་གསལ་བའི་མེ་ལོང་ལ། །མདོ་སྔགས་གྲུབ་མཐའི་གཟུགས་
འཆར་བ། །བཤེས་གཉེན་ཤེས་རབ་སེང་གེ་ཡིས། །དྲིས་ལན་མདོར་བསྡུས་བརྗོད་པར་བྱ། །ཁྱེད་ཁམས་བཟང་ཞིང་དགེ་སྦྱོར་ལ་བརྩོན་པའི་ངང་ནས་གསུང་ཡིག་གསེར་སྲང་གང་གི་འབུལ་བ་དང་བཅས་པ་ཀུན་དགའ་སྙིང་པོས་འཕྲོད་པས་
རྗེས་སུ་ཡི་རང་ཞིང་དགེ་བའི་རྩ་བ་ཚེ་རབས་ཐམས་ཅད་དུ་བླ་མ་དམ་པས་རྗེས་སུ་བཟུང་ཞིང་ཐར་པའི་ལམ་ལ་བར་ཆད་མེད་པར་འཛེགས་པའི་རྒྱུར་བསྔོ།  འཇིགས་བྱེད་ས་ལུགས་ཀྱི་མངོན་དཀྱིལ་ལ་ལོག་པར་རྟོག་པ་བཀག་པའི་ཡི་གེ་
ཁྱེད་རང་གིས་བྱས་པ་དེ་ཉིད་གནད་ཟིན་ཅིང་ས་ཆེན་གྱི་ཊཱི་ཀའི་དགོངས་པ་ཇི་ལྟ་བ་བཞིན་དུ་སོང་འདུག་པས་དེ་ཀ་བསྐྱངས་པས་ཆོག་པར་འདུག །གཞན་ཡང་ནམ་མཁའི་དཀྱིལ་ཞེས་པས་ཆོས་འབྱུང་སྟོན་པའི་ཤེས་བྱེད་དུ།  བརྟག་གཉིས་
ལས།  ནམ་མཁའི་ཁམས་སུ་བྷ་ག་བསམ། །ཞེས་པ་འདྲེན་པ་ནི་ནམ་མཁའི་ཁམས་ཞེས་པས་ཆོས་འབྱུང་སྟོན་ན་ནི་བྷ་ག་ཞེས་པ་ཆོས་འབྱུང་གི་དོན་ཡིན་པས་ཆོས་འབྱུང་ཉིས་བརྩེགས་སུ་འགྱུར་ལ།  དེ་མི་སྟོན་ན་ནི་དེ་འདྲེན་པ་ལ་འབྲེལ་ཅི་
10-3-37b


ཡོད།  རྗེ་བླ་མ་རྡོ་རྗེ་འཆང་གི་ཞལ་ནས།  སློབ་དཔོན་ཨ་བོའི་ལུགས་ལ།  བདག་མདུན་གཉིས་ཀ་ལ་རོ་ལངས་བརྒྱད་ཀྱིས་བསྐོར་བའི་ལྷ་དགུ་བྱེད་པ་མ་གཏོགས་གཞན་རྒྱ་བོད་སུའི་ལུགས་ལ་ཡང་།  མདུན་བསྐྱེད་ལ་ལྷ་དགུ་བྱེད་པའི་ཚེ་བདག་
བསྐྱེད་ལ་དཔའ་བོ་གཅིག་པ་ལས་ལྷ་དགུ་བྱེད་པའི་ལུགས་མེད་ཅེས་གསུངས་ཤིང་།  གཞུང་རྣམས་ལ་ཡང་དེ་ལྟར་སྣང་བཞིན་དུ།  ཀུན་རིག་དང་།  ཚེ་དཔག་མེད་གཉིས་ཙམ་མ་གཏོགས་གཞན་རྣམས་ལ་བདག་མདུན་ལྷ་གྲངས་མཉམ་པ་
དགོས་ཞེས་སྨྲ་བ་ནི་ལྕང་ར་མཁན་པོས།  ཕྱི་དཀྱིལ་དང་ལུས་དཀྱིལ་ལྷ་གྲངས་མཉམ་པ་དགོས་ཅེས་སྨྲ་བའི་འོད་ཟེར་གཅིག་ཕོག་པ་འདྲ་བས།  དེ་འདྲ་བ་ལ་དགག་སྒྲུབ་ལས་སྔགས་བཟླས་པ་ཁེ་ཆེ།  མངོན་རྟོགས་ཚུལ་བཅུ་བཞིའི་སྐབས་སུ་ས་
བོན་ལས་བསྐྱེད་པ་ཡན་ལག་དྲུག་གིས་འཆིང་བ་གནད་ཀྱི་ཟླ་ཟེར་ན་ཡོད་ཀྱང་།  རྗེ་བླ་མའི་རྩོམ་པའི་ཐོག་མ་ཡིན།  ཕྱིས་གཏིང་ས་བོན་ལས་བསྐྱེད་པ་དང་།  སྐད་ཅིག་གིས་བསྐྱེད་པ་གཉིས།  གཙོ་འཁོར་ཐམས་ཅད་མངོན་བྱང་ལས་བསྐྱེད་པའི་
ཕྱོགས་དྲུག་སྟེ།  བརྒྱད་པོ་རྩ་རྒྱུད་ལས་གསུངས་པའི་བསྐྱེད་ཆོག་ཐུན་མོང་མ་ཡིན་པ་ཡིན་པས་རྩ་རྒྱུད་ཀྱི་ཐུན་མོང་མ་ཡིན་པའི་ཆིང་།  ཡན་ལག་བཞི་པ་སྦྱར་དགོས་པར་བཞེད་པར་གྲགས་པ་འདི་ཉིད།  རྗེ་བཙུན་གོང་མའི་དགོངས་པ་དཔྱིས་
ཕྱིན་པར་སྣང་བས་ངེད་རང་གིས་ཀྱང་དེ་ལྟར་བྱས་པ་ཡིན།  མངོན་རྟོགས་ཚུལ་བཅོ་ལྔ་པ་གང་ཡིན་གྱི་ཉལ་མགོ་རེ་ཞིག་གཞན་གྱིས་ནོན་པ་མེད་པས།  རྒྱུད་གསུམ་དང་གསུང་ངག་གི་ཡིག་ཆ་ཞིབ་ཏུ་བལྟས་པའི་བློ་གཟུར་གནས་གཅིག་ལ་
10-3-38a


ལུགས་འདིས་ས་བོན་བྱས་ན་གཟོད་རྟོགས་པར་འགྱུར་རོ། །རྗེ་བཙུན་མ་དྲོས་ཞབས་ལ་རྒྱུན་བཞིའི་བླ་མ་ནི། །རྒྱལ་པོ་རིག་དང་སྙིང་པོ་སྣང་བའི་མཐའ་ཅན་ཏེ། །ཞེས་གསུངས་པའི་སེ་སྟོན་ཀུན་རིག་
གིས་འབྲོག་མི་ལས་རྒྱུད་དངོས་སུ་མ་གསན་པས་རྒྱུན་བཞིའི་བླ་མར་ཇི་ལྟར་འགྱུར་ཞེས་པའི་ལན་ནི་སེ་སྟོན་ཀུན་རིག་གིས།  འབྲོག་མི་ལས་རྒྱུད་དངོས་སུ་མ་གསན་པ་མ་ཡིན་ཏེ།  རྒྱུད་གསུམ་ལ་མན་ངག་ལུགས་ཀྱི་བཤད་བཀའ་དང་།  
ཌོམ་བྷི་ལུགས་ཀྱི་བཤད་བཀའ་གཉིས་ཡོད་པ་ལས་དང་པོ་གསན་པའི་ཕྱིར་རོ། །འོ་ན་འབྲོག་མིས་བླ་མ་གཅིག་གི་དྲུང་དུ་མན་ངག་བསྟན་པ་ལ་གཞུང་མི་བཤད།  གཞུང་བཤད་པ་ལ་མན་ངག་མི་སྟོན་པར་ཁས་བླངས་པས།  སེ་སྟོན་ལ་
གཞུང་མ་བཤད་པ་དང་།  མཁོན་དཀོན་མཆོག་རྒྱལ་པོ་ལ་མན་ངག་མ་བསྟན་པར་གསུངས་པ་ཇི་ལྟར་སྙམ་ན་འདི་ནི་ཌོམ་བྷི་ལུགས་ཀྱི་རྒྱུད་ཀྱི་གཞུང་ལ་དགོངས་ཏེ།  སྤྱི་རྣམ་དང་།  ལྗོན་ཤིང་ལས།  འབྲོག་མི་ཡན་ཆད་ལ་བརྒྱུད་པ་གཉིས་
ཡོད་པར་གསུངས་ཤིང་།  འབྲོག་མི་ལས་རྒྱུན་བཞིའི་བླ་མ་བྱུང་བར་གསུངས་པ་ཉིད་ཀྱིས་ཤེས་སོ། །དེ་ལྟར་ན་འབྲོག་མི་ལས།  ཌོམ་བྷི་ལུགས་ཀྱི་རྒྱུན་འཛིན་པ་རྒྱལ་པོ་དང་།  སྙིང་པོ་དང་།  སྣང་བའི་མཐའ་ཅན་གསུམ་མན་ངག་
ལུགས་ཀྱི་རྒྱུན་འཛིན་པ་རིག་གི་མཐའ་ཅན་ཏེ།  བཞི་ཆར་ཡང་རྒྱུད་ཀྱི་བཤད་བཀའི་དབང་དུ་བྱས་པའོ། །དབུ་མ་པའི་ལུགས་ལ་སོ་ཐར་གྱི་སྡོམ་པ་གཟུགས་ཅན་དུ་བཞེད་པའི་སྒྲུབ་བྱེད་དབུ་མ་ཕུང་པོ་ལྔའི་རབ་བྱེད་ལས།  ཡང་དག་པར་
10-3-38b


བླངས་པ་ལས་བྱུང་བའི་གཟུགས་ཞེས་དང་།  སྤྱོད་བསྡུས་སྒྲོན་མེར།  ཡང་དག་པར་བླངས་པ་ལས་བྱུང་བའི་གཟུགས་ནི་མི་བསྐྱོད་པའོ་ཞེས་དང་།  འགྲེལ་པ་ཀུ་མུ་ཏིར།  ཡང་དག་པར་བླངས་པ་ལས་བྱུང་བའི་སྡོམ་པའི་གཟུགས་ནི་རྣམ་པར་
རིག་བྱེད་མ་ཡིན་པའི་གཟུགས་སོ་ཞེས་པ་རྣམས་འདྲེན་པའི་དགོངས་པ་ཇི་ལྟར་ལགས་ཞེས་པའི་ལན་ནི།  སྤྱིར་དབུ་མའི་གཞུང་ལུགས་ལས་ཀྱང་ཕུང་ཁམས་སྐྱེ་མཆེད་ཀྱི་མིང་གི་ཐ་སྙད་རྣམས་ཆོས་མངོན་པའི་གཞུང་ལས་བཤད་པ་ལྟར་མཛད་
ལ།  མངོན་པའི་གཞུང་ལས་ཐ་སྙད་དེ་རྣམས་གསུངས་པ་སོར་བཞག་པའོ། །ཐ་སྙད་དེ་ལྟར་གསུངས་པའི་དོན་ལ།  བྱེ་བྲག་ཏུ་སྨྲ་བས་གཟུགས་ཅན་མཚན་ཉིད་པར་འདོད་ཅིང་།  མདོ་སྡེ་པ་ཡན་ཆད་ཀྱིས་མངོན་པའི་མདོ་ལས་དེ་ལྟར་གསུངས་
པ་ནི་གཟུགས་ཅན་གྱི་མིང་གིས་བཏགས་པ་ཡིན་གྱི།  དོན་ལ་སྤོང་བའི་སེམས་པ་མཚུངས་ལྡན་དང་བཅས་པ་ལ་བཞེད་ཅེས་པ་སྟེ།  དཔེར་ན་འཇིག་རྟེན་པའི་དཀྱིལ་འཁོར་དྲུག་ཅེས་པའི་མིང་བཏགས་ཀྱང་འཇིག་རྟེན་པར་མི་གྲུབ་པ་བཞིན་ནོ། །
འཇུག་པའི་དཀའ་འགྲེལ་དུ།  ཆོས་ལ་དམིགས་པའི་སྙིང་རྗེའི་ཡུལ།  ཉན་རང་མི་སློབ་པ་དང་།  ས་བཅུའི་རྗེས་ཐོབ་ལ་གནས་པ་རྣམས་ཡིན་གྱི་མཉམ་གཞག་ལ་གནས་པ་རྣམས་མིན་པའི་རྒྱུ་མཚན་སྐྱེ་སོགས་མི་སྣང་བ་ཙམ་བཀོད་པ་མ་ཡིན་
གྱི།  རྫོགས་སངས་རྒྱས་བློ་རྒྱ་མཚོར་སྐྱེ་བ་བརྙེས། །ཞེས་པ་ལྟར།  ས་བཅུའི་མཉམ་གཞག་དང་།  སངས་རྒྱས་ཀྱི་ཡེ་ཤེས་རང་བཞིན་རྣམ་དག་གི་ཆོས་དབྱིངས་རྟོགས་ཚུལ་ཁྱད་པར་མེད་པ་བཀོད་པ་ཡིན་པས།  དོགས་པ་གཞན་
10-3-39a


རྣམས་འབྱུང་བའི་གནས་མེད་དོ། །མྱུ་གུའི་གནས་ཚུལ་ལ་དཔྱད་པའི་ཚེ་ཆོས་ཅན་མྱུ་གུ་ཁས་མི་ལེན་པ་ཡིན་གྱི་དམ་བཅའ་དང་ཐལ་འགྱུར་སོགས་ཀྱི་གནས་ལུགས་ལ་དཔྱད་པ་མེད་པས་སྐྱོན་མེད་ཅེས་པ་དང་།  ཐལ་
རང་གི་ཁྱད་པར་ཕྱེ་བའི་ཚེ་ཆོས་ཅན་དང་།  དམ་བཅའ་སོགས་དྲུག་གི་ཁྱད་པར་ཕྱེ་བས་ཆོས་ཅན་སོགས་དྲུག་ཁས་ལེན་དགོས་པས་དེ་གཉིས་འགལ་ཞེས་པའི་སྐྱོན་ཡང་མི་གནས་ཏེ།  ཐལ་རང་གི་ཁྱད་པར་ཕྱེ་བའི་ཚེ་ཆོས་ཅན་སོགས་དྲུག་གི་ཁྱད་
པར་ཕྱེ་བ་ནི་ཆོས་ཅན་སོགས་ཀྱི་འདོད་ཚུལ་གྱི་ཁྱད་པར་ཕྱེ་བ་ཡིན་ལ།  དེ་ཙམ་གྱིས་ཆོས་ཅན་གྱི་གནས་ཚུལ་ལ་དཔྱད་པའི་ཚེ་ཆོས་ཅན་ཁས་ལེན་པར་མི་འགྱུར་བའི་ཕྱིར་རོ། །དཀའ་འགྲེལ་དུ་ཐ་སྙད་དུ་ཀུན་གཞི་ལས་འབྲས་ཀྱི་རྟེན་དུ་ཁས་ལེན་པ་
ལ་འགལ་བ་མེད་དེ།  ལས་འབྲས་སེམས་ལ་བརྟེན་པའི་ཕྱིར་རོ་ཞེས་ཀུན་གཞི་ལས་འབྲས་ཀྱི་རྟེན་དུ་ཁས་ལེན་པ་དང་།  ལས་བྱེད་པ་པོ་དང་། །རྣམ་སྨིན་མྱོང་བ་པོའི་བདག་ཁས་བླངས་པས་བདག་ལས་འབྲས་ཀྱི་རྟེན་དུ་ཁས་མི་ལེན་པ་ནི་ཇི་
ལྟར་འགལ་ཞེས་པའི་དོགས་སྤོང་ཇི་ལྟར་ལགས་ཞེས་པའི་ལན་ནི།  སྤྱིར་ལས་ཀྱི་བག་ཆགས་ཀུན་གཞི་ལ་བརྟེན་པ་ཀླུ་སྒྲུབ་ཀྱིས།  སཱ་ལུ་ལྗང་པའི་མདོ་འགྲེལ་ལས་ཀྱང་གསུངས་ཤིང་།  རྗེ་བཙུན་གྱིས་འཁོར་འདས་དབྱེར་མེད་ཀྱི་འགྲེལ་པར་ཡང་
གསུངས་པ་ལྟར་ངེས་པར་ཁས་ལེན་དགོས་ཏེ།  དེར་སེམས་ཙམ་པ་འདོད་པ་ལྟར་གྱི་ཚོགས་བདུན་ལས་རྫས་གཞན་པའི་ཀུན་གཞི་བདེན་གྲུབ་མི་འདོད་ཅིང་།  ཡིད་ཀྱི་རྣམ་ཤེས་གཅིག་ཉིད་ལ་གསལ་ཙམ་རྒྱུན་མི་འཆད་པའི་ཆ་དང་།  རེས་
10-3-39b


འགའ་ངར་འཛིན་པའི་ཆ་དང་།  རེས་འགའ་ཡུལ་དྲུག་པ་ཆོས་ལ་འཇུག་པའི་ཆ་གསུམ་ཡོད་པ་ལ་རིམ་པ་ལྟར་ཀུན་གཞི་དང་།  ཉོན་ཡིད་དང་།  དྲུག་པ་ཡིད་ཀྱི་རྣམ་ཤེས་གསུམ་དུ་འཇོག་པའི་སྐབས་ཡིན་པས།  དང་པོ་ལ་ལམ་དུ་ཞུགས་པའི་
ཚེ་ཐོས་སོགས་ཀྱི་བག་ཆགས་འཇོག་ཏུ་རུང་ན་ལམ་དུ་མ་ཞུགས་པའི་ཚེ་ལས་ཉོན་གྱི་བག་ཆགས་འཇོག་པ་ཡང་འབད་མེད་དུ་གྲུབ་པའི་ཕྱིར་རོ། །བདག་ལས་བྱེད་པ་པོ་དང་།  རྣམ་སྨིན་མྱོང་བ་པོར་ཁས་བླངས་པས་དེ་ལས་འབྲས་ཀྱི་རྟེན་དུ་ཁས་
ལེན་མི་དགོས་ཏེ་འདིར་རྟེན་ཅེས་པ་བག་ཆགས་འཇོག་པའི་གཞི་ཡིན་ལ།  ལས་བྱེད་པ་པོ་ནི་བག་ཆགས་འཇོག་པ་པོ་ཡིན་གྱི།  བག་ཆགས་འཇོག་པའི་གཞི་མ་ཡིན་པའི་ཕྱིར་རོ། །དཔེར་ན་རྣམ་རིག་པའི་ལུགས་ལ་ཡང་འཇུག་ཤེས་བག་ཆགས་
འཇོག་པ་པོ་ཡིན་གྱི།  བག་ཆགས་འཇོག་པའི་གཞི་མ་ཡིན་པ་བཞིན་ནོ། །སྐུ་དང་ཡེ་ཤེས་ལ་སོགས་པ་སངས་རྒྱས་རང་རྒྱུད་ཀྱིས་བསྡུས་པ་མེད་ན་ཚོགས་ལམ་པ་ལྟ་བུ་ལ་དངོས་སུ་སྣང་བ་དེ་ཉིད་ཚོགས་ལམ་པ་རང་གི་སེམས་ཡིན་ནམ་དེ་ལས་
གཞན་པ་ཞིག་གི་སེམས་ཡིན་ཞེས་སོགས་ཀྱི་ཤུགས་ལ་སློབ་དཔོན་ཟླ་བའི་ལུགས་ལ་འཇིག་རྟེན་མཐུན་འཇུག་སོགས་གསུམ་དུ་ཕྱེ་ནས་གནས་སྐབས་དང་པོ་ལ་ཕྱི་རོལ་གྱི་དོན་དང་།  གཉིས་པ་ལ་སྣང་བ་སེམས་སུ་ཁས་ལེན་མི་དགོས་ཏེ།  འདི་གཞན་
གྱིས་སྣང་བ་སེམས་སུ་ཁས་བླངས་ནས་སངས་རྒྱས་ལ་རང་རྒྱུད་ཀྱིས་བསྡུས་པའི་སྐུ་དང་ཡེ་ཤེས་མེད་པར་འདོད་པ་འགོག་པའི་སྐབས་ཡིན་པའི་ཕྱིར་རོ། །སྤྱི་རྣམ་དུ་སློབ་དཔོན་ཟླ་བས་ལམ་གཅིག་ལ་འབྲས་བུ་གསུམ་བཞེད་པའི་དོན།  དེ་ནི་
10-3-40a


རིང་དུ་སོང་བར་བློ་ཡང་ལྷག་པར་འགྱུར་ཞེས་པའི་འགྲེལ་པར།  རྒྱུ་མེད་པ་ཡི་མེ་བཞིན་དུ། །གནས་མེད་ལེན་མེད་མྱ་ངན་འདའ། །ཞེས་རིན་ཆེན་ཕྲེང་བའི་ལུང་དྲངས་པས་དངོས་བསྟན་ལ་མཐར་ཐུག་ཐེག་པ་གསུམ་དུ་བསྟན་
ཏེ།  ཉན་རང་གི་ལྷག་མེད་མྱང་འདས་ཐོབ་ནས་སྐྱེ་བ་ལེན་པ་མེད་པར་བསྟན་པའི་ཕྱིར།  འདི་ཉིད་དགོངས་པ་ཅན་དུ་བསྒྲུབ་པ་ནི་ཟླ་བ་ཉིད་ཀྱིས་འབྲས་བུའི་སྐབས་སུ་མཐར་ཐུག་ཐེག་པ་གཅིག་ཏུ་གསུངས་པ་དེ་ཉིད་ཀྱིས་གྲུབ་པས་ཐེག་ཆེན་གྱི་གྲུབ་མཐའ་
གཅིག་པུ་ལ་བརྟེན་ནས་མཐར་ཐུག་ཐེག་པ་གསུམ་ཐོབ་པ་ཟླ་བ་ཉིད་ཀྱིས་དགོངས་པ་ཅན་དུ་བསྒྲུབ་ཞེས་པའི་དོན་ཡིན་གྱི།  ཟླ་བའི་མཐར་ཐུག་གི་དགོངས་པ་རྗེ་བཙུན་གོང་མས་དགོངས་པ་ཅན་དུ་བསྒྲུབ་མི་སྲིད་དོ། །གཞུང་ཚད་བརྩི་བའི་སྐབས་སུ་
རྩ་བ་གཉིས་པའི་ཚིགས་སུ་བཅད་པ་ནི་དབུས་མཐར།  ཉོན་མོངས་ཅན་མིན་ཉོན་མོངས་མིན། །དེ་ནི་དག་དང་མ་དག་མིན། །ཅེས་པ་ལྟ་བུའོ། །གསུམ་པ་ནི་དེ་ཉིད་དུ།  ཁྱབ་དང་ཉི་ཚེ་ལྷག་པ་དང་། །མཉམ་དང་ལེན་དང་སྤོང་བ་ནི། །གཉིས་ཀྱིས་
སྒྲིབ་པར་བསྟན་པ་ཡིན། །ཅེས་པ་ལྟ་བུའོ། །བཞི་པ་ནི་ཤིན་ཏུ་མང་ངོ་། །ལྔ་པ་ནི་མདོ་སྡེ་རྒྱན་དུ།  བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དེ་དང་པོ་གསུམ། །ཐ་མ་གཉིས་ཀྱི་རྣམ་པ་
གཉིས། །གཅིག་ནི་གསུམ་ཆར་ལ་ཡང་གཏོགས། །ཞེས་གསུངས་པ་ལྟ་བུའོ། །རྐང་པ་དྲུག་པའི་ཚིགས་སུ་བཅད་པ་ནི།  དེ་ཉིད་དུ།  ཆོས་སྦྱིན་ཚུལ་ཁྲིམས་དག་པ་དང་། །ཞེས་པ་ནས།  ཕ་རོལ་ཕྱིན་པའི་གཙོ་བོར་འདོད། །ཞེས་
10-3-40b


པའི་བར་ཚིག་རྐང་དྲུག་གསུངས་པ་ལྟ་བུའོ། །རབ་གནས་དོན་གསལ་དུ།  རྒྱས་གདབ་ཀྱི་སྐབས་སུ་རྒྱུད་སྡེའི་ཁྱད་པར་ཕྱེ་བས་རྟེན་བསྐྱེད་ཀྱི་སྐབས་སུ་རྒྱུད་སྡེའི་ཁྱད་པར་ཕྱེ་བ་དངོས་སུ་གསུངས་མི་དགོས་ཏེ།  རྒྱས་གདབ་ཀྱི་སྐབས་སུ་
བླ་མེད་སྤྱི་ཙམ་ལ་རྒྱས་གདབ་དེ་ཉིད་ཀྱིས་ཆོག་པས་རྒྱུད་སྡེ་འོག་མ་ལས་ཁྱད་པར་དུ་ཕྱེ་དགོས་ཤིང་།  རྟེན་བསྐྱེད་ཀྱི་སྐབས་སུ་དཀྱིལ་འཁོར་གང་ཡིན་དེའི་རིགས་ལྔ་བསྐྱེད་པ་གཞིར་བཞག་ནས་ཁྱད་པར་དངོས་སུ་མ་གསུངས་པའི་ཕྱིར་རོ། །དེས་ན་རྗེ་བླ་
མའི་བཞེད་པས་རྟེན་བསྐྱེད་ཀྱི་སྐབས་སུ་དཀྱིལ་འཁོར་སོ་སོའི་རིགས་ལྔ་བསྐྱེད་པར་བཞེད་ཅིང་ཁ་ལྟ་ཕྱོགས་ལ་རྟེན་སྤྱན་དྲང་དུ་བཏུབ་ཅིང་།  གནས་ཁང་གི་སྟབས་བདེ་ན་རྟེན་ཁ་བྱང་ནས་ལྷོར་བསྟན་པ་དང་།  སློབ་དཔོན་ལྷོ་ནས་བྱང་དུ་བསྟན་པ་ཡང་བཞེད་
དོ། །འོན་ཀྱང་རྣལ་འབྱོར་ཆེན་པོའི་སྐབས་སུ་ཡང་ཡོ་ག་ལྟར་རིགས་ལྔ་བསྐྱེད་པ་ལ་ཡང་འགལ་བ་མེད་པ་སྔར་བྱས་པ་ལྟར་རོ། །སྦྱིན་སྲེག་གི་ཚེ་སློབ་དཔོན་དང་།  དཀྱིལ་འཁོར་གཉིས་ཀ་ཁ་ཤར་དུ་བལྟས་ནས་ལྟག་པའི་ཕྱོགས་ནས་བསྲེག་རྫས་
བསྐྱུར་བ་དང་།  བདག་འཇུག་གི་ཚེ་ཡང་དེ་ལྟར་བྱེད་པ་ངོར་པའི་ཕྱག་ལེན་ཡིན་ཟེར་བའི་གང་ཟག་དེ་འདྲ་ཡང་ས་ཕྱོགས་དེ་འདྲ་ན་ཡོད་པ་རེད་བླུན་པོའི་ལོག་རྟོག་ལ་མཐའ་མེད།  གནད་ཀྱི་དོན་ནི་སྦྱིན་སྲེག་གི་ཚེ་སྒྲུབ་པ་པོའི་ཁ་ལྟ་ཕྱོགས་གཙོ་བོ་ཡིན་
པས་ཞི་བའི་སྦྱིན་སྲེག་བྱེད་པའི་ཚེ་སྒྲུབ་པ་པོ་ཁ་ཤར་དུ་བལྟས།  དཀྱིལ་འཁོར་ཞལ་ནུབ་དུ་བསྟན།  སྒྲུབ་མཆོད་ཀྱི་ཚེ་མདུན་བསྐྱེད་གཙོ་བོ་ཡིན་པས་དཀྱིལ་འཁོར་ཞལ་ཤར་དུ་བསྟན་སྒྲུབ་པ་པོ་ཁ་ནུབ་དུ་བསྟན་པ་འདི་ནི་རྗེ་བཙུན་གོང་མའི་
10-3-41a


ཡིག་ཆའི་དངོས་བསྟན་རྗེ་བླ་མ་རྣམས་ཀྱི་ཕྱག་ལེན་མ་འཁྲུལ་བ་ཡིན་ནོ། །ད་ལན་ཡི་གེའི་རྟེན་མཚོན་པར་བདུད་རྩི་རིལ་བུ་གཅིག་ལ་རྟགས་འབྱར་བ་ཡོད།  ཡིག་རྟེན་དྲག་པ་གཅིག་རྗེས་སུ་བསྐུར་བ་བགྱིད།  དྲིས་ལན་པད་
དཀར་ཕྲེང་བ་འདི། །བློ་གྲོས་སྤྱི་བོའི་རྒྱན་དུ་མཛོད། །མཐོང་བ་ཙམ་གྱིས་དགའ་བའི་སེམས། །འཛུམ་མདངས་བཞིན་རས་གསལ་བར་མཛོད། །ཡོས་ལོ་ཧོར་ཟླ་བཞི་པའི་ཚེས་བཅུ་བཞི་ལ་ཐུབ་བསྟན་རྣམ་པར་རྒྱལ་བའི་དགོན་པ་ནས་དགེ།    །།
༄༅།    །བཀའ་བཅུ་པ་རིན་ཆེན་བྱང་ཆུབ་ཀྱི་དྲིས་ལན་ཟླ་ཟེར་བྱ་བ་ལགས་སོ། །འགྲོ་བ་ཀུན་ལ་ཁྱབ་པའི་ཐུགས་རྗེ་དང་། །བདེ་ཆེན་དགའ་བཞིའི་ཏིང་འཛིན་ཟུང་འཇུག་ལས། །ཕྲིན་ལས་བཟང་པོའི་དཔལ་འབྱོར་ལྷམ་མེ་བ། །རྗེ་བཙུན་བླ་མའི་ཞབས་པད་
སྤྱི་བོས་མཆོད། །དལ་འབྱོར་རིན་ཆེན་སྐྱོན་མེད་རྙེད་དུས་འདིར། །བླ་མེད་བྱང་ཆུབ་སྒྲུབ་པའི་གོ་བགོས་ནས། །མན་ངག་བཅུད་འཐུང་རྩེ་གཅིག་སྒྲུབ་ལ་བརྩོན། །རྟོགས་པའི་ལུས་རྒྱས་དེ་ཡིས་དྲིས་པའི་ལན། །མང་ཐོས་དོན་ལ་ངེས་པའི་བློ་ལྡན་
ཡང་། །རློམ་པའི་དགྲ་ཡིས་བརྫི་བར་མ་ནུས་པ། །ཤཱཀྱའི་དགེ་སློང་བསོད་ནམས་སེང་གེ་ཡིས། །དཔལ་ལྡན་བདེ་ཆེན་གནས་ནས་འདི་སྐད་འབྲི། །དྲི་བ་དང་པོ་མ་ག་དྷ་རྡོ་རྗེའི་གདན་དུ་ཐུབ་པའི་དབང་པོས་མཛད་པ་བཅུ་གཉིས་ཀྱི་ཚུལ་བསྟན་པ་རྣམས་
དྲང་ངེས་སོ་སོར་འབྱེད་ལགས་སམ།  སྒྲ་ཇི་བཞིན་ཞལ་གྱིས་བཞེས།  གཞན་དོན་གཟུགས་སྐུ་རྣམ་གཉིས་སངས་རྒྱས་མིན་པར་བཞེད་པ་རྣམས་འཐད་དམ།  མི་འཐད།  དང་པོ་ལྟར་ན་དག་སའི་འཕགས་པས་སངས་རྒྱས་དངོས་སུ་མ་མཐོང་བར་
10-3-41b


འགྱུར།  དེས་ན་སངས་རྒྱས་ཀྱི་གསུང་ཐོས་པའི་གདུལ་བྱ་མེད་པར་འགྱུར།  གཉིས་པ་ལྟར་ན།  གང་དག་ང་ལ་གཟུགས་སུ་མཐོང་། །ཞེས་སོགས་ཀྱི་ལུང་དོན་གསལ་བར་ཞུ་ཞེས་པའི་ལན་ནི།  བྱེ་བྲག་ཏུ་སྨྲ་བས་རྒྱལ་བུ་དོན་གྲུབ་བསྐལ་
པ་གྲངས་མེད་གསུམ་དུ་ཚོགས་བསགས་པའི་བྱང་སེམས་ཚོགས་ལམ་པ་དེས་བྱང་ཆུབ་ཀྱི་ཤིང་དྲུང་དུ་མཚན་གང་གཅིག་ལ་སྲོད་ནས་བཟུང་སྟེ།  མི་སློབ་ལམ་གྱི་བར་གྱི་རྟོགས་པ་བསྐྱེད་པར་རང་རྒྱུད་པར་འདོད་པ་དང་།  ཡོ་ག་བ་ཤཱཀྱ་བཤེས་
གཉེན་གྱིས་ནཻ་རན་ཛ་རཱའི་འགྲམ་དུ་དཀའ་བ་སྤྱོད་པའི་དུས་སུ་བྱང་ཆུབ་གསར་དུ་ཐོབ་པ་རང་རྒྱུད་པར་འདོད་པ་གཉིས་མ་གཏོགས་ཐེག་པ་ཆེན་པོ་པ་ཐམས་ཅད་སྟོན་པ་འདི་བསྐལ་བ་དཔག་ཏུ་མེད་པའི་གོང་རོལ་དུ་སངས་རྒྱས་ནས་ཞིང་འདིར་གདུལ་
བྱའི་དོན་དུ་མཛད་པ་བཅུ་གཉིས་ཀྱི་ཚུལ་སྟོན་པས་དེ་དག་དྲང་དོན་དུ་བཞེད་པར་མཐུན།  གཞན་དོན་གཟུགས་སྐུ་གཉིས་པོ་གསུང་རབ་ཀྱི་དོན་ལ་འཇུག་ཚུལ།  འཇིག་རྟེན་མཐུན་འཇུག་དང་།  ཐ་སྙད་དཔྱོད་པའི་གནས་སྐབས་དང་།  དོན་དམ་
དཔྱོད་པའི་གནས་སྐབས་གསུམ་དུ་ཕྱེ་བའི་ཚེ་གནས་སྐབས་དང་པོའི་ཚེ་སངས་རྒྱས་དངོས་སུ་ཁས་ལེན་པས།  གདུལ་བྱས་སངས་རྒྱས་ཀྱི་སྐུ་དངོས་སུ་མཐོང་བ་དང་།  གསུང་དངོས་སུ་ཐོས་པའི་ཐ་སྙད་བྱེད།  གཉིས་པའི་ཚེ་སངས་རྒྱས་དངོས་
མ་ཡིན་པར་གདུལ་བྱའི་སེམས་སྣང་ཡིན་ཡང་།  སྤྱིར་སངས་རྒྱས་ཡིན་པར་གྱུར་པའི་གཟུགས་སྐུ་གཉིས་མེད་པར་མི་འགྱུར་ཏེ།  སངས་རྒྱས་རང་སྣང་གི་སྐུ་གསུམ་རྒྱུད་བླར་བཤད་པའི་ཕྱིར་རོ། །གསུམ་པའི་ཚེ་སངས་རྒྱས་ཡིན་མིན་གྱི་སྤྲོས་
10-3-42a


པ་དང་བྲལ་བས་མཐའ་གང་དུ་ཡང་བརྗོད་པར་མི་ནུས་སོ་དེས་ན།  གང་དག་ང་ལ་གཟུགས་སུ་མཐོང་། །ཞེས་སོགས་ཀྱང་གནས་སྐབས་ཕྱི་མ་གཉིས་ལ་དགོངས་ཏེ།  སངས་རྒྱས་རང་སྣང་གི་གཟུགས་སྐུ་གཉིས་དང་།  
སངས་རྒྱས་རང་སྣང་གི་དོན་དམ་སྤྲོས་བྲལ་གདུལ་བྱ་ལ་མི་སྣང་བའི་ཕྱིར་རོ། །དྲི་བ་གཉིས་པ་ཚུར་མཐོང་ལ་སྣང་བའི་འཁོར་བ་འདི་ཀུན་རྫོབ་ཙམ་དུ་ཡོད་པ་འཐད་དམ་མེད་པ་འཐད།  དང་པོ་ལྟར་ན་ཕྱིའི་རྒྱ་མཚོ་བདུད་རྩིར་འགྱུར་ཏེ་ལྷ་ལ་དེ་
ལྟར་སྣང་བའི་ཕྱིར་དང་།  རྣག་ཁྲག་ཏུ་འགྱུར་ཏེ།  ཡི་དྭགས་ལ་དེ་ལྟར་སྣང་བས་སོ། །ཕྱི་མ་ལྟར་ན་སྤང་གཉེན་གཉིས་འཁོར་འདས་གཉིས་ཇི་ལྟར་འཇོག་ལགས་ཞེས་པའི་ལན་ནི་ཚུར་མཐོང་ལ་སྣང་བའི་འཁོར་བ་འདི་ཀུན་རྫོབ་ཙམ་དུ་ཡོད་
དེ།  ཐ་སྙད་བདེན་པ་ཐབས་སུ་གྱུར་པ་མེད་ན།  དོན་དམ་བདེན་པ་ཐབས་བྱུང་དུ་གྱུར་པའང་མེད་པར་ཐལ་བའི་ཕྱིར་རོ། །དེ་ལྟར་ནའང་ཕྱིའི་རྒྱ་མཚོ་བདུད་རྩི་དང་རྣག་ཁྲག་ཏུ་འགྱུར་བའི་སྐྱོན་མེད་དེ།  ཕྱིའི་རྒྱ་མཚོ་ཞེས་པ་ཁས་བླངས་པ་
ཙམ་གྱིས་མིའི་ཐ་སྙད་ཀྱི་དབང་དུ་བྱས་པ་ཡིན་ལ།  མིའི་བློ་ངོར་ནི་བདུད་རྩི་དང་རྣག་ཁྲག་གཉིས་ཀུན་རྫོབ་ཙམ་དུ་ཡང་མེད་པའི་ཕྱིར་དང་།  ལྷ་དང་ཡི་དྭགས་ལ་བདུད་རྩི་དང་རྣག་ཁྲག་ཏུ་སྣང་བའི་ཚེ་དེ་ཀུན་རྫོབ་ཙམ་དུ་ཡོད་ཀྱི་དེ་ལས་གཞན་ཀུན་རྫོབ་ཙམ་དུ་
ཡང་མེད་པའི་ཕྱིར་དེས་ན་སློབ་དཔོན་ཟླ་བས།  ཆུ་འབབ་ཀླུང་ལ་ཡི་དྭགས་རྣག་བློ་ཡང་། །ཞེས་མིའི་ཐ་སྙད་གཞིར་བཞག་ནས།  ཡི་དྭགས་ལ་སྣང་ཚུལ་བརྩི་བའི་གནད་ཀྱང་འདི་ཉིད་ཡིན་ནོ། །དྲི་བ་གསུམ་པ་རྗེ་བཙུན་ས་སྐྱ་པ་ཡབ་སྲས་ལམ་
10-3-42b


འབྲས་ཀྱི་སྐབས་སུ་སྣང་བ་སེམས་སུ་བཞེད་པར་འདུག་པ་གདུལ་བྱ་རང་ལ་ཤར་བའི་སངས་རྒྱས་དེ་དང་རང་སེམས་གཉིས་ཁྱད་པར་མེད་པ་གཅིག་ཡིན་ནམ་མིན།  དང་པོ་ལྟར་ན་རང་སེམས་སངས་རྒྱས་སུ་འགྱུར།  ཕྱི་མ་ལྟར་ན་སྣང་བ་ཐམས་ཅད་
སེམས་ཡིན་པ་དང་འགལ་ཞེས་པའི་ལན་ནི་སྔར་བཤད་པ་ལྟར་གནས་སྐབས་གསུམ་དུ་ཕྱེ་བའི་དང་པོ་ལ་སྣང་བ་ཕྱི་རོལ་གྱི་དོན་དུ་ཁས་ལེན་གྱི།  རང་སེམས་སུ་ཁས་མི་ལེན་པས་རང་སེམས་སངས་རྒྱས་སུ་ཐལ་བའི་སྐྱོན་མི་གནས།  གནས་
སྐབས་བར་པ་ལ་སྣང་བ་སེམས་སུ་ཁས་ལེན་ཀྱང་།  གདུལ་བྱའི་རང་སྣང་ལ་ཤར་བས་སངས་རྒྱས་སུ་ཁས་མི་ལེན་པས་སྔར་གྱི་སྐྱོན་མི་གནས་ལ།  གནས་སྐབས་གསུམ་པ་ལ་ནི་སྤྲོས་པ་དང་བྲལ་ལོ། །འདི་ཡང་ས་སྐྱ་པཎྜི་ཏས།  འཇུག་ཚུལ་
ཡང་ནི་རྣམ་པ་གསུམ། །ཐུབ་པས་འཇིག་རྟེན་མཐུན་འཇུག་ལ། །དགོངས་ནས་ཕྱི་རོལ་དོན་དུ་གསུངས། །ཐ་སྙད་དཔྱོད་པའི་རིགས་པ་ལ། །དགོངས་ནས་སྣང་བ་སེམས་སུ་གསུངས། །དམ་པའི་དོན་ལ་དགོངས་ནས་ནི། །ཆོས་ཀུན་སྤྲོས་པ་
བྲལ་ཅེས་གསུངས། །ཞེས་གསུངས་པ་གནས་ལུགས་ཀྱི་དོན་ལ་འཇུག་པ་དང་།  གསུང་རབ་ཀྱི་དྲང་ངེས་འབྱེད་པའི་སྒྲོན་མེ་ཡིན་པ་ལས་རྟོགས་སོ། །དྲི་བ་བཞི་པ་ཡོད་ན་ཀྱཻ་རྡོར་ཡིན་པས་ཁྱབ་གསུང་པ།  སངས་རྒྱས་དང་།  སེམས་
ཅན་གང་གི་ངོར་ཡིན།  དང་པོ་ལྟར་ན་མ་དག་པའི་སེམས་ཅན་སངས་རྒྱས་ཀྱིས་མ་གཟིགས་པར་འགྱུར་རོ། །ཕྱི་མ་ལྟར་ན་སེམས་ཅན་གྱིས་ཤེས་བྱ་ཐམས་ཅད་དག་པར་མཐོང་བར་འགྱུར་ལ་ཞེས་པའི་ལན་ནི་བསྐྱེད་རིམ་གྱིས་སྦྱང་གཞི་སྦྱོང་བྱེད་སྦྱར་
10-3-43a


བའི་ཚེ་ཡོད་ན་ཀྱཻ་རྡོར་ཡིན་པས་ཁྱབ་པ་ཁས་ལེན་དགོས་ཀྱང་།  སྤྱིར་བདེན་པ་གཉིས་ཀྱི་ཐ་སྙད་སོ་སོར་ཕྱེ་ནས་འཆད་པའི་ཚེ་དེ་ཁས་ལེན་པ་ཅུང་མི་བདེ་སྟེ།  ཆོས་དབྱིངས་བསྟོད་པ་ལས།  ཇི་ལྟར་སོས་ཀའི་དུས་སུ་ཆུ། །དྲོའོ་
ཞེས་ནི་བརྗོད་པར་བྱེད། །དེ་ཉིད་གྲང་བའི་དུས་སུ་ནི། །གྲང་ངོ་ཞེས་ནི་རྗོད་པར་བྱེད། །དེ་བཞིན་ཉོན་མོངས་དང་བཅས་ན། །སེམས་ཅན་ཞེས་ནི་རྗོད་པར་བྱེད། །དེ་ཉིད་ཉོན་མོངས་བྲལ་བ་ན། །སངས་རྒྱས་ཞེས་ནི་རྗོད་པར་བྱེད། །ཞེས་
གསུངས་པས།  སེམས་ཅན་དང་སངས་རྒྱས་སོ་སོར་ཕྱེ་ནས་འཆད་དགོས་པའི་ཕྱིར་རོ། །དེ་ལྟ་ན་ཡང་སངས་རྒྱས་ཀྱི་ངོར་ནི་ཡོད་ན་ཀྱཻ་རྡོར་ཡིན་པས་ཁྱབ་སྟེ།  ཤེས་བྱ་ཐམས་ཅད་རང་སྣང་གི་ཡེ་ཤེས་བརྙེས་པའི་ཕྱིར་རོ། །དེ་ལ་སངས་རྒྱས་
ཀྱིས་མ་དག་པའི་སེམས་ཅན་མ་གཟིགས་པར་འགྱུར་རོ་ཞེས་པ་ནི་མ་དག་པའི་སེམས་ཅན་མ་དག་པར་མ་གཟིགས་པར་འགྱུར་རོ་ཞེས་པའི་དོན་ཡིན་ན་འདོད་ཐོག་ཡིན་ཞིང་།  མ་དག་པའི་སེམས་ཅན་དག་པར་གཟིགས་པས་མ་དག་པའི་སེམས་ཅན་མ་
གཟིགས་པར་འགྱུར་རོ་ཞེས་པ་ཡིན་ན།  རོ་མི་ཞིམ་པ་རོ་མཆོག་ཏུ་སྣང་བས་རོ་མི་ཞིམ་པ་མ་གཟིགས་པར་འགྱུར་བ་དང་རྣམ་པ་ཀུན་ཏུ་མཚུངས་སོ། །དྲི་བ་ལྔ་པ་ཀྱཻ་རྡོར་པའི་ལུགས་ཀྱི་དབང་བཞི་ཐ་དད་ཀྱི་སྦྱང་གཞི་ཇི་ལྟར་ལགས།  ཁ་ཅིག་
སྔགས་སྡོམ་རྒྱུད་ལྡན་གྱི་སྐྱེས་བུའི་གཟུགས་ཕུང་བུམ་དབང་གི་སྦྱང་གཞིར་འདོད་ཀྱིན༷་འདུག་པ་དེའི་གཟུགས་སྐུ་ཀྱཻ་རྡོར་དུ་འགྱུར་ཡང་སྐྱེས་བུའི་ལུས་བོར་མ་ཐག་སྦྱང་གཞི་དོར་བར་འགྱུར་ཏེ།  དེ་ཉིད་ཀྱི་གཟུགས་ཕུང་སྦྱང་གཞི་ཡིན་པས་སོ་ཞེས་
10-3-43b


པའི་ལན་ནི་དབང་བཞི་ཐ་དད་ཀྱི་སྦྱང་གཞི།  ལུས་རྩ་དང་།  རྩ་ཡི་གེ་དང་།  ཁམས་བདུད་རྩི་དང་།  སྙིང་པོ་ཡེ་ཤེས་རླུང་རྣམས་ཡིན་ཏེ།  རྩ་རྒྱུད་བརྟག་གཉིས་ཀྱི་ལེའུ་དང་པོར།  ལུས་རྩ་ལ་སོགས་པ་བཞིའི་ས་མཚམས་སོ་སོར་བཅད་པའི་
གཞུང་ཚོམ་བུ་བཞི་གསུངས་པ་དབང་བཞི་ཐ་དད་ཀྱི་སྦྱང་གཞི་ཉིད་ལ་དགོངས་པའི་ཕྱིར་དང་།  རྡོ་རྗེ་གུར་ལས།  སངས་རྒྱས་སངས་རྒྱས་སྲས་པོ་དང་། །ཡན་ལག་ཀུན་དང་བུ་ག་ཀུན། །རྩ་ཡི་དྲྭ་བ་སྐུད་པར་བཅས། །ལུས་ནི་ཡོད་མིན་
ལྟར་གཟིགས་ཤིང་། །སྐད་ཅིག་ཀྱེ་རྡོར་གཟུགས་འཛིན་ཞིང་། །ཞེས་གསུངས་པའི་དོན་མན་ངག་གི་མིག་གིས་བལྟས་ན་གསལ་ལོ། །སྔགས་སྡོམ་རྒྱུད་ལྡན་གྱི་གཟུགས་ཕུང་།  བུམ་དབང་གི་སྦྱང་གཞིར་འདོད་པའི་ཚེ་གཟུགས་ཕུང་
ཀྱེ་རྡོར་དུ་འགྱུར་བ་ལ་འགལ་བ་ཅུང་ཟད་ཀྱང་མེད་དེ།  སྦྱང་གཞི་དང་སྦྱོང་བྱེད་སྦྱར་བའི་དོན་དེ་གཉིས་དབྱེར་མེད་ལ་འཇོག་དགོས་པའི་ཕྱིར།  འདིའི་དོན་རྒྱུད་དང་མཁས་གྲུབ་ཀྱི་གཞུང་དང་།  བླ་མ་གོང་མའི་མན་ངག་ཕྱོགས་གཅིག་ཏུ་
བསྡེབས་པའི་ཡིག་ཆ་ཁོ་བོས་ལོགས་ན་བྱས་ཡོད་དོ། །སྤྱིར་སྦྱང་གཞི་དེ་ཉིད་སྦྱོང་བྱེད་ལྷའི་ངོ་བོ་ཉིད་དུ་དངོས་སུ་འགྱུར་བ་ནི་ཚེ་གཅིག་ལུས་གཅིག་ལ་ཕྱག་ཆེན་མཆོག་གི་དངོས་གྲུབ་ཐོབ་པའི་དབང་དུ་བྱས་པ་ཡིན་པས་སྐྱེས་བུའི་ལུས་དོར་མ་ཐག་
སྦྱང་གཞི་དོར་བ་ལ་སྐྱོན་མེད་དེ།  ཚེ་འདི་ཉིད་ལ་འབྲས་བུ་མ་ཐོབ་ན་ལུས་དོར་བ་ལས་འོས་མེད་པའི་ཕྱིར།  དྲི་བ་དྲུག་པ་བཀའ་རྫོགས་ཆེན་པའི་ལུགས་ཀྱིས་ཆོས་དབྱིངས་མངོན་སུམ་དུ་སྣང་བ་རྣམས་འཐད་དམ་མི་འཐད་ལགས་ཞེས་པའི་ལན་
10-3-44a


ནི་ཆོས་ཉིད་མངོན་སུམ་གྱི་སྣང་བ་འཕགས་པ་ལ་དགོངས་ན་ནི་ཡེ་ཤེས་སུ་བྱེད་དགོས་མཆི༷།  ཚུར་མཐོང་ལ་ཡིན་ན་ནི་ངེད་དེ་འདྲ་ཁས་མི་ལེན་པས་རྫོགས་ཆེན་པ་ཉིད་ལ་སྨྲ་རྒྱུ་ཡོད་ལས་ཆེ།  སྙིང་པོར་དྲིལ་བ་མཐར་ཐུག་ལྟ་
བའི་སྐྱེལ་སོ་འཁྲུལ་མེད་འཁྱེར་བདེ་གཅིག་ཞུ་ལགས་ཅེས་པའི་ལན་ནི།  གསང་བ་འདུས་པའི་ལེའུ་གཉིས་པར་གསུངས་པའི་རྣམ་སྣང་གི་བྱང་ཆུབ་ཀྱི་སེམས་ཐོས་བསམ་གྱིས་གཏན་ལ་ཕབ་ཚུལ་འཕགས་མཆོག་ཀླུ་སྒྲུབ་ཀྱིས།  སངས་
རྒྱས་རྣམས་ཀྱི་བྱང་ཆུབ་སེམས། །བདག་དང་ཕུང་སོགས་རྣམ་རིག་གི།  རྟོག་པ་རྣམས་ཀྱིས་མ་བསྒྲིབས་པ། །རྟག་ཏུ་སྟོང་ཉིད་མཚན་ཉིད་ཅན། །ཞེས་གསུངས་པ་ལྟར་ཕྱི་རོལ་པས་འདོད་པའི་གང་ཟག་གི་བདག་ཉན་ཐོས་སྡེ་གཉིས་
ཀྱིས་འདོད་པའི་གཟུང་འཛིན་རྫས་གཞན་དང་།  སེམས་ཙམ་པས་འདོད་པའི་གཉིས་མེད་ཀྱི་རྣམ་ཤེས་རྣམས་དབུ་མའི་གཞུང་ལས་བཤད་པའི་རིགས་པས་བཙལ་བའི་ཚེ།  བདེན་པར་གྲུབ་པ་ཅུང་ཟད་ཀྱང་མི་རྙེད།  དགག་བྱ་བདེན་པ་མེད་པས་དེ་
བཀག་པའི་བདེན་མེད་ཉིད་ཀྱང་མི་རྙེད།  དེ་མེད་པས་གཉིས་ཀ་དང་གཉིས་ཀ་མ་ཡིན་པ་ཉིད་ཀྱང་མི་རྙེད་པས་མཐའ་བཞིའི་སྤྲོས་པ་གང་དུ་ཡང་འཛིན་རྒྱུ་མེད།  དེ་ལས་གཞན་ཞིག་ཀྱང་འཛིན་རྒྱུ་མེད་པས་འཛིན་མེད་ཀྱི་ངང་ལ་གསལ་བའི་ངར་
དང་མ་བྲལ་བར་འབོལ་ལེ།  ཤིག་གེ།  སིང་ངེ་།  ཧད་དེ་བར་བཞག །བྱིང་རྒོད་བྱུང་ན་སེལ་ཚུལ་མན་ངག་བཞིན་བྱེད་པ་འདི་ནི་ཕ་རོལ་ཏུ་ཕྱིན་པའི་ལུགས་ཀྱི་མཐར་ཐུག་གི་སྐྱེལ་སོ་ཡིན་ཏེ།  མགོན་པོ་འཇམ་པའི་དབྱངས་ཀྱིས་ས་སྐྱ་པ་
10-3-44b


ཆེན་པོ་ལ་གནང་བའི་མན་ངག་ལས།  འཛིན་པ་བྱུང་ན་ལྟ་བ་མིན། །ཞེས་གསུངས་པའི་དོན་ཏོ། །རྡོ་རྗེ་ཐེག་པའི་སྒོམ་ཚུལ་དེ་ཙམ་གྱིས་རིགས་པའི་དཔྱད་པ་མ་བྱུང་ཀྱང་།  ནམ་མཁའ་དང་རང་སེམས་དང་གནས་ལུགས་བསྲེ་བའི་ངང་ལ་
མཉམ་པར་བཞག་པས་ནམ་ཞིག་ན་ཡེ་ཤེས་ཁྱད་པར་ཅན་སྐྱེ་སྟེ།  དབང་གོང་མ་གསུམ་གྱི་ལྟ་བ་སྐྱོང་བ་ཡིན་པའི་ཕྱིར་རོ། །རྩེ་གཅིག་སྒྲུབ་ལ་བརྩོན་པའི་དཔྱོད་ལྡན་གྱིས། །ཚུལ་བཞིན་དྲིས་པའི་དྲིས་ལན་ཟླ་ཟེར་འདིས། །ངེས་དོན་ཀུན་དའི་
ཕྲེང་བ་རྒྱས་གྱུར་ནས། །དོན་གཉེར་ཙ་ཀོར་ཚོགས་རྣམས་རྒྱས་གྱུར་ཅིག    །༄༅།  །ལྡན་མ་ཚེ་རྒྱལ་སྐྱབས་ཀྱི་དྲིས་ལན།  ཐུགས་རྗེས་འགྲོ་ཀུན་རྗེས་འཛིན་པ། །སྤྱན་རས་གཟིགས་མགོན་ལ་བཏུད་ནས། །དད་དང་ལྡན་པས་དྲིས་པའི་དོན། །
མདོར་བསྡུས་ཙམ་ཞིག་བརྗོད་པར་བྱ། །ཕ་རོལ་ཕྱིན་པའི་གཞུང་ལུགས་ཀྱི། །ཡང་དག་ལྟ་བ་བསྒྲུབ་ཚུལ་ནི། །གཞན་གྱི་སྡེ་པས་བརྟགས་པ་ཡི། །ཕུང་པོ་ལས་གཞན་གང་ཟག་དང་། །རང་སྡེས་བརྟགས་པའི་རྡུལ་ཕྲན་དང་། །
ཤེས་པ་སྐད་ཅིག་རྫས་གྲུབ་དང་། །གཉིས་མེད་ཡེ་ཤེས་བདེན་གྲུབ་རྣམས། །དབུ་མའི་གཞུང་ལས་གསུངས་པ་ཡི། །གཅིག་དང་དུ་བྲལ་ལ་སོགས་པའི། །རིགས་པས་དཔྱད་ཚེ་མ་རྙེད་པ། །མཐའ་བཞིའི་དང་པོ་དགག་པ་སྟེ། །སྤྲོས་
བྲལ་ཀུན་གྱི་གཞི་མ་ཡིན། །དགག་བྱ་བདེན་པ་མ་གྲུབ་པས། །དེ་བཀག་སྟོང་ཉིད་ག་ལ་རྙེད། །གཉིས་དང་གཉིས་མིན་མ་རྙེད་པས། །གང་དུའང་མི་འཛིན་ལྟ་བ་ཡིན། །འདི་ལ་ཁ་ཅིག་ཧ་ཤང་གི།  ལྟ་བ་ཡིན་ཅེས་སྨྲ་བ་ནི། །
10-3-45a


དཔྱད་ནས་མཐའ་བཞི་མ་རྙེད་དང་། །རང་དགར་རྟོག་པ་བཀག་ཙམ་ལ། །སྒོམ་གྱི་མཆོག་ཏུ་སྨྲ་བ་གཉིས། །ཁྱད་པར་མ་ཕྱེད་བཞིན་དུ་ཡང་། །ལྟ་བ་སྤྲོས་བྲལ་བསྣུབ་པའི་ཕྱིར། །རང་དགར་སྨྲ་བའི་བདུད་ཚིག་ཡིན། །
དཔྱད་ཚེ་མཐའ་བཞི་མ་རྙེད་ཀྱང་། །ཤེས་པ་གསལ་ཙམ་མ་འགགས་པ། །བྱིང་རྒོད་ལ་སོགས་སྐྱོན་སྤོང་ནས། །རང་དགར་བཞག་པ་བསྒོམ་པ་ཡིན། །རྡོ་རྗེ་ཐེག་པའི་ལྟ་བ་ནི། །རིགས་པས་དཔྱད་ནས་གཏན་ཕབ་ཚེ། །འདི་ལས་ལྷག་པའི་རིགས་
པ་མེད། །དེ་ཕྱིར་ཐོས་བསམ་ལྟ་བ་གཅིག །མན་ངག་སྒོ་ནས་བསྡུ་བའི་ཚེ། །སེམས་དང་སྒྱུ་མ་རང་བཞིན་མེད། །གསུམ་དུ་བསྡུས་ནས་བསྒོམ་པ་ཡང་། །གཉིས་ཀ་ལ་ཡང་ཁྱད་པར་མེད། །སྨིན་བྱེད་དབང་དང་རིམ་གཉིས་དང་། །བྱིན་
རླབས་ཟབ་མོ་འགའ་ཞིག་ལས། །རང་བྱུང་ཡེ་ཤེས་སྐྱེ་ཚུལ་གྱིས། །རྡོ་རྗེ་ཐེག་པ་ཁྱད་པར་འཕགས། །འདི་ལ་བརྗོད་པ་མང་ཡོད་ཀྱང་། །གནས་སྐབས་མིན་པས་རེ་ཞིག་བཞག །འདི་ཙམ་གྱིས་ཀྱང་དད་ལྡན་གྱི། །རེ་བ་མ་ལུས་སྐོངས་གྱུར་
ཅིག །ལྡན་མའི་སྐྱེ་བོ་ཚེ་རྒྱལ་སྐྱབས་ཀྱིས་རྒྱང་རིང་པོ་ནས་བསྐུལ་ནས་མང་དུ་ཐོས་པའི་དགེ་སློང་བསོད་ནམས་སེང་གེས་ཐུབ་བསྟན་རྣམ་པར་རྒྱལ་བའི་དགོན་པར་བྲིས་པའོ།།    །།  འདི་བསྒྲུབ་པ་ལས་བྱུང་བ་ཡི། །དགེ་བ་གང་ཞིག་ཐོབ་གྱུར་
པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །དགེའོ། །དགེའོ། །དགེའོ།།    །།
10-3-45b


empty page
10-4-1a


༄༅།  །རྣལ་འབྱོར་ཆེན་པོའི་སྡོམ་པའི་གནད་བྱེ་བྲག་ཏུ་བཤད་པ་ཟབ་དོན་བདུད་རྩིའི་ཉིང་ཁུ་འཆི་བ་མེད་པའི་གོ་འཕང་སྦྱིན་པ་ཞེས་བྱ་བ་བཞུགས་སོ།།    །།
10-4-1b


༄༅། །བཙུན་བླ་མ་རྒྱལ་བ་ཐམས་ཅད་འདུས་པའི་ངོ་བོ་དེ་ལ་ཕྱག་འཚལ་ལོ། །སྣ་ཚོགས་སྣང་བ་ཟུང་འཇུག་ཡེ་ཤེས་སུ། །དབང་གི་ཆོ་གས་ཐོག་མར་སྡོམ་མཛད་ཅིང་། །རྨད་བྱུང་ལམ་གྱིས་ཡང་
ཡང་གོམས་པ་ལས། །གསང་བ་སྒྲུབ་མཛད་རྗེ་བཙུན་བླ་མ་རྒྱལ། །རང་སེམས་གདོད་ནས་སྤྲོས་བྲལ་རྒྱུ་རྒྱུད་དང་། །དབང་གི་ཡེ་ཤེས་ལམ་གྱི་ལྟ་བ་དང་། །ཉམས་མྱོང་སངས་རྒྱས་ས་དང་ངོ་བོ་གཅིག །  
རྟོགས་པའི་ཁྱད་པར་ཟླ་བའི་དཔེ་ཡིས་བསྟན། །ཚིག་འདི་ཐོས་ན་དྲི་ཟའི་དབྱངས་ལྟར་སྙན། །བསམ་ན་བདུད་རྩི་མྱང་ལྟར་ཡིད་རབ་ཚིམ། །བསྒོམས་ན་ཡིད་བཞིན་ནོར་ལྟར་དགོས་འདོད་འབྱུང་། །དཔེ་གསུམ་ལྡན་
འདི་ཀུན་དང་ཐུན་མོང་མིན། །དེ་ཕྱིར་རྒྱུ་ནི་ལམ་དང་འབྲས་བུར་བཅས། །ལམ་ཡང་རྒྱུ་དང་འབྲས་བུ་དང་བཅས་ཤིང་། །འབྲས་བུ་ཡང་ནི་རྒྱུ་ལམ་དང་བཅས་པས། །ལྷུན་གྲུབ་སྡོམ་པ་སྔགས་ཀྱི་སྡོམ་པ་ཡིན། །
10-4-2a


དེ་ཉིད་རྒྱུ་ལ་ཇི་ལྟར་གནས་པ་དང་། །ལམ་གྱི་ཐོག་མར་གང་ལས་ཐོབ་པ་དང་། །བར་དུ་གང་གིས་མངོན་དུ་བྱེད་པ་དང་། །ཐ་མ་འབྲས་བུའི་ངོ་བོར་འགྱུར་ཚུལ་དང་། །དཔེ་དང་དོན་གྱི་རབ་དུ་དབྱེ་
བ་དང་། །གནས་སོགས་ལྔ་ཡིས་གཏན་ལ་དབབ་པ་དང་། །སྣ་ཚོགས་མཚན་གྱི་རྣམ་གྲངས་བསྟན་པ་དང་། །ཉམས་ལེན་ཐམས་ཅད་དེ་ཉིད་དུ་འདུས་དང་། །སྣང་བ་ཐམས་ཅད་དེ་ཉིད་དུ་སྡོམ་སོགས། །རྣམ་མང་
རྒྱུད་སྡེའི་ཚོགས་ལས་གསུངས་པའི་དོན། །གྲུབ་པའི་དབང་ཕྱུག་རྣམས་ཀྱིས་བཀྲལ་བའི་ཚུལ། །འཁྲུལ་ཟད་བརྒྱུད་པའི་མན་ངག་ལ་བརྟེན་ནས། །བཤད་པར་བྱ་ཡིས་བསྐལ་བཟང་དགའ་བས་ཉོན། །ཇི་ལྟར་
སྣང་བ་རང་གི་སེམས་སུ་སྡོམ། །སེམས་ཉིད་སྤྲོས་བྲལ་རང་བཞིན་ལྷན་སྐྱེས་སུ། །ལེགས་པར་སྡོམ་པ་རྒྱུ་ལ་གནས་པ་ཡི། །སྡོམ་པ་ཡིན་པར་རྩ་བའི་རྒྱུད་ལས་གསུངས། །གཞིར་གནས་དཀྱིལ་འཁོར་བཞི་ལ་དབང་
10-4-2b


བཞི་ཡིས། །སྐུ་བཞིའི་ས་བོན་ཐེབས་ཚེ་བླ་མེད་ཀྱི། །སྡོམ་པ་རྫོགས་པ་རྒྱུད་སྡེ་འོག་མ་ལས། །ཟབ་ཁྱད་ཡིན་པར་དབང་གི་རིམ་པས་ཤེས། །དམ་ཚིག་ཉི་ཤུ་མན་ངག་གནད་དྲུག་སོགས། །རྒྱུ་དང་དབང་དང་ལམ་དང་འབྲས་བུ་རྣམས། །བཞི་བཞིར་ཕྱེ་བ་རྣལ་འབྱོར་
དབང་ཕྱུག་གི།  མན་ངག་མཐའ་དག་འདི་ཡི་སྒྲུབ་བྱེད་ཡིན། །ས་བོན་དེ་ཉིད་ཚོགས་གཉིས་བསགས་པ་ཡི། །སྐལ་ལྡན་རྣམས་ལ་ཡེ་ཤེས་ཉིད་དུ་སྐྱེ། །གཞན་ལ་མངོན་གསལ་ཉིད་དུ་མི་སྐྱེ་ཡང་། །དེ་ཚེ་སྤོང་སེམས་ཐོབ་པ་སྡོམ་པ་ཡིན། །སྤོང་སེམས་བུམ་དབང་ཉིད་དུ་
ཐོབ་སྙམ་ན། །ཐ་མལ་རྣམ་རྟོག་སྤོང་སེམས་དེར་ཐོབ་ཀྱང་། །གྱ་ནོམ་ལྷར་ཞེན་རྣམ་རྟོག་སྤོང་སེམས་ནི། །མཆོག་དབང་གསུམ་དུ་ཐོབ་ཀྱི་གཞན་དུ་མིན། །རྒྱས་གདབ་ལྔ་དང་རྡོ་རྗེའི་བརྟུལ་ཞུགས་དང་། །དམ་ཚིག་གསུམ་གྱི་བརྡ་དོན་འཕྲོད་པའི་ཚེ། །ཆོས་ཅན་ལྔ་པོ་
ཆོས་ཉིད་དང་བཅས་དང་། །སྒོ་གསུམ་ཐ་མལ་རྣམ་རྟོག་སྤོང་སེམས་ཐོབ། །གཞིར་གནས་བྱང་ཆུབ་སེམས་ལ་བླ་མ་ཡི། །བྱང་སེམས་འདྲེས་དང་མས་བརྟན་བཞི་པ་དང་། །དེ་ཉིད་ཚིག་གིས་བརྡ་དོན་འཕྲོད་པའི་ཚེ། །གྱ་ནོམ་ལྷར་ཞེན་རྣམ་རྟོག་སྤོང་སེམས་ཐོབ། །
ཡེ་ཤེས་སྐྱེས་ཚེ་སྤོང་སེམས་གཞན་ཡོད་དང་། །རྩ་བའི་ལྟུང་བར་སྤོང་སེམས་མ་འདུས་དང་། །སྨིན་གྲོལ་སྤང་བྱ་འཆོལ་སོགས་སྐྱོན་རྣམས་ཀྱིས། །མི་སྒྲིབ་རྒྱུ་མཚན་ངག་ལས་ཤེས་པར་བྱ། །དེ་རྗེས་དཀྱིལ་འཁོར་དེའམ་གཞན་དུའང་རུང་། །རྒྱུ་དབང་བཞི་དང་ལུས་དཀྱིལ་
དབང་བཞི་དང་། །བླ་མའི་རྣལ་འབྱོར་བྱིན་བརླབས་རིམ་གཉིས་སོགས། །ཐོབ་པའི་སྡོམ་པ་ཡང་ཡང་གོམས་པའི་ཐབས། །དབང་གི་རབ་དབྱེ་བཅུ་གཉིས་གསུངས་པ་དང་། །ལམ་དུས་དབང་དང་ལམ་ཟབ་བླ་མ་ཡིས། །རིམ་གཉིས་བསྒོམ་པ་མེད་ཀྱང་དངོས་གྲུབ་
10-4-3a


མཆོག །འགྲུབ་པར་གསུངས་པ་འདི་ལ་འཐད་པ་ཡིན། །དབང་ལས་བྱུང་བ་ཐབས་ཀྱིས་གོམས་པ་ཡིས། །བདེ་ཆེན་སྒྲིབ་པ་འགགས་ནས་རང་སྣང་གི།  ཡེ་ཤེས་སྐྱེས་ཚེ་ཤེས་བྱ་མ་ལུས་པ། །གསང་གསུམ་ངོ་བོར་སྡོམ་པ་འབྲས་བུའི་སྡོམ། །
འབྲས་བུའི་རྣམ་པ་ལམ་དུ་བྱེད་དགོས་པས། །ལམ་གྱི་དུས་སུ་ཤེས་བྱ་མ་ལུས་པ། །ལྷ་དང་བདེ་ཆེན་ངོ་བོར་བསྒོམ་པ་ནི། །འབྲས་བུའི་སྡོམ་པ་འདི་ཡི་སྒྲུབ་བྱེད་ཡིན། །དབང་དང་ལམ་ལས་བྱུང་བའི་ཡེ་ཤེས་བཞི། །སོ་སྐྱེའི་དུས་སུ་དཔེ་ཡི་སྡོམ་པ་ཡིན། །མཐོང་
བའི་ལམ་ནས་རྡོ་རྗེ་འཛིན་པའི་བར། །དོན་གྱི་སྡོམ་པ་ཡིན་ཏེ་ཕྱག་ཆེན་བཞིན། །གང་དུ་སྡོམ་དང་སྤང་བྱ་གང་སྡོམ་དང་། །ཇི་སྙེད་སྡོམ་དང་སྡོམ་བའི་ངོ་བོ་དང་། །གང་གིས་སྡོམ་པ་དོན་ཚན་རྣམ་ལྔ་ཡིས། །སྡོམ་གསུམ་མ་ལུས་གཏན་ལ་དབབ་པར་གསུངས། །
སྐལ་ལྡན་གང་གིས་རྣལ་འབྱོར་ཆེན་པོ་ཡི། །སྔགས་ཀྱི་སྡོམ་པ་དབང་གི་ཡེ་ཤེས་དང་། །ལམ་གྱི་ཉམས་མྱོང་ཕྱག་རྒྱ་ཆེན་པོ་དང་། །རང་བྱུང་བདེ་ཆེན་བརྗོད་བྲལ་ལྷན་ཅིག་སྐྱེས། །རང་རིག་མཁའ་མཉམ་རྡུལ་བྲལ་སྟོང་པ་ཉིད། །ཟུང་འཇུག་འགྱུར་མེད་ལྷུན་གྲུབ་
མ་བཅོས་པ། །དབྱེར་མེད་ཤེས་ནས་རྩེ་གཅིག་སྒྲུབ་པ་དེ། །གསང་བ་ཆེན་པོའི་རྣལ་འབྱོར་པ་ཞེས་བྱ། །ཡེ་ཤེས་སྐྱེས་ཚེ་དེ་དག་སྡོམ་པ་ཡི། །མིང་གི་རྣམ་གྲངས་ཡིན་ཀྱང་མ་སྐྱེས་ན། །སྤོང་སེམས་ཙམ་ལ་དེ་དག་མི་འཇུག་པས། །ཁྱབ་མཉམ་ཉིད་དུ་འཁྲུལ་པར་མི་
བྱའོ། །མཉམ་པར་བཞག་དང་མ་བཞག་རྣལ་འབྱོར་བཅུས། །དབང་གི་དུས་ཀྱི་སྐུ་བཞིའི་ས་བོན་ཉིད། །བསྲུང་ཞིང་འཕེལ་བར་བྱེད་ཕྱིར་བཅུ་ཆར་ཡང་། །སྔགས་ཀྱི་སྡོམ་པའི་ཉམས་ལེན་ཉིད་དུ་འདུས། །སྣང་བའི་དངོས་པོ་རིམ་པ་དང་པོར་ནི། །ལྷ་རུ་སྡོམ་ཞིང་དེ་
10-4-3b


ཉིད་གཉིས་པའི་ཚེ། །བདེ་ཆེན་ཡེ་ཤེས་ཉིད་དུ་སྡོམ་པའི་ཕྱིར། །སྣང་བ་ཐམས་ཅད་འདི་རུ་སྡོམ་པར་གསུངས། །རྒྱུད་གསུམ་ཀྱེ་ཡི་རྡོ་རྗེར་སྦྱོར་ཚུལ་དང་། །རྒྱུད་གསུམ་དག་པ་གསུམ་དུ་སྦྱོར་ཚུལ་གྱིས། །རྒྱུད་གསུམ་སྡོམ་པར་སྦྱོར་ཚུལ་རྟོགས་པར་འགྱུར། །འོན་ཀྱང་མཚན་
བཏགས་ཕྱེ་བ་གནད་དུ་གཅེས། །དབང་གི་ཡེ་ཤེས་དེ་ཡིས་སྣང་བ་ལ། །རྒྱས་འདེབས་ཕྱིར་ན་ཕྱག་རྒྱ་ཆེན་པོ་སྟེ། །སྣང་བ་ཐམས་ཅད་ཡེ་ཤེས་དེ་ཉིད་དུ། །འདུས་ཕྱིར་སྡོམ་པར་ཁ་སྦྱོར་རྒྱུད་ལས་གསུངས། །སྤང་བྱ་འབྲས་བུ་རྟེན་དང་བརྟེན་པ་ཡིས། །རིམ་གཉིས་གྲངས་ངེས་
སྒྲུབ་པའི་ལུང་རིགས་ཀྱིས། །ལུགས་མཆོག་འདི་ལ་སྡོམ་པའང་རིམ་གཉིས་ཀྱི། །སྡོམ་པ་གཉིས་སུ་ངེས་པའི་གྲངས་ངེས་འགྲུབ། །རྩ་རྒྱུད་ཁ་སྦྱོར་ཡེ་ཤེས་ཐིག་ལེ་དང་། །ལུགས་འདིར་ཚད་མར་གྱུར་པའི་གཞུང་འགྲེལ་དང་། །སྙིང་པོ་རྩེ་མོ་རྒྱལ་མཚན་བཟང་པོ་ཡི། །
མཐའ་ཅན་བླ་མའི་གསུང་རབ་འདིར་སྦྱར་བྱ། །ཐུག་མེད་སྐྱོན་དང་བསྲུང་བའི་དམ་ཚིག་དང་། །གསོལ་བཏབ་ཚིག་དང་བུམ་དབང་ཆོ་ག་དང་། །ཐོབ་མཚམས་འགའ་ཞིག་ལ་སོགས་སྐྱོན་རྣམས་ཀྱིས། །ལུགས་བཟང་འདི་ལ་གནོད་པར་ག་ལ་འགྱུར། །བདག་གི་བླ་མ་རྫོགས་
པའི་སངས་རྒྱས་ཀྱི། །མཛད་པ་ཇི་བཞིན་བློ་ཡི་རིམ་པ་དང་། །མཚམས་པར་སྟོན་ཕྱིར་སྣོད་མིན་རྣམས་ལ་གསང་། །བླ་མས་གནང་ན་དོན་འདི་གཞན་ལ་སྤེལ། །གཞན་དག་གྲགས་པའི་རྗེས་འབྲང་མང་སྨྲ་ནའང་། །དཔྱོད་ལྡན་ཡིད་ལ་ངེས་པའི་གྲུབ་མཐའ་ནི། །གནོད་བྱེད་ཚད་
མ་གཅིག་གིས་བཟློག་འགྱུར་གྱི། །ལྟར་སྣང་བྱེ་བས་བཟློག་པར་ག་ལ་འགྱུར། །མཁས་པ་སྔ་མའི་ལེགས་བཤད་སུན་ཕྱུང་ནས། །མི་ཤེས་ཤེས་དང་མ་མཐོང་མཐོང་སྨྲ་བའི། །བསམ་པ་མེད་ཀྱང་བློ་གྲོས་ཤར་རིའི་རྩེར། །གནས་ལུགས་ཉི་མ་ཤར་ཚེ་འོད་ཟེར་འབྱུང་། །
10-4-4a


ས་གླང་ས་གར་མདོ་མཁར་གནས་སུ་ནི། །ཟབ་དོན་ཟབ་མོའི་གནད་ཀྱི་བདུད་རྩི་འདི། །རྒྱུད་གསུམ་རྒྱུད་དོན་སྨྲ་བ་དེ་ཡིས་སྦྱར། །དགེ་ཚོགས་དགེ་བའི་སེམས་ཀྱིས་འགྲོ་ལ་སྦྱིན། །བདག་ཀྱང་དེང་ནས་ཚེ་རབས་ཐམས་ཅད་དུ། །ཀུན་དགའི་གསུང་
རབ་བཟང་པོ་རྟག་ཉན་ཅིང་། །དཀོན་མཆོག་བསྟན་པའི་རྒྱལ་མཚན་མཆོད་བྱས་ནས། །རྟག་ཏུ་འགྲོ་ལ་དམ་ཆོས་སྟོན་པར་ཤོག །རྣལ་འབྱོར་ཆེན་པོའི་སྡོམ་པའི་གནད་བྱེ་བྲག་ཏུ་བཤད་པ་ཟབ་དོན་བདུད་རྩིའི་ཉིང་ཁུ་འཆི་བ་མེད་པའི་གོ་འཕང་སྦྱིན་པ་ཞེས་བྱ་བ་འདི་ནི་
རྒྱལ་བ་ཁྱབ་བདག་རྡོ་རྗེ་འཆང་དང་དབྱེར་མ་མཆིས་པ་རྗེ་བཙུན་བླ་མ་ཀུན་དགའ་བཟང་པོ་ཡབ་སྲས་རྣམས་ཀྱི་བཀའ་དྲིན་ལ་བརྟེན་ནས་རྒྱུད་གསུམ་མན་ངག་དང་བཅས་པའི་དོན་ལ་བློ་ཁ་ཅུང་ཟད་ཕྱོགས་པ་ཤཱཀྱའི་དགེ་སློང་བསོད་ནམས་སེང་གེས་ས་མོ་གླང་གི་ལོ་ས་ག་
ཟླ་བའི་ཡར་ཚེས་བཅུ་བཞི་ལ་དབེན་གནས་མདོ་མཁར་ཆོས་རྫོང་དགོན་པར་སྦྱར་བའོ།།    །།དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་རྒྱས་ཡུན་རིང་གནས་གྱུར་ཅིག །དགེའོ། །དགེའོ། །དགེའོ། །
10-4-4b


empty page
10-5-1a


༄༅།  །རྣལ་འབྱོར་ཆེན་པོའི་སྡོམ་པའི་གནད་བྱེ་བྲག་ཏུ་བཤད་པ་ཟབ་དོན་བདུད་རྩིའི་ཉིང་ཁུ་འཆི་བ་མེད་པའི་གོ་འཕང་སྦྱིན་པ་ཞེས་བྱ་བ་བཞུགས་སོ།།    །།
10-5-1b


༄༅། །རྣལ་འབྱོར་ཆེན་པོའི་སྡོམ་པའི་གནད་བྱེ་བྲག་ཏུ་བཤད་པ་ཟབ་དོན་བདུད་རྩིའི་ཉིང་ཁུ་འཆི་བ་མེད་པའི་གོ་འཕང་སྦྱིན་པའི་རྣམ་བཤད་བདུད་རྩི་སྤེལ་བ་ཞེས་བྱ་བ།  བླ་མ་དང་ལྷག་
པའི་ལྷ་མཆོག་མགོན་པོ་འཇམ་པའི་དབྱངས་ལ་གུས་པས་ཕྱག་འཚལ་ལོ། །གྲུབ་པ་མཆོག་གི་རྩེ་མོར་གཤེགས་པའི་ལམ། །མ་ལུས་མདོ་རྒྱུད་ཀུན་གྱི་སྙིང་པོའི་དོན། །སྡོམ་གསུམ་བདུད་རྩིའི་
དགའ་སྟོན་ཟབ་མོ་ཡིས། །དད་ལྡན་ཚིམ་མཛད་རྗེ་བཙུན་བླ་མ་རྒྱལ། །ཟབ་གསལ་དཀྱིལ་འཁོར་མངོན་དུ་མ་གྱུར་ཀྱང་། །བྱིན་རླབས་སྐྱ་རེངས་འོད་ཆགས་མཛེས་པ་ཡིས། །རྨོངས་པའི་སྨག་རུམ་
བསལ་ནས་བློ་གྲོས་ཀྱི། །མཁའ་དབྱིངས་གསལ་མཛད་ལྷ་མཆོག་དེ་ལ་འདུད། །ཡི་དམ་ཀུན་གྱི་སྙིང་པོ་ཀྱེ་རྡོ་རྗེ། །གྲུབ་ཐོབ་ཀུན་གྱི་སྙིང་པོ་བི་རཱུའི་ཞབས། །སྐལ་ལྡན་ཀུན་གྱི་འདྲེན་པ་ས་སྐྱ་པ། །
10-5-2a


བརྒྱུད་པར་བཅས་པས་དོན་འདི་དགེ་ལེགས་མཛོད། །གང་ཞིག་ཐོབ་ན་སྐུ་བཞིའི་ས་བོན་རྙེད། །ཚུལ་བཞིན་བསྲུངས་ན་འབད་མེད་སངས་རྒྱས་ཐོབ། །བརྩོན་པས་བསྒྲུབས་ན་
ཚེ་འདིར་མཆོག་སྟེར་བའི། །རྣལ་འབྱོར་ཆེན་པོའི་སྡོམ་པ་བཤད་ཀྱིས་ཉོན། །འདི་ལ་གཉིས་ཏེ།  སྔོན་འགྲོ་སྤྱིའི་རྣམ་གཞག་དང་།  གཞུང་གི་དོན་ལ་འཇུག་པའོ། །དང་པོ་ལ་བཞི་སྟེ།  སྡོམ་པ་སྤྱིའི་རྣམ་
གཞག །སྐབས་ཀྱི་སྡོམ་གསུམ་ངོས་གཟུང་།  རྣལ་འབྱོར་ཆེན་པོའི་སྡོམ་པ་མཆོག་ཏུ་བསྔགས།  དེ་ཉིད་རྣམ་པར་བཤད་པའི་དགོས་པའོ། །དང་པོ་ལ་བཞི་སྟེ།  སྤང་བྱའི་སྒོ་ནས་སྡོམ་པ་
དུ་མའི་རྣམ་གཞག །སྡོམ་པ་གསུམ་གྱི་རྣམ་གཞག །སྡོམ་པ་གཉིས་ཀྱི་རྣམ་གཞག །སྡོམ་པ་གཅིག་ཏུ་ཐམས་ཅད་འདུས་པའི་ཚུལ་ལོ། །དང་པོ་ནི།  བསྡུ་བར།  མི་དགེ་བ་བཅུ་སྤོང་བའི་ལྡོག་པའི་
10-5-2b


སྒོ་ནས་སྡོམ་པ་བརྒྱའི་རྣམ་གཞག་གསུངས་ཏེ།  མི་དགེ་བ་བཅུ་ཕྱོགས་གཅིག་སྤོང་བ་བཅུ།  ཕལ་ཆེར་སྤོང་བ་བཅུ།  ཀུན་སྤོང་བ་བཅུ།  ཉིན་ཞག་ནས་ལོའི་བར་དུ་ཡུན་ཐུང་ངུར་སྤོང་བ་བཅུ།  ལོ་ཕན་ཆད་ཡུན་རིང་དུ་སྤོང་བ་བཅུ།  ཇི་སྲིད་
འཚོ་བའི་བར་དུ་སྤོང་བ་བཅུ།  རང་ཉིད་སྤོང་བ་བཅུ།  གཞན་སྤོང་དུ་འཇུག་པ་བཅུ།  སྤོང་བའི་བསྔགས་པ་དུ་མ་བརྗོད་པ་བཅུ།  སྤོང་བ་མཐོང་ན་དགའ་ཞིང་ཡི་རང་བ་བཅུའོ། །ཡང་དེ་ཉིད་ལས་སྡོམ་པ་བརྒྱད་ཀྱི་རྣམ་གཞག་གསུངས་ཏེ།  
ཀུན་ནས་སློང་བའི་སྡོམ་པ།  ཡོངས་སུ་འཛིན་པའི་སྡོམ་པ།  ཀུན་ཏུ་བསྲུང་བའི་སྡོམ་པ།  ཕྱིས་ལེན་པའི་སྡོམ་པ།  སྡོམ་པ་ཆུང་ངུ་།  སྡོམ་པ་འབྲིང་།  སྡོམ་པ་ཆེན་པོ།  ཡོངས་སུ་དག་པའི་སྡོམ་པ་རྣམས་ཏེ།  དང་པོ་བཞི་ནི།  
སྡོམ་པ་གཅིག་ཉིད་ཀྱི་རྒྱུན་ལ་ལེན་པའི་ཀུན་སློང་དང་།  ལེན་པ་དང་།  རྒྱུན་ལྡན་དུ་བསྲུང་བ་དང་།  ཉམས་ན་ཕྱིར་བཅོས་པའི་ཆ་ནས་ཕྱེ་བ་ཡིན་ལ།  དེ་ནས་གསུམ་ནི།  ལས་ལམ་དང་།  དུས་དང་།  རང་གཞན་གྱི་ཆ་ནས་ཕྱེ་བ་
ཡིན་ཞིང་།  ཕྱི་མ་ནི།  སྡོམ་པ་སྐྱོན་མེད་པ་བསམ་གཏན་དང་ཟག་མེད་ཀྱི་རྒྱུར་གྱུར་པ་ལ་འཇོག་གོ། །རིགས་པ་འདི་ཉིད་ཀྱིས་དགེ་བསྙེན་གྱི་སྡོམ་པ་ལ་སྤང་བྱའི་སྒོ་ནས་སྡོམ་པ་ལྔ་དང་།  བསྙེན་གནས་ཀྱི་སྡོམ་པ་ལ་བརྒྱད་དང་།  
དགེ་ཚུལ་གྱི་སྡོམ་པ་ལ་བཅུ་དང་། དགེ་སློང་གི་སྡོམ་པ་ལ་ཉིས་བརྒྱ་ལྔ་བཅུ་རྩ་གསུམ་ཞེས་པའང་དོན་གྱིས་འཐོབ་སྟེ། མཛོད་དུ།  སྤང་བྱ་ལྔ་བརྒྱད་བཅུ་དང་ནི། །ཐམས་ཅད་སྤང་བར་ནོས་པ་ལས། །དགེ་བསྙེན་དང་ནི་བསྙེན་གནས་དང་། །དགེ་ཚུལ་ཆེད་དང་དགེ་སློང་ཉིད། །
10-5-3a


ཅེས་གསུངས་པ་ལྟར་རོ། །དེ་དག་རེ་རེ་ལ་ཡང་ཕྱོགས་གཅིག་སྤོང་བ་དང་།  ཕལ་ཆེར་སྤོང་བ་སོགས་སྔ་མ་ལྟར་བཅུར་བསྒྲེས་པས་ལྔ་བཅུ་དང་།  བརྒྱད་ཅུ་དང་།  བརྒྱ་དང་།  ཉིས་སྟོང་ལྔ་བརྒྱ་སུམ་བཅུ་ཞེས་
པའང་འཐོབ་བོ། །འདི་དག་ནི་ཐེག་པ་ཆེན་པོའི་ལུགས་ཡིན་གྱི་ཉན་ཐོས་ཀྱི་ལུགས་ནི་མ་ཡིན་ཏེ།  དེ་དག་གིས་ངེས་པ་ལྔ་དང་མ་བྲལ་ན་སྡོམ་པ་མི་ཐོབ་པར་འདོད་ཅིང་གཞན་སྤོང་དུ་འཇུག་པ་དང་བསྔགས་པ་བརྗོད་པ་སོགས་སྡོམ་པར་མི་འདོད་པའི་
ཕྱིར།  གཉིས་པ་སྡོམ་པ་གསུམ་གྱི་རྣམ་གཞག་ལ།  གསུང་རབ་ལས་བཤད་ཚུལ་བདུན་མཐོང་སྟེ།  དང་པོ་ནི།  མངོན་པ་མཛོད་དུ།  སྡོམ་པ་སོ་སོར་ཐར་ཞེས་བྱ། །དེ་བཞིན་ཟག་མེད་བསམ་གཏན་སྐྱེ། །ཞེས་པ་ལྟར་གསུམ་
སྟེ།  འདི་ནི་ཚུལ་ཁྲིམས་རྣམ་པར་དག་ན་ཏིང་ངེ་འཛིན་སྐྱེ་ཞིང་དེ་ལས་ཟག་པ་མེད་པའི་ཤེས་རབ་སྐྱེ་སྟེ།  སྒྲིབ་པ་མ་ལུས་པ་སྤངས་པས་ན་ཕ་རོལ་ཏུ་ཕྱིན་པའི་ལུགས་ཀྱི་ཉམས་ལེན་མཐའ་དག་བསྡུས་པའི་སྡོམ་པའོ། །འདི་ནི་བསླབ་པ་
གསུམ་གསུངས་པ་དང་ཡང་དོན་གཅིག་ཅིང་འདི་དག་གི་ངོ་བོ་བྱེ་བྲག་ཏུ་སྨྲ་བས་གཟུགས་སུ་འདོད་པ་དང་།  མདོ་སྡེ་པས་ཆོས་ཀྱི་སྐྱེ་མཆེད་པའི་གཟུགས་ཞེས་པའི་མིང་གིས་བཏགས་ཀྱང་དོན་ལ་སེམས་པར་འདོད་པ་སོགས་ཀྱི་སྤྲོས་པ་ནི་གཞན་དུ་
བཤད་ཟིན་ཏོ། །བསམ་གཏན་གྱི་སྡོམ་པ་ནི་ཕྱི་རོལ་པའི་རྒྱུད་ལ་ཡང་ཡོད་པས་བསླབ་པ་གསུམ་གྱི་ནང་དུ་མ་འདུས་པ་ཡང་ཡོད་པའི་དམིགས་བསལ་ཤེས་དགོས་སོ། །གཉིས་པ་ནི།  མཛོད་འགྲེལ་དུ།  ཐ་དད་དེ་དག་འགལ་བ་མེད། །ཅེས་པའི་
10-5-3b


འགྲེལ་པར།  དགེ་བསྙེན།  དགེ་ཚུལ།  དགེ་སློང་གི་སྡོམ་པ་གསུམ་ལ་སྡོམ་པ་གསུམ་ཞེས་པའི་ཐ་སྙད་དངོས་སུ་གསུངས་པ་སྟེ།  སོ་སོར་ཐར་པ་གཏན་ཁྲིམས་བདུན་ལ་སྡོམ་པ་གསུམ་གྱི་རྣམ་གཞག་བྱས་པའོ། །གསུམ་པ་ནི།  རྩ་བའི་
ལུང་སོ་སོར་ཐར་པར།  ལུས་ཀྱི་སྡོམ་པ་ལེགས་པ་སྟེ། །ངག་གི་སྡོམ་པ་ལེགས་པ་ཡིན། །ཡིད་ཀྱི་སྡོམ་པ་ལེགས་པ་སྟེ། །ཐམས་ཅད་དུ་ནི་སྡོམ་པ་ལེགས། །ཞེས་ལུས་ངག་ཡིད་གསུམ་གྱི་སྡོམ་པ་གསུམ་གྱི་ཐ་སྙད་གསུངས་པ་
སྟེ།  འདི་ལ་བྱེ་བྲག་ཏུ་སྨྲ་བས་སྡོམ་པ་ནི་ལུས་ངག་གི་སྤོང་བཞིའམ་སྤོང་བདུན་ཁོ་ན་ཡིན་པས།  ཡིད་ཀྱི་སྡོམ་པ་ནི་དྲན་ཤེས་བཞིན་གཉིས་ལ་སྡོམ་པའི་མིང་གིས་བཏགས་པར་འདོད་ཀྱང་།  སྡོམ་པ་སྤོང་སེམས་སུ་འདོད་པ་དག་གིས་ནི་ལུས་
ངག་གི་སྡོམ་པ་ཡང་སྤོང་བའི་སེམས་པར་འདོད་དོ། །བཞི་པ་ནི།  ཐེག་པ་ཆེན་པོ་མདོ་སྔགས་གཉིས་ཀ་མཐུན་པར་བྱང་ཆུབ་སེམས་དཔའི་བསླབ་པ་ལ་ཉེས་སྤྱོད་སྤོང་བ།  དགེ་བ་ཆོས་སྡུད།  སེམས་ཅན་དོན་བྱེད་ཀྱི་ཚུལ་ཁྲིམས་གསུམ་
གསུངས་པ་སྟེ།  འདི་ལ་ཚུལ་ཁྲིམས་ཀྱི་བསླབ་པ་གསུམ་ཞེས་གསུངས་པའི་ཚུལ་ཁྲིམས་དང་སྡོམ་པ་དོན་གཅིག་ཅིང་།  དཀོན་མཆོག་བརྩེགས་པའི་ལེའུ་དང་པོར་འདི་གསུམ་གྱི་རྣམ་བཞག་རྒྱས་པར་བཤད་ནས་ལེའུ་མཚན་ལ་སྡོམ་གསུམ་བསྟན་
པའི་ལེའུ་ཞེས་པས་ཀྱང་ཤེས་སོ། །སྔགས་ཀྱི་ཉམས་ལེན་ཐམས་ཅད་ཀྱང་འདི་གསུམ་དུ་འདུས་ཏེ།  རིགས་ལྔ་སོ་སོའི་དམ་ཚིག་རིགས་ལྔ་སྤྱིའི་དམ་ཚིག་ཏུ་འདུས་དགོས་པའི་ཕྱིར་དང་།  ཉམས་ལེན་ཐམས་ཅད་ཀྱང་མི་མཐུན་ཕྱོགས་སྤོང་བའི་ཆ་དང་།  
10-5-4a


དགེ་བ་བསྒྲུབ་པའི་ཆ་དང་།  གཞན་དོན་བྱེད་པའི་ཆ་གསུམ་ལས་གཞན་མེད་པའི་ཕྱིར་རོ། །ལྔ་པ་ནི་རྒྱུད་རྡོ་རྗེ་རྩེ་མོར།  སྲོག་གཅོད་རྐུ་དང་འཁྲིག་པ་དང་། །བརྫུན་དང་ཆང་ནི་རྣམ་སྤོང་སྟེ། །ཁྱིམ་པའི་སྡོམ་
ལ་ལེགས་གནས་ནས། །གསང་སྔགས་རྒྱལ་པོ་རབ་ཏུ་བསྒྲུབ། །གལ་ཏེ་དེ་དག་རབ་བྱུང་གྱུར། །སྡོམ་པ་གསུམ་དང་ཡང་དག་ལྡན། །སོ་སོ་ཐར་དང་བྱང་ཆུབ་སེམས། །རིག་འཛིན་རང་གི་ངོ་བོ་འོ། །ཞེས་པ་ལྟར།  སོ་ཐར།  བྱང་སེམས།  གསང་
སྔགས་ཀྱི་སྡོམ་པ་གསུམ་སྟེ།  འདི་ནི་སྔགས་སྡོམ་རྒྱུད་ལ་ལྡན་ན་སྡོམ་གསུམ་རིམ་གྱིས་བླངས་སམ་དབང་བསྐུར་གྱི་ཆོ་ག་ཉིད་ལས་གཅིག་ཆར་དུ་བླངས་པ་ཡང་རུང་སྟེ།  སྡོམ་པ་གསུམ་དང་ངེས་པར་ལྡན་པའི་སྡོམ་གསུམ་གྱི་དབང་དུ་བྱས་པའོ། །དེས་ན་གལ་ཏེ་དེ་དག་རབ་བྱུང་གྱུར་ཞེས་པའི་དོན་ཡང་།  རྟེན་དེ་ཁྱིམ་པའི་སྡོམ་ལ་གནས་པའམ། གལ་ཏེ་རབ་བྱུང་དུ་གྱུར་པ་ཡིན་ཀྱང་རུང་།  གསང་སྔགས་རྒྱལ་པོ་བསྒྲུབ་པའི་ཚེ། །སྡོམ་པ་གསུམ་དང་ལྡན།  ཞེས་པའི་དོན་ཡིན་གྱི་ཁྱིམ་པའི་རྟེན་ལ་སྡོམ་གསུམ་མི་ལྡན་ཡང་དེས་རབ་བྱུང་བྱས་པའི་ཚེ་སྡོམ་
གསུམ་ལྡན་ཞེས་པའི་དོན་ནི་མ་ཡིན་ནོ། །དྲུག་པ་ནི།  རྗེ་བཙུན་རྩེ་མོས་སཾ་བུ་ཊིའི་རྒྱུད་འདིར།  ཇི་ལྟར་དུས་གསུམ་མགོན་པོ་རྣམས། །ཞེས་པའི་སྐབས་ནས་བསྟན་པའི་ཕ་རོལ་ཏུ་ཕྱིན་པའི་སེམས་བསྐྱེད་ཀྱི་སྡོམ་པ་དང་།  ཀུན་ལས་སྣ་ཚོགས་སྡོམ་པ་ཡིས། །
ཞེས་པའི་སྐབས་ནས་བསྟན་པའི་བསྐྱེད་རིམ་གྱི་སྡོམ་པ་དང་།  སྡོམ་པའི་དབྱེ་བའང་བཤད་པར་བྱ་སྟེ།  ཞེས་པའི་སྐབས་ནས་བསྟན་པའི་རྫོགས་རིམ་གྱི་སྡོམ་པ་གསུམ་ཡོད་པར་གསུངས་པ་ལྟ་བུ་སྟེ།  འདི་ནི་རྒྱུད་འདི་ཉིད་ཀྱི་ནང་ནས་གསུངས་
པའི་སྡོམ་པའི་རྣམ་གཞག་བསྡུས་པའོ། །བདུན་པ་ནི།  སམྦུཊིའི་བརྟག་པ་བཅུ་པར་དངོས་སུ།  བུད་མེད་དང་ནི་སྐྱེས་པའི་ལུས། །ལས་ནི་དུ་མས་སྐྱེད་པས་ན། །མི་ཤེས་པས་ཀྱང་མི་བྱ་སྟེ། །སྐུ་ཡི་རྡོ་རྗེའི་དམ་ཚིག་གོ། །སེམས་ཅན་སྣ་ཚོགས་
10-5-4b


གདུང་བ་དང་། །ཀུན་རྟོག་དྲ་བའི་རྣམ་རྟོག་གིས། །སེམས་ལ་སྨད་པར་མི་བྱ་སྟེ། །ཐུགས་ཀྱི་རྡོ་རྗེའི་དམ་ཚིག་གོ། །ཕྲག་དོག་ཉིད་ཀྱིས་མ་རངས་པས། །ཚིག་རྩུབ་ལ་སོགས་སྨྲ་མི་བྱ། །རྣ་བ་བདེ་བར་བྱེད་པ་ཉིད། །གསུང་གི་རྡོ་རྗེའི་དམ་ཚིག་གོ། །ཞེས་
སྐུ་གསུང་ཐུགས་ཀྱི་དམ་ཚིག་གསུམ་གསུངས་པ་ལྟ་བུ་སྟེ།  དམ་ཚིག་དང་སྡོམ་པ་གཉིས་རྣམ་གྲངས་ཀྱི་སྒོ་ནས་ཕྱེ་བ་ཡིན་གྱི་དོན་གཅིག་ཡིན་པར་རྗེ་བཙུན་གྱིས་གསུངས་པའི་ཕྱིར་རོ། །བླ་མ་ཕྱི་མ་དག་ས་སྐྱ་པས་སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་
པ་ཐམས་ཅད་མཐོལ་ལོ་བཤགས་སོ། །ཞེས་པ་ནི་རྙིང་མ་པའི་འདྲེས་ཤོར་བ་ཡིན་ཏེ།  སྐུ་གསུང་ཐུགས་ཀྱི་དམ་ཚིག་ཅེས་པ་ནི་རྙིང་མ་པའི་ལུགས་ཡིན་གྱི་གསར་མའི་གཞུང་ལུགས་གང་ནའང་བཤད་པ་མི་སྣང་ངོ་ཞེས་བྲིས་པ་ནི་འདི་ཙམ་མ་མཐོང་
བཞིན་དུ་གསུང་རབ་ལ་དབང་ཟ་བའོ། །གཉིས་པ་སྡོམ་པ་གཉིས་ཀྱི་རྣམ་གཞག་ལ།  ཉན་ཐོས་ཀྱི་ཐེག་པར་ཡིད་དང་དབང་པོའི་སྡོམ་པ་གཉིས་ཞེས་དང་།  ཐེག་པ་ཆེན་པོ་ཕ་རོལ་ཏུ་ཕྱིན་པ་པ་དག་སྨོན་འཇུག་གི་སེམས་བསྐྱེད་ཀྱི་སྡོམ་པ་གཉིས་
ཞེས་གསུངས་པ་ཡང་ཡོད་མོད་ཀྱི།  སྔགས་ཀྱི་གཞུང་དུ་ནི་འཇོག་ཚུལ་གསུམ་མཐོང་སྟེ།  དང་པོ་ནི།  བདེ་མཆོག་སྡོམ་འབྱུང་གི་རིམ་པར་ཕྱེ་བ་དང་པོར།  རྣམ་པ་ཀུན་གྱི་མཆོག་དང་ལྡན་པའི་སྡོམ་པ་ལ་བསྐྱེད་རིམ་དང་།  རྫོགས་རིམ་གཉིས་
ཡོད་པའི་མཚན་ཉིད་ཅི་ལྟར་ལགས་ཞེས་ཞུས་ནས།  དེའི་འོག་ཏུ་རིམ་པར་ཕྱེ་བ་གཉིས་པས་དེ་གཉིས་རིམ་པ་བཞིན་བཤད་པ་ལྟ་བུའོ། །གསང་བ་འདུས་པའི་རྒྱུད་ཕྱི་མར་ཡང་དེ་དང་མཐུན་པར་གསུངས་ཏེ།  དྲི་བ་སོ་གཉིས་པ་དེ་བཞིན་སྡོམ་པ་ཅི་
10-5-5a


ལྟ་བུ་ཞེས་པའི་ལན་དུ།  སངས་རྒྱས་རྣམས་ཀྱིས་དེར་བསྟན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པའི་རིམ་པ་ཉིད་དང་ནི། །དེ་བཞིན་རྫོགས་པའི་རིམ་ཉིད་དོ། །ཞེས་གསུངས་སོ། །གཉིས་པ་ནི།  
སློབ་དཔོན་སྨན་པའི་ཞབས་ཀྱིས་གསང་བ་འདུས་པའི་སྒྲུབ་ཐབས་དངོས་གྲུབ་འབྱུང་བའི་གཏེར་དུ།  དམ་ཚིག་ལ་ནི་རྣམ་གཉིས་ཏེ། །ཐུན་མོང་སྡོམ་པར་བསྟན་པ་དང་། །ཐུན་མོང་མ་ཡིན་སྡོམ་པའོ། །ཞེས་གསུངས་པ་ལྟར།  ཐུན་མོང་བའི་
སྡོམ་པ་དང་།  ཐུན་མོང་མ་ཡིན་པའི་སྡོམ་པ་གཉིས་ཏེ།  ཐུན་མོང་བའི་སྡོམ་པ་ནི།  གཞུང་དེར།  ངོས་འཛིན་གསལ་པོར་མ་བྱུང་ཡང་ཞལ་ལུང་གི་འགྲེལ་པར་རིག་པའི་དབང་ལྔ་མན་ཆད་དུ་ཐོབ་པའི་སྡོམ་པ་ལ་ཐུན་མོང་བའི་སྡོམ་པ་དང་།  
རྡོ་རྗེ་སློབ་དཔོན་ཕྱིར་མི་ལྡོག་པའི་དབང་གི་སྐབས་སུ་ཐོབ་པའི་སྡོམ་པ་ལ་ཐུན་མོང་མ་ཡིན་པའི་སྡོམ་པར་གསུངས་སོ། །གསུམ་པ་ནི།  རྗེ་བཙུན་གྱིས་ཌཾོ་བྷི་པའི་ལམ་སྐོར་དུ།  ཕྱིའི་སྡོམ་པ་དང་།  ནང་གི་སྡོམ་པ་གཉིས་གསུངས་ཏེ།  འདི་ནི་
སུམ་ལྡན་གྱི་གང་ཟག་གི་རྒྱུད་ཀྱི་སྡོམ་པ་གསུམ་པོ་རེ་རེ་ལ་ཡང་ཕྱི་ནང་གཉིས་གཉིས་སུ་ཕྱེ་བའོ། །གསུམ་པ་སྡོམ་པ་གཅིག་ཏུ་ཐམས་ཅད་འདུས་པའི་ཚུལ་ནི།  ཤེར་ཕྱིན་གྱི་བསླབ་པའམ་སྡོམ་པར་བསླབ་པ་ཐམས་ཅད་འདུས་པ་སྟེ་མདོ་སྡུད་པར། 
ཉི་མ་མཁའ་ལ་འགྲོ་བའི་ཟེར་གྱིས་ཟིལ་གནོན་པའི། །མདུན་གྱི་བར་སྣང་ལ་ནི་མུན་པ་མི་གནས་བཞིན། །ཤེས་རབ་ཕ་རོལ་ཕྱིན་ལ་བསླབ་པར་བྱས་རྣམས་ཀྱི། །ཕ་རོལ་ཕྱིན་པ་ཐམས་ཅད་འདིར་ནི་འདུས་པར་འགྱུར། །ཞེས་གསུངས་པས་སོ། །
10-5-5b


འདིར་སྡོམ་པའི་ཐ་སྙད་མ་གསུངས་སོ་སྙམ་ན་དེ་ཡང་གསུངས་ཏེ།  གང་ལ་སྡོམ་དང་སྡོམ་པ་མ་ཡིན་རློམ་སེམས་མེད། །འདི་ནི་ཚུལ་ཁྲིམས་སྡོམ་པར་རྣམ་པར་འདྲེན་པས་གསུངས། །ཞེས་སོ། །སྔགས་གཞུང་རྣམས་ཀྱི་དགོངས་པའང་འདི་ཉིད་ཡིན་ཏེ། 
རྒྱུའི་ཆོས་ཐམས་ཅད་ཟུང་འཇུག་ཏུ་སྡོམ་པ་དང་།  ལམ་དང་འབྲས་བུའི་ཆོས་ཐམས་ཅད་ཡེ་ཤེས་སུ་སྡོམ་པར་གསུངས་པ་སོགས་ཏེ་རྒྱས་པར་འཆད་པར་འགྱུར་རོ། །གཉིས་པ་སྐབས་ཀྱི་སྡོམ་གསུམ་ངོས་བཟུང་བ་ནི།  སྔགས་ཀྱི་གཞུང་
ལས་བཤད་པའི་སྡོམ་གསུམ་ཕལ་ཆེ་བ་ནི།  རྡོ་རྗེ་རྩེ་མོ་ལས་གསུངས་པ་ལྟར།  སོ་ཐར།  བྱང་སེམས།  སྔགས་སྡོམ་གསུམ་ལ་འཇོག་སྟེ།  དཀྱིལ་ཆོག་ཕལ་ཆེར་དུ།  རང་གི་བསླབ་ལྡན་འཁོར་བཞི་པོ། །ཐེག་ཆེན་བློ་ཅན་རྣམས་
ལ་ནི། །དེ་བཞིན་གཤེགས་པས་གསུངས་པ་ཡི། །ཡང་དག་ཆོ་ག་རྗེས་སུ་གནང་། །ཞེས་པའི་ཚིག་རྐང་དང་པོས་སོ་ཐར།  གཉིས་པས་བྱང་སེམས།  ཕྱི་མ་གཉིས་ཀྱིས་སྔགས་སྡོམ་བསྟན་པའི་ཕྱིར་དང་།  གསོལ་གདབ་ཀྱི་ཚིག་ཏུ། 
དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཞེས་དོན་གྱི་གཙོ་བོ་སྔགས་ཀྱི་དམ་ཚིག་དང་།  དེའི་རྟེན་བྱང་སེམས་ཀྱི་སྡོམ་པ་དང་། 
དེའི་རྟེན་སོ་ཐར་གྱི་སྡོམ་པ་སྩལ་དུ་གསོལ་ཞེས་གསུངས་པའི་ཕྱིར།  དོན་འདི་ཉིད་ཀྱི་དབང་དུ་བྱས་ནས།  རྡོ་རྗེ་རྩེ་མོར་སྡོམ་པ་བསྒྲགས་པའི་སྐབས་སུ།  དང་པོ་རིགས་ལྔ་སོ་སོའི་དམ་ཚིག །དེ་ནས་ཕ་རོལ་ཏུ་ཕྱིན་པའི་སེམས་བསྐྱེད་
10-5-6a


ཀྱི་རྩ་ལྟུང་བཅུ་བཞི།  དེ་ནས་དགེ་བསྙེན་གྱི་བསླབ་བཞི་ལྔ་བསྒྲགས་པས་ན་འདི་ལྟ་བུའི་སྡོམ་པ་གསུམ་ནི་སྔགས་ཀྱི་རྒྱུད་སྡེ་ཁོ་ནའི་ལུགས་ཡིན་ཏེ།  ཕ་རོལ་ཏུ་ཕྱིན་པའི་ཐེག་པར་སྡོམ་པ་འོག་མ་གཉིས་ཙམ་གསུངས་
ཀྱང་སྔགས་སྡོམ་མ་གསུངས་པའི་ཕྱིར་རོ། །དེས་ན་གཙོ་བོ་སྔགས་སྡོམ་འབོགས་པའི་ཚེ།  སྔོན་འགྲོའི་སྐབས་སུ་སོ་ཐར་དང་།  བྱང་སེམས་འབོགས་པ་དང་།  གཙོ་བོ་སྔགས་སྡོམ་ཉམས་སུ་ལེན་པའི་ཚེ་སྔོན་འགྲོའི་སྐབས་སུ་སོ་ཐར་དང་།  བྱང་
སེམས་ཉམས་སུ་ལེན་པ་དང་།  གཙོ་བོ་སྔགས་སྡོམ་བསྲུང་བའི་ཚེ།  དེའི་ཡན་ལག་ཏུ་སོ་ཐར་དང་བྱང་སེམས་བསྲུང་བ་ནི་རྡོ་རྗེ་ཐེག་པའི་ཉམས་ལེན་གྱི་གནད་དུ་ཤེས་པར་བྱ་སྟེ།  དབང་བསྐུར་གྱི་སྟ་གོན་དང་འཇུག་པའི་སྐབས་ཀྱི་རྒྱུན་བཤགས་དང་།  སྒྲུབ་
ཐབས་ཀྱི་སྔོན་འགྲོའི་རྒྱུན་བཤགས་ལ་ཡན་ལག་གི་གྲངས་དུ་ཡོད་ཀྱང་ཐུན་མོང་མ་ཡིན་པའི་སྐྱབས་འགྲོ་དང་།  སྨོན་འཇུག་གི་སེམས་བསྐྱེད་ལེན་པ་མ་ཚང་བ་མི་སྲིད་པའི་ཕྱིར་དང་།  རྩ་ལྟུང་བཅུ་བཞི་པའི་གཞུང་དུ་སྡོམ་པ་འོག་མ་གཉིས་ཀྱི་བཅས་པ་ལ་ཁྱད་གསོད་
དང་བཅས་ཏེ་འདའ་བ་རྩ་ལྟུང་དང་།  ཁྱད་གསོད་མེད་ཀྱང་དགོས་མེད་དུ་འདའ་བ་ཡན་ལག་གི་ལྟུང་བར་བཅས་པའི་ཕྱིར་རོ། །དེང་སང་བོད་འདིར་ཀྱེ་རྡོ་རྗེའི་སྒྲུབ་ཐབས་ཀྱི་སྔོན་འགྲོ་གུར་ནས་གསུངས་པའི་རྒྱུན་བཤགས་བོར་ནས་བཟང་སྤྱོད་ཀྱི་གོ་རིམ་དང་མཐུན་པའི་རྒྱུན་
བཤགས་རང་བཟོ་བྱས་ནས་འཇུག་པ་ནི་གནད་འདི་གཅོད་པའི་བདུད་ཚིག་ཏུ་ཤེས་པར་བྱའོ། །འོ་ན་ཐུན་མོང་མ་ཡིན་པའི་སྐྱབས་འགྲོ་དང་སྨོན་འཇུག་གི་སེམས་བསྐྱེད་ཀྱི་རྗེས་ཟློས་ལན་གསུམ་བྱས་པས་སོ་ཐར་དང་བྱང་སེམས་ཐོབ་ན་རིགས་ལྔའི་སྡོམ་བཟུང་གི་རྗེས་ཟློས་ལན་
10-5-6b


གསུམ་བྱས་པས་ཀྱང་སྔགས་སྡོམ་ཐོབ་པར་མཚུངས་སོ་ཞེ་ན།  དེ་ནི་གནད་མི་འདྲ་སྟེ།  སོ་ཐར་དང་བྱང་སེམས་ལོགས་སུ་ལེན་པའི་ཆོ་གའི་དངོས་གཞི་ལ་ཡང་རྗེས་ཟློས་ལན་གསུམ་བྱེད་པ་ལས་མེད་ཅིང་དེ་ནི་འདི་ལ་ཡང་ཚང་བའི་ཕྱིར་དང་སྔགས་སྡོམ་ལེན་པའི་དངོས་
གཞི་ནི་དབང་གི་ཆོ་ག་ཡིན་པའི་ཕྱིར་རོ། །གསུམ་པ་རྣལ་འབྱོར་ཆེན་པོའི་སྡོམ་པ་མཆོག་ཏུ་བསྔགས་པ་ནི།  དེ་ལྟར་སྡོམ་པ་དུ་མ་ཡོད་པའི་ནང་ནས་སྤྱིར་སྔགས་ཀྱི་སྡོམ་པ་མཆོག་ཡིན་ཏེ།  སྔར་བཤད་པའི་སྡོམ་པའི་རྣམ་གཞག་ཐམས་ཅད་འདིའི་ཡོན་ཏན་གྱི་
ལྡོག་པ་ལ་ཚང་བའི་ཕྱིར་རོ། །དེ་ལ་ཡང་རྒྱུད་སྡེ་བཞི་ལ་དབང་གི་བབས་མི་འདྲ་བ་བཞི་ཡོད་པས་སྡོམ་པའི་རིམ་པ་མི་འདྲ་བ་བཞི་ཡོད་པ་ལས་རྣལ་འབྱོར་ཆེན་པོའི་སྡོམ་པ་མཆོག་ཡིན་སྟེ།  འདིས་མ་ཟིན་པ་རྒྱུད་སྡེ་འོག་མ་གསུམ་གྱི་སྡོམ་པས་རྡོ་རྗེ་འཛིན་པའི་ས་
མི་ཐོབ་པའི་ཕྱིར་དང་།  འདི་ཉིད་ཐོབ་ན་རྒྱུད་སྡེ་འོག་མའི་དབང་བསྐུར་སྔོན་དུ་མ་སོང་ཡང་དེ་དག་གི་སྡོམ་པ་ཐོབ་པར་དབང་གི་དག་པ་ངོ་སྤྲོད་པ་ལས་ཤེས་སོ། །དེས་ན་འདི་ལ་སྤང་བྱ་དང་།  བསྲུང་བྱ་དང་།  ཐོབ་བྱ་ཐམས་ཅད་མཐར་ཐུག་པའི་ཚུལ་འོག་ཏུ་
རྒྱས་པར་འབྱུང་བ་ལས་ཤེས་པར་བྱས་ནས་སྡོམ་པ་ཀུན་གྱི་ནང་ནས་འདི་ཉིད་མཆོག་ཏུ་ཤེས་པར་བྱའོ། །བཞི་པ་དེ་ཉིད་རྣམ་པར་བཤད་པའི་དགོས་པ་ནི།  ཁ་ཅིག་འདི་ལ་རྒྱུད་གསུམ་གྱི་སྡོམ་པ་གསུམ་དུ་ཕྱེ་བ་མཐོང་བས་རྒྱུ་རྒྱུད་ཀྱི་སྡོམ་པའང་སྔགས་
སྡོམ་མཚན་ཉིད་པར་བཟུང་ནས་སེམས་ཅན་ཐམས་ཅད་སྔགས་ཀྱི་སྡོམ་ལྡན་དུ་འདོད་པ་དང་།  ལ་ལ་དག་བསྐྱེད་རྫོགས་ཀྱི་སྡོམ་པའི་དོན་ལྟ་ཅི་སྨོས་མིང་ཙམ་ཡང་བློ་ལ་མི་ཤོང་བ་དང་། འགའ་ཞིག་རྒྱུད་སྡེ་ནས་གསུང་པའི་སྡོམ་པ་རྣམས་སྡོམ་པ་གསུམ་གྱི་
10-5-7a


ནང་ཚན་དུ་གྱུར་པའི་སྔགས་སྡོམ་མ་ཡིན་པར་སྨྲ་བ་རྣམས་བསལ་ནས་ཡང་དག་པའི་དོན་རྒྱུད་སྡེའི་དགོངས་པ་གྲུབ་པའི་དབང་ཕྱུག་རྣམས་ཀྱིས་བཀྲལ་བ་རྗེ་བཙུན་ས་སྐྱ་པའི་གསུང་རབ་ལས་ཇི་ལྟར་འབྱུང་བའི་རྣལ་འབྱོར་ཆེན་པོའི་
སྡོམ་པ་ཕྱིན་ཅི་མ་ལོག་པར་ངེས་པར་བྱ་བའི་ཕྱིར་ཁོ་བོས་བསྟན་བཅོས་འདི་བརྩམས་སོ། །དེ་ལ་ཡང་རྒོལ་བར་འདོད་པ་ཁ་ཅིག་ཕྱོགས་སྔ་མ་རྟོགས་བཞིན་དུ་དགག་པ་བརྗོད་པ་དང་།  ལ་ལ་ལུང་རིགས་ལྟར་སྣང་གི་དགག་པ་བརྗོད་པ་ལ་མཆོག་ཏུ་རློམ་པ་རྣམས་ཀྱི་
བསོད་ནམས་མ་ཡིན་པ་བཟློག་པ་དང་།  འདུན་ཅིང་དོན་དུ་གཉེར་བ་དག་གིས་ཀྱང་བདེ་བླག་ཏུ་རྟོགས་པར་མ་ནུས་པས་དེ་དག་རྗེས་སུ་བཟུང་པར་བྱ་བའི་ཕྱིར་འགྲེལ་པ་འདི་ཡང་བརྩམས་པར་རིགས་སོ། །དེ་ལྟར་སྤྱིའི་རྣམ་གཞག་བསྟན་ཟིན་ནས་ད་ནི་གཉིས་པ་གཞུང་གི་དོན་ལ་
འཇུག་པ་ལ།  ཐོག་མར་དོན་དང་ལྡན་པའི་མཚན་ནི།  རྣལ་འབྱོར་ཆེན་པོའི་སྡོམ་པའི་གནད་བྱེ་བྲག་ཏུ་བཤད་པ་ཟབ་དོན་བདུད་རྩིའི་ཉིང་ཁུ་འཆི་བ་མེད་པའི་གོ་འཕང་སྦྱིན་པ་ཞེས་བྱ་བ་ཞེས་པ་སྟེ།  རྣལ་འབྱོར་ཆེན་པོའི་སྡོམ་པ་ནི་བརྗོད་བྱའི་གཙོ་བོ་ཡིན་ལ།  དེའི་ཁྱད་པར་གྱི་
ཆོས་རྟོགས་པར་དཀའ་ཞིང་རྟོགས་ན་དོན་ཆེ་བས་གནད།  རྟོག་གེའི་བློས་རྟོགས་པར་དཀའ་བས་ན་ཟབ་དོན།  རྒྱུད་སྡེ་ཀུན་གྱི་བཅུད་ཡིན་པས་ན་བདུད་རྩིའི་ཉིང་ཁུ།  འདི་བསྒོམས་པ་ལས་མཐར་མཆོག་གི་དངོས་གྲུབ་འབྱུང་བས་ན།  འཆི་བ་མེད་པའི་གོ་
འཕང་སྦྱིན་པའོ། །བྱེ་བྲག་ཏུ་བཤད་པ་ནི་རྗོད་བྱེད་གཞུང་གི་ཚོགས་ཏེ།  བརྗོད་བྱའི་དོན་དེ་སྟོན་པ་རྗོད་བྱེད་ཀྱི་གཞུང་ལ་ཡང་མཚན་དེ་དག་བཏགས་པ་ནི་གསུང་རབ་སྤྱིའི་ལུགས་སོ། །དེ་ལྟར་མཚན་གྱི་དོན་བསྟན་ནས་བར་ཆད་ཞི་བའི་ཆེད་དུ་མཆོད་པར་
10-5-7b


བརྗོད་པ་ནི་རྗེ་བཙུན་བླ་མ་རྒྱལ་བ་ཐམས་ཅད་འདུས་པའི་ངོ་བོ་དེ་ལ་ཕྱག་འཚལ་ལོ་ཞེས་པ་སྟེ་བར་ཆད་ཐམས་ཅད་སེལ་བ་དང་།  དངོས་གྲུབ་ཐམས་ཅད་སྦྱིན་པ་ནི་གདན་གསུམ་ཚང་བའི་ལྷ་ཚོགས་ཐམས་ཅད་འདུས་པའི་ངོ་བོ་བླ་མ་དམ་པ་ཉིད་ཡིན་པས་དེ་ལ་མཆོད་
པར་བརྗོད་པའོ། །ད་ནི་བསྟན་བཅོས་ཀྱི་དོན་ལ་འཇུག་པ་ལས།  ཐོག་མར་བཤད་པ་ལ་འཇུག་པའི་ཡན་ལག་ནི།  སྣ་ཚོགས་སྣང་བ་ཟུང་འཇུག་ཡེ་ཤེས་སུ། །དབང་གི་ཆོ་གས་ཐོག་མར་སྡོམ་མཛད་ཅིང་། །རྨད་བྱུང་ལམ་གྱིས་ཡང་ཡང་གོམས་
པ་ལས། །གསང་བ་སྒྲུབ་མཛད་རྗེ་བཙུན་བླ་མ་རྒྱལ། །ཞེས་པ་སྟེ།  ཐོག་མ་མེད་པའི་བག་ཆགས་ཀྱི་དབང་གིས་འཁྲུལ་པའི་སྣང་བ་སྣ་ཚོགས་སུ་ཤར་བ་ཐམས་ཅད་གསལ་སྟོང་ཟུང་འཇུག་གམ་ལྷན་ཅིག་སྐྱེས་པའི་ཡེ་ཤེས་སུ་སྡོམ་པ་ནི་རྒྱུ་རྒྱུད་ཀྱི་སྡོམ་པའོ། །
དེ་ལྟར་རང་བཞིན་གྱི་སྡོམ་པ་དེ་ཡང་དབང་གི་ཆོ་གས་རྣལ་འབྱོར་པའི་རྒྱུད་ལ་སྡོམ་པའི་ཐབས་ཐོག་མར་ཐོབ་པར་མཛད་ཅིང་།  དེ་ཉིད་ལས་རིམ་པ་གཉིས་དང་།  ལམ་དུས་ཀྱི་དབང་ལ་སོགས་པས་ཡང་དང་ཡང་དུ་གོམས་པ་ནི་ཐབས་རྒྱུད་ཀྱི་སྡོམ་པའོ། །དེ་ལྟར་ལམ་ལ་
གོམས་པ་ལས་མཐར་སྣང་བའི་དངོས་པོ་ཐམས་ཅད་གསང་བ་གསུམ་གྱི་ངོ་བོར་སྡོམ་པ་ནི་འབྲས་རྒྱུད་ཀྱི་སྡོམ་པ་སྟེ།  དེ་དག་རང་ཉིད་ཉམས་སུ་ལེན་པའི་སྒོ་ནས་སྒྲུབ་པར་མཛད་ཅིང་སློབ་མ་ལ་ཚུལ་བཞིན་དུ་བསྟན་པའི་སྒོ་ནས་སྒྲུབ་པར་མཛད་པ་ནི།  རྗེ་བཙུན་བླ་མ་སངས་
རྒྱས་ཐམས་ཅད་ཀྱི་ངོ་བོ་དེ་ཉིད་ཡིན་པས་དེ་ལ་མཆོད་པར་བརྗོད་པ་ནི་རྡོ་རྗེ་ཐེག་པའི་ལུགས་སོ། །འདི་ནི་བསྟན་བཅོས་ལུས་ཀྱི་བརྗོད་བྱ་དང་མཐུན་པའི་མཆོད་བརྗོད་དེ།  ཤུགས་ལ་སྡོམ་པ་དེ་དག་བརྗོད་བྱར་བྱས་པའི་བསྟན་བཅོས་བརྩམ་ཞེས་དམ་བཅས་
10-5-8a


པའོ། །བརྗོད་བྱ་དེ་དག་ཇི་ལྟར་གཏན་ལ་དབབ་སྙམ་ན།  དེའི་བཤད་པ་ཉིད་ཉེ་བར་དགོད་པ་ལ་ཐོག་མར་བཤད་བྱ་རྡོ་རྗེའི་ཚིག་དགོད་པ་ནི།  རྗེ་བཙུན་འཁྲུལ་པའི་དྲི་མ་ཟད་པའི་ཐུགས་མངའ་བ་གྲགས་པ་རྒྱལ་མཚན་གྱི་ཞལ་སྔ་ནས།  
རང་སེམས་གདོད་ནས་སྤྲོས་བྲལ་རྒྱུ་རྒྱུད་དང་། །དབང་གི་ཡེ་ཤེས་ལམ་གྱི་ལྟ་བ་དང་། །ཉམས་མྱོང་སངས་རྒྱས་ས་དང་ངོ་བོ་གཅིག །རྟོགས་པའི་ཁྱད་པར་ཟླ་བའི་དཔེ་ཡིས་བསྟན། །ཞེས་གསུངས་པ་འདི་ཡིན་ནོ། །ཚིག་དོན་ཅུང་ཟད་བཤད་ན།  རང་
སེམས་ནི་ཐབས་རིག་པ་གསལ་ལ་མ་འགགས་པ་ཡིན་ལ།  གདོད་ནས་སྤྲོས་བྲལ་ནི་ངོ་བོ་སྟོང་པ་ཉིད་དེ།  དེ་གཉིས་ཟུང་དུ་འཇུག་པ་ནི་རྒྱུའི་རྒྱུད་དོ། །དེར་སྣང་བ་ཐམས་ཅད་སྡོམ་པའི་ཆ་ནས་རྒྱུ་རྒྱུད་ཀྱི་སྡོམ་པར་ཡང་འཇོག་སྟེ་འཆད་པར་འགྱུར་རོ། །
དབང་གི་ཡེ་ཤེས་ནི་ཟུང་འཇུག་དེ་ཉིད་དབང་གི་སྐབས་སུ་ཉམས་མྱོང་གི་ངོ་བོར་སྐྱེ་བ་ཡིན་ལ།  ལམ་གྱི་ལྟ་བ་ནི་དབང་གི་ཡེ་ཤེས་ལ་ངོ་སྤྲོད་པའི་ལྟ་བ་འཁོར་འདས་དབྱེར་མེད་དང་། ལམ་བཞི་བསྒོམས་པ་ལས་བྱུང་བའི་ལྟ་བ་ངོ་བོ་ཉིད་གསུམ་
སོགས་བཞིའོ། །ཉམས་མྱོང་ནི་མཚོན་བྱ་དོན་གྱི་ཡེ་ཤེས་ཉམས་སུ་མྱོང་བ་སྟེ།  ས་ཕྱེད་དང་བཅུ་གསུམ་མོ། །འདི་དག་ནི་ཐབས་ཀྱི་རྒྱུད་དེ།  ཐབས་རྒྱུད་ཀྱི་སྡོམ་པར་འཇོག་ཚུལ་ཡང་གནས་སོགས་ལྔས་གཏན་ལ་དབབ་པའི་སྐབས་སུ་གསལ་ལོ། །
སངས་རྒྱས་ས་ནི་ས་བཅུ་གསུམ་པའི་ཕྱེད་དེ།  འབྲས་བུའི་རྒྱུད་དེ།  འབྲས་རྒྱུད་ཀྱི་སྡོམ་པར་འཇོག་ཚུལ་ཡང་འཆད་པར་འགྱུར་རོ། །དེ་ལྟར་རྒྱུད་གསུམ་པོ་ངོ་བོ་དབྱེར་མེད་གཅིག་ཡིན་ཏེ།  རྒྱུའི་རྒྱུད་དེ་ཉིད་དབང་གི་སྐབས་སུ་ཡེ་ཤེས་སུ་སྐྱེ་ཞིང་།  དེ་ཉིད་
10-5-8b


ལམ་གྱི་སྐབས་སུ་ལྟ་བར་ཉམས་སུ་མྱོང་ཞེས་བྱ་བ་ལ་སོགས་པའི་ཚུལ་གྱིས་སོ། །རྟོགས་པའི་ཁྱད་པར་ཟླ་བའི་དཔེས་བསྟན་པ་ནི།  ནམ་མཁའི་ཟླ་བ་བལྟ་བར་འདོད་པ་ལ་ཟླ་བའི་ཁ་དོག་དང་དབྱིབས་ལ་སོགས་པ་བཤད་པའི་སྒོ་ནས་སྤྱིའི་ཚུལ་གྱིས་རྟོགས་པ་
དང་འདྲ་བ་ནི།  ཕ་རོལ་ཏུ་ཕྱིན་པའི་ལུགས་ཀྱི་རྟོགས་ཚུལ་ཡིན་ལ།  འདི་ནི་ཆུ་ནང་གི་ཟླ་བའི་གཟུགས་བརྙན་ལ་མིག་གིས་བལྟ་བ་དང་འདྲ་བར་དབང་དང་རིམ་གཉིས་ལས་བྱུང་བའི་ཡེ་ཤེས་ཀྱིས་དཔེའི་ཚུལ་གྱིས་མངོན་སུམ་དུ་མཐོང་ཞིང་།  ས་དང་པོ་ནས་བཅུ་
གསུམ་པའི་བར་དུ་ཚེས་གཅིག་ནས་བཅོ་ལྔའི་བར་ཟླ་བའི་ཆ་ཤས་དངོས་རིམ་གྱིས་རིམ་གྱིས་འཕེལ་བ་ལྟར་དྲི་བྲལ་གྱི་ཆོས་དབྱིངས་དངོས་ཆ་ཤས་ཇེ་གསལ་ཇེ་གསལ་དུ་མཐོང་བ་སྟེ།  མགོན་པོ་ཀླུ་སྒྲུབ་ཀྱིས།  ཇི་ལྟར་མར་ངོའི་བཅུ་བཞི་ལ། །ཟླ་བ་ཅུང་ཟད་མཐོང་བ་
ལྟར། །དེ་བཞིན་ཐེག་མཆོག་མོས་ལ་ཡང་། །སངས་རྒྱས་སྐུ་ནི་ཅུང་ཞིག་མཐོང་། །ཇི་ལྟར་ཟླ་བ་ཚེས་པ་ལ། །སྐད་ཅིག་སྐད་ཅིག་རྒྱས་པར་མཐོང་། །དེ་བཞིན་ས་ལ་ཞུགས་རྣམས་ཀྱང་། །རིམ་གྱིས་རིམ་གྱིས་འཕེལ་བ་མཐོང་། །ཇི་ལྟར་ཡར་ངོའི་བཅོ་ལྔ་ལ། །
ཟླ་བ་རྫོགས་པར་འགྱུར་བ་ལྟར། །དེ་བཞིན་ས་ཡི་མཐར་ཐུག་ནས། །ཆོས་ཀྱི་སྐུ་ཡང་རྫོགས་ཤིང་གསལ། །ཞེས་གསུངས་སོ། །སྔགས་ཀྱི་མཚོན་བྱེད་དཔེའི་ཡེ་ཤེས་ཀྱིས་ཆུ་ནང་གི་ཟླ་བའི་གཟུགས་བརྙན་ལ་བལྟ་བའི་དཔེ་ནི་རྗེ་བཙུན་གྱིས་གསུང་རབ་
གཞན་དུ་བཤད་ལ།  འདིར་མར་ངོའི་བཅུ་བཞིའི་ཟླ་བ་དཔེར་བྱས་པ་ནི།  ཕ་རོལ་ཏུ་ཕྱིན་པའི་མཐོང་ཚུལ་གྱི་དབང་དུ་བྱས་པའོ། །འོ་ན་དེ་དང་ཚེས་གཅིག་གི་ཟླ་བ་གཉིས་ཟླ་བའི་ཆ་ཤས་དངོས་ཡིན་པ་ལ་ཁྱད་པར་མེད་པས།  མོས་སྤྱོད་དང་ས་དང་པོའི་མཐོང་ཚུལ་
10-5-9a


ལ་ཡང་ཁྱད་པར་མེད་པར་འགྱུར་རོ་སྙམ་ན།  མར་ངོའི་བཅུ་བཞིའི་ཟླ་བ་ནི་སྔར་གྱི་ཚེས་བཅོ་ལྔའི་ཟླ་བ་འགྲིབ་པའི་འཕྲོ་ཡིན་གྱི།  ཡར་འཕེལ་བའི་མགོ་མ་ཡིན་པ་དཔེར་བླངས་ནས་མོས་སྤྱོད་ཀྱི་སྐབས་སུ་ཆོས་སྐུ་མཐོང་ཚུལ་ནི་སངས་
རྒྱས་སྔ་མས་ཆོས་སྐུ་མངོན་དུ་བྱས་པའི་རྒྱུ་མཐུན་གསུང་རབ་ལ་ཐོས་བསམ་བྱས་ནས་རྟོགས་པ་ཡིན་གྱི།  རང་རྒྱུད་ལ་འབྱུང་བར་འགྱུར་བའི་ཆོས་སྐུའི་ཆ་ཤས་མངོན་སུམ་དུ་མཐོང་བ་མ་ཡིན་པ་དང་སྦྱར་བས་སྐྱོན་མེད་དོ། །རྡོ་རྗེའི་ཚིག་དེ་ཉིད་དཔེའི་སྒོ་ནས་བསྔགས་
པར་འདོད་ནས།  ཚིག་འདི་ཐོས་ན་དྲི་ཟའི་དབྱངས་ལྟར་སྙན། །བསམ་ན་བདུད་རྩི་མྱངས་ལྟར་ཡིད་རབ་ཚིམ། །བསྒོམ་ན་ཡིད་བཞིན་ནོར་ལྟར་དགོས་འདོད་འབྱུང་། །དཔེ་གསུམ་ལྡན་འདི་ཀུན་དང་ཐུན་མོང་མིན། །ཞེས་པ་སྨོས་ཏེ་གོ་སླའོ། །རྡོ་རྗེའི་ཚིག་
དེའི་དོན་བསྡུས་ཏེ་བསྟན་པ་ནི།  དེ་ཕྱིར་རྒྱུ་ནི་ལམ་དང་འབྲས་བུར་བཅས། །ལམ་ཡང་རྒྱུ་ལམ་འབྲས་བུ་དང་བཅས་ཤིང་། །འབྲས་བུ་ཡང་ནི་རྒྱུ་ལམ་དང་བཅས་པས། །ལྷུན་གྲུབ་སྡོམ་པ་སྔགས་ཀྱི་སྡོམ་པ་ཡིན། །ཞེས་བྱ་བ་སྟེ།  རྒྱུད་གསུམ་པོ་དབྱེར་
མེད་པ་ཡིན་པ་དེའི་ཕྱིར།  རྒྱུའི་རྒྱུད་ཀྱི་དོན་དམ་པར་ཆོས་ཐམས་ཅད་ཆོས་ཀྱི་དབྱིངས་ཀྱི་ངོ་བོར་དག་པ་དེ་བཞིན་ཉིད་ཀྱི་དག་པ་དང་།  ཀུན་རྫོབ་ཏུ་ཕུང་ཁམས་སྐྱེ་མཆེད་ཐམས་ཅད་ལྷའི་ངོ་བོར་རྣམ་པར་དག་པ་ལྷ་སོ་སོའི་དག་པ་དང་།  སྣང་བ་ཐམས་ཅད་སེམས་
ཡིན་པ་རང་རིག་པའི་དག་པ་གསུམ་པོ་ལ་ལྟ་བ་དང་།  བསྐྱེད་རིམ་དང་།  རྫོགས་རིམ་ལམ་དུས་ཀྱི་དག་པ་གསུམ་དང་།  སྐུ་གསུམ་པོ་འབྲས་དུས་ཀྱི་དག་པ་གསུམ་རང་བཞིན་ལྷུན་གྲུབ་ཀྱི་ཚུལ་གྱིས་ཚང་ལ།  དེ་བཞིན་དུ་ལམ་དུས་ཀྱི་དག་པ་གསུམ་ལ་གཞན་
10-5-9b


གཉིས་པོ་དང་།  འབྲས་དུས་ཀྱི་དག་པ་གསུམ་ལ་ཡང་གཞན་གཉིས་པོ་རང་བཞིན་ལྷུན་གྲུབ་ཀྱི་ཚུལ་གྱིས་ཤེས་པར་བྱའོ། །དེས་མཚོན་ནས་རྒྱུ་དུས་ཀྱི་སྐྱེ་གནས་བཞི་པོ་རེ་རེ་ལ་ཡང་།  ལམ་མངོན་པར་བྱང་ཆུབ་པ་ལྔ་དང་།  འབྲས་བུ་
ཡེ་ཤེས་ལྔ་རང་བཞིན་ལྷུན་གྲུབ་ཀྱི་ཚུལ་དུ་ཚང་བ་དང་།  ལམ་ལ་ཡང་གཞན་གཉིས་དང་།  འབྲས་བུ་ལ་ཡང་གཞན་གཉིས་རང་བཞིན་ལྷུན་གྲུབ་ཀྱི་ཚུལ་དུ་ཚང་བ་སོགས་རྒྱུ་དང་།  ལམ་དང་།  འབྲས་བུའི་ཆོས་ཐམས་ཅད་ལ་ཞིབ་ཏུ་སྦྱར་བར་ཤེས་པར་བྱ་
སྟེ།  ཐམས་ཅད་གསང་བའི་རྒྱུད་དུ།  རྒྱུ་ལ་འབྲས་བུས་རྒྱས་བཏབ་ཅིང་། །འབྲས་བུ་ལ་ཡང་རྒྱུས་རྒྱས་གདབ། །ཅེས་དང་།  ཀྱེ་རྡོ་རྗེའི་རྒྱུད་དུ།  རིགས་དང་འབྱུང་བ་ལྔ་རྣམས་དང་། །ཕུང་པོ་ལྔ་ཡི་རང་བཞིན་གྱིས། །རིགས་དང་བགྲང་
བྱ་འདི་ཡིས་ནི། །རིགས་ཤེས་མངོན་པར་བརྗོད་པར་བྱ། །ཞེས་དང་།  རྗེ་བཙུན་གྱིས།  རང་བཞིན་རྒྱུ་ལ་བསམས་ན་ལྷུན་གྲུབ་སྟེ། །མཐའ་ཡས་ཡོན་ཏན་ཚོགས་ནི་གནས་གྱུར་ཡིན། །དེས་ན་ལྷུན་གྲུབ་གནས་གྱུར་མི་འགལ་ཏེ། །འདི་ནི་འབྲས་
བུའི་འཁོར་འདས་དབྱེར་མེད་ཡིན། །ཞེས་གསུངས་པས་སོ། །དེ་ལྟར་བྱས་ན་གཞི་ལམ་འབྲས་བུའི་ཆོས་ཐམས་ཅད་རྒྱུད་གསུམ་གྱི་ངོ་བོར་སྡོམ་པའམ།  རྒྱུད་གསུམ་པོ་ཉིད་ཀྱང་དབྱེར་མེད་གཅིག་ཏུ་སྡོམ་པ་ནི།  སྤྱིར་མཚན་བཏགས་མ་ཕྱེ་བའམ།  
སངས་རྒྱས་ཀུན་གྱི་སྡོམ་པ་ནི། །ཞེས་པ་ལྟ་བུའི་དངོས་བསྟན་དང་།  ཤུགས་བསྟན་སོ་སོར་མ་ཕྱེ་བའི་སྔགས་ཀྱི་སྡོམ་པ་སྟེ་མཚན་བཏགས་ཕྱེ་བ་ནི་འཆད་པར་འགྱུར་རོ། །ད་ནི་དེ་ཉིད་བྱེ་བྲག་ཏུ་བཤད་པར་འདོད་ནས།  ཐོག་མར་ལུས་རྣམ་པར་གཞག་པའི་
10-5-10a


སྒོ་ནས་མཉན་པར་གདམས་པ་ནི།  དེ་ཉིད་རྒྱུ་ལ་ཇི་ལྟར་གནས་པ་དང་། །ལམ་གྱི་ཐོག་མར་གང་ལས་ཐོབ་པ་དང་། །བར་དུ་གང་གིས་མངོན་དུ་བྱེད་པ་དང་། །ཐ་མར་འབྲས་བུའི་ངོ་བོར་འགྱུར་ཚུལ་དང་། །དཔེ་དང་དོན་གྱི་རབ་
ཏུ་དབྱེ་བ་དང་། །གནས་སོགས་ལྔ་ཡིས་གཏན་ལ་དབབ་པ་དང་། །སྣ་ཚོགས་མཚན་གྱི་རྣམ་གྲངས་བསྟན་པ་དང་། །ཉམས་ལེན་ཐམས་ཅད་དེ་ཉིད་དུ་འདུས་དང་། །སྣང་བ་ཐམས་ཅད་དེ་ཉིད་དུ་སྡོམ་སོགས། །རྣམ་མང་རྒྱུད་སྡེའི་ཚོགས་
ལས་གསུངས་པའི་དོན། །གྲུབ་པའི་དབང་ཕྱུག་རྣམས་ཀྱིས་བཀྲལ་བའི་ཚུལ། །འཁྲུལ་ཟད་བརྒྱུད་པའི་མན་ངག་ལ་བརྟེན་ནས། །བཤད་པར་བྱ་ཡི་སྐལ་བཟང་དགའ་བས་ཉོན། །ཞེས་བྱ་བ་སྨོས་ཏེ།  ཚིག་ལེའུར་བྱས་པ་འདི་དག་ནི་འོག་
ཏུ་རྒྱས་པར་བཤད་པས་རྣམ་པར་བཤད་པར་བསམས་ཏེ།  ཟློས་པའི་ཉེས་པར་འགྱུར་དུ་དོགས་ནས་རྣམ་པར་མ་བཀྲོལ་ལོ། །ད་ནི་ཡན་ལག་རྒྱས་པར་བཤད་པའི་སྒོ་ནས་དོན་རྣམ་པར་ངེས་པར་བྱ་བ་ལ།  ཐོག་མར་རྒྱུ་ལ་གནས་པའི་ཚུལ་ནི། 
ཇི་ལྟར་སྣང་བ་རང་གི་སེམས་སུ་སྡོམ། །སེམས་ཉིད་སྤྲོས་བྲལ་རང་བཞིན་ལྷན་སྐྱེས་སུ། །ལེགས་པར་སྡོམ་པ་རྒྱུ་ལ་གནས་པ་ཡི། །སྡོམ་པ་ཡིན་པར་རྩ་བའི་རྒྱུད་ལས་གསུངས། །ཞེས་པ་སྟེ།  སྣང་བ་ཐམས་ཅད་རང་གི་སེམས་སུ་སྡོམ་སྟེ།  
ཀྱེ་རྡོ་རྗེར།  རང་རིག་རྒྱལ་པོ་རང་གཙོ་བོ། །རང་གིས་འཕྲོག་ཅིང་རང་གིས་བྱེད། །ཅེས་དང་།  རྡོ་རྗེ་གུར་དུ།  རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་གང་ཟག་མེད། །རྣམ་པར་ཤེས་པའི་གནས་དོན་ལས། །ཕྱི་རོལ་
10-5-10b


གྱུར་པ་ཅུང་ཟད་མེད། །ཅེས་གསུངས་སོ། །དེ་ནི་སྣང་བ་སེམས་སུ་འདུས་པའི་ལུང་ཡིན་གྱི།  སྡོམ་པའི་དོན་མ་ཡིན་ནོ་སྙམ་ན།  སྡོམ་པའི་དོན་ལ་མང་པོ་གཅིག་ཏུ་སྡོམ་པ་དང་།  སྤང་བྱ་མི་མཐུན་པའི་ཕྱོགས་སྡོམ་པ་གཉིས་གསུངས་
པ་ལས།  དང་པོ་ནི།  འདུས་པ་དང་།  བསྡུས་པ་ལ་འཇུག་སྟེ།  རྣལ་འབྱོར་མ་ལུས་དབུས་གནས་པ། །ཞེས་པའི་འགྲེལ་པར།  གྲུབ་ཆེན་མཚོ་སྐྱེས་ཀྱིས།  ཡང་ན་ཕྱི་དང་ནང་གི་ཆོས་ཐམས་ཅད་རྣམ་པ་མང་བས་དེའི་ཕྱིར་སྡུད་པར་
བྱེད་པས་སྡོམ་པའོ། །ཞེས་གསུངས་པས་སོ། །སེམས་ཉིད་རང་བཞིན་ལྷན་སྐྱེས་སྤྲོས་བྲལ་གྱི་ངོ་བོར་སྡོམ་སྟེ།  ཀྱེ་རྡོ་རྗེ་རྩ་བའི་རྒྱུད་དུ།  ལྷན་ཅིག་སྐྱེས་པ་གང་སྐྱེས་པ། །ལྷན་ཅིག་སྐྱེས་པར་དེ་བརྗོད་བྱ། །རང་བཞིན་ལྷན་ཅིག་སྐྱེས་
ཞེས་བརྗོད། །རྣམ་པ་ཐམས་ཅད་སྡོམ་པ་གཅིག །ཅེས་གསུངས་སོ། །དེ་ཉིད་རྒྱུ་ལ་གནས་པའི་སྡོམ་པ་ཡིན་པར་གང་ལས་ཤེས་སྙམ་ན།  ཚིགས་སུ་བཅད་པ་འདི་རྗེ་བཙུན་གྱིས་རྒྱུ་ལྷན་ཅིག་སྐྱེས་པའི་ཆོས་གསུམ་གྱི་ཤེས་བྱེད་དུ་དྲངས་
པ་ལས་ཤེས་སོ། །རྒྱུ་ལ་གནས་པ་དེ་ཉིད་ལམ་གྱི་ཐོག་མར་གང་ལས་ཐོབ་ན།  སྨིན་བྱེད་ཀྱི་དབང་ལས་ཐོབ་པ་ཡིན་ནོ། །དེ་ལ་དབང་ལས་ཐོབ་པའི་མཚམས་ནི།  གཞིར་གནས་དཀྱིལ་འཁོར་བཞི་ལ་དབང་བཞི་ཡིས། །སྐུ་བཞིའི་ས་བོན་ཐེབས་
ཚེ་བླ་མེད་ཀྱི། །སྡོམ་པ་རྗོགས་པ་རྒྱུད་སྡེ་འོག་མ་ལས། །ཟབ་ཁྱད་ཡིན་པར་དབང་གི་རིམ་པས་ཤེས། །ཞེས་པ་སྟེ།  ཡེ་ཤེས་ཐིག་ལེའི་རྒྱུད་ལས།  རྒྱུད་སྡེ་བཞི་ལ་དབང་གི་དངོས་གཞིའི་བབས་མི་འདྲ་བ་བཞི་གསུངས་ཏེ།  
10-5-11a


བྱ་རྒྱུད་ལ་ཆུ་དང་ཅོད་པན་གྱི་དབང་།  སྤྱོད་རྒྱུད་ལ་དེའི་སྟེང་དུ་རྡོ་རྗེ་དྲིལ་བུ།  མིང་གི་དབང་དང་ལྔ།  རྣལ་འབྱོར་གྱི་རྒྱུད་ལ་དེའི་སྟེང་དུ་ཕྱིར་མི་ལྡོག་པ་འཁོར་ལོའི་དབང་དང་དྲུག །རྣལ་འབྱོར་བླ་མེད་
ལ་དེའི་སྟེང་དུ་དབང་གོང་མ་གསུམ་སྟེ།  དབང་བཞི་ཡོངས་སུ་རྫོགས་པ་ཡོད་པར་གསུངས་སོ། །དེས་ན་རྒྱུད་སྡེ་བཞི་པོ་རང་རང་གི་སྔགས་ཀྱི་སྡོམ་པ་ཡང་རང་རང་གི་དབང་གི་དངོས་གཞི་རྫོགས་པའི་ཚེ་རྫོགས་པར་འཐོབ་སྟེ།  དབང་
གི་དངོས་གཞི་ནི་སྔགས་སྡོམ་འབོགས་པའི་ཐབས་ཡིན་པའི་ཕྱིར་རོ། །བྱ་སྤྱོད་གཉིས་ལ་རྡོ་རྗེ་སློབ་མའི་དབང་དང་།  སློབ་དཔོན་གྱི་དབང་གཉིས་སུ་ཕྱེ་བ་མི་སྣང་ཡང་རང་རང་གི་དབང་གི་དངོས་གཞི་དེ་ཉིད་རྡོ་རྗེ་སློབ་དཔོན་གྱི་དབང་དུ་བཞེད་
དེ།  གསང་བ་སྤྱི་རྒྱུད་ལས།  དབང་བསྐུར་བ་ནི་རྣམ་པ་བཞི། །སློབ་དཔོན་རྣམ་པར་མཁས་པ་ཡིས། །དེ་དག་ཤེས་ནས་ཅི་རིགས་སྤྱད། །སློབ་དཔོན་གོ་འཕང་རབ་བསྒྲུབ་ཕྱིར། །དང་པོ་ཡོངས་སུ་བསྒྲགས་པ་ཡིན། །རིག་སྔགས་
རྣམས་ནི་བསྒྲུབ་པའི་ཕྱིར། །གཉིས་པ་ལེགས་པར་བཤད་པ་ཡིན། །བགེགས་རྣམས་འཇོམས་པར་བྱ་བའི་ཕྱིར། །གསུམ་པ་ཡོངས་སུ་བསྒྲགས་པ་ཡིན། །བཞི་པ་འབྱོར་པ་ཐོབ་བྱའི་ཕྱིར། །ཆོ་ག་རྒྱས་པ་དེ་བཤད་དོ། །ཞེས་
གསུངས་པའི་དབང་དང་པོ་ནི།  ཆུ་དང་ཅོད་པན་གྱི་དབང་དང་།  གཉིས་པ་ནི་སྔགས་ཀྱི་བཟླས་ལུང་དང་།  གསུམ་པ་ནི་བྱ་བ་ཁྲུས་བསྲུང་གསུམ་དང་།  བཞི་པ་ནི་བཀྲ་ཤིས་རྫས་བརྒྱད་སྟེར་བ་ལ་རྗེ་བླ་མས་བཤད་ཅིང་།  དེའི་རིགས་པས་
10-5-11b


སྤྱོད་རྒྱུད་ལ་ཆུ་ནས་མིང་གི་དབང་གི་བར་ལྔ་རྡོ་རྗེ་སློབ་དཔོན་གྱི་དབང་ཡིན་པར་གྲུབ་པའི་ཕྱིར་དང་།  བྱ་སྤྱོད་གཉིས་པོ་རང་རང་གི་དབང་བསྐུར་ཐོབ་ནས་རྒྱུད་སྡེ་གོང་མའི་དབང་བསྐུར་མ་ཐོབ་ཀྱང་རང་རང་གི་དབང་བསྐུར་བ་དང་།  རྒྱུད་འཆད་པ་
སོགས་རྡོ་རྗེ་སློབ་དཔོན་གྱི་ཕྲིན་ལས་ལ་ངེས་པར་དབང་ཞིང་དེ་ལ་རྡོ་རྗེ་སློབ་དཔོན་གྱི་དབང་ཐོབ་པ་དགོས་པའི་ཕྱིར་རོ། །རྣལ་འབྱོར་དང་རྣལ་འབྱོར་ཆེན་པོ་གཉིས་ལ་རིག་པའི་དབང་ལྔ་ལ་རྡོ་རྗེ་སློབ་མའི་དབང་དུ་བྱེད་པ་ནི་འདྲ་ཞིང་།  རྣལ་འབྱོར་གྱི་
རྒྱུད་ལ་དམ་ཚིག་གསུམ་སྦྱིན་ནས་ཆུ་དབང་རྒྱས་པར་བསྐུར་བ་ལ་སློབ་དཔོན་གྱི་དབང་དུ་འཇོག་ལ།  རྣལ་འབྱོར་ཆེན་པོ་ལ་ནི་དེ་ཉིད་བུམ་དབང་དུ་བྱས་ནས་དབང་གོང་མ་གསུམ་དང་བཅས་པ་ལ་རྡོ་རྗེ་སློབ་དཔོན་གྱི་དབང་དུ་འཇོག་སྟེ།  རྡོ་རྗེ་གུར་
ལས།  བརྒྱད་པ་བུམ་པའི་དབང་བསྐུར་ཡིན། །དགུ་པ་གསང་བའི་དབང་བསྐུར་ཡིན། །ཞེས་རྣལ་འབྱོར་རྒྱུད་དང་ཐ་སྙད་ཐུན་མོང་བའི་རྡོ་རྗེ་སློབ་དཔོན་གྱི་དབང་ལ་བུམ་པའི་དབང་ཞེས་པའི་ཐ་སྙད་མཛད་པས།  དེ་ཡན་ཆད་ཀྱིས་དབང་
བཞི་ཆར་རྡོ་རྗེ་སློབ་དཔོན་གྱི་དབང་དུ་གསལ་བར་བཞེད་པའི་ཕྱིར་འདི་ལ་དགོངས་ནས།  མངོན་རྟོགས་ལྗོན་ཤིང་ལས་དབང་གི་དངོས་གཞི་ལ་ཐུན་མོང་གི་དང་།  ཐུན་མོང་མ་ཡིན་པའི་དབང་གཉིས་སུ་ཕྱེ་ནས་ཕྱི་མ་ལ་བུམ་དབང་སོགས་བཞིར་ཕྱེ་
བ་ཡང་།  རྡོ་རྗེ་སློབ་མ་དང་ཐུན་མོང་དང་།  རྡོ་རྗེ་སློབ་དཔོན་གྱི་ཐུན་མོང་མ་ཡིན་པ་ཞེས་པའི་དོན་དུ་མཛད་པར་ཤེས་པར་བྱའོ། །གཞན་དུ་བུམ་དབང་གིས་རྡོ་རྗེ་སློབ་དཔོན་གྱི་དབང་རྫོགས་ན།  ལྗོན་ཤིང་ལས་རྡོ་རྗེ་སློབ་དཔོན་གྱི་དབང་ཐོབ་པས་
10-5-12a


མངོན་པར་རྟོགས་པ་བཅུ་གཅིག་པོ་ཐམས་ཅད་ཉམས་སུ་ལེན་དུ་རུང་བར་གསུངས་པ་ཇི་ལྟར་དྲང་སྟེ།  བུམ་དབང་ཙམ་ཐོབ་པས་དེ་དག་ཉམས་སུ་ལེན་དུ་མི་རུང་བའི་ཕྱིར་རོ། །ཀྱེ་རྡོར་རྩ་རྒྱུད་དང་།  ཕྱག་ཆེན་ཐིག་ལེ་
དང་།  དྲིལ་བུ་དཀྱིལ་ཆོག་རྣམས་ལས།  བུམ་དབང་ལ་རྡོ་རྗེ་སློབ་དཔོན་གྱི་དབང་དུ་གསུངས་པ་ནི་ཡོ་ག་དང་སྒོ་བསྟུན་པའི་དབང་དུ་བྱས་པའོ། །དེས་ན་རྒྱུད་སྡེ་བཞི་པོ་རང་རང་གི་རྡོ་རྗེ་སློབ་དཔོན་གྱི་དབང་མ་རྫོགས་པར་སྐབས་དེའི་སྡོམ་
པ་མི་རྫོགས་ཤིང་།  དེ་རྫོགས་པ་ན་སྐབས་དེའི་སྡོམ་པ་རྫོགས་པས་བླ་མེད་ཀྱི་སྔགས་སྡོམ་རྫོགས་པར་ཐོབ་པ་ཡང་དབང་བཞི་རྫོགས་པར་ཐོབ་པ་ལ་ལྟོས་པར་ཤེས་པར་བྱ་སྟེ།  ལུས་རྩ་དང་།  རྩ་ཡི་གེ་དང་།  ཁམས་བདུད་རྩི་དང་།  སྙིང་པོ་ཡེ་
ཤེས་རླུང་བཞི་ལ་སྐུ་བཞི་རང་བཞིན་ལྷུན་གྲུབ་ཀྱི་ཚུལ་གྱིས་གནས་པ་དེ་ལ་དབང་བཞིའི་ཆོ་གས་སྐུ་བཞིའི་ས་བོན་ནུས་ལྡན་ཐེབ་པའི་ཚེ་བླ་མེད་ཀྱི་སྔགས་སྡོམ་རྫོགས་པར་ཐོབ་པའི་ཕྱིར་རོ། །འདི་རྒྱུད་སྡེ་འོག་མ་ལས་ཟབ་ཁྱད་ཡིན་པར་
སྔར་གྱི་དབང་གི་རིམ་པ་ལས་ཤེས་ཏེ།  གཞན་དུ་རྣལ་འབྱོར་དང་རྣལ་འབྱོར་ཆེན་པོ་གཉིས་ཀྱི་སྡོམ་པའི་ཐོབ་མཚམས་ལ་ཁྱད་པར་མེད་ན།  དབང་གི་དངོས་གཞིའི་རིམ་པ་ལ་ཡང་ཁྱད་པར་མེད་པར་འགྱུར་བའི་ཕྱིར་རོ། །གཞན་ཡང་ལུགས་
གཞན་དག་སྟ་གོན་ནམ་འཇུག་པའི་སྐབས་སུ་རིགས་ལྔའི་སྡོམ་གཟུང་གི་རྗེས་ཟློས་ལན་གསུམ་བྱས་པས་སྔགས་སྡོམ་རྫོགས་པར་ཐོབ་པ་ཅིས་འགོག །དབང་གི་དངོས་གཞིའི་ཆོ་ག་དགོས་པ་མེད་པར་འགྱུར་ཏེ།  དེའི་གོང་དུ་སྔགས་སྡོམ་
10-5-12b


རྫོགས་པར་ཐོབ་པའི་ཕྱིར་ཞེ་ན།  དེ་ལྟར་སོང་མོད།  ལོག་ན་འདི་ལ་མཚུངས་སོ། །ཅི་ལྟར་ཞེ་ན་དབང་གོང་མ་གསུམ་གྱི་ཆོ་ག་དགོས་པ་མེད་པར་འགྱུར་ཏེ།  དེའི་གོང་དུ་བླ་མེད་ཀྱི་སྔགས་སྡོམ་རྫོགས་པར་ཐོབ་པའི་ཕྱིར་རོ། །སྐྱོན་འདི་སྤོང་
བར་བཞེད་ནས་བླ་མ་མཁས་པ་དག་ཀྱང་དབང་གོང་མ་གསུམ་ནི་རྫོགས་རིམ་གྱི་སྣོད་རུང་དུ་བྱ་བའི་ཕྱིར་དུ་བྱིན་གྱིས་བརླབ་པ་ཙམ་ཡིན་གྱི།  ཆོ་ག་མེད་ཅེས་གསུངས་པར་གྲགས་ན་ཡང་བྱིན་རླབས་ཡིན་པ་ཉིད་ཀྱིས་ཆོ་ག་མེད་པར་མི་འགྲུབ་སྟེ།  བྱིན་རླབས་
ཉིད་ལ་བྱིན་རླབས་ཀྱི་ཆོ་ག་ཡོད་པའི་ཕྱིར་རོ། །དབང་གོང་མ་བྱིན་རླབས་ཙམ་ཡང་མ་ཡིན་ཏེ།  ཞུས་ལན་གསལ་བར།  དེ་ཡིས་གནང་ནས་དཀྱིལ་འཁོར་ཆེན་པོ་རུ། །ཞུགས་ལ་དབང་བཞི་པོ་རྣམས་རྫོགས་པར་བླང་། །བྱིན་རླབས་
ཕྲ་མོ་ཙམ་གྱིས་མ་ཡིན་ཏེ། །སྔགས་ཀྱི་རྩ་བ་དབང་བསྐུར་ཡིན་ཕྱིར་རོ། །ཞེས་གསུངས་པ་འདི་ལ་བྱིན་རླབས་ཕྲ་མོ་བླང་དགོས་པའི་སྒྲུབ་བྱེད་དུ་བྱིན་རླབས་ཕྲ་མོ་ཙམ་གྱིས་མ་ཡིན་ཏེ།  ཞེས་བཀོད་པར་ཐལ་བའི་ཕྱིར་རོ། །དེས་ན་འཇུག་པ་དང་
བུམ་དབང་གི་སྐབས་སུ་དབང་རྫས་དེ་དག་གཏོད་པ་ཙམ་ལ་ཆོ་ག་མེད་ཀྱང་དག་བྱ་དག་བྱེད་ངོ་འཕྲོད་པའི་ཏིང་ངེ་འཛིན་གྱི་བསྐྱེད་ཆོག་རྣམ་པར་དག་པ་བྱས་ནས་སྦྱོར་དངོས་རྗེས་གསུམ་གྱི་ཆོ་ག་ཚང་བའི་སྐབས་སུ་གཏོད་པ་ལ་ཆོ་ག་ཡོད་པ་བཞིན་དུ།  དབང་
གོང་མ་གསུམ་ལ་ཡང་སྦྱོར་བ་མཎྜལ་ཕུལ་ནས་གསོལ་བ་གདབ་པ་དང་།  དངོས་གཞིར་བླ་མས་དབང་རྫས་བསྒྲུབས་ནས་ལྕེ་ལ་བཞག་པ་དང་། སློབ་མ་ལ་ཕྱག་རྒྱ་གཏད་ནས་སྦྱོར་དངོས་རྗེས་གསུམ་གྱིས་སྙོམས་པར་འཇུག་པའི་ཚུལ་དང་།  དེའི་ཡེ་
10-5-13a


ཤེས་ལ་ཚིག་གིས་ངོ་སྤྲོད་པ་རྣམས་དང་།  རྗེས་དབང་གི་དག་པ་ངོ་སྤྲོད་པ་ཡོད་པས་ཆོ་ག་ཡོད་པར་ཤེས་པར་བྱའོ། །གཞན་དུ་ན་སཾ་པུ་ཊིར།  དབང་བཞི་པ་ཚིག་ཙམ་གྱིས་བསྐུར་བའི་སྐབས་སུ་དབང་ཆོག་འདིས་
སྦྱིན་པར་བྱ་ཞིང་ཞེས་དང་།  རྗེ་བཙུན་གྱིས་གླེགས་བཾ་དཀར་ཆག་ཏུ་དབང་བཞིའི་ཆོ་ག་མདོར་བསྡུས་པའི་མན་ངག་གི་གནད་ཅེས་དང་།  གནས་སྐབས་གཞན་དུ་ཡང་དབང་བཞིའི་ཆོ་ག་ཞེས་ཡང་ཡང་གསུངས་པ་རྣམས་ཅི་ལྟར་འཆད།  གཞན་
ཡང་དབང་གོང་མ་ལ་ཆོ་ག་མེད་ན་སྨིན་བྱེད་མ་ཡིན་པར་འགྱུར་རོ། །དེ་ཡང་འདོད་དོ་ཞེ་ན།  དབང་གོང་མ་ལ་ཕྱི་ནང་གི་རྟེན་འབྲེལ་འགྲིགས་པར་མི་འགྱུར་ཞིང་།  སྐུ་ཕྱི་མ་གསུམ་གྱི་ས་བོན་ཐེབས་པར་མི་འགྱུར་ཏེ།  བྱིན་རླབས་ཙམ་ཡིན་གྱི་སྨིན་པར་
བྱེད་པ་མ་ཡིན་པའི་ཕྱིར་རོ། །ཁྱབ་སྟེ།  ཚད་ལྡན་གྱི་གཞུང་ལས།  རྡོ་རྗེ་ཕག་མོའི་བྱིན་རླབས་ལ། །ཕྱི་ནང་རྟེན་འབྲེལ་འགྲིག་མི་འགྱུར། །སྐུ་བཞིའི་ས་བོན་ཐེབས་མི་ནུས། །དེ་ཕྱིར་འདི་ནི་བྱིན་རླབས་ཙམ། །ཡིན་གྱིས་སྨིན་པར་བྱེད་
པ་མིན། །ཅེས་གསུངས་པས་སོ། །དེ་ཡང་འདོད་དོ་ཞེ་ན།  བུམ་དབང་གིས་སྤྲུལ་སྐུའི་ས་བོན་མི་ཐེབས་པར་འགྱུར་ཏེ།  དབང་གོང་མ་གསུམ་གྱིས་སྐུ་ཕྱི་མ་གསུམ་གྱི་ས་བོན་མི་ཐེབས་པའི་ཕྱིར་རོ། །མ་ཁྱབ་ན།  དབང་བཞིའི་དག་པའི་
སྐབས་སུ་སྤྲུལ་སྐུའི་ས་བོན་དང་བག་ཆགས་རྒྱུད་ལ་གཞག་ཅེས་སོགས་བཞི་གསུངས་པ་ཅི་ལྟར་འཆད།  གཞན་ཡང་དབང་གོང་མ་གསུམ་སྨིན་བྱེད་མ་ཡིན་ན།  རྫོགས་རིམ་གྲོལ་བྱེད་མ་ཡིན་པར་འགྱུར་ཏེ།  དབང་གིས་མ་སྨིན་པ་ལམ་གྱིས་
10-5-13b


གྲོལ་བར་མི་འཐད་པའི་ཕྱིར་རོ། །གལ་ཏེ་བུམ་དབང་གིས་སྨིན་པས་གྲོལ་ལོ་སྙམ་ན།  འོ་ན་སྨིན་གྲོལ་གྱི་རྣམ་གཞག་ཐམས་ཅད་འཆུག་པར་འགྱུར་རོ། །དེས་ན་རྗེ་བཙུན་རྩེ་མོས་དབང་བཞིས་སྨིན་མཛད་ལམ་བཞིས་གྲོལ་བ་སྟོན། །ཅེས་
གསུངས་པ་འདི་གཅམ་བུའི་ངོ་བོ་མ་ཡིན་པར་དོན་ལ་གནས་པའི་བསྟོད་པ་དང་།  རྗེ་བཙུན་གྱི་དབང་གི་རབ་དབྱེར།  དབང་བཞི་རྒྱས་བསྡུས་དུས་སྐབས་ཀྱིས། །དབྱེ་བ་བླ་མའི་གསུང་བཞིན་བྲི། །སྔར་མ་སྨིན་པ་གཅིག་སྦྱོར་དངོས་འཇུག་གིས་
གཞན་ལ་ལེན་པ་རྒྱུ་དུས་ཀྱི་དབང་དང་།  ཞེས་གསུངས་པའང་སྔར་གྱི་དབང་བཞི་ལ་སྦྱར་དགོས་པར་ཤེས་པར་བྱས་ནས།  འདི་དང་མི་འགལ་བའི་སྡོམ་པའི་ཐོབ་མཚམས་བློ་ལ་གཞག་པར་བྱའོ། །ཐོབ་མཚམས་དེ་ལ་སྒྲུབ་བྱེད་འགོད་
པར་འདོད་ནས།  དམ་ཚིག་ཉི་ཤུ་མན་ངག་གནད་དྲུག་སོགས། །རྒྱུ་དང་དབང་དང་ལམ་དང་འབྲས་བུ་རྣམས། །བཞི་བཞིར་ཕྱེ་བ་རྣལ་འབྱོར་དབང་ཕྱུག་གི།  མན་ངག་མཐའ་དག་འདི་ཡི་སྒྲུབ་བྱེད་ཡིན། །ཞེས་བྱ་བ་སྨོས་ཏེ།  མན་
ངག་གི་སྐབས་སུ་དབང་བཞི་པོ་རེ་རེ་ལ་མཉམ་གཞག་གི་དམ་ཚིག །རྗེས་སྤྱོད་ཀྱི་དམ་ཚིག །བཟའ་བའི་དམ་ཚིག །བསྲུང་བའི་དམ་ཚིག །མི་འབྲལ་བའི་དམ་ཚིག་ལྔ་ལྔ་གསུངས་ཏེ།  དེ་ལ་བུམ་དབང་གི་མཉམ་གཞག་གི་དམ་
ཚིག་བསྐྱེད་རིམ།  རྗེས་སྤྱོད་ཀྱི་དམ་ཚིག་ངོ་བོ་ཉིད་གསུམ།  བཟའ་བའི་དམ་ཚིག་བདུད་རྩི་ལྔ་དང་།  ཤ་ལྔའི་རིལ་བུ།  བསྲུང་བའི་དམ་ཚིག་རྩ་བ་དང་ཡན་ལག་གི་དམ་ཚིག་ཉི་ཤུ་རྩ་གཉིས།  མི་འབྲལ་བའི་དམ་ཚིག་རྡོ་རྗེ་དྲིལ་བུའོ། །
10-5-14a


དེ་བཞིན་དུ་དབང་གཞན་གསུམ་ལ་ཡང་ལྔ་ལྔ་གསུངས་ཏེ་འདིར་མ་སྤྲོས་སོ། །འདིས་ཀྱང་ལུགས་འདིའི་སྔགས་སྡོམ་རྫོགས་པ་དབང་བཞི་རྫོགས་པ་ལ་ལྟོས་པར་གྲུབ་སྟེ།  ལུགས་འདིའི་སྔགས་སྡོམ་
ཡོངས་སུ་རྫོགས་པ་ལ་དམ་ཚིག་ཉི་ཤུ་རྫོགས་པར་ཐོབ་དགོས་པའི་ཕྱིར་རོ། །གཞན་དུ་བུམ་དབང་གིས་སྔགས་སྡོམ་རྫོགས་ན་དབང་གོང་མ་མ་ཐོབ་པའི་རྡོ་རྗེ་འཛིན་པའི་ས་ཐོབ་པ་ཡོད་དགོས་པར་འགྱུར་ཏེ།  སྔགས་སྡོམ་རྫོགས་པར་
ཐོབ་ནས་དམ་ཚིག་ཚུལ་བཞིན་དུ་བསྲུངས་ན་ལམ་གཞན་མ་བསྒོམས་ཀྱང་།  སྐྱེ་བ་བཅུ་དྲུག་ནས་སངས་རྒྱས་པར་ཚད་ལྡན་གྱི་གཞུང་ལས་གསུངས་པ་དེ།  བླ་མ་གོང་མས་ཡང་ཡང་དྲངས་པའི་ཕྱིར་རོ། །མན་ངག་གི་གནད་དྲུག་ནི་
དབང་བཞི་པོ་རེ་རེ་ལ་ཡང་རྒྱུ་ལ་གནས་པ། དབང་ལས་ཐོབ་པ།  ལམ་ལ་གོམས་པ།  ལྟ་བ་ལ་ཉམས་སུ་མྱོང་བ།  གྲུབ་མཐའ་ལ་རྟགས་སུ་ཤར་བ།  འབྲས་བུ་ལ་དོན་མ་ལུས་པ་མངོན་དུ་གྱུར་པ་དྲུག་དྲུག་ཡོད་པར་གསུངས་
སོ། །འདིས་ཀྱང་དོན་དེ་ཉིད་གྲུབ་སྟེ།  སྡོམ་པ་ལ་རྒྱུད་གསུམ་གྱི་སྡོམ་པ་གསུམ་དུ་ཕྱེ་བའི་རྒྱུ་ལ་གནས་པའི་སྡོམ་པ་དེ།  དབང་ལས་ཐོབ་པ།  དབང་ལས་ཐོབ་པ་དེ་ལམ་ལས་གོམས་ཞེས་སོགས་བུམ་དབང་ལ་སྦྱར་ན་དབང་
གོང་མ་ལ་ཡང་སྦྱར་དགོས་པར་མཚུངས་པའི་ཕྱིར་དང་།  བུམ་དབང་ལ་མི་སྦྱར་ན་བུམ་དབང་གི་སྐབས་སུ་དབང་ལས་ཐོབ་པ་ཞེས་པ་དེ་སྡོམ་པ་ཐོབ་པ་མ་ཡིན་པར་འགྱུར་བའི་ཕྱིར་རོ། །གལ་ཏེ་རྒྱུ་ལ་སྡོམ་པ་གནས་ན་དབང་ལས་ཐོབ་མི་དགོས་
10-5-14b


སོ་སྙམ་ན།  དེ་ནི་མན་ངག་གི་གནད་དྲུག་པོ་འདི་ཉིད་ལ་ཅོ་འདྲི་བ་སྟེ།  འདིར་ཡང་རྒྱུ་ལ་གནས་པ་དང་།  དབང་ལས་ཐོབ་པ་དོན་གཅིག་ན་ཁྱོད་ཀྱིས་སྨྲས་པའི་སུན་འབྱིན་དེ་ཉིད་མཚུངས་ཤིང་།  དོན་མི་གཅིག་ན་རྒྱུ་ལ་གནས་པ་དེ་ཉིད་དབང་
ལས་མ་ཐོབ།  དབང་ལས་ཐོབ་པ་དེ་ཉིད་ལམ་ལ་མ་གོམས་ཞེས་སོགས་ཕྱིན་ཅི་ལོག་ཏུ་འགྱུར་བའི་ཕྱིར་རོ། །གཞན་ཡང་དེ་ལྟར་སྨྲ་བ་དེས་ནི།  ཀྱེ་རྡོ་རྗེ་ལས།  སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་
བསྒྲིབས། །དེ་བསལ་ན་ནི་སངས་རྒྱས་ཉིད། །ཅེས་གསུངས་པའི་སངས་རྒྱས་སྔ་མ་རྒྱུ་ལ་གནས་པ་དང་།  ཕྱི་མ་ལམ་ལས་ཐོབ་པ་ཡིན་པ་དང་།  རྒྱུད་བླར། སེམས་ཅན་གྱི་རྒྱུད་ལ་རང་བཞིན་གྱི་སངས་རྒྱས་ཡོད་པར་དཔེ་དགུས་
བསྒྲུབས་ཤིང་།  སངས་རྒྱས་དེ་ཉིད་ལམ་མཉམ་རྗེས་གཉིས་ཀྱིས་ཐོབ་དགོས་པར་གསུངས་པ་དང་།  རྗེ་བཙུན་གྱིས།  རང་བཞིན་རྒྱུ་ལ་བསམ་ན་ལྷུན་གྲུབ་སྟེ། །མཐའ་ཡས་ཡོན་ཏན་ཚོགས་ནི་གནས་གྱུར་ཡིན། །ཞེས་གསུངས་པ་
སོགས་མདོ་རྒྱུད་བསྟན་བཅོས་ཟབ་མོའི་དོན་ལ་བློ་ཁ་མ་ཕྱོགས་པའོ། །རྩ་བའི་སོགས་ཀྱི་སྒྲས་བསྡུས་པ་ནི།  རྗེ་བཙུན་གྱིས་དབང་གི་རབ་དབྱེར་སྔར་མ་སྨིན་པ་སྨིན་པར་བྱེད་པ་རྒྱུ་དབང་བཞི།  དེ་ཉིད་གཞན་ལས་ཡང་ཡང་ལེན་པ་རྒྱུ་དབང་
ལམ་དུ་བྱེད་པ་བཞི།  དེ་ཉིད་རང་གིས་ལེན་པ་རྒྱུ་དབང་ཏིང་ངེ་འཛིན་གྱི་ལམ་དུ་བྱེད་པ་བཞི་ཞེས་རབ་དབྱེ་བཅུ་གཉིས་གསུངས་པ་ཡང་ལུགས་འདིའི་སྒྲུབ་བྱེད་ཡིན་ཏེ།  དབང་བཞི་ཆར་རྒྱུ་དབང་དུ་འགྲོ་ན་འགྲོ་མཉམ་དང་།  རྒྱུ་དབང་ལམ་དུ་བྱེད་པར་འགྲོ་
10-5-15a


ན་འགྲོ་མཉམ་དུ་གསུངས་པའི་ཕྱིར་རོ། །	ཐོབ་པའི་མཚམས་བཤད་ཟིན་ནས་ཐོབ་ཚུལ་བྱེ་བྲག་ཏུ་བཤད་པ་ལ།  ས་བོན་གྱི་སྐྱེ་ཚུལ་ནི།  ས་བོན་དེ་ཉིད་ཚོགས་གཉིས་བསགས་པ་ཡི། །སྐལ་ལྡན་རྣམས་ལ་ཡེ་ཤེས་ཉིད་
དུ་སྐྱེ། །གཞན་ལ་མངོན་གསལ་ཉིད་དུ་མི་སྐྱེ་ཡང་། །དེ་ཚེ་སྤོང་སེམས་ཐོབ་པ་སྡོམ་པ་ཡིན། །སྤོང་སེམས་བུམ་དབང་ཉིད་དུ་ཐོབ་སྙམ་ན། །ཐ་མལ་རྣམ་རྟོག་སྤོང་སེམས་དེར་ཐོབ་ཀྱང་། །གྱ་ནོམ་ལྷར་ཞེན་རྣམ་རྟོག་སྤོང་སེམས་ནི། །མཆོག་
དབང་གསུམ་དུ་ཐོབ་ཀྱི་གཞན་དུ་མིན། །ཞེས་པ་ཡིན་ཏེ།  འདི་ལ་དོན་དངོས་བཤད་པ་དང་།  ཧ་ཅང་མི་འཚམ་པའི་ལོག་རྟོག་དགག་པ་དང་།  དོན་ལ་གནས་པའི་ཐོབ་ཚུལ་གྱི་རིམ་པ་གཞག་པ་གསུམ་ལས།  དང་པོ་ནི།  དབང་བཞིའི་ཆོ་
གས་སྐུ་བཞིའི་ས་བོན་ཐེབས་པའི་ས་བོན་དེ་ཉིད།  ཀྱེ་རྡོ་རྗེ་ལས།  བདག་གི་བསོད་ནམས་ལས་ཤེས་བྱ། །ཞེས་པ་ལྟ་བུ་ཚེ་འདིར་བསོད་ནམས་བསགས་པ་དང་།  ལས་འཕྲོ་ཅན་རང་གི་ངང་གིས་ཁམས་འདུ་བ་ལྟ་བུ།  ཚེ་སྔ་མའི་ལས་
འཕྲོ་བཟང་པོ་ཡོད་ཅིང་རྩ་རླུང་གི་བྱེད་པ་བཟང་པོའི་སྐལ་ལྡན་རྣམས་ལ།  རྗེས་ཀྱི་བློས་གསལ་བར་ངོ་ཤེས་པའི་ཡེ་ཤེས་ཉིད་དུ་སྐྱེ་སྟེ།  དངོས་དབང་བསྐུར་བའི་ཚེ་དབང་གསུམ་པའི་སྐབས་སུ་མཚོན་བྱེད་དཔེའི་ཡེ་ཤེས་སྐྱེ་ཞིང་གལ་ཏེ་མ་སྐྱེས་
ན་བཞི་པའི་སྐབས་སུ།  བཞི་པ་རྟེན་ཅན་ཞེས་པ་དབང་དེ་ཉིད་བསྐྱར་ནས་བསྐུར་བར་གསུངས་པ་ལྟ་བུ་དང་།  གྲོལ་ལམ་ལ་བརྟེན་པ་ལ་ཡང་རྗེ་བཙུན་གྱིས་དཔེའི་ཡེ་ཤེས་སྐྱེ་མི་སྐྱེ་གཉིས་གསུངས་པ་ལྟ་བུ།  འགའ་ཞིག་ལ་མཚོན་བྱེད་དཔེའི་ཡེ་
10-5-15b


ཤེས་ཉིད་དུ་སྐྱེའོ། །རྗེ་བཙུན་རྣལ་འབྱོར་གྱི་དབང་ཕྱུག་ལྟ་བུ་འགའ་ཞིག་ལ་ནི་མཚོན་བྱ་དོན་གྱི་ཡེ་ཤེས་ཉིད་དུ་སྐྱེའོ། །རྒྱལ་ཆེན་ཨིནྡྲ་བྷུ་ཏི་ལྟ་བུ་འགའ་ཞིག་ལ་ནི་འབྲས་བུ་སངས་རྒྱས་ཀྱི་ཡེ་ཤེས་ཉིད་དུ་སྐྱེའོ། །དེ་དག་ལས་གཞན་པ་ཡིན་ཀྱང་
སློབ་དཔོན་དང་།  ཆོ་ག་དང་།  སློབ་མ་མཚན་ཉིད་དང་ལྡན་པའི་ཚེ།  རྗེས་ཀྱི་བློས་གསལ་བར་ངོ་ཤེས་པའི་ཡེ་ཤེས་མ་སྐྱེས་ཀྱང་།  དབང་གི་སྐབས་སུ་ཉམས་མྱོང་ཁྱད་པར་ཅན་ངེས་པར་སྐྱེ་ལ།  དེའི་ཚེ་མི་མཐུན་ཕྱོགས་སྤོང་བའི་སེམས་
ཐོབ་པ་ནི་སྔགས་སྡོམ་ཐོབ་པར་འཇོག་གོ།  སྤོང་སེམས་དེ་ཡང་ཉམས་མྱོང་ཁྱད་པར་ཅན་སྐྱེས་པའི་ཚེ་དོན་གྱིས་ཐོབ་པ་ཞིག་དགོས་ཀྱི།  མི་མཐུན་ཕྱོགས་སྤང་བར་བྱའོ་སྙམ་དུ་ཁས་བླངས་པའི་སེམས་པ་མངོན་གྱུར་ཙམ་ནི་མ་ཡིན་ཏེ།  དེ་ནི་སྔར་
རིགས་ལྔའི་སྡོམ་བཟུང་གི་རྗེས་ཟློས་ཀྱི་སྐབས་སུ་ཡང་ཡོད་པའི་ཕྱིར་དང་།  ཡེ་ཤེས་སྐྱེས་པའི་ཚེ་དེ་རྣམས་མངོན་གྱུར་ཡོད་པ་ཡང་མ་ཡིན་པའི་ཕྱིར་རོ། །དཔེར་ན་འཁོར་ལོས་སྒྱུར་བའི་རྒྱལ་པོས་འགྲན་ཟླ་མེད་པ་ཐོབ་པ་དེ་ཡང་ཁྲི་ཐོག་ཏུ་དབང་
བསྐུར་བ་ཐོབ་པའི་སྒོ་ནས་དགོས་ཀྱི་འགྲན་ཟླ་བྱེད་པ་མེད་པ་ཙམ་དང་།  འགྲན་ཟླ་བྱེད་པ་དངོས་སུ་བཅོམ་པ་ལ་མི་འཇོག་པ་བཞིན་ནོ། །འདི་ལ་ཐེག་པ་ཆེན་པོའི་མཐོང་ལམ་གྱི་གནས་སྐབས་སུ་ཡོན་ཏན་གྱི་ལྡོག་པ་བསམ་གྱིས་མི་ཁྱབ་པ་ཐོབ་
ཚུལ་དང་།  དབང་བསྐུར་ཉིད་ལ་ཡང་ཡོན་ཏན་གྱི་ལྡོག་པ་བསམ་གྱིས་མི་ཁྱབ་པ་ཐོབ་ཚུལ་སོགས་མདོ་རྒྱུད་ཀྱི་དགོངས་པ་ཕྱོགས་གཅིག་པ་མང་དུ་སྣང་མོད་ཀྱི།  བཤད་ཀྱང་རེ་ཤིག་གཞན་གྱིས་གོ་བར་དཀའ་བ་དང་།  ཡི་གེ་ཡང་མངས་སུ་དོགས་ནས་
10-5-16a


འདིར་མ་སྤྲོས་སོ། །གང་དག་དབང་གི་སྐབས་སུ་ཉམས་མྱོང་སྐྱེས་པ་ལྟ་ཅི་སྨོས།  དམིགས་པ་ཙམ་ཡང་འཛིན་མི་ཤེས་པར་དབང་གི་གྲལ་དུ་འདུག་ཙམ་གྱིས་དབང་བསྐུར་ཐོབ་པར་རློམ་ནས་སྔགས་སྡོམ་ཐོབ་པར་སྨྲ་བས་
ནི།  བདག་ཉིད་ཆེན་པོ་ས་སྐྱ་པཎྜི་ཏས།  ཁ་ཅིག་བླུན་པོ་སྡིག་པ་ཅན། །ཡིན་ཡང་དེར་འཚོགས་ཐམས་ཅད་ནི། །སོ་སོ་ཐར་པའི་སྡོམ་པ་ཅན། །བྱང་ཆུབ་སེམས་དཔའི་སྡེ་སྣོད་ལ། །མཁས་པ་ཤ་སྟག་ཡིན་ནོ་ལོ། །འདི་འདྲའི་
ཚིག་ལའང་བདེན་འཛིན་ཡོད། །གལ་ཏེ་འདི་འདྲའི་ཚིག་བདེན་ན། །དེ་ལས་མི་བདེན་གཞན་ཅི་ཡོད། །ཅེས་གསུངས་པའི་ཕྱོགས་སྔའི་ནང་དུ་ད་དུང་ཡང་འཇུག་པའི་ཞུ་བ་ཕུལ་བའོ། །གལ་ཏེ་དབང་གི་ཡེ་ཤེས་ནི་མུན་པ་ལ་ནི་
མར་མེ་ལྟར་ཞེས་པ་ལྟར།  གསལ་བ་འབའ་ཞིག་ཏུ་སྐྱེ་བ་ཡིན་གྱི་མངོན་གསལ་དུ་སྐྱེ་མི་སྐྱེའི་ཁྱད་པར་མི་འཐད་དོ་སྙམ་ན།  ཡེ་ཤེས་རང་གི་ངོ་བོ་གསལ་བ་ཡིན་ཀྱང་ཕན་ཚུན་ལྟོས་ནས་གསལ་མི་གསལ་གྱི་ཁྱད་པར་
མི་འགལ་ཏེ།  སྤྱིར་ཤེས་པ་ཐམས་ཅད་གསལ་བ་ཡིན་ཀྱང་དེ་ཉིད་ལ་ཕན་ཚུན་ལྟོས་ནས་གསལ་མི་གསལ་གྱི་རྣམ་གཞག་མང་དུ་གསུངས་པ་དང་།  བྱེ་བྲག་དྲན་པ་དང་ཤེས་རབ་ལ་སོགས་ལ་ཕན་ཚུན་ལྟོས་ནས་གསལ་
མི་གསལ་གྱི་ཁྱད་པར་ཡོད་པ་དང་།  ཕྱི་རོལ་གྱི་དངོས་པོ་ལ་ཡང་།  མར་མེ་གསལ་བ་ཡིན་ཀྱང་ཕན་ཚུན་ལྟོས་ནས་གསལ་མི་གསལ་གྱི་ཁྱད་པར་མངོན་སུམ་གྱིས་གྲུབ་པ་བཞིན་ནོ། །འདིར་ནི་རྗེས་ཀྱི་བློས་ཡེ་ཤེས་སུ་ངོ་ཤེས་མི་
10-5-16b


ཤེས་ཀྱི་སྒོ་ནས་གསལ་མི་གསལ་གྱི་ཐ་སྙད་བྱས་པ་ཡིན་གྱི།  ཡེ་ཤེས་རང་གི་ངོ་བོ་མི་གསལ་བ་ཡིན་ཞེས་པ་ཁོ་བོས་གང་དུ་ཡང་མ་སྨྲས་ཏེ།  རྨི་ལམ་རང་གི་ངོ་བོ་གསལ་བ་ཡིན་ཀྱང་།  སད་པའི་ཚེ་རྨི་ལམ་གསལ་མི་
གསལ་གྱི་ཐ་སྙད་འདི་སུ་ཞིག་འགོག །གལ་ཏེ་དཔེའི་ཡེ་ཤེས་རང་གི་ངོ་བོ་གསལ་བ་ཡིན་ན་གསལ་བར་ངོ་མི་ཤེས་པ་མི་སྲིད་དོ་སྙམ་ན།  དེ་ནི་རྒྱུད་དང་།  མན་ངག་དང་།  རྒྱ་གར་མཁས་པའི་གཞུང་རྣམས་དང་འགལ་ཏེ།  
ཀྱེ་རྡོ་རྗེ་ལས།  བདེ་བ་གང་གིས་འཆི་བ་འདིར། །དེ་ཡི་བདེ་བ་བསམ་གཏན་བརྗོད། །ཅེས་དང་།  དེའི་འགྲེལ་པ་དག་ལྡན་ལས་བདེ་བ་གང་གིས་འཆི་བ་ཞེས་བྱ་བ་འདི་ནི་ཐ་མལ་པ་རྣམས་འཆི་བའི་ཚེ།  རྩ་མདུད་རྣམས་
གྲོལ་ནས་བདེ་སྟོང་གི་དཔེའི་ཡེ་ཤེས་དེ་སྐྱེ་བར་འགྱུར་ལ།  དེ་ངོ་ཤེས་ན་གྲོལ་བ་ལས།  མ་ཤེས་ན་འཁོར་བར་འཁྱམ་པར་འགྱུར་རོ་ཞེས་དང་།  འཇམ་དཔལ་ཞལ་ལུང་ལས།  ཆོས་སྐུ་རབ་དགའ་མཁའ་མཉམ་པ། །ཤི་
དང་བརྒྱལ་དང་གཉིད་ལོག་དང་། །གླལ་དང་འཁྲིག་དུས་སྐད་ཅིག་ཙམ། །མྱོང་བར་འགྱུར་བས་རབ་བསྒོམས་ན། །ལུས་ཅན་རྣམས་ཀྱི་ཡིད་ནི་སྦྱོང་། །ཞེས་དང་།  དེའི་འགྲེལ་པར་སྨན་པའི་ཞབས་ཀྱིས།  གཉིས་སུ་མེད་
པའི་ཡེ་ཤེས་ཡིད་ལ་བྱེད་པའི་དུས་ཀྱང་གསུངས་པ།  ཆོས་སྐུ་ཞེས་པ་ལ་སོགས་པའོ། །སྐད་ཅིག་ཙམ་ཞེས་པ་ནི་དེ་ཙམ་དུ་ལམ་དེ་ལས་རིང་དུ་ཡང་རྟོག་པ་དང་བྲལ་བའི་བདེ་བ་ཆེན་པོ་སྐྱེ་ཡང་དེ་བླ་མའི་མན་ངག་དང་བྲལ་བས་
10-5-17a


རྟོགས་པར་མི་བྱེད་དོ་ཞེས་གསུངས་པས་སོ། །གཉིས་པ་ནི་ཁ་ཅིག་མཚོན་བྱེད་དཔེའི་ཡེ་ཤེས་ནི་དབང་གི་རྗེས་སུ་རྫོགས་རིམ་བསྒོམས་པ་ལས་སྐྱེ་བ་ཁོ་ན་ཡིན་གྱི།  དབང་གི་སྐབས་སུ་སྐྱེ་བ་ནི་མེད་
དེ་གལ་ཏེ་ཡོད་ན།  དབང་བསྐུར་ཉིད་ཀྱི་སྐབས་སུ་རྫོགས་རིམ་ལོ་དང་ཟླ་བར་བསྒོམ་པ་ཡོད་པར་ཐལ་བའི་ཕྱིར་ཞེས་སྨྲའོ། །འདི་ནི་རྒྱུད་དང་གོང་མའི་གསུང་རབ་ལ་བློ་ཁ་མ་ཕྱོགས་པ་སྟེ།  རྩ་རྒྱུད་དང་པོའི་བཅུ་པར།  རོ་མཉམ་
སློབ་མའི་སྤྱོད་ཡུལ་ཉིད། །དེ་ཉིད་ལ་ཡང་བྱ་བར་བྱ། །ཞེས་ཤེས་རབ་ཡེ་ཤེས་ཀྱི་དབང་བསྐུར་ཚུལ་གསུངས་ནས་དེའི་ཡེ་ཤེས་སྟོན་པའི་དབང་དུ་བྱས་ཏེ།  རང་རིག་ཡེ་ཤེས་ཉིད་དུ་འགྱུར་ཞེས་པ་ནས།  རྣམ་པར་ཤེས་པ་ཀུན་གྱི་
ཚུལ། །ཞེས་པའི་བར་ཚིགས་བཅད་ཕྱེད་དང་བཞི་དང་།  དེའི་འགྲེལ་པ་དག་ལྡན་ལས།  ཤེས་རབ་ཡེ་ཤེས་ཀྱི་དབང་གི་ཡེ་ཤེས་ནི།  བརྗོད་བྱའི་གཙོ་བོ་ལྟ་བ་གཏན་ལ་འབེབས་པར་བྱེད་དོ། །དེའི་ཡེ་ཤེས་དེ་ཇི་ལྟ་བུ་
ཞེས་སྟོན་པ་ནི་རང་རིག་ཡེ་ཤེས་ཉིད་དུ་ཞེས་བྱ་བ་ལ་སོགས་པ་སྨོས་ཏེ་ཞེས་དང་།  ཕྱི་མའི་ལྔ་པར།  དེ་ལ་དབང་ནི་སྦྱིན་པར་བྱ། །ཅི་ལྟར་མཆོད་དང་བསྟོད་བཤད་པ། །སློབ་མ་བཟང་པོས་སྔར་ཤེས་བྱ། །དེ་ཉིད་དེ་ལ་བསྟན་
པ་ནི། །དགའ་བྲལ་དང་པོ་མཆོག་མཐའ་ཅན། །ཞེས་དང་།  ལོངས་སྤྱོད་ཀྱི་ནི་རླབས་གཉིས་ལ། །རང་གི་གཡས་དང་ལག་གཞན་གྱི། །མཐེ་བོང་དང་ནི་སྲིན་ལག་གིས། །དེ་ནི་རྣལ་འབྱོར་པ་ཡིས་བཙིར། །
10-5-17b


དེ་ནས་ཡེ་ཤེས་སྐྱེ་བར་འགྱུར། །དེ་ལ་ཅི་ཞིག་སྐྱེ་ཞེ་ན། །གཞོན་ནུའི་དགའ་བ་ཇི་ལྟ་བའམ། །ལྐུགས་པའི་རྨི་ལམ་ཇི་ལྟ་བའོ། །མཆོག་གི་མཐའ་དང་དགའ་བྲལ་དབུས། །སྟོང་དང་སྟོང་མིན་ཧེ་རུ་ཀ།  
ཞེས་དང་།  དེའི་འགྲེལ་པར།  དགའ་བྲལ་དང་པོ་མཆོག་མཐའ་ཅན། །ཅེས་པ་ལ།  ལྷན་སྐྱེས་གསུམ་པ་འདོད་པ་ནི་གོང་དུ་སུན་ཕྱུང་ཟིན་ཏོ། །ལོངས་སྤྱོད་ཀྱི་ནི་རླབས་གཉིས་ལ་ཞེས་བྱ་བ་ནི།  ཁ་ཅིག་གསང་དབང་དུ་
འཆད་པ་དང་།  ཁ་ཅིག་ཤེས་རབ་ཡེ་ཤེས་སུ་འཆད་པ་ལས།  འདིར་བླ་མ་རྣམས་ནི།  ནང་ལྟར་བཤད་པ་མ་ནིང་གི་དབང་ཞེས་བྱ་བ་དགེ་སློང་བསླབ་པས་བཅིངས་པ་དང་།  རྒན་པོ་སྟོབས་མེད་པ་དང་།  བྱིས་པ་སྦྱོར་བ་
མི་ཤེས་པ་རྣམས་ལ་དབང་གསུམ་པའི་ཡེ་ཤེས་ངོ་སྤྲོད་པའི་ཕྱིར་སྟོན་པ་སྟེ།  དེའི་ལག་ཏུ་བླང་བ་བླ་མས་སྟོན་པར་འགྱུར་རོ། །ཞེས་དང་།  ལྗོན་ཤིང་ལས།  ཤེས་རབ་དེ་ཡང་རྣམ་པར་མི་རྟོག་པ་ཡིན་ལ་མི་རྟོག་པ་དེ་ཡང་ཕ་
རོལ་ཏུ་ཕྱིན་པ་ལྟར།  ཚིག་ཙམ་གྱིས་བསྟན་པར་མི་ནུས་པས་དབང་གི་ཡེ་ཤེས་ཐོབ་པའི་རྗེས་ལ་བསྟན་པའི་ཕྱིར།  ཕྱི་ནས་དེ་ཉིད་ཡང་དག་བཤད། །ཅེས་བྱ་བ་ལ་སོགས་པ་གསུངས་སོ། །འདི་ལ་ལྔ་སྟེ།  དབང་གི་ཡེ་ཤེས་
བསྟན་པས་དེ་ཁོ་ན་ཉིད་ཀྱི་དོན་ལ་ངོ་སྤྲོད་པ་དངོས་དང་།  ཡེ་ཤེས་དེ་ལ་གང་ཟག་གི་བདག་ཏུ་ལོག་པར་རྟོག་པར་འགྱུར་བས་གང་ཟག་གི་བདག་མེད་བསྟན་པ་དང་ཞེས་སོགས་དང་།  དབང་གི་ཡེ་ཤེས་ལ་ལོག་རྟོག་དགག་པའི་སྐབས་སུ། 
10-5-18a


 གནས་ལ་ལོག་པར་རྟོག་པ་བྱང་སེམས་རྡོ་རྗེ་ནོར་བུའི་དཀྱིལ་ན་གནས་པ་ན་ལྷན་ཅིག་སྐྱེས་པའི་ཡེ་ཤེས་སྐྱེ་བར་འདོད་པ་དང་།  ངོ་བོ་ལ་ལོག་པར་རྟོག་པ་དབང་གི་ཡེ་ཤེས་ནི་དོན་གྱི་ཡེ་ཤེས་སུ་འདོད་པ་དང་།  གོ་རིམ་
ལ་ལོག་པར་རྟོག་པ་ལྷན་སྐྱེས་དགའ་བ་གསུམ་པར་འདོད་པ་རྣམས་ལུང་དང་རིགས་པ་དུ་མས་བཀག་ནས་རང་ལུགས་བཞག་པ་ན།  གནས་ཀྱི་དབང་དུ་བྱས་ན་ཐབས་ཀྱི་རིགས་ཀྱི་བདག་པོའི་ཁ་དང་ཤེས་རབ་ཀྱི་རྩ་མཛེས་པའི་སྣ་རྩེར་བྱང་ཆུབ་ཀྱི་
སེམས་གནས་ཏེ།  མ་ཉམས་པའི་དུས་དེར་སྐྱེ་བར་འགྱུར་ཞེས་དང་།  རང་གི་ངོ་བོ་ནི་མཚོན་བྱེད་དཔེའི་ཡེ་ཤེས་བྱ་བ་བཞིན་གྱི་དཀྱིལ་འཁོར་བལྟ་བར་འདོད་པ་ལ་མེ་ལོང་གི་གཟུགས་བརྙན་ནམ།  བདུད་རྩི་དོན་དུ་གཉེར་བ་ལ་སྦྲང་
རྩི་ལྕེ་ལ་བཞག་པ་ལྟ་བུ་སྟེ།  ཡང་དག་པར་རྫོགས་པའི་སངས་རྒྱས་ཀྱིས་ཆོས་ཉིད་དམ།  མཐོང་ལམ་གྱི་ཡེ་ཤེས་དང་འདྲ་བ་ལས་ཡེ་ཤེས་དེ་ཉིད་ནི་མ་ཡིན་ཞིང་།  ཡེ་ཤེས་དེ་མཚོན་དུ་རུང་བ་སྤྲོས་པའི་མཐའ་ཐམས་ཅད་དང་བྲལ་
བ་སྐྱེ་བ་ཡིན་ཏེ་ཞེས་དང་།  གསུམ་པ་གོ་རིམ་གྱི་དབང་དུ་བྱས་ན་ལྷན་ཅིག་སྐྱེས་པ་ནི་བཞི་པར་སྐྱེ་སྟེ་ཞེས་དང་།  སྡོམ་གསུམ་རབ་དབྱེར།  ཇོ་བོ་ན་རོ་ཏ་པ་ནི། །དབང་བསྐུར་དུས་སུ་མཐོང་ལམ་སྐྱེ། །དེ་ནི་སྐད་ཅིག་དེ་ལ་
འགག །ཆོས་མཆོག་རྗེས་ཀྱི་ཡེ་ཤེས་ནི། །འགགས་པ་མེད་ཅེས་གསུངས་པར་གྲགས། །དེ་ནི་དཔེ་ཡི་ཡེ་ཤེས་ལ། །མཐོང་བའི་ལམ་དུ་བཏགས་པར་ཟད། །ཅེས་དང་།  རྗེ་བླ་མས་མཁའ་འགྲོ་རྒྱ་མཚོའི་དཀྱིལ་ཆོག་
10-5-18b


ཏུ།  རྣམ་རྟོག་བཀག་སླ་བའི་ཕྱིར་གདོང་གཡོགས་བཅིངས་ལ།  འདི་སྐད་བརྗོད་དོ། །ཁྱོད་ཀྱི་ཤེས་རབ་ཡེ་ཤེས་ཀྱི་དབང་གི་སྐབས་དགའ་བ་བཞི་པ་ལྷན་སྐྱེས་ཀྱི་དགའ་བ་རྒྱུད་ལ་སྐྱེས་པའི་དུས་སུ་རྣམ་རྟོག་ཐམས་ཅད་
འགག་ཅིང་སེམས་ཉིད་བདེ་བ་ཆེན་པོའི་ངོ་བོར་ཤར་བ་དེ་ནི།  དབང་གི་ཡེ་ཤེས་མཚོན་བྱེད་དཔེའི་ཡེ་ཤེས་ཡིན་ལ།  དེས་མཚོན་པའི་དོན་གྱི་ཡེ་ཤེས་ཟུང་དུ་འཇུག་པ་དབང་བཞི་པའི་དོན་ཚིག་ཙམ་གྱི་སྒོ་ནས་བཤད་ན་ཞེས་
དང་།  སམ་བུ་ཊའི་དཀྱིལ་ཆོག་ཏུ།  དབང་བཞི་པའི་དངོས་རྒྱུ་འཆད་པ་ན་ཤེས་རབ་ཡེ་ཤེས་ཀྱི་དབང་རབ་མཆོག་རིགས་ཀྱི་བདག་པོའི་ཁ་དང་།  རྩ་མཛེས་པའི་སྤྱི་བོར་རླུང་འདྲེན་པའི་སྒོ་ནས་ཐིག་ལེ་བཟུང་བས་གསུམ་
པའི་ཉམས་མྱོང་མན་ངག་མེད་པ་རྣམས་ཀྱིས་རྙེད་པར་དཀའ་ཞིང་།  དབབ་པ་དང་།  བཟློག་པ་དང་།  དགྲམ་པ་ལ་སོགས་མཚུངས་པ་མེད་པའི་མན་ངག་གི་སྒོ་ནས་བདེ་བའི་རྟེན་ཁམས་བྱང་ཆུབ་ཀྱི་སེམས་ཉིད།  ཕ་
རོལ་ཏུ་འཕོས་པ་མེད་པར་རང་གི་ལུས་ལ་བསྡམས་པ་ལས་སྐྱེས་པའི་ཡེ་ཤེས་ནི་དངོས་ཀྱི་རྒྱུ་ཡིན་ལ་ཞེས་དང་།  གཤེད་དམར་གྱི་དཀྱིལ་ཆོག་ཏུ།  དབང་གསུམ་པའི་དུས་སུ་ཉམས་སུ་མྱོང་བའི་ལྷན་ཅིག་སྐྱེས་པའི་དགའ་
བའི་ཡེ་ཤེས་དེས་མཚོན་པའི་དོན་གྱི་ལྷན་ཅིག་སྐྱེས་པའི་དགའ་བའི་ཡེ་ཤེས་དབང་བཞི་པ་ཚིག་གི་སྒོ་ནས་ངོ་སྤྲོད་ན།  ཞེས་དང་།  རྗེ་མུས་པ་ཆེན་པོས།  ཀྱེ་རྡོ་རྗེའི་རས་བྲིས་ཀྱི་དཀྱིལ་ཆོག་ཏུ།  དབང་གསུམ་པའི་གནས་
10-5-19a


སྐབས་སུ།  ཕྱག་རྒྱ་དང་མཉམ་པར་སྦྱར་བ་ལས་བྱུང་བའི་བདེ་ཆེན་གྱི་ཡེ་ཤེས་འདི་ནི་ཞེས་པ་ནས།  དཔེའི་ཡེ་ཤེས་ཀྱིས་དོན་གྱི་ཡེ་ཤེས་རྟོགས་པར་བྱ་སྟེ།  སངས་རྒྱས་ཀྱིས་མངོན་དུ་གྱིས་ཤིག་ཅེས་བྱ་
བའི་དོན་ཏོ་ཞེས་སོགས་རྒྱུད་དང་།  རྒྱ་བོད་ཀྱི་དཀྱིལ་ཆོག་ཚད་ལྡན་ཐམས་ཅད་དུ་དབང་གསུམ་པའི་ཡེ་ཤེས་ལ་བཞི་པའི་སྐབས་སུ་ངོ་སྤྲོད་བྱེད་པ་འབའ་ཞིག་གསུངས་ཀྱི་ཁྱོད་འདོད་པ་དེ་ནི་ཡིག་ཆ་ཚད་ལྡན་གང་ན་ཡང་མི་
འདུག་པའི་ཕྱིར་རོ། །དེང་སང་དབང་གི་དུས་སུ་མཚོན་བྱེད་དཔེའི་ཡེ་ཤེས་སྐྱེ་མི་སྲིད་པར་ཁས་བླངས་ནས།  སློབ་མ་ལ་དབང་བསྐུར་བྱེད་པའི་ཚེ་དབང་གསུམ་པའི་དུས་སུ་སྐྱེས་པའི་མཚོན་བྱེད་དཔེའི་ཡེ་ཤེས་འདི་ནི།  དཔེ་
དང་གཏན་ཚིགས་ལ་སོགས་པས་རྟོགས་པར་མི་ནུས་པས་ཆེས་ཕྲ་ཞིང་ཞེས་སོགས་འདོན་པ་དང་།  དཀྱིལ་འཁོར་གྱི་ལྷ་ལ་བཀོད་པའི་འཇིག་རྟེན་པའི་ཚུལ་སྟོན་པ་རྣམས་འཇིག་རྟེན་པའི་འབྱུང་པོ་རང་རྒྱུད་པར་ཁས་བླངས་
བཞིན་དུ་མེ་ཏོག་དོར་བའི་ཚེ།  ཡེ་ཤེས་ཀྱི་སྣང་བ་ལས་གྲུབ་པའི་གཞལ་ཡས་ཁང་འདི་ན་བཞུགས་པའི་ལྷ་ཚོགས་ཐམས་ཅད་སངས་རྒྱས་ཀྱི་ཡེ་ཤེས་གཅིག་ཉིད་གཙོ་འཁོར་གྱི་རྣམ་པ་ཐ་དད་དུ་སྟོན་པ་ཡིན་གྱི་བཟང་ངན་གྱི་དབྱེ་བ་
མེད་དོ། །འོན་ཀྱང་ལས་བསགས་པའི་ལྷ་གཅིག་ལ་འབབ་པར་ཤོག་ཅིག་སྙམ་དུ།  ཨཾོ་པྲ་ཏཱིཙྪ་བཛྲ་ཧོ་ཞེས་བརྗོད་ལ་དོར་ཅིག་ཅེས་བརྗོད་པ་ནི་གྲུབ་མཐའ་མི་ཤེས་བཞིན་དུ་འཆའ།  དཀྱིལ་ཆོག་འདོན་པ་གོམས་པས་འདོན་པའོ། །
10-5-19b


གསུམ་པ་ནི།  གནས་ལུགས་ཟབ་མོའི་དོན་ལ་ཡེ་ཤེས་ཀྱི་འཇུག་པ་འགྲན་ཟླ་མེད་པ་རྗེ་བཙུན་དམ་པ་དཀོན་མཆོག་རྒྱལ་མཚན་གྱི་ཞལ་སྔ་ནས་དབང་གི་སྐབས་སུ་མཚོན་བྱེད་དཔེའི་ཡེ་ཤེས་སྐྱེ་བའང་ཡོད།  མཚོན་བྱ་དོན་གྱི་ཡེ་
ཤེས་མཐོང་བའི་ལམ་སྐྱེ་བ་ཡང་ཡོད།  ས་བཅུ་གསུམ་རྡོ་རྗེ་འཛིན་པའི་ས་སྐྱེ་བ་ཡང་ཡོད་མོད་ཀྱི་དེ་དག་སྐྱེ་བས་ནི་མ་ཁྱབ་སྟེ།  བླ་མས་ཆོ་ག་མཚན་ཉིད་དང་ལྡན་པར་བྱས་ནས་སློབ་མ་སྣོད་ལྡན་གྱིས་དམིགས་པ་བཟུང་བའི་ཚེ་སྔར་གྱི་
ཡེ་ཤེས་དེ་དག་མ་སྐྱེས་ཀྱང་སྔར་དང་མི་འདྲ་བའི་ཉམས་མྱོང་ཁྱད་པར་ཅན་ཅིག་ངེས་པར་སྐྱེ་ལ།  དེ་ཉིད་དབང་གི་ཡེ་ཤེས་སུ་བྱས་ནས་དེ་ལ་དབང་བཞི་པའི་ངོ་སྤྲོད་དང་།  ལྟ་བ་འཁོར་འདས་དབྱེར་མེད་ཀྱི་ངོ་སྤྲོད་ཐམས་ཅད་བྱེད་པ་ཡིན་
ནོ། །ཞེས་གསུངས་པ་འདི་ཉིད་རྒྱུད་དང་མན་ངག་ཐམས་ཅད་ཀྱི་གནད་དམ་པར་མཐོང་སྟེ་དབང་བསྐུར་ཚུལ་ལ་དངོས་ཀྱི་ཕྱག་རྒྱ་ལ་བརྟེན་པ་དང་།  ཡེ་ཤེས་ཀྱི་ཕྱག་རྒྱ་ལ་བརྟེན་པ་གཉིས་ལས།  དང་པོ་ལ་དབང་གསུམ་པའི་
སྐབས་སུ་ཡེ་ཤེས་ངོས་མ་ཟིན་ན་བཞི་པ་རྟེན་ཅན་ཞེས་པ་བཞི་པའི་སྐབས་སུ་བསྐྱར་ནས་བསྐུར་བར་གསུངས་པས་གང་ལྟར་ཡང་བཞི་པའི་ངོ་སྤྲོད་ཀྱི་གོང་དུ་མཚོན་བྱེད་དཔེའི་ཡེ་ཤེས་སྐྱེས་པར་ངེས་པར་དགོས་སོ། །རྒྱུད་ཀྱི་
དངོས་བསྟན་ཕལ་ཆེར་འདིའི་དབང་དུ་བྱས་པ་ཡིན་པས་དབང་གསུམ་པའི་ཡེ་ཤེས་ཀྱི་ངོ་སྤྲོད་མང་དུ་གསུངས་ཤིང་།  རྗེ་བཙུན་གྱིས་ཀྱང་ལོག་རྟོག་གསུམ་ཀ་བཀག་ནས་རང་ལུགས་སྐྱོན་མེད་གསུམ་བཞག་པར་ཤེས་པར་
10-5-20a


བྱའོ། །ཡེ་ཤེས་ཀྱི་ཕྱག་རྒྱ་ལ་བརྟེན་པ་ལ་བདེ་སྟོང་གི་ཡེ་ཤེས་དངོས་སུ་སྐྱེ་བ་དང་མི་སྐྱེ་བ་གཉིས་ཡོད་དེ།  རྗེ་བཙུན་གྱི་མཆོག་དབང་གསུམ་གྲོལ་ལམ་ལ་བརྟེན་ནས་བསྐུར་བའི་ཡིག་ཆ་ལས།  སྤྱིར་ཡེ་
ཤེས་ཀྱི་ཕྱག་རྒྱ་རྐྱང་པས་ཀྱང་ཁ་ཅིག་ལ་བདེ་སྟོང་གི་ཡེ་ཤེས་སྐྱེ་བའང་སྣང་ལ།  ཁ་ཅིག་ལ་མི་སྐྱེ་བ་ཡང་ཡོད་ལ།  དེ་ལ་དབང་གི་ཆོ་ག་ཙམ་མོ་ཞེས་གསུངས་པས་སོ། །དེའི་དང་པོ་ནི་སྔ་མ་དང་མཚོན་བྱེད་དཔེའི་ཡེ་ཤེས་སུ་ཁྱད་
པར་མེད་ཀྱང་།  རྟེན་ཕྱག་རྒྱའི་ངོས་ནས་སྔ་མ་ལ་ལྟོས་ཏེ་ཅུང་ཟད་མི་གསལ་བའོ། །ཕྱི་མ་སྔར་བཤད་པ་ལྟར་མཚོན་བྱེད་དཔེའི་ཡེ་ཤེས་མ་སྐྱེས་ཀྱང་ཆོ་ག་མཚན་ཉིད་དང་ལྡན་པས་ཉམས་མྱོང་ཁྱད་པར་ཅན་སྐྱེས་པ་སྟེ།  དབང་གི་
ཆོ་ག་ཙམ་ཞེས་པའི་དོན་ཡང་ཡིན་ཞིང་།  དབང་ཐ་མ་ཐོབ་པའི་དོན་ཡང་ཡིན་པའི་ཕྱིར།  ཉམས་མྱོང་མ་སྐྱེས་ཀྱང་དབང་བསྐུར་གྱི་གྲལ་ན་འདུག་པ་ཙམ་ཡང་མ་ཡིན་ཏེ།  ཧ་ཅང་ཐལ་བའི་ཕྱིར་རོ། །འདི་དག་ནི་སོ་སོ་སྐྱེ་བོའི་རྡོ་རྗེ་
སློབ་དཔོན་གྱིས་དབང་བསྐུར་ཚུལ་གྱི་དབང་དུ་བྱས་པ་ཡིན་ཏེ།  སྤྲུལ་པའི་དཀྱིལ་འཁོར་གྱིས་དབང་བསྐུར་བའི་ཚེ་དོན་གྱི་ཡེ་ཤེས་ངེས་པར་སྐྱེ་ཞིང་།  གྲུབ་པའི་ས་ལ་གནས་པས་དབང་བསྐུར་བའི་ཚེ་དོན་གྱི་ཡེ་ཤེས་སྐྱེ་བ་དང་། །
དཔེའི་ཡེ་ཤེས་སྐྱེ་བ་ཅི་རིགས་པར་ཡོད་པའི་ཕྱིར་རོ། །དེ་ལྟར་བྱས་ན་དོན་གྱི་ཡེ་ཤེས་སྐྱེས་པ་ལ་ནི་ངོ་སྤྲོད་མི་དགོས་ལ།  དཔེའི་ཡེ་ཤེས་སྐྱེས་པ་དང་།  མ་སྐྱེས་པ་གཉིས་ལ་དབང་བཞི་པ་དང་།  ལྟ་བའི་ངོ་སྤྲོད་བྱེད་པ་ནི་དཔེའི་ཡེ་ཤེས་
10-5-20b


ཉིད་ལ་ངོ་སྤྲོད་བྱེད་པ་དང་།  ཉམས་མྱོང་ཁྱད་པར་ཅན་ལ་དབང་གི་ཡེ་ཤེས་སུ་བྱས་ནས་དེ་ལ་ངོ་སྤྲོད་བྱེད་པར་གྲུབ་ཅིང་དབང་བསྐུར་མཚན་ཉིད་པ་ཐོབ་པ་ཐམས་ཅད་ལ་ལྟ་བའི་ངོ་སྤྲོད་བྱར་ཡོད་པའི་ཚུལ་ནི་ལེགས་པར་ཤེས་པར་འགྱུར་རོ། །
འདི་ནི་གཞུང་བཤད་གཉག་མར།  དེ་དག་ཀྱང་དངོས་ཀྱི་རིག་མ་ལ་བརྟེན་ནས་ཐོབ་ན་རབ།  ཡེ་ཤེས་ཀྱི་རིག་མ་ལ་བརྟེན་ནས་ཐོབ་ན་འབྲིང་།  ཚིག་ཙམ་གྱི་སྒོ་ནས་ཐོབ་ན་ཐ་མ་ཞེས་པའི་དགོངས་པ་བླ་ན་མེད་པ་སྟེ།  རབ་ནི་རྟོགས་
པར་སླ་ལ།  འབྲིང་དང་ཐ་མ་གཉིས་ནི་སྔར་བཤད་པའི་ཡེ་ཤེས་ཀྱི་ཕྱག་རྒྱ་རྐྱང་པ་ལ་བརྟེན་ནས་བདེ་སྟོང་གི་ཡེ་ཤེས་སྐྱེ་མི་སྐྱེ་གཉིས་དང་དོན་གཅིག་པའི་ཕྱིར་ཏེ།  ཚིག་ཙམ་གྱིས་ཞེས་པའི་དོན་ཡང་བདེ་སྟོང་གི་ཡེ་ཤེས་མ་སྐྱེས་ཀྱང་བླ་
མས་དབང་གསུམ་པའི་ཆོ་ག་ཚིག་ཙམ་གྱིས་བརྗོད་པས།  སློབ་མས་ཚུལ་བཞིན་དུ་བསྒོམས་པའི་ཚེ་ཉམས་མྱོང་ཁྱད་པར་ཅན་སྐྱེས་པ་ལ་འཇོག་དགོས་ཀྱི།  གཞན་དུ་ཚིག་བརྗོད་པ་ཙམ་གྱིས་དབང་ཐོབ་པ་སོགས་ནི་བརྒྱུད་པ་འདིའི་
ལུགས་ཀྱི་དགག་བྱ་ཡིན་པའི་ཕྱིར་རོ། །རྣམ་དཔྱོད་དང་ལྡན་ཞིང་གོང་མའི་གསུང་རབ་ལ་འདྲིས་ཆ་ཡོད་པ་དག་གིས་ལེགས་པར་དཔྱོད་ཅིག །མི་ཤེས་པ་དག་ངོ་ཚ་བོར་བའི་གཏམ་ཅི་ཡང་མ་སྨྲ་ཞིག །དེ་ལྟ་བུའི་དབང་བསྐུར་ཐོབ་ཚུལ་
ཐམས་ཅད་ལ་སྤོང་སེམས་སྐྱེ་བར་ཁྱད་པར་མེད་པས་སྤོང་སེམས་རྫོགས་པ་ཡང་དབང་གོང་མ་ལ་ལྟོས་སོ།  གལ་ཏེ་སྤོང་སེམས་ནི་རྩ་བ་དང་།  ཡན་ལག་གི་ལྟུང་བ་ཁོ་ན་སྤོང་བའི་སེམས་པ་ཡིན་པས།  དེ་ཉིད་བུམ་དབང་གི་གནས་སྐབས་
10-5-21a


སུ་ཐོབ་བོ་སྙམ་ན་དེ་ནི་མ་ཡིན་ཏེ།  ཐ་མལ་གྱི་རྣམ་རྟོག་སྤོང་བའི་སྤོང་སེམས་བུམ་དབང་གི་སྐབས་སུ་ཐོབ་ཀྱང་།  གྱ་ནོམ་ལྷར་ཞེན་གྱི་རྣམ་རྟོག་སྤོང་བའི་སྤོང་སེམས་མཆོག་དབང་གསུམ་དུ་ཐོབ་དགོས་པའི་ཕྱིར།  གཞན་
དུ་དེ་ཡང་བུམ་དབང་གི་སྐབས་སུ་ཐོབ་ན།  བསྐྱེད་རིམ་གྱིས་གྱ་ནོམ་ལྷར་ཞེན་གྱི་རྣམ་རྟོག་སྤོང་ནུས་པར་ཡང་འགྱུར་རོ། །སྤོང་སེམས་དེ་གཉིས་ཀྱི་ཐོབ་ཚུལ་བྱེ་བྲག་ཏུ་བཤད་པར་འདོད་ནས།  རྒྱས་གདབ་ལྔ་དང་རྡོ་རྗེའི་བརྟུལ་ཞུགས་དང་། །
དམ་ཚིག་གསུམ་གྱི་བརྡ་དོན་འཕྲོད་པའི་ཚེ། །ཆོས་ཅན་ལྔ་པོ་ཆོས་ཉིད་དང་བཅས་དང་། །སྒོ་གསུམ་ཐ་མལ་རྣམ་རྟོག་སྤོང་སེམས་ཐོབ། །གཞིར་གནས་བྱང་ཆུབ་སེམས་ལ་བླ་མ་ཡི། །བྱང་སེམས་འདྲེས་དང་མས་བརྟན་བཞི་པ་
དང་། །དེ་ཉིད་ཚིག་གི་བརྡ་དོན་འཕྲོད་པའི་ཚེ། །གྱ་ནོམ་ལྷར་ཞེན་རྣམ་རྟོག་སྤོང་སེམས་ཐོབ། །ཅེས་བྱ་བ་སྨོས་ཏེ།  སྤོང་སེམས་དེ་དག་ཀྱང་ཆོ་གའི་སྒོ་ནས་ཐོབ་དགོས་པས་མི་བསྐྱོད་པ་ཆུ་དབང་གི་སྐབས་སུ།  སློབ་མ་དང་
དབང་རྫས་ཀྱི་དག་བྱ་དག་བྱེད་ངོ་འཕྲོད་པའི་སྒོ་ནས་སློབ་མ་ལ་བུམ་པའི་ཆུས་དབང་བསྐུར་ཏེ།  དབུ་རྒྱན་ལ་རིགས་བདག་ཚར་བའི་ཚེ།  ཕུང་པོ་ལྔའི་ནང་ནས་རྣམ་ཤེས་ཀྱི་ཕུང་པོ་དང་།  ཉོན་མོངས་ལྔའི་ནང་ནས་ཞེ་སྡང་ལ་ཐ་མལ་གྱི་
རྣམ་རྟོག་སྤོང་སེམས་ཐོབ་སྟེ།  དེའི་ཚེ་སྦྱང་གཞི་དེ་དག་སྦྱོང་བྱེད་དེའི་ངོ་བོར་བསྒྱུར་བའི་དབང་གི་ཆོ་ག་རྫོགས་པའི་ཕྱིར།  འདི་ཅི་ལྟར་ཤེས་ཞེ་ན།  ཀྱེ་རྡོ་རྗེ་ལས།  དབང་བསྐུར་ནས་སྤྱི་བོར་རང་གི་རིགས་ཀྱི་བདག་པོར་འགྱུར་རོ། །འདིས་
10-5-21b


ནི་ཧེ་རུ་ཀ་རྫོགས་པ་ཉིད་དོ། །ཞེས་བསྐྱེད་རིམ་ཀྱི་སྐབས་སུ་གསུངས་པ་དེ་ཉིད་དབང་གི་སྐབས་སུའང་མཚོན་པའོ། །རིགས་པའི་དབང་གཞན་བཞི་པོའང་དབུ་རྒྱན་ལ་རིགས་བདག་ཚར་བའི་ཚེ།  སྦྱང་གཞི་དེ་དང་དེ་དག་སྦྱོང་བྱེད་དེ་དང་དེའི་
ངོ་བོར་བསྒྱུར་བའི་ཆོ་ག་རྫོགས་པས།  སྦྱང་གཞི་དེ་དང་དེ་དག་ལ་ཐ་མལ་གྱི་རྣམ་རྟོག་སྤང་བའི་སྤོང་སེམས་འཐོབ་བོ། །རྡོ་རྗེའི་བརྟུལ་ཞུགས་ལ་ནི།  རྡོ་རྗེའི་བརྟུལ་ཞུགས་ནམ་ཐོབ་པའི་ཚེ་ཕུང་པོ་ལྔའི་ཆོས་ཉིད་ལ་ཐ་མལ་རྣམ་རྟོག་
སྤང་སེམས་ཐོབ་བོ། །འོན་ཀྱང་རིག་པའི་དབང་ལྔ་ནི་ཆོས་ཅན་ལྔ་ལ་ཐ་མལ་གྱི་རྣམ་རྟོག་སྤོང་སེམས་ཐོབ་པ་གཙོ་བོ་ཡིན་ལ།  འདི་ནི་ཐ་མལ་གྱི་རྣམ་རྟོག་བརྟུལ་ནས།  རྡོ་རྗེ་འཆང་གི་སྐུ་གསུང་ཐུགས་ཀྱི་བརྟུལ་ཞུགས་ལ་གནས་པ་
གཙོ་བོ་ཡིན་པས།  དཀྱིལ་ཆོག་ཕལ་ཆེར་ལས་སྐབས་འདིར་བཤད་ལ།  དཀྱིལ་ཆོག་ཚད་ལྡན་འགའ་ཞིག་ཏུ་རྡོ་རྗེ་སློབ་དཔོན་གྱི་དབང་གི་འོག་ཏུའང་བཤད་དེ་འདྲ་བའོ། །ཕུང་པོ་ལྔའི་ཆོས་ཉིད་ལ་ཐ་མལ་གྱི་རྣམ་རྟོག་སྦྱོང་བའི་
ཆེད་དུ་ལྷར་བསྒོམ་དགོས་ན་བརྟག་གཉིས་ལས།  ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱི་ནས་རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་བརྗོད་པར་བྱ་ཞེས་རང་བཞིན་རྣམ་དག་ལྷར་བསྒོམ་དུ་མེད་
ལ།  ཕྱི་ནས་ཀུན་རྫོབ་ལྷར་བསྒོམས་པར་གསུངས་པ་དང་།  གུར་ལས།  གལ་ཏེ་འགལ་བ་ཡོད་པ་མ་ཡིན་ཡང་། །དེ་ཚེ་རྒྱལ་བའི་དངོས་པོས་སྦྱངས་པ་ཡོད། །ཀུན་རྫོབ་གཟུགས་སུ་རྣམ་པར་གནས་ནས་ནི། །འཁོར་ལོའི་
10-5-22a


གཟུགས་ཀྱི་ཆོས་ཙམ་རྣམ་པར་བརྟག །ཞེས་ཀུན་རྫོབ་ཁོ་ན་ལྷར་བསྒོམ་པར་གསུངས་པ་དང་འགལ་ལོ་སྙམ་ན།  འདིར་ཕུང་པོ་ལྔའི་ཆོས་ཉིད་འཕགས་པའི་སོ་སོ་རང་གིས་རིག་པའི་ཡེ་ཤེས་ཀྱིས་
རིག་པའི་ཆ་ལྷར་བསྒོམ་པ་མ་ཡིན་ཏེ།  དེ་ནི་ལྷ་ཡིན་མིན་གྱི་སྤྲོས་པ་དང་བྲལ་བའི་ཕྱིར་དང་།  ཡུལ་ཅན་དེས་ཡུལ་དེ་ལ་ཐ་མལ་གྱི་རྣམ་རྟོག་ཀྱང་མེད་པའི་ཕྱིར་རོ། །དེ་ཉིད་རྟོག་བློས་འདི་ནི་ཕུང་པོ་ལྔའི་ཆོས་ཉིད་དོ་སྙམ་དུ་གཟུང་
བའི་ཚེ་དེའི་ཡུལ་ནི་རྣམ་གྲངས་པའི་དོན་དམ་དང་།  རྣམ་གྲངས་པའི་ཆོས་ཉིད་ཡིན་གྱི།  རྣལ་འབྱོར་པའི་ཀུན་རྫོབ་ཡིན་པས།  དེ་ལྷར་བསྒོམ་དགོས་ཏེ།  དེ་ལ་ཐ་མལ་གྱི་རྣམ་རྟོག་ཡོད་པས་དེ་སྦྱོང་དགོས་པའི་ཕྱིར་
གནད་འདི་ནི་སློབ་དཔོན་ཟླ་བས།  བདེན་པ་གཉིས་སུ་འཇོག་པ་ནི་འཇིག་རྟེན་པའི་བློ་ལ་ལྟོས་ནས་ཡིན་པར་གསུངས་པ་ལན་ཅིག་མ་ཡིན་པར་ཡང་ཡང་དྲངས་ནས་བསྟན་པའི་སྒྲས་བརྗོད་པའི་བདེན་གཉིས་དང་།  གདུལ་བྱའི་བློ་
ལ་ཐོས་བསམ་གྱི་སྒོ་ནས་ཤར་བའི་བདེན་གཉིས་ཀྱི་ཟླས་ཕྱེ་བའི་དོན་དམ་བདེན་པ་རྣམ་གྲངས་པའི་དོན་དམ་བདེན་པ་ཡིན་པ་རྗེ་བཙུན་གོང་མས་གཏན་ལ་ཕབ་པའི་སྐབས་སུ་མཁོ་ཞིང་།  སྔགས་ཀྱི་གཞུང་རྣམས་སུ་རེས།  སྒོམ་
པ་པོ་མེད་བསྒོམ་པའང་མེད།  ལྷ་མེད་སྔགས་ཀྱང་ཡོད་མ་ཡིན། །ཅེས་དོན་དམ་ལ་བསྒོམ་པ་དང་།  ལྷ་དང་སྔགས་མེད་པར་གསུངས་པ་དང་།  རེས་ཆོས་ཉིད་ལྷར་བསྒོམ་པར་གསུངས་པའི་གནས་སྐབས་རྣམས་སུ་མི་དགོས་
10-5-22b


ཁ་མེད་དུ་ཤེས་པར་བྱའོ། །རྡོ་རྗེ་ཐུགས་ཀྱི་དམ་ཚིག་ངོ་འཕྲོད་པའི་ཚེ་སེམས་ལ་ཐ་མལ་རྣམ་རྟོག་སྤོང་སེམས་ཐོབ་སྟེ།  དེའི་ཚེ་སེམས་ཐོག་མཐའ་མེད་པའི་སེམས་པར་དང་།  རྡོ་རྗེ་སེམས་དཔའ་དང་།  ཀུན་ཏུ་བཟང་པོ་དང་།  
དཔལ་མཆོག་དང་པོའི་སྐྱེས་བུ་སོགས་སུ་རང་བཞིན་གྱིས་རྣམ་པར་དག་པར་ངོ་འཕྲོད་པའི་ཕྱིར།  དྲིལ་བུ་གསུང་གི་དམ་ཚིག་གི་ཚེ་ངག་ལ་ཐ་མལ་གྱི་རྣམ་རྟོག་སྤོང་སེམས་ཐོབ་སྟེ།  དེའི་ཚེ་ངག་སྲིད་པ་རྣམ་པར་དག་པ་གསུང་གི་ངོ་བོ་རང་
བཞིན་གྱིས་རྣམ་པར་དག་པར་ངོ་འཕྲོད་པའི་ཕྱིར།  ཕྱག་རྒྱ་སྐུའི་དམ་ཚིག་གི་ཚེ།  ལུས་ལ་ཐ་མལ་གྱི་རྣམ་རྟོག་སྤོང་སེམས་ཐོབ་སྟེ།  དེའི་ཚེ་ལུས་རྡོ་རྗེ་འཆང་ཆེན་པོ་ཁ་སྦྱོར་གྱི་ངོ་བོར་རྣམ་པར་དག་པར་ངོ་འཕྲོད་པའི་ཕྱིར།  དཀྱིལ་
ཆོག་འགའ་ཞིག་ཏུ།  དམ་ཚིག་འདི་དག་རྡོ་རྗེ་སློབ་མའི་དབང་གི་སྐབས་སུ།  བརྟུལ་ཞུགས་དང་མཉམ་དུ་སྦྱིན་པར་སྣང་ཡང་།  རྣལ་འབྱོར་དབང་ཕྱུག་བརྒྱུད་པ་དང་བཅས་པས་བུམ་དབང་གི་རྡོ་རྗེ་སློབ་དཔོན་གྱི་དབང་གི་དངོས་གཞིར་
མཛད་པ་ནི།  བརྟག་གཉིས་ལས།  རྡོ་རྗེ་རབ་གནས་རྡོ་རྗེ་ཉིད། །ཆེ་དང་དྲིལ་བུ་ཆེན་པོ་བཟུང་། །དེ་རིང་རྡོ་རྗེ་སློབ་དཔོན་གྱུར། །སློབ་མའི་ཚོགས་རྣམས་བསྡུ་བར་གྱིས། །ཞེས་གསུངས་པའི་དགོངས་པར་སྣང་ངོ་། །གཞིར་
གནས་ཀྱི་བྱང་ཆུབ་ཀྱི་སེམས་ལ་བླ་མ་ཡབ་ཡུམ་སྙོམས་པར་ཞུགས་པའི་བྱང་སེམས་འདྲེས་པ་དང་།  དབང་གསུམ་པའི་དངོས་གཞི་ལྷན་སྐྱེས་ཀྱི་སྐབས་དང་།  དེ་ཉིད་ལ་སངས་རྒྱས་ཀྱི་ཡེ་ཤེས་དང་།  འཁོར་འདས་ཐམས་
10-5-23a


ཅད་ཚང་ངོ་ཞེས།  ཚིག་གི་བཞི་པས་བརྡ་དོན་འཕྲོད་པའི་ཚེ།  གྱ་ནོམ་ལྷར་ཞེན་གྱི་རྣམ་རྟོག་སྤོང་སེམས་ཐོབ་སྟེ།  གྱ་ནོམ་ལྷར་ཞེན་གྱི་རྣམ་རྟོག་སྤོང་བའི་བསྒོམ་པ་ནི་གྲོལ་བྱེད་ཀྱི་ལམ་རྫོགས་རིམ་ཡིན་པས་དེའི་
སྨིན་བྱེད་དབང་གོང་མ་གསུམ་ཡིན་པའི་ཕྱིར་རོ། །དེས་ན་སྤོང་སེམས་ཐོབ་ཚུལ་ཉན་ཐོས་ལྟར་སྤང་བྱ་འདི་དག་སྤང་བར་བྱའོ་སྙམ་པའི་རྟོག་པ་མངོན་གྱུར་སྐྱེས་པ་ལ་འཇོག་པ་མ་ཡིན་པར་དབང་གི་ཆོ་གའི་ལག་རྗེས་ལ་མཚོན་བྱ་དོན་གྱི་ཡེ་ཤེས་སམ།  
མཚོན་བྱེད་དཔེའི་ཡེ་ཤེས་སམ།  ཉམས་མྱོང་ཙམ་ཐོབ་པའི་ཚེ་རང་ཤུགས་ཀྱིས་ཐོབ་པར་ཤེས་པར་བྱའོ། །དེ་ཉིད་ལ་རྩོད་པ་སྤོང་བར་འདོད་ནས།  ཡེ་ཤེས་སྐྱེས་ཚེ་སྤོང་སེམས་གཞན་ཡོད་དང་། །རྩ་བའི་ལྟུང་བ་སྤོང་སེམས་
མ་འདུས་དང་། །སྨིན་གྲོལ་སྤང་བྱ་འཆོལ་སོགས་སྐྱོན་རྣམས་ཀྱིས། །མི་སྒྲིབ་རྒྱུ་མཚན་ངག་ལས་ཤེས་པར་བྱ། །ཞེས་བྱ་བ་སྨོས་ཏེ།  གལ་ཏེ་མཚོན་བྱེད་དཔེའི་ཡེ་ཤེས་རྟོག་པ་ཐམས་ཅད་དང་བྲལ་བ་ནམ་མཁའི་
ཟླ་བ་བལྟ་བར་འདོད་པ་ལ་ཆུ་ནང་གི་ཟླ་བའི་གཟུགས་བརྙན་མཐོང་བ་དང་འདྲ་བ་སྐྱེས་བའི་ཚེ་ཡང་ཐ་མལ་གྱི་རྣམ་རྟོག་སྤང་བར་བྱའོ་སྙམ་པའི་སེམས་པ་ཡེ་ཤེས་དེ་ལས་གཞན་དུ་གྱུར་པ་ཞིག་དགོས་སོ་སྙམ་ན།  དེ་ནི་མ་ཡིན་ཏེ།  
འདི་ཉིད་འཁོར་བ་ཞེས་བྱ་སྟེ། །འདི་ཉིད་མྱ་ངན་འདས་པ་ཉིད། །ཅེས་དང་།  དེ་ནི་སྔགས་བཟླས་དེ་དཀའ་ཐུབ་དང་དེ་སྦྱིན་སྲེག །དེ་ནི་དཀྱིལ་འཁོར་ཅན་དང་དེ་ནི་དཀྱིལ་འཁོར་ཉིད། །མདོར་བསྡུས་ན་ནི་སེམས་ནི་འདུས་
10-5-23b


པའི་གཟུགས་ཅན་ནོ་ཞེས་གསུངས་པ་ལྟར།  དེའི་ཚེ་ཡེ་ཤེས་དེའི་ངོ་བོར་མ་གྱུར་པའི་སྣང་བའི་དངོས་པོ་གང་ཡང་མེད་པའི་ཕྱིར་དང་།  རྟོག་པ་མངོན་གྱུར་བ་ནི་སྐབས་དེར་སྐྱེ་མི་སྲིད་པའི་ཕྱིར་རོ། །འདིར་སྤོང་སེམས་ཐམས་
ཅད་ཐ་མལ་གྱི་རྣམ་རྟོག་སྤོང་སེམས་དང་།  གྱ་ནོམ་ལྷར་ཞེན་གྱི་རྣམ་རྟོག་སྤོང་སེམས་གཉིས་སུ་འདུས་ན་རྩ་བ་དང་ཡན་ལག་གི་ལྟུང་བ་སྤོང་བའི་སྤོང་སེམས་རྣམས་མ་འདུས་པར་འགྱུར་རོ་སྙམ་ན།  དེས་ཀྱང་མི་སྒྲིབ་སྟེ།  དེ་
དག་ཐ་མལ་གྱི་རྣམ་རྟོག་སྤོང་བའི་སྤོང་སེམས་སུ་འདུས་པའི་ཕྱིར་རོ། །སྤང་བྱའི་རྣམ་རྟོག་དེ་དག་ཐ་མལ་གྱི་རྣམ་རྟོག་ལས་མ་འདས་པའི་ཕྱིར་རོ། །ཡང་ཐ་མལ་གྱི་རྣམ་རྟོག་དང་།  གྱ་ནོམ་ལྷར་ཞེན་གྱི་རྣམ་རྟོག་གཉིས་གྲོལ་བྱེད་
ཀྱི་ལམ་བསྐྱེད་རྫོགས་གཉིས་ཀྱི་སྤང་བྱར་བཤད་པས་དེ་གཉིས་སྤོང་བའི་སྤོང་སེམས་དབང་གི་གནས་སྐབས་སུ་ཐོབ་ན་སྨིན་གྲོལ་གཉིས་སྤང་བྱ་འཆོལ་བར་འགྱུར་རོ་སྙམ་ན་དེས་ཀྱང་མི་སྒྲིབ་སྟེ།  དབང་ལས་ལོགས་སུ་ལམ་མེད་པར་
དབང་གི་སྐབས་སུ་ཐོབ་པ་དེ་ཉིད་བསྒོམ་པ་ལ་ལམ་དུ་འཇོག་པའི་ལུགས་མཆོག་འདི་ལ་དབང་དང་ལམ་གཉིས་སྤང་བྱ་གཅིག་པ་ཁྱད་པར་གྱི་ཆོས་ཡིན་གྱི་སྐྱོན་མ་ཡིན་པའི་ཕྱིར་རོ། །སོགས་ཀྱིས་བསྡུས་པ་དབང་ལས་ལོགས་
སུ་ལམ་མེད་ཅིང་ལམ་གྱི་སྤང་བྱ་རྣམས་ཀྱང་དབང་གི་སྤང་བྱ་ཡིན་ན།  དབང་བསྐུར་ཉིད་ཀྱིས་གྲོལ་བར་འགྱུར་རོ་སྙམ་ན་དེས་ཀྱང་མི་སྒྲིབ་སྟེ།  དེ་ཉིད་ཀྱི་ཕྱིར་གང་ཟག་རབ་རྒྱལ་པོ་ཨིནྡྲ་བྷཱུ་ཏི་ལྟ་བུ་དབང་བསྐུར་ཉིད་ཀྱིས་གྲོལ་བར་
10-5-24a


གསུངས་ཤིང་།  དབང་གིས་གྲོལ་བར་མ་ནུས་པའི་གང་ཟག་གཞན་གྱིས་བསྒོམ་དགོས་ཀྱང་དབང་བསྐུར་ཐོབ་པ་དེ་བསྲུང་ཞིང་འཕེལ་བར་བྱེད་པ་ལ་བསྒོམ་པ་ཞེས་བཏགས་པ་ཡིན་པའི་ཕྱིར་ཏེ།  སྡོམ་
གསུམ་རབ་དབྱེ་ལས།  དེས་ན་སྙིང་གཏམ་འདི་ལྟར་ཡིན། །དབང་བསྐུར་ཆོས་སྒོ་ཙམ་མ་ཡིན། །གསང་སྔགས་རྟེན་འབྲེལ་ལམ་བྱེད་པས། །རྟེན་འབྲེལ་སྒྲིག་པའི་གདམས་ངག་ཡིན། །ཕུང་པོ་ཁམས་དང་སྐྱེ་མཆེད་ལ། །
སངས་རྒྱས་ས་བོན་བཏབ་ནས་ནི། །ཚེ་འདིར་སངས་རྒྱས་བྱེད་པ་ཡི། །ཐབས་ལ་དབང་བསྐུར་ཞེས་སུ་བཏགས། །དེས་ན་གང་ཟག་དབང་པོ་རབ། །དབང་བསྐུར་ཉིད་ཀྱིས་གྲོལ་བར་གསུངས། །དབང་གིས་གྲོལ་བར་མ་ནུས་
པའི། །གང་ཟག་གཞན་ལ་བསྒོམ་དགོས་སོ། །དེས་ན་དབང་བསྐུར་ཐོབ་པ་དེ། །བསྲུང་ཞིང་འཕེལ་བར་བྱེད་པ་ལ། །བསྒོམ་པ་ཞེས་སུ་བཏགས་པ་ཡིན། །ཞེས་གསུངས་པས་སོ། །དབང་གིས་ཐོབ་པ་དེ་ཉིད་ལམ་དུ་
ཇི་ལྟར་བསྒོམ་སྙམ་ན། །དེ་རྗེས་དཀྱིལ་འཁོར་དེའམ་གཞན་དུའང་རུང་། །རྒྱུ་དབང་བཞི་དང་ལུས་དཀྱིལ་དབང་བཞི་དང་། །བླ་མའི་རྣལ་འབྱོར་བྱིན་རླབས་རིམ་གཉིས་སོགས། །ཐོབ་པའི་སྡོམ་པ་ཡང་ཡང་གོམས་པའི་ཐབས། །
ཞེས་བྱ་བ་ཡིན་ཏེ།  དང་པོ་དཀྱིལ་འཁོར་གཅིག་ཏུ་སྨིན་བྱེད་ཀྱི་དབང་བཞི་ཐོབ་ནས་དེའི་རྗེས་སུ་དཀྱིལ་འཁོར་དེ་ཉིད་དང་།  དཀྱིལ་འཁོར་གཞན་དུའང་རུང་སྟེ་བླ་མ་ལས་དབང་བཞི་ལེན་པའམ་རང་ཉིད་ཀྱིས་དཀྱིལ་འཁོར་བྲིས་ནས་
10-5-24b


བདག་འཇུག་གི་ཚུལ་གྱིས་ལེན་པ་ཐམས་ཅད་ཀྱང་སྨིན་བྱེད་ཀྱི་སྐབས་སུ་ཐོབ་པའི་སྡོམ་པ་ཐོབ་པ་ཡང་ནས་ཡང་དུ་གོམས་པའི་ཐབས་ཡིན་པས་ལམ་ཉིད་དུ་འགྱུར་རོ། །དེ་བཞིན་དུ་བདེ་མཆོག་ལུས་དཀྱིལ།  རྡོ་རྗེ་བདག་མེད་མ་
ཀྱེ་རྡོ་རྗེའི་ལུས་དཀྱིལ་ལ་བརྟེན་ནས་དབང་བཞི་བླ་མ་ལས་ལེན་པའམ།  རང་ཉིད་ཀྱི་ཏིང་ངེ་འཛིན་གྱིས་ཐུན་བཞི་ལ་སོགས་པའི་ཚུལ་གྱིས་ལེན་པ་ཡང་དེ་དང་འདྲ་སྟེ།  འདི་ལ་སྨིན་བྱེད་སྔོན་དུ་འགྲོ་དགོས་པའི་གནད་ཀྱང་འདི་ཉིད་
ཡིན་ཏེ།  དེ་བཞིན་དུ་གང་ཟག་དབང་པོ་རབ་ལམ་ཟབ་མོ་བླ་མའི་རྣལ་འབྱོར་ཁོ་ན་བསྒོམ་པ་དང་།  རྫོགས་རིམ་ཟབ་མོ་འགའ་ཞིག་བསྒོམ་པའི་སྔོན་དུ་བྱིན་རླབས་ཀྱི་ཆོ་ག་ཉམས་སུ་ལེན་པ་རྣམས་ཀྱང་ཐོབ་པའི་སྡོམ་པ་གོམས་
པའི་ཐབས་ཡིན་པ་ཡང་སྔ་མ་དང་འདྲའོ། །སོགས་ཀྱི་སྒྲས་བསྡུས་པ་རིམ་གཉིས་བརྩོན་འགྲུས་དྲག་པོས་ཚུལ་བཞིན་དུ་བསྒོམ་པ་དང་།  རིམ་གཉིས་བརྩོན་འགྲུས་དྲག་པོས་མ་བསྒོམས་ཀྱང་དམ་ཚིག་དང་སྡོམ་པ་ཚུལ་བཞིན་དུ་
བསྲུངས་ན་སྐྱེ་བ་བཅུ་དྲུག་ཚུན་ཆད་ནས་འགྲུབ་པ་རྣམས་ཀྱང་སྟེ།  སྔ་མ་ནི་སྐུ་བཞིའི་ས་བོན་དེ་ཉིད་ལ་འགལ་རྐྱེན་མེད་པའི་སྟེང་དུ་མཐུན་རྐྱེན་རླབས་པོ་ཆེ་མྱུར་དུ་འགྲུབ་པའི་དབང་དུ་བྱས་ལ།  ཕྱི་མ་ནི་འགལ་རྐྱེན་མེད་ན་དུས་
རིང་མོ་ཞིག་ནས་སྐུ་བཞིའི་ས་བོན་དེ་ཉིད་ངང་གིས་འཕེལ་ཏེ་འབྲས་བུ་འགྲུབ་པའི་དབང་དུ་བྱས་པའོ། །འདིས་ཀྱང་ལུགས་འདིའི་སྔགས་སྡོམ་རྫོགས་པ་ལ་དབང་བཞི་རྫོགས་པར་ཐོབ་དགོས་པར་གྲུབ་སྟེ།  སྔགས་སྡོམ་རྫོགས་
10-5-25a


པར་ཐོབ་ནས་དམ་ཚིག་ཚུལ་བཞིན་དུ་བསྲུངས་ན་སྐྱེ་བ་བཅུ་དྲུག་ནས་འགྲུབ་པ་ནི་འདིའི་དོན་ཡིན་ཞིང་།  བུམ་དབང་གིས་སྔགས་སྡོམ་རྫོགས་ན་དབང་གོང་མ་མ་ཐོབ་པར་འབྲས་བུ་འགྲུབ་པར་ཐལ་བའི་
ཕྱིར་རོ། །འདི་དག་ལ་སྒྲུབ་བྱེད་འགོད་པར་འདོད་ནས།  དབང་གི་རབ་དབྱེ་བཅུ་གཉིས་གསུངས་པ་དང་། །ལམ་དུས་དབང་དང་ལམ་ཟབ་བླ་མ་ཡིས། །རིམ་གཉིས་བསྒོམ་པ་མེད་ཀྱང་དངོས་གྲུབ་མཆོག །
འགྲུབ་པར་གསུངས་པ་འདི་ལ་འཐད་པ་ཡིན། །ཞེས་བྱ་བ་སྨྲོས་ཏེ་རྗེ་བཙུན་གྱི་དབང་གི་རབ་དབྱེར་སྔར་མ་སྨིན་པ་ཅིག་སྦྱོར་དངོས་མཇུག་གིས་གཞན་ལ་ལེན་པ་རྒྱུ་དུས་ཀྱི་དབང་དང་།  དེ་ནས་ཆོ་ག་དེ་ཉིད་ཀྱིས་དབང་དེ་ཡང་ནས་
ཡང་དུ་གཞན་ལ་ལེན་པ་རྒྱུའི་དབང་ལམ་དུ་བྱེད་པ་དང་།  ཆོ་ག་དེ་ཉིད་ཀྱིས་རང་གིས་ལེན་པ་རྒྱུའི་དབང་ཏིང་ངེ་འཛིན་གྱི་ལམ་དུ་བྱེད་པ་དང་།  ས་ཆོག་ཡན་ཆད་གཏོར་མ་བྱིན་ཏེ་བདེན་པ་བདར་བ་ཙམ་བྱས་ནས་ལྷ་ལྷག་གནས་མན་ཆད་
ལེན་པ་དང་།  སློབ་མ་ལྷག་གནས་ཡན་ཆད་དོར་ནས་དེའི་དོད་རྒྱུན་བཤགས་བཅུག་སྟེ་གཞན་རྣམས་ལེན་པ་དང་།  འཇུག་པ་ཡན་ཆད་དོར་ནས་དེའི་དོད་རིགས་ལྔའི་སྡོམ་བཟུང་བཅུག་སྟེ་གཞན་རྣམས་ལེན་པ་དང་།  སྡོམ་པ་བསྒྲག་
གཟུང་གཉིས་མདོར་བསྡུས་ཀྱིས་བཟུང་ནས་བུམ་དབང་མན་ཆད་ལེན་པ་དང་།  རྒྱུན་བཤགས་སྔོན་དུ་བཏང་ནས་དབང་བཞི་ཚིག་བཞིས་ལེན་ཅིང་།  མཇུག་འབྲས་བུའི་དབུགས་དབྱུང་ཙམ་སྟེར་བ་དང་།  བྱང་ཆུབ་སེམས་
10-5-25b


ཀྱི་ཆུ་རྒྱུན་གཅིག་ལ་དབང་བཞི་ལེན་པ་དང་།  འཇུག་འདྲ།  རྒྱུན་བཤགས་སྔོན་དུ་སོང་ནས་རིགས་ལྔའི་སྡོམ་གཟུང་གིས་ལེན།  གཙོ་བོས་ཇི་ལྟར་བཀའ་བསྩལ་སོགས་མཇུག་དམ་ཚིག་གྲུབ་པར་ཁས་བླངས་པ་དང་།  དེ་བཞིན་གཤེགས་
པ་ཐམས་ཅད་ཀྱིས་ཅིག་ཆར་དབང་བསྐུར་ཏེ།  འབྲས་བུ་ལ་མཚམས་སྦྱོར་བ་དང་།  ཟབ་ལམ་གང་རུང་གཅིག་གིས་དབང་བཞི་ལེན་པ་སྟེ་རིམ་པ་བཅུ་གཉིས་སོ། །དེ་ལྟར་བླང་ཚུལ་དེ་དག་ལས་དང་པོ་ནི།  སྔར་མ་སྨིན་པ་ལ་བྱ་ཞིང་།  
གཉིས་པ་ནི་ཆོ་ག་མི་ཤེས་པ་ལའང་བྱ།  གསུམ་པ་ནས་བཅུ་པའི་བར་ནི་རང་གཞན་དབང་གིས་སྨིན་པ་ལ་དུས་སྐབས་དང་དགག་དགོས་བརྩིས་ལ་བྱ་ཡིས།  མུ་ཅོར་དུ་ནི་མི་བྱའོ། །བཅུ་གཅིག་པ་ནི་གང་ཟག་མཆོག་ཁོ་ན་ཡིན་ལ།  
བཅུ་གཉིས་པ་ནི་ཁྲིད་བསྐྱངས་པ་རྣམས་ལ་དུས་སྐབས་དང་དྲོད་ཚད་ལ་སྦྱར་ལ་བྱའོ། །ཕན་ཡོན་ནི་ལམ་ལ་མ་ཞུགས་པ་རྣམས་ཀྱི་བར་ཆད་ཞི་ཞིང་།  མཐུན་རྐྱེན་ཚང་བ་དང་རིམ་གྱིས་ལམ་ལ་འཇུག་པ་རྣམས་སྣོད་དུ་རུང་བ་དང་།  ལམ་
ཞུགས་རྣམས་ཀྱི་དགེ་སྦྱོར་གྱི་བོགས་འདོན་པ་དང་།  ཡན་ལག་གི་ཉེས་པ་ཐམས་ཅད་འདག །ཐུན་བཞིར་བླངས་ན་རྩ་བའི་ལྟུང་བ་མི་འབྱུང་།  མཐར་བརྩོན་པ་ཆེ་འབྲིང་ཆུང་གསུམ་གྱི་བྱེ་བྲག་གིས་ཚེ་འདི་འམ།  བར་དོ།  སྐྱེ་བ་བདུན་ནམ་བཅུ་
དྲུག་ཚུན་ཆད་དུ་གྲོལ་ཏེ།  རྒྱུད་ལས་འབྱུང་ངོ་། །ཞེས་གསུངས་སོ། །འདི་དག་གིས་ནི་རིམ་གཉིས་བསྒོམ་པ་མེད་ཀྱང་དབང་བསྐུར་ཉིད་ཀྱིས་གྲོལ་བར་གསུངས་ཤིང་།  དེ་ཡང་ཐོག་མར་སྨིན་བྱེད་ཀྱི་དབང་བཞིའི་སྐབས་སུ་ཐོབ་པའི་
10-5-26a


སྡོམ་པ་དེ་ཉིད་དབང་ཕྱི་མ་རྣམས་ཀྱིས་གོང་ནས་གོང་དུ་འཕེལ་བའི་གནད་ཀྱིས་སོ། །ལམ་དུས་ཀྱི་དབང་དང་།  ལམ་ཟབ་དང་།  བྱིན་རླབས་ཀྱིས་གྲོལ་བ་ཡང་འདི་ཉིད་ལས་འབྱུང་མོད་ཀྱི།  བྱེ་བྲག་ཕྱེ་ན་རྡོ་
རྗེའི་ཚིག་རྐང་ལས་ལམ་གྱི་ཐུན་བཞི་ལ་ཞེས་སོགས་དང་།  ཀླུ་སྒྲུབ་ཡབ་སྲས་གཉིས་ཆར་གྱིས།  རི་དབང་རྩེ་ལས་འགའ་ཞིག་ལྷུང་གྱུར་ན། །ལྷུང་བར་མི་འགྱུར་སྙམ་ཡང་ལྷུང་བར་འགྱུར། །བླ་མའི་དྲིན་གྱིས་ཕན་པའི་ལུང་
ཐོབ་ན། །གྲོལ་བར་མི་འགྱུར་སྙམ་ཡང་གྲོལ་བར་འགྱུར། །ཞེས་སོགས་དང་།  མན་ངག་ཟབ་མོའི་སྐབས་སུ་ཡང་བླ་མའི་རྣལ་འབྱོར་ཚུལ་བཞིན་བསྒོམས་ན་དེ་ལས་གཞན་བླ་མས་ཐུན་གཅིག་བསྟན་པ་མེད།  སློབ་མས་ཐུན་
གཅིག་བསྒོམས་པ་མེད་ཀྱང་གྲོལ་བར་གསུངས་པ་རྣམས་ངེས་པའི་དོན་ཏུ་གསུངས་པ་ལས་ཀྱང་འགྲུབ་བོ། །དེའི་རྒྱུ་མཚན་ཡང་རིམ་གཉིས་ཚུལ་བཞིན་དུ་བསྒོམ་པ་དང་།  འདི་དག་དབང་བཞིའི་སྐབས་སུ་ཐོབ་པའི་སྡོམ་པ་གོང་
འཕེལ་དུ་བྱེད་པའི་ཐབས་སུ་མཚུངས་པའི་ཕྱིར་རོ། །དབང་ལས་ཐོབ་ཅིང་ལམ་གྱིས་གོམས་པ་དེ་ཉིད་འབྲས་བུའི་སྐབས་སུ་ཇི་ལྟར་མངོན་དུ་འགྱུར་སྙམ་ན།  དབང་ལས་བྱུང་བ་ཐབས་ཀྱིས་གོམས་པ་ཡིས། །བདེ་ཆེན་སྒྲིབ་པ་འགགས་
ནས་རང་སྣང་གི།  ཡེ་ཤེས་སྐྱེས་ཚེ་ཤེས་བྱ་མ་ལུས་པ། །གསང་གསུམ་ངོ་བོར་སྡོམ་པ་འབྲས་བུའི་སྡོམ། །ཞེས་བྱ་བ་སྨོས་ཏེ།  སྔར་རྒྱུ་དུས་སུ་སྣང་བ་ཐམས་ཅད་གསལ་སྟོང་ཟུང་འཇུག་གི་ངོ་བོར་རང་བཞིན་གྱིས་སྡོམ་པ་དེ་
10-5-26b


དབང་གིས་སྐབས་སུ་ཐབས་ཀྱི་ངོ་བོར་གྱུར་པའི་སྡོམ་པར་བསྒྱུར་ནས་དེ་ཉིད་སྔར་བཤད་པའི་ལམ་གྱི་གཙོ་བོ་དེ་དག་གིས་གློ་བུར་གྱི་དྲི་མ་མ་ལུས་པ་དང་བྲལ་བར་བྱས་ནས་ཤེས་བྱའི་སྣང་བ་ཉིད་ཀྱང་ཡེ་ཤེས།  ཡེ་ཤེས་ཉིད་ཀྱང་སྣང་བ།  དེ་
དག་ཀྱང་སྟོང་པ།  སྟོང་པ་ཡང་དེ་དག་དང་དབྱེར་མེད་པའི་རང་སྣང་གི་ཡེ་ཤེས་སྐྱེས་པའི་ཚེ་ཤེས་བྱ་ཐམས་ཅད་སྐུ་གསུང་ཐུགས་ཀྱི་གསང་བ་གསུམ་གྱི་ངོ་བོར་སྡོམ་པ་ནི་འབྲས་བུའི་སྡོམ་པ་སྟེ།  ཀྱེ་རྡོ་རྗེ་ལས།  དེ་ནས་ཆོས་ཀུན་སྡོམ་
ཅིག་པའི། །རྡོ་རྗེ་སེམས་དཔའ་ཞེས་བྱས་བསྟན། །ཞེས་དང་།  སམ་བྷུ་ཊི་ལས།  དངོས་དང་དངོས་མེད་ལས་གྲོལ་བ། །རྡོ་རྗེ་སེམས་དཔའ་བདེ་བའི་སྡོམ། །ཞེས་པ་རྣམས་ཀྱིས་བསྟན་ཏོ། །དེ་བཞིན་དུ་སམ་བྷུ་ཊི་
ལས།  བསམ་གྱིས་མི་ཁྱབ་པའི་གནས་ཞེས་གསུངས་པའི་དོན།  རྗེ་བཙུན་རྩེ་མོས།  ཤེས་བྱ་ཐམས་ཅད་རང་སྣང་གི་ཡེ་ཤེས་སུ་བཤད་པ་ཡང་སྡོམ་པའི་དོན་ཉིད་དུ་སྣང་སྟེ།  སྡོམ་པའི་དོན་མང་པོ་གཅིག་ཏུ་སྡོམ་པ་དང་།  
སྤང་བྱ་མི་མཐུན་པའི་ཕྱོགས་སྡོམ་པ་གཉིས་ཀ་ཡང་འདི་ལ་ཚང་བའི་ཕྱིར་རོ། །སྡོམ་པ་ཐམས་ཅད་མཐར་འབྲས་བུའི་སྡོམ་པར་འགྲོ་བ་འདིའི་སྒྲུབ་བྱེད་གང་ཞེ་ན།  འབྲས་བུའི་རྣམ་པ་ལམ་དུ་བྱེད་དགོས་པས། །ལམ་གྱི་
དུས་སུ་ཤེས་བྱ་མ་ལུས་པ། །ལྷ་དང་བདེ་ཆེན་ངོ་བོར་བསྒོམ་པ་ནི། །འབྲས་བུའི་སྡོམ་པ་འདི་ཡི་སྒྲུབ་བྱེད་ཡིན། །ཞེས་བྱ་བ་འདི་ཡིན་ཏེ།  འབྲས་བུའི་དུས་ན་སྣང་བ་ཐམས་ཅད་སྐུའི་གསང་བ་དང་།  གསུང་གི་གསང་བ་
10-5-27a


དང་།  ཐུགས་ཀྱི་གསང་བ་གསུམ་གྱི་ངོ་བོར་སྡོམ་པ་ཡིན་གྱི་དེ་ལས་ལོགས་སུ་གྱུར་པའི་མ་དག་པའི་སྣང་བ་མེད་པའི་སྒྲུབ་བྱེད་ཀྱང་།  ལུང་དང་རིགས་པ་གཉིས་ལས།  ལུང་ནི།  ཐེག་པ་ཆེན་པོ་
ཕ་རོལ་ཏུ་ཕྱིན་པ་དང་།  རྡོ་རྗེ་ཐེག་པ་གཉིས་ཅར་དུ།  སངས་རྒྱས་རང་སྣང་ལ་མ་དག་པའི་སྣང་བ་མེད་པར་གསུངས་པ་མཐའ་དག་ཡིན་ལ།  རིགས་པ་ནི།  ལམ་གྱི་སྐབས་སུ་བསྐྱེད་རིམ་གྱིས་སྣང་བ་ཐམས་ཅད་ལྷའི་ངོ་བོར་
སྡོམ་པ་དང་།  རྫོགས་རིམ་གྱིས་དེ་དག་ཀྱང་ཡེ་ཤེས་ཀྱི་ངོ་བོར་སྡོམས་ནས་བསྒོམ་པ་འདི་ཉིད་དེ།  བསྐྱེད་རྫོགས་འདི་དག་འབྲས་བུའི་རྣམ་པ་ལམ་དུ་བྱེད་པ་ཡིན་ཞིང་།  འབྲས་བུའི་དུས་སུ་དེ་ལྟ་བུའི་སྡོམ་པ་མེད་ན་འབྲས་
བུ་ལམ་བྱེད་དུ་མི་འགྱུར་བའི་ཕྱིར་རོ། །འདི་ལ་དགོངས་ནས་རྗེ་བཙུན་གྱིས།  རིག་པ་འཛིན་པ་ནི་དེ་དག་ཀྱང་ལྷའི་རྣམ་པར་ཡེ་ཤེས་ཀྱིས་བྱིན་གྱིས་བརླབས་ནས་ལོངས་སྤྱོད་པས་འདི་ལ་འགལ་བ་ཅི་ཞིག་ཡོད་ཅེས་གསུངས་སོ། །
དབང་དང་རིམ་གཉིས་ལས་བྱུང་བའི་སྡོམ་པ་དེ་དག་ཀྱང་མཚོན་བྱེད་དཔེའི་ཡེ་ཤེས་མ་སྐྱེས་པར་ས་བོན་ཙམ་ལ་སྔགས་སྡོམ་དུ་འཇོག་པའི་ཚེ་དཔེ་དང་དོན་གྱི་དབྱེ་བ་མེད་ཀྱང་།  ཡེ་ཤེས་སྐྱེས་པའི་ཚེ་ཡེ་ཤེས་ལས་ལོགས་སུ་སྡོམ་
པ་མེད་པས་དེ་དག་ཀྱང་དཔེ་དང་དོན་གྱི་ཡེ་ཤེས་གཉིས་སུ་བསྡུ་བར་འདོད་ནས།  དབང་དང་ལམ་ལས་བྱུང་བའི་ཡེ་ཤེས་བཞི། །སོ་སྐྱེའི་དུས་སུ་དཔེ་ཡི་སྡོམ་པ་ཡིན། །མཐོང་བའི་ལམ་ནས་རྡོ་རྗེ་འཛིན་པའི་བར། །དོན་གྱི་སྡོམ་
10-5-27b


པ་ཡིན་ཏེ་ཕྱག་ཆེན་བཞིན། །ཞེས་བྱ་བ་སྨོས་ཏེ།  མཚོན་བྱེད་དཔེའི་ཡེ་ཤེས་སྐྱེས་པ་ནས་གཟུང་སྟེ།  ཅི་སྲིད་དོན་གྱི་ཡེ་ཤེས་མ་སྐྱེས་ཀྱི་བར་གྱི་ཡེ་ཤེས་ཐམས་ཅད།  མཚོན་བྱེད་དཔེའི་སྡོམ་པ་ཞེས་བྱ་བར་གཞག་ཏུ་
རུང་སྟེ།  དོན་གྱི་ཡེ་ཤེས་མཚོན་པར་ནུས་པའི་ཆ་ནས་མཚོན་བྱེད་དཔེའི་ཡེ་ཤེས་དང་།  དོན་གྱི་ཕྱག་ཆེན་མཚོན་པར་ནུས་པའི་ཆ་ནས་དཔེའི་ཕྱག་ཆེན་དུ་འཇོག་པ་ལྟར་འདིར་ཡང་རང་གི་ཡེ་ཤེས་དེ་ཉིད་དོན་གྱི་སྡོམ་པ་མཚོན་
པར་ནུས་པའི་ཆ་ནས་དཔེའི་སྡོམ་པར་འཇོག་པ་ཡིན་ནོ། །དབང་དང་རིམ་གཉིས་ལས་བྱུང་བའི་ཡེ་ཤེས་དེ་ཉིད་སྡོམ་པར་འཐད་ན་དཔེའི་སྡོམ་པར་འཇོག་ཏུ་རུང་ཡང་།  དེ་ཉིད་སྡོམ་པར་མི་འཐད་དོ་ཞེ་ན།  འདིའི་སྒྲུབ་བྱེད་
སྔར་ཡང་ཅུང་ཟད་བཤད་ཟིན་ཅིང་།  རྒྱས་པར་ནི་འཆད་པར་འགྱུར་རོ། །དེ་ཉིད་ཀྱི་རིགས་པས་ལམ་འདིས་ཐོབ་པའི་མཐོང་ལམ་ནས་བཟུང་སྟེ།  རྡོ་རྗེ་འཛིན་པའི་སའི་བར་གྱི་སྡོམ་པ་ཐམས་ཅད་དོན་གྱི་སྡོམ་པ་ཞེས་བྱ་བར་གྲུབ་
བོ། །དེ་ལྟར་ན་སོ་སྐྱེའི་དུས་ཀྱི་སྡོམ་པ་ནི་དཔེ་ཙམ་ཡིན་པས་སྡོམ་པ་མཚན་ཉིད་པར་མི་འགྱུར་རོ་སྙམ་ན།  སྤྱིར་སྡོམ་པའི་དཔེ་ཡིན་ཅེས་པའི་དོན་མ་ཡིན་གྱི།  འབྲས་བུའི་སྡོམ་པ་མཐའ་དག་མཚོན་ནུས་པའི་དཔེར་འཇོག་པས་
སྐྱོན་མེད་དོ། །ཀུན་མཁྱེན་ཡེ་ཤེས་དེ་ལྟ་བུ་ཞེས་གསུངས་པ་ལྟར་རོ། །གཞན་དུ་ན་ཡེ་ཤེས་ལ་ཡང་མཚུངས་སོ། །ད་ནི་རིག་པ་འཛིན་པའི་སྡོམ་པ།  སྡོམ་པ་འོག་མ་གཉིས་དང་བཅས་ཏེ།  གང་དུ་སྡོམ་པའི་གནས་ལ་
10-5-28a


སོགས་པ་ལྔའི་སྒོ་ནས་གནད་མ་ལུས་པ་གཏན་ལ་དབབ་པར་འདོད་ནས།  གང་དུ་སྡོམ་དང་སྤང་བྱ་གང་སྡོམ་དང་། །ཇི་སྙེད་སྡོམ་དང་སྡོམ་པའི་ངོ་བོ་དང་། །གང་གིས་སྡོམ་པ་དོན་ཆེན་རྣམ་ལྔ་ཡིས། །སྡོམ་གསུམ་
མ་ལུས་གཏན་ལ་དབབ་པར་གསུངས། །ཞེས་བྱ་བ་སྨོས་ཏེ།  རྗེ་བཙུན་གྱི་དག་ལྡན་ལས།  གཉིས་པ་སྡོམ་པའི་དབྱེ་བ་ནི་སྡོམ་པའི་དབྱེ་བའང་བཤད་པར་བྱ་སྟེ།  ཞེས་བྱ་བ་ལ་སོགས་པ་སྟེ།  འདི་ལ་སྤྱིའི་དོན་དང་།  ཡན་ལག་གི་དོན་གཉིས་ལས།  
དང་པོ་ལ་ལྔ་སྟེ།  གནས་གང་དུ་སྡོམ་པ་དང་།  ཇི་སྙེད་སྡོམ་པ་དང་།  གང་སྡོམ་པ་དང་།  སྡོམ་པ་རང་གི་ངོ་བོ་དང་།  ཐབས་གང་གིས་སྡོམ་པའོ། །དང་པོ་གང་དུ་སྡོམ་ན་ཕྱི་རོལ་ཏུ་ན་ལེནྟྲ་ལ་སོགས་པའི་གཙུག་ལག་ཁང་དུ།  རྩ་
བའི་སྡེ་བ་བཞི་གནས་པ་ལྟར།  འདིར་གང་དུ་སྡོམ་པའི་གནས་ནི་རང་གི་ལུས་ཏེ་འཁོར་ལོ་བཞི་དང་།  རྩ་གསུམ་ལ་སོགས་པའོ། །ཇི་སྙེད་ཅིག་སྡོམ་ན་ཕྱི་རོལ་ཏུ་སྤོང་བའི་ཆོས་མང་པོ་བསྡུས་པ་ལྟར།  འདིར་ཇི་སྙེད་ཡོད་པའི་
ཆོས་ཐམས་ཅད་ཀྱང་རྩ་འཁོར་ལོ་ལ་སོགས་པར་བསྡུས་པས།  སྤྲོས་པ་ཐམས་ཅད་འདིར་ཆོད་པར་བྱས་པས་ལམ་ལ་སོམ་ཉི་སེལ་བར་བྱེད་དོ། །གང་སྡོམ་ན་མི་མཐུན་པའི་ཕྱོགས་སྡོམ་པས་སྡོམ་པ་སྟེ།  ཕྱི་རོལ་ཏུ་ཉན་ཐོས་ལུས་ངག་
གི་ཁ་ན་མ་ཐོ་བ་སྡོམ་ཞིང་།  བྱང་ཆུབ་སེམས་དཔའ་སེམས་ཀྱི་ཁ་ན་མ་ཐོ་བ་སྡོམ་ལ།  འདིར་མཚན་མ་དང་རྣམ་པར་རྟོག་པ་ཐམས་ཅད་སྡོམ་པའོ། །སྡོམ་པ་རང་གི་ངོ་བོ་ནི།  དེས་བདེ་བར་གྱུར་པས་སྡོམ་པ་སྟེ།  མཐུན་པ་རྣམས་ཀྱི་
10-5-28b


བཀའ་ཐུབ་བདེ། །ཞེས་བྱ་བ་ལ་སོགས་པ་ལྟ་བུར་འདིར་ཡང་རང་བྱུང་གི་ཡེ་ཤེས་བདེ་བ་མཆོག་ཏུ་གྱུར་པ་སྟེ།  སམ་ཞེས་བྱ་བ་བདེ་བར་བཤད། །སངས་རྒྱས་ཀུན་གྱི་བདེ་ཆེན་ཡིན། །སྒྱུ་མ་ཐམས་ཅད་མཉམ་སྦྱོར་བས། །མཆོག་
ཏུ་བདེ་བ་བདེ་བའི་མཆོག །ཅེས་མཉམ་སྦྱོར་ལས་གསུངས་པ་ལྟ་བུའོ། །སྡོམ་པའི་ཐབས་ནི་ཕྱི་རོལ་ཏུ་བརྗོད་པས་ཐོབ་པ་ལྟར།  འདིར་ཕྱག་རྒྱའི་ལམ་མམ་གཏུམ་མོ་འབར་བ་དང་འཛག་པ་ལ་སོགས་པ་སྟེ་སྤྱིའི་དོན་ཏོ། །ཡན་ལག་གི་
དོན་ལ་སྡོམ་པའི་དབྱེ་བའང་བཤད་པར་བྱ་སྟེ།  ཞེས་པའི་སྡོམ་པ་ནི་བཤད་ཟིན་ལ།  དབྱེ་བ་ནི་ཕྱི་རོལ་ན་ཇི་སྙེད་ཡོད་པ་དེ་ནང་དུ་སྤྲོས་པ་གཅོད་པ་ཡིན་ཏེ།  ཇི་ལྟར་ཕྱི་རོལ་དེ་ལྟར་ནང་། །སྡོམ་པའི་དེ་ཉིད་རབ་ཏུ་དབྱེ། །ཞེས་
འཆད་པར་འགྱུར་རོ། །དེ་ལས་འདིར་གནས་དང་།  མང་པོ་གཅིག་ཏུ་སྡོམ་པ་དང་།  ཐབས་བསྟན་ལ།  གཉིས་པོ་ཤུགས་ཀྱིས་འབྱུང་ངོ་། །ཞེས་གསུངས་སོ། །དེ་དག་གི་དོན་ཡང་སྡོམ་པའི་སྐད་དོད་ལ།  སམ་བ་ར་ཞེས་པའི་
སམ་བདེ་བ་དང་།  བ་ར་མཆོག་ལ་འཇུག་པས།  བདེ་བའི་མཆོག་གམ།  མཆོག་ཏུ་བདེ་བ་སྟེ།  དེ་ཉིད་ཀྱང་སྤང་བྱ་མི་མཐུན་པའི་ཕྱོགས་སྡོམ་པའི་སྒོ་ནས་བདེ་བ་ཡིན་གྱི་ཚོར་བ་བདེ་བ་ལྟ་བུ་མ་ཡིན་པས་ན་སྡོམ་པར་ཡང་བསྒྱུར་རོ། །
དེ་ལྟ་བུའི་སྡོམ་པའི་སྒྲ་དོན།  སྡོམ་པ་གསུམ་ཆར་ལ་འཆད་དགོས་པས།  འདིར་རྗེ་བཙུན་གྱིས་སོ་ཐར་གྱི་སྡོམ་པ་ལ་གནས་སོགས་ལྔའི་སྒོ་ནས་སྡོམ་པར་འཇོག་པ་དཔེར་བྱས་ནས་རྫོགས་རིམ་གྱི་སྡོམ་པ་གནས་སོགས་ལྔའི་སྒོ་ནས་སྡོམ་
10-5-29a


པར་འཇོག་པར་གསུངས་པའི་སྐབས་དོན་རྫོགས་རིམ་གྱི་སྡོམ་པ་འཆད་པའི་སྐབས་ཡིན་པ་ལ་དགོངས་སོ། །དེ་ཉིད་ཀྱི་རིག་པས་བྱང་སེམས་ཀྱི་སྡོམ་པ་དང་།  བསྐྱེད་རིམ་གྱི་སྡོམ་པ་ཡང་གནས་སོགས་ལྔའི་སྒོ་ནས་
འཇོག་པར་འགྲུབ་སྟེ།  འདི་ཉིད་ཀྱི་སྤང་བྱ་གང་སྡོམ་པའི་སྐབས་སུ་བྱང་སེམས་སེམས་ཀྱི་ཁ་ན་མ་ཐོ་བ་སྡོམ་པར་གསུངས་པ་ལས་ཞེས་སོ། །དེས་ན་སྐབས་འདིར་སྡོམ་པ་རང་གི་ངོ་བོ་མཐུན་པ་རྣམས་ཀྱི་དཀའ་ཐུབ་བདེ་ཞེས་པ་དཔེར་བྱས་ནས་
རང་བྱུང་ཡེ་ཤེས་བདེ་བ་མཆོག་ཏུ་གྱུར་པ་ལ་དངོས་སུ་གསུངས་པས་རྫོགས་རིམ་གྱི་སྡོམ་པ་ཞེས་པའི་ཐ་སྙད་ཀྱང་མི་འཐད་པ་དང་།  དེ་འཐད་ཀྱང་རྫོགས་རིམ་གྱི་སྡོམ་པ་སྡོམ་པ་མ་ཡིན་པར་འདོད་པ་རྣམས་ནི་རྒྱུད་དང་གོང་མའི་གསུང་
རབ་འདི་དག་དང་འགལ་ལོ། །གལ་ཏེ་རྫོགས་རིམ་གྱི་སྡོམ་པ་སྡོམ་པ་ཡིན་ཀྱང་ཕྱིས་རྫོགས་རིམ་བསྒོམ་པ་ལས་སྐྱེ་བ་ཡིན་གྱི་སྔར་དབང་གི་གནས་སྐབས་སུ་ཐོབ་པ་མི་འཐད་དེ།  དབང་གི་སྐབས་སུ་ཐོབ་པའི་བཤད་པ་མེད་པའི་ཕྱིར་
དང་།  འདིར་ཡང་སྡོམ་པའི་ཐབས་ཕྱག་རྒྱའི་ལམ་མམ།  གཏུམ་མོ་འབར་འཛག་ཉིད་ལ་བཤད་པས་སོ་སྙམ་ན།  བཤད་པ་མེད་དོ་ཞེས་པའི་ཁ་ཚོན་གཅོད་པ་སྔ་བ་ནི་མི་རུང་སྟེ།  ཀྱེ་རྡོ་རྗེའི་རྩ་རྒྱུད་ཕྱི་མའི་གསུམ་པར།  སངས་
རྒྱས་ཀུན་ཀྱི་སྡོམ་པ་ནི། །ཨེ་ཝཾ་རྣམ་པར་རབ་ཏུ་གནས། །ཨེ་ཝཾ་རྣམ་པ་བདེ་ཆེན་པོ། །དབང་ལས་ཡང་དག་ཤེས་པར་འགྱུར། །ཞེས་གསུངས་པའི་དོན།  རྗེ་བཙུན་གྱིས་སྡོམ་པའི་གནས་གསང་གནས་དང་།  ངོ་བོ་ཟུང་འཇུག་གི་
10-5-29b


ཡེ་ཤེས་དང་།  ཐབས་དབང་གསུམ་པ་སྟེ།  ཚུལ་གསུམ་དུ་གནས་པར་གསུངས་པའི་ཕྱིར་རོ། །དེ་ཉིད་རྫོགས་རིམ་གྱི་སྡོམ་པ་མ་ཡིན་ནོ་སྙམ་ན།  ལེའུ་དེ་ཉིད་ཀྱི་མངོན་པར་རྟོགས་པ་གང་དང་འབྲེལ་གྱིས་སྐབས་སུ།  རྫོགས་རིམ་གྱི་
སྡོམ་པའི་རབ་དབྱེ་ཞེས་གསུངས་པ་དེ།  གཞུང་གང་ལ་བསྙེགས་པ་ཡིན་བརྗོད་དགོས་སོ། །གནས་སོགས་ལྔའི་སྐབས་ཀྱི་སྡོམ་པའི་ཐབས་ཀྱི་ངོས་འཛིན་ནི་ལེའུ་དེར།  གནས་དང་།  གྲངས་དང་།  ཐབས་གསུམ་དངོས་སུ་བསྟན་
པར་གསུངས་པའི་ཐབས་ནི།  ལྟེ་བར་གཏུམ་མོ་སྦར་བ་ཡིས། །ཞེས་སོགས་ཚིགས་བཅད་ཅིག་གིས་བསྟན་པ་ལ།  རང་བྱིན་རླབས་དང་།  དཀྱིལ་འཁོར་འཁོར་ལོའི་བཤད་པ་གཉིས་མཛད་པའི་དབང་དུ་བྱས་པ་ཡིན་པས་དེས་དབང་
ལས་ཐོབ་པ་མི་ཁེགས་སོ། །དེས་ན་ཁོ་བོའི་ལུགས་ཀྱིས་རྒྱུད་གོང་འོག་བསྡེབས་ནས་རྫོགས་རིམ་གྱི་སྡོམ་པ་དབང་གི་སྐབས་སུ་སྔར་མེད་གསར་དུ་ཐོབ་ཅིང་།  ལམ་གྱི་སྐབས་སུ་ཐོབ་ཟིན་ཡང་ཡང་མངོན་དུ་བྱེད་པའི་ཚུལ་གྱིས་གོམས་
པར་བྱེད་པས་སྡོམ་པའི་ཐབས་ལ་དབང་དང་ལམ་གཉིས་གསུངས་པ་གནད་གཅིག་ཏུ་འགྱུར་ཞིང་།  སྔར་བཤད་པའི་རྒྱུ་དབང་ལམ་དུ་བྱེད་པ་མན་ཆད་ཐམས་ཅད་ཀྱང་དབང་བཞིའི་སྡོམ་པ་ཡང་ཡང་གོམས་པར་བྱེད་པའི་ཐབས་སུ་གྲུབ་བོ། །
ད་ནི་སྔར་བཤད་པའི་རྫོགས་རིམ་གྱི་སྡོམ་པ་དེ་དག་གི་མིང་གི་རྣམ་གྲངས་རྒྱུད་སྡེ་ལས་གསུངས་པ་རགས་པ་ཙམ་བརྗོད་པའི་སྒོ་ནས་དེ་དག་དང་ལྡན་པའི་གང་ཟག་གི་སྒྲ་དོན་ཡང་བཤད་པར་འདོད་ནས།  སྐལ་ལྡན་གང་གིས་རྣལ་འབྱོར་ཆེན་པོ་
10-5-30a


ཡི། །སྔགས་ཀྱི་སྡོམ་པ་དབང་གི་ཡེ་ཤེས་དང་། །ལམ་གྱི་ཉམས་མྱོང་ཕྱག་རྒྱ་ཆེན་པོ་དང་། །རང་བྱུང་བདེ་ཆེན་བརྗོད་བྲལ་ལྷན་ཅིག་སྐྱེས། །རང་རིག་མཁའ་མཉམ་རྡུལ་བྲལ་སྟོང་པ་ཉིད། །ཟུང་འཇུག་འགྱུར་
མེད་ལྷུན་གྲུབ་མ་བཅོས་པ། །དབྱེར་མེད་ཤེས་ནས་རྩེ་གཅིག་སྒྲུབ་པ་དེ། །གསང་བ་ཆེན་པོའི་རྣལ་འབྱོར་པ་ཞེས་བྱ། །ཞེས་བྱ་བ་སྨོས་ཏེ།  དེ་ལ་སྔགས་ནི་མནྟྲ་ཅེས་པའི་མ་ནུ་ཡིད་དང་།  ཏ་ར་སྐྱོབ་པ་ལ་འཇུག་པས་ཡིད་མཚན་
རྟོག་ལས་སྐྱོབ་པས་ན་སྔགས་ཏེ།  གསང་བ་འདུས་པ་ལས།  དབང་པོ་དང་ནི་ཡུལ་རྣམས་ཀྱི། །རྐྱེན་ལས་གང་དང་གང་འབྱུང་བ། །ཡིད་དེ་མན་ཞེས་བྱ་བར་བཤད། །ཏྲཱ་ནི་སྐྱོབ་བར་བྱེད་པ་སྟེ། །གང་བཤད་དམ་ཚིག་སྡོམ་པ་སྟེ། །
རྡོ་རྗེ་ཀུན་གྱི་བསྲུང་བ་ནི། །སྔགས་ཀྱི་སྦྱོང་བ་ཞེས་བཤད་དོ། །ཞེས་བྱ་བ་དང་།  ཡང་གཉིས་སུ་མེད་པའི་མཚན་ཉིད་ཀྱང་།  དབང་ཡོན་ཏན་རིམ་པར།  མན་ནི་སྟོང་པ་མཚན་མ་བྲལ། །དེ་བཞིན་གཤེགས་པའི་དབུགས་དབྱུང་བ། །
ཤེས་རབ་ཆེན་པོར་བདག་གིས་བཤད། །ཏྲཱ་ནི་སྐྱོབ་པར་བྱེད་པའི་དོན། །རྡོ་རྗེ་སེམས་དཔའི་དབུགས་དབྱུང་བ། །སྙིང་རྗེ་ཆེན་པོར་བདག་གིས་བཤད། །སྟོང་པ་དང་ནི་སྙིང་རྗེ་ཉིད། །གཉིས་སུ་མེད་དང་གཉིས་ཀྱི་ཚུལ། །གསང་
སྔགས་ཞེས་ནི་དེ་ལ་བཤད། །ཅེས་གསུངས་སོ། །དེ་ལྟར་སྔགས་ཀྱི་དོན་ཡིད་མཚན་རྟོག་ལས་སྐྱོབ་པ་དང་།  ཐབས་ཤེས་གཉིས་སུ་མེད་པ་ལ་བཤད་པ་གཉིས་ཀ་ཡང་རྒྱུད་གསུམ་ཀ་ལ་འཇུག་ཏུ་རུང་སྟེ།  རྒྱུ་རྒྱུད་ནི་རང་བཞིན་
10-5-30b


གྱིས་མཚན་རྟོག་ལས་སྐྱོབ།  ཐབས་རྒྱུད་ནི་གློ་བུར་གྱི་མཚན་རྟོག་སྤོང་བར་བྱེད།  འབྲས་རྒྱུད་ནི་གློ་བུར་གྱི་མཚན་རྟོག་སྤངས་ཟིན་པས་ན་སྔགས་ཏེ།  རྒྱུད་ཀྱི་རྒྱལ་པོ་ཞེས་པའི་རྒྱལ་པོ་རྒྱུད་གསུམ་ཆར་ལ་བཤད་པ་བཞིན་ནོ། །གཉིས་སུ་
མེད་པ་རྒྱུད་གསུམ་ཆར་ལ་འཇུག་པ་ཡང་།  ཀྱེ་རྡོ་རྗེའི་མཚན་གྱི་སྒྲ་དོན་རྒྱུད་གསུམ་ཆར་ལ་བཤད་པ་ཉིད་ཀྱིས་ཤེས་སོ། །རྒྱུད་གསུམ་ཆར་ལ་སྔགས་ཀྱི་སྒྲ་འཇུག་ཀྱང་།  སྔགས་དང་།  དེའི་སྡོམ་པ་མཚན་ཉིད་པ་ཐབས་རྒྱུད་
ཡན་ཆད་ལ་འཇོག་པའི་ཚུལ་ནི་གཙོ་བོར་འོག་ཏུ་འབྱུང་ཞིང་།  འདིར་ཡང་སྔར་གྱི་ལུང་ཉིད་ལས།  རྒྱུད་ལས་གང་བཤད་པའི་དམ་ཚིག་དང་སྡོམ་པ་དང་།  རྡོ་རྗེ་ཀུན་གྱི་བསྲུང་བ་དང་།  སྔགས་ཀྱི་སྤྱོད་པ་གསུམ་པོ་དོན་གཅིག་པར་
གསུངས་པས་འགྲུབ་ཅིང་།  འདུས་པའི་རྒྱུད་ཕྱི་མར་ཡང་དེ་བཞིན་དུ་འབྱུང་ངོ་། །དེ་ལྟ་བུའི་སྔགས་ཀྱི་སྡོམ་པ་ལ་སྤྱིར་དུ་མ་ཡོད་པའི་ནང་ནས།  དབང་གི་སྐབས་སུ་སྐྱེས་པའི་ཡེ་ཤེས་དང་།  ལམ་གྱི་ཉམས་མྱོང་དང་།  ཕྱག་
རྒྱ་ཆེན་པོ་སྔགས་སྡོམ་དུ་འཇོག་པའི་ཚེ།  གསུམ་ཀ་ཡང་ཡེ་ཤེས་གཅིག་ཉིད་ཀྱི་རྣམ་གྲངས་སུ་ཤེས་པར་བྱའོ། །དེ་ཉིད་ལ་རྒྱུད་སྡེ་རྣམས་ལས།  རང་བྱུང་ལ་སོགས་པ་མཚན་གྱི་རྣམ་གྲངས་དུ་མས་བསྟན་ཏོ། །ལུས་ལ་གནད་དུ་
བསྣུན་པ་ལས་རང་གི་ངང་གིས་བྱུང་བས་ན་རང་བྱུང་དང་།  བདེ་བའི་ངོ་བོར་སྐྱེས་པས་ན་བདེ་ཆེན་དང་།  ཚིག་གིས་བརྗོད་མི་ཤེས་པས་ན་བརྗོད་བྲལ་དང་།  ཐོག་མ་མེད་པ་ནས་དབྱེར་མེད་དུ་ཡོད་པས་ན་ལྷན་སྐྱེས་དང་།  གཞན་གྱིས་
10-5-31a


རྟོགས་པ་མ་ཡིན་པར་སོ་སོ་རང་གིས་རིག་པས་ན་རང་རིག་དང་།  མཐའ་དབུས་མེད་པས་ན་མཁའ་མཉམ་དང་།  གློ་བུར་གྱི་རྣམ་པར་རྟོག་པའང་མེད་པས་ན་རྡུལ་བྲལ་དང་།  མཐའ་བཞིའི་སྤྲོས་པས་སྟོང་པས་ན་སྟོང་
ཉིད།  ཐབས་ཤེས་དབྱེར་མེད་པས་ན་ཟུང་འཇུག་དང་།  གཞན་དུ་མི་འགྱུར་བས་ན་འགྱུར་མེད་ཡི་གེ་དང་།  རང་བཞིན་རྒྱུའི་དུས་ནས་ཡོད་པས་ན་ལྷུན་གྲུབ་དང་།  རྐྱེན་གྱིས་གསར་དུ་མ་བསྐྱེད་པས་ན་མ་བཅོས་པ་དང་།  སེམས་
ཀྱི་རང་བཞིན་ཡིན་པས་ན་སྲོག་ཆགས་རྣམས་ཀྱི་སྲོག་དང་།  བརྟན་གཡོ་ཐམས་ཅད་ཀྱི་ཆོས་ཉིད་ཡིན་པས་འགྲོ་བའི་བདག་ཉིད་དང་།  བརྟན་གཡོ་ཐམས་ཅད་ལ་ཁྱབ་པས་ན་ཁྱབ་པ་པོ་ཞེས་སོགས་དོན་དམ་པར་མིང་གིས་བརྗོད་མི་ཤེས་
ཀྱང་གདུལ་བྱ་ལ་ཐ་སྙད་གདགས་པའི་ཆེད་དུ་མིང་གི་རྣམ་གྲངས་བསམ་གྱིས་མི་ཁྱབ་པ་ཞིག་གསུངས་ཏེ།  ཀྱེ་རྡོ་རྗེའི་དང་པོའི་བཅུ་པ་ལས།  རང་རིག་ཡེ་ཤེས་ཉིད་དུ་འགྱུར། །རང་གཞན་ཡང་དག་རིག་པ་སྤངས། །མཁའ་མཉམ་
རྡུལ་བྲལ་སྟོང་པ་ཉིད། །དངོས་དང་དངོས་མེད་བདག་ཉིད་མཆོག །ཐབས་དང་ཤེས་རབ་ཉིད་དུ་འདྲེས། །ཆགས་དང་ཆགས་བྲལ་རྣམ་པར་འདྲེས། །དེ་ཉིད་སྲོག་ཆགས་རྣམས་ཀྱི་སྲོག །དེ་ཉིད་ཡི་གེ་དམ་པ་ཉིད། །དེ་ཉིད་
འགྲོ་བའི་བདག་ཉིད་དེ། །དེ་ཉིད་ཐམས་ཅད་ཁྱབ་པ་པོ། །ཐམས་ཅད་ལུས་ལ་རྣམ་པར་གནས། །དངོས་དང་དངོས་མེད་དེ་ལས་བྱུང་། །གཞན་རྣམས་གང་རྣམས་དེ་རྣམས་དང་། །རྣམ་པར་ཤེས་པ་ཀུན་གྱི་ཚུལ། །ཞེས་གསུངས་ལ།  
10-5-31b


ལུང་གཞན་རྣམས་ནི་མངས་པས་འཇིགས་པས་མ་བྲིས་སོ། །དེ་ལྟ་བུའི་དབང་དང་རིམ་གཉིས་ལས་སྐྱེས་པའི་ཡེ་ཤེས་ཉིད་ལ་སྣང་བའི་དངོས་པོ་མཐའ་དག་དང་།  འབྲས་བུ་སངས་རྒྱས་ཀྱི་སའི་ཡོན་ཏན་མཐའ་དག་དག་བྱ་དག་བྱེད་དང་རྒྱུ་ལ་
འབྲས་བུའི་རྒྱ་ལ་སོགས་པའི་ཚུལ་གྱིས་དབྱེར་མེད་དུ་ཤེས་ཤིང་།  ལམ་སྡོམ་པ་གསུམ་པོ་མཐའ་དག་དང་།  སྔར་བཤད་པའི་ཡོན་ཏན་གྱི་ལྡོག་པ་མཐའ་དག་དང་།  སྔགས་ཀྱི་བཟླས་པ་དང་།  སྦྱིན་སྲེག་ལ་སོགས་པའི་སྤྱོད་པ་མཐའ་
དག་དབྱེར་མེད་དུ་ཤེས་ནས་རྩེ་གཅིག་ཏུ་ཉམས་སུ་ལེན་པའི་གང་ཟག་དེ་ལ་གསང་བ་ཆེན་པོའི་རྣལ་འབྱོར་པ་ཞེས་བྱ་སྟེ།  ཀྱེ་རྡོ་རྗེ་ལས།  ང་ལས་འགྲོ་བ་ཐམས་ཅད་འབྱུང་། །ང་ལས་གནས་གསུམ་པོ་ཡང་འབྱུང་། །ང་ཡིས་འདི་ཀུན་
ཁྱབ་པ་སྟེ། །འགྲོ་བའི་རང་བཞིན་གཞན་མ་མཐོང་། །ཞེས་དང་།  དེ་ཉིད་ལྷན་ཅིག་སྐྱེས་པའི་གཟུགས། །བདེ་ཆེན་བཟང་པོའི་རྣལ་འབྱོར་མ། །དེ་ཉིད་དཀྱིལ་འཁོར་འཁོར་ལོ་དང་། །ཡེ་ཤེས་ལྔ་ཡི་རང་བཞིན་ཅན། །ཅེས་
དང་།  སྔགས་ཀྱི་བཟླས་མེད་དཀའ་ཐུབ་མེད་དང་སྦྱིན་སྲེག་མེད། །དཀྱིལ་འཁོར་ཅན་ཡང་མེད་ཅིང་དཀྱིལ་འཁོར་ཡང་ནི་མེད། །དེ་ནི་སྔགས་བཟླས་དེ་དཀའ་ཐུབ་དང་དེ་སྦྱིན་སྲེག །དེ་ནི་དཀྱིལ་འཁོར་ཅན་དང་དེ་ནི་དཀྱིལ་འཁོར་ཉིད། །
མདོར་བསྡུས་ན་ནི་སེམས་ནི་འདུས་པའི་གཟུགས་ཅན་ནོ། །ཞེས་གསུངས་སོ། །དེ་ལྟར་མིང་གི་རྣམ་གྲངས་བསྟན་པ་དེ་དག་ཁྱབ་མཉམ་ཉིད་དུ་འཁྲུལ་པར་དོགས་ནས།  ཡེ་ཤེས་སྐྱེས་ཚེ་དེ་དག་སྡོམ་པ་ཡི། །མིང་གི་རྣམ་གྲངས་
10-5-32a


ཡིན་ཀྱང་མ་སྐྱེས་ན། །སྤོང་སེམས་ཙམ་ལ་དེ་དག་མི་འཇུག་པས། །ཁྱབ་མཉམ་ཉིད་དུ་འཁྲུལ་པར་མི་བྱའོ། །ཞེས་བྱ་བ་སྨོས་ཏེ།  དབང་དང་རིམ་གཉིས་ལས་སྐྱེས་པའི་ཡེ་ཤེས་ལ་སྔགས་སྡོམ་དུ་འདོད་
པའི་ཚེ་སྔར་གྱི་དེ་དག་མིང་གི་རྣམ་གྲངས་སུ་འཇུག་ཀྱང་།  སྔགས་ཀྱི་སྤྱོད་པ་དང་།  སྤོང་སེམས་མཐའ་དག་སྔགས་སྡོམ་དུ་འཇོག་པའི་ཚེ་མ་ངེས་ཏེ།  མཉམ་གཞག་ལའང་ཡེ་ཤེས་མ་སྐྱེས་པའི་སྐབས་དང་།  རྗེས་སྤྱོད་ཀྱི་སྐབས་ཀྱི་
སྔགས་སྡོམ་ཕལ་ཆེ་བ་རྟོག་བཅས་ཀྱི་སྔགས་སྡོམ་ཡིན་པའི་ཕྱིར་རོ། །ཅིའི་ཕྱིར་སྔགས་ཀྱི་སྤྱོད་པ་དང་།  སྔགས་སྡོམ་མཐའ་དག་སྔགས་ཀྱི་ཉམས་ལེན་དུ་འདུ་ཞེ་ན།  མཉམ་པར་གཞག་དང་མ་གཞག་རྣལ་འབྱོར་བཅུས། །དབང་གི་དུས་
ཀྱི་སྐུ་བཞིའི་ས་བོན་ཉིད། །བསྲུང་ཞིང་འཕེལ་བར་བྱེད་ཕྱིར་བཅུ་ཆར་ཡང་། །སྔགས་ཀྱི་སྡོམ་པའི་ཉམས་ལེན་ཉིད་དུ་འདུས། །ཞེས་བྱ་བ་འདི་ཉིད་ཡིན་ཏེ།  ཉམས་ལེན་མཐའ་དག་མཉམ་པར་གཞག་པའི་རྣལ་འབྱོར་དང་།  
མཉམ་པར་མ་གཞག་པའི་རྣལ་འབྱོར་གཉིས།  དང་པོ་ལ་བསྐྱེད་རིམ་དང་རྫོགས་རིམ་གཉིས།  ཕྱི་མ་ལ་ཉལ་བ་དང་།  ལྡང་བ་དང་།  ཁྲུས་དང་།  མཆོད་གཏོར་དང་།  བཟླས་པ་དང་།  ཁ་ཟས་དང་།  སྤྱོད་ལམ་དང་།  རྗེས་
ཆགས་ཀྱི་རྣལ་འབྱོར་རྣམ་པ་བརྒྱད་དེ་བཅུར་འདུས་པ་ལས།  བསྐྱེད་རིམ་གྱིས་ནི་བུམ་དབང་གི་སྐབས་སུ་ཐོབ་པའི་སྤྲུལ་སྐུའི་ས་བོན་གོང་འཕེལ་དུ་བྱེད།  རྫོགས་རིམ་གྱིས་ནི་དབང་གོང་མ་གསུམ་གྱི་སྐབས་སུ་ཐོབ་པའི་སྐུ་ཕྱི་མ་གསུམ་
10-5-32b


གྱི་ས་བོན་གོང་འཕེལ་དུ་བྱེད་པས་ཐམས་ཅད་ཀྱང་སྔགས་ཀྱི་སྡོམ་པའི་ཉམས་ལེན་དུ་འདུས་ཏེ།  འདི་ལ་དགོངས་ནས་ཆོས་རྗེ་ས་པཎ་གྱིས།  དེ་ཕྱིར་ཕ་རོལ་ཕྱིན་པ་ལ། །སེམས་བསྐྱེད་མིན་པའི་ཆོས་གཞན་མེད། །རྡོ་རྗེ་ཐེག་པའི་སྒོར་
ཞུགས་ནས། །དབང་བསྐུར་ལས་གཞན་ཆོས་མེད་དོ། །ཞེས་གསུངས་པར་ཤེས་པར་བྱའོ། །གཞན་ཡང་དམ་ཚིག་དང་སྡོམ་པའི་ནང་དུ་ཉམས་ལེན་མཐའ་དག་འདུས་པ་ནི།  དག་ལྡན་ལས།  དམ་ཚིག་དང་སྡོམ་པ་ནི།  དེ་ལ་དང་པོ་ཐོབ་
པ་ལ་དམ་ཚིག །མི་ཉམས་པ་བསྲུང་བ་ལ་སྡོམ་པ་ཞེས་བྱ་བའམ།  བཟའ་བ་ལ་དམ་ཚིག །བསྲུང་བ་ལ་སྡོམ་པ་ཞེས་བྱ་བའམ།  གཉེན་པོ་བརྟེན་པ་དམ་ཚིག །སྤང་བྱ་སྤོང་བ་ལ་སྡོམ་པ་ཞེས་བྱ་བའམ་དེ་གཉིས་མིང་གི་རྣམ་གྲངས་སུའང་
འགྱུར་རོ་ཞེས་གསུངས་ཤིང་།  དམ་ཚིག་ཉི་ཤུའི་སྐབས་ཀྱིས་ཀྱང་ཤེས་ཏེ།  བསྐྱེད་རྫོགས་གཉིས་ནི་མཉམ་གཞག་གི་དམ་ཚིག །དེ་ལས་བྱུང་བའི་ལྟ་བ་རྣམས་ནི་རྗེས་སྤྱོད་ཀྱི་དམ་ཚིག །ཉམས་ལེན་གཞན་རྣམས་ནི་བཟའ་བ་དང་བསྲུང་བ་
དང་།  མི་འབྲལ་བའི་དམ་ཚིག་ཏུ་འདུས་པའི་ཕྱིར་རོ། །སྣང་བ་ཐམས་ཅད་ཀྱང་དེར་སྡོམ་པའི་དག་བྱ་དག་བྱེད་ངོ་སྤྲོད་པའི་ཕྱིར་དུ།  སྣང་བའི་དངོས་པོ་རིམ་པ་དང་པོར་ནི། །ལྷ་རུ་སྡོམ་ཞིང་དེ་ཉིད་གཉིས་པའི་ཚེ། །བདེ་ཆེན་ཡེ་ཤེས་
ཉིད་དུ་སྡོམ་པའི་ཕྱིར། །སྣང་བ་ཐམས་ཅད་འདི་རུ་སྡོམ་པར་གསུངས། །ཞེས་སྨོས་ཏེ།  བསྐྱེད་རིམ་གྱི་སྐབས་སུ་གཉེན་པོར་ཆེ་བ་བཞིའི་སྒོ་ནས་མ་དག་པའི་སྣང་བ་མཐའ་དག་ལྷའི་ངོ་བོར་རང་བཞིན་གྱིས་རྣམ་པར་དག་པར་སྤྱོད་པ་དང་།  རྫོགས་
10-5-33a


རིམ་གྱི་སྐབས་སུ།  བརྟན་དང་གཡོ་བའི་དངོས་པོ་གང་། །རྩ་ལྕུག་འཁྲིལ་ཤིང་ལ་སོགས་པ། །བདག་གི་དངོས་པོའི་རང་བཞིན་ལས། །དམ་པའི་དེ་ཉིད་དེས་བསྒོམ་བྱ། །ཞེས་པའི་ཚུལ་གྱིས་ཡེ་ཤེས་ཀྱི་ངོ་བོར་
རྣམ་པར་དག་པར་གསུངས་པའི་རིགས་པས་སྣང་བའི་དངོས་པོ་མཐའ་དག་སྔགས་སྡོམ་གྱི་ངོ་བོར་རང་བཞིན་གྱིས་རྣམ་པར་དག་པར་ཤེས་པར་བྱ་སྟེ།  རྣལ་འབྱོར་མ་ལུས་དབུས་གནས་སུ། །ཨེ་ཡི་རྣམ་པ་སྡོམ་པའི་གནས། །ཇི་ལྟར་ཕྱི་
རོལ་དེ་བཞིན་ནང་། །སྡོམ་པའི་དེ་ཉིད་རབ་ཏུ་དབྱེ། །ཞེས་པའི་ལུང་དང་།  འདི་བསྒོམས་པས་མཐར་སྣང་བ་ཐམས་ཅད་རང་སྣང་གི་ཡེ་ཤེས་སུ་འགྱུར་བའི་རིགས་པས་སོ། །ལུས་རྣམ་གཞག་གི་སོགས་ཀྱི་སྒྲས་བསྡུས་པ་རྒྱུད་གསུམ་
སྡོམ་པར་སྦྱོར་ཚུལ་མཚན་བཏགས་ཕྱེ་བ་དང་བཅས་པ།  སྡོམ་པ་དང་ཕྱག་རྒྱ་ཆེན་པོའི་སྒྲ་དོན་གྱི་ཁྱད་པར།  རིམ་པ་གཉིས་ཀྱི་སྡོམ་པའི་གྲངས་ངེས་འགྲུབ་པ་དང་གསུམ་ལས་དང་པོ་ནི།  རྒྱུད་གསུམ་ཀྱེ་ཡི་རྡོ་རྗེར་སྦྱོར་ཚུལ་དང་། །རྒྱུད་
གསུམ་དག་པ་གསུམ་དུ་སྦྱོར་ཚུལ་གྱིས། །རྒྱུད་གསུམ་སྡོམ་པར་སྦྱོར་ཚུལ་རྟོགས་པར་འགྱུར། །འོན་ཀྱང་མཚན་བཏགས་ཕྱེ་བ་གནད་དུ་གཅེས། །ཞེས་བྱ་བ་ཡིན་ཏེ།  འདི་ལ་དཔེ་སྒྲུབ་པ་དང་།  མཚན་བཏགས་ཕྱེ་བ་དང་།  དོན་ལ་
སྦྱར་བ་གསུམ་ལས།  དང་པོ་ནི།  རྗེ་བཙུན་སྐུ་མཆེད་གཉིས་ཆར་གྱིས།  ཀྱེ་རྡོ་རྗེ་ཞེས་པའི་མཚན་གྱི་དོན་གྱིས་རྒྱུད་ཀྱི་བརྗོད་བྱ་རྒྱུད་གསུམ་པོ་མ་ལུས་པ་བསྟན་དགོས་པས་རྒྱུ་རྒྱུད་ལ་དངོས་པོ་སྣ་ཚོགས་སུ་སྣང་བ་ནི་ཐབས་ཏེ་ཧེའི་དོན་ཏོ། །རང་
10-5-33b


བཞིན་མེད་པ་ནི་ཤེས་རབ་སྟེ་བཛྲ་གྱི་དོན་ཏོ། །བདག་ཉིད་རྒྱུད་ནི་སེམས་ཅན་གཅིག་གི་རྒྱུད་ལ་དབྱེར་མི་ཕྱེད་པར་གཉིས་སུ་མེད་པའི་དོན་ཏོ། །ལམ་གྱི་དབང་དུ་བྱས་ན་བསྐྱེད་པ་ཐབས།  རྫོགས་པ་ཤེས་རབ།  བསྐྱེད་པའི་ཡང་ལྷ་ཡབ་
ཀྱི་རྣམ་པ་ཐབས།  ཡུམ་གྱི་རྣམ་པ་ཤེས་རབ།  རྫོགས་རིམ་གྱིའང་རང་བྱིན་རླབས་ཐབས།  དཀྱིལ་འཁོར་འཁོར་ལོ་ཤེས་རབ།  རང་བྱིན་རླབས་ཀྱིའང་དམིགས་བཅས་ཐབས།  དམིགས་མེད་ཤེས་རབ་བོ། །དེ་རྣམས་
ཐམས་ཅད་ཀྱང་སྒྲུབ་པ་པོ་གཅིག་གི་རྒྱུད་ལ་དབྱེར་མི་ཕྱེད་པར་ཉམས་སུ་ལེན་པར་བྱེད་པ་བདག་ཉིད་རྒྱུད་ཅེས་བྱ་བ་ཡིན་ནོ། །འབྲས་བུའི་རྒྱུད་ཀྱི་ཐབས་དང་ཤེས་རབ་གཉིས་སུ་མེད་པ་ནི་བསྟན་ཟིན་ཏོ། །ཞེས་གསུངས་ལ།  བསྟན་ཟིན་
པའི་དོན་ཡང་།  ཧེ་ནི་སྙིང་རྗེ་ཆེན་པོ་ཉིད། །བཛྲའང་ཤེས་རབ་བརྗོད་པར་བྱ། །ཞེས་པའི་སྐབས་སུ་སངས་རྒྱས་སའི་དམིགས་པ་མེད་པའི་སྙིང་རྗེ་དང་།  ཤེས་རབ་ཟུང་དུ་འཇུག་པ་ལ་བཤད་པ་ཉིད་དོ། །དག་པ་གསུམ་རྒྱུད་གསུམ་
ལ་སྦྱོར་བའི་ཚུལ་ནི་རྩ་རྒྱུད་དང་པོའི་དགུ་པར།  ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཅེས་དང་།  རང་རིག་བདག་ཉིད་དག་པ་ཉིད། །ཅེས་གསུངས་པའི་དོན་ལ་རྗེ་བཙུན་གྱིས་དེ་ཡང་རྒྱུའི་རྒྱུད་ཀྱི་དེ་བཞིན་
ཉིད་ཀྱི་དག་པ་ནི་ཆོས་ཐམས་ཅད་རང་གི་སེམས་ཡིན་ལ།  སེམས་དེ་ཡང་རང་བཞིན་གྱིས་སྤྲོས་པ་དང་བྲལ་བའོ། །དེའང་གསལ་བའི་ཆ་ནི་རང་རིག་པའི་དག་པ་སྟེ།  དེ་གཉིས་ནི་སེམས་རང་བཞིན་གྱིས་དག་པའི་རྫོགས་པའི་སངས་
10-5-34a


རྒྱས་སོ། །ལུས་ཞལ་ཕྱག་གི་རྣམ་པར་གྲུབ་པ་ནི་ལྷ་སོ་སོའི་དག་པ་སྟེ་ལུས་རང་བཞིན་གྱིས་རྫོགས་པའི་སངས་རྒྱས་སོ། །རྒྱུའི་རྒྱུད་དེ་ལྟར་གནས་པའི་སྟོབས་ཀྱིས།  ཐབས་ཀྱི་རྒྱུད་ཀྱང་དག་པ་གསུམ་སྟེ།  
ཆོས་ཐམས་ཅད་སྤྲོས་པ་དང་བྲལ་བར་ཡུལ་དུ་བྱེད་པའི་ལྟ་བ་ནི་དེ་བཞིན་ཉིད་ཀྱི་དག་པ་སྟེ།  འདིས་སྤང་བྱ་ཀུན་ཏུ་བརྟགས་པའི་དུག་ཞི་བར་བྱེད་དོ། །སྣང་བ་ཐམས་ཅད་ལྷའི་རང་བཞིན་དུ་ཤེས་པར་བྱས་ནས་ལྷ་ཡང་ཞལ༷་ཕྱག་གི་དག་པ་སྟོང་པ་
ལ་སོགས་པས་བྱེ་བྲག་ཏུ་སྦྱངས་ཏེ།  དེ་ཡང་དེ་བཞིན་ཉིད་ཀྱི་དག་པས་བྱིན་གྱིས་བརླབས་ནས་བསྒོམ་པ་ནི་ལྷ་སོ་སོའི་དག་པ་སྟེ།  འདིས་ཀུན་ཏུ་རྟོག་པའི་དུག་སྦྱོང་བར་བྱེད་དོ། །རྫོགས་རིམ་ལས་བྱུང་བའི་ཡེ་ཤེས་སྤྲོས་བྲལ་མངོན་དུ་
གྱུར་པ་དེས་ལྷའང་བྱིན་གྱིས་བརླབས་ནས་བསྒོམ་པ་ནི་རང་རིག་པའི་དག་པ་སྟེ།  འདིས་ལྷར་ཞེན་པའི་དུག་སྦྱོང་བར་བྱེད་དོ། །ཐབས་ཀྱི་རྒྱུད་དེ་ཉམས་སུ་བླངས་པས་འབྲས་བུའི་རྒྱུད་ཀྱང་དག་པ་གསུམ་དུ་འགྱུར་ཏེ།  ངོ་བོ་ཉིད་ཀྱི་
སྐུ་ནི་དེ་བཞིན་ཉིད་ཀྱི་དག་པ།  གཟུགས་ཀྱི་སྐུ་གཉིས་ནི་ལྷ་སོ་སོའི་དག་པ།  ཆོས་ཀྱི་སྐུ་ནི་རང་རིག་པའི་དག་པའོ། །ཡང་ན།  ཆོས་ཀྱི་སྐུ་ནི་དེ་བཞིན་ཉིད་ཀྱི་དག་པ།  ལོངས་སྤྱོད་རྫོགས་པའི་སྐུ་ནི་རང་རིག་པའི་དག་པ།  སྤྲུལ་པའི་
སྐུ་ནི་ལྷ་སོ་སོའི་དག་པའོ། །ཞེས་གསུངས་སོ། །གཉིས་པ་ནི།  དེ་བཞིན་དུ་སྡོམ་པ་ཞེས་པའི་སྒྲ་དོན་ཡང་རྒྱུད་གསུམ་ཆར་ལ་འཇུག་སྟེ།  བདེ་བའི་མཆོག་ལ་འཇུག་པའི་ཚེ་རྒྱུ་རྒྱུད་རང་བཞིན་གྱིས་མྱ་ངན་ལས་འདས་པ་ཡིན་པས་བདེ་
10-5-34b


བའི་མཆོག་དང་།  ཐབས་རྒྱུད་སྡུག་བསྔལ་སྤོང་བར་བྱེད་པས་བདེ་བའི་མཆོག་དང་།  འབྲས་རྒྱུད་སྡུག་བསྔལ་སྤངས་ཟིན་པས་ན་བདེ་བའི་མཆོག་གོ། །མང་པོ་གཅིག་ཏུ་སྡོམ་པ་ལ་འཇུག་པའི་ཚེ་རྒྱུད་གསུམ་པོ་དེ་དང་དེའི་གནས་སྐབས་
ཀྱི་སྣང་བ་ཐམས་ཅད་རྒྱུད་གསུམ་པོ་དེ་དང་དེའི་ངོ་བོར་སྡོམ་པ་སྟེ།  མན་ངག་ཐུན་མོང་མ་ཡིན་པའི་སྐབས་སུ།  རྒྱུ་ལམ་འབྲས་བུའི་ལྷན་ཅིག་སྐྱེས་པའི་ཆོས་གསུམ་གསུམ་བཤད་པ་ལྟར་རོ། །སྤང་བྱ་མི་མཐུན་པའི་ཕྱོགས་
སྡོམ་པ་ལ་འཇུག་པའི་ཚེ་རྒྱུད་གསུམ་ལ་སྦྱོར་བའི་ཚུལ་ནི་སྔར་བཤད་ཟིན་ཏོ། །འདི་དག་རིགས་པའི་འགྲོས་སྦྱར་བར་སྣང་བས་ལུང་གིས་བརྒྱན་དགོས་སོ་སྙམ་ན།  ཀྱེ་རྡོ་རྗེ་ལས།  རྣལ་འབྱོར་མ་ལུས་དབུས་གནས་སུ། །ཨེ་ཡི་
རྣམ་པ་སྡོམ་པའི་གནས། །ཇི་ལྟར་ཕྱི་རོལ་དེ་བཞིན་ནང་། །སྡོམ་པའི་དེ་ཉིད་རབ་ཏུ་ཕྱེ། །ཞེས་གསུངས་པའི་སྐབས་ཀྱི་སྡོམ་པ་གཙོ་བོར་རྫོགས་རིམ་གྱི་སྡོམ་པ་ཡིན་ཡང་ཤུགས་ལ་རྒྱུ་རྒྱུད་ཀྱི་སྡོམ་པ་སྟོན་པར་བཞེད་དེ།  རྗེ་
བཙུན་གྱིས་འདིར་གང་སྡོམ་ན་མི་མཐུན་པའི་ཕྱོགས་སྡོམ་པ་དང་།  གང་གིས་སྡོམ་ན་གཏུམ་མོ་འབར་འཛག་གི་ཐབས་དང་།  དཀྱིལ་འཁོར་འཁོར་ལོའི་ཐབས་གཉིས་ལས།  དང་པོ་ནི་གཙོ་བོར་ལེའུ་དང་པོར་བསྟན་ལ།  དཀྱིལ་
འཁོར་འཁོར་ལོ་དང་སྡོམ་པ་རང་གི་ངོ་བོ་ནི།  ཡེ་ཤེས་ལྔའི་ཚུལ་གྱིས་འདས་མ་ཐག་པར་བསྟན་ཅིང་གང་དུ་སྡོམ་པ་དང་།  ཇི་སྙེད་ཅིག་སྡོམ་པ་འདིར་འབྱུང་བ་ལས།  གང་དུ་སྡོམ་པ་ནི་ཨེ་ཝཾ་དང་འཁོར་ལོ་བཞིའོ། །ཇི་
10-5-35a


སྙེད་ཅིག་སྡོམ་པ་འདིར་ནང་གི་སྙོམས་འཇུག་དང་།  འཁོར་ལོ་བཞི་ལ་སྐུ་གསུམ་དུ་བཞག་པ་དང་།  འཁོར་ལོ་བཞི་ལ་འབྲས་བུ་བཞིར་བཞག་པ་དང་།  འཁོར་ལོ་བཞི་ལ་སྡེ་པ་བཞིར་བཞག་པ་སྟེ་བཞི་དང་། 
སེམས་ཅན་རྣམས་རང་བཞིན་གྱིས་སངས་རྒྱས་ཡིན་ཞིང་གནས་སྐབས་ཀྱི་ཆོས་མཐུན་གྱིས་སངས་རྒྱས་སུ་བསྟན་པས་སྡོམ་པ་དང་ལྡན་པའི་གང་ཟག་ཏུ་བསྟན་པའོ། །ཞེས་གསུངས་ལ།  འདིའི་དོན་གང་དུ་སྡོམ་པ་དང་།  
གྲངས་ཇི་སྙེད་སྡོམ་པ་ལུས་གྲུབ་ཙམ་ཉིད་ནས་རང་བཞིན་གྱིས་གནས་ལ་སྡོམ་པའི་ངོ་བོ་དང་།  མི་མཐུན་པའི་ཕྱོགས་སྡོམ་པ་ལ་ཡང་རང་བཞིན་གྱི་སྡོམ་པའི་ཆ་དང་།  ཐབས་ལ་བརྟེན་ནས་སྡོམ་པའི་ཆ་གཉིས་ལས།  དང་པོ་ནི། 
རྒྱུའི་དུས་ནས་གནས།  ཕྱི་མ་ནི་ལམ་གྱི་དུས་སུ་ཐོབ་པའོ། །སྡོམ་པའི་ཐབས་ནི་ལམ་ཁོ་ན་ལ་འཇོག་དགོས་པས་ལྔ་ཆར་ཚང་བའི་སྡོམ་པ་ལམ་ནས་འཇོག་པའི་གནད་ཀྱང་འདི་ཉིད་ཡིན་ཏེ་འཆད་པར་འགྱུར་རོ། །སེམས་ཅན་ཐམས་
ཅད་སྡོམ་པ་དང་ལྡན་པའི་གང་ཟག་ཡིན་པར་གསུངས་པ་ཡང་ལམ་མ་བསྒོམས་པའི་དུས་ན་རྒྱུ་རྒྱུད་ཀྱི་སྡོམ་པ་དང་ལྡན་ཞིང་ལམ་ལ་ཞུགས་ནས་ཐབས་ཀྱི་སྡོམ་པ་དང་ལྡན་པས་མཚན་བཏགས་མ་ཕྱེ་བའི་དབང་དུ་བྱས་པ་སྟེ།  དེ་ལྟར་
ན་རྒྱུ་རྒྱུད་ཀྱི་སྡོམ་པ་དང་ཐབས་ཀྱི་སྡོམ་པའི་རྣམ་གཞག་འགྲུབ་ཅིང་འབྲས་རྒྱུད་ཀྱི་སྡོམ་པ་ནི་སྔར་དྲངས་པའི་ལུང་རྣམས་དང་།  གཞན་ཡང་ཀྱེ་རྡོ་རྗེ་མཁའ་འགྲོ་མ་དྲ་བའི་སྡོམ་པ་ཞེས་དང་།  ཙཀྲ་སཾ་བ་རའི་དོན་འཁོར་ལོ་སྡོམ་པར་བསྒྱུར་
10-5-35b


བ་རྣམས་ཀྱིས་ཀྱང་སྟོན་ཏེ།  སྡོམ་པའི་དོན་སྡོམ་པ་རྒྱུད་གསུམ་ཆར་ལ་སྒྲ་འཇུག་པ་རྒྱུད་དང་བླ་མ་གོང་མའི་གསུང་རབ་ལས་བཤད་པའོ། །གསུམ་པ་ནི།  དེ་ལྟར་ཀྱེ་རྡོ་རྗེ་སོགས་དང་།  དག་པ་གསུམ་དང་།  སྡོམ་པ་རྣམས་རྒྱུད་
གསུམ་ཆར་ལ་སྒྲ་བཤད་ན་རྒྱུད་གསུམ་ཆར་དེར་མཚན་ཉིད་པར་ཁས་ལེན་ནམ་འོན་ཏེ་མཚན་བཏགས་སོ་སོར་དབྱེ་བར་བྱར་ཡོད་ཅེ་ན།  མཚན་བཏགས་སོ་སོར་ཕྱེ་བ་གནད་དུ་གཅེས་ཏེ།  མིང་བཏགས་པ་ཙམ་དེ་དང་དེར་ཁས་བླངས་ན་རྣམ་
གཞག་ཐམས་ཅད་འཆོལ་བར་འགྱུར་བའི་ཕྱིར་རོ། །འོ་ན་ཇི་ལྟར་ཞེ་ན།  ཀྱེ་རྡོ་རྗེ་མཚན་ཉིད་པ་ནི་འབྲས་བུའི་རྒྱུད་ཁོ་ན་སྟེ།  དེ་ཡིན་ན་ཧེ་ནི་སྙིང་རྗེ་ཆེན་པོ་སྟེ། །བཛྲའང་ཤེས་རབ་བརྗོད་པར་བྱ། །ཞེས་པའི་དངོས་བསྟན་ཡིན་དགོས་
ཤིང་།  གཞུང་དེ་ནི་འབྲས་རྒྱུད་སྟོན་པའི་སྐབས་ཡིན་པ་ལྟར་བླ་མ་གོང་མས་ཀྱང་འབྲས་རྒྱུད་ཁོ་ན་ལ་བཤད་པའི་ཕྱིར་རོ། །རྡོ་རྗེ་གུར་དང་།  སམ་བྷུ་ཊི་དང་།  གསང་བ་འདུས་པ་སོགས་ཀྱང་དེ་བཞིན་ནོ། །དག་པ་གསུམ་ལ་ནི་རྒྱུད་
གསུམ་ཆར་ཡང་མཚན་ཉིད་པ་སྟེ།  འདི་ནི་རྣམ་པར་དག་པའི་ཆ་ནས་གཞག་པ་ཡིན་ལ་དེ་ནི་རྒྱུད་གསུམ་ཆར་ལ་འགལ་བ་མེད་པའི་ཕྱིར་རོ། །དེ་ཡང་དཔེར་ན་རྒྱུ་རྒྱུད་ཀྱི་ཆོས་ཐམས་ཅད་དེ་བཞིན་ཉིད་ཀྱི་ངོ་བོར་རང་བཞིན་གྱིས་རྣམ་པར་དག་
པ་དང་།  ཕུང་པོ་ལྔ་སངས་རྒྱས་ལྔའི་ངོ་བོར་རང་བཞིན་གྱིས་རྣམ་པར་དག་པ་སོགས་སྒྲ་ཇི་བཞིན་དུ་གཟུང་དགོས་ཏེ།  གཞན་དུ་ན་དེ་དག་གི་ངོ་བོ་རང་བཞིན་གྱིས་དག་མ་དག་ཐེ་ཚོམ་ཟ་བ་དང་།  རང་བཞིན་གྱིས་མ་དག་པར་མཐའ་གཅིག་
10-5-36a


ཏུ་འཛིན་པ་ལ་རྩ་ལྟུང་དགུ་པ་འབྱུང་བར་གསུངས་པའི་ཕྱིར་རོ། །གལ་ཏེ་ལྷའི་ངོ་བོར་རང་བཞིན་གྱིས་རྣམ་པར་དག་པས་ཐ་སྙད་དུ་ལྷ་ཡིན་པར་ཁས་བླངས་ན་ཐ་སྙད་དུ་ཆོས་ཐམས་ཅད་ཆོས་དབྱིངས་སུ་ཁས་བླངས་
དགོས་པས་ཀུན་རྫོབ་བདེན་པ་དོན་དམ་བདེན་པར་ཁས་བླང་དགོས་པར་འགྱུར་རོ། །འོན་ཀྱང་འདི་ལ་ས་པཎ་གྱིས་གསུང་རབ་འཆད་པ་ལ་འཇུག་ཚུལ་ལ།  ཐ་སྙད་ཁས་ནི་མ་བླང་པར། །ངེད་ཅག་འཆད་པར་མི་བྱེད་དོ། །ཞེས་པ་ལྟར་ཐ་སྙད་
ཁས་བླངས་པ་འཇིག་རྟེན་མཐུན་འཇུག་གི་སྐབས་དང་།  ཐ་སྙད་དཔྱོད་པའི་རིགས་པའི་སྐབས་དང་།  དོན་དམ་དཔྱོད་པའི་རིགས་པའི་སྐབས་གསུམ་གསུངས་པ་བླ་མེད་འཆད་ཚུལ་ལ་སྦྱར་ན།  སྐབས་དང་པོའི་ཚེ་སྣང་བ་ལྷ་ཡིན་
པ་ཁས་མི་བླང་སྟེ།  འདི་ནི་སེམས་ཡིན།  འདི་སངས་རྒྱས་ཡིན།  འདི་ནི་བུམ་པ་ཡིན།  འདི་ནི་སྣམ་བུ་ཡིན།  ཞེས་སོགས་རྣམ་གཞག་སོ་སོར་ཕྱེ་བའི་སྐབས་ཡིན་པའི་ཕྱིར་རོ། །གཉིས་པའི་ཚེ་ཕུང་པོ་ལྔ་སངས་རྒྱས་ལྔ་ཡིན་པ་སོགས་
སྣང་བ་ཐམས་ཅད་ལྷར་ཁས་ལེན་དགོས་ཏེ།  བསྐྱེད་རིམ་གྱི་སྦྱང་གཞི་སྦྱོང་བྱེད་སྦྱར་བའི་རིགས་པས་དཔྱད་པའི་ཚེ།  ལྷ་མ་ཡིན་པའི་སྣང་བ་གང་ཡང་མེད་པའི་ཕྱིར་རོ། །གསུམ་པའི་ཚེ་ལྷ་ཡིན་པ་དང་མ་ཡིན་པ་སོགས་མཐའ་གང་ཡང་ཁས་
མི་ལེན་ཏེ།  སྤྲོས་པ་ཐམས་ཅད་དང་བྲལ་བའི་ཕྱིར་རོ། །འདིར་མཚན་བཏགས་ཕྱེ་བ་རྣམས་ནི་དང་པོའི་དབང་དུ་བྱས་པའོ། །སྡོམ་པ་ལ་རྒྱུ་རྒྱུད་ནི་བཏགས་པ་བ་སྟེ།  གཞན་དུ་ན་དབང་བསྐུར་མ་ཐོབ་པའི་སེམས་ཅན་ཐམས་ཅད་སྔགས་
10-5-36b


སྡོམ་རྒྱུད་ལྡན་དུ་ཁས་ལེན་དགོས་པས་འབད་མེད་དུ་གྲོལ་བ་དང་།  གསང་སྒྲོགས་ཀྱི་རྩ་ལྟུང་གི་ཡུལ་མེད་པ་དང་།  སྨིན་བྱེད་ལམ་དུས་ཀྱི་དབང་དུ་འགྱུར་བ་དང་།  མངལ་སྐྱེས་ཐམས་ཅད་དགེ་སློང་དུ་འགྱུར་བ་དང་།  སོ་སྐྱེ་དང་།  ཐེག་དམན་
ཐམས་ཅད་བྱང་སེམས་སུ་འགྱུར་བ་སོགས་སྐྱོན་མཐའ་ཡས་པའི་ཕྱིར་རོ། །ཐབས་རྒྱུད་དང་འབྲས་རྒྱུད་གཉིས་ནི་མཚན་ཉིད་པ་སྟེ།  སྔགས་སྡོམ་གྱི་དབང་དུ་བྱས་པའི་སྡོམ་པའི་གནས་སོགས་ལྔ་ཆར་ཚང་བའི་ཕྱིར་རོ། །དེ་ཡང་ཐབས་གང་
གིས་སྡོམ་པའི་མ་མཐའ་དབང་ནས་འཛིན་པ་ཉིད་ཀྱིས་འདི་འགྲུབ་པ་སྟེ་ལེགས་པར་དཔྱོད་ཅིག །ཟླ་བ་མེ་ལོང་ལྟ་བུའི་ཡེ་ཤེས་ཡིན་ནས་བསྒོམ་པར་གསུངས་པ་བས་ཀྱང་དོན་འདི་དག་འགྲུབ་སྟེ།  ཡིན་ཚུལ་ལ་འབྲས་བུ་དངོས་མ་ཡིན་
ཞིང་རྣམ་པ་ཡིན་པར་གསུངས་ལ།  ཡིན་ཚུལ་དེ་ཙམ་ནི་འཇུག་པའི་སྐབས་ཀྱི་རྡོ་རྗེ་དོན་དམ་སེམས་བསྐྱེད་དུ་བསྒོམ་པ་ལ་ཡང་ཡོད་པའི་ཕྱིར་རོ། །རྒྱུད་གསུམ་དག་པ་མཚན་ཉིད་པ་ཡིན་དུ་ཆུག་མོད་ཀྱི་ཀྱེ་རྡོ་རྗེ་སོགས་འབྲས་རྒྱུད་མཚན་ཉིད་པ་དང་། 
གཞན་གཉིས་བཏགས་པ་བ།  སྡོམ་པ་ལ་ཐབས་རྒྱུད་དང་།  འབྲས་རྒྱུད་མཚན་ཉིད་པ་དང་།  རྒྱུ་རྒྱུད་བཏགས་པ་བར་འཇོག་པ་འདི་རྟོག་པས་རང་དབང་དུ་སྦྱར་བར་སོང་གི་དེ་འདྲའི་རྣམ་པར་དབྱེ་བ་ཡིད་ཆེས་པའི་ལུང་ཁུངས་གང་ན་ཡོད་
ཅེ་ན།  དཔལ་ལྡན་རྩེ་མོའི་ཞབས་ཀྱིས་རྒྱུད་ཀྱི་མཚན་དོན་གྱི་སྐབས་སུ།  དེ་ལ་རྒྱུད་ཀྱི་མཚན་ནི་ཕལ་ཆེར་ཡང་དག་པར་རྫོགས་པའི་སངས་རྒྱས་ཀྱིས་ཡེ་ཤེས་འབྲས་བུའི་རྒྱུད་ལས་བརྩམས་ཏེ་བཏགས་ནས།  དེ་ནས་ཐབས་རྒྱུད་དང་རྒྱུ་རྒྱུད་
10-5-37a


ལ་ཤུགས་ལས་སྦྱར་བའི་མཚན་མང་སྟེ།  དཔེར་ན་དཔལ་ཀྱེ་རྡོ་རྗེ་དང་།  གསང་བ་འདུས་པ་དང་།  ཡང་དག་པར་སྦྱོར་བ་ལ་སོགས་པ་ལྟ་བུའོ། །ཡང་ཁ་ཅིག་ནི་འབྲས་བུའི་རྒྱུད་དང་ཐབས་རྒྱུད་ལས་
བཏགས་ཏེ།  དཔེར་ན་དེ་ཁོ་ན་ཉིད་བསྡུས་པ་ལྟ་བུའོ། །ཁ་ཅིག་ནི་ཐབས་རྒྱུད་ཁོ་ནའི་མིང་ཡིན་ཏེ།  དཔེར་ན་ལེགས་པར་གྲུབ་པ་བྱེད་པ་ལྟ་བུའོ་ཞེས་གསུངས་པ་འདི་ཉིད་ཡིད་ཆེས་པའི་ལུང་ཁུངས་ཡིན་ནོ། །འདིས་ཅི་ལྟར་འགྲུབ་ཅེ་ན་
རྒྱུད་གསུམ་ཀ་ཀྱེ་རྡོ་རྗེ་མཚན་ཉིད་པ་ཡིན་ན།  ཀྱེ་རྡོར་ཞེས་པའི་མཚན་གྱིས་འབྲས་རྒྱུད་དངོས་སུ་བསྟན་ནས་གཞན་གཉིས་ཤུགས་ལ་བསྟན་པ་འགལ་ཏེ།  བུམ་པ་ཞེས་པས་གསེར་བུམ་དངོས་སུ་བསྟན་ནས།  དངུལ་བུམ་དང་།  ཟངས་བུམ་
ཤུགས་ལ་བསྟན་པ་མི་འཐད་པ་བཞིན་ནོ། །དེ་ཁོ་ན་ཉིད་བསྡུས་པ་ཐབས་རྒྱུད་དང་འབྲས་རྒྱུད་ལ་དངོས་སུ་བཏགས་ནས་རྒྱུ་རྒྱུད་ཤུགས་ལ་བསྟན་པ་གྲུབ་ན་སྡོམ་པའང་འགྲུབ་སྟེ།  གང་སྨྲ་བ་དེ་སྨྲ་བའི་ཕྱིར་རོ། །དེས་ན་རྗེ་བཙུན་སྐུ་མཆེད་ཀྱིས་
རྒྱུད་གསུམ་ཀའང་ཀྱེ་རྡོ་རྗེ་སྟེ་ཞེས་གསུངས་ནས་བརྒྱད་སྟོང་དོན་བསྡུའི་ལུང་དྲངས་པའི་དོན་ཡང་།  དངོས་བསྟན་ཤུགས་བསྟན་ནམ་མཚན་བཏགས་མ་ཕྱེ་བའི་མཚན་དོན་གྱི་སྐབས་ཀྱི་ཀྱེ་རྡོ་རྗེ་ཡིན་ཞེས་པའི་དོན་ཏེ།  འབྲས་རྒྱུད་ནི་དངོས་
བསྟན་དང་མཚན་ཉིད་པ་ཡིན་པའི་ཕྱིར་དང་།  གཞན་གཉིས་ནི་ཤུགས་བསྟན་དང་བཏགས་པ་བ་ཡིན་པའི་ཕྱིར་རོ།  དེས་ན་འདི་ལ་སྒྲ་འཇུག་སྟེ་ཞེས་པའི་འབྲུ་ཡང་མི་དགོས་ཤིང་།  ཀྱེ་རྡོ་རྗེ་དང་།  རྡོ་རྗེ་གུར་དང་།  ཡང་དག་པར་སྦྱོར་
10-5-37b


བ་རྣམས་རྒྱུད་གསུམ་གྱི་བདག་ཉིད་ཅན་དུ་གསུངས་པའི་དོན་ཐམས་ཅད་ཀྱང་འདིས་རྟོགས་པར་བྱའོ། །གཉིས་པ་ནི།  དབང་གི་ཡེ་ཤེས་དེ་ཡིས་སྣང་བ་ལ། །རྒྱས་འདེབས་ཕྱིར་ན་ཕྱག་རྒྱ་ཆེན་པོ་སྟེ། །སྣང་བ་ཐམས་ཅད་ཡེ་ཤེས་དེ་ཉིད་དུ། །
འདུས་ཕྱིར་སྡོམ་པར་ཁ་སྦྱོར་རྒྱུད་ལས་གསུངས། །ཞེས་བྱ་བ་སྟེ།  དབང་དང་རིམ་གཉིས་ལས་སྐྱེས་པའི་ཡེ་ཤེས་ཕྱག་རྒྱ་ཆེན་པོ་ཁྱད་ཆོས་ལྔ་ལྡན་གྱི་སྡོམ་པ་ཡིན་ན།  ཕྱག་རྒྱ་ཆེན་པོ་དང་སྡོམ་པར་འཇོག་པའི་སྒྲ་དོན་ཡང་གཅིག་གམ་སྙམ་ན་དེ་ནི་
མ་ཡིན་ཏེ།  ཕྱག་རྒྱ་ཆེན་པོའི་སྐད་དོད་ནི་མ་ཧཱ་མུ་དྲ་ཞེས་པ་རྒྱས་འདེབས་པས་ན་རྒྱ་ཆེན་པོ་སྟེ།  དངོས་པོ་ཀུན་ལ་ཁྱབ་པ་པོ་ཞེས་དང་།  ང་ཡིས་འདི་ཀུན་ཁྱབ་པ་སྟེ། །ཞེས་པའི་ཚུལ་གྱིས་ཡེ་ཤེས་དེས་སྣང་བའི་དངོས་པོ་ཐམས་ཅད་ལ་
ཕར་རྒྱས་འདེབས་པའི་སྒོ་ནས་བཤད་དགོས་ལ།  སྡོམ་པའི་དོན་ནི།  ཇི་ལྟར་ཕྱི་རོལ་དེ་བཞིན་ནང་། །སྡོམ་པའི་དེ་ཉིད་རབ་ཏུ་ཕྱེ། །ཞེས་སྣང་བ་དེ་ཉིད་ཡེ་ཤེས་དེའི་ངོ་བོར་སྡོམ་པའི་ཆ་ནས་བཤད་དགོས་པའི་ཕྱིར་ཏེ།  ཁ་སྦྱོར་དང་
པོའི་གསུམ་པར།  ཀུན་ལས་སྣ་ཚོགས་ཕྱག་རྒྱ་སྟེ། །ཀུན་ལས་སྣ་ཚོགས་སྡོམ་པ་ཡིན། །ཞེས་གསུངས་པས་སོ། །གལ་ཏེ་འདིའི་ཕྱག་རྒྱ།  རྗེ་བཙུན་རྩེ་མོས།  ཕྱག་རྒྱ་ནི་རྡོ་རྗེ་ལྷ་མོའི་ཚོགས་ཏེ།  སྔར་བསྟན་པའི་བུད་མེད་སྒྱུ་
མ་ཉིད་དོ། །ཞེས་བཤད་པ་དང་འགལ་ལོ་སྙམ་ན།  ཡེ་ཤེས་ཕྱག་རྒྱ་ཆེན་པོ་དེ། །བསྐྱེད་པའི་ཆ་ནས་བུད་མེད་སྒྱུ་མ་ཡང་ཕྱག་རྒྱར་འཇོག་པ་སྟེ།  ཕྱག་རྒྱ་ཡེ་ཤེས་སུ་བསྒྲུབ་པ་དང་།  ཡེ་ཤེས་ཕྱག་རྒྱར་བསྒྲུབ་པ་ལས་ཤེས་སོ། །
10-5-38a


གསུམ་པ་ནི།  སྤང་བྱ་འབྲས་བུ་རྟེན་དང་བརྟེན་པ་ཡིས། །རིམ་གཉིས་གྲངས་ངེས་བསྒྲུབ་པའི་ལུང་རིགས་ཀྱིས། །ལུགས་མཆོག་འདི་ལ་སྡོམ་པའང་རིམ་གཉིས་ཀྱི། །སྡོམ་པ་གཉིས་སུ་ངེས་པའི་
གྲངས་ངེས་འགྲུབ། །ཞེས་བྱ་བ་སྟེ། མངོན་པར་རྟོགས་པ་རིན་པོ་ཆེའི་ལྗོན་ཤིང་ལས།  སྤང་བྱ་ལ་ཐ་མལ་གྱི་རྣམ་རྟོག་དང་།  གྱ་ནོམ་ལྷར་ཞེན་གྱི་རྣམ་རྟོག་གཉིས་སུ་ངེས་པས་རིམ་པ་གཉིས་སུ་ངེས་པ་དང་།  འབྲས་བུ་ལ་གཟུགས་སྐུ་དང་
ཆོས་སྐུ་གཉིས་སུ་ངེས་པས་རིམ་པ་གཉིས་སུ་ངེས་པ་དང་།  རང་གི་ངོ་བོ་མེ་ཏོག་དང་མེ་ཏོག་གི་དྲི་ལྟར་རྟེན་དང་བརྟེན་པ་ཡིན་པས་རིམ་པ་གཉིས་སུ་གྲངས་ངེས་པར་སྒྲུབ་པ་གསུམ་གྱིས་རྣལ་འབྱོར་ཆེན་པོའི་སྡོམ་པ་ལ་ཡང་བསྐྱེད་རིམ་གྱི་སྡོམ་པ་དང་།  རྫོགས་
རིམ་གྱི་སྡོམ་པ་གཉིས་སུ་གྲངས་ངེས་པར་འགྲུབ་སྟེ།  ཁ་སྦྱོར་དང་འདུས་པའི་རྒྱུད་ཕྱི་མ་ལས་གསལ་བར་གསུངས་པའི་ཚུལ་ནི་འོག་ཏུ་བཤད་པར་བྱའོ། །ད་ནི་སྔར་བཤད་པའི་དོན་དེ་དག་ཐམས་ཅད་རྟོག་གེའི་རིགས་པས་རང་དགར་དབྱེ་
བསྡུ་བྱས་པ་མ་ཡིན་པར།  བཀའ་དང་།  བསྟན་བཅོས་དང་།  མན་ངག་ཐུན་མོང་མ་ཡིན་པའི་ཡིད་ཆེས་པའི་ཁུངས་བསྟན་པར་འདོད་ནས།  རྩ་རྒྱུད་ཁ་སྦྱོར་ཡེ་ཤེས་ཐིག་ལེ་དང་། །ལུགས་འདིར་ཚད་མར་གྱུར་པའི་གཞུང་འགྲེལ་དང་། །
སྙིང་པོ་རྩེ་མོ་རྒྱལ་མཚན་བཟང་པོ་ཡི། །མཐའ་ཅན་བླ་མའི་གསུང་རབ་འདི་སྦྱར་བྱ། །ཞེས་བྱ་བ་སྨོས་ཏེ།  ཀྱེ་རྡོ་རྗེའི་རྩ་བའི་རྒྱུད་ལས།  ལེའུ་དང་པོར།  སྡོམ་པའི་དབྱེ་བའང་བཤད་པར་བྱ་སྟེ།  ཞེས་དང་།  ཕྱི་མའི་གསུམ་པར་
10-5-38b


དེ་ནས་རྡོ་རྗེ་ཅན་གྱིས་རྣལ་འབྱོར་མ་རྣམས་ལ་རྒྱུད་ཐམས་ཅད་ཀྱི་གླེང་གཞི་ཞེས་བྱ་བའི་ཐབས་བཀའ་སྩལ་པ།  སྡོམ་པ་དང་ནི་དབང་དང་ཡང་། །ཞེས་དང་།  དེ་ལ་སྡོམ་པ་བཀའ་སྩལ་པ། །སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་རྣམ་
པར་རབ་ཏུ་གནས། །ཨེ་ཝཾ་རྣམ་པའང༷་བདེ་ཆེན་པོ། །དབང་ལས་ཡང་དག་ཤེས་པ་ནི། །ཞེས་དང་།  ཕྱི་མའི་བཞི་པར།  རྣལ་འབྱོར་མ་ལུས་དབུས་གནས་སུ། །ཨེ་ཡི་རྣམ་པ་སྡོམ་པའི་གནས། །ཇི་ལྟར་ཕྱི་རོལ་དེ་བཞིན་ནང་། །
སྡོམ་པའི་དེ་ཉིད་རབ་ཏུ་དབྱེ། །ཞེས་པ་རྣམས་ཀྱིས་གཙོ་བོར་རྫོགས་རིམ་གྱི་སྡོམ་པ་བསྟན་ནས།  ཤུགས་ལ་རྒྱུ་རྒྱུད་ཀྱི་སྡོམ་པའང་བསྟན་ནོ། །ཁ་སྦྱོར་གཉིས་པའི་གཉིས་པ་ལས་དམ་ཚིག་ཉམས་པས་རྣལ་འབྱོར་པ་བག་མེད་པར་སྐྱེ་བར་
འགྱུར་ཏེ།  བྱང་ཆུབ་སེམས་དཔའི་དམ་ཚིག་བླང་བར་བྱས་ནས་ཡང་མི་བྱེད་པར་སྡོམ་པ་གཟུང་བར་བྱ་སྟེ།  དེའི་ཕྱིར་ཀུན་གྱི་སྡོམ་པ་དང་ལྡན་ཞིང་དེ་ཁོ་ན་ལ་གནས་པས་ཕྱག་རྒྱའི་རྣལ་འབྱོར་བྱའོ། །ཞེས་གསུངས་པ་འདིས་དབང་གསུམ་
པའི་ལམ་བསྒོམ་པ་ལ་སྡོམ་པ་རྫོགས་དགོས་པར་བསྟན་ནོ། །ཡང་དང་པོའི་གསུམ་པར།  ཀུན་ལས་སྣ་ཚོགས་ཕྱག་རྒྱ་སྟེ། །ཀུན་ལས་སྣ་ཚོགས་སྡོམ་པ་ཡིས། །ཞེས་གསུངས་པའི་དོན་རྗེ་བཙུན་རྩེ་མོས་རྫོགས་རིམ་གྱི་སྡོམ་པ་
ལ་བཤད་ཅིང་།  གཉིས་པའི་གསུམ་པར་ཚིག་དེ་ཉིད་གསུངས་པ་བསྐྱེད་རིམ་གྱི་སྡོམ་པ་ལ་བཤད་པ་ནི་རྣལ་འབྱོར་ཆེན་པོའི་སྡོམ་པ་དེ་གཉིས་སུ་ངེས་པའི་ལུང་ངོ་། །ཡང་དྲུག་པའི་གསུམ་པར་དཀྱིལ་འཁོར་དང་།  སྦྱིན་སྲེག་དང་།  
10-5-39a


བཟླས་པ་སོགས་ནང་དུ་སྡོམ་པའི་ཚུལ་རྒྱས་པར་བཤད་ཅིང་།  དྲུག་པའི་བཞི་པར་དེ་ལ་སྡོམ་པ་བཀའ་སྩལ་པ། །རྣལ་འབྱོར་མ་ལུས་དབུས་གནས་སུ། །ཞེས་སོགས།  ཨེ་ཡི་རྣམ་པ་ཞེས་པ་ལ་ཨཾ་གི་རྣམ་པ་
ཞེས་པའི་ཁྱད་པར་ཙམ་མ་གཏོགས།  རྩ་རྒྱུད་ཕྱི་མའི་བཞི་པར་ཇི་ལྟ་བ་བཞིན་གསུངས་པ་དེས་ཀྱང་སྔ་མ་དེ་ཉིད་སྟོན་ནོ། །རྒྱུད་ཕྱི་མར།  འདི་སྐད་ལ་སོགས་མཐའ་ཡས་མཆོག །སངས་རྒྱས་ཀུན་གྱི་སྡོམ་པ་མཆོག །ཅེས་
གསུངས་པས་རྩ་རྒྱུད་ལས་རྒྱུད་ཐམས་ཅད་ཀྱི་གླེང་གཞིའི་དོན་སངས་རྒྱས་ཀུན་གྱི་སྡོམ་པར་གསུངས་པའི་དོན་སྟོན་ནོ། །རྡོ་རྗེ་གུར་ལས།  དེ་ཕྱིར་དཀྱིལ་འཁོར་འཁོར་ལོ་ཞེས། །ཐབས་ནི་བདེ་བའི་སྡོམ་པ་སྟེ། །སངས་རྒྱས་ང་
རྒྱལ་རྣལ་འབྱོར་གྱིས། །སངས་རྒྱས་ཉིད་དུ་འགྲུབ་པར་འགྱུར། །སྟོན་པ་སུམ་བཅུ་རྩ་གཉིས་མཚན། །གཙོ་བོ་དཔེ་བྱད་བརྒྱད་ཅུར་ལྡན། །ཞེས་གསུངས་པ་འདི་ཉིད་ཀྱིས་བསྐྱེད་རིམ་གྱི་སྡོམ་པའི་དོན་དང་ཐ་སྙད་གཉིས་ཀ་ལེགས་པར་
བསྟན་ནོ། །ཡེ་ཤེས་ཐིག་ལེའི་རྒྱུད་ལས།  ཆུ་ཡི་དབང་བསྐུར་ཅོད་པན་དག །བྱ་བའི་རྒྱུད་ལ་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་ལ་རབ་ཏུ་གསལ། །ཕྱིར་མི་ལྡོག་པ་ཡི་ནི་དབང་། །རྣལ་འབྱོར་རྒྱུད་དུ་
གསལ་བར་ཕྱེ། །དེ་ནི་དྲུག་གི་བྱེ་བྲག་དབང་། །དེ་ནི་སློབ་དཔོན་དབང་ཞེས་བྱ། །རྣལ་འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་ཡང་ནི་དེ་བཞིན་ནོ། །ཞེས་གསུངས་པའི་
10-5-39b


དོན་ནི་སྤྱིར་རྒྱུད་སྡེ་བཞི་ལ་དབང་གི་བབས་མི་འདྲ་བ་བཞི་ཡོད་པ་ཉིད་ཀྱིས་སྔགས་སྡོམ་ཐོབ་མཚམས་ལ་ཡང་མི་འདྲ་བ་བཞི་ཡོད་པ་བསྟན་ཏོ། །འདུས་པའི་རྒྱུད་ཕྱི་མར།  དྲི་བ་སོ་གཉིས་པ།  དེ་བཞིན་སྡོམ་པ་ཇི་ལྟ་བུ། །ཞེས་པའི་ལན་དུ། 
རྡོ་རྗེ་ཅན་གྱིས་དེར་སྟོན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པ་ཡི་ནི་རིམ་ཉིད་དང་། །དེ་བཞིན་རྫོགས་པའི་རིམ་པའོ། །སྒྲུབ་པ་དང་ནི་ནན་ཏན་དང་། །དམ་ཚིག་དེ་བཞིན་སྡོམ་པ་རྣམས། །སྔར་བཞིན་དེ་ཀུན་རྒྱས་པར་ནི། །
རིམ་པའི་དབྱེ་བས་ཕྱེ་བ་ཡིན། །ཞེས་གསུངས་པ་འདིས་སྡོམ་པའི་ངོས་འཛིན་བསྐྱེད་རྫོགས་གཉིས་ལ་མཛད་པ་དང་།  རྒྱུད་ལས་གསུངས་པའི་ཆོས་ཐམས་ཅད་གཉིས་པོ་དེར་འདུས་པའི་ཚུལ་གྱི་བར་བཤད་དོ། །བདེ་མཆོག་སྡོམ་
འབྱུང་ལས།  ཀྱེ་རྣམ་པ་ཀུན་མཆོག་སྡོམ་པ་ཡི། །བསྐྱེད་པའི་རྣལ་འབྱོར་མཚན་ཉིད་དང་། །རྫོགས་པ་ཡི་ནི་ཇི་ལྟར་ལགས། །ཞེས་དང་།  རྫོགས་པའི་བྱང་ཆུབ་བདེ་བ་ཆེ། །ཕྱག་རྒྱ་ཆེན་པོ་མཆོག་དེ་བཞིན། །དེ་ཉིད་ཆོས་ལ་འཇུག་བྱའི་
ཕྱིར། །དེ་ནས་དབྱེ་བ་རབ་བསྟན་པ། །བླ་མ་དམ་པའི་གདམས་ངག་ནི། །གསལ་བར་འགྱུར་གྱིས་གཞན་དུ་མིན། །སངས་རྒྱས་ཀུན་གྱི་སྡོམ་པ་ནི། །ཨེ་ཝཾ་ཡི་གེ་ལ་རབ་གནས། །སྐུ་དང་གསུང་དང་ཐུགས་རྣམས་ལས། །རྣམ་
ཀུན་མཆོག་གི་སྡོམ་པའོ། །སྡོམ་པ་བྱང་ཆུབ་བདེ་མཆོག་སྟེ། །བལྟར་མེད་བརྗོད་དུ་མེད་པའོ། །སངས་རྒྱས་ཀུན་གྱི་གསང་བ་ནི། །འདུས་པ་བདེ་བའི་མཆོག་ཡིན་ཏེ། །བདག་བྱིན་རླབས་པའི་རིམ་པ་འདི། །བླ་མའི་དྲིན་གྱིས་གསལ་
10-5-40a


བར་འགྱུར། །འདི་ནི་རྫོགས་པའི་རིམ་པ་ངེས་པར་བསྟན་པའི་རིམ་པར་ཕྱེ་བ་སྟེ་གསུམ་པའོ། །ཞེས་གསུངས་པ་འདིས་ཀྱང་སྔར་བཤད་པའི་དོན་དེ་ཉིད་གསལ་བར་བསྟན་ཏོ། །ཡང་དེ་ཉིད་ལས།  བུམ་པ་ལས་
ནི་བྱུང་བའོ། །གཉིས་པ་གསང་བ་མཆོག་ཡིན་ཏེ། །གསུམ་པ་ཤེས་རབ་ཡེ་ཤེས་ཡིན། །བཞི་པ་དེ་ལྟར་ཡང་དེ་བཞིན། །དབང་བསྐུར་འདི་དག་ཡང་དག་ལྡན། །དེ་ནི་དམ་ཚིག་ཅན་ཞེས་བྱ། །ཞེས་གསུངས་པ་འདིས་ནི་དབང་བཞི་
རྫོགས་པས་དམ་ཚིག་རྫོགས་པར་བསྟན་པ་ཡིན་ནོ། །གྲུབ་ཆེན་མཚོ་སྐྱེས་ཀྱིས་སངས་རྒྱས་ཀུན་གྱི་སྡོམ་པ་ནི་ཞེས་པའི་འགྲེལ་པར་སྡོམ་པ་ནི་བདེ་བའི་མཆོག་གམ།  ཆོས་ཐམས་ཅད་ཀྱི་བདག་ཉིད་དེ་བཞིན་གཤེགས་པར་བསྡུས་པའོ། །
དབང་བསྐུར་བ་ལས་ཤེས་པར་བྱ། །ཞེས་པ་ནི་གང་དུ་ཨེ་དང་ཝཾ་ལས་དབང་བསྐུར་བར་ཤེས་པར་བྱེད་པའོ། །ཡང་དག་ཅེས་པ་ནི་མཆོག་གི་དབང་བསྐུར་བས་དྲི་མ་མ་ལུས་པ་འཁྲུད་པར་བྱེད་པའོ། །དེ་ཅི་སྙམ་པ་ལ་གསུངས་པ་བདེ་བ་ཆེན་པོ་སྟེ།  
བདེ་བ་ཆེན་པོའི་ཡེ་ཤེས་སོ། །ཞེས་དང་།  རྣལ་འབྱོར་མ་ལུས་དབུས་གནས་སུ། །ཞེས་པའི་འགྲེལ་པར།  རྡོ་རྗེ་རིགས་ཀྱི་ལེའུ་ལས་བསྟན་པའི་སྡོམ་པ་བཤད་པའི་ཕྱིར་རྡོ་རྗེ་སྙིང་པོས་ཞུས་པ་འཁོར་ལོའི་ཞེས་པའོ། །རྣལ་འབྱོར་
མ་ལུས་དབུས་གནས་པ་ཞེས་པ་ནི།  དེ་ཉིད་བདག་མེད་རྣལ་འབྱོར་མའི་ས་བོན་ལུས་ཀྱི་དབུས་ན་གནས་པ་དེ་ཉིད་སྡོམ་པ་དེ་ཉིད་ཕྱི་རོལ་གྱི་ཚུལ་སྡུད་པར་བྱེད་པ་དེ་ཉིད་ཀྱིས་གསུངས་པ་ཇི་ལྟར་ཕྱི་རོལ་དེ་ལྟར་ནང་ཞེས་པ་སྟེ།  གང་ཕྱི་རོལ་གྱི་
10-5-40b


དཀྱིལ་འཁོར་དུ་ཨ་དེ་ཡོངས་སུ་གྱུར་པ་ལས་བདག་མེད་མ་སྟེ་དེ་ཉིད་ཀྱི་རྣམ་པར་དག་པ་ལུས་ཀྱི་དབུས་ནའོ། །ཡང་ན་ཕྱི་དང་ནང་གི་ཆོས་ཐམས་ཅད་རྣམ་པ་མང་བས་དེའི་ཕྱིར་སྡུད་པར་བྱེད་པས་སྡོམ་པའོ། །ཞེས་གསུངས་པ་འདི་དག་གིས་རྫོགས་
རིམ་གྱི་སྡོམ་པའི་ངོ་བོ་བདེ་ཆེན་གྱི་ཡེ་ཤེས་དང་།  དེ་ཡང་དབང་གོང་མ་ལས་ཐོབ་པ་དང་།  དེར་ཆོས་ཐམས་ཅད་སྡུད་བའི་ཚུལ་བསྟན་ཏོ། །སྨན་པའི་ཞབས་ཀྱིས་གསང་བ་འདུས་པའི་སྒྲུབ་ཐབས་དངོས་གྲུབ་འབྱུང་བའི་གཏེར་ལས།  
དམ་ཚིག་ལ་ནི་རྣམ་གཉིས་ཏེ། །ཐུན་མོང་སྡོམ་པར་བསྟན་པ་དང་། །ཐུན་མོང་མ་ཡིན་སྡོམ་པའོ། །ཐུན་མོང་མ་ཡིན་རྣམ་གསུམ་སྟེ། །སྤང་བའི་དམ་ཚིག་སྡོམ་པ་དང་། །བཟའ་དང་བསྲུང་བའི་དམ་ཚིག་དང་། །རྣལ་འབྱོར་སྙིང་པོ་སྡོམ་
པའོ། །ཞེས་གསུངས་ཤིང་།  དེ་དག་གི་དོན་ཞལ་ལུང་གི་འགྲེལ་པར།  སློབ་དཔོན་དེ་ཉིད་ཀྱིས།  ཐུན་མོང་ཞེས་པ་ནི་བྱང་ཆུབ་སེམས་དཔའ་ལ་སོགས་པ་དང་ཐུན་མོང་དུ་གྱུར་པའི་སྡོམ་པས་ཐོབ་པ་སྟེ་རིག་པའི་དབང་ངོ་། །དེ་དང་
ཞེས་པ་ནི་ཐུན་མོང་མ་ཡིན་པའི་སྡོམ་པས་ཐོབ་པ་སྟེ་རྡོ་རྗེ་སློབ་དཔོན་ཕྱིར་མི་ལྡོག་པའི་དབང་ངོ་ཞེས་དང་།  དེ་ལ་སོགས་པའི་རྣལ་འབྱོར་པའི་སྙིང་པོ་སྡོམ་པ་དང་།  བཟའ་བའི་དམ་ཚིག་མཆོག་ལ་གནས་པར་བྱས་ནས་ཞེས་གསུངས་
པ་འདི་དག་གིས་རྣལ་འབྱོར་སྙིང་པོ་སྡོམ་པ་རྫོགས་རིམ་གྱི་སྡོམ་པར་བསྟན་པས་གྲུབ་བའི་དབང་ཕྱུག་དེ་དག་དགོངས་པ་གཅིག་པའོ། །དཔལ་རྩེ་བ་ཆེན་པོ་རྗེ་བཙུན་ས་སྐྱ་པའི་ཞལ་སྔ་ནས།  དབང་བཞི་ངོ་སྤྲོད་ཀྱི་འགྲེལ་པར།  དེ་ལྟར་
10-5-41a


དབང་བཞིའི་ལམ་དེ་དག་བསྡུས་ནས་ཉམས་སུ་ལེན་ན།  སྡོམ་པ་གསུམ་ལྡན་གྱིས་བསྒོམ་དགོས་ཏེ།  སོ་སོ་ཐར་པའི་སྡོམ་པ་དགེ་བསྙེན་ནས་དགེ་སློང་གི་བར་དུ་ཐོབ་པ།  བྱང་ཆུབ་སེམས་དཔའི་སྨོན་འཇུག་གི་
སེམས་བསྐྱེད་ཐོབ་པ།  གསང་སྔགས་ཀྱི་དབང་བཞིའི་སྡོམ་པ་ཐོབ་པའོ། །དེ་ལ་ཉན་ཐོས་ཉོན་མོངས་པའི་སྐྱོན་ཤེས་པར་བྱས་ནས་མྱུར་དུ་སྤོང་།  བྱང་ཆུབ་སེམས་དཔའ་སྐྱོན་ཡོན་འདྲིས་པར་བྱས་ནས་གནས་བསྒྱུར།  གསང་སྔགས་པས་
ཉོན་མོངས་པ་གང་སྐྱེས་པ་དེའི་ཆོས་ཅན་དང་།  ཆོས་ཉིད་དབྱིངས་དང་ཡེ་ཤེས་གཉིས་སུ་མེད་པར་གཟུགས་ཀྱི་སྐུ་དང་།  ཆོས་ཀྱི་སྐུ་ཉིད་ངོ་ཤེས་པར་བྱས་ནས།  ལྷུན་གྲུབ་དང་གནས་གྱུར་གྱི་སྐུ་སྒྲུབ་པར་བྱེད་དོ། །དེ་ལྟར་ཤེས་པར་བྱས་ཏེ་
མཚན་མ་དང་རྣམ་རྟོག་ཡེ་ཤེས་ཀྱི་དབང་དུ་བསྡུ་བའི་ཕྱིར་འདི་བསྒོམ་སྟེ། དཔེར་ན་བདག་ལ་འདོད་ཆགས་སྐྱེས་ན།  གཉེན་པོས་འདོད་ཆགས་ཀྱི་དབང་དུ་མི་གཏོང་བ་ནི་སོ་སོ་ཐར་བའི་སྡོམ་པའོ། །དེ་ནས་བདག་ལ་སེམས་ཅན་གྱི་ལས་དང་
ཉོན་མོངས་པ་བག་ཆགས་དང་བཅས་པ་བྲལ་ནས་མངོན་པར་རྫོགས་པར་འཚང་རྒྱ་བར་གྱུར་ཅིག །ཅེས་བྱང་ཆུབ་ཀྱི་སེམས་ཀྱི་སྒོམ་པ་ནི་བྱང་ཆུབ་སེམས་དཔའི་སྡོམ་པའོ། །དེ་ནས་རང་ཡི་དམ་གྱི་ལྷར་བསྒོམ།  བླ་མ་སྤྱི་བོའམ་སྙིང་ཁར་བསྒོམས་
ལ་མོས་གུས་བྱ།  སེམས་བསྐྱེད་རྫོགས་ཀྱི་ཡེ་ཤེས་དྲན་པར་བྱ་སྟེ།  རང་གི་ལུས་ངག་ཡིད་གསུམ་སངས་རྒྱས་ཀྱི་ཆོས་ཀྱི་སྐུ་དང་གཟུགས་ཀྱི་སྐུར་བསྒོམ་པ་ནི་རིག་འཛིན་སྔགས་ཀྱི་སྡོམ་པའོ། །དེ་ནས་དགེ་བའི་རྩ་བ་སངས་རྒྱས་ཐོབ་པར་
10-5-41b


གྱུར་ཅིག་ཅེས་བསྔོ་བ་དང་།  དེ་མ་རྟོགས་པའི་སེམས་ཅན་ལ་སྙིང་རྗེ་བསྒོམ་པ་དང་།  ཆོས་ཐམས་ཅད་རྨི་ལམ་ལྟ་བུའི་ངང་ལ་སྤྱོད་ལམ་བྱ་བ་སྡོམ་པ་གསུམ་མྱུར་དུ་སྨིན་པར་བྱེད་པའོ། །ཞེས་གསུངས་པ་འདི་དག་གིས་སྡོམ་པ་
གསུམ་ལྡན་གྱི་སྔགས་སྡོམ་དབང་བཞིའི་སྡོམ་པ་དང་།  དེ་ཉིད་ཉམས་སུ་ལེན་པ་ན་བསྐྱེད་རྫོགས་ཀྱི་ཏིང་ངེ་འཛིན་དྲན་དགོས་པར་བསྟན་ནོ། །སྐྱེས་བུ་ཆེན་པོ་བསོད་ནམས་རྩེ་མོའི་ཞལ་སྔ་ནས།  ཀུན་ལས་སྣ་ཚོགས་ཕྱག་རྒྱ་སྟེ། །ཀུན་
ལས་སྣ་ཚོགས་སྡོམ་པ་ཡི། །ཞེས་པ་གོང་མའི་འགྲེལ་བར།  དེ་ཉིད་ཀུན་ལས་སྣ་ཚོགས་ཕྱག་རྒྱ་སྟེ་ཕྱོགས་དང་དུས་ཀུན་ལའོ། །སྣ་ཚོགས་ནི་ཁ་དོག་དང་དབྱིབས་མི་འདྲ་བ་དུ་མའོ། །ཕྱག་རྒྱ་ནི་རྡོ་རྗེ་ལྷ་མོའི་ཚོགས་ཏེ་སྔར་བསྟན་པའི་
བུད་མེད་སྒྱུ་མ་ཉིད་དོ། །དེ་ཉིད་དང་མཉམ་པར་སྦྱོར་བ་ལས་ཕྱོགས་བཅུ་ཀུན་ལས་སྣ་ཚོགས་ཀྱི་སྡོམ་པ་སྟེ།  འདོད་ཆགས་ལ་སོགས་པའི་རྣམ་པར་རྟོག་པ་སྡོམ་པའམ།  ཡང་ན་བདེ་བ་ཆེན་པོའི་ཡེ་ཤེས་བསྐྱེད་པ་ཉིད་ཀྱི་ཕྱིར་སཾ་བྷ་རའོ། །
དེས་ནི་བདེ་མཆོག་གི་བཤད་པར་འགྱུར་རོ། །ཞེས་དང་།  དེ་ཉིད་ཕྱི་མའི་འགྲེལ་པར།  ཀུན་ལས་སྣ་ཚོགས་ཞེས་བྱ་བ་རྐང་པ་གསུམ་གྱིས་བསྒོམ་བྱའི་ལྷ་མདོར་བསྟན་ཏེ།  དེའང་ཀུན་ལས་ཞེས་བྱ་བ་ནི་ཕྱོགས་ཀུན་ལའོ། །སྣ་ཚོགས་པ་ནི་ཁ་དོག་
སྣ་ཚོགས་པ་སྟེ་རིགས་ལྔའོ། །ཕྱག་རྒྱ་ནི་ལྷ་མོ་སྟེ་ཡུམ་དང་བཅས་པའོ། །ཀུན་ལ་ནི་ལྷ་ཀུན་ལའོ། །སྣ་ཚོགས་པ་ནི་བཞུགས་ཚུལ་ལོ། །སྡོམ་པ་ནི་དེས་ཐ་མལ་གྱི་རྣམ་རྟོག་སྡོམ་པའོ། །ཀུན་ལས་སྣ་ཚོགས་ནི་དེ་ལྟ་བུའི་ལྷ་རྣམས་ཀྱིས་སོ། །
10-5-42a


བྱ་བ་ནི་དངོས་གྲུབ་གང་འདོད་སྒྲུབ་པ་པོ།  ཞེས་དང་།  དྲུག་པའི་བཞི་པའི་འགྲེལ་པར།  སྡོམ་པ་ཞེས་བྱ་བ་གོང་དུ་བྱང་ཆུབ་སེམས་དཔའི་སྡོམ་པའང་གསུངས།  བསྐྱེད་པའི་རིམ་པའི་སྡོམ་པའང་གསུངས་ན།  འདིར
་རྫོགས་པའི་རིམ་པའི་སྡོམ་པ་དེ་ཞུ་ཞེས་བྱའོ། །བཅོམ་ལྡན་འདས་ཞེས་བྱ་བ་ལ་སོགས་པས་དེའི་ལན་བསྟན་ཏོ། །འདི་ལ་གཉིས་ཏེ་མདོར་བསྟན་པ་དང་།  རྒྱས་པར་བཤད་པའོ། །དང་པོ་ནི་རྣལ་འབྱོར་མ་ལུས་ཞེས་བྱ་བ་ལ་
སོགས་པ་ཤ་ལོ་ཀ་གཅིག་གོ།  དེའང་འདིར་སྤྱིར་སྡོམ་པ་ཞེས་བྱ་བ་ནི་སྤྱིར་ཉན་ཐོས་སམ་བྱང་ཆུབ་སེམས་དཔའ་འམ།  བསྐྱེད་པའི་རིམ་པ་གང་ལ་སྡོམ་པའི་གནས་གང་དུ་སྡོམ་པ་དང་།  རང་གི་ངོ་བོ་གང་སྡོམ་པ་དང་།  ཐབས་
གང་གིས་སྡོམ་པ་དང་།  སྡོམ་པ་དང་ལྡན་པའི་གང་ཟག་ཅེས་བྱ་བ་བཞི་དགོས་ཏེ།  དཔེར་ན་ཉན་ཐོས་ལ་གནས་ན་ལེནྟྲ་ལ་སོགས་པ་དང་།  སྡེ་པ་ཐམས་ཅད་ཡོད་པར་སྨྲ་བ་ལ་སོགས་པའི་གཞི་ལ་གནས་པ་དང་།  རང་གི་ངོ་
བོ་མི་མཐུན་པའི་ཕྱོགས་སྡོམ་པ་དང་།  མང་པོ་གཅིག་ཏུ་སྡོམ་པ་དང་།  རང་གི་ངོ་བོ་བདེ་བས་སྡོམ་པ་སྟེ།  དེ་ལ་དང་པོ་ནི།  ལུས་ངག་གི་མི་དགེ་བ་སྤང་བ་བདུན་སྡོམ་ལ།  མང་པོ་གཅིག་ཏུ་སྡོམ་པ་ནི་བསླབ་པ་བསམ་གྱིས་
མི་ཁྱབ་པ་ཐམས་ཅད་ཉིས་བརྒྱ་ལྔ་བཅུ་རྩ་གསུམ་ལ་སོགས་པར་སྡོམ་པའོ། །རང་གི་ངོ་བོ་མཐུན་པ་རྣམས་ཀྱི་དཀའ་ཐུབ་བདེ་བའི་ཕྱིར་སྡོམ་པའོ། །ཐབས་གང་གིས་སྡོམ་ན་གསོལ་བ་དང་བཞི་ལ་སོགས་པས་སྡོམ་པའོ། །སྡོམ་
10-5-42b


པ་དང་ལྡན་པའི་གང་ཟག་ནི་དགེ་སློང་ལ་སོགས་པའོ། །དེ་ལྟར་བྱང་ཆུབ་སེམས་དཔའ་དང་བསྐྱེད་པའི་རིམ་པ་ལའང་ཤེས་པར་བྱའོ། །དེ་འདིར་རྫོགས་པའི་རིམ་པ་ལ་སྦྱར་ན།  གནས་ནི་ལུས་དང་རྩའི་འཁོར་ལོའོ། །རང་གི་ངོ་
བོ་ལ་གསུམ་ལས།  མི་མཐུན་པའི་ཕྱོགས་སྡོམ་པའི་དབང་དུ་བྱས་ན།  མཚན་མ་དང་རྣམ་པར་རྟོག་པ་ཐམས་ཅད་སྡོམ་པའོ། །མང་པོ་གཅིག་ཏུ་སྡོམ་པའི་དབང་དུ་བྱས་ན་ཆོས་མཐུན་གྱི་སྒོ་ནས་འཁོར་འདས་ཀྱི་ཆོས་ཐམས་ཅད་འདིར་
ལུས་ལ་བསྡུ་བའོ། །ཡང་རང་བྱུང་གི་ཡེ་ཤེས་བདེ་བས་སྡོམ་པའོ། །ཐབས་གང་གིས་སྡོམ་ན་འབར་འཛག་གི་ཐབས་ཏེ་ཤུགས་ལ་འོག་ནས་ཤེས་སོ། །སྡོམ་པ་དང་ལྡན་པའི་གང་ཟག་ནི་སེམས་ཅན་ཐམས་ཅད་དགེ་སློང་ངམ་
སངས་རྒྱས་ཡིན་པའོ། །དེས་ན་ཕྱི་རོལ་ན་ཇི་ལྟར་གནས་པ་ནང་དུ་དབྱེ་ཞེས་བྱ་བའི་དོན་ཏོ། །ཞེས་གསུངས་པ་འདི་དག་གིས་བསྐྱེད་རྫོགས་ཀྱི་སྡོམ་པའི་དོན་དང་ཐ་སྙད་ཐམས་ཅད་གསལ་བར་བསྟན་ཅིང་།  གནས་སོགས་བཞི་
འམ་ལྔ་བྱང་སེམས་དང་བསྐྱེད་རིམ་གྱི་སྡོམ་པ་ལ་ཡང་སྦྱར་བར་བསྟན་ནོ། །རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱི་ཞལ་སྔ་ནས།  ཨིནྟྲ་བྷུ་ཏིའི་ལམ་ལས།  སྦྱངས་པ་ལས་བྱུང་བའི་ཡོན་ཏན་ནི།  སྐྱབས་གསུམ་སྔོན་དུ་
འགྲོ་བའི་སོ་སོ་ཐར་པའི་སྡོམ་པ་དང་ཡང་ལྡན།  སྨོན་འཇུག་གི་སེམས་བསྐྱེད་བྱས་ཏེ་བྱང་ཆུབ་སེམས་དཔའི་བསླབ་པ་དང་ཡང་ལྡན།  དབང་བཞི་ཡོངས་སུ་རྫོགས་ཏེ་རྡོ་རྗེ་ཐེག་པའི་སྡོམ་པ་དང་ཡང་ལྡན།  རྒྱུད་དང་གདམས་
10-5-43a


ངག་མང་དུ་ཐོས་ཏེ།  ཐོས་བསམ་མཐར་ཕྱིན་པ་ཞིག་ཡིན་ནོ། །ཞེས་དང་།  ཌོམ་བྷི་བའི་ལམ་ལས།  ལུས་ཆུད་མ་ཟོས་པ་ནི་སྡོམ་པ་གསུམ་དང་ལྡན་པ་སྟེ།  སོ་སོ་ཐར་པ་དང་།  བྱང་ཆུབ་སེམས་
དཔའ་དང་།  རིག་པ་འཛིན་པའོ། །དེ་རེ་རེ་ལའང་ཕྱིའི་སྡོམ་པ་དང་།  ནང་གི་སྡོམ་པ་གཉིས་གཉིས་སོ། །དེ་ལ་ཕྱིའི་སོ་སོ་ཐར་པ་ནི་དགེ་སྙེན་གྱི་བསྲུང་བ་རྣམ་པ་ལྔ།  དགེ་ཚུལ་གྱི་ཡང་དག་པར་བླང་བ་བཅུ།  དགེ་སློང་གི་
བསྙེན་པར་རྫོགས་པའི་ཁྲིམས་ཉིས་བརྒྱ་ལྔ་བཅུ་རྩ་གསུམ་མོ། །ནང་ནི་ཐིག་ལེ་མི་ཉམས་པར་ལུས་ལ་གནས་པ་ཉིད་དོ། །བྱང་ཆུབ་སེམས་དཔའི་ཕྱི་ནང་གཉིས་ལས་ཕྱི་ནི་ཕམ་པའི་ཆོས་བཞི་དང་།  ཉེས་བྱས་བཞི་བཅུ་རྩ་དྲུག་
ལ་སོགས་པའོ། །ནང་ནི་སྡུག་བསྔལ་ཅན་ལ་སྙིང་རྗེ་ཆེན་པོས་ཀུན་ནས་བསླངས་ཏེ་སེམས་ཅན་གྱི་དོན་སྙིང་རྗེས་བྱེད་པ་དང་།  ཤེས་པ་གསལ་ཆ་མ་འགགས་པས་ལུས་ཅི་རིགས་སུ་བཀོལ་བ་ཉིད་དོ། །རིག་པ་འཛིན་པའི་སྡོམ་པ་ལ་
ཕྱི་ནང་གཉིས་ལས།  ཕྱི་ནི་རྒྱུད་རྣམས་ལས་ཐུན་མོང་དུ་གྲགས་པའི་རྩ་བའི་ལྟུང་བ་བཅུ་བཞི།  ཡན་ལག་གི་ལྟུང་བ་བརྒྱད་དེ།  ཉི་ཤུ་རྩ་གཉིས་བསྲུང་བའོ། །ནང་ནི་ཤེས་པ་གཉུག་མ་མི་རྟོག་པར་གནས་པའོ། །དེ་ལྟར་ན་ཕྱིའི་སྡོམ་པ་
གསུམ་ནི་དཀའ་ཐུབ་ཀྱི་ལམ་དུ་འགྱུར་ལ།  ནང་གི་སྡོམ་པ་གསུམ་གྱིས༷་ནི་བུ་ཆུང་གི་མི་རྟོག་པའི་ལམ་དུ་འགྱུར་རོ། །ཞེས་གསུངས་པ་འདི་དག་གིས་ནི་རྣལ་འབྱོར་ཆེན་པོའི་སྡོམ་གསུམ་རྫོགས་པ་ལ་དབང་བཞི་རྫོགས་པར་ཐོབ་པ་དང་
10-5-43b


ཕྱི་ནང་གཉིས་ཀའི་སྡོམ་པ་ཐོབ་དགོས་པར་བསྟན་ནོ། །དཔལ་ལྡན་ས་སྐྱ་པཎྜི་ཏའི་ཞལ་སྔ་ནས།  སྐུ་བཞིའི་ས་བོན་ཐེབས་ནུས་པ། །སངས་རྒྱས་གསུང་བཞིན་མཛད་པ་ཡི། །བླ་མ་བཙལ་ལ་དབང་བཞི་བླང་། །དེ་ཡིས་སྡོམ་པ་
གསུམ་ལྡན་འགྱུར། །ཞེས་དང་།  རྡོ་རྗེ་ཕག་མོའི་བྱིན་རླབས་ལ། །སྡོམ་པ་གསུམ་ལྡན་བྱར་མི་རུང་། །ཕྱི་ནང་རྟེན་འབྲེལ་འགྲིག་མི་འགྱུར། །སྐུ་བཞིའི་ས་བོན་ཐེབས་མི་ནུས། །དེ་ཕྱིར་འདི་ནི་བྱིན་རླབས་ཙམ། །ཡིན་གྱིས་
སྨིན་པར་བྱེད་པ་མིན། །ཞེས་གསུངས་པ་འདི་དག་གིས་སྐུ་བཞིའི་ས་བོན་ཐེབས་པ་དང་།  སྡོམ་གསུམ་རྫོགས་པ་ལ་དབང་བཞི་ཐོབ་དགོས་པར་བསྟན་ཅིང་།  དབང་གོང་མ་བྱིན་རླབས་ཙམ་དུ་ཡང་མ་ཡིན་པ་བསྟན་ཏོ། །རྗེ་ཐམས་
ཅད་མཁྱེན་པ་ཀུན་དགའ་བཟང་པོའི་ཞལ་སྔ་ནས་ཀྱང་།  རྣམ་དག་དཀྱིལ་འཁོར་བཞི་ཡི་འཛིན་མ་ལ། །རྣམ་དཀར་དབང་བཞིའི་ཆར་རྒྱུན་ལེགས་ཕབ་ནས། །རྣམ་གྲོལ་སྐུ་བཞིའི་ལོ་ཐོག་རྒྱས་མཛད་པ། །རྣམ་མཁྱེན་བླ་མ་བཞི་ལ་
གསོལ་བ་འདེབས། །ཞེས་གསུངས་པ་ཡང་སྔར་གྱི་དོན་དེ་དག་ཐུགས་ལ་གཞག་པ་དང་།  མན་ངག་ཐུན་མོང་མ་ཡིན་པའི་དོན་བསྡུས་པར་ཤེས་པར་བྱའོ། །ལུང་དང་རིགས་པས་གྲུབ་པའི་དོན་དེ་དག་ལ་དཔྱོད་པ་དང་ལྡན་པ་དག་གིས་དོགས་
པའི་གནས་བསལ་བར་བྱ་བའི་ཕྱིར།  ཐུག་མེད་སྐྱོན་དང་བསྲུང་བའི་དམ་ཚིག་དང་། །གསོལ་བཏབ་ཚིག་དང་བུམ་དབང་ཆོ་ག་དང་། །ཐོབ་མཚམས་འགའ་ཞིག་ལ་སོགས་སྐྱོན་རྣམས་ཀྱིས། །ལུགས་བཟང་འདི་ལ་གནོད་པར་ག་ལ་
10-5-44a


འགྱུར། །ཞེས་བྱ་བ་སྨོས་ཏེ།  གལ་ཏེ་བུམ་དབང་ཐོབ་ཀྱང་དེའི་རྗེས་སུ་དབང་གོང་མ་ལ་སྡོམ་པ་ཐོབ་རྒྱུ་ཡོད་པས་བུམ་དབང་གི་སྐབས་སུ་སྡོམ་པ་མ་རྫོགས་ན་དབང་བཞི་རྫོགས་པའི་རྗེས་སུ་ཡང་སྡོམ་པ་མ་
རྫོགས་པར་འགྱུར་ཏེ།  དེའི་རྗེས་སུ་ཡང་དབང་དང་རྗེས་གནང་ཐམས་ཅད་ལ་དམ་ཚིག་དང་སྡོམ་པ་རེ་ཐོབ་རྒྱུ་ཡོད་པའི་ཕྱིར།  འདོད་ན་སྡོམ་པ་ཐོབ་པའི་དུས་ཐུག་མེད་དུ་འགྱུར་རོ། །ཞེ་ན།  དེས་ཀྱང་འདི་ལ་མི་སྒྲིབ་སྟེ། དབང་གོང་མ་
བུམ་དབང་གིས་གནས་སྐབས་སུ་མ་ཐོབ་པའི་སྡོམ་པའི་རིགས་རྫོགས་རིམ་གྱི་སྡོམ་པ་གསར་དུ་ཐོབ་པ་བྱར་ཡོད་ལ་ཅིག་ཤོས་ལ་ནི་སྔར་ཐོབ་ཟིན་གྱི་སྡོམ་པ་ཡང་ཡང་མངོན་དུ་བྱེད་པ་ཡིན་གྱི་བསྐྱེད་རྫོགས་ཀྱི་སྡོམ་པའི་རིགས་སྔར་མ་ཐོབ་པ་གསར་དུ་
ཐོབ་པར་བྱར་མེད་པའི་ཕྱིར་རོ། །ཁ་ཅིག །དབང་གོང་མ་ལ་བུམ་དབང་ལས་ལོགས་སུ་གྱུར་པའི་བསྲུང་བའི་དམ་ཚིག་ཡོད་པར་འགྱུར་རོ་ཞེས་སྨྲའོ། །ཅི་དམ་ཚིག་ཉི་ཤུའི་རྐང་གྲངས་ཙམ་ཡང་མི་དྲན་པ་ཡིན་ནམ།  གལ་ཏེ་དབང་
གོང་མ་ལ་རྩ་བའི་ལྟུང་བ་ཡོད་པར་འགྱུར་རོ་ཞེ་ན།  དེའི་དོན་གང་ཞིག་དཔྱད་པས་དབང་གོང་མའི་སྡོམ་པ་གཏོང་བ་ལ་ཟེར་ན་ནི་རྩ་ལྟུང་བཅུ་བཞི་པོ་ཐམས་ཅད་དེ་ཉིད་ཡིན་ལ།  གཞན་དུ་ན་བུམ་དབང་གི་རྩ་བའི་ལྟུང་བ་ཡང་གང་
ལ་ཟེར་སྨྲ་དགོས་སོ། །ཁ་ཅིག །བུམ་དབང་གི་གསོལ་གདབ་ལ།  སངས་རྒྱས་ཀུན་གྱི་དམ་ཚིག་དང་། །སྡོམ་པའང་བླ་ན་མེད་པ་སྩོལ། །ཞེས་འབྱུང་གི་དབང་གོང་མ་ལ་སྡོམ་པ་སྩལ་དུ་གསོལ་ཞེས་པའི་གསོལ་གདབ་མ་བྱུང་བས་དབང་
10-5-44b


གོང་མ་ལ་སྡོམ་པ་མེད་དོ་ཞེས་སྨྲའོ། །དེས་ཀྱང་མི་སྒྲིབ་སྟེ་ཚིག་གཉིས་པོ་དེ་ནི་དབང་བཞི་ཆར་གྱི་ཐུན་མོང་གི་གསོལ་གདབ་ཏུ་སྣང་བའི་ཕྱིར་ཏེ།  རྒྱུད་ལས།  སངས་རྒྱས་ཀུན་གྱི་སྡོམ་པ་དབང་གསུམ་པའི་སྐབས་སུ་ཐོབ་པར་
གསུངས་པའི་ཕྱིར་རོ། །གཞན་དུ་ན་རྡོ་རྗེ་སློབ་མའི་དབང་གི་སྐབས་སུ་ཡང་སྡོམ་པ་མི་ཐོབ་པར་འགྱུར་ཏེ།  སྡོམ་པ་སྩལ་དུ་གསོལ་ཞེས་པའི་ཚིག་མི་སྣང་བའི་ཕྱིར་རོ། །གལ་ཏེ་བྱང་ཆུབ་རྡོ་རྗེ་སངས་རྒྱས་ལ། །ཞེས་སོགས་
ཡོད་དོ་སྙམ་ན།  དེ་ནི་དཀྱིལ་འཁོར་ཆོ་ག་འགའ་ཞིག་ཏུ་དབང་གོང་མའི་གསོལ་གདབ་ལ་སྦྱར་བ་ཡང་སྣང་ངོ་། །ལ་ལ་དག་དབང་ཆུ་ཆེན་མོ་ལ་བུམ་དབང་གི་ཆོ་ག་ལས་མེད་པས་དེར་སྔགས་སྡོམ་རྫོགས་ཞེས་སྨྲ་བར་གྲག་གོ། །
འདི་ནི་གྱི་ན་སྟེ།  བསྐྱེད་རིམ་དང་ཐུན་མོང་དུ་དགོས་པའི་ཆོས་སྣ་བདུན་གྱི་ཁོངས་སུ་བགྲང་པའི་དབང་དུ་བྱས་ནས་དེར་བུམ་དབང་ཙམ་ལས་མ་གསུངས་པ་ཡིན་ལ་གཞན་དུ།  དབང་རིམ་གྱིས་པའི་ཆོ་ག་རེ་ལ་སྔགས་སྡོམ་རྫོགས་ན་རྡོ་རྗེ་
སློབ་མའི་དབང་ཙམ་གྱིས་ཀྱང་སྔགས་སྡོམ་རྫོགས་པར་ཐལ་བའི་ཕྱིར་རོ། །རྩ་བའི་ལྟུང་བ་བསྲུང་དགོས་པའི་སྔགས་སྡོམ་ཐོབ་པ་ཙམ་གྱིས་སྔགས་སྡོམ་རྫོགས་སོ་ཞེས་སྨྲ་བ་ཡང་མི་འཐད་དེ།  བསྲུང་བ་ཙམ་ནི་མ་མཐའི་ས་མཚམས་
ཀྱི་དབང་དུ་བྱས་ནས་བུམ་དབང་ལ་བཞག་ལ།  བསྲུང་དགོས་པ་ནི་དབང་བཞི་ཆར་ལ་ཁྱད་པར་མེད་པའི་ཕྱིར་རོ། །དཔེར་ན་རྩ་བ་བཞི་བསྲུང་པའི་སེམས་པ་ཙམ་གྱིས་སོ་ཐར་གྱི་སྡོམ་པ་མི་རྫོགས་པ་བཞིན་ནོ། །སོགས་ཀྱིས་བསྡུས་པ་
10-5-45a


ཕུང་པོ་ཁམས་དང་སྐྱེ་མཆེད་ལ། །སངས་རྒྱས་ས་བོན་བཏབ་ནས་ནི། །ཚེ་འདིར་སངས་རྒྱས་བྱེད་པ་ཡི། །ཐབས་ལ་དབང་བསྐུར་ཞེས་སུ་བཏགས། །ཞེས་གསུངས་པའི་ཐབས་ནི་བུམ་དབང་གིས་རྫོགས་
པས་དེར་སྡོམ་པ་རྫོགས་པར་གྲུབ་བོ་ཞེས་བཞེད་པ་ལ་ཡང་དཔྱད་དུ་ཡོད་དེ།  ལུས་རྩའི་དབང་དུ་བྱས་པའི་ཕུང་ཁམས་སྐྱེ་མཆེད་ལ་སངས་རྒྱས་སྤྲུལ་སྐུའི་ས་བོན་བཏབ་པ་བུམ་དབང་ལ་ཡོད་ཀྱང་།  ཡི་གེ་བྷ་ག་དང་།  ཁམས་
བདུད་རྩི་དང་།  སྙིང་པོ་ཡེ་ཤེས་རླུང་གི་དབང་དུ་བྱས་པའི་ཕུང་ཁམས་སྐྱེ་མཆེད་ལ་སྐུ་ཕྱི་མ་གསུམ་གྱི་ས་བོན་གདབ་པ་ནི་དབང་གོང་མ་གསུམ་ལ་ཡོད་པའི་ཕྱིར་རོ། །འདི་དག་ནི་གདན་སོགས་ཀྱི་ཡིག་ཆུང་དང་།  དབང་འཁོར་འདས་
དབྱེར་མེད་ཀྱི་སྐབས་སུ་གསུངས་པའི་རྟེན་དཀྱིལ་འཁོར་བཞི་ལ་གདན་གསུམ་ཚང་པའི་དག་བྱ་དག་བྱེད་གསུངས་པའི་སྐབས་ལས་རྟོགས་པར་བྱ་ཞིང་།  སྡོམ་གསུམ་རབ་དབྱེར་ནི་ཐུན་མོང་དུ་བཤད་དུ་རུང་བའི་དབང་དུ་བྱས་ནས་རགས་པ་ཙམ་
གསུངས་པར་ཤེས་པར་བྱ་སྟེ།  གཞན་དུ་ན་བུམ་དབང་ཙམ་གྱིས་ཚེ་འདིར་སངས་རྒྱས་བྱེད་ནུས་པར་ཐལ་བ་དང་།  དབང་གོང་མ་ཉིད་དབང་ཡང་མ་ཡིན་པར་ཐལ་བའི་སྐྱོན་གཉིས་ཡོད་པའི་ཕྱིར་རོ། །བདག་ཉིད་འབའ་ཞིག་གི་རྟོག་པས་སྦྱར་བའི་
ཉེས་པ་སྤོང་བའི་ཕྱིར།  བདག་གི་བླ་མ་རྫོགས་པའི་སངས་རྒྱས་ཀྱིས། །མཛད་པ་ཇི་བཞིན་བློ་ཡི་རིམ་པ་དང་། །འཚམ་པར་སྟོན་ཕྱིར་སྣོད་མིན་རྣམས་ལ་གསང་། །བླ་མས་གནང་ལ་དོན་འདི་གཞན་ལ་སྤེལ། །ཞེས་བྱ་བ་སྨོས་ཏེ།  རྗེ་བཙུན་བླ་
10-5-45b


མ་མཁྱེན་རབ་དང་ཐུགས་རྗེ་འགྲན་པའི་ཟླ་དང་བྲལ་བ་དེ་ཉིད་ཀྱིས།  དོན་འདི་གཟིགས་མོད་ཀྱི།  སངས་རྒྱས་ཀྱི་མཛད་པ་བཞིན་དུ་གདུལ་བྱའི་ཁམས་དང་བག་ལ་ཉལ་དང་འཚམ་པར་ཆོས་སྟོན་པས།  རེ་ཞིག་སྣོད་དང་མི་ལྡན་པ་ལ་གསང་ཞིང་ཅི་ཙམ་
འཚམ་པར་སྟོན་པར་མཛད་པའོ། །བདག་གིས་འདི་ཉིད་སྤེལ་བའི་གནང་བ་ཞུས་ན་ངེས་པར་གནང་མོད་ཀྱི་ཡུལ་གྱིས་བསྐལ་པའི་མཚམས་སུ་སྒྲོས་མ་ཟིན་པ་འགའ་ཞིག་གིས་སྔགས་སྡོམ་ཡིན་ན།  མཚོན་བྱེད་དཔེའི་ཡེ་ཤེས་ཡིན་པས་
ཁྱབ་ཞེས་སྨྲ་བར་འདུག་གོ་ཞེས་ཞུས་པ་ལ་དགག་པ་མཛད་པ་སྣང་གི་བླ་མེད་ཀྱི་སྔགས་སྡོམ་དབང་གོང་མས་རྫོགས་དགོས་པ་འདི་དཔྱོད་ལྡན་གྱིས་དཔྱད་པར་བྱ་བའི་གཞིར་འདུག་ཅེས་ཡང་ཡང་གསུངས་པས་འདི་གནང་བར་ངེས་
ཤིང་།  དེང་སང་ཕྱག་ཆེན་མཆོག་གི་དངོས་གྲུབ་མངོན་དུ་མཛད་པ་གདོན་མི་ཟ་བས་གནས་ལུགས་ཕྱིན་ཅི་མ་ལོག་པའི་དོན་འགྲེལ་པ་གནང་བ་ལས་འོས་མེད་དོ། །དེའི་ཐུགས་སྲས་བདག་གི་བླ་མ་དག་སྒྲོས་སྔ་མ་སྒྲུབ་པ་ནི་བླ་མའི་བཀའི་
རྗེས་སུ་འབྲང་བས་ཁ་ན་མ་ཐོ་བ་ཅི་ཡང་མེད་དོ། །དེ་ལས།  གཞན་དག་གྲགས་པའི་རྗེས་འབྲང་མང་སྨྲ་ནའང་། །དཔྱོད་ལྡན་ཡིད་ལ་ངེས་པའི་གྲུབ་མཐའ་ནི། །གནོད་བྱེད་ཚད་མ་ཅིག་གིས་བཟློག་འགྱུར་གྱི། །ལྟར་སྣང་བྱེ་བས་བཟློག་པར་ག་ལ་
འགྱུར། །དེའི་ཕྱིར་དེ་དག་གི་ལན་བརྗོད་པར་མི་བྱ་སྟེ།  ལུང་རིགས་ཁས་མི་ལེན་པར་སྣང་བའི་ཕྱིར་དང་།  མཐའ་མེད་པའི་ཕྱིར་རོ། །རིགས་པའི་གཙུག་རྒྱན་ཆོས་ཀྱི་གྲགས་པས་ཀྱང་།  ལོག་པའི་ལམ་ལ་མཐའ་མེད་ཕྱིར། །དེ་དག་འདིར་
10-5-46a


ནི་སྤྲོ་བྱ་མིན། །ཞེས་གསུངས་སོ། །ཅིའི་ཕྱིར་ན་འདི་ལྟར་རྩོམ་སྙམ་ན།  མཁས་པ་སྔ་མའི་ལེགས་བཤད་སུན་ཕྱུང་ནས།  མི་ཤེས་ཤེས་དང་མ་མཐོང་མཐོང་སྨྲ་བའི། །བསམ་པ་མེད་ཀྱང་བློ་གྲོས་ཤར་རིའི་རྩེར། །
གནས་ལུགས་ཉི་མ་ཤར་ཚེ་འོད་ཟེར་འབྱུང་། །ཞེས་པ་འདི་ཉིད་ཀྱི་ཕྱིར་ཏེ།  གནས་ལུགས་ཀྱི་དོན་དེ་ཉིད་དམ་པ་གོང་མའི་གསུང་གི་རྒྱུན་མི་ཉམས་པར་བྱ་བ་དང་།  དོན་དུ་གཉེར་བ་གཞན་ལ་ཡང་ཕན་པར་འདོད་པའི་ལྷག་བསམ་འབའ་ཞིག་
གིས་བྱས་ཀྱི་སྤྱིར་སོ་སྐྱེའི་ཀུན་སློང་ལ་བདག་ཏུ་འཛིན་པས་ཟིལ་གྱིས་མནན་པའི་དབང་གིས་ཉེས་པ་ཡོད་པ་མི་རིགས་ནའང་ཡང་ནས་ཡང་དུ་དཔྱད་པའི་ཚེ་ཉེས་པ་མེད་པར་སེམས་སོ། །ད་ནི་བསྟན་བཅོས་ཀྱི་མཇུག་རྫོགས་པར་བསྟན་
པ་ནི།  ས་གླང་ས་གར་མདོ་མཁར་གནས་སུ་ནི། །ཟབ་དོན་ཟབ་མོའི་གནད་ཀྱི་བདུད་རྩི་འདི། །རྒྱུད་གསུམ་རྒྱུད་དོན་སྨྲ་བ་དེ་ཡིས་སྦྱར། །དགེ་ཚོགས་དགེ་བའི་སེམས་ཀྱིས་འགྲོ་ལ་སྦྱིན། །བདག་ཀྱང་དེང་ནས་ཚེ་རབས་ཐམས་ཅད་དུ། །
ཀུན་དགའི་གསུང་རབ་ཟབ་མོ་རྟག་ཉན་ཅིང་། །དཀོན་མཆོག་བསྟན་པའི་རྒྱལ་མཚན་མཆོད་བྱས་ནས། །རྟག་ཏུ་འགྲོ་ལ་དམ་ཆོས་སྟོན་པར་ཤོག །ཞེས་བྱ་བ་ཡིན་ཏོ། །ཚིག་རྐང་པ་དང་པོས་རྩོམ་པའི་དུས་དང་གནས་བསྟན།  གཉིས་
པས་བསྟན་བཅོས་ཀྱི་མིང་བསྟན།  གསུམ་པས་རྩོམ་པ་པོ་བསྟན།  བཞི་པས་དགེ་རྩ་གཞན་དོན་དུ་བསྔོ་བ་བསྟན།  ཚིགས་སུ་བཅད་པ་ཕྱི་མས་རང་ཉིད་སྐྱེ་བ་ཀུན་ཏུ་དམ་པས་རྗེས་སུ་བཟུང་ཞིང་།  ཐོས་པའི་དོན་གཞན་ལ་བསྟན་
10-5-46b


པའི་ཆེད་དུ་བསྔོ་བ་བསྟན་ནོ། །དེས་ན་རྣལ་འབྱོར་ཆེན་པོའི་སྡོམ་པའི་གནད་བྱེ་བྲག་ཏུ་བཤད་པ་ཟབ་དོན་བདུད་རྩིའི་ཉིང་ཁུ་འཆི་བ་མེད་པའི་གོ་འཕང་སྦྱིན་པ་ཞེས་བྱ་བ་འདི་ནི།  རྒྱལ་བ་ཁྱབ་བདག་རྡོ་རྗེ་འཆང་དང་དབྱེར་མ་མཆིས་
པ་རྗེ་བཙུན་བླ་མ་ཀུན་དགའ་བཟང་པོ་ཡབ་སྲས་རྣམས་ཀྱི་བཀའ་དྲིན་ལ་བརྟེན་ནས་རྒྱུད་གསུམ་མན་ངག་དང་བཅས་པའི་དོན་ལ་བློ་ཁ་ཅུང་ཟད་ཕྱོགས་པ།  ཤཱཀྱའི་དགེ་སློང་བསོད་ནམས་སེང་གེས་ས་གླང་གི་ལོ་ས་ག་ཟླ་བའི་ཡར་ཚེས་
བཅུ་བཞི་ལ་དབེན་གནས་མདོ་མཁར་ཆོས་རྫོང་དགོན་པར་སྦྱར་བའོ། །ཞེས་བྱ་བ་ནི་རྩ་བའི་ཚིགས་སུ་བཅད་པ་གང་ལ་བརྟེན་ནས་གང་གིས་རྩོམ་པ་བསྟན་ཏེ།  མན་ངག་ཐུན་མོང་མ་ཡིན་པའི་སྐབས་རྣམས་ནི་འདིར་ཁུངས་
ཙམ་ལས་མ་སྨོས་ལ།  གསུང་ངག་ཐོབ་པ་དག་གིས་ནི་དེ་དག་ཏུ་ཞིབ་ཏུ་བལྟས་ནས་སྒྲོ་འདོགས་ཆོད་པར་བྱ་ཞིང་།  གཞན་རྣམས་ནི་ལུང་རིགས་ཀྱི་སྤྲོས་པ་དུ་མ་དང་བཅས་ཏེ་སློབ་མ་དབང་ཐོབ་ཅིང་དམ་ཚིག་དང་ལྡན་པ་
རྣམས་ལ་བཤད་པར་བྱའོ།།    །།རྗེ་བཙུན་བླ་མ་མཁྱེན་པའི་དེད་དཔོན་གྱིས། །གསུང་རབ་རྒྱ་མཚོའི་ཕ་མཐར་སོན་གྱུར་ནས། །སྡོམ་གསུམ་ཡིད་བཞིན་ནོར་བུའི་དགའ་སྟོན་གྱིས། །དོན་གཉེར་བློ་ཡི་དབུལ་བ་སེལ་བར་མཛད། །
ཁྱད་པར་མཁས་རློམ་དུ་མས་མ་ཕྱེད་པའི། །ཐེག་ཆེན་གཞུང་འདིར་སོ་ཐར་སྤོང་སེམས་དང་། །སྡོམ་གསུམ་རིམ་གྱིས་ཐོབ་ཚེ་གནས་གྱུར་ནས། །གསུམ་ཆར་ལྡན་ཚེ་ངོ་བོ་གཅིག་ཚུལ་དང་། །དེ་ལྟ་ན་ཡང་གཏོང་ཐོབ་སྡོམ་རྒྱུན་
10-5-47a


ལ། །ལྟོས་པས་ཐ་དད་འགལ་བ་མེད་པ་སོགས། །ཟབ་མོའི་གཏམ་གྱིས་ཕུལ་བྱུང་བློ་ལྡན་ལ། །ནང་ནས་འཆར་བའི་དགའ་བདེའི་དཔལ་སྟེར་མཛད། །དེ་ཡི་ཁ་སྐོང་རྣལ་འབྱོར་ཆེན་པོ་ཡི། །སྡོམ་པའི་
ཐོབ་མཚམས་ངོ་བོ་ངོས་འཛིན་དང་། །རྒྱུ་ལམ་འབྲས་བུའི་རབ་ཏུ་དབྱེ་བ་དང་། །དེ་ཉིད་མཚན་བཏགས་སོ་སོར་ཕྱེ་བ་དང་། །སྤང་བྱ་སྤོང་ཚུལ་ཉམས་ལེན་དེར་འདུས་སོགས། །རྒྱུད་སྡེ་གཞན་ལས་ཁྱད་པར་འཕགས་ཚུལ་དང་། །
བླ་མེད་ཉིད་ལའང་བསྐྱེད་རྫོགས་བྱེ་བྲག་གིས། །དབང་ལས་ཐོབ་པའི་རིམ་པའི་རྣམ་གཞག་སོགས། །རྒྱུད་དང་རྒྱ་གར་མཁས་པའི་གཞུང་ལུགས་དང་། །རྣལ་འབྱོར་དབང་ཕྱུག་གསུང་གི་མན་ངག་དང་། །དམ་པའི་ཞལ་གདམས་
བདུད་རྩི་ལ་བརྟེན་ནས། །ལེགས་བཤད་འདི་ནི་གཞན་ལ་ཕན་ཕྱིར་སྦྱར། །འདི་ནི་གསང་ཆེན་ལམ་ལ་སློབ་པ་ཡི། །དད་ལྡན་རྣམས་ཀྱི་རྟོགས་པའི་བོགས་འདོན་ཡིན། །རྒྱུད་སྡེ་བཞི་ཡི་ཡང་རྩེ་འདེགས་པ་ཡི། །མི་འཇིགས་སེང་
གེའི་ཁྲི་ཡང་འདི་ཉིད་ཡིན། །བླ་ཆེན་གོང་མའི་གསུང་གི་དོན་བལྟ་བའི། །བྱི་དོར་བྱས་པའི་མེ་ལོང་འདི་ཉིད་ཡིན། །བླ་མ་ལྷག་པའི་ལྷ་རྣམས་མཉེས་བྱེད་པའི། །སྒྲུབ་པའི་མཆོད་པ་དམ་པའང་འདི་ཉིད་ཡིན། །སྣོད་ལྡན་གཟུར་
གནས་སློབ་མའི་ཚོགས་རྣམས་ལ། །ཕྲིན་ལས་རྙོག་པ་མེད་པའང་འདི་ཉིད་ཡིན། །དེ་སླད་འདི་ལ་རྣམ་དཔྱོད་བཟང་ལྡན་པའི། །ཕྱོགས་ཞེན་མེད་པར་བལྟ་བ་ཐམས་ཅད་གུས། །གང་དག་མཐོ་ལ་ཕྲག་དོག་མཉམ་ལ་འགྲན། །
10-5-47b


དམན་ལ་ཁྱད་གསོད་ཁོ་ནས་དུས་འདའ་བའི། །མ་རབས་སྐྱེ་བོས་སྨོད་པར་གྱུར་ན་ཡང་། །དེ་ལ་དེ་ཡི་སྡིག་པར་མ་གྱུར་ཅིག །སྐལ་བཟང་སྐྱེ་བོ་ཐོས་བསམ་སྒོམ་པ་ཡིས། །ཚུལ་བཞིན་ཞུགས་པའི་བརྩོན་ལྡན་དེ་དག་ལ། །བསྟན་
དང་བསྟན་འཛིན་བསྲུང་བར་ཁས་བླངས་པའི། །སྲུང་མ་རྣམས་ཀྱིས་རྟག་ཏུ་གྲོགས་མཛོད་ཅིག །འདི་སྦྱར་དགེ་བ་ཡིད་བཞིན་ནོར་བུ་དེས། །མ་གྱུར་མཁའ་མཉམ་འགྲོ་བ་ཐམས་ཅད་ལ། །གནས་སྐབས་ཕན་དང་བདེ་བའི་ཆར་
ཕབ་ཅིང་། །མཐར་ཐུག་རྡོ་རྗེ་འཛིན་ས་ཐོབ་པར་ཤོག །རྣལ་འབྱོར་ཆེན་པོའི་སྡོམ་པའི་གནད་བྱེ་བྲག་ཏུ་བཤད་པ་ཟབ་དོན་བདུད་རྩིའི་ཉིང་ཁུ་འཆི་བ་མེད་པའི་གོ་འཕང་སྦྱིན་པའི་རྣམ་བཤད་བདུད་རྩི་སྤེལ་བ་ཞེས་བྱ་བ་འདི་ནི།  རྩ་བའི་
རྩོམ་པ་པོ་དེ་ཉིད་ཀྱིས་སླར་ཡང་མྱོས་བྱེད་ཅེས་བྱ་བ་ཤིང་མོ་ལུག་གི་ལོ་གྲོ་ཞུན་གྱི་ཟླ་བ་ལ་ཐུབ་བསྟན་རྣམ་པར་རྒྱལ་བའི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།།    །།ཀུན་མཁྱེན་བསོད་ནམས་སེང་གེས་མཛད་པའི་བསྟན་བཅོས་འདི་ཤིང་རྟ་ལོར་ལྷུན་
གྲུབ་སྟེང་དུ་མཁན་མིང་ངག་དབང་བློ་ལྡན་ནས་སྤར་དུ་བསྒྲུབས་པ་དགེ་ལེགས་འཕེལ།།    །།

10-6-1a


༄༅།  །འཇིག་རྟེན་དབང་ཕྱུག་གི་གཞུང་བཞི་ཉམས་སུ་ལེན་ཚུལ་བཞུགས་སོ།།    །།
10-6-1b


༄༅།  །ཡང་དག་ལམ་སྟོན་དགེ་བའི་བཤེས་གཉེན་དང་། །ཐུགས་རྗེའི་གཏེར་ཆེན་སྤྱན་རས་གཟིགས་མགོན་ལ། །རྙོག་མེད་དང་བའི་ཡིད་ཀྱིས་ཕྱག་འཚལ་ནས། །རྨད་བྱུང་གནད་ཀྱི་གདམས་པ་འདིར་བཤད་བྱ། །དེ་ལ་འདིར་ཡང་
དག་པའི་སྒྲུབ་པ་ལ་བརྩོན་པས་ས་དང་པོའི་རྟོགས་པ་བརྙེས་པ་དགེ་སློང་མ་དཔལ་མོས་ཨུ་རྒྱན་གྱི་ཡུལ་གྱི་རྒྱུད་རྒྱས་པ་ལས་ཕྱུང་ནས་སྡིག་པ་བཤགས་པའི་ཆོ་ག་དང་།  བྱ་རྒྱུད་ཀྱི་ཁོངས་སུ་གཏོགས་པ་ཕྱག་སྟོང་སྤྱན་སྟོང་པའི་གཟུངས་དང་།  
ཞལ་བཅུ་གཅིག་པའི་གཟུངས་ལ་སོགས་པ་རྣམས་ལ་བརྟེན་ནས་ཞལ་བཅུ་གཅིག་པའི་སྒྲུབ་ཐབས།  གཏོར་མའི་ཆོ་ག །བསྟོད་པ་སྟེ་སྤྱན་རས་གཟིགས་ལ་བརྟེན་པའི་གཞུང་བཞི་མཛད་པའི་དོན་ཉམས་སུ་ལེན་པ་ལ།  སྡིག་པ་བཤགས་པའི་
ཆོ་ག་ཉམས་སུ་ལེན་པའི་ཚུལ་དང་།  གཞུང་ཕྱི་མ་གསུམ་ཉམས་སུ་ལེན་པའི་ཚུལ་གཉིས་ལས།  དང་པོ་ལ་བཞི་སྟེ།  རྟེན་གྱི་གང་ཟག །དུས་ཀྱི་ཁྱད་པར།  ཆོ་གའི་ཁྱད་པར།  དཀའ་ཐུབ་ཀྱི་ཁྱད་པར་རོ། །དང་པོ་ལ་ཐ་མལ་པ་
10-6-2a


སྡིག་པོ་ཆེ་དང་།  ཐུགས་རྗེ་ཆེན་པོ་ལ་ཡི་དམ་བྱེད་པ་དང་།  གསང་སྔགས་གཞན་ཉམས་སུ་ལེན་པ་དང་གསུམ་ལས།  དང་པོས་ནི་ཐ་མལ་པའི་གཟུགས་དང་།  གཉིས་པས་ནི་ཐུགས་རྗེ་ཆེན་པོའི་ང་རྒྱལ་དང་།  
གསུམ་པས་ནི་ཡི་དམ་གྱི་ལྷ་གང་ཡིན་པའི་ང་རྒྱལ་གྱིས་བཤགས་པ་བྱེད་དོ། །གཉིས་པ་ནི།  ཟླ་བ་གང་ཡང་རུང་བའི་ཚེས་བདུན་ནས་དགུའི་བར་རམ།  བཅུ་བཞི་ནས་བཅུ་དྲུག་གི་བར་རམ།  ཉི་ཤུ་ནས་ཚེས་གཅིག་གི་བར་
ཏེ་ཉིན་ཞག་དགུ་ནི་བཤགས་པའི་དུས་ཡིན་ལ།  ཞག་རེ་རེ་ལའང་བརྩོན་པའི་བྱེ་བྲག་གིས་ཐུན་གསུམ་མམ།  བཞིའམ།  ལྔའམ།  དྲུག་ཏུ་བྱའོ། །གསུམ་པ་ནི།  གནས་དབེན་པར་སྐྱང་ནུལ་ལ་སོགས་པ་བྱས་ནས་མཎྜལ་
ཁྲུ་གང་པ་ལ་བའི་རྣམ་ལྔའམ།  དྲི་བཟང་གི་ཆུས་བྱུགས་ཏེ་མེ་ཏོག་དཀར་པོ་སིལ་མ་དགྲམ་ཞེས་པ་ཙམ་ལས་མི་འབྱུང་ཡང་།  དམིགས་པ་གསལ་བའི་ཆེད་དུ་དབུས་དང་གཡས་གཡོན་གཉིས་མདུན་རྣམས་སུ་མེ་ཏོག་གི་ཚོམ་བུ་བཞི་
10-6-2b


བྱ།  དེའི་མཐའ་སྐོར་དུ་མཆོད་པ་རྣམ་པ་ལྔ་ཅི་འབྱོར་པ་བཤམ་མོ། །དེ་ནས་མཎྜལ་གྱི་སྟེང་དུ་པྃ་ལས་སྣ་ཚོགས་པདྨའི་ལྟེ་བར་ཨ་ལས་ཟླ་བའི་དཀྱིལ་འཁོར་གྱི་དབུས་སུ་ཧྲཱིཿ དམར་པོ།  དེ་ལས་འོད་ཟེར་ཕར་འཕྲོས།  སེམས་ཅན་གྱི་དོན་བྱས།  ཚུར་འདུས་ཡོངས་སུ་གྱུར་
པ་ལས་ལྷ་གསུམ་ཐོད་པ་དང་བཞི་ཅིག་ཅར་དུ་བསྐྱེད་དེ།  དབུས་སུ་ཐུགས་རྗེ་ཆེན་པོ་ཞལ་གཅིག་ཕྱག་གཉིས་པ་གཡས་མཆོག་སྦྱིན།  གཡོན་པདྨའི་སྡོང་བུ་བསྣམས་པ།  སྐུ་མདོག་གསེར་དང་འདྲ་བ།  འཇམ་པ།  སྣུམ་པ།  དབུ་རྒྱན་དུ་འོད་དཔག་མེད་བཞུགས་
པ།  གཡོན་ན་སྒྲོལ་མ་ཞལ་གཅིག་ཕྱག་གཉིས་མ་སྐུ་མདོག་ལྗང་གུ།  གཡོན་ན་ཨུཏྤ་ལ་འཛིན་པ།  རྒྱན་སྣ་ཚོགས་ཀྱིས་བརྒྱན་པ།  གཡས་ཕྱོགས་སུ་སྦྲུལ་དཀར་པོ་འཁྱིལ་ནས་ཞལ་ནམ་མཁའ་ལ་གདེངས་པ།  མདུན་ན་ཐོད་པ་དཀར་པོ་མེ་ཏོག་སྣ་ཚོགས་ཀྱིས་
བཀང་བའོ། །ཐུགས་རྗེ་ཆེན་པོའི་ཐུགས་ཀར་རྃ་ལས་ཉི་མའི་དཀྱིལ་འཁོར་གྱི་སྟེང་དུ་ཐོད་པ་དཀར་པོའི་ནང་ཧྲཱིཿའི་མཐའ་མར་གཟུངས་ཀྱི་ཡི་གེས་བསྐོར་བ།  རང་གི་སྙིང་གར་ཡང་དེ་བཞིན་དུ་བསྒོམས་ལ།  སྔར་བྱས་ཀྱི་སྡིག་པ་ལ་འགྱོད་པ་དྲག་པོ་དང་།  ཕྱིན་
ཆད་མི་བྱེད་པའི་སྡོམ་སེམས་བསྐྱེད་དེ།  རང་གི་ལུས་ཀྱང་མང་པོར་སྤྲུལ།  སེམས་ཅན་ཐམས་ཅད་ཀྱིས་ཀྱང་སྡིག་པ་བཤགས་པར་བསམས་ལ།  ཐུགས་རྗེ་ཆེན་པོའི་ཐུགས་ཀའི་ཡི་གེ་རྣམས་ལས་འོད་ཟེར་ཤངས་བུག་གཡས་ནས་བྱུང་།  རང་གི་གཡོན་ནས་ཞུགས་ཏེ་ཡིག་
འབྲུ་ལ་ཐིམ་པར་བསམ་ཞིང་གཟུངས་རིང་གཅིག་གིས་ཐོག་དྲངས་པའི་གཟུངས་ཐུང་བདུན་ནམ།  ཉེར་གཅིག་གམ།  བརྒྱ་རྩ་བརྒྱད་ལ་སོགས་པ་ནུས་ཚད་བཟླ།  མཇུག་དགེ་བའི་རྩ་བ་བྱང་ཆུབ་ཏུ་བསྔོ།  བཞི་པ་ནི།  མཚམས་མེད་པ་ལ་སོགས་པའི་སྡིག་པ་བྱས་ན་དངོས་
10-6-3a


གཞིའི་དུས་སུ་སྨྱུང་གནས་བྱ།  ཟླ་བ་ཉ་གསུམ་ལ་སྨྱུང་བར་བྱས་ནས།  བཅུ་དྲུག་གི་ཉི་མ་རྩེ་ཤར་ལ་བཟའ།  རྩ་བའི་ལྟུང་བ་བྱུང་བ་ལ་ནི་ཟས་དཀར་གསུམ་བཟའ་ཞིང་ཞག་གསུམ་བཟླ།  ཡང་ན་ཟས་གཅིག་པ་ཞག་གསུམ་བྱའོ། །སྦོམ་པོ་ཡན་ཆད་
ལ་ཤ་ཆང་སྤངས་པ་ཙམ་གྱིས་བྱའོ། །ཁྱད་པར་དུ་སྔགས་པའི་སྡིག་པ་བཤགས་ན་མདུན་གྱི་ཐོད་པའི་མེ་ཏོག་ཡིད་ཀྱིས་བསལ་ལ།  རང་གི་རྣམ་སྨིན་གྱི་ལུས་པོ་དེར་བཅུག་སྟེ་འཁྱགས་པ་ཞུ་བ་ལྟར་བདུད་རྩིར་གྱུར་པར་བསམ།  དེ་ནས་རང་གི་སྙིང་ག་ནས་འོད་ཟེར་འཕྲོས་པས་སངས་
རྒྱས་དང་བྱང་ཆུབ་སེམས་དཔའ་རྣམས་སྤྱན་དྲངས་ལ།  རྗེ་བཙུན་མ་སྒྲོལ་མས་ཕྱག་ཚང་བྱས་ནས་སངས་རྒྱས་དང་བྱང་ཆུབ་སེམས་དཔའ་རྣམས་ལ་དྲང་བར་བསམ་མོ། །དེ་ལྟར་གང་ཟག་བཞི་ལས་དང་པོ་ནི་ཐ་མལ་པ་སྡིག་པོ་ཆེ་དང་།  བར་པ་གཉིས་ནི་ཕ་རོལ་ཏུ་ཕྱིན་པའི་ལུགས་ཀྱི་བྱང་
ཆུབ་ཏུ་སེམས་བསྐྱེད་པ་དང་།  ཐ་མ་ནི་སྔགས་ཀྱི་སྒོར་ཞུགས་པའི་དབང་དུ་བྱས་སོ། །གཉིས་པ་ནི།  འདིའི་རྗེས་སུ་གནང་བ་ཐོབ་པའི་གང་ཟག་གིས་སྟན་བདེ་བ་ལ་འདུག་སྟེ།  སྐྱབས་སུ་འགྲོ་བ་དང་སེམས་བསྐྱེད་པ་སྔོན་དུ་སོང་ནས།  རང་སྐད་ཅིག་གིས་ཐུགས་རྗེ་ཆེན་པོ་བཅུ་གཅིག་
ཞལ་དུ་གསལ་བའི་སྙིང་གར་ཨ་ལས་ཟླ་བའི་སྟེང་དུ་ཡི་གེ་ཧྲཱིཿདཀར་པོ་དེ་ལས་འོད་ཟེར་ལྕགས་ཀྱུའི་རྣམ་པ་ལྟ་བུ་དཔག་ཏུ་མེད་པ་འཕྲོས་པས་བླ་མ་དང་།  སངས་རྒྱས་དང་།  བྱང་ཆུབ་སེམས་དཔའ་དང་།  རྗེ་བཙུན་སྤྱན་རས་གཟིགས་དབང་ཕྱུག་སྤྱན་དྲངས་པར་བསམས་ལ།  སངས་རྒྱས་ཐམས་
ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །ཆོས་སྐུ་ནམ་མཁའ་བཞིན་དུ་དབྱེར་མེད་ཀྱང་། །གཟུགས་སྐུ་འཇའ་ཚོན་བཞིན་དུ་སོ་སོར་གསལ། །ཐབས་དང་ཤེས་རབ་མཆོག་ལ་མངའ་བརྙེས་པའི། །
10-6-3b


རིགས་ལྔ་བདེ་བར་གཤེགས་ལ་ཕྱག་འཚལ་ལོ། །དུས་གསུམ་བདེ་བར་གཤེགས་པ་ཆོས་ཀྱི་སྐུ། །འགྲོ་དྲུག་སེམས་ཅན་རྣམས་ལ་སྤྱན་རས་གཟིགས། །ནམ་མཁའ་ལྟ་བུར་ཁྱབ་པའི་བཅུ་གཅིག་ཞལ། །གཟི་བརྗིད་འོད་དཔག་མེད་ལ་ཕྱག་འཚལ་ལོ། །ཞེས་པས་ཕྱག་བྱ།  
ཨོཾ་སརྦ་ཏ་ཐཱ་ག་ཏ་ཨཱཪྱ་ཨ་ཝ་ལོ་ཀེ་ཤྭ་རཱ་ས་པ་རི་ཝཱ་ར་ཨོཾ་བཛྲ་པུཥྤེ་ཨཱཿཧཱུྃ་སྭཱ་ཧཱ།  ཨོཾ་བཛྲ་དྷཱུ་པེ་ཨཱཿཧཱུྃ་སྭཱ་ཧཱ།  ཨོཾ་བཛྲ་དཱི་པེ་ཨཱཿཧཱུྃ་སྭཱ་ཧཱ།  ཨོཾ་བཛྲ་གནྡྷེ་ཨཱཿཧཱུྃ་སྭཱ་ཧཱ།  ཨོཾ་བཛྲ་ནཻ་ཝི་དྱཱ་ཨཱཿཧཱུྃ་སྭཱ་ཧཱ།  ཞེས་པས་མཆོད་པ་དབུལ་ལོ། །དེ་ནས།  གང་ཡང་བདག་གིས་དུས་ཀུན་
ཏུ། །སྡིག་པ་བགྱིས་པ་གང་གྱུར་པ། །སྐྲག་པས་རྨི་འདྲར་འཆགས་བགྱིད་ཅིང་། །དེང་ནས་བརྩམས་ཏེ་འབྱུང་མི་བགྱིད། །དགེ་བ་རྣམས་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཐམས་ཅད་བྱང་ཆུབ་མཆོག་ཏུ་བསྔོ། །དེ་ཐོབ་ལམ་ལ་གནས་བགྱིད་
ཅིང་། །སྐྱབས་གསུམ་ལ་ནི་བདག་སྐྱབས་མཆི། །ཞེས་ལན་གསུམ་བརྗོད་ལ།  དེ་ནས་ཚད་མེད་པ་བཞི་བསྒོམས་ནས།  ཨོཾ་སྭ་བྷཱ་ཝ་ཤུདྡྷཿ སརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ།  ཞེས་པས་རྒྱུ་བ་དང་མི་རྒྱུ་བ་ཐམས་ཅད་རང་བཞིན་གྱིས་རྣམ་པར་དག་པར་བསམ།  ཨོཾ་ཤཱུ་ཉ་ཏཱ་ཛྙཱ་ན་
བཛྲ་སྭ་བྷཱ་ཝ་ཨཱཏྨ་ཀོ྅ཧཾ།  ཞེས་པས་ཐམས་ཅད་སྟོང་པ་ཉིད་དུ་བསམས་ནས།  སྟོང་པའི་ངང་ལས་པཾ་ལས་སྣ་ཚོགས་པདྨ་འདབ་མ་བརྒྱད་པ།  དེའི་ལྟེ་བར་ཟླ་བའི་དཀྱིལ་འཁོར་གྱི་སྟེང་དུ་ཧྲཱིཿདཀར་པོ།  དེ་ལས་འོད་ཟེར་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས་ནས་སྤྱན་རས་
གཟིགས་ཀྱི་གོ་འཕང་ལ་བཀོད།  ཚུར་འདུས་དེ་ཉིད་ལ་ཞུགས་པས་པདྨ་འདབ་མ་བརྒྱད་པ་གསེར་བཙོ་མ་ལྟ་བུར་འབར་བ།  ལྟེ་བར་ཧྲཱིཿཡིག་གིས་མཚན་པ།  དེ་ལས་འོད་ཟེར་ལྕགས་ཀྱུ་དང་ཞགས་པ་ལྟ་བུ་དཔག་ཏུ་མེད་པ་སྤྲོས།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་
10-6-4a


བཀུག་ནས་ཧྲཱིཿལ་ཐིམ།  དེ་མ་ཐག་ཏུ་པདྨ་ཧྲཱིཿདང་བཅས་པ་ཡོངས་སུ་གྱུར་པ་ལས།  བདག་ཉིད་འཕགས་པ་སྤྱན་རས་གཟིགས་དབང་ཕྱུག་བཞེངས་པ་སྐུ་མདོག་དཀར་པོ་ལང་ཚོ་དར་ལ་བབ་ཅིང་འོད་ཟེར་འཕྲོ་བ།  ཞལ་བཅུ་གཅིག་པའི་རྩ་ཞལ་དཀར་བ།  
གཡས་ལྗང་བ།  གཡོན་དམར་བ།  དེའི་སྟེང་མ་དབུས་ལྗང་།  གཡས་དམར།  གཡོན་དཀར་བ།  དེའི་སྟེང་དུ་དབུས་དམར་བ།  གཡས་དཀར།  གཡོན་ལྗང་བ།  དེ་རྣམས་འཛུམ་པའི་ཉམས་ཅན།  དེའི་སྟེང་ན་ཁྲོ་ཞལ་ནག་པོ་མཆེ་བ་གཙིགས་ཤིང་ཁྲོ་གཉེར་དང་ལྡན་པ།  
སྤྱན་གསུམ་པ།  རལ་པ་དམར་སེར་གྱེན་ལ་འགྲེང་བ།  དེའི་སྤྱི་བོར་ཞི་ཞལ་དམར་པོ་གཙུག་ཏོར་དང་བཅས་པ།  རྒྱན་སྤངས་པ།  ཚངས་པར་སྤྱོད་པའི་ཆ་ལུགས་འཛིན་ཞིང་འཛུམ་པ།  མགུལ་པ་དང་བཅས་པའོ། །ཕྱག་དང་པོ་གཉིས་ཐུགས་ཀར་ཐལ་མོ་སྦྱར་བ།  གཡས་གཉིས་
པ་བགྲང་ཕྲེང་།  གསུམ་པ་མཆོག་སྦྱིན་གྱི་ཕྱག་རྒྱ་ལས་བདུད་རྩིའི་རྒྱུན་འཛག་པས་ཡི་དྭགས་ཀྱི་བཀྲེས་སྐོམ་སེལ་བ།  བཞི་པས་འཁོར་ལོ་འཛིན་པ།  གཡོན་གྱི་གཉིས་པ་ན་གསེར་གྱི་པདྨ་ཡུ་བ་དང་བཅས་པ།  གསུམ་པ་ན་རིལ་བ་སྤྱི་བླུགས།  བཞི་པ་ན་མདའ་གཞུ་འཛིན་
པ།  ཕྱག་ལྷག་མ་དགུ་བརྒྱ་དང་དགུ་བཅུ་རྩ་གཉིས་པདྨའི་འདབ་མ་ལྟར་འཇམ་ཞིང་མཆོག་སྦྱིན་མཛད་པ།  ཕྱག་ཐམས་ཅད་ཀྱི་མཐིལ་ན་སྤྱན་རེ་རེ་ཡོད་པ།  ཕྱག་རྣམས་ཡར་དབུའི་གཙུག་ཏོར་དང་།  མར་པུས་མོའི་ལྷ་ང་མི་འདའ་བ།  རི་དྭགས་ཀྱི་པགས་པས་ནུ་མ་གཡོན་པ་
བཀབ་པ།  རས་བཟང་པོའི་ཤམ་ཐམས་ཅན།  ནོར་བུས་སྤྲས་པའི་གསེར་གྱི་སྐ་རགས་དང་ལྡན་པ།  རལ་པ་དམར་སེར་འཁྱུག་པས་མཛེས་པ།  རིན་པོ་ཆེའི་དབུ་རྒྱན།  རྣ་རྒྱན།  མགུལ་རྒྱན།  ཕྱག་གདུབ།  ཞབས་གདུབ།  དཔུང་རྒྱན།  དར་གྱི་ཅོད་པན་ལ་
10-6-4b


སོགས་པས་བརྒྱན་ཅིང་འོད་ཟེར་དཀར་པོ་འཕྲོ་བར་བསམ།  དེའི་ཐུགས་ཀར་པད་ཟླའི་སྟེང་དུ་ཧྲཱིཿདཀར་པོ།  དེ་ལས་འོད་ཟེར་འཕྲོས་པས་འཕགས་པ་སྤྱན་རས་གཟིགས་དབང་ཕྱུག་སྤྱན་དྲངས།  མཆོད་པ་ལྔས་མཆོད་ནས།  ཛཿཧཱུྃ་བྃ་ཧོཿཞེས་པས་གཉིས་སུ་མེད་པར་བསྟིམ་མོ། །
རང་གི་དཔྲལ་བར་ཟླབའི་སྟེང་དུ་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་ཀར་ཧཱུྃ་སྔོན་པོ།  སངས་རྒྱས་ཐམས་ཅད་ཀྱི་སྐུ་གསུང་ཐུགས་སུ་མོས་པར་བྱའོ། །སླར་ཡང་སྙིང་གའི་ས་བོན་ལས་འོད་ཟེར་འཕྲོས་པས་འོད་དཔག་མེད་ཀྱིས་གཙོར་བྱས་པའི་རིགས་ལྔ་
མདུན་གྱི་ནམ་མཁར་སྤྱན་དྲངས་ནས་མཆོད་པ་ལྔས་མཆོད་དེ།  དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་སྩལ་དུ་གསོལ།  ཞེས་གསོལ་བ་བཏབ་པས།  དེ་བཞིན་གཤེགས་པ་རྣམས་ཀྱིས།  ཇི་ལྟར་བལྟམས་པ་ཙམ་གྱིས་ནི། །ལྷ་
རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ།  ཞེས་གསུང་ཞིང་བྱང་ཆུབ་སེམས་ཀྱི་ཆུ་རྒྱུན་གྱིས་དབང་བསྐུར་བས་ལུས་ཐམས་ཅད་གང་།  དྲི་མ་ཐམས་ཅད་དག །
ཆུ་ལྷག་མ་ཡར་ལུད་པ་ལས་འོད་དཔག་མེད་གཙོ་བོར་གྱུར་པའི་རིགས་རྣམ་པ་ལྔས་དབུར་བརྒྱན།  རང་གི་སྙིང་གར་པདྨ་དང་ཟླ་བའི་སྟེང་དུ་རང་འདྲའི་ཡེ་ཤེས་སེམས་དཔའ་ཚོན་གང་བ།  དེའི་ཐུགས་ཀར་པདྨ་དང་ཟླ་བའི་སྟེང་དུ་ཏིང་ངེ་འཛིན་སེམས་དཔའ་ཧྲཱིཿདམར་པོ།  
དེ་ལས་ཐུགས་རྗེ་ཆེན་པོའི་སྐུ་དཔག་ཏུ་མེད་པ་འཕྲོས།  སེམས་ཅན་གྱི་སྡིག་སྒྲིབ་སྦྱངས་ནས་ཐུགས་རྗེ་ཆེན་པོའི་གོ་འཕང་ལ་བཀོད།  ཚུར་འདུས་ཧྲཱིཿལ་ཐིམ་པར་ཡུན་རིང་དུ་བསམ་མོ། །བསྒོམ་པས་སྐྱོ་ན།  ས་བོན་གྱི་མཐར་སྔགས་ཀྱི་ཕྲེང་བ་གཡས་སྐོར་དུ་བཀོད་པ་
10-6-5a


སྤྲོ་བསྡུ་སྔ་མ་བཞིན་དུ་བསམས་ཏེ།  ན་མོ་རཏྣ་ཏྲ་ཡཱ་ཡ།  ན་མཿཨཱཪྱ་ཛྙཱ་ན་སཱ་ག་ར།  བཻ་རོ་ཙ་ནཱ་ཡ།   བྻུ་ཧ་རཱ་ཛཱ་ཡ།  ཏ་ཐཱ་ག་ཏཱ་ཡ།  ཨཪྷ་ཏེ་སམྱཀྶྃ་བུདྡྷཱ་ཡ།  ན་མཿསརྦ་ཏ་ཐཱ་ག་ཏེ་བྷྱཿ ཨཪྷ་ཏེ་བྷྱཿ སམྱཀྶྃ་བུདྡྷེ་བྷྱཿ ན་མཿཨཱཪྱ་
ཨ་ཝ་ལོ་ཀི་ཏེ་ཤྭ་རཱ་ཡ།  བོདྷི་ས་ཏྭ་ཡ།  མ་ཧཱ་སཏྭ་ཡ།  མ་ཧཱ་ཀཱ་རུ་ཎི་ཀཱ་ཡ།  ཏདྱ་ཐཱ།  ཨོཾ་དྷ་ར་དྷ་ར།  དྷི་རི་དྷི་རི།  དྷུ་རུ་དྷུ་རུ།  ཨེ་ཊྚེ།  ཝཊྚེ།  ཙ་ལེ་ཙ་ལེ།  པྲ་ཙ་ལེ།  པྲ་ཙ་ལེ།  ཀུ་སུ་མེ།  ཀུ་སུ་མ་བ་རེ།  ཨི་ལི་མི་ལི།  ཙི་ཏི་ཛྭ་ལ་མ་པ་ན་ཡེ་སྭཱ་ཧཱ། །
ཞེས་གཟུངས་རིང་ཚར་གཅིག་གིས་སྣ་དྲངས་པའི་སྙིང་པོ་ཅི་ནུས་བཟླ།  སླར་ཡང་མདུད་འཛིན་གྱི་རྩར་སླེབ་པའི་ཚེ་གཟུངས་རིང་རེ་རེས་སྣ་དྲང་བར་བྱའོ། །མཇུག་ཏུ་ཡེ་ཤེས་པ་མདུན་དུ་ཕྱུང་བ་ལ་མཆོད་པ་ལྔས་མཆོད།  གསོལ་བ་གདབ།  ནོངས་པ་བཟོད་པར་གསོལ་ཏེ།  ཛཿཏི་
ཞེས་ལན་གསུམ་བརྗོད་ནས་གཤེགས་སུ་གསོལ་ཏེ།  རང་དམ་ཚིག་པའི་ང་རྒྱལ་གྱིས་གནས་པར་བྱའོ། །ཐུན་མཚམས་སུ་འབྱུང་པོ་ཐམས་ཅད་ལ་གཏོར་མ་སྦྱིན་པར་འདོད་ན།  རིན་པོ་ཆེ་ལ་སོགས་པའི་སྣོད་དུ་དཀར་གཏོར་བཤམས་ཏེ།  སྭ་བྷཱ་ཝའི་སྔགས་ཀྱིས་སྟོང་པར་སྦྱངས་
ནས།  སྟོང་པའི་ངང་ལས་ཡྃ་ལས་རླུང་།  བྃ་ལས་ཆུ།  ལྃ་ལས་སའི་དཀྱིལ་འཁོར་གྱི་སྟེང་དུ་པྃ་ལས་པདྨ་དང་།  བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ།  ཁྃ་ལས་ཁ་ཟས་རོ་བརྒྱ་དང་ལྡན་པ་ནམ་མཁའ་དང་མཉམ་པར་དམིགས་ལ།  རང་ཉིད་དམ་
ཚིག་སེམས་དཔའི་ངོ་བོར་གནས་པའི་སྙིང་གའི་ས་བོན་གྱི་འོད་ཟེར་གྱིས་ཕྱོགས་བཅུའི་ཡེ་ཤེས་ཀྱི་བདུད་རྩི་བཀུག་ནས།  ཨོཾ་ཨཱ་ཧཱུ།  ལན་གསུམ་བརྗོད་པས་དེ་ལ་བསྟིམ་པར་བྱའོ། །དེ་ནས་ནམ་མཁའ་མཛོད་ཀྱི་སྔགས་དང་ཕྱག་རྒྱས་མི་ཟད་པར་སྤེལ་ནས།  ཡང་སྙིང་
10-6-5b


གའི་ས་བོན་གྱི་འོད་ཟེར་གྱིས་བརྒྱ་བྱིན་ལ་སོགས་པའི་ཕྱོགས་སྐྱོང་རྣམས་ཀྱིས་མཚོན་པའི་འབྱུང་པོ་རྣམས་བཀུག་ཅིང་སྤྱན་རས་གཟིགས་ཀྱི་ངོ་བོར་བྱས་ཏེ།  ལྗགས་ལ་ཧྲཱིཿས་མཚན་པའི་འོད་ཀྱི་སྦུ་གུས་གྱ་ནོམ་པའི་ཞལ་ཟས་དེ་དག་དྲངས་ནས་གསོལ་བར་བསམས་ལ།  ཨོཾ་ཨ་ཀཱ་རོ་མུ་ཁྃ་
སརྦ་དྷརྨཱ་ཎཱྃ་ཨཱདྱ་ནུཏྤན་ན་ཏྭཱ་ཏ་ཨོཾ་ཨཱ་ཧཱུ་ཕཊ་སྭཱ་ཧཱ།  ཞེས་ལན་གསུམ་བརྗོད་ལ།  གཞན་ཡང་།  ཕྱོགས་བཅུ་ཀུན་ན་བཞུགས་པ་ཡི། །ལྷ་ཀླུ་གནོད་སྦྱིན་དྲི་ཟ་དང་། །མིའམ་ལྟོ་འཕྱེ་མཁའ་ལྡིང་དང་། །ཡི་དྭགས་ཤ་ཟ་གྲུལ་བུམ་སོགས། །འབྱུང་པོའི་ཚོགས་ཀུན་
འདིར་བྱོན་ལ། །ལེགས་སྦྱར་ཞལ་ཟས་བཞེས་ནས་ཀྱང་། །མི་མཐུན་རྐྱེན་ལས་བྱུང་བ་ཡི། །བར་ཆད་ཐམས་ཅད་ཞི་བ་དང་། །ཚེ་དང་བསོད་ནམས་འཕེལ་བ་དང་། །འདོད་པའི་དོན་ཀུན་འགྲུབ་པར་མཛོད། །ཅེས་ཟང་ཟིང་གི་དངོས་པོ་བྱིན་ལ།  ཆོས་ཀྱི་
སྦྱིན་པ་ནི།  ཡེ་དྷརྨཱ་ཧེ་ཏུ་པྲ་བྷ་ཝཱ་ཧེ་དུནྟེ་ཥཱནྟ་ཐཱ་ག་ཏོ་ཧྱ་བ་དཏ།  ཏེ་ཥཱཉྩ་ཡོ་ནི་རོ་དྷ་ཨེ་ཝྃ་བཱ་དཱི་མ་ཧཱ་ཤྲ་མ་ཎཿཞེས་བརྗོད་པར་བྱའོ། །བསྟོད་པའང་ཐུན་མཚམས་སུ་མདུན་དུ་ཐུགས་རྗེ་ཆེན་པོ་མངོན་སུམ་ལྟར་དམིགས་ནས་བསྟོད་པ་ཡིན་གྱི།  སྔར་གྱི་ཆོ་གའི་
ཡན་ལག་ཏུ་སྦྱར་བ་ནི་མི་སྣང་ངོ་། །དེ་ལྟར་ན་བཤགས་པའི་ཆོ་ག་ནི་ལམ་དུ་མ་ཞུགས་པའི་ཐ་མལ་པ་དང་།  བྱ་རྒྱུད་རང་ལུགས་ལྟར་ཉམས་སུ་ལེན་པ་དང་།  རྒྱུད་སྡེ་གོང་མ་ལྟར་ཉམས་སུ་ལེན་པ་ཐམས་ཅད་ལ་སྦྱར་དུ་རུང་ལ།  སྒྲུབ་པའི་ཐབས་ནི་རྣལ་
འབྱོར་རྒྱུད་ཀྱི་ལུགས་ལྟར་མཛད་པ་སྟེ།  བདག་ཉིད་སྤྱན་རས་གཟིགས་ཡན་ལག་བཞི་རྫོགས་སུ་བསྐྱེད་ནས།  ཆོ་ག་ཚར་བའི་ཚེ་ཡེ་ཤེས་པ་གཤེགས་ནས་དམ་ཚིག་པ་རྐྱང་པའི་ང་རྒྱལ་གྱིས་གནས་པར་བཤད་པའི་ཕྱིར་རོ། །ཉམས་སུ་ལེན་པའི་ཚུལ་ཡང་
10-6-6a


ཐ་མལ་པ་སྡིག་པོ་ཆེ་ཡིན་ན་སྔར་གྱི་བཤགས་པའི་ཆོ་ག་སྡིག་པ་དག་པའི་མཚན་མ་བྱུང་བྱུང་གི་བར་དུ་ཉམས་སུ་བླངས་ནས།  དེའི་འོག་ཏུ་འདིའི་རྗེས་སུ་གནང་བ་ཞུས་ཏེ་བསྒོམ་བཟླས་ལ་འཇུག་ཅིང་།  གཞན་དག་གིས་ནི་དང་པོ་ཉིད་ནས་རྗེས་གནང་
ཞུས་ཏེ་བསྒོམ་བཟླས་ལ་འཇུག་པའི་དབང་དུ་བྱས་པ་ཡིན་གྱི།  གཞུང་འདིས་སྨྱུང་གནས་ཀྱི་དུས་ཀྱི་བདག་བསྐྱེད་བསྟན་པ་ནི་གཏན་མ་ཡིན་ཏེ།  སྨྱུང་གནས་ནི་བྱ་རྒྱུད་ཀྱི་ལུགས་ཡིན་ལ།  བྱ་རྒྱུད་ལ་བདག་བསྐྱེད་མེད་པར་ཡེ་ཤེས་རྡོ་རྗེ་ཀུན་ལས་བཏུས་སུ་བཤད་
ཅིང་།  རྒྱུད་སྡེ་རང་ཉིད་ནས་ཀྱང་བདག་བསྐྱེད་མ་བཤད་ལ།  དོན་ཐོབ་ལའང་མེད་པའི་ཕྱིར་དང་།  གཞུང་ལས་ཀྱང་མཚམས་མེད་བྱས་པ་ལ་སོགས་པས་ཀྱང་བཤགས་པའི་ཆོ་ག་བྱེད་པའི་ཚེ་ཉི་མ་བར་པ་ལ་ཟས་མི་ཟ་བ་ཁོ་ན་ལ་སྨྱུང་གནས་སུ་བཤད་ཀྱི།  
གཞན་རྣམས་ལ་ནི་སྨྱུང་གནས་ཀྱི་ཐ་སྙད་བྱས་པའང་མི་སྣང་བའི་ཕྱིར།  དེའི་ཚེ་སང་ནངས་པར་ཐོ་རངས་ཟས་ཟ་བའང་མི་འཐད་དེ།  བཤགས་པའི་གཞུང་ལས།  བཅུ་དྲུག་གི་ཉི་མ་རྩེ་ཤར་ལ་བཟའ་ཞེས་གསུངས་པའི་ཕྱིར་རོ། །བྱ་རྒྱུད་ཀྱི་ལྷ་ལ་བདག་བསྐྱེད་
སྦྱར་བ་ནི་རྒྱུད་སྡེ་གོང་མའི་ཆོ་ག་ལྟར་ཉམས་སུ་ལེན་པ་ཡིན་ལ།  དེའི་ཚེ་ལུས་སྡུག་བསྔལ་བའི་ཆེད་དུ་སྨྱུང་གནས་བྱེད་པ་མི་འཐད་དེ།  གསང་འདུས་རྩ་རྒྱུད་ལས།  དཀའ་ཐུབ་དཀའ་སྤྱད་མི་བཟད་པས། །བསྒྲུབས་ན་འགྲུབ་པར་མི་འགྱུར་ཞིང་། །ཞེས་
སོགས་མང་དུ་གསུངས་ལ།  དེ་དག་གི་དོན་བསྡུས་ནས་དཔལ་ལྡན་ས་སྐྱ་པཎྜི་ཏས།  བྱ་བའི་རྒྱུད་ལ་བདག་བསྐྱེད་མེད། །བྲིས་སྐུ་མཆོད་ནས་དངོས་གྲུབ་ལེན། །བདག་བསྐྱེད་སྒྲུབ་ཐབས་ཡོད་པ་ནི། །རྣལ་འབྱོར་རྒྱུད་ཀྱི་རྗེས་འབྲངས་ནས། །དེ་ཡི་ལུགས་
10-6-6b


བཞིན་མཛད་པ་ཡིན། །དེ་ལྟར་བྱེད་ན་སྨྱུང་གནས་མེད། །བདག་ཉིད་ལྷ་རུ་བསྐྱེད་པ་ལ། །མཆོད་ན་བསོད་ནམས་བརྙས་ན་སྡིག །ཞེས་སོགས་གསུངས་སོ། །འོན་ཀྱང་ལུས་སྡུག་བསྔལ་བའི་ཆེད་དུ་མ་ཡིན་པར་དེ་བཞིན་གཤེགས་པས་གསུངས་པའི་ཆོ་ག་རྣམ་པར་དག་
པ་ཡིན་པས་ཉམས་སུ་བླང་བར་བྱའོ་སྙམ་པའི་བསམ་པས་ནི་རྒྱུད་སྡེ་གོང་མའི་རྣལ་འབྱོར་པས་ཀྱང་ཉམས་སུ་བླང་དུ་རུང་བར་རྗེ་བཙུན་གྱིས་གསུངས་སོ། །བོད་ཀྱི་སྨྱུང་གནས་པ་དག་གིས་བདག་ཉིད་ཐུགས་རྗེ་ཆེན་པོ་བཅུ་གཅིག་ཞལ་ཡན་ལག་བཞི་རྫོགས་སུ་བསྐྱེད། 
མདུན་དུ་མཎྜལ་ལ་རྡུལ་ཚོན་གྱིས་པདྨ་འདབ་བརྒྱད་དང་།  བུམ་པ་དང་།  གཏོར་མ་གསུམ་བཤམས་ནས།  མཎྜལ་ལ་དབུས་སུ་ཞལ་བཅུ་གཅིག་པ།  ཕྱོགས་བཞིར་མི་བསྐྱོད་པ།  རིན་འབྱུང་།  རྣམ་སྣང་།  དོན་གྲུབ་རྣམས་ཡན་ལག་བཞི་རྫོགས་སུ་བསྐྱེད་ནས།  
བདག་བསྐྱེད་དང་མདུན་བསྐྱེད་ཀྱི་ཕྱག་ནས་བདུད་རྩིའི་རྒྱུན་བབས་པས་བུམ་པ་གང་བར་བསམ་ཞིང་གཟུངས་བཟླ།  མཇུག་ཏུ་བདག་བསྐྱེད་ཀྱི་ཡེ་ཤེས་པ་མདུན་བསྐྱེད་ལ་བསྟིམས་ནས་པོ་བསྟོད་མང་དུ་འདོན།  བུམ་པའི་ཆུས་དང་པོར་མདུན་བསྐྱེད་ལ་ཁྲུས་གསོལ་ནས།  
ཕྱིས་རང་ཉིད་ལ་ཁྲུས་བྱེད་པ་ནི་སྔར་གྱི་གཞུང་བཞི་པོ་དེ་དག་གི་དོན་དུ་མི་སྣང་ཡང་།  ལུགས་འདི་ལ་བརྟེན་ནས་དངོས་གྲུབ་བརྙེས་པ་མང་དུ་བྱུང་འདུག་པས་བརྒྱུད་པའི་མན་ངག་གམ་དགེ་སློང་མ་དཔལ་མོའི་གཞུང་གཞན་ལ་བརྟེན་པར་སྣང་ངོ་། །རྒྱུད་དང་རྒྱ་གར་འཕགས་མའི༷་
གཞུང་བཞིན་དུ། །སྡིག་པ་བཤགས་དང་བསྒོམ་བཟླས་གཏོར་མ་དང་། །བསྟོད་པའི་ཚོགས་རྣམས་ཉམས་སུ་ལེན་ཚུལ་ཏེ། །འཇིག་རྟེན་མགོན་པོའི་གཞུང་བཞིན་བདག་གིས་བཤད། །རྣམ་དག་དགེ་ཚོགས་ཀུནྡའི་ཕྲེང་བ་ལྟར། །རྣམ་པར་དཀར་བ་གང་ཞིག་ཐོབ་
10-6-7a


པ་དེས། །རྣམ་མང་འགྲོ་བ་སྲིད་པའི་མཚོར་ལྷུང་རྣམས། །རྣམ་མཁྱེན་ཆོས་ཀྱི་རྒྱལ་པོའི་གནས་ཐོབ་ཤོག །དགེ་སློང་མ་དཔལ་མོས་མཛད་པའི་ཐུགས་རྗེ་ཆེན་པོའི་གཞུང་བཞི་ཉམས་སུ་ལེན་པའི་ཚུལ་འདི་ནི་རྒྱུད་སྡེ་བཞིའི་ལམ་གྱི་བབས་དང་
མཐུན་པར་གཞུང་བཞིའི་དགོངས་པ་ཇི་ལྟ་བ་བཞིན་དུ་ཤེས་བྱའི་དཀྱིལ་འཁོར་མཐའ་དག་ལ་བསྙེངས་པ་མི་མངའ་བའི་མཁྱེན་རབ་ཅན་ཆོས་ཀྱི་རྒྱལ་པོ་ཀུན་དགའ་བཟང་པོ་ཡབ་སྲས་ཀྱི་གསུང་ལ་བརྟེན་ནས།  རྒྱལ་ཁམས་པ་བསོད་ནམས་སེང་གེས་གླིང་ཁ་བདེ་བ་
ཅན་དུ་སྦྱར་བའོ།།    །།དགེའོ།།    །།
10-6-7b


empty page
10-7-1a


༄༅།  །ཡང་དག་པར་རྫོགས་པའི་སངས་རྒྱས་གཟི་བརྗིད་ཀྱི་རྒྱལ་པོའི་བརྟག་པའི་རྣམ་པར་བཤད་པ་གཞན་ཕན་ཀུན་ཁྱབ་ཅེས་བྱ་བ་བཞུགས་སོ། །
10-7-1b


༄༅།  ༈    །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་བརྟག་པའི་རྣམ་པར་བཤད་པ་
གཞན་ཕན་ཀུན་ཁྱབ་ཅེས་བྱ་བ།  བླ་མ་དང་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཇི་སྙེད་ཆོས་ཀུན་ཇི་ལྟའི་དབྱིངས་ཉིད་དུ། །ཡེ་ཤེས་མིག་གིས་རིག་ནས་ཐུགས་རྗེ་ཡིས། །ལམ་མཆོག་
རྣམ་པར་སྣང་བའི་འོད་མཛད་པ། །བླ་མ་འཁོར་ལོའི་དབང་ཕྱུག་ཉིད་ལ་འདུད། །གང་ཐུགས་གཉིས་མེད་དང་པོའི་སངས་རྒྱས་མཆོག །འཁོར་གྱི་ཚུལ་འཛིན་གསང་རྒྱུད་སྡུད་མཛད་པ། །རྡོར་
སེམས་ཀུན་བཟང་ཕྱག་ན་རྡོ་རྗེ་སོགས། །མཚན་མཆོག་དུ་མས་སྤྲས་ལ་གུས་བཏུད་ནས། །དཔལ་ལྡན་ངན་སོང་སྦྱོང་བའི་རྒྱུད་ཀྱི་དོན། །རྨད་བྱུང་བརྒྱུད་པའི་ཚུལ་ལུགས་ཇི་བཞིན་དུ། །རང་
10-7-2a


ཉིད་དྲན་པ་གསོ་ཞིང་གཞན་དག་ལའང་། །ཕན་གདགས་ཆེད་དུ་ཅི་ནུས་དབྱེ་བར་བྱ། །འདི་ལ་དོན་གཉིས་ཏེ།  བཤད་པའི་སྔོན་དུ་འགྲོ་བ་དང་།  བཤད་པ་དངོས་སོ། །དང་
པོ་ལ་ལྔ་སྟེ།  ཕྱོགས་གར་གཏོགས་ངོས་བཟུང་བ།  དེ་འཇིག་རྟེན་དུ་ཇི་ལྟར་བྱུང་བའི་ཚུལ།  དེ་ལ་རྒྱ་བོད་དུ་བཤད་སྲོལ་ཇི་ལྟར་བྱུང་བའི་ཚུལ།  དེའི་བརྗོད་བྱ་ངོས་བཟུང་བ།  བཤད་ཐབས་
ཀྱི་མན་ངག་བསྟན་པའོ། །དང་པོ་ནི།  སྔགས་དོན་རྣམ་གཟིགས་ལས།  རྣལ་འབྱོར་སྤྱོད་དང་བྱ་བའི་རྒྱུད། །དེ་བཞིན་ཕ་རོལ་ཕྱིན་པའི་ཚུལ། །ཞེས་གསུངས་པ་ལྟར།  བྱ་བ་དང་།  སྤྱོད་པ་
དང་།  རྣལ་འབྱོར་གྱི་རྒྱུད་གསུམ་ལས།  ཁ་ཅིག་རྒྱུད་འདི་བདག་གི་རྣལ་འབྱོར་མི་གསལ་ཞིང་།  བྲི་བསྐྱེད་ཤིན་ཏུ་གསལ་བས་ན།  སྤྱོད་པའི་རྒྱུད་ཡིན་ནོ་ཞེས་ཟེར་རོ། །དེ་ནི་མི་འཐད་དེ།  
10-7-2b


ཚེ་དཔག་མེད་ཀྱི་སྐབས་ནས་བདག་གི་རྣལ་འབྱོར་གསལ་བར་གསུངས་ཤིང་།  སྤྱོད་རྒྱུད་ལ་ཡང་བདག་གི་རྣལ་འབྱོར་གསལ་བས།  བདག་གི་རྣལ་འབྱོར་མི་གསལ་བ་དེ་སྤྱོད་རྒྱུད་ཡིན་པའི་ཤེས་བྱེད་དུ་མི་རུང་བའི་ཕྱིར་རོ། །དེས་བྱ་
རྒྱུད་ཡིན་པ་ཡང་ཁེགས་པས་ན་རྣལ་འབྱོར་གྱི་རྒྱུད་ཡིན་ཏེ།  ཚེ་དཔག་མེད་ཀྱི་སྐབས་ནས།  རྡོ་རྗེ་སེམས་དཔའི་གནས་འདུག་ནས། །ཐམས་ཅད་ཟོས་ཏེ་ཀུན་བྱས་ཀྱང་། །འགྲུབ་འགྱུར་ཉེས་པས་མི་གོས་ན། །སྙིང་རྗེར་ལྡན་པས་སྨོས་ཅི་
དགོས། །ཞེས་བདེ་བས་འགྲུབ་པར་གསུངས་པའི་ཕྱིར།  འོ་ན་རྩ་རྒྱུད་དང་།  བཤད་རྒྱུད་གང་ཡིན་སྙམ་ན།  སྲུ་ལུང་པས་བཤད་རྒྱུད་དམ།  ཕྱུང་རྒྱུད་དམ།  བསྡུས་རྒྱུད་ལྟ་བུ་མ་ཡིན་ཏེ་རྩ་རྒྱུད་རང་རྐྱང་པ་ཡིན་པས།  འདི་ལ་རྩ་རྒྱུད་
དམ་རྒྱུད་རྒྱས་པ་གཞན་ལོགས་ན་མེད་དོ་ཞེས་ཟེར་བ་ནི་མི་འཐད་དེ།  དེ་ཉིད་བསྡུས་པ་ལས་གཞན་པའི་ཡོ་གའི་རྒྱུད་ཡིན་ན།  དེ་ཉིད་བསྡུས་པ་རྩ་རྒྱུད་དུ་བྱེད་དགོས་པའི་ཕྱིར་རོ། །བུ་སྟོན་གྱིས།  རྣལ་འབྱོར་གྱི་རྒྱུད་ལ།  རྩ་བའི་
རྒྱུད།  རྒྱུད་ཕྱི་མ།  ཕྱི་མའི་ཕྱི་མ།  བཤད་པའི་རྒྱུད།  ཆ་མཐུན་པའི་རྒྱུད།  འཕྲོས་པའམ་ཡན་ལག་གི་རྒྱུད་དང་དྲུག་ལས།  ཕྱི་མ་ཡིན་ཏེ།  དེ་ཉིད་བསྡུས་པའི་དུམ་བུ་གཉིས་པ་ལས།  ངན་འགྲོ་དགུག་ཅིང་སྡིག་པ་བྲལ་བ་ལས་འཕྲོས་
ནས།  ངན་སོང་སྦྱོང་བའི་ཐབས་རྒྱ་ཆེར་བསྟན་པས་འཕྲོས་རྒྱུད་དམ།  དེ་ཉིད་ཀྱི་རྩ་བའི་ལྷ་ཕལ་ཆེར་དུམ་བུ་དང་པོའི་ལྷ་དང་ཕལ་ཆེར་འདྲ་ཞིང་།  དེའི་ཆ་ཤས་སུ་གྱུར་པས་ཡན་ལག་གི་རྒྱུད་ཅེས་གསུངས་སོ། །བླ་མ་རྣམས་ཀྱི་བཞེད་
10-7-3a


པ་ལ།  སློབ་དཔོན་པདྨ་ལྕགས་ཀྱུས།  རྩ་རྒྱུད་ཤིན་ཏུ་ཟབ་ཅིང་རྟོགས་དཀའི་དོན། །བཤད་དང་ཆ་མཐུན་རྒྱུད་ཀྱིས་རྣམ་ཕྱེ་བ། །ཞེས་གསུངས་པ་ལྟར།  རྩ་རྒྱུད།  བཤད་རྒྱུད།  ཆ་མཐུན་གྱི་རྒྱུད་དང་གསུམ་ལས།  འདི་ཆ་
མཐུན་གྱི་རྒྱུད་ཡིན་པར་བཤད་དོ། །གཉིས་པ་ནི།  དཔལ་སྡོམ་པའི་རྒྱུད་ཕྱི་མ་ལས།  ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །བསྟན་པའི་སྙིང་པོ་དམ་པ་ཞིག །ལྷ་གནས་གསུམ་དུ་གྲགས་པ་དེ། །འཛམ་གླིང་ཤར་
ལྷོའི་ཕྱོགས་མཚམས་ན། །དཔལ་ཞེས་བྱ་བའི་རི་བོ་ལ། །ཐུགས་རྗེས་མཐུན་པའི་བྱིན་བརླབས་ཀྱིས། །རྒྱལ་པོ་ཛ་ཞེས་བྱ་བ་ལ། །ལག་ན་རྡོ་རྗེས་གནང་བར་བྱེད། །མི་ལ་སྐལ་ལྡན་དམ་པ་རྣམས། །བྱང་ཆུབ་མཆོག་ཏུ་འགྲུབ་འགྱུར་
བས། །དེ་ལ་རྟག་ཏུ་གུས་པར་བྱོས། །ཞེས་འབྱུང་བས་སྟོན་པ་མྱ་ངན་ལས་འདས་ནས་ལོ་བརྒྱད་དང་བཅུ་གཉིས་ཏེ།  ཉེར་བརྒྱད་ན་རྒྱ་གར་ཤར་ལྷོའི་ཕྱོགས།  གྲོང་ཁྱེར་པ་ཏི་ཀིརྟི་ཞེས་བྱ་བར་རྒྱལ་པོ་རབ་གསལ་ཟླ་བ་ཞེས་བྱ་བ་བྱུང་།  
དེ་ལ་ཕྱག་ན་རྡོ་རྗེས་རྡོ་རྗེ་དབྱིངས་ཀྱི་དཀྱིལ་འཁོར་སྤྲུལ་ནས་དབང་བསྐུར་ཏེ།  ལྷ་གནས་གསུམ་དུ་གྲགས་པ་དེ་ཉིད་བསྡུས་པའི་རྒྱུད་ལ་སོགས་པ་རྣལ་འབྱོར་གྱི་རྒྱུད་མཐའ་དག་གནང་ནས།  དེ་ནས་མི་ཡུལ་དུ་དར་རོ། །དེ་ཉིད་བསྡུས་པའི་
རྒྱུད་ལ་ལྷ་གནས་གསུམ་དུ་གྲགས་པ་ནི།  ལྷ་གནས་དང་པོ་འོག་མིན།  གཉིས་པ་རི་རབ་ཀྱི་རྩེ།  གསུམ་པ་བཀའ་བསྡུ་བའི་གནས་ལྕང་ལོ་ཅན་དང་གསུམ་དུ་གྲགས་པའོ། །གསུམ་པ་ནི།  འཕགས་པའི་ཡུལ་དུ་གྲུབ་ཆེན་ཀུན་
10-7-3b


སྙིང་གིས་མཛད་པའི་འགྲེལ་པ་སྟོང་ཕྲག་བཅུ་གཉིས་པ་ཡོད་པར་གྲགས་ཀྱང་བོད་དུ་མ་འགྱུར་ཞིང་།  ཀ་མ་དྷེ་ནུས་མཛད་པའི་འགྲེལ་པ་ནི་བོད་དུ་འགྱུར་ཡང་བླ་མེད་དུ་འགྲེལ་པའི་ལུགས་སོ། །བོད་དུ་རྒྱུད་འདི་རྒྱལ་པོ་ཁྲི་སྲོང་ལྡེ་བཙན་
གྱི་དུས་སུ་པཎྜི་ཏ་ཞི་བ་སྙིང་པོ་དང་།  ལོ་ཙྪ་བ་སད་མི་མི་བདུན་གྱི་དུས་སུ་འགྱུར་ནས།  ཕྱིས་རལ་པ་ཅན་གྱི་དུས་སུ་ཨཱ་ཙཪྱ་རིན་ཆེན་མཆོག་གིས་སྐད་གསར་བཅད་ཀྱིས་བཅོས་པ་ལས།  དུས་ཕྱིས་ལོ་ཙྪ་བ་གཞན་གྱིས་བཅོས་པ་ནི་མེད་
དོ། །འདི་ལ་མེ་ལྟར་འབར་བའི་སྐབས་ནས་དྲག་པོའི་སྦྱིན་སྲེག་ཡོད་ཀྱང་སྔོན་གྱི་རྒྱལ་བློན་རྣམས་ཀྱིས།  སྔགས་པས་མངོན་སྤྱོད་བྱས་སུ་དོགས་ནས་མ་བསྒྱུར་བ་ཡིན་ནོ། །ཞེས་སྔ་མ་དག་འཆད་པ་ལ།  རྗེ་བཙུན་གྱིས་ལོ་ཙྪ་བ་ཕྱི་མ་
རྣམས་ཀྱིས་གཞན་ལ་འགྱུར་ཆད་པ་དག་འཇུག་པ་ལྟར་འདི་ལ་ཡང་འཇུག་པར་རིགས་པ་ལས་མ་བཅུག་པའི་ཕྱིར།  རྒྱ་དཔེ་ཉིད་ལ་མེད་དོ་སྙམ་དུ་སེམས་པ་ཡིན་ནོ་ཞེས་གསུང་།  སྲུ་ལུང་པས་མེ་ལྟར་འབར་བའི་སྦྱིན་སྲེག་གི་
སྐབས་ནས།  དེ་ནས་ཁུང་བུ་གསུམ་ལས་རྣམ་གཅིག་ནི་ཞེས་བཤད་པས།  མངོན་སྤྱོད་མ་གསུངས་པ་སྟེ།  དེའི་རྒྱུ་མཚན་ཡང་དེ་ཉིད་ལས།  རྡོ་རྗེ་ཁྲོ་བོའི་ལས་དངོས་སུ། །བསད་པ་ཡིན་པར་བཤད་མོད་ཀྱི། །ཞི་དང་རྒྱས་དང་
དབང་རྣམས་ཀྱང་། །དེ་དག་བྱེད་འགྱུར་གདོན་མི་ཟ། །ཞེས་ལས་འཇམ་པོ་དངོས་སུ་བསྟན་པས་དྲག་པོ་ཤུགས་ལས་ཤེས་པ་ལ་དགོངས་སོ་ཞེས་བཞེད་པ་ནི་རྨད་དུ་བྱུང་བའི་བཤད་པར་སྣང་ཞིང་།  ལུགས་སྔ་མའི་སྒྲུབ་བྱེད་དུ་
10-7-4a


འགྲོའོ། །འདི་ལ་བོད་ན་འགྲེལ་པར་མིང་བཏགས་པ་བརྒྱད་ཙམ་སྣང་ཡང་།  བོད་ཀྱི་སྦྱར་བ་ལས།  རྒྱ་གར་ནས་འགྱུར་བ་ནི་མེད་གསུང་།  དེ་ཡང་གཟི་བརྗིད་བཤད་པ་ཞེས་བྱ་བ་འདིས་བྱས་ཆ་མེད་པ་ཅིག་
དང་།  མཛེས་པའི་རྒྱན་ཅེས་བྱ་བ་འཁྱིན་ལོ་ཙཱ་བ་དགེ་ཚུལ་ཁྱུང་གྲགས་ཀྱིས་བྱས་ནས་ཀུན་སྙིང་ལ་ཁ་འཕངས་པ་དང་།  དེ་ཉིད་སྣང་བའི་རྒྱན་ཅེས་བྱ་བ་འབྲིང་མཚམས་ཀྱི་སྤྲག་ལེ་ཆུང་བས་བྱས་ནས་ཀུན་སྙིང་ལ་ཁ་འཕངས་པ་
དང་།  ཟངས་དཀར་གྱིས་བྱས་པའི་འབྲུ་འབུམ་མམ།  ནམ་མཁའ་དྲི་མེད་ཅེས་བྱ་བ་ཁོང་རང་གིས་མཛད་པ་ཁ་བྱང་བཏབ་པ་དང་།  རོང་ཟོམ་ཆོས་ཀྱི་བཟང་པོས་བྱས་པའི་འགྲེལ་པ་དང་།  གོ་རུ་པ་ལོ་ཙྪ་བས་བྱས་ནས་ཀུན་སྙིང་ལ་ཁ་
འཕངས་པ་འདོད་འཇོའི་བ་བྱ་བ་དང་།  འབྲུ་འགྲེལ་ཞེས་བྱ་བ་མཆན་དཀྱུས་སུ་བཅུག་པ་ཅིག་དང་།  རྨ་རིན་ཆེན་མཆོག་གིས་བྱས་པའི་དྲིས་ལན་རྒོལ་བ་མིག་ཚར་བྱ་བ་དང་བརྒྱད་དོ། །འོ་ན་བཤད་སྲོལ་གང་གི་རྗེས་སུ་འབྲང་སྙམ་
ན།  རྒྱལ་པོ་རབ་གསལ་ཟླ་བའི་སློབ་མ་རྒྱལ་བུ་སྒྲ་གཅན་འཛིན་བཟང་པོ་དང་།  ཡེ་ཤེས་རྡོ་རྗེ་དང་།  པྲཛྙཱ་སིདྡྷི་དང་།  རབ་འབྱོར་བསྐྱངས་དང་བཞི་ཡིན་ལ་ཁ་ཅིག་སྭ་སྟི་ཕ་ལ་དང་བཞི་ཡིན་གྱི་རབ་འབྱོར་བསྐྱངས་ཀུན་སྙིང་གི་སློབ་བརྒྱུད་ཡིན་ཞེས་ཟེར།  
ཁ་ཅིག་དེ་གཉིས་ཀ་མ་ཡིན་གྱི་ཉི་མའི་སྙིང་པོ་དང་བཞི་ཡིན་ཞེས་ཟེར་རོ། །དེ་བཞི་ཆར་གྱི་སློབ་མ་ཀུན་དགའ་སྙིང་པོ་སྟེ།  འདི་ཉིད་འཇམ་དཔལ་རྩ་བའི་རྒྱུད་ལས།  ཡི་གེ་ཨཱ་མིང་བདག་ཉིད་ཆེ། །སྟོན་པའི་བསྟན་པ་གཅེས་འཛིན་བྱེད། །
10-7-4b


བློ་ལྡན་ཡོན་ཏན་ཀུན་གྱིས་བཀུར། །ཅེས་ལུང་བསྟན་ཅིང་།  གྲུབ་ཐོབ་བརྒྱད་ཅུ་རྩ་བཞིའི་བསྟོད་པ་ལས་ཀྱང་།  སྒྲོལ་མ་དཀར་མོས་བྱིན་གྱིས་བརླབས། །རྣལ་འབྱོར་རྒྱུད་ལ་འགྲེལ་བཤད་མཛད། །ཀུན་དགའ་སྙིང་པོ་ཞེས་བྱ་བའི། །བླ་མ་དེ་ལ་
ཕྱག་འཚལ་ལོ། །ཞེས་བསྟོད་པའི་ཡོན་ཏན་ལ་སོགས་པ་བསམ་གྱིས་མི་ཁྱབ་པ་དང་ལྡན་ནོ། །དེ་ནས་པྲཛྙཱ་ཝ་ལ་ཏི།  པྲཛྙཱ་བོ་དྷི།  མུ་ཏིག་ཀ་ཀོ་ཤ།  དྷརྨཱ་ཕ་ལ་རྣམས་ལས་རིམ་པ་བཞིན་བརྒྱུད་དེ།  དྷརྨཱ་ཕ་ལའི་སློབ་མ་ནི།  རྗེ་དཱི་པཾ་ཀ་ར་དང་།  ལོ་ཙྪ་
བ་རིན་ཆེན་བཟང་པོའོ། །ཡང་ཁ་ཅིག་ན་རེ།  སློབ་དཔོན་ཆེན་པོ་བུདྡྷ་གུ་ཧྱ་ཞེས་བྱ་བ་དངོས་གྲུབ་བརྙེས་པའི་སློབ་དཔོན་ཞིག་གིས།  དེ་ཉིད་བསྡུས་པ་དང་།  རྡོ་རྗེ་རྩེ་མོ་དང་།  དཔལ་མཆོག་དང་པོ་དང་།  ངན་སོང་སྦྱོང་བའི་རྒྱུད་དང་།  རྟོག་
པ་ཐམས་ཅད་བསྡུས་པ་དང་ལྔའི་དབང་དང་གདམས་པ་རྣམས་འཇམ་དཔལ་ལས་དངོས་སུ་ཐོས་ནས།  ཡན་ལག་མེད་པའི་རྡོ་རྗེ་སོགས་ལས་རིམ་པ་བཞིན་བརྒྱུད་དེ།  སློབ་དཔོན་ཤཱཀྱ་བཤེས་གཉེན་ཞེས་བྱ་བས་དེ་ཉིད་བསྡུས་པའི་རྒྱ་ཆེར་
བཤད་པ་ཤ་ལོ་ཀ་སྟོང་ཕྲག་བཅུ་གཉིས་པ་ཀོ་ས་ལའི་རྒྱན་ཅེས་བྱ་བ་མཛད།  ཡང་སྔར་གྱི་སློབ་དཔོན་གྲུབ་པ་ཐོབ་པ་དེ་དང་མིང་མཚུངས་པའི་སློབ་དཔོན་སངས་རྒྱས་གསང་བ་ཞེས་བྱ་བས་དེ་ཉིད་བསྡུས་པའི་འགྲེལ་པ་མཛད་དེ།  དེ་
ལྟར་ན་དོན་ལ་མཁས་པ་སངས་རྒྱས་གསང་བ།  ཚིག་ལ་མཁས་པ་ཤཱཀྱ་བཤེས་གཉེན།  ཚིག་དོན་གཉིས་ཀ་ལ་མཁས་པ་ཀུན་དགའ་སྙིང་པོ་སྟེ།  རྣལ་འབྱོར་རྒྱུད་ལ་མཁས་པའི་མི་གསུམ་དུ་གྲགས་སོ་ཞེས་བཞེད་དོ། །ཡང་ཀུན་དགའ་
10-7-5a


སྙིང་པོའི་མཆེད་གྲོགས་སློབ་དཔོན་འཇམ་དཔལ་གྲགས་པ་ཞེས་བྱ་བ་འཇམ་དཔལ་གྱི་གྲུབ་པ་ཐོབ་ཅིང་སྐུ་ཆེ་བའི་ཡོན་ཏན་ལྔ་དང་ལྡན་པ་དེས།  དཔལ་སྦས་བཟང་པོ་ལ་བཤད།  དེས་བྲམ་ཟེ་ཡེ་ཤེས་རྡོ་རྗེ་ལ་བཤད།  དེས་ནཱ་
ལེནྟྲའི་ནུབ་སྒོ་བ་ཤེས་རབ་འབྱུང་གནས་བློ་གྲོས་ལ་བཤད།  དེས་བྲམ་ཟེ་བཞད་པའི་རྡོ་རྗེ་དང་།  པདྨཱ་ཀ་ར་དང་།  ཤྲདྡྷ་ཀ་ར་གསུམ་ལ་བཤད།  ཕྱི་མ་གཉིས་ཀྱིས་ལོ་ཆེན་ལ་བཤད་དོ། །ཡང་སློབ་དཔོན་འཇམ་དཔལ་བཤེས་གཉེན་ཞེས་བྱ་བས།  སངས་
རྒྱས་ཡེ་ཤེས་ཞབས་དང་།  སྒེག་པའི་རྡོ་རྗེ་གཉིས་ལ་བཤད།  དེ་ལ་སྒེག་པའི་རྡོ་རྗེ་གསང་མཚན་ཡིན་ལ།  མཚན་དངོས་ནི་དཔལ་ལྡན་བྱང་ཆུབ་མཆོག་གི་སྐལ་བ་དང་ལྡན་པ་ཞེས་གྲགས་ཤིང་རིན་པོ་ཆེའི་གླིང་དུ་སྒྲུབ་པ་མཛད་ནས་དངོས་གྲུབ་
བརྙེས་པས་ནོར་བུ་གླིང་པ་ཞེས་ཀྱང་གྲགས།  མུ་སྟེགས་ཀྱིས་གསོད་པར་བརྩམས་པའི་ཚེ།  འཇམ་དཔལ་དུ་སྤྲུལ་ནས་གཟུགས་སྣ་ཚོགས་སུ་སྟོན་པས་སྣ་ཚོགས་གཟུགས་ཅན་ཞེས་ཀྱང་གྲགས།  ཐུགས་རྗེས་གཞན་ལ་ཕན་འདོགས་
པས་ཉི་མ་ལྟ་བུའི་སློབ་དཔོན་ཞེས་ཀྱང་གྲགས་སོ། །སློབ་དཔོན་དེས་སཱུཪྱ་སིང་ཧ།  དེས་དྷརྨཱ་བཛྲ་དང་མུ་དྲ་སིདྡྷི།  དེས་དེ་ཝ་ཤ་ར་ལ་བཤད།  དེ་ལ་ཤཱནྟི་གརྦྷ་དང་།  སྨྲྀ་ཏི་ཛྙཱ་ན་སྟེ་སློབ་མ་གཉིས་སོ། །དེ་དག་ལས་བོད་དུ་ཇི་ལྟར་བརྒྱུད་ན།  
ལོཙྪ་བ་རིན་ཆེན་བཟང་པོ་ཁ་ཆེར་ལན་གསུམ་དུ་བྱོན་པའི་དང་པོ་ལ།  ཁ་ཆེའི་མཁན་པོ་ཙནྡྲ་ཧ་རི་ལ་འཇིག་རྟེན་སྣང་བྱེད་ཀྱི་དཀྱིལ་འཁོར་དུ་ཞུགས་ནས་དབང་བསྐུར་ཞུས།  ཕྱིས་ཤྲདྡྷ་ཀ་ར་ཝརྨ་ལ།  གསང་འདུས་འཇམ་རྡོར་དང་།  མི་
10-7-5b


བསྐྱོད་པ་གཉིས་དང་།  རྡོ་རྗེ་དབྱིངས་ཀྱི་དཀྱིལ་འཁོར་དུ་དབང་བསྐུར་ཞུས་ནས་དེ་དག་གི་བཤད་བཀའ་ཡང་གསན་ཅིང་།  འགའ་ཞིག་བསྒྱུར།  ལན་གཉིས་པ་ལ་པཎྜི་ཏ་པདྨཱ་ཀ་ར་ཝརྨ་དང་།  པྲཛྙཱ་ཀ་ར་ཝརྨ་གཉིས་ལ་གཏུགས་ཏེ་ཡོ་གའི་
གཞུང་འགྲེལ་འགའ་ཞིག་བསྒྱུར།  དཔལ་མཆོག་གི་ཕྲེང་ཆད་གསོ་བས།  དུམ་བུ་དང་པོའི་རྒྱུད་འགྲེལ་གཉིས་ཀ་དག་པར་བཅོས།  དེ་ཡན་ཆད་ཀྱི་ལོ་ཆེན་གྱི་སློབ་མ་རྣམས་ནི།  ཤྲདྡྷ་ནས་བརྒྱུད་པའི་ཡོ་གའི་སྐོར་འཛིན་པས་
ཕྱག་ལེན་ཀུན་དགའ་སྙིང་པོའི་ལུགས་ལ་བྱེད་ཀྱང་དེ་ཉིད་སྣང་བ་མ་འགྱུར་བས།  བཤད་པ་ཀོ་ས་ལའི་རྒྱན་གྱི་སྟེང་ནས་མཛད་པས་བསྙེན་པའི་སྐབས་སུ་འཁོར་ལོས་བསྒྱུར་བའི་ཆས་སུ་ཞུགས།  སྙིང་ཁའི་བདག་འཇུག་ལ་
བུམ་པ་འཆའ།  རྣམ་སྣང་ལ་མི་བཞི་རྒྱབ་སྤྲོད་ལྟ་བུ་བྱེད་པ་སོགས་བཤད་པ་དང་།  ལག་ལེན་ཡང་མི་མཐུན་ཅིང་།  བོན་པོ་འདུལ་བའི་ཆེད་དུ་དབྱངས་ལ་སོགས་པའི་སྤྲོས་པ་ཡང་ཆེ་བར་གྲགས་སོ། །ལན་གསུམ་པ་ལ་པཎྜི་ཏ་
སངས་རྒྱས་ཞི་བ་ཞེས་བྱ་བ་ནོར་བུ་གླིང་པ་བདེ་བའི་རྡོ་རྗེའི་སློབ་མར་གྲགས་ཤིང་འགའ་ཞིག་དེ་གཉིས་མཚན་དངོས་དང་།  གསང་མཚན་གྱི་ཁྱད་པར་མ་གཏོགས་པ་གཅིག་ཡིན་པར་ཡང་འདོད་ལ།  པཎྜི་ཏ་དེ་ལ་ཀུན་སྙིང་གི་ལུགས་
ཀྱི་ལག་ལེན་དང་བཤད་པ་གཉིས་ཀ་ཞུས་པས་དེ་ཉིད་ལ་ཐུགས་ཆེས་ཤིང་ཐུགས་རྩིས་ཆེ་བར་མཛད།  ཞེས་བུ་སྟོན་བཞེད་དོ། །ལོ་ཆེན་གྱི་སྐུ་ཚེའི་མཇུག་ཏུ་རྒྱ་གར་ཤར་ཕྱོགས་ཀྱི་པཎྜི་ཏ་དྷརྨ་ཕ་ལ་མངའ་རིས་སུ་བྱོན་པ་ལ་རྣལ་འབྱོར་
10-7-6a


རྒྱུད་ཀྱི་སྐོར་གསན་པས།  ཀུན་སྙིང་གི་བརྒྱུད་པ་བཞི་པར་འདུག་ཅིང་དེ་ཡི་གདམས་པ་མ་ནོར་བར་བྱུང་སྟེ་མཉེས་སྐད་དོ། །སྦྱོང་རྒྱུད་ལ་ཡང་རྒྱུད་གོང་འོག་འཁྲུགས་བསྡེབས་ནས་མཛད་པ་མ་གཏོགས་གཞན་ནས་
རྒྱས་འགེབས་པ་མི་མཛད།  བསྙེན་པའི་དུས་སུ་ཆ་ལུགས་ཇི་བཞིན་པ་བུམ་པ་ལྷག་གནས་ལ་རྣམ་རྒྱལ་གཅིག་པུ་རྡོ་རྗེའི་གླུ་མ་གཏོགས་པ་རྣམས་ལ་དབྱངས་མི་མཛད་དོ། །ལོ་ཆེན་དེ་ལ་སྤྱིར་སློབ་མ་མང་ཡང་ཐུགས་ཀྱི་སྲས་མཆོག་
བཞི་སྟེ།  ལོ་ཆུང་ལེགས་པའི་ཤེས་རབ།  མང་ནང་གི་གུར་ཤིང་བརྩོན་འགྲུས་རྒྱལ་མཚན།  གྲྭ་པ་གཞོན་ཤེ།  སྐྱི་ནོར་ཛྙཱ་ན་དང་བཞི་ལས།  དང་པོས་དྷརྨཱ་ཕ་ལའི་ལུགས་མ་གསན།  སྔར་གྱི་ཤྲདྡྷ་དང་།  སངས་རྒྱས་ཞི་བ་གཉིས་ཀྱི་
ལུགས་འཛིན།  གཉིས་པས་དྷརྨཱ་ཕ་ལའི་ལུགས་གཙོ་བོར་འཛིན།  གསུམ་པས་གཉིས་ཀའི་གུང༷་སྲོང་།  བཞི་པས་ཕྱིས་ཀྱི་གཞུང་སྲོངའོ། །ཡང་གཞན་དུ་སྦྱངས་ཤིང་དེར་ཐུག་པའི་པུ་ཧྲངས་པ་ཨན་སྟོན་གྲགས་རིན།  
རྒྱ་ཡེ་ཚུལ།  གུངས་པ་དགེ་བཤེས།  མར་ཡུལ་བ་དཀོན་མཆོག་བརྩེགས་ཏེ་བཞིའོ། །དབུས་གཙང་ན་མར་དར་ཚུལ་ནི།  ལོ་ཆེན་གྱི་དྲུང་དུ་འགྲོ་བ་ལ་རྒྱང་རོ་དཔེ་དམར་གྱི་རྐྱང་པོ་ཆོས་བློ་སྔ།  དེ་ནས་ཤངས་ཀྱི་སུམ་སྟོན་ཡེ་འབར།  
དེ་ནས་ཉང་སྟོན་ལྕེ་ཞར།  དེ་ནས་སྤང་ཁ་འདར་ཆུང་གི་ཕ་གཞོན་ནུ་རྒྱ་མཚོ།  ལ་སྟོད་ཀྱི་བྲག་སྟེང་པ།  སྣུར་ཕྱི་རུའི་དམར་སྟོན་ཆོས་ཀྱི་རྒྱལ་མཚན།  མདོག་གླེ་སྟོན།  བལ་ཤཱཀྱ་རྡོ་རྗེ།  ཐང་སྟོན་ཀོང་ཀ་བ།  མདོག་གོང་གང་རྣམས་ཏེ།  
10-7-6b


དེ་དག་ཕལ་ཆེར་ལོ་ཆེན་ལ་ཐུག་པ་ཙམ་བྱས་ནས་གཙོ་བོར་ལོ་ཆུང་གི་དྲུང་དུ་སྦྱངས་ཏེ།  དབུས་གཙང་གི་ས་ཆ་སྨད་ཕྱོགས་སུ་དར་བས་ཡོ་ག་སྨད་ལུགས་སུ་གྲགས།  ཡང་ལོ་ཆེན་གྱི་སློབ་མ་བྲག་སྟེང་པ་ཡོན་ཏན་ཚུལ་ཁྲིམས།  དེས་མལ་
གྱོ།  དེས་རྗེ་ས་སྐྱ་པ་ལ་བརྒྱུད་དེ།  ས་ཆ་སྟོད་དུ་དར་བ་རྣམས་ལ་ཡོ་ག་སྟོད་ལུགས་སུ་གྲགས་སོ། །ཡང་པཎྜི་ཏ་དྷརྨཱ་ཕ་ལ་ནས།  ཇོ་བོ་རྗེ།  གོ་མི་སྒོམ་ཆེན།  སྐྱི་ནོར་ཛྙཱ་ན།  རྨྱལ་པ་ཉི་མ་ཤེས་རབ།  སྣུར་ཉི་མ་འོད་ཟེར་སོགས་ནས་
བརྒྱུད་པ་ལ་ཇོ་བོའི་ལུགས་སམ།  རྩ་སྣུར་འཛིམ་གསུམ་ནས་བརྒྱུད་པ་ཞེས་གྲགས་སོ། །བཤད་སྲོལ་དེ་དང་།  བྲག་སྟེང་པ་ནས་བརྒྱུད་པ་དེ་དང་།  ལོ་ཆུང་ནས་དབུས་པ་དགེ་སེར།  གནམ་ཁའུ་པ།  ས་ཆེན་རྣམས་ལས་རིམ་པ་བཞིན་
བརྒྱུད་པའི་བཤད་པ་རྣམས་ལ།  རྩིང་ཞིབ་བག་རེ་དང་ཆོ་ག་གོང་འོག་མི་མཐུན་པ་བག་རེ་མ་གཏོགས།  ཕལ་ཆེར་ནི་འདྲ་བ་ཉིད་དུ་སྣང་ཞེས་གསུངས་སོ། །མདོར་ན་པཎྜི་ཏ་དྷརྨཱ་པ་ལའི་ལུགས་བྲག་སྟེང་པ་ནས་བརྒྱུད་པ་འདི་ལ་རྗེ་བཙུན་རིན་པོ་
ཆེས། རྒྱུད་བཤད་ཐབས་ཀྱི་མན་ངག་གཞན་ཕན་སྤྱི་ཆིངས།  རྒྱུད་ཀྱི་ས་བཅད་དང་མཆན་གཉིས།  ལག་ཏུ་བླང་བའི་རིམ་པ་གཞན་ཕན་འོད་ཟེར་དང་།  གཞན་ཕན་ཉེར་མཁོ་གཉིས་ཏེ།  དེ་དག་གི་རྗེས་སུ་འབྲངས་ནས་བཤད་པར་བྱ་བ་ཡིན་ནོ། །བཞི་
པ་ལ་གསུམ་སྟེ།  བརྗོད་བྱའི་དབྱེ་བ།  བསྡུ་བ།  གསུངས་པའི་དགོས་པའོ། །དང་པོ་ནི།  དེ་བཞིན་གཤེགས་པའི་དཀྱིལ་འཁོར་གཙོ་བོར་གྱུར་པ་དྲུག །དེ་བཞིན་གཤེགས་པ་ལ་འཇིག་རྟེན་པའི་འཁོར་གྱིས་བསྐོར་བའི་དཀྱིལ་འཁོར་དྲུག །རོ་
10-7-7a


སྲེག་པའི་དཀྱིལ་འཁོར་རྒྱས་པ་གཅིག །ལས་བཞིའི་སྦྱིན་སྲེག་བཞི་སྟེ།  བཅུ་བདུན་ནི་བརྗོད་བྱའི་གཙོ་བོ་ཡིན་ལ།  དཀྱིལ་འཁོར་བཅུ་གཉིས་པོ་ལ།  ཏིང་ངེ་འཛིན་གྱི་དཀྱིལ་འཁོར་དང་།  རྡུལ་ཚོན་གྱི་དཀྱིལ་འཁོར་དང་།  ཀུན་རིག་དང་ཤཱཀྱ་ཐུབ་
པས་དཔ༷ང་པོ་བྱས་ནས་རས་ལ་བྲི་བ་དང་གསུམ་དུ་ཕྱེ་ན་སོ་དྲུག་དང་།  སྡོམ་པས་བཞི་བཅུ་ཞེ་གཅིག་ཏུ་འགྱུར་བ་ཡིན་ནོ། །དེ་ལ་ཀུན་རིག་རྩ་བའི་རྒྱུད་ནས་ཀུན་རིག་གི་དཀྱིལ་འཁོར་དང་།  རོ་སྲེག་གི་དཀྱིལ་འཁོར་རྒྱས་པ་དང་།  རས་བྲིས་དང་།  
ལས་བཞིའི་སྦྱིན་སྲེག་བསྡུས་པ་ཙམ་བསྟན།  རྒྱུད་ཕྱི་མ་ལས་ཤཱཀྱ་ཐུབ་པ་སྐུའི་དཀྱིལ་འཁོར་དང་།  ཕྱག་ན་རྡོ་རྗེ་ཐུགས་ཀྱི་དཀྱིལ་འཁོར་གྱི་སྐབས་ནས་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་གཉིས།  ཚེ་དཔག་མེད་གསུང་གི་དཀྱིལ་
འཁོར་ནས་དེ་ཉིད་ཀྱི་དཀྱིལ་འཁོར་དང་།  རོ་སྦྱོང་བའི་ཐབ་རྒྱས་པ་དང་།  ལས་བཞིའི་སྦྱིན་སྲེག་གི་ཅུང་ཟད་གསལ་བར་བྱེད་པ་རྣམས་སྟོན།  འཁོར་ལོས་སྒྱུར་བའི་སྐབས་ནས་དེ་ཉིད་ཀྱི་དཀྱིལ་འཁོར་དང་སྔར་གྱི་རོ་སྲེག་གསལ་བར་བྱེད་པ་སྟོན་ནོ། །
མེ་ལྟར་འབར་བའི་སྐབས་ནས་དེ་ཉིད་ཀྱི་དཀྱིལ་འཁོར་དང་ལས་གསུམ་གྱི་སྦྱིན་སྲེག་གོང་གི་དེ་རྣམས་གསལ་བར་བྱེད་པའི་ཕྱིར་རྒྱས་པར་སྟོན་ནོ། །གཉིས་པ་ནི།  ཡང་དེ་དག་ཐམས་ཅད་ཀྱི་དོན་བསྡུ་ན་ཏིང་ངེ་འཛིན་གྱི་བསྙེན་པ་དང་།  རས་བྲིས་ལ་བརྟེན་
དེ་སྒྲུབ་པ་དང་།  རང་དང་གཞན་གྱི་དོན་གྱི་ལས་ལ་སྦྱར་བ་ཞེས་བྱ་བ་གསུམ་དུ་ཡང་གསུངས་པ་ཡིན་ནོ། །ཡང་དེ་དག་གི་དོན་བསྡུ་ན།  སྔོན་དུ་སློབ་མ་སྨིན་པར་བྱ་བ་དང་།  སྨིན་པ་དེས་དངོས་གྲུབ་ཀྱི་ཡེ་ཤེས་ལ་བསླབ་པར་བྱ་བ་དང་།  ཕྱག་རྒྱའི་
10-7-7b


ཡེ་ཤེས་ལ་བསླབ་པ་དང་།  མཚན་མ་ཐོབ་ནས་རང་དང་གཞན་གྱི་དོན་སྒྲུབ་པ་ཞེས་པ་གསུམ་དུའང་བསྡུ་བ་ཡིན་ནོ། །ཡང་དེ་དག་ཐམས་ཅད་ཀྱི་དོན་དགོས་པས་བསྡུ་ན་རང་གི་དོན་དང་གཞན་གྱི་དོན་གཉིས་སུ་འདུ་ལ་གཞན་དོན་ལ་ཚེ་དང་ལྡན་པའི་
དོན་བྱ་བ་དང་།  ཚེ་འདས་པའི་དོན་བྱ་བ་གཉིས་ཀྱིས་བསྡུས་པ་ཡིན་ནོ། །དེ་དག་ཐམས་ཅད་བསྡུ་ན་འདི་ལྟར་གོ་བར་བྱ་སྟེ།  བརྗོད་བྱའི་གཙོ་བོ་ནི་དཀྱིལ་འཁོར་དྲུག་གམ་བཅུ་གཉིས་ཡིན་ལ།  རོ་སྲེག་དང་སྦྱིན་སྲེག་གཉིས་ནི་དེའི་ཕྲིན་ལས་
ཡིན་ཞིང་།  བཟླས་པ་དང་།  དངོས་གྲུབ་ཀྱི་ཡེ་ཤེས་དང་།  ཕྱག་རྒྱའི་ཡེ་ཤེས་རྣམས་ནི་དེ་དག་གི་གྲོགས་སུ་གྱུར་པ་ཡིན་ནོ། །དེ་དག་ཉམས་སུ་ལེན་ན་ཐོག་མར་སློབ་མ་སྨིན་པར་བྱས་ལ་ཏིང་ངེ་འཛིན་གྱི་བསྙེན་པ་བྱ་ཞིང་རས་བྲིས་ལ་བརྟེན་
ནས་བསྒྲུབས་ཏེ།  རང་དང་གཞན་གྱི་དོན་བསྒྲུབ་པའི་ཕྲིན་ལས་ལ་སྦྱར་ན་གནས་སྐབས་ཀྱི་འབྲས་བུ་ཇི་ལྟར་འདོད་པ་འགྲུབ་ཅིང་།  མཐར་ཐུག་གི་འབྲས་བུ་སངས་རྒྱས་འགྲུབ་པ་ཡིན་ནོ་ཞེས་བྱ་བར་ཤེས་པར་བྱའོ། །གསུམ་པ་ནི།  
ཐུགས་ཆོས་ཉིད་ལས་མ་གཡོས་པའི་རྟགས་སུ་དཀྱིལ་འཁོར་བསྟན་ལ།  ཐུགས་རྗེས་འགྲོ་བའི་དོན་མཛད་པའི་རྟགས་སུ་སྦྱིན་སྲེག་བསྟན་ནོ། །དེ་ཡང་བདེན་པ་གཉིས་དང་མི་འགལ་བའི་ཆེད་དུ་དཀྱིལ་འཁོར་ལ་ཡང་འཇིག་རྟེན་དང་
འཇིག་རྟེན་ལས་འདས་པའི་དཀྱིལ་འཁོར་གཉིས་གསུངས།  དངོས་པོར་མངོན་པར་ཞེན་པ་བཟློག་པ་དང་།  ཐུགས་རྗེས་འགྲོ་བའི་དོན་མཛད་པ་མཚོན་པའི་ཆེད་དུ།  རོ་སྲེག་གི་སྦྱིན་སྲེག་དང་།  ཕྲིན་ལས་རྣམ་བཞིའི་སྦྱིན་སྲེག་གཉིས་
10-7-8a


གསུངས།  དེ་དག་གི་གོ་རིམ་ཡང་ཐུགས་ཆོས་ཉིད་ལས་མ་གཡོས་ཀྱང་།  རྩ་བ་བྱང་ཆུབ་ཀྱི་སེམས་སུ་འདུས་པའི་རྟགས་སུ་རྩ་བའི་དཀྱིལ་འཁོར་གསུངས།  དེ་ལྟར་བྱང་ཆུབ་ཀྱི་སེམས་སུ་འདུས་ཀྱང་ཐུགས་རྗེས་
ངན་སོང་གི་རྒྱུ་འབྲས་གཞོམ་པའི་ཕྱིར་ཤཱཀྱ་ཐུབ་པའི་དཀྱིལ་འཁོར་གསུངས།  དེ་ལྟར་རྒྱུ་འབྲས་བཅོམ་ཡང་གློ་བུར་གྱི་རྐྱེན་གྱིས་འཆི་བས་དེ་བཟློག་པའི་ཆེད་དུ་ཕྱག་ན་རྡོ་རྗེའི་དཀྱིལ་འཁོར་གསུངས།  གློ་བུར་གྱི་རྐྱེན་གྱིས་མི་འཆི་ཡང་སྔོན་གྱི་
ལས་ཀྱིས་འཆི་བས་དེ་བཟློག་པའི་ཆེད་དུ་ཚེ་དཔག་མེད་ཀྱི་དཀྱིལ་འཁོར་གསུངས།  འཆི་བདག་བཅོམ་ཡང་ཕྲིན་ལས་རྣམ་བཞིའི་སྒོ་ནས་དོན་མཛད་དགོས་པས་འཁོར་ལོས་སྒྱུར་བའི་དཀྱིལ་འཁོར་གསུངས།  འགྲོ་བའི་དོན་མཛད་
ཀྱང་མ་རུངས་པ་འདུལ་དགོས་པས་མེ་ལྟར་འབར་བའི་དཀྱིལ་འཁོར་གསུངས།  མ་རུངས་པ་བཏུལ་ཡང་དངོས་པོར་ལྟ་བ་སུན་ཕྱུང་དགོས་པས་རོ་སྲེག་གི་དཀྱིལ་འཁོར་གསུངས།  དེ་སུན་ཕྱུང་ཡང་ཐུགས་རྗེས་ཆོས་ཉིད་ལས་མ་གཡོས་
པའི་རྟགས་སུ་ཞི་བའི་སྦྱིན་སྲེག་གསུངས།  དེ་ལྟར་མ་གཡོས་ཀྱང་འགྲོ་བའི་དོན་མཛད་དགོས་པས་རྒྱས་པའི་སྦྱིན་སྲེག་གསུངས།  དེ་ལྟར་དོན་མཛད་ཀྱང་འཁོར་བ༷་དབང་དུ་བསྡུ་དགོས་པས་དབང་གི་དཀྱིལ་འཁོར་གསུངས།  དབང་དུ་
བསྡུས་ཀྱང་མ་རུངས་པ་ལ་མངོན་སྤྱོད་ཀྱི་ལས་དགོས་པས་དྲག་པོའི་སྦྱིན་སྲེག་གསུངས།  འཇིག་རྟེན་པའི་གནོད་པ་རྣམས་ཞི་ཞིང་འཇིག་རྟེན་གྱི་ཕུན་སུམ་ཚོགས་པ་བསྒྲུབ་པའི་ཕྱིར་དུ་འཇིག་རྟེན་པའི་དཀྱིལ་འཁོར་དྲུག་གསུངས་ལ་སོ་སོའི་
10-7-8b


དགོས་པ་ནི་གཞུང་ཉིད་ཀྱི་སྟེང་དུ་རྟོགས་པར་བྱའོ། །ལྔ་པ་རྒྱུད་བཤད་ཐབས་ཀྱི་མན་ངག་ནི་སྤྱིར་རྒྱུད་འཆད་ཚུལ་ལ་འགྲེལ་ཆེན་དྲི་མེད་འོད་ཀྱིས་དུས་འཁོར་བསྡུས་རྒྱུད་འཆད་པ་ལྟ་བུ་རྒྱུད་འགྲེལ་པས་འཆད་པ་དང་།  གསང་འདུས་ཡེ་ཤེས་
ཞབས་ལུགས་ཀྱི་གཞུང་ཕྲན་རྣམས་ལ་བརྟེན་ནས་གསང་བ་འདུས་པའི་རྒྱུད་འཆད་པ་ལྟ་བུ་རྒྱུད་གཞུང་ཕྲན་གྱིས་འཆད་པ་དང་།  རྒྱུད་རྒྱུད་ཉིད་ཀྱིས་འཆད་པ་དང་གསུམ་ཡོད་པ་ལས།  འདི་ནི་ཕྱི་མ་སྟེ་ས་ཆོག་གཞན་དུ་ཁ་འཕངས་པ་དང་།  
སེམས་དཔའ་བཅུ་དྲུག་འགོད་པར་གསུངས་ཀྱང་།  དེའི་ཞལ་ཕྱག་མ་གསུངས་པ་རྣམས་རྒྱུད་གཞན་གྱིས་ཁ་བསྐང་བ་མ་གཏོགས་རྒྱུད་ཀྱི་དངོས་བསྟན་ལ་ཡོད་པ་རྣམས་ནི་བརྟག་པ་གོང་འོག་འཁྲུགས་བསྡེབས་ནས་ཉམས་སུ་བླང་བ་
ཡིན་གྱིས།  རྒྱུད་སྡེ་གཞན་གྱིས་རྒྱས་བཀབ་པ་ལ་སོགས་པ་མི་བྱེད་པའི་ཕྱིར་རོ། །འཁྲུགས་ཇི་ལྟར་སྡེབ་པའི་ཚུལ་ནི་འོག་གཞུང་དོན་གྱི་སྐབས་སུ་རྟོགས་པར་བྱའོ། །གཉིས་པ་བཤད་པ་དངོས་ལ་གཉིས་ཏེ།  མཚན་དོན་གྱི་སྒོ་ནས་
མདོར་བསྟན།  གཞུང་དོན་གྱི་སྒོ་ནས་རྒྱས་པར་བཤད་པའོ། །དང་པོ་ལ་གཉིས་ལས།  དང་པོ་མཚན་བསྒྱུར་བ་ནི།  རྒྱ་གར་སྐད་དུ།  སརྦ་དུརྒ་ཏི་ནི།  བོད་སྐད་དུ།  ངན་སོང་ཐམས་ཅད།  པ་རི་ཤོ་དྷ་ནི་ནི་ཡོངས་སུ་སྦྱོང་བ།  ཏེ་ཛོ་རཱ་ཛཱ་ཡ་ནི།  
གཟི་བརྗིད་ཀྱི་རྒྱལ་པོ།  ཏ་ཐཱ་ག་ཏཱ་ཡ་ནི་དེ་བཞིན་གཤེགས་པ།  ཨར་ཧ་ཏེ་ནི་དགྲ་བཅོམ་པ།  སཾ་མྱཀ་སཾ་བུདྡྷ་ནི་ཡང་དག་པར་རྫོགས་པའི་སངས་རྒྱས།  ནཱ་མ་ནི་ཞེས་བྱ་བ།  ཀ་ལ་པ་ནི་བརྟག་པའོ། །གཉིས་པ་མཚན་བཤད་པ་ནི་རྗེ་བཙུན་
10-7-9a


གྱིས་ཆོས་ཐམས་ཅད་ཀྱི་དེ་བཞིན་ཉིད་ཇི་ལྟ་བ་དེ་བཞིན་དུ་ཆུད་ཅིང་གཞན་ལ་སྟོན་ནུས་པས་བྱང་སེམས་དང་།  སྦྱིན་པ་དང་།  ཤེས་རབ་དང་།  བརྩོན་འགྲུས་བཞི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་སོ། །དེས་སྤྱིར་འདོད་ཁམས་ཀྱི་ལྷ།  བྱེ་བྲག་ཏུ་ཡུལ་སུམ་ཅུ་རྩ་གསུམ་གྱི་ལྷ་རྣམས་དེ་བཞིན་གཤེགས་པའི་ཞལ་མཐོང་བསླབ་པའི་གཞི་བཟུང་།  དཀོན་མཆོག་གསུམ་ལ་སྐྱབས་སུ་སོང་།  ཕྱིར་མི་ལྡོག་པས་ན་རྒྱུ་དང་
འབྲས་བུས་བསྡུས་པའི་ངན་སོང་ཐམས་ཅད་ཡོངས་སུ་སྦྱོང་བའོ། །མཛོད་སྤུའི་འོད་ཟེར་གྱིས་ངན་སོང་ཐམས་ཅད་ཟིལ་གྱིས་གནོན་པས་ན་གཟི་བརྗིད་ཀྱི་རྒྱལ་པོ།  བརྟག་པ་ནི་ཆོ་ག་ཞིབ་མོའོ་ཞེས་བཞེད་དོ། །འབྲུ་འགྲེལ་ལས་ནི།  དེ་
བཞིན་གཤེགས་པ་ནི་མེ་ལོང་ལྟ་བུའི་ཡེ་ཤེས་ཏེ་ཆོས་ཀྱི་སྐུའོ། །དགྲ་བཅོམ་པ་ནི་མཉམ་པ་ཉིད་ཀྱི་ཡེ་ཤེས།  ཡང་དག་པར་རྫོགས་པ་ནི་སོ་སོར་རྟོག་པའི་ཡེ་ཤེས་ཏེ་དེ་གཉིས་ནི་ལོངས་སྐུ།  སངས་རྒྱས་ནི་བྱ་བ་ནན་ཏན་གྱི་ཡེ་ཤེས་ཏེ་
སྤྲུལ་སྐུའོ། །སྐུ་གསུམ་པོ་དེའི་ཕྲིན་ལས་ནི།  རྒྱུ་ངན་པ་ལས་དང་ཉོན་མོངས་པའི་དབང་གིས་འབྲས་བུ་ཁམས་གསུམ་དུ་སོང་བས་ན་ངན་སོང་སྟེ།  འཁོར་བ་ཐམས་ཅད་ཡོངས་སུ་སྦྱོང་བའོ། །ཇི་ལྟར་ན་རྒྱུ་ཏིང་ངེ་འཛིན་གྱིས་ལས་ཉོན་དང་།  
འབྲས་བུ་འོད་ཟེར་གྱིས་སྡུག་བསྔལ་སྦྱོང་བས་ན་གཟི་བརྗིད་དོ། །རྒྱལ་པོ་དང་བརྟག་པ་ནི་སྔར་དང་འདྲ་བར་གསུངས་སོ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཞེས་པ་ནི་ལོཙྪ་བས་བཀོད་པའི་མཆོད་བརྗོད་དོ། །དེས་ན་མཚན་
10-7-9b


དོན་གྱིས་འོག་ནས་འཆད་པར་འགྱུར་བའི་བརྗོད་བྱ་མཐའ་དག་བསྡུས་པས་ན་དབང་པོ་རྣོན་པོས་མཚན་དོན་ལ་བརྟེན་ནས་ཀྱང་བརྗོད་བྱ་མདོར་བསྡུས་ཏེ་རྟོགས་པར་འགྱུར་རོ། །གཉིས་པ་ལ་བཞི་སྟེ།  གླེང་གཞི་དང་།  གླེང་བསླང་བ་དང་།  རྒྱུད་ཀྱི་
གཞུང་དངོས་དང་།  རྗེས་སུ་ཡི་རང་བའོ། །དང་པོ་ལ་དྲུག །ཆོས་དང་།  སྡུད་པ་པོ་དང་།  དུས་དང་།  སྟོན་པ་དང་།  གནས་ཕུན་སུམ་ཚོགས་པ་དང་།  འཁོར་དང་སྟོན་པའི་ཆེ་བས་བཞུགས་པའོ། །དང་པོ་ནི།  འོག་ནས་འབྱུང་བའི་རྒྱུད་ཀྱི་ཚིག་དོན་
འདི་སྐད་ཅེས་པ་སྟེ།  སྒྲོ་སྐུར་དང་།  དབྲི་བསྣན་མེད་ཅེས་པའི་དོན་ནོ། །གཉིས་པ་ནི།  ཕྱག་ན་རྡོ་རྗེ་བདག་གིས་སངས་རྒྱས་ཤཱཀྱ་ཐུབ་པ་ལས་མངོན་སུམ་དུ་ཐོས་ཀྱི།  གཞན་ལས་བརྒྱུད་པ་མ་ཡིན་ཅེས་པའོ། །ཐོས་པ་ནི་རྣ་བའི་དབང་པོ་སྐྱོན་
མེད་པས་ཐོས་ཀྱི།  སྒོམ་བྱུང་གིས་དོན་མངོན་སུམ་དུ་གྱུར་པ་ནི་མ་ཡིན་པའོ། །གསུམ་པ་ནི།  དུས་གཅིག་ན་ཞེས་པ་སྟེ།  དེ་ལ་སྟོན་པ་སྤྱོད་ལམ་གྱི་དུས།  ཡང་དག་འཇོག་གི་དུས།  སྙོམས་པར་འཇུག་པའི་དུས།  ཆོས་འཆད་པའི་
དུས་དང་བཞི་ལས།  དུས་གཅིག་ཆོས་འཆད་པའི་དུས་སུ་ཐོས་པའོ། །དེ་ཡང་དུས་མཐའི་སྐད་ཅིག་མ་གཅིག་ལ་གསུངས་པར་ནུས་པས་འཆད་བྱེད་སྟོན་པའི་ཆེ་བ།  དེའི་ཚེ་ཕྱག་ན་རྡོ་རྗེས་ཁོང་དུ་ཆུད་པས་སྡུད་བྱེད་འཁོར་གྱི་ཆེ་བ།  དུས་
གཅིག་གི་ཚེ་འདི་ཐོས་ཀྱི་གཞན་དུ་ནི་གཞན་དག་ཀྱང་ཐོས་སོ་ཅེས་པས།  སྡུད་པ་པོ་ཐོས་པ་ཆེ་བ།  དུས་གཅིག་གི་ཚེ་ཆོས་འདི་འབྱུང་གི་གཞན་གྱི་ཚེ་ནི་མི་འབྱུང་ཞེས་པས་བཤད་བྱ་ཆོས་ཀྱི་ཆེ་བ་དང་བཞི་བསྟན་པ་ཡིན་ནོ། །འདི་དག་
10-7-10a


ནི་ཕ་རོལ་ཏུ་ཕྱིན་པའི་ཐེག་པ་དང་ཐུན་མོང་དུ་སྟོན་འཁོར་ཐ་དད་ཀྱི་དབང་དུ་བྱས་པ་ཡིན་གྱི་ཡང་དག་པར་ན་ཕུན་སུམ་ཚོགས་པ་ལྔ་ཀ་ཡང་སྟོན་པ་ཉིད་ཀྱི་ཡེ་ཤེས་ཀྱི་སྣང་བ་ལས་གྲུབ་པ་ཁོ་ན་ཡིན་གྱི་རྒྱུད་ཐ་དད་པ་ནི་ཅུང་
ཟད་ཀྱང་མེད་དོ། །བཞི་པ་ནི་བཅོམ་ལྡན་འདས་ཞེས་པ་སྟེ།  བདུད་བཞི་བཅོམ་ཞིང་དབང་ཕྱུག་གི་ཡོན་ཏན་དྲུག་དང་ལྡན་པས་ན་བཅོམ་ལྡན་ཏེ།  རྡོ་རྗེ་རྩེ་མོ་ལས།  ཉོན་མོངས་ལས་དང་དེ་བཞིན་སྐྱེ། །ཉོན་མོངས་ཤེས་བྱའི་སྒྲིབ་དེ་བཞིན། །
མི་མཐུན་ཕྱོགས་ཀྱི་ཆོས་རྣམས་གང་། །དེ་བཅོམ་པས་ན་བཅོམ་ལྡན་བརྗོད། །ཅེས་དང་།  སཾ་བྷུ་ཊི་ལས།  འདི་ལྟ་སྟེ།  དཔལ་དང་ཕུན་སུམ་ཚོགས་པ་དང་།  གྲགས་པ་དང་།  ཡེ་ཤེས་དང་།  དབང་ཕྱུག་དང་།  གཟུགས་བཟང་བ་དང་།  
བརྩོན་འགྲུས་ཕུན་སུམ་ཚོགས་པ་སྟེ།  ཡོན་ཏན་དྲུག་གི་སྐལ་བ་དང་ལྡན་པའོ། །ཞེས་སོ། །འོ་ན་བཅོམ་ལྡན་འདས་ཀྱི་སྒྲ་བཤད་ལ་བཞི་བཅོམ་དྲུག་ལྡན་ནོར་བར་བཤད་པ་དང་འགལ་ལོ་སྙམ་ན།  དེ་ནི་བཅོམ་པ་དང་ལྡན་པའི་སྐད་
དོད་སོ་སོར་བཤད་པ་དགག་པ་ཡིན་གྱི།  བྷ་ག་ཝཱན་ཞེས་པའི་ཚིག་ཉིད་བཅོམ་པ་དང་ལྡན་པ་གཉིས་ཀ་ལ་འཇུག་པས་བདུད་བཞི་བཅོམ་པས་ན་བྷ་ག་ཝཱན།  དབང་ཕྱུག་གི་ཡོན་ཏན་དྲུག་དང་ལྡན་པས་ན་བྷ་ག་ཝཱན་ཞེས་པའི་སྒྲ་སྐད་
དགག་པ་མ་ཡིན་པས་སྐྱོན་མེད་དོ། །ལྔ་པ་ལ་གནས་དངོས་དང་།  དེའི་ཁྱད་པར་གཉིས་ལས།  དང་པོ་ནི།  རྫུ་འཕྲུལ་ཡོད་ཅིང་རང་འོད་དང་ལྡན་པས་ན་ལྷ།  བསམ་གཏན་གྱི་བདེ་བ་དང་ལྡན་པས་ན་མཆོག་སྟེ་སུམ་ཅུ་རྩ་གསུམ་པ་
10-7-10b


ཐམས་ཅད་ཀྱི་ཚལ་ལོ། །དེ་ཇི་ལྟ་བུ་ཞེ་ན།  གནས་དེ་ན་ཤར་དུ་ཤིང་རྟ་སྣ་ཚོགས་ཀྱི་ཚལ།  ལྷོ་ན་རྩུབ་འགྱུར་གྱི་ཚལ།  ནུབ་ན་འདྲེས་པའི་ཚལ།  བྱང་ན་དགའ་བའི་ཚལ་དང་བཞི་ཡོད་པ་ལས་ཕྱི་མའོ། །དེ་ཉིད་ལྷ་རྣམས་ཀྱི་བསོད་ནམས་
ལས་གྲུབ་པའམ།  སངས་རྒྱས་ཀྱི་ཡེ་ཤེས་ཉིད་དེར་སྣང་བས་ན་ཡིད་དུ་འོང་བའོ། །ན་ཞེས་པ་ནི་ཚིག་ཕྲད་དོ། །གཉིས་པ་ལ་ལྔ་སྟེ།  མེ་ཏོག་ལ་སོགས་པའི་ཁྱད་པར།  རྒྱན་གྱི་ཁྱད་པར།  སྒྲའི་ཁྱད་པར།  རྩེ་བའི་ཁྱད་པར།  བྱིན་རླབས་ཀྱི་ཁྱད་
པར་རོ། །དང་པོ་ནི།  ནོར་བུ་དང་ཞེས་སོགས་ཏེ།  མེ་ཏོག་འདི་དག་ནི་མི་ཡུལ་ན་མེད་ཅིང་སུམ་ཅུ་རྩ་གསུམ་ན་ཡོད་པ་རྣམས་སོ། །གཉིས་པ་ནི།  དཔག་བསམ་གྱི་ཤིང་རྣམས་ཀྱིས་མཛེས་པར་བྱས་ཤིང་གཞལ་ཡས་ཁང་གི་རྒྱན་སྣ་ཚོགས་
ཀྱིས་བརྒྱན་པའོ། །གསུམ་པ་ནི།  དཀོན་མཆོག་བརྩེགས་པ་ནས་བཤད་པ་ལྟ་བུའི་བྱ་མང་པོ་སྣ་ཚོགས་ཞེས་སོགས་ཏེ།  ཀ་རེ་ཀོ་ནི་འཁར་རྔའོ། །བཞི་པ་ནི།  བརྒྱ་བྱིན་དང་ཞེས་སོགས་ཏེ།  བརྒྱ་བྱིན་མིག་བརྒྱ་དང་ལྡན་པའམ།  ཡབ་
རྒྱལ་པོ་གྷ་ན་པ་ཏིས་ལོངས་སྤྱོད་ཀྱི་རྒྱན་དུ་ནོར་བུ་ཏི་ལ་ཀ་ཁལ་བརྒྱ་དུས་གཅིག་ལ་སྦྱིན་པ་བཏང་བས་ན་བརྒྱ་བྱིན་ནོ། །ཚངས་པ་ནི་ཚད་མེད་བཞིའི་རྣམ་སྨིན་གྱིས་འབྲས་བུའི་གཟུགས་ཁམས་སུ་སྐྱེས་པས་ནའོ། །ལྔ་པ་ནི།  སངས་
རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་པ་ན་ཞེས་པའོ། །དྲུག་པ་ལ་གཉིས་ཏེ།  འཁོར་གྱི་ཆེ་བ་དང་སྟོན་པའི་ཆེ་བས་བཞུགས་པའོ། །དང་པོ་ལ་གཉིས་ཏེ།  འཇིག་རྟེན་དང་།  འཇིག་རྟེན་ལས་འདས་
10-7-11a


པའོ། །དང་པོ་ནི།  བརྒྱ་བྱིན་དང་།  ཞེས་སོགས་ཏེ།  བརྒྱ་བྱིན་ནི་སུམ་ཅུ་རྩ་གསུམ་པའི་གཙོ་བོ།  ཚངས་པ་ནི་གཟུགས་ཁམས་པའི་གཙོ་བོ།  རིག་འཛིན་ནི་རྟེན་མིའི་ལུས་ལ་བསམ་གཏན་གྱི་ཏིང་ངེ་འཛིན་
སྐྱེས་པ་འཇིག་རྟེན་པའི་རིག་འཛིན་དང་།  རྟེན་ལྷའི་ལུས་ལ་བསམ་གཏན་གྱི་ཏིང་ངེ་འཛིན་སྐྱེས་པས་ཚེ་བསྐལ་པར་ཐུབ།  སྤྲུལ་སྐུའི་ཞིང་ཁམས་སུ་འགྲོ་ནུས།  ཅི་བསམས་པ་ནམ་མཁའ་ལས་འབྱུང་ཞིང་ནམ་མཁའ་མཛོད་ལ་
མངའ་བརྙེས་པ་ནི་འཇིག་རྟེན་ལས་འདས་པའི་རིག་འཛིན་ནོ། །ལྷའི་བུ་བུ་མོ་འཁོར་བྱེ་བ་ཁྲག་ཁྲིག་བརྒྱ་སྟོང་དུ་མ་ནི་བྱེ་བ་ནི་བགྲངས་པའི་གྲངས་ཀྱི་གནས་གཞན་བརྒྱད་པའོ། །གནོད་སྦྱིན་ནི་གང་བ་བཟང་པོ་ལ་སོགས་པའོ། །
སྲིན་པོ་ནི་ལང་ཀ་མགྲིན་བཅུའོ། །ལྷ་མ་ཡིན་ནི་ཐགས་ཟངས་རིས་ལ་སོགས་པའོ། །དྲི་ཟ་ནི་ཟུར་ཕུད་ལྔ་པ་ལ་སོགས་པའོ། །མིའམ་ཅི་ནི་ལྗོན་པ་རྟ་མགོ་ཅན་ལ་སོགས་པའོ། །ལྟོ་འཕྱེ་ཆེན་པོ་ནི་སྦྲུལ་མགོ་བདུན་པའོ། །ཀླུ་ནི་དགའ་བོ་
ལ་སོགས་པ་སྟེ།  སོགས་ཀྱི་སྒྲས་བསྡུས་པ་ནི་གྲུལ་བུམ་གསུས་པོ་ཆེ་ལ་སོགས་པའོ། །དེ་ལྟར་འཇིག་རྟེན་པའི་ཚུལ་འཛིན་པའི་འཁོར་དུ་མ་དང་བཅས་པ་ནི་བགྲང་དུ་མི་ལང་བའོ། །གཉིས་པ་ནི།  བྱང་ཆུབ་སེམས་དཔའ་ཞེས་སོགས་
ཏེ།  དངོས་སུ་སྨོས་པའི་བྱང་སེམས་དགུ་པོ།  རྩ་སྐྱ་པས་ཕྱག་ན་རྡོ་རྗེ།  འཇམ་དཔལ།  ནམ་མཁའི་སྙིང་པོ།  འཇིག་རྟེན་དབང་ཕྱུག །ནམ་མཁའ་མཛོད།  འཁོར་ལོས་སྒྱུར་བ།  རྡོ་རྗེ་ཁུ་ཚུར།  རྡོ་རྗེ་གནོད་སྦྱིན།  རྡོ་རྗེ་ལས་
10-7-11b


རྣམས་ལ་སྦྱོར་བར་མཛད་ཅིང་།  རྗེ་བཙུན་གྱིས་འདི་རྣམས་ལ་འདི་ཡིན་བྱ་བ་མེད་པས་དེ་དག་ལ་སྦྱོར་བ་མི་འཐད་གསུང་།  ཁ་ཅིག་ཕྱོགས་བཅུའི་སངས་རྒྱས་ཀྱི་རང་བཞིན་ཡིན་པར་ཡང་འདོད།  ཕྱིར་མི་ལྡོག་པ་ནི་ས་དང་པོའི་བྱང་
སེམས་སྔགས་ཐོབ་པའི་བྱིན་རླབས་ཀྱིས་ཕྱིར་མི་ལྡོག །ས་བརྒྱད་པའི་བྱང་སེམས་སྒྲིབ་པ་མེད་པའི་གནས་ཐོབ་པས་ཕྱིར་མི་ལྡོག་སྟེ།  དེ་ལྟ་བུའི་དགེ་འདུན་གྲངས་ཀྱི་མཐར་ཐུག་པ་མེད་པ་རྣམས་ཀྱིས་བསྟི་སྟང་སྟེ་བསྙེན་བཀུར་དུ་བྱེད།  
སྟོན་པ་ཤཱཀྱ་ཐུབ་པ་ལ་བླ་མར་བྱེད།  མེ་ཏོག་ལ་སོགས་པས་མཆོད་ཅིང་བརྗོད།  རང་ལ་ཡང་ཞེན་པ་མེད་པས་རབ་ཏུ་མཆོད་ཅིང་སངས་རྒྱས་ཀྱི་ཡོན་ཏན་སྤེལ་ཏེ།  དེ་ལྟ་བུའི་འཁོར་མང་པོའི་དབུས་ན་བཞུགས་ཅེས་པའོ། །གཉིས་པ་སྟོན་
པའི་ཆེ་བས་བཞུགས་པ་ནི།  སུ་ཞིག་བཞུགས་ན།  ཚད་མེད་པ་བཞི་དང་ལྡན་པས་ན་ཚངས་པ།  ཆོས་དབྱིངས་རྟོགས་པའི་དོན་གྱིས་ཆེན་པོ་སྟེ།  སངས་རྒྱས་ཤཱཀྱ་ཐུབ་པ་ཉིད་འཁོར་བའི་ཉེས་པས་མ་གོས་པ་མཚོན་པས་པདྨའི་གདན་ལ་
བཞུགས་པའོ། །འདིར་ཚངས་པ་ཆེན་པོ་སངས་རྒྱས་ཀྱི་མིང་གི་རྣམ་གྲངས་ཡིན་པའི་དོན་མ་རྟོགས་པར།  ཚངས་པ་ཆེན་པོ་ཡིན་ན་ཞལ་བཞི་ཡོད་དགོས་ཞེས་སྨྲ་བ་ནི་རྒྱུད་འགོག་པ་སྟེ།  སྟོན་པ་ཤཱཀྱ་ཐུབ་པ་པདྨའི་གདན་ལ་
བཞུགས་པ་ལ་ཚངས་པ་ཆེན་པོ་པདྨའི་གདན་ལ་བཞུགས་པར་གསུངས་པའི་ཕྱིར་རོ། །གཉིས་པ་གླེང་བསླང་བ་ལ་གཉིས་ཏེ།  སྟོན་པས་གླེང་བསླང་བ་དང་།  འཁོར་གྱིས་གླེང་བསླང་བའོ། །དང་པོ་ལ་དྲུག་སྟེ།  རྒྱུ་ཏིང་ངེ་
10-7-12a


འཛིན་ལ་སྙོམས་པར་ཞུགས་པ་དང་།  ཐབས་འོད་ཟེར་གྱི་སྤྲོ་བསྡུ་དང་།  འབྲས་བུ་ངན་སོང་ལས་གྲོལ་བར་བསྟན་པ་དང་།  མཆོད་པ་སྔོན་དུ་སོང་བས་ཆེད་དུ་བརྗོད་པ་དང་།  བརྒྱ་བྱིན་ལ་སོགས་པས་ངོ་མཚར་བར་བསྟན་
པ་དང་།  བཅོམ་ལྡན་འདས་ཀྱི་ངོ་མ༷ཚར་བར་བསྟན་པའོ། །དང་པོ་ནི།  དེ་ནས་སྟོན་པས་ངན་སོང་གི་རྒྱུད་དེ་རྒྱུ་དང་འབྲས་བུས་བསྡུས་པའི་སྡུག་བསྔལ་དང་འབྲེལ་བའི་ཤེས་པ་སྦྲེང་ཆགས་ཐམས་ཅད་ཡོངས་སུ་སྦྱོང་བ་ཞེས་བྱ་བའི་ཏིང་ངེ་འཛིན་
ལ་སྙོམས་པར་ཞུགས་སོ། །གཉིས་པ་ནི།  དེ་ལྟར་སྙོམས་པར་ཞུགས་ནས་ཏིང་ངེ་འཛིན་གྱི་མིང་ངན་སོང་གསུམ་གྱི་རྒྱུད་ལས་རྣམ་པར་གྲོལ་བ་ཞེས་སོགས་ཏེ།  གཞན་རྣམས་ནི་གོ་སླ་ལ།  བྱང་ཆུབ་སེམས་དཔའ་དང་།  སེམས་དཔའ་ཆེན་པོ་
ནི།  སྙིང་རྗེ་ཆེན་པོ་དང་།  ཤེས་རབ་ཆེན་པོའོ། །གསུམ་པ་ནི།  ཀུན་དུ་སྣང་བར་བྱས་པས་དེ་སེམས་ཅན་ཐམས་ཅད་ཀྱི་སེམས་འདོད་ཆགས་ལ་སོགས་པའི་ཉོན་མོངས་པས་བྱས་པའི་འཆིང་བ་ལས་རྣམ་པར་གྲོལ།  ལུས་སེམས་ཀྱི་བདེ་བ་
སོ་སོར་ཐོབ་ནས་སྟོན་པའི་བཞུགས་གནས་དགའ་བའི་ཚལ་ཐམས་ཅད་ཀུན་ཏུ་གང་བར་བྱས་ཏེའོ། །བཞི་པ་ནི།  མཆོད་པའི་སྤྲིན་ཞེས་སོགས་ཏེ།  ནོར་བུ་དྲི་མ་མེད་པ་ནི་ཐུགས་ཡེ་ཤེས་ས་གཞིར་སྣང་བ་སྟེ།  འཇམ་དཔལ་རྩ་རྒྱུད་ལས།  
སེམས་ཉིད་ནོར་བུ་རིན་པོ་ཆེ། །ཇི་ལྟར་དམིགས་ཤིང་བསམ་པར་སྣང་། །འགྲོ་བའི་སེམས་རྒྱུད་གཉིས་མི་འཆད། །དེ་ནི་ཡེ་ཤེས་ཀུན་གྱི་གཞི། །ཞེས་སོ། །ཨེ་མ་ཧོ་ངོ་མཚར་བ།  སངས་རྒྱས་གསུམ་ནི་ཆོས་སྐུ།  ལོངས་སྐུ།  སྤྲུལ་སྐུ་གསུམ་
10-7-12b


ཡིན་ལ།  དེ་དག་གི་མཛད་པ་ལེགས་པ་ནི།  གང་གི་ཕྱིར་ན་རྒྱུ་དང་འབྲས་བུས་བསྡུས་པའི་ངན་སོང་ལས་བདག་ཅག་རྣམས་སྨིན་མཚམས་ཀྱི་མཛོད་སྤུའི་འོད་ཟེར་གྱིས་སྦྱངས་ནས་ཆོས་ཉན་པའི་སྐལ་བ་ཅན་དུ་བྱས་པས་བྱང་ཆུབ་སྤྱོད་པ་ཉིད་ལ་བཀོད་
པའི་ཕྱིར་རོ། །འདི་དག་གིས་སྔོན་བྱུང་ལ་བཅོམ་ལྡན་འདས་ཀྱི་སྨིན་མཚམས་ཀྱི་མཛོད་སྤུའི་འོད་ཟེར་གྱི་སྤྲོ་བསྡུས་ངན་སོང་སྦྱངས་ནས་དེ་དག་གིས་ཆེད་བརྗོད་བྱས་པར་བསྟན་ལ།  རྗེས་འཇུག་ལ་བདག་བསྐྱེད་ཀྱི་གཙོ་བོའི་ང་རྒྱལ་གྱིས་ཏིང་ངེ་འཛིན་
ལ་འཇུག་དགོས་པར་སྟོན་ནོ། །ལྔ་པ་ནི།  དེ་ནས་ལྷའི་དབང་པོ་ཞེས་སོགས་ཏེ་གོ་སླའོ། །དྲུག་པ་ནི།  བཅོམ་ལྡན་འདས་ཀྱིས་བཀའ་སྩལ་པ།  ལྷའི་དབང་པོ་ཞེས་བོས་ནས་འདི་ནི་ངོ་མཚར་ཆེ༷་སྟེ།  དེའི་རྒྱུ་མཚན།  སངས་རྒྱས་བཅོམ་ལྡན་
འདས་རྣམས་ནི་རྒྱུའི་དུས་ན།  ཚད་མེད་གྲངས་མེད་པའི་བསོད་ནམས་ཀྱི་ཚོགས་ཕར་ཕྱིན་དྲུག་གིས་བསྡུས་པ་ཡང་དག་པར་བསགས་པའོ། །འབྲས་བུའི་དུས་ན་རེ་འདོད་ཐམས་ཅད་སྐོང་བར་བྱེད་པས་ཡོན་ཏན་རིན་པོ་ཆེའི་འབྱུང་ཁུངས་སུ་
གྱུར་པའོ། །རྒྱུའི་དུས་སུ་ཤེས་རབ་ཆེན་པོའི་སྒོ་ནས་ཚད་མེད་པའི་ཐབས་ཡང་དག་པར་རྫོགས་པའོ། །ཐོས་བསམ་སྒོམ་གསུམ་གྱི་ཤེས་རབ་ཚད་མེད་པ་བསགས་པའོ། །སྐུ་གསུང་ཐུགས་ཀྱི་སྤྱོད་པ་ནི་ཚད་མེད་པའོ། །འབྲས་བུའི་དུས་སུ་
གདུལ་བྱའི་སྐྱེ་བོ་ཚད་མེད་པ་རྣམས་གསང་སྔགས་སྤྱོད་པའི་སྣོད་དུ་གྱུར་པར་མཛད་པའོ། །མི་མཉམ་པ་ནི།  སོ་སོ་སྐྱེ་བོ།  ཕྱི་རོལ་པ།  ཉན་རང་།  བྱང་སེམས་རྣམས་དང་མི་མཉམ་པ་ཡིན་ལ།  མཉམ་པ་ནི་དུས་གསུམ་གྱི་སངས་རྒྱས་ཀུན་དང་
10-7-13a


ཆོས་དབྱིངས་མཉམ་པར་རྟོགས་པའོ། །དེ་ལྟ་བུའི་ཡེ་ཤེས་ནི་རྡོ་རྗེ་རྩེ་མོ་ལས།  ཡེ་ནས་ཤེས་པས་ཡེ་ཤེས་ཏེ། །སླར་ཡང་ཆོས་སུ་རྟོགས་པ་མིན། །རྟག་དང་ཆད་པ་སྤོང་བྱེད་པ། །འཆི་མེད་དེ་ལ་ཡེ་ཤེས་བརྗོད། །ཅེས་པ་
ལྟར་རོ། །རྫུ་འཕྲུལ་ནི་ལུས་ཀྱི་མཐུའོ། །སྨོན་ལམ་གྱི་སྟོབས་ནི་འབད་རྩོལ་ལ་མི་ལྟོས་པས་སྨོན་ལམ་མོ། །རྒྱུ་མཚན་དགུ་པོ་དེ་ལྟ་བས་ན་སངས་རྒྱས་བཅོམ་ལྡན་འདས་རྣམས་ནི་སྐུའི་སྒོ་ནས་སྣོད་ཇི་ལྟ་བ་བཞིན་དུ།  གསུང་གི་སྒོ་ནས་ཇི་ལྟར་འདུལ་
བ་བཞིན་དུ་དང་།  ཐུགས་ཀྱི་སྒོ་ནས་མོས་པ་ཇི་ལྟ་བ་བཞིན་དུ་སེམས་ཅན་གྱི་དོན་མཛད་པ་ཡིན་པར་ཤེས་པར་བྱས་ཏེ་འདི་ལ་ཞེས་སོགས་སོ། །གཉིས་པ་འཁོར་གྱིས་གླེང་བསླང་བ་ལ་བརྒྱད་དེ།  བརྒྱ་བྱིན་གྱིས་སྟོན་པ་ལ་སྤོབས་པ་བསྐྱེད་ཅིག་པར་གསོལ་
བ་གདབ་པ་དང་།  ནོར་བུ་དྲི་མ་མེད་པ་གང་དུ་སྐྱེས་པར་ལུང་བསྟན་པར་གསོལ་ཞེས་ཞུས་པ་དང་།  བཅོམ་ལྡན་འདས་ཀྱིས་དུས་ལ་བབ་ན་ཉོན་ཅིག་པར་གདམས་པ་བསྟན་པས་བརྒྱ་བྱིན་གྱིས་དུས་ལ་བབ་པར་ཁས་བླངས་པ་དང་།  དྲི་མ་མེད་
པའི་སྐྱེ་རྒྱུད་བསྟན་པ་དང་།  བརྒྱ་བྱིན་ལ་སོགས་པ་སྐྱོ་བ་སྐྱེས་ཏེ་འགྱེལ་བ་དང་།  བཅོམ་ལྡན་འདས་ལ་ནོར་བུ་དྲི་མ་མེད་པ་སྡུག་བསྔལ་ལས་ཐར་པའི་ཐབས་ཞུས་པ་དང་།  བཅོམ་ལྡན་འདས་ཀྱིས་ཉོན་ཅིག་པར་བསྟན་པ་དང་།  ཞུས་པ་དངོས་
སོ། །དང་པོ་ནི།  དེ་ནས་ལྷ་རྣམས་ཀྱི་དབང་པོ་བརྒྱ་བྱིན་རང་གི་སྟན་ལས་ལངས་ཏེ་ཞེས་སོགས་ཏེ།  སྤྱིར་རིགས་དྲུག་གིས་བསྡུས་པའི་སེམས་ཅན་ཐམས་ཅད་ལ་བདེ་བ་དང་བདེ་བའི་རྒྱུ་དང་འཕྲད་པར་འདོད་པའི་ཕན་པ་ཉིད་དུ་བགྱི་བ་དང་།  
10-7-13b


དུད་འགྲོ་ལ་སྡུག་བསྔལ་དང་བྲལ་བར་འདོད་པའི་སྙིང་བརྩེ་བ་ཉིད་དུ་བགྱི་བ་དང་།  ཡི་དྭགས་ལ་སྙིང་རྗེ་ཅན་ཉིད་དུ་བགྱི་བ་དང་།  དམྱལ་བ་ལ་སྙིང་བརྩེ་བ་ཅན་ཆེན་པོ་ཉིད་དུ་བགྱི་བ་དང་།  ཐུན་མོང་དུ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་བདེ་བ་དང་ཡིད་
བདེ་བས་བསྡུས་པའི་བསམ་པ་ཐམས་ཅད་ཞེས་སོགས་ཏེ།  བདག་སྤོབས་པ་བསྐྱེད་པ་ནི་བློ་ཆེན་པོ་དང་ལྡན་པར་བྱིན་གྱིས་རློབས་ཤིག་པའི་དོན་ནོ། །གཉིས་པ་ནི།  བཅོམ་ལྡན་འདས་སུམ་ཅུ་རྩ་གསུམ་པའི་ལྷའི་རིས་འདི་ཉིད་ནས་ཞེས་སོགས་སོ། །
གསུམ་པ་ནི།  བཀའ་སྩལ་པ་ལྷའི་དབང་པོ་ཅི་སྟེ་ཞེས་སོགས་སོ། །བཞི་པ་ནི།  བཀའ་སྩལ་པ།  ལྷའི་དབང་པོ་ལྷའི་བུ་ནོར་བུ་དྲི་མ་མེད་པའི་འོད་ཞེས་སོགས་སོ། །ལྔ་པ་ནི།  དེ་ནས་བརྒྱ་བྱིན་ལ་སོགས་པ་ལྷའི་བུ་ཐམས་ཅད་ཀྱིས་ཐོས་
ནས་ཞེས་སོགས་སོ། །དྲུག་པ་ནི།  དེ་ནས་ཡང་ལངས་ནས་ཞེས་སོགས་སོ། །བདུན་པ་ནི།  བཅོམ་ལྡན་འདས་ཀྱིས་བཀའ་སྩལ་པ།  ལྷའི་དབང་པོ་སངས་རྒྱས་ཞེས་སོགས་སོ། །བརྒྱད་པ་ལ་གཉིས་ཏེ།  བརྒྱ་བྱིན་གྱིས་ཞུས་པ་དང་།  ཚངས་
པ་ལ་སོགས་པས་ཞུས་པའོ། །དང་པོ་ནི།  དེ་ནས་ལྷའི་དབང་པོ་བརྒྱ་བྱིན་གྱིས་ཡང་བཅོམ་ལྡན་འདས་ལ་ཞེས་སོགས་སོ། །གཉིས་པ་ནི།  དེ་ནས་ཚངས་པ་ལ་སོགས་ཞེས་སོགས་སོ། །གསུམ་པ་རྒྱུད་ཀྱི་གཞུང་དངོས་ལ་གཉིས་ཏེ།  སྟོན་པས་
འཁོར་བྱིན་གྱིས་བརླབ་པ་དང་།  རྒྱུད་དངོས་སོ། །དང་པོ་ནི།  གསོལ་བ་བཏབ་པའི་རྗེས་དེ་ནས་བཅོམ་ལྡན་འདས་ཀྱིས་བརྒྱ་བྱིན་དང་ཚངས་པ་ལ་སོགས་པ་འཁོར་དུ་འདུས་པའི་ལྷའི་བུ་དེ་དག །དེ་བཞིན་གཤེགས་པ་ཐམས་ཅད་ཀྱི་ཐུགས་
10-7-14a


བསྐུལ་བའི་དོན་གྱིས་སྙིང་པོ་འདིས་འཁོར་རྣམས་སྣོད་རུང་དུ་བྱིན་གྱིས་བརླབ་པར་བྱ་བའི་ཕྱིར།  འབྲས་བུའི་སྐལ་བ་ཅན་དུ་བྱེད་པས་ན་དོན་ཡོད་པ།  སྟོང་ཉིད་རྡོ་རྗེས་བྱིན་གྱིས་བརླབ་པ་ཞེས་བྱ་བའི་ཏིང་ངེ་འཛིན་ལ་སྙོམས་
པར་ཞུགས་སོ། །དེ་ནས་ཡང་སྔགས་འདི་ཕྱུང་ནས་ལྷ་དེ་དག་སྔགས་ཀྱི་དམ་ཚིག་ཅན་དུ་བྱིན་གྱིས་བརླབས་སོ། །ཨོཾ་ནི་བཀྲ་ཤིས་པ་སྟེ།  རྩེ་མོ་ལས།  ཡི་གེ་ཨོཾ་ནི་ཅི་ཡིན་བརྗོད། །མཆོག་དང་ནོར་གཏེར་དཔལ་དང་གཡང་། །སྐལ་བཟང་རྣམ་པ་དང་
ལྡན་ཞིང་། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྙིང་པོ་ཡིན། །ཞེས་སོགས་སོ། །ཨ་དྷི་ནི་བདག་པོའོ། །ཏིཥྛ་ནི་བྱིན་རླབས།  ཛྙཱ་ན་ཡེ་ཤེས།  ས་མ་ཡ་ནི་དམ་ཚིག། ཧཱུྃ་ནི་ཡེ་ཤེས་ལྔ་བསྡུས་པའོ། །དེ་ལྟར་ཏིང་ངེ་འཛིན་ལ་སྙོམས་
པར་ཞུགས་ནས་ཀྱང་།  གདོན་མི་ཟ་བར་སྟེ་ངེས་པར་ཚད་མེད་པའི་དོན་གྱིས་ན་མི་ཆོམས་པས་རྡོ་རྗེས་བྱིན་གྱིས་རླབས་ཀྱིས་བརྒྱ་བྱིན་ལ་སོགས་པ་བྱིན་གྱིས་བརླབས་ཞེས་པའོ། །འདི་དག་གི་དོན་ནི།  སྔོན་བྱུང་བ་སྟོན་པས་འཁོར་རྣམས་ཡེ་ཤེས་
ཀྱི་དཀྱིལ་འཁོར་དུ་བཅུག་སྟེ།  རྒྱུད་ཉན་པའི་སྐལ་བ་ཅན་དུ་མཛད་པ་ཡིན་ལ།  རྗེས་འཇུག་གི་གདུལ་བྱས་རྒྱུད་ཉན་པ་ལ་དབང་བསྐུར་སྔོན་དུ་འགྲོ་དགོས་པར་བསྟན་ཅིང་ཆོ་ག་ཉམས་སུ་ལེན་པ་ན།  ཚེ་ལྡན་དང་ཚེ་འདས་ལ་སྔགས་འདིས་བྱིན་
གྱིས་བརླབ་དགོས་པར་བསྟན་ནོ། །གཉིས་པ་ལ་གཉིས་ཏེ།  ཤཱཀྱ་ཐུབ་པས་གསུངས་པའི་ཀུན་རིག་རྩ་བའི་དཀྱིལ་འཁོར་དང་།  ཕྱག་ན་རྡོ་རྗེའི་ཞལ་ནས་གསུངས་པའི་བརྟག་པ་ཕྱི་མའོ། །དང་པོ་ལ་དྲུག་སྟེ།  སྔགས་ཀྱི་ཕྲེང་བ་ཕན་ཡོན་དང་
10-7-14b


བཅས་པ་བསྟན་པ་དང་།  ནང་གི་དཀྱིལ་འཁོར་སྔོན་དུ་འགྲོ་བས་རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་དང་།  རས་བྲིས་ལ་བརྟེན་པའི་དངོས་གྲུབ་དང་།  ངན་སོང་གི་སྡིག་པ་སྦྱོང་བའི་ཐབས་ཀྱི་བྱེ་བྲག་རྣམས་བསྟན་པ་དང་།  ནོར་བུ་དྲི་མ་
མེད་པ་ངན་སོང་ལས་ཐོན་པ་ཕན་ཡོན་དང་བཅས་ཏེ་བསྟན་པ་དང་།  རྒྱུད་ཀྱི་ཆེ་བ་བསྟན་པའོ། །དང་པོ་ལ་གཉིས།  སྔགས་ཀྱི་ཕྲེང་བ་དངོས་དང་།  ཕན་ཡོན་ནོ། །དང་པོ་ནི།  ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ཞེས་སོགས་ཏེ།  སྔོན་
བྱུང་ལས།  སྔགས་འདི་དག་སྟོན་པའི་ཐུགས་ཁ་ནས་ཕྱུང་བ་ཕན་ཡོན་དང་བཅས་པ་བསྟན་ལ།  རྗེས་འཇུག་ལ།  སྔོན་དུ་བསྙེན་པའི་ཆོ་ག་ཉམས་སུ་ལེན་པ་བསྟན་ཏེ།  དེ་ལ་ཡང་དཔའ་བོ་གཅིག་པའི་བསྙེན་པ་དང་།  དཀྱིལ་འཁོར་ཡོངས་
རྫོགས་ཀྱི་བསྙེན་པ་གཉིས་ལས།  ཕྱི་མ་བསྟན་ནོ། །ཇི་ལྟར་ན།  ཨོཾ་ཤ་ཅེས་པས་སྣོད་བཅུད་སྟོང་ཉིད་དུ་སྦྱང་པ་བསྟན་ལ།  ཨོཾ་བྷ་ཞེས་པས་འབྱུང་བ་རིམ་བརྩེགས་བསྒོམ་པ་བསྟན་ཅིང་།  ཤུགས་ལས་གཞལ་ཡས་ཁང་གདན་བཅས་བསྒོམ་
པ་ཡང་བསྟན་ནོ། །དེ་ནས་རིགས་ལྔའི་སྔགས་དང་པོས་ནི་ཟློས་སྔགས་དང་།  རིགས་ལྔའི་སྔགས་གཉིས་པས་ནི་བསྐྱེད་སྔགས་དང་།  རིགས་ལྔའི་སྔགས་གསུམ་པས་ནི་བུམ་པ་ལ་བཟློས་སྔགས་བསྟན།  རྩ་རིག་ནི་ཐུན་མོང་གི་བཟློས་
སྔགས་དང་།  སྔགས་དངོས་སུ་མ་བསྟན་པ་རྣམས་ཀྱི་བསྐྱེད་སྔགས་བསྟན་ནོ། །ཡང་རོ་ཆས་སུ་གཞུག་པའི་ཚེ།  གནས་རྣམས་ལ་གདགས་པའི་ཡི་གེ་ཡང་བསྟན་ནོ། །དེ་ལ་རིགས་ལྔ་སོ་སོ་དང་།  གནས་སོ་སོ་ལ་སྦྱོར་ཚུལ་བསྟན་པ་ནི་
10-7-15a


རིགས་ལྔའི་སྔགས་ཚན་དང་པོས་ནི་རིམ་པ་ལྟར་རྣམ་སྣང་དང་མཛོད་སྤུ།  རྒྱལ་མཆོག་རིན་ཆེན་དང་རྣ་བ་གཡས།  ཤཱཀྱ་རིག་དབང་དང་རྣ་བ་གཡོན།  མེ་ཏོག་ཆེར་རྒྱས་དང་གཙུག་ཕུད།  སྦྱོང་རྒྱལ་དང་དཔུང་པ་གཡས་
རྣམས་སོ། །དེ་ནས་རྩ་རིག་ནི་ལྷ་ཐམས་ཅད་ཀྱི་ཐུན་མོང་དང་སྙིང་ཁའོ། །རིགས་ལྔའི་སྔགས་ཚན་གཉིས་པ་ནི་རིམ་པ་བཞིན་ཀུན་རིག་དང་སྣ་གོང་།  སྦྱོང་རྒྱལ་དང་རྐེད་པ།  རྒྱལ་མཆོག་རིན་ཆེན་དང་པུས་མོ་གཡས།  ཤཱཀྱ་རིག་དབང་དང་པུས་
མོ་གཡོན།  མེ་ཏོག་ཆེར་རྒྱས་དང་བོལ་གོང་གཡས་རྣམས་བསྟན་ནོ། །རིགས་ལྔའི་སྔགས་ཚན་གསུམ་པས་ནི་རིམ་པ་བཞིན།  ཀུན་རིག་དང་བོལ་གོང་གཡོན།  ཤཱཀྱ་རིག་དབང་དང་ལོང་བུ་གཡས།  རིན་ཆེན་མེ་ཏོག་དང་ལོང་བུ་གཡོན།  སྦྱོང་
རྒྱལ་དང་སྣའི་རྩེ་མོ།  མེ་ཏོག་ཆེར་རྒྱས་དང་མིག་གཡས་རྣམས་བསྟན་ནོ། །ཨོཾ་ཤ་ནི་མིག་གཡོན།  ཨོཾ་བྷ་ནི་གསང་གནས་སོ། །སྔགས་དོན་གཞན་རྣམས་ནི་གོ་སླ་ལ།  ཤོ་དྷ་ནི་གཉིས་ནི་སྦྱོང་བ་གཉིས།  སརྦ་པཱ་པཾ་ནི་སྡིག་པ་ཐམས་ཅད།  བི་ཤོ་དྷ་ནི་
རྣམ་པར་སྦྱོང་བ།  ཤུདྡྷེ་དག་པ།  བི་ཤུདྡྷེ་རྣམ་པར་དག་པ།  སརྦ་ཀརྨཱ་ཨཱ་ཝ་ར་ཎ་ནི་ལས་ཀྱི་སྒྲིབ་པ་ཐམས་ཅད།  བི་ཤུདྡྷེ་རྣམ་པར་དག་པ།  སྭཱ་ཧཱ་ནི་གཞི་ཚུགས་པའོ། །སརྦ་ཨ་བྷ་ཡ་ནི་སྒྲིབ་པ་ཐམས་ཅད།  སརྦ་སཏྭ་སེམས་ཅན་ཐམས་
ཅད།  བི་ཤོ་དྷ་ནི་ཧ་ན་ནི་རྣམ་པར་དག་ཅིང་བསྣུན་པའོ། །ཧཱུྃ་དང་།  ཕཊ་དང་།  སྭཱ་ཧཱ་གསུམ་ནི་རྡོ་རྗེ་རྩེ་མོ་ལས།  ཡི་གེ་ཧཱུྃ་ནི་ཅི་ཡིན་བརྗོད། །སྡུག་བསྔལ་འཆོས་ཤིང་འཇོམས་པར་བྱེད། །སྲིད་པའི་ཞགས་པ་གཅོད་བྱེད་ཅིང་། །གདུག་
10-7-15b


པ་སྡང་ཞིང་གསོད་བྱེད་པ། །ཧཱུྃ་ནི་མཆོག་ཏུ་དྲན་པར་བྱ། །ཞེས་དང་།  ཡི་གེ་ཕཊ་ནི་ཅི་ཡིན་བརྗོད། །གདུག་དང་སྡུག་བསྔལ་འཇོམས་བྱེད་ཅིང་། །བདེ་བ་དག་ནི་འགུགས་པར་བྱེད། །ཕཊ་ནི་འཇོམས་བྱེད་སྒྲ་ཡིན་ཏེ། །གྲོགས་དང་བཅས་ཏེ་འཇོམས་པར་བྱེད། །ཅེས་དང་།  
སྭཱཧཱ་ཅེས་པ་ཅི་ཡིན་བརྗོད། །སྡིག་པ་ཐམས་ཅད་ཞི་བྱེད་ཅིང་། །དགེ་བའི་ཚོགས་ནི་འཕེལ་བར་བྱེད། །ཉེས་པར་བཅས་པ་འཕྲོག་བྱེད་ཅིང་། །དུཿཁ་ཐམས་ཅད་འཇོམས་པར་བྱེད། །ཅེས་སོ། །གཉིས་པ་ལ་གཉིས་ཏེ།  སྔགས་ཐོས་པ་ལ་
སོགས་པའི་ཕན་ཡོན།  སྔགས་དེ་དང་འབྲེལ་བའི་དཀྱིལ་འཁོར་དུ་ཞུགས་པའི་ཕན་ཡོན་ནོ། །དང་པོ་ནི།  ལྷའི་དབང་པོ་དེ་བཞིན་གཤེགས་པ་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོའི་གསང་བའི་སྙིང་པོ་འདི་ཞེས་
སོགས་ཏེ།  གཞན་རྣམས་ནི་གོ་སླ་ལ།  དུས་མ་ཡིན་པར་འཆི་བ་བརྒྱད་ནི།  མཚོན།  དུག །རྒྱལ་པོའི་ཆད་པ།  འབྲུམ་ནད།  གཅན་གཟན།  ཆོམ་རྐུན།  མེར་ཚིག་པ།  ཆུར་ཤི་བ་དང་བརྒྱད་དོ། །དེ་དང་འབྲེལ་བའི་རྨི་ལམ་གྱི་རྣམ་པ་ནི་ཐུར་ལ་བབ་པ།  
གོས་དང་བྲལ་བ།  གཅན་གཟན་གྱིས་ཟོས་པ།  ཉི་ཟླ་ནུབ་པ།  ནམ་སྲོས་པ་ལ་སོགས་པ་ཡིན་པར་རྩ་སྐྱ་པས་བཤད་དོ། །གཉིས་པ་ནི།  དཀྱིལ་འཁོར་དུ་ཇི་ལྟ་བ་བཞིན་དུ་ཞུགས་ལ་ཞེས་སོགས་ཏེ།  ངན་སོང་དུ་འགྲོ་བར་ཡང་མི་འགྱུར་རོ་ཞེས་པ་
ཡན་ཆད་ཀྱིས་ཚེ་ལྡན་ལ་དབང་བསྐུར་བའི་ཕན་ཡོན་དང་།  མྱོང་བར་འགྱུར་རོ་ཞེས་པ་ཡན་ཆད་ཀྱིས་ཚེ་འདས་ལ་དབང་བསྐུར་བའི་ཕན་ཡོན་བསྟན་ཏེ།  དེ་བཞིན་གཤེགས་པ་ཐམས་ཅད་ཀྱིས་ཆོས་ཉིད་མངོན་སུམ་དུ་བྱེད་པ་ནི་ས་དང་པོ་ཡན་ཆད།  བསྙེན་
10-7-16a


བསྐུར་ནི་རྫུ་འཕྲུལ་གྱི་སྟོབས་ཀྱིས་ལུས་ཀྱིས་བསྙེན་བཀུར་བ།  ཕྱིར་མི་ལྡོག་པ་ནི་འཁོར་བ་དང་།  ཐེག་དམན་ལམ་དུ་ཕྱིར་མི་ལྡོག་པ།  རྒྱུད་ངེས་པ་ཅན་ནི་ཐེག་པ་ཆེན་པོར་རོ། །རིགས་སུ་སྐྱེས་པ་ནི་བྱང་ཆུབ་སེམས་དཔར་རོ། །
སྒྲིབ་པ་ཐམས་ཅད་རབ་ཏུ་སྤངས་པ་ནི་སེར་སྣ་ལ་སོགས་པའི་ཉོན་སྒྲིབ་དང་།  གཟུང་འཛིན་གྱི་རྟོག་པ་ཤེས་བྱའི་སྒྲིབ་པ་དང་།  མཚམས་མེད་ལྔ་པོ་ལས་ཀྱི་སྒྲིབ་པ་དང་།  སྒྲིབ་པ་ལྔ་པོ་ཆོས་ཀྱི་སྒྲིབ་པ་སྟེ་བཞི་ཡོད་པར་ཀུན་དགའ་སྙིང་པོས་དེ་ཉིད་སྣང་
བར་བཤད་དོ། །གཉིས་པ་ནང་གི་དཀྱིལ་འཁོར་སྔོན་དུ་འགྲོ་བས་རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་ལ་གསུམ་སྟེ།  བརྒྱ་བྱིན་གྱིས་བཤད་པར་གསོལ་བ་གདབ་པ།  བཅོམ་ལྡན་འདས་ཀྱིས་བཤད་པའི་དོན་དུ་ཏིང་ངེ་འཛིན་ལ་སྙོམས་
པར་ཞུགས་པ།  བཤད་པ་དངོས་སོ། །དང་པོ་ནི།  དེ་ནས་ལྷ་རྣམས་ཀྱི་དབང་པོ་ཞེས་སོགས་སོ། །གཉིས་པ་ནི།  དེ་ནས་བཅོམ་ལྡན་འདས་ཞེས་སོགས་ཏེ།  ངན་སོང་ཐམས་ཅད་ཡོངས་སུ་སྦྱོང་བའི་ཆོས་དབྱིངས་ཤེས་པས་ཡེ་ཤེས་རྡོ་རྗེ་ཞེས་བྱ་བའི་ཏིང་
ངེ་འཛིན་ལ་སྙོམས་པར་ཞུགས་ནས་དོན་བྱེད་པ་པོ།  དེ་བཞིན་གཤེགས་པ་ཐམས་ཅད་ཀྱིས།  བྱ་བ་ངན་སོང་ཐམས་ཅད་ཡོངས་སུ་སྦྱོང་བ་གཟི་བརྗིད་ཀྱི་རྒྱལ་པོ་ཞེས་བྱ་བའི་སྙིང་པོའམ་ནང་གི་དཀྱིལ་འཁོར་ཆེན་པོ་འདི་གསུངས་སོ། །གསུམ་པ་ལ་
གཉིས་ཏེ།  ནང་གི་དཀྱིལ་འཁོར་དང་།  ཕྱིའི་དཀྱིལ་འཁོར་རོ། །དང་པོ་ནི།  ས་བཅུ་གཅིག་པའི་སས་བསྡུས་པའི་སངས་རྒྱས་ཀུན་གྱི་བྱང་ཆུབ་ཀྱི་སེམས་ལ་དོན་དམ་དང་།  ཀུན་རྫོབ་གཉིས་ལས།  དང་པོ་ནི།  ཆོས་ཉིད་སྤྲོས་པ་དང་བྲལ་བ་དམིགས་པ་མེད་པ་ཡིན་ཏེ།  
10-7-16b


དབུ་མ་ལས།  སངས་རྒྱས་རྣམས་ཀྱི་བྱང་ཆུབ་སེམས། །བདག་དང་ཕུང་པོ་རྣམ་རིག་གི།  རྟོག་པ་རྣམས་ཀྱིས་མ་བསྒྲིབས་ཤིང་། །རྟག་ཏུ་སྟོང་ཉིད་མཚན་ཉིད་བཞེད། །ཅེས་སོ། །དེ་ཉིད་གོང་ན་མེད་ཅིང་ཕུལ་དུ་བྱུང་བས་ན་བླ་ན་མེད་པའོ། །ཀུན་རྫོབ་བྱང་ཆུབ་ཀྱི་སེམས་ནི་དོན་
དམ་བྱང་ཆུབ་ཀྱི་སེམས་དེ་རྟོགས་པར་འགྱུར་བའམ་རྟོགས་པའི་ཐབས་སུ་གྱུར་པ་སྟེ།  སྨོན་པ་དང་འཇུག་པ་གཉིས་སོ། །དང་པོ་ནི།  སེམས་ཅན་གྱི་དོན་དུ་སངས་རྒྱས་འདོད་པའོ། །གཉིས་པ་ནི།  ལམ་ལ་འཇུག་པ་སྟེ།  བསྙེན་པ་ནས་བརྩམས་
ཏེ།  རྒྱུད་འདི་ནས་འབྱུང་བའི་རང་དོན་དང་གཞན་དོན་གྱི་ལས་ལ་འཇུག་པའོ། །དེ་ལྟར་གཉིས་ལས།  འདས་པའི་རྒྱལ་བ་བྱེ་བ་ཕྲག་བརྒྱད་ཅུ་རྩ་བཞིས་གསུངས་པའི་དོན་དམ་པའི་བྱང་ཆུབ་སེམས་ཀྱི་ཡེ་ཤེས་གང་ཡིན་པ་དེ་ནི་རྟོགས་བྱ་མཐར་
ཐུག་དང་།  བཅུད་དམ་དྭངས་མར་གྱུར་པས་ན་དཀྱིལ་འཁོར་སྙིང་པོར་གསུངས་སོ། །དེ་རྟོགས་པའི་ཐབས་སུ་གྱུར་པ་འདས་པའི་རྒྱལ་བ་བྱེ་བ་ཕྲག་བརྒྱད་ཅུ་རྩ་བཞིས་གསུངས་པའི་ཀུན་རྫོབ་བྱང་ཆུབ་སེམས་ཀྱི་ཡེ་ཤེས་གང་ཡིན་པ་དེ་ནི་འབྱུང་
གནས་སུ་འགྱུར་བའམ་གཅེས་པར་འགྱུར་བའི་དོན་གྱིས་ན་དཀྱིལ་འཁོར་སྙིང་པོར་གསུངས་སོ། །འདིར་ཀུན་རྫོབ་བྱང་ཆུབ་ཀྱི་སེམས་ལ་གཉིས་ལས།  འཇུག་པ་བྱང་ཆུབ་ཀྱི་སེམས་ནི་ལམ་ཉམས་སུ་ལེན་པ་ཏིང་ངེ་འཛིན་གྱི་དཀྱིལ་འཁོར་
ཡིན་པས་འདིར་མངོན་རྟོགས་ཀྱི་ཐོ་བསྒྲིགས་ཏེ་བཤད་པ་ནི།  དཀྱིལ་འཁོར་བཅུ་གཉིས་པོ་ཐམས་ཅད་ལ།  སྔོན་དུ་བསྙེན་པ།  དཀྱིལ་འཁོར་ལས་རིམ།  དངོས་གྲུབ་ཀྱི་ཡེ་ཤེས་ལ་བསླབ་པ་གསུམ་ལས།  དང་པོ་ནི།  གནས་དབེན་པར་ཁྲུས་
10-7-17a


བྱས་ཏེ།  སྟན་བདེ་བ་ལ་འདུག་ནས་ལྷའི་རྣལ་འབྱོར་ལ་འཇུག་པ་ནི།  ཀུན་རིག་ནས།  དེ་ནས་ཁྲུས་ལ་སོགས་བྱས་ཏེ། །དྲི་དང་ཕྲེང་མཆོག་ཕྲེང་བ་ཅན། །ཞེས་སོ། །དེ་ནས་སྐྱབས་འགྲོ་ནི།  ཐུབ་པའི་སྐབས་ནས།  སངས་རྒྱས་
ཆོས་དང་དགེ་འདུན་ལ། །ཐོས་ནས་ཀྱང་ནི་སྐྱབས་སུ་སོང་། །ཞེས་དང་།  ཚེ་དཔག་མེད་ནས།  དཀོན་མཆོག་གསུམ་དང་བྱང་ཆུབ་སེམས། །བླ་མ་དམ་པ་རྣམས་མི་སྤང་། །ཞེས་སོགས་སོ། །ཆོས་བདག་མེད་པ་དྲན་ཅིང་སེམས་བསྐྱེད་པ་ནི།  འཁོར་ལོས་
སྒྱུར་བ་ནས།  སྟོང་པ་མཚན་མ་མེད་པའི་སེམས། །ཞེས་དང་།  ཀུན་རིག་ནས།  སངས་རྒྱས་ཀུན་གྱི་བྱང་ཆུབ་སེམས། །ཞེས་སོ། །སྲུང་འཁོར་བསྒོམ་པ་ལ།  ཐོག་མར་ཕྱག་རྡོར་བསྐྱེད་པ་ནི།  མེ་ལྟར་འབར་བ་ནས།  དེ་ནས་བཅོམ་ལྡན་འདས་ཕྱག་ན་རྡོ་
རྗེས་ཞེས་གསུངས་ལ།  དེ་ཉིད་འཇིག་རྟེན་གསུམ་རྒྱལ་དུ་བསྒྱུར་བ་ནི།  རང་གི་སྐུ་བོར་ཏེ་རྡོ་རྗེ་སེམས་དཔའི་སྐུར་ཞུགས་ནས་ཞེས་དང་།  ཀུན་རིག་ནས།  འཇིག་རྟེན་གསུམ་ལས་རྣམ་རྒྱལ་གྱིས། །བདག་བསྲུང་ལ་སོགས་བྱས་ནས་ནི། །ཞེས་སོ། །དེ་ཉིད་
ཀྱི་སྐུའི་རྣམ་པ་ནི།  མེ་ལྟར་འབར་བ་ནས།  མ་རུངས་སྙིང་ཁར་མནན་ནས་བསྡིགས་བྱེད་ཅིང་། །ཞལ་ནི་ཤིན་ཏུ་འཇིགས་འཇིགས་བལྟ། །ཕྱག་ནི་བརྒྱ་ཕྲག་དུ་མར་ལྡན། །སྦྲུལ་དང་མི་སྡུག་མགོས་བརྒྱན་པ། །སྟག་ལྤགས་ཀྱིས་ནི་སྨད་གཡོགས་བགོས། །
རྒྱུ་མ་ཐོགས་ཤིང་དབུ་མཐའ་ཡས། །མགོ་ཐོད་ཤས་བཀང་ཕྱག་ན་བསྣམས། །ཞེས་སོ། །བདག་བསྲུང་སོགས་ཀྱི་སྔགས་ནི།  དེ་ཉིད་ལས།  རྡོ་རྗེ་སེམས་དཔའི་ཁྲོ་བོ་མེ་ཉི་མ་ཞེས་བྱ་བའི་སྙིང་པོ་འདི་ཉིད་ཀྱི་ཐུགས་ཁ་ནས་ཕྱུང་ངོ་། །ཨོཾ་བཛྲ་སཏྭ་ཀྲོ་
10-7-17b


དྷ་ཞེས་སོགས་གསུངས་སོ། །དེ་དག་ནི་རྒྱུད་ཀྱི་དངོས་བསྟན་གྱི་སྲུང་འཁོར་བསྡུས་པ་ཡིན་ལ།  རྒྱས་པ་ནི།  སྔར་གྱི་ཚིག་རྐང་གཉིས་པོ་དེ་ལ་བརྟེན་ནས་བླ་མའི་མན་ངག་གི་རྡོ་རྗེ་འབྱུང་བ་བཞིན་མཛད་དོ། །སྲུང་འཁོར་གྱི་རྗེས་ལ་ལག་པ་བྱིན་གྱིས་
བརླབ་པ་ནི།  འཁོར་ལོས་སྒྱུར་བ་ནས།  ལག་པ་གཉིས་མདུན་དུ་བཞག་ལ་ཞེས་པ་ནས་དེ་བཞིན་གཤེགས་པ་རྣམས་ཡིན་པར་མོས་པ་བསྐྱེད་དེ་ཞེས་པའི་བར་གསུངས་ལ།  དེ་ནས་ཆོས་ཐམས་ཅད་གཅིག་ལ་གཅིག་འདྲེས་པ་དང་།  བདག་དང་ཡང་རྗེས་སུ་
དྲན་པར་བྱ་སྟེ།  ཞེས་གསུངས་པའི་དོན་གཟུགས་བརྙན་གྱི་སྦྱོར་བ་བྱ་བ་ནི།  རྡོ་རྗེ་འབྱུང་བ་ལས།  གཟུགས་བརྙན་ལ་སོགས་པའི་སྦྱོར་བས་ཕྱག་རྒྱ་བཅིང་བ་སྔོན་དུ་འགྲོ་བ་དང་།  ཆོ་ག་ཐམས་ཅད་རྗེས་སུ་བསྐྱེད་པར་བྱ་སྟེ།  ཅེས་དང་།  དེ་ཡི་སྔགས་
དང་ཕྱག་རྒྱ་ཡང་། །ཐལ་མོ་དམ་དུ་བསྡམས་པ་ལས། །སོར་མོ་ཐམས་ཅད་བསྣོལ་བ་ནི། །རྡོ་རྗེ་ཐལ་མོར་བཀའ་སྩལ་ཏེ། །རབ་ཏུ་བསྡམས་ཕྱིར་རྡོ་རྗེ་བསྡམས། །བཛྲ་ཨཉྫ་ལི་ཅེས་བྱ་བ་ནི་རྡོ་རྗེ་ཐལ་མོའི་སྔགས་སོ། །བཛྲ་བནྡྷ་ཅེས་
བྱ་བ་ནི་རྡོ་རྗེ་བསྡམས་པ་སྟེ།  བཛྲ་བནྡྷ་ཏྲ་ཐ་ཞེས་བྱ་བ་ལན་གསུམ་བརྗོད་ཅིང་སྙིང་ཁར་བཀྲོལ་ལོ་ཞེས་པ་ནས་ཡེ་ཤེས་དབབ་པའི་བར་གསུངས་སོ། །བདག་བསྐྱེད་དངོས་ལ།  དཔའ་བོ་གཅིག་པ་དང་།  དཀྱིལ་འཁོར་གྱི་འཁོར་ལོ་ཡོངས་རྫོགས་
བསྒོམ་པ་གཉིས་ལས།  དང་པོ་ནི།  ཀུན་རིག་ནས།  བདག་གིས་དེ་ཉིད་དྲན་བྱེད་ཅིང་། །ཅེས་པས་སྟོན་ལ།  ཇི་ལྟར་སྒོམ་པའི་ཚུལ་ནི་ཚེ་དཔག་མེད་ནས།  ཆོས་རྣམས་ཐམས་ཅད་དངོས་མེད་པར། །ཞེས་པ་ནས།  སངས་རྒྱས་རྣམས་ཀྱིས་
10-7-18a


དབང་བསྐུར་རོ། །ཞེས་པའི་བར་གྱིས་བསྟན་ལ།  ཟླ་བའི་འོག་ཏུ་པདྨ་བསྒོམ་པ་ནི་གླེང་གཞི་ནས་པདྨའི་གདན་ལ་བཞུགས་ཏེ་ཞེས་པས་བསྟན།  རང་གི་ས་བོན་དང་ཕྱག་རྒྱས་བྱིན་གྱིས་བརླབ་པ་ནི་ཤཱཀྱ་ཐུབ་པ་ནས་གསུངས་
ལ།  ལྟག་འོག་གོ་རིམ་ཇི་བཞིན་དུ་སངས་རྒྱས་རྣམས་ཀྱིས་དབང་བསྐུར་བའི་སྔགས་ནི་ཕྱག་རྡོར་ནས་གསུངས་སོ། །རྗེ་བཙུན་གྱིས་སྦྱོང་རྒྱུད་ཀྱི་དངོས་བསྟན་བཞིན་མཛད་པས་འདི་ལ་ཡེ་ཤེས་ཀྱི་འཁོར་ལོ་དགུག་གཞུག་མི་མཛད་ལ།  རྩ་སྐྱ་བ་ནི་ཡེ་
ཤེས་ཀྱི་འཁོར་ལོ་དགུག་གཞུག་ཀྱང་མཛད་དོ། །སྒྲིབ་པ་སྦྱོང་བའི་ཏིང་ངེ་འཛིན་ནི་གླེང་གཞི་ནས་ཚངས་པ་ཆེན་པོ་ཞེས་སོགས་གསུངས།  མཆོད་བསྟོད་ནི་མེ་ལྟར་འབར་བ་ནས།  རིན་ཆེན་གདུགས་ལ་སོགས་མཆོག་གིས། །མཆོད་པ་སྣ་ཚོགས་བྱས་
ནས་ཀྱང་། །ཕྱག་ན་རྡོ་རྗེ་རྒྱས་སྤྱན་ལ། །དགའ་བའི་བསམ་པས་བསྟོད་བྱེད་པ། །སངས་རྒྱས་ཀུན་པས་སྔར་སངས་རྒྱས། །ཞེས་སོགས་གསུངས་སོ། །བཟླས་སྔགས་ནི་གོང་དུ་གསུངས་པའི་རྩ་རིག་ཡིན་ལ།  དེའི་དམིགས་པ་ནི་ཕྱག་རྡོར་ནས།  
འཇིག་རྟེན་གྱི་ཁམས་ཐམས་ཅད་སྣང་བར་བྱས་ཏེ།  སྣང་བར་བྱས་ནས་ཀྱང་སངས་རྒྱས་ཀྱི་མཛད་པ་བཅུ་གཉིས་ཀྱི་ཚུལ་དུ་བྱས་ནས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་ཆོས་ཀྱི་ཡི་གེ་དེ་ཉིད་དུ་ཞུགས་པར་གྱུར་ཏོ་ཞེས་སོ། །གཉིས་པ་
དཀྱིལ་འཁོར་ཡོངས་རྫོགས་ཀྱི་བསྙེན་པ་ནི།  སྔགས་ཀྱི་ཕྲེང་བའི་སྐབས་སུ་བསྟན་པ་སྔར་བཤད་ཟིན་ཅིང་།  དེ་ནི་དཀྱིལ་འཁོར་སྙིང་པོར་གསུངས་ཞེས་པའི་དེ་མ་ཐག་ཏུ་ཕྱིའི་དཀྱིལ་འཁོར་གསུངས་པ་ཞེས་པའི་ཤུགས་ཀྱིས་ཀྱང་ནང་གི་དཀྱིལ་
10-7-18b


འཁོར་བསྒོམ་པ་བསྟན་ལ།  དཀྱིལ་འཁོར་སྔ་མ་བཞིན་བསམས་ལ་ཞེས་པས་ཀྱང་བསྟན་ནོ། །སྒོམ་ཚུལ་སྔར་དཔའ་བོ་གཅིག་པའི་སྐབས་སུ་རྡོ་རྗེ་སེམས་དཔའ་འམ་རང་རང་གི་དཀྱིལ་འཁོར་གྱི་གཙོ་བོ་གང་བསྒོམས་ཀྱང་རུང་སྟེ།  འགྲོ་བ་ངན་སོང་
ལས་གྲོལ་བའི་ཆེད་དུ་བརྗོད་པའི་བར་བྱས་པའི་རྗེས་ལ་རྩ་སྐྱ་པ་ལྟར་ན་སྔར་གྱི་ཕྱག་རྒྱ་ཆེན་པོ་ནམ་མཁར་བཏེག་སྟེ།  སྣོད་བཅུད་སྟོང་པར་སྦྱངས་ནས་འབྱུང་བཞི་རི་རབ་དང་བཅས་པའི་སྟེང་དུ་གཞལ་ཡས་ཁང་གདན་བཅས་བསྐྱེད་དེ།  དབུས་ཀྱི་
གདན་གྱི་སྟེང་དུ་ཕྱག་རྒྱ་ཆེན་པོ་ཕབ་ནས་དེའི་ཐུགས་ཁ་ནས་འཁོར་སྤྲོ་བར་བཞེད་ལ།  རྗེ་བཙུན་གྱིས་ནི་ཕྱག་རྒྱ་ཆེན་པོ་ནམ་མཁར་མི་འདེགས་པར་སྟོང་པར་སྦྱངས་ནས་གཞལ་ཡས་ཁང་གདན་བཅས་བསྐྱེད་པའི་བར་བྱས་ལ།  དབུས་ཀྱི་
གདན་གྱི་སྟེང་དུ་མཐའ་སྐོར་དུ་རྩ་རིག་དང་།  ནང་སྐོར་དུ་རྩ་བའི་སྔགས་བཀོད་པ་ལས་འོད་ཟེར་གྱི་སྤྲོ་བསྡུ་བྱས་ནས་གཙོ་བོ་བསྐྱེད།  དེའི་ཐུགས་ཁར་ཟླ་བའི་སྟེང་དུ་མཐའ་སྐོར་དུ་རྩ་རིག་དང་།  ནང་སྐོར་དུ་འཁོར་གང་ཡིན་གྱི་སྔགས་བཀོད་པ་ལས་
འོད་ཟེར་སྤྲོ་བསྡུ་བྱས་ནས་འཁོར་དེ་དང་དེ་བསྐྱེད་དེ་རང་གནས་སུ་སྤྲོ་བར་མཛད་དོ། །དེ་ནས་ཡེ་ཤེས་པ་སྤྱན་དྲངས་པ་ནས་ཕྱག་རྒྱ་བཞིས་རྒྱས་འདེབས་པའི་བར་མདུན་བསྐྱེད་བཞིན་བྱས་ནས་མཆོད་བསྟོད་སྔ་མ་བཞིན་བྱས་ནས་གཙོ་འཁོར་ཐམས་
ཅད་ཀྱི་སྔགས་བཟླས་ཏེ་མཇུག་ཏུ་ཡེ་ཤེས་པ་གཤེགས་སུ་གསོལ་ལོ། །རས་བྲིས་ལ་བརྟེན་པའི་བསྙེན་པ་ནི་འོག་གཞུང་དོན་གྱི་སྐབས་སུ་འབྱུང་ངོ་། །གཉིས་པ་དཀྱིལ་འཁོར་ལས་རིམ་ལ་ས་ཆོག་ནི།  ཀུན་རིག་ནས།  གཙུག་ལག་ཁང་ངམ་
10-7-19a


སྐྱེད་མོས་ཚལ། །ཞེས་སོགས་ཚིགས་བཅད་གཅིག་གིས་བསྟན།  ལྷ་སྟ་གོན་ནི་རྒྱུད་འདིར་དངོས་སུ་མ་གསུངས་པས་མ་བྱས་ཀྱང་རུང་ལ།  འོག་ཏུ་སློབ་མ་སྟ་གོན་གསུངས་པའི་ཤུགས་ཀྱིས་བྱེད་པར་སྤྲོ་ན་འགལ་བ་མེད་དོ། །
དཀྱིལ་འཁོར་བྲི་བ་ནི།  ཀུན་རིག་ནས།  གྲུ་བཞི་པ་ལ་སྒོ་བཞི་པ། །ཞེས་པ་ནས།  རྩིབས་ནི་ཉིས་འགྱུར་ཉིད་དུ་བྱ། །ཞེས་གསུངས་པའི་བར་གསུངས་ཤིང་།  དཀྱིལ་འཁོར་གཞན་རྣམས་ཀྱི་མི་འདྲ་བའི་ཁྱད་པར་ནི་སོ་སོའི་སྐབས་སུ་འབྱུང་ངོ་། །ལྷ་
དགོད་ཚུལ་ནི།  ཀུན་རིག་ནས།  དབུས་ཀྱི་ཕྱོགས་སུ་ཀུན་རིག་ནི། །ཞེས་པ་ནས།  ཐིག་ལེ་རྣམས་ཀྱང་བྲི་བར་བྱ། །ཞེས་གསུངས་པའི་བར་གསུངས་ཤིང་།  གཞན་རྣམས་ཀྱི་ཁྱད་པར་ཡང་སོ་སོའི་སྐབས་སུ་གསལ་བར་འབྱུང་ངོ་། །མཆོད་གཏོར་
དང་བུམ་པ་བཤམ་ཚུལ་ནི།  ཀུན་རིག་ནས།  དེ་ནས་མཁས་པས་དཀྱིལ་འཁོར་ལ། །ཞེས་པ་ནས།  རབ་ཏུ་བཀང་བ་བཞག་པར་བྱ། །ཞེས་གསུངས་ཤིང་།  སོ་སོའི་སྐབས་སུ་ཅུང་ཟད་འབྱུང་ངོ་། །དཀྱིལ་འཁོར་བསྒྲུབ་པ་ལ།  བདག་བསྐྱེད་
སྐབས་འདིར་དངོས་སུ་མ་གསུངས་ཀྱང་།  རས་བྲིས་ཀྱི་སྐབས་སུ།  བདག་གི་དེ་ཉིད་དྲན་བྱེད་ཅིང་། །ཞེས་གསུངས་པས་བསྟན།  བུམ་བཟླས་ནི།  ཀུན་རིག་ནས།  སྔ་མ་བཞིན་དུ་བུམ་པ་ལ། །བརྒྱ་རྩ་བརྒྱད་དུ་བཟླས་ནས་ནི། །ཞེས་གསུངས་ཤིང་
དཀྱིལ་འཁོར་གཞན་རྣམས་ལ་ཡང་ཕྱོགས་སྐྱོང་རང་གི་སྔགས་བཏབ་པའི། །བུམ་པ་རྣམས་ཀྱིས་དབང་བསྐུར་ཏེ། །ཅེས་སོགས་གསུངས་སོ། །མདུན་བསྐྱེད་བསྒྲུབ་པ་ལ།  ཐོག་མར་ལུས་ཀྱི་སྤྱོད་ལམ་དང་།  དཀྱིལ་འཁོར་ཁང་པར་འཇུག་
10-7-19b


ཚུལ་ནི།  ཀུན་རིག་ནས།  དེ་ནས་ཁྲུས་ལ་སོགས་བྱས་ལ། །ཞེས་སོགས་ཚིག་རྐང་ལྔ་གསུངས་དེ་ནས་རྒྱུད་འདིར་མདུན་བསྐྱེད་ལ་དམ་ཚིག་པ་བསྐྱེད་པ་དངོས་སུ་མ་གསུངས་པས་ཡེ་ཤེས་པ་སྤྱན་དྲངས་བ་ནི།  ཀུན་རིག་ནས།  གཙོ་བོ་རྒྱལ་བ་སྲས་
ཀྱི་འཁོར། །མང་པོ་རྣམས་ནི་སྤྱན་དྲངས་ཏེ། །ཞེས་གསུངས་ལ།  དཀྱིལ་འཁོར་གཞན་རྣམས་ལ་ཡང་འདི་ཁོ་ན་བཞིན་བྱའོ། །དམ་ཚིག་པ་བསྐྱེད་པར་སྤྲོ་ན་རྣལ་འབྱོར་གྱི་རྒྱུད་གཞན་བཞིན་དུ་བྱ་བར་མན་ངག་ལས་འབྱུང་སྟེ།  གཞལ་ཡས་ཁང་
གདན་བཅས་བསྐྱེད་ནས་འོད་ཟེར་གྱི་སྤྲོ་བསྡུ་ལས་བསྐྱེད་པའམ།  སྙིང་པོ་ཚིག་ཙམ་ལས་བསྐྱེད་པ་གང་འགྲུབ་བྱའོ། །དགུག་གཞུག་གི་རྗེས་སུ་ཕྱག་རྒྱ་བཞིས་རྒྱས་འདེབས་པ་ནི་དམ་ཚིག་གི་ཕྱག་རྒྱ་ནི་དངོས་སུ་བཤད་ལ།  ལས་ཀྱི་ཕྱག་རྒྱ་
ནི་འཁོར་ལོས་སྒྱུར་བའི་སྐབས་ནས་དམ་ཚིག་གི་ཕྱག་རྒྱའི་རྗེས་ལ་དེ་ཉིད་གཉིས་སུ་བྱས་ནས།  གར་བྱས་ན་ལས་ཀྱིའོ་ཞེས་དང་།  ཆོས་ཀྱི་ཕྱག་རྒྱ་ཡང་དེ་ཉིད་ལས།  སེམས་དཔའ་བཅུ་དྲུག་གི་ས་བོན་ལྟ་བུ་བཤད་ཅིང་།  ཕྱག་རྒྱ་ཆེན་པོ་ནི་ཤུགས་
ལས་གྲུབ་པ་ཉིད་དོ། །མཆོད་པ།  བསྟོད་པ།  གཏོར་མ་རྣམས་ནི་ཀུན་རིག་ནས།  ཨརྒྷཾ་མཆོག་བཏགས་གསང་ལ་སོགས་པ་ཡི། །ཞེས་པ་ནས།  དེ་ཡི་གཏོར་མ་ཇི་ལྟར་མཐུན་པར་བྱ། །ཞེས་པའི་བར་གསུངས་སོ། །སློབ་དཔོན་བདག་ཉིད་
འཇུག་ཤིང་དབང་བླང་བ་ནི་ཀུན་རིག་ནས།  དངོས་སུ་མ་གསུངས་ཀྱང་ཕྱོགས་སྐྱོང་གི་སྐབས་ནས།  དེ་ནས་བདག་ཉིད་ཞུགས་ནས་ཀྱང་། །ཞེས་འཇུག་པ་དང་།  ཚེ་དཔག་མེད་ནས།  དེ་ནས་བདག་ཉིད་དབང་བསྐུར་ཏེ། །ཞེས་དབང་བླང་བར་གསུངས་
10-7-20a


ཤིང་།  འཁོར་ལོས་བསྒྱུར་བ་ནས།  སྤྱན་དྲངས་བདག་ཉིད་འཇུག་པར་བྱ། །བདག་ཉིད་ཀྱི་ནི་དབང་ཡང་བསྐུར། །ཞེས་འཇུག་པ་དང་དབང་བླང་བ་གཉིས་ཀྱང་གསུངས་སོ། །མདུན་བསྐྱེད་ལ་དམིགས་པའི་བཟླས་པ་ནི་ཚེ་དཔག་
མེད་ནས།  སྐྱིལ་ཀྲུང་བཅས་ཏེ་འདུག་ལ་ཞེས་པ་ནས།  དེའི་ཚེ་ཡིད་ཀྱི་ལས་ཐམས་ཅད་ནུས་པར་འགྱུར་རོ་ཞེས་པའི་བར་གསུངས།  བདག་མདུན་ཐ་མི་དད་དུ་བསྒྲུབ་པ་ནི་ཚེ་དཔག་མེད་ནས།  དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ།  ཨོཾ་
བཛྲ་དྷ་ར་ཞེས་པ་ནས།  ང་རྒྱལ་བསྐྱེད་ལ་ཞེས་པའི་བར་གསུངས་སོ། །སློབ་མ་དབང་བསྐུར་ལ་འཇུག་པའི་ཆོས་བཅུ་བདུན་ནི།  ཀུན་རིག་ནས།  དེ་ནས་སྔགས་པས་བླ་མེད་བྱང་ཆུབ་ཀྱི། །ཞེས་པ་ནས།  བདག་གི་དེ་ཉིད་དང་ནི་སྔགས་སོགས་
དེ་བཞིན་ནོ། །ཞེས་པའི་བར་གྱི་གོ་རིམ་བསྟན་ལ།  མི་འདྲ་བའི་ཁྱད་པར་རྣམས་ནི་སོ་སོའི་སྐབས་ནས་འབྱུང་ངོ་། །དབང་གི་དངོས་གཞི་ལ་སྔགས་དབང་དང་།  བུམ་པ་ལ་སོགས་པའི་དབང་བཅུ་དང་།  ཐབས་ཤེས་རབ་ཀྱི་དབང་དང་།  རིན་
ཆེན་སྣ་བདུན་གྱི་དབང་སྟེ་བཅུ་དགུ་ནི།  མོས་པ་བརྟན་དང་ལྡན་པས་དམ་བཅས་ནས། །ཅེས་པ་ནས།  སྡིག་པ་གཞོམ་ཕྱིར་དབང་ནི་བསྐུར་བར་བྱ། །ཞེས་པའི་བར་གྱིས་བསྟན་ལ།  སྔགས་རྣམས་ནི་ཕྱག་རྡོར་ནས་འབྱུང་ངོ་། །བཀའ་བསྒོ་བ་དང་
བླ་མ་ལ་ཡོན་འབུལ་བ་ནི།  ཚེ་འདིའི་བདེ་བ་མ་ལུས་དང་། །ཞེས་སོགས་དང་།  དེས་ཀྱང་མོས་པས་སྤྱི་བོས་ཕྱག་འཚལ་ཏེ། །ཞེས་སོགས་ཀྱིས་བསྟན་ནོ། །མཇུག་ཆོག་ནི་མེ་ལྟར་འབར་བ་ནས།  དེ་ཡི་ལུས་ལ་དབང་བསྐུར་ཞིང་། །མཉམ་པར་
10-7-20b


གཞག་པས་བསྲུངས་ནས་ཀྱང་། །མཇུག་ཏུ་མངོན་པར་མཆོད་ནས་ནི། །ལྷ་རྣམས་ཐམས་ཅད་གཤེགས་པར་གསོལ། །ཞེས་པ་འདི་དངོས་སུ་སྦྱིན་སྲེག་གི་མཇུག་ཆོག་ཏུ་གསུངས་ཀྱང་།  མདུན་བསྐྱེད་ཀྱི་མཇུག་ཆོག་ཐམས་ཅད་འདིས་བསྟན་པ་ཡིན་
ནོ། །གསུམ་པ་དངོས་གྲུབ་ཀྱི་ཡེ་ཤེས་ལ་བསླབ་པ་ནི་གཞུང་སོ་སོའི་སྟེང་དུ་རྟོགས་པར་བྱའོ། །དེ་ལྟར་ན་རྒྱུད་འདིར་ཁ་འཕངས་པ་ཡོད་ཀྱང་ཆོ་ག་དངོས་སུ་མ་བཤད་པ་རྣམས་དེ་ཉིད་འདུས་པ་སོགས་ནས་ཁ་བསྐང་བ་མ་གཏོགས་རྒྱུད་འདིར་དངོས་
སུ་གསུངས་པའི་ཆོ་ག་གོང་འོག་འཁྲུགས་བསྡེབས་ནས།  རྒྱུད་ཀྱི་དངོས་བསྟན་བཞིན་དུ་མཛད་པ་འདི་ནི་པཎྜི་ཏ་དྷརྨཱ་པ་ལའི་མན་ངག །ཇོ་བོ་རིན་ཆེན་བཟང་པོ་ནས་ས་སྐྱ་པ་ལ་བརྒྱུད་པ་དང་།  ཇོ་བོ་རྗེ་ནས་རྩ་སྣུར་འཛིམ་གསུམ་ལ་བརྒྱུད་པ་རྣམས་ཕལ་
ཆེར་འདྲ་ཞིང་།  ཁྱད་པར་དུ་འཕགས་པ་འགའ་ཞིག་ཡོད་པ་འདིའི་རྗེས་སུ་འབྲང་བ་ནི་སྐལ་བ་བཟང་བར་ཤེས་པར་བྱའོ། །གཉིས་པ་ཕྱིའི་དཀྱིལ་འཁོར་ལ་གཉིས་ཏེ།  སྡུད་པ་པོའི་མཚམས་སྦྱོར་དང་།  གཞུང་ངོ་། །དང་པོ་ནི།  དེ་ནས་ཡང་
བཅོམ་ལྡན་འདས་ཀྱིས་ཞེས་སོགས་སོ། །གཉིས་པ་ལ་གཉིས་ཏེ།  སློབ་དཔོན་གྱི་ལས་དང་།  སློབ་མ་གཞུག་ཅིང་དབང་བསྐུར་བའི་ཆོ་གའོ། །དང་པོ་ལ་དྲུག་སྟེ།  དཀྱིལ་འཁོར་བྲི་བའི་གནས།  སའི་ཆོ་ག །ཐིག་བཏབ་སྟེ་བྲི་བ།  ལྷ་དགོད་པ།  མཆོད་པའི་
རྫས་དགོད་པ།  ཞུགས་ཏེ་སྒྲུབ་པའོ། །དང་པོ་ནི།  རིག་པའི་གནས་ལྔ་མཁྱེན་པའི་པཎྜི་ཏའི་གཙུག་ལག་ཁང་དང་།  རྒྱལ་པོའི་སྐྱེ་ཤིང་གི་ར་བ་སྐྱེད་མོས་ཚལ་དང་།  ཕྱི་བྱང་ཆུབ་ཆེན་པོའི་མཆོད་རྟེན་དང་།  ནང་གསུང་རབ་བཞུགས་པའི་ལྷ་ཁང་དང་།  
10-7-21a


དགེ་འདུན་མང་པོ་འདུ་བའི་ཀུན་དགའ་ར་བ་དང་།  སོགས་ཀྱི་སྒྲས་བསྡུས་པ་གྲོང་དང་གྲོང་ཁྱེར་ལ་སོགས་པའོ། །གཉིས་པ་ནི།  ས་ཆོག་བྱ་དགོས་པ་རྣམས་ཀྱི་ཕྱོགས་སུ་རྒྱས་པར་བྱེད་ན།  རྡོ་རྗེ་རྩེ་མོའམ།  གསང་བ་སྤྱི་རྒྱུད་དམ།  
དེ་དག་གི་དོན་བསྡུས་པ་ཀུན་དགའ་སྙིང་པོས་མཛད་པར་གྲགས་པའི་དཀྱིལ་འཁོར་གྱི་ཆོ་ག་རྣམས་ནས་གསུངས་པའི་ཇི་བཞིན་པ་ཡི་ཆོ་ག་ཡིས་གནས་ནི་བྱིན་གྱིས་བརླབ་པའི་ཆོ་ག་ཙམ་མོ། །དེ་ཙམ་བྱ་བ་མ་གྲུབ་ན་ས་ཕྱོགས་དེར་གཏོར་མ་རྒྱས་
པར་བཏང་ལ།  ས་ཕྱོགས་དེ་ན་གནས་པའི་མི་མ་ཡིན་པ་ལ་ཞི་བས་བསླང་།  ཁྲོ་བོའི་སྔགས་ཟློས་ཤིང་།  གུ་གུལ་གྱི་དུད་པ་དང་།  ཡུངས་ཀར་གྱིས་བྲབ་ཅིང་དྲག་པོས་བླང་ངོ་། །ལག་པས་མནན་ལ།  ས་གཞི་ནམ་མཁར་བསྒོམས་ནས་
ཨོཾ་བྷཱུ་ཁཾ་ཞེས་པ་དང་།  ཨོཾ་ཧ་ན་ཧ་ན་ཀྲོ་དྷ་ཧཱུྃ་ཕཊ།  ཞེས་མང་དུ་བཟླས་ཏེ།  དཀྱིལ་འཁོར་ཅི་ཙམ་བྱེད་པའི་ས་གཞི་མཛེས་པར་ག༷་དར་ལེགས་པར་བྱའོ། །ས་ཆོག་བསྡུས་པ་འདི་ནི་བླ་མའི་གསུང་ངོ་། །གསུམ་པ་ལ་གཉིས་ཏེ།  སྤྱིའི་དོན་དང་།  
གཞུང་གི་དོན་ནོ། །དང་པོ་ནི།  སྤྱི་ཆིངས་ལས།  སྤྱིར་དཀྱིལ་འཁོར་ཆེན་པོ་ཐམས་ཅད་ལ་ཆ་ཆེན་བཅུ་དྲུག་བཏབ་ལ།  དེ་ནས་རྩིག་པ་དང་།  འདོད་ཡོན་དང་།  ཕ་གུ་དང་།  དྲྭ་ཕྱེད་དང་།  མདའ་ཡབ་དང་།  དེའི་ཤུགས་ལ་འབྱུང་བ་སྒོ་འགྲམ་
དང་།  ཡ་ཕུབས་དང་།  སྒོ་ཁྱུད་དང་།  སྒོ་ལོགས་དང་།  ཀ་བ་དང་།  རྟ་བབས་སྒོའི་སུམ་འགྱུར་རམ།  བཞི་འགྱུར་གང་མཛེས་དང་།  རྟ་བབས་ནི་གླང་པོ་ཆེའི་རྒྱབ་བམ།  མཆོད་རྟེན་གྱི་དབྱིབས་གང་མཛེས་དང་།  འཁོར་ལོ་དང་།  རི་དྭགས་དང་བཅས་
10-7-21b


པ་རྣམས་ལ་སྒོ་ནི་ཆ་ཆེན་གྱི་ཚད་ཡིན་ལ།  འདོད་ཡོན་དང་།  དྲྭ་ཕྱེད་དང་།  འཁོར་ལོ་རྣམས་ནི་ཆ་ཆུང་གི་ཚད་ཡིན་ཞིང་།  གཞན་རྣམས་ནི་ཆ་ཕྲན་གྱི་ཚད་ཡིན་པར་ཤེས་པར་བྱ་བ་ནི་ཐམས་ཅད་ཀྱི་ཕྱིའི་དཀྱིལ་འཁོར་གྱི་རྣམ་པར་བཞག་པ་ཡིན་ནོ། །ནང་གི་དཀྱིལ་
འཁོར་ནི་ལྷ་སྣམ་ཡོད་པའམ།  མེད་པར་ཤེས་པར་བྱས་ལ།  དེའི་ནང་དུ་འཁོར་ལོའི་རྩིབས་ལྟེ་བ་མུ་ཁྱུད་དང་བཅས་པར་ཤེས་པར་བྱའོ། །ཀུན་རིག་ལ།  ཁྱད་པར་དུ་སྒོ་རྐྱང་དང་སྒོ་སྦྲག་གཉིས་ཀྱི་དབྱེ་བ་ཤེས་པར་བྱ་སྟེ།  དེའང་སྒོ་རྐྱང་ལ་སྦྱར་ན།  སྲད་བུ་བརྒྱད་
དང་ལྡན་པ་དང་། །ཞེས་བྱ་བ་ལ་སོགས་པ་ལ།  སྲད་བུ་བརྒྱད་ནི་ཚངས་ཐིག་གི་ངོས་རེ་རེ་ནས་ཆ་ཆེན་བརྒྱད་བརྒྱད་དོ། །དེ་བས་ན་ཆ་བཅུ་དྲུག་ཏུ་འགྱུར་ཏེ།  འདི་ནི་སྒོ་རྐྱང་སྒོ་སྦྲག་གཉིས་ཀའི་ཐུན་མོང་ངོ་། །ཕྱི་ཡི་སྒོ་ཁྱུད་རྣམས་ཀྱིས་བརྒྱན། །ཞེས་བྱ་བ་
ནི།  སྒོ་ཁྱུད་དང་རྟ་བབས་ལ་སོགས་པ་རྒྱན་རྣམས་བྱའོ། །ཞེས་བྱ་བ་ལ་སོགས་པའི་དོན་ཏོ། །དགུ་ཡི་ཆར་ནི་བགོས་པ་ལས། །ཞེས་པ་ནི།  འཁོར་ལོའི་ལྟེ་བ་ལ་ཐིག་གཉིས་བཏབ་པ་ལས་ལེ་ཚེ་དགུར་བྱས་པ་ཡིན་ནོ། །སྒོ་དང་སྒོ་ཁྱུད་སུམ་ཆར་
བྱ། །ཞེས་བྱ་བ་ནི་དགུ་ཆའི་ཕྱོགས་གཅིག་ན་འཕར་མ་ལེ་ཚེ་གསུམ་ཡོད་ལ།  དེའི་སུམ་ཆ་གཙོ་བོའི་གནས་ལྟ་བུ་གཅིག་དང་།  སྒོ་དང་སྒོ་ཁྱུད་མཉམ་པ་ཡིན་ནོ། །དེའང་ཇི་ལྟར་གདབ་ཞེ་ན་སྒོ་རྐྱང་གི་པཎ་རེག་གི་རྩིག་པ་ཕན་ཚུན་ཐད་ཀར་གདུང་གི་
ཚུལ་དུ་བཏབ་ལ།  དེ་ནས་ལྷ་སྣམ་ཆ་ཆེན་གཅིག་བོར་ལ་ཟླུམ་པོར་བསྐོར།  དེ་ནས་པཎ་རེག་གི་ཚད་གཅིག་མུ་ཁྱུད་དུ་བསྐོར།  དེ་ནས་ཆ་ཕྲན་སུམ་ཆ་བོར་ལ་ཆ་ཆེན་གཉིས་པའི་ཐིག་ལྔ་བསྐོར་ཏེ་ལྟེ་བ་བྱ།  ཆ་ཕྲན་གསུམ་བོར་བ་དེ་ལ་འཁོར་ལོ་རྩིབས་
10-7-22a


བཅུ་དྲུག་ཕྱོགས་རེ་རེར་བཞི་བཞི་བྱ།  དེ་ནས་ནང་གི་ཆ་ཕྲན་གཅིག་ལྟེ་བའི་མུ་ཁྱུད་ལ་བསྐོར་བར་བྱའོ། །ཡང་ལྟེ་བ་ནི་དེ་ཉིད་ཡིན་ལ་འཁོར་ལོ་དང་འཁོར་ལོའི་མུ་ཁྱུད་ལ་ཆ་ཆེན་གཉིས་བཏང་ལ།  ལྷ་སྣམ་གྱི་ལྷ་ཚོགས་རྟ་
བབས་ཀྱི་གཡས་གཡོན་དུ་འགོད་པ་ཡིན་ཏེ།  དེ་ལྟར་ན་འོག་ནས་འབྱུང་བའི་རིམ་པ་གསུམ་དང་ལྡན་པའི་རྩིབས་ནི་ཉིས་འགྱུར་ཉིད་དུ་བྱ། །ཞེས་བྱ་བའི་གཞུང་ཡང་གཙོ་བོ་དང་སྦྱོང་བའི་རྒྱལ་པོ་དང་།  འཁོར་ལོའི་རྩིབས་ཏེ་རིམ་པ་གསུམ་ཡིན་ལ།  
ནང་གི་ལྷའི་ས་གཉིས་ལ་ཆ་ཆེན་གཉིས་འཁོར་ལོའི་རྩིབས་ལ་ཆ་ཆེན་གཉིས་ཡིན་པས་ན་རྩིབས་ནི་ཉིས་འགྱུར་ཞེས་བྱའོ། །སྒོ་སྦྲག་གི་དབང་དུ་བྱས་ནས།  ཕྱི་ཡི་སྒོ་ཁྱུད་རྣམས་ཀྱི་རྒྱན། །ཞེས་འབྱུང་བས་ན་གོང་དུ་བསྟན་པ་རྣམས་ནང་གི་དཀྱིལ་འཁོར་
ཡིན་པར་མངོན་ནོ། །དེ་ལྟར་ཕྱིའི་ཆ་ཆུང་ནི་ནང་གི་ཆ་ཆེན་དུ་བྱ།  ཕྱིའི་ཆ་ཕྲན་ནི་ནང་གི་ཆ་ཆུང་དུ་བྱའོ། །ཕྱིའི་ཆ་ཕྲན་ཕྱེད་ནི་ནང་གི་ཆ་ཕྲན་དུ་བྱས་ལ།  ནང་ན་ཆ་ཆེན་བརྒྱད་ཡོད་པ་དེ་ཕྱེད་ཕྱེད་དུ་བགོས་ཏེ་ཆ་ཆེན་བཅུ་དྲུག་དུ་བཏང་ལ།  རྟ་བབས་དང་བཅས་
པ་ཡོངས་སུ་རྫོགས་པ་ཕྱིའི་དཀྱིལ་འཁོར་བཞིན་བཏབ་ལ།  ནང་གི་སྒོ་རྐྱང་གི་ཐིག་པཎ་རེག་གི་ཐིག་རྒྱ་གྲམ་དུ་བཏབ་པས་ལེ་ཚེ་དགུའི་གདུང་གི་ཐིག་བྱས་ལ།  ཕྱིའི་དཀྱིལ་འཁོར་བཞིན་ལྷ་སྣམ་ཁོང་རང་གི་ཆ་ཆེན་གཅིག་བོར་བའམ་མ་བོར་
ཀྱང་རུང་སྟེ།  སྔ་མ་བཞིན་ལྟེ་བ་འཁོར་ལོའི་ཐིག་བསྐོར་བར་བྱའོ། །རྩིབས་ནི་ཉིས་འགྱུར་ཉིད་དུ་བྱ། །ཞེས་བྱ་བ་ནི་ཕྱི་རོལ་ཏུ་ལྷ་སྣམ་བོར་ན་འཁོར་ལོའི་རྩིབས་ཉིས་འགྱུར་གྱིས་ཆུང་བ་ཡིན་ལ།  མ་བོར་ན་ཉིས་འགྱུར་གྱིས་ཆེ་བ་ཡིན་ནོ། །གཞུང་
10-7-22b


ལྷག་མ་ཐམས་ཅད་ནི་སྒོ་རྐྱང་སྦྲག་ཐམས་ཅད་འདྲ་བ་ཉིད་ཡིན་ནོ་ཞེས་གསུངས་སོ། །གཉིས་པ་གཞུང་དོན་ལ་གཉིས་ཏེ།  མདོར་བསྟན་པ་དང་།  རྒྱས་པར་བཤད་པའོ། །དང་པོ་ནི།  བྱིན་གྱིས་བརླབ་པ་སྟེ།  ས་ཆོག་བྱས་པའི་གནས་དེར་ནི་ཕྱིའི་
དཀྱིལ་འཁོར་བྲི་བར་བྱའོ། །འདི་ལ་དགོངས་ནས་གཉལ་པ་སྟ་གོན་མེད་པར་མཛད་པ་ཡང་འགལ་བ་མེད་དེ་ས་ཆོག་བྱས་མ་ཐག་ཏུ་བྲི་བར་བཤད་པའི་ཕྱིར།  ཁའུ་པ་གཞུང་ན་མེད་ཀྱང་ཤུགས་འབྱུང་མཛད་པ་ལྟར་ནའང་འགལ་བ་མེད་དེ།  སློབ་མ་
ལ་ཆོས་ཟབ་མོ་བཤད་པ་དང་།  སྡོམ་པ་འབོགས་པར་བཤད་པའི་སྐབས་དེ་བཀའ་དང་བསྟན་བཅོས་ཕལ་ཆེར་ནས་སྟ་གོན་དུ་བཤད་པའི་ཕྱིར་རོ། །དེ་ལ་བྱེད་པར་འདོད་ན།  དཀྱིལ་འཁོར་གྱི་ས་བྱི་དོར་ལེགས་པར་བྱས་པའི་སྟེང་དུ་ལྷའི་གནས་ངོ་ཤེས་པར་
བྱ་བའི་ཕྱིར།  ཅི་འགྲུབ་པའི་ཐིག་བཏབ་ལ།  ལྷའི་གནས་རྣམས་སུ་དྲིའི་ཐིག་ལེ་དང་།  མེ་ཏོག་ཚོམ་བུ་བྱས་ལ་མཆོད་གཏོར་རྒྱས་པར་བཤམས་ཏེ།  བདག་གི་རྣལ་འབྱོར་རྫོགས་ནས་མདུན་དུ་འོག་ནས་འབྱུང་བ་བཞིན་ལྷ་བསྒྲུབ་ལ།  ཇི་ལྟར་
འབྱོར་པས་མཆོད་ཅིང་གཏོར་མ་བཏང་ནས་འཆད་པར་འགྱུར་བའི་སློབ་མ་འཇུག་པ་ཡན་ཆད་བྱས་ནས་ཅི་བདེར་གནས་ཏེ།  ནངས་པར་སྤྱན་དྲངས་པའི་དཀྱིལ་འཁོར་གཤེགས་སུ་གསོལ་ནས་དཀྱིལ་འཁོར་བྲི་བ་ལ་འཇུག་པར་བྱའོ། །གཉིས་པ་ནི།  
ཚད་མེད་པ་བཞི་དག་པས་གྲུ་བཞི་པ་ལ་རྣམ་ཐར་བཞི་དག་པས་སྒོ་བཞི་པ།  བསམ་གཏན་བཞི་དག་པས་རྟ་བབས་བཞི་དང་ལྡན་པ་དང་།  སྒོ་ཁང་བཞི་ལ་ཐེམ་སྐས་བཞི་ཡི་ཕྲེང་བ་དང་།  རྟ་བབས་ཀྱི་ཀ་བ་ལ་སེང་གེ་དང་།  བན་གླང་ཆེན་པོ་
10-7-23a


རྣམས་ཀྱིས་བརྒྱན་པ་དང་།  ཁོར་ཡུག་ཏུ་དར་སྣ་ལྔའི་ལྡ་ལྡི་དང་།  དོ་ཤལ་དང་།  དོ་ཤལ་ཕྱེད་པའི་ཕྲེང་བ་དང་།  དྲིལ་བུ་དང་ནི་རྔ་མས་བརྒྱན་ནོ། །སྒོའི་སྟེང་གི་པདྨ་ལ་ཤར་དུ་རྡོ་རྗེ།  ལྷོར་རིན་ཆེན།  ནུབ་ཏུ་པདྨ་དང་།  བྱང་དུ་
རྒྱ་གྲམ་པ་ཡི་ཕྱག་རྒྱས་བརྒྱན་ནོ། །སྲད་བུ་བརྒྱད་དང་ལྡན་པ་ནི།  རྗེ་བཙུན་གྱིས་ཚངས་ཐིག་གི་གཡས་གཡོན་དུ་ཆ་ཆེན་བརྒྱད་བརྒྱད་ཡོད་པ་ལ་གསུངས་ཤིང་།  རྩ་སྐྱ་པས་རེ་མིག་དབུས་མ་ཁྱབ་བྱེད་དུ་བཏང་བའི་རེ་མིག་བརྒྱད་ལ་འཆད།  གཉན་སྟོན་
གྱིས་ཐིག་ཆེན་བརྒྱད་ལ་འཆད་དོ། །ཕྱིའི་སྒོ་ཁྱུད་རྣམས་ཀྱིས་བརྒྱན་པ་ནི་སྒོ་ཁྱུད་དང་རྟ་བབས་ལ་སོགས་པའི་རྒྱན་རྣམས་རྫོགས་པར་བྱ་བའོ། །དགུའི་ཆར་ནི་བགོས་པ་ནི།  ཁའུ་པ་སྤྱིར་འཁོར་ལོའི་ལྟེ་བ་ལ་ལེ་ཚེ་དགུ་བགོས་ནས་ཕྱོགས་རེ་
ལ་གསུམ་གསུམ་ཡོད་པའི་སུམ་ཆ་གཙོ་བོའི་གནས་ལྟ་བུ་དང་།  སྒོ་དང་སྒོ་ཁྱུད་མཉམ་པ་ལ་འཆད་ཅིང་།  རྗེ་བཙུན་ཡང་འདི་ཉིད་འཆད་དོ། །གཉལ་པ་ཕྱི་རོལ་གྱི་ཁོར་ཡུག་ལ་ཆ་ཆེན་གཅིག་དང་།  ཆ་བཅོ་བརྒྱད་དུ་བྱས་པ་ལ་ཟེར་ལ་སྒོ་དང་སྒོ་ཁྱུད་
སུམ་ཆ་ཞེས་བྱ་བ་ནི་དགུ་ཆར་བསྒྱུར་ལ་ཆ་ཆེན་གཅིག་ཡིན་ནོ་ཞེས་ཟེར་བ་འདི་ནི་ནོར་ཏེ།  ཁོར་ཡུག་ནི་ཐམས་ཅད་ལ་དགོས་ཀྱང་ཐིག་གི་ཁོངས་སུ་གཏོགས་པ་མ་ཡིན་པས་ཆ་དགུ་པ་ཡང་མ་ཡིན་ལ།  སུམ་ཆ་དགུ་ཆར་བསྒྱུར་བ་འདི་བདེ་བར་གཤེགས་
པའི་བཀའ་འགོམས་པར་མི་རིགས་སོ། །རྡོ་རྗེའི་སྲད་བུ་ནི་སྲད་བུ་ལ་ཡེ་ཤེས་ལྔའི་ཁམས་ཐིམ་པ་ཡིན་ལ་དེས་ཐིག་གདབ་བོ། །གྲུ་བཞི་པ་དེའི་ནང་དུ་དབུས་ཀྱི་དཀྱིལ་འཁོར་ཟླུམ་པོའི་ཐིག་གདབ་པ་ནི་ཆོས་ཀྱི་འཁོར་ལོ་དང་འདྲ་བར་རྩིབས་
10-7-23b


རྣམས་ཟླུམ་པོར་བྱས་པ་ལ་ལྟེ་བར་བཅས་ཤིང་རྩིབས་ཀྱི་གྲངས་བཅུ་དྲུག་ལ་མུ་ཁྱུད་ཀྱིས་བསྐོར་བའོ། །རྩིབས་ཀྱི་ཁ་དོག་འདིར་དངོས་སུ་མ་གསུངས་ཀྱང་དམ་པ་གོང་མ་རྣམས་སྔོན་པོར་བཞེད་ལ།  རྩ་སྐྱ་པས་ཤེས་རབ་ཀྱི་བསླབ་པ་མཚོན་པས་
སྔོན་པོ་ཡིན་ཞེས་གསུངས་ཀྱང་སེམས་དཔའ་བཅུ་དྲུག་པོ་ཐམས་ཅད་རྡོ་རྗེ་སེམས་དཔའ་ཐུགས་ཀྱི་རིགས་ཡིན་པ་ཀུན་དགའ་སྙིང་པོས་བཤད་པས་དེ་མཚོན་བྱེད་དུ་སྔོན་པོ་མཛད་པར་མངོན་ཏེ།  བདེ་མཆོག་གི་སྐབས་སུ་ཐུགས་ཀྱི་འཁོར་ལོ་སྔོན་
པོར་མཛད་པ་དང་དོན་གཅིག་གོ་སྙམ་དུ་སེམས་སོ། །རང་བཟོ་མཁན་དག་ཞི་བའི་ལས་བསྒྲུབ་པའི་སྐབས་ཡིན་པས་དཀར་པོ་ཡིན་ནོ་ཞེས་ཟེར་བ་ནི་གཞན་ཕན་གནོད་འཇོམས་སུ་བཀག་ཟིན་ཏོ། །དེ་ལྟར་ན་གཙོ་བོ་དང་།  སྦྱོང་རྒྱལ་དང་།  སེམས་
དཔའ་བཅུ་དྲུག་གི་གནས་ཏེ།  རིམ་པ་གསུམ་དང་ལྡན་པ་ལ།  རྩིབས་ནི་ཉིས་འགྱུར་ཉིད་དུ་བྱ་སྟེ་ལྷ་སྣམ་ཆ་ཆེན་གཅིག་བཞག་ན་ཉིས་འགྱུར་གྱིས་ཆུང་བ་དང་།  མ་བཞག་ན་ཉིས་འགྱུར་གྱིས་ཆེ་བའི་དོན་དུ་རྗེ་བཙུན་གྱིས་བཞེད་དོ། །བཞི་པ་ལྷ་
དགོད་པ་ནི།  ལེའུ་དགུའི་དབུས་ཀྱི་ཕྱོགས་སུ་ཀུན་རིག་ནི།  ཁ་དོག་དུང་དང་།  ཀུན་ད་དང་ཟླ་བ་དང་འདྲ་བར་དཀར་ལ།  རྒྱུའི་དུས་སུ་བྱང་ཆུབ་ཀྱི་སེམས།  སྦྱིན་པ།  ཤེས་རབ།  བརྩོན་འགྲུས་བཞི་སྤྱོད་ཅིང་རྫོགས་པས་ཞལ་བཞི་པ་ལ་འབྲུ་འགྲེལ་ལྟར་ན་
ཕྱག་མཚན་རྡོ་རྗེ་འཛིན་པ་དང་།  རྩ་སྐྱ་པས་རྡོ་རྗེ་སྐྱིལ་ཀྲུང་གིས་སེང་གེའི་གདན་ལ་བཞུགས་པ་ཞེས་འཆད་ཀྱང་འདིར་བྱེད་ཚིག་མེད་པས་རྡོ་རྗེས་མཚན་པའི་སེང་གེའི་གདན་ལ་བཞུགས་པའི་དོན་དུ་མངོན་ནོ། །ཕྱག་གཉིས་ཏིང་ངེ་འཛིན་གྱི་ཕྱག་
10-7-24a


རྒྱར་ལྡན་པ།  དང་ནི་སྡུད་པའི་ཚིག་ཡིན་པས་མགྲིན་པ་བག་ཙམ་དགུག །མིག་སྣ་རྩེར་ཕབ།  ལྕེ་རྐན་ལ་སྦྱར་བའོ་ཞེས་རྩ་སྐྱ་པ་བཞེད་དེ།  དབུ་རྒྱན་ལ་སོགས་པ་རྒྱན་རྣམས་ཀུན་གྱིས་བརྒྱན་པར་བྲིའོ། །དེའི་སྤྱན་སྔ་སྟེ་ཤར་
ཕྱོགས་སུ་ངན་སོང་ཀུན་སྦྱོང་བའི་རྒྱལ་པོ་བྲི་བར་བྱ་སྟེ།  གདན་དང་ཞལ་མ་གཏོགས་ཀུན་རིག་དང་འདྲ་ཞིང་།  རྒྱལ་མཆོག་སྐྱེས་བུ་ནི་སྦྱོང་རྒྱལ་གྱི་མིང་གཉིས་པ་ཡིན་པར་རྗེ་བཙུན་བཞེད་ཅིང་།  གང་བ་ནི་མཚན་དཔེས་སྤྲས་པར་རྩ་སྐྱ་པ་བཞེད་དོ། །
ཀུན་རིག་གི་རྒྱབ་ཏུ་སྟེ་ནུབ་ཏུ་ཤཱཀྱའི་རིགས་ཀྱི་དབང་པོ་གཙོ་བོ་འཁོར་ལོས་སྒྱུར་བའི་ཆ་བྱད་ཅན་གྱི་ཐུབ་པ་སེར་པོ་ཆོས་འཆད་ཀྱི་ཕྱག་རྒྱ་ཅན་བྲི་བར་བྱའོ། །ཀུན་རིག་གི་གཡས་ཀྱི་ཕྱོགས་ལྷོའི་ཆར་ནི་རྒྱལ་མཆོག་རིན་ཆེན་སྔོན་པོ་མཆོག་སྦྱིན་དང་།  
ཏིང་ངེ་འཛིན་གྱི་ཕྱག་རྒྱ་ཅན།  གཡོན་གྱི་ཕྱོགས་བྱང་གི་ཆར་ནི་མེ་ཏོག་ཆེར་རྒྱས་ལྗང་གུ་སྐྱབས་སྦྱིན་དང་ཏིང་ངེ་འཛིན་གྱི་ཕྱག་རྒྱ་ཅན་གཉིས་བྲི་བར་བྱའོ། །འདིར་ཇོ་བོ་རྗེའི་གསུང་གི་སྐུ་མདོག་དམིགས་བསལ་
མེད་པ་རྣམས་དཀར་པོ་ཡིན་ནོ་ཞེས་གསུང་ཞིང་།  རྗེ་བཙུན་གྱིས་ཀྱང་ཀུན་རིག་དང་སྦྱོང་རྒྱལ་གཉིས་དཀར་པོ་ཏིང་ངེ་འཛིན་གྱི་ཕྱག་རྒྱ་ཅན་དུ་དངོས་སུ་གསུངས་པའི་ཤུགས་ཀྱིས་རིགས་གཞན་གསུམ་པོ་ཡང་དེ་ལྟར་དུ་གྲུབ་པ་རྒྱུད་ཀྱི་དགོངས་པར་བཞེད་
དོ། །ལོ་ཙ་ན་དང་།  མཱ་མ་ཀཱི་དང་།  དེ་བཞིན་དུ་གོས་དཀར་མོ་དང་།  སྒྲོལ་མ་རྣམས་ནི་རང་གི་རིགས་ཀྱི་མཚན་མ་སྤྱན།  རྡོ་རྗེ།  པདྨ།  ཨུཏྤལ་བཞི་སྟེ།  དེའི་རྣམ་པར་ཤར་ལྷོ་ལ་སོགས་པའི་གྲྭ་ཡི་ཕྱོགས་སུ་ནི་ཀུན་ཏུ་བྲིའོ། །འདི་ནི་ཡུམ་བཞི་པོ་མཚན་
10-7-24b


མའི་གཟུགས་སུ་སྦས་པར་དེ་ཉིད་འདུས་པའི་རྒྱུད་ལས་གསུངས་ཤིང་།  ལོ་ཆེན་དང་།  སྨྲྀ་ཏིས་བཞེངས་པའི་གཙུག་ལག་ཁང་རྣམས་ན་ཡང་དེ་ལྟར་དུ་ཡོད་པ་དང་དོན་གཅིག་པར་མངོན་ནོ། །འཁོར་ལོའི་རྩིབས་ཀྱི་ནང་ནི་ཐམས་ཅད་དུ་རྡོ་རྗེ་སེམས་དཔའ་ལ་སོགས་
པའི་སེམས་དཔའ་ཐུགས་ཀྱི་རིགས་ཡིན་པས་ན་མཆོག །སྐུ་མདོག་དང་ཕྱག་མཚན་སྣ་ཚོགས་སུ་སྤྲུལ་པས་ན་རྫུ་འཕྲུལ་ཆེ་བའི་སེམས་དཔའ་རྣམས་བྱང་ཤར་གྱི་ཕྱོགས་ནས་བརྩམས་སྟེ་གཡས་སྐོར་དུ་གོ་རིམ་བཞིན་དུ་བྲི་བར་བྱའོ། །བྲི་བ་ལ་མཁས་པས་
ལཱ་སྱེ་ལ་སོགས་པའི་མཆོད་པའི་ལྷ་མོ་བརྒྱད་རྩིབས་ཀྱི་ཕྱི་རོལ་གྱི་གྲྭའི་ཕྱོགས་སུ་བྲིའོ། །ནང་གི་སྒོ་ཡི་ཕྱོགས་ནི་བཞི་པོ་ཐམས་ཅད་དུ་རྡོ་རྗེ་ལྕགས་ཀྱུ་ལ་སོགས་པའི་སྒོ་བ་བཞི་པོ་བྲི་བར་བྱའོ། །རྟ་བབས་ཀྱི་ཁྱམས་ཏེ་སྒོ་ཉིས་སྦྲག་ཏུ་བྱེད་ན་དཀྱིལ་
འཁོར་ནང་མའི་རྟ་བབས་ཀྱི་ཁྱམས་དང་།  གཅིག་རྐྱང་དུ་བྱེད་ན།  དཀྱིལ་འཁོར་གྱི་རྟ་བབས་ཀྱི་གཡས་གཡོན་ཐམས་ཅད་དུ་བྱམས་པ་ལ་སོགས་པའི་བྱང་སེམས་བཅུ་དྲུག་བྲི་བར་བྱ་ཞིང་།  དེ་བཞིན་དུ་ཉན་ཐོས་རྒྱལ་བ་བཅུ་དྲུག་པོ་ཐམས་ཅད་དང་།  
རང་རྒྱལ་གཙོ་བོ་བཅུ་གཉིས་པོ་རྣམས་དང་།  ཁྲོ་བོ་མངགས་པ་ཕོ་ཉ་ལ་སོགས་པ་བཅུ་དྲུག་པོ་རྣམས་སྐུ་ཡོངས་སུ་རྫོགས་པ་བྲི་བར་བྱ་བའམ་ཡང་ན་མིང་ཙམ་ཡང་རུང་ངོ་། །གཞན་ཕན་ཉེར་མཁོ་ལས་བྱང་སེམས་བཅུ་དྲུག་སོགས་སྒོ་ཉིས་
བརྩེགས་སུ་བྱེད་ན་ནང་མའི་ཁྱམས་སུ་དགོད་ལ།  སྒོ་རྐྱང་དུ་བྱེད་ན་ཡང་ལྷ་སྣམ་ཆེ་བར་བྱས་ལ་རིམ་པ་གཉིས་སུ་བྱ།  ནང་མ་ལ་རྩ་བའི་ལྷ་སོ་བདུན།  ཕྱི་མ་ལ་མགྲོན་ཐབས་ཀྱི་ལྷ་དྲུག་ཅུ་དགོད་ཅེས་གསུང་ངོ་། །ཡང་ཅེས་པའི་སྒྲས་ནི།  སྤྱི་
10-7-25a


ཆིངས་ལས་ཡང་ལྟེ་བ་ནི་དེ་ཉིད་ཡིན་ལ།  འཁོར་ལོ་དང་འཁོར་ལོའི་མུ་ཁྱུད་ལ་ཆ་ཆེན་གཉིས་བཏང་ལ།  ལྷ་སྣམ་གྱི་ལྷ་ཚོགས་རྟ་བབས་ཀྱི་གཡས་གཡོན་དུ་དགོད་པ་ཡིན་ཏེ་ཞེས་གསུངས་པ་སྡུད་དེ།  ལུགས་གཉིས་
འདམ་ཁ་ཅན་དུ་བཞེད་པར་མངོན་ནོ། །ཕྱིའི་དཀྱིལ་འཁོར་གྱི་ཕྱི་རོལ་ཁོར་ཡུག་ཏུ་གླིང་བཞི་པོ་ནི་བྲི་བར་བྱའོ། །ལྷོར་འཛམ་བུ་གླིང་དུ་ཚངས་པ་སེར་པོ་པདྨ་ཐོགས་པ།  ཆུང་མ་ཚངས་མ་དབྱངས་ཅན་གཉིས་འཁོར་ཚངས་པ་བརྒྱད་དང་བཅས་པ་
བྲིའོ། །བྱང་སྒྲ་མི་སྙན་དུ་ནི་དབང་ཕྱུག་ཆེན་པོ་མདུང་རྩེ་གསུམ་ཐོགས་པ།  འཁོར་ཆུང་མ་བརྒྱད་དེ་ཨུ་མ་སྔོ།  གྷ་གྷ་དཀར།  ཡ་མ་ན་ལྗང་།  དམར་མོ་སེར།  འཇིགས་བྱེད་མ་དཀར།  ལྗང་གི་ལྷ་མོ་དམར།  སྟོབས་བཟང་མ་དཀར།  ཀུ་མཱ་རི་
དམར་སྐྱ་བདེ་བའི་ལག་ཆ་འཛིན་པ་བྲིའོ། །ཤར་གྱི་ལུས་འཕགས་གླིང་དུ་ནི།  བརྒྱ་བྱིན་སེར་པོ་གླང་པོ་ཆེ་ལ་ཞོན་པ་རྡོ་རྗེ་འཛིན་པ།  ཐིག་ལེ་འཛིན་ཤ་རྩི་དང་།  ཐིག་ལེ་མཆོག་གཉིས་དཀར་མོའོ། །ནུབ་བ་གླང་སྤྱོད་དུ་ནི།  གཏོགས་འདོད་
སྟེ་ཁྱབ་འཇུག་སྔོན་པོ་བཙུན་མོ་ནོར་རྒྱུན་མ་དང་།  དབྱངས་ཅན་གཉིས་དཀར་སེར་ཏེ་ཐམས་ཅད་ཀྱང་འཁོར་དང་བཅས་ཏེ་བྲི་བར་བྱ་བའི་དོན་ནི་བཤད་ཟིན་ཏོ། །བཞི་པོ་ལས་གཞན་དག་ཀྱང་ནི་དེ་བཞིན་དུ་ཁོར་ཡུག་ཏུ་བྲི་བར་བྱ་སྟེ།  ནུབ་ཕྱོགས་
སུ་ལྷ་མ་ཡིན་གྱི་དབང་པོ་ཐགས་བཟངས་རིས་སྔོན་པོ་འཁོར་དང་བཅས་པ།  ཤར་ཕྱོགས་སུ་དྲི་ཟའི་རྒྱལ་པོ་ཟུར་ཕུད་ལྔ་པ་ཆུང་མ་གཉིས།  ཕོ་ཉ་གཉིས་ཏེ་བཞི།  བྱང་སྟོད་དུ་ནམ་མཁའ་ལྡིང་གི་རྒྱལ་པོ་གསེར་མིག་ཅན་ཆུང་མ་དང་བཅས་པ་
10-7-25b


ཕྱག་བཞི་གཡས་གཉིས་ན་གནྡྷེ་དང་བགྲང་ཕྲེང་།  གཡོན་གཉིས་པདྨ་དང་མཆོག་སྦྱིན།  བྱང་ཕྱོགས་སུ་གནོད་སྦྱིན་ནོར་བུ་བཟང་པོ་ལ་རྒྱལ་བ་ཁྱུ་མཆོག་དང་།  ཡང་དག་ཤེས་དང་།  ལྔས་རྩེན་གྱིས་བསྐོར་བ་ནེའུ་ལེ་དང་བི་ཛ་པུ་ར་འཛིན་པ་སེར་
པོའོ། །ལྟོ་འཕྱེ་ནི་ནུབ་ཏུ་ཀླུའི་རྒྱལ་པོ་སྦྲུལ་མགོ་བདུན་པ་དང་།  མིའམ་ཅིའི་རྒྱལ་པོ་ལྗོན་པ་རྟ་མགོ་ཅན་ནོ། །སྲིན་པོ་ཆེ་ནི་ལྷོ་ནུབ་ཏུ་སྲིན་པོ་ནག་པོ་མི་ལ་ཞོན་པའོ། །འབྱུང་པོ་ནི་བྱང་ཤར་དུ་དབང་ཕྱུག་དཀར་པོ་གླང་ལ་ཞོན་པ་རྩེ་གསུམ་
འཛིན་པའོ། །ཡི་དྭགས་ནི་འཆི་བདག་ནག་པོ་སྟེ་མ་ཧེ་ལ་ཞོན་པ་དབྱིག་པ་ཅན་ནོ། །ཀླུ་ནི་ཀླུ་ཆེན་བརྒྱད་དེ་ཁོར་ཡུག་གི་ནུབ་ཕྱོགས་སུ་བྲི་ཞིང་ཁ་དོག་དང་ལག་ཆ་ནི་འོག་འཇིག་རྟེན་པའི་སྐབས་སུ་འབྱུང་ངོ་། །གྲུལ་བུམ་རླིག་པོ་ཆེ་ཕོ་ཉ་མོ་
དང་བཅས་པ་ནག་པོ་དང་།  རི་རྣམས་དང་ཞེས་པས་ནི་རི་བརྒྱད་སྟོན་ནོ། །ཕྱོགས་བཞིར་རྒྱལ་པོ་བཞི་བྲི་བར་བྱ་ཞིང་གཟའ་བརྒྱད་དང་སྐར་མ་གཞན་རྣམས་དང་།  རྒྱུ་སྐར་ཉེར་བརྒྱད་ཕྱོགས་རེར་བདུན་བདུན་ཏེ་དེ་དག་གི་ཕྱག་མཚན་ཡང་འོག་
ཏུ་འབྱུང་ངོ་། །ཁྲོ་བོ་ནི་ཤར་དུ་གདོན་གྱི་བདག་པོ་སྔོ་སྐྱ།  མ་རུངས་འཚེ་བ་ནི།  ལྷོར་རྡོ་རྗེ་མཆུ་དང་།  རྡོ་རྗེ་སྤྲིན་གཉིས་སྨུག་པོ།  ནུབ་དུ་སྤྲིན་གྱི་སྒྲོལ་མ་དམར་མོ་རྡོ་རྗེ་རྩེ་གསུམ་དང་སྡིགས་མཛུབ་མཛད་པའོ། །བགེགས་ཀྱི་རྒྱལ་པོ་བྱི་ན་
ཡ་ག་ནི་གླང་སྣ་དཀར་པོ་གཡས་བགྲང་ཕྲེང་དང་ལ་ཕུག །གཡོན་དགྲ་སྟྭ་དང་ལ་དུའི་སྣོད་འཛིན་པའོ། །གོང་དུ་བཤད་པ་དེ་རྣམས་ཀྱང་སངས་རྒྱས་ཀྱི་ཡེ་ཤེས་ཉིད་གདུལ་བྱའི་དོན་དུ་དེ་དང་དེའི་སྐུར་སྟོན་པས་ན་སེམས་ཅན་ཀུན་ལ་ཕན་
10-7-26a


པར་བྱེད་པ་སྟེ།  འདིས་ནི་འཇིག་རྟེན་པ་རང་རྒྱུད་པར་འདོད་པ་བཀག་གོ།  དྲང་སྲོང་སྐལ་པ་ཆེན་པོ་རྣམས་ཀྱི་གཟུགས་ནི་ཤར་ལྷོར་རྒྱས་པ་དང་།  གར་མཁན་གྱི་བུ་ལ་སོགས་པ་ཅི་རིགས་པར་བྲི་བར་བྱ་སྟེ།  སྐུ་མདོག་དང་ལག་ཆ་ལ་ངེས་པ་མེད་དོ། །ཕྲ་མེན་མ་
ནི།  ལྷོ་ནུབ་ཏུ་གཽ་རཱི་དང་ཙཽ་རཱི་དང་།  མ་ཏཾ་ཀི་ལ་སོགས་པ་ཅི་རིགས་པར་བྲིས་ཏེ།  ཁ་དོག་དང་ལག་ཆ་ལ་ངེས་པ་མེད་དོ། །བུད་མེད་ནི་ཙ་མུནྜི་དང་།  རིའུ་ཏི་མ་ལ་སོགས་པ་གཞུང་གང་ཡང་རུང་བ་ནས་འབྱུང་བ་བཞིན་བྲིའོ། །དེ་བཞིན་དུ་ནུབ་བྱང་དུ་སྲིང་མོ་བཞི་ནི་འདོད་པ་མ་ནག་
མོ།  ཕག་མོ་དཀར་མོ་རྡོ་རྗེ་ཐོད་པ་འཛིན་པའོ། །ཐོད་པ་མོ་དམར་མོ་ལྕགས་ཀྱུ་འཛིན་པ།  གྲུབ་མ་ལྗང་ཁུ་བགྲང་ཕྲེང་འཛིན་པ།  དེའི་རྩར་མིང་པོ་གསུམ་རྒྱལ་བར་བྱེད་པ་ལྗང་ཁུ་དྲིལ་བུ་འཛིན་པ།  སྦྲང་རྩིར་བྱེད་པ་དཀར་པོ་ལྕགས་ཀྱུ་
འཛིན་པ།  དོན་ཀུན་གྲུབ་པར་བྱེད་པ་དམར་པོ་ལྕགས་སྒྲོག་འཛིན་པའོ། །བྱང་ཤར་དུ་རྣལ་འབྱོར་མ་བཞི་ནི་སྲིན་མོ་ནག་མོ་ཐོད་པ་འཛིན་པ།  བེ་ཅོན་མ་དཀར་མོ་བེ་ཅོན་འཛིན་པ།  མཚན་མོ་ནག་མོ་དགྲ་སྟྭ་འཛིན་པ།  གནོད་སྦྱིན་མ་ནག་མོ་མཆེ་
བ་འཛིན་པའོ། །འབྱུང་བ་བཞིའི་ལྷ་ཆེན་པོ་ནི།  སའི་ལྷ་མོ་སེར་མོ་བུམ་པ་འཛིན་པ།  ཆུ་ལྷ་དཀར་པོ་ཞགས་པ་འཛིན་པ།  མེ་ལྷ་དམར་པོ་ར་ལ་ཞོན་པ།  རླུང་ལྷ་ལྗང་ཁུ་ཤ་བ་ལ་ཞོན་པའོ། །ཁྱིམ་གྱི་ལྷ་ནི།  ཕྱུག་ལྷ་གླང་ཞོན་དཀར།  
ལམ་གྱི་ལྷ་རྟ་ཞོན་ཁྲམ་ཐོགས་སྔོ།  ཁྱིམ་ལ་བརྟེན་པ་དམར་སྐྱའོ། །རི་ལ་གནས་པ་ནི་རིའི་ལྷའོ། །ཤིང་ལྷ་ནི་ཤིང་གསེབ་ན་ལྗང་།  ཀུན་དགའི་ལྷ་ནི་སྐྱེད་ཤིང་གསེབ་ན་དམར།  ལྗོངས་ཀྱི་ལྷ་ནི་ལྗོངས་ཆེན་པོ་ལ་བརྟེན་པ་ནི་སོགས་ཀྱིས་
10-7-26b


བསྡུས་པའོ། །དུར་ཁྲོད་ན་གནས་པ་ནི་འདྲེ་ནག་པོའོ། །གྲོང་ཁྱེར་ན་གནས་པ་ནི་གྲོང་ན་གནས་པའོ། །དེ་རྣམས་ཀྱི་སྐུ་ཕྱག་རྒྱ་ཆེན་པོའམ།  མིང་ངམ།  བརྡ་སྟེ་ཚོམ་བུའམ།  ཡང་ན་ནི་ཐིག་ལེ་རྣམས་ཀྱང་བྲི་བར་བྱའོ། །ལྔ་པ་མཆོད་པའི་རྫས་དགོད་པ་
ནི།  དེ་ནས་མཁས་པས་དཀྱིལ་འཁོར་ལ། །ཞེས་སོགས་སོ། །གཞན་རྣམས་ནི་གོ་སླ་ལ།  བརྒྱད་དམ་བཅུ་དྲུག་ལྷག་ཀྱང་རུང་། །ཅེས་པས་མཆོད་བུམ་དང་།  བུམ་པ་ལྔ་ནི་བཞག་པར་བྱ། །ཞེས་པས་དབང་བུམ་དང་།  མར་མེ་གཏོར་མ་བུམ་པ་དང་། །
ཞེས་པའི་བུམ་པས་ནི་ཉེ་བར་མཁོ་བའི་བུམ་པ་བསྟན་ནོ། །གནོད་སྦྱིན་སྲིན་པོའི་ཁ་ཟས་སུ། །གཏོར་མ་རྣམ་པ་སྣ་ཚོགས་བཞག །ཅེས་པས་བགེགས་གཏོར་དང་།  འབྱུང་པོ་དག་དང་ཅེས་པས་ནི་ཕྱོགས་སྐྱོང་སོགས་སྤྱིར་བསྟན་ལ།  ཀླུ་དག་དང་
ཞེས་སོགས་ཀྱིས་འབྱུང་པོའི་གཏོར་མ་བསྟན།  རྣམ་རྒྱལ་བུམ་པ་ནི་གོ་སླའོ། །དྲུག་པ་ཞུགས་ཏེ་བསྒྲུབ་པ་ལ་བཞི་སྟེ།  སློབ་དཔོན་བདག་ཉིད་དཀྱིལ་འཁོར་གྱི་སྒོ་དྲུང་དུ་འདུག་པ།  ཡེ་ཤེས་སེམས་དཔའ་སྤྱན་དྲངས་ཏེ་བསྒྲུབ་པ།  མཆོད་པ་
དང་བསྟོད་པ།  གཏོར་མ་གཏོང་བའོ། །དང་པོ་ནི།  མཆོད་གཏོར་སོགས་བཤམས་ཟིན་པའི་རྗེས་དེ་ནས།  ཁྲུས་དང་ལ་སོགས་པས་ཆས་གོས་ཀྱིས་བརྒྱན་པར་བྱས་ལ་དྲི་ཞིམ་པོས་བྱུགས་པ་དང་།  མེ་ཏོག་གི་ཕྲེང་བ་མཆོག་གི་ཕྲེང་བ་ཅན་དུ་བྱས་
པ་དང་།  དྲི་ཞིམ་པོའི་ཆུས་ཁ་བཀང་སྟེ་མཆོག་ཏུ་མཛེས་པར་བྱས་ནས་རྡོ་རྗེ་འཛིན་མའི་སྔགས་དང་ཕྱག་རྒྱས་དཀྱིལ་འཁོར་གྱི་ཁང་པར་ཞུགས་ནས་ཀྱང་མེ་ཏོག་ཐོགས་ཏེ།  དཀྱིལ་འཁོར་གྱི་ཤར་སྒོའི་ཕྱོགས་སུ་འདུག་གོ།  འདིར་སྣུར་པ་བྲིས་
10-7-27a


པའི་རྗེས་དེ་ཉིད་ལ།  དཀྱིལ་འཁོར་མ་བསྒྲུབས་པར་འཇུག་པའི་ཆོས་རྣམས་ལེན་ནོ་ཞེས་ཟེར་དེ་ནི་མི་འཐད་དེ།  དཀྱིལ་འཁོར་མ་བསྒྲུབས་པར་འཇུག་པ་ལ་དོན་མེད་པའི་ཕྱིར་དང་།  འཁོར་ལོས་སྒྱུར་བའི་སྐབས་ནས་ཀྱང་།  དེ་
ནས་སྔགས་མཁན་བདག་ཉིད་ཀྱིས། །སྤྱན་དྲངས་བདག་ཉིད་འཇུག་པར་བྱ། །བདག་ཉིད་ལ་ནི་དབང་ཡང་བསྐུར། །ཞེས་འབྱུང་བ་དང་འགལ་བའི་ཕྱིར་རོ། །དེས་ན་ཁའུ་པ།  སྒྲུབ་མཆོད་བྱས་ནས་འཇུག་པ་ལེན།  འོ་ན་འདིར་རྡོ་རྗེ་འཛིན་མས་ཞུགས་ཅེས་པ་
དང་མི་འགལ་ལམ་ཞེ་ན།  དེ་ནི་དཀྱིལ་འཁོར་གྱི་སྒོ་དྲུང་དུ་ཕྱག་རྒྱ་བཅས་ཏེ་འདུག་པ་ཙམ་ལ་དགོངས་ཞེས་གསུངས་པ་འདི་ཉིད་འཐད་པའི་ཕྱོགས་ཡིན་ནོ། །གཉིས་པ་ནི།  གཙོ་བོ་རྒྱལ་བ་སྲས་ཀྱི་འཁོར། །ཞེས་སོགས་ཏེ།  རྒྱུད་འདིར་མདུན་བསྐྱེད་
བསྒྲུབ་པའི་གོང་དུ་བདག་བསྐྱེད་དངོས་སུ་མ་གསུངས་ཀྱང་།  འོག་རས་བྲིས་ཀྱི་སྐབས་སུ།  བདག་གི་དེ་ཉིད་དྲན་བྱེད་ཅིང་། །ཅེས་པས་བདག་བསྐྱེད་ཟིན་ལ།  འོག་ནས་སྔགས་མཁན་ཞེས་པས་ཀྱང་བདག་བསྐྱེད་བསྟན་པས་མཆོད་པ་བྱིན་དབབ་
སྔོན་དུ་སོང་ནས།  བདག་བསྐྱེད་རྒྱས་བསྡུས་གང་རུང་བསྒོམས་ཏེ།  སྟ་གོན་མ་བྱས་ན་སྐབས་འདིར་བུམ་པའི་བཟླས་པ་ཡང་བྱས་ལ་མདུན་བསྐྱེད་བསྒྲུབ་པ་ལ་འཇུག་གོ།  འདིར་རྒྱས་བསྡུས་གཉིས་ལས།  རྒྱས་པར་བྱེད་ན་ཤཱུ་ཉ་ཏཱའི་སྔགས་ཀྱིས་
དཀྱིལ་འཁོར་སྟོང་པར་བསམས།  ཨོཾ་བྷ་ཞེས་པས་འབྱུང་བ་རིམ་བརྩེགས་ཀྱི་སྟེང་དུ་གཞལ་ཡས་ཁང་གདན་བཅས་བསྐྱེད་ནས་བརྟེན་པ་ལྷ་རྣམས་སྙིང་པོ་ཚིག་ཙམ་གྱིས་བསྐྱེད་པའམ་སྤྲོ་བསྡུ་ལས་བསྐྱེད་པ་གང་རུང་བྱའོ། །བསྡུས་པ་ནི།  
10-7-27b


བྲིས་པའི་དཀྱིལ་འཁོར་ཉིད་ལ་ཡེ་ཤེས་པ་སྤྱན་འདྲེན་པ་སྟེ་རྒྱུད་ཀྱི་དངོས་བསྟན་ལ་འདི་ཉིད་གསལ་ལོ། །གང་ལྟར་ཡང་འདི་མན་ཆད་འདྲ་བ་ཉིད་ཡིན་པས་སྤྱན་དྲང་ཞེས་པ་བཤད་པའི་གཞིར་བཞག་ནས་གང་ན་གཙོ་བོ་ནི་རྩ་བའི་ལྷ་སོ་བདུན།  སྲས་
ནི།  མགྲོན་ཐབས་ཀྱི་ལྷ།  འཁོར་ནི་འཇིག་རྟེན་པའོ། །རྩ་སྐྱ་པས་ནི་གཙོ་བོ་ནི་ཀུན་རིག །རྒྱལ་བ་དེ་བཞིན་གཤེགས་པ་བཞི།  སྲས་ནི་ཡུམ་བཞི་ནས་སྒོ་བཞིའི་བར།  འཁོར་ནི་བསྐལ་བཟང་ཉན་རང་།  མང་པོ་རྣམས་ནི་ཁོར་ཡུག་གི་འཇིག་རྟེན་པའི་ལྷ་
གྲངས་མང་བའོ་ཞེས་བཤད་དེ་སྤྱན་དྲངས་པའོ། །རྣལ་འབྱོར་གང་གིས་ན་རྡོ་རྗེ་བསྡུ་བའི་ཕྱག་རྒྱ་དང་།  སྔགས་དང་སྒྲུབ་པ་པོ་འདི་ཉིད་ལྡན་ཞིང་རྡོ་རྗེ་ལྕགས་ཀྱུ་ལ་སོགས་པ་སྤྲོ་བའི་རྣལ་འབྱོར་གྱིས་སོ། །རྡོ་རྗེ་བསྡུ་བའི་སྔགས་ནི།  ཛཿཧཱུཾ་བཾ་ཧོཿས་ཐུགས་རྗེའི་
བདག །ཚུར་གཤེགས་ཞེས་ནི་བརྗོད་ནས་ཀྱང་། །ཞེས་པ་སྟེ།  ཤཱཀ་ཐུབ་ཀྱི་སྐབས་ནས་འབྱུང་བའི་སྔགས་དེ་ཉིད་དོ། །ལྕགས་ཀྱུ་སོགས་ཀྱི་ཕྱག་རྒྱ་གང་ཞེ་ན།  གསང་བའི་བཅིང་བ་བཅིངས་ནས་ནི། །ཞེས་སོགས་ཏེ།  དགུག །གཞུག །བཅིང་།  དབང་དུ་
བྱས་ནས་རིགས་གསུམ་སྤྱིའི་ཕྱག་རྒྱས་བྱིན་གྱིས་བརླབ།  ཕྱག་རྒྱ་བཞིས་རྒྱས་གདབ་པ་ནི།  དཀྱིལ་འཁོར་བསྒྲུབ་པ་སྟེ།  དམ་ཚིག་པ་ལ་ཡེ་ཤེས་པ་འཇུག་པ་དེ་ནས་རས་བྲིས་ཀྱི་སྐབས་ནས་བསྟན་པའི་མཚན་མ་སྐྱེས་ནས་ནི།  ཆོས་ཀྱི་དབྱིངས་
ཐོག་མར་མཐོང་བ་ནས།  ཐ་མ་རྫོགས་ཀྱི་བར་མངོན་སུམ་དུ་མཐོང་བར་འགྱུར་རོ། །གསུམ་པ་ནི།  ཨརྒྷཾ་ནི།  མཆོད་ཡོན་ཏེ།  དེས་མཚོན་པའི་མེ་ཏོག་ལ་སོགས་པ་ལྔ་མི་རྟོག་པས་ཟིན་པས་མཆོག་ཏུ་བརྟགས་པའོ། །གསང་བ་ནི་ལྷ་མོ་བརྒྱད།  
10-7-28a


སོགས་ཀྱི་སྒྲས་བསྡུས་པ་ནི།  རྡོ་རྗེ་རྩེ་མོ་བཞིན་ངོ་མཚར་བའི་མཆོད་པ་བཅོ་བརྒྱད་དང་།  འདི་ཉིད་ནས་འབྱུང་བའི་མཆོད་པ་ཉི་ཤུ་རྩ་ལྔའོ། །དབྱངས་སྙན་པའི་བསྟོད་པ་ནི་མཚན་བརྒྱ་རྩ་བརྒྱད་པའམ།  དཀྱིལ་ཆོག་རྣམས་ནས་
འབྱུང་བའི་ལྷ་སོ་སོའི་མཆོད་བསྟོད་ཅི་ནུས་པའོ། །ལྷ་རྫས་མཆོག་གི་དམ་པ་ནི།  རིན་ཆེན་སྣ་བདུན་དང་།  འདོད་ཡོན་ལྔའོ། །བཞི་པ་ནི།  ཕྱོགས་ན་གནས་པ་རྣམས་ལ་རྣམ་པར་བརྟག་ཅེས་པ་ཡར་དྲངས་ཏེ་ཕྱོགས་སྐྱོང་གི་གཏོར་མ་དང་།  
དེ་ནས་འབྱུང་པོ་ཀུན་གྱི་གཏོར་མ་བྱ། །ཞེས་པས་འབྱུང་པོའི་གཏོར་མ་སྔར་བཤད་པའི་བགེགས་གཏོར་དང་གསུམ་པོ་དེའི་གཏོར་མ་དཔུང་བཟངས་ལ་སོགས་པ་ནས་བཤད་པ་ལྟར་མཐུན་པར་བྱའོ། །སེམས་ཅན་བཀྲེས་ཤིང་སྐོམ་ལ་བཏུང་བ་
དང་། །ཞེས་པ་ནི་རིགས་དྲུག་དང་།  ཡི་དྭགས་ཀྱི་གཏོར་མའོ། །གཉིས་པ་སློབ་མ་འཇུག་ཅིང་དབང་བསྐུར་བ་ལ་གཉིས་ཏེ།  མདོར་བསྟན་པ་དང་རྒྱས་པར་བཤད་པའོ། །དང་པོ་ནི།  སྐབས་འདིར་སློབ་དཔོན་བདག་ཉིད་འཇུག་ཅིང་དབང་བླང་བ་མ་
གསུངས་ཀྱང་།  འོག་ཕྱོགས་སྐྱོང་དང་།  ཚེ་དཔག་མེད་དང་།  འཁོར་ལོས་སྒྱུར་བའི་སྐབས་ནས་འབྱུང་བ་ལྟར་བདག་ཉིད་འཇུག་ཅིང་དབང་བླང་།  མདུན་བསྐྱེད་ལ་དམིགས་པའི་བཟླས་པ་དང་།  བདག་མདུན་ཐ་མི་དད་དུ་བསྒྲུབ་པའི་རྗེས་དེ་ནས་
སྔགས་པ་རྡོ་རྗེ་སློབ་དཔོན་གྱིས་བླ་ན་མེད་པའི་བྱང་ཆུབ་ཀྱི་སེམས་ས་བཅུ་གཅིག་པ་འབྱུང་བའི་གནས།  དཀྱིལ་འཁོར་དུ་སློབ་མ་རྣམས་ཡོངས་སུ་སྨིན་པར་བྱའོ། །གཉིས་པ་ལ་གཉིས་ཏེ།  འཇུག་པ་དང་།  དབང་ངོ་། །དང་པོ་ལ་སློབ་མ་ལྷག་པར་
10-7-28b


གནས་པ།  སེམས་བསྐྱེད་པ།  སློབ་མ་འཇུག་པ།  དམ་ཚིག་བསྒྲག་པ་སྔོན་དུ་སོང་ནས་སྡོམ་པ་འབོགས་པ་གསུམ་དུ་གསུངས་ཀྱང་།  གཞན་ཕན་འོད་ཟེར་ལས་འཇུག་པའི་ཆོས་བཅུ་བདུན་གསུངས་པ་ལྟར་བཤད་ན།  སེམས་བསྐྱེད་གཙོ་བོར་གྱུར་
པའི་རྒྱུན་བཤགས་བྱ་བ་དང་།  བྱིན་གྱིས་བརླབས་པ་དང་།  སྨོན་ལམ་གདབ་པ་དང་།  ཟབ་མོའི་ཆོས་བཤད་པ་དང་།  བསྲུང་བ་བྱ་བ་དང་།  གདོང་གཡོགས་བཅིང་བ་དང་།  ཕྱག་རྒྱ་བཅིངས་ནས་འཇུག་པ་དང་།  ཡེ་ཤེས་དབབ་པ་དང་།  དམ་ལ་བཞག་པ་
དང་།  མེ་ཏོག་དོར་བ་དང་།  མགོ་ལ་བཅིང་བ་དང་།  གདོང་གཡོགས་དབྱེ་བ་དང་།  དཀྱིལ་འཁོར་བསྟན་པ་དང་།  དམ་ཚིག་བསྐྱེད་པ་དང་།  དམ་ཚིག་བརྟན་པར་བྱ་བ་དང་།  དམ་ཚིག་བསྒྲག་པ་དང་།  སྡོམ་པ་སྦྱིན་པ་དང་བཅུ་བདུན་ལས།  དང་པོ་ནི།  འགྲོ་ལ་ཕན་ཕྱིར་མྱུར་
དུ་བྱང་ཆུབ་བར་ཞེས་པ་སྟེ་རྡོ་རྗེ་འབྱུང་བ་ལྟར་རྒྱུན་བཤགས་སྔོན་དུ་འགྲོ་བའི་སེམས་བསྐྱེད་པ་དང་ནང་གི་སེམས་བསྐྱེད་པ་དང་།  རིགས་ལྔའི་སྡོམ་པ་གཟུང་བ་རྣམས་སོ། །གཉིས་པ་ནི།  དེ་རྣམས་བྱིན་བརླབ་ཞེས་པ་སྟེ།  རིགས་གསུམ་
སྤྱིའི་ཕྱག་རྒྱས་བྱིན་གྱིས་བརླབ་པ་དང་།  ཨོཾ་བཛྲ་ཨ་དྷི་ཏིཥྛ་ཞེས་སོགས་དང་།  རྡོ་རྗེ་ཁུ་ཚུར་གཉིས་ཀྱིས་གནས་ཉི་ཤུ་རྩ་གཉིས་སུ་བྱིན་གྱིས་བརླབ་པའོ། །གསུམ་པ་ནི།  བྱང་ཆུབ་སྨོན་ལམ་གདབ་ཅེས་པ་སྟེ།  བདག་གིས་དགེ་བའི་
རྩ་བ་འདིས་ཞེས་སོགས་སོ། །བཞི་པ་ནི།  ཟབ་ཅིང་རྒྱ་ཆེ་བའི་ཆོས་བསྒྲགས་ལ་ཞེས་པ་སྟེ།  རྣམ་སྣང་མངོན་བྱང་ལས་འབྱུང་བ་བཞིན།  འཇིག་རྟེན་དུ་ནི་ཀུན་མཁྱེན་དག །ཞེས་སོགས་སོ། །ལྔ་པ་ནི།  བསྲུང་བ་བྱས་ནས་ཞེས་པ་སྟེ།  
10-7-29a


མེ་ལྟར་འབར་བའི་སྔགས་དང་།  ཕྱག་རྒྱས་ལན་གསུམ་བསྲུང་བའོ། །ས་ཆོག་གི་རྗེས་སུ་བྲི་བ་མ་གྲུབ་ན་སྟ་གོན་བྱེད་པར་གསུངས་པ་ལྟར་ན་ནུབ་སྔ་མ་ལ་བྱེད་དགོས་པས།  སོ་ཤིང་།  ཀུ་ཤ།  སྲུང་སྐུད་གསུམ་འདིས་
ཟིན་ཏོ། །དྲུག་པ་ནི།  སློབ་མ་མི་དགེ་བ་བཅུ་སྤངས་པའི་བརྟུལ་ཞུགས་ཀྱི་སྡོམ་པ་ལ་གནས་པ་སེམས་བསྐྱེད་པས་རབ་ཏུ་ཞི་བ་དེ་རང་གི་ཁ་ནས་སྔགས་བརྗོད་པའི་སྒོ་ནས་དཀྱིལ་འཁོར་དུ་གཞུག་པར་བྱ་ཞེས་མདོར་བསྟན་ནས།  ཐོག་མར་
དར་རམ།  རས་ལ་སོགས་པས་མིག་གཉིས་གཡོགས་ནས་ནི་ཞེས་པའོ། །བདུན་པ་ནི།  རྡོ་རྗེ་འཛིན་པ་དཔལ་གྱི་ལག་གཉིས་བྱ། །ཞེས་པ་སྟེ།  དེའི་སྔགས་ནི།  ཨོཾ་བཛྲ་ཨ་དྷི་ཏིཥྛ་ཧཱུྃ།  ཞེས་པའོ། །མེ་ཏོག་རིན་ཆེན་ལ་སོགས་པས་སློབ་མའི་
ལུས་དེ་བརྒྱན་ལ།  བླ་མ་ལ་འབུལ་བའི་ཡོན་གྱིས་ལག་པ་བཀང་སྟེ་གཞུག་པར་བྱ།  དེའི་སྔགས་ནི།  ཨོཾ་བཛྲ་ས་མ་ཡ་ཧཱུཾ་ཞེས་པའོ། །བརྒྱད་པ་ནི།  ཨོཾ་བཛྲ་པྲ་བྷེ་ཤ་ཡ་ཧཱུཾ་ཞེས་པ་སྟེ།  རྡོ་རྗེ་ཕོབ་ཤིག་ཅེས་པའི་དོན་ནོ། །དགུ་པ་ནི།  ཨ་ས་མེ་
ནི་སྐྱེ་བ་མེད་པ།  ཏྲི་ས་མེ་ནི་སྐུ་གསུང་ཐུགས།  མ་ཧཱ་ས་མ་ཡེ་ནི་དམ་ཚིག་ཆེན་པོ།  ཧཱུཾ་ནི་སྡུས་ཤིག་པའོ། །བཅུ་པ་ནི།  དེ་ནས་སྔགས་འདིས་ཞེས་སོགས་ཏེ་གོ་སླའོ། །བཅུ་གཅིག་པ་ནི།  ཨོཾ་བཛྲ་པྲ་ཏཱིཙྪ་བཛྲ་ས་མ་ཡ་སྟཾ་ཞེས་པའོ། །བཅུ་
གཉིས་པ་ནི།  ཕྱག་ན་རྡོ་རྗེའི་སྐབས་ནས།  ཨོཾ་བཛྲ་ཧ་སེ་ཨུད་ག་ཊ་ཡ་ཧཱུཾ་ཞེས་པའོ། །བཅུ་གསུམ་པ་ནི།  ཕྱག་རྡོར་ནས།  ཨོཾ་བཛྲ་པ་ཤྱཱ་ཧོ་ཞེས་པས་དཀྱིལ་འཁོར་བསྟན་ནས།  མེ་ཏོག་རིན་ཆེན་ལ་སོགས་པ་ཞེས་སོགས་ཏེ་གོ་སླའོ། །བཅུ་
10-7-29b


བཞི་པ་ནི།  དེ་ནས་སྔགས་ལ་མཁས་པ་ཡིས། །ཞེས་སོགས་སོ། །བཅོ་ལྔ་པ་ནི།  ཨོཾ་ནི་བཤད་ཟིན་བཛྲ་ས་མ་ཡ་ནི་རྡོ་རྗེ་དམ་ཚིག་ཧྲྀ་ད་ཡ་མི་ནི་སྙིང་ལ། །པྲ་བྷེ་ཤཱ་ནི་ཕབ་ནས་ཌིཌྷ་ཏིཥྛ་ནི་གནས་ཤིང་བརྟན་པའོ། །བཅུ་དྲུག་པ་ནི།  དེ་ནས་འདིས་ཞེས་སོགས་ཏེ་
བདུན་བརྒྱུད་རིགས་ནི་ཁའུ་པ་མར་གྱི་རྒྱུད་བུ་ཚ་ལ་སོགས་པ་ལ་བྱེད།  སྣུར་པ་སྒྲུབ་པ་པོ་མ་གཏོགས་པ་ཡར་གྱི་བདུན་བརྒྱུད་དེ་ཕ་མེས་ལ་སོགས་པ་བདུན་བརྒྱུད་ལ་བྱེད་དོ། །བཅུ་བདུན་པ་ནི།  ཁྱོད་ཀྱིས་སྲོག་ཆགས་བསད་མི་བྱ། །ཞེས་སོགས་
སོ། །འདིར་དགེ་བསྙེན་གྱི་བསླབ་གཞི་ལྔ་བསྲུང་དགོས་པར་གསུངས་ཤིང་།  རྡོ་རྗེ་རྩེ་མོ་ལས་ཀྱང་དེ་ལྟར་གསུངས་པས་སྔགས་པ་ཁྱིམ་པ་ཡིན་ན་ཡང་དགེ་བསྙེན་གྱི་བསླབ་གཞི་ལྔ་ངེས་པར་བསྲུང་དགོས་ཞེས་བླ་མ་མུས་པ་ཆེན་པོ་གསུངས་ཤིང་།  རྩ་
ལྟུང་འཁྲུལ་སྤོང་དང་མངོན་རྟོགས་ལྗོན་ཤིང་གི་དགོངས་པ་ཡང་འདི་ཉིད་དུ་སྣང་ངོ་། །གདོན་གྱི་ལས་སོགས་བྱ་བ་མིན་ནི་རང་གི་དངོས་གྲུབ་ལ་བར་ཆད་མི་བྱེད་ན།  གཞན་གྱི་འདྲེ་རྒོད་གཟིར་བ་དང་།  ཕུར་བུས་གདབ་པ་སོགས་མི་བྱའོ། །མུ་སྟེགས་
ཅན་ལ་ཡང་སྨད་པར་མི་བྱ་སྟེ།  རྣམ་སྣང་མངོན་བྱང་ལས།  རྣམ་པར་སྣང་མཛད་རིང་བའི་རྒྱུར་གསུངས་པའི་ཕྱིར་རོ། །མདོར་ན་སྤང་བླང་གི་དམ་ཚིག་ལ་ཡིད་གཉིས་དང་སོམ་ཉི་དང་ཐེ་ཚོམ་མི་བྱ་སྟེ།  དེར་མ་ཟད་བདག་གི་དེ་ཁོ་ན་ཉིད་དང་།  
སྔགས་ཀྱི་དེ་ཁོ་ན་ཉིད་དང་།  སོགས་ཀྱིས་སྒྲས་བསྡུས་པ་དེ་དག་སྟོན་པའི་བླ་མ་ལ་ཡང་དེ་བཞིན་དུ་ཡིད་གཉིས་སོགས་མི་བྱའོ། །གཉིས་པ་དབང་ལ་གཉིས་ཏེ།  དབང་བསྐུར་བ་དང་།  རྗེས་བླ་མ་ལ་མཆོད་པ་ཕན་ཡོན་དང་བཅས་པ་བསྟན་
10-7-30a


པའོ། །དང་པོ་ནི།  སློབ་མ་སྔར་གྱི་དམ་ཚིག་དེ་དག་ལ་མོས་པ་བརྟན་པོ་དང་ལྡན་པས་དམ་ཚིག་བསྲུང་བར་དམ་བཅས་ནས།  དབང་གི་དངོས་གཞི་བསྐུར་བར་བྱའི།  དམ་ཚིག་བསྲུང་མི་ནུས་པ་ནི་འཇུག་པ་ཙམ་བྱས་ནས་
བཏང་ངོ་། །དེའང་ཚེ་ལྡན་གྱི་དབང་དུ་བྱས་ཀྱིས།  ཚེ་འདས་ལ་ནི་དབང་མཐའ་དག་བསྐུར་བར་གསུངས་སོ། །འདིས་ཚེ་འདས་ལ་དབང་བསྐུར་བ་ནི་སྡིག་པ་སྦྱོང་བའི་ཐབས་ཙམ་ཡིན་གྱིས་སྡོམ་པ་སྐྱེ་བ་མ་ཡིན་པར་གསལ་ལོ། །དབང་གི་
དངོས་གཞི་ཇི་ལྟར་བསྐུར་ན།  འདི་ལ་སྔགས་ཀྱི་དབང་བུམ་པ་ལ་སོགས་ཀྱི་དབང་བཅུ།  ཐབས་ཤེས་རབ་ཀྱི་དབང་།  རིན་ཆེན་སྣ་བདུན་གྱི་དབང་སྟེ་བཅུ་དགུ་ཡོད་པ་ལས།  དང་པོ་ནི།  སརྦ་བིད་ཀྱིས་སྔར་སྔགས་ཀྱི་ཕྲེང་བའི་སྐབས་སུ་བཤད་
པ་ཅི་བཞིན་གྱི་དབང་བསྐུར་ཏེ།  རྩ་རིག་ལ་སོགས་པ་སྔགས་བཅུ་གསུམ་མོ། །དེ་ནས་བུམ་པ་ལ་སོགས་པའི་དབང་རྫས་ཇི་སྙེད་པ་མང་པོ་སྟེ་བཅུ་ཐོགས་པས་བུམ་པ་ལ་སོགས་པ་བཅུ་པོ་རྣམས་ཀྱི་དབང་བཅུ་ཅི་དགར་བསྐུར་ཏེ།  སྔགས་
རྣམས་ནི་ཕྱག་རྡོར་ནས་འབྱུང་ངོ་། །དེ་ནས་ལག་ཏུ་རྡོ་རྗེ་དང་དྲིལ་བུ་བྱིན་ནས་ཐབས་དང་ཤེས་རབ་ཀྱི་དབང་བསྐུར་རོ། །དེ་ནས་འཁོར་ལོ་ལ་སོགས་པའི་རིན་ཆེན་སྣ་བདུན་ཐོགས་ལ་གནས་སྐབས་སུ་མི་དབང་དབང་ཕྱུག་འཁོར་ལོས་སྒྱུར་
བའི་གོ་འཕང་ཐོབ་པ་དང་།  མཐར་ཐུག་སྡིག་པ་གཞོམ་པའི་ཕྱིར་དབང་བདུན་ནི་བསྐུར་བར་བྱའོ། །འདི་ལ་བུམ་པ་དངོས་སུ་སྨོས་པས་རིན་པོ་ཆེའི་ཅོད་པན་དང་།  དར་གྱི་ཅོད་པན་སོ་སོར་བྱས་ཏེ་སོགས་ཁོངས་ནས་བཅུ་བསྡུས་ནས་སྔགས་
10-7-30b


དབང་མ་གཏོགས་པའི་དབང་བཅུ་དགུ་གསུངས་པའང་ཡོད་མོད་ཀྱི།  འཁོར་ལོ་ལ་སོགས་རིན་ཆེན་བདུན་ཐོགས་ལ། །ཞེས་པའི་ཚིག་འགྲོས་དང་བསྟུན་ན།  སྔ་མ་ཉིད་འཐད་པའི་ཕྱོགས་སུ་སྣང་ངོ་། །བུམ་པ།  རིགས་ལྔའི་ཅོད་པན།  རིན་པོ་
ཆེའི་ཅོད་པན་དང་དར་དཔྱངས།  ཕྱག་རྒྱ་ལྔ།  མིང་།  ཕྲིན་ལས།  ཆོས་ཀྱི་འཁོར་ལོ།  བདག་པོ།  གཟུངས།  གསང་བའི་དབང་རྣམས་ནི་བུམ་པ་ལ་སོགས་པའི་དབང་བཅུའོ། །གཉིས་པ་ནི།  སྔགས་བསྒྲུབ་ཕྱིར་ན་མོས་ལྡན་སློབ་མ་ལ་ཞེས་སོགས་
ཏེ།  ཚེ་འདིའི་བདེ་བ་མ་ལུས་དང་། །ཞེས་སོགས་ཀྱི་བཀའ་བསྒོས་ནས་སློབ་མས་བླ་མ་ལ་ཕྱག་འཚལ་ནས་ཡོན་ཕུལ་བ་སྟེ་གོ་སླའོ། །སྐབས་འདིར་རྩ་སྐྱ་པས་ཆོས་བཤད་པའི་རྗེས་གནང་།  དངོས་གྲུབ་བསྒྲུབ་པ་སྔགས་ཀྱི་རྗེས་གནང་།  
ཕྲིན་ལས་ཐམས་ཅད་བསྒྲུབ་པ་བཀའི་རྗེས་གནང་དང་གསུམ་མཛད་པར་སྣང་ཡང་འདིར་མི་གསལ་ཞིང་།  ཁ་ཅིག །ཚེ་དཔག་མེད་ཀྱི་སྐབས་ནས་བཤད་པའི་བཀའི་དབང་བསྐུར་བ་འདིར་བྱེད་པ་ནི་མི་འཐད་དེ།  སྐབས་དེར་དམ་ཚིག་དང་
བཀའི་དབང་བསྐུར་བ་གཉིས་གསུངས་པའི་དམ་ཚིག་གི་དབང་དང་འདིར་བསྟན་པའི་བཀའ་བསྒོ་བ་གཉིས་དོན་གཅིག་ཏུ་སྣང་བས་བཀའ་བསྒོ་བ་དང་།  བཀའི་དབང་བསྐུར་བ་གཉིས་དོན་མི་གཅིག་པའི་ཕྱིར་རོ། །གསུམ་པ་རས་བྲིས་ལ་བརྟེན་
པའི་དངོས་གྲུབ་ལ་གཉིས་ཏེ།  སྡུད་པ་པོའི་མཚམས་སྦྱོར་དང་།  གཞུང་དངོས་སོ། །དང་པོ་ནི།  དེ་ནས་བཅོམ་ལྡན་འདས་ཀྱིས་ཞེས་སོགས་སོ། །གཉིས་པ་ལ་གསུམ་སྟེ།  རྟེན་རས་བྲིས་བྲི་བ།  རྟེན་རྫོགས་པ་ལ་རབ་གནས་བྱ་བ།  
10-7-31a


དེ་ལ་སྒྲུབ་པའོ། །དང་པོ་ནི།  རས་ལ་བཅོམ་ལྡན་འདས་ཞེས་སོགས་ཏེ།  ཤཱཀ་ཐུབ་སེར་པོ་ཆོས་འཆད་ཀྱི་ཕྱག་རྒྱ་ཅན།  སྤྱན་རས་གཟིགས་ནི་གཡས་མཆོག་སྦྱིན་དང་།  གཡོན་པདྨ་བསྣམས་པ།  ཕྱག་ན་རྡོ་རྗེ་ནི།  
སྔོ་སྐྱ་གཡས་རྡོ་རྗེ་ཐུགས་ཁར་འཛིན་ཅིང་།  གཡོན་དྲིལ་བུ་དཀུར་བརྟེན་པའོ། །རང་གི་ལྷ་ལ་བརྟེན་པར་བྲི་བ་ནི།  སྤྱན་རས་གཟིགས་ཀྱི་འོག་ཏུ་རྟ་མགྲིན་དམར་པོ་ཞལ་གཅིག་ཕྱག་གཉིས་སྤྱི་བོར་རྟ་མགོ་ལྗང་གུས་བརྒྱན་པ།  གཡས་རྡོ་རྗེས་
མཚན་པའི་བེ་ཅོན་ཐུགས་ཁར་འཛིན་ཅིང་གཡོན་སྡིགས་མཛུབ་དཀུར་བསྒྲེང་བའོ། །ཕྱག་རྡོར་གྱི་འོག་ཏུ་འཇིག་རྟེན་གསུམ་རྒྱལ་སྔོ་ནག་ཤིན་ཏུ་ཁྲོས་པ་ཕྱག་གཉིས་ཀྱིས་རང་གི་སྙིང་ཁར་ཧཱུཾ་མཛད་ཀྱི་ཕྱག་རྒྱས་རྡོ་རྗེ་དང་དྲིལ་བུ་འཛིན་པའོ། །
དེ་བཞིན་གཤེགས་པ་བཞི་ནི་རྡོ་རྗེའི་སྐྱིལ་ཀྲུང་།  སྤྱན་རས་གཟིགས་དང་།  ཕྱག་ན་རྡོ་རྗེ་ནི་ཕྱེད་ཀྲུང་།  རྟ་མགྲིན་དང་གསུམ་རྒྱལ་ནི་གཡོན་བརྐྱང་གཡས་བསྐུམ་དུ་བཞུགས་པའོ། །གཞན་རྣམས་ནི་གོ་སླའོ། །གཉིས་པ་ནི།  
བྲིས་ཟིན་པའི་རྗེས་དེ་ནས།  ཡོ་བྱད་ཚོགས་པར་བྱས་ཏེ་རབ་གནས་ཀྱི་ཆོ་ག་ཚང་བར་བྱས་ལ་དངོས་གཞིའི་སྐབས་སུ་རི་མོའི་སྐུ་གཟུགས་དེ་ལ་དམ་ཚིག་པ་བསྐྱེད།  ཡེ་ཤེས་པ་བཅུག་ནས་མཆོད་པ་ཅི་འབྱོར་པས་མཆོད་དེ།  ཨཾ་ཙཀྵུ་ཞེས་
སོགས་ཀྱིས་བདག་ཉིད་ཀྱི་སྤྱན་དབྱེ་བར་བྱ་ཞིང་།  མཆོད་བསྟོད་རྫོགས་པར་བྱས་ལ།  བདེན་པའི་བྱིན་གྱིས་བརླབ་པར་དམིགས་པར་བྱ་བ་ནི།  དཀོན་མཆོག་གསུམ་གྱི་བདེན་པའི་བྱིན་གྱིས་རླབས་ཀྱིས་འཇིག་རྟེན་གྱི་ཁམས་མ་ཞིག་
10-7-31b


གི་བར་དུ།  བདག་ཅག་གི་རྟེན་ལ་གནས་པར་གྱུར་ཅིག །དངོས་གྲུབ་ཐམས་ཅད་སྩོལ་ཅིག །བར་དུ་གཅོད་པ་ཐམས་ཅད་ཞི་བར་གྱུར་ཅིག །ཅེས་བརྗོད་ཅིང་མེ་ཏོག་དོར་བའོ། །དེ་ནས་སྐུ་གཟུགས་དེའི་ཐུགས་ཁར་སྔགས་བཀོད་ལ།  རྩ་རིག་
དང་ལས་ཐམས་ཅད་པའི་སྔགས་བཟླས་པས་མཚན་མ་ཞིག་མཐོང་ན་ནི་ཞེས་སོགས་ནི་གོ་སླའོ། །གསུམ་པ་ལ་བཞི་སྟེ།  བསྙེན་པ།  ཉེ་བསྙེན།  སྒྲུབ་པ།  སྒྲུབ་པ་ཆེན་པོའོ། །དང་པོ་ནི།  སྒྲུབ་པ་པོ་རྟག་ཏུ་རས་བྲིས་ཀྱི་མངོན་སུམ་དུ་འདུག་
ནས་ཀྱང་།  འཇིག་རྟེན་གསུམ་ལས་རྣམ་རྒྱལ་གྱིས།  བདག་བསྲུང་བ་ལ་སོགས་པའི་སྲུང་འཁོར་བསྡུས་པ་བྱས་ནས་ཀྱང་།  བདག་གི་དེ་ཉིད་ལྷའི་རྣལ་འབྱོར་རྫོགས་པར་དྲན་པར་བྱས་ཤིང་རས་བྲིས་དམིགས་ཡུལ་དུ་བཞག་ནས་ཕྱག་
རྒྱ་སྟོན་ཅིང་།  དངོས་གྲུབ་ཀྱི་མཚན་མ་མ་བྱུང་གི་བར་དུའམ།  གྲངས་ཀྱི་བསྙེན་པ་འབུམ་ཕྲག་གསུམ་མམ།  ཡང་ན་འབུམ་ཕྲག་དྲུག་རྩ་རིག་བཟླས་པར་བྱའོ། །གཉིས་པ་ནི།  དེ་ནས་དབེན་པའི་གནས་སུ་ཞེས་སོགས་སོ། །གསུམ་པ་ནི།  
དེ་ནས་བཟླས་པའི་མཇུག་ཏུ་ནི།  རས་བྲིས་ཀྱི་དཀྱིལ་འཁོར་སྔ་མ་བཞིན་དུ་བསམས་ལ་ཞེས་པའམ།  ཡང་ན་ཏིང་ངེ་འཛིན་གྱི་དཀྱིལ་འཁོར་སྔ་མ་རྡུལ་ཚོན་གྱི་དཀྱིལ་འཁོར་བཞིན་དུ་བསམས་ལ།  རས་བྲིས་ལ་མཆོད་པ་རྒྱ་ཆེན་བྱས་ནས་ཀྱང་
ཞེས་སོགས་སོ། །བཞི་པ་ནི།  ཕྱག་མཚན་དངོས་གྲུབ་ལ་སོགས་བླང་། །ཞེས་སོགས་ཏེ་གོ་སླའོ། །བཞི་པ་ངན་སོང་གི་སྡིག་པ་སྦྱོང་བའི་ཐབས་ཀྱི་བྱེ་བྲག་བསྟན་པ་ལ་བཞི་སྟེ།  ལྷའི་དབང་པོ་བརྒྱ་བྱིན་གྱིས་བཅོམ་ལྡན་འདས་ལ་ཞུས་
10-7-32a


པ་དང་།  བཅོམ་ལྡན་འདས་ཀྱིས་བཀས་གནང་བ་དང་།  ངན་སོང་གི་སྡིག་པ་སྦྱོང་བའི་ཐབས་བཤད་པའི་གཞུང་དངོས་དང་།  དེའི་ཕན་ཡོན་བསྟན་པའོ། །དང་པོ་ནི།  དེ་ནས་ལྷ་ཐམས་ཅད་ཀྱི་དབང་པོ་བརྒྱ་བྱིན་གྱིས་ཞེས་སོགས་སོ། །གཉིས་པ་ནི།  བཅོམ་ལྡན་འདས་ཀྱིས་ཞེས་
སོགས་སོ། །གསུམ་པ་ལ་དགུ་སྟེ།  ཀུན་རིག་རྩ་བའི་དཀྱིལ་འཁོར་དུ་དབང་བསྐུར་ཏེ་སྡིག་པ་སྦྱང་བ་དང་།  ཀུན་རིག་རྩ་བའི་དཀྱིལ་འཁོར་དུ་དབང་བསྐུར་ཏེ་མཆོད་རྟེན་གྱི་དབུས་སུ་བཞག་སྟེ་སྡིག་པ་སྦྱང་བ་དང་།  དབང་བསྐུར་ཏེ་དྲི་གཙང་ཁང་དུ་བཞག་པས་
སྡིག་པ་སྦྱང་བ་དང་།  མཆོད་རྟེན་བྱ་བས་སྦྱང་བ་དང་།  བཟླས་པ་བྱ་བས་སྦྱང་བ་དང་།  སྦྱིན་སྲེག་བྱ་བས་སྦྱང་བ་དང་།  རོ་བསྲེགས་ཏེ་སྡིག་པ་སྦྱང་བ་དང་།  རྟེན་མེད་པ་ལ་སྡིག་པ་སྦྱང་བ་དང་།  ཕྱིར་བཟློག་གིས་སྡིག་པ་སྦྱང་བའོ། །དང་པོ་
ལ་གཉིས་ཏེ།  རྟེན་རོ་ཡོད་པ་ལ་སྦྱང་བ་དང་།  རྟེན་མེད་ན་གཟུགས་བརྙན་ལ་དབང་བསྐུར་ཏེ་སྡིག་པ་སྦྱང་བའོ། །དང་པོ་ནི།  དེ་ནས་དཀྱིལ་འཁོར་བྲིས་ནས་ནི། །ཞེས་སོགས་ཏེ།  ས་ཆོག་ནས་བརྩམས་ཏེ།  དཀྱིལ་འཁོར་བྲི་བ་དང་།  བདག་གི་རྣལ་
འབྱོར་དང་།  བུམ་པ་ལ་བཟླས་པ་དང་།  མདུན་བསྐྱེད་ལ་བདག་མདུན་ཐ་མི་དད་དུ་བསྒྲུབ་པའི་བར་རྫོགས་པར་བྱས་ལ།  རྟེན་རོ་དེ་བགེགས་སྦྱོང་བ།  རྟེན་བསྐྱེད་པ།  རྟེན་དགུག་པ།  སྡིག་པ་བྲལ་བ་དང་བཞི་བྱས་ནས།  སྔ་མ་བཞིན་དུ་འཇུག་
པ་དང་།  དབང་རྫོགས་པར་བསྐུར་ཏེ།  དེའི་ཕན་ཡོན་ནི།  དེ་ནས་སྡིག་པ་ཀུན་སྦྱངས་ཏེ། །ཞེས་སོགས་སོ། །གཉིས་པ་ནི།  དེ་ཡི་གཟུགས་བརྙན་བྲི་བའམ། །ཞེས་སོགས་ཏེ་གོ་སླའོ། །གཉིས་པ་ནི།  དེ་ནས་རྣལ་འབྱོར་ཅན་གྱིས་ནི། །ཞེས་
10-7-32b


སོགས་ཏེ།  རྟེན་རོ་ཡོད་པ་ལ་སྦྱང་བར་མི་འདོད་པའམ།  རོ་མེད་ན་ཚ་ཚ་འདེབས་པར་མི་འདོད་པའི་དབང་དུ་བྱས་པ་སྟེ།  སྔ་མ་བཞིན་དུ་དབང་ཐམས་ཅད་བསྐུར་ལ།  ཁྱད་པར་རྟེན་དེ་ལྷ་དཔའ་བོ་གཅིག་པའམ་དཀྱིལ་འཁོར་རྫོགས་པར་བསྐྱེད་ནས།  
དེ་ལ་ཡེ་ཤེས་པ་སྤྱན་དྲངས་ནས་མཆོད་པས་མཆོད་དེ་མཆོད་རྟེན་གྱི་དབུས་སུ་བཞག་པར་བྱའོ། །ལྷག་མ་རྣམས་ནི་སྔ་མ་བཞིན་ནོ། །གསུམ་པ་ནི།  རང་གི་ལྷའམ་ལྷ་གཞན་གྱི་ཞེས་སོགས་ཏེ།  རོ་ཡོད་པའམ།  མེད་ཀྱང་གཟུགས་སུ་བྲིས་པ་ནི་ཅིས་
ཀྱང་དགོས་ཏེ།  དེ་སྦྱང་བ་དང་།  མཆོད་རྟེན་དུ་འཇོག་པ་དང་།  ཚ་ཚ་བྱེད་པ་ཡང་མི་འདོད་ཅིང་།  རང་གི་ཁྱིམ་དུ་འཇོག་པར་འདོད་པའི་དབང་དུ་བྱས་པ་སྟེ་དེ་ལ་སྔར་བཞིན་དབང་བསྐུར་ལ།  ཁྱད་པར་རྒྱུད་འདི་དང་།  རྒྱུད་གཞན་ནས་འབྱུང་བའི་སྔགས་
མང་པོ་གསེར་རམ།  དངུལ་ལམ།  གུར་གུམ་གྱིས་བྲིས་པ་དེའི་སྙིང་ཁར་གདགས་ཏེ།  རྟེན་དེ་གོས་དང་།  དྲི་ལ་སོགས་པས་བརྒྱན་ཏེ་ལྷར་བསྐྱེད།  ཡེ་ཤེས་པ་བཀུག་ལ་ཇི་ལྟར་གྲུབ་པས་མཆོད་ནས་བསྟོད་དེ།  རང་གི་ཁྱིམ་གྱི་ཕྱོགས་ཅིག་དབེན་
པའམ་དྲི་གཙང་ཁང་དྲིས་བྱུགས་པར་བཞག་ལ་དུས་ནར་མར་ལྷ་བསྐྱེད་པའི་རྟེན་དེ་ལ་མཆོད་བསྟོད་བྱེད་ཅིང་བཞག་གོ།  ལྷག་མ་ཐམས་ཅད་ནི་སྔ་མ་བཞིན་ནོ། །བཞི་པ་ནི།  དེ་ཡི་མིང་ནས་སྨོས་ནས་ནི། །ཞེས་སོགས་ཏེ།  སྔགས་ལ་མིང་
སྤེལ་ཚིག་ཏུ་བྱས་པའི་གཟུངས་སྙིང་དུ་བཅུག་སྟེ།  མཆོད་རྟེན་བཏབ་པའོ། །ལྔ་པ་ནི།  དེ་ཡི་མིང་ནས་བརྗོད་ནས་ནི། །ཞེས་སོགས་ཏེ།  བདག་གི་རྣལ་འབྱོར་དང་ལྡན་པའི་སྙིང་ཁར་ཟླ་བ་ལ་མཐའ་སྐོར་དུ་རྩ་རིག །ནང་དུ་གཙོ་བོ་གང་ཡིན་གྱི་
10-7-33a


སྔགས་བཀོད་ལ་ཕྱག་ན་རྡོ་རྗེའི་སྐབས་ནས་བཤད་པ་བཞིན་དེ་ལས་འོད་ཟེར་འཕྲོས་པས་ཚེ་ལས་འདས་པས་གཙོར་བྱས་པའི་ངན་སོང་ཐམས་ཅད་རབ་ཏུ་ཞི་སྟེ།  སེམས་ཅན་དམྱལ་བ་དང་། བྱོལ་སོང་དང་།  ཡི་དྭགས་སུ་
སྐྱེས་པའི་སེམས་ཅན་ཐམས་ཅད་གྲོལ་བར་བདག་ཉིད་ཀྱིས་རབ་ཏུ་ཤེས་སོ། །འཇིག་རྟེན་གྱི་ཁམས་ཐམས་ཅད་སྣང་བར་བྱས་ཏེ།  སྣང་བར་བྱས་ནས་ཀྱང་།  སངས་རྒྱས་ཀྱི་མཛད་པ་བཅུ་གཉིས་ཀྱི་ཚུལ་དུ་བྱས་ནས།  དེ་བཞིན་
གཤེགས་པ་ཐམས་ཅད་ཀྱི་ཐུགས་ཀྱི་ཆོས་ཀྱི་ཡི་གེ་དེ་ཉིད་དུ་ཞུགས་པར་གྱུར་ཏོ་ཞེས་བསམ་ཞིང་།  རྒྱུད་ནས་འབྱུང་བའི་སྔགས་ཐམས་ཅད་དང་།  གཙོ་བོར་རྩ་བའི་རིགས་པ་བཟླས་པར་བྱའོ། །དྲུག་པ་ནི།  དེ་ཡི་མིང་ནས་
བརྗོད་ནས་ཀྱང་། །ཞེས་སོགས་ཚིགས་སུ་བཅད་པ་བརྒྱད་དེ།  འདི་དང་ཚེ་དཔག་མེད་ནས་ཚིགས་སུ་བཅད་པ་བཅུ་གསུམ་གྱིས་ཚེ་འདས་ཀྱི་ལས་གཙོ་བོར་བསྟན་ཅིང་།  ཚེ་ལྡན་ལ་ཞར་ལ་སྦྱར་བར་བསྟན་ལ།  འཁོར་ལོས་སྒྱུར་
བ་དང་མེ་ལྟར་འབར་བ་གཉིས་ནས་ཚེ་ལྡན་གྱི་བྱ་བ་བསྟན་ཏེ།  ཆོ་ག་ནི་ཁྱད་པར་མེད་དོ། །དེ་ལ་བཞི་སྟེ།  ཞི་བ་དང་།  རྒྱས་པ་དང་།  དབང་དང་།  དྲག་པོའོ། །དེ་དག་ཀྱང་དཀྱིལ་འཁོར་དང་མ་འབྲེལ་ན་ནི་ཕྱོགས་ཤར་དུ་ཞི་བ།  
བྱང་དུ་རྒྱས་པ།  ནུབ་ཏུ་དབང་།  ལྷོར་དྲག་པོའི་ཐབ་བརྩིགས་ལ་སྒྲུབ་པ་པོའི་ཁ་ཡང་ཞི་བ་ལ་ཤར་དུ་སྟེ།  དེ་བཞིན་དུ་དེ་དག་གི་ཕྱོགས་སུ་བལྟའོ། །དཀྱིལ་འཁོར་དང་འབྲེལ་ན་དཀྱིལ་འཁོར་གྱི་ནུབ་ཏུ་ཞི་བའི་ཐབ་བཅས་ལ་ཁ་ཤར་དུ་
10-7-33b


བལྟ།  དེ་བཞིན་དུ་ཐམས་ཅད་སྒྲུབ་པ་པོ་དཀྱིལ་འཁོར་ལ་ཕྱོགས་ཏེ་བལྟ་བས་ལྷོར་རྒྱས་པ་ཁ་བྱང་དུ་བལྟ།  ཤར་དུ་དབང་ཁ་ནུབ་ཏུ།  བྱང་དུ་དྲག་པོའི་ཐབ་བཅས་ལ་ཁ་ལྷོར་བལྟའོ། །དེ་ལ་ཞི་བའི་སྦྱིན་སྲེག་ནི་གཙོ་བོ་ཡིན་ལ།  
ལྷག་མ་གསུམ་ནི།  ཅི་གྲུབ་པ་ཉམས་སུ་བླང་ངོ་། །དེའང་ཞི་བ་རྟོགས་ན་འོག་མ་གསུམ་ཞར་ལ་རྟོགས་པར་འགྱུར་རོ། །དེ་ལ་དགུ་སྟེ།  ཐབ་བཅའ་བ་དང་།  བུད་ཤིང་བཤམ་པ་དང་།  མཆོད་པ་ལ་སོགས་པ་རྒྱན་དགྲམ་པ་དང་།  བསྲེག་རྫས་
དང་།  སྒྲུབ་པ་པོའི་ཡན་ལག་དང་།  མེ་སྦར་བ་དང་།  འཇིག་རྟེན་པའི་མེ་ལྷ་དང་།  འདས་པའི་ལྷ་སྤྱན་དྲངས་ཞིང་མཆོད་བསྟོད་སོགས་སྦྱང་བ་དང་།  མཇུག་གི་བྱ་བ་དང་།  ཕན་ཡོན་ནོ། །དང་པོ་ནི།  ཚེ་དཔག་མེད་ནས་འབྱུང་བ།  
མདོར་ན་ཐིག་ནི་བཏབ་ནས་ཀྱང་། །ཆོ་ག་བཞིན་དུ་བྲི་བར་བྱ། །དེ་ནི་མཐོང་བ་བརྒྱུད་པས་ཤེས་སོ། །ལྷ་ཡི་བུ་རྣམས་ཞི་བ་ཡི། །ཧོམ་ཁུང་བར་མ་ཐ་མ་མཆོག །ཁྲུ་གང་ཁྲུ་དོ་ཁྲུ་བཞི་པའི། །ཟླུམ་པོ་ཉིད་དུ་བྱས་ནས་ནི། །དེ་ནི་དབྱིབས་
སོ། །དེ་ཡི་དབུས་སུ་འཁོར་ལོ་ནི། །རྩིབས་བརྒྱད་འོད་ཟེར་དཀར་པོ་བྲི། །དེ་ནས་རོ་སྲེག་སྐབས་ནས་འབྱུང་བ་ལྟེ་བར་རིགས་ལྔའི་མཚན་མ་དང་།  སེམས་དཔའ་བཅུ་དྲུག་བྲི།  དེ་ནས་སོར་བཞི་སྐྱེད་པ་ལ་ཁོར་ཡུག་གི་རྡོ་རྗེ་རྩེ་
ལྔ་པ་འོད་ཟེར་དཀར་པོ་དང་ལྡན་པ་བྲི།  དེ་ནས་རྡོ་རྗེ་རྒྱ་གྲམ་དང་།  དེ་ནས་སོར་གཉིས་སྨད་པ་དང་།  ཡང་སོར་གཉིས་པོ་སྨད་པ་ལ།  རྡོ་རྗེ་རིན་ཆེན་ཆུ་སྐྱེས་མཆོག །དེའི་ཕྱི་རོལ་གྱི་ལྷ་སྣམ་ལ།  དེ་ནས་སྡིག་པ་གཞོམ་པའི་ཕྱིར། །ཕྱག་རྒྱ་
10-7-34a


སྣ་ཚོགས་བཞག་པར་བྱ། །ཞེས་པ་སྟེ།  བྱང་ཆུབ་སེམས་དཔའ་དང་།  ཉན་ཐོས་དང་རང་རྒྱལ་རྣམས་ཀྱི་མཚན་མ་བྲི།  སྒོ་བཞིར།  ཕྱིའི་རྡོ་རྗེའི་རིགས་རྣམས་ནི། །ཕྱག་རྒྱ་རྣམས་ནི་ཕྱི་རིམ་བྲི། །དེ་ནས་སྒོ་བྱ་བའམ་ཡང་ན། །ཟླུམ་པོ་ཉིད་ལ་
འཁོར་ཡུག་ལ། །གཟའ་དང་སྐར་མའི་མཚན་མ་ལ། །དེ་ལྟར་འཇིག་རྟེན་སྐྱོང་བ་རྣམས་ཞེས་པས་བསྟན་ཏེ།  ཁོར་ཡུག་ལ་ལྷ་ཆེན་བརྒྱད།  ཀླུ་ཆེན་བརྒྱད།  གཟའ་བརྒྱད།  ཕྱོགས་སྐྱོང་བ་བཅུ།  འཇིགས་བྱེད་དགུ།  རྒྱལ་ཆེན་བཞི།  རྒྱུ་སྐར་ཉི་ཤུ་རྩ་
བརྒྱད་རྣམས་མིང་ངམ།  བརྡའམ།  ཐིག་ལེར་བྲི་བར་བྱའོ། །དེ་ནས་མེ་ལྟར་འབར་བ་ནས། །བུད་ཤིང་ཞོ་དང་ལྡན་པ་ལ། །དྲི་ཆུས་བཀུས་པས་ཤེས་པར་བྱ། །ཞེས་པ་སྟེ།  བུད་ཤིང་མཛེས་པར་བཤམ་པར་བྱ།  དེ་ནས་རྒྱན་དགྲམ་པ་ནི་
གཙོ་བོ་རི་མོ་ལུགས་མའང་རུང་།  རྡོ་རྗེ་ཅན་དང་ལྷན་ཅིག་བཞག །བྱ་དང་བུམ་པ་བཀང་བ་དང་། །གཏོར་མ་ལྷ་བཤོས་རབ་བཀང་བཞག །ཞེས་པ་སྟེ་དེ་དག་ཀྱང་མེ་ལྟར་འབར་བ་ནས་ཀྱང་།  བདུག་སྤོས་མེ་ཏོག་མར་མེ་རྣམས་ཀྱང་
བཞག །མཆོད་པ་བྱ་བའི་ཕྱིར་ནི་བླ་རེ་དང་། །གདུགས་དང་རྒྱལ་མཚན་རྔ་ཡབ་ལ་སོགས་བཞག །ནངས་རེ་ག་བུར་བཅས་པའི་དྲི་ཞིམ་དང་། །ཙན་དན་ལ་སོགས་པ་ཡི་བྱུག་པས་བྱུག །ཅེས་པས་རྒྱན་དགྲམ་པའོ། །བསྲེག་
རྫས་ནི་ཀུན་རིག་ནས།  ཏིལ་དང་ཡུངས་ཀར་འབྲས་རྣམས་དང་། །ར་ཡི་འོ་མ་ལྡན་པ་དང་། །དྲི་ཡིས་བཀུས་པའི་ཡམ་ཤིང་གིས། །ཆོ་ག་བཞིན་དུ་སྦྱིན་སྲེག་བྱ། །ཞེས་པ་དང་།  ཚེ་དཔག་མེད་ཉིད་ཀྱིས།  དེ་ཡི་མིང་
10-7-34b


དང་ཡུངས་ཀར་གྱིས། །བརྒྱ་ཕྲག་སྟོང་དུ་བསྲེགས་བྱས་ན། །ངན་སོང་ཀུན་ལས་ཐར་བར་འགྱུར། །དེ་ཡི་ཤ་དང་རུས་པ་དང་། །སྐྲ་དང་ཐལ་བ་ལ་སོགས་པས། །ཆོ་ག་དེ་དང་འདྲ་བར་ནི། །སྦྱིན་སྲེག་བྱས་ན་ངན་སོང་ཡང་། །ཀུན་ལས་
རྣམ་པར་ཐར་བར་འགྱུར། །མར་དང་འོ་མ་སྦྲང་རྩི་ཅན། །འབྲས་ཡོས་ཡུངས་མར་བསྲེས་པ་དང་། །དེ་ཡི་རུས་པ་ཤ་ལ་སོགས། །མེད་ན་མིང་ནས་སྨོས་ཏེ་བྱ། །ཞེས་པས་བསྲེག་རྫས་བསྟན་ནོ། །དེ་ནས་སྒྲུབ་པ་པོའི་ཡན་ལག་ནི། །
དཀར་པོའི་གོས་ནི་གྱོན་ནས་ཀྱང་། །སངས་རྒྱས་གཟུགས་ཅན་མི་འཇིགས་པས། །ངན་སོང་རྒྱུད་ན་གནས་པ་ཡི། །སེམས་ཅན་རྗེས་སུ་དྲན་བྱེད་ཅིང་། །ཞེས་བྱ་བ་དང་།  འཁོར་ལོས་སྒྱུར་བ་དང་།  མེ་ལྟར་འབར་བ་ནས་ཀྱང་བསྟན་པ་
བཞིན་ཏེ།  རྒྱན་ལ་སོགས་པ་དཀར་པོར་བྱས་བྱང་ཆུབ་ཀྱི་སེམས་དང་ལྡན་པས་རྡོ་རྗེ་སྐྱིལ་ཀྲུང་ངམ།  སེམས་དཔའི་འདུག་སྟངས་ཀྱིས་གནས་པ་བདག་གི་རྣལ་འབྱོར་དཔའ་བོ་གཅིག་པ་བསྙེན་པ་བཞིན་བསྒོམ་པར་བྱའོ། །དེ་ནས་མེ་
སྤར་བ་ནི།  ཡམ་ཤིང་གིས་མེ་སྤར་ཏེ།  མེ་ལྟར་འབར་བ་ནས།  འདབ་བདུན་མེ་ཏོག་འབྲས་བུ་རྣམས། །ཞོ་དང་ལྡན་པའི་ཡམ་ཤིང་གིས། །དེ་དག་ཐབ་ཁུང་ཁྱད་པར་ལས། །རང་གི་སོར་གྱིས་གཞལ་བྱ་ཞིང་། །ཉི་ཤུ་རྩ་བརྒྱད་
མན་ཆད་མཆོག །བཅུ་བདུན་སོར་ནི་བར་མ་སྟེ། །ཐ་མ་བཅུ་གཉིས་ཉིད་དུ་ཤེས། །ཤིན་ཏུ་ཆུང་ན་སོར་བརྒྱད་དོ། །བུད་ཤིང་ཞོ་དང་ལྡན་པ་ལ། །དྲི་ཆུས་བཀུས་པས་ཤེས་པར་བྱ། །བསྲེག་ཤིང་དེ་ལས་བྱུང་བའི་མེ། །སྦར་ནས་དྲི་ཆུས་གཏོར་
10-7-35a


ནས་ནི། །ཞེས་པའི་དོན་ཡམ་ཤིང་གིས་མེ་སྦར་ལ་དེ་ནས་བདུད་རྩི་འཁྱིལ་པའི་སྔགས་ཟློས་ཤིང་།  ཐབ་དང་རྫས་ཐམས་ཅད་ལ་ཀུ་ཤའི་རྩེ་མོས་དྲི་ཆུས་གཏོར་ཞིང་བསངས་ལ།  མཆོད་རྫས་ཐམས་ཅད་བདུད་རྩི་མཆོག་
ཏུ་བསམ་པར་བྱའོ། །དེ་ནས་འཇིག་རྟེན་དང་འཇིག་རྟེན་ལས་འདས་པ་མཆོད་པ་ནི།  མེ་ལྟར་འབར་བ་ནས།  པདྨ་དཀར་པོ་ཞལ་འདྲ་དགེ།  པདྨ་ནོར་བུའི་རིལ་བ་ཐོགས། །ལག་ན་དབྱུག་པ་མཆོག་ཐོགས་པ། །པདྨ་དཀར་པོའི་འདབ་སྟེང་
འདུག །དེ་ལྟའི་མེ་ལྷ་བཀུག་ནས་ཀྱང་། །མཆོད་ཡོན་བླངས་ཏེ་དབུལ་བར་བྱ། །དེ་ནས་ཟླ་བ་དཀར་པོ་ལ། །བཞུགས་པའི་འགྲོ་ཕན་སྤྱན་དྲངས་ཏེ། །པདྨ་དཀར་པོ་ཤར་ཕྱོགས་སུ། །བསམ་སྟེ་སྟེང་དུ་བཞག་པར་བྱ། །དེ་ནས་དེ་ལྟར་བསམས་
ནས་ཀྱང་། །བསྒྲུབ་བྱ་རྟག་ཏུ་མདུན་བཞག་སྟེ། །དེ་ཡི་ཉེས་པ་དྲངས་ནས་ནི། །ཤིན་ཏུ་དཀྲིས་ཏེ་སྦར་བར་བྱ། །ནངས་པར་སྔར་ནི་བརྩང་འགྱུར་ཅིང་། །ཤིན་ཏུ་དྲི་ཞིམ་ལུས་བྱུགས་ལ། །བདུད་རྩི་བཞིན་བསམ་སྦྱིན་སྲེག་བྱ། །དམ་ཚིག་འདི་ནི་
འདའ་བར་དཀའ། །ལྷ་རྫས་བདུད་རྩི་བྲོ་ལྔ་ནི། །དང་པོ་མེ་ལྷ་བརྟགས་བྱས་ལ། །ཁྲོ་བོ་དེ་ནི་དེ་ལུས་ལ། །སྤྱན་དྲངས་ནས་ནི་བཞུག་པར་བསམ། །དེ་ནས་དང་པོ་ཁྲོ་བོ་ལ། །བསྲེག་བྱ་ལན་གསུམ་དབུལ་བར་བྱ། །དེ་ནས་དཀོན་
མཆོག་གསུམ་ལ་དབུལ། །དེ་ནས་མེ་ལྷ་ཉིད་ལ་གསུམ། །དེ་ནས་རྡོ་རྗེ་སེམས་དཔའ་ལ། །དེ་ནས་ལྷ་རྣམས་རེ་རེ་ལ། །དེ་ནས་བགེགས་ལ་སོགས་ལ་འབུལ། །ཡིད་དུ་འོང་བའི་ལྷ་ཡང་རུང་། །དེ་ལ་དང་པོ་ཁྲོ་བོ་ཡི། །སྔགས་ཀྱིས་ཡམ་ཤིང་
10-7-35b


སྦྱིན་སྲེག་བྱ། །དེ་ནས་གཅིག་ཏུ་བསྲེག་ནས་ཀྱང་། །བདུད་རྩིའི་སྔགས་ཀྱིས་བཏབ་ནས་ནི། །དེ་བཞིན་སྦྱིན་སྲེག་བྱས་འོག་ཏུ། །བརྒྱ་སྟོང་ཉིད་དམ་ཡང་ན་ཡང་། །བརྒྱ་རྩ་བརྒྱད་ཀྱི་བར་དུ་ནི། །ཁྲོ་བོ་ཉིད་ལ་དབུལ་བར་བྱ། །ཞེས་བཤད་དོ། །
དེ་དག་གི་དོན་ནི་འདི་ཡིན་ཏེ།  སྔར་བསྟན་པ་བཞིན་དུ་ཐབ་ཁུང་ལེགས་པར་བྱས་ནས་བུད་ཤིང་མཛེས་པར་བརྩིགས་ཏེ།  མཆོད་པ་དང་གཏོར་མ་ལ་སོགས་པ་ལེགས་པར་བཤམས་ལ།  མར་དང་ཏིལ་གཙོ་བོར་གྱུར་པའི་བསྲེག་རྫས་རྣམས་དྲུང་དུ་
ཉེ་བར་བསགས་ཏེ།  བདག་སྔ་དྲོའི་དུས་སུ་ཁ་ཤར་དུ་བལྟས་གོས་དང་རྒྱན་དཀར་པོས་བརྒྱན་ཏེ།  དཔའ་བོ་གཅིག་པའི་རྣལ་འབྱོར་བསྙེན་པ་བཞིན་རྫོགས་པར་བྱས་ནས་ཅི་འབྱོར་གྱིས་བདག་ཉིད་ལ་མཆོད་ལ་ཡམ་ཤིང་ལ་མེ་སྦར་ཏེ།  ཨོཾ་
བཛྲ་ཛྭ་ལ་ཛྭ་ལ་ཧཱུཾ་ཞེས་བརྗོད་པས་ཐབ་ཏུ་མེ་སྦར་ལ།  ཀུ་ཤའི་ཆུན་པོས་དྲི་ཞིམ་པོའི་ཆུས་ཐབ་དང་།  ཡོ་བྱད་ལ་གཏོར་ཞིང་ཨོཾ་བཛྲ་ཨ་མྲྀ་ཏེ་ཧཱུཾ་ཕཊ་ཞེས་པས་བསངས་ལ།  ཐབ་ཨོཾ་ཤས་སྟོང་པར་བསམས།  ཨོཾ་བྷ་ཞེས་པས་ཐབ་
དྭངས་ཤིང་ཐོགས་པ་མེད་པ་དཀར་པོ་རྒྱ་དང་ཚད་ཡོངས་སུ་མ་ཆད་པ་བསྐྱེད་ལ།  ཨོཾ་ཨགྣེ་ཡེ་ཛཿཧཱུཾ་བཾ་ཧོཿཞེས་བྱ་བ་ཙམ་མམ།  ཚིགས་བཅད་ལ་སོགས་པ་རྒྱས་པ་བྱས་ཀྱང་རུང་སྟེ།  ཤར་ལྷོ་ནས་མེ་ལྷ་དཀར་པོ་ར་སྐྱེས་དང་པདྨ་
དཀར་པོའི་གདན་ཅན་སྐུ་མདོག་དཀར་པོ་ཞལ་གཅིག་ཕྱག་བཞི་པ་ཕྱག་དང་པོ་གཉིས་གཡས་རིན་པོ་ཆེ་དང་།  གཡོན་པདྨ།  འོག་མ་གཉིས་ཀྱིས་གཡོན་རིལ་བ་དང་།  གཡས་དབྱུག་པ་འཛིན་པ་སྤྱན་དྲངས་ཏེ་ཐབ་ཏུ་བཞུགས་པ་ལ་མཆོད་
10-7-36a


ཡོན་དང་ཞབས་བསིལ་དབུལ།  མེ་ལྷའི་སྦྱིན་སྲེག་འདིར་འབུལ་བའམ།  འོག་ཏུ་འབུལ་བ་གང་རུང་བྱས་སྟེ།  གཞུང་ནས་འོག་ཏུ་བྱ་བར་བཤད་དོ། །དེ་ནས་སངས་རྒྱས་དང་བྱང་ཆུབ་སེམས་དཔའ་འཁོར་དང་བཅས་པ་
གོང་དུ་བཤད་པའི་ཚིགས་བཅད་ལ་སོགས་པས་སྤྱན་དྲངས་ལ།  ཐབ་ཀྱི་ཤར་དུ་པདྨའི་སྟེང་དུ་སྤྱན་དྲངས་ལ་ཡང་ཅི་འབྱོར་གྱིས་མཆོད།  མེ་ལྷའི་ལྟོ་བ་ཡངས་པར་སྤྱན་དྲངས་ལ།  དེའི་ཐུགས་ཀའི་འོད་དང་།  བདག་གི་ཐུགས་ཀའི་འོད་ཀྱིས་
བསྒྲུབ་བྱའི་སྡིག་པ་རྣམས་བཀུག་སྟེ་མེ་ལ་ཐིམ་པས་སྡིག་པ་ཐམས་ཅད་བསྲེགས་པར་བསམས་ནས་བསྲེགས་རྫས་རྣམས་སོ་སོར་བྱ་བའམ་ཐམས་ཅད་བསྲེས་ནས་བྱས་ཀྱང་བཏུབ་སྟེ།  བདུད་རྩི་འཁྱིལ་པའི་སྔགས་བཏབ་པས་ཐམས་ཅད་བདུད་རྩིར་
བསམས་ལ།  ཨོཾ་ཨགྣེ་ཡེ་ཆེ་གེ་མོའི་སྡིག་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ།  ཞེས་བྱ་བས་མེ་ལྷ་ལ་ལན་གསུམ་དབུལ་བར་བྱའོ། །དེ་ནས་མེ་ལྷའི་ལྟོ་བ་ལ་བཞུགས་པའི་ཁམས་གསུམ་རྣམ་རྒྱལ་ལ།  ཨོཾ་བཛྲ་སཏྭ་ཀྲོ་དྷ་ཨ་ན་ལརྐ་
མ་ཧཱ་བཛྲ་ཀྲོ་དྷ་དྲ་བ་དྲ་བ་བི་ཏྲ་བ་བི་ཏྲ་བ་སརྦ་ཨ་པ་ཡ་ན་ཤ་ཡ་ན་ཤ་ཡ་ཧ་ར་ཧ་ར་པྲ་ནན་ཧཱུྃ་ཕཊ།  ཆེ་གེ་མོའི་སྡིག་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ།  ཞེས་བྱ་བས་སྡིག་པ་ཐམས་ཅད་ཞི་བར་བྱ་བའི་དོན་དུ་ཁྲོ་བོ་ལ་ལན་གསུམ་ལ་
སོགས་པ་ཅི་རིགས་པ་ཞིག་དབུལ་བར་བྱའོ། །དེ་ནས།  ན་མོ་རཏྣ་ཏྲ་ཡཱ་ཡ།  བུདྡྷ་དྷརྨཱ་སཾ་ག་ཡ་བྷྱཿ།  ཆེ་གེ་མོའི་སྡིག་པ་ཐམས་ཅད་ཤཱནྟིཾ་ཀུ་རུ་ཡེ་སྭཱཧཱ།  ཞེས་བྱ་བས་དཀོན་མཆོག་གསུམ་ལ་ལན་ཅི་རིགས་པར་
10-7-36b


དབུལ་བར་བྱའོ། །དེ་ནས་ཡང་མེ་ལྷ་ལ་ལན་གསུམ་དབུལ་བར་བྱའོ། །དེ་ནས་རིགས་སྔགས་ཐམས་ཅད་ཀྱི་བདག་པོ་རྡོ་རྗེ་སེམས་དཔའ་ཁྲོ་བོའི་ལྟོ་བར་བསམས་ལ།  ཨོཾ་བཛྲ་སཏྭ་ཧཱུྃ་ཆེ་གེ་མོའི་སྡིག་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་
ཧཱ།  ཞེས་པས་ལན་ཅི་རིགས་པར་དབུལ་བར་བྱའོ། །དེ་ནས་དཀྱིལ་འཁོར་གྱི་ལྷ་ཐམས་ཅད་རྡོ་རྗེ་སེམས་དཔའི་ལྟོ་བར་སྤྱན་དྲངས་ལ་རང་རང་གི་སྔགས་སམ།  རྩ་བའི་རིག་པས་ཅི་འབྱོར་པ་དབུལ་བར་བྱའོ། །དེ་ནས་ཁྲོ་བོ་ཁམས་གསུམ་རྣམ་
རྒྱལ་ལ།  བགེགས་ཉེ་བར་ཞི་བར་བྱ་བའི་ཕྱིར་ལན་མང་དུ་དབུལ་བར་བྱའོ། །དེ་ནས་ཕྱོགས་སྐྱོང་དང་བགེགས་ལ་སོགས་པ་ཐབ་ཀྱི་ཕྱོགས་གཅིག་ཏུ་བཀུག་ལ་རང་རང་གི་སྔགས་ཀྱིས་ཅི་རིགས་པ་དབུལ་ལོ། །དེ་ནས་ཡང་རང་གི་ཕྱོགས་
སྐྱོང་བ་དང་དཔལ་མགོན་པོ་ལ་སོགས་པ་ཐབ་ཀྱི་ཕྱོགས་གཅིག་ཏུ་བཀུག་ལ་རང་སྔགས་ཀྱིས་ཅི་རིགས་པ་དབུལ་ལོ། །དེ་ནས་རྩ་བའི་རིག་པས་རིགས་དྲུག་བཀུག་ལ་ཅི་རིགས་པར་སྦྱིན་ནོ། །དེ་ནས་ཡང་མེ་ལྷ་ཉིད་ལ་ཅི་རིགས་པར་སྦྱིན་པར་བྱའོ། །
མཇུག་གི་བྱ་བ་ནི་མེ་ལྟར་འབར་བ་ལས།  དེ་ཡི་ལུས་ལ་དབང་བསྐུར་ཞིང་། །མཉམ་པར་བཞག་པས་བསྲུངས་ནས་ཀྱང་། །མཇུག་ཏུ་མངོན་པར་མཆོད་ནས་ནི། །ལྷ་རྣམས་ཐམས་ཅད་གཤེགས་སུ་གསོལ། །ཞེས་
འབྱུང་བ་སྟེ་དེའི་དོན་ནི་འདི་ཡིན་ཏེ།  སྦྱིན་སྲེག་རྫོགས་པ་དང་།  བསྒྲུབ་བྱ་ལ་ཅི་རིགས་པར་དབང་བསྐུར་ལ།  མེ་ལྟར་འབར་བའི་སྔགས་ཀྱིས་བསྲུང་བ་བྱས་ལ་ལྷ་ཐམས་ཅད་ལ་ཅི་འབྱོར་པས་མཆོད་དེ།  ཡི་གེ་བརྒྱ་པ་བརྗོད་
10-7-37a


དེ་ཆོ་ག་ལྷག་ཆད་ཁ་བསྐངས་ཏེ་གཤེགས་སུ་གསོལ་བར་བྱའོ། །དེ་ལྟར་ན་སྦྱིན་སྲེག་དབང་དང་འབྲེལ་བར་བྱེད་ན།  ལྷ་བསྒྲུབས་ནས་མཆོད་པའི་སྐབས་སུ་སྦྱིན་སྲེག་བྱས་ལ་གདོད་དབང་བསྐུར་བ་དང་།  བཟླས་པ་དང་
ཕྱིར་ཟློག་ལ་སོགས་པ་བྱ་བའམ།  མཇུག་ཏུ་སྦྱིན་སྲེག་བྱས་ལ་མཇུག་གི་བྱ་བ་གང་རུང་ཡིན་ནོ། །དགོས་པ་ནི་ཀུན་རིག་ནས།  དེ་ཡི་མིང་ནས་བརྗོད་ནས་ཀྱང་། །མཁས་པས་འབུམ་ཕྲག་བརྒྱའམ་ནི། །ཡང་ན་བརྒྱ་ཕྲག་སྟོང་རྙེད་དུ། །
སྦྱིན་སྲེག་བྱས་པར་གྱུར་པ་ནི། །དམྱལ་བ་ཆེན་པོར་གྱུར་པ་འདི། །སྡིག་པ་དེ་ལས་ཐར་བར་འགྱུར། །ཞེས་བྱ་བ་དང་།  སྡིག་པ་བྱང་བའི་རྟགས་ཀྱང་།  ཡང་ན་ཧོཾ་ཁུང་ནང་དུ་ནི། །མེ་ཡིས་ལྟས་ནི་སྟོན་པར་འགྱུར། །དཀར་པོ་ཉིད་
དང་གཡས་སུ་འཁྱིལ། །ཞེས་བྱ་བ་ལ་སོགས་པ་གསུངས་སོ། །སྤོགས་ཆོག་ནི་བདག་མེད་བསྒོམ་པའོ། །ཞི་བའི་སྦྱིན་སྲེག་གོ།  ལས་འོག་མ་གསུམ་པོ་ལ་མི་འདྲ་བའི་ཁྱད་པར་བག་ཙམ་རེ་བཤད་པས་རྟོགས་པར་འགྱུར་
བས་དེ་བརྗོད་པར་བྱའོ། །དེ་ལ་རྒྱས་པའི་ཐབ་ཀྱི་ཁྱད་པར་ནི།  ཁྲུ་དོ་པ་ནས་བརྒྱད་པའི་བར་སེར་པོ།  དབུས་རིན་པོ་ཆེས་མཚན་པ་གྲུ་བཞི་པའོ། །བུད་ཤིང་དང་མཆོད་རྫས་ཐམས་ཅད་སེར་པོའོ། །ཡམ་ཤིང་ནི་འཛུབ་གང་པ་
ནས་ཁྲུ་བཞི་པའི་བར་རོ། །བསྲེག་རྫས་ནི་འབྲུ་སྣ་ཚོགས་པ་དང་།  མེ་ཏོག་སེར་པོ་སྣ་ཚོགས་པ་དང་།  མར་དང་།  སྦྲང་རྩི་དང་དཔལ་འབྲས་རྣམས་སོ། །སྒྲུབ་པ་པོའི་གོས་དང་རྒྱན་སེར་པོ་དང་།  ཉི་མའི་གུང་ལ་ཁ་བྱང་དུ་ལྟས་
10-7-37b


ལ་རྒྱས་པའི་བསམ་པས་བྱའོ། །སྤྱན་དྲང་ཞིང་མཆོད་བསྟོད་ནི་འཇིག་རྟེན་པ་དང་།  འདས་པ་ཐམས་ཅད་སེར་པོ་རིན་པོ་ཆེའི་རྒྱན་ཅན་ཡིན་ལ།  ཁྱད་པར་དུ་མཇུག་ཏུ་རྣམ་ཐོས་སྲས་ལ་སོགས་པ་གནོད་སྦྱིན་རྣམས་ལ་མང་དུ་མཆོད་ལ།  
བདག་གཞན་གྱི་བསམ་པ་ཐམས་ཅད་ཚིམ་ཞིང་རྒྱས་པར་བྱས་པར་བསམ་མོ། །དགོས་པ་ནི།  དེ་ནི་བདེ་འགྲོར་སྐྱེས་ནས་ཀྱང་། །མཁས་པས་རྒྱས་པར་བྱ་དགོས་ཏེ། །ཞེས་པ་དང་།  ལུས་ཅན་དེ་ཡི་ཚེ་དང་དཔལ། །གཟི་བརྗིད་བདེ་བའི་ལོངས་
སྤྱོད་འཕེལ། །ཞེས་བཤད་དོ། །སྔགས་ཀྱི་སྤེལ་ཚིག་མ་གཏོགས་པ་ལྷག་མ་རྣམས་ནི་སྔ་མ་བཞིན་ནོ། །རྒྱས་པའི་སྦྱིན་སྲེག་གོ།  དབང་ནི།  དེ་ནས་ཕན་ཕྱིར་ངེས་པར་ཡང་། །དབང་དུ་བྱ་བའི་ལས་བྱ་སྟེ། །ཞེས་བྱ་བ་ལ་སོགས་པའི་དོན་ནི།  
ཐབ་ཀྱི་ཁྱད་པར་ནི་ཁྲུ་གང་པ་ནས་བཞི་པའི་བར་ཅི་རིགས་པར་དམར་པོ་གཞུའི་དབྱིབས་ལྟ་བུ་དབུས་སུ་པདྨ་བྲིས་པའོ། །འདི་ལ་ཁོར་ཡུག་ལ་ཁྱད་པར་དུ་མདའ་གཞུའོ། །བུད་ཤིང་དང་མཆོད་རྫས་ཐམས་ཅད་ནི་དམར་པོའོ། །བུད་ཤིང་
ནི་ཞི་བ་དང་ཚད་མཉམ་པ་ལས་རྒྱུ་དམར་པོའམ།  ཙག་ལ་སོགས་པས་དམར་པོར་བཀུས་པའོ། །བསྲེག་རྫས་ནི་པདྨ་ལ་སོགས་པ་མེ་ཏོག་དང་འབྲས་བུ་དམར་པོ་ཉིད་དོ། །དམར་པོ་མ་ཡིན་པ་རྣམས་ཀྱང་དམར་པོར་བཀུས་པ་དང་།  
མར་དང་།  གུར་གུམ་དང་།  ཙན་དན་དམར་པོ་དང་།  ཡུངས་དམར་དང་།  ཙག །མཚལ།  ཟངས་ཕྱེ།  ཀེ་ཚེ།  ལན་ཚ།  ཏིལ།  ཞིམ་ཚེ།  ལ་ཕུག །ཁྲག་རྡུལ་ཆེན་པོ་རྣམས་ཡིན་ནོ། །སྒྲུབ་པ་པོའི་གོས་དང་རྒྱན་དམར་པོ་དང་།  ཆགས་
10-7-38a


པའི་ཡིད་ཀྱིས་ཕྱི་དྲོ་ཁ་ནུབ་ཏུ་བལྟས་པར་བྱའོ། །འཇིག་རྟེན་དང་དེ་ལས་འདས་པའི་ལྷ་རྣམས་དམར་པོར་སྤྱན་དྲངས་ཤིང་མཆོད་པ་ནི།  སྦྱིན་སྲེག་བྱས་ནས་ལྷ་ལ་སོགས། །ཐམས་ཅད་དེ་ཡི་དབང་དུ་འགྱུར། །ཞེས་
སོ། །སྔགས་རྣམས་ཀྱི་སྤེལ་ཚིག་མ་གཏོགས་ལྷག་མ་རྣམས་ནི་སྔ་མ་བཞིན་ནོ། །དབང་གི་སྦྱིན་སྲེག་གོ།  དྲག་པོ་ནི།  དེ་ལ་གདོན་རྣམས་རྣམ་གཞོམ་ཕྱིར། །མངོན་སྤྱོད་ཀྱང་ནི་བརྩམ་བྱ་སྟེ། །ཞེས་བྱ་བ་ལ་སོགས་པའི་དོན་ནི།  ཐབ་ཀྱི་
ཁྱད་པར་ནི་ཁྲུ་ཕྱེད་དང་གསུམ་པ་ནས་དགུ་པའི་བར་ནག་པོ་གྲུ་གསུམ་པ།  དབུས་སུ་རྡོ་རྗེ་རྩེ་དགུ་པ་དང་།  རྩེ་གསུམ་པ་དང་།  རྡོ་རྗེ་རྒྱ་གྲམ་དང་།  རྡོ་རྗེ་དབྱུག་པ་དང་།  རྡོ་རྗེ་རྩེ་གསུམ་པའི་དབྱུག་པ་དང་ལྔས་བརྒྱན་ལ་དགྲ་སྟྭས་མཐའ་
བསྐོར་བའོ། །མཆོད་རྫས་རྣམས་ཀྱང་ནག་པོ་སྟེ་ཤ་དང་ཁྲག་གིས་གང་བའི་ཐོད་པའོ། །བསྲེག་རྫས་ནི་ཁྲག་དང་།  དུག་དང་།  ཡུངས་ཀར་དང་།  སྒྲུབ་པ་པོའི་གོས་དང་རྒྱན་ནག་པོ་དང་།  བགེགས་ཚར་གཅད་པའི་ཡིད་ཀྱིས་སྲོད་དམ་
ནམ་གྱི་གུང་ལ་ཁ་ལྷོར་བལྟས་ལ་བྱའོ། །འཇིག་རྟེན་དང་འཇིག་རྟེན་ལས་འདས་པའི་ལྷ་རྣམས་ནག་པོའི་རྣམ་པས་སྤྱན་དྲངས་ལ་མཆོད་པར་བྱའོ། །དགོས་པ་ནི།  དེ་ནས་དེ་ཡི་སྡིག་འཇོམས་ལུས། །བགེགས་དང་བྲལ་ཏེ་ཅི་བདེ་བར། །
མཐོ་རིས་འཇིག་རྟེན་མི་ཡི་ནང་། །ཁམས་གསུམ་ན་ནི་ཅི་བདེར་སྤྱོད། །ཅེས་བཤད་དོ། །སྔགས་རྣམས་ཀྱི་སྤེལ་ཚིག་མ་གཏོགས་པ་ལྷག་མ་རྣམས་ནི་སྔ་མ་བཞིན་ཉམས་སུ་བླང་བར་བྱའོ། །དྲག་པོའི་སྦྱིན་སྲེག་གོ།  དེ་ལྟ་བུའི་སྦྱིན་སྲེག་
10-7-38b


རྣམས་ཚེ་དང་ལྡན་པ་རྣམས་ཀྱི་དོན་དུའང་བྱ་སྟེ།  ཚེ་དཔག་མེད་ཉིད་ལས།  གོ་རིམ་འདི་དག་ཉིད་ཀྱིས་ནི། །ཚེ་ལྡན་རྣམས་ལའང་བྱ་བ་སྟེ། །དེ་ནས་གང་གི་ཕྱིར་བྱས་ལ། །དེ་ཡི་ཕྱིར་ཡང་དེ་བཞིན་འགྱུར། །གཞན་དག་ཀྱང་ནི་ལས་རྣམས་ཀྱང་། །
སྔ་མ་ཇི་བཞིན་དེ་ལྟར་བྱ། །དེ་ནས་སེམས་ཅན་ཐམས་ཅད་ལའང་། །མྱུར་དུ་བདེ་སྐྱིད་འཐོབ་པར་འགྱུར། །ཞེས་བཤད་པས་སོ། །སྦྱིན་སྲེག་གི་སྤྱིའི་དོན་འདི་དག་ནི་འོག་ཚེ་དཔག་མེད་དང་།  འཁོར་ལོས་སྒྱུར་བའི་སྐབས་སུའང་སྦྱར་བར་བྱའོ། །
གཞུང་གི་དོན་ནི་གོ་སླའོ། །བདུན་པ་རོ་བསྲེགས་ཏེ་སྡིག་པ་སྦྱོང་བ་ལ་བརྒྱད་དེ།  ཐབ་ཁུང་གི་དཀྱིལ་འཁོར་བྲི་བ་དང་།  མཆོད་པའི་རྫས་དགོད་པ་དང་། ཡེ་ཤེས་ཀྱི་དཀྱིལ་འཁོར་སྤྱན་དྲངས་ཏེ་མཆོད་པ་དང་།  རང་ལྷའི་རྣལ་འབྱོར་དང་
ལྡན་པས་བསྲེག་རྫས་བྱིན་གྱིས་བརླབ་པ་དང་།  རོ་བྱིན་གྱིས་བརླབས་ཏེ་ཆས་སུ་གཞུག་པ་དང་།  སྦྱིན་སྲེག་བྱ་བའི་རིམ་པ་དངོས་དང་།  མཆོད་རྟེན་གདབ་པ་དང་།  རྟགས་དང་ཕན་ཡོན་འབྱུང་བར་བསྟན་པའོ། །དང་པོ་ནི།  གྲུ་བཞི་པ་ཡི་
ཚད་དུ་ནི། །ཞེས་སོགས་ཏེ།  ཕྱི་དྲོའི་དུས་སུ་མཐོང་བ་བརྒྱུད་པ་བཞིན་ཐིག་གདབ།  རོ་ནར་མོར་བསྲེག་ན་ཁྲུ་བཞི་པ་ཙོག་པུར་བསྲེག་ན་ཁྲུ་གང་པ་ལ་ཤོང་བས་ཁྲུ་ཕྱེད་མར་བྲུས་པའམ།  མ་བྲུས་ཀྱང་རུང་སྟེ།  ཁྲུ་གང་པ་ཟླུམ་པོ་དཔངས་ཅི་རིགས་བརྩིགས་
པ་དེའི་ཁ་ལ་རྡོ་རྗེ་ཕྲེང་བ་བྲི་བར་བྱ།  ནང་དུ་འཁོར་ལོ་རྩིབས་བརྒྱད་པའི་ལྟེ་བ་ལ་རྡོ་རྗེ།  ཕྱོགས་བཞིར་འཁོར་ལོ་དང་།  རིན་པོ་ཆེ་དང་།  པདྨ་དང་།  སྣ་ཚོགས་རྡོ་རྗེ་དང་།  མཚམས་སུ་ལྷ་མོ་བཞིའི་མཚན་མ་བྲི་བར་བྱའོ། །དེའི་ཕྱི་རོལ་དུ་རྒྱ་དང་དཔངས་
10-7-39a


སོར་བཞི་པ་གཞི་དཀར་པོ་ལ་སྣ་ཚོགས་རྡོ་རྗེ་ལྗང་ཁུ།  དེའི་ཕྱི་རོལ་ཏུ་རྒྱ་དང་དཔངས་སོར་གཉིས་པ་ལྗང་ཁུ་ལ་རིན་པོ་ཆེ་སེར་པོ།  དེའི་ཕྱི་རོལ་ཏུ་རྒྱ་དང་དཔངས་སོར་གཅིག་པ་སེར་པོ་ལ་པདྨ་དམར་པོ་བྲི།  ཡང་ན་དཔངས་སུ་མ་
བྱས་པར་གཞི་མཉམ་པོར་བྲིའོ། །དེའི་ཕྱི་རོལ་ཏུ་ལྷ་སྣམ་ལ་སེམས་དཔའ་བཅུ་དྲུག་དང་།  ཉན་ཐོས་དང་།  རང་རྒྱལ་དང་།  ཁྲོ་བོ་རྣམས་བྲི།  སྒོ་བྱེད་ན་སྒོ་བ་རྣམས་བྲི་བར་བྱའོ། །དེའི་ཕྱི་རོལ་དུ་ཁོར་ཡུག་ལ་འཇིག་རྟེན་པ།  ལྷ་ཆེན་པོ་བརྒྱད།  ཀླུ་ཆེན་
པོ་བརྒྱད།  གཟའ་ཆེན་པོ་བརྒྱད་རྒྱུ་སྐར་དང་བཅས་པ།  འཇིགས་བྱེད་དགུ།  ཕྱོགས་སྐྱོང་བཅུ་དང་།  རྒྱལ་པོ་ཆེན་པོ་བཞི་རྣམས་མིང་ངམ།  བརྡའམ།  ཐིག་ལེར་བྲི་བར་བྱའོ། །གཉིས་པ་ནི།  བྱ་དང་བུམ་པ་གང་བ་དང་། །ཞེས་སོགས་
ཏེ་བྱ་ནི་མཆོད་པའི་བུམ་པ་དང་།  བུམ་པ་གང་བ་ནི་ཁྲུས་ཀྱི་བུམ་པའོ། །གཏོར་མས་སྣོད་རྣམས་བཀང་བ་ནི།  གཏོར་མ་གསུམ།  གཞི་བདག་ལ་གཅིག །རིགས་དྲུག་ལ་གཅིག །ཡི་དྭགས་ལ་གཅིག་སྟེ་དྲུག་ནི་ཅིས་ཀྱང་བཤམ་མོ། །ལྷག་
མ་རྣམས་ནི་གོ་སླའོ། །གསུམ་པ་ནི།  ལྷ་རྣམས་མང་པོ་སྤྱན་དྲངས་ལ། །ཞེས་སོགས་ཏེ།  འོག་སྦྱིན་སྲེག་བྱ་བའི་རིམ་པ་དང་དངོས་ཀྱི་སྐབས་སུ་ཕྱོགས་གཅིག་ཏུ་བཤད་པར་བྱའོ། །བཞི་པ་ནི།  ལྷ་ཡི་སྦྱོར་བ་རབ་གནས་ལ། །ཞེས་སོགས་ཏེ།  
གོང་དུ་སྨོས་པའི་བསྲེག་རྫས་རྣམས་ཅི་འབྱོར་པར་སྟ་གོན་བྱས་ལ་བུད་ཤིང་ལ་རྩ་བའི་རིག་པ་བཟླས་ཤིང་།  དྲི་ཞིམ་པོ་གཏོར་ལ་ཁུང་བུར་ལེགས་པར་བརྩིགས་སྒྱེད་བུ་གཟུགས་སོ། །དེ་ནས་རོའི་དྲུང་དུ་ཅི་འབྱོར་པའི་མཆོད་པ་བཤམས་ལ་བདག་གི་རྣལ་
10-7-39b


འབྱོར་དཔའ་བོ་གཅིག་པ་བཟླས་པ་དང་བཅས་པ་བྱས་ནས་རོའི་བྱ་བ་ལ་འཇུག་པར་བྱའོ། །དེ་དག་གིས་ནི་བསྲེག་རྫས་བཤམ་པ་དང་།  བུད་ཤིང་བརྩིག་པ་དང་།  བདག་གི་རྣལ་འབྱོར་རྣམས་བསྟན་ཏོ། །ལྔ་པ་ནི།  རོ་ལ་སྔགས་ཀྱིས་བཏབ་
ནས་ཀྱང་། །ཞེས་སོགས་ཏེ།  བདག་གི་རྣལ་འབྱོར་རྫོགས་པ་དང་།  ཆང་བུས་བགེགས་ཞི་བས་སྦྱང་ངོ་། །བགེགས་དྲག་པོས་ཉེ་བར་ཞི་བར་བྱ་བའི་དོན་དུ་ཁམས་གསུམ་རྣམ་རྒྱལ་གྱི་སྔགས་ལན་ཅི་རིགས་པ་བཟླས་པས་བགེགས་སྦྱང་བའོ། །བུམ་
པ་ལ་རྩ་བའི་རིག་པ་བཟླས་པའི་ཆུས་བཀྲུ་བར་བྱའོ། །རྩ་རིག་བཟླས་པའི་དྲིས་ཉེ་བར་བྱུག་པར་བྱའོ། །རྩ་རིག་བཟླས་ཏེ་སྟོད་གཡོགས་དང་།  སྨད་གཡོགས་དང་།  ཅི་རིགས་པའི་རྒྱན་གྱིས་བཀླུབས་ཏེ་མཛེས་པར་བྱའོ། །གུ་གུལ་ལ་སོགས་པའི་བདུག་པས་
བདུག་ཅིང་ཁྲོ་བོ་གང་ཡིན་པའི་སྔགས་བཟླ་བར་བྱས་ནས།  རོ་དེ་ཉིད་ལྷ་ཡིན་པ་སྙམ་དུ་བསམས་ལ་ཅི་འབྱོར་པའི་མཆོད་པས་མཆོད་དེ།  རྡོ་རྗེ་ཁུ་ཚུར་གཉིས་ཀྱིས་སྙིང་ག་དང་།  ལྐོག་མ་དང་།  སྤྱི་གཙུག་དང་།  རྣ་བ་རྣམས་སུ་གཏུག་ཅིང་།  ཨོཾ་སརྦ་
བིད་ཨདྷི་ཏིཥྛ་ཛྙཱ་ན་ས་མ་ཡེ་ཧཱུྃ་ཞེས་པས་བྱིན་གྱིས་བརླབ་པའོ། །ཉིན་མོ་ཤོག་བུ་ལ་བྲིས་ཏེ་སྟ་གོན་བྱས་པའི་ཡི་གེ་རྣམས་གནས་བཅོ་བརྒྱད་པོ་རྣམས་སུ་གདགས་པར་བྱའོ། །དེ་ཙམ་མ་གྲུབ་ན་གཞུང་ནས།  གཙུག་ཕུད་དཔུང་པར་དེ་བཞིན་དུ། །
སྔགས་བྲིས་པས་ནི་གདགས་པར་བྱ། །ཞེས་འབྱུང་བས་སྔགས་རྣམས་རྫོགས་པར་ཚར་གསུམ་བྱས་ལ་མགོ་དང་དཔུང་པ་གཉིས་ཀྱི་ཕྱོགས་སུ་བཏགས་ལ་གཞན་གནས་བཅོ་བརྒྱད་པོ་རྣམས་སུ།  དེ་ལྟར་གཞན་དུ་ཡི་གེ་སྔགས། །མཆོག་ཏུ་དགེ་
10-7-40a


བ་རྣམས་གཞག་གོ།  ཞེས་པས་གནས་བཅོ་བརྒྱད་པོར་སྔགས་བྲིས་ནས་གློན་པ་བཞིན་བསམ་ཡང་འགལ་བ་མེད་དོ་ཞེས་མཆན་རྙིང་པའི་བཤད་པ་ལས་འབྱུང་སྟེ།  དེ་ནི་ལེགས་པར་རྟོགས་སོ། །དེ་ནས་རས་ཁྲུ་གང་བ་ལ་སོགས་
པའི་སྟན་དང་བཅས་ཏེ།  རོལ་མོ་དང་བགེགས་བསྐྲད་པ་དང་བཅས་པས་ཐབ་ཀྱི་དབུས་སུ་བཅུག་ལ་ཡང་རྩ་བའི་རིག་པ་བཟླའོ། །གཞན་དུ་ཅི་རིགས་པའི་གོས་གཡོགས་པར་བྱའོ། །དྲུག་པ་ནི།  དེ་ནས་བྱིན་ཟ་དགེ་བ་རབ་སྦར་ལ། །ཞེས་སོགས་ཚིགས་
བཅད་ཕྱེད་གཉིས་དང་།  དེ་ནས་བྱིན་ཟ་ལ་ནི་བརྟག་བྱ་བ། །ཞེས་སོགས་ཚིག་རྐང་གཉིས་ཀྱི་དོན་ནི།  མེ་སྦར་ཏེ་ཐབ་དང་ཡོ་བྱད་ཐམས་ཅད་ལ་བདུད་རྩི་འཁྱིལ་བའི་སྔགས་བཟླས་ཤིང་ཀུ་ཤའི་ཆུན་པོས་དྲིའི་ཆུས་རོ་ལ་བགེགས་དང་མི་གཙང་བ་ཐམས་
ཅད་བསངས་ལ།  ལས་ཁ་ཚར་བ་སྔོན་དུ་སོང་བས།  བདག་གི་རྣལ་འབྱོར་དཔའ་བོ་གཅིག་པ་བསྙེན་པ་བཞིན་རྫོགས་པར་བསྒོམ་བཟླས་པ་ཅི་རིགས་པར་བྱས་ལ་མཆོད་པ་ལ་འཇུག་པར་བྱ་སྟེ།  རྡོ་རྗེ་དྲིལ་བུ་འཛིན་པའི་སྔགས་པས་ཚིགས་བཅད་ཅི་
ཤེས་པ་དབྱངས་དང་བཅས་པས།  ཨོཾ་ཨགྣེ་ཡ་མ་ཧཱ་ཏེ་ཛ་བཛྲ་སརྦ་ཀརྨཱ་པྲ་སཱ་དྷ་ཀ་ཀཱ་རུ་ཎ་ཡ་ཀྲྀ་ཏ་མ་ཧཱ་ཏེ་ཛ་པ་ཏ་ཀཾ་ཨསྨིན་ས་ནི་ཧི་ཏོ་བྷ་ཝ།  ཞེས་བྱ་བས་མེའི་ཕྱོགས་ནས་མེ་ལྷ་དཀར་པོ།  ཞལ་གཅིག་ཕྱག་བཞི་པ་པདྨ་དང་ར་དཀར་པོའི་གདན་ལ་
བཞུགས་པ།  གཡས་རིན་པོ་ཆེའི་དབྱུག་པ།  གཡོན་པདྨ་སྤྱི་བླུགས་འཛིན་པ་སྤྱན་དྲངས་ལ་ཐབ་ཏུ་བཞུགས་སུ་གསོལ་ཏེ་མཆོད་ཡོན་སྔོན་དུ་སོང་བའི་མཆོད་པས་བསྲེག་རྫས་རྣམས་བདུད་རྩིར་བསམས་ཏེ་ཐམས་ཅད་བསྲེས་པའམ་སོ་སོར་བྱས་ཀྱང་རུང་སྟེ།  
10-7-40b


ཨོཾ་ཨགྣེ་ཡེ་སརྦ་པཱ་པཾ་ད་ཧ་ན་ཤཱནྟིཾ་ཀུ་རུ་སྭཱ་ཧཱ།  ཞེས་བྱ་བས་སྦྱིན་སྲེག་ལན་ཅི་རིགས་པ་ཕུལ་ལ་བསྟོད་པར་བྱའོ། །དེ་ནས་མེ་ལྟར་འབར་བ་ནས་འབྱུང་བ་བཞིན་ཁྲོ་བོ་མེ་ལྟར་འབར་བ་སྤྱན་དྲངས་ལ་ལན་གསུམ་དབུལ་ལོ། །དེ་ནས་དཀོན་མཆོག་གསུམ་
ལ་ལན་གསུམ་དབུལ་བར་བྱའོ། །དེ་ནས་ཡང་།  ཇི་ལྟར་གསུངས་བཞིན་འདོད་པ་ཡིས། །ཞེས་སོགས་ཚིགས་བཅད་གཅིག་དང་།  དེ་ནས།  བསྲེག་བྱས་བཀང་སྟེ་རིམ་གྱིས་ནི། །ཞེས་སོགས་ཚིགས་བཅད་ཕྱེད་དང་གཉིས་ཀྱི་དོན་ནི་སྔར་དཀྱིལ་འཁོར་
གྱི་སྐབས་སུ་བཤད་པའི་ཚིགས་བཅད་དབྱངས་དང་བཅས་པས་དཀྱིལ་འཁོར་གྱི་འཁོར་ལོ་འཁོར་དང་བཅས་པ་མེ་ལྷའི་ལྟོ་བར་སྤྱན་དྲངས་ལ་སྔར་དཀྱིལ་འཁོར་དུ་བཤད་པའི་མཆོད་པ་དང་བསྟོད་པ་ཅི་རིགས་པས་བསྟོད་དེ།  བསྲེག་རྫས་གཞན་
རྣམས་དང་རོའི་ཤ་ཁྲག་རུས་པ་དང་བཅས་པ་རྣམས་བདུད་རྩིར་བསམས་ཏེ།  རྩ་བའི་རིག་པའི་མཇུག་ཏུ་སརྦ་པཱ་པཾ་ཤཱནྟིཾ་ཀུ་རུ་སྭཱ་ཧཱ།  ཞེས་བཏགས་ལ་གཙོ་བོ་ལ་བརྒྱ་རྩ་བརྒྱད་དབུལ་བར་བྱའོ། །དེ་ནས་གཙོ་བོའི་ཤར་ཕྱོགས་ན་བཞུགས་པའི་སྦྱོང་བའི་
རྒྱལ་པོ་ལ་རང་གི་སྔགས་ཀྱིས་ཉི་ཤུ་རྩ་གཅིག་དབུལ་བར་བྱའོ། །དེ་ནས་འཁོར་གཞན་རྣམས་ལའང་རང་སྔགས་ཀྱིས་ལན་གསུམ་གསུམ་ཕུལ་ལ་མཆོད་དེ་བསྟོད་པར་བྱའོ། །དེ་ནས་ཡང་།  ཕྱག་ན་རྡོ་རྗེ་པདྨ་ཞགས་པ་བསྣམས། །ཞེས་སོགས་ཚིག་
རྐང་བཅུ་གཅིག་གི་དོན་ནི།  དེ་ལྟར་དཀྱིལ་འཁོར་མཆོད་ནས་མ་གཤེགས་པར་ཕྱག་ན་རྡོ་རྗེ་འཇིག་རྟེན་གསུམ་ལས་རྣམ་རྒྱལ་གྱི་གཟུགས་སུ་བཞུགས་པ་སྤྱན་དྲངས་ལ་ཀུན་རིག་གི་སྤྱན་སྔར་བཞུགས་སུ་གསོལ་ལ་ཅི་འབྱོར་གྱིས་མཆོད་དེ།  སྦྱིན་
10-7-41a


སྲེག་བྱ་བ་ནི་བསྲེག་རྫས་རྣམས་དང་།  རོའི་ཤ་དང་ཁྲག་དང་རུས་པ་རྣམས་བདུད་རྩིར་བསམས་ལ་དབུལ་ཏེ།  ཨོཾ་བཛྲ་ས་ཏྭ་ཀྲོ་དྷ་ཨ་ན་ལརྐ་མ་ཧཱ་བཛྲ་ཀྲོ་དྷ་དྲ་བ་དྲ་བ་བི་དྲ་བ་བི་དྲ་བ་སརྦ་ཨ་པ་ཡ་ནཱ་ཤ་ཡ་ནཱ་ཤ་ཡ་ཧ་ར་ཧ་ར་པྲ་ནན་ཧཱུཾ་
ཕཊ།  ཆེ་གེ་མོའི་སྡིག་པ་ཐམས་ཅད་ཤཱནྟིཾ་ཀུ་རུ་སྭཱ་ཧཱ།  ཞེས་བྱ་བ་བརྒྱ་ནས་བྱེ་བའི་བར་ཅི་རིགས་པས་ཕུལ་ལ་སྦྱིན་སྲེག་བྱའོ། །དེས་ནི་མེའི་དབུས་སུ་མཚན་མ་སྟོན་པ་ལ་སོགས་པའི་སྡིག་པ་དག་པའི་རྟགས་རྣམས་ཞི་བའི་སྦྱིན་སྲེག་དང་མཐུན་པར་སྟོན་པར་
འགྱུར་རོ། །དེ་ནས་དཀྱིལ་འཁོར་གྱི་གཙོ་བོ་དང་ཕྱག་ན་རྡོ་རྗེ་འཁོར་དང་བཅས་པ་དཀྱིལ་འཁོར་གྱི་སྐབས་བཞིན་མཆོད་ཅིང་བསྟོད་དེ་ལྷག་ཆད་ཁ་བསྐང་བའི་ཕྱིར་ཡི་གེ་བརྒྱ་པ་བརྗོད་ཅིང་བཟོད་པར་གསོལ་ལ།  འདོད་པའི་དོན་ལ་གསོལ་བ་བཏབ་ལ་ཅུང་
ཟད་མཆོད་དེ་གཤེགས་སུ་གསོལ་བར་བྱའོ། །དེ་ནས་ཡང་མེ་ལྟར་འབར་བའི་སྐབས་ནས་འབྱུང་བ་བཞིན་རང་གི་ལྷ་དང་།  ཀླུ་དང་།  ཕྱོགས་སྐྱོང་བ་དང་།  གཟའ་དང་།  རྒྱུ་སྐར་དང་།  འཇིགས་བྱེད་དང་།  རྒྱལ་ཆེན་བཞི་རྣམས་སྤྱན་དྲངས་ལ་རང་སྔགས་
ཀྱིས་ཕུལ་ལ་མཆོད་དེ་རང་སར་བཏང་བར་བྱའོ། །དེ་ནས་ཡང་བགེགས་ལ་སོགས་པ་འཇིག་རྟེན་པ་རང་གིས་ཡིད་ལ་འདོད་པ་གང་ཡིན་པ་བཀུག་ལ་མཆོད་ལ་གཏང་བར་བྱའོ། །དེ་ནས་ཡང་མེ་ལྷ་མཆོད་དེ་བསྟོད་ལ་འདོད་པའི་དོན་ལ་གསོལ་བ་
བཏབ་ལ།  ལྷག་ཆད་བཟོད་པར་གསོལ་ཏེ་མཉེས་པར་བྱས་ལ་གཤེགས་སུ་གསོལ་བར་བྱའོ། །དེ་ནས་མཇུག་གི་བྱ་བ་ནི་གཏོར་མ་རྣམས་གཏང་།  ཆོས་ཀྱི་སྦྱིན་པ་རྒྱས་པར་བྱ།  དགེ་བའི་རྩ་བ་བསྔོ་བ་རྒྱས་པར་བྱ།  གསོན་པོ་རྣམས་ལ་
10-7-41b


བཀྲ་ཤིས་པའི་སྨོན་ལམ་ཡང་གདབ།  བཀྲ་ཤིས་བྱ།  ཡོན་བདག་གིས་དཔོན་སློབ་འཁོར་དང་བཅས་པ་ལ་སྟོན་མོ་དང་ཡོན་དབུལ་བ་དང་།  བསྔོ་བ་རྒྱས་པར་བྱའོ། །དེ་དག་ནུབ་གཅིག་ལ་བྱས་ཀྱང་རུང་།  ནུབ་གཉིས་པར་བྱས་ན་རོ་ཆས་སུ་
གཞུག་པ་ཡན་ཆད་ནུབ་གཅིག །མེ་སྦར་བ་མན་ཆད་ནུབ་གཉིས་པ་ལ་བྱེད་པ་ཡིན་ཏེ།  གང་ལྟར་ཡང་འགལ་བ་མེད་དོ། །བདུན་པ་ནི།  དེ་ནས་ཐལ་བར་གྱུར་པ་དང་། །ཞེས་པ་སྟེ།  འདི་ལ་རུས་པའི་ཆོ་ག་དང་།  འཇིམ་པའི་ཆོ་ག་དང་།  མཆོད་རྟེན་
གདབ་པ་དང་།  རབ་ཏུ་གནས་པར་བྱས་ཏེ་བསྒྲུབ་པ་དང་བཞི་ལས།  དང་པོ་ནི།  བསྲེག་ཁང་གི་དྲུང་དུ་ཕྱིན་ལ་ཨོཾ་བཛྲ་ས་མཱ་ཛཿཛཿཧཱུྃ་བྃ་ཧོཿཞེས་བརྗོད་ཅིང་ལག་པ་བསྣོལ་ལ་སེ་གོལ་མང་དུ་བརྡབ་པར་གསུངས་ལ།  རུས་པ་བསྡུ་བར་བྱའོ། །
དེ་ནས་བ་བྱུང་ལྔ་དང་དྲི་ཞིམ་པོའི་ཆུ་བསྲེས་ལ་བུམ་པར་བླུགས་པ་ལྷར་བསྐྱེད་ཅིང་མཆོད་ཀྱང་རུང་།  མ་མཆོད་ཀྱང་རུང་སྟེ་རྩ་བའི་རིག་པ་མང་དུ་བཟླས་པས་ཆུ་བྱིན་རླབས་ཅན་དུ་བྱས་པ་དེས།  རྩ་རིག་གི་རྗེས་སུ་སྦྱོང་བའི་རྒྱལ་པོའི་སྔགས་བཟླས་
པ་དང་བཅས་པས་བཀྲུས་ལ་ཞིབ་ཏུ་བརྫི་ཞིང་བརྡུང་བར་བྱའོ། །གཉིས་པ་ནི།  རུས་བུ་དང་།  དྲི་བཟང་པོ་དང་།  འཇིམ་པ་གཙང་མར་བསྲེས་ལ་འཇིམ་པའི་གོང་བུ་ལ་ཡང་རྩ་རིག་མང་དུ་བཟླས་ཏེ་བྱིན་གྱིས་བརླབ་པར་བྱའོ། །གསུམ་པ་ནི།  མདོར་
བསྡུས་པའི་སྐབས་ནས་འབྱུང་བ།  དེ་ཡི་མིང་ནས་སྨོས་ནས་ནི། །གུར་གུམ་བཟང་པོས་སྔགས་བྲིས་ལ། །ཞེས་འབྱུང་བས་རྩ་བའི་རིག་པའི་མཇུག་ཏུ་ཆེ་གེ་མོ་ཞེས་བྱ་བའི་སྡིག་པ་ཐམས་ཅད་ཤཱནྟིཾ་ཀུ་རུ་སྭཱ་ཧཱ།  ཞེས་བྱ་བའི་མིང་གུར་གུམ་གྱིས་བྲིས་ལ་
10-7-42a


འབི་འབིའི་དབུས་སུ་བཅུག་སྟེ།  ལྷའི་སྐུའམ་མཆོད་རྟེན་དུ་རྩ་བའི་རིག་པ་ཟློས་ཤིང་གདབ་བོ། །བཞི་པ་ནི།  མཆོད་རྟེན་ཐེབས་པ་དང་།  སྟོང་པའི་ངང་ལས་མཆོད་རྟེན་ཉིད་ཆེན་པོ་མང་པོར་བསམས་ལ་བུམ་པའི་ནང་དུ་ཀུན་རིག་རིགས་
ལྔའམ།  སུམ་ཅུ་སོ་བདུན་གྱི་བར་དུ་སྐད་ཅིག་གིས་བསྐྱེད་ལ།  དཀྱིལ་འཁོར་གྱི་སྐབས་ནས་འབྱུང་བ་བཞིན་ཡེ་ཤེས་པ་སྤྱན་དྲངས་ནས་རྩ་བའི་རིག་པ་ཉིས་འབུམ་གྱི་བར་ཅི་རིགས་པ་བཟླས་པས་བྱིན་གྱིས་བརླབས་ལ།  ཅི་གྲུབ་པས་མཆོད་དེ་གཏོར་མ་གཏང་
བར་བྱའོ། །དེ་ནས་ཡང་མཆོད་རྟེན་རྣམས་ཞུ་བ་ལས་སླར་བཏབ་པའི་མཆོད་རྟེན་གྱི་རྣམ་པར་བསམས་ལ་ཕྱག་བྱས་ལ་ཅི་འབྱོར་པས་མཆོད་དེ་བསྟོད་ལ་སྨོན་ལམ་རྒྱས་པར་གདབ་བོ། །བརྒྱད་པ་ལ་གསུམ་སྟེ་རྟགས་དངོས་དང་།  རྟགས་མ་བྱུང་ན་བསྐྱར་
བའི་ཆོ་ག་དང་།  བསྐྱར་ཆོག་བྱས་པས་རྟགས་འབྱུང་བར་བསྟན་པའོ། །དང་པོ་ནི།  དེ་ནས་མཆོད་རྟེན་འབར་གྱུར་ཏམ། །ཞེས་སོགས་ཚིགས་བཅད་ཕྱེད་དང་གསུམ་སྟེ།  གོང་དུ་བཤད་པ་ལྟར་གྱི་མཆོད་རྟེན་ལ་སྒྲུབ་པ་བྱས་པས་སྡིག་པ་དག་པའི་
རྟགས་འདི་དག་འབྱུང་བའི་དོན་ཏོ། །གཉིས་པ་ནི།  ཅི་སྟེ་མཚན་མ་དེ་དག་ནི། །ཞེས་སོགས་ཚིགས་བཅད་གཉིས་ཏེ་གོ་སླའོ། །གསུམ་པ་ནི།  དེ་ནས་དེ་ཡི་སྡིག་པ་ནི། །ཞེས་སོགས་ཚིགས་བཅད་གཉིས་ཏེ་བསྐྱར་ཆོག་བྱས་པས་ཚེ་འདས་དེའི་སྡིག་པ་
དག་པའི་མཚན་མ་ངེས་པར་མཐོང་ཞིང་ཕྱི་མར་ལྷའི་ལུས་ཀྱི་གཟུགས་སུ་འགྱུར་ལ།  དེའི་ཚེ་སྔར་འདིར་སྐྱེས་པ་དང་།  འདི་ནས་ཤི་ནས་འདིར་སྐྱེས་ཞེས་དྲན་པའི་སྒོ་ནས་རང་གི་རྒྱུད་དུ་ངོ་ཤེས་པར་འགྱུར་རོ། །དེ་ལྟར་ན་ཚེ་སྔ་ཕྱིའི།  མཚན་མ་འདི་དག་ཤེས་ནས་ནི། །
10-7-42b


ཞེས་སོགས་སོ། །བརྒྱད་པ་རྟེན་མེད་པ་ལ་སྡིག་པ་སྦྱང་བ་ནི།  ཡང་ན་མེད་པར་གྱུར་ན་ནི། །ཞེས་སོགས་ཏེ་ཤཱཀ་ཐུབ་ནས་ཀྱང་།  ལྷ་དང་།  ཀླུ་དང་།  གནོད་སྦྱིན་དང་།  སྲིན་པོ་ལ་སོགས་པ་ངན་སོང་གི་རྒྱུད་ཀྱི་དབང་དུ་གྱུར་པ་རྣམས་ཀྱི་ཤི་བའི་རོའམ་ཞེས་
སོགས་དང་།  ཚེ་དཔག་མེད་ནས་ཀྱེ་ལྷའི་བུ་རྣམས་ངན་སོང་གི་རྒྱུད་དུ་སྐྱེས་ཟིན་པ་གང་ཡིན་པ་དེ་དག་གི་མིང་ལ་ཡང་དབང་བསྐུར་ཅིག་ཅེས་སོགས་འབྱུང་བའི་དོན་ནི་སྔར་བསྟན་པ་རྣམས་ལས་རོ་བསྲེག་མ་ཡིན་པ་རྣམས་མིང་ལ་སོགས་པ་ཐམས་
ཅད་ལ་བྱ་བར་ནུས་སོ། །དགུ་པ་ཕྱིར་བཟློག་གི་སྒོ་ནས་སྡིག་པ་སྦྱང་བ་ནི།  ཐལ་བ་ཡུངས་ཀར་བྱེ་མ་སོགས། །ཞེས་སོགས་ཚིགས་བཅད་གཅིག་སྟེ།  འདིའི་མངོན་པར་རྟོགས་པ་བསྡུས་ཏེ་བྱེད་ན།  བསྙེན་པ་ནས་མཆོད་གཏོར་གྱི་བར་དང་།  
རྟེན་བསྐྱེད་པའི་བར་དུ་རྒྱས་བསྡུས་གང་བྱེད་པ་སྔ་མ་བཞིན་དུ་ཉམས་སུ་བླངས་ལ།  རྟེན་དེ་ལ་བྱེ་མའམ་ཡུངས་ཀར་ཐོགས་པས་རྒྱུད་ནས་འབྱུང་བའི་སྔགས་རྣམས་ཟློས་ཤིང་བྲབས་ནས།  ནུབ་དུ་བྱེད་པ་རྫོགས་པའི་མཇུག་ཏུ་བྱེ་མ་ལ་སོགས་པའི་
དམན་པ་རྣམས་རྒྱ་མཚོ་ལ་འབབ་པའི་ཆུ་བོར་དོར་བར་བྱའོ། །རྒྱུད་ན་ནི་དེ་ཉིད་བཞུགས་སོ། །ཇོ་བོ་རིན་ཆེན་བཟང་པོའི་ཕྱག་ལེན་རྒྱས་པ་བརྗོད་ན།  ཡ་མཐའ་བསྙེན་པ་ནས་བཟུང་སྟེ་མ་མཐའ་མཆོད་པ་དང་གཏོར་མའི་བར་རྣམས་རྒྱས་བསྡུས་གང་བྱེད་པ་
སྔ་མ་བཞིན་བྱས་ལ།  དེ་ནས་རྟེན་ལ་བྱ་བའི་བགེགས་སྦྱང་བ་དང་།  རྟེན་བསྐྱེད་པ་དང་།  རྣམ་པར་ཤེས་པ་དགུག་པ་དང་།  སྡིག་པ་དང་བྲལ་བ་དང་བཞི་ཡང་སྔ་མ་བཞིན་བྱས་ལ།  ཡང་བགེགས་ཞི་བའི་སྦྱང་བ་སྤྲོས་པའི་བྱེ་བྲག་གིས་རྒྱས་བསྡུས་
10-7-43a


གང་རུང་ཅིག་འདིར་ཡང་བྱ་སྟེ།  དེའང་ཞི་བས་སྦྱང་བ་ནི་སྔར་བྱས་ལ།  འདིར་དྲག་པོས་སྦྱང་བ་བྱས་ན་མཛེས་སོ། །དེ་ནས་བརྡེག་པ་ནི་རྒྱུད་འདི་ནས་ཀྱང་གསུངས་ལ།  གཙུག་དགུ་ནས་ཀྱང་།  ཡུངས་དཀར་མེ་ཏོག་དང་ལྡན་པས། །
གསང་སྔགས་ཟློས་ཤིང་བརྡེག་པར་བྱ། །ཞེས་འབྱུང་བས།  བྱེ་མའམ་ཡུངས་ཀར་གྱིས་རྟེན་ལ་བྲབ་ཅིང་།  རྩ་རིག་ལ་སོགས་པའི་དཀྱིལ་འཁོར་གྱི་ལྷའི་སྔགས་ཅི་ཙམ་ནུས་པ་བཟླས་པའི་རྗེས་ལ་ཤཱཀ་ཐུབ་ནས་འབྱུང་བའི་བརྡེག་སྔགས་བཅོ་ལྔ་དང་།  
གཞན་ཡང་རིག་སྔགས་མཐུ་དང་གཟི་བརྗིད་ཆེན་པོ་རྣམས་ཟློས་ཤིང་རྟེན་ལ་བྲབ་བོ། །དེ་ནས་རྒྱུད་འདི་ཉིད་ནས་ཀྱང་།  དེ་ནས་ཁྲུས་ལ་སོགས་བྱས་ལ། །ཞེས་པས་དངོས་སུ་སློབ་དཔོན་གྱི་ལས་བསྟན་ཀྱང་ཁྲུས་ཅུང་ཟད་ཟིན་ལ་གཙུག་དགུ་ནས་
རུས་པའམ་གོས་སམ་མིང་ལ་ནི། །རྡོ་རྗེ་ཆུ་ཡིས་བཀྲུ་བར་བྱ། །ཞེས་དང་།  སླར་ཡང་བཀྲ་ཤིས་ཚིགས་བཅད་ཀྱིས། །དུས་གསུམ་དུ་ནི་ཁྲུས་བྱའོ། །ཞེས་གསུངས་པས་ན།  རྣམ་རྒྱལ་བུམ་པའི་ཆུས་ལུགས་མའམ།  རས་བྲིས་ལ་སོགས་པའི་
རྟེན་རྙིང་པ་ལ་ཚིགས་བཅད་དང་སྔགས་ཅི་རིགས་པས་བཀྲུས་ཏེ་སླར་བུམ་པར་བླུགས།  དེ་ནས་བུམ་པ་ཐོགས་ལ་ནུབ་གོང་མ་ལ་ནི་མེ་ལོང་ལ་གཟུགས་བརྙན་འཆར་བ་ལ་བཀྲུ།  ནུབ་ཐ་མ་ལ་མིང་བྱང་ལ་སོགས་པའི་རྟེན་ལ་དངོས་སུ་བཀྲུ་སྟེ།  
ཕར་ཕྱིན་དྲུག་གི་ཚིགས་བཅད་དང་།  ཆུ་བོ་དྲུག་གི་ཁྲུས་བྱས་པས། །ཞེས་སོགས་ཚིགས་བཅད་ཕྱེད་དང་གསུམ་ལ་རྩ་རིག་རེ་རེ་སྤེལ་ཞིང་བཀྲུའོ། །དེ་ནས།  གང་ལ་སེར་སྣ་རྣམ་ཆགས་པ། །ཞེས་སོགས་བཀྲ་ཤིས་ཀྱི་ཚིགས་བཅད་དང་།  
10-7-43b


འདོད་ཆགས་ཞེ་སྡང་གཏི་མུག་གསུམ། །ཞེས་སོགས་དང་།  ས་ནི་དུག་གི་ཕ་ཡིན་ཏེ། །ཞེས་སོགས་ཀྱིས་ཀྱང་བཀྲུའོ། །དེ་ནས་བུ་ལ་སོགས་པས་མིང་བྱང་འཛིན་ལ་ཡིད་ཀྱིས་ཚེ་འདས་དེས་ཕྱག་བྱེད་ཅིང་འོག་ནས་འབྱུང་བ་རྣམས་ངག་ཏུ་བརྗོད་
པས་སྐྱབས་སུ་འགྲོ་བར་བསམ་ཞིང་།  གཙོ་བོ་རྒྱལ་བ་འགྲོ་བའི་མགོན། །ཞེས་སོགས་ཀྱིས་ཕྱག་བྱེད་དུ་བཅུག་གོ།  དེ་ལ་གོང་དུ་བསྟན་པ་རྣམས་རིམ་པ་ཇི་ལྟར་ཉམས་སུ་བླང་ཞེ་ན།  རོ་སྦྱོང་བ་ནི་ཐམས་ཅད་ཀྱི་ཐོག་མ་དང་མཇུག་ཏུ་བྱས་ཀྱང་འདྲ་ལ།  
གཞན་བཟླས་པའི་རྗེས་ལ་ཕྱིར་བཟློག །དེ་ནས་དབང་བྱའོ། །སྦྱིན་སྲེག་ནི་མཆོད་པའི་སྐབས་སམ་མཇུག་ཏུ་བྱ་བ་གང་རུང་ཡིན་ནོ། །སཱཙྪ་ནི་རོ་ཡོད་ན་སྦྱང་བའི་རྗེས་ལ་བྱ་སྟེ།  རོ་མེད་ན་གོང་དུ་བྱས་ཀྱང་འགལ་བ་མེད་དོ། །བཞི་པ་དེའི་
ཕན་ཡོན་ལ་གཉིས་ཏེ།  ཕན་ཡོན་དངོས་དང་།  དགེ་བའི་རྩ་བ་མ་བསྐྱེད་པའི་རྟེན་ལ་ཐབས་སྔགས་དང་།  ཕྱག་རྒྱ་མེད་ན་མི་འབྱོངས་པར་བསྟན་པའོ། །དང་པོ་ནི།  དེ་ལྟར་བྱས་ན་སྡིག་ཅན་ཡང་། །ཞེས་སོགས་ཏེ་གོང་དུ་བསྟན་པའི་
སྡིག་པ་སྦྱོང་བའི་ཐབས་གང་རུང་རེ་རེའམ་ཐམས་ཅད་བྱས་ན།  སྡིག་པ་སྟོབས་ཆེན་པོ་དང་ལྡན་པ་ཡང་ངན་སོང་ལས་ཐར་བར་འགྱུར་ན།  དགེ་བའི་མཆོག་བསྐྱེད་པ་དང་།  བྱང་ཆུབ་ཏུ་སེམས་བསྐྱེད་པ་དང་།  ཕ་རོལ་ཏུ་ཕྱིན་པ་དྲུག་ལ་
གོམས་པའི་སོ་སོ་སྐྱེ་བོ་རེ་ཞིག་ལས་ཀྱི་དབང་གིས་ངན་སོང་དུ་སྐྱེས་པ་རྣམས་གྲོལ་བ་ལྟ་སྨོས་ཀྱང་ཅི་དགོས་སོ། །གཉིས་པ་ནི།  དགེ་བའི་རྩ་བ་མ་བསྐྱེད་ལ། །ཞེས་སོགས་གོ་སླའོ། །ལྔ་པ་ནོར་བུ་དྲི་མ་མེད་པ་ངན་སོང་ལས་ཐོན་པའི་
10-7-44a


ཐབས་ཕན་ཡོན་དང་བཅས་ཏེ་བསྟན་པ་ལ་བདུན་ཏེ།  བརྒྱ་བྱིན་ལ་སོགས་པས་ཆོ་ག་ཇི་ལྟ་བ་བཞིན་བྱས་པས་དྲི་མ་མེད་པ་སྡུག་བསྔལ་ལས་ཐར་ཏེ་དགའ་ལྡན་དུ་སྐྱེས་པ་དང་།  ནོར་བུ་དྲི་མ་མེད་པ་ལ་སོགས་པས་བཅོམ་ལྡན་
འདས་ལ་མཆོད་པ་བྱས་ཏེ་ངོ་མཚར་བར་བསྟན་པ་དང་།  བརྒྱ་བྱིན་ལ་སོགས་པས་ཆེད་དུ་བརྗོད་པ་བསྟན་པ་དང་།  དགའ་ལྡན་པས་ངོ་མཚར་ཏེ་ཆེད་དུ་བརྗོད་པ་དང་།  སུམ་ཅུ་རྩ་གསུམ་པ་རྣམས་ཀྱིས་ཡ་མཚན་སྐྱེས་ཏེ་ཆེད་དུ་བརྗོད་པ་དང་།  
ཡང་དགའ་ལྡན་པས་ངོ་མཚར་སྐྱེས་ཏེ་ཆེད་དུ་བརྗོད་པ་དང་།  ནོར་བུ་དྲི་མ་མེད་པ་ལ་སོགས་པས་མཆོད་པ་བྱས་ཏེ།  སླར་དོང་བར་བསྟན་པའོ། །དང་པོ་ནི།  དེ་ནས་བརྒྱ་བྱིན་ལ་སོགས་ལྷ། །ཞེས་སོགས་ཏེ་སྔར་བཤད་པའི་སྡིག་སྦྱོང་གི་སྒོ་དེ་
རྣམས་ནོར་བུ་དྲི་མ་མེད་པའི་ཆེད་དུ་བརྒྱ་བྱིན་གྱིས་བྱས་པས་ནོར་བུ་དྲི་མ་མེད་པ་དགའ་ལྡན་དུ་སྐྱེས་ཏེ།  སྐྱེས་མ་ཐག་ཏུ་བྱང་ཆུབ་མཆོག་ཏུ་སེམས་བསྐྱེད་པས་ན།  སེམས་ཅན་ཀུན་ལ་ཕན་ཕྱིར་བདེར་གཤེགས་འདྲ་བར་སྐྱེས། །ཞེས་སོ། །གཉིས་
པ་ནི།  དེ་ནས་དབང་པོར་བཅས་པ་ཡིས། །ཞེས་སོགས་ཏེ།  དགའ་ལྡན་གྱི་ལྷ་རྣམས་ལ་དབང་བས་ན་དབང་པོ་ཞེས་བྱ་ཡི་བརྒྱ་བྱིན་ནི་མ་ཡིན་ནོ། །གསུམ་པ་ནི།  དེ་ནས་བརྒྱ་བྱིན་ལ་སོགས་པའི་ལྷའི་བུ་ཐམས་ཅད་ཀྱིས་ཞེས་སོགས་སོ། །བཞི་པ་ནི།  
དེ་ནས་ལྷའི་བུ་དེ་དག་གིས་ཞེས་སོགས་ཀྱིས་སྔར་དགའ་བའི་ཚལ་ནི་གང་བར་བྱས་ཞེས་པ་ནི།  དབང་པོར་བཅས་པའི་དྲག་ཆེན་ལྷ་རྣམས་དགའ་ལྡན་ཉིད་དུ་གནས་ནས་མཆོད་པའི་སྤྲིན་གྱིས་གང་བར་བྱས་པ་ཡིན་ལ།  འདིར་འོད་ཟེར་གྱིས་བསྐུལ་
10-7-44b


བའི་རྗེས་སུ་ནོར་བུ་དྲི་མ་མེད་པའི་འོད་དེ་ཉིད་ལྷའི་འཁོར་དང་བཅས་ཏེ་དགའ་ལྡན་དུ་མི་སྣང་བར་བྱས་ཏེ།  དགའ་བའི་ཚལ་དུ་འོངས་ནས་བཅོམ་ལྡན་འདས་ཀྱི་འོད་ཟིལ་གྱིས་གནོན་མི་ནུས་ལ།  བརྒྱ་བྱིན་དྲིན་ཆེ་བས་དེ་ལས་གཞན་པའི་ལྷ་རྣམས་ཀྱི་
འོད་ཟིལ་གྱིས་མནན་ནས་བཅོམ་ལྡན་འདས་ལ་ཆེད་དུ་བརྗོད་པའོ། །ལྔ་པ་ནི།  དེ་ནས་སྐད་ཅིག་མ་དེ་ཉིད་ཀྱི་ཚེ་ཞེས་སོགས་སོ། །དྲུག་པ་ནི།  དེ་ནས་ལྷའི་བུ་དེ་དག་དེ་ལྟ་བར་འདོད་ནས་ཞེས་སོགས་ཏེ།  སུམ་ཅུ་རྩ་གསུམ་པའི་ལྷའི་བུ་རྣམས་
ཀྱིས་དྲི་མ་མེད་པའི་འོད་ལྟ་བར་འདོད་ནས་བཅོམ་ལྡན་འདས་ལ་ཞུས་པས།  བཅོམ་ལྡན་འདས་ཀྱིས་འོད་ཟེར་གྱིས་བསྐུལ་ནས་སྣང་བར་བྱས་སོ། །དེ་ནས་དྲི་མ་མེད་པའི་འོད་འཁོར་དང་བཅས་པ་རྣམས་ཀྱིས་རྫུ་འཕྲུལ་བསྟན་ནས་བསྐོར་བ་བྱས་
ཏེ་ཆེད་དུ་བརྗོད་པའོ། །བདུན་པ་ནི།  དེ་ནས་ནོར་བུ་དྲི་མ་མེད་པའི་འོད་ཅེས་བྱ་བའི་ལྷའི་བུ་དེ་དག་གིས་བཅོམ་ལྡན་འདས་ལ་ནོར་བུ་དང་ཞེས་སོགས་ཏེ་རྗེས་འཇུག་གི་ཉམས་ལེན་ལ་མཆོད་པ་ཉེར་ལྔ་པ་བསྟན་ནོ། །དྲུག་པ་རྒྱུད་ཀྱི་ཆེ་བ་བསྟན་པ་
ལ་བཞི་སྟེ།  བརྒྱ་བྱིན་ལ་སོགས་པས་བཤད་པར་གསོལ་བ་གདབ་པ་དང་།  བཅོམ་ལྡན་འདས་ཀྱིས་ཉོན་ཅིག་པར་གདམས་པ་བསྟན་པ་དང་།  བཤད་པ་དངོས་དང་།  བཅོམ་ལྡན་འདས་ཀྱིས་བརྒྱ་བྱིན་ལ་ཡོན་ཏན་དེ་ལྟ་བུ་དང་ལྡན་པའི་རྒྱུད་
དེ་འཛམ་བུ་གླིང་པ་རྣམས་ཀྱི་དོན་དུ་བག་ཡོད་པར་སྒྲུབས་ཤིག་པར་བཀའ་གནང་བའོ། །དང་པོ་ནི།  དེ་ནས་བརྒྱ་བྱིན་དང་།  ཚངས་པ་ལ་སོགས་པའི་ལྷ་རྣམས་མཆོག་ཏུ་ཡ་མཚན་དུ་གྱུར་ནས་ཞེས་སོགས་སོ། །གཉིས་པ་ནི།  བརྒྱ་བྱིན་
10-7-45a


དང་ཞེས་སོགས་སོ། །གསུམ་པ་ལ་ལྔ་སྟེ།  སྣོད་དང་ལྡན་པས་ཐོས་པར་བསྟན་པ་དང་།  ལྷ་རྣམས་ཀྱིས་སྣོད་དང་ལྡན་པར་ཁས་བླངས་པ་དང་།  གཞན་གྱི་དོན་བྱས་པའི་ཕན་ཡོན་བསྟན་པ་དང་།  བརྒྱ་བྱིན་ལ་སོགས་པས་
བསྟན་པ་བསྲུང་བར་དམ་བཅས་པ་དང་།  རྒྱུད་བཅང་བ་ལ་སོགས་པའི་ཕན་ཡོན་བསྟན་པའོ། །དང་པོ་ནི།  ལྷའི་བུ་རྣམས་དགེ་བ་དང་ལྡན་པའི་སེམས་རྣམས་ཀྱིས་ཞེས་སོགས་ཏེ་མ་རབས་དང་པོ་ནི་མི་དགེ་བ་བཅུ་དང་ལྡན་པ།  གཉིས་པ་ནི།  
དགེ་སྡིག་གང་ཡང་མེད་པ་སྟེ་ཕལ་པ་ཞེས་ཀྱང་ཟེར་རོ། །བསམ་པ་ངེས་པ་ནི།  ཐེག་ཆེན་དུ་རིགས་ངེས་པ།  ཕྱིར་མི་ལྡོག་པའི་གནས་མངོན་པར་འདོད་པ་ནི་ས་དང་པོ་ཡན་ཆད་ཀྱི་ཡོན་ཏན་འདོད་པའོ། །གཉིས་པ་ནི།  དེ་ནས་བརྒྱ་བྱིན་དང་ཚངས་པ་
ལ་སོགས་པའི་ལྷའི་བུ་དེ་དག་ཞེས་སོགས་སོ། །གསུམ་པ་ལ་གཉིས་ཏེ།  དྲི་བ་དང་།  ལན་ནོ། །དང་པོ་ནི།  བཅོམ་ལྡན་འདས་བརྟག་པའི་རྒྱལ་པོ་འདིས་ཞེས་སོགས་སོ། །གཉིས་པ་ནི།  བཅོམ་ལྡན་འདས་ཀྱིས་བཀའ་སྩལ་པ་ཞེས་སོགས་ཏེ་
ཡང་དག་པར་རྫོགས་པའི་སངས་རྒྱས་ཉིད་དུ་བལྟ་བ་ནི།  གཞན་དོན་བྱས་པས་སངས་རྒྱས་དང་མཛད་པ་འདྲ་བའི་དོན་ཏེ།  འོག་ཏུ་ལྷའི་དབང་པོ་དཔེར་ན་ཞེས་སོགས་གསུངས་པ་ལས་ཤེས་སོ། །བཞི་པ་ནི།  དེ་ནས་བརྒྱ་བྱིན་དང་ཚངས་པ་ལ་
སོགས་པའི་ལྷའི་བུ་རྣམས་དང་རྒྱལ་པོ་བཞི་དང་ཞེས་སོགས་ཏེ་འཇིག་རྟེན་སྐྱོང་བ་བརྒྱད་ནི་ཕྱོགས་སྐྱོང་བ་བརྒྱད་དོ། །གནོད་སྦྱིན་གྱི་སྡེ་དཔོན་ཉེར་བརྒྱད་ནི་གཟུངས་གྲྭ་ལྔ་ལས་ཕྱོགས་བཞིར་སྲུང་བ་བཞི་བཞི།  མཚམས་བཞིར་སྲུང་བ་རེ་རེ།  
10-7-45b


སྟེང་འོག་གི་སྲུང་བ་བཞི་བཞི་སྟེ་ཉེར་བརྒྱད་དོ། །ཞེས་གསུངས་སོ། །འཕྲོག་མ་བུ་ལྔ་བརྒྱས་བསྐོར་བ་རྣམས་ནི།  ཁམས་གསུམ་གྱི་སེམས་ཅན་ཐམས་ཅད་ཀྱི་གཟི་བརྗིད་དང་སྲོག་འཕྲོག་པར་བྱེད་ཅིང་།  ཟ་མ་རེ་རེ་ལ་སེམས་ཅན་ལྔ་བརྒྱའི་དབུགས་ལེན་པ་སེམས་
ཅན་ལ་ཤིན་ཏུ་གནོད་ཅིང་གདུག་པ་ཅན་ཏེ་དེ་འདུལ་བའི་ཕྱིར།  སངས་རྒྱས་ཐུགས་རྗེ་ཆེ་ལ་ཐབས་མཁས་པས་ཆང་ཟན་བྱིན་གྱིས་བརླབས་ཏེ་ཁ་ཟས་སུ་བྱིན་པས་ཚིམ་པར་བྱས་ཤིང་།  འཕྲོག་མ་འཁོར་དང་བཅས་པ་བཅོམ་ལྡན་འདས་ཀྱི་བཀའ་འབངས་སུ་
བཀོད་པ་ཡིན་ནོ། །ལྔ་པ་ནི།  བཅོམ་ལྡན་འདས་གང་དུ་བརྟག་པའི་རྒྱལ་པོ་འདི་རིགས་ཀྱི་བུའམ་རིགས་ཀྱི་བུ་མོ་དད་པས་འཆང་ངམ་ཞེས་སོགས་སོ། །བཞི་པ་ནི།  བཅོམ་ལྡན་འདས་ཀྱིས་བཀའ་སྩལ་པ།  ལྷའི་དབང་པོ་ཁྱོད་ཀྱིས་ཇི་སྐད་སྨྲས་པ་དེ་དེ་
བཞིན་ཏེ་ཞེས་སོགས་སོ། །དེ་དག་གིས་ནི་བརྟག་པ་དང་པོའི་དོན་རྗེ་བཙུན་ས་སྐྱ་པའི་དགོངས་པ་ཇི་ལྟ་བ་བཞིན་དུ་བཤད་ཟིན་ཏོ། །གཉིས་པ་ཕྱག་ན་རྡོ་རྗེའི་ཞལ་ནས་གསུངས་པའི་བརྟག་པ་ཕྱི་མ་ལ་གཉིས་ཏེ།  སྤྱི་དོན་དང་གཞུང་གི་དོན་ནོ། །དང་པོ་
ནི།  དཀྱིལ་འཁོར་ཕྱི་མ་བཅུ་གཅིག་པོ་འདི་དག་ལ་རྗེ་བཙུན་ས་སྐྱ་པའི་བཞེད་པས་ཆོ་གའི་ཆིངས་ཀུན་རིག་དང་འདྲ་བ་ལས།  མི་འདྲ་བའི་ཁྱད་པར་གཞུང་ལས་དངོས་སུ་བཤད་པ་རྣམས་སོ་སོར་སྦྱར་བར་བཞེད་དོ། །དེ་ཡང་བདག་བསྐྱེད་ཀྱི་སྐབས་
སུ་དཀྱིལ་འཁོར་ཐམས་ཅད་དུ་འཇུག་པ་རྡོ་རྗེ་སེམས་དཔའ་བསྐྱེད་པ་ལ་ནི་ཁྱད་པར་མེད་ལ།  རང་རང་གི་དཀྱིལ་འཁོར་གྱི་གཙོ་བོ་བསྐྱེད་པ་ལ་ཞལ་ཕྱག་དང་སྔགས་སོ་སོར་བྱའོ། །བསྐྱེད་པ་རྒྱས་པ་ལ་ནི་རང་རང་གི་དཀྱིལ་འཁོར་ཡོངས་རྫོགས་
10-7-46a


བསྒོམས་ནས་སྔགས་དང་ཕྱག་རྒྱ་བཞིའི་རྒྱས་འདེབས་རྣམས་ཀྱང་དེ་བཞིན་དུ་སྦྱར་བར་བྱའོ། །མདུན་བསྐྱེད་བསྒྲུབ་ཚུལ་ཡང་དེ་དང་འདྲ་ཞིང་།  དབང་གི་འཇུག་པའི་སྐབས་དང་དངོས་གཞིའི་སྐབས་སུ་མི་འདྲ་བའི་ཁྱད་པར་ཡོད་པ་རྣམས་
སོ་སོར་སྦྱར་ཞིང་།  ཆོ་ག་གཞན་རྣམས་ནི་ཁྱད་པར་མེད་པར་བཞེད་དོ། །འོན་ཀྱང་ད་ལྟ་དབང་བསྐུར་གྱི་ཕྱག་ལེན་ཡོད་པ་ནི་རྩ་སྐྱ་པ་ནས་བརྒྱུད་པ་ཡིན་པས་དེའི་ལུགས་ལྟར་བརྗོད་ན།  རང་རང་གི་དཀྱིལ་འཁོར་དུ་དབང་བསྐུར་ལེགས་པར་ཐོབ་པའི་རྣལ་འབྱོར་
པས་སེམས་ཅད་ཐམས་ཅད་ཀྱི་སྒྲིབ་པ་སྦྱངས་ཏེ་སངས་རྒྱས་ཐོབ་པར་བྱེད་པ་ལ་བཞི་སྟེ།  སློབ་དཔོན་ལས་ཀྱི་ཆོ་ག་དང་།  སློབ་མ་དཀྱིལ་འཁོར་དུ་འཇུག་ཅིང་དབང་བསྐུར།  དངོས་གྲུབ་ཀྱི་ཡེ་ཤེས་ལ་བསླབ་པ།  སྡིག་པ་སྦྱོང་ཐབས་ཕན་ཡོན་
དང་བཅས་པ་བསྟན་པའོ། །དང་པོ་ལ་ལྔ་སྟེ།  དང་པོ་བསྙེན་པ་ནི་གནས་མཚན་ཉིད་དང་ལྡན་པར་དུས་ཁྱད་པར་ཅན་གྱི་ཚེ།  ཡོ་བྱད་དང་ལྡན་པས།  སྔོན་འགྲོ།  དངོས་གཞི།  རྗེས་གསུམ་གྱིས་འཆིང་བ་ཡང་ཀུན་རིག་བཞིན་དུ་ཤེས་པར་བྱ་ཞིང་།  
འདིར་ཡིག་ཐོ་ཙམ་བསྟན་པར་བྱའོ། །སྐྱབས་འགྲོ་སེམས་བསྐྱེད་ཚད་མེད་བཞི། །མི་རྟོག་སྟོང་ཉིད་དྲན་པར་བྱ། །ཚོགས་གཉིས་གསག་པའི་ལམ་དང་གཅིག །དེ་ཡི་ངང་ལས་བདག་དང་གནས། །རྣལ་འབྱོར་བསྲུང་སྟེ་གཉིས་པའོ། །ལག་པ་བྱིན་
བརླབ་གཟུགས་སྦྱོར་བསྒོམ། །སྡིག་པ་བྲལ་ཞིང་ཡེ་ཤེས་དབབ། །དེ་ཉིད་བརྟན་པར་བྱེད་པ་གསུམ། །སྟོང་པ་ཉིད་དང་ཟླ་བར་བསྒོམ། །དེ་སྟེང་ཐུན་མང་རིག་པ་དང་། །ཁྱད་པར་ས་བོན་སྤྲོ་བསྡུ་ཡིས། །རང་རང་ཕྱག་མཚན་དེ་གྱུར་ལ། །ས་བོན་
10-7-46b


བརྗོད་ཅིང་རང་ལྷར་བསྐྱེད། །དམ་ཚིག་ལྡན་དང་རིགས་གསུམ་གྱིས། །བརྟན་པར་བྱ་བའི་བྱིན་བརླབ་གསུམ། །དེ་ལ་རིགས་ལྔའི་དབང་བསྐུར་ནས། །ཏིང་འཛིན་རྩེ་གཅིག་བཞི་པའོ། །སེམས་ཅན་སྒྲིབ་སྦྱངས་སླར་འདུས་པས། །བསང་སྦྱང་བྱིན་བརླབ་མཆོད་
པ་དང་། །བདག་ལ་བསྟོད་དེ་ལྔ་པའོ། །རང་ལྷ་རྐྱང་པའི་བསྙེན་བྱེད་ན། །སྐབས་འདིར་བཟླས་བརྗོད་ཤེས་བྱ་སྟེ། །འདས་པ་རྣམས་ལའང་ཉན་མོད་ཀྱི། །དེ་ལོག་དྲུག་ལ་རབ་ཏུ་བསྔགས། །ལྷ་ཚངས་བསྙེན་པའི་སྔོན་འགྲོའོ། །དངོས་གཞི་ལ་ཡང་རྣམ་
གཉིས་ཏེ། །ཏིང་འཛིན་དཀྱིལ་འཁོར་བསྐྱེད་པ་དང་། །ནུས་དང་ལྡན་ཕྱིར་བསྒྲུབ་པའོ། །དང་པོ་ལ་ཡང་རྣམ་གསུམ་སྟེ། །མ་དག་པ་ཡི་ཁམས་སྦྱང་དང་། །འབྱུང་བཞི་རི་རབ་གཞལ་ཡས་ཁང་། །གསུམ་གྱིས་བརྟེན་པ་བསྐྱེད་པ་ཡང་། །ཀུན་རིག་བཞིན་
ལས་ཁྱད་པར་ནི། །བྷྲཱུྃ་ལས་གཞལ་ཡས་ཁང་གྲུ་བཞི་སྒོ་བཞི་པ་ཤར་ཤེལ་དཀར་པོ།  ལྷོ་བཻ་ཌཱུཪྱ་སྔོན་པོ།  ནུབ་པདྨ་ར་ག་དམར་པོ།  བྱང་ཨིནྡྲ་ནཱི་ལ་ལྗང་གུ།  དབུས་གསེར་གྱི་རང་བཞིན་ལ་ལྷའི་གཙོ་བོའི་འོད་ཟེར་གྱི་མདངས་ཀྱིས་ཁྱབ་པའོ། །དེ་རྣམས་ལ་ཐུན་
མོང་དུ་པད་ཟླའི་གདན་ཅན།  དབུས་ཀྱི་གཙོ་བོ་རྣམས་ལ་སེང་གེ་ལ་སོགས་པའི་གདན་བསམ་པའོ། །དེ་ནས་དབུས་ཀྱི་གདན་གྱི་སྟེང་དུ་སྔར་གྱི་ཕྱག་རྒྱ་ཆེན་པོ་གཙོ་བོའི་ང་རྒྱལ་གྱིས་གནས་ནས།  དེའི་ཐུགས་ཀར་ཟླ་བའི་སྟེང་དུ།  མཐའ་སྐོར་དུ་རྩ་
རིག་དང་ནང་སྐོར་དུ་གཙོ་བོའི་སྔགས་བཀོད་པ་ལས་འོད་ཟེར་སྤྲོ་བསྡུ་བྱས་པས་གཙོ་བོ་བསྐྱེད་དེ།  དེའི་ཐུགས་ཀར་ཟླ་བའི་སྟེང་དུ་མཐའ་སྐོར་དུ་རྩ་རིག་ནང་སྐོར་དུ་རང་གི་སྔགས་བཀོད་པ་ལས་འཁོར་བསྐྱེད་ནས་སོ་སོའི་གནས་སུ་བཀོད་དེ།  འདི་
10-7-47a


དག་གི་སྔགས་དང་ཕྱོགས་གང་དུ་དགོད་པ་དང་།  སྐུ་མདོག་དང་ཕྱག་མཚན་རྣམས་ནི་འོག་གཞུང་དོན་གྱི་སྐབས་སུ་འབྱུང་ངོ་། །དེ་ལྟར་ཏིང་ངེ་འཛིན་གྱི་དཀྱིལ་འཁོར་བསྐྱེད་ནས་དེ་ཉིད་བསྒྲུབ་པ་ལ་ཆོས་ལྔ་ལས།  དང་པོ་ཡེ་ཤེས་
སེམས་དཔའ་སྤྱན་དྲང་བ་ནི་ཀུན་རིག་ཏུ་བསྟན་པའི་སྔགས་དང་།  ཕྱག་རྒྱས་དེ་བཞིན་གཤེགས་པ་རང་རང་གི་ལྷ་ཚོགས་ཀྱི་རྣམ་པར་སྤྱན་དྲངས་ཏེ་མཆོད་ནས།  འཇིག་རྟེན་པ་རྣམས་ནི་རང་རྒྱུད་པར་རང་སྔགས་ལ་ཛཿཧཱུཾ་བཾ་ཧོཿ བཏགས་དེ་སྤྱན་འདྲེན་
པའོ། །གཉིས་པ་དགུག་གཞུག་བྱ་བ་ནི་ཀུན་རིག་བཞིན་ནོ། །གསུམ་པ་བྱིན་གྱིས་བརླབ་ཅིང་རྒྱས་གདབ་པའི་དང་པོ་བྱིན་གྱིས་བརླབ་པ་ནི་ཐམས་ཅད་ཀུན་རིག་བཞིན་དུ་ཤེས་པར་བྱའོ། །དེ་ལ་ཕྱག་རྒྱ་བཞིས་རྒྱས་གདབ་པ་ལ་བཞི་ལས།  དམ་
ཚིག་གི་ཕྱག་རྒྱ་ནི།  ལུས་ཀྱི་ལས་སུ་ལག་པའི་ཕྱག་རྒྱ་བཅའ་བ་རྣམས་རིམ་པ་བཞིན་དུ་བསྟན་པར་བྱ་བ་ནི།  ཤཱཀ་ཐུབ་ཀྱི་ལ།  ལག་གཉིས་ཏིང་ངེ་འཛིན་དུ་བཞག །བསྡམས་པའི་གུང་མོ་མཐའ་སྦྱར་དང་། །ཁུ་ཚུར་གཉིས་ལ་མཛུབ་གཉིས་དང་། །
མཐེའུ་ཆུང་འདུ་བྱེད་གྱེན་དུ་བསྐོར། །བསྡམས་པའི་གུང་སྒྲེང་ཧཱུྃ་གཉིས་བཅག །བསྡམས་པ་ཧཱུྃ་སྒྲེང་རྣམ་རྒྱལ་གྱིའོ། །སོར་མོ་ཐམས་ཅད་འབར་བ་དང་། །བསྡམས་པ་སྤྱི་བོར་འཇོག་པ་དང་། །བཅིང་པའི་གུང་སྒྲེང་གཞན་རྣམས་བརྐྱང་། །དེ་ལས་མཐའ་
གཉིས་བསྣོལ་ནང་བཀུག །མཆོད་བཞི་སྒོ་བ་ཀུན་རིག་བཞིན། །འདིར་ཡང་འཆིང་བར་ཤེས་པར་བྱོས། །ཚེ་དཔག་མེད་ཀྱི་ལ།  ཐལ་མོའི་ཨོཾ་བརྐྱང་ཨཱ་ནང་གཞུག །ཏྲཱྃ་གཞིབ་ཧཱུྃ་ཧྲཱིཿཔད་འདབ་ཚུལ། །དེ་ཉིད་མདུན་དུ་འདེབས་པ་དང་། །དེ་ཉིད་གཡས་སུ་བསྐོར་བ་དང་། །དེ་ལས་
10-7-47b


ཁ་སྦྱར་སྤྱི་བོར་སྦྱར། །ཕྱག་ན་རྡོ་རྗེའི་གཞི་ཐལ་མོ། །ཧཱུཾ་བརྐྱང་ཏྲཱཾ་གཞིབ་ཧཱུཾ་པདྨ། །སྲིན་ལག་ནང་གཞུག་ཨཱཿ སྒྲེང་བ། །བསྡམས་པའི་ཧཱུཾ་ཚིགས་བར་མ་བཅག །ཧཱུཾ་བཅིང་ཧྲཱིཿནི་པདྨོར་བྱ། །དེ་ཉིད་ཧཱུཾ་ཧྲཱིཿནང་དུ་གཞུག །མཆོད་དང་སྒོ་སྲུང་སྔར་བཞིན་ནོ། །
འཁོར་ལོས་སྒྱུར་བའི་དཀྱིལ་འཁོར་ལ། །བསྡམས་པའི་ཧཱུྃ་གཉིས་གཤིབས་པ་དང་། །དེ་ཉིད་པདྨོའི་ཚུལ་སྦྱོར་དང་། །འོད་ཟེར་འབར་བའི་ཚུལ་དུ་བྱ། །ལྷག་མ་རྣམས་ནི་སྔ་མ་བཞིན། །མེ་ལྟར་འབར་བའི་དཀྱིལ་འཁོར་ལ། །རྡོ་རྗེ་ཁུ་ཚུར་མཁྲིག་
གཉིས་བསྣོལ། །ཨཱཿསྦྲེལ་ཧཱུྃ་གཉིས་སྒྲེང་བའོ། །བསྡམས་པ་ཧཱུཾ་ཨཱཿགཉིས་གཤིབས་སྒྲེང་། །ཨོཾ་སྒྲེང་འཇིག་རྟེན་སྣང་བྱེད་ཅིང་། །དེ་ལས་ཨཱཿབཅིང་ཨོཾ་ནང་གཞུག །ཨོཾ་ཨཱཿསྔར་བཞིན་བརྐྱང་བ་དང་། །དེ་ལས་ཏྲཱཾ་གཞིབ་གསུམ་འཆིང་
གི།  ཨཱཿཨོཾ་ནང་དུ་ལུ་གུ་རྒྱུད། །ལྷག་གཤིབས་བདུད་རྩི་འཁྱིལ་བའོ། །ཧྲཱིཿཧཱུྃ་སྒྲེང་བ་མི་གཡོ་མགོན། །ཧཱུཾ་སྒྲེང་ལྷག་མ་འབར་བར་བྱ། །ཐལ་མོའི་ཧཱུཾ་ཧྲཱིཿཨཱཿསྦྱར་སྒྲེང་། །ཨོཾ་བརྐྱང་ཕྱེ་ལ་ཧྲཱིཿབསྣོལ་བའོ། །འཇིག་རྟེན་པ་རྣམས་ཀྱི་ལ་རིམ་པར།  ཐལ་
མོའི་ཨོཾ་སྦྲེལ་ཨཱཿབསྣོལ་དང་། །པི་ཝཾ་གཡོན་ཐོགས་ཡུལ་འཁོར་སྲུང་། །བསྡམས་པ་ཨཱཿསྒྲེང་འཕགས་སྐྱེས་པོ། །དེ་ལ་ཧཱུཾ་སྦྱར་མིག་མི་བཟང་། །རྣོ་ལ་ཁྲོ་དང་དབང་སྦྱར་བྱ། །དབུས་མ་གསུམ་ནི་རྡོ་རྗེ་ཅན། །ལག་པ་གཉིས་འབར་མེ་འབར་བ། །
གུང་མོ་དབྱུག་འདྲ་གཤིན་རྗེ་ཡི། །སྲིན་པོ་ཡི་ནི་ཁྲག་འཕྲོག་པ། །དེ་ཉིད་བསྡུས་བཏུད་སྦྲུལ་མགོར་འགྱུར། །ཐལ་མོ་བསྐོར་བ་རླུང་གི་ལྷ། །དབྱུག་པར་ལྡན་པ་གནོད་སྦྱིན་མོ། །བུམ་པར་བཞག་པ་ས་ཡི་ལྷ། །ལག་པ་གཡོན་ནས་འཁོར་ལོ་ཡིས། །འདི་
10-7-48a


ནི་ཉི་མ་ཟླ་བའི་ཞལ། །ཐལ་མོ་དམ་སྦྱར་མིག་མི་བཟང་། །གཟའ་ལྷག་ལ་ནི་སེ་གོལ་གཏོག །གཡས་ཀྱི་མཛུབ་མོ་ཁ་ནང་ནས། །ཚིག་དབྱུང་ཕུར་བུར་ཤེས་པར་བྱ། །པ་ཝ་སངས་ནི་གཉིས་སྙོམས་སྦྱོར། །སྤེན་པ་དབྱུག་པ་འཛིན་
པར་བྱ། །རཱ་ཧུ་ལ་ནི་ཆུ་སྲིན་འདྲ། །ཤེས་བྱ་རྒྱུ་སྐར་མེ་སྟག་བཞིན། །དེ་ཉིད་བསྐོར་ནས་གློག་ཕྲེང་གི།  བླ་འོག་བཞག་པ་ཀླུ་ཡི་རྒྱ། །མགོ་བོ་ཐོད་པ་ནག་པོ་སྟེ། །གཡོན་པ་མགོ་ཐོད་ཐོགས་འདྲ་དང་། །གཡས་པས་མདུང་རྩེ་རྩེ་གསུམ་པ། །གཡོན་པས་པདྨ་
ཁ་འཛུམ་དང་། །གཡས་པས་ཨོཾ་ཞེས་བྱ་བར་བཞག །གཡོན་པས་འཁོར་ལོ་དབྱུག་ཐོ་གསུམ། །ཨཱཿདང་་གཉིས་རྩེ་སྤྲད་ལ། །ལྷག་མ་གསུམ་ནི་བརྒྱ་བྱིན་གྱིས། །ཧཱུྃ་དང་ཨོཾ་གཉིས་གཞུར་བྱས་ལ། །ལྷག་མ་མདར་བྱས་ཀ་མ་ལའི། །བ་གླང་
སྣ་ཡི་ཆུ་སྲིན་ཚུལ། །རྩེ་གསུམ་པ་ནི་ཀརྟི་ཀ།  བྷྲྀ་གི་རི་ཏི་ལག་བརྐྱང་བ། །སྒོ་བ་ཐམས་ཅད་ཀུན་རིག་བཞིན། །མཁས་པས་རིམ་བཞིན་བཅིང་བར་བྱ། །ངག་ཏུ་རང་རང་གི་འབྱིན་སྔགས་ལན་གསུམ་གླུར་ལེན་ཅིང་།  སེམས་ཀྱིས་རང་རང་གི་ཐུགས་ཀར་
ཧཱུྃ་ལས་དང་པོའི་རྡོ་རྗེ་རྩེ་ལྔ་པ་རེ་རེ་བསྒོམ་པར་བྱ་བ་ནི་དམ་རྒྱའོ། །ཆོས་ཀྱི་ཕྱག་རྒྱའི་ལུས་ཀྱི་བཅའ་བ་རྣམ་སྣང་གི་ཆོས་བདུན་སྔར་བཞིན་བྱས་ལ།  ངག་སེམས་ཀྱིས་ཧྲཱིཿལས་ལྷག༷་མ་དམིགས་པ་དེའི་མགྲིན་པར་པདྨའི་སྟེང་གི་ཟླ་བ་རྡོ་རྗེ་ཕྲ་མོ་
བསམ་པའི་ལྟེ་བར་རང་རང་གི་འབྱིན་སྔགས་ལན་རེ་དགོད་པའོ། །རྡོ་རྗེ་ལས་ཀྱི་ཕྱག་རྒྱ་བཅའ་བ་ནི།  ཐལ་མོ་གཉིས་སུ་ཕྱེ་བའི་གར་སྔོན་དུ་སོང་བའི་འཆིང་བ་སྟེ།  དེ་ཉིད་གཉིས་སུ་བྱས་ནས་ལན་གཉིས་ཀྱིས་བསྐོར་བ་ནི་ལས་ཀྱི་ཕྱག་
10-7-48b


རྒྱའོ་ཞེས་སོ། །དེ་ཡང་གར་སྔོན་དུ་འགྲོ་བས་རང་རང་གི་དཀྱིལ་འཁོར་དུ་བཞུགས་པའི་ཚུལ་དུ་འདས་པ་རྣམས་ལ་བཅིང་ཞིང་།  འཇིག་རྟེན་པ་རྣམས་ཀྱི་དམ་རྒྱ་བཞིན་ཏེ།  འདི་དག་སྙིང་པོའི་ཕྱག་རྒྱ་སྟེ། །ལས་ཀྱི་ཕྱག་རྒྱའང་དེ་བཞིན་ནོ། །
ཞེས་སོ། །ངག་གིས་རང་རང་གི་སྔགས་ལན་རེ་རེ་གླུ་རུ་བླངས་ནས་ཡིད་ཀྱིས་རང་རང་གི་ཐུགས་ཀར་ཨཱཿལས་སྣ་ཚོགས་རྡོ་རྗེ་བསྐྱེད་པའོ། །ཕྱག་རྒྱ་ཆེན་པོ་ནི།  རང་རང་གི་གནས་ཚུལ་ཇི་ལྟ་བར་བཅིང་ཞིང་དེར་མོས་ལ་རང་རང་གི་སྔགས་ལན་རེ་བརྗོད།  རང་
རང་གི་ཐུགས་ཀར་དང་པོའི་རྡོ་རྗེ་ཧཱུཾ་གིས་མཚན་པ་གསལ་གདབ་པའོ། །བཞི་པ་དེ་ལ་མཆོད་ཅིང་བསྟོད་པ་བྱ་བ་ནི།  ཨརྒྷ་མཆོག་བརྟག་ལ་སོགས་པའི་ལུང་གིས་མཚོན་ནས་མཆོད་པ་བྱིན་གྱིས་བརླབ་པ་སྔོན་དུ་སོང་བས།  མཆོད་ཡོན་རང་རང་
གི་དཀྱིལ་འཁོར་གྱི་གཙོ་བོའི་སྔགས་ཀྱིས་དབུལ་བ་ནི་ཁྱད་པར་གྱི་ཕྱག་ལེན་ནོ། །གཞན་དངོས་འབྱོར་གྱི་ལྔ་དང་།  གསང་བ་ལྷ་མོ་བརྒྱད་ཀྱི་མཆོད་པ་དང་།  པཱུ་ཙ་ཉི་ཤུ་རྩ་ལྔ་པ་དང་།  ཕྱག་ན་རྡོ་རྗེའི་མཚན་བརྒྱ་རྩ་བརྒྱད་ཀྱིས་བསྟོད་པ་རྣམས་
ནི་ཀུན་རིག་བཞིན་དུ་འདིར་ཡང་མཆོད་ཅིང་བསྟོད་ནས།  སྤྲོས་པ་ལ་དགའ་ན་སྐབས་དང་སྦྱར་བའི་མཆོད་བསྟོད་ཅི་རིགས་པར་སྦྱར་ཏེ་ཤེས་པར་བྱའོ། །ལྔ་པ་ཕྲིན་ལས་གཞོལ་ཞིང་བཟླས་པ་བྱེད་པ་ནི།  དང་པོ་ལ་ལྷ་རང་རང་གི་ཕྱག་རྒྱ་འཆིང་
ཞིང་རང་རང་གི་མཚན་མ་བརྗོད་པ་སྔོན་དུ་སོང་བས།  སེམས་ཅན་ཐམས་ཅད་ངན་སོང་ལས་བཏོན་ནས་མངོན་པར་རྫོགས་པར་སངས་རྒྱས་པར་མཛོད་ཅིག་ཅེས་པ་དང་།  འཇིག་རྟེན་པ་རྣམས་ལ་མངོན་པར་སངས་རྒྱ་བའི་གྲོགས་མཛོད་ཅིག་ཅེས་
10-7-49a


བསྐུལ་བར་བྱའོ། །དེའི་རྗེས་སུ་རང་རང་གི་དཀྱིལ་འཁོར་གྱི་གཙོ་བོའི་ང་རྒྱལ་གྱིས་རང་རང་གི་ལྷ་ཐམས་ཅད་གསུང༷་བར་དམིགས་པའི་ཐུགས་ཀར་ཟླ་བ་ལ་མཐར་རྩ་རིག །དེའི་དབུས་སུ་རང་རང་གི་སྔགས་བཀོད་ནས་ཕྱིར་
དྲིལ་ཅིག་ཆར་གྱིས་བཟླས་པའམ།  རྐྱང་དོན་རིམ་གྱིས་བཟླས་པ་གཉིས་ཀྱི་བྱེ་བྲག་སྔར་བཞིན་ཤེས་པར་བྱས་ལ་འོད་ཟེར་སྤྲོས།  དོན་གཉིས་བྱས་ཚུར་འདུས་སྔགས་ལ་ཐིམ་པར་བསམ་ཞིང་།  ཐུན་བཞིའི་དང་པོ་ཐོ་རངས་ཐམས་
ཅད་བསྐྱེད་ལ་བཟླའོ། །གསུམ་པ་རྗེས་ནི།  བཟླས་པས་སྐྱོ་ན་ཐུན་མཚམས་སུ་ཡི་གེ་བརྒྱ་པས་ནུས་པ་བརྟན་པར་བྱས་ལ་མཆོད་ཅིང་བསྟོད་དེ་སྤྱོད་ལམ་བྱའོ། །ཐུན་གཉིས་པ་དང་གསུམ་པ་ལ་རང་བྱུང་རང་ཞུགས་སོ། །ཐུན་བཞི་པ་བཟླས་པས་
སྐྱོ་ན་མཆོད་ཅིང་བསྟོད་ལ་རྩ་རིག་གིས་ཕྱག་རྒྱ་དགྲོལ་ཞིང་ཡི་གེ་བརྒྱ་པ་བརྗོད།  དགེ་བ་བསྔོ།  བཟོད་པར་གསོལ།  མཆོད་ཡོན་ཕུལ་ལ།  སྤྱན་དྲངས་པའི་ཡེ་ཤེས་པ་གཤེགས་ཤིང་དམ་ཚིག་པ་བསྡུས་ཏེ།  བདག་ཉིད་བསྲུངས་ལ་ཀུན་
སྤྱོད་དགེ་བའི་ལས་འབའ་ཞིག་བྱ་སྟེ།  ལྷའི་མཚན་མ་ཐོབ་པར་བྱེད་པ་ནི་བསྙེན་པའོ། །གཉིས་པ་སའི་ཆོ་ག་ལ་ནི་གསུམ།  ས་གཞི་གཟུང་དང་སྦྱང་བ་གཉིས། །ལྷ་ཡི་རྣལ་འབྱོར་སྔོན་སོང་ནས། །བགེགས་བསྐྲད་བསྲུང་བ་གསུམ་ཡིན་ཏེ། །
གཟུང་བདེའི་ཕྱིར་དུ་ཀུན་རིག་བཞིན། །ཉམས་ལེན་ཐམས་ཅད་ཐུན་མོང་དུ། །གནས་ཀྱི་བྱེ་བྲག་བརྟགས་བྱས་ལ། །མཁས་པས་རིམ་བཞིན་སྦྱར་བར་བྱ། །གསུམ་པ་ཐིག་ལ་གསུམ་ཡིན་ཏེ། །བྱིན་གྱིས་བརླབ་པ་ཀུན་རིག་བཞིན། །གདབ་པ་
10-7-49b


དང་ནི་ཆ་དབྱེ་བ། །སྒོ་རྐྱང་མཐོང་བ་བརྒྱུད་བཞིན་གདབ། །བཞི་པ་སྟ་གོན་དག་ལ་གསུམ། །ལྷ་དང་བུམ་པ་སློབ་མའོ། །དང་པོ་རང་གི་འབྱིན་སྔགས་ཀྱིས། །ཐིག་ལེ་དང་ནི་ཚོམ་བུ་ལས། །ལྷ་རྣམས་བསྐྱེད་ལ་སྤྱན་དྲངས་བསྒྲུབ། །མཆོད་བསྟོད་མཉེས་
བྱས་སླར་བསྡུའོ། །བུམ་པ་མཚན་ཉིད་ལྡན་པ་ལ། །རྫས་དང་རྒྱན་གྱིས་མཛེས་པ་ཡིས། །སྦྱངས་ཏེ་ཐུན་མོང་ཁྱད་པར་སྔགས། །བཟླས་བྱས་མཆོད་དེ་བདུད་རྩིར་བསམ། །སློབ་མས་ཡོན་དབུལ་གསོལ་བ་གདབ། །ཉན་པར་བསྐུལ་ཞིང་སྡིག་པ་
བཤགས། །རྗེས་སུ་ཡི་རང་སྐྱབས་སུ་འགྲོ། །སེམས་བསྐྱེད་ལམ་གནས་སྨོན་པ་བརྒྱད། །ཁྱད་པར་སེམས་བསྐྱེད་བྱིན་བརླབ་མཆོད། །སོ་ཤིང་དོར་དང་ཀུ་ཤ་སྦྱིན། །སྲུང་སྐུད་སྨོན་ལམ་གདབ་པ་ལྔ། །ཟབ་མོའི་ཆོས་བཤད་ངན་པ་བཟློག །
རྣམ་པར་ཕྱེ་ན་བཅོ་ལྔ་ཡང་། །སྦྱོར་བ་དངོས་གཞི་རྗེས་ཀྱིས་བསྡུ། །དེ་རྣམས་ཚིག་གིས་བྱེད་པ་རྣམས། །ཀུན་རིག་བཞིན་དུ་ཤེས་པར་བྱའོ། །ལྔ་པ་བྲི་ཞིང་བསྒྲུབ་པ་གཉིས། །བྲི་ལ་བྱིན་བརླབ་ཕུར་བུ་དབྱུང་། །ཀུན་རིག་བཞིན་དུ་ཀུན་ལ་སྦྱར། །ཚོན་
རིམ་དཀར་སྔོ་དམར་ལྗང་ནི། །ཤིང་སོགས་ཕྱོགས་བཞི་མཚམས་བརྒྱད་མཚོན། །དབུས་ནི་གཙོ་བོའི་ཁ་དོག་བཞིན། །ཀ་གདུང་རྩིབས་བརྟེན་འཁོར་ལོ་སྔོ། །གོང་རས་མཛེས་ཚོན་སྣམ་བུ་དམར། །པདྨ་ཟླ་བའི་གདན་དག་ལ། །རང་རང་
སྔགས་ཀྱིས་ལྷ་བསྐྱེད་པ། །བསྙེན་པའི་སྐབས་བཞིན་རང་གནས་སུ། །ཅི་རིགས་པ་ཡི་མཚན་མ་དགོད། །དེ་རྗེས་མཆོད་པའི་རྫས་དགོད་པ། །འཇིག་རྟེན་པ་ལ་རང་རིགས་ཀྱི། །མཚན་མའི་ལྷ་བུམ་དང་བཅས་པ། །ཐམས་ཅད་ཀུན་རིག་
10-7-50a


བཞིན་དུ་བཤམ། །བསྒྲུབ་པ་ལ་ནི་རྣམ་ལྔ་སྟེ། །དང་པོ་བདག་བསྐྱེད་རྣལ་འབྱོར་ནི། །བསྙེན་པའི་སྐབས་སུ་བསྟན་པ་བཞིན། །རང་རང་གཙོ་བོར་བསྐྱེད་ནས་ཀྱང་། །ཅུང་ཞིག་བཟླས་པ་བྱེད་པའོ། །གཉིས་པ་བུམ་པར་བཟླས་པ་
ནི། །ཐུན་མོང་རྩ་བའི་རིག་པ་དང་། །ཁྱད་པར་རང་གི་སྔགས་ཉིད་ཀྱིས། །བདུད་རྩིར་བསྐྱེད་ནས་དབུལ་བའོ། །གསུམ་པ་སློབ་དཔོན་འཇུག་པ་ནི། །རྣམ་པ་བརྒྱད་ཀྱིས་ཤེས་བྱ་སྟེ། །ཀུན་རིག་བཞིན་ལས་ཁྱད་པར་དག །སློབ་འཇུག་སྐབས་བཞིན་
འདིར་ཤེས་བྱ། །བཞི་པ་དངོས་ཀྱི་བྱ་བ་ནི། །སྟོང་པའི་ངང་ལས་རྟེན་དང་ལྷ། །བསྐྱེད་ལ་སྤྱན་དྲངས་གཅིག་ཏུ་བསྒྲུབ། །བྱིན་གྱིས་བརླབ་ཅིང་རྒྱས་གདབ་སྟེ། །མཆོད་དང་བསྟོད་པས་མཉེས་བྱས་ནས། །ལས་གཞོལ་བཟླས་པ་བྱེད་པའོ། །ལྔ་པ་གཏོར་
མའི་ཆོ་ག་ནི། །འབྱུང་པོ་ཐམས་ཅད་ཚིམ་བྱས་ཏེ། །སློབ་མའི་སྐབས་བཞིན་བདག་ཉིད་ཀྱིས། །དབང་བསྐུར་ལ་ནི་ས༷ར་བྱེད་པའོ། །རྡོ་རྗེ་སློབ་དཔོན་གྱི་ལས་ཀྱི་རིམ་པའོ། །དོན་གཉིས་པ་སློབ་མ་འཇུག་ཅིང་དབང་བསྐུར་བ་ལ་གཉིས་ལས།  
འཇུག་པ་ལ་ནི་ཆོས་བརྒྱད་ཀྱི། །དང་པོ་ཆས་སུ་གཞུག་པ་ནི། །ཁྲུས་དང་ཕྱག་ཡོན་སྔོན་སོང་ནས། །གོས་བྱིན་མིག་དར་བཅིང་བྱས་ལ། །སྔགས་ཀྱི་སྡོམ་པ་ལེགས་གནས་པའོ། །གཉིས་པ་འཇུག་པ་དངོས་ཉིད་ནི། །ཤཱཀ་ཐུབ་ལ་
ནི་ཀུན་རིག་བཞིན། །ཐུགས་ལ་ཏི་རིའི་ཕྱག་རྒྱའོ། །གསུང་ལ་ཁྱད་པར།  ཨོཾ་བཛྲ་དྷ་ར་རཏྣ་དྷ་ར།  སོགས་ཀྱིས་སློབ་མ་རིགས་ལྔར་བསྐྱེད་པའོ། །འཁོར་ལོས་སྒྱུར་བར།  ཨོཾ་བཛྲ་ཧཱུཾ་ཛཿཡིས་སྒོ་བཞི་ནས་འཇུག་པའོ། །མེ་ལྟར་འབར་
10-7-50b


བར་ཨོཾ་བཛྲ་ཀྲོ་དྷ་ས་མ་ཡ་ཧཱུཾ་གིས་སོ། །ཕྱོགས་སྐྱོང་བཅུའི་དཀྱིལ་འཁོར་དུ།  རྡོ་རྗེ་ཐལ་མོའི་མཛུབ་མོ་བརྐྱང་བ་རྡོ་རྗེ་གནོད་སྦྱིན་གྱི་ཕྱག་རྒྱས་སོ། །གཟའ་ཆེན་གྱི་ལ།  ཨོཾ་བཛྲ་ཧ་ན་ཧ་ན་ཧཱུྃ་ཕཊ་ཀྱིས་སོ། །ཀླུའི་ལ་ཐལ་མོའི་ཧཱུྃ་གཉིས་རྩེ་སྤྲད་དེ།  
ཨོཾ་གཉིས་བསྣོལ་ལྷག་མ་རྣམས་བརྐྱང་པ་སྦྲུལ་མགོའི་ཕྱག་རྒྱས་སོ། །འཇིག་རྟེན་དུ་སྙིམ་པ་བཟེད་པ་མགོ་ཐོད་ཕྱག་རྒྱའོ། །གསུམ་པ་ཡེ་ཤེས་ཕབ་བརྟན་བྱ་བ་ནི།  ཡོན་ཏན་གྱི་ལ།  ཨོཾ་བཛྲ་ས་མ་ཡ་པྲ་བེ་ཤ་ཡ་ཧཱུྃ་གིས་འབེབས་པའོ། །ཕྲིན་ལས་
ཀྱི་ལ།  ཨོཾ་བཛྲ་ན༷ཾ་ཤ༷ཾ་བ༷ཾ་ཧཱུྃ་ཕཊ།  ཀྱིས་བརྟེན་པར་བྱེད་པའོ། །བཞི་པ་མེ་ཏོག་དོར་ལ་བཅིང་བ་ནི།  ཐུགས་སུ།  ཨོཾ་པྲ་ཏཱིཙྪ་བཛྲ་ཧཱུཾ་གིས་སོ། །ཨོཾ་སརྦ་ཏ་ཐཱ་ག་ཏ་པྲ་ཏཱིཙྪ་ཧོཿས་མ་ཡ་སྟྭཾ་གྱིས་འདོར་འཆིང་གཉིས་ཀའོ། །ཨོཾ་བཛྲ་པཱ་ཎི་པྲ་ཏཱིཙྪ་བཛྲ་ས་
ཏྭ་མ་ཧཱ་སུ་ཁ་ཧཱུཾ་ཧ་ཧ་ཧ་ཧ་ཧོཿས་མ་ཡ་སྟྭཾ་གྱིས་དོར་ནས་བབ་པའི་ལྷ་དེའི་སྔགས་ཀྱིས་འཆིང་བའོ། །ཨོཾ་བཛྲ་ཀྲོ་དྷ་ཨ་ན་ལ་སྤུ་ཏྲ་པྲ་ཏཱིཙྪ་ཧཱུཾ་གིས་སོ། །རྒྱལ་པོའི་ལ།  ཨོཾ་པྲ་ཏཱིཙྪ་དྷི་མ་ཧོ་ཏ་མ་ཡིས་སོ། །ཨོཾ་གྲ་ཧ་ས་མ་ཡེ་ཧཱུཾ་གིས་དོར།  ཨོཾ་བཛྲ་གྲ་ཧ་པྲ་
ཏཱིཙྪ་ས་མ་ཡ་ཧཱུཾ་གིས་འཆིང་བའོ། །པྲ་ཏཱིཙྪ་དྷཾ་མ་ཧཱ་ས་ཏྭ་བཛྲ་དྷ་ར་ཨཱཏྨ་ཡ་ཧ་ཧ་ཧ་ཧ་ཧོཿཡིས་དོར་བའོ། །ལྔ་པ་མིག་དབྱེ་ཞིང་དཀྱིལ་འཁོར་བསྟན་པ་ནི།  ཨོཾ་བཛྲ་ཙཀྵུ་པ་ཤ་ཧོ་ཨཱཏྨ་ས་མ་ཡ་ན་ཏ་མནྟྲ་ཀྵེ་ཧཱུཾ་གིས་ཕྱེ་ལ།  ཨོཾ་བཛྲ་ཀྲོ་དྷ་ན་ནི་རཀྵ་ཧཱུཾ་པ་ཤེ་
ཕཊ།  ཨོཾ་བཛྲ་ཀྲོ་དྷ་ས་མ་ཡེ་ན་བྷི་ར༷་བྷ༷་ཧུ་ཧཱུཾ་ཕཊ་ཀྱིས་ཕྱེ་ཞིང་བསྟན་པའོ། །དྲུག་པ་དམ་ཚིག་བསྐྱེད་ཅིང་བརྟན་པ་ནི།  ཨོཾ་ཅི་སྟེ་ཁྱོད་ཀྱིས་སུ་ཡང་རུང་བ་ལ་སྨྲས་ན་ནི།  ཕྱག་ན་རྡོ་རྗེ་ཉིད་ཀྱིས་རྡོ་རྗེ་འབར་བ་རབ་ཏུ་འབར་བས་ཁྱོད་ཀྱི་མགོ་བོ་བཀས་པར་
10-7-51a


འགྱུར་རོ།  ¤།  ཨོཾ་བཛྲ་ས་མ་ཡ་ཌི་ཏ་ཏིཥྛ་ཧཱུྃ་ཨཱཿཡིས་སོ།། ཨོཾ་བཛྲ་ཀྲོ་དྷ་ས་མ་ཡ་མ་ཏི་ཀྲ་མ་ཧཱུྃ་ཕཊ།  ཀྱིས་སོ། །བདུན་པ་དམ་ཚིག་བསྒྲག་པ་ཀུན་རིག་བཞིན་ནོ། །བརྒྱད་པ་སྡོམ་པ་འབོགས་པ་ནི་ཀུན་རིག་བཞིན་ནོ། །དེ་ལྟར་འཇུག་པའི་ཆོས་
བརྒྱད་ནི་དམིགས་བསལ་མེད་པ་རྣམས་ནི་ཀུན་རིག་བཞིན་དུ་ཤེས་པར་བྱའོ། །འཇུག་པའི་ཆོས་བསྟན་ཏོ། །དབང་བསྐུར་བ་ལ་ནི་རྣམ་པ་གཉིས་ཏེ།  བསྐུར་བ་དངོས་དང་།  མཇུག་གི་ཆོས།  དངོས་གཞི་ལ་རིམ་པ་ཉི་ཤུ་སྟེ།  ཀུན་རིག་བཞིན་ལས་ཁྱད་
པར་ནི།  ཚེ་དཔག་མེད་ཀྱི་དཀྱིལ་འཁོར་དུ་བུམ་དབང་གི་ཁྱད་པར།  ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་བཛྲ་དྷ་ར་ཡ་ཛྙཱ་ཡ་ཧཱུཾ་ཧཱུཾ་སོགས་སོ། །འཁོར་ལོས་སྒྱུར་བ་ཡོན་ཏན་གྱི་དཀྱིལ་འཁོར་དུ་བུམ་དབང་གི་ཁྱད་པར།  ཨོཾ་བཛྲ་པཱ་ཎི་སཱོ་ཡན་
ཏེ་ཨ་ནུ་རཀྟོ་ཨ་བྷི་ཥིཉྩ་ཏྲཱཾ་ཞེས་སོགས་སོ། །མེ་ལྟར་འབར་བའི་དཀྱིལ་འཁོར་དུ་བུམ་དབང་གི་ཁྱད་པར།  ཨོཾ་བཛྲ་ཀྲོ་དྷ་ར་ཀྲི་ས་མ་ཡ་ཨ་བྷི་ཥིཉྩ་ཧཱུཾ་ཕཊ།  ཀྱིས་སོ། །འཇིག་རྟེན་པ་རྣམས་ཀྱི་ལ་རང་རང་གི་ས་བོན་ལ་ཨ་བྷི་ཥིཉྩ་ཧཱུཾ་བཏགས་ལ་
བུམ་པའི་དབང་བསྐུར་བ་ནི་ཁྱད་པར་རོ། །དེ་རྗེས་ཆུ་དང་ཅོད་པན་དར་དཔྱངས་དང་། །ཕྱག་མཚན་བདག་པོ་མིང་དབང་དང་། །འཁོར་ལོ་ཕྲིན་ལས་གཟུངས་དང་ནི། །གསང་དབང་ཤེས་རབ་ཡེ་ཤེས་ནི། །ཀུན་རིག་བཞིན་ལས་ཁྱད་པར་དུ། །
རང་རིགས་དང་པོར་སྨོས་པས་སོ། །འཁོར་ལོ་གླང་པོ་རྟ་མཆོག་དང་། །ནོར་བུ་བཙུན་མོ་བློན་པོ་དང་། །དམག་དཔོན་རིན་ཆེན་བདུན་གྱི་དབང་། །ཆོས་ཀྱི་རྗེས་གནང་ཀུན་རིག་བཞིན། །རང་རང་སྔགས་ཀྱི་གནང་བ་སྦྱིན། །འདས་པ་ལྔ་ལ་
10-7-51b


བཀའ་དབང་བསྐུར། །དམ་ཚིག་སྦྱིན་ཞིང་བཀའ་བསྒོ་བ། །ཀུན་རིག་བཞིན་དུ་ཐམས་ཅད་ལའོ། །མཆོད་ཡོན་སྔོན་སོང་ཡོན་དབུལ་ཞིང་། །སྟོན་མོས་ཚིམ་བྱས་ཤིས་པ་བརྗོད། །སློབ་མ་བསྲུང་བ་དག་རྗེས་སོ། །གཏོར་མ་དབུལ་ཞིང་མཆོད་དང་བསྟོད། །
ཡི་གེ་བརྒྱ་པས་བརྟན་བྱ་ཞིང་། །བཟོད་གསོལ་དགེ་བ་བསྔོ་བ་དང་། །མཆོད་ཅིང་ཡེ་ཤེས་གཤེགས་སུ་གསོལ། །སྤྲུལ་པ་བསྡུས་ཏེ་དམིགས་མེད་བསྒོམ། །རྡུལ་ཚོན་ཕྱགས་ལ་ཆུ་བོར་དོར། །ལས་རྗེས་བསྡུས་ཤིང་བདག་བསྲུངས་ནས། །སྤྱོད་
ལམ་དགེ་ལ་བརྩོན་བྱེད་པ། །དཀྱིལ་འཁོར་རྗེས་ཀྱི་བྱ་བའོ། །སོ་སོའི་དཀྱིལ་འཁོར་དུ་གཞུག་ཅིང་དབང་བསྐུར་བའི་རིམ་པའོ། །གསུམ་པ་དངོས་གྲུབ་ཀྱི་ཡེ་ཤེས་ལ་བསླབ་པ་ནི།  རང་རང་དཀྱིལ་འཁོར་དུ་རང་རང་གི་སྔགས་ཀྱི་གནང་བ་ཐོབ་པའི་
རྣལ་འབྱོར་པས་གནས་ཁྱད་པར་ཅན་དུ་དུས་བཟང་པོ་ལ་ཡོ་བྱད་འཚོགས་པར་བྱས་ནས།  ལྷའི་མཚན་མ་ཐོབ་པས་སྤྱིར་བསྒྲུབ་པར་ཤེས་པར་བྱའོ། །ཤཱཀ་ཐུབ་ཀྱི་ལ་བརྟེན་རས་རིས་རང་གི་ཚུལ་དུ་བྲིས་ལ།  བསྒྲུབ་པ་ཀུན་རིག་བཞིན་ནོ། །
ཐུགས་ཀྱི་དང་།  གསུང་གི་བསྒྲུབ་ཚུལ་ནི་གཞུང་དུ་འབྱུང་ངོ་། །ཡོན་ཏན་གྱི་དང་།  ཕྲིན་ལས་ཀྱིའང་རང་རང་གི་རྣལ་འབྱོར་གྱིས་མཚན་མའི་བསྙེན་པ་ཐོབ་པར་བྱས་ནས་བསྒྲུབ་པའི་ཚེ།  དཀྱིལ་འཁོར་གྱི་དབུས་སུ་ལས་གང་བསྒྲུབ་ཀྱི་ཐུགས་ཀར་སྔགས་
ཕྲེང་བཀོད་དེ།  བཟླས་བརྗོད་ཀྱིས་རང་ཉིད་དངོས་གྲུབ་ཐོབ་པར་བྱས་ནས་གཞན་དོན་ཕྲིན་ལས་སྣ་ཚོགས་བྱེད་པའོ། །འཇིག་རྟེན་པའི་དཀྱིལ་འཁོར་རྣམས་ལ་གཙོ་བོ་ཕྱག་ན་རྡོ་རྗེ་ཞི་ཁྲོ་གཉིས་ཀྱི་རྣལ་འབྱོར་གྱིས་མཚན་མ་ཐོབ་པས་སྒྲུབ་པའི་ཚུལ་ནི་
10-7-52a


རང་རང་འཇིག་རྟེན་པ་གང་རུང་མདུན་དུ་བསྐྱེད་པ་དང་།  རང་རྒྱུད་པ་སྤྱན་དྲངས་པ་གཉིས་གཅིག་ཏུ་བསྒྲུབས་ནས།  བཟླས་བརྗོད་ཀྱིས་ཐུན་མོང་གི་དངོས་གྲུབ་ཅི་རིགས་པ་ཐོབ་པར་བྱེད་པའོ། །བཞི་པ་སྡིག་པ་སྦྱོང་བའི་ཐབས་ཀྱི་བྱེ་བྲག་
ནི།  ཀུན་རིག་ལས་འབྱུང་བ་བཞིན།  འཇིག་རྟེན་ལས་འདས་པའི་དཀྱིལ་འཁོར་ལྔ་རྣམས་སུ་ཤེས་པར་བྱ་བ་ནི།  རྟེན་གྱི་བྱེ་བྲག་ཕྱེ་བ་ཡིས། །དབང་བསྐུར་གཉིས་ཀྱི་སྦྱོར་བ་དང་། །མཆོད་རྟེན་དྲི་གཙང་ཁང་ནང་དུ། །བཞག་པར་བྱ་སྟེ་
དབང་བསྐུར་རོ། །མཆོད་རྟེན་བཟླས་བརྗོད་བྱེ་བ་སྟོང་། །སྦྱིན་སྲེག་རོ་སྲེག་རྣམ་གཉིས་དང་། །ཕྱིར་བཟློག་སྦྱང་བའི་ཐབས་དགུ་ནི། །ཀུན་རིག་བཞིན་དུ་ཤེས་བྱའོ། །ཞེས་ངན་སོང་སྦྱོང་རྒྱུད་ཀྱི་དཀྱིལ་འཁོར་གྱི་ཆོ་ག་རིན་ཆེན་སྒྲོན་མ་ལས་འབྱུང་ངོ་། །འདི་ལ་
ཐོག་མར་ཚད་མེད་བཞི་བསྒོམ་པ་ནི་མི་དགོས་ཤིང་།  གཞལ་ཡས་ཁང་གྲུ་བཞི་སྒོ་བཞི་པ་ཤར་ཤེལ་དཀར་པོ་ལ་སོགས་པ་ནི།  རྩིག་པའི་ཁ་དོག་དང་ལྷ་རྣམས་གང་ལ་སྦྱར་ནའང་།  འདིའི་ལུགས་ལ་མེད་པས་ལུགས་གཞན་ཞིག་གིས་འཁྲུལ་གཞི་
བྱས་པའོ། །ཕྱག་རྒྱ་འགའ་ཞིག་ཀྱང་རྒྱུད་དང་བསྟུན་ནས་དག་པར་བྱ་དགོས་པར་སྣང་ཞིང་།  དཀྱིལ་འཁོར་མ་བསྒྲུབས་པའི་གོང་དུ་འཇུག་པ་སྔར་བཀག་ཟིན།  འདས་པ་ལྔ་ལ་བཀའི་དབང་བསྐུར་ཞེས་པ་ཡང་བཀའི་དབང་བསྐུར་བ་ཚེ་དཔག་མེད་
ལ་དགོས་ཀྱི་གཞན་ལ་མི་དགོས་སོ། །འཇིག་རྟེན་པ་རྣམས་རང་རྒྱུད་པར་འདོད་པ་ནི་འོག་ཏུ་འགོག་པར་འགྱུར་རོ། །གཞན་རྣམས་ནི་ལུགས་འདི་ལ་ཆོ་ག་འདི་བཞིན་དུ་བྱེད་དགོས་པ་འདྲའོ། །ཡང་འཛིམ་པ་བློ་ཆེན་གྱིས་བདག་བསྐྱེད་དཔའ་
10-7-52b


བོ་གཅིག་པའི་སྐབས་སུ་སྲུང་འཁོར་དང་གཟུགས་བརྙན་གྱི་སྦྱོར་བ་སོགས་མི་བྱེད་པར་ཚོགས་གཉིས་བསག་པ་སྔོན་དུ་སོང་ནས་རྡོ་རྗེ་ཆོ་ག་གསུམ་ལས་རྡོ་རྗེ་སེམས་དཔའ་བསྐྱེད་ནས།  སྐུ་གསུང་ཐུགས་བྱིན་བརླབ་དང་།  ཡེ་ཤེས་ཀྱི་འཁོར་ལོ་
དགུག་གཞུག་དང་།  དབང་བསྐུར་རིགས་བདག་གིས་རྒྱས་གདབ་རྣམས་བླ་མེད་ལྟར་བྱེད་པ་དང་།  བསྙེན་པ་རྒྱས་པའི་སྐབས་དང་།  མདུན་བསྐྱེད་རྣམས་ལའང་དེ་བཞིན་དུ་བྱེད་པ་དང་།  བུམ་བསྐྱེད་ཀྱི་སྐབས་སུ་ལས་བུམ་དང་།  གཏོར་མའི་སྐབས་
སུ་འདས་གཏོར་དང་།  འཇུག་པའི་སྐབས་སུ་དམ་གཞག་བཞི་བྱེད་པ་དང་།  དབང་གི་དངོས་གཞིའི་སྐབས་སུ་སྔགས་དབང་རྣམས་ཆུ་དབང་གི་སྐབས་སུ་བྱེད་པ་དང་།  འདིར་དབང་པོ་རབ་ཀྱི་དབང་དུ་བྱས་ནས་སྐད་ཅིག་གིས་བསྐྱེད་པའི་རིམ་པ་
གསུངས་པའི་ཤེས་བྱེད་དུ།  རྣམ་སྣང་མངོན་བྱང་དང་།  མཚན་བརྗོད་ཀྱི་ལུང་དྲངས་པ་རྣམས་ནི་ཕན་ཚུན་ནང་འགལ་ཞིང་།  བླ་མེད་ཀྱི་ཆོ་ག་བསྲེས་ནས་རྒྱུད་འདི་ནས་འབྱུང་བའི་ཆོ་ག་རྣམས་དོར་བར་སྣང་བས་ཤེས་ལྡན་དག་གིས་སྤང་བར་བྱའོ། །གཉིས་
པ་གཞུང་དོན་ལ་གསུམ་སྟེ།  སྡུད་པ་པོའི་མཚམས་སྦྱོར་དང་།  སྟོན་པ་གདན་ལས་བཞེངས་ཏེ་ཕྱག་བྱས་ནས་ཏིང་ངེ་འཛིན་ལ་སྙོམས་པར་ཞུགས་པ་དང་།  རྒྱུད་ཀྱི་གཞུང་ངོ་། །དང་པོ་ནི།  དེ་ནས་བཅོམ་ལྡན་འདས་ཞེས་སོགས་སོ། །གཉིས་པ་ནི།  
བདུད་བཞི་འཇོམས་པས་ན་དཔའ་བོ་སྟེ།  འཁོར་གྱི་ཚུལ་སྟོན་པའི་ཕྱག་ན་རྡོ་རྗེ་ཡེ་ཤེས་ཀྱི་སྣང་བ་ལས་གྲུབ་པའི་གདན་ལས་བཞེངས་ནས་ནི་ཞེས་སོགས་སོ། །གསུམ་པ་ལ་ལྔ་སྟེ།  ཤཱཀྱ་ཐུབ་པ་སྐུའི་དཀྱིལ་འཁོར་དང་།  ཕྱག་ན་རྡོ་རྗེ་ཐུགས་
10-7-53a


ཀྱི་དཀྱིལ་འཁོར་དང་།  ཚེ་དཔག་མེད་གསུང་གི་དཀྱིལ་འཁོར་དང་།  འཁོར་ལོས་སྒྱུར་བ་ཡོན་ཏན་གྱི་དཀྱིལ་འཁོར་དང་།  མེ་ལྟར་འབར་བ་ཕྲིན་ལས་ཀྱི་དཀྱིལ་འཁོར་རོ། །དང་པོ་ལ་ལྔ་སྟེ།  སྔགས་ཀྱི་ཕྲེང་བ་དང་།  རྡུལ་
ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་ཕན་ཡོན་དང་བཅས་ཏེ་བསྟན་པ་དང་།  ཕྱག་རྒྱའི་ཡེ་ཤེས་དང་།  དངོས་གྲུབ་ཀྱི་ཡེ་ཤེས་དང་།  ནོར་བུ་དྲི་མ་མེད་པའི་འོད་ཀྱི་སྐྱེ་རྒྱུད་བསྟན་པའོ། །དང་པོ་ནི།  ངན་སོང་ཐམས་ཅད་རྣམ་པར་སྦྱོང་བ་
ཞེས་སོགས་ཏེ།  འདི་མན་ཆད་དུ་སྔགས་ཕྲེང་རྣམས་ནི་བསྙེན་པ་རྒྱས་པ་ལ་བསྐྱེད་སྔགས་དང་།  བཟླས་སྔགས་དང་།  མདུན་བསྐྱེད་ལ་བཀོད་པའི་སྔགས་དང་ཕྱག་རྒྱ་སྟོན་པ་དང་།  བུམ་པ་ལ་བཟླས་པ་ཐམས་ཅད་དུ་དགོས་པར་ཤེས་པར་བྱའོ། །
སྐབས་འདིར་སྔགས་གང་ལས་ལྷ་གང་བསྐྱེད་པ་དང་ཕྱོགས་གང་དུ་དགོད་པ་དང་།  སྐུ་མདོག་དང་ཕྱག་མཚན་ཙམ་ཞིག་བརྗོད་པ་ཡིན་ལ།  ཆོ་གའི་ཆིངས་ནི་སྔར་བཤད་པ་ལྟར་ཤེས་པར་བྱའོ། །དེ་ལ་འདིར་གཞལ་ཡས་ཁང་སྒོ་རྐྱང་སྤྱི་དང་མཐུན་པའི་
ལྷ་སྣམ་གྱི་དབུས་སུ་འཁོར་ལོ་རྩིབས་བརྒྱད་ལྟེ་བ་དང་བཅས་ཤིང་རྩིབས་རྟེན་རྡོ་རྗེའི་ཕྲེང་བས་བསྐོར་བའི་སྟེང་དུ་སྣ་ཚོགས་པདྨ་དང་ཟླ་བ་ལ་ཨོཾ་སརྦ་པཱ་པཾ་ད་ཧ་ན་བཛྲ་ཧཱུཾ་ཕཊ་ལས་ཤཱཀྱ་ཐུབ་པ་སེར་པོ་གཡས་མཆོག་སྦྱིན་གཡོན་མི་འཇིགས་པ་སྦྱིན་
པའམ།  ཡང་ན་ཆོས་འཆད་ཀྱི་ཕྱག་རྒྱ་ཅན་དུ་རྩ་སྐྱ་པ་བཞེད་ལ།  འཛིམ་པ་རིན་ཤེས་ནི།  གཡས་གསེག་ཤང་།  གཡོན་སྤར་བུ་འཛིན་པར་བཞེད་དོ། །ཤར་དུ་ཨོཾ་སརྦ་པཱ་པཾ་བི་ཤོ་དྷ་ན་བཛྲ་ཧཱུཾ་ཕཊ།  ལས་ཕྱག་རྡོར་དཀར་པོ་རྡོ་རྗེ་དང་དྲིལ་བུ་
10-7-53b


འཛིན་པའོ། །ལྷོར་ཨོཾ་སརྦ་ཀརྨཱ་ཨཱ་ཝ་ར་ཎ་བྷསྨི་ཀུ་རུ་ཧཱུཾ་ཕཊ།  ལས་རྒྱལ་བའི་གཙུག་ཏོར་སྔོན་པོ་མཆོག་སྦྱིན་གྱིས་རིན་པོ་ཆེ་འཛིན་པའོ། །ནུབ་ཏུ་ཨོཾ་བྷྲཱུཾ་བི་ཤ་ན་ཡ་ཨཱ་བ་ར་ཎ་ནི་ཧཱུཾ་ཕཊ།  ལས་འཁོར་ལོས་སྒྱུར་བ་དམར་སྐྱ་ཆོས་འཆད་དམ་ཏིང་ངེ་
འཛིན་གྱི་ཕྱག་རྒྱས་འཁོར་ལོ་རྩིབས་བརྒྱད་པ་འཛིན་པའོ། །བྱང་དུ་ཨོཾ་བྷྲཱུཾ་བི་ཤོ་དྷ་ཡ་ཨཱ་ཝ་ར་ཎ་ནི་ཧཱུཾ་ཕཊ།  ལས་རྣམ་པར་རྒྱལ་བ་ལྗང་གུ་མི་འཇིགས་པ་སྦྱིན་པས་སྣ་ཚོགས་རྡོ་རྗེ་འཛིན་པའོ། །ཤར་ལྷོར་ཨོཾ་ཛྭ་ལ་ཛྭ་ལ་དྷ་ཀ་དྷ་ཀ་ཧ་ན་ཧ་ན་ཨཱ་ཝ་ར་ཎ་
ནི་ཧཱུཾ་ཕཊ།  ལས་གཟི་བརྗིད་ཕུང་པོ་དཀར་དམར་ཕྱག་གཉིས་གཡས་ཉི་མ་གཡོན་དཀུར་བརྟེན་པའོ། །བྱང་ཤར་དུ་ཨོཾ་སྲུཾ་ས་ར་ས་ར་པྲ་ས་ར་པྲ་ས་ར་ཨཱ་ཝ་ར་ཎ་ནི་ཧཱུཾ་ཕཊ།  ལས་གདུགས་དཀར་པོ་ཅན་ཕྱག་གཡས་ཀྱིས་གདུགས་འཛིན་པའོ། །ནུབ་བྱང་དུ་
ཨོཾ་ཧཱུཾ་ཧ་ར་ཧ་ར་ཨཱ་ཝ་ར་ཎ་ནི་ཧཱུཾ་ཕཊ།  ལས་རྣམ་པར་འཐོར་བ་སྔོན་པོ་གཡས་རལ་གྲི།  གཡོན་པོ་ཏི་འཛིན་པའོ། །ལྷོ་ནུབ་ཏུ་ཨོཾ་ཧཱུཾ་ཕཊ་སརྦ་ཨཱ་ཝ་ར་ཎ་ནི་ཧཱུཾ་ཕཊ།  ལས་གདུགས་དཀར་པོ་ཅན་ཕྱག་གཡས་ཀྱིས་གདུགས་འཛིན་པའོ། །དེ་ཉིད་
ཀྱི་གྲྭ་བཞིར་བདུག་སྤོས་མ་ལ་སོགས་པ་བཞི་ནི།  ཨོཾ་སརྦ་ཨ་པ་ཡ་བི་ཤོ་དྷ་ནི་དྷ་མ་དྷ་མ་དྷུ་པ་ཡ་ཨ་པཱ་ཡ་ག་ཏི་གནྡྷ་ནི་གནྡྷ་པ་ཏཾ་ཧཱུཾ་ཕཊ།  ལས་བྱང་ཤར་དུ་དྲི་ཆབ་མ་དང་།  ཨོཾ་སརྦ་ན་ར་ཀ་ག་ཏི་ཨཱ་ཀཪྵ་ནི་ཧཱུཾ་ཕཊ།  ལས་ཤར་སྒོར་རྡོ་རྗེ་ལྕགས་
ཀྱུ་དང་།  ཨོཾ་སརྦ་ན་ར་ཀ་བྷི་དྷ་ཏི་ར་ཎི་ཧཱུཾ་ཕཊ།  ལས་ལྷོ་སྒོར་རྡོ་རྗེ་ཞགས་པ་དང་།  ཨོཾ་སརྦ་ཨ་བྷ་ཡ་བནྡྷ་ནི་མོ་ཙ་ནི་ཧཱུཾ་ཕཊ།  ལས་ནུབ་སྒོར་རྡོ་རྗེ་ལྕགས་སྒྲོག་དང་།  ཨོཾ་སརྦ་ཨ་བྷ་ག་ཏི་ག་ཧ་ན་བི་ན་ཤ་ནི་ཧཱུཾ་ཕཊ།  ལས་བྱང་སྒོར་རྡོ་རྗེ་དྲིལ་
10-7-54a


བུའོ། །ཨོཾ་བྷྲི་ཏ་སོགས་གསུམ་ནི།  ལུས་ངག་ཡིད་གསུམ་གྱི་སྡིག་པ་སྦྱང་།  སྐུ་གསུང་ཐུགས་བྱིན་གྱིས་བརླབ་པ་འོག་གི་ཕྱག་རྒྱ་དང་སྦྱར་ཏེ་དཀྱིལ་འཁོར་ཐམས་ཅད་ལ་དགོས་སོ། །ཨོཾ་ད་ཧ་སོགས་ནི།  ཕྲེང་སྔགས་ཀྱི་
མཇུག་ལ་བཏགས་ལ་བཟླས་ཏེ་ཕྱིར་བཟློག་དང་འབྲེལ་ལོ། །གཉིས་པ་ལ་གཉིས་ཏེ།  སློབ་དཔོན་གྱི་ལས་དང་།  སློབ་མ་དབང་བསྐུར་བ་ཕན་ཡོན་དང་བཅས་པའོ། །དང་པོ་ལ་གཉིས་ཏེ།  བྲི་ཞིང་ལྷ་དགོད་པ་དང་།  དཀྱིལ་འཁོར་དུ་ཞུགས་ཏེ་བདག་
བསྐྱེད་ལ།  མདུན་བསྐྱེད་བསྒྲུབ་པའོ། །དང་པོ་ནི།  དེ་ནས་དེའི་དཀྱིལ་འཁོར་བཤད་དེ།  ཞེས་སོགས་སོ། །གཉིས་པ་ནི།  དེ་ནས་དྲི་ཞིམ་ལ་སོགས་པ་ཞེས་སོགས་ཏེ།  སྤྱན་འདྲེན་གྱི་སྔགས་འདི་ནི་གོང་འོག་ཀུན་ཏུ་དགོས་སོ། །གཉིས་པ་ནི།  དེ་བཞིན་
དུ་བཅུག་སྟེ་དབང་བསྐུར་ཞེས་སོགས་སོ། །གསུམ་པ་ཕྱག་རྒྱའི་ཡེ་ཤེས་ནི།  དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས་སེང་གེའི་སྟ་སྟངས་ཀྱིས་ཞེས་སོགས་ཏེ།  སྐུ་གསུང་ཐུགས་བྱིན་གྱིས་བརླབ་པའི་ཕྱག་རྒྱ་ནི།  སྔར་གྱི་
སྔགས་དང་སྦྱར་ཏེ་གོང་འོག་ཀུན་ཏུ་དགོས་སོ། །རིགས་ལྔའི་ཕྱག་རྒྱ་དང་བདུག་པ་མ་སོགས་བཞིའི་ཕྱག་རྒྱ་ནི་ཀུན་རིག་གི་སྐབས་སུ་ཡང་དགོས་ཤིང་འོག་ཏུ་ཡང་དགོས་སོ། །སེམས་དཔའ་བཅུ་དྲུག་གི་ཕྱག་རྒྱ་ནི་ཀུན་རིག་གི་སྐབས་སུ་དགོས་སོ། །སྒོ་
བ་བཞིའི་ཕྱག་རྒྱ་ནི་གོང་འོག་ཀུན་ཏུ་དགོས་སོ། །བདུག་པ་མ་སོགས་བཞིའི་ཕྱག་རྒྱ་གོང་མ་ནི་མཆོད་པའི་ཕྱག་རྒྱ་ཡིན་ལ།  འོག་མ་ནི་དམ་ཚིག་གི་ཕྱག་རྒྱ་ཡིན་ནོ། །བཞི་པ་དངོས་གྲུབ་ཀྱི་ཡེ་ཤེས་ནི།  སྐུ་གཟུགས་ཀྱི་ཆོ་ག་ནི་འདིར་དེ་བཞིན་དུ་བྱ་
10-7-54b


སྟེ་ཞེས་སོགས་ཏེ།  ཀུན་རིག་གི་སྐབས་དང་བསྒྲུབ་ཚུལ་འདྲ་ཞིང་།  བྲི་ཚུལ་ནི་གཞུང་དུ་གསལ་ལ།  ཡང་ན་སྐུ་གཟུགས་ནི་དཀྱིལ་འཁོར་གྱི་ཚུལ་དུ་བྲིས་ལ་ཞེས་པས་རས་བྲིས་ཀྱི་དཀྱིལ་འཁོར་ལ་གསལ་བར་བསྟན་ནོ། །ལྔ་པ་ནོར་བུ་དྲི་མ་མེད་
པའི་སྐྱེས་རྒྱུད་བསྟན་པ་ལ་གཉིས་ཏེ།  དྲི་བ་དང་།  ལན་ནོ། །དང་པོ་ནི།  དེ་ནས་ཚངས་པ་ལ་སོགས་པའི་ལྷ་ཚོགས་རྣམས་ཀྱིས་ཞེས་སོགས་སོ། །གཉིས་པ་ནི།  དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་ཞེས་སོགས་ཏེ།  མཚམས་མེད་པ་བྱས་པའི་
གང་ཟག་འགྲོ་བ་གཞན་གྱིས་བར་མ་ཆོད་པར་དམྱལ་བར་སྐྱེ་བས་ཁྱབ་པ་ནི་ཕ་རོལ་ཏུ་ཕྱིན་པའི་ལུགས་ཡིན་ལ།  འདིར་ལྷར་སྐྱེས་པར་བཤད་པ་ནི་རྡོ་རྗེ་ཐེག་པའི་ལུགས་ཡིན་ཞིང་།  ཀྱེ་རྡོ་རྗེའི་རྒྱུད་ལས་ཀྱང་འདི་ཉིད་འབྱུང་ངོ་། །ཕྱག་ན་རྡོ་རྗེ་ཐུགས་ཀྱི་
དཀྱིལ་འཁོར་ལ་གཉིས་ཏེ།  ཕྱག་ན་རྡོ་རྗེ་ལ་འཁོར་དེ་བཞིན་གཤེགས་པས་བསྐོར་བའི་དཀྱིལ་འཁོར་དང་།  འཇིག་རྟེན་པས་བསྐོར་བའི་དཀྱིལ་འཁོར་རོ། །དང་པོ་ལ་གཉིས་ཏེ།  གླེང་བསླང་བ་དང་།  གཞུང་ངོ་། །དང་པོ་ལ་གཉིས་ཏེ།  འཁོར་གྱིས་བསླང་བ་
དང་།  སྟོན་པས་བསླང་བའོ། །དང་པོ་ནི།  དེ་ནས་བརྒྱ་བྱིན་དང་ཚངས་པ་ལ་སོགས་པ་ལྷའི་བུ་རྣམས་ཞེས་སོགས་ཏེ།  ཀོ་ཊ་ཀྵ་ལ་སོགས་པ་བཅུ་ནི་སྒྲ་ཇི་བཞིན་མ་ཡིན་པས་སྒྲ་དྲང་ཐད་དུ་བསྒྱུར་དུ་མི་བཏུབ་སྟེ།  སྒྲོན་གསལ་ལས།  ཀོ་ཊ་ཀྵ་ལ་སོགས་པའི་
སྒྲ། །འཇིག་རྟེན་བསྟན་བཅོས་ལ་མེད་ཅིང་། །དེ་བཞིན་གཤེགས་པའི་བརྡར་གྱུར་པ། །དེ་ནི་ཇི་བཞིན་མིན་པར་བསྒྲགས། །ཞེས་སོ། །དོན་མང་པོ་ལ་འཇུག་སྟེ།  སངས་རྒྱས་མཉམ་སྦྱོར་ལས།  ཁྱོད་ནི་གླང་པོའི་རྣ་བ་ཅན། །ཁྱོད་ནི་སེང་གེའི་ལྟ་སྟངས་
10-7-55a


ཅན། །ཁྱོད་ནི་མེ་ལྕེ་འབར་བ་ཅན། །ཁྱོད་ནི་བདེན་པའི་སྤྲིན་ཡིན་ཏེ། །ཁྱོད་ནི་ཕ་ལྟར་སློབ་པ་ཡིན། །ཁྱོད་ནི་མ་ལྟར་སློབ་པ་ཡིན། །ཁྱོད་ནི་བརྟན་པའི་ས་ཡང་ཡིན། །ཁྱོད་ནི་ཆུ་བོའི་གཞུང་ཡང་ཡིན། །ཁྱོད་ནི་འཐོར་བྱེད་རླུང་ཡང་ཡིན། །ཁྱོད་ནི་
རིན་ཆེན་འབྱུང་གནས་མཛོད། །ཞེས་གསུངས་ཤིང་།  ཡང་ཁྱོད་ནི་ཕ་ལྟར་བྱམས་པ་སྟེ་ཞེས་སོགས་བཤད་པ་ཡང་སྣང་ལ།  གཞན་ཡང་ས་བཅུ་དང་།  ཕར་ཕྱིན་བཅུ་དང་།  སྟོབས་བཅུ་ལ་འཇུག་གོ།  དེས་ན་ཕྱག་ན་རྡོ་རྗེ་ནི།  གསང་བའི་མཛོད་ལས།  
བྱང་ཆུབ་སེམས་དཔའ་ཀུན་ཏུ་བཟང་པོས་གནས་སྐབས་ཀྱི་སྐྱེ་བ་ཐ་དད་པ་ལེན་པར་སྨོན་ལམ་བཏབ་སྟེ་འོག་མིན་གྱི་གནས་སུ་རྡོ་རྗེ་སེམས་དཔའོ། །གཞི་དང་མེ་ཏོག་གིས་བརྒྱན་པར་ནི་ཀུན་ཏུ་བཟང་པོའོ། །གནོད་སྦྱིན་འདུལ་བའི་དབང་ཉེ་བར་བཟུང་ནས་གནོད་
སྦྱིན་གྱི་སྡེ་དཔོན་འབྲོག་གནས་བུའི་གནས་སུ་གནས་སོ། །མི་རྣམས་ཀྱི་ཕྱིར་ནི་གནས་བརྟན་ཀུན་དགའ་བོ་ཡིན་ནོ་ཞེས་གསུངས་ཤིང་ཐུན་མོང་མ་ཡིན་པའི་གསང་བ་ནས་ཀྱང་འདི་བཞིན་དུ་གསུངས་པས་ཐུགས་རྒྱུད་ཡེ་ཤེས་སུ་སྣང་བའི་ཕྱག་ན་རྡོ་རྗེ་དེ་ཉིད་འཁོར་གྱི་
ཚུལ་སྟོན་པའོ། །གཉིས་པ་ནི།  དེ་ནས་བཅོམ་ལྡན་འདས་ཕྱག་ན་རྡོ་རྗེས་ཞེས་སོགས་སོ། །གཉིས་པ་གཞུང་ལ་གསུམ་སྟེ།  སྔགས་ཀྱི་ཕྲེང་བ་ཕན་ཡོན་དང་བཅས་ཏེ་བསྟན་པ་དང་།  རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་དང་།  དངོས་གྲུབ་ཀྱི་ཡེ་
ཤེས་བསྟན་པའོ། །དང་པོ་ནི།  དེ་ནས་བཅོམ་ལྡན་འདས་ཕྱག་ན་རྡོ་རྗེས་ཐམས་ཅད་ཀྱི་ཚེ་དཔག་ཏུ་མེད་པས་ཁྱབ་པར་འབྱུང་བའི་རྡོ་རྗེ་ཞེས་སོགས་ཏེ།  དཀྱིལ་འཁོར་གྱི་ནང་དུ་སྣམ་བུའི་དབུས་སུ་འཁོར་ལོ་རྩིབས་བཞི་པའི་ལྟེ་བར་པདྨ་ལ།  ཨོཾ་པུཎྱ་པུཎྱ་མ་ཧཱ་པུཎྱ་ཨ་པ་
10-7-55b


ར་མི་ཏ་ཨཱ་ཡུར་པུཎྱ་ཛྙ་ན་སཾ་བ་རོ་པཱ་ཙི་ཡ་ཀ་རི་སྭཱ་ཧཱ།  ལས་ཕྱག་ན་རྡོ་རྗེ།  ནུབ་ཏུ་ཨོཾ་ཨ་མྲི་ཏེ་ཨ་མྲི་ཏེ་ཨ་མི་ཏོ་བྷ་ཝ།  ཨ་མི་ཏ་བི་ཀྲཱན་ཏེ།  ཨ་མི་ཏ་བི་ཀྲཱན་ཏ་ག་མི་ནི་སརྦ་ཀརྨཱ་ཀླེ་ཤཀྵ་ཡཾ་ཀ་རི་ནི་སྭཱ་ཧཱ་ལས་འོད་དཔག་མེད།  ཤར་དུ་ཨོཾ་ཀཾ་ཀ་ནི་ཀཾ་ཀ་ནི།  རོ་ཙ་ནི་རོ་ཙ་ནི།  ཏྲོ་ཏ་
ནི་ཏྲོ་ཏ་ནི།  ཏྲ་ས་ནི་ཏྲ་ས་ནི།  པྲ་ཏི་ཧ་ན་པྲ་ཏི་ཧ་ན་སརྦ་ཨཱ་བ་ར་ཎ་བི་ན་ཤ་ནི་ཧ་ར་ཧ་ར་ཀརྨ་པ་རཾ།  པ་ར་ནི་མེ་སརྦ་ས་ཏྭཱ་ནན་སྭ་ཧ།  ལས་མི་བསྐྱོད་པ།  ལྷོར་ཨོཾ་རཏྣེ་རཏྣེ་མ་ཧཱ་རཏྣེ་རཏྣ་སཾ་བྷ་ཝེ།  རཏྣ་ཀེ་རཏྣེ།  རཏྣ་མ་ལ་བི་ཤུདྡྷེ་ཤོདྷ་ཡ་སརྦ་པཱ་པཾ་ཧཱུཾ་ཏྲ་ཐ།  ལས་རིན་ཆེན་འབྱུང་ལྡན།  བྱང་དུ་ཨོཾ་
ཨ་མོ་གྷ་ཨ་པྲ་ཏི་ཧ་ཏ་སརྦ་ཨཱ་ཝ་ར་ཎ་བི་ན་ཤ་ནི་ཧ་ར་ཧ་ར་ཧཱུྃ་ཕཊ།  ལས་དོན་ཡོད་གྲུབ་པ་སྟེ་ཐམས་ཅད་ཀྱང་སྐུ་མདོག་དཀར་པོ་རིན་པོ་ཆེ་སྣ་ཚོགས་ཀྱིས་བརྒྱན་པ།  གཙོ་བོ་ནི་རྡོ་རྗེ་དང་དྲིལ་བུ་འཛིན་པ།  གཞན་རྣམས་གཡས་མཆོག་སྦྱིན།  གཡོན་མི་འཇིགས་པ་སྦྱིན་པ་རྡོ་རྗེའི་སྐྱིལ་ཀྲུང་གིས་
བཞུགས་པའོ། །གྲྭ་བཞིར་བདུག་སོགས་བཞི་དང་།  སྒོ་བཞིར་སྒོ་བ་བཞི་ནི།  སྔར་དང་འདྲ་བ་ལས་འདིར་སྒོ་བ་རྣམས་ཁྲོ་བོའི་ཆ་ལུགས་ཀྱིས་བཞུགས་པའོ། །གཞན་ཕན་འོད་ཟེར་ལས་སྒོ་བ་བཞི་བཞེངས་པའི་ཁྲོ་བོ་ཡིན་པ་དགག་པ་ནི་བཞེངས་པ་དགག་པ་ཡིན་གྱི་ཁྲོ་བོ་ཡིན་པ་དགག་
པ་མ་ཡིན་ནོ། །གཉིས་པ་རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་ལ་གཉིས་ཏེ།  སློབ་དཔོན་གྱི་ལས་དང་།  སློབ་མ་ལ་དབང་བསྐུར་བའོ། །དང་པོ་ལ་གཉིས་ཏེ།  བྲི་ཞིང་ལྷ་དགོད་པ་དང་།  དཀྱིལ་འཁོར་བསྒྲུབ་པའོ། །དང་པོ་ནི།  དེ་ནས་དཀྱིལ་འཁོར་ནི་འདི་
ཡིན་ཏེ་ཞེས་སོགས་ཏེ་ལྷ་བཅུ་གསུམ་བྲིའོ། །གཉིས་པ་ནི།  དེ་ནས་རྣལ་འབྱོར་ཅན་ཉིད་ཞུགས། །ཞེས་སོགས་སོ། །གཉིས་པ་སློབ་མ་ལ་དབང་བསྐུར་བ་ནི།  འཆི་བདག་སྦྲུལ་གྱིས་འཇིགས་ལྡན་རྣམས། །ཞེས་སོགས་ཏེ་འཇུག་པའི་སྔགས་ནི་ཀུན་རིག་དང་ཐུན་མོང་བ་ཡིན་ཅིང་།  
10-7-56a


ཕྱག་རྒྱ་དང་།  དམ་ཚིག་སྦྱིན་པ་ནི་འདིའི་ཐུན་མོང་མ་ཡིན་པ་ཡིན་ལ།  གཞན་རྣམས་ནི་གོང་འོག་ཀུན་ཏུ་དགོས་སོ། །གསུམ་པ་དངོས་གྲུབ་ཀྱི་ཡེ་ཤེས་བསྟན་པ་ནི།  དེ་ལྟར་དབང་བསྐུར་ནས་ཚེ་བསྲིང་བའི་རིག་པ་འདི་སྦྱིན་པར་བྱའོ་ཞེས་སོགས་ཏེ་རས་རིས་གཞུང་
བཞིན་དུ་བྲིས་ནས་མདུན་དུ་བཀྲམ།  རང་ལྷའི་རྣལ་འབྱོར་གྱིས་རང་གི་སྔགས་ལ།  ཨོཾ་བཛྲ་ཨཱ་ཡུ་ཤེ་ཧཱུཾ་ཨཱཿབཏགས་ལ་བསྙེན་པ་འབུམ་ཕྲག་གཅིག་གིས་མཚན་མ་ཐོབ་པར་བྱས་ལ།  སྒྲུབ་པའི་རྟེན་རིན་པོ་ཆེའི་སྣོད་དུ་བ་དམར་སེར་གྱི་མར་བཟང་པོ་བཅུག་ལ།  མཆོད་པ་རྒྱ་ཆེན་
པོ་བཤམས་ཏེ།  རང་གི་ལག་པ་གཡོན་རྡོ་རྗེ་དང་བཅས་པས་རྫས་དེ་མནན་ལ་བཟླས་བརྗོད་བྱས་པས།  བཅོམ་ལྡན་འདས་ཀྱི་ནུས་པ་བསྐུལ་བདུད་རྩི་སྣོད་དུ་བབ་པར་བསམ་ཞིང་།  མཚན་ཐོག་ཐག་བཟླས་པས་དྲི་ངད་ཀྱི་རྟགས་འབྱུང་།  དེ་བྱུང་བ་དང་བཟའ་བཏུང་གང་
ཡང་རུང་བ་ལ་སྦྱར་ཏེ།  རང་ཉིད་ལྷའི་རྣལ་འབྱོར་དང་ལྡན་པས་འཐུང་ངམ།  ཟོས་ན་རིག་འཛིན་ཚེའི་དངོས་གྲུབ་ཐོབ།  འབྲིང་གིས་རྫུ་འཕྲུལ་གྱི།  ཐ་མས་ཞི་སོགས་དམན་པའི་དངོས་གྲུབ་འགྲུབ་པར་འགྱུར་བའོ། །དེ་དག་ལ་བརྟེན་ནས་མཆོག་གི་དངོས་གྲུབ་སངས་
རྒྱས་ཀྱང་ཐོབ་པར་བྱེད་པའོ། །གཉིས་པ་ཕྱག་ན་རྡོ་རྗེ་ལ་འཇིག་རྟེན་པས་བསྐོར་བའི་དཀྱིལ་འཁོར་ལ་གཉིས་ཏེ།  སྤྱིའི་དོན་དང་གཞུང་གི་དོན་ནོ། །དང་པོ་ནི།  ཁ་ཅིག་འཇིག་རྟེན་པ་འདི་རྣམས་རང་རྒྱུད་པ་ཡིན་པས།  མེ་ཏོག་དོར་བའི་ཚེ།  གཙོ་བོ་ལ་དོར་གྱི་འཁོར་ལ་
མི་དོར་བ་དང་།  དབང་ལེན་པའི་ཚེ་གཙོ་བོ་ལ་ལེན་གྱི་འཁོར་ལ་མི་ལེན་པ་དང་།  ཆུ་དབང་གི་ཚེ་གཙོ་བོའི་ཆུ་དབང་བསྐུར་གྱི་འཁོར་གྱི་ཆུ་དབང་མི་བསྐུར་བ་དང་།  བསྙེན་པའི་ཚེ་ཡང་གཙོ་བོའི་བསྙེན་པ་བྱེད་ཀྱི་འཁོར་གྱི་བསྙེན་པ་མི་བྱེད་ཞེས་ཟེར་བར་
10-7-56b


གྲག་གོ།  དེ་ལ་འཇིག་རྟེན་པ་རང་རྒྱུད་པར་འདོད་པ་ནི་མི་འཐད་དེ།  སྒོ་བ་བཞི་པོ་འདས་པ་ཡིན་པས་འཇིག་རྟེན་པ་རང་རྒྱུད་པས་དཀྱིལ་འཁོར་གྱི་རྩ་བའི་ལྷ་བྱས་ནས་འདས་པས་སྒོ་སྲུང་བྱེད་པ་ནི་བཞད་གད་ཀྱི་གནས་ཡིན་པའི་ཕྱིར་དང་།  དཀྱིལ་འཁོར་ལ་
བཀོད་པའི་ལྷ་ཚོགས་ཐམས་ཅད་དཀྱིལ་འཁོར་གྱི་གཙོ་བོའི་རྣམ་འཕྲུལ་ཡིན་པ་རྡོ་རྗེ་ཐེག་པའི་ལུགས་ཡིན་པའི་ཕྱིར།  རྒྱུད་ལས་ཀྱང་།  རྒྱལ་པོ་བཞིས་བཅོམ་ལྡན་འདས་ལ་ཞུས་པའི་སྐབས་སུ།  དེ་ལ་རྡོ་རྗེ་འཛིན་བདག་རྒྱལ། །བུ་སྡུག་བཞིན་དུ་བསྐྱང་
བར་བྱ། །རྡོ་རྗེ་ཞེས་རྡོ་རྗེ་འཛིན་པའི་བདག་ཉིད་ཡིན་པར་ཁས་བླངས་པའི་ཕྱིར་རོ། །རྒྱལ་པོ་མ་ཡིན་རྒྱལ་པོར་འགྱུར། །རྒྱལ་པོ་ཡིན་ན་ཆེན་པོར་འགྱུར། །ཞེས་པ་ཤེས་བྱེད་དུ་དྲངས་པ་ཡང་མི་འཐད་དེ།  ཕན་ཡོན་དེ་ཡོད་པར་གསུངས་པས་གཞན་
མེད་པར་མི་འགྲུབ་པའི་ཕྱིར་རོ། །འདི་དག་འཇིག་རྟེན་པ་རང་རྒྱུད་པ་ཡིན་ན་ཀུན་རིག་གི་ཁོར་ཡུག་ཏུ་བཀོད་པ་རྣམས་ཀྱང་དེ་ལྟར་དུ་འདོད་དགོས་ཤིང་།  དེའང་འདོད་ན་ཁྱམས་ལ་བཀོད་པའི་ཉན་ཐོས་དང་རང་རྒྱལ་རྣམས་ཀྱང་རང་རྒྱུད་པར་འདོད་དགོས་པས་རྡོ་རྗེ་
ཐེག་པའི་དཀྱིལ་འཁོར་གྱི་ལྷ་ལ་ཐེག་དམན་གྱི་གང་ཟག་བཀོད་པ་ནི།  གསང་སྔགས་རང་བཟོར་བྱེད་པ་མ་གཏོགས་པ་གཞན་སུ་ཞིག་གིས་སྨྲ་བར་ནུས།  འཁོར་ལ་མེ་ཏོག་མི་འདོར་བ་ནི་མི་འཐད་དེ།  དེ་ནས་མེ་ཏོག་གམ་རིན་པོ་ཆེ་འདིས་དོར་བར་བྱའོ། །
ཨོཾ་བཛྲ་པྲ་ཏཱིཙྪ་དྷཾ་མ་ཧོ་དྷ་མ།  གང་ལ་བབ་པའི་རྒྱལ་པོ་ནི། །དེས་ནི་འདི་འགྲུབ་གཞན་དུ་མིན། །ཞེས་གསུངས་པའི་ཕྱིར་རོ། །འཁོར་ལ་དབང་མི་ལེན་པ་ཡང་མི་འཐད་དེ།  ལན་བཞིར་དབང་ནི་བསྐུར་བ་དང་། །ལན་བཞིར་འཇུག་པ་བྱས་ནས་
10-7-57a


ནི། །ཞེས་གསུངས་པའི་ཕྱིར་རོ། །འཁོར་གྱི་ཆུ་དབང་མི་བྱེད་པ་ཡང་མི་འཐད་དེ།  ཕྱོགས་སྐྱོང་རང་གི་སྔགས་བཏབ་པའི། །བུམ་པ་རྣམས་ཀྱིས་དབང་བསྐུར་ཏེ། །ཞེས་དང་།  དེ་ནས་གཟའ་བརྒྱད་སྔགས་བཏབ་པའི། །བུམ་པ་
བརྒྱད་ཀྱིས་དབང་བསྐུར་རོ། །ཞེས་དང་།  བུམ་པའམ་མགོའི་ཐོད་པ་ནི། །དེ་ལྟར་བརྒྱད་ཀྱིས་དབང་བསྐུར་རོ། །ཞེས་གསུངས་པའི་ཕྱིར་རོ། །འཁོར་གྱི་བསྙེན་པ་མི་བྱེད་པ་ཡང་མི་འཐད་དེ།  འདིར་སྔགས་ཕྲེང་གསུངས་པ་རྣམས་བསྙེན་པ་རྒྱས་པའི་
སྐབས་ཡིན་པའི་ཕྱིར་རོ། །ཡང་བླ་མ་མཁས་པ་དག །དེ་བཞིན་གྲུ་བཞིར་བྲིས་ནས་ནི། །སྒོ་ཁྱུད་ལ་སོགས་རྣམ་པར་སྤང་། །ཞེས་ཤེས་བྱེད་དུ་དྲངས་ནས།  འཇིག་རྟེན་པའི་དཀྱིལ་འཁོར་རྣམས་ལ་སྒོ་ཁྱུད་སོགས་མེད་པར་བཞེད་ལ།  རྗེ་བཙུན་གྱིས་
ཀླུ་ཆེན་བརྒྱད་མ་གཏོགས་པར་གཞན་རྣམས་ལ་རྟ་བབས་སོགས་རྫོགས་པར་བྱེད་པར་གསུངས་སོ། །སྤྱན་འདྲེན་པའི་ཚེ་དང་པོ་གཙོ་བོ་སྤྱན་དྲངས་ནས་དེའི་རྗེས་སུ་འཁོར་སྤྱན་འདྲེན་པ་འཇིག་རྟེན་པའི་ཁྱད་པར་ཡིན་ནམ་སྙམ༷་སྟེ།  འདས་པའི་སྐབས་སུ་
གཙོ་བོ་རྒྱལ་བ་སྲས་ཀྱི་འཁོར། །མང་པོ་རྣམས་ཀྱི་སྤྱན་དྲངས་ཏེ། །ཞེས་དང་།  བདེ་བར་གཤེགས་པ་སྲས་དང་འབངས་སུ་བཅས་ཤིང་འཁོར་གྱིས་བསྐོར་བའི་རིག་པ་ལྷན་ཅིག་སྤྱན་དྲངས་ཞེས་དང་།  རྒྱལ་པོ་བཞིའི་སྐབས་སུ།  སྔགས་མཁན་ཉིད་
ནི་ཞུགས་ནས་ཀྱང་། །བཅོམ་ལྡན་འདས་ནི་སྤྱན་དྲངས་ཏེ། །དེ་ནས་རྒྱལ་པོ་སྤྱན་དྲང་ངོ་། །ཞེས་གསུངས་པའི་ཕྱིར་རོ། །འདིར་རྗེ་བཙུན་བླ་མ་ཐམས་ཅད་མཁྱེན་པའི་ཞལ་སྔ་ནས་བདག་བསྐྱེད་ཀྱི་སྐབས་སུ།  དཀྱིལ་འཁོར་གྱི་གཙོ་བོའམ་རྡོ་རྗེ་སེམས་
10-7-57b


དཔའ་བསྐྱེད་པ་ཆོས་སྐུའི་ཉམས་ལེན།  དེ་ནས་གཞལ་ཡས་ཁང་གི་དབུས་སུ་གཙོ་བོ་བསྐྱེད་པ་ལོངས་སྐུའི་ཉམས་ལེན།  དེའི་ཐུགས་ཀར་རིགས་བཞི་ནས་ཁོར་ཡུག་པའི་བར་རྣམས་བསྐྱེད་ནས་རང་གི་གནས་སུ་དགོད་པ་སྤྲུལ་སྐུའི་ཉམས་ལེན་དུ་
མཛད་ནས།  དེའི་དོན་ཡང་ལོངས་སྤྱོད་རྫོགས་པའི་སྐུ་ཉིད།  སངས་རྒྱས།  བྱང་སེམས།  ཉན་ཐོས།  རང་རྒྱལ།  འཇིག་རྟེན་པའི་གཟུགས་ཀྱིས་འདུལ་བ་རྣམས་ལ་དེ་དང་དེའི་སྐུར་སྟོན་པར་གསུངས་པ་འདི་སྙིང་གི་དཀྱིལ་དུ་ཞོག་ཅིག །གཉིས་པ་
གཞུང་གི་དོན་ལ་དྲུག་སྟེ།  རྒྱལ་པོ་ཆེན་པོ་བཞིའི་དཀྱིལ་འཁོར་དང་།  ཕྱོགས་སྐྱོང་བཅུའི་དཀྱིལ་འཁོར་དང་།  གཟའ་ཆེན་པོ་བརྒྱད་འཁོར་རྒྱུ་སྐར་དང་བཅས་པའི་དཀྱིལ་འཁོར་དང་།  ཀླུ་ཆེན་པོ་བརྒྱད་ཀྱི་དཀྱིལ་འཁོར་དང་།  འཇིགས་
བྱེད་བརྒྱད་ཆུང་མ་དང་བཅས་པའི་དཀྱིལ་འཁོར་དང་།  ལྷ་ཆེན་པོ་བརྒྱད་ཀྱི་དཀྱིལ་འཁོར་བསྟན་པའོ། །དང་པོ་ལ་གསུམ།  སྔགས་ཀྱི་ཕྲེང་བ་དང་།  རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་དང་།  དབང་བསྐུར་བའི་ཕན་
ཡོན་བསྟན་པའོ། །དང་པོ་ནི།  དེ་ནས་རྒྱལ་པོ་ཆེན་པོ་བཞིས་ཞེས་སོགས་ཏེ།  དཀྱིལ་འཁོར་གྱི་དབུས་སུ་འཁོར་ལོ་རྩིབས་བཞི་པའི་ལྟེ་བར་པད་ཟླའི་སྟེང་དུ་སྔར་གྱི་པུཎྱ་ལས་ཕྱག་ན་རྡོ་རྗེ་སྐུ་མདོག་དཀར་པོ་འགྱིང་བག་ཅན་རྡོ་རྗེ་དང་དྲིལ་
བུ་འཛིན་པ།  ཤར་དུ་ཨོཾ་དྷི་ལས་ཡུལ་འཁོར་སྲུང་ལྗང་གུ་པི་ཝཾ་འཛིན་པ།  ལྷོར་ཨོཾ་བྷི་ལས་འཕགས་སྐྱེས་པོ་སྐུ་མདོག་སྔོན་པོ་རལ་གྲི་འཛིན་པ།  ནུབ་ཏུ་ཨོཾ་ཀྵྞཾ་ལས་མིག་མི་བཟང་དམར་སྐྱ་སྦྲུལ་མགོ་བདུན་གྱིས་བསྐོར་བ་རྡོ་རྗེ་ཞགས་
10-7-58a


པ་འཛིན་པ།  བྱང་དུ་ཨོཾ་བྷེ་ལས་རྣམ་ཐོས་སྲས་སེར་པོ་བེ་ཅོན་འཛིན་པ།  གཡོན་ནེའུ་ལེ་ཐོགས་པའོ། །སྒོ་བཞིར་སྒོ་བ་བཞི་ཁྲོས་པའོ། །གཉིས་པ་ལ་གཉིས་ཏེ།  སློབ་དཔོན་གྱི་ལས་དང་།  སློབ་མ་འཇུག་ཅིང་དབང་བསྐུར་
བའི་ཆོ་གའོ། །དང་པོ་ལ་གཉིས་ཏེ།  བྲི་ཞིང་ལྷ་དགོད་པ་དང་།  སློབ་དཔོན་ཞུགས་ཏེ་བསྒྲུབ་པའོ། །དང་པོ་ནི།  དེ་ནས་དེ་དག་གི་དཀྱིལ་འཁོར་བཤད་དེ་ཞེས་སོགས་སོ། །གཉིས་པ་ནི།  དེ་ནས་རྡོ་རྗེའི་ཕྱག་རྒྱ་ཞེས་བྱ་བས་ཞེས་སོགས་སོ། །གཉིས་
པ་སློབ་མ་འཇུག་ཅིང་དབང་བསྐུར་བའི་ཆོ་ག་ནི།  དེ་ནས་སྔགས་མཁན་སྔགས་འདི་དང་། །ཞེས་སོགས་ཏེ།  མེ་ཏོག་དོར་བའི་སྔགས་ནི་ཁྱད་པར་གྱི་ཆོས་སོ། །གསུམ་པ་དབང་བསྐུར་བའི་ཕན་ཡོན་ནི།  རྒྱལ་པོ་མ་ཡིན་རྒྱལ་པོར་འགྱུར། །ཞེས་
སོགས་སོ། །གཉིས་པ་ཕྱག་ན་རྡོ་རྗེ་ལ་ཕྱོགས་སྐྱོང་བཅུས་བསྐོར་བའི་དཀྱིལ་འཁོར་ལ་བཞི་སྟེ།  སྔགས་ཀྱི་ཕྲེང་བ་དང་།  རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་དང་།  སྙིང་པོ་རྗེས་སུ་གནང་བ་བྱིན་ཏེ་བསྒྲུབ་པར་བསྟན་པ་དང་།  ཕྱོགས་
སྐྱོང་རྣམས་ཀྱིས་བསྟན་པ་བསྲུང་བར་ཁས་བླངས་པའོ། །དང་པོ་ནི།  དེ་ནས་ཕྱོགས་སྐྱོང་བཅུ་རྣམས་ཀྱི། །ཞེས་སོགས་ཏེ་གཞལ་ཡས་ཁང་གི་དབུས་སུ་འཁོར་ལོ་རྩིབས་བརྒྱད་པའི་ལྟེ་བར་ཕྱག་རྡོར་སྔར་བཞིན་བསྐྱེད།  ཤར་དུ་ཨོཾ་ཨི་ལས་བརྒྱ་བྱིན་
སེར་པོ་གླང་པོ་ཆེ་ལ་ཞོན་པ་རྡོ་རྗེ་འཛིན་པ།  ཐིག་ལེ་འཛིན་ཤ་རྩི་དང་།  ཐིག་ལེ་མཆོག་གཉིས་དཀར་པོའོ། །ལྷོར་ཨོཾ་ཡ་ལས་གཤིན་རྗེ་སྔོན་པོ་མ་ཧེ་ལ་ཞོན་པ་དབྱུག་པ་ཐོགས་པ།  རེ་མ་ཏི་ལག་ཆ་སྣ་ཚོགས་པ་ནག་པོ།  ནུབ་ཏུ་ཨོཾ་བཾ་ལས་ཆུ་ལྷ་དཀར་པོ་
10-7-58b


ཆུ་སྲིན་ལ་ཞོན་པ་སྦྲུལ་ཞགས་འཛིན་པ།  བྱང་དུ་ཨོཾ་ཀུ་ལས་གནོད་སྦྱིན་སེར་པོ་རྟ་ལ་ཞོན་པ་རིན་པོ་ཆེ་འཛིན་པ།  བྱང་ཤར་དུ་ཨོཾ་ཨི་ལས་དབང་ཕྱུག་དཀར་པོ་གླང་ལ་ཞོན་པ་རྩེ་གསུམ་འཛིན་པ།  ཤར་ལྷོར་ཨོཾ་ཨ་ལས་མེ་ལྷ་དམར་པོ་ར་ལ་ཞོན་པ་དབྱུག་གུ་
འཛིན་པ།  ལྷོ་ནུབ་ཏུ་ཨོཾ་རི་ལས་སྲིན་པོ་ནག་པོ་མི་ལ་ཞོན་པ་རལ་གྲི་འཛིན་པ།  ནུབ་བྱང་དུ་ཨོཾ་ཨཾ་ལས་རླུང་ལྷ་ལྗང་ཁུ་ཤ་བ་ལ་ཞོན་པ་བ་དན་འཛིན་པ།  ལྷོར་ཨོཾ་ཨ་ལས་ཉི་མ་དམར་པོ་རྟ་ལ་ཞོན་པ་ཉི་མ་འཛིན་པ།  བྱང་དུ་ཨོཾ་སྭ་ལས་ཟླ་བ་དཀར་པོ་ངང་པ་ལ་ཞོན་པ་
ཟླ་བ་འཛིན་པ།  བྱང་ཤར་དུ་ཨོཾ་བྲ་ལས་ས་བདག་ཕག་མགོ་ཅན་སེར་པོ་ཕག་ལ་ཞོན་པ་པི་ཝཾ་འཛིན་པའོ་ཞེས་རྗེ་བཙུན་བཞེད་ལ།  རྩ་སྐྱ་པས་གཞན་འདྲ་བ་ལས།  ཨོཾ་ཨ་ལས།  གཙོ་བོའི་མདུན་དུ་ཚངས་པ་དཀར་པོ་ཕྱག་བཞི་པ་གཡས་གཉིས་ན་གླེགས་བམ་དང་ཕྲེང་
བ།  གཡོན་མཆོག་སྦྱིན་དང་བུམ་པ་འཛིན་ཅིང་ངང་པ་ཆིབས་ནས།  གཡས་སུ་ཉི་མ་དམར་པོ་པདྨ་ཉི་མས་བརྒྱན་པ་འཛིན་པ་དང་།  གཡོན་དུ་ཟླ་བ་དཀར་པོ་ཀུ་མུ་ཏ་བསྣམས་པའོ། །ཨོཾ་བྲི་ལས་གཙོ་བོའི་རྒྱབ་ཏུ་སའི་ལྷ་མོ་སེར་མོ་བུམ་པ་འཛིན་ཅིང་
ཕག་ལ་ཆིབས་ནས།  གཡས་སུ་ལྷ་མ་ཡིན་ནག་པོ་གོ་ཆ་འཛིན་པ།  གཡོན་དུ་ཀླུ་དཀར་པོ་སྦྲུལ་ཐོགས་པ་ཅན་བསྐྱེད་དོ། །ཞེས་བཞེད་དོ། །གཉིས་པ་ལ་གཉིས་ཏེ།  སློབ་དཔོན་གྱི་ལས་དང་།  སློབ་མ་འཇུག་ཅིང་དབང་བསྐུར་བའི་ཆོ་གའོ། །དང་པོ་
ལ་གཉིས་ཏེ།  བྲི་ཞིང་ལྷ་དགོད་པ་དང་།  ཞུགས་ཏེ་བསྒྲུབ་པའོ། །དང་པོ་ནི།  དེ་ནས་དེ་དག་གི་དཀྱིལ་འཁོར་བཤད་དེ།  ཞེས་སོགས་སོ། །གཉིས་པ་ནི།  དེ་ནས་སྤྱན་དྲངས་ཏེ་ཀུན་ལ། །ཞེས་སོགས་སོ། །གཉིས་པ་ནི།  སློབ་མ་རྣམས་ནི་གཞུག་པའི་ཕྱིར། །
10-7-59a


ཞེས་སོགས་སོ། །གསུམ་པ་ནི།  དེ་ལ་ཕན་པར་འདོད་པ་ཡིས། །ཞེས་སོགས་སོ། །བཞི་པ་ལ་གཉིས་ཏེ།  སྤྱིར་ཁས་བླངས་པ་དང་།  བྱེ་བྲག་ཏུ་ཁས་བླངས་པའོ། །དང་པོ་ནི།  དེ་ནས།  དེ་དག་མགུ་ནས་འདི་སྐད་ཅེས་གསོལ་ཏེ་ཞེས་སོགས་
སོ། །གཉིས་པ་ནི།  དེ་ནས་ཆོས་ཀྱི་རྒྱལ་པོ་གཤིན་རྗེས་ཞེས་སོགས་ཏེ།  བརྒྱ་བྱིན་དང་མེ་ལྷ་གཉིས་ཀྱིས་ཁས་བླངས་པ་མི་སྣང་ངོ་། །གསུམ་པ་གཟའ་བརྒྱད་རྒྱུ་སྐར་དང་བཅས་པའི་དཀྱིལ་འཁོར་ལ་བཞི་སྟེ།  སྔགས་ཀྱི་ཕྲེང་བ་དང་།  རྡུལ་ཚོན་གྱི་དཀྱིལ་
འཁོར་དུ་དབང་བསྐུར་བ་དང་།  སྒྲུབ་པ་དང་།  བསྟན་པ་བསྲུང་བར་ཁས་བླངས་པའོ། །དང་པོ་ནི།  དེ་ནས་གཟའ་ཆེན་པོ་བརྒྱད་དང་འཁོར་རྒྱུ་སྐར་དང་བཅས་པ་རྣམས་ཀྱིས་ཀྱང་ཞེས་སོགས་ཏེ།  རྩ་སྐྱ་པས་ཕྱིའི་དཀྱིལ་འཁོར་གྱི་ནང་དུ་ཟླུམ་པོར་ཆ་ཆེན་
གཅིག་གི་ཚད་བསྐོར་བའི་དབུས་ལེ་ཚེ་དགུར་ཕྱེ་བའི་དབུས་ཀྱི་པད་ཉི་ལ་རྩ་རིག་དང་།  མེ་ཉི་མའི་སྔགས་ཀྱིས་ཁམས་གསུམ་རྣམ་རྒྱལ་བསྐྱེད་པར་བཞེད་ལ།  རྗེ་བཙུན་གྱིས།  ཤར་དུ་ཨོཾ་ཤཱུ་ལས་པ་ཝ་སངས་དཀར་པོ་སྟན་ནང་ཚངས་ཅན་ལ་འདུག་པ་རྒྱན་
ཐམས་ཅད་ཀྱིས་བརྒྱན་པ་ཤིང་ཐོག་ཐོགས་པ།  ལྷོར་ཨོཾ་བྲི་ལས་ཕུར་བུ་དཀར་པོ་ཟླ་བ་ལ་གནས་པ་གཡས་པོ་ཏི་གཡོན་ཆོས་འཆད་པའི་ཚིག་འདྲེན་པའི་ཚུལ།  སྟོད་གཡོགས་སེར་པོ་ཅན་ནོ། །ནུབ་ཏུ་ཨོཾ་སྭ་ལས་ཟླ་བ་དཀར་པོ་ཨུཏྤ་ལ་ཐོགས་པ་ངང་པ་ལ་ཞོན་པ།  
བྱང་དུ་ཨོཾ་ཕུ་ལས་གཟའ་ལྷག་སེར་པོ་གཡས་མཆོག་སྦྱིན་གཡོན་ཨུཏྤ་ལ་འཛིན་པ།  སྟན་ནང་ཚངས་ཅན་ནོ། །རླུང་དུ་ཨོཾ་ཨ་ལས་ཉི་མ་དམར་པོ་རྟ་ལ་ཞོན་པ་ཡ་ལད་གྱོན་པ་ལག་ན་པདྨ་འཛིན་པའོ། །དབང་ལྡན་དུ་ཨོཾ་སྭ་ལས་སྤེན་པ་མདོག་ནག་པོ་རྒྱན་མེད་པ།  སྐྲ་བཤིག་པ།  
10-7-59b


དབྱུག་ཐོ་ཐོགས་པ་སྟན་ནང་ཚངས་ཅན་ནོ། །ཤར་ལྷོར་ཨོཾ་ཨཾ་ལས་མིག་དམར་མདོག་དམར་པོ་གཡས་བུམ་པ་ཆུས་གང་བ།  གཡོན་མགལ་མེ་འཛིན་པ་སྟན་ནང་ཚངས་ཅན་ནོ། །སྲིན་པོར་ཨོཾ་ཨ་ར་ལས་སྒྲ་གཅན་མདོག་དུད་ཁ་བཞིན་ཁྲོས་པ་མཆེ་བ་
གཙིགས་པ།  སྐྲ་སེར་པོ་གྱེན་དུ་བརྫེས་པ།  རྐེད་པ་མན་ཆད་སྦྲུལ་སྤྲིན་གསེབ་ན་འདུག་པ་དེ་དག་ནི་ལེ་དགུའི་ཕྱོགས་མཚམས་བརྒྱད་དོ། །དེའི་ཕྱི་རོལ་གྱི་ལྷ་སྣམ་ལ་ཕྱོགས་རེ་རེར་རྒྱུ་སྐར་བདུན་བདུན་གནས་པ་ནི།  ཤར་དུ་སྨིན་དྲུག་དམར་པོ་བུམ་པ་ལ་གནས་
པ།  སྣར་མ་ལྗང་ཁུ་བ་དཀར་མོ་ལ་ཞོན་པ།  མགོ་སེར་པོ་ཤ་བ་ལ་ཞོན་པ།  ལག་དམར་པོ་སྦྲུལ་ལ་ཞོན་པ།  ནམས་སོ་དམར་པོ་པདྨ་ལ་འདུག་པ།  རྒྱལ་ལྗང་ཁུ་བུམ་པ་ལ་འདུག་པ།  སྐག་ལྗང་ཁུ་བྱ་རོག་ལ་ཞོན་པ།  ལྷོ་རུ་མཆུ་སེར་པོ་མེ་ཏོག་ལ་འདུག་པ།  
བྲེ་དཀར་པོ་པདྨོ་ལ་འདུག་པ།  དབོ་ལྗང་ཁུ་ཁྲི་ལ་འདུག་པ།  མེ་བཞི་སེར་པོ་གླང་ལ་ཞོན་པ།  ནག་པ་ལྗང་ཁུ་རྨ་བྱ་ལ་ཞོན་པ།  ས་རི་དམར་པོ་སྤྱང་མོ་ལ་ཞོན་པ།  ས་ག་ལྗང་ཁུ་ར་དཀར་པོ་ལ་ཞོན་པ།  ནུབ་ཏུ་ལྷ་མཚམས་སེར་པོ་བྱ་རོག་ལ་ཞོན་པ།  སྣྲོན་
དམར་པོ་སྟན་ནང་ཚངས་ཅན་ལ་འདུག་པ།  སྣྲུབས་ལྗང་ཁུ་རུས་སྦལ་ལ་ཞོན་པ།  ཆུ་སྟོད་སེར་པོ་སྟན་ནང་ཚངས་ཅན་ལ་འདུག་པ།  ཆུ་སྨད་ལྗང་ཁུ་མིའི་སྙིང་ལ་འདུག་པ།  བྱི་བཞིན་དཀར་པོ་སྟན་ནང་ཚངས་ཅན་ལ་འདུག་པ།  གྲོ་ཞུན་སེར་པོ་མོན་སྐུད་ལ་
འདུག་པ།  བྱང་དུ་མོན་གྲུ་དམར་པོ་སྟན་ནང་ཚངས་ཅན་ལ་འདུག་པ།  མོན་གྲེ་ལྗང་ཁུ་བ་ལ་ཞོན་པ།  ཁྲུམས་སྟོད་ལྗང་ཁུ་གསེར་ཁྲི་ལ་འདུག་པ།  ཁྲུམས་སྨད་སེར་པོ་གསེར་ཁྲི་ལ་འདུག་པ།  ནམ་གྲུ་དམར་པོ་རྟ་ལ་ཞོན་པ།  ཐ་སྐར་ལྗང་ཁུ་
10-7-60a


མིའི་སྙིང་ལ་འདུག་པ།  བྲ་ཉེ་སེར་པོ་འཁོར་ལོ་ལ་འདུག་པའོ། །སྒོ་བཞིར་སྒོ་བ་བཞི་ཁྲོས་པའོ། །གཉིས་པ་ལ་གཉིས་ཏེ།  སློབ་དཔོན་གྱི་ལས་དང་།  སློབ་མ་འཇུག་ཅིང་དབང་བསྐུར་བའི་ལས་སོ། །དང་པོ་ལ་གཉིས་ཏེ།  བྲི་ཞིང་ལྷ་དགོད་པ་དང་།  ཞུགས་
ཏེ་སྒྲུབ་པའོ། །དང་པོ་ནི།  དེ་ནས་དེ་དག་གི་དཀྱིལ་འཁོར་བཤད་དེ་ཞེས་སོགས་སོ། །གཉིས་པ་ནི།  རྡོ་རྗེ་འཛིན་མས་ཞུགས་ནས་ནི། །ཞེས་སོགས་སོ། །གཉིས་པ་ནི།  དེ་ནས་སློབ་མ་རྣམས་གཞུག་སྟེ། །ཞེས་སོགས་སོ། །དཀྱིལ་འཁོར་དུ་འཇུག་པ་དང་
དམ་ཚིག་པ་བསྐྱེད་པ་དང་།  མེ་ཏོག་དོར་བའི་སྔགས་གསུམ་ནི་ཁྱད་པར་རོ། །གསུམ་པ་ནི།  གཟའ་ཐམས་ཅད་སྒྲུབ་པར་བྱའོ་ཞེས་པ་སྟེ་གཙོ་བོའི་སྔགས་ལ་བཏགས་ནས་བསྒྲུབ་པའོ། །བཞི་པ་ནི།  དེ་ནས་གཟའ་ཆེན་པོ་དེ་དག་གིས་བཅོམ་ལྡན་འདས་ལ་
ཕྱག་འཚལ་ནས།  ཞེས་སོགས་སོ། །བཞི་པ་ཀླུ་ཆེན་བརྒྱད་ཀྱི་དཀྱིལ་འཁོར་ལ་གསུམ་སྟེ།  སྔགས་ཀྱི་ཕྲེང་བ་དང་།  རྡུལ་ཚོན་གྱི་དཀྱིལ་འཁོར་དུ་སློབ་མ་དབང་བསྐུར་བ་ཕན་ཡོན་དང་བཅས་པ་དང་།  དངོས་གྲུབ་ཀྱི་ཡེ་ཤེས་ལ་བསླབ་པའོ། །
དང་པོ་ནི།  དེ་ནས་ཀླུ་ཆེན་པོ་བརྒྱད་ཀྱིས་ཕུཿཊ་ཅེས་བྱ་བའི་སྒྲས་ཞེས་སོགས་ཏེ།  པདྨ་འདབ་བརྒྱད་ཀྱི་ལྟེ་བར་པུཎྱའི་སྔགས་ལ་ཕྱག་ན་རྡོ་རྗེ་དཀར་པོ་རྡོ་རྗེ་དང་དྲིལ་བུ་འཛིན་པར་རྩ་སྐྱ་པས་བཤད་ལ།  རྗེ་བཙུན་གྱིས་སྔོ་ལྗང་དུ་བཞེད་དོ། །འདབ་མ་
བརྒྱད་ལ་ཤར་དུ་ཨོཾ་ཕུ་ལས་མཐའ་ཡས་སྔོན་པོ།  ལྷོར་ཨོཾ་ཕ་ལས་འཇོག་པོ་དམར་པོ།  ནུབ་ཏུ་ཨོཾ་ཕུཾ་ལས་སྟོབས་ཀྱི་རྒྱུ་ལྗང་ཁུ།  བྱང་དུ་ཨོཾ་ཕ་ལས་རིགས་ལྡན་ཁྲ་བོ།  ཤར་ལྷོར་ཨོཾ་ཕིཾ་ལས་ནོར་རྒྱས་དཀར་པོ།  ལྷོ་ནུབ་ཏུ་ཨོཾ་ཕཱཾ་ལས་དུང་སྐྱོང་སེར་པོ།  
10-7-60b


ནུབ་བྱང་དུ་ཨོཾ་ཕེཾ་ལས་པདྨ་དམར་པོ།  བྱང་ཤར་དུ་ཨོཾ་ཕཱོུ་ལས་ཆུ་ལྷ་དཀར་པོ།  སྦྲུལ་མགོ་བདུན་བདུན་གྱིས་བསྐོར་བ་ཆུང་མའི་མགུལ་ནས་འཁྱུད་པའོ། །ཆུང་མ་རྣམས་སྐུ་མདོག་ཡབ་དང་འདྲ་བ་ལ་ཨུཏྤལ་འཛིན་པ།  སྦྲུལ་མགོ་གསུམ་གསུམ་གྱིས་བསྐོར་
བ་ཡབ་ལ་འཁྱུད་པའོ། །སྒོ་བ་བཞི་ནི་མ་བཤད་དོ། །གཉིས་པ་ལ་གཉིས་ཏེ།  དབང་བསྐུར་བ་དང་།  ཕན་ཡོན་ནོ། །དང་པོ་ལ་གཉིས་ཏེ།  སློབ་དཔོན་གྱི་ལས་དང་།  སློབ་མ་གཞུག་ཅིང་དབང་བསྐུར་བའོ། །དང་པོ་ལ་གཉིས་ཏེ།  བྲི་ཞིང་ལྷ་དགོད་པ་དང་།  ཞུགས་ཏེ་སྒྲུབ་
པའོ། །དང་པོ་ནི།  དེ་ནས་དེ་དག་གི་དཀྱིལ་འཁོར་བཤད་དེ་ཞེས་སོགས་སོ། །གཉིས་པ་ནི།  དེ་ནས་རྡོ་རྗེའི་བདག་ཉིད་ཞུགས། །ཞེས་སོགས་སོ། །གཉིས་པ་ནི།  དེ་ནས་བུ་ནི་རྒྱལ་པོ་དང་། །ཞེས་སོགས་སོ། །གཉིས་པ་ཕན་ཡོན་ནི།  དེ་ནས་མིང་ཙམ་
བརྗོད་པས་ཀྱང་། །ཞེས་སོགས་སོ། །གསུམ་པ་དངོས་གྲུབ་ཀྱི་ཡེ་ཤེས་བསྟན་པ་ནི།  དེ་ནས་སྒྲུབ་པ་བཤད་དེ།  ཞེས་སོགས་སོ། །ལྔ་པ་འཇིགས་བྱེད་ཀྱི་དཀྱིལ་འཁོར་ལ་གསུམ་སྟེ།  སྔགས་ཀྱི་ཕྲེང་བ་དང་།  རྡུལ་ཚོན་གྱི་དཀྱིལ་འཁོར་དུ་སློབ་མར་དབང་
བསྐུར་བ་དང་།  དངོས་གྲུབ་ཀྱི་ཡེ་ཤེས་ལ་བསླབ་པའོ། །དང་པོ་ནི།  དེ་ནས་ལྷ་ཆེན་པོ་རྣམས་ཀྱི་བདག་པོ་འཇིགས་པར་བྱེད་པ་ཆེན་པོ་ཞེས་སོགས་ཏེ།  གཞལ་ཡས་ཁང་གི་དབུས་སུ་འཁོར་ལོ་རྩིབས་བརྒྱད་པའི་ལྟེ་བར་པད་ཉི་ལ་མེ་ཉི་མའི་སྔགས་
ཀྱིས་ཁམས་གསུམ་རྣམ་རྒྱལ།  ཤར་དུ་ཨོཾ་བྷཻ་ར་ལས་འཇིགས་བྱེད་ཆེན་པོ་སྐུ་མདོག་སྔོ་ནག་གཡས་གྲི་གུག་གཡོན་ཐོད་པ།  སྤྱན་གསུམ་པ།  མཆེ་བ་གཙིགས་པ།  གླང་པོ་ཆེའི་ཀོ་རློན་གྱོན་པ།  དབུ་ལ་ཐོད་པ་ཟླ་ཚེས་ཀྱིས་བརྒྱན་པ་མཚན་མ་བཙུན་
10-7-61a


མོ་ལ་བསྟན་པ།  ཡུམ་དབུ་མ་ཨོཾ་བྷཻ་ར་བྷེ་སྭཱ་ཧཱ་ལས་དཀའ་ཐུབ་བཟློག་པའི་ཚུལ་སྐུ་མདོག་ཕྱག་མཚན་གཙོ་བོ་དང་འདྲ།  གྷ་ག་དཀར།  ཡ་མི་ནི་ལྗང་།  དཔལ་མོ་སེར།  འཇིགས་བྱེད་དཀར།  རྫོང་གི་ལྷ་མོ་དམར།  སྟོབས་བཟང་མ་དཀར།  
ཀུ་མཱ་རི་དམར་སྐྱ་ཅི་བདེ་བའི་ལག་ཆ་འཛིན་པའོ། །ཡང་ཤར་དུ་ཨོཾ་ཕུ་སྭཱ་ཧཱ།  ལས་ལྷ་ཆེན་ཁྲོས་པ་དཀར་པོ་ཡུམ་དང་བཅས་པའོ། །ལྷོར་ཨོཾ་བྷཻ་སྭཱ་ཧཱ་ལས་བརྒྱ་བྱིན་ཁྲོས་པ་སེར་པོ་ཡུམ་ཐིག་ལེ་འཛིན་ཤ་རྩི་དང་།  ཐིག་ལེ་མཆོག་གཉིས་དཀར་མོའོ། །
ནུབ་ཏུ་ཨོཾ་བྷཻ་སྭཱ་ཧཱ།  ལས་ཚངས་པ་ཁྲོས་པ་དམར་པོ།  ཡུམ་ཚངས་མ་དང་དབྱངས་ཅན་གཉིས་འཁོར་ཚངས་མ་བརྒྱད་དང་བཅས་པ།  བྱང་དུ་ཨོཾ་བི་སྭཱ་ཧཱ་ལས་ཁྱབ་འཇུག་ཁྲོས་པ་སྔོན་པོ།  ཡུམ་ནོར་རྒྱུན་མ་དང་དབྱངས་ཅན་གཉིས་སེར་དང་དཀར་བའོ། །ཤར་
ལྷོར་ཨོཾ་བྷཻ་སྭཱ་ཧཱ་ལས་འདོད་པའི་རྒྱལ་པོ་ཁྲོས་པ་དམར་པོ་ཡུམ་དང་བཅས་པ།  ལྷོ་ནུབ་ཏུ་ཨོཾ་བྷཽ་སྭཱ་ཧཱ་ལས་ཚོགས་བདག་ཁྲོས་པ་དུད་ཁ་ཡུམ་དང་བཅས་པ།  ནུབ་བྱང་དུ་ཨོཾ་བྷྲྀ་སྭཱ་ཧཱ་ལས་བྷྲྀཾ་གི་རི་ཏི་ཁྲོས་པ་སྔོ་སྐྱ་ཆུང་མ་དང་བཅས་པ།  བྱང་ཤར་
དུ་ཨོཾ་བྷ་སྭཱ་ཧཱ་ལས་སྨིན་དྲུག་ཁྲོས་པ་ཆུང་མ་དང་བཅས་པའོ། །སྒོ་བཞིར་སྒོ་བ་བཞི་ཁྲོས་པ་ནི་སྔར་བཞིན་ནོ། །གཉིས་པ་ལ་གཉིས་ཏེ།  སློབ་དཔོན་གྱི་ལས་དང་།  སློབ་མ་གཞུག་ཅིང་དབང་བསྐུར་བའོ། །དང་པོ་ལ་གཉིས་ཏེ།  བྲི་ཞིང་ལྷ་དགོད་པ་དང་།  
ཞུགས་ཏེ་བསྒྲུབ་པའོ། །དང་པོ་ནི།  དེ་དག་གི་དཀྱིལ་འཁོར་བཤད་དེ།  ཞེས་སོགས་སོ། །གཉིས་པ་ནི།  དེ་ནས་ལྕགས་ཀྱུ་ལ་སོགས་པས། །ཞེས་སོགས་སོ། །གཉིས་པ་ནི།  དེ་ནས་འཇིག་རྟེན་གསུམ་རྒྱལ་གྱིས། །ཞེས་སོགས་སོ། །གསུམ་པ་ནི།  
10-7-61b


དེ་ནས་ལས་རྣམས་སྦྱིན་བྱ་སྟེ། །ཞེས་སོགས་སོ། །དྲུག་པ་ལྷ་ཆེན་བརྒྱད་ཀྱི་དཀྱིལ་འཁོར་ལ།  སྔགས་ཀྱི་ཕྲེང་བ་དང་།  རྡུལ་ཚོན་གྱི་དཀྱིལ་འཁོར་དུ་སློབ་མ་ལ་དབང་བསྐུར་བ་དང་།  དངོས་གྲུབ་ཀྱི་ཡེ་ཤེས་ལ་བསླབ་པ་དང་།  འཇིག་རྟེན་དང་འཇིག་རྟེན་ལས་འདས་
པའི་དཀྱིལ་འཁོར་དུ་ཞུགས་པ་ལས་དངོས་གྲུབ་གསོལ་བར་བསྟན་པའོ། །དང་པོ་ནི།  དེ་ནས་ཚངས་པ་ལ་སོགས་པ་ལྷ་ཆེན་པོ་རྣམས་ཀྱིས།  ཞེས་སོགས་ཏེ།  དཀྱིལ་འཁོར་གྱི་ནང་དུ་འཁོར་ལོ་རྩིབས་བརྒྱད་པའི་ལྟེ་བར་པད་ཉི་ལ་འཇིག་རྟེན་གསུམ་
རྒྱལ་སྔར་བཞིན།  ཤར་དུ་ཨོཾ་རུ་ལས་དབང་ཕྱུག་ཆེན་པོ་སྔོ་སྐྱ་གླང་ལ་ཞོན་ཅིང་ཟླ་བ་ཕྱེད་པའི་ཅོད་པན་ཅན།  ཕྱག་བཞིའི་གཡས་དང་པོས་ཨུ་མ་ལ་འཁྱུད་ཅིང་།  གཉིས་པ་རྡོ་རྗེ་རྩེ་གསུམ་དང་ལྡན་པའི་མཆོག་སྦྱིན།  གཡོན་དང་པོས་མདུང་རྩེ་
གསུམ་པ།  གཉིས་པས་རལ་གྲི་འཛིན་པའོ། །ནུབ་ཏུ་ཨོཾ་ཨོཾ་ལས་ངང་པའི་སྟེང་དུ་ཚངས་པ་སེར་པོ་གདོང་བཞི་པ་དང་།  རྡོ་རྗེ་ཞི་བ་མ་ནི་གཡས་གཉིས་ཀྱིས་རྡོ་རྗེ་དང་བགྲང་ཕྲེང་།  གཡོན་གཉིས་ཀྱིས་དབྱུག་པ་དང་སྤྱི་བླུགས་འཛིན་པ།  བྱང་
དུ་ཨོཾ་བྷི་ལས་ཁྱབ་འཇུག་ནག་པོ་དང་།  ཡུམ་རྡོ་རྗེ་གསེར་ནི་སེར་མོ་ནམ་མཁའ་ལྡིང་གི་སྟེང་ན་ཕྱག་བཞིའི་གཡས་གཉིས་ཀྱིས་དབྱུག་པ་དང་རྡོ་རྗེ་འཛིན་པ།  གཡོན་གཉིས་དུང་དང་འཁོར་ལོ་འཛིན་པའོ། །ལྷོར་ཨོཾ་ཨི་ལས་བརྒྱ་བྱིན་དང་།  ཁུ་ཚུར་མ་ནི་
སེར་སྐྱ་གླང་ཆེན་ལ་ཞོན་པ་གཡས་རྡོ་རྗེ་རྩེ་ལྔ་པ།  གཡོན་རྡོ་རྗེ་རྩེ་གསུམ་པ་འཛིན་པའོ། །ཤར་ལྷོར་ཨོཾ་ཀཾ་ལས་འདོད་པའི་དབང་ཕྱུག་དཀར་པོ་ཕྱག་གཉིས་རལ་གྲི་དང་གཤོལ་མདའ་འཛིན་པའོ། །ལྷོ་ནུབ་ཏུ་ཨོཾ་ག་ལས་ཚོགས་བདག་དཀར་པོ་གླང་
10-7-62a


པོ་ཆེའི་ཞལ་ཅན་ཕྱག་གཡས་གཉིས་ཀྱིས་རྩེ་གསུམ་དང་ལ་དུ།  གཡོན་གཉིས་ཀྱིས་དགྲ་སྟྭ་དང་ལ་ཕུག་འཛིན་པ་ནི་བྱི་བའི་གདན་ལའོ། །བྱང་ཤར་དུ་ཨོཾ་བྷྲི་ལས་རྡོ་རྗེ་གཞོན་ནུ་དང་།  ཡུམ་ནི་དམར་མོ་ཞལ་དྲུག་པ་ཕྱག་གཡས་
གཉིས་ཀྱིས་མདུང་དང་རྡོ་རྗེ་འཛིན་པ།  གཡོན་གཉིས་ཀྱིས་ཁྱིམ་བྱ་ཅན་རྨ་བྱའི་གདན་ལ་བཞུགས་པའོ། །ནུབ་བྱང་དུ་ཨོཾ་ཀ་ལས།  བྷྲིང་གི་རི་ཏི་ནག་པོ་རྔ་ལ་ཞོན་ཅིང་ཕྱག་གཉིས་ཀྱིས་རྔ་བརྡུང་བའོ། །སྒོ་བ་བཞི་ཁྲོས་པ་སྔར་གྱི་ས་བོན་ལས་བསྐྱེད་
པ་སྟེ་ལྷ་བཅུ་གསུམ་མོ། །གཉིས་པ་ལ་གཉིས་ཏེ།  སློབ་དཔོན་གྱི་ལས་དང་།  སློབ་མ་གཞུག་ཅིང་དབང་བསྐུར་བའོ། །དང་པོ་ལ་གཉིས་ཏེ།  བྲི་ཞིང་ལྷ་དགོད་པ་དང་།  ཞུགས་ཏེ་བསྒྲུབ་པའོ། །དང་པོ་ནི།  དེ་ནས་དེ་དག་གི་དཀྱིལ་འཁོར་བཤད་དེ་
ཞེས་སོགས་སོ། །གཉིས་པ་ནི།  དེ་ནས་ཞུགས་ནས་ལྷ་རྣམས་ནི། །ཞེས་སོགས་སོ། །གཉིས་པ་ནི།  དེ་ནས་རྡོ་རྗེ་འཛིན་མའི་ཞེས་སོགས་ཏེ།  མེ་ཏོག་དོར་བའི་སྔགས་ནི་འདིའི་ཁྱད་པར་རོ། །གསུམ་པ་ནི།  དེ་ནས་ལྷ་རྣམས་གང་དགའ་བའི། །ཞེས་
སོགས་ཏེ།  གང་ཕྱིར་མཆོག་ནི་ཁྱོད་ལ་སྦྱིན། །ཞེས་པས་མཆོག་གི་དངོས་གྲུབ་སྦྱིན་ནུས་པར་བསྟན་ལ།  གལ་ཏེ་དེ་ནི་ཐུན་མོང་གི་དངོས་གྲུབ་རྣམས་ཀྱི་ནང་ནས་མཆོག་ཏུ་གྱུར་པ་ལ་དགོངས་སོ་སྙམ་ན་མ་ཡིན་ཏེ།  ལྷ་ལ་མཆོག་ནི་གསོལ་བ་
གདབ། །ཅེས་པ་ལ་སོགས་པ་དང་།  ལྷ་རྫས་ཁུ་བ་བྲོ་བརྡུང་དང་། །མི་སྣང་བ་དང་མཁའ་འགྲོ་དང་། །རིལ་བུ་རྫས་དང་རྒྱལ་ལ་སོགས། །ཡིད་འདོད་ཚད་མེད་གསོལ་བ་གདབ། །ཞེས་གསུངས་པའི་ཕྱིར་རོ། །བཞི་པ་ནི།  དེ་ནས་དབང་ཕྱུག་ཆེན་པོ་ལ་
10-7-62b


སོགས་པས་ཞེས་སོགས་ཏེ།  འདིར་ཡང་སྒྲིབ་པ་མ་མཆིས་པའི་ལམ་བསྟན་པར་བགྱིའོ་ཞེས་པ་ནས་རྡོ་རྗེ་འཛིན་པ་ཉིད་དུ་འགྲུབ་པའི་ལམ་བསྟན་པར་བགྱིའོ་ཞེས་པའི་བར་གྱིས་འདི་དག་འཇིག་རྟེན་པ་རང་རྒྱུད་པ་ཡིན་པ་བཀག་སྟེ།  འཇིག་རྟེན་
པ་རང་རྒྱུད་པ་ལ་འདི་དག་བསྟན་པའི་ནུས་པ་ག་ལ་ཡོད།  གསུམ་པ་ཚེ་དཔག་མེད་གསུང་གི་དཀྱིལ་འཁོར་ལ་གཉིས་ཏེ།  གླེང་བསླང་བ་དང་རྒྱུད་ཀྱི་གཞུང་བསྟན་པའོ། །དང་པོ་ལ་གཉིས་ཏེ་སྟོན་པས་གླེང་བསླང་བ་དང་།  འཁོར་གྱིས་གླེང་བསླང་
བའོ། །དང་པོ་ནི་དེ་ནས་བཅོམ་ལྡན་འདས་ཕྱག་ན་རྡོ་རྗེ་ཉིད་ཀྱིས་དཀྱིལ་འཁོར་ཀུན་ཏུ་གཟིགས་ནས་ཞེས་སོགས་སོ། །གཉིས་པ་ནི།  དེ་ནས་ཞེས་སོགས་སོ། །གཉིས་པ་རྒྱུད་ཀྱི་གཞུང་ལ་བཞི་སྟེ།  སྔགས་ཀྱི་ཕྲེང་བ་དང་།  རྡུལ་ཚོན་གྱི་དཀྱིལ་
འཁོར་དུ་སློབ་མ་ལ་དབང་བསྐུར་བ་དང་།  ངན་སོང་དུ་སྐྱེ་བ་དང་སྐྱེས་ཟིན་པའི་སྡིག་པ་སྦྱོང་བ་དང་།  རྒྱུད་ཀྱི་ཆེ་བ་བསྟན་པའོ། །དང་པོ་ནི།  དེ་ནས་ཚངས་པ་ལ་སོགས་པ་ལྷ་རྣམས་ཤིན་ཏུ་མང་བར་གྱུར་ནས་ཞེས་སོགས་ཏེ།  གཞལ་ཡས་ཁང་གི་ནང་
དུ་འཁོར་ལོ་རྩིབས་བཞི་པའི་ལྟེ་བར་པད་ཟླ་ལ།  ཨོཾ་བྷྲཱུཾ་སྭཱ་ཧཱ་ལས་ཚེ་དཔག་མེད་དཀར་དམར་གཡོན་ཏིང་ངེ་འཛིན་ཅན་གཡས་སྐྱབས་སྦྱིན་གྱིས་བུམ་པ་འཛིན་པའོ། །ཤར་དུ་ཨོཾ་དྷྲཱིཾ་སྭཱ་ཧཱ་ལས་ཕྱག་རྡོར་དཀར་ལྗང་རྡོ་རྗེ་དང་དྲིལ་བུ་འཛིན་པ།  བྱང་
དུ་ཨོཾ་ཀྲུཾ་སྭཱ་ཧཱ་ལས་ཁམས་གསུམ་རྣམ་རྒྱལ་སྔོ་སྐྱ་གཡས་རྡོ་རྗེ་དབྱུག་པ།  གཡོན་སྡིག་མཛུབ་ཅན།  ལྷོར་ཨོཾ་ཏྲཾ་སྭཱ་ཧཱ་ལས་ནམ་སྙིང་སྔོ་སྐྱ་གཡས་རིན་པོ་ཆེ་དང་གཡོན་དེས་ཡུ་བ་བྱས་པའི་དྲིལ་བུ་འཛིན་པ།  ནུབ་ཏུ་ཨོཾ་ཧྲཱིཿསྭཱ་ཧཱ།  ལས་སྤྱན་རས་གཟིགས་དམར་
10-7-63a


སྐྱ་གཡས་པདྨ།  གཡོན་མི་འཇིགས་པ་སྦྱིན་པ།  བདུག་སོགས་བཞི་དང་།  སྒོ་བ་བཞི་ནི་ཀུན་རིག་བཞིན་ཏེ་ལྷ་བཅུ་གསུམ་མོ། །གཉིས་པ་ལ་གཉིས་ཏེ།  སློབ་དཔོན་གྱི་ལས་དང་།  སློབ་མ་གཞུག་ཅིང་དབང་
བསྐུར་བ་ཡན་ལག་དང་བཅས་པའོ། །དང་པོ་ལ་གཉིས་ཏེ།  བྲི་ཞིང་ལྷ་དགོད་པ་ལ་སོགས་པ་དང་།  ཞུགས་ཏེ་སྒྲུབ་པ་ལ་སོགས་པའོ། །དང་པོ་ནི།  དེ་ནས་དེ་དག་གི་དཀྱིལ་འཁོར་བཤད་དེ།  ཞེས་སོགས་ཏེ།  བུམ་པ་ལྔ་དང་བརྒྱད་ནི་
དབང་བུམ་དང་མཆོད་བུམ་ཡིན་ལ།  བདུག་པ་ལ་སོགས་ནི་མཆོད་རྫས་ཏེ།  ལས་ཐམས་ཅད་པའི་སྔགས་ཀྱིས་བཏབ་པ་ནི་ཁམས་གསུམ་རྣམ་རྒྱལ་གྱི་སྔགས་སོ། །མཆོད་པ་ལ་སོགས་པ་བཞག་སྟེ་ཞེས་པ་ནི་བདུག་སོགས་བཞི་གྲྭ་བཞིར་དགོད་
པའོ། །གཉིས་པ་ནི།  དེ་ནས་སྔགས་མཁན་བདག་ཉིད་ཞུགས་ལ་ཞེས་སོགས་ཏེ།  སྔགས་མཁན་ཞེས་པ་གོང་འོག་ཏུ་མང་དུ་འབྱུང་བ་རྣམས་ཀྱིས་ནི།  མདུན་བསྐྱེད་མ་བསྒྲུབས་པའི་གོང་དུ་བདག་བསྐྱེད་བསྒོམ་པ་བསྟན་སྙམ་མོ། །འདིར་
མདུན་བསྐྱེད་བསྒྲུབས་པའི་རྗེས་སུ་བདག་ཉིད་དབང་བསྐུར་ཞིང་།  མདུན་བསྐྱེད་ལ་དམིགས་པའི་བཟླས་པ་བྱ་བར་གསུངས་པ་ནི་གོང་འོག་ཀུན་ལ་སྦྱར་བར་བྱའོ། །གཉིས་པ་ལ་བཞི་སྟེ།  སློབ་མ་གཞུག་ཅིང་དབང་བསྐུར་བ་དང་།  བླ་
མ་ལ་ཡོན་དབུལ་བ་དང་།  དངོས་གྲུབ་ཀྱི་ཡེ་ཤེས་དང་།  དབང་བསྐུར་བའི་ཕན་ཡོན་བསྟན་པའོ། །དང་པོ་ནི།  དེ་ནས་རྡོ་རྗེ་འཛིན་མའི་ཕྱག་རྒྱ་བཅིངས་ལ་ཞེས་སོགས་ཏེ།  བདག་འཇུག་གི་རྗེས་སུ་བདག་མདུན་ཐ་མི་དད་དུ་བསྒྲུབ་ཚུལ་འདི་ནི་
10-7-63b


འདས་པའི་དཀྱིལ་འཁོར་ཀུན་ལ་སྦྱར་བར་བྱའོ། །འདིར་ཨོཾ་བཛྲ་དྷ་ར་ཞེས་སོགས་ནི་འཇུག་པའི་ཚེ་མེ་ཏོག་གཟུང་བའི་སྔགས་ཀྱང་ཡིན་ལ།  ཨོཾ་ཏ་ཐཱ་ག་ཏ་ཞེས་སོགས་ནི་མེ་ཏོག་འདོར་འཆིང་གཉིས་ཀའི་སྔགས་དང་།  ཨོཾ་སརྦ་ཏ་ཐཱ་ག་ཏ་ཞེས་
སོགས་ནི་ཆུ་དབང་གི་སྔགས་སོ། །དེ་དག་དང་།  དམ་ཚིག་དང་།  བཀའི་དབང་བསྐུར་བ་དང་།  ལས་ཀྱི་དབང་བསྐུར་བ་རྣམས་ནི་འདིའི་ཁྱད་ཆོས་སོ། །གཉིས་པ་ནི།  དེ་ནས་བླ་མ་བླ་མའི་ཕྱིར། །ཞེས་སོགས་སོ། །གསུམ་པ་ནི།  དེ་ནས་
བྱང་ཆུབ་བར་དུ་ནི། །ཞེས་སོགས་ཏེ།  ཆོས་རྣམས་ཐམས་ཅད་དངོས་མེད་པ། །སེམས་ཀྱིས་བསྒོམས་པ་བྱས་ནས་ཀྱང་། །ཞེས་པས་སྣོད་བཅུད་སྟོང་ཉིད་དུ་བསྒོམ་པ་བསྟན།  ཨ་ལས་ཟླ་བའི་དཀྱིལ་འཁོར་བསམ། །ཞེས་པས་ནི་
གདན་གྱི་ཟླ་བ་བསྟན་ལ།  དེའི་འོག་ཏུ་པདྨ་ནི་གླེང་གཞིར་བསྟན་ཟིན་ཏོ། །རང་གི་ས་བོན་དེ་དབུས་སུ། །བསམས་ནས་ཞེས་དང་།  དམ་ཚིག་གི་ཕྱག་རྒྱ་ཡང་།  བསམ་ཞིང་ཞེས་པས་ནི་རྡོ་རྗེ་སེམས་དཔའ་དང་།  དཀྱིལ་འཁོར་གྱི་གཙོ་བོ་
གང་བསྐྱེད་པ་དེའི་ས་བོན་དང་།  དེ་ལས་ཕྱག་མཚན་དུ་གྱུར་པ་བསྟན།  དེ་བཞིན་དེ་ཉིད་དུ་ཞེས་པས་ནི་ཕྱག་མཚན་ལ་ས་བོན་གྱིས་མཚན་པ་བསྟན།  སྒྲུབ་པ་པོས་ནི་བསྒྱུར་བར་བྱ། །ལྷ་ཡི་རྣལ་འབྱོར་ཚུལ་དུ་བསྒྱུར། །ཞེས་པས་ནི་དེ་
ལས་ལྷའི་སྐུར་བསྒོམ་པ་བསྟན།  དེ་ནས་རང་གི་ས་བོན་དང་། །ཕྱག་རྒྱས་ཕྱག་རྒྱ་དེ་བྱིན་བརླབ། །ཅེས་པས་ནི།  ཤཱཀ་ཐུབ་ནས་འབྱུང་བའི་སྔགས་དང་ཕྱག་རྒྱས།  གནས་གསུམ་བྱིན་གྱིས་བརླབ་པ་བསྟན།  ལྟག་འོག་གོ་རིམ་ཇི་
10-7-64a


བཞིན་དུ། །སངས་རྒྱས་རྣམས་ཀྱིས་དབང་བསྐུར་རོ། །ཞེས་པས་གནས་ལྔར་དབང་བསྐུར་བ་བསྟན་ནོ། །འདི་བདག་བསྐྱེད་ཡིན་པ་ནི།  དེ་ནས་ང་རྒྱལ་བསྐྱེད་པ་དང་། །ཞེས་པས་ཤེས་སོ། །བཞི་པ་ནི།  དེ་
ནས་ཚངས་པ་ལ་སོགས་པའི་ལྷ་ཆེན་པོ་རྣམས་ཀྱིས་ཞེས་སོགས་སོ། །གསུམ་པ་ངན་སོང་དུ་སྐྱེ་བ་དང་སྐྱེས་ཟིན་པའི་སྡིག་པ་སྦྱོང་བ་ལ་གཉིས་ཏེ།  ལྷ་རྣམས་ཀྱིས་ཞུས་པ་དང་།  བཅོམ་ལྡན་འདས་ཀྱིས་གསུངས་པའོ། །དང་པོ་
ནི།  དེ་ནས་ལྷ་དེ་དག་གིས་དེ་བཞིན་དུ་ཕྱག་འཚལ་ནས།  ཞེས་སོགས་སོ། །གཉིས་པ་ལ་གཉིས་ཏེ།  ཚེ་འདས་ལ་སྦྱང་བ་དང་།  ཚེ་ལྡན་ལ་སྦྱང་བའོ། །དང་པོ་ལ་གསུམ་སྟེ།  དབང་བསྐུར་བས་སྡིག་པ་སྦྱོང་བ་དང་།  བཟླས་
པས་སྦྱང་བ་དང་།  སྦྱིན་སྲེག་གིས་སྦྱང་བའོ། །དང་པོ་ལ་གཉིས་ཏེ།  མདོར་བསྟན་པ་དང་།  རྒྱས་པར་བཤད་པའོ། །དང་པོ་ནི།  ཀྱེ་ལྷ་ཡི་བུ་རྣམས་དེ་དག་ནི། །ཞེས་སོགས་སོ། །གཉིས་པ་ནི།  ཀྱེ་ལྷའི་བུ་རྣམས་ངན་
སོང་དུ་སྐྱེས་ཟིན་པ་ཞེས་སོགས་ཏེ།  མཆོད་རྟེན་དང་རང་གི་ལྷའི་སྐུ་ནི་རུས་པ་ལ་བཏབ་པ་སྟེ།  རྟེན་བསྐྱེད་ནས་དབང་བསྐུར་བའོ། །རིགས་མཐུན་པ་དང་བུ་ལ་སོགས་པ་ནི་རྟེན་བསྐྱེད་དུ་མི་རུང་གི།  ཚེ་འདས་དེའི་ཆེད་དུ་དེ་དག་ལ་
དབང་བསྐུར་བའོ། །གཉིས་པ་ནི།  ལྷའི་བུ་རྣམས་དེའི་མིང་ནས་སྨོས་ཏེ།  ཞེས་སོགས་སོ། །གསུམ་པ་ལ་བཞི་སྟེ།  ཞི་བ་དང་།  རྒྱས་པ་དང་། དབང་དང་།  མངོན་སྤྱོད་དོ། །དང་པོ་ནི།  ལྷ་ཡི་བུ་རྣམས་ཞི་བ་ཡི། །ཞེས་སོགས་སོ། །
10-7-64b


གཉིས་པ་ནི།  དེ་ནི་བདེ་འགྲོར་སྐྱེས་ནས་ཀྱང་། །ཞེས་སོགས་སོ། །གསུམ་པ་ནི།  དེ་ནས་ཕན་ཕྱིར་ངེས་པར་ཡང་། །ཞེས་སོགས་སོ། །བཞི་པ་ནི།  དེ་ལ་གདོན་རྣམས་གཞོམ་པ་ནི། །ཞེས་སོགས་ཏེ།  མངོན་པར་རྟོགས་པ་རྣམས་ཀུན་
རིག་གི་སྐབས་སུ་བསྟན་ཟིན་ནོ། །གཉིས་པ་ཚེ་ལྡན་ལ་སྦྱང་བ་ནི།  གོ་རིམ་འདི་དག་ཉིད་ཀྱིས་ནི། །ཞེས་སོགས་ཏེ།  རོ་བསྲེག་པ་དང་།  རུས་བུའི་སཱཙྪ་མ་གཏོགས་པ་སྡིག་སྦྱོང་གི་སྒོ་ཐམས་ཅད་གསོན་པོ་ལ་ཡང་འཇུག་པར་ཤེས་པར་
བྱའོ། །བཞི་པ་རྒྱུད་ཀྱི་ཆེ་བ་བསྟན་པ་ལ་བཞི་སྟེ།  རྒྱུད་བྲིས་པའི་ཕན་ཡོན།  མངའ་གསོལ་བའི་ཕན་ཡོན།  རྒྱུད་བཤད་པའི་ཕན་ཡོན།  དཀྱིལ་འཁོར་དུ་ཞུགས་པའི་ཕན་ཡོན་ནོ། །དང་པོ་ནི།  དེ་ནས་ཚངས་པ་ལ་སོགས་པའི་ལྷའི་
བུ་རྣམས་ཡིད་མགུ་ནས་ཞེས་སོགས་སོ། །གཉིས་པ་ནི།  གང་གིས་བརྟག་པའི་རྒྱལ་པོ་འདི་དད་པས་ཞེས་སོགས་སོ། །གསུམ་པ་ནི།  བདག་ཅག་ཚངས་པ་ལ་སོགས་པའི་ལྷ་རྣམས་ཀྱིས་ཞེས་སོགས་སོ། །བཞི་པ་ནི།  བཅོམ་ལྡན་འདས་
དཀྱིལ་འཁོར་དུ་ཞུགས་ཏེ།  དབང་བསྐུར་བ་གང་ལགས་པ་དེ་དག་ཀྱང་ཞེས་སོགས་སོ། །བཞི་པ་འཁོར་ལོས་སྒྱུར་བ་ཡོན་ཏན་གྱི་དཀྱིལ་འཁོར་ལ་བཞི་སྟེ།  སྔགས་ཀྱི་ཕྲེང་བ་དང་།  རྡུལ་ཚོན་གྱི་དཀྱིལ་འཁོར་དུ་སློབ་མར་དབང་
བསྐུར་བ་དང་།  དངོས་གྲུབ་ཀྱི་ཡེ་ཤེས་དང་།  ཕྱག་རྒྱའི་ཡེ་ཤེས་སོ། །དང་པོ་ནི།  དེ་ནས་བཅོམ་ལྡན་འདས་ཕྱག་ན་རྡོ་རྗེས་གསང་སྔགས་དང་།  རིག་པ་དང་།  ཞེས་སོགས་ཏེ།  གཞལ་ཡས་ཁང་གི་ནང་དུ་འཁོར་ལོ་རྩིབས་བཞི་པ་སྔོན་
10-7-65a


པོའི་ཕྱིར་ལྷ་སྣམ་རིམ་པ་བརྒྱད་བྱས་པའི་དབུས་ཀྱི་པད་ཟླ་ལ།  ཨོཾ་བྷྲཱུྃ་དྷྲུྃ་ལས་རྡོ་རྗེ་སེམས་དཔའ་དཀར་པོ་རྡོ་རྗེ་དང་དྲིལ་བུ་འཛིན་པའམ།  ཨོཾ་བཛྲ་པཱ་ཎི་ཧྲཱིཿཏ་ཏིཥྚ་ཧཱུྃ་ལས་ཀུན་བཟང་སེར་པོ་རིན་པོ་ཆེའི་སྙེ་མ་འཛིན་པའམ།  
ཨོཾ་ཧཱུྃ་ཨ་ལས་བདེ་བ་ཆེན་པོ་དམར་པོ་མདའ་གཞུ་འཛིན་པ་གང་མོས་སུ་བསྐྱེད།  ཤར་དུ་ཨོཾ་བཛྲ་ཧཱུྃ་ཕཊ་ལས་ཕྱག་ན་རྡོ་རྗེ་དཀར་སེར་རྡོ་རྗེ་དྲིལ་བུ་འཛིན་པ།  ལྷོར་ཨོཾ་དྷྲི་ཌ་བཛྲ་ཧཱུྃ་ཕཊ་ལས་རྡོ་རྗེ་རིན་ཆེན་སེར་པོ་རཏྣ་འཛིན་པ།  ནུབ་རྩིབས་ལ་
ཨོཾ་བཛྲ་ཧཱུྃ་ཧྲཱིཿལས་རྡོ་རྗེ་ཆོས་དམར་སྐྱ་པད་སྡོང་འཛིན་པ།  བྱང་དུ་ཨོཾ་བཛྲ་ཧཱུྃ་ཨ་ལས་རྡོ་རྗེ་ལས་ལྗང་སེར་ཕྱག་གཡས་སྣ་ཚོགས་རྡོ་རྗེ་གཡོན་དེས་ཡུ་བ་བྱས་པའི་དྲིལ་བུ་འཛིན་པ།  ལྷ་སྣམ་གཉིས་པའི་ཕྱོགས་བཞིར་སེམས་དཔའ་བཅུ་དྲུག་ཀུན་
རིག་བཞིན་བསྐྱེད།  སྒོ་བ་བཞི་ཡང་བསྐྱེད་དེ་རྩ་བའི་ལྷ་ཉེར་ལྔར་རྩ་སྐྱ་པ་བཞེད་ལ།  འཛིམ་པ་རིན་ཤེར་ནི་སྒེག་སོགས་བརྒྱད་ཀྱང་འདོད་པ་ནི་གཞུང་ན་མི་གསལ་ལོ། །མགྲོན་ཐབས་ཀྱི་ལྷ་ནི།  ལྷ་སྣམ་དང་པོ་ལ་སངས་རྒྱས་
རབ་བདུན།  ཤཱཀ་ཐུབ་དང་བརྒྱད་བྲི་གསུང་ཡང་།  ཤཱཀྱ་ཐུབ་པ་ཉིད་བདུན་གྱི་ཁོངས་སུ་གཏོགས་པས་དཔེ་མ་དག་པ་འདྲའོ། །རྩ་སྐྱ་པ་དང་།  འཛིམ་པས་སངས་རྒྱས་རབ་བདུན།  རིགས་ལྔ་དང་བཅུ་གཉིས་ཕྱོགས་རེ་རེར་
བཀོད།  ཤར་དུ་རྣམ་སྣང་མི་བསྐྱོད་པ།  རྣམ་གཟིགས་དེས་འགྲེའོ། །གསུམ་པ་ལ་བསྐལ་བཟང་བཅུ་དྲུག །བཞི་པ་ལ་ཉན་ཐོས་བཅུ་དྲུག །རང་རྒྱལ་བཅུ་གཉིས།  ལྔ་པ་ལ་ལྷ་ཆེན་བརྒྱད།  དྲུག་པ་ལ་གཟའ་བརྒྱད་རྒྱུ་སྐར་དང་
10-7-65b


བཅས་པའོ། །བདུན་པ་ལ་རྒྱལ་པོ་བཞི་དང་ཀླུ་ཆེན་པོ་བརྒྱད་བྲི།  བརྒྱད་པ་ལ་ཕྱོགས་སྐྱོང་བཅུ།  གྲྭ་བཞིའི་ཤར་ལྷོར་དམྱལ་བ།  སྲིན་པོར་བྱ།  རླུང་དུ་ཕག །འབྱུང་པོར་རྩངས་པ་རྣམས་སོ། །གཉིས་པ་ལ་གཉིས་ཏེ།  སློབ་དཔོན་གྱི་
ལས་དང་།  སློབ་མ་གཞུག་ཅིང་དབང་བསྐུར་བའོ། །དང་པོ་ལ་གཉིས་ཏེ།  བྲི་ཞིང་ལྷ་དགོད་པ་ལ་སོགས་པ་དང་།  ཞུགས་ཏེ་སྒྲུབ་པའོ། །དང་པོ་ནི།  དེ་ནས་དེ་དག་གི་དཀྱིལ་འཁོར་བཤད་དེ་ཞེས་སོགས་སོ། །གཉིས་པ་ནི།  དེ་ནས་
སྔགས་མཁན་ཉིད་ཀྱིས་ནི། །ཞེས་སོགས་ཏེ།  འདིར་སྤྱན་དྲངས་པའི་རྗེས་སུ་སློབ་དཔོན་བདག་ཉིད་འཇུག་ཅིང་དབང་བླང་བ་གསལ་ལོ། །གཉིས་པ་ལ་གསུམ་སྟེ།  སློབ་མའི་མཚན་ཉིད་དང་།  གཞུག་ཅིང་དབང་བསྐུར་བ་དངོས་
དང་།  བླ་མ་ལ་ཡོན་དབུལ་ཞིང་བཀའ་ནོད་པའོ། །དང་པོ་ནི།  སྡོམ་གནས་དམ་ཚིག་ལྡན་པ་དང་། །ཞེས་སོགས་ཏེ།  སློབ་མའི་མཚན་ཉིད་འདི་ནི་གོང་འོག་ཀུན་ཏུ་ཤེས་པར་བྱའོ། །གཉིས་པ་ནི།  སྔགས་འདི་ཡིས།  བྱང་
ཆུབ་ཏུ་སེམས་བསྐྱེད་ལ།  ཞེས་སོགས་ཏེ།  ཡེ་ཤེས་དབབ་པའི་སྔགས་ནི་གཞན་དང་ཐུན་མོང་བ་ཡིན་ལ།  གཞན་རྣམས་ནི་འདིའི་ཁྱད་ཆོས་སོ། །གསུམ་པ་ནི།  དེ་ནས་བདག་གི་ལུས་ལ་སོགས་པ།  ཞེས་སོགས་སོ། །གསུམ་
པ་དངོས་གྲུབ་ཀྱི་ཡེ་ཤེས་ལ་གཉིས་ཏེ།  མདོར་བསྟན་པ་དང་།  རྒྱས་པར་བཤད་པའོ། །དང་པོ་ནི།  དེ་ནས་ལས་ཐམས་ཅད་བྱེད་དུ་གཞུག་ཅིང་ཞེས་སོགས་སོ། །གཉིས་པ་ལ་གཉིས་ཏེ།  རང་དོན་དང་གཞན་དོན་བསྟན་པའོ། །དང་པོ་ནི།  
10-7-66a


བདེ་བས་བདེ་བ་བསྐྱེད་ན་ནི། །ཞེས་སོགས་སོ། །གཉིས་པ་ལ་ལྔ་སྟེ།  ཕྲིན་ལས་བཞི་མདོར་བསྟན་པ་དང་།  རྒྱས་པར་བཤད་པ་དང་།  སེམས་དཔའ་བཅུ་དྲུག་གི་ལས་ཚོགས་དང་།  ཕྲིན་ལས་བཞིའི་མཇུག་སྡུད་བསྟན་པ་
དང་།  འཁོར་གྱིས་ལེགས་སོ་བྱིན་པའོ། །དང་པོ་ནི།  དེ་ནས་ལས་རྣམས་བཤད་བྱ་སྟེ། །ཞེས་སོགས་སོ། །གཉིས་པ་ནི།  རྡོ་རྗེ་སེམས་དཔར་བདག་སྒྱུར་ལ། །ཞེས་སོགས་སོ། །གསུམ་པ་ནི།  འདྲེན་པ་ཀུན་ཏུ་བཟང་པོ་ཡིས། །
ཞེས་སོགས་སོ། །བཞི་པ་ནི།  བཟླས་དང་སྦྱིན་སྲེག་ལས་རྣམས་ཀྱིས། །ཞེས་སོགས་སོ། །ལྔ་པ་ནི།  དེ་ནས་བཅོམ་ལྡན་འདས་ཕྱག་ན་རྡོ་རྗེ་ལ་ཕྱག་འཚལ་ནས་ཞེས་སོགས་སོ། །བཞི་པ་ཕྱག་རྒྱའི་ཡེ་ཤེས་ལ་བསླབ་པ་ལ་གཉིས་ཏེ།  
མདོར་བསྟན་པ་དང་།  རྒྱས་པར་བཤད་པའོ། །དང་པོ་ནི།  དེ་ནས་བཅོམ་ལྡན་འདས་ཞེས་སོགས་སོ། །གཉིས་པ་ལ་གསུམ་སྟེ།  ལག་པ་བྱིན་གྱིས་བརླབ་པ་དང་།  ཕྱག་རྒྱ་བཅིང་ཐབས་དངོས་དང་།  ཞར་ལས་བྱུང་བ་སྔགས་
བསྟན་པའོ། །དང་པོ་ནི།  ལག་པ་གཉིས་མདུན་དུ་བཞག་ལ་ཞེས་སོགས་ཏེ།  དེ་བཞིན་གཤེགས་པ་རྣམས་ཡིན་པར་མོས་པ་བསྐྱེད་དེ་ཞེས་པ་ཡན་ཆད་ཀྱིས་ལག་པ་བྱིན་གྱིས་བརླབ་པ་བསྟན།  ཆོས་ཐམས་ཅད་གཅིག་ལ་གཅིག་
འདྲེས་པ་དང་།  ཞེས་པས་གཟུགས་བརྙན་གྱི་སྦྱོར་བ་བསྟན་ཏེ།  ཨ་ནུ་ཉ།  ཞེས་པ་བོད་སྐད་དུ་བསྒྱུར་བ་ལ་ཆོས་ཐམས་ཅད་གཅིག་ལ་གཅིག་འདྲེས་པ་ཞེས་འབྱུང་བའི་ཕྱིར་རོ། །བདག་དང་ཡང་རྗེས་སུ་མཐུན་པར་བྱ་སྟེ།  
10-7-66b


ཞེས་པས་ནི་བདག་བསྐྱེད་དངོས་བསྟན་ནམ་སྙམ།  རྩ་སྐྱ་པས་ནི་དེ་གཉིས་ཆར་གྱིས་གཟུགས་བརྙན་གྱི་སྦྱོར་བ་དང་།  རྡོ་རྗེ་རྩེ་མོ་ནས་བཤད་པའི་སྡིག་པ་དྲལ་བ་དང་།  ཡེ་ཤེས་དབབ་ཅིང་བརྟན་པ་རྣམས་གསུངས་སོ། །གཉིས་པ་ནི།  
ལག་པ་གཉིས་པདྨ་འདྲ་བར་སྦྱར་བར་བྱས་ནས།  ཞེས་སོགས་སོ། །གསུམ་པ་ནི།  ས་བཅུ་དྲུག །བ་བཅུ་དྲུག །ཛ་བཅུ་དྲུག །ཏྭ་བཅུ་དྲུག་རྣམས་སོ་སོར་སྦྱར་ན་བཛྲ་སཏྭ་འབྱུང་ལ། ཧཱུྃ་ལ་སོགས་པའི་ས་བོན་བཅུ་དྲུག་དང་སྦྱར་བའི་ཚེ།  བཛྲ་
སཏྭ་ཧཱུྃ་བཛྲ་སཏྭ་ཛཿལ་སོགས་པ་བཅུ་དྲུག་ཏུ་འགྱུར་བ་ནི་སེམས་དཔའ་བཅུ་དྲུག་གི་སྙིང་པོ་དང་།  འབྱིན་སྔགས་སུ་རྩ་སྐྱ་པ་བཞེད་ལ།  རྗེ་བཙུན་གྱིས་སེམས་དཔའ་བཅུ་དྲུག་གི་ཞལ་ཕྱག་དེ་ཉིད་འདུས་པ་ལྟར་བྱ་དགོས་པས།  སྔགས་ཀྱང་དེ་
ཉིད་འདུས་པ་ལྟར་བྱ་དགོས་པར་དགོངས་ནས་གཞན་ཕན་འོད་ཟེར་དུ་དེ་ལྟར་གསུངས་ལ།  འདིར་བཛྲ་སཏྭ་ཧཱུྃ་ཞེས་པ་ལ་སོགས་པ་ཡི་གེ་ལྔའི་མཐའ་རྟེན་དུ་ཤམ་ཊ་དང་།  བྷུ་དང་། ཧོཿཏཾ་དང་།  ཁ་ཊྭཱཾ་རྣམས་སྦྱར་བའི་ཚེ་ལས་བཞིའི་རོལ་མོ་
བརྡུང་བའི་སྔགས་སུ་བཞེད་དོ། །ཡུམ་བཞིའི་སྔགས་ཀུན་རིག་གི་གནས་སྐབས་སུ་སྦྱར་དགོས་པ་ལ་བལྟས་ན་སྔ་མ་རྣམས་སེམས་དཔའ་བཅུ་དྲུག་གི་བཟླས་སྔགས་སུ་བྱས་ཀྱང་ཉེས་པ་མེད་དམ་སྙམ་མོ། །ལྔ་པ་མེ་ལྟར་འབར་བའི་ཕྲིན་ལས་ཀྱི་
དཀྱིལ་འཁོར་ལ་གཉིས་ཏེ།  ལྷ་རྣམས་ཀྱིས་ཞུས་པ་དང་།  ཕྱག་ན་རྡོ་རྗེས་བཤད་པའོ། །དང་པོ་ནི།  དེ་ནས་ལྷ་རྣམས་ཀུན་མགུ་ནས། །ཞེས་སོགས་སོ། །གཉིས་པ་ལ་བཞི་སྟེ།  སྔགས་ཀྱི་ཕྲེང་བ་དང་།  རྡུལ་ཚོན་གྱི་དཀྱིལ་འཁོར་དུ་
10-7-67a


སློབ་མར་དབང་བསྐུར་བ་དང་།  སྒྲུབ་པ་དང་།  ཕྲིན་ལས་བསྟན་པའོ། །དང་པོ་ནི།  དེ་ནས་བཅོམ་ལྡན་འདས་ཕྱག་ན་རྡོ་རྗེས།  རང་གི་སྐུ་ཞི་བ་དེ་བོར་ཏེ་རྡོ་རྗེ་སེམས་དཔའ་ཁྲོ་བོ་མེ་ཉི་མ་ཞེས་བྱ་བའི་སྐུར་ཞུགས་ནས་ཞེས་
སོགས་སོ། །འདིས་ཕྱག་ན་རྡོ་རྗེ་འཇིག་རྟེན་གསུམ་རྒྱལ་དུ་བསྒྱུར་ནས།  ཨོཾ་བཛྲ་སཏྭ་ཀྲོ་དྷ་སོགས་ཀྱི་སྔགས་ཕྱུང་བར་གསུངས་པས་སྲུང་འཁོར་བསྡུས་པའི་སྐབས་སུ་འདི་ལྟར་ཉམས་སུ་ལེན་པ་ནི་རྒྱུད་ཀྱི་དགོངས་པ་བླ་ན་མེད་པའོ། །
དཀྱིལ་འཁོར་སྒྲུབ་ཚུལ་ནི།  འཁོར་ལོ་རྩིབས་བཅུ་གཉིས་པ་རྩིབས་རྟེན་དང་བཅས་པའི་དབུས་ཀྱི་པད་ཉི་ལ།  བཛྲ་སཏྭ་ཀྲོ་དྷ་སོགས་ཀྱིས་འཇིག་རྟེན་གསུམ་རྒྱལ་བསྐྱེད་དེ།  ཤར་རྩིབས་སུ་ཨོཾ་ཏྲཻ་ལོ་ཀ་ཀ་ར་ཧཱུྃ་ཕཊ་ལས་འཇིག་
རྟེན་གསུམ་སྣང་།  ལྷོར་ཨོཾ་ཏྲཻ་ལོ་ཀ་ད་མ་ཀ་ཧཱུྃ་ཕཊ་ལས་གསུམ་འདུལ།  ནུབ་ཏུ་ཨོཾ་ཏྲཻ་ལོ་ཀ་ན་ཤཱ་ཡ་ཧཱུྃ་ཕཊ་ལས་གསུམ་འཇིག །བྱང་དུ་ཨོཾ་ཏྲཻ་ལོ་ཀ་བན་དྷ་ཧཱུྃ་ཕཊ་ལས་གསུམ་འཆིང་།  དེ་བཞིའི་གཡས་རྩིབས་ལ་རིམ་པར་ཨོཾ་ཨ་མྲྀ་ཏེ་
ཧཱུྃ་ཕཊ་ལས་དབང་ལྡན་དུ་བདུད་རྩི་འཁྱིལ་པ།  ཨོཾ་ཀ་ལ་དཎྜ་ཧཱུྃ་ཕཊ་ལས་མེ་རུ་དབྱུག་སྔོན་ཅན།  ཨོཾ་ཀ་ནི་དུ་ནི་ཧཱུྃ་ཕཊ་ལས་སྲིན་པོར་མི་གཡོ་བ།  ཨོཾ་ཧྲཱིཿཏྲི་ཧཱུྃ་ཕཊ་ལས་རླུང་དུ་རྟ་མགྲིན།  གཡོན་རྩིབས་ལ་རིམ་པར་ཨོཾ་ཀ་ལ་རཀྵ་སཱི་
ཧཱུྃ་ཕཊ་ལས་དུས་ཀྱི་བདུག་པ་མ།  ཨོཾ་ཀ་ལ་དན་ཏི་དུན་ཏི་ཧཱུྃ་ཕཊ་ལས་སྲིན་པོར་མེ་ཏོག་མ།  ཨོཾ་ཀ་ལ་རཀྵི་ཧཱུྃ་ཕཊ་ལས་རླུང་དུ་མར་མེ་མ།  ཨོཾ་ཀ་ལ་ཡཀྵ་ཧཱུྃ་ཕཊ་ལས་བྱང་ཤར་དུ་དུས་ཀྱི་གནོད་སྦྱིན་མོའོ། །ཞེས་རྩ་སྐྱ་པས་བཞེད་
10-7-67b


ལ།  རྗེ་བཙུན་གྱིས་དེ་བཞི་རིམ་པ་བཞིན།  དུས་ཀྱི་སྲིན་མོ།  དུས་ཀྱི་དབྱུག་པ་མ།  དུས་ཀྱི་མཚན་མོ།  དུས་ཀྱི་གནོད་སྦྱིན་མོར་བཞེད་དེ་སྔགས་དོན་ལ་དེ་ཉིད་གསལ་ལོ། །ཨོཾ་ཀ་ལ་ཨཾ་ཀུ་ཤ་ཧཱུྃ་ཕཊ་ལས་ཤར་སྒོར་ལྕགས་ཀྱུ།  ཨོཾ་ཀ་ལ་པཱ་
ཤ་ཧཱུྃ་ཕཊ་ལས་ལྷོ་སྒོར་ཞགས་པ།  ཨོཾ་ཀ་ལ་བན་དྷ་ཧཱུྃ་ཕཊ་ལས་ནུབ་སྒོར་ལྕགས་སྒྲོག །ཨོཾ་ཀ་ལ་རཀྵ་ཧཱུྃ་ཕཊ་ལས་བྱང་སྒོར་དུས་ཀྱི་འབེབས་པ་སྟེ།  དེ་རྣམས་ཐམས་ཅད་སྐུ་མདོག་སྔོ་ནག་ཞལ་ཕྱག་མཐའ་ཡས་པ་ཁྲོ་བོའི་རྒྱན་ཐམས་ཅད་
ཀྱིས་བརྒྱན་ཅིང་།  དབང་ཕྱུག་ཆེན་པོ་ལ་སོགས་པའི་རོའི་གདན་ལ་ཞབས་གཡོན་བརྐྱང་ཞིང་གཡས་བསྐུམ་སྟེ།  གྲི་གུག་དང་ཐོད་པ་ལ་སོགས་པའི་མཚོན་ཆས་རྒྱུ་མ་དྲངས་ནས་ཞལ་དུ་གསོལ་བའོ། །གཉིས་པ་ལ་གཉིས་ཏེ།  སློབ་
དཔོན་གྱི་ལས་དང་།  སློབ་མ་གཞུག་ཅིང་དབང་བསྐུར་བའོ། །དང་པོ་ལ་གཉིས་ཏེ།  བྲི་ཞིང་ལྷ་དགོད་པ་ལ་སོགས་པ་དང་།  ཞུགས་ཏེ་སྒྲུབ་པའོ། །དང་པོ་ནི།  དེ་ནས་དཀྱིལ་འཁོར་མི་བཟད་པ། །ཞེས་སོགས་ཏེ་སྔར་གྱི་རྡོ་རྗེ་སེམས་
དཔའི་སྐུར་ཞུགས་ནས་ཞེས་པ་ཁྲོ་བོ་ཡིན་པ་གཞུང་འདིས་ཤེས་སོ། །གཉིས་པ་ནི།  དེ་ནས་སློབ་དཔོན་བདག་ཉིད་ཅེས་སོགས་སོ། །གཉིས་པ་ནི།  དེ་ནས་སློབ་མ་བསྡུས་ནས་ཞེས་སོགས་ཏེ།  སྔགས་བརྒྱད༷་ནི་རིམ་པ་ལྟར་དཀྱིལ་
འཁོར་དུ་འཇུག་པ་དང་།  དམ་ལ་གཞག་པ་དང་།  ཕྲེང་བ་དོར་བ་དང་།  མིག་དབྱེ་བ་དང་།  དཀྱིལ་འཁོར་བསྟན་པ་དང་།  དམ་ཚིག་བརྟན་པར་བྱེད་པ་དང་།  ཆུའི་དབང་བསྐུར་བའི་སྔགས་ཡིན་ལ།  དེ་བཞིན་དུ་དབང་བསྐུར་
10-7-68a


བར་བྱའོ་ཞེས་པས་ནི་དབང་བསྐུར་ལྷག་མ་རྣམས་བསྟན་ནོ། །གསུམ་པ་ནི།  དེ་ནས་དེ་དག་གི་སྒྲུབ་པ་བཤད་དེ་ཞེས་སོགས་སོ། །བཞི་པ་ལ་གསུམ་སྟེ།  ཞི་བ་དང་།  རྒྱས་པ་དང་།  དབང་ངོ་། །དང་པོ་ལ་བཅུ་སྟེ།  
ཐབ་ཁུང་དང་བཅས་པའི་དཀྱིལ་འཁོར་བྲི་བ་དང་།  མཆོད་པའི་རྫས་དགོད་པ་དང་།  ཕྱོགས་ཀྱི་ཤིས་པ་སྔོན་དུ་སོང་ནས་ལྷའི་རྣལ་འབྱོར་དང་།  སྒྲུབ་པ་པོའི་ཆས་དང་བསྲེག་རྫས་ཀྱི་ཁྱད་པར་དང་།  ཡམ་ཤིང་དང་བུད་ཤིང་གི་
ཁྱད་པར་དང་།  བུད་ཤིང་ལ་མེ་སྦར་བ་སྔོན་དུ་སོང་ནས་མེ་ལྷའི་ཁྱད་པར་བསྟན་པ་དང་།  མེ་ལྷ་དང་།  ཡེ་ཤེས་ཀྱི་ལྷ་ལ་སྦྱིན་སྲེག་བྱ་བ་དངོས་དང་།  བསྒྲུབ་བྱ་ལ་བསྲུང་བ་དང་།  གཤེགས་སུ་གསོལ་བའི་ཆོ་ག་དང་།  མ་
གྲུབ་ན་བསྐྱར་བའི་ཆོ་ག་བསྟན་པའོ། །དང་པོ་ནི།  དེ་ནས་ཁུང་བུ་གསུམ་ལ་རྣམ་གཅིག་ནི། །ཞེས་སོགས་སོ། །གཉིས་པ་ནི།  དྲི་ཞིམ་ཆུས་བཀང་མདོག་འོད་དཀར་གྱུར་ལ། །ཞེས་སོགས་སོ། །གསུམ་པ་ནི།  ཁ་ནི་ཤར་
ཕྱོགས་བལྟས་ཏེ་སྦྱིན་སྲེག་བྱ། །ཞེས་སོགས་སོ། །བཞི་པ་ནི།  གོས་ལ་སོགས་པ་ཕྲེང་བ་དཀར་གྱིས་བརྒྱན། །ཞེས་སོགས་སོ། །ལྔ་པ་ནི།  འདབ་བདུན་འབྲས་བུ་མེ་ཏོག་རྣམས། །ཞེས་སོགས་སོ། །དྲུག་པ་ནི།  བུད་
ཤིང་དེ་ལས་བྱུང་བའི་མེ། །ཞེས་སོགས་སོ། །བདུན་པ་ནི།  དེ་ནས་དེ་ལྟར་བསམས་ནས་ཀྱང་། །ཞེས་སོགས་སོ། །བརྒྱད་པ་ནི།  དེ་ཡི་ལུས་ལ་དབང་བསྐུར་ཞིང་། །ཞེས་སོགས་སོ། །དགུ་པ་ནི།  མཇུག་ཏུ་མངོན་པར་
10-7-68b


མཆོད་ནས་ནི། །ཞེས་སོགས་སོ། །བཅུ་པ་ནི།  ཅི་སྟེ་དེ་ནི་སྡིག་ཅན་ནམ། །ཞེས་སོགས་སོ། །གཉིས་པ་རྒྱས་པ་ལ་བཅུ་གཅིག་སྟེ།  སྦྱིན་སྲེག་གི་གནས་དང་།  ཐབ་དང་དཀྱིལ་འཁོར་བྲི་བ་དང་།  མཆོད་པའི་རྫས་དགོད་པ་དང་།  
སྒྲུབ་པའི་ཆོས་དང་ཕྱོགས་ཀྱི་ཤིས་པ་སྔོན་དུ་སོང་བས་ལྷའི་རྣལ་འབྱོར་བྱ་བ་དང་།  ཏིང་ངེ་འཛིན་དང་བཟླས་བརྗོད་ཀྱི་ཁྱད་པར་དང་།  མཆོད་པ་དང་།  ཡམ་ཤིང་དང་བུད་ཤིང་གི་ཁྱད་པར་དང་།  བསྲེག་རྫས་ཀྱི་ཁྱད་པར་དང་།  མེ་ལྷ་ལ་སྦྱིན་
སྲེག་བྱ་བ་དང་།  ཡེ་ཤེས་ཀྱི་ལྷ་ལ་སྦྱིན་སྲེག་བྱ་བ་དང་དབང་བསྐུར་བ་དང་།  བསྲུང་བའོ། །དང་པོ་ནི།  ད་ནི་རྒྱས་པའི་ལས་བཤད་དེ། །ཞེས་སོགས་སོ། །གཉིས་པ་ནི།  ཁྲུ་དོའམ་ཡང་ན་ཁྲུ་བཞི་པའམ། །ཞེས་སོགས་སོ། །གསུམ་པ་
ནི།  བུམ་པ་ཁ་དོག་གསེར་འདྲ་ཞིང་། །ཞེས་སོགས་སོ། །བཞི་པ་ནི།  བདག་ཉིད་གོས་དང་རྒྱན་རྣམས་དང་། །ཞེས་སོགས་སོ། །ལྔ་པ་ནི།  ལྷ་ཡི་ཡིད་བཞིན་ནོར་རྒྱལ་མཚན། །ཞེས་སོགས་སོ། །དྲུག་པ་ནི།  དུང་དང་
པི་ཝང་ཅང་ཏེའུ་དང་། །ཞེས་སོགས་སོ། །བདུན་པ་ནི།  ཐབ་ཁུང་ཁྱད་པར་ཉིད་ལས་ཀྱང་། །ཞེས་སོགས་སོ། །བརྒྱད་པ་ནི།  འབྲུ་རྣམས་ཐམས་ཅད་འབྱོར་བ་དང་། །ཞེས་སོགས་སོ། །དགུ་པ་ནི།  མེ་ལྷ་གསེར་དང་འདྲ་བ་ལ། །ཞེས་
སོགས་སོ། །བཅུ་པ་ནི།  དེ་ཡི་ལུས་ལ་ཁྲོ་རྒྱལ་པོ། །ཞེས་སོགས་སོ། །བཅུ་གཅིག་པ་ནི།  དེ་ནས་མཇུག་ཏུ་འོད་ཟེར་གྱིས། །ཞེས་སོགས་སོ། །གསུམ་པ་དབང་ལ་བཅུ་གསུམ་སྟེ།  ལྷ་དང་བསམ་པ་བསྟན་པ་དང་།  གནས་དང་ཐབ་ཁུང་
10-7-69a


གི་ཁྱད་པར་དང་།  ཡམ་ཤིང་དང་བུད་ཤིང་བསྟན་པ་དང་།  བསྲེག་པའི་རྫས་དང་།  ཐབ་ཁུང་ལ་བྱུག་པ་བྱ་ཞིང་མཚན་མ་དྲི་བ་དང་།  མཆོད་པ་དང་།  སྒྲུབ་པ་པོའི་ཆས་གོས་སྔོན་དུ་སོང་ནས་ཕྱོགས་དང་དུས་ཀྱི་
ཤིས་པ་དང་།  ཏིང་ངེ་འཛིན་གྱི་ཁྱད་པར་དང་།  སྦྱིན་སྲེག་གི་མེ་ལྷའི་ཁྱད་པར་དང་།  སྦྱིན་སྲེག་གི་མེ་ལྷའི་ཕན་ཡོན་དང་།  བསྲུང་བ་དང་།  གཤེགས་སུ་གསོལ་ཞིང་རང་ལ་བསྲུང་བའོ། །དང་པོ་ནི།  དབང་ནི་ཞེས་སོགས་སོ། །གཉིས་
པ་ནི།  ཕྱོགས་དང་མཐུན་པའི་ས་ཕྱོགས་སམ། །ཞེས་སོགས་སོ། །གསུམ་པ་ནི།  དེར་ནི་སྟེགས་བུ་ཁྲུ་བརྒྱད་པ། །ཞེས་སོགས་སོ། །བཞི་པ་ནི།  ཐ་མ་མཆོག་གི་ཁྱད་པར་ལས། །ཞེས་སོགས་སོ། །ལྔ་པ་ནི།  མེ་ཏོག་
འབྲས་བུ་དམར་པོའམ། །ཞེས་སོགས་སོ། །དྲུག་པ་ནི།  དེ་ནས་ཐབ་ཁུང་དམར་པོ་ལ། །ཞེས་སོགས་སོ། །བདུན་པ་ནི།  མེ་ཏོག་དམར་པོ་ལ་སོགས་པས། །ཞེས་སོགས་སོ། །བརྒྱད་པ་ནི།  དཔལ་ལྡན་གོས་དང་ཕྲེང་བ་དང་། །
ཞེས་སོགས་སོ། །དགུ་པ་ནི།  པདྨ་དམར་པོའི་གདན་བསམས་ལ། །ཞེས་སོགས་སོ། །བཅུ་པ་ནི།  མདའ་དང་གཞུ་ཐོགས་དེ་བཞིན་དུ། །ཞེས་སོགས་སོ། །བཅུ་གཅིག་པ་ནི།  ལས་བྱེད་པ་ནི་གང་ཡིན་པ། །ཞེས་སོགས་སོ། །བཅུ་
གཉིས་པ་ནི།  ལས་རྣམས་ཟིན་པར་གྱུར་པ་དང་། །ཞེས་སོགས་སོ། །བཅུ་གསུམ་པ་ནི།  དེ་ནས་རྡོ་རྗེ་འདོད་པ་ཡིས། །ཞེས་སོགས་སོ། །བཞི་པ་རྗེས་སུ་ཡི་རང་བ་ལ་བདུན་ཏེ།  གང་གིས་བསྟོད་པ་དང་།  མཆོད་པ་དང་།  བསྟོད་པའི་
10-7-69b


ཡུལ་དང་།  བསམ་པ་དང་།  བསྟོད་པའི་ཚིག་དང་།  བསྟོད་པའི་ཕན་ཡོན་དང་།  རྗེས་སུ་ཡི་རང་བ་དངོས་སོ། །དང་པོ་ནི།  དེ་ནས་བརྒྱ་བྱིན་ཚངས་སོགས་ལྷ། །ཞེས་སོགས་སོ། །གཉིས་པ་ནི།  ཡང་དང་ཡང་དུ་སྟེ་ཞེས་སོགས་སོ། །གསུམ་པ་ནི།  ཕྱག་
ན་རྡོ་རྗེ་རྒྱལ་སྤྱན་ལ། །ཞེས་པའོ། །བཞི་པ་ནི།  དགའ་བའི་བསམ་པས་བསྟོད་བྱེད་པ། །ཞེས་སོགས་སོ། །ལྔ་པ་ནི།  སེམས་དཔའ་བཅུ་དྲུག་གི་སྒོ་ནས་མཚན་བརྒྱ་རྩ་བརྒྱད་དུ་སྦྱར་བ་ལ།  དང་པོ་རྡོ་རྗེ་སེམས་དཔའི་སྒོ་ནས་མཚན་བཅུ་ནི།  སངས་རྒྱས་ཀུན་པས་
སྔར་སངས་རྒྱས། །ཞེས་སོགས་སོ། །རྡོ་རྗེ་རྒྱལ་པོའི་སྒོ་ནས་མཚན་བརྒྱད་ནི།  རྡོ་རྗེ་ཡན་ལག་སོགས་སོ། །རྡོ་རྗེ་ཆགས་པའི་སྒོ་ནས་མཚན་བརྒྱད་ནི།  ཕྱག་ན་རྡོ་རྗེ་སོགས་སོ། །རྡོ་རྗེ་ལེགས་པའི་སྒོ་ནས་མཚན་བརྒྱད་ནི།  རྡོ་རྗེ་པདྨ་སོགས་སོ། །རྡོ་རྗེ་ལས་ཀྱི་སྒོ་
ནས་མཚན་དྲུག་ནི།  རྡོ་རྗེ་རྒྱུ་སོགས་སོ། །རྡོ་རྗེ་སྲུང་བའི་སྒོ་ནས་མཚན་བརྒྱད་ནི།  རྡོ་རྗེ་འཇིགས་པ་སོགས་སོ། །རྡོ་རྗེ་གནོད་སྦྱིན་གྱི་སྒོ་ནས་མཚན་དགུ་ནི།  རྡོ་རྗེ་གནོད་སྦྱིན་སོགས་སོ། །རྡོ་རྗེ་ཁུ་ཚུར་གྱི་སྒོ་ནས་མཚན་བདུན་ནི།  བསྒྲུབ་དཀའ་སོགས་སོ། །
རྡོ་རྗེ་རིན་ཆེན་གྱི་སྒོ་ནས་མཚན་དྲུག་ནི།  འོད་སྟུག་པ་ནི་ཞེས་སོགས་སོ། །རྡོ་རྗེ་རྒྱལ་མཚན་གྱི་སྒོ་ནས་མཚན་དྲུག་ནི།  རྡོ་རྗེ་རྒྱལ་མཚན་སོགས་སོ། །རྡོ་རྗེ་གཟི་བརྗིད་ཀྱི་སྒོ་ནས་མཚན་དྲུག་ནི།  སྒྲ་ཆེན་ཞིང་ནི་སོགས་སོ། །རྡོ་རྗེ་བཞད་པའི་སྒོ་ནས་
མཚན་དྲུག་ནི།  གློག་བཞིན་སོགས་སོ། །རྡོ་རྗེ་ཆོས་ཀྱི་སྒོ་ནས་མཚན་བདུན་ནི།  སྤྱན་དམར་སོགས་སོ། །རྡོ་རྗེ་རྣོན་པོའི་སྒོ་ནས་མཚན་ལྔ་ནི།  འཁྱིལ་ཞིང་སོགས་སོ། །རྡོ་རྗེ་འཁོར་ལོའི་སྒོ་ནས་མཚན་བཞི་ནི།  འདོད་ཆགས་ཞེ་སྡང་སྲིད་
10-7-70a


མཐར་མཛད། །སོགས་སོ། །རྡོ་རྗེ་སྨྲ་བའི་སྒོ་ནས་མཚན་བཞི་ནི།  སྲིད་དང་སྲིད་མིན་རྣམ་སྦྱོང་བ། །སོགས་སོ། །དེ་ལྟར་མཚན་བརྒྱ་རྩ་བརྒྱད་པོ་སུ་ལ་ལྡན་ན།  རྡོ་རྗེ་རབ་སྐྱེས་རྡོ་རྗེ་སེམས། །སོགས་སོ། །དྲུག་པ་
ནི།  གང་གིས་འདི་བྲིས་བཀླགས་གྱུར་ཏམ། །སོགས་སོ། །བདུན་པ་ནི།  བཅོམ་ལྡན་འདས་ཀྱིས་བཀའ་སྩལ་པ། །སོགས་སོ། །བརྟག་པ་ཕྱི་མའི་ཚིག་དོན་རྒྱས་པར་གཞན་དུ་འཆད་པར་འགྱུར་རོ། །རྫོགས་སངས་རྒྱས་དང་
མཛད་པ་མཚུངས་པའི་རྒྱུད་རྒྱལ་འདི། །རིན་ཆེན་བཟང་པོའི་གསུང་གི་རྗེས་འབྲང་ས་སྐྱ་པའི། །བཞེད་པ་ཇི་བཞིན་དམ་པའི་གསུང་ལ་བརྟེན་ནས་ནི། །བདག་དང་སྐལ་པ་མཉམ་པ་གཞན་ལའང་ཕན་ཕྱིར་བཤད། །བྱིས་བློས་རྒྱུད་དོན་
རང་དགར་འགྲེལ་བར་མི་ནུས་ཤིང་། །སྔོན་མེད་གཏམ་གྱིས་གདུལ་བྱ་བསླུ་བར་འདོད་མིན་ཡང་། །འཁྲུལ་ཟད་གོང་མའི་གསུང་གི་ཆ་ཤས་གོ་རིམ་བཞིན། །ལེགས་པར་བཀོད་ལ་ཉེས་པར་འགྱུར་བ་མེད་སྙམ་སེམས། །འདི་སྦྱར་དགེ་ཚོགས་
མཛོད་སྤུའི་འོད་ལྟར་དཀར་བ་ཡིས། །རྒྱུ་དང་འབྲས་བུས་བསྡུས་པའི་ངན་སོང་ཀུན་ཞི་ནས། །ཐེག་ཆེན་ལུས་བཟང་ཐོབ་སྟེ་དཔག་མེད་སྤྲུལ་པ་ཡིས། །སངས་རྒྱས་ཞིང་གི་དགའ་ཚལ་ཀུན་ཏུ་གང་བར་ཤོག །ངན་སོང་ཐམས་ཅད་
ཡོངས་སུ་སྦྱོང་བའི་བརྟག་པའི་རྒྱལ་པོའི་རྣམ་པར་བཤད་པ་གཞན་ཕན་ཀུན་ཁྱབ་ཅེས་བྱ་བ་འདི་ནི།  བདེ་བར་གཤེགས་པའི་རིང་ལུགས་པ་མཐའ་དག་གི་གཙུག་གི་ནོར་བུར་གྱུར་པ་རྗེ་བཙུན་མཁས་པའི་དབང་པོ་ཀུན་དགའ་བཟང་པོ་དང་།  ངེས་
10-7-70b


དོན་གྱི་ཟབ་མོའི་གནད་ཕྱིན་ཅི་མ་ལོག་པར་སྟོན་པ་ལ་འགྲན་ཟླ་ཐམས་ཅད་དང་བྲལ་བ་མཚུངས་མེད་དཀོན་མཆོག་རྒྱལ་མཚན་དཔལ་བཟང་པོ་ལ་སོགས་པ་ཡོངས་འཛིན་དུ་མའི་ཞབས་རྡུལ་སྤྱི་བོས་བླངས་པ་ལ་བརྟེན་ནས་སྡེ་སྣོད་དང་རྒྱུད་སྡེའི་དོན་ལ་བློ་ཁ་ཅུང་ཟད་
ཕྱོགས་པ་ཤཱཀྱའི་དགེ་སློང་བསོད་ནམས་སེང་གེས་མཁས་གྲུབ་ཆེན་པོ་གཡག་གི་དངོས་སློབ་མཁན་ཆེན་བློ་གྲོས་དཔལ་བཟང་པོའི་གསུང་གིས་བསྐུལ་ཞིང་།  རང་གི་སློབ་མ་དུ་མས་ཉེ་བར་བསྐུལ་བའི་ངོར།  ས་མོ་གླིང་གི་ལོ་སྨིན་དྲུག་ཟླ་བའི་ཡར་གྱི་
ངོ་ལ་དཔལ་ཨེ་ཝཾ་ཆོས་ལྡན་དུ་སྦྱར་བའི་ཡི་གེ་པ་ནི་མདོ་ཁམས་པ་འོད་ཟེར་བཟང་པོ་དང་།  ལ་སྟོད་པ་གཞོན་ནུ་བཟང་པོས་བགྱིས་སོ། །དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་
རྒྱས་ཡུན་དུ་འབར་གྱུར་ཅིག །དགེའོ། །དགེའོ། །དགེའོ།།    །།

10-8-1a


༄༅།  །ཀུན་རིག་གི་ཞི་བའི་སྦྱིན་སྲེག་བཞུགས་སོ།།    །།
10-8-1b


༄༅།  །བླ་མ་དང་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ངན་སོང་ཐམས་ཅད་ཡོངས་སུ་སྦྱོང་བའི་རྒྱུད་ལས་ཞི་རྒྱས་དབང་དྲག་གི་སྦྱིན་སྲེག་བཞི་གསུངས་པའི་ཞི་བའི་སྦྱིན་སྲེག་ལ་དོན་དགུ་ཡོད་པ་ལས།  དང་པོ་
ཐབ་བཅའ་བ་ནི།  ཐབ་ཐ་མ་ཁྲུ་གང་བའི་དབང་དུ་བྱས་ན།  མདུན་བསྐྱེད་ཀྱི་དཀྱིལ་འཁོར་ཡོད་ན་དེའི་ནུབ་དང་།  མེད་ན་གནས་ཁང་གི་ཤར་ཕྱོགས་སུ་ས་གཞི་བྱི་དོར་ལེགས་པར་བྱས་པར་རྒྱར་ཁྲུ་གསུམ་པའི་ཚངས་ཟུར་བརྒྱད་
བཏབ་སྟེ།  དབུས་ནས་ཕྱོགས་རེ་རེར་སོར་སུམ་ཅུ་སོ་དྲུག་ཡོད་པ་ལ།  སོར་བཞི་པ་ལྔ་དང་།  གཉིས་པ་དྲུག་དང་།  ཡང་བཞི་པ་གཅིག་སྟེ་ཟླུམ་སྐོར་བཅུ་གཉིས་བྱས་པའི།  དང་པོ་ལ་ཕྱོགས་གཉིས་སུ་སོར་བརྒྱད་ཡོད་པ་ནི་འཁོར་
ལོའི་ལྟེ་བ་སྟེ།  ཟླ་བ་ལ་གནས་པའི་རྡོ་རྗེ་བྲིའོ། །གཉིས་པ་ནི་འཁོར་ལོ་དཀར་པོ་རྩིབས་བརྒྱད་པ་སྟེ།  ཤར་ནས་ཕྱོགས་བཞིར་འཁོར་ལོ་དང་།  རིན་པོ་ཆེ་དང་།  པདྨ་དང་།  སྣ་ཚོགས་རྡོ་རྗེ་དང་།  ཤར་ལྷོ་ནས་མཚམས་བཞིར་
10-8-2a


སྤྱན་གྱིས་མཚན་པའི་འཁོར་ལོ་དང་།  རྡོ་རྗེ་དང་།  པདྨ་དང་།  ཨུཏྤ་ལ་བྲིའོ། །གསུམ་པ་ལ་འཁོར་ལོ་སྔོན་པོ་རྩིབས་བཅུ་དྲུག་པར་བྱས་ནས་སེམས་དཔའ་བཅུ་དྲུག་གི་མཚན་མ་བྲིས་ཏེ།  དེ་ཡན་ཆད་ནི་
ཐབ་ནང་གི་རྒྱ་ཚད་ཁྲུ་གང་བའོ། །བཞི་པ་ནི་ཐབ་ཀྱི་ཁ་ཁྱེར་ཏེ།  གཞི་སེར་པོ་ལ་རྡོ་རྗེ་དཀར་པོ་རྩེ་ལྔ་པ་ཁོར་ཡུག་ཏུ་བྲི།  ལྔ་པ་ནི་མུ་རན་ཏེ།  གཞི་དཀར་པོ་ལ་སྣ་ཚོགས་རྡོ་རྗེ་འཁོར་མར་བྲི།  དྲུག་པ་ནི་ཐབ་ཀྱི་ཁ་བད་དེ།  གཞི་ལྗང་
གུ་ལ་རིན་པོ་ཆེ་སེར་པོ་འཁོར་བར་བྲི།  བདུན་པ་ནི་ཐབ་ཀྱི་ཁ་འཕྱང་བ་སྟེ།  གཞི་དཀར་པོ་ལ་པདྨ་དམར་པོ་འཁོར་བར་བྲི།  བརྒྱད་པ་དང་།  དགུ་པ་དང་།  བཅུ་པ་གསུམ་ནི་ལྷ་སྣམ་ཕྱོགས་མདོག་ཅན་ཏེ།  དང་པོ་ལ་ཕྱོགས་བཞིར་
སྒོ་བའི་མཚན་མ་དང་།  མཚམས་བཞིར་སྒེག་སོགས་བརྒྱད་ཀྱི་མཚན་མ་བྲི།  གཉིས་པ་ལ་བྱང་སེམས་བཅུ་དྲུག །གསུམ་པ་ལ་ཉན་ཐོས་རང་རྒྱལ།  ཁྲོ་བོ་བཅུ་དྲུག་གི་མཚན་མ་བྲི།  བཅུ་གཅིག་པ་ལ་གཞི་སྔོན་པོ་ལ་དཔལ་མགོན་
10-8-2b


བདུན་ཅུ་རྩ་ལྔ་སོགས་འཇིག་རྟེན་པའི་ཁོར་ཡུག་གི་མཚན་མ་རྣམས་བྲི།  བཅུ་གཉིས་པ་ལ་གྲྭ་བཞིར་ཟླ་ཕྱེད་རྡོ་རྗེ་བྲིས་ཏེ།  ཐབ་རྐྱང་གི་ལུགས་སོ། །ཡང་ཐབ་དཀྱིལ་འཁོར་དང་འབྲེལ་བར་བྱེད་ན་རྒྱར་ཁྲུ་བཞི་དང་སོར་བརྒྱད་པའི་ཚངས་ཐིག་བཏབ་ནས་ཟླུམ་ཐིག་བདུན་པ་
ཡན་ཆད་སྔ་མ་བཞིན་བྱས་ལ།  དེའི་ཕྱི་རོལ་དུ་སོར་ལྔ་པ་གཉིས་ཀྱིས་ལོགས་ཐིག་གྲུ་བཞིར་བཏབ་པ་ནི་ཆ་ཆེན་གཉིས་ཡིན་པས་རྩིག་པ་ནས་མདའ་ཡབ་ཀྱི་བར་གྱི་སྒོ་ལ་སོགས་པ་བྱའོ། །དེ་ནས་སོར་ལྔ་ལ་རྟ་བབས་བང་རིམ་བཞི། དེ་ནས་སོར་ལྔ་ལ་པདྨ།  ཆོས་འཁོར།  
གདུགས་བྱ།  དེ་ནས་མདའ་ཡབ་ཀྱི་ཟུར་ནས་ཁོར་ཡུག་ལ་སོར་གཉིས།  རྡོ་ར་ལ་སོར་གཅིག །མེ་རི་ལ་སོར་གསུམ།  ཟླ་ཕྱེད་རྡོ་རྗེ་ལ་སོར་གཉིས་བསྐོར།  དེ་ལྟར་བྲིས་པའི་ནང་གི་སྒོ་བཞི་ལ་སྒོ་བ་བཞི་དང་།  གྲྭ་བཞི་ལ་སྒེག་སོགས་བརྒྱད།  རྟ་བབས་ཀྱི་གཡས་གཡོན་
ལ་བྱང་སེམས་དང་ཉན་རང་རྣམས་དང་།  རྭ་རྩ་ལ་ཁྲོ་བོ་བཅུ་དྲུག་སྟེ།  ཀུན་རིག་གི་སྒོ་རྐྱང་གི་ལུགས་ལྟར་ཐམས་ཅད་རྡུལ་ཚོན་གྱིས་བྲིའོ། །གཉིས་པ་བུད་ཤིང་བཤམ་པ་ནི།  སྲོག་ཆགས་མེད་པའི་ལྕི་བ་སྐམ་པོའམ།  འོ་མ་ཅན་གྱི་ཤིང་སོར་བརྒྱད་པ་ཡན་
ཆད་ཁྲུ་གང་ཙམ་བརྩིགས་ནས་ནང་དུ་མེ་ཚང་བཅས་ལ་གཞག་གོ།  གསུམ་པ་མཆོད་པ་སོགས་བཤམ་པ་ནི།  ཐབ་ཀྱི་གཡས་རང་གི་གཡོན་དུ་མཆོད་ཡོན་སྔོན་དུ་འགྲོ་བའི་ཉེར་སྤྱོད་ལྔ་བཤམ།  གཞི་བདག་དང་མེ་ལྷའི་དཀར་གཏོར་གཉིས་ཀྱང་བཤམ།  
མདུན་བསྐྱེད་དང་མ་འབྲེལ་ན་ཆ་གསུམ་སོགས་ཀྱི་གཏོར་མ་ལྔ་པོའང་ཐབ་ཀྱི་རྒྱབ་ཏུ་བཤམ།  གཞན་ཡང་གདུགས།  རྒྱལ་མཚན།  བ་དན།  བླ་རེ་སོགས་ཀྱིས་བརྒྱན།  བཞི་པ་བསྲེག་རྫས་བཤམ་པ་ནི།  ཐབ་ཀྱི་གཡོན་རང་གི་གཡས་སུ་བསྲེག་རྫས་
10-8-3a


རྣམས་བཤམ་སྟེ།  རྒྱུད་ཀྱི་དངོས་བསྟན་ལ།  མར་དང་འོ་མ་སྦྲང་རྩི་དང་། །འབྲས་ཡོས་ཡུངས་ཀར་བསྲེས་པ་དང་། །དེ་ཡི་རུས་པ་ཤ་ལ་སོགས། །མེད་ན་མིང་ནས་སྨོས་ཏེ་བྱ། །མར་དང་འོ་མ་ཏིལ་བསྒོས་ལ། །ཏིལ་དང་ཡུངས་ཀར་
འབྲས་རྣམས་ལ། །དྲི་ཡི་ཆུ་ཡིས་ལེགས་བཀང་སྟེ། །ཞེས་སོགས་དང་།  ཏིལ་དང་ཡུངས་ཀར་འབྲས་རྣམས་དང་། །ར་ཡི་འོ་མར་ལྡན་པ་ལ། །དྲི་ཡིས་བསྐུས་པའི་ཡམ་ཤིང་གིས། །ཞེས་པ་ཙམ་ལས་མ་གསུངས་ཀྱང་།  ལག་ལེན་ལ་བསྲེག་
རྫས་ཚང་མ་བྱེད་དེ།  སོར་བརྒྱད་པའི་ཡམ་ཤིང་མང་པོ་དང་།  མར་དཀར་གྱི་ཁུ་བ་དང་།  ཏིལ་དང་།  བཟའ་བ་སྣ་ཚོགས་བསྲེས་པའི་ཟས་མཆོག་དང་།  འབྲས་དྲུས་པ་དང་།  འབྲས་སོ་བ་དང་།  ནས་དང་།  གྲོ་དང་།  སྲན་མ་དང་།  དཱུ་རྦ་
དང་།  ཀུ་ཤ་སྟེ།  རྫས་བཅུ་གཅིག་པོ་རིམ་པ་བཞིན་དུ་བཤམ་པའམ།  ཡང་ན་ཡམ་ཤིང་།  མར།  ཏིལ།  དཱུརྦ།  ཀུ་ཤ་རྣམས་མ་གཏོགས་པའི་བསྲེག་རྫས་གཞན་རྣམས་སྣོད་ཆེ་བ་གཅིག་ཏུ་བསྲེས་ནས་བཤམས་ཏེ།  རྩ་རིག་བཟླས་ཤིང་འབུལ་བ་ལ་
དགོངས་ལ།  སྔགས་སོ་སོས་འབུལ་བ་ན་བསྲེ་མི་རུང་ངོ་། །གཞན་ཡང་རང་གི་མདུན་གྱི་གཡས་སུ་རྡོ་རྗེ།  གཡོན་དུ་དྲིལ་བུ།  དེ་གཉིས་ཀྱི་བར་དུ་དགང་བླུགས་གཟར་ཁ་སྦྱར་ལ།  རྡོ་རྗེའི་གཡས་སུ་དུང་ཆོས་དྲིའི་ཆུས་བཀང་བ།  ཀུ་ཤའི་ཆུན་པོ་དང་བཅས་
པའི་བསང་ཆུའང་བཤམ་མོ། །ལྔ་པ་སྒྲུབ་པ་པོའི་ཡན་ལག་ནི།  དུས་སྔ་དྲོ།  ཆས་གོས་དཀར་པོ་གྱོན་ཏེ།  ཐབ་ཁུང་གི་ནུབ་ཕྱོགས་ནས་ཤར་དུ་ཁ་བལྟས་ཏེ་སེམས་དཔའི་སྐྱིལ་ཀྲུང་གིས་འདུག་སྟེ།  ནད་གདོན་དང་སྡིག་སྒྲིབ་ཞི་བར་འདོད་པའི་བསམ་པས་
10-8-3b


མདུན་བསྐྱེད་དང་མ་འབྲེལ་ན།  སྲུང་འཁོར་རྒྱས་བསྡུས་གང་རུང་སྔོན་དུ་སོང་བའི་བདག་བསྐྱེད་དཔའ་བོ་གཅིག་པའི་བཟླས་པ་དང་།  མཆོད་བསྟོད་ཡན་ཆད་བྱ།  མདུན་བསྐྱེད་དང་འབྲེལ་ན།  ཆ་གསུམ་ཡན་ཆད་ཚར་བའི་སྐབས་སུ་ཐབ་དྲུང་དུ་བསྡད་ལ་སྦྱིན་སྲེག་
ལ་འཇུག་པ་ཡིན་གྱི།  ཐབ་དྲུང་དུ་མངོན་རྟོགས་བསྒོམ་དགོས་པ་ནི་མ་ཡིན་ནོ། །དྲུག་པ་མེ་སྦར་བ་ནི།  རས་མདེའི་རྩེ་མོ་མར་མེ་ལས་སྦར་བ་རྡོ་རྗེ་དང་བཅས་པའི་ལག་པས་ཐབ་ལ་གཡས་སུ་ལན་གསུམ་བསྐོར་ཞིང་།  ཨོཾ་བཛྲ་ཛྭ་ལ་ཛྭ་ལ་ཧཱུྃ་ཕཊ།  ཅེས་བརྗོད་དེ་
ཤར་ལྷོ་ནས་ཐབ་དབུས་སུ་བཅུག་ནས།  ཨགྣེ་ཛྭ་ལ་རཾ།  ཞེས་བརྗོད་ཅིང་བླུགས་གཟར་ལན་གསུམ་གྱིས་མེ་གསོའོ། །དེ་ནས་ཀུ་ཤ་འབུལ་ན་སྐབས་འདིར་འབུལ་ཞིང་།  གང་ལྟར་ཡང་བསང་ཆུས་རྫས་རྣམས་ལ་གཏོར་ཏེ།  ཨོཾ་བཛྲ་ཨ་མྲྀ་ཏེ་ཧཱུྃ་ཕཊ།  ཨོཾ་ཤཱུ་ཉ་ཏཱ་
སོགས་བརྗོད་པས།  མཆོད་རྫས་དང་བསྲེག་རྫས་མི་དམིགས་ཏེ་སྟོང་པའི་ངང་ལས་རིན་པོ་ཆེ་ལས་གྲུབ་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཨོཾ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་མཆོད་ཡོན་ནས་ཞལ་ཟས་ཀྱི་བར་དང་།  གཞན་ཡང་རོལ་མོ་དང་འཕན་
གདུགས་ལ་སོགས་པའི་མཆོད་རྫས་རྣམས་དང་།  ཡམ་ཤིང་མར་ཏིལ་ལ་སོགས་པའི་བསྲེག་རྫས་རྣམས་ལྷ་རྫས་ལས་གྲུབ་པ།  ངོ་བོ་བཟང་ཞིང་རྒྱ་ཆེ་བ།  བདུད་རྩིའི་རང་བཞིན་ཞི་བའི་ལས་སྒྲུབ་པའི་ནུས་པ་དང་ལྡན་པ།  དྭངས་ཤིང་ཐོགས་པ་མེད་པར་གྱུར།  
ཅེས་བརྗོད་པས་ཨརྒྷཾ་ནས་ཤབྡའི་བར་དང་།  ཨོཾ་བོ་དྷི་བྲྀཀྵ་ཡེ་སྭཱ་ཧཱ།  ཞེས་སོགས་རྫས་སྔགས་རྣམས་ཀྱིས་བྱིན་གྱིས་བརླབ་བོ། །ཡང་ཐབ་ཁུང་བསང་སྦྱང་བྱིན་གྱིས་བརླབས་ནས།  ཐབ་ཁུང་མི་དམིགས་ཏེ་སྟོང་པའི་ངང་ལས་ཨོཾ་བྷ་ཡོངས་སུ་གྱུར་པ་ལས་ཞི་བའི་
10-8-4a


ཐབ་ཁུང་དཀར་པོ་ཟླུམ་པོ།  རྒྱར་ཁྲུ་གང་།  ཟབས་སུ་ཁྲུ་ཕྱེད་པ།  ཁ་ཁྱེར་དང་མུ་ཁྱུད་རིམ་པ་གསུམ་དང་ལྡན་པ།  ལྷ་རྫས་ལས་གྲུབ་པའི་བུད་ཤིང་བརྩིགས་པ་དང་བཅས་པ།  དྭངས་ཤིང་ཐོགས་པ་མེད་པ་མཚན་ཉིད་ཐམས་ཅད་ཡོངས་སུ་རྫོགས་
པར་གྱུར།  ཅེས་བརྗོད།  བདུན་པ་འཇིག་རྟེན་དང་འཇིག་རྟེན་ལས་འདས་པའི་མེ་ལྷ་སྤྱན་དྲངས་ཤིང་མཆོད་བསྟོད་སོགས་བྱ་བ་ལ།  འཇིག་རྟེན་པའི་མེ་ལྷ་སྤྱན་དྲང་བ་ནི།  རང་གི་ཐུགས་ཀ་ནས་འོད་ཟེར་འཕྲོས་པས།  ཤར་ལྷོ་ནས་མེ་ལྷ་སྐུ་མདོག་དཀར་པོ་ཞལ་
གཅིག་ཕྱག་བཞི་པ།  གཡས་གཉིས་ན་རིན་པོ་ཆེ་དང་དབྱུག་པ།  གཡོན་གཉིས་ན་པདྨ་དང་སྤྱི་བླུགས་འཛིན་པ།  ར་སྐྱེས་དང་པདྨ་དཀར་པོ་ལ་གནས་པ་སྤྱན་དྲངས་ཏེ།  རྡོ་རྗེ་དང་དྲིལ་བུ་འཛིན་པས།  ཨོཾ།  ཚུར་བྱོན་ཚུར་བྱོན་འབྱུང་པོ་ཆེ། །མེ་ལྷའི་རྒྱལ་པོ་
དྲང་སྲོང་མཆོག །བསྲེག་བླུགས་ཞལ་ཟས་བཞེས་སླད་དུ། །འདི་ཉིད་དུ་ནི་བཞུགས་སུ་གསོལ། །ཨོཾ་ཨགྣ་ཡེ་མ་ཧཱ་ཏེ་ཛཿསརྦ་ཀརྨ།  པྲ་སཱ་དྷ་ཀ།  ཀཱ་རུ་ཎ་ཀྲྀ་ཏ།  སརྦ་ཨརྠ་ཨསྨིན་ས་ནི་ཧི་ཏོ་བྷ་ཝ།  པདྨ་ཀ་མ་ལ་ཡེ་སྟྭྃ།  ཞེས་བརྗོད།  དེ་ནས་བྱོན་
ཟན་དབུལ་བའམ་མེད་ནའང་རུང་སྟེ།  ཨོཾ་ཨགྣ་ཡེ་རེ་རེ་ལ་སྦྱར་བའི་ཨརྒྷཾ་ནས་ཤབྡའི་བར་གྱིས་མཆོད།  འཇིག་རྟེན་དབང་ཕྱུག་ཚངས་དབང་མགོན་གྱི་སྲས། །ཞེས་སོགས་ཀྱིས་བསྟོད།  བསྲེག་རྫས་ནི་འོག་ཏུ་འབུལ་བར་བཤད་དོ། །དེ་ནས་འཇིག་རྟེན་ལས་
འདས་པའི་མེ་ལྷ་སྤྱན་དྲང་བ་ནི།  རང་གི་སྙིང་ག་ནས་འོད་ཟེར་འཕྲོས་པས།  དཀོན་མཆོག་རིན་པོ་ཆེ་རྣམ་པ་གསུམ་ལ་སངས་རྒྱས་དང་བྱང་ཆུབ་སེམས་དཔས་བསྐོར་བ་ཨོཾ་བཛྲ་ས་མཱ་ཛཿཞེས་བརྗོད་ཅིང་སེ་གོལ་བརྡབ།  མ་ལུས་སེམས་ཅན་ཞེས་སོགས་ཤ་ལོ་ཀ་
10-8-4b


གསུམ་དང་།  ཛཿཧཱུྃ་སོགས་བརྗོད་དེ།  ཐབ་ཀྱི་ཤར་དུ་བྱོན་པ་ལ།  པདྨ་ཀ་མ་ལ་ཡེ་སྟྭཾ་གྱིས་གདན་དབུལ།  ཨརྒྷཾ་ནས་ཤབྡའི་བར་གྱིས་མཆོད་དེ།  མཉེས་བཞིན་དུ་མེ་ལྷའི་ལྟོ་བ་ཡངས་པར་བཞུགས། །ཞེས་བརྗོད།  དེའི་ཐུགས་ཀའི་འོད་ཟེར་དང་།  རང་གི་
སྙིང་གའི་འོད་ཟེར་གྱིས་བསྒྲུབ་བྱའི་སྡིག་སྒྲིབ་རྣམས་བཀུག་སྟེ་མེ་ལ་ཐིམ་པས་སྡིག་སྒྲིབ་ཐམས་ཅད་མེས་བསྲེགས་པར་གྱུར།  ཅེས་བརྗོད།  ཡང་རང་གི་ཐུགས་ཀ་ནས་འོད་ཟེར་འཕྲོས་པས་རང་བཞིན་གྱི་གནས་ནས་ཁྲོ་བོ་ཁམས་གསུམ་རྣམ་པར་རྒྱལ་བ་ཨོཾ་བཛྲ་ས་
མཱ་ཛཿཞེས་དང་།  ཡེ་ཤེས་བསྐལ་པ་སོགས་ཀྱིས་སྤྱན་དྲང་བ་དང་གདན་ཕུལ་ནས།  མེ་ལྷའི་ལྟོ་བ་ཡངས་པར་བཞུགས། །ཞེས་བརྗོད་ལ།  མ་ཧཱ་ཀྲོ་དྷ་རཱ་ཛ་སྔོན་དུ་འགྲོ་བའི་མཆོད་ཡོན་ནས་རོལ་མོའི་བར་གྱིས་མཆོད།  ཆོས་ཉིད་སྟོང་པ་སོགས་
ཀྱིས་བསྟོད་དོ། །དེ་ནས་ཐོག་མར་མེ་ལྷ་ལ་བསྲེག་རྫས་དབུལ་ཏེ།  ཨོཾ་ཨགྣ་ཡེ་ཆེ་གེ་མོ་མིང་འདི་ཞེས་བྱ་བས་གཙོར་བྱས་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ།  ཞེས་པ་མར་དང་།  རྫས་གཞན་བཅུ་པོའི་སྔགས།  
ཨོཾ་བོ་དྷི་བྲྀཀྵ་ཡེ་སྭཱ་ཧཱ།  ཨོཾ་སརྦ་པཱ་པཾ་ད་ཧ་ན་བཛྲ་ཡེ་སྭཱ་ཧཱ།  ཨོཾ་སརྦ་སྃ་པ་དེ་སྭཱ་ཧཱ།  ཨོཾ་མ་ཧཱ་པུཥྚ་ཡེ་སྭཱ་ཧཱ།  ཨོཾ་མ་ཧཱ་བི་ཛ་ཡེ་སྭཱ་ཧཱ།  ཨོཾ་མ་ཧཱ་བེ་ག་ཡེ་སྭཱ་ཧཱ།  ཨོཾ་བཛྲ་གྷསྨ་རཱི་ཡེ་སྭཱ་ཧཱ།  ཨོཾ་མ་ཧཱ་བ་ལ་ཡེ་སྭཱ་ཧཱ།  ཨོཾ་བཛྲ་ཨཱ་ཡུཿཥེ་སྭཱ་ཧཱ།  
ཨོཾ་ཨ་པྲ་ཏི་ཧ་ཏ་བཛྲ་ཡེ་སྭཱ་ཧཱ།  ཞེས་པའི་ཐོག་མཐར་སྤེལ་ཚིག་རེ་རེའི་བར་དུ་སྔགས་རྐྱང་ལན་ལྔ་སྟེ།  བདུན་བདུན་གྱིས་དབུལ།  དེ་ནས་ཁམས་གསུམ་རྣམ་རྒྱལ་ལ་སཏྭ་ཀྲོ་དྷའི་རྗེས་སུ་སྤེལ་ཚིག་དང་བཅས་པའི་རྫས་བཅུ་གཅིག་པོ་གོང་བཞིན་དབུལ།  སླར་
10-8-5a


ཡང་གོང་ལྟར་མཆོད་བསྟོད་བྱས་ནས།  བཅོམ་ལྡན་འདས་ཁྲོ་བོ་ཁམས་གསུམ་རྣམ་པར་རྒྱལ་བས་བདག་དང་སེམས་ཅན་ཐམས་ཅད་ཀྱི་སྡིག་པ་ཐམས་ཅད་བྱང་ཞིང་དག་པ་དང་།  བྱང་ཆུབ་སྒྲུབ་པའི་བར་ཆད་ཐམས་ཅད་ཞི་བར་བྱིན་གྱིས་བརླབ་ཏུ་
གསོལ།  ཞེས་བརྗོད།  དེ་ནས་དཀོན་མཆོག་གསུམ་ལ།  ན་མོ་རཏྣ་ཏྲ་ཡཱ་ཡ།  བུདྡྷ་དྷརྨཱ་སངྒཱ་བྷྱཿ སྔོན་དུ་འགྲོ་བའི་སྤེལ་ཚིག་དང་བཅས་པས་རྫས་བཅུ་གཅིག་པོ་གོང་བཞིན་ཕུལ་ལ།  བུདྡྷ་དྷརྨཱ་སངྒཱ་བྷྱཿ སྔོན་དུ་འགྲོ་བས་མཆོད་ཡོན་ནས་རོལ་མོའི་བར་གྱིས་མཆོད།  
མགོན་པོ་ཐུགས་རྗེ་ཆེར་ལྡན་པ། །སོགས་ཤ་ལོ་ཀ་གསུམ་གྱིས་བསྟོད།  དཀོན་མཆོག་རིན་པོ་ཆེ་རྣམ་པ་གསུམ་གྱིས་ཞེས་སོགས་གསོལ་བ་གདབ།  སླར་ཡང་མེ་ལྷ་ལ་བསྲེག་རྫས་ལན་གསུམ་དབུལ་ལོ། །ཡང་ཐུགས་ཀ་ནས་འོད་འཕྲོས་པས་རང་བཞིན་གྱི་
གནས་ནས་རྡོ་རྗེ་སེམས་དཔའ་སྐུ་མདོག་དཀར་པོ་རབ་ཏུ་དགྱེས་པའི་སྤྱན་གདངས་པ་ཞེས་པ་ནས།  སེམས་དཔའི་སྐྱིལ་ཀྲུང་གིས་བཞུགས་པ་ཨོཾ་བཛྲ་ས་མཱ་ཛཿ པདྨ་ཀ་མ་ལ་ཡེ་སྟྭཾ།  འཇིག་རྟེན་གསུམ་རྒྱལ་གྱི་ལྟོ་བར་པད་ཟླའི་གདན་ལ་འཁོད།  ཅེས་བརྗོད་ལ་
བཛྲ་ས་ཏྭ་སྔོན་དུ་འགྲོ་བའི་མཆོད་ཡོན་ནས་རོལ་མོའི་བར་གྱིས་མཆོད།  རྡོ་རྗེ་སེམས་དཔའ་སེམས་དཔའ་ཆེ། །ཞེས་སོགས་ཀྱིས་བསྟོད།  ཨོཾ་བཛྲ་ས་ཏྭ་ཧཱུྃ་གི་རྗེས་སུ་སྤེལ་ཚིག་དང་བཅས་པས་བསྲེག་རྫས་རྣམས་གོང་བཞིན་ཕུལ་ལ་ཡང་མཆོད་བསྟོད་བྱའོ། །
དེ་ནས་རང་གི་ཐུགས་ཀ་ནས་འོད་འཕྲོས་པས་རང་བཞིན་གྱི་གནས་ནས་བཅོམ་ལྡན་འདས་ཀུན་རིག་རྣམ་པར་སྣང་མཛད་ཀྱི་ལྷ་ཚོགས་འཁོར་དང་བཅས་པ་ཨོཾ་བཛྲ་ས་མཱ་ཛཿ རྡོ་རྗེ་དྲིལ་བུ་འཛིན་པས།  མ་ལུས་སེམས་ཅན་ནས།  དེ་སྲིད་བཅོམ་ལྡན་བཞུགས་
10-8-5b


སུ་གསོལ།  གྱི་བར་དཀྱིལ་ཆོག་བཞིན་བྱས་ལ།  ཨོཾ་པདྨ་ཀ་མ་ལ་ཡེ་སྟྭཾ།  རྡོ་རྗེ་སེམས་དཔའི་ལྟོ་བར་རང་རང་གི་གདན་ལ་འཁོད་པ་ནི།  དབུས་སུ་སེང་གེའི་ཁྲིའི་སྟེང་དུ་སྐད་ཅིག་གིས་བཅོམ་ལྡན་འདས་ཀུན་རིག་རྣམ་པར་སྣང་མཛད་ཅེས་སོགས་གསལ་གདབ།  
རིགས་གསུམ་སྤྱིའི་སྔགས་རྒྱས་ལྷ་རྣམས་ཀྱི་གནས་གསུམ་བྱིན་བརླབ་བྱ།  དབང་བསྐུར་བ་དང་།  ཕྱག་རྒྱ་བཞིའི་རྒྱས་འདེབས་པ་དང་།  ཕྲིན་ལས་འཆོལ་བ་ནི་མེད་དོ། །མདུན་བསྐྱེད་དང་འབྲེལ་ན་རང་བཞིན་གྱི་གནས་ནས་སྤྱན་མི་འདྲེན་པར་སློབ་
དཔོན་གྱིས་མདུན་བསྐྱེད་ཀྱི་ལྷ་ཐམས་ཅད་མར་མེ་གཅིག་ལས་གཉིས་ཆད་ཀྱི་ཚུལ་དུ་ཐབ་དབུས་སུ་ཨོཾ་བཛྲ་ས་མཱ་ཛཿཞེས་སོགས་ཀྱིས་སྤྱན་འདྲེན།  མཆོད་གཡོག་པས་མདུན་བསྐྱེད་ཀྱི་དྲུང་ནས་མེ་ཏོག་གིས་མཚོན་ནས་སྤྱན་འདྲེན་པའི་ཚུལ་དང་།  
གཞན་རྣམས་ཀྱིས་རོལ་ཆེན་བྱ།  མཐར་རྡོ་རྗེ་སེམས་དཔའི་ལྟོ་བར་རང་རང་གི་གདན་ལ་འཁོད་ཟེར་དུས་མཆོད་གཡོག་པས་མེ་ཏོག་ཐབ་དབུས་སུ་དོར།  དེ་ནས་སྔར་བཞིན་ལྷ་གསལ་གདབ་པའི་རྗེས་སུ་བྱོན་ཟན་ཕུལ་ན།  རྩ་རིག་བརྗོད་ཅིང་མར་དགང་བླུགས་
གསུམ་དབུལ།  གོང་མ་རྣམས་སུའང་བྱོན་ཟན་ཕུལ་ན་གདན་ལ་འཁོད་ནས་མཆོད་བསྟོད་མ་བྱས་པའི་བར་དེར་སོ་སོའི་སྔགས་ཀྱི་རྗེས་སུ་ཨགྣེ་ཡེ་བཏགས་པས་མར་དགང་བླུགས་གསུམ་དབུལ།  གཞུང་ནས་མ་བཤད་པས་མ་བྱས་ཀྱང་འགལ་བ་མེད་དོ། །དེ་
ནས་མཆོད་པ་བྱིན་གྱིས་བརླབས་ཏེ།  མཆོད་ཡོན་ནས་རོལ་མོའི་བར་དང་།  ལྷ་ཐམས་ཅད་ཀྱི་བསྟོད་པ་བསྡུས་པ་ཚིགས་བཅད་དགུས་བསྟོད་ནས།  ཨོཾ་ཨ་མྲྀ་ཏེ་ཧཱུྃ་ཕཊ།  ཅེས་པས་བསྲེག་རྫས་རྣམས་བདུད་རྩི་མཆོག་ཏུ་བསམས་ལ།  ཐོག་མར་གཙོ་བོ་ལ་ཨོཾ་
10-8-6a


སརྦ་བིད་སོགས་ཀྱི་རྗེས་སུ་མར་གྱི་སྔགས་ཨོཾ་ཨགྣེ་ཡེ་སྭཱ་ཧཱ་ཞེས་སོགས་དང་།  གོང་གི་སྤེལ་ཚིག་ཐོག་མཐའ་གཉིས་སུ་བཏགས་པས་རྫས་བཅུ་གཅིག་པོ་བརྒྱ་རྩ་བརྒྱད།  སྦྱོང་རྒྱལ་ལ་རང་སྔགས་ཀྱིས་ཉེར་གཅིག་རེ་དང་།  རིགས་གཞན་གསུམ་
ལ་རང་སྔགས་ཀྱིས་བདུན་རེ་དང་།  ཡུམ་བཞི་སྡེ་ཚན་གཅིག་དང་།  སེམས་དཔའ་བཅུ་དྲུག་སྡེ་ཚན་བཞི་དང་།  ནང་སྒེག་སོགས་བཞི་གཅིག་དང་།  ཕྱི་སྒེག་བཞི་ལ་སྡེ་ཚན་གཅིག །སྒོ་བ་བཞི་གཅིག་ཏུ་བྱས་ནས་རང་སྔགས་ཀྱིས་བདུན་རེ་དབུལ་ལོ། །
མགྲོན་ཐབས་ཀྱི་ལྷ་མན་ཆད་ལ་སྡེ་ཚན་ལྔར་བྱས་ནས་རྩ་རིག་གིས་རྫས་བཅུ་གཅིག་པོ་བདུན་རེ་དབུལ་ལོ། །སྡེ་ཚན་རེ་རེའི་མཐར་མཆོད་བསྟོད་བྱེད་ན།  མཆོད་པ་རེ་རེ་དང་རང་རང་གི་བསྟོད་པས་བསྟོད་དོ། །ཡང་ན་རྫས་རྣམས་བསྲེས་ནས་ཐམས་ཅད་ལ་རྩ་རིག་
ཁོ་ནས་ཕུལ་བས་ཆོག་གོ།  ཡང་ཁྲོ་བོ་ཁམས་གསུམ་རྣམ་རྒྱལ་ལ་གོང་གི་སྔགས་སྤེལ་ཚིག་དང་བཅས་པ་ཉེར་གཅིག་གིས་ཕུལ་ལ།  བགེགས་དང་ལོག་འདྲེན་ལ་སོགས་པ་བྱང་ཆུབ་སྒྲུབ་པའི་བར་ཆད་ཞི་བར་བྱིན་གྱིས་བརླབ་ཏུ་གསོལ།  ཞེས་གསོལ་བ་
གདབ་བོ། །དེ་ནས་ཕྱོགས་སྐྱོང་དང་བགེགས་རིགས་གང་ཡིན་འཁོར་དང་བཅས་པ་ཨཱ་ཀཪྵ་ཡ་ཛཿཞེས་ཐབ་ཀྱི་ཕྱོགས་ཅིག་ཏུ་འཁོད་ཅེས་བརྗོད་ལ།  བསྲེག་རྫས་རྣམས་རྩ་རིག་གིས་ལན་གསུམ་ཕུལ་ལ།  བགེགས་དང་ལོག་འདྲེན་གྱི་བསམ་སྦྱོར་ངན་པ་ཐམས་
ཅད་ཞི་བར་གྱུར་ཅིག །ཅེས་བརྗོད།  ཡང་བསྲེག་རྫས་རྣམས་བྱིན་གྱིས་བརླབས་ལ་ཆོས་སྐྱོང་ལྕམ་དྲལ་རྣམས་བཀུག་ནས་རང་སྔགས་ཀྱིས་བསྲེག་རྫས་རྣམས་ལན་གསུམ་ཕུལ་ལ་བར་ཆད་ཞི་བར་གསོལ་བ་གདབ།  ཡང་རིགས་དྲུག་དང་གཞི་བདག་རྣམས་ཀྱང་
10-8-6b


བཀུག་ནས་རྩ་རིག་གིས་བསྲེག་རྫས་ཕུལ་ལ།  རིགས་དྲུག་སོ་སོའི་བསམ་པ་ཚིམ་པ་དང་།  ལོངས་སྤྱོད་ཟད་མི་ཤེས་པ་ཐོབ་ཅིང་།  སྡུག་བསྔལ་ལས་གྲོལ་ནས་མྱུར་དུ་སངས་རྒྱས་ཐོབ་པར་གྱུར་ཅིག །ཅེས་བརྗོད།  སླར་ཡང་མེ་ལྷ་ཉིད་ལ་སྔར་གྱི་སྤེལ་ཚིག་དང་
བཅས་པས་བསྲེག་རྫས་ལྷག་མ་རྣམས་ཕུལ་ལ།  གཏོར་མ་ཨོཾ་ཨཱ་ཧཱུྃ་གིས་བྱིན་གྱིས་བརླབས་ནས་ཨགྣེ་ཡེ་ཨ་ཀཱ་རོ་སོགས་ཀྱིས་བསྔོས་ལ་མཆོད་བསྟོད་བྱའོ། །དེ་ནས་མདུན་བསྐྱེད་དང་མ་འབྲེལ་ན།  ཐབ་རྒྱབ་ཀྱི་གཏོར་མ་གཉིས་དང་པོ་ཕྱོགས་སྐྱོང་དང་འབྱུང་པོ་
ལ་ཆ་གསུམ་ལྟར་སྦྱིན།  གསུམ་པ་གཞི་བདག་ལ་ཨ་ཀཱ་རོའི་སྔགས་ཀྱིས་བསྔོས་ནས་འདོད་པའི་དོན་འཆོལ།  ཕྱི་མ་གསུམ་རིགས་དྲུག་དང་།  ཡི་དྭགས་དང་།  བགེགས་ལ་བསྔོའོ། །མདུན་བསྐྱེད་དང་འབྲེལ་ན་འདིར་མེ་ལྷ་དང་གཞི་བདག་གི་གཏོར་མ་གཉིས་
ལས་མེད་དོ། །བརྒྱད་པ་མཇུག་གི་བྱ་བ་ནི།  རང་ཉིད་ལ་དབང་བསྐུར་བ་ནས་བཟོད་གསོལ་གྱི་བར་དཀྱིལ་ཆོག་བཞིན་བྱས་ལ།  ཨོཾ།  ཁྱེད་ཀྱིས་སེམས་ཅན་དོན་ཀུན་མཛད། །ཅེས་སོགས་ཀྱིས་ལྷ་རྣམས་རང་བཞིན་གྱི་གནས་སུ་གཤེགས་སུ་གསོལ།  སྔར་
དཀྱིལ་འཁོར་ལས་ལྷ་རྣམས་སྤྱན་དྲངས་པ་ཡིན་ན།  སློབ་དཔོན་གྱིས་བཛྲ་མུཿཞེས་བརྗོད་པའི་ཚེ།  མཆོད་གཡོག་པས་ཐབ་ཁུང་གི་མེ་ཏོག་གིས་མཚོན་ནས་ལྷ་རྣམས་དཀྱིལ་འཁོར་དུ་སྤྱན་དྲངས་པར་མོས་ཏེ།  རོལ་ཆེན་དང་བཅས་ཏེ་མེ་ཏོག་དཀྱིལ་འཁོར་གྱི་
དྲུང་དུ་དོར་རོ། །དགུ་པ་ཕན་ཡོན་ནི།  དེ་ཡི་མིང་ནས་བརྗོད་ནས་ནི། །མཁས་པས་འབུམ་ཕྲག་བརྒྱའམ་ནི། །ཡང་ན་བརྒྱ་ཕྲག་སྟོང་ཉིད་དུ། །སྦྱིན་སྲེག་བྱས་པར་གྱུར་ན་ནི། །དམྱལ་བ་ཆེན་པོར་གྱུར་པ་ཡི། །སྡིག་པ་དེ་ལས་ཐར་བར་འགྱུར། །ཞེས་
10-8-7a


སོགས་རྒྱས་པར་གསུངས་པ་བཞིན་དུ་ཤེས་པར་བྱའོ། །འདི་དག་ནི་ཞི་བའི་སྦྱིན་སྲེག་ཡིན་ལ།  ལས་གསུམ་གྱི་སྦྱིན་སྲེག་གི་ཁྱད་པར་རྣམས་ཀྱང་གཞན་ཕན་འོད་ཟེར་ལས་ཤེས་པར་བྱའོ། །གལ་ཏེ་རོ་སྲེག་གི་ཆོ་ག་བྱེད་པར་
འདོད་ན།  རོ་ཡོན་བདག་གི་ཚུལ་དུ་སྦྱང་བ་དང་།  རོ་བླ་མཆོད་ཀྱི་ཚུལ་དུ་སྦྱང་བ་གཉིས་ལས།  དང་པོ་ནི་གང་ཟག་ཕལ་པ་ལ་བྱ་སྟེ།  སྔར་གྱི་སྦྱིན་སྲེག་གཞིར་བྱས་པ་ལ།  བསྲེག་ཁང་བརྩིགས་ནས།  ཐོག་མར་བགེགས་ཞི་དྲག་གིས་སྦྱང་བ།  བུམ་ཆུས་
བཀྲུ་བ།  སྟོད་གཡོགས་སྨད་གཡོགས་ཀྱིས་བརྒྱན་པ།  རོ་ལྷར་བསམས་ནས་མཆོད་པ།  གནས་ཉི་ཤུ་རྩ་གཉིས་བྱིན་གྱིས་བརླབ་པ།  གདགས་ཡིག་འདོགས་པ།  བགེགས་བསྐྲད་ཅིང་རོལ་མོ་བྱས་ཏེ་གོས་གདན་དང་བཅས་པ་ཐབ་དབུས་སུ་འཇོག་པར་གཞན་ཕན་
འོད་ཟེར་ལས་གསུངས་པ་ལྟར་བྱས་ལ།  དངོས་གཞི་བསྲེག་རྫས་བྱིན་གྱིས་རློབ་པའི་དུས་སུ་རོའི་ཤ་རུས་དང་བཅས་པ་བདུད་རྩིར་བྱིན་གྱིས་བརླབ།  ལྷའི་ཐུགས་ཀའི་འོད་ཀྱིས་སྡིག་པ་དྲང་བའི་སྐབས་སུ་ཚེ་འདས་ཀྱི་སྡིག་སྒྲིབ་ཐམས་ཅད་བཀུག་ནས་བསྲེགས་པར་
བསམ།  སྤེལ་ཚིག་གི་སྐབས་སུ་ཚེ་འདས་ཀྱི་སྡིག་པ་དང་སྒྲིབ་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ།  ཞེས་བརྗོད་དོ། །གཉིས་པ་ནི་གང་ཟག་མཆོག་ལ་བྱ་སྟེ།  ཆས་གཞུག་གི་ཚུལ་སྔར་དང་འདྲ་བ་ལས།  ལྷར་བསྐྱེད་པའི་སྐབས་སུ་གང་ཟག་དེ་ལྷའི་ཐུགས་དམ་རྒྱུན་དུ་
མཛད་པ་ཞིག་ཡིན་ན་གདུང་དེ་ལ་མཆོད་པ་དང་བསྟོད་པ་བྱས་ལ།  སྔར་གྱི་ལྷ་ཐམས་ཅད་གཤེགས་སུ་གསོལ་ཏེ།  ཡང་གསར་དུ་ལྷ་རྣམ་སྣང་ལྟ་བུར་བསྐྱེད་ནས་མཆོད་བསྟོད་བསྡུས་པ་ཞིག་བྱས་ནས་གཞག་གོ།  དངོས་གཞིའི་ལྷའི་འོད་ཟེར་གྱིས་སྡིག་པ་དྲང་
10-8-7b


བའི་སྐབས་སུ་བདག་དང་སེམས་ཅན་ཐམས་ཅད་ཀྱི་སྡིག་པ་བཀུག་པར་བསམ།  ཀུན་རིག་གི་དཀྱིལ་འཁོར་གྱི་ལྷ་ཚོགས་སྤྱན་དྲང་བའི་ཚེ་སྐུ་གདུང་དེ་དང་དཀྱིལ་འཁོར་གྱི་ལྷ་དབྱེར་མེད་དུ་མོས་ནས།  མཆོད་པ་དང་བསྲེག་རྫས་རྣམས་དབུལ།  སྤེལ་ཚིག་གི་སྐབས་སུ་
བདག་དང་སེམས་ཅན་ཐམས་ཅད་ཀྱི་སྡིག་པ་དང་སྒྲིབ་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ།  ཞེས་བརྗོད།  གཞན་རྣམས་འདྲའོ། །འདི་དག་གི་ཆོ་གའི་གོ་རིམ་དང་།  རྒྱུད་ཀྱི་ཚིག་གང་གིས་བསྟན་པའི་ཚུལ་རྣམས་ལ་ངེས་པ་བསྐྱེད་པར་འདོད་ན་གཞན་ཕན་འོད་ཟེར་དུ་བལྟ་
བར་བྱའོ། །ཞེས་པ་འདི་ནི་གཞན་ཕན་འོད་ཟེར་གྱི་དགོངས་པ་བཞིན་དུ་བདག་གིས་བླ་མ་མཁས་པ་དག་གིས་མཛད་པའི་ཕྱག་ལེན་ལས་བཏུས་ཏེ་ལས་དང་པོ་པ་དག་གིས་གཟུང་བདེ་བའི་ཕྱིར་དུ་དགེ་སློང་བསོད་ནམས་སེང་གེས་བྲིས་པའོ།།    །།མངྒ་ལཾ་བྷ་ཝནྟུ།  དགེའོ། །དགེའོ། །དགེའོ།།    །།

10-9-1a


༄༅།  །བཅོམ་ལྡན་འདས་ཀུན་རིག་གི་ཆོ་ག་ལག་ཏུ་བླང་བའི་རིམ་པ་གཞན་ཕན་འོད་ཟེར་ལ་རྩོད་པ་སྤོང་བ་གཞན་ཕན་གནོད་འཇོམས་བཞུགས་སོ། །
10-9-1b


༄༅། །བཅོམ་ལྡན་འདས་ཀུན་རིག་གི་ཆོ་ག་ལག་ཏུ་བླང་བའི་རིམ་པ་གཞན་ལ་ཕན་པའི་འོད་ཟེར་ལ་རྩོད་པ་སྤོང་བ་གཞན་ཕན་གནོད་འཇོམས་ཞེས་བྱ་བ།  བླ་མ་དང་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དཔལ་ལྡན་ཡོན་
ཏན་ཀུན་གྱི་རིན་ཆེན་གཏེར། །ཐར་འདོད་འདབ་བཟང་དགའ་ཞིང་བསྟི་བའི་གནས། །དངོས་གྲུབ་བཟང་པོའི་པདྨོས་རྣམ་མཛེས་པ། །ཡོན་ཏན་རྒྱ་མཚོ་རྗེ་བཙུན་བླ་མ་རྒྱལ། །དཀོན་མཆོག་གསུམ་གྱི་མཁྱེན་བརྩེ་གཅིག་བསྡུས་ནས། །སྙིགས་
དུས་བསྟན་པའི་རྒྱལ་མཚན་ལེགས་འཛིན་ཅིང་། །རྣམ་དཀར་གྲགས་པའི་དཔལ་གྱིས་ལྷམ་མེ་བ། །སྨྲ་བ་བཟང་པོའི་ཞབས་ལ་གུས་ཕྱག་འཚལ། །རྒྱལ་བས་གསུངས་པའི་ངན་སོང་སྦྱོང་བའི་རྒྱུད། །རྒྱལ་བས་ལུང་བསྟན་ཀུན་དགའ་སྙིང་
པོ་ཡིས། །རྒྱལ་བའི་དགོངས་པ་ཇི་བཞིན་ཕྱེ་བའི་དོན། །རྒྱལ་བ་གཉིས་པ་རྗེ་བཙུན་ས་སྐྱ་པས། །ཡང་དག་བརྒྱུད་པའི་སྲོལ་ལས་ལེགས་བཟུང་ནས། །སྐལ་ལྡན་གདུལ་བྱའི་དགའ་སྟོན་བཀྱེ་བ་ལ། །འཁྲུལ་པར་སྣང་བའི་དྲི་མ་ཕྲ་བ་ཡང་། །
10-9-2a


ཐམས་ཅད་མཁྱེན་པའི་སྤྱན་གྱིས་མ་གཟིགས་སོ། །འོན་ཀྱང་མཁས་པར་གྲགས་པ་འགའ་ཞིག་གིས། །རྒྱུད་དོན་རང་དགར་འགྲེལ་པའི་ཆོ་ག་དང་། །ལྟར་སྣང་ལུང་དང་རིགས་པའི་སྤྲིན་ཚོགས་ཀྱིས། །ལམ་བཟང་
ཉི་མ་སྒྲིབ་པ་མ་བཟོད་ནས། །རྣམ་དཔྱོད་ཡངས་པའི་མཁའ་དབྱིངས་ལས་བྱུང་བའི། །མི་ཟད་ལུང་དང་རིགས་པའི་རླུང་ཆེན་གྱིས། །ལོག་པར་སྨྲ་བའི་སྤྲིན་རུམ་ཀུན་བསལ་ནས། །གཞན་ཕན་ཉི་མའི་འོད་ཟེར་གསལ་བར་བྱ། །སྐྱེ་བ་
ཀུན་ཏུ་ཡང་དག་པའི་ལམ་ལ་སྦྱངས་ཤིང་མགོན་པོ་འཇམ་པའི་དབྱངས་ཀྱིས་བྱིན་གྱིས་བརླབས་པས།  ཤེས་བྱའི་དཀྱིལ་འཁོར་མཐའ་དག་ལ་བསྙེངས་པ་མི་མངའ་བའི་མཁྱེན་རབ་ཅན་སྐུ་ཚེ་དེ་ཉིད་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་
པ།  བདག་ཉིད་ཆེན་པོ་ལོ་ཙྪ་བ་རིན་ཆེན་བཟང་པོ་ལ་ཡོ་གའི་སྲོལ་གཉིས་མངའ་བའི་སྐུ་ཚེའི་སྟོད་ལ་པཎྜི་ཏ་སངས་རྒྱས་ཞི་བ་ལས་གསན་པའི་སྲོལ་ནི།  ཕྱག་ལེན་དང་དབང་བཀའ་ཀུན་དགའ་སྙིང་པོ་ནས་བརྒྱུད་ཀྱང་བཤད་པ་ཀོ་ས་ལའི་རྒྱན་གྱི་
10-9-2b


སྟེང་ནས་མཛད་པས།  ཕྱག་ལེན་དང་བཤད་པ་ཡང་ཅུང་ཟད་མི་མཐུན་ཅིང་།  སྦྱོང་རྒྱུད་ལ་ཡང་རྡོར་དབྱིངས་སོགས་ཀྱི་ཆོ་གས་རྒྱས་བཀབ།  དབྱངས་ལ་སོགས་པའི་སྤྲོས་པ་ཡང་ཆེ་བར་གྲག་གོ།  སྐུ་ཚེའི་སྨད་ལ་པཎྜི་ཏ་དྷརྨཱ་པ་ལ་ལས་གསན་པའི་སྲོལ་ནི།  པཎྜི་ཏ་དེ་ཉིད་ཀུན་
དགའ་སྙིང་པོ་ནས་བརྒྱུད་པའི་བརྒྱུད་པ་བཞི་པ་ཡིན་པས་བརྒྱུད་ཐག་ཉེ་ཞིང་ཕྱག་ལེན་དང་བཤད་པ་གཉིས་ཀ་ཡང་ཀུན་དགའ་སྙིང་པོའི་ལུགས་འབའ་ཞིག་མཛད།  སྦྱོང་རྒྱུད་ལ་ཡང་ཆོ་ག་གཞན་དུ་ཁ་འཕངས་ནས་གསལ་བར་མ་བཤད་པ་རྣམས།  གཙུག་དགུ་དང་དེ་ཉིད་འདུས་པ་
སོགས་ནས་ཁ་བསྐང་བ་མ་གཏོགས་རྒྱུད་ཀྱི་སྟེང་ནས་ཆོ་ག་ཐོན་པ་རྣམས་གཞན་དང་མི་བསྲེ་བར་རྒྱུད་ཀྱི་གོང་འོག་འཁྲུགས་སྡེབས་ནས་སྤྲོས་པ་ཆུང་ཞིང་དག་པར་མཛད་པས།  འདི་ལ་ཐུགས་གཙིགས་ཆེ་བར་མཛད་དོ། །ལུགས་དེ་ཉིད་ལོ་ཆེན་པ།  བྲག་སྟེང་པ་ཡོན་ཏན་ཚུལ་ཁྲིམས།  
མལ་གྱོ་བློ་གྲོས་གྲགས་པ།  རྗེ་བཙུན་ས་སྐྱ་པ་ཆེན་པོ་རྣམས་ལས་རིམ་པར་བརྒྱུད་དེ།  སྙན་བརྒྱུད་དུ་བཞུགས་པ་ཕྱི་རབས་ཀྱི་གདུལ་བྱ་རྣམས་ཀྱིས་སྙན་བརྒྱུད་འཛིན་པར་མི་ནུས་པས་བཀའ་སྲོལ་ནུབ་པར་དོགས་ནས།  མགོན་པོ་འཇམ་པའི་དབྱངས་དང་མི་གཉིས་པའི་ཐུགས་མངའ་བ་རྗེ་
བཙུན་གྲགས་པ་རྒྱལ་མཚན་གྱིས།  རྒྱུད་བཤད་ཐབས་ཀྱི་མན་ངག་གཞན་ཕན་སྤྱི་ཆིངས།  རྒྱུད་ཀྱི་ས་བཅད།  རྒྱུད་ཀྱི་མཆན།  ལག་ཏུ་བླང་བའི་རིམ་པ་གཞན་ཕན་འོད་ཟེར།  གཞན་ཕན་ཉེར་མཁོ་རྣམས་མཛད་དོ། །འདི་དག་ནི་རྒྱལ་བས་ལུང་བསྟན་པའི་གྲུབ་ཆེན་ཀུན་དགའ་
སྙིང་པོའི་བཀའ་སྲོལ་སྐྱོན་མེད་པའི་བླ་མ་བརྒྱུད་པ་ལས་འོངས་པ།  སྒྲོ་སྐུར་དང་བྲལ་བ་ཡིན་པས་ལུགས་འདི་ལ་རྒྱ་གཞུང་ལྟ་བུར་ཁས་བླང་བར་བྱ་བ་ཡིན་ནོ། །དུས་ཕྱིས་ངག་དབང་ལྷ་མོ་དབྱངས་ཅན་མས་རྗེས་སུ་གཟུང་བས།  སྡེབ་སྦྱོར་དང་སྙན་ངག་ལ་སོགས་པ་ཐོགས་མེད་དུ་རྩོམ་
10-9-3a


པའི་ངག་གི་དབང་ཕྱུག་གྲུབ་ཅིང་གསུང་རབ་བོད་དུ་འགྱུར་རོ་ཅོག་ལ་འགྲེལ་པ་རང་དགར་མཛད་པའི་བློ་གྲོས་ཅན།  བོ་དོང་ཕྱོགས་ལས་རྣམ་པར་རྒྱལ་བ་དཔལ་འཇིགས་མེད་གྲགས་པ་ཞེས་མཚན་ཡོངས་སུ་གྲགས་པ་དེ་ཉིད་ཀྱིས།  སྤྱིར་བོད་ཀྱི་ཀུན་རིག་གི་
ཆོ་ག་མཐའ་དག་དང་།  ཁྱད་པར་དུ་གཞན་ཕན་འོད་ཟེར་གྱི་ལུགས་དེ་དག་རྒྱུད་ཀྱི་དགོངས་པ་ལ་ཞུགས་པ་མ་ཡིན་ནོ་ཞེས་བཀག་ནས།  རང་ལུགས་ཀྱི་རྒྱུད་དོན་རང་དགར་འགྲེལ་པ་ལས་བྱུང་བའི་ཆོ་ག་རྒྱུད་དོན་གསལ་བ།  དེ་ཉིད་ལུང་དང་སྦྱར་བ་ལུང་གི་རྣམ་ངེས།  རིགས་པའི་རྣམ་
ངེས་ཏེ་གསུམ་མཛད་དོ། །དེ་ལ་གཞན་ཕན་འོད་ཟེར་ལ་སྐྱོན་བརྗོད་པ་རྣམས་ནི།  ལུང་རིགས་ལྟར་སྣང་གིས་སྐྱོན་མེད་ལ་སྐྱོན་དུ་བརྗོད་པ་འབའ་ཞིག་ཏུ་སྣང་བས།  དེ་དག་མི་འཇུག་པའི་རྒྱུ་མཚན་དང་།  ལུགས་སྔ་མ་རྒྱུད་ཀྱི་དོན་ལ་གནས་པའི་ཚུལ་རྣམས་ཁོ་བོས་བཤད་པར་བྱ་བ་
འདི་ལ།  བློ་གྲོས་དང་ལྡན་པ་དག་གིས་གཟུ་བོར་གནས་པའི་བློ་ཡིས་དཔྱོད་ལ་ཡང་དག་པའི་བཀའ་སྲོལ་ལ་གནས་པར་གྱིས་ཤིག །དེ་ལ་གཞན་ཕན་འོད་ཟེར་ལས་རྒྱུད་ཀྱི་སྡིག་སྦྱོང་གི་སྒོ་ཐམས་ཅད་ཁྲིགས་ཆགས་སུ་སྡེབས་ནས་སྟོན་པ་ལ།  སྔོན་དུ་བསྙེན་པ་བྱ་བ་དང་། 
དེས་ལས་སུ་བྱ་བའི་རིམ་པ་གཉིས་ལས།  དང་པོ་ལ།  དཔའ་བོ་གཅིག་པའི་བསྙེན་པ།  དཀྱིལ་འཁོར་ཡོངས་རྫོགས་ཀྱི་བསྙེན་པ།  རས་བྲིས་ལ་བརྟེན་པའི་བསྙེན་པ་དང་གསུམ།  དང་པོའི་སྐབས་སུ་སྲུང་འཁོར་མདོར་བསྡུས་པ་ལ།  དང་པོར་ཕྱག་རྡོར་ལྗང་སྔོན་བསྐྱེད་
ནས་དེ་ཉིད་ཁམས་གསུམ་རྣམ་རྒྱལ་དུ་བསྒྱུར་ཏེ།  བདག་བསྲུང་སོགས་མཛད་པ་ལ།  རིགས་པའི་རྣམ་ངེས་ལས།  ཁ་ཅིག་ན་རེ།  ཕྱག་ན་རྡོ་རྗེ་ལྗང་སྔོན་བསྒོམ་མོ་ཞེས་ཟེར་རོ། །དེ་ནི་མ་ཡིན་ཏེ།  དེའི་སྒྲུབ་བྱེད་མེད་པའི་ཕྱིར་དང་།  རྡོ་རྗེ་ལས་ལ་མེ་ཏོག་ཕོག་པ་ཡིན་ན་ཡང་
10-9-3b


སྣ་ཚོགས་རྡོ་རྗེ་འཛིན་པ་བསྒོམ་པར་རིགས་པའི་ཕྱིར་དང་།  བརྟག་པ་ཕྱི་མ་ལས་ཕྱག་ན་རྡོ་རྗེ་གསུངས་པ་འདིར་བསྒོམས་ན་ཧ་ཅང་ཐལ་བའི་ཕྱིར་དང་།  འདིར་ནི་ཕྱག་ན་རྡོ་རྗེ་སྐུ་མདོག་དཀར་པོ་གསལ་བར་གསུངས་པའི་ཕྱིར་རོ་ཞེས་ཟེར་རོ། །དེ་ནི་མི་འཐད་དེ།  རྡོ་རྗེ་ལས་ལ་མེ་ཏོག་ཐོག་
པ་ཡིན་ན་ཡང་ཞེས་པ་ནི།  ཕྱོགས་སྔའི་དོན་མ་རྟོགས་པ་ཡིན་གྱི།  འདིར་ཁས་མི་ལེན་ལ།  སྒྲུབ་བྱེད་མེད་པའི་གཏན་ཚིགས་མ་གྲུབ་སྟེ།  རྒྱུད་ལས།  འཇིག་རྟེན་གསུམ་ལས་རྣམ་རྒྱལ་གྱིས། །བདག་བསྲུངས་ལ་སོགས་བྱས་ནས་ནི། །ཞེས་ཁམས་གསུམ་རྣམ་རྒྱལ་
གྱིས་སཏྭ་ཀྲོ་ཏ་སོགས་ཀྱི་སྔགས་བརྗོད་པའི་སྒོ་ནས་བདག་བསྲུང་སོགས་བྱ་བར་གསུངས་ལ།  དེའི་སྔོན་དུ་ཕྱག་ན་རྡོ་རྗེ་ལྗང་སྔོན་བསྒོམ་དགོས་ཏེ།  མེ་ལྟར་འབར་བའི་སྐབས་ནས།  དེ་ནས་ཕྱག་ན་རྡོ་རྗེ་རང་གི་སྐུ་བོར་ཏེ།  རྡོ་རྗེ་སེམས་དཔའི་སྐུར་ཞུགས་ནས་རྡོ་རྗེ་གཉིས་སུ་མེད་པར་
མཉམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས།  རྡོ་རྗེ་སེམས་དཔའི་ཁྲོ་བོ་མེ་ཉི་མ་ཞེས་བྱ་བའི་སྙིང་པོ་འདི་ཉིད་ཐུགས་ཀ་ནས་ཕྱུང་ངོ་། །ཨོཾ་བཛྲ་སཏྭ་ཀྲོ་ཏ་ཞེས་སོགས་གསུངས་པའི་དོན་རྗེས་འཇུག་གི་ཉམས་ལེན་ལ་སྦྱར་བ་ཡིན་པའི་ཕྱིར།  དེས་སྔོན་དུ་ཕྱག་ན་རྡོ་རྗེ་
བསྒོམ་པར་གྲུབ་མོད་ཀྱི།  སྐུ་མདོག་ལྗང་སྔོན་བསྒོམ་པར་གང་ལས་ཤེས་སྙམ་ན།  འདིར་བསྒོམ་པའི་ཕྱག་ན་རྡོ་རྗེ་ནི་རྒྱུད་ལས།  དེ་ནས་བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ཀྱི་མཐུས་བརྟག་པའི་རྒྱལ་པོ་བརྟག་པ་ཕྱི་མ་འདི་
བཤད་དོ། །དཔའ་བོ་གདན་ལས་བཞེངས་ནས་ནི། །དགེས་ཤིང་རྡོ་རྗེ་གསོར་ནས་ཀྱང་། །ཤཱཀྱའི་རྒྱལ་པོ་དགེས་མཛད་པ། །ཐུབ་པའི་གཙོ་ལ་ཕྱག་འཚལ་ནས། །ཞེས་གསུངས་པ་ལྟར།  རྒྱུད་ཕྱི་མ་གསུང་བ་པོ་ཕྱག་ན་རྡོ་རྗེ་དེ་ཉིད་ཡིན་ཅིང་།  དེ་ཡང་སྟོན་པའི་
10-9-4a


འཁོར་ན་གནས་པའི་ཉེ་བའི་སྲས་བརྒྱད་ཀྱི་ནང་ཚན་དུ་གྱུར་པའི་ཕྱག་ན་རྡོ་རྗེ་ཡིན་པས།  དེ་ནི་སྐུ་མདོག་ལྗང་སྔོན་དུ་གྲུབ་པའི་ཕྱིར།  དེས་ན་རྒྱུད་ཕྱི་མ་གསུང་བ་པོའི་ཕྱག་ན་རྡོ་རྗེ་དང་།  རྒྱུད་ཕྱི་མར་དཀྱིལ་འཁོར་གྱི་གཙོ་བོར་གསུངས་པའི་ཕྱག་ན་རྡོ་རྗེ་གཉིས་ནི་
སྐུའི་རྣམ་པ་གཅིག་པ་མ་ཡིན་ནོ། །གང་དག་ཁམས་གསུམ་རྣམ་རྒྱལ་གྱི་བསྲུང་བ་བྱེད་པ་ལ།  ཕྱག་ན་རྡོ་རྗེ་ལྗང་སྔོན་དུ་མི་བསྒོམ་པ་ནི།  རྒྱུད་ནས་གསུངས་པའི་ཉམས་ལེན་དང་འགལ་བས་མ་དག་པར་ཤེས་པར་བྱའོ། །གཟུགས་བརྙན་གྱི་སྦྱོར་བའི་སྐབས་སུ།  རིགས་པའི་
རྣམ་ངེས་ལས།  དང་པོར་བདག་བསྐྱེད་ཀྱི་ལྷ་བསྐྱེད་དེ་ནས་གཟུགས་བརྙན་གྱི་སྦྱོར་བ་བྱེད་པ་ནི་ཤིན་ཏུ་མི་འཐད་དེ།  རྒྱུད་དང་འགལ་བ་དང་།  ལམ་གྱི་རིམ་པ་དང་འགལ་བའི་ཕྱིར་རོ། །དང་པོ་ནི།  གཟུགས་བརྙན་གྱི་སྦྱོར་བ་ནི་འཁོར་ལོས་སྒྱུར་བའི་སྐབས་ནས་འབྱུང་བ་
ཡིན་ལ།  བདག་བསྐྱེད་ཀྱི་ལྷའི་བསྐྱེད་ཆོག་ནི།  ཚེ་དཔག་མེད་ཀྱི་སྐབས་ནས་འབྱུང་བའི་ཉམས་ལེན་ཡིན་པས།  དེ་ཉིད་ཀྱི་བར་མཚམས་སུ་གཟུགས་བརྙན་གྱི་སྦྱོར་བ་བཅུག་པ་ལ་ཤེས་བྱེད་མེད་པའི་ཕྱིར་དང་།  དེ་ནས་རང་གི་ས་བོན་དང་། །ཕྱག་རྒྱས་ཕྱག་རྒྱ་དེ་བྱིན་བརླབ། །
ཅེས་པའི་ཚིག་གཉིས་ཀྱིས་ནི་གནས་གསུམ་བྱིན་བརླབ་སྟོན་པ་ཡིན་གྱི།  གཟུགས་བརྙན་གྱི་སྦྱོར་བ་སྟོན་པ་མ་ཡིན་པའི་ཕྱིར་ཏེ།  ཕྱག་རྒྱ་དེ་ཞེས་པ་ནི་བསྐྱེད་ཟིན་མ་ཐག་པའི་ལྷའི་སྐུ་དེ་ཡིན་ལ།  གཟུགས་བརྙན་གྱི་སྦྱོར་བ་ནི་ལག་པ་བྱིན་གྱིས་བརླབ་པ་ཙམ་ཡིན་གྱི།  ལྷའི་སྐུ་
བྱིན་གྱིས་བརླབ་པ་མ་ཡིན་པའི་ཕྱིར་རོ། །གཉིས་པ་ནི།  རྣལ་འབྱོར་གྱི་རྒྱུད་ཀྱི་ཉམས་ལེན་ནི།  དང་པོར་ཚོགས་བསགས་ནས་དེ་རྗེས་སངས་རྒྱས་པའི་ཉམས་ལེན་ལ་སྦྱར་བ་དང་འགལ་ཏེ།  དང་པོར་བདག་བསྐྱེད་ཀྱི་ལྷ་བསྐྱེད་ནས་དེའི་རྗེས་སུ་གཟུགས་བརྙན་གྱི་སྦྱོར་བ་བྱེད་ན།  དང་
10-9-4b


པོར་སངས་རྒྱས་ནས་དེ་རྗེས་སུ་སྦྱོར་ལམ་དྲོད་ལ་འཇུག་དགོས་པར་འགྱུར་བའི་སྐྱོན་ཡོད་པའི་ཕྱིར་ཏེ།  གཟུགས་བརྙན་གྱི་སྦྱོར་བ་དྲོད་སོགས་དང་སྦྱོར་བ་དེ་གྲུབ་ཆེན་ཀུན་སྙིང་གིས་བཤད་ཅིང་།  ཁྱེད་རང་གིས་ཀྱང་དེ་ལྟར་དུ་ཁས་བླངས་པའི་ཕྱིར་དང་།  དེའི་ཚེ་ལྷ་བསྐྱེད་པ་ནི་སངས་
རྒྱས་པ་དང་སྦྱོར་དགོས་པའི་ཕྱིར།  ཡང་རིགས་པའི་རྣམ་ངེས་ལས།  ཡེ་ཤེས་དབབ་པ་བརྟན་བྱེད་ཀྱི་སྔགས་ལ་ཚན་པ་དྲུག་ཏུ་བཅད་ནས་ས་གཉིས་པ་ནས་བདུན་པའི་བར་ལ་སྦྱོར།  གནས་གསུམ་བྱིན་བརླབ་དག་པ་ས་གསུམ་ལ་སྦྱོར་བ་ཡང་མི་འཐད་དེ།  ཤེས་བྱེད་གང་
ཡང་མེད་པའི་ཕྱིར་དང་།  གོང་གི་རིགས་པས་དེ་ལྟར་དུ་ཐོབ་ན།  སྔགས་དེ་ཉིད་ཚན་པ་དགུར་བྱས་ནས་ས་གཉིས་པ་ནས་བཅུ་པའི་བར་ལ་སྦྱོར་བ་ཡང་ཐོབ་པར་མཚུངས་པའི་ཕྱིར་དང་།  ཨོཾ་བཛྲ་མུཥྚི་བཾ་ལན་གསུམ་བརྗོད་པ་ལ་སྦྱོར་རྒྱུ་མི་འདུག་པའི་ཕྱིར་རོ། །གནས་གསུམ་བྱིན་
བརླབ་དག་པ་ས་གསུམ་ལ་སྦྱོར་བའང་མི་འཐད་དེ།  དེ་ནི་ཕྱག་རྒྱ་ཆེན་པོའི་སྐུ་གྲུབ་ནས་བྱ་དགོས་པའི་ཕྱིར་རོ། །བདག་བསྐྱེད་དངོས་ཀྱི་སྐབས་སུ།  གཞན་ཕན་འོད་ཟེར་ལས།  རང་རང་གི་དཀྱིལ་འཁོར་གྱི་གཙོ་བོ་བསྐྱེད་པ་དང་།  དཀྱིལ་འཁོར་ཐམས་ཅད་དུ་འཇུག་པ་
རྡོ་རྗེ་སེམས་དཔའ་བསྐྱེད་པ་གཉིས་གདམ་ཀ་ཅན་དུ་གསུངས་ནས་གཉིས་ཀ་ཡང་བསྐྱེད་ཆོག་ཚེ་དཔག་མེད་ཀྱི་སྐབས་ནས་གསུངས་པ་ལྟར་ཆོ་ག་གསུམ་ལས་བསྐྱེད།  རྡོ་རྗེ་སེམས་དཔའ་བསྐྱེད་ནས་སྔགས་རྩ་རིག་ཟློས་ཤིང་།  བསྟོད་པ་མཚན་བརྒྱ་རྩ་བརྒྱད་པོ་བྱེད་པར་གསུངས་
པ་ལ།  རིགས་པའི་རྣམ་ངེས་ལས།  ཁ་ཅིག་དག །བདག་བསྐྱེད་རྡོ་རྗེ་སེམས་དཔའ་བསྒོམས་ནས་དེའི་བསྙེན་སྔགས་རྩ་རིག་ཟློས་ཤིང་།  བསྟོད་པ་ཕྱག་ན་རྡོ་རྗེའི་བསྟོད་པ་ཉིད་བྱེད་དོ། །དེ་ཡང་རིགས་པ་མ་ཡིན་ཏེ།  འདིར་ཚངས་པ་ཆེན་པོ་ཞེས་སོགས་ཀྱི་ལྷའི་རྣལ་འབྱོར་གྱི་
10-9-5a


ལུང་དྲངས་ལ།  འདིར་ཀུན་རིག་རྣམ་པར་སྣང་མཛད་ཉིད་ཚངས་པ་ཆེན་པོ་ཡིན་པའི་ཕྱིར་དང་།  ཤཱཀྱ་ཐུབ་པའི་བསྙེན་སྔགས་སུ་གཤིན་རྗེའི་གཤེད་ཀྱི་རྩ་སྔགས་ཟློས་པ་ལྟར་བཞད་གད་ཡིན་པའི་ཕྱིར་དང་།  རྩ་རིག་ནི་ཀུན་རིག་གི་སྔགས་ཀྱི་རྣམ་
གྲངས་ཡིན་པར་གསུངས་ཀྱི།  ཀུན་རིག་ལྷ་ཐམས་ཅད་ཀྱི་རྩ་སྔགས་ཡིན་པའི་ཤེས་བྱེད་མེད་པའི་ཕྱིར་དང་།  རྒྱུད་འདི་ཉིད་ལས་རྡོ་རྗེ་སེམས་དཔའ་དང་ཕྱག་ན་རྡོ་རྗེ་ནི་གཙོ་འཁོར་དུ་གསུངས་ཤིང་།  གཞན་ཡང་།  དེ་ནས་བཅོམ་ལྡན་འདས་ཕྱག་ན་རྡོ་རྗེ་རང་གི་སྐུ་བོར་ཏེ་རྡོ་རྗེ་
སེམས་དཔའི་སྐུར་ཞུགས་ནས།  ཞེས་གསུངས་པས་ཀྱང་དེ་གཉིས་གཅིག་ཏུ་མི་བཞེད་པའི་ཕྱིར་རོ། །ཞེས་བྲིས་སོ། །དེ་དག་རིམ་བཞིན་འགོག་པ་ནི།  འདིར་ཚངས་པ་ཆེན་པོ་ཞེས་སོགས་ཀྱི་ལྷའི་རྣལ་འབྱོར་གྱི་ལུང་དྲངས་པས།  བདག་བསྐྱེད་ལ་རྡོ་རྗེ་
སེམས་དཔའ་བསྐྱེད་པ་མི་འཐད་པའི་རྒྱུ་མཚན་ནི།  རྡོ་རྗེ་སེམས་དཔའ་ནི་ཞལ་བཞི་མེད་པས་ཚངས་པ་ཆེན་པོའི་དོན་མི་གནས་པའི་ཕྱིར་ཞེས་བཀོད་པར་སྣང་བས་དེ་ནི་ཤིན་ཏུ་མི་འཐད་དེ།  ཚངས་པ་ཆེན་པོ་ནི་རྫོགས་པའི་སངས་རྒྱས་ཀྱི་མཚན་གྱི་རྣམ་གྲངས་ཡིན་གྱི།  དེ་ལ་
ཞལ་བཞི་ཡོད་མི་དགོས་པའི་ཕྱིར་ཏེ།  སྔོན་བྱུང་ལ་སྟོན་པ་ཤཱཀྱ་ཐུབ་པ་སུམ་ཅུ་རྩ་གསུམ་གྱི་དགའ་བའི་ཚལ་གྱི་པདྨའི་གདན་ལ་བཞུགས་པ་ལ།  ཚངས་པ་ཆེན་པོ་པདྨའི་གདན་ལ་བཞུགས་ནས་ཞེས་གསུངས་པའི་ཕྱིར་དང་།  ཕྱག་ན་རྡོ་རྗེའི་མཚན་གྱི་རྣམ་གྲངས་ལ་
ཡང་མ་རིག་འཇོམས་པའི་ཚངས་པ་སྟེ།  ཞེས་གསུངས་པའི་ཕྱིར་རོ། །དེ་ལྟར་མ་ཡིན་པར་ཞལ་བཞི་མེད་ན་ཚངས་པ་ཆེན་པོའི་སྒྲ་མི་འཇུག་པས་ཁྱབ་ན།  སངས་རྒྱས་ཀྱི་བསྟོད་པ་ལ།  སྟོན་པ་གླང་པོ་དེ་ལ་ཕྱག་འཚལ་ལོ། །ཞེས་དང་།  སྟོན་པ་སེང་གེ་དེ་ལ་ཕྱག་འཚལ་ལོ། །
10-9-5b


ཞེས་པའང་མི་འཐད་པར་འགྱུར་ཏེ།  སྟོན་པ་ལ་གླང་པོའི་སྣ་མེད་པའི་ཕྱིར་དང་།  སེང་གེའི་གཡུ་རལ་མེད་པའི་ཕྱིར་རོ། །དེས་ན་རྒྱུད་ལས་ཤཱཀྱ་ཐུབ་པ་པདྨའི་གདན་ལ་བཞུགས་པ་ལ་ཚངས་པ་ཆེན་པོ་ཞེས་སོགས་གསུངས་བཞིན་དུ་རྡོ་རྗེ་སེམས་དཔའ་ལ་ཞལ་བཞི་མ་
ཚང་བས་ཚངས་པ་ཆེན་པོའི་འདྲ་ཆོས་མེད་དོ་ཞེས་སྨྲ་བ་ནི་རྒྱུད་དངོས་སུ་འགོག་པ་ཡིན་པས་འཛིན་པ་ལྟ་ཅི་སྨོས།  ཐོས་པར་གྱུར་ན་ཡང་རྣ་བ་དགབ་པར་བྱའོ། །ཀུན་རིག་རྣམ་པར་སྣང་མཛད་ཉིད་ཚངས་པ་ཆེན་པོ་ཡིན་ཞེས་པའི་རྣམ་བཅད་ཀྱི་ཚིག་དེ་མི་ལྡན་རྣམ་
གཅོད་ཡིན་ནམ།  གཞན་ལྡན་རྣམ་གཅོད་ཡིན།  དང་པོ་ལྟར་ན།  དེས་རྡོ་རྗེ་སེམས་དཔའ་ཚངས་པ་ཆེན་པོ་ཡིན་པ་འགོག་མི་ནུས་ལ།  ཕྱི་མ་ལྟར་ན་མི་མཇེད་ཀྱི་བདག་པོ་ཚངས་པ་ཆེན་པོ་དེ་ཡང་ཚངས་པ་ཆེན་པོ་མ་ཡིན་པར་འགྱུར་རོ། །བདག་བསྐྱེད་རྡོ་རྗེ་སེམས་
དཔར་བསྐྱེད་ནས་སྔགས་རྩ་རིག་ཟློས་པ་ཡང་ཤཱཀྱ་ཐུབ་པའི་བསྙེན་སྔགས་སུ་གཤིན་རྗེའི་གཤེད་ཀྱི་སྔགས་ཟློས་པ་ལྟར་བཞད་གད་གྱི་གནས་ཡིན་ཞེས་པ་ཡང་མི་འཐད་དེ།  ཁྱེད་རང་གི་རྒྱུད་དོན་གསལ་བར།  བསྡུས་པར་བྱེད་ན།  བདག་ཉིད་རྡོ་རྗེ་སེམས་དཔའ་བསྐྱེད་
ནས་ཚངས་པ་ཆེན་པོ་ཞེས་སོགས་ཀྱི་ཚིག་དོར་ཏེ།  ཨོཾ་བཛྲ་སཏྭ་ཧཱུཾ་ཞེས་པ་བརྒྱ་རྩ་བརྒྱད་དང་།  དེའི་རྗེས་སུ་དུར་ག་ནི་བདུན་ནམ་ཉེར་གཅིག་ལ་སོགས་པ་བཟླས་ཤིང་།  མཆོད་པ་རྣམ་པ་བདུན་ཙམ་ཕུལ་ཏེ།  རྡོ་རྗེ་སེམས་དཔའ་སེམས་དཔའ་ཆེ། །ཞེས་པའི་ཤོ་ལོ་ཀ་
གཅིག་གིས་བསྟོད་པར་བྱའོ་ཞེས་འདོད་པ་ལ་ཡང་བདག་ཉིད་ཤཱཀྱ་ཐུབ་པར་བསྐྱེད་ནས།  ཨོཾ་མུ་ནེ་མུ་ནེ་ཞེས་སོགས་བརྒྱ་རྩ་བརྒྱད་དང་།  དེའི་རྗེས་སུ་གཤིན་རྗེའི་གཤེད་ཀྱི་སྔགས་བདུན་ནམ་ཉེར་གཅིག་ལ་སོགས་པ་བཟླ་དགོས་པར་མཚུངས་པའི་ཕྱིར་རོ། །བདག་བསྐྱེད་ལ་རྡོ་རྗེ་སེམས་དཔའ་
10-9-6a


བསྐྱེད་པའི་ཚེ་ན་ཨོཾ་བཛྲ་སཏྭ་ཧཱུཾ་ཞེས་པ་བསྙེན་སྔགས་སུ་འདོད་པ་ཡང་ཤིན་ཏུ་མི་འཐད་དེ།  དེ་ལྟར་ན་རྒྱུད་ལས།  འབུམ་ཕྲག་གསུམ་མམ་ཡང་ན་དྲུག །དེ་ནས་དབེན་པའི་གནས་སུ་ནི། །བརྒྱད་བརྒྱ་ཉིད་དུ་ཚང་བར་བྱ། །ཞེས་དང་།  མཚན་གཅིག་
ཐོག་ཐག་བཟླ་བར་བྱ། །ཞེས་དང་།  སྔ་མ་བཞིན་དུ་བུམ་པ་ལ། །བརྒྱ་རྩ་བརྒྱད་དུ་བཟླས་ནས་ནི། །ཞེས་པའི་སྐབས་ཀྱི་བཟླ་བྱའི་སྔགས་རྣམས་ཀྱང་བཛྲ་སཏྭ་ཡིན་པར་འགྱུར་བ་ལས།  དེ་དག་གི་གོང་དུ་རྩ་རིག་བཤད་པ་ཡིན་གྱི།  ཨོཾ་བཛྲ་སཏྭ་ཧཱུཾ་ཞེས་
གསུངས་པ་མེད་པའི་ཕྱིར་རོ། །མདོར་ན་རྒྱུད་འདིར་འཁོར་ལོས་སྒྱུར་བའི་སྐབས་སུ་བཛྲ་སཏྭ་བཅུ་དྲུག་ལ་སེམས་དཔའ་བཅུ་དྲུག་གི་ས་བོན་སྦྱར་བ་ནི།  རོལ་མོ་བརྡུང་བའི་སྔགས་ཡིན་ལ།  དེ་ལས་གཞན་བཛྲ་སཏྭ་བདག་བསྐྱེད་ཀྱི་བསྙེན་སྔགས་སུ་བཤད་པ་མེད་པས་མ་དག་
པར་ཤེས་པར་བྱའོ། །རྩ་རིག་ཀུན་རིག་ཁོ་ནའི་སྔགས་ཀྱི་རྣམ་གྲངས་ཡིན་པར་གསུངས་ཞེས་པ་ཡང་།  སྦྱོང་རྒྱུད་འདི་ན་དེ་ལྟར་གསུངས་པ་མི་སྣང་སྟེ།  རྒྱུད་ལས་ལྷའི་དབང་པོ་གཞན་ཡང་མདོར་ན་དྲན་པ་ཙམ་གྱིས་ཀྱང་།  བསོད་ནམས་ཆུང་བའི་སེམས་ཅན་
རྣམས་ངན་སོང་གི་རྒྱུད་ཐམས་ཅད་ལས་བདེ་བླག་ཏུ་རྣམ་པར་གྲོལ་བར་འགྱུར་བ་ནི་འདི་ཡིན་ནོ། །ན་མོ་བྷ་ག་ཝ་ཏེ།  ཞེས་པ་ནས་ཨོཾ་ཤ།  ཨོཾ་བྷ་ཞེས་པའི་བར་སྔགས་བཅུ་གསུམ་འབྲེལ་ཆགས་སུ་གསུངས་པས་དེ་དག་ཀུན་རིག་གི་སྔགས་ཡིན་ན།  ཨོཾ་སརྦྦ་བིད་
ཧཱུཾ་སོགས་ཀྱང་ཀུན་རིག་གི་སྔགས་ཡིན་པར་ཁས་བླང་དགོས་པའི་ཕྱིར་རོ། །དེས་ན་རྩ་རིག་ནི་ཀུན་རིག་གི་ལྷ་ཐམས་ཅད་ཀྱི་རྩ་སྔགས་ཡིན་པར་ཡང་གྲུབ་སྟེ།  འདིར་དང་པོར་རྩ་རིག་གསུངས་ནས་དེའི་འོག་ཏུ་རིགས་ལྔའི་སྔགས་ཚན་པ་གཉིས་ལོགས་སུ་གསུངས་
10-9-6b


པའི་ཕྱིར་ན།  རྩ་རིག་ནི་དེ་ཐམས་ཅད་ལ་ཐུན་མོང་དུ་ཁྱབ་པར་བསྟན་གྱི་གཙོ་བོ་ཁོ་ནའི་མ་ཡིན་པར་བསྟན་པའི་ཕྱིར་རོ། །གལ་ཏེ་སྔགས་དོན་ལ།  ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ཞེས་པ་འབྱུང་བས་གཙོ་བོ་ཁོ་ནའི་སྔགས་ཡིན་ནོ་སྙམ་ན།  དེ་ནི་མ་དཔྱད་པ་སྟེ།  དེ་ཡི་
སྤྱན་སྔར་ངན་སོང་ཀུན། །སྦྱོང་བའི་རྒྱལ་པོ་བྲི་བྱ་སྟེ། །ཞེས་གསུངས་པས་སྦྱོང་རྒྱལ་ཡང་གཙོ་བོར་འགྱུར་བའི་སྐྱོན་ཡོད་པའི་ཕྱིར་རོ། །རྩ་རིག་ཀུན་རིག་གི་ལྷ་ཐམས་ཅད་ཀྱི་སྔགས་ཡིན་པ་འགོག་པ་ནི་རང་ལུགས་དང་ཡང་འགལ་ཏེ།  ཁྱེད་རང་གི་རིགས་པའི་རྣམ་ངེས་སུ་
སྔགས་ནི།  ཨོཾ་སརྦྦ་བིད་ཞེས་སོགས་ཏེ།  རང་སྔགས་མ་བཤད་པ་རྣམས་ལ་ཡང་ཐུན་མོང་དུ་རྩ་རིག་བརྗོད་པར་བྱ་སྟེ།  འཁོར་རྣམས་ནི་གཙོ་བོའི་སྔགས་ཀྱིས་སྒྲུབ་ནས་ལས་བྱས་པ་ཡིན་པས་སོ་ཞེས་བཤད་པའི་ཕྱིར་རོ། །བདག་བསྐྱེད་རྡོ་རྗེ་སེམས་དཔར་བསྐྱེད་ནས། 
སངས་རྒྱས་ཀུན་པས་སྔར་སངས་རྒྱས། །ཞེས་སོགས་ཀྱིས་བསྟོད་པ་བྱེད་པ་མི་འདོད་པ་ལ་ནི་རྒྱུད་དང་འགལ་བ་དང་།  ཁས་བླངས་དང་འགལ་བ་དང་།  རིགས་པ་དང་འགལ་བ་གསུམ་ལས།  དང་པོ་ནི།  མེ་ལྟར་འབར་བའི་སྐབས་ནས།  དེ་ནས་ཕྱག་ན་རྡོ་རྗེ་རང་གི་སྐུ་བོར་
ཏེ།  རྡོ་རྗེ་སེམས་དཔའི་སྐུར་ཞུགས་ནས་ཞེས་སོགས་སྔར་དྲངས་པ་ལྟར།  ཕྱག་ན་རྡོ་རྗེ་རྡོ་རྗེ་སེམས་དཔའི་སྐུར་ཞུགས་པ་དེ་ཉིད་ཀྱིས་རྒྱུད་ལྷག་མ་རྫོགས་པར་གསུངས་ནས།  རྡོ་རྗེ་སེམས་དཔའ་དེ་ཉིད་ལ། །དེ་ནས་བརྒྱ་བྱིན་ཚངས་སོགས་ལྷས། །ཕྱག་འཚལ་
ཡང་ནས་ཡང་དུ་ནི། །རིན་ཆེན་གདུགས་ལ་སོགས་མཆོག་གིས། །མཆོད་པ་སྣ་ཚོགས་བྱས་ནས་ཀྱང་། །ཕྱག་ན་རྡོ་རྗེ་དགེས་སྤྱན་ལ། །དགའ་བའི་བསམ་པས་བསྟོད་བྱེད་པ། །སངས་རྒྱས་ཀུན་པས་སྔར་སངས་རྒྱས། །ཞེས་སོགས་གསུངས་པས།  རྡོ་རྗེ་
10-9-7a


སེམས་དཔའ་ལ་ཕྱག་ན་རྡོ་རྗེའི་བསྟོད་པ་བྱས་པ་དང་འགལ་ལོ། །དེས་ན་རྡོ་རྗེ་སེམས་དཔའ་ལ་ཕྱག་ན་རྡོ་རྗེའི་བསྟོད་པ་བྱེད་པ་མི་འཐད་ཅེས་པ་ནི།  སྦྱོང་རྒྱུད་ཉན་པའི་འཁོར་གྱི་ཚངས་པ་དང་།  བརྒྱ་བྱིན་ལ་སོགས་པ་ལ་དགག་པ་བརྗོད་པར་སྣང་སྟེ།  
དེ་དག་གིས་དེ་ལྟར་དུ་བསྟོད་པའི་ཕྱིར་རོ། །གལ་ཏེ་རྒྱུད་ལྷག་མ་རྣམས་རྫོགས་ནས།  རྡོ་རྗེ་སེམས་དཔའ་རང་གི་སྐུ་བོར་ཏེ།  ཕྱག་ན་རྡོ་རྗེའི་སྐུར་ཞུགས་པ་ལ་སྔར་ལྟར་བསྟོད་པས་སྐྱོན་མེད་དོ་སྙམ་ན།  དེ་ནི་མ་ཡིན་ཏེ།  དབང་གི་ལས་རྫོགས་སོ་ཞེས་པའི་དེ་མ་ཐག་ཏུ། 
དེ་ནས་བརྒྱ་བྱིན་ཚངས་སོགས་ལྷས། །ཞེས་སོགས་གསུངས་ཀྱི།  བར་སྐབས་དེར་ཕྱག་ན་རྡོ་རྗེའི་སྐུར་བསྒྱུར་བ་མི་སྣང་བའི་ཕྱིར་དང་།  གལ་ཏེ་དེ་ལྟར་དུ་ཁས་ལེན་ན་ཡང་།  རྡོ་རྗེ་རབ་དགེས་རྡོ་རྗེ་སེམས། །ཀུན་ཏུ་བཟང་པོ་ཆེར་བཟང་བ། །ཞེས་ཕྱག་ན་རྡོ་རྗེ་ལ།  རྡོ་རྗེ་
སེམས་དཔའ་དང་ཀུན་ཏུ་བཟང་པོའི་བསྟོད་པ་བྱས་པ་དེ་དང་རྡོ་རྗེ་སེམས་དཔའ་ལ་ཕྱག་ན་རྡོ་རྗེའི་བསྟོད་པ་བྱས་པ་གཉིས་ལ་འཐད་མི་འཐད་ཀྱི་ཁྱད་པར་འཇམ་པའི་དབྱངས་ཀྱིས་ཀྱང་འབྱེད་པར་མི་ནུས་པའི་ཕྱིར་རོ། །གཉིས་པ་ནི།  ཁྱེད་རང་གིས་རྡོ་རྗེ་སེམས་དཔའ་བསྐྱེད་ནས།  རྡོ་རྗེ་
སེམས་དཔའ་སེམས་དཔའ་ཆེ། །ཞེས་སོགས་ཀྱིས་བསྟོད་པ་བྱེད་པ་དང་འགལ་ཏེ།  དེ་ཉིད་ཀྱི་མཇུག་ཏུ།  ཕྱག་འཚལ་ཕྱག་ན་རྡོ་རྗེ་ལའོ། །ཞེས་པ་ཡོད་པའི་ཕྱིར་རོ། །གལ་ཏེ་ཕྱག་འཚལ་རྡོ་རྗེ་སེམས་དཔའ་ལའོ། །ཞེས་འདོན་པ་བསྒྱུར་བ་ཡིན་ནོ་ཞེ་ན།  དེ་ནི་གྱི་ན་སྟེ།  
དེ་ལྟར་ན།  ཐོག་མའི་རྡོ་རྗེ་སེམས་དཔའ་ཞེས་པ་དང་།  མཇུག་གི་རྡོ་རྗེ་སེམས་དཔའ་ཞེས་པ་གཉིས་མཚན་གྱི་རྣམ་གྲངས་གཅིག་ཏུ་སོང་བས།  སེམས་དཔའ་བཅུ་དྲུག་གི་བསྟོད་པ་ལ་མཚན་བརྒྱ་རྩ་བརྒྱད་མ་ཚང་བར་ཐལ་བའི་སྐྱོན་ཡོད་པའི་ཕྱིར་དང་།  དེ་ཉིད་འདུས་པའི།  
10-9-7b


ཕྱག་འཚལ་ཕྱག་ན་རྡོ་རྗེ་ལའོ།   །ཞེས་པ་ཡན་ཆད་ཀྱི་ཚིགས་བཅད་དེ་རྡོ་རྗེ་སེམས་དཔའ་ལ་བསྟོད་པའི་ཚེ་རྒྱུད་གསུང་བ་པོ་དེས།  བསྟོད་ཡུལ་གྱི་རྡོ་རྗེ་སེམས་དཔའ་ངོ་མ་ཤེས་པར་ཐལ་བའི་སྐྱོན་ཡོད་པའི་ཕྱིར་དང་།  དང་པོའི་རྡོ་རྗེ་ཀུན་ཏུ་བཟང་། །ཞེས་པ་ཡང་།  དང་པོའི་རྡོ་རྗེ་
རྡོ་རྗེ་སེམས། །ཞེས་པར་འདོན་པ་བསྒྱུར་དགོས་པར་ཐལ་བའི་སྐྱོན་ཡོད་པའི་ཕྱིར་རོ།  ¤།  གསུམ་པ་ནི།  འོག་མིན་རྣམ་པར་སྣང་མཛད་ཀྱི་ཐུགས་ཡང་དག་པའི་ཡེ་ཤེས་ཐོག་མ་དང་།  ཐ་མ་མེད་པ་བྱང་ཆུབ་ཀྱི་སེམས་སྤྲོས་པ་ཐམས་ཅད་དང་བྲལ་བ་དེ།  གཟུགས་ཀྱི་
རྣམ་པར་ལངས་པ་ན།  རྡོ་རྗེ་སེམས་དཔའི་སྐུར་བསྟན་ནས།  རྣམ་པར་སྣང་མཛད་ཀྱི་འཁོར་གྱི་ཚུལ་དུ་བཞུགས།  དེ་ཉིད་གཞི་དང་སྙིང་པོ་མེ་ཏོག་གིས་བརྒྱན་པའི་འཇིག་རྟེན་གྱི་ཁམས་སུ་ཀུན་ཏུ་བཟང་པོའི་སྐུར་བསྟན།  དེ་ཉིད་མི་མཇེད་འཇིག་རྟེན་གྱི་ཁམས་སུ་ཕྱག་ན་
རྡོ་རྗེའི་སྐུར་བསྟན་པར་ཐུན་མོང་མ་ཡིན་པའི་གསང་བ་སོགས་ནས་བཤད་པ་དེ་ཡང་མི་འཐད་པར་འགྱུར་ཏེ།  རྡོ་རྗེ་སེམས་དཔའ་ལ་ཕྱག་ན་རྡོ་རྗེའི་བསྟོད་པ་བྱེད་པ་མི་འཐད་པའི་ཕྱིར་རོ། །དེས་ན་དེ་གསུམ་ངོ་བོ་གཅིག་པའི་ཕྱིར་ན།  རྒྱུད་འདིའི་མཚན་བརྒྱ་རྩ་བརྒྱད་ཀྱི་ནང་དུ་ཡང་
དེ་གསུམ་ཆར་གྱི་མཚན་གྱི་རྣམ་གྲངས་གསུངས་ཤིང་།  དེ་ཉིད་འདུས་པའི་ལུང་དྲངས་པའི་ཚིགས་བཅད་གཅིག་པོ་དེའི་ནང་དུ་ཡང་།  དེ་གསུམ་ཆར་གྱི་མཚན་གྱི་རྣམ་གྲངས་གསུངས་པ་ནི་གནད་ཀྱི་དོན་དུ་ཤེས་པར་བྱའོ། །དེ་ལ་སྲུང་འཁོར་གྱི་སྐབས་སུ།  ཕྱག་ན་རྡོ་རྗེ་ལྗང་
སྔོན་བསྐྱེད་པ་ནི།  བརྟག་པ་ཕྱི་མ་གསུང་བ་པོའི་ཕྱག་རྡོར་བསྐྱེད་པའི་དབང་དུ་བྱས་ལ།  བདག་བསྐྱེད་ཀྱི་སྐབས་སུ་རྡོ་རྗེ་སེམས་དཔའ་དཀར་པོ་བསྐྱེད་པ་ནི།  འོག་མིན་ན་བཞུགས་པའི་རྡོ་རྗེ་སེམས་དཔའ་བསྐྱེད་པའི་དབང་དུ་བྱས་ཤིང་།  རྣམ་སྣང་བསྐྱེད་པ་ནི།  དཀྱིལ་འཁོར་
10-9-8a


གྱི་གཙོ་བོ་བསྐྱེད་པའི་དབང་དུ་བྱས་སོ། །དེ་བཞིན་དུ་དཀྱིལ་འཁོར་གཞན་བཅུ་གཅིག་ལ་བདག་བསྐྱེད་ལ་རྡོ་རྗེ་སེམས་དཔའ་བསྐྱེད་པ་དང་།  རང་རང་གི་དཀྱིལ་འཁོར་གྱི་གཙོ་བོ་གང་རུང་བསྐྱེད་པ་གཉིས་ནི་འདྲ་ལ།  རྒྱུད་ཀྱི་དངོས་བསྟན་ནི་རྡོ་རྗེ་སེམས་
དཔའ་བསྐྱེད་པ་སྟེ།  བདག་བསྐྱེད་གསལ་བར་སྟོན་བྱེད་ཀྱི་གཞུང་།  བདག་གི་དེ་ཉིད་དྲན་བྱེད་ཅིང་། །ཞེས་དང་།  རྡོ་རྗེ་སེམས་དཔའི་གནས་འདུག་ནས། །ཞེས་པ་གཉིས་ལས་མེད་པའི་ཕྱིར་རོ། །གང་ལྟར་ཡང་བསྐྱེད་ཆོག་ནི་ཚེ་དཔག་མེད་ཀྱི་སྐབས་ནས།  ཆོས་རྣམས་
ཐམས་ཅད་དངོས་མེད་པར། །སེམས་ཀྱིས་བསྒོམ་པར་བྱས་ནས་ཀྱང་། །ཨ་ལས་ཟླ་བའི་དཀྱིལ་འཁོར་བསམ། །རང་གི་ས་བོན་དེ་དབུས་སུ། །བསམས་ནས་དམ་ཚིག་ཕྱག་རྒྱ་དག །བསམ་ཞིང་དེ་བཞིན་དེ་ཉིད་དུ། །སྒྲུབ་པ་པོས་ནི་བསྒྱུར་བར་བྱ། །རང་གི་རྣལ་འབྱོར་
ཚུལ་དུ་བསྒྱུར། །དེ་ནས་རང་གི་ས་བོན་དང་། །ཕྱག་རྒྱས་ཕྱག་རྒྱ་དེ་བྱིན་བརླབ། །ལྟག་འོག་གོ་རིམ་ཇི་བཞིན་དུ། །སངས་རྒྱས་རྣམས་ཀྱིས་དབང་བསྐུར་རོ། །ཞེས་འབྱུང་བས་དེའི་དོན་ནི་ཚིག་རྐང་པ་དང་པོ་གཉིས་ཀྱིས་སྭ་བྷཱ་ཝའི་སྔགས་ཀྱིས་སྟོང་པར་བསྒོམ་པ་
བསྟན།  གསུམ་པས་གདན་གྱི་ཟླ་བ་བསྒོམ་པ་བསྟན།  དེའི་འོག་ཏུ་པདྨ་བསྒོམ་པ་ནི།  གླེང་གཞིར།  ཚངས་པ་ཆེན་པོ་པདྨའི་གདན་ལ་བཞུགས་ཏེ་ཞེས་པས་བསྟན་ཞེས་རྗེ་བཙུན་གྱིས་གསུངས་ལ།  དེ་ནས་ཚིག་རྐང་ཕྱེད་དང་གསུམ་གྱིས་ས་བོན་ལས་ཕྱག་མཚན་ས་བོན་གྱིས་མཚན་པ་
བསྒོམ་པ་བསྟན།  དེ་ནས་ཕྱེད་དང་གསུམ་གྱིས་ལྷའི་སྐུ་བསྐྱེད་པ་བསྟན།  དེ་ནས་གཉིས་གཉིས་ཀྱིས་གནས་གསུམ་བྱིན་བརླབ་དང་སངས་རྒྱས་ལྔས་དབང་བསྐུར་བ་བསྟན་ནོ། །འདིར་བདག་བསྐྱེད་དཔའ་བོ་གཅིག་པ་ནི།  ཚིགས་བཅད་གསུམ་པོ་འདིའི་དོན་ཉམས་སུ་
10-9-8b


ལེན་པ་ཡིན་པས།  ཡོ་ག་གཞན་ལྟར་ཡེ་ཤེས་ཀྱི་འཁོར་ལོ་དགུག་གཞུག་དང་།  ལྷ་བསྐྱེད་པ་དང་གནས་གསུམ་བྱིན་རླབས་ཀྱི་བར་དུ་གཟུགས་བརྙན་གྱི་སྦྱོར་བ་འདུག་པ་རྣམས་ནི་མ་དག་པར་ཤེས་པར་བྱའོ།།    །།དཀྱིལ་འཁོར་ཡོངས་རྫོགས་ཀྱི་བསྙེན་པའི་སྐབས་སུ། 
གཞན་ཕན་འོད་ཟེར་ལས་ཀུན་རིག་གི་སྐབས་ནས།  དེ་ནི་དཀྱིལ་འཁོར་སྙིང་པོར་གསུངས། །ཞེས་པའི་རྗེས་ལ།  ཕྱིའི་དཀྱིལ་འཁོར་གསུངས་པ་ཞེས་པས་ནང་གི་དཀྱིལ་འཁོར་བསྒོམ་པར་བསྟན།  ཡང་རས་བྲིས་ཀྱི་སྐབས་ནས་ཀྱང་།  དཀྱིལ་འཁོར་སྔ་མ་བཞིན་བསམས་ལ། 
ཞེས་པས་དཀྱིལ་འཁོར་བསྒོམས་ཟིན་ཏོ་ཞེས་གསུངས་པ་ལ།  རིགས་པའི་རྣམ་ངེས་ལས།  དེ་ནི་མ་ཡིན་ཏེ་འདིར་བསྙེན་སྒྲུབ་གཉིས་ལས་སྒྲུབ་པའི་མཐའ་ཁོ་ནར།  དེ་ནས་བཟླས་པའི་མཇུག་ཏུ་ནི། །དཀྱིལ་འཁོར་སྔ་མ་བཞིན་བསམས་ནས། །མཆོད་པ་རྒྱ་ཆེར་བྱས་ནས་
ཀྱང་། །མཚན་གཅིག་ཐོག་ཐག་བཟླས་པར་བྱ། །ཅི་སྟེ་གཙོ་བོའམ་དེ་ཡི་སྲས། །ཡང་ན་ལྷ་རྣམས་མཐོང་གྱུར་ན། །བསོད་ནམས་འདོད་ལ་ཅི་དགའ་བར། །དངོས་གྲུབ་མཆོག་ནི་སྩོལ་བར་བྱེད། །ཅེས་བཞེད་ཀྱི་འདི་ཁོ་ནར་དཀྱིལ་འཁོར་གྱི་བསྙེན་པ་བྱེད་པའི་རྒྱུ་
མཚན་མེད་པའི་ཕྱིར་རོ། །ཞེས་བྱ་བ་བྲིས་སོ། །དེ་ནི་ཁྱེད་རང་གི་ལུགས་དང་འགལ་ཏེ།  ཅི་སྟེ་གཙོ་བོའམ་དེ་ཡི་སྲས། །ཞེས་སོགས་ཀྱི་ཚིགས་བཅད་དེ།  རྣམ་ངེས་གཉིས་ཀ་ལས་མཚན་མའི་བསྙེན་པ་སྟོན་བྱེད་ཀྱི་གཞུང་དུ་བཤད་པ་ལ་ཡང་མཚུངས་ཏེ།  དེ་ནི་སྒྲུབ་པའི་
མཐའ་ཁོ་ནར་གསུངས་ཀྱི།  དང་པོ་ཁོ་ནར་དཀྱིལ་འཁོར་གྱི་བསྙེན་པ་བྱེད་པ་སྟོན་པའི་རྒྱུ་མཚན་མེད་པར་མཚུངས་པའི་ཕྱིར་རོ། །གལ་ཏེ་གཞུང་དེས་སྒྲུབ་པའི་མཚན་མ་སྟོན་ཀྱང་བསྙེན་པའི་མཚན་མ་ལ་སྦྱོར་བ་མི་འགལ་ཏེ།  དེ་གཉིས་ཀྱི་མཚན་མ་འབྱུང་ཚུལ་མཚུངས་པའི་ཕྱིར་
10-9-9a


ཞེ་ན།  འོ་ན་གཞུང་དེས་སྒྲུབ་པའི་སྐབས་ཀྱི་དཀྱིལ་འཁོར་སྟོན་ཀྱང་བསྙེན་པའི་དཀྱིལ་འཁོར་ལ་སྦྱོར་བ་མི་འགལ་ཏེ།  དེ་གཉིས་དཀྱིལ་འཁོར་བསྒོམ་པའི་ཚུལ་མཚུངས་པའི་ཕྱིར་རོ། །ཡང་ཁ་ཅིག་དཀྱིལ་འཁོར་སྔ་མ་བཞིན་བསམས་ལ།  ཞེས་པས་རས་
བྲིས་ཀྱི་ཞིང་བཀོད་མ་དེ་ཉིད་སྟོན་ཏེ།  ཞེས་སྨྲ་བ་ནི་མི་འཐད་དེ།  དེ་ལ་དཀྱིལ་འཁོར་གྱི་ཐ་སྙད་མ་གསུངས་པའི་ཕྱིར་དང་།  གོང་དུ་རྡུལ་ཚོན་གྱི་དཀྱིལ་འཁོར་ལ་དཀྱིལ་འཁོར་གྱི་ཐ་སྙད་གསུངས་པའི་ཕྱིར་རོ། །དེས་ན་སྔར་རྡུལ་ཚོན་གྱི་དཀྱིལ་འཁོར་གསུངས་པ་ཇི་ལྟ་བ་བཞིན་དུ་འདིར་
སྒྲུབ་པའི་སྐབས་སུ་བདག་བསྐྱེད་ལ་བསྒོམ་པར་དངོས་སུ་གསུངས་པས།  བསྙེན་པའི་སྐབས་སུ་ཡང་དཀྱིལ་འཁོར་ཡོངས་རྫོགས་བསྒོམ་པར་གྲུབ་བོ། །བསྙེན་པའི་སྐབས་ཀྱི་རྩོད་པ་སྤོང་བ་རྣམས་བསྟན་ཟིན་ཏོ། །གཉིས་པ་དེས་ལས་སུ་བྱ་བའི་རིམ་པ་ལ་སློབ་དཔོན་གྱི་ལས་སུ་བྱ་བ་དང་།  
སློབ་མ་འཇུག་ཅིང་དབང་བསྐུར་བ་གཉིས།  དང་པོ་ལ་བསྙེན་པ་སྔོན་དུ་བྱ་བ་དང་།  སའི་ཆོ་ག་དང་།  ཤུགས་ལས་བྱུང་བ་སྟ་གོན་བྱས་ཀྱང་འགལ་བ་མེད་པ་དང་།  བྲི་ཞིང་ལྷ་དགོད་པ་དང་།  སྡིག་པ་སྦྱང་བའི་རྟེན་དགོད་པ་དང་།  རྒྱན་དགྲམ་པ་དང་།  བདག་གི་རྣལ་འབྱོར་དང་།  
ལྷ་བསྒྲུབ་པ་དང་།  མཆོད་ཅིང་གཏོར་མ་བྱ་བ་དང་།  སློབ་དཔོན་བདག་ཉིད་འཇུག་པ་དང་བཅུ་ལས།  དང་པོ་ནི་བརྗོད་ཟིན་ཏོ།།    །།གཉིས་པ་ས་ཆོག་གི་སྐབས་སུ་གཞན་ཕན་འོད་ཟེར་ལས།  ཀུན་རིག་གི་སྐབས་ནས།  གཙུག་ལག་ཁང་དང་སྐྱེད་མོས་ཚལ། །མཆོད་
རྟེན་ལྷ་ཁང་ཀུན་དགའ་སོགས། །ཇི་བཞིན་པ་ཡི་ཆོ་ག་ཡིས། །གནས་ནི་བྱིན་གྱིས་བརླབ་པ་ཙམ། །བྱིན་གྱིས་བརླབས་པའི་གནས་དེར་ནི། །ཕྱི་ཡི་དཀྱིལ་འཁོར་བྲི་བར་བྱ། །ཞེས་འབྱུང་བས་ས་ཆོག་བྱ་དགོས་པ་རྣམས་ཀྱི་ཆོ་ག་རྒྱས་པར་བྱེད་ན།  རྡོ་རྗེ་རྩེ་མོའམ།  གསང་
10-9-9b


བ་སྤྱི་རྒྱུད་ནས་བཤད་པ་བཞིན་ནམ།  དེ་དག་གི་དོན་བསྡུས་པ་དཀྱིལ་ཆོག་གཞན་ནས་འབྱུང་བ་བཞིན་བྱའོ། །དེ་ཙམ་བྱ་བ་མ་གྲུབ་ན།  ས་ཕྱོགས་དེར་གཏོར་མ་རྒྱས་པར་བཏང་ལ།  ས་ཕྱོགས་དེ་ན་གནས་པའི་མི་མ་ཡིན་པ་ལ་ཞི་བས་བསླང་།  ཁྲོ་བོའི་སྔགས་ཟློས་ཤིང་།  གུ་གུལ་
གྱི་དུད་པ་དང་ཡུངས་ཀར་གྱིས་བྲབ་ཅིང་དྲག་པོས་བསླང་ངོ་། །ལག་པས་མནན་ལ་ས་གཞི་ནམ་མཁར་བསྒོམས་ཏེ།  ཨོཾ་བྷུ་ཁཾ་ཞེས་པ་དང་།  ཨོཾ་ཧ་ན་ཧ་ན་ཀྲོ་དྷ་ཧཱུཾ་ཕཊ།  ཞེས་མང་དུ་བཟླས་ཏེ་དཀྱིལ་འཁོར་ཇི་ཙམ་བྱེད་པའི་ས་གཞི་མཛེས་པར་ག་དར་ལེགས་པར་བྱའོ། །
ཆོ་ག་བསྡུས་པ་འདི་ནི་བླ་མའི་གསུང་ངོ་། །ཞེས་གསུངས་པ་ལ།  རིགས་པའི་རྣམ་ངེས་ལས།  དེ་ནི་མ་ཡིན་ཏེ་སའི་ཆོ་ག་དགོས་པ་རྣམས་ཀྱི་ཕྱོགས་སུ་ཞེས་པའི་སྟོབས་ཀྱིས།  ས་ཆོག་མི་དགོས་པའི་རྡུལ་ཚོན་གྱི་ཆོ་ག་ཁས་བླངས་པར་འགྱུར་བས།  དེ་ལ་ཡང་ཤེས་
བྱེད་ཅུང་ཟད་ཀྱང་མེད་པའི་ཕྱིར་དང་།  སྤྱི་རྒྱུད་ལས།  དྲང་སྲོང་གནས་དང་བ་གླང་སླས། །ཕུག་དང་རི་ཡི་རྩེ་མོ་དང་། །ས་གཞི་གང་ན་འཐས་པ་དང་། །ཁང་སྟོང་དང་ནི་རྡོ་ལེབ་དང་། །མཆོད་རྟེན་དྲུང་དང་འབབ་ཆུའི་གླིང་། །མཚོ་རྣམས་ཀྱི་ནི་འགྲམ་དག་ཏུ། །
ས་གཞི་སྦྱང་དང་བརྟག་པ་དང་། །ནན་ཏན་དུ་ནི་བྱ་མི་དགོས། །འཐས་པར་བཅགས་ཀྱང་དེར་མི་དགོས། །མཐོ་དམན་ལ་སོགས་སྐྱོན་རྣམས་ཀྱང་། །དེར་ནི་དོགས་པ་བསྐྱེད་མི་དགོས། །ཞེས་བཤད་པ་ནི་སའི་ཆོ་ག་རྒྱས་པར་མི་དགོས་པར་སྟོན་གྱི་སའི་ཆོ་ག་གཏན་མི་དགོས་
པར་སྟོན་པ་མ་ཡིན་པའི་ཕྱིར་དང་།  གཞན་དུ་ན།  མཆོད་རྟེན་ལྷ་ཁང་ཀུན་དགའ་སོགས། །ཇི་བཞིན་པ་ཡི་ཆོ་ག་ཡིས། །གནས་ནི་བྱིན་གྱིས་བརླབ་པ་བརྩམ། །ཞེས་པ་རྒྱུ་མཚན་དུ་བྱས་ནས།  སའི་ཆོ་ག་དགོས་པར་འཆད་པ་དང་།  མཆོད་རྟེན་དྲུང་དང་འབབ་ཆུའི་
10-9-10a


གླིང་། །ཞེས་སོགས་རྒྱུ་མཚན་དུ་བྱས་ནས།  སའི་ཆོ་ག་མི་དགོས་པར་འཆད་པ་ཡང་འགལ་བའི་ཕྱིར་དང་།  སྤྱི་རྒྱུད་ལས།  མཐོ་དམན་ལ་སོགས་སྐྱོན་རྣམས་ཀྱང་། །དེར་ནི་དོགས་པ་བསྐྱེད་མི་དགོས། །རང་བཞིན་གནས་པའི་ས་གཞི་ལ། །
བྱི་དོར་ལེགས་པར་བྱས་ནས་སུ། །ལག་པས་མནན་ཅིང་གསང་སྔགས་བཟླས། །དེ་ཡི་སྦྱང་བ་དེ་ཡིན་ནོ། །ཞེས་གསུངས་པས་དེའི་ས་སྦྱང་བའི་ཁྱད་པར་མདོར་བསྡུས་པ་གསུངས་པའི་ཕྱིར་དང་།  ས་གཟུང་བ་ནི།  དཀྱིལ་འཁོར་གྱི་ས་གཞི་ཐམས་ཅད་ལ་དགོས་པར་
མཚུངས་པའི་ཕྱིར་དང་།  འདི་ནི་ཆོ་གའི་སྤྲོས་པ་རྒྱ་ཆེན་པོ་རྣམས་དོར་ནས་ཨོཾ་ཤ་ཨོཾ་བྷ་ཞེས་བྱ་བའི་ཚུལ་གྱིས་བྱ་བའི་སྤྲོས་པ་ཤིན་ཏུ་བསྡུས་ཏེ་བཟླས་པ་དང་།  ཏིང་ངེ་འཛིན་ལ་གཙོ་བོར་བྱེད་པ་ཉིད་ཡིན་པས་ན།  ཇི་ལྟར་ཏིང་ངེ་འཛིན་གསུམ་ལ་སོགས་པའི་བསྙེན་པ་རྒྱས་
པར་མི་བྱེད་པ་ལྟར།  རྡོ་རྗེ་རྩེ་མོའི་ས་ཆོག་རྒྱས་པ་ཡང་འདིར་སྐབས་སུ་མ་བབས་པའི་ཕྱིར་དང་།  ཨོཾ་བྷུ་ཁཾ།  ཞེས་དང་།  ཨོཾ་ཧ་ན་ཧ་ན་ཀྲོ་དྷ་ཧཱུྃ་ཞེས་པ་མང་དུ་བཟླས་ཏེ།  དེ་ལྟ་བུའི་སྔགས་དང་ཕྱག་རྒྱ་ལ་སོགས་པས་སའི་ཆོ་ག་བྱེད་པ་ཡང་རྣལ་འབྱོར་བླ་ན་མེད་པའི་ཆོ་ག་
འགའ་ཞིག་ལ་མཐོང་གི།  འདིར་བྱེད་པའི་ཚད་མ་ཅི་ཡང་མེད་པའི་ཕྱིར་རོ། །ཞེས་བྱ་བ་བྲིས་སོ། །དེ་དག་ནི་མི་འཐད་དེ།  དཀྱིལ་འཁོར་གྱི་ཁང་པ་རྙིང་པ་ལ་ས་ཆོག་མ་བྱས་པར་རྡུལ་ཚོན་གྱི་དཀྱིལ་འཁོར་བཞེངས་སུ་རུང་བས་ས་ཆོག་མི་དགོས་པའི་རྡུལ་ཚོན་གྱི་དཀྱིལ་
འཁོར་གྱི་ཆོ་ག་ཁས་བླངས་པ་ལ་ཤེས་བྱེད་མེད་པའི་གཏན་ཚིགས་མ་གྲུབ་པའི་ཕྱིར་དང་།  དྲང་སྲོང་གནས་དང་བ་གླང་སླས། །ཞེས་སོགས་ཀྱིས་སའི་ཆོ་ག་མི་དགོས་པར་སྟོན་པར་ཁས་མ་བླངས་པས།  མཆོད་རྟེན་ལྷ་ཁང་ཀུན་དགའ་སོགས། །ཞེས་སོགས་རྒྱུ་མཚན་དུ་
10-9-10b


བྱས་ནས་ས་ཆོག་དགོས་པར་འཆད་པ་དང་འགལ་བ་མེད་པའི་ཕྱིར་དང་།  ས་གཟུང་བ་དཀྱིལ་འཁོར་གྱི་ས་གཞི་ཐམས་ཅད་ལ་དགོས་པ་བསྒྲུབ་བྱར་འདུག་པའི་ཕྱིར་རོ། །ཁྱེད་རང་གིས།  དྲང་སྲོང་གནས་དང་བ་གླང་སླས། །ཞེས་སོགས་ཀྱི་གནས་དང་།  རང་བཞིན་གནས་པའི་
ས་གཞི་ལ། །ཞེས་པ་གཉིས་དོན་གཅིག་ཏུ་བྱས་ནས་ས་སྦྱང་བ་དགོས་པར་འཆད་པ་ནི་ནང་འགལ་ཏེ།  གཞུང་སྔ་མ་ལས།  ས་གཞི་སྦྱང་དང་བརྟག་པ་དང་། །ནན་ཏན་དུ་ནི་བྱ་མི་དགོས། །ཞེས་སྦྱང་བ་མི་དགོས་པར་གསུངས་པའི་ཕྱིར་རོ། །འདིར་སྤྲོས་པ་ཤིན་ཏུ་བསྡུས་
ཏེ་བཟླས་པ་དང་།  ཏིང་ངེ་འཛིན་ལ་གཙོ་བོར་བྱེད་པ་ཡིན་པས་ས་ཆོག་རྒྱས་པ་མི་དགོས་པ་ཡང་མི་འགྲུབ་སྟེ།  ས་ཆོག་ནི།  དཀྱིལ་འཁོར་རྒྱས་བསྡུས་ཀྱི་སྒོ་ནས་རྒྱས་བསྡུས་སུ་འཇོག་པ་མ་ཡིན་གྱི།  ཕྱི་རོལ་གྱི་ཕྱོགས་སྐྱོང་དང་འབྱུང་པོ་ལ་སློང་དཀའ་སླའི་སྒོ་ནས་རྒྱས་བསྡུས་
སུ་འཇོག་པའི་ཕྱིར་རོ། །དཔེར་ན་ཆོས་གོས་གསུམ་པོ་དགེ་སློང་གི་ལུས་ཆེ་ཆུང་དང་འཚམས་པར་བྱ་བ་ཡིན་པས་རང་ཁྲུས་གཞལ་བར་བྱ་བ་ཡིན་ལ།  གདིང་བ་ནི།  དགེ་སློང་གི་ལུས་ལ་མི་ལྟོས་པར་གནས་མལ་ཆེ་ཆུང་ལ་ལྟོས་པས་བདེ་བར་གཤེགས་པའི་ཁྲུས་གཞལ་
བ་བཞིན་ནོ། །ཨོཾ་བྷུ་ཁཾ་ཞེས་སོགས་བླ་མེད་ཀྱི་ཆོ་གའི་ཡན་ལག་འགའ་ཞིག་ལ་མཐོང་བས་འདིར་བྱར་མི་བཏུབ་ན་བྱ་རྒྱུད་ནས་གསུངས་པའི་ཆ་གསུམ་ཡང་འདིར་བྱེད་དུ་མི་རུང་བར་འགྱུར་རོ། །མི་མཚུངས་ཏེ་འདིར།  དེ་ཡི་ཆོ་ག་ཇི་ལྟར་མཐུན་པར་བྱ། །ཞེས་རྒྱུད་སྡེ་གཞན་
དུ་ཁ་འཕངས་ནས་ཆོ་ག་གསལ་བར་མ་བཤད་པ་རྒྱུད་སྡེ་གཞན་ནས་ཁ་བསྐང་དགོས་ལ།  བྱ་རྒྱུད་ཀྱི་ཆ་གསུམ་འདིར་མི་རུང་བའི་རྒྱུ་མཚན་མེད་པའི་ཕྱིར་ཞེ་ན།  དེ་ནི་སྔ་མ་ལ་ཡང་མཚུངས་ཏེ།  ཇི་བཞིན་པ་ཡི་ཆོ་ག་ཡིས། །གནས་ནི་བྱིན་གྱིས་བརླབ་པ་བརྩམ། །ཞེས་པ་ཆོ་
10-9-11a


ག་རྒྱུད་སྡེ་གཞན་དུ་ཁ་འཕངས་ནས།  འདིར་གསལ་བར་མ་བཤད་པས་རྒྱུད་སྡེ་གཞན་ནས་ཁ་བསྐང་དགོས་ལ།  བླ་མེད་ནས་བཤད་པའི་ཨོཾ་བྷུ་ཁཾ་སོགས་འདིར་མི་རུང་བའི་རྒྱུ་མཚན་ཡང་མེད་པའི་ཕྱིར་རོ། །ས་ཆོག་གི་སྐབས་འདིར་རིགས་པའི་རྣམ་ངེས་
དང་།  རྒྱུད་དོན་གསལ་བ་ལས།  ས་བསླང་བ།  སྦྱང་བ།  གཟུང་བ་དང་གསུམ་བྱས་ནས།  ས་གཟུང་བ་ནི་བདག་བསྐྱེད་དཔའ་བོ་གཅིག་པའི་བསྒོམ་བཟླས་བྱས་པ་གཅིག་པུ་ལ་འཆད་པའང་མི་འཐད་དེ།  དེ་ལྟར་ན་ས་གཟུང་བའི་ཆོ་ག་མ་བྱས་པར་དང་པོ་ཉིད་ནས་ཆོ་ག་བྱས་པས་ཆོག་
པར་ཁས་ལེན་དགོས་པའི་ཕྱིར་རོ། །ཡང་རིགས་པའི་རྣམ་ངེས་ལས།  ཇི་བཞིན་པ་ཡི་ཆོ་ག་ཡིས། །ཞེས་པས་ས་བསླང་བ།  སྦྱང་བ།  གཟུང་བའི་ཆོ་ག་བསྟན་ཅིང་།  གནས་ནི་བྱིན་གྱིས་བརླབས་པ་བརྩམ། །ཞེས་པས་སྟ་གོན་བསྟན་པར་འདོད་པ་ཡང་མི་འཐད་དེ།  
ས་བསླང་བ་སོགས་གསུམ་གྱིས་སྟ་གོན་གྱི་ཆོ་ག་བྱ་ཞེས་པར་འགྱུར་བའི་ཕྱིར་རོ། །སྟ་གོན་གྱི་སྐབས་སུ།  གཞན་ཕན་འོད་ཟེར་ལས།  སྟ་གོན་ནི་གཞུང་འདི་ཉིད་ན་མེད་པས་མ་བྱས་ཀྱང་ཆོག་ལ།  ས་ཆོག་གི་རྗེས་སུ་བྲི་བ་མ་གྲུབ་ན་བྱས་
ཀྱང་འགལ་བ་མེད་དེ།  བྱིན་གྱིས་བརླབས་པའི་གནས་དེར་ནི། །ཕྱི་ཡི་དཀྱིལ་འཁོར་བྲི་བར་བྱ། །ཞེས་དང་།  སློབ་མ་ལ་ཆོས་ཟབ་མོ་བཤད་པ་དང་།  སྡོམ་པ་སྦྱིན་པའི་སྐབས་དེ་བཀའ་དང་བསྟན་བཅོས་ཕལ་ཆེར་ནས་སྟ་གོན་དུ་བཤད་པའི་ཕྱིར་རོ། །དེ་ཡང་བདག་
གི་རྣལ་འབྱོར་རྫོགས་ནས་མདུན་དུ་འོག་ནས་འབྱུང་བ་བཞིན་ལྷ་བསྒྲུབས་ནས་ཇི་ལྟར་འབྱོར་པས་མཆོད་པར་བྱའོ་ཞེས་གསུངས་པ་ལ།  རིགས་པའི་རྣམ་ངེས་སུ།  དེ་ཡང་མི་རིགས་ཏེ།  གཞུང་འདི་ན་ཆོ་ག་གསལ་བར་མེད་པས་མ་བྱས་ཀྱང་ཆོག་ན་ས་ཆོག་ལ་ཡང་མཚུངས་
10-9-11b


པའི་ཕྱིར་དང་།  རྩ་རིག་ལས་ཀུན་རིག་བསྐྱེད་པ་དང་།  ཀུན་རིག་གི་ཐུགས་ཁར་རྩ་རིག་བཀོད་ནས།  དེ་ལས་ལྷ་བསྐྱེད་པ་སོགས་ཀྱང་མ་བྱས་ཀྱང་ཆོག་པར་མཚུངས་པའི་ཕྱིར་དང་།  ཇི་བཞིན་པ་ཡི་ཆོ་ག་ཡིས། །གནས་ནི་བྱིན་གྱིས་བརླབ་པ་བརྩམ། །ཞེས་པས་ས་ཆོག་བསྟན་ན་
བྱིན་གྱིས་བརླབ་པ་ཞེས་པ་ལྷག་པར་གནས་པ་ལ་འཇུག་པས།  སྟ་གོན་གྱི་སྐབས་ཀྱི་མིང་གཞན་ཡིན་པའི་ཕྱིར་དང་།  འདིས་སྟ་གོན་མ་བསྟན་ན།  སྟ་གོན་བྱས་ཀྱང་འགལ་བ་མེད་པའི་ཤེས་བྱེད་དུ་གཞུང་འདི་འདྲེན་པ་འགལ་བའི་ཕྱིར་དང་།  སློབ་མ་ལ་ཆོས་ཟབ་མོ་བཤད་པ་དང་།  
སྡོམ་པ་སྦྱིན་པ་བཤད་པའི་སྐབས་བཀའ་དང་བསྟན་བཅོས་དྲི་མ་མེད་པ་ནས་དཀྱིལ་འཁོར་གྱི་སྟ་གོན་དུ་བཤད་པ་མ་མཐོང་ཞིང་མི་རིགས་པའི་ཕྱིར་དང་།  སྟ་གོན་གྱི་སྐབས་ན་དེ་ཡོད་པས་སྟ་གོན་དུ་འགྱུར་ན་མཆོད་པ་འབུལ་བ་དང་།  གསོལ་བ་གདབ་པ་སོགས་ཀྱང་སྟ་གོན་
དུ་འགྱུར་བའི་ཕྱིར་དང་།  ཆོས་ཟབ་མོ་བཤད་པ་དང་།  སྡོམ་པ་སྦྱིན་པ་སོགས་དཀྱིལ་འཁོར་དུ་འཇུག་པའི་སྐབས་ནས་ཡོད་པས།  དཀྱིལ་འཁོར་དུ་འཇུག་པའི་ཕྱིར་ཆོ་གར་འགྱུར་བའི་ཕྱིར་དང་།  སྟ་གོན་གྱི་སྐབས་སུ་རྣལ་འབྱོར་རྒྱུད་ནས་མཆོད་གཏོར་རྒྱས་པ་བྱེད་པའི་རྒྱུ་མཚན་
ཡང་མེད་པའི་ཕྱིར་དང་།  རྟེན་དཀྱིལ་འཁོར་མི་སྒྲུབ་ན་འདིར་ཐིག་ཆེན་བརྒྱད་ལ་སོགས་པ་བཏབ་པ་ལ་དགོས་པ་མེད་པའི་ཕྱིར་དང་།  སྒྲུབ་ན་འདིར་ལྷ་བསྒྲུབ་པ་ཁྱད་པར་དུ་བསྟན་པ་ལ་དགོས་པ་མེད་པའི་ཕྱིར་རོ་ཞེས་བྲིས་སོ། །དེ་ནི་མི་འཐད་དེ།  སྟ་གོན་གཞུང་ན་ཆོ་ག་
གསལ་བར་མེད་པས་མ་བྱས་ཀྱང་ཆོག་པ་དེ་ས་ཆོག་ལ་མི་མཚུངས་པའི་ཕྱིར་ཏེ།  ས་ཆོག་ལ་ཆོ་ག་གསལ་བར་མེད་ཀྱང་།  ཇི་བཞིན་པ་ཡི་ཆོ་ག་ཡིས། །ཞེས་ཁ་འཕངས་པ་ཡོད་ལ་སྟ་གོན་ནི་ཁ་འཕངས་པ་ཡང་མེད་པའི་ཕྱིར་ཏེ།  གནས་ནི་བྱིན་གྱིས་བརླབ་པ་བརྩམ། །བྱིན་གྱིས་
10-9-12a


བརླབས་པའི་གནས་དེར་ནི། །ཕྱི་ཡི་དཀྱིལ་འཁོར་བྲི་བར་བྱ། །ཞེས་ས་ཆོག་བྱས་མ་ཐག་ཏུ་དཀྱིལ་འཁོར་བྲི་བར་བཤད་ཀྱི།  སྟ་གོན་བྱ་བར་མ་བཤད་པའི་ཕྱིར་རོ། །དེ་བཞིན་དུ་རྩ་རིག་ལས་ཀུན་རིག་བསྐྱེད་པ་སོགས་མ་བྱས་ཀྱང་ཆོག་པའང་བདག་བསྐྱེད་དཔའ་
བོ་གཅིག་པ་ལྟར་ན་འདོད་ལ།  དཀྱིལ་འཁོར་ཡོངས་རྫོགས་བསྒོམ་པ་ལྟར་ན་མི་མཚུངས་ཏེ།  བདག་བསྐྱེད་ལ་དཀྱིལ་འཁོར་ཡོངས་རྫོགས་བསྒོམ་པ་ཡོད་པར་སྔར་གྱི་ལུང་གིས་གྲུབ་ལ།  བསྒོམ་ཚུལ་གྱི་ཆོ་ག་རྒྱུད་འདིར་མ་བཤད་པས་གཙུག་དགུ་སོགས་ནས་ཁ་བསྐང་དགོས་པའི་ཕྱིར་རོ། །
ཇི་བཞིན་པ་ཡི་ཆོ་ག་ཡིས། །གནས་ནི་བྱིན་གྱིས་བརླབ་པ་བརྩམ། །ཞེས་པའི་གཞུང་དེས་སྟ་གོན་མ་བསྟན་ན།  སྟ་གོན་མ་བྱས་ཀྱང་འགལ་བ་མེད་པའི་རྒྱུ་མཚན་དུ་གཞུང་འདི་འདྲེན་པ་འགལ་ཞེས་པའང་ཕྱོགས་སྔའི་དོན་མ་རྟོགས་པ་སྟེ།  གཞན་ཕན་འོད་ཟེར་ལས།  སྟ་གོན་རྒྱུད་འདིར་མེད་པས་མ་བྱས་
ཀྱང་བཏུབ་པའི་སྒྲུབ་བྱེད་དུ་གཞུང་དེ་དྲངས།  ས་ཆོག་གི་རྗེས་ལ་བྲི་བ་མ་གྲུབ་ན་སྟ་གོན་བྱས་ཀྱང་འགལ་བ་མེད་པའི་སྒྲུབ་བྱེད་དུ་སློབ་མ་ལ་ཆོས་ཟབ་མོ་བཤད་པ་སོགས་བཀའ་དང་བསྟན་བཅོས་ཕལ་ཆེར་ནས་སྟ་གོན་དུ་བཤད་པ་བཀོད་པ་ཡིན་གྱི།  དེ་གཉིས་ཀ་སྟ་གོན་བྱས་ཀྱང་འགལ་བ་མེད་
པའི་སྒྲུབ་བྱེད་མ་ཡིན་པའི་ཕྱིར་རོ། །གཞུང་དེ་སྔ་མའི་སྒྲུབ་བྱེད་དུ་འགྲོ་བའི་རྒྱུ་མཚན་ཅི་ཡིན་ཞེ་ན།  བྱིན་གྱིས་བརླབས་པའི་གནས་དེར་ནི། །ཕྱི་ཡི་དཀྱིལ་འཁོར་བྲི་བར་བྱ། །ཞེས་པས་ས་ཆོག་བྱས་མ་ཐག་དཀྱིལ་འཁོར་བྲི་བར་བཤད་པའི་ཕྱིར་རོ། །སློབ་མ་ལ་ཆོས་ཟབ་མོ་བཤད་
པ་སོགས་དཀྱིལ་འཁོར་གྱི་སྟ་གོན་དུ་བཤད་པ་མ་མཐོང་ཞིང་མི་རིགས་ཞེས་པའང་ཕྱོགས་སྔ་མ་ལོངས་པ་སྟེ།  གཞན་ཕན་འོད་ཟེར་གྱི་དགོངས་པ་ནི།  རྒྱུད་ལས།  ཟབ་ཅིང་རྒྱ་ཆེ་བ་ཡི་ཆོས་བསྒྲགས་ལ། །བསྲུང་བ་བྱས་ནས་བརྟུལ་ཞུགས་སྡོམ་གནས་པ། །ཞེས་གསུངས་ཤིང་།  
10-9-12b


ཆོས་ཟབ་མོ་བཤད་པ་དང་སྡོམ་པ་བསྒྲག་གཟུང་རྣམས་ནི་བཀའ་རྣམ་སྣང་མངོན་བྱང་དང་།  རྡོ་རྗེ་རྩེ་མོ་དང་།  བསྟན་བཅོས་རྒྱ་གར་གྱི་དཀྱིལ་ཆོག་ཕལ་ཆེར་ལས་སློབ་མ་སྟ་གོན་གྱི་ཆོ་གར་བཤད་པས།  འདིར་སློབ་མ་སྟ་གོན་བྱས་ཀྱང་འགལ་བ་མེད་ལ།  དེའི་ཚེ་ལྷ་དང་བུམ་པ་སྟ་གོན་བྱས་ཀྱང་
འགལ་བ་མེད་དེ་ཞེས་པའི་དོན་ཡིན་གྱི།  དེ་དག་བཀའ་དང་བསྟན་བཅོས་ཕལ་ཆེར་ནས་དཀྱིལ་འཁོར་གྱི་སྟ་གོན་བཤད་པར་ཁས་མ་བླངས་པའི་ཕྱིར་རོ། །སྟ་གོན་གྱི་སྐབས་སུ་རྣལ་འབྱོར་རྒྱུད་ནས་མཆོད་པ་རྒྱས་པ་རྣམ་པ་ཐམས་ཅད་དུ་བྱེད་དགོས་པར་ཁས་མ་བླངས་ཏེ།  ཇི་ལྟར་འབྱོར་བས་
མཆོད་པར་བྱའོ་ཞེས་གསུངས་པའི་ཕྱིར་རོ། །རྒྱས་པར་བྱེད་པ་འགོག་པའང་མི་འཐད་དེ།  མི་བྱེད་པའི་རྒྱུ་མཚན་ཡང་མེད་པའི་ཕྱིར་རོ། །སྟ་གོན་དཀྱིལ་འཁོར་མི་སྒྲུབ་ན་ཐིག་ཆེན་བརྒྱད་ལ་སོགས་པ་བཏབ་པར་དགོས་པ་མེད་ཅིང་།  བསྒྲུབས་ན་འདིར་ལྷ་སྒྲུབ་པ་ཁྱད་པར་དུ་བསྟན་
པར་དགོས་པ་མེད་ཅེས་པ་ནི་བྱིས་པའི་དགག་སྒྲུབ་སྟེ།  ཁྱེད་རང་གིས་བཅོམ་ལྡན་འདས་ཀུན་རིག་གི་ཆོ་ག་ཞེས་པའང་འཁོར་དང་བཅས་པའི་ཆོ་ག་མི་བྱེད་ན་འཁོར་གྱི་ལྷ་བསྐྱེད་པ་ལ་དགོས་པ་མེད་ཅིང་།  འཁོར་དང་བཅས་པའི་ཆོ་ག་བྱེད་ན་ཀུན་རིག་གི་ཆོ་ག་ཞེས་ཁྱད་པར་དུ་བསྟན་
པ་ལ་དགོས་པ་མེད་པར་མཚུངས་པའི་ཕྱིར་རོ། །བཞི་པ་བྲི་ཞིང་ལྷ་དགོད་པའི་སྐབས་སུ།  གཞན་ཕན་འོད་ཟེར་ལས།  རྒྱུད་འདི་ནས་ཐིག་ཚོན་གཉིས་ཀ་བྱིན་བརླབ་མ་བཤད་ཅིང་བྱས་ཀྱང་འགལ་བ་མེད་ལ།  བྱེད་ན་རིགས་ལྔའི་ས་བོན་ལས་རིགས་ལྔར་བསྐྱེད་ལ།  
ཅི་འབྱོར་པས་མཆོད་དེ་དེ་དག་ཞུ་བ་ལས་བྱུང་བའི་ཐིག་ཚོན་དུ་བསམ་མོ། །དེ་དག་གི་ཁ་དོག་ནི་རྒྱུད་ནས་བཤད་པ་མེད་ཀྱང་མཐོང་བ་བརྒྱུད་པས་ཤེས་སོ་ཞེས་གསུངས་ལ།  རིགས་པའི་རྣམ་ངེས་ལས།  དེ་ནི་མ་ཡིན་ཏེ།  ཐིག་ཚོན་བྱིན་བརླབ་
10-9-13a


རྒྱུད་འདི་ནས་དངོས་སུ་བཤད་པ་མེད་ཀྱང་མཐོང་བ་བརྒྱུད་པས་ཤེས་པར་མཚུངས་པའི་ཕྱིར་དང་།  གཞན་དུ་ན་ཁ་དོག་རྣམས་ཀྱང་མེད་ཀྱང་རུང་བར་འགྱུར་བ་དང་།  བྱ་རྒྱུད་ནས་སྔགས་དང་ཕྱག་རྒྱས་བྱིན་གྱིས་བརླབས་ནས།  ཐིག་ཚོན་བྲི་བར་གསུངས་
པས་བྱིན་གྱིས་མ་བརླབས་པའི་ཐིག་ཚོན་བྲི་བ་ནི་རྩེད་མོ་ལྟར་གཟུ་ལུམ་ཡིན་པའི་ཕྱིར་དང་།  དེས་ན་ཐིག་མེད་པར་རྡུལ་ཚོན་གྱི་དཀྱིལ་འཁོར་བྲི་བར་ཡང་རང་བཟོ་ཁོ་ན་ཡིན་པ་དང་།  ཇི་བཞིན་པ་ཡི་ཆོ་ག་ཡིས། །གནས་ནི་བྱིན་གྱིས་བརླབས་པ་བརྩམ། །ཞེས་པས་མཚོན་ནས།  ཇི་
བཞིན་པ་ཡི་ཆོ་ག་ཡིས། །ཐིག་ཚོན་བྱིན་གྱིས་བརླབ་པ་བརྩམ། །ཞེས་ཐོབ་པས་གཞལ་ཡས་ཁང་དང་ལྷ་ཕལ་ཆེར་གྱི་ཁ་དོག་ལྟར་རྣལ་འབྱོར་རྒྱུད་སྤྱི་དང་མཐུན་པར་དགོངས་ནས་འདིར་དངོས་སུ་མ་སྨོས་པ་ཡིན་པའི་ཕྱིར་དང་།  ཐིག་སྐུད་མེ་ཏོག་སྤོས་མཆོད་པས། །
ཞེས་པས་ཚོན་ཀྱང་མཚོན་ནས།  མེ་ཏོག་སྤོས་ཀྱིས་མཆོད་པར་བཞེད་ཀྱི།  འདིར་ལྷ་ལ་ཅི་འབྱོར་པས་མཆོད་པར་མི་བཞེད་པའི་ཕྱིར་ཞེས་བྲིས་སོ། །དེ་ནི་མི་འཐད་དེ།  ཐིག་ཚོན་བྱིན་རླབས་རྒྱུད་འདི་ནས་མ་བཤད་ཅིང་།  ཁ་འཕངས་ཡང་མེད་ཅེས་ཁས་བླངས་ཀྱི་ཐིག་
ཚོན་བྱིན་རླབས་མི་དགོས་པར་ཁས་མ་བླངས་པའི་ཕྱིར་དང་།  མཐོང་བ་བརྒྱུད་པས་ཤེས་པར་མཚུངས་པ་ལ་འདོད་ལན་ཐེབས་པའི་ཕྱིར་དང་།  ཐིག་ཚོན་བྱིན་རླབས་མེད་ཀྱང་ཐིག་གདབ་པ་དང་།  ཚོན་བྲིར་རུང་ལ་ཁ་དོག་མེད་ན་བྲིར་མི་རུང་བས་དེ་གཉིས་མི་མཚུངས་པའི་ཕྱིར་
དང་།  ཐིག་མེད་པར་རྡུལ་ཚོན་གྱི་དཀྱིལ་འཁོར་བྲི་བ་སུས་ཀྱང་ཁས་མ་བླངས་པས་ཁས་བླངས་མེད་པའི་དགག་པ་ཡིན་པའི་ཕྱིར་དང་།  ཐིག་སྐུད་མེ་ཏོག་སྤོས་མཆོད་པས། །ཞེས་མཆོད་པ་གཞན་རྣམས་ཀྱང་མཚོན་པ་ཡིན་གྱི་གཞན་རྣམས་འགོག་མི་ནུས་པའི་ཕྱིར་རོ། །
10-9-13b


ཡང་གཞན་ཕན་འོད་ཟེར་ལས་འཁོར་ལོའི་ལྟེ་བ་ལེ་ཚེ་དགུར་བྱས་པའི་དབུས་དཀར་པོ།  ཤར་སྔོ།  ལྷོ་སེར།  ནུབ་དམར།  བྱང་ལྗང་།  མཚམས་རྣམས་ཟུར་ཐིག་གིས་བཅད་པའི་ཤར་སོགས་ཕྱོགས་མདོག །རྡོ་རྗེའི་གདུང་ཅི་མཛེས་དེའི་ཕྱི་རོལ་འཁོར་ལོའི་རྩིབས་བཅུ་དྲུག་
སྔོན་པོ།  སྒོ་གཉིས་ཀའི་ནང་ཕྱོགས་ཚོན།  དཀྱིལ་འཁོར་ཕྱི་མའི་སྣ་ཚོགས་རྡོ་རྗེ་ཕྱོགས་མདོག །ཁོར་ཡུག་སྒོའི་ཕྱེད་ཙམ་གྱིས་བསྐོར་བར་བྱ་ཞེས་གསུངས་པ་ལ།  རིགས་པའི་རྣམ་ངེས་ལས།  དེ་ནི་མ་ཡིན་ཏེ།  ལྟེ་བའི་ལེ་ཚེ་དགུ་སོགས་ཕྱོགས་མདོག་དང་ཟུར་ཐིག་གིས་བཅད་
པ་རྣམས་མཐོང་བ་ཡིན་ན།  འཁོར་ལོའི་ལྟེ་བ་དང་།  རྩིབས་ཕྱེད་མེད་པར་འགྱུར་བ་དང་།  དེ་ཡང་རྡོར་དབྱིངས་ལ་སོགས་པ་འཁོར་ལོ་རྩིབས་ཅན་མི་འགོད་པའི་རེ་མིག་དབུས་མས་འཁྲུལ་གཞི་བྱས་པ་ཙམ་དུ་ཟད་པས་བབ་ཅོལ་ཁོ་ན་ཡིན་པའི་ཕྱིར་དང་།  ཞི་བའི་དཀྱིལ་འཁོར་
འདིར་ཞི་བའི་སྦྱིན་སྲེག་གི་སྐབས་ལྟར་འཁོར་ལོ་དཀར་པོ་འགོད་པར་རིགས་པས་སྔོན་པོ་འགོད་པའི་རྒྱུ་མཚན་ཡང་མེད་པའི་ཕྱིར་དང་།  འདིར་འཁོར་ལོའི་ཁ་དོག་གསལ་བར་མི་འགོད་པ་ནི།  ལས་ཀྱི་མདོག་ཅན་དུ་རྟོགས་པར་བྱ་བ་ཡིན་པས་མཐའ་གཅིག་ཏུ་མ་ངེས་པའི་ཕྱིར་
དང་།  འདིར་སྒོ་གཉིས་སྦྲག་འབྱུང་བའི་རྒྱུ་མཚན་མེད་པའི་ཕྱིར་དང་།  འདིར་མངོན་པར་རྟོགས་པ་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་ཟུར་ཙམ་ཡང་གསུངས་པ་མེད་པའི་ཕྱིར་དང་།  རྡོ་རྭ་མེ་རིས་དང་བཅས་པ་འཇིག་རྟེན་ཁོར་ཡུག་གིས་གཉིས་ལ་སྒོ་ཕྱེད་ཙམ་གྱིས་བྱེད་པའི་
རྒྱུ་མཚན་ཡང་མེད་པའི་ཕྱིར་རོ་ཞེས་བྲིས་སོ། །དེ་དག་ནི་མི་འཐད་དེ།  ཟུར་ཐིག་གིས་བཅད་པ་རྣམས་མཐོང་བ་ཡིན་ན།  འཁོར་ལོའི་ལྟེ་བ་དང་རྩིབས་ཕྱེད་མེད་པར་འགྱུར་ཞེས་པའི་དོན་འཁོར་ལོའི་འོག་གི་ལྷ་སྣམ་ཕྱོགས་མདོག་མཐོང་བར་འགྱུར་རོ་ཞེས་པར་འཆད་པ་ཡིན་ན་ནི་
10-9-14a


རྣམ་པར་མ་དཔྱད་པ་སྟེ།  འཁོར་ལོའི་ལྟེ་བའི་འོག་གི་ལྷ་སྣམ་ནི་དབུས་ཀྱི་དཀར་པོ་དེ་ཁོ་ན་ཡིན་པས་དེ་ལ་ཕྱོགས་མདོག་མེད་པའི་ཕྱིར་རོ། །དེ་ལས་གཞན་པའི་དོན་ཞིག་སྟོན་ན་ནི་སྨྲ་བའི་དུས་ལ་བབ་བོ། །རྡོར་དབྱིངས་སོགས་འཁོར་ལོ་རྩིབས་ཅན་མི་འགོད་
པའི་རེ་མིག་དབུས་མས་འཁྲུལ་གཞི་བྱས་པ་ཙམ་དུ་ཟད་ཅེས་པ་དེ་ཡང་བབ་ཅོལ་ཡིན་ཏེ།  འདིར་འཁོར་ལོའི་ལྟེ་བ་དབུས་དཀར་བ་དང་།  ཤར་སྔོ་བ་སོགས་ཀྱི་ཕྱོགས་མདོག་བྱས་པ་ནི་སྦྱོང་རྒྱལ་སོགས་སྐུ་མདོག་དང་ཕྱག་རྒྱ་ཅི་ལྟར་བཞུགས་ཀྱང་རིགས་ལྔ་ལས་མ་འདས་སོ་ཞེས་
མཚོན་གྱི།  རྒྱུད་གཞན་གྱི་འཁྲུལ་གཞི་བྱས་པ་དེ་འདི་དང་སྦྱར་བ་མ་ཡིན་པའི་ཕྱིར་རོ། །ཞི་བའི་སྦྱིན་སྲེག་གི་སྐབས་དཔེར་བྱས་ནས་འདིར་ཞི་བའི་དཀྱིལ་འཁོར་ཡིན་པས་འཁོར་ལོ་དཀར་པོར་འདོད་པ་ཡང་མི་འཐད་དེ།  དེ་ལྟར་ན་ཞི་བའི་སྦྱིན་སྲེག་གི་སྐབས་སུ་ཐབ་ཐམས་ཅད་
དཀར་པོ་བྱས་པ་ལྟར།  འདིར་ཡང་རྩིག་པ་ལ་སོགས་པ་གཞལ་ཡས་ཁང་ཐམས་ཅད་དཀར་པོར་བྱེད་རིགས་པར་ཐལ་བའི་སྐྱོན་ཡོད་པའི་ཕྱིར་རོ། །འཁོར་ལོའི་རྩིབས་སྔོན་པོ་བྱེད་པ་ལ་ཡང་རྒྱུ་མཚན་མེད་པ་མ་ཡིན་ཏེ།  སེམས་དཔའ་བཅུ་དྲུག་པོ་ཐམས་ཅད་རྡོ་རྗེ་སེམས་དཔའ་ཐུགས་
ཀྱི་ངོ་བོ་ཡིན་པར་ཀུན་དགའ་སྙིང་པོས་བཤད་ཅིང་།  རྒྱུད་འདིར་ཡང་འཁོར་ལོས་སྒྱུར་བའི་སྐབས་ནས།  བཛྲ་སཏྭ་བཅུ་དྲུག་ལ།  སེམས་དཔའ་བཅུ་དྲུག་གི་ས་བོན་སྦྱར་བའི་དོན་ཡང་ཡིན་པས།  དེ་མཚོན་པའི་ཕྱིར་དུ་སྔོན་པོར་བྱེད་པའི་ཕྱིར་དང་།  འདིར་འཁོར་ལོའི་ཁ་
དོག་གསལ་བར་མི་འགོད་པ་ནི་ཐུགས་ཀྱི་རིགས་མཚོན་བྱེད་དུ་བྱ་བ་ཡིན་པར་ཡང་མཚུངས་པའི་ཕྱིར།  འདི་སྒོ་སྦྲག་འབྱུང་བར་རྣམ་པ་ཐམས་ཅད་དུ་ཡང་ཁས་བླངས་མེད་ལ།  རྒྱུད་ཀྱི་དོན་ལ་གཏན་མི་གནས་པ་ཡང་མ་ཡིན་ཏེ།  ཕྱི་ཡི་སྒོ་ཁྱུད་རྣམས་ཀྱིས་བརྒྱན། །ཞེས་པའི་
10-9-14b


གཞུང་གིས།  དཀྱིལ་འཁོར་ཕྱི་ནང་གཉིས་འབྱུང་བར་སྟོན་པའི་ཕྱིར།  འདིར་མངོན་པར་རྟོགས་པར་སྣ་ཚོགས་རྡོ་རྗེ་རྩེ་མོ་རྭ་བཅུ་གཉིས་པར་དངོས་སུ་མ་གསུངས་པས་མི་འཐད་ན།  རྩིག་པ་རིམ་པ་ལྔ་ཡང་མི་འཐད་པར་འགྱུར་ཏེ།  དངོས་སུ་མ་གསུངས་པའི་ཕྱིར།  གལ་ཏེ་གྲུ་བཞི་པ་ལ་སྒོ་
བཞི་པ། །ཞེས་གཞལ་ཡས་ཁང་གྲུ་བཞི་སྒོ་བཞི་པ་བྲི་བར་གསུངས་པས་རྩིག་པ་ལྔ་འགྲུབ་བོ་སྙམ་ན།  དེའི་ཕྱིར་འོག་གཞི་ལ་ཡང་སྣ་ཚོགས་རྡོ་རྗེ་རྩེ་མོ་བཅུ་གཉིས་དགོས་པར་གྲུབ་བོ། །རྡོ་རྗེ་མེ་རིས་དང་།  འཇིག་རྟེན་ཁོར་ཡུག་གི་ས་གཉིས་ལ་སྒོའི་ཕྱེད་ཙམ་རེ་རེ་བྱེད་པའི་རྒྱུ་མཚན་མེད་
ན་ཁྱེད་རང་གི་ལུགས་དང་འགལ་ཏེ།  ཁྱེད་རང་གི་རྒྱུད་ལས།  དགུ་ཡི་ཆ་ནི་བགོས་པ་ལས། །སྒོ་དང་སྒོ་ཁྱུད་གསུམ་ཆར་བྱ། །ཞེས་ཚངས་ཐིག་ནས་ཕྱོགས་རེ་རེ་ཆ་ཆེན་དགུ་དགུ་བགོ་བར་གསུངས་ལ།  དེའི་ཚེ་ཚངས་ཐིག་ནས་རྭ་རྩེའི་བར་ལ་ཆ་ཆེན་བརྒྱད་ཡོད་པས་དེ་
གཉིས་ཀྱི་ས་ལ་ཆ་ཆེན་གཅིག་ལས་མེད་པའི་ཕྱིར་རོ། །དྲུག་པ་རྒྱན་དགྲམ་པའི་སྐབས་སུ།  གཞན་ཕན་འོད་ཟེར་ལས།  གསེར་ལས་བྱས་པའི་བྱ་རྣམས་ནི། །བརྒྱད་དམ་བཅུ་དྲུག་ལྷག་ཀྱང་རུང་། །ཞེས་པས་མཆོད་བུམ་བཅུ་དྲུག །དབང་བསྐུར་རིན་ཆེན་ཆུས་བཀང་བའི་། །
བུམ་པ་ལྔ་ནི་བཞག་པར་བྱ། །ཅེས་པས་དབང་བུམ་ལྔ།  རྣམ་རྒྱལ་བུམ་པ་དྲི་ཡི་ཆུས། །རབ་ཏུ་བཀང་བ་བཞག་པར་བྱ། །ཞེས་པས་རྣམ་རྒྱལ་བུམ་པ་བསྟན་པར་བཤད་ཀྱི།  ལས་བུམ་མ་གསུངས་པ་ལ།  རིགས་པའི་རྣམ་ངེས་ལས།  མར་མེ་གཏོར་མ་བུམ་པ་དང་། །
ཞེས་པས་ལས་བུམ་སྟོན་པས་ལས་བུམ་ཡང་དགོས་སོ་ཞེས་སྨྲའོ། །དེ་ནི་མི་འཐད་དེ།  དེ་ལྟར་ན་ཚེ་དཔག་མེད་ཀྱི་སྦྱིན་སྲེག་གི་སྐབས་ནས།  བྱ་དང་བུམ་པ་བཀང་བ་དང་། །གཏོར་མ་ལྷ་བཤོས་རབ་དཀར་བཞག །ཅེས་པའི་བུམ་པ་དེ་ཡང་ལས་བུམ་ཡིན་པར་
10-9-15a


འགྱུར་ཏེ།  རྣམ་རྒྱལ་དང་དབང་བུམ་ནི་སྦྱིན་སྲེག་གི་སྐབས་སུ་དོན་མེད་ཅིང་།  མཆོད་བུམ་ནི།  བྱ་དང་ཅེས་པས་བསྟན་ཟིན་པའི་ཕྱིར་རོ། །འདོད་ན་སྦྱིན་སྲེག་གི་སྐབས་སུ་ལས་བུམ་གྱིས་ཅི་བྱེད་སྨྲོས་ཤིག །གལ་ཏེ་དེའི་བུམ་པ་ནི་ཉེ་བར་མཁོ་བའི་བུམ་པ་ཡིན་ནོ་
ཞེ་ན།  སྔ་མ་ཡང་དེ་བཞིན་དུ་ཁས་ལོངས་ཤིག་སྟེ།  མཆན་རྙིང་པ་ལས་དེ་ལྟར་དུ་འབྱུང་བའི་ཕྱིར་རོ། །གཞན་དུ་མར་མེ་གཏོར་མ་ཞེས་པའི་གཏོར་མ་དེས་ཀྱང་འདས་གཏོར་བསྟན་པར་འགྱུར་ཏེ།  ཡོ་གའི་སྐབས་སུ་འདས་གཏོར་ནི།  དོན་མེད་ཅིང་ཁྱེད་རང་གིས་ཀྱང་མི་
དགོས་པར་ཁས་བླངས་ལ།  ཆ་གསུམ་ནི།  ཕྱོགས་ན་གནས་པ་རྣམས་ལ་རྣམ་པར་བརྟག །ཞེས་དང་།  དེ་ནས་འབྱུང་པོ་ཀུན་གྱི་གཏོར་མ་བྱ། །ཞེས་དང་།  གནོད་སྦྱིན་སྲིན་པོའི་ཁ་ཟས་སུ། །གཏོར་མ་རྣམ་པ་སྣ་ཚོགས་བཞག །ཅེས་པས་བསྟན་ལ།  རིགས་དྲུག་དང་། །
ཡི་དྭགས་ཀྱི་གཏོར་མ་ནི།  སེམས་ཅན་བཀྲེས་ཤིང་སྐོམ་ལ་གཏོར་མ་དང་། །ཅེས་པས་བསྟན་ཟིན་པའི་ཕྱིར་རོ། །བདུན་པ་བདག་གི་རྣལ་འབྱོར་བུམ་པ་བཟླས་པ་དང་བཅས་པ་ལ།  བདག་གི་རྣལ་འབྱོར་གྱི་སྐབས་སུ་གཞན་ཕན་འོད་ཟེར་ལས།  རྒྱུད་ལས།  འཇིག་རྟེན་
གསུམ་ལས་རྣམ་རྒྱལ་གྱིས། །བདག་བསྲུང་ལ་སོགས་བྱས་ནས་ནི། །ཞེས་བྱ་བ་བསྲུང་བ་བསྡུས་པའམ།  ཡང་ན་རྒྱས་པར་བྱེད་ན་གཞུང་དེ་ལ་བརྟེན་ནས་བླ་མ་བརྒྱུད་པ་རྣམས་འདིར་རྡོ་རྗེ་འབྱུང་བ་སོགས་ནས་འབྱུང་བའི་བསྲུང་བ་དང་།  གཞན་ནས་འབྱུང་བའི་ཁྲོ་བོའི་
བསྟོད་པ་ལ་སོགས་པ་མཛད་ལ།  དེ་ལ་ལས་ཁ་ཚར་བ་ཞེས་བྱ་བར་འདོགས་སོ། །དེ་ལ་དྲུག །སྲུང་འཁོར་བསྒོམ་པ་དང་ཞེས་གསུངས་པ་ལ།  རིགས་པའི་རྣམ་ངེས་ལས།  ཁ་ཅིག་ན་རེ།  འདིར་འཇིག་རྟེན་གསུམ་རྒྱལ་གྱི་སྲུང་བ་དོར་ནས་རྡོ་རྗེ་འབྱུང་བ་ནས་འབྱུང་བའི་སྲུང་བ་
10-9-15b


ཉིད་བྱེད་དོ། །དེ་ནི་གྱི་ན་སྟེ།  དེ་ནི་ཡོད་པའི་སྒོ་བོར་ནས་མེད་པའི་སྲང་འཆག་པ་ཞེས་པ་བླུན་པོས་ཀྱང་བཞད་གད་ཀྱི་གནས་ཡིན་པའི་ཕྱིར་ཏེ་ཞེས་བྲིས་སོ། །དེ་ནི་ཁས་བླངས་མེད་པའི་དགག་པ་བརྗོད་པ་སྟེ།  གཞན་ཕན་འོད་ཟེར་ལས།  སྲུང་འཁོར་བསྡུས་པའམ་རྒྱས་པ་གང་རུང་
བྱེད་པར་གསུངས་ཤིང་།  རྒྱུད་འདིའི་དགོངས་པ་ནི་ཤིན་ཏུ་བསྡུས་པ་ཉིད་ཡིན་པར་གསུངས་ཀྱི།  བསྡུས་པ་བོར་ནས་རྒྱས་པ་ཁོ་ན་བྱེད་པར་མ་གསུངས་པའི་ཕྱིར་རོ། །ཡང་གཞན་ཕན་འོད་ཟེར་ལས།  རྡོ་རྗེ་འབྱུང་བ་ནས་གསུངས་པའི་སྲུང་འཁོར་ལ་ཡང་སྤྲོ་ན་ཁྲོ་བོ་སྤྱན་
འདྲེན་པ་ནས་ཡིག་བརྒྱ་ལན་གསུམ་བརྗོད་པས་བརྟན་པར་བྱ་ཞིང་།  དེ་ཉིད་ལ་བླ་མ་གོང་མས་ལས་ཁ་ཚར་བ་ཞེས་བྱ་བར་འདོགས་སོ་ཞེས་གསུངས་པ་ལ།  རིགས་པའི་རྣམ་ངེས་ལས།  དེ་ཡང་མ་ཡིན་ཏེ།  རྡོ་རྗེ་འབྱུང་བ་ལ་ཁྲོ་བོ་སྤྱན་འདྲེན་སོགས་ཁ་སྐོང་དགོས་ན་གོ་བགོས་པའི་རྗེས་བསྣུན་
བསྲེག་བཅིང་གསུམ་གྱི་གོང་དུ་སྤྱན་དྲང་བ་སོགས་རིགས་ཏེ།  འཇིག་རྟེན་གསུམ་རྒྱལ་གྱི་དཀྱིལ་ཆོག་ལས།  རང་ཧཱུྃ་མཛད་དུ་བསྐྱེད་ཅིང་བྱིན་གྱིས་བརླབས་པའི་རྗེས་ལ།  དེ་བཞིན་གཤེགས་པ་ཐམས་ཅད་ཀྱི་ཐུགས་ཁ་ནས་ཁྲོ་བོ་རྡོ་རྗེ་སེམས་དཔའ་ལ་སོགས་པ་དཔག་ཏུ་མེད་པ།  
རྡོ་རྗེ་འབེབས་པའི་ཚུལ་གྱིས་ནམ་མཁའ་ནས་བབས་ནས་བགེགས་བསྐྲད་པ་སོགས་ཀྱི་རྗེས་སུ་བསྣུན་བསྲེག་བཅིང་གསུམ་སོགས་བཤད་པ་ལྟར་རིགས་ཏེ།  དེ་ལྟར་མ་ཡིན་ན་སྔར་ཡོད་ཀྱི་བགེགས་ཐམས་ཅད་བཅོམ་ཟིན་ཕྱིན་ཆད་མི་འཇུག་པའི་ཕྱིར།  སྲུང་འཁོར་བྱས་པའི་རྗེས་ལ་
ཁྲོ་བོ་སྤྱན་དྲངས་པ་ལ་དགོས་པ་མེད་པའི་ཕྱིར་རོ་ཞེས་པ་བྲིས་སོ། །དེ་ནི་མི་འཐད་དེ།  རྡོ་རྗེ་འབྱུང་བ་ལ་ཁྲོ་བོ་སྤྱན་འདྲེན་སོགས་སྤྲོ་ན་ཁ་སྐོང་བར་གསུངས་ཀྱི་ངེས་པར་དགོས་པར་མ་གསུངས་ཤིང་།  འཇིག་རྟེན་གསུམ་རྒྱལ་གྱི་དཀྱིལ་ཆོག་ལས།  དེ་ལྟར་གསུངས་པ་ལ་ས་ཆོག་གི་
10-9-16a


སྐབས་ཡིན་པས་འདི་གནོད་བྱེད་དུ་མི་འཇུག་ལ།  བསྣུན་བསྲེག་བཅིང་གསུམ་གྱི་རྗེས་སུ་ཁྲོ་བོ་སྤྱན་འདྲེན་པ་དགོས་པ་མེད་ན།  ཁྲོ་བོ་སྤྱན་དྲངས་བགེགས་བསྐྲད་པ་ལ་སོགས་པ་བྱས་པའི་རྗེས་ལ་བསྣུན་བསྲེག་བཅིང་གསུམ་བྱེད་པ་ལ་ཡང་དགོས་པ་མེད་པར་
མཚུངས་པའི་ཕྱིར་དང་།  ཀྱེ་རྡོ་རྗེ་ལས།  ཐུན་མོང་དང་ཐུན་མོང་མ་ཡིན་པའི་སྲུང་འཁོར་བསྒོམ་པའི་རྗེས་ལ་ཁྲོ་བོ་ཡེ་ཤེས་པ་སྤྱན་འདྲེན་པ་ཡང་དགོས་མེད་དུ་འགྱུར་བའི་སྐྱོན་ཡོད་པའི་ཕྱིར་རོ། །བུམ་པ་བཟླས་པའི་སྐབས་སུ།  གཞན་ཕན་འོད་ཟེར་ལས།  དཀྱིལ་
འཁོར་བྲིས་ཟིན་ནས་རྡོ་རྗེ་འཛིན་མའི་ཕྱག་རྒྱ་བཅིངས་ནས་ཁང་པར་ཞུགས་ཏེ་བདག་བསྐྱེད་བསྒོམ་བཟླས་དང་བུམ་བཟླས་བྱས་ནས་མདུན་བསྐྱེད་སྒྲུབ་པར་གསུངས་པ་ལ།  རིགས་པའི་རྣམ་ངེས་ལས།  དེ་ཡང་མ་ཡིན་ཏེ།  རྒྱུད་རྣམས་ལས་དཀྱིལ་འཁོར་བྲི་བའི་གོང་དུ་ས་ཆོག་གི་
སྐབས་སུ་བདག་བསྐྱེད་བསྒོམ་བཟླས་བྱེད་པ་ཁོ་ན་གསུངས་ཀྱི།  དེའི་གོང་དུ་བདག་བསྐྱེད་མ་བྱས་པར།  དཀྱིལ་འཁོར་བྲིས་ཟིན་ནས་བསྒོམ་བཟླས་བྱ་སྟེ།  དཀྱིལ་འཁོར་བསྒྲུབ་པ་ནི་ཅུང་ཟད་ཀྱང་གསུངས་པ་མ་མཐོང་བའི་ཕྱིར་དང་།  འདིར་ཡང་རྡོ་རྗེ་འཛིན་མས་ཞུགས་
ནས་མདུན་བསྐྱེད་བསྒྲུབ་པར་གསུངས་ཀྱི།  བདག་བསྐྱེད་བསྒོམ་བཟླས་བྱེད་པར་མ་གསུངས་པའི་ཕྱིར་དང་།  དཀྱིལ་འཁོར་མ་བསྒྲུབས་པའི་གོང་དུ་བུམ་བཟླས་བྱེད་པ་ཡང་འདིར་ཟུར་ཙམ་མ་གསུངས་པའི་ཕྱིར་རོ་ཞེས་བྲིས་སོ། །དེ་དག་ནི་མི་འཐད་དེ།  དཀྱིལ་འཁོར་བྲིས་ཟིན་ནས་
མདུན་བསྐྱེད་མ་བསྒྲུབས་པའི་གོང་དུ་བདག་བསྐྱེད་བསྒོམ་བཟླས་བྱེད་པར་རྒྱུད་རྣམས་ལས་གསུངས་པ་མ་མཐོང་ཞེས་པའི་དོན་རྒྱུད་སྡེ་ཐམས་ཅད་ལ་བྱེད་པ་ཡིན་ན་ནི།  བརྟག་གཉིས་ལས།  བདག་མེད་མའི་དཀྱིལ་འཁོར་བྲིས་ཟིན་ནས།  ཕྱག་གཉིས་ཀྱེ་རྡོ་རྗེ་སྦྱོར་བས། །ཞེས་གསུངས་པ་
10-9-16b


སོགས་རྒྱུད་སྡེ་རྣམས་ལས་ཀྱང་གསུངས་ཤིང་།  རྒྱ་གར་གྱི་དཀྱིལ་ཆོག་ཚད་ལྡན་རྣམས་ལས་ཀྱང་དེ་ལྟར་དུ་བཤད་པའི་ཕྱིར་ན་མདུན་བསྐྱེད་བསྒྲུབ་པའི་སྔོན་གྱི་བདག་བསྐྱེད་ཐམས་ཅད་གཅོད་པ་འདི་ནི།  ཐབས་ལ་བསླུ་བའི་བདུད་ཡིན་པར་ཤེས་ནས་སྤང་བར་བྱ་སྟེ།  འདིའི་དགག་སྒྲུབ་རྒྱས་
པར་ཟུར་དུ་འཆད་དོ། །གལ་ཏེ་རྒྱུད་འདིར་དཀྱིལ་འཁོར་བྲིས་ཟིན་ནས་མདུན་བསྐྱེད་མ་བསྒྲུབས་པའི་གོང་དུ་བདག་བསྐྱེད་དངོས་སུ་མ་གསུངས་པའི་ཕྱིར་མི་འཐད་ན།  གཏོར་མའི་རྗེས་སུ་སློབ་མ་ལ་དབང་བསྐུར་བ་མ་བྱས་པའི་སྔོན་དུ་བདག་འཇུག་ལེན་པ་ཡང་མི་འཐད་པར་འགྱུར་ཏེ། 
བར་དེར་བདག་འཇུག་དངོས་སུ་མ་གསུངས་པའི་ཕྱིར།  གལ་ཏེ་སློབ་མ་ལ་དབང་བསྐུར་བར་གསུངས་པ་ཉིད་ཀྱིས་བདག་འཇུག་ལེན་དགོས་པར་གྲུབ་སྟེ།  དཀྱིལ་འཁོར་གྱི་ཆོ་ག་གཞན་རྣམས་ལས་དེ་ལྟར་དུ་འབྱུང་བའི་ཕྱིར་ཞེ་ན།  སྔ་མ་ལ་ཡང་མཚུངས་ཏེ།  སྤྱོད་རྒྱུད་ཡན་ཆད་དུ་
མདུན་བསྐྱེད་བསྒྲུབ་པ་ལ་བདག་བསྐྱེད་སྔོན་དུ་འགྲོ་དགོས་པའི་ཕྱིར་རོ། །དེས་ན་བདག་བསྐྱེད་མེད་པར་མདུན་བསྐྱེད་བསྒྲུབ་པ་དང་།  སློབ་མ་ལ་དབང་བསྐུར་བ་ཡོད་ན་བྱ་རྒྱུད་ཀྱི་ཉམས་ལེན་ཡིན་གྱི།  སྤྱོད་རྒྱུད་ཡན་ཆད་ལ་འདི་ལྟ་བུའི་ཆོ་ག་སྦྱོར་བ་ལྷྭམ་དཔེ་ཞྭ་ལ་བཀབ་པའོ། །
མདུན་བསྐྱེད་བསྒྲུབ་པའི་སྔོན་དུ་བུམ་བཟླས་བྱེད་པར་རྒྱུད་འདིར་དངོས་སུ་མ་གསུངས་པའི་ཕྱིར་མི་འཐད་ན།  ཁྱེད་རང་གིས་གཏོར་མ་ཟིན་ནས་བདག་འཇུག་མ་བླངས་པའི་གོང་དུ་བུམ་བཟླས་བྱེད་པ་དེ་ཡང་མི་འཐད་པར་འགྱུར་ཏེ།  དེར་བུམ་བཟླས་བྱེད་པར་རྒྱུད་འདིར་མ་གསུངས་པའི་
ཕྱིར་རོ། །གལ་ཏེ་དེར་བུམ་བཟླས་བྱ་དགོས་ཏེ།  བདག་འཇུག་ལེན་པ་ལ་བུམ་བཟླས་ཟིན་པ་དགོས་པའི་ཕྱིར་ཞེ་ན།  དེའི་ཕྱིར་མདུན་བསྐྱེད་མ་བསྒྲུབས་པའི་གོང་དུ་བྱེད་པར་རིགས་ཏེ།  བདག་འཇུག་ལེན་པ་ལ་བུམ་བཟླས་ཟིན་པ་དགོས་ཤིང་འདིར་བདག་འཇུག་གི་རྗེས་ཀྱི་བཛྲ་དྷ་ར་སོགས་
10-9-17a


བརྗོད་ནས་བདག་མདུན་ཐ་མི་དད་དུ་བསྒྲུབས་མ་ཚར་གྱི་བར་དུ་མདུན་བསྐྱེད་སྒྲུབ་པ་མ་རྫོགས་པས་མདུན་བསྐྱེད་ཀྱི་བར་མཚམས་སུ་ཆོ་ག་རིགས་མི་མཐུན་བུམ་བསྐྱེད་ཀྱིས་བཅད་པ་ལ་དགོས་པ་མེད་པའི་ཕྱིར་རོ། །དེས་ན་རྗེ་བཙུན་འཁྲུལ་པའི་དྲི་མ་ཟད་པ་དེས་བདག་བསྐྱེད་དང་མདུན་བསྐྱེད་
ཀྱི་བར་དུ་བུམ་བསྐྱེད་མཛད་པའི་གནད་ཀྱང་འདི་ཡིན་ནོ། །གཞན་ཕན་འོད་ཟེར་ལས་མཆོད་བུམ་ལ་ལྷ་བསྐྱེད་མི་དགོས་པར་རྩ་རིག་བཟླ།  དབང་བུམ་རྣམས་ལ་རིགས་ལྔ་བསྐྱེད་པའམ་མ་བསྐྱེད་ཀྱང་རུང་སྟེ།  རྩ་རིག་དང་རིགས་ལྔའི་སྔགས་བཟླ།  རྣམ་རྒྱལ་ནི།  ལྷ་
ཐམས་ཅད་བསྐྱེད་པའམ་མ་བསྐྱེད་ཀྱང་རུང་སྟེ།  ལྷ་ཐམས་ཅད་ཀྱི་སྔགས་བཟླ།  ལྷ་བསྐྱེད་ན་ནི་ལྷ་ལ་མཆོད་ལ།  ལྷ་མ་བསྐྱེད་ན་མ་མཆོད་པས་བཏུབ།  ཆུ་ནུས་ལྡན་དུ་བསམ་པ་ལས་གཞན་མེད་དོ། །ཡི་གེ་བརྒྱ་པས་བརྟན་པར་བྱ་བར་གསུངས་པ་ལ།  རིགས་པའི་རྣམ་
ངེས་ལས།  དེ་ནི་མ་ཡིན་ཏེ།  ལྷ་ཐམས་ཅད་ཀྱི་སྔགས་བཟླ།  ལྷ་བསྐྱེད་ན་ནི་ལྷ་ལ་མཆོད་སྐད་ཅིག་གིས་བསྐྱེད་པ་དེ་འདྲ་རྣལ་འབྱོར་གྱི་རྒྱུད་ནས་བཤད་པ་མ་མཐོང་ཞིང་།  སྒྲུབ་བྱེད་གཞན་ཡང་མེད་པའི་ཕྱིར་དང་།  མཆོད་བུམ་ལ་རྩ་རིག་བཟླས་པའི་རྒྱུ་མཚན་
ཡང་མེད་པའི་ཕྱིར་དང་།  ལྷ་མ་བསྐྱེད་ཀྱང་གསང་བ་སྤྱི་རྒྱུད་དང་མཐུན་པར་རྡོ་རྗེ་འབྱུང་བ་ལས་ཀྱང་མེ་ཏོག་སོགས་གསུམ་གྱིས་མཆོད་པའི་ཕྱིར།  བཛྲ་ཀ་ལ་སོགས་བུམ་པའི་དབང་སྔགས་མི་བརྗོད་པར་གཞན་བརྗོད་པ་ནི།  ཡོད་པའི་སྒོ་བོར་ནས་མེད་པའི་སྲང་འཆག་
པ་ཡིན་པའི་ཕྱིར་དང་།  འདིར་ཡིག་བརྒྱས་བརྟན་པར་བྱེད་པའི་རྒྱུ་མཚན་མེད་པའི་ཕྱིར་རོ་ཞེས་བྲིས་སོ། །དེ་དག་ནི་མི་འཐད་དེ།  ལྷ་ཐམས་ཅད་སྐད་ཅིག་གིས་བསྐྱེད་པ་རྣལ་འབྱོར་གྱི་རྒྱུད་ལས་བཤད་པ་མ་མཐོང་ན།  སྒྱུ་དྲྭ་ལས།  སྤྲོ་དང་བསྡུ་བའི་བྱེད་པ་པོ། །རྣམ་པ་ཀུན་གྱི་
10-9-17b


མཆོག་ལྡན་པའི། །ཡེ་ཤེས་སྐད་ཅིག་གིས་རྫོགས་པ། །རྫོགས་པའི་རྣལ་འབྱོར་ཞེས་བཤད་དོ། །ཞེས་གསུངས་པ་ཇི་ལྟར་དྲང་།  གལ་ཏེ་དེ་རྣལ་འབྱོར་གྱི་རྒྱུད་མ་ཡིན་ནོ་སྙམ་ན།  ཁྱེད་རང་གིས་ས་ཆོག་གི་སྐབས་སུ་དེ་ལས་བླང་བ་ནི་དངོས་སུ་རྣལ་འབྱོར་གྱི་རྒྱུད་ཤིན་ཏུ་རྒྱས་པ་
རྣམས་སུ་ཡང་མ་གསུངས་ཀྱང་།  རྣམ་པར་སྣང་མཛད་སྒྱུ་འཕྲུལ་དྲྭ་བ་ལས་གསུངས་པ་དང་ཆ་འདྲ་བར།  སྔོན་དུ་འགྲོ་བའི་གཏོར་མ་བསང་སྦྱང་བྱིན་གྱིས་བརླབས་ནས་ཞེས་བྲིས་པ་དང་འགལ་ལོ། །གལ་ཏེ་ཚིག་དེས་ཀྱང་རྣལ་འབྱོར་རྒྱུད་དུ་ཁས་མ་བླངས་ཀྱི་བླ་མེད་དུ་ཁས་ལེན་ནོ་ཞེ་ན།  
འོ་ན་ཁྱེད་ཀྱིས་གོང་དུ་ཨོཾ་བྷུ་ཁཾ་སོགས་བླ་མེད་ཀྱི་ཆོ་གའི་ཡན་ལག་ཡིན་པས་འདིའི་སྐབས་སུ་སྦྱར་དུ་མི་རུང་བར་ཁས་བླངས་པ་དང་འགལ་ལོ། །མཆོད་བུམ་ལ་རྩ་རིག་བཟླས་པ་དང་ཡིག་བརྒྱས་བརྟན་པར་བྱེད་པ་རྣམས་ནི་བླ་མ་གོང་མའི་ཕྱག་ལེན་ཡིན་པས་འདིར་མཛད་པ་
ཡིན་ལ།  རྒྱུད་འདིར་དངོས་སུ་མ་བཤད་པའི་ཕྱིར་མི་རུང་ན།  ཁྱེད་རང་གིས་ཁམས་གསུམ་རྣམ་རྒྱལ་གྱི་བསྲུང་བ་ལ་ཁྲོ་བོ་སྤྱན་འདྲེན་སོགས་སྦྱར་བ་སྲུང་འཁོར་འབྲིང་པོ་དང་།  དེ་ལ་ཡང་ལས་ཀྱི་སེམས་དཔའ་བཞིའི་སྔགས་ཀྱི་བསྲུང་བ་སྦྱར་བ་སྲུང་འཁོར་རྒྱས་པར་བཤད་པ་
རྣམས་ཀྱང་མི་རུང་བར་འགྱུར་རོ། །ལྷ་མ་བསྐྱེད་ན་མ་མཆོད་ཀྱང་བཏུབ།  ཞེས་གསུངས་ཀྱི་མཆོད་པ་བཀག་པ་ནི་མེད་ལ།  བཛྲ་ཀ་ལ་སོགས་བུམ་པའི་དབང་སྔགས་མི་བརྗོད་པར་གཞན་བརྗོད་པ་ཡང་ནོར་ཞེས་པའང་མི་འཐད་དེ།  གཞན་ཕན་འོད་ཟེར་ལས་དངོས་སུ་མ་
གསུངས་ཀྱང་ཨ་བྷི་ཥེ་ཀ་སོགས་བརྗོད་པ་ཕྱག་ལེན་ལ་མཛད་པ་ནི།  རྟེན་ལ་ཁྲུས་བྱེད་པའི་དོན་དུ་ཡིན་གྱི་དབང་གི་དོན་དུ་མ་ཡིན་པའི་ཕྱིར་ཏེ།  དབང་གི་དོན་དུ་བཟླས་པ་ནི་རྩ་རིག་ཡིན་པའི་ཕྱིར་རོ། །བརྒྱད་པ་ལྷ་བསྒྲུབ་པའི་སྐབས་སུ་གཞན་ཕན་འོད་ཟེར་ལས།  བསྡུས་པ་
10-9-18a


དང་རྒྱས་པ་གཉིས་ལས་བསྡུས་ཏེ་བྱེད་ན་བྲིས་པའི་དཀྱིལ་འཁོར་གྱི་སྟེང་དུ།  ཡེ་ཤེས་པ་སྤྱན་འདྲེན་པ་མན་ཆད་སྦྱོང་རྒྱུད་ཀྱི་དངོས་བསྟན་ལྟར་བྱ་བ་དང་།  རྒྱས་པར་བྱེད་ན་ཨོཾ་ཤ་ཅེས་དང་།  ཨོཾ་ཤཱུ་ཉ་ཏཱ་ཞེས་སོགས་ཀྱིས་དཀྱིལ་འཁོར་སྟོང་པར་བསམ།  ཨོཾ་བྷ་ཞེས་སོགས་
བརྗོད་པས་སྐད་ཅིག་གིས་འབྱུང་བ་རིམ་བརྩེགས་རི་རབ་དང་བཅས་པའི་སྟེང་དུ་གཞལ་ཡས་ཁང་གདན་བཅས་བསྐྱེད་ནས་དེར་ལྷ་རྣམས་སྙིང་པོ་ཚིག་ཙམ་གྱིས་བསྐྱེད་པའམ་སྤྲོ་བསྡུ་ལས་བསྐྱེད་པ་གང་རུང་གསུངས་པ་ལ།  རིགས་པའི་རྣམ་ངེས་ལས།  དེ་ནི་མ་ཡིན་ཏེ།  ཨོཾ་ཤཱུ་ནྱ་ཏཱ་
ཞེས་བརྗོད་དགོས་ན་ཨོཾ་བྷ་བྷྲཱུྃ་ཞེས་ཀྱང་བརྗོད་དགོས་པར་འགྱུར་བའི་ཕྱིར་དང་།  བྷ་ཞེས་པས་འབྱུང་བ་རིམ་བརྩེགས་བསྐྱེད་ན།  ཨོཾ་ཤ་ཞེས་པས་ཀྱང་སྟོང་ཉིད་བསམ་པར་མཚུངས་པས་ཨོཾ་ཤཱུ་ཉ་ཏཱ་སོགས་བརྗོད་མི་དགོས་པའི་ཕྱིར་དང་།  རྒྱུད་འདི་ཉིད་ལས་ས་བོན་དང་ཕྱག་མཚན་ལས་ལྷ་བསྐྱེད་པ་ཁོ་ན་གསུངས་ཀྱི་
སྙིང་པོ་ཚིག་ཙམ་བརྗོད་པའམ།  དབུས་སུ་སྙིང་པོ་དང་མཐའ་སྐོར་དུ་རྩ་རིག་བསམས་ནས་འོད་ཟེར་སྤྲོ་བསྡུས་ལྷ་བསྐྱེད་པའི་རྒྱུ་མཚན་མེད་པའི་ཕྱིར་དང་།  གཙུག་དགུ་ནས་འབྱུང་བས་འདིར་བྱེད་ན་ཧ་ཅང་ཐལ་བའི་ཕྱིར་རོ།  ཞེས་བྲིས་སོ། །དེ་ནི་མི་འཐད་དེ།  གཞན་ཕན་
འོད་ཟེར་གྱི་དགོངས་པ་ནི།  ཨོཾ་ཤ་ཅེས་དང་།  ཨོཾ་ཤཱུ་ཉ་ཏཱ་གཉིས་ཀ་ངེས་པར་བརྗོད་དགོས་པ་མ་ཡིན་པའི་ཕྱིར་ཏེ།  འོག་སྦྱིན་སྲེག་གི་སྐབས་སུ་ཨོཾ་ཤ་བརྗོད་པས་སྟོང་པར་བསྒོམ་པར་གསུངས་པའི་ཕྱིར།  གཉིས་ཀ་བརྗོད་ནའང་སྐྱོན་ཡོད་པ་མ་ཡིན་ཏེ།  བླ་མེད་ཀྱི་སྒྲུབ་ཐབས་
འགའ་ཞིག་ཏུ།  ཡེ་ཤེས་ཚོགས་བསག་གི་སྔགས་གཉིས་དང་གསུམ་ལ་སོགས་པ་གསུངས་པའི་ཕྱིར་རོ། །བརྗོད་དགོས་ན་ཨོཾ་བྷ་བྷྲཱུྃ་ཞེས་བརྗོད་དགོས་པར་འགྱུར་རོ། །ཞེས་པ་ཡང་དོན་མ་རྟོགས་པ་སྟེ།  ཨོཾ་ཤས་ནི་ཤཱུ་ནྱ་ཏཱ་དྲངས་པ་ཡིན་ལ།  བྷ་ཞེས་པས་བྷྲཱུྃ་དྲངས་པ་མ་ཡིན་
10-9-18b


པའི་ཕྱིར་ཏེ།  བྷ་བ་ཞེས་པ་ནི་ཡོད་ཅིང་འབྱུང་བའི་དོན་གྱིས་ན་དངོས་པོ་མཐའ་དག་ལ་འཇུག་པས་དེ་ལས་འབྱུང་བཞི་ནས་གཞལ་ཡས་ཁང་གདན་བཅས་ཀྱི་བར་བསྐྱེད་པའི་དོན་ཡིན་པའི་ཕྱིར་རོ། །རྒྱུད་འདི་ཉིད་ལས།  ས་བོན་དང་ཕྱག་རྒྱ་ཙམ་ལས་ལྷ་བསྐྱེད་པ་ནི་བདག་བསྐྱེད་
ལ་གསུངས་ཤིང་།  མདུན་བསྐྱེད་ལ་དེ་སྦྱར་བའི་ཤེས་བྱེད་མེད་ལ་མདུན་བསྐྱེད་ཀྱི་དམ་ཚིག་པ་བསྐྱེད་པ་རྒྱུད་འདིར་དངོས་སུ་མ་བཤད་པས།  མ་བྱས་ཀྱང་ཆོག་ལ་བྱེད་ན་གཙུག་དགུ་ནས་བཤད་པ་ལྟར་སྙིང་པོ་ཚིག་ཙམ་དང་།  འོད་ཟེར་གྱི་སྤྲོ་བསྡུ་ལས་བསྐྱེད་པ་གང་རུང་
གསུངས་པ་ལྟར་བྱ་དགོས་ཏེ།  མདུན་བསྐྱེད་ཀྱི་དམ་ཚིག་པ་བསྐྱེད་པ་ཉིད་ཀྱང་གཙུག་དགུ་ལ་བརྟེན་དགོས་པའི་ཕྱིར་རོ། །གཙུག་དགུ་ནས་འབྱུང་བས་འདིར་བྱེད་ན་ཧ་ཅང་ཐལ་ཞེས་པ་ནི་ཁྱེད་རང་གིས་བུམ་བསྐྱེད་རྒྱས་པ་གཙུག་དགུ་ནས་འབྱུང་བ་ལྟར་བྱེད་པ་ལ་ཡང་མཚུངས་
སོ། །གཞན་ཕན་འོད་ཟེར་ལས།  ནང་གི་སྒོ་བ་བཞི་ཁ་ཅིག་བཞེངས་པའི་ཁྲོ་བོར་འདོད་པ་ནི་རྣལ་འབྱོར་གྱི་རྒྱུད་རྣམས་ལས་མ་བཤད་པའི་ཕྱིར་མ་ཡིན་ནོ་ཞེས་དང་།  བྱང་སེམས་བཅུ་དྲུག་རྡོ་རྗེ་དང་དྲིལ་བུ་འཛིན་པ་ཕྱོགས་ཀྱི་མདོག་ཅན་དུ་གསུངས་པ་ལ།  རིགས་པའི་
རྣམ་ངེས་ལས།  དེ་ནི་མ་ཡིན་ཏེ།  འདི་ཉིད་ལས་སྒོ་བ་ཡང་།  དཔའ་བོ་ལྕགས་ཀྱུ་ཞགས་པ་དང་། །ལྕགས་སྒྲོག་དྲིལ་བུ་རྣམས་ནི་བཞག །ཞེས་དཔའ་བོའམ་ཁྲོ་བོར་བཞེད་པའི་ཕྱིར་དང་།  བྱམས་པ་ལ་སོགས་པ་བཅུ་དྲུག་རྡོ་རྗེ་དང་དྲིལ་བུ་འཛིན་པ་ཡིན་པར་རྣལ་འབྱོར་གྱི་
རྒྱུད་དང་བསྟན་བཅོས་དྲི་མེད་ནས་བཤད་པ་ཅུང་ཟད་མ་མཐོང་ཞིང་།  སྒྲུབ་བྱེད་གཞན་ཡང་མེད་པའི་ཕྱིར་རོ་ཞེས་བྲིས་སོ། །དེ་ནི་མི་འཐད་དེ།  སྒོ་བ་བཞི་པོ་བཞེངས་པ་བཀག་པ་ཡིན་གྱི།  ཁྲོ་བོ་ཡིན་པ་མ་བཀག་པའི་ཕྱིར་དང་།  ཁྱེད་རང་གིས་བྱང་སེམས་བཅུ་དྲུག་ཕྱོགས་
10-9-19a


བཞིའི་དབང་གིས་རྡོ་རྗེ་སེམས་དཔའ་དང་།  རྡོ་རྗེ་རིན་ཆེན་དང་།  རྡོ་རྗེ་ཆོས་དང་།  རྡོ་རྗེ་ལས་ལྟ་བུར་བཤད་པ་ལ་ཡང་སྒྲུབ་བྱེད་མེད་པའི་ཕྱིར་དང་།  གལ་ཏེ་རྡོ་རྗེ་རྩེ་མོ་ལས་གསུངས་པ་འདིར་སྦྱོར་ན།  ཀུན་དགའ་སྙིང་པོས་རྡོ་རྗེ་འབྱུང་བ་ནས་ཇི་ལྟར་དགའ་བའི་
སྐུ་མདོག་དང་རྒྱན་ཅན་ནོ་ཞེས་བཤད་པས།  སྔ་མ་ལ་ཡང་སྒྲུབ་བྱེད་མེད་པའི་གཏན་ཚིགས་མ་གྲུབ་པའི་ཕྱིར་རོ། །མགྲོན་ཐབས་ཀྱི་ལྷ་རྣམས་རྒྱུད་དོན་གསལ་བ་ལས་དཀྱིལ་འཁོར་སྒོ་རྐྱང་དུ་བྱས་པའི་ལྷ་སྣམ་ལ་བཀོད་ནས།  དེའི་ཤེས་བྱེད་དུ།  གཞི་ཡི་ཁྱམས་ནི་ཐམས་ཅད་དུ། །
བྱམས་པ་ལ་སོགས་བྲི་བར་བྱ། །ཞེས་དྲངས་པ་ནི་མི་འཐད་དེ།  རྒྱུད་ལས།  རྟ་བབས་ཁྱམས་ནི་ཐམས་ཅད་དུ། །ཞེས་པར་ཡོད་ཀྱི།  གཞི་ཡི་ཁྱམས་ནི་ཐམས་ཅད་དུ། །ཞེས་པ་མེད་པའི་ཕྱིར་དང་།  དབུས་དང་གཡས་གཡོན་གྱི་ཁྲོ་བོ་གསུམ་སྒོ་ཁང་དུ་འགོད་ན་སྒོ་ཁང་ལ་ཆ་
ཆེན་གཅིག་ལས་མེད་པས།  ཁྲོ་བོ་གསུམ་གྱི་གཡོན་བརྐྱང་མི་ཤོང་བའི་ཕྱིར་དང་།  དེའི་ཐད་ཀྱི་ལྷ་སྣམ་ལ་འགོད་ན་ལྕགས་ཀྱུ་སོགས་བཞི་པོ་དེའི་ཡང་ནང་ཕྱོགས་ཀྱི་ལྷ་སྣམ་ལ་འགོད་དགོས་པས།  བཞི་པོ་སྒོ་བར་རྒྱུད་ནས་དངོས་སུ་གསུངས་པ་དང་འགལ་བའི་ཕྱིར་དང་།  རྟགས་
ཁས་བླངས་ཏེ།  ཁྱེད་རང་གིས་བརྟག་གཉིས་ལས་གཽ་རཱི་སོགས་བཞི་སྒོ་སྲུང་དུ་བཤད་པས་སྒོའི་ཐད་ཀྱི་པད་འདབ་ལ་འགོད་ན་སྒོ་སྲུང་གི་དོན་མི་གནས་པར་ཁས་བླངས་བའི་ཕྱིར་རོ། །དམ་རྒྱའི་སྐབས་སུ།  གཞན་ཕན་འོད་ཟེར་ལས།  རྡོ་རྗེ་བསྡམས་པ་ལས་གུང་མོ་དང་མཐའ་
བཞི་བསྒྲེང་།  མཛུབ་མོ་དང་སྲིན་ལག་གཉིས་པདྨ་དང་འདྲ་བར་བྱས་པ་ནི་ངན་སོང་སྦྱོང་བའི་རྒྱལ་པོའིའོ། །རྡོ་རྗེ་བསྡམས་པ་ལས་གུང་མོ་རྩེ་སྤྲད།  མཛུབ་མོ་གཉིས་གུང་མོའི་ཚིགས་དང་པོར་བཙུགས་ཏེ་མིག་འདྲ་བར་བྱས།  སྲིན་ལག་དང་མཐེའུ་ཆུང་ནང་དུ་བཅུག་པའི་སྟེང་
10-9-19b


མཐེ་བོས་མནན་པ་ནི་སྤྱན་གྱི་མིག་དང་འདྲ་བར་བཤད་དོ། །ཐལ་མོ་སྦྱར་བ་ལས་སྲིན་ལག་དང་མཐེའུ་ཆུང་ནང་དུ་བཅུག་ཀྱང་རུང་།  མ་བཅུག་ཀྱང་རུང་སྟེ།  མཛུབ་མོ་གཉིས་རྡོ་རྗེའི་རྭ་ལྟར་གུང་མོ་ལ་བལྟ་བ་ནི་མཱ་མ་ཀཱིའི་རྡོ་རྗེར་བཤད་དོ། །ཐལ་མོ་སྦྱར་བ་ལས་གུང་མོ་གཉིས་པདྨ་ལྟར་བྱས་ལ་མཐེའུ་
ཆུང་སོ་སོར་ཕྲལ་བ་ནི་གོས་དཀར་མོའི་པདྨར་བཤད་དོ། །ཐལ་མོ་སྦྱར་བ་ལས་མཛུབ་མོ་གཉིས་གུང་མོའི་རྒྱབ་ནས་དཀྲིས་ཏེ་མཐེ་བོང་གཉིས་གུང་མོ་ལ་སྦྱར།  ལྷག་མ་བསྣོལ་བ་ཨུཏྤ་ལ་ནི་སྒྲོལ་མར་དགོད།  ཅེས་སོ། །ཁྲོ་བོ་དང་མངག་གཞུག་ལ་སོགས་པའི་ཕྱག་རྒྱ་ནི།  རྡོ་རྗེ་
བསྡམས་པ་ནང་དུ་བཅིངས་ལ་གུང་མོ་རྩེ་སྤྲད།  མཐའ་མ་བཞི་པོ་སོ་སོར་བསྒྲེང་བའོ། །ཐལ་མོ་སྦྱར་བ་ལས་དབུས་མ་གསུམ་བཀུག་སྟེ་རྩེ་སྤྲད།  མཐའ་མ་བཞི་བསྐྱེད་པ་ནི་ལྷ་རྣམས་ཀྱི་ཐུན་མོང་བའི་པདྨའི་ཕྱག་རྒྱའོ། །གཡས་པའི་སྙིམ་པ་མགོ་ཚལ་དུ་བསྟན་པ་ནི་འཇིགས་བྱེད་
འཁོར་བཅས་དང་སྲིན་པོའི་ཕྱག་རྒྱའོ། །ཐལ་མོ་གཉིས་མདུན་དུ་བཀན་པའི་སྲིན་ལག་བཀུག་པ་ནི་རྒྱུ་སྐར་གྱིའོ། །སོར་མོ་བཅུའི་རྩེ་མོ་བཀུག་སྟེ་སྤྲད་པའི་སྙིམ་པ་ནི་ཕྲ་མེན་མའིའོ། །དེ་ཉིད་ལས་མཐེ་བོང་གཉིས་ནང་དུ་བཅུག་པ་ནི་རྣལ་འབྱོར་མའིའོ། །ཐལ་མོ་སྦྱར་བ་བརྐྱང་
པ་པད་སྐོར་བྱས་ཏེ།  ཐལ་མོ་སྦྱར་བ་ཁ་ཕྱེ་བ་ནི་འཇིག་རྟེན་པ་སྤྱིའིའོ་ཞེས་གསུངས་པ་ལ།  རིགས་པའི་རྣམ་ངེས་ལས།  དེའང་རིགས་པ་མ་ཡིན་ཏེ།  སྦྱོང་རྒྱལ་གྱི་ཕྱག་རྒྱ་གུང་མོ་བསྒྲེང་བ་ཡིན་པའི་རྒྱུ་མཚན་མེད་པའི་ཕྱིར་དང་།  མཛུབ་མོ་པདྨ་ལྟར་བྱས་པ་ལ་བསྒྲེང་བ་དགོས་
ན་སྲིན་ལག་ཀྱང་བསྒྲེང་བ་དགོས་པའི་ཕྱིར་དང་།  འདིར་དེ་ཉིད་ལས་ཞེས་པ་ཕྱག་ན་རྡོ་རྗེའི་ཕྱག་རྒྱ་ལ་སྙེགས་ནས་གུང་མོ་བསྒྲེང་བ་བྱེད་ན་མཐེ་བོང་དང་མཐེའུ་ཆུང་དེ་བཞིན་དུ་སྦྱར་ལ་ཞེས་པའི་ཁྱད་པར་གྱི་ཚིག་དོན་མེད་པའི་ཕྱིར་དང་།  ཡུམ་བཞིའི་ཕྱག་རྒྱ་ནི་འདི་ཉིད་ལས།  
10-9-20a


དེ་ལྟར་ཧཱུྃ་ཞེས་བྱ་བ་གཞིབས། །ལྷག་མ་འོད་ཟེར་འབར་བར་བྱ། །རྟ་མགྲིན་ཕྱག་རྒྱ་གང་ཡིན་པ། །དེ་ཡང་ལས་རྣམས་ཀུན་ལ་གསུངས། །སྤྱན་ནི་མིག་དང་འདྲ་བར་བཤད། །ཅེས་སོགས་གསུངས་པ་ལ།  དེ་ལྟར་ཞེས་པ་རྡོ་རྗེ་བསྡམས་པ་ལས། ཧཱུྃ་
ཞེས་པ་ལས་མཛུབ་མོ་གཉིས་གཤིབས་ཏེ།  སོར་མོ་ལྷག་མ་རྣམས་འོད་ཟེར་འབར་བར་བྱས་ལ།  མཛུབ་མོ་གཉིས་གུང་མོའི་རྒྱབ་ནས་མིག་ལྟར་བྱས་པ་སྤྱན་མ་དང་།  དེ་ཉིད་ལས་གུང་མོ་རྩེ་སྤྲད་པའི་རྒྱབ་ནས་མཛུབ་མོ་གཉིས་རྭ་ལྟར་ཕན་ཚུན་འདུད་པ་མཱ་མ་ཀཱི་དང་།  དེ་ཉིད་ལས་
གུང་མཛུབ་པདྨའི་འདབ་མ་ལྟར་བྱས་པ་གོས་དཀར་མོ་དང་།  དེ་ཉིད་ལས་གུང་མོ་རྩེ་སྤྲད་དེ་བརྐྱངས་པའི་རྒྱབ་ནས་མཛུབ་མོ་དཀྲིས་ལ་མཐེ་བོང་གཉིས་གུང་མོ་ལ་ལྟོ་སྦྱར་བ་སྒྲོལ་མའི་དམ་ཚིག་གི་ཕྱག་རྒྱར་བཤད་པ་ཡིན་པའི་ཕྱིར་དང་།  དེ་ཉིད་ནང་དུ་བཀུག་པ་ཁྲོ་བོ་སྣ་ཚོགས་གཟི་ཅན་
གྱིའོ། །ཞེས་པ་ནི་འཁོར་ལོས་སྒྱུར་བའི་རྡོ་རྗེ་ལས་ཀྱི་ཕྱག་རྒྱ་ཡིན་གྱི།  འཇིག་རྟེན་གསུམ་སྣང་སོགས་ཀྱི་ཕྱག་རྒྱ་མ་ཡིན་པའི་ཕྱིར་དང་།  གཞན་དུ་ན་དེར་སེམས་དཔའ་བཅུ་དྲུག་ལས་རྡོ་རྗེ་ལས་ཁོ་ནའི་ཕྱག་རྒྱ་མི་སྟོན་པའི་རྒྱུ་མཚན་མེད་པའི་ཕྱིར་དང་།  ཡོད་དུ་ཆུག་ཀྱང་དེའི་ཕྱག་རྒྱ་ནི་
སོར་མོ་ལྷག་མ་རྣམས་འོད་ཟེར་འབར་བ་ལྟ་བུར་བྱ་བར་གསུངས་པས།  གུང་མོ་གཉིས་རྩེ་སྤྲད་པ་དང་མཐའ་མ་བཞི་སོ་སོར་བསྒྲེང་བ་མ་ཡིན་པའི་ཕྱིར་དང་།  ལྷ་རྣམས་ཀྱི་པདྨའི་ཕྱག་རྒྱ་ནི་སྙིམ་པ་པདྨ་ཁ་འབུས་ཁ་བྱེ་བ་ལྟ་བུ་ཡིན་པས།  དབུས་བཀུག་ནས་མཐའ་མ་བཞི་བསྐྱེད་པ་ཡིན་
པའི་རྒྱུ་མཚན་ཡང་མེད་པའི་ཕྱིར་དང་།  འཇིགས་བྱེད་འཁོར་བཅས་ཀྱི་ཕྱག་རྒྱ་ནི་གཡས་པའི་སྙིམ་པ་མགོ་ཚལ་ལྟ་བུ་ཡིན་པའི་རྒྱུ་མཚན་མེད་པའི་ཕྱིར་དང་།  གཟའི་ཕྱག་རྒྱ་ལ་གཡོན་པ་སྙིང་གར་སྡུད་པ་མི་འགྲུབ་པའི་ཕྱིར་དང་།  སྙིམ་པ་བཟེད་པ་ལས་གུང་མོ་གཉིས་ནང་དུ་བཀུག་
10-9-20b


པ་ཨརྒྷའི་ཕྱག་རྒྱ་ཡིན་པས།  ཨརྒྷ་འབུལ་བ་རྒྱུ་སྐར་རྣམས། །ཞེས་པར་ཐལ་མོ་གཉིས་བཀན་པའི་སྲིན་ལག་བཀུག་པར་ཡང་མི་འགྲུབ་པའི་ཕྱིར་དང་།  མགོ་ཐོད་ཁར་གཞག་ནི་སྙིམ་པ་བཟེད་པ་ལྟར་གཞག་པ་ཡིན་པས་སྙིམ་པ་ཁ་འབུས་ཉིད་མགོ་ཐོད་ཁར་གཞག་གི་ཕྲ་མེན་མའི་
ཕྱག་རྒྱར་མི་འགྲུབ་པའི་ཕྱིར་དང་།  རྒྱུད་འདི་ཉིད་ལས།  ལྷ་རྣམས་ཀུན་གྱི་ཐུན་མོང་དུ། །ཕྱག་རྒྱ་ཆེན་པོ་བཤད་པར་བྱ། །ཐལ་མོ་བརྐྱང་བར་བཤད་པ་སྟེ། །ཡང་ན་ཐལ་མོ་པདྨར་བྱ། །ཞེས་པ་འདིས་ནི་ལྷ་རྣམས་ཀྱི་ཕྱག་རྒྱ་ཆེན་པོ་བསྟན་གྱི།  དམ་ཚིག་གི་ཕྱག་
རྒྱ་བསྟན་པ་མ་ཡིན་པའི་ཕྱིར་དང་།  ཡིན་ན་སྔར་དང་ཟློས་པའི་ཕྱིར་དང་།  གཞུང་དེས་ནི་ཐལ་མོ་བརྐྱངས་ཏེ་སྦྱར་བའམ།  པདྨ་ལྟར་བྱ་བར་བཞེད་ཀྱི།  ཐལ་མོ་བརྐྱངས་ལ་པད་སྐོར་བྱེད་པ་སོགས་བསྟན་པའི་རྒྱུ་མཚན་མེད་པའི་ཕྱིར་རོ། །ཞེས་བྲིས་སོ། །དེ་དག་
རིམ་བཞིན་འགོག་པ་ནི།  སྦྱོང་རྒྱལ་གྱི་ཕྱག་རྒྱར་གུང་མོ་བསྒྲེང་བའི་རྒྱུ་མཚན་མེད་པ་མ་ཡིན་ཏེ།  ཤཱཀ་ཐུབ་ཀྱི་སྐབས་ནས་དེ་ཉིད་ལས་ཞེས་པ་ཕྱག་ན་རྡོ་རྗེའི་ཕྱག་རྒྱ་ལ་སྙེགས་པའི་དབང་དུ་བྱས་ནས།  གུང་མོ་བསྒྲེང་བ་དངོས་སུ་མ་གསུངས་ཀྱང་འཁོར་ལོས་སྒྱུར་བའི་སྐབས་ནས་
དེ་བཞིན་དུ་ཧཱུྃ་ཞེས་བྱ་བ་དང་། ཧཱུྃ་ཞེས་བྱ་བ་པདྨའི་འདབ་མ་འདྲ་བར་བྱ།  ཏྲཱྃ་ཞེས་བྱ་བ་གཉིས་གཞིབས་ཏེ་བརྐྱངས་པ་འདི་ནི་བཅོམ་ལྡན་འདས་ཀྱི་རྩ་བའི་ཕྱག་རྒྱའོ། །ཞེས་གསུངས་པའི་ཕྱིར་དང་།  དེ་ཉིད་ལས་ཞེས་པ་ཕྱག་ན་རྡོ་རྗེའི་ཕྱག་རྒྱ་ལ་མི་སྙེགས་པར་རྡོ་
རྗེ་བསྡམས་པ་ལ་བྱེད་ན།  མཐེ་བོང་དང་མཐེའུ་ཆུང་ཡང་དེ་བཞིན་དུ་སྦྱར་ལ་ཞེས་པའང་རྡོ་རྗེ་བསྡམས་པ་ལ་བསྙེགས་དགོས་པའི་ཕྱིར་དང་།  ལག་པ་གཡོན་པས་དེ་བཞིན་དུ་བསྒྱུར་ཞིང་བྱ་བ་འདི་ནི་ལས་ཐམས་ཅད་པའི་ཕྱག་རྒྱའོ། །ཞེས་པའི་དེ་བཞིན་གཤེགས་པ་
10-9-21a


ཡང་ཕྱག་རྒྱ་སྔ་མ་ལ་མི་བསྙེགས་པར་རྡོ་རྗེ་བསྡམས་པ་ལ་བསྙེགས་དགོས་པའི་ཕྱིར་དང་།  ཡུམ་བཞིའི་ཕྱག་རྒྱ་འདི་ཉིད་ལས།  དེ་ལྟར་ཧཱུྃ་ཞེས་བྱ་བ་གཞིབས། །ཞེས་སོགས་ཀྱིས་སྟོན་པར་འདོད་པ་ནི་འཁོར་ལོས་སྒྱུར་བའི་སྐབས་ནས་ཧཱུྃ་མཛད་ནས་རྟ་
མགྲིན་གྱི་བར་གྱི་ཁྲོ་བོ་རྣམས་ཀྱི་ཕྱག་རྒྱ་བསྟན་ཟིན་པའི་རྗེས་སུ།  སྤྱན་ནི་མིག་དང་འདྲ་བར་བཤད། །ཅེས་སོགས་ཚིག་རྐང་བཞི་ཡུམ་བཞིའི་དམ་རྒྱ་བསྟན་པའི་དོན་ལ་མ་དཔྱད་པར་རྟ་མགྲིན་གྱི་ཕྱག་རྒྱ་དེ་ཉིད་སྤྱན་མ་ལ་སྦྱར་འདུག་པའི་ཕྱིར།  དེས་ན་ཡུམ་བཞིའི་ཕྱག་རྒྱ་ཁྱེད་ཀྱིས་
བཤད་པ་ལྟར་རྒྱུད་ཀྱི་དོན་གཏན་མ་ཡིན་པར་ཤེས་པར་བྱའོ། །དེ་ཉིད་ནང་དུ་བཀུག་པ་ཁྲོ་བོ་སྣ་ཚོགས་གཟི་ཅན་གྱིའོ་ཞེས་པ་ནི་འཁོར་ལོས་སྒྱུར་བའི་རྡོ་རྗེ་ལས་ཀྱི་ཕྱག་རྒྱ་ཡིན་གྱི།  འཇིག་རྟེན་གསུམ་སྣང་སོགས་ཀྱི་ཕྱག་རྒྱ་མ་ཡིན་ཞེས་པའང་ཞིབ་ཏུ་མ་གཟིགས་པ་སྟེ།  འཁོར་
ལོས་སྒྱུར་བའི་སྐབས་ནས་དེ་ཉིད་ནང་དུ་བཀུག་པ་ནི་ཁྲོ་བོ་སྣ་ཚོགས་ཀྱི་ཕྱག་ན་གཟི་ཅན་ནོ་ཞེས་པ་ཡོད་ཀྱི།  ཁྲོ་བོ་སྣ་ཚོགས་གཟི་ཅན་གྱིའོ་ཞེས་པ་མེད་ཅིང་།  ལུང་དེའི་དོན་ནི་ཕྱག་རྒྱ་དེ་འཇིག་རྟེན་གསུམ་སྣང་ལ་སོགས་པའི་ཁྲོ་བོ་སྣ་ཚོགས་ཀྱི་ཕྱག་རྒྱ་བདུད་སྐྲག་པར་བྱེད་པའི་གཟི་
བརྗིད་ཅན་ཡིན་ཞེས་པའི་དོན་ཡིན་པའི་ཕྱིར་དང་།  རྡོ་རྗེ་ལས་ཀྱི་ཕྱག་རྒྱའང་དེ་ཉིད་ལས་གནོད་སྦྱིན་གྱི་འོག་ཏུ་ཧཱུྃ་ཞེས་བྱ་བ་གཉིས་ལྕགས་ཀྱུར་བྱས་པ་ནི་འགུགས་པའོ་ཞེས་པས་བསྟན་པ་ཡིན་པའི་ཕྱིར་རོ། །ལྷ་རྣམས་ཀྱི་པདྨའི་ཕྱག་རྒྱ་དབུས་བཀུག་ནས་མཐའ་མ་བཞི་
བཀྱེད་པའང་བླ་མ་གོང་མའི་ཕྱག་ལེན་ཡིན་གྱི།  གཞན་དུ་ན་སྙིམ་པ་ཁ་འབུས་སོགས་ཀྱང་ཡིན་པའི་རྒྱུ་མཚན་མེད་ལ།  འཇིགས་བྱེད་འཁོར་བཅས་ཀྱི་ཕྱག་རྒྱ་གཡས་པའི་སྙིམ་པ་མགོ་ཚལ་ལྟ་བུ་ཡིན་པ་ལ་སྒྲུབ་བྱེད་མེད་པའང་མ་ཡིན་ཏེ།  འཁོར་ལོས་སྒྱུར་བའི་སྐབས་ནས།  
10-9-21b


མགོ་བོའི་ཐོད་པ་ནག་པོ་སྟེ། །ཞེས་པའི་དོན་ཡིན་པའི་ཕྱིར།  གཟའི་ཕྱག་རྒྱ་ལ་གཡོན་པ་སྙིང་གར་སྡུད་པ་དངོས་སུ་མ་གསུངས་པས་མི་འཐད་ན།  ཁྱེད་རང་གིས་པདྨའི་ཕྱག་རྒྱ་ལ་པདྨ་ཁ་འབུས་སོགས་བྱེད་པའང་མི་འཐད་པར་མཚུངས་སོ། །རྒྱུ་སྐར་གྱི་ཕྱག་རྒྱ་ལ་སྲིན་ལག་བཀུག་
པ་ནི་གཞན་ཕན་འོད་ཟེར་གྱི་དཔེ་མ་དག་པ་ལས་འབྱུང་ལ།  དག་པ་རྣམས་ལས་ནི་གུང་མོ་བཀུག་པར་བཤད་ཅིང་།  ཕྲ་མེན་མའི་མགོ་ཐོད་ཁར་གཞག་སྙིམ་པ་ཁ་འབུས་ཉིད་བྱེད་པ་ནི་སྤྱིར་མགོ་ཐོད་ལ་སྙིམ་པ་ཁ་འབུས་མ་ངེས་ཀྱང་།  འདིར་ནི་རྒྱུད་ལས།  མགོ་བོའི་ཐོད་
པ་ཁར་གཞག་པའི། །ཕྱག་རྒྱ་འདི་ནི་ཕྲ་མེན་མའི། །མགོ་ཐོད་ལྕེ་ཡི་ཕྱག་རྒྱ་ནི། །རྡོ་རྗེ་རྣལ་འབྱོར་མ་ཡིར་བཤད། །ཅེས་མགོ་ཐོད་ཀྱི་ཕྱག་རྒྱ་གཞིར་བཞག་ནས་ལྕེའི་ཕྱག་རྒྱའང་ཐོན་དགོས་པས་སྙིམ་པ་ཁ་འབུས་ཉིད་མཛད་པ་ཡིན་ནོ། །ལྷ་རྣམས་ཀུན་གྱི་ཐུན་མོང་དུ། །
ཞེས་སོགས་ཀྱིས་ལྷ་རྣམས་ཀྱི་ཕྱག་རྒྱ་ཆེན་པོ་བསྟན་གྱི།  དམ་ཚིག་གི་ཕྱག་རྒྱ་མ་བསྟན་ཞེས་པའང་མི་འཐད་དེ།  རྒྱུད་དང་གཞན་ཕན་འོད་ཟེར་ལས་དེ་དག་ཐམས་ཅད་ཀྱི་ཐུན་མོང་དུ་ཞེས་པ་ཡོད་ཀྱི།  ལྷ་རྣམས་ཀུན་གྱི་ཐུན་མོང་དུ། །ཞེས་པ་མེད་ལ།  རྣལ་འབྱོར་མ་ཡན་
ཆད་ཀྱི་ཕྱག་རྒྱ་རྫོགས་པའི་རྗེས་སུ་གཞུང་དེ་འབྱུང་བ་ནི་འཇིག་རྟེན་པ་སྤྱིའི་ཕྱག་ཆེན་བསྟན་ན།  མགྲོན་ཐབས་ཡན་ཆད་ལ་ཕྱག་ཆེན་མེད་པར་འཇིག་རྟེན་པ་ལ་ཕྱག་ཆེན་དགོས་པའི་རྒྱུ་མཚན་ཡང་མེད་པའི་ཕྱིར་རོ། །ཡང་གཞན་ཕན་འོད་ཟེར་ལས་བྱང་སེམས།  ཉན་ཐོས།  
རང་རྒྱལ་གསུམ་ལ་རྒྱུད་ལས་དམ་རྒྱ་དངོས་སུ་མ་བཤད་པས་རིགས་གསུམ་སྤྱིའི་ཕྱག་རྒྱ་ལན་གསུམ་བསྟན་པའམ།  ཡང་ན་ཀུན་དགའ་སྙིང་པོས་མཛད་ཟེར་བའི་དཀྱིལ་ཆོག་ལས།  ལག་པ་ཐལ་མོ་སྦྱར་བ་ལས། །ཞེས་པ་ནས།  རང་རྒྱལ་རྣམས་ཀྱི་ཕྱག་རྒྱའོ། །
10-9-22a


ཞེས་གསུངས་པ་ལྟར་བྱའོ་ཞེས་གསུངས་པ་ལ།  རིགས་པའི་རྣམ་ངེས་ལས།  དེ་ནི་ཀུན་སྙིང་གིས་བྱས་ཟེར་བའི་གཞུང་བརྫུས་མ་ཡིན་པས་ཤེས་བྱེད་མེད་དོ་ཞེས་བྲིས་སོ། །དེ་ནི་རིགས་པའི་རྒྱལ་པོས།  གྲགས་པ་དག་ཀྱང་མི་རྣམས་ཚིག །དེ་ཡང་ཚད་
མར་མི་འདོད་ན། །སླར་ཡང་དེ་ལས་དོན་རྟོགས་པ། །སྡང་འདོད་འདི་ནི་ཅི་ཞིག་ཡིན། །ཞེས་པའི་ལུང་གིས་ཟིན་པར་སྣང་སྟེ།  ཕྱག་རྒྱ་མི་འཐད་པའི་སྐབས་སུ་གཞུང་བརྫུས་མར་བྱས་ནས།  འོག་བསྟོད་པའི་སྐབས་སུ།  ཆོས་དབྱིངས་ཡེ་ཤེས་རྣམ་པར་དག །ཅེས་
སོགས་དང་།  རྣམ་དག་རྡོ་རྗེ་ཐུགས་འཛིན་མ། །ཞེས་སོགས་དྲངས་པའི་ཚེ་ལུང་རྣམ་དག་ཏུ་བྱས་འདུག་པའི་ཕྱིར་རོ། །བཅུ་པ་སློབ་དཔོན་བདག་ཉིད་འཇུག་པའི་སྐབས་སུ།  གཞན་ཕན་འོད་ཟེར་ལས།  རྩ་རིག་ནས་ཨོཾ་ཤ།  ཨོཾ་བྷ་ཞེས་སོགས་བཅུ་གསུམ་གྱིས་སྔགས་
དབང་བསྐུར་བར་བཤད་པ་ལ།  རིགས་པའི་རྣམ་ངེས་ལས།  དེ་ནི་མ་ཡིན་ཏེ།  སརྦ་བིད་ཀྱིས་ཇི་ལྟར་དབང་བསྐུར་བ། །ཞེས་གསུངས་པས།  རྩ་རིག་དང་།  ཨོཾ་ཤ།  ཨོཾ་བྷ་ཞེས་པ་ལ་ཨོཾ་སརྦ་བིད་ཀྱི་སྔགས་མེད་པའི་ཕྱིར་ཞེས་བྲིས་སོ། །དེ་ནི་མི་འཐད་དེ།  སརྦ་
བིད་ཅེས་པ་ནི་ཐམས་ཅད་རིག་པ་ཞེས་པ་ཡིན་ལ།  ཁྱེད་རང་གིས་རྩ་རིག་ཀུན་རིག་གི་སྔགས་ཀྱི་རྣམ་གྲངས་སུ་ཁས་བླངས་པ་དང་འགལ་བའི་ཕྱིར་དང་།  གཞན་ཕན་འོད་ཟེར་ལས་རྩ་རིག་ནས་ཨོཾ་བྷ་ཞེས་པའི་བར་སྔགས་བཅུ་གསུམ་གྱིས་དབང་བསྐུར་བར་གསུངས་པས།  
དེའི་ནང་ན་ཨོཾ་སརྦ་བིད་སོགས་ཀྱི་སྔགས་མེད་པར་མི་འགྲུབ་པའི་ཕྱིར་རོ། །གཞན་ཕན་འོད་ཟེར་ལས།  རིན་ཆེན་བདུན་གྱི་དབང་བསྐུར་རྫོགས་པའི་རྗེས་ལ་དེ་ལྟར་དབང་དེ་དག་དགོས་པ་གང་གི་དོན་དུ་བསྐུར་ཞེ་ན།  སྡིག་པ་གཞོམ་ཕྱིར་དབང་ནི་བསྐུར་བར་བྱ། །ཞེས་སོ། །
10-9-22b


དེའི་རྗེས་ལ།  སྔགས་བསྒྲུབ་ཕྱིར་ནི་མོས་ལྡན་སློབ་མ་ལ། །སྔགས་པས་བཀའ་ནི་རབ་ཏུ་བསྒོ་བར་བྱ། །ཞེས་འབྱུང་བས་བཀའ་བསྒོ་བ་ནི།  ཚེ་འདིའི་བདེ་བ་མ་ལུས་དང་། །ཞེས་སོགས་གསུངས་པ་ལ།  རིགས་པའི་རྣམ་ངེས་ལས།  ཚེ་འདིའི་ཞེས་སོགས་བཀའ་བསྒོ་བ་ཡིན་
གྱི།  བཀའི་དབང་བསྐུར་བ་མ་ཡིན་པའི་ཕྱིར་དང་།  བཀའི་དབང་བསྐུར་ནི་ཚེ་དཔག་མེད་ཀྱི་སྐབས་སུ་འདིའི་བཀའི་དབང་བསྐུར་ཏེ།  ཨོཾ་སརྦ་ཏ་ཐཱ་ག་ཏ་ཞེས་སོགས་བརྗོད་ནས་བཞེད་པའི་ཕྱིར་རོ་ཞེས་བྲིས་པ་འདིས་གཞན་ཕན་འོད་ཟེར་འགོག་པ་ཡིན་ན་ནི་ཁས་བླངས་མེད་
པའི་དགག་པ་སྟེ།  གཞན་ཕན་འོད་ཟེར་གྱི་དཔེ་དག་པ་རྣམས་ལ་སྔ་མ་ལྟར་གྱི་ཚིག་ཡོད་ཀྱི།  བཀའི་དབང་བསྐུར་བ་ཞེས་པའི་ཚིག་མེད་པའི་ཕྱིར་རོ། །ཚེ་དཔག་མེད་ཀྱི་སྐབས་ནས་འབྱུང་བ་ལྟར་བཀའི་དབང་བསྐུར་བར་བྱེད་པ་མི་འཐད་པའི་ཚུལ་ནི་འོག་ཏུ་འཆད་དོ། །དབང་
གི་དངོས་གཞིའི་སྐབས་སུ།  རྒྱུད་ལས།  བུམ་པ་ལ་སོགས་ཇི་སྙེད་མང་ཐོགས་པས། །བཅུ་པོ་རྣམས་ཀྱིས་དབང་བཅུ་ཅི་དགར་བསྐུར། །ཞེས་གསུངས་པའི་དོན་ལ་གཞན་ཕན་འོད་ཟེར་ལས་བུམ་པ་དངོས་སུ་སྨོས་པ་ཡིན་ལ།  དེའི་རྗེས་ལ་སོགས་ཀྱིས་བསྡུས་པ་དབང་བཅུས་ཏེ།  
འོག་ནས་འབྱུང་བ་རིགས་ལྔའི་ཅོད་པན་ནས་གསང་བའི་དབང་གི་བར་བཅུའམ།  ཡང་ན་བུམ་པ་ལ་སོགས་ཏེ་དར་དང་རིན་པོ་ཆེའི་ཅོད་པན་གཅིག་ཏུ་བྱས་ཏེ་བཅུའོ་ཞེས་གསུངས་པ་ལ།  རིགས་པའི་རྣམ་ངེས་ལས།  དེའང་མ་ཡིན་ཏེ།  བུམ་པ་ལ་སོགས་ཐོགས་ནས་ཅོད་པན་
སོགས་དབང་བཅུ་བསྐུར་ཞེས་བུམ་དབང་དོར་བ་འགལ་བའི་ཕྱིར་ཏེ།  སྦྱིན་པ་སོགས་ཀྱིས་ས་བཅུ་འགྲུབ། །ཅེས་པས་སྦྱིན་པ་དང་པོར་བསྒྲུབ་པ་ཤིན་ཏུ་གསལ་བ་ལྟར་རོ་ཞེས་བྲིས་སོ། །དེ་ནི་མི་འཐད་དེ།  བུམ་པ་མ་གཏོགས་པའི་དབང་བཅུ་ཞེས་མཐའ་གཅིག་ཏུ་མ་གསུངས་
10-9-23a


ཤིང་།  དེ་ལྟར་དུ་ཁས་ལེན་ནའང་སོགས་པའི་སྒྲ་དང་འགལ་བའི་ཉེས་པ་མེད་དེ།  རྣལ་འབྱོར་དབང་ཕྱུག་གི་གཞུང་གིས་འདོད་ཡོན་སོགས་ལྔ་ཞེས་པའི་སོགས་ཀྱི་སྒྲས་འདོད་ཡོན་ལྔ་སྡུད་པའི་ཚུལ་ཡང་གསུངས་པའི་ཕྱིར་རོ། །རིན་ཆེན་སྣ་བདུན་གྱི་
དབང་རྫོགས་པའི་རྗེས་སུ་རིགས་པའི་རྣམ་ངེས་ལས།  དེ་ཐམས་ཅད་ཀྱང་མཆོག་གི་དངོས་གྲུབ་ཀྱི་ཐབས་སུ་བྱ་བའི་ཕྱིར་བཀའི་དབང་བསྐུར་ཏེ།  ཚེ་དཔག་མེད་ལས།  ཨོཾ་སརྦ་ཏ་ཐཱ་ག་ཏ་ཞེས་སོགས་ཏེ།  བདེ་བའི་དངོས་གྲུབ་ཟུང་ཞིག་པའོ། །དེ་ནས་བླ་མ་ལ་སློབ་མས་
ཅི་བཞེད་པའི་ཡོན་དབུལ་བར་བྱས་ནས།  དབང་གི་ཕན་ཡོན་ནི་ཚེ་འདིའི་ཞེས་སོགས་བྲིས་པ་ནི་མི་འཐད་དེ།  རྒྱུད་ལས།  མི་དབང་དབང་ཕྱུག་འཁོར་ལོས་སྒྱུར་བ་དང་། །སྡིག་པ་གཞོམ་ཕྱིར་དབང་ནི་བསྐུར་བར་བྱ། །སྔགས་བསྒྲུབ་ཕྱིར་ནི་མོས་ལྡན་སློབ་མ་ལ། །སྔགས་
པས་བཀའ་ནི་རབ་ཏུ་བསྒོ་བར་བྱ། །དེས་ཀྱང་མོས་པས་སྤྱི་བོར་ཕྱག་འཚལ་ཏེ། །ཅི་སྟེ་ནོར་ཡོད་བླ་མར་དབུལ་བར་བྱ། །ཞེས་པ་ནས།  མདོར་ན་རང་གི་ལུས་ཀྱང་དབུལ་བར་བྱ། །ཚེ་འདིའི་བདེ་བ་མ་ལུས་དང་། །ཞེས་སོགས་གསུངས་པས་རིན་ཆེན་སྣ་བདུན་གྱི་
དབང་གི་རྗེས་སུ་བཀའ་བསྒོ་བ་ཁོ་ན་གསུངས་ཀྱི།  བཀའི་དབང་བསྐུར་བ་མ་གསུངས་པའི་ཕྱིར་རོ། །གལ་ཏེ་བཀའ་བསྒོ་བ་ཞེས་གསུངས་པས་བཀའི་དབང་བསྐུར་བ་བསྟན་ནོ་སྙམ་ན།  འོ་ན་ཁྱེད་རང་གིས་ཚེ་འདིའི་ཞེས་སོགས་ནི་བཀའ་བསྒོ་བ་ཡིན་གྱི།  བཀའི་དབང་
དབང་བསྐུར་བ་མ་ཡིན་ནོ་ཞེས་བྲིས་པ་དང་འགལ་ལོ། །ཚེ་དཔག་མེད་ནས་འབྱུང་བའི་བཀའི་དབང་བསྐུར་བ་འདིར་སྦྱོར་ན།  དེའི་སྔོན་དུ་དམ་ཚིག་སྦྱིན་པའང་སྦྱོར་དགོས་པར་འགྱུར་ཏེ།  དེ་ཉིད་ལས།  དེ་ནས་དམ་ཚིག་དང་བཀའི་དབང་བསྐུར་བར་བྱ་སྟེ།  དེ་ལ་དམ་
10-9-23b


ཚིག་ནི།  དཀོན་མཆོག་གསུམ་དང་བྱང་ཆུབ་སེམས། །ཞེས་པ་ནས།  སྙིང་རྗེར་ལྡན་པས་སྨོས་ཅི་དགོས། །དེ་ནས་འདིས་བཀའི་དབང་བསྐུར་བར་བྱའོ། །ཨོཾ་སརྦ་ཏ་ཐཱ་ག་ཏ་ཞེས་སོགས་གསུངས་པའི་ཕྱིར་རོ། །གལ་ཏེ་དམ་ཚིག་ནི་འཇུག་པའི་སྐབས་སུ་སོང་བས་སོ་སྙམ་
ན།  དེའི་ཕྱིར་འདིར་ཚེ་དཔག་མེད་ནས་འབྱུང་བའི་བཀའི་དབང་བསྐུར་བ་ཁ་བསྐང་མི་དགོས་ཏེ།  འདིར་དམ་ཚིག་སྦྱིན་པ་འཇུག་པའི་སྐབས་སུ་སོང་ནས་དངོས་གཞི་རྫོགས་པའི་རྗེས་སུ་བཀའ་བསྒོ་བ་བྱེད་པར་གསུངས་ལ།  ཚེ་དཔག་མེད་ཀྱི་སྐབས་ནས་དེ་གཉིས་ཀ་
དངོས་གཞིའི་སྐབས་སུ་བྱེད་པར་གསུངས་པའི་ཕྱིར་རོ། །ཚེ་འདིའི་བདེ་བ་མ་ལུས་དང་། །ཞེས་སོགས་སློབ་མས་ཡོན་ཕུལ་བའི་རྗེས་སུ་བརྗོད་པ་ནི་ནོར་ཏེ།  རྒྱུད་ལས།  སྔགས་པས་བཀའ་ནི་རབ་ཏུ་བསྒོ་བར་བྱ། །དེས་ཀྱང་མོས་པས་སྤྱི་བོས་ཕྱག་འཚལ་ཏེ། །
ཞེས་གསུངས་པའི་ཕྱིར་རོ། །བཀའ་བསྒོ་བའི་དོན་ཚེ་འདིའི་ཞེས་སོགས་བརྗོད་པ་ཡིན་པར་ཁྱེད་རང་གིས་ཀྱང་ཁས་བླངས་ཤིང་དོན་ལའང་གནས་པའི་ཕྱིར་རོ། །རྟེན་བསྐྱེད་པའི་སྐབས་སུ་གཞན་ཕན་འོད་ཟེར་ལས།  ཚེ་འདས་ཀྱི་མིང་ཡིག་དང་པོའམ།  ཎི་ལས་
ཚེ་འདས་དེར་བསྐྱེད་ལ།  དེ་ལ་ཡི་དམ་གྱི་ལྷ་ཡོད་ན་ཡི་དམ་གྱི་ལྷར་བསྐྱེད་ཀྱང་བཏུབ་བོ་ཞེས་གསུངས་པ་ལ།  རིགས་པའི་རྣམ་ངེས་སུ།  དེ་ལའང་རྟེན་དགོས་པས་རོ་མ་ཉམས་པ་ལ་དགུག་ཅིང་།  མེད་ན་ཚེ་འདས་ཀྱི་མིང་ཡིག་དང་པོ་ཐིག་ལེས་བརྒྱན་པའམ།  ནྲྀ་ལས་
གསོན་པོའི་རྣམ་པ་བཞིན་བསྐྱེད་པར་བྱ་སྟེ།  ཎི་ལས་བསྐྱེད་པ་ལ་ནི་ཤེས་བྱེད་མེད་ལ།  ནྃ་ར་ཞེས་པ་ནྃ་མིའི་ས་བོན་ཡིན་པ་དང་།  བར་དོའི་ཤེས་པ་ནི་རླུང་ཤས་ཆེ་བ་ལ་བརྟེན་པས་ན་ལས་རླུང་གི་ར་ཡིག་བཅུག་པའོ་ཞེས་བྲིས་སོ། །དེ་ནི་མི་འཐད་དེ།  ནྃ་མིའི་ས་བོན་
10-9-24a


ཡིན་དུ་ཆུག་ཀྱང་དེ་ལས་ཚེ་འདས་བསྐྱེད་པ་ནི་སྔོན་བྱུང་དང་རྗེས་འཇུག་གི་ཉམས་ལེན་གཉིས་ཀ་ལ་མ་ངེས་པའི་ཕྱིར་ཏེ།  སྔོན་བྱུང་ལ་ཀུན་རིག་གི་ཆོ་ག་འདི་རྣམས་ལྷའི་བུ་ནོར་བུ་དྲི་མ་མེད་པའི་ཆེད་དུ་གསུངས་པ་ཡིན་ཅིང་།  རྗེས་འཇུག་ལ་རིགས་
དྲུག་གི་སེམས་ཅན་གྱི་དོན་དུ་གསུངས་པ་ཡིན་པས།  རིགས་དྲུག་གང་ཤི་ཡང་མིའི་ས་བོན་ལས་བསྐྱེད་པ་ནི་བཞད་གད་ཀྱི་གནས་ཡིན་པའི་ཕྱིར་རོ། །རྗེས་འཇུག་དེ་ལྟར་ཡིན་པར་ཡང་ཀུན་རིག་གི་སྐབས་ནས་སྐྱེས་པའམ།  བུད་མེད་དམ།  ལྷའམ།  ཀླུའམ།  གནོད་སྦྱིན་
ནམ།  སྲིན་པོའམ།  བྱོལ་སོང་ངམ།  ཡི་དྭགས་སམ།  སེམས་ཅན་དམྱལ་བ་སོགས་ཏེ་གང་ཡང་རུང་བ་ཤི་བའི་ལུས་དཀྱིལ་འཁོར་དུ་བཅུག་སྟེ་དབང་བསྐུར་ན།  སེམས་ཅན་དམྱལ་བར་སྐྱེས་ན་ཡང་དེ་མ་ཐག་ཏུ་རྣམ་པར་ཐར་ནས་ལྷའི་རིགས་སུ་སྐྱེ་བར་འགྱུར་རོ་ཞེས་
དང་།  ཤཱཀ་ཐུབ་ཀྱི་སྐབས་ནས་ལྷ་དང་།  ཀླུ་དང་།  གནོད་སྦྱིན་དང་།  སྲིན་པོ་ལ་སོགས་པ་ངན་སོང་གི་རྒྱུད་དུ་གྱུར་པ་རྣམས་ཤི་བའི་རོ་དང་།  གཟུགས་བརྙན་ནམ།  མིང་ལ་སོགས་པའང་བྲིས་ནས་བཟླས་བརྗོད་དང་།  སྦྱིན་སྲེག་དང་།  དབང་རྣམས་ཀྱིས་སྔ་མ་
བཞིན་དུ་ངན་སོང་ལས་གྲོལ་བར་འགྱུར་རོ་ཞེས་གསུངས་པས་ཤེས་སོ། །དེས་ན་འདིར་མིའི་ས་བོན་ལས་བསྐྱེད་དགོས་པར་འདོད་པ་ནི་ད་ལྟ་མི་ཤི་བའི་ཚེ་ན་ཆོ་ག་བྱེད་པར་མཐོང་བས་འཁྲུལ་གཞི་བྱས་པར་སྣང་གི།  རྒྱུད་ཀྱི་དོན་ལ་དཔྱད་པ་མ་ཡིན་པར་གསལ་ལོ། །རླུང་གི་
ར་ཡིག་བཅུག་ཅེས་པ་ཡ་ར་ལ་ཝ་བཞི་འབྱུང་བ་བཞི་ལ་སྦྱར་བའི་ཚེ་ན་ཡ་རླུང་དང་།  ར་མེ་ལ་སྦྱར་བར་བྱ་བ་ཡིན་གྱི།  ར་རླུང་ལ་སྦྱར་བ་ནི་སྔོན་མེད་པའི་གཏམ་མོ། །ལམ་སྦྱང་བསྟན་གྱི་སྐབས་སུ་གཞན་ཕན་འོད་ཟེར་ལས།  དེ་ནས་ཚེ་འདས་ཀྱི་རྣམ་ཤེས་ལྷ་དང་དབྱེར་མེད་
10-9-24b


བདེ་བ་ཅན་དུ་སྐྱེས་པ་ལ་བྱང་སེམས་རྙིང་པ་རྣམས་ཀྱིས་མཆོད།  དེས་ཀྱང་འོད་དཔག་མེད་འཁོར་བཅས་ཞལ་མཐོང་ནས་མཆོད་དེ།  དེར་སྐྱེ་བའི་རྒྱུ་བརྟགས་པས་རྡོ་རྗེ་སློབ་དཔོན་བདག་གི་མཐུར་ཤེས་ཏེ་བདག་དང་དཀྱིལ་འཁོར་གྱི་ལྷ་ལ་མཆོད་ཅིང་ཆེད་དུ་བརྗོད་ནས།  བདག་གིས་ཀྱང་
དེ་ཉིད་ལ་སླར་མཆོད་དེ་བདེ་བ་ཅན་དུ་སོང་བར་བསམ་མོ།  ཞེས་གསུངས་པ་ལ།  རིགས་པའི་རྣམ་ངེས་སུ།  དེ་ལས་འགའ་ཞིག་ནི་མ་ཡིན་ཏེ།  སྔོན་བྱུང་ལྟར་ན་བརྒྱ་བྱིན་འཁོར་དང་བཅས་པས་བཅོམ་ལྡན་འདས་ལ་མཆོད་ཅིང་།  དེ་ནས་ཀྱང་བརྒྱ་བྱིན་གྱི་ལྷ་ཚོགས་ཉིད་ལ་ནོར་བུ་
དྲི་མེད་ཀྱིས་མཆོད་པའི་རྣམ་འཕྲུལ་བསྟན་ནས་ཆེད་དུ་བརྗོད་པ་རྣམས་བྱས་ཏེ།  དེ་ནས་སླར་ཡང་ནོར་བུ་དྲི་མེད་བཅོམ་ལྡན་འདས་འཁོར་བཅས་དང་བརྒྱ་བྱིན་འཁོར་བཅས་མཆོད་ནས་དགའ་ཚལ་དུ་སོང་བར་གསུངས་པས།  རྗེས་འཇུག་ལྟར་ན་བཅོམ་ལྡན་འདས་ཀྱི་ཚབ་འོད་
དཔག་མེད།  བརྒྱ་བྱིན་གྱི་ཚབ་རྡོ་རྗེ་སློབ་དཔོན་དང་།  ནོར་བུ་དྲི་མེད་ཀྱི་ཚབ་ཚེ་འདས་ཡིན་པས།  རྡོ་རྗེ་སློབ་དཔོན་དང་།  དེ་ནས་མཚོན་པའི་ཚེ་འདས་ཀྱིས་ཀྱང་འོད་དཔག་མེད་འཁོར་བཅས་མཆོད་ཅིང་།  དེ་ནས་ཚེ་འདས་ལྷར་སྐྱེ་བའི་རྒྱུ་བརྟགས་པས་རྡོ་རྗེ་སློབ་དཔོན་དང་དཀྱིལ་
འཁོར་གྱི་ལྷའི་མཐུར་ཤེས་ཏེ།  བཅོམ་ལྡན་འདས་ཀྱིས་བརྟགས་པའི་རྒྱལ་པོ་འདི་ཞེས་སོགས་ཀྱི་ངན་སོང་སྦྱོང་བའི་རྡོ་རྗེ་སློབ་དཔོན་ནི་དེ་ལས་ཀྱང་ཕྱག་མཆོད་བྱ་བར་རྟོགས་ཏེ་མཆོད་པ་ཡིན་གྱི།  མཆོད་བྱའི་ཕྱིར་ཞེས་སོགས་ཀྱིས་ཚེ་འདས་ལ་ལྷ་རྣམས་ཀྱིས་མཆོད་
པར་བསྟན་ན།  སྐབས་དེར་དགའ་བའི་ཚལ་མཆོད་པ་སྣ་ཚོགས་ཀྱིས་གང་བའི་རྒྱུ་མཚན་ཅི་ཡིན་ཞེས་དྲིས་པ་ལ།  བཅོམ་ལྡན་འདས་ཀྱིས་མཆོད་པ་སྣ་ཚོགས་ཀྱི་རྫུ་འཕྲུལ་རྣམ་པར་འཕྲུལ་པ་འདི་ནི་ནོར་བུ་དྲི་མེད་ཀྱི་མཐུ་ཡིན་ནོ་ཞེས་ལན་གསུངས་ཤིང་།  རང་གིས་ཕུལ་
10-9-25a


བའི་མཆོད་པ་ལ་འདི་ཅི་ཡིན་ཞེས་པ་དེ་ལྟ་བུའི་དྲིས་ལན་མི་རིགས་པའི་ཕྱིར་དང་།  ཆེད་བརྗོད་བྱས་པའི་རྗེས་སུའང་ནོར་བུ་དྲི་མེད་ཀྱིས་བཅོམ་ལྡན་འདས་འཁོར་བཅས་དང་བརྒྱ་བྱིན་འཁོར་བཅས་ལ་མཆོད་པ་བྱས་ནས་དགའ་བའི་ཚལ་དུ་སོང་བར་བཞེད་
པས།  རྗེས་འཇུག་ལ་ཚེ་འདས་ཀྱིས་དཀྱིལ་འཁོར་དང་སློབ་དཔོན་འཁོར་བཅས་ལ་མཆོད་ནས་བདེ་བ་ཅན་དུ་སོང་བར་བསམ་བྱ་ཡིན་པའི་ཕྱིར་རོ་ཞེས་བྲིས་སོ། །དེ་ནི་མ་བརྟགས་པ་སྟེ།  གཞན་ཕན་འོད་ཟེར་ལས་ལམ་སྦྱང་བསྟན་འདི་དག་གཙུག་དགུ་ན་ཡོད་
པས་བྱ་བར་བཤད་ཀྱི།  རྒྱུད་འདིར་གསུངས་པའི་སྔོན་བྱུང་གི་རྣམ་འཕྲུལ་སྦྱར་བར་མ་བཤད་པས།  བརྒལ་ཞིང་བརྟག་པ་དེ་དག་འཇུག་པའི་གཞི་མེད་པའི་ཕྱིར་དང་།  གལ་ཏེ་སྔོན་བྱུང་གི་རྣམ་འཕྲུལ་ལ་སྦྱར་བ་ཡིན་ནའང་དེ་ཇི་ལྟ་བ་བཞིན་འདིར་འབྱུང་བའི་ངེས་པ་མེད་
པའི་ཕྱིར་ཏེ།  ཁྱེད་རང་གིས་ཀྱང་བཅོམ་ལྡན་འདས་ཀྱི་ཚབ་འོད་དཔག་མེད་དང་།  བརྒྱ་བྱིན་གྱི་ཚབ་རྡོ་རྗེ་སློབ་དཔོན་དང་།  ནོར་བུ་དྲི་མེད་ཀྱི་ཚབ་ཚེ་འདས་ཡིན་པར་ཁས་བླངས་པས།  ནོར་བུ་དྲི་མེད་ཀྱིས་བཅོམ་ལྡན་འདས་དང་བརྒྱ་བྱིན་གཉིས་ལ་མཆོད་པ་དུས་གཅིག་
ཏུ་བྱས་པ་ལྟར།  ཚེ་འདས་བདེ་བ་ཅན་དུ་གཤེགས་པ་དེས་འོད་དཔག་མེད་དང་རྡོ་རྗེ་སློབ་དཔོན་གཉིས་ལ་མཆོད་པ་དུས་གཅིག་ཏུ་བྱེད་པར་ཁས་བླང་དགོས་པའི་ཕྱིར་རོ། །རྗེས་ཆོག་གི་སྐབས་སུ་གཞན་ཕན་འོད་ཟེར་ལས་མེ་ལྟར་འབར་བའི་སྦྱིན་སྲེག་གི་
སྐབས་ནས་འབྱུང་བ།  དེ་ཡི་ལུས་ལ་དབང་བསྐུར་ཞིང་། །མཉམ་པར་བཞག་པས་བསྲུངས་ནས་ཀྱང་། །མཇུག་ཏུ་མངོན་པར་མཆོད་ནས་ནི། །ལྷ་རྣམས་ཐམས་ཅད་གཤེགས་པར་གསོལ། །ཞེས་གསུངས་པས་བདག་ཉིད་དང་པོར་དབང་བསྐུར།  དེ་ནས་
10-9-25b


ཁམས་གསུམ་རྣམ་རྒྱལ་གྱིས་བསྲུང་བ་བྱ།  དེ་ནས་མཆོད་ཅིང་གསོལ་བ་གདབ་པ་སོགས་བྱའོ་ཞེས་གསུངས་པ་ལ།  རིགས་པའི་རྣམ་ངེས་སུ།  དེ་ནི་མ་ཡིན་ཏེ།  ལྷག་པ་དང་ཆད་པའི་སྐྱོན་ཆགས་པའི་ཕྱིར་རོ། །དེ་ལ་ཆོ་ག་ལྷག་སྟེ།  དེ་ཡི་ལུས་ལ་དབང་བསྐུར་ཞིང་། །
ཞེས་སོགས་ནི་སྦྱིན་སྲེག་བྱས་ནས་བསྒྲུབ་བྱ་ལ་དབང་བསྐུར་ཞིང་བསྲུང་བ་བྱས་ནས།  མཇུག་ཆོག་གི་མགོར་མཆོད་པ་དང་གསོལ་བ་གདབ་པ་སྔོན་དུ་འགྲོ་བས་གཤེགས་པར་བྱ་བ་ཡིན་པའི་ཕྱིར་དང་།  གཞན་དུ་ཁྱེད་ཀྱི་ལྟར་ཡིན་དགོས་ན།  མཇུག་ཏུ་ལུས་ལ་དབང་
བསྐུར་ཞིང་། །ཞེས་འབྱུང་བར་རིགས་པའི་ཕྱིར་དང་།  བདག་བསྐྱེད་ཀྱི་ཡེ་ཤེས་པ་གཤེགས་པར་གསོལ་བ་རྣལ་འབྱོར་རྒྱུད་ལ་དགོས་པ་ལ་དེ་ཆད་པའི་ཕྱིར་རོ་ཞེས་བྲིས་སོ། །དེ་ནི་མི་འཐད་དེ།  དེ་ཡི་ལུས་ལ་དབང་བསྐུར་ཞིང་། །ཞེས་སོགས་ནི་གཞན་ཕན་འོད་
ཟེར་ལས་ཀྱང་།  སྦྱིན་སྲེག་དང་འབྲེལ་བའི་ཚེ་སྦྱིན་སྲེག་བྱས་ནས་བསྒྲུབ་བྱ་ལ་དབང་བསྐུར་ཞིང་བསྲུང་བ་བྱ་བ་ལ་བཤད་པས་མཐའ་གཅིག་ཏུ་མཇུག་ཆོག་ཏུ་ཁས་མ་བླངས་བའི་ཕྱིར།  སྦྱིན་སྲེག་དང་མ་འབྲེལ་བའི་ཚེ་མཇུག་ཆོག་ཏུ་ཁས་བླངས་ཀྱང་།  མཇུག་ཏུ་ལུས་ལ་དབང
་བསྐུར་ཞིང་། །ཞེས་པའི་ཚིག་འབྱུང་མི་དགོས་ཏེ།  མཇུག་ཏུ་ཞེས་པས་མཇུག་ཆོག་སྟོན་པ་མ་ཡིན་གྱི།  བསྲུང་བ་བྱས་པའི་མཇུག་ཏུ་ཞེས་པའི་དོན་ཡིན་པའི་ཕྱིར།  བདག་བསྐྱེད་ཀྱི་ཡེ་ཤེས་པ་གཤེགས་པ་ཆད་ཅེས་པ་ཡང་མ་བརྟགས་པ་སྟེ།  བདག་
བསྐྱེད་བསྡུས་པའི་སྐབས་སུ་ཡེ་ཤེས་པ་བཅུག་པ་མེད་པས་གཤེགས་རྒྱུ་མེད་པའི་ཕྱིར་དང་།  ཁྱེད་རང་གིས་ནི་སྒྲུབ་མཆོད་དངོས་གཞིའི་དུས་སུ་བདག་བསྐྱེད་གཏན་མི་འདོད་པའི་ཕྱིར་དང་།  ས་ཆོག་གི་སྐབས་སུ་བདག་བསྐྱེད་བྱས་ཀྱང་དེ་ལ་ལྷ་ཡེ་ཤེས་པ་བཅུག་པ་མེད་
10-9-26a


བའི་ཕྱིར་རོ། །ལྷ་རྣམས་ཐམས་ཅད་གཤེགས་པར་གསོལ། །ཞེས་པས་བདག་བསྐྱེད་ཀྱི་ཡེ་ཤེས་པ་གཤེགས་པ་བསྟན་པར་འདོད་པ་ཤིན་ཏུ་ངོ་མཚར་ཆེ་སྟེ།  དེ་མདུན་བསྐྱེད་ཀྱི་ལྷ་གཤེགས་སུ་གསོལ་བ་སྟོན་པར་ཁྱེད་རང་གིས་ཁས་བླངས་པ་དང་
འགལ་ཞིང་།  དོན་ལའང་དེ་ལྟར་དུ་གནས་པའི་ཕྱིར་རོ། །དེ་ལྟར་ན་རིགས་པའི་རྣམ་ངེས་ལས་གཞན་ཕན་འོད་ཟེར་ལ་སྐྱོན་བརྗོད་པ་རྣམས་ནི་དོན་ལ་གནས་པ་ཅུང་ཟད་ཀྱང་མི་སྣང་ནའང་།  དེང་སང་གི་སྐྱེ་བོ་རི་བོང་ཅལ་གྱི་རྗེས་སུ་འབྲང་བ་རྣམས་འཕགས་ཡུལ་གྱི་གྲུབ་པའི་
དབང་ཕྱུག་རྣམས་ནས་བརྒྱུད་བའི་བཀའ་སྲོལ་རྣམ་པར་དག་པ་དོར་ནས་རང་བཟོའི་ཆོ་ག་གློ་བུར་དུ་བྱུང་བ་རྣམས་ལ་འཇུག་པ་དག་མཐོང་ནས་དེ་དག་ལ་སྙིང་བརྩེ་བའི་བསམ་པས་འདིར་དགག་སྒྲུབ་ཀྱི་གནད་རྣམས་མདོར་བསྡུས་ཏེ་བྲིས་པ་ཡིན་ལ།  རྒྱས་པར་ནི་རྒྱུད་ཀྱི་སྟེང་དུ་
ཁོ་བོའི་ངག་ལས་རྟོགས་པར་བྱའོ། །ཡང་གཙང་སྟོད་ཀྱིས་ཆ་འདིར་རིན་ཆེན་ཕྲེང་མཛེས་ཞེས་བྱ་བའི་ཀུན་རིག་གི་ཆོ་ག་ཞིག་དར་བར་སྣང་སྟེ།  འདི་ནི་ཆོ་གའི་རྣམ་གཞག་ཕལ་ཆེར་གཞན་ཕན་འོད་ཟེར་དང་འདྲ་བར་སྣང་བས་ཡོ་ག་སྨད་ལུགས་ཀྱང་མིན་ལ།  
གོང་འོག་གི་གནད་མང་པོ་གཞན་ཕན་འོད་ཟེར་དང་མི་མཐུན་པས་སྟོད་ལུགས་ཀྱང་མིན་ནོ། །ཇི་ལྟར་མི་མཐུན་ན།  སྲུང་འཁོར་གྱི་སྐབས་སུ་བསྣུན་བསྲེག་བཅིང་གསུམ་གྱི་གོང་དུ་ཁྲོ་བོ་སྤྱན་འདྲེན་བྱེད་པ་དང་།  བདག་བསྐྱེད་ཀྱི་སྐབས་སུ་གཟུགས་བརྙན་གྱི་སྦྱོར་བ་གོ་ལོག་
པ་དང་།  བུམ་པ་སྟ་གོན་གྱི་སྐབས་སུ་རྣམ་རྒྱལ་དང་ལས་བུམ་གཉིས་བྱས་ནས་ལས་བུམ་ལ་རྡོ་རྗེ་གནོད་སྦྱིན་བསྐྱེད་པ་དང་།  བུམ་བཟླས་ཟིན་ནས་ལྷ་མ་བཞུ་བར་གཞག་པ་དང་།  སྟ་གོན་བྱེད་པའི་ཚེ་དཀྱིལ་འཁོར་ནམ་མཁའ་ལ་འདེགས་པ་དང་།  དཀྱིལ་འཁོར་
10-9-26b


བྲི་བའི་ཚེ་རྟ་བབས་སྒོ་ཚད་གཅིག་ལ་སྣམ་བུ་བཅུ་གཅིག་མ་བྱེད་པ་དང་།  དེའི་སྤྱོད༷་ཚུལ་ཡང་ཨ་བྷྱའི་ལུགས་དང་མི་མཐུན་པ་དང་།  མདུན་བསྐྱེད་སྒྲུབ་པའི་སྐབས་སུ་རླུང་གི་དཀྱིལ་འཁོར།  འོ་མའི་རྒྱ་མཚོ།  གསེར་གྱི་ས་གཞི།  རྒྱ་མཚོ་ཆེན་པོ།  རི་རབ་
རྣམས་ཀྱི་སྟེང་དུ་རྡོ་རྗེ་རྒྱུའི་སྔགས་རྒྱས་དཀྱིལ་འཁོར་སྐད་ཅིག་གིས་སྤྲུལ་པ་དང་།  ཡེ་ཤེས་པ་དགུག་གཞུག་གི་རྗེས་སུ་ཕྱག་རྒྱ་བཞིའི་རྒྱས་འདེབས་བྱས་ནས།  དེའི་རྗེས་སུ་རིགས་གསུམ་སྤྱིའི་སྔགས་རྒྱས་སྒོ་གསུམ་བྱིན་གྱིས་བརླབ་པ་དང་།  རིགས་ལྔ།  བྱང་སེམས།  
ཉན་རང་།  འཇིག་རྟེན་པ་དང་བཅས་པ་ལ་རིན་པོ་ཆེའི་ཅོད་པན་དང་།  ཡུམ་བཞི་ནས་འབེབས་པའི་བར་ལ་རིགས་ལྔའི་དབུ་རྒྱན་དང་།  ཕྱི་སྒོའི་ཁྲོ་བོ་རྣམས་ལ་རྡོ་རྗེ་ཕྲེང་བའི་དབང་དང་།  ཐམས་ཅད་ལ་ཐུན་མོང་དུ་དར་དཔྱངས་ཀྱི་དབང་བསྐུར་ནས།  སྐབས་འདིར་
བཟླས་པ་བྱས་ནས་ཕྲིན་ལས་གཞོལ་བ་དང་།  བསྟོད་རིང་གི་རྗེས་སུ་གཏོར་མ་མི་བསྔོ་བར་བདག་འཇུག་དང་བཛྲ་དྷ་ར་སོགས་ཀྱིས་བདག་སྒྲུབ་པ་བྱས་ཟིན་པའི་རྗེས་སུ་གཏོར་མ་བསྔོ་བ་དང་།  དབང་བསྐུར་གྱི་རྗེས་སུ་སྔགས་དབང་རྒྱུད་ཀྱི་དངོས་བསྟན་ལ་ཡོད་པ་དེ་མ་བྱས་པར་
སྐབས་དེར་སློབ་མ་དབང་སྟེགས་ཀྱི་སྟེང་དུ་བཞག་པ་ལ་མཆོད་པ་ལྔས་མཆོད་ནས།  བཀྲ་ཤིས་གང་གི་སེམས་ཅན་ཀུན་ལ་ཕན་བཞེད་པ། །ཞེས་སོགས་བརྗོད་པ་དང་།  བུམ་པའི་དབང་གི་རྗེས་སུ་ཁྲོ་དབང་རྒྱས་པར་བསྐུར་བ་དང་།  རིན་ཆེན་སྣ་བདུན་གྱི་དབང་གི་
རྗེས་སུ།  ཚེ་འདིའི་བདེ་བ་མ་ལུས་དང་། །ཞེས་སོགས་བཀའ་བསྒོ་བ་མི་བྱེད་པར་ཚེ་དཔག་མེད་ཀྱི་སྐབས་ནས་འབྱུང་བའི་བཀའི་དབང་བསྐུར་བ་དང་།  རྡོ་རྗེའི་བརྟུལ་ཞུགས་སྦྱིན་པ་དང་།  སློབ་མས་ཡོན་ཕུལ་བའི་རྗེས་སུ།  ཚེ་འདིའི་བདེ་བ་མ་ལུས་དང་། །ཞེས་
10-9-27a


སོགས་བརྗོད་པ་དང་། །ལམ་སྦྱང་བསྟན་གྱི་སྐབས་སུ་ཚེ་འདས་ཀྱི་རྣམ་ཤེས་ལྷ་དང་དབྱེར་མེད་དུ་འདྲེས་པ་བདེ་བ་ཅན་དུ་གཤེགས་པའི་རྗེས་སུ་བྱང་བུ་བསྲེགས་ནས།  གསོན་ཅིག་དགོངས་ཤིང་རིགས་ཀྱི་བུ། །ཞེས་སོགས་བླ་མེད་ནས་གསུངས་
པའི་ཕུང་ཁམས་སྐྱེ་མཆེད་གདན་གསུམ་ཚང་བའི་ལྷ་དང་སྦྱང་གཞི་སྦྱོང་བྱེད་སྦྱར་ནས་བྱང་བུ་སྲེག་པའི་ཚིག་བརྗོད་པ་དང་།  མཇུག་ཆོག་གི་སྐབས་སུ་ཐོག་མར་མཆོད་བསྟོད་བྱས་ནས་དམ་རྒྱ་བཀྲོལ་ཏེ།  སླར་ཡང་མདུན་བསྐྱེད་ལ་དབང་བསྐུར་ཏེ་འདོད་པའི་དོན་ལ་གསོལ་
བ་བཏབ་ནས།  བདག་ཉིད་ལ་རིགས་ལྔའི་དབུ་རྒྱན་དང་།  གནས་གསུམ་བྱིན་རླབས་དང་།  ཁམས་གསུམ་རྣམ་རྒྱལ་གྱི་སྔགས་རྒྱས་བསྲུང་བ་བྱས་པ་རྣམས་ནི་གཞན་ཕན་འོད་ཟེར་དང་མི་མཐུན་ཞིང་།  རྒྱུད་ནས་གསུངས་པ་དང་ཡང་འགལ་བས་དོར་བར་བྱ་བ་ཡིན་ནོ། །ཇི་ལྟར་
འགལ་ན།  ཕལ་ཆེར་ནི་དགག་སྒྲུབ་སྔ་མ་ཉིད་ཀྱིས་ཤེས་པར་ནུས་ལ།  བསྟོད་རིང་གི་རྗེས་སུ་གཏོར་མ་མི་བསྔོ་བ་ནི་ཀུན་རིག་གི་སྐབས་ནས།  དབྱངས་སྙན་པ་ཡིས་བསྟོད་དང་ལྷ་རྫས་ཀྱི། །མཆོག་གི་དམ་པ་རྣམས་ཀྱིས་མཆོད་པར་བྱ། །དེ་ནས་འབྱུང་པོ་ཀུན་གྱི་གཏོར་
མ་བྱ། །ཞེས་གསུངས་པ་དང་འགལ་ལོ། །གལ་ཏེ་གཏོར་མ་བཏང་ཟིན་མ་ཐག་ཏུ་སློབ་མ་ལ་དབང་བསྐུར་བར་གསུངས་པས་གཏོར་མའི་ཐོག་མར་བདག་འཇུག་དང་།  བདག་སྒྲུབ་པ་བྱ་དགོས་པར་གྲུབ་བོ་ཞེ་ན།  དེ་ནི་རྒྱུད་ཀྱི་དོན་བསྒྲིག་མ་ཤེས་པ་སྟེ།  ཚེ་དཔག་མེད་ཀྱི་སྐབས་
ནས་ཨོཾ་བཛྲ་དྷ་ར་ཞེས་སོགས་ཀྱིས་ང་རྒྱལ་བསྐྱེད་ལ་སློབ་མ་རྣམས་གཞུག་པར་བྱའོ་ཞེས་གསུངས་པ་དང་གོང་འོག་བསྒྲིགས་ནས་བདག་སྒྲུབ་པ་བྱས་ཟིན་མ་ཐག་ཏུ་སློབ་མ་གཞུག་པར་བྱ་བ་ཡིན་པའི་ཕྱིར་རོ། །དམ་རྒྱ་བཀྲོལ་བའི་རྗེས་སུ་འདོད་དོན་ལ་གསོལ་བ་གདབ་པ་
10-9-27b


ཡང་ནོར་ཏེ།  དམ་རྒྱ་བཀྲོལ་བ་དང་ཡེ་ཤེས་པ་གཤེགས་པ་དུས་མཉམ་པས།  ཡེ་ཤེས་པ་གཤེགས་ཟིན་ནས་གསོལ་བ་གདབ་པ་ནི་ཕོ་ཉ་སོང་ཟིན་ནས་ལས་ལ་བསྐུལ་བ་དང་མཚུངས་པའི་ཕྱིར་རོ། །མཇུག་ཆོག་གི་སྐབས་སུ་མཆོད་བསྟོད་ཐོག་མར་བྱས་ནས་བདག་ཉིད་ལ་
དབང་བསྐུར་བ་དང་བསྲུང་བ་རྗེས་སུ་བྱེད་པའང་ནོར་ཏེ།  མེ་ལྟར་འབར་བའི་སྦྱིན་སྲེག་གི་སྐབས་ནས།  དེ་ཡི་ལུས་ལ་དབང་བསྐུར་ཞིང་། །མཉམ་པར་བཞག་པས་བསྲུངས་ནས་ཀྱང་། །མཇུག་ཏུ་མངོན་པར་མཆོད་ནས་ཀྱང་། །ལྷ་རྣམས་ཐམས་ཅད་གཤེགས་པར་
གསོལ། །ཞེས་པའི་གཞུང་གི་གོ་རིམ་དང་འགལ་ཞིང་།  དེ་ལས་གཞན་པའི་མཇུག་ཆོག་སྟོན་བྱེད་ཀྱི་གཞུང་མེད་པའི་ཕྱིར་རོ། །དེའི་ཕྱིར་ཆོ་ག་འདི་ནི་ཡོ་ག་སྟོད་ལུགས་དང་སྨད་ལུགས་གཉིས་ཀྱི་ནོར་བུ་མཆོག་རྣམས་དོར་ནས་མཆིང་བུ་རྣམས་ཕྱོགས་གཅིག་ཏུ་
བསྒྲིགས་པའི་ཕྲེང་བར་སྣང་བས་མཛེས་མི་མཛེས་ལྟ་བ་པོའི་བློ་ལ་རག་ལས་སོ། །དེ་ལྟར་ན་གངས་རིའི་ཁྲོད་འདིར་ད་ལྟར་ཀུན་རིག་གི་ཆོ་ག་ལོ་ཆེན་ནས་བརྒྱུད་པའི་སྲོལ་གཉིས་དང་།  པཎྜི་ཏ་དྷརྨཱ་པ་ལ་ནས་ཇོ་བོ་རྗེ་ལ་བརྒྱུད་དེ་རྩ་སྐྱ་པ་སོགས་ཀྱིས་མཛད་པའི་སྲོལ་ཏེ་
འཕགས་ཡུལ་ནས་བརྒྱུད་པའི་སྲོལ་གསུམ་དང་།  བོད་འདིར་གསར་དུ་བཟོས་པའི་སྔར་གྱི་ལུགས་གཉིས།  འདུལ་འཛིན་གྲགས་རྒྱལ་ཞེས་གྲགས་པ་དེས་བྱས་པའི་མཐོང་ཐོས་ཀྱི་མཆོད་ཕྲེང་རྣམས་ཕྱོགས་གཅིག་ཏུ་བསྒྲིགས་ནས།  སྐབས་དོན་དང་པོ་སྦྱོར་བ་ཆོས་སྐུའི་
ཉམས་ལེན་ཆད་པའི་ལུགས་དེ་དང་བོད་མ་གསུམ་སྟེ་ལུགས་དྲུག་ཡོད་པ་ལས།  རྣམ་དཔྱོད་ཀྱི་བློ་དང་ལྡན་ཞིང་བསོད་ནམས་ཀྱི་སྐལ་བ་དང་ལྡན་པ་དག་གིས་འཕགས་ཡུལ་ནས་བརྒྱུད་པའི་སྲོལ་ལ་གནས་ཏེ་རང་གཞན་ལ་ཕན་གདགས་པར་བྱའོ། །རྣམ་མང་འགྲོ་བའི་སྡུག་
10-9-28a


བསྔལ་རྒྱུར་བཅས་ཀུན། །རྣམ་པར་སྦྱོང་བྱེད་ཆོ་ག་ཡིད་བཞིན་ནོར། །རྣམ་རྟོག་རང་བཟོའི་དྲི་མས་སྦགས་པ་དག །རྣམ་དག་ལུང་རིགས་ཆུ་ཡིས་སྦྱང་འདོད་ནས། །བྱང་བུའི་ནམ་མཁར་རི་མོའི་སྐྱ་རེངས་ནི། །རྣམ་པར་ཤར་ནས་ཅུང་ཟད་ལོན་པའི་ཚེ། །རྨི་ལམ་རི་རྩེར་ཟབ་
དོན་རྙེད་པ་ཡི། །རྟགས་དང་མཚན་མའི་ཉི་འོད་ལྷམ་མེར་གསལ། །དེ་སླད་རྒྱུད་སྡེའི་མེ་ཤེལ་ལས་གྲུབ་ཅིང་། །གཞན་ཕན་འོད་ཀྱི་ཚ་ཟེར་སྟོང་འཕྲོ་བའི། །གཞུང་བཟང་ཉི་མ་གསུང་རབ་ནམ་མཁའ་ལ། །སྒྲུབ་དང་སུན་འབྱིན་རྟ་བདུན་གྱིས་དྲངས་ཏེ། །རང་བཟོའི་ཆོག་ཁྲིགས་
ཀུ་མུད་ཟུམ་པ་དང་། །ལུང་རིགས་ལྟར་སྣང་མུན་པ་སེལ་བ་དང་། །རྨད་བྱུང་བརྒྱུད་པའི་སྲོལ་ལས་བྱུང་བ་ཡི། །ཆོ་ག་བཟང་པོའི་པད་ཚལ་མཉམ་དུ་རྒྱས། །རྣམ་དཔྱོད་རི་དབང་བརྩོན་པའི་སྲུབ་ཐག་གིས། །མན་ངག་རྒྱ་མཚོར་བསྲུབས་པའི་ལེགས་བཤད་ལས། །རབ་དཀར་དགེ་
ཚོགས་བདུད་རྩི་གང་ཐོབ་དེ། །འགྲོ་ཀུན་འཆི་མེད་གོ་འཕང་ཐོབ་ཕྱིར་སྦྱིན། །བཅོམ་ལྡན་འདས་ཀུན་རིག་གི་ཆོ་ག་ལག་ཏུ་བླང་བའི་རིམ་པ་གཞན་ཕན་འོད་ཟེར་ལ་རྩོད་པ་སྤོང་བ་གཞན་ཕན་གནོད་འཇོམས་ཞེས་བྱ་བ་འདི་ནི་བདག་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན་
པ་ཐམས་ཅད་མཁྱེན་པ་ཀུན་དགའ་བཟང་པོའི་ཞལ་སྔ་ནས་དང་།  མཚན་བརྗོད་པར་དཀའ་བ་རྗེ་བཙུན་མུས་པ་ཆེན་པོ་ལ་སོགས་པའི་ཞབས་རྡུལ་སྤྱི་བོས་བླངས་པ་ལ་བརྟེན་ནས་ཟབ་མོའི་དོན་ལ་བློ་ཁ་ཕྱོགས་པ་མང་དུ་ཐོས་པའི་དགེ་སློང་བསོད་ནམས་སེང་གེས་སྡེ་སྣོད་འཛིན་པ་དུ་མས་བསྐུལ་
བའི་ངོར་མེ་ཕོ་ཁྱིའི་ལོ་ལ་དཔལ་ངམ་རིངས་ཀྱི་ཆོས་གྲྭ་ཆེན་པོར་སྦྱར་བའི་ཡི་གེ་པ་ནི་དོན་མཆོག་ལེགས་སེམས་སོ། །འདིས་གཞན་ལ་ཕན་པའི་འོད་ཟེར་ཕྱོགས་ཀུན་ཏུ་འཕྲོ་བར་གྱུར་ཅིག།    །།དགེའོ། །དགེའོ། །དགེའོ།།    །།
10-9-28b


empty page
10-10-1a


༄༅།  །འཇམ་པའི་རྡོ་རྗེའི་སྒྲུབ་ཐབས་ཀུན་ཏུ་བཟང་པོའི་ཉི་འོད་བཞུགས་སོ། །  
10-10-1b


༄༅། །དཔལ་གསང་བ་འདུས་པ་འཇམ་པའི་རྡོ་རྗེ་ལྷ་བཅུ་དགུའི་སྒྲུབ་པའི་ཐབས་ཀུན་ཏུ་བཟང་པོའི་ཉི་འོད་ཅེས་བྱ་བ།  རྗེ་བཙུན་བླ་མ་དམ་པ་རྣམས་དང་ལྷག་པའི་ལྷ་
མཆོག་འཇམ་པའི་དབྱངས་ལ་ཕྱག་འཚལ་ལོ། །དཔལ་ལྡན་ཟབ་གསལ་གཉིས་མེད་དཀྱིལ་འཁོར་གསེར་བཟང་ལྟར་འབར་སྐུ་གསུམ་ཞལ་གྱིས་མཛེས། །རྩ་ཞལ་གུར་གུམ་བཟང་
འདྲ་གཞན་དག་དབང་སྔོན་མདོག་མཚུངས་ཀུ་མུད་ཕྲེང་ལྟར་དཀར། །ཕྱིན་དྲུག་ཕྱག་གི་ཡལ་ག་རལ་གྲི་ཨུཏྤལ་མདའ་གཞུས་ལེགས་སྦྲེལ་གཞན་དག་གིས། །རང་སྣང་འོད་ཀྱི་ཡུམ་ལ་
ལེགས་འཁྱུད་བླ་མ་འཁོར་ལོའི་དབང་ཕྱུག་ལ་ཕྱག་འཚལ། །བཅོམ་ལྡན་གང་གི་སྒྲུབ་ཐབས་ཀུན་ཏུ་བཟང་། །རྣམ་གསུམ་ཡེ་ཤེས་ཞབས་ཀྱིས་མཛད་པ་ལས། །གངས་རིའི་ཁྲོད་
10-10-2a


འདིར་རྣམ་གཉིས་བྱོན་པ་ཡི། །དགོངས་པ་ཇི་བཞིན་གོ་བདེའི་ངག་གིས་བཤད། །འདིའི་དཀྱིལ་འཁོར་དུ་དབང་བསྐུར་བ་ཐོབ་ཅིང་དམ་ཚིག་དང་སྡོམ་པ་
ལྡན་པས།  མེ་ཏོག་དང་འབབ་ཆུས་བརྒྱན་པའི་རི་ལ་སོགས་པ་དབེན་པའི་གནས་སུ་ཙནྡན་དམར་པོའི་ཆུས་བྱུག་ཅིང་།  དྲི་ཞིམ་པོའི་མེ་ཏོག་གི་སིལ་མར་བཀྲམ་ནས་བདེ་བའི་སྟན་ལ་
འདུག་སྟེ།  རྣལ་འབྱོར་བསྒོམ་པ་ལ་དོན་གསུམ་སྟེ།  དང་པོ་སྦྱོར་བའི་ཏིང་ངེ་འཛིན།  དཀྱིལ་འཁོར་རྒྱལ་མཆོག་གི་ཏིང་ངེ་འཛིན།  ལས་རྒྱལ་མཆོག་གི་ཏིང་ངེ་འཛིན་ནོ། །དང་
པོ་ལ་གསུམ་སྟེ།  སྔོན་དུ་འགྲོ་བའི་རྣལ་འབྱོར།  དངོས་གཞི་རྟེན་དང་བརྟེན་པའི་རྣལ་འབྱོར།  རྗེས་སུ་ཆགས་པའི་རྣལ་འབྱོར་རོ། །དང་པོ་ལ་གསུམ་སྟེ།  བསྒོམ་པའི་རྣལ་
10-10-2b


འབྱོར་གཞན་དོན་དུ་འགྱུར་བའི་ཕྱིར་དུ་ཚངས་པའི་གནས་བཞི་བསྒོམ་པ།  ལྷ་བསྐྱེད་པའི་རྒྱུ་ཚོགས་གཉིས་བསག་པ།  བར་ཆད་མི་འབྱུང་བའི་ཕྱིར་དུ་སྲུང་བའི་འཁོར་ལོ་བསྒོམ་པའོ། །དང་པོ་ནི།  ཐུན་དང་པོར་རྣམ་ཐར་སྒོ་གསུམ་དྲན་
པར་བྱས་ནས་གདོང་དག་པའི་རྗེས་སམ་ཐུན་གཞན་རྣམས་ལ་སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་བསྒོམ་བཟླས་ཀྱི་རྗེས་སུ།  རང་སྐད་ཅིག་གིས་དཔལ་འཇམ་པའི་རྡོ་རྗེར་གསལ་བའི་སྙིང་ཁར་ཨ་དཀར་པོ་ལས་བྱུང་བའི་ཟླ་བའི་དཀྱིལ་
འཁོར་གྱི་སྟེང་དུ་མྃ་གྱི་ཡི་གེ་གུར་གུམ་གྱི་མདོག་ལྟ་བུ་སེམས་གཟུང་འཛིན་གཉིས་དང་བྲལ་བའི་ངོ་བོ།  དེ་ལས་འོད་འཕྲོས་པས་ཁམས་གསུམ་གྱི་སེམས་ཅན་ཐམས་ཅད་སྣང་བར་བསམས་ནས།  ནམ་མཁའི་མཐའ་དང་མཉམ་པའི་སེམས་
ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག །སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག །ཉེ་རིང་ཆགས་སྡང་དང་བྲལ་བའི་བཏང་སྙོམས་ལ་གནས་
པར་གྱུར་ཅིག །ཅེས་བརྗོད་དོ། །གཉིས་པ་ནི།  སླར་ཡང་སྙིང་ཁའི་མྃ་ཡིག་ལས་འོད་ཟེར་འཕྲོས་པས་བཅོམ་ལྡན་འདས་འཇམ་པའི་རྡོ་རྗེ་ལྷ་བཅུ་དགུའི་དཀྱིལ་འཁོར་གཙོ་བོའི་དབུ་ལ་བླ་མ་རིགས་བདག་གི་ཚུལ་དུ་བཞུགས་པ་ལ།  སངས་
རྒྱས་དང་།  བྱང་ཆུབ་སེམས་དཔའ་དང་།  རྡོ་རྗེ་རྣལ་འབྱོར་མ་ནམ་མཁའི་དཀྱིལ་འཁོར་ཁྱབ་པས་བསྐོར་བ་མདུན་གྱི་ནམ་མཁར་ཨོཾ་བཛྲ་ས་མཱ་ཛཿཞེས་པས་སྤྱན་དྲངས་ནས།  འོད་ཟེར་གྱི་རྩེ་མོ་ལས་བྱུང་བའི་མཆོད་པ་རྣམས་ཀྱིས་མཆོད་
10-10-3a


པར་བསམ་ཞིང་ངག་ཏུ།  ཨོཾ་སརྦ་ཏ་ཐཱ་ག་ཏ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཨཱཿཧཱུྃ།  ཞེས་པས་མེ་ཏོག །དེ་བཞིན་དུ་དྷཱུ་པེས་བདུག་སྤོས།  ཨཱ་ལོ་ཀེས་མར་མེ།  གནྡྷེས་དྲི།  ནཻ་ཝི་དྱཱས་ཞལ་ཟས།  
ཤབྡས་རོལ་མོ་དབུལ།  ཨོཾ་ཨཱཿརཱུ་པ་བཛྲཱི་ཧཱུྃ་ཞེས་པས་གཟུགས་དང་།  ཤབྡས་སྒྲ།  གནྡྷེས་དྲི།  ར་སས་རོ།  སྤཪྵེས་རེག་རྡོ་རྗེ་མའི་མཆོད་པ་ཕུལ་ལ།  ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།  ཞེས་བརྗོད།  དེ་ནས་
འོད་ཟེར་གྱི་རྩེ་མོ་ལས་བྱུང་བའི་སྤྲུལ་པའི་ལུས་རྣམས་ཀྱིས་ཚོགས་ཞིང་རྣམས་ཀྱི་སྤྱན་སྔར་པུས་མོ་བཙུགས་ནས།  དཔལ་ལྡན་བདེ་རྫོགས་ཟབ་གསལ་གཉིས་མེད་འོད་ཟེར་ལྡན། །དེ་ཡི་རང་བཞིན་ཞི་བ་བཅུ་དྲུག་ཕྱེད་ཆ་འབར། །དོན་
དམ་སྙིང་པོ་དེ་སྟོན་བླ་མ་གསུམ་པོ་རབ། །དེ་ལ་བྱ་བྱེད་གསུམ་མཉམ་པ་ཡིས་རྟག་ཏུ་འདུད། །དཔལ་ལྡན་མི་ཤེས་ཀུན་སྤངས་དྲི་མེད་གཟི་བརྗིད་ལྡན། །དཔག་མེད་རིགས་ཀྱི་སྤྲུལ་པ་རྣམས་ཀྱིས་རབ་བརྒྱན་ཞིང་། །ཤེས་རབ་ཡན་
ལག་འདུས་པ་འབར་ཞིང་རྣམ་མཛེས་པ། །འཇམ་དཔལ་གང་དེ་མཆོད་ཕྱིར་དེ་ལ་ཕྱག་འཚལ་ལོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀྐ་ཙིཏྟ་པྲ་ཎ་མེ་ན་བཛྲ་བནྡྷ་ནཾ་ཀཱ་རོ་མི། །ཞེས་པས་ཕྱག་བྱ།  མི་བསྐྱོད་པ་ནི་ཡེ་ཤེས་ཆེ། །ཞེས་སོགས་དེ་
ཉིད་ལྔ་པས་བསྟོད་དེ།  གང་ཞིག་ཐོག་མེད་སྲིད་པའི་ཆུ་ཀླུང་དུ། །མ་ལུས་ཀུན་རྟོག་གིས་བསགས་རྙོག་པ་རྣམས། །ཐུགས་རྗེ་ཆེར་ལྡན་དེ་དག་སྤྱན་སྔར་ནི། །ཆོ་ག་བཞིན་དུ་ཐམས་ཅད་བཤགས་པར་བྱ། །རྫོགས་སངས་རྒྱས་དང་བྱང་
10-10-3b


ཆུབ་སེམས་དཔའ་དང་། །འཕགས་པ་གཞན་གྱིས་དགེ་བ་གང་མཛད་པ། །དེ་དག་ཀུན་ལ་ཡང་དག་ཡི་རང་ཞིང་། །བྱང་ཆུབ་ཏུ་ནི་ཡོངས་སུ་བསྔོ་བར་བགྱི། །ཡིད་ཀྱིས་རོལ་པ་དྲི་མེད་ཟླ་འདྲས་བསྒྲུབས། །སྙིང་རྗེ་དམ་པ་མཐའ་ཡས་པ་ཡི་
ཐབས། །རང་གི་ཡིད་ལ་གནས་པར་གྱུར་པ་ཡི། །བདེ་གཤེགས་རྣམས་ལ་རྟག་ཏུ་སྐྱབས་སུ་མཆི། །རྟོག་པ་མ་ལུས་པ་ལས་ངེས་གྲོལ་ཞིང་། །སེམས་པ་དམ་པ་ཀུན་གྱི་ཕུན་ཚོགས་གཞི། །དངོས་པོ་ཐམས་ཅད་རོ་གཅིག་ངོ་བོ་ཉིད། །དམ་
པའི་ཆོས་ལ་རྟག་པར་སྐྱབས་སུ་མཆི། །འཆིང་བ་རྣམས་ལས་ཡང་དག་གྲོལ་གྱུར་ཅིང་། །སྙིང་རྗེ་མཆོག་གིས་བསྐྲུན་པའི་དཔལ་དང་ལྡན། །རབ་ཏུ་དགའ་སོགས་ས་ལ་རབ་བཞུགས་པའི། །བརྟུལ་ཞུགས་དབང་པོའི་ཚོགས་ལ་སྐྱབས་སུ་
མཆི། །བསམ་དང་རྣམ་པར་སྨིན་པ་དག་གྱུར་པས། །སྒྲིབ་པ་ཀུན་གྱི་བག་ཆགས་ཡང་དག་འབྱིན། །ལྷག་པར་མོས་པས་རྣམ་པར་བརྒྱན་པ་ཡི། །སེམས་ནི་བྱང་ཆུབ་དམ་པར་བསྐྱེད་པར་བགྱི། །བདེ་གཤེགས་སྲས་བཅས་རྣམས་ཀྱི་ལམ་
གཅིག་པུ། །སྦྱིན་སོགས་རྣམ་བཅུའི་དཀར་པོའི་ཡོན་ཏན་ཚུལ། །རྫོགས་སངས་རྒྱས་བདག་མ་ལུས་ངོ་བོའི་བློས། །ཡང་དག་ཉིད་དུ་ད་ནི་གནས་པར་བགྱི། །ཞེས་ལན་གསུམ་བརྗོད་དོ། །དེ་ནས་ཆོས་ཐམས་ཅད་ངོ་བོ་དང་།  རྒྱུ་དང་།  
འབྲས་བུས་སྟོང་པའི་རྣམ་ཐར་སྒོ་གསུམ་མངོན་དུ་བྱས་ནས་བརྟན་པའི་ཆེད་དུ།  ཨོཾ་ཤཱུ་ཉ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།  ཞེས་བརྗོད།  གསུམ་པ་ནི།  སྟོང་པའི་ངང་ལས་ནམ་མཁར་ལུས་ངག་ཡིད་གསུམ་ཐམས་ཅད་ཀྱི་ངོ་བོ་ཨོཾ་དཀར་པོ།  ཨཱཿ
10-10-4a


དམར་པོ། ཧཱུྃ་སྔོན་པོ།  ཧོཿདམར་པོ་གཉིས་ཀྱི་བར་དུ་ཆུད་པར་བསྒོམས་ནས་རྣལ་འབྱོར་པ་རང་གི་སེམས་ཉིད་དེའི་གཟུགས་སུ་ལངས་པར་བསམ་མོ། །དེའི་འོག་ཏུ་ཨོཾ་ལས་ཟླ་བའི་དཀྱིལ་འཁོར་གྱི་སྟེང་དུ་བྷྲཱུྃ་
སེར་པོ་ཡོངས་སུ་གྱུར་པ་ལས་འཁོར་ལོ་སེར་པོ་རྩིབས་བཅུ་པ།  རྩེ་མོ་རྣོ་བ།  ཁོག་པ་སྟོང་པ།  ཡངས་ཤིང་རྒྱ་ཆེ་བར་བསམས་ལ།  དེའི་དབུས་དང་ཕྱོགས་བཅུར་པདྨ་དང་ཉི་མའི་དཀྱིལ་འཁོར་རེ་རེ།  དེ་རྣམས་ཀྱི་སྟེང་དུ་ཧཱུྃ་རེ་རེ།  དེ་
ཡང་སྟེང་གི་སེར་པོ།  ལྷོའི་དཀར་པོ།  ནུབ་ཀྱི་དམར་པོ།  གཞན་ཐམས་ཅད་སྔོན་པོ།  དེ་རྣམས་ཡོངས་སུ་གྱུར་པ་ལས་དབུས་དང་འོག་ཏུ་རྡོ་རྗེ།  སྟེང་དུ་འཁོར་ལོ།  ཕྱོགས་མཚམས་བརྒྱད་དུ་རྡོ་རྗེ་ཐོ་བ་དང་།  རྡོ་རྗེ་དབྱུག་པ་དང་།  
པདྨ་དང་།  རྡོ་རྗེ་རྩེ་ལྔ་པ་དང་།  རལ་གྲི་དང་།  ལྕགས་ཀྱུ་དང་།  དབྱུག་པ་སྔོན་པོ་དང་།  རྩེ་གསུམ་པ་རྣམས་ཧཱུྃ་གིས་མཚན་པ།  དེ་ལས་འོད་ཟེར་ཁ་དོག་ནག་པོ་སྤྲོས་ཏེ།  དེ་བཞིན་གཤེགས་པ་ཐམས་ཅད་ལ་རེག་པ་ལས།  དེ་བཞིན་གཤེགས་
པ་ཐམས་ཅད་བདེ་བ་ཆེན་པོ་ཐོབ་སྟེ་ཞལ་གསུམ་ཕྱག་དྲུག་པར་གྱུར་ནས་རང་རང་གི་ས་བོན་ལ་ཞུགས་ཏེ་ཡོངས་སུ་གྱུར་པ་ལས།  དབུས་སུ་རང་ཉིད་རྡོ་རྗེ་ཧཱུྃ་མཛད་ནག་པོ་ནག་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འོད་ཀྱི་རིག་མ་ལ་འཁྱུད་པ།  
གཡས་འོག་མ་གཉིས་ཀྱིས་རྡོ་རྗེ་དང་རལ་གྲི།  གཡོན་འོག་མ་གཉིས་ཀྱིས་ནོར་བུ་དང་པདྨ་འཛིན་པ།  འོག་ཏུ་རྡོ་རྗེ་གནོད་མཛེས་སྔོན་པོ་སྔོ་དཀར་དམར་བའི་ཞལ་གསུམ་ཕྱག་དྲུག་ཞལ་ཕྱག་སྔ་མ་དང་འདྲ་བ།  སྟེང་དུ་གཙུག་གཏོར་འཁོར་ལོས་སྒྱུར་བ་སེར་པོ་སེར་
10-10-4b


སྔོ་དཀར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་འཁོར་ལོ་དང་རལ་གྲི།  གཡོན་གཉིས་སྔ་མ་དང་འདྲ་བ།  ཤར་དུ་གཤིན་རྗེ་མཐར་བྱེད་ནག་པོ་ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་
རྡོ་རྗེ་ཐོ་བ་དང་རལ་གྲི།  གཡོན་གཉིས་སྔ་མ་དང་འདྲ་བ།  ལྷོར་ཤེས་རབ་མཐར་བྱེད་དཀར་པོ་དཀར་སྔོ་དམར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་དབྱུག་པ་དཀར་པོ་དང་རལ་གྲི།  གཡོན་གཉིས་སྔ་མ་དང་འདྲ།  ནུབ་ཏུ་པདྨ་
མཐར་བྱེད་དམར་པོ་དམར་སྔོ་དཀར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་པདྨ་དང་རལ་གྲི་གཡོན་འོག་མ་གཉིས་ཀྱིས་ནོར་བུ་དང་འཁོར་ལོ། །བྱང་དུ་བགེགས་མཐར་བྱེད་ནག་པོ་ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་འོག་
མ་གཉིས་ཀྱིས་རྡོ་རྗེ་རྩེ་ལྔ་ཁ་གྱེས་པ་དང་རལ་གྲི།  གཡོན་འོག་མ་གཉིས་ཀྱིས་ནོར་བུ་དང་པདྨ་འཛིན་པ།  ཤར་ལྷོར་མི་གཡོ་བ་ནག་པོ་ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་རལ་གྲི་དང་འཁོར་ལོ། །གཡོན་
གཉིས་སྔ་མ་དང་འདྲ།  ལྷོ་ནུབ་ཏུ་འདོད་རྒྱལ་སྔོན་པོ་སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་ལྕགས་ཀྱུ་དང་རལ་གྲི།  གཡོན་གཉིས་སྔ་མ་དང་འདྲ།  ནུབ་བྱང་དུ་དབྱུག་སྔོན་ཅན་སྔོན་པོ་སྔོ་དཀར་
དམར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་དབྱུག་པ་སྔོན་པོ་དང་རལ་གྲི།  གཡོན་གཉིས་སྔ་མ་དང་འདྲ།  བྱང་ཤར་དུ་སྟོབས་པོ་ཆེ་ནག་པོ་ནག་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འོད་ཀྱི་
10-10-5a


རིག་མ་ལ་འཁྱུད་པ།  གཡས་འོག་མ་གཉིས་ཀྱིས་རྩེ་གསུམ་པ་དང་རལ་གྲི།  གཡོན་འོག་མ་གཉིས་ཀྱིས་ནོར་བུ་དང་པདྨ་འཛིན་པ།  སྤྲོ་ན་རྒྱན་དང་ཆ་ལུགས་འོག་ནས་འབྱུང་བ་ལྟར་གསལ་བཏབ་སྟེ།  ལྷ་རྣམས་ཀྱི་ཐུགས་
ཀར་ཉི་མ་ལ་གནས་པའི་རང་འདྲའི་ཡེ་ཤེས་སེམས་དཔའ་རེ་རེ།  དེ་རྣམས་ཀྱི་ཐུགས་ཀར་ཏིང་ངེ་འཛིན་སེམས་དཔའ་ཧཱུྃ་རེ་རེ།  དེ་ལས་འོད་འཕྲོས་པས་འཁོར་ལོ་གཡས་སུ་འཁོར་ཞིང་།  འབར་བའི་རྡོ་རྗེ་རྩེ་ལྔ་པ་ཁ་གྱེས་པའི་ཚོགས་ཀྱིས་ལུས་
དང་ངག་དང་ཡིད་ལ་གནས་པའི་བདུད་ཕྱུང་ནས་ཕྱི་རོལ་དུ་ཡེ་ཤེས་ཀྱི་མེ་རི་འབར་བ་དང་།  དེའི་ནང་དུ་ལོགས་རྡོ་རྗེའི་ར་བ་དང་།  སྟེང་དུ་རྡོ་རྗེའི་གུར་དང་།  འོག་ཏུ་རྡོ་རྗེའི་ས་གཞི།  སྟུག་ཅིང་མཁྲེགས་པ།  བར་མཚམས་མེད་པའི་རང་
བཞིན་གྱི་སྲུང་བའི་འཁོར་ལོར་གྱུར་པར་བསམ་མོ། །གཉིས་པ་ལ་གཉིས་ཏེ།  རྟེན་བསྐྱེད་པ་དང་།  བརྟེན་པ་བསྐྱེད་པའོ། །དང་པོ་ནི།  དབུས་ཀྱི་ཧཱུྃ་མཛད་ཞུ་བ་ལས་ཧཱུྃ་ལས་རྡོ་རྗེ་ཧཱུྃ་གིས་མཚན་པ་དེ་ལས་འོད་འཕྲོས་འདུས་ཡོངས་སུ་
གྱུར་པ་ལས།  ཀུན་ཏུ་བཟང་པོ་ཞལ་གསུམ་ཕྱག་དྲུག་པ།  སྐུ་ཐམས་ཅད་དང་ཞལ་གྱི་གཙོ་བོ་དཀར་པོ།  གཡས་སྔོ།  གཡོན་དམར་བ།  ཕྱག་དང་པོ་གཉིས་ཀྱིས་རང་འོད་ཀྱི་རིག་མ་ལ་འཁྱུད་པ།  གཡས་འོག་མ་གཉིས་ཀྱིས་རྡོ་རྗེ་དང་རལ་གྲི།  
གཡོན་འོག་མ་གཉིས་ཀྱིས་ནོར་བུ་དང་པདྨ་འཛིན་པ།  ནོར་བུ་དང་རིན་པོ་ཆེས་དབུར་བརྒྱན་པ།  རིན་པོ་ཆེའི་རྒྱན་ཅན།  ཟླ་བའི་འོད་དང་ཟླ་བའི་གདན་མངའ་བ།  རྣམ་པ་སྣ་ཚོགས་ཀྱི་ན་བཟའ་གསོལ་བ།  རྡོ་རྗེའི་སྐྱིལ་ཀྲུང་གིས་བཞུགས་པར་
10-10-5b


བསམ་མོ། །དེ་ཡོངས་སུ་གྱུར་པ་ལས་ཆོས་ཀྱི་འབྱུང་གནས་ཁ་དོག་དཀར་པོ་ཟུར་གསུམ་པ།  གདེངས་ཀ་ཆེ་བ་གྱེན་དུ་ཕྱོགས་པ།  རྩ་བ་ཕྲ་བ་ཐུར་དུ་ཟུག་པའི་དབུས་སུ།  པྃ་སེར་པོ་ལས་བྱུང་བའི་སྣ་ཚོགས་པདྨའི་ལྟེ་བར་ཁྃ་ལྗང་གུ་ལས་སྣ་ཚོགས་
རྡོ་རྗེའི་སྟེང་དུ།  བྷྲཱུྃ་ལས་འཁོར་ལོ་རྩིབས་བརྒྱད་པ་ལྟེ་བ་ལ་བྷྲཱུྃ་གྱིས་མཚན་པ།  དེ་ལས་འོད་ཟེར་འཕྲོས་པས་དེ་བཞིན་གཤེགས་པ་ཐམས་ཅད་རྣམ་པར་སྣང་མཛད་ཞལ་གསུམ་ཕྱག་དྲུག་པའི་གཟུགས་སུ་གྱུར་ཏེ་བྷྲཱུྃ་ལ་ཐིམ།  དེ་ཡོངས་སུ་གྱུར་པ་
ལས་རྣམ་པར་སྣང་མཛད་ཞལ་གསུམ་ཕྱག་དྲུག་པ།  སྐུ་ཐམས་ཅད་དང་ཞལ་གྱི་གཙོ་བོ་དཀར་པོ།  གཡས་སྔོ།  གཡོན་དམར་བ།  ཕྱག་དང་པོ་གཉིས་ཀྱིས་རང་འོད་ཀྱི་རིག་མ་ལ་འཁྱུད་པ།  གཡས་འོག་མ་གཉིས་ཀྱིས་འཁོར་ལོ་དང་རལ་གྲི།  
གཡོན་འོག་མ་གཉིས་ཀྱིས་ནོར་བུ་དང་པདྨ་འཛིན་པ།  རལ་པའི་ཅོད་པན་མཛེས་པ་དང་།  རིན་པོ་ཆེའི་རྒྱན་ཅན།  ཟླ་བའི་འོད་དང་ཟླ་བའི་གདན་མངའ་བ།  རྣམ་པ་སྣ་ཚོགས་ཀྱི་ན་བཟའ་གསོལ་བ།  རྡོ་རྗེའི་སྐྱིལ་མོ་ཀྲུང་གིས་བཞུགས་པར་བསམ་མོ། །
དེ་ཡོངས་སུ་གྱུར་པ་ལས།  རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་པ་གྲུ་བཞི་པ།  སྒོ་བཞི་པ།  རིན་པོ་ཆེའི་རྩིག་པ་ཕྱི་ནས་རིམ་པ་བཞིན་དཀར་སེར་དམར་ལྗང་སྔོ་བའི་རྩིག་པ་རིམ་པ་ལྔ་དང་ལྡན་པའི་སྟེང་དུ་རིན་པོ་ཆེའི་ཕ་གུ་སེར་པོ་ལ་
རིན་པོ་ཆེའི་ཕྲ་ཡིས་མཛེས་པ།  དེའི་སྟེང་ན་རིན་པོ་ཆེའི་བྲེ་ཕུལ་གྱི་སྟེང་ན་གསེར་གྱི་སྐ་རགས་བཞིའི་ཕྱི་ངོས་སུ་ཆུ་སྲིན་གྱི་ཁ་ནས་བྱུང་བའི་དྲྭ་བ་དང་།  དྲྭ་བ་ཕྱེད་པ་དང་།  དྲིལ་བུ་དང་།  རྔ་ཡབ་དང་།  མེ་ཏོག་གི་ཕྲེང་བ་དང་།  མེ་ལོང་དང་།  ཟླ་
10-10-6a


བ་རླུང་གིས་བསྐྱོད་པ་ལ་སོགས་པས་བརྒྱན་པ།  བྱ་འདབ་ལས་ཐུར་དུ་འཕྱང་བའི་རིན་པོ་ཆེའི་མདའ་ཡབ་དང་།  སྟེང་དུ་རིན་པོ་ཆེའི་དྲྭ་མིག་སེང་མའི་པུ་ཤུས་བསྐོར་བ།  དེ་དག་གི་བར་རྣམས་སུ་རྒྱལ་མཚན་དང་།  བ་དན་དང་།  
རྔ་ཡབ་ལ་སོགས་པས་བརྒྱན་པ།  ཟུར་རྩེ་བཞིར་གདུགས་བཞིས་མཛེས་ཤིང་།  ཕྱི་འགྲམ་འདོད་ཡོན་གྱི་སྣམ་བུ་ལ་གཟུངས་མ་སྣ་ཚོགས་པས་མཆོད་པ་བྱེད་བཞིན་པ།  སྒོ་དང་སྒོ་ཁྱུད་ཀྱི་མཚམས་དང་ཟུར་བཞིར་ཟླ་བ་ཕྱེད་པ་ལ་གནས་
པའི་རྡོ་རྗེ་ནོར་བུས་སྤྲས་པ།  སྒོ་བཞིའི་སྟེང་གི་ཐད་སོར་ཀ་བ་བཞི་བཞིས་བཏེག་པའི་རྟ་བབས་བང་རིམ་བཞི་བཞི་དང་ལྡན་པའི་རྩེ་མོར་པདྨ་ལ་གནས་པའི་ཆོས་ཀྱི་འཁོར་ལོ་དང་།  དེའི་སྟེང་དུ་གདུགས་དང་།  གཡས་གཡོན་དུ་རི་དྭགས་ཕོ་མོ་
དང་བཅས་པ།  སྣམ་བུ་སོ་སོ་ལ་རྒྱལ་མཚན་དང་བ་དན་ལ་སོགས་པས་བརྒྱན་པ།  དེའི་ནང་དུ་ལྷ་སྣམ་ཤར་དཀར།  ལྷོ་སེར།  ནུབ་དམར།  བྱང་ལྗང་།  དབུས་སྔོ་བའི་དབུས་སུ་དཀྱིལ་འཁོར་ནང་མ་ཕྱི་ནས་འོད་ཟེར་ལྔས་བསྐོར་བའི་ནང་དུ་རྡོ་རྗེ་རྩེ་
གསུམ་པས་ཟླུམ་པོར་བསྐོར་བ་ལ་བརྟེན་པའི་ཀ་བ་ཤར་དུ་འཁོར་ལོ།  ལྷོར་རིན་པོ་ཆེ།  ནུབ་ཏུ་པདྨ།  བྱང་དུ་རལ་གྲིས་མཚན་པའི་ཀ་བ་གཉིས་གཉིས་ཀྱིས་བཏེག་པའི་སྟེང་རྡོ་རྗེའི་གདུང་གིས་མཛེས་པར་ཕུབ་པའི་ཕྱིའི་རྩེ་མོར་རྡོ་རྗེ་རིན་པོ་ཆེའི་ཏོག་གིས་
སྤྲས་པ་ལྷ་དང་མི་ལས་ཁྱད་པར་དུ་འཕགས་པའི་ཁང་བཟངས་དྭངས་ཤིང་ཐོགས་པ་མེད་པ།  ཕྱི་བལྟས་ནང་གསལ།  ནང་བལྟས་ཕྱི་གསལ་བའི་གཞལ་ཡས་ཁང་དུ་གྱུར་པའི་ནང་དུ་ལྷ་བཅུ་དགུའི་གནས་སུ་རབ་ཏུ་རྒྱས་པའི་པདྨ་རྣམས་ཀྱི་སྟེང་དུ་ཟླ་
10-10-6b


བའི་དཀྱིལ་འཁོར་བཅུ་གཉིས་དང་།  ཉི་མའི་དཀྱིལ་འཁོར་བདུན་གྱི་གདན་བསམ་མོ། །གཉིས་པ་བརྟེན་པ་ལྷ་བསྐྱེད་པ་ལ་གཉིས་ཏེ།  ཡན་ལག་དང་འབྲས་བུ་བཞི་ཆུང་ངུས་རྗེ་བཙུན་ཡབ་དང་།  དེ་དག་འབྲིང་གིས་རྗེ་བཙུན་ཡུམ་བསྐྱེད་
པའོ། །དང་པོ་ལ་ཡང་བཞི་ལས།  དང་པོ་བསྙེན་པའི་ཡན་ལག་དང་རྒྱུ་མཐུན་པའི་འབྲས་བུ་ཆུང་ངུ་ནི།  ནམ་མཁའི་ཡི་གེ་གསུམ་གཞལ་ཡས་ཁང་གི་དབུས་སུ་བབས་ཏེ།  རྣལ་འབྱོར་པ་རང་ཉིད་ཡི་གེ་གསུམ་གྱི་གཟུགས་སུ་གནས་པའི་
ཡེ་ཤེས་ཀྱིས་བསྐུལ་བས་དེ་བཞིན་གཤེགས་པ་ཐམས་ཅད་གཞལ་ཡས་ཁང་གི་སྟེང་གི་ནམ་མཁར་བཞུགས་པ་ལ།  རྗེ་བཙུན་དེ་བཞིན་གཤེགས་པ་རྣམས་ཀྱིས་བདག་ལ་གཟིགས་པར་མཛོད་ཅིག་ཅེས་བསྐུལ་བས།  དེ་བཞིན་གཤེགས་པ་
ཐམས་ཅད་ཡི་གེ་གསུམ་གྱི་གཟུགས་ཀྱིས་རྣལ་འབྱོར་པའི་ལུས་ལ་ཞུགས་པར་བསམ་མོ། །དེ་ནས་དེའི་འོག་གི་ཆར་སངས་རྒྱས་ཀྱི་མཚན་བཟང་པོ་སུམ་ཅུ་རྩ་གཉིས་ཀྱི་ངོ་བོ།  ཨ་ཨཱ།  ཨི་ཨཱི།  ཨུ་ཨཱུ།  རྀ་རཱྀ།  ལྀ་ལཱྀ།  ཨེ་ཨཻ།  ཨོ་ཨཽ།  ཨཾ་ཨཿ
ཕྲག་གཉིས་བརྗོད་པ་གཡས་སྐོར་གཡོན་སྐོར་དུ་དམིགས་ཏེ།  ཞུ་བ་ལས་བྱུང་བའི་ཟླ་བའི་དཀྱིལ་འཁོར་ཤེས་རབ་ཀྱི་ངོ་བོ་ཉིད་དུ་བསམ།  ཡི་གེ་གསུམ་གྱི་སྟེང་གི་ཆར་དཔེ་བྱད་བཟང་པོ་བརྒྱད་ཅུའི་ངོ་བོ།  ཀ་ཁ་ག་གྷ་ང་།  ཙ་ཚ་ཛ་ཛྷ་ཉ།  ཊ་
ཋ་ཌ་ཌྷ་ཎ།  ཏ་ཐ་ད་དྷ་ན།  པ་ཕ་བ་བྷ་མ།  ཡ་ར་ལ་ཝ་ཤ་ཥ་ས་ཧཀྵ།  ཡ་ར་ལ་ཝ་ཌ་ཌྷ།  ཕྲག་གཉིས་བརྗོད་པ་གཡས་སྐོར་གཡོན་སྐོར་དུ་དམིགས་ཏེ།  ཞུ་བ་ལས་བྱུང་བའི་ཟླ་བའི་དཀྱིལ་འཁོར་གཉིས་པ་ཐབས་ཀྱི་ངོ་བོ་ཉིད་དུ་བསམས་
10-10-7a


ལ།  གཉིས་ཀའང་མེ་ལོང་ལྟ་བུའི་ཡེ་ཤེས་སུ་བསམ་མོ། །ཟླ་བ་གཉིས་ཀ་གཅིག་ཏུ་གྱུར་པ་མཉམ་པ་ཉིད་ཀྱི་ཡེ་ཤེས།  དེ་ཡོངས་སུ་གྱུར་པ་ལས་ཧཱུྃ་དམར་པོ་ལས་རྡོ་རྗེ་དམར་པོ་རྩེ་ལྔ་པ་ལྟེ་བ་ལ་ཧཱུྃ་གིས་མཚན་པ།  སོ་
སོར་ཀུན་ཏུ་རྟོག་པའི་ཡེ་ཤེས་སུ་བསམས་ལ།  ཨོཾ་བཛྲ་ཨཱཏྨ་ཀོ྅ཧཾ།  ཞེས་པས་ང་རྒྱལ་གཟུང་ངོ་། །ཧཱུྃ་ལས་འོད་ཟེར་འཕྲོས་པས་སེམས་ཅན་ཐམས་ཅད་རྡོ་རྗེ་སེམས་དཔར་གྱུར་ནས་འོད་ཟེར་གྱིས་བཀུག་སྟེ་ཧཱུྃ་ལ་ཐིམ་པ་བྱ་བ་ནན་ཏན་གྱི་ཡེ་ཤེས་སུ་བསམས་ལ།  
ཡ་ཐཱ་སརྦ་ཏ་ཐཱ་ག་ཏཱ་ཏ་ཐཱ་ཨ་ཧཾ།  ཞེས་བཟླའོ། །སླར་ཡང་ཧཱུྃ་ལས་འོད་ཟེར་འཕྲོས་པས་དེ་བཞིན་གཤེགས་པ་ཐམས་ཅད་རྡོ་རྗེ་འཛིན་པའི་གཟུགས་ཀྱིས་ས་བོན་གྱི་ཡི་གེ་ཧཱུྃ་ལ་ཐིམ།  ས་བོན་ཕྱག་མཚན་དང་བཅས་པ་ཡོངས་སུ་གྱུར་པ་ལས།  རང་ཉིད་
སྐད་ཅིག་གིས་ཆོས་ཀྱི་དབྱིངས་ཀྱི་ཡེ་ཤེས་ཀྱི་ངོ་བོ་རྒྱུ་རྡོ་རྗེ་འཛིན་པ་ཞལ་གསུམ་ཕྱག་དྲུག་པ།  སྐུ་ཐམས་ཅད་དང་ཞལ་གྱི་གཙོ་བོ་དཀར་པོ།  གཡས་སྔོ།  གཡོན་དམར་བ།  ཕྱག་དང་པོ་གཉིས་ཀྱིས་རང་འོད་ཀྱི་རིག་མ་ལ་འཁྱུད་པ།  གཡས་འོག་མ་གཉིས་
ཀྱིས་རྡོ་རྗེ་རྩེ་ལྔ་པ་དམར་པོ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  རྒྱན་དང་བཞུགས་ཚུལ་ཀུན་ཏུ་བཟང་པོ་བཞིན་དུ་བསམ་མོ། །དེ་ནས་འདོད་ཆགས་ཆེན་པོས་གདུལ་བའི་སེམས་ཅན་རྣམས་བདེ་བ་ཆེན་པོའི་ཐབས་
ཀྱིས་གདུལ་བའི་ཕྱིར་དུ་ཡབ་ཡུམ་སྙོམས་པར་ཞུགས་པའི་བདེ་བ་ཆེན་པོའི་སྒྲ།  ནམ་མཁའི་ཁམས་གང་བ་གྲག་པས་དེ་བཞིན་གཤེགས་པ་ཐམས་ཅད་རང་གི་བ་སྤུའི་བུ་ག་ནས་ཞུགས་ཏེ།  རྗེ་བཙུན་ཡབ་རྒྱས་པར་གྱུར་ནས་ལྷ་མོ་མཉེས་པར་གྱུར་
10-10-7b


པར་བསམ་མོ། །དེ་རྣམས་སྤྱན་དང་།  མཱ་མ་ཀཱི་དང་།  གོས་དཀར་མོ་དང་།  སྒྲོལ་མ་དང་།  གཟུགས་རྡོ་རྗེ་དང་།  སྒྲ་རྡོ་རྗེ་དང་།  དྲི་རྡོ་རྗེ་དང་།  རོ་རྡོ་རྗེ་དང་།  རེག་རྡོ་རྗེའི་ངོ་བོར་བྱུང་སྟེ།  རང་གི་བ་སྤུའི་བུ་ག་ནས་ཕྱིར་སྤྲོས།  རྗེ་བཙུན་མའི་བ་སྤུའི་བུ་གར་
ཞུགས་པས་ཡུམ་རྒྱས་པར་གྱུར་པས་རྗེ་བཙུན་ཡབ་མཉེས་པར་གྱུར་པར་བསམ་མོ། །དེ་ནས་ཡབ་ཡུམ་གཉིས་ཀའི་ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་ཟེར་འཕྲོས་པས་དེ་བཞིན་གཤེགས་པ་ཐམས་ཅད་སྤྱན་དྲངས།  ཡབ་ཀྱི་ཞལ་དུ་ཞུགས།  
བྱང་ཆུབ་ཀྱི་སེམས་སུ་ཞུ་བ།  རྡོ་རྗེའི་ལམ་ནས་ལྷ་མོའི་པདྨར་བབས་པ་སྐད་ཅིག་གིས་རྡོ་རྗེ་འཛིན་པ་གཙོ་བོར་གྱུར་པའི་རྟེན་དང་བརྟེན་པར་བཅས་པའི་དཀྱིལ་འཁོར་ཡོངས་སུ་རྫོགས་པར་གྱུར།  སླར་ཡང་ཐུགས་ཀའི་ས་བོན་ལས་འོད་འཕྲོས་པས་སེམས་
ཅན་ཐམས་ཅད་བཀུག །དཀྱིལ་འཁོར་གྱི་སྒོ་བཞི་ནས་རྡོ་རྗེ་སེམས་དཔའི་འཇུག་པས་ཞུགས་ཏེ་བྷ་གའི་དཀྱིལ་འཁོར་གྱི་ནང་དུ་ཞུགས་པར་བསམ་མོ། །སླར་ཡང་ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་འཕྲོས་པས་དེ་བཞིན་གཤེགས་པ་
ཐམས་ཅད་སྤྱན་དྲངས།  ཡབ་ཀྱི་ཞལ་དུ་ཞུགས།  བྱང་ཆུབ་ཀྱི་སེམས་སུ་ཞུ་བར་གྱུར་པ་རྡོ་རྗེའི་ལམ་ནས་བྱུང་སྟེ།  སེམས་ཅན་གྱི་ཚོགས་དེ་རྣམས་ལ་དབང་བསྐུར་བས་དེ་རྣམས་ཀྱི་དབང་པོ་དྲུག །ཡུལ་དྲུག །འབྱུང་བ་བཞི།  ཕུང་པོ་ལྔ་རྣམས་
ཞུ་ནས་བྱང་ཆུབ་ཀྱི་སེམས་ཀྱི་ཐིག་ལེ་ཉི་ཤུ་རྩ་གཅིག་ཏུ་གྱུར།  དེ་ལས་ཀྵི། ཛྲཱིྃ། ཁྃ།  གྃ།  ཥྐྃ།  སྃ།  ཛྃ ཧཱུྃ་བྃ་ཧོྃ།  ཁྃ་རྃ།  ལྃ་མཱྃ་པཱྃ་ཏཱྃ།  བུྃ།  ཨཱྃ།  ཛྲཱིྃ། ཁྃ། ཧཱུྃ་རྣམས་ཀྱི་ས་བོན་དང་ཕྱག་མཚན་ལས་བྱུང་བའི་སའི་སྙིང་པོ་ལ་སོགས་པའི་བྱང་ཆུབ་སེམས་
10-10-8a


དཔའ་དྲུག །གཟུགས་རྡོ་རྗེ་མ་ལ་སོགས་པའི་ལྷ་མོ་དྲུག །སྤྱན་མ་ལ་སོགས་པའི་རིག་མ་བཞི།  རྣམ་སྣང་ལ་སོགས་པའི་རིགས་ལྔ་སྟེ།  ལྷ་ཉི་ཤུ་རྩ་གཅིག་ཏུ་གྱུར་པ་བྷ་ག་ནས་མཐའ་ཡས་པར་སྤྲོས་ཏེ།  དཀྱིལ་འཁོར་གྱི་ཕྱི་རོལ་དུ་
ལན་གསུམ་བསྐོར་བ་བྱས་ཏེ་ཕྱག་འཚལ་ནས།  དེ་བཞིན་གཤེགས་པ་རྣམས་ནི་བདག་ཅག་རྣམས་ཀྱི་མའོ། །དེ་བཞིན་གཤེགས་པ་རྣམས་ནི་བདག་ཅག་རྣམས་ཀྱི་ཕའོ། །དེ་བཞིན་གཤེགས་པ་རྣམས་ནི་བདག་ཅག་རྣམས་ཀྱི་སྟོན་པའོ། །ཨེ་མའོ་
སངས་རྒྱས་ཐམས་ཅད་ཀྱི། །བྱང་ཆུབ་སེམས་ནི་རབ་འཇུག་པ། །དེ་བཞིན་གཤེགས་པ་ཀུན་གྱི་གསང་། །རབ་ཏུ་མི་རྟོག་རྙོག་མེད་པའོ། །ཞེས་ཆེད་དུ་བརྗོད་པས་ཆེད་དུ་བརྗོད་དེ་བསམ་གྱིས་མི་ཁྱབ་པར་སྤྲོས་ནས།  ཕྱོགས་བཅུའི་སེམས་ཅན་གྱི་དོན་བྱས་
པར་བསམ་མོ། །སླར་ཡང་ཡབ་ཡུམ་སྙོམས་པར་ཞུགས་པས་ནམ་མཁའ་ནས་ཧོཿ དམར་པོ་གཉིས་ཀྱི་བར་དུ་ཆུད་པའི་ཡི་གེ་གསུམ་ཡབ་ཀྱི་ཞལ་དུ་ཞུགས།  ཐུགས་ཀར་རྗེས་སུ་ཆགས་པའི་མེས་འོད་དུ་ཞུ།  རྡོ་རྗེའི་ལམ་ནས་ལྷ་མོའི་པདྨར་བབས་
པའི་རྐྱེན་གྱིས་ཡབ་ཡུམ་གཉིས་ཀ་འོད་དུ་ཞུ་སྟེ་བྱང་ཆུབ་ཀྱི་སེམས་ཀྱི་ཐིག་ལེར་གྱུར་པར་བསམ་མོ། །དེ་ནས་ཐིག་ལེ་ལས་སྤྲོས་པའི་ལྷ་མོ་བཞི་རང་རང་གི་གནས་སུ་འདུག་ནས་གླུས་བསྐུལ་ཏེ།  མཱ་མ་ཀཱིས།  སེམས་ཅན་ཁམས་ན་གནས་ཀྱི་དབང་ཕྱུག་ཁྱོད་ནི་རྡོ་རྗེའི་
ཐུགས། །དགའ་བ་ཡིད་འོང་དོན་ཆེན་འདོད་པས་བདག་ལ་བསྐྱབ་ཏུ་གསོལ། །མགོན་པོ་གལ་ཏེ་དེ་རིང་བདག་ནི་གསོན་པར་མཆི་བཞེད་ན། །སེམས་ཅན་ཡབ་ཆེན་གཉེན་མཆོག་བདག་ལ་དགྱེས་པར་མཛད་དུ་གསོལ། །སྤྱན་མས།  རྡོ་རྗེའི་
10-10-8b


སྐུ་ཁྱོད་བཀའ་ཡི་འཁོར་ལོས་སེམས་ཅན་ཀུན་ལ་ཕན། །སངས་རྒྱས་དོན་དུ་བྱང་ཆུབ་དོན་དམ་རབ་ཏུ་ཕན་བཞེད་སྟོན། །མགོན་པོ་གལ་ཏེ་དེ་རིང་བདག་ནི་གསོན་པར་མཆི་བཞེད་ན། །འདོད་ཆགས་དམ་ཚིག་ཆགས་པ་བདག་ལ་དགེས་པར་མཛད་དུ་གསོལ། །
གོས་དཀར་མོས།  ཁྱོད་ནི་རྡོ་རྗེའི་གསུང་སྟེ་ཀུན་ལ་ཕན་ཞིང་ཐུགས་བརྩེ་བ། །འཇིག་རྟེན་དག་ནི་དོན་དང་དགོས་པ་མཛད་པར་རབ་ཏུ་བརྩོན། །མགོན་པོ་གལ་ཏེ་དེ་རིང་བདག་ནི་གསོན་པར་མཆི་བཞེད་ན། །དགའ་བ་སྤྱོད་པ་ཀུན་ཏུ་བཟང་པོ་བདག་ལ་
དགྱེས་པར་མཛད་དུ་གསོལ། །སྒྲོལ་མས།  ཁྱོད་ནི་རྡོ་རྗེ་འདོད་པ་དམ་ཚིག་མཆོག་གི་ཕན་ཡོན་ཆེ། །ཡང་དག་རྫོགས་སངས་རྒྱས་ཀྱི་གདུང་མཆོག་མཉམ་ཉིད་ཐུགས་བརྩེ་བ། །མགོན་པོ་གལ་ཏེ་དེ་རིང་བདག་ནི་གསོན་པར་མཆི་བཞེད་ན། །
ཡོན་ཏན་རིན་ཆེན་མང་པོའི་གཏེར་གྱུར་བདག་ལ་དགྱེས་པར་མཛད་དུ་གསོལ། །ཞེས་བསྐུལ་བས་ཐིག་ལེ་དེ་མྃ་ལས་གསེར་གྱི་ཡུ་བ་ཅན་གྱི་རལ་གྲི་ལྗང་ཁུ་ཡུ་བ་ལ་མྃ་གྱིས་མཚན་པ།  དེ་ལས་འོད་ཟེར་འཕྲོས་ཏེ་དེ་བཞིན་གཤེགས་པ་ཐམས་ཅད་ལ་
རེག་པས་དེ་བཞིན་གཤེགས་པ་ཐམས་ཅད་བདེ་བ་ཆེན་པོ་ཐོབ་པར་གྱུར་ཏེ།  འཇམ་པའི་རྡོ་རྗེ་ཞལ་གསུམ་ཕྱག་དྲུག་པའི་གཟུགས་ཀྱིས་མྃ་གྱི་ཡི་གེ་ལ་ཐིམ།  རལ་གྲི་མྃ་དང་བཅས་པ་ཡོངས་སུ་གྱུར་པ་ལས་རང་ཉིད་འཇམ་པའི་རྡོ་རྗེ་ཞལ་གསུམ་ཕྱག་
དྲུག་པ།  སྐུ་ཐམས་ཅད་དང་ཞལ་གྱི་གཙོ་བོ་གུར་གུམ་གྱི་མདོག་ལྟ་བུ།  གཡས་སྔོ།  གཡོན་དཀར་བ།  ཕྱག་དང་པོ་གཉིས་ཀྱིས་རང་འོད་ཀྱི་རིག་མ་ལ་འཁྱུད་པ།  གཡས་འོག་མ་གཉིས་ཀྱིས་རལ་གྲི་ལྗང་གུ་དང་མདའ།  གཡོན་འོག་མ་
10-10-9a


གཉིས་ཀྱིས་ཨུཏྤལ་སྔོན་པོ་དང་གཞུ་འཛིན་པ།  རིན་པོ་ཆེ་དང་ནོར་བུའི་དབུ་རྒྱན་ཅན།  སྣ་ཚོགས་པའི་ན་བཟའ་གསོལ་བ།  ཟླ་བའི་འོད་དང་ཟླ་བའི་གདན་ཅན།  མཚན་བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་
སྤྲས་པ།  རྡོ་རྗེའི་སྐྱིལ་ཀྲུང་གིས་བཞུགས་པར་བསམས་ལ།  ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ།  ཞེས་བྱ་བས་ཆོས་ཀྱི་དབྱིངས་སུ་བྱིན་གྱིས་བརླབ་བོ། །གཉིས་པ་ཉེར་སྒྲུབ་དང་རྣམ་སྨིན་གྱི་འབྲས་བུ་ཆུང་ངུ་ནི།  གནས་རྣམས་སུ་ཟླ་བའི་དཀྱིལ་
འཁོར་རེ་རེའི་སྟེང་དུ།  མིག་གཉིས་ཀྱི་དབུས་སུ་ཀྵིཾ་ལས་འཁོར་ལོ་ཀྵིཾ་གྱིས་མཚན་པ་ཡོངས་སུ་གྱུར་པ་ལས་ས་སྙིང་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འོད་ཀྱི་རིག་མ་ལ་འཁྱུད་པ།  གཡས་འོག་མ་གཉིས་
ཀྱིས་འཁོར་ལོ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  རྣ་བར་ཛྲཱིཾ་ལས་རྡོ་རྗེ་ཛྲཱིཾ་གྱིས་མཚན་པ་ཡོངས་སུ་གྱུར་པ་ལས་ཕྱག་རྡོར་ནག་པོ་ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་རྡོ་རྗེ་
དང་རལ་གྲི།  གཡོན་འོག་མ་གཉིས་ཀྱིས་ནོར་བུ་དང་པདྨ་འཛིན་པ།  སྣར་ཁྃ་ལས་རིན་པོ་ཆེ་ཁྃ་གིས་མཚན་པ་ཡོངས་སུ་གྱུར་པ་ལས་ནམ་སྙིང་སེར་པོ་སེར་ནག་དཀར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་རིན་པོ་ཆེ་དང་རལ་གྲི།  
གཡོན་འོག་མ་གཉིས་ཀྱིས་འཁོར་ལོ་དང་པདྨ་འཛིན་པ།  ལྕེར་གྃ་ལས་པདྨ་གྃ་གིས་མཚན་པ་ཡོངས་སུ་གྱུར་པ་ལས་འཇིག་རྟེན་དབང་ཕྱུག་དམར་པོ་དམར་སྔོ་དཀར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་པདྨ་དང་རལ་གྲི།  གཡོན་
10-10-9b


འོག་མ་གཉིས་ཀྱིས་རིན་པོ་ཆེ་དང་འཁོར་ལོ་འཛིན་པ།  སྐྲ་མཚམས་སུ་ཥྐཾ་ལས་རལ་གྲི་ཥྐཾ་གིས་མཚན་པ་ཡོངས་སུ་གྱུར་པ་ལས་སྒྲིབ་སེལ་ལྗང་གུ་ལྗང་སྔོ་དཀར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་རལ་གྲི་དང་འཁོར་ལོ།  གཡོན་
འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  ལྟེ་བར་སྃ་ལས་རྡོ་རྗེ་སྃ་གིས་མཚན་པ་ཡོངས་སུ་གྱུར་པ་ལས་ཀུན་བཟང་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འོད་ཀྱི་རིག་མ་ལ་འཁྱུད་པ།  གཡས་འོག་མ་
གཉིས་ཀྱིས་རྡོ་རྗེ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  རྒྱན་དང་བཞུགས་ཚུལ་ཐམས་ཅད་གཙོ་བོ་དང་མཚུངས་པར་བསམ་མོ། །གསུམ་པ་སྒྲུབ་པ་དང་སྐྱེས་བུ་བྱེད་པའི་འབྲས་བུ་ཆུང་ངུ་ནི།  ནུ་མ་གཉིས་
ཀྱི་དབུས་སུ་ཧཱུྃ་ལས་རྡོ་རྗེ་ནག་པོ་རྩེ་ལྔ་པའི་ལྟེ་བར་ཧཱུྃ་ལས་རྡོ་རྗེ་ཧཱུྃ་གིས་མཚན་པ་ཡོངས་སུ་གྱུར་པ་ལས་ཐུགས་རྡོ་རྗེ་ནག་པོ་ནག་དཀར་དམར་བའི་ཞལ་གསུམ་ཕྱག་དྲུག་གི་ཕྱག་མཚན་ཕྱག་རྡོར་དང་མཚུངས་པ།  མགྲིན་པར་ཨཱཿལས་པདྨ་དམར་པོ་འདབ་མ་བརྒྱད་པའི་ལྟེ་
བར་ཨཱཿལས་པདྨ་ཨཱཿས་མཚན་པ་ཡོངས་སུ་གྱུར་པ་ལས་གསུང་རྡོ་རྗེ་དམར་པོ་ཞལ་ཕྱག་འཇིག་རྟེན་དབང་ཕྱུག་དང་མཚུངས་པ།  སྤྱི་བོར་ཨོཾ་ལས་འཁོར་ལོ་དཀར་པོ་རྩིབས་བརྒྱད་པའི་ལྟེ་བར་ཨོཾ་ལས་འཁོར་ལོ་ཨོཾ་གྱིས་མཚན་པ་ཡོངས་སུ་གྱུར་པ་ལས་
སྐུ་རྡོ་རྗེ་དཀར་པོ་ཞལ་ཕྱག་ས་སྙིང་དང་མཚུངས་པར་བསྒོམ་མོ། །ཐུགས་རྡོ་རྗེའི་ཡེ་ཤེས་སེམས་དཔའི་ཐུགས་ཀའི་ས་བོན་ཡི་གེ་ཧཱུྃ་ལས་སྤྱན་མ་ལ་སོགས་པའི་རིག་མ་ཕྱུང་སྟེ།  དེས་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་
10-10-10a


མཆོད་ཅིང་བསྟོད་ནས་རིག་མ་རྣམས་དེ་བཞིན་གཤེགས་པའི་ལུས་ལ་ཞུགས་ཏེ།  དེ་བཞིན་གཤེགས་པ་རྣམས་བྱོན་ནས་མདུན་གྱི་ནམ་མཁར་བཞུགས་པ་ལ་བསྐུལ་བར་བྱ་སྟེ།  དཔལ་ལྡན་རྡོ་རྗེའི་ཐུགས་
འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །ཞེས་པས་དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་བདག་གི་ཐུགས་རྡོ་རྗེ་ལ་ཞུགས་པར་བསམ་
མོ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་ཐུགས་ཀྱིས་མཛད་དུ་གསོལ། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།  ཞེས་
གསོལ་བ་གདབ་པས།  དེ་བཞིན་གཤེགས་པ་ཐམས་ཅད་ཀྱི་ཐུགས་རྡོ་རྗེ་བདག་ཉིད་ཀྱི་ཐུགས་རྡོ་རྗེ་ལ་ཐིམ་པར་བསམ་མོ། །གསུང་རྡོ་རྗེའི་ཡེ་ཤེས་སེམས་དཔའི་ཐུགས་ཀའི་ས་བོན་ཡི་གེ་ཨཱཿལས་སྤྱན་མ་ལ་སོགས་པའི་རིག་མ་ཕྱུང་སྟེ།  
དེས་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་མཆོད་ཅིང་བསྟོད་ནས་རིག་མ་རྣམས་དེ་བཞིན་གཤེགས་པའི་ལུས་ལ་ཞུགས་ཏེ་དེ་བཞིན་གཤེགས་པ་རྣམས་བྱོན་ནས་མདུན་གྱི་ནམ་མཁར་བཞུགས་པ་ལ་བསྐུལ་བར་
བྱ་སྟེ།  ཆོས་ཀྱི་གསུང་ལམ་དཔལ་ལྡན་པ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ཞེས་པས་དེ་བཞིན་གཤེགས་པ་ཐམས་ཅད་ཀྱི་གསུང་
10-10-10b


རྡོ་རྗེ་བདག་གི་གསུང་རྡོ་རྗེ་ལ་ཞུགས་པར་བསམ་མོ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་གསུང་གིས་མཛད་དུ་གསོལ། །ཨོཾ་སརྦ་
ཏ་ཐཱ་ག་ཏ་ཝཱཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།  ཞེས་པས་དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེ་བདག་ཉིད་ཀྱི་གསུང་རྡོ་རྗེ་ལ་ཐིམ་པར་བསམ་མོ། །སྐུའི་རྡོ་རྗེའི་ཡེ་ཤེས་སེམས་དཔའི་ཐུགས་ཀའི་ས་བོན་ཡི་གེ་ཨོཾ་ལས་སྤྱན་མ་
ལ་སོགས་པའི་རིག་མ་ཕྱུང་སྟེ།  དེས་འཇིག་རྟེན་གྱི་ཁམས་ན་བཞུགས་པའི་དེ་བཞིན་གཤེགས་པ་ཐམས་ཅད་མཆོད་ཅིང་བསྟོད་ནས་རིག་མ་རྣམས་དེ་བཞིན་གཤེགས་པའི་ལུས་ལ་ཞུགས་ཏེ།  དེ་བཞིན་གཤེགས་པ་རྣམས་བྱོན་
ནས་མདུན་གྱི་ནམ་མཁར་བཞུགས་པ་ལ་བསྐུལ་བར་བྱ་སྟེ།  དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་གསོལ། །ཞེས་པས་
དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེ་རང་གི་སྐུ་རྡོ་རྗེ་ལ་ཞུགས་པར་བསམ་མོ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །དེང་བདག་བྱིན་གྱིས་བརླབས་ནས་སུ། །རྡོ་རྗེ་སྐུས་ནི་མཛད་དུ་
གསོལ། །ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།  ཞེས་པས་དེ་བཞིན་གཤེགས་པ་ཐམས་ཅད་ཀྱི་སྐུ་རྡོ་རྗེ་བདག་ཉིད་ཀྱི་སྐུ་རྡོ་རྗེ་ལ་ཐིམ་པར་བསམ་མོ། །བཞི་པ་སྒྲུབ་པ་ཆེན་པོ་དང་བྲལ་བའི་འབྲས་བུ་ཆུང་ངུ་ནི།  རང་གི་སྙིང་གར་ཟླ་བའི་སྟེང་དུ་
10-10-11a


མྃ་ལས་རལ་གྲི་མྃ་གྱིས་མཚན་པ་ལས་འོད་ཟེར་འཕྲོས།  དེ་བཞིན་གཤེགས་པ་ཐམས་ཅད་འཇམ་པའི་རྡོ་རྗེའི་རྣམ་པར་སྤྱན་དྲངས་ནས་མྃ་ལ་ཐིམ།  དེ་ཡོངས་སུ་གྱུར་པ་ལས་རང་འདྲའི་ཡེ་ཤེས་སེམས་དཔའི་ཐུགས་
ཀར་ཟླ་བ་ལ་གནས་པའི་ཏིང་ངེ་འཛིན་སེམས་དཔའ་མྃ་ཡིག་གུར་གུམ་གྱི་མདོག་ལྟ་བུ་དེ་ལས་འོད་ཟེར་འཕྲོས་ཏེ།  དེ་བཞིན་གཤེགས་པ་རྣམས་ཀྱི་ཐུགས་ཀ་ནས་འོད་ཟེར་གྱི་རྩེ་མོ་ལ་གནས་པའི་རིག་མས་བུམ་པ་བདུད་རྩི་ལྔས་ཡོངས་སུ་གང་བའི་
ཆུས་དབང་བསྐུར་བར་བསམ་ཞིང་།  ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ནི་སརྦ་ཨརྠ་སཱ་དྷ་ནི་སྭཱ་ཧཱ།  ཨོཾ་ཤཾ་ཀ་རི།  ཤཱནྟཾ་ཀ་རི་གྷུ་ཊ་གྷུ་ཊ་གྷུ་ཊི་ནི།  གྷ་ཊ་ཡ་གྷ་ཊ་ཡ་གྷུ་ཊི་ནི་སྭཱ་ཧཱ།  ཨོཾ་ཀ་ཊེ་བི་ཀ་ཊེ་ནི་ཀ་ཊེ་ཀ་ཊཾ་ཀ་ཊེ་ཀ་རོ་ཊ་བིཪྱེ་སྭཱ་ཧཱ།  
ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ།  ཞེས་གསུང་ཞིང་བུམ་པའི་ཆུས་སྤྱི་བོ་ནས་དབང་བསྐུར།  ལུས་ཐམས་ཅད་གང་།  དྲི་མ་ཐམས་ཅད་དག །ཆུ་ལྷག་མ་ཡར་ལུད་པ་ལས་ལྷ་མོ་རྣམས་སྤྱི་བོར་ཐིམ་པས།  གཙོ་བོ་ལ་མི་བསྐྱོད་པ།  སྐུ་རྡོ་རྗེ་དང་ས་སྙིང་
ལ་རྣམ་སྣང་།  ཐུགས་རྡོ་རྗེ་དང་།  ཡེ་ཤེས་སེམས་དཔའ་དང་།  ཕྱག་ན་རྡོ་རྗེ་དང་།  ཀུན་ཏུ་བཟང་པོ་ལ་མི་བསྐྱོད་པ།  ནམ་མཁའི་སྙིང་པོ་ལ་རིན་ཆེན་འབྱུང་ལྡན།  འཇིག་རྟེན་དབང་ཕྱུག་དང་གསུང་རྡོ་རྗེ་ལ་སྣང་བ་མཐའ་ཡས།  སྒྲིབ་
པ་རྣམ་སེལ་ལ་དོན་ཡོད་གྲུབ་པས་དབུར་བརྒྱན་པར་བསམ་མོ། །གཉིས་པ་ཡན་ལག་དང་འབྲས་བུ་འབྲིང་བཞིས་རྗེ་བཙུན་ཡུམ་བསྐྱེད་པ་ལ་ཡང་བཞི་ལས།  དང་པོ་བསྙེན་པའི་ཡན་ལག་དང་རྒྱུ་མཐུན་པའི་འབྲས་བུ་འབྲིང་ནི།  རང་གི་མདུན་
10-10-11b


དུ་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་རྣལ་འབྱོར་པ་རང་ཉིད་ཡི་གེ་གསུམ་གྱི་གཟུགས་སུ་གནས་པའི་ཡེ་ཤེས་ཀྱིས་བསྐུལ་བས་ཞེས་པ་ནས་མངོན་བྱང་ལྔ་ལས་རྒྱུ་རྡོ་རྗེ་འཛིན་པ་ཡབ་ཡུམ་བསྐྱེད།  དེ་ནས་འགྲོ་བ་དབང་བསྐུར་གྱི་བར་རྣམས་དོར་ནས་ནམ་
མཁའི་ཡི་གེ་ལྔ་པོ་ཞུགས་པ་ནས་ཞུ་བ་དང་།  གླུས་བསྐུལ་བ་དང་།  དེ་ལས་འཇམ་པའི་རྡོ་རྗེ་མར་བཞེངས་ཏེ་ཞལ་ཕྱག་གསལ་གདབ་པའི་བར་སྔ་མ་བཞིན་དུ་བྱའོ། །གཉིས་པ་ཉེར་སྒྲུབ་དང་རྣམ་སྨིན་གྱི་འབྲས་བུ་འབྲིང་དང་།  གསུམ་པ་སྒྲུབ་པ་
དང་སྐྱེས་བུ་བྱེད་པའི་འབྲས་བུ་འབྲིང་དང་།  བཞི་པ་སྒྲུབ་ཆེན་དང་དྲི་མ་མེད་པའི་འབྲས་བུ་འབྲིང་ནི་སྔ་མ་ཇི་ལྟ་བ་བཞིན་བྱའོ། །གསུམ་པ་རྗེས་སུ་ཆགས་པའི་རྣལ་འབྱོར་ནི།  ཡུམ་གྱི་སྤྱི་བོར་ཟླ་བའི་དཀྱིལ་འཁོར་ལ་ཨོཾ་ཡིག་དཀར་པོ་
རྡུལ་ཕྲ་རབ་ཀྱི་ངོ་བོ་མགྲིན་པ་ཡན་ཆད་དུ་ཁྱབ་པ།  སྙིང་གར་ཉི་མའི་དཀྱིལ་འཁོར་ལ་ཧཱུྃ་ཡིག་ནག་པོ་རྡུལ་ཕྲ་རབ་ཀྱི་ངོ་བོ་ནུ་མའི་བར་དུ་ཁྱབ་པ།  ལྟེ་བར་ཉི་མའི་དཀྱིལ་འཁོར་ལ་སྭཱ་ཡིག་སེར་པོ་རྡུལ་ཕྲ་རབ་ཀྱི་ངོ་བོ་སུམ་མདོའི་བར་དུ་ཁྱབ་པ།  
པདྨའི་དབུས་སུ་ཉི་མའི་དཀྱིལ་འཁོར་ལ་ཨཱཿཡིག་དམར་པོ་རྡུལ་ཕྲ་རབ་ཀྱི་ངོ་བོ་བརླ་ལ་ཐུག་པར་ཁྱབ་པ།  བྱིན་པ་གཉིས་ལ་ཉི་མའི་དཀྱིལ་འཁོར་ལ་ཧཱ་ཡིག་ལྗང་གུ་རྡུལ་ཕྲ་རབ་ཀྱི་ངོ་བོ་རྐང་པའི་བར་དུ་ཁྱབ་པར་བསྒོམས་ཏེ།  འདིས་ལྷ་མོ་རིགས་
ལྔའི་རང་བཞིན་དུ་གྱུར་ཏོ། །དེ་ནས་ཡབ་ཀྱི་རྡོ་རྗེ་ཧཱུྃ་ལས་རྡོ་རྗེ་དམར་པོ་རྩེ་ལྔ་པ་ཨོཾ་ལས་བྱུང་བའི་ནོར་བུའི་བུག་པར་ཕཊ་སེར་པོས་བཀག་པ།  ཡུམ་གྱི་པདྨ་ཧཱུྃ་ལས་པདྨ་དམར་པོ་ཨཱཿལས་བྱུང་བའི་ཟེའུ་འབྲུའི་བུག་པར་ཕཊ་སེར་པོས་བཀག་པར་
10-10-12a


བསྒོམས་ལ།  ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།  ཞེས་པས་ཡབ་ཡུམ་སྙོམས་པར་ཞུགས་པར་བསམ་མོ། །གཉིས་པ་དཀྱིལ་འཁོར་རྒྱལ་མཆོག་ལ་བཞི་ལས།  དང་པོ་བསྙེན་པའི་ཡན་ལག་རྒྱུ་
མཐུན་པའི་འབྲས་བུ་ཆེན་པོ་ནི།  ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་ཟེར་འཕྲོས་པས་དེ་བཞིན་གཤེགས་པ་ཐམས་ཅད་ལ་རེག་སྟེ།  བདེ་བ་ཆེན་པོ་ཐོབ་ནས་དེ་བཞིན་གཤེགས་པ་ཐམས་ཅད་ཞལ་དུ་ཞུགས།  ཟླ་བ་ཞུ་བའི་གཟུགས་སུ་
གྱུར་ནས་རྡོ་རྗེ་ནོར་བུའི་ལམ་ནས་པདྨར་ལྷུང་བ་ཡོངས་སུ་གྱུར་པ་ལས་ས་བོན་མྃ་གྱི་ཡི་གེར་གྱུར།  དེ་ལས་མི་བསྐྱོད་པ་གཙོ་བོར་གྱུར་པའི་ལྷ་བཅུ་དགུའི་དཀྱིལ་འཁོར་ཅིག་ཆར་དུ་གྱུར་པར་བསམ་མོ། །དེ་ནས་བཛྲ་དྷྲྀཀ་ཅེས་པས་མཁའ་ནང་གི་མི་
བསྐྱོད་པ་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་ཞེ་སྡང་གཙོ་བོར་གྱུར་པའི་སེམས་ཅན་གྱི་དོན་བྱས།  སླར་གཅིག་ཏུ་འདུས།  ཞེ་སྡང་ཆེན་པོ་བསྐྱེད་པའི་རྣམ་པར་ཤེས་པའི་ཕུང་པོ་དང་།  ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་རང་བཞིན་རང་གི་
ལུས་ལ་ཐིམ་པར་བསམ་མོ། །ཛི་ན་ཛིཀ་ཅེས་པས།  མཁའ་ནང་གི་རྣམ་པར་སྣང་མཛད་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་གཏི་མུག་གཙོ་བོར་གྱུར་པའི་སེམས་ཅན་གྱི་དོན་བྱས།  སླར་གཅིག་ཏུ་འདུས་ནས་གཏི་མུག་ཆེན་པོ་བསྐྱེད་པར་བྱེད་པའི་
གཟུགས་ཀྱི་ཕུང་པོ་དང་།  མེ་ལོང་ལྟ་བུའི་ཡེ་ཤེས་ཀྱི་ངོ་བོ་ཤར་ཕྱོགས་སུ་ཟླ་བའི་དཀྱིལ་འཁོར་ལ་བཞུགས་པ་ནི།  རྣམ་སྣང་དཀར་པོ་ཞལ་གསུམ་ཕྱག་དྲུག་པ།  སྐུ་ཐམས་ཅད་དང་ཞལ་གྱི་གཙོ་བོ་དཀར་པོ།  གཡས་སྔོ།  གཡོན་དམར་བ།  
10-10-12b


ཕྱག་དང་པོ་གཉིས་ཀྱིས་རང་འོད་ཀྱི་རིག་མ་ལ་འཁྱུད་པ།  གཡས་འོག་མ་གཉིས་ཀྱིས་འཁོར་ལོ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  རཏྣ་དྷྲྀཀ་ཅེས་པས།  མཁའ་ནང་གི་རིན་འབྱུང་ཕྱིར་སྤྲོས་ཏེ་དཔག་ཏུ་མེད་པར་གྱུར་
ནས་ང་རྒྱལ་གཙོ་བོར་གྱུར་པའི་སེམས་ཅན་གྱི་དོན་བྱས་ཏེ།  སླར་གཅིག་ཏུ་འདུས་ནས་ང་རྒྱལ་ཆེན་པོ་བསྐྱེད་པར་བྱེད་པའི་ཚོར་བའི་ཕུང་པོ་དང་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ལྷོ་ཕྱོགས་སུ་ཉི་མའི་དཀྱིལ་འཁོར་ལ་བཞུགས་པ་ནི།  རིན་འབྱུང་སེར་པོ་
སེར་ནག་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འོད་ཀྱི་རིག་མ་ལ་འཁྱུད་པ།  གཡས་འོག་མ་གཉིས་ཀྱིས་རིན་པོ་ཆེ་དང་རལ་གྲི།  གཡོན་འོག་མ་གཉིས་ཀྱིས་འཁོར་ལོ་དང་པདྨ་འཛིན་པ།  ཨཱ་རོ་ལྀཀ་ཅེས་པས།  མཁའ་ནང་གི་སྣང་བ་
མཐའ་ཡས་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་འདོད་ཆགས་གཙོ་བོ་གྱུར་པའི་སེམས་ཅན་གྱི་དོན་བྱས།  སླར་གཅིག་ཏུ་འདུས་ནས་འདོད་ཆགས་ཆེན་པོ་བསྐྱེད་པར་བྱེད་པའི་འདུ་ཤེས་ཀྱི་ཕུང་པོ་དང་།  སོ་སོར་རྟོག་པའི་ཡེ་ཤེས་ཀྱི་རང་བཞིན་ནུབ་
ཕྱོགས་སུ་ཉི་མའི་དཀྱིལ་འཁོར་ལ་བཞུགས་པ་ནི།  འོད་དཔག་མེད་དམར་པོ་དམར་སྔོ་དཀར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀུན་ལ་འདྲ།  གཡས་འོག་མ་གཉིས་ཀྱིས་པདྨ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་འཁོར་ལོ་
འཛིན་པ།  པྲཛྙ་དྷྲྀཀ་ཅེས་པས།  མཁའ་ནང་གི་དོན་གྲུབ་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་ཕྲག་དོག་གཙོ་བོར་གྱུར་པའི་སེམས་ཅན་གྱི་དོན་བྱས།  སླར་གཅིག་ཏུ་འདུས་ནས་ཕྲག་དོག་ཆེན་པོ་བསྐྱེད་པར་བྱེད་པའི་འདུ་བྱེད་ཀྱི་ཕུང་པོ་དང་།  བྱ་བ་
10-10-13a


ནན་ཏན་གྱི་ཡེ་ཤེས་ཀྱི་རང་བཞིན་བྱང་ཕྱོགས་སུ་ཉི་མའི་དཀྱིལ་འཁོར་ལ་བཞུགས་པ་ནི།  དོན་གྲུབ་ལྗང་གུ་ལྗང་སྔོ་དཀར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་རལ་གྲི་དང་འཁོར་ལོ།  གཡོན་འོག་མ་གཉིས་
ཀྱིས་ནོར་བུ་དང་པདྨ་འཛིན་པ།  ཐམས་ཅད་ཀྱང་མཛེས་པའི་རལ་པའི་ཐོར་ཚུགས་ཅན།  རིན་པོ་ཆེའི་རྒྱན་དང་།  སྣ་ཚོགས་པའི་ན་བཟའ་གསོལ་བ།  རྡོ་རྗེའི་སྐྱིལ་མོ་ཀྲུང་གིས་བཞུགས་པའོ། །མོ་ཧ་ར་ཏི་ཞེས་པའི་སྔགས་བརྗོད་པས་མཁའ་ནང་གི་སྤྱན་མ་
ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་སེམས་ཅན་ཐམས་ཅད་ཀྱི་ཞི་བའི་ལས་མཛད།  སླར་གཅིག་ཏུ་འདུས་ནས་རིང་དུ་སོང་བའི་ས་རྣམ་པར་དག་པ་སའི་ཁམས་དང་།  སྙིང་རྗེ་ཆེན་པོ་དང་།  སྟོང་པ་ཉིད་ཀྱི་རྣམ་པར་ཐར་པའི་སྒོ་དང་།  ཐབས་ཀྱི་ཕ་རོལ་ཏུ་ཕྱིན་
པའི་རང་བཞིན་མེའི་མཚམས་སུ་ཟླ་བའི་དཀྱིལ་འཁོར་ལ་བཞུགས་པ་ནི།  སྤྱན་མ་དཀར་མོ་དཀར་སྔོ་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འོད་ཀྱི་ཐབས་ལ་འཁྱུད་པ།  ལྷག་མ་རྣམ་སྣང་དང་འདྲ་བ།  དྭེ་ཥ་ར་ཏི་ཞེས་པས།  
མཁའ་ནང་གི་མཱ་མ་ཀཱི་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་སེམས་ཅན་ཐམས་ཅད་ཀྱི་སྲུང་བའི་ལས་མཛད།  སླར་གཅིག་ཏུ་འདུས་ནས་མི་གཡོ་བའི་ས་རྣམ་པར་དག་པ་ཆུའི་ཁམས་དང་།  བྱམས་པ་ཆེན་པོ་དང་།  མཚན་མ་མེད་པའི་རྣམ་པར་ཐར་
པའི་སྒོ་དང་།  སྨོན་ལམ་གྱི་ཕ་རོལ་ཏུ་ཕྱིན་པའི་རང་བཞིན་སྲིན་པོའི་མཚམས་སུ་ཟླ་བའི་དཀྱིལ་འཁོར་ལ་བཞུགས་པ་ནི།  མཱ་མ་ཀཱི་སྔོན་མོ་སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་ཨུཏྤལ་དམར་པོ་དང་རལ་གྲི།  གཡོན་
10-10-13b


འོག་མ་གཉིས་ཀྱིས་རིན་པོ་ཆེ་དང་འཁོར་ལོ་འཛིན་པ།  རཱ་ག་ར་ཏི་ཞེས་པས།  མཁའ་ནང་གི་གོས་དཀར་མོ་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་སེམས་ཅན་ཐམས་ཅད་རྒྱས་པར་བྱས།  སླར་གཅིག་ཏུ་འདུས་ནས་ས་ལེགས་པའི་བློ་གྲོས་རྣམ་པར་དག་པ་མེའི་
ཁམས་དང་།  དགའ་བ་ཆེན་པོ་དང་།  སྨོན་པ་མེད་པའི་རྣམ་པར་ཐར་པའི་སྒོ་དང་།  སྟོབས་ཀྱི་ཕ་རོལ་ཏུ་ཕྱིན་པའི་རང་བཞིན་རླུང་གི་མཚམས་སུ་ཟླ་བའི་དཀྱིལ་འཁོར་ལ་བཞུགས་པ་ནི།  གོས་དཀར་མོ་དམར་མོ་དམར་སྔོ་དཀར་བའི་ཞལ་གསུམ་ཕྱག་དྲུག་
གི་ཕྱག་ལྷག་མ་འོད་དཔག་མེད་དང་འདྲ་བ།  བཛྲ་ར་ཏི་ཞེས་པས།  མཁའ་ནང་གི་སྒྲོལ་མ་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་སེམས་ཅན་ཐམས་ཅད་དབང་དུ་བྱས།  སླར་གཅིག་ཏུ་འདུས་ནས་ཆོས་ཀྱི་སྤྲིན་གྱིས་རྣམ་པར་དག་པ་རླུང་གི་ཁམས་དང་།  
བཏང་སྙོམས་ཆེན་པོ་དང་།  མངོན་པར་འདུ་བྱེད་པ་མེད་པའི་རྣམ་པར་ཐར་པའི་སྒོ་དང་།  ཡེ་ཤེས་ཀྱི་ཕ་རོལ་ཏུ་ཕྱིན་པའི་རང་བཞིན་དབང་ལྡན་གྱི་མཚམས་སུ་ཟླ་བའི་དཀྱིལ་འཁོར་ལ་བཞུགས་པ་ནི།  སྒྲོལ་མ་སེར་མོ་སེར་སྔོ་དམར་བའི་ཞལ་གསུམ་ཕྱག་
དྲུག་གི་གཡས་འོག་མ་གཉིས་ཀྱིས་ཨུཏྤལ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་འཁོར་ལོ་འཛིན་པ།  ཨོཾ་ཨཱཿཧཱུྃ་ཞེས་པས།  མཁའ་ནང་གི་གཟུགས་རྡོ་རྗེ་མ་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་སེར་སྣ་གཙོ་བོར་གྱུར་པའི་སེམས་ཅན་གྱི་དོན་
བྱས།  སླར་གཅིག་ཏུ་འདུས་ནས་ས་དང་པོ་རབ་ཏུ་དགའ་བ་རྣམ་པར་དག་པ་སེར་སྣའི་གཉེན་པོ་སྦྱིན་པའི་ཕ་རོལ་ཏུ་ཕྱིན་པའི་རང་བཞིན་ཕྱི་རོལ་མེའི་མཚམས་སུ་ཟླ་བའི་དཀྱིལ་འཁོར་ལ་བཞུགས་པ་ནི།  གཟུགས་རྡོ་རྗེ་མ་དཀར་མོ་དཀར་ནག་དམར་བའི་ཞལ་
10-10-14a


གསུམ་ཕྱག་དྲུག་གི་གཡས་གཉིས་པས་མེ་ལོང་།  ཞལ་ཕྱག་ལྷག་མ་རྣམ་སྣང་དང་འདྲ་བའོ། །ཨོཾ་ཨཱཿཧཱུྃ་ཞེས་པས།  མཁའ་ནང་གི་སྒྲ་རྡོ་རྗེ་མ་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་འཆལ་བའི་ཚུལ་ཁྲིམས་གཙོ་བོར་གྱུར་པའི་
སེམས་ཅན་གྱི་དོན་བྱས།  སླར་གཅིག་ཏུ་འདུས་ནས་དྲི་མ་མེད་པའི་ས་རྣམ་པར་དག་པ་འཆལ་བའི་ཚུལ་ཁྲིམས་ཀྱིས་གཉེན་པོ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་རང་བཞིན་སྲིན་པོའི་མཚམས་སུ་ཟླ་བའི་དཀྱིལ་འཁོར་ལ་བཞུགས་པ་ནི།  སྒྲ་རྡོ་རྗེ་མ་སྔོན་མོ་
སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་པི་ཝཾ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  ཨོཾ་ཨཱཿཧཱུྃ་ཞེས་པས།  མཁའ་ནང་གི་དྲི་རྡོ་རྗེ་མ་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་ཁྲོ་བོ་གཙོ་བོར་
གྱུར་པའི་སེམས་ཅན་གྱི་དོན་བྱས།  སླར་འདུས་གཅིག་ཏུ་གྱུར་ནས་འོད་བྱེད་པའི་ས་རྣམ་པར་དག་པ་ཁྲོ་བའི་གཉེན་པོ་བཟོད་པའི་ཕ་རོལ་ཏུ་ཕྱིན་པའི་རང་བཞིན་རླུང་གི་མཚམས་སུ་ཟླ་བའི་དཀྱིལ་འཁོར་ལ་བཞུགས་པ་ནི།  དྲི་རྡོ་རྗེ་མ་སེར་མོ་སེར་ནག་དཀར་བའི་
ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་དྲིའི་དུང་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  ཨོཾ་ཨཱཿཧཱུྃ་ཞེས་པས།  མཁའ་ནང་གི་རོ་རྡོ་རྗེ་མ་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་ལེ་ལོ་གཙོ་བོར་གྱུར་པའི་སེམས་ཅན་
གྱི་དོན་བྱས།  སླར་གཅིག་ཏུ་འདུས་ནས་འོད་འཕྲོ་བའི་ས་རྣམ་པར་དག་པ་ལེ་ལོའི་གཉེན་པོ་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་དབང་ལྡན་གྱི་མཚམས་སུ་ཟླ་བའི་དཀྱིལ་འཁོར་ལ་བཞུགས་པ་ནི།  རོ་རྡོ་རྗེ་མ་དམར་མོ་དམར་ནག་དཀར་བའི་ཞལ་གསུམ་
10-10-14b


ཕྱག་དྲུག་གི་གཡས་འོག་མ་གཉིས་ཀྱིས་ཐོད་པ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  ཨོཾ་ཨཱཿཧཱུྃ་ཞེས་པས།  མཁའ་ནང་གི་རེག་རྡོ་རྗེ་མ་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་གཡེང་བ་གཙོ་བོར་གྱུར་པའི་སེམས་ཅན་གྱི་
དོན་བྱས།  སླར་གཅིག་ཏུ་འདུས་ནས་སྦྱང་དཀའ་བའི་ས་རྣམ་པར་དག་པ་གཡེང་བའི་གཉེན་པོ་བསམ་གཏན་གྱི་ཕ་རོལ་ཏུ་ཕྱིན་པའི་རང་བཞིན་ཤར་སྒོའི་བྱང་དུ་ཟླ་བའི་དཀྱིལ་འཁོར་ལ་བཞུགས་པ་ནི།  རེག་རྡོ་རྗེ་མ་ལྗང་གུ་ལྗང་ནག་དཀར་བའི་ཞལ་གསུམ་ཕྱག་
དྲུག་གི་གཡས་འོག་མ་གཉིས་ཀྱིས་སྣ་ཚོགས་པའི་གོས་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  ཨོཾ་ཨཱཿཧཱུྃ་ཞེས་པས།  མཁའ་ནང་གི་ཆོས་དབྱིངས་རྡོ་རྗེ་མ་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་ཤེས་རབ་འཆལ་བ་གཙོ་བོར་གྱུར་
བའི་སེམས་ཅན་གྱི་དོན་བྱས།  སླར་གཅིག་ཏུ་འདུས་ནས་མངོན་དུ་གྱུར་པའི་ས་རྣམ་པར་དག་པ་ཤེས་རབ་འཆལ་བའི་གཉེན་པོ་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཤར་སྒོའི་ལྷོ་ཕྱོགས་སུ་ཟླ་བའི་དཀྱིལ་འཁོར་ལ་བཞུགས་པ་ནི།  ཆོས་དབྱིངས་རྡོ་རྗེ་མ་
དཀར་མོ་དཀར་ནག་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འོད་ཀྱི་ཐབས་ལ་འཁྱུད་པ།  གཡས་འོག་མ་གཉིས་ཀྱིས་ཆོས་འབྱུང་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  ལྷ་མོ་བཅུ་པོ་ཐམས་ཅད་ཀྱང་ཤིན་ཏུ་
སྒེག་ཅིང་བཞིན་འཛུམ་བག་དང་ལྡན་པ།  རིན་པོ་ཆེ་དང་ནོར་བུའི་དབུ་རྒྱན་ཅན།  རིན་པོ་ཆེའི་རྒྱན་དང་ན་བཟའ་སྣ་ཚོགས་གསོལ་བ།  ཟླ་བའི་གདན་དང་ཟླ་བའི་འོད་ཡོད་པ།  རྡོ་རྗེའི་སྐྱིལ་ཀྲུང་གིས་བཞུགས་པའོ། །འབྱིན་སྔགས་འདི་དག་ཀུན་
10-10-15a


བཟང་ཆེ་བ་ན་ཡོད་པ་བཞིན་བྲིས་པ་ཡིན་ལ།  མར་མེ་མཛད་ཀྱིས་འབྱིན་སྔགས་ལ་དེ་ཉིད་གསུམ་གྱིས་སྤེལ་བ་བཤད་པ་ལྟར་ན་རཱུ་པ་བཛྲཱི་སོགས་དྲུག་གིས་ཀྱང་རུང་ངོ་། །ཨོཾ་ཨཱཿཡ་མཱནྟ་ཀྲིཏ་ཧཱུྃ་ཞེས་པས་མཁའ་ནང་གི་གཤིན་རྗེའི་གཤེད་ཕྱིར་སྤྲོས་
ཏེ་དཔག་ཏུ་མེད་པར་གྱུར་ནས་མ་དད་པ་གཙོ་བོར་གྱུར་པའི་སེམས་ཅན་གྱི་དོན་བྱས།  སླར་གཅིག་ཏུ་འདུས་ནས་མ་དད་པ་དང་།  ཕུང་པོའི་བདུད་དང་།  ཤེས་བྱའི་སྒྲིབ་པ་དང་།  འཇིག་ཚོགས་ལ་ལྟ་བ་རྣམས་ཀྱི་གཉེན་པོ་དད་པ་གཙོ་བོར་གྱུར་པ་ཤར་སྒོར་ཉི་མ་ལ་བཞུགས་པ་ནི།  གཤིན་
རྗེའི་གཤེད་སྔོན་པོ་སྔོ་དཀར་དམར་བའི་ཞལ་གསུམ་ཕྱག་དྲུག་གི་དང་པོ་གཉིས་ཀྱིས་རང་འོད་ཀྱི་རིག་མ་ལ་འཁྱུད་པ།  གཡས་འོག་མ་གཉིས་ཀྱིས་རྡོ་རྗེ་ཐོ་བ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  ཨོཾ་ཨཱཿཔྲཛྙཱན་ཏ་ཀྲིཏ་ཧཱུྃ་
ཞེས་པས་མཁའ་ནང་གི་ཤེས་རབ་མཐར་བྱེད་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་ལེ་ལོ་གཙོ་བོར་གྱུར་པའི་སེམས་ཅན་གྱི་དོན་བྱས།  སླར་གཅིག་ཏུ་འདུས་ནས་ལེ་ལོ་དང་།  ཉོན་མོངས་པའི་བདུད་དང་།  ཉོན་མོངས་པའི་སྒྲིབ་པ་དང་།  ལོག་པར་ལྟ་བ་
རྣམས་ཀྱི་གཉེན་པོ་བརྩོན་འགྲུས་གཙོ་བོར་གྱུར་པ་ལྷོ་སྒོར་ཉི་མ་ལ་བཞུགས་པ་ནི།  ཤེར་རབ་མཐར་བྱེད་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་རྡོ་རྗེ་དབྱུག་པ་དང་རལ་གྲི།  གཡོན་སྔར་དང་འདྲ།  ཨོཾ་ཨཱཿཔདྨཱནྟ་ཀྲིཏ་
ཧཱུྃ་ཞེས་པས་མཁའ་ནང་གི་པདྨ་མཐར་བྱེད་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་བརྗེད་ངས་གཙོ་བོར་གྱུར་པའི་སེམས་ཅན་གྱི་དོན་བྱས།  སླར་གཅིག་ཏུ་འདུས་ནས་བརྗེད་ངས་པ་དང་།  འཆི་བདག་གི་བདུད་དང་།  སྐྱེ་བའི་སྒྲིབ་པ་དང་།  མཐར་འཛིན་
10-10-15b


པར་ལྟ་བ་རྣམས་ཀྱི་གཉེན་པོ་དྲན་པ་གཙོ་བོར་གྱུར་པ་ནུབ་སྒོར་ཉི་མ་ལ་བཞུགས་པ་ནི།  པདྨ་མཐར་བྱེད་དམར་པོ་དམར་ནག་དཀར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་པདྨ་རྒྱས་པ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་འཁོར་ལོ་འཛིན་པ།  
ཨོཾ་ཨཱཿབིགྷྣཱན་ཏྭ་ཀྲིཏ་ཧཱུྃ་ཞེས་པས་མཁའ་ནང་གི་བགེགས་མཐར་བྱེད་ཕྱིར་སྤྲོས་ཏེ་དཔག་ཏུ་མེད་པར་གྱུར་ནས་རྣམ་གཡེང་གཙོ་བོར་གྱུར་པའི་སེམས་ཅན་གྱི་དོན་བྱས།  སླར་གཅིག་ཏུ་འདུས་ནས་རྣམ་པར་གཡེང་བ་དང་།  ལྷའི་བུའི་བདུད་དང་།  ལས་
ཀྱི་སྒྲིབ་པ་དང་།  ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་རྣམས་ཀྱི་གཉེན་པོ་ཏིང་ངེ་འཛིན་གཙོ་བོར་གྱུར་པ་བྱང་སྒོར་ཉི་མ་ལ་བཞུགས་པ་ནི།  བགེགས་མཐར་བྱེད་སྔོན་པོ་སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་འོག་མ་གཉིས་ཀྱིས་རྡོ་རྗེ་
ཁ་གྱེས་པ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  ཁྲོ་བོ་བཞི་པོ་ཐམས་ཅད་ཀྱང་གཡོན་བརྐྱངས་པས་བཞུགས་པ།  མཆེ་བ་གཙིགས་པ།  དགོད་ཅིང་ཁྲོས་བའི་ཞལ་དང་ལྗགས་འགྱུ་བ།  ཉི་མའི་འོད་དང་སྤྱན་ཟླུམ་པོ་གཡོ་
བ།  ཁྲོ་གཉེར་གྱི་ཞལ་ཅན།  ཆེ་ཞིང་མཁྲང་ལ་སྟུག་པ།  བྲང་དང་གསུས་པ་འཕྱང་བ།  ཐུང་ཞིང་སྦོམ་པ།  འབར་བའི་སྐྲ་ཁམ་པ་གྱེན་དུ་འབར་བ།  སྟག་གི་པགས་པའི་ཤམ་ཐབས་བསྣམས་པ།  ཀླུ་ཆེན་པོ་བརྒྱད་ཀྱིས་བརྒྱན་པའོ། །དེ་ནས་
ཡེ་ཤེས་སེམས་དཔའི་ཐུགས་ཀའི་ས་བོན་མྃ་ཡིག་ལས་འོད་ཟེར་འཕྲོས་གཤིན་རྗེའི་གཤེད་ལ་རེག་པས།  དེས་ཛཿཞེས་བརྗོད་པས་གཤིན་རྗེའི་གཤེད་ཀྱི་ཐུགས་ཀའི་ས་བོན་ཧཱུྃ་ལས་འོད་ཟེར་འཕྲོས་ཏེ།  བཅོམ་ལྡན་འདས་འཇམ་པའི་རྡོ་རྗེ་ལྷ་བཅུ་དགུའི་
10-10-16a


དཀྱིལ་འཁོར་མདུན་གྱི་ནམ་མཁར་སྤྱན་དྲངས་པར་བསམས་ལ།  ཨོཾ་ཨཱཿཡ་མཱནྟ་ཀྲིཏ་ཛཿཞེས་བརྗོད།  དེ་ནས་རང་གི་གཡོན་དུ་ཤྃ་ལས་བྱུང་བའི་དུང་ཕོར་གསུམ་གྱི་ནང་དུ་ཧཱུྃ་ཞུ་བ་ལས་བྱུང་བའི་བསང་གཏོར།  མཆོད་ཡོན།  ཞབས་བསིལ་
རྣམས་དྭངས་ཤིང་ཐོགས་པ་མེད་པར་བསམས་ལ།  ཨོཾ་ཨཱཿམྃ་ཧཱུྃ་ཞེས་པས་དུང་དང་པོའི་ཆུ་དང་།  ཨོཾ་ཨཱཿབིགྷྣཱན་ཏ་ཀྲིཏ་ཧཱུྃ་སྭཱ་ཧཱ།  ཞེས་ལན་གཉིས་བརྗོད་པས་དུང་གཉིས་པ་དང་།  གསུམ་པའི་ཆུ་བྱིན་གྱིས་བརླབ་བོ། །དེ་ནས་གཙོ་བོའི་སྔགས་ལན་གསུམ་བརྗོད་
པས་ཡེ་ཤེས་པ་ལ་བསང་གཏོར་དང་།  མཆོད་ཡོན་དང་།  ཞབས་བསིལ་ཕུལ་ཏེ།  སྔར་བཞིན་རྡོ་རྗེ་མ་ལྔས་ཀྱང་མཆོད་དོ། །སླར་ཡང་ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་ཟེར་འཕྲོས་ཁྲོ་བོ་གཞན་གསུམ་ལ་རེག་པས།  དེ་དག་གི་སོ་སོའི་སྔགས་
ཧཱུྃ་བྃ་ཧོཿརྣམས་བརྗོད་དེ།  དེ་དག་སོ་སོའི་ཐུགས་ཀའི་ཧཱུྃ་ཡིག་ལས་འོད་ཟེར་འཕྲོས་པས་ཡེ་ཤེས་ཀྱི་འཁོར་ལོ་རྣམས་དམ་ཚིག་པ་ལ་ཐིམ་པ་དང་།  བཅིང་བ་དང་།  མཉེས་པར་བྱས་པར་བསམ་ཞིང་།  ཨོཾ་ཨཱཿཔྲཛྙཱནྟ་ཀྲིཏ་ཧཱུྃ།  ཨོཾ་ཨཱཿཔདྨཱནྟ་ཀྲིཏ་བྃ།  ཨོཾ་
ཨཱཿབིགྷྣཱནྟ་ཀྲིཏ་ཧོཿཞེས་བརྗོད།  གཉིས་པ་ཉེ་བར་སྒྲུབ་པ་དང་རྣམ་སྨིན་གྱི་འབྲས་བུ་ཆེན་པོ་ནི་སྔར་ལྟར་མིག་ལ་སོགས་པ་བྱིན་གྱིས་བརླབ་པའོ། །གསུམ་པ་སྒྲུབ་པ་དང་སྐྱེས་བུ་བྱེད་པའི་འབྲས་བུ་ཆེན་པོ་ནི་སྔར་ལྟར་ཐུགས་ལ་སོགས་པ་བྱིན་གྱིས་བརླབ་
པའོ། །བཞི་པ་སྒྲུབ་ཆེན་དང་དྲི་མ་མེད་པའི་འབྲས་བུ་ཆེན་པོ་ནི།  སླར་ཡང་ཡེ་ཤེས་སེམས་དཔའི་ཐུགས་ཀའི་ས་བོན་མྃ་ལས་འོད་ཟེར་འཕྲོས་པས་དབང་བསྐུར་གྱི་ལྷ་རིགས་ལྔ་འཁོར་དང་བཅས་པ་ཨོཾ་བཛྲ་ས་མཱ་ཛཿཞེས་པས་སྤྱན་དྲང་།  སྔར་ལྟར་
10-10-16b


མཆོད་ཅིང་གསོལ་བ་བཏབ་ནས་དབང་བསྐུར་བས་ཆུ་ལྷག་མ་ཡར་ལུད་པ་ལས་གཙོ་བོ་ལ་རིགས་བདག་མི་བསྐྱོད་པ་དང་།  དེ་བཞིན་གཤེགས་པ་བཞི་ལ་མི་བསྐྱོད་པ།  སྤྱན་མ་དང་།  གཟུགས་རྡོ་རྗེ་དང་།  གཤིན་རྗེའི་གཤེད་ལ་རྣམ་པར་སྣང་མཛད།  
མཱ་མ་ཀཱི་དང་།  སྒྲ་རྡོ་རྗེ་དང་།  ཆོས་དབྱིངས་རྡོ་རྗེ་དང་།  ཤེས་རབ་མཐར་བྱེད་དང་།  བགེགས་མཐར་བྱེད་ལ་མི་བསྐྱོད་པ།  གོས་དཀར་མོ་དང་།  རོ་རྡོ་རྗེ་དང་།  རྟ་མགྲིན་ལ་འོད་དཔག་མེད།  རེག་རྡོ་རྗེ་ལ་དོན་གྲུབ།  སྒྲོལ་མ་དང་།  དྲི་རྡོ་རྗེ་ལ་རིན་ཆེན་
འབྱུང་ལྡན་གྱིས་དབུར་བརྒྱན་པར་བསམ་མོ། །དེ་ནས་ཡེ་ཤེས་སེམས་དཔའི་ཐུགས་ཀའི་ས་བོན་མྃ་ཡིག་ལས་འོད་ཟེར་སྤྲོས་པས་དེ་བཞིན་གཤེགས་པ་ཐམས་ཅད་བཀུག་སྟེ་ཞལ་ནས་ཞུགས།  ཟླ་བ་ཞུ་བའི་གཟུགས་སུ་གྱུར་པ་རྡོ་རྗེ་ནོར་བུའི་ལམ་ནས་ལྷ་མོའི་པདྨར་
ལྷུང་སྟེ།  ཟླ་བའི་གདན་བཅུ་ལ་ཛཿཧཱུྃ་བྃ་ཧོཿཁྃ་རྃ།  ལྃ་མཱྃ་པཱྃ་ཏཱྃ་རྣམས་སུ་གྱུར།  དེ་ལས་འོད་ཟེར་འཕྲོས།  ཚུར་འདུས་ཡོངས་སུ་གྱུར་པ་ལས་སྤྱན་མ་ལ་སོགས་པའི་ལྷ་མོ་བཅུར་གྱུར་པ་བ་སྤུའི་བུ་ག་ནས་ཕྱིར་སྤྲོས་ཏེ་བདག་ཉིད་ཀྱི་དཀྱིལ་འཁོར་ལ་མཆོད་པར་
བསམ་ཞིང་ཚོགས་ཞིང་གི་སྐབས་ལྟར་ཉེར་སྤྱོད་དང་།  རྡོ་རྗེ་མ་ལྔས་མཆོད་ནས་མཆོད་བྱ་མཆོད་བྱེད་གཉིས་སུ་མེད་པར་བསམས་ལ།  ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ།  ཞེས་བརྗོད་དོ། །དེ་ནས་བསྟོད་བྱ་བསྟོད་བྱེད་གཉིས་སུ་མེད་པར་བསམས་
ལ།  མི་བསྐྱོད་པ་ནི་ཡེ་ཤེས་ཆེ། །རྡོ་རྗེ་དབྱིངས་ནི་མཁའ་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་རྗེ་དབྱིངས་ལ་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་འོད་གསལ་མཆོག་གི་མཆོག །
10-10-17a


སྟོན་པ་རྡོ་རྗེར་ཕྱག་འཚལ་ལོ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མེད་མཁའ། །རང་བཞིན་དག་པས་གོས་པ་མེད། །རྡོ་རྗེའི་སྐུ་ལ་ཕྱག་འཚལ་ལོ། །རྡོ་རྗེ་མི་ཕྱེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་
ཕ་རོལ་ཕྱིན་པ་བརྙེས། །རྡོ་རྗེའི་གསུང་ལ་ཕྱག་འཚལ་ལོ། །དོན་ཡོད་རྒྱལ་པོ་རྫོགས་སངས་རྒྱས། །བསམ་པ་ཐམས་ཅད་རྫོགས་མཛད་པ། །རང་བཞིན་དག་པ་ཉིད་ལས་བྱུང་། །རྡོ་རྗེ་སེམས་དཔར་ཕྱག་འཚལ་ལོ། །ཞེས་པས་བསྟོད་དོ། །དེ་ནས་བདུད་རྩི་དངོས་སུ་
ཡོད་པའམ་མེད་ན་བསམས་ཀྱང་རུང་སྟེ།  བགེགས་མཐར་བྱེད་ཀྱི་སྔགས་ཀྱིས་བསང་།  སྭ་བྷཱ་ཝས་སྦྱང་།  སྟོང་པའི་ངང་ལས་ཡྃ་ལས་རླུང་གི་དཀྱིལ་འཁོར་གཞུའི་དབྱིབས་ཅན་གཡོ་བའི་བ་དན་དང་བཅས་ཤིང་ཡྃ་གྱིས་མཚན་པ།  དེའི་སྟེང་དུ་རྃ་ལས་མེའི་དཀྱིལ་འཁོར་གྲུ་གསུམ་
འབར་བ་རྃ་གྱིས་མཚན་པ།  དེའི་ནང་དུ་ཨ་ལས་ཐོད་པ་ཕྱི་དཀར་ལ་ནང་དམར་བའི་ནང་དུ་ཤར་དུ་དྲི་ཆེན་ལ་བྷྲཱུྃ།  ལྷོར་རཀྟ་ལ་ཨཱྃ།  ནུབ་ཏུ་བྱང་སེམས་དཀར་པོ་ལ་ཛྲཱིཾ།  བྱང་དུ་ཤ་ཆེན་གྱི་དྭངས་མ་ལ་ཁྃ།  དབུས་སུ་དྲི་ཆུ་ལ་ཧཱུྃ་ཡིག་གིས་མཚན་པ།  ས་བོན་དེ་རྣམས་ལས་འོད་
ཟེར་འཕྲོས་པས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་བཀུག་ནས་རང་རང་གི་ས་བོན་ལ་བཅུག་སྟེ།  དེའི་རྐྱེན་གྱིས་འོག་གི་རླུང་གཡོས།  མེ་སྦར་བས་འབར་བ་དང་།  གསལ་བ་དང་།  དྲོས་པ་དང་།  ལྷགས་པར་གྱུར་པར་བསམ་མོ། །དེའི་རླངས་པ་
ལ་ཧཱུྃ་ལས་བྱུང་བའི་རྡོ་རྗེ་དཀར་པོ་རྩེ་ལྔ་པ་ལན་གསུམ་སྤྲོས་ཏེ་ཞུགས།  དེའི་སྟེང་དུ་ཨོཾ་ཡིག་ལས་འོད་ཟེར་འཕྲོས་པས་ཕྱོགས་བཅུའི་འཇིག་རྟེན་གྱི་ཁམས་ན་གནས་པའི་བདུད་རྩི་ཐམས་ཅད་བཀུག་སྟེ།  ཡི་གེ་ཨོཾ་ལ་ཐིམ།  ཨོཾ་ཡིག་ཀྱང་ཞུ་སྟེ་བདུད་རྩི་ལ་ཐིམ་པར་བསམས་ལ།  
10-10-17b


ཨོཾ་ཨཱཿཧཱུྃ།  ལན་གསུམ་བརྗོད་པས་བྱིན་གྱིས་བརླབ་བོ། །དེ་ནས་ལྷ་རྣམས་ཀྱི་ལྗགས་ཧཱུྃ་ལས་བྱུང་བའི་རྡོ་རྗེ་ཧཱུྃ་གིས་མཚན་པར་བསམས་ལ།  དེའི་འོད་ཟེར་གྱིས་བདུད་རྩི་གསོལ་བར་བསམ་ཞིང་།  ལྷ་བཅུ་དགུའི་སྔགས་བརྗོད་དེ་བདུད་རྩི་ཕུལ་བས་སྙིང་གའི་སངས་རྒྱས་
ཀྱི་དཀྱིལ་འཁོར་ཚིམས་པར་བསམ་མོ། །གསུམ་པ་ལས་རྒྱལ་མཆོག་ལ་བཞི་ལས།  དང་པོ་ཐིག་ལེའི་རྣལ་འབྱོར་ནི།  ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་ཟེར་འཕྲོས།  དེས་སེམས་ཅན་ཐམས་ཅད་སངས་རྒྱས་སུ་བྱས་ནས་ཚུར་འདུས་ས་བོན་མྃ་ཡིག་ལ་
ཐིམ།  མྃ་གྱི་ཡི་གེ་དེ་ཐིག་ལེར་གྱུར་པའི་ནང་དུ་རྣལ་འབྱོར་པའི་སེམས་ཞུགས་ནས་ཚངས་པའི་གནས་བཞི་བསྒོམ་པ་ནས་ཏིང་ངེ་འཛིན་གསུམ་ཀ་སྐད་ཅིག་མས་བསྒོམས་ཏེ།  དེའི་ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་ཟེར་བྱུང་བས་རལ་གྲིའི་ཡུ་
བ་དང་།  ཡེ་ཤེས་སེམས་དཔའི་ལུས་དང་།  དཀྱིལ་འཁོར་གྱི་ལྷ་དང་།  གཞལ་ཡས་ཁང་དང་།  དམ་ཚིག་སེམས་དཔའི་ལུས་དང་།  དཀྱིལ་འཁོར་གྱི་ལྷ་དང་།  གཞལ་ཡས་ཁང་རྣམས་གསལ་བར་བྱས་ནས་ཕྱི་རོལ་དུ་སོང་སྟེ་འགྲོ་བ་ཐམས་ཅད་གསལ་བར་བྱས་ནས་
སླར་ལོག་སྟེ།  སྔར་གྱི་རིམ་པས་ཡེ་ཤེས་སེམས་དཔའི་ཐུགས་ཀའི་ས་བོན་མྃ་ཡིག་ལ་ཐིམ་སྟེ་དེ་ལྟ་བུའི་སྤྲོ་བ་དང་།  བསྡུ་བ་ཡང་ཡང་བྱའོ། །གཉིས་པ་ཕྲ་མོའི་རྣལ་འབྱོར་ནི།  ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་ཟེར་བྱུང་སྟེ།  དེ་བཞིན་གཤེགས་
པ་ཐམས་ཅད་ཞལ་དུ་ཞུགས།  ཟླ་བ་ཞུ་བའི་གཟུགས་སུ་གྱུར་པ་པདྨའི་ནང་དུ་ལྷུང་བ་ལས་རལ་གྲི་ནས་ཀྱི་ཚད་ཙམ་གྱི་ཡུ་བའི་དབུས་སུ་ཧཱུྃ་གི་ས་བོན་ལས་མངོན་པར་བྱང་ཆུབ་པ་ལྔའི་རིམ་པས་གཞལ་ཡས་ཁང་དང་བཅས་པའི་རྗེ་བཙུན་རྡོ་རྗེ་སེམས་དཔར་གྱུར་ཏེ།  གཉིས་ཀ་
10-10-18a


མཉེས་པ་ལ་སོགས་པའི་ཆོ་གས་ཐིག་ལེའི་རྣལ་འབྱོར་ལ་ཐུག་གི་བར་སྐད་ཅིག་གིས་བསྒྲུབས་ནས།  དེའི་ཐུགས་ཀ་ནས་རྡོ་རྗེ་རྩེ་ལྔ་པ་སྔར་བཞིན་སྤྲོ་བ་དང་བསྡུ་བར་བྱའོ། །གསུམ་པ་བཟླས་པའི་རྣལ་འབྱོར་ནི།  སྤྱི་བོར་འཁོར་ལོ་རྩིབས་བརྒྱད་
པའི་དབུས་སུ་སྐུ་རྡོ་རྗེ།  དེའི་ཐུགས་ཀར་འཁོར་ལོ་རྩིབས་བརྒྱད་པའི་སྟེང་དུ་ཟླ་བའི་དཀྱིལ་འཁོར་ལ་ཨོཾ།  མགྲིན་པར་པདྨ་དམར་པོ་འདབ་མ་བརྒྱད་པའི་དབུས་སུ་གསུང་རྡོ་རྗེ།  དེའི་ཐུགས་ཀར་པདྨ་འདབ་མ་བརྒྱད་པའི་དབུས་སུ་ཟླ་བའི་དཀྱིལ་འཁོར་ལ་ཡི་གེ་ཨཱཿ
རལ་གྲིའི་ཡུ་བའི་དབུས་སུ་འཇམ་པའི་རྡོ་རྗེའི་ཐུགས་ཀར་རལ་གྲིའི་ཡུ་བའི་དབུས་སུ་ཟླ་བའི་དཀྱིལ་འཁོར་ལ་ཡི་གེ་མྃ།  སྙིང་གར་རྡོ་རྗེ་རྩེ་ལྔ་པའི་དབུས་སུ་ཐུགས་རྡོ་རྗེ།  དེའི་ཐུགས་ཀར་རྡོ་རྗེ་རྩེ་ལྔ་པའི་དབུས་ན་ཟླ་བའི་དཀྱིལ་འཁོར་ལ་ཧཱུྃ་བསམས་ནས།  ཨོཾ་ཨཱཿམྃ་ཧཱུྃ།  
ཞེས་ཅི་ནུས་བཟླས་ཏེ།  འདི་ལ་དམིགས་པའི་བྱེ་བྲག་གིས་རིམ་གྱིས་བཟླས་པ་དང་།  ཅིག་ཆར་བཟླས་པའི་ཚུལ་གཉིས་གསུངས་སོ། །ཀུན་བཟང་ཆེ་ཆུང་དང་།  ཇོ་བོ་རྗེའི་གཞུང་རྣམས་ལས་འདི་ཙམ་ཞིག་ལས་གཞན་བཟླས་པ་མི་སྣང་ཡང་།  བོད་དག་ཨོཾ་ཨཱཿ
བཛྲ་དྷྲྀཀ་ཧཱུྃ་ཞེས་པ་ནས།  ཨོཾ་ཨཱཿབིགྷྣཱན་ཏ་ཀྲིཏ་ཧཱུྃ་ཞེས་པའི་བར་རང་རང་གི་སྔགས་དེ་ཉིད་གསུམ་གྱིས་སྤེལ་བ་བཟླས་པ་ཡང་བཞེད་པ་ནི་བཞི་བརྒྱ་ལྔ་བཅུ་པར།  ཡང་ན་རང་གི་ལྷ་ཡི་འབུམ། །གཞན་གྱི་ཁྲི་སྟེ་ཡང་ན་ནི། །འཁོར་ལོ་ཅན་གྱི་བཀའ་གནད་བྲི། །འབྱིན་པ་
དེ་ཉིད་གསུམ་དང་སྤེལ། །གཞན་དག་སྙིང་པོའི་ས་བོན་སྤེལ། །མིང་གི་ཡི་གེ་དང་པོ་ནི། །ཀླད་སྐོར་བཅས་པས་སྔགས་རྣམས་སུ། །ཞེས་གསུངས་པའི་དོན་དུ་སྣང་ངོ་། །དེ་ནས་ཐུན་ལས་ལངས་པར་འདོད་པ་ན་དཀྱིལ་འཁོར་གྱི་འཁོར་ལོ་བསྡུས་ལ་གཙོ་བོའི་ང་རྒྱལ་གྱིས་སྨོན་
10-10-18b


ལམ་འདི་གདབ་བོ། །དཔལ་ལྡན་འཇམ་པའི་རྡོ་རྗེ་མགོན། །རྣལ་འབྱོར་གྱིས་ཐོབ་དགེ་བ་གང་། །བདེ་ཆེན་ཡེ་ཤེས་རང་བྱུང་ནས། །སེམས་ཅན་ཀུན་མཁྱེན་སར་འགོད་ཤོག །གང་ཞིག་འདི་མཐོང་འདོད་པའམ། །གང་ཞིག་ཞུ་བར་འདོད་པ་དེས། །ཐུགས་
ཀྱི་དབང་ཕྱུག་གྲངས་མེད་པ། །མགོན་པོ་དེ་འདྲ་མཐོང་བར་ཤོག །ནམ་མཁའི་མཐའ་ཀླས་ཕྱོགས་བཅུ་རུ། །སེམས་ཅན་ཀུན་གྱི་དོན་སྤྱོད་ལ། །ཇི་ལྟར་ཐུགས་ཀྱི་དབང་ཕྱུག་བཞིན། །བདག་གིས་ཀྱང་ནི་མཐོང་བར་ཤོག །ཇི་སྲིད་ཐོག་མ་མེད་པ་ནས། །འཁོར་
བ་ཡི་ནི་མཐར་ཐུག་བར། །དེ་སྲིད་སེམས་ཅན་ཕན་པ་ཉིད། །སངས་རྒྱས་སྤྱོད་པ་བདག་སྤྱོད་ཤོག །ཇི་སྲིད་སངས་རྒྱས་སྣ་ཚོགས་རྣམས། །འཇིག་རྟེན་གཉེན་བཤེས་མྱ་ངན་འདས། །དེ་ནི་བསྟན་པའི་དོན་དུ་ནི། །བསྐལ་པའི་བསྐལ་པར་བྱེད་པར་ཤོག །རྡོ་རྗེ་འཆང་སོགས་
གཟུགས་ཀྱིས་ནི། །བདག་གིས་ཕྱོགས་བཅུར་སྤྲུལ་གྱུར་ཅིང་། །སྔགས་ཀྱི་ཚུལ་གྱིས་སེམས་ཅན་མཆོག །དེ་ཚེ་བདག་གིས་འདུལ་གྱུར་ཅིག །བཞི་པ་ཚིམ་པའི་ཆོ་ག་ནི།  སྤྱི་བོར་ཡྃ་ལས་རླུང་གི་དཀྱིལ་འཁོར་གཞུའི་དབྱིབས་ཅན་ཡྃ་གྱིས་མཚན་པའི་དབུས་སུ་ཟླ་བའི་དཀྱིལ་
འཁོར་ལ་ཨོཾ་ཨཱཿཧཱུྃ་བསམ།  མགྲིན་པར་བྃ་ལས་ཆུའི་དཀྱིལ་འཁོར་བུམ་པ་ལ་བྃ་གྱིས་མཚན་པ།  སྙིང་ཁར་རྃ་ལས་མེའི་དཀྱིལ་འཁོར་དམར་པོ་ལ་རྃ་གྱིས་མཚན་པ་བསམས་ལ།  ཨ་ལས་ཐོད་པ་ཕྱི་དཀར་ལ་ནང་དམར་བའི་ནང་དུ་རྫས་ལྔ་ལ་རིགས་ལྔའི་ས་བོན་གྱིས་
མཚན་པ་ལས་འོད་ཟེར་འཕྲོས།  འཇིག་རྟེན་གྱི་ཁམས་ཀྱི་བདུད་རྩི་ཐམས་ཅད་བཀུག་སྟེ།  དེ་བཞིན་གཤེགས་པ་ཐམས་ཅད་དང་རོ་གཅིག་ཏུ་གྱུར་ནས་རྣལ་འབྱོར་པའི་ཁའི་ལམ་ནས་ཞུགས་ཏེ་སྙིང་ཁར་བཅུག །ཡང་སྤྱི་བོའི་སོར་བརྒྱད་ཀྱི་སྟེང་ན་ཟླ་བའི་དཀྱིལ་འཁོར་གྱི་
10-10-19a


དབུས་སུ་རྣམ་པར་སྣང་མཛད་ལ་སོགས་པ་རྫས་ལྔ་ས་བོན་ལྔས་བྱིན་གྱིས་བརླབས་ལ་ཟླ་བའི་དཀྱིལ་འཁོར་གྱི་འོག་ཏུ་ཙ་ན་ཀའི་ཚད་ཙམ་གྱི་བུ་ག་བལྟས་ཏེ་བུ་ག་ལས་བདུད་རྩིའི་རྒྱུན་བྱུང་ནས་སྐུ་གསུང་ཐུགས་ཀྱི་རྡོ་རྗེ་རྣམས་མཉེས་པར་བསམ་ཞིང་ཚིམ་པར་
བསམ་མོ། །འདབ་བཟང་འཁོར་བཅས་ལྷ་ཡི་ལམ་ལ་བཞིན། །འཁོར་ཚོགས་དང་བཅས་མཆོག་གི་ལམ་གཤེགས་པ། །དཀྱིལ་འཁོར་ཆེན་པོའི་སློབ་དཔོན་ཡེ་ཤེས་ཞབས། །གང་དེས་འཇམ་པའི་དབྱངས་ཀྱི་བཀའ་བཞིན་དུ། །ལུང་དང་མཐུན་པའི་གཞུང་བཟང་བཞིས་ལྷག་
པའི། །བཅུ་ཕྲག་མཛད་ལས་སྒྲུབ་ཐབས་རྣམ་གཉིས་ཀྱི། །དགོངས་པ་ཇི་བཞིན་སློབ་མས་བསྐུལ་བའི་ངོར། །མང་ཐོས་དགེ་སློང་བསོད་ནམས་སེང་གེས་སྦྱར། །ཟབ་མོའི་དོན་ལ་ཉེས་གང་བདག་གིས་ཉེས། །བླ་མ་ལྷར་བཅས་རྣམས་ལ་བཟོད་པར་གསོལ། །འབད་པས་
བསྒྲུབ་པའི་དགེ་ཚོགས་འགྲོ་བའི་དགེ། །མཁའ་མཉམ་སེམས་ཅན་ཀུན་ལ་སྤྱིར་སྦྱིན་ནོ། །དཔལ་གསང་བ་འདུས་པ་འཇམ་པའི་རྡོ་རྗེ་ལྷ་བཅུ་དགུའི་སྒྲུབ་ཐབས་ཀུན་ཏུ་བཟང་པོའི་ཉི་འོད་ཅེས་བྱ་བ་འདི་ནི་དད་པ་དང་བློ་གྲོས་ཕུན་སུམ་ཚོགས་པ་ཚ་འདུ་ཤེས་རབ་
སེང་གེས་བསྐུལ་བའི་ངོར།  རྗེ་བཙུན་མཁྱེན་རབ་ཀྱི་དབང་ཕྱུག་ཀུན་དགའ་བཟང་པོ་ཡབ་སྲས་ཀྱི་ཞབས་རྡུལ་སྤྱི་བོས་བླངས་པ།  མང་དུ་ཐོས་པའི་དགེ་སློང་བསོད་ནམས་སེང་གེས་ས་ཕོ་ཁྱིའི་ལོ་སྣྲོན་གྱི་ཟླ་བ་ལ་ཐུབ་བསྟན་རྣམ་པར་རྒྱལ་བའི་དགོན་པར་སྦྱར་བའི་ཡི་གེ་
པ་ནི་གཞོན་ནུ་བཟང་པོས་བགྱིས་སོ།།    །།དགེའོ། །དགེའོ། །དགེའོ།།    །།
10-10-19b


empty page
10-11-1a


༄༅།  །འཇམ་པའི་རྡོ་རྗེའི་དཀྱིལ་ཆོག་ཡེ་ཤེས་རྣམ་རོལ་བཞུགས་སོ།།    །།
10-11-1b


༄༅། །དཔལ་གསང་བ་འདུས་པ་འཇམ་པའི་རྡོ་རྗེའི་དཀྱིལ་འཁོར་གྱི་ཆོ་ག་ཡེ་ཤེས་རྣམ་རོལ་ཞེས་བྱ་བ།  བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །དཔལ་ལྡན་
ཆོས་དབྱིངས་ཕྱག་རྒྱས་བརྟན་གཡོ་ཀུན་འཁྱུད་ཅིང་། །གྲངས་མེད་རིགས་སྤྲུལ་ཐུགས་རྗེ་སྒྱུ་མའི་དྲྭ་བ་ཡིས། །འཇིག་རྟེན་གསུམ་ཁོངས་ཤེས་རབ་འབར་བའི་འོད་མཛད་པ། །བླ་མ་འཁོར་ལོའི་
དབང་ཕྱུག་ཞབས་ལ་ཕྱག་བགྱིའོ། །འདུས་པའི་རྒྱུད་རྒྱལ་ལས་བྱུང་བའི། །ཆོ་ག་གྲུབ་བཟང་གཞུང་བཞིན་དུ། །གཞན་ལ་ཕན་པར་བྱ་བའི་བློས། །གོ་བདེའི་ངག་གིས་གསལ་བར་བྱ། །
དཀྱིལ་འཁོར་འདིར་དབང་བཞི་རྫོགས་པར་ཐོབ་ཅིང་དེ་ཉིད་བཅུ་དང་ལྡན་པའི་རྡོ་རྗེ་སློབ་དཔོན་གྱིས།  འོས་སུ་གྱུར་པའི་སློབ་མ་གུས་པས་གསོལ་བ་འདེབས་པ་དག་སྨིན་པར་བྱ་བའི་ཆོ་ག་ལ་དོན་ལྔ་
10-11-2a


སྟེ།  སྔོན་དུ་བསྙེན་པ་བྱ་བ།  སའི་ཆོ་ག །སྟ་གོན་གྱི་ཆོ་ག །དཀྱིལ་འཁོར་ཞག་གི་ཆོ་ག །མཇུག་གི་ཆོ་གའོ། །དང་པོ་ནི།  གནས་དབེན་པར་བསྙེན་པའི་ཡོ་བྱད་ཚོགས་
པའི་ཚེ།  སྒྲུབ་པའི་ཐབས་ལས་བྱུང་བའི་ཏིང་ངེ་འཛིན་གསུམ་གྱི་དཀྱིལ་འཁོར་བསྒོམས་ནས་གཙོ་བོའི་སྔགས་འབུམ།  འཁོར་གྱི་སྔགས་ཁྲི་བཟླ་བའམ།  ཡང་ན་རྡོ་རྗེ་སློབ་དཔོན་གྱིས་
དཀྱིལ་འཁོར་བྲིས་ཤིག་པའི་གནང་བ་བྱུང་བས་བྲི་བར་བྱའོ། །གཉིས་པ་ལ་གསུམ་སྟེ།  ས་སྦྱང་བ།  ས་གཟུང་བ།  བགེགས་གཞོམ་པའོ། །དང་པོ་ནི།  གྲོང་ཁྱེར་གྱི་བྱང་ཤར་ལ་སོགས་པ་ཡིད་དང་
མཐུན་པའི་གནས་སུ་མཎྜལ་དྲིས་བྱུགས་པར་སྟ་གོན་དང་མཐུན་པར་ཚོམ་བུ་དགོད།  དེའི་མཐར་མཆོད་པ་དང་གཏོར་མ་རྣམས་བཤམས་ཏེ།  ཐོག་མར་སྐྱབས་འགྲོ་སེམས་བསྐྱེད་རྡོ་རྗེ་སེམས་དཔའི་
10-11-2b


བསྒོམ་བཟླས་ནས་བཟུང་སྟེ།  ཡེ་ཤེས་ཚོགས་བསག་གི་བར་སྒྲུབ་ཐབས་ལྟར་བྱས་ནས།  སྲུང་འཁོར་མན་ཆད་བདག་མདུན་ཐ་མི་དད་དུ་བསྲེ་བའི་ཏིང་ངེ་འཛིན་གསུམ་གྱི་དཀྱིལ་འཁོར་བསྒོམས་ནས་འཇིག་རྟེན་ལས་འདས་
པའི་གཏོར་མ་ཕུལ་ནས་དཀྱིལ་འཁོར་ནམ་མཁར་འདེགས་པར་བྱའོ། །འདི་ནི་ཁུང་བུ་བརྐོས་ནས་བྱིན་གྱིས་བརླབ་པའི་ཆེད་དུ་ཡིན་པར་གསུངས་པས་ཁུང་བུ་བརྐོ་མི་དགོས་པ་རྣམས་ལ་འདི་མི་དགོས་སོ། །གང་ལྟར་ཡང་
གཏོར་ཆོག་ལྟར་ཕྱོགས་སྐྱོང་གི་གཏོར་མ་ཕུལ་ནས།  ཁུང་བུ་བརྐོ་དགོས་ན་པུས་མོ་ནུབ་ཙམ་བརྐོས་ནས།  གྱོ་མོ་ལ་སོགས་པའི་ས་རོ་རྣམས་བསལ་ཏེ།  ས་བཟང་པོ་གཞན་དང་བསྲེས་ནས་རིན་པོ་ཆེ་དང་འབྲུ་རྣམས་གཞུག་སྟེ།  
འཐས་པར་བཅགས་ནས་སྟེགས་བུ་བརྩིག་པར་བྱའོ། །དེར་དྲི་བཟང་གི་ཆུས་གཏོར་ནས་ལག་པ་གཉིས་ས་ལ་བཞག་སྟེ།  ཨོཾ་བྷུ་ཁཾ།  ཞེས་པས་ས་གཞི་ནམ་མཁར་བསྒྱུར་བར་བསམ། ཧཱུྃ་ལཾ་ཧཱུྃ་ཞེས་པས་རྡོ་རྗེའི་ས་གཞིར་
བྱིན་གྱི་བརླབས།  ཨོཾ་མེ་དཱི་ནི་བཛྲཱི་བྷ་ཝ་བན་དྷ་ཧཱུྃ་ཞེས་པས་བགེགས་གཞོམ་པར་བྱའོ། །གཉིས་པ་ནི་སྟེགས་བུའི་དབུས་སུ་སྟན་ནང་ཚངས་ཅན་ལ་སློབ་དཔོན་དང་།  ཕྱོགས་བཞིར་རྟག་པ་ལ་སོགས་པའི་ང་རྒྱལ་འཛིན་པའི་
སློབ་མ་བཞི་འདུག་ནས།  ཏིང་ངེ་འཛིན་གསུམ་གྱི་དཀྱིལ་འཁོར་རྫོགས་པར་བསྒོམ་སྟེ།  ཕྱོགས་བཞིའི་སློབ་དཔོན་གྱིས་དཀྱིལ་འཁོར་སྤྲུལ་པའི་ཕྱིར།  ཚིགས་སུ་བཅད་པ་འདི་དག་གིས་གསོལ་བ་གདབ་པར་བྱ་སྟེ།  དེ་
10-11-3a


བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །མཚན་ཉིད་ཐམས་ཅད་ཡང་དག་རྫོགས། །མཚན་མིན་
ཐམས་ཅད་རྣམ་སྤངས་པ། །ཀུན་ཏུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །ཞི་བའི་ཆོས་ནི་མཆོག་ལས་བྱུང་། །ཡེ་ཤེས་སྤྱོད་པ་རྣམ་སྦྱོང་བ། །ཀུན་ཏུ་བཟང་པོ་གསུང་གི་མཆོག །དཀྱིལ་འཁོར་དམ་པ་
བཤད་དུ་གསོལ། །སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པ་དྲི་མ་མེད། །ཀུན་ཏུ་བཟང་པོ་ཐུགས་ཀྱི་མཆོག །དཀྱིལ་འཁོར་དམ་པ་བཤད་དུ་གསོལ། །དེ་ལྟར་ལན་གསུམ་གསོལ་བ་བཏབ་ནས། ཧཱུྃ་བཛྲ་ཨུཊྚིཥྛ་ཞེས་
པས་དཀྱིལ་འཁོར་ནམ་མཁར་བཏེག་སྟེ།  རང་ཉིད་གཙོ་བོ་ལས་བྱེ་བའི་འཇམ་པའི་རྡོ་རྗེའི་སྐུར་བྱས་ཏེ།  མིག་གཡས་པ་མ་ལས་ཉི་མ་དང་།  གཡོན་པ་ཊ་ལས་ཟླ་བ།  མིག་འབྲས་གཉིས་ཧཱུྃ་ལས་ཁྲོ་བོའི་རྡོ་རྗེ་འབར་བ་རེ་རེ།  རྐང་མཐིལ་གཉིས་
ཧཱུྃ་ལས་རྡོ་རྗེ་འབར་བར་བསྒོམས་ནས་རྡོ་རྗེའི་འགྲོས་ཀྱིས།  དཀྱིལ་འཁོར་གྱི་ས་གཞི་གཡས་སྐོར་དུ་བཅགས་ནས་བགེགས་རྣམས་བསྐྲད་པར་བྱའོ། །གྲུབ་ན་རིགས་བཞིའི་ང་རྒྱལ་གྱིས་གཡས་བརྐྱང་ལ་སོགས་པ་བཞི།  ཁྲོ་བོ་བཅུའི་ང་རྒྱལ་
གྱིས་རྐང་སྟབས་དྲུག་དྲུག་སྟེ།  དྲུག་ཅུ་རྩ་བཞི་བྱ་བར་བཤད་པ་ལྟར་བྱའོ། །དེ་ནས་དབུས་སམ་དབང་ལྡན་དུ་གནས་ནས།  སྐུ་གསུང་ཐུགས་ལ་གནས་པ་ཡི། །བགེགས་ཀྱི་ཚོགས་རྣམས་ཐམས་ཅད་ཉོན། །ང་ནི་དཔལ་ལྡན་འཇམ་དབྱངས་ཏེ། །སྲུང་བའི་
10-11-3b


འཁོར་ལོ་རབ་སྦྱོར་བ། །གལ་ཏེ་བདག་བསྒོ་ལས་འདས་ན། །རྡོ་རྗེ་འབར་བའི་གཟུགས་ལྡན་པ། །སྐུ་གསུམ་བྱུང་བས་དགས་བྱ་སྟེ། །འཇིག་འགྱུར་འདི་ལ་གདོན་མི་ཟ། །ཞེས་པས་བགེགས་ལ་བཀའ་བསྒོ་བར་བྱའོ། །གསུམ་པ་ནི་ཕུར་བུ་གཅིག་
གི་མགུལ་དུ་དར་དམར་པོའི་ཅོད་པན་དང་།  ཉུངས་ཀར་གྱི་ཐུམ་བུ་བཏགས་པ་མདུན་དུ་བཞག་ནས།  བསང་སྦྱངས་སྟོང་པའི་ངང་ལས། ཧཱུྃ་ལས་ཡེ་ཤེས་ཀྱི་ཕུར་བུ་སྟོད་ཁྲོ་བོ་བདུད་རྩི་འཁྱིལ་པ།  ཞལ་གསུམ་ཕྱག་དྲུག་གི་རྣམ་པ་ཅན།  ལྟེ་བ་
མན་ཆད་རྡོ་རྗེ་རྩེ་གཅིག་པའི་རྣམ་པ་ཅན་དུ་བསྒོམ་སྟེ།  དཀྱིལ་འཁོར་གྱི་དབུས་སུ་བཏབ་ནས།  ལག་པ་གཡོན་པས་ཕུར་བུའི་མགུལ་པ་ནས་བཟུང་།  གཡས་པས་རྡོ་རྗེ་ཐོ་བས་བརྡུངས་ཏེ།  ཨོཾ་གྷ་གྷ།  གྷ་ཏ་ཡ་གྷ་ཏ་ཡ།  སརྦ་དུཥྚན་ཕཊ་ཕཊ།  ཀཱི་ལ་ཡ་
ཀཱི་ལ་ཡ་སརྦ་པ་པཾ་ཕཊ་ཧཱུྃ་ཧཱུྃ་ཧཱུྃ།  བཛྲ་ཀཱི་ལ་ཡ་བཛྲ་དྷ་རོཏ།  ཨཛྙཱ་པ་ཡ་ཏི།  ཀཱ་ཡ་ཝཱཀ་ཙིཏྟ།  བཛྲ་ཀཱི་ལ་ཡ་ཧཱུྃ་ཕཊ།  ཅེས་བརྗོད་ཅིང་གདབ་བོ། །དེ་ནས་ཕུར་བུ་ལས་བྱུང་བའི་འོད་ཟེར་གྱིས་འོག་རྡོ་རྗེའི་ས་གཞི།  ཁོར་ཡུག་རྡོ་རྗེའི་རྭ་བ།  སྟེང་རྡོ་རྗེའི་གུར་དང་
བླ་རེ།  ཡེ་ཤེས་ཀྱི་མེ་འབར་བ་དང་བཅས་པར་གྱུར་ཏེ།  བགེགས་དང་བྲལ་བར་བསམ་མོ། །གསུམ་པ་སྟ་གོན་གྱི་ཆོ་ག་ལ་ལྔ་སྟེ།  སའི་ལྷ་མོ་སྟ་གོན།  ལྷ་སྟ་གོན།  བུམ་པ་སྟ་གོན།  སངས་རྒྱས་ལ་གསོལ་བ་བཏབ་པ།  སློབ་མ་སྟ་གོན་ནོ། །དང་པོ་
ནི།  ས་ཆོག་དང་འབྲེལ་མར་བྱེད་ན་བདག་བསྐྱེད་ལོགས་སུ་མི་དགོས་ལ།  མ་འབྲེལ་ན་ཕྱོགས་སྐྱོང་ལ་སྔོན་འགྲོ་གཏོར་མ་དང་གནས་དང་ཡོ་བྱད་བྱིན་བརླབ་དང་།  མཎྜལ་ཞུ་འབུལ་བྱས་ནས་བདག་བསྐྱེད་བཟླས་པ་དང་བཅས་པ་བྱས་ཏེ།  ས་ཕྱོགས་དེར་དྲི་
10-11-4a


བཟང་གིས་བྱུག་པའམ་མཎྜལ་གྱི་དབུས་སུ་མེ་ཏོག་གི་ཚོམ་བུ་དང་།  མཐའ་སྐོར་དུ་མཆོད་པ།  སའི་ལྷ་མོའི་གཏོར་མ་བཤམ།  དེ་ནས་རང་གི་ལག་པ་གཡས་པར་ཟླ་བའི་དཀྱིལ་འཁོར་གྱི་དབུས་སུ་ཧཱུྃ་ཡིག་འབར་བ་བསམས་ནས་དེ་
ས་ལ་བརྡབ་པ་དང་། ཧཱུྃ་ཞེས་པའི་སྒྲ་ལན་གསུམ་གྱིས་ས་འོག་ནས།  སའི་ལྷ་མོ་སྐུ་མདོག་སེར་མོ།  དགའ་བ་དང་ལྡན་པའི་ཐུགས་ཅན།  རྒྱན་ཐམས་ཅད་ཀྱིས་བརྒྱན་པ།  ལུས་ཕྱེད་དམ་རིལ་པོ་ཐོན་པ་ཡང་རུང་སྟེ་སྤྱན་དྲངས་ནས།  ཨོཾ་པྲྀ་ཐཱི་ཝཱི་དེ་ཝཱི།  ཨོཾ་
བཛྲ་པུཥྤེ་ཨཱཿཧཱུྃ།  ཞེས་སོགས་རོལ་མོའི་བར་གྱིས་མཆོད་ནས།  ཨོཾ་ཨཱཿཧཱུྃ་ལན་གསུམ་གྱིས་གཏོར་མ་བྱིན་གྱིས་བརླབ།  ལག་པ་གཡས་པས་མཆོག་སྦྱིན་དུ་བྱས་ཏེ།  ཨ་ཀཱ་རོའི་སྔགས་ལན་གསུམ་གྱིས་གཏོར་མ་ཕུལ་ནས་རྡོ་རྗེ་དྲིལ་བུ་འཛིན་པས།  
སྐྱབས་དང་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་གྱི་ཁྱད་པར་དང་། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་ཀྱི་སྡེ། །ཕམ་པར་
བྱས་ཏེ་དཀྱིལ་འཁོར་བྲི། །ཞེས་པ་ལན་གསུམ་གྱི་གསོལ་བ་བཏབ་ནས།  ཨོཾ་པྲྀ་ཐཱི་ཝཱི་དེ་ཝཱི་བཛྲ་མུཿཞེས་པས།  སའི་ལྷ་མོ་ས་དེ་ཉིད་ལ་ཐིམ་པར་བསམ་མོ། །གཉིས་པ་ནི།  སའི་ལྷ་མོའི་མཆོད་པ་དམན་པ་རྣམས་བསལ་ཏེ།  དཀྱིལ་འཁོར་གྱི་
དབུས་སུ་ལྷའི་གནས་ཅི་ལྟ་བ་བཞིན་དུ་དྲིའི་ཐིག་ལེ་དང་།  མེ་ཏོག་གི་ཚོམ་བུ་བཀོད་དེ།  སོ་སོའི་སྔགས་ལན་གསུམ་གསུམ་བཟླ་བར་བྱའོ། །དེ་ནས་སྔར་ས་ཆོག་བྱས་ནས་ནམ་མཁའི་དཀྱིལ་འཁོར་ཕབ་སྟེ།  ཞལ་ཕྱག་གསལ་བཏབ་ནས་མཆོད་བསྟོད་
10-11-4b


བདུད་རྩི་མྱང་བས་ཆོག་ལ།  ས་ཆོག་མ་བྱས་ན་སྔར་ལྟར་བདག་མདུན་ཐ་མི་དད་ཀྱི་ཏིང་ངེ་འཛིན་གསུམ་མམ།  ཡང་ན་གཞལ་ཡས་ཁང་སྒྲུབ་ཐབས་ལྟར་བསྐྱེད་ནས་དེའི་ནང་དུ།  ལྷ་རྣམས་སྐད་ཅིག་གིས་བསྐྱེད་པའམ་ཡན་ལག་བཞི་རྫོགས་སུ་བྱ་བ་
གང་རུང་བྱ་བར་སྨན་ཞབས་ཀྱིས་བཤད་པ་ལྟར་བྱས་ལ།  སྔ་མ་ལྟར་ན་བདག་བསྐྱེད་ཀྱི་མཆོད་པའི་སྐབས་སུ།  ལྷ་ཡི་མཆོད་ཡོན་དམ་པ་འདི། །ཞེས་སོགས་ཚིགས་བཅད་དང་སྦྱར་བའི་མཆོད་པ་ཕ་རྒྱུད་གཞན་དང་ཆ་མཐུན་པ་དང་།  འདོད་ཡོན་ལྔའི་
སྐབས་སུ་གཟུགས་སོགས་ཐབས་ཀྱི་ངོ་བོར་བྱས་པ་དང་།  གཟུགས་སོགས་ཤེས་རབ་ཀྱི་ངོ་བོར་བྱས་པའི་ཚིགས་བཅད་དང་།  ནང་མཆོད་ཀྱི་སྐབས་སུ་འདིའི་བླ་མ་བརྒྱུད་པ་དང་།  དཀྱིལ་འཁོར་གྱི་ལྷ་ལ་ཕུལ་བའི་རྗེས་སུ་བདག་ཉིད་ཀྱི་ཡེ་ཤེས་ཀྱི་དཀྱིལ་
འཁོར་ཚིམ་པ་དང་།  ཆོས་སྐྱོང་ནས་རིགས་དྲུག་གི་བར་ལ་འབུལ་བའི་ཚུལ་དཀྱིལ་འཁོར་གཞན་དང་ཐུན་མོང་བ་ལྟར་བྱ་སྟེ།  འོག་དངོས་གཞིའི་སྐབས་སུ་ཡང་འདི་བཞིན་དུ་ཤེས་པར་བྱ།  ཕྱི་མ་ལྟར་ན་མདུན་བསྐྱེད་ཀྱི་ཚུལ་དུ།  མཆོད་བསྟོད་བདུད་རྩི་མྱང་
བ་བྱ་སྟེ།  ཇི་སྐད་བཤད་པ་བཞིན་ནོ། །གསུམ་པ་ནི།  མཚན་ཉིད་དང་ལྡན་པའི་བུམ་པ་གཉིས།  ཁ་རྒྱན་མགུལ་ཆིང་དང་བཅས་པའི་ནང་དུ་འབྲུ་ལྔ་ལ་སོགས་པའི་རྫས་སུམ་ཅུ་སོ་ལྔ་བླུགས་ཏེ།  དུང་ཆོས་དྲི་བཟངས་ཀྱི་ཆུས་བཀང་བའི་སྟེང་དུ།  རྡོ་རྗེ་ལ་
གཟུངས་ཐག་བཏགས་པ་མདུན་དུ་བཞག་ནས།  བསང་སྦྱང་སྟོང་པའི་ངང་ལས།  བུམ་པ་མཚན་ཉིད་དང་ལྡན་པར་བསྐྱེད་པའི་རྣམ་རྒྱལ་བུམ་པའི་ནང་དུ་ལྷ་ཐམས་ཅད་དང་།  ལས་ཐམས་ཅད་པའི་བུམ་པར་བདུད་རྩི་འཁྱིལ་པ་སྐད་ཅིག་གིས་བསྐྱེད་
10-11-5a


ནས།  ཡན་ལག་བཞི་རྫོགས་སུ་བྱ་སྟེ།  ཕྱི་ནང་གི་མཆོད་པ་དང་།  བསྟོད་པ་རྣམས་བྱས་ནས་གཙོ་བོའི་སྔགས་བརྒྱ་རྩ་བརྒྱད།  འཁོར་རྣམས་ཀྱི་ཉེར་གཅིག་རེ།  བདུད་རྩི་འཁྱིལ་བའི་སྔགས་བརྒྱ་རྩ་བརྒྱད་བཟླས།  སླར་ཡང་མཆོད་བསྟོད་
སྔར་བཞིན་བྱས་ནས་དུང་ཆོས་ཀྱི་ཆུ་བུམ་པ་གཉིས་སུ་བླུགས་ཏེ།  ལྷ་རྣམས་ཞུ་བ་ལས་བྱུང་བའི་བུམ་པའི་ཆུར་བསམ་མོ། །དེ་ནས་སོ་སོའི་ཀུ་ཤས་ཆུ་གཏོར་ཏེ།  རྣམ་རྒྱལ་ལ་བདག་གི་སློབ་མ་ཐམས་ཅད་ལ་དབང་བསྐུར་བར་མཛོད་ཅིག་ཅེས་དང་།  ལས་བུམ་ལ་
བདག་གི་སློབ་མ་ཐམས་ཅད་ཀྱི་བགེགས་བཟློག་ཏུ་གསོལ།  ཞེས་སྙན་གསན་དབབ་བོ། །བཞི་པ་ནི་པུས་བཙུགས་ཐལ་མོ་སྦྱར་བའི་ཀུན་སྤྱོད་ཀྱི།  བཅོམ་ལྡན་འཇམ་པའི་རྡོ་རྗེ་མཆོག །རིག་སྔགས་རྒྱལ་ལ་ཕྱག་འཚལ་ལོ། །སློབ་མ་རྣམས་ལ་
བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །ཐུགས་རྗེའི་བདག་ཉིད་ཅན་རྣམས་ཀྱི། །དཀྱིལ་འཁོར་བདག་ཉིད་འབྲི་བར་འཚལ། །བཅོམ་ལྡན་བདག་ནི་གུས་པ་ལ། །དེ་ནི་གནང་བ་མཛད་པར་རིགས། །སངས་རྒྱས་འགྲོ་འཁོར་བྱ་
དོན་སྩོལ། །བྱང་ཆུབ་སེམས་དཔའ་འབྲས་གནས་དང་། །གང་གཞན་གསང་སྔགས་ལྷ་རྣམས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། །གང་སུ་ལྷ་ཡི་སྤྱན་མངའ་བའི། །སེམས་ཅན་བསྟན་ལ་དགའ་བ་
རྣམས། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བགྱི་བ་ཡིས། །དཀྱིལ་འཁོར་འཇམ་དཔལ་བྱུང་བ་ནི། །འགྲོ་བ་དག་པར་བྱ་བའི་ཕྱིར། །ཡོ་བྱད་ཅི་འབྱོར་པས་འབྲི་ན། །དེང་བདག་སློབ་མར་བཅས་པ་ལ། །ཐུགས་
10-11-5b


ནི་བརྩེ་བས་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པར་མཛད་དུ་གསོལ། །ཞེས་ལན་གསུམ་གསོལ་བ་གདབ་པའོ། །དེ་ནས་ལྷའི་བསྐྱེད་ཆོག་སྔ་མ་ལྟར་ན་སྐབས་འདིར་གཏོར་མ་རྣམས་བསྔོས་ནས་
རྗེས་ཀྱི་ཆོ་ག་བྱ་སྟེ། ཧཱུྃ་བཛྲ་ཨུཊྚྀ་ཥྛ་ཞེས་པའི་སྔགས་དང་ཕྱག་རྒྱས་དཀྱིལ་འཁོར་ནམ་མཁར་བཏེག་ནས།  རང་ཉིད་གཙོ་བོའི་ཐུགས་ཀ་ནས་བྱེ་བའི་འཇམ་པའི་རྡོ་རྗེའི་སྐུར་བསམས་ལ།  བསྐྱེད་ཆོག་ཕྱི་མ་ལྟར་ན་རྗེས་ཆོག་སློབ་མ་སྟ་གོན་གྱི་རྗེས་སུ་བྱ་
བའམ།  སྐབས་འདིར་བྱ་བ་གང་རུང་བྱ་སྟེ།  དེ་ནས་དཀྱིལ་འཁོར་ནམ་མཁར་བཏེག་ནས་སླར་ཡང་ནམ་མཁའི་དཀྱིལ་འཁོར་ལ་མཆོད་བསྟོད་བྱའོ། །ལྔ་པ་ནི།  མཚན་ཉིད་དང་ལྡན་པའི་སློབ་མ་ཁྲུས་བྱས།  ཕྱག་དང་མཎྜལ་སྔོན་དུ་འགྲོ་བ་ལ།  དཀྱིལ་
འཁོར་གྱི་ནི་ཆོ་ག་ལས། །འཁོར་བཞིའི་ཆར་ཡང་རྗེས་སུ་གནང་། །རང་གི་བསླབ་དང་ཤིན་ཏུ་ལྡན། །ཐེག་ཆེན་ལ་དགའི་བདག་ཉིད་ཅན། །ལ་ལ་གསང་སྔགས་གྲུབ་དོན་གཉེར། །འདི་ནི་དཀྱིལ་འཁོར་འཇུག་པར་བྱེད། །བསོད་ནམས་འདོད་
པས་དེ་ལས་གཞན། །གཞན་དག་འཇིག་རྟེན་གཞན་དོན་གཉེར། །འཇིག་རྟེན་ཕ་རོལ་གཉེར་བ་ཡིས། །དད་པ་མང་དུ་བྱེད་པ་ཡི། །བློ་ལྡན་དཀྱིལ་འཁོར་འཇུག་བྱ་ཡི། །ཚེ་འདིའི་འདོད་པར་གྱུར་པ་ལ། །འཇིག་རྟེན་ཕ་རོལ་དོན་མེད་འབྱུང་། །
འཇིག་རྟེན་ཕ་རོལ་དོན་གཉེར་གྱིས། །འཇིག་རྟེན་འདི་ཡི་འབྲས་བུ་རྒྱས། །ཞེས་པའི་དོན་བཤད་དེ།  སེམས་ཅན་གྱི་དོན་དུ་སངས་རྒྱས་ཐོབ་འདོད་ཀྱི་བསམ་པ་བརྟན་པོ་བསྐྱེད་དུ་གཞུག་གོ།  དེ་ནས་སློབ་མ་རྣམས་རང་གི་ཞལ་ནས་ཞུགས་སྐུའི་
10-11-6a


དབྱིབས་བརྒྱུད།  གསང་བ་ནས་དབྱུང་།  ཡུམ་གྱི་བྷ་གར་གནས་པ་ལ་བྱང་ཆུབ་ཀྱི་སེམས་ཀྱིས་དབང་བསྐུར་ནས་ལུས་ངག་ཡིད་གསུམ་གྱི་དྲི་མ་དག་པར་བྱས་ནས།  དཀྱིལ་འཁོར་གྱི་སྒོ་དྲུང་དུ་གནས་པས།  དགའ་ཆེན་ཁྱོད་བདག་
སྟོན་པ་བས། །སློབ་དཔོན་ཁྱེད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་སྟོན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །
སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །ཞེས་ལན་གསུམ་གསོལ་བ་གདབ་བོ། །དེ་ནས་སློབ་དཔོན་སྙིང་རྗེ་དང་ལྡན་པས།  ཁྱོད་ནི་ཚུལ་ཆེན་སྣོད་ཡིན་ཏེ། །བུ་ཚུར་ཐེག་
པ་ཆེན་པོ་ཡི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་མགོན་པོ་རྣམས། །འགྲོ་ལ་ཕན་པར་བཞུགས་པ་རྣམས། །དེ་དག་
ཀུན་གྱིས་གསང་སྔགས་ཀྱི། །ཆོ་ག་མཆོག་བཟང་འདི་བརྙེས་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །མཐུ་དང་མཉམ་མེད་ཡེ་ཤེས་དེས། །ཤཱཀྱ་སེང་གེ་སྐྱོབ་པ་ཡིས། །བདུད་སྡེ་ཤིན་ཏུ་མི་བཟད་པའི། །
དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡི་བློ་གྲོས་འདི་གྱིས་ཤིག །ཅེས་བརྗོད་ནས་དོན་བཤད་ལ།  སེམས་མ་བསྐྱེད་པ་བསྐྱེད་ཅིང་བསྐྱེད་པ་དྲན་དུ་གཞུག་གོ།  དེ་ནས་གང་ཞིག་ཐོག་མེད་ལ་སོགས་པ་བརྗོད་ཅིང་
10-11-6b


རྒྱུན་བཤགས་བྱ།  ལས་ཐམས་ཅད་པའི་བུམ་པའི་ཆུས་སློབ་མ་རྣམས་བསངས་ལ།  སྙིང་ཁ།  ལྐོག་མ།  སྤྱི་བོ་རྣམས་སུ།  རྡོ་རྗེ་དང་།  པདྨ་དང་།  འཁོར་ལོ་བསྐྱེད་པའི་ལྟེ་བར། ཧཱུྃ་ཨཱཿཨོཾ་བཀོད་དེ།  རྡོ་རྗེ་དང་བཅས་པའི་ཁུ་ཚུར་གྱིས་དྲི་བཟང་པོ་དང་སྦྱར་བའི་
ཆུས།  ཐིག་ལེ་བྱ་ཞིང་འབྲུ་གསུམ་བརྗོད་དེ་སྐུ་གསུང་ཐུགས་ཀྱི་རང་བཞིན་དུ་བྱིན་གྱིས་བརླབ།  སྤྱི་བོར་མེ་ཏོག །མདུན་དུ་སྤོས་དང་མར་མེ།  སྙིང་གར་བྱུག་པ་རྣམས་ཀྱིས་མཆོད།  ཨ་ཤྭད་ཨུ་དུམ་འབར་བ་ཡི། །སོ་ཤིང་སོར་ནི་བཅུ་གཉིས་པ། །མ་ཡོ་མ་
གས་སྲོག་ཆགས་མེད། །རྩེ་མོར་མེ་ཏོག་བཅས་པ་སྦྱིན། །ཅེས་པའི་སོ་ཤིང་ཤར་རམ་བྱང་དུ་བསྟན་ནས་ས་ལ་མ་ལྷུང་བའི་བ་ཡི་ལྕི་བ་ཀོ་བ་ཙམ་བྱུགས་ལ་མེ་ཏོག་ཚོམ་བུ་ལ་དོར་ཏེ།  ཞི་བ་ལ་སོགས་པའི་དངོས་གྲུབ་གང་འགྲུབ་བརྟག །ཨོཾ་ཧྲཱིཿབི་ཤུདྡྷཿསརྦཱ་དྷརྨཱཿཔཱ་
པཾ་ནི་ཙ་སཾ་ཤོ་དྷ་ཡ་སརྦ་བི་ཀལྤན་ཨ་པ་ན་ཡ་ཧཱུྃ།  ཞེས་བརྗོད་ལ་ཁྱོར་ཆུ་ལན་གསུམ་བླུད།  སྲུང་སྐུད་དམར་པོ་གསུམ་བསྒྲིལ་དུ་བྱས་པ་ལ།  རྡོ་རྗེའི་མདུད་པ་གསུམ་བྱས་ནས་བསང་སྦྱང་སྟོང་པའི་ངང་ལས་སྲུང་སྐུད་དུ་བསྐྱེད།  སྟ་གོན་གྱི་ལྷའི་ཐུགས་
ཀ་ནས་ཡེ་ཤེས་ཀྱི་སྲད་བུ་སྤྱན་དྲངས་ནས་བསྟིམ་སྟེ་སྐྱེས་པའི་དཔུང་པ་གཡས་དང་།  བུད་མེད་ཀྱི་གཡོན་དུ་གདགས།  གཉིས་ཀའང་ལས་ཐམས་ཅད་པའི་སྔགས་ཀྱིས་བྱའོ། །ཟབ་མོའི་ཆོས་བཤད་པ་ནི།  འཇིག་རྟེན་དུ་ནི་ཀུན་མཁྱེན་རྣམས། །ཨུ་དུམ་
ཝཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ནི་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་པ་
10-11-7a


བྱེ་བ་དུ་མ་རུ། །སྡིག་པ་བགྱིས་པར་གྱུར་པ་གང་། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་བྱང་བར་འགྱུར་ལགས་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་
གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །གང་དག་སྤྱོད་པ་མཆོག་འདི་ལ། །བློ་གྲོས་ཤིན་ཏུ་མི་གཡོ་བ། །དེ་དག་གིས་ནི་ངན་འགྲོའི་རྒྱུན། །སྡུག་བསྔལ་ཀུན་འབྱུང་རབ་ཏུ་བཅད། །བདག་ཉིད་ཆེན་པོ་ཁྱེད་རྣམས་ཀྱི། །
རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱིས་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པ། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་
འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །རང་བྱུང་སྐལ་བ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །ཞེས་པའི་
དོན་བཤད་ནས་འདུད་རྩི་ཐབས་སྦྱོར་གྱི་སྔགས་ཀྱིས་བསྲུང་བ་བྱས་ལ་ཀུ་ཤའི་མལ་ལ་ཉལ་དུ་བཅུག་ནས་རྨི་ལམ་མཐོང་བ་གང་ཡིན་པ་ནངས་པར་ང་ལ་སྨྲོས་ཤིག །ཅེས་བསྒོས་ཏེ།  སློབ་དཔོན་དུ་དབང་བསྐུར་བར་འོས་པའི་སློབ་མས་མཎྜལ་ཕུལ་ནས།  
མི་ལྡོག་འཁོར་ལོའི་དབང་བསྐུར་བ། །སྩལ་ནས་མགོན་པོས་བདག་ལ་ནི། །འཁོར་ལོ་ལྷ་ཡི་དེ་ཉིད་དང་། །སློབ་དཔོན་གྱི་ནི་ལས་རྣམས་དང་། །སངས་རྒྱས་ཀུན་གྱི་དམ་ཚིག་དང་། །སྡོམ་དང་གསང་བ་དམ་པ་ནི། །སེམས་ཅན་ཀུན་གྱི་དོན་
10-11-7b


གྱི་ཕྱིར། །རྟག་ཏུ་སློབ་དཔོན་བདག་འགྱུར་གསུངས། །ཞེས་ལན་གསུམ་གསོལ་བ་གདབ་ཅིང་།  སངས་རྒྱས་བྱང་ཆུབ་སེམས་དཔའ་ཀུན། །བདག་ལ་ཡང་དག་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །ཞེས་སོགས་རིགས་ལྔའི་སྡོམ་
པ་ལན་གསུམ་དུ་གཟུང་བར་བྱའོ། །བཞི་པ་དཀྱིལ་འཁོར་ཞག་གི་ཆོ་ག་ལ་བཞི་སྟེ།  དཀྱིལ་འཁོར་བྲི་ཞིང་རྒྱན་བཀྲམ་པ།  སྒྲུབ་ཅིང་མཆོད་པ།  བདག་ཉིད་འཇུག་ཅིང་དབང་བླང་བ།  སློབ་མ་གཞུག་ཅིང་དབང་བསྐུར་བའོ། །དང་པོ་ནི།  དེའི་ནུབ་མོ་
དགེ་བའི་བྱ་བ་ལ་བརྩོན་ཅིང་།  ཉལ་བའི་རྣལ་འབྱོར་གྱིས་ཉལ་ནས་སང་ནངས་པར་ལྷ་སྟ་གོན་གྱི་ཚོམ་བུ་དང་མཆོད་པ་དམན་པ་རྣམས་བསལ་ལ།  ཚོན་རྩི་ཁ་དོག་ལྔ་ལ་བྷྲཱུྃ།  ཨཱཾ།  ཛྲཱིཾ།  ཁཾ། ཧཱུཾ་རྣམས་བྲིས་པ་སྔོན་པོ་དབུས་དང་།  དཀར་པོ་ཤར་ལ་སོགས་
པའི་ཕྱོགས་སུ་བཀོད་ནས་སྲད་བུ་ཁ་དོག་ལྔ་ཡང་སོ་སོར་བཞག །མདུན་དུ་མཆོད་པ་རྣམ་པ་ལྔ་དང་གཏོར་མ་བཤམ་སྟེ།  བསང་སྦྱང་སྟོང་པའི་ངང་ལས་ཧཱུྃ།  བྷྲཱུྃ།  ཨཱཾ།  ཛྲཱིཾ།  ཁཾ།  རྣམས་ལས་སྒྲུབ་པའི་ཐབས་ལས་འབྱུང་བའི་ཚུལ་གྱིས་མི་
བསྐྱོད་པ་ལ་སོགས་པའི་རིགས་ལྔར་བསྐྱེད་ལ།  རང་གི་མིག་གཉིས་སུ་ཛཿལས་ཉི་མ་དང་ཟླ་བ་འོད་འབར་བ་བསྐྱེད་དེ།  མིག་རྫི་མ་མྱུར་དུ་བརྡབ་པའི་སྦྱོར་བས་རྣམ་པར་སྣང་མཛད་ལ་སོགས་པའི་ཐུགས་ཡེ་ཤེས་ཀྱི་སྲད་བུ་དང་ཚོན་གྱི་རྣམ་པར་སྤྱན་དྲངས་ནས།  སྲད་
བུ་དང་།  ཚོན་སོ་སོ་ལ་ཐིམ་པར་བསམས་ཤིང་།  རྣམ་སྣང་ལ་སོགས་ཐུགས་ཡེ་ཤེས། །སྲད་བུ་ཐམས་ཅད་བྱེད་དང་བཅས། །རང་གི་འཁོར་ལོ་ཐིག་གདབ་ཕྱིར། །རྟག་པའི་ཐིག་ནི་སྩལ་དུ་གསོལ། །ཞེས་པ་མི་བསྐྱོད་ཐིག་ནི་སྩལ་དུ་གསོལ་
10-11-8a


ཞེས་པའི་བར་འདོན་པ་བསྒྱུར་ནས་མེ་ཏོག་ལ་སོགས་པ་ལྔས་མཆོད།  ཨ་ཀཱ་རོའི་སྔགས་ཀྱིས་གཏོར་མ་ཕུལ་ནས་རིགས་ལྔ་ཞུ་བ་ལས་བྱུང་བའི་ཐིག་ཚོན་དུ་བསམ་མོ། །དེ་ནས་ཐིག་རྣམས་རང་གི་ལག་པ་གཡོན་དུ་བཟུང་བ།  
གཡས་པས་སློབ་མ་ལ་རིམ་པ་བཞིན་གཏད་དེ།  ཨོཾ་ཨཱཿཨ་ཉོ་ཉ་ཨ་ནུ་ག་ཏ།  སརྦ་དྷརྨཱཿསྥ་ར་སྥ་ར།  ཨ་ནུ་པྲ་བིཥྚཿསརྦ་དྷརྨཱཿབཛྲ་ཨཉྫ་ལི་ཡི་ཨ་དྷ་ཡནྟ་ཨ་ནུ་པྲ་བིཥྚ་སརྦ་དྷརྨཱཿཧཱུཾ།  ཞེས་བརྗོད་ཅིང་།  དྲི་བཟངས་ཀྱི་ཆུས་སྦངས་ནས་རྡོ་རྗེའི་ལྟེ་བར་དཀྲིས་ཏེ།  
བསྲུང་བ་བྱས་ལ་བཞག་གོ།  དེ་ནས་ཚོན་རྣམས་ཨོཾ་བཛྲ་ས་མ་ཡ་ཙི་ཏྲ་མ་ཏི་ཀྲ་མ་ཧཱུྃ།  ཞེས་བརྗོད་ཅིང་མཐེབ་སྲིན་གྱིས་མཉེས་ལ་བཞག་གོ།  དེ་ནས་སློབ་དཔོན་གྱིས་གཡོན་པའི་ཁུ་ཚུར་གྱིས་ཐིག་སྐུད་ལྟེ་བར་བཟུང་ནས་ལས་ཀྱི་རྡོ་རྗེ་ལ་ཛཿགསུམ་
བཟླས་ནས་གཏད།  དེས་ཀྱང་ཛཿགསུམ་བཟླས་ནས་བླངས་ཏེ།  ནམ་མཁའ་གང་བའི་དེ་བཞིན་གཤེགས། །ཁྱེད་ཀྱིས་འགྲོ་དོན་མཛད་དུས་ལགས། །ཐིག་སྐུད་སྒྲ་ཡིས་བསྐུལ་ནས་ནི། །ཁྱེད་རྣམས་འདིར་ནི་གཤེགས་སུ་གསོལ། །ཨོཾ་བཛྲ་ས་
མ་ཡ་སུ་ཏྲ་མ་ཏི་མ་ཀྲ་མ་ཧཱུྃ་ཞེས་བརྗོད་ཅིང་།  མཐེབ་སྲིན་གཡས་པས་ཐིག་སྐུད་འོག་ནས་བསྐོར་ཞིང་སྟེང་དུ་ཐིག་གདབ།  དེ་ནས་ས་ལ་ཡང་གདབ།  དེའི་རིམ་པ་ཡང་སློབ་དཔོན་ནུབ་དང་།  སློབ་མ་ཤར་དུ་གནས་པས་ཚངས་ཐིག་དང་པོ་གདབ།  དེ་བཞིན་དུ་ལྷོ་
དང་བྱང་ན་གནས་པས་ཚངས་ཐིག་གཉིས་པ།  མེ་དང་དབང་ལྡན་དུ་གནས་པས་ཤར་གྱི་ལོགས་ཐིག །རླུང་དང་སྲིན་པོར་གནས་པས་ནུབ་ཀྱི་ལོགས་ཐིག །སློབ་དཔོན་དེ་ཉིད་དང་།  སློབ་མ་དབང་ལྡན་དུ་གནས་པས་བྱང་གི་ལོགས་ཐིག །མེ་དང་སྲིན་པོར་གནས་
10-11-8b


པས་ལྷོའི་ལོགས་ཐིག །སློབ་དཔོན་དེ་ཉིད་དང་།  སློབ་མ་རླུང་དུ་གནས་པས་མཚམས་ཐིག་དང་པོ།  སྲིན་པོ་དང་དབང་ལྡན་དུ་གནས་པས་མཚམས་ཐིག་གཉིས་པ་གདབ།  ལུགས་འདི་ལ་དབུས་ནས་ལྕགས་རི་གཡས་བསྐོར་དུ་སྐོར་བ་ཡང་བཤད་དོ། །དེ་
ནས་སློབ་དཔོན་ནུབ་ཕྱོགས་ནས་ཡེ་ཐིག་བཏེག་ནས་དཀྱིལ་འཁོར་གྱི་དབུས་སུ་ཞུགས་ཏེ།  ཧྲཱིཿབརྗོད་པས་སྒོ་དབྱེ་བར་བསམ་མོ། །སྐབས་འདིར་ལས་ཐིག་གདབ་པར་བཤད་ཀྱང་།  ས་ཆོག་དང་།  སྟ་གོན་གྱི་བར་དུ་ལས་ཐིག་གདབ་པ་ཆོ་ག་གཞན་ལྟར་
བྱས་ན་འགལ་བ་གང་ཡང་མེད་དོ། །དེ་ནས་སློབ་དཔོན་གྱིས་དཀྱིལ་འཁོར་གྱི་དབུས་སུ་འདུག་ནས་དབང་ལྡན་གྱི་རྩིག་པ།  ཕྱི་ནས་རིམ་པ་བཞིན་དཀར་སེར་དམར་ལྗང་སྔོ་བ་སྒོ་ཚད་གཅིག་གི་བར་བྲིས་ཏེ།  དེའི་ཚེ་ཨོཾ་བཛྲ་ཙི་ཏྲ་ས་མ་ཡ་ཧཱུྃ།  འདི་ནི་ཆོས་
དབྱིངས་དག་པ་སྟེ། །སེམས་ཅན་རྣམས་ནི་གྲོལ་བྱེད་པ། །འཇམ་དབྱངས་རྒྱལ་པོ་རང་ཉིད་ནི། །དེ་བཞིན་གཤེགས་པ་ཀུན་གྱི་གནས། །ཉེས་པ་ཀུན་ལས་རྣམ་གྲོལ་བ། །འཁོར་ལོའི་ནང་ན་ཡང་དག་གནས། །ཞེས་བརྗོད་དེ།  དེའི་སྟེང་དུ་ཐོད་པ་ལ་
སོགས་པས་བཀབ་སྟེ་རྡོ་རྗེ་བཞག་ནས་བསྲུང་སྟེ་མཆོད་དོ། །དེ་ནས་གཞན་གྱིས་དཀྱིལ་འཁོར་གྱི་དབུས་ནས་བརྩམས་ཏེ་རིམ་པ་བཞིན་འབྲི་སྟེ།  སྔར་ལས་ཐིག་གི་སྐབས་སུ་དཀྱིལ་འཁོར་རྟ་བབས་དཔངས་སུ་སྒོ་ཚད་གཅིག་མ།  ཕྱི་རོལ་རྡོ་རྗེའི་རྭ་བ་དང་འོད་
ཟེར་ཕྲེང་བས་བསྐོར་བ་སྤྱི་དང་མཐུན་པར་གདབ།  ནང་དུ་ལྷ་སྣམ་རིམ་པ་གཅིག་བཞག་ནས་དབུས་ཆ་ཆེན་དྲུག་པ་ལ།  འོད་ཟེར་ཕྲེང་བས་ཟླུམ་པོར་བསྐོར་ནས་ཚངས་ཐིག་གི་གཡས་གཡོན་ཆ་ཕྲན་གསུམ་གསུམ་དོར་ནས་བཞི་པ་ལ་ཐིག་ཏལ་པོར་བཏབ་པས་ལེ་
10-11-9a


དགུར་འགྱུར་རོ། །ལྷ་སྣམ་ནི་ཤར་དཀར།  ལྷོ་སེར།  ནུབ་དམར།  བྱང་ལྗང་།  ལྟེ་བ་སྔོན་པོ་ཡིན་ལ།  གདན་སྒྲུབ་པའི་ཐབས་ལས་འབྱུང་བ་ལྟར་ཟླ་བ་དང་ཉི་མའི་སྟེང་དུ་དབུས་སུ་རལ་གྲི་སྔོ་བསངས།  ཤར་དུ་འཁོར་ལོ།  ལྷོར་རིན་པོ་ཆེ།  
ནུབ་ཏུ་པདྨ།  བྱང་དུ་རལ་གྲི་ལྗང་ཁུ།  ཤར་ལྷོ་ལ་སོགས་པའི་མཚམས་བཞིར།  སྤྱན་དང་།  རྡོ་རྗེ་དང་།  པདྨ་དམར་པོ་དང་།  ཨུད་པ་ལ་སྔོན་པོ་རྣམས་བྲི།  ལྷ་སྣམ་གྱི་མེ་ལ་སོགས་པའི་མཚམས་བཞི་དང་།  ཤར་གྱི་གཡས་གཡོན་དུ་མེ་ལོང་དང་།  པི་ཝང་དང་།  
དྲིའི་དུང་དང་།  རོའི་སྣོད་དང་།  གོས་དང་།  ཆོས་འབྱུང་བྲི།  སྒོ་བཞིའི་ཐད་སོར་ཐོ་བ་དང་།  དབྱིག་པ་དང་།  པདྨ་དང་།  རྡོ་རྗེ་རྣམས་བྲིའོ། །གཞན་གཞལ་ཡས་ཁང་གི་ཁྱད་པར་རྣམས་ནི་སྤྱི་དང་མཐུན་ནོ། །གདན་བྲིས་ནས་མཚན་མ་མ་འགོད་པའི་བར་དེར།  ན་
མཿས་མནྟ་ཀཱ་ཡ་ཝཱཀ་ཙིཏྟ་བཛྲ་ནཾ།  ན་མོ་བཛྲ་ཀྲོ་དྷ་ཡ་མ་ཧཱ་དཾཥྚོད་ཀ་ར་བྷཻ་ར་ཝ་ཡ་ཨ་སི་མུ་ས་ལ།  པ་ར་ཤུ།  པཱ་ར་ཤུ།  པཱ་ཤ་ཧསྟ་ཡ།  ཨོཾ་ཨམྲྀ་ཏ་ཀུཎྜ་ལི།  ཁ་ཁ་ཁཱ་ཧི་ཁཱ་ཧི།  ཏིཥྛ་ཏིཥྛ།  བྷནྡྷ་བྷནྡྷ།  ཧ་ན་ཧ་ན།  གརྫ་གརྫ།  བི་སྥོ་ཊ་ཡ་བི་སྥོ་ཊ་ཡ།  སརྦ་བིག་
ནན་བི་ན་ཡ་ག་ནཾ།  མ་ཧཱ་ག་ན་པ་ཏི་ཛཱི་ཝི་ཏ།  ཨནྟ་ཀ་རཱ་ཡ་ཧཱུྃ་ཕཊ།  ཅེས་བརྗོད་ཅིང་།  བདུད་རྩི་ཐབས་སྦྱོར་གྱི་ང་རྒྱལ་གྱིས་བགེགས་བསྐྲད་པར་བཤད་དོ། །དེའི་མཐར་བུམ་པ་ཆོ་ག་བཞིན་ཕུལ་ནས་ཆུ་གསུམ་སྔོན་དུ་འགྲོ་བའི་ཉེར་སྤྱོད་དང་།  སྒོས་མཆོད་
ཅི་འབྱོར་པ་བཤམ།  བྱང་ཤར་ནས་ཤར་ལྷོའི་བར་འདས་གཏོར་དང་།  གུར་མགོན་དང་།  གདོང་བཞི་པ་དང་།  ལས་མགོན་དང་།  འཇིག་རྟེན་པའི་གཏོར་མ་རྣམས་རིམ་པ་བཞིན་བཤམ་མོ། །གཉིས་པ་ནི་སྟ་གོན་གྱི་སྐབས་ལྟར་སྔོན་འགྲོ་རྣམ་གསུམ་སྔོན་དུ་སོང་ནས་
10-11-9b


ཏིང་ངེ་འཛིན་གསུམ་གྱི་དཀྱིལ་འཁོར་བདག་མདུན་ཐ་མི་དད་ཀྱི་ཚུལ་གྱིས་བསྒོམ་པ་བཟླས་བརྗོད་ཀྱི་བར་བྱ་སྟེ།  ཁྱད་པར་ནི་ཡེ་ཤེས་ཀྱི་འཁོར་ལོ་དགུག་གཞུག་གི་དུས་སུ་སྟ་གོན་གྱི་ལྷ་ནམ་མཁར་བཏེག་པ་དེ་ཉིད་དགུག་གཞུག་བྱེད་པའོ། །འདིར་བདུད་རྩི་
མྱང་བའི་རྗེས་སུ་མཉེས་པའི་མཆོད་པ་བྱ་བར་སྨན་ཞབས་ཀྱིས་བཤད་པས།  འདོད་པའི་སྒྱུ་རྩལ་དྲུག་ཅུ་བཞི་ལ་མཁས། །ཞེས་པའི་ཚིགས་བཅད་ལྔ་སྔགས་དང་བཅས་པའམ།  བསྡུ་ན་དཀྱིལ་འཁོར་གྱི་ལྷ་རྣམས་ཐབས་ཤེས་རབ་སྙོམས་པར་འཇུག་པའི་
བདེ་བས་མཉེས་པར་བསམས་ལ།  ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཱད་མ་ཀོ྅ཧཾ།  ཞེས་བརྗོད་དེ་འཁྱུད་པའི་ཕྱག་རྒྱ་བྱའོ། །བཟླས་པའི་རྗེས་སུ་དཀྱིལ་འཁོར་བརྟན་བཞུགས་བྱས་ནས་རང་གཙོ་བོའི་ཐུགས་ཀ་ནས་བྱེ་བའི་འཇམ་པའི་རྡོ་རྗེའི་
སྐུར་བྱས་ཏེ།  དཀྱིལ་འཁོར་གྱི་ཁང་པའི་ཕྱི་རོལ་དུ་གཏོར་ཆོག་ནས་འབྱུང་བ་ལྟར་ཕྱོགས་སྐྱོང་རྣམས་ལ་གཏོར་མ་ཕུལ་ནས་ཧཱུྃ་མཛད་ཀྱི་ང་རྒྱལ་གྱིས་དཀྱིལ་འཁོར་ལ་བསྐོར་བ་ལན་གསུམ་བྱས་ནས་གཙོ་བོ་ལ་མེ་ཏོག་ཕུལ་ཏེ།  མེ་ཏོག་རང་གི་མགོ་ལ་བཅིངས་
པར་བསམས་ནས།  གཡོན་བརྐྱང་གི་སྦྱོར་བས་སྒོ་བཞི་ཕྱེ་སྟེ་རང་གནས་སུ་འཁོད་དོ། །སླར་ཡང་དཀྱིལ་འཁོར་ལ་ཕྱི་ནང་གི་མཆོད་པ་བསྡུས་པ་བྱས་ནས།  རྡོ་རྗེའི་གླུ་འདི་བླང་བར་བྱ་སྟེ། ཧཱུྃ་ཧཱུྃ་འཁོར་བ་འདོན་བྱེད་སྐུ་འཛིན་པ། །གཉིས་གཉིས་འཁྱུད་
པའི་སྦྱོར་བས་མཆོད། །འཇམ་པའི་རྡོ་རྗེ་ཁྱོད་འབའ་ཞིག །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ།  ཁྱོད་ཀྱི་ཞབས་ཀྱི་པད་མ་ལ། །ལྷ་དང་མི་ཡིས་འདུད་པའི་མཆོག །སྤྲུལ་པའི་མེ་ཏོག་སྣ་ཚོགས་དག །འཇམ་པའི་རྡོ་རྗེ་ཁྱོད་འབའ་ཞིག །ཏེ་ན་སོགས།  
10-11-10a


དངོས་པོ་རྣམ་གྲོལ་རྣམ་པར་བསྙེན། །གསང་བའི་གསང་བ་འཛིན་པ་ཁྱོད། །བདུད་རྩི་མཐའ་མེད་གསོལ་བ་ཁྱོད། །ཁྱོད་ཀྱི་དགོངས་པ་སངས་རྒྱས་ཡིན། །ཏེ་ན་སོགས།  རྩོམ་སྤངས་སེམས་ཅད་དོན་མཛད་པ། །རྒྱུ་མེད་
གཟུགས་ལ་ཕྱག་འཚལ་ལོ། །ཏེ་ན་སོགས།  དུང་དང་ཀུ་མུཏ་ཏ་ཡི་གཟུགས། །རྒྱ་མཚོ་དྭངས་མ་ཟླ་གཟུགས་འདྲ། །ཏེ་ན་སོགས།  རོལ་པ་གཉིས་མེད་རྣལ་འབྱོར་མཛད། །རྡོ་རྗེ་དྲིལ་བུ་ཕྱག་རྒྱ་འཛིན། །ཏེ་ན་སོགས།  སྒྱུ་འཕྲུལ་ལུས་ཀྱིས་འགྲོ་བ་གཟུང་། །
རྐྱེན་གྱིས་མ་བྱས་གཟུགས་ཅན་ཡིན། །ཏེ་ན་ཧཱུྃ་ཏེ་ན་ཧཱུྃ་ཏེ་ན་ཏེ་ཏེ་ཧཱུྃ།  ཞེས་བརྗོད་པར་བྱའོ། །གསུམ་པ་ནི་འོག་ནས་འབྱུང་བ་ལྟར་སློབ་མ་ལ་དབང་ཅི་ཙམ་བསྐུར་བ་རང་ཉིད་བདག་འཇུག་གི་ཚུལ་དུ་བླངས་ནས་སློབ་མ་གཞུག་པའི་ཕྱིར་བདེན་པའི་སྟོབས་འདི་
བརྗོད་པར་བྱ་སྟེ།  ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་སེམས་དཔའ་བདག་གྲུབ་མཛོད། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་
གྱི་རྒྱལ། །མི་འགྱུར་མཆོག་ཏུ་བདག་གྲུབ་མཛོད། །ཉེས་པ་མི་མངའ་རྟག་པ་ཁྱོད། །འདོད་ཆགས་ཀུན་གྱི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་བདག་གྲུབ་མཛོད། །ཤིན་ཏུ་དག་པ་ཀུན་གྱི་མཆོག །གདོད་
ནས་གྲོལ་བ་དེ་བཞིན་གཤེགས། །ཀུན་ཏུ་བཟང་པོ་ཀུན་བདག་ཉིད། །བྱང་ཆུབ་སེམས་དཔར་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་རྒྱལ་མཆོག་གི།  གྲུབ་པའི་རྡོ་རྗེ་ཆེར་བསྟོད་པ། །རྡོ་རྗེ་སྙེམས་བདག་
10-11-10b


བདག་མཛོད་ཅིག །སེམས་ཅན་ཀུན་གྱི་ཡིད་ཁྱབ་ཅིང་། །སེམས་ཅན་ཀུན་གྱི་སྙིང་ལ་འཇུག །སེམས་ཅན་ཀུན་གྱི་ཡབ་གྱུར་ཉིད། །འདོད་ཆགས་དམ་ཚིག་མཆོག་གྱུར་པ། །བདེན་པ་གང་གི་ཡེ་ཤེས་མཆོག །ཤེས་རབ་ཐབས་བདག་
དཀྱིལ་འཁོར་ཡིན། །བདེན་པ་དེ་ཡིས་མགོན་བདག་ལ། །ཁྱོད་ཀྱི་འདོད་པ་རབ་རྫོགས་མཛོད། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་ཏུ་འབྱུང་། །དེ་
བཞིན་ཉིད་ལས་ངེས་པར་སྐྱེས། །བདེན་པ་དེ་ཡིས་དཀྱིལ་འཁོར་དུ། །གཟུགས་བརྙན་གསལ་བར་སློབ་མ་ནི། །ཀུན་གྱིས་དྲི་མ་མེད་མཐོང་ཤོག །ཅེས་ལན་གསུམ་བརྗོད་དོ། །བཞི་པ་སློབ་མ་གཞུག་ཅིང་དབང་བསྐུར་བ་ལ་གཉིས་ཏེ།  འཇུག་པ་དང་།  
དབང་གི་དངོས་གཞིའོ། །དང་པོ་ནི།  སློབ་མ་རྣམས་ཁྲུས་བྱས་ཕྱག་དང་།  ཡོན་སྔོན་དུ་འགྲོ་བས་གྲལ་རིམ་བཞིན་འཁོད་དེ།  མཎྜལ་ཕུལ་ནས་དགའ་ཆེན་ཁྱོད་བདག་སོགས་ཀྱིས་གསོལ་གདབ་དང་།  རྒྱུན་བཤགས་དང་།  རིགས་ལྔའི་སྡོམ་པ་བཟུང་བ་
སོགས་བྱས་ནས་ལས་ཐམས་ཅད་པའི་བུམ་པའི་ཆུས་བསང་གཏོར་བྱ།  ཨཱ་ཁཾ་བཱི་ར་ཧཱུྃ་གིས་གདོང་བཅིང་།  སྡུག་པ་ཁྱོད་སུ་ཞིག་ཅེས་དྲིས།  དེས་ཀྱང་བདག་ནི་སྐལ་པ་བཟང་པོ་ལགས།  ཞེས་བརྗོད།  སྔར་གྱི་སྔགས་ཀྱིས་མེ་ཏོག་གི་ཕྲེང་བ་གཏད།  དེས་ཀྱང་བླ་མ་ལ།  
ཡུལ་མཁར་ཁྱིམ་དང་གླང་པོ་རྟ། །བྲན་དང་བྲན་མོ་ཆུང་མ་སྡུག །བུ་མོ་ཤིན་ཏུ་ཡིད་འོང་དང་། །གང་གིས་རང་གི་ལུས་འདི་ཡང་། །དེང་ནས་བརྩམས་ཏེ་འབུལ་བར་བགྱི། །སློབ་དཔོན་དུ་ནི་ཉེར་གནས་ཕྱིར། །རྡོ་རྗེ་ཆེན་པོ་ཉེར་གནས་ཕྱིར། །སེམས་ཅན་ཐམས་ཅད་
10-11-11a


སྐྱབས་དོན་དུ། །བདག་གི་ལུས་འདི་དབུལ་བར་བགྱི། །ཞེས་པས་ཡོན་དབུལ།  སློབ་མའི་སྙིང་གར་ཟླ་བ་རྡོ་རྗེའི་སེམས་བསྐྱེད་དེ།  ཨོཾ་སརྦ་ཡོ་ག་ཙིཏྟ་ཨུཏྤ་ཏ་ཡ་མི་ཞེས་ཟློས་སུ་གཞུག །སྙིང་གར་རྡོ་རྗེ་བཞག་སྟེ།  སུ་ར་ཏི་ས་མ་ཡ་སྟྭཾ་ཧོ། 
སིདྡྷི་བཛྲ་ཡ་ཐཱ་སུ་ཁཾ་ཞེས་པས་བརྟན་པར་བྱ།  དེ་ནས་གསང་བ་བསྒྲག་པ་ནི།  དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཀྱིས།  དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་ཁྱོད་ཀྱིས་དཀྱིལ་འཁོར་མ་མཐོང་བ་རྣམས་ལ་སྨྲ་བར་མ་
བྱེད་ཅིག །དད་པ་དང་མི་ལྡན་པ་རྣམས་ལའང་མ་ཡིན་ནོ། །ཞེས་བརྗོད་ཅིང་དོན་བཤད་དེ།  ཁྲོ་བོ་བཞིའི་སྔགས་ཀྱིས་དགུག་གཞུག་བྱ་ཞིང་།  ཨཱ་ཁཾ་བཱི་ར་ཧཱུྃ་གིས་དཀྱིལ་འཁོར་དུ་བཅུག་ནས་དམ་ཚིག་རྣམས་འཛིན་དུ་གཞུག །དེང་ཁྱོད་དེ་བཞིན་གཤེགས་པ་
རྣམས་ཀྱི་རིགས་སུ་ཞུགས་ཀྱི།  ངས་ཁྱོད་ལ་ཡེ་ཤེས་གང་དང་གང་གིས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་ན།  དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ་དེ་ལྟ་བུའི་ཡེ་ཤེས་བསྐྱེད་པར་བྱ་ཡི།  ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་
ཀྱི་མདུན་དུ་སྨྲ་བར་མ་བྱེད་ཅིག །དམ་ཚིག་ཉམས་པར་གྱུར་ཏ་རེ།  ཡང་སྙིང་གར་རྡོ་རྗེ་གཏུགས་ལ།  ཨོཾ་རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །འབྲུ་གསུམ་
བརྗོད་ཅིང་བདུད་རྩི་ལྕེ་ལ་བཞག །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེར། །རྡོ་རྗེ་བདུད་རྩིའི་ཆུ་འཐུངས་ཤིག །ཨོཾ་བཛྲ་ཨུ་ཏ་ཀ་ཋཿཋཿཋཿདེ་ནས་དམ་བཅའ་བརྗོད་པ་ནི།  དེང་ཕྱིན་
10-11-11b


ཆད་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱི།  ངས་འདི་བྱོས་ཤིག་ཅེས་བྱ་བ་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ཏེ་དམྱལ་བར་ལྟུང་བར་གྱུར་ཏ་རེ།  ཞེས་བརྗོད་ཅིང་དོན་བཤད་པར་
བྱ།  དེ་ནས་ཡེ་ཤེས་དབབ་པ་ནི་སྔོན་དུ་གསོལ་བ་གདབ་སྟེ།  དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ།  རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག །ཅེས་བརྗོད་ལ་སློབ་མའི་རྐང་པའི་འོག་ཏུ་ཡཾ་ལས་རླུང་གི་དཀྱིལ་འཁོར་མཆོག་མ་ལ་བ་
དན་གྱིས་མཚན་པ།  རྐང་མཐིལ་གཉིས་སུ་ཛྷཻཾ་མེའི་རང་བཞིན།  སུམ་མདོར་རཾ་ལས་མེའི་དཀྱིལ་འཁོར་གྲུ་གསུམ་འབར་བ།  སྙིང་གར་ལཾ་ལས་སའི་དཀྱིལ་འཁོར་སེར་པོ་གྲུ་བཞི་པའི་མཚམས་བཞི་རྡོ་རྗེས་མཚན་པ་ལ་ཧཱུྃ།  མགྲིན་པར་བཾ་ལས་ཆུའི་
དཀྱིལ་འཁོར་ཟླུམ་པོ་དཀར་པོ་བུམ་པས་མཚན་པ་ལ་ཧ།  སྤྱི་བོར་ཡཾ་ལས་རླུང་གི་དཀྱིལ་འཁོར་ལྗང་སྔོན་ཟླ་གམ་ལ་ཨས་མཚན་པ་བསམས་ཤིང་།  རྐང་འོག་གི་རླུང་གཡོས་པས་ཛྷཻཾ་ལས་མེ་འབར།  སུམ་མདོའི་མེ་དང་གཅིག་ཏུ་འདྲེས་ཤིང་ཆེར་
འབར།  སྙིང་གའི་ས་ཚིག་མགྲིན་པའི་ཆུ་ཁོལ།  སྤྱི་བོའི་རླུང་གིས་མནན་ཅིང་།  རླངས་པ་བ་སྤུའི་སྒོ་ནས་ཕྱིར་འཕྲོས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཁ་བ་བབས་པ་ལྟར་སྤྱན་དྲངས་ལ།  དབང་པོའི་སྒོ་དང་བ་སྤུའི་བུ་ག་ནས་
ཐིམ་པར་བསམས་ཏེ།  གུ་གུལ་གྱི་དུད་པ་དང་།  རོལ་མོའི་སྒྲ་བྱ་ཞིང་།  དྲིལ་བུ་དཀྲོལ་ལ།  ཨཱ་བེ་ཤ་ཡ།  སྟྭཾ་བ་ཡ།  རཱ་རཱ་རཱ་རཱ།  ཙཱ་ལ་ཡ་ཙཱ་ལ་ཡ། ཧཱུྃ་ཨཱཿཧ་ཛྷཻཾ་ཞེས་བརྗོད་དེ་དབབ།  སྤྱི་བོར་རྡོ་རྗེ་རྒྱ་གྲམ་དུ་བཞག་ནས་ཏིཥྛ་བཛྲ་ཞེས་པས་བརྟན་པར་བྱའོ། །
10-11-12a


དེ་ནས་པྲ་ཏཱིཙྪ་བཛྲ་ཧོཿས་མེ་ཏོག་དཀྱིལ་འཁོར་ལ་དོར།  དེ་ཉིད་བླངས་ལ།  པྲ་ཏི་གྲྀཧྞཱ་སྭ་མི།  མཾ་སཏྭ་མ་ཧཱ་བ་ལ་ཞེས་བརྗོད་དེ།  མགོ་ལ་བཅིངས་ཏེ།  མིག་གི་སྣང་བ་དྲི།  མིག་གཉིས་སུ་ཨོཾ་འོད་ཟེར་འབར་བ་དང་བཅས་པ་བསམས་ལ། 
རྡོ་རྗེ་སེམས་དཔའ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛད། །མིག་ནི་ཐམས་ཅད་འབྱེད་མཛད་དེ། །རྡོ་རྗེའི་མིག་ནི་བླ་ན་མེད། །གདོང་རས་བསལ་ལ།  གཙོ་བོ་ནས་མེ་རིའི་བར་རྟེན་དང་བརྟེན་པར་བཅས་པའི་ལྷ་ངོ་བསྟན་ཏེ་འཇུག་པའི་ཆོ་གའོ། །
གཉིས་པ་དབང་གི་དངོས་གཞི་ལ་གཉིས་ཏེ།  རྡོ་རྗེ་སློབ་མའི་དབང་དང་།  རྡོ་རྗེ་སློབ་དཔོན་གྱི་དབང་ངོ་། །དང་པོ་ནི།  སློབ་མ་དང་དབང་རྫས་རྣམ་རྒྱལ་བུམ་པའི་ཆུས་བསང་སྦྱངས་སྟོང་པའི་ངང་ལས།  མི་བསྐྱོད་པ་སྔོན་པོ་སྔོ་དཀར་དམར་བའི་ཞལ་གསུམ་ཕྱག་
དྲུག་གི་དང་པོ་གཉིས་ཀྱིས་རང་འོད་ཀྱི་ཡུམ་ལ་འཁྱུད་པ།  གཡས་འོག་མ་གཉིས་ཀྱིས་རྡོ་རྗེ་དང་རལ་གྲི།  གཡོན་འོག་མ་གཉིས་ཀྱིས་རིན་པོ་ཆེ་དང་པདྨ་འཛིན་པ།  དར་དང་རིན་པོ་ཆེའི་རྒྱན་གྱིས་བརྒྱན་པ།  ཞབས་རྡོ་རྗེའི་སྐྱིལ་ཀྲུང་གིས་བཞུགས་པར་
བསྐྱེད།  སློབ་དཔོན་གྱི་ཐུགས་ཀ་ནས་འོད་འཕྲོས་པས་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མི་བསྐྱོད་པའི་རྣམ་པར་སྤྱན་དྲངས་ནས་གཉིས་ཀ་ལ་བསྟིམ་པ་ནི་ཡན་ལག་དང་པོ་བསྙེན་པའོ། །མིག་ཏུ་སའི་སྙིང་པོ་སོགས་སྐྱེ་
མཆེད་དྲུག་བྱིན་གྱིས་རློབ་པ་ནི་ཡན་ལག་གཉིས་པ་ཉེར་སྒྲུབ་བོ། །ཐུགས་ཀར་ཐུགས་རྡོ་རྗེ་སོགས་གནས་གསུམ་བྱིན་གྱིས་རློབ་པ་ནི་ཡན་ལག་གསུམ་པ་སྒྲུབ་པའོ། །ཡན་ལག་བཞི་པ་བྱ་བའི་ཕྱིར།  སླར་ཡང་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་
10-11-12b


པས་དབང་བསྐུར་གྱི་ལྷ་གདན་གསུམ་ཚང་བ་དཀྱིལ་འཁོར་གྱི་སྟེང་གི་ནམ་མཁར་སྤྱན་དྲངས།  ཨོཾ་བཛྲཱི་བྷ་ཝ་ཨ་བྷི་ཥིཉྩ་ཧཱུྃ་ཞེས་པས་དབང་རྫས་ཀྱི་ལྷ་ལ་དབང་བསྐུར།  ཆུ་ལྷག་མ་ཡར་ལུད་པ་ལས་མི་བསྐྱོད་པས་དབུར་བརྒྱན་པ་ནི་དབང་རྫས་ཀྱི་ཡན་
ལག་བཞི་པ་སྒྲུབ་ཆེན་ནོ། །དེ་ཞུ་བ་ལས་བྱུང་བའི་བུམ་པའི་ཆུར་བལྟས་ལ་སློབ་མས།  དེ་བཞིན་གཤེགས་པ་ཐམས་ཅད་ཀྱིས་བདག་ལ་མངོན་པར་དབང་བསྐུར་བ་རྩལ་དུ་གསོལ།  ཞེས་གསོལ་བ་བཏབ་ནས་སློབ་དཔོན་གྱིས་བུམ་པ་ཐོགས་ཏེ།  རྡོ་རྗེ་ཆེན་
པོའི་དབང་བསྐུར་བ། །ཁམས་གསུམ་ཀུན་གྱིས་ཕྱག་བྱས་པ། །གསང་བ་གསུམ་གྱི་གནས་ནས་བྱུང་། །སངས་རྒྱས་ཀུན་གྱིས་སྦྱིན་པར་བྱ། །བཛྲ་ཨ་བྷི་ཥིཉྩ་ཞེས་བུམ་པའི་ཆུས་སྤྱི་བོ་ནས་དབང་བསྐུར།  སྐུ་གང་དྲི་མ་དག །ཆུ་ལྷག་མ་ཡར་ལུད་པ་ལས་
མི་བསྐྱོད་པས་དབུར་བརྒྱན་པ་ནི་སློབ་མའི་ཡན་ལག་བཞི་པ་སྒྲུབ་ཆེན་ཏེ།  འོག་མ་རྣམས་ལ་ཡང་ཚུལ་དེས་འགྲེའོ། །དེ་ལ་མཆོད་ནས་དོན་ལྔའི་རྟོགས་པ་བསྐྱེད་དོ། །དེ་བཞིན་དུ་སློབ་མ་དང་།  དབུ་རྒྱན་གཉིས་རིན་འབྱུང་དུ་བསྐྱེད་དེ།  ཨོཾ་རཏྣ་མུ་ཀུ་ཊ་ཨ་བྷི་
ཥིཉྩ་ཞེས་པས་དབུ་རྒྱན་གྱིས་དབང་བསྐུར།  སློབ་མ་དང་རྡོ་རྗེ་གཉིས་འོད་དཔག་མེད་དུ་བསྐྱེད་ནས།  སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོངས། །ཞེས་པས་རྡོ་རྗེས་
དབང་བསྐུར་རོ། །སློབ་མ་དང་དྲིལ་བུ་དོན་གྲུབ་ཏུ་བསྐྱེད་ལ།  ཨོཾ་བཛྲ་ཨ་དྷི་པ་ཏི་སྟྭཾ།  ཨ་བྷི་ཥིཉྩཱ་མི།  ཏིཥྛ་བཛྲ་ས་མ་ཡ་སྟྭཾ།  ཞེས་པས་དྲིལ་བུའི་དབང་བསྐུར་ནས་རྡོ་རྗེ་དང་དྲིལ་བུས་འཁྱུད་པའི་ཕྱག་རྒྱ་བྱེད་དུ་གཞུག །སློབ་མ་རྣམ་སྣང་དུ་བསྐྱེད་ནས་ཨོཾ་བཛྲ་
10-11-13a


སཏྭ་སྟྭཾ་ཨ་བྷི་ཥིཉྩཱ་མི།  བཛྲ་ནཱ་མ་ཀྱཻ་དཔལ་ཆེ་གེ་མོ་རྡོ་རྗེ་ཞེས་བྱ་བའི་དེ་བཞིན་གཤེགས་པ་ཨ་བྷི་ཥེ་ཀ་ཏ།  ཞེས་པས་མིང་གིས་དབང་བསྐུར།  རང་གི་དངོས་ཀུན་གང་གང་སྣང་། །གཙོ་ཆེར་དེ་ནི་འཇམ་རྒྱལ་རང་། །ཆོས་རྣམས་རང་
བཞིན་གྱིས་དག་པས། །སངས་རྒྱས་ཡེ་ཤེས་གང་ཡིན་དེའོ། །ཞེས་པས་རིག་པའི་དབང་ལྔའི་དོན་ངོ་སྤྲད།  སློབ་མ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་ཕྱག་མི་བསྐྱོད་པ་ལྟ་བུ་ཡན་ལག་བཞི་རྫོགས་སུ་བསྐྱེད་ལ། ཧཱུ་ལས་བྱུང་བའི་རྡོ་རྗེ་ལག་པ་
གཡས་སུ་བྱིན་ཏེ།  འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ལག་ན་གནས། །ཁྱོད་ཀྱིས་ཀྱང་ནི་རྟག་ཏུ་བཅང་། །རྡོ་རྗེ་སེམས་དཔའི་བརྟུལ་ཞུགས་བརྟན། །ཨོཾ་སརྦ་ཏ་ཐཱ་ག་ཏ་སིད་དྷི་བཛྲ་ས་མ་ཡ་ཏིཥྛ་ཨེ་ཀ་སྟྭཾ།  དྷ་ར་ཡཱ་མི་བཛྲ་སཏྭ་ཧི་ཧི་
ཧི་ཧི་ཧི་ཧཱུྃ།  ཞེས་པས་རྡོ་རྗེའི་བརྟུལ་ཞུགས་བྱིན་ནས་ཐུགས་ཀར་འཛིན་དུ་གཞུག །ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་མཆོག །ཞེས་བརྗོད་
པས་ཐུགས་ཀྱི་དབང་ཐོབ།  མི་རྟོག་པ་སྒོམ་པ་ལ་དབང་།  འབྲས་བུ་སངས་རྒྱས་ཀྱི་ཐུགས་འགྲུབ་ཅིང་།  དམ་ཚིག་ཏུ་རྡོ་རྗེ་སངས་རྒྱས་ཀྱི་ཐུགས་སུ་མོས་པར་བྱེད།  ཨཿལས་དྲིལ་བུ་སངས་རྒྱས་ཀྱི་གསུང་དུ་མོས་པ་ལག་པ་གཡོན་པར་བྱིན་ལ།  འདི་དེ་སངས་
རྒྱས་ཐམས་ཅད་དེ། །ཤེར་རབ་སྒྲ་ཡིས་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་མཆོག་ཏུ་རྒྱལ་བ་བཞེད། །ཅེས་པས་བྱིན་ཞིང་འཁྲོལ་དུ་བཅུག་ལ།  སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་
10-11-13b


བཞིན་དག་པའི་སེམས་དཔའ་མཆོག །སྲིད་པ་མཆོག་ཏུ་བྱེད་པར་འགྱུར། །ཞེས་གསུང་གི་དབང་ཐོབ།  ངག་བཟླས་པ་ལ་དབང་།  འབྲས་བུ་སངས་རྒྱས་ཀྱི་གསུང་འགྲུབ།  དམ་ཚིག་ཏུ་དྲིལ་བུ་སངས་རྒྱས་ཀྱི་གསུང་དུ་མོས་པ་བྱ། །འཇམ་པའི་རྡོ་རྗེའི་སྐུར་
བསྐྱེད་དེ།  གཟུགས་སོགས་འདོད་པའི་དམ་ཚིག་གིས། །གསང་སྔགས་མ་ཚང་མེད་པར་བཟླས། །རང་གི་རིག་པའི་ངོ་བོ་དེ། །ཕྱོགས་བཅུ་དུས་གསུམ་བཞུགས་པ་ཡི། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །དཀའ་
ཐུབ་སྡོམ་པ་མི་ཟད་པ། །བསྟེན་ན་མི་སྣང་མངོན་ཤེས་དང་། །མཁའ་ལ་རྒྱུ་དང་ལུས་ངག་ཡིད། །ལས་བྱུང་དངོས་གྲུབ་འགྲུབ་མི་འགྱུར། །དེ་བས་སངས་རྒྱས་སེམས་དཔའ་མཆོག །སྔགས་ཀྱི་སྤྱོད་མཆོག་སྤྱོད་པ་རྣམས། །འདོད་པ་ཐམས་
ཅད་བརྟེན་པ་ཡིས། །ཆོས་ཀྱི་ཡི་གེ་མཆོག་བརྙེས་སོ། །བདེ་དང་སྡུག་བསྔལ་དེ་བདག་མིན། །འདོད་པའི་ཡོན་ཏན་ལྔ་རྣམས་བསྟེན། །ཡེ་ཤེས་དོན་གཉེར་འདོད་ཆགས་ཅན། །སྦྱོར་བས་བསྒོམས་ན་མྱུར་དུ་འགྲུབ། །སྐུ་གསུང་ཐུགས་ནི་ཡང་
དག་འགྲུབ། །གང་གཞན་དམན་པར་བཤད་པ་ནི། །སྔགས་ཀྱི་བཟླས་པས་འགྲུབ་འགྱུར་བ། །སྐུ་གསུང་ཐུགས་ནི་བསྒོམས་པས་སོ། །དེ་ཉིད་ཀྱི་ནི་རྡོ་རྗེ་གཟུང་། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་
བརླབས་ལ་སྙིང་པོ་བཟླས། །ཅེས་བརྗོད་ཅིང་དོན་བཤད་པས་སྐུའི་དབང་ཐོབ།  ལྷ་བསྒོམ་པ་ལ་དབང་ཞིང་གཟུགས་ཀྱི་སྐུ་འགྲུབ།  དམ་ཚིག་ཏུ་སྐུ་གཟུགས་ལ་སངས་རྒྱས་དངོས་ཀྱི་འདུ་ཤེས་བསྐྱེད་དོ། །དེ་ནས་རྡོ་རྗེ་སློབ་དཔོན་གྱི་དབང་གི་དོན་དུ་ཡོན་
10-11-14a


ཕུལ་ལ།  བྱང་ཆུབ་རྡོ་རྗེ་སངས་རྒྱས་ཀྱིས། །མཆོད་ཆེན་ཇི་ལྟར་གསོལ་བ་བཞིན། །བདག་ཀྱང་རབ་ཏུ་བསྐྱབ་པའི་ཕྱིར། །ནམ་མཁའི་རྡོ་རྗེ་བདག་ལ་སྩོལ། །ཞེས་གསོལ་བ་བཏབ།  འཇུག་སྒོར་པདྨ་འདབ་བརྒྱད་བྲིས་ཏེ།  དར་གྱིས་
བཀབ་པའི་སྟེང་དུ།  ལྷའི་རྣལ་འབྱོར་དང་ལྡན་པས་འདུག་སྟེ།  དུས་གསུམ་གྱི་སངས་རྒྱས་ཐམས་ཅད་ནམ་མཁར་སྤྱན་དྲངས་ལ།  བཀྲ་ཤིས་ཀྱི་གླུ་དང་རོལ་མོའི་སྒྲ་བྱ་ཞིང་།  སྔ་མ་བཞིན་དུ་རིག་པའི་དབང་ལྔ་བསྐུར།  ཉོན་མོངས་པ་ཞེ་སྡང་ལ་སོགས་པ་དག  །
རྣམ་ཤེས་ལ་སོགས་པའི་ཕུང་པོ་ལྔ་གནས་གྱུར།  དེ་བཞིན་གཤེགས་པ་ལྔ་དང་ཡེ་ཤེས་ལྔའི་རང་བཞིན་མངོན་དུ་བྱས་པ་ཡིན་ནོ་ཞེས་དོན་ལྔའི་རྟོགས་པ་བསྐྱེད།  སླར་ཡང་རྡོ་རྗེ་ཆེན་པོའི་དབང་བསྐུར་བ་ཞེས་སོགས་བརྗོད་ཅིང་།  བུམ་པའི་ཆུས་དབང་
བསྐུར་སློབ་མའི་སྤྱི་བོར་བུམ་པ་བཟུང་སྟེ།  ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །ཞེས་སོགས་ཚིགས་བཅད་གསུམ་གྱིས་བཀྲ་ཤིས་བརྗོད་ནས་དབང་བསྐུར་གྱི་ལྷ་ཐམས་ཅད་མི་བསྐྱོད་པ་གཙོ་བོར་གྱུར་པའི་རིགས་ལྔར་གྱུར་ནས།  སློབ་
མའི་སྤྱི་བོར་དབུ་བརྒྱན་པར་བསམ།  དེ་ནས་དཀྱིལ་འཁོར་དང་ལྷའི་དེ་ཁོ་ན་ཉིད་བསྟན་ཏེ།  མི་མཉམ་མེད་པ་ཟུར་བཞི་པ། །སངས་རྒྱས་སངས་རྒྱས་མིན་མཉམ་ཉིད། །ལུས་ཚོར་སེམས་དང་ཆོས་རྣམས་ཀྱི། །གཅིག་དང་སྣ་ཚོགས་སྦྱོར་བྲལ་
ཉིད། །དེ་དྲན་དེ་ལ་དད་པ་གང་། །ཤར་སྒོ་བྱང་ཆུབ་ཕྱིར་འདོད་དོ། །དེ་ལས་བྱུང་དང་འབྱུང་འགྱུར་བའི། །ཕྱིན་ཅི་ལོག་སྤངས་མི་བསྐྱེད་བྱ། །མ་སྐྱེས་སྐྱེས་པའི་ཡང་དག་ཀྱང་། །བསྐྱེད་པ་དག་ནི་གནས་བྱ་བ། །བརྩོན་འགྲུས་རྣམ་བཞི་ལྷོ་ཡི་སྒོ། །
10-11-14b


འདུན་དང་སྤྲོ་དང་གནས་དང་བློ། །རྫུ་འཕྲུལ་རྐང་དང་དྲན་པ་འདིར། །ནུབ་ཀྱི་སྒོ་ནི་ཡིན་པར་བཤད། །དད་དང་བརྩོན་འགྲུས་དྲན་བསམ་གཏན། །ཤེས་རབ་དབང་སྟོབས་མཉམ་མེད་དེ། །ཏིང་ངེ་འཛིན་ཡང་བྱང་དེ་ལྟར། །དྲན་དང་
དབང་པོ་སྒོ་བཞི་ཡིན། །དང་པོ་ལ་སོགས་བསམ་གཏན་བཞི། །རྟ་བབས་བཞི་ནི་བྱུང་བ་ཡིན། །དཔའ་བར་འགྲོ་དང་མཁར་མཛད་སོགས། །ཏིང་འཛིན་ཁ་ཁྱེར་ཡིན་པར་བཤད། །ལག་ན་མཆོད་ཐོགས་དབེན་སྤྱོད་རྣམས། །ཚིག་ལ་སོགས་པའི་
གཟུངས་ཚོགས་ཡིན། །གང་ཕྱིར་སྣ་ཚོགས་རྒྱན་ལྡན་པ། །བསམ་པ་ཐམས་ཅད་རྫོགས་བྱེད་པའོ། །གདུལ་བྱ་སྐྱོང་བ་དམ་པའི་ཆོས། །ཡན་ལག་དགུ་སྒྲ་ཀུན་གྲོལ་བ། །བ་དན་སྣ་ཚོགས་རླུང་གིས་བསྐྱོད། །རྩེ་མོ་དྲིལ་བཏགས་སྒྲ་སྒྲོགས་
ཡིན། །ཡེ་ཤེས་མེ་ལོང་བྱང་ཡན་ལག །ཕྱོགས་དུས་ཀུན་ནི་འོད་རབ་གསལ། །དྲྭ་བ་དྲྭ་ཕྱེད་ཉི་ཟླ་དང་། །རྔ་ཡབ་མེ་ལོང་མེ་ཏོག་ཕྲེང་། །དེ་ཡི་འཁོར་ལོ་སོགས་ཀ་བ། །རྣམ་ཐར་བརྒྱད་ཀྱི་སྦྱངས་པ་ཡིན། །དེ་ཡི་ནང་གི་འཁོར་ལོ་དེ། །དཀྱིལ་
འཁོར་བརྒྱད་པ་ལྟ་བུ་ཡིན། །ཕྱོགས་ཀུན་དུས་གསུམ་རྫོགས་སངས་རྒྱས། །རྡོ་རྗེ་ཐེག་པ་རབ་སྟོན་པས། །ཀུན་ནས་ཡོངས་སུ་ཟླུམ་པོར་ནི། །རྡོ་རྗེ་ཐིག་གིས་བསྐོར་བ་ཡིན། །ཡེ་ཤེས་ཀྱི་འགྲོ་ལ་ཞེན་པས། །ཚོན་ནི་རྫོགས་སངས་རྒྱས་ལྔ་ཡིན། །དབང་
པོ་དོན་སོགས་རྣམ་དག་པས། །རང་གི་མཚན་ཉིད་དབེན་པ་ཉིད། །ཤེས་རབ་ཡེ་ཤེས་བདུད་རྩི་ནི། །རྡོ་རྗེ་ཅན་གསོལ་བུམ་པའང་དེ། །ཚོགས་རྫོགས་པ་ཡི་རྒྱུ་མཐུན་པ། །ཐུགས་རྗེ་རླན་ཉིད་བུམ་པ་གང་། །དཀྱིལ་འཁོར་གང་དུ་མེ་ཏོག་སྤོས། །མར་
10-11-15a


མེ་ཆེ་དང་དྲིར་བཤད་པ། །བྱང་ཆུབ་ཡན་ལག་ཡིད་རབ་ཚིམ། །ཆོས་ཀྱི་སྣང་བ་གྲགས་བསྡུས་ཡིན། །ཆོས་ཀྱི་ཟས་ནི་ལྷ་བཤོས་ཡིན། །ངོ་ཚ་ཁྲེལ་ཡོད་པ་ཡི་གོས། །གླུ་གར་སྙན་དང་རོལ་མོ་རྣམས། །བདེ་བ་ཆེན་པོ་རྣམ་འཕེལ་
བའོ། །གྲོང་ཁྱེར་ཐར་པའི་གྲོང་ཁྱེར་བས། །དཀྱིལ་འཁོར་སྙིང་པོ་བསྡུས་པ་ཡིན། །འཁོར་ལོའི་དེ་ཉིད་ལེགས་བསྟན་ནས། །ལྷ་ཡི་དེ་ཉིད་བསྟན་པར་བྱ། །དད་དང་བརྩོན་འགྲུས་དྲན་བསམ་གཏན། །རྣམ་དག་སྒོ་སྲུང་མཆོག་གི་གཟུགས། །སྐུ་སོགས་འཛིན་
པའི་རྣལ་འབྱོར་སེམས། །ཤེས་རབ་དག་པ་རབ་དྲི་མེད། །སྦྱིན་སོགས་དྲུག་པོའི་ཕྱི་རོལ་དག །གཟུགས་རྡོ་རྗེ་ལ་སོགས་རང་བཞིན། །ས་ཐབས་ལ་སོགས་མཚན་མེད་ཕྱིར། །སྤྱན་ལ་སོགས་པའི་ངོ་བོ་ཡིན། །དོན་དང་སེམས་ཅན་བདག་ཀུན་རྟོག །འཇུག་པའི་
ཤེས་པ་རྣམ་དག་པ། །མེ་ལོང་ལ་སོགས་ཡེ་ཤེས་ནི། །སངས་རྒྱས་ཀུན་གྱི་ངོ་བོ་ཡིན། །མ་སྐྱེས་ཡེ་ཤེས་སྦྱོར་བ་ཡི། །འཁོར་ལོའི་གཙོ་བོ་ལྟ་བུར་སྣང་། །གཟུགས་སོགས་འཁྲུལ་པ་ལེགས་དག་པ། །ཕུང་པོ་སྐྱེ་མཆེད་ཁམས་རྣམས་སོ། །སེར་སྣ་
ལ་སོགས་གནས་གྱུར་པ། །ཕ་རོལ་ཕྱིན་པར་ཤིན་ཏུ་གནས། །རང་གི་མི་མཐུན་གནས་གྱུར་པ། །སྟོབས་སོགས་ཚང་ཞིང་དྲི་མ་མེད། །རྣམ་པར་མི་རྟོག་ཟབ་པ་དང་། །རྒྱ་ཆེ་བ་ནི་རང་བཞིན་འབྱུང་། །ཟབ་དང་རྒྱ་ཆེ་འདི་དག་ཉིད། །ཤེས་རབ་ཐབས་བདག་
ཉིད་གང་སྟེ། །སོ་སོ་རང་རིག་ཆོས་ཡིན་ཕྱིར། །དབྱེ་ཡོད་དབྱེ་མེད་སོགས་མི་གནས། །དེ་ལྟར་སྤྲོས་པར་གྱུར་པ་ནི། །ཕ་རོལ་ཕྱིན་སོགས་འབྲས་བུར་སྣང་། །ཞེས་བརྗོད་དོ། །བླ་མ་དག་སྐབས་འདིར་ཀྱེ་རྡོར་ལྟར་རྗེས་གནང་རྒྱས་པ་མཛད་པ་བྲིས་སྣང་བ་ནི་བཞི་
10-11-15b


བརྒྱ་ལྔ་བཅུ་པར་མི་འབྱུང་ཡང་།  དེའི་འགྲེལ་པར་ཤཱནྟི་པས་ལྷ་མཆོད་པ་དང་།  སེམས་ཅན་གྱི་དོན་བྱེད་པ་དང་།  ཆོས་ཀྱི་འཁོར་ལོ་བསྐོར་བའི་རྗེས་གནང་རྣམས་ཀྱེ་རྡོ་རྗེ་ཇི་ལྟ་བ་བཞིན་བྲིས་སྣང་བས་སྤྲོས་པ་ལ་དགའ་ན་བྱ་ཞིང་བསྡུ་ན།  སྨན་
ཞབས་ཀྱིས་དེ་བཞིན་སློབ་མ་དབང་བསྐུར་དང་། །དངོས་གྲུབ་སྒྲུབ་པའི་དཀྱིལ་འཁོར་ནི། །སྒྲུབ་པའི་ཐབས་ནི་རབ་བརྟེན་པས། །གང་ཟག་གཉིས་སུ་ཤེས་པར་བྱ། །གཟུགས་བརྙན་གླེགས་བམ་ལ་སོགས་པ། །ཡོད་ན་ཁྱོད་ཀྱིས་རབ་གནས་མཛོད། །དེ་ནི་ཇི་
སྲིད་བར་དུ་ནི། །སེམས་ཅན་དོན་དུ་འགྱུར་བས་སོ། །ཞེས་གསུངས་པ་འདི་ཙམ་གྱིས་ཆོག་གོ།  དེ་ལྟར་ན་རྡུལ་ཚོན་གྱི་དཀྱིལ་འཁོར་དུ་བུམ་པའི་དབང་ཐོབ་པས།  ལུས་ཀྱི་དྲི་མ་དག་པར་བྱས་ཤིང་བསྐྱེད་པའི་རིམ་པ་བསྒོམ་པ་ལ་དབང་།  འབྲས་བུ་སྤྲུལ་པའི་
སྐུ་ཐོབ་པར་བྱེད་དོ་ཞེས་ངོ་སྤྲད་དོ། །དེ་ནས་གསང་བའི་དབང་གི་རྟེན་གཟུགས་བཟང་ཞིང་མཛེས་པ།  ཡོན་ཏན་དུ་མ་དང་ལྡན་པ་རྣལ་འབྱོར་ལ་གོམས་ཤིང་དམ་ཚིག་སྡོམ་པ་ལ་ཤིན་ཏུ་གནས་པ་ཞིག་འཇམ་པའི་རྡོ་རྗེ་ལོངས་སྐུའི་རང་བཞིན་ཅན་ལ་ཕུལ་ཞིང་།  གཞན་
ཡང་ཕྱག་དང་མཎྜལ་སྔོན་དུ་འགྲོ་བས།  བྱང་ཆུབ་རྡོ་རྗེ་སངས་རྒྱས་ལ་སོགས་པས་ལན་གསུམ་གསོལ་བ་གདབ།  དེ་ནས་གདོང་གཡོགས་བཅིངས་ཏེ།  བླ་མ་འཇམ་པའི་རྡོ་རྗེ་ཡབ་ཡུམ་ཟག་པ་མེད་པའི་བདེ་བ་ལ་སྙོམས་པར་ཞུགས།  ཐུགས་ཀའི་མཱྃ་ལས་འོད་ཟེར་
འཕྲོས་པས།  སངས་རྒྱས་ཀྱི་སྐུ་རྣམས་སྤྱན་དྲངས་ནས་ཡབ་ཡུམ་གྱི་ཞལ་དུ་ཐིམ།  ཐུགས་ཀར་ཞུགས་ནས་གསང་བའི་མཐར།  བྱང་ཆུབ་ཀྱི་སེམས་དཀར་དམར་གྱི་རང་བཞིན་དུ་གྱུར།  མཐེ་བོང་དང་སྲིན་ལག་གིས་བླངས་ཏེ།  སློབ་མ་བློ་བརྟན་པ་རྣམ་པར་
10-11-16a


སྣང་མཛད་ཀྱི་ང་རྒྱལ་དང་ལྡན་པ་ལ་འཐུང་དུ་བཅུག་པས།  བདེ་བ་སྣ་ཚོགས་ཀྱིས་ལུས་གང་བར་མོས་ཤིང་།  ཀྱེ་མ་ཤིན་ཏུ་བདེ་ཆེན་ཞེས་བརྗོད།  དེ་ལྟར་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་གསང་བའི་དབང་གིས་ངག་གི་དྲི་
མ་དག །རྡོ་རྗེའི་བཟླས་པ་དང་།  སྒྱུ་ལུས་བསྒོམ་པ་ལ་དབང་།  འབྲས་བུ་ལོངས་སྤྱོད་རྫོགས་པའི་སྐུ་ཐོབ་ཅེས་བསྟན་ནོ།།    །།དེ་ནས་ཤེས་རབ་ཡེ་ཤེས་ཀྱི་དབང་གི་དོན་དུ་ཕྱག་དང་མཎྜལ་སྔོན་དུ་འགྲོ་བས་སྔར་བཞིན་གསོལ་བ་གདབ་ཅིང་།  གདོང་
གཡོགས་བཅིངས་ལ།  མཚན་ཉིད་མཐའ་དག་དང་ལྡན་པའི་རིག་མ་གཅིག་སློབ་མའི་ལག་ཏུ་གཏད་ལ།  གཟུངས་འདི་ཤིན་ཏུ་ཡིད་འོང་སྟེ། །བསྙེན་བྱར་སངས་རྒྱས་རྣམས་ཀྱིས་བརྟགས། །འཁོར་ལོ་རིམ་གྱིས་རབ་སྦྱོར་བས། །བདེ་བ་དམ་པ་ཡང་དག་
སྦྱར། །ཞེས་བརྗོད་དེ་བྱིན་ནས།  འཇམ་པའི་རྡོ་རྗེ་ཡབ་ཡུམ་དུ་བསྐྱེད་ལ།  མཁའ་དང་གསང་བ་བྱིན་གྱིས་བརླབ་ཅིང་།  གནས་ལྔར་ཡིག་འབྲུ་རྣམས་དགོད་དེ།  ཕན་ཚུན་འཁྱུད་པ་དང་།  ཙུམ་བྷ་དགའ་བ།  རྡོ་རྗེ་དང་པདྨ་མཉམ་པར་སྦྱར་བ་མཆོག་དགའ། 
སྲུབ་པ་དང་།  བསྲུབས་པའི་སྦྱོར་བས་དགའ་བྲལ་གྱི་དགའ་བ།  བྱང་ཆུབ་ཀྱི་སེམས་གསང་བའི་གནས་ནས་མ་འཕྲོས་པའི་དུས་སུ་ལྷན་ཅིག་སྐྱེས་པའི་དགའ་བ་བདེ་བ་ལ་མི་རྟོག་པའི་ངང་དུ་སྐྱོངས་ཤིག་ཅེས་བསྟན།  རྡོ་རྗེའི་སྐྱིལ་ཀྲུང་ཉིད་དང་སེམས། །
ནོར་ལྡན་ཁོངས་སུ་རྟོག་པར་ལྟ། །དཀྱིལ་འཁོར་ལྷ་ཡི་དེ་ཉིད་དང་། །སློབ་དཔོན་གྱི་ནི་ལས་རྣམས་དག །རབ་གསང་ཤེས་རབ་མཆོག་གིས་ནི། །དབང་བསྐུར་དེ་ཉིད་ཡང་དག་བཤད། །ཅེས་པས་ཡི་གེ་བྷ་གའི་དཀྱིལ་འཁོར་དུ་དབང་གསུམ་
10-11-16b


པས་གཙོ་ཆེར་སེམས་ཀྱི་དྲི་མ་སྦྱོང་ཞིང་གཞན་ལུས་ཕྱག་རྒྱ་བསྒོམ་པ་ལ་དབང་།  འབྲས་བུ་ཆོས་སྐུ་ཐོབ་པར་བྱེད་པ་ཡིན་ནོ། །ཞེས་བརྗོད་དོ། །དེ་ནས་དབང་བཞི་པའི་དོན་དུ་མཎྜལ་ཕུལ་ནས།  བྱང་ཆུབ་རྡོ་རྗེ་སོགས་ཀྱིས་གསོལ་བ་བཏབ།  ཨོཾ་
ཨཱཿཧཱུྃ་གིས་གདོང་གཡོགས་བཅིངས་ནས།  རྒྱུད་ཀྱི་རྒྱལ་པོ་དཔལ་གསང་བ་འདུས་པ་ལས་དངོས་པོ་ཐམས་ཅད་དང་བྲལ་བ།  ཕུང་པོ་ཁམས་དང་སྐྱེ་མཆེད་དང་། །གཟུང་དང་འཛིན་པ་རྣམ་སྤངས་པ། །ཆོས་བདག་མེད་པར་མཉམ་པ་ཉིད། །རང་
སེམས་གདོད་ནས་མ་སྐྱེས་པ། །སྟོང་པ་ཉིད་ཀྱི་རང་བཞིན་ནོ། །ཞེས་གསུངས་ཏེ།  རྒྱུད་སྡེ་རྣམས་ལས།  བཞི་པ་དེ་ཡང་དེ་བཞིན་ནོ། །ཞེས་དང་།  མཚོན་བྱ་མཚོན་བྱེད་དུ་གསུངས་པའི་དོན།  མཚོན་བྱ་དོན་གྱི་དབང་བཞི་པ་ཡང་།  སངས་རྒྱས་རྣམས་ཀྱི་
དོན་དམ་པའི་བྱང་ཆུབ་ཀྱི་སེམས་ཡིན་ལ།  དེའི་མཚན་ཉིད་ཕྱི་རོལ་པས་བརྟགས་པའི་བདག་གི་དངོས་པོ་ཐམས་ཅད་དང་བྲལ་ཞིང་།  ཉན་ཐོས་སྡེ་གཉིས་ཀྱིས་བརྟགས་པའི་ཕུང་ཁམས་སྐྱེ་མཆེད་ཀྱི་ཆོས་དང་།  གཟུང་འཛིན་གཉིས་རྣམ་པར་སྤངས་
ལ།  རྣམ་རིག་པས་བརྟགས་པའི་གཉིས་མེད་ཀྱི་ཤེས་པ་ཙམ་གྱི་རྟོག་པ་དང་ཡང་བྲལ་བའི་རང་སེམས་ཐབས་ཀྱི་ཆ་གསལ་བ།  མ་འགགས་པ་དེ་ཉིད་སྐྱེ་འགག་ཐམས་ཅད་དང་བྲལ་བ།  མཐའ་བཞི་ཆར་གྱི་སྤྲོས་པས་སྟོང་པའི་སྟོང་ཉིད་ཡིན་ལ།  དེ་ཉིད་སློབ་
དཔོན་ངག་གི་དབང་ཕྱུག་གྲགས་པས།  ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་འཆད་དང་འགོག་པ་མེད། །ཡན་ལག་བདུན་དང་ལྡན་པའི་སངས་རྒྱས་འདི་ཉིད་ནི། །བདག་འདོད་ཚད་མས་ཡོངས་བགོས་བློ་
10-11-17a


ཅན་རྣམས་ཀྱང་འདོད། །ཅེས་གསུངས་པ་ལྟར་ཡན་ལག་བདུན་དང་ལྡན་པའི་སངས་རྒྱས་ཡིན་ནོ། །དེ་ཉིད་དབང་གསུམ་པའི་ཡེ་ཤེས་འདིས་མཚོན་ནུས་པ་ཡིན་ནོ་ཞེས་ངོ་སྤྲོད་པ་ནི་ཚིག་གི་བཞི་པ་སྟེ།  ཅི་ལྟར་མཚོན་ན།  
དབང་གསུམ་པའི་དུས་སུ་ལྷ་སྐུ་ཞལ་སྦྱོར་གྱི་རྣམ་པ་གསལ་ལ་མ་འགགས་པ།  དེའི་སེམས་རྒྱུད་འཛག་མེད་ཀྱི་བདེ་བས་གང་བ་བདེ་བའི་ངོ་བོ་ལ་བལྟས་པ་ན་ཕྱི་རོལ་པའི་བདག་ནས་རྣམ་རིག་པའི་གཉིས་མེད་ཀྱི་ཤེས་པའི་བར་གྱི་རྣམ་པར་རྟོག་པ་གང་
ཡང་མ་གྲུབ་པའི་ནམ་མཁའ་ལྟ་བུ་ཡིན་ལ།  དེ་ཡང་དམིགས་པ་མེད་པའི་སྙིང་རྗེས་སེམས་ཅན་གྱི་དོན་རྒྱུན་མི་འཆད་པ་ཡིན་པས།  དེས་མཚོན་ནུས་པས་ན་དེའི་ངང་ལ་མཉམ་པར་ཞོག་ཅིག་ཅེས་བརྗོད།  ཡེ་ཤེས་དེ་ཉིད་ལས་ཀྱི་ཕྱག་རྒྱ་དང་།  རིག་པ་
བརྟུལ་ཞུགས་ཀྱི་སྤྱོད་པ་སྤྱད་པས་མས་བརྟན་གྱི་དགའ་བ་བཞི་མཐར་ཕྱིན་ཏེ།  ལོངས་སྤྱོད་རྫོགས་པའི་སྐུ་ཡན་ལག་བདུན་ལྡན་མངོན་དུ་གྱིས་ཤིག་ཅེས་བརྗོད་པ་ནི་ལམ་གྱི་བཞི་པའོ། །དེ་ལྟར་ན་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་
དབང་བཞི་པ་ཐོབ།  ལམ་ཕྱག་རྒྱ་ཆེན་པོ་བསྒོམས་པ་ལ་དབང་།  འབྲས་བུ་ངོ་བོ་ཉིད་ཀྱི་སྐུ་ཐོབ་པར་བྱེད་པ་ཡིན་ནོ། །དེ་ནས་དབང་གསུམ་པ་དང་བཞི་པའི་དམ་ཚིག་ཏུ།  དབང་བསྐུར་འདི་ནི་ཇི་ལྟ་བར། །བྱང་ཆུབ་སྤྱོད་གཞན་དེ་བཞིན་དུ། །དགེ་བའི་
ཚུལ་ནི་གཞན་གསུངས་པས། །སངས་རྒྱས་ཀུན་སོགས་ཐོབ་མི་འགྱུར། །དམ་ཚིག་རྟག་ཏུ་བསྲུང་བ་དང་། །རྟག་ཏུ་སྡོམ་པ་བསྐྱང་བར་བྱ། །བཅུ་ཕྱེད་སྒྲོན་མ་མི་འཆི་སྤྱོད། །དམ་ཚིག་གཞན་ཡང་བསྲུང་བ་ནི། །དཀོན་མཆོག་གནོད་གཞོམ་
10-11-17b


བུད་མེད་ནི། །མཆོག་མྱང་ལོག་པའི་ལམ་མ་ཡིན། །འདི་དག་ཆོ་ག་བཞིན་དུ་བསྲུང་། །རྣལ་འབྱོར་རྒྱུད་དུ་གང་བཤད་པའོ། །ཞེས་པ་ལ་སོགས་པའི་དོན་བཤད།  དེ་ལྟར་དབང་བཞི་ཐོབ་ཅིང་།  དམ་ཚིག་དང་སྡོམ་པ་རྣམས་བསྐྱངས་བས་དེ་བཞིན་གཤེགས་པར་
འགྱུར་རོ། །ཞེས་ལུང་བསྟན་པ་ནི་གཡོན་པའི་ཁུ་ཚུར་གྱིས་ཆོས་གོས་སྙིང་གར་བཟུང་ཞིང་གཡས་པས་མཆོག་སྦྱིན་དུ་བྱས་ལ།  ཨོཾ་ངས་ཁྱོད་འདི་ལྟར་ལུང་བསྟན་ཏེ། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པའི་མཐའ་ནི་གྲུབ་པའི་ཕྱིར། །སྲིད་
པའི་ངན་འགྲོ་ཉིད་ལས་བཏོན། །ཀྱཻ་དེ་བཞིན་གཤེགས་པ་རྡོ་རྗེ་ཆེ་གེ་མོ་ཞེས་བྱ་བ་སིད་དྷི་བྷུར་བྷུ་བ་སྭ།  འདི་ཡིས་དབང་བསྐུར་གྱུར་པ་ཡིས། །སྔགས་པ་འགྲོ་བ་ཀུན་གྱི་བདག །བླ་ན་མེད་པའི་བྱང་ཆུབ་ཏུ། །བདེ་གཤེགས་ཀྱིས་ཀྱང་
ལུང་བསྟན་མཛད། །ཞེས་བརྗོད་དོ། །དེ་ཡང་ལམ་གྱི་དུས་སུ་སེམས་ཅན་སྣ་ཚོགས་ཀྱི་དོན་བྱེད་ཅིང་།  ཐུན་བཞིར་ཏིང་ངེ་འཛིན་གསུམ་གྱི་སྦྱོར་བས་ཐུན་མོང་གི་དངོས་གྲུབ་མི་སྣང་བ་དང་།  མངོན་ཤེས་དང་།  རིག་པ་འཛིན་པ་ལ་སོགས་པ་དང་།  མཆོག་གི་
དངོས་གྲུབ་རྡོ་རྗེ་འཆང་བྱང་ཆུབ་ཀྱི་སེམས་དང་ལྡན་པས་བསྒྲུབས་ན་མྱུར་དུ་འགྲུབ་པར་འགྱུར་བ་ཡིན་ནོ། །དེ་ནས་དབུགས་དབྱུང་བ་དང་གཟེངས་བསྟོད་པ་ནི།  མཆོག་གསང་དཀྱིལ་ཆོག་དམ་པ་འདི། །མཐོང་བ་དང་ནི་ཞུགས་གྱུར་པ། །སྡིག་པ་ཀུན་
ལས་ངེས་གྲོལ་བར། །ཁྱེད་རྣམས་འདི་ཉིད་ལེགས་པར་གནས། །བདེ་ཆེན་ཐེག་པ་འདི་ལས་ནི། །སླར་ཁྱོད་འཆི་བ་ཡོད་མིན་ཏེ། །མི་ཚུགས་པ་དང་མི་ཆོད་པ། །ཅིས་ཀྱང་མི་འཇིགས་དགའ་བར་གྱིས། །སྲིད་པ་ཤིན་ཏུ་དག་པའི་ཕྱིར། །སྲིད་པའི་
10-11-18a


སྡུག་བསྔལ་ལས་ཁྱོད་འདས། །སྲིད་པ་ཤིན་ཏུ་གྲུབ་པའི་ཕྱིར། །སྟོན་པའི་མཆོག་ཏུ་གྱུར་པ་ཡིན། །དམ་ཚིག་སྡོམ་པ་འགྲུབ་པ་འདི། །རྟག་ཏུ་ཁྱོད་ཀྱིས་བསྲུང་བར་བྱ། །སངས་རྒྱས་ཀུན་གྱིས་མཐུན་པར་གསུངས། །
དམ་པ་རྟག་པའི་བཀའ་ཡིན་ནོ། །གང་ཞིག་བསྐྱེད་པ་ཙམ་གྱིས་ནི། །སངས་རྒྱས་ཀུན་གྱི་དོགས་མེད་པའི། །བྱང་ཆུབ་སེམས་ནི་གཏང་མི་བྱ། །ཕྱག་ན་རྡོ་རྗེ་གང་ཡིན་པའོ། །དམ་པའི་ཆོས་ནི་མི་སྤོང་ཞིང་། །ནམ་ཡང་དོར་བར་མི་བྱའོ། །མི་
ཤེས་པ་འམ་རྨོངས་པ་ཡིས། །ཚུལ་ཆེན་བསྟན་པར་མི་བྱའོ། །བདག་ཉིད་ཡོངས་སུ་སྤངས་ནས་སུ། །དཀའ་ཐུབ་ཀྱིས་ནི་མ་གདུངས་ཤིག །ཅི་བདེ་བར་ནི་བདེ་བས་གཟུང་། །འདི་ནི་མ་བྱོན་རྫོགས་སངས་རྒྱས། །རྡོ་རྗེ་དྲིལ་བུ་ཕྱག་རྒྱ་རྣམས། །ནམ་
ཡང་ཡོངས་སུ་མི་གཏོང་ཞིང་། །སློབ་དཔོན་སྨད་པར་མི་བྱ་སྟེ། །འདི་ནི་སངས་རྒྱས་ཀུན་དང་འདྲ། །སངས་རྒྱས་ཀུན་མཚུངས་བླ་མ་ཡི། །སློབ་དཔོན་ལ་ནི་གང་སྨོད་པ། །དེ་ནི་སངས་རྒྱས་ཀུན་སྨད་པས། །རྟག་ཏུ་དུཿཁ་ཐོབ་འགྱུར་ཏེ། །རིམས་དང་དུག་
དང་དབྱིག་དུག་ནད་། །མཁའ་འགྲོ་རྣམས་ཀྱིས་གཙེས་པ་དང་། །གདོན་དང་ལོག་འདྲེན་གཏུམ་པོ་ཡིས། །བསད་ནས་སེམས་དམྱལ་ལྟུང་བར་འགྱུར། །དེ་བས་ནན་ཏན་ཐམས་ཅད་ཀྱིས། །རྡོ་རྗེ་སློབ་དཔོན་བློ་གྲོས་ཆེ། །དགེ་བ་རབ་ཏུ་མི་བཅོམ་པ། །
ནམ་ཡང་སྨད་པར་མི་བྱའོ། །བླ་མ་ལ་ནི་གུས་བཅས་ཡོན། །རྗེས་མཐུན་ཁྱོད་ཀྱིས་སྦྱིན་པར་བྱ། །དེས་ནི་རིམས་སོགས་གནོད་པ་རྣམས། །ཕྱིར་ཞིང་འབྱུང་བར་མི་འགྱུར་རོ། །རྟག་ཏུ་རང་གི་དམ་ཚིག་བསྲུང་། །རྟག་ཏུ་དེ་བཞིན་གཤེགས་པ་
10-11-18b


མཆོད། །རྟག་ཏུ་བླ་མ་ལ་ཡང་དབུལ། །འདི་ནི་སངས་རྒྱས་ཀུན་དང་འདྲ། །དེ་བྱིན་སངས་རྒྱས་ཐམས་ཅད་ལ། །རྟག་ཏུ་བྱིན་པ་ཉིད་དུ་འགྱུར། །དེ་བྱིན་བསོད་ནམས་ཚོགས་ཡིན་ཏེ། །ཚོགས་པས་དངོས་གྲུབ་མཆོག་ཏུ་འགྱུར། །གང་ཕྱིར་འདི་
ནི་ལེགས་གནས་པས། །དེང་ཁྱོད་སྐྱེ་བ་འབྲས་བུ་བཅས། །དམ་ཚིག་ལྷ་རྣམས་ཀུན་མཉམ་པར། །དེང་ཁྱོད་འགྱུར་བར་ཐེ་ཚོམ་མེད། །སངས་རྒྱས་རྡོ་རྗེ་འཛིན་བཅས་པས། །ཀུན་གྱིས་དེང་ཁྱོད་དབང་བསྐུར་བས། །ཁམས་གསུམ་གྱི་ནི་
རྒྱལ་པོ་ཆེ། །རྒྱལ་པོའི་བདག་པོར་བསྟན་པ་ཡིན། །དེ་ནི་བདུད་ལས་རྣམ་རྒྱལ་ཏེ། །གྲོང་ཁྱེར་མཆོག་ཏུ་རབ་ཏུ་ཞུགས། །ཁྱེད་རྣམས་ཀྱིས་ནི་སངས་རྒྱས་ཉིད། །དེ་ཉིད་ཐོབ་པར་ཐེ་ཚོམ་མེད། །དེ་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གིས་དམ་
ཚིག་མི་ཟད་བདེ་བསྐྱེད་བསྟེན་པར་གྱིས། །དེང་ནི་འགྲོ་ལས་མྱུར་བདེ་རྡོ་རྗེ་སེམས་དཔའ་དང་། །རབ་ཏུ་མཉམ་ཞིང་རྟག་པ་ཉིད་དུ་རྟོགས་པར་འགྱུར། །ཞེས་བརྗོད་དེ་དོན་བཤད་དོ། །དེ་ནས་སློབ་མས་བླ་མའི་ཞབས་ལ་ཕྱག་བྱས་ཏེ།  གཙོ་བོས་ཇི་ལྟར་བཀའ་
སྩལ་པའི། །གསུང་ནི་དེ་བཞིན་བདག་བགྱིད་དོ། །ཞེས་བརྗོད་ནས་མཎྜལ་ཕུལ་ཏེ།  དེང་ནས་བརྩམས་ཏེ་བདག་བྲན་ཏུ། །ཞེས་སོགས་ཀྱིས་ལུས་ལོངས་སྤྱོད་ཐམས་ཅད་དབུལ་བར་བྱའོ། །དེ་ནས་སློབ་དཔོན་གྱིས་རྡུལ་ཚོན་གྱི་དཀྱིལ་འཁོར་ལ་མཆོད་
བསྟོད་བདུད་རྩི་མྱོང་བ་བྱས་ནས་ཡི་གེ་བརྒྱ་པས་ལྷག་ཆད་ཁ་བསྐང་།  ནོངས་པ་བཟོད་པར་གསོལ་ནས།  ཨོཾ་ཨཱཿཧཱུྃ།  མུཿཞེས་པས་ཡེ་ཤེས་པ་གཤེགས་སུ་གསོལ་ཞིང་།  དམ་ཚིག་པ་བདག་ལ་བསྡུ།  ཨ་ཀཱ་རོའི་སྔགས་ཀྱིས་ཐོག་མར་དབང་ལྡན་གྱི་རྩིག་པ་
10-11-19a


ནས་བཟུང་སྟེ།  རྡུལ་ཚོན་རིམ་པ་བཞིན་བསྡུས་ལ་རང་དང་སྒྲུབ་པའི་གྲོགས་རྣམས་ཀྱི་སྤྱི་བོར་ཅུང་ཟད་རེ་བཞག །ལྷག་མ་ཆུ་བོ་ཆེན་པོར་དོར། ཧཱུྃ་བཞི་པའི་སྔགས་དང་། ཧཱུྃ་མཛད་ཀྱི་ཕྱག་རྒྱས་ཕུར་བུ་ཕྱུང་ལ།  ཕུར་ཁུང་སངས་རྒྱས་
སྤྱན་གྱི་སྔགས་བཟླས་པའི་འོ་མས་དགང་སྟེ།  བགེགས་ཀྱི་རྨ་སོས་པར་བསམ།  དྲི་བཟངས་ཀྱི་ཆུས་ཐིག་རྗེས་བཀྲུ་ཞིང་།  བསྔོ་བ་སྨོན་ལམ་དང་ཤིས་པ་བརྗོད་པར་བྱའོ། །རྣམ་མང་རྒྱུད་སྡེའི་ཆུ་གཙང་ལས་འཁྲུངས་ཤིང་། །རྣམ་དག་ཆོ་གའི་འདབ་
མ་སྟོང་ལྡན་པའི། །གཞུང་བཟང་ཟེའུ་འབྲུ་ལས་བྱུང་སྦྲང་རྩིའི་རྒྱུན། །འཇམ་དཔལ་ཡེ་ཤེས་བུང་བ་རོལ་ཕྱིར་སྦྱར། །འདི་སྦྱར་དགེ་བ་དུང་དང་ཀུན་ད་ལྟར། །དྲི་མེད་དཀར་བའི་ཕྲེང་བ་གང་ཐོབ་དེས། །ཁམས་གསུམ་འགྲོ་བའི་སྙིང་མུན་ཀུན་
བསལ་ནས། །འཇམ་དཔལ་ཡེ་ཤེས་ཉི་མ་ཤར་གྱུར་ཅིག །བདག་ཀྱང་དེང་ནས་སྐུ་གསུམ་མ་ཐོབ་བར། །ལམ་གྱི་བར་ཆད་ཐམས་ཅད་ཞི་བ་དང་། །སྨིན་གྲོལ་ཟབ་མོའི་དགའ་སྟོན་རྟག་མྱོང་ཞིང་། །སྐལ་ལྡན་འགྲོ་ལ་དམ་ཆོས་སྟོན་པར་ཤོག  །
དཔལ་གསང་བ་འདུས་པ་འཇམ་པའི་རྡོ་རྗེ་ལྷ་བཅུ་དགུའི་དཀྱིལ་འཁོར་གྱི་ཆོ་ག་ཡེ་ཤེས་རྣམ་རོལ་ཞེས་བྱ་བ་འདི་ནི་བཞི་བརྒྱ་ལྔ་བཅུ་པའི་གཞུང་དང་།  དེར་ཅུང་ཟད་མི་གསལ་བ་སྨན་པའི་ཞབས་ཀྱི་གཞུང་ལས་གསལ་བར་བཤད་པའི་དགོངས་པ་ཇི་ལྟ་བ་བཞིན་
དད་པ་དང་བློ་གྲོས་ཀྱི་རྒྱན་དང་ལྡན་པ་ཚ་འདུ་ཤེས་རབ་སེང་གེ་ལ་སོགས་པ་དོན་དུ་གཉེར་བ་དུ་མས་བསྐུལ་བའི་ངོར།  རྗེ་བཙུན་མཁྱེན་རབ་ཀྱི་དབང་ཕྱུག་ཀུན་དགའ་བཟང་པོ་ཡབ་སྲས་ཀྱི་ཞབས་རྡུལ་སྤྱི་བོས་བླངས་པ་མང་དུ་ཐོས་པའི་དགེ་སློང་བསོད་ནམས་
10-11-19b


སེང་གེས་ཐུབ་བསྟན་རྣམ་པར་རྒྱལ་བའི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།།    །།འཇམ་པའི་རྡོ་རྗེ་ས་ལུགས་ཀྱི་དབང་གི་བརྒྱུད་པ་ནི།  འཇམ་པའི་རྡོ་རྗེ།  སངས་རྒྱས་ཡེ་ཤེས་ཞབས།  མར་མེ་མཛད་བཟང་པོ།  དཔལ་སྡེ།  བི་མ་ལ་གུབྟ།  རཏྣ་བཛྲ།  
རཏྣ་ཀི་རྟི།  བླ་མ་པེན་ད་པ།  གཉན་ལོ་ཙྪ་པ།  གནམ་ཁའུ་པ།  ས་སྐྱ་པ་ཆེན་པོ།  སློབ་དཔོན་རིན་པོ་ཆེ།  རྗེ་བཙུན་རིན་པོ་ཆེ།  ས་སྐྱ་པཎྜི་ཏ།  བླ་མ་འཕགས་པ།  བླ་མ་ཀུན་དགའ་གྲགས།  སློབ་དཔོན་བཀྲ་ཤིས་དཔལ།  དགའ་ལྡན་པ་ཀུན་བསོད།  ཁམས་པ་རྡོ་རྗེ་
དཔལ།  བླ་མ་ཀིརྟི་ཤྲཱི།  ཀུན་མཁྱེན་གངས་པ།  མ་ཏི་པཎ་ཆེན།  ས་བཟང་འཕགས་པ་གཞོན་ནུ་བློ་གྲོས།  རྗེ་བཙུན་ཀུན་དགའ་བཟང་པོ།  དམ་པ་ཀུན་དགའ་དབང་ཕྱུག །དེས་བདག་ཀུན་མཁྱེན་བསོད་ནམས་སེང་གེ་ལའོ།།    །།དགེའོ།།    །།།  
༄༅།།    །།འཇམ་པའི་རྡོ་རྗེ་དང་སྤྱན་རས་གཟིགས་ཀྱི་སྒྲུབ་དཀྱིལ་གྱི་མི་འདྲ་བའི་ཁྱད་པར་བཞུགས་སོ། །༄༅།  །བླ་མ་དང་འཇིག་རྟེན་དབང་ཕྱུག་ལ་ཕྱག་འཚལ་ལོ། །གསང་བ་འདུས་པ་འཇམ་པའི་རྡོ་རྗེའི་སྒྲུབ་ཐབས་ལས།  འཇིག་རྟེན་དབང་
ཕྱུག་གི་སྒྲུབ་ཐབས་ཀྱི་ཁྱད་པར་ལོགས་སུ་བརྗོད་ན།  ཐོག་མར་ཨོཾ་གྷ་གྷ།  གྷ་ཏ་ཡ་གྷ་ཏ་ཡ་སརྦ་དུཥྚན་ཕཊ།  ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཕཊ། ཧཱུྃ་ཧཱུྃ་ཧཱུྃ་བཛྲ་ཀཱི་ལ་ཡ་བཛྲ་དྷ་རོད་ཨཛྙ་པ་ཡ་ཏི།  སརྦ་དུཥྚ་ནཾ་ཀཱ་ཡ་ཝཱཀ་ཙིཏྟ་ཀཱི་ལ་ཡ་ཧཱུྃ་ཕཊ།  ཞེས་པའི་སྔགས་
འདིས་ཕྱོགས་བཅུའི་བགེགས་ཐམས་ཅད་བསལ་བར་བྱས་ནས་ཚད་མེད་བཞི་བསྒོམ་པ་དང་།  ཚོགས་ཞིང་སྤྱན་འདྲེན་པ་ནི།  འཇིག་རྟེན་དབང་ཕྱུག་གི་ང་རྒྱལ་དང་།  ས་བོན་ཧྲཱིཿཡིག་དང་།  མདུན་དུ་འཇིག་རྟེན་དབང་ཕྱུག་གིས་གཙོར་བྱས་པ་སྤྱན་འདྲེན་པ་མ་
10-11-20a


གཏོགས་གཞན་འདྲའོ། །དེ་ནས་ཀཱ་ཡ་ཝཱཀ་ཙིཏྟ་སོགས་ཀྱིས་ཕྱག་བྱས་ནས།  ཉེར་སྤྱོད་དང་རྡོ་རྗེ་མ་ལྔས་མཆོད།  རྒྱུན་བཤགས་དང་ཡེ་ཤེས་ཀྱི་ཚོགས་བྱའོ། །དེའི་རྗེས་སུ་སྟོང་པའི་ངང་ལས་ཨོཾ་དམར་པོ་ལས་ཉི་མའི་དཀྱིལ་
འཁོར་གྱི་སྟེང་དུ། ཧཱུྃ་ལས་རྡོ་རྗེ་རྩེ་ལྔ་པ་ནག་པོ་ཁ་གྱེས་པ།  ལྟེ་བ་ལ་ཧཱུྃ་གིས་མཚན་པ།  དེ་ལས་བྱུང་བའི་རྡོ་རྗེའི་རང་བཞིན་གྱི་འོད་ཟེར་ཕྱོགས་བཅུ་ཀུན་དུ་འཕྲོས་པས་བགེགས་ཐམས་ཅད་བསལ་ལ།  རྡོ་རྗེའི་རང་བཞིན་གྱི་འོད་ཟེར་དེ་ཉིད་ལས་རྡོ་རྗེའི་ར་བ་
དང་།  དྲྭ་བ་དཔངས་དཔག་ཚད་བརྒྱ་སྟོང་དུ་ཡོད་པ།  བདུད་ཐམས་ཅད་ཀྱིས་བགྲོད་པར་མི་ནུས་པ་ཕྱོགས་ཐམས་ཅད་ཁྱབ་པ།  ཕྱི་རོལ་ན་དུས་མཐའི་མེའི་ཕུང་པོ་འབར་བ་ལྟ་བུས་བསྐོར་བ་དང་།  རྡོ་རྗེའི་རང་བཞིན་གྱི་སའི་དཀྱིལ་འཁོར་ས་འོག་གི་མཐར་ཐུག་པར་
བསམས་ལ།  ཆོས་འབྱུང་ནས་བཟུང་སྟེ།  གཞལ་ཡས་ཁང་གདན་བཅས་བསྒོམ་པ་ལ་འཇུག་པས་ཆོག་གི།  ནམ་མཁར་ཡིག་འབྲུ་ལྔ་འཇོག་པ་དང་།  རྩིབས་བཅུ་པའི་སྲུང་འཁོར་ནི་མི་དགོས་སོ། །གཞལ་ཡས་ཁང་ལ་ལྷ་སྣམ་ནི་ཤར་དཀར།  ལྷོ་སེར།  ནུབ་སྔོ།  བྱང་
ལྗང་།  དབུས་དམར་པོ་སྟེ།  དེས་རྩིག་པའི་གོ་རིམ་ཡང་ཤེས་པར་བྱས་ནས།  བདག་མདུན་ཀུན་ལ་སྦྱར་བར་བྱའོ། །གཞལ་ཡས་ཁང་གདན་བཅས་བསྒོམས་པའི་རྗེས་སུ།  ནམ་མཁའ་ནས་ཡི་གེ་གསུམ་བབས་པ་མི་དགོས་པར།  ཨཱ་ལི་ཕྲག་གཉིས་ལས་ཟླ་བ་
བསྒོམ་པ་སོགས་མངོན་བྱང་ལྔ་ལས་རྡོ་རྗེ་སེམས་དཔའ་བསྐྱེད་པ་ནས།  ཞུ་བ་གླུས་བསྐུལ་གྱི་བར་འདྲ་ལ།  ཐིག་ལེ་དེ་ཡོངས་སུ་གྱུར་པ་ལས།  ཧྲཱིཿལས་པདྨ་དམར་པོའི་ལྟེ་བར་ཧྲཱིཿས་མཚན་པ།  དེ་ལས་འོད་ཟེར་འཕྲོས།  སེམས་ཅན་ཐམས་ཅད་འཇིག་
10-11-20b


རྟེན་དབང་ཕྱུག་ཞལ་གསུམ་ཕྱག་དྲུག་པའི་གཟུགས་ཀྱིས་ཧྲཱིཿལ་ཐིམ།  པདྨ་ཧྲཱིཿདང་བཅས་པ་ཡོངས་སུ་གྱུར་པ་ལས་འཇིག་རྟེན་དབང་ཕྱུག་སྐུ་མདོག་དམར་པོ་ཞལ་གསུམ་ཕྱག་དྲུག་པ།  རྩ་བའི་ཞལ་དམར་བ།  གཡས་ཞལ་སྔོ་བ།  གཡོན་ཞལ་དཀར་བ། 
རྩ་ཕྱག་གཉིས་ཀྱིས་རང་འདྲ་བའི་རིག་མ་ལ་འཁྱུད་པ།  གཡས་གཉིས་པས་པདྨ།  གསུམ་པས་རལ་གྲི།  གཡོན་གཉིས་པས་རིན་པོ་ཆེ།  གསུམ་པས་འཁོར་ལོ་བསྣམས་པ།  རྒྱན་ཆ་ལུགས་འདྲ་བར་བྱས་ནས་དྷརྨ་དྷཱ་ཏུའི་སྔགས་ཀྱིས་བྱིན་གྱིས་བརླབ་བོ། །
ཡན་ལག་ཕྱི་མ་གསུམ་ནི་གཞན་འདྲ་ལ་རིགས་བདག་འོད་དཔག་མེད་དོ། །དེ་ནས་ཡན་ལག་བར་མ་བཞི་ཡང་ཞལ་ཕྱག་དང་།  ས་བོན་འདོན་པ་བསྒྱུར་བ་མ་གཏོགས་འདྲ།  དཀྱིལ་འཁོར་རྒྱལ་མཆོག་གི་སྐབས་སུ་ཡུམ་གྱི་མཁར་ཐིག་ལེ་དེ་ཧྲཱིཿདམར་པོར་
གྱུར།  དེ་ལས་འོད་དཔག་མེད་གཙོ་བོར་གྱུར་པ་དང་མི་བསྐྱོད་པ་ནུབ་ཏུ་བཞག་པའི་ལྷ་བཅུ་དགུ་བསྐྱེད།  འོད་དཔག་མེད་ཕྱིར་ཕྱུང་སྟེ་མཛད་པ་མཛད་ནས་རང་ལ་བསྟིམ།  དེ་ནས་རྣམ་སྣང་དང་རིན་འབྱུང་གཉིས་འདྲ།  མི་བསྐྱོད་པ་ཕྱིར་ཕྱུང་མཛད་པ་མཛད་
ནས་ནུབ་ཕྱོགས་སུ་འགོད།  གཞན་རྣམས་འདྲའོ། །རིགས་བདག་གི་སྐབས་སུ་རིགས་ལྔ་ལ་འོད་དཔག་མེད་ཀྱིས་དབུར་བརྒྱན།  གཞན་རྣམས་འདྲ།  གཙོ་བོའི་སྔགས་ནི་ཨོཾ་ཨཱཿཨོཾ་མ་ཎི་པདྨེ་ཧཱུྃ་ཧཱུྃ་ཞེས་པའོ། །དེ་དག་ནི་སྒྲུབ་ཐབས་ཀྱི་མི་འདྲ་བའི་
ཁྱད་པར་རོ། །དཀྱིལ་འཁོར་གྱི་ཆོ་ག་ལ་ཡང་གཙོ་བོ་གོ་འཕོ་ཚུལ་དང་།  ས་བོན་གྱི་འདོན་པ་བསྒྱུར་བ་དང་།  གསོལ་གདབ་དང་།  མཆོད་པའི་སྐབས་ཀྱི་གཙོ་བོའི་མཚན་བསྒྱུར་བ་ཙམ་མ་གཏོགས་གཞན་འདྲ་བར་ཤེས་པར་བྱའོ། །
10-11-21a


དཀྱིལ་ཆོག་གང་ལ་སྦྱར་ཡང་མདུན་བསྐྱེད་ཀྱི་བསྟོད་པའི་སྐབས་སུ་སྤྲོས་པ་ལ་དགའ་ན་དེ་ཉིད་ལྔ་པའི་རྗེས་སུ།  གང་གི་དངོས་ཀུན་གདོད་ནས་གསལ་བས་མཁའ་བཞིན་ཞི་ཞིང་དག །ཡང་དག་གསལ་བས་བསྲེས་པའི་འཁོར་
ལོས་ཀུན་འདས་རབ་བཟློག་པའི། །རྟག་སོགས་རྒྱལ་བ་བསྐྱེད་བྱེད་འགྲོ་ཀུན་དེ་ཉིད་གཅིག་པ་པོ། །ཁྱབ་བདག་དཔལ་ལྡན་རྡོ་རྗེ་སེམས་དཔའ་དེ་ལ་ཕྱག་འཚལ་ལོ། །དེ་ཡི་གཟུགས་ཚོར་འདུ་ཤེས་འདུ་བྱེད་རྣམ་པར་ཤེས་པ་རྣམས། །འཁྲུལ་དང་
བྲལ་བས་དྲི་མེད་ཕུང་པོ་དངོས་པོར་གྲུབ་པ་སྟེ། །འདོད་ཆགས་ལ་སོགས་ཐབས་ཀྱིས་དེ་བསྐྱོད་མངོན་པར་བྱང་ཆུབ་ཕྱིར། །སེམས་དོན་བདག་བཅས་རྣམ་རིག་ལས་སྐྱེས་རྟག་སོགས་དེ་ལ་འདུད། །ས་ཆུ་མེ་རླུང་རང་བཞིན་གྱུར་ཅིང་ཚངས་སྤྱོད་བཞི་ལས་
སྐྱེས། །འཇོ་སྒེག་རོལ་གདུང་རབ་ཏུ་བྲོད་པའི་ཡིད་དགའ་གང་གི་སེམས། །སྒྱུ་མའི་སྐུ་ཡིས་རང་འབྱོར་མཐའ་རུ་དེ་སྒྲོལ་རབ་མཁས་པ། །རྡོ་རྗེ་ཐེག་པར་འགྲོ་བའི་ལམ་མཆོག་སྤྱན་མ་ལ་སོགས་དེ་ལ་འདུད། །དེ་བཞིན་མིག་ལ་སོགས་པའི་གཏི་མུག་དམ་
ཚིག་ལས་བྱུང་ཞིང་། །མ་ནིང་གནས་སུ་རྒྱས་བཏབ་དེ་ལས་ཐམས་ཅད་མཁྱེན་པ་སྐྱེ། །རིག་པའི་རྒྱལ་པོས་ལྷ་ཡི་མིག་སོགས་གང་བར་སྩོལ་མཛད་པ། །ས་སྙིང་ལ་སོགས་སེམས་དཔའ་ཚོགས་ཆེན་དེ་ལ་རབ་ཏུ་འདུད། །གཟུགས་ལ་སོགས་པའི་
སྤྱོད་ཡུལ་འདུལ་བར་དཀའ་བ་ཉམས་བྱས་པ། །བླ་ན་མེད་པའི་འདོད་པ་རྣམས་ཀྱིས་རྣལ་འབྱོར་གང་གི་སེམས། །ཚིམ་པར་མཛད་པ་འདི་ལ་བསྒྲུབ་བྱ་མཆོག་འབྱུང་གང་ཡིན་པའི། །གཟུགས་ཀྱི་རྡོ་རྗེ་ལ་སོགས་ལྷ་མོ་ཚོགས་ཆེན་དེ་ལ་འདུད། །ཀུན་ཏུ་སྦྱོར་
10-11-21b


བའི་གདེང་གཡོས་རབ་བརྒྱན་དྲག་པོའི་ཆ་ལུགས་འཆང་། །འཇིགས་བྱེད་ཞལ་བཞད་ས་འཛིན་གཡོ་ཞིང་ཐུབ་སྐྲག་སྡིག་ལ་སོགས། །དད་པ་ལ་སོགས་སེམས་སུ་གཏོགས་དང་དེ་ཡི་རང་བཞིན་ཆོས། །དམ་པར་བཟུང་སོགས་རྣམ་དག་གཤིན་རྗེ་གཤེད་
སོགས་དེ་ལ་འདུད། །ཤེས་རབ་ཆེན་པོ་ལས་སྐྱེས་དེ་རྣམས་ཤིན་ཏུ་དག་མཛད་ཅིང་། །འཇམ་ཞིང་མཉེན་པའི་དབྱངས་ཀྱིས་འགྲོ་བའི་རྒྱུད་ནི་ཚིམ་མཛད་པ། །འབར་ཞིང་ཟུར་ཕུད་ལྔ་ལྡན་བརྒྱད་གཉིས་ལོན་པའི་ཚུལ། །དབང་པོའི་གཞུ་མཚུངས་འཇམ་
དབྱངས་རྡོ་རྗེ་དེ་ལ་ཕྱག་འཚལ་ལོ། །ཞེས་ཙི་ལུ་པའི་འགྲེལ་པའི་མཆོད་བརྗོད་ལས་འབྱུང་བ་འདི་དག་གིས་བསྟོད་པར་བྱ་ཞིང་འཇམ་པའི་རྡོ་རྗེ་ལ་བསྟོད་ན་ཚིགས་བཅད་འོག་མ་གོང་དུ་བཏོན་པར་བྱའོ། །ཤིན་ཏུ་རྒྱས་པ་ལ་སྤྲོ་ན།  རྗེ་བླ་མས་མཛད་པའི་
དཀྱིལ་འཁོར་གྱི་བསྟོད་པས་བསྟོད་པར་བྱའོ། །འདིའི་བརྒྱུད་པ་ནི།  ཇོ་བོ་རྗེ།  རྒྱ་ལྕགས་རི་གོང་པ།  རྫིང་བུ་ཁ་བ་ཤཱཀྱ་གྲགས།  སྤེན་ཕུག་པ་དར་མ་ཤཱཀྱ།  ཞང་ཡེ་པ།  བཟེ་པ་དོན་གྲུབ།  བར་ཐང་པ་ཡབ་སྲས།  བསོད་ནམས་དབང་ཕྱུག  །
ལོ་ཙྪ་བ་མཆོག་ལྡན།  བླ་མ་དཔལ་ལྡན་སེང་གེ།  བུ་སྟོན་རིན་པོ་ཆེ།  མཁས་གྲུབ་གཞོན་ནུ་བསོད་ནམས།  བླ་མ་བཀྲ་ཤིས་རིན་ཆེན།  རྗེ་བཙུན་ཀུན་དགའ་བཟང་པོ།  དམ་པ་ཀུན་དགའ་དབང་ཕྱུག །དེས་བདག་བསོད་ནམས་སེང་གེ་ལའོ། །
ཇོ་བོ་རྗེ་དང་།  རྒྱ་ལྕགས་རི་གོང་པའི་བར་དུ་ལྷ་བྱང་ཆུབ་འོད།  འམ་པ་ལྕགས་རི་བ་གཉིས་ཆད་པ་འདྲ།  བུ་སྟོན་པའི་གསན་ཡིག་ན་སྔ་མ་དེ་ལས་མི་སྣང་ཡང་།  རྒྱ་ལྕགས་རི་བས་ཇོ་བོ་རྗེ་མ་ཟིན་ཞེས་རྗེ་རྡོ་རྗེ་འཆང་གསུང་ངོ་། །བརྒྱུད་པ་གོང་མ་རྣམས་ཤཱནྟི་པ་
10-11-22a


ཡན་ཆད་ཡེ་ཤེས་ཞབས་ལུགས་དང་འདྲའམ་བསམ་སྟེ།  ཇོ་བོ་རྗེ་ཤཱན་ཏི་པའི་དངོས་སློབ་ཡིན་པས་སོ་ཞེས་བུ་སྟོན་གསུངས་ཏེ།  དེ་ལྟར་ན་འཇམ་པའི་དབྱངས།  ཡེ་ཤེས་ཞབས།  མར་མེ་མཛད་བཟང་པོ།  ཀུན་དགའ་སྙིང་པོ།  
ཐ་ག་ན།  ཤཱནྟི་པ།  ཇོ་བོ་རྗེ་ཞེས་སྦྱར་བར་བྱའོ། །འདི་ཡང་འཇམ་པའི་རྡོ་རྗེའི་སྒྲུབ་དཀྱིལ་སྤྱན་རས་གཟིགས་དང་མི་འདྲ་བའི་ཁྱད་པར་ཅུང་ཟད་ཡོད་པ་རྣམས་ཤེས་པའི་ཆེད་དུ་ཤཱཀྱའི་དགེ་སློང་བསོད་ནམས་སེང་གེས་བྲིས་པའོ། །།  དགེའོ། །།  
༄༅། །འཇམ་པའི་རྡོ་རྗེའི་གཏོར་ཆོག་ཕྲིན་ལས་རྣམ་རོལ་བཞུགས་སོ། །༄༅།  །དཔལ་གསང་བ་འདུས་པ་འཇམ་པའི་རྡོ་རྗེའི་གཏོར་མའི་ཆོ་ག་ཕྲིན་ལས་རྣམ་རོལ་ཞེས་བྱ་བ།  བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་
ལ་ཕྱག་འཚལ་ལོ། །གང་གི་རྣམ་འཕྲུལ་བྱེ་བའི་ཆ་ཙམ་གྱིས། །བགེགས་འཇོམས་དོན་ཀུན་འགྲུབ་བྱེད་ཕྱོགས་སྐྱོང་སྐུར། །སྟོན་མཛད་འཁོར་ལོའི་གཙོ་ལ་ཕྱག་བྱས་ནས། །གཏོར་མའི་ཆོ་ག་གཞུང་བཞིན་བཤད་པར་བྱ། །འདི་ལ་མདུན་བསྐྱེད་དང་
འབྲེལ་བའི་ཚུལ་དང་།  མདུན་བསྐྱེད་དང་མ་འབྲེལ་བར་ཐུན་མོང་དུ་གཏོང་བའི་ཚུལ་དང་།  ཕྱི་རོལ་པ་སོགས་འཇིག་རྟེན་པ་ཁོ་ན་ལ་གཏོང་བའི་ཚུལ་གསུམ་ལས།  དང་པོ་ནི།  མདུན་བསྐྱེད་ཀྱི་བྱང་ཤར་དུ་འདས་པའི་གཏོར་མ།  ཤར་ལྷོར་འཇིག་རྟེན་པའི་གཏོར་
མ།  དེ་དག་གི་བར་དུ་སྒོས་ཀྱི་ཆོས་སྐྱོང་གང་བྱེད་ཀྱི་གཏོར་མ་རྣམས་རིམ་པ་བཞིན་བཤམ།  ནང་མཆོད་ཆུ་ཆང་གིས་བྲན་ནས།  བྱིན་རླབས་སྒྲུབ་ཐབས་ལྟར་དུས་གཅིག་ལ་བྱ།  དེ་ནས་མདུན་བསྐྱེད་ཀྱི་ལྷ་རྣམས་ཀྱི་ལྗགས་ཧཱུྃ་ལས་བྱུང་བའི་རྡོ་རྗེ་རྩེ་ལྔ་
10-11-22b


པར་བསམས་ལ།  དེ་ལས་བྱུང་བའི་འོད་ཀྱི་སྦུ་གུས་གཏོར་མ་གསོལ་བར་བསམ་ཞིང་།  པད་སྐོར་སྔོན་དུ་འགྲོ་བས་རྡོ་རྗེ་ཐལ་མོ་ཁ་ཕྱེ་སྟེ།  ཨོཾ་ཨཱཿམཱཾ།  བྷྲཱུྃ།  ཨཱཾ།  ཛྲཱིཾ།  ཁཾ།  ལཾ་མཱཾ་པཱཾ་ཏཱཾ།  ཛཿཧཱུྃ་བྃ་ཧོཿཁཾ་རཾ་ཧཱུྃ་ཧཱུྃ་ཧཱུྃ་ཧཱུྃ་པཉྩ་ཨ་མྲྀ་ཏ་ཧཱུྃ་ཞེས་གསུམ་
མམ།  ལྔའམ་བདུན་གྱིས་ཕུལ།  ཆུ་གསུམ་ལ་གཙོ་བོའི་སྔགས་དང་།  ཉེར་སྤྱོད་ཀྱིས་མཆོད་ལ།  སྔར་གྱི་སྔགས་ཀྱིས་བདུད་རྩི་གཏོར།  དེ་ཉིད་ལྔ་པས་བསྟོད་ནས།  རྡོ་རྗེ་གསུམ་དངོས་མི་ཕྱེད་སྐུ། །ཡེ་ཤེས་ལྔ་ལྡན་བདེ་བ་ཆེ། །འདུས་པའི་
དཀྱིལ་འཁོར་ལྷ་ཚོགས་རྣམས། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས་ཡིད་ལ་འདོད་པ་ཀུན་འགྲུབ་ཤོག་གི་བར་བརྗོད།  དེ་ནས་ཆོས་སྐྱོང་གི་གཏོར་མ་རྣམས་རིམ་པ་བཞིན་དུ་བསྔོས་ནས་འཇིག་རྟེན་པའི་གཏོར་མགྲོན་སྤྱན་དྲང་བ་ནི།  རང་
སྐད་ཅིག་གིས་འཇམ་པའི་རྡོ་རྗེར་གསལ་བའི་ཐུགས་ཀའི་ཏིང་ངེ་འཛིན་སེམས་དཔའི་འོད་ཟེར་གྱིས་འཇིག་རྟེན་སྐྱོང་བ་རྣམས་བཀུག་སྟེ།  རང་རང་གི་གཟུགས་ཀྱིས་རང་རང་གི་ཕྱོགས་མཚམས་རྣམས་སུ་འཁོད་པར་བསམས་ལ་རང་གི་སྙིང་གའི་འོད་ཟེར་ལས་
བྱུང་བའི་རྡོ་རྗེ་ཕུར་བུ་བཅུ།  སྟོད་རང་རང་གི་ཕྱོགས་ཀྱི་སྲུང་འཁོར་གྱི་ཁྲོ་བོའི་དབྱིབས་སུ་གནས་པ།  ལྟེ་བ་མན་ཆད་རྡོ་རྗེ་རྩེ་གཅིག་པ་ལྟ་བུས་ཤེས་རབ་དམ་པ་ལ་འཁྱུད་པ་སྤྲོས་ནས་རང་གི་ཐུགས་ཀ་ནས་རང་འདྲའི་ཁྲོ་བོ་སྤྲོས་ཏེ།  གཡོན་པས་ཕུར་བུའི་མགུལ་
པ་ནས་བཟུང་།  གཡས་པས་རྡོ་རྗེ་ཐོ་བས་སྤྱི་བོ་ནས་བརྡུངས་ཤིང་སྔགས་འདི་བརྗོད་པར་བྱ་སྟེ།  ཨོཾ་ཨཱཿཡ་མཱནྟ་ཀྲིཏ།  སརྦ་དུཥྚ།  ཨིནྟྲ་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ།  ཨོཾ་ཨཱཿཔྲ་ཛྙཱནྟ་ཀྲིཏ།  སརྦ་དུཥྚ།  ཡ་མཱན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ།  ཨོཾ་ཨཱཿཔདྨཱནྟ་
10-11-23a


ཀྲིཏ།  སརྦ་དུཥྚནཱ་ག་ན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ།  ཨོཾ་ཨཱཿབིགྷནྟ་ཀྲིཏ་སརྦ་དུཥྚ།  ག་ན་པ་ཏི་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ།  ཨོཾ་ཨཱཿཊཱ་ཀི་རཱ་ཛ་སརྦ་དུཥྚ་ཨཱ་ཀ་ནཱི་ན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ།  ཨོཾ་ཨཱཿནཱི་ལ་དནྟྲ་སརྦ་དུཥྚ།  ནི་རི་
ཏི་ན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ།  ཨོཾ་ཨཱཿམ་ཧཱ་བཱ་ལ་སརྦ་དུཥྚ།  ཝ་ཡུན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ།  ཨོཾ་ཨཱཿཨ་ཙཱ་ལ་སརྦ་དུཥྚ་ཨི་ཤྭ་རན།  ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ།  ཨོཾ་ཨཱཿཙ་ཀྲ་ཝརྟི་སརྦ་དུཥྚ་པཉྩི་ཊ།  ཨརྐ་ལི་ཏ།  མ་ཧཱ་ན་ས་པ་རི་ཝཱ་ར་ཀཱི་ལ་ཡ་ཧཱུྃ་
ཕཊ།  ཨོཾ་ཨཱཿསུམྦྷ་རཱ་ཛ་སརྦ་དུཥྚ་བི་མ་ཙི་ཏྲི།  པྲྀ་ཐཱི་ཝཱི།  དེ་ཝ་ན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ།  ཞེས་བརྗོད་ཅིང་རྐང་པའི་མཐར་ཐུག་པའི་བར་དུ་ཕུར་བུས་བཏབ་པས་ཐམས་ཅད་ཀྱང་གསང་བ་འདུས་པའི་སྐུར་གྱུར་པ་ནི་ཤར་དུ་རྡོ་རྗེ་མཚོན་ཆ་སེར་པོ་མི་བསྐྱོད་པའི་
ཅོད་པན་ཅན།  སེར་ནག་དཀར་བའི་ཞལ་གསུམ་ཕྱག་དྲུག་གི་གཡས་གཉིས་ན་རྡོ་རྗེ་དང་རལ་གྲི།  གཡོན་གཉིས་ན་རིན་པོ་ཆེ་དང་པདྨ་ཐོགས་པ།  དེའི་གཡོན་ཕྱོགས་སུ་རྡོ་རྗེ་སྒྱུ་མ་སྔོན་པོ་མི་བསྐྱོད་པའི་ཅོད་པན་ཅན།  སྔོ་དཀར་དམར་བའི་ཞལ་གསུམ་
ཕྱག་དྲུག་གིས་གཡས་གཉིས་ན་འཁོར་ལོ་དང་རལ་གྲི།  གཡོན་གཉིས་ན་དུང་དང་པདྨ།  ཤར་ལྷོར་རྡོ་རྗེ་མེ་དམར་པོ་མི་བསྐྱོད་པའི་ཅོད་པན་ཅན།  དམར་སྔོ་དཀར་བའི་ཞལ་གསུམ་ཕྱག་དྲུག་གི་གཡས་པ་གཉིས་ན་བགྲང་ཕྲེང་དང་མི་འཇིགས་པ་སྟེར་བ།  
གཡོན་གཉིས་ན་དབྱུག་པ་དང་གནྡྷེ།  ལྷོར་རྡོ་རྗེ་དུས་ནག་པོ་མི་བསྐྱོད་པའི་ཅོད་པན་ཅན།  ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་དབྱུག་པ་དང་རལ་གྲི།  གཡོན་གཉིས་ན་པདྨ་དང་རིན་པོ་ཆེ།  ལྷོ་ནུབ་ཏུ་རྡོ་རྗེ་གཏུན་ཤིང་ནག་པོ་ཅོད་པན་
10-11-23b


འདྲ།  གཡས་གཉིས་ན་གྲི་གུག་དང་རལ་གྲི།  གཡོན་གཉིས་ན་རིན་པོ་ཆེ་དང་ཁྲག་གིས་གང་བའི་ཐོད་པ།  ནུབ་ཏུ་རྡོ་རྗེ་ཀླུ་དཀར་པོ་འོད་དཔག་མེད་ཀྱི་ཅོད་པན་ཅན།  དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་པ་གཉིས་ན་སྦྲུལ་ཞགས་དང་རལ་གྲི།  
གཡོན་གཉིས་ན་པདྨ་དང་རིན་པོ་ཆེ།  ནུབ་བྱང་དུ་རྡོ་རྗེ་རླུང་ལྷ་ལྗང་གུ་དོན་གྲུབ་ཀྱི་ཅོད་པན་ཅན།  ལྗང་ནག་དཀར་བའི་ཞལ་གསུམ་ཕྱག་དྲུག་གི་གཡས་གཉིས་ན་གོས་དང་རལ་གྲི།  གཡོན་གཉིས་ན་པདྨ་དང་རིན་པོ་ཆེ།  དེའི་གཡོན་ཕྱོགས་ན་རྡོ་རྗེ་སྣ་རིང་
དཀར་པོ་མི་བསྐྱོད་པའི་ཅོད་པན་ཅན།  དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་དུང་དང་རལ་གྲི།  གཡོན་གཉིས་ན་རིན་པོ་ཆེ་དང་ཆང་གི་བཀང་བའི་ཁམ་ཕོར།  བྱང་དུ་རྡོ་རྗེ་འཇིགས་བྱེད་སེར་པོ་མི་བསྐྱོད་པའི་ཅོད་པན་ཅན།  སེར་ནག་
དཀར་བའི་ཞལ་གསུམ་ཕྱག་དྲུག་གི་གཡས་གཉིས་ན་བི་ཙ་པུ་ར་དང་རལ་གྲི།  གཡོན་གཉིས་ན་པདྨ་དང་ནེའུ་ལེ་ཐོགས་པ།  བྱང་ཤར་དུ་རྡོ་རྗེ་ཁྲོ་བོ་དཀར་པོ་འོད་དཔག་མེད་ཀྱི་ཅོད་པན་ཅན།  དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་རྩེ་
གསུམ་དང་རལ་གྲི།  གཡོན་གཉིས་ན་རིན་པོ་ཆེ་དང་པདྨ།  སྟེང་གི་ཕྱོགས་ཀྱི་ཆ་ལ་རྡོ་རྗེ་འོད་དཀར་པོ་མི་བསྐྱོད་པའི་ཅོད་པན་ཅན།  དཀར་སྔོ་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་པདྨ་དཀར་པོ་དང་རལ་གྲི།  གཡོན་གཉིས་ན་རིན་པོ་ཆེ་དང་འཁོར་ལོ།  དེའི་
གཡས་སུ་རྡོ་རྗེ་འཁྱིལ་པ་ནག་པོ་རིན་འབྱུང་གི་ཅོད་པན་ཅན།  སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་པདྨ་དམར་པོ་དང་རལ་གྲི།  གཡོན་གཉིས་སྔ་མ་དང་འདྲ།  གཡོན་དུ་རྡོ་རྗེ་མི་སྨྲ་སེར་པོ་རྣམ་སྣང་གི་ཅོད་པན་ཅན།  སེར་ནག་དཀར་བའི་
10-11-24a


ཞལ་གསུམ་ཕྱག་དྲུག་གི་གཡས་གཉིས་ན་པདྨ་སེར་པོ་དང་རལ་གྲི།  གཡོན་གཉིས་སྔ་མ་དང་འདྲ།  འོག་ཏུ་ཐགས་བཟངས་རིས་སྔོན་པོ་མི་བསྐྱོད་པའི་ཅོད་པན་ཅན།  སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་རྡོ་
རྗེ་དང་འཁོར་ལོ།  གཡོན་གཉིས་ན་རིན་པོ་ཆེ་དང་པདྨ།  དེའི་གཡོན་དུ་སའི་ལྷ་མོ་སེར་མོ་རྣམ་སྣང་གི་ཅོད་པན་ཅན།  སེར་ནག་དཀར་བའི་ཞལ་གསུམ་ཕྱག་དྲུག་གི་གཡས་གཉིས་ན་པདྨ་སེར་པོ་དང་རལ་གྲི།  གཡོན་གཉིས་ན་རིན་པོ་ཆེ་དང་འཁོར་ལོ་ཐོགས་
པ།  ཐམས་ཅད་ཀྱང་སྣ་ཚོགས་པདྨའི་སྟེང་དུ་རྡོ་རྗེའི་སྐྱིལ་ཀྲུང་གིས་བཞུགས་པ།  ཕྱག་དང་པོ་གཉིས་ཀྱིས་རང་སྣང་གི་ཤེས་རབ་མ་ལ་འཁྱུད་པ།  རིན་པོ་ཆེའི་ཅོད་པན་དང་།  རྒྱན་ཐམས་ཅད་ཀྱིས་བརྒྱན་པ།  ལྷའི་གོས་དང་།  ཕྲེང་བ་དང་།  བྱུག་པ་དང་
ལྡན་པ།  མཚན་དང་དཔེ་བྱད་ཉེ་བར་འབར་བ་གསལ་གདབ་བོ། །བསྡུས་པར་འདོད་ན་རང་རང་གི་ཕྱོགས་སུ་རང་རང་གི་མིང་དང་ཁ་དོག་ཙམ་བརྗོད་ནས་འདི་དག་ཐམས་ཅད་ཀྱང་ཞལ་གསུམ་ཕྱག་དྲུག་སྣ་ཚོགས་པདྨའི་སྟེང་ན་ཞེས་སོགས་ཀྱིས་གསལ་
བ་ཡང་རུང་ངོ་། །དེ་ནས་རྡོ་རྗེ་མ་ལྔ་དང་།  ཉེར་སྤྱོད་ཀྱིས་མཆོད་ནས་རྡོ་རྗེ་ཐལ་མོ་ཁ་ཕྱེ་སྟེ།  ཨོཾ་ཨཱཿསརྦ་ཏྲྱ་དྷྭ་ཛ།  ད་ཤ་དི་ཀ།  ལོ་ཀ་དྷཱ་ཏུ།  ཨ་ནནྟ།  ག་ག་ན།  ས་མུ་ཏྲ།  མེ་གྷ།  བྱཱུ་ཧ་པྲ་ས་ར།  པ་ར་མཱ་བྱུ་ཛོ།  མཎྜ་ལ་པ་རཾ་པ་ར།  ཨནྟརྒྒ་ཏ།  ས་མ་པཏྟི། 
ཨཱ་བསྠི་ཏཱ།  དྷརྨཱ་དྷཱ་ཏུ།  ས་མ་བ་ས་རཱ་ཎཱ།  ཨཱ་ཀཱ་ཤ།  དྷཱ་ཏུ།  སདྱ་བ་སཱ་ན་མཿསརྦ་ཏྲྱ་དྷྭ་ཛ།  ད་ཤ་དི་ཀ་ལོ་ཀ་དྷ་ཏུ།  ཨ་ནནྟ།  མེ་གྷ་བྱུ་ཧ།  པྲ་ས་ར།  ག་ག་ན།  ས་མཱཿསརྦ་ལོ་ཀཱ་པཱ་ལ།  སརྦ་སཏྟྭཥྩ་ཏ་དྱ་ཐཱ།  བཛྲ་ཡུ་དྷ།  མཱ་ཡཱ་བཛྲ།  བཛྲ་ཨ་ན་ལ།  བཛྲ་
10-11-24b


ཀཱ་ལ།  བཛྲ་མུ་ཥ་ལ།  ནཱ་ག་བཛྲ།  བཛྲ་ཨ་ནི་ལ་བཛྲ་ཤོཎྜ།  བཛྲ་བྷཻ་ར་ཝ།  བཛྲ་ཀྲོ་དྷ།  བཛྲ་ཀུཎྜ་ལི།  བཛྲ་པྲ་བྷ།  མོ་ན་བཛྲ།  བེ་མ་ཙི་ཏྲི།  པྲི་ཐཱི་ཝཱི།  དེ་ཝ་ཏཱཿས་པ་རི་ཝཱ་ར།  ཨི་མཾ།  པུཥྤེ།  དྷཱུཥྤེ།  དཱི་པ།  གན་དྷ།  ནཻ་ཝིདྷྱེ།  ཨཱ་དཱི་པཾ་ཡུ་ཏཾ་བ་ལི།  ཨུ་པ་ཧཱ་
རཾ།  པྲ་ཏཱིཙྪ།  ཨུ་པ་བྷུ་ཛཱ།  མ་མ།  ཧི་ར་ཎྱ་སུ་ཝརྞ་དྷ་ན་དྷཱ་ཉ།  ཨཱ་ཡུ།  ཡཽ་བ་ན།  ཨཱ་རོ་ཀྱ།  སད་སུ་ཁཾ།  ཨ་པ་ཧ་ར་ཀཱ།  སརྦ་བིགྷྣན་བི་ན་ཡ་ཀཱན།  སརྦ་དུཥྚན།  པྲ་དུཥྚན།  མ་ནུ་ཥྱན།  ཨ་མ་ནུ་ཥྱན།  ཛམྦྷ་ཡ་ཏ།  ཏམྦྷ་ཡ་ཏ།  བྷན་དྷ་ཡ་ཏ།  བིདྷྭཾ་ས་ཡ་
ཏ།  མ་མ་ཧི་ར་ཎྱེ།  སུ་ཝརྞ།  དྷ་ན།  དྷ་ཉ།  ཨཱ་ཡུར་ཡཽ་བ་ན།  ཨཱ་རོ་ཀྱ་སཏ་སུ་ཁ་ནི།  མ་ཧཱ་སུ་ཁ་པྲ་བྲིད་དྷ་ཡེ།  ཡཱ་བད་ཨཱ་བོ་དྷི་མཎྜ་པཱཪྻན་ཏཾ།  ཌྷོ་ཀ་ཡ་ཏ།  ས་ཏ་ས་ཧ་ཡ་ཏཾ།  ཤཱནྟིཾ་རཀྵ་ཙ།  ཀུ་རུ་ཧཱུྃ།  ཞེས་ལན་གསུམ་གྱིས་འབུལ།  ཨོཾ་ད་ཤ་དི་ཀ་ལོ་ཀ་པཱ་ལ། 
ཨོཾ་ཨཱཿཧཱུྃ་ཞེས་པས་ནང་མཆོད་གཏོར་ནས་ཐམས་ཅད་ཀྱང་རིགས་ལྔའི་ངོ་བོར་མོས་པར་བྱ་སྟེ།  རྡོ་རྗེ་དྲིལ་བུ་འཛིན་པས།  མི་བསྐྱོད་པ་ནི་ཡེ་ཤེས་ཆེ། །ཞེས་སོགས་དེ་ཉིད་ལྔ་པ་དང་།  ཨོཾ་ཨཱཿདུས་གསུམ་སྐྱེས་པ་ཀུན་དང་ཕྱོགས་བཅུ་ཡི། །འཇིག་
རྟེན་ཁམས་རྣམས་ནམ་མཁའི་མཐའ་ཀླས་པ། །རྒྱ་མཚོའི་སྤྲིན་གྱི་བཀོད་པ་རབ་འབྱམས་ཀྱི། །ཤིན་ཏུ་ཕྲ་བའི་རྡུལ་སྐྱེས་དཀྱིལ་འཁོར་ནི། །ཕན་ཚུན་གཅིག་གི་ནང་དུ་གཅིག་སོན་པ། །སྙོམས་པར་འཇུག་ལ་ཀུན་ཏུ་གནས་པ་ཡི། །ཆོས་
ཀྱི་དབྱིངས་སུ་ཡང་དག་པར་འདུ་ཞིང་། །ནམ་མཁའི་ཁམས་ཀྱི་ཡོངས་སུ་མཐར་ཐུག་པའི། །དུས་གསུམ་སྐྱེས་པ་ཀུན་དང་ཕྱོགས་བཅུ་ཡི། །འཇིག་རྟེན་ཁམས་རྣམས་མཐའ་ཡས་སྤྲིན་བཀོད་པ། །ནམ་མཁའ་རབ་འབྱམས་མཉམ་དང་
10-11-25a


འཇིག་རྟེན་སྐྱོང་། །ཀུན་དང་སེམས་ཅན་ཀུན་ཡང་འདི་ལྟ་སྟེ། །རྡོ་རྗེ་མཚོན་ཆ་སྒྱུ་མ་རྡོ་རྗེ་དང་། །རྡོ་རྗེ་མེ་དང་རྡོ་རྗེ་དུས་དང་ནི། །རྡོ་རྗེ་གཏུན་ཤིང་རྡོ་རྗེ་ཀླུ་དག་དང་། །རྡོ་རྗེ་རླུང་དང་རྡོ་རྗེ་སྣ་རིངས་དང་། །རྡོ་རྗེ་འཇིགས་བྱེད་རྡོ་
རྗེ་ཁྲོ་བོ་དང་། །རྡོ་རྗེ་འཁྱིལ་བ་རྡོ་རྗེ་འོད་དང་ནི། །མི་སྨྲ་རྡོ་རྗེ་དང་ནི་ཐགས་བཟངས་རིས། །ས་ཡི་ལྷ་མོ་འཁོར་དང་བཅས་པ་ལ། །མེ་ཏོག་དག་དང་བདུག་པ་མར་མེ་དང་། །དྲི་དང་ལྷ་བཤོས་ལ་སོགས་ཡང་དག་ལྡན། །ཉེ་བར་སྤྱོད་པ་དང་ནི་གཏོར་མ་
འདི། །སོ་སོར་བཞེས་ཤིང་ཉེ་བར་ལོངས་སྤྱོད་ནས། །བདག་གི་དབྱིག་གསེར་ནོར་འབྲུ་ལང་ཚོ་ཚེ། །ནད་མེད་པ་དང་བདེ་བ་དམ་པ་རྣམས། །འཕྲོག་པར་བྱེད་པའི་བགེགས་དང་ལོག་འདྲེན་ཀུན། །སྡང་དང་རབ་ཏུ་སྡང་བ་ཐམས་ཅད་དང་། །མི་དང་མི་མ་
ཡིན་རྣམས་རྨུགས་པར་མཛོད། །རེངས་དང་བཅིངས་དང་རྣམ་པར་འཇིགས་པར་མཛོད། །བདག་ལ་དབྱིག་གསེར་ནོར་འབྲུ་ལང་ཚོ་ཚེ། །ནད་མེད་པ་དང་བདེ་བ་དམ་པ་དང་། །བདེ་བ་ཆེན་པོ་རབ་ཏུ་འཕེལ་བ་རྣམས། །ཇི་སྲིད་བྱང་ཆུབ་སྙིང་པོའི་
མཐར་ཐུག་པར། །གནང་བར་མཛད་ཅིང་རྟག་ཏུ་སྟོང་གྲོགས་དང་། །ཞི་བ་དང་ནི་བསྲུང་བར་མཛད་དུ་གསོལ། །ཧཱུྃ་ཞེས་པས་དངོས་གྲུབ་སྟེར་བ་ཉིད་དུ་གསོལ་བ་བཏབ་ནས་ཡི་གེ་བརྒྱ་པ་ལན་གསུམ་གྱིས་བཟོད་པར་གསོལ་ཏེ།  ཨོཾ་ཨཱཿཨ་ཀཱ་རོ་མུ་
ཁཾ།  སརྦ་དྷརྨཱ་ནཱཾ།  ཨཱཏྱ་ནུད་པན་ན་ཏྭཱད་ཧཱུྃ་མུཿཞེས་པས་གཤེགས་སུ་གསོལ་ལོ། །གཉིས་པ་མདུན་བསྐྱེད་དང་མ་འབྲེལ་བར་དཀྱིལ་འཁོར་དང་ཐུན་མོང་དུ་འབུལ་བའི་ཚུལ་ནི།  མཎྜལ་དྲིས་བྱུགས་པར་དབུས་སུ་ལྷ་བཅུ་དགུའི་ཚོམ་བུ་དགོད།  མཐའ་
10-11-25b


སྐོར་དུ་ཕྱོགས་སྐྱོང་བཅུ་པོ་རང་རང་གི་གནས་གཞན་དང་སྟེང་གི་གསུམ་ཤར་གྱི་ཤར་དང་།  འོག་གི་གཉིས་ནུབ་ཀྱི་ནུབ་ཏུ་དགོད།  དེའི་མཐར་གཏོར་མ་གཉིས་སམ་གཅིག་ཀྱང་རུང་མཆོད་པ་དང་བཅས་པ་བཤམས་ནས་སྒྲུབ་ཐབས་ལྟར་མཆོད་གཏོར་བྱིན་གྱིས་བརླབ། 
དེ་ནས་མདུན་གྱི་མཎྜལ་གྱི་དབུས་སུ་གཞལ་ཡས་ཁང་པའི་ནང་དུ་ལྷ་བཅུ་དགུ་སྐད་ཅིག་གིས་བསྐྱེད།  ཕྱོགས་སྐྱོང་སྤྱན་དྲང་བ་ནས་གསལ་གདབ་པའི་བར་སྔ་མ་བཞིན་བྱས་ལ་རྡོ་རྗེ་མ་ལྔ་དང་།  ཉེར་སྤྱོད་ཀྱིས་མཆོད་ནས་འདས་པའི་གཏོར་སྔགས་དང་།  ཕྱོགས་
སྐྱོང་གི་གཏོར་སྔགས་སྦྲེལ་བ་ལན་གསུམ་གྱིས་གཏོར་མ་འབུལ།  དེ་ཉིད་ལྔ་པ་སོགས་ཀྱིས་གསོལ་གདབ་དང་།  ནོངས་པ་བཟོད་པར་གསོལ་བ་བྱས་ནས་དཀྱིལ་འཁོར་གྱི་ལྷ་རྣམས་རང་ལ་བསྡུ།  སྔར་གྱི་སྔགས་ཀྱིས་ཕྱོགས་སྐྱོང་རྣམས་གཤེགས་སུ་གསོལ་ལོ། །
གསུམ་པ་ཕྱི་རོལ་པ་སོགས་ཕྱོགས་སྐྱོང་ཁོ་ན་ལ་འབུལ་བའི་ཚུལ་ནི་མཎྜལ་ལ་དབུས་སུ་སྟེང་གི་ཚོམ་བུ་གསུམ་འགོད།  གཞན་རྣམས་སྔ་མ་དང་འདྲ་བར་བྱས་ནས་གཏོར་མགྲོན་སྤྱན་དྲང་བ་ནས་གཤེགས་སུ་གསོལ་བའི་བར་སྔར་གྱི་ཕྱོགས་སྐྱོང་གི་གཏོར་མ་དང་
འདྲའོ། །མཁས་པ་གཞན་དག་གཏོར་མའི་ཆོ་ག་འདི། །འཕགས་ལུགས་ཉིད་ལ་སྦྱར་བ་མི་མཛེས་པར། །མཐོང་ཞེས་བདག་གི་བླ་མ་གསུང་བས་ན། །ལུགས་འདི་ཡེ་ཤེས་ཞབས་ཀྱི་ཁྱད་ཆོས་ཡིན། །འདི་སྦྱར་དགེ་བ་དྲི་མེད་དེས། །འདི་སྒྲུབ་
བྱེད་པའི་སྐལ་ལྡན་ལ། །འདི་དང་ཕྱི་མར་ཕྲིན་ལས་བཞི། །འདི་ནས་བཤད་བཞིན་འགྲུབ་པར་ཤོག །གཏོར་མའི་ཆོ་ག་ཕྲིན་ལས་རྣམ་རོལ་ཞེས་བྱ་བ་འདི་ནི་སློབ་དཔོན་ངག་གི་དབང་ཕྱུག་གྲགས་པའི་གཞུང་བཞིན་དུ་མང་ཐོས་བསོད་ནམས་སེང་གེས་
10-11-26a


རང་གི་གཞུང་གཉིས་ཀྱི་ཆ་ལག་ཏུ་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།།    །།དགེའོ།།    །།
10-11-26b


empty page
10-12-1a


༄༅།  །དཔལ་གསང་བ་འདུས་པ་འཇམ་པའི་རྡོ་རྗེའི་ཕྱི་རོལ་ཚོགས་བསག་གི་ཆོ་ག་མཎྜལ་ལ་བརྟེན་ཏེ་སྒྲུབ་ཅིང་མཆོད་པ་བཞུགས་སོ། །
10-12-1b


༄༅།  །བླ་མ་དང་ལྷག་པའི་ལྷ་ལ་ཕྱག་འཚལ་ལོ། །དཔལ་གསང་བ་འདུས་པ་འཇམ་པའི་རྡོ་རྗེའི་ཕྱི་རོལ་ཚོགས་བསག་གི་ཆོ་ག་མཎྜལ་ལ་བརྟེན་ཏེ་སྒྲུབ་ཅིང་མཆོད་པར་འདོད་པས།  གཙུག་
ལག་ཁང་ལ་སོགས་པའི་གནས་དབེན་པར་ཕྱག་དར་དང་སྐྱང་ནུལ་བྱས་ལ།  དེར་ཁྲུ་གང་ཡན་ཆད་ཇི་ལྟར་འཚམས་པའི་ཚད་ཀྱིས་ཟླུམ་པོར་བྱས་པ་ལ་བའི་རྣམ་པ་ལྔའམ་དྲི་བཟང་གིས་བྱུགས་ཏེ།  གནས་སྲུང་གི་མེ་
ཏོག་བཞག་གོ།  དེའི་མཐར་བྱང་ཤར་དུ་མཚམས་འཛིན་གྱི་མེ་ཏོག །ཤར་དུ་བསང་གཏོར་དང་མཆོད་ཡོན།  ཤར་ལྷོར་ཞབས་བསིལ།  ལྷོར་མེ་ཏོག །ལྷོ་ནུབ་ཏུ་བདུག་སྤོས།  ནུབ་ཏུ་མར་མེ།  ནུབ་བྱང་དུ་དྲི་
ཆབ།  བྱང་དུ་ཞལ་ཟས་བཤམ།  སྤྱི་མཆོད་དེའི་ནང་དུ་བདུག་སྤོས།  མར་མེ།  ཞལ་ཟས་གསུམ་ཤར་ནུབ་གཉིས་སུ་ཚན་པ་དྲུག་རེ་དང་།  ལྷོ་བྱང་གཉིས་སུ་ཚན་པ་བཞི་རེ་སྟེ་ཉི་ཤུ་བཤམ།  དེ་ཡང་ནུབ་ཀྱི་གཉིས་
10-12-2a


ཤར་གྱི་སྣམ་བུའི་རེག་རྡོ་རྗེ་མ་དང་ཆོས་དབྱིངས་རྡོ་རྗེ་མ་གཉིས་ཀྱི་ཡིན་ལ།  ཤར་གྱི་གཉིས་གཙོ་བོ་ཡབ་ཡུམ་དང་།  རིགས་བདག་གཉིས་ཀྱི་ཡིན་ཅིང་།  ལྷག་མ་ཕྱོགས་རེ་རེར་བཞི་བཞིར་གནས་པ་ནི་
ནུབ་ཀྱི་བཞི་ཤར་དང་།  ཤར་ལྷོའི་འཁོར་གྱི་ལྷ་བཞིའི་ཡིན་པ་སོགས་སོ། །དེའི་ཤར་ཕྱོགས་སུ་ཅི་འབྱོར་པའི་ཡོ་བྱད་ཀྱིས་བརྒྱན་པའི་གཏོར་མ་རྒྱལ་མཚན་ནམ།  བ་དན་གྱིས་སྤྲས་པ་ལྔ་བཤམ།  གཞན་ཡང་བླ་རེ་དང་།  བ་དན་
དང་།  གདུགས་དང་།  རྒྱལ་མཚན་དང་།  གོས་ཟུང་དང་།  རོལ་མོའི་ཡོ་བྱད་ལ་སོགས་པ་རྣམས་བཤམས་ཤིང་།  རང་གི་མདུན་དུ་ནང་མཆོད་དང་།  རྡོ་རྗེ་དྲིལ་བུ་ཡང་བཤམ་མོ། །དེ་ནས་སྐྱབས་འགྲོ་སེམས་
བསྐྱེད་རྡོ་རྗེ་སེམས་དཔའི་སྒོམ་བཟླས་ནས་བརྩམས་ཏེ།  སྒྲུབ་པའི་ཐབས་ལས་འབྱུང་བའི་རིམ་པས།  ཏིང་ངེ་འཛིན་གསུམ་གྱི་བདག་བསྐྱེད་རྒྱས་པ་བསྒོམ་ཏེ།  རང་གཙོ་བོ་ཡབ་ཡུམ་གྱི་ང་རྒྱལ་གྱིས།  མཎྜལ་
10-12-2b


དབུས་ཀྱི་གནས་སྲུང་གི་མེ་ཏོག་བསལ་ཏེ།  དྲིའི་ཐིག་ལེ་གྲུ་བཞི་བྱ་སྟེ།  མེ་ཏོག་ཅུང་ཟད་ཅིག་བཞག །དེ་ནས་མཎྜལ་བགེགས་མཐར་བྱེད་ཀྱིས་བསང་།  ཤཱུ་ཉ་ཏཱས་སྦྱངས།  སྟོང་པའི་ངང་ལས་ཨྃ་དམར་པོ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་
རྡོ་རྗེ་རྩེ་ལྔ་པ་ནག་པོ་ཁ་གྱེས་པ།  ལྟེ་བ་ལ་ཧཱུྃ་གིས་མཚན་པ་དེ་ལས་བྱུང་བའི་རྡོ་རྗེའི་རང་བཞིན་གྱི་འོད་ཟེར་ཕྱོགས་ཀུན་དུ་འཕྲོས་པས་བགེགས་ཐམས་ཅད་བསལ་ལ།  རྡོ་རྗེའི་རང་བཞིན་གྱི་འོད་ཟེར་དེ་ཉིད་ལས་རྡོ་རྗེའི་རྭ་བ་དང་།  
དྲྭ་བ་དཔངས་དཔག་ཚད་བརྒྱ་སྟོང་དུ་ཡོད་པ།  བདུད་ཐམས་ཅད་ཀྱིས་བགྲོད་པར་མི་ནུས་པ་ཕྱོགས་ཐམས་ཅད་ཁྱབ་པ།  ཕྱི་རོལ་ན་དུས་མཐའི་མེའི་ཕུང་པོ་འབར་བ་ལྟ་བུས་བསྐོར་བ་དང་།  རྡོ་རྗེའི་རང་བཞིན་གྱི་སའི་དཀྱིལ་འཁོར་ས་འོག་
གི་མཐར་ཐུག་པར་བསམས་ལ།  ཆོས་འབྱུང་ནས་བཟུང་སྟེ།  གཞལ་ཡས་ཁང་གདན་དང་བཅས་པ་སྒྲུབ་ཐབས་ལྟར་བསྒོམ་མོ། །དེ་ནས་དབུས་སུ་སླར་ཡང་མེ་ཏོག་སྤུངས་ཏེ།  ཨོཾ་ཨཱཿམཱཾ་ཧཱུྃ་ཞེས་པ་གཙོ་བོའི་སྔགས་ལན་གསུམ་དང་
འཁོར་གྱི་ལྷ་སོ་སོའི་གནས་སུ་དྲིའི་ཐིག་ལེ་དང་།  མེ་ཏོག་གི་ཚོམ་བུ་རེ་བྱ་སྟེ།  སོ་སོའི་སྔགས་ལན་གསུམ་གསུམ་བཟླ་བར་བྱའོ། །དེ་ནས་དཀྱིལ་འཁོར་གྱི་གཙོ་བོ་ནས་བརྩམས་ཏེ།  བགེགས་མཐར་བྱེད་ཀྱི་བར་སྐད་ཅིག་གིས་
བསྐྱེད་ནས་སྒྲུབ་པའི་ཐབས་ཀྱི་དཀྱིལ་འཁོར་རྒྱལ་མཆོག་གི་སྐབས་ནས་འབྱུང་བ་ལྟར།  ཡེ་ཤེས་ཀྱི་འཁོར་ལོ་དགུག་གཞུག་དང་།  དབང་བསྐུར་ནས་རིགས་ཀྱི་བདག་པོས་རྒྱས་གདབ་པའི་བར་རྣམས་བྱའོ། །དེ་ནས་ཡེ་ཤེས་སེམས་དཔའི་
10-12-3a


ཐུགས་ཁའི་ས་བོན་མྃ་ཡིག་ལས་འོད་ཟེར་སྤྲོས་པས་དེ་བཞིན་གཤེགས་པ་ཐམས་ཅད་བཀུག་སྟེ་ཞལ་ནས་ཞུགས་པ་སོགས་ལྷ་མོ་བཅུ་སྒྲུབ་ཐབས་ལྟར་མངལ་དུ་བསྐྱེད་པ་ཨོཾ་བཛྲ་ས་ཕ་ར་ཎ་ཁྃ་ཅེས་པས་དེ་རྣམས་རང་
གི་བ་སྤུའི་བུ་ག་ནས་ཕྱིར་འཕྲོས་དཔག་ཏུ་མེད་པར་གྱུར་ནས་མདུན་བསྐྱེད་ཀྱི་མཐའ་སྐོར་དུ་འཁོད་ནས་དཀྱིལ་འཁོར་པ་རྣམས་ལ་མཆོད་པར་བསམ་སྟེ།  མཆོད་རྫས་རྣམས་བགེགས་མཐར་བྱེད་ཀྱིས་བསང་།  སྭ་བྷཱ་ཝས་སྦྱངས།  སྟོང་པའི་ངང་
ལས་ཨ་ལས་བྱུང་བའི་ཡེ་ཤེས་ཀྱི་ཀ་པཱ་ལ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུྃ་ཞུ་བ་ལས་བྱུང་བའི་བསང་གཏོར།  མཆོད་ཡོན།  ཞབས་བསིལ།  མེ་ཏོག །བདུག་སྤོས།  མར་མེ།  དྲི།  ཞལ་ཟས།  རོལ་མོ་ལ་སོགས་པའི་མཆོད་རྫས་རྣམས་
དྭངས་ཤིང་ཐོགས་པ་མེད་པ་ངོ་བོ་བཟང་ཤིང་རྒྱ་ཆེ་བ།  ས་དང་ནམ་མཁའ་བར་སྣང་ཐམས་ཅད་ཁྱབ་པ།  འཕགས་པ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུ་བསམ་གྱིས་མི་ཁྱབ་པ་ཞིག་བླ་མ་དང་། 
དཔལ་གསང་བ་འདུས་པའི་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་ལམ་དུ་འབྱུང་ཞིང་རྒྱས་པར་གྱུར་ཅིག །ཅེས་བརྗོད་ལ།  སོ་སོའི་སྔགས་དང་ཕྱག་རྒྱས་བྱིན་གྱིས་བརླབ་བོ། །དེ་ནས་རྡོ་རྗེ་ཐལ་མོ་
སྙིང་གར་སྦྱར་ལ།  ལྷ་ཡི་བསང་གཏོར་དམ་པ་འདིས། །དཀྱིལ་འཁོར་མཆོད་པ་བགྱིད་པར་འཚལ། །ཐུགས་ནི་བརྩེ་བས་ཉེར་དགོངས་ཏེ། །མགོན་པོས་མཆོད་པ་འདི་བཞེས་ཤིག །ཨོཾ་མྃ་མཉྫུ་བཛྲ་་ཨཱཿམྃ་ཧཱུྃ།  ཅེས་པས་
10-12-3b


གཙོ་བོ་ཡབ་ཡུམ་དང་།  ཨོཾ་ཧཱུྃ་བཛྲ་ཌྷྲྀ་ཀ་ཨོཾ་ཨཱཿམྃ་ཧཱུྃ།  ཅེས་པས་རིགས་བདག་དང་།  དེ་བཞིན་དུ་ཨོཾ་བུྃ་ཛི་ན་ཛིཀ་དང་།  ཨོཾ་ཨཱྃ་རཏྣ་ཌྷྲྀཀ།  ཨོཾ་ཛྲཱིཾ་ཨཱཿརོ་ལིཀ།  ཨོཾ་ཁྃ་པྲཛྙཱ་ཌྷྲྀཀ།  ཨོཾ་ལྃ་མོ་ཧཱ་ར་ཏཱི།  ཨོཾ་མྃ་དྭེ་ཥ་ར་ཏཱི།  ཨོཾ་པཱྃ་ར་ག་ར་ཏཱི།  ཨོཾ་ཏཱྃ་
བཛྲ་ར་ཏཱི།  ཨོཾ་ཛ་རཱུ་པ་བཛྲཱི།  ཨོཾ་ཧཱུྃ་ཤབྡ་བཛྲཱི།  ཨོཾ་བྃ་གནྡྷེ་བཛྲཱི།  ཨོཾ་ཧོཿར་ས་བཛྲཱི།  ཨོཾ་ཁྃ་པཪྵེ་བཛྲཱི།  ཨོཾ་རཾ་དྷརྨ་དྷཱ་ཏུ་བཛྲཱི།  ཨོཾ་ཧཱུྃ་ཡ་མཱནྟ་ཀྲིཏ།  ཨོཾ་ཧཱུྃ་པྲཛྙཱནྟ་ཀྲིཏ།  ཨོཾ་ཧཱུྃ་པདྨཱནྟ་ཀྲིཏ།  ཨོཾ་ཧཱུྃ་བིགྷཱནྟ་ཀྲིཏ།  ཨོཾ་ཨཱཿམྃ་ཧཱུྃ།  ཞེས་པ་རེ་རེ་
བཞིན་སྦྱར་བས་འཁོར་གྱི་ལྷ་རྣམས་ལ་དབུལ་ལོ། །དེ་བཞིན་དུ་མཆོད་ཡོན་དང་།  ཞབས་བསིལ་གཉིས་ཀྱང་ཚིགས་བཅད་ཀྱི་འདོན་པ་བསྒྱུར་བ་མ་གཏོགས་སྔགས་རྣམས་འདྲའོ། །ཆུ་སྐྱེས་དེ་བཞིན་ཐང་ལས་སྐྱེས། །མེ་ཏོག་དམ་པ་འདི་དག་
ནི། །མཆོག་ཏུ་དད་པས་བདག་འབུལ་ན། །ཅི་བདེ་བར་ནི་ཁྱོད་ཀྱིས་བཞེས། །ཨོཾ་མྃ་མཉྫུ་བཛྲ་པུཥྤེ་པྲ་ཏཱིཙྪ་ཡེ་སྭཱ་ཧཱ།  ཅེས་པ་ནས།  ཨོཾ་ཧཱུཾ་བིགྷཱན་ཏ་ཀྲིཏ་པུཥྤཾ་པྲ་ཏིཙྪ་ཡེ་སྭཱ་ཧཱ།  ཞེས་པའི་བར་བརྗོད།  ལྷན་ཅིག་སྐྱེས་དང་སྦྱར་ལས་བྱུང་། །
དེ་བཞིན་བདུག་སྤོས་མཆོག་འདི་དག །མཆོག་ཏུ་དད་པས་བདག་འབུལ་ན། །ཅི་བདེ་བར་ནི་ཁྱེད་ཀྱིས་བཞེས། །ལྷ་སོ་སོའི་སྔགས་ལ་དྷཱུ་པྃ་པྲ་ཏཱིཙྪ་ཡེ་བཏགས་པས་བདུག་སྤོས་དབུལ།  ཞུན་མར་འབྲུ་མར་མར་མེ་འདི། །ལྷ་རྫས་འབར་
བས་མུན་པ་འཇོམས། །མི་ཤེས་ཐམས་ཅད་ཞི་བྱའི་ཕྱིར། །བདག་ཉིད་དད་པས་དབུལ་བར་བགྱི། །ལྷ་སོ་སོའི་སྔགས་ལ་དཱི་པྃ་པྲ་ཏཱིཙྪ་སྦྱར་བས་མར་མེ་དབུལ།  ལྷན་ཅིག་སྐྱེས་དང་སྦྱར་བ་ཡིས། །དྲི་མཆོག་དམ་པ་འདི་དག་ནི། །
10-12-4a


མཆོག་ཏུ་དད་པས་བདག་འབུལ་ན། །ཅི་བདེ་བར་ནི་ཁྱེད་ཀྱིས་བཞེས། །ལྷ་སོ་སོའི་སྔགས་ལ་གནྡྷཾ་པྲ་ཏཱིཙྪ་སྦྱར་བས་དྲི་མཆོག་དབུལ།  བཟའ་དང་བཅའ་བར་ཡང་དག་ལྡན། །ཁ་དོག་དྲི་དང་རོ་ལྡན་ཞིང་། །ཐམས་
ཅད་སྦྱར་བའི་ཞལ་ཟས་འདི། །འབུལ་གྱི་ཡང་དག་བཞེས་སུ་གསོལ། །ལྷ་སོ་སོའི་སྔགས་ལ་ནཻ་བི་དྱཱ་བཏགས་པས་ཞལ་ཟས་དབུལ།  སིལ་སྙན་ལ་སོགས་རོལ་མོའི་ཚོགས། །དབྱངས་ཀྱི་ང་རོ་ལྡན་པ་འདི། །མཆོག་ཏུ་དགའ་བས་
བདག་འབུལ་གྱིས། །ཅི་བདེ་བར་ནི་བཞེས་སུ་གསོལ། །ལྷ་སོ་སོའི་སྔགས་ལ་ཤབྡཾ་པྲ་ཏཱིཙྪ་ཡེ་སྭཱ་ཧཱ་སྦྱར་བ་དང་།  བཛྲ་དྷརྨཱ་ར་ཎི་ཏའི་སྔགས་བརྗོད་པས་རོལ་མོ་ཅི་འབྱོར་པར་དབུལ་ལོ། །དེ་ནས་གཟུགས་སོགས་ཐབས་ཀྱི་ངོ་བོར་བྱས་པའི་
མཆོད་པ་རྒྱུད་ཀྱི་དངོས་བསྟན།  གཟུགས་ལ་རྣམ་གསུམ་ཤེས་བྱས་ནས་ཞེས་སོགས་རྗེ་བླ་མས་མཛད་པའི་གསང་བ་འདུས་པའི་མཆོད་པའི་ཆོ་ག་མཆོད་སྤྲིན་རྒྱ་མཚོ་ལས་འབྱུང་བ་ལྟར་བྱའོ། །གཟུགས་སོགས་ཤེས་རབ་ཀྱི་ངོ་བོར་བྱས་པའི་མཆོད་
པ་ནི།  བུད་མེད་མཚན་གྱིས་རབ་རྒྱས་སྣ་ཚོགས་རྒྱན་གྱིས་སྤྲས། །འཇོ་སྒེག་སྒྱུ་འཕྲུལ་རོལ་པས་མཐའ་ཡས་ཞིང་བཀང་ནས། །མ་ལུས་རྒྱལ་བ་དཔེ་མེད་གཟུགས་ཀྱི་སྤྲིན་གྱིས་མཆོད། །ཀུན་འཛིན་རྣམ་སྦྱོང་མ་ཆགས་རབ་དགའི་ས་བསྒྲུབ་
ཤོག །ཨོཾ་ཨཱཿརཱུ་པ་བཛྲཱི་ཧཱུྃ།  བུད་མེད་མཚན་གྱིས་རབ་རྒྱས་སྣ་ཚོགས་རྒྱན་གྱིས་སྤྲས། །ཡན་ལག་འཁྲིལ་ལྡན་དབྱངས་ཀྱིས་མཐའ་ཡས་ཞིང་བཀང་ནས། །མ་ལུས་རྒྱལ་བ་དཔེ་མེད་སྒྲ་ཡི་སྤྲིན་གྱིས་མཆོད། །འཆལ་ཚུལ་རྣམ་སྦྱོང་ཁྲིམས་དག་
10-12-4b


དྲི་མེད་ས་སྒྲུབ་ཤོག །ཨོཾ་ཨཱཿཤབྡ་བཛྲཱི་ཧཱུྃ།  བུད་མེད་མཚན་གྱིས་རབ་རྒྱས་སྣ་ཚོགས་རྒྱན་གྱིས་སྤྲས། །དྲི་ཞིམ་སྤོས་ངད་ལྡན་པས་མཐའ་ཡས་ཞིང་བཀང་ནས། །མ་ལུས་རྒྱལ་བ་དཔེ་མེད་དྲི་ཞིམ་སྤྲིན་གྱིས་མཆོད། །ཁྲོ་བ་རྣམ་སྦྱོང་བཟོད་དག་འོད་
བྱེད་ས་བསྒྲུབ་ཤོག །ཨོཾ་ཨཱཿགནྡྷེ་བཛྲཱི་ཧཱུྃ།  བུད་མེད་མཚན་གྱིས་རབ་རྒྱས་སྣ་ཚོགས་རྒྱན་གྱིས་སྤྲས། །རོ་མཆོག་བརྒྱ་ལྡན་མཐའ་ཡས་བཅུད་ཀྱིས་ཞིང་བཀང་ནས། །མ་ལུས་རྒྱལ་བ་དཔེ་མེད་རོ་མཆོག་སྤྲིན་གྱིས་མཆོད། །ལེ་ལོ་རྣམ་སྦྱོང་བརྩོན་
དག་འོད་འཕྲོའི་ས་བསྒྲུབ་ཤོག །ཨོཾ་ཨཱཿར་ས་བཛྲཱི་ཧཱུྃ།  བུད་མེད་མཚན༴ འཇམ་ཞིང་བདེ་སྐྱེད་རེག་བྱས་མཐའ་ཡས་ཞིང་བཀང་ནས། །མ་ལུས་རྒྱལ་བ་དཔེ་མེད་རེག་མཆོག་སྤྲིན་གྱིས་མཆོད། །གཡེང་བ་རྣམ་སྦྱོང་རྩེ་གཅིག་སྦྱང་
དཀའི་ས་བསྒྲུབ་ཤོག །ཨོཾ་ཨཱཿ པཪྵེ་བཛྲཱི་ཧཱུྃ།  བུད་མེད༴ སྤྲོས་མེད་རྒྱ་ཆེན་ཆོས་ཀྱིས་མཐའ་ཡས་ཞིང་བཀང་ནས། །མ་ལུས་རྒྱལ་བ་དཔེ་མེད་ཆོས་ཀྱི་སྤྲིན་གྱིས་མཆོད། །མི་ཤེས་རྣམ་སྦྱོང་ཤེས་རབ་མངོན་གྱུར་ས་བསྒྲུབ་ཤོག ། 
ཨོཾ་ཨཱཿདྷརྨ་དྷཱ་ཏུ་བཛྲཱི་ཧཱུྃ།  ཞེས་པས་མཆོད།  དེ་ནས་ཐུན་མོང་གི་མཆོད་པ་དང་།  ཁྱད་པར་གྱི་མཆོད་པ་དང་།  ལུས་ངག་ཡིད་གསུམ་གྱི་མཆོད་པ་རྣམས་ནི་མཆོད་སྤྲིན་རྒྱ་མཚོ་བཞིན་བྱའོ། །ནང་གི་མཆོད་པ་ལ་བསྡུ་ན།  
10-12-5a


བླ་མའི་མཚན་གྱི་སྐབས་སུ་འདིའི་བླ་མ་བརྒྱུད་པ་དང་།  དཀྱིལ་འཁོར་གྱི་སྔགས་ཀྱི་སྐབས་སུ་འདིའི་སྔགས་རྣམས་བརྗོད་ནས།  རིགས་དྲུག་གི་སེམས་ཅན་ཚིམ་པའི་བར་ཕ་རྒྱུད་སྤྱི་དང་མཐུན་པའི་ནང་མཆོད་འབུལ་
བ་ཉིད་ཀྱིས་ཆོག་ལ།  རྒྱས་པར་སྤྲོ་ན་ནང་གི་མཆོད་པ་ལྔ་ཆར་ཡང་མཆོད་སྤྲིན་རྒྱ་མཚོ་ལྟར་བྱའོ། །གསང་བའི་མཆོད་པ་ནི་རང་གི་སྙིང་ཁ་ནས་མཚན་ཉིད་དང་ལྡན་པའི་ཡེ་ཤེས་ཀྱི་ཕྱག་རྒྱ་དཔག་ཏུ་མེད་པ་སྤྲོས་ནས་མདུན་གྱི་དེ་བཞིན་
གཤེགས་པ་རྣམས་ལ་ཕུལ་བས།  རྒྱལ་བ་རྣམས་རིག་མའི་འདོད་ཡོན་ལྔ་ལ་ལོངས་སྤྱོད་ཅིང་།  མཆོག་ཏུ་དགའ་བའི་བདེ་བ་ཉམས་སུ་མྱོང་བར་བསམས་ལ།  མཚུངས་མེད་སྒྱུ་འཕྲུལ་སྒེག་མ་ཐུགས་རྗེའི་སྤྱན། །བརྟན་མཛད་
དབྱིངས་ཀྱི་འདྲེན་པ་རྒྱ་མཚོ་བསྐྲུན། །ཞི་མཛད་ཐབས་མཁས་རིང་སོང་ས་སྒྲུབ་མ། །འཇམ་པའི་རྡོ་རྗེའི་ལྷ་ཚོགས་མཉེས་ཕྱིར་འབུལ། །མཚུངས་མེད་སྒྱུ་འཕྲུལ་སྒེག་མ་བྱམས་པའི་བདག །བརླན་མཛད་དབྱིངས་ཀྱི་འདྲེན་པ་རྒྱ་
མཚོ་བསྐྲུན། །སྲུང་མཛད་སྨོན་ལམ་མི་གཡོའི་ས་སྒྲུབ་མ། །འཇམ་པའི་རྡོ་རྗེའི༴།  མཚུངས་མེད་སྒྱུ་འཕྲུལ་སྒེག་མ་དགའ་དཀར་མོ། །སྨིན་མཛད་དབྱིངས་ཀྱི་འདྲེན་པ་རྒྱ་མཚོ་བསྐྲུན། །རྒྱས་མཛད་མི་བརྫི་ལེགས་པའི་
ས་སྒྲུབ་མ། །འཇམ་པའི་རྡོ་རྗེའི༴།  མཚུངས་མེད་སྒྱུ་འཕྲུལ་སྒེག་མ་བཏང་སྙོམས་སྒྲོལ། །གཡོ་མཛད་དབྱིངས་ཀྱི་འདྲེན་པ་རྒྱ་མཚོ་བསྐྲུན། །དབང་མཛད་ཡེ་ཤེས་ཆོས་སྤྲིན་ས་སྒྲུབ་མ། །འཇམ་པའི་རྡོ་རྗེའི༴།  མཚུངས་
10-12-5b


མེད་སྒྱུ་འཕྲུལ་སྒེག་མ་ཡེ་ཤེས་དབྱིངས། །གོ་འབྱེད་དབྱིངས་ཀྱི་འདྲེན་པ་རྒྱ་མཚོ་བསྐྲུན། །མཆོག་མཛད་ཆོས་སྐུ་ཀུན་ཏུ་འོད་སྒྲུབ་མ། །འཇམ་པའི་རྡོ་རྗེའི་ལྷ་ཚོགས་མཉེས་ཕྱིར་འབུལ། །རེ་རེའི་མཇུག་ཏུ།  ཨོཾ་སརྦ་ཏ་ཐཱ་ག་
ཏ་ཨ་ནུ་རཱ་ག་ན་བཛྲ་སྭ་བྷཱ་ཝ་ཨཱཏྨ་ཀོ྅ཧྃ།  ཞེས་བརྗོད་པས་མཆོད་དོ། །དེ་ནས་ཡིད་ལས་བྱུང་བའི་མཆོད་པ་གསུམ་དང་།  བླ་ན་མེད་པའི་མཆོད་པ་གསུམ་ཡང་མཆོད་སྤྲིན་རྒྱ་མཚོ་བཞིན་བྱས་ནས།  བསྟོད་པའི་མཆོད་པ་ནི་རྡོ་རྗེ་
དྲིལ་བུ་འཛིན་པས།  དེ་ཉིད་ལྔ་པ་དང་།  གང་གིས་དངོས་ཀུན་གདོད་ནས་གསལ་བ་སོགས་དང་།  རྗེ་བླ་མས་མཛད་པའི་དཀྱིལ་འཁོར་གྱི་འཁོར་ལོའི་བསྟོད་པ་རྣམས་ཀྱིས་མཆོད་དོ། །དེ་ནས་དམ་ཚིག་གཟུང་བ་ནི་ལུགས་འདིའི་རྒྱུན་
བཤགས་ལན་གསུམ་དང་།  རིགས་ལྔའི་སྡོམ་གཟུང་ལན་གསུམ་བྱ་སྟེ།  སྒྲུབ་པའི་མཆོད་པ་ཡང་དཀྱིལ་འཁོར་འདིའི་སྔགས་ཀྱི་བཟླས་པས་མཆོད་པར་བྱའོ། །དེ་ནས་མདུན་དུ་བཤམས་པའི་གཏོར་མ་རྣམས་ནང་མཆོད་
ཆུ་ཆང་གིས་སྦྱངས་ལ་སྒྲུབ་ཐབས་ལྟར་བྱིན་གྱིས་བརླབས་ནས།  གཏོར་མ་དང་པོ་གཏོར་ཆོག་ལྟར་འདས་པའི་ལྷ་ལ་དབུལ།  གཉིས་པ་གུར་གྱི་མགོན་པོ་ལ་དབུལ།  གསུམ་པ་སངས་རྒྱས་ཡེ་ཤེས་ཞབས་ཀྱི་བཀའ་སྲུང་
མགོན་པོ་གདོང་བཞི་པ་ལ་དབུལ།  བཞི་པ་གུར་གྱི་མགོན་པོའི་ལས་མགོན་རྣམས་ལ་དབུལ།  ལྔ་པ་གཏོར་ཆོག་ལྟར་ཕྱོགས་སྐྱོང་རྣམས་ལ་དབུལ།  དེ་ནས་དཔའ་བོའི་སྟོན་མོ་ལ་ལོངས་སྤྱོད་རྒྱུ་ཡོད་ན་མཆོད་ཅིང་བྱིན་གྱིས་བརླབས་
10-12-6a


ནས།  རྡོ་རྗེའི་གླུ་དང་།  བཀྲ་ཤིས་བརྗོད་པའི་བར་ཚུལ་བཞིན་དུ་བྱའོ། །རྗེས་ཀྱི་ཆོ་ག་ནི་མཆོད་པ་རྣམས་ཁ་གསོས་ཏེ་བསང་སྦྱང་བྱིན་གྱིས་བརླབས་ལ།  ཨོཾ་སརྦ་ཏ་ཐཱ་ག་ཏ་ཤྲཱི་གུ་ཧྱ་ས་མཱ་ཛ་མཎྜ་ལ་ས་པ་རི་ཝཱ་
ར་ཞེས་པ་ཀུན་ལ་སྦྱར་བའི་ཆུ་གསུམ་ཉེར་སྤྱོད་རོལ་མོའི་བར་དང་།  རྡོ་རྗེ་མ་ལྔས་མཆོད།  དེ་ཉིད་ལྔ་པས་བསྟོད།  ལྷ་སོ་སོའི་ས་བོན་གྱི་མཐར་འབྲུ་གསུམ་བཏགས་པས་བདུད་རྩི་དབུལ།  སྔར་ལྟར་དངོས་གྲུབ་བླངས་ལ་ཡི་གེ་
བརྒྱ་པ་ལན་གསུམ་བརྗོད་ཅིང་།  མ་འབྱོར་པ་དང་ཉམས་པ་དང་། །ཞེས་སོགས་ཀྱིས་ནོངས་པ་བཟོད་པར་གསོལ།  མདུན་བསྐྱེད་ཀྱི་ཡེ་ཤེས་པ་གཤེགས་སུ་གསོལ།  དམ་ཚིག་པ་རང་ལ་བསྡུས་ལ་སྐྱེ་མཆེད་དང་སྐུ་གསུང་ཐུགས་བྱིན་གྱིས་
བརླབས་ཏེ།  སྒྲུབ་པའི་ཐབས་ནས་འབྱུང་བ་ལྟར།  སྨན་པའི་ཞབས་ཀྱིས་མཛད་པའི་སྨོན་ལམ་དང་།  རྗེ་བླ་མས་མཛད་པའི་དཀྱིལ་འཁོར་གྱི་བསྟོད་པའི་ནང་གི་རྒྱུན་བཤགས་ཀྱི་འཇུག་གི་སྨོན་ལམ་རྣམས་བཏབ་ལ་ཆོས་འཆད་
པ་སོགས་ཆོས་མཐུན་གྱི་བྱ་བ་ལ་འཇུག་པར་བྱའོ། །དཔལ་ལྡན་འཇམ་པའི་རྡོ་རྗེའི་ལྷ་ཚོགས་ལ། །ཚུལ་བཞིན་མཆོད་པའི་ཆོ་ག་འདི་ཕུལ་བས། །མཁའ་མཉམ་འགྲོ་ལ་ཕན་བདེའི་ཆར་ཕབ་ནས། །ཤེས་རབ་སྣང་བ་ཕྱོགས་བཅུར་
འབར་གྱུར་ཅིག །འདི་ཡང་ཤཱཀྱའི་དགེ་སློང་བསོད་ནམས་སེང་གེས་སྦྱར་བའོ།།    དགེའོ།  དགེའོ།  དགེའོ།།    །།
10-12-6b


empty page
10-13-1a


༄༅།  །གསང་བ་འདུས་པའི་རིམ་པ་ལྔའི་མན་ངག་གི་ཁྲིད་ཡིག་ཟུང་འཇུག་གསལ་བའི་སྒྲོན་མེ་བཞུགས་སོ། །
10-13-1b


༄༅། །དཔལ་གསང་བ་འདུས་པའི་ལམ་རིམ་པ་ལྔའི་མན་ངག་གི་ཁྲིད་ཡིག་ཟུང་འཇུག་གསལ་བའི་སྒྲོན་མེ་ཞེས་བྱ་བ།  བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །
ཡིད་འོང་སྒྱུ་མའི་མཚན་དཔེས་རྣམ་པར་མཛེས། །གཞོམ་མེད་སྐད་ཀྱིས་དམ་ཆོས་སྣ་ཚོགས་རྣམས། །རྒྱུན་ཆད་མེད་པར་འགྲོ་ལ་གསལ་མཛད་པ། །རྡོ་རྗེ་འཆང་བདག་དཔལ་ལྡན་བླ་
མར་འདུད། །རྒྱུད་དང་ཀླུ་སྒྲུབ་དགོངས་པ་ཇི་བཞིན་དུ། །མ་ནོར་ཐུགས་སུ་ཆུད་པ་འཕགས་པའི་ལྷ། །དེ་ཡི་གདམས་ངག་མཁས་མང་ལས་བརྒྱུད་པའི། །རྫོགས་རིམ་ཟབ་མོའི་གདམས་
ངག་བཤད་ཀྱིས་ཉོན། །དཔལ་གསང་བ་འདུས་པ་རྩ་བའི་རྒྱུད་ལེའུ་བཅུ་བདུན་པ་རྒྱུད་ཕྱི་མ་དང་བཅས་པའི་དགོངས་པ་བཤད་རྒྱུད་རྣམ་པ་བཞིས་བཀྲལ་བའི་དོན།  བདག་ཉིད་ཆེན་པོ་འཕགས་
10-13-2a


པ་ཀླུ་སྒྲུབ་ཡབ་སྲས་ཀྱིས་གསལ་བར་མཛད་པ།  དུས་གསུམ་སངས་རྒྱས་ཐམས་ཅད་ཀྱི་བསྒྲོད་པ་གཅིག་པའི་ལམ།  མདོ་རྒྱུད་ཐམས་ཅད་ཀྱི་དགོངས་པ་གཅིག་ཏུ་བསྡུས་པ། 
ཟབ་མོ་རྫོགས་པའི་རིམ་པ།  རིམ་པ་ལྔའི་སྒོ་ནས།  གདུལ་བྱའི་སེམས་རྒྱུད་མཐར་ཐུག་གི་ཟུང་འཇུག་རྡོ་རྗེ་འཆང་གི་སར་ཁྲིད་པར་བྱེད་པ་ལ་དོན་གསུམ་སྟེ།  གང་གིས་ཉམས་སུ་ལེན་པར་བྱེད་པའི་རྟེན་གྱི་གང་
ཟག །གང་ཉམས་སུ་བླང་བར་བྱ་བ་ལམ་གྱི་ངོ་བོ།  ཅི་ལྟར་ཉམས་སུ་ལེན་པའི་ཉམས་ལེན་གྱི་ཚུལ་བཤད་པའོ། །དང་པོ་ནི།  རྣམ་དག་དབང་བཞིས་བདག་རྒྱུད་སྨིན་བྱས་ཤིང་། །དམ་ཚིག་སྡོམ་པ་
རྣམ་དག་དང་ལྡན་པས། །བསྐྱེད་རིམ་ཟབ་མོའི་རྣལ་འབྱོར་མཐར་ཕྱིན་ནས། །སྔགས་ཀྱི་ནུས་པ་ཐོན་པར་བྱིན་གྱིས་རློབས། །ཞེས་གསུངས་པ་ལྟར།  ཁྱད་པར་གསུམ་དང་ལྡན་པའི་སྒོ་ནས་སྔགས་ཀྱི་སྐུ་ཐོབ་པའོ། །
10-13-2b


དེ་ལ་དབང་བཞིས་སྨིན་པའི་ཚུལ་ནི།  སྐལ་བ་དམན་པ་རིམ་གྱིས་བཀྲི་དགོས་པ་ཡིན་ན།  སྤྱོད་བསྡུས་ལས།  ཐོག་མ་ཉིད་དུ་སངས་རྒྱས་པའི་ཐེག་པའི་བསམ་པ་ལ་བསླབ་པར་བྱའོ། །ཞེས་གསུངས་པ་ལྟར།  དལ་འབྱོར་རྙེད་དཀའ།  འཆི་བ་
མི་རྟག་པ།  ལས་རྒྱུ་འབྲས།  འཁོར་བའི་ཉེས་དམིགས་ཏེ་ཉན་ཐོས་དང་ཐུན་མོང་བའི་ལམ་དང་།  སྨོན་པ་དང་།  འཇུག་པའི་བདག་ཉིད་ཅན་གྱི་སེམས་བསྐྱེད་པ་ཕ་རོལ་ཏུ་ཕྱིན་པ་དང་ཐུན་མོང་བའི་ལམ་གྱིས་རིམ་གྱིས་སྦྱང་བར་བྱས་པའམ།  སྐྱེ་
བ་སྔ་མ་རྣམས་སུ་ཐེག་པ་ཆེན་པོའི་ལམ་ལ་གོམས་པའི་སྟོབས་ཀྱིས་ཚེ་འདིར་དང་པོ་ནས།  སེམས་ཅན་གྱི་དོན་དུ་ཕྱག་ཆེན་མཆོག་གི་དངོས་གྲུབ་འདོད་པའི་སྐལ་བ་དང་ལྡན་པའི་གང་ཟག་ལ་གྲུབ་ཆེན་ཀླུའི་བློས་བཀྲལ་བའི་ཆོ་ག་ཉི་ཤུ་པ་དང་།  སྒྲ་གཅན་
འཛིན་དཔལ་བཤེས་གཉེན་གྱིས་མཛད་པའི་ཟུང་འཇུག་གསལ་བ་གཉིས་ལས།  ཇི་ལྟར་འབྱུང་བའི་དབང་བཞིའི་ཆོ་གས་རྒྱུད་སྨིན་པར་བྱས་པའོ། །དེ་ལྟར་རྒྱུད་སྨིན་ནས་དམ་ཚིག་དང་།  སྡོམ་པ་རྣམ་པར་དག་པའི་ཚུལ་ནི་བླ་མེད་སྤྱི་དང་
ཐུན་མོང་བའི་དམ་ཚིག །འདུས་པའི་རྒྱུད་རྒྱས་པ་སོགས་རྒྱུད་བཞི་ནས་འབྱུང་བའི་རྩ་བའི་ལྟུང་བ་བཅུ་བཞི་དང་།  ཡན་ལག་གི་ལྟུང་བ་བརྒྱད་བསྲུང་བ་ཡིན་ལ།  རྒྱུད་འདི་ཉིད་ལས་འབྱུང་བའི་ཐུན་མོང་མ་ཡིན་པ་ནི།  དེ་བཞིན་གཤེགས་པ་རིགས་
ལྔའི་དམ་ཚིག་དུ་ཤ་ལྔ་བདུད་རྩི་ལྔ་བསྟེན་པ་རྣམས་ལ་ཚུལ་བཞིན་དུ་བསླབ་པའོ། །དེ་ལྟར་དམ་ཚིག་རྣམ་པར་དག་པ་ལ་བརྟེན་ནས།  བསྐྱེད་པའི་རིམ་པ་ཚུལ་བཞིན་དུ་བསྒོམ་པའི་ཚུལ་ནི།  སྒྲུབ་ཐབས་མདོར་བྱས་ལས་འབྱུང་བ་ལྟར་ཏིང་ངེ་
10-13-3a


འཛིན་གསུམ་གྱིས་བསྡུས་པའི་བསྐྱེད་པའི་རིམ་པ།  མདོ་བསྲེ་ལས་འབྱུང་བ་ལྟར་རྩ་རྒྱུད་ལེའུ་བཅུ་བདུན་པའི་གཞུང་དང་སྦྱར་ཏེ་ངེས་ཤེས་བསྐྱེད།  རྣམ་བཞག་རིམ་པ་ལས་འབྱུང་བ་ལྟར་སྦྱང་གཞི་སྲིད་པ་སྐྱེ་བའི་རིམ་པ་དང་སྦྱར་
ཏེ།  དྲན་པ་རྩེ་གཅིག་པའི་རྣལ་འབྱོར་གྱིས་བསྒོམས་པས།  རྟོགས་པའི་རྣལ་འབྱོར་མཐར་ཕྱིན་ཏེ།  སྤྲོ་བསྡུ་ལ་དབང་ཐོབ་པ་ནི་སྔགས་ཀྱི་སྐུ་ཐོབ་པ་ཡིན་ལ།  དེ་ནི་རྫོགས་པའི་རིམ་པ་བསྒོམ་པའི་རྟེན་གྱི་གང་ཟག་གོ།  །གཉིས་པ་ནི།  འདུས་པ་ལ་
སྦྱངས་པའི་བོད་ཀྱི་མཁས་པ་ཕྱི་མ་དག །མཁས་པ་པཎྜི་ཏའི་ལུགས་དང་།  རྣལ་འབྱོར་པ་ཀུ་སཱ་ལིའི་ལུགས་གཉིས་ལས།  དང་པོ་ནི།  ཕྱག་ན་རྡོ་རྗེས་ཀླུ་ལས་གྱུར་པའི་ཡེ་ཤེས་ཀྱི་མཁའ་འགྲོ་མ་ལ་གདམས།  དེ་ནས་རིམ་པ་ལྟར་རྒྱལ་པོ་བི་སུ་ཀལྤ།  བྲམ་
ཟེ་ས་ར་ཧ།  ཀླུ་སྒྲུབ་སྙིང་པོ།  སློབ་དཔོན་ཨཱཪྱ་དེ་བ་ལ་སོགས་པ་ནས་བརྒྱུད་པའོ། །གཉིས་པ་ནི།  བཅོམ་ལྡན་འདས་བདེ་ཆེན་མགོན་པོ་སྟེ།  རྡོ་རྗེ་འཆང་དངོས་ཀྱིས།  དགའ་ལྡན་གྱི་ལྷའི་བུ་བྱང་ཆུབ་སེམས་དཔའ་བློ་གྲོས་རིན་ཆེན་ལ་གདམས།  
དེས་འཛམ་བུ་གླིང་དུ་བྱོན་ནས།  བྲམ་ཟེ་ས་ར་ཧ་དང་འཕགས་པ་ཀླུ་སྒྲུབ་གཉིས་ལ་གདམས།  ཀླུ་སྒྲུབ་ཀྱིས།  མ་ཏཾ་གི་དེ་བ་ལ་གནང་།  དེ་ནས་ཏི་ལོ་པ།  ནཱ་རོ་པ།  མར་པ་ལོཙྪ།  མཚུར་སྟོན་དབང་གི་རྡོ་རྗེ།  འཁོན་སྟོན་གད་པ་ཀིརྟི་སོགས་
ནས་བརྒྱུད་པའོ། །དེས་ན་ལུགས་དེ་གཉིས་གཅིག་ཏུ་བསྲེས་ནས་མན་ངག་དམར་ཁྲིད་དུ་ཉམས་སུ་ལེན་པར་བྱ་བ་ཡིན་ནོ་ཞེས་བཞེད་དོ། །དེ་ལ་བདག་གི་བླ་མ་འཁྲུལ་པ་ཟད་པའི་ཞལ་སྔ་ནས།  དེ་ནི་མ་ཡིན་ཏེ།  ལུགས་དང་པོ་ནི།  རིམ་པ་སྔ་མ་སྔ་
10-13-3b


མ་ལ་བརྟན་པ་ཐོབ་ནས།  ཕྱི་མ་ཕྱི་མ་ལ་སློབ་པ་རིམ་གྱིས་པའི་ལུགས་ཡིན་པའི་ཕྱིར་དང་།  ལུགས་ཕྱི་མ་ནི་རིམ་ལྔ་སྟན་ཐོག་གཅིག་ཏུ་བསྒོམ་པ་ཅིག་ཆར་བའི་ལུགས་ཡིན་པས།  དེ་གཉིས་གཅིག་ཏུ་བསྲེས་ནས་ཉམས་སུ་ལེན་པར་མི་རུང་བའི་
ཕྱིར་ཏེ།  སྤྱོད་བསྡུས་ལས།  བདག་ཅག་ལྟ་བུའི་སོ་སོ་སྐྱེ་བོ་ཐོག་མ་མེད་པ་ནས།  ཕྱི་རོལ་གྱི་དངོས་པོ་སྣ་ཚོགས་ལ་མངོན་པར་ཞེན་པས།  ཡོད་པ་དང་མེད་པ་དང་།  གཅིག་དང་དུ་མ་དང་།  གཉིས་དང་གཉིས་མ་ཡིན་པ་དང་།  རྟག་པ་དང་
ཆད་པ་ལ་སོགས་པའི་རང་བཞིན་གྱི་བག་ཆགས་ཀྱི་རྒྱུ་རྣམ་པར་རྟོག་པ་ལ་ཞེན་པ་ལ་ཞུགས་པ་རྣམས་ཀྱིས་རྫོགས་པའི་རིམ་པའི་གོ་རིམ་གྱི་ཏིང་ངེ་འཛིན་ལ་སློབ་ན།  གོ་རིམ་ཇི་ལྟ་བ་བཞིན་དུ་བསླབ་པར་བགྱིའམ།  ཡང་ན་བླ་མའི་མན་ངག་ཙམ་
གྱིས་སྐད་ཅིག་ཙམ་གྱིས་སོ་སོར་སྣང་བར་བགྱི།  སྨྲས་པ།  རིམ་གྱིས་འཇུག་པས་བསླབ་པར་བྱའི།  ཅིག་ཆར་ནི་མ་ཡིན་ནོ་ཞེས་པ་དང་།  ཡང་རང་གི་སྣང་བའི་རྒྱུད་འདི་ཅིག་ཆར་རམ།  རིམ་གྱིས་འཇུག་པས་སམ་ཇི་ལྟར་རྣམ་པར་དག་པར་འགྱུར་
ཞུས་པ་ལས།  ལན་དུ་རིམ་གྱིས་འཇུག་པས་རྣམ་པར་དག་པ་སྟེ།  ཅིག་ཆར་ནི་མ་ཡིན་ནོ་ཞེས་ཨ་འབྲས་འབྲས་བུའི་དཔེ་དང་རྫ་མཁན་ལ་སོགས་པའི་དཔེ་དང་།  འཕོང་གི་དཔེའི་རྒྱུས་དཔའ་བར་འགྲོ་བའི་ཏིང་ངེ་འཛིན་ལ་བསླབ་པར་བྱ་བའི་
རིམ་པས་མཐར་ཆགས་སུ་བསླབ་པར་གསུངས་པ་ཡིན་ནོ་ཞེས་གསུངས་པས་སོ། །དེས་ན་ལུགས་གཉིས་པོ་བརྒྱུད་པ་སོ་སོ་ནས་འབྱུང་བ་ལྟར་སོ་སོར་ཉམས་སུ་བླང་བར་བྱ་བ་ཡིན་པ་ལས།  དང་པོ་ནི།  རྩ་རྒྱུད་ལེའུ་དྲུག་པ་ལས།  སྔགས་ལ་
10-13-4a


དམིགས་པའི་ལུས་དང་ནི། །ངག་དང་ཡིད་ཀྱང་བསྐུལ་བྱ་ཞིང་། །ཡིད་ནི་དགའ་ཞིང་མགུ་བ་ཡིས། །དངོས་གྲུབ་རབ་མཆོག་བསྒྲུབ་པར་བྱ། །ཞེས་དང་།  ལེའུ་བདུན་པ་ལས།  སངས་རྒྱས་རྗེས་སུ་དྲན་པ་སྦྱོར། །ཆོས་
ནི་རྗེས་སུ་དྲན་པ་བསྒོམ། །རྡོ་རྗེ་རྗེས་སུ་དྲན་བསྒོམ་པ། །སྐུ་དང་གསུང་དང་ཐུགས་རྣམས་བསྒོམ། །རིགས་ནི་རྗེས་སུ་དྲན་པ་སྦྱོར། །ཁྲོ་བོ་རྗེས་སུ་དྲན་པ་བསྒོམ། །ལྷ་ནི་རྗེས་སུ་དྲན་སྦྱོར་བ། །བསྒོམས་ན་བྱང་ཆུབ་ཐོབ་པར་འགྱུར། །ཞེས་
རིམ་པ་དྲུག་ཏུ་གསུངས་པ།  སློབ་དཔོན་འཕགས་པས།  ལུས་དབེན་ངག་དབེན་གྱི་སྔོན་འགྲོར་བསྡུས་ནས།  ཕ་རོལ་དུ་ཕྱིན་པའི་ལམ་ལྔ་དང་གྲངས་སྒོ་བསྟུན་པའི་ཕྱིར་དུ་རིམ་པ་ལྔར་མཛད་པའི་དོན་རིམ་ལྔ་དང་།  སྤྱོད་བསྡུས་གཉིས་ལ་གཞི་
བྱས།  སེམས་དབེན་གྱི་སྐབས་སུ་སེམས་ཀྱི་སྒྲིབ་སྦྱོང་།  སྒྱུ་ལུས་ཀྱི་སྐབས་སུ་བདག་བྱིན་གྱིས་རླབས་པའི་རིམ་པ།  འོད་གསལ་གྱི་སྐབས་སུ་མངོན་པར་བྱང་ཆུབ་པའི་རིམ་པ་དང་ལས་མཐའ་རྣམ་འབྱེད་གཉིས།  ཟུང་འཇུག་གི་སྐབས་སུ་བྱང་
ཆུབ་སེམས་འགྲེལ་རྣམས་སྦྱར་ནས།  རྗེ་འགོས་ཀྱི་སྟོང་ཐུན་ཆེན་མོ་དང་།  བླ་མ་བཙུན་མོ་ཅན།  མངོན་ཤེས་ཅན།  ནག་པོ་དམ་ཚིག་རྡོ་རྗེ་གསུམ་གྱི་མན་ངག་ཤོག་དྲིལ་གསུམ་དུ་གྲགས་པ་ནས་ཇི་ལྟར་འབྱུང་བ་བཞིན་ཉམས་སུ་བླང་བར་བྱ་
བ་ཡིན་ནོ། །ལུགས་གཉིས་པ་ནི།  དེ་དག་གི་མན་ངག་དོན་ལྔ་མ་དང་།  དོན་བཞི་མ་དང་།  རིམ་ལྔ་སྟན་ཐོག་གཅིག་ཏུ་བསྒོམ་པའི་མན་ངག་འཁོར་ལོ་ཅན་དང་།  འཁོར་ལོ་མེད་པ་དང་།  སྲོག་རྩོལ་ལ་བརྟེན་ནས་གཏུམ་མོ་བསྒོམ་པ་ལམ་རིམ་པ་ལྔ་
10-13-4b


དང་སྦྱར་བ་དང་།  རིམ་ལྔ་སེམས་དཔའ་སུམ་བརྩེགས་ཀྱི་གདམས་པ་དང་།  འཁོར་བ་འཇུག་ལྡོག་ལ་བརྟེན་ནས་མ་རིག་པ་རྩད་བཅད་པ་དང་།  སྐྱེ་འཆི་གཉིས་ལ་བརྟེན་ནས་གྲོང་འཕོ་གྲོང་འཇུག་གིས་ལེ་ལོ་ཅན་འཆི་ཁར་སངས་རྒྱ་བའི་མན་ངག་དང་།  
མཉམ་བཞག་སྒྱུ་མའི་མན་ངག །རྨི་ལམ་སྒྱུ་མའི་མན་ངག །བར་དོ་སྒྱུ་མའི་མན་ངག །སྐུ་གསུམ་འཕོ་བའི་མན་ངག །བཙན་ཐབས་སུ་འཕོ་བའི་མན་ངག །ཆགས་ཅན་འོག་སྒོ་ལ་བརྟེན་ནས་བདེ་བ་ཉམས་སུ་བླང་བའི་མན་ངག །བསྲེ་བ་དྲུག་
གི་མན་ངག །རྡོ་རྗེ་སེམས་དཔའི་གསེབ་ནས་སྡིག་པོ་ཆེ་བཙན་ཐབས་སུ་སངས་རྒྱ་བའི་མན་ངག །མགྲིན་པར་རྨི་ལམ་ལ་བརྟེན་ནས་སྒྱུ་མ་བཙན་ཐབས་སུ་བཟུང་བའི་མན་ངག །ད་ལྟར་ཉིད་ནས་འབྲས་བུ་སངས་རྒྱས་ཀྱི་བཞུགས་ཚུལ་གཏན་ལ་
ཕབ་པ།  ཕ་རྒྱུད་ཡང་སྙིང་།  མ་རྒྱུད་ཡང་སྙིང་ལ་སོགས་པ་རྣམས་ནས་འབྱུང་བ་བཞིན་ཉམས་སུ་བླང་བར་བྱ་བ་ཡིན་ནོ་ཞེས་གསུངས་པས།  ལུགས་དང་པོ་དེ་ཉིད་འདིར་ཉམས་སུ་བླང་བར་བྱ་བའི་ལམ་གྱི་ངོ་བོ་ཡིན་ནོ། །གསུམ་པ་ཅི་ལྟར་ཉམས་
སུ་ལེན་པའི་ཉམས་ལེན་གྱི་ཚུལ་བཤད་པ་ལ་གསུམ་སྟེ།  དམིགས་པར་བྱ་བའི་ཡུལ།  ཉམས་སུ་ལེན་པའི་ཐབས།  ཉམས་སུ་བླང་བའི་འབྲས་བུའོ། །དང་པོ་ནི་བསྐྱེད་རྫོགས་གཉིས་ཀའི་དམིགས་པའི་ཡུལ་བཅོམ་ལྡན་འདས་དྲུག་པ་རྡོ་རྗེ་
འཆང་མགོན་པོ་ཟུང་འཇུག་གཉིས་སུ་མེད་པའི་ཡེ་ཤེས།  མི་སློབ་པ་ཐམས་ཅད་མཁྱེན་པའོ། །མགོན་པོ་དེ་ཉིད་སྐུ་གསུམ་གྱི་བདག་ཉིད་ཅན།  དུས་གསུམ་གྱི་བདག་ཉིད་ཅན།  ཐེག་པ་གསུམ་གྱི་བདག་ཉིད་ཅན།  དཀྱིལ་འཁོར་གསུམ་གྱི་བདག་ཉིད་
10-13-5a


ཅན།  བདེན་པ་གསུམ་གྱི་བདག་ཉིད་ཅན།  ཡན་ལག་བདུན་དང་ལྡན་པའི་སྐུ་སྟེ།  དམིགས་པའི་ཡུལ་ནི་དེ་ཉིད་དོ། །ལམ་དུ་རྒྱས་འདེབས་པའི་ཕྱག་རྒྱ་ཡང་དེ་ཉིད་དོ། །འབྲས་བུ་ལ་བྲོད་པ་བསྐྱེད་པའི་ཡུལ་ཡང་དེ་ཉིད་དོ། །
དཔེར་ན་འབྲས་བུ་སྟོན་ཐོག་ལ་དམིགས་པ་སོ་ནམ་བྱེད་པའི་རྒྱུ་མཚན་དུ་འགྲོ་ལ།  དམིགས་ཡུལ་དེ་ལག་ཏུ་ཐོབ་པ་སོ་ནམ་བྱས་པའི་འབྲས་བུ་ཡིན་པ་ལྟར།  དྲུག་པ་རྡོ་རྗེ་འཆང་ལ་དམིགས་པ་ཉམས་སུ་ལེན་པ་ལ་འཇུག་པའི་རྒྱུར་འགྲོ་ལ།  དམིགས་
ཡུལ་དུ་བཞག་པ་དེ་མངོན་དུ་གྱུར་པ་ནི་འབྲས་བུར་འགྲོའོ། །དེ་ལྟར་ཡང་མདོར་བྱས་ལས།  ཁམས་གསུམ་སྤྱོད་པ་ལས་གྲོལ་ཞེས་པ་ལ་སོགས་པ་དང་།  ཀླུའི་བྱང་ཆུབ་ཀྱིས།  རྡོ་རྗེ་མི་ཕྱེད་གསུམ་གྱི་སྐུ། །རྡོ་རྗེ་ཆེ་ལ་ཕྱག་འཚལ་ཏེ། །
ཞེས་དང་།  ཟླ་གྲགས་ཀྱིས།  ཁྱབ་བདག་དཔལ་ལྡན་རྡོ་རྗེ་སེམས་དཔར་བཏུད་དེ་ཞེས་ཡབ་སྲས་རྣམས་ཀྱི་ཕྱག་གི་ཡུལ་དུ་བཞག་པ་དང་།  རྗེ་འགོས་ཀྱིས།  དམིགས་ཡུལ་རྡོ་རྗེ་འཆང་ཆེན་ཡིན། །ཅེས་གསུངས་པ་ལས་ཤེས་སོ། །གཉིས་པ་ལ་གསུམ་
སྟེ།  སྔོན་དུ་འགྲོ་བའི་རྣལ་འབྱོར་གྱིས་ཟུང་འཇུག་གི་ཡེ་ཤེས་སྐྱེ་རུང་དུ་བྱ་བ།  དངོས་གཞིའི་རྣལ་འབྱོར་གྱིས་ཟུང་འཇུག་གི་ཡེ་ཤེས་བསྐྱེད་པ།  རྗེས་ཀྱི་རྣལ་འབྱོར་གྱིས་ཉམས་རྟོགས་ཕྱོགས་མེད་དུ་རྩལ་སྦྱང་བའོ། །དང་པོ་ལ་བཞི་སྟེ།  མོས་གུས་
སྐྱེད་པར་བྱེད་པ་བླ་མའི་རྣལ་འབྱོར་གྱི་ཁྲིད།  ཚོགས་རྫོགས་པར་བྱེད་པ་ཕྱག་དང་མཎྜལ་གྱི་ཁྲིད།  བྱིན་རླབས་འཇུག་པར་བྱེད་པ་མོས་གུས་གསོལ་འདེབས་ཀྱི་ཁྲིད།  ཉམས་གྲིབ་འདག་པར་བྱེད་པ་རྡོ་རྗེ་སེམས་དཔའི་བསྒོམ་བཟླས་ཀྱི་ཁྲིད་དོ། །
10-13-5b


དང་པོ་ནི་བླ་མའི་རྣལ་འབྱོར་ལ་སྤྱིར་ཁྲོམ་ཚོགས་སུ་བསྒོམ་པ་དང་།  མཐོ་བརྩེགས་སུ་བསྒོམ་པ་དང་།  གཅིག་ཏུ་བསྡུས་ཏེ་བསྒོམ་པ་དང་ལུགས་གསུམ་ལས།  འདིར་བླ་མ་གོང་མ་རྣམས་གཅིག་ལ་གཅིག་བསྟིམ་སྟེ་བསྒོམ་པ་འདི་མཛད་གསུངས་ཏེ།  
དེའི་ཚུལ་ནི་བསམ་གཏན་གྱི་ཁང་པ་དབེན་ཞིང་ཉམས་དགའ་བར་སྟན་བདེ་བ་ལ་སྐྱིལ་ཀྲུང་དུ་འདུག་ནས།  སྐྱབས་སུ་འགྲོ་བ་དང་སེམས་བསྐྱེད་པར་བྱས་ལ།  རང་ཡི་དམ་གྱི་ལྷར་གསལ་བའི་སྤྱི་བོའི་དྲུང་དུ།  རིན་པོ་ཆེའི་ཁྲི་ཡངས་ཤིང་རྒྱ་ཆེ་བའི་
སྟེང་དུ།  དར་སྣ་ཚོགས་ཀྱི་གདན་དང་།  པདྨ་དང་།  ཟླ་བ་དང་།  ཉི་མ་དང་།  རྡོ་རྗེ་སྔོན་པོ་རྩེ་ལྔ་པ་སྟེ།  གདན་དྲུག་བརྩེགས་ཀྱི་སྟེང་དུ།  རང་གི་རྩ་བའི་བླ་མ་དེ་ཉིད་རིགས་ལྔ་ཀའི་ཁྱབ་བྱེད་དྲུག་པ་རྡོ་རྗེ་འཆང་གི་ངོ་བོ།  རྣམ་པ་བཅོམ་ལྡན་འདས་མི་
བསྐྱོད་པ་རྡོ་རྗེ་འཆང་ཞལ་གསུམ་ཕྱག་དྲུག་པ།  ཞབས་གཉིས་རྡོ་རྗེ་སྐྱིལ་མོ་ཀྲུང་དུ་བཞུགས་པ།  རྩ་ཞལ་མཐིང་ཀ་ཁྲོ་ཞིང་ཆགས་པ་བཞད་པ་དང་བཅས་པའི་མཆེ་བའི་མྱུ་གུ་གཙིགས་པ།  གཡས་ཞལ་དཀར་པོ་རབ་ཏུ་ཞི་བ།  གཡོན་ཞལ་དམར་པོ་
ཆགས་པའི་ཉམས་ཅན།  ཞལ་གསུམ་ཀ་ཡང་མེ་ཏོག་ཨུཏྤ་ལའི་འདབ་མ་ལྟར་ཡངས་པའི་སྤྱན་གསུམ་གསུམ་དང་ལྡན་ཞིང་།  དབུ་སྐྲ་མཐོན་མཐིང་གི་ཐོར་ཅོག་སྤྱི་བོར་བཅིངས་པ།  ཕྱག་དང་པོ་གཉིས་རྡོ་རྗེ་དང་དྲིལ་བུ་འཛིན་པས་རང་འདྲའི་ཡུམ་
རེག་བྱ་རྡོ་རྗེ་མ་ལ་འཁྱུད་པ།  གཡས་འོག་མ་གཉིས་འཁོར་ལོ་དང་།  པདྨའོ། །གཡོན་འོག་མ་གཉིས་རིན་པོ་ཆེ་དང་རལ་གྲི་འཛིན་པ།  རིན་པོ་ཆེའི་རྒྱན་ཐམས་ཅད་ཀྱིས་བརྒྱན་ཞིང་།  དར་སྣ་ཚོགས་ཀྱི་ན་བཟའ་གསོལ་བ།  ཡེ་ཤེས་སྒྱུ་མ་ལྟ་བུའི་མཚན་
10-13-6a


དང་དཔེ་བྱད་འབར་བར་བསམ།  དེ་ཙམ་བློས་མི་ལྕོགས་ན་ཡབ་ཡུམ་གཉིས་ཀ་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པར་བསྒོམས་ཀྱང་བཏུབ་གསུངས།  དེའི་སྤྱི་བོར་ཨོཾ་དཀར་པོ།  མགྲིན་པར་ཨཱཿདམར་པོ།  ཐུགས་
ཀར་ཧཱུྃ་སྔོན་པོ་དུས་གསུམ་གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་དུ་བསམ།  ཐུགས་ཀའི་ཧཱུཾ་ལས་འོད་ཟེར་འཕྲོས་པས།  ཐོག་མར་རང་གི་གསུམ་ལྡན་གྱི་བླ་མ་ལ་སོགས།  མདོར་ན་ཚེ་རབས་ཐམས་ཅད་དུ་ཞལ་མཇལ་
བ།  གསུང་ཐོས་པ།  བྱིན་གྱིས་བརླབས་པ་ཐམས་ཅད་སྤྱན་དྲངས་ལ།  དེ་ལ་དབྱེར་མེད་དུ་བསྟིམ་མོ། །དེའང་སྟེང་ནས་བྱོན་པ་རྣམས་ནི་ཆར་བབ་པ་ལྟ་བུ།  ཕྱོགས་ཐད་ཀ་ནས་བྱོན་པ་རྣམས་ནི་ཆོས་འཁོར་ཆེན་པོའི་དགེ་འདུན་ཚོགས་པ་ལྟ་བུ།  
འོག་ནས་བྱོན་པ་རྣམས་ནི་ས་རླངས་འཐོན་པ་ལྟ་བུ།  ཕྱོགས་བཅུ་ནས་བུན་ནུ་ནུར་བྱོན་ནས་དེ་ལ་ཐིམ་པར་བསམ་སྟེ།  འོག་མ་རྣམས་ལའང་འགྲེའོ། །དེ་ནས་རྩ་བའི་ཡི་དམ་གང་ཡིན་ནས་བཟུང་སྟེ།  བླ་མེད།  རྣལ་འབྱོར་རྒྱུད།  སྤྱོད་རྒྱུད། 
བྱ་རྒྱུད་ཀྱི་ལྷ་ཐམས་ཅད་སྤྱན་དྲངས་ལ་བསྟིམ།  དེ་ནས་སངས་རྒྱས།  ཆོས།  བྱང་སེམས་དང་།  དགེ་སློང་།  དགེ་ཚུལ།  དགེ་བསྙེན།  ཁྱིམ་པའི་ཆ་ལུགས།  ཐེག་པ་གསུམ་གྱི་ལམ་ལ་གནས་པའི་དགེ་འདུན་དཀོན་མཆོག་ཐམས་ཅད་སྤྱན་
དྲངས་ལ་བསྟིམ།  མཁའ་འགྲོ།  ཆོས་སྐྱོང་སྲུང་མ།  འཇིག་རྟེན་དང་འཇིག་རྟེན་ལས་འདས་པ་ཐམས་ཅད་སྤྱན་དྲངས་ལ་བསྟིམ་སྟེ།  དེའང་འདས་པའི་ཆོས་སྐྱོང་སྲུང་མ་རྣམས་ཞབས་ལ།  འཇིག་རྟེན་པ་རྣམས་གདན་ལ་བསྟིམ་པར་རྡོ་རྗེ་
10-13-6b


གདན་བཞི་ལས་གསུང་ངོ་། །དེ་ལྟར་བླ་མ་བསྟིམ་པའི་རྩ་བའི་བླ་མ་དེ་ཉིད།  བླ་མ་ཀུན་འདུས་ཀྱི་ངོ་བོ།  ཡི་དམ་ཀུན་འདུས་ཀྱི་ངོ་བོ།  སངས་རྒྱས།  ཆོས།  དགེ་འདུན།  མཁའ་འགྲོ་ཆོས་སྐྱོང་ཐམས་ཅད་གཅིག་ཏུ་འདུས་པའི་བདག་ཉིད་ཡིན་སྙམ་
དུ་སྙིང་ཐག་པ་ནས་བསྒོམ་ལ།  མོས་གུས་རྐང་གི་ཁོང་།  སྙིང་གི་དཀྱིལ་ནས་བྱའོ། །ཡོན་ཏན་ཐམས་ཅད་ཀྱི་རྩ་བ་བླ་མའི་མོས་གུས་ཡིན།  དེ་མ་སྐྱེས་པར་སེམས་ལ་ཡོན་ཏན་སྐྱེ་བར་མི་སྲིད་གསུངས་ཏེ་དམིགས་པ་དང་པོའོ། །གཉིས་
པ་ཚོགས་གཉིས་རྫོགས་པར་བྱེད་པ་ཕྱག་དང་མཎྜལ་གྱི་ཁྲིད་ནི།  སྔར་བཞིན་བླ་མ༷འི་རྣལ་འབྱོར་རྫོགས་པར་བསྒོམ་ལ།  གང་གི་དྲིན་གྱིས་བདེ་ཆེན་ཉིད་ལ་སོགས་པ་དང་།  གསང་འདུས་ཀྱི་རྒྱུད་ལས་བྱུང་བ།  ཁོང་སྟོང་ཁྱོད་ཀྱི་སྐུ་ལ་མེད། །
ཤ་དང་རུས་པ་ཁྲག་མེད་དེ་ལ་སོགས་པ་ཅི་ཤེས་བརྗོད་ཅིང་།  ཕྱག་འཚལ།  ཨོཾ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུཾ་ལ་སོགས་པས་མཆོད་ལ།  སའམ་རྡོའམ་ཤིང་ངམ་རིན་པོ་ཆེ་ལས་གྲུབ་པའི་མཎྜལ་ཁྲུ་གང་
ལས་མི་ཆུང་བའི་དབུས་སུ་ལག་པ་གཡས་པས་མེ་ཏོག་དང་བཅས་པས་རེག་ལ།  ཨོཾ་བཛྲ་བྷཱུ་མི་ཨཱཿཧཱུཾ་ཞེས་བརྗོད་ཅིང་དབང་ཆེན་གསེར་གྱི་ས་གཞིར་བསམ།  དྲི་ཞིམ་པོའི་ཆུ་དབུས་སུ་བླུགས་ལ་གཡས་སྐོར་དུ་ཁྱེད་མ་མེད་པར་བྱུག །
དེ་ནི་གསང་སྔགས་པ་དུས་རྒྱུན་དུ་བདེ་བའི་བརླན་དང་མ་བྲལ་བར་བྱེད་པའི་བརྡའ་ཡིན།  མཐའ་སྐོར་དུ་བྱུགས་ཏེ།  ཨོཾ་བཛྲ་རེ་ཁེ་ཨཱཿཧཱུཾ་ཞེས་བརྗོད་ལ།  ཁོར་ཡུག་གསལ་བཏབ་ཅིང་།  ལག་པ་མ་བཏེགས་པར་མེ་ཏོག་གཅིག་བཞག་གོ། །
10-13-7a


དེ་ནས་ལག་པས་མེ་ཏོག་ཚོམ་བུ་བཀོད་ལ།  ངག་ཏུ་རིའི་རྒྱལ་པོ་རི་རབ།  ཤར་དུ་ལུས་འཕགས་པོ།  ལྷོ་ཛམྦུའི་གླིང་།  ནུབ་བ་ལང་སྤྱོད།  བྱང་སྒྲ་མི་སྙན།  ཟླ་བ།  ཉི་མ།  ཞེས་བརྗོད་པས།  སེམས་ཀྱིས་དེ་དག་གསལ་བར་
བསྒོམ་པ་གསུམ་ཕྲུགས་སུ་བྱས་ཏེ།  གླིང་བཞི་རི་རབ་ལྷ་མིའི་འདོད་ཡོན་མ་ཚང་བ་མེད་པ།  བདག་གཞན་འཁོར་འདས་ཐམས་ཅད་ཀྱིས་དུས་གསུམ་དུ་བསགས་པའི་ལུས་ལོངས་སྤྱོད་དགེ་བའི་རྩ་བ་མཐའ་དག་བློས་གསལ་བར་དམིགས་ཏེ། 
བླ་མ་ལ་ཕུལ་བར་བསམ་ཞིང་ངག་ཏུ།  བདག་གཞན་ལུས་ངག་ཡིད་གསུམ་ལོངས་སྤྱོད་དུས་གསུམ་དགེ་བའི་ཚོགས། །རིན་ཆེན་མཎྜལ་བཟང་པོ་ཀུན་བཟང་མཆོད་པའི་ཚོགས་བཅས་པར། །བློ་ཡིས་དམིགས་ནས་བླ་མ་ཡི་དམ་དཀོན་མཆོག་རྣམས་ལ་འབུལ། །
ཐུགས་རྗེའི་དབང་གིས་བཞེས་ནས་བདག་ལ་བྱིན་གྱིས་བརླབ་ཏུ་གསོལ། །ཞེས་བརྗོད་པས་དབུལ།  དེའི་རྗེས་སུ་མོས་གུས་ཀྱི་གདུང་ཤུགས་བསྐྱེད་ལ་བླ་མ་རིན་པོ་ཆེ་ལ་མཆོད་པའི་ཚོགས་ཐམས་ཅད་ནི་འབུལ་ལོ། །སྡིག་སྒྲིབ་དང་ཉེས་ལྟུང་
ཐམས་ཅད་ནི་སོ་སོར་བཤགས་སོ། །བསོད་ནམས་དང་ཡེ་ཤེས་ཀྱི་ཚོགས་ལ་རྗེས་སུ་ཡི་རང་ངོ་། །ཆོས་ཀྱི་འཁོར་ལོ་བླ་ན་མེད་པ་བསྐོར་བར་བསྐུལ་ལོ། །ཡོངས་སུ་མྱ་ངན་ལས་མི་འདའ་བར་གསོལ་བ་འདེབས་སོ། །ནམ་མཁའི་མཐའ་
དང་མཉམ་པའི་སེམས་ཅན་ཐམས་ཅད་ཀྱིས་ཕྱག་རྒྱ་ཆེན་པོ་མཆོག་གི་དངོས་གྲུབ་བླ་མ་རྡོ་རྗེ་འཆང་གི་གོ་འཕང་མྱུར་དུ་ཐོབ་པར་བྱིན་གྱིས་བརླབ་ཏུ་གསོལ།  ཞེས་པ་ལ་སོགས་པས་གསོལ་བ་གདབ།  དེ་ལྟ་བུ་ལན་ཉེར་གཅིག་ལ་སོགས་པའི་
10-13-7b


རྗེས་སུ།  གང་ཞིག་སྲིད་པའི་ཆུ་རླུང་ལ་སོགས་པ་གསང་འདུས་ལས་གསུངས་པའམ།  དེའང་མི་ཤེས་ན།  དཀོན་མཆོག་གསུམ་ལ་བདག་སྐྱབས་མཆི་ལ་སོགས་པ་རྡོ་རྗེ་གུར་ལས་གསུངས་པའི་རྒྱུན་བཤགས་ལན་གསུམ་དང་།  སཾ་བུ་ཊིའམ། 
རྡོ་རྗེ་མཁའ་འགྲོའམ།  རྡོ་རྗེ་རྩེ་མོ་ལ་སོགས་པའི་རིགས་ལྔའི་སྡོམ་པ་གཟུང་བ་ལན་གསུམ་བྱའོ། །དེ་ལྟར་ཐུན་བཞི་ལ་སོགས་པ་ཞག་གྲངས་ཅི་རིགས་པར་ཉམས་སུ་བླངས་ཏེ།  དམིགས་སྐོར་གཉིས་པའོ། །གསུམ་པ་བྱིན་རླབས་འཇུག་པར་
བྱེད་པ་མོས་གུས་གསོལ་འདེབས་ཀྱི་ཁྲིད་ནི་སྤྱིར་ལས་དང་པོ་པའི་དུས་སུ་སྒོ་གསུམ་གུས་པའི་གསོལ་འདེབས།  སྒྱུ་ལུས་ཀྱི་རྟོགས་པ་ཐོབ་ནས་ཀུན་རྫོབ་སྒྱུ་མའི་གསོལ་འདེབས།  འོད་གསལ་གྱི་རྟོགས་པ་ཐོབ་ནས་རང་སེམས་ཞལ་མཇལ་གྱི་
གསོལ་འདེབས།  ཟུང་འཇུག་གི་རྟོགས་པ་ཐོབ་ནས་ཁམས་གསུམ་རྒྱ་ཐེགས་ཀྱི་གསོལ་འདེབས་དང་བཞི་ལས་འདིར་དང་པོ་སྟོན་ཏེ།  དེའང་སྔར་བཞིན་བླ་མའི་རྣལ་འབྱོར་བསྒོམ་ལ།  ཕྱག་དང་མཆོད་པ་མཎྜལ་གསོལ་འདེབས།  རྒྱུན་བཤགས། 
རིགས་ལྔའི་སྡོམ་བཟུང་རྣམས་ཚང་བར་བྱས་པའི་རྗེས་སུ།  མོས་གུས་ཀྱི་གདུང་ཤུགས་ཚད་མེད་པ་བསྐྱེད་དེ།  སྙིང་ཐག་པ་ནས་འདི་སྐད་དུ།  བདག་དང་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཕྱོགས་བཅུ་དུས་གསུམ་
གྱི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་གཅིག་ཏུ་བསྡུས་པའི་བདག་ཉིད།  དྲིན་ཅན་རྩ་བའི་བླ་མ་རིན་པོ་ཆེའི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །
10-13-8a


ཐུགས་བརྩེ་བ་ཆེན་པོས་རྗེས་སུ་བཟུང་བ་དང་།  བྱིན་གྱིས་བརླབ་པར་མཛད་དུ་གསོལ།  བདག་དང་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་བསྒྲལ་དུ་གསོལ།
ཐར་པ་ཆེན་པོ་བླ་ན་མེད་པའི་གོ་འཕང་མྱུར་དུ་ཐོབ་པར་མཛད་དུ་གསོལ།  ཡང་དག་པའི་ཏིང་ངེ་འཛིན་བསམ་གྱིས་མི་ཁྱབ་པ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ།  བདེན་གཉིས་ཟུང་དུ་འཇུག་པའི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་
བརླབ་ཏུ་གསོལ།  ཞེས་པ་ལ་སོགས་པས་གསོལ་བ་བཏབ་པས།  བླ་མའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས།  སྣོད་ཀྱི་འཇིག་རྟེན་ཐམས་ཅད་ལ་ཕོག་པས་གཞལ་ཡས་ཁང་དུ་གྱུར།  བཅུད་ཀྱི་སེམས་ཅན་ཐམས་ཅད་ལ་ཕོག་
པས་ལྷ་དང་ལྷ་མོར་གྱུར།  སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་པ་རྒྱ་ཆེན་པོ་ཕུལ།  དེ་དག་གི་ཐུགས་གཉིས་སུ་མེད་པའི་ཡེ་ཤེས་འོད་ཟེར་བྱང་སེམས་ཀྱི་ཆུ་རྒྱུན་གྱི་རྣམ་པར་སྤྱན་དྲངས་ཏེ།  བདག་ལ་ཐིམ་པས།  སྡིག་སྒྲིབ་
ཐམས་ཅད་དག་ནས་སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱི་བྱིན་རླབས་ཞུགས་པར་བསམ་མོ། །དེ་ལྟར་སངས་རྒྱས་དང་བྱང་ཆུབ་སེམས་དཔས་བྱིན་གྱིས་བརླབས་ཤིང་།  རྒྱུད་ཡོངས་སུ་དག་པ་དེ་ལ་དབང་བསྐུར་དུ་རུང་བས།  བླ་མའི་སྤྱི་
བོར་ཨོཾ་དཀར་པོ་ལས་འོད་ཟེར་དཀར་པོ་འཕྲོས།  བདག་གི་སྤྱི་བོར་ཐིམ་པས་བུམ་པའི་དབང་ཐོབ།  བླ་མའི་མགྲིན་པའི་ཨཱཿདམར་པོ་ལས་འོད་ཟེར་དམར་པོ་འཕྲོས་ཏེ།  བདག་གི་མགྲིན་པར་ཐིམ་པས།  གསང་བའི་དབང་ཐོབ།  བླ་མའི་ཐུགས་
10-13-8b


ཀའི་ཧཱུཾ་སྔོན་པོ་ལས་འོད་ཟེར་སྔོན་པོ་འཕྲོས་ཏེ།  བདག་གི་སྙིང་གར་ཐིམ་པས།  ཤེས་རབ་ཡེ་ཤེས་ཀྱི་དབང་ཐོབ་པར་བསམ།  གཙུག་ཏོར་ནས་ཞབས་ཀྱི་མཐིལ་ཡན་ཆད་སྐུའི་ཆ་ཐམས་ཅད་ནས་འོད་ཟེར་ཁ་དོག་སྣ་ཚོགས་པ་འཕྲོས།  བདག་གི་
སྤྱི་གཙུག་ནས་རྐང་མཐིལ་ཡན་ཆད་ལུས་ཐམས་ཅད་ལ་ཐིམ་པས་དབང་བཞི་པ་ཐོབ་པར་བསམ།  དེ་དག་ལུས་ངག་ཡིད་དང་ཆགས་པའམ་ཤེས་སྒྲིབ་སྟེ་བཞི་དག་པར་བྱས།  བསྐྱེད་རིམ་སྒྱུ་ལུས་འོད་གསལ་ཟུང་འཇུག་གི་ལམ་བཞི་བསྒོམ་པ་ལ་
དབང་ཞིང་།  སྐུ་གསུང་ཐུགས་ཡེ་ཤེས་རྡོ་རྗེའི་བག་ཆགས་སམ་ས་བོན་རྒྱུད་ལ་བཞག་པའང་སོ་སོར་སྦྱར་ཏེ་གོ་བར་བྱའོ། །དེ་ལྟར་དབང་བཞི་ཐོབ་ཅིང་དྲི་མ་བཞི་དག་ནས་བླ་མའི་ཐུགས་དགོངས་སྙོམས་སུ་རུང་བས།  བླ་མ་ཡབ་ཡུམ་འོད་དུ་ཞུ་སྟེ་
བདག་གི་སྤྱི་གཙུག་ནས་ཐིམ་པས།  བླ་མ་དང་སངས་རྒྱས་ཐམས་ཅད་ཀྱི་སྐུ་གསུང་ཐུགས་དང་།  བདག་གི་ལུས་ངག་ཡིད་གསུམ་དབྱེར་མེད་དུ་འདྲེས་པར་བསམས་ལ།  དེའི་ངང་ལས་བཟོ་མེད་དུ་ལྷོད་དེ་བཞག །དེ་ལྟར་བཞག་པའི་ཚེ་ཤེས་པ་རྟོག་
མེད་ཀྱི་ངང་ལ་སིང་ངེ་གནས་ན་བླ་མ་ཆོས་སྐུ་སྤྲོས་པ་ཐམས་ཅད་དང་བྲལ་བའི་བྱིན་རླབས་སམ་ཡེ་ཤེས་སུ་མོས་པར་བྱའོ། །བདག་དང་།  ལྷ་དང་།  བླ་མའི་ཞལ་ཕྱག་གམ་མཚན་དཔེ་ལྟ་བུ་ལ་སེམས་གནས་ན།  བླ་མ་ལོངས་སྤྱོད་རྫོགས་པའི་སྐུ་
ཟུང་འཇུག་བདེ་བ་ཆེན་པོའི་བྱིན་རླབས་སམ་ཡེ་ཤེས་སུ་མོས་པར་བྱ།  ཡུལ་སྣ་ཚོགས་ལ་སེམས་འཕྲོ་ན།  བླ་མ་ཐུགས་རྗེ་སྤྲུལ་པའི་སྐུ་རྩལ་འགག་པ་མེད་པའི་བྱིན་རླབས་སམ་ཡེ་ཤེས་སུ་མོས་པར་བྱའོ། །དེ་ལྟར་ཐུན་བཞི་ལ་སོགས་པས་ཞག་གྲངས་
10-13-9a


ཅི་རིགས་པར་ཉམས་སུ་བླང་བར་བྱ་སྟེ།  དམིགས་སྐོར་གསུམ་པའོ། །བཞི་པ་ཉམས་གྲིབ་འདག་པར་བྱེད་པ་རྡོ་རྗེ་སེམས་དཔའི་བསྒོམ་བཟླས་ཀྱི་ཁྲིད་ནི།  སྔར་བཞིན་དུ་བླ་མའི་རྣལ་འབྱོར་མཎྜལ་གསོལ་འདེབས་
རྣམས་ཚར་བར་བྱས་པའི་རྗེས་སུ།  རང་གི་སྤྱི་བོར་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་སྟེང་དུ།  སྐད་ཅིག་གིས་རྡོ་རྗེ་སེམས་དཔའ་སྐུ་མདོག་སྟོན་ཀའི་ཟླ་བ་ལྟར་དཀར་བ།  ཞལ་གཅིག་ཕྱག་གཉིས་པ།  རྡོ་རྗེ་དང་དྲིལ་བུ་འཛིན་པས་ཡུམ་ལ་
འཁྱུད་པ།  རལ་པའི་ཐོར་ཅོག་ཅན།  ཞི་ཞིང་སྒེག་པའི་ཉམས་དང་ལྡན་པ།  རིན་པོ་ཆེའི་དབུ་རྒྱན་ལ་སོགས་པ་རྒྱན་བརྒྱད་ཀྱིས་སྤྲས་ཤིང་།  སེམས་དཔའི་སྐྱིལ་ཀྲུང་གིས་བཞུགས་པ།  དེའི་པང་ན་ཡུམ་རྡོ་རྗེ་སྙེམས་མ་དཀར་མོ་རྡོ་རྗེ་དང་དྲིལ་བུ་
འཛིན་པས་ཡབ་ལ་འཁྱུད་པ།  རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པར་བསམས་ལ།  དེའི་ཐུགས་ཀར་ཧཱུཾ་བསྒོམ་པས་སྡིག་སྒྲིབ་ཕྱིར་འཐོན་པའི་བར་སྔར་བཞིན་བསམས་ལ།  ཨོཾ་བཛྲ་ས་ཏྭ་ས་མ་ཡ།  མ་ནུ་པཱ་ལ་ཡ།  བཛྲ་ས་ཏྭ་ཏྭེ་ནོ་པ་ཏིཥྛ། 
དྲྀ་ཌྷོ་མེ་བྷ་ཝ།  སུ་ཏོཥྱོ་མེ་བྷ་ཝ།  སུ་པོཥྱོ་མེ་བྷ་ཝ།  ཨ་ནུ་རཀྟོ་མེ་བྷ་ཝ།  སརྦ་སིདྡྷི་མྨེ་པྲ་ཡཙྪ།  སརྦ་ཀརྨ་སུ་ཙ་མེ།  ཙིཏྟཾ་ཤྲེ་ཡཾ།  ཀུ་རུ་ཧཱུྃ།  ཧ་ཧ་ཧ་ཧ་ཧོཿབྷ་ག་ཝཱན།  སརྦ་ཏ་ཐཱ་ག་ཏ།  བཛྲ་མཱ་མེ་མུཉྩ།  བཛྲཱི་བྷ་ཝ།  མ་ཧཱ་ས་མ་ཡ་ས་ཏྭ་ཨཱཿ
ཞེས་བཟླས་པའི་མཐར།  ཕྱག་འཚལ་བསྟོད་དེ་ཕྱག་འཚལ་བསྟོད། །ཕྱག་འཚལ་འདུད་དེ་ཕྱག་འཚལ་འདུད། །གུས་པས་སྐུ་ལ་བདག་གསོལ་འདེབས། །རྡོ་རྗེ་སེམས་དཔའ་བདག་སྒྲུབས་ཤིག །སྐུ་གསུང་ཐུགས་རྩ་བ་དང་ཡན་ལག་གི་དམ་
10-13-9b


ཚིག་ཉམས་པ་ཐམས་ཅད་མཐོལ་ལོ་བཤགས་སོ། །སྡིག་པ་དང་སྒྲིབ་པ་ཉེས་པ་གྲིབ་མ་ལྟུང་བའི་ཚོགས་ཐམས་ཅད་བྱང་ཞིང་དག་པར་མཛད་དུ་གསོལ།  ཞེས་གསོལ་བ་བཏབ་པས་བཅོམ་ལྡན་འདས་རྡོ་རྗེ་སེམས་དཔའ་ཡབ་ཡུམ་འོད་དུ་
ཞུ་ནས་རང་ལ་ཐིམ་པར་བསམས་ལ་བདེ་སྟོང་སྤྲོས་པ་མེད་པའི་ངང་ལ་མཉམ་པར་བཞག་གོ།  དེ་ཡང་སྦྱང་བྱའི་སྡིག་སྒྲིབ་མ་གྲུབ།  སྦྱོང་བྱེད་ཀྱི་ཐབས་མ་གྲུབ།  སྦྱོང་མཁན་གྱི་སྒྲུབ་པ་པོ་རང་མ་གྲུབ་སྟེ།  དུས་གསུམ་བདེན་པས་སྟོང་ཞིང་
འཁོར་གསུམ་ཡོངས་སུ་དག་པ་དེ་ཉིད་བཤགས་པ་ཆེན་པོ་ཞེས་བྱ་བ་སྡིག་སྦྱོང་གི་མཆོག་ཏུ་གསུངས་ཏེ།  དྲང་པོར་འདུག་ལ་ཡང་དག་ལྟོས། །འགྱོད་ཚངས་རྣམས་ཀྱི་ནང་ནས་མཆོག །ཞེས་གསུངས་སོ། །རྗེས་བསྔོ་བ་དང་སྨོན་ལམ་
བྱའོ། །དེ་ཐམས་ཅད་རྣམ་རྟོག་གི་བསྒོམ་པ་ཡིན་པས།  རྟོག་བསྒོམ་འདི་ཐམས་ཅད་ལ་ར་གདུང་རྐྱང་གི་ཟམ་པ་ལ་འགྲོ་བ་ལྟར་གཅིག་གི་རྟིང་ན་གཅིག་ཁྲིག་ཁྲིག་པ་རྟོག་པ་གཞན་གྱིས་བར་མ་ཆོད་པ་གཅིག་གནད་དུ་ཆེ་བ་ཡིན་གསུང་ངོ་། །
དམིགས་སྐོར་བཞི་པའོ། །གཉིས་པ་དངོས་གཞིའི་རྣལ་འབྱོར་གྱིས་ཟུང་འཇུག་གི་ཡེ་ཤེས་རྒྱུད་ལ་བསྐྱེད་པ་ལ་གཉིས།  རིམ་ལྔ་སྤྱིའི་རྣམ་པར་བཞག་པ་དང་།  དམིགས་པའི་རིམ་པ་ཟབ་མོ་རྣམས་བཤད་པའོ། །དང་པོ་ལ་ལྔ་སྟེ།  རིམ་
འདིར་བསྐྱེད་རིམ་གྱི་སེམས་འཛིན་གཙོ་རྐྱང་ངམ།  ལྷ་སོ་གཉིས་གང་རུང་བྱས་པས་ཡོང་གསུང་ངོ་།  ལྔ་སྒོམ་པའི་རྟེན་གྱི་གང་ཟག །རིམ་ལྔའི་རྣལ་འབྱོར་གྱི་དབྱེ་བསྡུ།  རིམ་ལྔར་གྲངས་ངེས་པའི་རྒྱུ་མཚན།  དེ་དག་གི་སྦྱང་གཞི་བཤད་པ།  བསྒོམ་པའི་གནས་
10-13-10a


བསྟན་པའོ། །དང་པོ་ནི།  སངས་རྒྱས་པའི་ཐེག་པའི་བསམ་པ་ལ་བསླབ་པ་ནས་བརྩམས་ཏེ་དྲན་པ་གཅིག་པ་དང་།  རྟོག་པའི་རྣལ་འབྱོར་གྱི་བར་ལ་ཚུལ་བཞིན་དུ་བསླབ་པ་དང་།  སྔར་བསྐྱེད་རིམ་གྱི་སྔོན་འགྲོ་རྡུལ་
ཚོན་གྱི་དཀྱིལ་འཁོར་དུ་ཐུན་མོང་གི་དབང་དགུ།  དབང་གོང་མ་གསུམ་དང་བཅས་པ་ཐོབ་ཟིན་ཡིན་ན་དེས་ཆོག་ལ།  སྔར་བུམ་དབང་ཡན་ཆད་ལས་མ་ཐོབ་ན།  འདིར་རས་བྲིས་ཀྱི་དཀྱིལ་འཁོར་དུ་ཟུང་འཇུག་གསལ་བ་ལྟར་དབང་བཞི་རྫོགས་
པར་ཐོབ་པའི་གང་ཟག་གོ།  གཉིས་པ་ནི་སློབ་དཔོན་འཕགས་པས།  རྡོ་རྗེའི་བཟླས་པ།  སེམས་ལ་དམིགས་པ།  བདག་བྱིན་གྱིས་བརླབ་པ།  མངོན་པར་བྱང་ཆུབ་པའི་རིམ་པ།  ཟུང་དུ་འཇུག་པ་དང་ལྔར་མཛད་ལ།  རྡོར་བཟླས་ཀྱི་སྔོན་དུ་
ལུས་དབེན་མ་བསྟན་ཀྱང་།  མི་དགོས་པའམ་མི་བཞེད་པ་ནི་མ་ཡིན་ཏེ།  འབྲས་བུ་རྡོར་བཟླས་བསྟན་པས་དེའི་རྒྱུར་ལུས་དབེན་འགྲོ་དགོས་པའི་ཕྱིར་དང་།  རིམ་ལྔར་ལུས་དང་ངག་དང་ཡིད་རྣམ་པར་དབེན་པའི་ཐོས་པ་འཛིན་པ་ཞེས་གསུངས་
པའི་ཕྱིར།  དཔེར་ན་པི་ཝང་གི་སྐད་འབྱུང་བ་ལ་ཁོག་པ་ངེས་པར་དགོས་པ་བཞིན་ནོ། །འཕགས་པ་ལྷས་རྫོགས་རིམ་ལ་དྲུག་ཏུ་མཛད་པ་ནི།  ལུས་དབེན་ཉམས་ལེན་ལ་མི་དགོས་ཁ་མེད་ཡིན་པས།  རྡོར་བཟླས་ཀྱི་སྔོན་འགྲོ་སྦྱར་བ་སྣང་ངོ་། །
ཟླ་བ་གྲགས་པས་བསྐྱེད་རིམ་དང་པོ།  དབེན་གསུམ་གཉིས་པ།  སྒྱུ་ལུས་གསུམ་པ།  འོད་གསལ་བཞི་པ།  ཟུང་འཇུག་ལྔ་པར་མཛད་པ་ནི།  རྒྱུད་དབུ་ཞབས་ཀྱི་བརྗོད་བྱ་དེ་ལྔར་འདུ་བ་ལ་དགོངས་ནས།  མདོར་བསྟན་གྱི་ཚུལ་དུ་མཛད་པ་ཡིན་
10-13-10b


པས་ཡབ་སྲས་ཐམས་ཅད་ཀྱི་དགོངས་པ་ཉམས་ལེན་གྱི་གོ་རིམ་ལ་མི་མཐུན་པ་མེད་དོ། །གསུམ་པ་ནི།  སྤང་བྱ་ཉོན་མོངས་དང་རྣམ་རྟོག་མངོན་གྱུར་མགོ་གནོན་པ་དང་།  ས་བོན་དྲུང་ནས་འབྱིན་པ་ལ་རིམ་པ་ལྔ་དགོས་ཏེ།  དབེན་གསུམ་ནི།  སེམས་
རྩེ་གཅིག་པ་ཞི་གནས་གྱི་ལམ་ཡིན་པས་སྤང་བྱ་ཉོན་མོངས་དང་རྣམ་རྟོག་མངོན་འགྱུར་མགོ་གནོན་པ་ཡིན་ལ་ལྷག་མ་གསུམ་ནི་ཤེས་རབ་གཙོ་བོར་བྱེད་པ་ལྷག་མཐོང་གི་ལམ་ཡིན་པས་ས་བོན་དྲུངས་ནས་འབྱིན་པ་ཡིན་ནོ། །དང་པོ་ལ་ཡང་།  
ཞི་གནས་ཀྱི་རྟེན་དང་།  རྐྱེན་དང་།  དངོས་གསུམ་ལས།  སྔོན་འགྲོ་ལུས་དབེན་ནི་རྟེན་ཡིན་ཏེ།  དེས་བྱིན་གྱིས་བརླབས་པའི་ལུས་ལ་བརྟེན་ནས་ཞི་གནས་བསྒོམ་པའི་ཕྱིར་རོ། །ངག་དབེན་ནི་རྐྱེན་ཡིན་ཏེ།  རླུང་དབང་དུ་འདུས་པ་ལས་
མི་རྟོག་པའི་ཞི་གནས་སྐྱེ་བའི་ཕྱིར་རོ། །སེམས་དབེན་ནི་དངོས་ཡིན་ཏེ།  ཕྱག་རྒྱའམ་གྲོལ་ལམ་ལ་བརྟེན་ནས་བདེ་སྟོང་གི་ཡེ་ཤེས་སེམས་རྩེ་གཅིག་པའི་ཏིང་ངེ་འཛིན་སྐྱེ་བའི་ཕྱིར་རོ། །དེ་དག་གིས་སྤང་བྱ་མགོ་གནོན་དུ་ཟིན་ཀྱང་།  ས་བོན་
སྤང་བ་ལ་ལམ་ཕྱི་མ་གསུམ་དགོས་ཏེ།  སྒྱུ་མས་ཡུལ་སྟོང་ཉིད་དུ་རྟོགས་པས་གཟུང་རྟོག་གི་ས་བོན་སྤངས་ལ།  འོད་གསལ་གྱིས་སེམས་སྟོང་པར་རྟོགས་པས་འཛིན་རྟོག་གི་ས་བོན་སྤོང་ཞིང་།  ཟུང་འཇུག་གིས་བདེན་གཉིས་དབྱེར་མེད་པར་རྟོགས་
པས་བདེན་གཉིས་ཐ་དད་དུ་ཞེན་པའི་ས་བོན་སྤང་བའི་ཕྱིར་རོ། །དེ་བས་རིམ་པ་ལྔར་གྲངས་ངེས་ཏེ།  ལུས་དབེན་ནི་ངག་དབེན་གྱི་སྔོན་འགྲོ་ཡིན་པའི་ཕྱིར་རོ། །དེ་བཞིན་དུ་གོ་རིམ་ཡང་ངེས་པ་ཡིན་ཏེ།  སྔ་མ་སྔ་མ་ལ་བརྟེན་ནས་ཕྱི་མ་ཕྱི་མ་འབྱུང་བ་
10-13-11a


རྒྱུ་འབྲས་ཀྱི་གོ་རིམ་ཡིན་པས།  ལུས་དབེན་སྐུ་རྡོ་རྗེའི་རྣལ་འབྱོར་ལ་བརྟེན་ནས་ངག་དབེན་གསུང་རྡོ་རྗེའི་རྣལ་འབྱོར་འབྱུང་གི་གཞན་དུ་མ་ཡིན་ཏེ།  དཔེར་ན་པི་ཝང་གི་ཁོག་པ་ལེགས་པར་སྦྱངས་པ་ལས་སྐད་སྙན་པ་འབྱུང་གི་
གཞན་དུ་མ་ཡིན་པ་བཞིན་ནོ། །ངག་རྣམ་པར་དབེན་པས་སེམས་ཀྱི་བཞོན་པ་རླུང་དབང་དུ་འདུས་པ་ལས་རླུང་ལ་བཞོན་པའི་སེམས་རྣམ་པར་དབེན་པ་ཐུགས་རྡོ་རྗེའི་ཏིང་ངེ་འཛིན་འབྱུང་སྟེ།  དཔེར་ན་རྟའི་ཁ་ལོ་འབྱོངས་པའི་སྐྱེས་བུས་བགྲོད་
བྱའི་གནས་སུ་ཕྱིན་གྱིས་གཞན་གྱིས་མ་ཡིན་པ་བཞིན་ནོ། །སེམས་དབེན་གྱི་ཏིང་ངེ་འཛིན་མེད་ན་སྒྱུ་མ་ལྟ་བུའི་ཏིང་ངེ་འཛིན་མི་འབྱུང་སྟེ།  སྒྱུ་མའི་སྐུ་དེ་ནི་རང་རིག་པ་བདེ་བ་ཙམ་ལས་གྲུབ་པའི་ཕྱིར་རོ། །ཀུན་རྫོབ་སྒྱུ་མ་ལྟ་བུ་མངོན་དུ་མ་བྱས་
པར་དོན་དམ་འོད་གསལ་རྟོགས་པར་མི་ནུས་ཏེ།  ཆོས་ཅན་སྒྱུ་མ་མཐར་མ་ཕྱིན་ན།  དེ་བསམ་གཏན་གཉིས་ཀྱིས་བཤིག་པའི་ཆོས་ཉིད་འོད་གསལ་མངོན་དུ་མི་འགྱུར་བའི་ཕྱིར་རོ། །འོད་གསལ་དོན་དམ་པའི་བདེན་པ་མེད་ན་ཟུང་འཇུག་གི་སྐུ་མི་
འབྱུང་སྟེ།  གཡའ་དང་བྲལ་བའི་མེ་ལོང་མེད་ན་མེ་ལོང་ནང་གི་གཟུགས་བརྙན་སྣང་སྟོང་ཟུང་འཇུག་མི་འབྱུང་བའི་ཕྱིར་རོ། །དེས་ན་ལམ་འདི་དག་ལ་རིམ་ཅན་དུ་སློབ་དགོས་པ་ཡིན་ཏེ།  རིམ་ལྔར།  བསྐྱེད་པའི་རིམ་པར་ལེགས་གནས་ནས། །
རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་གདང་བུ་ལྟ་བུར་བསྟན། །ཞེས་བཤད་དོ། །བཞི་པ་ནི།  སྤྱིར་སེམས་ཅན་གྱི་ཁམས་ལ་སྐྱེ་འཆི་གཉིས་ལས།  སྐྱེ་བ་ཀུན་རྫོབ་ཀྱི་བདེན་པ་སྣོད་དང་
10-13-11b


བཅུད་ཀྱིས་བསྡུས་པ་ནི་བསྐྱེད་རིམ་གྱི་སྦྱང་གཞི་ཡིན་ལ།  འཆི་བ་དོན་དམ་པའི་བདེན་པ་བར་དོ་དང་བཅས་པ་ནི་རྫོགས་རིམ་གྱི་སྦྱང་གཞི་ཡིན་ཏེ།  ཡེ་ཤེས་རྡོ་རྗེ་ཀུན་ལས་བཏུས་པར།  སྐྱེ་བ་ཀུན་རྫོབ་བདེན་པ་ཞེས་བྱ་སྟེ། །འཆི་བ་ཡང་ནི་དོན་
དམ་བདེན་པ་ཡིན། །བདེན་གཉིས་འདི་ལ་རྣམ་པར་ངེས་བྱས་ནས། །བཤད་པ་གཉིས་ཀྱི་དབྱེ་བ་གསུངས་པ་ཡིན། །ཞེས་དང་།  སྤྱོད་བསྡུས་ལས།  གང་ཞིག་སྐྱེ་བ་ཀུན་རྫོབ་བདེན་པ་སྟེ། །འཆི་བའི་མིང་ཡང་དོན་དམ་བདེན་པ་ཡིན། །རིམ་
གཉིས་དེ་དག་བླ་མའི་དྲིན་གྱིས་ནི། །རྙེད་པ་འདི་ནི་མ་འོངས་སངས་རྒྱས་ཡིན། །ཞེས་བདེན་གཉིས་ཀྱི་དོན་ནི་རིམ་པ་གཉིས་ལ་བཤད་དོ། །སྐབས་འདིར་རྫོགས་རིམ་གྱི་སྦྱང་གཞི་འཆི་བ་དོན་དམ་པའི་བདེན་པའི་ཚུལ་ལྟར་བཤད་ན་བཞི་སྟེ།  སྦྱང་
གཞི།  སྦྱོང་བྱེད།  དེ་དག་ཕན་ཚུན་སྦྱར་བ།  ཇི་ལྟར་སྦྱང་བའི་ཚུལ་ལོ། །དང་པོ་ནི།  རང་གི་ལུས་འདི་འཇིག་ཅིང་འཆི་བའི་ཚེ་ཕུང་པོ་དང་ཁམས་དང་སྐྱེ་མཆེད་ཐམས་ཅད་ས་ཆུ་ལ་ཐིམ་པ་སོགས་འབྱུང་བ་རིམ་གྱིས་འགགས་པ་ནས་བཟུང་སྟེ།  བར་
དོ་ཡིད་ཀྱི་ལུས་གྲུབ་པའི་བར་ནི་རྫོགས་རིམ་གྱི་སྦྱང་གཞིར་བཙུན་མོ་ཅན་བཞེད་ལ།  མངོན་ཤེས་ཅན་གྱིས་ད་ལྟར་གྱི་ལུས་ངག་ཡིད་གསུམ་རྨི་ལམ་གྱི་སྣང་བ་དང་བཅས་པ་དང་།  འཆི་བ་བར་དོ་དང་བཅས་པ་ཐམས་ཅད་རྫོགས་རིམ་གྱི་སྦྱང་གཞིར་
བཞེད་དོ། །གཉིས་པ་ནི།  རྡོར་བཟླས་ཀྱི་སྔོན་འགྲོ་ལུས་དབེན་ནས་བརྩམས་ཏེ།  ཟུང་འཇུག་གི་བར་གྱི་རིམ་པ་ལྔའི་ཏིང་ངེ་འཛིན་རྣམས་སོ། །གསུམ་པ་ནི་འཆི་བའི་ཚེ་ས་ཆུ་ལ།  ཆུ་མེ་ལ།  མེ་རླུང་ལ་ཐིམ་པའི་བར་ཕུང་པོ་དང་ཁམས་དང་སྐྱེ་མཆེད་
10-13-12a


རགས་པ་འགགས་པ་ནི་ལུས་དབེན་གྱི་སྦྱང་གཞི་ཡིན་ལ།  རླུང་རྣམ་ཤེས་ལ་ཐིམ་པ་ངག་དབེན་གྱི་སྦྱང་གཞི་དང་།  རྣམ་ཤེས་འོད་གསལ་ལ་ཐིམ་པ་སེམས་དབེན་གྱི་སྦྱང་གཞི་ཡིན་ནོ། །སྒྱུ་མའི་སྦྱང་གཞི་ནི།  རྒྱལ་པོ་སྤྲིན་གྱི་
ཤུགས་ཅན་བར་དོ་ལ་བཞེད།  བཙུན་མོ་ཅན་རྨི་ལམ་དང་།  མངོན་ཤེས་ཅན་ལུས་ལེན་ཁའི་སྒྲོ་བཏགས་ཀྱི་ཤེས་པ་ཙམ་ཡིན་གསུངས་ཀྱང་།  རྗེ་འགོས་ཀྱིས་དེ་དག་མི་འཐད་པར་བཞག་ནས།  ནག་པོ་ཞབས་སྒྱུ་མ་ལ་སྦྱང་གཞི་ལོགས་པ་མེད་ཀྱང་།  
སྦྱོང་བྱེད་ལ་ངེས་པར་དགོས་ཏེ།  ཟུང་འཇུག་གི་ཉེར་ལེན་གྱི་རྒྱུ་ཡིན་པའི་ཕྱིར་རོ་ཞེས་གསུངས་ཤིང་།  འོད་གསལ་གྱི་སྦྱང་གཞི་ནི་འཆི་བ་ཤེར་ཕྱིན་ཡིན་ལ།  ཟུང་འཇུག་གི་སྦྱང་གཞི་བར་དོ་ཡིན་ནོ་ཞེས་རྗེ་འགོས་བཞེད་དོ། །རྔོག་ཉི་མ་སེང་
གེ་ལྟར་ན།  ཕུང་པོ་ཁམས་དང་སྐྱེ་མཆེད་ཡེ་ཤེས་ལྔ་དང་བཅས་པ་ཞིབ་མོར་ཕྱེ་ན་དངོས་པོ་བརྒྱར་གནས་པ་སོགས་ནི་ལུས་དབེན་གྱི་སྦྱང་གཞི་ཡིན་ལ།  ལུས་ཀྱི་ཁོང་སྟོང་དབུགས་ཉི་ཁྲི་ཆིག་སྟོང་དྲུག་བརྒྱ།  ཡི་གེ་འབྲུ་གསུམ་སྒྲ་རང་བཞིན་གྱིས་གྲག་པ་དང་
བཅས་པ་ངག་དབེན་གྱི་སྦྱང་གཞི་དང་།  སེམས་གསུམ་རང་བཞིན་དང་བཅས་པ་སེམས་དབེན་གྱི་དང་།  རྨི་ལམ་གྱི་ཚེ་རླུང་སེམས་ཙམ་ལས་ཡིད་ཀྱི་ལུས་མངོན་ཞེན་དང་བཅས་པ་གྲུབ་སྟེ་ཕྱོགས་བཅུར་རྒྱུ་ཞིང་འདོད་པ་ལ་ལོངས་སྤྱོད་པར་སྣང་བ་སྒྱུ་
ལུས་ཀྱི་དང་།  འཆི་བའི་ཚེ་འབྱུང་བ་བཞི་རྣམ་ཤེས་དང་བཅས་པ་ཆེན་པོ་ལྔ་འོད་གསལ་དུ་ཐིམ་སྟེ་འཆི་བ་ཤེར་ཕྱིན་མངོན་དུ་བྱས་པ་འོད་གསལ་གྱི་དང་།  དེ་ལས་ལུགས་བཟློག་གི་སྣང་བ་གསུམ་རླུང་དང་བཅས་པ་ལས་སྐད་ཅིག་གིས་བར་དོ་ཡིད་ཀྱི་རང་
10-13-12b


བཞིན་གྱི་ལུས་གྲུབ་པ་ནི་ཟུང་འཇུག་གི་སྦྱང་གཞི་ཡིན་ནོ་ཞེས་འདོད་དོ། །འོ་ན་བསྐྱེད་རིམ་དང་ལུས་དབེན་སྦྱང་གཞི་གཅིག་ཏུ་འགྱུར་རོ་ཞེ་ན།  སྐྱོན་མེད་དེ།  སྦྱང་གཞི་གཅིག་ཡིན་ཀྱང་སྤང་བྱ་ཐ་མལ་གྱི་རྣམ་རྟོག་རགས་པ་བསྐྱེད་རིམ་གྱིས་སྦྱངས་
ལ།  ཕྲ་བ་ལུས་དབེན་གྱིས་སྦྱངས་པས་མི་འགལ་ལོ། །ཡང་འཆི་བ་སྟོང་ཉིད་དང་བར་དོ་བསྐྱེད་རིམ་གྱི་སྦྱང་གཞིར་བཤད་པས་རྫོགས་རིམ་གྱི་སྦྱང་གཞིར་འགལ་ཞེ་ན།  མི་འགལ་ཏེ།  བསྐལ་པ་དང་པོའི་མི་རྫུས་སྐྱེས་ཤི་ནས་མངལ་དུ་འཇུག་པའི་
འཆི་བ་འོད་གསལ་དང་།  བར་དོ་ནི་བསྐྱེད་རིམ་གྱི་སྦྱང་གཞི་ཡིན་ལ།  མངལ་ཁ་དུ་མ་བརྒྱུད་པའི་འཆི་བ་འོད་གསལ་དང་།  བར་དོ་ནི་རྫོགས་རིམ་གྱི་སྦྱང་གཞི་ཡིན་པས་མི་འགལ་ལོ། །བཞི་པ་ནི།  དབེན་གསུམ་ནི་ཟག་བཅས་ཞི་གནས་ཀྱི་ལམ་
ཡིན་པས་སྤང་བྱ་མངོན་གྱུར་མགོ་གནོན་པའི་ཚུལ་གྱིས་སྦྱངས་ལ།  སྒྱུ་མ་འོད་གསལ་ཟུང་འཇུག་དང་བཅས་པ་ནི་ལྷག་མཐོང་ཤེས་རབ་ཀྱི་ལམ་ཡིན་པས་སྤང་བྱའི་ས་བོན་དྲུངས་ནས་འབྱིན་པའི་ཚུལ་གྱིས་སྦྱང་ངོ་། །སྤྱིར་དུ་ན།  སྣོད་བཅུད་ཐ་
མལ་གྱི་རྣམ་རྟོག་ནི་བསྐྱེད་རིམ་གྱི་སྤང་བྱ་ཡིན་ལ།  གཟུང་འཛིན་བྱ་བྱེད་ཀྱི་རྣམ་རྟོག་ནི་རྫོགས་རིམ་གྱི་སྤང་བྱ་ཡིན་པའི་ཕྱིར།  དྲི་མ་རགས་པ་གཉེན་པོ་སྟོབས་ཆུང་བས་སྤངས་ལ།  ཕྲ་བ་ནི་གཉེན་པོ་སྟོབས་ཆེ་བས་སྤང་བས་དངོས་པོ་ཐ་མལ་གྱི་
རྣམ་རྟོག་རགས་པའི་གཉེན་པོ་ནི་བསྐྱེད་རིམ་ཡིན་ལ།  ཕྲ་བའི་གཉེན་པོ་ནི་ལུས་དབེན་ནོ། །གཟུང་འཛིན་བྱ་བྱེད་ཀྱི་རྣམ་རྟོག་ཤེས་སྒྲིབ་རགས་པའི་གཉེན་པོ་ངག་དབེན་དང་སེམས་དབེན་གཉིས་ཡིན་ལ།  ཤེས་སྒྲིབ་ཕྲ་བའི་གཉེན་པོ་ནི་སྒྱུ་མ་
10-13-13a


སོགས་གསུམ་ཡིན་ནོ། །དེ་ཡང་གཟུང་རྟོག་ཕྲ་བའི་གཉེན་པོ་ཡུལ་སྟོང་པ་སྒྱུ་མ་དང་།  འཛིན་རྟོག་ཕྲ་བའི་གཉེན་པོ་སེམས་སྟོང་ཉིད་འོད་གསལ་དང་།  དེ་གཉིས་ཀྱི་བག་ཆགས་ཤིན་ཏུ་ཕྲ་ཞིང་ཕྲ་བའི་གཉེན་པོ་ཟུང་འཇུག་རྣམས་ཡིན་པར་
ཤེས་པར་བྱའོ། །ལྔ་པ་ནི།  རྩ་བའི་རྒྱུད་ལས།  དགོན་པ་ཆེན་པོའི་ས་ཕྱོགས་ནི། །མེ་ཏོག་འབྲས་བུ་སོགས་ཀྱིས་བརྒྱན། །རི་བོ་དབེན་པ་དག་ཏུ་ནི། །དངོས་གྲུབ་ཐམས་ཅད་བསྡུས་པས་སྒྲུབ། །ཅེས་གསུངས་པ་ལྟར།  རིའི་ཕུག་ལ་
སོགས་པའི་གནས་དབེན་པ།  ཉིན་པར་སྐྱེ་བོའི་རྒྱུན་ལུགས་དང་སྒྲའི་ཀླག་ཅོར་ལ་སོགས་མེད་པ།  མཚན་མོ་གཅན་གཟན་དང་ཆོམ་རྐུན་གྱི་གནོད་པ་དང་བྲལ་བའི་གནས་སུ་ཐུན་བཞིའི་རིམ་པས་རྣལ་འབྱོར་ལ་འཇུག་པར་བྱ་བ་ཡིན་ནོ།།    །།
༈  །སྤྱི་དོན་གཉིས་པ་དམིགས་པའི་རིམ་པ་ཟབ་མོ་ཉམས་སུ་བླང་བ་ལ་རིམ་པ་ལྔ་སྟེ།  རྡོ་རྗེའི་བཟླས་པ།  སེམས་རྣམ་པར་དབེན་པ།  ཀུན་རྫོབ་བདེན་པ་སྒྱུ་ལུས།  དོན་དམ་འོད་གསལ།  ཟུང་དུ་འཇུག་པའི་རིམ་པའོ། །དང་པོ་ལ།  སྔོན་
འགྲོ་ལུས་རྣམ་པར་དབེན་པ་དང་།  དངོས་གཞི་ངག་རྣམ་པར་དབེན་པའོ། །དང་པོ་ལ་དོན་བདུན་གྱི།  ལུས་དབེན་སྒོམ་པའི་རྟེན་གྱི་གང་ཟག་ནི།  བསྐྱེད་རིམ་མཐར་ཕྱིན་ནས་མཆོག་གི་དངོས་གྲུབ་དོན་དུ་གཉེར་བས་ལུས་དབེན་སོགས་རྫོགས་
རིམ་བསྒོམ་པར་འདོད་པའོ། །གཉིས་པ་ཤེས་བྱ་ནི།  དེ་ལ་སློབ་པའི་ཚེ་ལུས་ཐམས་ཅད་དོན་དམ་པར་སྟོང་པ་ཉིད་ལས་བྱུང་ཞིང་སྟོང་པ་ཉིད་ལ་ཐིམ་པ་ནམ་མཁའ་དང་མཉམ་པ་ཡིན་ལ།  ཀུན་རྫོབ་ཏུ་དངོས་པོ་བརྒྱས་བསྡུས་པའི་ལུས་ཐམས་ཅད་
10-13-13b


སངས་རྒྱས་ལྔའི་རྡུལ་ཕྲ་རབ་ལས་གྲུབ་པར་ཤེས་པར་བྱ་སྟེ།  རྩ་བའི་རྒྱུད་དུ།  སྐུ་ཡི་རྡོ་རྗེ་རྫོགས་བྱང་ཆུབ། །དངོས་དང་དངོས་མེད་རྣམ་དཔྱད་པ། །ཞེས་གསུངས་པའི་ཕྱིར་རོ། །གསུམ་པ་སྤང་བྱ་མི་མཐུན་པའི་ཕྱོགས་ནི།  ཁ་དོག་
གཟུགས་ལ་སོགས་པ་ཐ་མལ་པའི་རྟོག་པ་ཆ་ཕྲ་བ་སྟེ།  རགས་པ་ནི་བསྐྱེད་རིམ་གྱིས་སྦྱངས་པས་སོ། །བཞི་པ་དབྱེ་བ་སོ་སོའི་མཚན་ཉིད་ལ་བཞི་སྟེ།  གཟུགས་ཀྱི་ལུས་དབེན་དང་།  རང་བཞིན་གྱི་ལུས་དབེན།  རྣམ་པར་ཤེས་པའི་ལུས་དབེན།  
ཏིང་ངེ་འཛིན་གྱི་ལུས་དབེན་ནོ། །དང་པོ་ནི།  རང་གི་ལུས་འདི་མི་གཙང་བའི་རྫས་སུམ་ཅུ་སོ་དྲུག་འདུས་པའི་ཕྱིར།  ཐ་མལ་པ་རྣམས་ཀྱིས་གཟུགས་ཀྱི་ལུས་པོ་གཙང་བ་དང་བདེ་བ་ལ་སོགས་པར་བརྟགས་པ་ལས་དབེན་པ་སྟེ།  ཉན་ཐོས་དང་
ཤེས་བྱ་ཐུན་མོང་བའོ། །གཉིས་པ་ནི།  ལུས་འདི་ཕུང་པོ་ལ་སོགས་པའི་རང་བཞིན་ཉི་ཤུ་རྩ་ལྔ་ཡིན་པའི་ཕྱིར།  མུ་སྟེགས་པ་རྣམས་ཀྱིས་རང་བཞིན་གཅིག་ཏུ་བརྟགས་པས་དབེན་པ་སྟེ།  ཕར་ཕྱིན་ཐེག་པ་དང་ཤེས་བྱ་ཐུན་མོང་བའོ། །གསུམ་པ་ནི།  
རྣམ་པར་ཤེས་པ་ནི་ཕྱི་ནང་དུ་ཉེ་བར་མི་དམིགས་པའི་ཕྱིར།  རང་གི་སྡེ་པས་བཏགས་པའི་གཟུང་འཛིན་གྱིས་དབེན་པ་སྟེ།  སེམས་ཙམ་པ་དང་ཤེས་བྱ་ཐུན་མོང་བའོ། །བཞི་པ་ནི།  ལུས་ཐམས་ཅད་སྟོང་པར་ཤེས་པར་བྱས་ནས་ཀུན་རྫོབ་ཏུ་ཐ་མལ་གྱི་
དངོས་པོ་བརྒྱ་ལ་སོགས་པར་གནས་པ་དེ་ཉིད་དེ་བཞིན་གཤེགས་པ་རིགས་བརྒྱ་ལ་སོགས་པའི་ང་རྒྱལ་དུ་བསྒོམ་པ་སྟེ།  གསང་སྔགས་པའི་ཤེས་བྱ་ཐུན་མོང་མ་ཡིན་པའོ། །ལྔ་པ་ཇི་ལྟར་བསླབ་པའི་ཚུལ་ལ་གསུམ་ལས།  དང་པོ་རྒྱས་པར་རིགས་བརྒྱར་
10-13-14a


བསྒོམ་ཚུལ་ནི།  གཟུགས་དང་།  རང་བཞིན་དང་།  རྣམ་པར་ཤེས་པའི་ལུས་གསུམ་རང་བཞིན་མེད་པར་ཤེས་པར་བྱས་ནས།  ཕུང་པོ་སོགས་ཐ་མལ་གྱི་དངོས་པོ་ཆ་ཕྲ་བ་རྣམས་དེ་བཞིན་གཤེགས་པ་བརྒྱར་བསྒོམས་ཏེ།  
དེ་ཡང་གཟུགས་ཀྱི་ཕུང་པོ་སྤྱི་རྣམ་སྣང་དུ་བསྒོམས་ལ།  བྱེ་བྲག་ཏུ་ཕྱེ་ན།  གཟུགས་རྣམ་སྣང་ལ་ཕྱི་ནང་གཉིས་ཀའི་རིང་པོ་སོགས་དབྱིབས་ཀྱི་གཟུགས་ནི་རྣམ་སྣང་གི་རྣམ་སྣང་།  བདག་གཞན་སོགས་རྣམ་པའི་གཟུགས་ནི་རྣམ་སྣང་གི་རིན་འབྱུང་།  སྔོན་
པོ་སོགས་ཁ་དོག་གི་གཟུགས་ནི་རྣམ་སྣང་གི་སྣང་མཐའ།  ཉི་ཟླ་སོགས་སྣང་བའི་གཟུགས་ནི་རྣམ་སྣང་གི་དོན་གྲུབ།  རྣམ་པར་རིག་བྱེད་མ་ཡིན་པའི་གཟུགས་ནི་རྣམ་སྣང་གི་མི་བསྐྱོད་པར་ཤེས་པར་བྱས་ལ་བསྒོམ།  དེ་བཞིན་དུ་ཚོར་བ་སྤྱི་རིན་
འབྱུང་དུ་བསྒོམས་ཏེ།  དེ་ལ་འདུས་མཁྲིས་ལས་བྱུང་བའི་ཚོར་བ་རིན་འབྱུང་གི་མི་བསྐྱོད་པ།  བད་རླུང་ལས་བྱུང་བའི་ཚོར་བ་རིན་འབྱུང་།  ཚོར་བ་བདེ་བ་སྣང་མཐའ།  ཚོར་བ་སྡུག་བསྔལ་བ་དོན་གྲུབ།  ཚོར་བ་བཏང་སྙོམས་པ་སྣང་མཛད་
དུ་བསམ་མོ། །འདུ་ཤེས་སྤྱི་སྣང་བ་མཐའ་ཡས་སུ་བསྒོམས་ཏེ།  དེ་ལ་རྐང་གཉིས་པའི་འདུ་ཤེས་ནི་སྣང་མཐའི་མི་བསྐྱོད་པ།  རྐང་བཞི་པའི་འདུ་ཤེས་ནི་རིན་འབྱུང་།  རྐང་མེད་ཀྱི་འདུ་ཤེས་ནི་སྣང་མཐའ།  རྐང་མང་གི་འདུ་ཤེས་ནི་དོན་
གྲུབ།  མི་གཡོ་ཞིང་མི་རྒྱུ་བའི་འདུ་ཤེས་ནི་རྣམ་སྣང་དུ་བསྒོམ་མོ། །འདུ་བྱེད་སྤྱི་དོན་གྲུབ་དུ་བསྒོམས་ཏེ།  དེ་ལ་ལུས་ཀྱི་འདུ་བྱེད་དོན་གྲུབ་ཀྱི་རྣམ་སྣང་།  ངག་གི་འདུ་བྱེད་སྣང་མཐའ།  ཡིད་ཀྱི་འདུ་བྱེད་མི་བསྐྱོད་པ།  ཁམས་གསུམ་གྱི་འདུ་བྱེད་རིན་
10-13-14b


འབྱུང་།  ཐར་པའི་འདུ་བྱེད་དོན་གྲུབ་དུ་བསྒོམ་མོ། །རྣམ་པར་ཤེས་པ་སྤྱི་མི་བསྐྱོད་པ་བསྒོམས་ཏེ།  དེ་ལ་མིག་གི་རྣམ་ཤེས་མི་བསྐྱོད་པའི་རྣམ་སྣང་།  རྣ་བའི་རྣམ་ཤེས་རིན་འབྱུང་།  སྣའི་རྣམ་ཤེས་སྣང་མཐའ།  ལྕེའི་རྣམ་ཤེས་དོན་གྲུབ།  ལུས་
ཀྱི་རྣམ་ཤེས་མི་བསྐྱོད་པར་ཤེས་པར་བྱས་ལ་བསྒོམ་མོ། །དེ་བཞིན་དུ་ས་ཁམས་སངས་རྒྱས་སྤྱན་དུ་བསྒོམས་ཏེ།  དེ་ལ།  སྐྲ།  རུས་པ།  ཕྱི་ས།  མཆིན་པ།  སྙིང་རྣམས་ནི་སྤྱན་མའི་རྣམ་སྣང་།  སྤུ།  སེན་མོ།  རྣག །སྙིང་རྣམས་ནི་སྤྱན་མའི་རིན་
འབྱུང་།  སོ།  པགས་པ།  ཤ།  སྙིང་རྣམས་ནི་སྤྱན་མའི་སྣང་མཐའ།  རྒྱུས་པ།  ཤ།  རྩིབ་མ།  སྙིང་རྣམས་ནི་སྤྱན་མའི་དོན་གྲུབ།  དྲི་མ།  རྒྱུ་མ།  མཁྲིས་པ།  སྙིང་རྣམས་ནི་སྤྱན་མའི་མི་བསྐྱོད་པར་བསམ་མོ། །སྙིང་ལྔ་ནི།  སྤྱོད་བསྡུས་ལས།  
སྙིང་ནི་ལྔ་ལ་ངེས་གནས་ཏེ། །རྒྱུན་ལྔར་རྣམ་པར་འབྱུང་བ་ནི། །རླུང་ལྔ་དང་ནི་ལྡན་པ་རུ། །འདོད་པ་ལྔ་རྣམས་སྤྱོད་པར་བྱེད། །ཅེས་བཤད་རྒྱུད་རྡོ་རྗེ་ཕྲེང་བ་ལས་བཤད་པ་ཁུངས་སུ་དྲངས་སོ། །དེ་བཞིན་དུ་ཕྱི་རོལ་གྱིས་ཁམས་ཀྱང་རིགས་ལྔར་བསྒོམས་
ཏེ།  རི་རབ་ནི་རྣམ་སྣང་།  ལུས་འཕགས་པོ་མི་བསྐྱོད་པ།  འཛམ་གླིང་རིན་འབྱུང་།  བ་ལང་སྤྱོད་སྣང་མཐའ།  སྒྲ་མི་སྙན་དོན་གྲུབ་ཏུ་བསམ་མོ། །ཆུ་མཱ་མ་ཀཱིར་བསམས་ཏེ།  དེ་ཡང་བད་ཀན་དང་མཆི་མ་ནི་མཱ་མ་ཀཱིའི་རྣམ་སྣང་།  གཅིན་མི་
བསྐྱོད་པ།  རྔུལ་རིན་འབྱུང་།  ཁྲག་སྣང་མཐའ།  ཁ་ཆུ་དོན་གྲུབ་ཏུ་བསམ་མོ། །དེ་བཞིན་དུ་ཕྱི་རོལ་གྱི་ཆུ་ཁམས་ལ།  རྒྱ་མཚོའི་ཆུ་མི་བསྐྱོད་པ།  ཆུ་བོའི་ཆུ་རིན་འབྱུང་།  བཀོད་མའི་ཆུ་སྣང་མཐའ།  ལྟེང་ཀའི་ཆུ་དོན་གྲུབ།  འབབ་ཆུའི་
10-13-15a


ཆུ་རྣམ་སྣང་དུ་བསམ་མོ། །མེ་གོས་དཀར་མོ་ལ།  མགོ་བོའི་དྲོད་གོས་དཀར་མོའི་རྣམ་སྣང་།  སྙིང་གའི་དྲོད་མི་བསྐྱོད་པ།  ལྟེ་བའི་དྲོད་རིན་འབྱུང་།  རྐང་ལག་གི་དྲོད་སྣང་མཐའ།  ལྟོ་བའི་དྲོད་དོན་གྲུབ་རྣམས་སུ་
བསྒོམ་ཞིང་།  ཕྱི་རོལ་གྱི་མེ་ཁམས་ཡང་རྒྱུན་བཞག་གི་མེ་མི་བསྐྱོད་པ།  རྡོ་ལས་བྱུང་བའི་མེ་རྣམ་སྣང་།  མེ་ཤེལ་གྱི་མེ་རིན་འབྱུང་།  ཤིང་གི་མེ་སྣང་མཐའ།  ནགས་ཀྱི་མེ་དོན་གྲུབ་དུ་བསམ་མོ། །རླུང་ཁམས་སྒྲོལ་མར་བསམས་ཏེ། 
དེ་ཡང་སྲོག་རླུང་སྒྲོལ་མའི་མི་བསྐྱོད་པ།  ཐུར་སེལ་རིན་འབྱུང་།  གྱེན་རྒྱུ་སྣང་མཐའ།  མཉམ་གནས་དོན་གྲུབ།  ཁྱབ་བྱེད་རྣམ་སྣང་དུ་བསམས་ཤིང་།  ཕྱིའི་ལ་ཤར་གྱི་རླུང་མི་བསྐྱོད་པ།  ལྷོའི་རླུང་རིན་འབྱུང་།  ནུབ་རླུང་
སྣང་མཐའ།  བྱང་རླུང་དོན་གྲུབ།  སྟེང་གི་རླུང་རྣམ་སྣང་དུ་བསམ་མོ། །མིག་སའི་སྙིང་པོར་བསམས་ཏེ།  དེ་ཡང་མིག་གི་དབང་པོ་ནི་ས་སྙིང་གི་མི་བསྐྱོད་པ།  མིག་འབྲས་དཀར་པོ་རིན་འབྱུང་།  ཟུར་གྱིས་བལྟ་བ་སྣང་མཐའ།  རྣམ་པར་གཡོ་བའི་མིག་དོན་
གྲུབ།  གཟུགས་གསུམ་འཛིན་པ་རྣམ་སྣང་དུ་བསམ་མོ། །རྣ་བ་ཕྱག་རྡོར་དུ་བསྒོམས་ཏེ།  དེ་ལ་རྣ་བའི་དབང་པོ་ནི་ཕྱག་རྡོར་གྱི་མི་བསྐྱོད་པ།  རྣ་བའི་རང་བཞིན་རྣམ་སྣང་།  རྣ་བའི་བུ་ག་སྣང་མཐའ།  རྣ་བའི་རྩ་བ་དོན་གྲུབ།  སྒྲ་གསུམ་འཛིན་
པ་རིན་འབྱུང་དུ་བསྒོམ་མོ། །སྣ་ནམ་མཁའི་སྙིང་པོར་བསྒོམས་ཏེ།  དེ་ལ་སྣའི་དབང་པོ་ནི་ནམ་སྙིང་གི་མི་བསྐྱོད་པ།  སྣའི་རང་བཞིན་རྣམ་སྣང་།  སྣའི་ནང་གི་དབུས་རིན་འབྱུང་།  སྣའི་བུ་ག་དོན་གྲུབ།  དྲི་གསུམ་འཛིན་པ་སྣང་མཐར་
10-13-15b


བསྒོམ་མོ། །ལྕེ་འཇིག་རྟེན་དབང་ཕྱུག་ཏུ་བསྒོམས་ཏེ།  དེ་ལ་ལྕེའི་དབང་པོ་འཇིག་རྟེན་དབང་ཕྱུག་གི་མི་བསྐྱོད་པ།  ལྕེའི་རང་བཞིན་རྣམ་སྣང་།  ལྕེའི་རྩ་བ་རིན་འབྱུང་།  ལྕེའི་རྩེ་མོ་སྣང་མཐའ།  རོ་གསུམ་འཛིན་པ་དོན་གྲུབ་ཏུ་བསྒོམ་མོ། །ལུས་
སྒྲིབ་སེལ་དུ་བསྒོམས་ཏེ།  དེ་ལ་རྡུལ་ཕྲན་འདུས་པའི་གཟུགས་ཀྱི་ལུས་དབང་ནི་སྒྲིབ་སེལ་གྱི་རྣམ་སྣང་།  རུས་པའི་རང་བཞིན་རིན་འབྱུང་།  ཤའི་རང་བཞིན་སྣང་མཐའ།  པགས་པའི་རང་བཞིན་དོན་གྲུབ།  རེག་གསུམ་འཛིན་པ་མི་བསྐྱོད་པར་
བསྒོམ་མོ། །ཡིད་ཀྱི་དབང་པོ་སྟེ།  ནང་གི་རྣམ་ཤེས་གསུམ་ནི་འཇམ་དཔལ་དུ་བསམ།  ལྡང་ཞིང་རྒྱུ་བའི་རླུང་མིག་ལ་བརྟེན་ནས་གཟུགས་ལྔའི་བྱ་བ་རྫོགས་པར་བྱེད་པ་ཉིད་གཟུགས་རྡོ་རྗེ་མར་བསྒོམས་ཏེ།  དེ་ལ་རྐྱེན་གསུམ་འཚོགས་པས་མཐོང་
བའི་ཡུལ་གྱི་གཟུགས་ནི་གཟུགས་རྡོ་རྗེ་མའི་རྣམ་སྣང་།  འགྱིང་བག་དང་རྣམ་པར་རོལ་པ་ལ་བཏེག་པའི་གཟུགས་མི་བསྐྱོད་པ།  ཆགས་པའི་གཟུགས་རིན་འབྱུང་།  བཏང་སྙོམས་ཀྱི་གཟུགས་སྣང་མཐའ།  ལས་ཐམས་ཅད་སྒྲུབ་པའི་གཟུགས་དོན་གྲུབ་ཏུ་
བསམ་མོ། །རྣམ་པར་རྒྱུ་བའི་སྒྲའི་རང་བཞིན་སྒྲ་རྡོ་རྗེ་མར་བསྒོམས་ཏེ།  དེ་ལ་རྣ་བའི་ནང་གི་དང་།  མགོ་བོ་དང་།  སྒྲའི་སྒྲ་ནི་སྒྲ་རྡོ་རྗེ་མའི་རྣམ་སྣང་།  གླུ་དང་རྒྱུན་གྱི་སྒྲ་ནི་རིན་འབྱུང་།  རྐན་དང་མཆུ་དང་།  ངག་གི་སྒྲ་ནི་སྣང་མཐའ།  ནགས་
ཚལ་དང་།  ཆུ་བོ་དང་།  སེ་གོལ་དང་།  ཐལ་མོ་དང་།  རོལ་མོའི་སྒྲ་རྣམས་ནི་དོན་གྲུབ།  ཧཱུྃ་གི་ཞི་དྲག་གི་སྒྲ་ནི་མི་བསྐྱོད་པར་བསམ་མོ། །ཡང་དག་པར་རྒྱུ་བའི་རླུང་དྲིའི་རང་བཞིན་དྲི་རྡོ་རྗེ་མར་བསྒོམས་ཏེ།  དེ་ལ་དྲི་མ་ལུས་པ་ནི་དྲི་རྡོ་རྗེ་མའི་རྣམ་སྣང་།  
10-13-16a


ཡན་ལག་གི་དྲི་རིན་འབྱུང་།  དྲི་གསུམ་འཛིན་པ་སྣང་མཐའ།  རོའི་དྲི་དོན་གྲུབ།  དྲི་མི་ཟད་པ་མི་བསྐྱོད་པར་བསྒོམ་མོ། །རབ་ཏུ་རྒྱུ་བའི་རླུང་རོའི་རང་བཞིན་རོ་རྡོ་རྗེ་མར་བསྒོམས་ཏེ།  དེ་ལ་རོ་མངར་བ་རོ་རྡོ་རྗེ་མའི་རྣམ་
སྣང་།  བསྐ་བ་རིན་འབྱུང་།  ལན་ཚྭ་སྣང་མཐའ།  ཁ་བ་མི་བསྐྱོད་པ།  རོ་ཚ་སྐྱུར་སོགས་རོ་དྲུག་གི་བྱེ་བྲག་རྣམས་དོན་གྲུབ་ཏུ་བསྒོམ་མོ། །ངེས་པར་རྒྱུ་བའི་རླུང་རེག་བྱའི་རང་བཞིན་རེག་རྡོ་རྗེ་མར་བསྒོམས་ཏེ།  དེ་ལ་སྟན་གཅིག་ལ་གནས་པའི་
རེག་བྱ་ནི་རེག་རྡོ་རྗེ་མའི་རྣམ་སྣང་།  འཁྱུད་པའི་རེག་བྱ་རིན་འབྱུང་།  འོ་བྱེད་པའི་རེག་བྱ་སྣང་མཐའ།  རྔུབ་པའི་རེག་བྱ་དོན་གྲུབ།  དབང་པོ་གཉིས་སྦྱོར་གྱི་རེག་བྱ་མི་བསྐྱོད་པར་བསྒོམ་མོ། །ཡེ༷་ཤེས༷་ལྔ་ནི་ཐམས་ཅད་ཀྱི་དབྱེ་གཞི་མི་བསྐྱོད་
པ་ལ་སོགས་པའི་སངས་རྒྱས་ལྔ་སྟེ་རིགས་བརྒྱ་ཡིན་ལ།  ཇི་ལྟར་དུ་བསྒོམ་པའི་ཚུལ་ཡང་བསྐྱེད་རིམ་ལྟར་ལྷར་བསྐྱེད་ནས་བསྒོམ་པ་མ་ཡིན་གྱི།  སྨན་པ་མཁས་པ་ནགས་སུ་ཞུགས་པས་ཅི་མཐོང་སྨན་དུ་ཤེས་པ་ལྟར།  གང་སྣང་སངས་རྒྱས་ཀྱི་
རང་བཞིན་དུ་ཤེས་པར་བྱས་ནས་བསྒོམ་མོ་ཞེས་གསུང་ཡང་།  བསྐྱེད་རིམ་ལྟར་མངོན་བྱང་ལྔ་ལ་སོགས་པ་ལས་ལྷར་བསྐྱེད་ནས་མི་བསྒོམ་པ་ཡིན་གྱི།  སྐད་ཅིག་གིས་བསྐྱེད་ནས་ཞལ་ཕྱག་གི་རྣམ་པར་ཤར་བ་ངེས་པར་དགོས་སོ། །གཉིས་པ་འབྲིང་
པོར་རིགས་ལྔར་བསྒོམ་པ་ནི།  དེ་རྣམས་ཐམས་ཅད་བསྡུ་ན་ནི།  འབྱུང་བཞི་རྣམ་ཤེས་དང་ལྔར་འདུ་བའི་ཕྱིར།  རྣམ་སྣང་དུ་བསྒོམ་རྒྱུ་ཉི་ཤུ་སའི་ཁམས།  རིན་པོ་ཆེའི་རིགས་ཉི་ཤུ་མེའི་ཁམས།  པདྨའི་རིགས་ཉི་ཤུ་ཆུའི་ཁམས།  ལས་ཀྱི་
10-13-16b


རིགས་ཉི་ཤུ་རླུང་གི་ཁམས།  རྡོ་རྗེའི་རིགས་ཉི་ཤུ་རྣམ་ཤེས་ཀྱི་ཁམས་ཏེ།  གསང་བའམ་དེ་ཁོ་ན་ཉིད་ལྔ་སངས་རྒྱས་ལྔའི་བདག་ཉིད་དུ་བསྒོམ་མོ། །གསུམ་པ་བསྡུས་པ་རིགས་གསུམ་དུ་བསྒོམ་པ་ནི།  དེ་ཡང་བསྡུ་ན་རྣམ་སྣང་དང་རིན་འབྱུང་གཉིས་
སྐུ་རྡོ་རྗེ།  སྣང་མཐའ་དང་དོན་གྲུབ་གཉིས་གསུང་རྡོ་རྗེ།  མི་བསྐྱོད་པ་དང་དྲུག་པ་རྡོ་རྗེ་འཆང་གཉིས་ཐུགས་རྡོ་རྗེ་སྟེ།  དེ་གསུམ་རང་གི་ལུས་ངག་ཡིད་གསུམ་དུ་འདུས་པར་མོས་པར་བྱས་ལ་བསྒོམ་མོ། །ཉམས་སུ་བླང་བའི་ཚུལ་ནི།  བསམ་གཏན་གྱི་ཁང་པར་
འབོལ་བའི་སྟན་ལ་རྐང་པ་རྡོ་རྗེའི་སྐྱིལ་ཀྲུང་བཅས།  ལག་པ་མཉམ་གཞག །སྒལ་ཚིགས་དྲང་པོར་བསྲང་།  མིག་ཐད་ཀར་འབྱེད་འཛུམས་མེད་པ།  སོ་དང་མཆུ་མཉམ་པར་བྱ་བ་སྟེ།  ལུས་གནད་དེ་ལྟ་བུ་ལ་གནས་པས་དམིགས་པ་དང་པོ།  
རང་ཉིད་རྡོ་རྗེ་གསུམ་དབྱེར་མི་ཕྱེད་པའི་མཚན་ཉིད་རང་གི་སེམས་རང་བཞིན་གྱིས་དག་པའི་བདག་ཉིད་དུ་མོས་པ་བརྟན་པོས་རྡོ་རྗེ་གསུམ་གྱི་ངོ་བོ་གསང་ཆེན་རིགས་གཅིག་པ་རྡོ་རྗེ་འཆང་ཆེན་པོ་ཞལ་ཕྱག་གི་རྣམ་པ་ཅན་དུ་སྐད་ཅིག་གིས་གསལ་བཏབ་ལ་
ཡིད་རྩེ་གཅིག་ཏུ་མཉམ་པར་གཞག་པས།  སྔར་བསྐྱེད་རིམ་གོམས་པའི་སྟོབས་ཀྱིས་རང་ཉིད་ལྷ་སྐུར་གསལ་བར་འགྱུར་རོ། །གལ་ཏེ་རྣམ་པ་མི་གསལ་ན།  རྡོ་རྗེ་འཆང་ཆེན་པོའི་ཙ་ཀ་ལིའམ་ཐང་སྐུ་རང་གི་མདུན་དུ་བཞག་ལ།  དེ་ལ་བལྟས་ཤིང་
གསལ་བཏབ་ལ་བརྟན་པར་གྱུར་གྱི་བར་དུ་བསྒོམ་མོ། །དེ་ལ་བརྟན་ནས་སྔར་བཤད་པ་བཞིན་རིགས་གསུམ་གྱི་བདག་ཉིད་དུ་བསྒོམ།  དེ་ལ་བརྟན་ནས་རིགས་ལྔར་བསྒོམ།  དེ་ལ་བརྟན་ནས་རིགས་བརྒྱར་བསྒོམ།  དེ་རྣམས་ལ་བརྟན་ནས་ཁམས་
10-13-17a


གསུམ་པོ་ཐམས་ཅད་རྡོ་རྗེ་འཆང་ཆེན་པོའི་རང་བཞིན་དུ་བསྒོམ་མོ། །དྲུག་པ་མཐར་ཕྱིན་པའི་ཚད་ནི།  མཉམ་རྗེས་གཉིས་ཀ་ལ་ཁམས་གསུམ་ཐམས་ཅད་རྡོ་རྗེ་འཆང་ཆེན་པོའི་གསང་ཆེན་རིགས་གཅིག་ཏུ་ང་རྒྱལ་བརྟན་
པར་འགྱུར་བའོ། །བདུན་པ་ཕན་ཡོན་ནི།  ཐ་མལ་གྱི་རྣམ་རྟོག་ཕྲ་བ་སྤང་བ་དང་།  ངག་དབེན་བསྒོམ་པ་ལ་ཕྱོགས་པར་འགྱུར་བ་དང་།  འབྲས་བུའི་དུས་སུ་གཟུགས་ཀྱི་སྐུ་ཐོབ་པར་འགྱུར་བ་ལ་སོགས་པའོ།  ༈ །གཉིས་པ་དངོས་
གཞི་ངག་རྣམ་པར་དབེན་པ་ལ་དྲུག་སྟེ།  དང་པོ་རྟེན་གྱི་གང་ཟག་ནི།  ལུས་དབེན་སྐུ་རྡོ་རྗེའི་ཏིང་ངེ་འཛིན་མཐར་ཕྱིན་ནས།  ངག་དབེན་བསྒོམ་པ་ལ་འདོད་པ་ཡོད་པའོ། །གཉིས་པ་ཤེས་བྱ་ནི།  སྒྲའི་དེ་ཉིད་ནམ་མཁའ་དང་མཉམ་པ་དང་།  རླུང་
གི་དེ་ཉིད་འཇུག་གནས་ལྡང་གསུམ་དང་།  སྔགས་ཀྱི་དེ་ཉིད་ཡི་གེ་འབྲུ་གསུམ་དབྱེར་མེད་དུ་གཞི་དུས་ན་གནས་པ་ལྟར་ཤེས་པར་བྱ་བ་སྟེ།  དེ་ལ་རླུང་གི་གཙོ་བོ་ལྔ་སྟེ།  སྲོག་རླུང་སྙིང་ག་ན།  ཐུར་སེལ་འདོམས་ན།  གྱེན་རྒྱུ་ལྐོག་མ་ན།  མེ་དང་མཉམ་
དུ་གནས་པ་ལྟེ་བ་ན།  ཁྱབ་བྱེད་ཚིགས་ཐམས་ཅད་ན་གནས་སོ། །དེ་བཞིན་དུ་ཡན་ལག་གི་རླུང་ཡང་ལྔ་སྟེ།  རྒྱུ་བའི་རླུང་མིག་ལ་གནས་ནས་གཟུགས་མཐོང་བའི་བྱ་བ་བྱེད་ལ།  དེ་བཞིན་དུ་རྣམ་པར་རྒྱུ་བ་རྣ་བ་ལ་གནས་ནས་སྒྲ།  ཡང་དག་པར་
རྒྱུ་བ་སྣ་ལ་གནས་ནས་དྲི།  རབ་ཏུ་རྒྱུ་བ་ལྕེ་ལ་གནས་ནས་རོ།  ངེས་པར་རྒྱུ་བ་མཚན་མ་ལ་གནས་ནས་རེག་བྱ་ཐམས་ཅད་རིག་པའི་བྱ་བ་བྱེད་དོ། །རླུང་བཅུ་པོ་འདི་རྣམས་བུད་མེད་ཀྱི་པདྨ་དང་།  སྐྱེས་པའི་རྡོ་རྗེའི་སྣ་ལས་བྱུང་ནས་སྟེང་དུ་སོང་སྟེ།  ཀུན་རྫོབ་ཀྱི་གནས་སོ་སོ་ནས་དཀྱིལ་
10-13-17b


འཁོར་བཞིའི་རླུང་དུ་འགྱུར་ཏེ།  སྣ་གཡོན་ནས་རླུང་གི་དཀྱིལ་འཁོར་མདོག་ལྗང་སེར་དོན་གྲུབ་ཀྱི་ངོ་བོ་དགུ་བརྒྱ་པ་ཕྲག་གཅིག་རྒྱུ།  གཡས་ནས་མེ་རླུང་དམར་པོ་འོད་དཔག་མེད་ཀྱི་རང་བཞིན།  སྣ་གཉིས་ཀ་ནས་ས་རླུང་སེར་པོ་རིན་འབྱུང་གི་རང་
བཞིན།  དལ་ཞིང་རྒྱུ་བ་བུལ་བ་ཆུ་རླུང་དཀར་པོ་མི་བསྐྱོད་པའི་རང་བཞིན་དགུ་བརྒྱ་པ་ཕྲག་གཅིག་རྒྱུའོ། །ཁྱབ་བྱེད་ཀྱི་རླུང་ནི་དཀྱིལ་འཁོར་བཞི་ཆར་ལ་ཁྱབ་པའི་རླུང་སྟེ།  ད་ལྟ་མི་རྒྱུ་ཞིང་འཆི་བའི་དུས་སུ་དགུ་བརྒྱ་པ་ཕྲག་གཅིག་རྒྱུའོ། །དེ་ལྟར་མགོན་
པོ་རེ་རེའི་རླུང་རྒྱུ་བ་ན།  ལྷ་མོའི་རླུང་ཉིས་བརྒྱ་ཉི་ཤུ་རྩ་ལྔ་རྒྱུ་ཞིང་།  དཀྱིལ་འཁོར་རེ་རེ་ཡང་འཇུག་གནས་ལྡང་གསུམ་དུ་ཡོད་ལ།  ཡི་གེ་གསུམ་གྱི་སྐད་གདངས་སུ་གནས་པ་ནི་རླུང་གི་དེ་ཁོ་ན་ཉིད་དོ། །ཨཱ་ལི་ཀཱ་ལི་ལས་བྱུང་བའི་སྔགས་
རྣམས་ཀྱི་དེ་ཁོ་ན་ཉིད་མི་ཤིགས་པ་ལས་བྱུང་བའི་ཡི་གེ་གསུམ་ནི་སྔགས་ཀྱི་དེ་ཁོ་ན་ཉིད་དོ། །སྔགས་ཀྱི་སྒྲ་ཐམས་ཅད་ཨའི་རིགས་སུ་གྱུར་པ་དང་།  ཨ་རྒྱུར་གྱུར་པ་དང་།  ཨ་ལས་ངེས་པར་བྱུང་བ་སྟེ།  ངག་ཐམས་ཅད་སྟོང་པ་ཉིད་ལས་
བྱུང་ཞིང་།  སྟོང་པ་ཉིད་ལ་ཐིམ་པ་ནམ་མཁའ་དང་མཉམ་པར་ཤེས་པར་བྱ་བ་ནི་སྒྲའི་དེ་ཁོ་ན་ཉིད་དོ། །གསུམ་པ་སྤང་བྱ་ནི་ཕྱི་རོལ་གྱི་ངག་གི་བཟླས་པ་དང་།  ཐ་མལ་པའི་དུས་ཀྱི་ངག་དང་རླུང་གི་རྒྱུ་བ་དང་།  རླུང་སྔགས་ཡི་གེ་ཐ་དད་དུ་
བཟླས་པ་རྣམས་སོ། །བཞི་པ་གཉེན་པོ་ཉམས་ལེན་གྱི་རིམ་པ་ལ་གསུམ་སྟེ།  རང་བཞིན་གྱི་རླུང་ལ་བསླབ་པ།  ཐབས་མགོན་པོ་བཞིའི་རླུང་ལ་བསླབ་པ།  ཤེས་རབ་ལྷ་མོ་རྣམས་ཀྱི་རླུང་ལ་བསླབ་པའོ།  དང་པོ་ནི།  སྔར་གྱི་བསྒོམས་
10-13-18a


པའི་གནས་སུ་རྐང་པ་སྐྱིལ་ཀྲུང་སོགས་ལུས་གནད་སྔར་བཞིན་བཅའ།  དེ་ནས་རང་རྡོ་རྗེ་འཆང་གི་ང་རྒྱལ་གྱིས་རླུང་སྔགས་སྟོང་པ་དབྱེར་མེད་དུ་ཤེས་པའི་སྒོ་ནས་རླུང་ནང་དུ་འཇུག་པ་ཨོཾ།  ནང་དུ་གནས་པ་ཨཱཿ ཕྱིར་ལྡང་
བ་ཧཱུྃ་གི་སྒྲར་ཤེས་བའི་སྒོ་ནས།  རང་བཞིན་གྱི་རྡོ་རྗེའི་བཟླས་པ་ལ་སྐད་ཅིག་ཀྱང་མ་ཡེངས་པར་ཤེས་པ་གཏད་ལ་བསྒོམ།  དེ་ལྟར་ཐུན་བཞིར་ཞག་བདུན་ཙམ་བསྒོམས་པས་རླུང་གི་ཁ་དོག་དང་།  རྒྱུ་བ་མཐོང་བ་དང་།  རླུང་གཡས་ནས་གཡོན་དུ་འཕོ་
བ་དང་།  མགོན་པོ་བཞིའི་རླུང་གང་རྒྱུ་བ་ངོ་ཤེས་པ་འབྱུང་ངོ་། །གལ་ཏེ་འབད་པ་ཆེན་པོ་བྱས་ཀྱང་རླུང་རྒྱུ་བ་མི་གསལ་ན།  རས་བལ་སོབ་པོས་སྣ་བུག་ཅུང་ཟད་བཀག་ན་རྒྱུ་བ་གསལ་གསུང་།  ཁ་ཟས་བཅུད་ཅན་དང་།  སྤྱོད་ལམ་དལ་བར་བྱའོ། །གཉིས་པ་ནི།  དེ་ལྟར་རང་བཞིན་གྱི་བཟླས་པས་རླུང་གི་
རྒྱུ་ཚུལ་དང་།  ཁ་དོག་ལ་སོགས་པ་ངེས་ནས་ཐབས་ཀྱི་རྒྱུ་བ་ལ་བསླབས་ཏེ།  དེ་ཡང་སྔར་བཞིན་ནང་དུ་འཇུག་པ་ཨོཾ་དང་།  གནས་པ་ཨཱཿདང་།  ཕྱིར་ལྡང་བ་ཧཱུྃ་གི་སྒྲར་ཤེས་པའི་སྒོ་ནས།  གྱེན་རྒྱུ་མེའི་དཀྱིལ་འཁོར་ཁ་དོག་དམར་པོ་པདྨ་མགོན་པོའི་
རང་བཞིན་དུ་སྣ་སྒོ་གཡས་ནས་དགུ་བརྒྱ་པ་ཕྲག་གཅིག་རྒྱུ་བ་ལ་བསླབ།  དེ་ནས་ཐུར་སེལ་རླུང་གི་དཀྱིལ་འཁོར་ནག་པོ་ལས་ཀྱི་མགོན་པོའི་རང་བཞིན་སྣ་སྒོ་གཡོན་པ་ནས་དགུ་བརྒྱ་པ་ཕྲག་གཅིག་རྒྱུ་བ་ལ་བསླབ།  དེ་ནས་མེ་དང་མཉམ་གནས་སའི་
དཀྱིལ་འཁོར་སེར་པོ་རིན་པོ་ཆེའི་མགོན་པོའི་རང་བཞིན་སྣ་སྒོ་གཉིས་ཀ་ནས་དགུ་བརྒྱ་པ་ཕྲག་གཅིག་རྒྱུ་བ་ལ་བསླབ།  དེ་ནས་སྲོག་འཛིན་ཆུའི་དཀྱིལ་འཁོར་དཀར་པོ་རྡོ་རྗེ་མགོན་པོའི་རང་བཞིན་དལ་ཞིང་མི་གསལ་བ་དགུ་བརྒྱ་པ་
10-13-18b


ཕྲག་གཅིག་ལ་བསླབ་པས་རང་རང་གི་དཀྱིལ་འཁོར་ཁ་དོག་དང་ཚད་དང་རྣམ་པ་ངེས་པར་འགྱུར་བས་དེ་མ་བྱུང་གི་བར་དུ་བསྒོམ་མོ། །གསུམ་པ་ནི།  དེ་ལྟར་ཐབས་ཀྱི་རྒྱུ་བ་ལ་བསླབས་པའི་རྗེས་སུ་ཤེས་རབ་ཀྱི་རྒྱུ་བ་ལ་བསླབ་པ་སྟེ།  དེ་ཡང་ཐབས་མགོན་
པོ་རེ་རེ་རྒྱུ་བ་ན་ཤེས་རབ་ལྷ་མོ་བཞི་བཞི་རྒྱུ་བ་ཡིན་ཏེ།  སྔར་གྱི་གཡས་པ་ནས་མེའི་དཀྱིལ་འཁོར་པདྨ་མགོན་པོའི་རླུང་དམར་པོ་དགུ་བརྒྱ་པ་ཕྲག་གཅིག་རྒྱུ་བའི་སྤྱི་དེ་ལ།  བྱེ་བྲག་ཏུ་ཕྱེས་ན་བཞིར་འགྱུར་ཏེ།  དང་པོ་གོས་དཀར་མོ་མེའི་མེ་ཁ་དོག་དམར་པོའི་
དམར་པོ་ཉིས་བརྒྱ་ཉི་ཤུ་རྩ་ལྔ་སྟེང་དུ་རྒྱུའོ། །དེའི་ཚེ་རླུང་དམར་པོའི་དམར་པོ་གྱེན་དུ་ཕྲ་མོར་རྒྱུ་བ་དེ་ཉིད་ལ་ཤེས་པ་གཏད་ལ།  ནང་དུ་འཇུག་པ་ཨོཾ།  གནས་པ་ཨཱཿ ཕྱིར་འགྲོ་བ་ཧཱུྃ་གི་སྒྲར་ཤེས་པར་བྱས་ལ།  སྔར་བཞིན་དུ་བཟླ།  དེ་ནས་
སྒྲོལ་མ་མེའི་རླུང་ཁ་དོག་དམར་པོའི་ནག་པོ་ཉིས་བརྒྱ་ཉི་ཤུ་རྩ་ལྔ་གསེག་ལ་རྒྱུ་བ་ལ་བསླབ།  དེ་ནས་སྤྱན་མ་མེའི་ས་ཁ་དོག་དམར་པོའི་སེར་པོ་ཉིས་བརྒྱ་ཉི་ཤུ་རྩ་ལྔ་ཐད་ཀར་རྒྱུ་བ་ལ་བསླབ།  དེ་ནས་མཱ་མ་ཀཱི་མེའི་ཆུ་དམར་པོའི་དཀར་པོ་ཉིས་བརྒྱ་ཉི་ཤུ་རྩ་ལྔ་
འོག་ཏུ་རྒྱུ་བ་ལ་བསླབ།  དེ་བཞིན་དུ་དཀྱིལ་འཁོར་གཞན་གསུམ་པོ་ལ་ཡང་ཤེས་རབ་ཀྱི་རྒྱུ་བ་ཉིས་བརྒྱ་ཉི་ཤུ་རྩ་ལྔ་སྔར་ཤེས་པར་བྱས་ལ་བསླབ།  དེ་ལྟར་ཕྱོགས་བཞིའི་དབང་གིས་རླུང་ཉིས་བརྒྱ་ཉི་ཤུ་རྩ་ལྔ་པ་ཚན་པ་བཞི་སོང་བ་ནས།  ཐམས་
ཅད་བསྡོམས་པས་རླུང་དགུ་བརྒྱ་པ་ཕྲག་གཅིག་ཏུ་འགྱུར་རོ། །དེ་ལྟར་བསྒོམས་པས་ལྷ་མོ་རྣམས་ཀྱི་རླུང་རྒྱུ་ཚུལ་དང་།  ཚད་ལ་སོགས་པ་མཐོང་བ་དང་།  འབྱུང་འཇུག་གཉིས་ཆ་ཕྲི་ནས་རླུང་གནོད་པ་མེད་པར་ནང་དུ་སྡོམ་ནུས་པ་སྟེ།  དེ་ཡང་
10-13-19a


རླུང་གི་རླུང་རྒྱུ་བའི་དུས་སུ་ཕྱི་རོལ་དུ་རྒྱུ་བ་བཀག་ནས་ནང་དུ་བསྡམས་ན་ནམ་མཁའ་ལ་འཕུར་བ་དང་།  དེ་བཞིན་དུ་མེ་རླུང་རྒྱུ་བའི་དུས་སུ་ཕྱིར་འགྲོ་བ་བཀག་ན་ཕྱི་རོལ་གྱི་རླུང་ལ་སོགས་པས་གྲང་བའི་གནོད་པ་མི་འབྱུང་བ་དང་།  ས་
རླུང་རྒྱུ་བའི་དུས་སུ་ཕྱིར་འགྲོ་བ་བཀག་ན་གྱང་ལ་སོགས་པས་བསྒུལ་མི་ནུས་པ་དང་།  ཆུ་རླུང་རྒྱུ་བའི་དུས་སུ་ཕྱིར་འགྲོ་བ་བཀག་ནས་ནང་དུ་བསྡམས་ན་མེ་ལ་སོགས་པས་ཚིག་པར་མི་འགྱུར་རོ། །ལྔ་པ་མཐར་ཕྱིན་པའི་ཚད་ནི་རྡོ་རྗེའི་བཟླས་པ་གོམས་པས་
རང་གི་ཁམས་ཆ་མཉམ་པ་དང་།  རེག་པ་བདེ་བ་དང་།  རླུང་གཡས་གཡོན་སྤོ་ནུས་པ་དང་།  ཕྱི་ནང་གི་རླུང་བསྲེ་ནུས་པ་ལ་སོགས་པ་རླུང་ལས་རྣམ་པར་རྒྱལ་བའི་ཡོན་ཏན་རྣམས་ཐོབ་པ་ཡིན་ནོ། །དྲུག་པ་ཕན་ཡོན་ནི།  རླུང་གི་རྣལ་འབྱོར་མཐར་ཕྱིན་
པས་འབྲས་བུའི་དུས་སུ་དེ་བཞིན་གཤེགས་པའི་གསུང་རྣམ་པར་དག་པ་འགྲུབ་པ་དང་འཇིག་རྟེན་གྱི་ཆོས་བརྒྱད་ཟིལ་གྱིས་གནོན་པར་འགྱུར་བ་དང་།  རླུང་དབང་དུ་འདུས་པས་སེམས་དབེན་གྱི་ཡེ་ཤེས་སྐྱེ་བར་འགྱུར་བ་དང་།  ཟུང་འཇུག་གི་སྐབས་སུ་ཞི་བ་
ལ་སོགས་པའི་ལས་ཐམས་ཅད་འགྲུབ་པར་འགྱུར་བ་ཡིན་ནོ། །གཉིས་པ་སེམས་རྣམ་པར་དབེན་པ་ལ་ལྔ་ལས་བསྒོམ་པའི་གང་ཟག་ནི།  ངག་དབེན་མཐར་ཕྱིན་པས་རླུང་ནང་དུ་སྡོམ་ནུས་པའོ། །གཉིས་པ་ཤེས་བྱ་ནི་ཆོས་ཐམས་ཅད་རང་རིག་པ་བདེ་བ་
ཆེན་པོའི་རྣམ་པ་ཡིན་ལ།  སེམས་དེ་ཡང་སྟོང་པ་ཉིད་ལས་བྱུང་ཞིང་སྟོང་པ་ཉིད་དུ་ཐིམ་པར་འགྱུར་བས་ན་ནམ་མཁའ་དང་འདྲ་བར་ཤེས་པར་བྱའོ། །གསུམ་པ་སྤང་བྱ་ནི་གཟུང་འཛིན་གྱི་རྣམ་རྟོག་གིས་བསྡུས་པའི་རང་བཞིན་བརྒྱད་ཅུའོ། །བཞི་པ་སོ་སོའི་
10-13-19b


མཚན་ཉིད་ལ་གཉིས་ཏེ།  གཞི་ཆོས་ཅན་གཏན་ལ་དབབ་པ་ཤེས་བྱ་ཡེ་ཤེས་ཀྱི་མཚན་ཉིད་བསྟན་པ་དང་།  སེམས་ཀྱི་དེ་ཉིད་མངོན་དུ་བྱ་བའི་ཕྱིར་རྣལ་འབྱོར་པས་ཉམས་སུ་མྱོང་བའི་སེམས་ལ་དམིགས་པའི་ཡེ་ཤེས་གཉིས་སུ་འདུ།  ཕྱི་མ་འདི་ལ་དབྱེ་ན་གཉིས་
ཏེ།  སེམས་ཀྱི་ཆོས་ཅན་ཀུན་རྫོབ་རིག་པའི་ཡེ་ཤེས་དང་།  སེམས་ཀྱི་ཆོས་ཉིད་དོན་དམ་པའི་བདེན་པ་རིག་པའི་ཡེ་ཤེས་སོ། །དང་པོ་ནི།  ཆོས་ཐམས་ཅད་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བར་རིག་པའི་དཔེའི་རྣམ་པ་ཉམས་སུ་མྱོང་
བ་སྟེ།  ཀུན་རྫོབ་ཀྱི་བདེན་པའི་སྔོན་དུ་འགྲོ་བའོ། །སེམས་ཀྱི་ཆོས་ཉིད་དོན་དམ་པའི་བདེན་པ་རིག་པའི་ཡེ་ཤེས་ནི།  ཐམས་ཅད་སྟོང་པ་འོད་གསལ་བ་སྤྲིན་མེད་པའི་ནམ་མཁའ་ལྟ་བུའི་སེམས་དང་།  ལྷའི་སྐུར་མངོན་པར་ཞེན་པ་སྤངས་པ་སྤྲོས་
པའི་མཐའ་ཐམས་ཅད་དང་བྲལ་བ་སྟེ་འོད་གསལ་གྱི་སྐབས་སུ་ཤེས་པར་བྱའོ། །འདིར་ཀུན་རྫོབ་པའི་རང་རིག་པའི་ཡེ་ཤེས་དེ་རྟོགས་དགོས་ཏེ།  དེ་ཡང་རང་རིག་པའི་བདེ་བ་རབ་འབྲིང་གསུམ་སྟེ།  ཐོག་མར་གཟུང་བ་དང་འཛིན་པའི་རྣམ་རྟོག་གིས་
སྟོང་ཞིང་བདེ་བའི་རྣམ་པར་སྐྱེས་པ་ནི་སྣང་པའི་ཡེ་ཤེས་སོ། །གཟུང་འཛིན་གྱི་རྟོག་པ་ཆེས་སྟོང་ཞིང་ཀུན་དུ་བདེ་བའི་རྣམ་པ་སྐད་ཅིག་མ་ནི་སྣང་བ་མཆེད་པའི་ཡེ་ཤེས་སོ། །དེ་བས་
ཀྱང་གཟུང་འཛིན་གྱི་རྣམ་རྟོག་ཆེས་སྟོང་ཞིང་བདེ་བ་ཆེན་པོའི་རྣམ་པ་ཉམས་སུ་མྱོང་བ་ནི་སྣང་བ་ཉེ་བར་ཐོབ་པའི་ཡེ་ཤེས་སོ། །དེ་དག་སྒྲུབ་པའི་རིམ་པ་བསྒོམ་པ་ལ་གཉིས་ཏེ།  ཕྱག་
10-13-20a


རྒྱ་ལ་མི་ལྟོས་པ་སྟེང་སྒོ་ལ་བརྟེན་པའི་ཐབས་དང་།  ལྟོས་པ་འོག་སྒོ་ལ་བརྟེན་པའི་ཐབས་སོ། །དང་པོ་ནི།  བསམ་གཏན་གྱི་ཁང་པར་ཐུན་བཞིའི་ངེས་པས་ལུས་གནད་བདེ་བར་བཅས་ལ།  རང་རྡོ་རྗེ་འཆང་གི་ང་རྒྱལ་ལ་གནས་
པས་འདི་ལྟར་བསམས་ཏེ།  རང་གི་སྙིང་གར་ཟླ་བའི་དཀྱིལ་འཁོར།  དེའི་སྟེང་དུ་པདྨ་དམར་པོ་འདབ་མ་བརྒྱད་པ།  དེའི་སྟེང་དུ་ཡི་གེ་ཨོཾ་དཀར་པོ་གཅིག་བསམས་ལ།  ཡིད་རྩེ་གཅིག་ཏུ་མཉམ་པར་བཞག་གོ།  དེ་ལ་ཨོཾ་ནི་ཤེས་རབ་ཀྱི་རང་
བཞིན།  དེ་ལ་དམིགས་པའི་སེམས་རིག་པ་གསལ་བ་ནི་ཐབས་ཏེ།  དེ་ལྟ་བུའི་ཐབས་ཤེས་ཀྱི་སྙོམས་འཇུག་དང་།  རླུང་ནང་དུ་གནས་པའི་སྟོབས་ཀྱིས་ཨོཾ་ལས་འོད་དཀར་ལ་བསིལ་བ་བྱུང་།  ཨ་བ་དྷཱུ་ཏཱིར་ཞུགས།  སྤྱི་བོའི་ཧཾ་ལ་ཕོག་པས་དེ་ལས་
བྱང་ཆུབ་ཀྱི་སེམས་དཀར་ནར་གྱིས་བྱུང་སྟེ།  སྙིང་གའི་ཨོཾ་ལ་ཕོག་པ་དང་།  ཨོཾ་ཤེས་པའི་ངོ་བོ་དེ་གསལ་ཞིང་བདེ་བ་གཟུང་འཛིན་གྱིས་སྟོང་པ་རིག་པ་གསལ་བའི་ངོ་བོར་བསྒོམ་མོ། །དེ་ཡང་ཅི་ཙམ་གནས་ཚད་དུ་བསྒོམས་ལ་སྐྱོ་ན་འཕྲོ་
བཅད།  དེ་ལྟར་ཐུན་གསུམ་མམ་བཞི་ལ་སོགས་པ་བཅད་ཅིང་བསྒོམས་པས་འབད་རྩོལ་ལ་མི་ལྟོས་པར་དྲན་པ་ཙམ་གྱིས་བདེ་བ་སྐྱེ་ཞིང་ཇི་ཙམ་འདོད་པར་བཟུང་ནུས་པ་ནི་སྣང་བའི་ཡེ་ཤེས་བསྒོམ་པའོ། །དེ་ནས་སྔར་གྱི་ཟླ་བའི་དཀྱིལ་འཁོར་དེ་ཉི་མར་
བསྒྱུར།  པདྨ་རྡོ་རྗེ་རྩེ་ལྔ་པར་བསྒྱུར་ལ།  ཉི་མ་རྐྱང་པའི་སྟེང་དུ་རྡོ་རྗེ་རྩེ་ལྔ་པ་དམར་པོ།  དེའི་ལྟེ་བར་ཡི་གེ་ཨཱཿཐིག་ལེ་གཉིས་ཀྱིས་གློ་བརྒྱན་པར་བསམ།  དེ་ཡང་དམིགས་རྟེན་ཤེས་རབ་ཀྱི་རང་བཞིན།  དེ་ལ་དམིགས་པའི་རིག་པ་གསལ་བ་ཐབས་ཏེ།  
10-13-20b


དེ་གཉིས་སྙོམས་འཇུག་བྱས་པས་འོད་ཉི་མའི་འོད་ཟེར་ལྟ་བུ་ཚ་ལ་རྣོ་བ་བྱུང་སྟེ།  ཨ་བ་དྷཱུ་ཏཱི་ནས་ཞུགས།  སྤྱི་བོའི་ཧཾ་ལ་ཕོག་པས་བྱང་སེམས་སྔར་བཞིན་བྱུང་།  སྙིང་གའི་ཡི་གེ་དང་རྡོ་རྗེ་ལ་ཐིམ་པས་སྔར་གྱི་ཉམས་ལས་ཆེས་གསལ་བ་ཉི་མའི་དཀྱིལ་འཁོར་ལྟ་བུ་
རིག་པ་གསལ་ཞིང་བདེ་བ་གཟུང་འཛིན་གྱིས་སྟོང་པའི་རང་རིག་པ་གསལ་བར་བསྒོམས་ཏེ།  སྣང་བ་མཆེད་པའི་ཡེ་ཤེས་བསྒོམ་པའོ། །དེ་ནས་སྙིང་གར་དམིགས་རྟེན་གཞན་མེད་པར་ཨ་ཐུང་རྐྱང་པ་བསམ།  དེ་ཡང་ཨ་ཐུང་ཤེས་རབ་ཀྱི་རང་བཞིན།  
དེ་ལ་ཐབས་ཀྱི་རང་བཞིན་དམིགས་པའི་སྙོམས་འཇུག་བྱས་པས་འོད་ཟེར་མི་གསལ་བ་མོག་གེ་བ་ཙམ་སྤྲོས།  དྷཱུ་ཏཱིར་ཞུགས།  སྤྱི་བོའི་ཧཾ་ལ་རེག་དེ་ལས་བྱང་སེམས་བབས་པ་སྙིང་གར་ཨ་ཐུང་ལ་ཐིམ་པས།  སེམས་སྔར་བས་ཆེས་ཆེར་བདེ་ཞིང་། 
རང་རིག་པ་གསལ་བར་བསྒོམས་ཏེ།  ཉེ་བར་ཐོབ་པའི་ཡེ་ཤེས་བསྒོམ་པའོ། །ཐུན་ཚད་ཐུན་གྲངས་སོགས་སྔར་དང་འདྲ་བར་བྱ་ཞིང་ཟླ་བ་གཅིག་ཙམ་གྱི་བར་དུ་བསྒོམས་པས་རང་བཞིན་བརྒྱད་ཅུའི་རྟོག་པ་མངོན་གྱུར་པ་འགགས་ནས།  སེམས་ཀྱི་ཀུན་རྫོབ་པའི་
མཚན་ཉིད་རང་རིག་རང་གསལ་བདེ་བ་ཆེན་པོའི་རྣམ་པར་འཆར་བར་འགྱུར་རོ། །དེ་ནས་ལུགས་བཟློག་ཏུ་བསྒོམ་པར་བྱ་སྟེ།  སྔར་གྱི་ལུགས་འབྱུང་ཚུལ་བཞིན་དུ་བསྒོམས་པའི་རྗེས་ལ།  སྙིང་གའི་ཨ་ཐུང་ལས་གདན་ཉི་མ་ཅིག་སྤྲོས།  དེའི་སྟེང་དུ་རྡོ་རྗེ། 
དེའི་ལྟེ་བ་ལ་ཨཱཿཚེག་དྲག་ཅན་བསམས་ལ།  མཆེད་པའི་ཡེ་ཤེས་སྔར་བཞིན་དུ་བསྒོམ་མོ། །དེ་ནས་ཡང་ཨཱཿཚེག་དྲག་ཅན་དེ་ཨཾ་དུ་བསྒྱུར་ཞིང་།  རྡོ་རྗེ་དེ་པདྨ་དམར་པོར་བསྒྱུར་ལ།  ཉི་མ་ཟླ་བར་བསྒྱུར་ནས་སྣང་བའི་ཡེ་ཤེས་སྔར་བཞིན་དུ་བསྒོམ་མོ། །
10-13-21a


དེ་ལྟར་ལུགས་འབྱུང་དང་ལུགས་བཟློག་སྤེལ་མར་བསྒོམས་པས་མཉམ་གཞག་དང་།  རྗེས་ཐོབ་གཉིས་ཀ་ལ་རྟོགས་པ་ཁྱད་པར་མེད་པར་གྱུར་ན།  སེམས་དབེན་བསྒོམ་པའི་དམིགས་པ་མཐར་ཕྱིན་པའོ། །ཚུལ་འདི་སྤྱོད་པ་
བསྡུས་པའི་སྒྲོན་མེའི་དགོངས་པ་ཅི་ལྟ་བ་བཞིན་དུ་སྣང་ཞིང་།  རབ་ཏུ་བྱུང་བ་ཚངས་སྤྱོད་ཀྱི་རྟེན་ལ་གནས་པ་རྣམས་ཀྱི་འདི་ཁོ་ན་ལྟར་བསྒོམ་པར་བྱ་བ་ཡིན་ནོ། །གལ་ཏེ་ཕྱག་རྒྱ་ལ་བརྟེན་པའི་རྣལ་འབྱོར་པ་ཡིན་ན་འོག་སྒོ་ལ་བརྟེན་ནས་སེམས་བདེ་བ་ཆེན་པོ་
བསྒོམས་ཏེ།  དེ་ཡང་མཚན་ཉིད་དང་ལྡན་པའི་ཕྱག་རྒྱ་དགེ་བ་བཅུ་དང་བྱང་ཆུབ་ཀྱི་སེམས་ཀྱིས་རྒྱུད་སྦྱངས་པ།  སྒྲུབ་པ་པོ་རང་གིས་དབང་བསྐུར་ཞིང་དམ་ཚིག་དང་སྡོམ་པར་ལྡན་པ།  དྲན་པ་གཅིག་པ་དང་།  རྟོགས་པའི་རྣལ་འབྱོར་མཐར་ཕྱིན་པ་སྟེ།  དེ་
ལྟ་བུའི་རིག་མ་དང་གནས་དབེན་པར་འདུག་ལ།  རྡོ་རྗེ་དང་པདྨ་བྱིན་གྱིས་བརླབས་པ་སྔོན་དུ་འགྲོ་བས་སྙོམས་པར་ཞུགས་པས་རྩ་ཕྲན་སྟོང་ཕྲག་བདུན་ཅུ་རྩ་གཉིས་ན་གནས་པའི་བྱང་སེམས་རྣམས་རྩ་སོ་གཉིས་སུ་བབས།  དེ་རྣམས་རྩའི་གཙོ་བོ་གསུམ་དུ་
བབས།  དེ་རྣམས་ཀྱང་ཨ་བ་དྷཱུ་ཏཱིར་བབས་ནས་སྙིང་གའི་གནས་སུ་ཕྱིན་པ་དང་།  དེར་བདེ་བ་བཟུང་ལ་བསྒོམ་མོ། །བཟུང་བའི་ཐབས་ནི་གཞན་མི་དགོས་ཏེ་སྔར་ངག་དབེན་གྱི་སྐབས་སུ།  རླུང་ལས་རྣམ་པར་རྒྱལ་བ་ཐོབ་པས།  ནང་དུ་རླུང་ཟིན་པའི་
སྟོབས་ཀྱིས་ཅི་ཙམ་འདོད་ཚད་དུ་ཟིན་པར་གྱུར་ཏེ།  སྣང་བའི་ཡེ་ཤེས་སྒྲུབ་པའོ། །དེ་ལ་ཅི་ཙམ་འདོད་ཀྱི་བར་དུ་བཟུང་ནུས་ཙམ་ན་སླར་ཡང་།  རྡོ་རྗེ་དང་པདྨ་བསྐྱོད་པས་བྱང་སེམས་ནོར་བུའི་རྩ་བར་ཕབ་ལ་བཟུང་བས་སྔར་བས་རྒྱ་ཤིན་ཏུ་ཆེ་བའི་སྣང་
10-13-21b


བ་མཆེད་པའི་ཡེ་ཤེས་སྐྱེ།  དེ་ལ་ཅི་ཙམ་འདོད་ཚད་དུ་སེམས་བཟུང་བར་བྱ་སྟེ།  མཆེད་པའི་ཡེ་ཤེས་སྒྲུབ་པའོ། །ཡང་རྡོ་རྗེ་དང་པདྨ་བསྐྱོད་དེ་བྱང་སེམས་རྡོ་རྗེ་ནོར་བུའི་ལྟེ་བར་ཕབ་ལ་དེར་བཟུང་བས།  སྣང་བ་ཉེ་བར་ཐོབ་པའི་ཡེ་ཤེས་སྐྱེ་ལ།  དེ་
ལ་སེམས་རྩེ་གཅིག་ཏུ་བཞག་ཅིང་བསྒོམས་ཏེ།  ཉེར་ཐོབ་ཀྱི་ཡེ་ཤེས་སྒྲུབ་པའོ། །དེའི་རྗེས་ལ་ལུགས་བཟློག་གི་ཚུལ་གྱིས་བསྒོམས་པས་མཉམ་གཞག་དང་རྗེས་ཐོབ་ལ་ཁྱད་པར་མེད་པར་བདེ་བ་སྐྱེ་ཞིང་།  ཕྱག་རྒྱ་མེད་པའི་དུས་སུ་ཡང་བདེ་བ་ཚད་
མེད་དུ་སྐྱེ་ན་སེམས་དབེན་མཐར་ཕྱིན་པའོ། །ལྔ་པ་ཕན་ཡོན་ནི།  འབྲས་བུའི་དུས་སུ་སངས་རྒྱས་ཐམས་ཅད་ཀྱི་ཐུགས་རྣམ་པར་མི་རྟོག་པའི་ཡེ་ཤེས་བདེ་བ་ཆེན་པོ་འགྲུབ་པ་དང་།  གཞན་གྱི་སེམས་ཤེས་པ་སོགས་ཀྱི་མངོན་ཤེས་སྐྱེ་བ་དང་།  བདག་ལ་
བྱིན་གྱིས་བརླབ་པའི་སྒོ་ལ་ཕྱོགས་པ་དང་།  ས་བཅུའི་དབང་ཕྱུག་དང་འདྲ་བ་དང་།  སེམས་ཀྱི་གནས་ལུགས་ཅི་ལྟ་བ་བཞིན་དུ་རྟོགས་པས།  ལས་དང་ཉོན་མོངས་པའི་འཆིང་བ་ཐམས་ཅད་ལས་གྲོལ་བར་འགྱུར་བ་སྟེ།  རིམ་ལྔའི་གཉིས་པར།  རང་
བཞིན་སྣང་བའི་ཚུལ་གྱིས་ནི། །གང་གི་སྐྱེ་བོ་ཉོན་མོངས་པའོ། །དེ་ཉིད་ཤེས་ནས་ཡེ་ཤེས་ཅན། །སྲིད་པའི་གཟེབ་ལས་རྣམ་གྲོལ་འགྱུར། །ཞེས་གསུངས་སོ། །ཚིགས་བཅད་འདི་ཡན་ཆད་འཕགས་པས་མཛད་ལ།  ཤེས་རབ་ངོ་བོ་འདི་ཉིད་ནི། །
ཞེས་པ་ནས།  ཤཱཀྱ་བཤེས་གཉེན་གྱིས་ནི་དགེ་བ་གང་བསགས་དེས། །མཁས་ཤིང་གསལ་བའི་རྣམ་སྨིན་བྱང་ཆུབ་སྣོད་འགྱུར་ཤོག །ཅེས་པའི་བར་སློབ་དཔོན་ཤཱཀྱ་བཤེས་གཉེན་གྱིས་སྔ་མའི་འཕྲོས་ཁ་བསྐངས་པ་ཡིན་ནོ་ཞེས་རྗེ་འགོས་བཞེད་པ་
10-13-22a


ཉིད་ཤིན་ཏུ་ལེགས་པ་ཡིན་ནོ། །གཞན་དག་འཕགས་པའི་མཚན་གྱི་བྱེ་བྲག་ཤཱཀྱ་བཤེས་གཉེན་ཡིན་ཟེར་བ་དང་།  རིམ་པ་གཉིས་པ་ཡོངས་སུ་རྫོགས་པར་འཕགས་པས་མཛད་ཀྱང་ཤཱཀྱ་བཤེས་གཉེན་ལ་ཐུགས་དགེས་
པས་དེའི་མཛད་བྱང་བཏབ་ཅེས་པ་དང་།  རིམ་པ་གཉིས་པ་འཕགས་པས་མ་མཛད་པར་ཤཱཀྱ་བཤེས་གཉེན་གྱིས་ཕྱིས་བཅུག་པ་ཡིན་ཅེས་པ་རྣམས་ནི་མ་བརྟགས་པར་སྣང་ངོ་། །༈། །གསུམ་པ་ཀུན་རྫོབ་སྒྱུ་ལུས་ནི།  དེ་ལྟར་ཞི་གནས་
སེམས་གནས་པ་གཙོ་བོར་སྟོན་པའི་ལམ་གཞི་གསུམ་བཤད་ནས།  ལྷག་མཐོང་དངོས་པོའི་གནས་ལུགས་རྟོགས་པ་གཙོ་བོར་སྟོན་པ་ལམ་ཕྱི་མ་གསུམ་སྟེ།  དེ་ལ་སྒྱུ་མ་ཡུལ་གྱི་སྟོང་ཉིད།  འོད་གསལ་སེམས་ཀྱི་སྟོང་ཉིད།  ཟུང་འཇུག་ཡུལ་སེམས་གཉིས་མེད་ཀྱི་
སྟོང་ཉིད་དང་།  ཡང་ན་ཤེས་བྱའི་གཟུང་བྱ་སྒྱུ་མ།  སྒྱུ་མའི་འཛིན་བྱ་འོད་གསལ།  དེ་གཉིས་སུ་མེད་པ་ཟུང་འཇུག་ཏུ་ཤེས་དགོས་པས།  ལམ་ལྷག་མ་གསུམ་ཅིས་ཀྱང་ཉམས་སུ་བླང་དགོས་སོ། །དེ་ལ་སྒྱུ་མའི་ཏིང་ངེ་འཛིན་དངོས་ལ་བདུན་ལས། 
དང་པོ་གང་ཟག་ནི་གཞི་གསུམ་མཐར་ཕྱིན་ཅིང་སྒྱུ་མའི་ཏིང་ངེ་འཛིན་ལ་འདོད་པ་ཡོད་པ།  ཚོགས་ཀྱི་དཀྱིལ་འཁོར་དུ་ཐུན་མོང་གི་དབང་དགུ་སྔོན་དུ་འགྲོ་བས་གསང་བའི་དབང་བསྐུར་བ་མན་ངག་བཞིན་དུ་ཐོབ་པའོ། །གཉིས་པ་ཤེས་པར་
བྱ་བའི་ཡུལ་ནི།  ཁམས་གསུམ་ཐམས་ཅད་རླུང་དང་རྣམ་པར་ཤེས་པ་ཙམ་ལས་གྲུབ་པའི་རྡོ་རྗེ་འཆང་གི་སྐུ་སྒྱུ་མའི་དཔེ་བཅུ་གཉིས་ཀྱིས་མཚོན་པར་ཤེས་པར་བྱའོ། །གསུམ་པ་སྤང་བྱ་ནི།  ལྷ་སྐུ་ལ་སོགས་པའི་སྣང་བ་ཐམས་ཅད་ནུབ་པའི་རང་
10-13-22b


རིག་པའི་བདེ་བ་མྱོང་བ་ཙམ་འབའ་ཞིག་མཆོག་ཏུ་འདོད་པའི་གྲུབ་མཐའ་སྟེ།  འདིར་སྒྱུ་མའི་སྐུར་བསྒོམས་པས་ཟུང་འཇུག་གི་དུས་སུ་གཟུགས་ཀྱི་སྐུའི་སྣང་བ་འབྱུང་བའི་ཕྱིར་རོ། །བཞི་པ་མཚོན་བྱེད་ཀྱི་དཔེ་ནི།  བདག་བྱིན་གྱིས་བརླབ་པར།  
མེ་ལོང་ནང་གི་གཟུགས་བརྙན་གྱི། །སྒྱུ་མའི་ལུས་ནི་ཤེས་པར་བྱ། །ཁ་དོག་རྣམས་ནི་འཇའ་ལྟ་བུ། །ཁྱབ་པ་ཆུ་ཡི་ཟླ་བས་སོ། །ཞེས་གསུངས་པ་ལྟར།  དཔེ་ཡི་གཙོ་བོ་རྣམ་པ་གསུམ་སྟེ།  སྐད་ཅིག་ཙམ་གྱིས་ཡན་ལག་དང་ཉིང་ལག་རྫོགས་པར་
གྲུབ་པ་མེ་ལོང་གི་གཟུགས་བརྙན་ལྟ་བུ།  སྤྱོད་ཡུལ་ཐམས་ཅད་ལ་ཁྱབ་པ་ཆུ་ཟླ་ལྟ་བུ།  ཞི་བ་ལ་སོགས་པའི་ལས་ཀྱི་དབྱེ་བས་ཁ་དོག་སོ་སོར་སྣང་བ་འཇའ་ཚོན་ལྟ་བུའོ། །ལྔ་པ་སྒྱུ་མ་འགྲུབ་པའི་རྒྱུ་རྐྱེན་ནི་སེམས་དབེན་གྱི་སེམས་སྣང་བ་གསུམ་ཉེར་
ལེན་གྱི་རྒྱུ་ཡིན་ལ།  ངག་དབེན་གྱི་རླུང་འོད་ཟེར་ལྔ་ནི་ལྷན་ཅིག་བྱེད་པའི་རྐྱེན་ཏེ།  དེ་ཉིད་རླུང་དང་ཡང་དག་ལྡན། །རྣམ་ཤེས་གསུམ་པོ་སླར་ཡང་ནི། །རྣལ་འབྱོར་པ་ཡི་ལུས་སུ་འགྱུར། །སྒྱུ་མའི་ལུས་ཞེས་དེ་ལ་བྱ། །ཞེས་སོ། །དྲུག་པ་ཏིང་ངེ་འཛིན་
ཉམས་སུ་ལེན་པའི་ཚུལ་ལ་མཉམ་རྗེས་གཉིས་ཀྱི།  དང་པོ་ལ།  གནས་དབེན་པར་མཚམས་དམ་དུ་བསྡམ།  སྔར་གྱི་སེམས་དབེན་ཡན་ཆད་ཀྱི་ཏིང་ངེ་འཛིན་བསྒོམས་པ་སྔོན་དུ་སོང་ནས་སྒྱུ་མ་ལྟ་བུ་བསྒོམ་པ་ལ།  སྟེང་སྒོ་ལ་བརྟེན་པའི་རྣལ་འབྱོར་པ་ཡིན་ན་
སྔར་གྱི་སྟེང་སྒོའི་མན་ངག་ལྟར་ལུགས་བཟློག་གི་སྣང་བ་གསུམ་བསྐྱེད་ལ།  རང་གི་སེམས་རང་རིག་རང་གསལ་བདེ་བ་ཆེན་པོ།  སྣང་བའི་སེམས་དང་རླུང་ཙམ་ལས་སྐད་ཅིག་གིས་བདག་ཉིད་རྒྱལ་བ་ལོངས་སྤྱོད་རྫོགས་པའི་སྐུ་རྡོ་རྗེ་འཆང་ཆེན་པོ་སྐུ་མདོག་
10-13-23a


དཀར་པོ་ཞལ་གཅིག་ཕྱག་གཉིས་པ།  རྡོ་རྗེ་དང་དྲིལ་བུ་འཛིན་པ།  རྡོ་རྗེའི་སྐྱིལ་ཀྲུང་ཅན་དཔེའི་གཙོ་བོ་གསུམ་གྱིས་མཚོན་པའི་ཉམས་བདེ་གསལ་གྱི་རང་བཞིན་ཅན་དུ་བསྒོམ།  བདེ་བ་མི་གསལ་ན་སེམས་དབེན་གྱི་སྐབས་ལྟར་བདེ་བ་བསྐྱེད་ཀྱིན་བསྒོམ་མོ། །འོག་སྒོ་
ལ་བརྟེན་པའི་རྣལ་འབྱོར་པ་ཡིན་ན།  ཕྱག་རྒྱ་ལ་བརྟེན་ཏེ་ལུགས་བཟློག་གི་སྣང་བ་གསུམ་བསྐྱེད་ལ།  དེ་དང་རླུང་ལས་སྔར་བཞིན་ལྷའི་སྐུར་སྐད་ཅིག་གིས་བསྐྱེད་པ་སོགས་སྔ་མ་དང་འདྲའོ། །དེ་ལྟར་ཐུན་བཞིར་ཡུན་རིང་པོའི་བར་དུ་བསྒོམས་པས།  སྒྱུ་མ་ལྟ་བུའི་ལྷའི་སྐུ་ཇི་ལྟར་འདོད་
པ་བཞིན་འགྲུབ་པར་འགྱུར་རོ། །ཏིང་ངེ་འཛིན་དེ་གྲུབ་པ་དང་མཚན་མོ་གཉིད་ལོག་ཁར་བདག་གིས་དོ་ནུབ་གཉིད་ཀྱི་དུས་སུ་སེམས་དབེན་གྱི་ཡེ་ཤེས་བསྒོམ་པར་བྱ།  རྨི་ལམ་གྱི་དུས་སུ་དེ་ལས་སྒྱུ་མ་ལྟ་བུའི་ལྷའི་སྐུར་ལྡང་བར་བྱ་སྙམ་པའི་འདུན་པས་
གཉིད་ལོག་པས།  གཉིད་དངོས་ཀྱི་ཚེ་སེམས་དབེན་གྱི་ཡེ་ཤེས་སུ་འགྱུར་ཞིང་།  རྨི་ལམ་དུ་ལངས་པའི་ཚེ་སྒྱུ་མ་ལྟ་བུའི་སྐུར་སྔར་བཞིན་དུ་འབྱུང་བར་འགྱུར་ལ།  གཉིད་སད་པའི་ཚེ་མཉམ་གཞག་དང་ཁྱད་མེད་དུ་བསྒོམ།  དེ་ལྟར་ཡུན་རིང་དུ་སྦྱངས་པས་སད་
པའི་དུས་སུ་བསྒོམས་པ་བཞིན་རྨི་ལམ་དུ་ཡང་དེ་དང་ཁྱད་མེད་པར་འབྱུང་སྟེ།  གཉིད་ལོག་སད་ལ་དབྱེ་བ་ཡོད་མ་ཡིན། །ཞེས་སོ། །གཉིས་པ་རྗེས་ཐོབ་ཏུ་བྱ་བ་ནི།  སྲིད་པའི་དངོས་པོ་ཕྱི་ནང་དུ་བཅས་པ་ཐམས་ཅད་རླུང་སེམས་གཉིས་ལས་གྲུབ་པའི་
སྒྱུ་མའི་སྣང་བར་ཤེས་པར་བྱ་སྟེ།  དེ་བས་འདི་ལྟར་འགྲོ་བ་ཀུན། །སྒྱུ་མ་ལྟ་བུར་འདིར་བཤད་དེ། །སྒྱུ་མ་ལྟ་བུའི་ཏིང་འཛིན་གྱིས། །ཐམས་ཅད་དེ་དང་འདྲ་བར་བསྒྱུར། །ཞེས་སོ། །འདིར་པཎྜི་ཏ་བཙུན་མོ་ཅན་གྱི་མན་ངག་ཏུ་མི་གསལ་
10-13-23b


ཡང་།  རྗེ་འགོས་ཀྱིས་ཉམས་ལེན་གྱི་ཚུལ་འདི་ལྟར་མཛད་དེ།  གནས་དབེན་པར་བསམ་གཏན་གྱི་ཁང་པ་གྲུ་བཞི་པ་གཅིག་བྱས་ལ།  ཕྱོགས་བཞིར་སྐར་ཁུང་བཞི།  སྟེང་དུ་གཅིག་དང་ལྔ་བཏོད།  ཕྱོགས་མཐའ་དག་ལ་དཀར་ཞལ་བྱ།  སྟེང་འོག་ལ་
ཚོན་སྣ་ལྔའི་རི་མོ་བྲི།  རིན་པོ་ཆེའི་སྣོད་འོད་ཅན་དང་།  ཤེལ་དང་།  མེ་ལོང་གཡའ་དག་པར་སྤྱན་དྲངས།  འོག་ཏུ་ཆུ་སྣོད་མང་པོ་དང་།  བཙོད་ཁུ།  ཟངས་ལ་སོགས་པ་རྣམས་བཞག །མདུན་དུ་མེ་ལོང་རས་བྲིས་དང་རྒྱ་མཉམ་པ་གཅིག་བཞག །རྒྱབ་ཏུ་
རས་ལ་སོགས་པའི་གཞི་སྔོན་པོ་ལ་རྡོ་རྗེ་འཆང་གི་འདྲ་འབག་སྐུ་མདོག་དཀར་པོ་ཞལ་གཅིག་ཕྱག་གཉིས་པ་རྡོ་རྗེ་དང་དྲིལ་བུ་འཛིན་པ་གཅིག་བྲིས་ལ་བཞག །དེ་ལྟར་བྱས་པས་ཉི་མའི་འོད་ཤེལ་ལ་སོགས་པ་ལ་ཕོག །དེའི་འོད་ཆུ་ལ་ཕོག །དེའི་འོད་
བྲིས་སྐུ་ལ་ཕོག །དེའི་འོད་མེ་ལོང་ལ་ཤར་བའི་རྡོ་རྗེ་འཆང་གི་འདྲ་འབག་སྣང་ལ་རང་བཞིན་མེད་པ་གསལ་ལ་རྟོག་པ་མེད་པ་ལ་ཤེས་པ་གཏད་དོ། །དེ་ཡང་དང་པོར་སེམས་དབེན་གྱི་བདེ་སྟོང་གི་ངང་ལས་ལངས་པར་བྱས་ལ་བྲིས་སྐུའི་གཟུགས་བརྙན་མེ་ལོང་དུ་
ཤར་བ་ལ་སེམས་གཏད།  དེ་ལ་སེམས་ཟིན་པ་དང་།  རང་གི་ལུས་དང་དེ་གཉིས་དབྱེར་མེད་དུ་བསྒོམ།  དེ་ལྟར་བསྒོམས་པས་སེམས་གོམས་ཙམ་ན་ཐམས་ཅད་སྒྱུ་མའི་སྣང་བར་འཆར་བར་འགྱུར་ཏེ།  མེ་ལོང་ནང་གི་གཟུགས་བརྙན་གྱིས། །སྒྱུ་
མའི་ལུས་ནི་མཚོན་པར་བྱ། །ཁ་དོག་རྣམས་ནི་འཇའ་ལྟ་བུ། །ཞེས་བཤད་དོ། །མན་ངག་འདི་དང་པོ་ཉིད་ནས་བྱེད་ན།  ཏིང་ངེ་འཛིན་མྱུར་དུ་སྐྱེ་བའི་རྒྱུར་འགྱུར་ལ།  གང་ཟག་འགའ་ཞིག་ལ་རྩོལ་བ་ཆེན་པོ་ནས་ཉམས་སུ་བླངས་ཀྱང་
10-13-24a


སེམས་དབེན་གྱི་རྟོག་པ་ལས་ལྡང་མ་ཐུབ་ན་སྤོགས་ཆོག་གི་ཚུལ་དུ་ཕྱིས་ཉམས་སུ་བླངས་ན་སེམས་རྣམ་པར་དབེན་པའི་བདེ་སྟོང་གི་ཏིང་ངེ་འཛིན་ལས་རྡོ་རྗེ་འཆང་གི་སྐུར་ལྡང་ནུས་པར་འགྱུར་བས་ཤིན་ཏུ་ཟབ་པའི་གདམས་
ངག་ཏུ་སྣང་ངོ་། །བདུན་པ་མཐར་ཕྱིན་པའི་རྟགས་ཚད་དང་ཕན་ཡོན་ནི།  རྨི་ལམ་དུ་ཁྱེའུ་བུ་མོ་ལ་སོགས་པས་མཆོད་པ་བྱེད་པ་དང་།  སངས་རྒྱས་ཀྱི་ཞིང་ཁམས་མཐོང་བ་དང་།  སངས་རྒྱས་རྣམས་ཀྱིས་དབང་བསྐུར་བ་དང་།  དབང་རྟགས་རྡོ་རྗེ་
དང་དྲིལ་བུ་དང་།  གསང་འདུས་ཀྱི་གླེགས་བམ་ལག་ཏུ་བྱིན་ནས།  གཉིད་སད་ཙ་ན་པོ་ཏི་དང་།  རྡོར་དྲིལ་ལ་སོགས་པ་ལག་ཏུ་འབྱུང་བ་སོགས་ནི་གྲུབ་པའི་རྟགས་ཡིན་ལ།  འོད་གསལ་དོན་དམ་པའི་བདེན་པ་རྟོགས་པར་འགྱུར་བ་ནི་ཕན་ཡོན་ཡིན་ནོ། །༈། །
བཞི་པ་འོད་གསལ་ནི།  དེ་ལྟར་ཡུལ་གྱི་སྟོང་ཉིད་སྒྱུ་མའི་ཟུང་འཇུག་ལོངས་སྐུའི་ཉེར་ལེན་གྱི་རྒྱུ་བསྒོམ་པ་ལ་བརྟེན་ནས།  སེམས་ཀྱི་སྟོང་ཉིད་འོད་གསལ་དོན་དམ་པའི་བདེན་པ་བསྒོམ་པའི་ཚུལ་ལ་བདུན་ལས།  དང་པོ་གང་ཟག་ནི་ཀུན་རྫོབ་ཀྱི་བདེན་པ་
མཐར་ཕྱིན་ནས་ཐམས་ཅད་སྟོང་པ་འོད་གསལ་གྱི་ཏིང་ངེ་འཛིན་ལ་འདོད་པ་ཡོད་པའོ། །གཉིས་པ་ངོ་བོ་ནི།  ཆོས་ཐམས་ཅད་སྣང་བ་ནུབ་པས་ཁྱད་པར་དུ་བྱས་པའི་ཏིང་ངེ་འཛིན་ནོ། །གསུམ་པ་ཤེས་པར་བྱ་བའི་
ཡུལ་ནི།  ཆོས་ཐམས་ཅད་སྟོང་པ་འོད་གསལ་སྤྲིན་མེད་པའི་ནམ་མཁའ་སྟོང་པ་ལྟ་བུའི་མཐར་ཐུག་པའོ། །བཞི་པ་སྤང་བྱ་ནི།  སྒྱུ་མའི་སྐུ་དེ་ཉིད་ལ་དངོས་པོ་དང་མཚན་མར་
10-13-24b


འཛིན་པའི་རྟོག་པ་སྟེ།  རྡོ་རྗེ་ཕྲེང་བར།  བདག་བྱིན་རླབས་ཆེན་མ་གཏོགས་པའི། །རིན་ཆེན་གཞན་དག་འདི་ན་མེད། །མེ་ཡིས་སྦྱངས་པའི་ནོར་བུ་བཞིན། །རང་བཞིན་འོད་གསལ་རྣམ་དག་པའོ། །ཞེས་སོ། །གལ་ཏེ་སྒྱུ་མ་ལྟ་བུའི་སྐུ་དེ་ལ་དངོས་པོ་
དང་མཚན་མར་རྟོག་པ་དེ་ཡང་དག་པར་བརྟག་བཟོད་པ་གཅིག་ཏུ་ཞེན་པ་ཡིན་ནམ།  འོན་ཏེ་རྫུན་པ་སྒྱུ་མ་ཙམ་དུ་ཞེན་པ་ཡིན་སྙམ་ན།  ཕྱི་མ་འདི་ལ་ཡང་དག་ཏུ་ཞེན་པ་མི་རིགས་ཏེ།  སྒྱུ་མ་ལྟ་བུར་བསྒོམ་པའི་ཕྱིར་རོ། །སྒྱུ་མ་ཙམ་དུ་ཞེན་པ་ནི་ཕྱིན་
ཅི་ལོག་པ་མ་ཡིན་ཏེ།  སྒྱུ་མ་ལ་སྒྱུ་མར་ངོ་ཤེས་པའི་ཕྱིར་རོ་ཞེ་ན།  ཞེན་པ་འདི་དག་ཐམས་ཅད་ཚུལ་ཇི་ལྟར་ཞེན་ཀྱང་ཡང་དག་པའི་ཞེན་པར་འགྲོ་སྟེ།  དངོས་པོ་སྣང་ལ་རང་བཞིན་མེད་པ་ལ་སྒྲོ་བཏགས་པའི་ཕྱིར་རོ། །དཔེར་ན་སོ་སོ་སྐྱེ་བོ་རྣམས་མི་
རྟག་པར་རྟོགས་པའི་ཤེས་པ་ཉིད།  རྟག་པར་འཛིན་པའི་གཉེན་པོ་ཡིན་ཀྱང་།  ཞེན་པ་ཆ་ཕྲ་བ་ཡིན་པ་བཞིན་ནོ། །ལྔ་པ་གཉེན་པོ་མངོན་པར་བྱང་ཆུབ་པའི་རིམ་པ་ནི་ཕྱིའི་མངོན་པར་བྱང་ཆུབ་པ་དང་།  ནང་གིའོ། །དང་པོ་ནི།  ཐོ་རངས་ཀྱི་ཐུན་མཚམས་
སུ་མ་རིག་པའི་སྣང་བ་འདས་ནས།  ཇི་སྲིད་ཉི་མ་གསལ་བར་མ་གྱུར་གྱི་བར་ཏེ།  འདི་ལ་ནི་འོད་གསལ་བ་དྲི་མ་མེད་པའི་རྣམ་པར་གསལ་ཞིང་ལུས་དང་ངག་དང་ཡིད་བྲལ་བ་ཐམས་ཅད་སྟོང་པའི་མཚན་ཉིད་ཅན་ནོ། །ཉི་མ་ཤར་བ་ནི་སྣང་བ་མཆེད་
པ།  ཉི་མ་ནུབ་པ་ནི་ཐུན་མཚམས་སུ་མ་རིག་པའོ། །ཟླ་བ་ཤར་བའི་ཚེ་ནི་སྣང་བའོ། །ནང་གི་མངོན་པར་བྱང་ཆུབ་པ་ནི།  དང་པོ་སྨིག་རྒྱུ་ལྟ་བུ་ལ་འོད་ཟེར་ལྔའི་ཚོགས་དང་ལྡན་པ་མཐོང་ངོ་། །གཉིས་པ་ནི།  སྣང་བ་སྟེ་ཟླ་བའི་འོད་ཟེར་ལྟ་བུའོ། །
10-13-25a


གསུམ་པ་ནི།  སྣང་བ་མཆེད་པ་སྟེ་ཉི་མའི་འོད་ཟེར་ལྟ་བུའོ། །བཞི་པ་ནི།  སྣང་བ་ཐོབ་པ་སྟེ་མུན་པ་ལྟ་བུའོ། །དེ་ནས་མུན་པ་དང་བྲལ་བའི་སྐད་ཅིག་ལ་འོད་གསལ་བ་སྟེ།  ཤིན་ཏུ་གསལ་བ་རྟག་ཏུ་སྣང་བའི་མཚན་ཉིད་
ཅན།  དོན་དམ་པའི་བདེན་པ་ཡེ་ཤེས་ཀྱི་མིག་གིས་མཐོང་ངོ་ཞེས་པ་ལྟར་རོ། །དེ་ལ་མཚན་མོ་དང་སྨག་དང་ཉི་མ་འཆར་ཀའི་དཔེ་ནི།  གང་ཟག་གློ་བུར་བའི་རྟོག་པ་དང་བྲལ་བའི་ཁྱད་པར་བཞིའི་ཆ་ནས་མཚོན་པ་ཡིན་ལ།  ནང་གི་མངོན་པར་བྱང་ཆུབ་པའི་
བསམ་གཏན་གཉིས་ཀྱི་སྒྱུ་མ་འོད་གསལ་དུ་འཇུག་པའི་ཉམས་སུ་མྱོང་བའི་ཆ་ནས་བཤད་པ་ཡིན་ནོ། །དེ་མངོན་དུ་བྱེད་པའི་ཐབས་ནི་གཉིས་ཏེ།  རིལ་པོར་འཛིན་པའི་བསམ་གཏན་དང་།  རྗེས་སུ་གཞིག་པའི་བསམ་གཏན་ནོ། །དང་པོ་ནི།  གནས་
དབེན་པར་ལུས་གནད་བཅས་ལ།  སེམས་དབེན་གྱི་ཏིང་ངེ་འཛིན་ལས་སྒྱུ་མ་ལྟ་བུའི་ལྷ་སྐུར་ལངས།  དེ་ཡུན་རིང་པོར་གོམས་པ་དང་།  རང་གི་ལུས་ངག་ཡིད་གསུམ་གྱི་རྟོག་པ་སྤང་བའི་ཕྱིར།  རྡོ་རྗེ་གསུམ་གྱི་རིལ་འཛིན་བསྒོམ་པ་ལ།  དང་པོ་རླུང་
དང་ཤེས་པ་ཙམ་ལས་ཁམས་གསུམ་པོ་ཐམས་ཅད་ཀྱི་ངོ་བོ་ཉིད་རྡོ་རྗེ་འཆང་ཆེན་པོ་སྒྱུ་མ་ལྟ་བུར་བསྒོམས་ལ།  དེ་སྐུ་རྡོ་རྗེ་རྣམ་པར་སྣང་མཛད་དུ་བསྒྱུར།  དེ་ཐུགས་ཀའི་ཨོཾ་ལ་བསྡུ།  ཨོཾ་ཡང་རིལ་གྱིས་ཨ་ཐུང་ལ་བསྡུ།  དེ་ཡང་ཇེ་ཕྲ་ཇེ་ཕྲ་ལ་མཐར་
མི་དམིགས་པར་བསྒོམས་ཏེ།  སྐུའི་རིལ་འཛིན་ནོ། །དེ་བཞིན་དུ་གསུང་རྡོ་རྗེ་དང་ཐུགས་རྡོ་རྗེ་བསྒོམས་པའི་རིམ་པས་ཀྱང་ཁམས་གསུམ་གྱི་ངག་དང་སེམས་ཀྱི་རྟོག་པ་སྤང་བར་བྱའོ། །དེ་ལ་དང་པོ་སྐུ་རྡོ་རྗེའི་ཏིང་ངེ་འཛིན་གྱིས་ལུས་ཀྱི་རྟོག་པ་སྤང་
10-13-25b


བའི་ཚེ་ལུས་ཀྱི་ངོ་བོ་སའི་ཁམས་ཆུ་ལ་ཐིམ་པས་རྟགས་ཅན་སྨིག་རྒྱུ་ལྟ་བུ་དང་།  རྟགས་འོད་ཟེར་ལྔའི་ཚོགས་དང་པོར་མཐོང་ངོ་། །གསུང་རྡོ་རྗེའི་ཏིང་ངེ་འཛིན་གྱི་ངག་གི་རྟོག་པ་སྤོང་བའི་ཚེ།  ངག་ཐམས་ཅད་ཀྱི་ངོ་བོ་ཉིད་མེད་པ་དང་།  རླུང་ཐིམ་པའི་རྟགས་དང་རྟགས་ཅན་འབྱུང་བར་འགྱུར་
ཏེ།  དེའི་ཚེ་རྟགས་ཅན་ཤེས་པ་དེ་བརྟན་གཡོའི་ཚད་ནི་དུ་བ་ལྟ་བུ་ལ།  རྟགས་ནི་ཟླ་བའི་འོད་ཟེར་ལྟ་བུ་སྟེ།  སྣང་བ་མཆེད་པའི་ཡེ་ཤེས་མངོན་དུ་བྱས་པའོ། །ཐུགས་རྡོ་རྗེའི་ཏིང་ངེ་འཛིན་གྱི་རིམ་པས་ཁམས་གསུམ་ཐམས་ཅད་ཀྱི་སེམས་ཀྱི་རྟོག་པ་ཡང་འཇོམས་པའི་ཚེ་ན་ནི།  སེམས་སྣང་བ་གསུམ་ཐིམ་
པའི་རྟགས་གསུམ་འབྱུང་སྟེ།  དེ་ཡང་སེམས་སྣང་དང་པོ་སེམས་ལས་བྱུང་བ་ལ་ཐིམ་པར་འགྱུར་བའི་རྟགས་ཅན་ཉི་མའི་འོད་ཟེར་ལྟ་བུ་སྟེ།  ཐུགས་རྡོ་རྗེའི་དམ་ཚིག་སེམས་དཔའ་ཐིམ་པའི་དུས་སུ་འབྱུང་ངོ་། །སེམས་བྱུང་མ་རིག་པ་ལ་ཐིམ་པར་འགྱུར་བའི་རྟགས་ཅན་མར་མེའི་རྩེ་མོ་ལྟ་བུ་ལ།  
རྟགས་ནི་མུན་ནག་ལྟ་བུ་སྟེ།  ཡེ་ཤེས་སེམས་དཔའ་ཐིམ་པའི་དུས་སུ་འབྱུང་ངོ་། །མ་རིག་པ་འོད་གསལ་དུ་ཐིམ་པས།  ཐམས་ཅད་སྟོང་པ་འོད་གསལ་བ་སྤྲིན་མེད་པའི་ནམ་མཁའ་ལྟར་སྣང་སྟེ།  ཏིང་ངེ་འཛིན་སེམས་དཔའི་ཐིག་ལེར་བསྒོམ་པ་ཡང་སྤངས་པའི་དུས་སུ་འབྱུང་ངོ་། །དེའི་ཚེ་འོད་གསལ་དོན་དམ་པའི་
བདེན་པའི་མཚན་ཉིད་ཡེ་ཤེས་ཀྱི་མིག་གིས་མཐོང་བར་འགྱུར་བས།  དེའི་སྟེང་དུ་ཇི་ཙམ་གནས་ཀྱི་བར་དུ་མཉམ་པར་གཞག་གོ།  གཉིས་པ་རྗེས་སུ་གཞིག་པའི་བསམ་གཏན་ནི།  དང་པོ་རང་ཉིད་སྒྱུ་མ་ལྟ་བུའི་རྡོ་རྗེ་འཆང་དུ་བསྐྱེད་ལ།  དེ་སྐུ་རྡོ་རྗེ་ལ་སོགས་པ་གསུམ་དུ་བསྒྱུར་ནས།  དེ་གསུམ་གྱི་ཐུགས་ཀའི་
ས་བོན་ལས་རང་ཉིད་མ་གཏོགས་པའི་རྒྱུ་བ་དང་མི་རྒྱུ་བ་ཐམས་ཅད་བདག་ལ་བསྡུས།  བདག་ཉིད་ཀྱང་སེམས་དཔའ་སུམ་བརྩེགས་གཅིག་ལ་གཅིག་ཐིམ་པའི་རིམ་གྱིས་ཐིག་ལེར་བསྒོམ་པ་ཡང་སྤངས་ནས་འོད་གསལ་བ་མངོན་དུ་བྱེད་པ་ཡིན་ནོ། །གལ་ཏེ་སྒྱུ་ལུས་ཀྱི་དམིགས་པ་ཤིན་ཏུ་བརྟན་པས་རིལ་འཛིན་དང་།  རྗེས་གཞིག་གིས་
10-13-26a


སྒྱུ་ལུས་འོད་གསལ་དུ་བྱེད་པར་མ་ནུས་ན།  སྤོགས་ཆོག་གི་ཚུལ་དུ་དམིགས་པ་འདི་རྣམས་ཉམས་སུ་ལེན་ཏེ།  ཇི་སྐད་དུ།  བསམ་གཏན་གཉིས་ཀྱི་རིམ་པ་ནི། །རིལ་འཛིན་སྙིང་གར་གནས་པ་ཡི། །སྣ་ཚོགས་པདྨའི་ལྟེ་བ་ལ། །
ཟླ་བའི་སྟེང་ནས་མི་ཤིགས་པའི། །ཐིག་ལེ་ཨ་ཡི་རྣམ་པར་གནས། །རླུང་ལྡང་ཨཱ་ལི་ཀཱ་ལི་ཡི། །ཕྲེང་བ་སྣ་སྒོར་ནར་གྱིས་བྱུང་། །འཇུག་པ་ནང་དུ་ཨ་ལ་བསྐོར། །ཕྲེང་བ་ཕྱེད་དང་བཞི་ཡིས་བསྐོར། །ཀཱ་ལིས་སྣར་དྲངས་ཨས་གཞུག་བཏུལ། །
ཨ་ནས་ཕྱིར་ལ་ལྡོག་སྟེ་བསྐོར། །མི་ཤིགས་པ་ཡི་ཐིག་ལེ་ལ། །ཤེས་པ་གནས་ཚད་གཟུང་བར་བྱ། །གཞན་ཡང་སྣ་ཚོགས་པདྨ་ལ། །ཀཱ་ལིའི་གྲོང་ཁྱེར་དགོད་པར་བྱ། །གྷ་ཛྷ་དྷ་བྷ་བཞི་བཀོད་དེ། །ལྟེ་བའི་ཟླ་བར་ཨཱ་ལི་བཀོད། །དབུས་
སུ་མི་ཤིགས་ཨ་ཐུང་ནི། །ཉུངས་འབྲུ་ཙམ་དུ་བསྒོམ་པར་བྱ། །གཞན་ཡང་ཐིག་ལེར་གྱུར་པ་ལས། །ཨོཾ་ཨཱཿཧཱུྃ་སྭཱ་ཧཱ།  རིགས་ཀྱི་ཁ་དོག་བཞིན་བསམས་ཏེ། །རྩེ་གཅིག་རིགས་ལྔའི་བསམ་གཏན་བསྒོམ། །ཨཱ་ལི་ཀཱ་ལིའི་ཕྲེང་བ་ཡི། །
སྤྲོ་བསྡུ་སྔར་བཞིན་བྱ་བར་གསུངས། །རྗེས་སུ་གཞིག་པའི་བསམ་གཏན་ནི། །སྔར་བཞིན་གང་བསྒོམ་དེ་ཉིད་ལས། །འོད་འཕྲོས་སྣོད་བཅུད་རིམ་གྱིས་བསྡུས། །ཡིག་འབྲུ་སྟོང་པའི་བར་དུ་བསྡུ། །སྨིག་རྒྱུ་ལ་སོགས་རྟགས་ལྔ་དང་། །ཟླ་ཉི་
ནུབ་པའི་རྟགས་སུ་འབྱུང་། །མཐར་ཐུག་འོད་གསལ་སྟོང་པར་འཆར། །ཞེས་གསུངས་པ་ལྟར།  སྒྱུ་ལུས་འོད་གསལ་དུ་བྱེད་པའི་དམིགས་པ་བཅུ་གསུམ་འབྱུང་སྟེ།  བླ་མ་འགོས་ལོཙྪའི་གདམས་ངག་ལས་ཤེས་པར་བྱའོ། །དྲུག་པ་མངོན་སུམ་
10-13-26b


དུ་ཉམས་སུ་མྱོང་བར་བྱ་བ་ནི།  དེ་ལྟར་བསམ་གཏན་གཉིས་ཀྱི་མན་ངག་ཐོབ་ཅིང་ཉམས་མྱོང་ལེགས་པར་སྐྱེས་པའི་རྗེས་སུ།  སློབ་མས་མངོན་སུམ་དུ་ཉམས་སུ་མྱོང་བར་བྱ་བའི་ཕྱིར།  ཤེས་རབ་ཡེ་ཤེས་ཀྱི་དབང་བསྐུར་ཏེ།  དེ་ཡང་སློབ་དཔོན་གྱི་ལེགས་
པར་སྦྱངས་པའི་ཕྱག་རྒྱ་སློབ་མའི་ལག་པར་གཏད་ནས།  དངོས་པོ་ཐམས་ཅད་དང་བྲལ་ཞིང་། །ཕུང་པོ་ཁམས་དང་སྐྱེ་མཆེད་དང་། །གཟུང་དང་འཛིན་པ་རྣམ་པར་སྤངས། །ཆོས་བདག་མེད་པ་མཉམ་ཉིད་པ། །རང་སེམས་གདོད་ནས་མ་སྐྱེས་
པ། །སྟོང་པ་ཉིད་ཀྱི་རང་བཞིན་ནོ། །ཞེས་བརྗོད་པ་ནི་ཤེས་རབ་ཡེ་ཤེས་ཀྱི་དབང་ཡིན་ལ།  སློབ་མས་ཆགས་ལམ་གྱི་མན་ངག་ཇི་ལྟ་བ་བཞིན་སྙོམས་པར་ཞུགས་པས།  འོད་གསལ་གྱི་དོན་ཇི་ལྟ་བ་བཞིན་ཉམས་སུ་མྱོང་བ་ནི་ཡེ་ཤེས་ཀྱི་དབང་ཡིན་ནོ། །
དེ་ཡང་རིམ་ལྔར།  བྱང་ཆུབ་སེམས་ནི་དོན་དམ་ཞེས་བྱ་བ། །སྐལ་བཟང་སློབ་མ་བཟང་པོ་མན་ངག་ཐོབ། །ཐལ་མོ་སྦྱར་ནས་མེ་ཏོག་འཛིན་པ་ཡིས། །བླ་མ་ལས་ནི་སླར་ཡང་བླང་བར་བྱ། །ཞེས་སོ།  གལ་ཏེ་ཤེས་རབ་ཡེ་ཤེས་ཀྱི་
དབང་ནི་སྔར་ལམ་བསྒོམས་པའི་སྔོན་འགྲོར་བྱ་བར་རིགས་ན།  འདིར་ཅིའི་ཕྱིར་བསྐུར་སྙམ་ན།  སྨིན་བྱེད་ཀྱི་དབང་རྣམས་སྔར་རིམ་པ་བཞིན་བསྐུར་ཚར་ལ།  འདིར་ཕྱིས་དབང་བསྐུར་བ་ནི།  མན་ངག་གི་པྲ་ཀྲྀ་ཏ་ལ་བསླབ་པའི་ཕྱིར་བསྐྱར་ཏེ་བསྐུར་ཏེ།
བླ་མ་ལས་ནི་སླར་ཡང་བླང་བར་བྱ། །ཞེས་པའི་དོན་དུ་བཞེད་དོ། །བདུན་པ་མཐར་ཕྱིན་པའི་ཚད་ནི།  མཉམ་གཞག་གི་དུས་སུ་དངོས་པོ་ཐམས་ཅད་སྟོང་ཉིད་དུ་འགྲོ་བ་སྙམ་བྱེད་ཅིང་མཚན་མ་ཐམས་ཅད་ནུབ་པ་དང་།  གཞན་གྱི་ཀླག་ཅོར་ལ་
10-13-27a


སོགས་པའི་སྒྲས་རྣམ་རྟོག་མི་བསྐྱེད་ལ།  རྗེས་ཐོབ་ཀྱི་དུས་སུ་དངོས་པོ་ལ་མངོན་ཞེན་མི་སྐྱེ་བ་དང་།  ཉོན་མོངས་པའི་ཟུག་རྔུ་དང་བྲལ་བར་འགྱུར་ཞིང་།  འབྲས་བུ་མཐར་ཐུག་ཟུང་འཇུག་གི་སྐུར་ལྡང་ནུས་པར་འགྱུར་ཏེ།  ཡང་དག་
མཐའ་ལས་ལངས་ནས་ཀྱང་། །གཉིས་མེད་ཡེ་ཤེས་ཐོབ་པར་འགྱུར། །ཞེས་སོ། །ལྔ་པ་ཟུང་འཇུག་ལ་བདུན་ལས།  དང་པོ་རྟེན་གྱི་གང་ཟག་ནི་འོད་གསལ་མཐར་ཕྱིན་པའོ། །གཉིས་པ་ཤེས་བྱ་ནི་ཆོས་ཐམས་ཅད་གཉིས་སུ་མེད་པའི་ཡེ་
ཤེས་ཀྱི་རང་བཞིན་དུ་ཤེས་པར་བྱ་བ་ཉིད་དོ། །གསུམ་པ་སྤང་བྱ་ནི་ཆད་པའི་མཐར་ལྷུང་བ་དང་།  སངས་རྒྱས་ཀྱི་ཡེ་ཤེས་ལ་གཟུགས་སྐུའི་སྣང་བ་ནུབ་པར་འདོད་པའི་གྲུབ་མཐའོ། །བཞི་པ་མཚོན་པར་བྱེད་པའི་མཚན་ཉིད་ལ་གསུམ་སྟེ།  འགོག་པ་ཟུང་
འཇུག །སྣང་བ་ཟུང་འཇུག །འབྲེལ་པ་ཟུང་འཇུག་གོ།  དང་པོ་ནི།  ཐ་དད་པའི་རྣམ་པར་རྟོག་པས་སྟོང་པ་སྟེ།  གཉིས་མེད་ཀྱི་ཡེ་ཤེས་དེ་འཁོར་བ་དང་།  མྱ་ངན་ལས་འདས་པ་དང་།  ཀུན་ནས་ཉོན་མོངས་པ་དང་།  རྣམ་བྱང་གི་ཆོས་ཐམས་ཅད་དབྱེར་
མེད་པར་ཐུགས་སུ་ཆུད་པའི་ཕྱིར་རོ། །གཉིས་པ་ནི།  དོན་དམ་གྱི་མཐར་ཐུག་པ་སྟེ།  ཐབས་ཀུན་རྫོབ་ཀྱི་བདེན་པ་རྡོ་རྗེ་འཆང་ཆེན་པོའི་ལུས་དང་།  གནས་དང་།  ལོངས་སྤྱོད་དང་།  སྣང་བ་ཁྱད་པར་ཅན་དང་།  ཤེས་རབ་དོན་དམ་པའི་བདེན་པ་ཆོས་ཐམས་
ཅད་རང་བཞིན་མེད་པར་རྟོགས་པས་ཞེན་པ་དང་རྟོག་པ་ཐམས་ཅད་དང་བྲལ་བའི་ཏིང་ངེ་འཛིན་བདེན་གཉིས་དབྱེར་མེད་པ་སྟེ།  སྣང་ལ་ཞེན་པ་མེད་པའི་ཏིང་ངེ་འཛིན་ཏོ། །གསུམ་པ་ནི།  ཤེས་རབ་དང་སྙིང་རྗེ་དབྱེར་མེད་པར་འབྲེལ་བ་ཟུང་འཇུག་སྟེ།  འདི་ནི་
10-13-27b


སངས་རྒྱས་ཐམས་ཅད་ཀྱི་སྤྱོད་ཡུལ་དུ་གྱུར་པའོ། །ལྔ་པ་ཟུང་འཇུག་ལ་སློབ་པའི་ཚུལ་ལ་གཉིས་ཏེ།  བརྩོན་འགྲུས་ཅན་མཐོང་བའི་ཆོས་ལ་སངས་རྒྱ་བ་དང་།  ལེ་ལོ་ཅན་བར་དོར་སངས་རྒྱ་བའི་མན་ངག་གོ།  དང་པོ་ནི།  རྣལ་འབྱོར་པ་བརྩོན་འགྲུས་རབ་དང་
ལྡན་ཞིང་།  ཁ་ཟས་ལ་སོགས་ངང་གིས་འབྱོར་པ་དང་ལྡན་པས།  ཞིང་ལ་སོགས་པའི་གཡེང་བ་མེད་པ་རྣམས་ཀྱིས་ནི།  ཚེ་འདི་ཉིད་ལ་ཀུན་རྫོབ་ཀྱི་བདེན་པའི་གནས་སྐབས་སུ་སྤྱོད་པ་གསུམ་གང་ཡང་རུང་བ་ལ་གོམས་པར་བྱ་ཞིང་དོན་དམ་པའི་བདེན་
པ་བརྟེན་པའི་མཚན་མ་ཐོབ་པའི་རྣལ་འབྱོར་པས།  བསམ་གཏན་གྱི་ཁང་པར།  ལུས་གནད་དང་བཅས་པས་བསྡད་ལ།  སེམས་ཀྱི་འཕེན་པ་འདི་ལྟར་བྱ་སྟེ།  བདག་གིས་འོད་གསལ་བའི་ཏིང་ངེ་འཛིན་འདི་ལ་ལོ་དང་ཟླ་བ་ལ་སོགས་པའི་དུས་འདི་
སྲིད་ཅིག་ཏུ་གནས་པར་བྱས་ལ།  ཀུན་རྫོབ་བདེན་པ་རྗེས་སུ་དྲན་པས་ཟུང་དུ་འཇུག་པའི་སྐུར་ལྡང་བར་བྱའོ་སྙམ་པའི་འཕེན་པ་དྲག་པོ་བཏང་ནས།  ལོ་དང་ཟླ་བ་ལ་སོགས་པ་ཅི་ཙམ་པར་མཉམ་པར་འཇོག་ནུས་ཀྱི་བར་དུ་འོད་གསལ་བའི་ཏིང་ངེ་འཛིན་
ལ་སྙོམས་པར་འཇུག་པར་བྱའོ། །དེ་ལྟར་ཐམས་ཅད་སྟོང་པ་འོད་གསལ་མཐར་ཕྱིན་པ་དེ་ལས་དང་པོར།  ཐོབ་པའི་ཡེ་ཤེས་གཟུང་འཛིན་གཉིས་ཀྱིས་སྟོང་པ་མུན་པ་ལྟ་བུ་འབྱུང་།  དེ་ལས་མཆེད་པའི་ཡེ་ཤེས་ཉི་མ་ལྟར་ཆེར་གསལ་ལ་ཚ་བའི་
རྣམ་པ་ཅན་འབྱུང་།  དེ་ལས་སྣང་བའི་ཡེ་ཤེས་ཟླ་བ་ལྟར་བསིལ་བའི་རྣམ་པ་ཅན་འབྱུང་།  དེ་ལས་སྔར་ཀུན་རྫོབ་བསྒོམས་པའི་སྟོབས་ཀྱིས་སྒྱུ་མ་ལྟ་བུའི་ལྷའི་རྣམ་པ་ཅན་གྱི་རྡོ་རྗེ་འཆང་ཆེན་པོ་ཟུང་འཇུག་ལོངས་སྤྱོད་རྫོགས་པའི་སྐུ་སྐད་ཅིག་ཐང་ཅིག་ཡུད་ཙམ་
10-13-28a


གྱིས་འབྱུང་བ་ནི་ཟུང་འཇུག་སྟེ།  ཇི་ལྟར་ཞེ་ན།  རྒྱུ་ལ་འབྲས་བུས་རྒྱས་གདབ་ཅིང་། །འབྲས་བུ་ལ་ཡང་རྒྱུས་རྒྱས་གདབ། །ཅེས་པས་རྒྱུ་ཀུན་རྫོབ་ཀྱི་བདེན་པ་སྣང་བ་དེ་ལ།  འབྲས་བུ་འོད་གསལ་གྱིས་རྒྱས་གདབ་པས་སྣང་བ་དངོས་
པོའི་མཐར་མ་ལྷུང་།  འབྲས་བུ་འོད་གསལ་སྟོང་པ་ལ་སྣང་བ་ཀུན་རྫོབ་པའི་རྒྱས་བཏབ་པས་དོན་དམ་སྟོང་པའི་མཐར་མ་ལྷུང་བའོ། །དེ་ལྟ་བུའི་ལོངས་སྐུའི་ཟུང་འཇུག་ལ་བརྟན་པ་ཐོབ་པ་དང་།  སྤྲུལ་སྐུའི་ཟུང་འཇུག་བསྒོམ་པ་ནི།  དེ་ཡང་སྐད་ཅིག་ཙམ་
གྱི་གཞལ་ཡས་ཁང་གདན་བཅས་ཡེ་ཤེས་ཀྱི་རང་སྣང་ཙམ་གྱིས་སྤྲུལ་ལ།  དེའི་དབུས་སུ་བདག་ཉིད་གནས་ཏེ།  རང་གི་སྙིང་ག་ནས་འོད་ཀྱི་རིག་མ་རྡོ་རྗེ་དབྱིངས་ཀྱི་དབང་ཕྱུག་མ་ཕྱུང་ལ།  དེ་དང་སྙོམས་པར་ཞུགས་པའི་བྱང་ཆུབ་ཀྱི་སེམས་ཀྱི་བདེ་བ་
ཙམ་ལས་རང་གི་ལྷག་པའི་ལྷ་གང་ཡིན་པའི་སྤྲུལ་སྐུར་སྐད་ཅིག་གིས་བསྐྱེད་ལ།  རང་གི་མཚན་སྔགས་ཀྱིས་བསྐུལ་ཏེ།  སྤྲོ་བསྡུའི་རིམ་པས་བདག་ཉིད་ལ་བཅུག་པས་སྤྲུལ་པའི་སྐུར་བསྒྱུར་བ་ནི་དང་པོ་སྦྱོར་བའོ། །དེ་ནས་སྤྲུལ་སྐུ་དེ་ཡང་རང་གི་
འོད་ཀྱི་རིག་མ་དང་སྙོམས་པར་ཞུགས་པས་བྱང་ཆུབ་ཀྱི་སེམས་དང་བདེ་བ་ཙམ་ལས་ལྷ་སོ་གཉིས་སྐད་ཅིག་ཙམ་གྱིས་བསྐྱེད།  མཚན་སྔགས་ཀྱིས་བསྐུལ་ཏེ་ཕྱིར་སྤྲོས་མཛད་པ་མཛད།  སླར་བསྡུ་བའི་སེམས་ཀྱིས་རང་གནས་སུ་བཀོད་དོ། །ལྷ་དེ་
དག་ཐམས་ཅད་ཀྱང་རང་གི་ཕུང་པོ་ཁམས་དང་སྐྱེ་མཆེད་ལ་སོགས་པའི་ངོ་བོ་ཉིད་ཡིན་ཞིང་།  སྣང་ལ་རང་བཞིན་མེད་པར་བསྒོམ་པ་ནི་དཀྱིལ་འཁོར་རྒྱལ་མཆོག་གོ།  ཚུལ་དེ་ལ་གནས་པས་རྡོ་རྗེའི་བཟླས་པའི་སྒོ་ནས་ཞི་སོགས་ཀྱི་ལས་བསྒྲུབ་ཅིང་སེམས་ཅན་
10-13-28b


གྱི་དོན་མང་པོ་བྱེད་པ་ནི་ལས་རྒྱལ་མཆོག་སྟེ་སློབ་པའི་ཟུང་འཇུག་གི་ཏིང་ངེ་འཛིན་བསྒོམ་པའི་རིམ་པའོ། །ཚུལ་དེ་ལ་གནས་ནས་སྤྲོས་བཅས་དང་།  སྤྲོས་མེད་དང་།  ཤིན་ཏུ་སྤྲོས་མེད་ཀྱི་སྤྱོད་པ་གསུམ་གང་ཡང་རུང་བ་ལ་མན་ངག་བཞིན་བསླབས་པས་སྐུ་
གསུམ་དབྱེར་མེད་ཀྱི་ཏིང་ངེ་འཛིན་དངོས་གཞི་ཐོབ་པར་འགྱུར་ཏེ།  དེ་ལ་ཟུང་འཇུག་གི་སྐུ་དེ་ཉིད་རྣམ་པར་མི་རྟོག་པའི་ཡེ་ཤེས་ཀྱིས་རྒྱས་བཏབ་པས་ཆོས་ཀྱི་སྐུའོ། །ས་བཅུའི་བྱང་སེམས་རྣམས་རྡོ་རྗེ་འཆང་ཆེན་པོའི་གཟུགས་ཀྱི་ཆོས་ཀྱི་ལོངས་སྤྱོད་
ཀྱིས་རོ་མྱོང་བར་མཛད་པས་ལོངས་སྐུའོ། །དེ་ཉིད་སོ་སོ་སྐྱེ་བོ་ལས་དག་པ་རྣམས་ལ་ཞེ་སྡང་རྡོ་རྗེ་ལ་སོགས་པར་སྣང་ཞིང་སྤྲུལ་པ་སྣ་ཚོགས་པས་འགྲོ་བའི་དོན་བྱེད་པ་སྤྲུལ་པའི་སྐུ་སྟེ་སྐུ་གསུམ་ངོ་བོ་ཉིད་དབྱེར་མི་ཕྱེད་པའོ། །དེ་ལྟ་བུའི་ཚུལ་འདི་མཐོང་བའི་ཆོས་
ལ་མྱ་ངན་ལས་འདས་པའི་རིམ་པ་སྟེ།  རྣལ་འབྱོར་པ་བརྩོན་འགྲུས་ཅན་འབྱོར་བ་དང་ལྡན་ཞིང་།  གཡེང་བ་མེད་པ་རྣམས་ཀྱིས་ཚེ་འདི་ཉིད་ལ་ཡེ་ཤེས་ཀྱི་སྐུ་ཐོབ་པར་འགྱུར་བ་སྟེ།  ཇི་ལྟར་སྔོན་གྱི་དུས་ཀྱི་རྒྱལ་པོ་ཨིནྡྲ་བྷཱུ་ཏི་ཆེན་པོ་དང་འདྲ་བར་འགྱུར་
བ་ཡིན་ནོ། །གཉིས་པ་ལེ་ལོ་ཅན་བར་དོར་སངས་རྒྱ་བའི་མན་ངག་ནི།  རྣལ་འབྱོར་པ་གང་ཞིག །ཀུན་རྫོབ་ཀྱི་བདེན་པའི་གནས་སྐབས་སུ་སྤྱོད་པ་གསུམ་གང་ཡང་རུང་བ་ལ་མ་བསླབས་པར་འཆི་བའི་དུས་བྱེད་པར་འགྱུར་ན།  གཅིག་ཏུ་བྱེད་པའི་བསམ་
གཏན་གྱིས་གྲོལ་བར་བྱས་ཏེ།  དེ་ཡང་བདག་སྒྲུབ་པ་པོ་འཆི་བའི་སྔོན་དུ་སེམས་ཀྱི་འཕེན་པ་འདི་ལྟར་བཏང་སྟེ།  རང་ཉིད་ཀྱི་ས་ཆུ་ལ་ཐིམ་པ་ལ་སོགས་པ་རིམ་གྱིས་འཆར་བ་ཐམས་ཅད་སྟོང་པ་འོད་གསལ་མངོན་དུ་བྱ་སྟེ་ཏིང་ངེ་འཛིན་དེ་ལ་དུས་ཇི་སྲིད་འདོད་པར་
10-13-29a


གནས་ཏེ་གོམས་པར་བྱས་ལ།  དེ་ནས་བར་སྲིད་དེ་ཡེ་ཤེས་ཀྱི་སྐུ་ཟུང་འཇུག་ཏུ་བསྐྱེད་ལ།  དེ་སྤྲུལ་སྐུར་བསྒྱུར་ཏེ་དཀྱིལ་འཁོར་གྱི་འཁོར་ལོ་དང་བཅས་པར་བསྐྱེད་ལ་སྔ་མ་བཞིན་རྡོ་རྗེ་བཟླས་པས་འགྲོ་བའི་དོན་བྱ་བ་དང་།  སྤྱོད་པ་
གསུམ་གང་རུང་ལ་བསླབ་པ་དང་།  དངོས་གཞི་སྐུ་གསུམ་དབྱེར་མེད་ལ་བསླབས་པས།  དངོས་གྲུབ་ཀྱི་མཚན་མ་ཐོབ་ནས་མི་སློབ་པའི་ཟུང་འཇུག་སངས་རྒྱས་ཐོབ་པར་བྱའོ་སྙམ་པའི་སེམས་ཀྱི་འཕེན་པ་བཏང་ནས་འཆི་ཁ་མའི་མན་ངག་བསྒོམས་པས་ས་ཆུ་
ལ་ཐིམ་པ་ལ་སོགས་པའི་རྟགས་ཡན་ལག་ཐམས་ཅད་ཕྲ་བར་གྱུར་པ་ལ་སོགས་པའི་རིམ་གྱིས་འཆི་བ་ཤེས་རབ་ཀྱི་ཕ་རོལ་ཏུ་ཕྱིན་པ་སྤྲིན་མེད་པའི་ནམ་མཁའ་ལྟ་བུ་མངོན་དུ་བྱས་སྟེ།  ཇི་སྲིད་འདོད་ཀྱི་བར་དུ་མངོན་དུ་བྱས་ནས།  འོད་གསལ་དེ་ལས་སྒྱུ་མ་ལྟ་བུའི་
ཏིང་ངེ་འཛིན་གྱིས་བར་དོའི་སྲིད་པ་དེ་ཉིད་ཟུང་འཇུག་གི་སྐུར་བསྐྱེད་དེ།  དེ་སྤྲུལ་སྐུར་བསྒྱུར།  དཀྱིལ་འཁོར་གྱི་འཁོར་ལོ་དང་བཅས་པར་བསྐྱེད།  དེ་ལ་གནས་པས་རྡོ་རྗེའི་བཟླས་པ་ལ་སོགས་པས་སེམས་ཅན་གྱི་དོན་བྱེད་པ་དང་།  སྤྱོད་པ་གསུམ་གང་རུང་ལ་
བསླབས་པས།  དངོས་གྲུབ་ཀྱི་མཚན་ལྟས་རྣམས་འབྱུང་ཞིང་བར་དོ་ཉིད་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་འགྱུར་རོ། །དྲུག་པ་ནི་དེ་ལྟ་བུའི་བསླབ་ཚུལ་གང་རུང་ལ་བསླབས་པས་མཐར་ཕྱིན་པའི་རྟགས་གསུམ་འབྱུང་སྟེ།  རྣལ་འབྱོར་
པ་དེ་དབུགས་འབྱུང་རྔུབ་ཙམ་གྱིས་ཀྱང་སེམས་ཅན་གྱི་དོན་བྱེད་ནུས་པ་དང་།  ཅི་དང་ཅི་མཐོང་བ་ཐམས་ཅད་ཟག་མེད་ཀྱི་བདེ་བ་ཆེན་པོའི་རང་བཞིན་དུ་འགྱུར་བ་དང་།  བླང་དོར་བདག་གཞན་ལ་སོགས་པའི་ཐ་སྙད་ཀྱི་རྣམ་རྟོག་ཐམས་ཅད་ཞི་བ་དང་།  སངས་
10-13-29b


རྒྱས་རྣམས་ཀྱིས་ལུང་བསྟན་པར་འགྱུར་བའོ། །བདུན་པ་ཕན་ཡོན་ནི།  ཏིང་ངེ་འཛིན་འདི་མཐར་ཕྱིན་པའི་སྐད་ཅིག་མ་གཉིས་པ་ལ་མི་སློབ་པའི་ཟུང་འཇུག་རྡོ་རྗེ་འཆང་ཆེན་པོ་ཐམས་ཅད་མཁྱེན་པའི་གོ་འཕང་འཐོབ་པར་འགྱུར་བ་སྟེ།  རིམ་ལྔར་འདི་ནི་རྫོགས་པའི་རྣལ་
འབྱོར་པ། །རྡོ་རྗེ་འཛིན་པ་ཆེན་པོ་སྟེ། །རྣམ་པ་ཀུན་གྱི་མཆོག་ལྡན་པའི། །ཐམས་ཅད་མཁྱེན་པར་དེ་ནས་འགྱུར། །ཞེས་སོ།  ༈ །གསུམ་པ་རྗེས་ཀྱི་རྣལ་འབྱོར་གྱིས་ཉམས་དང་རྟོགས་པ་ཕྱོགས་མེད་དུ་རྩལ་སྦྱོང་བ་ནི།  གཞིའི་གནས་ལུགས་འཆི་བ་
དོན་དམ་པའི་བདེན་པ་རྫོགས་རིམ་གྱི་སྦྱང་གཞིར་གསུངས་པའི་འབྱུང་བཞིའི་ཐིམ་རིམ་དང་།  སེམས་སྣང་མཆེད་ཐོབ་གསུམ་གྱི་ཐིམ་རིམ་རྣམས་ངོ་སྤྲད།  ལམ་གྱི་བགྲོད་ཚུལ་ཉམས་ཇི་ལྟར་སྐྱེ་བའི་ཚུལ་རྣམས་ཤེས་པར་བྱས་ནས།  མཐར་སྣང་བ་ཐམས་ཅད་ཟུང་
འཇུག་གི་ཡེ་ཤེས་སུ་ངོ་སྤྲད།  དེ་དག་ལ་ཡིད་ཆེས་པའི་ལུང་ཁུངས་དང་བཅས་ཏེ།  ཉམས་དང་རྟོགས་པ་ཕྱོགས་མེད་དུ་རྩལ་སྦྱང་བར་བྱའོ། །གཞན་ཡང་འཕགས་པ་ཀླུའི་བློས།  བསྐྱེད་པའི་རིམ་པ་རིམ་པ་གཅིག་དང་།  རྫོགས་པའི་རིམ་པ་ལམ་ལྔ་སྟེ།  རིམ་པ་དྲུག་པོ་
རེ་རེའི་ནང་དུ་གཞན་ལྔ་ལྔ་འདུས་པའི་ཚུལ་རྣམས་ལ་ངེས་ཤེས་བསྐྱེད་པའི་སྒོ་ནས་བོགས་དབྱུང་བར་བྱ་སྟེ།  དེ་ལ་དང་པོ་བསྐྱེད་པའི་རིམ་པ་ལ་མཚོན་ན་ཕྲ་མོའི་རྣལ་འབྱོར་གྱི་དུས་སུ།  སྣའི་རྩེ་མོར་ཞེས་བྱ་བ་ལ་སོགས་པས་བསྐྱེད་པའི་རིམ་པའི་རྡོ་རྗེ་བཟླས་པའོ། །རང་བཞིན་
སྣང་བ་ཞེས་བྱ་བ་འདིས་ནི་བསྐྱེད་པའི་རིམ་པའི་སེམས་ལ་ངེས་པར་རྟོག་པའོ། །དེ་ཁོ་ན་ཉིད་དྲུག་གི་ནང་དུ་བསྐྱེད་པའི་རིམ་པའི་བདག་བྱིན་གྱིས་བརླབས་པའོ། །དོན་དམ་བདེན་པ་ཞེས་ཀྱང་བྱ་ཞེས་པ་ལ་སོགས་པས་ནི་བསྐྱེད་པའི་རིམ་པའི་མངོན་པར་བྱང་ཆུབ་པའོ། །
10-13-30a


ཡོངས་སུ་དག་པའི་ལྷའི་དེ་ཁོ་ན་ཉིད་འཆད་པ་ལས་ནི་བསྐྱེད་པའི་རིམ་པའི་ཟུང་འཇུག་གོ།  དེ་བཞིན་དུ་རྫོགས་པའི་རིམ་པ་ལྔ་པོ་རེ་རེའི་ནང་དུ་ཡང་།  གཞན་ལྔ་ལྔ་འདུས་པའི་ཚུལ་ཤེས་པར་བྱའོ། །འདུས་པ་ལ་སྦྱངས་པའི་བླ་མ་ཕྱི་མ་ཁ་
ཅིག །བཤད་པ་འདི་ཉིད་རྒྱུ་མཚན་དུ་བྱས་ནས།  རིམ་པ་ཁོངས་བསྡུ་ཀླུ་བྱང་གིས་མཛད་པ་ཡིན་མིན་ཐེ་ཚོམ་ཟའོ་ཞེས་གསུངས་པ་ནི།  མ་འོངས་པ་ན་འདི་ལྟ་བུའི་དོགས་པ་བྱུང་གིས་དོགས་ནས།  སློབ་དཔོན་ཉིད་ཀྱི་གཞུང་ལས།  མི་ཕམ་འཕགས་
པས་སྦྱིན་སོགས་ལ། །དབྱེ་བ་སུམ་ཅུ་དྲུག་བདག་ཉིད། །ཇི་སྐད་གསུངས་པ་དེ་བཞིན་འདིར། །རིམ་རྣམས་དབྱེ་གསལ་འདིར་བརྗོད་བྱ། །ཞེས་གསུངས་པ་འདིས་དོགས་པ་དེ་ངེས་པར་སེལ་དགོས་སོ། །དེས་ན་མགོན་པོ་བྱམས་པས།  སྦྱིན་
སོགས་དྲུག་པོ་རེ་རེའི་ནང་དུ་དྲུག་དྲུག་འདུས་ཚུལ་དང་།  འདིར་རིམ་པ་དྲུག་པོ་རེ་རེའི་ནང་དུ་རིམ་པ་དྲུག་དྲུག་འདུས་ཚུལ་དང་།  རྣལ་འབྱོར་དབང་ཕྱུག་གི་མན་ངག་ལས།  དབང་བཞི་པོ་རེ་རེའི་ནང་དུ་དབང་བཞི་བཞི་འདུས་ཚུལ་དང་།  བདེ་མཆོག་གསང་
མཐའི་མན་ངག་ལས།  སྣང་བའི་དངོས་པོ་ཡོངས་སུ་རྫོགས་པ་གཅིག་ལ་སྐུ་གསུམ་སྦྱར་བ་དང་།  མངོན་པར་རྟོགས་པ་ཚར་གཅིག་ལ་སྐུ་གསུམ་སྦྱར་བ་དང་།  འཁོར་ལོ་གསུམ་ལ་སྐུ་གསུམ་སྦྱར་བ་དང་།  ལྷ་རེ་རེ་ལ་ཡང་སྐུ་གསུམ་སྦྱར་ཚུལ་གསུངས་
པ་རྣམས་དོན་གྱི་གནད་གཅིག་པས།  ཐེག་པ་ཆེན་པོའི་ཆོས་ཤིན་ཏུ་ཟབ་པའི་རྒྱུ་མཚན་དུ་བྱས་ནས་ངེས་པའི་ཤེས་པ་ཁྱད་པར་ཅན་སྐྱེ་བའི་རྒྱུར་འགྲོ་བར་བྱའོ། །གསུམ་པ་ཉམས་སུ་བླངས་པའི་འབྲས་བུ་ནི།  མཆོག་དང་ཐུན་མོང་གི་དངོས་གྲུབ་
10-13-30b


གཉིས་རབ་འབྲིང་དུ་བྱས་ན་གསུམ་སྟེ།  དཔལ་ཡེ་ཤེས་རྡོ་རྗེ་ཀུན་ལས་བཏུས་པ་ལས།  ཞི་སོགས་བྱ་བའི་ཆོ་ག་དང་། །དེ་བཞིན་གྲུབ་པ་བརྒྱད་དང་ནི། །མཆོག་ནི་སངས་རྒྱས་ཀྱང་ཡིན་ནོ། །ཞེས་པ་དང་།  རྒྱུད་ཕྱི་མ་ལས།  མི་སྣང་ལ་སོགས་དངོས་
གྲུབ་ནི། །ཐ་མལ་པ་ཞེས་བཤད་པ་ཡིན། །སངས་རྒྱས་ཉིད་བསྒྲུབ་སངས་རྒྱས་ཀྱི། །དངོས་གྲུབ་མཆོག་ཅེས་གསུངས་པ་ཡིན། །ཞེས་དང་།  སྐུ་ཡི་དབང་ཕྱུག་གསུང་གི་དབང་ཕྱུག་དང་། །དེ་བཞིན་དུ་ནི་ཐུགས་ཀྱི་དབང་ཕྱུག་དང་། །རྫུ་འཕྲུལ་
ཀུན་འགྲོ་གནས་ཀྱི་དབང་ཕྱུག་དང་། །ཅི་འདོད་བསྐྱེད་དང་ཡོན་ཏན་བརྒྱད་པའོ། །ཞེས་སོ། །དེ་ལ་མཆོག་གི་དངོས་གྲུབ་ནི།  ཡང་དག་པར་རྫོགས་པའི་སངས་རྒྱས་ཟུང་འཇུག་མི་སློབ་པ་ཐམས་ཅད་མཁྱེན་པའི་སྐུ་གསུམ་དབྱེར་མེད་པའོ། །དེ་ལ་ཆོས་ཀྱི་
སྐུ་ནི་ཆོས་ཐམས་ཅད་ཀྱི་དེ་བཞིན་ཉིད་གློ་བུར་གྱི་དྲི་མ་མཐའ་དག་དང་བྲལ་བའོ། །དེ་ལ་ཟག་པ་མེད་པའི་ཤེས་རབ་ཀྱིས་མི་དམིགས་པའི་ཚུལ་གྱིས་དམིགས་པ་སྟེ་ཤེས་བྱ་དང་ཤེས་པ་རོ་གཅིག་པར་གྱུར་པ་ཆུ་ལ་ཆུ་བཞག་པ་དང་མར་ལ་མར་ཐིམ་པ་བཞིན་དུ་
མཚན་མ་ཐམས་ཅད་དང་བྲལ་བའི་ཆོས་ཀྱི་དབྱིངས་དེ་ལ་ཇི་ལྟ་བ་བཞིན་དུ་འཛིན་པའི་ཤེས་རབ་ཀྱིས་དམིགས་པའི་ཤེས་བྱ་མ་གྲུབ་པས་ཡེ་ཤེས་མི་འཇུག་ལ་ཤེས་བྱ་ཇི་ལྟ་བ་བཞིན་དུ་སེམས་རབ་ཏུ་ཞི་བ་ནི་ཆོས་ཀྱི་དབྱིངས་ཀྱི་ཚུལ་ཐམས་ཅད་ཇི་ལྟ་བ་བཞིན་དུ་གསལ་
བ་ཁོ་ནར་མཐོང་ཞེས་བྱ་ལ།  གནས་སྐབས་དེའི་ཚེ་ན་ཀུན་རྫོབ་ཀྱི་ཤེས་པ་རང་རིག་པ་སྒྱུ་མ་ལྟ་བུ་དེ་ཡང་རབ་ཏུ་ཞི་བའི་ཕྱིར་སྤྲོས་པའི་མུན་པ་རབ་ཏུ་ནུབ་པའི་ཕྱིར་རོ། །དེ་ནི་ཆོས་སྐུའོ། །དེའི་རྗེས་ལ་སྒྲིབ་པའི་ས་བོན་ཆ་ཕྲ་བ་དང་བྲལ་བའི་རྣམ་པར་གྲོལ་
10-13-31a


བའི་ལམ་གྱི་མཚན་ཉིད་སྔར་མཉམ་པར་བཞག་པའི་སེམས་ཀྱི་སྐད་ཅིག་གི་རྒྱུད་ལ་འབྱུང་བ་སྐྱེ་སྟེ།  དེས་ནམ་མཁའ་དང་མཉམ་པའི་རྒྱུ་དང་འབྲས་བུ་བསྟན་པའི་རྒྱུ་འབྲས་ཀྱི་ཆོས་མཐའ་དག་མངོན་སུམ་དུ་བྱེད་དོ། །དེ་ནི་མེ་ལོང་
ལྟ་བུའི་ཡེ་ཤེས་ཞེས་བྱ་སྟེ།  མེ་ལོང་གཡའ་དག་པ་ལ་སྔ་ན་མེད་པ་གཟུགས་ཀྱི་རྣམ་པ་ཐམས་ཅད་སྣང་བ་བཞིན་དུ་དྲི་མ་དང་བྲལ་བའི་དབང་གིས་དུས་གསུམ་དུ་བསྡུས་པའི་ཤེས་བྱ་ཐམས་ཅད་རབ་ཏུ་སྣང་སྟེ།  ཤེས་བྱ་རྣམ་པ་དང་ལྡན་པའི་ཚུལ་
དུ་སྣང་བ་ནི་མི་མཁྱེན།  ཤེས་བྱ་མཐའ་མེད་པའི་ཚུལ་དུ་མཁྱེན་པའོ། །ཡེ་ཤེས་དེ་ནི་ལོངས་སྤྱོད་རྫོགས་པའི་སྐུ་ཡིན་ཏེ་གཟུགས་ཀྱིས་བསྡུས་པའོ། །གཟུགས་སྣང་བ་བདག་པོའི་རྐྱེན་ཡིན་པ་དང་གཟུགས་ཀྱི་རྣམ་པར་རིག་པའི་མཚན་ཉིད་
ཅན་ཡིན་པས་སོ། །དེ་ནི་ནམ་མཁའ་ཆེན་པོ་ལྟར་རྟག་ཏུ་གནས་པ་སྟེ།  རེས་འགའ་ཆད་པ་ལ་བརྟེན་པ་མ་ཡིན་ནོ། །མཉམ་པ་ཉིད་ཀྱི་ཡེ་ཤེས་ནི་སྨོན་ལམ་དང་དགེ་བའི་ཚོགས་དཔག་ཏུ་མེད་པས་རབ་ཏུ་བསྒྲུབས་པའི་ཡེ་ཤེས་ཆེན་པོའོ། །དེ་
ལ་ནི་བདག་དང་གཞན་གྱི་རྒྱུད་ལ་ཐ་དད་དུ་མི་འཛིན་པར་ལྟ་བའི་ཤེས་པ་ངར་འཛིན་གྱིས་འཆིང་བའི་གཉེན་པོར་འགྱུར་བ་བདག་དང་གཞན་ལ་མཉམ་པ་ཉིད་དུ་འཛིན་པའི་བྱང་ཆུབ་ཀྱི་སེམས་མཐར་ཕྱིན་པ་དེ་ནི་མཉམ་པ་ཉིད་ཀྱི་ཡེ་ཤེས་ཞེས་བྱའོ། །སོ་སོར་
རྟོག་པའི་ཡེ་ཤེས་ནི་ཤེས་བྱ་ཇི་ལྟ་བ་དང་།  ཇི་སྙེད་པ་དང་ཆོས་རང་དང་སྤྱིའི་མཚན་ཉིད་ཀྱི་སྒོ་ནས་འཛིན་པའི་མཚན་ཉིད་དོ། །ཡེ་ཤེས་དེ་གཉིས་ནི་མེ་ལོང་ལྟ་བུའི་ཡེ་ཤེས་ལ་བརྟེན་ཏེ།  རྒྱ་མཚོ་ཆེན་པོ་ལ་རླབས་བརྟེན་པ་བཞིན་ནོ། །
10-13-31b


དེ་ལྟ་བུའི་རྟེན་དེ་དང་བརྟེན་པའི་ཡེ་ཤེས་གསུམ་པོ་དེ་ནི་ལོངས་སྐུའོ། །དེ་ལས་ནི་ལྷུན་གྱིས་གྲུབ་ཅིང་རྒྱུན་མི་འཆད་པར་འཇུག་པའི་ཕྲིན་ལས་ཀྱི་རང་བཞིན་བྱ་བ་གྲུབ་པའི་ཡེ་ཤེས་སྤྲུལ་པའི་སྐུ་རབ་ཏུ་འབྱུང་སྟེ།  ལོངས་སྐུའི་དབང་གིས་སྐལ་བ་བཞིན་དུ་
མཛད་པ་མཐའ་ཡས་པར་འཇུག་པའི་མཚན་ཉིད་དོ། །འདི་ནི་ཐུགས་རྗེ་ཆེན་པོའི་བདག་ཉིད་ལས་བྱུང་བ།  འདི་ནི་གཞན་གྱི་རྣམ་པར་རིག་པའི་ཆས་བསྡུས་པའོ། །དེ་ནི་དུས་གསུམ་ཐམས་ཅད་དུ་ཉམས་པ་མེད་པའོ། །དེ་ཡང་།  འཇའ་ཚོན་ལྟ་བུའི་ལོངས་
སྐུ་ལས། །འབད་པ་མེད་པར་སྤྲུལ་པའི་སྐུ། །མཐའ་མེད་རྡུལ་ཕྲན་ཇི་བཞིན་པས། །སེམས་ཅན་དོན་ཀུན་བསྒྲུབ་པར་མཛད། །ཅེས་སོ། །ཞེས་ཟུང་འཇུག་གསལ་བའི་སྒྲོན་མེ།  རྗེ་བླ་མ་ཐམས་ཅད་མཁྱེན་པ་ཀུན་དགའ་བཟང་པོའི་ཞལ་སྔ་ནས། 
ཐོག་མའི་མཚན་དོན།  མཆོད་བརྗོད།  རྩོམ་པར་དམ་བཅའི་ཚིགས་སུ་བཅད་པ་དང་།  དངོས་གཞི་ངག་དབེན་ནས་ཟུང་འཇུག་གི་བར་གྱི་ཁྲིད་ཡིག་མཛད་ནས་རྩོམ་འཕྲོ་ལུས་པ་ལ།  གོང་འོག་གཞན་རྣམས་ཞབས་ཏོག་གི་ཚུལ་དུ་ཁ་བསྐངས་བ་འདི་ནི་རྗེ་བླ་མ་
དེ་ཉིད་ཀྱི་ཞབས་རྡུལ་སྤྱི་བོས་བླངས་པ་ཤཱཀྱའི་དགེ་སློང་བསོད་ནམས་སེང་གེས་བྲིས་པའོ། །བླ་མའི་གསུང་རབ་ཟུང་འཇུག་གསལ་སྒྲོན་གྱི། །ཁ་བསྐང་བཅས་ཏེ་ཚང་བར་བྲིས་པ་ལས། །བྱུང་བའི་དགེ་བས་མཁའ་མཉམ་འགྲོ་བ་ཀུན། །ཟུང་འཇུག་
ཡེ་ཤེས་ཆེ་ལ་རོལ་པར་ཤོག །ཤུ་བྷཾ།།  ༈    འདི་བསྒྲུབས་པ་ལས་བྱུང་བ་ཡི། །དགེ་བ་གང་ཞིག་ཐོབ་པ་དེས། །མཁའ་མཉམ་སེམས་ཅན་ཐམས་ཅད་ཀྱིས། །འཇམ་དབྱངས་ཡེ་ཤེས་ཐོབ་པར་ཤོག།    །།
10-13-32a


རྒྱལ་བ་ཀུན་གྱི་གསང་ཆེན་མཛོད། །བླ་མེད་རྡོ་རྗེ་ཐེག་པ་ཡི། །བསྟན་པ་རྙེད་དང་བཀུར་སྟི་དང་། །བཅས་སྟེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།།    །།
10-13-32b


empty page
10-14-1a


༄༅།  །རྡོ་རྗེ་ཐེག་པ་ལ་ལོག་སྨྲ་ཚར་གཅོད་པ་རིགས་པའི་མཚོན་ཆ་བཞུགས། །
10-14-1b


༄༅།  །བློ་ཆེན་གང་གི་མཁྱེན་པའི་འོད་སྟོང་གིས། །ལོག་པར་སྨྲ་བའི་ཚང་ཚིང་ཀུན་བསྲེགས་ནས། །མ་ནོར་ཆོས་དོན་སྣང་བ་རྒྱས་མཛད་པ། །ཡོངས་འཛིན་ནམ་མཁའི་ནོར་བུས་བདག་སྐྱོངས་ཤིག །གང་
གི་དྲིན་ལས་ལམ་བཟང་བདུད་རྩི་དང་། །རྟོག་གེའི་དུག་ཆུ་སོ་སོར་འབྱེད་པ་ཡི། །བློ་གྲོས་ནུས་པ་ཐོབ་པས་དགག་སྒྲུབ་ཀྱི། །མཚོན་ཆ་འདི་ནི་ཁོ་བོས་བསྟར་བར་བྱ། །བློ་གྲོས་ཆེན་པོས་གསུང་རབ་མ་ལུས་པའི་དེ་ཁོ་ན་ཉིད་
གཟིགས་ཤིང་ཐུགས་རྗེ་ཆེན་པོས་ཁམས་གསུམ་གྱི་འགྲོ་བ་མཐའ་དག་ལ་བུ་གཅིག་པ་ལྟར་བརྩེ་བའི་ཐུགས་མངའ་བ།  འགྲན་ཟླ་མེད་པའི་མཁས་པ་ཆེན་པོ་བདག་ཅག་གི་དཔལ་ལྡན་བླ་མ་དམ་པའི་ཞལ་སྔ་ནས་རྣལ་
འབྱོར་བླ་ན་མེད་པའི་ལམ་གྱི་གཙོ་བོ་ནི།  བསྐྱེད་རྫོགས་གཉིས་ཡིན་ཅིང་བསྐྱེད་རིམ་གྱི་གནད་ཀྱང་སྦྱང་གཞི་སྦྱོང་བྱེད་སྦྱར་བ་ཡིན་ལ།  དེ་ཉིད་རྒྱལ་བ་རྡོ་རྗེ་འཆང་གིས་རྒྱུད་སྡེ་ལས་གསུངས།  འཕགས་ཡུལ་གྱི་གྲུབ་ཆེན་
10-14-2a


རྣམས་ཀྱིས་བཀྲལ།  དེ་དག་གི་མན་ངག་དང་ལྡན་པའི་བོད་ཀྱི་མཁས་པ་སྔ་མ་རྣམས་ཀྱི་བཞེད་པ་ཕྱོགས་གཅིག་པ་ཞིག་བྱུང་ན་གནད་མི་འཁྲུལ་བས་ཉམས་སུ་བླང་བར་བྱ་བ་ཡིན་ལ་དེ་ལས་བཟློག་
པ་ནི་གནད་འཁྲུལ་པས་བསྒྲུབ་དུ་མི་རུང་བར་དགོངས་ནས།  བསྐྱེད་རིམ་གྱི་སྦྱང་གཞི་སྦྱོང་བའི་འདོད་ཚུལ་ལ།  བོད་ཀྱི་མཁས་པ་སྔ་ཕྱི་དག་གི་བཞེད་པ་མི་འདྲ་བ་སོ་སོར་ཕྱེ་བའི་བསྐྱེད་རིམ་གྱི་གྲུབ་མཐའི་ཤན་འབྱེད་
ཅེས་བྱ་བའི་བསྟན་བཅོས་འདི་མཛད་པ་ལས།  ཐོག་མར་སྔོན་གྱི་དགེ་བའི་བཤེས་གཉེན་སྐད་གཉིས་སྨྲ་བའི་དབང་པོ་རྗེ་བཙུན་འགོས་དང་།  དཔལ་ལྡན་འདུས་པའི་སྲོལ་འཛིན་རྔོག་ཉི་མ་སེང་གེ་དང་།  བོད་ཡུལ་བསྟན་པའི་
བདག་པོ་རྗེ་བཙུན་ས་སྐྱ་པ་ཡབ་སྲས་རྣམས་ཀྱི་བཞེད་པ་བཀོད་པ་རྣམས་ནི་སྒྲུབ་ཐབས་མི་འདྲ་བའི་དབང་གིས་སྦྱོར་ཚུལ་གྱི་གོ་རིམ་ཅུང་ཟད་མི་འདྲ་བ་དང་།  མན་ངག་ཟབ་མི་ཟབ་ཀྱི་ཁྱད་པར་གྱིས་སྦྱོར་ཚུལ་ཞིབ་མི་ཞིབ་ཅུང་ཟད་
10-14-2b


ཙམ་མ་གཏོགས་པ་དོན་གྱི་གནད་གཅིག་པ་ཉིད་ཡིན་ཏེ།  ཐམས་ཅད་ཀྱིས་ཀྱང་མ་དག་པའི་བློ་ལ་ཐ་མལ་དུ་ཤར་བའི་ཕུང་ཁམས་སྐྱེ་མཆེད་རྣམས་སྦྱང་གཞི་དང་།  རྣལ་འབྱོར་ཆེན་པོས་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་བསྐྱེད་
ཆོག་དང་བཅས་པ་རྣམས་སྦྱོང་བྱེད་དུ་བྱས་ནས།  སྦྱོང་ཚུལ་མ་དག་པའི་ཕུང་ཁམས་སྐྱེ་མཆེད་རྣམས་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་བསྐྱེད་ཆོག་དང་བཅས་པར་སྣང་བ་བསྒྱུར་བའི་ཚུལ་གྱིས་སྦྱོང་བར་མཚུངས་པའི་ཕྱིར་རོ། །དེ་
ཉིད་བོད་ཀྱི་རྡོ་རྗེ་འཛིན་པ་སྔར་བྱོན་པ་གཞན་དག་གིས་ཀྱང་བཞེད་པ་ཕྱོགས་གཅིག་པ་ཉིད་ཡིན་ཏེ།  དེ་དག་གི་མཛད་པའི་སྒྲུབ་ཐབས་རྣམས་ལས།  མངོན་རྟོགས་དངོས་གཞིར་མ་ཟད་སྤྱོད་ལམ་ལ་འཇུག་པའི་ཚེའང་ཅི་དང་ཅིར་སྣང་
བ་ཐམས་ཅད་ལྷ་དང་།  ངག་ཏུ་བརྗོད་པ་ཐམས་ཅད་སྔགས་དང་།  སེམས་ཀྱིས་བསམ་པ་ཐམས་ཅད་ཡེ་ཤེས་ཀྱི་ཆོ་འཕྲུལ་དུ་ཤེས་པར་བྱས་ལ་སྤྱོད་ལམ་ལ་འཇུག་གོ་ཞེས་གསུངས་པར་མཚུངས་པའི་ཕྱིར་རོ། །དེ་ཉིད་འཕགས་ཡུལ་གྱི་
གྲུབ་ཆེན་རྣམས་ཀྱིའང་བཞེད་པ་ཕྱོགས་གཅིག་པ་ཉིད་ཡིན་ཏེ།  རྣལ་འབྱོར་གྱི་དབང་ཕྱུག་ལཱུ་ནག་དྲིལ་གསུམ་གྱིས་རགས་པ་ཕུང་ཁམས་སྐྱེ་མཆེད་ཀྱི་ཆོས་བཅུ་བདུན་རྣམ་སྣང་ལ་སོགས་པའི་ལྷ་བཅུ་བདུན་གྱི་ངོ་བོ་དང་།  སོ་དང་སེན་མོ་ལ་
སོགས་པའི་ལུས་ཀྱི་ཆ་ཤས་ཉི་ཤུ་རྩ་བཞི་ཐོད་པའི་དུམ་བུ་ལ་སོགས་པའི་དཔའ་བོ་ཉི་ཤུ་རྩ་བཞིའི་ངོ་བོ་དང་།  ཕྲ་བ་ལུས་ཀྱི་རྩ་ཁམས་ཐམས་ཅད་དཔའ་བོ་དང་དཔའ་མོའི་ངོ་བོ་ཡིན་པར་གསུངས་པའི་ཕྱིར་དང་།  རྣལ་འབྱོར་གྱི་
10-14-3a


དབང་ཕྱུག་ཌོམྦྷི་ཧེ་རུ་ཀ་དང་།  དཔལ་ལྡན་མི་ཐུབ་ཟླ་བ་དང་།  གྲུབ་ཆེན་པདྨ་བཛྲ་ལ་སོགས་པ་ཀྱེ་རྡོ་རྗེའི་སྲོལ་འབྱེད་རྣམས་ཀྱིས་ཀྱང་རྩ་རྒྱུད་ལས།  གཟུགས་ཕུང་རྡོ་རྗེ་མ་
ཡིན་ཏེ། །ཞེས་སོགས་གསུངས་པ་ལྟར།  མ་དག་པའི་ཕུང་ཁམས་སྐྱེ་མཆེད་རྣམས་ཀྱེ་རྡོ་རྗེ་དང་བདག་མེད་མའི་དཀྱིལ་འཁོར་གྱི་ལྷ་རྣམས་ཀྱི་ངོ་བོར་རྣམ་པར་དག་པར་གསུངས་པའི་ཕྱིར་དང་།  འཕགས་པ་ཀླུ་སྒྲུབ་ཀྱིས་ཀྱང་འདུས་པའི་ལུས་
དཀྱིལ་གྱི་སྐབས་སུ།  རྣམ་སྣང་མཛད་ཀྱི་ས་བོན་ནི། །ཁ་དོག་དཀར་པོ་ཡི་གེ་ཨོཾ། །གཟུགས་སུ་ངོ་བོ་ཉིད་ཀྱིས་ནི། །སྔགས་ཤེས་པས་ནི་སྤྱི་བོར་འགོད། །ཅེས་སོགས་ལུས་དཀྱིལ་གྱི་ལྷ་རྣམས་གཟུགས་ཕུང་ལ་སོགས་པའི་སྦྱང་གཞི་རྣམས་
དང་ངོ་བོ་དབྱེར་མེད་པར་གསུངས་པ་དང་།  ཉེར་བསྡུའི་སྐབས་སུ།  དེ་བྱུང་འགྲོ་ཀུན་རྡོ་རྗེ་སེམས་དཔར་བསམ། །ལངས་ནས་འགྲོ་ལ་ཇི་བཞིན་སྤྱད་པར་བྱ། །ཞེས་གསུངས་པའི་ཕྱིར་དང་།  སློབ་དཔོན་ཨཱཪྱ་དེ་བས་སྤྱོད་བསྡུས་སྒྲོན་མེར་ཡང་འདི་ལྟ་བུའི་
ཕུང་པོ་དང་ཁམས་དང་སྐྱེ་མཆེད་རྣམས་ནི་ཐོག་མ་མེད་པ་ནས་ཐ་མལ་པའི་ང་རྒྱལ་གྱིས་གནས་པ་རྣམས་ནི་ད་ལྟར་དེ་བཞིན་གཤེགས་པ་ཐམས་ཅད་ཀྱི་རྡུལ་ཕྲ་རབ་ལས་གྲུབ་པའི་ངོ་བོ་ཉིད་དུ་བསྟན་ཏེ།  ཞེས་སོགས་མདོར་བསྟན་ནས་རྒྱས་པར་བཤད་པར། 
ཕུང་པོ་ལྔ།  ཁམས་བཞི།  དབང་པོ་ལྔ།  ཡུལ་ལྔ་སྟེ་ཆོས་བཅུ་དགུ་པོ་ལ་རིགས་ལྔ་ལྔར་ཕྱེ་བས་དགུ་བཅུ་གོ་ལྔ་དང་།  གཞི་དུས་ཀྱི་ཡེ་ཤེས་ལྔ་སྟེ་བརྒྱ་པོ་རྣམས་རིགས་ལྔ་ཡུམ་བཞི།  སྒྲིབ་སེལ་དང་།  ཀུན་བཟང་མ་གཏོགས་པ་སེམས་དཔའ་དྲུག། 
10-14-3b


རྡོ་རྗེ་མ་ལྔ་སྟེ་ཉི་ཤུ་པོ་རྣམས་རིགས་ལྔ་ལྔར་ཕྱེ་ནས་དེའི་ངོ་བོར་བསྒོམ་པར་གསུངས་པའི་ཕྱིར་དང་།  སློབ་དཔོན་ཀླུའི་བློས་རྣམ་གཞག་རིམ་པར་ཟངས་ཀྱི་དངོས་པོ་གཅིག་ཉིད་ཆོལ་ཟངས་དང་།  ཟས་ཀྱི་སྣོད་དང་།  དེ་བཞིན་གཤེགས་པའི་སྐུ་
གཟུགས་སུ་རིམ་པ་བཞིན་གནས་འགྱུར་བ་ལྟར།  ཐ་མལ་པའི་ལུས་འདི་ཡང་དུག་གསུམ་གྱིས་བརླན་པས་འཁོར་བའི་རྒྱུ་དང་།  དབང་བསྐུར་ནས་རང་བཞིན་ཤེས་པས་ལྷའི་ངོ་བོ་དང་།  མཐར་ཐམས་ཅད་མཁྱེན་པར་རིམ་པ་བཞིན་གནས་འགྱུར་
བར་གསུངས་པའི་ཕྱིར་དང་།  སློབ་དཔོན་ཟླ་བ་གྲགས་པས་སྒྲོན་གསལ་ལེའུ་བཅུ་བདུན་པར།  མདོར་ན་ཕུང་པོ་ལྔ་རྣམས་ནི། །ཞེས་པའི་འགྲེལ་པར།  སྦྱང་གཞིའི་ཆོས་རྣམས་འདུས་པའི་ལྷ་རྣམས་ཀྱི་ངོ་བོར་གསུངས་པའི་ཕྱིར་རོ། །
དེ་ཉིད་རྒྱལ་བ་རྡོ་རྗེ་འཆང་གིས་གསུངས་པའི་རྣལ་འབྱོར་ཆེན་པོའི་རྒྱུད་སྡེ་རྣམས་ཀྱི་ཡང་དགོངས་པ་ཕྱོགས་གཅིག་པ་ཉིད་ཡིན་ཏེ།  རྣལ་འབྱོར་མ་ཀུན་སྤྱོད་ཀྱི་ལེའུ་དང་པོ་ལས།  དེ་ལ་ཐོག་མར་རྣལ་འབྱོར་གྱི་དབང་ཕྱུག་གིས་ཕུང་པོ་ལྔའི་ང་རྒྱལ་བསྐྱེད་
པར་བྱ་སྟེ།  གཟུགས་ཀྱི་ཕུང་པོ་ལ་ནི་རྣམ་པར་སྣང་མཛད་དེ།  ཞེས་པ་ནས།  དེ་ལྟར་ཕུང་པོ་ལྔ་དང་ཁམས་དང་སྐྱེ་མཆེད་རྣམས་ལ་ལྷའི་ང་རྒྱལ་བསྐྱེད་པར་བྱའོ་ཞེས་པའི་བར་གྱིས་ཕུང་ཁམས་སྐྱེ་མཆེད་ཀྱི་ཆོས་བཅུ་བདུན་རྣམ་སྣང་ལ་སོགས་པའི་ལྷ་བཅུ་བདུན་གྱི་
ངོ་བོར་གསུངས།  ལེའུ་བཞི་པར།  སོ་དང་སེན་མོ་ལ་ནི་ཐོད་པ་ཕྱེད་པའོ་ཞེས་པ་ནས་སྣབས་ལ་ནི་རྡོ་རྗེ་སེམས་དཔའོ་ཞེས་པའི་བར་གྱིས་ལུས་ཀྱི་ཆ་ཤས་ཉེར་བཞི་པོ་དཔའ་བོ་ཉེར་བཞིའི་ངོ་བོར་གསུངས།  ལེའུ་ལྔ་པར།  པུ་ཞེས་བྱ་བ་ནི།  པུ་ལིར་
10-14-4a


མ་ལ་ཡ་ན་ཐོད་པའི་དུམ་བུ་དང་རབ་ཏུ་གཏུམ་མོའོ། །ཛཱ་ཞེས་བྱ་བ་ནི།  ཛཱ་ལན་དྷ་ར་ན་མ་ཧཱ་ཀཾ་ཀ་ལ་དང་ཙཎྜཱཀྵིའོ་ཞེས་སོགས་ལུས་ཀྱི་རྩ་ཁམས་ཉེར་བཞི་འཁོར་ལོ་གསུམ་གྱི་དཔའ་བོ་དང་དཔའ་མོར་གསུངས་པའི་
ཕྱིར་དང་།  བརྟག་གཉིས་ལས།  སྐྱེ་བོ་མི་བཟད་པ་ཡི་ལས། །གང་དང་གང་གིས་འཆིང་གྱུར་པ། །ཐབས་དང་བཅས་ན་དེ་ཉིད་ཀྱིས། །སྲིད་པའི་འཆིང་བ་ལས་གྲོལ་འགྱུར། །ཞེས་ཐ་མལ་པ་འཆིང་བའི་རྒྱུར་གྱུར་པའི་གཟུགས་སོགས་
ཀྱི་སྣང་བ་འདི་ཉིད་ཐབས་མཁས་ཀྱིས་ཟིན་ན་གྲོལ་བའི་རྒྱུར་འགྱུར་བར་གསུངས་ལ་ཐབས་མཁས་ཇི་ལྟར་བུ་སྙམ་ན།  དུག་གི་དུམ་བུ་གང་ཉིད་ཀྱིས། །ཞེས་སོགས་ཚིགས་བཅད་བཞིས།  དུག་གིས་དུག་ལ་བསྣུན་པ་རིགས་འདྲ་གཉེན་པོར་ཆེ་བ།  
རླུང་གིས་རླུང་ལ་བསྣུན་པ་བཟློག་པ་གཉེན་པོར་ཆེ་བ།  ཆུ་ཡིས་ཆུ་དགུག་པ་སྦོམ་པ་གཉེན་པོར་ཆེ་བ།  ཚིག་པ་མེས་གདུངས་པ་བསྣན་པ་གཉེན་པོར་ཆེ་བ་དང་བཞི་ཡིན་པར་གསུངས་ཤིང་།  དེ་དག་ཐབས་མཁས་སུ་གྱུར་བའི་རྒྱུ་མཚན་ཡང་།  དང་
པོའི་དགུ་པ་ལས།  ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱི་ནས་རེ་རེའི་དབྱེ་བ་ཡིས། །ལྷ་རྣམས་ཀྱི་ནི་བརྗོད་པར་བྱ། །ཞེས་ཆོས་ཐམས་ཅད་དོན་དམ་པར་དེ་བཞིན་ཉིད་ཀྱི་ངོ་བོར་རྣམ་པར་དག་ཀྱང་།  ཕྱི་
ནས་ཏེ་ཀུན་རྫོབ་ཏུ་རེ་རེ་ཡང་ལྷ་སོ་སོའི་ངོ་བོར་རྣམ་པར་དག་པར་གསུངས་ནས་དེ་ཉིད་རྒྱས་པར་བཤད་པ་ལས།  གཟུགས་ཕུང་རྡོ་རྗེ་མ་ཡིན་ཏེ། །ཞེས་སོགས་ཀྱིས་ཕུང་པོ་ལྔ་ནང་གི་རྣལ་འབྱོར་མ་ལྔ་དང་།  ས་ནི་པུཀྐ་སཱི་ཞེས་བཤད། །ཅེས་སོགས་
10-14-4b


ཀྱིས་ཁམས་བཞི་ཕྱིའི་མཚམས་ཀྱི་ལྷ་མོ་བཞི་དང་།  གཟུགས་ལ་གཽ་རཱིར་རྟག་ཏུ་བཤད། །ཅེས་སོགས་ཀྱིས་ཡུལ་དྲུག །ཕྱིའི་ཕྱོགས་ཀྱི་ལྷ་མོ་བཞི་དང་།  སྟེང་འོག་གི་ལྷ་མོ་གཉིས་ཏེ་དྲུག་གི་ངོ་བོར་རྣམ་པར་དག་པར་གསུངས་པའི་ཕྱིར་དང་།  རྡོ་རྗེ་
གུར་ལས།  ཕལ་པའི་རྣམ་རྟོག་གཞོམ་པའི་ཕྱིར། །བསྒོམ་པ་ཡང་དག་རབ་ཏུ་གྲགས། །རང་བཞིན་གནས་སྐབས་གཞོམ་པ་ལས། །བསྒོམ་པ་མ་ཡིན་མི་བསྒོམ་མིན། །བྱང་ཆུབ་སེམས་དཔའ་རྣམས་ཀྱི་རྟོག་པ་ནི་དེ་བཞིན་ཏེ།  འོན་ཀྱང་མི་
གཙང་བའི་ཚད་མཉམ་པར་སྦྱང་བའི་ཕྱིར།  དེ་བཞིན་གཤེགས་པའི་སྐུ་གཟུགས་རབ་ཏུ་བསྒོམ་པར་བྱའོ་ཞེས་སོགས་གསུངས་པའི་ཕྱིར་དང་།  འདུས་པ་རྩ་བའི་རྒྱུད་ལས།  མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་བསྒྲགས། །
རྡོ་རྗེའི་སྐྱེ་མཆེད་ཉིད་དག་ཀྱང་། །བྱང་ཆུབ་སེམས་དཔའི་དཀྱིལ་འཁོར་མཆོག །ས་ནི་སྤྱན་ཞེས་བྱ་བ་ཡིན། །ཆུ་ཡི་ཁམས་ནི་མཱ་མ་ཀཱི། །མེ་ནི་གོས་དཀར་མོར་བཤད་དོ། །སྒྲོལ་མ་རླུང་དུ་རབ་ཏུ་གྲགས། །གཟུགས་སྒྲ་ལ་སོགས་སྔགས་པ་ཡིས། །
ལྷ་ཉིད་དུ་ནི་རྟག་ཏུ་བསྒོམ། །ཞེས་དང་།  དགོངས་པ་ལུང་སྟོན་ལས།  སེམས་ཅན་གང་དེ་སངས་རྒྱས་ཡིན། །དེ་བཞིན་ཉིད་དང་གཉིས་མེད་ཆོས། །གནས་མེད་གནས་པའི་སྦྱོར་བ་ཡིས། །སངས་རྒྱས་ཐམས་ཅད་རྣམ་པར་བཞུགས། །ཞེས་དང་།  
བཤད་རྒྱུད་རྡོ་རྗེ་ཕྲེང་བ་ལས།  དང་པོའི་སྐུ་ཡི་རྡོ་རྗེ་ནི། །གཟུགས་ཕུང་ལ་ནི་རབ་ཏུ་གྲགས། །ཞེས་སོགས་ཕུང་ཁམས་སྐྱེ་མཆེད་ཀྱི་ཆོས་རྣམས་གདན་གསུམ་ཚང་བའི་ལྷ་ཚོགས་སུ་གསུངས་པའི་ཕྱིར་རོ། །དོན་དེ་རྣམས་ཐུགས་ལ་བཞག་
10-14-5a


ནས།  དཔལ་ལྡན་ས་སྐྱ་པཎྜི་ཏས།  རྣལ་འབྱོར་ཆེན་པོའི་རྒྱུད་སྡེ་ལས། །ཐབས་ལ་མཁས་པའི་ཁྱད་པར་གྱིས། །སྦྱང་གཞི་སྦྱོང་བྱེད་ངོ་སྤྲད་པ། །དེ་ཚེ་དམ་པ་རིགས་བརྒྱ་ལ། །སོགས་པའི་དབྱེ་བ་རྒྱལ་བས་
གསུངས། །ཞེས་གསུངས་པ་ཡང་རྡོ་རྗེ་ཐེག་པའི་ཉམས་ལེན་པ་རྣམས་ལ་གནད་ཀྱི་གདམས་པ་བྱིན་པ་ཤེས་པར་བྱའོ། །ཕྱིས་ཀྱི་དགེ་བའི་བཤེས་གཉེན་ཆོས་རྗེ་རི་བོ་དགེ་ལྡན་པའི་བཞེད་པ་བཀོད་པ་ནི།  སྔར་གྱི་དེ་དག་ཐམས་ཅད་དང་མི་
མཐུན་ཏེ།  མ་དག་པའི་ཕུང་ཁམས་སྐྱེ་མཆེད་ཐམས་ཅད་སྦྱང་གཞིར་མི་འདོད་པར་ལམ་སྒོམ་པ་པོ་རང་ཉིད་ལ་མ་འོངས་པ་ན་འབྱུང་བར་འགྱུར་བའི་འཛམ་བུ་གླིང་པའི་སྐྱེ་འཆི་བར་དོ་གསུམ་པོ་ཁོ་ནར་སྦྱང་གཞིར་འདོད་པའི་ཕྱིར་དང་།  རྣལ་འབྱོར་ཆེན་
པོའི་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་བསྐྱེད་ཆོག་དང་བཅས་པ་ཐམས་ཅད་སྦྱོང་བྱེད་དུ་མི་འདོད་པར་སྐྱེ་འཆི་བར་དོ་གསུམ་དང་རྣམ་པ་མཚུངས་པའི་སྐབས་དེ་ཁོ་ན་སྦྱོང་བྱེད་དུ་འདོད་པའི་ཕྱིར་དང་།  མ་དག་པའི་ཕུང་ཁམས་
སྐྱེ་མཆེད་དག་པའི་ལྷའི་འཁོར་ལོ་བསྐྱེད་ཆོག་དང་བཅས་པར་སྣང་བ་བསྒྱུར་བ་སྦྱོང་ཚུལ་དུ་མི་འདོད་པར་ཐ་མལ་པ་ལ་སྐྱེ་འཆི་བར་དོ་གསུམ་འོང་བའི་དོད་ལ།  ལམ་བསྒོམས་པའི་སྟོབས་ཀྱིས་སྐུ་གསུམ་འབྱུང་བ་སྦྱོང་ཚུལ་དུ་འདོད་པའི་ཕྱིར་རོ། །
དེ་ལྟ་བུའི་བསྐྱེད་རིམ་གྱི་རྣམ་གཞག་ཁོང་རང་གིས་མཛད་པའི་རྣམ་གཞག་རིམ་པའི་ཊཱི་ཀར།  ཤིན་ཏུ་རྒྱས་པར་ཡོད་པ་ལས་གོང་འོག་གི་གྲུབ་མཐའི་གནད་རྣམས་གྲུབ་མཐའ་ཤན་འབྱེད་འདིར་ཕྱོགས་གཅིག་ཏུ་བསྒྲིགས་ནས་བཀོད་པ་ཡིན་ལ།  འདི་
10-14-5b


དག་ནི་སྔོན་མེད་པའི་བསྐྱེད་རིམ་གྱི་རྣམ་གཞག་ཏུ་སྣང་བས་སྲོལ་སྔ་མ་ལ་གནས་པའི་རྡོ་རྗེ་ཐེག་པ་བ་དག་གིས་ལུང་རིགས་ཀྱིས་བཀག་ནས་རང་ཡང་དེ་ལ་མི་འཇུག །གཞན་ཡང་དེ་ལ་མི་སྦྱོར་བར་བྱ་སྟེ།  རྡོ་རྗེ་ཐེག་པའི་ལམ་གྱི་རྩ་བ་ནི་བསྐྱེད་རྫོགས་ཀྱི་
གནད་མ་འཁྲུལ་བ་ཉིད་ཡིན་པའི་ཕྱིར་རོ། །དེའི་ཕྱིར་ཕྱོགས་སྔ་མའི་གོ་རིམ་བཞིན་དུ་འགོག་པ་ནི།  ཐོག་མར་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་ཕུང་པོ་ཇི་སྙེད་གསུངས་པའི་མདོ་སྡེ་དང་རྒྱུད་སྡེ་ཐམས་ཅད་ཀྱི་མཐར་ཐུག་པའི་རྩེ་མོ་
ནི་དཔལ་གསང་བ་འདུས་པ་ཡིན་པར་གསུངས་པས་ཞེས་པ་ཡང་།  སྤྱིར་རྒྱུད་སྡེ་ཐམས་ཅད་ལའང་གདུལ་བྱ་སྤྲོ་བ་བསྐྱེད་པའི་ཆེད་དུ།  རང་གི་ཆེ་བ་བརྗོད་པར་གསུངས་པ་ལྟར་ཡིན་ན་འགལ་བ་མེད་མོད་ཀྱི་འོན་ཀྱང་ཁྱེད་རྣམས་ཀྱིས་གྲུབ་མཐའ་ལ་ཁ་
ཟིན་ཙམ་མ་ཡིན་པར་བླ་མེད་ཀྱི་རྒྱུད་སྡེ་གཞན་རྣམས་ལས་ཀྱང་མཆོག་ཏུ་འདོད་པ་ནི་མི་འཐད་དེ།  འདི་ལ་ཤེས་བྱེད་མེད་པ་དང་གནོད་བྱེད་ཡོད་པ་གཉིས་ལས།  དང་པོ་ལ་ལུང་གི་སྒྲུབ་བྱེད་མེད་པ་ནི།  འདུས་པའི་རྒྱུད་ཕྱི་མ་དང་།  སྒྲོན་གསལ་དང་།  གྲོལ་
བའི་ཐིག་ལེ་རྣམས་ལས་གསུངས་པ་ནི་སྔར་བཤད་པ་ལྟར་ཆེ་བ་བརྗོད་པའི་སྐབས་ཡིན་ལ།  དགྲ་ནག་གི་རྒྱུད་ལས།  རྒྱུད་ཀྱི་མཐར་ཐུག་འདུས་པ་སྟེ། །མ་བྱུང་འབྱུང་བར་མི་འགྱུར་རོ། །ཞེས་པ་ནི།  རྒྱུད་མཐའ་དྲུག་ཚུལ་བཞིའི་སྒོ་ནས་བཤད་
པའི་རྒྱུད་འཆད་ཚུལ་ལ།  དཔལ་ལྡན་འདུས་པ་མཐར་ཐུག་ཡིན། །ཞེས་པའི་དོན་ཡིན་གྱི།  བརྗོད་བྱ་མ་ལུས་པ་ལ་ལྟོས་ནས་ནི་མ་ཡིན་ཏེ།  གཞན་དུ་ན་དེ་ཉིད་ལས།  ལས་ཚོགས་མཐར་ཐུག་གཤིན་རྗེའི་གཤེད། །བརྟུལ་ཞུགས་མཐར་
10-14-6a


ཐུག་སངས་རྒྱས་ཐོད། །ཞེས་ལས་ཚོགས་ལ་འདུས་པ་ལས་གཤིན་རྗེའི་གཤེད་མཐར་ཐུག་པ་དང་།  བརྟུལ་ཞུགས་འདུས་པ་ལས་སངས་རྒྱས་ཐོད་པ་མཐར་ཐུག་པར་གསུངས་པ་དང་ནང་འགལ་བར་འགྱུར་བའི་
ཕྱིར་རོ། །དེའི་རྗེས་འབྲང་དག་གིས།  སློབ་དཔོན་ནག་པོ་སྤྱོད་པའི་གསང་བའི་དེ་ཁོ་ན་ཉིད་གསལ་བར།  དཔལ་ལྡན་འདུས་རྗེས་ལམ་གྱིས་ནི། །རིམ་པ་གཉིས་ཀའི་ངོ་བོ་ལས། །དཔལ་ལྡན་འདུས་པ་ལྷག་ཡིད་འོང་། །རྒྱུད་
རྣམས་ཀུན་སོན་རྩེ་མོ་ཡིན། །ཞེས་གསུངས་པར་དྲངས་པ་ནི།  རང་གི་དེ་ཉིད་སྟོན་པར་ཟད་དེ།  གཞུང་དེར་དེ་ལྟ་བུའི་འདུས་པ་ངོས་འཛིན་པ་ན།  དབང་པོ་གཉིས་པོ་སྙོམས་འཇུག་པར། །འདུས་པ་ཞེས་ནི་བྱ་བར་བརྗོད། །ཅེས་དང་།  དེའི་
དབྱེ་བ་འཆད་པ་ན།  འདུས་པའང་རྣམ་པ་གཉིས་གསུངས་ཏེ། །བསྐྱེད་དང་རྫོགས་འབྱུང་རིམ་པ་ཡིས། །རྣལ་འབྱོར་བསྐྱེད་པ་ཤེས་བྱ་སྟེ། །རྫོགས་པ་རྣལ་འབྱོར་མ་རུ་དྲན། །ཅེས་བསྐྱེད་རིམ་གཙོ་བོར་སྟོན་པའི་ཕ་རྒྱུད་དང་།  རྫོགས་
རིམ་གཙོ་བོར་སྟོན་པའི་མ་རྒྱུད་གཉིས་ཡོད་པར་གསུངས་པས།  ཕ་རྒྱུད་དང་མ་རྒྱུད་ཀྱི་དབྱེ་གཞིར་གྱུར་པའི་ཕ་རྒྱུད་གསང་བ་འདུས་པ་ནི་ངོ་མཚར་གྱི་གནས་ཡིན་པའི་ཕྱིར་རོ། །དེས་ན་གཞུང་དེ་ཕ་རྒྱུད་མ་རྒྱུད་ཐུན་མོང་གི་རྫོགས་པའི་རིམ་པ་
སྟོན་པའི་གཞུང་ཡིན་པས་དེ་ཉིད་ཀྱི་དབྱེ་གཞིར་གྱུར་པའི་བླ་མེད་ཙམ་ལ་དཔལ་ལྡན་འདུས་པར་བྱས་ནས་དེའི་ཆེ་བ་བརྗོད་པ་ཡིན་གྱི།  ཕ་རྒྱུད་གསང་བ་འདུས་པ་ལ་ངོས་འཛིན་པའི་སྐབས་མ་ཡིན་པའི་ཕྱིར་རོ། །རིགས་པའི་སྒྲུབ་བྱེད་
10-14-6b


མེད་པ་ནི་རིམ་ལྔ་གསལ་སྒྲོན་དང་།  དེའི་རྗེས་འབྲང་དག་གིས་བསྐྱེད་རིམ་གྱི་བཤད་པ་ལས་གསང་བ་འདུས་པ་ལ་མ་བརྟེན་པར་བླ་མེད་གཞན་གྱི་ལམ་གྱིས་ཚེ་འདི་ཉིད་ལ་ཕྱག་ཆེན་མཆོག་གི་དངོས་གྲུབ་ཐོབ་མི་ནུས་ཏེ།  དེ་བསྒྲུབ་པ་ལ་ཚེ་འདིར་
མཚན་དཔེས་བརྒྱན་པའི་སྐུ་བསྒྲུབ་དགོས་ཤིང་།  དེའི་རིགས་འདྲའི་རྒྱུ་མ་དག་པའི་ལུས་འདི་དོར་ནས་རླུང་སེམས་ཙམ་ལས་གྲུབ་པའི་སྒྱུ་ལུས་དགོས་ལ།  དེ་ཅི་ལྟར་བསྒྲུབ་པའི་ཚུལ་དང་མ་དག་པའི་ལུས་གཉེན་པོའི་སྟོབས་ཀྱིས་ཇི་
ལྟར་འདོར་བའི་ཚུལ་རྣམས་གསང་བ་འདུས་པ་ལས་གཞན་པའི་རྒྱུད་སྡེ་རྣམས་སུ་མ་གསུངས་པའི་ཕྱིར་ཞེས་པ་ནི་རིགས་པའི་སྒྲུབ་བྱེད་དུ་སྨྲའོ། །འདི་ནི་རྣལ་འབྱོར་བླ་མེད་ཀྱི་ལམ་ཕལ་ཆེར་ལ་སྐུར་པ་འདེབས་པའི་ཚིག་ཡིན་པས།  
ཐོག་མར་མགོ་མཚུངས་ཀྱིས་དགག་པ་ནི་ཀྱེ་རྡོ་རྗེ་ལ་མ་བརྟེན་པར་བླ་མེད་གཞན་ལ་བརྟེན་ནས་ཚེ་འདིར་ཕྱག་རྒྱ་ཆེན་པོ་མཆོག་གི་དངོས་གྲུབ་བསྒྲུབ་མི་ནུས་པར་འགྱུར་ཏེ།  དེ་བསྒྲུབ་པ་ལ་ཚེ་འདིར་ཆོས་སྐུའི་ཡོན་ཏན་སྟོང་ཉིད་བཅུ་དྲུག་རྣམ་
ཐར་བརྒྱད་བསྡུ་དངོས་གཞི་མཚོན་པའི་ལོངས་སྐུ་ཞལ་བརྒྱད་ཕྱག་བཅུ་དྲུག་པ་བསྒྲུབ་དགོས་ཤིང་།  དེའི་རིགས་འདྲའི་རྒྱུ་ད་ལྟ་ནས་ཀྱེ་རྡོ་རྗེ་ཞལ་བརྒྱད་ཕྱག་བཅུ་དྲུག་པ་བསྒོམ་དགོས་ལ།  དེ་ནི་ཀྱེ་རྡོ་རྗེ་ལས་གཞན་པའི་རྒྱུད་སྡེ་གཞན་
རྣམས་སུ་མ་གསུངས་པའི་ཕྱིར་རོ། །དེ་ལ་ཁོ་ན་རེ།  གཏན་ཚིགས་མ་གྲུབ་སྟེ།  དེ་ལྟ་བུ་ནི་ཀྱེ་རྡོ་རྗེའི་རྒྱུད་ནས་གསུངས་པའི་ལམ་གྱི་རིམ་པ་ཡིན་གྱི།  རྒྱུད་སྡེ་གཞན་གྱི་ལམ་གྱི་རིམ་པ་དེ་ལྟར་མ་ཡིན་པའི་ཕྱིར་ཞེ་ན།  འོ་ན་
10-14-7a


སྔ་མའི་གཏན་ཚིགས་དང་པོ་མ་གྲུབ་སྟེ།  དེ་ལྟ་བུ་ནི་གསང་བ་འདུས་པ་ནས་གསུངས་པའི་ལམ་གྱི་རིམ་པ་ཡིན་གྱི།  རྒྱུད་སྡེ་གཞན་གྱི་ལམ་གྱི་རིམ་པ་ལ་དེ་ལྟར་མ་ངེས་པའི་ཕྱིར།  གལ་ཏེ་རྒྱུད་སྡེ་གཞན་ལས་རླུང་
སེམས་ཙམ་ལས་གྲུབ་པའི་སྒྱུ་ལུས་བསྒྲུབ་ཚུལ་གསང་འདུས་ལས་བཤད་པ་ལྟར་མེད་ན་ལོངས་སྐུའི་རིགས་མཐུན་གྱི་རྒྱུ་མི་འཐད་པར་འགྱུར་རོ་ཞེ་ན།  དེ་ནི་རྒྱུད་སྡེ་གཞན་ལ་བློ་ཁ་མ་ཕྱོགས་པའི་གཏམ་སྟེ་རགས་པའི་དབང་དུ་བྱས་ན་
བསྐྱེད་རིམ་ལོངས་སྐུའི་རིགས་མཐུན་གྱི་རྒྱུ་དང་།  རྫོགས་རིམ་ཆོས་སྐུའི་རིགས་མཐུན་གྱི་རྒྱུ་ཡིན་ལ།  ཞིབ་དུ་ན་རྩ་ཡི་གེ་གནས་གྱུར་པ་ལས་ལོངས་སྐུ་འབྱུང་བ་ཤིང་རྟ་ཆེན་པོ་དག་གིས་བཞེད་པའི་ཕྱིར་དང་།  ཁྱེད་རང་གིས་ཇོ་ནང་པ་
འགོག་པའི་སྐབས་སུ་བསྐྱེད་རིམ་གཟུགས་སྐུའི་སྒྲུབ་བྱེད་དུ།  རྒྱུད་དང་མཁས་གྲུབ་ཀྱི་གཞུང་མཐའ་ཡས་པ་ནས་བཤད་པར་ཁས་བླངས་པའི་ཕྱིར་རོ། །ཚེ་འདིར་ཕྱག་ཆེན་མཆོག་གི་དངོས་གྲུབ་བསྒྲུབ་པ་ལ་མ་དག་པའི་ལུས་འདི་དོར་ནས།  
དེ་ལས་ལོགས་སུ་རླུང་སེམས་ཙམ་ལས་གྲུབ་པའི་སྒྱུ་ལུས་བསྒྲུབ་པར་འདོད་པ་ནི་རྡོ་རྗེ་ཐེག་པའི་ལམ་དང་འབྲས་བུ་གཉིས་ཀའི་གནད་བཅོས་པ་ཡིན་པས།  འདི་དགག་པ་ལ།  ཐེག་པ་ཆེན་པོ་སྤྱི་དང་འགལ་བ།  བླ་མེད་སྤྱི་དང་འགལ་བ། 
བྱེ་བྲག་དུ་གསང་བ་འདུས་པ་དང་འགལ་བ།  དངོས་སྟོབས་ཀྱི་རིགས་པ་དང་འགལ་བ་དང་བཞི་ལས།  དང་པོ་ནི།  ཐེག་པ་ཆེན་པོའི་སྡེ་སྣོད་རྣམས་ལས།  ཆོས་ཐམས་ཅད་ཆོས་ཀྱི་དབྱིངས་སུ་རོ་གཅིག་པ་དང་།  ཆོས་ཐམས་ཅད་རྣམ་པ་
10-14-7b


ཐམས་ཅད་དུ་མངོན་པར་རྫོགས་པར་འཚང་རྒྱ་བར་གསུངས་པ་རྣམས་མི་འཐད་པར་འགྱུར་ཏེ།  ཕྱག་ཆེན་མཆོག་གི་དངོས་གྲུབ་ཐོབ་པའི་ཚེ་ཕྱི་རོལ་གྱི་དངོས་པོ་དང་།  ད་ལྟར་གྱི་ལུས་འདིར་རང་དགར་དོར་ནས་སེམས་ཉིད་གཅིག་པུ་ལོགས་སུ་སངས་རྒྱས་
པའི་ཕྱིར་རོ། །གཉིས་པ་ནི་ཕ་རོལ་ཏུ་ཕྱིན་པ་སེམས་ལ་གནད་དུ་བསྣུན་པ་ཡིན་ཅིང་།  རྡོ་རྗེ་ཐེག་པ་ལུས་ལ་གནད་དུ་བསྣུན་པ་ཡིན་པས་ཁྱད་པར་དུ་འཕགས་པ་ཡིན་ལ་ལུས་ལ་གནད་དུ་བསྣུན་པའི་དོན་ཡང་རྩ་ཐིག་རླུང་གསུམ་ལ་གནད་དུ་བསྣུན་པ་ཟབ་
མོའི་ལམ་བསྒོམས་པས་ལུས་ཟག་བཅས་ཉིད་ལྕགས་ལ་གསེར་འགྱུར་གྱི་རྩི་བཏབ་པ་བཞིན་དུ་ཟག་པ་མེད་པའི་ངོ་བོར་གནས་འགྱུར་ཞིང་།  དེའི་སྟོབས་ཀྱིས་སེམས་རྣམ་པར་མི་རྟོག་པའི་ཡེ་ཤེས་སུ་བསྒྱུར་བར་བྱེད་པ་ཡིན་ལ།  ཁྱོད་ཀྱི་ལུགས་
ལྟར་ན་ལུས་འདི་དོར་ནས་སེམས་འབའ་ཞིག་ལ་སྒྱུ་ལུས་བསྒྲུབ་དགོས་ན་ལུས་ལ་གནད་དུ་བསྣུན་པའི་དོན་དང་འགལ་བའི་ཕྱིར་རོ། །གསུམ་པ་ནི་ཡང་ཁྱོད་ཀྱི་ལུགས་འདི་གསང་བ་འདུས་པའི་ལམ་གྱི་རིམ་པ་དང་འགལ་ཏེ།  དེའི་ལམ་གྱི་རིམ་
པ་ནི་དབང་བསྐུར་བ་ཐོབ་ཅིང་དམ་ཚིག་དང་ལྡན་པའི་གང་ཟག་གིས་ཐོག་མར་ཕྱི་བསྐྱེད་པའི་རིམ་པ་ལྷའི་རྣལ་འབྱོར་ལ་དྲན་པ་རྩེ་གཅིག་པའི་ཏིང་ངེ་འཛིན་ཐོབ་ཐོབ་ཀྱི་བར་དུ་བསྒོམ།  དེ་ནས་ཕྲ་མོའི་རྣལ་འབྱོར་ཤིན་ཏུ་ཕྲ་བའི་དཀྱིལ་འཁོར་གྱི་འཁོར་
ལོ་སྤྲོ་བསྡུ་ལ་དབང་ཐོབ་ཐོབ་ཀྱི་བར་དུ་བསྒོམ།  དེ་ནས་ལུས་དབེན་གྱིས་སྣང་བའི་དངོས་པོ་རིགས་བརྒྱར་ཕྱེ་ནས་དམ་པ་རིགས་བརྒྱ་དང་དེ་ཡང་ལྔ་དང་གསུམ་དང་གཅིག་གི་བར་དུ་བསྡུས་ནས་མཐར་གསང་ཆེན་རིགས་གཅིག་ཏུ་བསྒྱུར།  དེ་ནས་
10-14-8a


ངག་དབེན་གྱིས་ངག་འབྱུང་བའི་གནས་རླུང་འབྱུང་འཇུག་གནས་གསུམ་ཡི་གེ་གསུམ་གྱི་རང་གདངས་སུ་ཤར་ཤར་གྱི་བར་དུ་བསྒོམ།  དེ་ནས་སེམས་དབེན་གྱིས་སྣང་བ་ཐམས་ཅད་སེམས་ཙམ་དུ་རྟོགས་པར་བྱས་ནས།  
དེ་ལྟ་བུའི་སེམས་ཙམ་རླུང་གི་ཞོན་པ་དང་བཅས་པ་དེ་སྒྱུ་མ་ལ་སོགས་པའི་དཔེ་བཅུ་གཉིས་ཀྱིས་ཉེ་བར་མཚོན་པའི་མཚན་དཔེས་སྤྲས་པའི་འཇའ་ཚོན་ལྟ་བུའི་སྐུ་བསྒྲུབ་པའི་སྒྱུ་ལུས་ཡིན་ལ།  དེ་ལ་ཡང་རྒྱུར་འཛིན་གྱི་དྲི་མ་ཡོད་པས་དེ་དག་པའི་ཆེད་
དུ་འོད་གསལ་གྱི་མེས་སྦྱངས་ནས་སླར་ཡང་སྔར་གྱི་རྣམ་པ་ཇི་ལྟ་བ་བཞིན་དུ་ཟུང་འཇུག་གི་སྐུར་བཞེངས་པ་ཡིན་པ་ལས།  ཁྱོད་ཀྱི་ལུགས་ལ་དབེན་གསུམ་མཐར་ཕྱིན་ནས་སྒྱུ་ལུས་བསྒྲུབ་པའི་སྐབས་སུ།  མ་དག་པའི་ལུས་འདི་གསར་དུ་
འདོར་དགོས་པའི་ཕྱིར་རོ། །སེམས་དབེན་གྱི་སྐབས་སུ་སེམས་ཀྱི་སྣང་བ་ཙམ་ལས་ལོགས་སུ་གྱུར་པའི་སྣང་བའི་དངོས་པོ་ཅུང་ཟད་ཀྱང་གྲུབ་པ་མེད་དེ།  སྤྱོད་བསྡུས་ལས།  སེམས་རྣམ་པར་དབེན་པའི་མཐར་ཐུག་པ་ཡང་རང་བཞིན་གྱི་སྣང་
བ་ཙམ་ཡོངས་སུ་ཤེས་པ་ཙམ་དུ་ཟད་པས་ཞེས་དང་།  སྒྲོན་གསལ་ལས།  སེམས་ལ་དམིགས་པ་ཙམ་ཞིག་ནི། །རིམ་པ་གཉིས་པ་ཞེས་བརྗོད་དོ། །ཞེས་གསུངས་པའི་ཕྱིར་རོ། །གཞན་ཡང་དབེན་གསུམ་གྱི་ཉམས་ལེན་ལ་དགོས་པ་
མེད་པར་འགྱུར་ཏེ།  ལུས་ཐ་མལ་པའི་ལུས་ཀྱིས་དབེན་ནས་སྐུ་རྡོ་རྗེ་བསྒྲུབ།  ངག་ཐ་མལ་པའི་ངག་གིས་དབེན་ནས་གསུང་རྡོ་རྗེ་བསྒྲུབ།  ཡིད་ཐ་མལ་པའི་ཡིད་ཀྱིས་དབེན་ནས་ཐུགས་རྡོ་རྗེ་བསྒྲུབ་པ་ཐམས་ཅད་སྒྱུ་ལུས་བསྒྲུབ་པའི་ཚེ་འདོར་
10-14-8b


དགོས་པའི་ཕྱིར་རོ། །གཞན་ཡང་སེམས་དབེན་མན་ཆད་ཀྱི་ཉམས་ལེན་དང་།  སྒྱུ་ལུས་མན་ཆད་ཀྱི་ཉམས་ལེན་ལ་འབྲེལ་བ་མེད་པར་འགྱུར་ཏེ།  སེམས་དབེན་མན་ཆད་ཀྱི་ཉམས་ལེན་མཐར་ཕྱིན་པའི་ལུས་དེ་ལོགས་སུ་དོར་ནས་སེམས་དབེན་
ལོགས་སུ་བསྒྲུབ་དགོས་པའི་ཕྱིར་རོ། །དེས་ན་འདི་ལྟ་བུའི་གྲུབ་མཐའ་ནི་རྫོགས་རིམ་གྱི་ཉམས་ལེན་གྱི་རིགས་འདྲ་རྒྱུན་གཅོད་པ་ཡིན་ཞིང་།  དང་པོའི་མགོན་པོ་སྤྲུལ་སྐུ་རྡོར་སེམས་སུ་མི་བསྒྱུར་བར་རང་བཞིན་གྱི་གནས་ནས་འོངས་པའི་སྤྲུལ་སྐུ་རྡོ་རྗེ་
འཆང་སྙོམས་འཇུག་བྱས་པ་ལས་བྱུང་བའི་མི་བསྐྱོད་པ་སྤྲུལ་སྐུ་རྡོར་སེམས་སུ་བསྒྱུར་བ་ནི་བསྐྱེད་རིམ་གྱི་ཉམས་ལེན་གྱི་རིགས་འདྲ་རྒྱུན་གཅོད་པ་ཡིན་པས།  དཔལ་ལྡན་འདུས་པའི་ལམ་ལ་མོས་པ་ཡོད་པའི་བློ་གྲོས་དང་ལྡན་པ་དག་གིས་ལུགས་འདི་
ལ་བག་ཟོན་གྱིས་ཤིག །གཞན་ཡང་སློབ་དཔོན་ཀླུའི་བྱང་ཆུབ་ཀྱིས་རྣམ་གཞག་རིམ་པར་བཤད་པ་ལྟར་ཟངས་ཀྱི་དངོས་པོ་གཅིག་ཉིད་གནས་སྐབས་གསུམ་དུ་གནས་འགྱུར་བ་བཞིན་དུ་ཐ་མལ་པའི་ལུས་འདི་ཉིད་གནས་སྐབས་གསུམ་དུ་རིམ་པ་བཞིན་གནས་
འགྱུར་བའི་ཤེས་བྱེད་དུ།  ཤིན་ཏུ་མི་གཙང་གཟུགས་འདི་གཟུང་བྱས་ལ། །རྒྱལ་བའི་རིན་ཆེན་གཟུགས་བྱས་རིན་ཐང་མེད། །རྩི་ཡིས་སྦྱངས་པ་ལྟ་བུར་བསྐྱེད་པ་འདི། །བྱང་ཆུབ་སེམས་ནི་རབ་ཏུ་བརྟག་པས་བཟུང་། །ཞེས་པ་དྲངས་པ་ཡང་
མི་འཐད་པར་འགྱུར་ཏེ།  ཐ་མལ་པའི་ལུས་འདི་ལྕགས་ལ་གསེར་འགྱུར་གྱི་རྩི་བཏབ་པས་གསེར་དུ་འགྱུར་བ་བཞིན་དུ་ཐབས་ཀྱིས་ཟིན་པས་རྒྱལ་བའི་སྐུར་འགྱུར་བ་མི་སྲིད་པའི་ཕྱིར་རོ། །བཞི་པ་ནི།  ཚེ་འདིར་ཕྱག་ཆེན་མཆོག་གི་དངོས་གྲུབ་བསྒྲུབ་པ་ལ་
10-14-9a


མ་དག་པའི་ལུས་འདི་དང་།  རྣམ་པར་ཤེས་པ་མ་བྲལ་བའི་གོང་དུ་མཆོག་གི་དངོས་གྲུབ་ཐོབ་པ་ཡིན་ནམ།  དེ་དང་དུས་མཉམ་དུ་ཐོབ་པ་ཡིན་ནམ།  དེའི་རྗེས་སུ་ཐོབ་པ་ཡིན།  དང་པོ་གཉིས་ལྟར་ན།  མ་དག་པའི་
ལུས་འདི་དོར་ནས་རླུང་སེམས་ཙམ་ལས་སྒྱུ་ལུས་ལོགས་སུ་བསྒྲུབ་པར་འདོད་པ་དང་འགལ་ལ།  ཕྱི་མ་ལྟར་ན།  ཚེ་འདིར་ཕྱག་ཆེན་མཆོག་གི་དངོས་གྲུབ་ཐོབ་པ་དང་འགལ་ཏེ།  ཚེ་འདིར་ལུས་སེམས་བྲལ་བའི་རྗེས་སུ་ཕྱག་ཆེན་མཆོག་གི་དངོས་
གྲུབ་ཐོབ་པ་ཡིན་པའི་ཕྱིར་རོ། །གཞན་ཡང་།  གྲུབ་ཆེན་ཌོམ་བྷི་ཧེ་རུ་ཀ་དང་།  སློབ་དཔོན་རྡོ་རྗེ་དྲིལ་བུ་པ་ལ་སོགས་པའི་གྲུབ་ཆེན་འགའ་ཞིག་ལུས་འདི་ཉིད་ཧེ་རུ་ཀའི་སྐུར་བསྒྱུར་ནས་མཁའ་ལ་གཤེགས་པ་དེ་ཡང་མི་འཐད་པར་འགྱུར་ཏེ།  
ཚེ་འདིར་ཕྱག་ཆེན་མཆོག་གི་དངོས་གྲུབ་ཐོབ་པ་ལ་ལུས་འདི་ཉིད་གཉེན་པོའི་སྟོབས་ཀྱིས་འདོར་དགོས་པའི་ཕྱིར་རོ། །དེས་ན་ཁྱོད་ཀྱི་གྲུབ་མཐའ་འདི་ནི་སེམས་ལས་རྫས་གཞན་པའི་ཕྱི་རོལ་གྱི་དོན་གྲུབ་པ།  དབུ་མ་ཐལ་འགྱུར་བའི་ལུགས་ཐུན་མོང་མ་
ཡིན་པར་བཟུང་ནས་སྣང་བ་སེམས་ཀྱི་བདག་ཉིད་ཡིན་པ་བློ་ལ་མ་ཤོངས་པའི་རླབས་ཆོལ་ཡིན་གྱི།  རྒྱུད་སྡེ་དང་གྲུབ་ཆེན་གྱི་དགོངས་པ་མ་ཡིན་པར་ཁོ་བོས་རྟོགས་སོ། །གཉིས་པ་གནོད་བྱེད་ཡོད་པ་ནི་འདུས་པའི་རྒྱུད་དང་རྒྱ་གཞུང་རྣམས་ནས་འདུས་པ་
རྒྱུད་ཀྱི་མཐར་ཐུག་ཡིན་པར་གསུངས་པ་ཙམ་མ་གཏོགས་མ་རྒྱུད་ཀྱི་མིང་སྨོས་ནས་དེ་ལས་ཁྱད་པར་དུ་འཕགས་པར་སྟོན་པའི་ཚིག་མེད་ལ།  བདེ་མཆོག་རྩ་རྒྱུད་ལས།  གསང་བའམ་རྡོ་རྗེ་འཇིགས་བྱེད་ལས། །རྣལ་འབྱོར་རྣམས་ཀྱི་མཆོག་འདི་ནི། །མ་བྱུང་འབྱུང་བར་མི་འགྱུར་རོ། །
10-14-9b


ཞེས་ཕ་རྒྱུད་གསང་འདུས་དང་རྡོ་རྗེ་འཇིགས་བྱེད་ལས་མ་གསུངས་པའི་རྣལ་འབྱོར་གྱི་མཆོག་སྟོན་པར་གསུངས་པ་དང་།  བརྟག་གཉིས་ལས།  དགོད་དང་ལྟ་བ་དག་གིས་ཀྱང་། །འཁྱུད་དང་དེ་བཞིན་གཉིས་ཉིད་ཀྱིས། །རྒྱུད་ཀྱང་རྣམ་པ་བཞི་རྣམས་
ཀྱིས། །དགོངས་པའི་སྐད་ནི་མ་བསྒྲགས་པ། །ཞེས་རྒྱུད་སྡེ་བཞི་ལས་མ་གསུངས་པའི་དགོངས་པའི་སྐད་ཅིག་སྟོན་པར་གསུངས་པའི་རྣལ་འབྱོར་བླ་མེད་ནི་ཕ་རྒྱུད་ལ་བྱ་དགོས་པས།  དེ་དག་ལས་གསང་བ་འདུས་པ་ཁྱད་པར་དུ་འཕགས་པ་ལ་
གནོད་པ་ཡིན་ནོ། །ཡང་ཁྱོད་ཀྱིས་དལ་འབྱོར་རྙེད་དཀའ།  འཆི་བ་མི་རྟག་པ།  བྱམས་སྙིང་རྗེ་བྱང་ཆུབ་ཀྱི་སེམས་སྦྱིན་སོགས་ཀྱི་སྤྱོད་པ་ལ་རིམ་པ་བཞིན་བསླབས་ནས་སྔགས་ཀྱི་དབང་བསྐུར་དང་།  ལམ་བསྒོམ་པ་ལ་འཇུག་པ་ནི་
སྔགས་ལ་མཁས་པའི་ཤིང་རྟ་ཆེན་པོ་དག་གི་ལུགས་ཡིན་ནོ་ཞེས་པ་ཡང་སྐལ་དམན་རིམ་འཇུག་པ་ལ་དེ་ལྟར་ཡིན་ཀྱང་སྔགས་ལ་འཇུག་པའི་རིམ་པ་ཐམས་ཅད་དེར་མ་ངེས་ཏེ།  སྐྱེ་བ་སྔ་མ་ནས་ལམ་ལ་གོམས་པའི་སྟོབས་ཀྱིས་ཚེ་འདིར་དང་
པོ་ནས་ཕྱག་ཆེན་མཆོག་གི་དངོས་གྲུབ་ཐོབ་པར་འདོད་པ་ལ་ནི་སྔར་གྱི་སྦྱངས་པ་དེ་དག་ལ་མ་ལྟོས་པར་དང་པོ་ནས་སྔགས་ལམ་དུ་བཅུག་པས་ཆོག་པའི་ཕྱིར་ཏེ།  སཾ་བུ་ཊི་ལས།  ཐོག་མར་དཀྱིལ་འཁོར་ཆེན་པོ་ཡི། །སྙིང་ཁ་ཡི་ནི་དཀྱིལ་འཁོར་དུ། །
རང་གི་དབང་སོགས་རྒྱས་པ་ཡིས། །རྡོ་རྗེ་སློབ་དཔོན་འགྲུབ་པར་འགྱུར། །ཞེས་དང་།  དེ་ཉིད་བསྡུས་པ་ལས།  བཅོམ་ལྡན་འདས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་འཇུག་པ་ལས།  སྣོད་དུ་གྱུར་པ་དང་མ་གྱུར་པ་བརྟག་མི་འཚལ་ལོ།  
10-14-10a


།དེ་ཅིའི་ཕྱིར་ཞེ་ན།  དཀྱིལ་འཁོར་ཆེན་པོའི་ཚོན་རྩི་མཐོང་བ་ཙམ་གྱིས་སྡིག་པ་ཐམས་ཅད་འདག་པར་འགྱུར་རོ། །ཞེས་གསུངས་པའི་ཕྱིར་རོ། །གལ་ཏེ་དེ་ལྟར་ན།  བརྟག་གཉིས་ལས།  དང་པོར་གསོ་སྦྱོང་སྦྱིན་
པར་བྱ། །ཞེས་སོགས་ཕ་རོལ་ཏུ་ཕྱིན་པའི་ལམ་གྱིས་སྦྱངས་པ་བྱས་ནས།  དེར་རྗེས་ཀྱེ་ཡི་རྡོ་རྗེ་སྟོན་ཞེས་གསུངས་པ་དང་།  སྤྱོད་བསྡུས་ལས།  ཐོག་མ་ཉིད་དུ་ནི་སངས་རྒྱས་པའི་ཐེག་པའི་བསམ་པ་ལ་སློབ་དཔོན་ཞེས་སོགས་ལམ་རིམ་པ་ཅན་
གསུངས་པ་དང་འགལ་ལོ་སྙམ་ན་མི་འགལ་ཏེ།  བརྟག་གཉིས་ལས།  སྐལ་དམན་སེམས་ཅན་འདུལ་དཀའ་བ། །གང་གིས་འདུལ་བར་འགྱུར་བ་ལགས། །ཞེས་པའི་ལན་དུ།  སྔར་གྱི་ལམ་གྱི་རིམ་པ་དེ་དག་གསུངས་པས།  སྐལ་ལྡན་
སེམས་ཅན་འདུལ་སླ་བ། །དང་པོར་ཀྱེ་ཡི་རྡོ་རྗེ་སྟོན་ཞེས་པ་དོན་གྱིས་ཐོབ་ཅིང་།  རྣལ་འབྱོར་དབང་ཕྱུག་བིར་ཝ་པའི་བཀའ་སྲོལ་ལས་དེ་ལྟར་བྱུང་བའི་ཕྱིར་དང་།  སྤྱོད་བསྡུས་ལས།  བདག་ཅག་ལྟ་བུའི་སོ་སོའི་སྐྱེ་བོ་ཐོག་མ་མེད་པ་ནས་ཕྱི་རོལ་
གྱི་དངོས་པོ་རྣམ་པ་སྣ་ཚོགས་པ་ལ་མངོན་པར་ཞེན་པས་ཡོད་པ་དང་།  མེད་པ་དང་།  གཅིག་དང་།  དུ་མ་དང་།  གཉིས་ཀ་དང་།  གཉིས་ཀ་མ་ཡིན་པ་དང་།  ཡོད་པ་མ་ཡིན་པ་དང་།  མེད་པ་མ་ཡིན་པ་དང་།  རྟག་པ་དང་ཆད་པ་ལ་སོགས་པའི་རང་བཞིན་གྱི་བག་
ཆགས་ཀྱི་རྒྱུས་རྣམ་པར་རྟོག་པ་ལ་མངོན་པར་ཞེན་པ་ལ་སོགས་པའི་མཐུས་རྫོགས་པའི་གོ་རིམ་གྱི་ཏིང་ངེ་འཛིན་ལ་སློབ་པ་ན་གོ་རིམ་ཇི་ལྟ་བ་བཞིན་དུ་བསླབ་པར་བགྱིའམ།  ཡང་ན་བླ་མའི་མན་ངག་ཙམ་གྱི་དེ་དག་སྐད་ཅིག་ཙམ་གྱིས་སོ་སོར་
10-14-10b


སྣང་བར་བགྱི་ཞེས་པའི་ལན་དུ་སྔར་གྱི་རིམ་པ་དེ་དག་གསུངས་པས་དེ་ལྟ་བུའི་མཚན་ཉིད་དང་མི་ལྡན་པའི་སྐལ་བ་དང་ལྡན་པའི་གང་ཟག་ལ་དང་པོ་ཉིད་ནས་དབང་བསྐུར་ཏེ་ལམ་བསྟན་པས་ཆོག་པར་དོན་གྱིས་ཐོབ་ཅིང་།  སྤྱོད་བསྡུས་ཉིད་ལས་ཀྱང་འདུས་
བྱས་པ་དང་།  འདུས་མ་བྱས་པའི་སློབ་མ་གཉིས་གསུངས་པའི་ཕྱིར་རོ། །ཡང་ཁྱོད་ཀྱིས་སྤྱིར་མངོན་རྟོགས་དངོས་གཞིའི་དོན་འདི་ཡིན་ཏེ།  གང་དུ་འཚང་རྒྱ་བའི་གནས་དང་།  དེར་འཚང་རྒྱ་བའི་རྟེན་དང་།  གང་གི་ངོ་བོར་འཚང་རྒྱ་བའི་རིམ་པ་དང་། 
སངས་རྒྱས་ནས་མཛད་པ་ཅི་མཛད་པ་དང་བཞི་ལས།  དང་པོ་ནི།  ཡེ་ཤེས་ཀྱི་ས་དང་རྡོ་རྗེའི་ས་སྔོན་དུ་འགྲོ་བའི་གཞལ་ཡས་ཁང་ངོ་། །གཉིས་པ་ནི།  ལྷག་མོས་ཀྱི་ལྷ་ཞེས་སོགས་འདོད་པ་ཡང་།  འཕགས་པ་ཡབ་སྲས་ཀྱི་གཞུང་ལས་དེ་ལྟར་དུ་བཤད་པ་
ཡོད་ན་འཐད་དུ་ཆུག་ཀྱང་།  ཁྱོད་ཀྱི་ལུགས་ལ་འགལ་ཏེ།  དེར་འཚང་རྒྱ་བའི་རྟེན་དེ་ལྷག་མོས་ཀྱི་ལྷ་ཉིད་ལ་བྱེད་པ་ཡིན་ནམ།  སྦྱང་གཞི་བསྐལ་པ་དང་པོའི་མི་ལ་བྱེད་པ་ཡིན་ནམ།  ལྷག་མོས་བསྒོམ་པའི་སྒྲུབ་པ་པོ་ལ་བྱེད་པ་ཡིན།  དང་པོ་ལྟར་ན་དེ་
སངས་རྒྱས་ཟིན་པ་ཡིན་པས་སངས་རྒྱ་བའི་རྟེན་དུ་འགལ་ལ།  གཉིས་པ་ལྟར་ན་ཁྱོད་ཀྱི་ལུགས་ལ་གསང་བ་འདུས་པའི་ལམ་ལ་བརྟེན་ནས་ཚེ་གཅིག་ལ་སྐུ་གསུམ་བསྒྲུབ་པའི་རྟེན་ཡིན་ན་འཛམ་བུ་གླིང་པའི་མི་མངལ་སྐྱེས་ཡིན་དགོས་པར་
འདོད་པ་དང་འགལ་ཏེ།  བསྐལ་པ་དང་པོའི་མི་ནི་རྫུས་སྐྱེས་ཡིན་པའི་ཕྱིར་རོ། །གསུམ་པ་ལྟར་ན།  གང་དུ་འཚང་རྒྱ་བའི་གནས་སོགས་བསྒོམ་པའི་སྒྲུབ་པ་པོ་བཞི་ཆར་དེར་འཚང་རྒྱ་བའི་རྟེན་ཡིན་པར་མཚུངས་པས་བཞི་པོ་སོ་སོར་སྦྱར་བ་མི་
10-14-11a


རིགས་ལ།  གོང་འོག་གི་ཆོས་གཞན་གསུམ་པོ་ཡང་སྒྲུབ་པ་པོ་ཉིད་ལ་འཇོག་པ་ཧ་ཅང་ཐལ་ལོ། །དེ་ལ་ཁོ་ན་རེ།  འོ་ན་ཁྱེད་རང་གིས་ཚོགས་གཉིས་བསགས་པ་དང་།  སྲུང་འཁོར་ལ་སོགས་པའི་མངོན་པར་རྟོགས་
པ་རྣམས་བསྐལ་པ་གྲངས་མེད་གསུམ་དུ་ཚོགས་བསགས་པ་དང་།  སྲོད་ལ་བདུད་བཏུལ་བ་ལ་སོགས་པ་སངས་རྒྱ་བའི་རིམ་པ་ལ་སྦྱར་བ་ལ་ཡང་།  གོང་གི་བརྟག་པ་གསུམ་པོ་དེ་མཚུངས་སོ་སྙམ་ན་མི་མཚུངས་ཏེ།  ངེད་ཀྱི་ལུགས་ལ་བསྐལ་པ་
གྲངས་མེད་གསུམ་དུ་ཚོགས་བསགས་པ་ལ་སོགས་པའི་སངས་རྒྱ་བའི་རིམ་པ་རྣམས་ཀྱང་མངོན་པར་རྟོགས་པ་དེ་དང་དེའི་ངོ་བོར་སྣང་བ་བསྒྱུར་བའི་ཚུལ་གྱིས་བསྒོམ།  ཚེ་སྔ་མའི་ལས་ཉོན་དང་།  ཚེ་འདིའི་སྣོད་བཅུད་ལ་སོགས་པའི་སྦྱང་གཞི་རྣམས་
ཀྱང་མངོན་པར་རྟོགས་པ་དེ་དང་དེའི་ངོ་བོར་སྣང་བ་བསྒྱུར་བའི་ཚུལ་གྱིས་བསྒོམས་ལ།  ཁྱོད་ཀྱི་ལུགས་ལ་དེ་མེད་པའི་ཕྱིར་རོ། །ཡང་ཁྱོད་ཀྱིས་སྤྱིར་འདོད་པའི་རྟེན་ལ་འཚང་རྒྱ་བའི་རྟེན་ཡིན་ན།  འཛམ་བུ་གླིང་པའི་མིའི་རྟེན་ཡིན་དགོས་པར་གསུངས་ལ། 
འདིར་ཚེ་གཅིག་ལ་སྔགས་བླ་མེད་ཀྱི་ལམ་ལ་བརྟེན་ནས་སྐུ་གསུམ་འགྲུབ་པའི་རྟེན་ཡིན་ན་འཛམ་བུ་གླིང་པའི་མི་མངལ་སྐྱེས་ཀྱི་རྟེན་ཡིན་དགོས་པ་ལས།  རྒྱུ་མཚན་དེས་ན་འཛམ་བུ་གླིང་པའི་མིའི་སྲིད་པ་སྐྱེ་བའི་རིམ་པ་དང་མཐུན་པར་ལྷ་བསྐྱེད་པའི་རིམ་
པ་འདིར་བསྟན་ཏོ་ཞེས་འདོད་པ་ཡང་མི་འཐད་དེ།  འདི་ལ་བསྒྲུབ་བྱ་དགག་པ་དང་།  སྒྲུབ་བྱེད་དགག་པ་གཉིས་ལས།  དང་པོ་ནི།  འདོད་པའི་རྟེན་ལ་སངས་རྒྱ་བའི་རྟེན་ཡིན་ན་འཛམ་བུ་གླིང་པའི་མིའི་རྟེན་ཡིན་དགོས་ན།  ཀླུའི་རྣལ་འབྱོར་མ་ཆོས་ཅན།  དེར་ཐལ།  དེའི་ཕྱིར།  ཡང་འདིར་ཚེ་གཅིག་
10-14-11b


ལ་སྔགས་བླ་མེད་ཀྱི་ལམ་ལ་བརྟེན་ནས་སྐུ་གསུམ་འགྲུབ་པའི་རྟེན་ཡིན་ན།  འཛམ་བུ་གླིང་པའི་མི་མངལ་སྐྱེས་ཀྱི་རྟེན་ཡིན་དགོས་ན།  སློབ་དཔོན་འཕགས་པ་ལྷ་ཆོས་ཅན།  དེར་ཐལ།  དེའི་ཕྱིར།  གཉིས་ཀ་ལ་འདོད་མི་ནུས་ཏེ།  སྔ་མ་ནི་ཀླུའི་འགྲོ་བ་
པ་ཡིན་པའི་ཕྱིར་དང་།  ཕྱི་མ་ནི་བརྫུས་སྐྱེས་ཡིན་པའི་ཕྱིར་རོ། །སྔ་མའི་གཏན་ཚིགས་གཉིས་པོ་མ་གྲུབ་ན།  འདུས་པའི་བླ་མ་བརྒྱུད་པ་ཆེས་ཆེ་བར་གྲགས་པ་དེ་གཉིས་ཀྱིས་ཀྱང་ཚེ་གཅིག་གིས་སྐུ་གསུམ་མི་འགྲུབ་ན།  གཞན་སུ་ཞིག་གིས་
འགྲུབ་པ་སྨྲོས་ཤིག །གཉིས་པ་ནི།  འདིར་ཚེ་གཅིག་ལ་སྔགས་བླ་མེད་ཀྱི་ལམ་ལ་བརྟེན་ནས་སྐུ་གསུམ་འགྲུབ་པའི་རྟེན་ཡིན་ན།  འཛམ་བུ་གླིང་པའི་མི་མངལ་སྐྱེས་ཀྱི་རྟེན་ཡིན་དགོས་པའི་སྒྲུབ་བྱེད་ཅི་ཡིན་ཞེས་དྲིས་པས།  རྣམ་གཞག་རིམ་
པར་འདུས་པའི་མངོན་པར་རྟོགས་པའི་དངོས་གཞི་འཛམ་བུ་གླིང་པའི་མི་མངལ་སྐྱེས་ཀྱི་སྲིད་པ་སྐྱེ་བའི་རིམ་པ་དང་མཐུན་པར་བསྒོམ་པར་གསུངས་པའི་ཕྱིར་ཞེ་ན།  འདི་ནི་བསྒྲུབ་བྱ་སྒྲུབ་བྱེད་རྟོགས་པ་ཕན་ཚུན་བརྟེན་པས་མཐར་གང་ཡང་མི་འགྲུབ་
པ་སྟེ་ཁྱོད་ཀྱིས་འོག་ཏུ་འདུས་པའི་མངོན་པར་རྟོགས་པའི་རིམ་པ་དེ་ལྟར་བསྒོམ་པའི་སྒྲུབ་བྱེད་དུ་སྔགས་བླ་མེད་ཀྱི་ལམ་ལ་བརྟེན་ནས་ཚེ་གཅིག་ལ་སྐུ་གསུམ་འགྲུབ་པའི་རྟེན་ཡིན་ན།  འཛམ་བུ་གླིང་པའི་མི་མངལ་སྐྱེས་ཀྱི་རྟེན་ཡིན་དགོས་པ་
བཀོད་འདུག་པའི་ཕྱིར་རོ། །ཁྱབ་པ་ཡང་མ་ངེས་ཏེ་ཨ་བྷི་དྷ་ན་ནས་བཤད་པའི་ལྷ་སྒོང་སྐྱེས་ལྟར་བསྐྱེད་པའི་ལམ་ལ་བརྟེན་ནས་ཚེ་གཅིག་ལ་སངས་རྒྱ་བའི་རྟེན་ཡིན་ན།  སྒོང་སྐྱེས་ཀྱི་རྟེན་ཡིན་དགོས་པར་ཐལ།  དེ་ལྟ་བུའི་ལམ་དེ་སྒོང་སྐྱེས་
10-14-12a


ཀྱི་སྲིད་པ་སྐྱེ་བའི་རིམ་པ་དང་མཐུན་པར་བསྒོམས་ནས་གསུངས་པའི་ཕྱིར་ཏེ།  དེ་ཉིད་ལས།  སྒོང་སྐྱེས་གླུ་ནི་མེད་པ་དང་། །སྒྲ་དང་སྒྲ་མིན་སྤངས་པའོ། །ཞེས་གསུངས་པའི་ཕྱིར།  ཡང་སྔར་གྱི་དེའི་སྒྲུབ་བྱེད་དུ་རྣམ་གཞག་རིམ་པར་སྐྱེ་བ་གཅིག་
གིས་ཐོགས་པའི་བྱང་ཆུབ་སེམས་དཔའ་ཆེན་པོ་དགའ་ལྡན་གྱི་གནས་ནས་གླིང་གཞན་གསུམ་དུ་མི་འཇུག་པ།  འཛམ་བུའི་གླིང་དུ་འཇུག་ཅིང་མི་རྣམས་ལ་ཆོས་སྟོན་པའི་རྒྱུ་ཅི་ཡིན་ཞེས་དྲིས་པའི་ལན་དུ།  གླིང་གཞན་གསུམ་གྱི་མི་ནི་བླུན་ཅིང་རྨོངས་
པས་མི་སྤྱོད་ཅིང་མི་འབྱེད་ལ་འཛམ་བུ་གླིང་པ་རྣམས་ནི་མགོ་སྨོས་པས་གོ་བ་དང་།  དབང་པོ་རྣོ་ཞིང་སྒྲིན་པ་དེས་ན་འཛམ་བུའི་གླིང་དུ་འཇུག་པར་མཛད་དོ་ཞེས་གསུངས་པའི་ཕྱིར་ཞེ་ན།  མི་འཐད་དེ།  དེ་ནི་འདུས་པའི་མངོན་པར་རྟོགས་པ་འཛམ་བུ་
གླིང་པའི་མིའི་སྲིད་པ་སྐྱེ་བའི་རིམ་པ་དང་མཐུན་པར་བསྒོམ་པའི་རྒྱུ་མཚན་དུ་བཀོད་པ་ཡིན་གྱི།  སྔ་མའི་སྒྲུབ་བྱེད་དུ་འབྲེལ་མེད་པའི་ཕྱིར་རོ། །རྣམ་གཞག་རིམ་པ་ལས།  སྔར་གྱི་ལུང་དེའི་མཇུག་དུ་རྒྱུ་དེས་ན་འདིར་མིའི་སྲིད་པ་སྐྱེ་བའི་རིམ་པ་
བསྟན་ཏོ་ཞེས་གསུངས་པའི་ཕྱིར་རོ། །ཡང་འདིའི་སྐབས་ཀྱི་ཊཱི་ཀར།  གླིང་གཞན་གསུམ་གྱི་མི་རྣམས་ནི་བླུན་ཅིང་རྨོངས་པས་མི་སྤྱོད་ཅིང་མི་འབྱེད་པ་དེས་ན་རྟེན་དེ་ལ་འཚང་རྒྱ་བར་མི་འགྱུར་ཞེས་བྲིས་པ་ཡང་མི་འཐད་དེ།  བླུན་ཅིང་རྨོངས་པ་ལ་སོགས་
པ་རྣམས་གདུལ་བྱའི་ཁྱད་ཆོས་ཡིན་པས།  དོན་དུ་མི་འགྱུར་བ་ལ་དགོངས་ནས་དེར་སངས་མི་རྒྱ་བ་ཡིན་གྱི།  དེ་དག་རང་ཉིད་ལས་འབྱུང་ནས་སངས་རྒྱ་མི་ནུས་པ་མ་ཡིན་པའི་ཕྱིར་རོ། །གལ་ཏེ་དེ་དག་སྔར་གྱི་དེའི་སྒྲུབ་བྱེད་དུ་འབྲེལ་ཡོད་ན།  སྐྱེ་བ་
10-14-12b


གཅིག་གིས་ཐོགས་པའི་བྱང་ཆུབ་སེམས་དཔའ་དགའ་ལྡན་ནས་བབས་ནས།  འཛམ་བུའི་གླིང་དུ་གསར་དུ་སངས་རྒྱ་བར་ཁས་ལེན་དགོས་ལ།  དེ་ལྟར་ཁས་ལེན་ན།  ཐོག་མར་འོག་མིན་དུ་མངོན་པར་རྫོགས་པར་སངས་རྒྱས་ནས་འདིར་སངས་རྒྱས་བའི་ཚུལ་
སྟོན་པ་མ་ཡིན་པར་འགྱུར་ཏེ།  དེ་འཛམ་བུའི་གླིང་དུ་གསར་དུ་སངས་རྒྱ་བ་ཡིན་པའི་ཕྱིར་རོ། །འདོད་ན་སྤྱིར་ཐེག་པ་ཆེན་པོའི་གཞུང་ལུགས་མཐའ་དག་དང་འགལ་ཞིང་།  ཁྱད་པར་དུ་སྒྲོན་གསལ་ལས་ཐུན་མོང་མ་ཡིན་པའི་གསང་བའི་ལུང་དྲངས་པར།  ཡང་
དག་པར་རྫོགས་པའི་སངས་རྒྱས་རྣམ་པར་སྣང་མཛད་ནི་ཤཱཀྱ་ཐུབ་པར་གྱུར་ཏོ། །འཇམ་དཔལ་ནི་ཟས་གཙང་མར་གྱུར་ཏོ། །འཇིག་རྟེན་དབང་ཕྱུག་ནི་ལྷ་མོ་སྒྱུ་འཕྲུལ་དུ་གྱུར་ཏོ་ཞེས་གསུངས་པ་དང་འགལ་ལོ། །ཡང་སྔར་ཀྱི་དེའི་སྒྲུབ་བྱེད་དུ་འདིར་བླ་མེད་
ཀྱི་ལམ་ལ་བརྟེན་ནས་ཚེ་གཅིག་ལ་སྐུ་གསུམ་འགྲུབ་པའི་རྟེན་ཡིན་ན།  ཐུན་མོང་མ་ཡིན་པའི་གསང་བ་ལས།  མི་རུ་འཁྲུངས་པ་ངེས་ཚུལ་དང་པོ་སྟེ། །རབ་ཏུ་བྱུང་བའི་ཚུལ་ནི་གཉིས་པའོ། །འདུལ་བ་བསྲུང་བ་ཚུལ་ཆེན་གསུམ་པ་སྟེ། །ཏིང་འཛིན་
བརྙེས་པ་ཚུལ་ཆེན་བཞི་པ་ཡིན། །ཞེས་གསུངས་པ་ལྟར་གྱི་ཚུལ་བཞི་དང་ལྡན་དགོས་པའི་ཕྱིར་ཏེ།  རྣམ་གཞག་ལས།  འདས་པ་དང་།  མ་འོངས་པ་དང་།  ད་ལྟར་བྱུང་བའི་སངས་རྒྱས་ཐམས་ཅད་མིའི་བདག་ཉིད་ཀྱི་སྲིད་པར་ཞུགས་ཏེ།  ཐམས་ཅད་
མཁྱེན་པའི་དངོས་གྲུབ་ཀྱི་གོ་འཕང་བརྙེས་པ་དང་ལྡན་པར་འགྱུར་རོ་ཞེས་གསུངས་པའི་ཕྱིར་ཞེ་ན།  འོ་ན་འདིར་བླ་མེད་ཀྱི་ལམ་ལ་བརྟེན་ནས་ཚེ་གཅིག་ལ་སྐུ་གསུམ་འགྲུབ་པའི་རྟེན་ཡིན་ན།  རབ་ཏུ་བྱུང་བའི་རྟེན་ཡིན་དགོས་པར་ཐལ།  གཏན་ཚིགས་
10-14-13a


དང་པོ་དེའི་ཕྱིར།  གཞན་ཡང་འོག་མིན་གྱི་རྟེན་ལ་སངས་རྒྱ་བའི་སངས་རྒྱས་མི་སྲིད་པར་ཐལ།  གཏན་ཚིགས་ཕྱི་མ་དེའི་ཕྱིར།  ཁྱབ་པ་ཁས་བླངས་སོ། །འོ་ན་རྣམ་གཞག་རིམ་པར།  སྐྱེ་བ་གཅིག་གིས་ཐོགས་པའི་
བྱང་སེམས་འཛམ་བུ་གླིང་གི་རྟེན་ལ་སངས་རྒྱ་བ་གསུངས་པ་དང་།  སངས་རྒྱ་བ་ལ་མི་རུ་འཁྲུངས་པ་སོགས་ཀྱི་ཚུལ་དགོས་པར་གསུངས་པ་དང་།  དུས་གསུམ་གྱི་སངས་རྒྱས་ཐམས་ཅད་མིའི་རྟེན་ལ་དངོས་གྲུབ་ཀྱི་མཆོག་བརྙེས་པར་གསུངས་
པ་རྣམས་ཀྱི་དགོངས་པ་གང་ཡིན་སྙམ་ན་བཤད་པར་བྱ་སྟེ།  སྤྱིར་གསང་སྔགས་རྡོ་རྗེ་ཐེག་པ་འབྲས་བུ་ལམ་དུ་བྱེད་པ་ཡིན་པས།  འདུས་པའི་མངོན་པར་རྟོགས་པ་འདིར་ཡང་འབྲས་བུའི་རྣམ་པ་ལམ་དུ་བྱེད་དགོས་ལ།  རྣམ་པ་དེ་ཡང་།  དམ་པ་ཏོག་
དཀར་པོ་འཛམ་བུ་གླིང་གི་མི་མངལ་སྐྱེས་ཀྱི་རྟེན་དུ་འཇུག་སྟེ།  སངས་རྒྱས་པའི་ཚུལ་བསྟན་ནས་འདུས་པའི་དཀྱིལ་འཁོར་སྤྲུལ་པའི་རྣམ་པ་དགོས་པས།  འདིར་དམ་པ་ཏོག་དཀར་པོ་འགྲོ་བ་གཞན་དང་མི་ལ་ཡང་གླིང་གཞན་གསུམ་དུ་མི་
འཇུག་པར་འཛམ་བུ་གླིང་པའི་མི་མངལ་སྐྱེས་ཀྱི་རྟེན་དུ་ཞུགས་ནས་སངས་རྒྱ་བའི་ཚུལ་བསྟན་པའི་རིགས་པའི་སྒྲུབ་བྱེད་སྔར་བཤད་པ་ལྟར་གཉིས་དང་།  ལུང་གི་སྒྲུབ་བྱེད་དེ་ལྟ་བུའི་སངས་རྒྱས་བའི་ཚུལ་བསྟན་པ་ལ་ཐུན་མོང་མ་ཡིན་པའི་གསང་
བ་ནས་གསུངས་པའི་སངས་རྒྱ་བའི་ཚུལ་བཞི་ཚང་དགོས་པ་བཀོད་པ་ཡིན་གྱི།  མངོན་རྟོགས་ཀྱི་ནང་དུ་ནི་ཚུལ་དང་པོའི་རྣམ་པ་ཉིད་བསྒོམས་པས་ཆོག་པས་ཚུལ་བཞི་ཆར་གྱི་རྣམ་པ་བསྒོམ་དགོས་པ་ནི་མ་ཡིན་ནོ། །གོང་གི་ལུང་རིགས་ཀྱི་སྒྲུབ་བྱེད་
10-14-13b


དེས་ན་བསྐལ་པ་བཟང་པོའི་སངས་རྒྱས་འདས་པ་གསུམ།  ད་ལྟ་བ་གཅིག་དང་།  མ་བྱོན་པ་བྱམས་མགོན་ནས་མོས་པའི་བར་ཀྱང་འཛམ་བུའི་གླིང་གི་མིའི་སྲིད་པ་བཟུང་ནས་སངས་རྒྱ་བའི་ཚུལ་སྟོན་ཞེས་བྱ་བའི་དོན་ཡིན་གྱི།  གཞུང་འདིས་བླ་
མེད་ཀྱི་ལམ་ལ་བརྟེན་ནས་སངས་རྒྱ་བའི་དུས་གསུམ་གྱི་སངས་རྒྱས་ཐམས་ཅད་འཛམ་བུ་གླིང་པའི་མིའི་རྟེན་ལ་སངས་རྒྱ་དགོས་ཞེས་འཆད་པ་ནི་ནོར་བའོ། །འོ་ན་འདུས་པའི་སྒྲུབ་ཐབས་འདིར་དམ་པ་ཏོག་དཀར་པོ་མིའི་རྟེན་ལ་འཇུག་པའི་འབྲས་བུའི་རྣམ་
པ་ཉམས་སུ་ལེན་དགོས་པའི་རྒྱུ་མཚན་ཅི་ཡིན་སྙམ་ན།  སྤྱིར་འབྲས་བུའི་རྣམ་པ་ལམ་དུ་བྱེད་པ་དེ་ཡང་རང་གི་རྒྱུད་གསུང་བ་པོ་སྟོན་པ་ཉིད་ཀྱི་རྣམ་འཕྲུལ་ལམ་དུ་བྱེད་པ་ཡིན་པས་ཀྱེ་རྡོ་རྗེ་ལྟ་བུ་ནི་སྟོན་པ་ལོངས་སྐུའི་རྣམ་པ་ལམ་དུ་བྱེད་པ་གཙོ་ཆེ་བ་
ཡིན་ཞིང་།  འཁོར་ལོ་བདེ་མཆོག་ལྟ་བུ་ནི་སྟོན་པ་སྤྲུལ་པ་མཆོག་གིས་དྲག་པོ་དབང་ཕྱུག་ཆེན་པོ་བཏུལ་ནས་རི་རབ་ཀྱི་སྟེང་དུ་དཀྱིལ་འཁོར་སྤྲུལ་ཏེ།  རྒྱུད་འཆད་པའི་རྣམ་པ་ལམ་དུ་བྱེད་པ་ཡིན་ལ།  གསང་བ་འདུས་པ་འདི་ནི་དམ་པ་ཏོག་དཀར་པོ་
འཛམ་བུའི་གླིང་དུ་སངས་རྒྱ་བའི་ཚུལ་བསྟན་ནས།  ཨུ་རྒྱན་གྱི་ཡུལ་དུ་རྒྱལ་པོ་ཨིནྡྲ་བྷཱུ་ཏི་ལ་གསང་བ་འདུས་བའི་དཀྱིལ་འཁོར་སྤྲུལ་པས་རྒྱུད་འཆད་པའི་རྣམ་པ་ལམ་དུ་བྱེད་པ་ཡིན་པས།  དང་པོ་སྦྱོར་བའི་སྐབས་སུ་འདོད་ཆགས་དང་བྲལ་བའི་
ཆོས་ཀྱིས་སངས་རྒྱ་བའི་ཚུལ་བཞིའི་དང་པོའི་རྣམ་པ་ལྟར་བསྒོམ།  དཀྱིལ་འཁོར་རྒྱལ་མཆོག་གི་སྐབས་སུ་འདོད་ཆགས་དང་བཅས་པས་སངས་རྒྱ་བའི་ཚུལ་བཞི་ཆར་གྱི་རྣམ་པ་ཉམས་སུ་ལེན་པ་ཡིན་ནོ། །འོ་ན་འདོད་ཆགས་བྲལ་ཆོས་ཀྱི་
10-14-14a


ཚུལ་ཕྱི་མ་གསུམ་གྱི་རྣམ་པ་ལམ་དུ་མི་བྱེད་པའི་རྒྱུ་མཚན་ཅི་ཡིན་ཞེ་ན།  བླ་མེད་ཀྱི་བསྐྱེད་པའི་རིམ་པ་ནི་སྦྱང་གཞི་སྲིད་པ་སྐྱེ་བའི་རིམ་པ་དང་ཡང་མཐུན་པར་བསྒོམ་དགོས་པས་ཚུལ་དང་པོ་ནི་སྲིད་པ་སྐྱེ་བའི་རིམ་པ་དང་ཡང་མཐུན་པར་
བསྒོམས་ལ་ཚུལ་ཕྱི་མ་གསུམ་ནི་སྲིད་པ་སྐྱེ་བའི་རིམ་པ་ལས་བཟློག་པ་ཡིན་པས་མི་བསྒོམ་ཞིང་འདོད་ཆགས་དང་བཅས་པའི་ཚུལ་བཞི་ཆར་ནི་སྲིད་པ་སྐྱེ་བའི་རིམ་པ་དང་མཐུན་པར་བསྒོམ་པ་ཡིན་ནོ། །འདིར་རྒྱུད་གསུང་བ་པོའི་དཀྱིལ་འཁོར་ནི་
ཤཱཀྱ་ཐུབ་པའི་རྣམ་འཕྲུལ་ཡིན་པས་སངས་རྒྱ་བའི་ཚུལ་བསྟན་པ་ལ་སངས་རྒྱས་ཞེས་དང་།  དམ་པ་ཏོག་དཀར་པོ་ལ་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་ཞེས་དྲང་དོན་དུ་ཁས་བླངས་པ་ཡིན་གྱི།  ངེས་དོན་དུ་ནི།  ཐེག་པ་ཆེན་པོའི་མདོ་
རྒྱུད་སྤྱི་དང་མཐུན་པར་འོག་མིན་དུ་སངས་རྒྱས་ནས་འདིར་སངས་རྒྱ་བའི་ཚུལ་སྟོན་པར་བཞེད་པ་ཡིན་ཏེ།  ཐུན་མོང་མ་ཡིན་པའི་གསང་བའི་ལུང་སྒྲོན་གསལ་དུ་དྲངས་པ་ལས་ཤེས་སོ། །དེས་ན་རྣམ་གཞག་རིམ་པར་སྔར་དོགས་པ་བཀོད་པའི་གཞུང་
གསུམ་གྱི་མཇུག་དུ།  རྒྱུ་དེས་ན་འདིར་མིའི་སྲིད་པ་སྐྱེ་བའི་རིམ་པ་ཡིན་ནོ་ཞེས་གསུངས་པས་འདུས་པའི་སྐབས་འདིར་འབྲས་བུའི་རྣམ་པ་ལ།  དམ་པ་ཏོག་དཀར་པོ་མིའི་རྟེན་དུ་འཇུག་པ་སོགས་དགོས་པས་སྒྲུབ་ཐབས་འདིར་མིའི་
སྲིད་པ་སྐྱེ་བའི་རིམ་པ་དང་མཐུན་པར་བསྒོམ་ཞེས་པའི་དོན་ཡིན་གྱི།  དེ་དག་བླ་མེད་ཀྱི་ལམ་ལ་བརྟེན་ནས་སངས་རྒྱ་བའི་རྟེན་ཡིན་ན་འཛམ་བུ་གླིང་པའི་མངལ་སྐྱེས་ཀྱི་རྟེན་དགོས་པའི་སྒྲུབ་བྱེད་དུ་འཆད་པ་ནི་མཁས་པས་མཐོང་ན་བཞད་གད་
10-14-14b


ཀྱི་གནས་སོ། །ཡང་སྔར་གྱི་དེའི་སྒྲུབ་བྱེད་དུ་རྣམ་གཞག་རིམ་པའི་ཊཱི་ཀར།  རྡོ་རྗེ་སྙིང་པོ་རྒྱན་གྱི་རྒྱུད་ལས་རྣལ་འབྱོར་ཆེན་པོའི་རྒྱུད་ཀྱི་རྣམ་གྲངས་མང་དུ་བཤད་པའི་མཐར།  འདི་ནི་གཉིས་པོ་འཁྱུད་པ་ཡིས། །རྒྱུད་ཀྱི་དབྱེ་བ་བསྟན་པ་ཡིན། །དེ་
བཞིན་དུ་ནི་ལག་བཅང་དང་། །དགོད་དང་བལྟས་པའང་ཤེས་པར་བྱ། །ཞེས་དང་།  སམ་བུ་ཊི་ལས།  དགོད་དང་བལྟ་བ་ལག་བཅང་དང་། །གཉིས་གཉིས་འཁྱུད་པ་ལ་སོགས་བདག །སྲིན་བུའི་ཚུལ་གྱིས་རྒྱུད་བཞིར་གནས། །ཞེས་གསུངས་པས་རྣལ་འབྱོར་
བླ་མེད་ཀྱི་གདུལ་བྱའི་གཙོ་བོ་ཡིན་ན།  དབང་པོ་གཉིས་སྦྱོར་གྱི་འཁྲིག་བདེ་དང་ལྡན་པ་ཅིག་དགོས་ཤིང་།  དབང་པོ་གཉིས་སྦྱོར་གྱི་འཁྲིག་བདེ་དེ།  ངན་འགྲོ་གཉིས་དང་མི་དང་། །འདོད་ལྷ་འོག་མ་གཉིས་ལ་ཡོད་ཀྱང་།  ངན་འགྲོ་ནི་སྔགས་ཀྱི་
ལམ་རྣམ་དག་གི་རྟེན་དུ་མི་རུང་།  འདོད་ལྷ་ལ་ཀུནྡ་ལྟ་བུའི་བྱང་ཆུབ་ཀྱི་སེམས་མེད་པས་བདེ་བ་ཆེན་པོའི་ཡེ་ཤེས་མཚོན་མི་ནུས་པའི་ཕྱིར་ན།  བླ་མེད་ཀྱི་ལམ་ལ་བརྟེན་ནས་ཚེ་གཅིག་ལ་སངས་རྒྱ་བའི་རྟེན་ཡིན་ན།  འཛམ་བུ་གླིང་པའི་མི་མངལ་སྐྱེས་
ཡིན་དགོས་ཞེས་བྱ་བ་བྲིས་སོ། །འོ་ན་བྱ་རྒྱུད་ཀྱི་གདུལ་བྱའི་གཙོ་བོ་ཡིན་ན།  བལྟས་པའི་འཁྲིག་བདེ་དང་ལྡན་པ་དང་།  སྤྱོད་རྒྱུད་ཀྱི་གདུལ་བྱའི་གཙོ་བོ་ཡིན་ན།  དགོད་པའི་འཁྲིག་བདེ་དང་ལྡན་པ་དང་།  རྣལ་འབྱོར་རྒྱུད་ཀྱི་གདུལ་བྱའི་གཙོ་བོ་
ཡིན་ན་ལག་བཅངས་ཀྱི་འཁྲིག་བདེ་དང་ལྡན་དགོས་པར་ཐལ།  བླ་མེད་ཀྱི་གདུལ་བྱའི་གཙོ་བོ་ཡིན་ན།  དབང་པོ་གཉིས་སྦྱོར་གྱི་འཁྲིག་བདེ་དང་ལྡན་དགོས་པའི་ཕྱིར།  འདོད་ན་དེ་གསུམ་ཡིན་ན།  རིམ་པ་བཞིན་གཞན་འཕྲུལ་དབང་བྱེད་པ་དང་།  
10-14-15a


འཕྲུལ་དགའ་བ་དང་།  དགའ་ལྡན་པ་ཡིན་དགོས་པར་ཐལ་ལོ། །གཞན་ཡང་བྱ་རྒྱུད་ཀྱི་ལམ་དུ་བྱ་རྒྱུའི་བལྟས་པའི་བདེ་བ་ཡིན་ན་གཞན་འཕྲུལ་དབང་བྱེད་པའི་བདེ་བ་ཡིན་དགོས་པར་ཐལ།  བླ་མེད་ཀྱི་ལམ་དུ་བྱ་རྒྱུའི་བདེ་
བ་དེ་ཡིན་ན།  འཛམ་བུའི་གླིང་པའི་མིའི་བདེ་བ་ཡིན་དགོས་པའི་ཕྱིར།  རྟགས་ཁས།  འདོད་ན།  འཛམ་བུ་གླིང་པའི་མི་ལ་དེ་ལྟ་བུའི་བལྟས་པའི་བདེ་བ་མེད་པར་ཐལ།  འདོད་པ་དེའི་ཕྱིར།  འདོད་ན།  འཛམ་བུ་གླིང་པའི་མི་ལ་བྱ་རྒྱུད་ཀྱི་སྒྲུབ་
པ་པོ་མེད་པར་ཐལ།  འདོད་པ་དེའི་ཕྱིར།  ཁྱབ་པ་ཁས་བླངས་ཏེ།  ཁྱེད་རང་གིས་བྱ་རྒྱུད་ལ་བདག་བསྐྱེད་ཡོད་པའི་སྒྲུབ་བྱེད་དུ་བྱ་རྒྱུད་ལ་བལྟས་པའི་བདེ་བ་ལམ་དུ་བྱེད་ཅིང་།  དེ་ཡང་རས་བྲིས་ལ་ཡོད་པ་མི་འཐད་པས་སྒྲུབ་པ་པོ་རང་ཉིད་ལ་བྱ་དགོས་
པ་སྐབས་ཀྱི་དོན་ཡིན་པར་སྨྲས་པའི་ཕྱིར་རོ། །གཞན་ཡང་འདོད་པ་ཁམས་ཀྱི་འདོད་ཆགས་ལ་རིགས་བཞིར་གྲངས་ངེས་པར་གསུངས་པའི་འཁྱུད་པའི་འདོད་ཆགས་དེ་དབང་པོ་གཉིས་སྦྱོར་གྱི་འདོད་ཆགས་ཁོ་ན་ལ་འཆད་པ་ཡང་ནོར་ཏེ།  གཞན་དུ་ན་དེ་ལ་བཞིར་གྲངས་མ་ངེས་པར་
ཐལ།  འཐབ་བྲལ་བའི་འཁྲིག་པའི་འདོད་ཆགས་དེ་དགོད་པ་དང་།  བལྟ་བ་དང་།  ལག་བཅངས་ཀྱི་འདོད་ཆགས་ཀྱང་མ་ཡིན།  དབང་པོ་གཉིས་སྦྱོར་གྱི་འདོད་ཆགས་ཀྱང་མ་ཡིན་པའི་ཕྱིར།  ཁྱབ་པ་ཁས་བླངས།  འདོད་ན།  དེར་གྲངས་ངེས་པའི་རྒྱུ་མཚན་གྱིས་རྒྱུད་
སྡེ་བཞིར་གྲངས་ངེས་པར་ཁས་བླངས་པ་དང་འགལ་ལོ། །དེས་ན་འདོད་པ་ཁམས་ཀྱི་འདོད་ཆགས་རིགས་བཞིར་གྲངས་ངེས་པར་གསུངས་པའི་འཁྱུད་པའི་འདོད་ཆགས་ནི་དབང་པོ་གཉིས་སྦྱོར་གྱི་འདོད་ཆགས་དང་།  དེ་མེད་པར་འཁྱུད་པ་ཙམ་གྱི་འདོད་ཆགས་
10-14-15b


གཉིས་ཀའི་ཁྱབ་བྱེད་ཡིན་པས་འཐབ་བྲལ་བ་མན་ཆད་ཀྱི་འཁྲིག་པའི་འདོད་ཆགས་ཐམས་ཅད་སྟོན་པའི་དོན་མ་རྟོགས་པར།  འཁྱུད་པའི་འདོད་ཆགས་འཛམ་བུ་གླིང་པའི་དབང་པོ་གཉིས་སྦྱོར་གྱི་འདོད་ཆགས་ཁོ་ན་ལ་འཆད་པ་ནི།  མཁས་པས་མཐོང་ན་
ལྕེ་རྩེ་དང་པོའི་འབད་པས་མཆིལ་མ་རྒྱང་རིང་དུ་འདོར་བར་རིགས་སོ། །གཞན་ཡང་འདོད་པ་ཁམས་ཀྱི་འདོད་ཆགས་རིགས་བཞི་གང་རུང་དུ་ངེས་པའི་རྒྱུ་མཚན་གྱིས་རྒྱུད་སྡེ་བཞིར་གྲངས་ངེས་པར་གསུངས་པའི་དོན།  རྒྱུད་སྡེ་དེ་དང་དེའི་གདུལ་བྱའི་གཙོ་བོ་འདོད་ཆགས་
དེ་དང་དེ་ལྡན་པ་ལ་འཆད་ན།  བླ་མེད་ཀྱི་དབང་བཞི་པའི་གདུལ་བྱའི་གཙོ་བོ་ཡིན་ན།  གཉིས་གཉིས་འཁྱུད་པའི་འདོད་ཆགས་དང་ལྡན་དགོས་པ་དང་།  དབང་གསུམ་པའི་གདུལ་བྱའི་གཙོ་བོ་ཡིན་ན།  ལག་བཅངས་ཀྱི་འདོད་ཆགས་དང་ལྡན་དགོས་པ་དང་།  
དབང་གཉིས་པའི་གདུལ་བྱའི་གཙོ་བོ་ཡིན་ན་བལྟས་པའི་འདོད་ཆགས་དང་ལྡན་དགོས་པ་དང་།  བུམ་དབང་གི་གདུལ་བྱའི་གཙོ་བོ་ཡིན་ན།  དགོད་པའི་འདོད་ཆགས་དང་ལྡན་དགོས་པར་ཐལ།  བརྟག་གཉིས་ལས།  དགོད་པ་དག་པ་སློབ་དཔོན་ཉིད། །
བལྟ་བ་གསང་བ་དེ་བཞིན་ནོ། །ལག་བཅངས་ལ་ནི་ཤེས་རབ་ཉིད། །གཉིས་གཉིས་འཁྱུད་ལ་དེ་ཡང་ཉིད། །ཞེས་གསུངས་པའི་ཕྱིར།  འདོད་ན།  གང་ཟག་གཅིག་ཉིད་དབང་བཞི་ཆར་གྱི་གདུལ་བྱའི་གཙོ་བོ་རུ་འགྱུར་བ་མི་སྲིད་པར་ཐལ་ལོ། །ངན་འགྲོ་
སྔགས་ཀྱི་ལམ་རྣམ་དག་གི་རྟེན་དུ་མི་རུང་ན།  ངན་འགྲོ་གསང་སྔགས་ཀྱི་ལས་རྒྱར་རུང་བར་མི་སྲིད་པར་ཐལ།  ཁས་བླང་དེའི་ཕྱིར།  ཁྱབ་སྟེ།  བརྟག་གཉིས་ལས།  བྱང་ཆུབ་ས་བོན་གདབ་པ་དང་། །སྦྱང་བ་ཡིས་ནི་གཟུང་བར་བྱ། །ཞེས་དང་།  རང་གིས་
10-14-16a


དབང་བསྐུར་ཀྱེ་རྡོ་རྗེ། །ཞེས་ལས་རྒྱ་སྦྱོང་ཚུལ་གསུངས་པ་དང་།  མ་གསང་སྦྲུལ་དང་ཆོམ་རྐུན་དང་། །ས་སྤྱོད་མེ་ཡི་སྡུག་བསྔལ་བྱེད། །ཞེས་ལས་རྒྱ་བསྟེན་པ་མ་སྨིན་པས་ཚོར་བའི་ཉེས་དམིགས་གསུངས་པའི་ཕྱིར་དང་།  
དམ་ཚིག་དང་མི་ལྡན་པའི་རིག་མ་ཡིད་ཀྱི་ཡུལ་དུ་བསྟེན་པར་དགའ་བ་ཙམ་ལ་ཡང་ཡན་ལག་གི་ལྟུང་བར་བཅས་པའི་ཕྱིར་རོ། །རྩ་བར་འདོད་ན།  སམ་བུ་ཊི་ལས།  ཤེས་རབ་མངོན་དུ་མེད་ན་བྱོལ་སོང་དག་ལ་ཡང་གོམས་པར་བྱའོ། །ཞེས་གསུངས་
པ་དང་འགལ་ལོ། །བླ་མེད་ཀྱི་གདུལ་བྱའི་གཙོ་བོ་ཡིན་ན།  ཀུན་ད་བྱང་ཆུབ་ཀྱི་སེམས་མངོན་དུ་བྱེད་ནུས་པ་ཅིག་དགོས་པར་ཐལ།  དེ་ཡིན་ན།  ཀུནྡ་བྱང་ཆུབ་ཀྱི་སེམས་དང་ལྡན་པ་ཅིག་དགོས་པའི་ཕྱིར།  འདོད་ན།  བུད་མེད་ཀྱིས་ཀུནྡ་བྱང་ཆུབ་
ཀྱི་སེམས་མངོན་དུ་བྱེད་ནུས་པ་ཡོད་པར་ཐལ།  བུད་མེད་བླ་མེད་ཀྱི་ལམ་དུ་གདུལ་བྱའི་གཙོ་བོ་ཡིན་པ་ཡོད་པར་གསང་འདུས་རྩ་རྒྱུད་ཀྱི་རིག་མ་ཆེན་མོ་སྤྱན་ལ་སོགས་ཞེས་པའི་སྒྲུབ་བྱེད་དང་བཅས་ཏེ་ཁས་བླངས་པའི་ཕྱིར།  བས༷ལ་བ་ཁས་བླངས་ཏེ།  བུད་
མེད་ཀྱིས་སྐྱེས་པ་དང་སྙོམས་འཇུག་བྱེད་པའི་ཚེ།  ཀུནྡ་བྱང་ཆུབ་ཀྱི་སེམས་མངོན་དུ་མི་བྱེད་ཅིང་།  དེ་ཉིད་སྐྱེས་པར་བསྒྱུར་ནས་ལས་རྒྱ་བསྟེན་པར་བརྟག་གཉིས་ལས་བཤད་ཀྱང་།  ཁྱེད་ཀྱིས་དེ་བཀག་ནས་འཇིགས་བྱེད་ལ་ཡུམ་ཡོད་པའི་སྒྲུབ་བྱེད་
དུ་བྱས་པའི་ཕྱིར་རོ། །ལྷ་ལ་བླ་མེད་ཀྱི་ལམ་གྱི་གདུལ་བྱའི་གཙོ་བོ་མི་སྲིད་ན།  གཞན་འཕྲུལ་དབང་བྱེད་ལ་སོགས་པ་ལྷའི་གནས་རྣམས་སུ་གསུངས་པའི་བླ་མེད་ཀྱི་རྒྱུད་དང་།  འོག་མིན་དུ་གསུངས་པའི་བླ་མེད་ཀྱི་རྒྱུད་རྣམས་ལ་གདུལ་བྱའི་གཙོ་བོ་མེད་
10-14-16b


པར་འགྱུར་རོ། །ཡང་ཁྱེད་ཀྱིས་དེས་ན་སྲིད་པར་འཁྱམས་པའི་རྩ་བ་བདག་འཛིན་གཅོད་བྱེད་ཀྱི་བདག་མེད་པའི་ལྟ་བ་ནི།  ལམ་གཉིས་ཀ་ལ་འདྲ་བས་སྔགས་ཀྱི་ལམ་ལ་ཡང་།  བསྟན་པའི་སྙིང་པོ་བདག་མེད་པའི་དེ་ཁོ་ན་ཉིད་གཏན་ལ་ཕབ་པའི་ཤེས་རབ་དང་
མ་བྲལ་བ་སྙིང་པོའི་དོན་དུ་ཤེས་པར་བྱའོ་ཞེས་འདོད་པ་ཡང་།  མཐའ་གཅིག་ཏུ་མ་ངེས་ཏེ།  ལྟ་བ་ཐོས་བསམ་གྱིས་གཏན་ལ་ཕབ་པ་མེད་ཀྱང་།  དབང་གི་དུས་སུ་སྐྱེས་བའི་མཚོན་བྱེད་དཔེའི་ཡེ་ཤེས་སྐྱེ་བ་ཡོད་པའི་ཕྱིར་རོ། །དེ་ལ་ཁོ་ན་རེ།  མི་འཐད་དེ།  
དབང་གི་དུས་སུ་སྐྱེས་བའི་མཚོན་བྱེད་དཔེའི་ཡེ་ཤེས་དེ་ནི་ཞི་གནས་རྐྱང་པ་ཡིན་གྱི་ལྷག་མཐོང་མི་སྲིད་པས།  དེ་ལྟ་བུའི་ཞི་གནས་དང་།  ལྟ་བ་ཐོས་བསམ་གྱིས་གཏན་ལ་ཕབ་པའི་ལྷག་མཐོང་གཉིས་ཟུང་འབྲེལ་དུ་བྱས་ཏེ་བསྒོམས་པས།  མཚོན་བྱ་དོན་གྱི་ཡེ་
ཤེས་སྐྱེའོ་ཞེས་སྨྲའོ། །འདི་དགག་པ་ལ་ལུང་དང་།  རིགས་པ་དང་།  ཁས་བླངས་དང་།  མན་ངག་གིས་དགག་པ་དང་བཞི་ལས།  དང་པོ་ནི།  བརྟག་གཉིས་ལས།  རོ་མཉམ་སློབ་མའི་སྤྱོད་ཡུལ་ཉིད། །དེ་ཉིད་ལ་ཡང་བྱ་བར་བྱ། །ཞེས་དབང་གསུམ་པའི་
ཆོ་ག་གསུངས་ནས་དེ་མ་ཐག་དུ།  རང་རིག་ཡེ་ཤེས་ཉིད་དུ་འགྱུར། །རང་གཞན་ཡང་དག་རིག་པ་སྤང་། །མཁའ་མཉམ་རྡུལ་བྲལ་སྟོང་པ་ཉིད། །དངོས་དང་དངོས་མེད་བདག་ཉིད་མཆོག །ཅེས་སོགས་དབང་དེ་དག་གིས་ཡེ་ཤེས་ངོ་སྤྲོད་པ་ཡང་མི་འཐད་པར་
འགྱུར་ཏེ།  དབང་གི་དུས་སུ་དེ་ལྟ་བུའི་ལྟ་བ་སྐྱེ་བ་མི་སྲིད་པའི་ཕྱིར།  དེ་བཞིན་དུ།  ཕྱི་ནས་དེ་ཉིད་ཡང་དག་བཤད། །ཅེས་སོགས་དབང་བསྐུར་བའི་ཕྱི་ནས་ཡེ་ཤེས་ངོ་སྤྲོད་པ་མི་འཐད་བར་འགྱུར་བ་དང་།  ཡེ་ཤེས་འདི་ནི་ཆེས་ཕྲ་ཞིང་། །ཞེས་སོགས་ངོ་སྤྲོད་
10-14-17a


པའི་ཡེ་ཤེས་འདི་དབང་གི་ཡེ་ཤེས་མ་ཡིན་པར་འགྱུར་བ་དང་།  གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟེན་པ་དང་། །བདག་གི་བསོད་ནམས་ལས་ཤེས་བྱ། །ཞེས་གསུངས་
པ་ཡང་མི་འཐད་པར་འགྱུར་བ་དང་།  རྒྱ་གར་གྱི་དཀྱིལ་ཆོག་ཚད་ལྡན་རྣམས་ལས་དབང་བཞི་པའི་སྐབས་སུ་དབང་གསུམ་པའི་ཡེ་ཤེས་ལ་སྤྲོས་བྲལ་གྱི་ལྟ་བའི་ངོ་སྤྲོད་བྱེད་པ་ཐམས་ཅད་ཀྱང་མི་འཐད་པར་འགྱུར་རོ། །གཉིས་པ་ནི།  ཕ་རོལ་དུ་ཕྱིན་པ་
ལས་རྡོ་རྗེ་ཐེག་པ་ལྟ་བ་རྟོགས་ཚུལ་གྱི་སྒོ་ནས་ཁྱད་པར་དུ་འཕགས་པ་མ་ཡིན་པར་འགྱུར་ཏེ།  དབང་གི་དུས་སུ་སྤྲོས་བྲལ་གྱི་ལྟ་བ་མི་སྐྱེ་བར་སྤྲོས་བྲལ་གྱི་ལྟ་བ་ཐོས་བསམ་གྱིས་གཏན་ལ་ཕབ་པ་ལས་ཐབས་གཞན་མེད་པའི་ཕྱིར་རོ། །ཁོ་ན་རེ་སྐྱོན་མེད་དེ།  
དབང་གི་དུས་སུ་སྐྱེས་པའི་ཞི་གནས་དང་ཟུང་འབྲེལ་དུ་བྱས་ནས་བསྒོམས་པས་ཁྱད་པར་འཕགས་པའི་ཕྱིར་ཞེ་ན་མི་འཐད་དེ།  ཕ་རོལ་དུ་ཕྱིན་པ་ལ་ཡང་སེམས་གནས་པའི་ཐབས་དགུ་ལ་སོགས་པས་ཞི་གནས་མཚན་ཉིད་པ་བསྒྲུབས་ཏེ།  དེ་དང་ཟུང་འབྲེལ་
དུ་བྱས་ནས་བསྒོམ་པ་ཡོད་པའི་ཕྱིར་རོ། །གསུམ་པ་ནི།  ཁྱོད་རང་གི་སྔགས་ཀྱི་ལམ་རིམ་དུ་དབང་བཞི་པའི་སྐབས་སུ་དཀྱིལ་ཆོག་རྣམས་ལས་འབྱུང་བ་ལྟར།  ངོ་སྤྲོད་མང་དུ་བྱས་པ་དང་འགལ་ཏེ།  ཞི་གནས་གཅིག་པུ་ལ་དེ་ལྟ་བུའི་ངོ་སྤྲོད་བྱེད་པ་དོན་མེད་
པའི་ཕྱིར་རོ། །བཞི་པ་ནི།  དཔལ་ལྡན་ཆོས་སྐྱོང་གིས་བདག་མེད་མའི་དཀྱིལ་འཁོར་དུ་དབང་བསྐུར་བ་ཐོབ་མ་ཐག་དུ།  ས་དང་པོ་རྒྱུད་ལ་སྐྱེས་པས་ཀྱང་།  དབང་གི་དུས་སུ་ལྷག་མཐོང་སྐྱེ་བར་གྲུབ་སྟེ།  བདག་མེད་མའི་དཀྱིལ་འཁོར་དུ་དབང་མ་
10-14-17b


ཐོབ་ཀྱི་དུས་སུ་སེམས་ཙམ་པ་ཡིན་པས་ཐོས་བསམ་གྱིས་གཏན་ལ་ཕབ་པའི་སྤྲོས་བྲལ་གྱི་ལྟ་བ་མེད་པའི་ཕྱིར་རོ། །རྒྱལ་ཆེན་ཨིནྡྲ་བྷཱུ་ཏཱི་དབང་བསྐུར་ཉིད་ཀྱིས་གྲོལ་བར་གསུངས་པས་ཀྱང་།  དབང་གི་དུས་སུ་ལྷག་མཐོང་སྐྱེ་བར་གྲུབ་སྟེ།  གཞན་
དུ་ན་དབང་གི་རྗེས་སུ་ལམ་བསྒོམས་པ་ལ་ལྟོས་པར་ཐལ་བའི་ཕྱིར་རོ། །གཞན་ཡང་སེམས་ཙམ་པའི་རྒྱུད་ལ་གསང་སྔགས་ཀྱི་ཉམས་ལེན་རྣམ་དག་མེད་པར་འགྱུར་ཏེ།  དེའི་རྒྱུད་ལ་གསང་སྔགས་ཀྱི་ལྟ་བ་རྣམ་དག་མེད་པའི་ཕྱིར།  རྟགས་ཁས་བླངས་
ཏེ།  དེའི་རྒྱུད་ལ་ཐོས་བསམ་གྱིས་གཏན་ལ་ཕབ་པའི་སྤྲོས་བྲལ་གྱི་ལྟ་བ་མེད་ཅིང་།  དབང་གི་དུས་སུ་སྤྲོས་བྲལ་གྱི་ལྟ་བ་སྐྱེ་བ་མི་སྲིད་པའི་ཕྱིར་རོ། །འོ་ན་སྔགས་ལམ་ལ་གནས་པའི་སེམས་ཙམ་པའི་རྒྱུད་ལ་དབང་གི་དུས་སུ་སྤྲོས་བྲལ་གྱི་ལྟ་
བ་སྐྱེས་པས་དེ་དབུ་མ་པར་འགྱུར་རོ་ཞེ་ན།  འདིའི་གནད་ནི་ཁོ་བོས་བཤད་པར་བྱ་ཡིས་ཟབ་མོའི་དོན་ལ་རྩེ་གཅིག་པའི་འདུན་པ་ཡོད་པ་རྣམས་རྣ་བ་བླགས་ཏེ་ཉོན་ཅིག །སྤྱིར་དབུ་མ་པ་དང་སེམས་ཙམ་པ་ལ་སོགས་པ་གྲུབ་མཐའ་སྨྲ་བ་བཞི་ལྟ་བའི་
སྒོ་ནས་སོ་སོར་འཇོག་པ་ནི།  ཕ་རོལ་ཏུ་ཕྱིན་པའི་ལུགས་ཡིན་པས་དེའི་ལུགས་ལ་མཉམ་གཞག་དུ་དབུ་མའི་ལྟ་བ་སྐྱེས་པས་ཀྱང་།  དབུ་མ་པར་འགྱུར་བ་ཡིན་ཏེ།  མཉམ་བཞག་གི་ལྟ་བ་ནི་སྔར་ཐོས་བསམ་གྱིས་གཏན་ལ་ཕབ་པའི་དོན་བསྒོམས་པ་
ལས་བྱུང་བ་ཡིན་པས་མཉམ་རྗེས་གཉིས་པོ་ལྟ་བ་གཅིག་པ་ཁོ་ན་ཡིན་པའི་ཕྱིར་རོ། །སྤྱིར་མཉམ་བཞག་དུ་དབུ་མའི་ལྟ་བ་སྐྱེས་པ་ཙམ་གྱིས་གང་ཟག་དེ་དབུ་མ་པར་འགྱུར་བའི་ངེས་པ་ནི་མེད་དེ།  ལྟ་བའི་སྒོ་ནས་གྲུབ་མཐའ་སྨྲ་བ་སོ་སོར་འཇོག་པ་ནི་
10-14-18a


གྲུབ་མཐའ་དེ་དང་དེ་ཁས་ལེན་པའི་སྒོ་ནས་འཇོག་པ་ཡིན་ལ།  གྲུབ་མཐའ་ཁས་ལེན་པ་དེ་ཡང་རྗེས་ཐོབ་དུ་ངེས་ཤེས་སྐྱེས་པའི་སྒོ་ནས་ཁས་ལེན་པ་ཡིན་གྱི་མཉམ་གཞག་ཏུ་རྟོགས་པ་ཐམས་ཅད་རྗེས་ཐོབ་དུ་ཁས་ལེན་པའི་ངེས་པ་
མེད་པའི་ཕྱིར་རོ། །དེས་ན་སྤྲོས་བྲལ་ལ་ངེས་ཤེས་སྐྱེས་པའི་སྔགས་པ་ནི་མཉམ་རྗེས་ལྟ་བ་མཐུན་ཅིང་།  རྗེས་ཐོབ་དབུ་མའི་ལྟ་བ་ཡིན་པའི་ཕྱིར་ན།  ཕ་རོལ་དུ་ཕྱིན་པའི་ལུགས་ཀྱི་དབུ་མ་པར་འཇོག་ཅིང་།  རྗེས་ཐོབ་དུ་སེམས་ཙམ་པའི་ལྟ་བ་ལ་ངེས་ཤེས་
སྐྱེས་པའི་སྔགས་པ་ནི།  མཉམ་གཞག་དབུ་མའི་ལྟ་བ་སྐྱེས་ཀྱང་རྗེས་ཐོབ་དུ་སེམས་ཙམ་པའི་ལྟ་བ་སྐྱོང་བའི་ཕྱིར་ན་སེམས་ཙམ་པར་འཇོག་པ་ཡིན་ནོ། །ཕ་རོལ་དུ་ཕྱིན་པའི་མཉམ་རྗེས་ལྟ་བ་མཐུན་ཅིང་།  སྔགས་ལ་མཉམ་རྗེས་ལྟ་བ་མཐུན་མི་མཐུན་རྣམ་
པ་གཉིས་འབྱུང་བའི་རྒྱུ་མཚན་ནི།  སྔགས་ཀྱི་མཚོན་བྱེད་དཔེའི་ཡེ་ཤེས་དེ་སེམས་ཙམ་པའི་ལྟ་བར་ངོ་སྤྲོད་པ་དང་།  དབུ་མ་པའི་ལྟ་བར་ངོ་སྤྲད་པ་གཉིས་རྗེས་ཐོབ་ཀྱི་གནས་སྐབས་སུ་སོ་སོར་འགྱུར་བའི་གནད་ཀྱིས་སོ། །ཡང་ཁྱོད་ཀྱིས་སྔོན་གྱི་མཁས་
པ་འགོས་རྔོག་དག་གིས་རྣམ་གཞག་རིམ་པར།  འདིས་བསྐྱེད་པའི་རིམ་པ་བསྒོམ་པར་བྱེད་པ་རྣམས་ཀྱིས་ཀྱང་།  རྣལ་འབྱོར་དང་རྗེས་སུ་རྣལ་འབྱོར་གྱི་རིམ་པས་ལྷའི་སྐུ་བསྐྱེད་པ་བསྟན་ཏོ་ཞེས་པའི་གཞུང་འདིས་བར་སྲིད་དང་མཐུན་པར་ལྷ་བསྐྱེད་པ་སྟོན་
པ་བློ་ལ་མ་བདེ་བས།  འོག་གི་རྐང་ལག་འགྱུས་ཏེ་གནས་སྐབས་ལྔ་གསལ་བར་འགྱུར་རོ་ཞེས་པའི་འོག་དུ་དྲངས་ནས་དང་པོའི་མགོན་པོ་བསྐྱེད་པ་མངལ་གྱི་གནས་སྐབས་ལ་སྦྱར་ནས་འཆད་པ་ནི།  མཁས་པའི་གཞུང་རྣམ་པ་གཞན་དུ་བསྐོར་ཏེ་འཆད་པའི་
10-14-18b


བཤད་པ་ཆེར་མི་འཚམས་པའོ་ཞེས་པ་ཡང་མི་འཐད་དེ།  གང་ཞིག་གང་དང་འབྲེལ་བ་དེ། །རང་བཞིན་གནས་ཀྱང་དེ་དང་དེར། །ཞེས་པའི་ཚུལ་གྱིས་བསྟན་བཅོས་འཆད་པའི་ཚེ་བརྗོད་བྱ་མཐུན་པ་རྣམས་གོང་འོག་གཞན་དུ་གནས་ཀྱང་ཕྱོགས་གཅིག་དུ་
བསྡེབས་ནས་འཆད་པ་མཁས་པའི་ལུགས་ཡིན་པའི་ཕྱིར་དང་།  རྣམ་པ་གཅིག་དུ་ན་ནག་ཚོའི་འགྱུར་ལས།  འདིས་ཞེས་པ་འདིར་ནི་ཞེས་དང་།  བསྟན་ཏོ་ཞེས་པ་བསྟན་ཏེ་ཞེས་པར་ཡོད་པས་རྣལ་འབྱོར་དང་རྗེས་སུ་རྣལ་འབྱོར་གཉིས་པོ་གོང་གི་བར་
སྲིད་ཀྱི་གནས་སྐབས་དང་།  འོག་གི་མངལ་གྱི་གནས་སྐབས་ལྔ་ཀ་ལ་འཇུག་པར་བཞེད་པའི་ཕྱིར་རོ། །དཔལ་ལྡན་བླ་མ་དམ་པའི་ཞལ་སྔ་ནས་ནི་གཞུང་འདི་འོག་ཏུ་དྲང་ཡང་མི་དགོས་ཤིང་།  འགྱུར་གཞན་ཡང་མི་དགོས་ཏེ།  སྦྱང་གཞི་བར་སྲིད་ཀྱི་རྣམ་
གཞག་འདིས་ནི་སྦྱོང་བྱེད་རྣལ་འབྱོར་དང་རྗེས་སུ་རྣལ་འབྱོར་གྱི་རིམ་པས་ལྷའི་སྐུ་བསྐྱེད་པ་བསྟན་ཞེས་པའི་བར་སྲིད་ནི་བར་སྲིད་མཚན་ཉིད་པ་དང་།  ཟླ་བ་བཅུའི་བར་གྱི་མངལ་གྱི་གནས་སྐབས་ལ་བར་སྲིད་ཀྱི་མིང་གིས་བཏགས་པ་གཉིས་ཀ་ལ་འཇུག་
པ་གཞུང་འདིའི་སྐབས་དོན་ཡིན་པའི་ཕྱིར།  དེ་ལ་དེའི་མིང་གིས་བཏགས་པར་གང་ལས་ཤེས་སྙམ་ན་རྣམ་གཞག་ལས།  དེའི་འོག་ཏུ་ཟླ་བ་བཅུའི་མཐར་རྩ་བའི་རྒྱུད་ལས་གསུངས་པའི་དམ་ཚིག་འབྱུང་བ་རྡོ་རྗེའི་ཏིང་ངེ་འཛིན་ཡང་དག་པར་བསྟན་
པའི་རིགས་པས་མའི་མངལ་ནས་འཐོན་པར་འགྱུར་ཏེ།  དེའི་ཕྱིར་དྲི་ཟ་ཉེ་བར་འཁོར་གྱི་སེམས་ཅན་ཤའི་མིག་གི་ཡུལ་དུ་གྱུར་ཏོ་ཞེས་གསུངས་པས་ཤེས་སོ་ཞེས་བཞེད་དོ། །ཡང་ཁྱེད་ཀྱིས་རྗེ་འགོས་ཀྱི་རང་བཞིན་གྱི་རིགས་ཡིན་པས་མེར་མེར་
10-14-19a


པོ་ཨོཾ།  ལྟར་ལྟར་པོ་ཨཱཿ གོར་གོར་པོ་ལ་ཧཱུྃ་གི་དབྱིབས་རང་ཆས་སུ་ཡོད་པར་བཞེད་པ་དང་།  རྔོག་ཉི་མ་སེང་གེས།  གནས་སྐབས་དང་པོ་གསུམ་གྱི་ཚེ་འབྲུ་གསུམ་གྱི་དབྱིབས་དང་།  བར་པ་གཉིས་ཀྱི་ཚེ་སངས་རྒྱས་ཀྱི་
སྙིང་པོ་ཅན་ཡིན་པས་ཕྱག་མཚན་གྱི་དབྱིབས་སུ་ཡོད་ལ།  ལྔ་པ་ནི་སྔར་དང་འདྲ་བར་འཆད་པའང་རྣ་བར་མི་འོང་སྟེ།  དཔལ་ལྡན་ཀླུའི་བྱང་ཆུབ་ལ་སོགས་པའི་ཆེན་པོ་དག་གིས་བར་དོ་དང་ལོངས་སྐུ་སྦྱར་བའི་ཆོས་མཐུན་ཁྱད་པར་ཅན་དོར་ནས་སྣང་
རུང་མ་དམིགས་པས་ཁེགས་པའི་་ལ་སོགས་པས་དབྱིབས་སྒྲུབ་བྱེད་ལྟར་སྣང་ལ་བརྟེན་ནས་ནན་གྱིས་བསྒྲུབ་པའི་ཕྱིར་རོ་ཞེས་སྨྲས་པ་ཡང་མི་འཐད་དེ།  དཔལ་ལྡན་ཀླུའི་བྱང་ཆུབ་ལ་སོགས་པའི་ཆེན་པོ་དག་གིས་བར་དོ་དང་ལོངས་སྐུ་ཆོས་
མཐུན་སྦྱར་བ་ཡང་བསྒྲུབ་བྱར་འདུག་པའི་ཕྱིར་དང་།  མངལ་གྱི་གནས་སྐབས་སུ་་ལ་སོགས་བའི་དབྱིབས་སྣང་རུང་མ་དམིགས་པས་ཁེགས་པར་འདོད་པ་ཡང་།  སྣང་རུང་མ་དམིགས་པའི་དོན་མ་གོ་བ་སྟེ་རྟོག་གེའི་གཞུང་ནས་བཤད་པའི་སྣང་རུང་
མ་དམིགས་པ་ནི་ཚུལ་མཐོང་གི་དབང་དུ་བྱས་པ་ཡིན་ལ་མངལ་གྱི་གནས་སྐབས་སུ་་ལ་སོགས་པའི་དབྱིབས་ཡོད་ཀྱང་ཚུར་མཐོང་ལ་སྣང་དུ་མི་རུང་བའི་ཕྱིར་ཏེ།  ནང་གི་ལུས་ནི་ཡུལ་རུང་མིན། །དེས་ན་རང་གིས་ཀྱང་མི་མཐོང་། །ཞེས་པ་ལྟར་རོ། །
ད་ནི་སྦྱང་གཞི་སྦྱོང་ཚུལ་འདོད་པ་དངོས་ལ་དཔྱད་པར་བྱ་སྟེ།  འདི་ལ་ཕྱོགས་སྔའི་ཁུངས་བསྟན་པ་དང་།  དེའི་དོན་ཞིབ་དུ་དགག་པ་གཉིས་ལས།  དང་པོ་ནི།  བླ་མ་ཙོང་ཁ་པའི་ལུགས་ཀྱིས་སྦྱང་གཞི་སྦྱོང་ཚུལ་དུ་འདོད་པ་རྒྱས་པར་ཁོང་རང་གིས་
10-14-19b


མཛད་པའི་རྣམ་གཞག་རིམ་པའི་ཊཱི་ཀར་ཡོད་པས་དེ་ཞིབ་དུ་བལྟས་ལ་ཕྱོགས་སྔའི་དོན་ཁོང་དུ་ཆུད་པར་བྱ་ཞིང་།  དེ་མ་རྙེད་ན་ཡང་གྲུབ་མཐའ་ཤན་འབྱེད་འདིར་ཁོང་རང་གི་བཞེད་པ་བྲིས་པའི་དོན་རྣམ་བློ་ཡུལ་དུ་ངེས་པར་བྱ་དགོས་ཀྱི།  འདིར་ནི་ཡི་གེ་མང་གིས་
དོགས་ནས་ཕྱོགས་གཅིག་དུ་མ་བཀོད་ལ།  སྐབས་སུ་བབས་པའི་ཕྱོགས་སྔ་རྣམས་ནི་དགག་པ་སོ་སོའི་སྐབས་སུ་འབྱུང་བས།  མི་རྟོགས་པའི་ཉེས་པའང་མེད་དོ། །གཉིས་པ་ལ།  ཆོས་མཐུན་ཤེས་པ་ཙམ་གྱིས་སྐུ་གསུམ་བསྒྲུབ་མི་ནུས། །འདྲ་ཆོས་
ཤེས་ཙམ་བཀག་པ་ཆོས་མཐུན་ལ་ཡང་མཚུངས། །སྦྱང་གཞི་སྦྱོང་བྱེད་བཀག་པས་ཕྱོགས་སྔའི་དོན་མ་རྟོགས། །འགོག་པའི་རིགས་པ་དེ་ཉིད་རང་གི་གཉིས་ལ་མཚུངས། །མཐུན་ཡུལ་སྦྱང་གཞི་སོ་སོར་ཕྱེ་ན་ཁས་བླངས་འགལ། །གཞུང་ལས་བཤད་པ་གཉིས་སུ་ཕྱེ་ན་ཤེས་བྱེད་མེད། །
འབྱུང་འགྱུར་འགོག་པ་སྦྱང་གཞི་སྦྱོང་བའི་དོན་མ་ཡིན། །རྟོག་གེའི་རིགས་པས་བསྒྲུབས་ན་ཐམས་ཅད་ལ་ཡང་མཚུངས། །འབྱུང་འགྱུར་དོད་དུ་གཞན་ཞིག་འབྱུང་ལ་རྣམ་པ་མཐུན་མི་དགོས། །སྦྱང་གཞིའི་ངོས་འཛིན་ལྟར་ན་སྦྱང་གཞི་ཕལ་ཆེར་མེད། །གཞན་གྱི་ཆོས་གསུམ་སྦྱང་གཞི་
ཡིན་མིན་བརྟག་སྟེ་དགག །སྦྱང་གཞིའི་ཆོས་གསུམ་སྟོན་པའི་རྣམ་གཞག་མེད་པར་ཐལ། །ཆོས་མཐུན་སྔ་མའི་སྒྲུབ་བྱེད་ལྟར་ན་ཐུག་མེད་འགྱུར། །ཞར་ལ་ཡིད་ངོའི་གཟུགས་བརྙན་དག་སྣང་ཡིན་པ་དགག །སྒྲུབ་པའི་ཐབས་ཀྱི་ཆོས་མཐུན་
སྦྱོར་ཚུལ་ལྷག་པར་དགག །དེས་ན་བརྩེ་བས་མ་ནོར་གནད་ཀྱི་གདམས་པ་བསྟན། །ཅེས་དོན་ཚན་བཅུ་དྲུག་ལས་དང་པོ་ནི་ཊཱི་ཀར།  དེ་ལྟར་ན་སྲིད་པ་སྐྱེ་བ་དང་ཆོས་མཐུན་སྦྱོར་བ་རྣམས་ཀྱི་སྙིང་པོ་ནི།  སྐྱེ་ཤི་བར་དོ་གསུམ་དང་མཐུན་པར་ལམ་
10-14-20a


གྱི་སྐུ་གསུམ་བསྒོམས་པས་འབྲས་བུའི་སྐུ་གསུམ་དང་ཡང་མཐུན་པར་འབྲས་བུའི་རྣམ་པ་ལམ་དུ་བྱེད་པ་འདི་ཡིན་ལ།  དེའི་ཕྱིར་རིམ་པ་དང་པོའི་སྐབས་སུ་སྐྱེ་ཤི་བར་དོ་གསུམ་གྱི་སོ་སོའི་ཆོས་མཐུན་ངོས་མ་ཟིན་པར་
འཆུགས་ན་རྒྱུད་འགྲེལ་དུ་རྫོགས་རིམ་གྱི་ཆོས་གསུམ་གྱི་ཆོས་མཐུན་གསུངས་པ་རྣམས་ཀྱི་གནད་ཟིན་པ་ཡང་ངེས་པར་འཆུགས་པ་ཡིན་པས་འདི་གལ་ཆེའོ་ཞེས་འདོད་པ་ཡང་མི་འཐད་དེ།  ཁྱོད་ཀྱི་ལྟར་ན་ལམ་གྱི་སྐུ་གསུམ་བསྒོམས་པས་སྐྱེ་ཤི་བར་དོ་
གསུམ་སྦྱངས་ནས་འབྲས་བུའི་སྐུ་གསུམ་བསྒྲུབ་མི་ནུས་པར་ཐལ།  ལམ་གྱི་སྐུ་གསུམ་པོ་དེ་སྐྱེ་ཤི་བར་དོ་གསུམ་གྱི་ངོ་བོ་དང་།  འབྲས་བུའི་སྐུ་གསུམ་གྱི་ངོ་བོར་བསྒོམ་པ་མེད་པར་དེ་དག་དང་ཆོས་མཐུན་པ་ཙམ་དུ་བསྒོམ་པའི་ཕྱིར།  ཁྱབ་སྟེ།  ཐམས་
ཅད་གསང་བའི་རྒྱུད་ལས།  རྒྱུ་ལ་འབྲས་བུའི་རྒྱས་གདབ་ཅིང་། །འབྲས་བུ་ལ་ཡང་རྒྱུའི་རྒྱས་གདབ། །གཞན་དུ་བསྐལ་པ་བྱེ་བ་ནི། །གྲངས་མེད་པར་ཡང་འགྲུབ་མི་འགྱུར། །ཞེས་གསུངས་པའི་ཕྱིར།  རིམ་པ་དང་པོའི་མཐུན་ཡུལ་སྐྱེ་ཤི་བར་དོ་གསུམ་
སོ་སོའི་ཆོས་མཐུན་ངོས་མ་ཟིན་པར་འཆུགས་ཀྱང་ལམ་གྱི་སྐུ་གསུམ་བསྒོམས་པས་འབྲས་བུའི་སྐུ་གསུམ་བསྒྲུབ་ནུས་པར་ཐལ།  ལམ་གྱི་སྐུ་གསུམ་པ་དེ་སྐྱེ་འཆི་བར་དོ་གསུམ་གྱི་ངོ་བོར་བསྒོམ་མི་དགོས་པར་འབྱུང་འགྱུར་གྱི་སྐྱེ་འཆི་བར་དོ་གསུམ་
གྱི་དོད་དུ་འབྲས་བུ་སྐུ་གསུམ་འབྱུང་བ་ཡིན་པའི་ཕྱིར་རོ། །དཔེར་ན་སཱ་ལུའི་མྱུ་གུའི་དོན་དུ་ནས་ཀྱི་མྱུ་གུ་འབྱུང་བར་བྱེད་པ་ལ་དེ་གཉིས་ཀྱི་ས་བོན་བཏབ་ནས་ཆུ་ལུད་ཀྱིས་བྲན་པས་ཆོག་གི་དེ་གཉིས་ཀྱི་སོ་སོའི་རྒྱུ་དང་འབྲས་བུ་ངོས་ཟིན་མི་དགོས་པ་བཞིན་ནོ། །
10-14-20b


གཉིས་པ་ནི་ཊཱི་ཀར་རྟོག་ལྡན་ལ་སྐྱེ་བའི་དོགས་པ་དགོད་པའི་སྐབས་སུ།  གལ་ཏེ་སྔར་བཤད་པ་ལྟར།  སྣོད་བཅུད་ཀྱི་སྲིད་པའི་རིམ་པ་དང་།  རྟེན་དང་བརྟེན་པའི་ལྷ་བསྒོམ་པའི་རིམ་པ་གཉིས་ལ་དངོས་པོ་ལ་འདྲ་བ་ཡོད་དུ་ཆུག་ཀྱང་དེ་རྟོགས་པས་ཅི་ཞིག་བྱ་
སྟེ་འདྲ་བར་མ་ཤེས་ཀྱང་མངོན་རྟོགས་བསྒོམས་པས་འདོད་པའི་དོན་བསྒྲུབ་པ་ལ་མི་སྒྲིབ་པའི་ཕྱིར་ཏེ།  སྒྲིབ་ན་ནི་འདི་འདྲ་ཡུལ་གཞན་རྣམས་ཡང་འདྲ་བར་རྟོགས་དགོས་པས་ཧ་ཅང་ཐལ་བར་འགྱུར་རོ་ཞེས་སོགས་ཀྱི་དོགས་པ་བཀོད་ནས་ལན་གྱི་སྐབས་སུ་དེ་
གཉིས་ལ་ཆོས་མཐུན་གྱི་འདྲ་ཆོས་གཅིག་དངོས་པོ་ལ་ཡོད་པ་དེ་ངོས་ཟིན་པ་ཙམ་གྱིས་འདྲ་ཆོས་སྒྲིག་པར་བྱེད་པ་མ་ཡིན་པས་ཧ་ཅང་ཐལ་བའི་ཉེས་པ་མེད་ཅེས་ལན་བཏབ་པས་འདྲ་ཆོས་སྒྲིག་པ་ལ་སྔར་གྱི་སྐྱོན་དེ་འཇུག་པར་ཁས་ལེན་པ་ཡིན་པས།  དེ་ནི་ཆོས་
མཐུན་ལ་ཡང་མཚུངས་ཏེ།  འདི་ལྟར་སྲིད་པ་སྐྱེ་བའི་རིམ་པ་དང་།  ལྷ་བསྐྱེད་པའི་རིམ་པ་གཉིས་ལ་དངོས་ལ་ཆོས་མཐུན་ཡོད་དུ་ཆུག་ཀྱང་དེ་རྟོགས་པས་ཅི་ཞིག་བྱ་སྟེ།  ཆོས་མཐུན་པར་མ་ཤེས་ཀྱང་མངོན་རྟོགས་བསྒོམས་པས་འདོད་པའི་དོན་བསྒྲུབ་
པ་ལ་མི་སྒྲིབ་པའི་ཕྱིར་ཏེ།  སྒྲིབ་ན་ནི་འདི་འདྲ་ཡུལ་གཞན་རྣམས་དང་ཡང་འདྲ་བར་རྟོགས་དགོས་པས་ཧ་ཅང་ཐལ་བར་འགྱུར་རོ་ཞེས་སོགས་ཐམས་ཅད་མཚུངས་སོ། །གསུམ་པ་ནི།  ཊཱི་ཀར་རྟོག་ལྡན་ལ་སྐྱེ་བའི་དོགས་པའི་སྐབས་སུ།  འོན་ཏེ་ཆོས་
མཐུན་སྦྱར་བ་ནི་སྲིད་པའི་སྣོད་བཅུད་འདི་དང་འདི་རྟེན་དང་བརྟེན་པའི་རྣལ་འབྱོར་འདི་དང་འདིས་སྦྱོང་བ་ཡིན་ནོ་ཞེས་སྦྱང་གཞི་སྦྱོང་བྱེད་ངོ་འཕྲོད་པའི་དོན་དུ་ཡིན་ནོ་སྙམ་ན།  བསྐལ་པ་དང་པོར་བྱུང་ཟིན་པའི་སྣོད་བཅུད་ཀྱི་སྐྱེ་འཆི་བར་དོ་རྣམས་ད་ལྟ་
10-14-21a


ལམ་བསྒོམ་པའི་བྱེད་པས་སྦྱོང་བར་འདོད་པ་ནི།  ན་ནིང་ཞིག་པའི་བུད་ཤིང་ད་ལོའི་མེས་བསྲེག་པར་འདོད་པ་དང་འདྲ་བས།  སྙིང་པོ་མེད་པའི་གཏམ་མོ་ཞེས་པའི་དོགས་པ་བཀོད་ནས་ལན་གྱི་སྐབས་སུ་བསྐལ་པ་དང་
པོའི་སྣོད་བཅུད་ཀྱི་རིམ་པ་རྣམས་ད་ལྟ་ལམ་བསྒོམ་པའི་སྦྱང་གཞིར་བོད་ཀྱི་འདུས་པ་ལ་སྦྱངས་པ་རྣམས་འཆད་མོད་ཀྱང་།  ཁོ་བོ་ཆོས་མཐུན་གྱི་ཡུལ་དང་སྦྱང་གཞི་གཉིས་སོ་སོར་མ་ཕྱེད་པའི་གཏམ་འདི་མི་སྨྲ་སྟེ་ཞེས་ལན་བཏབ་པས།  སྦྱང་གཞིར་འདོད་པ་
ལ་སྔར་གྱི་སྐྱོན་དེ་འཇུག་པ་ཁས་ལེན་པ་ཡིན་ལ་དེ་ནི་སྦྱང་གཞིར་འདོད་པའི་ཚུལ་ལ་གནོད་པ་ཅུང་ཟད་ཀྱང་མེད་དེ།  སྦྱང་གཞི་སྦྱོང་བྱེད་ཀྱི་དོན་སྣོད་བཅུད་ཞིག་ཟིན་པ་སྤང་བྱར་བྱས་ནས་ད་ལྟ་ལམ་བསྒོམ་པའི་བྱེད་པས་སྤོང་བར་མི་འདོད་ཀྱི་སྣོད་བཅུད་ཞིག་
ཟིན་པ་ལ་ཐ་མལ་དུ་འཛིན་པའི་རྣམ་རྟོག་སྦྱངས་ནས་དག་པའི་རྟེན་དང་བརྟེན་པ་ཉིད་དུ་བསྒྱུར་བར་འདོད་པའི་ཕྱིར་ཏེ།  བརྟག་གཉིས་ལས།  དེ་བཞིན་དངོས་པོའི་རྣམ་རྟོག་ཀྱང་། །རྣམ་པར་ངེས་པར་སྦྱང་བར་བྱ། །ཞེས་དང་།  གུར་ལས།  ཕལ་པའི་རྣམ་
རྟོག་གཞོམ་པའི་ཕྱིར། །བསྒོམ་པ་ཡང་དག་རབ་ཏུ་གྲགས། །ཞེས་གསུངས་པའི་ཕྱིར།  ལུང་འདི་གཉིས་ཀྱི་དོན་སོམས་ལ་བླ་མ་འུད་པོ་ཆེ་ཁྱེད་རྣམས་ཐུགས་དྲན་པས་ཟུང་ཤིག །བཞི་པ་ནི།  གལ་ཏེ་སྔར་ཞིག་ཟིན་པའི་སྣོད་བཅུད་ཐ་མལ་དུ་འཛིན་པའི་རྟོག་
པ་ད་ལྟ་ལམ་བསྒོམ་པའི་བྱེད་པས་སྦྱོང་བར་འདོད་པ་ལ་ཡང་སྔར་གྱི་སྐྱོན་དེ་འཇུག་པར་འདོད་ན་ནི་ཁྱེད་རང་གིས་འབྱུང་འགྱུར་གྱི་སྐྱེ་ཤི་བར་དོ་གསུམ་ད་ལྟ་ལམ་བསྒོམ་པའི་བྱེད་པས་སྦྱོང་བར་འདོད་པ་དང་།  ད་ལྟ་བདེན་མེད་བསྒོམ་པའི་ལྟ་བས་སྔར་ཞིག་ཟིན་
10-14-21b


པའི་སྣོད་བཅུད་བདེན་འཛིན་གྱི་རྣམ་རྟོག་སྦྱོང་བར་འདོད་པ་གཉིས་ལ་མཚུངས་ཏེ།  འདི་ལྟར་སང་ཕོད་འབྱུང་འགྱུར་གྱི་བུད་ཤིང་ད་ལོའི་མེས་བསྲེག་པར་ཐལ།  འདོད་པ་སྔ་མ་དེའི་ཕྱིར།  ན་ནིང་ཞིག་ཟིན་པའི་བུད་ཤིང་ད་ལོའི་མེས་བསྲེག་པར་ཐལ།  
འདོད་པ་ཕྱི་མ་དེའི་ཕྱིར།  ལྔ་པ་ནི།  ཁོ་བོ་ནི་ཆོས་མཐུན་གྱི་ཡུལ་དང་།  སྦྱང་གཞི་གཉིས་མ་ཕྱེད་པའི་གཏམ་དེ་མི་སྨྲ་སྟེ་ཞེས་པའི་དོན་ཆོས་མཐུན་གྱི་ཡུལ་ཡིན་ན།  སྦྱང་གཞི་མ་ཡིན་པས་ཁྱབ་པ་ཡིན་ན་ནི་ལམ་བསྒོམ་པའི་སྒྲུབ་པ་པོ་ལ།  འབྱུང་
འགྱུར་གྱི་སྐྱེ་ཤི་བར་དོ་གསུམ་པོ་དེ་ཆོས་ཅན།  དེར་ཐལ།  དེའི་ཕྱིར་གསུམ་ཆར་ཁས་བླངས།  དྲུག་པ་ནི།  གལ་ཏེ་དེའི་དོན་དེ་ལྟར་མ་ཡིན་གྱི་རྣམ་གཞག་ལས་བཤད་པའི་བསྐལ་པ་དང་པོ་ཞིག་པ་དང་།  བསྐལ་པ་འདི་ཆགས་ནས་དེར་བསྐལ་པ་དང་པོའི་
སེམས་ཅན་ཆགས་པའི་རིམ་པ་རྣམས་ནི་ཆོས་མཐུན་གྱི་ཡུལ་ཡིན་གྱི་སྦྱང་གཞི་མ་ཡིན།  སྐྱེ་འཆི་བར་དོ་གསུམ་བཤད་པ་ནི་ཆོས་མཐུན་གྱི་ཡུལ་དང་་སྦྱང་གཞི་གཉིས་ཀ་ཡིན་པའི་དོན་ཡིན་ནོ་ཞེ་ན་མི་འཐད་དེ།  མདོར་བྱས་ལས།  རྣལ་འབྱོར་རྒྱུད་ཀྱིས་
སྦྱང་བར་བྱ། །ཞེས་གསུངས་པ་ལ།  སྦྱང་གཞི་གང་སྦྱོང་བྱེད་གང་གིས་སྦྱོང་བ་ཡིན་སྙམ་ན་རྣམ་གཞག་རིམ་པར་སྦྱང་གཞི་བསྐལ་པ་སྔ་མ་ཞིག་ཅིང་འདི་ཆགས་པ་ནས་མངལ་ནས་སེམས་ཅན་ཕྱིར་བཙས་པའི་བར་དེ་སྦྱོང་བྱེད་ཡེ་ཤེས་ཀྱིས་བསྐྱེད་པ་ནས་
སེམས་དཔའ་སུམ་བརྩེགས་ཀྱི་བར་དང་སྦྱར་ནས་གསུངས་པས་དེ་དག་སྦྱང་གཞི་ཡིན་ན་ཡིན་མཉམ་དང་ཆོས་མཐུན་གྱི་ཡུལ་ཡིན་ན་ཡིན་མཉམ་དགོས་ཀྱི་སོ་སོར་ཕྱེ་བ་ནི་རང་བཟོ་ཁོ་ན་ཡིན་པའི་ཕྱིར་རོ། །གཞན་ཡང་རྣམ་གཞག་རིམ་པར་བཤད་པའི་སྐྱེ་འཆི་
10-14-22a


བར་དོ་གསུམ་པོ་དེ་ཆོས་ཅན།  འདུས་པའི་ལམ་གྱི་སྦྱང་གཞི་མ་ཡིན་པར་ཐལ།  འདུས་པའི་ལམ་བསྒོམ་པའི་སྒྲུབ་པ་པོ་ལ་འབྱུང་འགྱུར་མ་ཡིན་པའི་ཕྱིར་གསུམ་ཆར་ཁས་བླངས་སོ། །བདུན་པ་ནི།  ཊཱི་ཀར་།  སྔ་
རབས་པའི་སྦྱང་གཞི་སྦྱོང་ཚུལ་འགོག་པའི་སྐབས་སུ་འབྱུང་འགྱུར་ནི་རྒྱུའི་ནུས་པ་བཀག་པའི་སྒོ་ནས་དགག་ནུས་ལ།  འབྲས་བུ་ཕྱུང་ཟིན་གཉིས་ཀ་ལ་འགོག་པའི་བྱེད་པ་མི་འཇུག་པའི་ཕྱིར་ཞེས་སྨྲས་པས།  འབྱུང་འགྱུར་གྱི་ནུས་པ་འགོག་པ་ཁོ་
ན་ལ་སྦྱང་གཞི་སྦྱོང་བའི་དོན་དུ་ཁས་ལེན་པ་ཡིན་ནོ། །དེ་ནི་མི་འཐད་དེ།  འབྱུང་འགྱུར་གྱི་ནུས་པ་འགོག་པ་ལ་སྦྱང་གཞི་སྦྱོང་བའི་དོན་དུ་སྤྱིར་རྒྱུད་གཞུང་གང་དུ་ཡང་མ་བཤད།  བྱེ་བྲག་དུ་འདུས་པ་འཕགས་ལུགས་ཀྱི་ཆོས་སྐོར་གང་ནས་ཀྱང་མ་
བཤད་ཅིང་དོན་ཐོབ་ལ་ཡང་མེད་པའི་ཕྱིར་ཏེ།  ལམ་བསྒོམ་པའི་བྱེད་པས་སྤང་བྱ་འབྱུང་འགྱུར་གྱི་ནུས་པ་འགོག་པ་ནི་ཕ་རོལ་དུ་ཕྱིན་པ་དང་།  རྒྱུད་སྡེ་འོག་མ་གསུམ་གྱི་ཉམས་ལེན་ལ་ཡང་ཡོད་ཅིང་སྦྱང་གཞི་སྦྱོང་བྱེད་ནི་རྣལ་འབྱོར་ཆེན་པོའི་ཁྱད་ཆོས་ཡིན་
པའི་ཕྱིར་རོ། །བརྒྱད་པ་ནི།  གལ་ཏེ་སྦྱང་གཞི་སྦྱོང་བར་བྱེད་པ་ལ་སྦྱང་གཞི་འབྱུང་འགྱུར་གྱི་རྒྱུའི་ནུས་པ་བཀག་པའི་སྒོ་ནས་སྦྱོང་དགོས་ཏེ།  རིགས་པའི་རྒྱལ་པོས།  སྐྱེ་འདོད་ཉེས་པ་བཅོམ་པའི་ཕྱིར། །གང་ཡང་སྐྱོན་རྣམས་འགོག་བྱེད་
པ། །དེ་སྐྱེས༷་ལས་ལ་ནུས་འགྱུར་གྱི། །ཇི་ལྟར་བྱས་པ་ཉམས་པར་འགྱུར། །ཞེས་གསུངས་པའི་ཕྱིར་རོ། །ཞེས་སྨྲའོ། །འོ་ན་འབྱུང་འགྱུར་གྱི་སྐྱེ་ཤི་བར་དོ་གསུམ་སྦྱོང་བར་བྱེད་པའི་ལམ་ཡིན་ན།  དེ་དང་རྣམ་པ་འགལ་དགོས་པར་
10-14-22b


ཐལ།  རིགས་པའི་རྒྱལ་པོས།  བྱམས་སོགས་རྨོངས་དང་འགལ་མེད་ཕྱིར། །ཤིན་ཏུ་ཉེས་པ་ཚར་གཅོད་མིན། །ཞེས་གསུངས་པའི་ཕྱིར།  འདོད་ན་ལམ་གྱི་སྐུ་གསུམ་ཆོས་ཅན།  དེར་ཐལ།  དེའི་ཕྱིར་གསུམ་ཆར་ཁས་བླངས།  གཞན་ཡང་
འབྱུང་འགྱུར་གྱི་སྐྱེ་ཤི་བར་དོ་གསུམ་སྦྱོང་བར་བྱེད་པའི་ལམ་ཡིན་ན།  དེ་གསུམ་གྱི་ཞེན་ཡུལ་སུན་འབྱིན་དགོས་པར་ཐལ།  རིགས་པའི་རྒྱལ་པོས།  འདི་ཡུལ་སུན་དབྱུང་མེད་པར་ནི། །དེ་སྤོང་བར་ནི་ནུས་མ་ཡིན། །ཞེས་གསུངས་པའི་ཕྱིར།  འདོད་
ན་སྔ་མ་བཞིན་ནོ། །དགུ་པ་ནི།  ཊཱི་ཀར།  སྤྱིར་འཕགས་པ་ཡབ་སྲས་ཀྱི་བཞེད་པས་སྔགས་ཀྱི་སྙིགས་དུས་ཀྱི་མིས་ཚེ་གཅིག་ལ་བསྒྲུབ་པར་བྱ་བའི་འབྲས་བུ་ཐུན་མོང་མ་ཡིན་པ་ནི་གཞི་ལ་ཆོས་གསུམ་གནས་པ་ཅི་འདྲ་བ་དེ་འདྲ་བའི་སྐུ་གསུམ་གྱི་གོ་
འཕང་ཞིག་ཡིན་ནོ། །དེས་ན་དེ་གསུམ་དང་འདྲ་བའི་ལམ་གསུམ་བསྒོམས་པས་མཐར་ཐ་མལ་པ་ལ་འཆི་བ་འོང་བའི་དོད་ལ།  རྣལ་འབྱོར་པ་ལ་དོན་དམ་པའི་བདེན་པ་མངོན་དུ་བྱས་པའི་ཆོས་སྐུ་འོང་ཞིང་།  ཐ་མལ་པ་ལ་བར་དོ་འོང་བའི་དོད་ལ་
རྣལ་འབྱོར་པ་ལ་ལོངས་སྐུ་འོང་ལ།  ཐ་མལ་པ་ལ་སྐྱེ་བ་འོང་བའི་དོད་ལ་རྣལ་འབྱོར་པ་ལ་སྤྲུལ་སྐུ་འོང་བ་ཡིན་ནོ། །འདི་ནི་གཞུང་གཞན་ནས་བཤད་པའི་སྐུ་གསུམ་དང་མི་འདྲ་ཡི།  འདི་ཉིད་ཀྱི་ཁྱད་ཆོས་མཆོག་དུ་གྱུར་པའོ། །དེ་ལྟར་ན་ཐབས་
མཁས་དང་བྲལ་ན་འཁོར་བའི་རྒྱུར་འགྱུར་བའི་སྐྱེ་འཆི་བར་དོ་གསུམ་འོང་རྒྱུ་དེ་ཐབས་མཁས་ཀྱི་མཐུས་དེ་གསུམ་ཅི་འདྲ་བ་དེ་འདྲ་བའི་སྐུ་གསུམ་དུ་བསྒྱུར་བ་ཡིན་ཏེ།  བར་དོ་སོགས་འོང་བའི་དོད་ལ་ལོངས་སྐུ་སོགས་འོང་བ་ནི་སྤྱོད་བསྡུས་ལས་གསུངས་
10-14-23a


སོ། །དེས་ན་གཞིའི་སྐྱེ་ཤི་བར་དོ་གསུམ་དང་རིགས་མཐུན་པའི་སྐུ་གསུམ་སྒྲུབ་པར་བྱེད་པའི་གནད་ཀྱིས་ལམ་དུ་ཡང་དེ་གསུམ་དང་རྗེས་སུ་མཐུན་པའི་རིམ་པ་སྟོན་པས་སྣོད་བཅུད་ཀྱི་སྲིད་པ་རེ་དང་བསྟུན་ནས།  དེའི་དོད་
ལ་ལམ་འདི་འདྲ་ཞིག་བསྒོམ་ཞེས་གསུངས་ཏེ།  དཔེར་ན་རས་བྲིས་ལ་དོན་མེད་པའི་གཟུགས་བརྙན་མང་པོ་བྲི་བ་ཞིག་ལ།  དེའི་དོད་ལ་སངས་རྒྱས་ཀྱི་སྐུ་གཟུགས་འདི་བྲིས་ཤིག །ཅེས་སྨྲ་བ་བཞིན་དུ་འཁོར་བ་ལ་སྣོད་བཅུད་འདི་ལྟར་འབྱུང་བའི་
དོད་ལ་གཞལ་ཡས་ཁང་དང་སྐུ་གསུམ་འདི་འདྲ་བ་ཞིག་འོང་བ་གྱིས་ཞེས་གསུངས་པ་ཡིན་ནོ་ཞེས་བྲིས་ཏེ།  འདི་ནི་ལུགས་འདིའི་སྦྱང་གཞི་སྦྱོང་ཚུལ་གྱི་འདོད་པ་མཐར་ཐུག་པའོ། །དེ་དག་རིམ་པ་བཞིན་འགོག་པ་ནི་གཞི་ལ་ཆོས་གསུམ་གནས་པ་
ཅི་འདྲ་བ་དེ་འདྲ་བའི་སྐུ་གསུམ་གྱི་གོ་འཕང་ཞེས་པའི་ཆོས་སྐུའི་གོ་འཕང་དེ་སྒྱུ་ལུས་དང་ཟུང་འཇུག་གི་བར་གྱི་འོད་གསལ་ལ་འཇོག་པ་ཡིན་ན་ནི།  ཤིན་ཏུ་མི་འཐད་དེ།  དེའི་བར་གྱི་འོད་གསལ་ནི་སློབ་ལམ་གྱི་གནས་སྐབས་ཡིན་ལ།  སྔ་མ་ནི་
འབྲས་བུ་སྐུ་གསུམ་གྱི་གནས་སྐབས་ཡིན་པའི་ཕྱིར་རོ། །གལ་ཏེ་དེ་གཉིས་ཀྱི་བར་གྱི་འོད་གསལ་དེ་ལ་མི་འཇོག་ན་སྐུ་གསུམ་གྱི་གོ་འཕང་ཞེས་པའི་ལོངས་སྐུ་དེ་འོད་གསལ་ལས་ལུགས་བཟློག་དུ་ཤར་བའི་རླུང་སེམས་ཙམ་ལས་གྲུབ་པའི་ལོངས་སྐུར་
འདོད་པ་འགལ་ལོ། །འདི་ནི་གཞུང་གཞན་ལས་བཤད་པའི་སྐུ་གསུམ་དང་མི་འདྲ་ཞེས་པ་ནི་བདེན་པར་སྣང་སྟེ།  ཐེག་པ་ཆེན་པོའི་གཞུང་ལུགས་གང་ལས་ཀྱང་།  སྐུ་གསུམ་གཅིག་ཆར་དུ་གྲུབ་པ་མ་གཏོགས་པ།  སྐུ་གསུམ་འགྲུབ་ཚུལ་གྱི་གོ་རིམ་འདི་
10-14-23b


ལྟ་བུ་བཤད་པ་མེད་པའི་ཕྱིར་རོ། །འདི་ཉིད་ཀྱི་ཁྱད་ཆོས་མཆོག་དུ་གྱུར་པ་ནི་མི་བདེན་སྟེ།  རིམ་པ་ལྔའི་ནང་ཚན་དུ་གྱུར་པའི་འོད་གསལ་དང་།  འབྲས་བུའི་སྐབས་ཀྱི་ཆོས་སྐུ་གཉིས་དོན་གཅིག་ན་བདེན་ཀྱང་།  དེ་གཉིས་དོན་གཅིག་པ་གོང་དུ་བཀག་
ཟིན་པའི་ཕྱིར།  ཐབས་མཁས་དང་བྲལ་ན་སྐྱེ་ཤི་བར་དོ་གསུམ་འོང་རྒྱུ་དེ་ཐབས་མཁས་ཀྱི་མཐུས་སྐུ་གསུམ་དུ་བསྒྱུར་བར་སྤྱོད་བསྡུས་ལས་གསུངས་ཅེས་པ་ཡང་མི་འཐད་དེ།  ཁྱོད་རང་གིས་དྲངས་པའི་སྤྱོད་བསྡུས་ཀྱི་ལུང་དེ་ལྟར་བྱིས་པ་སོ་སོའི་སྐྱེ་
བོ་སྲིད་པ་བར་མ་ཞེས་བྱ་བ་ནི་འཁོར་བའི་རྒྱུར་འགྱུར་རོ་ཞེས་སོགས་ནི་ཚེ་འདིར་བདེན་པ་མ་མཐོང་བར་འཆི་འཕོས་ཏེ་ལས་དབང་གིས་བར་དོ་གྲུབ་པའི་རྟེན་ལ་སྒྱུ་ལུས་བསྒྲུབ་པའི་ལུང་ཡིན་ཞིང་།  ཡང་དེ་ཉིད་ལས།  དེ་བས་ན་དེ་ཁོ་ན་ཉིད་ཤེས་པ་ནི་རྐྱེན་མ་ཚང་
བ་ཇི་སྐད་དུ་བཤད་པའི་སྤྱོད་པ་གལ་ཏེ་མ་སྤྱད་དུ་ཟིན་ཀྱང་།  ཞེས་སོགས་དྲངས་པ་ནི་རྫོགས་རིམ་ཐོབ་པ་ཞིག་སྤྱོད་པ་བྱེད་པ་མ་བྱུང་བར་འཆི་བའི་དབང་དུ་བྱས་ནས་གསུངས་པར་ཁྱེད་རང་གིས་ཀྱང་ཁས་བླངས་ཤིང་དོན་ལ་ཡང་དེ་ལྟར་དུ་གནས་པའི་
ཕྱིར།  གཞིའི་སྐྱེ་ཤི་བར་དོ་གསུམ་དང་།  རིས་མཐུན་པའི་སྐུ་གསུམ་སྒྲུབ་པར་བྱེད་པ་ལ་ལམ་དུ་དེ་གསུམ་དང་རྗེས་སུ་མཐུན་པའི་རྣམ་པ་བསྒོམ་དགོས་པ་ཡང་ཁྱོད་ཀྱི་ལུགས་ལ་འགལ་ཏེ།  གཞིའི་སྐྱེ་འཆི་བར་དོ་གསུམ་པོ་དེ་ལམ་གྱི་
སྐུ་གསུམ་གྱི་ངོ་བོར་མི་བསྒོམ་པའི་ཕྱིར་རོ། །གལ་ཏེ་དེའི་ངོ་བོར་མི་བསྒོམ་ཀྱང་སྐྱེ་འཆི་བར་དོ་གསུམ་གྱི་དོད་དུ་དེ་དང་རིས་མཐུན་གྱི་འབྲས་བུ་གཞན་ཞིག་འབྱུང་བ་ལ་དེ་དང་རྣམ་པ་མཐུན་པར་བསྒོམ་དགོས་ན།  ངན་འགྲོའི་བར་དོ་དང་སྐྱེ་བར་ཚུལ་ཁྲིམས་
10-14-24a


བསྲུངས་པའི་སྟོབས་ཀྱིས་བདེ་འགྲོའི་བར་དོ་དང་སྐྱེ་བར་བསྒྱུར་བ་ལ་ཡང་།  ངན་འགྲོའི་བར་དོ་དང་སྐྱེ་བ་གཉིས་དང་རྣམ་པ་མཐུན་པར་བསྒོམ་དགོས་པར་འགྱུར་ཞིང་འདུས་པའི་ལམ་བསྒོམ་པ་པོ་ལ་འབྱུང་འགྱུར་གྱི་བར་དོ་དང་སྐྱེ་
བ་ཐམས་ཅད་དང་རྣམ་པ་མཐུན་པའི་ལམ་བསྒོམ་དགོས་པར་འགྱུར་རོ། །གཞན་ཡང་རས་བྲིས་ལ་དོན་མེད་པའི་གཟུགས་བརྙན་མང་པོ་བྲི་བའི་དོད་ལ་སངས་རྒྱས་ཀྱི་སྐུ་གཟུགས་བྲི་བར་བྱེད་པ་ལ་དོན་མེད་པའི་གཟུགས་བརྙན་དང་རྣམ་པ་མཐུན་པ་
གཅིག་བྲི་དགོས་པར་ཐལ།  ཐ་མལ་པ་ལ་སྐྱེ་འཆི་བར་དོ་གསུམ་འོང་བའི་དོད་ལ་སྐུ་གསུམ་འབྱུང་བར་བྱེད་པ་ལ་སྐྱེ་ཤི་བར་དོ་གསུམ་དང་རྣམ་པ་མཐུན་པར་བསྒོམ་དགོས་པའི་ཕྱིར།  རྟགས་ཁྱབ་ཁས་བླངས་སོ། །གཞན་ཡང་འཁོར་བའི་
སྣོད་བཅུད་གཉིས་ཀ་སྦྱང་གཞིར་ཐལ།  ལམ་བསྒོམ་པའི་བྱེད་པས་འཁོར་བ་ལ་སྣོད་བཅུད་འབྱུང་བའི་དོད་ལ་གཞལ་ཡས་ཁང་དང་སྐུ་གསུམ་འབྱུང་བར་བྱེད་པའི་ཕྱིར།  གསུམ་ཆར་ཁས་བླངས་སོ། །བཅུ་པ་ནི།  ཊཱི་ཀར།  དེ་ལྟར་སྔར་བཤད་པ་ལྟར་
ཆོས་མཐུན་སྒོམ་པ་པོ་འཛམ་བུ་གླིང་པའི་མི་ཡིན་པར་གྲུབ་པ་ན།  དེས་གང་དང་མཐུན་པའི་སྐྱེ་འཆི་བར་དོ་གསུམ་ཡང་འཛམ་བུ་གླིང་པའི་དབང་དུ་བྱས་པ་གཅིག་དགོས་པ་ཡིན་ཏེ།  སྐྱེ་ཤི་བར་དོ་གསུམ་པོ་ལམ་བསྒོམ་པའི་མཐུན་ཡུལ་དུ་བཀོད་པ་
ནི་འདྲ་སྒྲིག་པ་ཙམ་མ་ཡིན་གྱི་དེ་དང་རིགས་གཅིག་པའི་སྐྱེ་འཆི་བར་དོ་གསུམ་དུ་བསྒྱུར་བའི་ཆེད་དུ་ཡིན་པའི་ཕྱིར་དང་།  དེ་འཛམ་བུ་གླིང་པའི་ཆོས་གསུམ་ཁོ་ན་ལ་ཡོད་པས་སོ་ཞེས་སྨྲའོ། །འདི་ནི་གཟུ་ལུམས་ཀྱི་རིགས་པ་སྟེ།  འོ་ན་ཆོས་
10-14-24b


མཐུན་སྒོམ་པ་པོ་བྲམ་ཟེ་ཡིན་པར་གྲུབ་པ་ན།  དེས་གང་དང་མཐུན་པའི་སྐྱེ་འཆི་བར་དོ་གསུམ་ཡང་བྲམ་ཟེའི་དབང་དུ་བྱས་པ་ཅིག་དགོས་པར་ཐལ།  སྐྱེ་ཤི་བར་དོ་གསུམ་ལམ་བསྒོམ་པའི་མཐུན་ཡུལ་དུ་བཀོད་པ་ནི་འདྲ་སྒྲིག་པ་ཙམ་མིན་གྱི་དེ་དང་
རིགས་གཅིག་པའི་སྐྱེ་འཆི་བར་དོ་གསུམ་དུ་བསྒྱུར་བའི་ཆེད་ཡིན་པའི་ཕྱིར་དང་།  དེ་བྲམ་ཟེའི་ཆོས་གསུམ་ཁོ་ན་ལ་ཡོད་པའི་ཕྱིར།  རྟགས་ཁྱབ་རྣམ་པ་ཀུན་དུ་མཚུངས་ཤིང་།  འདོད་ན་བྲམ་ཟེ་ཤི་ནས་བྲམ་ཟེར་སྐྱེ་བ་དང་།  གླང་ཆེན་ཤི་ནས་གླང་ཆེན་
དུ་སྐྱེ་བ་སོགས་ཁས་ལེན་དགོས་པས་ཕྱི་རོལ་པའི་གཞུང་འཛུགས་པར་འགྱུར་རོ། །ལམ་མ་བསྒོམས་ན་འཛམ་བུ་གླིང་པའི་མི་ལས་གཞན་པའི་འགྲོ་བར་སྐྱེ་འགྱུར་གྱིས་འདུས་པའི་ལམ་བསྒོམ་པའི་སྒྲུབ་པ་པོ་དེ་ལ།  དང་པོའི་མགོན་པོ་དང་
སྤྲུལ་སྐུ་རྡོར་སེམས་གཉིས་ཀྱི་སྦྱང་གཞི་གཏན་མེད་པར་འགྱུར་ཏེ།  དེ་ལ་འཆི་སྲིད་ཀྱི་རྗེས་སུ་འཛམ་བུ་གླིང་པའི་མིའི་བར་དོ་དང་སྐྱེ་བ་ལམ་མ་བསྒོམས་ཀྱང་མི་འབྱུང་བའི་ཕྱིར།  དེས་ན་འདི་ལྟ་བུའི་གྲུབ་མཐའ་ནི་འཕགས་པ་ཀླུའི་བློས་བསྐལ་པ་
དང་པོ་ཞིག་ཅིང་འདི་འཆགས་པ་ནས་མངལ་ནས་སེམས་ཅན་ཕྱིར་བཙས་པའི་བར་དེ་ཡེ་ཤེས་ཀྱི་ས་བསྐྱེད་པ་ནས་སེམས་དཔའ་སུམ་བརྩེགས་ཀྱི་བར་དང་སྦྱར་བ་སྟེ།  སྦྱང་གཞི་སྦྱོང་བྱེད་སྦྱར་བ་ཡིན་པ་བཀག་ནས་ཆོས་མཐུན་ཙམ་དུ་བགྲངས།  དེ་ཡང་སྒྲུབ་
པ་པོ་རང་ཉིད་ལ་འབྱུང་འགྱུར་གྱི་སྐྱེ་ཤི་བར་དོ་གསུམ་དུ་བསྡུས།  དེ་ཡང་འཛམ་བུ་གླིང་པའི་སྐྱེ་ཤི་བར་དོ་གསུམ་དུ་བསྡུས་པས།  ལམ་མ་བསྒོམས་ཀྱང་འཛམ་བུ་གླིང་པའི་མིར་སྐྱེ་འགྱུར་གྱི་སྒྲུབ་པ་པོ་གཅིག་པོ་མ་གཏོགས་པ་གཞན་འདུས་པའི་
10-14-25a


ལམ་སྒོམ་པ་པོ་ཐམས་ཅད་ལ་དང་པོའི་མགོན་པོ་དང་སྤྲུལ་སྐུ་རྡོར་སེམས་ཀྱི་སྦྱང་གཞི་སྦྱོང་བ་མི་སྲིད་པར་བསྒྲུབ་པའི་བསླུ་ཐབས་ཁོ་ན་ཡིན་པར་ཤེས་ནས་སྤང་བར་བྱའོ། །བཅུ་གཅིག་པ་ནི།  ཊཱི་ཀར།  དེ་ལྟར་ན་འཆི་
བ་ལ་འཛམ་བུ་གླིང་པའི་དབང་དུ་བྱས་པ་དགོས་སུ་ཆུག་ཀྱང་།  སྐྱེ་བ་ལ་འཛམ་བུ་གླིང་པའི་མི་དང་།  དེར་སྐྱེ་བའི་བར་དོ་མི་དགོས་ཀྱི་འཛམ་བུ་གླིང་པའི་མི་ཤི་བའི་འོག་གི་བར་དོ་དང་།  སྐྱེ་བ་ཙམ་དང་ཆོས་མཐུན་སྦྱར་བས་ཆོག་སྙམ་ན་སྐྱོན་མེད་དེ།  
འཛམ་བུ་གླིང་པའི་མིའི་བར་དོ་དང་སྐྱེ་བའི་དོད་ལ་ལོངས་སྤྲུལ་གྱི་སྐུ་བསྒྲུབ་ནུས་ན།  རང་ཉིད་ལས་ཀྱི་དབང་གིས་འཇུག་པའི་བར་དོ་དང་།  སྐྱེ་བ་ཐམས་ཅད་སྦྱོང་ནུས་པའི་ཕྱིར་ཞེས་སྨྲའོ། །དེ་ལ་འདི་འདྲི་སྟེ།  ལམ་མ་བསྒོམས་ན་འགྲོ་བ་གཞན་དུ་
སྐྱེ་འགྱུར་གྱི་འདུས་པའི་ལམ་སྒོམ་པ་པོའི་འགྲོ་བ་གཞན་གྱི་བར་དོ་དང་སྐྱེ་བ་དེ་དང་པོའི་མགོན་པོ་དང་སྤྲུལ་སྐུ་རྡོར་སེམས་ཀྱི་སྦྱང་གཞི་ཡིན་ནམ་མ་ཡིན།  དང་པོ་ལྟར་ན།  གོང་དུ་དཔེ་གང་དང་མཐུན་པའི་སྐྱེ་འཆི་བར་དོ་གསུམ་ཡང་
འཛམ་བུ་གླིང་པའི་དབང་དུ་བྱས་པ་ཅིག་དགོས་པར་ཁས་བླངས་པ་དང་དངོས་སུ་འགལ་ལོ། །ཕྱི་མ་ལྟར་ན་དེ་ཆོས་ཅན།  དེ་གཉིས་ཀྱི་སྦྱང་གཞི་ཡིན་པར་ཐལ།  དེ་གཉིས་ཀྱི་འཛམ་བུ་གླིང་པའི་བར་དོ་དང་སྐྱེ་བའི་དོད་ལ་ལོངས་སྤྲུལ་གྱི་སྐུ་སྒྲུབ་
ནུས་པའི་སྟོབས་ཀྱིས་ཁྱོད་ཀྱང་སྦྱོང་ནུས་པའི་ཕྱིར།  གལ་ཏེ་འཛམ་བུ་གླིང་པའི་དེ་གཉིས་ཀྱི་དོད་དུ་ལོངས་སྤྲུལ་གྱི་སྐུ་བསྒྲུབ་ནུས་ན།  དེ་སྦྱོང་ནུས་ཞེས་ཁས་བླངས་ཀྱི་དེའི་སྟོབས་ཀྱིས་སྦྱོང་ནུས་ཞེས་ཁས་མ་བླངས་སོ་སྙམ་ན།  དེ་ལྟར་ན་གང་
10-14-25b


ཟག་དེའི་སྦྱང་གཞི་གང་ཡིན་དགེ་སྦྱོང་ཐམས་ཅད་འདུས་ནས་ལན་ཐོབ་ཤིག །བཅུ་གཉིས་པ་ནི།  ཁྱོད་འདོད་པ་ལྟར་གྱི་སྦྱང་གཞིའི་སྐྱེ་འཆི་བར་དོ་གསུམ་པོ་དངོས་སུ་སྟོན་བྱེད་ཀྱི་རྣམ་གཞག་རིམ་པའི་གཞུང་མེད་པར་ཐལ།  དེ་ནས་བཤད་པའི་
སྐྱེ་འཆི་བར་དོ་གསུམ་པོ་ནི་བསྐལ་པ་དང་པོའི་མི་རྫུས་སྐྱེས་ལ་འབྱུང་འགྱུར་གྱི་སྐྱེ་འཆི་བར་དོ་གསུམ་ཡིན་ལ།  ཁྱེད་ཀྱི་ལུགས་ལ་སྦྱང་གཞིའི་ཆོས་གསུམ་པོ་འཛམ་བུ་གླིང་པའི་མི་མངལ་སྐྱེས་ལ་འབྱུང་འགྱུར་གྱི་ཆོས་གསུམ་ཡིན་དགོས་པའི་
ཕྱིར།  འདོད་ན་རྣམ་གཞག་རིམ་པ་ནས་བཤད་པའི་སྦྱང་གཞི་སྦྱོང་བྱེད་ཞིབ་དུ་བཤད་པའི་གྲུབ་འབྲས་ལ་རང་ལུགས་ཀྱི་སྦྱང་གཞི་དེ་རྣམ་གཞག་རིམ་པ་ནས་གཏན་མ་བཤད་པ་ཅིག་ཐོན་པ་འདི་ལས་ངོ་མཚར་ཆེ་བ་ཅི་ཞིག་ཡོད།  བཅུ་གསུམ་པ་ནི།  
ཊཱི་ཀར།  འོ་ན་ལམ་སྒོམ་པ་པོ་དེའི་འབྱུང་འགྱུར་གྱི་སྐྱེ་འཆི་བར་དོ་གསུམ་མཐུན་ཡུལ་དུ་བྱ་བར་རིགས་པས་བསྐལ་པ་དང་པོའི་སྐབས་དང་མཐུན་པར་མི་རིགས་སོ་སྙམ་ན་སྐྱོན་མེད་དེ།  གཞིའི་ཆོས་གསུམ་དང་འདྲ་བའི་སྐུ་གསུམ་བསྒོམ་པ་ལ་
སྔོན་དུ་རྟེན་བསྐྱེད་དགོས་ཤིང་།  དེ་ནི་སྣོད་ཆགས་པ་དང་ཆོས་མཐུན་པར་བྱ་དགོས་ལ།  དེ་ལྟར་ན་དེར་བཅུད་ཀྱི་ལྷ་ཆགས་པ་དང་།  དེ་འོད་གསལ་དུ་སྡུད་པ་སོགས་ཀྱང་བསྐལ་པ་དང་པོའི་བཅུད་ཀྱི་སེམས་ཅན་ཆགས་པ་དང་ཆོས་མཐུན་པར་བྱ་
དགོས་པའི་ཕྱིར་རོ། །དེ་དག་ནི་ཆོས་མཐུན་གྱི་ཡུལ་ཙམ་ཡིན་གྱི་ད་ལྟ་བསྒོམ་པའི་བྱེད་པས་སྦྱོང་བ་ནི་མ་ཡིན་ནོ་ཞེས་སྨྲའོ། །མི་འཐད་དེ།  དགོས་པ་དེ་ཙམ་ལས་མེད་ན་ཆོས་མཐུན་གྱི་ཡུལ་ཐུག་མེད་དུ་འགྱུར་ཏེ།  བསྐལ་པ་འདི་ཆགས་
10-14-26a


པ་ལ་བསྐལ་པ་སྔ་མ་ཞིག་པ་སྔོན་དུ་འགྲོ་དགོས་ཤིང་།  དེ་ལ་ཡང་བསྐལ་པ་སྔ་མ་ཆགས་པ་སྔོན་དུ་འགྲོ་དགོས་པས་དེ་དག་གི་ཆོས་མཐུན་ཡང་བསྒོམ་དགོས་པར་འགྱུར་བའི་ཕྱིར།  སྦྱང་གཞི་སྦྱོང་བྱེད་དུ་འདོད་པ་ལ་ནི་
མི་མཚུངས་ཏེ།  སྔ་ཕྱི་ཐམས་ཅད་ལ་ཡང་ཐ་མལ་དུ་འཛིན་པའི་རྣམ་རྟོག་སྦྱོང་བའི་དགོས་པ་སོ་སོར་ཡོད་ཅིང་།  ཐ་མལ་དུ་འཛིན་པའི་ཡུལ་དུ་གྱུར་པའི་སྣོད་བཅུད་ཀྱི་རིམ་པ་ཡང་སྣོད་ཆགས་འཇིག་གཉིས།  བཅུད་ཆགས་འཇིག་གཉིས་
སུ་ངེས་པས་དེ་ནི་འདིར་འདུས་པའི་ཕྱིར།  ཁྱོད་ཀྱི་ལུགས་ལ་སྐྱོན་དེ་འཇུག་སྟེ།  གཞིའི་ཆོས་གསུམ་དང་འདྲ་བའི་སྐུ་གསུམ་བསྒོམ་པ་ལ་དེའི་སྔོན་འགྲོ་རྣམས་ཀྱིས་ཆོས་མཐུན་བསྒོམ་དགོས་པ་མ་གཏོགས་པ་དགོས་པ་གཞན་མེད་པའི་ཕྱིར་རོ། །བཅུ་
བཞི་པ་ནི།  རིམ་ལྔ་གསལ་སྒྲོན་ལས།  རྣལ་འབྱོར་ཆེན་པོའི་བསྐྱེད་རིམ་གྱི་སྐབས་སུ་སྣང་བ་ཐམས་ཅད་ལྷར་ཤར་བ་དང་།  རྫོགས་རིམ་གྱི་སྐབས་སུ་སྣང་བ་ཐམས་ཅད་བདེ་ཆེན་གྱི་ཡེ་ཤེས་སུ་ཤར་དགོས་པ་ནི་ཁྱད་པར་གྱི་ཆོས་ཡིན་ལ།  དེའི་དོན་ཡང་མ་དག་
པའི་ཕུང་ཁམས་སྐྱེ་མཆེད་ཐམས་ཅད་ལྷ་དང་བདེ་ཆེན་གྱི་ཡེ་ཤེས་སུ་ཤར་བ་མ་ཡིན་གྱི།  ཡིད་ངོ་ལ་རྟེན་དང་བརྟེན་པར་བཅས་པའི་དཀྱིལ་འཁོར་བསྒོམ་པའི་ཚེ་ཡིད་ངོ་དེ་ཉིད་ལ་ཐ་མལ་གྱི་སྣང་བ་མི་འཆར་བ་དང་།  ཡིད་ངོ་ལ་བདེ་ཆེན་གྱི་ཡེ་ཤེས་ཅིག་སྐྱེས་པའི་
ཚེ་ཡིད་ངོ་དེ་ཉིད་ལ་བདེ་ཆེན་གྱི་ཡེ་ཤེས་མ་ཡིན་པའི་སྣང་བ་གཞན་མི་འཆར་བའི་དོན་ཡིན་ཏེ།  རིགས་པའི་རྒྱལ་པོས།  རྟོག་གཉིས་ཅིག་ཆར་འཇུག་པ་མེད། །ཅེས་དང་།  རྣམ་ཤེས་དོན་གཞན་ཆགས་པ་ཡིས། །ནུས་མེད་དོན་གཞན་མི་འཛིན་ཕྱིར། །
10-14-26b


ཞེས་གསུངས་པའི་ཕྱིར།  མ་དག་པའི་ཕུང་ཁམས་སྐྱེ་མཆེད་འདི་རྣམས་ལས་ཉོན་གྱི་འབྲས་བུར་གྱུར་བའི་སྡུག་བསྔལ་གྱི་བདེན་པ་ཡིན་པས་ལྷར་བསྒོམས་ཀྱང་ལྷར་འགྱུར་བ་མི་སྲིད་དེ།  སོལ་བ་བརྡར་ཀྱང་དུང་མི་འབྱུང་བ་བཞིན་ནོ། །དེས་ན་བསྐྱེད་
རིམ་གྱི་ལྷ་ནི་ཡིད་ངོ་ལ་ཤར་བའི་གཟུང་རྣམ་ཡིན་གྱི།  ཕུང་པོ་འདི་ལྟར་བསྒོམ་པ་ནི་མ་ཡིན་ནོ་ཞེས་སྨྲའོ། །འདི་ཉིད་འགོག་པ་ལ།  ལུང་དང་འགལ་བ།  རིགས་པ་དང་འགལ་བ།  རྒྱུད་སྡེ་འོག་མ་གསུམ་ལ་ཡང་མཚུངས་པར་ཐལ་བ།  ལུས་དཀྱིལ་
བསྒོམ་ཚུལ་དང་འགལ་བ།  རྩ་ལྟུང་གི་གཞུང་དང་འགལ་བ།  འདོད་ཡོན་ལམ་བྱེད་དང་འགལ་བ།  གཞི་ལམ་འབྲས་གསུམ་ལ་སྐུར་པ་བཏབ་པ་སྟེ་བདུན་ལས།  དང་པོ་ནི།  མ་དག་པའི་སྣང་བ་ལྷར་མི་བསྒོམ་པ་ནི་གོང་དུ་དྲངས་པའི་ལུང་
རྣམས་དང་འགལ་ཞིང་།  དེ་བདེ་ཆེན་གྱི་ཡེ་ཤེས་སུ་མི་བསྒོམ་པ་ནི།  བརྟག་གཉིས་ལས།  བརྟན་དང་གཡོ་བའི་དངོས་པོ་གང་། །རྩྭ་ལྕུག་འཁྲི་ཤིང་ལ་སོགས་པ། །བདག་གི་དངོས་པོའི་རང་བཞིན་ལས། །དམ་པའི་དེ་ཉིད་ངེས་བསྒོམ་
བྱ། །ཞེས་གསུངས་པ་དང་འགལ་ལོ། །གཉིས་པ་ནི།  བསྐྱེད་རིམ་ཅི་ལྟར་བསྒོམས་ཀྱང་།  དག་སྣང་ཕྱོགས་མེད་དུ་འཆར་བ་མི་སྲིད་པར་འགྱུར་ཏེ།  མཉམ་གཞག་གི་སྐབས་སུ་ཡིད་ངོ་ལ་མ་དག་པའི་སྣང་བ་མི་འཆར་ཡང་།  རྗེས་
ཐོབ་ཀྱི་གནས་སྐབས་སུ་མ་དག་པའི་སྣང་བ་འདི་ཁོ་ན་འཆར་ཞིང་།  དེ་བཟློག་པའི་ཐབས་མི་འདུག་པའི་ཕྱིར་རོ། །གསུམ་པ་ནི།  རྒྱུད་སྡེ་འོག་མ་གསུམ་གྱི་དཀྱིལ་འཁོར་གྱི་འཁོར་ལོ་བསྒོམ་པའི་ཚེ་ཡང་སྣང་བ་ཐམས་ཅད་ལྷར་འཆར་བར་འགྱུར་ཏེ།  
10-14-27a


དེའི་ཚེ་ཡང་ཡིད་ངོ་ལ་མ་དག་པའི་སྣང་བ་མི་འཆར་པའི་ཕྱིར།  གལ་ཏེ་རྒྱུད་སྡེ་འོག་མ་གསུམ་གྱི་སྐབས་སུ་རྟོག་གཉིས་ཅིག་ཆར་འཇུག་ཅིང་།  བླ་མེད་ཀྱི་སྐབས་སུ་མི་འཇུག་པ་ཡིན་ནོ་ཞེ་ན་ཁོ་བོ་ཅག་ནི་ཁྱོད་དང་ལྷན་ཅིག་
མི་རྩོད་དོ། །བཞི་པ་ནི།  སྤྲུལ་སྐུ་རྡོར་སེམས་ལ་ལུས་དཀྱིལ་འགོད་པ་མི་འཐད་པར་འགྱུར་ཏེ།  སྤྲུལ་སྐུ་རྡོར་སེམས་ནི་ཡིད་ངོའི་གཟུང་རྣམ་ཡིན་གྱི་ལུས་འདི་དེར་བསྒོམ་པ་མ་ཡིན་ལ།  ལུས་དཀྱིལ་གྱི་ལྷ་ཡིན་ན།  ལུས་རྒྱུར་བྱས་པ་དགོས་པར་
ཁས་བླངས་པའི་ཕྱིར་རོ། །ལྔ་པ་ནི།  ཕུང་པོ་སངས་རྒྱས་ལྔ་བདག་ཉིད། །དེ་ལ་སྨོད་པ་བརྒྱད་པ་ཡིན། །ཅེས་པའི་གཞུང་དང་འགལ་ཏེ།  ཕུང་པོ་ལྔ་པོ་འདི།  སངས་རྒྱས་ལྔའི་བདག་ཉིད་མ་ཡིན་པར།  ཐ་མལ་པ་ཁོ་ན་ཡིན་པའི་ཕྱིར་རོ། །དྲུག་
པ་ནི།  འདོད་ཡོན་ལམ་བྱེད་ཀྱི་ཐབས་ཁྱད་པར་ཅན་མེད་པར་འགྱུར་ཏེ།  ལུས་འདི་འདོད་ཡོན་ལ་སྤྱོད་པ་ནི།  སྔགས་ལམ་ལ་མ་ཞུགས་པའི་ཐ་མལ་པས་འདོད་ཡོན་ཐ་མལ་པ་ལ་ལོངས་སྤྱོད་པ་དང་ཁྱད་པར་མེད་པའི་ཕྱིར་རོ། །བདུན་པ་ནི།  ཕུང་པོ་
ལྔ་དང་ཉོན་མོངས་ལྔ་ལ་སོགས་པ་རྣམས་སྨིན་བྱེད་ཀྱི་སྐབས་སུ་རིགས་ལྔར་བསྐྱེད་པའི་གཞི་དང་།  གྲོལ་བྱེད་ཀྱི་སྐབས་སུ་ལྷར་བསྒོམ་པའི་གཞི་ཡིན་པར་རྒྱུད་སྡེ་ལས་གསུངས་པ་རྣམས་བཀག་པས།  རྡོ་རྗེ་ཐེག་པའི་གཞི་ལ་སྐུར་པ་བཏབ་པ་ཡིན་
ཞིང་།  བསྐྱེད་རིམ་གྱི་ལྷ་ཐམས་ཅད་མ་དག་པའི་ཕུང་ཁམས་སྐྱེ་མཆེད་རྣམས་དང་།  སྦྱང་གཞི་སྦྱོང་བྱེད་སྦྱར་ནས་བསྒོམ་པར་གསུངས་པ་རྣམས་བཀག་པས་རྡོ་རྗེ་ཐེག་པའི་ལམ་ལ་སྐུར་པ་བཏབ་པ་ཡིན་ལ།  འབྲས་བུ་
10-14-27b


རིགས་ལྔ་དང་ཡེ་ཤེས་ལྔ་ལ་སོགས་པ་རྣམས་ཕུང་པོ་ལྔ་དང་ཉོན་མོངས་པ་ལྔ་ལས་འབྱུང་བར་གསུངས་པ་རྣམས་བཀག་པས་རྡོ་རྗེ་ཐེག་པའི་འབྲས་བུ་ལ་སྐུར་པ་བཏབ་པ་ཡིན་ནོ། །སོལ་བ་བརྡར་བ་ལས་དུང་མི་འབྱུང་བ་
དཔེར་བྱས་ནས་མ་དག་པའི་ཕུང་པོ་འདི་དེ་བཞིན་གཤེགས་པའི་སྐུར་འགྱུར་བ་མི་སྲིད་པར་བསྒྲུབ་པ་ནི་སྒྲིབ་པ་དང་བཅས་པའི་ཤེས་པ་སྒྲིབ་པ་མེད་པའི་ཤེས་པར་འགྱུར་མི་སྲིད་པ་དང་།  སེམས་ཅན་སངས་རྒྱས་སུ་འགྱུར་མི་སྲིད་པ་དང་།  སོ་སྐྱེ་འཕགས་
པར་འགྱུར་མི་སྲིད་པ་སོགས་ངན་པ་བཟང་པོར་འགྱུར་མི་སྲིད་པར་ཁས་ལེན་པ་ཡིན་པས་ཁོ་རང་གི་ལུགས་ཀྱི་སྔགས་ཀྱི་ཉམས་ལེན་བྱེད་པ་པོ་རྣམས་ལ་དགོངས་པ་ཡིན་པ་འདྲའོ། །བཅོ་ལྔ་པ་ནི།  མངོན་བྱང་ཕྱི་མ་བཞི་ཆར་བར་དོ་ཁོ་ན་ལ་སྦྱོར་
བ་མི་འཐད་དེ།  སྤྱིར་མངོན་བྱང་ལྔ་ལ་ཡོ་ག་ནས་བཤད་པ་དང་།  ཕ་རྒྱུད་གསང་འདུས་སོགས་ནས་བཤད་པ་དང་།  མ་རྒྱུད་ཀྱེ་རྡོར་དང་།  བདེ་མཆོག་ནས་བཤད་པ་སོགས་དུ་མ་ཡོད་པ་ལས་ཡོ་ག་ནས་བཤད་པ་ནི་འབྲས་བུ་དང་སྦྱར་བ་
ཙམ་ཡིན་གྱི་སྦྱང་གཞི་དང་སྦྱར་བ་མེད་ལ།  བླ་མེད་ནས་བཤད་པ་རྣམས་ནི་སྦྱང་གཞི་མངལ་སྐྱེས་གཙོ་བོར་སྦྱོང་བ་ཡིན་པས་ཕ་མའི་ཁུ་ཁྲག་དང་།  བར་དོའི་རྣམ་ཤེས་དང་།  དེ་གསུམ་འདྲེས་པ་ལས་བུ་ཚའི་ལུས་གྲུབ་པའི་སྦྱོང་བྱེད་ཚང་
དགོས་ཤིང་།  ཁྱད་པར་དུ་འདིར་ཡང་མངལ་སྐྱེས་གཙོ་བོར་སྦྱོང་བར་རྣམ་གཞག་རིམ་པ་ནས་གསུངས་པས།  མངོན་བྱང་ཕྱི་མ་བཞི་ཆར་བར་དོ་ཁོ་ན་ལ་སྦྱོར་ན།  བར་དོ་མངལ་དུ་འཇུག་ཚུལ་གྱི་སྦྱོང་བྱེད་ཆད་པར་འགྱུར་བའི་ཕྱིར་རོ། །དེ་ལ་ཁོ་ན་རེ།  
10-14-28a


ཆད་པར་འགྱུར་བའི་སྐྱོན་མེད་དེ།  རང་བཞིན་གྱི་གནས་ནས་སངས་རྒྱས་ཡབ་ཡུམ་སྙོམས་འཇུག་བྱས་པ་ལས་བྱུང་བའི་མི་བསྐྱོད་པ་ནི་ཁུ་བ་ཡིན་ལ།  དེ་ལ་དང་པོའི་མགོན་པོ་ཕར་ཞུགས་པས་བར་སྲིད་མངལ་དུ་འཇུག་ཚུལ་སྦྱོང་བ་
ཡིན་པའི་ཕྱིར་ཞེས་ཟེར་རོ། །འདི་ནི་ཤིན་ཏུ་མི་རིགས་ཏེ།  དེ་ལྟ་བུའི་རྣམ་གཞག་ཡབ་སྲས་ཀྱི་གཞུང་ལུགས་གང་ལས་ཀྱང་མ་བཤད་པའི་ཕྱིར་དང་།  མདོར་བྱས་ལས།  དང་པོའི་མགོན་པོ་ལ་མི་བསྐྱོད་པ་གཞུག་པས་སྤྲུལ་སྐུ་
རྡོར་སེམས་སུ་བསྒྱུར་བར་བཤད་ཀྱི།  མི་བསྐྱོད་པ་ལ་དང་པོའི་མགོན་པོ་ཞུགས་ནས་སྤྲུལ་སྐུ་རྡོར་སེམས་སུ་བསྒྱུར་བར་མ་བཤད་པའི་ཕྱིར་དང་།  དང་པོའི་མགོན་པོ་ཡུལ་བཏོན་ནས་དོན་མེད་ཀྱི་ཡུལ་ནས་འོངས་པའི་མི་བསྐྱོད་པ་སྤྲུལ་སྐུ་རྡོར་
སེམས་སུ་བསྒྱུར་ནས།  དེ་ལ་ལུས་དཀྱིལ་འགོད་པ་སོགས་ཀྱི་ཉམས་ལེན་ལྷག་མ་རྣམས་བྱེད་པ་ནི་བསྐྱེད་རིམ་གྱི་གནད་དངོས་གཞི་བཅོས་པ་ཡིན་པའི་ཕྱིར་རོ། །གལ་ཏེ་ཡབ་སྲས་ཀྱི་གཞུང་ནས་མ་བཤད་པ་མི་འགྲུབ་སྟེ།  རྣམ་བཞག་རིམ་
པར།  རྩ་རྒྱུད་ལས།  ཟིལ་གནོན་རྡོ་རྗེའི་ཏིང་ངེ་འཛིན་གསུངས་པའི་རིམ་པས་ཕ་མའི་ཁུ་ཁྲག་གཉིས་ལ་ཕ་མའི་རྣམ་ཤེས་འཇུག་སྟེ།  བདེ་བས་བརྒྱལ་བར་བཤད་པ་དེས་འདིའི་སྐབས་ཀྱི་སྦྱང་གཞི་བསྟན་པའི་ཕྱིར་སྙམ་ན།  ཤིན་ཏུ་མི་འཐད་དེ།  
དེ་ལྟར་ན་ཟིལ་གནོན་རྡོ་རྗེའི་ཏིང་ངེ་འཛིན་གྱིས་ཤིན་ཏུ་རྣལ་འབྱོར་བྱེད་པར་ཁས་ལེན་དགོས་པས་རྩ་རྒྱུད་དང་།  སྒྲོན་གསལ་དང་།  མདོ་བསྲེ་དང་།  རྣམ་གཞག་རིམ་པ་བཞི་ཆར་ལས་དམ་ཚིག་འབྱུང་བ་རྡོ་རྗེའི་ཏིང་ངེ་འཛིན་གྱིས་ཤིན་ཏུ་རྣལ་འབྱོར་བྱེད་པར་གསུངས་
10-14-28b


པ་དང་འགལ་བའི་ཕྱིར་རོ། །རྣམ་གཞག་ལས།  ཟིལ་གནོན་རྡོ་རྗེའི་ཏིང་ངེ་འཛིན་སྔར་བཤད་པ་ལྟར་གསུངས་པ་ནི།  ཟླ་བ་ལས་བྱང་ཆུབ་པའི་སྐབས་ཀྱི་ཉི་ཟླ་པད་གསུམ་དང་ཡི་གེ་གསུམ་རོ་གཅིག་ཏུ་འདྲེས་པའི་སྐབས་ཀྱི་སྦྱང་གཞི་སྟོན་པ་
ཡིན་གྱི་འདིའི་སྐབས་ཀྱི་སྦྱང་གཞི་སྟོན་པ་མ་ཡིན་པའི་ཕྱིར་རོ། །དེའི་རྗེས་འབྲངས་ཁ་ཅིག་གིས།  ཟིལ་གནོན་རྡོ་རྗེའི་ཏིང་ངེ་འཛིན་ཡི་གེའི་དོན་དུ་བཤད་པས་དང་པོའི་མགོན་པོ་སྤྲུལ་སྐུ་རྡོར་སེམས་སུ་བསྒྱུར་ཚུལ་གྱི་རྣམ་གཞག་བྲིས་འདུག་པ་ལ་
ནི་བརྫུན་གྱི་ཚིག་གཉིས་དང་།  ངོ་ཚ་བོར་བའི་གཏམ་ལྔ་མཐོང་སྟེ།  སྒྲོན་གསལ་ལས།  ཟིལ་གནོན་རྡོ་རྗེའི་ཏིང་ངེ་འཛིན་ལ་ཚུལ་བཞིན་བཤད་པ་བྱས་ཞེས་པ་ནི་བརྫུན་ཚིག་དང་པོའོ། །རྣམ་གཞག་རིམ་པར།  དང་པོའི་མགོན་པོ་སྤྲུལ་སྐུ་རྡོར་སེམས་
སུ་བསྒྱུར་བ་ཟིལ་གནོན་རྡོ་རྗེའི་ཏིང་ངེ་འཛིན་དང་སྦྱར་ཞེས་པ་ནི་བརྫུན་ཚིག་གཉིས་པའོ། །མཐའ་དྲུག་ཚུལ་བཞིའི་བཤད་པ་རྣམས་བཤད་རྒྱུད་ལས་གསུངས་པ་རྩ་རྒྱུད་ལ་མན་ངག་གིས་སྦྱར་བ་ཅིག་དགོས་པ་ལས།  ཡི་གེའི་དོན་གྱི་བཤད་པ་རང་བཟོར་
བྱས་པ་ནི་ངོ་ཚ་བོར་བའི་གཏམ་དང་པོའོ། །ཡིག་དོན་གྱི་བཤད་པ་ཉིད་ཀྱང་།  སྒྲོན་གསལ་ལས།  སྒྲ་ཙམ་ལ་ནི་རབ་གཞོལ་བའི། །ཕྱི་རོལ་བསྟན་བཅོས་མཁས་པ་ཡིས། །དེ་ཡི་བཀོད་པ་རབ་བསྟན་པ། །ཡི་གེའི་དོན་ནི་ཡིན་པར་འདོད། །ཅེས་གསུངས་
པ་ལྟར།  སྒྲ་ཙམ་གྱི་བཤད་པ་བྱས་པས་བརྗོད་བྱའི་དོན་དེ་གསལ་བར་སྟོན་པ་ཅིག་དགོས་པ་ལས་སངས་རྒྱས་ཡབ་ཡུམ་སྙོམས་པར་ཞུགས་པ་ཟིལ་གནོན་རྡོ་རྗེའི་ཏིང་ངེ་འཛིན་ལ་སྙོམས་པར་ཞུགས་པའི་ཡིག་དོན་དུ་བཤད་པ་སོགས་བྱས་པ་ནི་ངོ་ཚ་
10-14-29a


བོར་བའི་གཏམ་གཉིས་པའོ། །འདུས་པའི་རྒྱུད་འཆད་ཚུལ་ལ་ཡིག་དོན་དང་སྤྱི་དོན་གཉིས་ཀྱི་བརྗོད་བྱ་སོ་སོར་སྟོན་ན་བཤད་པ་སོ་སོར་བྱེད་ཅིང་།  བརྗོད་བྱ་གཅིག་ལས་མི་སྟོན་ན་ཡིག་དོན་
གྱི་བཤད་པ་ལོགས་སུ་མི་བྱེད་པའི་དོན་མ་གོ་བར་ཟིལ་ནོན་རྡོ་རྗེ་ལ་ཡིག་དོན་གྱི་བཤད་པ་ལོགས་སུ་བྱེད་པ་ནི་ངོ་ཚ་བོར་བའི་གཏམ་གསུམ་པའོ། །ཕ་མའི་ཁུ་ཁྲག་མངལ་ནས་ཕྱིར་བཏོན་པ་ལ་བར་དོའི་རྣམ་ཤེས་
འཇུག་པ་མངལ་སྐྱེས་ཀྱི་སྲིད་པ་སྐྱེ་བའི་རིམ་པར་འདོད་པ་ནི་ངོ་ཚ་བོར་བའི་གཏམ་བཞི་པའོ། །གཞལ་ཡས་ཁང་གི་ནང་དུ་མི་བསྐྱོད་པ་ཐམས་ཅད་གཅིག་ཏུ་འདུས་པ་ལ་དང་པོའི་མགོན་པོ་ཞུགས་པ་མའི་
མངལ་དུ་ཁུ་ཁྲག་ལ་བར་དོའི་རྣམ་ཤེས་ཞུགས་པའི་སྦྱོང་བྱེད་དུ་འདོད་པ་ནི་ངོ་ཚ་བོར་བའི་གཏམ་ལྔ་པ་སྟེ།  དེ་ལྟར་ན་བར་དོ་དང་པོ་ནས་མའི་མངལ་དུ་ཡོད་པ་ལ་ཕ་མ་གཞན་གྱི་ཁུ་ཁྲག་ཕྱུང་བ་ཚུར་བླུགས་ཏེ།  
ལུས་གྲུབ་པ་མངལ་ནས་ཕྱིར་བཙས་ནས་ཀྱང་མའི་མངལ་གྱི་ནང་ཉིད་དུ་གནས་པར་འགྱུར་བའི་ཕྱིར་རོ། །གཞན་ཡང་འདིས་ཡེ་ཤེས་པ་ལ་དམ་ཚིག་པ་ཕར་འདྲེས་པ་དང་།  དམ་ཚིག་པ་ལ་ཡེ་ཤེས་པ་ཚུར་འདྲེས་པའི་
དབྱེ་བ་མ་ཕྱེད་པས་སྐྱོན་སྤོང་མང་དུ་སྨྲས་འདུག་པ་རྣམས་ནི་སྐྱོན་འཇུག་པའི་སྒྲུབ་བྱེད་དུ་སོང་འདུག་སྟེ་འདིར་མ་སྤྲོས་སོ། །བཅུ་དྲུག་པ་ནི།  སྤྱིར་རྡོ་རྗེ་ཐེག་པ་འབྲས་བུ་ལམ་དུ་བྱེད་པ་ཡིན་པས་རྒྱུད་སྡེ་བཞི་ཆར་ལ་འབྲས་བུ་ལམ་བྱེད་ཡོད་པ་ནི་
10-14-29b


འདྲ་ལ་རྒྱུད་སྡེ་འོག་མ་གསུམ་ལ་ནི་འབྲས་བུའི་རྣམ་པ་ཉིད་ད་ལྟ་ལམ་གྱི་གནས་སྐབས་ནས་བསྒོམ་པ་ཡོད་པས་ཕ་རོལ་ཏུ་ཕྱིན་པ་ལས་ཁྱད་པར་དུ་འཕགས་ཀྱང་སྦྱང་གཞི་དང་སྦྱར་བ་ནི་མེད་དོ། །རྣལ་འབྱོར་བླ་མེད་ལ་ནི་ལམ་གྱི་རྣམ་པ་གཅིག་ཉིད་འབྲས་བུ་
སངས་རྒྱས་ཀྱི་རྣམ་འཕྲུལ་དང་།  སྦྱང་གཞི་སྲིད་པ་སྐྱེ་བའི་རིམ་པ་གཉིས་ཀ་དང་སྦྱར་ཏེ་གཞི་ལམ་འབྲས་བུ་གསུམ་ཀ་དབྱེར་མེད་དུ་བསྒོམས་པས་རྒྱུད་སྡེ་འོག་མ་གསུམ་ལས་ཁྱད་པར་དུ་འཕགས་པའི་གནད་འདི་ཡིན་ལ།  དེའི་ཕྱིར་འདུས་པའི་མངོན་
པར་རྟོགས་པ་འདིར་ཡང་བསྐལ་པ་དང་པོ་ཞིག་པ་དང་།  བསྐལ་པ་འདིའི་སྣོད་ཆགས་པ་དང་།  རི་གླིང་ལ་སོགས་པའི་སྣོད་བྱེ་བྲག་པ་ཆགས་པ་དང་།  དེར་བསྐལ་པ་དང་པོའི་སེམས་ཅན་ཆགས་པ་དང་།  དེ་དག་འཆི་བའི་རིམ་པ་དང་།  དེ་དག་གི་
བར་དོ་ཕ་མའི་ཁུ་ཁྲག་དང་འདྲེས་ཏེ་མེར་མེར་པོར་གྱུར་པ་དང་།  མངལ་དུ་རིམ་པ་བཞིན་འཕེལ་ཏེ་ཕྱིར་བཙས་པ་དང་།  དེའི་སྐྲ་སྤུ་སེན་མོ་དང་དབང་པོ་ལ་སོགས་པ་འཕེལ་ཏེ་སྟོབས་རྒྱས་པ་རྣམ་གཞག་ལས་དངོས་སུ་བཤད་པ་དང་།  དོན་གྱིས་ཐོབ་པ་དེས་ཆུང་
མ་བླངས་ཏེ་རྒྱན་གྱིས་བརྒྱན་པ་དང་།  དེ་དང་སྙོམས་འཇུག་བྱས་ནས་བུ་དང་ཚ་བོ་བསྐྱེད་པ་དང་།  དེ་དག་གིས་འཇིག་རྟེན་གྱི་བྱ་བ་བསྒྲུབ་པ་རྣམས་སྦྱང་གཞིར་བྱས་ནས་སྦྱོང་བྱེད་རིམ་པ་བཞིན་དུ་ཡེ་ཤེས་ཀྱི་ས་བསྐྱེད་པ་དང་།  རྡོ་རྗེའི་ས་བསྐྱེད་པ་དང་།  
གཞལ་ཡས་ཁང་གདན་དང་བཅས་པ་བསྒོམ་པ་དང་།  ལྷག་མོས་ཀྱི་ལྷ་བསྐྱེད་པ་དང་།  དེ་དག་འོད་གསལ་དུ་བསྡུ་བ་དང་།  ཉི་ཟླ་པདྨ་ཡི་གེ་གསུམ་དང་བཅས་པ་རོ་གཅིག་ཏུ་འདྲེས་ནས་ཟླ་བའི་དཀྱིལ་འཁོར་དུ་གྱུར་པ་དང་།  མངོན་བྱང་ཕྱི་མ་གསུམ་གྱིས་རིམ་
10-14-30a


གྱིས་དང་པོའི་མགོན་པོ་བསྐྱེད་དེ།  དེ་ཉིད་སྤྲུལ་སྐུ་རྡོར་སེམས་སུ་བསྒྱུར་བ་དང་།  དེ་ཉིད་ལ་ལུས་དཀྱིལ་བཀོད་ནས་སེམས་དཔའ་སུམ་བརྩེགས་ཀྱི་བར་དུ་བྱ་བ་དང་།  རིག་མ་འདུས་བྱས་ཏེ་དེ་ལ་ལུས་དཀྱིལ་འགོད་པ་དང་།  
སྙོམས་འཇུག་བྱས་ཏེ་དཀྱིལ་འཁོར་རྒྱལ་མཆོག་སྤྲུལ་པ་དང་།  བཟླས་པ་སོགས་ཀྱི་ཡན་ལག་ལྷག་མ་རྣམས་བྱ་བས་སྦྱངས་ལ།  སྦྱོང་ཚུལ་སྣོད་བཅུད་ཀྱི་སྲིད་པའི་རིམ་པ་དེ་དག་ལ་ཐ་མལ་དུ་འཛིན་པའི་རྟོག་པ་སྤངས་ཏེ།  མངོན་པར་རྟོགས་པ་དེ་དང་དེའི་
ངོ་བོར་དབྱེར་མེད་དུ་བསྒོམ་པ་ཡིན་ནོ། །དེ་ཉིད་འབྲས་བུའི་རྣམ་པ་དང་སྦྱར་ན།  རང་གི་རྒྱུད་གསུང་པ་པོ་སྟོན་པ་ཉིད་ཀྱི་རྣམ་འཕྲུལ་དང་སྦྱར་དགོས་པས།  ཤཱཀྱ་ཐུབ་པ་སངས་རྒྱ་བའི་ཚུལ་བསྟན་ཟིན་ནས་ཨུ་རྒྱན་གྱི་ཡུལ་དུ་འདུས་པའི་དཀྱིལ་འཁོར་སྤྲུལ་
ཏེ།  རྒྱུད་འཆད་པའི་ཚུལ་དང་སྦྱར་དགོས་ལ།  དེའི་ཕྱིར་སྟོན་པ་ཤཱཀྱ་ཐུབ་པའི་ལུས་ཀྱི་བརྒྱུད་པ་ནི།  བསྐལ་པ་སྔ་མ་ཞིག་ཅིང་འདི་ཆགས་ནས་བསྐལ་པ་དང་པོའི་སེམས་ཅན་རྣམས་འབྲས་ཆན་ཟ་བའི་བར་དུ་གྱུར་ནས།  མང་པོས་བཀུར་བའི་རྒྱལ་
པོར་བསྐོས་ཏེ།  རྒྱལ་པོ་ཟས་གཙང་གི་བར་དུ་རིམ་པ་བཞིན་དུ་གྱུར་པ་དེ་ཡིན་ལ།  ཐུགས་ཀྱི་བརྒྱུད་པ་ནི།  དགའ་ལྡན་གྱི་དམ་པ་ཏོག་དཀར་པོའི་བར་དོའི་རྣམ་ཤེས་ཡུམ་སྒྱུ་མ་ལྷ་མཛེས་ཀྱི་ལྷུམས་སུ་ཞུགས་པ་ཉིད་ཡིན་ཅིང་།  ཡབ་ཡུམ་གྱི་ཁུ་
ཁྲག་དང་།  བར་དོའི་རྣམ་ཤེས་རོ་གཅིག་ཏུ་འདྲེས་པ་མངལ་དུ་རིམ་པ་བཞིན་འཕེལ་ཏེ།  ཟླ་བ་བཅུའི་མཐར་ཕྱིར་བཙས་ནས་རྒྱལ་བུ་དོན་གྲུབ་དུ་གྱུར་པའི་འབྲས་བུའི་རྣམ་པ་ཉིད་ལམ་དུ་བྱེད་པ་ནི་ཡེ་ཤེས་ཀྱི་ས་བསྐྱེད་པ་ནས་སྤྲུལ་སྐུ་རྡོར་སེམས་སུ་བསྒྱུར་
10-14-30b


བའི་བར་ཡིན་ལ།  དེ་ནས་སྐྲ་སྤུ་དང་སེན་མོ་སོགས་འཕེལ་བ་ནི་སྔ་མ་བཞིན་ནོ། །འདི་ནི་འདོད་ཆགས་བྲལ་ཆོས་ཀྱི་ཚུལ་དང་པོ་ཡིན་ལ།  ཕྱི་མ་གསུམ་གྱི་རྣམ་པ་མི་བསྒོམ་པའི་རྒྱུ་མཚན་ནི་བརྗོད་ཟིན་ཏོ། །དེས་ན་ཨུ་རྒྱན་གྱི་ཡུལ་དུ་དཀྱིལ་འཁོར་
སྤྲུལ་པ་སོགས་ལ་འདོད་ཆགས་དང་བཅས་པའི་ཆོས་ཀྱིས་སངས་རྒྱ་བའི་ཚུལ་བཞི་ཚང་ཞིང་འབྲས་བུའི་རྣམ་པ་དེ་ལམ་དུ་བྱེད་པ་ནི་དཀྱིལ་འཁོར་རྒྱལ་མཆོག་མན་ཆད་དོ། །འོ་ན་སྲིད་པའི་རིམ་པ་དེ་དག་སྦྱང་གཞི་དང་འབྲས་བུའི་རྣམ་པ་གཉིས་ཀ་ཡིན་
པ་འགལ་ལོ་སྙམ་ན།  དེ་དག་ཐ་མལ་གྱི་སྣོད་བཅུད་ཀྱི་རིམ་པར་འཛིན་པ་ནི་སྦྱང་གཞི་ཡིན་ཅིང་།  ཤཱཀྱ་ཐུབ་པའི་གདུང་གི་རིམ་པར་འཛིན་པ་ནི་འབྲས་བུའི་རྣམ་པ་ཉིད་ཡིན་པས་འགལ་བ་མེད་དོ། །མདོར་ན་དང་པོ་སྦྱོར་བའི་སྐབས་སུ་ནི་སྦྱང་གཞི་
དང་སྦྱོར་བ་གཙོ་ཆེ་ཞིང་།  འབྲས་བུ་ཞར་བྱུང་ཡིན་ལ་དཀྱིལ་འཁོར་རྒྱལ་མཆོག་གི་སྐབས་སུ་ནི་འབྲས་བུའི་རྣམ་པ་གཙོ་ཆེ་ཞིང་།  སྦྱང་གཞི་ཞར་བྱུང་ཡིན་ཏེ།  འདི་ལྟ་བུའི་གནད་ཤེས་ན་རྣམ་གཞག་རིམ་པར།  མིའི་སྲིད་པ་སྐྱེ་བའི་རིམ་པ་དང་།  སྐྱེ་
བ་གཅིག་གིས་ཐོགས་པའི་བྱང་ཆུབ་སེམས་དཔའ་འཛམ་བུ་གླིང་དུ་འཇུག་ཚུལ་དང་།  འདོད་ཆགས་བྲལ་ཆོས་ཀྱིས་སངས་རྒྱ་བའི་ཚུལ་བཞི་གསུངས་པ་རྣམས་མངོན་པར་རྟོགས་པའི་རིམ་པ་མིའི་སྲིད་པ་སྐྱེ་བའི་རིམ་པ་དང་མཐུན་པར་བསྒོམ་པའི་
ཤེས་བྱེད་དུ་བཀོད་པ་དང་།  དཀྱིལ་འཁོར་རྒྱལ་མཆོག་ལ་སྦྱང་གཞི་དངོས་སུ་མ་གསུངས་པ་རྣམས་ཀྱིས་གནད་ཕྱིན་ཅི་མ་ལོག་པར་རྟོགས་པར་འགྱུར་ཞིང་།  རྣལ་འབྱོར་བླ་ན་མེད་པ་སྤྱི་དང་ཡང་མཐུན་པར་འགྱུར་རོ། །འདི་དག་གི་དགག་སྒྲུབ་ཀྱི་གནད་
10-14-31a


རྣམས་ནི་རྗེ་བཙུན་བླ་མའི་གསུང་ལས་བྱུང་བ་ཡིན་པས་ཞལ་ནས་གསུངས་པའི་བཀར་ཡང་འགྱུར་ཞིང་།  ཞིབ་ཏུ་ཕྱེ་བ་རྣམས་བློ་གྲོས་དང་ལྡན་པ་རྣམས་ཀྱིས་གཟུ་བོའི་བློས་དཔྱད་པར་བྱའོ་ཞེས་པའི་དོན་
བསྒྲུབས་པས་རྗེས་སུ་གནང་བའི་བཀར་ཡང་འགྱུར་བས་ཕྱོགས་ཞེན་སྤངས་ཏེ་བླང་བར་གྱིས་ཤིག  ༈  །ཤེས་དང་ཤེས་བྱ་དབྱིངས་སུ་རོ་གཅིག་གྱུར་ཀྱང་དམིགས་མེད་སྙིང་རྗེའི་རྣམ་པར་གཡོ་བའི་ཟློས་གར་གྱིས། །སྲིད་མཐའི་
བར་དུ་སྲིད་པ་འདྲེན་མཛད་རྡོ་རྗེ་འཛིན་དེས་སྐལ་ལྡན་རྣམས་ལ་བསྟན་པའི་སྙིང་པོ་ནི། །གཡོ་བའི་དུག་གིས་བརྟན་པའི་དུག་ལ་བསྣུན་ལྟར་སྲིད་པའི་རིགས་འདྲས་སྲིད་པ་འདག་པའི་ཐབས་མཁས་དང་། །རྫས་ཀྱི་རླུང་གིས་ནད་ཀྱི་རླུང་ལ་བསྣུན་
ལྟར་བཟློག་པའི་གཉེན་པོས་སྤང་བྱ་འདག་པའི་ཐབས་མཁས་དང་། །རྣ་བའི་ཆུ་ནི་ཆུ་གཞན་མང་པོས་དགུག་ལྟར་རྣམ་རྟོག་མང་པོས་རྣམ་རྟོག་འདག་པའི་ཐབས་མཁས་དང་། །མེ་ཡིས་ཚིག་པ་མེ་ལ་གདུངས་བས་ཞི་ལྟར་རྣམ་རྟོག་བསྣན་པས་
རྣམ་རྟོག་འདག་པའི་ཐབས་མཁས་ཏེ། །གང་དེའི་བཅུད་ཀྱི་སྙིང་པོ་བདུད་རྩིའི་རྒྱུན་འདི་འཕགས་ཡུལ་མཁས་ཤིང་གྲུབ་པའི་དབང་ཕྱུག་ཆེ་རྣམས་ཀྱིས། །རྣམ་པར་བཀྲལ་ཞིང་སྐད་གཉིས་སྨྲ་བའི་དབང་པོ་འགའ་ཡིས་གངས་རིའི་ཁྲོད་འདིར་
ཉམས་པ་མེད་པར་བསྒྱུར། །དེ་ཕྱིར་སྔོན་དུས་བོད་ཀྱི་སྔགས་འཆང་དག །རང་ཉིད་གྲོལ་ཞིང་རྣམ་གྲོལ་ལམ་དེ་ཉིད། །གཞན་ལ་བསྟན་པས་གསང་ཆེན་བསྟན་པ་ནི། །ཉི་མའི་འོད་བཞིན་ཕྱོགས་བཅུར་རྒྱས་པར་མཛད། །དེང་དུས་མཁས་
10-14-31b


རློམ་འགའ་ཡིས་རྒྱུད་སྡེའི་དོན། །དམ་པ་སྔ་མས་བཀྲལ་བའི་ལམ་བཟང་རྣམས། །རྟོག་གེའི་རིགས་པས་བཀག་ནས་བརྡོལ་ཆོས་ཀྱི། །ཅ་ཅོའི་སྒྲ་ཆེན་ངོམས་བཞིན་སྒྲོགས་པར་བྱེད། །དེ་ཚེ་འཇམ་པའི་རྡོ་རྗེའི་མཁྱེན་བརྩེ་ལས། །རྣམ་པར་
སྤྲུལ་ནས་འགྲོ་བའི་དོན་བརྩོན་པ། །ཀུན་དགའི་ལམ་བཟང་བྱེད་པོ་ཡབ་སྲས་ཀྱིས། །སྨྲ་ངན་བསལ་ནས་ཐེག་མཆོག་རྒྱས་པར་མཛད། །དེ་ལྟའི་མགོན་གྱིས་རྗེས་བཟུང་རྒྱལ་ཁམས་པ། །བསོད་ནམས་སེང་གེའི་རྣམ་དཔྱོད་རལ་གྲི་ཡིས། །
རྟོག་གེའི་འཁྲི་ཤིང་དྲྭ་བ་ཚར་བཅད་ནས། །རྡོ་རྗེ་ཐེག་པའི་ལྗོན་ཤིང་བསྐྱེད་བསྲིངས་སོ། །དགེ་ཚོགས་ཟླ་ལྟར་དཀར་བ་གང་ཐོབ་དེ། །མཁའ་མཉམ་འགྲོ་བ་ཀུན་དང་ཐུན་མོང་དུ། །རྒྱུ་འབྲས་ལྷུན་གྲུབ་སྤྱོད་པའི་ལམ་ཞུགས་ཏེ། །མཆོག་གི་
དངོས་གྲུབ་ཐོབ་པའི་ཕྱིར་བསྔོའོ། །ཟབ་མོ་རྡོ་རྗེ་ཐེག་པ་ལ་ལོག་སྨྲ་ཚར་གཅོད་པར་བྱེད་པ་རིགས་པའི་མཚོན་ཆ་འདི་ནི།  རྗེ་བཙུན་བླ་མ་མུས་པ་ཆེན་པོའི་ཞབས་རྡུལ་སྤྱི་བོས་ལེན་པ།  དགེ་སློང་བསོད་ནམས་སེང་གེས་བསྟན་འཛིན་གྱི་སྐྱེ་བུ་
ཆེན་པོ་དག་གིས་བཀའ་གནང་ཞིང་།  དོན་གཉེར་དུ་མས་བསྐུལ་བའི་ངོར།  གླིང་ཁ་བདེ་བ་ཅན་དུ་སྦྱར་བའོ།།    །།མངྒ་ལམ།།    །།འདི་བསྒྲུབས་པ་ལས་བྱུང་བ་ཡི། །དགེ་བའི་རྩ་བ་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་
ཤེས་རབ་ཐོབ་པར་ཤོག།    །།དགེའོ། །དགེའོ། །དགེའོ།།