9-1-0a


                    ༼ཏ༽
༄༅།  །ཀུན་མཁྱེན་གོ་བོ་རབ་འབྱམས་པ་བསོད་ནམས་སེང་གེའི་བཀའ་འབུམ། །
9-1-0b


empty page
9-1-1a


གླེགས་བམ་དགུ་པ་ལ།    སྡོམ་པ་གསུམ་གྱི་རབ་ཏུ་དབྱེ་བའི་རྣམ་བཤད་རྒྱས་བའི་གསུང་རབ་ཀྱི་དགོངས་པ་གསལ་བ།  ལྡེབ  ༡༦༣  1- 323  སྡོམ་གསུམ་
རབ་དབྱེའི་སྤྱི་དོན་ཡིད་བཞིན་ནོར་བུ།    ལྡེབ  ༨༣  325-488    སྡོམ་པ་གསུམ་གྱི་བསྟན་བཅོས་ལ་དྲིས་ཤིང་རྩོད་པའི་ལན་སྡོམ་གསུམ་འཁྲུལ་སྤོང་།    ལྡེབ  ༦༦  469-619  མདོ་
རྒྱུད་ཀུན་གྱི་དོན་བསྡུས་པ་སྙིང་པོ་ཡིད་ཀྱི་མུན་པ་རྣམ་པར་སེལ་བ།  ལྡེབ  ༡༢  621-644    སྡོམ་པ་གསུམ་གྱི་རབ་ཏུ་དབྱེ་བའི་ཁ་སྐོང་གཞི་ལམ་འབྲས་གསུམ་གསལ་བར་བྱེད་པའི་
ལེགས་བཤད་འོད་ཀྱི་སྣང་བ།  ལྡེབ  ༣༡    645-705    སྡོམ་གསུམ་ཁ་སྐོང་གི་བསྡུས་དོན།    ལྡེབ  ༨    707-721    བསྡོམས་ལྡེབ་༣༦༡ ཡོད།
9-1-1b


empty page
9-2-1a


༄། ཛ་ཡ་སྱ་པྲ་ཝ་ཙ་ནཱ་ནཱཾ་ཤྱཱ་ཀ་པྲ་ཀ་ཊ་ནཱ་མ་ཏྲི་ས་མྦ་རཱ་ཎཱཾ་ས་མྦྷེ་དཱ་ནཱཾ་མི་རྣཱ་ཥི་ཏ་བི་ཧ་ར་ཏི་སྨ། །
༄༅།  །སྡོམ་པ་གསུམ་གྱི་རབ་ཏུ་དབྱེ་བའི་རྣམ་བཤད་རྒྱལ་བའི་གསུང་རབ་ཀྱི་དགོངས་པ་གསལ་བ་ཞེས་བྱ་བ་བཞུགས་སོ།།    །།
9-2-1b


༄༅།  །སྡོམ་པ་གསུམ་གྱི་རབ་ཏུ་དབྱེ་བའི་རྣམ་བཤད་རྒྱལ་བའི་གསུང་རབ་ཀྱི་དགོངས་པ་གསལ་བ་ཞེས་བྱ་བ།  བླ་མ་དང་མགོན་པོ་འཇམ་པའི་དབྱངས་ལ་གུས་པས་ཕྱག་འཚལ་ལོ། །སྣ་
ཚོགས་ཐེག་པའི་རིགས་ཀྱི་བློ་གྲོས་ཁམས། །ནུས་ལྡན་ཐབས་མཁས་རྩི་ཡིས་ཟིན་པ་ཡིས། །སྡོམ་གསུམ་གསེར་གྱི་ཕུང་པོར་བསྒྱུར་མཛད་པའི། །ཤཱཀྱའི་དབང་པོ་བཟོ་སྦྱངས་མཁས་པ་རྒྱལ། །རབ་
མཛེས་པདྨའི་ལྟེ་བར་ཟླ་གདན་ལ། །གུར་གུམ་གཞོན་ནུའི་མདངས་འཕྲོག་འཛུམ་པའི་བཞིན། །དྲན་པ་ཙམ་གྱིས་ཡིད་ཀྱི་མུན་སེལ་བ། །ལྷ་མཆོག་འཇམ་པའི་དབྱངས་ལ་གུས་ཕྱག་འཚལ། །ཐུགས་
རྗེའི་གཏེར་ཆེན་ལག་ན་པདྨོ་ཡིས། །གྲངས་མེད་འགྲོ་ལ་ཕན་བདེ་བསྐྲུན་སླད་དུ། །གངས་རིའི་ཁྲོད་འདིར་མི་ཡི་གཟུགས་འཛིན་པ། །རྗེ་བཙུན་ས་སྐྱ་པ་ལ་མགོས་ཕྱག་འཚལ། །དེ་སྲས་འཇམ་དབྱངས་འཁོན་
9-2-2a


སྟོན་ཀུན་དགའ་འབར། །བསོད་ནམས་ཡེ་ཤེས་རྩེ་མོར་རབ་སོན་དང་། །རབ་སྙན་གྲགས་པའི་རྒྱལ་མཚན་འཛིན་པའི་དཔལ། །དཔལ་འབྱོར་ཆེན་པོའི་འོད་ཟེར་སྟོང་ལྡན་དང་། །ཡོངས་རྫོགས་བསྟན་
པའི་མངའ་བདག་པཎྜི་ཏ། །རྣམ་དཔྱོད་བློ་ལྡན་བསོད་ནམས་རྒྱལ་མཚན་ཞབས། །འགྲོ་བའི་བླ་མ་ཆོས་ཀྱི་རྒྱལ་པོ་སྟེ། །རིམ་པར་བྱོན་པའི་འཇམ་དབྱངས་བདུན་ལ་འདུད། །ཁྱད་པར་ཟབ་གསལ་མཁྱེན་པའི་དཀྱིལ་འཁོར་འཆད་
རྩོད་རྩོམ་པའི་འོད་ཟེར་སྟོང་འཕྲོ་བ། །དམིགས་མེད་ཐུགས་རྗེའི་རྟ་བདུན་གྱིས་དྲངས་རབ་འབྱམས་ཤེས་བྱའི་མཁའ་ལ་ཐོགས་མེད་རྒྱུ། །བདེ་གཤེགས་གསུང་རབ་པད་ཚལ་རྒྱས་ཤིང་སྐལ་ལྡན་བུང་བའི་དགའ་སྟོན་སྤེལ་མཛད་པ། །
འཇམ་དབྱངས་བླ་མ་སྔོན་མེད་ནམ་མཁའི་ནོར་བུ་འགྲོ་བའི་གཙུག་ན་རྒྱལ་གྱུར་ཅིག །གཞན་ཡང་སྤྲུལ་སྐུ་ཕྱག་ན་རྡོ་རྗེ་སོགས། །དྲི་མེད་འཁོན་གྱི་རིགས་སུ་སྐུ་འཁྲུངས་པ། །ཐུབ་པའི་རྒྱལ་ཚབ་སྐྱེས་ཆེན་མཆོག་རྣམས་ལ། །དང་བས་
9-2-2b


ཐལ་སྦྱར་རྟག་ཏུ་སྐྱབས་སུ་མཆི། །སྡོམ་གསུམ་བཀའ་དྲིན་སྩོལ་མཛད་འདྲེན་མཆོག་བཟང་པོའི་ཞབས། །དུས་གསུམ་རྒྱལ་བའི་ལམ་སྟོན་དཀོན་མཆོག་རྒྱལ་མཚན་དཔལ། །ཐེག་གསུམ་བསྟན་པ་རྒྱས་མཛད་ཀུན་མཁྱེན་སངས་རྒྱས་འཕེལ། །གནས་གསུམ་
ཤེས་རབ་བཟང་པོས་ལེགས་རྟོགས་རྣམས་ལ་འདུད། །འགྲོ་བའི་བླ་མ་ས་སྐྱ་པཎྜི་ཏས། །ཆོས་དང་ཆོས་མིན་རྣམ་འབྱེད་བསྟན་བཅོས་ཀྱིས། །གངས་ཅན་ཆོས་མིན་མུན་པ་མཐར་མཛད་ནས། །ཡང་དག་ལམ་བཟང་སྣང་བ་གསལ་བར་མཛད། །འོན་ཀྱང་ལ་ལ་བློ་མིག་
ཉམ་ཆུང་བས། །གཞུང་གི་དགོངས་པ་ཇི་བཞིན་མ་རྟོགས་ཤིང་། །ཁ་ཅིག་ལོག་པར་རྟོག་པའི་གླིང་དུ་འཁྱམས། །གཞན་དག་ཕྲག་དོག་གིས་གཟིར་འགོག་ལ་བརྩོན། །འགའ་ཞིག་རང་འདོད་གྲུབ་མཐའི་ཕྱོགས་སུ་ཁྱེར། །དེ་དག་དྲང་ཕྱིར་འཇམ་དབྱངས་བླ་མ་ཡི། །
དགོངས་པ་ཇི་བཞིན་དམ་པའི་མན་ངག་དང་། །བློ་གྲོས་གསལ་བའི་འོད་ཀྱིས་དབྱེ་བར་བྱ། །འདིར་ཆོས་དང་ཆོས་མ་ཡིན་པ་རྣམ་པར་འབྱེད་པའི་བསྟན་བཅོས་རྒྱལ་བའི་གསུང་རབ་ཀྱི་བཀའ་བསྡུ་བ་བཞི་པ།  མདོ་རྒྱུད་མ་ལུས་པ་གསལ་བར་བྱེད་པའི་སྒྲོན་མེ།  དད་ལྡན་
གྱི་དགོས་འདོད་མ་ལུས་པ་འབྱུང་བའི་ནོར་བུ།  ལོག་སྨྲའི་ཚང་ཚིང་སྲེག་པར་བྱེད་པའི་ཉི་མ།  ལེགས་པར་བཤད་པའི་ཆུ་བོ་འདུས་པའི་རྒྱ་མཚོ།  སྡོམ་པ་གསུམ་གྱི་རབ་ཏུ་དབྱེ་བ་ཞེས་བྱ་བའི་བསྟན་བཅོས་འདི་འཆད་པ་ལ་དོན་གསུམ་སྟེ།  བསྟན་བཅོས་རྩོམ་པ་པོའི་ཆེ་བའི་
ཡོན་ཏན།  དེས་བསྟན་བཅོས་ཇི་ལྟར་བརྩམས་པའི་ཚུལ།  བརྩམ་བྱ་བསྟན་བཅོས་ཀྱི་བརྗོད་བྱ་གཏན་ལ་དབབ་པའོ། །དང་པོ་ལ་བཅུ་སྟེ། རིགས་ཁྱད་པར་ཅན་དུ་འཁྲུངས་པའི་ཡོན་ཏན།  གཞི་ཚུལ་ཁྲིམས་ལ་གནས་པའི་ཡོན་ཏན།  ཐོས་བསམ་བསྒོམ་པས་རྒྱུད་སྦྱངས་པའི་ཡོན་
9-2-3a


ཏན།  འཆད་རྩོད་རྩོམ་པས་བསྟན་པ་སྤེལ་བའི་ཡོན་ཏན།  བླ་མ་ལྷ་ཡིས་རྗེས་སུ་བཟུང་བའི་ཡོན་ཏན།  ཆགས་ཐོགས་མེད་པའི་མངོན་ཤེས་མངའ་བའི་ཡོན་ཏན།  འཛམ་གླིང་ཆེ་དགུས་ཞབས་ལ་གཏུགས་པའི་ཡོན་ཏན།  རྨད་དུ་བྱུང་བའི་
ལུང་བསྟན་བརྙེས་པའི་ཡོན་ཏན།  སྐུ་གསུང་ཐུགས་ཀྱི་རྟེན་མཆོག་སྤྲུལ་པའི་ཡོན་ཏན།  བསྟན་པའི་གསལ་བྱེད་སློབ་མ་བསྐྲུན་པའི་ཡོན་ཏན་ནོ། །དང་པོ་ལ་ལྔ་སྟེ།  གནམ་ལྷའི་བརྒྱུད་པ་ཇི་ལྟར་བྱུང་ཚུལ།  དེ་ལས་འཁོན་གྱི་རིགས་བྱུང་ཚུལ།  དེ་ལས་ས་སྐྱ་པ་བྱུང་ཚུལ།  
དེ་ལས་བླ་མ་ཉིད་སྐུ་འཁྲུངས་ཚུལ།  འཁྲུངས་ནས་འཇིག་རྟེན་གྱི་སྤྱོད་པ་ལས་འདས་ཚུལ་ལོ། །དང་པོ་ནི།  གདུང་བརྒྱུད་རིན་པོ་ཆེ་འདི་ཉིད་ཐོག་མར་ལྷ་ལས་ཆད་པ་ཡིན་ཏེ།  དེའང་གནམ་ལྷ་སྤྱི་རིངས།  གཡུ་རིངས།  དབུ་སེ་དང་གསུམ་བྱུང་།  དེ་དག་ལ་མིའི་རྗེ་ཞུས་པས།  ཆུང་
བས་མིའི་རྗེ་མཛད།  དེ་ལ་སྲས་བཞི་བྱུང་བ་ལ་སི་བྱི་ལི་སྤུན་བཞིར་གྲགས།  དེ་དག་ལྡོང་རུས་ཆེན་བཅོ་བརྒྱད་དང་འཐབས།  དེའི་གྲོགས་ལ།  ཁུ་བོ་གནམ་ལྷ་གཡུ་རིངས་བྱོན།  ལྡོང་རུས་ཆེན་བཅོ་བརྒྱད་བཏུལ་ནས་བྲན་དུ་བྱས་སོ། །གཡུ་རིངས་ཀྱིས་དམུའི་བུ་མོ་དམུ་བཟའ་
ལྡེམ་བུ་ཁབ་ཏུ་བཞེས།  སྲས་བདུན་བྱུང་བ་ལ་མ་སངས་སྤུན་བདུན་དུ་གྲགས་སོ། །གཅེན་དྲུག་ཡབ་དང་བདུན་ལྷ་ཡུལ་དུ་གཤེགས་སོ། །ཆུང་བས་ཐོག་ལ་འོད་ཆེན་གྱི་བུ་མོ་ཐོག་ལྕམ་འུར་མ་ཁབ་ཏུ་བཞེས་པའི་སྲས་ཐོག་ཚ་དཔའ་བོ་སྟག་ཡིན།  དེས་ཀླུའི་བུ་མོ་ཀླུ་ལྕམ་བྲ་
མ་ཁབ་ཏུ་བཞེས་པའི་སྲས་ཀླུ་ཚ་རྟ་སོ་འོད་ཆེན་ཡིན།  དེས་མོན་བཟའ་མཚོ་མོ་རྒྱལ་ཁབ་ཏུ་བཞེས་པའི་སྲས་གཡའ་དང་སྤང་གི་མཚམས་སུ་སྐྱེས་པ་གཡའ་སྤང་སྐྱེས་སུ་མིང་བཏགས་སོ། །གཉིས་པ་ནི།  གཡའ་སྤང་སྐྱེས་ཀྱིས་སྲིན་པོ་སྐྱ་རིང་ཁྲག་མེད་བསད་ནས།  གཡའ་འབྲུག་
9-2-3b


སི་ལི་མ་འཕྲོགས་ཏེ།  ཁབ་ཏུ་བཞེས་པའི་སྲས་སྲིན་པོ་དང་འཁོན་པའི་བར་དུ་སྐྱེས་པ་འཁོན་པར་སྐྱེས་སུ་མིང་བཏགས་ཏེ།  འཁོན་ཞེས་བྱ་བ་དེ་ནས་གྲགས་སོ། །དེས་བཙན་བཟའ་ལྕམ་བུ་ཁབ་ཏུ་བཞེས་པའི་སྲས་མཐུ་དང་རྫུ་འཕྲུལ་ཆེ་བ་གཟུགས་བཟང་ཞིང་བཞིན་ཤིན་ཏུ་ལེགས་པ།  མཐོང་བ་རྣམས་ཀྱི་ཡིད་
འཕྲོག་པ་ཤིན་ཏུ་མཛེས་པ་གཅིག་བྱུང་བ་ལ།  འདི་འདྲ་མི་ཡུལ་དུ་དཀོན་ཟེར་བས།  དཀོན་པ་རྗེ་གུང་སྟག་ཏུ་བཏགས་སོ། །ཁྱེའུ་གཞོན་ནུ་དེ་ཡབ་ཀྱིས་ཡུལ་བཟང་ངན་བལྟ་རུ་བཏང་བས་གཉན་རྩ་ཐར་གྱི་ཡ་ཆངས་ལ་ཡུལ་གྱི་དགེ་བརྒྱད་ཚང་བར་མཐོང་སྟེ།  དེ་ཡང་མཚོ་རྗེ་མཚོ་མ་ནི་ཞིང་
ཆུ་དང་བཏུང་ཆུར་བཟང་།  ཞིང་ཐང་ཆེན་ཐང་ཆུང་ནི་ཁང་ས་དང་།  ཞིང་སར་བཟང་།  ཐར་གྱི་ཡ་ཆངས་ནི་གམ་འབྲོག་དང་། རྒྱང་འབྲོག་ཏུ་བཟང་།  ནགས་རྒུན་བུ་རྒུན་མུག་ནི་ཁང་ཤིང་དང་།  བུད་ཤིང་དུ་བཟང་བར་གཟིགས་ཏེ་ཡུལ་དེ་བཟུང་ངོ་། །དེའི་དུས་ན་རྒྱལ་པོ་ཁྲི་སྲོང་
ལྡེ་བཙན་གྱི་སྐུ་རིང་ལ།  དཀོན་པ་རྗེ་གུང་སྟག་འདི་བློ་ཆེ་ཞིང་འཇིག་རྟེན་གྱི་བྱ་བ་ལ་མཁས་པ་ཞིག་བྱུང་བས།  རྒྱལ་པོའི་ནང་རྗེ་བ་ཡུན་རིང་དུ་བྱས་ཤིང་།  དེ་ལ་འཁོན་དཔའ་བོ་ཆེ་ཞེས་ཀྱང་གྲགས་སོ། །འཁོན་དཔའ་བོ་ཆེ་ལ།  སྲས་གཉིས་བྱུང་བའི་གཅེན་པོ་དབའ་ཡེ་ཤེས་
དབང་པོ་དང་།  ཞང་པོའི་ཐད་དུ་རབ་ཏུ་བྱུང་བའི་མཚན་འཁོན་ཀླུའི་དབང་པོ་སྲུང་བ་ཞེས་བྱ་སྟེ།  སད་མི་མི་བདུན་གྱི་ནང་ནས་མཁས་ཤོས་གཅིག་ཡིན་ནོ།  དེ་ནས་འཁོན་ལ་གྲགས་པ་ཆེ་བར་བྱུང་སྐད་དོ། །དེའི་གཅུང་འཁོན་རྡོ་རྗེ་རིན་པོ་ཆེ་ཡིན་ནོ། །ཞེས་ལྷོ་པ་ཐམས་ཅད་མཁྱེན་པ་དང་། 
བདེ་བ་ཅན་པ་ཡེ་ཤེས་མགོན་གསུངས་ལ།  བླ་མ་དམ་པ་ནི།  འཁོན་དཔའ་བོ་ཆེ་ལ་སྲས་ཁྲི་མཛེས་ལྷ་ལེགས།  ཚེ་ལ་དབང་ཕྱུག །ཀླུའི་དབང་པོ་སྲུང་བ།  ཚེ་འཛིན་དང་བཞི་བྱུང་བའི་ཚེ་འཛིན་གྱི་སྲས་རྡོ་རྗེ་རིན་པོ་ཆེ་ཡིན་གསུང་ངོ་། །འཁོན་རྡོ་རྗེ་རིན་པོ་ཆེ་ལ་སྲས་བདུན་བྱུང་།  ཐ་སྟག་གྲོམ་
9-2-4a


པར་བྱོན་པ་དེ་འཁོན་ཤེས་རབ་ཡོན་ཏན།  དེའི་སྲས་ཡོན་ཏན་འབྱུང་གནས།  དེ་ལ་སྲས་གཉིས་བྱུང་བའི་ཆེ་བ་འཁོན་ཚུལ་ཁྲིམས་རྒྱལ་པོ།  ཆུང་བ་ཁབ་སོ་སྟག་ཐོག་ཏུ་བྱོན་པས།  འཁོན་ཅི་རིགས་པ་འཕེལ།  དེ་ནས་གཡས་རུ་བྱང་དུ་གྱེས་པས།  འཁོན་
ཚོའི་སྡེ་པ་མང་དུ་ཡོད།  འཁོན་ཚུལ་ཁྲིམས་རྒྱལ་པོ་ལ་སྲས་གསུམ་བྱུང་བའི་བར་པ་གང་ལ་ཆ་ཚང་དུ་བྱོན།  ཆེ་ཆུང་གཉིས་གཡའ་ལུང་དུ་བཞུགས་པའི་ཆེ་བ་འཁོན་གཙུག་ཏོར་ཤེས་རབ།  དེ་ལ་སྲས་བདུན་བྱུང་བ།  ཁུ་བོ་ཆུང་བ་དང་བཅས་པ་ལ།  འཁོན་ཚོ་བརྒྱད་དུ་གྲགས་
པ་གཡའ་ལུང་ན་ཡོད།  སྲས་བདུན་གྱི་ལྔ་པ་འཁོན་དགེ་སྐྱབས།  དེ་ཤབ་ཏུ་བྱོན།  དེ་ལ་སྲས་གཉིས་བྱུང་བའི་ཆེ་བ་དགེ་མཐོང་།  ཆུང་བ་ལས་ཤབ་སྟོད་ཀྱི་འཁོན་གྱེས་པ་ཡིན།  དགེ་མཐོང་གི་སྲས་འཁོན་སྟོན་བལ་པོ།  དེའི་སྲས་འཁོན་སྟོན་ཤཱཀྱ་བློ་གྲོས།  དེ་ལ་སྲས་གཉིས་
བྱུང་བའི་ཆེ་བ་འཁོན་རོག་ཤེས་རབ་ཚུལ་ཁྲིམས།  ཆུང་བ་འཁོན་དཀོན་མཆོག་རྒྱལ་པོ་ཡིན།  གཅེན་ཡན་ཆད་རྡོ་རྗེ་ཕུར་པ་ལ་གྲུབ་པ་བརྙེས་པ་སྔགས་སྔ་འགྱུར་ལ་མཁས་པ་མང་དུ་བྱོན།  ཆོས་སྐྱོང་དཀར་མོ་ཉི་ཟླ་ལྕམ་སྲིང་ལ་བྱེད་དོ། །དེའི་དུས་ན་འབྲོའི་ལུང་དུ་སྟོན་མོ་ཆེན་པོ་
གཅིག་བྱུང་བའི་ཚེ་ལྟད་མོའི་བྱེ་བྲག་མང་དུ་བྱུང་བའི་ནང་ནས་སྔགས་པ་འགའ་ཞིག །དབང་ཕྱུག་མ་ཉི་ཤུ་རྩ་བརྒྱད་ཀྱི་མགོ་བརྙན་རྣམས་གྱོན། ཕྱག་མཚན་སོ་སོར་ཐོགས།  མ་མོ་རལ་པ་དང་བཅས་པའི་རྔམ་སྟབས་དང་བཅས་ཏེ།  འཆམ་བྱས་པས་དེ་ག་ལྟད་མོ་ཆེ་ནས།  དེས་
ཁྲོམ་ཐོག་ཆོད།  འཁོན་དཀོན་མཆོག་རྒྱལ་པོས་ཀྱང་དེ་དག་གཟིགས་ནས།  གཅེན་ལ་འདི་ལྟ་བུ་གདའ་ཞུས་པས།  ད་གསང་སྔགས་འཆོལ་བ་བྱ་བ་བྱུང་བ་ཡིན།  གྲུབ་ཐོབ་མི་འོང་།  རང་རེ་ལ་ཡོད་པའི་དཔེ་ཆ་ལྷ་རྟེན།  སྔགས་ཀྱི་ལག་ཆ་ཀུན་གཏེར་དུ་སྦ།  ང་ནི་རྒས།  ཁྱོད་གཞོན་པ་
9-2-4b


ཡིན་པས།  མང་མཁར་ན་འབྲོག་མི་ལོ་ཙཱ་བ་གསང་སྔགས་གསར་འགྱུར་ཟབ་མོ་ལ་མཁས་པར་ཡོད་འདུག་པས།  དེ་ལ་སློབས་ཤིག་གསུང་རྙིང་མ་ཐམས་ཅད་གཏེར་དུ་སྦས་སོ། །དེར་ཆོས་སྐྱོང་གི་ཆོ་འཕྲུལ་བྱུང་ནས།  ཕུར་པའི་མངོན་རྟོགས་བསྡུས་པ་གཅིག་དང་།  གཏོར་མའི་ཆོ་ག་དང་།
སེང་ལྡེང་གི་ཕུར་པ་བཅོ་ལྔ་པ་ཆ་གཉིས་དང་།  དཀར་མོ་ཉིད་ཀྱིས་འཁོན་རོག་ཤེས་རབ་ཚུལ་ཁྲིམས་ལ་ཞལ་དངོས་སུ་བསྟན་ནས་མཛད་པའི་དཀར་མོ་ཉི་ཟླའི་གཏོར་མ་རྣམས་གཅུང་ལའང་གནང་།  གདུང་བརྒྱུད་ཀྱིས་དུས་གཏོར་མ་ཆག་པར་མཛད་དོ། །དེ་ནས་འཁོན་དཀོན་མཆོག་རྒྱལ་
པོས།  གཡའ་ལུང་དུར་ཁྲོད་ན་འབྲོག་མིའི་སློབ་མ་འཁྱིན་ལོ་ཙཱ་བ་ཞེས་བྱ་བ་ལ།  བརྟག་གཉིས་གསན་ནས་ཚར་ལ་ཁད་པ་ན།  དེ་སྐུ་གཤེགས་པའི་ཞལ་ཆེམས་ལ།  ད་ཁྱེད་ཀྱིས་ཆོས་འཕྲོ་དེ་མང་མཁར་དུ་འབྲོག་མི་ལོ་ཙཱ་བ་ལ་ཞུས་ཤིག་གསུང་ངོ་། །དེ་ནས་མང་མཁར་དུ་བྱོན།
འབྲོག་མིའི་དྲུང་དུ།  རྒྱུད་གསུམ་དང་།  ལམ་སྐོར་ཕྱི་མ་རྣམས་གསན།  མཁས་པར་མཁྱེན་ནས་དེའི་རྣམ་གཞག་བྱ་བ་དང་གདམས་ངག་ཞུ་བར་དགོངས་ཏེ།  གཡའ་ལུང་འཇག་གཤོངས་ཀྱི་ཞིང་བཙོང་བར་འོས་པ་ཀུན་བཙོངས།  ལྷག་མ་དགེ་འདུན་འཕྲང་པ་ལ་ཕུལ་ནས།  རིན་ལ་
རྟ་བཅུ་བདུན་གྱི་ཁལ་དང་བཅས་པ་ཁྱེར་ནས་འོངས་ཏེ།  བླ་ཆེན་ལ་ཕུལ།  གསུང་ངག་ཞུས་ཀྱང་མ་གནང་།  གཞུང་གི་སྐོར་ཐམས་ཅད་ཚང་བར་མཛད།  བསམ་མི་ཁྱབ་དང་གཏུམ་མོའི་དམིགས་པ་ཉི་ཤུ་རྩ་བཞི་ལ་སོགས་པའི་གདམས་ངག་ཅི་རིགས་པ་གནང་ངོ་། །གཞན་ཡང་འགོས་
ཁུག་པ་ལ།  འདུས་པ་ལ་སོགས་པ་གསན།  ཨུ་རྒྱན་གྱི་པཎྜི་ཏ་ཤེས་རབ་གསང་བ་ལ་ཐིག་ལེ་སྐོར་ལྔ་ལ་སོགས་པ་གསན།  མལ་ལོ་ཙཱ་བ་ལ།  བདེ་མཆོག་རྩ་རྒྱུད་དང་།  གྲུབ་སྙིང་གི་སྐོར་རྣམས་གསན།  གཞན་ཡང་བ་རི་ལོ་ཙཱ་བ།  བླ་མ་སྒྱི་ཆུ་བ།  པུ་ཧྲངས་ལོ་ཙཱ་བ།  གནམ་ཁའུ་
9-2-5a


པ་སྐུ་མཆེད།  སྐྱུར་ཨ་སྐྱབས་ལ་སོགས་པ་ལས་ཆོས་མང་དུ་གསན་ཏེ་ཆོས་ཀྱི་མངའ་བདག་ཏུ་གྱུར་ཏོ། །དེ་ནས་དུས་ཕྱིས་འཇག་ཤོངས་སུ་ཡབ་དང་གཅེན་གྱི་སྐུ་འབུམ་བཞེངས།  གཅེན་གྱི་སྐུ་འབུམ་ན་ཕུར་པ་བྱིན་རླབས་ཅན་དུ་གྲགས་
པ་ཆ་གཅིག་ཀྱང་བཞུགས།  ཕུར་པ་ཆ་གཅིག་ཐུགས་དམ་དུ་གང་གཤེགས་སར་བསྣམས་ཏེ་ཕྱིས་ས་སྐྱ་ན་ཡོད་དོ། །འཁོན་དཀོན་མཆོག་རྒྱལ་པོ་གཡའ་ལུང་ཆུ་སྐྱར་ཅི་རིགས་པར་བཞུགས།  བྲ་བོ་ལུང་པར་དགོན་ཆུང་གཅིག་བཏབ་སྟེ།  དེར་ཡང་ལོ་འགའ་བཞུགས་སོ། །གསུམ་པ་ལ་
བཞི་སྟེ།  ས་སྐྱའི་གཞི་འདིངས་ཚུལ།  སྤྱན་རས་གཟིགས་ཀྱི་རྣམ་འཕྲུལ་བྱུང་ཚུལ།  འཇམ་དབྱངས་ཀྱི་རྣམ་འཕྲུལ་བྱུང་ཚུལ།  ཕྱག་རྡོར་གྱི་རྣམ་འཕྲུལ་སོགས་བྱུང་ཚུལ་ལོ། །དང་པོ་ནི།  དཀོན་མཆོག་རྒྱལ་པོ་བྲ་བོ་ལུང་པར་བཞུགས་དུས།  དགོན་པ་དེའི་རི་རྩེ་ནས་གཟིགས་པས།
རི་དཔོན་པོ་རིའི་ངོས་འགྲམ་ན་ས་དཀར་ཞིང་སྣུམ་ལ་ཆུ་གཡས་སུ་འབབ་པ་སོགས་བཀྲ་ཤིས་པའི་དགེ་མཚན་མང་དུ་གཟིགས་ནས།  དགོན་པ་གཅིག་བཏབ་ན་སངས་རྒྱས་ཀྱི་བསྟན་པ་དང་།  འགྲོ་བ་དུ་མ་ལ་ཕན་པར་དགོངས་ཏེ།  ཇོ་བོ་ལ་ཞུས་པས་གནང་།  སའི་བདག་པོ་ཞང་ཞུང་བ་
དང་།  བནྡེ་གྲོང་བཞི་ལ་འདིར་དགོན་ཆུང་ཞིག་བྱས་ན།  ཁྱེད་ལ་འགལ་བ་མེད་ན།  རིན་ཞིག་འཇལ་བྱས་པས།  ཁོང་རྣམས་ན་རེ།  རིན་ཡེ་མི་འཚལ།  དགོན་པ་མཛད་པར་ཞུ་ཟེར་བ་ལ།  འོན་ཀྱང་ཕྱིན་ཆད་ལ་འདི་འཐད་གསུངས་ནས།  རྒོད་མ་དཀར་པོ་གཅིག །ཡོལ་བ་གཅིག །མོ་གོས་གཅིག །ནོར་
བུའི་ཕྲེང་བ་གཅིག །ཁྲབ་གཅིག་དེ་རྣམས་ཀྱིས་མགོ་བྱས་པའི་རིན་འཇལ་ནས།  མོན་འགོ་གྲོག་པོ་ནས།  འབལ་མོ་གྲོག་པོའི་བར་གདུང་བརྒྱུད་ལ་དབང་བར་བྱས་སོ། །བླ་མ་འདི་ཤིང་ཕོ་བྱི་ལོ་ལ་སྐུ་འཁྲུངས་ནས།  དགུང་ལོ་བཞི་བཅུ་བཞེས་པ་ཆུ་མོ་གླང་གི་ལོ་ལ་ས་སྐྱ་བཟུང་སྟེ།  ལོ་སུམ་ཅུའི་བར་
9-2-5b


དུ་སྒྲུབ་པ་དང་།  བཤད་ཉན་ལ་སོགས་པའི་སྒོ་ནས་བསྟན་པའི་བྱ་བ་མཛད་ནས།  དྲུག་ཅུ་རེ་དགུ་པ་ཆུ་ཕོ་རྟའི་ལོ་དབྱུ་གུའི་ཟླ་བའི་ཚེས་བཅུ་བཞི་ལ་སྐུ་གཤེགས་སོ། །གཉིས་པ་ནི།  བླ་མ་དཀོན་མཆོག་རྒྱལ་པོ་དགུང་ལོ་ལྔ་བཅུ་ང་དགུ་བཞེས་པ་ཆུ་ཕོ་སྤྲེའུའི་ལོ་ལ་མ་གཅིག་ཞང་
མོ་ལ་སྲས་གཅིག་འཁྲུངས་པ་བླ་མ་ཀུན་དགའ་སྙིང་པོ་སྟེ།  འདི་ཉིད་དང་པོ་ནས་འགྲོ་བ་ཐམས་ཅད་ཀྱི་ཡིད་དུ་འོང་ཞིང་མཛེས་པ་དང་།  ཞི་ཞིང་དུལ་བ་དང་།  ཡིད་གཞུངས་པ་དང་།  ཤེས་རབ་དང་སྙིང་རྗེ་ལ་སོགས་པ་རང་བཞིན་གྱི་ཡོན་ཏན་དུ་མ་དང་ལྡན་ཞིང་།  རྟ་དང་ནོར་བུ་བརྟག་པ་དང་།
སྐྱེས་པ་དང་བུད་མེད་བརྟག་པ་དང་།  སྙན་ངག་དང་།  སྡེབ་སྦྱོར་དང་།  སྨན་དཔྱད་དང་བཟོའི་གནས་ལ་སོགས་པ་ཐ་སྙད་ཀྱི་གཙུག་ལག་རྣམས་ལ་ཐུགས་བྱང་བར་གྱུར་བ་ཞིག་གོ།  དེ་ནས་གསུང་རབ་ལ་གསན་སྦྱོང་མཛད་པའི་ཚུལ་ནི།  ཐོག་མར་ཡབ་ལས་ཀྱེའི་རྡོ་རྗེའི་དབང་བསྐུར་ཞུས་ནས་
དེའི་ཆོས་ཅི་རིགས་པ་ཞུས་སོ། །དགུང་ལོ་བཅུ་གཅིག་ལོན་པའི་ཚེ་ཡབ་སྐུ་གཤེགས་ཏེ།  རྩིས་བྱས་པས་ཕྱི་རྟེན་གྱི་འགྲམ་འདིངས་བ།  གཤེགས་རྫོང་བྱེད་པ།  གདན་ས་ཚུད་པ་རྣམས་ཉི་མ་གཅིག་ལ་གྲུབ་ན།  ཤུལ་དུ་ཕུན་སུམ་ཚོགས་པ་འོང་ཟེར་བས།  འཕྲང་བྲག་དམར་བ་གཉིས་བསགས་
ནས་ཆོས་འཁོར་བྱེད་པ།  ཕྱི་རྟེན་གྱི་འགྲམ་འདིངས་པ།  བ་རི་བ་གདན་སར་བཏོན་པ་རྣམས་ཉིན་གཅིག་ལ་བྱས་ཏེ།  བ་རི་བས་ལོ་བརྒྱད་གདན་ས་བྱས་སོ། །དེ་ནས་བ་རི་བའི་དྲུང་དུ་འཇམ་དབྱངས་ཀྱི་སྒྲུབ་ཐབས་ཞུས་ཏེ།  བསྒྲུབས་པས་ཟླ་བ་དྲུག་ན་ཞལ་གཟིགས་ཏེ།  ཞེན་པ་བཞི་བྲལ་
ལ་སོགས་པའི་ཟབ་པ་དང་།  རྒྱ་ཆེ་བའི་ཆོས་ཀྱི་སྒོ་དཔག་ཏུ་མེད་པ་གསན་ཅིང་།  མི་བརྗེད་པའི་གཟུངས་དང་།  རྣམ་དཔྱོད་ཀྱི་བློ་གྲོས་མཚུངས་པ་མེད་པ་བརྙེས་པར་གྱུར་ཏོ། །དགུང་ལོ་བཅུ་གཉིས་བཞེས་པའི་ཚེ།  རོང་ངུར་སྨྲིག་ཏུ་བྱོན་ཏེ།  བྲང་ཏི་དར་མ་སྙིང་པོ་ལས་མངོན་པ་ཀུན་ལས་
9-2-6a


བཏུས་གསན་ཅིང་།  དེའི་ཚེ་རྡོ་ལ་ཕྱག་རྗེས་བཞག་པ་ད་ལྟའང་ཡོད་དོ། །བྲང་ཏི་སྐུ་གཤེགས་ནས་ཟུར་ཆོས་པ་དགེ་བའི་བཤེས་གཉེན་ཁྱུང་ལས་ས་སྡེ་ལྔ་དང་།  སྡོམ་རྣམ་གཉིས་གསན།  ཉང་སྟོད་དུ་ཁྱུང་རིན་ཆེན་གྲགས་དང་།  ཟུར་ཆོས་པ་མེ་དིག་པ་ལས་ཚད་མ་ལ་
སོགས་པ་གསན།  སླར་ཡང་ས་སྐྱར་བྱོན་ཏེ།  བ་རི་ལོ་ཙཱ་བའི་དྲུང་དུ་དཀོན་བརྩེགས་དང་།  ཕལ་ཆེན་ལ་སོགས་པ་ཕ་རོལ་ཏུ་ཕྱིན་པའི་གཞུང་ལུགས་དང་།  བྱ་བ་དང་སྤྱོད་པའི་རྒྱུད་ཉིས་བརྒྱ་ཙམ་དང་།  རྣལ་འབྱོར་ཆེན་པོ་ལ་གསང་བ་འདུས་པ་ལུགས་གཉིས་དང་།  གཤིན་རྗེའི་གཤེད་དགྲ་ནག་
གི་རྒྱུད།  ཀྱེའི་རྡོ་རྗེའི་རྒྱུད་གསུམ།  འཁོར་ལོ་བདེ་མཆོག་རྩ་བཤད་ཆ་ལག་དང་བཅས་པ་དང་སྒྲུབ་པའི་ཐབས་བསྡུས་པ་ལ་སོགས་པ་བ་རི་བའི་ཆོས་སྐོར་ཡོངས་སུ་རྫོགས་པ་གསན་ཅིང་ཐུགས་སུ་ཆུད་པར་མཛད་དོ། །དེ་ནས་གྲོམ་པ་གཡུ་རྩེར་དགེ་བཤེས་མེ་ལྷང་ཚེར་བ་ལས་ཚད་མ་
རྣམ་ངེས་དང་།  རིགས་ཐིགས་དང་།  དབུ་མ་རང་རྒྱུད་ཤར་གསུམ་ལ་སོགས་པ་གསན།  དེ་ནས་ཕ་ཆོས་རྩད་བཅད་པར་བཞེད་ནས་འཁོན་སྒྱི་ཆུ་བའི་དྲུང་དུ་བྱོན་ནས།  དབང་བསྐུར་ཞུས་པའི་སྟ་གོན་གྱི་ནུབ་མོར་སྲིད་པའི་རྒྱ་མཚོ་ཡིན་ཟེར་བའི་ཆུ་བོ་དམར་མེར་བ་གཅིག་ལ་ཟམ་པ་
གསུམ་འདུག་པའི་ཆུ་འགྲམ་ན་བསྒྲལ་རྒྱུ་མང་དུ་འདུག་པས།  ང་སྒྲོལ་བར་ཞུ།  ང་སྒྲོལ་བར་ཞུ་ཟེར་བ་ལ།  ཟམ་པ་ཕྱི་མ་ལ་གསུམ།  བར་པ་ལ་བདུན།  ཉེ་ཤོས་ལ་མང་པོ་བསྒྲལ་བའི་རྨི་ལམ་བྱུང་ངོ་། །དེ་ནས་བླ་མ་དེའི་དྲུང་དུ་ཌོམྦི་བའི་ལུགས་ཀྱི་ཀྱེ་རྡོ་རྗེའི་རྒྱུད་གསུམ་དང་།  གྲུབ་པ་སྡེ་བཅོ་
བརྒྱད་ལ་སོགས་པ་སྡེ་སྣོད་དང་རྒྱུད་སྡེའི་ཆོས་མང་དུ་གསན་ནོ། །དེའི་ཚེ་སྒྱི་ཆུ་བའི་སློབ་མ་བན་ཆུང་འགའ་དང་འགྲོགས་ཏེ།  མདོགས་སྟོད་དུ་བླ་མ་སེ་ཆོས་འཁོར་གཅིག་ལ་བྱོན་པའི་རྩར་ལྟད་མོ་ལ་བྱོན།  རྒྱུ་མཚན་ཞིབ་ཏུ་བསྙད་པས།  བླ་མ་དཀོན་མཆོག་རྒྱལ་པོའི་སྲས་པོ་ཡིན་པར་རྟོགས་
9-2-6b


ནས།  བླ་མ་སེས་བླ་ཆེན་པང་དུ་བཞེས་ཏེ་མི་གསོན་གཤིན་ཕྲད་པའི་དུས་བྱུང་།  རྒད་པོ་གོག་པོ་འདིའི་ནང་ན་ཆོས་ཡོད་པས་ཁྱོད་ལ་སྟེར་བ་ཡིན།  མྱུར་དུ་ཤོག །གུ་ལེ་ཡོང་སྙམ་ན།  སང་ཕོད་ང་འཆི་བ་ཡིན་གསུངས་ནས་བླ་ཆེན་དེར་ཞག་གཅིག་བཞུགས་ཏེ།  དེའི་བར་ལ་བླ་མས་ལམ་
འབྲས་བུ་དང་བཅས་པ་འདི་ལ་དཀྱུས་སུ་གསུངས་པ་འདི་ཙམ།  དེ་ལས་འཕྲོས་པ་འདི་ཙམ་གྱི་རྐང་གྲངས་ལམ་མེ་བ་ཞིག་གསུངས་སོ། །དེ་ནས་ཡར་བྱོན་ནས་བླ་མ་སེའི་དྲུང་དུ་བཞུད་པར་དགོངས་ཏེ།  འཁོན་སྒྱི་ཆུ་བ་ལ་ཞུས་པས་མ་གནང་ནས་སང་ཕོད་འགྲོ་སྙམ་ཙ་ན།  སེ་གསུངས་
པ་དེ་བདེན་ཏེ་སྐུ་གཤེགས་སོ། །དེ་ནས་བླ་མ་གནམ་ཁའུ་པའི་དྲུང་དུ་བྱོན་ཏེ།  རྒྱུད་སྡེ་བཞིའི་རྒྱུད་དང་འགྲེལ་པ་མན་ངག །སྒྲུབ་ཐབས་ལས་ཚོགས་དང་བཅས་པ་བསམ་གྱིས་མི་ཁྱབ་པ་གསན་ཅིང་།  ཁྱད་པར་དུ་རྣལ་འབྱོར་གྱི་རྒྱུད་འགྲེལ་པ་དང་བཅས་པ་ཡོངས་སུ་རྫོགས་པར་གསན་ནོ། །དགེ་བཤེས་
རྔོག་ལས་ཉི་ཁྲི་སྣང་བ།  བརྒྱད་སྟོང་འགྲེལ་ཆེན།  མདོ་སྡུད་པ།  མངོན་རྟོགས་རྒྱན་རྩ་འགྲེལ་ལ་སོགས་པ་གསན།  དེ་ནས་དུས་རིང་ཞིག་ན་བླ་མ་སྒྱི་ཆུ་བ་བསྙུངས་པས་བླ་ཆེན་ལ་ཤོག་གསུངས་ཏེ་བྱོན་པས་མ་སླེབས།  བླ་མས་ཁྱོད་རབ་ཏུ་བྱུང་ལ་འཁོན་ཚོའི་སྡེ་པ་འདི་སྐྱོངས་གསུངས་པའི་གསུང་བཞག་ནས་སྐུ་
གཤེགས་སོ། །དེའི་རྗེས་ཀྱི་བྱ་བ་རྣམས་ཚར་ནས་ས་སྐྱར་བྱོན་ཏེ།  རབ་ཏུ་བྱུང་བའི་ཆས་བསྒྲུབས་པ་ན་བླ་མ་གནམ་ཁའུ་པས་གསན་ནས་རབ་ཏུ་མ་བྱུང་ན་ཕན་ཆེ་བར་འོང་གསུངས་ནས་མ་གནང་།  འོན་ཀྱང་འཁོན་ཚོའི་དཔོན་ནི་མཛད།  དེ་ནས་བླ་མ་སྒྱི་ཆུ་བ་བླ་མ་མལ་གྱི་སློབ་མ་ཡིན་པས་དེའི་བདེ་
མཆོག་གི་ཕྱག་དཔེ་རྣམས་བསྣམས་ནས་གུང་ཐང་ན་ལ་རྩེ་གནས་གསར་དུ་བྱོན་ཏེ། བླ་མ་མལ་ལས་བདེ་མཆོག་རྩ་རྒྱུད་ཆ་ལག་དང་བཅས་པ་དང་།  དགྲ་ནག་འཇིགས་སྐོར་གསུམ།  ནཱ་རོ་པའི་མན་ངག་རྣམས་ཚང་བར་གསན་ནོ། །དེ་ནས་གཡས་རུ་ན་མར་བྱོན།  གསེར་སྲང་བཅུ་བདུན་གྱི་འབུལ་བ་བསྐུར་བས་བླ་མ་ཐུགས་དགྱེས་
9-2-7a


ཏེ།  དམ་ཚིག་པ་ཆེན་པོར་དགོངས་ནས་ཆོས་ཀྱི་ལྷག་མ་ད་དུང་ཡོད་པས་ཤོག་གསུངས།  བླ་ཆེན་གྱིས་བྱོན་པས་སྦྱོང་རྒྱུད་ལ་སོགས་པའི་ཆོས་མང་པོ་གནང་།  ཁྱད་པར་དུ་མགོན་པོའི་སྒྲུབ་ཐབས་རྗེས་གནང་དང་བཅས་པ་གནང་ནས།  དེའི་རྟེན་དར་ནག་དང་ལྕགས་
ཀྱི་རྡོ་རྗེ་རྩེ་དགུ་པ་དང་སྐུ་འབག་རྣམས་བརྫངས་ཏེ།  མགོན་པོ་ལ་ཁྱོད་འཁོན་ས་སྐྱ་པའི་རྗེས་སུ་སོང་ཞེས་གསུང་ངོ་། །དེ་ནས་མར་བྱོན་ནས་ལ་སྟོད་དུ་རྗེ་བཙུན་པུ་ཧྲངས་ལོ་ཆུང་ལས་བདེ་མཆོག་གི་ཆོས་སྐོར་ལ་སོགས་པ་གསན།  གཞན་ཡང་སྐྱུར་ཨ་སྐྱབས།  བལ་པོའི་པཎྜི་ཏ་པདྨ་ཤྲཱི།  རྒྱ་
གར་གྱི་རྣལ་འབྱོར་པ་བྷོ་ཏ་རཱ་ཧུ་ལ།  བལ་པོའི་པཎྜི་ཏ་ཛྙཱ་ན་བཛྲ་རྣམས་ལས་ཆོས་མང་དུ་གསན་ནོ། །དེ་ནས་གསུང་ངག་གསན་པར་བཞེད་ནས།  སག་ཐང་དིང་དུ་བྱོན་ཏེ།  རྗེ་ཞང་དགོན་པ་བའི་དྲུང་དུ་ལམ་འབྲས་བུ་དང་བཅས་པའི་མན་ངག་ཆ་ལག་དང་བཅས་པ་གསན་ཅིང་ཐུགས་ཉམས་སུ་
བཞེས་ཏེ།  ལམ་བསྡུས་ཏེ་སྒྲུབ་པ་ལུང་སྦྱིན་པ་མཛད་ནས་ལོ་བཅོ་བརྒྱད་ཀྱི་བར་དུ་བཀའ་རྒྱས་བཏབ་ཅིང་།  དེ་ནས་ཆོས་ཀྱི་བདག་པོར་དབང་བསྐུར།  སྤྱིར་ཁྱོད་ཀྱིས་སྒྲུབ་པ་གཙོར་བྱས་ན་ཚེ་འདི་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ།  བཤད་ཉན་བྱས་ན་གདུལ་བྱ་དཔག་ཏུ་མེད་
པའི་དོན་དུ་འགྱུར་ཞིང་།  ཁྱད་པར་དུ་ལུས་མ་སྤངས་པར་ཕྱག་རྒྱ་ཆེན་པོ་གྲུབ་པའི་སློབ་མ་གསུམ།  བཟོད་པ་ཐོབ་པ་བདུན།  རྟོགས་པ་དང་ལྡན་པའི་རྣལ་འབྱོར་པ་བརྒྱད་ཅུ་ཙམ་འབྱུང་ཞེས་ལུང་བསྟན་ནོ། །དེ་ནས་རྗེ་ཞང་དགོན་པ་བ་གཤེགས་པའི་རྗེས་ཀྱི་བྱ་བ་རྣམས་ཚར་ནས།  གུང་ཐང་དུ་བྱོན་པའི་ཚེ་
དུག་བྱུང་བ་ལས་དུས་ཕྱིས་དུག་རོ་ལངས་ནས་ཟླ་བ་གཉིས་ཙམ་བསྙུངས་ནས་ཆོས་ཐམས་ཅད་བརྗེད་འདུག་པས།  བྲང་ཁང་རྙིང་པར་སྐུ་མཚམས་བཅད་དེ་བླ་མ་ལ་གསོལ་བ་བཏབ་པས་ཚིག་རེ་དྲན་པ་བྱུང་།  དེ་ནས་རྗེ་དགོན་པ་བ་མནལ་ལམ་དུ་བྱོན་ནས་ཆོས་གསུངས་པས་མ་ལུས་པ་དྲན་པ་བྱུང་། 
9-2-7b


 དེ་ནས་རྣལ་འབྱོར་དབང་ཕྱུག་དངོས་སུ་བྱོན་ནས་ཟླ་བ་གཅིག་གི་བར་དུ་ཉིན་མཚན་མེད་པར་རྒྱུད་སྡེ་བདུན་ཅུ་རྩ་གཉིས།  ལྕགས་རིའི་ཁོངས་ལས་མི་འདའ་བའི་ཆོས་བཞི་ལ་སོགས་པ་ཆོས་མང་དུ་གསུངས་ཤིང་བྱིན་གྱིས་བརླབས་པ་ཡིན་ནོ། །གཞན་ཡང་ཚར་ཁར་སྒོམ་ཆེན་
སུམ་ཅུ་ཙམ་ལ་ཁྲིད་སྐྱོང་བ།  ས་སྐྱར་བཞུགས་ནས་ལམ་འབྲས་གསུང་པ།  གུང་ཐང་དུ་མལ་གྱི་ཉེ་གནས་མཛད་པ།  ལྕམ་ལྷ་ཁང་དུ་ནམ་མཁའ་དྲི་མེད་ཀྱི་དཀྱིལ་འཁོར་བཞེངས་ནས་རབ་གནས་མཛད་པ།  ཟངས་སྡོང་འབྲོག་པའི་གསེབ་ཏུ་ཆོས་གསུང་བ།  ཤབ་སྒོ་ལྔར་ཆོས་འཁོར་བསྐོར་
བ་སྟེ།  སྐུའི་བཀོད་པ་དྲུག་དུས་ཅིག་ཅར་ལ་བསྟན་པ་ལ་སོགས་པའི་ཡོན་ཏན་བསམ་གྱིས་མི་ཁྱབ་པ་མངའ་འོ། །དེ་ལྟ་བུའི་བླ་མ་དེ་རིམ་གཉིས་ཟབ་མོ་ལས་སྐད་ཅིག་ཀྱང་གཡེལ་བ་མེད་པའི་ངང་ནས་བསྡུ་བ་བཞིས་གཞན་དོན་ལོ་དྲུག་ཅུ་རྩ་བདུན་གྱི་བར་དུ་མཛད་དེ།  ས་ཕོ་སྟག་གི་
ལོ་ཐ་སྐར་གྱི་ཟླ་བའི་ཚེས་བཅུ་བཞི་ལ་གཡས་རུ་བྱང་གི་སྐྱ་བོ་ཁ་གདངས་ནས་བདེ་བ་ཅན་དུ་གཤེགས་སོ། །དེའི་ཚེ་སྐུའི་བཀོད་པ་བཞིར་བསྟན་ཏེ།  གཅིག་ནི་བདེ་བ་ཅན། གཉིས་པ་ནི་པོ་ཏ་ལ།  གསུམ་པ་ནི་ཨུ་ཌྱན།  བཞི་པ་ནི་བྱང་ཕྱོགས་ཀྱི་འཇིག་རྟེན་གྱི་ཁམས་གསེར་མདོག་ཅན་
དུ་གཤེགས་སོ། །ཞེས་སྤྱན་སྔ་ན་གནས་པ་ཕལ་ཆེ་བས་གསལ་བར་རྟོགས་པ་ཡིན་ནོ། །སྤུར་ཞུགས་ལ་ཕུལ་བའི་ཚེ་སྤྱན་སྔ་ན་བཞུགས་པ་ཐམས་ཅད་ལ་ཡིད་མི་བདེ་བ་མེད་པར་ཏིང་ངེ་འཛིན་དང་ལྡན་ཞིང་།  ཞལ་བཞི་པར་ནི་ཐམས་ཅད་ཀྱིས་མཐོང་ལ།  ཁ་ཅིག་གིས་ནི་ཞལ་བརྒྱད་པར་
མཐོང་ངོ་། །དེ་ལྟ་བུའི་བླ་མ་དེ་ལ་སློབ་མའི་མཆོག་ཇི་ལྟར་བྱུང་ན།  སྒྱི་ཆུ་བ་ལས་དབང་ཞུས་པའི་སྟ་གོན་གྱི་མནལ་ལམ་དང་།  རྗེ་དགོན་པ་བས་ལུང་བསྟན་པ་དང་མཐུན་པར།  ལུས་མ་སྤངས་པར་གྲུབ་པ་ཐོབ་པ་གསུམ་ནི།  སིདྒ་ལའི་གླིང་ནས་འོངས་པའི་ཨ་ཙ་ར།  བྱང་ཆུབ་
9-2-8a


སེམས་དཔའ་སྟག །སྒོམ་པ་ཀྱི་འབར་དང་གསུམ་མོ། །བཟོད་པ་ཐོབ་པ་བདུན་ནི།  རྗེ་བཙུན་ཆེན་པོ།  ཞུས་བྱེས་དངོས་གྲུབ།  རྒ་སྟོན་རྡོ་རྗེ་གྲགས།  ནགས་སྒོམ་བསོད་ནམས་རྒྱལ་མཚན།  འཚང་ཁའི་རྣལ་འབྱོར་པ།  སྒོམ་པ་འོད་གྲགས།  ཨ་ཅེ་
མང་ཆུང་མའོ། །བླ་མ་ཆ་གན་གྱི་གསུང་གིས།  བཟོད་ཐོབ་བཅུ་གཅིག་ནི།  རྗེ་པ།  ཞུས་བྱེས།  སྒོམ་ཆེན་རྟ་རྒན།  བྱང་སེམས་ཟླ་རྒྱལ།  ཨ་ཇོ་ཕག་སྟོན།  ཇོ་མོ་ཉང་ཆུང་མ།  མ་ཇོ་བྱང་རྒྱན།  ལྡན་མ་ཇོ་གདན།  བདེ་གཤེགས་ཁམས་པ་རྡོར་རྒྱལ།  ཞང་གསུམ་
ཐོག་པ།  གཤེན་སྒོམ་རྡོ་རྗེ་སེང་གེའོ། །དྲོད་ཆེན་པོ་ལ་གནས་པ་རྗེ་བཙུན་རྩེ་མོ་ལ་སོགས་པ་བཅོ་ལྔ།  དྲོད་འབྲིང་ལ་གནས་པ་སྐྱུ་ར་ཨ་སྐྱབས།  དྲིལ་ཆེན་གྱི་ཇོ་མོ་ཞང་མོ་ལ་སོགས་པ་སུམ་ཅུ་སོ་གཅིག །དྲོད་ཆུང་ངུ་ལ་གནས་པ་ཁམས་པ་ཨ་སེང་།  ནེ་ཚོ་སྦལ་སྟོན། 
མངའ་རིས་པ་གྲགས་སེང་།  ཇོ་མོ་མང་ཆུང་མ་ལ་སོགས་པ་མང་དུ་བྱུང་གསུང་ངོ་། །གཞན་ཡང་དཔལ་ཆེན་འོད་པོ།  གཉེན་གཙུག་ཏོར་རྒྱལ་པོ།  རྒྱ་སྒོམ་ཚུལ་ཁྲིམས་གྲགས།  མི་ཉག་པྲཛྙཱ་ཛྭ་ལ།  ཁམས་པ་རྒྭ་ལོ་ལ་སོགས་པ་མཁས་ཤིང་གྲུབ་པ་བརྙེས་པ་བསམ་གྱིས་མི་
ཁྱབ་པ་བྱུང་ངོ་། །གསུམ་པ་ནི། བླ་མ་ཆེན་པོ་དེ་ལ་རིགས་ཀྱི་སྲས་བཞི་འཁྲུངས་ཏེ།  དང་པོར་ཇོ་མོ་ཆུང་ཤོས་ཇོ་ལྕམ་ཕུར་མོ་བྱ་བ་ལ་གཅེན་ཀུན་དགའ་འབར་འཁྲུངས་ཏེ།  གཞོན་ནུ་ལ་རྒྱ་གར་དུ་བྱོན།  རིགས་པའི་གནས་ལྔ་ལ་མཁས་པར་གྱུར་ནས།  བོད་དུ་འབྱོན་གྲབས་བྱས་
པའི་ཐོག་ཏུ་ཚད་པ་བྱུང་སྟེ།  དགུང་ལོ་ཉི་ཤུ་རྩ་གཉིས་པ་ལ་མ་ག་དྷར་སྐུ་གཤེགས་སོ། །ཇོ་མོ་ཆེ་བ་ཚ་མོ་རོང་བའི་མ་གཅིག་འོད་སྒྲོན་བྱ་བ་ལ་སྲས་གསུམ་འཁྲུངས་པའི་ཆེ་བ་སློབ་དཔོན་རིན་པོ་ཆེ་བསོད་ནམས་རྩེ་མོ་སྟེ།  དེ་ཉིད་ཡབ་དགུང་ལོ་ང་གཅིག་བཞེས་པ་ཆུ་ཕོ་ཁྱིའི་ལོ་
9-2-8b


ལ་སྐུ་འཁྲུངས་ནས།  ཡུམ་ལས་བཙས་མ་ཁད་སཾཾ་ཀྲྀ་ཏའི་སྐད་དང་།  བདག་ནི་བྱིས་པའི་སྤྱོད་པ་ལས་འདས་པའོ། །ཞེས་ལན་གཉིས་སུ་བཏུད་ནས་གསུངས་ཤིང་དུས་ཀུན་ཏུ་སྐྱིལ་མོ་ཀྲུང་བཅས་པས་ཡ་མཚན་དུ་གྱུར་ཏོ། །དགུང་ལོ་གསུམ་པ་ལ་ཀྱེ་རྡོར།  འཇམ་དཔལ།  སྒྲོལ་མ།  མི་གཡོ་
བ་རྣམས་ཞལ་གཟིགས།  རྒྱུད་གསུམ།  བདེ་མཆོག་རྩ་རྒྱུད།  ཀུན་ལས་བཏུས་དང་ལྔ་ཐུགས་ལ་གསུངས།  རྒྱ་གར་དུ་མི་ཐུབ་ཟླ་བ་ལ་སོགས་པ་པཎྜི་ཏ་བཅུ་གཅིག་ཏུ་བརྒྱུད་ནས་སྐྱེ་བ་བཞེས་པ་དྲན་ནོ། །དགུང་ལོ་བཅུ་བདུན་བཞེས་པའི་ཚེ།  རྒྱུད་སྡེ་བཞི་བཅུ་ཐུགས་ལ་གསུངས་ཤིང་།  རྡོ་རྗེ་ཐེག་པ་མཐའ་དག་
ལ་མཁས་པར་རྒྱ་བོད་ཀུན་ལ་གྲགས།  རྡོ་རྗེ་གདན་གྱི་ཡ་ཐེམ་ལ་འཇམ་དཔལ་གྱི་སྤྲུལ་པ་བསོད་ནམས་རྩེ་མོ་རྡོ་རྗེ་ཐེག་པ་མཐའ་དག་གི་དབང་ཕྱུག་དམ་པ་ས་སྐྱར་སྐྱེས་སོ། །ཟེར་བའི་ཡི་གེ་མཁའ་འགྲོ་མས་བྲིས་པ་ཀོའུ་ཤཾ་བྷིའི་པཎྜི་ཏ་དེ་ཝ་མ་ཏིས་ཕྱོགས་ཀུན་ཏུ་བསྒྲགས་པས་བོད་ཉིད་ནས་རྩད་ཆོད་ཟེར་
རོ། །མདོར་ན་དེ་ཡན་ཆད་དུ་ཡབ་ལས་རྡོ་རྗེ་ཐེག་པས་བསྡུས་པའི་རྒྱུད་འགྲེལ་པ།  དཀྱིལ་ཆོག་སྒྲུབ་ཐབས་དབང་བྱིན་རླབས་མན་ངག་ཕྱག་ལེན།  ཁྲིད་དང་བཅས་པ་ཞུས་ནས་ཐུགས་སུ་ཆུད་པར་མཛད་དོ། །དེ་ཉིད་ཀྱི་ལོར་ཡབ་གཤེགས་ནས་དེའི་ཕྱིར་ལོར་རྗེ་པ་ལ་གདན་ས་གཏད་ནས། གསང་ཕུར་
ཕྱ་བ་ཆེན་པོའི་དྲུང་དུ་བྱོན་ཏེ།  སྒྲ་ཚད་ཕ་རོལ་ཏུ་ཕྱིན་པ་འདུལ་བ་མངོན་པ་ལ་སོགས་པའི་སྡེ་སྣོད་མ་ལུས་པ་གསན་ཏེ།  སྔ་ཕྱིར་ལོ་བཅུ་གཅིག་ཙམ་བཞུགས།  ཡུམ་རྒྱས་པ་དང་།  གསེར་གྱི་གན་ཇི་ར་ལ་སོགས་པའི་ཆོས་དང་ཟང་ཟིང་གི་འབུལ་བ་མང་པོས་བསྙེན་བཀུར་བར་མཛད་དོ། །ཡང་དབུ་རྩེ་
རྙིང་མར་གསུང་ངག་གི་ལྟ་བའི་སྐབས་སུ་ནམ་མཁར་མཆོད་པའི་ཚོགས་ཀྱི་དབུས་སུ།  རྗེ་པ།  ཞུ་བྱེས།  རྨོག་སྟོན་གསུམ་ལ་འཇམ་དཔལ།  བིཪྺ་པ།  སྤྱན་རས་གཟིགས་ཀྱི་རྣམ་འཕྲུལ་གསུམ་བསྟན་ནས།  ཆོས་ཉན་བཅུ་དགུ་དག་པའི་སྣང་བ་ལ་བཀོད་པར་མཛད་དོ། །གཞན་ཡང་རྗེ་པས་མཛད་པའི་བསྟོད་པ་ལས་མནལ་ཚེ་འོད་གསལ་
9-2-9a


དག་གི་མཉམ་པར་འཇོག །མཐུ་སྟོབས་དབང་ཕྱུག་ཡི་དམ་གང་རུང་ལ། །ཉིན་མཚན་གང་ཡང་ཐེ་ཚོམ་གཅོད་མཛད་པས། །རིག་པའི་གནས་ལྔ་མཐའ་རུ་ཕྱིན་ལ་འདུད། །གང་གི་ཀུན་སྤྱོད་ཉེས་པའི་དྲི་མ་བྲལ། །ལོག་སྨྲའི་མཐའ་སྤངས་བདེན་དོན་གསུང་པ་པོ། །
སྤྲོས་པ་མེད་ཐུགས་སྟོང་ཉིད་སྙིང་པོ་ཅན། །ས་གསུམ་སྙན་པར་གྲགས་པ་ཁྱོད་ལ་འདུད། །སྒྲ་ཚད་ཕ་རོལ་ཕྱིན་དང་གསང་སྔགས་སོགས། །གཟིགས་པ་ཙམ་གྱིས་ཚིག་དང་དོན་བཅས་པར། །ལེགས་དགོངས་གཞན་ལ་ཕན་པ་ལྷུར་ལེན་པའི། །མཁྱེན་པའི་སྤྱན་རས་གསལ་བ་
ཁྱོད་ལ་འདུད། །གཡེང་བ་མེད་པར་འཆད་རྩོད་རྩོམ་པ་དང་། །རིམ་གཉིས་རྣལ་འབྱོར་རྒྱུན་ཆད་མེད་པ་ཡིས། །རྗེས་ཐོབ་སྒྱུ་མར་མཁྱེན་ནས་སེམས་ཅན་ལ། །སྦྱིན་པ་རྣམ་བཞིས་ཚིམ་མཛད་ཁྱོད་ལ་འདུད། །བླ་ཆེན་འདོད་ལྷ་ཀུན་ལས་ཆོས་རྣམས་ནོད། །དབུས་གཙང་མཁས་
རྣམས་བསྟེན་ནས་སྦྱང་ཚུལ་བསྟན། །བསྟན་པའི་སྲོག་ཤིང་ཆེན་པོར་རྩ་བདུན་ལ། །འཛམ་གླིང་ཡོངས་སུ་གྲགས་པ་ཁྱོད་ལ་འདུད། །པོ་ཏ་ལ་དང་དཔལ་རི་ཨུ་ཌྱན་དུ། །ཉིན་ཕྱེད་ཙམ་གྱིས་ལེགས་འཁོར་མཁའ་འགྲོ་དང་། །དཔའ་བོའི་ཚོགས་དང་སྤྱོད་པའི་བརྟུལ་ཞུགས་
སྤྱད། །རྣམ་འཕྲུལ་དུ་མས་ཉེར་གནས་ཡི་རང་འདུད། །དབང་འདུས་དཀྱིལ་འཁོར་གཙོ་དང་དབྱེར་མེད་པས། །ཟབ་མོའི་དོན་གསུངས་གནས་དང་མཁའ་ཀུན་ལ། །འོད་དང་འོད་ཟེར་རོལ་མོའི་སྒྲ་སྒྲོགས་པས། །བདག་ཡིད་ཏིང་འཛིན་སྒོ་མང་ཕྱེ་ལ་འདུད། །ཅེས་གསུངས་པ་
ལྟར་ཤེས་པར་བྱའོ། །དེ་ལྟ་བུའི་བླ་མ་དེས་ཡང་དག་པར་སྦྱོར་བའི་རྒྱུད་ཀྱི་འགྲེལ་པ་དང་།  བྱང་ཆུབ་སེམས་དཔའི་སྤྱོད་པ་ལ་འཇུག་པའི་འགྲེལ་པ་དང་།  ཆོས་ལ་འཇུག་པའི་སྒོ་ལ་སོགས་པ་བསྟན་བཅོས་མང་དུ་མཛད་ནས། སྐལ་ལྡན་གྱི་འགྲོ་བ་མང་པོ་སྨིན་གྲོལ་གྱི་ལམ་ལ་བཀོད་པར་མཛད་དེ་
9-2-9b


དགུང་ལོ་ཞེ་གཅིག་པ་ཆུ་ཕོ་སྟག་གི་ལོ་སྨལ་པོ་ཟླ་བའི་ཚེས་བཅུ་གཅིག་ལ་ལུས་མ་སྤངས་པར་བདེ་བ་ཅན་གྱི་འཇིག་རྟེན་གྱི་ཁམས་སུ་གཤེགས་པར་གྱུར་ཏོ། །དེའི་སློབ་མ་ནི་ཕལ་ཆེར་བླ་ཆེན་དང་ཐུན་མོང་བ་ཡིན་པས་ལོགས་སུ་མ་སྨོས་སོ། །སྲས་བར་པ་རྗེ་བཙུན་རིན་པོ་ཆེ་གྲགས་པ་
རྒྱལ་མཚན་ནི།  ཡབ་དགུང་ལོ་ང་དྲུག་བཞེས་པ།  མེ་མོ་ཡོས་ཀྱི་ལོ་ལ་བཀྲ་ཤིས་པའི་ལྟས་དང་བཅས་ཏེ་བལྟམས་ཤིང་།  སྨྲ་ཤེས་ནས་དབེན་པ་ལ་དགའ་བ་དང་།  བརྐམ་ཆགས་མེད་པ་དང་།  ཡོན་ཏན་བསྒྲུབ་པ་ལ་བརྩོན་པ་དང༷་།  བྱིས་པའི་སྤྱོད་པ་ལས་འདས་པར་གྱུར་ཏོ། །
དགུང་ལོ་བརྒྱད་པ་ལ་བྱང་སེམས་ཟླ་བ་རྒྱལ་མཚན་ལས་ཚངས་པར་སྤྱོད་པའི་དགེ་བསྙེན་གྱི་སྡོམ་པ་མནོས་ཏེ།  དེ་ཕྱིན་ཆད་རབ་ཏུ་བྱུང་བ་བས་ཀྱང་བཙུན་པར་མཛད་ཅིང་།  ཚོགས་མཆོད་ཀྱི་དུས་སུ་དམ་ཚིག་གི་རྫས་ཙམ་མ་གཏོགས་པ་ཐ་མལ་དུ་ཤ་ཆང་ཞལ་དུ་མི་རེག་སྐད་དོ། །
དགུང་ལོ་བཅུ་པ་ལ་སྡོམ་པ་ཉི་ཤུ་པ།  སྒྲུབ་ཐབས་མཚོ་སྐྱེས་གསུངས།  བཅུ་གཉིས་པ་ལ་ཀྱེ་རྡོར་རྒྱུད་གསུམ་གྱི་པོ་ཏི་གསོལ་བའི་རྨི་ལམ་བྱུང་བ་དང་།  ཆོས་ཐམས་ཅད་ཀྱི་དེ་ཁོ་ན་ཉིད་ཐུགས་སུ་ཆུད་པར་གྱུར་ཏོ། །དེའི་ཚེ་ས་ཆེན་གཤེགས་ནས་ཆོས་འཁོར་ཆེན་པོ་མཛད་དེ།  རང་
གི་སློབ་མ་ལ་བརྟག་གཉིས་གསུངས་པས་ངོ་མཚར་དུ་གྱུར་ཏོ། །དེ་ཡན་ཆད་དུ་ཡབ་ལས་རྡོ་རྗེ་ཐེག་པས་བསྡུས་པའི་ཆོས་སྐོར་མང་དུ་གསན་ནས།  ལོ་བཅུ་གསུམ་པ་ལ་གདན་ས་བཟུང་སྟེ།  སླར་ཡང་སློབ་དཔོན་རིན་པོ་ཆེ།  གཉན་གཙུག་ཏོར་རྒྱལ་པོ།  ཞང་ཚུལ་
ཁྲིམས་གྲགས།  གཉག་དབང་རྒྱལ།  བལ་པོ་ཛ་ཡ་སེ་ན།  ལོ་ཙཱ་བ་དཔལ་མཆོག་དང་པོའི་རྡོ་རྗེ་ལ་སོགས་པ་ལ་རྒྱུད་སྡེ་བཞི་དང་།  སྡེ་སྣོད་གསུམ་གྱིས་བསྡུས་པའི་ཆོས་ཀྱི་རྣམ་གྲངས་བསམ་གྱིས་མི་ཁྱབ་པ་གསན་ཅིང་ཐུགས་སུ་ཆུད་པར་མཛད། ནང་དུ་རིམ་གཉིས་ཀྱི་ཏིང་
9-2-10a


ངེ་འཛིན་རྒྱུན་མི་འཆད་པར་མཛད་དེ།  ཆོས་གསུང་པ་ལ་འབྱོན་པའི་ཚེའང་།  ཀྱེ་རྡོར་སྒོམ་ཞིང་བྱོན་ནས་ཁྲི་ཐོག་ཏུ་ཕེབ་པ་དང་དབུ་རྒྱན་ལ་རིགས་བདག་ཚར།  ཆོས་གཏོར་ལ་རྒྱུན་གཏོར་གྱི་ཚབ་མཛད།  ཆོས་གསུང་པ་ལ་བཟླས་པའི་དོད་མཛད་ནས་
ཡར་བྱོན་པ་དང་བདེ་མཆོག་སྒོམ་ཞིང་བྱོན།  མདོར་ན་ཉིན་ཞག་ཕྲུགས་རེ་ལ་དཀྱིལ་འཁོར་བདུན་ཅུ་རེའི་ཐུགས་དམ་མཛད།  གསུང་ངག་ཀྱང་བླ་མའི་བཀའ་རྒྱ་ལོ་དགུ་མཛད་པ་ལ།  ལོ་བཅུ་གསུམ་གྱི་བར་དུ་མ་གསུངས་ཤིང་།  དེ་ནས་གསུང་ངག་གི་སྒོ་ནས་སྐལ་ལྡན་མང་
པོ་རྣམ་པར་གྲོལ་བ་མཆོག་ལ་བཀོད་པར་མཛད་དོ། །གཞན་ཡང་འཆད་རྩོད་རྩོམ་གསུམ་གྱི་སྒོ་ནས་ཐུབ་པའི་བསྟན་པ་ཆེས་ཆེར་གསལ་བར་མཛད་ཅིང་།  ཆོས་དང་ཟང་ཟིང་གི་སྒོ་ནས་མགོན་མེད་པའི་གདུལ་བྱ་རྣམས་ཀྱི་མགོན་མཛད་པ་ཞིག་གོ།  མནལ་ལམ་དུ་སྐྱེ་བ་དྲན་པ་
དང་།  ལུང་བསྟན་བརྙེས་པའི་ཚུལ་ནི།  ལོ་བཅོ་བརྒྱད་པ་ནས་མཚན་བརྗོད་སྔར་བཟུང་བ་མེད་པར་སྐྱེ་བ་སྔ་མ་ལ་བཟུང་བ་ཡིན་བྱས་ནས་ཚར་ཕྱེད་ཙམ་བཏོན་པ་རྨིས་པ་དང་།  བཅུ་དགུ་པ་ན་ཚར་གཅིག་བཏོན་པ་རྨིས་པ་དང་།  ཉི་ཤུ་པ་ན་རྒྱ་གར་ཤར་ཕྱོགས་བྷ་ལེནྡྲ་ན་དགེ་བསྙེན་སྔགས་
པ་པཎྜི་ཏ་གཅིག་ཏུ་སྐྱེ་བ་བཞེས།  དེ་ནས་བྱ་རྒོད་ཕུང་པོའི་རིའི་བྱང་ཕྱོགས་ན་བཙུན་པ་པཎྜི་ཏ་གཅིག་ཏུ་སྐྱེ་བ་བཞེས།  དེ་ནས་ཨུ་རྒྱན་གྱི་བྱང་ངོས་ན་བཙུན་པ་པཎྜི་ཏ་གཅིག་ཏུ་སྐྱེ་བ་བཞེས།  དེ་ནས་བོད་ཅུང་པའི་ཡུལ་ན་ལྡོག་སྟོན་གཅུ་གུ་བར་སྐྱེ་བ་བཞེས་ཏེ།  མཚན་བརྗོད་མང་དུ་བཤད་
ཅིང་།  བླ་ཆེན་ཡང་སློབ་མར་འདུག་པ་རྨིས་པ་དང་།  སུམ་ཅུ་སོ་བདུན་པ་ན་ཐོ་རངས་མནལ་དུ་སོང་བའི་ཚེ།  སློབ་དཔོན་རིན་པོ་ཆེ་སྐུ་གཤེགས་ནས་རིང་པོར་མ་ལོན་པའི་གདུང་གི་གསེབ་ནས་སྦྲང་པོ་ཆེའི་སྐད་ལྟ་བུའི་སྒྲ་གཅིག་བར་སྣང་ལ་འཐོན་ནས།  ཁྱོད་འདི་ནས་བྱང་ཕྱོགས་སུ་
9-2-10b


འཇིག་རྟེན་གྱི་ཁམས་དུ་མ་འདས་པ་ན་འཇིག་རྟེན་གྱི་ཁམས་གསེར་མདོག་ཅན་ཞེས་བྱ་བར་དེ་བཞིན་གཤེགས་པ་གསེར་འོད་རྣམ་པར་རྩེན་བའི་རྒྱལ་པོ་ཞེས་བྱ་བའི་བསྟན་པ་ལ་ད་ལྟ་འཁོར་ལོས་སྒྱུར་བའི་རྒྱལ་པོ་བསོད་ནམས་མཐའ་ཡས་ཞེས་བྱ་བའི་སྲས་འཁོར་ལོས་
སྒྱུར་པའི་རྒྱལ་པོ་ཡོན་ཏན་མཐའ་ཡས་ཞེས་བྱ་བར་འགྱུར་རོ་ཞེས་སྒྲ་གྲག་གོ་ཞེས་གསུངས་སོ། །ཞེ་དགུ་པའི་དུས་ན་རུ་མཚམས་སུ་བྱོན་པའི་མནལ་ལམ་དུ།  བླ་མ་ཡབ་སྲས་དང་མཇལ་ནས་དབང་བཞི་པའི་ལམ་བསྟན།  རང་ཉིད་ཀྱིས་ཀྱང་ཆོས་འབྲེལ་ཙམ་བྱས་པའི་འགྲོ་བ་མང་
པོ་དང་།  དབང་བསྐུར་ཙམ་བྱས་པ་མང་པོ་དང་།  ལམ་ལ་འབད་རྩོལ་ཅུང་ཟད་བྱས་པ་རྣམས་ཐར་ལམ་ལ་དྲོང་བའི་མཚན་མ་མཐོང་བ་དང་།  རྟོགས་པ་ཅུང་ཟད་དང་ལྡན་པ་བདུན་ཅུ་ཙམ་དང་།  དེ་ལས་རྟོགས་པ་ཆེ་བ་སུམ་ཅུ་ཙམ་དང་།  ཕ་རོལ་ཏུ་ཕྱིན་པ་ནས་བཤད་པའི་བཟོད་པ་ཐོབ་པ་
ལྔ་དྲུག་ཙམ་གྱི་སློབ་མ་འབྱུང་བ་དང་།  རང་ཉིད་ཀྱང་དེ་དང་མཉམ་པར་འབྱུང་བའི་མཚན་མ་མཐོང་བ་དང་།  ང་དྲུག་ལོན་པ་ན་མནལ་ལམ་དུ་བླ་ཆེན་དང་མཇལ་ནས།  སྔར་གནང་བའི་གསུང་ངག་ཐམས་ཅད་ཀྱི་བརྡ་སྟོན་པའི་རྡོ་དཀར་ལ་འཇམ་པ་མཚན་མ་དང་བཅས་པ་དང་།  མན་ངག་གི་
ཚིགས་སུ་བཅད་པ་ཡང་གནང་བ་དང་།  དྲུག་ཅུ་རེ་གཅིག་ལོན་པ་ན་མཁའ་འགྲོ་མས་མཁའ་སྤྱོད་དུ་གདན་འདྲེན་པའི་ཚེ།  ད་དུང་འདི་ན་དོན་ཆེ་བས་འདིར་སྡོད་གསུངས་པ་དང་།  ཡང་ནེའུ་གསིང་གཅིག་གི་སྟེང་ན་གསེར་གྱི་ཀོར་ཀོར་འཕང་ལོ་ཙམ་འདུག་པ་ལ།  འདི་ལ་གདན་ཐིང་ལ་བཞུགས་ཤིག །བཏེག་ནས་
མཁའ་སྤྱོད་དུ་འགྲོ་བ་ཡིན་ཟེར་བ་ལ།  སྔར་བཞིན་གསུངས་པ་དང་།  རེ་བདུན་ལོན་པ་ན་བླ་ཆེན་དང་མཇལ་ནས་ཆོས་ཀྱི་སྒྲོ་འདོགས་མང་དུ་བཅད་དེ།  བླ་མའི་གཡས་ཕྱོགས་ན་ཀྱེ་རྡོར་ལྷ་དགུ།  གཡོན་ཕྱོགས་ན་ཤཱཀྱ་ཐུབ་པ་ཉན་ཐོས་ཆེན་པོ་བརྒྱད་ཀྱིས་བསྐོར་བ་བསྟན་ནས།  ཁྱོད་སྡོམ་པ་ལེན་ན་གང་ལས་ལེན།  དབང་
9-2-11a


བསྐུར་ཞུ་ན་གང་ལ་ཞུ་གསུང་བ་སྙམ་བྱེད་ནས།  བདག་བཙུན་པ་བྱེད་ན་མཁན་པོར་གྱུར་པ་དང་།  དབང་བསྐུར་ཞུ་བའི་བླ་མར་གྱུར་པ་ནི་བླ་ཆེན་ཉིད་ལགས་སོ་ཞེས་ཞུས་པས་དེ་དེ་བཞིན་ནོ། །ཞེས་གསུངས་ནས་བླ་ཆེན་ཉིད་ལ་འཁོར་བྱང་སེམས་ཉེ་བའི་སྲས་བརྒྱད་
འདུག་པ་སྙམ་བྱེད་པ་དང་།  དེ་ལ་གཡས་གཡོན་གྱི་ལོངས་སྐུ་ལྷ་དགུ་དང་།  སྤྲུལ་སྐུ་ལྷ་དགུ་བླ་མ་ལ་ཐིམ་པར་མཐོང་།  བླ་མས་ཆོས་ཀྱི་སྒྲོ་འདོགས་མང་དུ་གཅད་ནས་རིགས་ཀྱི་བུ་ཆོས་ཐམས་ཅད་ཀྱི་དེ་ཁོ་ན་ཉིད་འདི་ལྟར་ཡིན་མོད་གསུངས་ནས།  མི་སྣང་བར་གྱུར་པ་དང་མནལ་སད་དོ། །རེ་བརྒྱད་
པའི་ཚེ་བདེ་བ་ཅན་དུ་སྤྱན་འདྲེན་པའི་ཕོ་ཉ་མང་པོ་ཕྱིར་ཟློག །རེ་དགུ་པ་ལ་ལྷ་མང་པོ་ལྷགས་ནས་མི་མཇེད་ཀྱི་མི་བསྔགས་པ་དང་།  བདེ་བ་ཅན་གྱི་བསྔགས་པ་བརྗོད་པ་ན་ཁོ་བོ་ཞིང་བཟང་པོ་ལ་དགའ་བ་མེད་ལ་ཞིང་སྦྱོང་བ་ལ་ཞིང་དམན་པ་ཁྱད་པར་དུ་འཕགས་ཤིང་།  བདག་ལ་ལྟོས་པའི་མགོན་མེད་
མེད་པ་འགའ་ཡོད་པས་མི་འགྲོ་གསུངས་ནས་བཟློག། དེ་ནས་ཞག་བདུན་ཅུ་འདས་པ་ན་ཅི་ནས་ཀྱང་གཤེགས་སོ་ཟེར་ནས་དེའི་ཚེ་བདེ་བ་ཅན་གྱི་བཀོད་པ་ཡང་གཟིགས་སོ། །བདུན་ཅུ་པའི་ཐོ་རངས་ཆོས་རྗེ་པ་ཙོག་ཙོག་འདུག་སྟེ།  ཅུང་ཟད་མནལ་བ་ན་བདེ་བ་ཅན་ནས་འོངས་པའི་ལྷ་ཚོགས་ནམ་
མཁའ་གང་བས་སེང་གེའི་ཁྲི་རྒྱན་དུ་མས་སྤྲས་པ་དང་།  མཆོད་པའི་བཀོད་པ་དུ་མ་དང་བཅས་པས།  རྗེ་པ་སྤྱན་འདྲེན་པ་ཡིན་ཟེར་བ་ལ་གསོལ་བ་བཏབ་པས།  རེ་ཤིག་ཅང་མི་སྨྲ་བར་འཁོད་དོ། །རྗེ་ཉིད་ལ་གསོལ་བ་བཏབ་པས་གཤེགས་པར་སྤྲོ་བར་གཟིགས་ནས།  ཁྱོད་ཀྱང་བདེ་བ་ཅན་
གྱི་བཀོད་པ་ལ་ལྟོས་ཤིག་གསུངས་ཏེ།  ཕྱག་གིས་བརྡ་མཛད་པས་བདེ་བ་ཅན་གྱི་བཀོད་པ་ཡིད་འཕྲོག་པ་གཟིགས་སོ། །དེར་དང་པོ་གསེར་མདོག་ཅན་དུ་གཤེགས་གསུངས་པ་དང་མི་འགལ་ལམ་ཞུས་པས།  བླ་མ་ཡབ་སྲས་ཀྱི་དྲུང་དུ་སྐྱེ་བར་གྱུར་ཅིག་ཅེས་པའི་སྨོན་ལམ་གྱི་སྟོབས་ལས་རེ་
9-2-11b


ཤིག་བདེ་བ་ཅན་དུ་འགྲོ་དེར་ཡུན་མི་རིང་བ་ཞིག་བསྡད་ནས།  གསེར་མདོག་ཅན་དུ་འཁོར་ལོས་སྒྱུར་བའི་ཆ་བྱད་དུ་བྱས་ཏེ་སངས་རྒྱས་ཀྱི་ཞིང་སྦྱོང་ཞིང་།  སྐྱེ་བ་གསུམ་པའི་ལུས་དེ་མ་སྤངས་པར་ཕྱག་ཆེན་མཆོག་གི་དངོས་གྲུབ་ཐོབ་ཏུ་རེ་བ་ཡིན་གསུངས་ནས།  ཟབ་མོའི་ཏིང་ངེ་འཛིན་ལ་རྩེ་གཅིག་ཏུ་མཛད་
དོ། །དེ་ལྟར་དགུང་ལོ་བདུན་ཅུའི་བར་དུ་གདུལ་བྱ་དཔག་ཏུ་མེད་པའི་དོན་མཛད་ནས།  མེ་ཕོ་བྱི་བའི་ལོ་ཁྲའི་ཟླ་བའི་ཚེས་བཅུ་གཉིས་ལ་བདེ་བ་ཅན་དུ་གཤེགས་སོ། །དེ་ལ་སློབ་མ་ཇི་ལྟར་བྱུང་བའི་ཚུལ་ནི།  བླ་མ་ཡབ་སྲས་ཀྱི་སློབ་མ་ཕལ་ཆེ་བ་རྗེ་འདི་ཉིད་ཀྱི་ཡང་སློབ་མ་ཡིན་ཅིང་།  ཁྱད་པར་
དུ་གྲགས་པའི་མཐའ་ཅན་གྱི་བུ་ཆེན་བཞི་ནི་དཀར་ཤཱཀྱ་གྲགས།  ནུབ་པ་རིག་འཛིན་གྲགས།  གསལ་བ་དབང་ཕྱུག་གྲགས།  ལྡེ་སྟོན་དཀོན་མཆོག་གྲགས་སོ། །ཐུགས་སྲས་གཉིས་ནི་ཆོས་རྗེ་པ་སྐུ་མཆེད་དོ། །གུར་རྒྱན་ཞུས་པའི་མི་བཞི་ནི།  མུ་ཚུ་བྱང་ཆུབ་གྲགས།  ཅང་སྟོན་བརྩོན་
འགྲུས་གྲགས།  ལྷ་ཐོག་ཡོན་ཏན་བཟུང་།  རིགས་ལྡན་ཤེས་རབ་རིན་ཆེན།  གཞན་ཡང་ཇོ་སྲས་ལྕགས་ཀྱི་རྡོ་རྗེ།  བྲ་སྟོན་ཡེ་ཤེས་སེང་གེ།  ཞང་རྒྱལ་བ་དཔལ་བཟང་པོ།  ལྷོ་པ་རིན་ཆེན་དཔལ་བཟང་པོ་ལ་སོགས་པ་མཐའ་ཡས་སོ། །སྲས་ཆུང་བ་དཔལ་ཆེན་འོད་པོ་ནི།  ཡབ་ང་དགུ་
བཞེས་པ་ལྕགས་ཕོ་རྟ་ལོ་ལ་འཁྲུངས་ནས་ཡབ་མེས་ཀྱི་ཆོས་རྣམས་ལ་ལེགས་པར་སྦྱངས་ཤིང་།  ཁྱད་པར་དུ་མན་ངག་མང་པོ་དང་གསོ་བ་རིགས་པ་ལ་སྦྱངས་ཏེ།  བརྩེ་བའི་ཐུགས་རྗེས་འགྲོ་བ་མང་པོའི་དོན་མཛད་ནས།  དགུང་ལོ་ང་བཞི་པ་ཆུ་མོ་ཕག་གི་ལོ་ལ་བདེ་བར་གཤེགས་སོ། །དེ་ལ་སྲས་
གཉིས་ལས་ཆེ་བ་བླ་མ་ཆོས་རྗེ་པའི་རྣམ་པར་ཐར་པ་འོག་ཏུ་འཆད་དོ། །གཅུང་བསོད་ནམས་རྒྱལ་མཚན་ནི།  ཡབ་དགུང་ལོ་སོ་ལྔ་བཞེས་པའི་ཚེ།  ཤིང་ཕོ་འབྲུག་ལ་སྐུ་འཁྲུངས་ནས།  བླ་མ་རྗེ་པ་དང་།  ཆོས་རྗེ་པ་གཉིས་ལ་ལུང་རིགས་མན་ངག་དུ་མ་གསན་ཅིང་ཐུགས་སུ་ཆུད་ནས་ཀྱེ་རྡོར་དང་
9-2-12a


ཕུར་པ་ལ་ཐུགས་དམ་མཛད།  ནག་པོ་ཆེན་པོ་ལྕམ་དྲལ་བྲན་བཞིན་དུ་འཁོལ་བ་ཞིག་སྟེ།  གདུལ་བྱ་དཔག་ཏུ་མེད་པའི་དོན་མཛད་ཅིང་།  བདེ་བར་གཤེགས་ཁར་དག་པའི་སྣང་བ་མང་པོ་གཟིགས་ཤིང་།  བླ་མ་དང་ཡི་དམ་དབྱེར་མི་ཕྱེད་པའི་དགོངས་པ་མཛད་སློབ་མ་
རྣམས་ལ་ཁྱེད་རྣམས་བླ་མ་འདི་སངས་རྒྱས་དངོས་སུ་འདུག་པས་ཐེ་ཚོམ་མ་ཟ་བར་མོས་གུས་གྱིས་གསུངས་ཏེ།  ང་ཡང་ལྷོ་ཕྱོགས་ཀྱི་རྒྱུད་དུ་སློབ་མ་འགའ་རེ་ལ་དབང་བསྐུར་ཞིང་སྦས་པའི་རྣལ་འབྱོར་གྱིས་ལམ་ཟབ་མོ་ཉམས་སུ་ལེན་པ་གཅིག་ཏུ་སྐྱེ་བ་འདུག་གསུངས་ནས།  ཟབ་མོའི་ཏིང་ངེ་འཛིན་ལ་
རྩེ་གཅིག་ཏུ་བཞུགས་ཏེ།  དགུང་ལོ་ང་དྲུག་བཞེས་པ་ས་མོ་ཕག་གི་ལོ་རྒྱལ་གྱི་ཟླ་བའི་ཉི་ཤུ་གཉིས་ལ་སྐུ་གཤེགས་སོ། །བླ་མ་འདི་ལ་ཇོ་མོ་ལྔ་བྱུང་ཞིང་སྲས་ལྕམ་སྲིང་བརྒྱད་འཁྲུངས་པ་ལས་ཡབ་དགུང་ལོ་ང་གཉིས་བཞེས་པ་ཤིང་མོ་ལུག་གི་ལོ།  མ་གཅིག་ཀུན་སྐྱིད་ལ་འགྲོ་མགོན་འཕགས་པ་
འཁྲུངས་པ་ནི།  སྐུ་བལྟམས་པ་ན་ལྟས་བཟང་པོ་དང་བཅས་ཤིང་།  ཆུང་ངུ་ན་འབྲི་ཀློག་ལ་སོགས་པའི་རིག་པའི་གནས་འགའ་ཞིག་མ་བསླབ་པར་མཁྱེན་པ་དང་།  སྤྱན་རས་གཟིགས་དང་གསུང་གླེང་མཛད་པར་གྲགས་པའི་ས་སྟོན་རི་བ་དང་།  གླང་རི་བ་ལ་སོགས་པའི་སྐྱེ་བ་སྔ་མ་དུ་མ་
དྲན་ཅིང་།  དགུང་ལོ་གསུམ་པ་ལ་སྒྲུབ་ཐབས་མཚོ་སྐྱེས་གསུངས།  བརྒྱད་པ་ལ་སྐྱེས་རབས་ཐུགས་ལ་གསུངས།  དགུ་པ་ལ་ཆོས་རྗེ་པའི་སྔོན་འགྲོའི་ཆོས་འཁོར་མཛད་དུས་བརྟག་གཉིས་གསུངས།  ཚོགས་ཀྱི་གཏམ་བཤད་མཛད་པས་ཐམས་ཅད་ངོ་མཚར་ཏེ།  མཁས་པ་ཐམས་ཅད་
ཀྱི་ང་རྒྱལ་ཆགས་ཅིང་སོ་སོའི་སྐྱེ་བོ་ལ་འདི་ལྟ་བུའི་བློ་གྲོས་འབྱུང་མི་སྲིད་འདི་ནི་ངེས་པར་འཕགས་པའོ། །ཞེས་ཀུན་གྱིས་བསྒྲགས་པས་འཕགས་པར་གྲགས་སོ། །བཅུ་པ་ལ་ཆོས་རྗེ་པའི་ཆགས་ཕྱིར་བྱོན་ནས་དབུས་སུ་ཆོས་རྗེ་པས་མཁན་པོ།  ཟུལ་ཕུ་མཁན་པོ་ནམ་བཟའ་འཕྲེད་གསོལ་གྱིས་
9-2-12b


སློབ་དཔོན་མཛད་དེ་རབ་ཏུ་བྱུང་།  སྐྱོར་མོ་ལུང་པ་ཤེས་རབ་དཔལ་ལས།  དགེ་ཚུལ་གྱི་བསླབ་བྱ་རྣམས་གསན་ནོ། །དེ་ནས་རིམ་གྱིས་ཆོས་རྗེ་པའི་དྲུང་དུ།  སྡེ་སྣོད་དང་རྒྱུད་སྡེའི་ཆོས་སྐོར་མཐའ་དག་གསན་ཅིང་ཐུགས་སུ་ཆུད་དོ། །བཅུ་བདུན་པ་ལ་ཆོས་རྗེ་པ་ལ་མངའ་བའི་ཡོན་ཏན་ཐམས་
ཅད་རྫོགས་པས་ཐུགས་ཤིན་ཏུ་མཉེས་ཏེ།  ཆོས་ཀྱི་དུང་དང་ལྷུང་བཟེད་ལ་སོགས་པ་གནང་། སློབ་མའི་ཚོགས་རྣམས་གཏད་ནས་བསྟན་པའི་བྱ་བ་དང་སེམས་ཅན་མང་པོའི་དོན་བྱ་བའི་དུས་ལ་བབ་པས་སྔོན་གྱི་དམ་བཅའ་དྲན་པར་གྱིས་ཤིག །ཅེས་པའི་སྒོ་ནས་བསྟན་པ་གཏད་དོ། །
དགུང་ལོ་བཅུ་དགུ་པ་ལ་སེ་ཆེན་གྱིས་གདན་དྲངས་ནས་རྒྱལ་པོ་ཡབ་ཡུམ་གྱིས་ཐོག་དྲངས་མི་ཉི་ཤུ་རྩ་ལྔ་ལ་ཀྱེ་རྡོ་རྗེའི་དབང་བསྐུར་ནས།  ཧོར་གྱི་རྒྱལ་ཁམས་སུ་རྡོ་རྗེ་ཐེག་པའི་དབུ་བརྙེས་སོ། །དེའི་ཕྱི་ལོར་རྒྱལ་པོ་ལྗང་ཡུལ་དུ་དམག་ལ་ཕྱིན།  བླ་མས་བྱང་ངོས་སུ་བྱོན་ཏེ།  ཆོས་རྗེ་པའི་སྐུ་འབུམ་
ལ་རབ་གནས་མཛད་ནས།  ཆོས་རྗེ་པའི་གསུང་བཞིན་དུ་འུ་ཡུག་པ་ལས་བསྙེན་རྫོགས་མཛད་པ་དང་།  སྔར་མ་གསན་པའི་ཆོས་མང་དུ་གསན་པར་དགོངས་ནས།  ཡར་བྱོན་པ་ན་འུ་ཡུག་པ་གླང་ལོ་ལ་སྐུ་གཤེགས།  ཞེས་ཐོས་ནས་ཕྱིར་ལོག་སྟེ་རྒྱལ་པོ་ཚུར་བྱོན་པ་དང་ལྷན་ཅིག་ཏུ་རྒྱ་ཡུལ་དུ་
གཤེགས།  རྒྱ་ཧོར་གྱི་མཚམས་སུ་དགུང་ལོ་ཉེར་གཅིག་པ་ཤིང་མོ་ཡོས་ཀྱི་ལོ་ལ་མཁན་པོ་གྲགས་པ་སེང་གེ།  ལས་སློབ་ཇོ་གདན་བྱང་ཐང་པ་བསོད་ནམས་རྒྱལ་མཚན།  གསང་སྟེ་སྟོན་པ་ཡར་ལུང་པ་བྱང་ཆུབ་རྒྱལ་མཚན།  དད་དགེ་ཆོས་རྗེ་པའི་བུ་སློབ་མང་པོ་སྟེ།  ཉི་ཤུའི་དབུས་
སུ་བསྙེན་པར་རྫོགས་ནས་མཁན་པོ་ལས།  ཕར་ཕྱིན་ལ་སོགས་པ་དང་།  སློབ་དཔོན་ལས་འདུལ་བ་གསན་ཏེ་དཔྱིས་ཕྱིན་པར་མཛད་དོ། །ཉེར་གསུམ་པ་ལ་ལྡོང་སྟོན་གདན་དྲངས་ནས་རི་བོ་རྩེ་ལྔར་བྱོན་ཏེ།  གཤིན་རྗེའི་གཤེད་ལ་སོགས་པའི་ཆོས་སྐོར་མང་དུ་གསན།  དེའི་ཚེ་ཆོས་རྗེ་པ་
9-2-13a


གསལ་བར་བྱོན་ནས་ཆོས་ཀྱི་གནད་མང་དུ་གསུངས།  ཁྱོད་འདི་ནས་བཟུང་སྟེ་ལོ་འབུམ་ཕྲག་གཅིག་དང་སྟོང་འདས་པའི་རྗེས་སུ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ཅེས་ལུང་བསྟན་ཅིང་།  དབུགས་ཕྱུང་བའི་ངང་ཉིད་ནས།  སྲིད་པ་དུཿཁ་དུ་མ་ཡིས། །ཡུན་
རིང་དུས་སུ་དུབ་པ་བདག །ལེགས་པར་གསུངས་པས་དབུགས་ཕྱིན་པ། །ཐུགས་རྗེའི་དབང་ཕྱུག་མཁྱེན་པའི་གཙོ། །ཆོས་ཀྱི་རྗེ་ལ་ཕྱག་འཚལ་ལོ། །ཞེས་པའི་བསྟོད་པ་མཛད་ཅེས་གསུངས་སོ། །དེ་ནས་རྒྱལ་པོའི་ཕོ་བྲང་དུ་བྱོན་ནས།  ཆོས་འཁོར་མཛད་པའི་ཚེ་ཟིན་ཤིང་གི་
སྟོན་པ་བཅུ་བདུན་རིགས་པས་ཕམ་པར་མཛད་ནས།  ཡང་དག་པའི་ལྟ་བ་འཛིན་དུ་བཅུག་གོ།  དགུང་ལོ་སུམ་ཅུ་པ་ལ་གདན་སར་ཆགས་ཕེབས་ནས་ཆོས་འཁོར་རྒྱ་ཆེན་པོ་མཛད།  གཉན་འོད་སྲུངས།  གྲུབ་ཐོབ་ཡོན་ཏན་དཔལ།  མཆིམས་ནམ་མཁའ་གྲགས།  ཚོགས་
སྒོམ་ཀུན་དགའ་དཔལ།  ཁ་ཆེའི་པཎྜི་ཏ་ཏ་ཐཱ་ག་ཏ་བྷ་དྲ།  ཞང་ཞུང་རྡོ་རྗེ་འོད་ཟེར།  གློ་བོ་ལོ་ཙཱ་བ།  རིན་པོ་ཆེ་སྐྱོབ་པ་དཔལ།  སྟག་སྟོན་འོད་ཟེར་ཤེས་རབ།  མངོན་པ་རིན་ཆེན་རྡོ་རྗེ།  འབུམ་པ་འོད་ཟེར་ཤེས་རབ།  ཐང་དཔེ་བ་གྲགས་བཟང་།  མདོག་གློ་བ་ཤཱཀྱ་བྱང་ཆུབ། 
མཁན་པོ་སེང་གེ་ཟིལ་ནོན།  སྤྱི་བོ་ལྷས་པ་ཇོ་སྲས།  མངོན་པ་བ་དབང་ཕྱུག་བརྩོན་འགྲུས།  རི་ལུང་ཕུག་པ་ཆོས་མགོན།  སློབ་དཔོན་ལྷ་བཙུན།  ལྷ་རྗེ་དར་མ་སེང་གེ།  དབུས་པ་སངས་རྒྱས་འབུམ་རྣམས་ལས།  ཕྱི་ནང་གི་རིག་པའི་གནས་རྣམས་དང་།  བཀའ་ལུང་མན་ངག་རྒྱ་
མཚོ་ལྟ་བུ་གསན་ནས་ཆོས་ཀྱི་མངའ་བདག་ཆེན་པོར་གྱུར་ཏོ། །སླར་ཡང་རྒྱལ་པོས་གདན་དྲངས་ནས་སུམ་ཅུ་སོ་གསུམ་པ་ལ་རྒྱ་ཡུལ་དུ་བྱོན།  བཞི་བཅུ་ཞེ་གཉིས་པ་ལ་གདན་སར་ཆགས་ཕེབས་ཏེ།  ཟང་ཟིང་གི་དངོས་པོ་རྣམ་ཐོས་ཀྱི་བུའི་དཔལ་འབྱོར་ལ་འགྲན་པར་
9-2-13b


བཟོད་པ་ཕྱག་ཏུ་བྱུང་བ་ཐམས་ཅད་རང་དོན་དུ་ཏིལ་འབྲུ་ཙམ་ཡང་མ་བཅངས་པར་ཆོས་འཁོར་ཆེན་པོ་མཛད་པ་དང་།  ཆོས་གྲྭ་རྣམས་ཀྱི་གཞི་རྐྱེན་འཛུགས་པ་དང་།  སྐུ་གསུང་ཐུགས་ཀྱི་རྟེན་བཞེངས་པ་དང་།  ཕོངས་པ་རྣམས་ལ་སྦྱིན་པ་གཏོང་བ་ལ་སོགས་པ་བསྟན་པ་དང་སེམས་ཅན་ལ་
ཕན་པ་འབའ་ཞིག་མཛད་དོ། །རྒྱ་ཧོར་བོད་ལ་སོགས་པའི་གདུལ་བྱ་དཔག་ཏུ་མེད་པ་ལ་ཆོས་ཀྱི་སྦྱིན་པ་རྒྱ་ཆེན་པོ་མཛད།  རང་ཉིད་ཀྱིས་དགེ་སློང་དང་དགེ་ཚུལ་སྟོང་བཞི་བརྒྱ་ལྔ་བཅུའི་མཁན་པོ་མཛད།  འདི་ཉིད་ཀྱི་སློབ་མ་འདུལ་འཛིན་ཆོས་ཀྱི་མགོན་པོ་ཞེས་བྱ་བས་ལོ་གཅིག་གི་ནང་དུ་རྒྱའི་
དགེ་སློང་དང་དགེ་ཚུལ་སྟོང་བཞི་བརྒྱ་དང་བཞི་བཅུ་རྩ་བདུན་གྱི་མཁན་པོ་བྱས་ཏེ།  ཚུལ་ཁྲིམས་ཀྱི་བསླབ་པ་ལ་བཀོད་དོ། །རྡོ་རྗེ་ཐེག་པའི་དབང་བསྐུར་ཡང་སྐད་རིགས་མི་གཅིག་པ་བཅུ་བཞི་ཙམ་ལ་མཛད་ཅིང་གཞན་ཡང་ལུང་མན་ངག་བྱིན་རླབས་ལ་སོགས་པའི་སྒོ་ནས་གདུལ་བྱ་དཔག་ཏུ་མེད་པ་
སྨིན་གྲོལ་ལ་བཀོད་དོ། །རྩོམ་པ་ལ་ཡང་བརྗོད་བདེ་ཞིང་རྟོགས་སླ་བའི་བསྟན་བཅོས།  བསྟོད་པ།  གསོལ་འདེབས།  བཀའ་དང་བསྟན་བཅོས་ཀྱི་འགྲེལ་པ།  ཐེག་པ་ཆེ་ཆུང་གི་ཉམས་ལེན་གྱི་རིམ་པ། སྒྲུབ་ཐབས་དཀྱིལ་ཆོག་མན་ངག །གསུང་རབ་ཀྱི་དཀར་ཆག །དྲིས་ལན།  བསྔོ་བ་
བཀྲ་ཤིས་ཀྱི་སྐོར་ལ་སོགས་པ་ངོ་མཚར་བ་དུ་མ་ཞིག་མཛད་དོ། །དེ་ལྟར་དགུང་ལོ་བཞི་བཅུ་ཞེ་དྲུག་གི་བར་དུ་གཞན་དོན་མཛད་ནས་འབྲུག་ལོ་ཟླ་བ་བཅུ་པའི་ཚེས་གཅིག་ནས་ཆོས་རྗེ་པའི་དུས་མཆོད་སྔར་བསུས་ཏེ་མཆོད་པ་རྒྱ་ཆེན་པོ་དང་།  ཐུགས་དམ་ལ་བརྩོན་པ་ན་ཚེས་གསུམ་གྱི་མཚན་མོ་དཔལ་གྱི་
རི་ལ་འཕགས་པ་ཀླུ་སྒྲུབ་བྱང་ཆུབ་ཀྱི་ཤིང་རྒྱས་པའི་དྲུང་ན་བཞུགས་པ་ལ་དབུ་མ་རིགས་ཚོགས་ལ་སོགས་པ་ཐེག་ཆེན་གྱི་ཆོས་དུ་མ་གསན།  ལྷའི་ཚོགས་ཀྱིས་མཆོད་པ་རྒྱ་ཆེན་པོ་གསལ་བར་གཟིགས་པའི་སྣང་བ་བྱུང་།  དེའི་རྗེས་ལ་དྷརྨཱ་ཕ་ལ་ས་ཆེན་ལ་སོགས་པ་བླ་མ་གོང་མ་རྣམས་
9-2-14a


ཀྱི་རྣམ་ཐར་དང་།  བླ་མ་ཉིད་ཀྱིས་བསྟན་པའི་བྱ་བ་མཛད་ཚུལ་ཡང་གསུངས་ཏེ།  ཁྱོད་ཀྱིས་ཀྱང་དེ་བཞིན་དུ་གོ་དགོས་སོ་གསུངས་ཤིང་།  ཚེས་བཅོ་བརྒྱད་ཀྱི་བར་དུ་ཚོགས་སུ་བྱོན་ནས་ཆོས་ཀྱང་གསུངས།  དེ་ནས་ཞག་བཞི་གཟིམས་ཁང་དུ་བཞུགས་ནས།  ཉི་ཤུ་གཉིས་ཀྱི་སྔ་
དྲོ་སྐྱིལ་མོ་ཀྲུང་མཛད་རྡོ་རྗེ་དྲིལ་བུ་བསྣམས་ཏེ།  སྒྲ་འོད་དང་དྲི་ཁྱད་པར་ཅན་དང་མེ་ཏོག་གི་ཆར་པ་ལ་སོགས་པའི་ལྟས་བསྟན་ཏེ་ཞི་བར་གཤེགས་སོ། །དེ་ལ་སློབ་མའི་མཆོག་ཇི་ལྟར་བྱུང་བ་ནི།  སྐུའི་དབོན་པོ་དྷརྨཱ་ཕ་ལ།  གཞན་ཡང་སློབ་དཔོན་ཡེ་ཤེས་འབྱུང་གནས།  རིན་ཆེན་རྒྱལ་མཚན་
གཉིས་ནི་གཅུང་པོ་ཡིན་ཅིང་།  སློབ་མ་ལ་ཤར་པ་འཇམ་དབྱངས་རིན་ཆེན་རྒྱལ་མཚན།  ཀུན་དགའ་སེང་གེ།  ཡེ་རྒན་དཔག་ཤི་སྟེ་གསུམ།  ཉི་ཐོག་པ་ཀུན་དགའ་སྨོན་ལམ།  སྲུ་ལུང་ཀུན་སྨོན།  དགའ་ལྡན་པ་ཀུན་བསོད།  དགའ་ལྡན་པ་བཀྲ་ཤིས་དཔལ།  ཞང་དཀོན་མཆོག་དཔལ་ལ་
སོགས་པ་མཁས་ཤིང་གྲུབ་པ་བརྙེས་པ་མཐའ་ཡས་པ་བྱུང་བས་བསྟན་པ་དར་རྒྱས་སུ་མཛད་དོ། །དེ་ལྟར་ས་ཆེན་གྱི་སྲས་བཞི།  ཆོས་རྗེ་པ་སྐུ་མཆེད་གཉིས།  བླ་ཆེན་འཕགས་པ་དང་བདུན་ལ་འཇམ་དབྱངས་བདུན་བརྒྱུད་དུ་གྲགས་སོ། །གསུམ་པ་ཕྱག་རྡོར་གྱི་རྣམ་འཕྲུལ་
སོགས་བྱུང་ཚུལ་ནི།  སློབ་དཔོན་ཟང་ཚ་བསོད་ནམས་རྒྱལ་མཚན་ང་དྲུག་བཞེས་པ།  ས་མོ་ཕག་གི་ལོ་ལ་འགྲོ་མགོན་ཕྱག་ན་འཁྲུངས་ཏེ།  སྐྱེས་སྟོབས་ཀྱི་ཤེས་རབ་ཕུལ་དུ་བྱུང་ཞིང་བརྩེ་བའི་སྙིང་རྗེས་འགྲོ་བ་མང་པོ་ལ་ཕན་པའི་ཕྱིར་དུ་མཐུ་སྟོབས་ཀྱི་སྒོ་ནས་བརྟུལ་ཞུགས་ཀྱི་སྤྱོད་པ་གཙོ་བོར་
མཛད་པ་ཞིག་སྟེ།  དགུང་ལོ་ཉི་ཤུ་རྩ་དགུ་བཞུགས་སོ། །དེ་ལ་སྲས་དྷརྨ་ཕ་ལ་རཀྵིཏ་སྐུ་འཁྲུངས་ཏེ་དགུང་ལོ་ཉི་ཤུ་བཞུགས་སོ། །ཡང་ཟང་ཚའི་ཇོ་མོ་མ་ཅིག་ཇོ་འབྲོ་ལ་སློབ་དཔོན་རིན་ཆེན་རྒྱལ་མཚན་ཡབ་ང་ལྔ་བཞེས་པའི་ཚེ་འཁྲུངས་སོ། །ཡང་དེ་ཉིད་ཀྱི་ལོར་མ་ཅིག་རྡོ་རྗེ་ལྡན་ལ་
9-2-14b


སློབ་དཔོན་ཡེ་ཤེས་འབྱུང་གནས་འཁྲུངས་སོ། །དེའི་སྲས་བདག་ཉིད་ཆེན་པོ་བཟང་པོ་དཔལ་ཆུ་ཕོ་ཁྱི་ལོ་ལ་བོ་དོང་དུ་སྐུ་འཁྲུངས་ཤིང་།  དེ་ལ་ཏི་ཤྲི་ཀུན་བློ་ལ་སོགས་པ་རིགས་ཀྱི་སྲས་བཅུ་གཉིས་འཁྲུངས་ཏེ།  དེང་སང་གི་བར་དུ་གདུང་བརྒྱུད་རྣམ་པར་དག་པའི་ཕྲེང་བ་རྒྱུན་མ་ཆད་པར་བྱུང་ཞིང་
བསྟན་པའི་བྱ་བ་རྒྱ་ཆེན་པོ་མཛད་དོ། །བཞི་པ་དེ་ལས་བླ་མ་ཉིད་སྐུ་འཁྲུངས་པའི་ཚུལ་ནི།  ཡབ་དཔལ་ཆེན་འོད་པོ་དང་།  ཡུམ་མང་མཁར་བ་ཉི་ཁྲི་ལྕམ་ལ་ཆོས་རྗེ་ཉིད་སྐུ་འཁྲུངས་ཏེ་ཐོག་མར་ཡུམ་ལ་བལྟམས་པའི་ཚེ།  ཡུམ་གྱི་རྨི་ལམ་དུ་ཀླུའི་རྒྱལ་པོ་གནས་གཡོར་དུ་བྱུང་བ་རྨིས་ཏེ།
ལུས་སེམས་ཟག་པ་མེད་པའི་དགའ་བདེས་ཁྱབ་པར་གྱུར་ཏེ།  ཆུ་ཕོ་སྟག་གི་ལོ་དཔྱིད་ཟླ་ར་བའི་ཉི་ཤུ་དྲུག་གི་ཉིན་པར་ལུང་པ་འོད་ཀྱིས་གང་བ་དང་།  མཁའ་འགྲོ་མ་མང་པོ་འདུ་བ་དང་།  མེ་ཏོག་གི་ཆར་ལ་སོགས་པ་ལྟས་ཁྱད་པར་ཅན་དང་བཅས་ནས་བཙས་སོ། །ལྔ་པ་འཁྲུངས་ནས་
འཇིག་རྟེན་གྱི་སྤྱོད་པ་ལས་འདས་པའི་ཚུལ་ནི།  གོག་པོ་གོག་པའི་དུས་སུ་ས་ལ་རྒྱ་གར་གྱི་ཡི་གེ་བྲི་བ་དང་།  སཾ་སྐྲྀ་ཏའི་སྐད་དུ་ཀློག་པ་མཛད་ཡི་གེའི་རི་མོ་དེ་ལས་མི་འགོམ་པར་ཕྱག་གིས་བསུབས་ནས་འཇོག་པ་ཡུམ་གྱིས་གཟིགས་ཏེ།  རྗེ་བཙུན་ཆེན་པོ་སྤྱན་དྲངས་ནས་ཞུས་པས། 
ལཉྫ་དང་བྷ་ཊུའི་ཨཱ་ལི་ཀཱ་ལི་ཚར་རེ་བྲིས་ནས།  དེ་བཀླགས་ཏེ་འགོམ་ཡུགས་སོང་དོགས་ནས་བསུབས་པ་ཡིན་པར་དགོངས་ནས་ཤིན་ཏུ་དགྱེས་སོ། །ཆོས་རྗེ་ཉིད་ཀྱི་གསུང་ལས་ཀྱང་རྒྱ་ཀློག་དང་བོད་ཀློག་མ་བསླབས་པར་སྔ་མོ་ནས་ཤེས་འདུག་སྟེ་སྔོན་ལ་གང་ཤེས་མི་དྲན་ནོ་གསུང་། 
གཉིས་པ་གཞི་ཚུལ་ཁྲིམས་ལ་གནས་པའི་ཡོན་ཏན་ནི།  ཐོག་མར་རྗེ་བཙུན་ཆེན་པོའི་དྲུང་དུ།  ཚངས་པར་སྤྱོད་པའི་དགེ་བསྙེན་གྱི་སྡོམ་པ་ཞུས་ཏེ།  མཚན་ནི་ཀུན་དགའ་རྒྱལ་མཚན་དུ་བཏགས་སོ། །དེ་ནས་བྱང་སེམས་ཀྱི་སྡོམ་པ་ལུགས་གཉིས་དང་།  རྣལ་འབྱོར་ཆེན་པོའི་
9-2-15a


དབང་བཞི་ཡོངས་སུ་རྫོགས་པ་དང་།  ཡབ་ལས་ཀྱང་ཀྱེའི་རྡོ་རྗེའི་དབང་མནོས་ཏེ་སྡོམ་པ་གསུམ་ལྡན་དུ་མཛད་དོ། །དགུང་ལོ་ཉི་ཤུ་རྩ་བདུན་བཞེས་པའི་ཚེ་ལོ་སྟོན་རྡོ་རྗེ་དབང་ཕྱུག་གིས་བཞེངས་པའི་ཉང་སྨད་རྒྱན་གོང་ཞེས་བྱ་བའི་གཙུག་ལག་ཁང་དུ་མཁན་པོ་ཁ་
ཆེའི་བསོད་སྙོམས་པ་ཆེན་པོ་ཤཱཀྱ་ཤྲཱི་བྷ་དྲ།  ལས་ཀྱི་སློབ་དཔོན་སྤྱི་བོ་ལྷས་པ་བྱང་ཆུབ་འོད།  གསང་སྟེ་སྟོན་པ་ཞུ་དོན་མོ་རི་པ་ལ་སོགས་པའི་དབུས་སུ་རབ་ཏུ་བྱུང་ཞིང་བསྙེན་པ་རྫོགས་པར་མཛད་དེ།  སྔར་གྱི་མཚན་ལ་མཁན་པོའི་མཚན་གྱི་མཐའ་ཅན་དུ་བྱས་ཏེ་ཀུན་དགའ་རྒྱལ་མཚན་
དཔལ་བཟང་པོ་ཞེས་བྱ་བར་བཏགས་སོ། །གསུམ་པ་ཐོས་བསམ་སྒོམ་པས་རྒྱུད་སྦྱངས་པའི་ཡོན་ཏན་ནི།  རིག་པའི་གནས་ལྔ་ལས།  བཟོ་རིག་པ་མཁྱེན་པའི་ཚུལ་ཡང་།  རྗེ་བཙུན་ཆེན་པོའི་ནང་རྟེན་འཇམ་པའི་དབྱངས་ཀྱི་གསེར་སྐུ་དང་།  དཔལ་བསམ་ཡས་ཀྱི་གཙུག་ལག་
ཁང་གི་འཁོར་སའི་ངོས་ན་འཕགས་པ་འཇམ་དཔལ་གྱི་སྐུ་རི་མོར་བྲིས་པ་རྣམས་དེང་སང་གི་ལྷ་བཟོ་བ་ཤིན་ཏུ་མཁས་པ་དག་གིས་ཀྱང་འགྲན་པར་བཟོད་པ་མ་ཡིན་ནོ། །གསོ་བ་རིག་པ་མཁྱེན་པའི་ཚུལ་ཡང་།  ཡན་ལག་བརྒྱད་པ་རྩ་འགྲེལ་དང་།  འཕགས་པ་ཀླུ་སྒྲུབ་ཀྱིས་མཛད་པའི་
སྨན་གྱི་མདོ་ལྔ་དང་།  དཔྱད་གཞུང་བཅུ་ལ་སོགས་པ་དང་།  ཨ་ཙ་རའི་གདམས་པའི་རྒྱུན་ལ་སོགས་པ་གསན་ཅིང་མཁྱེན་ནས་སྨན་ཡན་ལག་བརྒྱད་པའི་བསྡུས་དོན་ལ་སོགས་པ་མཛད་དོ། །སྒྲ་རིག་པ་མཁྱེན་པའི་ཚུལ་ཡང་།  བལ་པོའི་པཎྜི་ཏ་སཾཾཾ་ག་ཤྲཱི་ལ།  སྒྲའི་བསྟན་བཅོས་
ཀ་ལཱ་པ་དང་།  ཙཎྜ་པའི་བྱེད་པའི་ཚིག་བསྒྲུབ་པ་པྲ་ཏི་ཡ་ལ་སོགས་པ་གསན།  གཞན་ཡང་སྙན་ངགས་ཀྱི་བསྟན་བཅོས་གཞོན་ནུ་འབྱུང་བ་དང་།  དབྱངས་ཅན་གྱི་མགུལ་རྒྱན་སྟོང་ཕྲག་བཞི་པ་དང་།  དཱཎྜི་དང་།  སྡེབ་སྦྱོར་གྱི་བསྟན་བཅོས་འཕགས་པ་འཇམ་དཔལ་གྱི་བསྟོད་པ་
9-2-15b


ལ་གཞི་བྱས་པ་བྷྲི་ཏ་མ་ལ་ཞེས་བྱ་བ་དང་བཅས་པ་གསན།  པཎྜི་ཏ་དཱ་ན་ཤཱི་ལ་ལ།  མངོན་བརྗོད་ཀྱི་བསྟན་བཅོས་ཨ་མཱ་ར་ཀོ་ཥའི་ལེའུ་དང་པོ་ཡན་ཆོད་ཀྱི་འགྲེལ་པ་གསན།  པཎྜི་ཏ་སུ་ག་ཏ་ཤྲཱི་ལས།  སྒྲ་ཀ་ལཱ་པ་འགྲེལ་པ་སྟོང་ཕྲག་དྲུག་འགྲེལ་པ་དང་བཅས་པ་དང་།  དེའི་མིང་སྒྲུབ་པ་སུ་
ཝནྟི་དང་།  བྱིངས་སྒྲུབ་པ་ཏི་དན་ཏི་དང་བཅས་པ་དང་།  སྙན་ངགས་ཀྱི་བསྟན་བཅོས་ཆེན་པོ་གསུམ་དང་།  ཆུང་ངུ་གསུམ་དང་།  སྡེབ་སྦྱོར་རིན་ཆེན་འབྱུང་གནས་དང་།  རྒྱན་གྱི་བསྟན་བཅོས་དབྱངས་ཅན་གྱི་མགུལ་རྒྱན་སྟོང་ཕྲག་བརྒྱད་པའི་ཕྱེད་མན་ཆད་མིང་གི་མངོན་བརྗོད་ཨ་མཱ་ར་ཀོ་ཥའི་རྩ་
བ་རྫོགས་པ་དང་།  སྣ་ཚོགས་གསལ་བའི་ཕྱེད་ལྷག་དང་།  ཟློས་གར་གྱི་བསྟན་བཅོས་གཟུགས་ཀྱི་ཉི་མ་ལ་སོགས་པ་གསན།  ཁ་ཆེ་མཁན་པོའི་དྲུང་དུ་སྒྲའི་བསྟན་བཅོས་སྙིང་པོ་བསྡུ་བ་ཞེས་བྱ་བ་གསན་ཅིང་ཐུགས་སུ་ཆུད་པར་མཛད་དོ། །སྙན་ངགས་དང་མིང་གི་མངོན་བརྗོད་ལ་
སོགས་པ་རྣམས་རིག་པའི་གནས་ཆུང་བ་ཡིན་པས་སྒྲ་རིག་པ་མཁྱེན་པའི་སྐབས་འདིར་སྨོས་སོ། །ཚད་མ་རིག་པ་མཁྱེན་པའི་ཚུལ་ཡང་།  ཐོག་མར་རྐྱང་འདུར་བ་གཞོན་ནུ་སེང་གེའི་དྲུང་དུ།  ཚད་མ་རྣམ་པར་ངེས་པ་གསན།  ཁ་ཆེ་པཎ་ཆེན་ཤཱཀྱ་ཤྲཱིའི་དྲུང་དུ།  ཚད་མ་རྣམ་འགྲེལ་
ལེའུ་གསུམ་ཡིད་ཀྱི་ཤིང་རྟ་ལ་དགའ་བའི་རྗེས་སུ་འབྲང་བ་དང་།  ལྷ་དབང་བློའི་འགྲེལ་པ་དང་།  ཀུན་ལས་བཏུས་དང་སྦྱར་བའི་རྣམ་འགྲེལ་གྱི་བཤད་པ་དང་།  རིགས་ཐིགས་དང་དེའི་ཕྱོགས་སྔ་མདོར་བསྡུས་ཀ་མ་ལ་ཤཱི་ལས་མཛད་པ་དང་།  རྒྱུད་གཞན་གྲུབ་པ་དང་།  རྣམ་འགྲེལ་
གྱི་རྒྱན་སྟོང་ཕྲག་བཅོ་བརྒྱད་པ་དང་།  ཆོས་མཆོག་གིས་མཛད་པའི་ཚད་མ་གྲུབ་པའི་རབ་ཏུ་བྱེད་པ་དང་།  བྲམ་ཟེའི་ཚད་མ་གྲུབ་པའི་རབ་ཏུ་བྱེད་པ་དང་།  ཕྱོགས་གླང་གིས་མཛད་པའི་དམིགས་པ་བརྟག་པ་རྩ་འགྲེལ་དང་།  རླུང་གི་རབ་བྱེད་རྩ་འགྲེལ་ལ་སོགས་པ་གསན་ནོ། །པཎྜི་ཏ་དཱ་ན་ཤཱི་
9-2-16a


ལ་ལས།  འགྲེལ་པ་བརྟག་པ་དང་།  རྩོད་པའི་རིགས་པ་འགྲེལ་པ་དང་བཅས་པ་དང་།  སློབ་དཔོན་དགྲ་ལས་རྣམ་རྒྱལ་གྱིས་བྱས་པའི་བྱིས་པ་འཇུག་པའི་རབ་ཏུ་བྱེད་པ་དང་།  ལྷན་ཅིག་དམིགས་ངེས་ལ་སོགས་པ་གསན།  པཎྜི་ཏ་སཾ་ག་ཤྲཱི་ལས།  ལེའུ་དང་པོའི་
འགྲེལ་པ་དང་།  ཡིད་ཀྱི་ཤིང་རྟའི་བཤད་པ་ཀུན་ལས་བཏུས་དང་སྦྱར་བ་དང་།  བྲམ་ཟེའི་འགྲེལ་པ་དང་བཅས་པ་གསན་ནས་བསྒྱུར།  ཡན་ལག་གི་བསྟན་བཅོས་རྩོད་རིགས་དང་གཏན་ཚིགས་ཐིགས་པ་འགྲེལ་པ་དང་བཅས་པ་གསན་ནོ། །པཎྜི་ཏ་སུ་ག་ཏ་ཤྲཱི་ལས།  རྣམ་འགྲེལ་ལེའུ་
དང་པོའི་འགྲེལ་པ་སྟོང་ཕྲག་ཕྱེད་དང་བཞི་པ་དང་།  ཐར་པ་འབྱུང་གནས་ཀྱིས་མཛད་པའི་རྟོག་གེའི་སྐད་དང་།  དྲང་སྲོང་གཟེག་ཟན་གྱིས་སྦྱར་བའི་རྟོག་གེའི་བསྟན་བཅོས་ལ་སོགས་པ་མང་དུ་གསན་ནོ། །ནང་དོན་རིགས་པ་མཁྱེན་པའི་ཚུལ་ལ།  དཔལ་ལྡན་ས་སྐྱའི་འཇམ་དབྱངས་
རྗེ་བཙུན་ཆེན་པོ་གྲགས་པ་རྒྱལ་མཚན་གྱི་དྲུང་དུ།  ཕ་རོལ་ཏུ་ཕྱིན་པ་ལ་སོགས་པའི་སྡེ་སྣོད་ཀྱི་སྐོར་མ་ལུས་པ་གསན་ཅིང་།  རྒྱུད་སྡེ་ལ་བྱ་བའི་རྒྱུད།  སྤྱོད་པའི་རྒྱུད།  རྣལ་འབྱོར་གྱི་རྒྱུད་མཐའ་དག་གསན་ཅིང་།  རྣལ་འབྱོར་ཆེན་པོའི་རྒྱུད་ལ་གསང་བ་འདུས་པ།  འཕགས་སྐོར་ཡན་ལག་
དང་བཅས་པ་དང་།  ཡེ་ཤེས་ཞབས་ལུགས་ལ།  རྒྱན་ལྗོན་ཤིང་སྙིམ་པའི་མེ་ཏོག་སྟེ་འགྲེལ་པ་གསུམ་ཡན་ལག་དང་བཅས་པ་གསན།  གཤིན་རྗེའི་གཤེད་ཀྱི་རྒྱུད་གསུམ་བདེ་མཆོག་རྩ་རྒྱུད།  བཤད་པའི་རྒྱུད་རྡོ་རྗེ་མཁའ་འགྲོ།  མཁའ་འགྲོ་རྒྱ་མཚོ།  མངོན་བརྗོད་བླ་མ།  ཧེ་རུ་ཀ་མངོན་
བྱུང་།  ཀུན་ཏུ་སྤྱོད་པ།  རྣལ་འབྱོར་མ་བཞིའི་ཁ་སྦྱོར།  རྡོ་རྗེ་ཕག་མོ་མངོན་པར་འབྱུང་བ།  ཀྱེ་རྡོ་རྗེའི་རྒྱུད་གསུམ།  ཕྱག་རྒྱ་ཆེན་པོ་ཐིག་ལེ་ལ་སོགས་པ་ཐིག་ལེའི་སྐོར་ཚོ།  རྟོག་པ་མེད་པ་ལ་སོགས་པ་ཨ་ར་ལིའི་རྒྱུད་གསུམ།  མགོན་པོ་མངོན་པར་འབྱུང་བ།  དུས་ཀྱི་འཁོར་ལོ་ཡན་
9-2-16b


ལག་དང་བཅས་པ་གསན།  མན་ངག་གི་སྐོར་ལ་རྣལ་འབྱོར་དབང་ཕྱུག་བིཪྺ་པ་ནས་བརྒྱུད་པའི་སྙན་བརྒྱུད་ཚད་མ་བཞི་ལྡན།  རྗེ་ཞང་དགོན་པ་བ་ནས་བརྒྱུད་པ་དང་།  རྗེ་བཙུན་ས་སྐྱ་པ་ཆེན་པོ་ལ་དངོས་སུ་གནང་བའི་མན་ངག་གི་སྐོར་ལ་སོགས་པ་རིང་བརྒྱུད་དང་ཉེ་བརྒྱུད་མཐའ་ཡས་པ་གསན་ནོ། །
རྗེ་བཙུན་ནཱ་རོ་ཏ་པ་ནས།  ཕམ་མཐིང་པ་སྐུ་མཆེད་ལ་བརྒྱུད་པའི་འཁོར་ལོ་བདེ་མཆོག །གསང་མཐའི་ལུགས་ཀྱི་བསྐྱེད་རིམ་དང་རྫོགས་རིམ་གྱི་མན་ངག་ཡོངས་སུ་རྫོགས་པ་གསན།  ཡང་རྗེ་བཙུན་ནཱ་རོ་ཏ་པའི་ལུགས་ཀྱི་རྡོ་རྗེ་འཇིགས་བྱེད་ཀྱི་མན་ངག་གི་བཤད་པ་དང་།  ཇོ་བོ་རིན་ཆེན་
བཟང་པོ་ནས་བརྒྱུད་པའི་ངན་སོང་སྦྱོང་བའི་རྒྱུད་ཀྱི་མན་ངག་གི་བཤད་པ་དང་།  རྩ་བའི་དཀྱིལ་འཁོར་གྱི་དབང་དང་བཅས་པ་གསན་ནོ། །མཁན་པོ་ཆོས་རྗེ་པའི་དྲུང་དུ།  གསང་བ་འདུས་པའི་འགྲེལ་པ་སྒྲོན་མ་གསལ་བ་དང་།  རྫོགས་རིམ་རིམ་པ་ལྔ་དང་།  དཀྱིལ་འཁོར་གྱི་ཆོ་ག་གཉིས་
ལ་སོགས་པ་དང་།  གསང་འདུས་ཡེ་ཤེས་ཞབས་ལུགས།  སྒྲུབ་ཐབས་ཀུན་བཟང་དང་བཅས་པ་དང་།  འཁོར་ལོ་བདེ་མཆོག་གི་ཆོས་སྐོར་མང་པོ་དང་།  བརྟག་གཉིས་ཀྱི་འགྲེལ་པ་རྡོ་རྗེ་སྙིང་པོས་མཛད་པ་ལ་སོགས་པ་མང་དུ་གསན་ནོ། །གཞན་ཡང་ཡབ་དཔལ་ཆེན་འོད་པོ་དང་། 
ལས་ཀྱི་སློབ་དཔོན་སྤྱི་བོ་ལྷས་པ་དང་།  པཎྜི་ཏ་དཱ་ན་ཤཱི་ལ།  སཾ་ག་ཤྲཱི་དང་།  སུ་ག་ཏ་ཤྲཱི་ལ་སོགས་པ་རྣམས་ལས་མདོ་སྡེ་དང་རྒྱུད་སྡེ་འགྲེལ་པ་དང་བཅས་པ་གསན་པའི་ཚུལ་རྒྱས་པར་གསན་ཡིག་ལས་ཤེས་པར་བྱའོ། །གཞན་ཡང་མནལ་ལམ་དུ་ཆོས་གསན་པའི་ཚུལ་ནི།  ས་
སྐྱའི་ལྟག་གི་ཨ་ཕྱིའི་མཆོད་རྟེན་གྱི་དྲུང་དུ་དབྱིག་གཉེན་ཡིན་ཟེར་བའི་པཎྜི་ཏ་སྔོ་སང་སྐུ་ཤ་ཧ་ཅང་ཞུམ་པ་མ་ཡིན་པ་ཞིག་ལ་ཆོས་མངོན་པ་མཛོད་ཟླ་བ་གཅིག་གི་བར་དུ་ཉན་པ་རྨིས་ཤིང་མནལ་སད་པ་དང་མངོན་པ་མཛོད་ཀྱི་ཚིག་དོན་མ་ལུས་པ་ཐུགས་སུ་ཆུད་དེ།  ཕྱིས་ཁ་ཆེ་པཎ་ཆེན་ལས་
9-2-17a


གསན་དུས་སྔར་བས་ཁྱད་མ་བྱུང་གསུངས་སོ། །ཡང་ནུབ་གཅིག་སློབ་དཔོན་ཕྱོགས་ཀྱི་གླང་པོའི་གདན་སར་བསྐོ་བས་གཤེགས་པར་ཞུ་ཟེར་བ་དང་།  དེའི་བྲག་ཕུག་སྒོ་གླེགས་དང་བཅས་པའི་ངོས་རྣམས་ལ་གླེགས་བམ་མང་པོ་ཡོད་པ་ཞིག་གི་ལྡེ་མིག་གཏད།
སློབ་དཔོན་གྱིས་གདམས་པ་དང་རྗེས་སུ་གདམས་པ་ཡང་གནང་བ་རྨིས་ཏེ།  དེ་ནས་ཚད་མ་ལ་སོགས་པའི་ཆོས་འབད་མ་དགོས་པར་མཁྱེན་ཏོ་ཞེས་གསུངས།  དེ་ལྟར་གསན་པ་དེ་དག་བསམ་བྱུང་གི་རིགས་པས་ཚུལ་བཞིན་དུ་དཔྱད་ཅིང་།  བསྒོམ་བྱུང་གི་རིག་པས་ཉམས་སུ་བླངས་པ་
ལ་བརྟེན་ནས།  མཐར་ཕྱིན་པའི་རྟགས་མངོན་ཤེས་ཐོགས་མེད་དུ་འཆར་པ་དང་།  ལུས་ལ་སྐྲ་དཀར་བ་དང་གཉེར་མ་མེད་པ་དང་ཏིང་འཛིན་བརྟན་པ་ལ་སོགས་པ་ཡོན་ཏན་དཔག་ཏུ་མེད་པ་བརྙེས་ཏེ།  ཆོས་རྗེ་ཉིད་ཀྱི་གསུང་ནས་ཀྱང་མི་མང་པོའི་གསེབ་ཏུ་སྡོད་ཀྱང་གཡེང་བར་མི་ནུས་པའི་
ཏིང་ངེ་འཛིན་ཡོད་གསུངས་སོ། །བཞི་པ་འཆད་རྩོད་རྩོམ་པས་བསྟན་པ་སྤེལ་བའི་ཡོན་ཏན་ལ་གསུམ་ལས། དང་པོ་འཆད་པས་བསྟན་པ་སྤེལ་ཚུལ་ནི་རིག་པའི་གནས་ལྔས་བསྡུས་པའི་ཕྱི་ནང་གི་བདེ་བར་གཤེགས་པའི་གསུང་རབ་མཐའ་དག་ལ་གདུལ་བྱ་སོ་སོའི་བློ་གྲོས་
དང་འཚམས་པར་རྗོད་བྱེད་ཀྱི་ཚིག་གོ་བདེ་ཞིང་།  བརྗོད་བྱའི་དོན་ཕྱིན་ཅི་མ་ལོག་པར་བསྟན་པ་ལས་འོག་ཏུ་འཆད་པ་ལྟར་གྱི་སློབ་མའི་ཚོགས་རྣམས་བསྐྲུན་པར་མཛད་དེ།  དེ་ཡང་དགུང་ལོ་དགུ་པར་སྒྲུབ་ཐབས་མཚོ་སྐྱེས།  བཅུ་གཅིག་པའི་དུས་སུ་བརྟག་གཉིས།  སངས་རྒྱས་མཉམ་
སྦྱོར།  བཅུ་གཉིས་པའི་དུས་སུ།  གུར་དང་སཾ་བུ་ཊ་གསུངས་པ་ནས།  དགུང་ལོ་བདུན་ཅུའི་བར་དུ་བཤད་པ་རྒྱུན་མ་ཆད་པར་མཛད་དོ། །གཉིས་པ་རྩོད་པས་བསྟན་པ་སྤེལ་བའི་ཚུལ་ནི།  འགྲོ་བའི་བླ་མ་འདི་ཉིད་ཀྱི་སྙན་པའི་གྲགས་པས་རྒྱ་གར་ཤར་ནུབ་ཀུན་ཏུ་ཁྱབ་པའི་ཚེ།  རྒྱ་གར་ལྷོ་
9-2-17b


ཕྱོགས་པ་འཕྲོག་བྱེད་དགའ་བོ་ལ་སོགས་པ་ཕྱི་རོལ་པའི་སྟོན་པ་དྲུག་གིས་རྩོད་པར་བརྩོམས་ཏེ།  མང་ཡུལ་སྐྱིད་གྲོང་གི་འཕགས་པ་ཝ་ཏིའི་གཙུག་ལག་ཁང་དང་།  འདབས་འབྱོར་བའི་ཚོང་དུས་ན་བཞུགས་པའི་ཚེ།  སྟོན་པ་དྲུག་པོ་དག་ལྷགས་པ་ན།  ཐམས་ཅད་ཆོས་རྗེ་ཉིད་དང་བདེ་
བར་གཤེགས་པའི་རྟེན་ལ་ཕྱག་མི་འཚལ་བར་བདེ་ལེགས་དང་།  བསྔགས་པར་འོས་པའི་ཚིགས་སུ་བཅད་པ་རེ་རེ་ཙམ་བཏོན་ནས་གྲལ་ལ་འཁོད་དེ།  ངེད་ཀྱི་རིགས་ཐམས་ཅད་ནི་བླ་མ་ཚངས་པ་ནས་བརྩམས་ཏེ་དེང་སང་གི་བར་དུ་གོའུ་ཏ་མའི་བསྟན་པ་ལ་མི་ལྟོས།  དཀོན་མཆོག་
གསུམ་ལ་སྐྱབས་སུ་འགྲོ་མ་མྱོང་བས་དྲང་སྲོང་གི་རིགས་རྣམ་པར་དག་པའོ་ཞེས་སྨྲ་བར་བྱེད་དོ། །དེའི་ཚེ་ཆོས་རྗེ་འདིས་ཅི་ཚངས་པ་དེ་ནི་སྟོན་པ་ལ་ཤིན་ཏུ་གུས་པ་ཡིན་ནོ། །འོན་ཀྱང་དེ་གཏི་མུག་ཆེ་བས་གཉིད་ཀྱིས་ནོན་པ་མ་ཡིན་ནམ།  ཅི་སྐད་དུ་རབ་མཆོག་ལག་པ་བཞི་པ་ཞེས་སོགས་
ཀྱི་ཚིགས་བཅད་གསུངས་པས།  དེ་དག་ཤིན་ཏུ་མ་བཟོད་ཅིང་མ་རངས་པས་འབེལ་བའི་གཏམ་གྱི་སྐབས་རྙེད་དེ།  རྒོལ་བ་ངན་པ་དེ་ཐམས་ཅད་རེ་རེ་ནས་སུན་ཕྱུངས་ཤིང་ཕམ་པར་མཛད་དེ།  མི་སྨྲ་བའི་བརྟུལ་ཞུགས་ལ་བཀོད་ནས།  སླར་ཡང་དེ་ཐམས་ཅད་ཀྱི་ལྟ་བ་ངན་པས་སྙེམས་
པའི་དྲི་མ་མེད་པར་མཛད་དེ།  རལ་པའི་ཁུར་བྲེགས་ནས་ཉིད་ཀྱི་ཐད་དུ་རབ་ཏུ་བྱུང་སྟེ།  ངེས་པར་འབྱུང་བ་རིན་པོ་ཆེའི་འབྱོར་པ་དང་ལྡན་པའི་སྐབས་སུ་ཤཱཀྱའི་རྒྱལ་པོ་དེའི་བསྟན་པ་ལ་རྨ་འབྱིན་པ་གང་དག་བྱུང་བ་ན་སླར་ཡང་དེ་བཞིན་དུ་གདུལ་བར་བྱའོ་ཞེས་དགོངས་ཏེ་འདི་གསུངས་པ། 
རྒྱ་མཚོའི་གོས་ཅན་རྒྱ་མཚོའི་མཐའ་ཀླས་ས་ཆེན་འདི་ན་ལྷ་ཆེན་པོ། །འཕྲོག་བྱེད་བྲན་བྱེད་དེ་དག་ལྷར་བྱེད་ཐུབ་པ་དྲང་སྲོང་སྐར་དགའ་སོགས། །རྒྱས་པ་གྲོག་མཁར་བ་དང་གཟེག་གཟན་རྐང་མིག་སེར་སྐྱའི་རྗེས་འཇུག་པ། །ཐོར་ཚུགས་ཤིང་ཤུན་ལོ་མའི་གོས་ཅན་ཐལ་བ་དབྱུ་
9-2-18a


གུ་ཀུ་ཤ་ཐོགས། །རལ་པའི་ཁུར་འཛིན་མུ་ཛས་ལེགས་དཀྲིས་རི་དྭགས་གཡང་གཞིའི་སྟོད་གཡོགས་ཅན། །སོ་རིས་གསུམ་མཚན་རྩེ་མོ་ཅན་མཆོད་ཚངས་སྐུད་མཆོད་ཕྱིར་ཐོགས་པ་འཆང་། །རིག་བྱེད་ཀུན་སྦྱངས་ངེས་བརྗོད་འདོན་མཁས་སྒྲ་དང་
སྡེབ་སྦྱོར་མཐར་སོན་པ། །བདག་ཏུ་ལྟ་བའི་ལྟ་བ་ལ་ལྟ་རྒྱུན་དུ་དཀའ་སྤྱོད་ང་རྒྱལ་ཅན། །དེ་ལྟའི་ཚུལ་ཅན་མུ་སྟེགས་གླང་ཆེན་རབ་ཏུ་མྱོས་པའི་གླད་འགེམས་པ། །དཔལ་ལྡན་སྨྲ་བའི་སེང་གེ་བློ་གྲོས་སྟོབས་ལྡན་རིགས་པའི་མཆེ་བ་ཅན། །བརྡ་སྤྲོད་བྱེད་གཞུང་ཡན་ལག་རབ་
རྫོགས་བདེ་གཤེགས་བསྟན་པའི་རལ་པས་བརྗིད། །ལེགས་སྦྱར་ང་རོ་གཏན་ཚིགས་གད་རྒྱངས་ལྟག་བརྗོད་སུན་འབྱིན་མིག་བསྒྲད་པ། །དེ་ལྟའི་རི་དྭགས་རྒྱལ་པོ་དེ། །དཔལ་ལྡན་ས་སྐྱའི་གངས་རིར་གནས། །བློ་གསལ་རྣམས་ཀྱི་རི་དྭགས་སྐྱོང་། །རྒོལ་བ་ངན་པའི་ཝ་ཚོགས་
འཇོམས། །ད་དུང་དུ་ཡང་མུ་སྟེགས་བྱེད། །ཐམས་ཅད་ཆོས་ཀྱིས་ཕམ་བྱས་ནས། །བདེ་བར་གཤེགས་པའི་བསྟན་པའི་ཚུལ། །ཀུན་དགའི་རྒྱལ་མཚན་འཛིན་པར་ཤོག །ཅེས་གསུངས་ཏེ་དེའི་རལ་པའི་ཁུར་བྲེགས་ནས་རབ་ཏུ་བྱུང་སྟེ།  རལ་པ་རྣམས་དཔལ་ལྡན་ས་
སྐྱའི་གཙུག་ལག་ཁང་ན་ད་ལྟ་ཡང་ཡོད་དོ། །གསུམ་པ་རྩོམ་པས་བསྟན་པ་སྤེལ་བའི་ཚུལ་ནི།  སྐྱེ་བ་གཞན་དུ་སྦྱངས་པ་དང་། །མཁས་པ་དུ་མ་བསྟེན་པ་དང་། །རྣམ་པར་དཔྱོད་པའི་བློ་གྲོས་ཀྱིས། །ཤེས་བྱ་ཀུན་ལ་འཇིགས་མེད་ཐོབ། །ཞེས་པ་ལྟར་ཤེས་བྱ་མཐའ་དག་ལ་
མི་འཇིགས་པའི་སྤོབས་པ་བརྙེས་ནས།  མ་འོངས་པའི་གདུལ་བྱ་ལ་ཐར་པའི་ལམ་སྟོན་པའི་ཆེད་དུ་བདེ་བར་གཤེགས་པའི་གསུང་རབ་ཀྱི་དགོངས་པ་འགྲེལ་བའི་བསྟན་བཅོས་ཀྱང་མང་དུ་མཛད་དེ།  སྒྲའི་བསྟན་བཅོས་མཁས་པ་ལ་འཇུག་པའི་སྒོ་དང་།  སྒྲ་ཉེ་བར་བསྡུ་བ་ལ་
9-2-18b


སོགས་པ་དང་།  སྡེབ་སྦྱོར་གྱི་བསྟན་བཅོས་མེ་ཏོག་གི་ཆུན་པོ་དང་།  མིང་གི་མངོན་བརྗོད་ཚིག་གི་གཏེར་དང་།  ཟློས་གར་གྱི་བསྟན་བཅོས་རབ་དགའི་འཇུག་པ་དང་།  ནང་རིག་པ་ལ་ཐེག་པ་ཆེན་པོ་ཕ་རོལ་ཏུ་ཕྱིན་པའི་ཉམས་ལེན་ཐུབ་པའི་དགོངས་པ་གསལ་བ་
དང་།  རྡོ་རྗེ་ཐེག་པ་ལ་བདག་མེད་མའི་བསྟོད་འགྲེལ་ལ་སོགས་པ་དུ་མ་དང་།  གསུང་རབ་སྤྱི་ལ་ལོག་པར་རྟོག་པའི་དྲི་མ་སེལ་བར་བྱེད་པ་སྡོམ་པ་གསུམ་གྱི་རབ་ཏུ་དབྱེ་བ་དང་།  དེ་དག་གི་དཀའ་བའི་གནས་ཀྱི་དྲིས་ལན་མང་པོ་དང་།  དེ་ཐམས་ཅད་ཀྱི་སྙིང་པོ་བསྡུས་པ་ཕྱོགས་
བཅུའི་སངས་རྒྱས་ཀྱི་ཕྲིན་ཡིག་ལ་སོགས་པ་ངོ་མཚར་བ་དུ་མ་མཛད་དོ། །ལྔ་པ་བླ་མ་ལྷ་ཡིས་རྗེས་སུ་བཟུང་བའི་ཡོན་ཏན་ནི།  རྗེ་བཙུན་ཆེན་པོ་ལ་ལམ་ཟབ་མོ་བླ་མའི་རྣལ་འབྱོར་ཞུས་པའི་དུས་སུ་སངས་རྒྱས་ཐམས་ཅད་ཀྱི་ངོ་བོ་འཇམ་པའི་དབྱངས་སུ་གཟིགས་པས།  ཆོས་
ཐམས་ཅད་ཀྱི་གནད་ཕྱིན་ཅི་མ་ལོག་པར་གོ་བ་དང་།  ཏིང་ངེ་འཛིན་དང་རྟོགས་པ་བསམ་གྱིས་མི་ཁྱབ་པ་བརྙེས་པ་དང་།  རྒྱ་བོད་ཀྱི་རྒྱལ་པོ་དྲེགས་པ་ཅན་རྣམས་ཀྱང་འདུད་པ་ལ་སོགས་པ་ཆོས་དང་འཇིག་རྟེན་གྱི་དགེ་ལེགས་ཐམས་ཅད་ལྷུན་གྱིས་གྲུབ་ཅེས་གསུངས་པ་དང་།  གཞན་ཡང་
དེའི་ཚེ་རྒྱ་གར་ཤར་ནུབ་ན་མཁས་པར་གྲགས་པའི་ཁ་ཆེ་པཎ་ཆེན་དང་།  དཱ་ན་ཤཱི་ལ་དང་།  སཾ་ག་ཤྲཱི་དང་།  སུ་ག་ཏ་ཤྲཱི་ལ་སོགས་པ་རྣམས་སྤྱན་དྲངས་པ་བཞིན་ཉིད་ཀྱི་དྲུང་དུ་བྱོན་ནས་རིག་པའི་གནས་མཐའ་དག་སྟེར་བར་མཛད་དོ། །ལྷག་པའི་ལྷས་རྗེས་སུ་བཟུང་བའི་ཚུལ་ཡང་གདུལ་
བྱའི་དོན་དུ་བསྙུང་བའི་ཚུལ་བསྟན་པའི་ཚེ།  ཞི་བ་ལྷས་འཁོར་བ་རྒྱུ་འབྲས་ཀྱི་ཆོས་གསུངས་པ་དང་།  འཕགས་པ་ཀླུ་སྒྲུབ་ཀྱིས་ཆོས་ཀྱི་སྡོམ་བཞི་དང་།  སྒྱུ་མའི་དཔེ་བརྒྱད་གསུངས་པ་དང་།  འཇམ་པའི་དབྱངས་ཀྱིས་སྐྱེ་བ་ཐམས་ཅད་དུ་ལྷག་པའི་ལྷར་ཞལ་གྱིས་བཞེས་པ་དང་།  སྤྱན་རས་
9-2-19a


གཟིགས་ཀྱིས་ཕྱག་གིས་སྐུ་ལ་བྱུགས་པ་དང་།  རྗེ་བཙུན་སྒྲོལ་མས་འཁོར་བ་ལས་སྒྲོལ་ཞེས་གསུངས་པ་དང་།  བྱམས་པ་མགོན་པོས་ཏིང་ངེ་འཛིན་བརྒྱ་ཕྲག་གི་སྒོ་དབྱེ་བ་དང་།  མི་གཡོ་མགོན་པོས་བདུད་བཞིའི་བར་ཆད་བསལ་བར་ཞལ་གྱིས་བཞེས་པ་དང་།
ཐ་སྐར་ཟླ་བའི་ཉི་ཤུ་དགུའི་ནམ་ཕྱེད་ན་དེ་བཞིན་གཤེགས་པ་སྒྲ་དབྱངས་མི་ཟད་པ་སྒྲོགས་པའི་རྒྱལ་པོ་མངོན་སུམ་དུ་གཟིགས་ནས།  རྒྱས་འབྲིང་བསྡུས་གསུམ་གྱི་སྦས་དོན་ཞུས་པ་དང་།  དེའི་ཐོ་རངས་སྤྱན་རས་གཟིགས་ལ་ཐེག་པ་ཆེན་པོའི་སེམས་བསྐྱེད་ཞུས་པ་དང་།  ཉི་མ་
འཆར་ཁར་འཇམ་པའི་དབྱངས་ཀྱི་དྲུང་དུ།  ཐེ་ཚོམ་གྱི་དྲྭ་བ་བཅད་པ་དང་།  སྨིན་དྲུག་ཟླ་བའི་ཚེས་བཅུ་གསུམ་གྱི་ཉིན་པར་སངས་རྒྱས་བཅོམ་ལྡན་འདས་ཉན་ཐོས་དགྲ་བཅོམ་པའི་འཁོར་གྱི་ནང་དུ་བཞུགས་ནས།  བདེན་བཞིའི་ཆོས་འཁོར་བསྐོར་བ་ལ་སཾ་སྐྲྀ་ཏའི་སྐད་དུ་བཟང་པོ་སྤྱོད་
པའི་སྨོན་ལམ་བཏབ་པ་དང་།  བཅུ་བཞིའི་ཉིན་པར་ཀྱེ་རྡོ་རྗེའི་དཀྱིལ་འཁོར་ལ་དབང་བསྐུར་ཞུས་པ་དང་།  བཅོ་ལྔའི་ཉིན་པར་སྒྲོལ་མའི་ཞལ་ལན་གསུམ་གཟིགས་ཤིང་གཞན་ཡང་འཁོར་ལོ་བདེ་མཆོག་ལ་སོགས་པ་དཀྱིལ་འཁོར་བཅུ་གསུམ་ཞལ་གཟིགས་སོ། །དྲུག་པ་
ཆགས་ཐོགས་མེད་པའི་མངོན་ཤེས་མངའ་བའི་ཡོན་ཏན་ནི།  མདོ་བསྲིངས་སུ་མི་གཅིག་གིས་དར་ནག་པོ་གཅིག་ལ་གསེར་གྱི་ཐིག་ལེ་མང་དུ་བྱས་པ་གཅིག་ཕྱག་རྟེན་ལ་བྱུང་སྟེ།  ལྷ་རྗེ་བི་ཇི་ལ་གནང་ནས་ཁྱེད་རང་ཚགས་གྱིས་ནམ་མཁའ་དྭངས་པ་ལ་སྐར་མ་བཀྲ་བ་ལྟ་བུའི་བསྟན་པ་གཅིག་
འུ་ཅག་ལ་ཡོང་བ་ཡིན།  ས་སྐྱ་པས་རིང་བསྲེལ་བཀག་ཟེར་བ་ཡོད་ཀྱང་།  རིང་བསྲེལ་ཕལ་ཆེར་གདོན་ལས་བྱུང་། །དཀར་པོའི་ཕྱོགས་ཀྱིས་བྱས་པའང་སྲིད། །འབྱུང་བཞི་དག་གིས་བསྐྱེད་པའང་ཡོད། །འཕགས་པ་གསུམ་གྱི་རིང་བསྲེལ་ནི། །ཡོན་ཏན་སྟོབས་ཀྱིས་
9-2-19b


བྱུང་བ་སྟེ། །འབྱུང་ཁུངས་ནས་བྱུང་རིང་བསྲེལ་ཡིན། །དེ་ལ་གྲངས་ནི་བརྩི་རུ་མེད། །མི་འགྲིབ་འཕེལ་བའི་རིང་བསྲེལ་ཡིན། །ཞེས་བྱ་བ་ཡིན་པས་ང་ལ་རྟེན་འབྱོན་ན་གྲངས་བརྩི་རུ་མེད་པ་འབྱོན་པ་ཡིན་པས།  དར་འདིས་དེའི་ནམ་བཟའ་གྱིས་གསུང་།  གཞན་ཡང་།  ཤིང་མོ་སྦྲུལ་གྱི་
དབྱར་ཟླ་འབྲིང་པོ་དང་། །ལྕགས་ཕོ་ཁྱི་ཡི་སྟོན་ཟླ་ཐ་ཆུང་ཚེ། །ལྕགས་མོ་ཕག་ལ་གཞན་དོན་འགྲོ་ཞེས་གསུངས། །ཞེས་བྱ་བ་ལ་སོགས་པ་ཇི་བཞིན་ཐོག་ཏུ་བབས་སོ། །བདུན་པ་འཛམ་གླིང་ཆེ་དགུས་ཞབས་ལ་གཏུགས་པའི་ཡོན་ཏན་ལ་གསུམ་སྟེ།  མིའི་རྒྱལ་པོས་
ཞབས་ལ་གཏུགས་པ།  ཀླུའི་རྒྱལ་པོས་ཞབས་ལ་གཏུགས་པ།  འབྱུང་པོའི་རྒྱལ་པོས་ཞབས་ལ་གཏུགས་པའོ། །དང་པོ་ནི།  ཆོས་རྗེ་འདི་ཉིད་ཀྱི་སྙན་པའི་གྲགས་པས་འཛམ་གླིང་ཀུན་ཁྱབ་པའི་ཚེ།  བྱང་ཆུབ་སེམས་དཔའི་སྤྲུལ་པ་རྒྱལ་པོ་གོ་དན་གྱིས་གདན་འདྲེན་པ་
བཏང་བ་ན།  སྔར་རྗེ་བཙུན་ཆེན་པོས།  ཁྱེད་ཀྱི་ཚེ་གཞུག་ཏུ་ཞྭ་དང་ལྷྭམ་དང་ཆ་ལུགས་འདི་འདྲ་བས་གདན་འདྲེན་པ་འོང་བས།  དེའི་ཚེ་ཐེ་ཚོམ་མ་བྱེད་པར་སོང་ཤིག་དང་།  སངས་རྒྱས་ཀྱི་བསྟན་པ་དང་སེམས་ཅན་མང་པོ་ལ་ཕན་པ་འབྱུང་ངོ་། །ཞེས་ལུང་བསྟན་པ་
དྲན་ནས།  དགུང་ལོ་རེ་གསུམ་པ་ཤིང་ཕོ་འབྲུག་གི་ལོ་དཔལ་ལྡན་ས་སྐྱ་ནས་དབོན་པོ་གཉིས་དང་བཅས་པ་བཏེག་སྟེ།  མེ་ཕོ་རྟའི་ལོ་ལ་ཕོ་བྲང་ལིང་ཆུ་རྩེར་ཕེབས།  དེའི་ཚེ་རྒྱལ་པོ་གོ་དན་གོ་ཡུག་གན་རྒྱལ་སར་བཏོན་པ་ལ་ཧོར་ཡུལ་དུ་སོང་བ་ཚུར་བྱོན་པ་དང་།  ལུག་ལོ་ཟླ་
བ་དང་པོ་ལ་མཇལ།  ཆོས་དང་འཇིག་རྟེན་གྱི་གསུང་གླེང་མང་པོ་མཛད་པས་།  རྒྱལ་པོ་ཤིན་ཏུ་མཉེས་ནས།  སྔར་ཨརྐེ་འུན་དང་ཧོར་གྱི་ལྷ་ཕ་ཚོ་བན་དེའི་གྲལ་མགོར་སྡོད་པ་ཡིན་པ་ལ།  ད་ཕྱིན་ཆད་ཐམས་ཅད་ཀྱི་གྲལ་མགོར་བླ་མ་ཆོས་རྗེ་པ་བཞུགས་ལ་སྔོན་ལ་སྨོན་ལམ་ཐོབ་
9-2-20a


གསུངས་པའི་ལུང་བྱོན་ནས་རབ་ཏུ་བྱུང་བའི་དབུ་དཔངས་བསྟོད་དོ། །དེ་ནས་རྒྱལ་པོས་ཐེག་པ་ཆེན་པོའི་སེམས་བསྐྱེད་ལ་སོགས་པ་ཟབ་པ་དང་རྒྱ་ཆེ་བའི་ཆོས་མང་པོ་ཞུས་ནས་ཧོར་གྱི་རྒྱལ་ཁམས་དཀོན་མཆོག་མཆོད་པ་དང་།  སེམས་ཅན་ལ་ཕན་པ་བསྒྲུབ་
པ་དང་།  མི་དགེ་བའི་ལས་ལམ་ཆ་ཤས་ཀྱིས་སྤངས་ནས།  སངས་རྒྱས་ཀྱི་བསྟན་པ་ལ་འཇུག་པར་མཛད་དོ། །གཉིས་པ་ནི་ལུག་ལོ་ཟླ་བ་གསུམ་པའི་ཚེས་བཅུ་གཅིག་གི་ཐོ་རངས་མནལ་ལམ་དུ།  མི་འཐིང་པོ་ལུས་ལ་རྨ་དང་ཤུ་བས་གང་བ་གཅིག་བྱུང་བ་ན་རེ།
ཡུལ་ཕྱོགས་འདི་རྣམས་སུས་ཀྱང་མ་བཟུང་བའི་དུས་སུ་ངའི་དཔོན་དེས་བདག་པོ་བྱས་པ་ཡིན།  དེའི་ཚེ་གོ་དན་འདི་ཤཱཀྱ་མུ་ནེ་ལ་བསོད་ནམས་བསགས་པའི་རྒྱལ་པོ་གཅིག་ཏུ་སྐྱེས།  དེ་ནས་ཚེ་འཕོས་ནས།  མི་ཉག་གི་རྒྱལ་པོ་གཅིག་ཏུ་སྐྱེས།  རྒྱལ་པོ་དེས་ངའི་ཁང་པའི་སྟེང་དུ་མཁར་
ལས་བྱས་པས་ངེད་དཔོན་གཡོག་རིས་ནོན་པ་བཞིན་སོང་།  དེ་ནས་བྱང་ངོས་འདིར་འོངས་ནས་ཡུལ་བཟུང་།  དེར་ཡང་རྒྱལ་པོ་འདི་འོངས་ནས།  གནོད་པ་མང་པོ་བྱས་པས་སྡོད་ས་མ་བྱུང་།  དེ་ནས་ངའི་དཔོན་དེ་ཁྲོས་ནས་ཡུལ་ཕྱོགས་ཀྱི་ལྷ་འདྲེ་རྣམས་བསྡུས་ཏེ།  འདི་ལ་གནོད་པ་བྱེད་
པའི་གྲོགས་གྱིས་བྱས་ཀྱང་རྒྱལ་པོ་འདི་ཤཱཀྱ་མུ་ནེ་ལ་བསོད་ནམས་བསགས་པ་ཡིན་པས་རེ་ཤིག་མི་ཐུབ་ཟེར།  དེ་ནས་རྒྱལ་པོ་དེས་རྒྱལ་པོ་སྔ་མས་བནྡེ་ལ་རྒྱུགས་བྱིན་པ་ཆེས་ཟེར་ནས་ཕྲི།  ཤཱཀྱ་མུ་ནེ་འདི་གསེར་ཡིན་ནམ་ལྟ་ཟེར་ཏེ།  གཟོང་གིས་བརྐོས་པས་བསོད་ནམས་ཟད་
ནས་ལྷ་འདྲེ་རྣམས་འདུས་ཏེ།  ནང་བློན་དང་ཕྲ་མ་བཅུག་པས་བློན་པོས་རྒྱལ་པོ་བསད།  རྒྱལ་པོས་འཆི་ཁར་རྒྱལ་པོ་གཅིག་གི་བུར་སྐྱེས་ནས་ཁྱེད་རྣམས་ལ་གནོད་བསྐྱེལ་ཞིང་།  བྲན་བཞིན་དུ་འཁོལ་བར་ཤོག་ཅིག་ཅེས་སྨོན་ལམ་བཏབ་པས་ཇིན་གིར་གྱི་ཚ་བོར་སྐྱེས་ཏེ་གོ་དན་འདི་ཡིན།
9-2-20b


  དེས་བྱང་ངོས་འདིར་འོངས་ནས་ངེད་ཀྱི་སྡོད་སའི་སྟེང་དུ་རྟ་རྒྱུགས།  རྟ་བསད།  རྟ་ཁྲག་གར་སོང་སར་ངེད་ལ་ལ་ན།  ལ་ལ་ཤི་ཟེར་ནས་ལུས་ལ་སྦལ་པ་དང་།  ལྗོང་མོ་ཕྱེད་སྐམས་པ་ཤི་ལ་ཁད་ཡོད་པ་ལ།  ¤སྔར་བནྡེ་རྣམས་ཀྱིས་སྨོན་ལམ་འདེབས་ཀྱང་ངེད་ཀླུ་ལ་ཕན་པ་མ་
བྱུང་།  ཁྱེད་ས་སྐྱ་པས་བཟའ་རྒྱུ་དང་སྨན་བྱིན་པས་ཕན་པ་བྱུང་།  ངའི་དཔོན་དེ་ཤི་ན་གོ་དན་ཡང་འཆི།  དཔོན་སོས་ན་གོ་དན་ཡང་སོས་པས་ཁྱེད་ཀྱང་བཟང་པོར་འགྲོ་བས་འབད་པ་ཆེན་པོ་གྱིས་ཟེར་ནས།  ཆོས་རྗེ་པས་རྒྱལ་པོའི་དོན་དུ་སེང་གེ་སྒྲའི་ཆོ་ག་མཛད་པས་རྒྱལ་པོ་
ནད་ལས་ཐར་རོ། །གསུམ་པ་ནི་ཆོས་རྗེ་པ་སྲིན་པོ་རིར་བཞུགས་པའི་ཚེ།  ཐོ་རངས་མནལ་ལམ་དུ་མི་སྐྱ་ཤར་བ་ཚན་གཅིག་བྱུང་ནས།  ཕྱག་འཚལ་ཕྱག་རྟེན་ཕུལ་ནས་སེམས་ཅན་ཐམས་ཅད་སྐྱེ་རྒ་ན་འཆིའི་ཆུ་བོ་བཞིས་ཉམ་ཐག་པ་མི་གདའ་ལགས་སམ་ཟེར་བ་ལ།  དེ་ཙུག་
གདའ་གསུངས་པས།  འདི་ལས་ཐར་པའི་གསོལ་འདེབས་གཅིག་ཐུགས་ལ་འདོགས་པར་ཞུ་ཟེར་བ་ལ།  སྐྱེ་བ་སྐྱེ་བ་མེད་པའི་ཚུལ་རྟོགས་ཀྱང་། །ད་དུང་སྐྱེ་བའི་གཟེབ་ལས་བདག་མ་གྲོལ། །སྐྱེ་བ་ཀུན་ཏུ་སྐྱེ་བར་སྐྱེ་འགྱུར་བའི། །སྐྱེ་ངན་སྐྱེ་བ་དག་ལས་བསྐྱབ་ཏུ་གསོལ། །
ཟེར་བ་གྱིས་ལ་གསོལ་བ་ཐོབ་གསུངས་པས།  འོ་ན་རྒས་པ་ལ་སོགས་པ་གཞན་གསུམ་ལ་ཡང་དེ་སྦྱར་དུ་རུང་ངམ་ཞུས་པ་ལ་རུང་ཞེས་གསུངས་པས་རིགས་འགྲེ་བྱས་ནས་མཇུག་ཏུ།  དཔལ་ལྡན་བླ་མ་ཀུན་མཁྱེན་ཆོས་ཀྱི་རྗེ། །སྐྱེ་བ་འདི་དང་སྲིད་པ་ཐམས་ཅད་དུ། །བླ་
མ་ཁྱེད་ཀྱི་བཀའ་དྲིན་རྗེས་བཟུང་ནས། །སྐྱེ་རྒ་ན་འཆིའི་སྡུག་བསྔལ་བསྐྱབ་ཏུ་གསོལ། །ཞེས་ཟེར་ཞིང་ཕྱག་འཚལ་ནས།  བཀའ་དྲིན་ཆེའོ་ཞེས་སོང་བ་རྨིས་ཤིང་།  མནལ་སད་པ་ན་དེ་གཙུག་ལག་ཁང་གི་བཀའ་སྲུང་རྒྱལ་པོ་དེ་ཡིན་པར་འདུག་སྙམ་དུ་དགོངས་སོ། །
9-2-21a


བརྒྱད་པ་རྨད་དུ་བྱུང་བའི་ལུང་བསྟན་བརྙེས་པའི་ཡོན་ཏན་ནི།  ས་སྐྱར་ཆོས་གསུངས་པའི་ཚེ།  ནམ་མཁར་རྗེ་བཙུན་གྲགས་པ་རྒྱལ་མཚན་གྱིས་ཁྱོད་ཀྱི་སྐྱེ་བ་ཉི་ཤུ་རྩ་བདུན་གྱི་བར་གྱི་བླ་མ་ང་ཡིན་ཅིང་།  དེ་ལས་གཞན་སུས་ཀྱང་ཁྱོད་འདུལ་བར་འོས་པ་མ་
ཡིན་ནོ། །ཞེས་པའི་སྒྲ་གྲག་པ་དང་།  ཡང་སྐྱ་བོ་ཁ་གདངས་སུ་སྐྱེ་བ་ཉི་ཤུ་རྩ་ལྔའི་བར་གྱི་བླ་མ་ཡིན་ནོ། །ཞེས་པའི་སྒྲ་གྲག་པས་སྔར་གྱི་དེ་དྲན་གསུང་ངོ་། །ལིང་ཆུ་རྩེར་ནད་པ་ནད་གཡོག་མེད་པ་གཅིག་གི་རྒྱུ་མཚན་ཞུས་པས།  སྙིང་རྗེ་ཚད་མེད་པ་སྐྱེས་ཏེ།  སངས་རྒྱས་དང་
བྱང་ཆུབ་སེམས་དཔའ་རྣམས་ཀྱང་འདི་འདྲ་ལ་མི་གཟིགས་པ་ཐུགས་རྗེ་རེ་ཆུང་སྙམ་དུ་དགོངས་པའི་ཚེ།  ཐོ་རངས་དབུས་སུ་རྗེ་བཙུན་ཆེན་པོ།  གཡས་སུ་བིཪྺ་པ།  གཡོན་དུ་ནག་པོ་པ་དངོས་སུ་བྱོན་ནས་ཁྱོད་དེ་ལ་ཡི་ཆད་མ་བྱེད།  ཟག་བཅས་ལུས་འདི་ལ་སྐྱེ་རྒས་ན་འཆིའི་
ཆུ་བོ་ཡོད་པ་ཆོས་ཉིད་ཡིན་གསུངས།  བིཪྺ་པས་ཐོད་པའི་བདུད་རྩི་ལ་སྲིན་ལག་གིས་རེག་ནས་ཁྱོད་ཀྱི་ལྗགས་རྐྱོངས་གསུངས་ནས།  ལྗགས་ལ་ཐིག་ལེ་བྱས་པའི་སྣང་བ་བྱུང་།  དེའི་དུས་སུ་རྟོག་པ་དང་རྟོག་མེད་ཀྱི་མཐའ་ལས་འདས་པ།  བདེ་གསལ་མི་རྟོག་པ་རྒྱལ་བ་རྣམས་
ཀྱི་ཐུགས་ལའང་འདི་ལས་ལྷག་པ་མེད་སྙམ་པའི་སྣང་བ་བྱུང་གསུངས།  དེ་ནས་བླ་མ་རྗེ་བཙུན་པས།  ཁྱོད་འདི་ནས་གཞན་དོན་ལ་འགྲོ་བའི་དུས་སུ།  ཤར་ཕྱོགས་ཀྱི་འཇིག་རྟེན་གྱི་ཁམས་དུ་མ་བརྒལ་བའི་ཕ་རོལ་ཏུ་མཁའ་ལ་གནས་པའི་རིག་པ་འཛིན་པར་གྱུར་ནས།  དེ་བཞིན་གཤེགས་
པ་དུ་མ་མཉེས་པར་བྱས་ཤིང་ས་ལམ་ཕལ་ཆེར་བགྲོད་དེ།  རྒྱ་གར་ཤར་ཕྱོགས་མུ་མུ་ནི་ཞེས་བྱ་བར་རྒྱལ་པོ་ཉི་མའི་སྟོབས་འཕེལ་གྱི་བུར་སྐྱེས་ནས།  དད་ལྡན་གྱི་འགྲོ་བ་འབུམ་ཕྲག་དུ་མ་གྲོལ་བར་བྱས་ནས།  དེ་ནས་སྐྱེ་བ་གསུམ་པ་ལ་སངས་རྒྱས་དྲི་མ་མེད་པའི་དཔལ་ཞེས་བྱ་
9-2-21b


བར་འགྱུར་རོ་ཞེས་གསུངས།  རྗེ་བཙུན་པས་སློབ་དཔོན་བིཪྺ་པ་ལ་དེ་ལྟར་ལགས་སམ་གསུངས།  སློབ་དཔོན་གྱིས་དེ་ཡིན་གསུངས།  ནག་པོ་པས་ཀྱང་རྗེས་སུ་ཡི་རང་བའི་འཛུམ་པ་མཛད་དོ། །དེ་ཉིད་ཀྱི་ཚེ་གསང་བའི་གནས་སྦུབས་སུ་ནུབ་པ་དང་།  དབུའི་གཙུག་ཏོར་གསལ་པོར་
འཕགས་པ་ལ་སོགས་པའི་མཚན་དཔེའི་ཡོན་ཏན་རྣམས་ཀྱང་བརྙེས་པར་གྱུར་ཏོ། །དགུ་པ་སྐུ་གསུང་ཐུགས་ཀྱི་རྟེན་མཆོག་སྤྲུལ་པའི་ཡོན་ཏན་ནི་དེ་ལྟར་དགུང་ལོ་བདུན་ཅུའི་བར་དུ་གཞན་དོན་དཔག་ཏུ་མེད་པ་མཛད་ནས།  ལྕགས་མོ་ཕག་གི་ལོ་སྨལ་པོ་ཟླ་བའི་ཚེས་བཅུ་བཞིའི་
ཐོ་རངས་ཀྱི་ཆ་ལ།  ཆོས་རྒྱལ་འཕགས་པའི་སྤྱི་བོར་ཕྱག་བཞག་ནས།  སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ་བླ་མའི་རྣལ་འབྱོར་ལ་ཉམས་ལེན་གྱིས་ཤིག་ཅེས་སོགས་ཀྱི་ཞལ་ཏ་གནང་སྟེ་རྡོ་རྗེ་སྐྱིལ་ཀྲུང་བཅས་རྡོ་རྗེ་དྲིལ་བུ་ཐུགས་ཀར་བསྣོལ་ཏེ་མྱ་ངན་ལས་
འདས་པའི་ཚུལ་བསྟན་ཏོ། །དེ་ནས་ཞག་གསུམ་གྱི་བར་དུ་གཟི་བརྗིད་མདངས་དང་ལྡན་པར་བཞུགས་ནས།  བཅོ་བརྒྱད་ཀྱི་སྔ་དྲོ་སྐུ་གདུང་རིན་པོ་ཆེའི་སྒྲོམ་བུར་བསྡུས་ནས།  ཉེར་ལྔའི་ཉིན་པར་ཞུགས་ལ་འབུལ་བའི་ཚེ།  མེ་ཏོག་དང་ཙན་དན་གྱི་དྲི་ལ་སོགས་པའི་ལྷ་རྫས་ཀྱི་
མཆོད་པས་ས་དང་བར་སྣང་གང་ཞིང་།  དུ་བ་དང་འཇའ་གུར་སྤུངས་པའི་སྤྲིན་གྱི་གསེབ་ནས་ལྷ་བུ་གཞོན་ནུ་གདུགས་དང་རྒྱལ་མཚན་ཐོགས་པས་བཀྲ་ཤིས་ཀྱི་གླུ་དབྱངས་དང་།  རོལ་མོའི་སྒྲ་དུ་མ་བསྒྲགས་པ་དང་།  དུ་བའི་རྩེ་མོ་རྡོ་རྗེ་དང་རལ་གྲི་དང་།  ཨུཏྤ་ལ་སོགས་ཀྱི་རི་མོ་
ཀུན་གྱིས་མཐོང་བར་གྱུར་ཏོ། །དེའི་ཚེ་རྒྱའི་མི་གཉིས་དང་།  མི་ཉག་གཅིག་ལ་ཞག་གསུམ་གྱི་བར་དུ་དཔའ་བར་འགྲོ་བ་ལ་སོགས་པའི་ཏིང་ངེ་འཛིན་བསམ་གྱིས་མི་ཁྱབ་པ་སྐྱེས་སོ། །ཐོ་རངས་ཀྱི་ཆ་ལ་བི་ཇི་རིན་ཆེན་གྲགས་ཀྱིས་སྐུ་གདུང་རྣམས་རིན་པོ་ཆེའི་སྒྲོམ་བུར་
9-2-22a


བསྡུས་ཏེ།  ཕྱིས་གོ་དན་རྒྱལ་པོའི་དྲུང་དུ་བུ་སློབ་ཚོགས་ཀྱིས་བལྟས་པའི་ཚེ།  སྐུ་གསུང་ཐུགས་ཀྱི་རྟེན་མཆོག་བྱོན་པའི་ཚུལ་ནི།  གཙུག་ཏོར་དབུས་སུ་ཀྱེ་ཡི་རྡོ་རྗེ་དང་། །འཇམ་པའི་དབྱངས་སྐུ་དྲི་མེད་གསལ་བར་བྱོན། །དཔྲལ་བའི་ཆ་ལ་འཁོར་ལོ་སྡོམ་
པའི་སྐུ། །ལྟག་པའི་ཆ་ལ་སངས་རྒྱས་བཅོམ་ལྡན་འདས། །ཕྲག་པའི་གདུང་ལ་ཁ་སར་པཱ་ཎི་དང་། །རྐང་པའི་སྦུབས་ལ་སྤྱན་རས་གཟིགས་དབང་བྱོན། །སྒེལ་བུའི་ཆ་ལ་གསང་བའི་ཡུམ་བཞི་བྱོན། །སྒྲོལ་མ་མི་གཡོ་པུས་བཙུགས་རྣམ་པ་གཉིས། །ཕྱག་སོར་གཡས་པ་ཀླུ་
ཤིང་ལྗོན་པའི་སྟེང་། །བྱམས་པ་ཆོས་ཀྱི་འཁོར་ལོའི་ཕྱག་རྒྱ་ཅན། །སྤྲུལ་པ་རྣམ་བཅུ་སྐུ་ཡི་རྟེན་དུ་བྱོན། །ཚངས་པའི་གསུང་དབྱངས་སྟོང་ཉིད་སེང་གེའི་སྒྲ། །སྐྱེ་མེད་དོན་མཚོན་ཨ་ཡིག་འབུར་དུ་དོད། །སྙན་གོང་གཉིས་ལ་རྣམ་རྒྱལ་མཆོད་རྟེན་རེ། །ཐུགས་དགོངས་
རྣམ་དག་རང་བྱུང་ཆོས་སྐུར་ཤར། །དམ་ཚིག་རྡོ་རྗེ་ལྟེ་བར་ཧཱུཾ་གིས་མཚན། །ཞེས་བཤད་པ་ལྟར་ཤེས་པར་བྱའོ། །བཅུ་པ་བསྟན་པའི་གསལ་བྱེད་སློབ་མ་བསྐྲུན་པའི་ཡོན་ཏན་ནི།  བདག་ཉིད་ཆེན་པོ་འདིས་དགུང་ལོ་དགུ་པར་མཚོ་སྐྱེས་གསུངས་པ་ནས།  བདུན་ཅུ་
པའི་བར་ལ་རྒྱ་ཧོར་བོད་གསུམ་དུ་འཆད་པ་ཉི་མའི་འོད་ཟེར་གྱིས་ཟབ་དོན་གྱི་པདྨོ་ཁ་ཕྱེ་སྟེ།  ལེགས་བཤད་དར་དིར་སྒྲོགས་པའི་བློ་གསལ་བུང་བའི་ཚོགས་ཀྱིས་ཐུབ་བསྟན་པད་མཚོ་ཀུན་ཏུ་ཁྱབ་པར་མཛད་པ་ལས།  གཙོ་བོར་གྱུར་པ་ནི།  གཅུང་སློབ་དཔོན་བསོད་ནམས་རྒྱལ་མཚན་
སྐུའི་དབོན་པོ་འཕགས་པ་སྐུ་མཆེད་གཉིས།  རྟོགས་པའི་བརྒྱུད་འཛིན་གྲུབ་ཚོགས་རྣམ་གཉིས།  མན་ངག་གི་བརྒྱུད་འཛིན་ལྷོ་དམར་གཉིས།  སྒྲུབ་པའི་བརྒྱུད་འཛིན་རྒྱལ་བ་ཡང་དགོན་པ།  བཤད་པའི་བརྒྱུད་འཛིན་ལ་ཤར་ནུབ་གུང་གསུམ་དུ་གྲགས་པ་ལ་ཤར་པ་ཤེས་རབ་འབྱུང་གནས།  གཅུང་
9-2-22b


རྡོ་རྗེ་འོད་ཟེར།  གུང་པ་སྐྱོ་སྟོན་དྲི་མེད།  ནུབ་པ་ལ་ཐོག་མར་འུ་ཡུག་པ་རིག་པའི་སེང་གེ།  དེའི་གདན་ས་འཇམ་དབྱངས་ཉི་ཐོག་པ།  དེའི་བཀའ་ཆེན་བཞི་ནི།  ཁང་སྟོན་འོད་ཟེར་རྒྱལ་མཚན།  གཉན་དར་མ་སེང་གེ།  ཞང་མདོ་སྡེ་དཔལ་བཟང་པོ་སྟེ།  ཁང་གཉན་ཞང་གསུམ་དུ་
གྲགས་པ་དང་།  ཟུར་ཁང་བ་ཤཱཀྱ་གྲགས་སོ། །སྡོམ་ཕྲུག་བགྲེས་པ་དཔལ་བཟང་པོ་བཅུ་གསུམ་ནི།  ཚོགས་སྒོམ་ཀུན་དགའ་དཔལ་བཟང་པོ།  གྲུབ་ཐོབ་ཡོན་ཏན་དཔལ་བཟང་པོ།  རིན་པོ་ཆེ་སྐྱོབ་པ་དཔལ་བཟང་པོ།  ལྷོ་པ་ཀུན་མཁྱེན་རིན་ཆེན་དཔལ་བཟང་པོ།  ཞང་
རྒྱལ་བ་དཔལ་བཟང་པོ།  ཞང་མདོ་སྡེ་དཔལ་བཟང་པོ།  ཕྱ་རུ་བ་སེང་གེ་དཔལ་བཟང་པོ།  གྲུབ་སྙིང་པ་རྡོ་རྗེ་དཔལ་བཟང་པོ།  ལྡོང་སྟོན་ཤེས་རབ་དཔལ་བཟང་པོ།  ཇོ་གདན་བྱང་ཆུབ་དཔལ་བཟང་པོ།  ཁའུ་པ་འོད་ལྡན་དཔལ་བཟང་པོ།  སྐྱོ་སྟོན་དྲི་མེད་འོད་དཔལ་བཟང་པོ་
རྣམས་སོ། །གཞོན་པ་རྒྱལ་མཚན་གྱི་མཐའ་ཅན་བདུན་ནི།  ཤར་པ་ཡེ་ཤེས་རྒྱལ་མཚན།  ཁང་སྟོན་འོད་ཟེར་རྒྱལ་མཚན།  དགའ་ལྡན་པ་ཆོས་ཀྱི་རྒྱལ་མཚན།  གསོལ་བྱ་བ་འདུལ་བ་རྒྱལ་མཚན།  འུ་ཡུག་པ་དཔལ་གྱི་རྒྱལ་མཚན།  ཡར་ལུངས་པ་ཤཱཀྱ་རྒྱལ་མཚན།  ཡར་ལུངས་
པ་བྱང་ཆུབ་རྒྱལ་མཚན་རྣམས་སོ། །གཞན་ཡང་འཇམ་དབྱངས་གཙང་ནགས་ཕུག་པ་ཤེས་རབ་འོད་ཟེར།  ཏེ་ར་བ་བྱམས་མགོན།  ལྷ་རྗེ་བི་ཇི།  གློ་བོ་ལོ་ཙཱ་བ་ཤེས་རབ་རིན་ཆེན།  མཁན་པོ་གྲགས་པ་སེང་གེ།  བླ་མ་འོད་ཟེར་ཤཱཀྱ་ལ་སོགས་པའི་སྐྱེས་ཆེན་མང་དུ་བྱུང་ངོ་། །མཚན་
དཔེའི་དཔལ་གྱིས་བརྗིད་པའི་སྐུ་མངའ་ཞིང་། །ལེགས་བཤད་སྒྲ་སྒྲོགས་མུ་སྟེགས་སྟོན་པ་བཏུལ། །མི་དབང་ས་ཡི་བདག་པོས་གུས་བཏུད་པ། །ཐུབ་དབང་གཉིས་པ་ས་སྐྱ་པ་ལ་འདུད། །གང་གི་གསུང་ལས་སྐྱེས་པའི་སྲས་ཀྱི་མཆོག །བཤད་སྒྲུབ་མན་ངག་མི་
9-2-23a


ནུབ་རྒྱལ་མཚན་འཛིན། །ངོ་མཚར་སྐྱེས་ཆེན་རྣམས་ལའང་གུས་ཕྱག་འཚལ། །ཟབ་དོན་རྟོགས་པའི་བློ་གྲོས་བསྐྱེད་དུ་གསོལ། །བསྟན་བཅོས་རྩོམ་པ་པོའི་ཆེ་བའི་ཡོན་ཏན་བསྟན་ཟིན་ཏོ།།    །།གཉིས་པ་དེས་བསྟན་བཅོས་ཇི་ལྟར་བརྩམས་
པའི་ཚུལ་ལ་གཉིས་ཏེ།  དངོས་དང་ཞར་ལ་གཞུང་ཇི་ལྟར་འཆད་པའི་ཚུལ་ལོ། །དང་པོ་ནི།  འཕགས་པའི་ཡུལ་དུ་ཉན་ཐོས་ཀྱི་བསྟན་པ་ལ་བཀའ་བསྡུ་བ་རིམ་པ་གསུམ་བྱུང་ཚུལ།  ཐེག་པ་ཆེན་པོའི་བསྟན་པ་ལ་འཕེལ་འགྲིབ་བྱུང་ཚུལ།  དེ་ནས་གངས་རིའི་ཁྲོད་དུ་བསྒྱུར་བའི་ཚུལ། 
བསྟན་པ་སྔ་དར་དང་།  ཕྱི་དར་གྱི་སྐབས་སུ་ཆོས་ལོག་བྱུང་བ་རྣམས་དམ་པ་རྣམས་ཀྱིས་སུན་ཕྱུང་བའི་ཚུལ་རྣམས་འདིར་བཤད་པར་བྱ་བ་ཡིན་མོད་ཀྱི།  རྒྱས་པར་འོག་གཞུང་དོན་གྱི་སྐབས་སུ་འབྱུང་ཞིང་མདོར་བསྡུས་པ་ཙམ་ཞིག་ཁོ་བོས་བྱས་པའི་སྤྱི་དོན་དུ་བསྟན་ཟིན་པས་དེར་ལྟ་
བར་བྱའོ། །དེ་ནས་ཆོས་རྗེ་ས་སྐྱ་པ་འདས་པའི་རྗེས་སུ།  སེམས་བསྐྱེད་རྨི་ལམ་མ་ལ་སོགས་པའི་ཆོས་ལོག་དུ་མ་འཕེལ་བ་རྣམས་དགག་པར་བཞེད་ནས།  བསྟན་བཅོས་འདི་བརྩམས་ཏེ་ཕྱེད་ཙམ་ཚར་བ་ན།  བོད་ཀྱི་ཆོས་པ་རྣམས་ཀྱིས་ཆགས་སྡང་གི་དབང་གིས་བརྩམས་འདུག་
ཟེར་ནས་ཆོས་ཉན་དུ་འོང་བ་རྣམས་ཀྱི་གེགས་སུ་སོང་བའི་གཏམ་ཟངས་ཚ་བསོད་ནམས་རྒྱལ་མཚན་ལ་སོགས་པ་རྣམས་ཀྱིས་ཐོས་པས།  ཆོས་རྗེའི་དྲུང་དུ་ཆགས་སྡང་ཅན་ཟེར་བའི་གཏམ་འདིས་འོ་སྐོལ་གྱི་ཕྲིན་ལས་ལ་གནོད་པར་གདའ་ལགས་པས།  མི་རྩོམ་པར་ཞུ་ཞེས་ཞུ་བ་
ཕུལ་བས།  ཆོས་འདི་ལོ་འདོད་དམ།  ང་རྒྱལ་གྱིས་བྱས་པ་མ་ཡིན།  སངས་རྒྱས་ཀྱི་བསྟན་པ་ལ་བསམས་པ་ཡིན་ཏེ།  ཐམས་ཅད་མ་དགའ་བར་འདུག་པས།  བཞག་པ་ལས་མི་ཤེས་གསུངས་ནས་ཞལ་གྱིས་བཞེས་སོ། །དེའི་མཚན་མོ་མནལ་ལམ་དུ་སངས་རྒྱས་ཀྱི་སྐུ་ཤིན་
9-2-23b


ཏུ་མཚར་བ་གཅིག་མི་གཙང་བའི་ཁྲོད་ན་འདུག་པ་བྱི་དོར་མཛད་པས།  མི་མང་པོ་མི་མགུ་བའི་རྣམ་འགྱུར་བྱེད་ཀྱིན་འདུག་པས་བཞག་པ་དང་།  སླར་ཡང་སྐུ་དེ་ལ་མི་མང་པོས་མི་གཙང་བ་བསྐུ་བ་རྨིས་པ་དང་།  འཕགས་པ་འཇམ་དཔལ་གྱི་སྐུ་རྒྱབ་བསྟན་པ་རྨིས་པ་དང་།  འཕགས་
པ་ཀླུ་སྒྲུབ་བྱང་ཆུབ་ཀྱི་ཤིང་སྐམ་པོ་ལ་རྒྱབ་བརྟེན་ནས་བསྙུང་བའི་ཚུལ་དུ་བཞུགས་པ་ལ་སོགས་པ་རྨིས་ནས་མནལ་སད་པ་དང་།  བསྟན་བཅོས་འདི་བརྩམས་ན་མི་མི་དགའ་བར་འདུག་ཀྱང་མ་བརྩམས་ན་ལྷ་མི་དགའ་བ་འདུག་པས་བརྩམ་དགོས་གསུང་སྟེ།  སྔར་མི་རྩོམ་པར་ཞལ་
གྱིས་བཞེས་པའི་ཉེས་པ་བླ་མ་དང་དཀོན་མཆོག་ལ་བཟོད་པར་གསོལ་ཏེ།  ཡོངས་སུ་རྫོགས་པར་བརྩམས་པ་ཡིན་ནོ། །གཉིས་པ་ནི་བསྟན་བཅོས་འདི་འཆད་པ་ལ་ཐོག་མར་བསྟན་པའི་ཉམས་ལེན་ཐམས་ཅད་སྡོམ་པ་གསུམ་གྱིས་བསྡུས་པའི་ཚུལ།  དེ་གཞུང་འདིས་ཇི་ལྟར་
བསྟན་པའི་ཚུལ།  བསྟན་བྱ་སྡོམ་གསུམ་གྱི་མཐའ་དཔྱད་པའི་སྒོ་ནས་སྤྱིའི་དོན་གཏན་ལ་དབབ་དགོས་པ་ནི་སྤྱི་དོན་དུ་བལྟ་བར་བྱའོ། །དེ་ནས་གཞུང་ལ་འཇུག་པ་ནི་རྣམ་བཤད་འདིར་ནི།  དཀྱུས་ཀྱི་ས་བཅད་པ།  ཁ་འཕངས་པའི་ལུང་དྲང་བ།  དཀའ་གནས་ཀྱི་དོགས་པ་
དཔྱད་པ་གསུམ་གཙོ་བོར་སྟོན་ཅིང་གཞུང་གི་འབྲུ་ཕལ་ཆེར་ནི་སླ་བས་འདིར་མི་འབྲི་ལ།  ཅུད་ཟད་དཀའ་བ་རྣམས་དང་།  ལུང་གི་འབྲུ་རྣམས་དང་།  ཕྱོགས་སྔའི་དོན་རྣམས་ནི་ཇི་ལྟར་འཚམས་པར་བཤད་པར་བྱའོ། །ས་ཁོངས་ཀྱི་ཚིགས་བཅད་ཀྱི་གྲངས་རྣམས་ནི་ཤོ་ལོ་ཀའི་
གྲངས་ཡིན་ལ་དམིགས་བསལ་མེད་པའི་གྲངས་རྣམས་རྐང་པའི་གྲངས་ཡིན་པར་ཤེས་པར་བྱའོ། །གསུམ་པ་བརྩམ་བྱ་བསྟན་བཅོས་ཀྱི་བརྗོད་བྱ་གཏན་ལ་དབབ་པ་ལ་གསུམ་སྟེ་བརྗོད་བྱ་བདེ་བླག་ཏུ་རྟོགས་པའི་ཆེད་དུ་མཚན་གྱི་དོན།  བསྟན་པ་རྣམ་དག་ཏུ་བསྒྲུབ་པའི་ཆེད་དུ་གཞུང་གི་དོན།  བྱས་ཤེས་དྲིན་བཟོ་བསྐྱེད་
9-2-24a


པའི་ཆེད་དུ་མཛད་བྱང་སྨོས་པའོ། །དང་པོ་ནི།  སྡོམ་པ་གསུམ་གྱི་རབ་ཏུ་དབྱེ་བ་ཞེས་བྱ་བ་ཞེས་པ་སྟེ།  སྡོམ་པ་གསུམ་ནི་རྡོ་རྗེ་རྩེ་མོར།  སོ་སོ་ཐར་དང་བྱང་ཆུབ་སེམས། །རིག་འཛིན་རང་གི་ངོ་བོའོ། །ཞེས་པ་ལྟར་ཡིན་ལ།  རབ་ཏུ་དབྱེ་བ་ནི་གསུམ་པོ་དེ་དག་གི་
ནང་སེལ་གྱི་དབྱེ་བ་ཙམ་སྟོན་པ་མ་ཡིན་པར།  དང་པོར་ལེན་པའི་ཆོ་ག །བར་དུ་བསྲུང་བའི་བསླབ་བྱ།  མཐར་འབྲས་བུ་འབྱིན་པའི་ཚུལ་རྣམས་ལ་སངས་རྒྱས་ཀྱི་གསུང་དང་མི་མཐུན་པའི་ལོག་པར་རྟོག་པ་མཐའ་དག་བཀག་ནས།  ཉམས་ལེན་ཐམས་ཅད་སངས་རྒྱས་ཀྱི་དགོངས་པ་ཇི་ལྟ་བ་
བཞིན་སྟོན་པས་ན་དེ་སྐད་ཅེས་བྱའོ། །གཉིས་པ་ལ་གསུམ་སྟེ།  བཤད་པ་ལ་འཇུག་པའི་ཡན་ལག །བཤད་པ་རང་གི་ངོ་བོ།  བཤད་པ་ཡོངས་སུ་རྫོགས་པའི་བྱ་བའོ། །དང་པོ་ལ་གཉིས་ཏེ།  མཆོད་པར་བརྗོད་པ་དང་།  རྩམ་པར་དམ་བཅའ་བའོ། །དང་པོ་ལ་གསུམ་སྟེ།  བླ་མ་
དམ་པ་སྤྱི་ལ་མཆོད་པར་བརྗོད་པ།  སྡོམ་གསུམ་སྟེར་བའི་རྩ་བའི་བླ་མ་ལ་མཆོད་པར་བརྗོད་པ།  སྡོམ་གསུམ་གྱི་བསླབ་པ་འཆའ་བ་པོ་སངས་རྒྱས་ལ་མཆོད་པར་བརྗོད་པའོ། །དང་པོ་ནི།  བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །ཞེས་པ་སྟེ་བླ་མ་དམ་པའི་དོན་ནི་སྐབས་
གསུམ་པར་འཆད་དོ། །གཉིས་པ་ནི་བདེ་གཤེགས་ཞེས་སོགས་ཚིགས་བཅད་གཅིག་སྟེ།  ཚིག་རྐང་དང་པོ་གཉིས་ཀྱིས་ནི་གཞན་གྱི་ལོག་རྟོག་ཐམས་ཅད་ཀྱང་སངས་རྒྱས་ཀྱི་གསུང་རབ་ལ་བརྟེན་པའི་སྒྲུབ་པ་དང་སུན་འབྱིན་གྱིས་འགོག་ཅིང་།  ཚིག་རྐང་གསུམ་པས་ནི་རང་གི་ཉམས་
ལེན་ཐམས་ཅད་སངས་རྒྱས་ཀྱི་གསུང་བཞིན་དུ་བསྒྲུབ་ཅེས་པ་སྟེ།  བསྟན་བཅོས་ལུས་ཀྱི་བརྗོད་བྱ་དང་མཐུན་པའི་ཡོན་ཏན་བརྗོད་པའོ། །ཚིག་རྐང་བཞི་པས་ནི་རྒྱུ་མཚན་དེའི་ཕྱིར་ན་གཞན་དང་མཚུངས་པ་མེད་པའི་བླ་མ་རྗེ་བཙུན་གྲགས་པ་རྒྱལ་མཚན་དེ་ལ་རྩོམ་པ་པོ་བདག་ཉིད་དྭང་
9-2-24b


བའི་དད་པ་རྙོག་པ་མེད་པས་འདུད་ཅེས་པ་སྟེ། འདི་ལྟ་བུའི་བླང་དོར་གྱི་མིག་ཕྱེད་པ་ནི་བླ་མ་དེ་ཉིད་ཀྱི་བཀའ་དྲིན་ཡིན་པས་སོ་སྙམ་དུ་དགོངས་སོ། །གསུམ་པ་ནི་སྒྲིབ་གཉིས་བག་ཆགས་དང་བཅས་པའི་སྐྱོན་མེད་པ་ནི་སྤངས་པ་ཕུན་ཚོགས་ཡིན་ལ་ཐུན་མོང་དང་ཐུན་མོང་མ་ཡིན་པའི་
ཡོན་ཏན་ཀུན་གྱི་མཛོད་མངའ་བ་ནི་རྟོགས་པ་ཕུན་ཚོགས་ཡིན་ཅིང་།  དངོས་སམ་བརྒྱུད་པའི་སྒོ་ནས་གདུལ་བྱ་རྣམས་སྐལ་བ་ཇི་ལྟ་བ་བཞིན་དུ་སྡོམ་པ་གསུམ་གྱི་ཉམས་ལེན་ལ་འགོད་པར་མཛད་པས་འགྲོ་བའི་བླ་མར་གྱུར་པ་ནི་ཕྲིན་ལས་ཕུན་སུམ་ཚོགས་པ་སྟེ།  དེ་ལྟ་བུའི་ཡོན་ཏན་དང་ལྡན་པའི་
སྟོན་པ་སངས་རྒྱས་ཀྱི་ཞབས་ལ་ཕྱག་འཚལ་ལོ། །ནས་ཞེས་པ་ནི་ལྷག་མ་འདྲེན་པའི་ཚིག་སྟེ་འོག་གི་བཤད་ཅེས་པ་དང་འབྲེལ་ལོ། །གཉིས་པ་ནི་བཤད་ཅེས་པ་དྲངས་ལ།  འདི་ལ་ལྔ་ལས་ཡུལ་གང་ལ་ན།  འཕགས་པ་ལྷས།  འདུན་དང་ཞེ་སྡང་འཇིགས་པ་དང་། །རྨོངས་པས་གང་
ཞིག་ཆོས་མི་འདའ། །དེ་ནི་དད་པ་ཅན་ཞེས་བྱ། །ཞེས་གསུངས་པ་ལྟར།  འགྲོ་བ་བཞི་ཡིས་ཆོས་ལས་མི་ཕྱེད་པའི་དད་པ་དང་ལྡན་པས་ཉམས་ལེན་སངས་རྒྱས་ཀྱི་གསུང་བཞིན་དུ་བསྒྲུབ་པར་འདོད་ཀྱང་རང་ཉིད་ཀྱིས་ཇི་ལྟ་བ་བཞིན་མི་ཤེས་པ་དེ་ལའོ། །ངོ་བོ་གང་ཞེ་ན་སྡོམ་པ་གསུམ་
གྱི་དབྱེ་བའོ། །གང་ཟག་གང་གིས་ན་ས་སྐྱ་པཎྜི་ཏ་བདག་གིས་སོ། །ཚིག་སྦྱོར་གི་སྦྱོར་བ་ཅི་ལྟ་བུས་ན་མཁས་རྣམས་སོགས་སོ། །དགོས་པ་གང་གི་ཆེད་དུ་ན་བདག་ནི་སོགས་ཏེ།  རྒྱུ་མཚན་དེའི་ཕྱིར་ན་བསྟན་པ་ལ་འཁྲུལ་པར་སྤྱད་པ་རྣམས་བཀག་ནས།  བཤད་སྒྲུབ་སངས་
རྒྱས་ཀྱི་གསུང་བཞིན་དུ་ཤེས་པའི་ཆེད་དུའོ། །གཉིས་པ་ལ་གཉིས་ཏེ།  དོན་ལ་འཁྲུལ་པ་དགག་པ་དང་།  ཚིག་ལ་འཁྲུལ་པ་དགག་པའོ། །དང་པོ་ལ་གསུམ་སྟེ།  བརྗོད་བྱའི་གཙོ་བོ་ངོས་བཟུང་བའི་སྒོ་ནས་ལུས་མདོར་བསྟན།  སྡོམ་གསུམ་གྱི་ཉམས་ལེན་ཞིབ་ཏུ་བསྟན་པའི་སྒོ་ནས་
9-2-25a


ཡན་ལག་རྒྱས་པར་བཤད།  གནད་མ་འཁྲུལ་བར་བསྒྲུབ་པར་གདམས་པའི་སྒོ་ནས་མཇུག་བསྡུ་བའོ། །དང་པོ་ནི།  སོ་སོར་ཐར་པའི་སྡོམ་པ་དང་། །བྱང་ཆུབ་སེམས་པའི་སེམས་བསྐྱེད་དང་།  གསང་སྔགས་ཀྱི་ནི་དབང་བསྐུར་དང་གསུམ་ནི།  བརྗོད་བྱའི་གཙོ་
བོ་ཡིན་པས་སྐབས་གསུམ་དུ་རིམ་པ་བཞིན་དུ་སྟོན་ཏོ། །དེ་དག་གི་ལེན་པའི་ཆོ་ག་དང་།  སོ་སོའི་བསླབ་པར་བྱ་བ་ནི།  སྐབས་གསུམ་དུ་སོ་སོར་སྟོན་ནོ། །སེམས་བསྐྱེད་པའི་གནད་བདག་གཞན་བརྗེ་བའི་བྱང་ཆུབ་ཀྱི་སེམས་ནི་སྐབས་གཉིས་པར་སྟོན་ཏོ། །སྟོང་ཉིད་སྙིང་རྗེའི་སྙིང་པོ་ནི་སྐབས་
གསུམ་ཆར་དུ་ཅི་རིགས་པར་སྟོན་ནོ། །རིམ་པ་གཉིས་ཀྱི་གསང་ཚིག་ལ།  རིམ་གཉིས་མི་དགོས་པར་འདོད་པའི་ལོག་རྟོག་འགོག་པ་ནི།  ཁ་ཅིག་འཁྲུལ་དང་མ་འཁྲུལ་མེད། །ཅེས་སོགས་སུ་སྟོན་ཅིང་གསང་ཚིག་དངོས་ནི་གཞུང་འདིར་མི་སྟོན་ནོ། །ཡེ་ཤེས་ཕྱག་རྒྱ་ཆེན་པོ་དང་། །ཕྱི་དང་
ནང་གི་རྟེན་འབྲེལ་དང་། །ས་དང་ལམ་གྱི་རྣམ་བཞག་གསུམ་ནི་སྐབས་གསུམ་པར་སྟོན་ནོ། །བཅུ་གཅིག་པོ་འདི་དག་ནི་བརྗོད་བྱའི་གཙོ་བོ་བསྡུས་པ་ཡིན་ཅིང་དེ་དག་གི་ཡན་ལག་དང་བཅས་པ་ལ་འཁྲུལ་པ་འགོག་ཅིང་མ་འཁྲུལ་བ་བསྒྲུབ་པའི་རྣམ་པར་དབྱེ་བ་བཤད་ཀྱིས་ཉོན།  ཅེས་མདོར་
བསྟན་པའོ། །གཉིས་པ་ལ་གཉིས་ཏེ།  དངོས་དང་དེ་ལ་རྩོད་པ་སྤང་བའོ། །དང་པོ་ལ་གསུམ་སྟེ།  སོ་ཐར་བྱང་སེམས་སྔགས་སྡོམ་གྱི་ཉམས་ལེན་བཤད་པའོ། །དང་པོ་ལ་གསུམ་སྟེ།  བརྗོད་བྱའི་གཙོ་བོ་སོ་ཐར་གྱི་རྣམ་བཞག །བསླབ་བྱའི་རང་བཞིན་ལས་འབྲས་ཀྱི་རྣམ་བཞག། 
ཐོས་བསམ་སྒོམ་གསུམ་མ་ནོར་བས་མཇུག་བསྡུ་བའོ། །དང་པོ་ལ་གསུམ་སྟེ།  དབྱེ་བའི་སྒོ་ནས་མདོར་བསྟན།  སོ་སོའི་རང་བཞིན་རྒྱས་པར་བཤད།  གདམས་པའི་སྒོ་ནས་མཇུག་བསྡུ་བའོ། །དང་པོ་ནི་སོ་སོར་ཅེས་སོགས་ཚིག་རྐང་གཉིས་སོ། །གཉིས་པ་ལ་གཉིས་ཏེ།  ཉན་ཐོས་ཀྱི་སོ་
9-2-25b


ཐར།  ཐེག་ཆེན་གྱི་སོ་ཐར་རོ། །དང་པོ་ལ་གཉིས་ཏེ།  རིས་བདུན་གྱི་དུས་ཀྱི་རྣམ་བཞག །བསྙེན་གནས་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ།  རྣམ་བཞག་སྤྱིར་བསྟན།  དུས་ལ་ལོག་རྟོག་དགག་པའོ། །དང་པོ་ལ་གཉིས་ཏེ།  དམ་བཅའ་འགོད་པ་དང་།  སྒྲུབ་བྱེད་བཤད་པའོ། །དང་པོ་ནི། 
ཉན་ཐོས་རྣམས་ཀྱི་ཞེས་སོགས་ཚིགས་བཅད་གཉིས་ཏེ།  ཚིགས་བཅད་དང་པོས་ནི་ཉན་ཐོས་ཀྱི་སོ་ཐར་རིས་བདུན་འཆི་འཕོ་བའི་ཚེ་གཏང་བའི་དམ་བཅའ་བསྟན་ལ།  དེ་ནས་ཚིག་རྐང་གཉིས་ཀྱིས་ནི་དེ་ལྟར་ན་བསྲུང་བ་ལ་དགོས་པ་མེད་པར་འགྱུར་རོ་སྙམ་ན།  དེའི་དགོས་པ་བསྟན་ནོ། །དེ་ནས་གཉིས་ཀྱིས་དམ་བཅའ་
ངེས་པའི་ཡན་ལག་ཏུ་ཐེག་པ་ཆེ་ཆུང་གི་སྡེ་སྣོད་ཀྱི་རྣམ་དབྱེ་བསྟན་ནོ། །གཉིས་པ་ལ་གཉིས་ཏེ།  རིས་བདུན་འཆི་འཕོ་བའི་ཚེ་གཏོང་བའི་སྒྲུབ་བྱེད།  དེའི་ཡན་ལག་ཏུ་སྡེ་སྣོད་ཀྱི་རྣམ་དབྱེ་བསྟན་པའོ། །དང་པོ་ནི།  དེ་དག་ཞེས་སོགས་བཅུ་གཅིག་སྟེ།  ཉན་ཐོས་སྡེ་པའི་ལུགས་ཀྱི་སོ་སོར་ཐར་
པའི་སྡོམ་པ་ནི།  རྣམ་པར་རིག་བྱེད་མ་ཡིན་པའི་གཟུགས་གཙོ་བོ་ཡིན་ཅིང་། རིག་བྱེད་ཀྱི་གཟུགས་དང་གཉིས་སུ་འདོད་དེ།  རྣམ་རིག་མིན་རྣམ་གསུམ་ཞེས་བྱ། །སྡོམ་དང་སྡོམ་པ་མིན་དང་གཞན། །སྡོམ་པ་སོ་སོ་ཐར་ཅེས་བྱ། །དེ་བཞིན་ཟག་མེད་བསམ་གཏན་སྐྱེས། །ཞེས་དང་། 
འཆལ་བའི་ཚུལ་ཁྲིམས་མི་དགེའི་གཟུགས། །དེ་སྤང་ཚུལ་ཁྲིམས་རྣམ་གཉིས་སོ། །ཞེས་གསུངས་སོ། །ངོ་བོ་བསྒྲུབ་བྱའི་ལུས་ངག་གི་ལས་ཀྱི་ངོ་བོར་སྐྱེ་ཞིང་།  གཟུགས་ཅན་ཡིན་པའི་ཕྱིར་ན།  འཆི་འཕོ་བའི་ཚེ་གཏོང་བར་འདོད་དེ།  རྟེན་མེད་པའི་ཕྱིར།  དེ་སྐད་དུ་ཡང་མཛོད་ལས།  བསླབ་པ་
ཕུལ་དང་ཤི་འཕོས་དང་།  ཕོ་མོའི་མཚན་གཉིས་ཅིག་ཅར་བྱུང་བ་དང་།  ལོག་ལྟས་དགེ་རྩ་ཆད་པ་དང་།  མཚན་མོ་འདས་པའི་ཚེ་སོ་སོ་ཐར་པའི་འདུལ་བ་གཏོང་བར་གསུངས་པ་ནི།  ཉན་ཐོས་ཀྱི་ལུགས་འདི་ལ་སྒྲུབ་བྱེད་ཚད་མ་ཡིན་པའི་ཕྱིར།  དེ་ལ་དང་པོ་བཞི་ནི།  རིས་བརྒྱད་ཆར་གྱི་གཏོང་རྒྱུ་ཡིན་ལ།  ཕྱི་
9-2-26a


མ་ནི་བསྙེན་གནས་ཁོ་ནའི་གཏོང་རྒྱུ་ཡིན་ནོ། །གཉིས་པ་ནི་བྱང་ཆུབ་སེམས་དཔའ་ཞེས་སོགས་དྲུག་སྟེ།  བྱང་སེམས་ཀྱི་སྡོམ་པ་ནི་བསྲུང་བའི་འཕེན་སེམས་མ་ཉམས་པའམ།  རྩ་ལྟུང་སོགས་མི་མཐུན་ཕྱོགས་ཀྱིས་མ་ཉམས་པ་དེ་སྲིད་དུ་ཡོད་དེ།  བྱང་ཆུབ་མ་ཐོབ་ཀྱི་བར་ལ་སོགས་
པ་འཕེན་སེམས་ཇི་ལྟར་འདོད་པ་ལས་སྐྱེས་པའི་ཕྱིར།  དེ་ལྟ་ན་ཡང་འཆི་འཕོ་བའི་ཚེ་གཏོང་སྟེ།  གཟུགས་ཅན་ཡིན་པས་དེའི་ཚེ་རྟེན་མེད་པའི་ཕྱིར་རོ་སྙམ་ན་མི་འཐད་དེ།  གཟུགས་ཅན་མ་ཡིན་པའི་ཕྱིར་རོ། །མདོ་རྒྱུད་ཐམས་ཅད་ཀྱི་དགོངས་པ་ཡང་དེ་ཉིད་ཡིན་ཏེ།  ཞིང་གི་ཡོན་ཏན་བཀོད་པ་ལས། །
བདག་ནི་བྱང་ཆུབ་རིངས་ཚུལ་དུ། །འཚང་རྒྱར་མོས་ཤིང་སྤྲོ་བ་མེད། །ཕྱི་མཐར་ཐུག་པའི་བར་དུ་ཡང་། །སེམས་ཅན་གཅིག་ཕྱིར་སྤྱད་པར་བགྱིའོ། །ཞེས་པ་དང་།  ནོར་བུ་ཐིག་ལེའི་རྒྱུད་དུ།  བདག་ཆེ་གེ་མོ་ཞེས་བྱ་བ་དུས་འདི་ནས་ཇི་སྲིད་བྱང་ཆུབ་སྙིང་པོ་ལ་ཐུག་གི་བར་དུ་ཞེས་པ་དང་།  བྷུ་རི་
པས།  བདག་ཀྱང་དེང་ནས་བྱང་ཆུབ་བར། །ལུས་དང་སྲོག་ལ་ལྟོས་མེད་པར། །བསླབ་རྣམས་མགོན་བཞིན་བསྲུང་ལ་གནས། །ཡེ་ཤེས་ཐུགས་ཀྱིས་དགོངས་སུ་གསོལ། །ཞེས་པ་དང་།  སྤྱོད་འཇུག་ལས།  བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །
ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །ཞེས་གསུངས་སོ། །འདིར་བྱང་སེམས་ཀྱི་སྡོམ་པ་འཆི་འཕོ་བའི་ཚེ་མི་གཏོང་བའི་དམ་བཅའ་དང་།  སྒྲུབ་བྱེད་གཉིས་འབྱུང་བ་ནི་འོག་གི་ཕྱོགས་སྔ་སྨྲ་བ་པོས།  སོ་ཐར་རིས་བདུན་སེམས་ཇི་སྲིད་འཚོའི་བར་དུ་ལེན་པ་སེམས་
བསྐྱེད་རྐུ་ཐབས་མར་འདོད་པ་ལ་དེ་ནི་སྡེ་སྣོད་ཀྱི་རྣམ་དབྱེ་མ་ཤེས་པའི་ཉེས་པ་ཡིན་ཏེ།  སྲོག་ཇི་སྲིད་འཚོའི་བར་དུ་ལེན་པ་ཉན་ཐོས་ཀྱི་ལུགས་དང་།  བྱང་ཆུབ་མ་ཐོབ་ཀྱི་བར་དུ་ལེན་པ་བྱང་སེམས་ཀྱི་སྡེ་སྣོད་ཀྱི་ལུགས་ཡིན་པའི་ཕྱིར་ཞེས་བསྟན་པའི་དོན་དུ་ཡིན་ཏེ།  འོག་ཏུ་སྡེ་སྣོད་རྣམ་དབྱེ་མེད་པར་ཟད།  ཅེས་
9-2-26b


འབྱུང་བ་དང་དོན་གཅིག་གོ།  དོན་འདི་མ་རྟོགས་པར།  ཁ་ཅིག་བྱང་སེམས་དང་།  སོ་ཐར་གཉིས་ཀའི་དུས་བསྟན་པ་སྐབས་སུ་བབ་ཅེས་པ་དང་།  ཁ་ཅིག་བྱང་སེམས་ཞར་བྱུང་ཙམ་ཡིན་ནོ་ཞེས་སྨྲ་བ་ནི།  གཞུང་དོན་རྟོགས་པའི་བློ་གྲོས་མེད་པར་ཟད་དོ། །གཉིས་པ་ལ་གཉིས་ཏེ།  ཕྱོགས་སྔ་
མ་བརྗོད་པ་དང་།  དེ་དགག་པའོ། །དང་པོ་ནི་ཁ་ཅིག་ཅེས་སོགས་གཉིས་ཏེ།  འབྲི་ཁུང་པ་རྣམས་ན་རེ།  ཇི་སྲིད་འཚོའི་སྒྲ།  ལུས་ཇི་སྲིད་འཚོ་བ་དང་།  སེམས་ཇི་སྲིད་འཚོ་བ་གཉིས་ལ་འཇུག་པ་ལས་སོ་ཐར་རིས་བདུན་ཇི་སྲིད་འཚོའི་བར་དུ་ལེན་པ་ནི།  སེམས་ལ་དགོངས་པ་ཡིན་ཏེ།  འདི་
ནི་སེམས་བསྐྱེད་རྐུ་ཐབས་མ་ཡིན་ནོ། །ཞེས་སྨྲའོ། །གཉིས་པ་ལ་གསུམ་ཏེ།  སྒྲུབ་བྱེད་མེད་པས་མདོར་བསྟན།  གནོད་བྱེད་ཡོད་པས་རྒྱས་པར་བཤད།  སྨད་པའི་གནས་སུ་བསྟན་པས་མཇུག་བསྡུ་བའོ། །དང་པོ་ནི་དེ་འདྲ་ཞེས་སོགས་གཉིས་ཏེ།  རིས་བདུན་བྱང་ཆུབ་མ་ཐོབ་ཀྱི་བར་དུ་ལེན་
པ་ནི་སངས་རྒྱས་ཀྱི་མདོ་རྒྱུད་ལས་མ་བཤད་ཅིང་།  རྒྱན་དྲུག་མཆོག་གཉིས་ལ་སོགས་པ་མཁས་པའི་གཞུང་ལས་ཀྱང་མ་བཤད་པས་མི་འཐད་དོ། །གཉིས་པ་ལ་གཉིས་ཏེ།  གནོད་བྱེད་ཀྱི་རིགས་པ་དངོས།  དེའི་ཉེས་སྤོང་གི་ལན་དགག་པའོ། །དང་པོ་ནི།  དེ་ལྟ་ཡིན་ཞེས་སོགས་བཅུ་སྟེ།  ཐེག་
པ་ཆེ་ཆུང་གི་སྡོམ་པ་དུས་ཀྱི་སྒོ་ནས་ཁྱད་པར་མི་འབྱེད་ན།  ཁྱད་པར་གཞན་གྱི་སྒོ་ནས་ཀྱང་མི་འབྱེད་པར་མཚུངས་ཤིང་།  ཤི་འཕོས་པ་གཏོང་རྒྱུ་མིན་ན།  གཏོང་རྒྱུ་གཞན་རྣམས་ཀྱང་གཏོང་རྒྱུ་མ་ཡིན་པར་མཚུངས་པའོ། །གཉིས་པ་ལ་གཉིས་ཏེ།  ཉེས་སྤོང་བརྗོད་པ་དང་།  དེ་དགག་པའོ། །དང་པོ་ནི་
དེ་ལ་ཅེས་སོགས་ལྔའོ། །གཉིས་པ་ལ་བཞི་སྟེ།  གཏོང་རྒྱུ་གཞན་ཡང་མཚུངས་པར་ཐལ་བ།  འདོད་པ་ལ་གནོད་པ་བསྟན་པ།  རྩ་བའི་ཉེས་སྤང་ལ་གནོད་པ་བསྟན་པ།  བསྙེན་གནས་ལའང་མཚུངས་པར་ཐལ་བའོ། །དང་པོ་ནི།  འོ་ན་སེམས་བསྐྱེད་སོགས་ལྔའོ། །གཉིས་པ་ནི་དེ་ལྟ་ཡིན་ན་
9-2-27a


ཅེས་སོགས་གསུམ་མོ། །གསུམ་པ་ནི་ཤི་འཕོས་ནས་ཀྱང་ཞེས་སོགས་བཅུ་གཅིག་སྟེ།  ལྷའི་དགེ་སློང་འདུལ་བ་ནས་བཀག་པ་ནི་མདོ་རྩར་མི་མ་ཡིན་པའི་འགྲོ་བ་པ་ནི་སྡོམ་པའི་ཞིང་ཉིད་མ་ཡིན་ནོ་ཞེས་གསུངས་སོ། །བྱིས་པའི་དགེ་སློང་བཀག་པ་ནི་ལས་ཀྱི་གཞིར་ལོ་ཉི་ཤུ་མ་ལོན་
པ་མ་ཡིན་ནམ་ཞེས་གསུངས་སོ། །བཞི་པ་ནི།  སེམས་བསྐྱེད་ལྡན་པའི་ཞེས་སོགས་དྲུག་གོ།  གསུམ་པ་ནི་དེས་ན་སོ་སོར་ཞེས་སོགས་བཞི་སྟེ།  ཉན་ཐོས་ཀྱི་སོ་ཐར་རིས་བདུན་ཤི་ཡང་ཡོད་པར་སྨྲ་བ་ལ།  སྡེ་སྣོད་ཀྱི་རྣམ་དབྱེ་མེད་པའི་སྐྱོན་བསྟན་པ་ཡིན་ཏེ།  དེ་འགོག་པའི་སྐབས་ཡིན་པའི་ཕྱིར་རོ། །
སོ་ཐར་ཙམ་ལ་ནི་མ་ཡིན་ཏེ།  རྗེ་བཙུན་རྩེ་མོས་བྱང་སེམས་ཀྱི་སྡོམ་པ་ལ་སོ་ཐར་གྱིས་ཁྱབ་པར་གསུངས་ཤིང་རྩ་ལྟུང་འཁྲུལ་སྤོང་དུ་དབང་བསྐུར་གྱི་ཆོ་ག་གཅིག་པུ་ལ་བརྟེན་ནས་སྡོམ་པ་གསུམ་ཀ་ཐོབ་པར་གསུངས་པ་དང་།  འདིར་ཡང་དབང་བཞི་བླངས།  དེ་ཡིས་སྡོམ་པ་གསུམ་ལྡན་འགྱུར།  ཅེས་གསུངས་
པས།  དེ་ལྟ་བུའི་སོ་ཐར་ནི་སྡོམ་པ་གཞན་གཉིས་པོ་མ་བཏང་བའི་བར་དུ་ཡོད་པའི་ཕྱིར་རོ། །གཉིས་པ་བསྙེན་གནས་བྱེ་བྲག་ཏུ་བཤད་པ་ལ་གཉིས་ཏེ།  རྣམ་གཞག་སྤྱིར་བསྟན་པ་དང་།  ལོག་རྟོག་བྱེ་བྲག་ཏུ་དགག་པའོ། །དང་པོ་ལ་གཉིས་ཏེ།  ཉན་ཐོས་སྡེ་གཉིས་ཀྱི་བསྙེན་གནས་ཀྱི་ཁྱད་པར། 
ཐེག་པ་ཆེ་ཆུང་གི་བསྙེན་གནས་ཀྱི་ཁྱད་པར་རོ། །དང་པོ་ནི་བྱེ་བྲག་སྨྲ་བའི་ཞེས་སོགས་བརྒྱད་དེ།  བྱེ་བྲག་ཏུ་སྨྲ་བའི་ལུགས་ལ་རིས་བདུན་དུ་མ་ཟད།  བསྙེན་གནས་ཀྱང་དགེ་སློང་ལས་ལེན་ཏེ།  འདུལ་བ་ལས་བསྙེན་པར་མ་རྫོགས་པ་དག་ནི།  བསྙེན་པར་རྫོགས་པའི་དགེ་འདུན་གྱིས་ཡོངས་སུ་བཟུང་
བ་ཙམ་མོ་ཞེས་གསུངས་པ་ལྟར།  བསྙེན་པར་མ་རྫོགས་པ་དག་གིས་གཞན་ལ་སྡོམ་པ་འབོགས་པ་མི་དབང་བའི་ཕྱིར་རོ། །རྟེན་གྱི་གང་ཟག་ཀྱང་གླིང་གསུམ་གྱི་སྐྱེས་པ་དང་།  བུད་མེད་ལས་གཞན་ལ་སྡོམ་པ་བཀག་སྟེ།  མཛོད་ལས།  ཟ་མ་མ་ནིང་སྒྲ་མི་སྙན། །མཚན་གཉིས་མ་གཏོགས་མི་
9-2-27b


རྣམས་ལ། །སྡོམ་མིན་སྡོམ་པའང་དེ་བཞིན་ལ། །ཞེས་གསུངས་སོ། །མདོ་སྡེ་པ་ནི་འགྲོ་བ་གཞན་ལའང་སྐྱེ་བར་འདོད་དེ་ཀླུ་གཞོན་ནུ་ཙམ་པ་ཞེས་བྱ་བ་དུས་བཟང་ལ་ཡན་ལག་བརྒྱད་ཀྱི་བསྙེན་གནས་བསྲུང་བ་དང་།  རྒྱ་མཚོའི་ཀླུ་རྣམས་དུས་བཟང་ལ་རྒྱ་མཚོ་ནས་བྱུང་སྟེ།  གསོ་སྦྱོང་ལེན་པ་ལ་སོགས་
གསུངས་པ་རྣམས་སྒྲ་ཇི་བཞིན་དུ་འཆད་པའི་ཕྱིར་རོ། །ཡུལ་ཡང་དགེ་སློང་ཁོ་ན་ལས་ལེན་པའི་ངེས་པ་མེད་དེ།  དྲང་སྲོང་གནས་འཇོག་གིས་ཞུས་པའི་མདོ་ལས།  དགེ་སྦྱོང་ངམ་བྲམ་ཟེའམ།  རབ་ཏུ་བྱུང་བ་ཆོ་ག་ཤེས་པ་གཅིག་གི་གམ་དུ་སོང་སྟེ།  ཞེས་བཤད་པ་དང་།  ཁྱིམ་བདག་མགོན་མེད་ཟས་
སྦྱིན་གྱིས།  རང་གི་འཁོར་འབངས་རྣམས་བསྙེན་གནས་ལ་བཀོད་པར་གསུངས་པ་རྣམས་སྒྲ་ཇི་བཞིན་དུ་འཆད་པའི་ཕྱིར་རོ། །གཉིས་པ་ནི་ཉན་ཐོས་རྣམས་ནི།  ཞེས་སོགས་དྲུག་སྟེ།  ཉན་ཐོས་ཀྱི་བསྙེན་གནས་དང་།  ཐེག་ཆེན་གྱི་བསྙེན་གནས་ལ་ཆོ་གའི་ཁྱད་པར་ཡོད་དེ།  ཉན་ཐོས་ཀྱི་བསྙེན་
གནས་ནི་སྐྱབས་འགྲོ་རྩོམ་བྱེད་དུ་བྱས་ནས།  གང་ཟག་གཞན་གྱིས་འབོགས་ལ།  དོན་ཡོད་ཞགས་པའི་རྟོགས་པ་ནས་གསུངས་པའི་བསྙེན་གནས་ནི་རྟེན་གྱི་དྲུང་དུ་རང་ཉིད་ཀྱིས་ལེན་པའི་ཆོ་ག །ཐེག་ཆེན་སེམས་བསྐྱེད་དང་འདྲ་བར་གསུངས་པའི་ཕྱིར་རོ། །གཉིས་པ་ལ་གསུམ་སྟེ།  བསྙེན་
གནས་འབུལ་བ་དགག་པ།  བཅོལ་བ་དགག་པ།  ལྷ་སྒོམ་ཐ་དད་དགག་པའོ། །དང་པོ་ནི།  ལ་ལ་བསྙེན་གནས་ཞེས་སོགས་དགུ་སྟེ།  བཀའ་གདམས་པ་ལ་ལ་ན་རེ།  བསྙེན་གནས་ཉིན་པར་བསྲུང་བའི་སང་ནངས་པར་འབུལ་དགོས་ཏེ།  མ་ཕུལ་ན་དེ་དང་འགལ་བའི་ཉེས་པ་བྱས་ན་ཉམས་པར་འགྱུར་
བའི་ཕྱིར་ཞེས་ཟེར་རོ། །དེ་ནི་མི་འཐད་དེ།  མཚན་མོ་འདས་པ་ན་གཏོང་བའི་ཕྱིར་རོ། །མདོ་སྡེ་པའི་ལུགས་ཀྱི་ཇི་ལྟར་འདོད་པའི་ཚེ་སྲུང་བ་ནི།  མཛོད་འགྲེལ་ལས།  གང་གིས་ཚེས་བརྒྱད་ལ་རྟག་ཏུ་བསྙེན་གནས་ལ་གནས་པར་བྱའོ། །ཞེས་སྔོན་ཡང་དག་པར་བླངས་པ་དེས་ནི་ཟན་ཟོས་ཀྱང་
9-2-28a


ནོད་པར་བྱའོ། །ཞེས་དང་།  རྒྱལ་པོའི་སྲས་ཀྱིས་སྡོམ་པ་ནི་སྤང་བར་བྱེད་པ་ཡང་དག་པར་ལེན་པར་ངེས་པའི་སེམས་ཡིན་པའི་ཕྱིར།  ཉི་མ་འཆར་བའི་ཚེ་ཁོ་ན་སྐྱེའོ། །ཟན་ཟོས་ནས་ནོད་པ་ནི་བསལ་བའི་ཕྱིར་རོ། །ཞེས་གསུངས་པ་ལྟར་ཟླ་བ་བྱུང་ངོ་ཅོག་གི་ཚེས་བརྒྱད་ལ་
བསྙེན་གནས་བསྲུང་བར་ལན་གཅིག་བླངས་པ་ཡིན་ལ།  འདི་ལ་ཡང་ནམ་བསྲུང་བ་དེའི་ནངས་པར་ཕན་ཆད་སོགས་སོ། །གཉིས་པ་ནི་ལ་ལ་ཞེས་སོགས་གཉིས་ཏེ།  ཆོས་རྒྱུས་ཆུང་བ་ལ་ལ་ན་རེ།  བསྙེན་གནས་བསྲུངས་ནས་སླར་ཡང་བསྲུང་འདོད་ན།  ནད་པར་གཞན་ལ་བཅོལ་དགོས་ཏེ། 
གཞན་དུ་ན་སླར་ལེན་དུ་མེད་པའི་ཕྱིར་རོ། །ཞེས་ཟེར་རོ། །དེ་ནི་མ་ཡིན་ཏེ།  དེ་འདྲ་གང་ནས་ཀྱང་མ་བཤད་པའི་ཕྱིར་རོ། །གསུམ་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ནི།  ཁ་ཅིག་བསྙེན་གནས་ཞེས་སོགས་བཞི་སྟེ།  བཀའ་གདམས་བྱ་ཡུལ་བ་ན་རེ།
བསྙེན་གནས་བསྲུང་བའི་ཚེ།  ཉ་དང་གནམ་སྟོང་ཚེས་བརྒྱད་གསུམ་ལ་ཤཱཀྱ་ཐུབ་པ།  སྣང་བ་མཐའ་ཡས།  སྨན་བླ་གསུམ་གྱི་ལྷ་བསྒོམ་པ་དང་སྔགས་བཟླས་པ་ཐ་དད་དུ་མ་བྱས་ན་བསྲུང་དུ་མི་རུང་ཞེས་ཟེར་རོ། །གཉིས་པ་ནི་འདི་ཡང་རེ་ཤིག་ཅེས་སོགས་བཅུ་སྟེ།  གཞན་རྣམས་ནི་རྟོགས་
པར་སླ་ལ།  འོན་ཀྱང་ཞེས་སོགས་ཀྱི་དོན་ནི།  བསྙེན་གནས་སྲུང་བ་པོ་དེ་གསང་སྔགས་ཀྱི་ཏིང་ངེ་འཛིན་གཙོ་བོར་བྱེད་པ་ཡིན་ན་དེའི་ཚེ་ཡི་དམ་བསྒོམ་པ་བསོད་ནམས་ཆེ་སྟེ་སྡོམ་པ་དང་ལྡན་པའི་རྟེན་ལ་དགེ་བ་བསྒྲུབ་པ་ཡིན་པའི་ཕྱིར་རོ། །གཉིས་པ་ཐེག་ཆེན་སོ་ཐར་ལ་གཉིས་ཏེ།  ཉན་པར་
གདམས་པ་དང་།  དོན་དངོས་སོ། །དང་པོ་ནི་ཐེག་པ་ཆེན་པོ་ཞེས་སོགས་གཉིས་སོ། །གཉིས་པ་ལ་གསུམ་སྟེ།  ལེན་པའི་ཆོ་ག །བསླབ་བྱའི་ཁྱད་པར།  གཏོང་བའི་ཚུལ་ལོ། །དང་པོ་ལ་གཉིས་ཏེ།  ཆོ་ག་ཐུན་མོང་མ་ཡིན་པ་དང་།  ཆོ་ག་ཐུན་མོང་པའོ། །དང་པོ་གཉིས་ཏེ།  ད་ལྟར་གྱི་
9-2-28b


ཆོ་ག་དང་།  སྔོན་གྱི་ཆོ་གའོ། །དང་པོ་ལ་གཉིས་ཏེ།  ཆོ་ག་ནུབ་པ་དང་།  ཆོ་ག་མ་ནུབ་པའོ། །དང་པོ་ནི་བྱང་ཆུབ་སེམས་དཔའ་ཞེས་སོགས་བཞི་སྟེ།  ཉན་ཐོས་ཀྱི་སྡེ་སྣོད་ལ་མ་ལྟོས་པར་བྱང་ཆུབ་སེམས་དཔའི་སྡེ་སྣོད་ཉིད་ལ།  སོ་ཐར་འབོགས་པའི་ཆོ་ག་འགའ་ཞིག་ཡོད་དེ།  ཆོ་འཕྲུལ་
བསྟན་པའི་མདོར་སྔོན་བསྐལ་པ་མངོན་པར་དགའ་བ་ལ།  འཇིག་རྟེན་གྱི་ཁམས་བདེ་བ་ཞེས་བྱ་བར་རྒྱལ་བ་རི་རབ་ལྟ་བུ་ལ།  འཁོར་ལོས་སྒྱུར་རྒྱལ་དགེ་བའི་བཀོད་པས་རྗེས་སུ་མཐུན་པའི་བཟོད་པ་ཐོབ་ནས་རབ་ཏུ་བྱུང་ཞིང་སྲས་སྙིང་རྗེ་ཆེར་སེམས་རྒྱལ་སར་བསྐོས་པས་དེ་ཉིད་ཀྱང་།  རབ་བྱུང་ཡོན་ཏན་
དུ་མ་བསགས་པ་ཞེས། །དེ་བཞིན་གཤེགས་པ་རྣམས་ཀྱིས་གསུངས་མོད་ཀྱི། །དེ་ལྟར་ལགས་ཀྱང་སྙིང་རྗེར་གྱུར་པ་ན། །འགྲོ་ལ་ཕན་ཕྱིར་རྒྱལ་སྲིད་བདག་གིས་བསྒྲུབ། །ཇི་སྲིད་འཚོ་བར་བདག་ནི་ཚངས་སྤྱོད་ཅིང་། །གསོ་སྦྱོང་ཡན་ལག་བརྒྱད་པ་བླང་བར་བྱ། །ཞེས་གསུངས་པ་དང་།  རྣམ་
པར་གཏན་ལ་དབབ་པ་བསྡུ་བ་ལས།  དགེ་སློང་གི་སྡོམ་པ་མ་གཏོགས་པའི་སོ་ཐར་གཞན་རྣམས་རང་ཉིད་ཀྱིས་ལེན་པའི་རྣམ་གཞག་གསུངས་པ་ལྟ་བུའོ། །འོན་ཀྱང་དེ་དག་ནི་དེང་སང་ནུབ་བོ། །ཕལ་ཆེར་གྱི་སྒྲ་ནི་འོག་མ་འདྲེན་ནོ། །གཉིས་པ་ནི།  གསོ་སྦྱོང་ཞེས་སོགས་གཉིས་ཏེ། 
དེང་སང་ལག་ལེན་ཡོད་པ་ནི།  དོན་ཡོད་ཞགས་པའི་རྟོགས་པ་ནས་བཤད་པའི་གསོ་སྦྱོང་རང་གིས་བླང་བའི་ཆོ་ག་དང་སོགས་ཀྱིས་བསྟན་པ་དབུ་མ་ལུགས་ཀྱི་སེམས་བསྐྱེད་ཀྱི་སྔོན་དུ་སྐྱབས་འགྲོའི་སྡོམ་པ་ལེན་པ་ལྟ་བུ་སྟེ།  འདི་ནི་སྐྱབས་འགྲོའི་སྡོམ་པ་ཡིན་པས།  སོ་ཐར་གྱི་ལྡོག་པ་
ནས་བསྟན་ལ།  བྱང་ཆུབ་མ་ཐོབ་ཀྱི་བར་དུ་ལེན་པ་ཡིན་པས།  ཐེག་ཆེན་ཐུན་མོང་མ་ཡིན་པར་ཡང་འཐད་པའི་ཕྱིར་རོ། །ཁ་ཅིག་འདིའི་སོགས་ཁོངས་ནས་འོག་གི་རྒྱལ་སྲས་བྱམས་པ་འཇམ་དབྱངས་སོགས་ཀྱིས་འགྲོ་བ་མང་པོ་ལ་བསྙེན་རྫོགས་མཛད་ཚུལ་འདྲེན་པ་ནི།  སྨྲ་བ་པོ་
9-2-29a


དེ་ཉིད་ལ་སེམས་མེད་པ་གསལ་བར་བྱས་ཏེ།  གཞན་དུ་ན།  ད་ལྟའི་ཆོ་གའི་ལག་ལེན་ཡོད་པའི་མཚན་གཞིར།  ཆོ་ག་མདོ་ལས་གསུངས་པ་ཙམ་ཡང་མ་མཐོང་བ་བཟུང་བ་ནི།  སུ་ཞིག་གིས་སྨྲ་བར་ནུས།  དེས་ན་འཆད་ཚུལ་འདི་ལྟ་བུའི་རིགས་ཅན་ལ་ཡིད་བརྟན་པར་མི་
བྱའོ། །གཉིས་པ་ནི།  རྒྱལ་སྲས་བྱམས་པ་ཞེས་སོགས་དགུ་སྟེ།  ཁྱིམ་པ་དྲག་ཤུལ་ཅན་གྱིས་ཞུས་པར།  རྒྱལ་སྲས་བྱམས་པས་ཁྱིམ་བདག་དགུ་སྟོང་དང་།  རྒྱལ་སྲས་སྤྱོད་པ་རྣམ་དག་སྟེ་འཇམ་པའི་དབྱངས་ཀྱིས་ཁྱིམ་བདག་བདུན་སྟོང་རབ་ཏུ་བྱུང་ཞིང་།  བསྙེན་པར་རྫོགས་པར་
མཛད་དོ། །ཞེས་པའི་ཚིག་འབྲུ་ཙམ་ཞིག་གསུངས་མོད་ཀྱི་ཆོ་ག་ཅི་ལྟ་བུས་མཛད་པ་མདོ་སྡེ་ལས་མ་གསུངས་ཤིང་།  ཁྱིམ་པའི་ཆ་ལུགས་ཅན་གྱིས་བསྒྲུབ་བྱ་ཁྱིམ་པའི་རྟགས་མ་སྤངས་པའི་བསྙེན་རྫོགས་མཛད་ཚུལ་འདི་འདྲ་བ་ནི།  འཕགས་པ་ཁོ་ནའི་སྤྱོད་ཡུལ་ཡིན་པས།  སོ་སོའི་སྐྱེ་བོས་བྱར་མི་
རུང་ངོ་། །གཉིས་པ་ནི་དེས་ན་ད་ལྟའི་ཞེས་སོགས་ལྔ་སྟེ།  བསྙེན་གནས་ལས་མ་གཏོགས་པའི་བྱང་སེམས་རང་ལུགས་ཀྱི་སོ་ཐར་ལེན་པའི་ཆོ་ག་ད་ལྟ་མེད་པ་དེས་ན། ད་ལྟ་ཐེག་ཆེན་སོ་ཐར་ལེན་པའི་ཆོ་ག་ནི།  བསམ་པ་ཐེག་ཆེན་སེམས་བསྐྱེད་ཀྱིས་ཟིན་པའི་ཆོ་ག་ཉན་ཐོས་ཇི་ལྟ་བ་བཞིན་དུ་བགྱིས་ཏེ།  ཆོ་
ག་དེ་ལ་བརྟེན་ནས་སོ་ཐར་གྱི་སྡོམ་པ་ཐོབ་ཅིང་ཀུན་སློང་གི་སྒོ་ནས་ཐེག་པ་ཆེན་པོའི་སྡོམ་པར་འགྱུར་བའི་ཕྱིར་རོ། །འདི་ལྟ་བུ་ནི་བྱང་སེམས་ཀྱི་སྡོམ་པ་ཡང་ཡིན་ཏེ།  བྱང་སར་བྱང་སེམས་ཀྱི་སྡོམ་པའི་ངོ་བོ་ཉེས་སྤྱོད་སྤོང་བ་དང་།  དགེ་བ་ཆོས་སྡུད་དང་།  སེམས་ཅན་དོན་བྱེད་གསུམ་དུ་བསྡུས་ནས།  ཉེས་སྤྱོད་
སྤོང་པའི་ཚུལ་ཁྲིམས་ནི།  སོ་སོ་ཐར་པ་རིས་བདུན་ལ་བཤད་པའི་ཕྱིར་རོ། །གཉིས་པ་ལ་གཉིས་ཏེ།  ཉན་པར་གདམས་པ།  ཁྱད་པར་སོ་སོར་བཤད་པའོ། །དང་པོ་ནི་དེ་ནས་ཞེས་སོགས་གསུམ་མོ། །གཉིས་པ་ནི།  འདི་ལ་སྡིག་ཏོ་ཞེས་སོགས་ཚིགས་བཅད་བཞི་སྟེ།  ཐེག་ཆེན་གྱི་སོ་ཐར་འདི་
9-2-29b


ལ།  སྡིག་ཏོ་མི་དགེ་བའི་ཕྱོགས།  རང་བཞིན་གྱིས་ཁ་ན་མ་ཐོ་བ་འདི་ནི།  ཉན་ཐོས་ཀྱི་ལུགས་བཞིན་དུ་བསྲུང་དགོས་ཏེ།  ཉེས་སྤྱོད་སྤང་བའི་ཚུལ་ཁྲིམས་དང་དོན་གཅིག་གོ།  རང་འདོད་ཀྱིས་དབེན་པའི་ལྟུང་བ་འགའ་ཞིག་ནི།  བྱང་ཆུབ་སེམས་དཔའི་ལུགས་བཞིན་དུ་བསྲུང་དགོས་ཏེ།  གཞན་དོན་
དུ་འགྱུར་ན་ལུས་ངག་གི་བཅས་པ་ཐམས་ཅད་གནང་བའི་ཕྱིར་རོ། །འཇིག་རྟེན་ལས་འདས་པའི་སྤྱོད་པ་ཐེག་པ་ཆེ་ཆུང་མཐུན་པ་ནི་འབད་པས་བསྲུང་དགོས་ཏེ།  སྤྱོད་འཇུག་ལས།  འཇིག་རྟེན་མ་དད་གྱུར་པའི་ཆ། །མཐོང་དང་དྲིས་ཏེ་སྤང་བར་བྱ། །ཞེས་གསུངས་སོ། །འཇིག་རྟེན་འཇུག་
པའི་རྒྱུར་འགྱུར་ན། །ཐེག་ཆེན་སོ་ཐར་ལ་གནང་སྟེ། །དེ་ཉིད་ལས།  ཐུགས་རྗེ་མངའ་བ་རིང་གཟིགས་པས། །བཀག་པ་རྣམས་ཀྱང་དེ་ལ་གནང་། །ཞེས་གསུངས་སོ། །དཔེར་ན་ཉན་ཐོས་ལ་གསེར་དངུལ་ལེན་པ་སྤང་ལྟུང་དུ་བཅས་ཤིང་།  སྡོམ་པ་ཉི་ཤུ་པར།  གསེར་ལ་སོགས་པ་ལེན་མི་
བྱེད།  ཞེས་གཞན་དོན་དུ་གསེར་དངུལ་མི་ལེན་པ་ལྟུང་བར་བཅས་པ་དང་།  ཉན་ཐོས་ལ་འདོད་ཆེན་པོ་སྟེ་མངོན་ཚན་ཅན་ཉོ་ཚོང་ལ་སྤང་ལྟུང་དུ་བཅས་ཤིང་།  ཚུལ་ཁྲིམས་ལེའུར་གཞན་གྱི་དོན་དུ་འགྱུར་ན།  གོས་བརྒྱ་སྟོང་རྙེད་ཀྱང་ཉེ་དུར་མི་འོང་བའི་བྲམ་ཟེ་དང་།  ཁྱིམ་བདག་ལས་བཙལ་བར་
བྱའོ། །སྐབས་འབྱེད་པ་ཡོད་ན།  ཆོག་གམ་མི་ཆོག་བརྟགས་ནས་ཇི་ཙམ་དགོས་པ་བླང་བར་བྱ།  ལྷུང་བཟེད་བཙལ་བ་དང་།  ཐགས་ཀྱི་རྒྱུ་སྐུད་པ་བླང་བ་དང་།  འཐག་ཏུ་གཞུག་པ་དང་།  གཞན་དོན་དུ་མོན་དར་གྱི་གདིང་བ་དང་།  མལ་སྟན་བརྒྱ་རྙེད་ཀྱང་བསྟབ་པར་བྱ།  གསེར་དངུལ་
སྲང་བྱེ་བ་འབུམ་ཕྲག་ལས་ལྷག་པ་ཡང་བདག་གིར་བྱའོ། །ཞེས་གསུངས་པ་ལྟ་བུའོ། །འོ་ན་འདི་དག་ཉན་ཐོས་ཀྱི་དགེ་སློང་ལ།  གཞན་དོན་ཡིན་ཀྱང་ལྟུང་བར་འགྱུར་བ་དང་།  བྱང་ཆུབ་སེམས་དཔའི་དགེ་སློང་ལ་གཞན་དོན་དུ་ལྟུང་བར་མི་འགྱུར་བའི་ཁྱད་པར་གང་ཡིན་ཞེ་ན།  ཉན་ཐོས་
9-2-30a


ནི་གཙོ་བོར་རང་དོན་སྒྲུབ་པ་ཡིན་པས།  འདི་དག་གི་བསྒྲུབ་བྱའི་གཙོ་བོ་ལ་གནོད་པའི་ཕྱིར་དང་།  བྱང་ཆུབ་སེམས་དཔའ་ནི་གཞན་དོན་གཙོ་བོར་བསྒྲུབ་པ་ཡིན་པས།  དོན་དུ་གཉེར་བྱའི་གཙོ་བོ་ལ་ཕན་འདོགས་པའི་ཕྱིར།  གསུམ་པ་ནི་ཐེག་ཆེན་སོ་སོ་ཐར་ཞེས་
སོགས་ལྔ་སྟེ།  བསམ་པ་སེམས་བསྐྱེད་ཀྱིས་ཟིན་པའི་སོ་ཐར་རིས་བརྒྱད་པོ་ལ་སྡོམ་པའི་ལྡོག་པ་དང་།  ཀུན་སློང་བྱང་ཆུབ་སེམས་ཀྱི་ལྡོག་པ་གཉིས་ལས།  དང་པོ་ནི།  ཤི་འཕོས་པའི་ཚེ་གཏོང་སྟེ།  ཇི་སྲིད་འཚོའམ་ཉིན་ཞག་གི་མཐའ་ཅན་གྱི་སྡོམ་པ་ཡིན་པའི་ཕྱིར་རོ། །ཕྱི་མ་སྡོམ་པའི་
འབྲས་བུ་ནི།  ཤི་འཕོས་ནས་ཀྱང་འབྱུང་སྟེ།  གཏོང་རྒྱུ་མ་བྱུང་བའི་ཕྱིར་རོ། །འདི་དག་གི་རྣམ་གཞག་རྒྱས་པར་ནི་སྤྱི་དོན་དུ་བལྟ་བར་བྱའོ། །ཁ་ཅིག་འདི་ལ།  དགེ་སློང་གི་སྡོམ་པའི་ལྡོག་པ་དང་བྱང་སེམས་ཀྱི་སྡོམ་པའི་ལྡོག་པ་གཉིས་ལས།   སྔ་མ་གཏོང་ཞིང་།  ཕྱི་མ་མི་གཏོང་བར་སྨྲ་བ་ནི་མི་
འཐད་དེ།  བྱང་ཆུབ་སེམས་ཀྱིས་ཟིན་པའི་དགེ་སློང་ལ་སོགས་པའི་དགེ་སློང་གི་སྡོམ་པ་འཆད་པའི་སྐབས་ཡིན་ཅིང་།  དེ་ལ་ཤི་འཕོས་པའི་ཚེ་མི་གཏོང་རྒྱུའི་སྡོམ་པ་མེད་པའི་ཕྱིར་དང་།  གཞུང་ལས་ཀྱང་བྱང་ཆུབ་སེམས་ཀྱི་ལྡོག་པ་ཞེས་བཤད་ཀྱི།  བྱང་སེམས་ཀྱི་སྡོམ་པའི་ལྡོག་པ་
ཞེས་མ་བཤད་པའི་ཕྱིར་རོ། །གཞན་དག་དགེ་སློང་གི་སྡོམ་པའི་ལྡོག་པ་གཏོང་།  ངོ་བོ་མི་གཏོང་བར་འདོད་པ་ལ་ནི།  ཤི་ཡང་དགེ་སློང་མི་འདོར་ན། །ཞེས་སོགས་ཀྱི་གནོད་པ་མཐའ་དག་འབབ་པར་འགྱུར་བས་བག་ཡོད་པར་གྱིས་ཤིག །གསུམ་པ་གདམས་པའི་སྒོ་ནས་མཇུག་བསྡུ་བ་ནི། 
གོང་གི་སོ་སོར་ཐར་པ་ཞེས་སོགས་གཉིས་སོ། །གསུམ་པ་བསླབ་བྱའི་རང་བཞིན་ལས་འབྲས་ཀྱི་རྣམ་བཞག་ལ་གཉིས་ཏེ།  ལས་འབྲས་ཀྱི་རྣམ་གཞག་སྤྱིར་བསྟན།  འཁྲུལ་པ་དགག་པ་རྒྱས་པར་བཤད་པའོ། །དང་པོ་ལ་གསུམ་སྟེ།  ཉན་པར་གདམས་པ།  དབྱེ་བ་དངོས།  མཇུག་
9-2-30b


བསྡུ་བའོ། །དང་པོ་ནི།  དེ་ནས་ཞེས་སོགས་གཉིས་སོ། །གཉིས་པ་ལ་ལྔ་སྟེ།  གསུམ་དུ་དབྱེ་བ།  གཉིས་སུ་དབྱེ་བ།  བཞིར་དབྱེ་བ།  གཉིས་སུ་དབྱེ་བ་གཞན་བསྟན་པ།  གསུམ་དུ་དབྱེ་བ་གཞན་བསྟན་པའོ། །དང་པོ་ལ་གཉིས་ཏེ།  དབྱེ་བ་དངོས་དང་།  དབྱེ་བའི་དགོས་པའོ། །དང་པོ་ནི།
ལས་ལ་དགེ་སྡིག་ཞེས་སོགས་ཚིགས་བཅད་གཉིས་སོ། །གཉིས་པ་ནི་འདི་དག་ཞེས་སོགས་ཚིགས་བཅད་གཅིག་སྟེ།  ཆོས་དབྱིངས་ནི་དགེ་བ་དང་སྡིག་པ་མ་ཡིན་ཏེ།  དགེ་སྡིག་ཡིན་ན་རྩོལ་བས་བྱས་པའི་འདུས་བྱས་ཡིན་དགོས་པ་ལས།  ཆོས་དབྱིངས་འདུས་མ་བྱས་ཡིན་པའི་ཕྱིར།  འདིར་དབྱེ་སྒོ་
དང་པོ་གཉིས་ཀྱི་སྐབས་སུ།  ཆོས་དབྱིངས་དགེ་སྡིག་ལས་གྲོལ་བར་བསྟན་པའི་གཞུང་འབྱུང་བ་ནི།  གཞན་གསུམ་ལ་མཚོན་ནས་ཤེས་པར་བྱ་སྟེ།  ཆོས་དབྱིངས་དགེ་བར་འདོད་པའི་ལོག་རྟོག་དགག་པའི་ཆེད་དུ།  ཐོག་མར་ལས་འབྲས་ཀྱི་རྣམ་བཞག་སྟོན་པ་ཡིན་པའི་ཕྱིར་རོ། །འཁྲུལ་པ་དགག་པའི་
སྔོན་དུ་དེ་དང་དེའི་རྣམ་གཞག་སྤྱིར་བསྟན་པ་ནི།  གོང་འོག་ཀུན་ཏུ་ཤེས་པར་བྱའོ། །གཉིས་པ་ལ་ནི་ལས་ལ་ཐུབ་པས་ཞེས་སོགས་དྲུག་སྟེ།  སེམས་པའི་ལས་ནི་ཡིད་ལས་དང་།  བསམས་པའི་ལས་ལུས་ངག་གི་རྣམ་པར་རིག་བྱེད་ལ་འདོད་པ་ནི།  བྱེ་བྲག་ཏུ་སྨྲ་བའི་ལུགས་ཏེ།  མཛོད་ལས།  
སེམས་པ་ཡིད་ཀྱི་ལས་ཡིན་ནོ། །དེས་བསྐྱེད་ལུས་དང་ངག་གི་ལས། །ཞེས་དང་།  ལུས་རྣམ་རིག་བྱེད་དབྱིབས་སུ་འདོད། །ཅེས་པས།  ལུས་ཀྱི་རྣམ་པར་རིག་བྱེད་ཀྱི་ལས་ངོས་བཟུང་ཞིང་།  ངག་རྣམ་རིག་བྱེད་ནི་ངག་སྒྲ་ཞེས་པས།  ངག་གི་རྣམ་པར་རིག་བྱེད་ཀྱི་ལས་ངོས་བཟུང་བའི་ཕྱིར་རོ། །
མདོ་སྡེ་པ་ཡན་ཆད་ནི།  སེམས་པའི་ལས་རྒྱུ་དུས་ཀྱི་ཀུན་སློང་ལ་འདོད་ལ།  དེ་ལ་བསོད་ནམས་དང་།  བསོད་ནམས་མ་ཡིན་པ་དང་།  མི་གཡོ་བའི་ལས་གསུམ་ཡོད་ཅིང་།  བསམ་པའི་ལས་ནི།  དེ་དུས་ཀྱི་ཀུན་སློང་ལ་འདོད་ལ།  དེ་ལ་ལུས་ངག་ཡིད་གསུམ་གྱི་ལས་གསུམ་ཡོད་པར་འདོད་དེ།  མངོན་
9-2-31a


པ་ཀུན་ལས་བཏུས་སུ།  དེ་གཉིས་ཀྱི་དབྱེ་བ་དེ་ལྟར་དུ་གསུངས་ཤིང་།  མཛོད་འགྲེལ་ལས། མདོ་སྡེ་པའི་འདོད་པ་བརྗོད་པའི་སྐབས་སུ་ལུས་ལ་བརྟེན་པའི་ལས་ནི།  ལུས་ཀྱི་ལས་ཏེ།  དེ་དང་དེར་ལུས་འཇུག་པར་བྱེད་པའི་སེམས་པ་གང་ཡིན་པའོ། །དེ་བཞིན་དུ་ངག་
དང་ཡིད་ཀྱི་ལས་དག་ལ་ཡང་ཅི་རིགས་པར་རིག་པར་བྱའོ། །འོ་ན་གང་སེམས་པ་དང་བསམ་པའི་ལས་སོ་ཞེས་གསུངས་ཞེ་ན།  འདི་དང་འདི་ལྟ་བུ་ཞིག་བྱའོ་སྙམ་པའི་ཀུན་ཏུ་རྟོག་པ་ནི་སྔར་བྱུང་ལ།  དེ་ལྟར་བསམས་ནས་དེའི་འོག་ཏུ་གང་གིས་ལུས་འཇུག་པར་བྱེད་པ་བྱ་བའི་སེམས་སྐྱེ་བར་འགྱུར་
ཏེ།  དེ་ནི་བསམ་པའི་ལས་ཞེས་བྱའོ་ཞེས་གསུངས་སོ། །གསུམ་པ་ནི་ལས་དཀར་རྣམ་སྨིན་ཞེས་སོགས་ཚིགས་བཅད་གསུམ་སྟེ།  རྣམ་སྨིན་དཀར་ནག་ནི་རྒྱུ་དུས་དང་།  དེ་དུས་ཀྱི་ཀུན་སློང་གི་སེམས་པ་དཀར་ནག་ཡིན་ལ།  ལས་དཀར་ནག་ནི་སྦྱོར་བ་དགེ་བར་སྣང་བ་དང་།  མི་དགེ་བར་སྣང་བའི་ཁྱད་
པར་རོ། །བཞི་པ་ནི།  གཞན་ཡང་ལས་ལ་ཞེས་སོགས་ཚིགས་བཅད་དྲུག་དང་།  ཚིག་རྐང་གཅིག་སྟེ།  འཕེན་བྱེད་ཀྱི་ལས་ནི་རྣམ་སྨིན་གྱི་འབྲས་བུ་གཙོ་བོར་གྱུར་པ་ཡིན་ལ།  རྫོགས་བྱེད་ཀྱི་ལས་ནི་སྐྱེས་བུ་བྱེད་པ་དང་།  རྒྱུ་མཐུན་དང་།  བདག་པོའི་འབྲས་བུ་གཙོ་བོར་གྱུར་པ་ཡིན་ནོ། །དེ་ལ་དགེ་མི་
དགེའི་རྣམ་སྨིན་གྱི་འབྲས་བུ་ནི།  བདེ་འགྲོ་དང་ངན་འགྲོ་སོ་སོར་ངེས་པ་ཡིན་ཅིང་།  འབྲས་བུ་གཞན་གསུམ་ནི་སོ་སོར་མ་ངེས་ཏེ།  རིན་ཆེན་ཕྲེང་བར།  མི་དགེ་བ་བཅུའི་བདག་འབྲས་སོགས་བདེ་འགྲོའི་རྟེན་ལའང་འབྱུང་བར་གསུངས་ཤིང་།  ངན་འགྲོའི་རྟེན་ལ་བདེ་བ་འབྱུང་བ་རྣམས་ཀྱང་།  དགེ་བའི་
འབྲས་བུ་ཡིན་པའི་ཕྱིར་རོ། །ལྔ་པ་ནི་གཞན་ཡང་ཞེས་སོགས་བདུན་ཏེ།  ཀུན་བཏུས་ལས།  གནག་ལ་རྣམ་པར་སྨིན་པ་གནག་པའི་ལས་གང་ཞེ་ན་གང་མི་དགེ་བའོ། །དཀར་ལ་རྣམ་པར་སྨིན་པ་དཀར་བའི་ལས་གང་ཞེ་ན།  གང་ཁམས་གསུམ་པའི་དགེ་བའོ། །དཀར་གནག་ཏུ་གྱུར་ལ་རྣམ་
9-2-31b


པར་སྨིན་པ་དཀར་གནག་ཏུ་གྱུར་པ་གང་ཞེ་ན།  འདོད་པ་དང་རབ་ཏུ་ལྡན་པ་འདྲེན༷་མ་སྟེ།  བསམ་པས་གནག་ལ་སྦྱོར་བས་དཀར་བའམ།  སྦྱོར་བས་གནག་ལ་བསམ་པས་དཀར་བའོ། །མི་གནག་ཅིང་དཀར་ལ།  རྣམ་པར་སྨིན་པར་མི་འགྱུར་ཅིང་།  ལས་ཟད་པར་འགྱུར་བའི་ལས་གང་ཞེ་ན།  སྦྱོར་བ་དང་བར་ཆད་མེད་
པའི་ལམ་རྣམས་ལ་ཟག་པ་མེད་པའི་ལས་སོ། །ཞེས་གསུངས་ཤིང་།  འདིར་ནི་མདོ་ལས།  གཅིག་ཏུ་དཀར་བའི་ལས་ནི།  གཅིག་ཏུ་དཀར་བར་འགྱུར་རོ།  གཅིག་ཏུ་གནག་པའི་ལས་ནི་གཅིག་ཏུ་གནག་པར་འགྱུར་རོ། །འདྲེན་མ་རྣམས་ཀྱང་འདྲེན་མར་འགྱུར་རོ། །ཞེས་གསུངས་པ་ལྟར་གསུམ་དུ་མཛད་དོ། །
འདྲེན་མའི་དོན་བསམ་སྦྱོར་གང་རུང་གཅིག་དཀར་ཞིང་གཅིག་གནག་པ་ལ་གསུངས་ཤིང་།  དེས་བདེ་སྡུག་འདྲེན་མར་སྐྱེད་པ་དང་།  གོང་དུ་བཞིར་དབྱེ་བའི་སྐབས་སུ།  བསམ་པས་གནག་ཅིང་སྦྱོར་བས་དཀར་བ།  སྡུག་བསྔལ་གྱི་རྒྱུ་དང་།  སྦྱོར་བ་གནག་ཅིང་བསམ་པ་དཀར་བ་བདེ་བའི་རྒྱུར་གསུངས་པ་དང་
འགལ་ལོ་སྙམ་ན།  གོང་དུ་རྒྱུ་དུས་དང་དེ་དུས་ཀྱི་ཀུན་སློང་གཉིས་ཀ་དཀར་བ་ལ་བསམ་པ་དཀར་བར་མཛད་ཅིང་།  འདིར་རྒྱུ་དུས་ཀྱི་ཀུན་སློང་ལ་བསམ་པ་དང་།  དེ་དུས་ཀྱི་ཀུན་སློང་ལ་སྦྱོར་བར་དགོངས་པས་མི་འགལ་ལོ། །གསུམ་པ་ནི།  འདི་འདྲའི་ཞེས་སོགས་བཞིའོ། །གཉིས་པ་ལོག་རྟོག་བྱེ་བྲག་ཏུ་དགག་
པ་ལ་བཞི་སྟེ།  བསྔོ་བའི་གནད་ལ་འཁྲུལ་པ་དགག་པ།  འབྲས་བུ་དཀར་ནག་ཟང་ཐལ་དགག་པ།  ཉམས་ལེན་ཡེ་བཀག་ཡེ་གནང་དགག་པ།  འཕྲལ་གྱི་ལག་ལེན་འཁྲུལ་པ་དགག་པའོ། །དང་པོ་ལ་བཞི་སྟེ།  བསྔོ་རྒྱུའི་དགེ་རྩ་ལ་འཁྲུལ་པ་དགག་པ།  བསྔོ་ཚུལ་གྱི་ལག་ལེན་ལ་འཁྲུལ་པ་དགག་
པ།  བསྔོ་བའི་འབྲས་བུ་ལ་འཁྲུལ་པ་དགག་པ།  དོན་བསྡུས་ཏེ་ལས་འབྲས་ཀྱི་གནད་བསྟན་པའོ། །དང་པོ་ལ་གཉིས་ཏེ་ཕྱོགས་སྔ་མ་བརྗོད་པ།  དེ་དགག་པའོ། །དང་པོ་ནི་མུ་སྟེགས་ཞེས་སོགས་ཚིགས་བཅད་གསུམ་སྟེ།  གྲངས་ཅན་པ་རྣམས་ནི།  ཤེས་བྱ་ཉི་ཤུ་རྩ་ལྔར་གྲངས་ངེས་པར་འདོད་དེ།  བདེ་སྡུག་
9-2-32a


བཏང་སྙོམས་གསུམ་མམ།  རྡུལ་མུན་སྙིང་སྟོབས་གསུམ་ཆ་མཉམ་པའི་རྫས།  རྟག་པ་གཅིག་པུ་གདོད་མ་ནས་གྲུབ་པ་ནི་གཙོ་བོ་དང་རང་བཞིན་ཞེས་བྱ་ལ།  དེ་ལས་རྣམ་འགྱུར་ཉེར་གསུམ་འབྱུང་ཚུལ་ནི།  ཡོན་ཏན་གསུམ་མི་མཉམ་པའི་གནས་སྐབས་ནི་ཆེན་པོ་དང་བློ་ཞེས་བྱ།  དེ་ལས་
བདག་དུ་རློམ་པའི་ང་རྒྱལ་འབྱུང་ངོ་། །དེ་ལ་རྡུལ་མུན་སྙིང་སྟོབས་ཤས་ཆེ་བའི་ང་རྒྱལ་རིགས་གསུམ་ལས།  དང་པོ་ལས།  མིག །རྣ་བ།  སྣ།  ལྕེ།  ལུས་ཏེ་བློའི་དབང་པོ་ལྔ་དང་།  ཁ།  ལག་པ།  རྐང་པ།  འདོམས།  བཤང་ཁུང་སྟེ།  ལས་ཀྱི་དབང་པོ་ལྔ་དང་།  ཐུན་མོང་བ་ཡིད་དབང་དང་
བཅུ་གཅིག་འབྱུང་ངོ་། །གཉིས་པ་ལས།  གཟུགས་སྒྲ་དྲི་རོ་རེག་བྱ་འབྱུང་ཞིང་དེ་ལྔ་ལས་རིམ་པ་བཞིན་དུ་མེ་ནམ་མཁའ།  ས་ཆུ་རླུང་སྟེ།  འབྱུང་བ་ལྔ་སྐྱེ་ལ།  གསུམ་པས་ནི་དེ་རྣམས་བསྐྱེད་པའི་གྲོགས་བྱེད་ཀྱི།  འབྲས་བུ་གུད་ན་མེད་དོ། །དེ་ལ་རང་བཞིན་དོན་དམ་པ་ཡིན་ལ།  རྣམ་འགྱུར་ཉེར་
གསུམ་ནི་ཀུན་རྫོབ་པ་ཡིན་ཅིང་།  དེ་ཐམས་ཅད་ཀྱང་བེམ་པོར་འདོད་དོ། །བདག་ཤེས་རིག་གི་སྐྱེས་བུ་ནི།  རྟག་པ་གཅིག་པུ་རྣམ་འགྱུར་ལ་ལོངས་སྤྱོད་པ་པོ།  བཅིངས་གྲོལ་གྱི་གཞིར་གྱུར་པ་ཡིན་ལ།  འཆིང་བའི་ཚུལ་ནི།  བློ་མེ་ལོང་ངོས་གཉིས་པ་ལྟ་བུའི་ཕྱོགས་གཅིག་ལ།  རྣམ་འགྱུར་ཉེར་
གསུམ་གྱི་གཟུགས་བརྙན་སྣང་ཞིང་།  ཕྱོགས་གཅིག་ནས་ཤེས་རིག་གསལ་བར་ཤར་བ་གཅིག་ཏུ་འདྲེས་ནས།  ལོག་པར་བཟུང་བའི་ཚུལ་གྱིས་འཁོར་བར་འཁྱམ་པ་ཡིན་ནོ། །གྲོལ་བའི་ཚུལ་ནི།  རྣམ་འགྱུར་ཉེར་གསུམ་གཙོ་བོས་སྤྲུལ་པར་ནམ་ཞིག་ཤེས་པའི་ཚེ།  གཙོ་བོ་ངོ་ཚ་བར་གྱུར་
ཏེ།  མི་གསལ་བར་བསྡུས་པ་བདག་གཅིག་པུར་གནས་པའི་ཚེ་གྲོལ་བར་འདོད་དོ། །དེས་ན་དགེ་སྡིག་གཙོ་བོའི་གཤིས་ལ་ཡོད་ཅིང་།  འབྲས་བུ་ཐམས་ཅད་ཀྱང་རྒྱུ་དུས་ན་ཡོད་པ་ཁོ་ན་སྐྱེ་བར་འདོད་དེ།  གྲངས་ཅན་གྱི་གཞུང་དུ།  དགེ་དང་སྡིག་པ་ཇི་སྙེད་དང་། །འཁོར་བ་དང་ནི་གྲོལ་བ་དག །གཙོ་
9-2-32b


བོའི་ནང་ན་གདོད་ནས་ཡོད། །འོན་ཀྱང་ཐབས་ཀྱིས་གསལ་བར་འབྱིན། །འོ་མའི་དུས་ན་ཞོ་གང་དང་། །ཞོ་ཡི་དུས་ན་མར་ཉིད་གང་། །དྲག་པོ་ལེན་གྱིས་བཤད་པ་སྟེ། །འབིགས་བྱེད་གནས་པའང་དེ་སྐད་སྨྲ། །ཞེས་བཤད་དོ། །དེ་བཞིན་དུ་བོད་ཀྱི་ཞང་གཡུ་བྲག་པའི་ལམ་མཆོག་མཐར་ཐུག་
ལས།  པ་ན་སེ་ཡི་འབྲས་བུ་བཞིན། །རྒྱུ་དང་འབྲས་བུ་དུས་མཚུངས་ཡིན། །ལས་འཕྲོ་ཅན་གྱིས་རྟོགས་པར་འགྱུར། །ཞེས་རྒྱུའི་དུས་ན་འབྲས་བུ་ཡོད་པར་འདོད་ཅིང་།  སངས་རྒྱས་ཕལ་པོ་ཆེ་ལས་གསུངས་པའི།  རྡོ་རྗེ་རྒྱལ་མཚན་གྱི་བསྔོ་བའི་མདོ་དོན་འཆད་པ་ལ།  གྲངས་ཅན་གཙོ་བོ་དང་
རང་བཞིན་གཅིག་པའི་དགེ་བ་ཡོད་པར་འདོད་པ་བཞིན་ཇི་སྙེད་ཡོད་པ་དང་།  ཞེས་པའི་དོན།  སེམས་ཅན་རྣམས་ལ་གདོད་མ་ནས་རང་བྱུང་དུ་ཡོད་པའི་དགེ་བར་འདོད་ཅིང་།  དེ་ཉིད་བདེར་གཤེགས་སྙིང་པོ་ཡང་ཡིན་ནོ། །ཞེས་ཟེར་ཞིང་།  དེ་བཞིན་དུ་འབྲི་ཁུང་པ་ཡོད་པའི་དགེ་བ་དང་།  རྒོད་ཚང་པ་གནས་
པའི་དགེ་བ་དང་།  སྟག་ལུང་པ་ལ་སོགས་པ་རང་བཞིན་གྱི་དགེ་བ་ཞེས་འཆད་དོ། །གཉིས་པ་ལ་ལྔ་སྟེ།  ཆོས་དབྱིངས་བསྔོ་རྒྱུའི་སྙིང་པོར་འདོད་པ་དགག་པ།  ཆོས་དབྱིངས་ལས་གཞན་པའི་ཁམས་བསྔོ་རྒྱུའི་སྙིང་པོར་འདོད་པ་དགག་པ།  ཆོས་དབྱིངས་ལ་བསྔོ་རྒྱུའི་སྙིང་པོ་ཡིན་མིན་གྱི་དབྱེ་
བ་ཡོད་པ་དགག་པ།  དེས་ན་སྤྲོས་བྲལ་ལ་སྙིང་པོར་འཇོག་པའི་འཐད་པ།  སྙིང་པོ་བསྒྲུབ་པའི་ཚུལ་གྱིས་ཡོད་པ་དྲང་དོན་དུ་བསྟན་པའོ། །དང་པོ་ལ་གསུམ་སྟེ།  ལུང་རིགས་གཉིས་ཀྱིས་དགག །དེའི་ཉེས་སྤོང་གི་ལན་དགག །ལུང་ཚིག་སྔ་ཕྱི་འགལ་བས་དགག་པའོ། །དང་པོ་ལ་གསུམ་སྟེ།
མདོར་བསྟན།  རྒྱས་པར་བཤད།  དོན་བསྡུ་བའོ། །དང་པོ་ནི།  གྲངས་ཅན་ཞེས་སོགས་ཏེ།  གྲངས་ཅན་གྱི་ལུགས་དང་མཚུངས་པའི་བསྔོ་རྒྱུའི་དགེ་བ་རྒྱུས་མ་བསྐྱེད་པར་དངོས་པོའི་གཤིས་ལ་ཡོད་པ་འདི་དགག་པར་བྱ།  ཞེས་པའི་དོན་ཡིན་གྱི།  ཁ་ཅིག་གྲངས་ཅན་འགོག་པ་ལ་སྦྱོར་བ་ནི།  སྐབས་
9-2-33a


ཀྱི་དོན་མ་ཡིན་ཏེ། གྲངས་ཅན་ལུང་གིས་དགག་མི་ནུས་ཤིང་།  འོག་ཏུ་མུ་སྟེགས་བྱེད་ཀྱི་ལུགས་འདིར་མི་འགོག་པར་གསུངས་པ་དང་འགལ་བའི་ཕྱིར་རོ། །གཉིས་པ་ལ་གཉིས་ཏེ།  ཡིད་ཆེས་པའི་ལུང་གིས་དགག་པ།  དངོས་སྟོབས་ཀྱི་རིགས་པས་དགག་པའོ། །དང་པོ་ལ་
གསུམ་སྟེ།  ཆོས་དབྱིངས་བསྔོ་རྒྱུའི་དགེ་བར་མི་འཐད་པའི་ལུང་དྲངས་པ།  དེ་བཞིན་ཉིད་ལ་དགེ་བར་གསུངས་པའི་ལུང་དོན་བཤད་པ།  འཁྲུལ་གཞིའི་ལུང་དོན་ཇི་ལྟར་འཆད་པའི་ཚུལ་ལོ། །དང་པོ་ལ་གསུམ་སྟེ།  ཆོས་དབྱིངས་བསྔོ་བས་མི་འགྱུར་བའི་ལུང་།  ཆོས་དབྱིངས་ལ་དགེ་སྡིག་མེད་པའི་ལུང་།  ཞར་ལ་སྙིང་
པོའི་སྦྱོང་བྱེད་སྙིང་པོར་འདོད་པ་དགག་པའོ། །དང་པོ་ནི་དེ་སྐད་དུ་ཡང་ཞེས་སོགས་བཅུ་བདུན་ཏེ།  གཞུང་ཁ་ཅིག་ལས།  བདེར་གཤེགས་སྙིང་པོ་ཞེས་བྱ་བ། །ཆོས་དབྱིངས་འགྱུར་མེད་ཉིད་ལ་གསུངས། །དེ་སྐད་དུ་ཡང་རྒྱུད་བླ་ལས། །ཞེས་འབྱུང་བ་ལྟར་ན།  རང་བྱུང་དུ་གྲུབ་པའི་བསྔོ་རྒྱུའི་
དགེ་རྩ་དེ་བདེར་གཤེགས་སྙིང་པོར་མི་འཐད་དེ།  བདེར་གཤེགས་སྙིང་པོ་ནི་སེམས་ཀྱི་ཆོས་དབྱིངས་སྤྲོས་པ་དང་བྲལ་བ་ལ་གསུངས་ཤིང་།  དེ་ནི་བསྔོ་བས་གཞན་དུ་མི་འགྱུར་བའི་ཕྱིར་ཏེ།  རྒྱུད་བླ་དང་།  དཔལ་ཕྲེང་གི་མདོ་དང་།  རྩ་བ་ཤེས་རབ་དང་།  ཤེར་ཕྱིན་གྱི་མདོ་བཞི་ལས།  དེ་ལྟར་དུ་གསུངས་
པའི་ཕྱིར་རོ། །ལུང་དང་པོ་ནི།  སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཡང་དག་མིན་རྟོག་ལས་བྱུང་འདོད་ཆགས་སོགས། །གློ་བུར་དྲི་མས་དེ་ཉོན་མོངས་མི་འགྱུར། །ཞེས་སོ། །ལུང་གཉིས་པ་ནི།  བཅོམ་ལྡན་འདས་དེ་བཞིན་གཤེགས་
པའི་སྙིང་པོ་ལ་ནི།  སྐྱེ་བའམ་འགུམ་པའམ་འཕོ་བའམ།  འབྱུང་བ་ཡང་མ་མཆིས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི།  འདུས་བྱས་ཀྱི་མཚན་ཉིད་ཀྱི་ཡུལ་ལས་འདས་པ་ལགས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་རྟག་པ་དང་།  བརྟན་པ་དང་།  ཐེར་ཟུག་
9-2-33b


པ་ལགས་སོ། །ཞེས་གསུངས་སོ། །ལུང་གསུམ་པའི་དོན་ནི།  སེམས་ཅན་གྱི་ཆོས་ཉིད་སངས་རྒྱས་པའི་ཚེ་ན་ཡང་གཞན་དུ་མི་འགྱུར་བས་ཆོས་དབྱིངས་གཞན་དུ་མི་འགྱུར་བར་གྲུབ་པ་སྟེ།  རྒྱུད་བླར།  ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པ་ཆོས་ཉིད་དོ། །ཞེས་གསུངས་པ་
དང་མཐུན་ནོ། །ལུང་བཞི་པ་ནི།  བརྒྱད་སྟོང་པ་ལས།  འདི་ལྟར་ཆོས་ཐམས་ཅད་ཀྱི་ཆོས་ཉིད་གང་ཡིན་པ་དེ་ནི་འདས་པ་ཡང་མ་ཡིན་མ་འོངས་པ་ཡང་མ་ཡིན་ད་ལྟར་བྱུང་བ་ཡང་མ་ཡིན།  གང་འདས་པ་དང་མ་འོངས་པ་དང་།  ད་ལྟར་བྱུང་བ་ཡང་མ་ཡིན་པ་དེ་ནི་དུས་གསུམ་ལས་རྣམ་པར་གྲོལ་བའོ། །
གང་དུས་གསུམ་ལས་རྣམ་པར་གྲོལ་བ་དེ་ནི་ཡོངས་སུ་བསྔོ་བར་བྱ་མི་ནུས་ཤིང་།  དེ་བཞིན་དམིགས་པ་དང་རྟོག་པ་དང་རྣམ་པར་ཤེས་པར་བྱ་བ་མ་ཡིན་ནོ། །ཞེས་གསུངས་སོ། །གཉིས་པ་ནི།  ཡང་དག་པར་སྦྱོར་བའི་ཞེས་སོགས་བཅུ་དགུ་སྟེ།  ཆོས་དབྱིངས་རང་གི་ངོ་བོ་དགེ་སྡིག་གང་དུ་ཡང་མ་གྲུབ་
སྟེ།  སམྦུ་ཊ་དང་།  རིན་ཆེན་ཕྲེང་བར་དེ་ལྟར་དུ་གསུངས་པའི་ཕྱིར་རོ། །ལུང་དང་པོའི་དོན་ནི། སྡིག་པ་དང་བསོད་ནམས་ཀྱི་ཆ་གཉིས་སྤྲོས་པའི་རྣམ་རྟོག་ལས་མ་འདས་པས།  མཁས་པས་གནས་ལུགས་ཀྱི་དོན་བསྒོམ་པའི་ཚེ།  སྤྲོས་པའི་མཐའ་འདི་གཉིས་རྣམ་པར་སྤངས་ཞེས་པའི་དོན་ནོ། །དེ་
བཞིན་དུ་གསང་འདུས་རྩ་རྒྱུད་དུ།  ཆོས་ཐམས་ཅད་ནམ་མཁའི་རྡོ་རྗེའི་དམ་ཚིག་ཏུ་མཚུངས་པའི་ཕྱིར།  གཟུགས་ཀྱི་ཕུང་པོ་མ་ཡིན་ནོ། །ཞེས་པ་ནས།  འདོད་ཆགས་ཞེ་སྡང་གཏི་མུག་མ་ཡིན།  ཆོས་མ་ཡིན།  ཆོས་མིན་པའང་མིན།  ཞེས་པ་དང་།  ཀྱེ་རྡོ་རྗེར།  བསྒོམ་མེད་སྒོམ་པ་པོ་ཡང་མེད། །ལྷ་མེད་
སྔགས་ཀྱང་ཡོད་མ་ཡིན། །ཞེས་དང་།  ཕྱག་རྡོར་དབང་བསྐུར་བའི་རྒྱུད་ལས།  ཡོད་ཅེས་བྱ་བའམ་མེད་ཅེས་བྱ་བའམ་བསོད་ནམས་ཞེས་བྱ་བའམ།  བསོད་ནམས་མ་ཡིན་པ་ཞེས་བྱ་བའམ།  མྱ་ངན་ལས་འདས་པ་ཞེས་བྱ་བའམ་ཐ་དད་པ་ཞེས་བྱ་བ་མེད་དོ། །ཞེས་གསུངས་སོ། །ལུང་གཉིས་པའི་དོན་
9-2-34a


ནི།  ཟབ་མོ་སྟོང་པ་ཉིད་ནི་སྡིག་པ་དང་བསོད་ནམས་ཀྱི་བྱ་བ་ལས་འདས་ཤིང་།  སོ་སོ་སྐྱེ་བོས་ཚིག་ཙམ་གྱིས་བཀྲོལ་བའི་དོན་དང་ལྡན་ཞིང་།  གཞན་མུ་སྟེགས་བྱེད་དང་།  རང་ཉིད་ཀྱི་ཉན་ཐོས་དང་རང་སངས་རྒྱས་ཀྱིས་ཀྱང་སྐྲག་པའི་སྒོ་ནས་མྱངས་པའི་གནས་མ་ཡིན་པ་ཞེས་དང་། 
སྟོང་ཉིད་རྟོགས་པའི་ཤེས་པས་ཡོད་འཛིན་དང་མེད་འཛིན་ཞི་བའི་ཕྱིར་ན།  སྡིག་པ་དང་བསོད་ནམས་ཀྱི་རྣམ་རྟོག་ལས་འདས་པའི་བློ་དེ་ཡིས་བདེ་འགྲོ་དང་ངན་འགྲོ་ལས་ཐར་བའི་ཐར་པ་དམ་པ་ཐོབ་པར་བཞེད་ཞེས་པའི་དོན་ནོ། །གསུམ་པ་ནི།  ཁ་ཅིག་ཞེས་སོགས་བཅུ་གཅིག་སྟེ།  སྟོད་ལུང་རྒྱ་དམར་
ནི།  སྟོང་ཉིད་སྙིང་རྗེའི་སྙིང་པོ་བདེར་གཤེགས་སྙིང་པོ་ཡིན་ཅིང་།  དེ་ཉིད་བསྔོ་རྒྱུའི་དགེ་རྩ་ཡིན་ནོ་ཞེས་འདོད་དོ། །དེའི་ལན་རྣམས་ནི་གོ་སླ་ལ།  མདོ་རྒྱུད་ཀུན་ལས་གསུངས་པ་ནི།  བློ་གྲོས་རྒྱ་མཚོས་ཞུས་པའི་མདོ་ལས།  རིན་པོ་ཆེའི་དཔེས་དྲི་མ་འདག་པ་དང་འདྲ་བར།  རྒྱས་འགྱུར་གྱི་རིགས་
ཀྱིས་རང་བཞིན་གནས་རིགས་ཀྱི་དྲི་མ་སྦྱོང་བར་གསུངས་པ་དང་།  གུར་ལས།  སྟོང་ཉིད་སྙིང་རྗེ་ཐ་དད་མེད། །གང་དུ་སེམས་ནི་རྣམ་བསྒོམས་པ། །དེ་ནི་སངས་རྒྱས་ཆོས་དང་ནི། །དགེ་འདུན་གྱི་ཡང་བསྟན་པའོ། །ཞེས་གསུངས་སོ། །གཞན་ཡང་སེམས་ཀྱི་སྒྲིབ་སྦྱོང་ལས།  དངུལ་
ཆུས་རེག་པའི་ཟངས་ལ་ནི། །ཇི་ལྟར་སྐྱོན་མེད་གསེར་དུ་འགྱུར། །དེ་བཞིན་ཡང་དག་ཡེ་ཤེས་ཀྱིས། །སྦྱངས་པས་ཉོན་མོངས་ཟད་པར་བྱེད། །ཞེས་གསུངས་སོ། །གཉིས་པ་ལ་ལྔ་སྟེ་ལུང་ལས་ཇི་ལྟར་བཤད་པའི་ཚུལ།  དེའི་དགོངས་པ་བཤད་པ།  དེ་ཉིད་དཔེའི་སྒོ་ནས་བསྒྲུབ་པ།  གཞན་དུ་
རྟོགས་ན་ཧ་ཅང་ཐལ་བ།  ཞར་ལ་གཤིས་ཀྱི་དགེ་བ་གཞན་དགག་པའོ། །དང་པོ་ནི།  མངོན་པའི་གཞུང་ལས་ཞེས་སོགས་དགུ་སྟེ།  ཀུན་ལས་བཏུས་ལས།  ངོ་བོ་ཉིད་ཀྱི་དགེ་བ་གང་ཞེ་ན་དད་པ་ལ་སོགས་པ་སེམས་ལས་བྱུང་བའི་ཆོས་བཅུ་གཅིག་གོ།  ཞེས་དང་།  དོན་དམ་པའི་དགེ་བ་གང་ཞེ་
9-2-34b


ན་དེ་བཞིན་ཉིད་དོ་ཞེས་དང་།  དོན་དམ་པར་མི་དགེ་བ་གང་ཞེ་ན་འཁོར་བ་ཐམས་ཅད་དོ་ཞེས་དང་།  དོན་དམ་པར་ལུང་དུ་མ་བསྟན་པ་གང་ཞེ་ན།  ནམ་མཁའ་དང་སོ་སོར་བརྟགས་པ་མ་ཡིན་པས་འགོག་པའོ། །ཞེས་གསུངས་སོ། །འདིར་ཀུན་ལས་བཏུས་ཉན་ཐོས་ཀྱི་གཞུང་དུ་མཛད་པ་ནི།  མངོན་
རྟོགས་ལྗོན་ཤིང་ལས།  མདོ་སྡེ་པའི་གྲུབ་མཐའ་སྟོན་བྱེད་ཡིན་པར་བཤད་པ་ལྟར་བཞེད་པ་ཡིན་གྱི།  མཛོད་ལ་འཁྲུལ་པར་མི་བྱ་སྟེ།  དེར་དགེ་བ་བཅུ་གཅིག་གི་ཐ་སྙད་མ་གསུངས་ཤིང་། ངོ་བོ་ཉིད་ཀྱི་དགེ་བ་ནི།  དགེ་བའི་རྩ་བ་གསུམ་དང་།  ངོ་ཚ་ཤེས་པ་དང་ཁྲེལ་ཡོད་པ་གཉིས་ལ་
གསུངས་པའི་ཕྱིར་རོ། །གཉིས་པ་ནི།  དེ་བཞིན་ཉིད་ལ་ཅེས་སོགས་བཅུ་གསུམ་སྟེ།  ཀུན་ལས་བཏུས་ལས།  དེ་བཞིན་ཉིད་ལ་དགེ་བའི་མིང་གིས་གསུངས་པ་བཏགས་པ་བར་འཆད་པ་སྟེ་གོ་སླའོ། །གསུམ་པ་ནི།  གཞན་ཡང་ཞེས་སོགས་དགུ་སྟེ།  ཀུན་བཏུས་སུ།  ཟས་ཀྱིས་འགྲངས་
ནས་རེ་ཞིག་ཟས་ལ་མི་འཕྲོད་པར་འཛིན་པ།  ཉེ་བར་བརྟེན་པས་འདོད་ཆགས་དང་བྲལ་བ་དང་།  འཁྲིག་པ་སྤྱད་གྲགས་ནས་རེ་ཤིག་མི་འཕྲོད་པར་འཛིན་པ།  གནོད་པས་འདོད་ཆགས་དང་བྲལ་བ་སོགས་གསུངས་ཀྱང་།  ཆགས་བྲལ་མཚན་ཉིད་པ་མ་ཡིན་པ་དེ་བཞིན་དུ་ཆོས་ཀྱི་དབྱིངས་ལ་
སོགས་སོ། །བཞི་པ་ནི།  ཅི་ནས་ཞེས་སོགས་བདུན་ནོ། །ལྔ་པ་ནི།  ལ་ལ་བྱམས་དང་ཞེས་སོགས་བདུན་ཏེ།  བཀའ་གདམས་པ་ལ་ལ་བྱམས་པ་དང་སྙིང་རྗེ་ཡང་།  ཐབས་མཁས་ལ་མ་ལྟོས་པར་གཤིས་ཀྱི་དགེ་བ་ཡིན་ནོ་ཞེས་ཟེར་རོ། །དེ་ཡང་དེ་ལྟར་མ་ངེས་ཏེ།  མཛངས་བླུན་ལས།  
ཞལ་ཏ་བས་དགེ་འདུན་དབྱར་གནས་པའི་མཐུན་རྐྱེན་གྱི་རིན་པོ་ཆེ་མང་པོ་སྦྱིན་བདག་གིས་ཕུལ་བ་རྣམས།  རང་གི་ཉེ་དུ་དང་།  ཡིད་མཐུན་པ་རྣམས་ལ་ཕན་འདོགས་པའི་བློས་བྱིན་པས།  ཞལ་ཏ་བ་ནི་ལྗོན་ཤིང་ལྟ་བུའི་སེམས་ཅན་དམྱལ་བར་གྱུར་ཏོ། །གཞན་རྣམས་ཤིང་གི་སྲིན་འབུར་གྱུར་ནས། 
9-2-35a


 ཟ་ཞིང་ཐམས་ཅད་དམྱལ་བའི་མེས་བསྲེག་པར་གྱུར་པར་བཤད་དོ། །གསུམ་པ་ལ་གསུམ་སྟེ།  འཆད་ཚུལ་མདོར་བསྟན།  གཞན་གྱི་འཆད་ཚུལ་དགག །རང་ཉིད་ཇི་ལྟར་འཆད་པའི་ཚུལ་ལོ། །དང་པོ་ནི།  ཆོས་དབྱིངས་བསྔོ་བས་མི་འགྱུར་བར་བསྒྲུབས་ཟིན་པ་དེས་ན་འགྲོ་བ་
ཞེས་སོགས་ཚིགས་བཅད་གཅིག་གོ།  གཉིས་པ་ལ་གཉིས་ཏེ།  མདོར་བསྟན་པ་དང་།  རྒྱས་པར་བཤད་པའོ། །དང་པོ་ནི།  གལ་ཏེ་དེ་ལྟ་མ་ཡིན་པར།  འགྲོ་ཀུན་དགེ་བ་ཇི་སྙེད་ཡོད་པ་དང་། །ཞེས་པའི་དོན།  ཆོས་དབྱིངས་ཡིན་ན་ཞེས་སོགས་གསུམ་མོ། །གཉིས་པ་ལ་གསུམ་སྟེ།  ཇི་
སྙེད་ཀྱི་སྒྲ་མི་འཐད་པར་ཐལ་བ།  ཡོད་ཅེས་བྱ་བའི་སྒྲ་མི་འཐད་པར་ཐལ་བ།  འགྲོ་ཀུན་གྱི་སྒྲ་མི་འཐད་པར་ཐལ་བའོ། །དང་པོ་ནི་དེ་ཡི་རྒྱུ་མཚན་ཞེས་སོགས་ཚིགས་བཅད་གཅིག་སྟེ།  བསྔོ་རྒྱུའི་དགེ་བ་དེ་ལ་ཇི་སྙེད་ཀྱི་སྒྲ་མི་འཇུག་པར་འགྱུར་ཏེ།  ཇི་སྙེད་ཀྱི་སྒྲ་ནི་མང་པོའི་སྒྲ་ཡིན་ཅིང་།  ཆོས་
དབྱིངས་ལ་མང་ཉུང་མེད་པའི་ཕྱིར་ཏེ།  མང་ཉུང་གི་སྤྲོས་པ་དང་བྲལ་བའི་ཕྱིར་རོ། །གཉིས་པ་ནི།  ཆོས་དབྱིངས་ཡོད་པའང་ཞེས་སོགས་ཚིགས་བཅད་བརྒྱད་དེ།  ཆོས་དབྱིངས་རང་གི་ངོ་བོ་ཡོད་པའང་མ་ཡིན་ཏེ།  རང་གི་ངོ་བོ་ཡོད་ཙམ་ལ་མི་རྟག་པས་ཁྱབ་པར་ཆོས་ཀྱི་གྲགས་པས་གསུངས་པའི་
ཕྱིར་ཏེ།  རྣམ་འགྲེལ་ལས།  འཇིག་ལ་འབྲས་དང་ཡོད་ཉིད་བཞིན། །ཅེས་དང་།  འཇིག་པ་ཡོད་ཙམ་འབྲེལ་པ་ཅན། །ཉིད་ཕྱིར་སྒྲ་ནི་མི་རྟག་ཉིད། །ཅེས་གསུངས་པའི་ཕྱིར་རོ། །རྩ་བ་ཤེས་རབ་ཀྱི་ལུང་བཞི་ལས།  དང་པོ་ནི།  ཡོད་པ་དང་དངོས་པོ་དོན་གཅིག་ཏུ་བྱས་ནས།  དེ་ལ་འདུས་བྱས་ཀྱིས་
ཁྱབ་པས་ན།  ཆོས་དབྱིངས་ཡོད་པ་མ་ཡིན་པར་བསྟན་ཏོ། །དེ་ཡང་སྤྱིར་ཡོད་པ་ལ་ཆོས་གཞན་བསལ་བའི་སྒོ་ནས་ཡོད་པར་བློས་འཇོག་པ་གཞན་སེལ་གྱི་ཡོད་པ་དང་།  ཆོས་གཞན་བསལ་བ་ལ་མ་ལྟོས་པར་རང་གི་ངོ་བོ་ཡོད་པ་གཉིས་ལས།  ཕྱི་མ་ལ་མི་རྟག་པས་ཁྱབ་པ་ནི།  མདོ་སྡེ་པས་
9-2-35b


ཀྱང་འདོད་དེ། ཡེ་ཤེས་སྙིང་པོ་ཀུན་ལས་བཏུས་ལས།  མདོ་སྡེ་པའི་གྲུབ་མཐའ་འཆད་པའི་སྐབས་སུ།  ནམ་མཁའ་མོ་གཤམ་བུ་འདྲ་ལ། །ཞེས་དང་དེའི་འགྲེལ་པར།  འདུས་མ་བྱས་བཏགས་པའི་ཡོད་པར་བསྟན་ཏེ།  བཏགས་པའི་ཡོད་པ་ནི་མིང་ཙམ་སྟེ།  ཞེས་གསུངས་སོ། །ལུང་
ཕྱི་མ་གསུམ་གྱིས་ནི།  ཆོས་དབྱིངས་ཡོད་མེད་སོགས་མཐའ་བཞི་གང་དུ་བཟུང་ན་ཡང་།  མཐར་འཛིན་གྱི་སྤྲོས་པ་ལས་མ་འདས་པས།  སངས་རྒྱས་ཀྱི་བསྟན་པའི་སྙིང་པོ་སྤྲོས་བྲལ་གྱི་ལྟ་བ་ལ་གུས་པར་བྱེད་ན།  མཐའ་བཞི་གང་དུ་ཡང་མ་བཟུང་ཞིག་ཅེས་པའོ། །དེང་སང་མཐར་འཛིན་གྱི་
ལྟ་བ་གཅིག་ལ་མ་སླེབ་ཀྱི་བར་དུ་དབུ་མའི་ལྟ་བ་འཇོག་མི་ཤེས་པའི་བོད་རྣམས་ཀྱིས་ནི་ཇི་སྐད་བཤད་པའི་ལུང་རྣམས་དང་།  གཞན་ཡང་རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱུང་བར་གསུངས། །གང་དག་སྟོང་པ་ཉིད་ལྟ་བ། །དེ་དག་བསྒྲུབ་ཏུ་མེད་པར་གསུངས། །ཞེས་དང་
དཀོན་མཆོག་བརྩེགས་པ་ལས་ཡོད་ཅེས་བྱ་བ་ནི་མཐའ་གཅིག་གོ།  མེད་ཅེས་བྱ་བ་ནི་མཐའ་གཉིས་པའོ། །ཞེས་དང་།  ཡེ་ཤེས་སྙིང་པོ་ཀུན་ལས་བཏུས་ལས།  ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་ཀྱང་མིན་པས། །མཐའ་བཞི་ལས་གྲོལ་དབུ་མ་པ། །མཁས་པ་
རྣམས་ཀྱི་དེ་ཁོ་ནའོ། །ཞེས་དང་།  སྤྱོད་འཇུག་ལས།  དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་བརྗོད། །ཞེས་སོགས་སྤྲོས་བྲལ་གྱི་ལྟ་བ་སྟོན་པའི་དབུ་མའི་གཞུང་ཆེན་པོ་རྣམས་ཀྱི་དོན།  བློར་མ་ཆུད་པར་བརྗོད་མེད་ལ་བརྗོད་པ་དང་།  སྤྲོས་མེད་ལ་སྤྲོས་པ་དང་།  ནོར་མེད་ལ་
ནོར་དུ་བཟུང་བ་ཡིན་པས་དུག་གི་མེ་ཏོག་ལྟར་རྒྱང་རིང་དུ་སྤང་བར་བྱའོ། །དེས་ན་བསྟན་པར་བྱ་བའི་སྤྲོས་བྲལ་ལ།  རིགས་མི་འདྲ་བའི་དབྱེ་བ་མེད་ཀྱང་།  གདུལ་བྱའི་བློ་དང་འཚམས་པར་གྲུབ་མཐའ་བཞི་ལ་ལྟ་བའི་རིམ་པ་ཇི་ལྟ་བསྟན་པའི་ཚུལ་དང་།  མཐར་ཐུག་སྤྲོས་བྲལ་གྱི་ལྟ་བ་ལ་ཇི་
9-2-36a


ལྟར་སྦྱོར་བའི་ཚུལ།  སྙིགས་དུས་ཀྱི་རྡོ་རྗེ་འཆང་ཆེན་པོ་གྲགས་པ་རྒྱལ་མཚན་གྱིས།  མངོན་པར་རྟོགས་པ་རིན་པོ་ཆེའི་ལྗོན་ཤིང་ལས་གསུངས་པ་རྣམས་བླ་མ་དམ་པའི་དྲུང་དུ་ཉན་པར་བྱའོ། །ཆོས་དབྱིངས་ཡོད་པ་མ་ཡིན་པར་རིགས་པས་བསྒྲུབ་པ་ནི།  རིགས་པས་
ཀྱང་ནི་ཞེས་སོགས་སོ། །གསུམ་པ་ནི།  གཞན་ཡང་ཡོད་པའི་ཞེས་སོགས་དྲུག་སྟེ།  འགྲོ་ཀུན་དགེ་བ་ཇི་སྙེད་ཡོད་པ་དང་། །ཞེས་པའི་དགེ་བ་དེ་ཆོས་དབྱིངས་ཡིན་ན་འགྲོ་ཀུན་དགེ་བ་ཞེས་དམིགས་ཀྱིས་བསལ་མི་དགོས་པར་འགྱུར་ཏེ།  བེམ་པོ་དང་འཕགས་པའི་ཆོས་དབྱིངས་ཀྱང་བསྔོ་
རྒྱུ་ཡིན་པའི་ཕྱིར་རོ། །གསུམ་པ་ལ་གསུམ་སྟེ།  ལུང་དོན་ཕྱིན་ཅི་མ་ལོག་པར་བཤད་པ།  དེ་ཉིད་དཔེའི་སྒོ་ནས་བསྒྲུབ་པ།  ལུང་གི་སྒོ་ནས་བསྒྲུབ་པའོ། །དང་པོ་ནི།  དེས་ན་གཞུང་དེའི་ཞེས་སོགས་བཅུ་གསུམ་སྟེ།  སྤྱིར་བཏང་དམིགས་བསལ་ལ་སྦྱར་བ་དང་།  རང་གཞན་ལ་སྦྱར་བ་དང་།  མདོར་བསྟན་
རྒྱས་བཤད་ལ་སྦྱར་བ།  གསུམ་སྟེ་གོ་སླའོ། །གཉིས་པ་ནི།  དཔེར་ན་འགྲོ་བ་ཞེས་སོགས་དགུ་སྟེ།  འདི་ནི་བསྔོ་རྒྱུའི་དགེ་བ་དང་བཤགས་པར་བྱ་རྒྱུའི་སྡིག་པ་གཉིས་ཀ་ཡང་།  སྐྱེས་བུས་རྩོལ་བས་བསྒྲུབ་པར་མཚུངས་པར་སྟོན་པའི་ཆེད་དུ་གསུངས་པ་ཡིན་གྱི།  བཤགས་པ་བྱེད་ཚུལ་འདི་ལྟ་བུ་
ཡོད་པ་ནི་མ་ཡིན་ཏེ།  བཤགས་པ་རྣམ་དག་ལ་ཕྱིན་ཆད་སྡིག་པ་མི་བྱེད་པའི་སྡོམ་སེམས་དགོས་པའི་ཕྱིར་རོ། །གསུམ་པ་ནི།  རྡོ་རྗེ་ཞེས་སོགས་གཉིས་ཏེ།  རྡོ་རྗེ་རྒྱལ་མཚན་གྱི་བསྔོ་བའི་ཆོ་ག་ལས།  ཕྱོགས་བཅུའི་འཇིག་རྟེན་ཁམས་ན་ཡོད་པ་ཡི། །དགེ་བ་དེ་དག་ཡང་དག་བསྒྲུབ་པས་ན། །
འགྲོ་བ་ཀུན་ལ་ཕན་དང་བདེ་སེམས་ཀྱིས། །ཡེ་ཤེས་མཁས་པ་དེ་དག་ཡོངས་སུ་བསྔོ། །ཞེས་གསུངས་སོ། །གཉིས་པ་དངོས་སྟོབས་ཀྱི་རིགས་པས་དགག་པ་ནི་ཆོས་དབྱིངས་དགེ་བར་ཞེས་སོགས་ཚིགས་བཅད་ཕྱེད་དང་དྲུག་སྟེ།  མདོ་ལས་དེ་བཞིན་གཤེགས་པ་རྣམས་འཇིག་རྟེན་དུ་བྱོན་
9-2-36b


ཡང་རུང་།  མ་བྱོན་ཡང་རུང་།  ཆོས་རྣམས་ཀྱི་ཆོས་ཉིད་འདི་ནི་གནས་པ་ཡིན་ནོ། །ཞེས་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ནི།  བསྟན་ཀྱང་མི་འཕེལ་མ་བསྟན་ཀྱང་མི་འགྲིབ་བོ་ཞེས་གསུངས་སོ། །རྩ་བ་ཤེས་རབ་ཀྱི་ལུང་དང་པོའི་དོན་ནི།  རང་བཞིན་དང་ཆོས་དབྱིངས་གཅིག་ཏུ་བྱས་ནས་
དེ་རྒྱུ་རྐྱེན་ལས་བྱུང་བ་ཡིན་ན་གློ་བུར་དུ་བྱས་པ་ཅན་དུ་འགྱུར་ཞིང་།  དེ་ཡང་མི་རུང་སྟེ།  རང་བཞིན་གྱི་དོན་ནི་མ་བཅོས་པ་དང་།  གཞན་ལ་ལྟོས་པ་མེད་པ་ཡིན་པའི་ཕྱིར་རོ། །རྒྱུ་མཚན་དེས་ན་རང་བཞིན་བསྔོ་བས་བསྒྱུར་དུ་མི་རུང་ངོ་། །ལུང་གཉིས་པའི་དོན་ནི།  རང་བཞིན་གཞན་དུ་འགྱུར་བ་མི་
སྲིད་དེ།  རང་བཞིན་གྱིས་ཡོད་ན་ཕྱིས་མེད་པ་ཉིད་དུ་མི་འགྱུར་བའི་ཕྱིར་རོ། །དེས་ན་རང་བཞིན་བསྔོ་རྒྱུར་མི་རུང་ངོ་། །གསུམ་པ་དོན་བསྡུ་བ་ནི།  དེ་ལ་སོགས་པའི་ཞེས་སོགས་གཉིས་སོ། །གཉིས་པ་དེའི་ཉེས་སྤོང་གི་ལན་དགག་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །
དང་པོ་ནི་གལ་ཏེ་ཆོས་ཉིད་ཞེས་སོགས་བཞི་སྟེ།  ཆོས་ཉིད་དེ་བཞིན་ཉིད་བསྔོ་བས་བསྒྱུར་དུ་མི་རུང་ཡང་།  དེ་སངས་རྒྱས་ཐོབ་པའི་རྒྱུར་གྱུར་ཅིག་སྙམ་པའི་བསམ་པས་བསྒྱུར་ན་བྱང་ཆུབ་སེམས་དཔའི་བློ་སྦྱོང་དུ་འགྱུར་བས་ཉེས་པ་མེད་དོ་སྙམ་ན།  གཉིས་པ་ལ་བཞི་སྟེ།  དམིགས་བཅས་ཀྱི་
བསྔོ་བ་དུག་ཅན་དུ་བསྟན་པ།  དམིགས་མེད་ཀྱི་བསྔོ་བ་བློ་སྦྱོང་དུ་བསྟན་པ།  དམིགས་བཅས་ཀྱི་བསྔོ་བ་བློ་སྦྱོང་དུ་མི་རུང་བའི་རྒྱུ་མཚན།  དམིགས་མེད་དམིགས་པར་བྱས་ན་ཧ་ཅང་ཐལ་བའོ། །དང་པོ་ནི་མ་ཡིན་འདི་ལ་ཞེས་སོགས་དྲུག་སྟེ།  ཆོས་དབྱིངས་བློས་དགེ་རྩར་བསྒྱུར་ན་དམིགས་པའི་
འདུ་ཤེས་ཅན་དུ་འགྱུར་ཏེ།  མཐའ་བཞིའི་སྤྲོས་པ་མཐའ་དག་མ་བཀག་ན་ཆོས་དབྱིངས་ཀྱི་དོན་མེད་ལ།  དེ་བཀག་པ་བྱང་ཆུབ་ཀྱི་རྒྱུར་གྱུར་ཅིག་སྙམ་དུ་དམིགས་ན།  དམིགས་མེད་དམིགས་པར་བཟུང་བ་ཡིན་པས།  འདུས་བྱས་ཀྱི་དགེ་རྩ་བསྔོས་པའི་བསྔོ་བ་ཐམས་ཅད་ཀྱང་དེས་དྲི་མ་ཅན་ཏུ་བསྒྱུར་ཏེ།
9-2-37a


  དཔེར་ན་ཁྲོན་པའི་ནང་གི་སྦལ་པ་གཅིག་ལ་རྨ་བྱུང་ན་དེའི་རྨ་རུལ་བས་སྦལ་པ་གཞན་རྣམས་ཀྱང་རུལ་བར་བྱེད་པ་བཞིན་ནོ། །གཉིས་པ་ནི།  ཆོས་ཉིད་སྤྲོས་བྲལ་ཞེས་སོགས་ལྔ་སྟེ།  ཚིག་རྐང་དང་པོས་བསྔོ་བའི་རྣམ་པ་བསྟན།  གཉིས་པས་བསྔོ་རྒྱུའི་དགེ་རྩ་བསྟན།  
གསུམ་པ་དང་བཞི་པས་དགོས་ཆེད་བསྟན།  ཁྱད་ཆོས་དེ་ལྟ་བུ་དང་ལྡན་པ་ནི་བསྔོ་བ་རྣམ་དག་གོ།  བསྔོ་བའི་ཚིག་ནི་བདག་ཉིད་ཆེན་པོ་འདིས།  ཕྱག་འཚལ་བ་དང་མཆོད་ཅིང་བཤགས་པ་དང་། །རྗེས་སུ་ཡི་རང་བསྐུལ་ཞིང་གསོལ་བ་འདེབས། །སྐྱབས་སུ་འགྲོ་ཞིང་བྱང་ཆུབ་སེམས་
བསྐྱེད་ཀྱི། །བདག་དང་གཞན་གྱི་དགེ་བ་ཅི་མཆིས་པ། །འཁོར་གསུམ་ཡོངས་སུ་དག་པའི་ཤེས་རབ་ཀྱིས། །ཡོད་མེད་ལ་སོགས་དམིགས་པའི་དུག་སྤངས་ནས། །འཁོར་དང་མྱ་ངན་འདས་ལ་མི་སྨོན་པར། །འགྲོ་བའི་དོན་དུ་སངས་རྒྱས་མྱུར་ཐོབ་ཤོག །ཅེས་གསུངས་པ་ལྟར་བྱའོ། །གསུམ་
པ་ནི།  ཆོས་ཉིད་བསྔོ་རྒྱུར་ཞེས་སོགས་བཅུ་བདུན་ཏེ།  མདོ་སྡུད་པར།  གལ་ཏེ་མཚན་མར་བྱེད་ན་དེ་ནི་བསྔོ་མ་ཡིན། །ཅི་སྟེ་མཚན་མ་མེད་ན་བྱང་ཆུབ་བསྔོ་བ་ཡིན། །ཇི་ལྟར་དུག་དང་འདྲེས་པའི་ཁ་ཟས་བཟང་ཟ་བ། །དཀར་པོའི་ཆོས་ལ་དམིགས་པའང་དེ་འདྲར་རྒྱལ་བས་གསུངས། །ཞེས་དང་། 
མངོན་རྟོགས་རྒྱན་ལས་ཀྱང་།  ཉན་རང་ལས་ཁྱད་པར་དུ་འཕགས་པ་ཅན་གྱི་ཡོངས་སུ་བསྔོ་བ་ནི་མི་དམིགས་པ་དང་ཕྱིན་ཅི་མ་ལོག་པ་དང་།  རང་གཞན་གྱི་དོན་བྱེད་པའི་མཚན་ཉིད་གསུམ་དང་ལྡན་པར་གསུངས་ཤིང་།  བརྒྱད་སྟོང་པར་དམིགས་པའི་འདུ་ཤེས་ཅན་ལ་ཡོངས་སུ་བསྔོ་བ་མེད་དོ། །དེ་ཅིའི་
ཕྱིར་ཞེ་ན་དམིགས་པ་ནི་དུག་དང་བཅས་པའོ། །ཞེས་པ་དང་།  རྒྱུད་ལས་རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །མི་རྟོག་ཏིང་འཛིན་ལ་གནས་ན། །མཁའ་བཞིན་དྲི་མ་མེད་པར་འགྱུར། །ཞེས་གསུངས་པ་ཐམས་ཅད་དམིགས་པ་དང་བཅས་པའི་བསྔོ་བ་རྣམ་
9-2-37b


དག་ཏུ་མི་རུང་བའི་ལུང་དུ་མཐུན་ནོ། །བཞི་པ་ནི།  གང་དག་དམིགས་པ་ཞེས་སོགས་བདུན་ནོ། །གསུམ་པ་ལུང་ཚིག་སྔ་ཕྱི་འགལ་བས་དགག་པ་ནི།  གཞན་ཡང་ཆོས་ཉིད་ཞེས་སོགས་ལྔ་སྟེ།  མདོ་དེ་ཉིད་དུ་ཆོས་ཉིད་མི་འགྱུར་བདེན་པའི་བྱིན་རླབས་དང་། །ཞེས་ཆོས་ཉིད་མི་འགྱུར་བར་
བཤད་པ་དང་།  ཁྱོད་ཀྱིས་ཆོས་ཉིད་དེ་བསྔོ་བས་བསྒྱུར་བ།  འགྲོ་ཀུན་དགེ་བ་ཇི་སྙེད་ཡོད་པ་དང་། །ཞེས་པའི་ལུང་གི་དོན་དུ་འདོད་པས་གོང་འོག་འགལ་བར་འགྱུར་རོ། །གཉིས་པ་ཆོས་དབྱིངས་ལས་གཞན་པའི་ཁམས་བསྔོ་རྒྱུའི་དགེ་བར་འདོད་པ་དགག་པ་ལ་གཉིས་ཏེ།  བདེ་
གཤེགས་སྙིང་པོའི་རྣམ་བཞག་གཏན་ལ་དབབ་པ།  གཞུང་གི་འབྲུ་ལ་སྦྱར་བའོ། །དང་པོ་ལ་བཞི་སྟེ།  བཀའ་དང་བསྟན་བཅོས་ལས་ཇི་ལྟར་བཤད་པའི་ཚུལ།  བདེར་གཤེགས་སྙིང་པོ་རང་གི་ངོ་བོ་ངོས་བཟུང་བ།  དེ་ཉིད་གྲུབ་མཐའི་རིམ་པ་དང་སྦྱར་བ།  བདག་ཉིད་ཆེན་པོའི་དགོངས་པ་དཔྱད་
པའོ། །དང་པོ་ནི་སྤྱིར་བདེ་བར་གཤེགས་པའི་གསུང་རབ་རྣམས་ལས་སེམས་ཅན་གྱི་ཁམས།  སངས་རྒྱས་ཀྱི་ཁམས།  སངས་རྒྱས་ཀྱི་རིགས།  བདེ་བར་གཤེགས་པའི་སྙིང་པོ།  རང་བཞིན་དུ་གནས་པའི་རིགས། ཞེས་འབྱུང་བ་རྣམས་མིང་གི་རྣམ་གྲངས་ཡིན་ལ།  དེ་ཉིད་སྐབས་འགའ་
ཞིག་ཏུ་སེམས་ཅན་གྱི་ཆོས་དབྱིངས་དང་།  སངས་རྒྱས་ཀྱི་ཆོས་དབྱིངས་དབྱེར་མེད་པ་ལ་བཤད་པ་ཡང་ཡོད་དེ།  མདོ་ལས་ཤཱ་རིའི་བུ་སེམས་ཅན་གྱི་ཁམས་ཞེས་བྱ་བ་ནི་དེ་བཞིན་གཤེགས་པའི་སྙིང་པོའི་ཚིག་བླ་དྭགས་སོ། །ཤཱ་རིའི་བུ་དེ་བཞིན་གཤེགས་པ་ཞེས་བྱ་བ་འདི་ནི་ཆོས་ཀྱི་སྐུའི་ཚིག་
བླ་དྭགས་སོ། །ཞེས་པ་དང་།  ཤཱ་རིའི་བུ་དེའི་ཕྱིར་ན་སེམས་ཅན་གྱི་ཁམས་ཀྱང་གཞན་ལ་ཆོས་ཀྱི་སྐུ་ཡང་གཞན་པ་ནི་མ་ཡིན་ཏེ།  སེམས་ཅན་གྱི་ཁམས་ཉིད་ཆོས་ཀྱི་སྐུ་ཆོས་ཀྱི་སྐུ་ཉིད་སེམས་ཅན་གྱི་ཁམས་ཏེ།  འདི་ནི་དོན་གྱིས་གཉིས་སུ་མེད་པ་དེ་ཡི་གེ་ཐ་དད་པ་ཡིན་ནོ། །ཞེས་པ་དང་།  རྒྱལ་
9-2-38a


ཚབ་བྱམས་པས།  དེ་བཞིན་ཉིད་འདི་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་གསུངས་སོ། །ཡང་དེ་ཉིད་ཆོས་དབྱིངས་དེ་བཞིན་ཉིད་ལ་བཤད་པ་ཡང་ཡོད་དེ།  ཤེར་ཕྱིན་གྱི་མདོ་ལས། 
ནམ་མཁའ་ལ་བྱའི་རྗེས་མེད་ཅིང་མི་དམིགས་སོ། །དེ་བཞིན་དུ་བྱང་ཆུབ་སེམས་དཔའི་ཚིག་གི་དོན་མེད་ཅིང་མི་དམིགས་སོ། །ཞེས་གསུངས་ཤིང་དེའི་དོན་མགོན་པོ་བྱམས་པས།  སྒྲུབ་པ་ཡི་ནི་རྟེན་གྱུར་པ། །ཆོས་ཀྱི་དབྱིངས་ཀྱི་རང་བཞིན་དང་། །ཞེས་གསུངས་པ་དང་།  ཀླུ་སྒྲུབ་
ཞབས་ཀྱིས་ཀྱང་།  གང་ཞིག་ཀུན་ཏུ་མ་ཤེས་པས། །སྲིད་པ་གསུམ་ན་རྣམ་འཁོར་ཞིང་། །སེམས་ཅན་རྣམས་ལ་ངེས་གནས་པའི། །ཆོས་ཀྱི་དབྱིངས་ལ་ཕྱག་འཚལ་འདུད། །ཞེས་གསུངས་སོ། །ཡང་དེ་ཉིད་སེམས་ཅན་ནས་སངས་རྒྱས་ཀྱི་སའི་བར་དུ་རྒྱུན་མི་འཆད་པའི་སེམས་
གསལ་བ་ཙམ་ལ་གསུངས་པ་ཡང་ཡོད་དེ།  མདོ་སྡེ་དགོངས་པ་ངེས་འགྲེལ་ལས།  ལེན་པའི་རྣམ་པར་ཤེས་པ་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་གྱུར་ན་མི་རུང་ཞེས། །དེ་ནི་བྱིས་པ་རྣམས་ལ་ངས་མ་བསྟན། །ཞེས་པ་དང་།  མགོན་པོ་
ཀླུ་སྒྲུབ་ཀྱིས།  ཇི་ལྟར་སོས་ཀའི་དུས་སུ་ཆུ། །དྲོ་འོ་ཞེས་ནི་བརྗོད་པར་བྱེད། །དེ་ཉིད་གྲང་བའི་དུས་སུ་ནི། །གྲང་ངོ་ཞེས་ནི་བརྗོད་པ་ཡིན། །ཉོན་མོངས་དྲྭ་བས་གཡོགས་པ་ན། །སེམས་ཞེས་བྱ་བ་བརྗོད་པ་ཡིན། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱ། །ཞེས་
གསུངས་སོ། །ཡང་དེ་ཉིད་ཀུན་གཞིའི་རྣམ་པར་ཤེས་པ་ལ་བཤད་པ་ཡང་ཡོད་དེ།  ལང་ཀར་གཤེགས་པ་ལས་ཀྱང་།  དེ་བཞིན་གཤེགས་པའི་སྙིང་པོ་ཀུན་གཞིའི་རྣམ་པར་ཤེས་པ་ཞེས་བསྒྲགས་པ་རྣམ་པར་སྦྱང་བར་བྱའོ། །བློ་གྲོས་ཆེན་པོ་གལ་ཏེ་ཀུན་གཞིའི་རྣམ་པར་ཤེས་པ་བསྒྲགས་པ། 
9-2-38b


 དེ་བཞིན་གཤེགས་པའི་སྙིང་པོ་མེད་དུ་ཟིན་ན་དེ་བཞིན་གཤེགས་པའི་སྙིང་པོ་ཀུན་གཞིའི་རྣམ་པར་ཤེས་པ་ཞེས་བསྒྲགས་པ་མེད་པས།  འཇུག་པ་ཡང་མེད་ལྡོག་པ་ཡང་མེད་པར་འགྱུར་ན་བློ་གྲོས་ཆེན་པོ་བྱིས་པ་དང་འཕགས་པ་རྣམས་ལ་འཇུག་པ་དང་།  ལྡོག་པ་ཡང་ཡོད་དེ།  རྣལ་འབྱོར་ཆེན་པོ་
བརྩོན་པ་མི་འདོར་བ་རྣམས་བདག་གིས་སོ་སོ་རང་རིག་པ་ཚེ་འདི་ལ་བདེ་བར་སྤྱོད་པས་གནས་སོ་ཞེས་པ་ནས།  དེ་བཞིན་གཤེགས་པའི་སྙིང་པོ་ཀུན་གཞིའི་རྣམ་པར་ཤེས་པ་ནི།  དེ་བཞིན་གཤེགས་པའི་ཡུལ་ཏེ་ཁྱོད་ལྟ་བུར་ཞིབ་ཅིང་མཁས་པའི་མོས་པ་དང་།  བློ་རབ་ཏུ་འབྱེད་པའི་བྱང་ཆུབ་སེམས་དཔའ་སེམས་
དཔའ་ཆེན་པོ།  དོན་ལ་རྟོན་པ་རྣམས་ཀྱི་ཡང་ཡུལ་ཏེ།  ཞེས་སོགས་དང་།  དེ་བཞིན་གཤེགས་པའི་སྙིང་པོ་ནི། །རྣམ་ཤེས་བདུན་དང་ལྡན་པར་ཡང་། །འཛིན་པ་གཉིས་ཀྱིས་རབ་འཇུག་སྟེ། །ཡོངས་སུ་ཤེས་པས་ལྡོག་པར་འགྱུར། །ཞེས་པ་དང་།  མདོ་གཞན་ལས།  ས་རྣམས་སྣ་ཚོགས་ཀུན་
གཞི་སྟེ། །བདེར་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་རྣམས་གསུངས་པར་ཟད། །སྙིང་པོ་ཀུན་གཞིར་བསྟན་པ་ཡང་། །བློ་ཆུང་རྣམས་ཀྱིས་མི་ཤེས་སོ། །ཞེས་པ་དང་།  སེམས་ཀྱི་རང་གཞིན་འོད་གསལ་བ། །དེ་བཞིན་གཤེགས་པའི་སྙིང་པོ་
དགེ།  ཞེས་གསུངས་སོ། །ཡང་དེ་ཉིད་ལ་ཡིད་ཀྱི་རྣམ་པར་ཤེས་པར་བཤད་པ་ཡང་ཡོད་དེ།  སོར་མོའི་ཕྲེང་བའི་མདོར།  ཉན་ཐོས་རྣམས་ཀྱི་ཐེག་པར་ཡིད་ཅེས་བསྟན་པ་ཡང་།  དེ་བཞིན་གཤེགས་པའི་སྙིང་པོ་ཞེས་གསུངས་པའི་དོན་ཏེ།  ཡིད་རང་བཞིན་གྱིས་རྣམ་པར་དག་པ་ཞེས་བྱ་བ་གང་ཡིན་པ་དེ་
དེ་བཞིན་གཤེགས་པའི་སྙིང་པོའོ། །ཞེས་གསུངས་སོ། །ཡང་དེ་ཉིད་ལ་ཆོས་ཀྱི་སྐུ་ཞེས་བཤད་པ་ཡང་ཡོད་དེ།  ཤཱ་རིའི་བུ་ཆོས་ཀྱི་སྐུ་དེ་ཉིད་ཉོན་མོངས་པའི་སྦུབས་བྱེ་བ་མཐའ་ཡས་པས་བཏུམས་པ།  འཁོར་བའི་རྒྱུན་གྱིས་ཁྱེར་བ།  ཐོག་མ་དང་ཐ་མ་མེད་པའི་འཁོར་བའི་འགྲོ་བར་འཆི་བ་དང་སྐྱེ་བ་དག་
9-2-39a


ཏུ་འཁོར་བ་ནི་སེམས་ཅན་གྱི་ཁམས་ཞེས་བརྗོད་དོ། །ཞེས་གསུངས་སོ། །གཉིས་པ་ནི།  དེ་ལྟར་བཀའ་དང་བསྟན་བཅོས་རྣམས་ལས།  ཐ་སྙད་མི་འདྲ་བ་དུ་མའི་སྒོ་ནས་བསྟན་ཀྱང་བདེར་གཤེགས་སྙིང་པོ་རང་གི་ངོ་བོ་ནི།  ཐོག་མ་མེད་པའི་དུས་ནས་སངས་རྒྱས་ཀྱི་སའི་བར་དུ་རྒྱུན་མ་
ཆད་པ།  དགེ་མི་དགེ་ལ་སོགས་པའི་རིས་སམ་ཕྱོགས་སུ་མ་ཆད་པ།  ཐབས་ཀྱིས་ཟིན་མ་ཟིན་གྱི་བྱེ་བྲག་གིས་འཆིང་གྲོལ་ཀུན་གྱི་གཞིར་གྱུར་པ།  ཐབས་ཀུན་རྫོབ་ཀྱི་མཚན་ཉིད་གསལ་ཙམ་མ་འགགས་པ་དོན་དམ་དཔྱོད་བྱེད་ཀྱི་རིགས་པས་རང་གི་ངོ་བོ་ལ་བརྟག་ན་ཡོད་མེད་དང་རྟག་ཆད་ལ་སོགས་
པའི་མཐའ་གང་དུའང་མ་གྲུབ་པའི་སྤྲོས་བྲལ་ལས་མ་འདས་པའི་གསལ་སྟོང་ཟུང་འཇུག་གམ།  རིག་སྟོང་ཟུང་འཇུག་འདི་ཉིད་ཡིན་ནོ། །དེས་ན་བདེར་གཤེགས་སྙིང་པོ་ནི་གསལ་སྟོང་ཟུང་འཇུག་ལ་འཇོག་པ་ཡིན་གྱི་གསལ་བ་སྤངས་པའི་སྟོང་པ་ཙམ་ནི་མ་ཡིན་ཏེ།  དེ་ནི་འཆིང་གྲོལ་གྱི་གཞིར་མི་རུང་བའི་ཕྱིར་རོ། །
སྟོང་པ་སྤངས་པའི་གསལ་བ་ཙམ་ཡང་མ་ཡིན་ཏེ།  དེ་ནི་འདུས་བྱས་ཀྱི་ཆ་ཡིན་ལ།  བདེར་གཤེགས་སྙིང་པོ་འདུས་མ་བྱས་སུ་གསུངས་པའི་ཕྱིར་རོ། །ཟུང་འཇུག་དེ་ཉིད་ཐབས་ཀྱིས་མ་ཟིན་ན་འཁོར་བའི་ཆོས་རྣམས་ཀྱི་གཞི་ཡིན་ཏེ། ཟུང་འཇུག་ལས་རྣམ་རྟོག་སྐྱེ།  དེ་ལས་ཉོན་མོངས་པ།  དེ་ལས་ལས་བསགས་
དེ་ལས་འཁོར་བས་བསྡུས་པའི་ཕུང་ཁམས་སྐྱེ་མཆེད་ཀུན་འབྱུང་བའི་ཕྱིར་ཏེ།  རྒྱུད་བླར།  ས་ནི་ཆུ་ལ་ཆུ་རླུང་ལ། །རླུང་ནི་མཁའ་ལ་རབ་ཏུ་གནས། །མཁའ་ནི་རླུང་དང་ཆུ་དག་དང་། །ས་ཡི་ཁམས་ལ་གནས་མ་ཡིན། །དེ་བཞིན་ཕུང་པོ་ཁམས་དབང་རྣམས། །ལས་དང་ཉོན་མོངས་དག་ལ་གནས། །
ལས་དང་ཉོན་མོངས་ཚུལ་བཞིན་མིན། །ཡིད་ལ་བྱེད་ལ་རྟག་ཏུ་གནས། །ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་དག་པ་ལ་རབ་གནས། །སེམས་ཀྱི་རང་བཞིན་ཆོས་རྣམས་ནི། །ཐམས་ཅད་ལ་ཡང་གནས་མ་ཡིན། །ཞེས་དང་།  ཀླུ་སྒྲུབ་ཀྱིས།  ལས་དང་ཉོན་མོངས་ཟད་པས་ཐར། །ལས་
9-2-39b


དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་གསུངས་སོ། །དེ་ཉིད་ཐབས་ཀྱིས་ཟིན་ན་ལམ་གྱི་ཆོས་ཐམས་ཅད་ཀྱི་གཞི་ཡིན་ཏེ་འཁྲུལ་པའི་དབང་གིས་འབྱུང་བའི་སེམས་འདི་དགེ་རྩ་སད་པར་བྱས་ཏེ།  སེམས་རང་གི་གནས་ཚུལ་སྙེགས་
པའི་ཚེ།  འཁོར་བ་ལ་སྤོང་འདོད་དང་།  མྱ་ངན་ལས་འདས་པ་ལ་དོན་གཉེར་གྱི་འདུན་པ་འབྱུང་ཞིང་།  དེ་ལས་དེ་དག་གི་སྒྲུབ་པ་འབྱུང་བའི་ཕྱིར་ཏེ།  རྒྱུད་བླར།  སྲིད་དང་མྱ་ངན་འདས་ལ་དེའི། །སྡུག་བདེའི་སྐྱོན་ཡོན་མཐོང་བ་ནི། །རིགས་ཡོད་ལས་ཡིན་གང་ཕྱིར་ཏེ། །རིགས་མེད་དག་ལ་
མེད་ཕྱིར་རོ། །ཞེས་དང་།  མངོན་རྟོགས་རྒྱན་ལས།  སྒྲུབ་པ་ཡི་ནི་རྟེན་གྱུར་པ། །ཆོས་ཀྱི་དབྱིངས་ཀྱི་རང་བཞིན་དང་། །ཞེས་དང་།  རྒྱས་བཤད་དུ།  སྒྲུབ་པ་བཅུ་གསུམ་བཤད་ནས།  རྟེན་ལ་རིགས་ཞེས་བྱ་ཞེས་གསུངས་སོ། །དེ་ཉིད་ལམ་བསྒོམས་པའི་སྟོབས་ཀྱིས་གློ་བུར་གྱི་དྲི་མ་མཐའ་དག་
དང་བྲལ་བ་ན།  སྟོབས་ལ་སོགས་པ་རང་དོན་གྱི་ཡོན་ཏན་དང་།  གཟུགས་སྐུ་གཉིས་ལ་སོགས་པ་གཞན་དོན་གྱི་ཡོན་ཏན་ཐམས་ཅད་ཀྱི་གཞི་ཡིན་ཏེ།  དག་པ་གཉིས་ལྡན་གྱི་ཆོས་དབྱིངས་ལ་སྟོབས་སོགས་ཟག་མེད་ཀྱི་ཡོན་ཏན་དབྱེར་མེད་དུ་ལྡན་ཞིང་དེ་ཉིད་གདུལ་བྱ་དག་མ་དག་གི་རིམ་པ་ལ།  གཟུགས་
སྐུ་གཉིས་ནས།  རི་བོང་སྟག་དང་སེང་གེ་དང་།  ལྗོན་ཤིང་དང་།  ཟམ་པ་ལ་སོགས་པར་ཡང་སྣང་བའི་ཕྱིར་ཏེ།  ཐོགས་མེད་ཞབས་ཀྱིས་དྲི་མ་མེད་པའི་སངས་རྒྱས་ཀྱི་ཡོན་ཏན་ནི་གནས་གྱུར་པའི་དེ་བཞིན་གཤེགས་པའི་ཆོས་ཀྱི་སྐུ་དེ་ཉིད་ལ་ཡོད་པ་འཇིག་རྟེན་ལས་འདས་པ་སྟོབས་བཅུ་ལ་སོགས་པ་
སངས་རྒྱས་ཀྱི་ཆོས་གང་དག་ཡིན་པའོ། །ཞེས་དང་།  རྒྱུད་བླར།  འདིར་ནི་དང་པོ་ཆོས་སྐུ་སྟེ། །ཕྱི་མ་དག་ནི་གཟུགས་ཀྱི་སྐུ། །ནམ་མཁའ་ལ་ནི་གཟུགས་གནས་བཞིན། །དང་པོ་ལ་ནི་ཐ་མ་གནས། །ཞེས་གསུངས་སོ། །གསུམ་པ་ནི།  མདོ་སྡེ་འགའ་ཞིག་ལས།  ཉན་ཐོས་ཀྱི་ཐེག་པར་ཡིད་ཅེས་
9-2-40a


བསྟན་པ།  དེ་བཞིན་གཤེགས་པའི་སྙིང་པོ་ཡིན་པར་གསུངས་པའི་དོན་ནི།  ཉན་ཐོས་པ་རྣམས་བདེར་གཤེགས་སྙིང་པོ་ལ་བརྟེན་ནས་སྒྲུབ་པ་ལ་འཇུག་པའི་ཆེད་དུ་དེ་དག་གི་གྲུབ་མཐའ་དང་སྒོ་བསྟུན་ནས་གསུངས་པ་སྟེ།  དེ་དག་ནི་སེམས་སྟོང་པར་མི་འདོད་པས།  སྟོང་པའི་ཆ་དང་།  གསལ་
སྟོང་ཟུང་འཇུག་ལ།  བདེར་གཤེགས་སྙིང་པོ་བཞག་ཏུ་མེད་ཅིང་།  གསལ་བ་ལ་ཡང་།  རྣམ་ཤེས་ཚོགས་དྲུག་ལས་མི་འདོད་ཅིང་།  སྒོ་ལྔའི་རྣམ་ཤེས་ནི་འཆིང་གྲོལ་གྱི་གཞིར་མི་རུང་བས་ཡིད་ཤེས་ལ་འཇོག་པ་སྟེ།  མཛོད་ལས།  སེམས་བྱུང་མ་ཆགས་པའི་རང་བཞིན།  འདོད་པ་ཆུང་ཞིང་ཆོག་ཤེས་
པ་ལ་རིགས་སུ་འཇོག་པ་དོན་གཅིག་སྟེ།  དེ་ལྟ་བུའི་སེམས་བྱུང་ནི།  ཡིད་ཀྱི་རྣམ་ཤེས་ཁོ་ནའི་འཁོར་ཡིན་པའི་ཕྱིར་རོ། །མདོ་ཁ་ཅིག་ལས།  ཀུན་གཞིའི་རྣམ་པར་ཤེས་པ་ལ་བཤད་པ་ནི།  སེམས་ཙམ་པ་རྣམས་བདེར་གཤེགས་སྙིང་པོ་ལ་བརྟེན་ནས་སྒྲུབ་པ་ལ་འཇུག་པའི་ཆེད་དུ།  དེའི་གྲུབ་
མཐའ་དང་སྒོ་བསྟུན་ནས་གསུངས་པ་སྟེ།  དེ་དག་ནི་སྟོང་པ་དང་ཟུང་འཇུག་མི་འདོད་པ་སྔར་དང་འདྲ་ལ།  གསལ་བ་ལ་རྣམ་ཤེས་ཚོགས་བརྒྱད་ལས།  ཚོགས་བདུན་ནི་འཁོར་འདས་ཀྱི་ཆོས་ཐམས་ཅད་ཀྱི་ས་བོན་འཇོག་པའི་གཞིར་མི་རུང་པའི་ཕྱིར་རོ། །འོན་ཀྱང་སེམས་ཙམ་པའི་འདོད་པ་ལྟར་གྱི་
ཀུན་གཞི་བདེར་གཤེགས་སྙིང་པོར་སྨྲ་བ་ནི་མ་ཡིན་ཏེ།  དེ་དག་གིས་བཤད་པའི་མཚན་ཉིད་དང་ལྡན་པའི་ཀུན་གཞི་ཡོད་པར་མི་འགྲུབ་པའི་ཕྱིར་རོ། །དེས་ན་སྔར་གྱི་ཟུང་འཇུག་གི་གསལ་བའི་ཆ་དེ་ཉིད་ལ་དགོངས་ནས་གསུངས་སོ། །དབུ་མའི་གཞུང་ལས།  ཆོས་ཅན་གསལ་བའི་ལྡོག་པ་ནས་
གསུངས་པ་དང་།  ཆོས་ཉིད་སྟོང་པའི་ལྡོག་པ་ནས་གསུངས་པ་དང་།  ཆོས་སྐུའི་ལྡོག་པ་ནས་གསུངས་པ་དང་།  དེ་གསུམ་ཅར་གྱི་སྒོ་ནས་གསུངས་པ་བཞི་ལས་དང་པོ་ནི་འཁོར་འདས་ཀྱི་བྱེད་པ་པོ་སེམས་ཡིན་པར་ཤེས་པའི་ཆེད་དུ།  སེམས་ལ་གསུངས་ཏེ།  རྡོ་རྗེ་གུར་ལས།  རིན་ཆེན་སེམས་ལས་ཕྱིར་
9-2-40b


གྱུར་པའི། །སངས་རྒྱས་མེད་ཅིང་གང་ཟག་མེད། །རྣམ་པར་ཤེས་པའི་གནས་དོན་ནམ། །ཕྱི་རོལ་གྱུར་པ་ཅུང་ཟད་མེད། །ཅེས་དང་།  སམྦུ་ཊ་ལས།  ཀུན་རྟོག་མང་པོའི་མུན་པས་བསྒྲིབས་གྱུར་ཅིང་། །རབ་ཏུ་འཇོམས་པས་སྨྱོ་ཞིང་གློག་འདྲ་ལ། །ཆགས་སོགས་དགག་དཀའ་དྲི་མས་གོས་གྱུར་
པའི། །སེམས་ནི་རྡོ་རྗེ་ཅན་གྱིས་འཁོར་བར་གསུངས། །ཞེས་དང་།  ས་ར་ཧས།  སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་གསུངས་པ་ལྟར་རོ། །
གཉིས་པ་ནི།  སེམས་དེ་ཡང་བདེན་པར་གྲུབ་ན།  གཉེན་པོ་བསྐྱེད་པ་དང་།  སྒྲིབ་པ་སྤོང་དུ་མི་རུང་བས།  བདེན་པས་སྟོང་པའི་ཕྱིར་ན།  འཆིང་གྲོལ་ཀུན་གྱི་གཞིར་རུང་བ་ཤེས་པའི་ཆེད་དུ།  སེམས་ཀྱི་སྟོང་ཉིད་ལ་གསུངས་ཏེ།  བཀའ་དང་བསྟན་བཅོས་ཕལ་ཆེར་ལས་དེ་ལྟར་ཏུ་གསུངས་ཤིང་། 
གང་ལ་སྟོང་པ་ཉིད་རུང་བ། །ཞེས་སོགས་ཀྱི་ལུང་།  གཞུང་འདིར་བདེར་གཤེགས་སྙིང་པོའི་ཤེས་བྱེད་དུ་དྲངས་པ་དང་དོན་གཅིག་གོ།  གསུམ་པ་ནི་གསལ་སྟོང་ཟུང་འཇུག་དེ་ཉིད་ལ་གློ་བུར་གྱི་དྲི་མ་སྦྱངས་པ་ལས།  འབྲས་བུ་ཆོས་སྐུ་འབྱུང་གི་ལོགས་ན་བཙལ་རྒྱུ་མེད་དོ། །ཞེས་བསྟན་པས། 
སེམས་ཞུམ་པ་ལ་སོགས་པའི་སྐྱོན་ལྔ་སྤོང་བའི་ཆེད་དུ་གསུངས་ཏེ།  དཔལ་ཕྲེང་གི་མདོ་ལས།  བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་འདི་ཉིད།  ཉོན་མོངས་པའི་སྦུབས་ལས་མ་གྲོལ་བ་ནི་དེ་བཞིན་གཤེགས་པའི་སྙིང་པོ་ཞེས་བགྱིའོ། །ཞེས་དང་།  དེ་བཞིན་གཤེགས་པའི་
སྙིང་པོའི་མདོ་ལས།  རིགས་ཀྱི་བུ་དག་དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་།  དེ་བཞིན་གཤེགས་པའི་མིག་ཡོངས་སུ་དག་པས་སེམས་ཅན་ཐམས་ཅད་དེ་ལྟར་མཐོང་ནས་དེ་བཞིན་གཤེགས་པའི་ཡེ་ཤེས་སྟོབས་དང་།  མི་འཇིགས་པ་དང་སངས་
9-2-41a


རྒྱས་ཀྱི་ཆོས་མ་འདྲེས་པའི་མཛོད་ཡོངས་སུ་སྦྱོང་བའི་ཕྱིར་བྱང་ཆུབ་སེམས་དཔའ་རྣམས་ལ་ཆོས་སྟོན་ཏོ། །ཞེས་གསུངས་པ་ལྟར་རོ། །བཞི་པ་ནི།  རྒྱུད་བླར།  རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་
ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་ལུས་ཅན་ལ་སངས་རྒྱས་ཀྱི་སྙིང་པོ་ཡོད་པའི་སྒྲུབ་བྱེད་གསུམ་གསུངས་ཤིང་།  གསུམ་པོ་དེ་དག་ཀྱང་དེའི་འོག་ཏུ་འདི་ཡི་རང་བཞིན་ཆོས་སྐུ་དང་། །དེ་བཞིན་ཉིད་དང་རིགས་ཀྱང་སྟེ། །དེ་ནི་དཔེ་གསུམ་གཅིག་དང་ནི། །ལྔ་རྣམས་ཀྱིས་
ནི་ཤེས་པར་བྱ། །ཞེས་དོན་རྣམ་པ་དགུར་ཕྱེ་ནས་དཔེ་དགུས་མཚོན་པར་གསུངས་སོ། །དོན་དགུ་ནི།  ཆོས་སྐུ་ལ་གློ་བུར་དྲི་བྲལ་གྱི་དབྱིངས་དང་།  ཟབ་མོ་སྟོང་ཉིད་སྟོན་པའི་གསུང་རབ་དང་།  བརྗོད་བྱ་སྣ་ཚོགས་སྟོན་པའི་གསུང་རབ་སྟེ་གསུམ་ཏུ་ཕྱེ་ཞིང་།  དེ་བཞིན་ཉིད་ནི་རང་བཞིན་རྣམ་དག་གི་ཆོས་
དབྱིངས་ཡིན་ལ།  རིགས་ལ་རང་བཞིན་གནས་རིགས་དང་།  རྒྱས་འགྱུར་གྱི་རིགས་གཉིས།  དེ་གཉིས་ཀྱི་འབྲས་བུ་སྐུ་གསུམ་དང་ལྔར་ཕྱེ་བ་སྟེ།  ཆོས་སྐུ་རྣམ་གཉིས་ཤེས་བྱ་སྟེ། །ཆོས་དབྱིངས་ཤིན་ཏུ་དྲི་མེད་དང་། །དེ་ཡི་རྒྱུ་མཐུན་ཟབ་པ་དང་། །སྣ་ཚོགས་ཚུལ་ནི་སྟོན་པའོ། །ཞེས་དང་།  གཏེར་
དང་འབྲས་བུའི་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོག་མེད་རང་བཞིན་གནས་པ་དང་། །ཡང་དག་བླངས་པ་མཆོག་ཉིད་དོ། །རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་སྟེ། །དང་པོའི་སྐུ་ནི་དང་པོ་སྟེ། །གཉིས་པ་ཡི་ནི་ཕྱི་མ་གཉིས། །ཞེས་
གསུངས་སོ། །དེ་དག་དཔེ་དགུས་མཚོན་ནས་སེམས་ཅན་གྱི་རྒྱུད་ལ་ཡོད་པར་བསྟན་བཅོས་རྒྱུད་བླ་འདིར་དངོས་སུ་བསྟན་པ་ནི།  གཞུང་འདིར་དྲང་དོན་དུ་གཏན་ལ་དབབ་པ་སྟེ།  གོས་ཧྲུལ་ནང་ན་རིན་ཆེན་ལྟར། །ཞེས་དང་།  དངོས་ལ་གནོད་བྱེད་ཀྱི་སྐབས་སུ་དེ་འདྲའི་ཞེས་པའི་ཚིག་གི་ཁྱད་པར་
9-2-41b


གསུངས་ཤིང་།  དེའི་དོན་ཡང་རྟེན་དང་བརྟེན་པ་གོས་ཧྲུལ་གྱི་ནང་ན་རིན་ཆེན་ཡོད་པ་སོགས་དཔེ་དགུས་མཚོན་པ་དེ་འདྲ་བ་ངེས་དོན་ཡིན་ན།  ཞེས་པའི་དོན་ཡིན་པའི་ཕྱིར་དང་།  དགོངས་གཞི་སོགས་གསུམ་པོ་ཡང་འདི་ལ་གནས་པའི་ཕྱིར་རོ། །དེ་དག་ནི་དཔེ་དགུ་པོ་སོ་སོས་དོན་སོ་སོ་མཚོན་པའི་དབང་དུ་བྱས་ལ། 
དཔེ་དགུ་ཆར་གྱིས་དོན་གཅིག་མཚོན་པའི་དབང་དུ་བྱས་ན་ཡང་དྲང་དོན་དུ་གཏན་ལ་དབབ་པ་སྔ་མ་དང་འདྲ་སྟེ།  དེ་ནི་འོག་གཞུང་དོན་གྱི་སྐབས་སུ་འཆད་དོ། །གསུམ་ལས་ཕྱེ་བའི་དོན་རྣམ་པ་དགུ་པོ།  ས་བོན་དང་།  འཇུག་ཏུ་རུང་བ་དང་།  རང་གི་ངོ་བོ་ཅི་རིགས་པའི་སྒོ་ནས་ཚང་བའི་ཟུང་འཇུག་ལ་
བདེར་གཤེགས་སྙིང་པོར་བཞག་པ་ནི།  དྲང་དོན་དུ་བསྟན་པ་མ་ཡིན་ཏེ།  དངོས་ལ་གནོད་བྱེད་མེད་པའི་ཕྱིར་རོ། །ཇི་ལྟར་ཚང་པའི་ཚུལ་ལ།  ཁ་ཅིག་སྟོབས་སོགས་དང་མཚན་དཔེ་སོགས་ཀྱིས་བརྒྱན་པའི་སངས་རྒྱས་ད་ལྟ་ཉིད་ནས་ཡོད་པར་འདོད་པ་ནི་དྲང་དོན་གྱི་མདོ་ལ།  སྒྲ་ཇི་བཞིན་དུ་འཁྲུལ་པ་སྟེ། 
མྱང་འདས་ཆེན་པོར་རིགས་ཀྱི་བུ་སེམས་ཅན་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱིར།  སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་དོ་ཞེས་གསུངས་ཏེ།  སེམས་ཅན་ཐམས་ཅད་ལ་ཡང་དག་པར་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་
ཅུ་མེད་པས་དོན་དེའི་ཕྱིར་ངས་མདོ་སྡེ་འདི་ལས་ཚིགས་སུ་བཅད་པ་འདི་གསུངས་སོ། །ཐོག་མ་ཡོད་ལ་ད་ལྟ་མེད། །ཐོག་མ་མེད་ལ་ད་ལྟར་ཡོད། །དུས་གསུམ་སྲིད་པའི་ཆོས་ཐམས་ཅད། །དེ་ལྟ་བུ་ཡི་གནས་མེད་དོ། །རིགས་ཀྱི་བུ་སྲིད་པ་ཞེས་བྱ་བ་ལ་གནས་གསུམ་སྟེ།  མ་འོངས་པའི་སྲིད་པ་
དང་།  ད་ལྟར་བའི་སྲིད་པ་དང་།  འདས་པའི་སྲིད་པའོ། །དེ་ལ་སེམས་ཅན་ཐམས་ཅད་མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོད་པའི་ཕྱིར་སངས་རྒྱས་ཀྱི་རང་བཞིན་ཞེས་བྱའོ། །སེམས་ཅན་ཐམས་ཅད་ལ་ད་ལྟར་ཉོན་མོངས་པ་རྣམས་ཡོད་པས།  དེའི་ཕྱིར་ད་ལྟར་མཚན་
9-2-42a


བཟང་པོ་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་མེད་དོ། །ཞེས་པ་དང་།  རིགས་ཀྱི་བུ་ངས་འོ་མའི་ནང་ན་ཞོ་ཡོད་དོ། །ཞེས་མ་གསུངས་ཀྱི་འོ་མ་ལས་ཞོ་འབྱུང་བའི་ཕྱིར་ཞོ་ཡོད་ཅེས་བྱས་སོ། །རིགས་ཀྱི་བུ་འོ་མའི་ཚེ་ན་ཞོ་མེད།  མར་དང་ཞུན་མར་དང་།  ཉིད་ཁུ་ཡང་མེད་
དེ།  དྲོད་དང་དྲི་མ་ལ་སོགས་པའི་རྐྱེན་གྱིས་འོ་མ་ལས་ཞོ་འབྱུང་བའི་ཕྱིར། འོ་མ་ལ་ཞོའི་རང་བཞིན་ཡོད་དོ་ཞེས་སྨྲས་སོ། །དེ་བཞིན་དུ་རྒོད་མ་ལས་རྟེའུ་དང་།  མ་ལས་བུ་དང་།  ཤིང་ཨ་མྲའི་ས་བོན་ལས་ལོ་མ་དང་འབྲས་བུ་ལ་སོགས་པའི་དཔེ་ཤིན་ཏུ་མང་པོ་གསུངས་སོ། །དེས་ན་ཆོས་སྐུ་ལ་
གསུམ་དུ་ཕྱེ་བའི་དང་པོ་ཐོབ་རུང་དང་།  ཕྱི་མ་གཉིས་འཇུག་རུང་གི་ཚུལ་དུ་ཚང་།  དེ་བཞིན་ཉིད་དང་རང་བཞིན་གནས་རིགས་ངོ་བོའི་སྒོ་ནས་ཚང་།  རྒྱས་འགྱུར་གྱི་རིགས་ནུས་མཐུའི་སྒོ་ནས་ཚང་།  སྐུ་གསུམ་ས་བོན་གྱི་སྒོ་ནས་ཚང་སྟེ།  འདི་ཡི་རང་བཞིན་ཆོས་སྐུ་དང་ཞེས་པའི་འགྲེལ་པར། 
སངས་རྒྱས་རྣམས་ཀྱི་ཆོས་ཀྱི་སྐུ་ནི་རྣམ་པ་གཉིས་སུ་རྟོགས་པར་བྱའོ། །ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ནི་རྣམ་པར་དག་པའི་སྤྱོད་ཡུལ་གྱི་ཡུལ་ལོ། །དེ་ཡང་དེ་བཞིན་གཤེགས་པ་རྣམས་ཀྱི་སོ་སོ་རང་གིས་རིག་པར་བྱ་བའི་ཆོས་ཀྱི་དབང་དུ་བྱས་ཏེ་རྟོགས་པར་བྱའོ། །དེ་ཐོབ་པའི་རྒྱུ་ཤིན་
ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་རྒྱུ་མཐུན་པ་ནི་གདུལ་བྱ་ཇི་ལྟ་བར་སེམས་ཅན་གཞན་ལ་རྣམ་པ་རིག་པ་འབྱུང་ངོ་། །དེ་ཡང་བསྟན་པའི་ཆོས་ཀྱི་དབང་དུ་བྱས་པར་རིག་པར་བྱའོ། །ཞེས་དང་།  རང་བཞིན་འགྱུར་བ་མེད་པ་དང་། །ཞེས་པའི་འགྲེལ་པར་གསེར་བཟང་པོ་བཞིན་དུ་
གཞན་དུ་མི་འགྱུར་བའི་དོན་གྱིས་དེ་བཞིན་ཉིད་ཞེས་བརྗོད་དོ་ཞེས་དང་།  གཏེར་དང་འབྲས་བུའི་ཤིང་བཞིན་དུ་ཞེས་སོགས་ཀྱི་འགྲེལ་པར་དཔེ་ལྷག་མ་ལྔ་པོ་འདི་དག་གིས་ནི་སངས་རྒྱས་ཀྱི་སྐུ་རྣམ་པ་གསུམ་བསྐྱེད་པའི་རིགས་ཡོད་པའི་དབང་དུ་བྱས་ཏེ།  དེ་བཞིན་གཤེགས་པའི་ཁམས་སེམས་
9-2-42b


ཅན་འདི་དག་ཐམས་ཅད་ཀྱི་སྙིང་པོར་བསྟན་པ་ཡིན་ནོ། །ཞེས་གསུངས་པས་སོ། །མདོར་ན་ཟུང་འཇུག་དེ་ཉིད་ལ་ཁ་ཅིག་ལས།  ཆོས་ཅན་གསལ་བ་དང་།  ཁ་ཅིག་ལས་ཆོས་ཉིད་སྟོང་པ་དང་།  ཁ་ཅིག་ལས་འབྲས་བུ་ཆོས་སྐུ་དང་།  ཁ་ཅིག་ལས་རྒྱུ་རིགས་ཀྱི་སྒོ་ནས་བསྟན་ཅིང་།  རྒྱུད་བླ་མ་འདིར་
ནི།  མཚན་ཉིད་ཡོངས་སུ་རྫོགས་པའི་སྒོ་ནས་བསྟན་པར་ཤེས་པར་བྱའོ། །གཞན་ཡང་ཟབ་ཅིང་གཏིང་དཔག་དཀའ་བའི་གནས་འདི་ལ་ནི་ཁོ་བོའི་བློ་གྲོས་དབྱར་གྱི་མཚོ་བཞིན་དུ་གྱུར་མོད་ཀྱི།  ཤེས་པར་འདོད་ན་ངག་ལས་དྲི་བར་བྱའོ། །བཞི་པ་ནི།  བདག་ཉིད་ཆེན་པོ་འདིས་ཀྱང་ཟུང་འཇུག་ལ་བདེར་
གཤེགས་སྙིང་པོར་བཞེད་དེ།  སྙེ་མོ་སྒོམ་ཆེན་གྱི་དྲིས་ལན་ལས།  བཅུ་པ་སེམས་རྟོགས་པ་ལ་སྡེ་སྣོད་གསུམ་དང་།  རྒྱུད་སྡེ་བཞིར་བརྩིར་བཏུབ་བམ་མི་བཏུབ་ཟེར་བ་ལ།  སེམས་སྟོང་པར་རྟོགས་པ་དང་།  ཟུང་འཇུག་ཏུ་རྟོགས་པ་གཉིས་ཡོད།  སྟོང་པར་རྟོགས་པ་ལ་སྡེ་སྣོད་གསུམ་པོ་དང་།
རྒྱུད་སྡེ་བཞིའི་དོན་བརྩིར་མི་བཏུབ།  གལ་ཏེ་བཏུབ་ན་ཉན་ཐོས་ཀྱི་འགོག་པ་ལའང་བརྩིར་བཏུབ་པར་འགྱུར་བ་ལས།  འགོག་པ་དེ་སྟོང་པ་རྐྱང་པའི་མཐར་ལྟུང་བས་དེ་ཐེག་པ་ཆེན་པོའི་བརྗོད་བྱའི་དོན་མི་བཏུབ་པར་ཐེག་པ་ཆེན་པོའི་མདོ་རྒྱུད་ཐམས་ཅད་ལས་འབྱུང་བ་ཡིན།  ཟུང་འཇུག་རྟོགས་པ་ལ་
བརྩིར་བཏུབ་སྟེ།  ཉེས་བྱས་ཕྲ་མོས་མ་གོས་པས་ཚུལ་ཁྲིམས་ཀྱི་གཞི་འདུལ་བའི་སྡེ་སྣོད།  དཔའ་བར་འགྲོ་བ་ལ་སོགས་པའི་ཏིང་ངེ་འཛིན་ཐམས་ཅད་དེ་ལས་འབྱུང་བས་མདོ་སྡེའི་སྡེ་སྣོད།  གཟུགས་ནས་རྣམ་པ་ཐམས་ཅད་མཁྱེན་པའི་བར་གྱི་ཇི་སྙེད་པའི་ཤེས་བྱ་ཐམས་ཅད་ཤེས་པས་མངོན་
པའི་སྡེ་སྣོད།  ཕྱི་ནང་གི་རྟེན་འབྲེལ་ཁྱད་པར་ཅན་རྣམས་རྟོགས་པའི་སྒོ་ནས་རྒྱུད་སྡེ་བཞི་ཚང་བ་ཡིན།  བཅུ་གཅིག་པ་རང་སེམས་ཀྱི་སྟེང་དུ་དཀོན་མཆོག་གསུམ་ཚང་ངམ་མི་ཚང་ཟེར་བ་ལ།  སེམས་སྟོང་པའི་ཆ་རྐྱང་པ་དང་།  སྟོང་པར་ངོ་འཕྲོད་པའི་ཆ་ལ་དཀོན་མཆོག་གསུམ་ཚང་དུ་མི་བཏུབ།  སེམས་རིག་
9-2-43a


སྟོང་ཟུང་འཇུག་ལ་དཀོན་མཆོག་གསུམ་གྱི་ས་བོན་ཚང་ཞིང་། ཟུང་འཇུག་གི་དོན་ལེགས་པར་རྟོགས་པ་ལ་མངོན་གྱུར་ཉིད་དུ་ཚང་བ་ཡིན་ཞེས་གསུངས་སོ། །གཉིས་པ་གཞུང་གི་འབྲུ་ལ་སྦྱར་བ་ལ་ལྔ་སྟེ།  ཕྱོགས་སྔ་མ་བཀོད་པ།  དེ་མཐའ་གསུམ་དུ་བརྟགས་པ། 
དང་པོ་རྣམ་པར་བརྟགས་ནས་དགག་པ།  གཉིས་པ་ཁས་བླངས་འགལ་བས་དགག་པ།  གསུམ་པ་ལྟར་ན་འདོད་པ་གྲུབ་པའོ། །དང་པོ་ནི།  ལ་ལ་ཞེས་སོགས་གསུམ་སྟེ།  བོད་ཁ་ཅིག་བདེར་གཤེགས་སྙིང་པོའི་སྒྲ་ཆོས་དབྱིངས་ཟུང་འཇུག་ལ་མི་ཟེར་བར།  དེ་ལས་གཞན་པའི་སེམས་ཅན་གྱི་ཁམས་ལ་འཇུག་པར་
འདོད་ཅིང་།  དེ་ཉིད་འགྲོ་ཀུན་དགེ་བ་ཇི་སྙེད་ཡོད་པ་དང་། །ཞེས་པའི་སྐབས་ནས་བསྟན་པའི་བསྔོ་རྒྱུའི་དགེ་བ་ཡིན་ནོ་ཞེས་ཟེར་རོ། །གཉིས་པ་ནི་སེམས་ཅན་ཁམས་དེ་ཞེས་སོགས་ཚིགས་བཅད་གཅིག་གོ།  གསུམ་པ་ནི།  དངོས་པོ་ཡིན་ན་ཞེས་སོགས་ཚིགས་བཅད་ལྔ་དང་རྐང་པ་གཅིག་སྟེ།
དངོས་པོ་ལ་བེམ་རིག་གཉིས་སུ་ཁ་ཚོན་ཆོད་པ་ནི་རྫས་ཀྱི་དབང་དུ་བྱས་པ་སྟེ།  ལྡན་མིན་འདུ་བྱེད་ནི་དེ་གཉིས་ཀྱི་གནས་སྐབས་ལ་བཏགས་པའི་བཏགས་ཡོད་ཡིན་པའི་ཕྱིར་རོ། །ཡང་ན་བདེར་གཤེགས་སྙིང་པོ་དངོས་པོར་འདོད་ན་དེ་གཉིས་སུ་ཁ་ཚོན་ཆོད་ཅེས་པའོ། །བེམ་པོ་སེམས་ཅན་གྱི་
ཁམས་སུ་འདོད་པ་མུ་སྟེགས་འགའི་ལུགས་ཡིན་པ་ནི་རྒྱང་འཕེན་པ་ས་སོགས་འབྱུང་བ་དང་གྲུབ་བདེ་རྫས་གཅིག་པའི་རྣམ་པར་ཤེས་པ་ཡོད་པར་འདོད་པ་དང་།  གཅེར་བུ་པ་ཤིང་སེམས་ལྡན་དུ་འདོད་པ་ལ་སོགས་པའོ། །རིག་པ་རྣམ་ཤེས་ཚོགས་བརྒྱད་ལས་མ་འདས་པ་ནི་འཁོར་དང་བཅས་
པའི་དབང་དུ་བྱས་པའམ།  ཡང་ན་བདེར་གཤེགས་སྙིང་པོ་ཤེས་པར་འདོད་ན་སེམས་བྱུང་དུ་འདོད་པ་ནི་མི་འཐད་པས་བརྒྱད་པོ་གང་རུང་དུ་འདོད་དགོས་པའོ། །མདོ་ལས།  བདེར་གཤེགས་སྙིང་པོ་འདུས་མ་བྱས་སུ་གསུངས་པ་ནི།  དཔལ་ཕྲེང་གི་མདོ་ལས།  བཅོམ་ལྡན་འདས་དེ་བཞིན་གཤེགས་
9-2-43b


པའི་སྙིང་པོ་ལ་ནི།  སྐྱེ་བའམ་འགུམ་པའམ་འཕོ་བའམ་འབྱུང་བ་ཡང་མ་མཆིས་སོ། །བཅོམ་ལྡན་འདས་དེ་བཞིན་གཤེགས་པའི་སྙིང་པོ་ནི་འདུས་བྱས་ཀྱི་མཚན་ཉིད་ཀྱི་ཡུལ་ལས་འདས་པ་ལགས་སོ། །ཞེས་གསུངས་སོ། །འགའ་ལས་ཟག་མེད་སེམས་རྒྱུད་ཅེས་གསུངས་པ་ནི།  མདོ་
ལས།  བདེར་གཤེགས་སྙིང་པོ་འགྲོ་ཀུན་ཡོངས་ལ་ཁྱབ། །དྲི་མ་མེད་པའི་ཡིད་ལ་རྣམ་པར་བརྟེན། །ཞེས་པ་སྟེ།  དེ་ནི་ཀུན་གཞིའི་གསལ་ཆ་ལ་དགོངས་ལ་ཀུན་གཞིའི་གསལ་ཆ་ནི་མ་བསྒྲིབས་ལུང་མ་བསྟན་ཡིན་པས་བསྔོ་རྒྱུའི་དགེ་བར་འདོད་པ་དང་འགལ་ལོ། །གལ་ཏེ་ཚོགས་བརྒྱད་
ལས་གཞན་པའི་ཟག་པ་མེད་པའི་སེམས་ཞེས་པའི་རྣམ་ཤེས་ཡོད་ན་རྣམ་ཤེས་ཚོགས་དགུར་འགྱུར་ལ་དེ་ཡང་འདོད་ན།  ལང་ཀར་གཤེགས་པ་ལས།  ཆོས་ལྔ་དང་ནི་རང་བཞིན་གསུམ། །རྣམ་པར་ཤེས་པ་བརྒྱད་ཉིད་དང་། །བདག་མེད་གཉིས་ཀྱི་ནང་དུ་ནི། །ཐེག་ཆེན་མཐའ་དག་འདུས་
པར་ཟད། །ཞེས་གསུངས་པ་དང་འགལ་ལོ། །བཞི་པ་ནི་དངོས་མེད་ཅེས་སོགས་གཉིས་ཏེ།  དངོས་མེད་ཡིན་ན་དགེ་སྡིག་མེད་པས་བསྔོ་རྒྱུའི་དགེ་བར་འདོད་པ་དང་འགལ་ལོ། །ལྔ་པ་ནི་གལ་ཏེ་སེམས་ཅན་ཞེས་སོགས་དྲུག་སྟེ།  སེམས་ཅན་གྱི་ཁམས་དེ་དངོས་པོར་ཡོད་མེད་ཀྱི་སྤྲོས་པ་དང་བྲལ་བ་
ཡིན་ན།  སྔར་ཀླུ་སྒྲུབ་ཀྱི་ལུང་དྲངས་ནས་བཤད་པའི་ཡོད་མེད་ལས་འདས་པའི་ཆོས་དབྱིངས་ལས་འདའ་བ་མེད་ལ།  དེ་ནི་བསྔོ་རྒྱུའི་དགེ་བ་མིན་པར་བཤད་ཟིན་ཏོ། །གསུམ་པ་ཆོས་དབྱིངས་ལ་བསྔོ་རྒྱུའི་སྙིང་པོ་ཡིན་མིན་གྱི་དབྱེ་བ་ཡོད་པར་འདོད་པ་དགག་པ་ནི།  གལ་ཏེ་བེམ་པོའི་ཞེས་སོགས་
བདུན་ཏེ།  བེམ་པོའི་ཆོས་དབྱིངས་བསྔོ་རྒྱུའི་དགེ་བར་གྱུར་པའི་བདེར་གཤེགས་སྙིང་པོ་མ་ཡིན་ཡང་སེམས་ཅན་ཀྱི་ཆོས་དབྱིངས་བསྔོ་རྒྱུའི་དགེ་བར་གྱུར་པའི་བདེར་གཤེགས་སྙིང་པོ་ཡིན་ནོ་སྙམ་ན་མ་ཡིན་ཏེ།  ཆོས་དབྱིངས་ལ་སྙིང་པོ་ཡིན་མིན་གྱི་དབྱེ་བ་ཡོད་ན་ངོ་བོ་མི་འདྲ་བའི་དབྱེ་བ་ཡོད་དགོས་པ་ལས། 
9-2-44a


 དེ་མེད་པར་རྒྱལ་བས་གསུངས་ཤིང་རིགས་པས་ཀྱང་འགྲུབ་པའི་ཕྱིར་རོ། །དེ་ལྟར་ཡང་ཡུམ་གྱི་མདོ་ལས།  རིགས་ཀྱི་བུ་ཆོས་འདི་དག་གི་དེ་བཞིན་ཉིད་གང་ཡིན་པ་དང་།  དེ་བཞིན་གཤེགས་པའི་དེ་བཞིན་ཉིད་གང་ཡིན་པ་དེ་ནི།  དེ་བཞིན་ཉིད་གཅིག་སྟེ།  རིགས་ཀྱི་བུ་དེ་བཞིན་ཉིད་ལ་གཉིས་
སུ་བྱར་མེད་དོ། །ཞེས་གསུངས་སོ། །དེ་ཡང་ངོ་བོའི་སྒོ་ནས་དབྱེ་བ་མེད་པ་ཡིན་གྱི།  ཆོས་ཅན་གྱི་སྒོ་ནས་སྟོང་ཉིད་བཞི་དང་།  བཅུ་དྲུག་དང་།  ཉི་ཤུར་དབྱེ་བ་དང་།  རྟེན་ཆོས་བསྒྲུབ་པའི་སྒོ་ནས་དབྱེ་བ་གསུམ་དང་།  བཅུ་གསུམ་དུ་དབྱེ་བ་ཡང་ཡོད་དོ། །བཞི་པ་དེས་ན་སྤྲོས་བྲལ་ལ་སྙིང་པོར་འཇོག་པའི་འཐད་
པ་ལ་གཉིས་ཏེ།  འཐད་པ་དངོས་དང་།  ཤེས་བྱེད་ཀྱི་ལུང་ངོ་། །དང་པོ་ནི།  དེས་ན་དེ་བཞིན་ཞེས་སོགས་བཞི་སྟེ།  སེམས་ཀྱི་རང་བཞིན་སྤྲོས་བྲལ་ཟུང་འཇུག་ལ་སྙིང་པོར་འཇོག་པའི་ཕྱིར་ན།  སེམས་ཅན་རྣམས་ལ་སོགས་ཏེ།  ཐབས་ཀྱིས་མ་ཟིན་ན་འཁོར་བ་དང་།  ཐབས་ཀྱིས་ཟིན་ན་སངས་རྒྱས་
འབྱུང་བའི་ཕྱིར་རོ། །གཉིས་པ་ལ་གསུམ་སྟེ།  ཀླུ་སྒྲུབ་ཀྱི་ལུང་།  བྱམས་པའི་ལུང་།  བརྒྱད་སྟོང་པའི་ལུང་ཁུངས་འགོད་པའོ། །དང་པོ་ནི།  འཕགས་པ་ཀླུ་སྒྲུབ་ཞེས་སོགས་དྲུག་སྟེ།  སེམས་བདེན་པར་གྲུབ་ན་འཆིང་གྲོལ་མི་རུང་ཞིང་།  བདེན་པས་སྟོང་པའི་ཕྱིར་ན་འཆིང་གྲོལ་རུང་ཞེས་པའོ། །
གཉིས་པ་ནི།  ཐེག་པ་ཆེན་པོ་ཞེས་སོགས་བཅུ་གསུམ་སྟེ།  ལུང་གི་དོན་བཤད་པ་ནི་ཉེ་བར་ལེན་པའི་ཞེས་སོགས་ཀྱིས་སྟོན་ནོ། །དེའི་དོན་ཡང་རིགས་སད་པའི་ཚེ་སྡུག་བསྔལ་ལ་སྤོང་འདོད་དང་།  མྱ་ངན་ལས་འདས་པ་ལ་དོན་གཉེར་གྱི་བློ་སྐྱེ་བ་གཉིས་ནི་སེམས་ཅན་ལ་བདེ་བར་གཤེགས་པའི་ཁམས་སེམས་
ཀྱི་རང་བཞིན་སྤྲོས་བྲལ་ཡོད་པའི་སྒྲུབ་བྱེད་དུ་འཐད་དོ། །དེས་ན་སེམས་ཀྱི་རང་བཞིན་སྤྲོས་བྲལ་ཡོད་དེ།  སྤྲོས་བྲལ་རྟོགས་པ་ལ་དོན་གཉེར་གྱི་བློ་སྐྱེ་ཞིང་།  སྤྲོས་པ་ལ་སྐྱོ་བ་སྐྱེ་བའི་ཕྱིར་ཞེས་པ་འདི་ནི།  མེ་ཡོད་པའི་སྒྲུབ་བྱེད་དུ་ཚ་བ་བཀོད་པ་ལྟར་རོ། །གསུམ་པ་ནི་འདི་དོན་ཞེས་སོགས་ཏེ།  བརྒྱད་སྟོང་
9-2-44b


པའི་ཆོས་འཕགས་ཀྱི་ལེའུ་ལས།  རིགས་ཀྱི་བུ་སྟོང་པ་ཉིད་ལ་འོང་བའམ་འགྲོ་བ་མེད་དེ།  སྟོང་པ་ཉིད་གང་ཡིན་པ་དེ་ནི་དེ་བཞིན་གཤེགས་པའོ། །རིགས་ཀྱི་བུ་ཇི་ལྟ་བ་བཞིན་ལ་འགྲོ་བའམ་འོང་བ་མེད་དེ་ཇི་ལྟ་བ་བཞིན་གང་ཡིན་པ་དེ་ནི་དེ་བཞིན་གཤེགས་པའོ། །རིགས་ཀྱི་བུ་འདོད་ཆགས་དང་བྲལ་
བ་ལ་ནི་འོང་བའམ་འགྲོ་བ་མེད་དེ།  འདོད་ཆགས་དང་བྲལ་བ་གང་ཡིན་པ་དེ་ནི་དེ་བཞིན་གཤེགས་པའོ་ཞེས་པ་དང་།  འཕགས་པ་ཆོས་འཕགས་ལ་བྱང་ཆུབ་སེམས་དཔའ་རྟག་ཏུ་ངུས་དེ་བཞིན་གཤེགས་པ་དེ་དག་གང་ནས་བྱོན་གང་དུ་བཞུད་ཅེས་དྲིས་པས་ལན་དུ་དེ་བཞིན་གཤེགས་པ་དེ་དག་
གང་ནས་ཀྱང་མ་བྱོན་གང་དུ་ཡང་མ་བཞུད།  དེ་བཞིན་ཉིད་ལས་མ་གཡོས་དེ་བཞིན་ཉིད་གང་ཡིན་པ་དེ་ནི་དེ་བཞིན་གཤེགས་པའོ་ཞེས་པ་དང་།  སྨིག་རྒྱུ་གཡོ་བ་མཐོང་ན་སྨིག་རྒྱུའི་ཆུ་དེ་གང་ནས་འོངས་གང་དུ་སོང་། ཆུ་མེད་པ་ལ་ཆུར་འདུ་ཤེས་པ་དེ་བཞིན་དུ་དེ་བཞིན་གཤེགས་པ་ལ་གཟུགས་དང་སྒྲར་
མངོན་པར་ཞེན་ནས་བྱོན་པ་དང་བཞུད་པར་རྟོག་པ་དེ་ནི་བྱིས་པ་ཤེས་རབ་འཆལ་བའོ། །ཞེས་གསུངས་སོ། །ལྔ་པ་སྙིང་པོ་བསྒྲུབ་པའི་ཚུལ་གྱིས་ཡོད་པ་དྲང་དོན་དུ་བསྟན་པ་ལ་གཉིས་ཏེ།  ཆོས་གསུམ་གྱི་སྒོ་ནས་དྲང་དོན་དུ་གཏན་ལ་དབབ་པ།  ཤེས་བྱེད་ཀྱི་ལུང་ཁུངས་འགོད་པའོ། །དང་པོ་
ནི།  འོན་ཀྱང་མདོ་སྡེ་ཞེས་སོགས་བཅུ་བཞི་སྟེ།  སེམས་ཀྱི་རང་བཞིན་སྤྲོས་བྲལ་ལས་གཞན་པའི་བདེ་བར་གཤེགས་པའི་སྙིང་པོ་མེད་ལ་འོན་ཀྱང་དེ་བཞིན་གཤེགས་པའི་སྙིང་པོའི་མདོ་དང་།  དཔལ་ཕྲེང་གི་མདོ་དང་།  སོར་མོའི་ཕྲེང་བ་ལ་ཕན་པའི་མདོ་དང་།  མྱང་འདས་ཆེན་པོ་ལ་སོགས་པའི་
མདོ་སྡེ་འགའ་ཞིག་དང་།  རྒྱུད་བླར།  གོས་ངན་ནང་ན་རིན་པོ་ཆེ་གསེར་གྱི་སངས་རྒྱས་ཀྱི་སྐུ་གཟུགས་ཡོད་པ་ལྟར་སེམས་ཅན་རྣམས་ལ་མཚན་དཔེས་བརྒྱན་པའི་སངས་རྒྱས་ཀྱི་སྙིང་པོ་ཡོད་པར་གསུངས་པ་ནི་དགོངས་པ་ཡིན་པར་སོགས་ཏེ།  ཇི་ལྟར་གསུངས་ན་མདོ་དང་པོ་ལས།  རིགས་ཀྱི་
9-2-45a


བུ་དག་དེ་བཞིན་དུ་སེམས་ཅན་ཐམས་ཅད་ཀྱིས་མངོན་པར་ཞེན་པའི་ཡིད་ལ་བྱེད་པའི་ཁྱིམ་ལྟ་བུར་གྱུར་པའི་འོག་ན་དེ་བཞིན་གཤེགས་པའི་སྙིང་པོ་སྟོབས་དང་མི་འཇིགས་པ་དང་མ་འདྲེས་པ་དང་།  སངས་རྒྱས་ཀྱི་ཆོས་ཐམས་ཅད་ཀྱི་མཛོད་དང་།  གཏེར་ཆེན་པོ་ཡོད་
ཀྱང་སེམས་ཅན་དེ་དག་གཟུགས་དང་སྒྲ་དང་དྲི་དང་རོ་དང་རེག་པ་ལ་ཆགས་པས་སྡུག་བསྔལ་ཞིང་།  འཁོར་བ་ན་འཁོར་ཏེ་ཆོས་ཀྱི་གཏེར་ཆེན་པོ་དེ་མ་ཐོས་པས་ཐོབ་པར་མ་གྱུར་ཅིང་ཡོངས་སུ་སྦྱང་བའི་ཕྱིར་བརྩོན་པར་ཡང་མི་བྱེད་དོ། །རིགས་ཀྱི་བུ་དག་དེ་ནས་དེ་བཞིན་གཤེགས་པ་འཇིག་རྟེན་དུ་བྱུང་
སྟེ།  བྱང་ཆུབ་སེམས་དཔའི་ནང་དུ་འདི་ལྟ་བུའི་ཆོས་ཀྱི་གཏེར་ཆེན་པོ་ཡང་དག་པར་རབ་ཏུ་སྟོན་ཏོ་ཞེས་གསུངས་སོ། །མདོ་གཉིས་པ་ལས།  རྣམ་པར་དབྱེར་མེད་པ་བསམ་གྱིས་མི་ཁྱབ་པའི་སངས་རྒྱས་ཀྱི་ཆོས་གང་གཱའི་ཀླུང་གི་བྱེ་མ་ལས་འདས་པ་དང་ལྡན་པ་དེ་བཞིན་གཤེགས་པའི་
ཆོས་ཀྱི་སྐུར་བསྟན་པ་སྟེ།  བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་འདི་ཉིད་ཉོན་མོངས་པའི་སྦུབས་ལས་མ་གྲོལ་བ་ནི་དེ་བཞིན་གཤེགས་པའི་སྙིང་པོ་ཞེས་བགྱིའོ། །ཞེས་གསུངས་སོ། །མདོ་གསུམ་པ་ལས།  སངས་རྒྱས་ཐམས་ཅད་ཀྱིས་ཤིན་ཏུ་ནན་ཏན་དུ་བཙལ་ཡང་དེ་བཞིན་
གཤེགས་པའི་སྙིང་པོ་འཇིག་པ་མ་རྙེད།  མི་འཇིག་པའི་དབྱིངས་སངས་རྒྱས་ཀྱི་དབྱིངས་སེམས་ཅན་ཐམས་ཅད་ལ་མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་ཡོད་དོ། །ཞེས་གསུངས་སོ། །མདོ་བཞི་པ་ལས།  རིགས་ཀྱི་བུ་སངས་རྒྱས་ཀྱི་རང་བཞིན་ནི་འདི་ལྟ་སྟེ་སྟོབས་
བཅུ་དང་མི་འཇིགས་པ་བཞི་དང་།  སྙིང་རྗེ་ཆེན་པོ་དང་།  དྲན་པ་ཉེ་བར་གཞག་པ་གསུམ་སྟེ།  སེམས་ཅན་ཐམས་ཅད་ལ་རྣམ་པ་གསུམ་ཡོད་པ་ཡང་ཉོན་མོངས་པ་ཡོངས་སུ་བཅོམ་ན་གདོད་མཐོང་བར་འགྱུར་རོ། །ལོག་སྲེད་ཅན་དག་ནི་ལོག་སྲེད་ཡོངས་སུ་བཅོམ་ནས་གདོད་སྟོབས་བཅུ་དང་།  མི་
9-2-45b


འཇིགས་པ་བཞི་དང་།  སྙིང་རྗེ་ཆེན་པོ་དང་།  དྲན་པ་ཉེ་བར་བཞག་པ་གསུམ་ཐོབ་པར་འགྱུར་རོ། །དོན་དེ་ལྟ་བུས་ན་ངས་རྟག་ཏུ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་དོ་ཞེས་གསུངས་སོ། །རྒྱུད་བླར།  དེ་བཞིན་རྒྱལ་བས་ཉོན་མོངས་མི་གཙང་ཆེན་པོར་ལྷུང་གྱུར་རྫོགས་སངས་
རིན་པོ་ཆེ། །སེམས་ཅན་རྣམས་ལ་གཟིགས་ནས་དེ་དག་བྱ་ཕྱིར་ལུས་ཅན་རྣམས་ལ་ཆོས་སྟོན་ཏོ། །ཞེས་དང་།  ཉོན་མོངས་ཀྱིས་བཏུམས་བདེར་གཤེགས་དངོས་པོ་ཉིད། །དུད་འགྲོ་ལ་ཡང་གཟིགས་ནས་དེ་བཞིན་ཏེ། །ཞེས་གསུངས་པའི་ཕྱིར།  དགོས་པ་སྐྱོན་ལྔ་སྤང་ཕྱིར་གསུངས་པ་ནི།  རྒྱུད་
བླར།  སེམས་ཞུམ་སེམས་ཅན་དམན་ལ་བརྙས་པ་དང་། །ཡང་དག་མིན་འཛིན་ཡང་དག་ཆོས་ལ་སྐུར། །བདག་ཆགས་ལྷག་པའི་སྐྱོན་ལྔ་གང་དག་ལ། །ཡོད་པ་དེ་དག་དེ་སྤོང་དོན་དུ་གསུངས། །ཞེས་གསུངས་པ་ལྟར་རོ། །དངོས་ལ་གནོད་བྱེད་ཀྱི་སྐབས་སུ་མུ་སྟེགས་བདག་དང་མཚུངས་
པ་ནི།  གྲངས་ཅན་པ་ཤེས་རིག་ཀུན་ལ་ཁྱབ་པའི་རྟག་པ་གཅིག་པུ་དང་།  དབང་ཕྱུག་པ་གསལ་ལ་དྭངས་བའི་རྟག་པ་གཅིག་པུ་དང་།  ཁྱབ་འཇུག་པ་ཀུན་ཁྱབ་ཀྱི་བློ་གཅིག་པུ་དང་།  གཅེར་བུ་པ་རང་བཞིན་རྟག་ལ་གནས་སྐབས་མི་རྟག་པ་རང་གི་ལུས་ཀྱི་ཚད་ཙམ་དང་།  རིག་པ་ཅན་པ་དཀར་ལ་
འཚེར་བ།  སྣུམ་ལ་འགྲིལ་བ།  རྡུལ་ཕྲན་ཙམ་ཞིག་རང་རང་གི་སྙིང་ལ་གནས་པར་འདོད་པ་སོགས་དང་མཚུངས་པའོ། །ངེས་དོན་གྱི་མདོ་སྡེ་དང་འགལ་བ་ནི་།  ངེས་དོན་གྱི་མདོ་སྡེ་རྣམས་ལས།  ཆོས་ཐམས་ཅད་སྟོང་པ་ཉིད་དུ་གསུངས་པ་དང་འགལ་བའོ། །འདིར་གོས་ཧྲུལ་ནང་ན་རིན་ཆེན་
ལྟར། །ཞེས་གསུངས་པའི་དོན།  རྒྱུད་བླའི་དཔེ་བདུན་པ་ནས་བཟུང་བ་མིན་གྱི།  འོག་ནས་འཆད་པ་ལྟར་ལང་གཤེགས་ནས་དཔེ་དེ་གཅིག་པུ་གསུངས་པ་དངོས་སུ་སྨོས་ནས།  རྒྱུད་བླའི་དཔེ་དགུ་ཆར་མཚོན་པ་ཡིན་ཏེ།  དཔེ་དགུས་མཚོན་པ་ལྟར།  རྟེན་དང་བརྟེན་པའི་ཚུལ་གྱིས་ཡོད་པ་དྲང་
9-2-46a


དོན་ཡིན་པ་དང་།  སྙིང་པོ་རང་གི་ངོ་བོ་ངེས་དོན་ཡིན་པའི་ཕྱིར་རོ། །གཉིས་པ་ནི་འདི་དོན་ཞེས་སོགས་དྲུག་སྟེ།  སྙིང་པོའི་མདོ་ལས།  འདི་ལྟ་སྟེ་གཏེར་ཆེན་པོ་ནི།  སེམས་ཀྱི་ངོ་བོ་ཉིད་ཀྱིས་སེམས་ཅན་མ་ཡིན་པའོ། །ཞེས་དང་།  རྒྱུད་བླའི་འགྲེལ་པར།  དོན་གྱི་གནས་གསུམ་པོ་
འདི་དག་ཀྱང་དེ་བཞིན་གཤེགས་པའི་སྙིང་པོའི་མདོའི་རྗེས་སུ་འབྲངས་ཏེ།  འོག་ནས་སྟོན་པར་འགྱུར་རོ་ཞེས་གསུངས་ཤིང་།  འོག་ནས་ཇི་ལྟར་སྟོན་ཅེ་ན།  འདི་ཡི་རང་བཞིན་ཆོས་སྐུ་དང་། །ཞེས་སོགས་ཀྱི་འགྲེལ་པར་དཔེ་དགུ་དོན་དགུ་སྦྱར་ནས་སེམས་ཀྱི་ཆོས་དབྱིངས་ཟུང་འཇུག་ལ་སངས་རྒྱས་
ཀྱི་སྐུ་གསུམ་བསྐྱེད་པའི་རིགས་ཡོད་པ་ལ་དགོངས་ནས་བདེར་གཤེགས་སྙིང་པོར་གསུངས་སོ། །ཟླ་བ་གྲགས་པའི་འཇུག་འགྲེལ་ལས།  མདོ་སྡེ་གང་ལས་ཕྱི་རོལ་སྣང་ཡོད་མིན། །ཞེས་སོགས་ཀྱི་ཐད་དུ།  དེ་བཞིན་དུ་བཅོམ་ལྡན་འདས་ཀྱིས་མདོ་བརྗོད་པ་ལས་དེ་བཞིན་གཤེགས་པའི་སྙིང་པོ་
གསུངས་པ་དེ་བཅོམ་ལྡན་འདས་ཀྱིས་རང་བཞིན་འོད་གསལ་བ་རྣམ་པར་དག་པས།  ཐོག་མ་ནས་རྣམ་པར་དག་པ་ཉིད་མཚན་སུམ་ཅུ་རྩ་གཉིས་དང་ལྡན་པ་སེམས་ཅན་ཐམས་ཅད་ཀྱི་ལུས་ཀྱི་ནང་ན་མཆིས་པར་བརྗོད་དེ།  བཅོམ་ལྡན་འདས་ཀྱིས་རིན་པོ་ཆེ་རིན་ཐང་ཆེན་པོ་གོས་དྲི་མ་ཅན་གྱིས་ཡོངས་སུ་དཀྲིས་
པ་ལྟར་ཕུང་པོ་དང་ཁམས་དང་སྐྱེ་མཆེད་ཀྱི་གོས་ཀྱིས་ཡོངས་སུ་དཀྲིས་པ་འདོད་ཆགས་དང་ཞེ་སྡང་དང་གཏི་མུག་གིས་ཟིལ་གྱིས་ནོན་པ་ཡོངས་སུ་རྟོག་པའི་རྟོག་པས་དྲི་མ་ཅན་དུ་གྱུར་པ་རྟག་པ་བརྟན་པ་ཐེར་ཟུག་པར་ནི་བརྗོད་ན་བཅོམ་ལྡན་འདས་དེ་གཞིན་གཤེགས་པའི་སྙིང་པོར་སྨྲ་བ་འདི་ནི་མུ་སྟེགས་
བྱེད་ཀྱི་བདག་ཏུ་སྨྲ་བ་དང་ཇི་ལྟར་འདྲ་བ་མ་ལགས།  བཅོམ་ལྡན་འདས་མུ་སྟེགས་བྱེད་རྣམས་ཀྱང་རྟག་པ་བྱེད་པ་པོ་ཡོན་ཏན་མེད་པ་ཁྱབ་པ་མི་འཇིག་པའོ། །ཞེས་བདག་ཏུ་སྨྲ་བ་སྟོན་པར་བྱེད་དོ། །བཅོམ་ལྡན་འདས་ཀྱིས་བཀའ་སྩལ་པ་བློ་གྲོས་ཆེན་པོ་ང་ཡིས་དེ་བཞིན་གཤེགས་པའི་
9-2-46b


སྙིང་པོ་བསྟན་པ་ནི་མུ་སྟེགས་བྱེད་ཀྱི་བདག་སྨྲ་བ་དང་མཚུངས་པ་མ་ཡིན་ཏེ།  བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སྟོང་པ་ཉིད་ཡང་དག་པའི་མཐའ་དང་། མྱ་ངན་ལས་འདས་པ་དང་མ་སྐྱེས་པ་དང་མཚན་མ་མེད་པ་དང་སྨོན་པ་མེད་པ་ལ་སོགས་པའི་
ཚིག་གི་དོན་རྣམས་ལ་དེ་བཞིན་གཤེགས་པའི་སྙིང་པོར་བསྟན་པར་བྱས་ནས་བྱིས་པ་རྣམས་བདག་མེད་པས་འཇིགས་པར་འགྱུར་བའི་གནས་རྣམ་པར་སྤང་བའི་དོན་དུ་དེ་བཞིན་གཤེགས་པའི་སྒོ་བསྟན་པས་རྣམ་པར་མི་རྟོག་པའི་གནས་སྣང་བ་མེད་པའི་སྤྱོད་ཡུལ་སྟོན་ཏེ་བློ་གྲོས་ཆེན་པོ་མ་འོངས་པ་དང་ད་ལྟར་
བྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བདག་ལ་མངོན་པར་བརྟེན་པར་མི་བྱ།  བློ་གྲོས་ཆེན་པོ་དཔེར་ན་རྫ་མཁན་ནི་འཇིམ་པའི་རྡུལ་གྱི་ཕུང་པོ་གཅིག་ལ།  ལག་པ་དང་བཟོ་དང་ལག་གཟུངས་དང་ཆུ་དང་སྲད་བུ་དང་ནན་ཏན་དང་ལྡན་པ་ལས་སྣོད་རྣམ་པ་སྣ་ཚོགས་བྱེད་དོ། །
བློ་གྲོས་ཆེན་པོ་དེ་བཞིན་དུ་དེ་བཞིན་གཤེགས་པ་རྣམས་ཀྱང་།  ཆོས་ལ་བདག་མེད་པ་རྣམ་པར་རྟོག་པའི་བདག་ཉིད་རྣམ་པར་ལོག་པ་དེ་ཉིད།  ཤེས་རབ་དང་ཐབས་ལ་མཁས་པ་དང་ལྡན་པ་རྣམ་པ་སྣ་ཚོགས་ཀྱིས་དེ་བཞིན་གཤེགས་པའི་སྙིང་པོ་བསྟན་པའམ་བདག་མེད་པ་བསྟན་པས་ཀྱང་
རུང་སྟེ།  རྫ་མཁན་བཞིན་དུ་ཚིག་དང་ཡི་གེའི་རྣམ་གྲངས་རྣམ་པ་སྣ་ཚོགས་ཀྱིས་སྟོན་ནོ། །དེ་ལྟར་དེའི་ཕྱིར་བློ་གྲོས་ཆེན་པོ་དེ་བཞིན་གཤེགས་པའི་སྙིང་པོ་བསྟན་པས་མུ་སྟེགས་བྱེད་ཀྱིས་བདག་ཏུ་བསྟན་པ་དང་མི་འདྲའོ། །བློ་གྲོས་ཆེན་པོ་དེ་ལྟར་དེ་བཞིན་གཤེགས་པ་རྣམས་ཀྱིས་མུ་སྟེགས་
བྱེད་བདག་ཏུ་སྨྲ་བ་ལ་མངོན་པར་ཞེན་པ་རྣམས་དྲང་བའི་ཕྱིར།  དེ་བཞིན་གཤེགས་པའི་སྙིང་པོ་བསྟན་པས་དེ་བཞིན་གཤེགས་པའི་སྙིང་པོ་སྟོན་ཏེ།  ཡང་དག་པའི་བདག་ཏུ་རྣམ་པར་རྟོག་པའི་ལྟ་བར་ལྟུང་བའི་བསམ་པ་ཅན་དག་རྣམ་པར་ཐར་པ་གསུམ་གྱི་སྤྱོད་ཡུལ་ལ་གནས་པའི་བསམ་པ་དང་ལྡན་
9-2-47a


ཞིང་།  མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ཇི་ལྟར་འགྱུར་ཞེས་པའི་མདོ་དྲངས་ནས་སྟོབས་སོགས་ཀྱིས་བརྒྱན་པའི་བདེར་གཤེགས་སྙིང་པོ་དྲང་དོན་དུ་བཤད་དོ། །གཉིས་པ་བསྔོ་ཚུལ་གྱི་ལག་ལེན་ལ་འཁྲུལ་པ་དགག་པ་ནི།  འགའ་
ཞིག་བསྔོ་བའི་ཞེས་སོགས་དྲུག་སྟེ།  འདུལ་བ་སྟོད་ལུགས་པ་དང་།  བལ་པོའི་འདུལ་འཛིན་ཁ་ཅིག་བསྔོ་བ་བྱེད་པའི་ཚེ་རིལ་བ་སྤྱི་བླུགས་ཀྱིས་ཆུ་བསྒྲེང་བའི་ལག་ལེན་བྱེད་དོ། །ཞེས་གྲགས་པ་འདི་ནི་མུ་སྟེགས་སོགས་སོ། །སྐྱེས་རབས་ལས་རྒྱལ་པོ་ཐམས་ཅད་སྒྲོལ་གྱིས་བྲམ་ཟེ་སློང་མོ་བ་ལ་གླང་པོ་ཆེ་དང་། 
བུ་དང་བུ་མོ་བྱིན་པ་དང་།  བརྒྱ་བྱིན་ལ་བཙུན་མོ་བྱིན་པའི་ཚེ།  གསེར་གྱི་རིལ་བས་བཏུད་དེ་བཞེས་སུ་གསོལ་ཞེས་མདུན་དུ་འཁོད་པ་དང་།  བྲམ་ཟེའི་ལག་པ་རྐྱོང་བ་ལ་རིལ་བ་སྤྱི་བླུགས་ཀྱིས་བཏུད་དོ། །དེ་ཡི་སྦྱིན་པའི་མཐུ་དག་གིས། །རིལ་བ་ལས་ནི་ཆུ་བྱུང་ནས། །མིག་ནི་པད་མོ་འདྲ་བ་ལས། །མ་བསྒྲིམས་
པར་ཡང་མཆི་མ་བྱུང་། །ཞེས་པ་དང་།  དེ་ནས་རྒྱལ་བུས་སྲས་གཉིས་ལག་པ་བཅིངས། །བྲམ་ཟེའི་ལག་པར་ཆུ་བླུགས་དེ་ལ་བྱིན། །དེའི་ཚེ་ས་གཡོས་འདོད་ལྷ་སྡིག་ཅན་གྱི། །སྙིང་ནི་མྱ་ངན་མེ་ཡིས་བསྲེགས་པར་གྱུར། །ཞེས་བཤད་པ་རྣམས།  དེའི་ཚེ་ཡུལ་དེ་ན་མུ་སྟེགས་རིག་བྱེད་པའི་ལག་ལེན་དར་
བས་དེའི་ལུགས་སུ་མཛད་པའོ། །གསུམ་པ་བསྔོ་བའི་འབྲས་བུ་ལ་འཁྲུལ་པ་དགག་པ་ནི།  བསྔོ་བ་དེ་ཡང་ཞེས་སོགས་བརྒྱད་དེ།  བསྔོ་རྒྱུའི་དགེ་རྩ་སྐྱེས་བུའི་རྩོལ་བས་གསར་དུ་བསགས་པ་དགོས་ན་བསྔོ་བ་རྣམ་དག་ལ་བསྔོ་བའི་འབྲས་བུ་ངེས་པར་འགྲུབ་པ་གཅིག་དགོས་སམ་སྙམ་ན་མ་ཡིན་ཏེ།
བསྔོ་བ་རྣམ་དག་དེ་ཡང་མདོར་བསྡུས་ན་འབྲས་བུ་འགྲུབ་ཏུ་རུང་བ་གནས་ཀྱི་བསྔོ་བ་དང་།  བསྔོས་ཀྱང་མི་འགྲུབ་པ་གནས་མིན་གྱི་བསྔོ་བ་དང་གཉིས་སུ་མདོ་ལས་གསུངས་པའི་ཕྱིར་ཏེ།  དང་པོ་ནི་འཇམ་དཔལ་སོགས་སོ། །གཉིས་པ་ནི།  དཀོན་མཆོག་བརྩེགས་པར།  བུ་མོ་དྲི་མེད་བྱིན་གྱིས་ཞུས་པའི་མདོ་
9-2-47b


ལས།  ཆོས་རྣམས་སོགས་ཏེ།  མདོ་དེ་ཉིད་ལས།  བུ་མོས་སྨྲས་པ་རིགས་ཀྱི་བུ་ཆོས་རྣམས་ཀྱི་ཆོས་ཉིད་ནི་སྨོན་ལམ་གྱི་དབང་གིས་བསྒྱུར་བར་མི་ནུས་སོ། །གལ་ཏེ་ནུས་པར་གྱུར་ན་དེ་བཞིན་གཤེགས་པ་རེ་རེའི་དགོངས་པ་དེ་སྨོན་ལམ་གྱི་དབང་གིས་ཇི་ལྟར་མི་འགྲུབ་སྟེ།  རྣམ་གྲངས་འདིས་ནི་སྨོན་ལམ་གྱི་
དབང་གིས་བསྒྱུར་བར་མི་ནུས་པར་རིག་པར་བྱའོ། །ཞེས་གསུངས་པ་དེའི་དོན་འཁོར་བའི་ཕྱི་མཐའ་མེད་པ་སོགས་ཆོས་རྣམས་ཀྱི་རྟེན་འབྲེལ་གྱི་ཆོས་ཉིད་དུ་གྲུབ་པ་ནི་སྨོན་ལམ་གྱི་དབང་གིས་གཞན་དུ་བསྒྱུར་བར་མི་ནུས་ཏེ།  གལ་ཏེ་ནུས་ན་སྔོན་གྱི་སངས་རྒྱས་རེ་རེས་ཀྱང་འཁོར་བ་སྟོངས་པར་གྱུར་ཅིག ། 
ཅེས་པའི་སྨོན་ལམ་ཅིས་མི་འགྲུབ་ཅེས་པའི་དོན་ནོ། །བཞི་པ་དོན་བསྡུས་ཏེ་ལས་འབྲས་ཀྱི་གནད་བསྟན་པ་ལ་གཉིས་ཏེ།  ལས་འབྲས་སྤྱིའི་གནད་བསྟན་པ།  ཐེག་པ་ཆེ་ཆུང་གི་ལས་འབྲས་ཀྱི་གནད་བསྟན་པའོ། །དང་པོ་ནི།  དེས་ན་བསྔོ་རྒྱུའི་ཞེས་སོགས་བཅུ་གཅིག་སྟེ།  ཆོས་དབྱིངས་དགེ་སྡིག་
གཉིས་ཀར་མིན་པ་ལུང་རིགས་གཉིས་ཀྱིས་བསྒྲུབས་ཟིན་པ་དེས་ན་ཞེས་སོགས་ཏེ།  རིན་ཆེན་ཕྲེང་བ་ལས།  འདོད་ཆགས་ཞེ་སྡང་སོགས་སོ། །གཉིས་པ་ལ་གཉིས་ཏེ།  མདོར་བསྟན་པ།  རྒྱས་པར་བཤད་པའོ། །དང་པོ་ནི།  ཉན་ཐོས་དགེ་བ་ཞེས་སོགས་ཚིགས་བཅད་གཅིག་གོ།  གཉིས་པ་ནི་
བསྐལ་པ་དུ་མར་ཞེས་སོགས་ཚིགས་བཅད་བཞི་སྟེ།  ཚིགས་བཅད་དང་པོའི་དོན་ནི།  མདོ་སྡུད་པ་ལས།  གལ་ཏེ་བསྐལ་པ་དུ་མར་དགེ་བའི་ལས་ལམ་བཅུ། །སྤྱོད་ཀྱང་ཉན་ཐོས་རང་རྒྱལ་བྱང་ཆུབ་འདོད་སྐྱེད་ན། །དེ་ནི་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་ཡིན། །སེམས་བསྐྱེད་དེ་ནི་ཕས་ཕམ་
བས་ཀྱང་ཤིན་ཏུ་ལྕི། །ཞེས་གསུངས།  ཚིགས་བཅད་གཉིས་པའི་དོན་ནི།  མདོ་སྡུད་པ་ལས།  གལ་ཏེ་བྱང་ཆུབ་སེམས་དཔའ་འདོད་ཡོན་ལྔ་སྤྱོད་ཀྱང་། །སངས་རྒྱས་ཆོས་དང་འཕགས་པའི་དགེ་འདུན་སྐྱབས་སོང་སྟེ། །སངས་རྒྱས་བསྒྲུབ་བྱ་སྙམ་དུ་ཀུན་མཁྱེན་ཡིད་བྱེད་ན། །མཁས་པ་ཚུལ་ཁྲིམས་
9-2-48a


ཕ་རོལ་ཕྱིན་གནས་རིག་པར་བྱ། །ཞེས་པ་སྟེ།  དཔེར་ན་བྲམ་ཟེའི་ཁྱེའུ་སྐར་མས།  ལོ་དུ་མར་ཚངས་སྤྱོད་བསྲུངས་ཀྱང་།  ཚོང་དཔོན་གྱི་བུ་མོ་ལ་སྙིང་བརྩེ་བས་བསླབ་པ་ཕུལ་ཏེ།  ལོ་བཅུ་གཉིས་ཁྱིམ་ཐབས་བྱས་པས་བསྐལ་པ་དགུ་ཁྲིའི་འཁོར་བ་ཕྱིར་བསྙིལ་བ་ལྟ་བུའོ། །
ཚིགས་བཅད་གསུམ་པའི་དོན་ནི། ཐབས་ལ་མཁས་པའི་མདོ་ལས།  དེ་ཡང་རིགས་ཀྱི་བུ་ཡོངས་སུ་བརྟག་པ་བཟུང་ན་གལ་ཏེ་རབ་ཏུ་བྱུང་བའི་བྱང་སེམས་ལྟུང་བའི་རྩ་བ་བཞི་པོ་ཐམས་ཅད་ལས་འདས་པར་གྱུར་ཀྱང་ཐབས་མཁས་པ་འདིས་སྦྱོང་བར་བྱེད་ན་བྱང་ཆུབ་སེམས་དཔའི་ལྟུང་བར་མི་
འགྱུར་བར་ངས་བཤད་དོ། །ཞེས་གསུངས་སོ། །ཚིགས་བཅད་བཞི་པའི་དོན་ནི་ཉེ་བ་འཁོར་གྱིས་ཞུས་པའི་མདོ་ལས།  ཉེ་བ་འཁོར་ཉན་ཐོས་ཀྱི་ཐེག་པ་པ་རྣམས་ཀྱིས་སྦྱོར་བ་ཡང་གཞན།  ལྷག་པའི་བསམ་པ་ཡང་གཞན་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའ་
རྣམས་ཀྱི་སྦྱོར་བ་ཡང་གཞན་ལྷག་པའི་བསམ་པ་ཡང་གཞན་པའི་ཕྱིར་རོ། །ཉེ་བ་འཁོར་དེ་ལ་ཉན་ཐོས་ཀྱི་ཐེག་པ་པའི་ཚུལ་ཁྲིམས་ཡོངས་སུ་མ་དག་པ་གང་ཡིན་པ་དེ་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་མ་དག་པ་ཉིད་དང་།  ཤིན་ཏུ་འཆལ་བའི་ཚུལ་
ཁྲིམས་ཉིད་ཡིན་ལ།  ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ཉིད་གང་ཡིན་པ་དེ་ནི་ཉན་ཐོས་ཀྱི་ཐེག་པའི་ཚུལ་ཁྲིམས་ཡོངས་སུ་མ་དག་པ་ཉིད་དང་།  ཤིན་ཏུ་འཆལ་བའི་ཚུལ་ཁྲིམས་ཉིད་ཡིན་ནོ། །དེ་ཅིའི་ཕྱིར་ཞེ་ན་ཉེ་བ་འཁོར་འདི་ལ་ཉན་ཐོས་ཀྱི་
ཐེག་པ་པ་ནི་སྐད་ཅིག་ཙམ་ཡང་སྲིད་པར་སྐྱེ་བ་ལེན་པར་མི་བྱེད་དོ། །དེ་ནི་ཉན་ཐོས་ཀྱི་ཐེག་པ་པའི་ཚུལ་ཁྲིམས་ཡོངས་སུ་དག་པ་ཉིད་ཡིན་ལ།  དེ་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་ཚུལ་ཁྲིམས་ཡོངས་སུ་མ་དག་པ་ཉིད་དང་ཤིན་ཏུ་འཆལ་བའི་ཚུལ་ཁྲིམས་ཉིད་ཡིན་པའི་ཕྱིར་རོ། །ཉེ་བ་འཁོར་
9-2-48b


ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ཉིད་གང་ཡིན་པ་དེ་ནི།  ཉན་ཐོས་ཀྱི་ཐེག་པའི་ཚུལ་ཁྲིམས་ཡོངས་སུ་མ་དག་པ་ཉིད་དང་ཤིན་ཏུ་འཆལ་བའི་ཚུལ་ཁྲིམས་ཉིད་དུ་འགྱུར་བ་གང་ཞེ་ན།  ཉེ་བ་འཁོར་འདི་ལ་ཐེག་པ་ཆེན་པོ་ལ་ཡང་དག་པར་ཞུགས་
པའི་བྱང་ཆུབ་སེམས་དཔའ་བསྐལ་པ་ཚད་མེད་གྲངས་མེད་པར་སྲིད་པར་སྐྱེ་བ་ལེན་ཀྱང་སེམས་ཡོངས་སུ་མི་སྐྱོ་ཞིང་ཡིད་མི་ཞུམ་པ་དེ་ནི།  ཐེག་པ་ཆེན་པོ་ལ་ཡང་དག་པར་ཞུགས་པའི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་ཉིད་ཡིན་ལ་དེ་ནི་ཉན་ཐོས་ཀྱི་ཐེག་པའི་ཚུལ་ཁྲིམས་ཡོངས་སུ་
མ་དག་པ་ཉིད་དང་།  ཤིན་ཏུ་འཆལ་བའི་ཚུལ་ཁྲིམས་ཉིད་ཡིན་ནོ་ཞེས་གསུངས་སོ། །གཉིས་པ་འབྲས་བུ་དཀར་ནག་ཟང་ཐལ་དགག་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ནི།  དཀར་གནག་ཞེས་སོགས་གཉིས་ཏེ།  འབྲི་ཁུང་པ་ཁ་ཅིག །དཀར་ནག་ཟང་ཐལ་ཞེས་བྱ་
བ།  ནག་པོ་ཟང་ཐལ་གྱི་རྣམ་སྨིན་སངས་རྒྱས་ཀྱིས་ཀྱང་མྱོང་དགོས་ཏེ།  དགོངས་གཅིག་ཏུ་རྡོ་རྗེའི་གསུང་ལས།  ཤཱཀྱ་ཐུབ་པ་ལ་ལྷ་བྱིན་གྱིས་སྒྱོགས་རྡོ་འཕངས་པས་ཞབས་ལ་རྨ་བྱུང་སྟེ།  ཞལ་སྔ་ནས་གང་དུ་གནས་ཀྱང་ལས་ཀྱིས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་
ན་མེད་རྒྱ་མཚོའི་གཏིང་ན་མེད། །རིའམ་ཕུག་ན་ཡོད་པ་མ་ཡིན་ནོ། །ཞེས་སོགས་འབྱུང་བས་སོ། །དེ་བཞིན་དུ་འདུལ་བ་ལུང་ལས།  སྟོན་པ་ལ་ཡང་སྐུ་ཚེ་སྔ་མའི་ལས་ངན་སྨིན་པར་གསུངས་པ་ཐམས་ཅད་ངེས་དོན་ཡིན་པས།  ལས་དཀར་གནག་སངས་རྒྱས་ཀྱི་སའི་བར་དུ་ཟང་ཐལ་དུ་
འགྲོའོ། །ཞེས་པའི་ཆོས་སྐད་ངོ་མཚར་བ་གྲག་གོ།  །གཉིས་པ་ལ་གསུམ་སྟེ།  དཀར་ནག་ཟང་ཐལ་དྲང་དོན་དུ་བསྒྲུབ་པ།  ངེས་དོན་ཡིན་པ་ལ་གནོད་བྱེད་བསྟན་པ།  ཤེས་བྱེད་ཀྱི་ལུང་རིགས་དང་སྦྱར་བའོ། །དང་པོ་ནི།  དེ་དག་གིས་ནི་ཞེས་སོགས་ཚིགས་བཅད་བཞི་སྟེ།  སྟོན་པ་ལ་ལས་
9-2-49a


ངན་སྨིན་པར་འདོད་པའི་འབྲི་ཁུང་པ་དེ་དག་གིས་ནི།  འདུལ་བ་ལུང་ལས་དྲང་དོན་དུ་གསུངས་པ་ལ་ངེས་པའི་དོན་དུ་འཁྲུལ་པར་ཟད་དོ། །ཇི་ལྟར་དྲང་དོན་ཡིན་སྙམ་ན་སེང་ལྡེང་ཚལ་པ་ཟུག་པ་དང་། །ཞེས་སོགས་ཀྱི་ཚིག་རྐང་ལྔ་པོ་རེ་རེ་ལ་ཐུབ་པའི་སྐུ་ཚེ་སྔ་མ་ཡི། །ཞེས་སོགས་ཚིག་རྐང་བདུན་
གསལ་བྱེད་དུ་སྦྱར་ནས་དོན་ཚན་ལྔར་བྱས་ཏེ།  འདུལ་བ་ལུང་ལས།  ལས་ངན་སྨིན་པར་གསུངས་ཚུལ།  དེ་ཉིད་གསང་ཆེན་ཐབས་ལ་མཁས་པའི་མདོ་ལས།  དྲང་དོན་དུ་གཏན་ལ་ཕབ་པའི་ཚུལ་གཉིས་གཉིས་ཀྱི་སྒོ་ནས་བཤད་པར་བྱའོ། །དང་པོ་ནི།  འདུལ་བ་ལུང་ལས།  སྔོན་ཚོང་པ་ནོར་འདོད་པ་
ལྔ་བརྒྱ་ཙམ་ཞིག་རྒྱ་མཚོ་ཆེན་པོར་ཞུགས་པ་ན་དེ་དག་གི་ནང་ནས་མི་སྡིག་པའི་ལས་བྱེད་པ་གཞན་གྱི་ནོར་འཕྲོག་པའི་ཆོམ་རྐུན་པ་ཞིག་འདི་སྙམ་དུ་སེམས་ཏེ།  ཚོང་པ་འདི་ཐམས་ཅད་སྲོག་དང་ཕྲལ་ལ་རྫས་ཀྱི་རྣམ་པ་འདི་དག་ཐམས་ཅད་ཁྱེར་ཏེ།  འཛམ་བུའི་གླིང་དུ་འགྲོ་བར་བྱའོ་སྙམ་མོ། །
དེའི་ཚེ་ཚོང་པ་དེའི་དེད་དཔོན་སྙིང་རྗེ་ཆེན་པོ་དང་ལྡན་པ་དེ་ལ་རྒྱ་མཚོར་གནས་པའི་ལྷས་རྨི་ལམ་དུ་མི་ནག་པོས་ཇི་ལྟར་བསམ་པ་ཐམས་ཅད་ལུང་བསྟན་པ་དང་།  དེད་དཔོན་གྱི་བསམ་པ་ལ་ཚོང་པ་ལྔ་བརྒྱ་པོ་འདི་དག་བྱང་ཆུབ་ལས་ཕྱིར་མི་ལྡོག་པ་ཤ་སྟག་ཡིན་པ་ལས་མི་འདིས་བསད་པར་གྱུར་ན།  
དེའི་ལས་ཀྱི་སྒྲིབ་པས་སེམས་ཅན་དམྱལ་བ་རྣམས་སུ་ཡུན་རིང་དུ་བསྲེག་པར་འགྱུར་བས། ཚོང་པ་འདི་དག་བསད་པར་མི་འགྱུར་ཞིང་།  མི་འདི་ཡང་དམྱལ་བ་ཆེན་པོ་རྣམས་སུ་འགྲོ་བར་མི་འགྱུར་བའི་ཐབས་ཅི་ཡོད་སྙམ་དུ་ཞག་བདུན་གྱི་བར་དུ་སེམས་སོ། །དེ་ནས་ཐབས་འདི་ཉིད་ཡིན་ནོ་སྙམ་
སྟེ།  ཆོམ་རྐུན་པ་དེ་ལ་རང་ཉིད་ཀྱིས་མདུང་བསྣུན་ཏེ།  སྲོག་དང་ཕྲལ་ནས་མགྲོན་པོ་ཐམས་ཅད་དོན་གྲུབ་ཅིང་རང་རང་གི་གྲོང་ཁྱེར་དུ་ཕྱིན་པར་གྱུར་ཏོ། །དེའི་དུས་ཀྱི་དེད་དཔོན་ནི་སྟོན་པ་རང་ཉིད་ཡིན་ཅིང་།  ཚོང་པ་ལྔ་བརྒྱ་ནི་བསྐལ་པ་བཟང་པོ་འདི་ལ་འཚང་རྒྱ་བའི་བྱང་ཆུབ་སེམས་དཔའ་ལྔ་བརྒྱ་
9-2-49b


ཡིན་ནོ། །དེ་ལྟར་ཆོམ་རྐུན་པ་བསད་པའི་ལས་ཀྱི་ཉེས་པས་དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་སྟེ།  ཁྲག་གི་རྒྱུན་བབས་པར་གསུངས་སོ། །དེ་ཉིད་ཐབས་ལ་མཁས་པའི་མདོ་ལས།  དྲང་དོན་དུ་བསྟན་པ་ནི།  དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་
ཟུག་པ་དེ་ཡང་རྫོགས་པའི་སངས་རྒྱས་ཀྱི་ཐབས་ལ་མཁས་པ་ཡིན་ཏེ།  འདི་ལྟར་ཡངས་ཅན་གྱི་གྲོང་ཁྱེར་ཆེན་པོ་འདི་ཉིད་ན་སྲིད་པ་ཐ་མ་པའི་མི་ཉི་ཤུ་དང་།  དེ་དག་གི་དགྲ་བོ་ཉི་ཤུ་ཞིག་ཀྱང་ཡོད་པར་གྱུར་ཏེ།  དགྲ་བོ་དེ་དག་གིས་མི་ཉི་ཤུ་པོ་དེ་དག་བསད་པར་བྱ་བའི་
ཕྱིར་དུ་མི་དེ་དག་གི་ཁྱིམ་དུ་ཞུགས་སོ། །དེ་ནས་མི་བཞི་བཅུ་པོ་དེ་དག་སངས་རྒྱས་ཀྱི་མཐུས།  སངས་རྒྱས་ག་ལ་བ་དེར་འདོང་ངོ་། །དེ་ནས་དེ་དག་འདུལ་བའི་ཆེད་དུ་སྟོན་པས་མོའུ་འགལ་གྱི་བུ་ལ།  ས་ཕྱོགས་འདིར་སེང་ལྡེང་གི་ཚལ་པ་ཞིག་བྱུང་ནས་སྟོན་པའི་ཞབས་ལ་ཟུག་པར་གྱུར་ཏོ་ཞེས་
བཀའ་བསྩལ་ཏོ། །དེ་མ་ཐག་ཏུ་སེང་ལྡེང་ཚལ་པ་བྱུང་ནས་སྟོན་པ་རྒྱལ་ཆེན་བཞིའི་རིས་དང་།  སུམ་ཅུ་རྩ་གསུམ་ནས་བཟུང་སྟེ་ཚངས་པའི་འཇིག་རྟེན་གྱི་བར་དུ་གཤེགས་ཀྱང་སེང་ལྡེང་གི་ཚལ་པ་དེ་ཡང་ཚངས་པའི་འཇིག་རྟེན་གྱི་བར་དུ་འོངས་སོ། །ཚངས་པའི་འཇིག་རྟེན་ནས་བབས་ཏེ་གདན་
ལ་བཞུགས་པ་ན་སེང་ལྡེང་གི་ཚལ་པ་དེ་ཡང་མདུན་དུ་འཁོད་དོ། །དེ་ནས་བཅོམ་ལྡན་འདས་ཀྱི་ཞབས་གཡས་པ་སེང་ལྡེང་གི་ཚལ་པའི་སྟེང་དུ་བཞག་མ་ཐག་ཏུ་སྟོང་གསུམ་གྱི་འཇིག་རྟེན་གཡོས་པར་གྱུར་ཏོ། །དེ་ནས་ཀུན་དགའ་བོས་འདི་ཅི་ལས་གྱུར་ཞེས་ཞུས་པས་ཚོང་པ་གཡོ་ཅན་བསད་པའི་ལས་
ཀྱི་ལྷག་མ་ཡིན་ནོ། །ཞེས་གསུངས་པས།  མི་ཉི་ཤུ་པོ་གསོད་པར་འདོད་པའི་དགྲ་བོ་ཉི་ཤུ་པོ་དེ་དག་གིས་མི་ཉི་ཤུ་པོ་གསོད་པར་འདོད་པའི་སེམས་བསྐྱེད་པའི་ཉེས་པ་བཅོམ་ལྡན་འདས་ཀྱི་སྤྱན་སྔར་བཤགས་སོ། །དེས་ན་དོན་དེ་ལ་དགོངས་ནས་སེང་ལྡེང་གི་ཚལ་པ་ཟུག་པར་བསྟན་པ་ནི་དེ་བཞིན་
9-2-50a


གཤེགས་པའི་ཐབས་ལ་མཁས་པ་ཡིན་པར་གསུངས་སོ། །གཉིས་པ་ནི་འདུལ་བ་ལུང་ལས།  སྔོན་སངས་རྒྱས་འོད་སྲུངས་ཀྱི་བསྟན་པ་ལ་རྫ་མཁན་དགའ་སྐྱོང་ཞེས་བྱ་བ་དང་།  དེའི་ནེའུ་ཟླ་བྲམ་ཟེའི་ཁྱེའུ་བླ་མ་ཞེས་བྱ་བ་གཉིས་ཡོད་པ་ལས།  བླ་མས་དགའ་སྐྱོང་ལ་སྨྲས་པ།
དེ་བཞིན་གཤེགས་པ་འོད་སྲུང་ལ་བསྙེན་བཀུར་བྱེད་པ་ཐོང་ཤིག །དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད།  བྱང་ཆུབ་ནི་མཆོག་ཏུ་དཀའ་བ་ཡིན་ནོ། །ཞེས་ལན་གསུམ་གྱི་བར་དུ་སྨྲས་ཀྱང་མ་བཟློག་པར་དགའ་སྐྱོང་གིས་བླ་མའི་ཐོར་ཏོ་ནས་བཟུང་སྟེ།  དེས་པ་བླ་མ་ཁྱོད་སངས་རྒྱས་འོད་སྲུང་
ལ་བསྙེན་བཀུར་གྱིས་ཤིག །དེ་ནས་བླ་མས་སངས་རྒྱས་ནི་མཆོག་མ་ཡིན་ཞིང་ཆོས་བསྟན་པ་ནི་མཆོག་མ་ཡིན་ནོ། །ཞེས་སྨྲས་པའི་ལས་ཀྱི་རྣམ་པར་སྨིན་པས་ད་ལྟ་ཡང་ལོ་དྲུག་གི་བར་དུ་དཀའ་བ་སྤྱད་དགོས་བྱུང་ངོ་། །ཞེས་གསུངས།  ཐབས་ལ་མཁས་པའི་མདོ་ལས།  གཞན་འདྲ་བ་ལ་
བྲམ་ཟེའི་ཁྱེའུ་འོད་ཕྲེང་དང་རྫ་མཁན་བུམ་བྱེད་ཅེས་གསུངས་སོ། །དེ་ཉིད་གསང་ཆེན་ཐབས་ལ་མཁས་པའི་མདོ་ལས།  དྲང་དོན་དུ་གཏན་ལ་ཕབ་པ་སྟེ།  བྲམ་ཟེའི་ཁྱེའུ་འོད་ཟེར་ཕྲེང་དེ་ལ་ནེའུ་ཟླ་བྲམ་ཟེའི་ཁྱེའུ་རིགས་ཤིང་སཱ་ལ་ཆེན་པོ་ལྟ་བུ་བྱང་ཆུབ་སེམས་དཔའི་ཐེག་པ་ལ་ཡང་དག་
པར་ཞུགས་པ་ལྔ་ཞིག་ཡོད་པ་དེ་དག་སྡིག་པའི་གྲོགས་པོའི་དབང་གིས་བྱང་ཆུབ་ཀྱི་སེམས་བརྗེད་ནས་མུ་སྟེགས་བྱེད་ཀྱི་བརྟུལ་ཞུགས་སྤྱོད་ཅིང་སངས་རྒྱས་ལ་མི་མོས་པར་གྱུར་ཏོ། །འོད་ཟེར་ཕྲེང་གི་དེ་དག་སྣོད་ཡིན་པར་རིག་ནས་མུ་སྟེགས་བྱེད་ལས་བཟློག་པར་འདོད་པས་རྫ་མཁན་བུམ་བྱེད་
ལ་འདི་སྐད་ཅེས་དགེ་སྦྱོང་མགོ་རེག་མཐོང་བས་ཁོ་བོ་ལ་ཅི་ཞིག་བྱ། བྱང་ཆུབ་ནི་མཆོག་ཏུ་རྙེད་པར་དཀའ་བ་ཡིན་པས་དགེ་སྦྱོང་མགོ་རེག་ལ་བྱང་ཆུབ་ག་ལ་ཡོད།  ཅེས་སྨྲས་ཏེ།  དུས་གཞན་ཞིག་ན་འོད་ཟེར་ཕྲེང་ནེའུ་ཟླ་ལྔ་པོ་དང་ལྷན་ཅིག་ཏུ་ཆུ་འགྲམ་ཞིག་ཏུ་འཁོད་པར་གྱུར་པ་དང་རྫ་མཁན་བུམ་
9-2-50b


བྱེད་ཀྱིས་འོད་ཟེར་ཕྲེང་ལ་འདི་སྐད་ཅེས་སྨྲས་སོ། །ཀྱེ་འོད་ཟེར་ཕྲེང་སངས་རྒྱས་འོད་སྲུང་ལ་ལྟ་བ་དང་།  ཕྱག་བྱ་བ་དང་བསྙེན་བཀུར་བྱ་བའི་ཕྱིར་འདོང་ངོ་། །འོད་ཟེར་ཕྲེང་གིས་སྔར་བཞིན་དུ་སྨྲས་པས་རྫ་མཁན་བུམ་བྱེད་ཀྱིས་འོད་ཟེར་ཕྲེང་གི་ཐོར་ཏོ་ནས་བཟུང་སྟེ།  སངས་རྒྱས་འོད་སྲུང་གི་དྲུང་དུ་བྲམ་
ཟེའི་ཁྱེའུ་ལྔ་པོ་དང་ལྷན་ཅིག་ཏུ་འདོང་ངོ་། །དེ་ནས་བྲམ་ཟེའི་ཁྱེའུ་ལྔ་པོ་དེ་དག་གིས་འོད་ཟེར་ཕྲེང་སངས་རྒྱས་འོད་སྲུང་གི་དྲུང་དུ་འགྲོ་བའི་ཕྱིར་རྫ་མཁན་བུམ་བྱེད་འདིས་བདག་ཉིད་ཀྱི་སྲོག་ཡོངས་སུ་བཏང་སྟེ།  སངས་རྒྱས་ཀྱི་དྲུང་དུ་འཁྲིད་པར་འགྱུར་བའི་སངས་རྒྱས་དེ་ནི་ཅི་འདྲ་བ་ཞིག་ཡིན་
སྙམ་དུ་སེམས་ནས་དད་པ་ཐོབ་པར་གྱུར་ཏེ།  དེ་དག་ལ་སངས་རྒྱས་འོད་སྲུང་གིས་ཆོས་བསྟན་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེས་ན་རིགས་ཀྱི་བུ་ལྔ་པོ་དེ་དག་སྨིན་པར་བྱ་བའི་ཕྱིར།  འོད་ཟེར་ཕྲེང་གིས་ཚིག་དེ་སྐད་ཅེས་སྨྲ་ཞིང་གཞན་ཡང་སེམས་ཅན་མི་ཤེས་པར་སྤྱོད་
པ་དག་གིས་དགེ་སྦྱོང་དང་བྲམ་ཟེ་ཚུལ་ཁྲིམས་དང་ལྡན་པ་དག་ལ་ལྐོག་ཏུ་ཚིག་རྩུབ་པོ་སྨྲས་པ་ལ་ལས་ཀྱི་བྱ་བ་བསྟན་པའི་ཕྱིར་དང་།  སེམས་ཅན་གང་དག་དགེ་སློང་དང་བྲམ་ཟེ་ཚུལ་ཁྲིམས་དང་ལྡན་པ་དག་ལ་ཚིག་རྩུབ་མོ་སྨྲས་ན་བདག་ཅག་ལ་ཐར་པའི་སྐལ་པ་མེད་དོ་སྙམ་སྟེ་འགྱོད་པ་ལ་གནས་
ཤིང་ཕྱིན་ཆད་རྩོལ་བ་མི་བྱེད་པ་དག་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔས་སངས་རྒྱས་འོད་སྲུང་གི་གསུང་རབ་ལ་ཚིག་དེ་སྐད་སྨྲས་པ་ཡང་རྣམ་པར་གྲོལ་བའི་སྐལ་བ་ཡོད་ན་བདག་མི་ཤེས་པ་རྣམས་ལྟ་སྨོས་ཀྱང་ཅི་དགོས་སྙམ་དུ་སེམས་ཤིང་ལས་ཀྱི་ཉེས་པ་འཆགས་པར་བྱ་བའི་
ཕྱིར་དང་།  མུ་སྟེགས་ཅན་དག་རྒྱ་ཤུག་དང་།  ཏིལ་དང་འབྲས་བུ་གཅིག་ཙམ་ཟ་ཞིང་ཟས་གཞན་མི་ཟ་བས་རྣམ་པར་དག་པར་འགྱུར་བར་འདོད་པ་དག་ཚར་བཅད་པའི་ཕྱིར་ལོ་དྲུག་ཏུ་དཀའ་བ་སྤྱད་པ་ཐབས་མཁས་པར་བསྟན་པ་ཡིན་གྱི་ལས་ཀྱི་རྣམ་པར་སྨིན་པས་མ་ཡིན་པར་གསུངས་སོ། །
9-2-51a


གསུམ་པ་ནི་ལུང་ལས།  ཉོན་མོངས་མེད་པའི་ལྗོངས་སུ་རྒྱལ་པོ་མེས་སྦྱིན་གྱིས་སྟོན་པ་འཁོར་ལྔ་བརྒྱར་གཉིས་ཀྱིས་མ་ཚང་བ།  དབྱར་ཟླ་བ་གསུམ་གནས་པར་ཞུས་པའི་ཚེ།  བློན་པོ་ཕྲག་དོག་ཅན་གྱིས་སྨྲས་པ་ལ་བརྟེན་ནས་རྒྱལ་པོ་མི་སྣང་བའི་ཕྱོགས་སུ་མཚམས་
བྱས།  སྟོན་པ་འཁོར་དང་བཅས་པ་ལ་ཞབས་ཏོག་སུས་བྱས་པ་ལ་ཆད་པས་གཅོད་བྱས་པ་ལ་བརྟེན་ནས།  ཟླ་བ་གསུམ་དུ་རྟ་ལྔ་བརྒྱ་འཚོང་བའི་ཚོང་པས་རྟ་རྣམས་ནས་དང་ཚོང་བྱས་ནས་ཕུལ།  ནས་རུལ་བ་གསོལ་ཞིང་མཆོག་ཟུང་གཅིག་གནས་གཞན་ལ་བདུད་རྩི་གསོལ་བའི་རྒྱུ་རྐྱེན་ཞུས་པས། 
སྔོན་སྐྱེ་རྒུ་རྣམས་ཀྱིས་ཚེ་ལོ་བརྒྱད་ཁྲི་ཐུབ་པ་ན།  སངས་རྒྱས་རྣམ་གཟིགས་ཉན་ཐོས་ཀྱི་དགེ་འདུན་དང་བཅས་པ་ཕོ་བྲང་ཉེ་ལྡན་ཞེས་བྱ་བར་གཞན་གྱིས་བསོད་སྙོམས་ཕུན་སུམ་ཚོགས་པ་ཕུལ་བ་ལ་བྲམ་ཟེ་རིག་བྱེད་སློབ་པའི་འཁོར་ལྔ་བརྒྱ་དང་བཅས་པའི་ནང་ནས་བྲམ་ཟེའི་ཁྱེའུ་བཟང་པོ་དད་
པ་ཅན་གཉིས་མ་གཏོགས་པ་ཐམས་ཅད་ཕྲག་དོག་ནས་དགེ་སྦྱོང་མགོ་རེག་འདི་དག་ནི་ནས་རུལ་བ་ཟ་བར་འོས་པ་ཡིན་ནོ། །ཞེས་སྨྲས་སོ། །བྲམ་ཟེ་འཁོར་ལྔ་བརྒྱར་གཉིས་ཀྱིས་མ་ཚང་བ་ནི།  ད་ལྟ་ང་འཁོར་ལྔ་བརྒྱར་གཉིས་ཀྱིས་མ་ཚང་བ་འདི་ཡིན་ནོ། །བྲམ་ཟེའི་ཁྱེའུ་དད་པ་ཅན་གཉིས་ནི་
མཆོག་ཟུང་གཅིག་ལྷའི་བདུད་རྩི་གསོལ་བ་འདི་ཡིན་ནོ། །ཞེས་གསུངས་སོ། །དེ་ཉིད་ཐབས་ལ་མཁས་པའི་མདོ་ལས། རྟ་ལྔ་བརྒྱ་པོ་དེ་དག་བྱང་ཆུབ་སེམས་དཔའི་ཐེག་པ་ལ་ཞུགས་པ་སྔོན་གྱི་རྒྱལ་བ་ལ་བྱ་བ་བྱས་པ་ཤ་སྟག་ཡིན་ཀྱང་སྡིག་གྲོགས་ཀྱི་དབང་གིས་སྡིག་པའི་ལས་བྱས་པས་དུད་
འགྲོའི་སྐྱེ་གནས་སུ་སྐྱེས་ཤིང་།  དེ་དག་གི་ནང་ནས་རྟ་ཅང་ཤེས་གཅིག་ཡོད་པ་ནི།  བྱང་ཆུབ་སེམས་དཔའ་ཉི་མའི་སྙིང་པོ་ཞེས་བྱ་བ་ཡིན་ལ་དེ་དག་ཡོངས་སུ་ཐར་བར་བྱ་བའི་ཕྱིར་སྨོན་ལམ་གྱི་དབང་གིས་དེར་སྐྱེས་སོ། །དེ་བཞིན་གཤེགས་པས་རྟ་དེ་དག་གི་དོན་དུ་དབྱར་གནས་པར་ཞལ་གྱིས་བཞེས་
9-2-51b


ཏེ།  རྟ་ལྔ་བརྒྱ་པོ་དེ་དག་གི་རྟ་ཆས་ཀྱི་ནས་ཕྱེད་ཕྱེད་དག་ནི།  དགེ་སློང་དག་ལ་འབུལ།  ཕྱེད་ཕྱེད་ནི་རྟ་དེ་ཉིད་ཟའོ། །རྟ་ཅང་ཤེས་ཀྱི་རྟ་ཆས་ཕྱེད་དེ་བཞིན་གཤེགས་པ་ལ་དབུལ།  ཕྱེད་ཅང་ཤེས་དེ་ཉིད་ཟ་ཞིང་།  རྟ་ལྔ་བརྒྱ་པོ་དེ་དག་རྟའི་སྐད་ཀྱིས་སྡིག་པ་བཤགས་པ་དང་།  སངས་རྒྱས་འཁོར་བཅས་ལ་
ཕྱག་འཚལ་དུ་ཡང་བཅུག་གོ།  དེ་ནས་རྟ་དེ་དག་གིས་དེ་ལྟར་བྱས་པས་དུས་གཞན་ཞིག་ན་ཤི་འཕོས་ཏེ་དགའ་ལྡན་གྱི་ལྷར་སྐྱེས་ནས་སངས་རྒྱས་ལ་བཀུར་བསྟི་བྱས་སོ། །དེས་ན་རྟ་དེ་དག་འདུལ་བར་བྱ་བའི་ཕྱིར་དང་།  སེམས་ཅན་གང་དག་དགེ་སྦྱོང་དང་བྲམ་ཟེ་ཚུལ་ཁྲིམས་དང་ལྡན་པ་དག་
མགྲོན་དུ་གཉེར་ནས་སེམས་རྣམ་པར་གཡེང་བས་རི་མོ་མི་བྱེད་པ་དེ་དག་ལ་ལས་ཀྱི་ཉེས་པ་བསྟན་པའི་ཕྱིར་དང་།  དགེ་སློང་ལྔ་བརྒྱ་དེ་དག་ལས་བཞི་བཅུ་འདོད་ཆགས་དང་སྡུག་པའི་མཚན་མ་སྤྱོད་པ་ཡིན་པས་དེ་དག་གིས་ཟས་ངན་པ་ཟོས་པས་འདོད་ཆགས་ཀྱིས་ཀུན་ནས་ལྡང་བ་རྣམ་པར་
བསལ་ནས།  ཟླ་བ་གསུམ་པོ་དེའི་འོག་ཏུ་ཞག་བདུན་གྱིས་དགྲ་བཅོམ་པ་ཉིད་ཐོབ་པས་དགོས་པ་དེ་དག་གི་ཆེད་དུ་ཐབས་མཁས་པས་ཟླ་བ་གསུམ་དུ་རྟ་ཆས་རུལ་བ་གསོལ་བར་བསྟན་གྱི།  ལས་ཀྱི་རྣམ་པར་སྨིན་པས་ནི་མ་ཡིན་པར་གསུངས་སོ། །བཞི་པ་ནི་ལུང་ལས།  ཡུལ་གྲུ་འཛིན་དུ་སྨད་
འཚོང་མ་བཟང་མོ་ཞེས་བྱ་བ་སྐྱེས་བུ་གཡོ་ཅན་པད་མའི་རྩ་ལག་གིས་བསད་ནས་རལ་གྲི་ཁྲག་ཅན་དྲང་སྲོང་མདོག་ནག་གི་དྲུང་དུ་བོར་ནས་སོང་ངོ་། །དེའི་རྣམ་པར་སྨིན་པས་ང་ལོ་མང་པོར་དམྱལ་བར་སྐྱེས་ལས་ཀྱི་ལྷག་མས་ད་ལྟ་ཡང་བྲམ་ཟེའི་བུ་མོ་དྲེགས་མས་གཞོང་བུ་ལྟོ་བར་བཅིངས་ཏེ། 
དགེ་སྦྱོང་ཁྱོད་ཀྱིས་ཁོ་མོ་སྦྲུམ་པར་བྱས་ཀྱི།  ཁོ་མོ་ལ་ཟས་དང་གོས་བྱིན་ཅིག་ཅེས་སྐུར་པ་བཏབ་པར་གྱུར་ཏོ། །ཞེས་གསུངས་སོ། །དེ་ཉིད་ཐབས་ལ་མཁས་པའི་མདོ་ལས།  ཕྱི་མའི་དུས་ན་བསྟན་པ་འདི་ལ་རབ་ཏུ་བྱུང་བའི་དགེ་སློང་གང་ལ་ཡང་དག་པ་མ་ཡིན་པའི་སྐུར་པ་བཏབ་པས་དེ་
9-2-52a


དག་འགྱོད་པ་དང་།  སེམས་ཞུམ་པར་འགྱུར་ཅིང་།  ཉམས་པ་ལ་འཇུག་པར་འགྱུར་བ་དེ་དག་འདི་སྐད་དུ།  དེ་བཞིན་གཤེགས་པ་དཀར་པོའི་ཆོས་ཐམས་ཅད་དང་ལྡན་པ་དེ་དག་གིས་ཀྱང་བསྐུར་པ་བརྙེས་པར་གྱུར་ན།  བདག་ལྟ་སྨོས་ཀྱང་ཅི་དགོས་ཞེས་དེ་བཞིན་གཤེགས་
པ་རྗེས་སུ་དྲན་པར་བྱེད་ཅིང་།  སྐུར་པ་དེ་ཟིལ་གྱིས་མནན་ནས་ཚངས་པར་སྤྱོད་པ་ཡོངས་སུ་དག་པ་ཡོངས་སུ་བྱང་བ་སྤྱོད་པར་འགྱུར་བ་དང་།  སྡོམ་པ་ལ་སྤྱོད་པར་འགྱུར་བར་བྱ་བའི་ཕྱིར།  ཐབས་ལ་མཁས་པས་སྐུར་པ་བརྙེས་པར་བསྟན་གྱི་ལས་ཀྱི་རྣམ་པར་སྨིན་པས་མ་ཡིན་པར་གསུངས་སོ། །ལྔ་པ་ནི་ལུང་
ལས།  སྔོན་རིག་བྱེད་སྨྲ་བའི་དྲང་སྲོང་འཁོར་བྲམ་ཟེ་མང་པོ་དང་ལྡན་པ་ཞིག་ཡོད་པ་ལ།  དྲང་སྲོང་ཅིག་གིས་གཅིག་ཤོས་ཀྱི་འཁོར་རྣམས་རིམ་གྱིས་ཁ་དྲངས་ཏེ།  ལན་དུ་མར་བཟློག་ཀྱང་མ་ཉན་པས་ཅིག་ཤོས་ཁྲོས་པར་གྱུར་ཏེ།  ངས་ཀྱང་ཁྱོད་བྱང་ཆུབ་ཐོབ་པའི་ཚེ་འཁོར་རྣམས་ཁ་དྲང་པར་
བྱའོ། །ཅེས་སྨོན་ལམ་བཏབ་པས།                                                      ད་ལྟ་ལྷས་བྱིན་གྱིས་དགེ་འདུན་འཁོར་ལོའི་དབྱེན་བྱས་པ་ཡིན་ནོ། །ཞེས་གསུངས་སོ། །དེ་ཉིད་དྲང་བའི་དོན་ཏེ་ཕན་ཚུན་དབྱེན་བྱེད་པ་དང་།   གཞན་
འཁོར་ཁ་དྲང་བ་རྣམས་ལ་ཉེས་དམིགས་བསྟན་པའི་ཆེད་དུ་ཐབས་མཁས་པ་དེ་ལྟར་བསྟན་གྱི།  ལས་ཀྱི་རྣམ་པར་སྨིན་པས་ནི་མ་ཡིན་ནོ། །གཞན་ཡང་ལུང་ལས།  སྔོན་སྨན་པ་ཞིག་གིས་ཁྱིམ་བདག་གཅིག་གི་བུའི་ནད་ལན་གསུམ་གྱི་བར་དུ་སོས་པར་བྱས་ཀྱང་།  རྔན་པ་མ་བྱིན་པས་ཞེ་སྡང་
དྲག་པོས་བུ་འདི་ན་ན་སྨན་མ་ཡིན་པ་བྱིན་ནས་ནང་ཁྲོལ་རྣམས་དུམ་བུ་དུམ་བུར་འཛག་པར་བྱའོ་སྙམ་ནས།  དེ་ལྟར་བྱས་པའི་ལས་ཀྱི་ལྷག་མས་ད་ལྟ་ཡང་བཅོམ་ལྡན་འདས་འཁྲུ་བའི་ནད་ཀྱིས་ཐེབས་སོ་ཞེས་དང་།  ཡང་ཉ་པའི་བུ་གཅིག་གིས་ཉ་བསད་པ་ལ་དགའ་བ་བསྐྱེད་པའི་ལས་ཀྱི་རྣམ་པར་
9-2-52b


སྨིན་པས་ལོ་མང་པོར་ཀླད་ནད་ཅན་དུ་གྱུར་ནས་ད་ལྟ་ཡང་ལས་ཀྱི་ལྷག་མས།  འཕགས་སྐྱེས་པོས་ཤཱཀྱ་རྣམས་བསད་པ་ན།  བཅོམ་ལྡན་འདས་ཀླད་ནད་དྲག་པོས་ཐེབས་པར་གྱུར་ཏོ། །ཞེས་སོགས་ཐུབ་པའི་སྐུ་ཚེ་སྔ་མ་ཡི་སོགས་སོ། །དྲང་བའི་དོན་ལ་ཡིད་མ་རྟོན་ཞེས་པ་ནི།  དཀོན་བརྩེགས་
ཀྱི་བྱང་ཆུབ་སེམས་དཔའི་སྡེ་སྣོད་ལས།  དེ་ལ་བྱང་ཆུབ་སེམས་དཔའི་རྟོན་པ་མཁས་པ་གང་ཞེ་ན།  བྱང་ཆུབ་སེམས་དཔའི་རྟོན་པ་འདི་བཞི་སྟེ།  བཞི་གང་ཞེ་ན་འདི་ལྟ་སྟེ།  དོན་ལ་རྟོན་གྱི་ཚིག་འབྲུ་ལ་མ་ཡིན་པ་དང་།  ཡེ་ཤེས་ལ་རྟོན་གྱི་རྣམ་ཤེས་ལ་མ་ཡིན་པ་དང་།  ངེས་པའི་དོན་གྱི་མདོ་སྡེ་
ལ་རྟོན་གྱི་དྲང་བའི་དོན་རྣམས་ལ་མིན་པ་དང་།  ཆོས་ལ་རྟོན་གྱི་གང་ཟག་ལ་མ་ཡིན་པའོ་ཞེས་གསུངས་སོ། །དེ་ལ་ཡེ་ཤེས་དང་རྣམ་ཤེས་ནི་འཇིག་རྟེན་ལས་འདས་མ་འདས་དང་།  ཚིག་འབྲུ་ནི་སྒྲ་ཇི་བཞིན་པ་དང་།  དོན་ནི་རིགས་པས་གྲུབ་པ་དང་།  གང་ཟག་ནི་གནས་བརྟན་རྒན་རབས་སོགས་དང་། 
ཆོས་ནི་གསུང་རབ་ཅེས་ཨ་བྷ་ཡ་ཀ་རས་བཤད་དོ། །གཉིས་པ་ལ་གཉིས་ཏེ།  ཐལ་བ་གསུམ་དགོད་པ།  ཕྱི་མ་རྒྱས་པར་བཤད་པའོ། །དང་པོ་ནི།  གལ་ཏེ་རྫོགས་པའི་ཞེས་སོགས་ལྔ་སྟེ།  སངས་རྒྱས་ལ་ལས་ངན་སྨིན་པར་བཤད་པ་བདེན་པ་ངེས་དོན་ཡིན་ན་བསོད་ནམས་ཀྱི་ཚོགས་ཀྱིས་
ཡོན་ཏན་མཐའ་དག་རྫོགས་ཤིང་།  ཡེ་ཤེས་ཀྱི་ཚོགས་ཀྱིས་སྒྲིབ་གཉིས་བག་ཆགས་དང་བཅས་པ་སྤངས་པ་དོན་མེད་པར་འགྱུར་ཞིང་།  སྤྱོད་འཇུག་ལས།  ཉོན་མོངས་མེད་ཀྱང་དེ་དག་ལ། །ལས་ཀྱི་ནུས་པ་མཐོང་བ་ཡིན། །ཞེས་པ་ལྟར་ལྷག་བཅས་མྱང་འདས་ལ་གནས་པའི་དགྲ་བཅོམ་
པ་དང་འདྲ་བར་འགྱུར་ལ།  སྐུ་གསུམ་གྱི་རྣམ་གཞག་ཀྱང་མི་རུང་བར་འགྱུར་རོ། །གཉིས་པ་ལ་བཞི་སྟེ།  སྤྲུལ་གཞི་ངོས་བཟུང་བ།  སྤྲུལ་པ་ངོས་བཟུང་བ།  ཇི་ལྟར་སྤྲུལ་པའི་ཚུལ།  སྐབས་ཀྱི་དོན་ལ་སྦྱར་བའོ། །དང་པོ་ནི།  དེ་ཡི་འཐད་པ་ཞེས་སོགས་ཚིགས་བཅད་གཅིག་སྟེ།  ལས་ངན་གྱི་
9-2-53a


འབྲས་བུ་སྤྲུལ་པའི་སྐུ་ལ་སྨིན་ན་སྐུ་གསུམ་གྱི་རྣམ་གཞག་མི་རུང་བར་འགྱུར་ཏེ།  དེ་ལྟར་ན་སྤྲུལ་སྐུའི་སྤྲུལ་གཞིར་གྱུར་པའི་ལོངས་སྐུ་མེད་དགོས་པའི་ཕྱིར་རོ། །དེ་ཡི་འཐད་པ་བཤད་ཀྱིས་ཉོན་སོགས་ཏེ།  སྟུག་པོ་བཀོད་པ་ནི།  འོག་མིན་སྟུག་པོ་ཉམས་དགའ་འདི། །
སྟུག་པོའི་ཞིང་ཁམས་འཇིག་མེད་པ། །དེ་ན་སངས་རྒྱས་རྣམས་ཀྱི་ཆོས། །རྫོགས་པར་ལོངས་སྤྱོད་ཚུལ་འདི་འབྱུང་། །ཞེས་གསུངས་པ་ལྟར། རྒྱུན་མི་འཇིག་པའི་གནས་ཡིན་པར་རྗེ་བཙུན་རྩེ་མོས་བཤད་དོ། །གཉིས་པ་ནི་དེ་ཡི་སྤྲུལ་པའི་ཞེས་སོགས་གསུམ་མོ། །གསུམ་པ་ནི།  འདི་ནི་
གདུལ་བྱ་ཞེས་སོགས་བཅུ་གསུམ་སྟེ།  ཤཱཀྱ་སེང་གེ་འདི་ནི་གདུལ་བྱའི་རྒྱུད་སྒྲིབ་པ་སྤང་རུང་དང་གཉེན་པོ་སྐྱེ་རུང་དུ་སྨིན་པར་བྱ་བའི་ཕྱིར།  བྱ་རྒོད་ཕུང་པོ་སོགས་སུ་གཤེགས་པ་དང་།  དྲི་གཙང་ཁང་གི་ནང་དུ་ཏིང་ངེ་འཛིན་ལ་བཞུགས་པ་དང་།  འོད་སྲུང་ལ་སོགས་པ་ལ་ཁྱོད་ཀྱིས་ཆོས་སྟོན་ཅིག་གསུངས་
ནས་སྐུ་མཉེལ་ཏེ་མནལ་གཟིམས་པ་དང་།  མུ་གེ་བྱུང་བའི་ཚེ་གྲོང་དུ་བསོད་སྙོམས་ལ་གཤེགས་པ་ན།  གྲོང་དཔོན་གྱི་བུ་གཅེར་བུ་པ་རལ་གྲི་ཐོགས་པ་ཞིག་གིས།  ལོ་ཉེས་འདི་ལྟ་བུ་ལ་གོའུ་ཏ་མ་ཁྱོད་འཁོར་མང་པོ་དང་ལྡན་པ་གྲོང་ཁྱེར་དུ་འོངས་ནས།  ཁྱིམ་རྣམས་ཕུང་བར་བྱེད་པ་ཡིན་
ནམ་ཞེས་ཟེར་ཞིང་བཀག་པར་གྱུར་པ་ན།  ངས་བསྐལ་པ་དགུ་བཅུ་རྩ་གཅིག་ཚུན་ཆད་དྲན་ཏེ།  ཟས་སྨིན་པ་སྟེར་དུ་གཞུག་པའི་ཕྱིར་ཁྱིམ་འགའ་ཞིག་ལའང་གནོད་པའི་ལས་མི་མཁྱེན་ནོ། །ཞེས་གསུངས་པ་དང་།  སཱ་ལའི་གྲོང་ཁྱེར་དུ་བསོད་སྙོམས་མ་རྙེད་པར་ལྷུང་ཟེད་སྟོང་པར་བྱོན་པ་
དང་།  རྒྱལ་བུ་རྒྱལ་བྱེད་ཀྱི་ཚལ་ཁྱིམ་བདག་མགོན་མེད་ཟས་སྦྱིན་གྱི་ཀུན་དགའ་ར་བ་སོགས་སུ་བསོད་སྙོམས་མང་དུ་རྙེད་པ་དང་།  ལྷས་བྱིན་སོགས་དགྲ་དང་།  སྲས་སྒྲ་གཅན་ཟིན་སོགས་ཉེ་དུའི་འབྲེལ་པ་དང་།  འབྲོག་གནས་སུ་ལག་བརྒྱུད་འབྲོག་གནས་འདུལ་བའི་ཕྱིར་བྱོན་པའི་ཚེ།  ས་གཞི་
9-2-53b


བ་གླང་མང་པོའི་རྨིག་པས་རད་རོད་དུ་གྱུར་པ་དང་།  འཕགས་སྐྱེས་པོས་ཤཱཀྱ་མང་པོ་བསད་པའི་ཚེ།  ས་ཕྱོགས་ཉམས་མི་དགའ་བ་རྡོ་བའི་རད་རོད་ཅན་དུ་ལོ་འདབ་མེད་པའི་ཤིང་སྐམ་པོ་ལ་བརྟེན་ཏེ།  འོ་བརྒྱལ་པོར་གཟིམས་པ་དང་།  ཀླུའི་རྒྱལ་པོ་མ་དྲོས་པས་གདན་དྲངས་པའི་དུས་ལྟ་བུ་རེས་
འགའ་བསྙུང་བར་གཤེགས་པ་དང་།  གྲོང་ཁྱེར་བཟང་བྱེད་ན་གནས་པའི་མུ་སྟེགས་བྱེད་རྣམས་ཀྱིས།  དགེ་སྦྱོང་གོའུ་ཏ་མ་འཁོར་དང་བཅས་པ་ལ་ལར་སྤུ་གྲིའི་སེར་བ་དག་འབེབས་ཤིང་འོངས་ནས།  ཁྱེད་ཅག་ལ་འགའ་ཞིག་ནི་བུ་མེད་པར་བྱེད།  འགའ་ཞིག་ནི་ཁྱོ་མེད་པར་བྱེད་དོ་
ཞེས་པ་དང་།  དགེ་སྦྱོང་གོའུ་ཏ་མ་སྐྱེས་ནས་ཞག་བདུན་ནས་མ་ཤི་བར་གྱུར།  ཕ་ཡི་ངག་བཅག་སྟེ་ཡིད་མི་བདེ་བར་གྱུར་པས་ཕ་མ་ལ་བྱས་པ་མི་གཟོ་བ་ཡིན་ནོ་ཞེས་པ་དང་།  དགེ་སྦྱོང་གོའུ་ཏ་མས་སྒྱུ་མ་བསླབས་ཏེ་འཇིག་རྟེན་གྱི་ཁམས་བསླུས་སོ། །ཞེས་པ་ལ་སོགས་གཞན་གྱིས་སྐུར་པ་
སྣ་ཚོགས་འདེབས་པ་དང་།  མཉན་དུ་ཡོད་པར་ཆོ་འཕྲུལ་ཆེན་པོ་བསྟན་པ་དང་།  སེར་སྐྱར་ཡབ་སྲས་མཇལ་བ་དང་།  གསལ་ལྡན་དུ་ལྷ་ལས་བབས་པ་དང་།  ལྟེང་རྒྱས་འོད་སྲུང་འཁོར་དང་བཅས་པ་བཏུལ་བ་དང་།  སོར་མོའི་ཕྲེང་བ་དང་།  རྒྱལ་པོ་ཀ་པི་ན་འཁོར་བཅས་བཏུལ་བ་ལ་སོགས་
པ་རེས་འགའ་སྙན་པའི་བ་དན་འཇིག་རྟེན་གསུམ་དུ་གྲགས་པ་དང་།  རེས་འགའ་སྐུ་བདེ་བ་དང་།  ཐུགས་དགྱེས་པར་སྤྱོད་པ་དང་།  བར་མར་བཞུགས་པ་སོགས་མཛད་པ་རྣམ་པ་སྣ་ཚོགས་སྟོན་པ་ནི་སྤྲུལ་པ་ཙམ་ཡིན་གྱི་སྤྲུལ་གཞིའི་གཟུགས་སྐུ་རང་རྒྱུད་པ་མིན་ནོ། །བཞི་པ་ནི་གལ་ཏེ་སངས་
རྒྱས་ཞེས་སོགས་བཅུ་སྟེ།  སངས་རྒྱས་དངོས་ལ་ལས་ངན་སྨིན་ན་ལོངས་སྤྱོད་རྫོགས་པའི་སྐུ་ལ་སྨིན་པར་རིགས་ཏེ།  ཚོགས་གཉིས་རྫོགས་པའི་རྣམ་སྨིན་གྱི་འབྲས་བུར་གྱུར་པའི་སངས་རྒྱས་རང་རྒྱུད་པ་ཡིན་པའི་ཕྱིར་རོ། །ཤཱཀ་ཐུབ་སོགས་ལ་སྨིན་པར་འདོད་པ་མུན་སྤྲུལ་ཡིན་ཏེ།  སངས་རྒྱས་
9-2-54a


རང་རྒྱུད་པ་དེ་ཡི་སྤྲུལ་པ་ཙམ་ཡིན་པའི་ཕྱིར་རོ། །དཔེར་ན་སྒྱུ་མའི་སོགས་ཏེ།  དེས་ན་འདུལ་བ་ལུང་ལས།  ལས་ངན་སྨིན་པར་གསུངས་པའི་དགོངས་པ་དྲང་དོན་ཡིན་པར་ཤེས་དགོས་སོ། །མངོན་རྟོགས་རྒྱན་ལས།  དེ་མཐའ་དེ་ཡི་རྣམ་སྨིན་ནི་ཞེས་སྐུ་གསུམ་ཀ་སྦྱོར་བཞི་
བསྒོམས་པའི་རྣམ་སྨིན་གྱི་འབྲས་བུར་བཤད་པ་ནི།  ཆོས་སྐུའི་ངང་ལས་ལོངས་སྐུ་སྟོན་ཅིང་།  དེ་ལས་སྤྲུལ་པ་སྣ་ཚོགས་འགྱེད་པ་ལ་སྦྱོར་བཞི་བསྒོམས་པ་སྔོན་དུ་སོང་བ་དགོས་སོ་ཞེས་པའི་དོན་ཏེ།  དཔེར་ན་སྒྱུ་མ་མཁན་གྱིས་སྒྱུ་མ་སྤྲུལ་པ་ལ་སྤྲུལ་པ་པོ་ལས་ལས་སྐྱེས་པ་དགོས་པ་བཞིན་ནོ། །
གསུམ་པ་ནི་འདི་ཡི་ལུང་དང་ཞེས་སོགས་གསུམ་སྟེ།  སངས་རྒྱས་ལ་ལས་ངན་སྨིན་པར་གསུངས་པ་དྲང་དོན་ཡིན་པ་དང་།  དྲང་དོན་གྱི་མདོ་སྒྲ་ཇི་བཞིན་དུ་ཁས་ལེན་དུ་མི་རུང་བ་འདི་ཡི་ལུང་དང་རིགས་པ་རྣམས་དབྱིག་གཉེན་གྱི་རྣམ་བཤད་རིགས་པ་དང་།  ལེགས་ལྡན་བྱེད་ཀྱི་རྟོག་གེ་འབར་བ་སོགས་
མཁས་པའི་གཞུང་བཞིན་དུ་ཤེས་པར་བྱ་སྟེ།  རྣམ་བཤད་རིགས་པ་ལས་ཀུན་ཏུ་སྣང་བའི་མདོ་ལས་ཀྱང་སྒྲ་ཇི་བཞིན་དུ་འཛིན་ན་ཉེས་པ་ལྔ་ཡོད་དེ།  ལྔ་གང་ཞེ་ན།  མི་མོས་པའི་གནས་སུ་འགྱུར་བའི་ཉེས་པ་དང་།  རྩ་བ་ཉམས་པའི་ཉེས་པ་དང་།  གཞན་ལ་བསླུ་བར་བྱེད་པའི་ཉེས་པ་དང་།  སྟོན་
པ་ལ་སྐུར་པ་འདེབས་པའི་ཉེས་པ་དང་།  ཆོས་སྤོང་བར་བྱེད་པའི་ཉེས་པའོ། །ཞེས་རང་གི་སྒྲས་བསྟན་པ་ཡིན་ནོ་ཞེས་དང་།  རྟོག་གེ་འབར་བ་ལས།  ཚིག་ལྷུག་པར་འབྱུང་བ་ཚིག་བཅད་དུ་བསྡེབས་པ་ནི།  ཞིང་འདིར་ཐུབ་པའི་མཛད་པ་དག །གལ་ཏེ་སྤྲུལ་པ་མ་ཡིན་ཞིང་། །མདོ་སོགས་སྒྲ་ནི་
ཇི་བཞིན་དུ། །ཁས་ལེན་པ་ལ་འགལ་བ་ནི། །རྒྱལ་སྲས་སྲིད་པ་ཐ་མ་པ། །འདོད་པ་བསྟེན་ན་ཚུལ་ཁྲིམས་འཆལ། །དེས་ན་སྦྱིན་པ་སོགས་ཀྱང་མེད། །ཅེས་པ་དང་།  གནས་བརྟན་ཆེན་པོ་བ་ཀུ་ལས། །ཁོ་བོ་བསྙེན་པར་རྫོགས་ནས་ལོ། །བརྒྱད་ཅུ་ལོན་ཡང་མགོ་བོ་ཙམ། །
9-2-54b


ན་བར་མི་དྲན་གང་ཡིན་པ། །ཨ་རུ་ར་གཅིག་ནད་པ་ལ། །སྦྱིན་པའི་འབྲས་བུ་ཉིད་ཡིན་ན། །སངས་རྒྱས་སྦྱིན་པའི་མཐར་སོན་པ། །སྐུ་ལ་ལས་ངན་ལས་བྱུང་བའི། །སྙུན་གྱིས་བཏབ་པའང་ཤིན་ཏུ་འགལ། །ཞེས་དང་།  གཞུང་དེ་གཉིས་ཀ་ལས།  དགའ་ལྡན་གནས་ནས་འཕོ་
བ་ན། །ལྷ་རིས་དྲུག་ལ་བཀའ་བསྩལ་ནས། །ཉོན་མོངས་དབང་གིས་སྐྱེ་བ་དང་། །སྙོམས་འཇུག་དག་ལ་དབང་ཐོབ་འགལ། །རྒ་ནད་འཆི་བ་མ་མཁྱེན་དང་། །མུ་སྟེགས་བྱེད་ལས་ཐར་ལམ་ཚོལ། །དཀའ་ཐུབ་དྲག་པོས་གདུང་བྱེད་པ། །ཇི་ལྟ་བུར་ནི་འགལ་མི་འགྱུར། །ཞེས་གསུངས་སོ། །
མདོ་སྡེ་རྒྱན་ལས།  དོན་སྒྲ་ཇི་བཞིན་ཡོངས་རྟོག་ན། །བདག་ཉིད་སྙེམས་ཤིང་བློ་ཉམས་འགྱུར། །ལེགས་པར་གསུངས་པའང་སྤངས་པས་ན། །བརླག་འགྱུར་ཆོས་ལ་ཁོང་ཁྲོས་སྒྲིབ། །ཞེས་དང་།  དཀོན་བརྩེགས་ཀྱི་ཆོས་བཅུ་པའི་ལེའུ་ལས།  རིགས་ཀྱི་བུ་དེ་ལ་ཇི་ལྟར་ན་བྱང་ཆུབ་སེམས་
དཔའ་དགོངས་ཏེ་གསུངས་པ་རྟོགས་པར་བྱ་བ་ལ་མཁས་པ་ཡིན་ཞེ་ན།  རིགས་ཀྱི་བུ་འདི་ལ་བྱང་ཆུབ་སེམས་དཔས་དེ་བཞིན་གཤེགས་པས་དགོངས་ཏེ་གསུངས་པའི་མདོ་སྡེ་ཟབ་མོ་གང་དག་ཡིན་པ་དེ་དག་ལ་སྒྲ་ཇི་བཞིན་ཁོ་ནར་མངོན་པར་ཞེན་པར་མི་བྱེད་པ་ཡིན་ཏེ།  དེ་ལ་དེ་པས་དགོངས་ཏེ་
གསུངས་པ་དེ་དག་ཀྱང་གང་ཞེ་ན།  འདི་ལྟ་སྟེ་དེ་བཞིན་གཤེགས་པས་ཉན་ཐོས་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །ཞེས་གསུངས་པ་ནི་དེ་ལྟར་མི་ལྟའོ། །ཀུན་དགའ་བོ་ང་ནི་རོ་རྒྱབ་ན་འོ་གསུངས་པ་ཡང་དེ་ལྟར་མི་ལྟའོ། །ང་ནི་རྒས་འཁོགས་པ་ཡིན་གྱི་ངའི་བསྙེན་བཀུར་བ་ཚོལ་ཅིག་
ཅེས་གསུངས་པ་ཡང་དེ་ལྟར་མི་ལྟའོ། །མོའུ་འགལ་གྱི་བུ་ཁྱོད་སོང་ལ་སྨན་པའི་རྒྱལ་པོ་འཚོ་བྱེད་ཀྱི་གན་ནས་སྨན་ལོང་ཞིག་དང་།  བཟའ་བར་བྱའོ་ཞེས་གསུངས་པ་ཡང་དེ་ལྟར་མི་ལྟའོ། །དེ་བཞིན་གཤེགས་པ་ནི་གཞན་མུ་སྟེགས་ཅན་ཀུན་ཏུ་རྒྱུ་བ་དག་དང་ལྷན་ཅིག་ཏུ་ཚིག་གིས་
9-2-55a


རྩོད་པར་བྱེད་དོ། །ཞེས་གསུངས་པ་ཡང་དེ་ལྟར་མི་ལྟའོ། །དེ་བཞིན་གཤེགས་པའི་ཞབས་ལ་སེང་ལྡེང་གི་ཚལ་པ་ཟུག་གོ་ཞེས་གསུངས་པ་ཡང་དེ་ལྟར་མི་ལྟའོ། །སྐྱེས་བུ་དམ་པ་མིན་པ་ལྷས་བྱིན་ནི་ཡུན་རིང་པོ་ནས།  དེ་བཞིན་གཤེགས་པའི་གཤེད་མ་དང་གཅུགས་
ཅན་དང་ཕྱིར་རྒོལ་བ་དགྲ་བོར་གྱུར་པ་ཡིན་ནོ་ཞེས་གསུངས་པ་ཡང་དེ་ལྟར་མི་ལྟའོ། །དེ་བཞིན་གཤེགས་པ་བསོད་སྙོམས་ཀྱི་ཕྱིར་བྲམ་ཟེའི་གྲོང་སཱ་ལ་ཅན་དུ་ཇི་ལྟར་ལྷུང་ཟེད་བཀྲུས་པས་ཞུགས་པ་བཞིན་དུ་ཕྱིར་ཕྱུང་ངོ་ཞེས་གསུངས་པ་ཡང་དེ་ལྟར་མི་ལྟའོ། །བྲམ་ཟེའི་བུ་མོ་དྲེགས་མས་ཤིང་གི་གཞོང་
བུ་ལྟོ་བར་བཅིངས་ཏེ།  དེ་བཞིན་གཤེགས་པ་ལ་སྐུར་པ་བཏབ་བོ་ཞེས་གསུངས་པ་ཡང་དེ་ལྟར་མི་ལྟའོ། །དེ་བཞིན་གཤེགས་པ་ཉོན་མོངས་མེད་ཀྱི་ལྗོངས་སུ་དབྱར་གནས་པར་ཞལ་གྱིས་བཞེས་པ་ན་ཟླ་བ་གསུམ་དུ་རྟ་ཆས་ཀྱི་ནས་གསོལ་ལོ་ཞེས་གསུངས་པ་ཡང་དེ་ལྟར་མི་ལྟའོ། །ཞེས་
གསུངས་སོ། །གསུམ་པ་ཉམས་ལེན་ཡེ་བཀག་ཡེ་གནང་ཡིན་པ་དགག་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ནི།  འབྲི་ཁུང་པ་ཁ་ཅིག །ཐེག་པ་ཆེ་ཆུང་གི་བསླབ་བྱ་ལ་གཅིག་ལ་བཀག་པ་ཐམས་ཅད་ལ་ཡེ་ནས་བཀག་པ་ཡིན་ཅིང་།  གཅིག་ལ་གནང་བ་ཐམས་ཅད་
ལ་ཡེ་ནས་གནང་བ་ཡིན་པར་འདོད་དེ།  དགོངས་གཅིག་ཏུ་རྡོ་རྗེའི་གསུང་སྤྱིར་བཀག་པ་ཐམས་ཅད་ཡེ་བཀག །གནང་བ་ཐམས་ཅད་ཡེ་གནང་བྱ་བ་འདི་བཞུགས་དེ་ལ་བོད་རྒན་རྣམས་ནད་པ་ལ་ཆང་མ་གཏོགས་པ་བཅས་པ་མཐའ་དག་གིས་སྐྱོང་ཞེས་གསུང་པ་དང་།  བུད་མེད་
ལ་རེག་པ་བཀག་པ་ལ་བུད་མེད་ཆུས་ཁྱེར་བ་ན་བོང་བའི་འདུ་ཤེས་ཀྱིས་རེག་པས་དག་པར་གསུངས་པས་གནང་བཀག་གཅིག་ཏུ་མ་ངེས་ཞེས་ཟེར་བ་ལ།  འདིར་ཞལ་སྔ་ནས།  སྤྱིར་འཁོར་འདས་ཀྱི་གཤིས་ལ་དགེ་མི་དགེ་གཉིས་ཡོད་པ་ལས་ཆོས་ཐམས་ཅད་གནས་དང་གནས་མ་ཡིན་པ་
9-2-55b


མཁྱེན་པའི་ཡེ་ཤེས་ལས་མི་འདའ་བ་དང་གཅིག །མི་དགེ་བ་དང་འབྲེལ་བའི་ལས་ལས་སྡུག་བསྔལ་འབྱུང་བར་ངེས་པ་དང་གཉིས།  བཅོམ་ལྡན་འདས་སེམས་ཅན་ལ་བུ་གཅིག་པ་བཞིན་བརྩེ་བར་དགོངས་ཀྱང་འཇུག་ལྡོག་གི་ཚུལ་ཁྲིམས་ལ་མ་ཞུགས་ན་སྐྱོན་སྤང་བ་དང་ཡོན་ཏན་སྒྲུབ་པའི་
ཐབས་གཞན་མེད་པ་དང་པོ་གསུམ་པོ་འདིའི་གནད་ཀྱིས་ཡེ་བཀག་ཡེ་གནང་དུ་མི་འོང་ཁ་མེད་ཡིན།  དང་པོ་གནང་བ་དེ་ཕྱིས་ཀྱང་གནང་སྟེ་བཀག་པ་མེད།  དང་པོ་བཀག་པ་དེ་ཕྱིས་ཀྱང་བཀག་སྟེ་གནང་བ་མེད།  དཔེར་ན་ནད་པས་ཕྱི་དྲོའི་ཁ་ཟས་ལ་མ་ཆགས་པར་ནད་གསོ་བའི་མཐུན་
རྐྱེན་དུ་འགྲོ་ཞིང་སྨན་ལྟ་བུའི་འདུ་ཤེས་ཡོད་ན་བཀག་པ་མེད་ལ་དེ་ལྟ་བུའི་བསམ་པ་མེད་ན་གནང་བ་མེད་དོ། །ཡུལ་བུད་མེད་ལ་ཆགས་སེམས་ཀྱིས་རེག་པ་དང་པོ་ནས་གནང་བ་མེད་ལ་ཕྱིས་ཀྱང་གནང་བ་མེད།  ས་དང་བོང་བའི་འདུ་ཤེས་ཀྱིས་རེག་པ་དང་པོ་ནས་བཀག་པ་མེད་ཅིང་ཕྱིས་ཀྱང་བཀག་
པ་མེད་པས་གནང་བཀག་གི་བྱེ་བྲག་གི་ཚུལ་དེ་དང་འདྲའོ་ཞེས་ཟེར་རོ། །གཉིས་པ་ལ་གསུམ་སྟེ།  གནང་བཀག་ཐ་དད་དུ་བསྟན་པ།  དེ་ལ་གནོད་པ་སྤང་བ།  མ་འཁྲུལ་པའི་གནང་བཀག་ཇི་ལྟར་བསྒྲུབ་པའི་ཚུལ་ལོ། །དང་པོ་ལ་གསུམ་སྟེ།  དམ་བཅའི་སྒོ་ནས་མདོར་བསྟན།  འཐད་པའི་སྒོ་ནས་
རྒྱས་པར་བཤད།  དཔེའི་སྒོ་ནས་དོན་བསྡུ་བའོ། །དང་པོ་ནི་ཡེ་བཀག་ཞེས་སོགས་དྲུག་སྟེ།  ཐེག་པ་ཆེ་ཆུང་གི་བསླབ་བྱ་བཀག་པ་ཐམས་ཅད་ཡེ་བཀག་དང་།  གནང་བ་ཐམས་ཅད་ཡེ་གནང་ཞེས་བྱ་བའི་ལུགས་འདི་ཡང་སངས་རྒྱས་ཀྱི་བསྟན་པ་དང་མཐུན་པ་མ་ཡིན་ཏེ།  ཉན་ཐོས་དང་ནི་
སོགས་སོ། །གཉིས་པ་ལ་བཞི་སྟེ།  ཉན་ཐོས་ནང་ཕན་ཚུན་གནང་བཀག་ཐ་དད་དུ་བསྟན་པ།  ཁྱིམ་པ་དང་རབ་བྱུང་གནང་བཀག་ཐ་དད་དུ་བསྟན་པ།  ཐེག་པ་ཆེ་ཆུང་གནང་བཀག་ཐ་དད་དུ་བསྟན་པ།  ཐེག་ཆེན་ནང་ཕན་ཚུན་གནང་བཀག་ཐ་དད་དུ་བསྟན་པའོ། །དང་པོ་ལ་གསུམ་སྟེ།  ཐ་དད་དུ་
9-2-56a


བསྟན་པ་དངོས།  དེའི་ཉེས་སྤོང་གི་ལན་དགག །གཅིག་པ་ལ་གནོད་བྱེད་བསྟན་པའོ། །དང་པོ་ནི།  དེ་ཡི་འཐད་པ་ཞེས་སོགས་བཅོ་ལྔ་སྟེ།  ཐེག་པ་ཆེ་ཆུང་དང་།  ཉན་ཐོས་ནང་ཕན་ཚུན་གནང་བཀག་གཅིག་ཏུ་མེད་པ་དེའི་འཐད་པ་འོག་ནས་བཤད་པ་འདི་ལྟར་ཡིན་པས་དཔྱད་
གསུམ་གྱིས་རྣམ་པར་དག་པའི་ལུང་བཞིན་དུ་བཤད་ཀྱིས་ཉོན་ཅིག །དེ་ཡང་ཉན་ཐོས་རྩ་བའི་སྡེ་བཞི་དང་གྱེས་པ་བཅོ་བརྒྱད་པོ་གཅིག་གིས་བཀག་པ་གཅིག་ལ་གནང་བས་གནང་བཀག་གཅིག་ཏུ་མེད་དེ།  ཉན་ཐོས་རྩ་བའི་སྡེ་བཞི་ལ།  འདུལ་བ་མི་འདྲ་བ་རྣམ་པ་བཞི།  དེ་བཞིན་དུ་སྐད་
མི་འདྲ་བ་རྣམ་པ་བཞི།  མཁན་པོ་མི་འདྲ་བ་རྣམ་པ་བཞི།  སྣམ་སྦྱར་གྱི་རྣམ་ཕྲན་གྱི་གྲངས་དང་།  གྲྭའི་རྟགས་མི་འདྲ་བ་རྣམ་པ་བཞི་ལ་སོགས་པ་ཡོད་ཅིང་།  གྱེས་པ་བཅོ་བརྒྱད་ལ་ཡང་།  དང་པོ་སྡོམ་པ་ལེན་པ་དང་།  བར་དུ་བསྲུང་བ་དང་།  ཉམས་ན་ཕྱིར་བཅོས་པ་དང་།  གསོ་སྦྱོང་གི་ཚེ་སོ་སོ་
ཐར་པ་འདོན་པའི་ཚུལ་དང་།  ཐ་མ་སྡོམ་པ་གཏོང་བའི་ཚུལ་ལ་སོགས་པ་ཕལ་ཆེར་མི་མཚུངས་པའི་ཕྱིར་རོ། །དེ་ཡང་ཁ་ཆེ་པཎ་ཆེན་གྱི་གསུང་སྒྲོས་ལས།  ཐམས་ཅད་ཡོད་སྨྲའི་མཁན་པོ་རྒྱལ་རིགས་སྒྲ་གཅན་ཟིན།  སྐད་སཾ་སྐྲྀ་ཏའི་སྐད།  སྣམ་སྦྱར་སྣམ་ཕྲན་ཉི་ཤུ་རྩ་ལྔ་མན་ཆད།  དགུ་ཡན་ཆེད།  
གྲྭའི་རྟགས་པད་མ་དང་།  ཨུཏྤལ་ལ་སོགས་པ།  ཕལ་ཆེན་པའི་མཁན་པོ་བྲམ་ཟེའི་རིགས་འོད་སྲུང་ཆེན་པོ།  སྐད་པྲ་ཀྲི་ཏའི་སྐད།  སྣམ་ཕྲན་ཉེར་གསུམ་པ་ནས་བདུན་ཡན་ཆད།  རྟགས་དུང་།  མང་པོས་བཀུར་བའི་མཁན་པོ།  འབྲེག་མཁན་གྱི་རིགས་ཉེ་བ་འཁོར།  སྐད་ཟུར་ཆག་གི་སྐད།  
སྣམ་ཕྲན་ཉེར་གཅིག་པ་ནས་ལྔ་ཡན་ཆད།  རྟགས་མེ་ཏོག་སོར་ཙི་ཀ།  གནས་བརྟན་པའི་མཁན་པོ།  མཐའ་འཁོབ་འདུལ་བ་ཀ་ཏ་ཡ་ན།  སྐད་པི་ཤ་ཙིའི་སྐད།  སྣམ་ཕྲན་དང་།  གྲྭའི་རྟགས་མང་པོས་བཀུར་བ་དང་འདྲ་བར་གསུངས་སོ། །གྱེས་པ་བཅོ་བརྒྱད་ཀྱི་དབྱེ་བ་ནི་འོག་ནས་འཆད་
9-2-56b


དོ། །གཉིས་པ་ལ་གཉིས་ཏེ།  གྱེས་པ་བཅོ་བརྒྱད་ལ་བདེན་བརྫུན་གྱི་དབྱེ་བ་ཡོད་པའི་ལན་དགག །བསླབ་པ་ཤེས་ན་གནང་བཀག་གཅིག་ཏུ་འགྱུར་བའི་ལན་དགག་པའོ། །དང་པོ་ནི།  གལ་ཏེ་སྡེ་པ་ཞེས་སོགས་བདུན་ཏེ།  ཉན་ཐོས་རྩ་བའི་སྡེ་བཞི་དང་།  གྱེས་པ་བཅོ་བརྒྱད་ལ་
གནང་བཀག་ཐ་དད་ཡོད་པས།  གནང་བཀག་ཐ་དད་པར་མི་འགྲུབ་སྟེ།  སྡེ་པ་གཅིག་ཁོ་ནའི་གནང་བཀག་བདེན་པ་ཡིན་གྱི།  དེ་ལས་གཞན་བརྫུན་པའི་ཕྱིར་རོོ་ཞེ་ན་མ་ཡིན་ཏེ།  རྒྱལ་པོ་ཀྲི་ཀྲིའི་རྨི་ལམ་ལྟར་སྡེ་པ་བཅོ་བརྒྱད་པོ་ཐམས་ཅད་ཀྱི་གནང་བཀག་བདེན་པར་གསུངས་པའི་ཕྱིར་
རོ། །རྒྱལ་པོ་ཀྲི་ཀྲིའི་རྨི་ལམ་ལ།  སྙན་ངག་དཔག་བསམ་འཁྲི་ཤིང་དང་།  མཛོད་ཀྱི་འགྲེལ་བཤད་ལས་བཅུ་བཤད་ཅིང་བསྟན་པ་སྔ་དར་གྱི་དུས་སུ་བྱུང་བའི་ཆོས་ཀྱི་བརྗེད་བྱང་ཞེས་བྱ་བ་ལས་བརྒྱད་དེ་བཅོ་བརྒྱད་འབྱུང་བ་རིམ་པ་བཞིན་བསྡུས་ན།  གླང་ཆེན་མཇུག་མ་དཀར་ཁུང་ཐོགས་པ་
དང་། །ཁྲོན་པས་མི་སྙེགས་ཕྱེ་དང་མུ་ཏིག་བརྗེ། །ངན་པའི་ཤིང་དང་ཙན་དན་མཉམ་དུ་བྱེད། །གླང་གི་ཕྲུ་གུས་གླང་ཆེན་གནས་ནས་སྐྲོད། །མི་གཙང་སྤྲེའུས་མི་གཙང་གཞན་ལ་བྱུག །སྤྲེའུ་མང་པོས་སྤྲེ་ངན་རྒྱལ་པོར་བཀུར། །བཅོ་བརྒྱད་མི་ཡིས་རས་ཡུག་སོ་སོར་དྲས། །ར་བའི་མེ་
ཏོག་འབྲས་བུ་རྐུན་པོས་ཁྱེར། །འཐབ་པར་མི་འོས་སྡེ་རིགས་ཕན་ཚུན་འཐབ། །མེ་ཏོག་དག་ནི་ཆོད་ཅིག་ཅེས་ནི་བསྒུལ། །རྫིང་བུ་གསུམ་གྱི་བར་མ་སྟོང་པར་མཐོང་། །རྒན་པོ་སྤྱི་ཐེར་དུ་ནི་གནས་པ་དང་། །རྟ་ཡི་ཁ་འཕོངས་གཉིས་ཀས་ཟ་བ་དང་། །ཆེ་བའི་ཁྱི་བས་ཆུང་བ་ཁ་ནི་དྲག །བེའུ་སྐྱེས་
མ་ཐག་ཏུ་བ་ལ་ནུ། །སྔ་དྲོ་གཞོན་ནུའི་མི་ནི་ཕྱི་དྲོ་རྒས། །སེང་གེའི་རོ་ནི་རང་གི་སྲིན་འབུས་ཟོས། །བཅོ་བརྒྱད་རྨིས་པ་འོད་སྲུང་ལ་ཞུས་པས། །བྲམ་ཟེའི་ཁྱེའུ་བླ་མ་མ་འོངས་པར། །སངས་རྒྱས་ཤཱཀ་ཐུབ་ཅེས་བྱར་གྱུར་པའི་ཚེ། །བསྟན་པའི་མཇུག་ཏུ་འདི་འདྲ་འབྱུང་བའི་ལྟས། །ཞེས་
9-2-57a


སོ། །སྡེ་པ་བཅོ་བརྒྱད་ཀྱི་གནང་བཀག་ལ་བདེན་བརྫུན་གྱི་དབྱེ་བ་མེད་པ་དང་།  བཅོ་བརྒྱད་ཇི་ལྟར་གྱེས་པའི་ཚུལ་འདིའི་དོན་རྒྱས་པར་བཙུན་པ་དབྱིག་བཤེས་ཀྱིས་མཛད་པའི་སྡེ་པ་ཐ་དད་ཀླག་པའི་འཁོར་ལོ་ཞེས་བྱ་བའི་དོན་བསྡུས་ནས་སློབ་དཔོན་དུལ་བ་ལྷས།  སྡེ་པ་ཐ་
དད་བསྟན་པ་བསྡུས་པ་ཞེས་བྱ་བ་དང་།  འདུལ་བ་འོད་ལྡན་དང་།  དགེ་ཚུལ་གྱི་ལོ་དྲི་བ་སོགས་ལ་ལྟོས་ཏེ་སྡེ་པ་ཐ་དད་བསྟན་པ་བསྡུས་པ་ལས།  ཡུལ་དོན་སློབ་དཔོན་བྱེ་བྲག་གིས། །ཐ་དད་རྣམ་པ་བཅོ་བརྒྱད་འདོད། །ཅེས་དང་།   འོད་ལྡན་ལས།  དེ་ལྟ་བས་ན་སྡེ་པ་གཞན་འདོན་པ་དག་
ཀྱང་སངས་རྒྱས་ཀྱི་གསུང་ནི་ཡིན་པར་ཐེ་ཚོམ་མེད་པ་ཡིན་ནོ་ཞེས་དང་།  དགེ་ཚུལ་གྱི་ལོ་དྲི་བ་ལས་དེ་ལྟར་བྱེ་བྲག་བཅོ་བརྒྱད་དུ།  ཤཱཀྱ་སེང་གེའི་བསྟན་པ་ནི། །གྱུར་ཏེ་འགྲོ་བའི་བླ་མ་དེའི། །སྔོན་གྱི་ཕྲིན་ལས་དབང་གིས་ཡིན། །ཞེས་གསུངས་སོ། །བཅོ་བརྒྱད་ཇི་ལྟར་གྱེས་པའི་ཚུལ་ནི། 
འོད་ལྡན་ལས།  ཐམས་ཅད་ཡོད་སྨྲ་གཅིག་པུ་ལས།  གཞན་རྣམས་གྱེས་པར་གསུངས་ཏེ།  ཇི་སྐད་དུ་སྔོན་ཐམས་ཅད་ཡོད་པར་སྨྲ་བ་འདི་གཅིག་པུ་ཡོད་པ་ལས་བཅོམ་ལྡན་འདས་མྱ་ངན་ལས་འདས་པ་དང་།  དེ་ལ་བརྟེན་ནས་སྡེ་པ་གཞན་དག་འབྱུང་བས་དེ་དག་གི་གཞིར་གྱུར་པའི་ཕྱིར་གཞི་
ཐམས་ཅད་ཡོད་པར་སྨྲ་བ་ཞེས་བྱ་བ་དང་།  དེ་ལྟ་བས་ན་ཐམས་ཅད་ཡོད་པར་སྨྲ་བ་ནི་གཞི་ཞེས་བྱའི།  སྡེ་པ་གཞན་དག་ནི་མ་ཡིན་ཏེ།  ཐ་མལ་པ་དང་།  ཟུར་ཆག་པ་དང་།  འབྲིང་དུ་འདོན་པའི་ཚིག་གི་ཐ་སྙད་བརྗོད་པའི་ཕྱིར་རོ། །ཞེས་སོ། །སྡེ་པ་ཐ་དད་བསྟན་པ་བསྡུས་པ་དང་།  དགེ་
ཚུལ་གྱི་ལོ་དྲི་བ་ལས།  རྩ་བའི་སྡེ་པ་བཞི་ལས།  བཅོ་བརྒྱད་དུ་གྱེས་པར་འདོད་དེ།  གཞུང་དང་པོ་ལས།  ཤར་དང་ནུབ་དང་གངས་རིར་གནས། །འཇིག་རྟེན་འདས་པར་སྨྲ་བའི་སྡེ། །རྟག་པར་སྨྲ་བའི་སྡེ་པ་དང་། །ལྔ་ཚན་དགེ་འདུན་ཕལ་ཆེན་པ། །གཞི་ཀུན་པ་དང་འོད་སྲུང་སྡེ། །ས་སྟོན་
9-2-57b


སྡེ་དང་ཆོས་སྲུང་སྡེ། །མང་ཐོས་གོས་དམར་སློབ་མ་དང་། །རྣམ་པར་ཕྱེ་སྟེ་སྨྲ་བའི་སྡེ། །ཐམས་ཅད་ཡོད་པར་སྨྲ་བ་ཡིན། །རྒྱལ་བྱེད་ཚལ་གནས་འཇིགས་མེད་གནས། །གཙུག་ལག་ཁང་ཆེན་གནས་བརྟན་པ། །ས་སྒྲོགས་རི་དང་བསྲུང་བ་པ། །གནས་མ་བུ་ཡི་སྡེ་རྣམས་ནི། །
ཀུན་གྱིས་བཀུར་བ་རྣམ་པ་གསུམ། །ཡུལ་དོན་སློབ་དཔོན་བྱེ་བྲག་གིས། །ཐ་དད་རྣམ་པ་བཅོ་བརྒྱད་གསུངས། །ཞེས་དང་།  གཞུང་གཉིས་པ་ལས།  འོད་སྲུང་ཞེས་བྱ་ས་སྲུང་དང་། །ཆོས་སྲུང་ཞེས་ནི་བྱ་བ་དང་། །གཞི་ཀུན་ཡོད་པར་སྨྲ་བ་སྟེ། །ལྟ་བའི་བྱེ་བྲག་འགའ་ཞིག་གིས། །
རྒྱུ་ཡིས་འདི་དག་ཐ་དད་བྱས། །སྟོན་པ་ཐ་དད་ཡོད་མ་ཡིན། །དགེ་འདུན་ཕལ་ཆེན་དབྱེ་བ་ནི། །དྲུག་སྟེ་ཤར་གྱི་རི་བོ་དང་། །དེ་བཞིན་ནུབ་རི་ཞེས་བྱ་དང་། །གངས་གནས་ཞེས་བྱ་དེ་ལས་གཞན། །རྣམ་པར་ཕྱེ་སྟེ་སྨྲ་བ་དང་། །གཞན་ནི་དེ་བཞིན་བརྟགས་པར་སྨྲ། །འཇིག་རྟེན་འདས་
སྨྲ་ཞེས་བྱ་བ། །དེ་དག་ཏུ་ནི་ཡང་དག་སྨྲ། །མང་པོས་བཀུར་བའི་བྱེ་བྲག་ནི། །རྣམ་པ་ལྔར་ནི་མཁས་པས་བསྒྲགས། །གོས་དམར་བ་དང་ས་སྲུང་དང་། །ཀུ་རུ་ཀུལླེ་དེ་ལས་གཞན། །མང་དུ་ཐོས་པ་ཞེས་བྱ་དང་། །གནས་མ་བུ་ཡི་སྡེ་ཞེས་དང་། །རྒྱལ་བྱེད་ཚལ་ན་གནས་པ་དང་། །
འཇིགས་མེད་རི་ལ་གནས་པ་དང་། །གཙུག་ལག་ཁང་ཆེན་ལ་གནས་པ། །གནས་བརྟན་དབྱེ་བ་གསུམ་དུ་འདོད། །དེ་ལྟར་བྱེ་བྲག་བཅོ་བརྒྱད་དུ། །ཞེས་སོགས་གསུངས་སོ། །རྟོག་གེ་འབར་བ་ལས།  རྩ་བའི་སྡེ་པ།  དགེ་འདུན་ཕལ་ཆེན་པ་དང་།  གནས་བརྟན་པ་གཉིས་ལས།  དང་
པོ་ལས་བརྒྱད།  ཕྱི་མ་ལས་བཅུར་གྱེས་པར་གསུངས་ཏེ།  ཇི་སྐད་དུ།  སངས་རྒྱས་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་ལོ་བརྒྱ་དང་བཅུ་དྲུག་ལོན་པ་ན།  གྲོང་ཁྱེར་མེ་ཏོག་གིས་རྒྱས་པ་ཞེས་བྱ་བར་རྒྱལ་པོ་དྷརྨཱ་ཨ་ཤྭ་ཀ་ཞེས་བྱ་བ་རྒྱལ་སྲིད་བྱེད་པའི་ཚེ།  རྩོད་པ་འགའི་དབང་གིས་
9-2-58a


དགེ་འདུན་གྱི་དབྱེན་ཆེན་པོར་གྱུར་ཏོ། །དེ་ནས་རེ་ཤིག་དང་པོར་སྡེ་པ་གཉིས་སུ་ཆད་ནས་གནས་ཏེ།  དགེ་འདུན་ཕལ་ཆེན་པ་དང་གནས་བརྟན་པའོ། །དགེ་འདུན་ཕལ་ཆེན་པའི་སྡེ་པ་ཡང་རིམ་གྱིས་བྱེ་བར་གྱུར་པ་ན།  རྣམ་པ་བརྒྱད་དུ་གནས་ཏེ།  འདི་ལྟ་སྟེ་དགེ་འདུན་ཕལ་ཆེན་
སྡེ་པ་དང་།  ཐ་སྙད་གཅིག་པ་དང་།  འཇིག་རྟེན་ལས་འདས་པར་སྨྲ་བ་དང་།  མང་དུ་ཐོས་པ་དང་།  རྟག་པར་སྨྲ་བ་དང་།  མཆོད་རྟེན་པ་དང་།  ཤར་གྱི་རི་བོ་པ་དང་།  ནུབ་ཀྱི་རི་བོ་པའོ། །གནས་བརྟན་པ་ཡང་རིམ་གྱིས་བྱེ་བར་གྱུར་པ་ན།  རྣམ་པ་བཅུར་འགྱུར་ཏེ།  འདི་ལྟ་སྟེ་གནས་བརྟན་པ་ཉིད་
ལ།  གངས་རི་པ་ཞེས་བརྗོད་པ་དང་།  ཐམས་ཅད་ཡོད་པར་སྨྲ་བ་ཉིད་ལ་རྣམ་པར་ཕྱེ་སྟེ་སྨྲ་བ་དང་།  རྒྱུར་སྨྲ་བ་དང་།  ཁ་ཅིག་མུ་རན་ཏ་ཀ་པ་ཞེས་ཟེར་བ་དང་།  གནས་མའི་བུ་ལ་ཆོས་མཆོག་དང་།  བཟང་པོའི་ལམ་པ་དང་།  ཀུན་གྱིས་བཀུར་བ་ལ་ཁ་ཅིག་ཨ་ནན་ཏ་ཀ་པ་ཞེས་ཟེར།  ཁ་ཅིག་ནི་ཀུ་རུ་ཀུལླེ་
ཞེས་ཀྱང་ཟེར་བ་དང་།  མང་སྟོན་པ་དང་།  ཆོས་སྦས་པ་དང་།  ཆར་བཟངས་འབེབས་པ་ཞེས་བྱ་བ་ལ་ཁ་ཅིག་ནི་འོད་སྲུང་པ་ཞེས་ཟེར་བ་དང་།  བླ་མ་ལ་ཁ་ཅིག་ནི་འཕོ་བར་སྨྲ་བ་ཞེས་ཟེར་བ་སྟེ།  སྡེ་པ་བཅོ་བརྒྱད་ནི་དེ་དག་གོ་ཞེས་སོ། །གཉིས་པ་ནི།  སྡེ་པ་ཀུན་གྱི་ཞེས་སོགས་ཚིགས་བཅད་དྲུག་དང་
ཚིག་རྐང་གཅིག་སྟེ་སྡེ་པ་བཅོ་བརྒྱད་པོ་ཀུན་གྱི་བསླབ་པ་ཤེས་ན།  གནང་བཀག་གཅིག་ཏུ་འགྱུར་ཞེ་ན།  ཤེས་ཀྱང་ཕལ་ཆེར་སོགས་ཏེ་བུ་རམ་ཕྱི་དྲོ་ལྟུང་བ་མེད་པ་དང་།  བྱིན་ལེན་ལག་པ་བཀན་པ་དང་།  མིར་ཆགས་པ་བསད་པ་ལ་ཕམ་པ་དང་།  གླེང་གཞིའི་ཚིགས་བཅད་རིང་ཐུང་གཞན་དུ་
ཡོད་པ་ནི་ཐམས་ཅད་ཡོད་སྨྲའོ། །གསོལ་བཞིའི་ཆོ་གས་སྡོམ་པ་འཇིག་པ་དང་།  སྨིན་མའི་སྤུ་མ་བཞར་ན་ལྟུང་བ་དང་།  ལྷུང་བཟེད་བྱིན་ལེན་བྱེད་པ་རྣམས་ནི་ཕལ་ཆེན་པའོ། །བུ་རམ་ཕྱི་དྲོ་འགོག་པ་དང་།  བྱིན་ལེན་ལག་པ་བཀན་པ་ལས་གཞན་སྐྱུར་ཐབས་སུ་བྱེད་པ་ནི་གནས་བརྟན་པའོ། །
9-2-58b


གསུམ་པ་ནི་མདོར་ན་ཕམ་པ་ཞེས་སོགས་བཅུ་བདུན་ཏེ།  སྡེ་པ་ཐམས་ཅད་གནང་བཀག་གཅིག་པ་མི་འཐད་དེ།  ཕམ་པ་བཞི་པོ་ནས་བརྩམས་ཏེ།  བསླབ་པར་བྱ་བ་ཐམས་ཅད་མི་མཐུན་པས་ཐམས་ཅད་ཡོད་སྨྲ་ལྟ་བུ་གང་ཞིག་གི་བཀག་པ་ལ་གནས་བརྟན་པ་ལྟ་བུ་གང་ཞིག་ལ་གནང་བར་
གྱུར་པ་ཡོད་པའི་ཕྱིར།  དེ་ལྟ་མིན་པར་གཅིག་ན་གནོད་བྱེད་ནི་དཔེར་ན་བུ་རམ་སོགས་སོ། །བུ་རམ་ཕྱི་དྲོ་ཟ་བ་དང་།  བྱིན་ལེན་ལ།  ཡེ་བཀག་ཡེ་གནང་བརྟགས་པ་དེ་བཞིན་དུ།  སྨིན་མའི་སྤུ་བཞར་བ་སོགས་ཀུན་ལ་སྦྱར་ནས་བརྟག་པར་བྱ་སྟེ།  དེ་ལྟར་བརྟགས་ན་ཡེ་བཀག་ཡེ་གནང་འཇིག་
གོ།  །གཉིས་པ་ཁྱིམ་པ་དང་རབ་བྱུང་གནང་བཀག་ཐ་དད་དུ་བསྟན་པ་ལ་གཉིས་ཏེ།  ཁས་བླངས་བརྗོད་པ་དང་།  དེ་དགག་པའོ། །དང་པོ་ནི།  ཁ་ཅིག་རབ་ཏུ་ཞེས་སོགས་ལྔ་སྟེ།  འབྲི་ཁུང་པ་ཁ་ཅིག་དགོངས་གཅིག་ཏུ་རྡོ་རྗེའི་གསུང་།  བཅས་པ་དང་རང་བཞིན་གྱི་ཁ་ན་མ་ཐོ་བ་གཅིག་པ་
ཡིན་ཞེས་བྱ་བ་འདི་བཞུགས་པས་དེ་གཉིས་གཅིག་པ་ཡིན་ནོ། །འོ་ན་དུད་འགྲོ་ལ་བཅས་པ་མཛད་པ་མེད་པས་བཅས་འགལ་གྱི་ཉེས་པ་མི་འབྱུང་ངམ་སྙམ་ན།  དུད་འགྲོ་ལ་ཡང་བཅས་པ་ཡོད་དེ།  ཡང་རྡོ་རྗེའི་གསུང་།  ཁམས་གསུམ་ཆོས་ཀྱི་རྒྱལ་པོས་འགྲོ་བ་སྤྱི་ལ་བཅས་བྱ་བ་བཞུགས། 
དེ་ལ་སངས་རྒྱས་བཅོམ་ལྡན་འདས་དང་པོ་ཐུགས་བསྐྱེད།  བར་དུ་ཚོགས་བསགས་།  ཐ་མར་ཆོས་འཁོར་བསྐོར་བ་དེ་ཡང་།  རྗེས་འབྲང་གི་སྲས་ཁོ་ནའི་དོན་དུ་མ་ཡིན་འགྲོ་བ་ཐམས་ཅད་ཀྱི་དོན་དུ་ཡིན་པ་དང་གཅིག །དེ་ལ་གང་ཟག་རེ་རེ་ལུང་སྟོན་པའི་ཚེ་ཞལ་ནས་འོད་ཟེར་ཁ་དོག་སྣ་ཚོགས་བཀྱེ་
སྟེ།  འོག་མིན་གྱི་བར་སྣང་བར་བྱས་ནས།  བརྩམ་པར་བྱ་ཞིང་དབྱུང་བར་བྱ། །ཞེས་སོགས་ཚིགས་བཅད་གཉིས་པོ་སེམས་ཅན་གྱི་རིས་ཐམས་ཅད་དུ་འབྱུང་བའི་གནད་དང་གཉིས།  འཁོར་ལོ་དང་པོ་འདུལ་བ་ཡིན་ལ།  དེ་བསྡུས་པའི་སྙིང་པོ་ནི་སྡིག་པ་ཅི་ཡང་མི་བྱ་སྟེ།  ཞེས་སོགས་གསུངས་
9-2-59a


པའི་གནད་འདི་དང་གསུམ་གྱིས་བཅས་པ་ཐམས་ཅད་སྤྱི་ལ་དགག་སྒྲུབ་ཀྱི་ཚུལ་དང་བཅས་པ་བཤད་པ་ཡིན་ཞེས་ཟེར་རོ། །གཉིས་པ་ནི།  འདི་ནི་སངས་རྒྱས་ཞེས་སོགས་བཅུ་གཅིག་སྟེ།  རབ་བྱུང་ལ་བཅས་པ་ཐམས་ཅད་ཁྱིམ་པ་ནས་དམྱལ་བའི་བར་ལ་མཚུངས་པར་འབྱུང་ཟེར་
བ་འདི་ནི་སངས་རྒྱས་ཀྱི་དགོངས་པ་མ་ཡིན་ཏེ།  ཅིའི་ཕྱིར་ཞེ་ན་སོགས་སོ། །དེས་ན་ཐུབ་པས་དྲུག་སྡེ་ཟས་མཆོད་རྟེན་འདྲ་བར་བྱས་ཏེ་གཞོམ་པ་སོགས་མ་བཅས་པའི་གོང་གི་ལས་དང་པོ་པས་ཉེས་པ་བྱས་ཀྱང་ལྟུང་བ་མེད་པར་གསུངས་སོ། །དེ་ལྟར་མ་ཡིན་པར་བཅས་མ་བཅས་ཐམས་ཅད་ལ་ལྟུང་བ་ཀུན་
འབྱུང་ན་འགྲོ་ཀུན་སོགས་སོ། །གསུམ་པ་ཐེག་པ་ཆེ་ཆུང་གནང་བཀག་ཐ་དད་པར་བསྟན་པ་ནི།  ཉན་ཐོས་རྣམ་གསུམ་ཞེས་སོགས་ལྔ་སྟེ།  འདི་ལ་ཉན་ཐོས་ལ་རྣམ་གསུམ་དག་པའི་ཤ་གནང་ཚུལ།  ཐེག་པ་ཆེན་པོ་ལས་ཤ་ཐམས་ཅད་བཀག་ཚུལ།  དེ་དག་གི་དགོངས་པ་དཔྱད་པ།  གཞུང་གི་
འབྲུ་གཉེར་བས་སྐབས་ཀྱི་དོན་ལ་སྦྱར་བ་དང་བཞི་ལས།  དང་པོ་ནི་འདུལ་བ་ལུང་སྨན་གྱི་གཞི་ལས།  བཅོམ་ལྡན་འདས་ཀྱིས་བཀའ་བསྩལ་པ།  གནས་གསུམ་གྱིས་རུང་བ་མ་ཡིན་པའི་ཤ་བཟའ་བར་མི་བྱའོ། །ཞེས་གསུངས་པའི་གསུམ་གང་ཞེ་ན། བདག་གི་ཆེད་དུ་བྱས་པ་མངོན་སུམ་དུ་མཐོང་བ་
དང་།  ཡིད་ཆེས་པ་ལས་ཁྱོད་ཀྱི་ཆེད་དུ་བྱས་པ་ཡིན་ནོ་ཞེས་ཐོས་པ་དང་།  རང་ཉིད་ཀྱི་བློ་ལ་རྣམ་པར་རྟོག་པ་སྐྱེས་པ་ཚུལ༷་གསུ༷མ་ལ༷ས།  འདི་ནི་བདག་གི་ཆེད་དུ་བྱས་པ་ཡིན་ནོ་སྙམ་པའོ། །ཞེས་དངོས་སུ་རྣམ་གསུམ་མ་དག་པའི་ཤ་བཀག་ཅིང་།  ཤུགས་ལ་རྣམ་གསུམ་དག་པའི་ཤ་གནང་བ་དང་།  ཡང་
ལུང་ལས།  ཡ་རབས་རྣམས་ལ་གནང་བའི་ཉ་དང་།  ཤ་ལ་སོགས་པ་ལྷུང་ཟེད་དུ་འོངས་པ་དག་ལ་མི་ཤ་ལ་སོགས་པ་མ་ཡིན་ནམ་སྙམ་དུ་བརྟགས་ཏེ།  མ་ཡིན་ན་བཟའོ་ཞེས་དང་།  རྟོག་གེ་འབར་བ་ལས།  ཉན་ཐོས་ཐེག་པའི་གཞུང་ལས་ནི། །རྣམ་གསུམ་དག་པའི་ཤ་གང་དག །ཟོས་ཀྱང་
9-2-59b


སྡིག་པར་མི་འགྱུར་ཏེ། །དྭངས་མ་སོགས་སུ་འགྱུར་བའི་ཕྱིར། །སློང་མོའི་ཟས་ལ་སྡིག་མེད་བཞིན། །ཞེས་གསུངས་སོ། །གཉིས་པ་ནི་ལང་ཀར་གཤེགས་པ་ལས།  བློ་གྲོས་ཆེན་པོ་ཚེ་འདི་ཉིད་ལ་ཡང་།  ཁྱིམ་བདུན་པོའི་ནང་ན་ཤ་ལ་ཤིན་ཏུ་བརྐམ་ཞིང་མ་འོངས་པར་བརྟེན་ན་མི་ཤ་ཟ་བའི་མཁའ་
འགྲོ་དང་།  མཁའ་འགྲོ་མ་མ་རུངས་པ་དག་ཏུ་སྐྱེའོ། །བློ་གྲོས་ཆེན་པོ་དེ་དག་ཚེ་བརྗེས་ནས་ཀྱང་ཤའི་རོ་ལ་ཆགས་པ་དེ་ཉིད་ཀྱིས་སེང་གེ་དང་།  སྟག་དང་།  གཟིག་དང་།  སྤྱང་ཀི་དང་།  འཕར་བ་དང་།  བྱི་ལ་དང་།  ཝ་དང་།  འུག་པ་དང་།  ཤ་མང་པོ་ཟ་བའི་སྐྱེ་གནས་དང་།  ཤ་མང་དུ་ཟ་བའི་སྲིན་འབུ་
ལ་སོགས་པ་ཤིན་ཏུ་གཏུམ་པའི་སྐྱེ་གནས་སུའང་ལྟུང་བར་བྱེད་དོ། །དེར་ལྟུང་བ་རྣམས་མིའི་སྐྱེ་གནས་ཀྱང་འཐོབ་པར་དཀའ་ན་མྱ་ངན་ལས་འདས་པ་ལྟ་ཅི་སྨོས་ཏེ།  བློ་གྲོས་ཆེན་པོ་ཤ་ཟ་བའི་ཉེས་པ་ཡང་དེ་དག་ལ་སོགས་པ་ཡིན་ན་བསྙེན་པ་རྣམས་ལྟ་སྨོས་ཀྱང་སྐྱེ༷་མོ༷ད།  ཕྱིར་མི་ལྡོག་པས་ན་ཡོན་ཏན་
ཤིན་ཏུ་མང་ན་བློ་གྲོས་ཆེན་པོ༷་རྣམས་ཀྱིས་ཡོན་ཏན་དང་ཉེས་པ་འདི་དག་དང་གཞན་ཡང་ཁོང་དུ་མི་ཆུད་ཞེས་རྒྱས་པར་གསུངས་ཤིང་།  གླང་པོའི་རྩལ་དང་སྤྲིན་ཆེན་དང་། །མྱ་ངན་འདས་དང་སོར་ཕྲེང་དང་། །ལང་ཀར་གཤེགས་པའི་མདོ་ལས་ཀྱང་། །ངས་ནི་ཤ་ཡང་རྣམ་པར་སྨད། །སངས་རྒྱས་བྱང་
ཆུབ་སེམས་དཔའ་དང་། །ཉན་ཐོས་རྣམས་ཀྱང་སྨད་པ་ལས། །ངོ་མི་ཚ་བར་ཟ་བ་ནི། །རྟག་ཏུ་སྨྱོན་པར་སྐྱེ་བར་འགྱུར། །ཞེས་དང་།  འཇམ་དཔལ་གྱིས་རང་གི་ལྟ་བའི་འདོད་པ་མདོར་བསྟན་པར།  གསོད་པོ་ནོར་ལ་སྲེད་པ་དག །བསྐལ་པ་འབུམ་དུ་འཚེད་པ་སྟེ། །ཟ་པོ་ཤ་ལ་སྲེད་པ་དག །
བསྐལ་པ་བྱེ་བར་འཚེད་པ་ཡིན། །ཞེས་དང་།  ཤ་ཟ་བ་ཡི་མི་གང་ཞིག །དང་པོ་ཡི་དྭགས་འགྲོ་བ་སྟེ། །ཕྱིས་ནས་ངུ་འབོད་འགྲོ་བ་ཡིན། །ཞེས་དང་།  དཔུང་བཟང་གིས་ཞུས་པའི་རྒྱུད་ལས།  ཤ་ཆང་ཀེའུ་བཙོང་དང་སྒོག་རྡོག་དང་། །འབྲུ་མར་ཏིལ་དང་ལ་ཕུག་སུ་ར་ཎ། །འབྱུང་པོའི་ཟས་དང་
9-2-60a


ལྷ་བཤོས་གཏོར་མ་དང་། །གུ་ལང་མཆོད་བྱས་གཏོར་མ་མི་ཟའོ། །ཞེས་གསུངས་སོ། །གསུམ་པ་ནི་འདུལ་བའི་དངོས་བསྟན་ལ།  ཉན་ཐོས་རྣམ་གསུམ་དག་པའི་ཤ་གནང་བར་གསུངས་པ་དེ་དག་དྲང་དོན་ཡིན་ནམ་ངེས་དོན་ཡིན་སྙམ་ན།  སློབ་དཔོན་ཡོན་ཤཱཀ་གཉིས་ཀྱིས་ནི་
དངོས་བསྟན་སྒྲ་ཇི་བཞིན་དུ་འགྲེལ་ཏེ།  མདོ་རྩར།  ཤ་བསྔོས་པར་ཤེས་ན་བཟའ་བར་མི་བྱའོ། །སྟག་གི་གོད་མ་མི་ཟའོ། །གླང་པོ་ཆེ་དང་།  རྟ་དང་།  ཀླུ་རྣམས་ཀྱི་མི་ཟའོ། །ཞེས་དང་།  ཤའི་བྱིན་ལེན་སྟོབ་པ་ལ།  བཅད་པ་ལས་བྱུང་བ་ཉིད་མ་ཡིན་ནམ།  ཞེས་དྲི་བར་བྱའོ། །དུ་
མ་ཉིད་ན་དང་པོས་སོ། །ཉམས་ན་འོག་མས་སོ་ཞེས་དང་།  སུམ་བརྒྱ་པ་ལས།  ཡ་རབས་རྣམས་ལ་ཉ་དང་ཤ་གནང་གང་། །གནོད་དང་བརྩེ་མེད་རོ་སོགས་ལ་ཆགས་དང་། །ཡོངས་སུ་བཙལ་བའི་སེམས་ནི་སྤངས་ནས་ནི། །ལྷུང་བཟེད་འོངས་པ་དེ་ལ་བརྟགས་ཏེ་བཟའ། །ཞེས་
གནང་བའི་ཤ་བཟའ་བར་གསུངས་ལ།  དེ་ཡང་རྣམ་གསུམ་དག་པའི་ཤའོ། །རྣམ་གསུམ་དག་པ་ནི་ཁ་ཅིག །རང་གི་ཆེད་དུ་མཐོང་ཐོས་དོགས་གསུམ་དང་བྲལ་བ་ཡིན་གྱི།  སྤྱིར་ཤའི་ཆེད་དུ་མ་ཡིན་ནོ་ཞེས་ཟེར་བ་མི་འཐད་དེ།  འོད་ལྡན་ལས།  ཆེད་དུ་བྱས་པའི་ཤ་དང་ཉ་ཤ་དག་བཟའ་བར་
མི་བྱའོ། །གལ་ཏེ་བྱས་པ་དང་བྱེད་དུ་བཅུག་པ་དང་།  རྗེས་སུ་ཡི་རང་བ་འཁོར་གསུམ་ཡོངས་སུ་དག་པ་ཡིན་དུ་ཟིན་ཀྱང་ཆེད་དུ་བྱས་པ་རྣམས་ལས་སྙིང་བརྩེ་བ་མེད་པ་སྐྱེ་བའི་ཕྱིར་དང་ཆ་མ་ཡིན་པའི་ཕྱིར་བཀག་གོ།  དེ་ལས་གཞན་པ་ནི་མ་བཀག་པའོ། །ཞེས་གསུངས་པས་སོ། །ཁ་ཅིག་
ལང་ཀར་གཤེགས་པར།  རྣམ་གསུམ་དག་པའི་ཤ་རྣམས་ནི། །མ་བརྟགས་པ་དང་མ་བླངས་པ། །མ་བསྐུལ་པ་ཡང་སྤོང་མེད་པས། །དེས་ན་ཤ་ནི་མི་ཟའོ། །ཞེས་གསུངས་པ་རྣམས་ལ་འཆད་པ་ནི་ཤིན་ཏུ་ནོར་ཏེ།  དེ་ནི་ཉན་ཐོས་ཀྱི་ཐེག་པར་གསུངས་པའི་རྣམ་གསུམ་དག་པའི་ཤ་དེ་ཡང་འདིར་
9-2-60b


རྣམ་པ་གསུམ་མ་དག་པ་ཡིན་པས་བཟར་མི་རུང་ཞེས་པའི་དོན་ཡིན་གྱི།  ཉན་ཐོས་ཀྱི་ཐེག་པའི་རྣམ་གསུམ་དག་ཚུལ་སྟོན་པ་ནི་མ་ཡིན་པའི་ཕྱིར་རོ། །དེས་ན་འདུལ་བ་ཚིག་ལེའུར་བྱས་པ་ལས།  གང་ཕྱིར་ཆེད་དུ་བྱས་པའི་ཤ།  མཐོང་ངམ་ཐོས་སམ་དོགས་པ་ནི། །དེ་ནི་བཟའ་བར་བྱ་མིན་པར། །འགྲོ་
ཀུན་ཕན་པར་བཞེད་པས་གསུངས། །ཞེས་པ་ལྟར།  ཤའི་ཆེད་དུ་མཐོང་ཐོས་དོགས་གསུམ་དང་བྲལ་བའོ། །སྔར་དྲངས་པའི་སྨན་གྱི་གཞི་ལས་བདག་གི་ཆེད་དུ་ཞེས་གསུངས་པ་ནི་ནད་པའི་དབང་དུ་མཛད་པའོ། །སློབ་དཔོན་ཞི་བ་ལྷས་ནི་འདུལ་བར་རྣམ་གསུམ་དག་པའི་ཤ་གནང་བ་དྲང་
དོན་དུ་གཏན་ལ་ཕབ་པ་སྟེ།  བསླབ་པ་ཀུན་ལས་བཏུས་པར།  འདུལ་བ་ལས།  དེ་ལ་རྣམ་གསུམ་ཡོངས་སུ་དག་པའི་ཤ་ཟོས་ན་སྤོང་བའི་བར་ཆད་དུ་མི་འགྱུར་རོ། །ཞེས་གང་གནང་བ་ནི་དེ་ཡོངས་སུ་སྤངས་པས་དག་པར་ལྟ་བ་རྣམས་ཀྱི་མངོན་པའི་ང་རྒྱལ་བསལ་བ་དང་།  སྐལ་བ་ཡོད་ཀྱང་
དེ་ལ་ཆགས་པས་བསྟན་པ་ལ་མི་འཇུག་པ་སྤང་བའི་ཕྱིར་རོ། །དེ་སྐད་དུ་ལང་ཀར་གཤེགས་པའི་མདོ་ལས་ཀྱང་།  བསྟན་པར་བརྗོད་པ་དེ་དང་།  དེ་ལས་བསླབ་པའི་གཞི་རིམ་པར་བཅའ་བ་སྐས་ཀྱི་གདང་བུ་བྲེ་བའི་ཚུལ་དུ་རྣམ་པ་གསུམ་བཅས་ནས།  དེའི་འོག་ཏུ་ཆེད་དུ་བྱས་པ་རྣམས་ཀྱང་
བཀག་སྟེ།  དེ་ནས་རང་ཤི་བ་བཅུའི་ཤ་ཡང་བཀག་གོ། །ཞེས་གསུངས་སོ། །ཞེས་ལུང་འདྲེན་དང་བཅས་པ་གསལ་བར་བཤད་པའི་ཕྱིར་རོ། །དེ་ལ་དགོངས་གཞི་ནི་དགེ་སློང་ནད་པས་སྨན་གྱི་ཆེད་དུ་བསྟེན་པ་དང་།  མདོ་ཏིང་འཛིན་རྒྱལ་པོ་ལས།  དགེ་སློང་འདི་ནི་འཆི་བའི་དུས་བགྱིས་
ན། །འཛམ་བུའི་གླིང་དུ་ཏིང་འཛིན་སྒྲ་རྣམས་ནི། །སེམས་ཅན་རྣམས་ལ་རྟག་ཏུ་ནུབ་པར་འགྱུར། །འདི་སོས་པས་ནི་ཏིང་འཛིན་རྣམས་ཀྱང་ཐོབ། །ཅེས་གསུངས་པ་ལྟར།  དགེ་སློང་ཡང་དག་བློ་གྲོས་ལྟ་བུ་ཤའི་སྨན་མ་བསྟེན་ན་འཆི་བའི་དུས་བྱེད་པར་འགྱུར་ལ།  དེ་འདས་ན་འཛམ་བུའི་
9-2-61a


གླིང་དུ་ཏིང་ངེ་འཛིན་ནུབ་པར་འགྱུར་བས།  འདི་ལྟ་བུའི་གང་ཟག་གིས་བཟར་རུང་བ་ལ་དགོངས་སོ། །དགོས་པ་ནི་ལྷས་བྱིན་ལ་སོགས་པ་ཤ་སྤངས་པ་ཙམ་གྱིས་དག་པར་ལྟ་བ་དང་།  རྒྱལ་པོ་རྐང་ཁྲ་ལྟ་བུ་ཤའི་རོ་ལ་ཆགས་པས་བསྟན་པ་ལ་མི་འཇུག་པ་རྣམས་རྗེས་སུ་བཟུང་བའི་
ཕྱིར་ཡིན་ནོ། །དངོས་ལ་གནོད་བྱེད་ནི་ལང་གཤེགས་ལས།  བློ་གྲོས་ཆེན་པོ་རབ་ཏུ་བྱུང་བ་རྣམས་ལ་ཤའི་ཟས་ནི་མི་རུང་བར་བཤད་དོ། །བློ་གྲོས་ཆེན་པོ་གང་ང་ལ་དེ་བཞིན་གཤེགས་པས་ཀྱང་གསོལ་ཏོ་ཞེས་སྐུར་པ་འདེབས་པ་དེ་ཡང་བློ་གྲོས་ཆེན་པོ།  སྐྱེས་བུ་བླུན་པོ་རང་གི་ལས་ཀྱི་ཉེས་པའི་
སྒྲིབ་པ་ལ་གནས་པ་དེ་དག་ལ་ཡུན་རིང་པོར་དོན་མེད་པ་དང་།  གནོད་པ་དང་མི་བདེ་བ་སྒྲུབ་པར་འགྱུར་རོ། །བློ་གྲོས་ཆེན་པོ་ངའི་འཕགས་པ་ཉན་ཐོས་རྣམས་ནི་ཁ་ཟས་ཐ་མལ་པ་ཡང་མི་ཟ་ན་ཤ་དང་ཁྲག་གི་ཟས་མི་རུང་བ་ལྟ་ཅི་སྨོས་ཞེས་དང་།  མྱང་འདས་ཆེན་པོར་བཅོམ་ལྡན་འདས།  འོ་ན་ཇི་
ལྟར་མུ་གསུམ་ཡོངས་སུ་དག་པའི་ཤ་ཟ་བར་གནང་ལགས།  བཀའ་བསྩལ་པ།  མུ་གསུམ་ཡོངས་སུ་དག་པ་ངས་རིམ་གྱིས་བསླབ་པའི་གཞི་བསྡམས་པའི་ཕྱིར།  དེ་ཡང་ངས་དང་པོར་ཞེས་དང་།  རིགས་ཀྱི་བུ་ད་ཕྱིན་ཆད་ངའི་ཉན་ཐོས་རྣམས་ཤ་བཟར་མི་རུང་ངོ་། །ཡུལ་འཁོར་གྱི་
བསོད་སྙོམས་ནི་བུའི་ཤ་དང་འདྲ་བར་བྱ་ན་ཤ་ཟ་བར་ངས་ཇི་ལྟར་གནང་ཞེས་གསུངས་སོ། །བདག་གི་བླ་མ་ཡང་འདི་ཁོ་ན་བཞིན་དུ་བཞེད་དེ།  སྤྲིང་ཡིག་སློབ་ཕན་དུ་ལྟ་བར་བྱའོ། །ཁོ་བོའི་རྟོག་པ་ལ་ནི།  འདུལ་བ་ལས་དང་པོར་བསླབ་པའི་གཞི་རིམ་གྱིས་འཆའ་བའི་དུས་སུ་ཤ་གནང་ཞིང་།  ཕྱིས་
བསླབ་གཞི་ཡོངས་སུ་རྫོགས་ནས།  ལང་གཤེགས་དང་།  མྱང་འདས་ཆེན་པོ་གསུངས་པ་ཕྱིན་ཆད་ནས།  ཉན་ཐོས་རྣམས་ལ་ཡང་ཤ་བཀག་སྟེ།  སྔར་དྲངས་པའི་མྱང་འདས་ཆེན་པོར།  ངས་རིམ་གྱིས་བསླབ་པའི་གཞི་བསྡམས་པའི་ཕྱིར་དེ་ཡང་ངས་དང་པོར་ཞེས་དང་།  ད་ཕྱིན་ཆད་ངའི་ཉན་ཐོས་
9-2-61b


རྣམས་ཞེས་པའི་ཚིག་གི་ཁྱད་པར་གསུངས་པའི་ཕྱིར་རོ་སྙམ་དུ་སེམས་ཏེ་གོང་མ་དང་ཕུགས་ཀྱི་དགོངས་པ་གཅིག་གོ།  །བཞི་པ་ནི་ཐེག་པ་ཆེ་ཆུང་ཡང་གནང་བཀག་ཐ་དད་དེ།  འདུལ་བ་ལས་ཉན་ཐོས་རྣམས་ལ།  དང་པོར་བསླབ་པའི་གཞི་འཆའ་བའི་དུས་སུ།  རྣམ་གསུམ་དག་
པའི་ཤ་བཟའ་རུ་རུང་བར་གནང་ཞིང་།  གལ་ཏེ་དེའི་ཚེ་ཡང་མ་གནང་ངོ་སྙམ་ནས་མི་ཟ་ན།  ལྷ་སྦྱིན་གྱི་བརྟུལ་ཞུགས་སུ་གྱུར་པའི་ཕྱིར་དང་།  ཐེག་པ་ཆེན་པོ་ལས།  དང་པོ་ཉིད་ནས་རྣམ་གསུམ་དག་པ་དང་། མ་དག་པའི་ཤ་རྣམས་ཐམས་ཅད་བཀག་ཅིང་།  ཟོས་ན་ངན་འགྲོའི་རྒྱུར་གསུངས་པའི་ཕྱིར་རོ། །
ལྷ་སྦྱིན་གྱི་བརྟུལ་ཞུགས་སུ་འགྱུར་བའི་ཚུལ་ལ་ཊཱི་ཀ་བྱེད་པ་དག །ཁ་ཅིག་ཤ་མི་ཟ་བའི་བརྟུལ་ཞུགས་ཙམ་གྱིས་དག་གྲོལ་དུ་འཛིན་ན་བརྟུལ་ཞུགས་སུ་འགྱུར་ཞེས་འཆད་པ་མི་འཐད་དེ།  ལྷ་སྦྱིན་ཡང་བརྟུལ་ཞུགས་གཅིག་ཙམ་གྱིས་ཆོག་པར་མི་འཛིན་ཅིང་།  གཞན་བཞི་ཡང་བཅའ་བ་བྱས་པའི་
ཕྱིར།  ཞེས་བཀག་ནས་རང་ལུགས་ལ་སྟོན་པ་སངས་རྒྱས་ཀྱི་བཅས་པ་དེ་མི་འཐད།  ལྷ་སྦྱིན་གྱི་བཅས་པ་འཐད་ཟེར་ནས།  ཤ་མི་ཟ་ན་ལྷ་སྦྱིན་གྱི་བརྟུལ་ཞུགས་སུ་འགྱུར་ཞེས་སྨྲ་བ་ནི་ཤིན་ཏུ་མི་འཐད་དེ།  གཞུང་འདི་ཐེག་པ་ཆེ་ཆུང་གནང་བཀག་ཐ་དད་པ་སྟོན་བྱེད་ཡིན་པས་ཉན་ཐོས་ལ་ལྷ་སྦྱིན་
གྱི་བརྟུལ་ཞུགས་སུ་འགྱུར།  ཐེག་པ་ཆེན་པོ་ལ་མི་འགྱུར་བ་ཞིག་དགོས་པ་ལས།  དེ་ནི་ཐེག་པ་ཆེན་པོ་ལ་ཡང་།  ལྷ་སྦྱིན་གྱི་བརྟུལ་ཞུགས་སུ་འགྱུར་བའི་ཕྱིར་རོ། །ལྷ་སྦྱིན་གྱི་བརྟུལ་ཞུགས་གང་ཞེ་ན།  རྟོགས་བརྗོད་བརྒྱ་པ་ལས།  དགེ་སྦྱོང་གོའུ་ཏ་མ་དགོན་པར་གནས་ན་ནི་བདག་ཅག་
གྲོང་འདབ་ན་གནས་པར་བྱའོ། །དེ་ཅིའི་ཕྱིར་ན་དགེ་སློང་དག་དགོན་པར་གནས་པ་ལ་ནི་ཉེས་དམིགས་མང་བའི་ཕྱིར་རོ། །དགེ་སྦྱོང་གོའུ་ཏ་མས་ཤ་བཟའ་བར་གནང་ན་ནི།  བདག་ཅག་གིས་བཟའ་བར་མི་བྱའོ། །དེ་ཅིའི་ཕྱིར་ཞེ་ན་གཞི་དེ་ལས་སེམས་ཅན་རྣམས་གསོད་པར་འགྱུར་བའི་ཕྱིར་རོ། །
9-2-62a


དགེ་སྦྱོང་གོའུ་ཏ་མ་ལན་ཚྭ་ཟ་ན་ནི་བདག་ཅག་གིས་བཟའ་བར་མི་བྱའོ། །དེ་ཅིའི་ཕྱིར་ཞེ་ན་ཁུ་ཆུ་ལས་བྱུང་བའི་ཕྱིར་རོ། །དགེ་སྦྱོང་གོའུ་ཏ་མས་འོ་མ་འཐུང་ན་ནི་བདག་ཅག་གིས་བཏུང་བར་མི་བྱའོ། །དེ་ཅིའི་ཕྱིར་ཞེ་ན་གཞི་དེ་ལས་བེའུ་རྣམས་ཉོན་མོངས་པར་འགྱུར་བའི་
ཕྱིར་རོ། །དགེ་སྦྱོང་གོའུ་ཏ་མ་ཆོས་གོས་དྲས་པ་གྱོན་ན་ནི་བདག་ཅག་གིས་བགོ་བར་མི་བྱའོ། །དེ་ཅིའི་ཕྱིར་ཞེ་ན་མི་རྣམས་ཀྱིས་ཞོ་ཤས་བསྒྲུབས་པ་ཆུད་ཟོས་པར་འགྱུར་བའི་ཕྱིར་རོ། །ཞེས་གསུངས་སོ། །བཞི་པ་ཐེག་ཆེན་ནང་ཕན་ཚུན་གནང་བཀག་ཐ་དད་པ་ནི།  དེ་བཞིན་ཕ་རོལ་ཞེས་
སོགས་ལྔ་སྟེ།  ཐེག་པ་ཆེ་ཆུང་ལ།  གནང་བཀག་ཐ་དད་དུ་ཡོད་པ་དེ་བཞིན་དུ་ཐེག་པ་ཆེན་པོ་ལ་ཡང་ཕ་རོལ་ཏུ་ཕྱིན་པ་དང་།  གསང་སྔགས་ཀྱི་ལྟུང་བ་ལ་གནང་བཀག་འགའ་ཞིག་ཐ་དད་དུ་ཡོད་དེ།  རྩ་ལྟུང་བརྒྱད་པ་དང་།  བཅུ་གསུམ་པ་དང་།  བཅུ་བཞི་པ་སོགས་གསང་སྔགས་ལ་ལྟུང་བར་
བཅས་ཤིང་།  ཕ་རོལ་ཏུ་ཕྱིན་པ་ལ་མ་བཅས་པའི་ཕྱིར་རོ། །དེས་ན་དེ་འདྲའི་འགལ་བ་སོགས་སོ། །གསུམ་པ་དཔེའི་སྒོ་ནས་དོན་བསྡུ་བ་ནི།  དེས་ན་ཡེ་བཀག་ཞེས་སོགས་ཚིགས་བཅད་བཞི་སྟེ།  ཉན་ཐོས་རྩ་བའི་སྡེ་བཞི་དང་།  རབ་ཏུ་བྱུང་མ་བྱུང་དང་།  ཐེག་པ་ཆེ་ཆུང་དང་།  ཐེག་ཆེན་ཕན་
ཚུན་ཐམས་ཅད་གནང་བཀག་ཐ་དད་པ་དེས་ན་ཡེ་བཀག་ཡེ་གནང་གི་རྣམ་གཞག་སོགས་སོ། །གཉིས་པ་དེ་ལ་གནོད་པ་སྤོང་པ་ལ་གཉིས་ཏེ།  ཐུབ་པས་རབ་བྱུང་ལ་སྙིང་ནད་བྱས་པར་ཐལ་བ་སྤང་བ།  བདེ་སྡུག་གི་བྱེད་པོ་སངས་རྒྱས་ཡིན་པར་ཐལ་བ་སྤོང་བའོ། །དང་པོ་ལ་རྩོད་པ་དང་།  ལན་
གཉིས་ལས།  དང་པོ་ནི་གལ་ཏེ་སྡོམ་པ་ཞེས་སོགས་ཚིགས་བཅད་གཉིས་ཏེ།  འབྲི་ཁུང་པ་ཁ་ཅིག་དགོངས་ཅིག་ཏུ་རྡོ་རྗེའི་གསུང་།  འགྲོ་དྲུག་གིས་བསྲུངས་ཀྱང་ཕན་ཡོན་འབྱུང་བྱ་བ་འདི་བཞུགས་དེ་ཡང་བཅས་པ་འགྲོ་བ་སྤྱི་ལ་བཅས་པ་དང་གཅིག །རྒྱུ་འབྲས་རྟེན་འབྲེལ་གྱི་གཤིས་ལ་མི་བསླུ་བ་དང་
9-2-62b


གཉིས།  འགྲོ་དྲུག་གིས་བཅས་པ་ལས་འདས་ཀྱང་ཉེས་པ་འབྱུང་བ་དང་རྒྱུ་མཚན་གསུམ་གྱིས་འགྲོ་དྲུག་གིས་བསྲུང་ཀྱང་ཕན་ཡོན་འབྱུང་།  དཔེར་ན་རྫ་མཁན་དགའ་སྐྱོང་ས་མི་རྐོ་བར་གཞན་གྱིས་བརྐོས་པ་དང་།  གད་པ་ཆད་པའི་ས་ལ་རྫ་མ་བྱེད།  དེའི་རིན་གྱིས་ཕ་གསོ།  བཅོམ་ལྡན་འདས་
འོད་སྲུང་ལ་ཡང་དུས་དུས་སུ་བསྙེན་བཀུར་བྱེད་པས་འོད་སྲུང་དེ་ལ་ཐུགས་དགྱེས་པའང་བཅས་པ་བསྲུངས་པའི་གནས་སྐབས་ཀྱི་འབྲས་བུ་ཡིན།  ཀ་ཤིའི་ནགས་ཁྲོད་དུ་གོང་མ་སྲེག་སོགས་བཞིས་ཁྲིམས་བསྲུངས་པས།  ཡུལ་དུ་དགེ་ལེགས་དཔག་མེད་འབྱུང་བ་བཞིན།  དེ་ལྟ་མིན་པར་སྤྱིར་རྗེས་
འབྲང་གི་སྲས་དང་བྱེ་བྲག་ཏུ་དགེ་སློང་ཁོ་ན་ལ་བཅས་ན་བཅོམ་ལྡན་འདས་ཕྱ་དང་དབང་ཕྱུག་ལྟར་བདེ་སྡུག་གི་བྱེད་པ་པོར་འགྱུར་ཏེ།  མ་བཅས་ན་སྡིག་པ་མེད་པ་ཡིན་པ་ལ་བཅས་ནས་དེ་བསྒྲུབ་མ་ནུས་ན་སྡིག་པ་ལྷག་པ་གཅིག་འབྱུང་བའི་ཕྱིར་དང་།  ཉེ་ཕུང་དུ་ཡང་འགྱུར་ཏེ།  ཚུར་ཉེ་བའི་དགེ་སློང་རྣམས་
ལ་རང་བཞིན་རྒྱབ་ཁལ་གྱི་སྟེང་དུ་བཅས་པའི་གོང་རྫས་བཀལ་བས་མཛོ་རྒན་སྐེད་པ་ཆག་ནས་ཤི་བ་དང་འདྲ་བར་རང་བཞིན་གྱི་སྡིག་པའི་སྟེང་དུ་བཅས་འགལ་གྱི་ཉེས་པ་འབྱུང་བས་ངན་སོང་གསུམ་དུ་ལྟུང་བའི་ཕྱིར་རོ་ཞེས་ཟེར་རོ། །དེའི་དོན་བསྡུས་པ་ནི་འདིར་བཀོད་པ་སྟེ།  གལ་ཏེ་རབ་བྱུང་གི་
སྡོམ་པ་མ་བླངས་ན་བཅས་པ་དང་འགལ་བ་ལ་ལྟུང་བའི་ཐ་སྙད་མི་ཐོབ་ཀྱང་རབ་བྱུང་ལ་བཅས་པའི་སྡིག་པ་ཁྱིམ་པ་ལ་ཡང་འབྱུང་སྟེ།  དེ་ལྟ་མ་ཡིན་པར་རབ་བྱུང་ཁོ་ན་ལ་འབྱུང་ན་རབ་བྱུང་ལ་ཆེད་དུ་གཉེར་ནས་སྡིག་པ་བསྒོས་པར་འགྱུར་ལ།  དེ་ཡང་འདོད་ན་ཐུབ་པས་སོགས་སོ། །གཉིས་པ་ལ་
གཉིས་ཏེ།  བཅས་ལྟུང་ལ་རང་བཞིན་གྱི་མི་དགེ་བ་ཡོད་པ་དགག་པ། །བརྟུལ་ཞུགས་ལ་རང་བཞིན་གྱི་དགེ་བ་ཡོད་པ་དགག་པའོ། །དང་པོ་ལ་གསུམ་སྟེ།  མགོ་མཚུངས་ཀྱི་རིགས་པས་དགག །དངོས་སྟོབས་ཀྱི་རིགས་པས་དགག །ཧ་ཅང་ཐལ་བས་དགག་པའོ། །དང་པོ་ནི་འདི་འདྲའི་
9-2-63a


རིགས་པ་ཞེས་སོགས་བཅུ་གསུམ་མོ། །གཉིས་པ་ནི་དེས་ན་མདོ་དང་ཞེས་སོགས་ཚིགས་བཅད་གཉིས་ཏེ།  ཁ་ན་མ་ཐོ་བ་ཡིན་ན་རང་བཞིན་གྱི་ཁ་ན་མ་ཐོ་བ་ཡིན་དགོས་པར་ཐལ།  ཁ་ན་མ་ཐོ་བ་ཡིན་ན།  བཅས་མ་བཅས་ཀྱི་སེམས་ཅན་ཀུན་ལ་སྡིག་པར་འགྱུར་བས་ཁྱབ་པའི་
ཕྱིར།  འདོད་མི་ནུས་ཏེ།  མ་བཅས་པ་ལ་བཅས་ལྟུང་མེད་པ་དེས་ན་མདོ་དང་བསྟན་བཅོས་སོགས་སོ། །སྔ་མ་ལ་ཁྱབ་པ་ཡོད་དེ།  རང་བཞིན་ཁ་ན་མ་ཐོ་བ་སོགས་སོ། །གསུམ་པ་ལ་ལྔ་སྟེ།  རྒྱལ་བ་སྲས་བཅས་ལྟུང་བ་ཅན་དུ་འགྱུར་བ།  གྲུབ་ཐོབ་བརྟུལ་ཞུགས་བོར་བ་ལྟུང་བ་ཅན་དུ་ཐལ་
བ།  ལྷས་ལྟས་ཀྱི་དགེ་སློང་ལྟུང་བ་ཅན་དུ་ཐལ་བ།  དགེ་བསྙེན་དགེ་ཚུལ་ལྟུང་མེད་མི་སྲིད་པར་ཐལ་བ།  རྩ་བརྒྱུད་ཀྱི་བླ་མ་སྨད་པར་ཐལ་བའོ། །དང་པོ་ནི།  དེ་ལྟར་མིན་པར་ཞེས་སོགས་བཅུ་གཉིས་ཏེ།  བཅས་པའི་ཁ་ན་མ་ཐོ་བ།  བཅས་པ་ལ་ལྟོས་པ་དེ་ལྟ་མ་ཡིན་པར།  མ་བཅས་ཀྱང་ཅི་ནས་སྡིག་
པར་འགྱུར་ན།  རྒྱལ་བ་རིགས་ལྔ་སོགས་ཚིག་རྐང་བཞི་ཆོས་ཅན།  གཤིས་ཀྱི་མི་དགེ་བ་ཅན་དུ་འགྱུར་ཏེ།  ཡེ་བཀག་པ་ལ་སྤྱོད་པའི་ཕྱིར།  རྟགས་ཁས་བླངས་ཏེ།  དབུ་སྐྲ་རིང་ཞིང་སོགས་ཚིག་རྐང་གསུམ་གང་ཞིག །དེ་དག་ཡེ་བཀག་ཡིན་པའི་ཕྱིར་རོ། །གཉིས་པ་ནི་རྣལ་འབྱོར་དབང་ཕྱུག་
ཞེས་སོགས་ཚིགས་བཅད་གཅིག་གོ།  གསུམ་པ་ནི་ཙན་དན་སྤོས་ཀྱི་ཞེས་སོགས་ཚིགས་བཅད་གཅིག་སྟེ།  དཀོན་བརྩེགས་ཀྱི་གཙུག་ན་རིན་པོ་ཆེས་ཞུས་པའི་མདོ་ལས།  སྔོན་བྱུང་བ་འདས་པའི་དུས་བསྐལ་པ་གྲངས་མེད་པ་བས་ཀྱང་ཆེས་གྲངས་མེད་པ་ཡངས་པ་ཚད་མེད་པ་བསམ་གྱིས་མི་ཁྱབ་
པར་གྱུར་པ་དེའི་ཚེ་དེའི་དུས་ན།  བསྐལ་པ་དགའ་བར་གྱུར་པ་ཞེས་བྱ་བ་ལ་འཇིག་རྟེན་གྱི་ཁམས་ལྷས་རྣམ་པར་ལྟས་པ་ཞེས་བྱ་བར།  དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས།  རིག་པ་དང་ཞབས་སུ་ལྡན་པ།  བདེ་བར་གཤེགས་པ།  འཇིག་རྟེན་མཁྱེན་པ་
9-2-63b


སྐྱེས་བུ་འདུལ་བའི་ཁ་ལོ་སྒྱུར་བ་ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་ཐམས་ཅད་མངོན་པར་དགའ་བ་ཞེས་བྱ་བ་འཇིག་རྟེན་དུ་བྱུང་ངོ་། །ཞེས་པ་ནས་གང་འཇིག་རྟེན་གྱི་ཁམས་དེའི་མི་དེ་དག་ཐམས་ཅད་ཀྱང་གསེར་གྱི་ཅོད་པན་ཐོགས་ཤིང་།  དཔུང་རྒྱན་དང་།  རྣ་
ཆས་བརྒྱན་པ།  ལྷའི་ཁ་དོག་དང་གཟུགས་དང་ལྡན་པར་གྱུར་པར་དག་གོ།  གང་ཉོན་མོངས་པ་དང་བྲལ་བར་གྱུར་པ་ཤ་སྟག་གོ།  གང་ཉོན་མོངས་པ་དང་བྲལ་བར་གྱུར་པ་དེ་ཉིད་དེ་དག་གི་རབ་ཏུ་བྱུང་བ་ཡིན་ཏེ།  བཅོམ་ལྡན་འདས་དེ་བཞིན་གཤེགས་པ་དེས་བྱང་ཆུབ་སེམས་དཔའ་དག་ལ་གོས་
ངུར་སྨྲིག་ཏུ་བགོས་པ་ཡང་མེད་དེ།  འདི་ལྟར་སེམས་ལ་རྙོག་པ་མེད་པའི་ཕྱིར་རོ། །ཞེས་གསུངས་སོ། །བཞི་པ་དགེ་བསྙེན་དགེ་ཚུལ་ཞེས་སོགས་ཚིགས་བཅད་གཅིག །ལྔ་པ་ནི་འདི་འདྲ་གང་དག་ཞེས་སོགས་ཚིགས་བཅད་གཉིས་ཏེ།  མ་བཅས་པ་ལ་བཅས་པའི་སྡིག་པ་འབྱུང་བ་འདི་འདྲ་
གང་དག་སོགས་སོ། །གཉིས་པ་ལ་གསུམ་སྟེ།  དངོས་ཀྱི་དོན།  ཤེས་བྱེད་ཀྱི་ལུང་།  རིགས་པས་གྲུབ་པའི་ཚུལ་ལོ། །དང་པོ་ནི།  དེས་ན་མདོ་ལས་ཞེས་སོགས་ཚིགས་བཅད་གཉིས་ཏེ།  མདོ་ལས་རབ་ཏུ་བྱུང་བའི་བརྟུལ་ཞུགས་ལ།  བཅས་པ་ལ་མ་ལྟོས་པར་དགེ་བ་དང་སྡིག་པ་གཉིས་ཀ་མེད་
པར་གསུངས་པའི་རྒྱུ་མཚན་ཡོད་དེ།  རྒྱལ་བ་རིགས་ལྔ་དང་།  ཉེ་བའི་སྲས་བརྒྱད་ལ་སོགས་པ་གོང་དུ་སྨོས་པ་རྣམས་ལ་རབ་བྱུང་གི་བརྟུལ་ཞུགས་མེད་ཀྱང་སྡིག་པ་མེད་ཅིང་།  ཚུལ་འཆལ་རྣམས་ཀྱིས་བརྟུལ་ཞུགས་བཟུང་ཡང་དགེ་བ་མེད་པ་དེས་ནའོ། །འོ་ན་བརྟུལ་ཞུགས་ལ་དགོས་པ་མེད་
པར་འགྱུར་རོ་ཞེ་ན།  ཞིང་གི་དྲ་བ་བཞིན་སྡོམ་པའི་ཚུལ་ཁྲིམས་ལ་གུས་པའི་རྒྱུ་རུ་གསུངས་པར་ཟད་དེ།  འདུལ་བ་ལ་བསྟོད་པ་ལས།  ར་བ་མཚམས་ཀྱི་འོབས་དང་འདྲ་བ་ཡི། །ཟག་པ་ཀུན་གྱི་ཆུ་ལོན་འདུལ་བ་ཡིན། །ཞེས་གསུངས་པའི་ཕྱིར།  ཁ་ན་མ་ཐོ་བ་གཉིས་ཡོད་པ་དེས་ན་འདོད་པས་
9-2-64a


དབེན་པ་བཅས་ལྟུང་སྤོང་བ་དང་།  སྡིག་ཏོ་མི་དགེ་བའི་ཆོས་ཀྱིས་དབེན་པ་རང་བཞིན་གྱིས་སྡིག་པ་སྤོང་བ་རྣམ་པ་གཉིས་གསུངས་པའི་ཐུབ་པའི་དགོངས་པ་ཇི་ལྟ་བ་བཞིན་དུ་ཟུངས་ཏེ་གཞན་དུ་ན་དབེན་པ་ཡང་གཅིག་ཁོ་ནར་ཐལ་བའི་ཕྱིར་རོ། །གཉིས་པ་ནི་བུ་མོ་གསེར་
མཆོག་ཞེས་སོགས་བཅུ་གསུམ་སྟེ།  མདོ་ལས་བུ་མོ་གསེར་མཆོག་འོད་དཔལ་བྱ་བ་ཤིན་ཏུ་མཛེས་པ་གཅིག་དང་།  ཚོང་དཔོན་གྱི་ཁྱེའུ་གཉིས་ལྡུམ་རར་འཇིག་རྟེན་པའི་བདེ་བ་ལ་ལོངས་སྤྱོད་ཅིང་ཡོད་པའི་དུས་སུ།  འཇམ་དཔལ་གྱིས་འདུལ་བའི་དུས་ལ་བབ་པར་ཤེས་ནས།  ཚོང་
དཔོན་གྱི་ཁྱེའུ་དེ་ཤི་བའི་ཚུལ་དང་།  དབང་པོའི་ལམ་རྣམས་ནས་མི་གཙང་བ་འཛག་པར་སྤྲུལ།  ཁྱེའུ་དེའི་འཁོར་རྣམས་ཀྱིས་བུ་མོ་ལ་ཉེས་པ་བཅད་ཀྱིས་དོགས་པ་དང་།  འཁོར་བ་ལ་ཅུང་ཟད་སྐྱོ་བ་སྐྱེས་ནས་འཇམ་དཔལ་ལ་བདག་རབ་ཏུ་བྱུང་བར་ཞུ་ཞེས་གསོལ་པས།  ལུས་རབ་ཏུ་
བྱུང་ཡང་འཇིགས་པ་ལས་མི་སྐྱོབ།  སེམས་རབ་ཏུ་བྱུང་གསུངས་སོ་ཞེས་པ་དང་།  འཇམ་དཔལ་རྣམ་པར་རོལ་པའི་མདོ་ལས།  སྨད་འཚོང་མ་གསེར་མཆོག་འོད་དཔལ་ཚོང་དཔོན་གྱི་ཁྱེའུ་འཇིགས་མེད་དང་།  ལྷའི་རིན་པོ་ཆེས་བརྒྱན་པའི་ཤིང་རྟར་ཞུགས་ཏེ།  གྲོང་ཁྱེར་གྱི་སྐྱེས་པ་ཐམས་ཅད་སྙིང་
བསྐུལ་བར་བྱེད་པའི་ཚེ་འཕགས་པ་འཇམ་དཔལ་གྱིས་སྐུ་ལུས་ཤིན་ཏུ་མཛེས་པར་བསྟན་ནས་བུ་མོ་བཏུལ་ཏེ་ཆོས་བསྟན་པས།  དེས་བཟོད་པ་ཐོབ་ནས་འཇམ་དཔལ་གྱི་རྐང་པ་ལ་གཏུགས་ཏེ།  རབ་ཏུ་བྱུང་བར་གསོལ་བ་བཏབ་པས།  འཇམ་དཔལ་གྱིས་སྨྲས་པ།  སྲིང་མོ་འདི་ལྟ་སྟེ་
མགོའི་སྐྲ་བྲེགས་པ་དེ་ནི་བྱང་ཆུབ་སེམས་དཔའི་རབ་ཏུ་བྱུང་བ་མ་ཡིན་ནོ། །དེ་ཅིའི་ཕྱིར་ཞེ་ན་བུ་མོ་གང་སེམས་ཅན་ཐམས་ཅད་ཀྱི་ཉོན་མོངས་པ་གཅད་པའི་ཕྱིར་བརྩོན་པ་དེ་ནི་བྱང་ཆུབ་སེམས་དཔའི་རབ་ཏུ་བྱུང་བ་ཡིན་པའི་ཕྱིར་རོ། །བུ་མོ་གང་གོས་ངུར་
9-2-64b


སྨྲིག་འཆང་བ་དེ་ནི་བྱང་ཆུབ་སེམས་དཔའི་རབ་ཏུ་བྱུང་བ་མ་ཡིན་གྱི།  བུ་མོ་གང་བདག་ཉིད་ཀྱིས་བསླབ་པ་དང་།  ཚུལ་ཁྲིམས་ཡང་དག་པར་བླངས་ལ།  ཚུལ་ཁྲིམས་འཆལ་བའི་སེམས་ཅན་རྣམས་ཀྱང་ཚུལ་ཁྲིམས་ཀྱི་སྡོམ་པ་དང་བརྟུལ་ཞུགས་ལ་ཡང་དག་པར་སྦྱོར་བར་བྱེད་པ་དེ་ནི་བྱང་ཆུབ་སེམས་
དཔའི་རབ་ཏུ་བྱུང་བ་ཡིན་ནོ། །ཞེས་གསུངས་སོ། །དཀོན་བརྩེགས་ཀྱི་འོད་སྲུངས་ཀྱིས་ཞུས་པའི་མདོ་ལས།  བསྟན་པ་འདི་བཤད་པ་ན་དགེ་སློང་རྣལ་འབྱོར་སྤྱོད་པ་ལྔ་བརྒྱས་བདག་ཅག་གིས་ཚུལ་ཁྲིམས་ཡོངས་སུ་མ་དག་བཞིན་དུ་དད་པས་བྱིན་པ་སྤྱད་པར་གྱུར་ན་མི་རུང་ཞེས་ཉམས་པར་བྱས་
སྟེ།  སླར་ཁྱིམ་དུ་དོང་ངོ་། །དེ་ལ་དགེ་སློང་གཞན་དག་གཅིག་འདི་སྐད་དུ་དགེ་སློང་ཆེ་བའི་བདག་ཉིད་ཅན་རྣལ་འབྱོར་སྤྱོད་པ་འདི་དག་བསྟན་པ་ལས་ཉམས་པ་ནི་ཤིན་ཏུ་མ་ལེགས་སོ། །ཞེས་འཕྱའོ། །བཅོམ་ལྡན་འདས་ཀྱིས་དགེ་སློང་དེ་དག་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་ཁྱེད་འདི་
སྐད་དུ་དགེ་སློང་ཆེ་བའི་བདག་ཉིད་ཅན་འདི་དག་འདི་ལྟར་བསྟན་པ་ལས་ཤིན་ཏུ་ཉམས་པ་འདི་ནི་ཤིན་ཏུ་མ་ལེགས་སོ། །ཞེས་མ་སྨྲ་ཤིག །དེ་ཅིའི་ཕྱིར་ཞེ་ན་དགེ་སློང་དག་མངོན་པར་མ་དགའ་ནས།  ཁྱིམ་ན་གནས་པ་འདི་ནི་དད་པ་ཅན་རྣམས་ཀྱི་ཆོས་ཡིན་གྱི།  དགེ་སློང་དད་པ་དང་མོས་པ་མང་བ་འགྱོད་
པ་དང་ལྡན་པ་འདི་དག་གིས་བསྟན་པ་འདི་ཐོས་ནས་བདག་ཅག་ཚུལ་ཁྲིམས་ཡོངས་སུ་མ་དག་བཞིན་དུ་དད་པས་བྱིན་པ་ཡོངས་སུ་སྤྱད་ན་མི་རུང་ངོ་ཞེས་ཉམས་པར་གྱུར་ཏོ། །འོད་སྲུང་ངས་ལུང་བསྟན་ཏེ་དགེ་སློང་འདི་དག་ནི་འདི་ནས་ཤི་འཕོས་ནས་དགའ་ལྡན་གྱི་ལྷའི་རིས་སུ་སྐྱེ་བར་འགྱུར་ཏེ།  དེ་དག་དེ་བཞིན་
གཤེགས་པ་བྱམས་པའི་ཉན་ཐོས་ཐོག་མར་འདུས་པའི་གྲངས་སུ་ཆུད་པར་འགྱུར་རོ་ཞེས་པ་དང་།  བྱམས་པ་སེང་གེའི་སྒྲས་ཞུས་པའི་མདོ་ལས་ཀྱང་བྱམས་པས་ཡོ་བྱད་བསྙུངས་པའི་སེང་གེའི་སྒྲ་བསྒྲགས་པས་འཁོར་དེ་ནས་དགེ་སློང་ལྔ་བརྒྱ་རང་ཉིད་ལ་ཡོ་བྱད་བསྙུངས་པའི་ཡོན་ཏན་མེད་ཅིང་།  དད་
9-2-65a


པས་བྱིན་པ་སྤྱད་དཀའ་བར་རྟོགས་ནས་ཁྱིམ་དུ་དོང་ངོ་། །དེ་དག་ལ་འཇམ་དཔལ་གྱིས་ལེགས་སོ་བྱིན་ནས།  གང་དག་དད་པས་སྦྱིན་པ་ལོངས་སྤྱོད་པར་མི་སྤྲོ་བ་དེ་དག་གིས་ནི་དེ་ལྟར་འཛེམ་པ་དང་ལྡན་པ་དང་འགྱོད་པ་དང་ལྡན་པར་བྱ་སྟེ།  ཞེས་སོགས་ཀྱི་ཆོས་བསྟན་
པས་དགེ་སློང་ལྔ་བརྒྱ་པོ་དེ་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །ཞེས་སོ། །གསུམ་པ་ནི་དེས་ན་སྡོམ་པ་ཞེས་སོགས་ཚིགས་བཅད་གཉིས་ཏེ།  དེས་ན་སྡོམ་པའི་ཚུལ་ཁྲིམས་དེ་ཉིད་དགེ་བ་ཡིན་གྱི།  དེ་བསྲུང་བའི་ཐབས་སུ་གྱུར་པའི་རབ་ཏུ་བྱུང་བའི་ཆ་ལུགས་ཙམ་ལ་བཅས་པ་
ལ་མ་ལྟོས་པར་རང་བཞིན་གྱི་དགེ་བ་མེད་དེ།  སྡོམ་པ་མེད་པའི་ཆ་ལུགས་ཀུན་མདོ་དང་བསྟན་བཅོས་རྣམས་ལས་བཀག་པའི་ཕྱིར་རོ། །དེ་ཡང་འོད་སྲུང་གིས་ཞུས་པའི་ལེའུ་ལས།  འོད་སྲུང་འདི་ལྟ་སྟེ་དཔེར་ན་མི་རོའི་མགོ་ལ་གསེར་གྱི་ཕྲེང་བ་བཏགས་པ་དེ་བཞིན་དུ་ཚུལ་ཁྲིམས་འཆལ་བ་ངུར་
སྨྲིག་གྱོན་པར་ལྟའོ། །དེ་ལ་འདི་སྐད་ཅེས་བྱ་སྟེ།  དཔེར་ན་མི་རོའི་མགོ་ལ་གསེར་ཕྲེང་ངམ། །ཡང་ན་མེ་ཏོག་ཕྲེང་བ་གདགས་བྱས་པ། །དེ་བཞིན་ཁྲིམས་མེད་ངུར་སྨྲིག་གྱོན་པ་སྤང་། །མཐོང་ནས་དེ་ལ་ཡིད་ནི་དད་མི་འགྱུར། །ཞེས་པ་དང་།  རྟོག་གེ་འབར་བར་མདོ་དྲངས་པ་ལས།  གང་
ཞིག་ངུར་སྨྲིག་བགོས་ཀྱང་སེམས་ཀྱི་སྐྱོན་མ་སྤངས། །ལག་ཏུ་ལྷུང་བཟེད་ཐོགས་ཀྱང་ཡོན་ཏན་སྣོད་མ་གྱུར། །སྐྲ་དང་ཁ་སྤུ་བྲེགས་ཀྱང་དགེ་སྦྱོང་ཚུལ་མ་ཞུགས། །རབ་ཏུ་བྱུང་ཡང་དངོས་པོ་ཀུན་ལས་ངེས་མ་བྱུང་། །དགེ་སྦྱོང་དེ་ནི་དགེ་སྦྱོང་མ་ཡིན་ཁྱིམ་པའང་མིན། །དེ་ནི་ཆུ་མེད་ཁྲོན་པ་རི་མོའི་མར་
མེ་བཞིན། །ཞེས་པ་དང་།  དགེ་སློང་ལ་རབ་ཏུ་གཅེས་པའི་མདོར།  ཇི་ལྟར་སྡོང་པོ་བཟང་པོ་ལ། །ཡུན་རིང་ཡལ་ག་འཕེལ་བ་ལྟར། །རྟགས་ཙམ་འཛིན་པ་ཡུན་རིང་ན། །ཁ་ན་མ་ཐོའི་གཏམ་རྣམས་དང་། །སྡིག་པ་དག་ནི་འཕེལ་བར་བཤད། །ཅེས་པ་དང་།  ཆེད་དུ་བརྗོད་པའི་ཚོམས་ལས།  བདེར་
9-2-65b


གཤེགས་རྒྱལ་མཚན་འཆང་བ་བས། །གཟུགས་བོར་ཁྱིམ་པར་གནས་པ་བཟང་། །ཞེས་གསུངས་སོ། །དེ་ལྟར་མིན་པར་བརྟུལ་ཞུགས་ལ། །གཤིས་ལ་དགེ་བ་ཡོད་ན་ནི། །གོང་དུ་བཤད་པའི་དགེ་སློང་ལྔ་བརྒྱ་པོ་དེ་དག་གིས་སྡོམ་པ་མེད་ཀྱང་རབ་བྱུང་གི་སོགས་སོ། །འདིར་བརྟུལ་ཞུགས་ལ་དགེ་
བ་མེད་པར་གསུངས་པ་ནི།  སྲོག་གཅོད་སྤངས་པ་ལྟ་བུ་བཅས་པ་ལ་མ་ལྟོས་པར་སུས་སྤྱད་ཀྱང་དགེ་བ་འབྱུང་བ་མིན།  ཞེས་པའི་དོན་ཡིན་གྱི།  བཅས་པ་དང་ལྡན་པ་ལ་དགེ་བ་མེད་པ་མ་ཡིན་ཏེ།  དཔེར་ན་བཅས་ལྟུང་ལ་རང་བཞིན་གྱི་མི་དགེ་བ་མེད་ཀྱང་།  བཅས་ལྡན་ལ་འབྱུང་བ་བཞིན་ནོ། །
གཉིས་པ་བདེ་སྡུག་གི་བྱེད་པོ་སངས་རྒྱས་སུ་ཐལ་བ་སྤོང་བ་ལ་གཉིས་ཏེ།  ཕྱོགས་སྔ་མ་བརྗོད་པ་དང་།  དེ་དགག་པའོ། །དང་པོ་ནི་དེ་ལ་ཁ་ཅིག་ཞེས་སོགས་དྲུག་སྟེ།  ཕྱོགས་སྔ་གོང་མའི་ནང་དུ་བཤད་ཟིན་ཏོ། །གཉིས་པ་ལ་གཉིས་ཏེ།  མགོ་བསྒྲེའི་ལན་དང་།  རྣལ་མའི་ལན་ནོ། །དང་པོ་ནི་འདི་ཡི་
ལན་ལ་ཞེས་སོགས་ལྔ་སྟེ།  ཁྱེད་ཀྱང་མུ་སྟེགས་གྲངས་ཅན་པ་འགའ་ཞིག་ལྟར།  ངོ་བོ་ཉིད་གཙོ་བོ་རྒྱུར་སྨྲ་བར་འགྱུར་ཏེ།  གཤིས་ལ་དགེ་སྡིག་ཡོད་པར་འདོད་པའི་ཕྱིར་རོ། །གཉིས་པ་ལ་གསུམ་སྟེ།  སྤྱིར་བསླབ་པ་འཆའ་བའི་རྒྱུ་མཚན།  བསླབ་པ་མི་འདྲ་བ་འཆའ་བའི་རྒྱུ་མཚན།  དེས་གྲུབ་པའི་དོན་
ནོ། །དང་པོ་ནི།  གཉིས་པ་དངོས་པོའི་ཞེས་སོགས་བཅུ་གསུམ་སྟེ།  རྫོགས་པའི་སངས་རྒྱས་ཉག་གཅིག་གིས་བསླབ་པ་འཆའ་བར་བྱེད་པའི་རྒྱུ་མཚན་ཡོད་དེ།  གཤིས་ལ་དགེ་བ་དང་སྡིག་པ་མེད་ཀྱང་བདེ་སྡུག་ལས་ཀྱིས་བྱས་པ་ཡིན་ཅིང་།  ལས་ཀྱི་བྱེད་པ་པོ་སེམས་ཉིད་ཡིན་ལ།  སེམས་
བཟང་ངན་དེ་དག་བླང་དོར་བྱེད་པའི་ཐབས་ནི་སྡོམ་པའི་ཚུལ་ཁྲིམས་ཡིན།  བཅས་པའི་བརྟུལ་ཞུགས་ནི་སྡོམ་པའི་ཚུལ་ཁྲིམས་བསྲུང་པའི་ཐབས་ཡིན་པས་སྡོམ་པའི་ཚུལ་ཁྲིམས་དེ་ལ་བརྟུལ་ཞུགས་གང་ལ་གང་དགོས་པ་རྫོགས་པའི་སངས་རྒྱས་ཁོ་ནས་མཁྱེན་པའི་ཕྱིར་རོ། །བདེ་སྡུག་ལས་ཀྱི་བྱས་
9-2-66a


པ་དང་།  ལས་ཀྱིས་བྱེད་པོ་སེམས་ཉིད་ཡིན་པར་གྲུབ་སྟེ།  སེམས་དགེ་བ་དང་མི་དགེ་བའི་སྟོབས་ཀྱིས་ལས་ལ་བཟང་ངན་འབྱུང་།  ལས་ལ་བཟང་ངན་དེ་ལས་འབྲས་བུ་བདེ་སྡུག་འབྱུང་བའི་ཕྱིར་རོ། །གཉིས་པ་ནི་དེས་ན་བསམ་པའི་ཞེས་སོགས་ལྔ་སྟེ།  རྫོགས་པའི་སངས་
རྒྱས་ཀྱིས་རབ་ཏུ་བྱུང་བ་སྡེ་ལྔ་པོ་ལ་བཅས་པ་མི་འདྲ་བ་སོ་སོར་མཛད་པའི་རྒྱུ་མཚན་ཡོད་དེ།  བསམ་པ་བཟང་ངན་བླང་དོར་བྱེད་པའི་ཐབས་སྡོམ་པའི་ཚུལ་ཁྲིམས་ཡིན་པ་དེས་ན་བསམ་པ་ཉོན་མོངས་པའི་ཁྱད་པར་གྱིས་དེ་དག་གི་གཉེན་པོ་སྡོམ་པའི་ཚུལ་ཁྲིམས་ཀྱི་བྱེ་བྲག་དགེ་ཚུལ་དང་དགེ་སློང་གི་
སྡོམ་པ་ལ་སོགས་པ་དུ་མ་ཡོད་ལ།  དེ་དག་བསྲུང་བའི་ཐབས་སུ་བརྟུལ་ཞུགས་དང་།  འདུལ་བའི་བཅས་པ་མི་འདྲ་བའི་རྒྱུ་མཚན་དེ་ལྟར་ཡིན་པའི་ཕྱིར་རོ། །གསུམ་པ་ནི་དེས་ན་བདེ་དང་ཞེས་སོགས་ཚིགས་བཅད་གཅིག་སྟེ་བདེ་སྡུག་གི་བྱེད་པ་པོ་སངས་རྒྱས་མ་ཡིན་ཡང་བསླབ་པ་འཆའ་བ་
དང་།  སྔགས་སྦྱོར་བའི་བྱེད་པ་པོ་སངས་རྒྱས་ཡིན་པར་གསུངས་ཏེ།  བདེ་སྡུག་སེམས་ལས་བྱུང་ཞིང་སེམས་ཀྱི་ཁྱད་པར་གྱིས་ཚུལ་ཁྲིམས་མི་འདྲ་བ་དུ་མ་ཡོད།  དེ་སྲུང་བ་ལ་བཅས་པ་མི་འདྲ་བ་དུ་མ་དགོས་ཤིང་དེ་ནི་སངས་རྒྱས་ཁོ་ནས་མཁྱེན་པའི་ཕྱིར་རོ། །གསུམ་པ་མ་འཁྲུལ་བའི་གནང་
བཀག་ཇི་ལྟར་བསྒྲུབ་པའི་ཚུལ་ནི།  སྦུ་གུ་ཅན་དང་ཞེས་སོགས་ཚིགས་བཅད་བརྒྱད་དང་རྐང་པ་གཉིས་ཏེ།  གཞན་རྣམས་ནི་གོ་སླ་ལ།  ལག་ཉ་ནི་བྱིན་ལེན་མ་བྱས་པའི་ཟས་ལ་དགེ་སློང་རང་ངམ་གཞན་གྱིས་རེག་པ་ཟོས་ན་ལྟུང་བར་འགྱུར་བའོ། །ནུབ་ཚང་ནི་བསྙེན་པར་མ་རྫོགས་པ་དང་ཆོས་དྲུག་གིས། 
གཅིག་པའི་གནས་སུ་གཉིད་ལོག་པས་ཉལ་ན་མཚན་མོ་གསུམ་པའི་མཐར་ལྟུང་བྱེད་དུ་འགྱུར་བའོ། །བཞི་པ་ཕྲལ་གྱི་ལག་ལེན་འཁྲུལ་པ་དགག་པ་ལ་གསུམ་སྟེ།  མ་འཁྲུལ་པའི་ལག་ལེན་བསྒྲུབ་པར་གདམས་པ།  འཁྲུལ་པའི་ལག་ལེན་བྱུང་བའི་ཚུལ།  དེ་ལ་གནོད་བྱེད་བསྟན་
9-2-66b


པའོ། །དང་པོ་ནི།  མདོ་བསྐུལ་ཞེས་སོགས་གཉིས་ཏེ།  དགེ་འདུན་གྱི་དབུས་སུ་མདོ་བསྐུལ་བ་དང་།  ཉི་མའི་གྲངས་བརྗོད་པ་ལ་སོགས་པའི་ཕྲལ་གྱི་བྱ་བ་ཀུན།  འདུལ་བའི་གཞུང་དང་མཐུན་པར་གྱིས་ཏེ།  འདུལ་བ་ནས་གསུངས་པའི་ལག་ལེན་ཡིན་པའི་ཕྱིར་རོ། །དེ་ཡང་མདོ་རྩ་བ་ལས། 
དགེ་འདུན་གྱི་གནས་བརྟན་གྱིས་སྨྱིག་མའི་ཐུར་མ་སྐུད་པ་ལ་རྒྱུས་པ་སྤོ་བས་ཉི་མ་བགྲང་བར་བྱའོ། །དགེ་སྐོས་ཀྱིས་དེ་ལ་བརྟགས་ཏེ་དགེ་འདུན་ལ་བརྗོད་པར་བྱའོ། །བྱེ་བྲག་ཏུ་བྱས་པའིའོ། །ངོའི་དབྱེ་བས་སོ། །གཙུག་ལག་ཁང་གི་བདག་པོ་དང་།  ལྷའི་ཕྱིར་ཚིགས་སུ་བཅད་པ་གདོན་པའི་དགེ་སློང་རྣམས་
ལ་བསྐུལ་བའི་ཚིག་ཀྱང་བྱའོ། །མོད་ལའོ། །དེང་ནི་ཡར་གྱི་ངོའི་ཚེས་གཅིག་ལགས་ཏེ།  གཙུག་ལག་ཁང་གི་བདག་པོ་དང་།  གཙུག་ལག་ཁང་གི་ལྷ་རྣམས་ཀྱི་སླད་དུ་ཚིགས་སུ་བཅད་པ་རེ་རེ་བཀླག་ཏུ་གསོལ།  ཞེས་གསུངས་སོ། །གཉིས་པ་ནི།  མདོ་བསྐུལ་རིང་མོ་ཞེས་སོགས་གཉིས་ཏེ།  བཀའ་
གདམས་པ་ཁ་ཅིག །མདོ་བསྐུལ་རིང་མོ་ཞེས་བྱ་བ་དཀའ་ལས་ཆེ་བ།  ངོ་བོ་ནོར་བ་བྱེད་པ་མཐོང་སྟེ།  འདི་ལྟར་ཀྱེ་གསོན་ཅིག་དགེ་འདུན་བཙུན་པ་རྣམས།  ཚངས་པ་བརྒྱ་བྱིན་རྒྱལ་ཆེན་རྣམས། །ཆོས་སྐྱོང་གཙུག་ལག་སྲུང་མ་དང་། །ལྷ་ཀླུ་ལ་སོགས་སྡེ་བརྒྱད་དང་། །ཆོས་རྒྱལ་རྗེ་བློན་ཡོན་བདག་དང་། །
ཕ་མ་མཁན་པོ་སློབ་དཔོན་དང་། །མཐའ་ཡས་སེམས་ཅན་དོན་སླད་དུ། །ཞལ་ནས་གསུངས་པའི་མདོ་བརྗོད་ཞུ། །ཞེས་པའི་མཇུག་ཏུ་ཨཱུ་ཧཱུཾ་ལགས་ཟེར་རོ། །ཊཱི་ཀ་བྱེད་པ་ཁ་ཅིག་འདི་འོག་ཏུ་དཀའ་ཡང་འབད་ནས་བྱེད་པ་མཚར།  ཞེས་པ་དང་དོན་གཅིག་པ་མ་གཏོགས་པར་སངས་རྒྱས་ཀྱི་བཀའ་བརྩམ་
པར་བྱ་ཞིང་འབྱུང་བ་བྱ།  ཞེས་སོགས་འདོན་རྒྱུ་ཡིན་པ་ལ་རང་བཟོའི་ནོར་བ་བྱེད་པ་མཐོང་།  ཞེས་པའི་འབྲུ་གཉེར་བ་ནི་ནོར་ཏེ།  མདོ་བསྐུལ་རིང་མོ་བྱེད་པས་ཀྱང་བསྐུལ་བའི་ཚིག་ནོར་བ་ཡིན་གྱི་འདོན་པའི་ཚེ་སངས་རྒྱས་ཀྱི་བཀའ་འདོན་པར་འདོད་པའི་ཕྱིར་ཏེ།  ཞལ་ནས་གསུངས་པའི་མདོ་
9-2-67a


བརྗོད་ཞུ་ཞེས་བཤད་པས་སོ། །གསུམ་པ་ལ་བཞི་སྟེ་ཤེས་བྱེད་མེད་པར་བསྟན་པ།  ཉེས་དམིགས་ཆེ་བར་བསྟན་པ།  སྨད་པའི་གནས་སུ་བསྟན་པ།  འཁྲུལ་པ་གཞན་ལའང་མཚུངས་པར་བསྟན་པའོ། །དང་པོ་ནི། མདོ་རྒྱུད་ཞེས་སོགས་གཅིག་གོ།  གཉིས་པ་ནི་འདི་འདྲའི་
ཞེས་སོགས་གཉིས་ཏེ།  བསྟན་པའི་རྩ་བ་ནི་འདུལ་བའོ། །གསུམ་པ་ནི་སངས་རྒྱས་གསུངས་པའི་ཞེས་སོགས་ཚིགས་བཅད་གཅིག་གོ།  བཞི་པ་ནི་སངས་རྒྱས་གསུང་དང་ཞེས་སོགས་ཚིགས་བཅད་གསུམ་སྟེ།  སངས་རྒྱས་ཀྱི་གསུང་དང་མི་མཐུན་ཡང་མདོ་བསྐུལ་རིང་མོ་འདི་འདྲ་
བདེན་པར་འདོད་ན་ནི།  སྡོམ་པ་ཐག་རྒྱ་མ་དང་།  ལས་ཆོག་མགོ་ལ་བཞག་པས་དགེ་སློང་དུ་འགྱུར་ཞེས་ཟེར་བ་སོགས་ཀྱི་ལག་ལེན་ཕྱིན་ཅི་ལོག་གཞན་ཡང་འཁྲུལ་ཞེས་བརྗོད་པར་མི་ནུས་ཏེ།  དེ་དང་མདོ་བསྐུལ་རིང་མོ་ལུང་དང་འགལ་བའི་སོགས་སོ། །གཞན་ཡང་མུ་སྟེགས་བྱེད་ཀྱིས་
སྲོག་གི་མཆོད་སྦྱིན་བྱས་པས་ཐར་པ་ཐོབ་པ་སོགས་ཀྱི་ཆོས་ལོག་ཀྱང་སུན་དབྱུང་བར་མི་ནུས་ཏེ།  དེ་དང་མདོ་བསྐུལ་རིང་མོ་ལུང་རིགས་མེད་པར་སོགས་སོ། །གསུམ་པ་ཐོས་བསམ་སྒོམ་གསུམ་མ་ནོར་བས་མཇུག་བསྡུ་བ་ལ་གཉིས་ཏེ།  ནོར་བ་སྤོང་བར་གདམས།  མ་ནོར་བ་བསྒྲུབ་
པར་གདམས་པའོ། །དང་པོ་ལ་གཉིས་ཏེ།  སྤང་བྱ་ངོས་བཟུང་།  སྤང་དགོས་པའི་འཐད་པའོ། །དང་པོ་ནི།  ལ་ལ་རྫོགས་པའི་ཞེས་སོགས་ཚིགས་བཅད་གསུམ་སྟེ།  ཞང་མཚལ་པ་དང་།  བཀའ་ཕྱག་པ་ལ་ལ།  རྫོགས་པའི་སངས་རྒྱས་ཀྱི་གསུང་རབ་སྡེ་སྣོད་གསུམ་དང་།  རྒྱུད་སྡེ་
བཞིས་བསྡུས་པའི་ཚིག་དོན་ཟབ་མོ་རྣམས་དང་།  དེ་དག་གི་དགོངས་འགྲེལ་གྲུབ་ཐོབ་རྣམས་ཀྱིས་ལེགས་པར་བཤད་པའི་གྲུབ་པ་སྡེ་བདུན་དང་།  སྙིང་པོ་སྐོར་དྲུག་ལ་སོགས་པ་རྣམས་དང་།  མཁས་པ་རྒྱན་དྲུག་ལ་སོགས་པ་རྣམས་ཀྱིས་ཤིན་ཏུ་ལེགས་པར་བཤད་པའི་ཆོས་ས་སྡེ་
9-2-67b


དང་།  རིགས་ཚོགས་ལ་སོགས་པ་རྣམས་ནི་ཚིག་གི་ན་ཡ་སོགས་སོ། །གཉིས་པ་ནི་བླུན་པོ་དགའ་བ་ཞེས་སོགས་ལྔ་སྟེ།  བཀའ་དང་བསྟན་བཅོས་རྣམ་དག་གི་ཐོས་བསམ་སྤངས་ནས་བླུན་པོའི་ཚིག་ལ་ཐོས་བསམ་བྱེད་པ་ནི།  བློ་གྲོས་དང་ལྡན་པ་རྣམས་ཀྱིས་དོར་བར་བྱ་སྟེ།  དེ་ལྟ་བུས་ནི་བླུན་
པོ་དགའ་བ་བསྐྱེད་ནུས་ཀྱི་མཁས་པ་རྣམས་དགའ་བ་བསྐྱེད་མི་ནུས་པའི་ཕྱིར་དང་།  དུས་དང་བློ་གྲོས་གཉིས་ཀ་གྲོན་དུ་འགྱུར་བའི་ཕྱིར་རོ། །ཀྱེ་མ་ཞེས་སྙིང་བརྩེ་བའི་ཚིག་གིས་བོས་ནས་སངས་རྒྱས་ཀྱི་བསྟན་པ་ནི་གཟུགས་བརྙན་འདི་ལྟར་གྱུར་པ་ད་གཟོད་གོ།  ཞེས་པའོ། །གཉིས་པ་
ནི།  དེས་ན་སངས་རྒྱས་ཞེས་སོགས་བཅུ་སྟེ།  དེས་ན་སངས་རྒྱས་ཀྱི་གསུང་རབ།  སྡེ་སྣོད་གསུམ་དང་།  རྒྱུད་སྡེ་བཞི་དང་།  དེ་དག་གི་དགོངས་འགྲེལ་གྲུབ་ཐོབ་རྣམས་ཀྱིས་བཤད་པའི་བསྟན་བཅོས་ཀྱི་ཚིག་ཐོས་ཤིང་འཛིན་པ་ལ་བྱིན་རླབས་ཡོད་དེ།  བློ་གྲོས་རྒྱ་མཚོས་ཞུས་པའི་མདོ་ལས། 
དེ་བཞིན་གཤེགས་པའི་དམ་པའི་ཆོས་འཛིན་པ། །རྒྱལ་བ་རྣམས་ཀྱིས་ཡོངས་སུ་བཟུང་བར་འགྱུར། །ལྷ་དང་ཀླུ་དང་མི་འམ་ཅི་རྣམས་དང་། །བསོད་ནམས་ཡེ་ཤེས་ཀྱིས་ནི་ཡོངས་སུ་བཟུང་། །དེ་བཞིན་གཤེགས་པའི་དམ་པའི་ཆོས་འཛིན་པ། །དྲན་ལྡན་བློ་གྲོས་ལྡན་ཅིང་བློ་ལྡན་འགྱུར། །
ཤེས་རབ་རྒྱ་ཆེན་ཀུན་ནས་ཡེ་ཤེས་ལྡན། །མཁས་པས་བག་ཆགས་བཅས་པའི་ཉོན་མོངས་སྤོང་། །ཞེས་དང་།  སྐྱེས་རབས་ལས།  ཐོས་ཆུང་དམུས་ལོང་བསྒོམ་པའི་ཚུལ་མི་ཤེས། །ཤེས་རབ་རྒྱས་བྱེད་པ་ནི་ཐོས་པ་ཡིན། །ཐོས་པ་གཏི་མུག་མུན་སེལ་སྒྲོན་མ་ཡིན། །ཡ་རབས་རྣམས་དང་
ཕྲད་ན་སྐྱེས་ཀྱི་མཆོག །རྐུན་པོས་འཕྲོག་ཏུ་མེད་པ་ནོར་གྱི་མཆོག །ཅེས་པ་དང་།  བྱུང་ཆུབ་སེམས་དཔའི་སྡེ་སྣོད་ལས།  ཐོས་པས་ཆོས་རྣམས་ཤེས་པར་བྱེད། །ཐོས་པས་སྡིག་ལས་ལྡོག་པར་བྱེད། །ཐོས་པས་དོན་མ་ཡིན་པ་སྤོང་། །ཐོས་པས་མྱ་ངན་འདས་པ་ཐོབ། །ཅེས་པ་དང་།  ལུང་རྣམ་འབྱེད་ལས།  
9-2-68a


མང་དུ་ཐོས་པ་ལ་ཕན་ཡོན་ལྔ་ཡོད་དེ།  ཕུང་པོ་ལ་མཁས་པ་དང་།  ཁམས་ལ་མཁས་པ་དང་།  སྐྱེ་མཆེད་ལ་མཁས་པ་དང་།  རྟེན་ཅིང་འབྲེལ་བར་འབྱུང་བ་ལ་མཁས་པ་དང་།  དེའི་གདམས་ངག་དང་རྗེས་སུ་བསྟན་པ་གཞན་ལ་རག་མ་ལས་པ་ཡིན་ནོ་ཞེས་སོ། །དོན་ཡིད་ལ་སེམས་
ཤིང་ཉམས་སུ་ལེན་པ་ལ་ཡང་བྱིན་རླབས་ཡོད་དེ།  ཡབ་སྲས་མཇལ་བའི་མདོ་ལས།  གང་གིས་བསྐལ་པ་བཅུའི་བར་དུ་མཉན་ཏེ།  གཞན་ལ་བསྟན་པ་བས།  གང་གིས་སེ་གོལ་གཏོགས་པ་ཙམ་དུ་འདི་བསྒོམས་ན།  དེ་ཉིད་དེ་བས་བསོད་ནམས་ཆེས་མང་དུ་འཕེལ་ལོ། །ཞེས་པ་དང་།  ཐར་པ་ཆེན་པོ་ཕྱོགས་སུ་རྒྱས་པ་
ཞེས་བྱ་བའི་མདོ་ལས།  རྒྱལ་བའི་དྲིན་ལན་བླན་འདོད་པ། །སྐད་ཅིག་ཡུད་ཙམ་སྒོམ་བྱེད་པ། །སྟོང་ཁམས་གང་བའི་སེམས་ཅན་གྱིས། །སྲོག་གི་སྦྱིན་པ་བྱིན་པ་བས། །བསམ་གཏན་བསྒོམས་པ་ཡོན་ཏན་ཆེ། །ཞེས་གསུངས་སོ། །འདི་འདྲའི་བཀའ་དང་བསྟན་བཅོས་རྣམ་དག་ཉན་བཤད་བྱེད་
པ་ལ།  ཐོས་པ་ཞེས་བརྗོད་པ་ཡིན་ཅིང་།  དེའི་དོན་ཚུལ་བཞིན་དུ་དཔྱོད་པ་བསམ་པ་ཡིན་ལ།  ནན་ཏན་གྱིས་དེ་བསྒྲུབ་པ་སྒོམ་པ་ཡིན་པར་ཤེས་པར་བྱས་ནས།  ཐོས་བསམ་སྒོམ་གསུམ་དེ་ལྟར་གྱིས་ཏེ།  དེ་ལྟ་བུའི་ཐོས་བསམ་སྒོམ་གསུམ་འདི་ནི་སངས་རྒྱས་ཀྱི་བསྟན་པ་རྣམ་པར་དག་པ་ཡིན་པའི་
ཕྱིར་རོ། །དེ་ཡང་ཐུབ་པ་དགོངས་གསལ་ལས།  མདོར་ན་སངས་རྒྱས་ཀྱིས་གསུངས།  སྡུད་པ་པོས་བསྡུས།  གྲུབ་ཐོབ་ཀྱིས་སྒོམ།  པཎྜི་ཏས་བཤད།  ལོ་ཙཱ་བས་བསྒྱུར།  མཁས་པ་རྣམས་ལ་གྲགས་པ་ཅིག་སངས་རྒྱས་ཀྱི་བསྟན་པ་ཡིན་པས་དེ་ལ་ཉན་བཤད་སྒོམ་བསྒྲུབ་བྱེད་དགོས་སོ་ཞེས་
གསུངས་པ་ལྟར་རོ། །སོ་སོར་ཐར་པའི་སྡོམ་པའི་སྐབས་ཏེ་དང་པོའོ།།    །།གཉིས་པ་བྱང་སེམས་ཀྱི་སྡོམ་པའི་ཉམས་ལེན་ལ་གསུམ་སྟེ།  སེམས་བསྐྱེད་ཀྱི་དབྱེ་བ་སྤྱིར་བསྟན།  ཐེག་ཆེན་སེམས་བསྐྱེད་བྱེ་བྲག་ཏུ་བཤད།  བསྟན་པ་རྣམ་པར་དག་པས་མཇུག་བསྡུ་བའོ། །དང་པོ་ནི། 
9-2-68b


 སེམས་བསྐྱེད་ལ་ནི་ཞེས་སོགས་ཚིགས་བཅད་གསུམ་སྟེ།  བྱང་ཆུབ་ཏུ་སེམས་བསྐྱེད་པ་ཙམ་གྱི་སེམས་བསྐྱེད་ལ།  ཉན་ཐོས་པའི་ལུགས་དང་།  ཐེག་པ་ཆེན་པོའི་ལུགས་རྣམ་པ་གཉིས་ཡོད་དེ།  ཉན་ཐོས་སྡེ་གཉིས་ཀྱི་ལུང་ནས་བཤད་པ་དང་།  ཐེག་པ་ཆེན་པོ་དབུ་སེམས་ཀྱི་གཞུང་ནས་བཤད་
པ་གཉིས་ཡོད་པའི་ཕྱིར་རོ། །ཉན་ཐོས་རྣམས་ཀྱི་གཞུང་ནས་བཤད་པའི་སེམས་བསྐྱེད་ལ་ཡང་།  ཐོབ་བྱ་བྱང་ཆུབ་ཀྱི་སྒོ་ནས་རྣམ་པ་གསུམ་ཡོད་དེ། ཉན་ཐོས་དགྲ་བཅོམ་དང་།  རང་རྒྱལ་དང་།  རྫོགས་པའི་སངས་རྒྱས་སུ་སེམས་བསྐྱེད་པ་གསུམ་ཡོད་པའི་ཕྱིར་ཏེ།  འདུལ་བ་ལུང་ལས།  ཁ་
ཅིག་ནི་ཉན་ཐོས་སུ་སེམས་བསྐྱེད་དོ། །ཁ་ཅིག་ནི་རང་རྒྱལ་དུ་སེམས་བསྐྱེད་དོ། །ཁ་ཅིག་ནི་སངས་རྒྱས་སུ་སེམས་བསྐྱེད་དོ་ཞེས་བཤད་དོ། །འོན་ཀྱང་གསུམ་པོ་དེ་དག་གི་ཆོ་ག་སྤྱོད་པ་དེང་སང་ཉུང་སྟེ།  ཉན་ཐོས་ཀྱི་བསྟན་པ་འབྲས་བུའི་དུས་ལྔ་བརྒྱ་པ་ཕྲག་གསུམ།  སྒྲུབ་པའི་དུས་ལྔ་བརྒྱ་
པ་ཕྲག་གསུམ་ནུབ་ནས།  ལུང་གི་དུས་ཡིན་པའི་ཕྱིར་རོ། །ཁ་ཅིག་སྟོན་པ་འདས་ནས་ལོ་དགུ་བརྒྱ་ལོན་པ་ན་སློབ་དཔོན་དབྱིག་གཉེན་བྱུང་བའི་དུས་སུ་ཡང་མཛོད་ལས་དེ་ལྟར་ཐུབ་པ་དག་གི་བསྟན་པ་ནི།  ལྐོག་མར་སྲོག་ཕྱིན་འདྲ་དང་ཞེས་ཉམས་པར་བཤད་ན་དེང་སང་སྐྱོན་མེད་ཉམས་པ་སྨོས་ཅི་དགོས་
ཟེར་བ་ནི་མི་འཐད་དེ།  དེའི་དུས་སུ་འབྲས་བུའི་དུས་ཡིན་པའི་ཕྱིར་རོ། །དེས་ན་སྒྲུབ་པའི་དུས་ཉམས་ནས་ཉམས་སུ་ལེན་པའི་ཆེད་དུ་སེམས་བསྐྱེད་ཀྱི་ཆོ་ག་མི་བསྟེན་པ་ལ་དགོངས་སོ། །ཐེག་པ་ཆེན་པོའི་སེམས་བསྐྱེད་ལ་དབུ་མ་ལུགས་དང་སེམས་ཙམ་ལུགས་རྣམ་པ་གཉིས་ཡོད་ཅིང་།  དེ་གཉིས་ཀ་
ཡང་བླ་མེད་བྱང་ཆུབ་ཏུ་སེམས་བསྐྱེད་པ་ཁོ་ན་ཡིན་གྱི།  བྱང་ཆུབ་གསུམ་དུ་སེམས་བསྐྱེད་པའི་ཚུལ་ནི་མེད་དོ། །དེ་གཉིས་ལ།  མ་ཐོབ་པ་ཐོབ་པར་བྱེད་པའི་ཆོ་ག་ཡང་ཐ་དད་དུ་ཡོད་དེ།  སྦྱོར་བའི་སྐབས་སུ་དབུ་མ་པ་རྣམས་ཀྱིས་ཡན་ལག་བདུན་པ་ཚང་བར་མཛད།  སེམས་ཙམ་པ་རྣམས་ཀྱིས་
9-2-69a


ཕྱག་འཚལ་བ་དང་།  མཆོད་པ་འབུལ་བ་གཅིག་ཙམ་མཛད།  གཞན་ཡང་དབུ་མ་པས་བར་ཆད་དྲི་བ་མི་མཛད།  སེམས་ཙམ་པས་བར་ཆད་དྲི་བ་མཛད།  དངོས་གཞིའི་སྐབས་སུ་དབུ་མ་པས་སྨོན་འཇུག་གཉིས་པོ་སྟབས་གཅིག་ཏུ་སློབ་དཔོན་གྱི་རྗེས་ཟློས་ལན་གསུམ་བྱས་
པའི་ཚུལ་གྱིས་ལེན།  སེམས་ཙམ་པས་ཐོག་མར་སྨོན་པ་སེམས་བསྐྱེད་ལེན།  དེ་ནས་བྱང་ཆུབ་སེམས་དཔའི་སྡེ་སྣོད་བསླབས་ནས་བསླབ་བྱ་རྣམས་ཉམས་འོག་ཏུ་ཚུད་པར་བྱས་ཏེ།  དེའི་རྗེས་སུ་འཇུག་པ་སེམས་བསྐྱེད་ལེན།  ཆོ་གའི་ཚིག་ཀྱང་སློབ་དཔོན་གྱིས་བརྗོད་པ་སློབ་མས་ཉན་པ་ཡིན་གྱི་
རྗེས་ཟློས་མི་བྱེད།  མཇུག་གི་ཆོ་ག་ལ་དབུ་མ་པས་རང་དགའ་བ་བསྒོམ་པ་དང་།  གཞན་དགའ་བ་བསྒོམ་དུ་གཞུག་པ་གཉིས་མཛད།  སེམས་ཙམ་པས་མཁྱེན་པར་གསོལ་བ་མཛད་པའི་ཕྱིར་རོ། །རྩ་བའི་ལྟུང་བ་ཡང་ཐ་དད་དུ་ཡོད་དེ།  དབུ་མ་པས་ནམ་མཁའི་སྙིང་པོའི་མདོ་ལས་འབྱུང་བ་ལྟར།  རྩ་
ལྟུང་བཅུ་བཞི་དང་།  སེམས་ཙམ་པས་སྡོམ་པ་ཉི་ཤུ་པ་ལྟར་རྩ་ལྟུང་བཞི་གསུངས་པའི་ཕྱིར་རོ། །ཕྱིར་བཅོས་ཀྱི་ཚུལ་ཡང་སོ་སོར་ཡོད་དེ།  དབུ་མ་པས་སྐྱ་རེངས་ལ་གསོལ་བ་བཏབ་ནས་ནམ་མཁའི་སྙིང་པོ་རྨི་ལམ་དུ་བྱུང་བ་ལ་རྩ་བའི་ལྟུང་བ་བཤགས།  སེམས་ཙམ་པས་སྡོམ་པ་ཉི་ཤུ་པར།  སྡོམ་པ་
སླར་ཡང་བླང་བར་བྱ། །ཟག་པ་འབྲིང་ནི་གསུམ་ལ་བཤགས། །གཅིག་གི་མདུན་དུ་ལྷག་མ་རྣམས། །ཉོན་མོངས་མི་མོངས་བདག་སེམས་བཞིན། །ཞེས་བཤད་པ་ལྟར་མཛད་པའི་ཕྱིར་རོ། །བསླབ་པ་བྱ་བའང་སོ་སོར་ཡོད་དེ།  དབུ་མ་པས་སྤྱོད་འཇུག་ལས།  རྐང་པ་རྐྱོང་སྟེ་མི་འདུག་ཅིང་། །ཅེས་
སོགས་བཤད་ལ།  སེམས་ཙམ་པས་སྡོམ་པ་ཉི་ཤུ་པ་ལྟར།  ཉེས་བྱས་བཞི་བཅུ་ཞེ་གཉིས༷་བཤད་པའི་ཕྱིར་རོ། །དེ་ལྟར་ཆོ་ག་ནས་བསླབ་བྱའི་བར་ཐ་དད་པ་དེ་ཡང་།  དབུ་སེམས་གཉིས་པོ་ལྟ་བ་མཐོ་དམན་ཐ་དད་པས་ལྟ་བ་དེ་དང་འཚམས་པའི་སེམས་བསྐྱེད་ཀྱི་ལུགས་གཉིས་རྫོགས་པའི་སངས་
9-2-69b


རྒྱས་ཀྱིས་གསུངས་པ་ཡིན་གྱི།  རྗེས་འཇུག་གི་གདུལ་བྱས་གཉིས་ཀ་ཉམས་སུ་ལེན་པ་ལ་འགལ་བ་མེད་དེ།  དཔེར་ན་ཉན་ཐོས་ལ་སོ་སོར་ཐར་པ་རིས་བདུན་དང་།  ཐེག་པ་ཆེན་པོ་ལ་སེམས་བསྐྱེད་ཀྱི་སྡོམ་པ་མ་ཐོབ་པ་ཐོབ་པར་བྱེད་པའི་ཆོ་ག་སོགས་སོ་སོར་གསུངས་ཀྱང་།  གང་ཟག་གཅིག་གིས་
གཉིས་ཀ་ཉམས་སུ་ལེན་པ་ལ་འགལ་བ་མེད་པ་བཞིན་ནོ། །འདིར་ནི་གཞུང་གི་འབྲུ་གནོན་པ་ཙམ་ཞིག་བྲིས་པ་ཡིན་ལ།  འདི་གཉིས་ཀྱི་རྣམ་དབྱེ་ཞིབ་པར་ཁོ་བོའི་སྤྱི་དོན་དུ་ལྟ་བར་བྱ་ཞིང་།  ཆོ་ག་ནི་དབུ་མ་ལུགས་ཆོས་རྗེ་པའི་སེམས་བསྐྱེད་ཀྱི་ཆོ་ག་དང་།  སེམས་ཙམ་ལུགས་རྗེ་བཙུན་ཆེན་པོའི་སྡོམ་
པ་ཉི་ཤུ་པའི་ཊཱི་ཀར་བལྟ་བར་བྱའོ།  །གཉིས་པ་ལ་གསུམ་སྟེ།  མ་ཐོབ་པ་ཐོབ་པར་བྱེད་པའི་ཆོ་ག །ཐོབ་པ་མི་ཉམས་པར་བསྲུང་བའི་བསླབ་བྱ།  དེ་དག་དང་འབྲེལ་བའི་ཐབས་ལམ་རྣམ་དག་ཏུ་བསྒྲུབ་པའོ། །དང་པོ་ལ་གཉིས་ཏེ།  ཀུན་རྫོབ་སེམས་བསྐྱེད་སྐྱེ་བའི་ཆོ་ག་བཤད།  དོན་དམ་
སེམས་བསྐྱེད་ཆོ་གས་སྐྱེ་བ་དགག་པའོ། །དང་པོ་ལ་བཞི་སྟེ།  ལུགས་གཉིས་རྟེན་གྱི་ཁྱད་པར་ལུང་གིས་བསྒྲུབ།  དེ་ཉིད་དཔེ་ཡི་སྒོ་ནས་གསལ་བར་བཤད། །ལུང་གི་དོན་ལ་ལོག་པར་རྟོག་པ་དགག །ལུགས་གཉིས་ཆོ་གའི་ཁྱད་པར་སོ་སོར་བཤད་པའོ། །དང་པོ་ལ་གཉིས་ཏེ།  སེམས་
ཙམ་ལུགས་ཀྱི་སེམས་བསྐྱེད་སྐྱེ་བའི་ཡུལ་ངེས་པར་བསྟན།  དབུ་མ་ལུགས་ཀྱི་སེམས་བསྐྱེད་ཀུན་ལ་སྐྱེ་བར་བསྟན་པའོ། །དང་པོ་ལ་གསུམ་སྟེ།  དངོས་ཀྱི་དོན།  དེ་ལ་ལོག་པར་རྟོག་པའི་ཚུལ་བརྗོད་པ།  དེ་ཉིད་ལུང་དང་རིགས་པས་དགག་པའོ། །དང་པོ་ནི།  སེམས་ཙམ་པ་ཡི་ཞེས་སོགས་ཚིགས་
བཅད་གཅིག་གོ།  །གཉིས་པ་ནི་ལ་ལ་སྐྱེ་བོ་ཞེས་སོགས་གསུམ་སྟེ།  དགེ་བཤེས་ཕྱག་སོར་བ་ལ་སོགས་པའི་སྐྱེ་བོ་འགའ་ཞིག་གི་རྨི་ལམ་དུ་བྱམས་པ་མགོན་པོ་ཁྲི་མཐོན་པོ་ལ་བཞུགས་ནས་ཁྲོམ་ཆེན་པོ་ལ་སེམས་བསྐྱེད་མཛད་པར་རྨིས་པའི་རྗེས་སུ་འབྲངས་ནས།  སོ་ཐར་གྱི་སྡོམ་པ་ཐོབ་པ་དང་མ་ཐོབ་པའི་སེམས་
9-2-70a


ཅན་ཀུན་ལ་སེམས་ཙམ་ལུགས་ཀྱི་སེམས་བསྐྱེད་འབོགས་པར་བྱེད་དོ། །གསུམ་པ་ནི།  རྨི་ལམ་བདུད་ཀྱིས་ཞེས་སོགས་ཚིགས་བཅད་བཞི་སྟེ།  རྨི་ལམ་གྱི་རྗེས་སུ་འབྲངས་ནས་སྐྱེ་བོ་ཀུན་ལ་སེམས་ཙམ་ལུགས་ཀྱི་སེམས་བསྐྱེད་བྱེད་པའི་ལུགས་དེ་སངས་རྒྱས་ཀྱི་བསྟན་པ་མ་ཡིན་ཏེ།  རྨི་ལམ་བདུད་ཀྱིས་
མིན་ན་དེ་ལྟར་རུང་ཡང་།  སངས་རྒྱས་ཀྱི་གསུང་དང་མི་མཐུན་པའི་ཐབས་ལམ་སྟོན་པའི་རྨི་ལམ་བདུད་ཀྱི་བྱིན་བརླབས་ཡིན་པའི་ཕྱིར་དང་།  བྱང་སའི་ཚུལ་ཁྲིམས་ལེའུར། རིགས་ཀྱི་བུ་ཁྱོད་བྱང་ཆུབ་སེམས་དཔའ་ཡིན་ནམ།  བྱང་ཆུབ་ཏུ་སྨོན་ལམ་བཏབ་བམ་ཞེས་དང་།  མར་མེ་མཛད་
ཀྱིས།  སོ་སོར་ཐར་པ་རིས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་བ་ཡོད་ཀྱི་གཞན་དུ་མིན། །ཞེས་བྱང་ཆུབ་སེམས་དཔའི་སྡེ་སྣོད་མི་ཤེས་པ་དང་།  སོ་ཐར་གྱི་སྡོམ་པ་མེད་པ་ལ་སེམས་ཙམ་ལུགས་ཀྱི་སེམས་བསྐྱེད་བཀག་པའི་ཕྱིར་དང་།  ཆོ་ག་
ལས་ཀྱང་དེ་ལྟར་དུ་གསལ་བའི་ཕྱིར།  དེ་ལ་བཀའ་གདམས་པ་ཁ་ཅིག །སེམས་ཙམ་ལུགས་ཀྱི་སེམས་བསྐྱེད་བྱེད་པ་ལ།  བྱང་ཆུབ་སེམས་དཔའི་སྡེ་སྣོད་ཤེས་པ་དང་།  སོ་ཐར་གྱི་སྡོམ་པས་བསྡམས་པ་དགོས་ཀྱང་།  སྐྱེ་བོ་ཀུན་ལ་བྱེད་པ་མི་འགལ་ཏེ།  བླུན་པོ་སྡིག་པ་ཅན་ཡིན་ཡང་།  སེམས་
ཙམ་ལུགས་ཀྱི་སེམས་བསྐྱེད་ཀྱི་གྲལ་དེར་ཚོགས་པ་ཐམས་ཅད་ནི་སོ་སོ་ཐར་པའི་སོགས་སོ། ༟ །གཉིས་པ་ནི།  དབུ་མའི་ལུགས་ཀྱི་ཞེས་སོགས་བཅུ་གཅིག་སྟེ།  དབུ་མ་ལུགས་ཀྱི་སེམས་བསྐྱེད་འདི་བརྡ་ཕྲད་ཅིང་ལེན་འདོད་ཡོད་པའི་སེམས་ཅན་ཀུན་གྱིས་ལེགས་པར་ཐོབ་ན་རྫོགས་པའི་
སངས་རྒྱས་ཀྱི་རྒྱུར་འགྱུར་ཞེས་མདོ་དང་བསྟན་བཅོས་རྣམས་ལས་གསུངས་ཏེ།  དེ་ཡང་སྡོང་པོ་བཀོད་པའི་མདོ་ལས།  འཕགས་པ་འཇམ་དཔལ་གྱིས།  གྲོང་ཁྱེར་སྐྱིད་པའི་འབྱུང་གནས་ཀྱི་ཤར་ཕྱོགས་ནགས་ཚལ་སཱ་ལ་སྣ་ཚོགས་ཀྱི་རྒྱལ་མཚན་ཞེས་བྱ་བར།  ཆོས་ཀྱི་དབྱིངས་ཀྱི་ཚུལ་སྣང་བ་ཞེས་
9-2-70b


བྱ་བའི་ཆོས་ཀྱི་རྣམ་གྲངས་བསྟན་པས།  རྒྱ་མཚོའི་ཀླུ་སྟོང་ཕྲག་བཅུ་བླ་ན་མེད་པའི་བྱང་ཆུབ་ཏུ་ངེས་པར་གྱུར་ཏོ། །ཞེས་པ་དང་།  བསྐལ་པ་བཟང་པོ་ལས།  རྒྱལ་བ་ཕན་བཞེད་གྲོང་དཔོན་གྱུར་པའི་ཚེ། །དེ་བཞིན་གཤེགས་པ་བསོད་ནམས་འོད་དེ་ལ། །ཉིན་གཅིག་སྲོག་གཅོད་སྡོམ་པ་བླངས་
ནས་ཀྱང་། །དང་པོ་བྱང་ཆུབ་མཆོག་ཏུ་སེམས་བསྐྱེད་དོ། །ཞེས་པ་དང་།  ནམ་མཁའི་སྙིང་པོའི་མདོ་ལས།  བྱང་ཆུབ་སེམས་དཔའ་རྒྱལ་པོ་ལ་ལྔ་དང་།  བློན་པོ་ལ་ལྔ་དང་།  ལས་དང་པོ་པ་ལ་བརྒྱད་དེ།  རང་སར་འབྱུང་ཉེ་བས་རྟེན་གྱི་སྒོ་ནས་དབྱེ་བ་བཅོ་བརྒྱད་གསུངས་པ་དང་།  དཀོན་
མཆོག་བརྩེགས་པའི་གཙུག་ན་རིན་པོ་ཆེས་ཞུས་པའི་མདོ་ལས།  ཤེས་རབ་ཀྱི་ཕ་རོལ་ཏུ་ཕྱིན་པའི་སྤྱོད་པ་ཡོངས་སུ་དག་པ་འདི་བསྟན་པ་ན།  འཁོར་དེའི་ནང་ནས་ལྷ་དང་།  མིའི་སྲོག་ཆགས་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཞེས་པ་དང་། 
རྒྱལ་པོ་ལ་གདམས་པའི་མདོ་ལས།  རྒྱལ་པོ་ཆེན་པོ་འདི་ལྟར་ཁྱོད་ནི་བྱ་བ་མང་བ་བྱེད་པ་མང་བ་སྟེ།  ཞེས་པ་ནས་ཁྱོད་རྫོགས་པའི་བྱང་ཆུབ་འདོད་པ་དང་།  དད་པ་དང་།  དོན་དུ་གཉེར་བ་དང་།  སྨོན་པས་འགྲོ་ཡང་རུང་ཞེས་པ་ནས།  རྒྱལ་པོའི་བྱ་བ་ཡང་ཉམས་པར་མི་འགྱུར་ཅིང་།  བྱང་ཆུབ་
ཀྱི་ཚོགས་ཀྱང་ཡོངས་སུ་རྫོགས་པར་འགྱུར་རོ། །ཞེས་པ་དང་།  ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས།  ཀླུ་ཁྲི་ཉིས་སྟོང་གིས་བྱང་ཆུབ་ཏུ་སེམས་བསྐྱེད་ཅེས་པ་དང་།  འཕགས་པ་སྤྱན་རས་གཟིགས་དབང་ཕྱུག་གིས་ངན་སོང་གི་གནས་རྣམས་སུ་བྱོན་ཏེ།  ངན་སོང་བ་དེ་དག་
བདེན་པ་མཐོང་བ་ལ་བཀོད་ཅེས་སོགས་རྒྱ་ཆེར་གསུངས་སོ། །བསྟན་བཅོས་ལས་གསུངས་ཚུལ་ནི།  འཕགས་པ་ཀླུ་སྒྲུབ་ཀྱིས་རིན་ཆེན་ཕྲེང་བར།  སེམས་ཅན་ཐམས་ཅད་བྱང་ཆུབ་ཏུ། །སེམས་བསྐྱེད་བཅུག་ཅིང་བརྟན་བྱས་ནས། །རི་དབང་རྒྱལ་པོ་ལྟར་བརྟན་པའི། །བྱང་ཆུབ་སེམས་
9-2-71a


དང་རྟག་ལྡན་འགྱུར། །ཞེས་པ་དང་།  ཞི་བ་ལྷས།  བསླབ་བཏུས་སུ།  དཔའ་བར་འགྲོ་བའི་མདོ་དྲངས་ཏེ།  གཡོ་སྒྱུས་སེམས་བསྐྱེད་པ་ཡང་།  སངས་རྒྱས་ཀྱི་རྒྱུར་གསུངས་ན་དགེ་བ་སྣ་འགའ་བྱས་ཏེ།  སེམས་ཅན་སེམས་བསྐྱེད་པ་ལྟ་ཅི་སྨོས།  ཞེས་གསུངས་
སོ། །གཉིས་པ་ནི།  ཇི་ལྟར་འབྲས་ཀྱི་ཞེས་སོགས་ཚིགས་བཅད་གཉིས་སོ། །གསུམ་པ་ནི།  གལ་ཏེ་མདོ་ལས་ཞེས་སོགས་བཅུ་གཅིག་སྟེ།  སྔར་དྲངས་པའི་མདོ་དང་།  བསྟན་བཅོས་རྣམས་ལས།  སེམས་ཅན་ཐམས་ཅད་ལ་སེམས་བསྐྱེད་སྐྱེ་བར་བཤད་པའི་གཞུང་དེ་སེམས་
ཙམ་པའི་ལུགས་ཀྱི་ཡང་སེམས་བསྐྱེད་སྐྱེ་བར་ཅི་འགལ་སྙམ་ན།  དེ་ནི་འཁྲུལ་པ་ཡིན་ཏེ།  སེམས་ཙམ་ལུགས་ཀྱི་སེམས་བསྐྱེད་སྐྱེ་བ་ལ་སོ་ཐར་རིས་བདུན་གང་རུང་དང་ལྡན་པ་ཅིག་དགོས་ཤིང་།  རྒྱལ་བ་ཕན་བཞེད་ཉིན་གཅིག་གི་སྲོག་གཅོད་སྡོམ་པ་བླངས་པ་ལ།  བྱང་ཆུབ་སེམས་
བསྐྱེད་མཛད་པར་བསྐལ་བཟང་ལས་གསུངས་ལ།  ཉིན་གཅིག་གི་སྲོག་གཅོད་སྡོམ་པ་བླངས་པ་དེ་ནི་སོ་སོ་ཐར་པ་རིས་བདུན་གང་ཡང་མ་ཡིན་པའི་ཕྱིར་རོ། །དེ་ལ་སོགས་པ་རིས་བདུན་གྱི་རྟེན་དུ་མི་རུང་བའི་ལྷ་དང་ཀླུ་ལ་སོགས་པ་ལ།  སེམས་བསྐྱེད་མཛད་པའི་འཐད་པ་རྣམས་དབུ་མའི་
ལུགས་ལ་སོགས་སོ། །བཞི་པ་ནི།  དེས་ན་སེམས་ཙམ་ཞེས་སོགས་བཅུ་སྟེ།  སེམས་ཙམ་ལུགས་ཀྱི་སེམས་བསྐྱེད་སྐྱེ་བའི་ཡུལ་ངེས་པ་དེས་ན།  སེམས་བསྐྱེད་དེ་ལེན་པར་འདོད་ན་ཐོག་མར་སོ་སོ་ཐར་པ་རིས་བདུན་གང་ཡང་རུང་བ་ལོངས།  དེ་ནས་བྱང་ཆུབ་སེམས་དཔའི་སྡེ་སྣོད་བྱང་ས་
ལྟ་བུར་སློབས།  དེའི་བསླབ་བྱ་ལ་དད་ཅིང་བསྒྲུབ་པར་ནུས་པར་གྱུར་ན།  ཕྱིས་ནས་འཇུག་པ་སེམས་བསྐྱེད་ཀྱི་སྡོམ་པ་ལོངས་ཏེ།  བྱང་སའི་ཚུལ་ཁྲིམས་ལེའུ་དང་།  གནས་བརྟན་བྱང་བཟང་སོགས་ཀྱིས་ལེན་ཚུལ་གྱི་རིམ་པ་དེ་ལྟར་དུ་བཤད་པའི་ཕྱིར་རོ། །ཅི་སྟེ་སེམས་ཅན་ཐམས་ཅད་ལ་
9-2-71b


སངས་རྒྱས་ཀྱི་ས་བོན་ཐེག་ཆེན་སེམས་བསྐྱེད་འཇོག་པར་འདོད་ན།  སྦྱོར་དངོས་རྗེས་གསུམ་གྱི་ཆོ་ག་འཁྲུལ་པ་མེད་པའི་སྒོ་ནས།  དབུ་མ་པའི་གཞུང་སྤྱོད་འཇུག་དང་།  ཡི་དམ་བླང་བའི་ཆོ་ག་བཞིན་དུ་གྱིས་ཏེ།  བརྡ་ཕྲད་ཅིང་ལེན་འདོད་ཡོད་པའི་སེམས་ཅན་ཀུན་ལ་སྐྱེ་བའི་ཕྱིར་རོ། །
གཉིས་པ་དོན་དམ་སེམས་བསྐྱེད་ཆོ་གས་སྐྱེ་བ་དགག་པ་ལ་གསུམ་སྟེ།  མདོར་བསྟན།  རྒྱས་པར་བཤད།  དོན་བསྡུ་བའོ། །དང་པོ་ནི།  དོན་དམ་སེམས་བསྐྱེད་ཞེས་སོགས་གསུམ་སྟེ།  ཕ་རོལ་ཏུ་ཕྱིན་པའི་གཞུང་ལས་བཤད་པའི་དོན་དམ་སེམས་བསྐྱེད་ཞེས་བྱ་བ་ནི།  ཚོགས་
སྦྱོར་གྱི་གནས་སྐབས་སུ་བསོད་ནམས་དང་ཡེ་ཤེས་ཀྱི་ཚོགས་བསྐལ་པ་གྲངས་མེད་གཅིག་ཏུ་བསྒོམས་པའི་སྟོབས་ཀྱིས།  ས་དང་པོར་རྣམ་པར་མི་རྟོག་པའི་ཡེ་ཤེས་རང་གི་ངང་གིས་སྐྱེ་བ་ལ་འཇོག་པ་ཡིན་ཏེ།  མདོ་སྡེ་རྒྱན་ལས།  རྫོགས་པའི་སངས་རྒྱས་རབ་མཉེས་བྱས། །བསོད་
ནམས་ཡེ་ཤེས་ཚོགས་རབ་བསགས། །ཆོས་ལ་མི་རྟོག་ཡེ་ཤེས་ནི། །སྐྱེས་ཕྱིར་དེ་ནི་དམ་པར་འདོད། །ཅེས་གསུངས་པའི་ཕྱིར་རོ། །དེ་ལྟ་མོད་ཀྱི་ཆོ་གའི་སྒོ་ནས་འདི་མི་སྐྱེ་སྟེ།  འོག་ནས་འཆད་པའི་ལུང་རིགས་ཀྱིས་གནོད་པའི་ཕྱིར་རོ། །གཉིས་པ་ལ་བཞི་སྟེ།  ཆོ་གས་སྐྱེ་བ་ལ་
གནོད་བྱེད་བསྟན།  ཆོ་གས་སྐྱེ་བའི་སྒྲུབ་བྱེད་མེད།  ཆོ་གས་མི་སྐྱེ་བ་དཔེའི་སྒོ་ནས་བསྒྲུབ།  དེ་ལ་ལུང་དང་འགལ་བ་སྤང་བའོ། །དང་པོ་ནི།  གལ་ཏེ་ཆོ་གས་ཞེས་སོགས་ཚིགས་བཅད་གཅིག་སྟེ།  དོན་དམ་སེམས་བསྐྱེད་ཆོ་གས་སྐྱེ་ན་དེ་བརྡ་ལས་བྱུང་བའི་སེམས་བསྐྱེད་དུ་འགྱུར་
ཅིང་།  འདོད་ན་མི་འཐད་དེ།  དོན་དམ་སེམས་བསྐྱེད་ཉིད་ནི།  དོན་དམ་ཆོས་ཉིད་ཀྱིས་ཐོབ་པའི་སེམས་བསྐྱེད་ཡིན་པའི་ཕྱིར་རོ། །གཉིས་པ་ནི་འདི་ལ་སྦྱོར་དངོས་ཞེས་སོགས་དྲུག་གོ།  གསུམ་པ་ནི།  དཔེར་ན་ཆུ་ལུད་ཞེས་སོགས་ཚིགས་བཅད་གསུམ་སྟེ།  དཔེར་ན་ཆུ་ལུད་དང་ས་
9-2-72a


བོན་འདེབས་པ་སོགས་སོ་ནམ་ཞིང་པས་དངོས་སུ་བྱར་ནུས་པ་དེ་བཞིན།  ཀུན་རྫོབ་བྱང་ཆུབ་ཀྱི་སེམས་ཀྱང་ཆོ་གའི་སྒོ་ནས་དངོས་སུ་བསྐྱེད་ནུས་ཀྱི།  མྱུ་གུ་དང་།  སྡོང་བུ་དང་།  སྙེ་མ་སོགས་ཞིང་ལས་དངོས་སུ་འབྱུང་གི་མི་ལས་དངོས་སུ་མི་འབྱུང་བ་དེ་བཞིན་དུ། 
དོན་དམ་བྱང་ཆུབ་ཀྱི་སེམས་དང་།  ཟག་པ་མེད་པའི་སྡོམ་པ་དང་།  བསམ་གཏན་གྱི་སྡོམ་པ་སོགས་བསྒོམས་པའི་སྟོབས་ཀྱིས་ངང་གིས་སྐྱེ་ཡི།  ཆོ་གའི་སྒོ་ནས་མ་ཡིན་ཏེ།  ཚུལ་འདི་དག་འཐད་པ་དང་བཅས་པ་མདོ་དང་བསྟན་བཅོས་ཀུན་ནས་འབྱུང་བའི་ཕྱིར་རོ། །དེ་ཡང་ཀ་མ་
ལ་ཤཱི་ལའི་བསྒོམ་རིམ་དུ་དགོངས་པ་ངེས་འགྲེལ་གྱི་མདོ་དྲངས་པ་ལས།  དོན་དམ་པའི་བྱང་ཆུབ་ཀྱི་སེམས་དེ་ནི་འཇིག་རྟེན་ལས་འདས་པ།  སྤྲོས་པ་མཐའ་དག་དང་བྲལ་བ་ཤིན་ཏུ་གསལ་བ།  དོན་དམ་པའི་སྤྱོད་ཡུལ་དྲི་མ་མེད་པ།  མི་གཡོ་བ་རླུང་མེད་པའི་མར་མེའི་རྒྱུན་
བཞིན་དུ་མི་གཡོ་བའོ། །དེ་འགྲུབ་པ་ནི་རྟག་ཏུ་གུས་པས་ཞི་གནས་དང་ལྷག་མཐོང་གི་རྣལ་འབྱོར་གོམས་པ་ལས་འགྱུར་རོ། །ཞེས་གསུངས་སོ། །བཞི་པ་ནི་དོན་དམ་སེམས་བསྐྱེད་སོགས་བཅུ་གཅིག་སྟེ།  རྣམ་སྣང་མངོན་བྱང་ལས།  ཡན་ལག་བདུན་པའི་སྐབས་སུ་དོན་དམ་
སེམས་བསྐྱེད་ཀྱི་ཚིག་ལན་གསུམ་གསུངས་པ་ལྟ་བུ་དང་།  སྤང་སྐོང་ཕྱག་བརྒྱ་པ་ལས།  དོན་དམ་པའི་བྱང་ཆུབ་ཀྱི་མཆོག་ཏུ་སེམས་བསྐྱེད་པར་བྱའོ། །ཞེས་གསུངས་པ་སྲིད་ན་ཡང་།  དེ་ནི་དམ་བཅའ་ཙམ་ཡིན་གྱི་ཆོ་གའི་སྒོ་ནས་བསྐྱེད་པ་མ་ཡིན་ཏེ།  དཔེར་ན་སྦྱིན་པ་སོགས་སོ། །
དེ་དག་ཀྱང་ཆོ་ག་ཡིན་ན།  གནས་ག་གེ་མོ་ཞིག་ཏུ་འགྲོ་བར་བྱའོ། །ཞེས་སོགས་ཀྱང་ཆོ་གར་ཧ་ཅང་ཐལ་བར་འགྱུར་ཅིང་།  ཆོ་ག་ཡང་ཐུག་མེད་དུ་འགྱུར་རོ། །གསུམ་པ་ནི།  ཀྱེ་མ་འཇིག་རྟེན་ཞེས་སོགས་ཚིགས་བཅད་གཅིག་སྟེ།  འཇིག་རྟེན་བླུན་པོ་འདིས་རྒྱལ་བས་གསུངས་པའི་
9-2-72b


སྡོམ་གསུམ་གྱི་ཆོ་ག་རྣམ་པར་དག་པ་ཀུན་བོར་ནས།  མ་གསུངས་པའི་དོན་དམ་སེམས་བསྐྱེད་ལ་ཆོ་ག་ནན་གྱིས་འཚང་པ་འདི་འདྲ་བདེ་འགྲོ་དང་ངན་འགྲོ་ཅིར་འགྱུར་བརྟག་དགོས་སོ། །གཉིས་པ་ཐོབ་པ་མི་ཉམས་པར་བསྲུང་བའི་བསླབ་བྱ་ལ་གཉིས་ཏེ།  ལྟུང་བའི་རྣམ་བཞག་མུ་བཞི་བསྟན་པ། 
བསླབ་བྱའི་གཙོ་བོ་ལ་ལོག་རྟོག་དགག་པའོ། །དང་པོ་གཉིས་ཏེ།  མུ་བཞིར་དབྱེ་བ།  བཞིར་འགྱུར་བའི་འཐད་པའོ། །དང་པོ་ནི།  དེ་ལྟར་སེམས་ཙམ་ཞེས་སོགས་བཅོ་ལྔ་སྟེ།  སྔར་བཤད་པ་དེ་ལྟར་སེམས་ཙམ་དབུ་མ་གཉིས་ལེན་པའི་ཆོ་ག་སོགས་ཀྱི་རྣམ་བཞག་ཐ་དད་དུ་ཡོད་མོད་ཀྱི།  འོན་
ཀྱང་ཐེག་ཆེན་དབུ་སེམས་ཀུན་མཐུན་པར་ལྟུང་བའི་རྣམ་གཞག་མུ་བཞི་གསུངས་ཏེ།  ལྟུང་མེད་དང་།  ལྟུང་བ་དང་།  ལྟུང་བའི་གཟུགས་བརྙན་དང་།  ལྟུང་བ་མེད་པའི་གཟུགས་བརྙན་རྣམ་བཞིར་གསུངས་པའི་ཕྱིར་རོ། །བཞི་པོ་གང་ཞེ་ན་བསམ་པ་དག་པའི་སོགས་སོ། །གཉིས་པ་ནི་མདོར་ན་སེམས་
ཀྱི་ཞེས་སོགས་དགུ་སྟེ།  ཀུན་སློང་དང་ལུས་ངག་གི་སྦྱོར་བ་གཉིས་ཀ་གནག་པ་ལྟུང་བ་དང་།  དཀར་བ་ལྟུང་མེད་དང་།  ཀུན་སློང་དཀར་ན་སྦྱོར་བ་གནག་ཀྱང་ལྟུང་བའི་གཟུགས་བརྙན་ཡིན་གྱི་དོན་ལ་ལྟུང་མེད་ཡིན་པ་དང་།  ཀུན་སློང་གནག་ན་སྦྱོར་བ་དཀར་ཡང་ལྟུང་བ་མེད་པའི་གཟུགས་
བརྙན་ཡིན་གྱི།  དོན་ལ་ལྟུང་བ་ཡིན་པའི་རྒྱུ་མཚན་མདོར་བསྡུ་ན་སེམས་ཀྱི་འཕེན་པ་ལས་གཞན་པའི་ཐེག་པ་ཆེན་པོའི་དགེ་སྡིག་ཡོད་པ་མ་ཡིན་པའི་ཕྱིར་ཏེ།  འཕགས་པ་ལྷའི་བཞི་བརྒྱ་པར།  བསམ་པའི་སྒོ་ནས་བྱང་ཆུབ་སེམས་དཔའི་ལུས་ངག་གི་དགེ་བའམ།  མི་དགེ་བར་སྣང་བ་
ཐམས་ཅད་དགེ་བ་ཉིད་དུ་འགྱུར་ཏེ།  གང་གི་ཕྱིར་ན་བྱང་ཆུབ་སེམས་དཔའི་དགེ་སྡིག་ལ་སེམས་དེ་གཙོ་བའི་ཕྱིར་ཞེས་གསུངས་པ་དང་།  མདོ་རྒྱུད་བསྟན་བཅོས་གཞན་རྣམས་ལས་ཀྱང་དགེ་སྡིག་གི་རྣམ་གཞག་སེམས་ལ་རག་ལས་པ་དེ་ལྟར་གསུངས་ཏེ།  དཀོན་མཆོག་སྤྲིན་ལས།  དགེ་
9-2-73a


བའམ་འོན་ཏེ་མི་དགེ་བའི། །ལས་ནི་སེམས་ཀྱིས་བསགས་པ་ཡིན། །ཞེས་དང་།  ཆོས་ཡང་དག་པར་སྡུད་པ་ལས།  ཆོས་ཐམས་ཅད་སེམས་ལ་རག་ལས་པ་ཡིན་ནོ། །ཞེས་པ་དང་། སློབ་དཔོན་ནག་པོ་པས།  དགྲ་ནག་གི་འགྲེལ་པར་རྒྱུད་ཀྱི་ལུང་དྲངས་པ་
ལས།  མཆོག་གསུམ་ཡོན་ཏན་རིག་པར་འགྱུར། །བདུད་རྩི་ཡིད་འོང་འཁོར་བས་བརྒལ། །འབྲས་བུ་ངེས་པར་ལེགས་པར་ཐོབ། །དེ་ཕྱིར་དམ་པའི་ཞལ་ལས་ནི། །གསུངས་པའི་བྱ་བ་སྡིག་ཀྱང་བྱ། །དམ་པའི་ཞལ་ལས་མ་གསུངས་པའི། །དགེ་བའང་མཁས་པས་སྤང་བར་བྱ། །
ཞེས་གསུངས་པ་དང་།  སེམས་ཀྱི་སྒྲིབ་སྦྱོང་ལས་ཀྱང་།  དགེ་སློང་རང་གི་ཕ་རྒན་ལ། །མྱུར་འདོང་ཞེས་ནི་བསྐུལ་གྱུར་ནས། །འཕུལ་བས་དེ་ནི་ཤི་གྱུར་ཀྱང་། །མཚམས་མེད་སྦྱོར་བ་མ་ཡིན་ནོ། །བསམ་པ་བཟང་པོས་མཆིལ་ལྷྭམ་གཉིས། །ཐུབ་པའི་དབུ་ལ་བཞག་པ་དང་། །དེ་ནི་
གཞན་གྱིས་བསལ་བྱས་པ། །གཉིས་ཀས་རྒྱལ་སྲིད་ཐོབ་པར་འགྱུར། །དེ་ཕྱིར་བསམ་པའི་རྩ་བ་ལ། །བསོད་ནམས་སྡིག་པ་རྣམ་པར་གནས། །ཞེས་དང་།  མཁས་མཆོག་དབྱིག་གཉེན་གྱིས་ཀྱང་།  ལས་གྲུབ་པར།  ལུས་ངག་གི་ལས་རྣམ་པ་རིག་བྱེད་དང་།  རིག་བྱེད་
མ་ཡིན་པ་གཟུགས་ཅན་ནི་དགེ་བ་དང་།  མི་དགེ་བ་མཚན་ཉིད་པ་མ་ཡིན་ཏེ།  ལུས་བོར་ནས་ཚེ་ཕྱི་མ་ལ་འབྲས་བུ་ཡིད་དུ་འོང་བ་དང་།  མི་འོང་བ་འགྲུབ་པ་དེ་དགེ་བ་དང་མི་དགེ་བ་ཡིན་པར་འཆད་པའི་ཕྱིར་རོ། །ལས་ནི་སེམས་པའི་ཁྱད་པར་ཡིན་ནོ་ཞེས་སོགས་སོ། །གཉིས་པ་ལ་
གསུམ་སྟེ།  བསླབ་བྱའི་གཙོ་བོ་འགོག་པའི་ལོག་རྟོག་བརྗོད།  དེ་ཉིད་རིགས་པས་རྣམ་པར་བརྟགས་ནས་དགག །བསླབ་བྱའི་གཙོ་བོ་ཡིན་པའི་སྒྲུབ་བྱེད་འགོད་པའོ། །དང་པོ་ནི།  བྱང་ཆུབ་སེམས་ཀྱི་ཞེས་སོགས་ཚིགས་བཅད་གསུམ་སྟེ།  བྱང་ཆུབ་སེམས་ཀྱི་བསླབ་པ་ལ་བདག་གཞན་
9-2-73b


མཉམ་པ་དང་།  བརྗེ་བ་བསྒོམ་པའི་ཚུལ་གཉིས་གསུངས་ཏེ།  སྤྱོད་འཇུག་ལས།  བདག་དང་གཞན་དུ་མཉམ་པ་ནི། །དང་པོ་ཉིད་དུ་འབད་དེ་བསྒོམ། །བདེ་དང་སྡུག་བསྔལ་མཉམ་པས་ན། །ཐམས་ཅད་བདག་བཞིན་བསྲུང་བར་བྱ། །ཞེས་དང་།  གང་ཕྱིར་བདག་དང་གཞན་གཉིས་ཀ།
མྱུར་དུ་སྐྱོབ་པར་འདོད་པ་དེས། །བདག་དང་གཞན་དུ་བརྗེ་བྱ་བ། །གསང་བའི་དམ་པ་སྤྱད་པར་བྱ། །ཞེས་གསུངས་སོ། །དེ་ལ་འབྲི་ཁུང་པ་ཁ་ཅིག །དགོངས་གཅིག་ཏུ་རྡོ་རྗེའི་གསུང་།  རང་གཞན་བརྗེས་པས།  ཉེས་པར་འགྱུར་བའི་སྐབས་ཡོད་བྱ་བ་བཞུགས།  དེས་ན་རང་
གཞན་བརྗེ་བ་བླ་མ་དམ་པའི་ཐུགས་དགོངས་མ་ཡིན་ཏེ།  རྗེ་རིན་པོ་ཆེ་རྟག་པར་ཞབས་སྙུང་ཞིང་མི་བདེ་བ་ཅི་ལགས།  ཞེས་འཇིག་རྟེན་མགོན་པོས་ཞུས་པས།  ཁོ་བོ་སྔོན་དད་པ་ནི་ཆེ་ཤེས་རབ་ནི་ཆུང་བས།  རྟག་པར་གཞན་གྱི་སྡུག་བསྔལ་བདག་ལ་སྨིན་པར་གྱུར་ཅིག། 
ཅེས་སྨོན་ལམ་བཏབ་པ་དེ་མཐའ་བཙན་པས་ད་ལྟ་རྟག་པར་ཞབས་སྙུང་བ་དེས་ལན།  ཞེས་གསུང་།  འོན་ཀྱང་བདག་ཅག་ལས་རྒྱུད་ཚོད་ཅུང་ཟད་མཐོ་བས་བཟོད་དམ་སྙམ་ན།  འཕགས་པ་ཤཱ་རིའི་བུ་ས་དྲུག་པ་བ་གཅིག་ཡིན་པ་ལ་དུས་ལ་མ་བབ་པར་མིག་སྦྱིན་པར་བཏང་བས་
ཉན་ཐོས་ཀྱི་སར་ལྷུང་བའི་རྐྱེན་དུ་གྱུར་པའི་ཕྱིར།  དེས་ན་བདག་གཞན་བརྗེ་བའི་བྱང་ཆུབ་ཀྱི་སེམས་བསྒོམ་མི་རུང་ཞེས་སྨྲའོ། །དེའི་རྒྱུ་མཚན་དྲིས་པས་འདི་སྐད་ལོ་སོགས་སོ། །གཉིས་པ་ལ་གཉིས་ཏེ།  བསྒྲུབ་བྱ་ལ་བརྟག་ནས་དགག་པ།  སྒྲུབ་བྱེད་ལ་བརྟག་ནས་དགག་
པའོ། །དང་པོ་ནི།  དེ་དོན་འདི་ལྟར་ཞེས་སོགས་དགུའོ། །གཉིས་པ་ནི།  བྱང་ཆུབ་སེམས་དཔའི་ཞེས་སོགས་བཅུ་གསུམ་སྟེ།  སྨོན་ལམ་ཐམས་ཅད་མཐའ་བཙན་པའི་གཏན་ཚིགས་མི་འགྲུབ་སྟེ།  བྱང་ཆུབ་སེམས་དཔའ་བློ་སྦྱོང་བའི་སྨོན་ལམ་འགའ་ཞིག་མཐའ་མི་བཙན་པའི་
9-2-74a


ཕྱིར་རོ། །གལ་ཏེ་བཙན་ན་དེད་དཔོན་མཛའ་བོའི་བུ་རྒྱུན་དུ་ཀླད་ནད་ཅན་དུ་འགྱུར་ཏེ།  སེམས་ཅན་ཐམས་ཅད་ཀྱི་ཀླད་ནད་བདག་ལ་སྨིན་པར་སྨོན་ལམ་བཏབ་པའི་ཕྱིར་རོ། །དེ་ཡང་མདོ་དྲིན་ལན་བསབ་པ་ལས།  སྔོན་བཱ་ར་ནཱ་སཱིར་དེད་དཔོན་མཛའ་བོ་ཞེས་པའི་བུ་
བྱུང་ངོ་ཅོག་ཤི་ནས་ཕྱིས་གཅིག་སྐྱེས་པ་ལ་མཛའ་བོའི་བུ་མོར་མིང་བཏགས་ཏེ།  ཕ་རྒྱ་མཚོར་ནོར་བུ་ལེན་དུ་ཕྱིན་པས་ཤི་ནས་ཆེར་སྐྱེས་པ་ན།  ཕའི་ལས་གང་ཡིན་དྲིས་པ་ལས།  དྲང་པོར་སྨྲས་ན་རྒྱ་མཚོར་ཤིར་དོགས་ནས་འབྲུ་འཚོང་བ་ཡིན་ཞེས་སྨྲས་པས་ཀར་ཤ་པ་ཎི་བཞི་རྙེད། 
དེ་བཞིན་དུ་སྤོས་བཙོངས་པས་བརྒྱད་དང་།  གོས་ཀྱིས་བཅུ་དྲུག་དང་།  གསེར་དངུལ་བཙོངས་པས་སོ་གཉིས་རྙེད་པ་ཐམས་ཅད་མ་ལ་ཕུལ།  དེ་ནས་ཚོང་པ་དེའི་རིགས་ཅན་རྣམས་ཀྱིས།  ཁྱོད་ཀྱི་ཕ་རྒྱ་མཚོར་ནོར་བུ་ལེན་པའི་རིགས་ཅན་ཡིན་ནོ་ཞེས་སྨྲས་པས།  དྲིལ་བསྒྲགས་ཏེ་
ཚོང་པ་ལྔ་བརྒྱ་དང་ལྷན་ཅིག་ཆས་པ་ལ།  མས་མ་བཟོད་པར་སྒོ་འཕྲེད་ལ་གཅད་དེ་ཉལ་བས་མའི་མགོ་ལ་རྡོག་པས་བསྣུན་ནས་སོང་ངོ་། །དེ་ནས་རྒྱ་མཚོར་ཞུགས་པས་གྲུ་བོ་ཆེ་ཆུ་སྲིན་ཉ་མིད་ཀྱིས་བཅོམ་ནས་ཞིག །མཛའ་བོའི་བུ་མོས་གྲུའི་ཤིང་ཚལ་ལ་འཇུས་ནས་མཐར་
གྱིས་ཕྱིན་པས།  གྲོང་ཁྱེར་མྱོས་བྱེད་དུ་ལྷའི་བུ་མོ་བཞི་དང་།  རྟག་མྱོས་སུ་བརྒྱད།  དགའ་བྱེད་དུ་བཅུ་དྲུག །ཚངས་པའི་བླ་མར་སོ་གཉིས་དང་ཕྲད་དེ།  ལོ་གྲངས་དུ་མར་དགའ་བདེ་མྱོང་ངོ་། །ཡང་ལྷོ་ཕྱོགས་སུ་སོང་བ་དང་།  ལྕགས་ཀྱི་ཁང་པ་ཆེན་པོ་ཞིག་མཐོང་སྟེ།  འགྲོ་འདོད་
པར་གྱུར་ནས་ནང་དུ་ཕྱིན་པ་དང་སྒོ་རང་འགྲིག་ཏུ་སོང་ངོ་། །ནང་ན་མི་ཞིག་ལྕགས་ཀྱི་འཁོར་ལོ་མེ་འབར་བ་མགོ་ལ་འཁོར་བ་ཞིག་མཐོང་ནས་དྲིས་པས།  མའི་མགོ་ལ་རྡོག་པས་བསྣུན་པའི་རྣམ་སྨིན་ནོ་ཟེར་བ་དང་།  རང་གི་དེ་དྲན་ཏེ།  ང་ཡང་ལས་ཀྱིས་འདིར་ཁྲིད་དོ་སྙམ་པ་དང་། 
9-2-74b


 ནམ་མཁའ་ལས་གང་མ་བཅིངས་པ་དེ་དག་ནི་ཆིངས་ཤིག །བཅིངས་པ་དེ་དག་གྲོལ་ཤིག །ཞེས་པའི་སྒྲ་ཐོས་པས་འཁོར་ལོ་དེ་རང་གི་མགོ་ལ་འཁོར་བར་གྱུར་ཏོ། །འདིར་གཞན་ཡང་ཡོད་མེད་དྲིས་པས་གང་མའི་མགོ་ལ་རྡོག་པས་བསྣུན་པ་ཐམས་ཅད་འདིར་འོངས་སོ་ཞེས་ཟེར་བ་དང་། གཞན་
གཅེས་འཛིན་གྱི་སྙིང་རྗེ་ཚད་མེད་པ་སྐྱེས་ཏེ།  འདི་ལྟ་བུའི་མྱོང་ངེས་ཀྱི་ལས་བསགས་པ་ཐམས་ཅད་བདག་ལ་སྨིན་པར་གྱུར་ཅིག །གཞན་སུ་ཡང་འདིར་འོང་བར་མ་གྱུར་ཅིག །ཅེས་བརྗོད་མ་ཐག་སྙིང་རྗེའི་སྟོབས་ཀྱིས།  མཛའ་བོའི་བུ་མོའི་མགོ་ལ་འཁོར་བའི་འཁོར་ལོ་དེ།  ཤིང་ཏ་ལ་བདུན་
སྲིད་ཙམ་དུ་འཕགས་ནས་ཚེའི་དུས་བྱས་ཏེ།  དགའ་ལྡན་དུ་སྐྱེས་སོ་ཞེས་གསུངས་སོ། །གཞན་ཡང་དུས་གསུམ་སངས་རྒྱས་སོགས་ཚིག་རྐང་གསུམ་སྟེ།  བློ་སྦྱོང་གི་སྨོན་ལམ་མཐའ་བཙན་པའི་ཕྱིར་རོ། །བརྗེས་པའི་ཡུལ་གྱི་སེམས་ཅན་དེ་དག་ཀུན།  སྡུག་བསྔལ་འབྱུང་བ་མི་
སྲིད་པར་འགྱུར་ཏེ།  སངས་རྒྱས་དང་བྱང་སེམས་ཀྱི་བདེ་བ་ལ་ལོངས་སྤྱོད་པའི་ཕྱིར་རོ། །དེས་ན་བརྗེ་བའི་བྱང་ཆུབ་ཀྱི་སེམས་བསྒོམ་དུ་མི་རུང་བ་འདི་འདྲའི་གསང་ཚིག་ནི་བདུད་ཀྱིས་ཡིན་པ་ཕལ་ཆེར་གྱིས་མི་ཤེས་པས་ཤེས་ནས་སྤང་བར་བྱའོ། །ཐབས་ཕྱིན་ཅི་ལོག་ཏུ་སྟོན་པ་
ཐབས་ལ་བསླུ་བའི་བདུད།  ཅེས་རྒྱལ་བས་གསུངས་པའང་དྲན་པར་བྱ་སྟེ།  མདོ་སྡེ་རྒྱན་ལས།  ཐབས་དང་སྐྱབས་དང་དག་པ་དང་། །ཐེག་ཆེན་ངེས་པར་འབྱུང་བ་ལས། །སེམས་ཅན་རྣམས་ནི་རབ་བསླུ་བའི། །བདུད་འཇོམས་ཁྱོད་ལ་ཕྱག་འཚལ་ལོ། །ཞེས་གསུངས་པ་ལྟར་རོ། །
གསུམ་པ་ལ་བཞི་སྟེ།  ཡིད་ཆེས་པའི་ལུང་གིས་བསྒྲུབ།  བསྒོམ་པའི་ཕན་ཡོན་གྱིས་བསྒྲུབ།  མ་བསྒོམས་པའི་ཉེས་དམིགས་ཀྱིས་བསྒྲུབ།  དེས་གྲུབ་པའི་དོན་བསྟན་པའོ། །དང་པོ་ལ་གསུམ་སྟེ།  ཀླུ་སྒྲུབ་ཀྱི་ལུང་གིས་བསྒྲུབ།  ཞི་བ་ལྷའི་ལུང་གིས་བསྒྲུབ།  མདོ་དང་བསྟན་
9-2-75a


བཅོས་གཞན་གྱི་ལུང་གིས་བསྒྲུབ་པའོ། །དང་པོ་ནི་བདག་གཞན་བརྗེ་བ་ཞེས་སོགས་བཅུ་བདུན་ཏེ།  འདི་ནི་བཅོམ་ལྡན་འདས་ཀྱིས་གསུངས་ཞེས་པ་ནི།  དཔལ་སྦྱིན་གྱིས་ཞུས་པའི་མདོ་ལས།  བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་
མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་ལས་ལྷག་པར་འགྱུར། །ཞེས་གསུངས་སོ། །གཏན་ཚིགས་ཀྱང་ནི་འདི་ལ་སྣང་། །ཞེས་པ་ནི་རིན་ཆེན་ཕྲེང་བར།  ཕྱོགས་རྣམས་ཀུན་ཏུ་ནམ་མཁའ་དང་། །ས་དང་ཆུ་དང་མེ་དང་རླུང་། །ཇི་ལྟར་མཐའ་ཡས་དེ་
བཞིན་དུ། །སྡུག་བསྔལ་སེམས་ཅན་མཐའ་ཡས་འདོད། །སེམས་ཅན་མཐའ་ཡས་དེ་དག་ནི། །བྱང་ཆུབ་སེམས་དཔའ་སྙིང་རྗེ་བས། །སྡུག་བསྔལ་དག་ལས་དྲངས་བྱས་ཏེ། །སངས་རྒྱས་ཉིད་ལ་དགོད་པར་ངེས། །དེ་ལྟར་བརྟན་པར་གནས་དེ་ནི། །མི་ཉལ་བའམ་ཉལ་
ཡང་རུང་། །ཡན་ལག་བླངས་པ་ནས་བཟུང་སྟེ། །བག་མེད་གྱུར་ཀྱང་སེམས་ཅན་རྣམས། །མཐའ་ཡས་ཕྱིར་ན་སེམས་ཅན་བཞིན། །བསོད་ནམས་མཐའ་ཡས་རྟག་གསོག་འགྱུར། །མཐའ་ཡས་དེས་ན་སངས་རྒྱས་ཉིད། །མཐའ་ཡས་ཐོབ་མི་དཀའ་ཞེས་བྱ། །ཞེས་གསུངས་
པ་ལྟར་རོ། །གཉིས་པ་ནི།  སྤྱོད་འཇུག་ལས་ཀྱང་།  ཞེས་སོགས་དྲུག་གོ།  གསུམ་པ་ནི།  མདོ་དང་བསྟན་བཅོས་ཞེས་སོགས་གཉིས་ཏེ།  གསང་ཆེན་ཐབས་ལ་མཁས་པའི་མདོ་ལས།  གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ནི།  ཞེས་པ་ནས་འདི་
ལྟར་སེམས་ཅན་དེ་དག་གི་སྡུག་བསྔལ་གྱི་ཚོར་བ་གང་ཡིན་པ་དེ་དག་ཐམས་ཅད་བདག་གི་ལུས་ལ་འབབ་པར་གྱུར་ཅིག །སེམས་ཅན་དེ་དག་བདེ་བར་གྱུར་ཅིག །ཅེས་པ་དང་།  རྡོ་རྗེ་རྩེ་མོ་ལས།  འཁོར་བ་མཐར་ཐུག་བར་དུ་ནི། །བདག་འཚང་རྒྱ་བར་མ་གྱུར་ཅིག །འགྲོ་བའི་སྡུག་
9-2-75b


བསྔལ་གང་ཅིའང་རུང་། །དེ་ཀུན་བདག་ལ་སྨིན་གྱུར་ཅིག །བྱང་ཆུབ་སེམས་དཔའི་དགེ་བ་ཡིས། །འགྲོ་བ་བདེ་ལ་སྤྱོད་པར་ཤོག །ཅེས་དང་།  བྱང་ཆུབ་སེམས་འགྲེལ་ལས།  བསམ་གཏན་བདེ་བ་བོར་ནས་ཀྱང་། །མནར་མེད་པར་ཡང་འཇུག་པར་བྱེད། །འདི་ནི་ངོ་མཚར་བསྔགས་
འོས་སོ། །འདི་ནི་དམ་པའི་ཚུལ་ལུགས་མཆོག །ཅེས་གསུངས་སོ། །གཉིས་པ་ནི་དེས་ན་བདག་གཞན་ཞེས་སོགས་ཚིགས་བཅད་གཅིག་སྟེ།  སྤྱོད་འཇུག་ལས།  མང་དུ་བཤད་ལྟ་ཅི་ཞིག་དགོས། །བྱིས་པ་རང་གི་དོན་བྱེད་དང་། །ཐུབ་པ་གཞན་གྱི་དོན་མཛད་པ། །འདི་
གཉིས་ཀྱི་ནི་ཁྱད་པར་ལྟོས། །ཞེས་གསུངས་པ་ལྟར་རོ། །གསུམ་པ་ནི།  བྱང་ཆུབ་སེམས་ཀྱི་ཞེས་སོགས་བཅོ་བརྒྱད་དེ།  བདག་གཞན་བརྗེ་བ་བྱང་ཆུབ་ཀྱི་སེམས་ཀྱི་གནད་འཆུགས་ན་ཆོས་གཞན་གྱིས་འཚང་མི་རྒྱ་སྟེ།  ཐབས་མཁས་དང་བྲལ་བའི་སྟོང་ཉིད་ཉན་ཐོས་
རྣམས་ཀྱིས་བསྒོམ་ཀྱང་།  དེའི་འབྲས་བུ་འགོག་པ་ཙམ་ཐོབ་པའི་ཕྱིར་དང་།  སོ་སོར་ཐར་པའི་མདོ་ལས།  སོ་སོ་ཐར་པ་བཏོན་པ་ཡི། །བསོད་ནམས་གྲུབ་པ་གང་ཡོད་པ། །དེ་ཡིས་འཇིག་རྟེན་མ་ལུས་པ། །ཐུབ་དབང་གོ་འཕང་ཐོབ་པར་ཤོག །ཞེས་གསུངས་པ་བཞིན་དུ་བསྔོ་བ་
ཉན་ཐོས་རྣམས་བྱེད་ཀྱང་།  རྫོགས་པའི་བྱང་ཆུབ་བསྒྲུབ་པར་མི་ནུས་པའི་ཕྱིར་རོ། །སྟོང་ཉིད་ཉན་ཐོས་རྣམས་བསྒོམ་པའི་སྒྲུབ་བྱེད་ནི་འདུལ་བ་ལུང་དང་།  མདོ་སྡེ་ལས་གསུངས་པ་དང་།  གང་པོའི་རྟོགས་བརྗོད་ལས།  ཉན་ཐོས་ཀྱི་དགྲ་བཅོམ་པ་ཐོབ་པའི་ཚེ་སྟོང་པ་ཉིད་
དང་།  སྐྱེ་བ་མེད་པ་དང་ནམ་མཁའ་དང་ལག་མཐིལ་དུ་མཉམ་པ་དང་།  གསེར་དང་བོང་བར་མཚུངས་པ་སོགས་ཆོས་ཀུན་མཉམ་ཉིད་དུ་རྟོགས་པར་གསུངས་སོ། །འོ་ན་ཆོས་ཀུན་མཉམ་པ་ཉིད་དུ་རྟོགས་པ་རྫོགས་པའི་སངས་རྒྱས་ཀྱི་ཐུན་མོང་མ་ཡིན་པའི་ལམ་མ་ཡིན་
9-2-76a


ནམ་སྙམ་ན།  འདི་ལ་གང་ཟག་གི་བདག་དང་།  གཟུང་བ་ཆོས་ཀྱི་བདག་དང་།  འཛིན་པ་ཆོས་ཀྱི་བདག་གིས་སྟོང་པའི་མཉམ་པ་ཉིད་གསུམ་ལས།  དང་པོ་གཉིས་ཉན་ཐོས་དང་།  རང་སངས་རྒྱས་ཀྱིས་རིམ་པ་བཞིན་རྟོགས་པའི་དབང་དུ་བྱས་པར་མངོན་རྟོགས་
རྒྱན་ལས་བཤད་དེ།  དེ་ནས་གསུངས་པའི་ཆོས་ཀྱི་བདག་འཛིན་ནི་འཁོར་འདས་ལ་བླང་དོར་གྱི་མཚན་མར་འཛིན་པ་དང་།  ཕུང་པོ་སྟོང་པ་ཉིད་དུ་འཛིན་པ་དང་།  དུས་གསུམ་གྱི་ཆོས་ལ་དེར་འཛིན་པ་དང་།  བྱང་ཕྱོགས་སོ་བདུན་ལ་ཐར་ལམ་དུ་འཛིན་པ་དང་།  རྫོགས་པའི་སངས་རྒྱས་
ལ་སྐྱབས་གནས་སུ་འཛིན་པ་སོགས་བླང་དོར་ཐ་དད་དུ་འཛིན་པའི་ཆགས་པ་ཕྲ་མོ་ཡིན་ལ།  དེ་ནི་ཉན་ཐོས་ཀྱི་ལམ་དུ་ཅུང་ཟད་ཙམ་ཡང་སྤོང་བར་མི་ནུས་ཏེ།  དེ་དག་ནི་འཁོར་བ་ལ་སྤང་བྱ་དང་།  མྱང་འདས་ལ་བླང་བྱར་བྱས་ནས་ལམ་བསྒྲུབ་པའི་ཕྱིར་རོ། །སོ་སོ༷་ཐར་པའི་མདོ་
བཞིན་དུ་བསྔོ་བ་ཉན་ཐོས་རྣམས་ཀྱང་བྱེད་པའི་སྒྲུབ་བྱེད་ནི།  ཐམས་ཅད་སྒྲོལ་གྱི་སྐྱེས་རབས་ལས།  བདག་གིས་བྲམ་ཟེ་འདོད་པ་ལ། །ཞེས་སོགས་དང་།  དཔལ་གྱི་སྡེའི་རྟོགས་བརྗོད་ལས།  བྲམ་ཟེ་དམ་པ་གཟུགས་བཟང་བ། །སྡུག་པའི་ཆུང་མ་འདི་ལོང་ཤིག །སྦྱིན་པ་འདི་ཡིས་མྱུར་
དུ་ནི། །བྱང་ཆུབ་དམ་པ་ཐོབ་པར་འགྱུར། །ཞེས་གསུངས་སོ། །འོན་ཀྱང་ཐབས་ལ་མཁས་པའི་ཁྱད་པར་འགའ་ཞིག་མ་གསུངས་པས་རྫོགས་པའི་བྱང་ཆུབ་བསྒྲུབ་པར་མི་ནུས་ཏེ།  མདོ་སྡུད་པ་ལས།  ཐབས་མེད་ཤེས་རབ་བྲལ་བས་ཉན་ཐོས་ཉིད་དུ་ལྟུང་། །ཞེས་དང་།  རིན་
ཆེན་ཕྲེང་བ་ལས།  ཉན་ཐོས་ཐེག་པ་དེ་ལས་ནི། །བྱང་ཆུབ་སེམས་དཔའི་སྨོན་ལམ་དང་། །སྤྱོད་པ་ཡོངས་བསྔོ་མ་བཤད་དེས། །བྱང་ཆུབ་སེམས་དཔར་ག་ལ་འགྱུར། །ཞེས་གསུངས་སོ། །བཞི་པ་ནི།  དེ་ཕྱིར་ཐབས་མཁས་ཞེས་སོགས་གཉིས་ཏེ།  བྱང་ཆུབ་སེམས་ཀྱི་གནད་འཆུགས་
9-2-76b


ན་སངས་མི་རྒྱ་བ་དེའི་ཕྱིར་ཀུན་རྫོབ་བྱང་ཆུབ་སེམས་ཀྱི་ཐབས་མཁས་པ་དང་།  སྤྲོས་བྲལ་རྟོགས་པའི་ཤེས་རབ་ཉིད་སངས་རྒྱས་ཀྱི་རྒྱུའི་གཙོ་བོ་ཡིན་ཏེ།  ལི་ཙ་བྱིས་ཞུས་པའི་མདོ་ལས།  བྱང་ཆུབ་སེམས་དཔའ་རྣམ་དག་གི།  ཡབ་ནི་ཐབས་ལ་མཁས་པ་སྟེ། །ཡུམ་ནི་ཤེས་རབ་ཕ་
རོལ་ཕྱིན། །འདྲེན་པ་རྣམས་ནི་དེ་ལས་སྐྱེས། །ཞེས་གསུངས་སོ། །གསུམ་པ་དེ་དང་འབྲེལ་བའི་ཐབས་ལམ་རྣམ་དག་ཏུ་བསྒྲུབ་པ་ལ་གཉིས་ཏེ།  སྤང་བྱ་མ་དག་པའི་ལྟ་སྤྱོད་ངོས་བཟུང་།  དེ་ཤེས་ནས་སྤོང་བར་གདམས་པའོ། །དང་པོ་ལ་བསྟན་བཤད་གཉིས་ལས།  དང་པོ་ནི།
སངས་རྒྱས་དགོངས་པ་ཞེས་སོགས་ཚིགས་བཅད་གཅིག་གོ།  གཉིས་པ་ལ་བཅུ་གཅིག་ལས།  དང་པོ་མ་དག་པའི་སྦྱིན་པ་ནི།  ཆང་དང་དུག་དང་ཞེས་སོགས་དྲུག་སྟེ།  སྟེར་སོགས་ཞེས་པའི་སོགས་ཀྱི་སྒྲས་བསྡུས་པའི་སྦྱིན་པ་རྣམས་ནི།  དྲང་སྲོང་རྒྱས་པས་ཞུས་པའི་མདོ་དང་
བྱང་ཆུབ་སེམས་དཔའི་སོ་སོ་ཐར་པ་ཆོས་བཞི་བསྒྲུབ་པའི་མདོ་ལས་བཀག་པ་རྣམས་མ་དག་པའི་སྦྱིན་པ་ཡིན་ནོ། །མདོ་དང་པོ་ལས་སུམ་ཅུ་རྩ་གཉིས་གསུངས་པ།  ཐུབ་པ་དགོངས་གསལ་ལས།  སྡོམ་གྱི་ཚིགས་སུ་བཅད་པ་ནི།  ལོག་ལྟ་མ་དད་ཕན་གདགས་ལན། །མེ་ཆུ་རྒྱལ་སྟེར་
འཕགས་ཕྱིར་སྟེར། །དུག་མཚོན་བསད་ཤ་བག་མེད་ཆང་། །བསྡུ་ཕྱིར་སྟོང་ཕྱིར་རོལ་མོ་མཁན། །སྐར་མཁན་གཞན་ནོར་མཛའ་ལ་སྟེར། །གཞན་གྱི་འབྲུ་སྙོང་བཟོ་བོ་དང་། །ནོར་ཕྱིར་སྨན་པ་བཅོས་ནས་སྟེར། །རྣམ་སྨིན་ཐེ་ཚོམ་བྱིན་རྗེས་འགྱོད། །འདི་ཡིས་ཕྱི་མར་བདག་ལ་
སྦྱིན། །རྣམ་སྨིན་རང་ཉིད་ལང་ཚོ་རྒས། །ན་དང་འཆི་ཚེ་བསྐུལ་ནས་མཆོད། །ཡུལ་གཞན་གྲགས་ཕྱིར་ཕོད་བསྟན་ཕྱིར། །བུད་མེད་ཕྱིར་སྟེར་བུད་མེད་ཕྱིར། །ཕྱི་མ་རྙེད་ཕྱིར་དམན་པ་རྣམས། །བོར་ནས་ཕྱུག་པོ་རྣམས་ལ་སྟེར། །མ་དག་སྦྱིན་པ་སུམ་ཅུ་གཉིས། །རྒྱས་པ་མདོ་
9-2-77a


ལས་གསུངས་ཕྱིར་སྤང་། །ཞེས་གསུངས་སོ། །ཚུལ་ཇི་ལྟར་མ་དག་ཞེ་ན།  དང་པོ་དྲུག་དང་བཅུ་གསུམ་པ། །བཅུ་བཞི་པ་དང་བཅོ་ལྔ་པ། །བཅུ་བདུན་པ་དང་བཅོ་བརྒྱད་པ། །ཐ་མ་གཅིག་སྟེ་བཅུ་གཉིས་པོ། །ཞིང་ནི་མ་དག་པ་ཡིན་ནོ། །བདུན་པ་བརྒྱད་པ་དགུ་པ་དང་། །
བཅུ་པ་དང་ནི་བཅུ་དྲུག་པ། །ལྔ་ནི་དངོས་པོ་མ་དག་པའོ། །བསམ་པ་མ་དག་ལྷག་བཅོ་ལྔ། །ཞེས་པ་ལྟར་ཤེས་པར་བྱའོ། །མདོ་གཉིས་པ་ལས།  ཤཱ་རིའི་བུ་གང་ཡང་བྱང་ཆུབ་སེམས་དཔའ་མཁས་པས་སྨད་པའི་སྦྱིན་པ་འདི་རྣམས་ལས་རབ་ཏུ་བཟློག་པ་ཡིན་ཏེ།  འདི་ལྟ་སྟེ།  དུས་
སུ་ལེན་པའི་སྦྱིན་པ་དང་།  ཆང་གི་སྦྱིན་པ་དང་།  དུག་གི་སྦྱིན་པ་དང་།  གནོད་པའི་སྦྱིན་པ་དང་།  འགྱོད་པའི་སྦྱིན་པ་དང་།  མཚོན་ཆའི་སྦྱིན་པ་དང་།  འཕྲོག་པའི་སྦྱིན་པ་དང་།  བརྙས་པའི་སྦྱིན་པ་དང་།  རང་གི་ལག་གིས་སྨིན་པའི་སྦྱིན་པ་དང་།  རྒྱབ་ཀྱིས་ཕྱོགས་པའི་སྦྱིན་པ་དང་།  འདོད་པ་
ལ་བརྟེན་པའི་སྦྱིན་པ་དང་།  མི་མཐུན་པའི་སྦྱིན་པ་དང་།  དམ་པ་མ་ཡིན་པའི་སྦྱིན་པ་དང་།  སྨད་པའི་སྦྱིན་པ་དང་།  དུག་དང་མཚོན་སྦྱིན་པའི་སྦྱིན་པ་དང་།  སོ་སོར་གནོད་པའི་སྦྱིན་པ་དང་།  རྙེད་པའི་ཕྱིར་སྦྱིན་པ་དང་།  རྟག་ཏུ་འཇིགས་པ་བསྐྱེད་པའི་སྦྱིན་པ་དང་།  བྱང་ཆུབ་ཡོངས་
སུ་ཉམས་པར་བྱེད་པའི་སྦྱིན་པ་དང་།  འཆི་བའི་ཞགས་པའི་སྦྱིན་པ་དང་།  བསྟེན་པའི་ཕྱིར་སྦྱིན་པ་དང་།  འཇིགས་པའི་སྦྱིན་པ་དག་ལས་བཟློག་པར་འགྱུར་རོ། །ཞེས་གསུངས་སོ། །སྦྱིན་པ་རྣམ་པར་དག་པ་ནི།  ཉེ་བ་འཁོར་གྱིས་ཞུས་པའི་མདོ་ལས།  བྱང་ཆུབ་སེམས་དཔའ་
ཁྱིམ་པ་དང་།  རབ་ཏུ་བྱུང་བ་དང་།  མི་སྐྱེ་བའི་ཆོས་ལ་བཟོད་པ་ཐོབ་པའི་སྦྱིན་པ་གསུམ་ལས།  དང་པོ་ལ་ཆོས་དང་ཟང་ཟིང་གི་སྦྱིན་པ་གཉིས་དང་།  གཉིས་པ་སྨྱུ་གུ་དང་།  སྣག་ཚ་དང་།  གླེགས་བམ་དང་།  ཆོས་སྦྱིན་པ་བཞི་དང་།  གསུམ་པ་ལ་རྒྱལ་སྲིད་ཡོངས་སུ་གཏོང་བ་དང་།  
9-2-77b


ཆུང་མ་དང་།  བུ་དང་བུ་མོ་ཡོངས་སུ་གཏོང་བ་གཏོང་བ་ཆེན་པོ་དང་།  མགོ་དང་རྐང་ལག་ལ་སོགས་པ་ཡོངས་སུ་གཏོང་བ་ཤིན་ཏུ་གཏོང་བ་སྟེ་གསུམ་གསུངས་སོ། །གཉིས་པ་མ་དག་པའི་ཚུལ་ཁྲིམས་ནི།  ཉན་ཐོས་ཀྱི་ནི་ཞེས་སོགས་ཚིགས་བཅད་གཉིས་ཏེ།  རིས་བདུན་སེམས་
ཇི་སྲིད་འཚོའི་བར་དུ་ལེན་པ་ཉན་ཐོས་ཀྱི་སྡོམ་པ་ཐེག་པ་ཆེན་པོར་འཆོས་པ་དང་།  དེ་བཞིན་དུ་ཐེག་པ་ཆེན་པོའི་ཚུལ་ཁྲིམས་བསྲུངས་ནས།  ཉན་ཐོས་དང་རང་སངས་རྒྱས་ལ་དམིགས་པ་ཐེག་ཆེན་ཉན་ཐོས་སུ་འཆོས་པའི་ཚུལ་ཁྲིམས་མ་དག་པ་ཡིན་ཏེ།  མདོ་སྡུད་པ་ལས།  
གལ་ཏེ་དགྲ་བཅོམ་རང་རྒྱལ་བྱང་ཆུབ་རེག་འདོད་ན། །ཚུལ་ཁྲིམས་འཆལ་ཅིང་མི་མཁས་དེ་བཞིན་སྤྱོད་པ་ཉམས། །ཞེས་གསུངས་སོ། །རང་ཉིད་ཚུལ་ཁྲིམས་བསྲུང་ན་ཡང་། །ཞེས་སོགས་ཀྱང་མདོ་དེ་ཉིད་ལས།  སེམས་ཅན་འདི་དག་ཁྲིམས་ལྡན་འདི་དག་ཁྲིམས་འཆལ་
ཞེས། །སྣ་ཚོགས་འདུ་ཤེས་ཞུགས་པ་ཤིན་ཏུ་ཁྲིམས་འཆལ་ཞེས་གསུངས་པའི་དོན་ནོ། །གསུམ་པ་མ་དག་པའི་བཟོད་པ་ནི།  དཀོན་མཆོག་གསུམ་དང་ཞེས་སོགས་ཚིགས་བཅད་གཅིག་སྟེ།  སྦྱོང་རྒྱུད་ལས།  དཀོན་མཆོག་གསུམ་ལ་སྨོད་བྱེད་ལ། །བཟོད་པ་བསྒོམ་
པར་མི་བྱ་སྟེ། །བླ་མ་སྨོད་བརྩོན་མ་རུངས་དང་། །དམ་ཚིག་ལས་ནི་འདའ་བ་དང་། །དེ་སོགས་བྱེད་པ་ཚར་བཅད་ན། །འགྲུབ་འགྱུར་ཞེས་ནི་ཀུན་རིག་གསུངས། །ཞེས་གསུངས་སོ། །བཞི་པ་མ་དག་པའི་བརྩོན་འགྲུས་ནི།  ལོག་པའི་ཆོས་ལ་ཞེས་སོགས་ཚིགས་བཅད་གཅིག་
སྟེ།  དེ་དག་མ་དག་པའི་བརྩོན་འགྲུས་ཡིན་པའི་རྒྱུ་མཚན།  བྱ་བ་ངན་ཞེན་གྱི་ལེ་ལོ་ཡིན་པའི་ཕྱིར་རོ། །ཇི་སྐད་དུ་ཐོགས་མེད་ཀྱི་ཆོས་འདི་པ་དག་ལས་གཞན་པའི་མུ་སྟེགས་བྱེད་ཀྱི་བརྩོན་འགྲུས་ནི། །ལེ་ལོ་ཉིད་དོ། །ཞེས་དང་།  སྤྱོད་འཇུག་ལས།  ལེ་ལོ་ངན་ལ་ཞེན་པ་དང་། །ཞེས་
9-2-78a


གསུངས་སོ། །ལྔ་པ་མ་དག་པའི་བསམ་གཏན་ནི།  མི་མཁས་སྟོང་ཉིད་ཞེས་སོགས་བདུན་ཏེ།  མི་མཁས་སྟོང་ཉིད་བསྒོམ་པ་ནི།  རིན་ཆེན་ཕྲེང་བ་ལས།  ཆོས་འདི་ལོག་པར་ཤེས་གྱུར་ན། །མི་མཁས་དེ་ནི་ཆུད་ཀྱང་འཛའ། །འདི་ལྟར་མེད་པར་བལྟ་བ་
ཡི། །མི་གཙང་དེར་ནི་བྱིང་བར་འགྱུར། །ཞེས་བཤད་པས།  དད་པ་ཆེན་པོས་བསྒོམ་ན་ཡང་སོགས་སོ། །གཞན་ཡང་རྩ་རླུང་ཐིག་ལེའི་གནད་འཆུགས་པའི་ཐར་ལམ་སོགས།  རྣམ་རྟོག་རགས་པ་འགའ་ཞིག་འཇིག་པ་དང་།  སེམས་གནས་པའི་ཏིང་ངེ་འཛིན་ཕྲ་མོ་སྐྱེ་
བའི་ཐབས་སུ་གྱུར་པ་དད་པ་ཆེན་པོས་སོགས་སོ། །དྲུག་པ་མ་དག་པའི་ཤེས་རབ་ནི།  སངས་རྒྱས་གསུང་དང་།  ཞེས་སོགས་ཚིགས་བཅད་གཅིག་སྟེ།  འོད་ཟེར་བཀྱེ་བའི་མདོ་ལས།  ཡང་དག་ཆོས་ནི་སྤོང་བྱེད་ཅིང་། །ཆོས་མ་ཡིན་པ་སྤྱོད་པར་བྱེད། །དེ་ལྟ་བས་ནི་རྨོངས་པ་
ཡི། །སྐྱེས་བུ་དམན་པ་སྤོང་བར་བྱེད། །ཞེས་གསུངས་པ་ལྟར་རོ། །བདུན་པ་མ་དག་པའི་དད་པ་ནི།  བླ་མ་ངན་ལ་ཞེས་སོགས་ཚིགས་བཅད་གཅིག་སྟེ།  སློབ་དཔོན་ཤཱནྟི་པས།  དད་པ་མེད་པ་གཙོ་བོའི་དགྲ། །ལྷག་དད་ཤིན་ཏུ་གོལ་བའི་གནས། །ཞེས་གསུངས་པ་ལྟར་
རོ། །བརྒྱད་པ་མ་དག་པའི་སྙིང་རྗེ་ནི།  ནད་པ་དགའ་བའི་ཞེས་སོགས་ཚིགས་བཅད་གཉིས་ཏེ།  མ་དག་པའི་སྙིང་རྗེ་བཞི་ལས།  དང་པོ་ནི།  འདུལ་བ་ལུང་ལས།  བྲན་མོ་སྐྱོང་མས་ཁྱིམ་བདག་ནད་པའི་མགོ་ལ་སྡོང་དུམ་གཞུག་པ་ལྟ་བུ་དང་།  གཉིས་པ་ནི་རྡོ་རྗེ་གུར་ལས།  གདུག་ལ་བྱམས་པར་མི་བྱ་ཞིང་། །
ཞེས་པ་ལྟ་བུ་དང་།  གསུམ་པ་ནི་རྩ་ལྟུང་བཅུ་བཞི་པ་ལས།  ཡོངས་སུ་མ་སྨིན་སེམས་ཅན་ལ། །གསང་བ་བསྒྲོགས་པ་བདུན་པ་ཡིན། །ཞེས་པ་ལྟ་བུ་དང་།  བཞི་པ་ནི་བསླབ་བཏུས་ལས།  བློ་སྦྱང་མ་བྱས་སེམས་ཅན་ལ། །སྟོང་པ་ཉིད་ནི་སྟོན་པ་དང་། །ཞེས་པ་ལྟ་བུ་སྟེ།  སྤྱིར་སྣོད་མ་
9-2-78b


ཡིན་པ་ནི།  རྣམ་བཤད་རིགས་པ་ལས།  ང་རྒྱལ་དང་ནི་མ་དད་དང་། །དོན་དུ་གཉེར་བ་མེད་ཉིད་དང་། །ཕྱི་རོལ་རྣམ་གཡེང་ནང་དུ་བསྡུ། །སྐྱོ་བས་ཉན་པ་དྲི་མ་ཡིན། །ཞེས་པ་ལྟར་རོ། །དགུ་པ་མ་དག་པའི་བྱམས་པ་ནི།  གདུག་པ་ཅན་ལ་ཞེས་སོགས་དྲུག་སྟེ།  དང་པོ་ནི་རྩ་ལྟུང་བཅུ་
བཞི་པ་ལས།  གདུག་ལ་རྟག་ཏུ་བྱམས་ལྡན་པ། །བྱེད་པ་དེ་ནི་བཅུ་པར་འདོད། །ཅེས་པ་ལྟ་བུའོ། །གཉིས་པ་ནི་རྡོ་རྗེ་གུར་ལས།  རྟག་ཏུ་སློབ་མ་བསྡུ་བྱ་ཞིང་། །ཞེས་དང་།  འདུལ་བ་ལས།  མཁན་པོས་མཁན་བུ་ལ།  བུའི་འདུ་ཤེས་བསྐྱེད་པར་གསུངས་པ་དང་།  གསུམ་
པ་ནི་བརྟག་གཉིས་ལས།  རྡོ་རྗེ་དེ་ཉིད་ཀྱིས་ནི་རྭ་བ་དང་། །གུར་བཅིང་བ་ཡང་རྣམ་པར་བསྒོམ་པ་ཉིད། །ཅེས་དང་།  བཞི་པ་ནི་རྡོ་རྗེ་རྣམ་འཇོམས་ལས།  རྡོ་རྗེ་ཁྲོ་བོ་ལས་བྱུང་བ། །ཞེས་པ་དང་།  གདོན་ཐམས་ཅད་བརླག་པར་བྱེད་པ་ཞེས་པ་ལྟ་བུ་སྟེ།  དེ་དག་འགོག་ན་རྒྱུད་སྡེ་དེ་དག་དང་
འགལ་ལོ། །བཅུ་པ་མ་དག་པའི་ཐབས་ལམ་ནི།  མདོ་རྒྱུད་ཀུན་ལས་ཞེས་སོགས་ཚིགས་བཅད་གཉིས་ཏེ།  ཐབས་ལམ་སྟོན་པའི་མདོ་རྒྱུད་ཀུན་ལས་མ་གསུངས་ཤིང་།  རིགས་པས་བསྒྲུབ་པར་མི་ནུས་པའི་དྲོད་དང་བདེ་བ་དང་།  མི་རྟོག་པ་ལྟར་སྣང་སྐྱེ་བ་སོགས་མ་དག་པའི་ཐབས་
ལམ་ཡིན་ཏེ།  ནད་གདོན་ཅུང་ཟད་སེལ་བའི་སྒོ་ནས།  བླུན་པོ་དགའ་བ་བསྐྱེད་ན་ཡང་།  ཐབས་ལམ་དེ་ལྟ་བུ་ནི་མུ་སྟེགས་བྱེད་ལ་ཡང་ཡོད་པའི་ཕྱིར་རོ། །བཅུ་གཅིག་པ་མ་དག་པའི་སྨོན་ལམ་ནི།  བདག་ལྟའི་རྩ་བ་ཞེས་སོགས་དྲུག་གོ།  གཉིས་པ་དེ་ཤེས་ནས་སྤོང་བར་གདམས་
པ་ནི།  དེ་ལ་སོགས་པ་ཞེས་སོགས་ཚིགས་བཅད་གཅིག་སྟེ།  གོང་དུ་བཤད་པའི་བཅུ་གཅིག་པོ་དེ་དག་ལ་སོགས་པ་མཐའ་ཡས་པ་ཐེག་པ་ཆེན་པོའི་ཕ་རོལ་ཏུ་ཕྱིན་པ་དང་།  གསང་སྔགས་ཀྱི་སངས་རྒྱས་ཀྱི་གསུང་གི་གནད་འཆུགས་པས་ཐེག་པ་ཆེན་པོའི་དགེ་བ་བྱེད་པར་སྣང་ན་ཡང་། 
9-2-79a


 མ་དག་པར་ཤེས་པར་བྱས་ནས་སྤང་བར་བགྱི་སྟེ།  ཐུབ་པ་དགོངས་གསལ་ལས།  དགེ་བའི་རྩ་བ་འགའ་ཞིག་མཐོ་རིས་ལྷ་དང་མིའི་ཕུན་སུམ་ཚོགས་པར་འགྲོ།  འགའ་ཞིག་ཉན་ཐོས་དང་རང་སངས་རྒྱས་ཀྱི་རྒྱུར་འགྲོ་བས།  དེ་བཟློག་པའི་དོན་དུ་ཐབས་ཀྱིས་མྱ་ངན་
ལས་འདས་པའི་མཐའ་མནན།  ཤེས་རབ་ཀྱིས་འཁོར་བའི་མཐའ་མནན།  བརྩོན་འགྲུས་ཀྱི་སྟོབས་ཀྱིས་དེ་གཉིས་མྱུར་དུ་མཐར་ཕྱིན་པར་བྱས་ནས་སྦྱིན་པས་མཚོན་པའི་དགེ་བ་ཅུང་ཟད་བྱས་པ་ཐམས་ཅད་མྱུར་དུ་མངོན་པར་རྫོགས་པར་འཚང་རྒྱ་བའི་རྒྱུར་འགྱུར་བ་ལ་བསླབ་སྟེ།  མདོ་ལས།
གང་ཟག་རྒྱལ་བ་རྣམ་འདྲེན་ལ། །བྱེད་པ་ཆུང་ངུའང་བྱེད་འགྱུར་བ། །དེ་དག་མཐོ་རིས་སྣ་ཚོགས་པར། །བགྲོད་ནས་འཆི་མེད་གནས་ཐོབ་བོ། །ཞེས་གསུངས་སོ། །གསུམ་པ་བསྟན་པ་རྣམ་པར་དག་པས་འཇུག་བསྡུ་བ་ནི།  མདོར་ན་སངས་རྒྱས་ཞེས་སོགས་ཚིགས་བཅད་
གཅིག་སྟེ།  མཛོད་ལས།  ཚུལ་གནས་ཐོས་དང་བསམ་ལྡན་པས། །བསྒོམ་པ་ལ་ནི་རབ་ཏུ་སྦྱོར། །ཞེས་གསུངས་པ་ལྟར་གཞི་ཚུལ་ཁྲིམས་ལ་གནས་ནས་ཐོས་བསམ་སྒོམ་གསུམ་བསྒྲུབ་པ་ནི་སངས་རྒྱས་ཀྱི་བསྟན་པའི་དངོས་གཞི་ཡིན་ཅིང་།  ཐོས་བསམ་སྒོམ་གསུམ་དེ་སངས་
རྒྱས་ཀྱི་གསུང་རབ་དང་མཐུན་པ་ཇི་ལྟར་བསྒྲུབ་པའི་ཚུལ་གོང་དུ་སོ་སོ་ཐར་པའི་སྐབས་སུ་བཤད་པ་ལྟར་ཤེས་པར་བྱའོ། །བྱང་ཆུབ་སེམས་དཔའི་སྡོམ་པའི་སྐབས་ཏེ་གཉིས་པའི་རྣམ་པར་བཤད་པའོ།།    །།གསུམ་པ་སྔགས་སྡོམ་ཉམས་སུ་ལེན་པའི་ཚུལ་ལ་གཉིས་
ཏེ།  སྤྱིའི་རྣམ་པར་གཞག་པ་དང་།  གཞུང་གི་དོན་ལ་འཇུག་པའོ། །དང་པོ་ལ་གཉིས་ཏེ།  རྗོད་བྱེད་རྒྱུད་སྡེའི་རྣམ་གཞག །བརྗོད་བྱ་ཉམས་ལེན་གྱི་རིམ་པའོ། །དང་པོ་ལ་བཞི་སྟེ།  ཕ་རོལ་ཏུ་ཕྱིན་པའི་ཐེག་པ་ལས་རྡོ་རྗེ་ཐེག་པ་ཁྱད་པར་དུ་འཕགས་པའི་ཚུལ།  ཁྱད་པར་འཕགས་
9-2-79b


པའི་རྒྱུད་སྡེའི་དབྱེ་བ།  དབྱེ་བ་དེ་ལྡན་གྱི་གྲངས་དང་གོ་རིམ་ངེས་པ།  གྲངས་ངེས་པའི་རྒྱུད་ཀྱི་སྒྲ་བཤད་པའོ། །དང་པོ་ནི།  སློབ་དཔོན་ཛྙཱ་ན་ཤྲཱིས།  གསང་སྔགས་ཀྱི་ཐེག་པ་འདི་ཐེག་པ་ཆེན་པོ་དབུ་མ་ལས་ཁྱད་པར་ཅི་ཞིག་ཡོད་པ་བསྟན་ཅེ་ན།  དམིགས་པ་དང་།  བསྒྲུབ་པ་དང་། 
ཡེ་ཤེས་དང་།  བརྩོན་འགྲུས་དང་།  གདུལ་བྱ་མ་ལུས་པ་རྗེས་སུ་འཛིན་ནུས་པ་དང་།  ཉོན་མོངས་བྱིན་གྱིས་རློབ་པ་དང་།  བྱིན་གྱིས་རློབ་པ་མྱུར་བ་དང་།  མྱུར་དུ་འབྱུང་བ་དང་།  ཉོན་མོངས་པ་སྤོང་བ་དང་།  བསམ་པ་དང་།  སྤྱོད་པ་བླ་ན་མེད་པའི་ཐབས་མཁས་པ་སྟེ།  རྣམ་པ་བཅུ་
གཅིག་གིས་ཁྱད་པར་དུ་འཕགས་སོ། །ཞེས་པའི་དང་པོ་ནི།  དགྱེས་པ་རྡོ་རྗེ་ལ་སོགས་པའི་རྒྱུད་སྡེ་བསམ་གྱིས་མི་ཁྱབ་པ་ལ་དམིགས་པའོ། །གཉིས་པ་ནི།  བསྐྱེད་པའི་རིམ་པ་ལ་བརྟེན་ནས་ལུས་ཀྱི་བཀོད་པ་སྣ་ཚོགས་པ་དང་།  ཏིང་ངེ་འཛིན་གྱི་སྟོབས་ཀྱིས་ཀྱང་སྟོན་
ནུས་པའོ། །གསུམ་པ་ནི།  རྒྱུ་དང་།  ངོ་བོ་དང་།  ལས་དག་པ་ཡེ་ཤེས་མྱུར་དུ་འགྲུབ་པའོ། །བཞི་པ་ནི།  དམ་ཚིག་རྣམ་པར་དག་པའི་དབང་གིས་བརྩོན་འགྲུས་ཆེན་པོ་མྱུར་དུ་བརྩམ་པའོ། །ལྔ་པ་ནི།  མཚམས་མེད་པ་ལྔ་བྱེད་པ་ལ་སོགས་པ་ཐེག་པ་གཞན་དུ་སྤངས་པ་རྣམས་
ཀྱང་འདིར་འགྲུབ་པར་འགྱུར་བའོ། །དྲུག་པ་ནི།  ལྷ་མཆོད་པའི་ཚུལ་དང་བདེ་བ་ལ་བརྟེན་པའི་རྫོགས་རིམ་ལ་སོགས་པའོ། །བདུན་པ་ནི།  ད་ལྟ་ཉིད་ནས་སངས་རྒྱས་ཀྱིས་དབང་བསྐུར་ཞིང་བྱིན་གྱིས་བརླབ་པའོ། །བརྒྱད་པ་ནི།  ཚེ་འདི་དང་སྐྱེ་བ་བདུན་ནམ།  བཅུ་དྲུག་ན་ངེས་
པར་འཚང་རྒྱ་བའོ། །དགུ་པ་ནི།  དབྱིབས་དང་ཁ་དོག་གི་དམ་ཚིག་གིས་ཉོན་མོངས་པ་རང་བཞིན་གྱིས་གྲོལ་བའོ། །བཅུ་པ་ནི་བསྐྱེད་རིམ་གྱི་དམིགས་པས་ཐ་མལ་གྱི་སྣང་བ་འགགས།  གསང་སྔགས་བཟླས་པས་ངག་རྒྱལ་བའི་བཀར་འགྱུར།  ཐུགས་ཀྱི་རྣལ་འབྱོར་གྱིས་
9-2-80a


ཆོས་ཐམས་ཅད་སྒྱུ་མ་ལྟ་བུར་ཤེས་ཤིང་ཉོན་མོངས་པ་ཚད་མེད་པ་སྤོང་བའོ། །བཅུ་གཅིག་པ་ནི།  དཀའ་ཐུབ་སྡོམ་པ་མི་བཟད་པ། །བསྟེན་པས་འགྲུབ་པར་མི་འགྱུར་གྱི། །འདོད་པའི་ལོངས་སྤྱོད་ཐམས་ཅད་ལ། །བརྟེན་ན་མྱུར་དུ་འགྲུབ་པར་འགྱུར། །ཞེས་པ་ལྟར།  
འདོད་པའི་ལོངས་སྤྱོད་ཐམས་ཅད་ལ་རྣམ་པར་རྟོག་པ་སྤངས་ནས་སྤྱོད་པའོ། །སློབ་དཔོན་ཤཱནྟི་པས།  ཕ་རོལ་ཏུ་ཕྱིན་པ་དང་སྔགས་ཀྱི་ཐེག་པ་ལ་དོན་དམ་པའི་བདེན་པ་ཁྱད་པར་མེད་ཀྱང་།  ཀུན་རྫོབ་ཀྱི་བདེན་པའི་ཁྱད་པར་ལ་སྣང་བའི་དམིགས་པ་རྣམས་ལྷར་བསྒོམས་པས་
དམིགས་པ་རྒྱ་ཆེ་བ་དང་།  དུས་གསུམ་གྱི་སངས་རྒྱས་ཀྱི་བདེན་པའི་དམ་ཚིག་རྣམས་ཡིད་བཞིན་དུ་བཟུང་བས་བྱིན་རླབས་ཁྱད་པར་ཅན་སྐྱེ་བས་གྲོགས་རྒྱ་ཆེ་བ་དང་།  འགྲོ་བའི་དོན་དང་ཞིང་ཡོངས་སུ་དག་པ་ད་ལྟ་ཉིད་ནས་སྦྱོང་བས་སྤྱོད་པ་རྒྱ་ཆེ་བ་སྟེ།  གསུམ་པོ་འདིས་རྡོ་རྗེ་
ཐེག་པ་ཁྱད་པར་དུ་འཕགས་པར་བཞེད་དོ། །རྗེ་བཙུན་ས་སྐྱ་པ་རྣམས་ཀྱིས་ཚུལ་གསུམ་སྒྲོན་མེ་ལས།  དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་པ་
ལྟར་བཞེད་དེ།  རྒྱུད་སྡེ་སྤྱིའི་རྣམ་གཞག་ཏུ་བལྟ་བར་བྱའོ། །གཉིས་པ་ལ་ལྔ་སྟེ།  གཉིས་སུ་དབྱེ་བ།  གསུམ་དུ།  བཞི་རུ།  ལྔ་རུ།  དྲུག་ཏུ་དབྱེ་བའོ། །དང་པོ་ནི།  རྡོ་རྗེ་རྩེ་མོར།  ཕྱི་དང་གསང་བ་ཐེག་པ་གསུམ། །ཞེས་ཕྱིའི་རྒྱུད་དང་གསང་བའི་རྒྱུད་གཉིས་སུ་གསུངས་སོ། །འཇིག་རྟེན་
གསུམ་རྒྱལ་གྱི་རྟོག་པའི་འགྲེལ་པ་ལས།  གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱི་ལམ་ཡང་།  སངས་རྒྱས་བཅོམ་ལྡན་འདས་ཀྱིས་རྣམ་པ་གཉིས་སུ་གསུངས་ཏེ།  སེམས་ཅན་རྟོག་པ་མང་བ་རྣམས་ཀྱི་དོན་དུ་བྱ་བའི་རྒྱུད་རྣམས་གསུངས་སོ། །
9-2-80b


གཅིག་ཁོ་ནར་རྣལ་འབྱོར་གྱིས་བསྒྲུབ་པར་འདོད་པ་རྣམས་ལ་རྣལ་འབྱོར་གྱི་རྒྱུད་རྣམས་བཤད་དོ། །ཞེས་བྱ་བའི་རྒྱུད་དང་རྣལ་འབྱོར་གྱི་རྒྱུད་གཉིས་སུ་གསུངས་སོ། །གཉིས་པ་ནི་སྔགས་དོན་རྣམ་གཟིགས་ལས།  རྣལ་འབྱོར་སྤྱོད་དང་བྱ་བའི་རྒྱུད། །དེ་བཞིན་ཕ་རོལ་ཕྱིན་པའི་
ཚུལ། །ཞེས་དང་།  སངས་རྒྱས་གསང་བས།  རྣལ་འབྱོར་སྤྱོད་དང་བྱ་དབྱེ་བས། །ཞེས་བྱ་བའི་རྒྱུད།  སྤྱོད་པའི་རྒྱུད།  རྣལ་འབྱོར་གྱི་རྒྱུད་གསུམ་དུ་གསུངས་སོ། །ཐམས་ཅད་གསང་བའི་རྒྱུད་ལས།  བྱ་སྤྱོད་གཉིས་ཀ་རྣལ་འབྱོར་རྒྱུད། །ཞེས་གསུམ་དུ་གསུངས།  གསུམ་པ་ནི་གཉིས༷་ཏེ༷། 
གུར་ལས།  དམན་པ་རྣམས་ལ་བྱ་བའི་རྒྱུད། །བྱ་མིན་རྣལ་འབྱོར་དེ་ལྟག་ལ། །སེམས་ཅན་མཆོག་ལ་རྣལ་འབྱོར་མཆོག །རྣལ་འབྱོར་བླ་མེད་དེ་ལྟག་ལ། །ཞེས་རྒྱུད་སྡེ་བཞིར་གསུངས་སོ། །བཞི་པ་ནི།  མཁའ་འགྲོ་རྒྱ་མཚོར།  བྷ་ག་རྣམས་སུ་རྒྱུད་རྣམས་ལྔ། །བྱ་བ་ལ་སོགས་བླ་
མེད་མཐར། །ཞེས་ལྔ་དང་།  ཤཱནྟི་པས།  བྱ་བའི་རྒྱུད།  སྤྱོད་པའི་རྒྱུད།  རྣལ་འབྱོར་རྒྱུད།  རྣལ་འབྱོར་ཆེན་པོའི་རྒྱུད།  རྣལ་འབྱོར་བླ་ན་མེད་པའི་རྒྱུད་སྡེ་ལྔར་གསུངས་སོ། །རྒྱ་གར་ཕྱག་ན་རྡོ་རྗེས་སྔ་མ་གསུམ་གྱི་སྟེང་དུ་བླ་ན་མེད་པ་དང་།  གོང་ན་མེད་པའི་རྒྱུད་ལྔ་ཞེས་དང་།  རབ་ཏུ་སྒྲོན་
གསལ་ལས།  སྔ་མ་གསུམ་གྱི་སྟེང་དུ་རྣལ་འབྱོར་བླ་མ་དང་།  རྣལ་འབྱོར་མའི་རྒྱུད་དང་ལྔ་ཞེས་དང་།  སློབ་དཔོན་བྷ་བའི་ལྷ་ལ་སོགས་པས་ཀྱེ་རྡོ་རྗེ་ལས།  དགོད་དང་བལྟ་བ་དག་གིས་དང་། །འཁྱུད་དང་དེ་བཞིན་གཉིས་གཉིས་ཀྱིས། །རྒྱུད་ཀྱང་རྣམ་པ་བཞི་རྣམས་ཀྱི། །དགོངས་
པའི་སྐད་ནི་མ་བསྒྲགས་པ། །ཞེས་བཞིར་མ་བསྒྲགས་པ་ཞེས་པའི་ཤུགས་ཀྱིས།  ལྔ་སྟོན་ཞེས་གསུངས་སོ། །ལྔ་པ་ནི་བདེ་མཆོག་རྩ་རྒྱུད་ལས།  ཇི་སྲིད་མདོ་བྱ་སྤྱོད་པ་དང་། །རྣལ་འབྱོར་གསང་མཐའི་དབྱེ་བ་ཡིས། །སེམས་ཅན་མོས་པ་སྣ་ཚོགས་པ། །དེ་དང་དེ་ལ་དགའ་བ་
9-2-81a


ཡིན། །ཞེས་མདོ་སྡེ་རྟོག་པའི་རྒྱུད་དང་།  བྱ་བ།  སྤྱོད་པ།  རྣལ་འབྱོར།  རྣལ་འབྱོར་གསང་བ།  གསང་བའི་མཐའ་སྟེ་དྲུག་ཏུ་གསུངས་སོ། །གསུམ་པ་ལ་གསུམ་སྟེ།  གྲངས་ངེས་པ།  དེ་ལ་རྩོད་པ་སྤང་བ།  གོ་རིམ་ངེས་པའོ། །དང་པོ་ནི།  དེ་ལྟར་དབྱེ་སྒོ་དུ་
མ་གསུངས་ཀྱང་།  རྒྱུད་སྡེ་རྣམ་པ་བཞིར་གྲངས་ངེས་ཏེ།  ཕྱི་རོལ་མུ་སྟེགས་ཀྱི་ལོག་པའི་སྤྱོད་པ་རྣམ་པ་བཞི་སྨྲ་བ་རྗེས་སུ་གཟུང་བའི་ཕྱིར་དུ་རྒྱུད་སྡེ་བཞི་གསུངས།  སངས་རྒྱས་པའི་གྲུབ་མཐའ་བཞི་དང་ལུང་སྒོ་བསྟུན་གྱི་དབང་དུ་བྱས་ནས་རྒྱུད་སྡེ་བཞིའི་
བསྐྱེད་ཆོག་བཞི་གསུངས།  འདོད་པ་ཁམས་ཀྱི་འདོད་ཆགས་རིགས་བཞི་མ་སྤངས་ཀྱང་བྱང་ཆུབ་བསྒྲུབ་པའི་ཕྱིར་དུ་རྒྱུད་སྡེ་བཞིའི་བདེ་བ་བཞི་གསུངས་པའི་ཕྱིར་ཏེ།  དང་པོ་ནི།  འདོད་ཆགས་ཅན་ལྷ་ཆེན་པོའི་རྗེས་སུ་འབྲངས་ནས་འདོད་ཆགས་ཆོས་སུ་སྨྲ་བ་རྗེས་སུ་གཟུང་བའི་ཕྱིར་དུ་བླ་མེད་ཀྱི་རྒྱུད་
གསུངས་ཏེ།  གསང་བ་འདུས་པ་ལས།  ཕྱག་ཆེན་ཡེ་ཤེས་འདོད་པ་ཡིས། །རྟག་ཏུ་འདོད་ཡོན་ལྔ་རྣམས་བསྟེན། །ཞེས་དང་།  བདེ་མཆོག་ལས།  སྒྱུ་མ་དག་ནི་ཐམས་ཅད་ལས། །བུད་མེད་སྒྱུ་མ་ཁྱད་པར་འཕགས། །ཞེས་སོ། །ཞེ་སྡང་ཅན་ཁྱབ་འཇུག་གི་རྗེས་སུ་འབྲངས་ནས་
འཚེ་བ་ཆོས་སུ་སྨྲ་བ་རྣམས་རྗེས་སུ་གཟུང་བའི་ཕྱིར་དུ་སྤྱོད་པའི་རྒྱུད་གསུངས་ཏེ།  ཁྲོ་བོ་ཁམས་གསུམ་རྣམ་རྒྱལ་གྱི་རྟོག་པ་ལས།  བཅོམ་ལྡན་འཇམ་པའི་དབྱངས་ཉིད་ནི། །ཁྲོ་བོའི་མིང་ནི་གཤིན་རྗེའི་གཤེད། །དེ་མཐོང་བས་ནི་ཁྲོ་བོ་གཞན། །ཐམས་ཅད་ཐམས་ཅད་ལག་
ཆ་ཤོར། །ཞེས་དང་།  ཡང་དེ་ཉིད་ལས།  དེ་ནས་འདིར་ནི་གསད་བྱ་བ། །ཇི་ལྟར་ཡང་དག་སྦྱོར་ལྡན་པས། །དོགས་པ་མེད་པར་འགྲུབ་པར་འགྱུར། །གསོད་པའི་མཆོག་ནི་བཤད་པར་བྱ། །ཞེས་སོ། །གཏི་མུག་ཅན་ཚངས་པའི་རྗེས་སུ་འབྲངས་ནས་གཙང་སྦྲ་ཆོས་སུ་སྨྲ་བ་རྣམས་
9-2-81b


རྗེས་སུ་བཟུང་བའི་ཕྱིར་དུ་བྱ་བའི་རྒྱུད་གསུངས་ཏེ།  ལེགས་གྲུབ་ལས།  ཤ་ཆང་ཀེའུ་ཙོང་དང་སྒོག་རྡོག་དང་། །འབྲུ་མར་ཏིལ་དང་ལ་ཕུག་སུ་ར་ཎ། །འབྱུང་པོའི་ཤ་དང་ལྷ་བཤོས་གཏོར་མ་དང་། །གུ་ལང་མཆོད་བྱས་གཏོར་མ་མི་ཟའོ། །ངས་ནི་སྔགས་པས་ཁ་ཟས་དཀར་གསུམ་དང་། །རྩ་བ་
སྡོང་བུ་འབྲས་བུ་ཚོད་མ་དང་། །འབྲུ་མར་ཚིགས་མ་དར་བ་འོ་སྐོལ་དང་། །ཐུག་པ་རྣམས་ནི་བཟའ་བཏུང་ཡིན་པར་གསུངས། །ཞེས་སོ། །རྐྱེན་མཉམ་པ་སྐབས་ཐོབ་ཀྱིས་གསུམ་ཀའི་རྗེས་སུ་འབྲངས་ནས་གསུམ་ཀ་ཆོས་སུ་སྨྲ་བ་རྣམས་རྗེས་སུ་གཟུང་བའི་ཕྱིར་དུ་རྣལ་འབྱོར་གྱི་རྒྱུད་གསུངས་
ཏེ།  དེ་ཉིད་འདུས་པའི་དུམ་བུ་དང་པོར།  འདོད་ཆགས་ཅན་རྗེས་སུ་གཟུང་བའི་ཕྱིར་དུ་ལྷ་ཐམས་ཅད་ཆགས་པའི་ཉམས་ཅན།  གཉིས་པར་ཞེ་སྡང་ཅན་རྗེས་སུ་གཟུང་བའི་ཕྱིར་དུ་ཁྲོ་བོའི་ཉམས་ཅན།  གསུམ་པར་གཏི་མུག་ཅན་རྗེས་སུ་གཟུང་བའི་ཕྱིར་དུ་ཞི་བའི་ཉམས་ཅན་དང་།  བཞི་པར་མ་ངེས་པ་
རྗེས་སུ་གཟུང་བའི་ཕྱིར་དུ་སྐུ་མདོག་དང་ཉམས་སྣ་ཚོགས་པར་གསུངས་སོ། །འདི་ནི་དེ་ཉིད་འདུས་པའི་རྒྱུད་ཀྱི་རྗེས་སུ་འབྲངས་ནས་རབ་འབྱོར་བསྐྱངས་དང་ཀུན་དགའ་སྙིང་པོ་ལ་སོགས་པར་བཞེད་པར་གྲག་གོ།  ཞེས་རྗེ་བཙུན་རྩེ་མོས་གསུངས་སོ། །དེ་ལ་ཕྱིས་ཀྱི་བླ་མ་ཁ་ཅིག །གང་ཟག་དེ་
དག་རྒྱུད་སྡེ་དེ་དང་དེས་འདུལ་སྲིད་པ་ལ་བྱེད་ན་ནི།  དེས་མི་འདྲ་བའི་ཁྱད་པར་ངོས་མི་ཟིན་ཏེ།  རྒྱུད་སྡེ་རེ་རེས་ཀྱང་གང་ཟག་བཞི་ཀ་འདུལ་སྲིད་པའི་ཕྱིར་རོ། །གདུལ་བྱའི་གཙོ་བོ་ལ་དེ་དག་དགོས་པར་འདོད་ན་ནི།  ཤིན་ཏུ་མི་རིགས་ཏེ།  སྔགས་ཀྱི་ཐེག་པའི་གདུལ་བྱའི་གཙོ་བོ་རྣམས་ནི་རྒྱལ་
བའི་བསྟན་པ་ལ་འཇུག་པའི་གདུལ་བྱ་མཆོག་ཡིན་པས།  དེ་ལ་སྔོན་དུ་ལྟ་བ་ལོག་པ་ལ་ཞུགས་པ་ཅིག་མི་དགོས་པའི་ཕྱིར་དང་།  དང་པོ་ནས་ཡང་དག་པའི་གྲུབ་མཐའ་ལ་ཞུགས་པ་རྣམས་རྒྱུད་དེ་དག་གི་གདུལ་བྱའི་གཙོ་བོར་མི་འགྱུར་བའི་སྐྱོན་ཡོད་པའི་ཕྱིར་རོ། །ཀུན་སྙིང་གི་བཞེད་པ་
9-2-82a


ཡང་མིན་ཏེ།  དེས་མཛད་པའི་གསང་འདུས་ཀྱི་འགྲེལ་པ་ལས།  ཁྱབ་འཇུག་ལ་སོགས་པའི་རྒྱུད་ལ་དགའ་བ་ལ།  བླ་མེད་ཀྱི་འདོད་ཆགས་ཀྱི་ཀུན་སྤྱོད་རྣམས་བསྟན་པར་གསུངས་པའི་ཕྱིར་རོ། །དེས་ན་དེ་ཉིད་འདུས་པའི་དུམ་བུ་བཞི་འདོད་ཆགས་དང་།  ཁྲོ་བ་ལ་
སོགས་པའི་ཉོན་མོངས་པ་ཅན་ལ་གསུངས་པ་ལ་དཔགས་ནས་སྦྱར་བ་ཙམ་དུ་སྣང་བས་ཤེས་བྱེད་མི་སྣང་ངོ་ཞེས་ཟེར་རོ། །འོ་ན་ཁྱབ་འཇུག་ལ་སོགས་པ་ལ་བླ་མེད་ཀྱི་འདོད་ཆགས་ཀྱི་ཀུན་སྤྱོད་བསྟན་པར་གསུངས་པ་དེ་ཡང་འདུལ་སྲིད་པ་ཙམ་ལ་དགོངས་པ་ཡིན་ནམ།  གདུལ་བྱའི་གཙོ་
བོ་ལ་དེ་དག་དགོས་པ་ཡིན་བརྟགས་ན་སྔ་མ་ཇི་ལྟ་བ་བཞིན་དུ་མཚུངས་ཤིང་།  དེ་ཉིད་འདུས་པའི་དུམ་བུ་བཞི་འདོད་ཆགས་དང་ཁོང་ཁྲོ་བ་ལ་སོགས་པའི་ཉོན་མོངས་ཅན་ལ་གསུངས་པ་ཡང་བརྟགས་ན་སྔ་མ་བཞིན་དུ་མཚུངས་སོ། །དེ་བཞིན་དུ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཉོན་
མོངས་པ་བརྒྱད་ཁྲི་བཞི་སྟོང་གི་གཉེན་པོར་གསུངས་པ་དང་།  འདོད་ཆགས་ཞེ་སྡང་གཏི་མུག་གིས། །རྒྱུད་ཀྱང་རྣམ་པ་གསུམ་དུ་འགྱུར། །ཞེས་པ་རྒྱུད་སྡེ་གསུམ་དུག་གསུམ་གྱི་གཉེན་པོར་གསུངས་པ་སོགས་སྤང་བྱ་གང་སྤོང་བའི་ཆེད་དུ་ཆོས་ཀྱི་ཕུང་པོ་གང་གསུངས་པ་མཐའ་དག་ལ་
མཚུངས་པས།  རྒྱལ་བའི་བསྟན་པ་སུན་འབྱིན་པའི་དགག་སྒྲུབ་འབའ་ཞིག་ཏུ་སྣང་ངོ་། །ཁྱབ་འཇུག་གི་ཞེ་སྡང་འདུལ་བའི་ཆེད་དུ་བླ་མེད་གསུངས་པ་དང་།  དེའི་འདོད་ཆགས་འདུལ་བའི་ཆེད་དུ་བླ་མེད་གསུངས་པ་འགལ་བར་འདོད་པ་ཡང་དོན་མ་རྟོགས་པ་སྟེ།  ཁྱབ་འཇུག་ལ་འདོད་
ཆགས་དང་།  ཞེ་སྡང་གཉིས་ཀ་ཤས་ཆེན་པོར་ཡོད་ཅིང་།  བླ་མེད་ལས་ཀྱང་འདོད་ཆགས་དང་ཞེ་སྡང་གི་ཀུན་སྤྱོད་གཉིས་ཀ་གསུངས་པའི་ཕྱིར་རོ། །གཉིས་པ་ནི།  སངས་རྒྱས་པའི་མཚན་ཉིད་ཀྱི་ཐེག་པའི་གྲུབ་མཐའ་ལ་བརྗོད་དུ་མེད་པའི་གང་ཟག་གི་བདག་ཁས་ལེན་
9-2-82b


པ་དང་།  དེ་ཁས་མི་ལེན་ཀྱང་རྡུལ་ཕྲན་དང་ཤེས་པ་སྐད་ཅིག་ཆ་མེད་བདེན་པར་ཁས་ལེན་པ་དང་།  གཟུང་བྱའི་ཡུལ་བདེན་པར་མེད་ཀྱང་འཛིན་པའི་ཤེས་པ་སྐད་ཅིག་མ་ཡོད་པར་ཁས་ལེན་པ་དང་།  གཟུང་འཛིན་གཉིས་ཀ་བདེན་པར་མེད་པ་ཁས་ལེན་པ་དང་བཞི་ཡོད་པས་དེ་
དང་ལུང་སྒོ་བསྟུན་གྱི་དབང་དུ་བྱས་ནས།  བྱ་རྒྱུད་ལ་མདུན་དུ་ཡེ་ཤེས་སེམས་དཔའ་སྤྱན་དྲངས་ཤིང་།  བདག་ཉིད་ཐ་མལ་དུ་གནས་པ་དང་།  སྤྱོད་རྒྱུད་ལ་བདག་ཉིད་ཀྱང་ལྷར་བསྐྱེད་ནས་མདུན་དུ་ཡེ་ཤེས་སེམས་དཔའ་སྤྱན་དྲངས་ནས་བདག་ལ་བསྟིམ་པ་དང་།  རྣལ་འབྱོར་གྱི་རྒྱུད་
དུ་བདག་དམ་ཚིག་པར་བསྐྱེད་ནས།  དེ་ལ་ཡེ་ཤེས་པ་བཅུག་པ་དང་།  བླ་མེད་དུ་ཐུན་མཚམས་ཀྱི་གནས་སྐབས་སུ་ཡང་ཡེ་ཤེས་སེམས་དཔའ་གཤེགས་པར་མི་འདོད་པ་སྟེ།  བསྐྱེད་ཆོག་བཞི་རིམ་པ་བཞིན་དུ་གསུངས་སོ། །དེ་ལ་ཕྱིས་ཀྱི་བླ་མ་ཁ་ཅིག་སངས་རྒྱས་པའི་གྲུབ་མཐའ་
སྨྲ་བ་བཞི་དང་སྒོ་བསྟུན་ནས་ལྷའི་བསྐྱེད་ཆོག་མི་འདྲ་བ་བཞིའི་སྒོ་ནས་རྒྱུད་སྡེ་བཞིར་འཇོག་པ་ལ་ཤེས་བྱེད་ཅི་ཡང་མི་སྣང་ཞིང་།  རང་སངས་རྒྱས་དང་།  རྣལ་འབྱོར་རྒྱུད་ཀྱི་བསྐྱེད་ཆོག་སྦྱར་ཡང་།  རང་རྒྱལ་གྲུབ་མཐའ་སྨྲ་བ་བཞིའི་ཡ་གྱལ་མ་ཡིན་པའི་ཕྱིར་མི་འཐད་དོ། །འདིར་འཕགས་པ་ཡབ་
སྲས་ཀྱི་བཞེད་པར་འདོད་པ་ཡང་།  ཡེ་ཤེས་རྡོ་རྗེ་ཀུན་ལས་བཏུས་ལས།  བྱ་རྒྱུད་ཀྱི་སྐབས་སུ་རང་ཉིད་ལྷའི་སྙེམས་པ་མེད་པ་དང་།  ཡེ་ཤེས་སེམས་དཔའི་བདེ་བ་མེད་པར་བཤད་པ་ཙམ་ལ་དཔགས་པར་སྣང་ཡང་།  བྱ་རྒྱུད་ལ་བདག་བསྐྱེད་མེད་པ་ཡེ་ཤེས་རྡོ་རྗེ་ཀུན་ལས་བཏུས་པའི་ལུང་
དོན་མ་ཡིན་པ་འཆད་པར་འགྱུར་རོ། །ཞེས་ཟེར་རོ། །འདི་ནི་ཕྱོགས་སྔའི་དོན་མ་རྟོགས་བཞིན་དུ་དགག་པ་བྱེད་པ་སྟེ།  མཚན་ཉིད་ཐེག་པ་ལ་གྲུབ་མཐའ་མི་འདྲ་བ་བཞི་ཡོད་པས་དེ་དང་ལུང་སྒོ་བསྟུན་གྱི་དབང་དུ་བྱས་ནས་བསྐྱེད་ཆོག་བཞི་གསུངས་པར་སྨྲས་ཀྱི་གྲུབ་མཐའ་སྨྲ་བ་བཞིའི་སྒོ་ནས་
9-2-83a


རྒྱུད་སྡེ་བཞིར་འཇོག་པ་མ་སྨྲས་པའི་ཕྱིར་རོ། །དེས་ན་རང་སངས་རྒྱས་གྲུབ་མཐའ་སྨྲ་བ་བཞིའི་ཡ་གྱལ་མ་ཡིན་ཞེས་པ་ཡང་དོན་མ་རྟོགས་པ་ཁོ་ནའོ། །ཡེ་ཤེས་རྡོ་རྗེ་ཀུན་ལས་བཏུས་ལས།  བྱ་རྒྱུད་ལ་བདག་བསྐྱེད་མེད་པར་བཤད་ཀྱང་།  བྱ་རྒྱུད་ལ་བདག་བསྐྱེད་མེད་པ་དེའི་ལུང་
དོན་མ་ཡིན་པ་འཆད་པར་འགྱུར་པ་ནི་ཤིན་ཏུ་ངོ་མཚར་ཏེ།  འདི་འདྲ་ཅིར་འགྱུར་བརྟག་དགོས་སོ། །གསུམ་པ་ནི།  འདོད་ཁམས་ཀྱི་གཞན་སྤྲུལ་དབང་བྱེད་པ་བལྟས་པ་ཙམ་གྱིས་ཆགས་པ་ཚིམ་ལ།  དེ་ཙམ་གྱི་བདེ་བ་སྣང་བ་ནི་བྱ་བའི་རྒྱུད།  འཕྲུལ་དགའ་བ་ནི་དགོད་པ་ཙམ་གྱིས་ཆགས་པ་ཚིམ་ལ།  དེ་ཙམ་གྱི་
བདེ་བ་སྣང་བ་ནི་སྤྱོད་པའི་རྒྱུད།  དགའ་ལྡན་པ་དང་མཐའ་བྲལ་པ་ལག་བཅངས་དང་འཁྱུད་པ་ཙམ་གྱིས་ཆགས་པ་ཚིམ་ལ།  དེ་ཙམ་གྱི་བདེ་བ་སྣང་བ་ནི་རྣལ་འབྱོར་གྱི་རྒྱུད།  སུམ་ཅུ་རྩ་གསུམ་པ་དང་།  རྒྱལ་ཆེན་རིས་བཞི་པ་དང་།  མི་ལ་སོགས་པ་རྣམས་དབང་པོ་གཉིས་སྦྱོར་གྱིས་ཆགས་པ་
ཚིམ་ལ།  དེ་ཙམ་གྱི་བདེ་བ་སྣང་བ་ནི་བླ་མེད་ཀྱི་རྒྱུད་དོ། །གཉིས་པ་དེ་ལ་རྩོད་པ་སྤོང་བ་ནི།  དེ་ལྟར་རྒྱུད་སྡེ་བཞིར་གྲངས་ངེས་ན་གཉིས་ལ་སོགས་པ་ནས་དྲུག་གི་བར་དུ་གསུངས་པ་དང་འགལ་ལོ་སྙམ་ན་སྐྱོན་མེད་དེ།  གཉིས་སུ་གསུངས་པ་ནི་རྒྱུད་སྡེ་འོག་མ་གཉིས་ཕྱི་ལུས་ངག་གི་བྱ་བ་སྟོན་པར་
མཚུངས་པས་བྱ་བའི་རྒྱུད་དུ་བསྡུས་ཤིང་།  གོང་མ་གཉིས་ཏིང་ངེ་འཛིན་གཙོ་ཆེ་བར་མཚུངས་པས་རྣལ་འབྱོར་གྱི་རྒྱུད་དམ་གསང་བའི་རྒྱུད་དུ་བསྡུས་པ་ཡིན་ལ།  གསུམ་དུ་བཤད་པ་ལ་ཡང་རྒྱུ་མཚན་ཕྱི་མ་འདི་ཉིད་མཚུངས་སོ། །ལྔར་དབྱེ་བ་ནི་བླ་མེད་ལ་རྣལ་འབྱོར་ཕ་མའི་དབྱེ་བ་ཤེས་པར་བྱ་
བའི་ཕྱིར་དུ་གཉིས་སུ་ཕྱེ་བ་ཙམ་ཡིན་ཅིང་།  དྲུག་ཏུ་གསུངས་པ་ནི།  བྱ་རྒྱུད་ཀྱི་ནང་ཚན་ལས་ཚོགས་གཙོ་བོར་སྟོན་པ་ལ་རྟོག་པའི་རྒྱུད་ཅེས་ལོགས་སུ་བཞག་ཅིང་།  ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས།  རྒྱུད་སྡེ་ལྔར་ཕྱེ་བ་ལ་ཡང་རྒྱུ་མཚན་འདི་ཉིད་ཡིན་ལ།  བླ་མེད་ཀྱི་ནང་ཚན་འཁོར་ལོ་
9-2-83b


བདེ་མཆོག་ཟབ་ཅིང་རྟོགས་པར་དཀའ་བ་དང་།  རྒྱུད་འདིའི་ལུགས་ཀྱིས་སྤྲུལ་པའི་སྐུ་ད་ལྟ་འཛམ་བུའི་གླིང་ན་དངོས་སུ་བཞུགས་པས་བྱིན་རླབས་མྱུར་བ་ལ་དགོངས་ནས།  གསང་བའི་མཐའ་ཞེས་ལོགས་སུ་ཕྱེའོ། །གསུམ་པ་གོ་རིམ་ངེས་པ་ནི།  གང་ཟག་དབང་པོ་དང་།  སྦྱངས་པ་ཆེ་འབྲིང་
བཞི་ལ་དགོངས་ནས་རྒྱུད་སྡེ་བཞི་རིམ་པ་བཞིན་དུ་བཞག་སྟེ།  བློ་དམན་པ་ཕྱིའི་བྱ་བ་ཁྲུས་ལ་སོགས་པ་ལ་དགའ་བ་ལ་བྱ་བའི་རྒྱུད།  དེ་བས་མཆོག་ཕྱི་ལུས་ངག་དང་།  ནང་ཏིང་ངེ་འཛིན་གཉིས་ཀ་ལ་སྤྱོད་པ་ལ་སྤྱོད་པའི་རྒྱུད།  དེ་བས་ཀྱང་མཆོག་ཏིང་ངེ་འཛིན་ཁོ་ན་ལ་གཙོ་བོར་སྤྱོད་པ་ལ་རྣལ་འབྱོར་གྱི་
རྒྱུད།  དེ་བས་ཀྱང་མཆོག་ཏིང་ངེ་འཛིན་གྱི་ཁྱད་པར་གོང་ན་མེད་པ་ལ་སྤྱོད་པ་ལ་རྣལ་འབྱོར་བླ་ན་མེད་པའི་རྒྱུད་གསུངས་སོ། །བཞི་པ་སྒྲ་བཤད་པ་ནི།  ཅིའི་ཕྱིར་བྱ་བའི་རྒྱུད་ཅེས་བྱ་ཞེ་ན།  ཕྱི་ལུས་ངག་གི་བྱ་བ་གཙོ་བོར་སྟོན་པའི་ཕྱིར་ཏེ།  བསམ་གཏན་ཕྱི་མའི་འགྲེལ་པ་ལས།  རྒྱུད་འདི་ནི་ཕྱི་ལུས་ངག་
གི་བྱ་བ་གཙོ་བོར་སྟོན་པས་བྱ་བའི་རྒྱུད་ཅེས་གསུངས་པས་སོ། །ཅིའི་ཕྱིར་སྤྱོད་པའི་རྒྱུད་ཅེས་བྱ་ཞེ་ན།  ལུས་ངག་གི་བྱ་བ་དང་ཏིང་ངེ་འཛིན་ཆ་མཉམ་པར་སྤྱོད་པ་སྟེ།  རྣམ་སྣང་མངོན་བྱང་གི་དོན་བསྡུས་པ་ལས།  རྒྱུད་འདི་ནི་གཙང་སྦྲ་ལ་སོགས་པ་ལ་སྨད་པ་འཇིག་རྟེན་དང་འགལ་བར་སྤྱོད་པས་གཉིས་ཀ་
ལ་སྤྱོད་པས་སྤྱོད་པའི་རྒྱུད་ཅེས་གསུངས་སོ། །ཅིའི་ཕྱིར་རྣལ་འབྱོར་གྱི་རྒྱུད་ཅེས་བྱ་ཞེ་ན།  ཏིང་ངེ་འཛིན་གཙོ་བོར་བྱེད་པ་སྟེ།  དེ་ཁོ་ན་ཉིད་སྣང་བའི་དོན་བསྡུས་པ་ལས།  རྒྱུད་འདི་ནི་ཏིང་ངེ་འཛིན་གཙོ་བོར་སྟོན་པས་རྣལ་འབྱོར་གྱི་རྒྱུད་དོ། །ཞེས་གསུངས་པས་སོ། །ཅིའི་ཕྱིར་རྣལ་འབྱོར་བླ་ན་མེད་པའི་རྒྱུད་ཅེས་
བྱ་ཞེ་ན་ཏིང་ངེ་འཛིན་གྱི་ཁྱད་པར་གོང་ན་མེད་པ་སྟོན་པའི་ཕྱིར་ཏེ།  སཾ་བུ་ཊི་ལས།  གསང་བའི་ཡེ་ཤེས་བླ་ན་མེད། །སྙིང་པོ་བཅོམ་ལྡན་བཤད་དུ་གསོལ། །ཞེས་པ་དང་།  གསང་བ་འདུས་པ་ལས་ཀྱང་།  སྐུ་དང་གསུང་དང་ཐུགས་ཀྱི་མཆོག །དེ་བཞིན་གཤེགས་པ་ཀུན་གྱིས་ཀྱང་། །བྱང་ཆུབ་སེམས་ནི་
9-2-84a


བླ་ན་མེད། །སྙིང་པོ་བཅོམ་ལྡན་བཤད་དུ་གསོལ།  ཞེས་སོ། །གཉིས་པ་བརྗོད་བྱ་ཉམས་ལེན་གྱི་རིམ་པ་ལ་བཞི་ལས།  དང་པོ་བྱ་རྒྱུད་ཀྱི་ཉམས་ལེན་ལ་གསུམ་སྟེ།  འཇུག་པའི་སྤྱོད་པ།  སྦྱོར་བའི་སྤྱོད་པ།  བསྒྲུབ་པའི་སྤྱོད་པའོ། །དང་པོ་ནི།  གསང་བ་སྤྱི་རྒྱུད་ལས་བཤད་པ་ལྟར་གྱི་
སའི་ཆོ་ག །སྟ་གོན་གྱི་ཆོ་ག །འཇུག་པ་རྣམས་སྔོན་དུ་སོང་ནས་ཆུ་དང་ཅོད་པན་གྱི་དབང་གིས་སློབ་མ་སྣོད་རུང་དུ་བྱེད་པའོ། །གཉིས་པ་ལ་སྦྱོར་དངོས་རྗེས་གསུམ་ལས།  སྦྱོར་བའི་ཆོ་ག་ལ་ལས་སུ་བྱ་བའི་རིམ་པ་ལྔ་རྣལ་འབྱོར་གྱི་སྔོན་འགྲོ་གསུམ་རྣམས་སྔོན་དུ་སོང་ནས།  དངོས་གཞི་ལ་
བདག་གི་རྣལ་འབྱོར།  ལྷའི་རྣལ་འབྱོར།  སྔགས་ཀྱི་རྣལ་འབྱོར་གསུམ་ལས།  བདག་གི་རྣལ་འབྱོར་ལ་ཆོས་ཐམས་ཅད་སྟོང་པ་ཉིད་དུ་གཏན་ལ་དབབ་པ་དོན་དམ་པའི་རྣལ་འབྱོར་བསྒོམས་ནས་དེའི་ངང་ལས་རང་གི་སེམས་ཉིད་ཟླ་བའི་དཀྱིལ་འཁོར་གྱི་རྣམ་པར་བལྟས་ནས་དེ་ལ་བཟླ་བྱའི་
སྔགས་རྣམས་བཀོད་ནས།  འོད་ཟེར་སྤྲོས་པས་འཕགས་པ་མཆོད་པ་ལ་སོགས་པ་བྱས་ནས་ཟླ་བའི་དཀྱིལ་འཁོར་ལ་ཐིམ་པར་བསམས་པ་ཀུན་རྫོབ་པའི་རྣལ་འབྱོར་ཡིན་ལ།  དེ་ནས་དམ་ཚིག་གི་ཕྱག་རྒྱ་བཅས་ནས།  སྙིང་ཁ་ལ་སོགས་པ་བྱིན་གྱིས་བརླབ་པ་བྱིན་གྱིས་བརླབས་པའི་རྣལ་འབྱོར་
ཏེ་གསུམ་མོ། །དེ་ནས་ལྷའི་རྣལ་འབྱོར་བསྒོམ་པ་ནི།  མདུན་གྱི་བྲིས་སྐུ་ལ་སོགས་པའི་རྗེས་སུ་གཞལ་ཡས་ཁང་ལྷ་དང་བཅས་པའམ།  གཞལ་ཡས་ཁང་བསྐྱེད་ནས་བརྟེན་པ་ལྷ་སྤྱན་དྲང་བ་གང་རུང་བྱས་ཏེ།  ཞལ་ཕྱག་གསལ་བཏབ་ནས་དམ་ཚིག་གི་ཕྱག་རྒྱ་བསྟན།  དེ་ལ་མཆོད་བསྟོད་བྱས་ཏེ་
སྡིག་པ་བཤགས་པའི་རྒྱུན་བཤགས་བྱས་ནས་ཚད་མེད་པ་བཞི་བསྒོམ་པའོ། །དེ་ནས་སྔགས་ཀྱི་རྣལ་འབྱོར་ནི།  བགྲང་ཕྲེང་མཚན་ཉིད་དང་ལྡན་པ་འདུས་བྱས་ནས།  ལེགས་གྲུབ་ལས་གསུངས་པ་ལྟར་གྱི་གཙང་སྦྲ་ལ་སོགས་པའི་ཀུན་སྤྱོད་དང་།  བརྟུལ་ཞུགས་ལ་གནས་པར་བྱས་ནས།  རང་དང་
9-2-84b


མདུན་གྱི་ལྷའི་སྙིང་ཁར་ཟླ་བའི་དཀྱིལ་འཁོར་ལ་དབུས་སུ་ས་བོན་དང་།  མཐའ་སྐོར་དུ་བཟླ་བྱའི་སྔགས་རྣམས་གཡས་སྐོར་དུ་བཀོད་དེ།  རྡོ་རྗེའི་ཚིག་གི་བཟླས་པ་དང་།  ཤུབ་བུའི་བཟླས་པ་གཉིས་བྱའོ། །གསུམ་པ་རྗེས་ནི།  ནོངས་པ་བཟོད་པར་གསོལ་ཏེ།  སྤྱན་དྲངས་པའི་ལྷ་གཤེགས་
སུ་གསོལ་ནས་རྡོ་རྗེའི་ར་གུར་དགྲོལ།  དེ་ནས་ཐུན་མཚམས་ཀྱི་བྱ་བ་ལ་གནས་པའོ། །དེ་ལྟར་སྦྱོར་བའི་སྤྱོད་པ་སྔོན་དུ་སོང་ནས།  དངོས་གྲུབ་སྒྲུབ་པ་ན་སྔོན་དུ་བསྙེན་པ་བྱས་ནས་དེ་ནས་ལས་ལ་སྦྱར་བར་བྱའོ། །གསུམ་པ་སྒྲུབ་པའི་སྤྱོད་པ་ལ་གསུམ་སྟེ།  མེ་གནས་ཀྱི་དེ་ཉིད།  སྒྲ་གནས་ཀྱི་
དེ་ཉིད།  སྒྲ་མཐའི་དེ་ཉིད་དོ། །དང་པོ་ནི།  བདག་གི་དེ་ཁོ་ན་ཉིད་སྟོང་ཉིད་བསྒོམ་པ་སྔོན་དུ་སོང་ནས།  དེ་ལས་ལངས་ཏེ་རང་གི་ལྷའི་གསང་སྔགས་དྲིལ་བུའི་སྒྲ་བཞིན་དུ་རྒྱུན་མ་ཆད་པར་འབྱུང་བ་ལ་བདེན་ཞེན་མེད་པར་བསམ་གཏན་དུ་བྱའོ། །དེ་ནས་སྙིང་ཁར་མར་མེའི་མེ་ལྕེ་ལྟ་བུའི་མེ་
འབར་བར་བསམས་ལ།  དེའི་ནང་དུ་སྔར་བཤད་པའི་སྒྲའི་ཕྲེང་བ་གནས་པར་སྲོག་རྩོལ་བཀག་ནས་བསྒོམ་པར་བྱའོ། །གཉིས་པ་ནི།  རང་གི་སྙིང་ཁར་ཟླ་བའི་དཀྱིལ་འཁོར་ཤིན་ཏུ་ཕྲ་བའི་ནང་དུ་མེ་ལྕེ་འོད་བཟང་པོ་འབར་བ་བསྒོམས་ནས།  དེ་ལ་སྔགས་ཀྱི་ཡི་གེ་བཞག་ནས།  ལུས་
སེམས་བདེ་བར་འདུག་སྟེ་བསྒོམ་མོ། །གསུམ་པ་ནི།  དེ་ལ་སྒྲ་མཐའ་ཞེས་པ་སྔགས་ཀྱི་སྒྲ་ཙམ་ལ་སེམས་གནས་པ་ཡོངས་སུ་བཏང་བའི་མཐའ་གཉིས་སུ་མེད་པའི་དེ་ཉིད་ཡིན་ལ།  ཇི་ལྟར་བཏང་བའི་ཚུལ་ནི།  གསང་སྔགས་ཡན་ལག་ཏུ་གྱུར་པར་སྣང་བ་དང་།  སྒྲ་དང་།  ཡིད་དང་།  ཚིག་
རྣམ་པར་དག་པའི་གནས་སྐབས་རྣམས་བཏང་དགོས་པས།  དང་པོ་ནི་མདུན་གྱི་ལྷའི་སྐུར་སྣང་བའོ། །གཉིས་པ་ནི།  ཤུབ་བུའི་བཟླས་བརྗོད་བྱེད་པའི་གནས་སྐབས་སོ། །གསུམ་པ་ནི།  ཡིད་ཀྱི་བཟླས་བརྗོད་བྱེད་པའི་གནས་སྐབས་སོ། །བཞི་པ་ནི།  དེ་གཉིས་ཀྱི་ཚིག་རྣམ་པར་དག་པའི་
9-2-85a


མེར་གནས་དང་།  སྒྲ་གནས་ཀྱི་གནས་སྐབས་སོ། །དེ་དག་ཇི་ལྟར་བཏང་བའི་རིམ་པ་ནི།  སྔ་མ་སྔ་མ་ལ་དམིགས་པ་བཏང་ནས་ཕྱི་མ་ཕྱི་མ་ལ་འཕོས་ཏེ།  མཐར་སྒྲ་གནས་ཀྱང་བཏང་ནས་ཆོས་སྐུའི་ཏིང་ངེ་འཛིན་ལ་ནན་ཏན་དུ་བྱེད་པའོ། །གཉིས་པ་སྤྱོད་རྒྱུད་ཀྱི་ཉམས་ལེན་ནི།  སྤྱོད་པ་
གསུམ་པོ་ཕལ་ཆེར་བྱ་རྒྱུད་དང་འདྲ་བ་ལས།  ཁྱད་པར་ནི་འཇུག་པའི་སྤྱོད་པའི་སྐབས་སུ་ཆུ་དང་ཅོད་པན་གྱི་དབང་གཉིས་ཀྱི་སྟེང་དུ་རྡོ་རྗེ་དང་།  དྲིལ་བུ་དང་།  མིང་གི་དབང་གསུམ་སྟེ།  ལྔ་ཡོད་པར་རྒྱུད་སྡེ་གོང་མ་ལས་གསུངས་སོ། །སྦྱོར་བའི་སྤྱོད་པའི་སྐབས་སུ།  རྣམ་སྣང་མངོན་བྱང་
ལས། །ཡི་གེ་དང་ནི་ཡི་གེ་སྦྱར། །དེ་བཞིན་གཞི་ལས་གཞིར་གྱུར་པ། །ཤིན་ཏུ་བསྡམས་པས་ཡིད་ལས་ནི། །བཟླས་བརྗོད་འབུམ་ཕྲག་གཅིག་བྱའོ། །ཡི་གེ་བྱང་ཆུབ་སེམས་ཡིན་ཏེ། །གཉིས་པ་སྒྲ་ཞེས་བྱ་བ་ཡིན། །གཞི་ནི་རང་གི་ལྷར་བཞག་པ། །རང་གི་ལུས་ཀྱི་གནས་ལ་བྱ། །གཞི་
གཉིས་པ་ནི་རྫོགས་སངས་རྒྱས། །རྐང་གཉིས་མཆོག་ཏུ་ཤེས་པར་བྱ། །ཞེས་ཏེ།  ཡི་གེ་དང་པོ་བྱང་ཆུབ་ཀྱི་སེམས་སྟོང་པ་ཉིད་བསྒོམས་ནས།  དེའི་རྗེས་ལ་ཡི་གེ་གཉིས་པ་སྔགས་ཀྱི་སྒྲར་ལྡང་།  དེ་ལས་གཞི་དང་པོར་རང་ཉིད་སངས་རྒྱས་ཀྱི་སྐུར་བསྐྱེད་ལ།  དེ་སྔགས་དང་ཕྱག་རྒྱ་ལ་སོགས་
པས་བྱིན་གྱིས་བརླབས།  དེ་ནས་གཞི་གཉིས་པ་རང་གི་མདུན་དུ་སངས་རྒྱས་ཀྱི་སྐུ་བསྐྱེད་པའི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་བཟླས་པར་བྱ་བའི་སྔགས་ཀྱི་ཕྲེང་བ་བཀོད་ནས།  དེ་ལ་ཏིང་ངེ་འཛིན་བརྟན་པར་བྱེད་པའོ། །སྒྲུབ་པའི་སྤྱོད་པའི་སྐབས་སུ་མེ་གནས་ལ་སོགས་པའི་
ཏིང་ངེ་འཛིན་གསུམ་ཀ་ཡང་རང་ཉིད་ལྷའི་རྣལ་འབྱོར་ལ་གནས་ནས་བསྒོམ་པའོ། །གསུམ་པ་རྣལ་འབྱོར་རྒྱུད་ཀྱི་ཉམས་ལེན་ནི།  རྡོ་རྗེ་རྩེ་མོ་ལས།  སྨིན་པ་དང་ནི་གྲོལ་བའི་ལམ། །སངས་རྒྱས་བྱང་ཆུབ་བསྟན་པའི་མཆོག །ཅེས་པ་ལྟར།  སྨིན་གྲོལ་གཉིས་ལས།  སྨིན་བྱེད་ཀྱི་དབང་ལ་
9-2-85b


ཡང་།  རྡོ་རྗེ་སློབ་མའི་དབང་དང་།  སློབ་དཔོན་གྱི་དབང་གཉིས་སོ། །དེ་ཡང་འདིར་འཇུག་པའི་གང་ཟག་ལ།  རྒྱུད་སྦྱང་བ་མ་བྱས་པ་རྣམས་སམ།  སྦྱང་བ་བྱས་ཀྱང་ཐེག་པ་ཆེན་པོ་བློའི་སྤོབས་པ་ཞན་པས་གཞན་གྱི་དོན་ལ་ད་ལྟ་ནས་འཇུག་པར་མི་ནུས་པ་རྡོ་རྗེ་སློབ་མའི་རིགས་དང་།  སྙིང་རྗེ་དང་
ཤེས་རབ་ཀྱི་རྩལ་ཆེ་བས་གཞན་དོན་གྱི་ཁུར་ད་ལྟ་ཉིད་ནས་ཁྱེར་བ་རྡོ་རྗེ་སློབ་དཔོན་གྱི་རིགས་གཉིས་ལས།  དང་པོ་ལ།  སྨིན་བྱེད་ཀྱི་དུས་སུ་རིག་པའི་དབང་ཙམ་སྟེར་ནས།  དེ་དང་འབྲེལ་བའི་ལམ་ནི།  དེ་ཉིད་འདུས་པའི་སྟོད་འགྲེལ་ལས་དེ་ལ་སློབ་མའི་དབང་དུ་བྱས་པ་ནི།  བདག་ལ་བྱིན་གྱིས་
བརླབ་པ་ལ་སོགས་པ་འདི་ལྟར་ཤེས་པར་བྱ་སྟེ།  བདག་བསྲུང་བ་དང་།  ཆུའི་ཁྲུས་དང་།  ཡང་བདག་བསྲུང་བ་དང་།  གནས་བསྲུང་བ་ཡང་བྱས་ནས།  རང་གི་ལྷ་མདུན་དུ་བཞུགས་སུ་གསོལ་ཏེ།  ཕྱག་བྱ་བ་དང་།  སྡིག་པ་བཤགས་པ་དང་།  བསོད་ནམས་ལ་རྗེས་སུ་ཡི་རང་བ་
དང་།  བསྐུལ་བ་དང་།  གསོལ་བ་དང་།  ཡོངས་སུ་བསྔོ་བ་དང་།  བྱང་ཆུབ་ཏུ་སེམས་བསྐྱེད་པ་དང་།  གསུམ་ལ་སྐྱབས་སུ་འགྲོ་བ་ལ་སོགས་པ་རྗེས་སུ་སྤྱད་ལ།  རྡོ་རྗེ་ཐལ་མོ་དང་།  རྡོ་རྗེ་བསྡམས་པ་བཅིངས་ཏེ།  རྡོ་རྗེ་ཐལ་མོ་སྙིང་ཁར་དྲལ་བ།  རྡོ་རྗེ་དབབ་པ་བརྟན་པར་བྱས་ནས། 
བདག་མེད་པར་བསྒོམས་པ་དང་།  ཟླ་བའི་དཀྱིལ་འཁོར་ལ་སོགས་པ་སྔ་མ་བཞིན་དུ་བསྒོམས་ཏེ།  རང་གི་ལྷའི་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིང་བར་བྱའོ། །ཡེ་ཤེས་སེམས་དཔའ་ཇི་ལྟ་བ་བཞིན་བཅུག་སྟེ།  ཕྱག་རྒྱ་ཆེན་པོ་བསྒྲུབ་པར་བྱས་ནས།   ཛཿཧཱུཾ་བཾ་ཧོཿཞེས་བརྗོད་དེ།  ཡིད་
ཀྱིས་ལེགས་པའི་སྦྱོར་བས།  དེ་བཞིན་གཤེགས་པ་ཐམས་ཅད་རང་གི་ལུས་ལ་བཅུག་སྟེ།  རང་གི་དམ་ཚིག་གི་ཕྱག་རྒྱ་རྣམས་ཀྱིས་རབ་ཏུ་བསྒྲུབ་ནས།  རང་གི་ལྷ་དང་དེ་བཞིན་གཤེགས་པ་ཐམས་ཅད་དང་།  ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ།  རིགས་ཀྱི་དམ་ཚིག་གིས་
9-2-86a


བདག་ཉིད་བྱིན་གྱིས་བརླབས་ཏེ།  རང་གི་རིགས་ཀྱི་དབང་བསྐུར་ནས་སྒེག་མོ་ལ་སོགས་པ་གསང་བའི་མཆོད་པ་བཞིས་ཡང་དག་པར་མཆོད་ལ།  དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ།  རང་གིས་ཕྱག་རྒྱ་ཆེན་པོ་ལེགས་པར་བསྒོམས་ལ།  བཛྲ་སཏྭ་ཞེས་བྱ་བ་
ལ་སོགས་པ་རང་གི་ལྷའི་སྔགས་ཟློས་ཤིང་།  ལོ་གཅིག་གི་བར་དུ་ཉིན་རེ་བཞིན་ཐུན་བཞིར་བསྒོམ་པར་བྱའོ། །ཞེས་པ་ལྟར་བསླབ་བོ། །གང་ཟག་གཉིས་པ་ལ་དེ་ཡི་སྟེང་དུ་རྡོ་རྗེ་སློབ་དཔོན་གྱི་དབང་བསྐུར་ཞིང་།  དེ་ནས་དེ་དང་རྗེས་སུ་འབྲེལ་བའི་དམ་ཚིག་ལ་བསླབ་པ་དང་།  དཀྱིལ་
འཁོར་དང་།  ལྷའི་དེ་ཁོ་ན་ཉིད་བཅུ་ལ་བསླབ་པ་དང་།  སློབ་མ་གཞུག་པ་ལ་སོགས་པ་སློབ་དཔོན་གྱི་ལས་ཐམས་ཅད་དང་།  དངོས་གྲུབ་ཀྱི་ཡེ་ཤེས་དང་།  ཕྱག་རྒྱའི་ཡེ་ཤེས་དང་།  རྩ་བའི་རྒྱུད་ཀྱི་སྒྲུབ་པ་ལ་སོགས་པའི་ཚུལ་ཐམས་ཅད་ལ་བསླབ་བོ། །བཞི་པ་བླ་མེད་ཀྱི་ཉམས་
ལེན་ནི།  གསང་བ་འདུས་པའི་རྒྱུད་ཕྱི་མའི་རྗེས་སུ་འབྲངས་ནས།  སྤྱིར་རྒྱུད་ཅེས་བྱ་བ་ནི་སེམས་གསལ་བ་ཙམ་འཁོར་འདས་ཀྱི་གནས་སྐབས་ཐམས་ཅད་དུ་རྒྱུན་མི་འཆད་པར་འབྱུང་བ་འདི་ཡིན་ལ།  དེ་ལ་རྒྱུ་རྒྱུད།  ཐབས་རྒྱུད།  འབྲས་བུའི་རྒྱུད་གསུམ་ལས།  དང་པོ་ནི།  སེམས་
ཉིད་ལྷན་ཅིག་སྐྱེས་པའི་ཡེ་ཤེས་ཐོག་མ་མེད་པ་ནས་ད་ལྟའི་བར་དུ་རྒྱུན་མ་ཆད་ཅིང་བག་ཆགས་ཀྱི་དབང་གིས་ཡེ་ཤེས་དེ་ཉིད་འཁོར་བའི་སྣང་བ་སྣ་ཚོགས་སུ་ཤར་བ་དང་བཅས་པ་འདིའོ། །ཐབས་རྒྱུད་ནི་དེ་ཉིད་ལ་གློ་བུར་གྱི་དྲི་མ་སྦྱང་བའི་ཆེད་དུ་བླ་མ་དམ་པའི་མན་ངག་ལ་བརྟེན་ནས་
བསྐྱེད་རྫོགས་ཀྱི་ཏིང་ངེ་འཛིན་ཉམས་སུ་ལེན་པའི་ཚུལ་འབྲས་བུ་མངོན་དུ་མ་གྱུར་པའི་བར་དུ་རྒྱུན་མི་ཆད་དུ་འབྱུང་བའོ། །འབྲས་བུའི་རྒྱུད་ནི།  དེ་ཉིད་ལ་གློ་བུར་གྱི་དྲི་མ་དང་བྲལ་བས་ཡོན་ཏན་བསམ་ལས་འདས་པ་རྒྱུའི་གནས་སྐབས་སུ་རང་རང་གི་རྒྱུ་ལྷུན་གྲུབ་ཀྱི་ཚུལ་དུ་ཡོད་པ་འབྲས་
9-2-86b


བུའི་དུས་སུ་མངོན་དུ་གྱུར་ནས་དག་པའི་སྣང་བ་དང་བཅས་པའི་ཡེ་ཤེས་ནམ་མཁའ་གནས་ཀྱི་བར་དུ་རྒྱུན་མི་ཆད་དུ་འབྱུང་བའོ། །དེ་ལ་རྒྱུ་རྒྱུད་ཀྱི་ཉམས་ལེན་ནི།  ཀྱཻ་རྡོ་རྗེ་ལས།  སྐལ་དམན་སེམས་ཅན་གདུལ་དཀའ་བ། །གང་གི་འདུལ་བར་འགྱུར་བ་ལགས། །ཞེས་
ཞུས་པའི་ལན་དུ།  དང་པོ་གསོ་སྦྱོང་སྦྱིན་པར་བྱ། །དེ་རྗེས་བསླབ་པའི་གནས་བཅུ་སྦྱིན། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །དེ་ནས་རྣལ་འབྱོར་སྤྱོད་པ་ཉིད། །དེ་ཡི་རྗེས་སུ་དབུ་མ་བསྟན། །སྔགས་ཀྱི་རིམ་པ་ཀུན་ཤེས་ནས། །ཞེས་པ་ལྟར།
དང་པོར་ཉིན་ཞག་གཅིག་པའི་གསོ་སྦྱོང་ནས་བཟུང་སྟེ།  དེ་ནས་གཏན་ཁྲིམས་བདུན་པོ་གང་ཡང་རུང་བ་དང་།  ཐེག་པ་ཆེན་པོའི་སེམས་བསྐྱེད་ཀྱི་བར་དུ་སྤྱོད་པ་རིམ་པ་ཅན་ལ་བསླབ་ཏེ།  དེ་ནས་གྲུབ་མཐའ་བཞི་དང་རྒྱུད་སྡེ་འོག་མ་རྣམས་ལ་རིམ་པ་བཞིན་དུ་སྦྱངས་པའི་ལྟ་བ་
རིམ་པ་ཅན་ལ་བསླབས་པའོ། །དེ་ནས་སྨིན་བྱེད་ཀྱི་དབང་བཞི་བསྐུར་ཏེ་ལམ་བསྒོམ་པའི་སྣོད་རུང་དུ་བྱེད་པ་སྟེ།  འདི་ནི་སྐལ་དམན་རིམ་འཇུག་པའི་དབང་དུ་བྱས་པའོ། །ཐུན་མོང་གི་བྱ་བ་ལ་མ་ལྟོས་པར་དང་པོ་ཉིད་ནས་རྡོ་རྗེ་ཐེག་པའི་སྣོད་དུ་རུང་བ་རྣམས་ལ་ནི་སྐལ་ལྡན་ཅིག་ཅར་བ་
ཞེས་བྱ་སྟེ།  དང་པོ་ནས་དབང་བསྐུར་བར་བྱའོ། །སྨིན་བྱེད་ཀྱི་དབང་འདི་ཐབས་རྒྱུད་ལ་སྨིན་ལམ་གཉིས་སུ་ཕྱེ་བའི་དབང་དུ་བྱས་ན།  ཐབས་རྒྱུད་དུ་ཡང་འགྲོ་སྟེ་འོག་ཏུ་འཆད་དོ། །གཉིས་པ་ཐབས་རྒྱུད་ཀྱི་ཉམས་ལེན་ལ་སྨིན་གྲོལ་གཉིས་ལས་དང་པོ་ལ།  བུམ་པ།  གསང་
བ།  ཤེས་རབ་ཡེ་ཤེས།  དབང་བཞི་པ་སྟེ།  བཞི་ཡོད་པར་བླ་མེད་ཀྱི་རྒྱུད་སྡེ་ཕལ་ཆེར་ནས་གསུངས་ཤིང་།  བཞིར་ངེས་པའི་རྒྱུ་མཚན་ཡང་རྟེན་དཀྱིལ་འཁོར་བཞི་ཡིན་པ་དང་།  སྦྱང་བྱ་དྲི་མ་བཞི་ཡིན་པ་དང་།  སྦྱོང་བྱེད་ལམ་བཞི་ཡིན་པ་དང་།  སྦྱངས་འབྲས་སྐུ་
9-2-87a


བཞི་ཡིན་པ་སོགས་མང་དུ་གསུངས་མོད་ཀྱི་འདིར་མ་སྤྲོས་སོ། །གྲོལ་བྱེད་ཀྱི་ལམ་ནི་ཇི་སྙེད་གསུངས་པ་ཐམས་ཅད་རིམ་པ་གཉིས་སུ་འདུས་ཏེ།  ཀྱཻ་རྡོ་རྗེ་ལས།  བསྐྱེད་པའི་རིམ་པ་ཉིད་དང་ནི། །རྫོགས་པ་ཡི་ཡང་རིམ་པ་ཉིད། །རིམ་གཉིས་མཉམ་པར་
གནས་ནས་ནི། །རྡོ་རྗེ་ཅན་གྱིས་ཆོས་འཆད་དོ། །ཞེས་དང་།  འདུས་པའི་རྒྱུད་ཕྱི་མ་ལས།  སངས་རྒྱས་རྣམས་ཀྱིས་ཆོས་བསྟན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པ་ཡི་ནི་རིམ་པ་དང་། །དེ་བཞིན་རྫོགས་པའི་རིམ་ཉིད་དོ། །ཅེས་སོ། །འདི་དག་གི་རྣམ་
གཞག་ལ་རྒྱུད་སྡེ་སོ་སོའི་དགོངས་པ་གྲུབ་པའི་དབང་ཕྱུག་རྣམས་ཀྱིས་བཀྲལ་བའི་ཚུལ་ཅུང་ཟད་མི་འདྲ་བ་མང་དུ་ཡོད་པ་ལས།  འདིར་ཀྱཻ་རྡོ་རྗེའི་རྒྱུད་གསུམ་གྱི་དགོངས་པ་རྣལ་འབྱོར་གྱི་དབང་ཕྱུག་བིཪྺ་པས་བཀྲལ་བའི་ཚུལ་བརྗོད་ན།  དབང་བསྐུར་གྱི་རྗེས་ལ་དབང་གི་ཡེ་ཤེས་
དེ་ཉིད་ལྷན་ཅིག་སྐྱེས་པའི་ཡེ་ཤེས་སུ་ངོ་སྤྲོད་ཅིང་།  འོག་ཏུ་འབྱུང་བའི་བསྐྱེད་རྫོགས་ཀྱི་ཉམས་ལེན་ཐམས་ཅད་དེ་དང་དེའི་རྣམ་པར་སྣང་ཡང་།  རང་གི་ངོ་བོ་ལྷན་ཅིག་སྐྱེས་པའི་ཡེ་ཤེས་སུ་རྟོགས་པར་བྱ་བའི་ཕྱིར་ལྟ་བ་འཁོར་འདས་དབྱེར་མེད་བསྒོམ་པར་བྱ་སྟེ།  ཀྱཻ་རྡོ་རྗེ་ལས།
ཕྱི་ནས་དེ་ཉིད་ཡང་དག་བཤད། །རྣམ་དག་ཡེ་ཤེས་གཟུགས་ཅན་དང་། །འཁོར་བ་རྣམ་པར་རྟོག་པ་ལ། །ཁྱད་པར་ཅུང་ཟད་ཡོད་མ་ཡིན། །ཞེས་སོ། །དེ་ནས་རྫོགས་རིམ་གྱི་རྟེན་བསྐྱེད་པའི་རིམ་པ་བསྒོམས་ཏེ།  དེ་ཡང་རྒྱུ་རྒྱུད་བག་ཆགས་ཀྱི་དབང་གིས་འཁོར་བའི་སྣང་བ་སྣ་
ཚོགས་སུ་འཆར་བ་འདི་ད་ལྟ་ཉིད་ནས་དག་པའི་སྣང་བར་སྒྱུར་བར་བྱེད་པའོ། །དེས་ན་འཁོར་བའི་ཆོས་ཀྱི་གཙོ་བོ་སྐྱེ་གནས་བཞི་ཡིན་པས་དེའི་གཉེན་པོར་མངོན་པར་བྱང་ཆུབ་པ་ལྔ་ལ་སོགས་པའི་བསྐྱེད་ཆོ༷ག་རྣམས་གསུངས།  སྐྱེ་བ་བླངས་པ་ལ་བརྟེན་ནས་སྣོད་བཅུད་རང་
9-2-87b


གཞན་ལ་སོགས་པའི་སྣང་བ་སྣ་ཚོགས་འཆར་བ་དེའི་གཉེན་པོར་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་གསུངས་ཏེ།  མདོར་ན་བླ་མེད་ཀྱི་དཀྱིལ་འཁོར་གཅིག་གི་སྟེང་དུ་རྒྱུ་ལས་དང་།  ཉོན་མོངས་པ་དང་།  འབྲས་བུ་འཁོར་བའི་སྡུག་བསྔལ་གྱིས་བསྡུས་
པའི་མ་དག་པའི་སྣང་བ་ཐམས་ཅད་དག་པའི་སྣང་བར་བསྒྱུར་བའི་ཉམས་ལེན་ཡོད་པར་ཤེས་པར་བྱའོ། །དེ་ནས་བསྐྱེད་རིམ་གྱི་ལྷ་བདེ་ཆེན་གྱི་ཡེ་ཤེས་སུ་རྟོགས་པར་བྱ་བའི་ཕྱིར་དུ་རྫོགས་པའི་རིམ་པ་བསྒོམ་སྟེ།  དེ་ཡང་ལུས་ཐམས་ཅད་ལ་རྩས་ཁྱབ།  དེ་ལ་བྱང་ཆུབ་ཀྱི་
སེམས་དང་རླུང་གིས་ཁྱབ།  དེ་དང་སེམས་ཉིད་ལྷན་ཅིག་སྐྱེས་པའི་ཡེ་ཤེས་འདི་དབྱེར་མེད་དུ་གནས་པ་ལ་རྟེན་རྩ་ཐིག་ལེ་རླུང་གསུམ་ལ་གནད་དུ་བསྣུན་ནས།  སེམས་ཉིད་ལྷན་ཅིག་སྐྱེས་པའི་ཡེ་ཤེས་མངོན་དུ་བྱས་ཏེ།  སྣང་བ་ཐམས་ཅད་ཟུང་འཇུག་གི་ངོ་བོར་བསྒྱུར་བའོ། །དེ་ལྟར་
རིམ་པ་གཉིས་ལ་བརྟན་པ་ཐོབ་ནས་དྲོད་ཆུང་ངུ་ཞེས་བྱ་བ་མཉམ་གཞག་ཏུ་འཇིག་རྟེན་ཆོས་བརྒྱད་མགོ་སྙོམས་པ་སྙམ་བྱེད་པའི་ཚེ་ཀུན་འདར་གསང་ནས་སྤྱོད།  དེ་ནས་དྲོད་འབྲིང་པོ་ཚར་གཅོད་དང་།  རྗེས་གཟུང་གང་རུང་གཅིག་ནུས་པའི་ཚེ་ཀུན་འདར་འཇིག་རྟེན་པའི་མངོན་དུ་སྤྱོད།  དེ་ནས་དྲོད་
ཆེན་པོ་ཚར་གཅོད་དང་རྗེས་གཟུང་གཉིས་ཀ་ནུས་པ་ཟག་པ་མེད་པའི་ཡེ་ཤེས་དང་པོ་སྐྱེས་པའི་ཚེ་གཞན་དོན་ཕྱོགས་ལས་རྣམ་པར་རྒྱལ་བའི་སྤྱོད་པ་བྱ་སྟེ།  ས་རྣམས་བསྐྱེད་པར་བྱའོ། །དེ་ཡང་ཕྱི་རོལ་གནས་དང་ཉེ་བའི་གནས་སོགས་ན་གནས་པའི་མཁའ་འགྲོ་མ་རྣམས་
དབང་དུ་འདུས་པས་ནང་གི་སྤྱི་བོ་ལ་སོགས་པའི་རྩ་རྣམས་ཀྱི་རླུང་སེམས་དབུ་མར་ཞུགས་ནས།  ས་དང་པོ་ནས་བཅུ་པའི་བར་གྱི་རྟོགས་པ་སྐྱེ་བའི་ཐབས་ལ་སྤྱོད་པ་ཞེས་བྱའོ། །དེ་ནས་ས་བརྒྱད་པའམ་བཅུ་པ་ཐོབ་པའི་ཚེ་ཉེ་རྒྱུའི་སྤྱོད་པ་བྱ་སྟེ།  ས་ལྷག་མ་རྣམས་བགྲོད་ནས་
9-2-88a


བཅུ་གསུམ་རྡོ་རྗེ་འཛིན་པའི་ས་མངོན་དུ་བྱའོ། །དེ་ལྟར་ལྟ་བ།  བསྐྱེད་རིམ།  རྫོགས་རིམ།  སྤྱོད་པ།  ཉེ་རྒྱུ་སྟེ།  ལྔ་ནི་གཙོ་བོར་མཆོག་གི་དངོས་གྲུབ་བསྒྲུབ་པའི་མངོན་པར་རྟོགས་པ་ཡིན་ཅིང་།  གང་ཟག་གཙོ་བོར་ནང་ལ་གཞོལ་བས་ཉམས་སུ་བླང་བར་བྱ་བ་ཡིན་ནོ། །
འཇིག་རྟེན་ལས་འདས་པའི་དངོས་གྲུབ་མཐའ་དག་སྒྲུབ་པ་དང་།  གང་ཟག་གཙོ་བོར་ཕྱི་ལ་གཞོལ་བས་ཉམས་སུ་བླང་བར་བྱ་བ་ནི།  སྔགས་ཀྱི་བཟླས་པ་དང་།  གཏོར་མ་དང་།  རབ་གནས་དང་།  སྦྱིན་སྲེག་དང་།  ལས་ཀྱི་ཚོགས་རབ་འབྱམས་དང་ལྔའོ། །དེ་གཉིས་ཀ་ལ་
ཡང་གྲོགས་དམ་ཚིག་དང་།  སྡོམ་པ་དགོས་པས་བཟའ་བའི་དམ་ཚིག་དང་།  བསྲུང་བའི་དམ་ཚིག་གཉིས་དགོས་སོ། །གསུམ་པ་འབྲས་བུའི་རྒྱུད་ནི།  དེ་ལྟར་ཐབས་རྒྱུད་ཉམས་སུ་བླངས་པས་རྒྱུ་རྒྱུད་ཀྱི་དྲི་མ་དག་ནས་སྐུ་གསུམ་ཡན་ལག་བདུན་ལྡན་མངོན་དུ་གྱུར་པའོ། །
འདི་ལ་དབང་དང་ལམ་བཞི་ཡོད་པས་འབྲས་བུ་སྐུ་བཞིར་བཞག་པའམ།  རྒྱུ་ལ་རྟེན་དཀྱིལ་འཁོར་བཞི།  བརྟེན་པ་ཡིད་དང་ལྔ་ཡོད་པས་འབྲས་བུ་སྐུ་བཞི་དང་།  ཤིན་ཏུ་རྣམ་པར་དག་པའི་ངོ་བོ་ཉིད་ཀྱི་སྐུ་སྟེ།  ལྔར་བཞག་པ་སོགས་མང་དུ་ཡོད་མོད་ཀྱི་དམ་པའི་ཞལ་ལས་དྲི་བར་བྱའོ། །
གཞན་ཡང་རིམ་པ་གཉིས་པོ་དེ་ཉིད་ཉམས་སུ་ལེན་པའི་ཚུལ་ལ།  དུས་ཀྱི་འཁོར་ལོ་དང་།  གསང་བ་འདུས་པ་དང་།  བདེ་མཆོག་སོགས་ནས་གསུངས་པའི་ལམ་གྱི་རིམ་པ་ཚུལ་ཅུང་ཟད་མི་འདྲ་བ་མང་དུ་ཡོད་མོད་ཀྱི།  གཞུང་འདིར་ཉེ་བར་མཁོ་བ་ནི་སྔ་མ་ཉིད་ཡིན་པས་དེ་ཙམ་ཞིག་
སྨོས་སོ། །དེ་ལྟར་རྒྱུད་སྡེ་བཞི་ལ་སྨིན་བྱེད་ཀྱི་དབང་དང་།  གྲོལ་བྱེད་ཀྱི་ལམ་མི་འདྲ་བ་བཞི་ཡོད་ན་གཞུང་འདིར་གང་ཞིག་བསྟན་པ་ཡིན་སྙམ་ན།  འདིར་ནི་བླ་མེད་ཀྱི་ལམ་གྱི་རྣམ་པར་གཞག་པ་གཙོ་བོར་སྟོན་ཏེ།  གསང་སྔགས་ཞེས་དང་།  རྡོ་རྗེ་ཐེག་པ་ཞེས་སྤྱིར་བཏང་བ་ལས། 
9-2-88b


 སྨིན་བྱེད་ཀྱི་སྐབས་སུ་དབང་བཞི་དང་།  གྲོལ་བྱེད་ཀྱི་སྐབས་སུ་རིམ་པ་གཉིས་དགོས་པར་གསུངས་ཤིང་།  དེ་དག་རྒྱུད་སྡེ་འོག་མ་ལ་མེད་པའི་ཕྱིར་དང་།  འདི་ནས་གསུངས་པའི་ལམ་གྱི་རྣམ་གཞག་སྨིན་གྲོལ་གཉིས་ལས།  ཕྱག་ཆེན་གྱི་ཡེ་ཤེས་སྐྱེ་ཞིང་ཕྱག་ཆེན་གོམས་པས་སྤྱོད་
པ་དང་།  དེ་ལས་འབྲས་བུ་སྐུ་བཞི་འགྲུབ་པའི་ཚུལ་རྣམས་བླ་མེད་ཁོ་ནའི་ལམ་གྱི་རྣམ་གཞག་ཏུ་སྣང་བའི་ཕྱིར་རོ། །ཅིའི་ཕྱིར་དེ་ལྟར་སྟོན་སྙམ་ན་གཞུང་འདིར་ནི་ལོག་རྟོག་འགོག་པ་གཙོ་བོ་ཡིན་ལ།  བླ་མེད་ཀྱི་ལམ་ལ་ལོག་རྟོག་ཞུགས་པ་གཙོ་ཆེ་བར་སྣང་བའི་ཕྱིར་རོ། །ཞར་
ལ་རྒྱུད་སྡེ་འོག་མའི་རྣམ་གཞག་ཀྱང་ཅུང་ཟད་སྟོན་ཏེ།  དེ་དག་ལ་ཡང་སྨིན་བྱེད་ཀྱི་སྐབས་སུ་དབང་བཞི་དང་།  གྲོལ་བྱེད་ཀྱི་སྐབས་སུ་རིམ་པ་གཉིས་ཡོད་པར་འདོད་པ་དང་།  བྱ་རྒྱུད་ལ་བདག་བསྐྱེད་ཡོད་པར་འདོད་པ་སོགས་ལོག་རྟོག་འགའ་ཞིག་སྣང་བའི་ཕྱིར་རོ། །གཉིས་པ་
གཞུང་གི་དོན་ལ་འཇུག་པ་ལ་གཉིས་ཏེ།  མདོར་བསྟན་པ་དང་།  རྒྱས་པར་བཤད་པའོ། །དང་པོ་ནི།  རྡོ་རྗེ་ཐེག་པའི་ཞེས་སོགས་གསུམ་སྟེ།  སྐལ་དམན་རིམ་འཇུག་པ་ལྟར་ན།  སྡོམ་པ་གཉིས་ཀྱི་སྦྱང་བ་སྔོན་དུ་སོང་ནས་རྡོ་རྗེ་ཐེག་པའི་སོགས་སོ། །སྐལ་ལྡན་ཅིག་ཅར་བ་ལྟར་ན།  ཐུན་
མོང་གི་སྦྱང་བ་ལ་མ་ལྟོས་པར་དང་པོ་ཉིད་ནས་རྡོ་རྗེ་ཐེག་པའི་སོགས་སོ། །གཉིས་པ་ལ་ལྔ་སྟེ།  སྨིན་བྱེད་ནོར་བ་མེད་པའི་དབང་བཞི།  གྲོལ་བྱེད་འཁྲུལ་བ་མེད་པའི་རིམ་པ་གཉིས།  དབང་དང་རིམ་གཉིས་ལས་བྱུང་བའི་ཡེ་ཤེས་ཕྱག་རྒྱ་ཆེན་པོ།  ཕྱག་ཆེན་གོམས་པ་ལས་འཁོར་
འདས་བསྲེ་བའི་སྤྱོད་པ་སྤྱད་པ།  དེ་ལ་བརྟེན་ནས་ས་ལམ་བགྲོད་དེ་འབྲས་བུ་མངོན་དུ་བྱེད་པའི་ཚུལ་ལོ། །དང་པོ་ལ་གསུམ་སྟེ།  མ་འཁྲུལ་བའི་སྨིན་བྱེད་བསྒྲུབ་པར་གདམས།  འཁྲུལ་པའི་སྨིན་བྱེད་དོར་བར་གདམས།  དབང་ལས་ཐོབ་པའི་དམ་ཚིག་ལ་འཁྲུལ་པ་དགག་པའོ། །དང་
9-2-89a


པོ་ནི།  སྨིན་པར་བྱེད་པའི་ཞེས་སོགས་ཚིགས་བཅད་གཉིས་ཏེ།  སྨིན་གྲོལ་གཉིས་ལ་འབད་པར་བྱ། །ཞེས་པའི་སྨིན་པར་བྱེད་པ་དེ་ཡང་རྡོ་རྗེ་འཆང་ནས་རྩ་བའི་བླ་མའི་བར་དུ་བླ་མ་བརྒྱུད་པ་མ་ཉམས་ཤིང་།  སྦྱོར་དངོས་རྗེས་གསུམ་གྱི་ཆོ་ག་འཁྲུགས་པར་
མ་གྱུར་པ་དང་།  ཕྱི་དང་ནང་གི་རྟེན་འབྲེལ་བསྒྲིག་མཁྱེན་ཅིང་སློབ་མའི་ཕུང་ཁམས་སྐྱེ་མཆེད་ལ་སྐུ་བཞིའི་ས་བོན་ཐེབས་ནུས་པ་སྟེ།  མདོར་ན་སངས་རྒྱས་ཀྱིས་རྒྱུད་སྡེ་ནས་གསུངས་བཞིན་མཛད་པའི་བླ་མ་བཙལ་ལ་དབང་བཞི་བླང་བར་བྱ་སྟེ།  དེ་ཡིས་རྟེན་གྱི་གང་ཟག་དེ་
སྡོམ་པ་གསུམ་ལྡན་དུ་འགྱུར་རོ། །དེ་ཡང་སྔར་སྡོམ་པ་འོག་མ་གཉིས་པོ་བླངས་པ་ཡིན་ན་དབང་བསྐུར་གྱི་ཚེ་སྔགས་སྡོམ་དུ་གནས་འགྱུར་ལ།  སྔར་མ་བླངས་ན་སྟ་གོན་གྱི་ཚེ་སོ་ཐར་དང་བྱང་སེམས་ཐོབ་པར་རྗེ་བཙུན་གྱིས་གསུངས་པ་ལ་ཚད་མར་བྱའོ། །གཉིས་པ་ལ་བཞི་སྟེ།  སྨིན་
བྱེད་མ་ཡིན་པ་སྨིན་བྱེད་དུ་འདོད་པ་དགག་པ།  སྨིན་བྱེད་ཀྱི་དབང་མི་དགོས་པར་འདོད་པ་དགག་པ།  དགོས་ཀྱང་འཁྲུལ་པར་སྤྱོད་པ་དགག་པ།  དབང་བསྐུར་མུ་བཞི་འདོད་པ་དགག་པའོ། །དང་པོ་ལ་བཞི་སྟེ།  བྱིན་རླབས་སྨིན་བྱེད་ཡིན་པ་དགག་པ།  གྲངས་ངེས་མེད་པའི་
དབང་བསྐུར་སྨིན་བྱེད་ཡིན་པ་དགག་པ།  དཀྱིལ་འཁོར་མ་དག་པའི་དབང་བསྐུར་སྨིན་བྱེད་ཡིན་པ་དགག་པ།  ཆོ་ག་མ་དག་པའི་དབང་བསྐུར་སྨིན་བྱེད་ཡིན་པ་དགག་པའོ། །དང་པོ་ལ་གཉིས་ཏེ།  ཕྱོགས་སྔ་མ་བརྗོད་པ་དང་།  དེ་དགག་པའོ། །དང་པོ་ནི།  དེང་སང་
རྡོ་རྗེ་ཞེས་སོགས་ཚིགས་བཅད་གཅིག་སྟེ།  ཕག་མོས་ཆོས་སྒོ་འབྱེད་པ་ནི་དྭགས་པོ་ལྷ་རྗེའི་དུས་སུ་བྱུང་སྟེ།  བླ་མ་གཞན་ལ་སློབ་མ་རྣམས་དབང་ཞུ་བ་ལ་བཏང་ནས།  དེར་བསྡད་ནས་ཕལ་ཆེར་ལོག་མ་བྱུང་བས་རང་རེ་ཚང་ལ་ཡང་དབང་བྱེད་མཁན་རེ་དགོས་པར་འདུག་གསུངས་
9-2-89b


པས།  ཀོང་ནེ་རུ་པས་ངས་ཕག་མགོའི་དབང་རེ་བྱས་ན་ཞུས་པས་དེས་ཆོག་གསུངས་ནས་ཕག་མོའི་བྱིན་རླབས་རེ་བྱས།  དེ་ནས་བླ་མས་ནཱ་རོ་ཆོས་དྲུག་ཕྱག་ཆེན་སོགས་བསྟན་པས་དེ་ནས་བཟུང་སྟེ།  ཆོས་སྒོ་པ་ལ་དབང་ཞུས་བླ་མས་ཁྲིད་གསུངས་པས་བདེ་མཆོག་གི་དབང་མ་
ཐོབ་ཀྱང་།  རྡོ་རྗེ་ཕག་མོའི་བྱིན་རླབས་ཙམ་གྱིས་ཆོས་དྲུག་གི་ཆོས་སྒོ་འབྱེད་པ་བྱུང་ངོ་། །གཉིས་པ་ལ་གསུམ་སྟེ།  བྱིན་རླབས་སྨིན་བྱེད་ཡིན་པ་ལ་གནོད་བྱེད་བསྟན།  བྱིན་རླབས་སྨིན་བྱེད་ཡིན་པའི་སྒྲུབ་བྱེད་དགག །བྱིན་རླབས་ཆོས་སྒོར་བྱེད་ན་ཧ་ཅང་ཐལ་བའོ། །དང་པོ་ལ་བཞི་
སྟེ།  ཤེས་བྱེད་མེད་པ།  ཉེས་དམིགས་ཆེ་བ།  ཕན་ཡོན་མེད་པ།  ལུང་དང་འགལ་བའོ། །དང་པོ་ནི།  འདི་འདྲ་རྒྱུད་སྡེ་ཞེས་སོགས་གཉིས་ཏེ།  དབང་མ་བསྐུར་བར་བྱིན་རླབས་ཀྱིས་ཆོས་སྒོ་ཕྱེ་ནས་རྫོགས་རིམ་བསྒོམ་པ་འདི་འདྲ་སོགས་སོ། །གཉིས་པ་ནི།  རྡོ་རྗེ་ཕག་མོ་ཞེས་སོགས་ཚིགས་
བཅད་གསུམ་སྟེ།  ཇོ་བོ་རྗེས་མཛད་པའི་རྡོ་རྗེ་ཕག་མོ་ཉིད་ཀྱི་གཞུང་རྗེ་བཙུན་མ་རིན་ཆེན་རྒྱན་གྱི་སྒྲུབ་ཐབས་ལས་ཀྱང་།  འདི་ལྟར་རྣལ་འབྱོར་པ་དབང་བསྐུར་བ་ཐམས་ཅད་ཡོངས་སུ་རྫོགས་པས་ཡིད་དང་རྗེས་སུ་མཐུན་པའི་གནས་སུ་ཞེས་པ་དང་།  སྔོན་གྱི་བླ་མའི་མན་ངག་གི་
དབང་བསྐུར་བའི་རིམ་པས་དེའི་དོན་ལ་དམིགས་ན་རྡོ་རྗེ་རྣལ་འབྱོར་མར་བསམ་པར་བྱའོ། །ཞེས་གསུངས་པ་འདི་འགྲེལ་བྱེད་ཕལ་ཆེར་གྱིས་དྲངས་པར་སྣང་ཡང་།  རྗེ་བཙུན་གྱི་རྣལ་འབྱོར་པ་བྱང་སེང་གི་དྲིས་ལན་ལས།  དེའང་རྗེ་བཙུན་མ་རྡོ་རྗེ་རྣལ་འབྱོར་མའི་གཞུང་ལས།  བྱིན་
རླབས་ཕྲ་མོ་བཤད་པ་དེ་དག་གང་ཞེ་ན།  དབང་ཐོབ་ཟིན་པའི་གང་ཟག་ལ་ཏིང་ངེ་འཛིན་གྱི་ཁྱད་པར་འགའ་ཞིག་རྒྱུད་ལ་སྐྱེ་བར་བྱ་བའི་ཕྱིར།  བྱིན་རླབས་ཀྱི་རྒྱུན་བསྒོམ་དུ་གཞུག་པ་ཞེས་བྱ་བའི་གདམས་ངག་ཡིན་གྱི་དབང་མ་ཐོབ་པ་རྣམས་ལ་རྡོ་རྗེ་རྣལ་འབྱོར་མའི་གསང་བ་བསྟན་
9-2-90a


དུ་ག་ལ་རུང་།  དེའང་རྡོ་རྗེ་རྣལ་འབྱོར་མ་རྣམས་ཀྱི་རྩ་བ་ལྟ་བུ།  རྒྱལ་པོ་ཨིནྡྲ་བྷཱུ་ཏིས་མཛད་པ་ཞལ་གཉིས་མ་ཆུང་བ་ཞེས་བྱ་བ་ལས།  སྔགས་པས་ཐོག་མར་བླ་མ་དང་།  སངས་རྒྱས་ལ་སེམས་མངོན་པར་དང་བའི་ཡིད་ཅན་གྱིས་བྱང་ཆུབ་ཀྱི་སེམས་བརྟན་པར་བཟུང་སྟེ་
དབང་བསྐུར་བ་ཡང་དག་པར་ཐོབ་ནས་ཞེས་འབྱུང་བ་ཡིན་ནོ། །ཞེས་པ་འདི་ཉིད་ཡིན་ཏེ།  ལུང་འདིར་རྡོ་རྗེ་རྣལ་འབྱོར་མ་རྣམས་ཀྱི་རྩ་བ་ལྟ་བུ་ཞེས་དང་།  རྩ་བར།  རྡོ་རྗེ་ཕག་མོ་ཉིད་ལས་ཀྱང་། །ཞེས་གསུངས་པ་ནི་དོན་གཅིག་གོ།  དེས་ན་སྨིན་བྱེད་ཀྱི་དབང་བསྐུར་མེད་པ་ལ་བྱིན་རླབས་བྱེད་པ་
བཀག་སྟེ།  དཔེར་ན་མུ་ཟིའི་སོགས་སོ། །གསུམ་པ་ནི་རྡོ་རྗེ་ཕག་མོའི་ཞེས་སོགས་དྲུག་སྟེ།  སྨིན་བྱེད་ཀྱི་དོན་འདི་རྣམས་མ་ཚང་བ་སྨིན་བྱེད་དུ་མི་རུང་བའོ། །བཞི་པ་ནི།  དེས་ན་ཐུབ་པས་ཞེས་སོགས་ཚིགས་བཅད་གཅིག་སྟེ།  དེ་ཉིད་བསྡུས་པ་ལས།  དཀྱིལ་འཁོར་ཆེན་པོ་མ་མཐོང་བ་
རྣམས་ཀྱི་མདུན་དུ་མ་སྨྲ་ཞིག་སྨྲས་ན་དམ་ཚིག་ཉམས་པར་འགྱུར་རོ། །ཞེས་གསུངས་སོ། །གཉིས་པ་ལ་གཉིས་ཏེ།  ལག་ལེན་གྱི་བསྒྲུབ་བྱེད་དགག་པ།  རང་བཟོའི་སྒྲུབ་བྱེད་དགག་པའོ། །དང་པོ་ནི།  འགའ་ཞིག་འདི་ལའང་ཞེས་སོགས་དྲུག་སྟེ།  ཕྱག་རྒྱ་བ་འགའ་ཞིག་ཕག་མོའི་
བྱིན་རླབས་འདི་ལའང་།  ཕག་མགོ་དང་།  གྲི་གུག་དང་།  མདའ་གཞུ་དང་།  ཆང་དང་ཐོད་པ་གཏོད་པ་ལ་སོགས་པའི་དབང་བསྐུར་ཡོད་ཅེས་ཟེར་བ་མི་འཐད་དེ།  དེ་འདྲ་དབང་བསྐུར་སོགས་སོ། །ཆག་ལོའི་དྲི་བར།  བརྒྱ་ལ་ཕག་མགོའི་དབང་ལ་སོགས་པ་གསུངས་ན་དབང་ཞེས་བརྗོད་
པ་ལ་འགལ་བ་ཅི་མཆིས་ཞུས་པའི་ལན་དུ།  དེ་འདྲ་རྒྱུད་སྡེ་གང་ནས་ཀྱང་གསུངས་པ་མི་གདའ།  བརྟགས་པ་མཐའ་བཟུང་གིས་གསུངས་པ་སྲིད་ན་དབང་བཏགས་པ་བ་ཡིན་ཏེ།  དབང་བསྐུར་ལ་སྦྱོར་དངོས་རྗེས་གསུམ་གྱི་ཆོ་ག་མང་དུ་ཡོད་ནའང་དངོས་གཞི་དེ་དབང་ཡིན།  གཞན་
9-2-90b


རྣམས་ཆ་ལག་ཡིན།  དགེ་སློང་གི་སྡོམ་པ་འབོགས་པའི་ཆོ་ག་ལ་མང་པོ་ཡོད་ནའང་།  གསོལ་བཞིའི་ལས་དེ་ཆོ་ག་དངོས་ཡིན།  བུམ་དབང་བཅུ་གཅིག་ཟེར་ཀྱང་ཡན་ལག་ལ་མིང་བཏགས་པ་ཡིན།  སམྦུ་ཊི་ལས་ཀྱང་།  དབང་དང་རྗེས་གནང་ཐོབ་པ་ཡིས། །བྱ་བ་བྱས་པར་རབ་
འཛུམ་ཞིང་། །འགྲོ་ཀུན་དགའ་བར་བྱེད་པ་ཡིས། །ཤིན་ཏུ་སྙན་པའི་ཚིག་གིས་བརྗོད། །ཅེས་ཐ་དད་དུ་གསུངས་ལ།  དབང་གི་མིང་བཏགས་ཚད་དེ་དབང་ཡིན་ན།  འདུལ་བ་སུམ་བརྒྱ་པར།  རྫོགས་པའི་སངས་རྒྱས་དཔལ་ནོད་དབང་བསྐུར་ཡིན། །ཞེས་པ་དང་།  མདོ་ལས།  དབང་
ཐོབ་པའི་བྱང་སེམས་ཞེས་པ་དང་།  རྒྱལ་རིགས་སྤྱི་བོ་ནས་དབང་བསྐུར་བ་ཞེས་སོགས་ཀྱང་གསུངས།  དེས་ན་མདའ་གཞུ་གཏོད་པ་སོགས་ཀྱང་རྗེས་གནང་ཡིན་གྱི་དབང་མ་ཡིན།  ཕག་མགོའི་དབང་བསྐུར་ཡང་གསུངས་འདུག་ན་འདི་འདྲར་བསྡུ་དགོས་ཏེ།  བརྫུན་འབའ་ཞིག་
ཡིན་གྱིས་གསུངས་པ་ཅིས་ཀྱང་མེད་ཅེས་པའི་ལན་མཛད་དོ། །གཉིས་པ་ནི།  ལ་ལ་རྡོ་རྗེ་ཞེས་སོགས་བཅོ་བརྒྱད་དེ།  ཞང་ཚལ་བ་ལ་སོགས་པ་ལ་ལ་ཕག་མོའི་བྱིན་རླབས་ལ་སྨིན་བྱེད་ཡོད་པར་བསྒྲུབ་འདོད་ནས།  སྡོམ་པ་འབོགས་པའི་སོགས་ཏེ།  ཆོ་ག་ཅུང་ཟད་ཉམས་པ་ལ་
འཆགས་པར་མ་གསུངས་པ་ནི།  འདུལ་བ་ལས།  བསྒྲུབ་བྱ་དང་།  མཁན་པོ་དང་།  དགེ་འདུན་གྱི་མིང་མ་བརྗོད་ན་ཡང་ཆོ་གའི་ཚིག་ཟུར་ཉམས་པས་དགེ་སློང་གི་སྡོམ་པ་མི་སྐྱེ་བར་གསུངས་པ་ལྟ་བུའོ། །ཆོ་ག་ནོར་བར་གྱུར་ན་གྲུབ་པ་མེད་པར་གསུངས་པ་ནི།  གསང་བ་སྤྱི་རྒྱུད་ལས། 
ཁྱད་པར་ཅན་གྱི་ལས་རྣམས་ལ། །ལྷ་དུས་བྱ་བ་དུས་བཞིན་སྤྱད། །གཞན་དུ་ཆོ་ག་ཉམས་པའི་ཕྱིར། །གྲུབ་པ་ནམ་ཡང་ཡོད་མ་ཡིན། །ཞེས་གསུངས་སོ། །གསུམ་པ་ནི།  གཞན་ཡང་ཕག་མོའི་ཞེས་སོགས་བཅུ་གཅིག་སྟེ།  ཕག་མོའི་བྱིན་རླབས་ལ་གསང་སྔགས་ཀྱི་
9-2-91a


ཆོས་སྒོར་བཤད་པ་མེད་ཀྱང་བྱེད་པ་བས།  དགེ་སློང་བྱེད་པ་ལ་རང་བྱུང་གི་བསྙེན་རྫོགས་སོགས་བླང་བར་རིགས་པར་འགྱུར་ཏེ།  དེ་གཉིས་ད་ལྟ་འཁྲུལ་པ་མཉམ་པོ་ལ་འདི་རྣམས་སྔོན་གྱི་ཆོ་གར་བཤད་པའི་ཕྱིར་རོ། །དེ་ཡང་ལུང་ལས།  སངས་རྒྱས་དང་རང་སངས་
རྒྱས་རང་བྱུང་གིས་བསྙེན་རྫོགས་དང་།  ལྔ་སྡེ་བཟང་པོ་ཡེ་ཤེས་ཁོང་དུ་ཆུད་པ་དང་།  མཆོད་སྦྱིན་མ་ཕྲིན་གྱིས་དང་།  འོད་སྲུང་ཆེན་པོ་སྟོན་པར་ཁས་བླངས་པ་དང་།  གྲགས་པ་ལ་སོགས་པ་ཚུར་ཤོག་དང་།  སྐྱེ་དགུའི་བདག་མོ་ལྕི་བའི་ཆོས་བརྒྱད་ཁས་བླངས་པ་དང་།  བྲམ་ཟེ་པོ་ཏ་ཡ་
ནའི་བུས་དྲིས་པའི་ལན་ལྡོན་པ་དང་།  བཟང་སྡེའི་ཚོགས་དྲུག་ཅུ་སྐྱབས་གསུམ་ཁས་བླངས་པ་དང་།  གསོལ་གཞིའི་ལས་ཀྱིས་རབ་ཏུ་བྱུང་ཞིང་བསྙེན་པར་རྫོགས་པ་རྣམས་སྔོན་གྱི་ཆོ་གར་གསུངས་སོ། །གཉིས་པ་གྲངས་ངེས་མེད་པའི་དབང་བསྐུར་སྨིན་བྱེད་ཡིན་པ་དགག་པ་ལ་
བཞི་སྟེ།  གྲངས་ངེས་མེད་པ་གསང་སྔགས་ནུབ་པའི་དཔེར་བསྟན་པ།  དེ་ཉིད་རྒྱུད་ལས་བཀག་པའི་ཚུལ།  རྒྱུད་དེའི་དོན་བཤད་པ།  གཞན་གྱི་དོགས་པ་སྤང་བའོ། །དང་པོ་ནི།  དེས་ན་ཉན་ཐོས་ཞེས་སོགས་ཚིགས་བཅད་གསུམ་མོ། །གཉིས་པ་ནི།  འདི་ནི་རྡོ་རྗེ་ཞེས་སོགས་བཅུ་གསུམ་
སྟེ།  སློབ་མ་ལ་གྲངས་ངེས་མེད་པར་དབང་བསྐུར་བྱེད་པ་འདི་ནི།  རྡོ་རྗེ་འཆང་གིས་བཀག་སྟེ།  སྤྱོད་རྒྱུད་ཀྱི་དབང་བསྐུར་ལ་སློབ་མ་གྲངས་ངེས་མེད་པར་གསུངས་ཤིང་།  ལྷག་མ་དམིགས་བསལ་མཛད་པའི་རྒྱུད་སྡེ་གསུམ་གྱི་སློབ་མ་ལ་གྲངས་ངེས་ཡོད་པའི་ཕྱིར་ཏེ།  འདི་ནི་
གསང་བ་སོགས་སོ། །སྤྱོད་རྒྱུད་ལ་གྲངས་ངེས་མེད་པར་གསུངས་པ་ནི།  རྣམ་སྣང་མངོན་བྱང་ལས།  གཅིག་གཉིས་བཞི་ལས་ལྷག་ཀྱང་རུང་། །དཔྱད་མི་དགོས་པས་གཟུང་བར་བྱ། །ཞེས་དང་།  དེས་བྱང་ཆུབ་ཀྱི་སེམས་ཀྱི་རྒྱུར་འགྱུར་བར་བྱ་བའི་ཕྱིར་སེམས་ཅན་ཚད་མེད་པ་
9-2-91b


ཡོངས་སུ་གཟུང་བར་བྱའོ། །ཞེས་གསུངས་སོ། །གསུམ་པ་ནི།  དེ་བས་ལྷག་པའི་ཞེས་སོགས་བཅུ་སྟེ།  རྒྱུད་སྡེ་གསུམ་པོ་ལ་ཉི་ཤུ་རྩ་ལྔ་ལས་ལྷག་པའི་སློབ་མ་ནུབ་གཅིག་ལ་གཟུང་དུ་མི་རུང་བ་གསང་བ་སྤྱི་རྒྱུད་དང་སྦྱར་ནས་བཤད་པའོ། །བཞི་པ་ནི།  འདི་ནི་བྱ་བའི་ཞེས་སོགས་
བཅུ་སྟེ།  ཉི་ཤུ་རྩ་ལྔར་གྲངས་ངེས་པར་གསུངས་པའི་གསང་བ་སྤྱི་རྒྱུད་འདི་ནི་བྱ་བའི་རྒྱུད་ཡིན་པས་རྒྱུད་སྡེ་གཞན་གྱི་ཆོ་ག་ལ་སྦྱར་བར་བྱ་བ་མ་ཡིན་ནོ་སྙམ་ན།  གཞན་རྣམས་སོགས་ཏེ།  རྒྱུད་གང་དུ་དབང་བསྐུར་བ་ལ་སོགས་པའི་ལས་ཡོད་པར་གྱུར་ལ།  ལས་ཀྱི་ཆོ་ག་རྣམས་གསལ་པོ་མེད་པ་དེར་
ནི་སྤྱི་ཡི་རྒྱུད་དག་ལས་སོགས་སོ།  །གསུམ་པ་དཀྱིལ་འཁོར་མ་དག་པའི་དབང་བསྐུར་སྨིན་བྱེད་ཡིན་པ་དགག་པ་ནི།  དེང་སང་བྱིན་རླབས་ཞེས་སོགས་བཅུ་གསུམ་སྟེ།  དཀྱིལ་འཁོར་དེ་དག་ཏུ་དབང་བསྐུར་ཀྱང་སྔགས་སྡོམ་མི་ཐོབ་པའི་རྒྱུ་མཚན་ནི།  ཕྱི་ལུས་ལ་འདོམ་གང་གྲུ་བཞི་ཡོད་པ་དང་། 
ནང་སེམས་ལ་བྱང་ཕྱོགས་སོ་བདུན་ཡོད་པའི་རྟེན་འབྲེལ་གྱི་སྟོབས་ཀྱིས་དཀྱིལ་འཁོར་གྲུ་བཞི་སྒོ་བཞི་སོགས་འབྱུང་བ་ཡིན་ཅིང་།  གཡུང་དྲུང་རིས་སོགས་འདི་ལ་ཕྱི་ནང་གི་རྟེན་འབྲེལ་བསྒྲིག་མི་ནུས་པ་དེས་ན་སངས་རྒྱས་རྣམས་ཀྱིས་བཀག་གོ།  །བཞི་པ་ཆོ་ག་མ་དག་པའི་དབང་བསྐུར་
སྨིན་བྱེད་ཡིན་པ་དགག་པ་ལ་གསུམ་སྟེ།  མ་དག་པའི་དབང་བསྐུར་བྱུང་ཚུལ་བརྗོད།  དེ་ཡི་བྱིན་རླབས་བགེགས་ཀྱིས་ཡིན་པར་བསྟན།  ཆོ་ག་དག་པའི་བྱིན་རླབས་རྣམ་དག་ཏུ་བསྟན་པའོ། །དང་པོ་ནི།  དབང་བསྐུར་བྱེད་པ་ཞེས་སོགས་བདུན་ནོ། །གཉིས་པ་ནི།  དེ་ཡི་ལུས་ངག་
ཞེས་སོགས་དྲུག་སྟེ།  དེ་ལྟ་བུའི་དབང་བསྐུར་བྱེད་པའི་དུས་སུ།  སློབ་མའི་ལུས་ངག་ཡིད་གསུམ་གྱི་རྣམ་པ་གདོན་གྱིས་བསྒྱུར་ནས།  འཕར་གཡོ་སོགས་བྱུང་བ་ལ་ཡི་དམ་གྱི་བྱིན་རླབས་ཡིན་པར་འཁྲུལ་བ་མང་ཡང་དཔལ་ལྡན་སོགས་སོ། །གསུམ་པ་ནི།  ཆོ་ག་དག་པར་ཞེས་
9-2-92a


སོགས་གཉིས་ཏེ།  རྒྱུད་ལས།  དབང་དང་རྗེས་གནང་ཐོབ་ནས་ནི། །མ་བསྙེན་པར་ཡང་དེ་ལ་ནི། །ལྷ་ནི་འགོ་ཞིང་དེ་ལ་གནས། །ཞེས་སོ། །གཉིས་པ་སྨིན་བྱེད་ཀྱི་དབང་མི་དགོས་པར་འདོད་པ་དགག་པ་ལ་བཞི་སྟེ།  དབང་བསྐུར་མེད་པར་ཟབ་ལམ་བསྒོམ་པ་དགག །དབང་
བསྐུར་མེད་པར་དབང་རབ་སྨིན་པ་དགག །སེམས་བསྐྱེད་ཙམ་གྱིས་གསང་སྔགས་བསྒོམ་པ་དགག །ཞར་ལ་སྨིན་བྱེད་ནོར་བ་གཞན་ཡང་དགག་པའོ། །དང་པོ་ནི་དབང་བསྐུར་མེད་ཀྱང་ཞེས་སོགས་བཅོ་ལྔ་སྟེ།  རྒྱུད་སྡེ་གཞན་ལས་ཀྱང་དེ་ལྟར་གསུངས་པ་ནི།  དམ་པ་དང་པོ་
ལས།  དབང་བསྐུར་མེད་པར་སྔགས་འཆད་དང་། །ཟབ་མོའི་དེ་ཉིད་སྒོམ་བྱེད་པ། །དེ་དོན་ལེགས་པར་ཤེས་ན་ཡང་། །དམྱལ་བར་འགྱུར་གྱི་གྲོལ་བ་མེད། །ཅེས་པ་དང་།  བཤད་རྒྱུད་རྡོ་རྗེ་ཕྲེང་བ་ལས།  དབང་བསྐུར་མེད་པར་རྒྱུད་འཆད་པ། །སྒྲུབ་པོས་སྔགས་ཀྱི་
དོན་ཤེས་ཀྱང་། །སློབ་དཔོན་སློབ་མ་མཚུངས་པར་ནི། །ཤི་ནས་ངུ་འབོད་ཆེན་པོར་ལྟུང་། །ཞེས་སོགས་གསུངས་སོ། །གཉིས་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ནི།  ཁ་ཅིག་གང་ཟག་ཞེས་སོགས་ཚིགས་བཅད་གཅིག་སྟེ།  ཕྱག་རྒྱ་བ་ཁ་ཅིག། 
གང་ཟག་དབང་པོ་རབ་སྨིན་བྱེད་ཕག་མོའི་བྱིན་རླབས་ཡིན་པས་དབང་བསྐུར་མི་དགོས་ལ་འབྲིང་དང་སོགས་སོ། །གཉིས་པ་ནི།  གང་ཟག་རབ་འབྲིང་ཞེས་སོགས་བཅུ་གཅིག་སྟེ།  འཕགས་པའི་གང་ཟག་དབང་པོ་རབ་ཨིནྡྲ་བྷཱུ་ཏི་དང་།  ཟླ་བ་བཟང་པོ་སོགས་སྤྲུལ་པའི་
དཀྱིལ་འཁོར་དུ་དབང་བསྐུར་བར་གསུངས་པ་ནི།  སྔོན་ཆོག་འཕགས་པའི་སྤྱོད་ཡུལ་ཡིན་གྱི་དེང་སང་གང་ཟག་སོགས་ཏེ།  རྒྱུད་སྡེ་རྣམས་ལས།  རྣམ་སྤྱད་དང་པོ་ས་གཞི་གཟུང་། །གཉིས་པ་ལ་ནི་སྟ་གོན་ཏེ། །ནུབ་གསུམ་པ་ལ་འཇུག་པ་ཤིས། །ཞེས་པས་བསྡུས་པའི་ཆོ་ག།
9-2-92b


  ཐོག་མར་བསྙེན་པ་ཇི་ལྟར་བྱ་བ་དང་།  སའི་ཆོ་ག་དང་།  སྟ་གོན་དང་དཀྱིལ་འཁོར་ཇི་ལྟར་བྲི་བའི་ཚུལ་དང་།  བདག་ཉིད་འཇུག་ཅིང་དབང་བླང་བ་དང་།  སློབ་མ་འཇུག་ཅིང་དབང་བསྐུར་བར་གསུངས་པ་རྣམས་ནི།  སོ་སོ་སྐྱེ་བོའི་རྡོ་རྗེ་སློབ་དཔོན་གྱིས་སོ་སོ་སྐྱེ་བོའི་སློབ་མ་སྨིན་
པ་འབའ་ཞིག་གི་དབང་དུ་བྱས་ནས་གསུངས་པའི་ཕྱིར་རོ། །འོ་ན་ད་ལྟའི་སྨིན་བྱེད་ལ་རྡུལ་ཚོན་གྱི་དཀྱིལ་འཁོར་ཁོ་ན་དགོས་སམ།  རས་བྲིས་ཀྱང་རུང་སྙམ་ན།  འདིའི་དཔྱད་པ་ནི་སྤྱི་དོན་དུ་བསྟན་ཟིན་ཏོ། །གསུམ་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །
དང་པོ་ནི།  ལ་ལ་སེམས་བསྐྱེད་ཞེས་སོགས་གསུམ་སྟེ།  གསང་འདུས་སྟོད་ལུགས་པའི་འདོད་པའོ། །གཉིས་པ་ལ་གསུམ་སྟེ།  བྱ་རྒྱུད་ལ་རྣམ་པར་ཕྱེ་སྟེ་ལན་བཏབ་པ།  ལྷག་མ་གསུམ་ལ་མགོ་གཅིག་ཏུ་ལན་བཏབ་པ།  སྒྲུབ་བྱེད་ཀྱི་སྒོ་ནས་མཇུག་བསྡུ་བའོ། །དང་པོ་ནི།  འདི་ཡང་
ཕྱེ་སྟེ་ཞེས་སོགས་བཅུ་བདུན་ཏེ།  བྱ་རྒྱུད་ལ་རྣམ་པ་གསུམ་ལས།  དོན་ཞགས་དང་།  བཅུ་གཅིག་ཞལ་ལ་སོགས་པ་རྣམས་ལ་དབང་བསྐུར་དང་སེམས་བསྐྱེད་གཉིས་ཀ་མ་ཐོབ་ཀྱང་སྨྱུང་གནས་སོགས་བྱེད་ནུས་ན་ཀུན་གྱིས་བསྒྲུབ་པར་གསུངས་སོ། །དམ་ཚིག་གསུམ་བཀོད་སོགས་
ལས།  འཇུག་པ་སེམས་བསྐྱེད་ཐོབ་ནས་དབང་བསྐུར་མ་ཐོབ་ཀྱང་ཕྲིན་ལས་འགའ་ཞིག་སྒྲུབ་པའི་ཕྱིར་ཆོ་ག་ཤེས་ན་བསྒྲུབ་པར་གསུངས་སོ། །ལེགས་གྲུབ་དང་དཔུང་བཟང་ཡན་ཆད་དུ་རང་དང་རང་གི་དཀྱིལ་འཁོར་དེའི་དབང་བསྐུར་མ་ཐོབ་ན་སོགས་སོ། །དེ་ལྟར་ལུགས་
གསུམ་ལས།  དང་པོའི་ལུང་ནི།  ཆོ་ག་ཞིབ་མོ་ལས།  སེམས་ཅན་ཐམས་ཅད་ལ་ནུས་སམ་མི་ནུས་དྲིས་ཏེ་སྦྱིན་པར་བྱའོ། །ཞེས་དང་།  དུད་འགྲོའི་རྣ་ལམ་དུ་ཡང་སྒྲོགས་ཤིག་ཅེས་སོགས་གསུངས་སོ། །གཉིས་པའི་ལུང་ནི།  གང་ཞིག་བྱང་ཆུབ་སེམས་བརྟན་ཅིང་། །
9-2-93a


བློ་གྲོས་ཆགས་པ་མེད་པ་དང་། །ཐམས་ཅད་དག་ཀྱང་མི་བྱེད་པ། །དེས་འདི་ངེས་པར་འགྲུབ་པར་འགྱུར། །ཞེས་སོ། །གསུམ་པའི་སོགས་ཀྱིས་སྒྲས་བསྡུས་པ་དཔུང་བཟང་ལས།  གང་དག་རིགས་དང་དབང་བསྐུར་ཆོ་ག་མེད། །གང་དག་དཀྱིལ་འཁོར་དུ་ནི་
མ་ཞུགས་དང་། །གང་དག་བྱང་ཆུབ་སེམས་ནི་མ་སྐྱེས་པ། །ང་ཡི་གསང་སྔགས་བཟླས་ན་ཕུང་བར་འགྱུར། །ཞེས་སོ། །གཉིས་པ་ནི།  ལྷག་མ་རྒྱུད་སྡེ་ཞེས་སོགས་ཚིགས་བཅད་གཅིག་སྟེ།  ལུང་རྣམས་ནི་སྤྱི་དོན་དུ་བསྟན་ཟིན་ཏོ། །གསུམ་པ་ནི་དབང་བསྐུར་ནང་གི་ཞེས་
སོགས་དྲུག་སྟེ།  ལེགས་གྲུབ་ཡན་ཆད་དུ།  དབང་བསྐུར་མེད་ན་བསྒོམ་དུ་མི་རུང་བའི་རྒྱུ་མཚན་བསྟན་ནོ། །བཞི་པ་ནི།  གཏོར་མའི་དབང་བསྐུར་ཞེས་སོགས་ཚིགས་བཅད་གཅིག་སྟེ།  འདིའི་ཏིང་ངེ་འཛིན་གྱི་དབང་བསྐུར་ནི།  ཆོ་ག་མེད་པར་དམིགས་པ་གཏད་པ་ཙམ་ལ་
དགོངས་པ་ཡིན་གྱི་ཏིང་ངེ་འཛིན་གྱི་དཀྱིལ་འཁོར་སྤྲུལ་ནས་སློབ་མ་ལ་སྟོན་ནུས་པའི་དབང་བསྐུར་སྨིན་བྱེད་ཡིན་པ་དགག་པ་ནི་མ་ཡིན་ནོ། །གསུམ་པ་དབང་བསྐུར་དགོས་ཀྱང་འཁྲུལ་པར་སྤྱོད་པ་དགག་པ་ལ་ལྔ་སྟེ།  དབང་བསྐུར་བའི་དུས་ལ་འཁྲུལ་པ་དགག་པ།  སློབ་མའི་
རྒྱུད་ལ་འཁྲུལ་པ་དགག་པ།  སྐུར་བྱེད་ཀྱི་དཀྱིལ་འཁོར་ལ་འཁྲུལ་པ་དགག་པ།  རྒྱུད་སྡེའི་ཁྱད་པར་ལ་འཁྲུལ་པ་དགག་པ།  ཆོས་སྒོའི་མིང་ལ་འཁྲུལ་པ་དགག་པའོ། །དང་པོ་ནི།  འགའ་ཞིག་གསང་སྔགས་ཞེས་སོགས་བཅུ་སྟེ།  གསང་འདུས་སྟོད་ལུགས་པ་འགའ་
དང་།  རྣམ་དབྱེ་ཆུང་བའི་སྔགས་པར་ཁས་འཆེ་བ་འགའ་ཞིག །གསང་སྔགས་ད་ལྟ་དབང་མ་ཐོབ་པར་སྤྱོད་ཅིང་།  དབང་བསྐུར་ཕྱིས་ནས་སོགས་ཏེ།  སློབ་དཔོན་ལྟུང་བ་ཅན་དུ་འགྱུར་བ་ནི།  ཡོངས་སུ་མ་སྨིན་སེམས་ཅན་ལ། །གསང་བ་སྒྲོགས་པ་བདུན་པ་
9-2-93b


ཡིན། །ཞེས་དང་།  སློབ་མའང་སྔོན་དུ་ཉམས་པར་འགྱུར་བ་ནི།  དེ་ཉིད་བསྡུས་པ་ལས།  དེ་ནི་འདི་ལྟར་དཀྱིལ་འཁོར་ཆེན་པོ་མ་མཐོང་བའི།  སེམས་ཅན་དེ་དག་གིས་ཕྱག་རྒྱ་བཅིང་བར་བྱས་ནས།  དེའི་ཚེ་དེ་དག་དེ་ལྟར་འགྲུབ་པར་མི་འགྱུར་རོ། །དེ་ནས་དེ་དག་ཐེ་ཚོམ་དུ་འགྱུར་
ཏེ།  གནོད་པ་མ་སྤངས་པས་མྱུར་བ་ཉིད་དུ་དུས་བྱས་ནས་དམྱལ་བ་ཆེན་པོ་མནར་མེད་པ་ཞེས་བྱ་བར་ལྟུང་བར་གྱུར་ཏོ། །ཁྱོད་ཉིད་ཀྱང་ངན་སོང་དུ་ལྟུང་བར་འགྱུར་རོ། །ཞེས་དང་།  བཞི་བརྒྱ་པ་ལས།  ཉམས་པར་གྱུར་པ་དམ་ཆོས་ཀྱི། །སྣོད་ནི་ཅིས་ཀྱང་མ་ཡིན་ནོ། །ཞེས་སོ། །
གཉིས་པ་ནི།  གཅོད་ཡུལ་བ་ལ་ལ་སེམས་ཉིད་ཞེས་སོགས་བཅུ་དགུའོ། །གསུམ་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ནི།  ཁ་ཅིག་ཆོ་ག་ཞེས་སོགས་གསུམ་སྟེ།  ཕྱག་རྒྱ་བ་ཁ་ཅིག །ཆོ་གའི་རྣམ་གཞག་མེད་བཞིན་དུ།  བླ་མའི་ལུས་དཀྱིལ་ལས་
དབང་བཞི་རྫོགས་པར་ལེན་པར་འདོད་དེ།  ལུས་བཙུན་མོ་ལྟ་བུར་སྐུ་ལ་འཁྲིལ། །སྙིང་ལ་སྙིང་སྤྲད་དཔྲལ་བ་གཏུགས། །དུས་དེར་དབང་རྫོགས་སེམས་ལ་བསྐུར། །ཆོས་རྫོགས་དོན་གྱི་ངོ་བོ་མཐོང་། །ཞེས་ཟེར་རོ། །གཉིས་པ་ལ་གསུམ་སྟེ།  ཆོ་ག་མེད་པ་ལ་གནོད་བྱེད་བསྟན། 
ཆོ་ག་ཡོད་པའི་སྒྲུབ་བྱེད་བརྗོད།  བདེན་གཉིས་ཀྱི་སྒོ་ནས་ཆོ་ག་ཐམས་ཅད་མཚུངས་པར་བསྟན་པའོ། །དང་པོ་ནི།  འོ་ན་དགེ་ཚུལ་ཞེས་སོགས་ཚིགས་བཅད་གསུམ་སྟེ།  རྒྱུ་མཚན་དེའི་ཕྱིར་ན་དབང་བསྐུར་དུ་མ་ཟད་སངས་རྒྱས་ཀྱིས་གསུངས་པའི་སྡོམ་གསུམ་གྱི་ཆོ་ག་ཐམས་
ཅད་སྤོང་བར་རིགས་པར་ཐལ་ལོ། །གཉིས་པ་ནི།  གལ་ཏེ་ཆོ་ག་ཞེས་སོགས་ཚིགས་བཅད་གསུམ་སྟེ།  རྐང་པ་དང་པོ་ལྔས་ཆོ་ག་མེད་པའི་ཉེས་དམིགས་བསྟན།  དེ་ནས་གཉིས་ཀྱིས་དབང་བསྐུར་ལ་ཆོ་ག་དགོས་པར་བསྟན།  ལྷག་མ་གཉིས་ཀྱིས་དབང་བསྐུར་གྱི་ཆོ་ག་
9-2-94a


སྤོང་མི་རིགས་པར་བསྟན་ནོ། །འདི་དག་ཀྱང་སྨིན་བྱེད་ཀྱི་དབང་བླ་མའི་ལུས་དཀྱིལ་ལས་ལེན་པ་དགག་པ་ཡིན་གྱི་སྤྱིར་དབང་ལེན་པ་ཙམ་དགག་པ་ནི་མ་ཡིན་པར་ཤེས་པར་བྱའོ། །གསུམ་པ་ནི།  དེ་ཕྱིར་དམ་པའི་ཞེས་སོགས་ཉེར་གསུམ་
སྟེ།  ཀུན་རྫོབ་ཏུ་སྡོམ་པ་གསུམ་ཅར་གྱི་ཆོ་ག་ཐམས་ཅད་ཡོད་མཚུངས་ཡིན་ཅིང་།  དོན་དམ་དུ་མེད་མཚུངས་ཡིན་ཏེ།  ལང་གཤེགས་ལས།  ཀུན་རྫོབ་ཏུ་ནི་ཐམས་ཅད་ཡོད། །དམ་པའི་དོན་དུ་ཡོད་མ་ཡིན། །དེས་ན་དངོས་པོ་གཅིག་ཉིད་ལ། །ཡོད་དང་མེད་པ་ཇི་
ལྟར་འགལ། །ཞེས་གསུངས་སོ། །དེས་ན་སོ་ཐར་ལ་སོགས་པའི་ཆོ་ག་ལ་ལ་དགོས་བཞིན་དུ།  སྨིན་བྱེད་ལ་ལའི་ཆོ་ག་མི་དགོས་ཞེས་སྨྲ་བ་སོགས་ཏེ།  མདོ་སྡུད་པ་ལས།  ཆོས་བཏང་ནས་ནི་ཆོས་མིན་བྱ་བ་སྤྱོད་འགྱུར་བ། །ལམ་བོར་ལམ་གོལ་འགྲོ་བ་འདི་ནི་བདུད་ཀྱི་ལས། །
ཞེས་སོགས་སོ། །བཞི་པ་ལ་གཉིས་ཏེ།  ཕྱོགས་སྔ་མ་བརྗོད་པ་དང་།  དེ་དགག་པའོ། །དང་པོ་ནི།  ཁ་ཅིག་བྱ་བའི་ཞེས་སོགས་ཚིགས་བཅད་གཅིག་སྟེ།  སྔོན་གྱི་དོན་ཞགས་པ་དང་།  ཕྱག་རྒྱ་པ་ཁ་ཅིག་འདོད་པའོ། །འདུལ་བ་སེང་གེས་འདི་པཎྜི་ཏ་ཨ་བྷ་ཡ་ཀ་རའི་འདོད་པ་
ལ་སྦྱོར་བ་ནི།  འདི་བོད་ཀྱི་འདོད་པ་འགོག་པའི་སྐབས་ཡིན་ཅིང་།  བྱ་རྒྱུད་ལ་དབང་བཞི་སྦྱར་བ་པཎྜི་ཏ་དེའི་དགོངས་པ་མ་ཡིན་པས་མི་འཐད་དམ་སྙམ་དུ་སེམས་སོ། །གཉིས་པ་ནི།  འདི་ཡང་སངས་རྒྱས་ཞེས་སོགས་བཅུ་བདུན་ཏེ།  རྒྱུད་སྡེ་རང་གི་ངོས་ནས་འོག་མ་གསུམ་ལ་
སྨིན་བྱེད་ཀྱི་དུས་སུ་དབང་བཞི་ཡང་མེད་ཅིང་།  གྲོལ་བྱེད་ཀྱི་དུས་སུ་རིམ་པ་གཉིས་ཀྱང་མེད་པས།  གཞུང་འདི་དག་སྒྲ་ཇི་བཞིན་དུ་བཤད་པར་བྱའོ། །ཁ་ཅིག་ཕྱོགས་བཅུའི་སངས་རྒྱས་ཀྱི་ཕྲིན་ཡིག་ལས།  བཅོམ་ལྡན་ཁྱོད་ཀྱིས་གསང་སྔགས་ལམ། །རིམ་པ་གཉིས་སུ་བསྡུས་ཏེ་
9-2-94b


གསུངས། །ཞེས་སོགས་ལ་འཁྲུལ་ནས་རྒྱུད་སྡེ་འོག་མ་ལ་རིམ་གཉིས་ཡོད་པར་བསམས་ཏེ།  དབང་བཞི་མེད་པས་དེ་ལ་ལྟོས་པའི་རིམ་གཉིས་མེད་པ་ཡིན་གྱི།  སྤྱིར་རིམ་གཉིས་ཡོད་དོ་ཞེས་སྨྲ་བ་རྣམས་སྤྱི་དོན་དུ་བཀག་ཟིན་པས་དེར་བལྟ་བར་བྱའོ། །རྒྱུད་སྡེ་བཞི་ལ་དབང་
མི་འདྲ་བ་རྣམ་པ་བཞི་ཡོད་པ་ནི།  ཡེ་ཤེས་ཐིག་ལེའི་རྒྱུད་ལས།  ཆུ་ཡི་དབང་བསྐུར་དབུ་རྒྱན་དག །བྱ་བའི་རྒྱུད་ལས་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་ལས་རབ་ཏུ་གསལ། །ཕྱིར་མི་ལྡོག་པ་ཡི་ནི་དབང་། །རྣལ་འབྱོར་རྒྱུད་དུ་གསལ་བར་ཕྱེ། །
དེ་ནི་དྲུག་གི་བྱེ་བྲག་དབང་། །དེ་ནི་སློབ་དཔོན་དབང་ཞེས་བྱ། །རྣལ་འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་དེ་ལྟར་དེ་བཞིན་ནོ། །ཞེས་གསུངས་པ་ལྟར་ཡིན་ལ།  ལམ་གྱི་དབྱེ་བ་མི་འདྲ་བ་བཞི་ནི་གོང་དུ་བཤད་
ཟིན་ཏོ། །ལྔ་པ་ལ་གསུམ་སྟེ།  མོས་པ་ཆོས་སྒོ་ཡིན་པ་དགག །དབང་ལས་གསང་སྔགས་ལོགས་ན་ཡོད་པ་དགག །དབང་ལས་གསང་སྔགས་ལོགས་ན་མེད་པའི་རྒྱུ་མཚན་ནོ། །དང་པོ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ནི།  ལ་ལ་དབང་
བསྐུར་ཞེས་སོགས་ཚིགས་བཅད་གཅིག་སྟེ།  ཕྱག་རྒྱ་བ་ཁ་ཅིག་འདོད་པའོ། །གཉིས་པ་ནི།  འོ་ན་སྡོམ་པ་ཞེས་སོགས་བཅུ་བཞིའོ། །གཉིས་པ་ནི།  དེས་ན་ཆོས་སྒོ་ཞེས་སོགས་བཅུ་བཞི་སྟེ།  ཆོས་སྒོ་ཞེས་བྱ་བ་རྒྱུད་སྡེའི་ཐ་སྙད་ལ་མེད་ཀྱང་གསར་དུ་བཟོས་པའི་མིང་གིས་
འཁྲུལ་གཞི་བྱས་ནས་དབང་བསྐུར་ཆོས་སྒོ་སོགས་སོ། །གསུམ་པ་ལ་གསུམ་སྟེ།  མདོར་བསྟན།  རྒྱས་པར་བཤད།  དོན་བསྡུ་བའོ། །དང་པོ་ནི།  དེས་ན་སྙིང་གཏམ་ཞེས་སོགས་ཚིགས་བཅད་གཅིག་གོ།  གཉིས་པ་ནི།  ཕུང་པོ་ཁམས་དང་ཞེས་སོགས་བཅོ་ལྔ་སྟེ།  འོ་
9-2-95a


ན་རྟེན་འབྲེལ་བསྒྲིག་པའི་ཚུལ་ཇི་ལྟར་ཡིན་སྙམ་ན།  སྦྱང་གཞི་སློབ་མའི་ཕུང་ཁམས་སྐྱེ་མཆེད་རྣམས་ལ།  རྡོ་རྗེ་སློབ་དཔོན་དག་བྱ་དག་བྱེད་ངོ་སྤྲོད་ཤེས་པས་གདན་གསུམ་ཚང་བའི་སངས་རྒྱས་ཀྱི་ས་བོན་བཏབ་ནས།  ཚེ་འདིར་སངས་རྒྱས་བྱེད་པའི་ཐབས་
ལ་དབང་བསྐུར་ཞེས་སུ་བཏགས་པ་ཡིན་ནོ། །དེས་ན་གང་ཟག་དབང་པོ་རབ་ཨིནྡྲ་བྷཱུ་ཏི་ལྟ་བུ་དབང་བསྐུར་ཉིད་ཀྱིས་གྲོལ་བར་གསུངས་པ་ཡང་།  དབང་བསྐུར་གསང་སྔགས་ཀྱི་ལམ་གྱི་གཙོ་བོ་ཡིན་པའི་རྒྱུ་མཚན་གྱིས་གྲོལ་བ་ཡིན་གྱི།  དབང་བསྐུར་ཆོས་སྒོ་ཙམ་དུ་བྱས་ནས་གསང་
སྔགས་ལོགས་ན་བསྒོམ་རྒྱུ་ཡོད་ན།  དབང་བསྐུར་ཁོ་ནས་ཇི་ལྟར་གྲོལ་ལེགས་པར་སོམས་ལ་སྨྲོས་ཤིག །དབང་གིས་གྲོལ་བར་མི་ནུས་པའི་གང་ཟག་གཞན་འབྲིང་དང་ཐ་མ་དག་ལ་བསྒོམ་དགོས་ཀྱང་།  སྔར་དབང་བསྐུར་ཐོབ་པ་དེ་བསྲུང་ཞིང་འཕེལ་བར་བྱེད་པ་ལ་བསྒོམ་
པ་ཞེས་སུ་བཏགས་པ་ཡིན་ཏེ།  བསྐྱེད་རིམ་བསྒོམ་པ་ནི་བུམ་དབང་གི་དུས་སུ་ཕུང་ཁམས་སྐྱེ་མཆེད་ལྷར་བསྐྱེད་པ་དེ་བསྒོམ་པ་ཡིན་ཅིང་།  རྫོགས་རིམ་བསྒོམ་པ་ནི་དབང་གོང་མ་གསུམ་གྱི་དུས་སུ་ངག་ལ་ལོངས་སྤྱོད་རྫོགས་སྐུ་དང་།  ཡིད་ལ་ཆོས་སྐུ་དང་།  གསུམ་
ཀ་ལ་ངོ་བོ་ཉིད་སྐུའི་ས་བོན་བཏབ་པ་དེ་བསྲུང་ཞིང་འཕེལ་བར་བྱེད་པ་ཡིན་པའི་ཕྱིར་རོ། །དེས་ན་རྡོ་རྗེ་ཐེག་པ་བླ་མེད་ཀྱི་སྒོར་ཞུགས་ནས།  དབང་བསྐུར་བ་རྣམ་པ་བཞི་ལས་གཞན་པའི་ཆོས་མེད་དེ།  སྦྱང་གཞིའི་ལུས་ཀྱང་དབང་བཞིའི་ཚུལ་དུ་གནས།  དེ་ལ་རྡོ་རྗེ་
སློབ་དཔོན་གྱིས་དབང་བཞི་བསྐུར།  དེ་ཉིད་ལམ་གྱི་དུས་སུ་ཡང་དབང་བཞིའི་ཚུལ་དུ་བསྒོམ།  འབྲས་བུའི་དུས་སུ་ཡང་དབང་བཞིའི་ཚུལ་དུ་སངས་རྒྱ་བ་ཡིན་པས།  རྒྱུ་ལ་འབྲས་བུའི་རྒྱས་གདབ་ཅིང་།  འབྲས་བུ་ལ་རྒྱུའི་རྒྱས་གདབ་པའི་གནད་དམ་པ་རྣམས་འདིའི་སྐབས་
9-2-95b


སུ་ཤེས་པར་བྱ་དགོས་སོ། །དབང་བསྐུར་ལས་གཞན་པའི་གསང་སྔགས་ཀྱི་ཉམས་ལེན་མེད་པའི་དཔེ་ནི།  ཐེག་པ་ཆེན་པོ་ཕ་རོལ་ཏུ་ཕྱིན་པ་ལ་སེམས་བསྐྱེད་མ་ཡིན་པའི་ཆོས་གཞན་མེད་པ་བཞིན་ཏེ།  དེ་ལ་ཡང་ཐོག་མར་སེམས་བསྐྱེད་བླངས་པའི་ཚེ།  སངས་རྒྱས་
སྒྲུབ་པའི་ཐབས་ཁྱད་པར་ཅན་གྱི་ས་བོན་སེམས་ལ་བཏབ་པ་ཡིན་ཅིང་།  དེའི་ཚེ་ཉེས་སྤྱོད་སྤོང་བ་དང་།  དགེ་བ་ཆོས་སྡུད་དང་།  སེམས་ཅན་དོན་བྱེད་ཀྱིས་བསྡུས་པའི་བྱང་ཆུབ་སེམས་དཔའི་སྤྱོད་པ་རླབས་པོ་ཆེའི་ས་བོན་སེམས་ལ་བཏབ་པ་དེ་ཉིད་བསྲུང་ཞིང་འཕེལ་
བར་བྱེད་པ་ལས་གཞན་པའི་ཐེག་པ་ཆེན་པོའི་ཆོས་ཅུང་ཟད་ཀྱང་མེད་པའི་ཕྱིར་རོ། །གནད་འདི་དག་ནི་ཁོ་བོ་འབའ་ཞིག་གི་སྤྱོད་ཡུལ་ཡིན་ནོ། །གསུམ་པ་ནི།  དེས་ན་ཐུབ་པས་ཞེས་སོགས་ཚིགས་བཅད་གཅིག་སྟེ།  རྒྱུད་སྡེ་རྣམས་དང་།  མཁས་གྲུབ་ཀྱི་གཞུང་རྣམས་
ལས་དབང་བསྐུར་བའི་ཕན་ཡོན་དང་།  མ་བསྐུར་བའི་ཉེས་དམིགས་དཔག་ཏུ་མེད་པ་གསུངས་པའི་སྒོ་ནས་དབང་བསྐུར་ཁོ་ན་ལ་བསྔགས་པ་ནི།  དབང་བསྐུར་གསང་སྔགས་ཀྱི་ལམ་གྱི་རྩ་བ་ཡིན་པ་དེས་ནའོ། །ལུང་རྣམས་ནི་སྤྱི་དོན་དུ་བལྟ་བར་བྱའོ། །བཞི་པ་དབང་
བསྐུར་མུ་བཞིར་འདོད་པ་དགག་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ནི།  ལ་ལ་དབང་བསྐུར་ཞེས་སོགས་ལྔ་སྟེ།  ཏི་ཕུ་པ་དང་།  རས་ཆུང་པ་སོགས་ཀྱི་འདོད་པའོ། །གཉིས་པ་ལ་བཞི་སྟེ།  མུ་བཞི་སྒྲུབ་བྱེད་ཀྱི་ལུང་མེད་པ།  རིགས་
པས་སྒྲུབ་ན་ཀུན་ལ་མཚུངས་པ།  མུ་བཞི་ཡོད་ཀྱང་ཤེས་པར་མི་ནུས་པ།  ནུས་ན་དབང་བསྐུར་དགོས་པར་གྲུབ་པའོ། །དང་པོ་ནི།  འདི་འདྲར་གང་ནའང་ཞེས་སོགས་གཉིས་སོ། །གཉིས་པ་ནི།  འོན་ཀྱང་འདི་ཡང་ཞེས་སོགས་བཅུ་གཅིག་གོ།  གསུམ་པ་ནི།  གལ་ཏེ་མུ་
9-2-96a


བཞི་ཞེས་སོགས་དྲུག་གོ།  བཞི་པ་ནི།  གལ་ཏེ་མུ་བཞི་བདེན་ཞེས་སོགས་བཅུའོ། །གསུམ་པ་དབང་ལས་ཐོབ་པའི་དམ་ཚིག་ལ་འཁྲུལ་པ་དགག་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ནི།  ཁ་ཅིག་གསང་སྔགས་
ཞེས་སོགས་གསུམ་སྟེ།  རྙིང་མ་བ་ཁ་ཅིག་གསང་སྔགས་སྤྱིར་གསང་བར་བྱ་བ་ཡིན་པ་ལ་འོན་ཀྱང་ཡེ་གསང་ཞེས་བྱ་བའི་ཐབས་ཀྱིས་ཆོད་པའི་ཕྱིར་ན།  དབང་གིས་མ་སྨིན་པའི་སེམས་ཅན་ལ་གསང་བ་བསྒྲགས་པ་ལ་ལྟུང་བ་མེད་དོ། །ཞེས་ཟེར་རོ། །གཉིས་པ་ནི།  འདི་
ཡང་ཅུང་ཟད་ཞེས་སོགས་བཅོ་ལྔ་སྟེ།  ཡེ་གསང་གི་དོན་གསང་སྔགས་ཀྱི་ཚིག་དོན་གོ་བ་མེད་པ་ལ་ཡེ་ནས་གསང་བ་ཡིན་ཟེར་ན།  འོ་ན་གོ་བའི་སོགས་ཏེ།  རྒྱུད་རྡོ་རྗེ་ཕྲེང་བ་སོགས་ལས།  དབང་མ་བསྐུར་བ་ལ་གསང་སྔགས་བཤད་པའི་ཉེས་དམིགས་མང་དུ་གསུངས་པ་དང་། 
གཞན་ཡང་དགྲ་ནག་གི་རྒྱུད་དང་།  རྡོ་རྗེ་གུར་དང་།  དེ་ཉིད་བསྡུས་པ་དང་།  རྡོ་རྗེ་སྙིང་པོ་རྒྱན་ལ་སོགས་པ་རྣམས་ལས།  དབང་མ་བསྐུར་བའི་སེམས་ཅན་ལ་གསང་སྔགས་སྒྲོགས་པ་ལ་ལྟུང་བ་འབྱུང་བར་གསུངས་པའི་ཕྱིར་དང་།  ཕ་རོལ་ཏུ་ཕྱིན་པའི་སྡེ་སྣོད་ལས་ཀྱང་།  བློ་
སྦྱངས་མ་བྱས་སེམས་ཅན་ལ། །སྟོང་པ་ཉིད་ནི་བརྗོད་པ་དང་། །ཞེས་ལྟུང་བར་གསུངས་པའི་ཕྱིར་རོ། །དེས་ན་སྨིན་བྱེད་ཀྱི་སྐབས་སུ་ཆོས་སྒོ་ཞེས་བྱ་བ་དང་།  དམ་ཚིག་གི་སྐབས་སུ་ཡེ་གསང་ཞེས་བྱ་བའི་ཐ་སྙད་རྣམས་ནི་བསྟན་པ་ལ་གནོད་པའི་ཚིག་ཡིན་པས་ཐ་སྙད་
ཙམ་ཡང་སྤངས་ཏེ།  སྨིན་བྱེད་ཀྱི་དབང་བླ་མ་ཚད་ལྡན་ལས་རྒྱུད་སྡེ་ལས་ཇི་ལྟར་གསུངས་པ་བཞིན་བླངས་ནས་དམ་ཚིག་དང་།  སྡོམ་པ་ཚུལ་བཞིན་དུ་བསྲུང་བ་ལ་འབད་པར་བྱའོ། །གཉིས་པ་གྲོལ་བྱེད་འཁྲུལ་པ་མེད་པའི་རིམ་གཉིས་ལ་བཞི་སྟེ།  ལམ་གྱི་གཙོ་བོ་མི་དགོས་
9-2-96b


པར་འདོད་པ་དགག །ལམ་གྱི་གཙོ་བོ་ངོས་བཟུང་བ།  སངས་རྒྱས་ཐོབ་པར་འདོད་པས་དེ་ལ་བསླབ་པར་གདམས་པ།  དེ་དག་དང་མ་འབྲེལ་བའི་ཆོས་ལུགས་དགག་པའོ། །དང་པོ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ནི།  ཁ་ཅིག་འཁྲུལ་དང་ཞེས་
སོགས་ཚིགས་བཅད་བཞི་སྟེ།  ཕྱག་རྒྱ་བ་ཁ་ཅིག་ན་རེ།  སངས་རྒྱས་སྒྲུབ་པའི་ཐབས་ལམ་ལ་འཁྲུལ་པ་དང་མ་འཁྲུལ་པའི་དབྱེ་བ་མེད་ཅིང་།  མཐའ་གཅིག་ཏུ་ངེས་པ་ཡང་མ་ཡིན་ཏེ།  རླུང་དང་གཏུམ་མོ་ལ་སོགས་པའི་ཐབས་ལམ་ཕྱོགས་རེ་བས་གྲུབ་པ་ཐོབ་པར་ཡོད་པའི་
ཕྱིར་ཏེ།  དཔེར་ན་ལྟ་བ་རྟོགས་པས་ཞེས་སོགས་སོ། །གོ་ར་ཀྵ་བ་ལང་བསྲུང་བའོ། །ཨིནྡྲ་བྷཱུ་ཏི་འདོད་ཡོན་གྱིས་ཞེས་པ་ནི།  བཙུན་མོའི་ཚོགས་དང་ལྷན་ཅིག་རོལ་ཞིང་།  རྒྱལ་སྲིད་ཀྱི་འདོད་ཡོན་ལ་ལོངས་སྤྱོད་པའོ། །རྒྱུ་རྐྱེན་གྱི་རྟེན་འབྲེལ་ཐམས་ཅད་ཚོགས་པ་ལས། 
བིཪྺ་པ་ལ་གྲུབ་ཐོབ་འབྱུང་བས།  འདི་འདྲའི་ཐབས་ལམ་སྣ་ཚོགས་ཀྱིས་སངས་རྒྱ་བ་ལ་སྐུར་པ་གདབ་ཏུ་མི་རུང་ངོ་ཞེས་ཟེར་རོ། །གཉིས་པ་ལ་ལྔ་སྟེ།  ཕྱོགས་རེའི་ཐབས་ཀྱིས་གྲོལ་བ་དགག །རིམ་གཉིས་ཐབས་ཀྱི་གཙོ་བོར་བསྟན།  གཙོ་བོ་ཡིན་པའི་སྒྲུབ་བྱེད་
དགོད།  ཕྱོགས་རེའི་ཐབས་ཀྱི་དགོས་པ་བསྟན།  སྒྲོ་སྐུར་སྤངས་ནས་གཙོ་བོར་བསྒྲུབ་པར་བསྟན་པའོ། །དང་པོ་ནི།  འདི་ཡང་ལེགས་པར་ཞེས་སོགས་བདུན་ཏེ།  ཐབས་དང་ཤེས་རབ་གཉིས་ལས་གཞན་པའི་སངས་རྒྱས་སྒྲུབ་པའི་ཐབས་མེད་པས།  གོང་དུ་
བཤད་པའི་གྲུབ་ཐོབ་རྣམས་ཀྱང་།  རླུང་དང་གཏུམ་མོ་ལ་སོགས་པ་ཐབས་ལམ་ཕྱོགས་རེ་བས་གྲོལ་བ་མ་ཡིན་གྱི།  དབང་དང་རིམ་གཉིས་ལས་བྱུང་བའི་ཐབས་ཤེས་ཟུང་འཇུག་གི་ཡེ་ཤེས་སྐྱེས་པས་གྲོལ་བ་ཡིན་ནོ། །གཉིས་པ་ནི།  ལྟ་བ་དང་ནི་ཞེས་སོགས་དྲུག་སྟེ།
9-2-97a


  སྟོང་ཉིད་རྟོགས་པའི་ལྟ་བ་རྐྱང་པ་དང་།  བསྐྱེད་རིམ་རྐྱང་པ་སོགས་ཀྱིས་གྲོལ་བ་མ་ཡིན་ཏེ།  སངས་རྒྱས་སྒྲུབ་པ་ལ་ཐབས་ཤེས་རབ་གཉིས་ཅར་དགོས་པའི་ཕྱིར་རོ། །འོ་ན་གྲོལ་བྱེད་ཀྱི་ལམ་གྱི་གཙོ་བོ་གང་ཞེ་ན་དབང་བསྐུར་བའི་ཞེས་སོགས་སོ། །གསུམ་པ་ནི།  བསྐྱེད་
རིམ་རླུང་དང་ཞེས་སོགས་བཅུ་གསུམ་སྟེ།  རིམ་པ་གཉིས་པོ་སངས་རྒྱས་སྒྲུབ་པའི་ལམ་གྱི་གཙོ་བོ་ཡིན་པའི་རྒྱུ་མཚན་གང་ཡིན་ཞེ་ན།  གོང་དུ་བཤད་པའི་གྲུབ་ཐོབ་རྣམས་ཀྱི་ཡེ་ཤེས་སྐྱེ་བའི་སྣ་འདྲེན་ཐམས་ཅད་འདིར་འདུས་ཤིང་།  འདི་གཉིས་ཡོད་ན་ཐབས་ལམ་ཕྱོགས་རེ་བ་
འགའ་ཞིག་མ་ཚང་ཡང་སངས་རྒྱས་བསྒྲུབ་པར་ནུས་ལ།  གཙོ་བོ་འདི་གཉིས་མ་ཚང་ན་ཐབས་ལམ་ཕྱོགས་རེ་བས་གྲོལ་བ་མི་སྲིད་པའི་ཕྱིར་རོ། །གོང་དུ་བཤད་པའི་ཐབས་ལམ་ཕྱོགས་རེ་བ་རྣམས་འདིར་འདུས་པའི་རྒྱུ་མཚན་ནི།  བསྐྱེད་རིམ་ནི་བསྐྱེད་རིམ་དངོས་ཡིན་ལ།  རླུང་
ཞི་དྲག་དང་།  གཏུམ་མོའི་དམིགས་པ་སོགས་ནི་རྫོགས་རིམ་དངོས་ཡིན་པས།  དེ་གཉིས་ལས་ཐ་དད་མ་ཡིན་ཞིང་།  བྱིན་རླབས་ནི་རིམ་གཉིས་དེ་ལས་བྱུང་བ་ཡིན།  ལྟ་བ་ནི་དེ་གཉིས་དག་པར་བྱེད་པའི་ཐབས་ཡིན་ལ།  ཕྱག་རྒྱ་ཆེན་པོ་ནི་དེ་ལས་སྐྱེས་པའི་ཡེ་ཤེས་ཡིན། 
རིམ་གཉིས་བོགས་དབྱུང་བར་བྱེད་པ་ནི་སྤྱོད་པ་ཡིན་ཅིང་།  དེ་ལ་སྤྲོས་བཅས།  སྤྲོས་མེད།  ཤིན་ཏུ་སྤྲོས་མེད་ཀྱི་སྤྱོད་པ་གསུམ་ལས།  ཨིནྡྲ་བྷཱུ་ཏིས་མཛད་པ་ནི་དང་པོ་ཡིན་ལ།  ཞི་བ་ལྷས་མཛད་པ་ནི་གཉིས་པ་ཡིན་ཅིང་།  དེ་ལ་བྷུ་སུ་ཀུ་ཞེས་ཀྱང་གསུངས།  རིམ་གཉིས་བརྟན་
པར་བྱ་བའི་ཕྱིར་བིཪྺ་པ་ལ་སོགས་པའི་གྲུབ་ཐོབ་རྣམས་ཀྱིས་མཛད་པ་ནི་གསུམ་པ་ཡིན་ཅིང་།  དེ་ལ་ཀུན་ཏུ་བཟང་པོའི་སྤྱོད་པར་ཡང་བཤད་དོ། །བཞི་པ་ནི།  དེས་ན་རྒྱུ་རྐྱེན་ཞེས་སོགས་བཅུ་སྟེ།  ཐབས་ཤེས་རབ་གཉིས་ཀྱི་རྒྱུ་རྐྱེན་མཐའ་དག་མ་ཚང་བར་སངས་རྒྱས་མི་འབྱུང་
9-2-97b


བས།  རླུང་དང་གཏུམ་མོ་ཕྱོགས་རེའི་ཐབས་ཀྱིས་གྲོལ་བ་མ་ཡིན་མོད།  འོན་ཀྱང་དེ་དག་ལ་དགོས་པ་མེད་པ་ཡང་མ་ཡིན་ཏེ།  ཚེ་སྔ་མའི་ལས་འཕྲོའི་བྱེ་བྲག་དང་།  ནང་གི་རྩ་ཁམས་ལ་སོགས་པའི་རྟེན་འབྲེལ་གྱི་ཁྱད་པར་གྱིས་ཟུང་འཇུག་གི་ཡེ་ཤེས་སྐྱེ་བའི་སྣ་འདྲེན་ཐབས་ལམ་རེ་རེ་བ་དག་གིས་ཀྱང་
བྱེད་པར་གསུངས་པའི་ཕྱིར་རོ། །དཔེར་ན་ནད་པའི་ལུས་རྟས་པ་བཟའ་བཏུང་གིས་བྱེད་ཀྱང་།  དེའི་ཡི་ག་འབྱེད་པ་ནི།  བད་ཀན་ལ་སོགས་པའི་ཁམས་ཀྱི་བྱེ་བྲག་གིས་ཟས་ཀྱི་ཁྱད་པར་སེའུ་འབྲུ་ལ་སོགས་པས་བྱེད་པ་བཞིན་ནོ། །ལྔ་པ་ནི།  དེ་ཕྱིར་ཐབས་ཀྱི་ཞེས་སོགས་དྲུག་སྟེ།  ཐབས་ལམ་རེ་
རེ་བའི་དགོས་པ་དང་།  ཐབས་ལམ་གྱི་གཙོ་བོའི་དགོས་པ་སོ་སོར་ཤེས་པར་བྱས་ནས།  རེ་རེ་བས་ཕན་པར་མི་འཛིན་པར་ལམ་གྱི་གཙོ་བོ་སྨིན་གྲོལ་གཉིས་ལ་འབད་པར་བྱའོ། །གཉིས་པ་ལ་གཉིས་ཏེ།  དཔེའི་སྒོ་ནས་འབྲས་བུ་འགྲུབ་པའི་དུས་བསྟན་པ།  ཉམས་ལེན་གྱི་སྒོ་ནས་ལམ་
བགྲོད་ཚུལ་སོ་སོར་བཤད་པའོ། །དང་པོ་ནི།  སོ་ནམ་ཚུལ་བཞིན་ཞེས་སོགས་ཚིགས་བཅད་གཉིས་ཏེ་གོ་སླའོ། །གཉིས་པ་ལ་གཉིས་ཏེ།  ཕ་རོལ་ཏུ་ཕྱིན་པའི་ལམ་གྱི་བགྲོད་ཚུལ།  རྡོ་རྗེ་ཐེག་པའི་ལམ་གྱི་བགྲོད་ཚུལ་ལོ། །དང་པོ་ནི།  སྟོང་ཉིད་སྙིང་རྗེ་ཞེས་སོགས་ཉི་ཤུ་རྩ་གཉིས་ཏེ།  སྟོང་ཉིད་སྙིང་རྗེའི་
སྙིང་པོ་ཅན་གཙོ་བོར་བསྒོམ་པ་ནི།  ཕ་རོལ་ཏུ་ཕྱིན་པའི་ལམ་བགྲོད་ཚུལ་ཡིན་ལ།  དེས་གང་ཟག་དབང་པོ་རྣོ་བ་དང་།  བརྩོན་འགྲུས་མྱུར་བ་ཡིན་ན་ཡང་།  བསྐལ་པ་གྲངས་མེད་གསུམ་གྱིས་དཀའ་བ་སྤྱད་དགོས་ཤིང་།  ཐེག་པ་ཆེན་པོའི་སྡེ་སྣོད་ཀུན་ལས་བཤད་པའི་སངས་རྒྱས་བསྒྲུབ་
པའི་ལམ་པོ་ཆེ་ལམ་ཡིན་མིན་གྱི་རྩོད་པ་ཀུན་ལས་གྲོལ་བའི་ཆོས་ཡིན་པས་ཐེག་པ་ཆེན་པོའི་མཁས་པ་ཀུན་གྱིས་ཀྱང་གུས་པས་བསྟན་པ་ཡིན་ནོ། །འདི་བཞིན་དུ་བསྒྲུབ་པར་འདོད་ན།  རྡོ་རྗེ་ཕག་མོའི་བྱིན་རླབས་ལ་སོགས་པ་རྣམས་མི་དགོས་ཀྱི།  འོན་ཀྱང་ཐེག་པ་ཆེན་པོ་ཕ་རོལ་ཏུ་
9-2-98a


ཕྱིན་པའི་སྡེ་སྣོད་རྣམས་ལས་འབྱུང་བ་བཞིན་བྱང་ཆུབ་མཆོག་ཏུ་སོགས་སོ། །གཉིས་པ་ནི།  ཕ་རོལ་ཕྱིན་གཞུང་ཞེས་སོགས་བཅོ་ལྔ་སྟེ།  ཕ་རོལ་ཏུ་ཕྱིན་པའི་གཞུང་ལས་བཤད་པའི་བསྐལ་པ་གྲངས་མེད་གསུམ་གྱིས་དཀའ་སྤྱད་མི་ནུས་
པར།  སེམས་ཅན་གྱི་སྡུག་བསྔལ་ལ་དམིགས་པའི་སྙིང་རྗེ་ཤིན་ཏུ་ལྷག་པར་གྱུར་པས།  གསང་སྔགས་རྡོ་རྗེ་ཐེག་པའི་ལམ་ལ་བརྟེན་ནས་ཚེ་འདིའམ།  བར་དོ་ལ་སོགས་སུ་སངས་རྒྱས་བསྒྲུབ་པར་འདོད་ན།  ཐོག་མར་སྨིན་བྱེད་ནོར་བ་མེད་པའི་དབང་བཞི་བླང་
དགོས་ཏེ།  དེ་ནི་གསང་སྔགས་རྡོ་རྗེ་ཐེག་པའི་ལམ་གྱི་རྩ་བ་ཡིན་པའི་ཕྱིར་རོ། །དབང་པོ་ཤིན་ཏུ་རྣོ་ཞིང་བསོད་ནམས་བསགས་པ་རྣམས་ནི།  དེ་ཙམ་གྱིས་གྲོལ་བ་ཡང་སྲིད་མོད་ཀྱི།  གལ་ཏེ་མ་གྲོལ་ན་དབང་བསྐུར་དེ་ཉིད་འཕེལ་ཞིང་རྒྱས་པར་བྱེད་པ་ལ་ཐ་མལ་གྱི་
སྣང་བ་དག་པའི་སྣང་བར་བསྒྱུར་བར་བྱེད་པའི་བསྐྱེད་རིམ་དང་།  དེ་ཉིད་བདེ་ཆེན་གྱི་ཡེ་ཤེས་སུ་བསྒྱུར་བར་བྱེད་པའི་རྫོགས་རིམ་རྒྱུད་སྡེ་ལས་ཇི་ལྟར་བཤད་པ་བཞིན་འཁྲུལ་པ་མེད་པར་བསྒོམ་པར་བྱའོ། །དབང་དང་རིམ་གཉིས་ལས་བྱུང་བའི་མཚོན་བྱེད་དཔེའི་ཡེ་ཤེས་
ཕྱག་རྒྱ་ཆེན་པོ་ནམ་ཞིག་སྐྱེས་པའི་ཚེ།  དེ་ཉིད་ཡང་ནས་ཡང་དུ་གོམས་པར་བྱས་ཏེ།  དྲོད་ཐོབ་པའི་རྟགས་མཉམ་གཞག་ཏུ་འཇིག་རྟེན་ཆོས་བརྒྱད་མགོ་སྙོམས་པ་སྙམ་བྱེད་པའི་ཚེ།  འཁོར་འདས་ལ་བླང་དོར་ཐ་དད་དུ་མི་འཛིན་པར་རོ་མཉམ་དུ་བསྲེ་བའི་ཕྱིར་ཀུན་འདར་
གྱི་སྤྱོད་པ་ལ་སོགས་པ་རིམ་གཉིས་བོགས་དབྱུང་བར་བྱེད་པའི་སྤྱོད་པ་རྣམས་སྤྱོད།  དེ་ལྟར་སྤྱད་པས་ཕྱི་རོལ་པུ་ལི་ར་མ་ལ་ཡ་ལ་སོགས་པའི་ཡུལ་སུམ་ཅུ་སོ་བདུན་དབང་དུ་འདུས་པ་ན།  ནང་ལུས་ཀྱི་སྤྱི་བོ་ལ་སོགས་པའི་ཡུལ་སོ་བདུན་གྱི་རླུང་སེམས་དབུ་མར་ཞུགས་
9-2-98b


ཏེ།  ས་ལམ་བགྲོད་ནས་རྡོ་རྗེ་འཛིན་པའི་ས་བཅུ་གསུམ་པ་ཐོབ་པར་འགྱུར་རོ། །ལམ་གྱི་བགྲོད་ཚུལ་འདི་ལྟ་བུ་འདི་ནི།  དུས་གསུམ་སངས་རྒྱས་ཞེས་སོགས་སོ། །རྡོ་རྗེ་ཐེག་པའི་སའི་རྣམ་པར་གཞག་པ་ནི་བརྟག་གཉིས་སུ།  གནས་དང་ཉེ་བའི་གནས་དང་ནི། །ཞིང་དང་
ཉེ་བའི་ཞིང་ཉིད་དང་། །ཚན་དྷོ་ཉེ་བའི་ཚན་དྷོ་དང་། །དེ་བཞིན་འདུ་བ་ཉེ་འདུ་བ། །འཐུང་གཅོད་ཉེ་བའི་འཐུང་གཅོད་ཉིད། །དུར་ཁྲོད་ཉེ་བའི་དུར་ཁྲོད་ཉིད། །འདི་རྣམས་ས་ནི་བཅུ་གཉིས་ཏེ། །ས་བཅུའི་དབང་ཕྱུག་མགོན་པོ་ཉིད། །ཅེས་གསུངས་ཤིང་།  བདེ་མཆོག་རྩ་རྒྱུད་
དང་།  སམྦུ་ཊིར།  གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་ནི་འོད་བྱེད་ཤེས་པར་བྱ། །ཉེ་བའི་ཞིང་ནི་འོད་འཕྲོ་ཅན། །ཚན་དྷོ་མངོན་དུ་གྱུར་པ་སྟེ། །ཉེ་བའི་ཚན་དྷོ་སྦྱང་དཀའ་བ། །འདུ་བ་རིང་དུ་སོང་བ་སྟེ། །ཉེ་བའི་འདུ་བ་མི་གཡོ་བ། །
དུར་ཁྲོད་ལེགས་པའི་བློ་གྲོས་ཏེ། །ཉེ་བའི་དུར་ཁྲོད་ཆོས་ཀྱི་སྤྲིན། །ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད། །ཅེས་འཐུང་གཅོད་ཉེ་བའི་འཐུང་གཅོད་མ་གཏོགས་པ་གཞན་བཅུ་པོ་ཕ་རོལ་ཏུ་ཕྱིན་པའི་ས་བཅུ་དང་སྦྱར་ཞིང་།  འགྲེལ་པ་ཀུ་མུ་ཏིར་
རྒྱུད་རྒྱས་པའི་ལུང་དྲངས་པར།  འཐུང་གཅོད་དཔེ་མེད་ཡེ་ཤེས་ཏེ། །ཉེ་བའི་འཐུང་གཅོད་ཡེ་ཤེས་ཆེ། །ཞེས་དང་རྒྱུད་གཞན་ལས།  རྡོ་རྗེའི་ས་ནི་བཅུ་གསུམ་པ། །ཞེས་པ་ཡང་ཡོད་དོ། །འདི་དག་གི་དོན་ལ།  རྗེ་བཙུན་ས་སྐྱ་པ་ཡབ་སྲས་རྣམས་ཀྱི་བཞེད་པས།  ས་
ལྷག་མ་གསུམ་པོ་རྡོ་རྗེ་ཐེག་པའི་ལམ་ཁོ་ནས་བགྲོད་པར་བྱ་བ་ཡིན་པས།  ཕ་རོལ་ཏུ་ཕྱིན་པའི་ལམ་གྱིས་བགྲོད་མི་ནུས་པ་ཡིན་ནོ། །ཕར་ཕྱིན་ཐེག་པ་ནས་ས་བཅུ་གཅིག་པ་སངས་རྒྱས་སུ་བཤད་པ་དང་།  རྡོ་རྗེ་ཐེག་པ་ནས་ས་བཅུ་གསུམ་པ་སངས་རྒྱས་སུ་བཤད་པ་ནི།  མཚན་
9-2-99a


གཞི་ལ་མི་མཐུན་པ་ཡིན་པས་རང་རང་གི་ལམ་དེ་ཉིད་ཀྱིས་བགྲོད་པར་བྱ་བ་མཐར་ཐུག་པ་དེ་ལ་དེ་དང་དེར་རྫོགས་པའི་སངས་རྒྱས་སུ་གསུངས་སོ། །འོན་ཀྱང་ས་བཅུ་གཅིག་པ་ནི་སངས་རྒྱས་མཚན་ཉིད་པ་མ་ཡིན་ཏེ།  སློབ་ལམ་གྱི་གནས་སྐབས་ཡིན་པའི་
ཕྱིར་རོ། །འོ་ན་ཕར་ཕྱིན་ཐེག་པར་ཡང་སློབ་ལམ་དུ་ཅིའི་ཕྱིར་མ་བཤད་ཅེ་ན།  དེར་ནི་ཐེག་པ་རང་ལུགས་ལ་དེ་ལས་ལྷག་པའི་ལམ་བགྲོད་པའི་ནུས་པ་མེད་པས་འབྲས་བུའི་ལྡོག་པ་ནས་བཤད་པ་ཡིན་ནོ། །དེའི་གོང་དུ་ཡང་ས་གཉིས་བགྲོད་དུ་ཡོད་པའི་རྒྱུ་མཚན་ནི།  ཡུལ་སུམ་
ཅུ་སོ་བདུན་གྱི་རླུང་སེམས་དབུ་མར་མ་ཞུགས་པར་རྫོགས་པའི་སངས་རྒྱས་མི་ཐོབ་ལ།  ཡུལ་ཉི་ཤུ་རྩ་བཞིའི་རླུང་སེམས་དབུ་མར་ཞུགས་པས་ནི།  ས་བཅུ་པ་མན་ཆད་ཀྱི་རྟོགས་པ་ལས་མི་བསྐྱེད་པར་གོང་དུ་དྲངས་པའི་བདེ་མཆོག་རྩ་རྒྱུད་དང་།  སམྦུ་ཊིའི་ལུང་གཉིས་ཀྱིས་གྲུབ་
ལ།  ལྷག་མ་སྙིང་ཁའི་ཕྱི་སྐོར་གྱི་རྩ་འདབ་བརྒྱད་དང་།  སྦས་པའི་རྩ་ལྔའི་རླུང་སེམས་དབུ་མར་ཞུགས་པས་བསྐྱེད་པར་བྱ་བའི་ས་ལྷག་མ་གསུམ་ངེས་པར་ཡོད་པའི་ཕྱིར་རོ། །ཁ་ཅིག་ས་སྐྱ་པའི་བཞེད་པ་ལ།  ས་བཅུ་གཅིག་པ་དང་བཅུ་གཉིས་པ་ཕ་རོལ་ཏུ་ཕྱིན་པའི་ས་བཅུའི་
ཁོངས་སུ་བསྡུ་བ་གོང་དུ་དྲངས་པའི་བརྟག་གཉིས་དང་།  སམྦུ་ཊིའི་དགོངས་པར་འཆད་པ་ནི་ཤིན་ཏུ་འཁྲུལ་ཏེ།  བརྟག་གཉིས་ཀྱི་ལུང་གི་དོན་ནི་ས་བཅུ་གཉིས་པོ་དེ་དག་ཕ་རོལ་ཏུ་ཕྱིན་པའི་ས་བཅུ་ཡིན་ཞེས་པའི་དོན་མ་ཡིན་གྱི།  ས་བཅུ་གཉིས་པོ་དེ་དག་ཕ་རོལ་ཏུ་ཕྱིན་པའི་ཐེག་པ་
ལས་ས་བཅུ་མན་ཆད་ལ་སློབ་ལམ་དུ་བཞག་པ་ལྟར།  རྡོ་རྗེ་ཐེག་པ་འདིར་ཡང་སློབ་ལམ་ཡིན་པའི་དོན་དུ་མངོན་རྟོགས་ལྗོན་ཤིང་ལས་བཤད་པར་མ་མཐོང་བར་ཟད་པའི་ཕྱིར་དང་།  སམྦུ་ཊིར།  འཐུང་གཅོད་དང་།  ཉེ་བའི་འཐུང་གཅོད་མ་གཏོགས་པའི་ཡུལ་ཉི་ཤུ་རྩ་བཞི་དང་། 
9-2-99b


 ཕ་རོལ་ཏུ་ཕྱིན་པའི་ས་བཅུ་སྦྱར་བ་ལ་བློ་ཁ་མ་ཕྱོགས་པར།  རྡོ་རྗེ་ཐེག་པའི་ས་ཐམས་ཅད་ཕ་རོལ་ཏུ་ཕྱིན་པའི་ས་བཅུའི་ཁོངས་སུ་འདུས་སྙམ་དུ་མོས་སྒོམ་བྱེད་པ་ཙམ་དུ་ཟད་པའི་ཕྱིར་རོ། །འོ་ན་ཕར་ཕྱིན་ཐེག་པ་ནས་སྐུ་གསུམ་གྱི་རྣམ་གཞག་བཤད་པའི་རྫོགས་པའི་སངས་རྒྱས་དེ་སློབ་
ལམ་གྱི་གནས་སྐབས་ཡིན་ནམ།  ས་བཅུ་གསུམ་པ་ཐོབ་ཟིན་པ་ཞིག་ཡིན་སྙམ་ན།  དེ་ནི་ས་བཅུ་གསུམ་པ་ཐོབ་ཟིན་པ་ཡིན་ཀྱང་།  དེར་ནི་དེའི་ཐ་སྙད་མ་གསུངས་ཏེ།  ས་བཅུ་གཅིག་པ་ལ་རྫོགས་པའི་སངས་རྒྱས་ཀྱི་རྣམ་གཞག་བྱེད་པའི་སྐབས་ཡིན་པའི་ཕྱིར་རོ། །འོ་ན་
ཕར་ཕྱིན་ཐེག་པའི་ལམ་དེ་ཉམས་སུ་བླངས་ཀྱང་དེ་ནས་བཤད་པའི་རྫོགས་པའི་སངས་རྒྱས་དེ་མི་ཐོབ་པར་འགྱུར་ལ།  དེ་ཡང་འདོད་ན།  ལམ་ཉམས་སུ་བླངས་པ་ལ་དགོས་པ་མེད་པར་འགྱུར་ཅིང་།  སྐད་ཅིག་མ་གཅིག་པའི་མངོན་པར་རྫོགས་པ་བྱང་ཆུབ་པ་རྣམ་པར་བསྒོམས་
པའི་སྐད་ཅིག་མ་གཉིས་པ་ལ་ཆོས་ཀྱི་སྐུར་མངོན་པར་རྫོགས་པར་བྱང་ཆུབ་པ་ཡིན་ཏེ།  ཞེས་པ་དང་ཡང་འགལ་བར་འགྱུར་རོ་སྙམ་ན།  ལམ་ཉམས་སུ་བླངས་པ་དོན་མེད་པར་མི་འགྱུར་ཏེ།  ས་བཅུ་པའི་བར་ཐོབ་ནས་སྔགས་ལམ་ལ་མི་འཇུག་པ་མི་སྲིད་པས།  ཕར་ཕྱིན་ཐེག་པའི་ལམ་མཐར་
ཕྱིན་ནས་སྔགས་ལམ་གྱིས་འབད་རྩོལ་ཆུང་ངུས་རྡོ་རྗེ་འཛིན་པའི་ས་ཐོབ་པར་འགྱུར་བའི་ཕྱིར་རོ། །གཞན་དུ་ན་སེམས་ཙམ་པའི་གཞུང་ནས་བཤད་པའི་སྐུ་གསུམ་པོ་དེ་སངས་རྒྱས་མ་ཡིན་ན་ཧ་ཅང་ཐལ་ཞིང་།  གལ་ཏེ་ཡིན་ན།  སེམས་ཙམ་པའི་ལམ་ཁོ་ན་ལ་བརྟེན་ནས་དེ་ཐོབ་ན།  དབུ་མའི་
ལྟ་བ་ལ་མ་བརྟེན་པར་སངས་རྒྱས་ཐོབ་པ་ཡོད་པར་འགྱུར་ཞིང་།  གལ་ཏེ་མི་ཐོབ་ན་སེམས་ཙམ་པའི་གཞུང་ནས་བཤད་པའི་ལམ་ཉམས་སུ་བླངས་པ་ལ་དགོས་པ་མེད་པར་ཁྱེད་ལ་མཚུངས་པར་འགྱུར་རོ། །གལ་ཏེ་མི་མཚུངས་ཏེ།  སེམས་ཙམ་པ་རང་གི་དེ་ནས་བཤད་པའི་ལམ་གྱིས་
9-2-100a


འབྲས་བུ་དེ་ཐོབ་པར་འདོད་ཀྱང་།  དབུ་མའི་ལུགས་ལ་དེ་མི་འདོད་པ་ནི་གྲུབ་མཐའི་ཁྱད་པར་ཡིན་པས་སོ་སྙམ་ན།  དེ་ནི་ཤིན་ཏུ་བདེན་མོད།  དེ་ལྟར་ན་ཕ་རོལ་ཏུ་ཕྱིན་པའི་ཐེག་པ་དང་།  རྡོ་རྗེ་ཐེག་པའི་ཁྱད་པར་རྒྱུད་སྡེ་རྣམས་དང་།  གྲུབ་ཐོབ་ཀྱི་གསུང་
རྣམས་ནས་བཤད་པ་རྣམས་ཡིད་ལ་བཞག་ནས་སེམས་རྣལ་དུ་གནས་པར་བྱའོ། །འགྲེལ་པ་དོན་གསལ་གྱི་ལུང་གིས།  རྡོ་རྗེ་ཐེག་པའི་ས་ལམ་གྱི་རྣམ་བཞག་ལ་མི་གནོད་པ་ཡང་ཚུལ་འདིས་རྟོགས་པར་བྱའོ། །འོ་ན་ཕར་ཕྱིན་ཐེག་པ་དང་།  རྡོ་རྗེ་ཐེག་པ་གཉིས་རྫོགས་
པའི་སངས་རྒྱས་ཀྱི་མཚན་ཉིད་ལ་མཐུན་ཀྱང་མཚན་གཞི་ལ་མི་མཐུན་པ་གང་ནས་བཤད་སྙམ་ན།  སམྦུ་ཊིར།  གང་དག་བསམ་གྱིས་མི་ཁྱབ་པའི་གནས་མངོན་དུ་མ་བྱས་པ་དེ་ནི་བདེ་བར་གཤེགས་པ་སྟེ་སངས་རྒྱས་ཡིན་ལ།  མཚན་གཞི་མཚོན་པ་ནི་རྡོ་རྗེ་འཛིན་པ་ཡང་དག་
པའོ། །ཞེས་པའི་དོན་རྗེ་བཙུན་རྩེ་མོའི་འགྲེལ་པར་ཞིབ་ཏུ་ཕྱེ་བ་ལས་ཤེས་པར་བྱའོ། །འདི་དག་ནི་དོན་འདི་ལ་བློའི་མོས་པ་ཡོད་ཀྱང་།  བཤེས་གཉེན་གྱི་འཁར་བ་ངན་ཞིང་རྣམ་དཔྱོད་ཀྱི་མིག་མི་གསལ་བས་ཇི་ལྟ་བ་བཞིན་རྟོགས་པར་མ་ནུས་པའི་དད་ལྡན་རྣམས་ལ་སྙིང་བརྩེ་
བའི་བསམ་པས།  རྗེ་བཙུན་བླ་མ་མུས་པ་ཆེན་པོའི་གསུང་ལས་ཇི་ལྟར་འབྱུང་བ་བཞིན་མ་སྦས་པར་བྲིས་པའོ། །གསུམ་པ་ནི།  གང་ཞིག་སངས་རྒྱས་ཞེས་སོགས་ཚིགས་བཅད་གཉིས་ཏེ།  དང་པོ་དྲུག་ནི་གོང་དུ་བཤད་པའི་ལམ་གཉིས་པོ་བློ་དང་འཚམས་པར་བསྒྲུབ་པར་
གདམས་པ་ཡིན་ལ།  ཐ་མ་གཉིས་ཀྱིས་ནི་དེའི་སྒྲུབ་བྱེད་སྟོན་ནོ། །བཞི་པ་ལ་བདུན་ཏེ།  བསྟན་པ་དང་མ་འབྲེལ་བའི་ཆོས་པ་དགག་པ།  སྡོམ་པ་དང་མ་འབྲེལ་བའི་ཐར་ལམ་དགག་པ།  ངེས་འབྱུང་དང་མ་འབྲེལ་བའི་སོ་ཐར་དགག་པ།  སྡེ་སྣོད་དང་མ་འབྲེལ་བའི་
9-2-100b


སེམས་བསྐྱེད་དགག་པ།  རྒྱུད་སྡེ་དང་མ་འབྲེལ་བའི་གསང་སྔགས་དགག་པ།  དབང་བསྐུར་དང་མ་འབྲེལ་བའི་བླ་མ་དགག་པ།  དམ་ཆོས་དང་མ་འབྲེལ་བའི་ཆོས་པ་དགག་པའོ། །དང་པོ་ནི།  ད་ལྟའི་ཆོས་པ་ཞེས་སོགས་བཅུ་བདུན་ཏེ།  སངས་རྒྱས་ཀྱི་བསྟན་པའི་
སྒོར་ཞུགས་ན།  ཉན་ཐོས་ཀྱི་ཆོས་ལུགས་དང་།  ཕ་རོལ་ཏུ་ཕྱིན་པའི་ཆོས་ལུགས་དང་།  རྡོ་རྗེ་ཐེག་པའི་ཆོས་ལུགས་གསུམ་པོ་གང་རུང་ལ་འཇུག་དགོས་ཞིང་།  དེ་ཡང་རང་རང་གི་གཞུང་ལུགས་ཁུངས་མ་ལྟར་ཉམས་སུ་བླངས་པ་ལ་འཇུག་དགོས་ཀྱི་གཞན་དུ་དེས་ཀྱང་འཚང་
རྒྱ་བར་མི་ནུས་སོ། །གཉིས་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ལ་གཉིས་ཏེ།  སྨད་པའི་ཆེད་དུ་མུ་སྟེགས་ཀྱི་དཔེ་བརྗོད་པ།  བོད་བླུན་གྱི་འདོད་པའི་དོན་ལ་སྦྱར་བའོ། །དང་པོ་ནི།  མུ་སྟེགས་ཞེས་སོགས་དྲུག་སྟེ།  སྔོན་དགེ་སློང་མང་པོས་
རྒྱལ་པོའི་ཁབ་ཏུ་བསོད་སྙོམས་ལ་ཕྱིན་པས་མུ་སྟེགས་ཀྱི་བྲམ་ཟེ་རྣམས་ཀྱིས།  ཁྱེད་དགེ་སྦྱོང་གོའུ་ཏ་མའི་ཆོས་ལུགས་ལའང་སྡིག་པ་སྤོང་ཞིང་དགེ་བ་སྒྲུབ་པ་ཡིན་པ་ལས།  ངེད་བྲམ་ཟེ་རྣམས་ཀྱི་རིག་བྱེད་ལས་ཀྱང་དེ་བཞིན་དུ་སྟོན་པས་ཁྱེད་ཀྱི་ཆོས་ལུགས་བཟང་ལ། 
ངེད་ཀྱི་ཆོས་ལུགས་ངན་པའི་རྒྱུ་མཚན་ཅི་ཡོད་ཅེས་ཟེར་བས།  དགེ་སློང་དེ་རྣམས་གསར་བུ་ཐོས་པ་ཆུང་བས་སྤ་གོང་སྟེ།  ལན་གདབ་པར་མ་ནུས་ནས་སླར་ལོག་སྟེ།  འཕགས་པ་ཤཱ་རིའི་བུ་ལ་བསྙད་པས།  ང་དང་མ་ཕྲད་པས་ཉེས་པ་ཡིན།  ཆོས་དང་མཐུན་པར་
ཚར་གཅོད་པ་ཡིན་ཏེ།  ཞེས་གསུངས་སོ། །གཉིས་པ་ནི།  དེ་བཞིན་འདི་ནའང་ཞེས་སོགས་ཚིགས་བཅད་གཉིས་ཏེ།  མུ་སྟེགས་བྱེད་ཀྱི་འདོད་པ་དེ་བཞིན་དུ་གངས་ཅན་འདི་ནའང་ཆོས་ཀྱི་གནད་མི་ཤེས་པའི་བླུན་པོ་འགའ་ཞིག་དཀོན་མཆོག་ལ་དད་པ་དང་།  སེམས་
9-2-101a


ཅན་ལ་སྙིང་རྗེ་དང་།  སྦྱིན་སོགས་ཀྱི་དགེ་བ་སྤྱད་ན་མདོ་རྒྱུད་ཀྱི་ཚིག་དོན་དང་མི་མཐུན་ཡང་སྐྱོན་མེད།  དེ་དག་མེད་ན་མདོ་རྒྱུད་དང་མཐུན་ཡང་ཕན་པ་མེད་ཅེས་ཟེར་རོ། །གཉིས་པ་ལ་གཉིས་ཏེ།  སྡོམ་གསུམ་གྱིས་དབེན་པའི་དགེ་བས་སངས་
རྒྱས་མི་འགྲུབ་པར་བསྟན་པ།  སྡོམ་གསུམ་གྱི་དགེ་བས་སངས་རྒྱས་འགྲུབ་པར་བསྟན་པའོ། །དང་པོ་ལ་གཉིས་ཏེ།  དཔེ་བསྒྲུབ་པ་དང་།  དོན་ལ་སྦྱར་བའོ། །དང་པོ་ནི།  དེ་ཡང་ཞེས་སོགས་ལྔའོ། །གཉིས་པ་ནི།  དེ་བཞིན་ཞེས་སོགས་ཚིགས་བཅད་གཉིས་ཏེ།  སྡོམ་
པ་ལས་མ་བྱུང་བའི་དགེ་བ་བར་མ་ཡིན་པ་དེ་བཞིན་དུ་དབང་བསྐུར་མ་ཐོབ་ན།  རིག་འཛིན་སྔགས་ཀྱི་སྡོམ་པ་མེད་ལ།  སྔགས་སྡོམ་མེད་པས་དགེ་བ་ཅི་སྤྱད་ཀྱང་སྔགས་སྡོམ་ལ་ལྟོས་ཏེ་བར་མ་ཡིན་གྱི་སྔགས་སྡོམ་ལས་བྱུང་བའི་དགེ་བར་མི་འབྱུང་།  སྔགས་སྡོམ་ལས་
བྱུང་བའི་དགེ་བ་མ་ཡིན་ན་གསང་སྔགས་ཐབས་ལམ་ཟབ་ཀྱང་འཚང་མི་རྒྱ་བར་རྫོགས་པའི་སངས་རྒྱས་ཀྱིས་གསུངས་ཏེ།  རྡོ་རྗེ་རྩེ་མོར།  སྡོམ་པ་གསུམ་ལ་གནས་པ་ནི། །དང་པོའི་ཁྲུས་སུ་བཤད་པ་ཡིན། །ཞེས་གསུངས་པ་ལྟར་རོ། །གཉིས་པ་ནི།  སྡོམ་པ་གསུམ་
དང་ཞེས་སོགས་དྲུག་སྟེ།  དབང་བསྐུར་གྱི་སྒོ་ནས་སྡོམ་གསུམ་དང་ལྡན་པར་བྱ་སྟེ།  རིམ་གཉིས་ཟབ་མོའི་གནད་ཤེས་ནས་བསྒོམས་ན་དེ་ནི་ཚེ་འདིའམ་ཞེས་སོགས་ཏེ།  དེའི་ཕྱིར་ན།  དབང་བསྐུར་གྱིས་སྡོམ་གསུམ་དང་ལྡན་པར་བྱེད་པ་འདི་ལ་མཁས་པ་རྣམས་གུས་པ་ཡིན་
ནོ། །དེ་ཡང་སམྦུ་ཊིར།  གཞན་དུ་བསྐལ་པ་བྱེ་བར་ནི། །གྲངས་མེད་པས་ནི་གང་ཐོབ་པ། །གང་དུ་དམ་པའི་བདེ་བས་ཁྱོད། །སྐྱེ་བ་འདིར་ནི་འགྲུབ་པར་འགྱུར། །ཞེས་པ་དང་།  གསང་འདུས་ལས།  འདི་ཡིས་ཆོས་ཀྱི་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་
9-2-101b


བའི། །ཡེ་ཤེས་རྒྱ་མཚོས་རྣམ་བརྒྱན་པ། །ཚེ་འདི་ཉིད་ལ་འགྲུབ་པར་འགྱུར། །ཅེས་དང་།  ཡེ་ཤེས་ཐིག་ལེར།  ཡང་ན་ལུས་འདི་སྤངས་མ་ཐག །བརྩོན་པ་མི་ལྡན་པས་ཀྱང་འགྲུབ། །ཅེས་དང་།  གསང་བའི་མཛོད་ལས།  དབང་བསྐུར་ཡང་དག་སྦྱིན་ལྡན་ན། །སྐྱེ་
ཞིང་སྐྱེ་བར་དབང་བསྐུར་འགྱུར། །དེ་ཡིས་སྐྱེ་བ་བདུན་ལ་ནི། །མ་བསྒོམས་པར་ཡང་དངོས་གྲུབ་ཐོབ། །ཅེས་དང་།  རྡོ་རྗེ་རྩེ་མོར།  ཕ་རོལ་ཕྱིན་པའི་འབྱུང་བས་ནི། །བསྐལ་པ་གྲངས་མེད་མི་འཐོབ་པ། །གལ་ཏེ་རྣལ་འབྱོར་པ་དེ་བརྩོན། །ཚེ་འདི་ཉིད་ལ་མྱ་ངན་འདའ། །ཡང་
ན་མཐོང་བ་ཙམ་གྱིས་ནི། །སྐྱེ་བ་བཅུ་དྲུག་དག་ནས་འགྲུབ། །སོ་སོ་སྐྱེ་བོས་སངས་རྒྱས་ཉིད། །འགྲུབ་པར་འགྱུར་གྱི་གཞན་དུ་མིན། །ཅེས་དང་།  དམ་ཚིག་ལྔ་པ་ལས།  གལ་ཏེ་ལྟུང་བ་མེད་གྱུར་ན། །སྐྱེ་བ་བཅུ་དྲུག་དག་ན་འགྲུབ། །ཅེས་གསུངས་སོ། །གསུམ་པ་ནི།  གང་
དག་རབ་ཏུ་ཞེས་སོགས་ཚིགས་བཅད་གཅིག་སྟེ།  འཁོར་བ་ལས་ངེས་པར་འབྱུང་བའི་བསམ་པས་མ་ཟིན་ན།  རབ་བྱུང་གི་སྡོམ་པ་བླངས་ཀྱང་སོ་སོ་ཐར་པར་མི་འགྱུར་ཏེ།  ཀུན་དགའ་བོའི་ཚ་བོ་གཉིས་དང་།  གཅུང་མཛེས་པའི་དགའ་བོའི་རྣམ་ཐར་བཞིན་ནོ། །བཞི་
པ་ནི།  སེམས་བསྐྱེད་བྱེད་པ་ཞེས་སོགས་ཚིགས་བཅད་གཅིག་སྟེ།  དབུ་སེམས་ཀྱིས་བསྟན་པའི་ལུགས་སོ་སོར་མི་ཕྱེད་པར།  ཐོས་པ་ཆུང་བ་རྣམས་ཀྱི་མགོ་བོ་བསྐོར་ནས།  བླུན་པོ་དགའ་བར་བྱ་བའི་ཕྱིར་དུ།  རང་བཟོའི་ཆོ་ག་བྱེད་པ་བཀག་པའོ། །ལྔ་པ་ལ་གཉིས་
ཏེ།  མདོར་བསྟན་པ་དང་།  རྒྱས་པར་བཤད་པའོ། །དང་པོ་ནི།  གསང་སྔགས་ཞེས་སོགས་ཚིགས་བཅད་གཅིག་གོ།  གཉིས་པ་ལ་བཞི་སྟེ།  རྒྱུད་སྡེ་དང་མ་འབྲེལ་བའི་དབང་བསྐུར་དགག་པ།  སྦྱང་གཞི་མི་སྦྱོང་པའི་བསྐྱེད་རིམ་དགག་པ།  རྟེན་འབྲེལ་མི་ཤེས་
9-2-102a


པའི་རྫོགས་རིམ་དགག་པ།  སྤང་བྱ་དང་མི་ཕྱེད་པའི་ཡེ་ཤེས་དགག་པའོ། །དང་པོ་ནི།  གལ་ཏེ་ཞེས་སོགས་ཚིགས་བཅད་གཅིག་སྟེ།  དབང་བསྐུར་བྱེད་པ་དག་ཀྱང་རྒྱུད་སྡེའི་དགོངས་པ་གྲུབ་ཐོབ་རྣམས་ཀྱིས་བཀྲལ་བའི་བཟང་པོའི་གཞུང་ལུགས་
ཀུན་དོར་ནས།  བརྫུན་གྱིས་བསླད་པའི་རང་བཟོའི་ཆོ་ག་གུས་པས་ལེན་པར་སྣང་ངོ་། །གཉིས་པ་ནི།  བརྒྱ་ལ་ཞེས་སོགས་ཚིགས་བཅད་གཅིག་སྟེ།  བསྐྱེད་རིམ་བསྒོམ་པ་དག་ཀྱང་སྦྱང་གཞི་སྦྱོང་བར་བྱེད་པའི་ཆོ་གའི་ཡན་ལག་མངོན་བྱང་ལྔ་དང་།  རྡོ་རྗེ་ཆོ་ག་གསུམ་བསྐྱེད་དང་
སྒྲ་ཚུལ་གྱི་རྟེན་འབྲེལ་དང་།  ཏིང་ངེ་འཛིན་གསུམ་དང་།  རྣལ་འབྱོར་བཞི་ལ་སོགས་པ་ཀུན་བོར་ནས་རང་བཟོའི་དཀྲོང་བསྐྱེད་བསྒོམ་པ་ལ་བསྐྱེད་རིམ་དུ་མིང་བཏགས་པར་ཟད་དོ། །འདི་ཡང་ལས་དང་པོ་པའི་དུས་ནས་བསྐྱེད་རིམ་གཞན་ལ་མ་སྦྱངས་པར།  དཀྲོང་བསྐྱེད་བསྒོམ་
པ་བཀག་པ་ཡིན་གྱི།  བསྐྱེད་རིམ་ལ་དཀྲོང་བསྐྱེད་གཏན་མེད་པར་བཞེད་པ་ནི་མ་ཡིན་ཏེ།  བརྟན་པ་ཐོབ་པའི་དུས་ཀྱི་བསྐྱེད་རིམ་དཀྲོང་བསྐྱེད་འབའ་ཞིག་ཡིན་པའི་ཕྱིར་རོ། །གསུམ་པ་ནི།  གཏུམ་མོ་ཞེས་སོགས་ཚིགས་བཅད་གཅིག་སྟེ།  བོད་ཀྱི་གཏུམ་མོ་བསྒོམ་པ་
ཕལ་ཆེར་ཡང་ལུས་ཐམས་ཅད་ལ་རྩས་ཁྱབ།  དེ་ལ་བྱང་ཆུབ་ཀྱི་སེམས་ཀྱིས་ཁྱབ།  དེ་ལ་རླུང་གིས་ཁྱབ།  དེ་ལ་རྣམ་པར་ཤེས་པས་ཁྱབ།  དེ་ལ་ཆོས་ཀྱི་དབྱིངས་ཀྱིས་ཁྱབ་ནས་གནས་པ་དེ།  ཐོག་མར་རླུང་ལ་དབང་ཐོབ་པར་བྱས་ནས་གཏུམ་མོའི་མེ་སྦར་ཏེ།  རྟེན་བྱང་
སེམས་བཞུས་པས་བརྟེན་པ་རིག་སྟོང་དབྱེར་མེད་མངོན་དུ་བྱེད་པའི་ནང་གི་རྟེན་འབྲེལ་མི་ཤེས་པར།  ལུས་ལ་དྲོད་ཙམ་སྐྱེས་ནས་རས་གོས་རྐྱང་པ་ཙམ་གྱིས་ཆོག་པར་འཛིན་པར་སྣང་ཡང་།  དེ་ལྟ་བུ་ནི་མུ་སྟེགས་བྱེད་ལ་ཡང་ཡོད་པས།  ཡང་དག་པའི་ཡེ་ཤེས་སྐྱེ་བའི་རྒྱུ་མ་
9-2-102b


ཡིན་ནོ། །བཞི་པ་ནི།  ཡེ་ཤེས་ཞེས་སོགས་ཚིགས་བཅད་གཅིག་སྟེ།  རིམ་གཉིས་བསྒོམས་པས་རང་བྱུང་གི་ཡེ་ཤེས་ཅུང་ཟད་སྐྱེས་ན་ཡང་ནང་གི་རྩ་ཁམས་ཀྱི་རྟེན་འབྲེལ་གྱིས་ཉོན་མོངས་རང་བྱུང་།  རྣམ་རྟོག་རང་བྱུང་།  སྣེལ་ཞི་རང་བྱུང་།  མི་རྟོག་རང་བྱུང་བཞི་སྐྱེ་བ་སོ་སོར་འབྱེད་
པའི་མན་ངག་ལམ་འབྲས་ལྟ་བུ་མེད་པས་རྫོགས་པའི་སངས་རྒྱས་ཀྱི་ལམ་དུ་མི་འགྱུར་རོ། །དྲུག་པ་ལ་གསུམ་སྟེ།  དབང་མ་བསྐུར་བ་ལ་བླ་མ་དམ་པ་མི་འབྱུང་བར་བསྟན།  དམ་པ་མ་ཡིན་པས་སངས་རྒྱས་སྦྱིན་མི་ནུས་པར་བསྟན།  མདོ་སྔགས་ཀྱི་བླ་མའི་ཁྱད་པར་བསྟན་
པའོ། །དང་པོ་ནི།  བླ་མ་ཞེས་སོགས་ཚིགས་བཅད་གཉིས་ཏེ།  དབང་མ་བསྐུར་བར་དྲོད་ཙམ་སྐྱེ་བའི་གཏུམ་མོའི་དམིགས་པ་སྟོན་པའི་བླ་མ་དེ་ནི་བླ་མ་དམ་པ་མ་ཡིན་ཏེ།  དབང་བསྐུར་གྱི་སྒོ་ནས་གསང་སྔགས་ཀྱི་སྡོམ་ལྡན་དུ་མ་བྱས་པའི་ཕྱིར་རོ། །དཔེར་ན་རབ་བྱུང་མ་བྱས་ན་མཁན་པོའི་
ཐ་སྙད་འཇུག་པའི་གཞི་མེད་པ་བཞིན་དུ་དབང་མ་བསྐུར་ན།  བླ་མ་དམ་པའི་ཐ་སྙད་འཇུག་པའི་གཞི་མི་འབྱུང་ངོ་། །བླ་མའི་ཐ་སྙད་ཙམ་དབང་མ་བསྐུར་བ་ལ་མེད་པ་མ་ཡིན་ཏེ།  འདུལ་བ་སུམ་བརྒྱ་པ་ལས།  ཚུལ་ཁྲིམས་ལྡན་ཅིང་འདུལ་བའི་ཆོ་ག་ཤེས། །ནད་པར་སྙིང་བརྩེ་འཁོར་
ནི་དག་པ་དང་། །ཆོས་དང་ཟང་ཟིང་ཕན་འདོགས་ཀྱིས་བརྩོན་པ། །དུས་སུ་འདོམས་པ་དེ་ནི་བླ་མར་བསྔགས། །ཞེས་དང་།  ཕ་རོལ་ཏུ་ཕྱིན་པའི་ལུགས་ལ་བླ་མ་སངས་རྒྱས་ལྟ་བུར་ལྟ་བར་བདག་ཉིད་ཆེན་པོ་འདིས་གསུངས་པའི་ཕྱིར་རོ། །དེ་དག་ནི་བླ་མ་ཙམ་ཡིན་གྱི།  བླ་མ་
དམ་པ་ནི་མ་ཡིན་ཏེ།  བླ་མ་དམ་པར་འགྱུར་བ་ལ་རྟེན་གྱི་གང་ཟག་དེ་ལ་དབང་བསྐུར་བའི་སྒོ་ནས་གསང་སྔགས་ཀྱི་སྡོམ་ལྡན་དུ་བྱས་ཏེ།  གང་ཟག་དེས་རྩེ་གཅིག་ཏུ་གསོལ་བ་བཏབ་ན།  ཚེ་འདིའམ་བར་དོ་སོགས་ལ་སངས་རྒྱས་སྦྱིན་ནུས་པ་ཅིག་དགོས་པའི་ཕྱིར་རོ། །གཉིས་
9-2-103a


པ་ནི།  གསང་སྔགས་ཞེས་སོགས་དྲུག་སྟེ།  དབང་བསྐུར་གྱི་སྒོ་ནས་གསང་སྔགས་ཀྱི་སྡོམ་ལྡན་དུ་བྱས་པ་མ་ཡིན་པའི་བླ་མ་ལ་མོས་པ་བྱས་ཀྱང་ཚེ་འདིའི་བདེ་སྐྱིད་ཙམ་མམ།  སྐྱེ་བ་ཕྱི་མ་ལ་དལ་འབྱོར་གྱི་ལུས་ཐོབ་ཅིང་སངས་རྒྱས་ཀྱི་བསྟན་པ་དང་
མཇལ་བ་སོགས་རིམ་གྱིས་འགྲུབ་པའི་རྒྱུར་འགྱུར་བ་སྲིད་ཀྱི་དེ་ནི་ཚེ་འདི་ལ་སོགས་སོ། །གསུམ་པ་ནི།  ཕ་རོལ་ཕྱིན་པའི་ཞེས་སོགས་ཚིགས་བཅད་གཉིས་ཏེ།  འདུལ་བ་ལས།  ལྷན་ཅིག་གནས་པ་དང་།  ཉེ་གནས་ཀྱིས་མཁན་པོ་དང་སློབ་དཔོན་ལ་སྟོན་པའི་འདུ་ཤེས་
བསྐྱེད་པར་བྱའོ། །ཞེས་པ་དང་།  འཇམ་དཔལ་རྣམ་པར་འཕྲུལ་པ་ལས།  འཇམ་དཔལ་དེ་ལྟ་བས་ན་བྱང་ཆུབ་སེམས་དཔའ་དེ་བཞིན་གཤེགས་པ་ལ་ཇི་ལྟར་གུས་པར་བྱ་བ་དེ་བཞིན་དུ་དགེ་བའི་བཤེས་གཉེན་རྣམས་ལའང་བསྟེན་པར་བྱའོ། །ཞེས་བྱ་བ་ལ་སོགས་པ་གསུངས་
སོ། །འདུས་པའི་རྒྱུད་ལས།  དབང་བསྐུར་བའི་རྡོ་རྗེ་སློབ་དཔོན་ལ་ཇི་ལྟར་བལྟ་བར་བགྱི་ཞུས་པའི་ལན་དུ།  སངས་རྒྱས་ཀུན་གྱི་རང་བཞིན་སྐུ། །ཡན་ལག་བྱང་ཆུབ་སེམས་དཔའ་སྟེ། །བ་སྤུ་རྣམས་ནི་དགྲ་བཅོམ་ཉིད། །སྤྱི་གཙུག་རིགས་ལྔའི་སངས་རྒྱས་ཏེ། །
འཇིག་རྟེན་པ་ནི་ཞབས་ཀྱིས་མནན། །འོད་ཟེར་གནོད་སྦྱིན་གསང་བའོ། །རྣལ་འབྱོར་ཅན་གྱིས་རྟག་ཏུ་བལྟ། །ཞེས་དང་།  དབང་ཐོབ་པའི་རྡོ་རྗེ་སློབ་དཔོན་ལ་ཇི་ལྟར་བལྟ་བར་བྱ།  བཅོམ་ལྡན་འདས་ཀྱིས་བཀའ་སྩལ་པ།  དུས་གསུམ་གྱི་སངས་རྒྱས་ཐམས་ཅད་བླ་མའི་བ་སྤུ་གཅིག་ལ་
མཐོང་ནས།  དུས་གསུམ་གྱི་སངས་རྒྱས་ཐམས་ཅད་བླ་མ་ལ་མཆོད་པ་བྱེད་པར་མཐོང་ངོ་། །ཞེས་བྱ་བ་ལ་སོགས་པ་དང་།  བཤད་རྒྱུད་རྡོ་རྗེ་ཕྲེང་བ་ལས།  རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །འདི་ཡི་གཟུགས་ཀྱི་ཕུང་པོ་ནི། །བཅོམ་ལྡན་སངས་རྒྱས་
9-2-103b


རྣམ་སྣང་མཛད། །ཅེས་པ་ནས་རྐང་མཐིལ་གནོད་མཛེས་ཀྱི་བར་གདན་གསུམ་ཚང་བའི་ལྷ་ཚོགས་སུ་གསུངས་པ་དང་།  རྡོ་རྗེ་གུར་ལས།  དཔལ་ཀྱཻ་རྡོ་རྗེའི་དཀྱིལ་འཁོར་དུ་དབང་བསྐུར་བའི་སློབ་དཔོན་ལ་ཇི་ལྟར་བལྟ་བར་བགྱི།  དེ་བཞིན་གཤེགས་པས་བཀའ་སྩལ་པ། 
སློབ་དཔོན་སྟོན་པར་གྱུར་པ་ནི། །སངས་རྒྱས་ཀུན་གྱིས་ཕྱག་མཛད་པ། །བདག་ཅག་ཀུན་གྱི་ཕ་དང་མ། །འདི་ཉིད་ཡིད་ལ་བསམ་པར་བྱ། །ཞེས་བྱ་བ་དང་།  གང་ཕྱིར་ཡེ་ཤེས་རྡོ་རྗེ་ནི། །མཉེས་པས་དངོས་གྲུབ་ཐོབ་པར་འགྱུར། །དེ་ཕྱིར་སློབ་དཔོན་དྲུང་གཤེགས་ཏེ། །
དེ་བཞིན་གཤེགས་རྣམས་ཕྱག་མཛད་དོ། །རྡོ་རྗེ་སེམས་དཔའ་ལྟ་བུ་ཡིས། །དེ་ལྟར་སློབ་དཔོན་གཟུགས་འཛིན་ཏེ། །སེམས་ཅན་རྗེས་སུ་བཟུང་དམིགས་ནས། །ཕལ་པའི་གཟུགས་སུ་གནས་པའོ། །ཅེས་བྱ་བ་དང་།  བླ་མ་ལྔ་བཅུ་པ་ལས།  དབང་བསྐུར་མཆོག་ཐོབ་རྡོ་རྗེ་ཡི། །
སློབ་དཔོན་ལ་ནི་དེ་བཞིན་གཤེགས། །ཕྱོགས་བཅུའི་འཇིག་རྟེན་ཁམས་བཞུགས་པས། །དུས་གསུམ་དུ་ནི་མངོན་ཕྱག་འཚལ། །ཞེས་པ་དང་།  བདེ་མཆོག་རྩ་རྒྱུད་ལས།  དེ་ནས་སྒྲུབ་པོས་དངོས་ཀུན་གྱིས། །དང་པོ་སློབ་དཔོན་མཉེས་པར་བྱ། །བསྒྲུབ་འདོད་ཀུན་ཏུ་མཉམ་བཞག་
པས། །ཅི་ནུས་པས་ནི་བླ་མ་མཆོད། །ཅེས་གསུངས་སོ། །དབང་བསྐུར་བའི་སྒོ་ནས་སྔགས་སྡོམ་གྱིས་མ་སྦྲེལ་ན།  ཆོས་གཞན་སྟོན་པའི་བླ་མ་བཟང་ཡང་།  ཕ་རོལ་ཏུ་ཕྱིན་པའི་ལུགས་ལྟར་རིམ་གྱིས་གྲུབ་པའི་རྒྱུ་སྲིད་ཀྱི་ཚེ་འདིའམ་བར་དོ་སོགས་སུ་སངས་རྒྱས་སྦྱིན་པར་མི་ནུས་སོ། །
བདུན་པ་ནི།  རབ་བྱུང་མིན་ལ་ཞེས་སོགས་ཚིགས་བཅད་གཉིས་ཏེ།  རབ་ཏུ་བྱུང་བར་བྱེད་པ་པོ་མ་ཡིན་པ་ལ་མཁན་པོ་མཚན་ཉིད་པ་མེད།  དབང་མ་བསྐུར་བ་ལ་སངས་རྒྱས་དངོས་སུ་ལྟ་བའི་བླ་མ་མཚན་ཉིད་པ་མེད།  སྡོམ་པ་མེད་པ་ལ་སྤོང་སེམས་ཀྱི་དགེ་བ་རྒྱུན་ཆགས་པ་མེད།  སྐྱབས་
9-2-104a


འགྲོ་མེད་ན་ཆོས་འདི་པའི་ཁོངས་སུ་མི་ཆུད་པས་ན།  སྡོམ་པ་མེད་པར་དགེ་སྦྱོང་དུ་ཁས་ལེན་པ་དང་།  སེམས་བསྐྱེད་མ་ཐོབ་པར་རྒྱལ་སྲས་སུ་ཁས་འཆེ་བ་དང་།  དབང་བསྐུར་མ་ཐོབ་པར་སྔགས་པར་ཁས་འཆེ་བ་གསུམ་ནི་སངས་རྒྱས་ཀྱི་བསྟན་པ་འདུལ་བ་
དང་།  ཕ་རོལ་ཏུ་ཕྱིན་པ་དང་།  རྡོ་རྗེ་ཐེག་པ་གསུམ་གྱི་ཆོམ་རྐུན་ཡིན་པས་ཤེས་ནས་སྤང་བར་བྱའོ། །གསུམ་པ་དབང་དང་རིམ་གཉིས་ལས་བྱུང་བའི་ཡེ་ཤེས་ཕྱག་རྒྱ་ཆེན་པོ་ལ་གཉིས་ཏེ།  རྟོགས་བྱེད་ཕྱག་ཆེན་གྱི་ཡེ་ཤེས་ལ་འཁྲུལ་པ་དགག་པ་དང་།  རྟོགས་བྱ་སྤྲོས་བྲལ་གྱི་
ལྟ་བ་ལ་འཁྲུལ་པ་དགག་པའོ། །དང་པོ་ལ་གསུམ་སྟེ།  མཚོན་བྱེད་དཔེའི་ཕྱག་ཆེན་ལ་འཁྲུལ་པ་དགག་པ།  མཚོན་བྱ་དོན་གྱི་ཕྱག་ཆེན་ལ་འཁྲུལ་པ་དགག་པ།  ཞར་ལ་ཐེག་པ་གསུམ་གྱི་ལག་ལེན་ལ་འཁྲུལ་པ་དགག་པའོ། །དང་པོ་ལ་གསུམ་སྟེ།  སྟོང་རྐྱང་དུ་ལྟ་བའི་
ལྷག་མཐོང་ལྟར་སྣང་ལ་ཕྱག་ཆེན་དུ་འདོད་པ་དགག་པ།  མོས་གུས་ཀྱིས་སེམས་བསྒྱུར་བའི་ཞི་གནས་ལྟར་སྣང་ལ་ཕྱག་ཆེན་དུ་འདོད་པ་དགག་པ།  ཞར་ལ་ཕྱག་ཆེན་གྱི་རྒྱུ་ལ་ལོག་རྟོག་དགག་པའོ། །དང་པོ་ལ་བཞི་སྟེ།  གཞན་ལུགས་ཀྱི་ཕྱག་ཆེན་དགག་པ་དངོས།  རང་
ལུགས་ཀྱི་ཕྱག་ཆེན་ངོས་བཟུང་བ།  གཞན་ལུགས་ཀྱི་ཕྱག་ཆེན་རྒྱ་ནག་ལུགས་སུ་བསྟན་པ།  རང་ལུགས་ཀྱི་ཕྱག་ཆེན་རྒྱ་གར་གྱི་ལུགས་སུ་བསྟན་པའོ། །དང་པོ་ནི།  ཕྱག་རྒྱ་ཆེན་པོ་ཞེས་སོགས་ཚིགས་བཅད་བཞི་སྟེ།  དེང་སང་གི་ཕྱག་ཆེན་བསྒོམ་པ་ཕལ་ཆེར་དབང་དང་ཡེ་
ཤེས་ལས་བྱུང་བའི་རང་བྱུང་གི་ཡེ་ཤེས་ལ་ཕྱག་ཆེན་དུ་རྣལ་འབྱོར་ཆེན་པོའི་རྒྱུད་སྡེ་ནས་བཤད་པའི་དོན་མི་ཤེས་པར།  མདོ་ལས།  གང་ཡིད་ལ་བྱེད་པ་དེ་ནི་མི་དགེ་བའོ། །གང་ཡིད་ལ་མི་བྱེད་པ་དེ་ནི་དགེ་བའོ། །ཞེས་དང་།  ཆོས་ཐམས་ཅད་ནི་དྲན་པ་མེད་ཅིང་ཡིད་ལ་བྱར་མེད་པའོ། །
9-2-104b


ཞེས་པའི་དོན་སྒྲ་ཇི་བཞིན་དུ་བཟུང་ནས།  རྣམ་པར་རྟོག་པ་ཕྱི་རོལ་ཡུལ་ལ་འཕྲོ་བ་བཀག་ནས་སྟོང་པ་ཧ་དེར་འཇོག་པའི་རྟོག་པ་ཁ་ཚོམ་པ་ཉིད་བསྒོམ་པར་བྱེད་དོ། །འདི་ལ་རྣམ་པར་བརྟགས་ན།  ཚོགས་དྲུག་གི་རྒྱུ་བ་བཀག་ནས་དྲན་རིག་ཙམ་ཡང་གསལ་བ་མེད་པར་བསྒོམས་ན་ཉེ་བའི་ཉོན་
མོངས་པ་རྨུགས་པའི་ཁོངས་སུ་གཏོགས་པ་དུད་འགྲོའི་རྒྱུ་རུ་གསུངས་ལ།  གཟུགས་ཀྱི་སྣང་བ་མཐའ་དག་བཀག་ནས།  གཟུགས་ལ་འདོད་ཆགས་དང་བྲལ་བར་བྱས་ཏེ་ནམ་མཁའ་ལ་དམིགས་པ་དང་།  དེ་ཡང་བཀག་སྟེ་ཡུལ་ཅན་གྱི་རྣམ་པར་ཤེས་པ་ལ་དམིགས་པ་དང་།  དེ་
ཡང་བཀག་སྟེ་གཟུང་བྱ་ཅི་ཡང་མེད་པ་ལ་དམིགས་པ་དང་།  དེ་ལས་འདས་ཏེ་འདུ་ཤེས་རགས་པ་མེད་ཅིང་ཕྲ་བ་མེད་པ་མ་ཡིན་ནོ་སྙམ་དུ་དམིགས་པ་རྣམས་ནི་རིམ་པ་ལྟར།  གཟུགས་མེད་སྐྱེ་མཆེད་མུ་བཞིར་སྐྱེ་བའི་རྒྱུར་འགྱུར་རོ། །དེ་ལས་བསྒོམ་ལེགས་ཏེ།  གང་ཟག་གི་
བདག་འཛིན་བཀག་ནས།  འཁོར་བ་ལ་ངེས་པར་འབྱུང་བའི་བློས་རྩེ་གཅིག་ཏུ་བསྒོམ་པར་བྱས་ན།  ཉན་ཐོས་ཀྱི་མྱང་འདས་ཐོབ་པར་འགྱུར་རོ། །དེ་ལ་ཁ་ཅིག་ཉན་ཐོས་འགོག་པ་འདུ་ཤེས་མེད་པའི་སེམས་ཅན་ལ་འདོད་པ་ནི།  ཆོས་མངོན་པའི་དོན་ལ་བློ་གྲོས་ཞིབ་མོས་མ་
དཔྱད་པར་གསལ་ཏེ།  འདུ་ཤེས་མེད་པའི་སེམས་ཅན་ལ་ཉན་ཐོས་འགོག་པར་གང་ནས་ཀྱང་བཤད་པ་མེད་པའི་ཕྱིར་དང་།  ཁྱེད་རང་གིས་ཀྱང་འདི་འགོག་པའི་སྙོམས་འཇུག་མ་ཡིན་པའི་ཤེས་བྱེད་དུ་འདི་ལ་བསམ་གཏན་དང་།  གཟུགས་མེད་ཀྱི་ཏིང་ངེ་འཛིན་གོ་ཆོད་མེད་པ་
བཀོད་པས་ནང་འགལ་བ་ཡིན་ནོ། །འདུ་ཤེས་མེད་པའི་སེམས་ཅན་ནི་བསམ་གཏན་བཞི་པའི་གནས་ཀྱི་བྱེ་བྲག་གྲོང་ལས་དགོན་པའི་ཚུལ་དུ་འཕགས་པ་ཞིག་ཡིན་པར་མངོན་པ་ལས་བཤད་ལ།  བསམ་གཏན་གྱི་ཏིང་ངེ་འཛིན་གོ་ཆོད་མེད་པར་བསམ་གཏན་བཞི་པར་སྐྱེ་བ་
9-2-105a


བཞད་གད་ཀྱི་གནས་ཡིན་པའི་ཕྱིར་རོ། །གལ་ཏེ་དེ་ནི་བསྒོམ་ལེགས་ཀྱང་སོ་སོར་རྟོག་པའི་ཤེས་རབ་ཀྱིས་ཡོད་མེད་ལ་སོགས་པ་གཉིས་འཛིན་གྱི་སྤྲོས་པ་མཐའ་དག་བཅད་ནས་སྙིང་རྗེ་ཆེན་པོ་དང་ཟུང་འཇུག་ཏུ་བྱས་ཏེ་བསྒོམས་ན།  དབུ་མའི་བསྒོམ་དུ་འགྱུར་
བ་ཡིན་མོད་ཀྱི།  འོན་ཀྱང་དེ་འགྲུབ་པ་ལ་ཡུན་རིང་དུ་འགོར་ཏེ་ཇི་སྲིད་ཚོགས་གཉིས་སོགས་སོ། །དེ་ཡང་མདོ་སྡུད་པ་ལས།  དེ་དག་དགེ་བའི་རྩ་བ་ཇི་སྲིད་མ་རྫོགས་པར། །དེ་སྲིད་སྟོང་ཉིད་དམ་པ་དེ་ནི་ཐོབ་མི་བྱེད། །ཅེས་གསུངས་སོ། །མདོར་ན་དབང་དང་རིམ་གཉིས་
ལས་བྱུང་བའི་རང་བྱུང་གི་ཡེ་ཤེས་མ་རྟོགས་པར་སྟོང་པར་ལྟ་བའི་བསྒོམ་ཐམས་ཅད་གོང་དུ་བཤད་པའི་བསྒོམ་བཞི་པོ་དེར་མ་འདུས་པ་མེད་ཅིང་།  བཞི་པོ་དེ་དག་ནི་ཕྱག་ཆེན་མ་ཡིན་པས།  མ་བཅོས་མ་བཅོས་བློ་མ་བཅོས། །བཅོས་མའི་ཆོས་ཀྱིས་འཚང་མི་རྒྱ། །
ཞེས་དང་།  དམ་ཆོས་ཕྱག་རྒྱ་ཆེན་པོ་འདི་ལ། །བསྒོམ་ནས་བསྒོམ་རྒྱུ་ཅི་ཡང་མེད་དོ། །ཐ་མལ་ཤེས་པ་རང་སོར་ཞོག་ཅིག །རང་སར་མི་སྡོད་འཕྲོ་བའི་ཚེ་ན། །འཕྲོ་མཁན་གང་ཡིན་ཙིར་དེ་ཟུང་ཞིག །ཞེས་སོགས་ཀྱི་སྒོ་ནས་རྟོག་པ་བཀག་ཙམ་གྱི་བསྒོམ་ཐམས་
ཅད་ཕྱག་ཆེན་ཡིན་པ་སངས་རྒྱས་ཀྱི་གསུང་ལ་བརྟེན་པའི་མཁས་པ་རྣམས་ཀྱིས་སྤང་བར་བྱའོ། །གཉིས་པ་ནི་ངེད་ཀྱི་ཞེས་སོགས་བཅུ་སྟེ།  ཚིག་རྐང་དང་པོ་གསུམ་གྱིས་རྒྱུ་བསྟན།  བཞི་པས་རང་གི་ངོ་བོ་བསྟན།  དེ་ནས་གཉིས་ཀྱིས་འགྲུབ་པའི་དུས་བསྟན་ནོ། །དེ་
ནས་གཉིས་ཀྱིས་གཞན་དུ་རྟོག་པ་དགག །དེ་ནས་གཉིས་ཀྱིས་ཕྱག་ཆེན་བསྒྲུབ་པར་འདོད་པས་གང་ལ་འཇུག་པའི་ལུང་བསྟན་ནོ། །འདི་དག་གི་དོན་ཞིབ་ཏུ་རྟོགས་པར་འདོད་ན་རྣལ་འབྱོར་ཆེན་པོའི་རྒྱུད་སྡེ་རྣམས་ཀྱི་དགོངས་པ་མཐར་ཐུག་པ་གྲུབ་པ་ཐོབ་པའི་སློབ་དཔོན་རྣམས་
9-2-105b


ཀྱིས་མཛད་པའི་གྲུབ་པ་སྡེ་བདུན་ལས་ཤེས་པར་བྱའོ། །གསུམ་པ་ནི།  ད་ལྟའི་ཕྱག་རྒྱ་ཞེས་སོགས་ཚིགས་བཅད་ཕྱེད་དང་བཅུ་སྟེ།  རྒྱ་ནག་ཧྭ་ཤང་གི་ཆོས་ནོར་བ་འདི་འདྲ་འབྱུང་བ་ཡང་མཁན་བོ་དྷི་ས་ཏྭ་སྟེ།  བྱང་ཆུབ་སེམས་དཔའ་ཞི་བ་འཚོས།  རྒྱལ་པོ་ཁྲི་སྲོང་ལྡེ་བཙན་
ལ་ལུང་བསྟན་གྱི་ཞལ་ཆེམས་མཛད་པ་ཐོག་ཏུ་བབ་པ་ཡིན་ནོ། །དེ་ཡང་ཆོས་རྒྱལ་སྲོང་བཙན་སྒམ་པོས།  ད་ནས་རྒྱལ་རབས་ལྔ་ནས་རྒྱལ་པོ་ལྡེའི་མིང་ཅན་གཅིག་འབྱུང་སྟེ།  དེས་སངས་རྒྱས་ཀྱི་བསྟན་པའི་རྩ་བ་རབ་ཏུ་བྱུང་བ།  ངུར་སྨྲིག་གི་གོས་འཛིན་པའི་སྡེ་འཛུག་པར་
འགྱུར་རོ། །དེ་ལ་ངའི་དབོན་སྲས་འབངས་དང་བཅས་པ་རྣམས་ཀྱིས་མཆོད་པ་དང་བཀུར་སྟི་ཆེན་པོ་གྱིས་ཤིག །ཚེ་འདི་དང་ཕྱི་མའི་བདེ་ལེགས་རྣམས་འབྱུང་བར་འགྱུར་རོ། །ཞེས་ལུང་བསྟན་པ་བློན་པོ་འགར་གྱིས་ཟངས་མའི་གླེགས་བམ་ལ་ཡི་གེ་བྲིས་པ་དེ་དཀོར་
མཛོད་དུ་བཅུག་གོ།  ལུང་བསྟན་པ་བཞིན་དུ་ཁྲི་སྲོང་ལྡེ་བཙན་ལྕགས་ཕོ་རྟའི་ལོ་ལ་འཁྲུངས་ཏེ།  དགུང་ལོ་བཅུ་གསུམ་ལོན་པ་ཆུ་ཕོ་རྟའི་ལོ་ལ་རྒྱལ་སར་བྱོན་ནས་བློན་པོ་སྦ་གསལ་སྣང་མཁན་པོ་སྤྱན་འདྲེན་པ་ལ་མངགས་ཏེ།  མང་ཡུལ་སྐྱིད་གྲོང་དུ་མཁན་པོ་བྱོན་པ་དང་མཇལ་ཅིང་སྤྱན་དྲངས་
ནས་བསུ་བ་རྒྱ་ཆེན་པོ་མཛད་དེ།  ཆོས་རྒྱལ་དང་ཞལ་འཛོམ་པའི་ཚེ་སྔོན་སྨོན་ལམ་བཏབ་པ་དྲན་ནམ།  ཞེས་ལན་གསུམ་གྱི་བར་དུ་གསུངས་པས།  རྗེས་ལ་འོལ་སྤྱིར་དྲན་ལགས་ཏེ།  བསྒོམ་ཡུན་ཐུངས་པས་མི་གསལ་ཞེས་ཞུས་སོ། །མཁན་པོའི་ཞལ་སྔ་ནས་ཆུ་བོ་གང་གཱའི་འགྲམ་
ན་མཆོད་རྟེན་ཆེན་པོ་ཞིག་བཞུགས་པ་ལ་དད་པས་ཞིག་གསོས་དང་།  ཕྱག་དང་བསྐོར་བ་བྱས་ཤིང་།  རྒྱལ་པོ་ཁྱོད་ཀྱིས་ཡུལ་མཐའ་འཁོབ་དམ་པའི་ཆོས་མ་དར་བའི་ཕྱོགས་སུ་རྒྱལ་པོར་གྱུར་ཏེ།  སངས་རྒྱས་ཀྱི་བསྟན་པ་སྤེལ་བར་གྱུར་ཅིག་ཅེས་སྨོན་ལམ་བཏབ་བོ། །ཁོ་བོ་ནི་དེའི་ཚེ་
9-2-106a


མཁན་པོར་གྱུར་ཅིག་ཅེས་བྱས་སོ། །ཞེས་པ་འདི་ཙམ་སྦ་བཞེད་ལས་བྱུང་ཞིང་།  ཡིག་ཚང་འགའ་ཞིག་ཏུ་སློབ་དཔོན་པད་མས་གདུག་པ་ཅན་འདུལ་བའི་སྔགས་འཆང་དུ་གྱུར་ཅིག་ཅེས་པ་དང་།  ཡེ་ཤེས་དབང་པོས་སྤྱན་འདྲེན་པའི་ཕོ་ཉ་བར་གྱུར་ཅིག།
ཅེས་སྨོན་ལམ་བཏབ་ཟེར་རོ། །དེའི་ཚེ་བོད་ཀྱི་མི་འགའ་ཞིག་མཐའ་མིས་ངན་སྔགས་བྱས་དོགས་ཡོད་ཟེར་ཏེ།  ཁ་ཆེ་ཨཱ་ནནྡས།  ལོ་ཙཱ་བྱས་ཤིང་ལེགས་པར་བརྟགས་པས།  བྱང་ཆུབ་སེམས་དཔའ་བཟང་པོ་ཞིག་ལགས་ཏེ།  ཐུགས་འཁྲིག་མི་འཚལ་ལོ་ཟེར་བས་བོ་དྷི་ས་ཏྭར་
གྲགས་སོ། །སྡོམ་བརྩོན་ཆེན་པོ་འདི་ནི་ཤར་ཕྱོགས་ཟ་ཧོར་གྱི་རྒྱལ་པོའི་སྲས་སུ་འཁྲུངས་ནས།  ནཱ་ལེནྡྲར་མཁན་པོ་ཡེ་ཤེས་སྙིང་པོ་ཡོད་སྨྲའི་སྡེ་པའི་བསླབ་རྒྱུད་ལས་རབ་ཏུ་བྱུང་ཞིང་།  རིགས་པའི་གནས་མཐའ་དག་ལ་མཁས་པར་གྱུར་ཏོ། །ནཱ་ལེནྡྲར་མཁན་པོ་མཛད་
ཅིང་རྒོལ་བ་ངན་པ་ཐམས་ཅད་ཚར་གཅད་པས་མཁས་པའི་གྲགས་པས་འཛམ་བུའི་གླིང་ཐམས་ཅད་ཁྱབ་པར་གྱུར་ཏེ།  ལྷོ་ཕྱོགས་ནས་བྲམ་ཟེའི་བུ་མུ་སྟེགས་ཀྱི་རིག་བྱེད་ལ་ཤིན་ཏུ་མཁས་པ་ཞིག་གིས།  ཕྱི་ནང་གི་རྒོལ་བ་རྣམས་ཕམ་པར་བྱས་ཏེ།  སྙན་པའི་གྲགས་པས་ཁེངས་ཤིང་ནཱ་
ལེནྡྲར་སོང་ནས་མཁན་པོ་ཕམ་པར་བྱས་ན་འགྲན་ཟླ་དང་བྲལ་བར་འགྱུར་སྙམ་དུ་སེམས་སོ། །དེ་ནས་མཁན་པོའི་བཞུགས་སར་རིམ་གྱིས་ཕྱིན་ཏེ།  བལྟས་པས་མཁན་པོ་མི་སྣང་ཞིང་།  འཇམ་པའི་དབྱངས་ཀྱི་སྐུ་གསེར་བཙོ་མའི་མདོག་ལྟར་འབར་ཞིང་བཞུགས་པར་མཐོང་ངོ་། །ཕྱིར་
འོངས་ནས་གཞན་དག་ལ་དྲིས་པས་མཁན་པོ་དེ་ཉིད་ན་བཞུགས་ཡོད་དོ་ཞེས་ཟེར་རོ། །སླར་ལོག་སྟེ་བལྟས་པས་མཁན་པོའི་ཞལ་མཐོང་མ་ཐག་ཤིན་ཏུ་དད་པར་གྱུར་ཏེ།  རྩོད་པའི་བསམ་པ་དོར་ནས་གུས་པས་ཞབས་སྤྱི་བོར་བླངས་ཤིང་བསྟན་པའི་སྒོར་ཞུགས་སོ། །མདོར་
9-2-106b


ན་འཇམ་པའི་དབྱངས་གྲུབ་པའི་སྡོམ་བརྩོན་དམ་པ་འདིས་ནཱ་ལེནྡྲར་ཡུན་རིང་དུ་བཞུགས་ཤིང་།  རྒྱ་གར་ཤར་ཕྱོགས་དང་།  རྒྱ་ནག་ལ་སོགས་པར་དགུང་ལོ་བདུན་བརྒྱའི་བར་དུ་སངས་རྒྱས་ཀྱི་བསྟན་པ་ལེགས་པར་བསྐྱངས་ནས།  སླར་བོད་ཡུལ་དུ་སྔོན་གྱི་སྨོན་ལམ་གྱི་མཐུས་བྱོན་
ཏེ།  ཆོས་རྒྱལ་ཆེན་པོའི་བཞེད་པ་བསྒྲུབས་ནས་སྐུ་གཤེགས་ཁར་རྒྱལ་པོ་ཁྱོད་ཀྱི་མངའ་འོག་ཏུ་རབ་ཏུ་བྱུང་བ་མང་བར་འདོད་ན།  ངའི་ལུས་འདི་ཧས་པོ་རིའི་ཤར་དུ་ཁ་ཤར་ཕྱོགས་སུ་སྟོན་ལ་ཞོག་ཅིག །རབ་བྱུང་རྣམ་དག་ཉུང་ཤས་ཅིག་འདོད་ན།  ནུབ་ཕྱོགས་སུ་ཞོག་
ཅིག །རྒྱལ་པོ་ཁྱོད་ཀྱི་ཡུལ་ཁམས་སུ་ཕྱི་རོལ་མུ་སྟེགས་པ་མི་འབྱུང་སྟེ།  སྔགས་འཆང་པདྨ་འབྱུང་གནས་ཀྱིས་མ་མོའི་སྡེ་དཔོན་བརྟན་མ་བཅུ་གཉིས་ལ་བསྟན་པ་གཏད་ཅིང་སྐྱོང་བར་དམ་བཅས་པ་ཡིན་པས་སོ། །སློབ་དཔོན་པདྨ་འབྱུང་གནས་བོད་ཡུལ་དུ་བྱོན་པའི་ཚུལ་ནི། 
མཁན་པོ་བོ་དྷི་ས་ཏྭས་ཆོས་རྒྱལ་རྗེ་བློན་རྣམས་ལ།  དགེ་བ་བཅུའི་ཆོས་གསུངས་ཤིང་མི་དགེ་བ་སྤོང་བའི་སྲོལ་བཏོད་པས་བོད་ཡུལ་གྱི་མི་མ་ཡིན་རྣམས་འཁྲུགས་ཏེ།  ཡར་ལུང་འཕང་ཐང་ན།  མེས་ཨག་ཚོམ་གྱིས་བཞེངས་པའི་ལྷ་ཁང་ཡོད་པ་ལ།  ཤམ་པོས་ཆུ་ཐོག་ཕབ་ནས་
བཤིག །དམར་པོ་རིའི་རྩེ་ལ་ཡབ་མེས་ཀྱི་སྐུ་མཁར་ཡོད་པ་ལ།  ཐང་ལྷས་ཐོག་ཕབ་ནས་བསྒྱེལ།  བརྟན་མ་བཅུ་གཉིས་ཀྱིས་སད་དང་སེར་བ་དང་།  མི་ནད་ཕྱུགས་ནད་ལ་སོགས་ཡམས་དྲག་པོ་གསོར་མི་རུང་བ་བཏང་བས་བོད་འབངས་རྣམས།  རྒྱ་གར་གྱི་ཨ་
ཙ་རའི་ཕྱིར་འདྲེ་སྲིན་གདུག་པ་ཅན་མང་པོ་འོངས་ནས་བཀྲ་མི་ཤིས་པ་བྱུང་ངོ་། །ཞེས་གླེང་ཞིང་མཁན་པོ་རྒྱ་གར་དུ་རྫོང་བར་ཆད་དོ། །དེའི་ཚེ་ཁྱོད་རེ་ཤིག་བལ་ཡུལ་དུ་བཞུགས་ཤིག །སླར་ཡང་སྤྱན་འདྲེན་གཏོང་བས་འབྱོན་པར་ཞུ་བྱས་པས།  ཁོ་བོ་སྨོན་ལམ་རྫོགས་
9-2-107a


པར་བྱེད་པས་སླར་ཡང་འོང་གིས།  བོད་ཀྱི་ལྷ་སྲིན་མ་རུངས་པ་འདུལ་བ་ལ་ཨུ་རྒྱན་གྱི་སྔགས་འཆང་པདྨ་འབྱུང་གནས་ཞེས་བྱ་བ་ཡོད་ཀྱི།  བལ་ཡུལ་དུ་ཁོ་བོས་སྤྱན་དྲང་བར་བྱ།  དེ་ནས་ཁྱེད་ཀྱིས་སྤྱན་འདྲེན་ཐོང་ལ།  མི་མ་ཡིན་པ་རྣམས་ཐུལ་ཅིག །སླར་
ཁོ་བོས་རབ་ཏུ་བྱུང་བའི་སྡེའི་མཁན་པོ་བྱའོ། །ཞེས་ཡོན་མཆོད་ལྐོག་ཏུ་གླེང་ནས་མཁན་པོ་བལ་ཡུལ་དུ་བརྫངས་སོ། །དེ་ནས་སྦ་ཡེ་ཤེས་དབང་པོ་སློབ་དཔོན་སྤྱན་འདྲེན་དུ་བཏང་བས་མང་ཡུལ་སྐྱིད་གྲོང་དུ་མཇལ་ཏེ།  ལོ་རྒྱུས་བསྙད་པས་ཁོ་བོ་དོན་དེ་ཁོ་ནའི་ཕྱིར་འོངས་
པ་ཡིན་ནོ་ཞེས་གསུངས་ཏེ།  ལམ་ན་ཡོད་པའི་མི་མ་ཡིན་རྣམས་འདུལ་ཞིང་རིམ་གྱིས་གནམ་ཆུ་ཚན་ཁར་ཕེབས་པའི་ཚེ།  ཉི་ཚེ་བའི་སེམས་ཅན་དམྱལ་བའི་ཆུ་ཁོལ་བ་ཡིན་ཏེ།  ཁོ་བོས་ཅུང་ཟད་ཕན་པར་བྱའོ། །ཞེས་གསུངས་ནས་ཐུགས་དམ་མཛད་པས་ཆུ་ཁོལ་བ་ཆད་དེ་གྲང་
མོར་གྱུར་ཏོ། །ཐུགས་དམ་གྲོལ་ནས་བཞེངས་པའི་ཚེ་སྔར་བཞིན་གྱུར་པས།  རྣལ་འབྱོར་པའི་ཏིང་ངེ་འཛིན་གྱི་རྒྱུ་མཐུན་གྱི་འབྲས་བུ་ཅུང་ཟད་འགྲུབ་པ་ཡིན།  སེམས་ཅན་གྱི་སྡིག་པ་སྟོབས་ཅན་གྱི་རྣམ་སྨིན་གྱི་འབྲས་བུ་འགོག་པར་མི་ནུས་གསུངས།  དེ་ནས་རིམ་གྱིས་སྟོད་ལུང་
གི་མདའི་ལྷ་ཆུ་ཁར་ཕེབས་ནས་འདི་ན་ཆུ་མི་འདུག་གསུངས་ཏེ།  གསེག་ཤང་ས་ལ་ལན་བདུན་གཙུགས་པས་ཆུ་བདུན་བྱུང་སྟེ་ལྷ་ཆུ་ཁར་གྲགས་སོ། །དེ་ནས་མཁར་ནག་འདུལ་བའི་ཕྱིར་བྱོན་ནས།  བྲག་ལ་རྡོ་རྗེ་སེམས་དཔའི་སྐུ་བཞེངས་སོ། །དེ་ནས་རིམ་གྱིས་ཟུར་མཁར་གྱི་མདར་
ཕེབས་ནས་ལྷ་བཙན་པོ་དང་མཇལ་བའི་སར།  རྡོའི་མཆོད་རྟེན་ལྔ་བཞེངས་སོ། །དེ་ནས་བྲག་དམར་གྱི་ལྷ་ཁང་དུ་ཕེབས་ཏེ་ལྷ་སྲིན་འདུལ་བར་ཞུས་ཤིང་།  ཁྱེའུ་དང་བུ་མོ་གཙང་མ་ལ་པྲ་འབེབས་པའི་ཆོ་ག་མཛད།  འཇིག་རྟེན་སྐྱོང་བ་བཞི་ལ་གདུག་པ་ཅན་ཐམས་ཅད་ཁུག་
9-2-107b


ཅིག་ཅེས་བཀའ་བསྒོས་ཏེ།  བཀའ་ནན་དྲག་པོ་སྩལ་བས་མི་མ་ཡིན་རྣམས་ཀྱིས་རང་གི་ཉེས་པ་ཁས་བླངས་ཤིང་ཕྱིན་ཆད་མི་བྱེད་པར་དམ་བཅས་སོ། །སླར་ཡང་མཆིམས་ཕུའི་དབེན་གནས་སུ་མི་མ་ཡིན་རྣམས་ལ་བཀའ་བསྒོ་ཞིང་།  བསྟན་པ་བསྲུང་བར་དམ་བཅས་
སོ། །དེ་ནས་སློབ་དཔོན་གྱིས་བྱེ་མ་ནེའུ་གསིང་དུ་བསྒྱུར་བ་དང་།  བར་སྣང་ནས་ལྷ་རྫས་ཀྱི་ཆུས་གང་བའི་བུམ་པ་ལེན་པ་ལ་སོགས་པའི་ཆོ་འཕྲུལ་བསྟན་པས།  བསམ་སྦྱོར་ངན་པར་བྱེད་པའི་བློན་པོ་ངན་པ་རྣམས་འཁུ་འཁྲིག་ཟོས་ཏེ།  སློབ་དཔོན་བཀྲོང་བར་ཆད་པས།  ལྷ་
བཙན་པོ་ཐུགས་མ་བདེ་བར།  དམག་མང་པོ་དང་བཅས་ཏེ།  བོད་དང་མོན་གྱི་མཚམས་སུ་བསྐྱལ་ལོ། །སློབ་དཔོན་བཀྲོང་བའི་གཤེད་མ་མཚོན་ཆ་གཟུང་བ་རྣམས་རེངས་པར་གྱུར་ཏོ། །སློབ་དཔོན་གྱི་ཞལ་ནས་བོད་ཀྱི་ལྷ་སྲིན་སྡེ་བརྒྱད་ལན་གསུམ་དམ་ལ་བཏགས་དགོས་
ཏེ།  ད་དུང་ལན་གཅིག་མ་གྲུབ་པས་རྒྱལ་བརྒྱུད་དང་ཆོས་བྱེད་པའི་ཚེ་སྲོག་དང་དམ་པའི་ཆོས་ལ་བར་ཆད་འགའ་རེ་འབྱུང་བར་འདུག་པས་ཅུང་ཟད་ཡིད་འཕྲེང་།  ངའི་དངོས་ཀྱི་གདུལ་བྱ་བོད་ཡུལ་ན་མེད་སྲིན་པོ་འདུལ་དུ་འགྲོ་གསུངས་ནས་བླ་གོས་པུ་རེ།  གསེག་ཤང་སིལ་ལེ།  སྲིན་
པོའི་ཡུལ་དུ་བཞུད་དོ། །བོད་ཡུལ་དུ་ཟླ་བ་བཅོ་བརྒྱད་བཞུགས་པ་ཡིན་བྱ་བ་སྦ་བཞེད་ན་སྣང་ཞིང་།  དེ་བས་ལྷག་པའི་ལོ་རྒྱུས་མང་པོ་ནི་མི་སྣང་ངོ་། །མཁན་པོས་རྒྱལ་པོ་ལ་ཁྱོད་ཀྱི་བོད་ཡུལ་འདིར་མུ་སྟེགས་མི་འབྱུང་ཡང་ཡར་ངོ་མར་ངོ་གཉིས་ལ་སོགས་རྟེན་འབྲེལ་འགའ་ཡི་
རྒྱུས་ཆོས་ལུགས་དག་མ་དག་གཉིས་སུ་འགྲོ་བར་འགྱུར་ཏེ།  དེ་ཡང་ཐོག་མར་ང་འདས་ནས་རྒྱ་ནག་དགེ་སློང་ཞེས་བྱ་བས།  བྱ་བྱེད་ཀྱི་ཆོས་ཀྱིས་འཚང་མི་རྒྱ་བས་རྣམ་པར་མི་རྟོག་པ་བསྒོམ་པས་སེམས་རྟོགས་པ་འབའ་ཞིག་གིས་འཚང་རྒྱ་བའི་ཆོས་སྟོན་པར་འགྱུར་རོ། །དེའི་ཚེ་
9-2-108a


ངའི་སློབ་མ་ཀཱ་མ་ལ་ཤཱི་ལ་སྤྱན་དྲོངས་ལ་དེས་སུན་འབྱིན་པར་ནུས་སོ། །དེ་ནས་དད་ལྡན་རྣམས་ཀྱིས་སློབ་དཔོན་གྱི་ཆོས་ལུགས་བཞིན་དུ་ཉམས་སུ་ལོང་ཅིག་གསུང་།  དེ་བདག་ཅག་གིས་གདན་འདྲོང་བ་མི་སྲིད་པས་ཕྱག་ཡིག་
ཅིག་བཞག་པར་ཞུ་ཞུས་པས།  ཀཱ་མ་ལ་ཤཱི་ལ་ཁྱེད་ལ་མ་འོངས་པའི་དུས་སུ་བོད་ཀྱི་རྒྱལ་པོས་གདན་འདྲེན་པ་བྱུང་ན་ཅིས་ཀྱང་འབྱོན་དགོས་སོ། །གལ་ཏེ་མ་འོངས་ན་དཔོན་སློབ་ལ་དམ་ཚིག་མེད་དོ། །ཞེས་པའི་ཕྱག་ཡིག་བཞག་སྐད།  དེའི་
རྗེས་སུ་ལུང་བསྟན་པ་དེ་བཞིན་ཐོག་ཏུ་བབས་ཏེ།  མཁན་པོ་གཤེགས་ནས།  སྦ་ཡེ་ཤེས་དབང་པོ་རྒྱལ་ཚབ་ཏུ་བསྐོས་ཏེ་བསྟན་པ་འཛིན་པའི་ཚེ།  ཉང་ཏིང་འཛིན་བཟང་པོ་དང་།  ཉང་ཤ་མི་ལ་སོགས་པ་མི་གུས་པ་དང་སྐུར་པ་བཏབ་
པས་ཐུགས་སྐྱོ་ནས་མཁར་ཆུར་བསྒོམ་དུ་བཞུད་དོ། །དེའི་ཚེ་རྒྱ་ནག་མཁན་པོ་བྱུང་ནས་ཁོ་རང་གི་ཆོས་ལུགས་བསྟན་པས།  ཆོས་འདི་བྱ་སླ་ཞིང་ཕན་ཡོན་ཆེའོ། །ཞེས་ཟེར་ཞིང་།  བོད་རིལ་གྱིས་ཁོའི་ཆོས་ལུགས་བྱེད།  དཀོན་
མཆོག་ལ་མཆོད་པ་དང་།  སྡེ་སྣོད་ལ་ཐོས་བསམ་དང་།  ལུས་ངག་གི་དགེ་སྦྱོར་འཕྲོ་གཅད་དོ། །དཔལ་དབྱངས་དང་།  སྤ་རཏྣ་ལ་སོགས་པ་ཉུང་ཤས་ཤིག་མཁན་པོའི་ཆོས་ལུགས་བྱེད་དོ། །བཙན་པོས་རྒྱའི་སྟོན་པའི་ལུགས་འདི་ཆོས་རང་མིན་པ་འདྲ་གསུངས་པས་
སྟོན་མིན་པར་གྲགས་སོ། །དྲང་སྲོང་བཟོད་པས་མཆིམས་ཕུར་རང་གི་ལུས་ལ་མེ་སྦར་ཏེ།  དཀོན་མཆོག་ལ་ཕུལ་བས།  སེམས་ཅན་གྱི་དོན་དུ་རང་ལ་བརྩེ་བ་མེད་པ་འདི་ལྟ་བུའི་ཚོགས་བསགས་པ་གལ་ཆེ་བྱས་པས་བརྩེན་མིན་པར་གྲགས་སོ། །བཙན་པོས་ལྟ་སྤྱོད་
9-2-108b


འཛོམ་པའི་ཆོས་བརྩེན་མིན་པའི་ལྟར་བྱ་རྒྱུ་ཡིན་གསུངས་པས་སྟོན་མིན་པ་རྣམས་ཡི་ཆད་དེ།  ཧྭ་ཤང་གིས་རང་གི་མགོ་ལ་མེ་སྦར་བས་རྒྱ་མེ་མགོ་བར་གྲགས་སོ། །དེ་ནས་རྒྱལ་པོ་ཐུགས་མ་བདེ་ནས།  སྦ་ཡེ་ཤེས་དབང་པོ་སྤྱན་འདྲེན་པ་བཏང་བས་ཁུགས་ཏེ།  བཙན་
པོའི་སྤྱན་སྔར་མཇལ་ཞིང་གླེང་པས།  མཁན་པོའི་ཞལ་ཆེམས་དཀོར་མཛོད་དུ་ཟངས་མའི་གླེགས་བུ་ལ་བྲིས་པ་བཏོན་ནས་ཕུལ་བས།  ཀཱ་མ་ལ་ཤཱི་ལ་སྤྱན་འདྲེན་པ་བཏང་སྟེ།  བསམ་ཡས་སུ་ཕེབས་ནས་བྱང་ཆུབ་གླིང་དུ་ཁྲི་བཤམས་ཏེ།  བཙན་པོ་གུང་ལ་བཞུགས།  ཧྭ་
ཤང་གཡས་སུ་འཁོད།  འཁོར་བན་དྷེ་ལན་ཀ་དང་།  ཇོ་མོ་བྱང་ཆུབ་ལ་སོགས་པ་གྲལ་རིང་པོ་བྱུང་ངོ་། །སློབ་དཔོན་ཀཱ་མ་ལ་ཤཱི་ལ་གཡོན་དུ་འཁོད།  འཁོར་བཻ་རོ་ཙ་ན་ལ་སོགས་པ་ཉུང་ཤས་ཤིག་བྱུང་།  ལྷ་བཙན་པོས་མེ་ཏོག་དཀར་པོའི་ཕྲེང་བ་རེ་གཏད་ནས།  གང་རྩོད་
པ་རྒྱལ་བ་ལ་ཕམ་པ་དེས་མེ་ཏོག་ཕུལ་ཅིག །ངའི་མངའ་རིས་བོད་ཡུལ་འདིར་ནག་པོ་ལ་དགའ་བའི་དུས་སུ་ཟ་ཧོར་རྒྱལ་པོའི་སྲས་བོ་དྷི་ས་ཏྭ་སྤྱན་དྲངས་ནས།  བོད་ཉུང་ཤས་ཤིག་དམ་པའི་ཆོས་ལ་བཀོད།  དད་པ་ཅན་རབ་ཏུ་བྱུང་ཞིང་།  དཀོན་མཆོག་གསུམ་གྱི་
རྟེན་རྣམས་བཙུགས་ནས་མཆོད་པ་བྱེད་པའི་དུས་སུ།  རྒྱ་ནག་ཧཱ་ཤང་མ་ཧཱ་ཡ་ན་བྱུང་སྟེ།  བོད་ཀྱི་བཙུན་པ་ཕལ་ཆེར་ཀྱང་དེའི་སློབ་མར་གྱུར་ཏེ།  བོ་དྷི་ས་ཏྭའི་སློབ་མ་ཉུང་ཤས་ཤིག་གིས།  སློབ་ཏུ་མ་བཏུབ་པས་སྟོན་བརྩེན་གཉིས་སུ་ཆད་དེ་རྩོད་པར་གྱུར་ཏོ། །ཀཱ་མ་
ལ་ཤཱི་ལ་བོ་དྷི་ས་ཏྭའི་ཆོས་ལུགས་སྐྱོང་བའི་སློབ་མ་ཡིན་པས།  ཁྱེད་གཉིས་ང་རྒྱལ་མི་བྱ་བར་ཆོས་ལུགས་སུ་བཟང་བ་ལ་ངན་པ་དེས་གུས་པར་གྱིས་ཤིག །ཅེས་བཀའ་སྩལ་པ་དང་།  ཧྭ་ཤང་ན་རེ།  གཞི་ལ་ཡོད་པ་སྔ་བ་ཡིན་པས།  དྲིའམ་ལན་གདབ་ཅེས་ཟེར་རོ། །
9-2-109a


སློབ་དཔོན་ཀཱ་མ་ལས།  ཁྱེད་ཀྱི་དགོངས་པ་ལྟར་དུ་ཤགས་གསུངས་ཤིག །ཅེས་བྱས་པས་ཧཱ་ཤང་ན་རེ།  ལས་དགེ་མི་དགེའི་དབང་གིས་མཐོ་རིས་དང་ངན་སོང་གི་འབྲས་བུ་མྱོང་ཞིང་འཁོར་བར་འཁོར་བ་ཐམས་ཅད།  སེམས་ཀྱི་རྣམ་པར་རྟོག་པས་
བསྐྱེད་པ་ཡིན།  གང་ཅི་ཡང་མི་སེམས་ཤིང་།  ཅི་ཡང་མི་བྱེད་པ་དེ་འཁོར་བ་ལས་ཐར་བར་འགྱུར་རོ། །དེ་ལྟ་བས་ན་ཅི་ཡང་བསམ་པར་མི་བྱའོ། །སྦྱིན་པ་ལ་སོགས་དཀར་པོའི་ཆོས་སྤྱོད་པ་ནི།  སྐྱེ་བོ་བློ་ཞན་པ་དཀར་པོའི་ལས་འཕྲོ་མེད་པའི་དབང་པོ་རྟུལ་པོ་རྣམས་
ལ་བསྟན་པ་ཡིན་ཏེ།  སྔོན་བློ་སྦྱངས་པའི་དབང་པོ་རྣོན་པོ་རྣམས་སྤྲིན་དཀར་ནག་གང་གིས་ཀྱང་ཉི་མ་བསྒྲིབས་པ་ལྟར་ལས་དགེ་སྡིག་གཉིས་ཀས་བསྒྲིབས་པས་ཅི་ཡང་མི་སེམས།  ཅི་ཡང་མི་རྟོག །གང་ཡང་མི་སྤྱོད་པ་དེ་ནི་མ་དམིགས་པ་ཞེས་བྱ།  དེ་ནི་ཅིག་ཅར་འཇུག་
པའི་ལམ་ས་བཅུ་པ་དང་འདྲའོ། །དེས་ན་ཁྱེད་ཀྱི་ཆོས་ལུགས་ནི་སྤྲེའུ་ཤིང་རྩེར་འཛེགས་པ་དང་འདྲ་བས་རིམ་གྱིས་པ་ཞེས་བྱ།  ངེད་ཀྱི་ཆོས་ལུགས་འདི་ཁྱུང་ནམ་མཁའ་ནས་ཤིང་རྩེར་བབས་པ་དང་འདྲ་བས།  ཡས་འབབ་དང་ཅིག་ཅར་ཞེས་བྱའོ། །ཞེས་ཟེར་རོ། །དེ་ལ་སློབ་དཔོན་
གྱིས་དཔེ་དོན་ལ་དགག་པ་མཛད་དེ།  དང་པོ་དཔེ་དགག་པ་ལ་ཁྱོད་ཀྱི་དཔེ་མི་འཐད་དེ།  ཁྱུང་ནམ་མཁའ་ལས་གློ་བུར་དུ་འདབ་གཤོག་རྫོགས་པར་སྐྱེས་ནས་ཤིང་རྩེར་འབབ་བམ།  འོན་ཏེ་བྲག་ལ་ཚང་བཅས་ནས་རིམ་གྱིས་འདབ་གཤོག་རྒྱས་ཏེ་ཤིང་རྩེར་འབབ།  དང་པོ་མི་སྲིད་ལ།  ཕྱི་
མ་ལྟར་ན་རིམ་གྱིས་པའི་དཔེར་འགྱུར་གྱི།  ཅིག་ཅར་པའི་དཔེར་མི་རུང་ངོ་། །དེར་མཁན་པོས་དཔེ་ལ་ལན་མ་ཐེབས་པ་དང་དོན་བཀག་སྟེ།  ཁྱེད་ཀྱི་དཔེ་ནོར་བར་མ་ཟད་དོན་ཡང་འཁྲུལ་ཏེ།  རྣམ་པར་མི་རྟོག་པ་བསྒོམ་པ་དེ་ནི་རྣམ་རྟོག་ཕྱོགས་གཅིག་བཀག་པ་ཙམ་ཡིན་ནམ།  མཐའ་དག་
9-2-109b


བཀག་པ་ཡིན།  དང་པོ་ལྟར་ན།  གཉིད་དང་བརྒྱལ་བ་ལ་སོགས་པའང་མི་རྟོག་པ་བསྒོམ་པ་ཡིན་པར་ཐལ།  རྟོག་པ་ཕྱོགས་གཅིག་བཀག་པ་ཙམ་ཡིན་པའི་ཕྱིར།  རྣམ་རྟོག་མཐའ་དག་དགག་དགོས་ན།  ཁྱོད་མི་རྟོག་པ་བསྒོམ་པའི་ཚེ་མི་རྟོག་པ་བསྒོམ་སྙམ་པའི་བློ་སྔོན་དུ་བཏང་དགོས་
སམ་མི་དགོས།  དགོས་ན་དེ་ཉིད་རྟོག་པ་ཡིན་པས་མི་རྟོག་པ་བསྒོམ་པའི་དམ་བཅའ་ཉམས་སོ། །མི་དགོས་ན་ཁམས་གསུམ་གྱི་སེམས་ཅན་ཐམས་ཅད་ལ་བསྒོམ་སྐྱེ་བར་ཐལ།  བསྒོམ་སྙམ་པའི་རྟོག་པ་སྔོན་དུ་མ་བཏང་ཡང་སྐྱེ་བའི་ཕྱིར་རོ། །ཞེས་བྱ་བ་ལ་སོགས་པ་ལུང་དང་རིགས་
པས་སུན་ཕྱུང་བས།  རྒྱ་ནག་མཁན་པོ་སྤོབས་པ་མེད་པར་གྱུར་ཏོ། །རྒྱལ་པོས་སྨྲས་པ་ལན་ཡོད་ན་ད་ལྟ་གསུངས་ཤིག །མཁན་པོས་སྨྲས་པ་མགོར་ཐོག་རྒྱབ་པ་ལྟར་ལན་མི་ཤེས་སོ། །དེ་ནས་རྒྱལ་པོས་དེ་ལྟར་ན་སློབ་དཔོན་ལ་མེ་ཏོག་ཕུལ།  བཟོད་པར་གསོལ་ལ་ལུང་
རིགས་དང་མི་འགལ་བར་རྒྱ་གར་གྱི་ཆོས་ལུགས་བཞིན་གྱིས་ཤིག །རྒྱ་ནག་མཁན་པོའི་ལུགས་བྱེད་ན་ཆད་པས་གཅད་དོ། །ཞེས་བཀའ་ནན་དྲག་ཏུ་མཛད་ནས་བཀའ་ཡིག་གསུམ་མཛད་ཅིང་།  མདོ་ཁམས་དང་།  བོད་དང་།  དཀོར་མཛོད་དུ་བཞག་གོ།  རྒྱ་ནག་ཧྭ་ཤང་
གིས་ཐོག་མར་པཎྜི་ཏ་སྤྱན་འདྲེན་བཏང་བ་ཐོས་ནས།  སློབ་མ་བསྡུས་ཏེ།  ཤགས་འདེབས་པ་བསླབ་པའི་ཚེ།  ཅི་ཡང་ཡིད་ལ་མི་སེམས་པར་ཉལ་བས་ཆོག་གོ། ཞེས་པའི་བསྒོམ་ཡིག་བསམ་གཏན་ཉལ་ཆོག་གི་འཁོར་ལོ།  དེའི་གནད་སྟོན་པ་ལ་བསམ་གཏན་གྱི་
ལོན།  གེགས་སེལ་བ་ལ་བསམ་གཏན་གྱི་ཡང་ལོན།  རིགས་པས་བསྒྲུབ་པ་ལ་ལྟ་བའི་རྒྱབ་ཤ།  ལུང་གིས་སྒྲུབ་པ་ལ་མདོ་སྡེ་བརྒྱད་བཅུའི་ཁུངས་ཞེས་བྱ་བའི་གཞུང་ལྔ་བརྩམས་སོ། །དེ་རྣམས་གཏེར་དུ་སྦས་པ་རིམ་གྱིས་མཆེད་པར་གྱུར་ཏེ།  བོད་ཀྱི་མན་ངག་ཆོས་
9-2-110a


རྒྱུས་ཆུང་བས་རང་བཟོར་བྱས་པ་རྣམས་ལ་འདྲེས་པ་ཡིན་ནོ། །རྒྱ་ནག་མཁན་པོའི་ལྷྭམ་རྩོད་པའི་གྲྭར་ལུས་པས་བོད་ཀྱི་བསྟན་པའི་མཇུག་ཏུ་ངའི་ཆོས་ལུགས་འབྱུང་ངོ་ཞེས་པ་དང་།  རྒྱ་ནག་ཏུ་འགྲོ་བའི་ཚེ་ལྷྭམ་ལུས་པ་དང་།  ད་རུང་བོད་ཡུལ་
དུ་ངའི་ཆོས་ལུགས་འབྱུང་ཞེས་ཟེར་རོ། །ལྷ་བཙན་པོས་སློབ་དཔོན་ལ་ཐོས་བསམ་གྱིས་གཏན་ལ་ཕབ་པའི་ཆོས་དེའི་གནས་ལུགས་ཇི་ལྟར་ཡིན་པའི་བསྟན་བཅོས་མཛད་པར་ཞུས་པས།  བསྒོམ་རིམ་དང་པོ་བརྩམས།  སྟན་ཐོག་གཅིག་ཏུ་བསྒོམ་ཚུལ་ཞུས་པས།  བསྒོམ་
རིམ་བར་པ་མཛད།  དེ་ལས་འབྲས་བུ་གང་འབྱུང་ཞུས་པས།  བསྒོམ་རིམ་ཐ་མ་བརྩམས།  དེ་ལ་རྒོལ་བ་བཟློག་པའི་ཕྱིར།  ལུང་དང་རིགས་པས་སྒྲུབ་པའི་དབུ་མ་སྣང་བ་བརྩམས་ཏེ་གནང་ངོ་། །དེ་ལྟར་རྒྱ་གར་གྱི་ལུགས་ཀྱི་རིམ་གྱིས་པའི་ཆོས་ལུགས་དར་བའི་ཚེ།  རྒྱལ་པོ་གླང་དར་
མ་བློན་པོ་ངན་པ་དང་གྲོས་ངན་བཤམས་ཏེ།  མངའ་བདག་རལ་པ་ཅན་བཀྲོངས་ནས་བོད་ཡུལ་གྱི་ཆོས་ཁྲིམས་དང་།  རྒྱལ་ཁྲིམས་གཉིས་ཀ་བཤིག །གླང་དར་མའང་ལྷ་ལུང་དཔལ་གྱི་རྡོ་རྗེས་བསད།  དེ་རྗེས་སུ་ཡུམ་བརྟན་དང་།  འོད་སྲུང་འཁྲུགས་ནས་བོད་ཡུལ་ཕུང་བར་གྱུར་པའི་ཚེ་
ཧྭ་ཤང་གི་ཆོས་ལུགས་ཡི་གེར་བཀོད་པ་གཏེར་ནས་འཐོན་པ་ལ་བརྟེན་ནས།  བླུན་པོ་ཆོས་དད་ཅན་གདམས་ངག་འབོགས་པ་ལ་སྤྲོ་བས་ཡས་འབབ་དང་ཅིག་ཅར་བའི་མིང་འདོགས་གསང་ནས།  ཕྱག་རྒྱ་ཆེན་པོར་མིང་བཏགས་ཏེ་བཤད་དོ། །དེ་ལ་ཡང་ཆོས་ཐམས་ཅད་སེམས་སུ་ངོ་སྤྲོད། 
སེམས་ནམ་མཁར་ངོ་སྤྲོད།  ནམ་མཁའ་ཅི་ཡང་མེད་པའི་སྟོང་ཉིད་དུ་ངོ་སྤྲོད་པའི་ཕྱག་རྒྱ་ཆེན་པོ་ངོ་སྤྲོད་གསུམ་པར་གྲགས་པ་དང་།  ཡང་སེམས་བདེ་བ་དང་།  གསལ་བ་དང་།  མི་རྟོག་པར་ཞེན་པའི་གོལ་ས་གསུམ་བཅད་དེ།  གཤིས་ལ་ཤོར་བ་དང་།  སྒོམ་དུ་ཤོར་བ་དང་།  ལམ་དུ་
9-2-110b


ཤོར་བ་དང་།  རྒྱས་འདེབས་སུ་ཤོར་བ་སྟེ།  ཤོར་ས་བཞི་སྤངས་ནས།  སོ་མ།  མ་བཅོས་པ།  ལྷུག་པ།  འབོལ་ལེ།  ཤིག་གེར་འཇོག་པ་ཉམས་སུ་ལེན་པ་སྟེ།  འཇུར་པོས་བཅིངས་པའི་སེམས་ཉིད་འདི། །གློད་ན་གྲོལ་བར་ཐེ་ཚོམ་མེད། །བྲམ་ཟེ་སྐུད་པ་འཁལ་བ་ལྟར། །སོ་མ་མ་བཅོས་ལྷུག་
པར་ཞོག །ཅེས་བྲམ་ཟེ་ཆེན་པོས་གསུངས་སོ། །ཞེས་ཟེར་བའི་དེང་སང་གི་ཕྱག་རྒྱ་ཆེན་པོ་ཐམས་ཅད་ཀྱང་།  རྒྱ་ནག་གི་ལུགས་ཀྱི་རྫོགས་ཆེན་ལས་མ་འདས་སོ། །གཞུང་དེའི་ཚིག་རྐང་དང་པོ་གཉིས་བྲམ་ཟེའི་གསུང་ཡིན་ཀྱང་།  ཕྱི་མ་གཉིས་ནི་བརྫུས་མ་ཁོ་ནའོ། །འདི་ལ་ཕྱོགས་བཅུའི་སངས་རྒྱས་
ཀྱི་ཕྲིན་ཡིག་ལས།  ཁ་ཅིག་དཀར་པོ་ཆིག་ཐུབ་ལ། །ཕྱག་རྒྱ་ཆེན་པོ་ངོ་སྤྲོད་བྱེད། །ཤོར་ས་བཞི་དང་གོལ་ས་གསུམ། །སྤོངས་ལ་གཉུག་མར་བསྒོམ་པར་བྱ། །བྲམ་ཟེ་སྐུད་པ་འཁལ་བ་ལྟར། །སོ་མ་མ་བཅོས་ལྷུག་པར་བཞག །འདི་ལ་ཕྱག་རྒྱ་ཆེན་པོ་ཟེར། །འདི་དོན་བརྟགས་ན་འདི་
ལྟར་མཐོང་། །སོ་མར་བཞག་ན་བལ་ཉིད་ཡིན། །སྐུད་པར་བྱས་ན་བཅོས་པར་གྱུར། །དེ་ཕྱིར་འདི་ལ་དཔེ་སྐྱོན་ཡོད། །དོན་གྱི་སྐྱོན་ཡང་འདི་ལྟར་མཐོང་། །གོལ་ས་གསུམ་པོ་གཅད་ཙམ་གྱིས། །ཕྱག་རྒྱ་ཆེན་པོར་འགྱུར་ན་ནི། །ཉན་ཐོས་འགོག་པའང་དེར་འགྱུར་རོ། །ཤོར་ས་
བཞི་པོ་སྤང་སྙམ་པའི། །རྣམ་རྟོག་ཕྱག་རྒྱ་ཆེན་པོ་མིན། །རྟོག་པ་མེད་ན་སྤོང་མི་ནུས། །རྟོག་པ་མེད་ཀྱང་སྤོང་ནུས་ན། །སེམས་ཅན་ཀུན་ལ་འབད་མེད་པར། །ཕྱག་རྒྱ་ཆེན་པོ་ཅིས་མི་སྐྱེ། །དེས་ན་ཕྱག་རྒྱ་ཆེན་པོ་ཉིད། །ཡིན་ན་ཤོར་ས་གོལ་ས་མེད། །ཡོད་ན་ཕྱག་རྒྱ་ཆེན་པོ་མིན། །ཞེས་སོགས་ཀྱི་སྒོ་ནས་རྒྱས་པར་བཀག་
གོ།  །བཞི་པ་ལ་བཞི་སྟེ།  ནཱ་རོ་དང་མཻ་ཏྲི་བའི་ལུགས་དང་མཐུན་པ།  འཕགས་པ་ཀླུ་སྒྲུབ་ཀྱི་ལུགས་དང་མཐུན་པ།  རྒྱུད་དང་བསྟན་བཅོས་གཞན་དང་མཐུན་པ།  དེ་ལྟ་བུའི་ཕྱག་ཆེན་རྟོགས་པའི་ཕན་ཡོན་ནོ། །དང་པོ་ནི།  ནཱ་རོ་དང་ནི་ཞེས་སོགས་དྲུག་སྟེ།  གྲུབ་ཆེན་དེ་གཉིས་ཀྱིས་བཞེད་པའི་ཕྱག་རྒྱ་ཆེན་པོ་ནི།  སམྦུ་ཊི་ལས།  ཨེ་ཝཾ་
9-2-111a


མ་ཡ་བཞི་དང་།  འཁོར་ལོ་བཞི་ལ་སོགས་པ་བཞི་ཚན་གྱི་ཆོས་བཅུ་ལ་ཕྱག་རྒྱ་བཞི་སྦྱོར་བའི་ཚུལ་དེ་ཉིད་ཡིན་ནོ། །དེ་ཡང་ཏི་ལོ་པས་ནཱ་རོ་པ་ལ་གནང་བའི་ཕྱག་རྒྱ་ཆེན་པོ་གཾ་ག་མ་ལས།  སྔགས་སུ་སྨྲ་དང་ཕ་རོལ་ཕྱིན་པར་སྨྲ། །འདུལ་བའི་སྡེ་སྣོད་ལ་སོགས་
ཆོས་རྣམས་དང་། །རང་རང་གཞུང་དང་གྲུབ་པའི་མཐའ་ཡིས་ཀྱང་། །འོད་གསལ་ཕྱག་རྒྱ་ཆེན་པོ་མཐོང་མི་འགྱུར། །ཡིད་ལ་མི་བྱེད་ཞེ་འདོད་ཀུན་དང་བྲལ། །ཞེས་དང་།  མཻ་ཏྲི་པའི་ཕྱག་རྒྱ་ཆེན་པོ་ཚིག་ཏུ་བསྡུས་པ་ལས།  སྣང་བ་རང་གྲོལ་ཆོས་ཀྱི་དབྱིངས། །རྟོག་པ་རང་གྲོལ་
ཡེ་ཤེས་ཆེ། །གཉིས་མེད་མཉམ་པ་ཆོས་ཀྱི་སྐུ། །ཆུ་བོ་ཆེན་པོའི་རྒྱུན་ལྟར་འབབ། །ཅེས་པ་དང་།  དེ་ཉིད་ཉི་ཤུ་པ་ལས།  ལས་དང་དམ་ཚིག་ཕྱག་རྒྱ་གཉིས། །འཁོར་ལོ་རྫོགས་པར་བསྒོམ་པ་ཉིད། །ཐ་མའི་བྱང་ཆུབ་བསྒོམ་པ་ནི། །དག་པའི་དེ་ཉིད་ཕྱིར་ཕྱོགས་པའོ། །ཡེ་ཤེས་
ཕྱག་རྒྱ་མཉམ་སྦྱོར་བས། །འཇམ་པའི་རྡོ་རྗེ་ལ་སོགས་གཙོ། །བདེན་མིན་བརྫུན་མིན་རྣམ་པར་ནི། །བདག་ཉིད་བསྒོམ་པ་འབྲིང་པོའོ། །ཞེས་པ་དང་།  ཐེག་ཆེན་ཉི་ཤུ་པ་ལས།  ཟུང་འཇུག་གོ་འཕང་སྐྱོང་བ་པོའི། །རྣམ་པ་ཀུན་གྱི་མཆོག་ལྡན་པ། །མཚན་ཉིད་མེད་ཉིད་འདུས་མ་
བྱས། །གཉུག་མའི་ཚུལ་ལ་བདག་ཕྱག་འཚལ། །ཞེས་གསུངས་སོ། །ནཱ་རོ་པའི་ལུགས་ཀྱི་ཕྱག་ཆེན་ནི།  ཆོས་དྲུག་རྡོ་རྗེའི་ཚིག་རྐང་ལས།  ཕྱག་ནི་གཉིས་མེད་ཡེ་ཤེས་དེ་ཡིས་བཟུང་། །རྒྱ་ནི་འཁོར་བའི་མདུད་པ་དྲལ་བ་སྟེ། །ཆེན་པོ་ཟུང་འཇུག་སྒྲོན་མ་བལྟམ་པ་ལགས། །གཞན་
གྱིས་མ་རྟོགས་རང་གྲོལ་ཆོས་སྐུའོ། །ཞེས་པའི་ལུང་དྲངས་ནས་འཆད་པ་ནི།  རྒྱ་གར་གྱི་ཕྱག་རྒྱ་ཆེན་པོའི་སྐད་དོད་ལ།  ཕྱག་གི་སྐད་དོད་མེད་ཅིང་འོག་ཏུ་ཕྱག་རྒྱ་ཆེན་པོའི་བཤད་པ་ལ།  ལག་པའི་སྒྲ་དོན་འཆད་པ་དང་། །ཞེས་འཁྲུལ་བར་བཤད་པ་དང་འགལ་བས་ཐེ་ཚོམ་གྱི་གཞིའོ། །
9-2-111b


དེས་ན་འདིའི་ལུགས་ཀྱི་ཕྱག་རྒྱ་བཞི་ནི།  འཁོར་ལོ་བདེ་མཆོག་གི་རྫོགས་རིམ་ཕྱག་རྒྱ་བཞི་ལ་སྦྱོར་བའི་ཚུལ་ཡོད་པ་ལ་དགོངས་ཏེ་འདིར་མ་སྤྲོས་སོ། །གཉིས་པ་ནི།  འཕགས་པ་ཀླུ་སྒྲུབ་ཞེས་སོགས་དྲུག་སྟེ།  ཕྱག་རྒྱ་བཞི་པར།  ལས་ཀྱི་ཕྱག་རྒྱ་ལ་བརྟེན་ནས་རྒྱུ་མཐུན་པའི་འབྲས་བུ་སྐྱེ་
བར་བྱེད་དོ། །འདྲ་བར་འབྱུང་བས་རྒྱུ་མཐུན་པའོ། །ཇི་ལྟར་མེ་ལོང་ལ་བརྟེན་ནས་བཞིན་གྱི་གཟུགས་བརྙན་འབྱུང་བ་དེ་བཞིན་དུ་མི་འབྱུང་བར་མི་འགྱུར་རོ། །སྔོན་དུ་ཡང་མ་གྲུབ་པ་ལ་ད་ལྟར་ཡང་མ་གྲུབ་པའི་ཕྱིར།  དེ་ལྟར་བཞིན་གྱི་གཟུགས་བརྙན་ནི་འདྲ་བ་ཙམ་དུ་རྟོགས་པར་ཟད་དོ། །
དེ་ལྟར་ན་འཇིག་རྟེན་པ་རྣམས་རང་གིས་རང་གི་བཞིན་མཐོང་ངོ་། །ཞེས་འཁྲུལ་པས་དགའ་བར་འགྱུར་རོ། །དེ་བཞིན་དུ་སློབ་དཔོན་དམན་པས་སློབ་མ་དམན་པ་རྣམས་ཤེས་རབ་ཡེ་ཤེས་བསྒྲུབས་ནས་དེ་ཁོ་ན་ཉམས་སུ་མྱོང་ངོ་། །ཞེས་དགའ་བ་སྐྱེ་བར་འགྱུར་ཏེ།  དེ་ལ་དགའ་ཞིང་མགུ་
བས་ཆོས་ཀྱི་ཕྱག་རྒྱའི་གཏམ་ཡང་མི་ཤེས་སོ། །ཞེས་བཤད་དོ། །གསུམ་པ་ནི།  རྒྱུད་ཀྱི་རྒྱལ་པོ་ཞེས་སོགས་ཚིགས་བཅད་གཅིག་སྟེ།  བརྟག་གཉིས་སོགས་རྒྱུད་ཀྱི་རྒྱལ་པོ་དང་།  གྲུབ་པ་སྡེ་བདུན་དང་།  སྙིང་པོ་སྐོར་དྲུག་སོགས་བསྟན་བཅོས་ཆེན་པོ་གཞན་ལས་ཀྱང་།  བླ་མེད་ཀྱི་
དབང་བསྐུར་བ་བཞི་པོ་དག་དང་མ་འབྲེལ་བ་དེ་ལ་ཕྱག་རྒྱ་ཆེན་པོ་བཀག་སྟེ།  བརྟག་གཉིས་ལས།  དེ་ནས་རྣལ་འབྱོར་མས་ཞུས་པ། །ཕྱག་རྒྱ་ཆེན་པོ་ཇི་ལྟ་བུ། །ཀུན་རྫོབ་རྣམ་པའི་གཟུགས་ཀྱིས་ནི། །བདེ་བ་སྦྱིན་པས་བཤད་དུ་གསོལ། །ཞེས་པའི་ལན་དུ།  གཞན་གྱིས་བརྗོད་མིན་ལྷན་
ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་དུས་ཐབས་བསྟེན་པ་དང་། །བདག་གི་བསོད་ནམས་ལས་ཤེས་བྱ། །ཞེས་པ་དང་།  སམྦུ་ཊི་ལས།  ནང་གི་དབྱེ་བ་འདི་ཉིད་ནི། །བླ་མའི་ཞལ་ལས་རྙེད་པར་འགྱུར། །ཞེས་པ་དང་།  གསང་བ་མཛོད་ཀྱི་མདོ་ལས་ཀྱང་།  རྡོ་རྗེ་སེམས་
9-2-112a


དཔའ་ཉོན་ཅིག་དང་།  གསང་སྔགས་ཀྱི་ཐེག་པ་མཆོག་གི་དབང་བསྐུར་བ་གསར་བ་ཆེན་པོ་འདིས་སངས་རྒྱས་ཐོབ་པར་ནུས་ཀྱི།  ཐེག་པ་གཞན་གྱིས་ནི་བསྐལ་བ་བྱེ་བས་ཀྱང་སངས་རྒྱས་འཐོབ་པར་མི་འགྱུར་རོ། །ཞེས་པ་དང་།  ཡེ་ཤེས་གྲུབ་པ་ལས།  རྟོག་པ་ཐམས་
ཅད་རྣམ་སྤངས་པའི། །ཡེ་ཤེས་མཆོག་བཟང་ཐོབ་པ་ཡིས། །རྡོ་རྗེ་ཡེ་ཤེས་དབང་བསྐུར་བས། །དངོས་གྲུབ་མཆོག་ནི་བསྒྲུབ་པར་བྱ། །ཞེས་པ་དང་།  སློབ་དཔོན་ཨཱཪྱ་དེ་ཝས།  དེ་ནི་དཔེ་ཡིས་ཉེར་མཚོན་ནས། །བླ་མའི་ཞལ་གྱིས་དྲིན་གྱིས་སོ། །ཞེས་པ་དང་།  ཐབས་དང་ཤེས་རབ་
རྣམ་པར་གཏན་ལ་དབབ་པ་གྲུབ་པ་ལས།  བདེར་གཤེགས་གནས་ཀྱི་དཀྱིལ་འཁོར་དུ། །རྒྱུད་ཀྱི་ལམ་གྱི་རྗེས་འབྲངས་ནས། །མཁས་པ་གང་ཚེ་དབང་བསྐུར་ན། །སངས་རྒྱས་ཐམས་ཅད་མངོན་སུམ་ཡིན། །དཔག་མེད་འཇིག་རྟེན་ཁམས་དབང་ཕྱུག །བདག་བྱིན་བརླབ་པའི་རིམ་ཐོབ་
པ། །ཞེས་གསུངས་སོ། །ཁ་ཅིག་འདིར།  ཕྱག་ཆེན་མཆོག་གི་དངོས་གྲུབ་ཐོབ་པ་ནི།  ཕར་ཕྱིན་ཐེག་པ་བ་ལྟར་ན།  མཐོང་སྤང་གི་སྒྲིབ་པ་སྤངས་པ་དང་།  གསང་སྔགས་པ་ལྟར་ན་རྩ་དབུ་མའི་མདུད་པ་གྲོལ་བ་ལ་ཟེར་ཞེས་སྨྲ་བ་ནི་བབ་ཆོལ་ཏེ།  གོང་དུ་དྲངས་པའི་ལུང་རྣམས་དང་།  འདིར་
དབང་བསྐུར་དག་དང་མ་འབྲེལ་བ། །དེ་ལ་ཕྱག་རྒྱ་ཆེན་པོ་བཀག །ཞེས་ཕར་ཕྱིན་ཐེག་པ་ལ་ཕྱག་རྒྱ་ཆེན་པོ་མེད་པར་བཤད་པ་དང་དངོས་སུ་འགལ་བའི་ཕྱིར་རོ། །བཞི་པ་ནི་དབང་བསྐུར་བ་ལ་ཞེས་སོགས་ཚིགས་བཅད་གཅིག་སྟེ།  དབང་དང་རིམ་གཉིས་ལས་བྱུང་བའི་མཚོན་བྱ་དོན་གྱི་ཡེ་
ཤེས་མཐོང་ལམ་གྱི་ཕྱག་རྒྱ་ཆེན་པོ་མངོན་སུམ་དུ་རྟོགས་ན་ད་གཟོད་སོགས་ཏེ།  དེའི་ཚེ་འཁོར་ལོ་བསྐོར་བ་འཇིག་རྟེན་ལས་འདས་པའི་ལམ་ཐོབ་པའི་ཕྱིར་རོ། །གཉིས་པ་མོས་གུས་ཀྱིས་སེམས་བསྒྱུར་བའི་ཞི་གནས་ལྟར་སྣང་ལ་ཕྱག་ཆེན་དུ་འདོད་པ་དགག་པ་ལ་གཉིས་ཏེ།  འདོད་
9-2-112b


པ་བརྗོད་པ་དང་།  དེ་དགག་པའོ། །དང་པོ་ནི།  དེང་སང་འགའ་ཞིག་ཞེས་སོགས་ཚིགས་བཅད་གཅིག་གོ།  གཉིས་པ་ནི།  དེ་འདྲ་བདུད་ཀྱི་ཞེས་སོགས་ཚིགས་བཅད་གསུམ་སྟེ།  བླ་མའི་མོས་གུས་ཀྱིས་སེམས་བསྒྱུར་ནས་རྟོག་པ་ཅུང་ཟད་འགགས་པ་ལ་ཕྱག་རྒྱ་ཆེན་པོའི་
ངོ་སྤྲོད་བྱེད་པ་མི་འཐད་དེ།  དེ་འདྲ་བདུད་ཀྱི་བྱིན་བརླབས་ཡིན་པ་ཡང་སྲིད་ཅིང་ཡང་ན་རྣལ་འབྱོར་པ་ཁམས་འདུས་པ་འགའ་ལ་ཡང་འབྱུང་བའི་ཕྱིར་རོ། །དཔེར་ན་ཀ་རུ་འཛིན་སོགས་ཏེ།  རྟོགས་ལྡན་གྱི་ཡུལ་དཔལ་མོ་དཔལ་ཐང་གི་ལྷ་མཚོ་ཁར་ཀ་རུ་འཛིན་ཞེས་བྱ་བ་དེས་གྲུབ་ཐོབ་
ཏུ་ཁས་བླངས་ཏེ།  ཁ་སྐོར་དུ་པགས་པ་ནག་པོས་སྨ་ར་བྱས།  ཉིན་མོ་མཚམས་གཅད་མཚན་མོ་ལོ་ཙཱ་བཅུག་ནས་ཆོས་ལྟར་བཅོས་པ་འགའ་རེ་སྟོན།  གཞན་ཡང་གཡོ་རྒྱུའི་སྤྱོད་པ་སྣ་ཚོགས་བསྟན་པས་འཁོར་མང་པོ་འདུས་ཤིང་།  དེའི་དགོན་པ་མཐོང་བ་ཙམ་གྱིས་འགའ་ལ་
ཏིང་ངེ་འཛིན་སྐྱེས་ཞེས་ཟེར།  ཕྱིས་ནས་ཐེ་ཚོམ་དུ་གྱུར་ཏེ།  རྟོགས་ལྡན་གྱིས་མི་མང་པོའི་དཀྱིལ་དུ་དེའི་སྨ་ར་བཤུས།  སྨ་ཕབ་པས་གྲུབ་ཐོབ་ཞིག་ཅིང་།  དེ་ནས་ཏིང་ངེ་འཛིན་གྱི་རྒྱུན་ཆད་པར་གྱུར་རོ། །ཞེས་འདུལ་བ་སེང་གེའི་ཕྱོགས་སྔ་མདོར་བསྡུས་ལས་བཤད་ལ།  ཁ་
ཅིག་སྔར་གྱི་མི་དེས་ཞྭ་དཀར་པོ་རྙེད་པ་གོན་པས་དེ་ལྟར་གྱུར་ཅིང་།  ཕྱིས་ནས་ཞྭ་དཀར་པོ་ཕུད་པས་གྲུབ་ཐོབ་ཞིག་ཅེས་འཆད་དོ། །མདོར་ན་སངས་རྒྱས་ཀྱི་གསུང་བཞིན་མ་བསྒྲུབས་པའི་གློ་བུར་གྱི་ཏིང་ངེ་འཛིན་བདུད་རིགས་ཀྱིས་བྱེད་པར་གསུངས་ལ།  སངས་རྒྱས་ཀྱི་
གསུང་བཞིན་བསྒྲུབ་པ་ལས་བྱུང་བའི་ཏིང་ངེ་འཛིན་སངས་རྒྱས་རྣམས་ཀྱི་བྱིན་བརླབས་ཡིན་པར་གསུངས་སོ། །གསུམ་པ་ཞར་ལ་ཕྱག་ཆེན་གྱི་རྒྱུ་ལ་ལོག་རྟོག་དགག་པ་ལ་གསུམ་སྟེ།  ཁས་བླངས་བརྗོད།  མགོ་མཚུངས་ཀྱིས་དགག །སྨད་པའི་གནས་སུ་
9-2-113a


བསྟན་པའོ། །དང་པོ་ནི།  ཁ་ཅིག་སྐྱེ་བ་ཞེས་སོགས་དྲུག་སྟེ།  གོ་སླ་ཞིང་།  དེང་སང་ཡང་འདི་བཞིན་དུ་སྨྲ་བ་མང་བར་སྣང་ངོ་། །གཉིས་པ་ནི།  འོ་ན་སོ་སོར་ཞེས་སོགས་དགུ་སྟེ།  སོ་ཐར་དང་བྱང་སེམས་ལ་ཡང་མཚུངས་བཞིན་དུ་དབང་བསྐུར་ཁོ་
ན་ལ་འདི་བཞིན་དུ་སྨྲ་བ་ནི།  ཐབས་ལ་བསླུ་བའི་བདུད་དུ་བསྟན་པའོ། །གསུམ་པ་ནི།  སངས་རྒྱས་ཆོས་ལ་ཞེས་སོགས་དྲུག་སྟེ།  དབང་བསྐུར་འགོག་པ་ནི་མདོ་རྒྱུད་ཀྱི་བཤད་ཉན་གྱི་དོན་འགོག་པ་ཡིན་པས་དེ་སྐད་དུ་གསུངས་པའོ། །གཉིས་པ་མཚོན་བྱ་དོན་གྱི་
ཕྱག་ཆེན་ལ་འཁྲུལ་པ་དགག་པ་ལ་གསུམ་སྟེ།  ཡོན་ཏན་མེད་པའི་མཐོང་ལམ་དགག །དེ་ལ་ལུང་དང་འགལ་བ་སྤང་།  དེས་ན་འཕགས་པའི་མཁྱེན་པར་གྲུབ་པའོ། །དང་པོ་ལ་གསུམ་སྟེ།  ཕྱོགས་སྔ་མ་བརྗོད།  དེ་དགག །ཉེས་སྤོང་གི་ལན་དགག་པའོ། །དང་པོ་ནི། 
ལ་ལ་ཞི་གནས་ཞེས་སོགས་ཚིགས་བཅད་གཉིས་ཏེ།  བོད་ལ་ལ་དབང་དང་།  རིམ་གཉིས་ལས་བྱུང་བའམ།  མ་བྱུང་བ་ཡིན་ཡང་རུང་།  སེམས་གནས་པའི་ཞི་གནས་ཅུང་ཟད་ཙམ་དང་།  སྣང་སྟོང་གི་རྟོག་པ་ཕྲ་མོ་ལ་མཐོང་ལམ་དུ་ངོ་སྤྲོད་བྱེད་ཅིང་།  འོ་ན་ཡོན་ཏན་བརྒྱ་ཕྲག་
བཅུ་གཉིས་འབྱུང་བར་འགྱུར་རོ་སྙམ་ན།  ཁྱུང་གི་ཕྲུ་གུ་སྒོ་ངའི་རྒྱས་བཅིངས་ནས་འཕུར་མི་ནུས་པ་བཞིན་དུ་རྣམ་སྨིན་གྱི་ལུས་ཀྱི་རྒྱས་བཅིངས་པས་ན།  ད་ལྟ་ཡོན་ཏན་བརྒྱ་ཕྲག་བཅུ་གཉིས་མི་འབྱུང་བས།  རྣམ་སྨིན་གྱི་ལུས་རྒྱ་ཞིག་པའི་ཤི་མ་ཐག་ཡོན་ཏན་བརྒྱ་ཕྲག་
བཅུ་གཉིས་འབྱུང་བ་ཡིན་ཞེས་ཟེར་རོ། །འདིའི་ཕྱོགས་སྔ་མ་ནི།  རྗེ་བཙུན་གྱིས་མངོན་རྟོགས་ལྗོན་ཤིང་ལས།  ཡེ་ཤེས་ལ་ལོག་རྟོག་དགག་པ་ལ།  ལོག་པར་རྟོག་པ་དང་།  དེ་དགག་པ་གཉིས་སུ་བྱས་ནས།  དང་པོ་ལ་བྱང་ཆུབ་ཀྱི་སེམས་རྡོ་རྗེ་ནོར་བུའི་དཀྱིལ་དུ་
9-2-113b


གནས་པའི་ཚེ།  ལྷན་སྐྱེས་སྐྱེ་བ་དང་།  བྱང་ཆུབ་ཀྱི་སེམས་རྡོ་རྗེ་ནོར་བུ་དང་བྲལ་ནས་ཡུམ་གྱི་པད་མར་ལྷུང་བའི་ཚེ།  ལྷན་སྐྱེས་སྐྱེ་བ་གནས་ལ་ལོག་པར་རྟོག་པ།  དབང་གསུམ་པའི་ཡེ་ཤེས་མཐོང་ལམ་ཡིན་པར་འདོད་པ་ངོ་བོ་ལ་ལོག་པར་རྟོག་པ་དང་།  ལྷན་སྐྱེས་དགའ་བ་གསུམ་
པར་སྐྱེ་བ་གོ་རིམ་ལ་ལོག་པར་རྟོག་པ་གསུམ་དུ་མཛད་པའི་བར་པ་དེ་ཉིད་ཡིན་ཅིང་།  དེ་ཡང་རིན་ཆེན་རྒྱན་འདྲ་ནས་འབྱུང་བའི་རྔོག་གཞུང་པའི་དགེ་བའི་བཤེས་གཉེན་རྣམས་ཀྱི་བཞེད་པའོ། །ཁ་ཅིག་འདི་མ་མཐོང་བར་ཕྱག་རྒྱ་བ་ལ་ལ་ཞེས་སྨྲ་བ་ནི་མཛོ་ཁལ་གླང་ལ་སྦྱོར་བའོ། །
གཉིས་པ་ནི།  ཐེག་པ་ཆེན་ཞེས་སོགས་ཚིགས་བཅད་གཅིག་སྟེ།  ཚིག་རྐང་དང་པོ་གཉིས་ཀྱིས་ལུང་གི་ཤེས་བྱེད་མེད་པར་བསྟན་ཅིང་།  ཕྱི་མ་གཉིས་ཀྱིས་དཔེའི་སྒོ་ནས་རིགས་པའི་གནོད་བྱེད་བསྟན་ནོ། །འདི་ལ་མངོན་རྟོགས་ལྗོན་ཤིང་ལས།  མི་མཁས་པ་ཁ་ཅིག །དབང་
གསུམ་པའི་ཡེ་ཤེས་ཉིད་དོན་གྱི་ཡེ་ཤེས་ཡིན་ནོ། །ཞེས་འདོད་དོ། །དེ་ལ་འདི་སྐད་ཅེས་འདྲི་སྟེ།  དོན་གྱི་ཡེ་ཤེས་ཞེས་བྱ་བ་དེ་རྣམ་པར་རྟོག་པ་ནུབ་ཅིང་བརྗོད་དུ་མེད་པ་ཅུང་ཟད་གསལ་བར་བྱས་པ་མཐོང་ལམ་གྱི་ཡེ་ཤེས་དང་འདྲ་བ་ཡིན་ནམ།  མཐོང་བའི་ལམ་ཉིད་སྐད་ཅིག་
ཙམ་སྐྱེས་པ་ཡིན།  དང་པོ་ལྟར་ན་དོན་གྱི་ཡེ་ཤེས་སུ་འདོད་ཀྱང་དཔེ་རུ་ཐལ་ལོ། །གཉིས་པ་ལྟར་ན།  མུ་སྟེགས་ཀྱི་ཡེ་ཤེས་དང་མཐུན་པར་འགྱུར་ཏེ།  རིག་བྱེད་ཀྱི་མཐའ་གསང་བར་སྨྲ་བའི་གཞུང་ལས།  ནུས་དང་ཕྲད་ཅིང་སྦྱོར་བ་ལས། །ནུས་པ་ཆགས་འགྱུར་མཐར་འགྱུར་བ། །
ཚངས་པའི་དེ་ཉིད་བདེ་བ་གང་། །བདེ་དེས་མངོན་སུམ་གྲོལ་བར་འགྱུར། །སྦྱོར་བས་བདེ་བ་རྒྱུན་མི་འཆད། །སྡུག་བསྔལ་འབྱུང་བ་མེད་པ་ཡིས། །ཀུན་ཏུ་དགའ་བ་ཚངས་པའི་གཟུགས། །བདེ་བ་ཐར་པ་ཞེས་བརྗོད་དོ། །ཞེས་བཤད་པས་སོ། །རྩ་རྒྱུད་དང་པོའི་བརྒྱད་པ་ལས།  ཀུན་མཁྱེན་ཡེ་ཤེས་དེ་ལྟ་བུ་ཞེས་དཔེར་བཤད་པ་
དང་།  བཅུ་པ་ལས།  གང་ཕྱིར་འབྱུང་བ་ཆེ་བདེ་བ། །དེ་ཕྱིར་བདེ་བ་དེ་ཉིད་མིན། །ཞེས་འབྱུང་བ་ལ་བརྟེན་ནས།  དོན་གྱི་ཡེ་ཤེས་སྐྱེ་བར་མི་འགྱུར་རོ། །ཞེས་བཤད་པས་སོ། །རིགས་པས་ཀྱང་གནོད་དེ།  དོན་གྱི་ཡེ་ཤེས་སྐྱེས་ནས་འགགས་པའི་ཕྱིར།  མཐོང་ལམ་གྱི་ཡེ་ཤེས་དང་།  སངས་རྒྱས་ཀྱི་ས་ཐོབ་ཀྱང་ཉམས་པར་འགྱུར་རོ། །དེ་འདོད་ན།  འབད་པ་དོན་
9-2-114a


མེད་པར་ཐལ་ལོ། །ཡང་མཐོང་ལམ་ནི། མ་མཐོང་བ་མཐོང་བས་མཐོང་ལམ་ཞེས་བྱ་བ་ཡིན་པས།  སྔར་དབང་གི་སྐབས་སུ་མཐོང་ཟིན་པའི་ཕྱིར་མཐོང་ལམ་ཡང་མཐོང་ལམ་མ་ཡིན་པར་འགྱུར་རོ། །ཡང་དེ་དག་གི་སྐྱོན་སྤོང་ཡང་།  སྐད་ཅིག་ཙམ་མཐོང་ལམ་སྐྱེ་བ་ནི་
གསང་སྔགས་ཀྱི་ལུགས་ཡིན་ནོ། །ཞེས་སྨྲ་ན་སྐད་ཅིག་ཙམ་མཐོང་བའི་ཚེ་ན།  གླིང་བཞི་པ་བརྒྱ་བསྒུལ་བ་ལ་སོགས་པའི་རྫུ་འཕྲུལ་སྟོན་ཅིག །དེ་ལྟར་མི་ནུས་ཀྱང་མཐོང་ལམ་དུ་འདོད་ན་སྨྱོན་པའི་ཚིག་བཞིན་བཞད་གད་ཀྱི་གནས་སོ། །ལོག་རྟོག་རྣམས་ལས་ནི་འདི་དམན་ནོ། །ཞེས་བཤད་དོ། །
གསུམ་པ་ནི།  ཁ་ཅིག་ཕ་རོལ་ཞེས་སོགས་ཚིགས་བཅད་ལྔ་སྟེ།  དེའི་སྐྱོན་སྤོང་བར་འདོད་པ་ཁ་ཅིག་ཕ་རོལ་ཏུ་ཕྱིན་པའི་མཐོང་ལམ་ཡོན་ཏན་བརྒྱ་ཕྲག་བཅུ་གཉིས་ཀྱི་རྒྱན་ཅན་དང་།  གསང་སྔགས་ཀྱི་མཐོང་ལམ་རྒྱན་མེད་པ་ཡིན་པས་གསང་སྔགས་ཀྱི་མཐོང་ལམ་ཐོབ་ཀྱང་ཡོན་ཏན་
བརྒྱ་ཕྲག་བཅུ་གཉིས་མེད་པ་མི་འགལ་ལོ། །ཞེས་ཟེར་རོ། །དེ་ལྟ་ཡིན་ན་ཕ་རོལ་ཏུ་ཕྱིན་པ་དང་།  གསང་སྔགས་ཀྱི་སངས་རྒྱས་ཀྱང་རྒྱན་ཅན་རྒྱན་མེད་གཉིས་སུ་འགྱུར་ཏེ།  རྒྱུ་མཚན་མཚུངས་པའི་ཕྱིར་རོ། །ཉན་ཐོས་རྣམས་ཀྱི་དགྲ་བཅོམ་ལ་འགོག་པའི་སྙོམས་འཇུག་ཐོབ་པའི་
རྒྱན་ཅན་དང་།  མ་ཐོབ་པའི་རྒྱན་མེད་གཉིས་འཐད་དེ།  མཛོད་ལས།  འགོག་ཐོབ་གཉིས་ཀ་ལས་རྣམ་གྲོལ། །ཤེས་རབ་ཀྱིས་ནི་ཅིག་ཤོས་སོ། །ཞེས་གསུངས་སོ། །ཐེག་པ་ཆེན་པོ་འཕགས་པ་ལ་རྒྱན་ཅན་རྒྱན་མེད་གཉིས་མི་སྲིད་དེ།  མདོ་སྡེ་རྒྱན་ལས།  རྒྱལ་སྲས་བྱང་ཆུབ་
ཕྱོགས་མཐུན་པ། །རྣམ་པ་སྣ་ཚོགས་ཐམས་ཅད་ནི། །རྟག་ཏུ་མཐོང་བའི་ལམ་དེ་དང་། །ལྷན་ཅིག་ཏུ་ནི་ཐོབ་པར་འདོད། །ཅེས་དང་།  མདོ་སྡེ་ས་བཅུ་པའི་དོན་དབུ་མ་འཇུག་པ་ལས།  དེ་ཚེ་འདིས་ནི་སངས་རྒྱས་བརྒྱ་མཐོང་ཞིང་། །དེ་དག་བྱིན་གྱིས་བརླབས་ཀྱང་འདི་ཡིས་
9-2-114b


རྟོགས། །དེ་ཉིད་ཚེ་ན་བསྐལ་པ་བརྒྱར་གནས་ཤིང་། །སྔོན་དང་ཕྱི་མའི་མཐར་ཡང་ཡང་དག་འཇུག །བློ་ལྡན་ཏིང་འཛིན་བརྒྱ་ཕྲག་སྙོམས་པར་འཇུག་ཅིང་གཏོང་བྱེད་དེ། །འཇིག་རྟེན་ཁམས་བརྒྱ་འདི་ཡིས་ཀུན་ནས་གཡོ་ཞིང་སྣང་བར་ནུས། །དེ་བཞིན་རྫུ་འཕྲུལ་གྱིས་དེ་
སེམས་ཅན་བརྒྱ་ཕྲག་སྨིན་བྱེད་ཅིང་། །བརྒྱ་ཕྲག་གྲངས་དང་རྗེས་འབྲེལ་ཞིང་དག་ཏུ་ཡང་འགྲོ་བར་འགྱུར། །དེས་ནི་ཆོས་ཀྱི་སྒོ་རྣམས་ཡང་དག་འབྱེད་བྱེད་ཐུབ་དབང་སྲས། །རང་གི་ལུས་ལ་ལུས་རྣམས་ཀུན་ནས་སྟོན་པར་བྱེད་པའང་ཡིན། །རང་གི་འཁོར་དང་བཅས་པས་
མཛེས་འབྱོར་ལུས་ནི་རེ་རེ་ཞིང་། །རྒྱལ་བའི་སྲས་པོ་བརྒྱ་ཕྲག་དག་དང་རྗེས་སུ་འབྲེལ་པའང་སྟོན། །ཞེས་ཐེག་པ་ཆེན་པོའི་མཐོང་ལམ་ཐོབ་པ་དེ་ཉིད་ཀྱི་ཚེ།  ཡོན་ཏན་དེ་དག་ཅིག་ཅར་དུ་ཐོབ་པར་བཤད་པའི་ཕྱིར།  དེ་ནི་གསང་སྔགས་ཀྱི་མཐོང་ལམ་ཡོན་ཏན་དང་ལྡན་
པའི་ལུང་དུ་མི་འགྲོའོ་སྙམ་ན།  སམྦུ་ཊི་ལས།  གནས་ནི་རབ་ཏུ་དགའ་བའི་ས། །ཞེས་དང་།  ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད། །ཞེས་ཕར་ཕྱིན་ཐེག་པའི་རབ་དགའ་སོགས་ཀྱི་ཐ་སྙད་ལ།  རྡོ་རྗེ་ཐེག་པ་ནས་གནས་དང་ཉེ་བའི་གནས་སོགས་ཀྱི་ཐ་སྙད་
བརྡའི་སྐད་ཀྱིས་གསུངས་པར་བཤད་པས་ཤིན་ཏུ་ཡང་འཐད་དོ། །ཉན་ཐོས་རྣམས་ལ་ཞོགས་མའི་མེ་སྟག་གནམ་དུ་ཡར་མ་ཁད་ཡལ་བ་དང་།  ལྕགས་ཀྱི་ཚྭ་ཚྭ་གནམ་དུ་སོང་ནས་འབབ་པར་མ་བརྩམས་པ་ལ་ཡལ་བ་དང་།  འབབ་པར་བརྩམས་ནས་ས་ལ་མ་ལྷུང་ཙམ་དུ་ཡལ་བའི་
དཔེས།  ཚེ་འདི་མྱ་ངན་ལས་མ་འདས་པ་བར་དོར་མྱུར་བ་དང་མྱུར་བ་མ་ཡིན་པ་དང་།  ཆེས་ཡུན་རིང་པོ་ཞིག་ནས་འདའ་བར་གསུངས་པ་དེ་བཞིན་དུ་གསང་སྔགས་བསྒོམ་པ་ལས་ཚེ་འདིར་མཐོང་ལམ་མ་ཐོབ་པ།  བར་དོར་ཐོབ་པར་གསུངས་མོད་ཀྱི་ཚེ་འདིར་མཐོང་ལམ་ཐོབ་པ་ལ་ཡོན་ཏན་
9-2-115a


ཤི་ནས་འབྱུང་བ་ནི།  བླུན་པོ་རྣམས་ཀྱིས་མཐོང་ལམ་ཐོབ་པར་ཁས་བླངས་ཀྱང་ཡོན་ཏན་སྟོན་རྒྱུ་མེད་པའི་བརྫུན་རིབ་ཡིན་ནོ། །དེས་ན་མདོ་རྒྱུད་སོགས་སོ། །གཉིས་པ་ལ་གཉིས་ཏེ།  ནཱ་རོ་པའི་ལུང་དང་འགལ་བ་སྤང་བ།  འཕགས་པ་ལྷའི་ལུང་དང་
འགལ་བ་སྤང་བའོ། །དང་པོ་ནི་ཇོ་བོ་ནཱ་རོ་ཞེས་སོགས་བདུན་ཏེ།  དབང་བསྐུར་གྱི་དུས་སུ་སྐྱེས་པའི་མཚོན་བྱེད་དཔེའི་ཡེ་ཤེས་ལ་མཐོང་ལམ་གྱི་མིང་གིས་བཏགས་པར་ཟད་ཀྱི།  མཐོང་ལམ་མཚན་ཉིད་པ་མ་ཡིན་ཏེ།  གཞན་དུ་ན་ཆོས་མཆོག་གི་རྗེས་ཀྱི་མཐོང་ལམ་དེ་མཐོང་ལམ་མ་ཡིན་པར་
ཐལ་བའི་ཕྱིར་རོ། །གཉིས་པ་ནི།  འཕགས་པ་ལྷ་ཡི་ཞེས་སོགས་ལྔ་སྟེ།  སྤྱོད་བསྡུས་སུ་བདེན་པ་མཐོང་ཡང་ཞིང་ལས་དང་།  ཚོང་ལས་ཀྱི་མཐའ་ལ་ཆགས་པར་གསུངས་པ་ནི།  མཚོན་བྱེད་དཔེའི་ཡེ་ཤེས་རྫོགས་རིམ་གྱི་རང་བྱུང་གི་ཡེ་ཤེས་རྟོགས་པ་ལ་དགོངས་ཏེ།  འཕགས་
པ་ལྷ་ཉིད་ཀྱིས་ཀྱང་།  དེ་ནི་དཔེ་ཡིས་ཉེར་མཚོན་ནས། །བླ་མའི་དྲིན་གྱིས་རྟོགས་པར་འགྱུར། །ཞེས་གསུངས་སོ། །སྤྱོད་བསྡུས་ལས།  ཇི་ལྟར་གསུངས་ན།  རྡོ་རྗེ་སློབ་མས་གསོལ་པ།  གལ་ཏེ་སྒྲུབ་པ་པོ་བདེན་པ་མཐོང་ཡང་།  སྔོན་གྱི་བག་ཆགས་གོམས་པའི་སྟོབས་ཀྱིས་
ཞིང་ལས་དང་།  ཚོང་དང་བསྙེན་བཀུར་ལ་སོགས་པས་གཡེང་བས་སྤྱོད་པ་རྣམ་པ་གསུམ་སྤྱོད་པར་མི་བྱེད་པ་དང་།  སྒྲུབ་པ་པོ་གཞན་དག་འབྱོར་པ་མ་ཚང་བས་རྒྱུད་ལས་ཇི་སྐད་གསུངས་པའི་ཆོ་ག་རྫོགས་པར་བྱེད་མི་ནུས་པའི་ཕྱིར།  མི་སྤྱོད་པ་དེ་དག་འཆི་བའི་དུས་བྱས་ནས་
ཡང་སྲིད་པ་གཞན་དུ་འགྲོ་བར་འགྱུར་རམ།  ཡང་ན་རྡོ་རྗེ་འཆང་ཉིད་ཐོབ་པར་འགྱུར།  ཞེས་དྲིས་པའི་ལན་དུ་དེ་བས་ན་དེ་ཁོ་ན་ཉིད་ཤེས་པའི་རྐྱེན་མ་ཚང་བ་ནི།  ཇི་སྐད་དུ་བཤད་པའི་སྤྱོད་པ་གལ་ཏེ་མ་སྤྱད་དུ་ཟིན་ཀྱང་ལྟ་བ་ཐམས་ཅད་རྣམ་པར་སྤངས་ནས།  འཆི་བར་འགྱུར་བ་ནི་
9-2-115b


དོན་དམ་པའི་བདེན་པ་ཡིན་ལ།  སྐྱེ་བ་ནི་ཀུན་རྫོབ་ཀྱི་བདེན་པ་ཡང་དག་པར་མངོན་པར་རྫོགས་ནས།  བརྒྱ་ལམ་ན་འོད་གསལ་བར་ཞུགས་ནས།  ཐ་མལ་པའི་ཕུང་པོ་བོར་ནས་བདག་ལ་བྱིན་གྱིས་བརླབ་པའི་རིམ་གྱིས་ལྡང་བར་བྱའོ། །ཞེས་བསྟན་པའི་སྐྱེ་མཆེད་དེ་ཡིད་ལ་བྱེད་པས་གནས་
པར་བྱེད་ན།  དེ་སྐྱེ་བ་གཞན་དུ་ཡིད་ལ་བྱེད་པ་དེ་འདོར་བར་མི་འགྱུར་ཏེ།  དེ་བས་ན་ཐམས་ཅད་མཁྱེན་པར་འགྱུར་རོ། །ཞེས་གསུངས་སོ། །གསུམ་པ་ནི།  དེ་དང་ལམ་འབྲས་ཞེས་སོགས་ཚིགས་བཅད་གཅིག་སྟེ།  ངེད་ཀྱི་ལུགས་ལ།  འཕགས་པ་མ་ཡིན་པ་ལ་མཐོང་ལམ་
མཚན་ཉིད་པ་འབྱུང་མི་སྲིད་དེ།  གྲུབ་ཐོབ་གཉིས་ཀྱིས་དབང་དང་རིམ་གཉིས་ཡེ་ཤེས་ལ་མཐོང་ལམ་དུ་བཤད་པ་བཏགས་པར་བཞེད་པ་དེ་དང་།  ལམ་འབྲས་ལས་ཀྱང་།  རིམ་གཉིས་བསྒོམ་པའི་ཉམས་མྱོང་འགའ་ཞིག་ལ།  ཆོས་སྐུའི་ཉམས་ལ་སོགས་པ་བཤད་པ་ཡོད་ཀྱང་།  མཐོང་
ལམ་མཚན་ཉིད་པ་གྲུབ་མཐའ་དང་པོ་ནས་འཇོག་པ་ལ་སོགས་པ་གྲུབ་ཐོབ་རྣམས་ཀྱི་དགོངས་པ་མཐུན་པ་དེས་ནའོ། །གསུམ་པ་ཞར་ལ་ཐེག་པ་གསུམ་གྱི་ལག་ལེན་འཁྲུལ་པ་དགག་པ་ལ་གཉིས་ཏེ།  མདོར་བསྟན་པ་དང་།  རྒྱས་པར་བཤད་པའོ། །དང་པོ་ནི།  ཐེག་པ་གསུམ་གྱི་ཞེས་
སོགས་ཚིགས་བཅད་གཅིག་གོ།  གཉིས་པ་ལ་ལྔ་སྟེ།  ལམ་གྱི་རྩ་བ་བླ་མ་བསྟེན་ཚུལ།  ལམ་གྱི་གོ་རིམ་ཐོད་རྒལ་དུ་སྤྱོད་པ་དགག་པ།  ལམ་གྱི་ཡན་ལག་མཆོད་གཏོར་གྱི་ཚུལ།  ལམ་གྱི་དམིགས་རྟེན་སྐུ་གཟུགས་བཞེངས་ཚུལ།  ལམ་གྱི་ངོ་བོ་མདོ་སྔགས་འཆོལ་བ་དགག་པའོ། །
དང་པོ་ལ་གཉིས་ཏེ།  བླ་མའི་མཚན་ཉིད།  གསོལ་བ་བཏབ་པའི་ཚུལ་ལོ། །དང་པོ་ནི།  ཉན་ཐོས་རྣམས་ཀྱི་ཞེས་སོགས་ཚིགས་བཅད་བཞི་སྟེ།  ཉན་ཐོས་ཀྱི་བླ་མ་དེ་བཟང་བ་མཆོག་གི་སྤྲུལ་སྐུ་ལྟ་བུ་ཡིན་ཀྱང་གང་ཟག་ཁོ་ནར་བས་ཀྱི་དགེ་འདུན་དུ་ཡང་མི་འགྱུར་ཏེ།  འདིའི་ལུགས་
9-2-116a


ཀྱི་དགེ་འདུན་དུ་འགྱུར་བ་ལ་དགེ་སློང་བཞི་ཚོགས་དགོས་པའི་ཕྱིར་རོ། །ཐེག་པ་ཆེན་པོ་ཕ་རོལ་ཏུ་ཕྱིན་པའི་བླ་མ་ནི་བཟང་ན་དགེ་འདུན་དཀོན་མཆོག་ཡིན་ཏེ།  མཆོག་གི་སྤྲུལ་སྐུ་ལྟ་བུ་ཡང་མཐར་ཐུག་གི་དགེ་འདུན་དཀོན་མཆོག་གི་ཁོངས་སུ་འདུ་ཞིང་།  བྱང་
སེམས་འཕགས་པ་ཡིན་ན་རྒྱུད་བླ་མ་ནས་བཤད་པའི་དགེ་འདུན་དཀོན་མཆོག་ཡིན་དགོས་པའི་ཕྱིར།  འོ་ན་ཉན་ཐོས་པའི་ལུགས་ལ་ཡང་ཐེག་དམན་འཕགས་པ་སློབ་མི་སློབ་ཀྱི་གང་ཟག་རེ་རེ་བ་ཡང་དགེ་འདུན་དཀོན་མཆོག་ཏུ་མི་འགྱུར་རམ་སྙམ་ན།  མི་འགྱུར་ཏེ།  དགེ་འདུན་དུ་བྱེད་
པའི་ཆོས་སློབ་མི་སློབ་ཀྱི་ལམ་བདེན་གཉིས་དགེ་འདུན་དཀོན་མཆོག་ཏུ་འདོད་པའི་ཕྱིར།  མཛོད་ལས།  གང་ཞིག་གསུམ་ལ་སྐྱབས་འགྲོ་དེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་བཤད་པའི་ཕྱིར་རོ། །ཁ་
ཅིག་འདིར།  རྒྱུད་བླར་སངས་རྒྱས་ཆོས་ཚོགས།  ཞེས་དང་།  མངོན་རྟོགས་རྒྱན་ལས།  སློབ་པ་ཕྱིར་མི་ལྡོག་པའི་ཚོགས། །ཞེས་པའི་ཚོགས་ལ་ཡང་།  གང་ཟག་བཞི་ཚོགས་དགོས་པར་འདོད་པ་ནི་ཤིན་ཏུ་འཁྲུལ་ཏེ།  རིག་གྲོལ་གཉིས་དང་ལྡན་པའི་རྒྱལ་སྲས་འཕགས་པ་ཡིན་ན་རྒྱུད་བླ་ནས་
བཤད་པའི་དགེ་འདུན་དཀོན་མཆོག་ཡིན་པས་མ་ཁྱབ་པར་ཐལ་བ་དང་།  ཕྱིར་མི་ལྡོག་པའི་རྟགས་ཐོབ་པའི་བྱང་སེམས་འཕགས་པ་ཡིན་ན།  སློབ་པ་ཕྱིར་མི་ལྡོག་པའི་ཚོགས་ཞེས་པའི་སྐབས་ཀྱི་དགེ་འདུན་ཡིན་པས་མ་ཁྱབ་པར་ཐལ་བའི་སྐྱོན་ཡོད་པའི་ཕྱིར།  དེས་ན་དགེ་འདུན་གྱི་སྐད་དོད་
སྡེབ་སྦྱོར་གྱི་དབང་གིས་ཚོགས་ལ་འཇུག་པའི་དོན་མ་རྟོགས་པར་ཚོགས་ཅེས་པའི་ཚིག་ཙམ་ལ་འཁྲུལ་པར་ཟད་དོ། །གསང་སྔགས་པ་ཡི་བླ་མ་མཆོག །དབང་བཞི་རྫོགས་པར་བསྐུར་བ་དེ་ནི་དཀོན་མཆོག་གསུམ་དང་དབྱེར་མེད་ཡིན་ཏེ།  ཧེ་རུ་ཀ་མངོན་འབྱུང་གི་རྒྱུད་ལས།  བླ་མ་
9-2-116b


སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་ཧེ་རུ་ཀ།  ཀུན་གྱི་བྱེད་པོ་བླ་མ་ཡིན། །ཅེས་སོ། །དེ་ལ་གསོལ་བ་བཏབ་པས།  དཀོན་མཆོག་གསུམ་པོ་ཚེ་འདིར་འགྲུབ་སྟེ།  སློབ་དཔོན་རྡོ་རྗེ་དྲིལ་བུ་པས།  བླ་མའི་བྱིན་རླབས་ཙམ་གྱིས་ནི། །སྐད་
ཅིག་ཉིད་ལ་འབྱུང་གང་ཡིན། །ཞེས་གསུངས་སོ། །ད་ལྟའི་སོ་སོ་སྐྱེ་བོའི་རྡོ་རྗེ་སློབ་དཔོན་ལ་ནི།  ཐེག་པ་གསུམ་པོ་སོ་སོའི་གཞུང་ནས་འབྱུང་བའི་བླ་མའི་མཚན་ཉིད་གསུམ་ཀ་དང་ལྡན་པ་ཅིག་དགོས་ཀྱི་དེ་དང་མི་ལྡན་ན་བླ་མ་ཙམ་ཡིན་ཀྱང་བླ་མ་དམ་པ་མ་ཡིན་ཏེ།  གསོལ་
བ་བཏབ་པས།  ཚེ་འདིའམ་བར་དོ་སོགས་སུ་སངས་རྒྱས་ཉིད་སྦྱིན་པར་མི་ནུས་པའི་ཕྱིར་རོ། །ཐེག་པ་གསུམ་པོ་སོ་སོའི་གཞུང་ནས་ཇི་ལྟར་བཤད་ན།  ཉན་ཐོས་ཀྱི་ཐེག་པ་ལས།  ཚུལ་ཁྲིམས་ལྡན་ཅིང་འདུལ་བའི་ཆོ་ག་ཤེས། །ཞེས་སོགས་སུམ་བརྒྱ་པའི་ལུང་སྔར་དྲངས་པ་དང་།  ཕ་རོལ་
ཏུ་ཕྱིན་པའི་ཐེག་པ་ལས།  རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་གཏང་ངོ་། །ཞེས་སྤྱོད་འཇུག་ལས་བཤད་པ་དང་།  རྡོ་རྗེ་ཐེག་པ་ལས།  བརྟན་ཅིང་དུལ་ལ་བློ་གྲོས་
ལྡན། །བཟོད་ལྡན་དྲང་ལ་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །སྙིང་རྗེར་ལྡན་ཞིང་བསྟན་བཅོས་མཁས། །དེ་ཉིད་བཅུ་ནི་ཡོངས་སུ་ཤེས། །དཀྱིལ་འཁོར་བྲི་བའི་ལས་ལ་མཁས། །སྔགས་བཤད་པ་ཡི་སྦྱོར་བ་ཤེས། །རབ་ཏུ་དང་ཞིང་དབང་པོ་དུལ། །ཞེས་
བླ་མ་ལྔ་བཅུ་པ་ལས་བཤད་པ་རྣམས་སོ། །མདོར་ན་ད་ལྟའི་བླ་མ་དམ་པ་ལ།  ཐེག་པ་གསུམ་ནས་བཤད་པའི་སྡོམ་པ་གསུམ་དང་ལྡན་པ་དགོས་ཞེས་པའི་དོན་ཏེ།  བཤད་རྒྱུད་རྡོ་རྗེ་ཕྲེང་བ་ལས།  ཕྱི་རུ་ཉན་ཐོས་སྤྱོད་པ་བསྲུང་། །ནང་དུ་འདུས་པའི་དོན་ལ་དགའ། །ཞེས་དང་། 
9-2-117a


 རྡོ་རྗེ་གུར་ལས།  ཉན་ཐོས་སྤྱོད་པ་སྲུང་བ་པོ། །ཞེས་དང་།  སློབ་དཔོན་འཇམ་དཔལ་གྲགས་པས།  སྡོམ་གསུམ་ཆོ་གར་མི་ལྡན་པས། །སྔགས་པའི་བདག་ཉིད་མི་འགྱུར་ཏེ། །ཞེས་གསུངས་པ་ལྟར་རོ། །གཉིས་པ་ནི།  དེས་ན་དབང་བསྐུར་ཞེས་སོགས་
ཚིགས་བཅད་གསུམ་སྟེ།  དབང་སྐུར་ཐོབ་པའི་བླ་མ་ལ།  དཀོན་མཆོག་གསུམ་འདུས་པའི་དོན་ནི།  བཤད་རྒྱུད་རྡོ་རྗེ་ཕྲེང་བ་ལས།  རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །ཞེས་སོགས་ཀྱི་དོན་ནི།  རྒྱུད་སྡེའི་སྟེང་དུ་རྟོགས་པར་བྱའོ། །དབང་
བསྐུར་མ་ཐོབ་པའི་བླ་མ་དཀོན་མཆོག་གསུམ་ལ་ཕར་བསྡུ་བའི་ཚུལ་ནི།  མཆོག་གི་སྤྲུལ་སྐུ་ལྟ་བུ་སངས་རྒྱས་དཀོན་མཆོག་དང་།  བྱང་སེམས་འཕགས་པ་ལྟ་བུ་དགེ་འདུན་དཀོན་མཆོག་དང་།  དེ་དག་གི་ཐུགས་རྒྱུད་ཀྱི་སྤངས་རྟོགས་ཆོས་དཀོན་མཆོག་ཏུ་བསྡུ་ཞིང་།  སོ་སོ་སྐྱེ་
བོའི་བླ་མ་ལ་ནི།  དཀོན་མཆོག་གསུམ་གྱི་རྗེས་སུ་སྐྱབས་སུ་འགྲོ་བའི་ཚུལ་སྐྱེས་རབས་ལས་བཤད་དོ། །གཉིས་པ་ནི།  དབང་བསྐུར་དང་པོ་ཞེས་སོགས་ཚིགས་བཅད་བཞི་སྟེ།  དབང་བཞི་པོ་མ་ཐོབ་པར་དེ་དག་གི་ལམ་བཞི་པོ་བསྒོམ་པ་དང་།  དགེ་སློང་གི་སྡོམ་པ་མ་
ཐོབ་པར་གཞན་གྱི་མཁན་སློབ་སོགས་བྱེད་པ་ནི་གསང་སྔགས་མེད་པར་སོགས་སོ། །གསུམ་པ་ལ་གསུམ་སྟེ།  གཏོར་མའི་མཚན་སྔགས་ལ་འཁྲུལ་པ་དགག །ཆུ་སྦྱིན་གྱི་རྫས་ལ་འཁྲུལ་པ་དགག །ཕུད་མཆོད་ཀྱི་དབྱིབས་ལ་འཁྲུལ་པ་དགག་པའོ། །དང་
པོ་ནི།  གཞན་ཡང་གངས་རིའི་ཞེས་སོགས་གཉིས་ཏེ།  ཁ་འབར་མའི་གཏོར་མ་ལ་དེ་བཞིན་གཤེགས་པ་བཞིའི་མཚན་སྔགས་སྔོན་ལ་བརྗོད་ནས།  དེའི་རྗེས་སུ་སྔགས་བཟླས་པའི་ལག་ལེན་བོད་འགའ་ཞིག་གིས་བྱེད་པ་ནི།  མདོ་དང་མཐུན་པ་མ་ཡིན་ཏེ།  མདོ་ལས་སྔོན་
9-2-117b


ལ་སོགས་སོ། །ཇི་ལྟར་གསུངས་ན་ཁ་འབར་མའི་གཏོར་མའི་མདོ་ལས།  རྒྱ་ཆེན་ཤུགས་ལྡན་འོད་ཀྱི་སྔགས་ནི།  ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀེ་ཏེ།  ཨོཾ་སཾ་བྷ་ར་སཾ་བྷ་ར་ཧཱུྃ།  ཞེས་པ་འདི།  འཕགས་པ་ལ་མཆོད་པ་འབུལ་ན་ལན་ཉི་ཤུ་རྩ་གཅིག་བཟླས་ནས་འབུལ།  ཡི་དྭགས་
ལ་ལན་བདུན་བཟླས་པའི་རྗེས་སུ་དེ་བཞིན་གཤེགས་པ་རིན་ཆེན་མང་དང་།  གཟུགས་མཛེས་དམ་པ་དང་།  སྐུ་འབྱམས་ཀླས་དང་།  འཇིགས་པ་ཐམས་ཅད་དང་བྲལ་བ་ལ་ཕྱག་འཚལ་ལོ། །ཞེས་བརྗོད་པར་གསུངས་སོ། །གཉིས་པ་ནི།  འགའ་ཞིག་ཆུ་སྦྱིན་ཞེས་སོགས་བདུན་ཏེ།
དགེ་བའི་བཤེས་གཉེན་སྤྱན་སྔ་བས་ཆུ་སྦྱིན་མང་དུ་མཛད་པས།  མནལ་ལམ་དུ་ཡི་དྭགས་བྱུང་ནས་ཆུ་སྦྱིན་གྱི་ནང་དུ་ཟན་བཅུག་ན་བདག་ཅག་རྣམས་ལ་ཕན་པ་ཡོད་ཞེས་ཟེར་བ་ལ་བརྟེན་ནས།  དེའི་ལག་ལེན་བྱེད་པ་ཐོས་པ་ནི་མི་འཐད་དེ།  འཇུར་འགེགས་ཅན་གྱི་སོགས་སོ། །
དེས་ན་ཆུ་སྦྱིན་གྱི་ནང་དུ་ཟན་འདེབས་པ་ནི།  ཆུ་སྦྱིན་གྱི་ཆོ་ག་ཉམས་པ་ཡིན་ནོ། །གསུམ་པ་ལ་བཞི་སྟེ།  ཕུད་མཆོད་གསུངས་པའི་ཚུལ།  དེའི་ལག་ལེན་འཁྲུལ་ཚུལ།  དེ་ཉིད་འཁྲུལ་བར་བསྟན་པ།  མ་འཁྲུལ་བར་བསྒྲུབ་པར་གདམས་པའོ། །དང་པོ་ནི།  ཟན་གྱི་ཕུད་ལ་
ཞེས་སོགས་དགུ་སྟེ།  ཟན་གྱི་ཕུད་ལ་ལྷ་ལ་འབུལ་བའི་ལྷ་བཤོས་དང་།  འབྱུང་པོ་ལ་སྦྱིན་པའི་ཆང་བུ་བྱ་བར་སངས་རྒྱས་ཀྱིས་གསུངས་ཏེ།  བརྟག་གཉིས་ལས།  ཨོཾ་ངྷཱཾ་ངྷཱཾ་སྭཱ་ཧཱ།  ལྷ་བཤོས་ཀྱི་སྔགས་སོ། །ཞེས་དང་།  རྡོ་རྗེ་རྩེ་མོའི་རྒྱུད་ལས།  དེ་ནས་ཟན་གྱི་དུས་སུ་ནི། །རྣམ་
པ་ཀུན་ཏུ་ཆང་བུ་སྦྱིན། །ཞེས་དང་།  འཕྲོག་མའི་མདོ་ལས།  ང་ལ་སྟོན་པར་ཁས་འཆེ་བའི་ཉན་ཐོས་རྣམས་ཀྱིས་འཕྲོག་མ་བུ་དང་བཅས་པ་ལ་ཆང་བུ་སྦྱིན་པར་བྱའོ། །ཞེས་གསུངས་ལ།  ཇི་ལྟར་སྦྱིན་པ་དེ་ཡི་ཆོ་ག་ནི།  མཻ་ཏྲི་པའི་ལྟ་བ་ངན་སེལ་དང་།  རྗེ་བཙུན་གྱིས་ལས་དང་
9-2-118a


པོ་པའི་བྱ་བ་དང་།  ཆོས་རྗེ་པའི་ཐུབ་པ་དགོངས་གསལ་སོགས་ལ་ལྟོས་ཤིག །གཉིས་པ་ནི།  འགའ་ཞིག་ཞེས་སོགས་ཚིགས་བཅད་གཅིག་སྟེ།  འབྲང་རྒྱས་བྱེད་པ་ནི་སྣར་ཐང་པ་དང་།  གྲུ་གསུམ་བྱེད་པ་ནི་འབྲི་ཁུང་པའོ། །གསུམ་པ་ནི།  གསང་
སྔགས་རྙིང་མ་ཞེས་སོགས་བཅུའོ། །བཞི་པ་ནི།  ལག་ལེན་ཐམས་ཅད་ཞེས་སོགས་ཚིགས་བཅད་གཅིག་གོ།  བཞི་པ་ལ་གཉིས་ཏེ།  ཕྱག་མཚན་ལ་འཁྲུལ་པ་དགག་པ།  ཁ་དོག་ལ་འཁྲུལ་པ་དགག་པའོ། །དང་པོ་ནི།  སངས་རྒྱས་རབ་ཏུ་ཞེས་སོགས་ལྔ་སྟེ།  བོད་
ཁ་ཅིག་སངས་རྒྱས་སུམ་ཅུ་སོ་ལྔ་རབ་ཏུ་བྱུང་བའི་ཆ་ལུགས་ཅན་གྱི་ཕྱག་ཏུ་ཕུབ་དང་།  རལ་གྲི་ལ་སོགས་པའི་མཚོན་ཆ་བསྐུར་བ་མཐོང་བ་ནི་མི་འཐད་དེ།  སངས་རྒྱས་ཁྱིམ་པའི་ཆ་ལུགས་ཅན་ལ་རིན་པོ་ཆེ་ལ་སོགས་པའི་རྒྱན་དག་དང་ཕྱག་མཚན་མཚོན་ཆ་སོགས་འཛིན་
པ་སྲིད་ཀྱི།  རབ་བྱུང་གི་ཆ་ལུགས་ཅན་ལ་དེ་མི་སྲིད་དེ།  ཁྱད་པར་འཕགས་བསྟོད་ལས།  འཁོར་ལོ་མདུང་ཐུང་ཅན་དག་གིས། །བདུད་དཔུང་དེ་ལས་རྒྱལ་མི་ནུས། །ཁྱོད་ནི་འཁོར་ལོ་མདུང་མེད་པར། །བྱམས་པའི་མཚོན་གང་ལགས་པས་རྒྱལ། །ཞེས་གསུངས་སོ། །ཁ་ཅིག་
འདིའི་སྒྲུབ་ཐབས་ཀླུ་སྒྲུབ་ཀྱིས་མཛད་པ་ཡིན་ནོ། །ཞེས་ཟེར་བ་དང་།  ཁ་ཅིག་གཟིགས་སྣང་ཡིན་ནོ་ཞེས་ཟེར་ཞིང་།  དེ་ཉིད་མདོ་སྡེ་ན་ཇི་ལྟ་བ་བཞིན་སྣང་ངོ་། །ཞེས་སྨྲ་བ་ནི་རྫོགས་པའི་སངས་རྒྱས་ཉན་ཐོས་ཀྱི་ཆ་ལུགས་ཀྱིས་འདུལ་བ་ལ་དེ་དང་མཐུན་པར་སྟོན་ཅིང་།  ཁྱིམ་
པའི་ཆ་ལུགས་ཀྱིས་འདུལ་བ་ལ་དེ་དང་མཐུན་པར་སྟོན་པའི་དོན་མ་རྟོགས་པར་མདོ་སྔོན་མ་མཐོང་བཞིན་དུ་བརྫུན་སྨྲས་པའོ། །གཉིས་པ་ལ་གཉིས་ཏེ།  དངོས་དང་།  ལུང་འགལ་སྤང་བའོ། །དང་པོ་ནི།  བྱང་ཆུབ་མཆོག་གི་ཞེས་སོགས་ཚིགས་བཅད་བཞི་སྟེ།  བྱང་ཆུབ་
9-2-118b


མཆོག་གི་ཕྱག་རྒྱ་དང་།  ས་གནོན་དང་།  མཆོག་སྦྱིན་དང་།  མཉམ་བཞག་དང་།  སྐྱབས་སྦྱིན་གྱི་ཕྱག་རྒྱ་སོ་སོར་མཛད་པའི་རིགས་ལྔ་ཁ་དོག་སེར་འབྱམས་སུ་བྱེད་པ་མཐོང་ཞིང་མདོ་ལུགས་ཡིན་ནོ། །ཞེས་བཀའ་གདམས་པ་ལ་ལ་སྨྲ་ལ།  ཁ་ཅིག་ཇོ་བོ་རྗེའི་ཞལ་གཟིགས་
ཡིན་ནོ། །ཞེས་སྨྲའོ། །འདི་ནི་མི་འཐད་དེ།  མདོ་ནས་རིགས་ལྔ་འདི་འདྲ་གསུངས་པ་མེད་ཅིང་།  གསང་སྔགས་རྒྱུད་སྡེ་བཞིའི་ལུགས་ཀྱང་མ་ཡིན་པའི་ཕྱིར་རོ། །དེ་ཡང་བྱ་སྤྱོད་གཉིས་ཀྱི་ལུགས་མ་ཡིན་ཏེ།  དེ་ལ་སངས་རྒྱས་རྡོ་རྗེའི་རིགས།  པདྨའི་རིགས།  དེ་
བཞིན་གཤེགས་པའི་རིགས་ཏེ་གསུམ་དུ་བསྡུས་པ་མ་གཏོགས་པ་རིགས་ལྔར་བསྡུས་པ་མེད་པའི་ཕྱིར།  རྣལ་འབྱོར་རྒྱུད་ཀྱི་ལུགས་ཀྱང་མ་ཡིན་ཏེ།  དེ་ཉིད་འདུས་པ་སོགས་ནས་གསུངས་པའི་རིགས་ལྔ་ཁ་དོག་དཀར་པོ་དང་ནག་པོ་སོགས་ཐ་དད་ཅིང་།  ཕྱག་རྒྱ་བྱང་ཆུབ་མཆོག་
གི་ཕྱག་རྒྱ་སོགས་ཐ་དད་དུ་གསུངས་པའི་ཕྱིར།  རྣལ་འབྱོར་གྱི་རྒྱུད་འདིའི་ལུགས་ཀྱི་རིགས་ལྔ་སྐུ་མདོག་ཐ་དད་པ་དང་།  ཕྱག་རྒྱ་ཐ་དད་པ་ནི་ཡེ་ཤེས་ལྔ་མཚོན་པར་བྱེད་པའི་རྟེན་ཅིང་འབྲེལ་བར་འབྱུང་བའི་སྐུ་ཡིན་པས་ཐ་དད་དུ་འཐད་པ་ཡིན་གྱི།  སེར་འབྱམས་
ཀྱིས་ནི་དེ་དག་མཚོན་པར་མི་ནུས་སོ། །བླ་མེད་ཀྱི་ལུགས་ཀྱང་མ་ཡིན་ཏེ།  དུས་ཀྱི་འཁོར་ལོ་སོགས་ལས་རིགས་ལྔའི་ཁ་དོག་རྣལ་འབྱོར་རྒྱུད་ལས་གཞན་དུ་མི་བསྐྱོད་པ་ལྗང་ཁུ།  དོན་གྲུབ་ནག་པོ།  རིན་འབྱུང་དམར་པོ།  སྣང་མཐའ་དཀར་པོ།  རྣམ་སྣང་སེར་པོ་
གསུངས་པ་ནི།  རིམ་པ་བཞིན་དུ་འབྱུང་བ་ནམ་མཁའ།  རླུང་།  མེ།  ཆུ།  ས་རྣམ་པ་ལྔ་སྦྱོང་བའི་རྟེན་ཅིང་འབྲེལ་འབྱུང་གི་སྐུ་ཡིན་ཅིང་།  སེར་འབྱམས་ཀྱིས་ནི་དེ་དག་སྦྱོང་བར་མི་ནུས་པའི་ཕྱིར་རོ། །གཉིས་པ་ནི།  སངས་རྒྱས་གསེར་མདོག་ཅེས་སོགས་ལྔ་སྟེ།  རིགས་
9-2-119a


ལྔ་སེར་འབྱམས་མི་འཐད་ན་སངས་རྒྱས་ལ།  པགས་པ་གསེར་མདོག་པགས་པ་སྲབ་པ་དང་། །ཞེས་གསུངས་པ་དང་འགལ་ལོ་ཞེ་ན།  དེ་ནི་དྲི་མ་མེད་ཅིང་དྭངས་པའི་དཔེར་གསེར་མདོག་ཅེས་གསུངས་པའམ།  སྤྲུལ་སྐུ་ཕལ་ཆེ་བ་ལ་དགོངས་ཏེ་
གསུངས་པ་ཡིན་གྱི།  གཞན་དུ་ཐམས་ཅད་སེར་པོར་མ་ངེས་ཏེ།  སངས་རྒྱས་སྨན་བླ་ནམ་མཁའི་མདོག་སྔོན་པོ་ཉིད་དུ་མདོ་ལས་གསུངས་པའི་ཕྱིར་རོ། །འོ་ན་གསེར་འོད་དམ་པ་ལས།  སངས་རྒྱས་ཐམས་ཅད་ཁ་དོག་མཚུངས། །འདི་ནི་སངས་རྒྱས་ཆོས་ཉིད་ཡིན། །
ཞེས་པའི་དོན་ཇི་ལྟར་འཆད་ཅེ་ན།  ཁ་དོག་གང་གིས་འདུལ་བའི་གདུལ་བྱ་དེ་ལ་ཁ་དོག་དེ་ཉིད་སངས་རྒྱས་ཐམས་ཅད་ཀྱིས་སྟོན་ཞེས་པའི་དོན་ཡིན་གྱི་ཐམས་ཅད་ཁ་དོག་སེར་པོར་སྟོན་པའི་ལུང་མ་ཡིན་ནོ། །ལྔ་པ་ལ་གསུམ་སྟེ།  རང་བསྒོམ་པའི་ཡན་ལག་འཆོལ་བ་དགག་པ།  གཞན་
རྗེས་སུ་འཛིན་པའི་ཡན་ལག་འཆོལ་བ་དགག་པ།  དེ་གཉིས་ཀ་འཆོལ་བ་དགག་པའོ། །དང་པོ་ནི།  ཡི་དམ་ལྷ་ཡི་ཞེས་སོགས་ཚིགས་བཅད་གཉིས་ཏེ།  དེང་སང་བཀའ་གདམས་པ་ལ་ལ་གསང་སྔགས་ལ་མི་མོས་པར་ཡི་དམ་གྱི་ལྷ་བསྒོམ་པ་དང་།  སྔགས་བཟླ་བ་སོགས་བྱེད་པ་ཡང་། 
སངས་རྒྱས་ཀྱི་བསྟན་པ་དང་མཐུན་པ་མ་ཡིན་ཏེ།  དེ་དག་མདོ་སྡེ་ལས་གསུངས་པ་མེད་ཅིང་།  གསང་སྔགས་ཀྱི་རྒྱུད་སྡེའི་ལུགས་ཁོ་ན་ཡིན་པའི་ཕྱིར་རོ། །གཉིས་པ་ནི།  གཞན་ཡང་སྦྱིན་སྲེག་ཞེས་སོགས་བཅུ་གཅིག་སྟེ།  བཀའ་གདམས་པ་ལ་ལ།  སྦྱིན་སྲེག་དང་།  རོ་སྲེག་
སོགས་གསང་སྔགས་ཀྱི་ལུགས་བོར་ནས་མདོ་སྡེ་ནས་གསུངས་པའི་དཀོན་མཆོག་མཆོད་པ་ཙམ་ལ་བརྟེན་པའི་ཆོ་གའི་རྣམ་གཞག་བྱེད་པ་ཡོད་པ་ཡང་མི་འཐད་དེ།  ཕ་རོལ་ཏུ་ཕྱིན་པའི་མདོ་དང་སོགས་སོ། །ངན་སོང་སྦྱོང་རྒྱུད་ལས་ཅི་ལྟར་གསུངས་ན།  དྲི་ཡིས་བསྐུས་པའི་ཡམ་ཤིང་གིས། །
9-2-119b


ཆོ་ག་བཞིན་དུ་སྦྱིན་སྲེག་བྱ། །ཞེས་པ་དང་།  རོ་ལ་སྔགས་ཀྱིས་བཏབ་ནས་ཀྱང་། །ཆུ་མཆོག་གིས་ནི་བཀྲུས་ནས་ཀྱང་། །ཞེས་པ་དང་།  དེ་ཡི་གཟུགས་བརྙན་བྲི་བའམ། །གུར་གུམ་གྱིས་ནི་མིང་ཡང་བྲི། །ངན་སོང་གསུམ་གྱི་འཇིག་རྟེན་ལས། །སེམས་ཅན་རྣམས་ནི་གྲོལ་བའི་
ཕྱིར། །སྔགས་མཁན་གཞན་ལ་ཕན་བརྩོན་ཞིང་། །སྙིང་རྗེ་ཅན་གྱིས་དབང་བསྐུར་རོ། །དེ་ནས་རྣལ་འབྱོར་ཅན་གྱིས་ནི། །སྔགས་དང་ཕྱག་རྒྱས་དེ་དབང་བསྐུར། །ལྷ་ཡི་གཟུགས་སུ་བརྟགས་ནས་ཀྱང་། །མཆོད་རྟེན་དབུས་སུ་གཞག་པར་བྱ། །རང་གི་ལྷའམ་ལྷ་གཞན་གྱི། །
སྙིང་པོ་སྙིང་ཁར་བྲིས་ནས་ཀྱང་། །ལྷ་འདྲ་བར་ནི་སེམས་བསྐྱེད་དེ། །ཁྱིམ་གྱི་ནང་དུ་གཞག་པར་བྱ། །དེ་ཡི་མིང་ནས་སྨོས་ནས་སུ། །གུར་གུམ་བཟང་པོས་སྔགས་བྲིས་ལ། །རིམ་གྱིས་འབུམ་ནི་ཚང་ཙམ་དུ། །མཆོད་རྟེན་ལས་ནི་རབ་ཏུ་བྱ། །སྡིག་ཅན་སྡིག་ནི་ཟད་བྱའི་ཕྱིར། །
བྱེ་བ་སྙེད་ནི་ཚང་བར་བྱ། །དེ་ནི་ངེས་པར་དམྱལ་བ་ནས། །འདི་བྱས་པས་ནི་གྲོལ་བར་འགྱུར། །ཞེས་གསུངས་སོ། །གཞན་ཡང་ནག་པོ་དམ་ཚིག་རྡོ་རྗེའི་ཀྱཻའི་རྡོ་རྗེའི་སྦྱིན་སྲེག་དང་།  རོ་སྲེག་གི་ཆོ་ག་དང་།  སློབ་དཔོན་དཔའ་བོ་རྡོ་རྗེའི་རིན་ཆེན་འབར་བ་སོགས་ལས་
གསུངས་པ་ཡིན་གྱི།  མདོ་སྡེ་རྣམས་ནས་བཤད་པ་མེད་དོ། །གསུམ་པ་ལ་གསུམ་སྟེ།  འཁྲུལ་པ་བརྗོད།  དེ་དགག །མ་འཆོལ་བ་བསྒྲུབ་པར་གདམས་པའོ། །དང་པོ་ནི།  དེ་བཞིན་རབ་གནས་ཞེས་སོགས་ཚིགས་བཅད་གཅིག་གོ།  གཉིས་པ་ལ་གསུམ་སྟེ།  རབ་གནས་
མདོ་ལུགས་དགག །ཕྱག་རྡོར་མདོ་ལུགས་དགག །ལྟུང་བཤགས་སྔགས་ལུགས་དགག་པའོ། །དང་པོ་ལ་བཞི་སྟེ།  མདོར་བསྟན་པ།  ཞར་ལས་བྱུང་བ།  རྒྱས་པར་བཤད་པ།  དོན་བསྡུ་བའོ། །དང་པོ་ནི།  འདི་ཡང་བརྟག་པར་ཞེས་སོགས་བཅྭོ་བརྒྱད་དེ།  མདོ་སྡེ་ནས་རབ་གནས་
9-2-120a


མཚན་ཉིད་པ་བཤད་པ་མེད་ཅིང་།  འོན་ཀྱང་རྟེན་དེ་ལ་མཆོད་པ་དང་།  བསྟོད་པ་དང་།  བཀྲ་ཤིས་ལ་སོགས་པའི་སྒོ་ནས་རྒྱལ་པོ་རྒྱལ་སར་བཏོན་པའི་མངའ་དབུལ་ལྟ་བུ་ལ།  རབ་གནས་ཡིན་ཞེས་སྨྲ་ན་སྨྲོས་ཏེ།  དེ་ནི་མིང་དུ་བཏགས་པ་ཙམ་
མོ། །དེས་ན་རབ་གནས་མཚན་ཉིད་པ་ལ་སྟ་གོན་གྱི་སྐབས་སུ།  ཡི་དམ་གྱི་ལྷ་བསྒོམ་ཞིང་སྔགས་བཟླ་བ་དང་།  བུམ་པ་སྟ་གོན་དང་།  གང་གིས་རབ་ཏུ་གནས་པར་བྱེད་པའི་ལྷ་སྟ་གོན་དང་།  རབ་ཏུ་གནས་བྱའི་རྟེན་བསྐྱེད་ནས་ཡེ་ཤེས་པ་བཅུག་སྟེ།  སྙན་གསན་དབབ་པ་ལ་
སོགས་པའི་ཆོས་བཅུ་གསུམ་དང་།  དངོས་གཞིའི་སྐབས་སུ་རྟེན་གྱི་དམ་ཚིག་པ་བསྐྱེད་པ་ལ།  ཡེ་ཤེས་ཀྱི་འཁོར་ལོ་དགུག་གཞུག་བྱས་ནས།  སྤྱན་དབྱེ་བ་དང་།  བརྟན་པར་བཞུགས་པ་དང་།  སྔགས་ཀྱིས་བྱིན་གྱིས་བརླབས་པའི་མེ་ཏོག་དོར་ནས།  གསོལ་བ་བཏབ་པ་དང་།  མཆོད་
པ་རྒྱས་པས་ལེགས་པར་མཆོད་པ་ལ་སོགས་པའི་ཆོས་བཅུ་གསུམ་དང་།  རྗེས་བཀྲ་ཤིས་རྒྱས་པར་བྱེད་པ་ལ་སོགས་པའི་ཆོས་བཅུ་གསུམ་ཚང་བ་ཞིག་དགོས་ཤིང་།  དེ་ལྟ་བུའི་ཆོ་ག་ནི་རབ་གནས་ཀྱི་རྒྱུད་ལ་སོགས་པ་གསང་སྔགས་ཀྱི་རྒྱུད་སྡེ་ལས་གསུངས་ཀྱི།  ཕ་རོལ་ཏུ་ཕྱིན་པ་ལས་
གསུངས་པ་མ་ཡིན་པས།  རབ་གནས་མདོ་ལུགས་མི་འཐད་དོ། །དེ་ལ་བཀའ་གདམས་པ་ལ་ལ་ཇོ་བོ་རྗེའི་གདམས་ངག་ཡིན་ནོ་ཞེས་སྨྲའོ། །འོ་ན་ཇོ་བོ་རྗེས་མདོ་སྡེ་གང་ལ་བརྟེན་པ་ཡིན་པ་སྨྲ་དགོས་ཏེ།  མདོ་ལུགས་ཀྱི་མན་ངག་མདོ་ལ་བརྟེན་དགོས་པའི་ཕྱིར་རོ། །རབ་གནས་
ཀྱི་སྦྱོར་དངོས་རྗེས་གསུམ་གྱི་ཆོས་བཅུ་གསུམ་པོ་དེ་དག་ཉམས་སུ་ལེན་པའི་ཚུལ་ཞིབ་པར་ནི།  ཇོ་བོ་རིན་ཆེན་བཟང་པོའི་སྡོམ་ཚིག་གི་སྟེང་དུ་རྗེ་བཙུན་རིན་པོ་ཆེས།  དོན་གསལ་དུ་རྒྱས་པར་བཤད་པས་དེར་བལྟ་བར་བྱའོ། །གཉིས་པ་ནི།  དེང་སང་གསང་བ་ཞེས་སོགས་
9-2-120b


ཚིགས་བཅད་གཉིས་ཏེ།  བཀའ་ཕྱག་པ་འགའ་ཞིག་གསང་བ་འདུས་པའི་ལྷ་བསྒོམ་ནས་སོགས་སོ། །གསུམ་པ་ནི།  ལྷ་ལ་རབ་ཏུ་ཞེས་སོགས་ཚིགས་བཅད་དྲུག་དང་ཚིག་རྐང་གཅིག་སྟེ།  ཚིག་རྐང་དང་པོ་དྲུག་གིས།  རྡོ་རྗེ་སློབ་
དཔོན་གྱི་དབང་བསྐུར་མ་ཐོབ་ན།  རྡོ་རྗེ་སློབ་མའི་དབང་བསྐུར་བ་ཐོབ་པས་ཀྱང་རབ་གནས་བྱར་མི་རུང་བར་བསྟན་པས་རབ་གནས་མདོ་ལུགས་མི་འཐད་པར་བསྟན།  དེ་ནས་བཅུས་ནི་རྡོ་རྗེ་སློབ་མས་ཅི་ཙམ་བྱར་རུང་བའི་རང་དོན་དང་།  གཞན་དོན་གྱི་བསྒྲུབ་ཚུལ་བསྟན།  དེ་ནས་དགུས་ནི་རྡོ་རྗེ་སློབ་དཔོན་གྱི་ཐུན་མོང་མ་
ཡིན་པའི་རང་དོན་དང་།  གཞན་དོན་བསྒྲུབ་ཚུལ་བསྟན་ནོ། །དེ་དག་གི་དོན་ནི་རབ་གནས་མདོ་ལུགས་མི་འཐད་དེ།  གཞན་དོན་དུ་ལྷ་ལ་རབ་ཏུ་གནས་པ་དང་།  མི་ལ་དབང་བསྐུར་བྱ་བ་དང་།  རང་དོན་དུ་རྟེན་དང་བརྟེན་པའི་རྣམ་དག་བསྒོམ་པ་སོགས་རྡོ་རྗེ་སློབ་མའི་དབང་བསྐུར་
བ་ཐོབ་པས་ཀྱང་བྱ་བར་མ་གསུངས་ན།  དབང་བསྐུར་གཏན་ནས་མ་ཐོབ་པའི་གང་ཟག་རྣམས་ཀྱིས་ལྟ་སྨོས་ཀྱང་ཅི་དགོས་པའི་ཕྱིར་རོ། །འོ་ན་རྡོ་རྗེ་སློབ་མའི་དབང་བསྐུར་ཙམ་ཐོབ་ནས་ཅི་ཞིག་དབང་བ་ཡིན་ཞེ་ན།  རང་དོན་ཏུ་མེ་ཏོག་གང་ལ་ཕོག་པའི་ལྷ་བསྒོམ་པ་དང་དེའི་
སྔགས་བཟླ་བ་དང་།  དེའི་བཅུ་ཆའི་སྦྱིན་སྲེག་དང་།  དེ་ལ་བརྟེན་ནས་ཞི་རྒྱས་ལ་སོགས་པའི་ལས་ཚོགས་འགའ་ཞིག་དང་།  རིལ་བུ་དང་མིག་སྨན་ལ་སོགས་པའི་ཐུན་མོང་གི་དངོས་གྲུབ་བསྒྲུབ་པ་དང་།  ཕྱག་རྒྱའི་ཡེ་ཤེས་བསྒྲུབ་པའི་ཆོ་ག་བསྟན་པ་དང་།  གསང་
སྔགས་རྒྱུད་སྡེ་འོག་མ་འགའ་ཞིག་ཉན་པ་ལ་དབང་བ་ཡིན་གྱི།  རྒྱུད་མཐའ་དག་འཆད་པ་དང་དབང་བསྐུར་དང་།  རབ་གནས་སོགས་སློབ་དཔོན་གྱི་ཕྲིན་ལས་རྣམས་ནི་བྱར་མི་རུང་སྟེ།  དེ་དག་སློབ་དཔོན་ཁོ་ནའི་ལས་ཡིན་པའི་ཕྱིར་རོ། །འོ་ན་རྡོ་རྗེ་སློབ་དཔོན་གྱི་དབང་ཐོབ་
9-2-121a


ནས་བྱ་དགོས་པའི་ཐུན་མོང་མ་ཡིན་པ་རྣམས་གང་ཞེ་ན།  དཀྱིལ་འཁོར་གྱི་འཁོར་ལོ་བྱང་ཕྱོགས་སོ་བདུན་དང་སྦྱར་བ་འཁོར་ལོའི་དེ་ཉིད་དང་།  དཀྱིལ་འཁོར་གྱི་ལྷ་རྣམས་ཕུང་ཁམས་སྐྱེ་མཆེད་དང་སྦྱར་བ་ལྷའི་དེ་ཉིད་ལ་སོགས་པ།  སྦྱང་གཞི་སྦྱོང་
བྱེད་ཀྱི་རྣམ་དག་སྦྱར་བའི་རྟེན་དང་བརྟེན་པར་བཅས་པའི་དཀྱིལ་འཁོར་བསྒོམ་པ་དང་།  དབང་བསྐུར་དང་རབ་གནས་ལ་སོགས་པའི་གཞན་དོན་དང་།  སངས་རྒྱས་ཀུན་གྱི་དམ་ཚིག་གི་རྡོ་རྗེ་དྲིལ་བུ་ཕྱག་རྒྱ་གསུམ་དང་།  ཐེག་པ་བླ་ན་མེད་པའི་སྔགས་ཀྱི་སྡོམ་པ་ཡོངས་
རྫོགས་རྡོ་རྗེ་སློབ་དཔོན་ཁོ་ནའི་ལས་ཡིན་གྱི།  གཞན་སློབ་མའི་དབང་ཙམ་ཐོབ་པ་དང་།  དབང་བསྐུར་གཏན་མ་ཐོབ་པ་རྣམས་ཀྱིས་བྱར་མི་རུང་སྟེ།  རྡོ་རྗེ་སློབ་དཔོན་གྱི་དབང་གི་གསོལ་བ་གདབ་པའི་སྐབས་སུ།  འཁོར་ལོ་ལྷ་ཡི་དེ་ཉིད་དང་། །སློབ་དཔོན་ཕྲིན་ལས་ཡོངས་
སུ་གསུངས། །སངས་རྒྱས་ཀུན་གྱི་དམ་ཚིག་དང་། །སྡོམ་པའང་བླ་ན་མེད་པ་སྩོལ། །ཞེས་གསུངས་པའི་ཕྱིར་རྡོ་རྗེ་སློབ་དཔོན་གྱི་ལས་འདི་དག་ནི།  གཙོ་བོར་བླ་མེད་ཀྱི་དབང་དུ་བྱས་པ་ཡིན་གྱི།  རྒྱུད་སྡེ་འོག་མའི་རྡོ་རྗེ་སློབ་དཔོན་གྱི་དབང་ཐོབ་པ་ཙམ་གྱིས།  འདི་དག་ཐམས་
ཅད་བྱར་རུང་བའི་ངེས་པ་མེད་དོ། །འོན་ཀྱང་དེ་དག་ལ་དབང་བསྐུར་དང་།  རབ་གནས་དང་།  རྒྱུད་འཆད་པ་རྣམས་ནི་རུང་ངོ་། །བཞི་པ་ནི།  དེང་སང་རབ་གནས་ཞེས་སོགས་དྲུག་གོ།  གཉིས་པ་ནི།  ཕྱག་ན་རྡོ་རྗེའི་ཞེས་སོགས་ཚིགས་བཅད་གཅིག་སྟེ།  གྲུ་གོ་
ཆེའི་རྗེས་འབྲང་ཁ་ཅིག །ཕྱག་ན་རྡོ་རྗེ་མདོ་ལུགས་བྱེད་པ་ནི་མི་འཐད་དེ།  ཕྱག་ན་རྡོ་རྗེའི་བསྒོམ་བཟླས་ཀྱང་མདོ་སྡེ་རྣམས་སོགས་སོ། །གསུམ་པ་ནི།  ལྟུང་བཤགས་སངས་རྒྱས་ཞེས་སོགས་གསུམ་མོ། །གསུམ་པ་ནི།  མདོ་དང་རྒྱུད་ཀྱི་ཞེས་སོགས་ཚིགས་
9-2-121b


བཅད་གཅིག་སྟེ།  མདོ་དང་རྒྱུད་ཀྱི་ཁྱད་པར་ནི།  རང་དོན་དུ་ལྷ་བསྒོམ་པ་དང་།  སྔགས་བཟླ་བ་དང་།  གཞན་དོན་དུ་དབང་བསྐུར་བ་དང་།  རབ་གནས་སོགས་ཀྱི་ཆོ་གའི་བྱ་བ་ཡོད་མེད་ཡིན་པ་དེ་ལྟར་ཤེས་ནས་མདོ་སྡེ་དང་།  སྔགས་ཀྱི་ལུགས་རྣམས་མ་འདྲེས་པར་སྤྱོད་
དེ་སོ་སོར་སྨྲོས་ཤིག །གཉིས་པ་རྟོགས་བྱ་སྤྲོས་བྲལ་གྱི་ལྟ་བ་ལ་འཁྲུལ་པ་དགག་པ་ལ་དངོས་དང་།  ཞར་ལ་རྒྱུད་སྡེ་བཞིའི་སྒྲུབ་པ་ལ་འཁྲུལ་པ་དགག་པ་གཉིས་ལས།  དང་པོ་ལ་བཞི་སྟེ།  ཐེག་པ་རིམ་དགུ་ལ་ལྟ་བ་ཐ་དད་ཡོད་པ་དགག །རྒྱུད་སྡེ་བཞི་ལ་ལྟ་
བ་ཐ་དད་ཡོད་པ་དགག །རྣལ་འབྱོར་བཞི་ཐེག་པའི་རིམ་པར་འདོད་པ་དགག །དེས་ན་དབུ་མ་ཡན་ཆད་ལྟ་བ་གཅིག་ཏུ་བསྟན་པའོ། །དང་པོ་ནི།  ལ་ལ་ཐེག་པ་ཞེས་སོགས་བཅུ་བཞི་སྟེ།  གསང་སྔགས་རྙིང་མ་བ་ལ་ལ།  ཉན་ཐོས།  རང་རྒྱལ།  བྱང་སེམས་ཏེ།  ཕྱི་མཚན་ཉིད་
ཀྱི་ཐེག་པ་གསུམ།  ཀྲི་ཡ་ཨུ་པ་ཡོ་ག་སྟེ།  ནང་སྔགས་ཀྱི་ཐེག་པ་གསུམ།  མ་ཧཱ་ཨ་ནུ་ཨ་ཏི་སྟེ།  གསང་བ་མཐར་ཐུག་པའི་ཐེག་པ་གསུམ་སྟེ།  དེ་ལྟར་ཐེག་པ་རིམ་དགུ་ལ་ལྟ་བ་ཐ་དད་པ་དགུ་ཡོད་ཅེས་ཟེར་རོ། །དེ་ནི་མི་འཐད་
དེ།  ཐེག་པ་གསུམ་དུ་བྱས་པའི་ཉན་ཐོས་དང་།  ཐེག་ཆེན་ལ་སྤྲོས་བྲལ་རྟོགས་པ་དང་།  མ་རྟོགས་པའི་བྱེ་བྲག་གིས་ལྟ་བའི་རིམ་པ་ཡོད་མོད་ཀྱི།  ཐེག་པ་ཆེན་པོ་ཕ་རོལ་ཏུ་ཕྱིན་པ་དང་།  གསང་སྔགས་ལ་ཐོས་བསམ་གྱིས་གཏན་ལ་ཕབ་པའི་ལྟ་བའི་དབྱེ་བ་བཤད་པ་མེད་པའི་ཕྱིར་
རོ། །གལ་ཏེ་ཕ་རོལ་ཏུ་ཕྱིན་པས་གཏན་ལ་ཕབ་པའི་སྤྲོས་བྲལ་ལས་ལྷག་པའི་རྡོ་རྗེ་ཐེག་པའི་ལྟ་བ་ཡོད་ན་ལྟ་བ་དེ་སྤྲོས་པ་ཅན་དུ་འགྱུར་ཏེ།  སྤྲོས་བྲལ་ལས་འདས་པའི་ལྟ་བ་ཡིན་པའི་ཕྱིར།  རྡོ་རྗེ་ཐེག་པའི་ལྟ་བ་དེ་སྤྲོས་བྲལ་ཡིན་ན་ནི།  ཕ་རོལ་ཏུ་ཕྱིན་པས་གཏན་ལ་ཕབ་
9-2-122a


པའི་ལྟ་བ་དང་།  ཁྱད་པར་མེད་པ་དེས་ན་བཤད་པས་གོ་བའི་ཐོས་པའི་ལྟ་བ་གཅིག་ཉིད་ཡིན་ནོ། །འོན་ཀྱང་སྤྲོས་བྲལ་དེ་རྟོགས་པའི་ཐབས་ལ་གསང་སྔགས་ཁྱད་པར་འཕགས་ཏེ།  རྒྱུད་སྡེ་བཞིའི་ཉམས་ལེན་གྱི་རིམ་པ་ཐམས་ཅད་སྤྲོས་བྲལ་རྟོགས་
པའི་ཐབས་ཡིན་པའི་ཕྱིར་དང་།  ཕར་ཕྱིན་ཐེག་པ་ལ་སོ་སོ་སྐྱེ་བོའི་དུས་སུ་རྟགས་ལ་བརྟེན་པའི་རིགས་ཤེས་རྗེས་དཔག་གི་རྒྱུན་བསྒོམ་པ་ལས་གཞན་མེད་ཅིང་།  རྡོ་རྗེ་ཐེག་པ་ལ་དབང་དང་རིམ་གཉིས་ལས་བྱུང་བའི་མཚོན་བྱེད་དཔེའི་ཡེ་ཤེས་དང་།  མཐོང་ལམ་ཐོབ་པའི་ཚེ་
རླུང་སེམས་དབུ་མར་ཞུགས་པས་བདེ་བས་བརྒྱན་པའི་ཚུལ་གྱིས་རྟོགས་པ་ཡོད་པའི་ཕྱིར་རོ། །གཞུང་འདི་དག་གི་དོན་ལ་གཅེས་པའི་མན་ངག་བཤད་པར་བྱ་སྟེ།  སྤྱིར་ལྟ་བ་ལ་རྟོགས་བྱེད་ཀྱི་ཡེ་ཤེས་ལ་ལྟ་བར་བྱས་པ་དང་།  རྟོགས་བྱའི་ཡུལ་ལ་ལྟ་བར་བྱས་པ་གཉིས་
ལས།  འདི་ཕྱི་མ་ཡིན་ཅིང་།  དེ་ཡང་གྲུབ་མཐའ་རང་རང་གི་ལུགས་ཀྱི་རིགས་པ་ཡང་དག་གིས་དཔྱད་པའི་ཚེ།  བློ་དེའི་ངོར་གནོད་པ་མེད་པར་གྲུབ་པ་ལ་ལྟ་བར་འཇོག་པ་ཡིན་པས།  ཕྱི་རོལ་པ་རྣམས་ཀྱིས་ནི་རིགས་པས་དཔྱད་པའི་ཚེ།  གང་ཟག་གི་བདག་གྲུབ་པ་ལ་གནོད་
པ་མ་མཐོང་།  ཉན་ཐོས་སྡེ་གཉིས་ཀྱིས་ནི།  རྡུལ་ཕྲན་དང་ཤེས་པ་སྐད་ཅིག་མ་གྲུབ་པ་ལ་གནོད་པ་མ་མཐོང་ལ།  སེམས་ཙམ་པ་རྣམས་ཀྱིས་ནི་གཟུང་འཛིན་གཉིས་མེད་ཀྱི་ཤེས་པ་གསལ་རིག་ཙམ་གྲུབ་པ་ལ་གནོད་པ་མ་མཐོང་བས།  དེ་དག་གྲུབ་མཐའ་དེ་དང་དེ་དག་གི་
ལྟ་བར་འཇོག་གོ།  དབུ་མ་པས་ནི་གཅིག་དུ་བྲལ་ལ་སོགས་པའི་རིགས་པ་ཡང་དག་གིས་དཔྱད་པའི་ཚེ་དངོས་པོར་གྲུབ་པའི་ཆོས་ཅུང་ཟད་ཙམ་ཡང་མི་རྙེད་ཅིང་།  དེ་བཀག་པའི་དངོས་མེད་ཀྱང་མི་རྙེད་དེ།  དགག་བྱ་དངོས་པོ་མེད་པའི་ཕྱིར་རོ། །གཉིས་ཀའང་མི་རྙེད་དེ། 
9-2-122b


 རེ་རེ་བ་མེད་པའི་ཕྱིར་རོ། །གཉིས་ཀ་མ་ཡིན་པ་ཡང་མི་རྙེད་དེ།  བློས་བཏགས་པའི་མཐའ་ནི་དེ་གཉིས་སུ་ཟད་པའི་ཕྱིར་རོ། །དེས་ན་མཐའ་བཞིའི་སྤྲོས་པ་གང་ཡང་མ་རྙེད་པ་ལ་སྤྲོས་བྲལ་དང་།  བརྗོད་བྲལ་དང་།  ཟུང་འཇུག་གི་ཐ་སྙད་བཏགས་པ་ཙམ་མོ། །འོ་ན་རིགས་པ་ཡང་
དག་གི་ངོར་གནོད་པ་མེད་པར་གྲུབ་པ་ལ་ལྟ་བར་འཇོག་པ་དང་འགལ་ཏེ།  དེའི་ངོར་ཅུང་ཟད་ཙམ་ཡང་གྲུབ་པ་མེད་པའི་ཕྱིར་རོ་སྙམ་ན།  འདི་ལ་དགོངས་ནས་རྗེ་བཙུན་གྱིས་མངོན་རྟོགས་ལྗོན་ཤིང་ལས།  དབུ་མ་པ་ལ་གནས་ལུགས་དང་ལྟ་བ་མེད་པར་གསུངས་པས་དེ་དག་གི་མིང་
གིས་བཏགས་པ་ཙམ་མོ། །དེས་ན་ཐོས་པའི་ལྟ་བ་ཕ་རོལ་ཏུ་ཕྱིན་པའི་དབུ་མ་ལས་ལྷག་པ་གཞན་མེད་པའི་དོན་ཡང་།  མཐའ་བཞིའི་སྤྲོས་བྲལ་དུ་གཏན་ལ་ཕབ་ན་དབུ་མའི་ལྟ་བ་དེ་ཉིད་ཡིན་ཅིང་།  སྤྲོས་བྲལ་དུ་གཏན་ལ་མ་ཕབ་ན་མཐའ་བཞི་གང་རུང་ལས་མ་འདས་པས་
དབུ་མ་ལས་དམན་པའོ། །དེས་ན་སྤྲོས་བྲལ་དུ་གཏན་ལ་ཕབ་པའི་ཆ་ལ་ཁྱད་པར་མེད་པ་ཡིན་གྱི།  ཉམས་མྱོང་ལ་ཁྱད་པར་ཡོད་པ་ནི་བཤད་ཟིན་ཏོ། །ལྟ་བའི་འཇོག་ཚུལ་འདི་བཞིན་དུ་ཤེས་ན་གོང་དུ་བཤད་པའི་མདོ་སྔགས་ཀྱི་ཐོས་པའི་ལྟ་བ་ལ་ཁྱད་པར་མེད་པ་དང་།  འོག་
ཏུ་རིགས་གསུམ།  རིགས་ལྔ་ལ་སོགས་པའི་ཁྱད་པར་བསྒོམ་པ་ཡིན་གྱི་ལྟ་བ་མ་ཡིན་པར་གསུངས་པ་དང་།  ཀུན་རྫོབ་ལྟ་བར་འཁྲུལ་དུ་མི་རུང་བར་གསུངས་པའི་དོན་རྣམས་ཀྱང་བདེ་བླག་ཏུ་རྟོགས་པར་འགྱུར་རོ། །གཉིས་པ་ལ་གཉིས་ཏེ།  འདོད་པ་བརྗོད་པ་དང་།  དེ་
དགག་པའོ། །དང་པོ་ནི།  ཁ་ཅིག་དབུ་མའི་ཞེས་སོགས་བཅུ་གཅིག་སྟེ།  རྙིང་མ་པ་ཁ་ཅིག །དབུ་མ་ནས་རྣལ་འབྱོར་ཆེན་པོའི་བར་ལ་དོན་དམ་དང་ཀུན་རྫོབ་ཀྱི་ལྟ་བ་གཉིས་སུ་བྱས་ནས་དོན་དམ་གྱི་ལྟ་བ་སྤྲོས་བྲལ་ཡིན་པ་ཐམས་ཅད་མཐུན་ཅིང་།  ཀུན་རྫོབ་ཀྱི་ལྟ་བ་ལ་
9-2-123a


དབུ་མ་པ་ཇི་ལྟར་སྣང་བ་བཞིན་ཡིན་པ་དང་།  བྱ་རྒྱུད་ཀྱི་ཀུན་རྫོབ་རིགས་གསུམ་གྱི་དཀྱིལ་འཁོར་དང་།  སྤྱོད་རྒྱུད་དང་རྣལ་འབྱོར་རྒྱུད་ཀྱི་ཀུན་རྫོབ་རིགས་ལྔའི་རྒྱལ་བ་དང་།  རྣལ་འབྱོར་ཆེན་པོའི་ཀུན་རྫོབ་དམ་པ་རིགས་བརྒྱ་ཡིན་པས་ཀུན་རྫོབ་ཀྱི་ལྟ་བ་ལ་
བཟང་ངན་གྱི་རིམ་པ་ཡོད་པ་ཡིན་ནོ་ཞེས་ཟེར་རོ། །གཉིས་པ་ལ་གསུམ་སྟེ།  ལྟ་སྒོམ་གྱི་ཁྱད་པར་སྤྱིར་བསྟན།  བསྒོམ་པའི་ཁྱད་པར་བྱེ་བྲག་ཏུ་བཤད།  དེས་ན་ཀུན་རྫོབ་ལྟ་བར་མི་འཐད་པའོ། །དང་པོ་ནི།  ལྟ་སྒོམ་ཞེས་སོགས་ཚིགས་བཅད་གཉིས་ཏེ།  ཤེས་
རབ་ཀྱིས་གནས་ལུགས་རྟོགས་པ་ལྟ་བ་དང་།  དེ་རྟོགས་པའི་ཐབས་དམིགས་པའི་བྱེ་བྲག་རྣམས་བསྒོམ་པ་ཡིན་པའི་ཁྱད་པར་མ་ཕྱེད་པས་ཀུན་རྫོབ་ལྟ་བར་འདོད་ཅིང་།  དེ་ལ་བཟང་ངན་འདི་འདྲའི་དབྱེ་བ་འཁྲུལ་པ་ཡིན་ཏེ།  རིགས་གསུམ་སོགས་སུ་བསྒོམ་པ་ནི་སྒོམ་པ་སྡོམ་པ་
ཡིན་གྱི་ལྟ་བ་མ་ཡིན་ཅིང་།  སྒོམ་པ་ལ་ཡང་བྱ་སྤྱོད་རྣལ་འབྱོར་གྱི་རྒྱུད་གསུམ་ལས་སྣང་བ་ལྷ་རུ་བསྒོམ་པ་གསུངས་པ་མེད་པའི་ཕྱིར་རོ། །གཉིས་པ་ལ་གཉིས་ཏེ།  སྒོམ་ཚུལ་དམིགས་པའི་ཁྱད་པར།  བསྒོམ་གཞི་ཀུན་རྫོབ་ཀྱི་ཁྱད་པར་རོ། །དང་པོ་ནི།  འོན་ཀྱང་བྱ་
བའི་ཞེས་སོགས་ཉེར་གཉིས་ཏེ།  ལུང་སྦྱོར་ཡི་གེ་མངས་ཀྱིས་དོགས་པས་བཞག་པ་ནི།  རྡོ་རྗེ་གུར་གྱི་འགྲེལ་པ་ལས།  བྱ་བའི་རྒྱུད་ཅེས་བྱ་བ་ནི།  ཕྱི་རོལ་རྔ༷་རྡུང་མ་ལ་སོགས་པའི་ལྷར་དམིགས་པ་དང་།  གཙང་སྦྲ་དང་སྡོམ་པ་ལ་སོགས་པ་ལྷུར་ལེན་པའོ། །བྱ་བའི་སྦྱོར་བ་ཞེས་
བྱ་བ་ནི།  བདག་ལས་ཕྱི་རོལ་ཏུ་དམིགས་པའོ། །ཞེས་པ་དང་།  དགྲ་ནག་གི་འགྲེལ་པ་ལས།  བྱ་བ་དང་སྤྱོད་པའི་རྒྱུད་ལའང་བསྒྲུབ་བྱ་དང་སྒྲུབ་པའི་ཐབས་དུས་ཡུན་རིང་པོར་རྗེས་སུ་མི་འཇུག་སྟེ་དེ་དག་ནི་བཏགས་པ་ལས་བྱུང་བ་ཉིད་ཡིན་ཏེ།  དེས་ནི་འདི་ལྟར་རས་བྲིས་
9-2-123b


ལ་སོགས་པར་རྟོགས་པའི་ལྷའི་སྟོབས་ཀྱིས་དངོས་གྲུབ་རྫོགས་པར་བྱེད་པའི་ཕྱིར་རོ། །རྣལ་འབྱོར་གྱི་རྒྱུད་དུ་ནི་ཁྱད་པར་འདི་ཡོད་དེ།  རང་གི་ལྷའི་རྣལ་འབྱོར་གྱིས་རས་བྲིས་ལ་སོགས་པར་རྟོགས་པའི་ལྷ་ལ་དམིགས་ནས་མཐུན་པར་བསྒྲུབ་པའི་དངོས་གྲུབ་སྒྲུབ་པར་བྱེད་དོ། །
ཞེས་པ་དང་།  འོད་ཟེར་ཅན་གྱི་རྟོག་པ་ལས།  བདག་ཉིད་རྣམ་པར་སྣང་མཛད་ཀྱི་གཟུགས་པདྨའི་ལྟེ་བར་སེང་གེའི་ཁྲི་ལ་རྡོ་རྗེ་སྐྱིལ་ཀྲུང་གིས་བཞུགས་པ་གསེར་གྱི་མདོག་ཅན།  བྱང་ཆུབ་མཆོག་གི་ཕྱག་རྒྱ་ཅན་ཏིང་ངེ་འཛིན་ལ་སྙོམས་པར་ཞུགས་པ།  རལ་པའི་དབུ་རྒྱན་
འཆང་ཞིང་ཞི་བ།  ཡི་གེ་མྃ་ཉིད་ཀྱིས་བརྗོད་པའི་རྣམ་པར་བསམ་པར་བྱའོ། །དེ་ནས་མདུན་དུ་ཟླ་བའི་གཟུགས་ལས་རྣམ་པར་སྣང་མཛད་ལས་བྱུང་བའི་འོད་ཟེར་ཅན་ནི།  ཨོཾ་མ་རཱི་ཙྱཻ་སྭཱ་ཧཱ།  ཞེས་བྱ་བས་གསེར་གྱི་མདོག་ཅན་སྐུད་པ་དང་བཅས་པའི་ཁབ་འཛིན་པའི་ཕྱག་གིས་གདུག་པ་
ཅན་གྱི་ཁ་དང་།  མིག་ཡང་དག་པར་དྲུབས་པ་མདུན་དུ་རྣམ་པར་བསམ་པར་བྱའོ། །ཞེས་དང་།  དཱ་ན་ཤཱི་ལས།  ལྷག་པའི་ལྷ་མཆོག་དེ་ཡི་མདུན་དུ་ཡང་། །བདག་ཉིད་ཇི་ལྟའི་ཁྲོ་རྒྱལ་བསམ་བྱ་སྟེ། །ཞེས་དང་།  དེ་ཉིད་སྣང་བ་ལས།  ཕྱག་རྒྱ་གང་དང་གང་ནས་འབྱུང་བ་དེ་དང་དེ་ཉིད་དུ་
བཀྲོལ་ཏེ།  ཡེ་ཤེས་པ་གཤེགས་སུ་གསོལ་ལོ། །གཞན་དུ་ན་ལྷ་ལ་བརྙས་པར་འགྱུར་ཞེས་སོགས་གསུངས་སོ། །རྣལ་འབྱོར་ཆེན་པོའི་རྒྱུད་དུ་ནི།  དེ་བཞིན་ཉིད་ཀྱི་དག་པ་ཆོས་ཐམས་ཅད་རང་བཞིན་གྱིས་སྟོང་པ་ཉིད་ཡིན་པ་དང་།  ལྷ་སོ་སོའི་དག་པ་ཀུན་རྫོབ་ཀྱི་སྣང་བ་ཐམས་
ཅད་ལྷར་བསྒོམ་པ་དང་།  རང་རིག་པའི་དག་པ་དེ་ཐམས་ཅད་བདེ་ཆེན་གྱི་ཡེ་ཤེས་སུ་བསྒྱུར་བ་སྟེ།  དག་པ་གསུམ་གྱི་རང་བཞིན་བཤད་དེ།  ཀྱཻ་རྡོ་རྗེ་ལས།  ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱི་ནས་རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་
9-2-124a


བརྗོད་པར་བྱ། །ཞེས་དང་།  རང་རིག་བདག་ཉིད་དག་པ་ཉིད། །དག་པ་གཞན་གྱིས་རྣམ་གྲོལ་མིན། །ཞེས་གསུངས་སོ། །གཉིས་པ་ལ་གཉིས་ཏེ།  རྒྱུད་སྡེ་འོག་མར་ཀུན་རྫོབ་ལྷར་མི་བསྒོམ་པ།  རྣལ་འབྱོར་ཆེན་པོར་ཀུན་རྫོབ་ལྷར་བསྒོམ་པའོ། །དང་པོ་ནི།
གལ་ཏེ་བྱ་བའི་ཞེས་སོགས་ཉེར་གཉིས་ཏེ།  བྱ་རྒྱུད་ཀྱི་ཡང་ཀུན་རྫོབ་ལྷ་རུ་གནས་ན།  ཟས་གཅོད་པ་ལ་སོགས་པའི་དཀའ་ཐུབ་དང་།  ཁྲུས་ལ་སོགས་པའི་གཙང་སྦྲ་ག་ལ་འཐད་དེ།  ལྷ་ལ་གཙང་དང་སོགས་སོ། །ཁ་ཅིག་སྤྱོད་རྒྱུད་ཀྱི་ཡང་ཀུན་རྫོབ་ཀྱི་ལྟ་བ་རྣལ་འབྱོར་གྱི་རྒྱུད་དང་
མཐུན་པས་རིགས་ལྔ་ཡིན་ཅིང་།  སྤྱོད་པ་བྱ་བའི་རྒྱུད་བཞིན་དུ་གཙང་སྦྲ་བྱེད་དོ། །ཞེས་ཟེར་བ་འདི་ཡང་དེ་ལྟར་ངེས་པ་མེད་དེ།  སྤྱོད་རྒྱུད་འདི་ནི་ཕྱིའི་བྱ་བ་དང་།  ནང་ཏིང་ངེ་འཛིན་གཉིས་ཀ་སྟོན་པའི་རྒྱུད་ཡིན་པས།  ལས་ཚོགས་བསྒྲུབ་པ་སོགས་གཙང་སྦྲ་སྤྱོད་མོད་ཀྱི།  ཕལ་
ཆེར་བདག་ཉིད་ལྷར་བསྒོམས་ནས།  རང་ཉིད་ཅི་བདེར་སྤྱོད་པར་གསུངས་པའི་ཕྱིར་རོ། །སྤྱོད་པའི་རྒྱུད་ཀྱི་ཀུན་རྫོབ་ལྷར་བསྒོམ་པ་ཉིད་ཀྱང་མེད་ཅིང་།  བསྒོམ་བྱའི་ལྷ་ལ་རིགས་ལྔའི་དོན་གྲུབ་ཡང་ཐ་སྙད་མེད་ལ།  ཕྱག་རྒྱ་དང་།  སྐུ་མདོག་དང་།  ཡེ་ཤེས་ལྔ་དང་སྦྱར་བའི་རྣམ་གཞག་
ཀྱང་།  རྣལ་འབྱོར་གྱི་རྒྱུད་དེ་ཉིད་བསྡུས་པ་བཞིན་དུ་དེར་མ་གསུངས་པས་རིགས་ལྔ་མེད་དོ། །འདིའི་མཚན་གཞི་ནི་ཨ་ར་པ་ཙ་ན་ལྷ་ལྔ་མ་དང་།  མི་འཁྲུགས་པ་ལྷ་དགུ་མ་ལྟ་བུ་ཡིན་པར་སེམས་སོ། །ཁ་ཅིག་སྦྱོང་རྒྱུད་ལ་སྤྱོད་རྒྱུད་དུ་བྱས་ནས་རིགས་ལྔའི་ཐ་སྙད་མེད་པ་དང་།  ཕྱག་
རྒྱ་དང་།  སྐུ་མདོག་དང་།  རྣམ་གཞག་རྣལ་འབྱོར་གྱི་རྒྱུད་བཞིན་མ་གསུངས་པ་ནི་སྦྱོང་རྒྱལ་དང་།  རྒྱལ་མཆོག་རིན་ཆེན་སོགས་ཀྱི་ཐ་སྙད་དང་།  སྦྱོང་རྒྱལ་དཀར་པོ་སོགས་ཀྱི་ཁ་དོག་དང་།  རྒྱལ་མཆོག་རིན་ཆེན་མཆོག་སྦྱིན་དང་།  ས་གནོན་སོགས་ཀྱི་ཕྱག་རྒྱ་མཛད་པ་ལ་
9-2-124b


འཆད་པ་ནི་མི་འཐད་དེ།  རྗེ་བཙུན་གྱིས་གཞན་ཕན་སྤྱི་ཆིངས་སུ་སྦྱོང་རྒྱུད་རྣལ་འབྱོར་གྱི་རྒྱུད་དུ་གསུངས་པའི་ཕྱིར་དང་། རྒྱུད་ཉིད་ལས་ཀྱང་། ཛཿ ཧཱུྃ་བཾ་ཧོཿཐུགས་རྗེའི་བདག །ཚུར་གཤེགས་ཞེས་ནི་བརྗོད་ནས་ཀྱང་། །གསང་བའི་བཅིང་པ་བཅིངས་ནས་ནི། །མཛུབ་
གཉིས་ལྕགས་ཀྱུའི་ཚུལ་དུ་བྱ། །ཞེས་སོགས་ཡེ་ཤེས་པ་གཞུག་པ་བཤད་པའི་ཕྱིར་དང་།  རྒྱལ་མཆོག་རིན་ཆེན་སོགས་ཀྱི་སྐུ་མདོག་དང་ཕྱག་རྒྱ་སྦྱོང་རྒྱུད་ཀྱི་དངོས་བསྟན་ལ་མེད་པའི་ཕྱིར་དང་།  རྗེས་འཇུག་གིས་བཀྲལ་བའི་དབང་དུ་བྱས་ན་པཎྜི་ཏ་སྨྲྀ་ཏི་ཛྙཱ་ནས་ཡེ་ཤེས་
ལྔའི་རྣམ་གཞག་དང་ཡང་སྦྱར་བའི་ཕྱིར་རོ། །ཀུན་རྫོབ་ལྷ་རུ་གནས་ན་དཀའ་ཐུབ་དང་གཙང་སྦྲ་མེད་ཅིང་།  སྦྱང་གཞི་སྦྱོང་བྱེད་སྦྱར་བ་རྣལ་འབྱོར་ཆེན་པོའི་ཁྱད་ཆོས་ཡིན་པ་དེས་ན་རྣལ་འབྱོར་རྒྱུད་ཡན་ཆད་སོགས་སོ། །གཉིས་པ་ནི།  རྣལ་འབྱོར་ཆེན་པོའི་ཞེས་
སོགས་དྲུག་སྟེ།  རྣལ་འབྱོར་ཆེན་པོའི་རྒྱུད་སྡེ་ལས།  ཀུན་རྫོབ་སྣང་བ་འདི་ཇི་ལྟར་སྣང་བ་བཞིན་དུ་བས་པ་མ་ཡིན་པའི་ཕྱིར།  བསྐྱེད་རིམ་གྱི་ཐབས་ལ་མཁས་པའི་ཁྱད་པར་གྱིས།  སྦྱང་གཞི་མ་དག་པ་སྣང་བ་རྣམས།  སྦྱོང་བྱེད་ཡེ་ཤེས་ལྔར་སྤྲོད་པ་དེའི་ཚེ།  དམ་པ་རིགས་བརྒྱ་དང་། 
འབུམ་ལ་སོགས་པའི་དབྱེ་བ་རྒྱལ་བས་གསུངས་ཏེ།  ཟླ་གསང་ཐིག་ལེ་ལས།  རིགས་ནི་རྣམ་པ་བརྒྱར་བསྟན་དང་། །མདོ་རུ་བསྡུ་ན་རྣམ་པ་ལྔ། །ལུས་དང་ངག་དང་ཡིད་སྦྱོར་བས། །གསུམ་དུ་ཡང་ནི་འགྱུར་བ་ཡིན། །ཞེས་དང་།  ཀྱཻ་རྡོ་རྗེ་ལས།  རྒྱས་པར་རབ་ཏུ་ཕྱེ་བ་ལས། །
རིགས་ནི་རྣམ་པ་དྲུག་ཏུ་བརྗོད། །རྣམ་གསུམ་རྣམ་པ་ལྔ་ཉིད་ཀྱང་། །ཞེས་དང་།  རིགས་ཀྱི་ཚོགས་ལ་རིགས་ནི་དུ་མ་རྣམས། །དེ་རྣམས་རིགས་ལ་རིགས་ནི་རྣམ་པ་བརྒྱ། །དེ་རྣམས་ལ་ཡང་འབུམ་ཕྲག་རིགས་ཆེན་རྣམས། །བྱེ་བའི་རིགས་ལ་གྲངས་ནི་མེད་པར་འགྱུར། །
9-2-124c


ཞེས་སོ། །དེ་ལ་དམ་པ་རིགས་བརྒྱ་ལ་ཀྱཻ་རྡོ་རྗེའི་དགོངས་པ་ནི།  སྦྱང་གཞི་འབྱུང་བ་ལྔ་པོ་རེ་རེ་ལ་སྦྱང་བྱ་ཉོན་མོངས་པ་ལྔ་ལྔ་གནས་པས་ཉེར་ལྔ།  དེ་རེ་རེ་ཡང་ནང་སེལ་གྱིས་ཕྱེ་ན་ཤ་ཆེན་སྤྱི་ཁྱབ་ཏུ་བཏང་བའི་བདུད་རྩི་བཞི་བཞི་སྟེ་བརྒྱའོ། །སྦྱོང་བྱེད་ལམ་
ལ་སྦྱར་ན་བསྐྱེད་རིམ་གྱི་རིགས་བརྒྱ་ནི།  རིགས་ལྔ་པོ་རེ་རེ་ལ་མངོན་བྱང་ཡེ་ཤེས་ལྔ་ལྔས་ཕྱེ་བས་ཉེར་ལྔ།  དེ་ལ་འཁོར་ཡུམ་བཞི་བཞི་དང་ལྡན་པས་བརྒྱའོ། །རྫོགས་རིམ་གྱི་རིགས་བརྒྱ་ནི།  འདིར་ཐིག་ལེ་ལ་སྦྱར་ན་ཐིག་ལེ་ཕྲ་མོ་གཅིག་ཀྱང་འབྱུང་བ་ལྔ་དང་ལྡན་པ།  དེ་རེ་
རེ་ཡང་བདུད་རྩི་བཞི་བཞིས་ཕྱེ་བས་ཉི་ཤུ།  རྟེན་ཐིག་ལེ་གཅིག་ལ་ཡང་མཚོན་བྱེད་དཔེའི་ཡེ་ཤེས་ལྔ་ལྔ་དང་ལྡན་པས་བརྒྱའོ། །འབྲས་བུའི་དམ་པ་རིགས་བརྒྱ་ནི།  སྤྲུལ་པའི་སྐུ་རིགས་ལྔ་པོ་རེ་རེ་ལ་ཡེ་ཤེས་ལྔ་ལྔས་ཕྱེ་བས་ཉེར་ལྔ།  དེ་ཚད་མེད་པའམ་ལྷ་མོ་བཞི་བཞི་དང་ལྡན་པས་
བརྒྱའོ། །གསང་འདུས་ཀྱི་དགོངས་པ་ནི།  སྤྱོད་བསྡུས་ལས།  དེ་བཞིན་གཤེགས་པ་རིགས་ལྔའམ་ཡུམ་བཞི།  ས་སྙིང་།  ཕྱག་རྡོར།  ནམ་སྙིང་།  འཇིག་རྟེན་དབང་ཕྱུག །སྒྲིབ་པ་རྣམ་སེལ་ཏེ་ལྔ།  གཟུགས་རྡོ་རྗེ་མ་སོགས་ལྷ་མོ་ལྔ་སྟེ།  བཅུ་དགུ་པོ་རེ་རེ་ལ་རིགས་ལྔ་ལྔར་ཕྱེ་
བས་དགུ་བཅུ་རྩ་ལྔ་དང་།  ཡེ་ཤེས་ལྔ་སྟེ་བརྒྱ་ལ་བཤད་དོ། །རྙིང་མ་བ་རྣམས་ཀྱིས་ནི་བུད་དྷ་བཞི་བཅུ་ཞེ་གཉིས།  ཁྲག་འཐུང་ལྔ་བཅུ་རྩ་བརྒྱད་ལ་དམ་པ་རིགས་བརྒྱར་འདོད་དོ། །གསུམ་པ་ནི།  དེས་ན་ཀུན་རྫོབ་ཞེས་སོགས་ཚིགས་བཅད་གཅིག་སྟེ།  རྒྱུད་སྡེ་འོག་
མ་གསུམ་ལ་ཀུན་རྫོབ་ལྷར་བསྒོམ་པ་མེད་ཅིང་།  བླ་མེད་ལ་ཀུན་རྫོབ་ལྷར་བསྒོམ་པ་ཡོད་ཀྱང་ཐབས་ཀྱི་ཁྱད་པར་ཡིན་གྱི།  ལྟ་བ་མ་ཡིན་པ་དེས་ན་ཀུན་རྫོབ་སྣང་བའི་ལྡོག་པ་དང་།  ལྷར་བསྒོམ་པ་མ་ཕྱེད་པས་གསང་སྔགས་རྙིང་མ་བ་རྣམས་ཀྱིས།  རྒྱུད་སྡེ་བཞིའི་ཀུན་རྫོབ་ཀུན་
9-2-124d


ལྟར་བསྒོམ་ནས་དེ་ལྟ་བ་དང་འཁྲུལ་ཏེ།  དེའི་བཟང་ངན་གྱི་རིམ་པ་ལ་ལྟ་བ་བཟང་ངན་གྱི་རིམ་པར་འཇོག་པའི་རྒྱུ་མཚན་དེ་ལྟར་ཡིན་ནོ། །གསུམ་པ་ལ་བཞི་སྟེ།  སྔ་འགྱུར་གྱི་ལུགས་བརྗོད།  ཕྱི་འགྱུར་གྱི་ལུགས་བརྗོད།  ཕྱི་འགྱུར་བའི་ལུགས་འཐད་པར་སྒྲུབ།  དེས་སྔ་
འགྱུར་བའི་ལུགས་མི་འཐད་པར་གྲུབ་པའོ། །དང་པོ་ནི།  གསང་སྔགས་སྔ་འགྱུར་ཞེས་སོགས་དྲུག་སྟེ།  སྔ་འགྱུར་པ་རྣམས་ནི་རྣལ་འབྱོར་ཡོ་ག་དང་།  རྣལ་འབྱོར་ཆེན་པོ་མ་ཧཱ་ཡོ་ག་དང་།  རྗེས་སུ་རྣལ་འབྱོར་ཨ་ནུ་ཡོ་ག་དང་།  ཤིན་ཏུ་རྣལ་འབྱོར་ཨ་ཏི་ཡོ་ག་ཞེས་བྱ་
བ་རྣམ་པ་བཞི་ཐེག་པའི་རིམ་པ་ཡིན་ཞེས་ཟེར་ཞིང་།  ཤིན་ཏུ་རྣལ་འབྱོར་ཐེག་པ་རིམ་དགུའི་ཡང་རྩེ་ཡིན་པས་བཟང་བར་འདོད་དོ། །གཉིས་པ་ནི།  གསང་སྔགས་ཕྱི་འགྱུར་ཞེས་སོགས་ལྔ་སྟེ།  དེ་དག་གི་རྣལ་འབྱོར་བཞིའི་གོ་རིམ་ཡང་སྔ་མ་དང་མི་འདྲ་ཞིང་།  ངོ་
བོ་ཡང་བསྐྱེད་རྫོགས་ཀྱི་ཏིང་ངེ་འཛིན་གྱི་རིམ་པ་ཡིན་གྱི།  རྒྱུད་སྡེའི་རིམ་པར་མི་བཞེད་དེ།  དགྲ་ནག་གི་རྒྱུད་ལེའུ་བཅུ་བདུན་པ་ལས།  རྡོ་རྗེ་སེམས་དཔའ་རྫོགས་པ་ནི། །རྣལ་འབྱོར་ཡིན་པར་འདི་ལྟར་འདོད། །དེ་ཡི་རྒྱུ་མཐུན་ལྷ་ཡི་སྐུ། །རྗེས་ཀྱི་རྣལ་འབྱོར་ཡིན་པར་
གྲགས། །འཁོར་ལོ་ཐམས་ཅད་ཡོངས་རྫོགས་པར། །ཤིན་ཏུ་རྣལ་འབྱོར་ཡིན་པར་གྲགས། །སྐུ་དང་གསུང་དང་ཐུགས་རྣམས་དང་། །ལྷ་ཡི་མིག་སོགས་བྱིན་བརླབ་དང་། །ཡེ་ཤེས་འཁོར་ལོ་གཞུག་པ་དང་། །བདུད་རྩི་མྱང་བ་དག་དང་ནི། །མཆོད་དང་བསྟོད་པ་
ཆེན་པོ་དག །རྣལ་འབྱོར་ཆེན་པོ་ཞེས་བྱའོ། །ཞེས་དང་།  དཔལ་མཆོག་གི་འགྲེལ་པ་ལས།  དེ་ལ་དེ་ཁོ་ན་ཉིད་རྣམ་པ་ལྔ་བསྒོམས་པས།  བདག་ཉིད་རང་གི་ལྷའི་ངོ་བོ་ཉིད་དུ་བསྐྱེད་པ་བསྒོམ་པའི་རྣལ་འབྱོར་ཞེས་བྱའོ། །ཡེ་ཤེས་སེམས་དཔའ་བཅུག་གནས་
9-2-125a


དེ་དང་ལྷན་ཅིག་ཏུ་གྱུར་པར་ལྷག་པར་མོས་པ་ནི་རྗེས་སུ་རྣལ་འབྱོར་ཞེས་བྱའོ། །རྒྱུ་བ་དང་མི་རྒྱུ་བ་ཐམས་ཅད་ཀྱི་ངོ་བོ་ཉིད་ཀྱི་རང་བཞིན་དུ་བདག་ཉིད་བསྒོམ་པ་ནི་ཐམས་ཅད་ཀྱི་རྣལ་འབྱོར་ཞེས་བྱའོ། །རྣལ་འབྱོར་དང་རྗེས་སུ་རྣལ་འབྱོར་དང་།
ཐམས་ཅད་ཀྱི་རྣལ་འབྱོར་རྣམ་པར་བསྒོམས་པས་སེམས་རྩེ་གཅིག་ཏུ་གྱུར་པ་གང་ཡིན་པ་དེ་ནི་ཤིན་ཏུ་རྣལ་འབྱོར་ཞེས་བྱའོ། །ཞེས་དང་།  བཤད་རྒྱུད་རྡོ་རྗེ་ཕྲེང་བའི་དགོངས་པ་སློབ་དཔོན་འཕགས་པ་ཀླུ་སྒྲུབ་ཀྱིས།  གསང་བ་འདུས་པའི་བསྐྱེད་པའི་རིམ་པ་ལ་རྣལ་འབྱོར་
བཞི་སྦྱོར་བར་མཛད་པ་རྣམས་ཏིང་ངེ་འཛིན་གྱི་རིམ་པ་ཁོ་ནའོ། །གསུམ་པ་ནི།  དེས་ན་རྒྱུད་སྡེ་ཞེས་སོགས་ཚིགས་བཅད་བཞི་སྟེ།  རྣལ་འབྱོར་བཞི་དང་།  རྒྱུད་སྡེ་བཞི་ཐ་དད་དུ་ཡོད་པ་དེས་ན།  རྒྱུད་སྡེ་བཞིའི་རྣལ་འབྱོར་དང་།  རྣལ་འབྱོར་ཆེན་པོ་དང་།  རྣལ་འབྱོར་བཞིའི་རྣལ་འབྱོར་
དང་།  རྣལ་འབྱོར་ཆེན་པོ་དོན་མི་གཅིག་སྟེ།  སྔ་མ་རྒྱུད་སྡེའི་རིམ་པ་ཡིན་ཅིང་།  ཕྱི་མ་ཏིང་ངེ་འཛིན་གྱི་རིམ་པ་ཡིན་པའི་ཕྱིར།  དཔེར་ན་ཀླུ་ཆེན་སོགས་སོ། །དེས་ན་གསང་སྔགས་གསར་མ་ལ་རྣལ་འབྱོར་ཆེན་པོའི་ལྟག་ན་དེ་ལས་ལྷག་པའི་རྒྱུད་སྡེ་མེད་ཅིང་།  རྣལ་འབྱོར་བཞིར་བྱས་
པའི་རྣལ་འབྱོར་ཆེན་པོའི་གོང་ན་བསྒོམ་པའི་དམིགས་པ་ཉིད་ཀྱང་མེད་པས།  རྣལ་འབྱོར་ཆེན་པོ་ལས་བཟང་བའི་ཤིན་ཏུ་རྣལ་འབྱོར་མི་འཐད་དོ། །རྣལ་འབྱོར་ཆེན་པོ་དེ་ལས་སྐྱེས་པའི་ཡེ་ཤེས་ནི་སྤྲོས་པ་མེད་ཅིང་།  བརྗོད་པ་དང་བྲལ་བ་ཡིན་པས་ལྟ་བ་ཡིན་གྱི་ཐེག་པའི་རིམ་པར་
མི་བཞེད་དེ།  ཐེག་པའི་རིམ་པ་ནི་ལྟ་བ་རྟོགས་བྱེད་ཀྱི་ཐབས་ཀྱི་ཁྱད་པར་ཡིན་པའི་ཕྱིར་རོ། །བཞི་པ་ནི།  ལུགས་འདི་ལེགས་པར་ཞེས་སོགས་ལྔ་སྟེ།  རྣལ་འབྱོར་བཞི་ཏིང་ངེ་འཛིན་གྱི་རིམ་པ་ཡིན་པ་དང་།  དེ་ལས་སྐྱེས་པའི་ཡེ་ཤེས་ལྟ་བ་ཡིན་པའི་ལུགས་འདི་ལེགས་
9-2-125b


པར་ཤེས་པར་གྱུར་ན།  ཨ་ཏི་ཡོ་གའི་ལྟ་བ་ཤིན་ཏུ་རྣལ་འབྱོར་ཡང་བརྗོད་བྲལ་གྱི་ཡེ་ཤེས་ཡིན་གྱི།  ཐེག་པའི་རིམ་པ་མ་ཡིན་པས་བརྗོད་བྲལ་གྱི་ཡེ་ཤེས་ལ་བརྗོད་བྱ་ཐེག་པར་བྱས་པ་ནི་སོགས་སོ། །བཞི་པ་ནི།  དེས་ན་ཐོས་པའི་ཞེས་སོགས་དྲུག་སྟེ།  དབུ་མ་ནས་རྣལ་འབྱོར་ཆེན་
པོའི་བར་ལ་རྟོགས་བྱའི་ལྟ་བ་བཟང་ངན་མེད་པ་དེས་ན་ཐོས་བསམ་གྱིས་གཏན་ལ་ཕབ་པའི་ལྟ་བ་ནི་དབུ་མ་ཡན་ཆད་མཐུན་ཏེ།  རྒྱུ་མཚན་དེའི་ཕྱིར་ན་རྡོ་རྗེ་མཁའ་འགྲོའི་འགྲེལ་པར་མདོ་སྡེ་ས་བཅུ་པ་དང་།  དབྱིག་གཉེན་གྱིས་ཉི་ཤུ་པའི་ལུང་ཁུངས་སུ་མཛད་ནས།  སྣང་བ་སེམས་
སུ་བསྒྲུབ་པ་དང་།  སྤྱོད་བསྡུས་སྒྲོན་མེར་བརྒྱད་སྟོང་པ་དང་།  ལས་ཀྱི་སྒྲིབ་པ་ཐམས་ཅད་རྣམ་པར་དག་པའི་མདོ་དྲངས་ནས་ཆོས་ཐམས་ཅད་སྐྱེ་མེད་དུ་གཏན་ལ་ཕབ་པ་སོགས་སོ། །རྡོ་རྗེ་ཐེག་པའི་སྐབས་སུ་ཡང་ལྟ་བའི་ལུང་སྦྱོར་ཀུན།  ཕ་རོལ་ཏུ་ཕྱིན་པ་བཞིན་ཐམས་ཅད་ཀྱིས་
མཛད་པའི་ཕྱིར་རོ། །འོན་ཀྱང་ལྟ་བ་དེ་རྟོགས་པའི་ཐབས་སོགས་ནི་བཤད་ཟིན་ཏོ། །གཉིས་པ་ཞར་ལ་རྒྱུད་སྡེ་བཞིའི་སྒྲུབ་པ་ལ་འཁྲུལ་པ་དགག་པ་ལ་གསུམ་སྟེ།  འཁྲུལ་པ་དགག་པ་མདོར་བསྟན།  མ་འཁྲུལ་པའི་སྒྲུབ་པ་རྒྱས་པར་བཤད།  དེ་དག་དཀྲུགས་པ་སྨད་པས་
དོན་བསྡུ་བའོ། །དང་པོ་ནི།  རྒྱུད་སྡེ་བཞི་ཡི་ཞེས་སོགས་གཉིས་སོ། །གཉིས་པ་ལ་གསུམ་སྟེ།  བྱ་བའི་རྒྱུད་ཀྱི་སྒྲུབ་པ།  རྒྱུད་སྡེ་བར་པ་གཉིས་ཀྱི་སྒྲུབ་པ།  རྣལ་འབྱོར་ཆེན་པོའི་སྒྲུབ་པ་བཤད་པའོ། །དང་པོ་ལ་གཉིས་ཏེ།  སྤྱིའི་དོན་དང་།  གཞུང་གི་དོན་ནོ། །དང་པོ་ལ་
ལྔ་སྟེ།  རྒྱུད་ལས་ཇི་ལྟར་གསུངས་པའི་ཚུལ།  དེ་ཉིད་གྲུབ་ཆེན་རྣམས་ཀྱིས་བཀྲལ་བའི་ཚུལ།  དེ་ལས་ས་སྐྱ་པའི་བཞེད་པ་ངོས་གཟུང་བ།  རྟོག་པས་བརྟགས་པའི་ལུགས་དགག །གནད་ཀྱི་དོན་བསྡུས་ཏེ་བསྟན་པའོ། །དང་པོ་ནི།  སྤྱོད་པ་གསུམ་ཀ་མདོར་བསྡུས་ཏེ་བསྟན་
9-2-126a


པ་དཔུང་བཟངས།  འཇུག་པའི་སྤྱོད་པ་གསལ་བར་སྟོན་པ་གསང་བ་སྤྱི་རྒྱུད།  སྦྱོར་བའི་སྤྱོད་པ་གསལ་བར་སྟོན་པ་ལེགས་གྲུབ།  སྒྲུབ་པའི་སྤྱོད་པ་གསལ་བར་སྟོན་པ་བསམ་གཏན་ཕྱི་མ་སྟེ།  བྱ་བ་སྤྱིའི་རྒྱུད་ཆེན་བཞི་དང་།  དམ་ཚིག་གསུམ་བཀོད་ལ་
སོགས་པ་སོ་སོའི་རྒྱུད་སུམ་བརྒྱ་དང་དྲུག་ཅུ་ལྷག་ཙམ་ད་ལྟ་བོད་ན་བཞུགས་པ་འདི་རྣམས་ལས་བདག་བསྐྱེད་དངོས་སུ་མ་བསྟན་ཅིང་།  དེར་མ་ཟད་རྒྱུད་སྡེ་གོང་མར་བྱ་རྒྱུད་ལ་བདག་བསྐྱེད་དང་།  ཡེ་ཤེས་པ་གཞུག་པ་མེད་པར་གསལ་བར་བཤད་དེ།  ཡེ་ཤེས་རྡོ་རྗེ་ཀུན་ལས་
བཏུས་པའི་རྒྱུད་ལས།  འཇིགས་པར་དམིགས་ཤིང་ཤིན་ཏུ་གཙང་སྦྲ་བྱེད་པ་དང་།  ཡེ་ཤེས་སེམས་དཔའི་བདེ་བ་དམ་པ་མེད་པ་དང་།  བདག་ཉིད་ལྷའི་སྙེམས་པ་མེད་པ་དང་།  རྨད་དུ་བྱུང་བའི་སྤྱོད་ཡུལ་མ་ཡིན་པ་དང་།  སྐྱོན་གྱི་རྒྱུ་རྟོག་པ་རབ་ཏུ་སྦྱོང་པས་
སྒྲུབ་པར་བྱེད་པ་ནི་བྱ་བའི་རྒྱུད་ལ་གནས་སོ། །ཞེས་གསུངས་སོ། །གཉིས་པ་ལ་བཞི་སྟེ།  བྱ་རྒྱུད་བླ་མེད་ལྟར་བཀྲལ་བ།  རྣལ་འབྱོར་རྒྱུད་ལྟར་བཀྲལ་བ།  སྤྱོད་རྒྱུད་ལྟར་བཀྲལ་བ།  བྱ་རྒྱུད་རང་ལུགས་ལྟར་བཀྲལ་བའོ། །དང་པོ་ནི།  འཕགས་པ་ཀླུ་སྒྲུབ་ཀྱིས་མཛད་པའི་
སྤྱན་རས་གཟིགས་ཕྱག་སྟོང་པའི་སྒྲུབ་ཐབས་ལས།  སྤྱན་རས་གཟིགས་འཁོར་བཅས་ཡན་ལག་བཞི་རྫོགས་སུ་བསྐྱེད་པའི་བསྐྱེད་རིམ་བཤད་ནས་དེའི་འོག་ཏུ།  དེ་ནས་རྫོགས་པའི་རིམ་པ་བསྒོམ་པར་བྱ་སྟེ།  ཟབ་པ་དང་ཕྲ་བའི་རྫོགས་རིམ་ནི་བླ་མའི་མན་ངག་ལས་ཤེས་
པར་བྱའོ། །ཞེས་འབྱུང་བ་ལྟ་བུ་སྟེ།  བསྐྱེད་རྫོགས་གཉིས་ནི་བླ་མེད་ཀྱི་ཁྱད་ཆོས་ཡིན་པའི་ཕྱིར་རོ། །དེ་བཞིན་དུ་སྒྲུབ་ཐབས་རྒྱ་མཚོ་དང་།  ཕྱེད་དང་ཉིས་བརྒྱ་པ་དང་།  བརྒྱ་རྩ་རྣམས་སུ་བཤད་པའི་བྱ་རྒྱུད་ཀྱི་ལྷའི་སྒྲུབ་ཐབས་རྣམས་དང་།  ཛེ་ཏ་རའི་གྲྭ་ལྔའི་སྒྲུབ་ཐབས་
9-2-126b


སོགས་གཞུང་ཆུང་ཕལ་ཆེ་བ་རྣམས་བླ་མེད་ལྟར་བཀྲལ་བ་ཡིན་ནོ། །ཞེས་རྗེ་བཙུན་བླ་མས་གསུང་ངོ་། །གཉིས་པ་ནི།  དེ་ཉིད་བསྡུས་པའི་འགྲེལ་བར་སློབ་དཔོན་ཀུན་སྙིང་གིས།  བྱ་བ་དང་།  སྤྱོད་པ་དང་།  གཉིས་ཀའི་རྒྱུད་ལ་སོགས་པའི་ཆོ་ག་ལ་མངོན་པར་ཞེན་པ་
རྣམས་ཀྱིས་ཀྱང་ཆོ་ག་དེས་འདི་ལས་བཤད་པའི་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱའོ། །ཞེས་དོན་དེ་བཤད་པར་བྱ་བའི་ཕྱིར།  སྙིང་པོ་ཕྱག་རྒྱས་སྔགས་རིང་རྣམས། །ཇི་ལྟར་འདོད་པའི་ཚུལ་གྱིས་ནི། །ཞེས་པ་ལ་སོགས་པའི་ཚུལ་གྱིས་སྟོན་ནོ། །ཞེས་
གསུངས་ཤིང་དེའི་དོན་རྣལ་འབྱོར་རྒྱུད་ལས་གསུངས་པའི་ཆོ་ག་བྱ་སྤྱོད་ཀྱི་རྒྱུད་ལ་སྦྱར་ན་རུང་ཞེས་པ་ཡིན་ལ།  ཇི་ལྟར་སྦྱོར་ཚུལ་ནི།  རྣམ་སྣང་སྒྱུ་དྲྭར།  རྣལ་འབྱོར་རྣམ་གསུམ་ཤེས་བྱ་སྟེ། །བྱིན་གྱིས་བརླབ་དང་ཡོངས་བརྟག་དང་། །གཟུགས་ཉིད་རྫོགས་པར་གྱུར་པ་ནི། །རྣལ་
འབྱོར་ཡིན་ཞེས་སངས་རྒྱས་གསུང་། །ཞེས་སོགས་རྣལ་འབྱོར་གསུམ་གསུངས་པའི་དང་པོ་བྱ་རྒྱུད་ལ་སྦྱོར་བ་ཡིན་པར།  དེའི་འགྲེལ་པར་སློབ་དཔོན་ཀུན་སྙིང་གིས་གསུངས་པ་ལྟར་ཡིན་གྱི།  ཏིང་ངེ་འཛིན་གསུམ་ལ་སོགས་པ་རྣལ་འབྱོར་རྒྱུད་ལས་ཇི་ལྟར་གསུངས་པ་
ལྟར་སྦྱོར་བ་ནི་མ་ཡིན་ནོ། །ཚུལ་འདི་དང་མཐུན་པའི་སྒྲུབ་ཐབས་ཟུར་དུ་བྱས་པ་ནི་མ་མཐོང་ངོ་། །ཞེས་རྗེ་བླ་མས་གསུངས་སོ། །ཁོ་བོའི་རྟོག་པ་ལ་ནི་སྒྲུབ་ཐབས་རྒྱ་མཚོ་དང་།  བརྒྱ་རྩ་སོགས་ནས་བཤད་པའི་བྱ་རྒྱུད་ཀྱི་ལྷའི་སྒྲུབ་ཐབས་རྣམས་རྣལ་འབྱོར་རྒྱུད་ཀྱི་དབང་
དུ་བྱས་པ་བདག་ཉིད་ཆེན་པོ་འདིའི་དགོངས་པ་ཡིན་ནམ་སྙམ་སྟེ།  གཞུང་འདིར་ཡང་།  བདག་བསྐྱེད་སྒྲུབ་ཐབས་ཡོད་པ་ནི། །རྣལ་འབྱོར་རྒྱུད་ཀྱི་རྗེས་འབྲངས་ནས། །དེ་ཡི་ལུགས་བཞིན་མཛད་པ་ཡིན། །ཅེས་དང་།  འཆད་ཁ་བ་ནམ་མཁའ་འབུམ་གྱི་དྲིས་ལན་ལས།  དོན་
9-2-127a


ཞགས་ལ་སོགས་པའི་རྒྱུད་ལ་བརྟེན་ནས་བདག་ལྷར་བསྐྱེད་པར་བཤད་པ་དེ་རྣལ་འབྱོར་གྱི་རྒྱུད་ཀྱི་ལུགས་སུ་བགྱིས་པར་གདའ།  ཞེས་གསུངས་ཤིང་སྒྲུབ་ཐབས་དེ་དག་ལ།  བདག་བསྐྱེད་དང་ཡེ་ཤེས་པ་གཞུག་པ་ཙམ་བཤད་
པ་ནི།  རྣལ་འབྱོར་གྱི་རྒྱུད་ལ་ཡང་མི་འགལ་ཞིང་།  དེ་ལས་གཞན་པའི་བླ་མེད་ཀྱི་ཉམས་ལེན་མ་བཤད་པའི་ཕྱིར་རོ་སྙམ་དུ་སེམས་སོ། །གསུམ་པ་ནི།  སློབ་དཔོན་སངས་རྒྱས་གསང་བས་བྱ་སྤྱོད་གཉིས་ཀ་གཅིག་ཏུ་བསྡུས་ནས་ཉམས་ལེན་གྱི་ཚུལ་
འདྲ་བར་བཞེད་ཅིང་།  བདག་བསྐྱེད་ཡོད་པའི་ཤེས་བྱེད་དུ་སྤྱོད་རྒྱུད་རྣམས་དྲངས་པར་མཛད་དེ།  བསམ་གཏན་ཕྱི་མའི་འགྲེལ་པར་འདི་ཡང་གསང་སྔགས་བཟླས་བརྗོད་བྱེད་པའི་བསམ་གཏན་གྱི་ཆ་ནི་བྱ་བར།  བྱ་བའི་རྒྱུད་ཐམས་ཅད་ཀྱི་སྤྱིའི་
ཆོ་ག་བསྡུས་པའི་རྒྱུད་འཕགས་པ་རབ་ཏུ་གྲུབ་པར་བྱེད་པ་དང་།  དཔུང་བཟངས་དང་།  དཔལ་རྟོགས་པ་བསྡུས་པ་ལ་སོགས་པ་དང་།  བྱེ་བྲག་གི་རྒྱུད་འཕགས་པ་རྣམ་པར་སྣང་མཛད་མངོན་པར་རྫོགས་པ་བྱང་ཆུབ་རྣམ་པར་འཕྲུལ་པའི་བྱིན་གྱིས་
རློབ་པ་དང་།  འཕགས་པ་ལག་ན་རྡོ་རྗེ་མངོན་པར་དབང་བསྐུར་བ་དང་།  བྱང་ཆུབ་ཀྱི་སྙིང་པོ་དང་།  རིག་འཛིན་གྱི་སྡེ་སྣོད་ལ་སོགས་པ་ལས་གསུངས་ཏེ།  ཁ་ཅིག་ཏུ་ནི་མི་མངོན་པའི་ཚུལ་དུ་བཤད།  ཁ་ཅིག་ཏུ་གསལ་བར་
བཤད་དེ།  འདི་ལྟར་ཞེས་སོགས་གསུངས་ཤིང་།  དེས་མཛད་པའི་རྣམ་འཇོམས་ཀྱི་སྒྲུབ་ཐབས་དང་།  བྱང་ཆུབ་སྙིང་པོའི་རྣམ་འཇོམས་ཀྱི་སྒྲུབ་ཐབས་དང་།  ཤུ་རངྒ་ཝརྨའི་རྣམ་འཇོམས་ཀྱི་དཀྱིལ་ཆོག་དང་།  ཛེ་ཏ་རི་དང་།
9-2-127b


ཇོ་བོ་རྗེའི་མི་འཁྲུགས་པའི་སྒྲུབ་ཐབས་དང་།  ཀེ་ལ་དྷ་རིའི་དམ་ཚིག་གསུམ་བཀོད་ཀྱི་སྒྲུབ་ཐབས་རྣམས་ཀྱང་བྱ་རྒྱུད་སྤྱོད་རྒྱུད་དང་མཐུན་པར་བཀྲལ་བའི་སྲོལ་ཡིན་ནོ། །བཞི་པ་ནི།  སློབ་དཔོན་བྱང་ཆུབ་མཆོག་གིས།  དེ་བས་
ན་འདི་ལྟར་ཁམས་གསུམ་པོ་འདི་དག་ནི་རྣམ་པར་ཤེས་པ་ཙམ་མོ། །ཞེས་རྣམ་པར་དཔྱད་དེ།  མཐའ་དག་ནམ་མཁའ་ལྟ་བུར་བསམས་ནས།  རང་གི་སེམས་ཀྱི་རྣམ་པ་ཟླ་བའི་དཀྱིལ་འཁོར་ལྟ་བུར་གནས་པ་འདི་ནི་བྱང་ཆུབ་ཀྱི་སེམས་བསྒོམ་པ་ཡིན་ནོ། །དེ་ལ་བཟླས་པའི་
གསང་སྔགས་རྣམས་གོ་རིམ་བཞིན་དུ་བཀོད་པས་དེ་དག་ལས་འོད་ཟེར་སྣ་ཚོགས་རྣམ་པར་འབྱུང་ཞིང་།  སེམས་ཅན་རྣམས་ཚིམ་པར་བྱས་ནས།  ཡང་དེ་བཞིན་གཤེགས་པ་ཐམས་ཅད་ཀྱི་གཟུགས་དང་བཅས་པར་འོད་ཟེར་སླར་ལོག་ནས།  རང་གི་སེམས་ཟླ་བའི་དཀྱིལ་
འཁོར་ལ་ཞུགས་པར་བསམ་མོ། །ཞེས་ཐོག་མར་བྱང་ཆུབ་ཀྱི་སེམས་བསྒོམ་པ།  དེ་ཟླ་བའི་དཀྱིལ་འཁོར་དུ་བསྒྱུར་བ།  དེ་ལ་གསང་སྔགས་བཀོད་པ།  དེ་ལས་ལྷ་ཡི་སྐུ་སྤྲོས་ནས་སེམས་ཅན་གྱི་དོན་བྱས་ཏེ།  སླར་བསྡུས་ནས་ཟླ་བའི་དཀྱིལ་འཁོར་དུ་ཞུགས་པར་བསམ་
པ་རྣམས་བཤད་ཀྱི།  རང་ལྷའི་སྐུར་བསྒོམ་པ་མ་བཤད་པ་དང་།  སློབ་དཔོན་པདྨ་འབྱུང་གནས་ཀྱིས་མཛད་པའི་རྣམ་འཇོམས་ཀྱི་འགྲེལ་པར་དཀྱིལ་འཁོར་བྲིས་ནས་རྒྱན་དགྲམ་པའི་འོག་ཏུ་གཞལ་ཡས་ཁང་བསྐྱེད་དེ།  ལྷ་སྤྱན་དྲངས་ནས་མཆོད་བསྟོད་བྱས་ཏེ།  བཟླས་བརྗོད་
བྱ་བར་གསུངས་ཀྱི།  བདག་ཉིད་ལྷར་བསྐྱེད་པར་མ་གསུངས་པ་དང་།  སུ་མ་ཏི་ཀིརྟིས།  བྱ་རྒྱུད་ཀྱི་རབ་གནས་ཀྱི་སྐབས་སུ།  རྟེན་དང་པོར་ལྷར་མི་བསྐྱེད་པར་ལྷ་སྤྱན་དྲངས་པ་ཉིད་ཐིམ་པས་སོ་སོའི་སྐུར་བསྒོམ་པར་བཤད་པ་རྣམས་སོ། །གསུམ་པ་ནི།  དེ་ལྟར་བྱ་རྒྱུད་ལ་
9-2-128a


རྒྱུད་སྡེ་གོང་མའི་དབང་དུ་བྱས་པའི་འགྲེལ་ལུགས་གསུམ་དང་།  བྱ་རྒྱུད་རང་ལུགས་ལྟར་འགྲེལ་བ་དང་བཞི་ཡོད་པ་ལས།  རྗེ་བཙུན་ས་སྐྱ་པ་རྣམས་ནི།  ལུགས་ཕྱི་མ་འདི་ཉིད་བཞེད་དེ།  བླ་ཆེན་ས་སྐྱ་པའི་རྒྱུད་སྡེ་སྤྱི་རྣམ་དང་།  དེའི་གསུང་སྒྲོས་གཉན་
ཕུལ་བྱུང་བས་བྲིས་པའི་བདེ་མཆོག་གི་ཊཱི་ཀ་དང་།  རྗེ་བཙུན་རྩེ་མོའི་རྒྱུད་སྡེ་སྤྱི་རྣམ་དང་།  རྗེ་བཙུན་གྲགས་པ་རྒྱལ་མཚན་གྱི་མངོན་རྟོགས་ལྗོན་ཤིང་དང་།  ས་པཎ་གྱི་གཞུང་འདི་རྣམས་ལས།  བྱ་རྒྱུད་ལ་བདག་བསྐྱེད་མེད་པའི་ལུགས་དེ་ཉིད་གསལ་བར་འབྱུང་བའི་ཕྱིར་རོ། །
དེ་ལྟར་བཞེད་པའི་རྒྱུ་མཚན་ཡང་བདག་ཉིད་ཆེན་པོ་འདི་རྣམས་ཀྱིས་སྡེ་སྣོད་དང་།  རྒྱུད་སྡེའི་རིམ་པ་ཐམས་ཅད་རང་རང་གི་ལུགས་བཞིན་དུ་སྤྱོད་པ་སངས་རྒྱས་ཀྱི་བསྟན་པ་རྣམ་དག་ཡིན་པར་དགོངས་ཤིང་།  བྱ་རྒྱུད་ལ་རྒྱུད་རང་ངོས་ནས་བདག་བསྐྱེད་བཤད་པ་མེད་ཅིང་།  དེར་མ་
ཟད་རྒྱུད་སྡེ་གོང་མར་བྱ་རྒྱུད་ལ་བདག་བསྐྱེད་མེད་པར་གསལ་བར་བཤད་པས་སོ། །ལུང་དེ་ཉིད་ནི་སྔར་དྲངས་ཟིན་ལ་དོན་ནི་རང་ལྷའི་སྐུར་བསྒོམ་པ་སོགས་ནང་གི་བྱ་བས་འཇིགས་པར་དམིགས་ཤིང་ཤིན་ཏུ་ཁྲུས་དང་གཙང་སྦྲ་བྱེད་པ་དང་།  ཡེ་ཤེས་སེམས་དཔའ་རང་ལ་འཇུག་པའི་
བདེ་བ་དམ་པ་མེད་པ་དང་།  འདི་ལྷའི་སྐུ་ཞལ་ཕྱག་གི་རྣམ་པ་ཅན་གྱི་སྙེམས་པ་སྟེ་ང་རྒྱལ་མེད་པ་དང་།  རྒྱུད་སྡེ་གོང་མར་བཤད་པ་ལྟར་གྱི་རྨད་དུ་བྱུང་བའི་སྤྱོད་ཡུལ་མིན་པ་དང་།  འཁོར་བའི་སྡུག་བསྔལ་གྱི་སྐྱོན་དང་།  དེའི་རྒྱུ་བདེན་འཛིན་གྱི་རྟོག་པ་རབ་ཏུ་གཅོད་པ་སོ་སོར་རྟོག་པའི་
ཤེས་རབ་བསྒོམ་པ་སྟེ།  དེ་ལྟ་བུའི་ལམ་གྱིས་སངས་རྒྱས་སྒྲུབ་པར་བྱེད་པ་ནི་བྱ་བའི་རྒྱུད་ལ་བཞུགས་སོ། །ཞེས་བྱ་བ་ཡིན་ནོ། །གཞན་ཡང་རིགས་པ་ནི་རྡོ་རྗེ་གུར་ལ་སོགས་པའི་རྒྱུད་སྡེ་རྣམས་ལས་རྒྱུད་སྡེ་བཞིར་གྲངས་ངེས་པར་གསུངས་པ་ལྟར་དུ་འདོད་དགོས་ལ།
9-2-128b


  དེའི་ཚེ་བྱ་རྒྱུད་ལ་བདག་བསྐྱེད་ཡོད་ན་དེ་དང་།  སྤྱོད་རྒྱུད་ལ་ཁྱད་པར་འབྱེད་བྱེད་གཞན་མེད་པས་རྒྱུད་སྡེ་གཅིག་ཏུ་འགྱུར་བའི་སྐྱོན་ཡོད་དོ། །འདི་བཞིན་དུ་དཔལ་འཛིན་གྱི་དགྲ་ནག་གི་འགྲེལ་པ་དང་།  ལྷའི་རིགས་ཀྱི་བློ་གྲོས་ཀྱི་གུར་གྱི་འགྲེལ་པ་དང་།  ཨིནྡྲ་བྷཱུ་ཏིའི་
བདེ་མཆོག་གི་འགྲེལ་པ་རྣམས་ལས་ཀྱང་།  བྱ་རྒྱུད་ལ་བདག་བསྐྱེད་མེད་པའི་ལུགས་དེ་ཉིད་གསལ་བར་འབྱུང་ཞིང་།  དང་པོ་གཉིས་ཀྱི་ལུང་ནི་སྔར་དྲངས་ཟིན་ལ།  ཕྱི་མ་ནི་གསང་བ་རྡོ་རྗེ་ཐེག་པ་ལ་གནས་པ།  བྱ་བ་དང་སྤྱོད་པའི་སྒོ་ནས་ཀྱང་རིག་སྔགས་ཀྱི་རྗེས་སུ་གནང་བ་ཙམ་
ལ་བརྟེན་ནས།  བདག་དང་ལྷ་ཐ་དད་དུ་ལྟ་བ་ཅན་ཡོངས་སུ་བརྟགས་པ་མཚན་བཅས་དམིགས་པ་ལས་གྲུབ་པའི་དོན་མངོན་དུ་བྱེད་པར་འདོད་པའོ། །ཞེས་ཟེར་རོ། །བཞི་པ་ནི།  ཕྱིས་ཀྱི་མཁས་པ་ཁ་ཅིག །ཡེ་ཤེས་རྡོ་རྗེ་ཀུན་ལས་བཏུས་ལས།  བདག་ཉིད་ལྷའི་སྙེམས་པ་
མེད་པ་དང་།  ཡེ་ཤེས་སེམས་དཔའི་བདེ་བ་དམ་པ་མེད་པ་དང་།  ཞེས་བྱ་རྒྱུད་ལ་བདག་བསྐྱེད་མེད་པར་བཤད་པ་ནི།  དུས་ཐམས་ཅད་དུ་ལྷའི་སྙེམས་པ་མེད་པ་ལ་དགོངས་པ་ཡིན་གྱི།  བདག་ལྷའི་སྐུར་བསྐྱེད་པ་གཏན་ནས་མེད་པ་མ་ཡིན་ཏེ།  སློབ་དཔོན་བྱང་ཆུབ་མཆོག་གི་
ལེགས་གྲུབ་ཀྱི་མངོན་རྟོགས་དང་།  སངས་རྒྱས་གསང་བའི་བསམ་གཏན་ཕྱི་མའི་འགྲེལ་པ་དང་།  རྣམ་འཇོམས་ཀྱི་འགྲེལ་པ་རྣམས་སུ།  ལྷ་དྲུག་གི་སྒོ་ནས་ལྷའི་སྐུར་བསྒོམ་པ་བསྟན་པའི་ཕྱིར་རོ། །ཞེས་གསུངས་སོ། །དེ་ལ་སངས་རྒྱས་གསང་བའི་ལུང་གིས་བྱ་རྒྱུད་
ལ་བདག་བསྐྱེད་ཡོད་པར་འདོད་ཅིང་།  དུས་ཐམས་ཅད་དུ་ལྷའི་སྙེམས་པ་མེད་པར་འདོད་པ་ནང་འགལ་ཏེ།  སློབ་དཔོན་དེས་མཛད་པའི་རྣམ་འཇོམས་ཀྱི་འགྲེལ་པ་ལས།  དགེ་བའི་རྩ་བ་ཡང་རྒྱ་ཆེར་བསྔོ།  འཕགས་པ་རྣམས་ལ་ཡང་མཆོད་པའི་ཕྱིར་བདག་ལས་ཀྱི་རྡོ་རྗེ་
9-2-129a


སེམས་དཔར་བྱིན་གྱིས་བརླབ་པ་ནི།  ཞེས་སྒྲུབ་ཐབས་རྫོགས་པའི་རྗེས་ལ་རང་ལས་ཀྱི་རྡོ་རྗེ་སེམས་དཔར་བྱིན་གྱིས་བརླབས་ནས་ཐུན་མཚམས་ཀྱི་བྱ་བ་རྣམས་བྱེད་པར་བཤད་པའི་ཕྱིར་དང་།  སློབ་དཔོན་དེས་བྱ་རྒྱུད་ལ་བདག་བསྐྱེད་ཡོད་པའི་
ཤེས་བྱེད་དུ་ཕྱག་རྡོར་དབང་བསྐུར་སོགས་འདྲེན་པ་ཡིན་ལ།  དེ་ལས་བདག་ཉིད་རང་གི་ལྷའི་གཟུགས་སུ་བྱས་ལ་ཐེ་ཚོམ་མེད་པའི་ཡིད་ཀྱིས་ང་རྒྱལ་བསྐྱེད་ཅིང་འགྲོ་ཡང་རུང་།  འགྲེང་ཡང་རུང་།  འདུག་ཀྱང་རུང་།  རྟག་ཏུ་དུས་ཐམས་ཅད་དུ་བསྐྱོད་ཀྱང་མི་གཡོ་བ་དེའི་
ཚེ་ཞེས་གསུངས་པ་དང་འགལ་བའི་ཕྱིར་རོ། །དེས་ན་སངས་རྒྱས་གསང་བས་བྱ་རྒྱུད་ལ་བདག་བསྐྱེད་ཡོད་པར་བཤད་ཀྱང་།  བྱ་རྒྱུད་རང་ངོས་ནས་བདག་བསྐྱེད་ཡོད་པར་མི་འགྲུབ་སྟེ།  དེས་བྱ་རྒྱུད་ལ་བདག་བསྐྱེད་ཡོད་པའི་ཤེས་བྱེད་དུ་སྤྱོད་རྒྱུད་རྣམས་དྲངས་པའི་ཕྱིར་
དང་།  རྣམ་སྣང་མངོན་བྱང་སོགས་སྤྱོད་རྒྱུད་རྣམས་ལ་ཡང་བྱ་རྒྱུད་ཅེས་པའི་ཐ་སྙད་མཛད་པའི་ཕྱིར་ན།  བྱ་སྤྱོད་གཉིས་རྒྱུད་སྡེ་གཅིག་ཏུ་བསྲེས་པའི་ལུགས་ཡིན་པའི་ཕྱིར་རོ། །ཡང་ཕྱིས་ཀྱི་བླ་མ་ཁ་ཅིག །བྱ་རྒྱུད་ལ་བདག་བསྐྱེད་མེད་པར་བཤད་པའི་དོན་ནི།  ཤས་ཆེར་བའི་མི་
སྲོག་རྩོལ་ལ་སོགས་པ་བསམ་གཏན་གྱི་ཡན་ལག་རྣམས་བསྒོམ་མི་ནུས་པའི་གང་ཟག་ལ་དགོངས་པ་ཡིན་ལ།  རང་གི་ངོ་བོ་བདག་བསྐྱེད་ཡོད་པ་ཁོ་ནར་སློབ་དཔོན་སངས་རྒྱས་གསང་བས་བཤད་པས།  ཡན་ལག་བཞི་ལ་སོགས་པའི་ལྷའི་རྣལ་འབྱོར་ལ་བྱ་སྤྱོད་གཉིས་འདྲ་ལ་རྣམ་
སྣང་མངོན་བྱང་ལྟ་བུ་གདུལ་བྱའི་དབང་གིས་བྱ་རྒྱུད་དུའང་གསུངས་པས།  བྱ་སྤྱོད་གཉིས་གདུལ་བྱའི་དབང་གིས་འབྱེད་པ་མ་གཏོགས་པ།  རྒྱུད་རང་གི་ངོ་བོའི་སྒོ་ནས་མི་འབྱེད་པས་སྤྱོད་རྒྱུད་ལ་བདག་བསྐྱེད་ཡོད་པ་ལྟར་བྱ་རྒྱུད་ལ་ཡང་ཡོད་དེ།  ཕྱག་རྡོར་དབང་བསྐུར་བ་དང་།  རྣམ་
9-2-129b


སྣང་མངོན་བྱང་ལས།  རང་ཉིད་ལྷར་བསྒོམ་པར་གསུངས་པའི་ཕྱིར་དང་།  ལེགས་གྲུབ་ཀྱི་མངོན་རྟོགས་ལས།  བྱ་བའི་རྒྱུད་ལས་ལྷ་བསྒྲུབ་པའི་རྣལ་འབྱོར་གྱི་རིམ་པ་མ་བསྟན་ནོ་སྙམ་དུ་བསམ་པར་མི་བྱ་སྟེ།  བཅོམ་ལྡན་འདས་ཀྱིས་ཕལ་ཆེར་མ་བསྟན་ཀྱང་ཕྱག་ན་རྡོ་རྗེ་དབང་
བསྐུར་བ་དང་དེ་ཁོ་ན་ཉིད་བཅུ་པ་ལ་འཇུག་པ་དག་ལས་གཙོ་བོར་བསྟན་ཏོ། །གཅིག་ཏུ་ནི་དངོས་གྲུབ་ཐམས་ཅད་ནི་གསང་སྔགས་ཀྱི་ལྷ་དང་།  དེ་ཁོ་ན་ཉིད་ལ་རག་ལས་པ་ཡིན་ལ་དེ་དག་རྣམ་པར་ཉམས་ན་ཞི་བ་ལ་སོགས་པའི་ལས་རྣམས་འགྲུབ་པར་མི་འགྱུར་ལ་བླ་མ་རྒྱུད་པ་དང་
རྒྱུད་ཀྱི་ཁྱད་པར་ཅུང་ཟད་དཔྱད་པ་ལས་ཁོང་དུ་ཆུད་པར་བྱའོ། །དེ་ལྟར་རིམ་པ་འདིས་ལྷ་ཉིད་ཀྱི་སྐུ་བསྐྱེད་པར་བྱའོ། །ཞེས་གསུངས་པའི་ཕྱིར་རོ་ཞེས་དང་།  ཡང་བསམ་གཏན་ཕྱི་མར།  སྒྲ་དང་སེམས་དང་གཞི་ལ་གཞོལ། །ཞེས་པའི་འགྲེལ་པར།  གཞི་ནི་དེ་བཞིན་གཤེགས་པའི་
སྐུའི་རང་བཞིན་ནོ། །གཞི་གཉིས་པ་ནི་རང་གི་ལྷའི་གཟུགས་སོ་ཞེས་དང་།  འདིའི་གཞིའི་ཚིག་དོན་རང་ལྷར་བསྐྱེད་པའི་གཞི་ལ་བྱར་མི་རུང་ན།  རྣམ་སྣང་མངོན་བྱང་གི་གཞི་ནི།  ཞེས་པ་རྐང་པ་གཉིས་ཀྱིས་ཀྱང་བདག་ཉིད་ལྷར་བསྐྱེད་པ་མ་བསྟན་པར་འགྱུར་ཏེ།  ཁྱད་པར་མེད་པའི་
ཕྱིར་རོ། །བྱ་རྒྱུད་ལ་བདག་བསྐྱེད་མེད་ན།  རྒྱུད་སྡེ་གོང་མར་ལྷ་ཕོ་མོ་ཕན་ཚུན་བལྟས་པའི་བདེ་བ་ལམ་དུ་བྱེད་པ་ཡོད་པར་གསུངས་པ་དང་འགལ་ཏེ།  རྣམ་སྣང་དང་།  སྤྱན་མ་སོགས་ཀྱི་ལྷ་ལ་ཆགས་པ་མི་སྲིད་པས་ལྷ་དེའི་ང་རྒྱལ་འཆང་བའི་སྒྲུབ་པ་པོ་ལ་བྱ་བ་སྐབས་ཀྱི་དོན་ཡིན་པའི་
ཕྱིར་རོ། །ཞེས་བྱ་བ་བྲིས་པ་དེ་རྣམས་རིམ་པ་བཞིན་མི་འཐད་པར་སྟོན་པ་ནི།  འོ་ན་བྱ་རྒྱུད་ཤས་ཆེར་ལ་བལྟས་པའི་བདེ་བ་ལམ་བྱེད་མེད་པར་འགྱུར་ཏེ།  བྱ་རྒྱུད་ཤས་ཆེར་ལ་བདག་བསྐྱེད་མེད་པའི་ཕྱིར་རོ། །སྲོག་རྩོལ་ལ་སོགས་པ་བསམ་གཏན་གྱི་ཡན་ལག་བསྒོམ་མི་ནུས་པའི་གང་
9-2-130a


ཟག་དེ་བྱ་རྒྱུད་ཀྱི་གདུལ་བྱའི་གཙོ་བོ་ཡིན་ནམ་མ་ཡིན།  དང་པོ་ལྟར་ན་གདུལ་བྱའི་གཙོ་བོ་ལ་བསྟན་པའི་ལམ་དེ་བྱ་རྒྱུད་ཀྱི་ལམ་རྣམ་དག་མ་ཡིན་པར་འགྱུར་ཏེ།  བྱ་རྒྱུད་ཀྱི་ལམ་རྣམ་དག་ལ་བདག་བསྐྱེད་དགོས་ཤིང་།  བསམ་གཏན་གྱི་ཡན་ལག་བསྒོམ་
མི་ནུས་པ་དེ་ལ་བདག་བསྐྱེད་མ་བསྟན་པའི་ཕྱིར་རོ། །གཉིས་པ་ལྟར་ན།  བྱ་རྒྱུད་ཤས་ཆེ་བ་རྒྱུད་རང་གི་གདུལ་བྱའི་གཙོ་བོ་མ་ཡིན་པ་ལ་བསྟན་པར་འགྱུར་ཏེ།  བྱ་རྒྱུད་ཤས་ཆེར་ལ་བདག་བསྐྱེད་མེད་ཅིང་།  བདག་བསྐྱེད་མེད་པ་རྣམས་བསམ་གཏན་གྱི་ཡག་ལག་བསྒོམ་མི་ནུས་པ་དེ་ལ་
བསྟན་པའི་ཕྱིར་རོ། །སངས་རྒྱས་གསང་བའི་ལུང་གིས་བྱ་རྒྱུད་ལ་བདག་བསྐྱེད་ཡོད་པར་མི་འགྲུབ་པ་ནི་གོང་དུ་བཤད་ཟིན་ཅིང་།  གཞན་ཡང་སློབ་དཔོན་དེས་བསམ་གཏན་ཕྱི་མའི་འགྲེལ་པར།  བྱ་རྒྱུད་ལ་བདག་བསྐྱེད་ཡོད་པའི་ཤེས་བྱེད་དུ་དྲངས་པའི་ལེགས་གྲུབ་དང་།  དཔུང་བཟང་
གཉིས་ལས་ནི་བདག་བསྐྱེད་བསྟན་པ་མི་སྣང་ལ།  རིག་སྔགས་འཆང་བའི་སྡེ་སྣོད་ཀྱི་ལུང་ནི།  རི་མོ་ལ་གནས་པའི་བསམ་གཏན་བྱ་བའི་ལུང་དུ་སྣང་ངོ་། །རྟོག་བསྡུས་ནི་བོད་ན་མི་བཞུགས་ཀྱང་ཡོ་གའི་འགྲེལ་པ་ཨ་ཝ་ཏ་རར།  རྟོག་པ་ཐམས་ཅད་བསྡུས་པ་རྣལ་འབྱོར་གྱི་རྒྱུད་ཐམས་
ཅད་ཀྱི་དགོངས་པ་འགྲེལ་པ་ལས་ཀྱང་།  ཞེས་རྣལ་འབྱོར་གྱི་རྒྱུད་དུ་བཤད་ཅིང་།  རྣམ་སྣང་མངོན་བྱང་དང་།  ཕྱག་རྡོར་དབང་བསྐུར་བ་གཉིས་ནི།  སྤྱོད་རྒྱུད་ཡིན་པས་དེ་གསུམ་གྱི་ལུང་གིས་བྱ་རྒྱུད་རང་ངོས་ནས་བདག་བསྐྱེད་ཡོད་པར་མི་འགྲུབ་བོ། །ཡང་རྣམ་སྣང་མངོན་བྱང་ལྟ་བུ་
གདུལ་བྱའི་དབང་གིས་བྱ་རྒྱུད་དུ་གསུངས་པའི་དོན།  བྱ་རྒྱུད་དུ་འགྲེལ་བའི་གང་ཟག་ཡོད་པ་ལ་བྱེད་དམ།  བྱ་རྒྱུད་ཀྱི་གདུལ་བྱས་ཉམས་སུ་ལེན་དུ་རུང་བ་ལ་བྱེད།  དང་པོ་ལྟར་ན།  གསང་བ་འདུས་པ་ཡང་ཡོ་གར་འགྱུར་ཏེ།  གྲུབ་ཆེན་ཀུན་སྙིང་གིས་བཀྲལ་བའི་ཕྱིར་རོ། །གཉིས་
9-2-130b


པ་ལྟར་ན་རྒྱུད་སྡེ་གོང་མ་གསུམ་ཀ་ཡང་བྱ་རྒྱུད་དུ་འགྱུར་ཅིང་དེ་གཉིས་ཀ་ལ་འདོད་ན།  རྒྱུད་སྡེ་བཞི་ཀ་གདུལ་བྱའི་དབང་གིས་འབྱེད་པ་མ་གཏོགས་པ་རྒྱུད་རང་གི་ངོ་བོའི་སྒོ་ནས་མི་འབྱེད་པར་མཚུངས་སོ། །བྱ་སྤྱོད་གཉིས་གདུལ་བྱའི་དབང་གིས་འབྱེད་ཀྱི་རང་གི་ངོ་བོའི་སྒོ་ནས་
མི་འབྱེད་པ་ལ་དཔྱད་ན་རྣམ་སྣང་མངོན་བྱང་ལྟ་བུ་གདུལ་བྱའི་དབང་གིས་སྤྱོད་རྒྱུད་ཡིན་གྱི་བྱ་རྒྱུད་མ་ཡིན་ཞེས་སྨྲའམ།  གདུལ་བྱའི་དབང་གིས་བྱ་རྒྱུད་ཡིན་གྱི་སྤྱོད་རྒྱུད་མ་ཡིན་ནོ་ཞེས་སྨྲའམ།  གདུལ་བྱའི་དབང་གིས་གཉིས་ཀ་ཡིན་ཞེས་སྨྲ།  དང་པོ་ལྟར་ན་དེ་གདུལ་བྱའི་དབང་
གིས་བྱ་རྒྱུད་དུ་གསུངས་པར་ཁས་བླངས་པ་དང་དངོས་སུ་འགལ་ལོ། །གཉིས་པ་ལྟར་ན་དེ་སྤྱོད་རྒྱུད་གཏན་མ་ཡིན་པར་འགྱུར་ཏེ།  གདུལ་བྱའི་དབང་གིས་བྱ་རྒྱུད་ཁོ་ན་ཡིན་ཅིང་རང་གི་ངོ་བོའི་སྒོ་ནས་བྱ་སྤྱོད་གཉིས་ལ་ཁྱད་པར་མེད་པའི་ཕྱིར་རོ། །གསུམ་པ་ལྟར་ན་བྱ་སྤྱོད་
གཉིས་གདུལ་བྱའི་དབང་གིས་འབྱེད་པར་ཁས་བླངས་པ་དང་འགལ་ལོ། །ཡང་བྱ་སྤྱོད་གཉིས་ཀ་གདུལ་བྱའི་དབང་གིས་འབྱེད་པའི་ཤེས་བྱེད་དུ་རྣམ་སྣང་མངོན་བྱང་གདུལ་བྱའི་དབང་གིས་བྱ་རྒྱུད་དུ་གསུངས་པའི་ཕྱིར།  ཞེས་བཀོད་པ་ནི་གདུལ་བྱའི་དབང་གིས་
སོ་སོར་འབྱེད་དེ།  གདུལ་བྱའི་དབང་གིས་སྤྱོད་རྒྱུད་ཀྱང་བྱ་རྒྱུད་ཡིན་པའི་ཕྱིར།  ཞེས་པར་སོང་བས་འདི་ལ་ལྷ་དང་བཅས་པའི་འཇིག་རྟེན་གྱིས་ཁྲེལ་བར་མི་འགྱུར་རམ།  གཞན་ཡང་རྣམ་སྣང་མངོན་བྱང་ལ་སོགས་པའི་སྤྱོད་རྒྱུད་རྣམས་བྱ་རྒྱུད་དུ་ཁས་ལེན་ནམ།  བྱ་རྒྱུད་མ་
ཡིན་པར་སྤྱོད་རྒྱུད་དུ་ཁས་ལེན།  དང་པོ་ལྟར་ན་རྒྱུད་འགྲེལ་ཚད་ལྡན་རྣམས་ལས་རྒྱུད་སྡེ་བཞིར་གསུངས་ཤིང་།  ཁྱེད་རང་གིས་ཀྱང་ཁས་བླངས་པ་དང་འགལ་ལོ། །གཉིས་པ་ལྟར་ན་གདུལ་བྱའི་དབང་གིས་དེ་ལྟར་དུ་ཁས་ལེན་ནམ།  རང་གི་ངོ་བོའི་སྒོ་ནས་ཁས་ལེན།  དང་
9-2-131a


པོ་ལྟར་ན་དེ་གདུལ་བྱའི་དབང་གིས་བྱ་རྒྱུད་དུ་གསུངས་པར་ཁས་བླངས་པ་དང་དངོས་སུ་འགལ།  ཕྱི་མ་ལྟར་ན་བྱ་སྤྱོད་གཉིས་རང་གི་ངོ་བོའི་སྒོ་ནས་མི་འབྱེད་པར་ཁས་བླངས་པ་དང་འགལ་ལོ། །འདིའི་རྗེས་འབྲངས་གངས་རིའི་ཁྲོད་ན་གནས་པ་རྣམས་ཀྱིས་
ཉིན་མཚན་བརྒྱར་འབད་པས་སོམས་ལ་ལན་སྨྲོས་ཤིག །ཡང་འདི་དང་ཕྱོགས་སྔ་གོང་མ་གཉིས་ཀས་ལེགས་གྲུབ་ཀྱི་མངོན་རྟོགས་ལས་བདག་བསྐྱེད་བསྟན་པར་འདོད་པ་ནི་ཤིན་ཏུ་འཁྲུལ་ཏེ།  དེ་ལས་རིམ་པ་འདིས་ལྷ་ཉིད་ཀྱི་སྐུ་བསྐྱེད་པར་བྱའོ། །ཞེས་པའི་མཇུག་
ཏུ་མདུན་བསྐྱེད་བསྒྲུབ་ཚུལ་བསྟན་གྱི།  སྒྲུབ་ཐབས་དེའི་དབུ་ཞབས་གང་དུ་ཡང་བདག་ཉིད་ལྷར་བསྐྱེད་པ་མ་གསུངས་པའི་ཕྱིར་རོ། །འོ་ན་སྔར་དྲངས་པའི་ལུང་དེའི་དོན་ཇི་ལྟར་ཡིན་སྙམ་ན།  བྱ་བའི་རྒྱུད་ལས།  མདུན་དུ་ལྷ་བསྒྲུབ་པའི་རྣལ་འབྱོར་གྱི་རིམ་པ་མ་བསྟན་ནོ་
སྙམ་དུ་བསམ་པར་མི་བྱ་སྟེ།  བཅོམ་ལྡན་འདས་ཀྱིས་བྱ་བ་སོ་སོའི་རྒྱུད་ཕལ་ཆེར་ལས་མ་བསྟན་ཀྱང་།  ཕྱག་རྡོར་དབང་བསྐུར་སོགས་ནས་བསྟན་ཞེས་པའི་དོན་ནོ། །འོ་ན་ཕྱག་རྡོར་དབང་བསྐུར་སོགས་ནས་བདག་བསྐྱེད་ཀྱང་གསུངས་སོ་སྙམ་ན་སྐྱོན་མེད་དེ།  སློབ་དཔོན་འདིས་
བྱ་སྤྱོད་གཉིས་ཀ་ལ་བྱ་རྒྱུད་ཀྱི་ཉམས་ལེན་སྦྱར་ནས་བདག་བསྐྱེད་མེད་པར་འདོད་པའི་ཕྱིར་རོ། །བསམ་གཏན་ཕྱི་མའི་གཞི་ཡི་ཚིག་དོན་རང་ལྷར་བསྐྱེད་པ་ལ་བྱར་མི་རུང་ན།  རྣམ་སྣང་མངོན་བྱང་གི་གཞི་ནི་ཞེས་པ་རྐང་པ་གཉིས་ཀྱིས་ཀྱང་བདག་ཉིད་ལྷར་བསྐྱེད་པ་མ་བསྟན་
པར་འགྱུར་རོ། །ཞེས་སྨྲ་བ་ནི་རྣམ་པར་མ་བརྟགས་པ་སྟེ།  འོ་ན་རྣམ་སྣང་མངོན་བྱང་ལས་གཞི་གཉིས་མ་གསུངས་པར་འགྱུར་ཏེ།  བསམ་གཏན་ཕྱི་མར་སྒྲ་དང་སེམས་དང་གཞི་ལ་གཞོལ། །ཞེས་གཞི་གཅིག་ལས་མ་གསུངས་པའི་ཕྱིར་རོ། །ཁྱབ་པ་ཁས་བླངས་སོ། །དེས་ན་
9-2-131b


བསམ་གཏན་ཕྱི་མའི་གཞིའི་ཚིག་དོན་རང་ལྷར་བསྐྱེད་པ་ལ་བཤད་ན།  དེའི་དོན་མདུན་དུ་ལྷ་བསྐྱེད་པ་ལ་བཤད་དུ་མི་རུང་བར་འགྱུར་ཏེ།  གཞི་གཅིག་ལས་མེད་པའི་ཕྱིར་རོ། །འདོད་ན་རྣམ་སྣང་མངོན་བྱང་གི་གཞི་གཉིས་པ་ནི་ཞེས་པའི་རྐང་པ་གཉིས་ཀྱིས་མདུན་དུ་ལྷ་བསྐྱེད་
པ་མ་བསྟན་པར་འགྱུར་ཅིང་།  ཁྱབ་པ་ཁས་བླངས་སོ། །འོ་ན་བསམ་གཏན་ཕྱི་མའི་འགྲེལ་པར་གཞི་གཉིས་གསུངས་པ་དང་འགལ་ལོ་སྙམ་ན།  སློབ་དཔོན་དེས་བྱ་སྤྱོད་གཉིས་ཀ་ལ་སྤྱོད་རྒྱུད་ཀྱི་ཉམས་ལེན་སྦྱར་བར་བཞེད་ནས་བསམ་གཏན་ཕྱི་མའི་གཞི་གཅིག་པོ་དེ་
ཉིད་ལ་རྣམ་སྣང་མངོན་བྱང་གི་གཞི་གཉིས་ཀའི་དོན་བཤད་པ་ཡིན་པས་སྐྱོན་མེད་དོ། །དེས་ན་རྣམ་སྣང་མངོན་བྱང་ལས་གཞི་གཉིས་གསུངས་ཤིང་།  བསམ་གཏན་ཕྱི་མར་གཅིག་ལས་མ་གསུངས་པས་ཀྱང་།  བྱ་རྒྱུད་ལ་བདག་བསྐྱེད་མེད་པར་གྲུབ་བོ། །འདི་ནི་ཁོ་བོ་འབའ་
ཞིག་གིས་རྟོགས་པས་ལུགས་འདི་ལ་མོས་པ་ཡོད་པ་རྣམས་ཀྱིས་དགའ་བ་སྒོམས་ཤིག །བལྟས་པའི་བདེ་བ་ལམ་བྱེད་ཡོད་ན།  ལྷ་དེའི་ང་རྒྱལ་བསྒོམ་པའི་སྒོ་ནས་བལྟས་པའི་བདེ་བ་བསྒོམ་པར་འདོད་པ་ནི་དོན་མ་རྟོགས་པ་སྟེ།  རང་ཉིད་ཐ་མལ་དུ་གནས་ནས་མདུན་གྱི་ལྷ་
ལ་བལྟས་པས་བལྟས་པའི་བདེ་བ་འདྲེན་ནུས་པའི་ཕྱིར་རོ། །ལྔ་པ་ནི་དེ་ལྟར་བྱ་རྒྱུད་ཀྱི་ལྷ་ལ་རྒྱུད་སྡེ་གོང་མའི་ཉམས་ལེན་སྦྱར་བ་དང་།  བྱ་བ་སྤྱིའི་རྒྱུད་ཆེན་བཞི་ནས་བཤད་པའི་ཉམས་ལེན་སྦྱར་བ་གཉིས་ལས།  དང་པོ་ལ་སྤྱོད་རྒྱུད་ཀྱི་ཉམས་ལེན་སྦྱར་ན་བདག་བསྐྱེད་ཡོད་ཅིང་།
རྣལ་འབྱོར་རྒྱུད་ཀྱི་ཉམས་ལེན་སྦྱར་ན་ཡེ་ཤེས་པ་གཞུག་པ་ཡང་ཡོད་ལ།  བླ་མེད་ཀྱི་ཉམས་ལེན་སྦྱར་ན་རིམ་གཉིས་ཀྱང་ཡོད་དོ། །དེ་དག་གིས་བྱ་རྒྱུད་རང་ངོས་ནས་བདག་བསྐྱེད་ཡོད་པ་མི་འགྲུབ་སྟེ།  དཔེར་ན་སེམས་ཙམ་པའི་གཞུང་ནས་བཤད་པའི་བྱང་སེམས་ཀྱི་སྤྱོད་
9-2-132a


པ་ལ་དབུ་མའི་ལྟ་བ་སྦྱར་ནས་ཉམས་སུ་ལེན་པའི་ཚེ།  སེམས་ཙམ་པ་རང་ངོས་ནས་དབུ་མའི་ལྟ་བ་ཡོད་པར་མི་འགྲུབ་པ་བཞིན་ནོ། །གཉིས་པ་ནི།  བདག་བསྐྱེད་སོགས་གཏན་ནས་མེད་དེ།  སྤྱི་རྒྱུད་བཞི་དང་།  སོ་སོའི་རྒྱུད་རྣམས་ནས་བདག་བསྐྱེད་མ་
གསུངས་ཤིང་།  བདག་བསྐྱེད་མེད་པར་རྒྱུད་སྡེ་གོང་མ་ནས་དངོས་སུ་གསུངས་པའི་ཕྱིར་རོ། །གནད་འདི་དག་ནི་འགྲན་ཟླ་ཀུན་དང་བྲལ་བའི་རྗེ་བཙུན་བླ་མའི་བཀའ་དྲིན་ལས།  ཁོ་བོས་ཀྱང་ཇི་ལྟ་བ་བཞིན་སྨྲ་བར་ནུས་པ་ཡིན་ནོ། །གཉིས་པ་གཞུང་གི་དོན་ནི།  བྱ་བའི་
རྒྱུད་ལ་ཞེས་སོགས་ཉེར་གཉིས་ཏེ།  བདག་བསྐྱེད་ཡོད་པའི་དེ་ལྟར་བྱེད་ན།  སྨྱུང་གནས་མེད་དེ་བདག་ཉིད་སོགས་སོ། །གལ་ཏེ་སྨྱུང་གནས་བྱེད་འདོད་ན། །རང་ཉིད་ཐ་མལ་སོགས་ཏེ་གཞུང་ལྷག་མ་རྣམས་ཀྱིས་ནི།  དཔུང་བཟང་དང་ལེགས་གྲུབ་ནས་བཤད་པའི་བྱ་
རྒྱུད་དང་འབྲེལ་བའི་ཀུན་དུ་སྤྱོད་པ་སྟོན་ནོ། །གཉིས་པ་ནི།  སྤྱོད་དང་རྣལ་འབྱོར་ཞེས་སོགས་བཅུ་གསུམ་སྟེ།  རྒྱུད་སྡེ་དེ་གཉིས་ལས་ལས་ཚོགས་བསྒྲུབ་པ་འགའ་ཞིག་ལ་གཙང་སྦྲ་བཤད་པ་ཡོད་དེ།  ཕྱག་རྡོར་དབང་བསྐུར་བའི་རྒྱུད་ལས།  དེས་ཟས་མི་འཚལ་བར་
ལག་ན་རྡོ་རྗེ་ལ་བལྟ་ཞིང་ལན་གསུམ་བཟླས་བརྗོད་བགྱིས་ན་རྒྱལ་སྲིད་ཐོབ་པར་འགྱུར།  ཅེས་དང་།  རྡོ་རྗེས་འོག་གི་རྒྱུད་དུ། བཅོམ་ལྡན་འདས་ཕྱག་ན་རྡོ་རྗེ་དང་། གནོད་སྦྱིན་རྣམས་ལ་དཀར་གསུམ་གྱིས་མཆོད་པར་བྱའོ། །ཆང་ནི་ཀུན་ཏུ་སྤང་བར་བགྱིའོ། །ཤ་རྣམས་
ནི་འོས་པ་དང་ཤིས་པ་དྲང་བར་བྱའོ་ཞེས་སོ། །རབ་ཏུ་གནས་པའི་རྒྱུད་ལས།  བདེར་གཤེགས་ལྷག་མ་འདི་དག་ནི། །ཟོ་ཤིག་སྡིག་པ་དག་པར་འགྱུར། །ཞེས་གསུངས་ལ།  འབྱུང་པོའི་གཏོར་མ་ནི་འདིར་ཡང་མི་ཟ་སྟེ།  རྒྱུད་སྡེ་འོག་མ་གསུམ་ལ་སྣང་བ་ཐམས་ཅད་ལྷར་བསྒོམ་
9-2-132b


པ་མེད་པའི་ཕྱིར།  གསུམ་པ་ནི།  རྣལ་འབྱོར་ཆེན་པོའི་ཞེས་སོགས་བདུན་ཏེ།  རྒྱུད་དེ་ལས་ཨ་ཝ་དྷཱུ་ཏཱི་གཉིས་སྤངས་ཀྱི་སྤྱོད་པ་སོགས་ལ་འབྱུང་པོའི་གཏོར་མ་ཟ་བའང་གནང་སྟེ།  ཀྱཻ་རྡོ་རྗེ་ལས།  བཟའ་བཅའ་དེ་ཉིད་བཏུང་བ་ཉིད། །ཇི་ལྟར་རྙེད་པ་རབ་ཏུ་བཟའ། །ཡིད་འོང་
མི་འོང་རྣམ་རྟོག་ཕྱིར། །ཞེན་པ་ཙམ་དུའང་མི་བྱའོ། །ཞེས་སོ། །དཀའ་ཐུབ་ལ་སོགས་པའི་བརྟུལ་ཞུགས་འགོག་སྟེ།  གསང་བ་འདུས་པ་ལས།  དཀའ་ཐུབ་དཀའ་སྤྱད་མི་བཟོད་པ། །བསྟེན་ན་འགྲུབ་པར་མི་འགྱུར་ཅིང་། །ཅེས་སོ། །འཇུག་པ་བདེ་བའི་རྣལ་འབྱོར་ནི། 
འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པར་ནི་བསྟེན་བཞིན་དུ། །ཞེས་པ་ལྟར་བླ་མེད་དུ་འཇུག་པ་བདེ་བའི་རྣལ་འབྱོར་འདི་དག་རྒྱས་པར་སོགས་སོ། །གསུམ་པ་ནི།  གྲུབ་མཐའི་རྣམ་དབྱེ་ཞེས་སོགས་ཚིགས་བཅད་གཅིག་གོ།  བཞི་པ་ཕྱག་ཆེན་གོམས་
པས་འཁོར་འདས་བསྲེ་བའི་སྤྱོད་པ་ལ་གཉིས་ཏེ།  སྤྱིའི་དོན་དང་།  གཞུང་གི་དོན་ནོ། །དང་པོ་ལ་གཉིས་ཏེ།  སྤྱོད་པའི་སྔོན་དུ་འགྲོ་བ་དྲོད་དང་།  དྲོད་ཐོབ་པས་སྤྱད་པའི་སྤྱོད་པ་དངོས་སོ། །དང་པོ་ལ་དྲུག་སྟེ།  ངོ་བོ།  དབྱེ་བ།  སོ་སོའི་མཚན་ཉིད།  མ་ཐོབ་པ་ཐོབ་པར་བྱེད་
པའི་ཐབས།  ཐོབ་པ་བརྟན་པར་བྱེད་པའི་དུས།  དྲོད་དང་སྤྱོད་པ་མཚམས་སྦྱོར་བའོ། །དང་པོ་ནི།  ཏིང་ངེ་འཛིན་ལས་སྐྱེས་པའི་ལུས་ངག་ཡིད་གསུམ་གྱི་མཐུའམ།  ནུས་པའི་ཁྱད་པར་ལ་དྲོད་ཅེས་བྱའོ། །གཉིས་པ་ནི།  དྲོད་ཆུང་འབྲིང་ཆེན་པོ་གསུམ་མོ། །གསུམ་པ་
ལ་དྲོད་ཆུང་བ་ནི།  མཉམ་གཞག་ཏུ་འཇིག་རྟེན་གྱི་ཆོས་བརྒྱད་མགོ་སྙོམས་པ་སྙམ་བྱེད།  ཉོན་མོངས་པ་གློ་བུར་བ་བཟློག་པ་སྙམ་བྱེད་པའོ། །དྲོད་འབྲིང་པོ་ནི་ཚར་གཅད་དང་རྗེས་གཟུང་གི་ལས་གང་རུང་ཞིག་ནུས་པའོ། །དྲོད་ཆེན་པོ་ནི།  ཚར་གཅད་དང་རྗེས་གཟུང་གི་ལས་
9-2-133a


གཉིས་ཀ་ནུས་པ་སྟེ།  རྣམ་ཤེས་དང་ཡེ་ཤེས་ཀྱི་ལས་ཆ་མཉམ་པ་ཞེས་བྱའོ། །བཞི་པ་ནི།  དྲོད་ཆུང་ངུ་མ་ཐོབ་པ་ཐོབ་པར་བྱེད་པའི་ཐབས་རིམ་པ་གཉིས་བསྒོམ་པ་ཉིད་ཡིན་ལ།  འབྲིང་མ་ཐོབ་པ་ཐོབ་པར་བྱེད་པ་ནི་ཀུན་འདར་གྱི་གསང་སྤྱོད་ཡིན་ཅིང་།  ཆེན་
པོ་མ་ཐོབ་པ་ཐོབ་པར་བྱེད་པ་ནི་དྲག་ཤུལ་གྱི་ལས་སོ། །ལྔ་པ་ནི།  ཟླ་བ་ཕྱེད་དུ་སྔར་གྱི་དེ་ལ་གོམས་པར་བྱེད་ཅིང་གནས་པར་བྱེད་པའོ། །དྲུག་པ་ནི་དྲོད་ཆུང་ངུ་ཐོབ་ནས་ཀུན་འདར་གསང་ནས་སྤྱོད་ལ།  འབྲིང་ཐོབ་ནས་འཇིག་རྟེན་པའི་མངོན་དུ་སྤྱོད་ཅིང་།  ཆེན་པོ་ཐོབ་ནས་ཀུན་ཏུ་
བཟང་པོ་སྤྱོད་དོ། །གཉིས་པ་ལ་དྲུག་སྟེ།  ངོ་བོ།  དབྱེ་བ།  མཚན་ཉིད།  སྤྱད་པའི་དུས།  རྟེན་གྱི་གང་ཟག །སྤྱད་པའི་དགོས་པའོ། །དང་པོ་ནི།  ནང་དུ་དེ་ཁོ་ན་ཉིད་ཀྱི་རྟོགས་པས་ཀུན་ནས་བསླངས་པའི་ཕྱི་རོལ་ཏུ་ལུས་ངག་གཡོ་ཞིང་རྒྱུ་བ་ཅི་འདོད་བྱེད་པའི་ཁྱད་པར་ལ་སྤྱོད་པ་
ཞེས་བྱ་སྟེ།  ལུས་དང་།  བཟའ་བ་དང་།  བཏུང་བ་དང་།  རྒྱན་ཆ་དང་།  གནས་དང་།  སྣོད་དང་།  སྤྱོད་པ་བྱེད་པའི་དུས་དང་།  གྲོགས་ལ་སོགས་པ་རྣམས་ལ།  བཟང་ངན་གྱི་བླང་དོར་མེད་པར་ཅི་དགར་སྤྱོད་པའོ། །གཉིས་པ་ལ་ཀུན་འདར་གྱི་སྤྱོད་པ་དང་།  ཀུན་ཏུ་བཟང་པོའི་སྤྱོད་པ་གཉིས་
ལས།  དང་པོ་ལ་མིང་གི་རྣམ་གྲངས།  སྨྱོན་པ་བརྟུལ་ཞུགས་ཀྱི་སྤྱོད་པ་དང་།  རྒྱལ་བུ་གཞོན་ནུའི་སྤྱོད་པ་དང་།  གསང་སྤྱོད་ཅེས་བྱའོ། །གཉིས་པ་ལ་མིང་གི་རྣམ་གྲངས།  ཕྱོགས་ལས་རྣམ་པར་རྒྱལ་བའི་སྤྱོད་པ་དང་།  རྒྱལ་ཚབ་ཆེན་པོའི་སྤྱོད་པ་དང་།  འཇིག་རྟེན་པའི་མངོན་
དུ་སྤྱོད་པ་ཞེས་བྱའོ། །གསུམ་པ་ནི་ཅིའི་ཕྱིར་མིང་དེ་སྐད་དུ་བརྗོད་ཅེ་ན།  འཇིག་རྟེན་པ་རྣམས་འཇིགས་ཤིང་འདར་བས་ཀུན་འདར་རམ།  ཀུན་འདར་གྱི་སྒྲ་ཨ་ཝ་དྷཱུ་ཏཱི་ཞེས་པ་གཉིས་སྤངས་ཞེས་བྱ་བར་ཡང་འགྱུར་བས་ན།  བཟའ་བྱ་དང་བཟའ་བྱ་མ་ཡིན་པ་སོགས་བླང་དོར་གཉིས་
9-2-133b


སུ་མེད་པར་སྤྱོད་པས་ན་གཉིས་སྤངས།  སྨྱོན་པར་བརྫུས་ཏེ་རིགས་ལ་སོགས་པ་གསང་ནས་སྤྱོད་པས་ན་སྨྱོན་པ་བརྟུལ་ཞུགས་ཀྱི་སྤྱོད་པ་དང་།  རྒྱལ་ཚབ་ཆེན་པོ་དྲོད་ཆེན་པོ་མ་ཐོབ་པས་ན་རྒྱལ་བུ་གཞོན་ནུའི་སྤྱོད་པ་དང་།  རྣལ་འབྱོར་པར་ཁས་མི་ལེན་པར་གསང་སྟེ་སྤྱོད་པས་ན་
གསང་སྤྱོད་ཅེས་བྱའོ། །གཉིས་པ་ལ་སྣང་བ་ཐམས་ཅད་རང་གི་རྟོགས་པའི་ཡེ་ཤེས་ཀྱི་ངོ་བོར་ཀུན་ཏུ་བཟང་པོར་རྟོགས་པས་ན་ཀུན་ཏུ་བཟང་པོ་དང་།  རྣམ་ཤེས་དང་ཡེ་ཤེས་ཆ་མཉམ་པས་གཞན་དོན་ཐོགས་མེད་དུ་ནུས་པས་ན་རྒྱལ་ཚབ་ཆེན་པོ་དང་།  འཇིག་རྟེན་པའི་མངོན་
དུ་སྤྱོད་པས་ན་མངོན་སྤྱོད་ཅེས་བྱའོ། །བཞི་པ་ནི་དྲོད་ཆུང་ངུ་ཐོབ་ནས་ཀུན་འདར་གསང་སྟེ་སྤྱོད་པ་ཞེས་བྱ་བ་མཚན་མོའི་དུས་བཟའ་བྱ་དང་།  བཟའ་བྱ་མ་ཡིན་པ་གཉིས་སུ་མེད་པ་ལ་སོགས་པ་སྤྱོད་ལ།  ཉིན་མོ་རང་གི་རིགས་དང་མཐུན་པར་སྤྱོད་དོ། །དེས་དྲོད་འབྲིང་པོ་སྐྱེས་པ་ན་ཀུན་
འདར་མངོན་དུ་སྤྱོད་པ་ཞེས་བྱ་བ་རང་གི་ཡུལ་འཁོར་སྤངས་ཏེ།  རིགས་ལ་སོགས་པ་གསང་ནས་སྤྱོད་པ་ཞེས་བྱ་བ་སྨྱོན་པར་བརྫུས་ཏེ་སྤྱོད་པ་ཡིན་ནོ། །དེས་དྲོད་ཆེན་པོ་འཇིག་རྟེན་ལས་འདས་པའི་ཟག་པ་མེད་པའི་ཡེ་ཤེས་ཐོབ་པ་ན།  ཀུན་ཏུ་བཟང་པོའི་སྤྱོད་པ་སྤྱད་དོ། །ལྔ་པ་ནི་
དྲོད་ཐོབ་ཅིང་སེམས་ཅན་གྱི་དོན་དུ་ཚེ་འདི་ཉིད་ལ་མཆོག་གི་དངོས་གྲུབ་འདོད་པའི་ཆོས་གཉིས་དང་ལྡན་པ་གཅིག་གིས་སྤྱོད་པ་སྤྱད་པ་ཡིན་གྱི།  གང་ཡང་རུང་བ་གཅིག་མ་ཚང་ན་ནི་མ་ཡིན་ནོ། །དྲུག་པ་ལ་གསུམ་ལས།  ཀུན་འདར་གསང་ནས་སྤྱོད་པའི་དགོས་པ་ནི།  རང་
གི་སེམས་ཀྱི་བརྟན་གཡོ་བརྟག་པའི་ཆེད་ཡིན་ལ།  ཀུན་འདར་མངོན་དུ་སྤྱོད་པའི་དགོས་པ་ནི།  གྲུབ་པའི་ས་དང་གྲོགས་དབང་དུ་བྱ་བའི་ཆེད་ཡིན་ཅིང་།  ཀུན་ཏུ་བཟང་པོའི་སྤྱོད་པའི་དགོས་པ་ནི་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཡིན་ནོ། །དེ་ལྟར་སྤྱོད་པ་
9-2-134a


གཉིས་ལས།  གཞུང་འདིར་ཀུན་འདར་གྱི་སྤྱོད་པ་སྟོན་པ་ཡིན་ཅིང་།  དེ་ལ་ཡང་གསང་སྤྱོད་དང་།  མངོན་སྤྱོད་གཉིས་ལས།  ཕྱི་མ་སྟོན་ཏེ།  གང་ཟག་དང་གནས་ལ་ལོག་པར་རྟོག་པའི་གཞི་ནི་དེ་ཉིད་ཡིན་པའི་ཕྱིར་རོ། །གཉིས་པ་གཞུང་གི་དོན་
ལ་གཉིས་ཏེ།  སྤྱོད་པའི་རྣམ་གཞག་སྤྱིར་བསྟན་པ།  ལོག་རྟོག་དགག་པ་བྱེ་བྲག་ཏུ་བཤད་པའོ། །དང་པོ་ནི།  དབང་བཞི་ཡོངས་སུ་ཞེས་སོགས་བཅོ་ལྔ་སྟེ།  དབང་བཞི་རྫོགས་པར་ཐོབ་ཅིང་།  རིམ་གཉིས་ཤེས་པའི་གང་ཟག་དེས།  དང་པོར་བར་ཆད་ཉུང་བས་རང་གི་
ཁྱིམ་དུ་བསྒོམ།  བརྟན་པ་ཅུང་ཟད་ཐོབ་ནས་བརྩོན་འགྲུས་རྩོམ་པས་དུར་ཁྲོད་སོགས་སུ་བསྒོམ།  བརྟན་པ་ཆེན་པོ་དྲོད་འབྲིང་གི་རྟོགས་པ་ཐོབ་ནས།  གང་ཞིག་སོར་མོ་གཅིག་སྟོན་དང་། །གཉིས་ཀྱིས་ལེགས་པར་འོངས་པ་ཡིན། །ཞེས་སོགས་ལུས་བརྡ་དང་།  མ་ད་ན་
ཆང་།  བ་ལ་ཤ་ཞེས་སོགས་ངག་གི་བརྡ་རྣམས་ལ་ལེགས་པར་སྦྱངས་ཤིང་།  བླང་དོར་གཉིས་སུ་མེད་པའི་དེ་ཉིད་རྟོགས་པའི་གང་ཟག་དེས་སྤྱོད་པ་སྤྱད་དོ། །དགོས་པ་ནི་ནང་གི་ས་རྣམས་བགྲོད་པར་བྱ་བ་དང་།  ཕྱི་ནང་གི་པུ་ལི་ར་མ་ལ་ཡ་ལ་སོགས་པའི་ཡུལ་རྣམས་དབང་དུ་བསྡུ་
བའི་ཕྱིར་ཡིན་ཏེ།  དེ་ཡང་ཕྱི་རོལ་པུ་ལི་ར་མ་ལ་ཡ་ལ་སོགས་པའི་ཡུལ་བཞིན།  ས་དང་པོ་ཐོབ་པའི་ཚུལ་བཟུང་བའི་མཁའ་འགྲོ་མ་གནས་པ་རྣམས་དབང་དུ་འདུས་པས།  ནང་དུ་སྤྱི་བོ་ལ་སོགས་པའི་ཡུལ་བཞིའི་རླུང་སེམས་དབུ་མར་འདུས་པས།  ས་དང་པོའི་རྟོགས་པ་
སྐྱེ་བ་ལ་སོགས་པའོ། །གནས་གང་དུ་སྤྱོད་པ་སྤྱད་ན།  གནས་དང་ཉེ་བའི་གནས་ལ་སོགས་པ་བཅུ་གཉིས་ལས་ཕྱེ་བའི་ཡུལ་སུམ་ཅུ་སོ་གཉིས་དང་།  གླིང་བཞི་དང་།  གླིང་བཞི་གཅིག་ཏུ་སྡོམ་པ་སྟེ་སུམ་ཅུ་སོ་བདུན་དུའོ། །ངོ་བོ་ནི་རིག་པ་བརྟུལ་ཞུགས་ཀྱི་སྤྱོད་པའོ། །གང་ལས་
9-2-134b


གསུངས་ན་ལུགས་འདི་སོགས་སོ། །མཐར་ཐུག་གི་དགོས་པ་ནི།  འདི་འདྲའི་སོགས་སོ། །གཉིས་པ་ལ་གསུམ་སྟེ།  གང་གིས་རྒྱུ་བའི་གང་ཟག་ལ་འཁྲུལ་པ་དགག་པ།  གང་དུ་རྒྱུ་བའི་གནས་ལ་འཁྲུལ་པ་དགག་པ།  དེ་གཉིས་ཀའི་མཇུག་བསྡུའོ། །དང་པོ་ལ་གསུམ་
སྟེ།  མཚན་ཉིད་དང་མི་ལྡན་པའི་གང་ཟག་སྤྱོད་པ་སྤྱད་པ་དགག་པ།  མཚན་ཉིད་དང་ལྡན་པའི་གང་ཟག་སྤྱོད་པ་སྤྱད་པའི་དགོས་པ།  དེས་གྲུབ་པའི་དོན་བསྟན་པའོ། །དང་པོ་ནི།  དེང་སང་གསང་སྔགས་ཞེས་སོགས་ཚིགས་བཅད་ལྔ་སྟེ།  དེང་སང་རིམ་གཉིས་མི་
བསྒོམ་པར།  ཡུལ་ཆེན་སུམ་ཅུ་སོ་བདུན་དུ་སྤྱོད་པའི་ཆེད་དུ་འགྲོ་བ་ནི་སངས་རྒྱས་ཀྱིས་མ་གསུངས་ཏེ།  རིམ་པ་གཉིས་པོ་མི་སྒོམ་པའི་སྒོམ་ཆེན་བཟང་ཡང་ས་དང་པོ་ཡན་ཆད་ཀྱི་རྟོགས་པ་བསྐྱེད་ནུས་པ་ཡང་ཕ་རོལ་ཏུ་ཕྱིན་པའི་ལུགས་ཀྱི་སེམས་ལ་གནད་དུ་བསྣུན་པའི་
བསྒོམ་ཆེན་ལས་མ་འདས་ལ།  མདོ་ལས།  ས་ལམ་གྱི་རྟོགས་པ་བསྐྱེད་པའི་ཆེད་དུ་ཡུལ་ཆེད་དེ་དག་ཏུ་འགྲོ་བའི་ཆོ་ག་བཤད་པ་མེད་པའི་ཕྱིར།  ཡུལ་ཆེན་བགྲོད་ནས་ས་ལམ་གྱི་རྟོགས་པ་བསྐྱེད་པ་ནི།  ནང་ལུས་ཀྱི་གནས་དེ་དང་།  དེ་དག་གི་རླུང་སེམས་དབུ་མར་ཞུགས་
པའི་ཆེད་ཡིན་པའི་ཕྱིར།  འདིར་ཁ་ཅིག་རིམ་གཉིས་མི་བསྒོམ་པའི་ཉམས་ལེན་ཐམས་ཅད་ཕ་རོལ་ཏུ་ཕྱིན་པའི་ཉམས་ལེན་དུ་བྱས་ནས།  རྒྱུད་སྡེ་བཞི་ཀ་ལ་རིམ་གཉིས་ཡོད་པར་འདོད་པ་ནི་སྐབས་ཀྱི་དོན་མ་རྟོགས་པ་སྟེ།  འདི་ལ་བླ་མེད་ཀྱི་ཉམས་ལེན་མེད་པས་སྤྱོད་པ་བྱེད་
པ་དགག་པའི་སྐབས་ཡིན་པས།  རྒྱུད་སྡེ་འོག་མ་གསུམ་གྱི་ཉམས་ལེན་བྱེད་པ་ལ་ཡང་སྤྱོད་པ་སྤྱད་པ་མེད་པར་འཆད་དགོས་པའི་ཕྱིར་རོ། །ཁ་ཅིག་ཕ་རོལ་ཏུ་ཕྱིན་པའི་སྒོམ་ཆེན་བདག་འཛིན་སྤོང་བ་དང་།  སྙིང་རྗེ་ཆེན་པོ་བསྒོམ་པ་ཙམ་ལ་འཆད་པ་ནི།  རྒྱུད་སྡེ་འོག་མ་
9-2-135a


གསུམ་གྱི་ཉམས་ལེན་བྱེད་པ་ལ་ཡང་དེ་ཙམ་ལས་མེད་པའམ།  རིམ་གཉིས་ཡོད་པར་འདོད་དགོས་པས་མི་འཐད་དོ། །དེས་ན་སྐབས་ཀྱི་དོན་ནི་སྒོམ་ཆེན་བཟང་པོ་ཞེས་པ་ས་དང་པོ་ཡན་ཆད་ཀྱི་རྟོགས་པ་སྐྱེས་པ་ཡིན་ལ།  དེ་ལ་སེམས་ལ་
གནད་དུ་བསྣུན་ནས་སྐྱེས་པ་དང་།  ལུས་ལ་གནད་དུ་བསྣུན་ནས་སྐྱེས་པ་གཉིས་ལས།  རིམ་གཉིས་མ་བསྒོམས་པར་སྐྱེས་པ་ནི་སེམས་ལ་གནད་དུ་བསྣུན་ནས་སྐྱེས་པ་ཡིན་པས།  རྒྱུད་སྡེ་འོག་མ་གསུམ་གྱི་ས་ལམ་གྱི་རྟོགས་པ་བསྐྱེད་པའི་ཚུལ་ཡང་།  སེམས་ལ་གནད་
དུ་བསྣུན་པ་ལས་མ་འདས་པའི་ཕྱིར་ན།  ཕ་རོལ་ཏུ་ཕྱིན་པའི་ལུགས་ཀྱི་ས་ལམ་གྱི་རྟོགས་པ་བསྐྱེད་པའི་ལུགས་སུ་སྟོན་པ་ཡིན་གྱི།  ཉམས་ལེན་ཐམས་ཅད་ཕ་རོལ་ཏུ་ཕྱིན་པའི་ཉམས་ལེན་དུ་འདུས་པ་ནི་མ་ཡིན་ནོ། །ཚུལ་འདི་ཇི་ལྟ་བ་བཞིན་རྟོགས་པ་ནི་དམ་པའི་མགོན་
གྱིས་ཟིན་པ་ཁོ་བོ་འབའ་ཞིག་གོ།  གལ་ཏེ་གསང་སྔགས་མི་བསྒོམ་ཞིང་རྟོགས་པ་ཡོད་པར་རློམ་པ་ཡིས་ཡུལ་དེར་ཕྱིན་ན་བར་ཆད་འབྱུང་ཞིང་།  རློམ་པ་དང་།  རྟོགས་པ་ཅི་ཡང་མེད་པའི་སྒོམ་ཆེན་གྱིས་ཕྱི་ན་ཡང་ཕན་གནོད་གང་ཡང་མེད་དེ་དཔེར་ན་ཨུ་ཎྱན་སོགས་སོ། །
གཉིས་པ་ནི།  གསང་སྔགས་བསྒོམ་པའི་ཞེས་སོགས་དྲུག་སྟེ།  མཚན་ཉིད་དེ་དག་དང་ལྡན་པའི་གང་ཟག་ལ་ཡུལ་དེར་གནས་པའི་མཁའ་འགྲོ་མ་ས་དང་པོ་སོགས་ཐོབ་པའི་ཚུལ་བཟུང་བ་རྣམས་ཀྱིས་བྱིན་གྱིས་བརླབས་ནས།  ནང་དུ་ས་རྣམས་བགྲོད་པ་འདིའི་དོན་སོགས་སོ། །
གསུམ་པ་ནི།  དེས་ན་གསང་སྔགས་ཞེས་སོགས་གཉིས་སོ། །གཉིས་པ་ལ་གཉིས་ཏེ།  ཏི་སེ་གངས་ཅན་དུ་འདོད་པ་དགག་པ།  ཙཱ་རི་གནས་ཆེན་དུ་འདོད་པ་དགག་པའོ། །དང་པོ་ལ་གསུམ་སྟེ།  དགག་པ་སྤྱིར་བསྟན།  ལུང་འགལ་བྱེ་བྲག་ཏུ་བཤད།  ཉེས་སྤོང་གི་
9-2-135b


ལན་དགག་པའོ། །དང་པོ་ནི།  དཔལ་ལྡན་དུས་ཀྱི་ཞེས་སོགས་བཅུ་གཅིག་སྟེ།  དུས་འཁོར་གྱི་འཇིག་རྟེན་ཁམས་ལེ་ལས་གསུངས་པའི་རི་བོ་གངས་ཅན་དང་།  མངོན་པའི་གཞུང་ལས་གསུངས་པའི་རི་བོ་སྤོས་ངད་ལྡན་གྱི་བྱང་ན།  བྲག་རི་གསེར་གྱི་བྱ་སྐྱིབས་ལྷ་མ་ཡིན་གྱི་
ཕུག །ཆུ་ཞེང་དཔག་ཚད་ལྔ་བཅུ།  དཔངས་དཔག་ཚད་ཕྱེད་དང་བཞི་པ།  བྲག་ཕྲན་ལྔ་བརྒྱས་བསྐོར་བ།  དེའི་བྱང་ན་ཤིང་སཱ་ལའི་རྒྱལ་པོ་རབ་བརྟན་ཤིང་ཕྲན་ལྔ་བརྒྱས་བསྐོར་བ།  དེའི་ཤར་ན་རྫིང་བུ་དལ་འབབ་མཚོ་མ་དྲོས་པ་དང་མཉམ་པ་རྫིང་བུ་ལྔ་བརྒྱས་བསྐོར་
བ་ཡོད།  དེར་གླང་པོ་ཆེ་རབ་བརྟན་འཁོར་ལྔ་བརྒྱས་བསྐོར་བ་གནས་ཤིང་།  དབྱར་ཟླ་བ་བཞིར་སཱ་ལའི་ཚལ་དུ་འགྲོ།  དགུན་ཟླ་བ་བཞིར་གསེར་གྱི་བྱ་སྐྱིབས་སུ་སྡོད།  རི་སྤོས་ངད་ལྡན་པའི་ཚུ་རོལ་ན་མཚོ་མ་དྲོས་པ་ཡོད་ལ།  དེའི་ཚུ་རོལ་ན་རི་བོ་གངས་ཅན་ཡོད་པར་
གསུངས་ཤིང་།  མཚོ་མ་དྲོས་པ་བཅོམ་ལྡན་འདས་དགྲ་བཅོམ་ལྔ་བརྒྱ་དང་བཅས་པ།  རང་རང་གི་ལས་ཀྱི་རྒྱུ་བ་ལུང་སྟོན་པར་མཛད་པའི་གནས་ཡིན་པར་གསུངས་པའི་རི་བོ་གངས་ཅན་དེ་ནི་མངའ་རིས་ཀྱི་ཏི་སེ་འདི་མ་ཡིན་ཅིང་།  མ་དྲོས་པའི་རྒྱ་མཚོ་ཡང་མ་ཕམ་གཡུ་མཚོ་
མ་ཡིན་ཏེ།  གླང་པོ་རྣམས་ཀྱང་སོགས་སོ། །གཉིས་པ་ལ་ལྔ་སྟེ།  དུས་ཀྱི་འཁོར་ལོའི་དང་།  མངོན་པའི་དང་།  མུ་སྟེགས་བྱེད་ཀྱི་དང་།  རྨ་བྱ་ཆེན་མོའི་མདོའི་དང་།  ཕལ་པོ་ཆེའི་ལུང་དང་འགལ་བའོ། །དང་པོ་ནི།  དཔལ་ལྡན་དུས་ཀྱི་ཞེས་སོགས་ཉེར་གཉིས་
ཏེ།  ད་ལྟའི་ཏི་སེ་འདི་དུས་ཀྱི་འཁོར་ལོ་ནས་བཤད་པའི་རི་བོ་གངས་ཅན་མ་ཡིན་ཏེ།  དེའི་འགྲམ་ན་ཤམ་བྷ་ལ་མེད་པའི་ཕྱིར་དང་།  རྫུ་འཕྲུལ་དང་མི་ལྡན་པས་ཀྱང་བགྲོད་ནུས་པའི་ཕྱིར།  ཁྱབ་པ་ཡོད་དེ།  དཔལ་ལྡན་དུས་ཀྱི་འཁོར་ལོ་ལས་སོགས་སོ། །དེ་ལྟར་
9-2-136a


ཡང་བསྡུས་རྒྱུད་ལས།  ལན་ཚྭ་ཆང་དང་ཆུ་དང་འོ་མ་ཞོ་དང་མར་དང་སྦྲང་རྩིའི་རྒྱ་མཚོ་རྣམས་དང་རི་བདུན་ནི། །འོད་སྔོན་པོ་དང་མནྡ་ར་བའི་རི་སྟེ་རྩུབ་ལྡན་ནོར་འོད་ཚད་ལྡན་གྲང་བའི་རི་རྡོ་རྗེ། །གླིང་རྣམས་ཟླ་བ་དང་ནི་རབ་དཀར་རབ་མཆོག་
ཀུ་ཤ་མི་འམ་ཅི་སྟེ་ཁྲུང་ཁྲུང་དྲག་པོ་རྣམས། །ལོངས་སྤྱོད་པ་རྣམས་ཉིད་དེ་འཛམ་གླིང་བདུན་པ་ལས་ཀྱི་ས་རྣམས་ལ་ནི་མི་རྣམས་གནས་པའོ། །ཞེས་རི་རབ་ལ་མཚོ་བདུན་དང་།  རི་བདུན་དང་།  གླིང་བདུན་གྱིས་ཁོར་ཡུག་ཏུ་བསྐོར་ནས་ཡོད་པའི་གླིང་ཕྱི་མ་འཛམ་གླིང་
ཆེན་པོ་ཡིན་ཅིང་།  དེ་ལ་དུམ་བུ་བཅུ་གཉིས་སུ་བྱས་པའི་ལྷོའི་ཆ་ནི་འཛམ་གླིང་ཆུང་ངུ་ཡིན་ལ།  དེའི་ཆུ་ཞེང་ཆེ་བ་ལ་སི་ཏ་ཡོད།  དེའི་བྱང་ན་རི་བོ་གངས་ཅན་ཡོད་ཅིང་།  རི་བོ་གངས་ཅན་གྱིས་བསྐོར་བའི་དབུས་ན་ཤམ་བྷ་ལའི་ཡུལ།  ས་པདྨ་འདབ་བརྒྱད་ཀྱི་རྣམ་པར་
གནས་པ་དབུས་ཀྱི་སུམ་ཆ་ལྟེ་བར་བྱས་པ་ལ་ཀེ་ལ་ཤའི་རི་བོར་གྲགས་ཤིང་།  དེ་ལ་རྒྱལ་པོའི་ཕོ་བྲང་ཀཱ་ལ་པ་དང་།  དུས་ཀྱི་འཁོར་ལོའི་གཞལ་ཡས་ཁང་དང་།  མ་ལ་ཡའི་སྐྱེད་མོས་ཚལ་ཡོད་ལ།  འདབ་མ་བརྒྱད་པོ་རེ་རེ་ལ་གྲོང་ཁྱེར་བྱེ་བ་བཅུ་གཉིས་རེ་ཡོད་ཅིང་།  བྱེ་བ་ཕྲག་རེ་ལ་རྒྱལ་པོ་རེ་
ཡོད་པས་རྒྱལ་ཕྲན་དགུ་བཅུ་རྩ་དྲུག་ཡོད་དེ།  དེ་ལྟར་ཡང་།  གངས་རི་མཆོག་གི་ཕྱོགས་རྣམས་མ་ལུས་ཀུན་ནས་ཡང་དག་བསྐོར་བ་དེ་དག་དབུས་སུ་ཀེ་ལ་ཤ།  ས་ལ་ཀེ་ལ་ཤ་ཡ་དུམ་བུར་གངས་རི་ལྡན་པ་དེ་ཡི་སུམ་ཆ་ཀུན་ནས་ཤེས་བྱ་སྟེ། །ཕྱི་རོལ་དུ་ཡང་ཡུལ་རྣམས་ཉིན་བྱེད་འདབ་མ་
རེ་རེའི་གླིང་རྣམས་ཀུན་གྱིས་བརྒྱན་པར་བརྗོད་པ་སྟེ། །གཡས་ཀྱི་ཕྱེད་དུ་ཐུབ་མཆོག་གནས་གྲོང་ཤམ་བྷ་ལ་ཞེས་བྱ་བ་གྲོང་ཁྱེར་བྱེ་བ་ཡང་དག་གནས། །ཞེས་སོགས་སོ། །དེར་རྒྱལ་པོ་ཉི་མའི་འོད་ཅེས་བྱ་བ་བྱུང་བའི་སྲས་ཟླ་བ་བཟང་པོ་ལ་སྟོན་པས་འབྲས་སྤུངས་སུ་དཔལ་
9-2-136b


ལྡན་རྒྱུ་སྐར་གྱི་དཀྱིལ་འཁོར་སྤྲུལ་ནས་དུས་ཀྱི་འཁོར་ལོའི་རྩ་རྒྱུད་གསུངས་སོ། །དེས་ཤམ་བྷ་ལར་རྩ་རྒྱུད་ལོ་གཅིག་གསུངས།  དེའི་བརྒྱུད་པ་ལྷ་དབང་།  གཟི་བརྗིད་ཅན།  ཟླ་བས་བྱིན།  ལྷའི་དབང་ཕྱུག །སྣ་ཚོགས་གཟུགས།  ལྷའི་དབང་ལྡན་རྣམས་ཀྱིས་ལོ་བརྒྱ་བརྒྱ་རྩ་
རྒྱུད་གསུངས་སོ། །དེ་ནས་འཇམ་དབྱངས་གྲགས་པས་ལོ་བརྒྱར་རྩ་རྒྱུད་གསུངས་ནས་བསྡུས་རྒྱུད་མཛད།  དེ་ནས་པདྨ་དཀར་པོས་བསྡུས་རྒྱུད་ཀྱི་འགྲེལ་བ་དྲི་མེད་འོད་མཛད་དོ། །དེ་ནས་བཟང་པོ་རྣམ་རྒྱལ།  བཤེས་གཉེན་བཟང་པོ་ལ་སོགས་པ་རིགས་ལྡན་གྱི་རྒྱལ་པོ་མང་དུ་བྱུང་
ངོ་། །སྙིགས་མའི་དུས་རྟགས་ཙམ་འཛིན་པར་གྱུར་པ་ན།  ཧོར་ཡུལ་གྱི་བྱང་ཕྱོགས་དག་སྦྱིན་ཅེས་བྱ་བར་ལྷ་མ་ཡིན་གྱི་སྤྲུལ་པ་ཀླ་ཀློའི་རྒྱལ་པོ་སྟོབས་ཅན་ཞིག་བྱུང་སྟེ།  ཡུལ་དབུས་དང་།  བོད་རྣམས་འཇོམས་ཤིང་།  འཛམ་གླིང་ཆུང་ངུའི་ཕྱེད་དབང་དུ་བསྡུས་ཏེ།  འཁོར་
རྒྱལ་ཕྲན་དགུ་བཅུ་རྩ་དྲུག་ཡོད་པས་སྟོབས་ཀྱིས་དྲེགས་ནས་ཤམ་བྷ་ལར་དམག་འདྲེན་པར་རྩོམ་མོ། །དེའི་ཚེ་འཇམ་དཔལ་གྱི་སྤྲུལ་པ་དྲག་པོ་འཁོར་ལོ་ཅན་ཞེས་བྱ་བའི་རྒྱལ་པོ་སོགས་སོ། །གཉིས་པ་ནི།  མངོན་པ་ལས་ཞེས་སོགས་བཅུ་སྟེ།  ད་ལྟའི་མ་ཕམ་འདི་མ་དྲོས་པར་འདོད་
པ་མངོན་པའི་གཞུང་དང་འགལ་ཏེ།  མངོན་པ་ལས་ཡུལ་དབུས་འདི་ནས་བྱང་དུ་རི་ནག་པོ་དགུ་འདས་པ་ན་རི་བོ་གངས་ཅན་ཡོད་ལ།  དེ་ནས་རི་སྤོས་ངད་ལྡན་པ་ཡོད་པའི་ཚུ་རོལ་དཔག་ཚད་བཅུ་འོངས་པ་ན།  མཚོ་མ་དྲོས་པ་ཆུ་ཞེང་དང་ཟབས་སུ་དཔག་ཚད་ལྔ་བཅུ་ལྔ་བཅུ་
ཡོད་པ་ཡན་ལག་བརྒྱད་ལྡན་གྱི་ཆུས་གང་བ་ཡོད་ལ།  དེའི་གཡས་རོལ་ན་ཤིང་འཛམ་བུ་ཞེས་བྱ་བ་འབྲས་བུ་རྫ་མ་ཙམ་རོོ་སྦྲང་རྩི་འདྲ་བ་ཆུ་ནང་དུ་ལྷུང་བ་ཉ་རྣམས་ཀྱིས་ཟོས་པའི་ལྷག་མ་འཛམ་བུ་ཆུ་བོའི་གསེར་དུ་འགྱུར་བ་ཡོད་དོ། །ཞེས་སོགས་ཀྱི་མཚན་ཉིད་རྒྱས་པར་
9-2-137a


གསུངས་པའི་ཕྱིར་དང་།  མཛོད་འགྲེལ་ལས།  དེར་ནི་རྫུ་འཕྲུལ་དང་མི་ལྡན་པའི་མིས་བགྲོད་པར་དཀའོ། །ཞེས་བཤད་ཅིང་ད་ལྟའི་ཏི་སེ་སོགས་སོ། །གསུམ་པ་ནི།  མུ་སྟེགས་བྱེད་པའི་ཞེས་སོགས་བཅུ་བཞི་སྟེ།  རྒྱས་པའི་བསྟན་བཅོས་
གཞོན་ནུ་འབྱུང་བ་དང་།  བྷ་ར་ཏ་ཀ་ལས།  གླིང་འདིའི་ཤར་ནུབ་གཉིས་ཀྱི་རྒྱ་མཚོ་ལ་ཐུག་གི་བར་རི་བོ་གངས་ཅན་གྱིས་ཁྱབ་པར་བཤད་པ་དང་།  སྔོན་རྒྱལ་པོ་ཤིང་རྟ་བཅུ་པའི་བུ་དགའ་བྱེད་ཀྱི་ཆུང་མ་རོལ་རྙེད་མ་ལང་ཀ་མགྲིན་བཅུས་ཕྲོགས་ནས་དེ་ལ་དམག་དྲངས་ཏེ།
སྲིན་པོ་ཕལ་ཆེར་བསད་པའི་ཚེ་མགྲིན་བཅུའི་སྤུན་ཟླ་བསམ་གཏན་བསྒོམ་པ་ཞིག་གིས་རླུང་དྲག་པོ་བརྔུབས་པས་དགའ་བྱེད་དང་།  ཧ་ནུ་མནྡྷ་མ་གཏོགས་དམག་དཔུང་ཐམས་ཅད་ཀེང་རུས་སུ་སོང་ནས་དེ་གསོ་བའི་ཕྱིར་རི་བོ་གངས་ཅན་བླངས་ནས་དེ་ལ་ཡོད་པའི་བདུད་རྩི་
གཏོར་བས་སོས་པར་གྱུར་ཏེ་སྤྲེའུ་ཧ་ནུ་མནྡྷས་སླར་ཡང་གངས་རི་རང་གནས་སུ་འཕངས་པའི་དུམ་བུ་ཞིག་ལམ་དུ་ཆད་པ་དེ་ཏི་སེ་ཡིན་ཅེས་གྲོག་མཁར་བ་སྨྲ་བ་དེས་ན།  ཕྱི་ནང་གང་གི་ལུགས་ལ་ཡང་དབང་ཕྱུག་ཆེན་པོའི་གནས་སོགས་སོ། །གླང་པོ་ཆེ་ས་སྲུང་གི་བུས་བསྟེན་པ་ནི་འདུལ་
བ་ལུང་ལས་བཤད་ལ།  གདགས་པ་ལས་ནི་རབ་བརྟན་གྱིས་བསྟེན་པར་བཤད་དོ། །བཞི་པ་ནི།  རྨ་བྱ་ཆེན་མོའི་ཞེས་སོགས་གཉིས་ཏེ།  མདོ་དེ་ལས་ཀྱང་རིའི་རྒྱལ་པོ་གངས་ཅན་དང་།  རིའི་རྒྱལ་པོ་ཏི་སེ་དང་ཞེས་ཐ་དད་དུ་གསུངས་པ་དང་འགལ་ལོ། །ལྔ་པ་ནི།  ཕལ་པོ་ཆེ་
ཡི་ཞེས་སོགས་ཚིགས་བཅད་བདུན་ཏེ།  ད་ལྟའི་མ་ཕམ་འདི་ལ་ནི། །ཕལ་པོ་ཆེ་ནས་གསུངས་པ་ཡི། །མཚན་ཉིད་འདི་དག་གང་ཡང་མེད་པས་མ་དྲོས་པ་ཡིན་པར་འགལ་ལོ། །གསུམ་པ་ལ་གཉིས་ཏེ།  ཉེས་སྤོང་བརྗོད་པ།  དེ་དགག་པའོ། །དང་པོ་ནི།  དེ་ལ་ཁ་ཅིག་ཞེས་
9-2-137b


སོགས་ལྔ་སྟེ།  སྔར་བཤད་པ་དེ་དག་ལ་སྐྱོན་སྤོང་བར་འདོད་པ་ཁ་ཅིག །ད་ལྟ་མཚན་ཉིད་དེ་དག་དང་མི་ལྡན་ཡང་གངས་ཅན་དང་།  མ་དྲོས་པ་མ་ཡིན་པར་མི་འགྱུར་ཏེ།  བྱ་རྒོད་ཕུང་པོའི་རི་ལ་ཡང་དཀོན་བརྩེགས་ཀྱི་སྡོམ་གསུམ་བསྟན་པའི་གླིང་གཞིར་མཐོ་བ་དང་།  ཟླུམ་པ་
དང་།  ཤིང་ལྗོན་པ་སྣ་ཚོགས་དང་།  འདབ་ཆགས་མཛེས་ཤིང་ཡིད་དུ་འོང་བ་དུ་མ་སྐད་སྙན་པ་སྒྲོག་པ་དང་།  ལྷ་རྫས་ཀྱི་མེ་ཏོག་དྲི་བསུང་ཕུན་སུམ་ཚོགས་པས་ཁྱབ་པར་བཤད་པ་རྣམས་ད་ལྟ་མེད་པས།  དུས་སྙིགས་པའི་སྟོབས་ཀྱིས་ཡུལ་ཀུན་ཀྱང་རྣམ་པར་འགྱུར་
བར་སྣང་བའི་ཕྱིར་ཞེས་སོ། །གཉིས་པ་ལ་གཉིས་ཏེ།  འཆད་ཚུལ་གཉིས་ཀྱི་རང་བཞིན་བཤད། །དེ་ཉིད་སྐབས་ཀྱི་ལན་ལ་སྦྱར་བའོ། །དང་པོ་ལ་གཉིས་ཏེ།  སྒྲོ་སྐུར་སྐྱོན་དུ་འགྱུར་མི་འགྱུར་དཔྱད། །དེ་ཡི་དཔེར་བརྗོད་སོ་སོར་བཤད་པའོ། །དང་པོ་ནི།  འདི་ཡང་ཕྱེ་སྟེ་
ཞེས་སོགས་བཅུ་བཞི་སྟེ།  སྤྱིར་འཆད་ཚུལ་ལ་དངོས་པོའི་གནས་ལུགས་འཆད་པ་དང་སྐྱོན་ཡོན་བསྔགས་པའི་སྐབས་གཉིས་ཡོད་པ་ལས།  དང་པོ་ལ་སྒྲོ་སྐུར་བརྗོད་ན་གནས་ལུགས་ངོས་མི་ཟིན་པས་སྐྱོན་དུ་འགྱུར་ལ།  ཕྱི་མ་ལ་སྒྲོ་སྐུར་སྐྱོན་དུ་མི་འགྱུར་ཏེ།  ཡོན་ཏན་
བསྔགས་པའི་སྐབས་ཡིན་གྱི་གནས་ལུགས་འཆད་པའི་སྐབས་མ་ཡིན་པའི་ཕྱིར་རོ། །གཉིས་པ་ནི།  དཔེར་ན་བ་གླང་ཞེས་སོགས་ཉེར་གཉིས་ཏེ།  འཆད་ཚུལ་གཉིས་པོ་ལ་སྒྲོ་སྐུར་སྐྱོན་དུ་འགྱུར་མི་འགྱུར་དཔེའི་སྒོ་ནས་བཤད་པའོ། །གཉིས་པ་ནི།  དེས་
ན་བྱ་རྒོད་ཞེས་སོགས་ཚིགས་བཅད་གཉིས་ཏེ།  བྱ་རྒོད་ཕུང་པོ་སོགས་ཀྱི་ཡོན་ཏན་བཤད་པ་ད་ལྟ་མེད་པ་དང་།  གངས་ཅན་དང་།  མ་དྲོས་པ་སོགས་ཀྱི་མཚན་ཉིད་བཤད་པ་ད་ལྟ་མེད་པ་མི་མཚུངས་ཏེ།  སྔ་མ་ནི་མདོ་སྡེ་དེ་ལ་ངེས་པ་བསྐྱེད་པའི་ཆེད་དུ་སྔོན་ཕུན་སུམ་
9-2-138a


ཚོགས་པ་ལྔ་འཛོམས་པའི་དུས་སུ་མདོ་སྡེ་འདི་འབྱུང་ངོ་ཞེས་སྙན་ངགས་ཀྱི་གཞུང་བཞིན་དུ་ཡོན་ཏན་བསྔགས་པའི་སྐབས་ཡིན་པའི་ཕྱིར་དང་།  རྣམ་པ་གཞན་དུ་ཐེག་ཆེན་གྱི་མདོ་སྡེ་གསུངས་པའི་ཚེ།  བཅོམ་ལྡན་འདས་ཀྱིས་ས་ཕྱོགས་
བྱིན་གྱིས་བརླབས་པས་འཁོར་ཐམས་ཅད་ཀྱིས་དེ་ལྟར་མཐོང་བ་ཡིན་ཏེ།  མདོ་སྡེ་གཞན་ལས་ཀྱང་མི་མཇེད་ཀྱི་འཇིག་རྟེན་གྱི་ས་ཕྱོགས་ལག་མཐིལ་ལྟར་མཉམ་པ།  སྡོང་དུམ་དང་།  ཚེར་མ་དང་།  མི་གཙང་བའི་ལྗན་ལྗིན་དང་།  རི་ནག་པོ་མེད་པར་གྱུར་ཏོ་ཞེས་
གསུངས་པ་དང་མཐུན་པའི་ཕྱིར་དང་།  ཕྱི་མ་ནི་ཆོས་རྣམས་ཀྱི་རང་སྤྱིའི་མཚན་ཉིད་འཆད་པའི་སྐབས་ཡིན་པས་དངོས་པོའི་གནས་ལུགས་འཆད་པ་ཡིན་ཅིང་།  དེ་ལ་འཁྲུལ་ན་སོགས་སོ། །གཉིས་པ་ནི།  ཙཱ་རི་ཏྲ་ཞེས་སོགས་བཅུ་གཅིག་སྟེ།  གནས་འཐུང་གཅོད་
ཀྱི་བྱེ་བྲག་ཙཱ་རི་ཏྲ་ནི།  ལྷོ་ཕྱོགས་རྒྱ་མཚོའི་འགྲམ་ན་ཡོད་པར་གསུངས་པས།  ཀོང་ཡུལ་གྱི་ཙཱ་རི་ཙཱ་གོང་ནི་དེ་མ་ཡིན་ནོ། །ཁ་ཅིག་གནས་ཞིང་གི་བྱེ་བྲག་དེ་ཝཱི་ཀོ་ཊ་ལ་གཉིས་ཡོད་པའི།  ཆེ་ཤོས་རྒྱ་གར་ལྷོ་ཕྱོགས་ན་ཡོད།  ཆུང་བ་གཞན་ཞིག་ཀོང་ཡུལ་གྱི་ཙཱ་རི་ཡིན་
ཞེས་ལ་ལ་སྨྲ་བ་ནི།  དེའི་ཕྱོགས་ན་བྷ་ཏྲའི་ཤིང་ཡོད་ན་ཡུལ་དེ་དེ་ཝཱི་ཀོ་ཊ་ཡིན་པ་ལ་སྐྱོན་མེད་དེ།  རྡོ་རྗེ་མཁའ་འགྲོའི་རྒྱུད་ལས་སོགས་སོ། །དེ་ཡང་རྒྱུད་དུ།  གྱེན་དུ་འབར་ཊ་ཞེས་བྱ་བ། །ཀྵེ་ཊ་པ་ལ་གཙིགས་པ་ཆེ། །དེ་ཝཱི་ཀོ་ཊ་སྣ་ཆེན་མོ། །སྟོབས་པོ་ཆེ་ནི་སྐྱེ་གནས་བྱུང་། །ལྷ་
མོ་ལག་ན་མདུང་ཅན་ཏེ། །རྣལ་འབྱོར་དབང་ཕྱུག་ཀུན་གྱི་མཆོག །གནས་དེར་ལྷ་མོ་དྲག་ཆེན་མོ། །བྷ་ཏྲའི་ཤིང་ལ་བརྟེན་ཏེ་གནས། །བོད་ཡུལ་དུ་ནི་ལྷན་སྐྱེས་ཏེ། །རང་བྱུང་གི་ནི་སྐྱེ་གནས་བྱུང་། །ཆུ་སྲིན་རྒྱལ་མཚན་ལག་ན་ཐོགས། །ཞི་ཞིང་གསལ་བའི་གཟུགས་ཅན་ཏེ། །ཡུལ་
9-2-138b


དེར་གནས་པའི་ལྷ་མོ་དེ། །བྲག་གི་ཁྱིམ་ལ་བརྟེན་ཏེ་གནས། །ཞེས་སོ། །གསུམ་པ་ནི།  ཏི་སེ་དང་ནི་ཞེས་སོགས་དགུའོ། །ལྔ་པ་དེ་ལ་བརྟེན་ནས་ས་ལམ་བགྲོད་དེ་འབྲས་བུ་མངོན་དུ་བྱེད་པའི་ཚུལ་ལ་གཉིས་ཏེ།  མཐར་ཐུག་གི་འབྲས་བུ་ལ་འཁྲུལ་པ་དགག་པ།  གནས་
སྐབས་ཀྱི་འབྲས་བུ་ལ་འཁྲུལ་པ་དགག་པའོ། །དང་པོ་ལ་ལྔ་སྟེ།  རྒྱུ་འབྲས་རིགས་མི་མཐུན་དགག་པ།  རྒྱུ་འབྲས་ཕྱིན་ཅི་ལོག་དགག་པ།  རྒྱུ་མེད་པར་འབྲས་བུ་འབྱུང་བ་དགག་པ།  རྒྱུ་མ་ཚང་བར་འབྲས་བུ་འབྱུང་བ་དགག་པ།  འབྲས་བུའི་ངོ་བོ་ལ་འཁྲུལ་པ་དགག་པའོ། །
དང་པོ་ལ་གཉིས་ཏེ།  ཆིག་ཐུབ་ལས་སྐུ་གསུམ་འབྱུང་བ་དགག་པ།  ཆིག་ཐུབ་རང་གི་ངོ་བོ་དགག་པའོ། །དང་པོ་ནི།  ཁ་ཅིག་དཀར་པོ་ཞེས་སོགས་དྲུག་སྟེ།  ཞང་འཚལ་པ་ལ་སོགས་པ་ཁ་ཅིག །དཀར་པོ་ཆིག་ཐུབ་ཞེས་བྱ་བ།  སྟོང་ཉིད་ཁོ་ན་བསྒོམ་པ་ལས་འབྲས་བུ་སྐུ་གསུམ་
འབྱུང་ཞེས་ཟེར་བ་མི་འཐད་དེ།  གཅིག་ལ་སོགས་སོ། །དེ་ཡང་སྤྱོད་འཇུག་ཏུ།  རྐྱེན་གཅིག་གིས་ནི་ཀུན་ནུས་པ། །གང་ན་ཡང་ནི་ཡོད་མ་ཡིན། །སྣ་ཚོགས་རྐྱེན་ལས་བྱུང་བ་ཡི། །སྒྱུ་མ་དེ་ཡང་སྣ་ཚོགས་ཉིད། །ཅེས་སོ། །གཉིས་པ་ལ་བཞི་སྟེ།  ཆིག་ཐུབ་ཐབས་དང་བཅས་ན་
ཁས་བླངས་འགལ་བ།  ཐབས་དང་བྲལ་ན་ལུང་རིགས་གཉིས་དང་འགལ་བ།  དེས་ན་ཐབས་མཁས་ལམ་གྱི་གཙོ་བོར་བསྒྲུབ་པ།  སྟོང་ཉིད་ཁོ་ན་བསྒོམ་པའི་ཉེས་དམིགས་བསྟན་པའོ། །དང་པོ་ལ་གཉིས་ཏེ།  དངོས་དང་།  ལུང་འགལ་སྤོང་བའོ། །དང་པོ་ནི་འགའ་ཞིག་ཆིག་
ཐུབ་ཞེས་སོགས་ཚིགས་བཅད་གཉིས་ཏེ།  དྭགས་པོ་ལྷ་རྗེ་ལ་སོགས་པ་འགའ་ཞིག་ཆིག་ཐུབ་བསྒོམ་པའི་རྗེས་ལ་བསྔོ་བ་བྱ་དགོས་ཟེར་བ་མི་འཐད་དེ།  འོ་ན་ཆིག་ཐུབ་སོགས་སོ། །དེས་ན་ཆིག་ཐུབ་འདི་འདྲའི་ལུགས་སངས་རྒྱས་ཀྱིས་གསུངས་པ་མི་འཐད་དེ།  ཐབས་
9-2-139a


གཞན་དང་བཅས་ན་ཆིག་ཐུབ་མ་ཡིན་ཅིང་།  ཐབས་དང་བྲལ་ན་ཐམས་ཅད་མཁྱེན་པའི་ཡེ་ཤེས་ནི་སྙིང་རྗེའི་རྩ་བ་ཅན།  བྱང་ཆུབ་སེམས་ཀྱི་རྒྱུ་ལས་བྱུང་བ་ཐབས་ཀྱིས་མཐར་ཕྱིན་པ་ཡིན་ནོ་ཞེས་གསུངས་པ་དང་འགལ་བའི་ཕྱིར་རོ། །གཉིས་པ་ནི། 
ཐུབ་པས་སྟོང་ཉིད་ཞེས་སོགས་བཅུ་སྟེ།  འོ་ན་གསང་བ་བསམ་གྱིས་མི་ཁྱབ་པའི་མདོ་ལས།  དམ་པའི་ཆོས་ནི་འཛིན་པ་དང་། །བྱང་ཆུབ་སེམས་ཀྱི་བསོད་ནམས་དེས། །སྟོང་པ་ཉིད་ལ་མོས་པ་ཡི། །བཅུ་དྲུག་ཆར་ཡང་མི་ཕོད་དོ། །ཞེས་གསུངས་པ་དང་འགལ་
ལོ་སྙམ་ན་མི་འགལ་ཏེ།  སྟོང་ཉིད་ལ་བསྔགས་པ་ནི།  དངོས་པོར་འཛིན་པ་བཟློག་པའི་ཕྱིར་ཡིན་གྱི།  དེ་ཁོ་ནས་ཐོབ་པ་ནི་མ་ཡིན་ཏེ།  རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱུང་བར་གསུངས། །ཞེས་གསུངས་པ་བཞིན་ནོ། །དཔེར་ན་སངས་རྒྱས་ཕྱག་འཚལ་
སོགས་སོ། །དམ་ཆོས་པད་དཀར་ལས།  མཆོད་རྟེན་དེ་ལ་གང་གིས་ཐལ་མོ་སྦྱོར། །ཡོངས་སུ་ཚང་ངམ་ཐལ་མོ་ཡ་གཅིག་གམ། །ཡང་ན་མགོ་བོ་སྐད་ཅིག་བཏུད་པ་དང་། །དེ་བཞིན་ལུས་ཀྱང་ལན་གཅིག་བཏུད་པ་དང་། །གང་གིས་རིང་བསྲེལ་གནས་པ་དེ་དག་ལ། །གཡེང་བའི་
སེམས་ཀྱིས་སངས་རྒྱས་ཕྱག་འཚལ་ཞེས། །ཚིག་གཅིག་ལན་འགའ་བརྗོད་པར་བྱེད་པ་ཡང་། །དེ་དག་ཀུན་གྱིས་བྱང་ཆུབ་མཆོག་འདི་ཐོབ། །ཞེས་དང་།  མཆོད་རྟེན་བསྐོར་བའི་གཟུངས་ལས།  གཟུངས་འདི་ལན་གཅིག་བརྗོད་པས།  ཕྱོགས་བཅུ་དུས་གསུམ་གྱི་དཀོན་
མཆོག་གསུམ་ལ་ཕྱག་འཚལ་ཞིང་།  བསྐོར་བ་བྱས་པར་འགྱུར་རོ། །ཐོག་མ་མེད་པ་ནས་བསགས་པའི་སྡིག་པ་ཐམས་ཅད་དག་པར་འགྱུར་རོ། །དགེ་བ་སྣ་གཅིག་བྱས་པ་ཡང་བྱེ་བ་ཕྲག་ཏུ་འགྱུར་རོ་ཞེས་གསུངས།  རྟེན་འབྲེལ་སྙིང་པོའི་གཟུངས་ལས།  སྙིང་པོ་འདི་ལན་གཅིག་
9-2-139b


བརྗོད་པས་སྡིག་པ་ཐམས་ཅད་བྱང་བར་འགྱུར་རོ། །མི་མཐུན་པའི་ཕྱོགས་ཐམས་ཅད་ཞི་ཞིང་བཟློག་པར་འགྱུར་རོ་ཞེས་དང་།  དོན་ཞགས་དང་།  ཚེ་དཔག་མེད་དང་།  སྦྱོང་རྒྱུད་ནས་གསུངས་པའི་སྔགས་འབྲུ་འགའ་ཞིག་དྲན་པ་ཙམ་གྱིས་སྡིག་པ་ཀུན་ལས་གྲོལ་བར་འགྱུར་རོ། །
ཞེས་གསུངས་པའི་དགོངས་པ་མི་ཤེས་པར་ཚིག་འབྲུ་སྒྲ་ཇི་བཞིན་པ་ཙམ་ལ་བརྟེན་པར་མི་བྱའོ། །གཉིས་པ་ལ་གཉིས་ཏེ།  རིགས་པ་དང་འགལ་བ།  ལུང་དང་འགལ་བའོ། །དང་པོ་ནི།  མདའ་རྐྱང་ལ་ནི་ཞེས་སོགས་བདུན་ནོ། །གཉིས་པ་ནི།  རྡོ་རྗེ་གུར་ལས་ཞེས་སོགས་ཚིགས་
བཅད་དགུ་སྟེ།  ཐབས་དང་བྲལ་བའི་སྟོང་ཉིད་ཁོ་ན་བསྒོམས་པས་སངས་རྒྱས་འབྱུང་བར་འདོད་པ་མི་འཐད་དེ།  རྡོ་རྗེ་གུར་དང་།  རྣམ་སྣང་མངོན་བྱང་དང་།  རྣམ་འགྲེལ་གྱི་ལུང་གསུམ་དང་འགལ་བའི་ཕྱིར་རོ། །ལུང་དང་པོའི་དོན་ནི།  གལ་ཏེ་སྟོང་པ་ཉིད་དུ་ལྟ་བ་ཁོ་ན་སངས་རྒྱས་ཐོབ་པའི་
ཐབས་ཡིན་ན།  དེའི་ཚེ་སངས་རྒྱས་ཉིད་མི་འབྱུང་སྟེ།  འབྲས་བུའི་འདྲ་བ་ནི་རྒྱུའི་འདྲ་བ་ལས་གཞན་མ་ཡིན་པའི་ཕྱིར་རོ། །དེས་ན་ཐབས་ནི་སྟོང་པ་ཉིད་དུ་ལྟ་བ་མ་ཡིན་པའི་ཕྱིར་རོ། །འོན་ཀྱང་སྟོང་ཉིད་ལ་བསྔགས་པ་གསུངས་པའི་དགོས་པ་ནི།  བདེན་འཛིན་གྱི་ལྟ་བ་རྣམས་ལས་
བཟློག་པ་དང་།  མུ་སྟེགས་བྱེད་བདག་ཏུ་ལྟ་བ་རྣམས་ཀྱིས་བདག་ཏུ་ཞེན་པའི་བསམ་པ་བཟློག་པའི་ཕྱིར་དུ།  སྟོང་ཉིད་ཀྱི་ལྟ་བ་རྒྱལ་བ་རྣམས་ཀྱིས་གསུངས་པ་ཡིན་ནོ། །སྟོང་ཉིད་ཁོ་ནས་སངས་རྒྱས་ཐོབ་པ་མ་ཡིན་ཅིང་སྟོང་ཉིད་བསྒོམ་པ་དགོས་པ་ཡོད་པ་དེའི་ཕྱིར་ན།  ཐབས་
ཤེས་ཟུང་འཇུག་གིས་སངས་རྒྱས་འགྲུབ་སྟེ།  དཀྱིལ་འཁོར་གྱི་འཁོར་ལོ་ཞེས་བྱ་བའི་རྫོགས་རིམ་གྱི་ཐབས་ནི་བདེ་བའི་སྡོམ་པ་སྟེ་ཤེས་རབ་ཡིན་ལ།  སངས་རྒྱས་ང་རྒྱལ་རྣལ་འབྱོར་ནི་བསྐྱེད་རིམ་སྟེ།  ཐབས་ཡིན་པས་དེ་གཉིས་ཀྱིས་སངས་རྒྱས་ཉིད་དུ་ངེས་པར་འགྲུབ་ཅེས་པའི་
9-2-140a


དོན་ནོ། །ལུང་གཉིས་པ་ལ།  ཚིགས་བཅད་དང་པོས་ནི་ཐབས་དང་བྲལ་བའི་ཤེས་རབ་ཀྱིས་ཉན་ཐོས་ཀྱི་བྱང་ཆུབ་ཐོབ་པར་སྟོན་ཅིང་།  ཕྱི་མས་ནི་རྫོགས་པའི་བྱང་ཆུབ་བསྒྲུབ་པ་ལ་ཐབས་ཤེས་ཟུང་འཇུག་དགོས་པར་བསྟན་ནོ། །ལུང་
གསུམ་པའི་ཚིགས་བཅད་དང་པོ་ནི།  ཐབས་མང་པོས་ཡུན་རིང་དུ་གོམས་པས་སྐྱོན་ཡོན་གྱི་གནས་ཚུལ་རབ་ཏུ་གསལ་བ་ཐོབ་པ་བསྟན།  དེ་ནས་ཚིག་རྐང་གཉིས་ཀྱིས་དེ་ཐོབ་པ་སྒྲིབ་གཉིས་ཀྱི་རྒྱུའི་བག་ཆགས་སྤངས་པར་བསྟན།  དེ་ནས་གཉིས་ཀྱིས་གཞན་དོན་ལ་འཇུག་
པ་ཅན་གྱི་ཐུབ་པ་ཆེན་པོ་ཉན་རང་ལས་ཁྱད་པར་དུ་འཕགས་པར་བསྟན།  དེ་ནས་གཉིས་ཀྱིས་དེ་ཉིད་ཀྱི་ཕྱིར་ན་རྒྱུའི་དུས་སུ་ཐབས་གོམས་པ་དེ་ཉིད་འབྲས་བུའི་དུས་ཀྱི་སྟོན་པའི་རྒྱུ་ཡིན་པས།  ཚད་མ་མདོར་སྟོན་པ་ཞེས་པའི་མིང་གི་བཏགས་པར་བཞེད།  ཅེས་བསྟན་ནོ། །གསུམ་
པ་ལ་གསུམ་སྟེ།  རྣམ་གྲོལ་བཟང་ངན་ཐབས་ཀྱིས་བྱེད་པར་བསྟན།  དེ་ལ་ཡིད་ཆེས་ལུང་གི་སྒྲུབ་བྱེད་འགོད།  རྣམ་གྲོལ་བཟང་པོ་འདོད་པས་ཐབས་ལ་འབད་པར་གདམས་པའོ། །དང་པོ་ནི།  དེས་ན་ཐབས་ཞེས་སོགས་བཅོ་ལྔ་སྟེ།  རྫོགས་པའི་བྱང་ཆུབ་བསྒྲུབ་པའི་རྒྱུ་ཐུན་
མོང་མ་ཡིན་པ་ནི་ཐབས་ལ་མཁས་པ་ཡིན་ཏེ།  བྱང་ཆུབ་གསུམ་ཀ་ཡང་སྟོང་ཉིད་བསྒོམ་པས་རྣམ་པར་གྲོལ་བ་ཐོབ་པར་མཚུངས་ན་ཡང་།  གཞན་དོན་འབད་མེད་ལྷུན་གྲུབ་ཏུ་བྱེད་པའི་བྱང་ཆུབ་ནི་ཐབས་མཁས་ཁོ་ན་ལས་བྱུང་བའི་ཕྱིར་རོ། །གཉིས་པ་ལ་གཉིས་ཏེ།  བྱམས་
པའི་ལུང་།  དཔའ་བོའི་ལུང་ངོ་། །དང་པོ་ནི།  དེ་ཡང་མདོ་སྡེ་ཞེས་སོགས་དྲུག་སྟེ།  དཔེ་ཇི་ལྟར་ན་མདུད་པའི་བྱེ་བྲག་གིས་གོས་ལ་ཚོན་བཀྲ་བ་དང་།  མི་བཀྲ་བ་དེ་བཞིན་དུ་སེམས་བསྐྱེད་དང་སྨོན་ལམ་གྱི་འཕེན་པའི་དབང་གིས་ཐེག་པ་གསུམ་ལ་གྲོལ་བའི་དབང་གིས་ཡེ་
9-2-140b


ཤེས་བཀྲ་མི་བཀྲ་འབྱུང་ངོ་ཞེས་དེ་སྐད་གསུངས་པ་ཡང་འབྲས་བུའི་བཟང་ངན་ཐབས་ཀྱིས་བྱེད་པའི་ཞེས་གསུངས་པ་ཡང་དོན་འདི་ཉིད་ཡིན་ནོ། །གཉིས་པ་ནི།  སློབ་དཔོན་མ་ཏི་ཞེས་སོགས་དྲུག་སྟེ།  བསྟོད་པ་བརྒྱ་ལྔ་བཅུ་པ་ལས།  བསེ་རུའི་རྭ་དང་འདྲ་བའི་རང་སངས་རྒྱས་
དང་།  སྟོན་པ་ཁྱེད་ཀྱི་རྗེས་སུ་འགྲོ་ཞིང་སློབ་པའི་ཉན་ཐོས་ཉོན་མོངས་ཞི་བ་ཙམ་གྱིས་ཁྱེད་དང་མཚུངས་ཀྱང་རང་དོན་སྟོབས་སོགས་ཀྱི་ཡོན་ཏན་དང་།  གཞན་དོན་འབད་མེད་ལྷུན་གྲུབ་ཏུ་འབྱུང་བ་ལ་སོགས་པའི་བསམ་ཡས་ཡོན་ཏན་གྱི་ཚོགས་ཀྱིས་མ་ཡིན་ཞེས་
གསུངས་པ་ཡང་དོན་འདི་ཉིད་ཡིན་ནོ། །གསུམ་པ་ནི།  དེས་ན་སངས་རྒྱས་ཞེས་སོགས་དྲུག་སྟེ།  བརྒྱད་སྟོང་པར་རབ་འབྱོར་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ལ་རྟོག་མོད་ཀྱི་མངོན་སུམ་དུ་བྱའོ་སྙམ་
དུ་མི་རྟོག་གོ།  ཡོངས་སུ་འདྲིས་པར་བྱའོ་སྙམ་དུ་མི་རྟོག་གོ།  མངོན་སུམ་དུ་བྱ་བའི་དུས་འདི་ཡིན་ནོ་སྙམ་དུ་མི་རྟོག་གོ་ཞེས་སོ། །བཞི་པ་ནི།  སྟོང་ཉིད་རྐྱང་པ་ཞེས་སོགས་བཅུ་གསུམ་སྟེ།  སྟོང་ཉིད་རྐྱང་པ་བསྒོམས་ན་ཆད་ལྟར་འགྱུར་བས་སྟོང་ཉིད་ཀྱང་རྟོགས་མི་ནུས་
ཤིང་།  གལ་ཏེ་སྟོང་ཉིད་རྟོགས་ན་ཡང་ཉན་ཐོས་ཀྱི་འགོག་པར་ལྟུང་སྟེ།  འཕགས་པ་དཀོན་མཆོག་སོགས་སོ། །གཉིས་པ་ནི།  ལ་ལ་སྟོང་ཉིད་ཞེས་སོགས་དྲུག་གོ།  གསུམ་པ་ནི།  ཁ་ཅིག་ས་ལམ་ཞེས་སོགས་བཅུ་བཞི་སྟེ།  ཞང་འཚལ་པ་ལ་སོགས་པ་ཁ་ཅིག །ཕྱག་རྒྱ་
ཆེན་པོ་ཆིག་ཆོད་ལ། །ས་ལམ་བརྩི་བའི་རྨོངས་པ་འཁྲུལ། །ཞེས་ས་ལམ་མི་བགྲོད་པར་འཚང་རྒྱ་བར་འདོད་པ་དང་།  ཏི་སེ་ལ་སོགས་པ་སྐོར་བ་དང་མཉམ་དུ།  རྩ་མདུད་མེད་པ་སོགས་འདོད་པ་ཡང་རྒྱུད་སྡེའི་དགོངས་པ་མ་ཤེས་པས་ཤིན་ཏུ་འགལ་བ་ཡིན་ཏེ།  ཕྱི་རུ་
9-2-141a


ཡུལ་ཉི་ཤུ་རྩ་བཞི་པོ་རྣམས་བགྲོད་པ་དང་།  ནང་དུ་རྩ་མདུད་གྲོལ་བ་ནི།  རྣལ་འབྱོར་པས་ས་བཅུ་ལ་སོགས་བགྲོད་པའི་རྟེན་འབྲེལ་ཉིད་ཀྱིས་འབྱུང་བ་ཡིན་པའི་ཕྱིར་རོ། །འདི་དོན་རྣལ་འབྱོར་ཆེན་པོའི་སོགས་ཏེ།  སམྦུ་ཊི་ལས།  གནས་དང་ཉེ་བའི་གནས་
སོགས་བཅུ། །རབ་དགའ་ལ་སོགས་པའི་ས་བཅུ་ལ་སྦྱར་བ་དང་།  ཀྱཻ་རྡོ་རྗེ་ལས།  གནས་དང་ཉེ་བའི་གནས་དང་ནི། །ཞེས་སོགས་ཀྱི་མཇུག་ཏུ།  འདི་རྣམས་ས་ནི་བཅུ་གཉིས་ཏེ། །ཞེས་ཕྱི་ནང་གི་གནས་རྣམས་དང་རབ་དགའ་ལ་སོགས་པའི་ས་རྣམས་སྦྱོར་བ་བླ་མེད་ཀྱི་དགོངས་
པ་ཡིན་ནོ། །བཞི་པ་ནི།  ལ་ལ་དབང་བཞི་ཞེས་སོགས་དྲུག་སྟེ།  ཕ་རོལ་ཏུ་ཕྱིན་པའི་ཐེག་པར་སྐུ་གསུམ་གྱི་རྣམ་གཞག་མཛད་ཅིང་།  རྡོ་རྗེ་ཐེག་པར་སྐུ་བཞིའི་རྣམ་གཞག་མཛད་པའི་རྒྱུ་མཚན་ཡང་འབྲས་བུ་སྐུ་བཞི་ལ་རྒྱུ་སྨིན་བྱེད་ཀྱི་དབང་བཞི་དང་།  གྲོལ་བྱེད་ཀྱི་ལམ་བཞི་དགོས་
པའི་ཕྱིར་རོ། །ལྔ་པ་ནི།  ཁ་ཅིག་འབྲས་བུའི་ཞེས་སོགས་དྲུག་སྟེ།  གསང་འདུས་པ་ཁ་ཅིག་འབྲས་བུའི་མཐར་ཐུག་ནི།  འོད་གསལ་སྟོང་ཉིད་ཡིན།  ཞེས་སྨྲ་བ་ཐོས་པ་འདི་ནི་འཕགས་པ་ཡབ་སྲས་ཀྱི་དགོངས་པ་མ་ཡིན་ཏེ།  རིམ་ལྔ་དང་ནི་སོགས་སོ། །དེ་ཡང་རིམ་ལྔ་ལས། 
ཡང་དག་མཐའ་ལས་ལངས་ནས་ནི། །གཉིས་མེད་ཡེ་ཤེས་ཐོབ་པར་འགྱུར། །ཟུང་འཇུག་ཏིང་འཛིན་ལ་གནས་ནས། །སླར་ཞིང་གང་ལའང་མི་སློབ་བོ། །འདི་ནི་རྫོགས་པའི་རྣལ་འབྱོར་པ། །རྡོ་རྗེ་འཛིན་པ་ཆེན་པོའང་དེ། །རྣམ་པ་ཀུན་གྱི་མཆོག་ལྡན་པའི། །ཐམས་ཅད་མཁྱེན་པ་
དེ་ནས་འགྱུར། །ཞེས་དང་།  སྤྱོད་བསྡུས་ལས།  བྱང་ཆུབ་ཀྱི་ཤིང་དྲུང་ལ་བཞུགས་ནས་མཚན་ཕྱེད་ཀྱི་དུས་སུ་འོད་གསལ་མངོན་དུ་མཛད་དེ།  སྒྱུ་མ་ལྟ་བུའི་ཏིང་ངེ་འཛིན་ལས་བཞེངས་ནས།  འགྲོ་བ་རྣམས་ལ་སྟོན་པར་མཛད་པ་ཡིན་ནོ་ཞེས་སོ། །གཉིས་པ་གནས་
9-2-141b


སྐབས་ཀྱི་འབྲས་བུ་ལ་འཁྲུལ་པ་དགག་པ་ལ་གསུམ་སྟེ།  གྲུབ་ཐོབ་ལས་རྟོགས་ལྡན་བཟང་བ་དགག་པ།  ཉམས་ལས་གོ་རྟོགས་བཟང་བ་དགག་པ།  རྣལ་འབྱོར་བཞི་པོ་འཕགས་པའི་ས་ལ་སྦྱར་བ་དགག་པའོ། །དང་པོ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །
དང་པོ་ནི།  ཕྱག་རྒྱ་བ་ལ་ལ་གྲུབ་ཐོབ་ཞེས་སོགས་ཚིགས་བཅད་གཅིག་གོ།  གཉིས་པ་ནི།  འདི་འདྲ་འཕགས་པའི་ཞེས་སོགས་ཉེར་གཉིས་ཏེ།  ཐེག་ཆེན་འཕགས་པ་མ་ཡིན་པ་ལ་གྲུབ་ཐོབ་མེད་པའི་རྒྱུ་མཚན།  མདོ་སྡེ་རྒྱན་ལས།  ས་རྣམས་ཐམས་ཅད་མ་གྲུབ་
དང་། །གྲུབ་པ་དག་ཏུ་ཤེས་པར་བྱ། །གྲུབ་པ་དག་ཀྱང་མ་གྲུབ་དང་། །གྲུབ་པ་དག་ཏུ་ཡང་འདོད་དོ། །ཞེས་མོས་སྤྱོད་ཀྱི་ས་མ་གྲུབ་པ་དང་།  ས་དང་པོ་ཡན་ཆད་གྲུབ་པ་ཡིན་ཅིང་།  དེ་ལ་ཡང་ས་བདུན་པ་མན་ཆད་མ་གྲུབ་པ་དང་།  ས་བརྒྱད་པ་ཡན་ཆད་གྲུབ་པ་ཡིན་
ནོ་ཞེས་སོགས་གསུངས་པ་ཡང་།  གྲུབ་ཐོབ་ས་དང་པོ་ཡན་ཆད་ལ་འཇོག་པའི་དགོངས་པ་དེ་ཉིད་ཡིན་ནོ། །ལམ་འབྲས་ལས་ཀྱང་།  གྲུབ་མཐའ་བཞི་པོ་ས་དང་པོ་ཡན་ཆད་ལ་འཇོག་པས།  ངེད་ཀྱི་ལུགས་ཀྱི་གྲུབ་ཐོབ་དེ་འདྲ་ཡིན་ཅིང་།  གྲུབ་ཐོབ་ལས་བཟང་
བའམ་རྟོགས་ལྡན་གྱི་མཚན་ཉིད་འདི་ཡིན་ནོ་ཞེས་མདོ་རྒྱུད་ལས་གསུངས་པ་མེད་པས།  གྲུབ་ཐོབ་ལས་བཟང་བའི་རྟོགས་ལྡན་བླུན་པོ་ལ་སོགས་སོ། །གཉིས་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ནི།  གླིང་རས་ལ་སོགས་པ་ལ་ལ་ཉམས་
དང་ཞེས་སོགས་ཚིགས་བཅད་གཅིག་གོ།  གཉིས་པ་ནི།  འདི་ཡང་རེ་ཞིག །ཞེས་སོགས་ཚིགས་བཅད་དྲུག་སྟེ།  ཉམས་ཞེས་བྱ་བ་དེ།  འདིར་བརྟགས་པའི་མཐའ་གསུམ་པོ་གང་ཡིན་ནའང་།  དེ་ལས་གོ་རྟོགས་བཟང་བ་མི་འགྲུབ་སྟེ།  གོ་རྟོགས་གཉིས་པོ་ཡང་དེའི་
9-2-142a


ནང་དུ་འདུས་པ་ཡིན་པའི་ཕྱིར་རོ། །གོ་བ་དང་རྟོགས་པ་གཉིས་ནི།  རྣམ་གྲངས་ཡིན་གྱི་ངོ་བོ་ཐ་དད་མ་ཡིན་ཏེ།  ག་ཏ་ཞེས་པ་དང་།  ས་མ་ཡ་ཞེས་པ་སྐབས་ཐོབ་ཀྱིས་གཉིས་ཀ་ཡང་གོ་བ་དང་།  རྟོགས་པ་གཉིས་ཀ་ལ་འཇུག་པའི་ཕྱིར་རོ། །ལམ་
འབྲས་ལ་སོགས་པའི་གཞུང་ལུགས་འགའ་ལས་བསྒོམ་པའི་ཏིང་ངེ་འཛིན་ལ་ཉམས་ཀྱི་སྣང་བ་དང་།  རྫོགས་པའི་སངས་རྒྱས་ཀྱི་ཡེ་ཤེས་ལ་དག་པའི་སྣང་བར་བཤད་པ་ཡོད་ཅིང་།  བསྒོམ་ཉམས་སྐྱོན་ཡོད་མེད་ཕྱེད་པས་ས་བཅུ་གསུམ་པའོ་ཞེས་སངས་རྒྱས་ཀྱི་ས་ལ་
བཤད་པ་ཡང་མཐོང་བས་དེ་འདྲའི་ཉམས་དང་སོགས་སོ། །གསུམ་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །དང་པོ་ནི།  རྩེ་གཅིག་དང་ནི་ཞེས་སོགས་དྲུག་སྟེ།  ཕྱག་རྒྱ་བ་རྣམས་ལ་གྲགས་པའི་བསྒོམ་རྣལ་འབྱོར་བཞི་ཞེས་བྱ་བ་འདི་མར་པའི་སློབ་
མ་རྣམས་ལ་མེད་ཅིང་།  དུས་ཕྱིས་ཀོང་ནེ་རུ་པ་ལ།  དྭགས་པོ་ལྷ་རྗེས་རྩད་ཆོད་ནས་ཕྱག་རྒྱ་ཆེན་པོ་ལ་སྦྱར་བ་ཡིན་ལ།  ངོ་སྤྲོད་པའི་ཚེ་ན།  མཐོང་ལམ་སོགས་སུ་སྤྲོད་དོ། །གཉིས་པ་ལ་གཉིས་ཏེ།  སོ་སྐྱེ་ལ་ཆོས་མཐུན་བརྩི་ན་དཔྱད་པར་བྱ་བ།  འཕགས་པའི་ས་ལ་
སྦྱར་ན་མདོ་རྒྱུད་དང་འགལ་བའོ། །དང་པོ་ནི།  འདི་ཡང་ཕྱེ་སྟེ།  ཞེས་སོགས་ཉེར་དགུ་སྟེ།  རྣལ་འབྱོར་བཞི་པོ་ས་བཅུ་གཅིག་ལ་སྦྱོར་བའི་ས་བཅུ་གཅིག་པོ་འདི་སོ་སྐྱེའི་ས་ལ་ཆོས་མཐུན་ཙམ་བརྩི་འམ།  འཕགས་པའི་ས་ཁོ་ན་ལ་སྦྱོར།  དང་པོ་ལྟར་ན།  ཆོས་ནས་
གསུངས་ན་བརྩི་ཡང་འགའ་ཡང་འགལ་བ་མེད་དེ།  དཔེར་ན་དཀོན་མཆོག་བརྩེགས་པའི་རྨི་ལམ་ངེས་བསྟན་གྱི་ལེའུ་ལས།  ཐུབ་པའི་མཆོད་རྟེན་སོགས་སོ། །འདི་དག་ཀྱང་ཚོགས་ལམ་དང་སྦྱོར་ལམ་དང་པོ་གསུམ་པོ་རེ་རེ་ལ་ཡང་གསུམ་གསུམ་སྟེ།  མོས་པས་
9-2-142b


སྤྱོད་པའི་ས་ལ་ས་བཅུར་བྱས་ནས་སྦྱར་བ་ཡིན་གྱི།  འཕགས་པའི་མིན་པ་དེ་བཞིན་དུ་རྩེ་གཅིག་སོགས་ལའང་སོགས་སོ། །གཉིས་པ་ནི།  ཅི་སྟེ་འཕགས་པའི་ཞེས་སོགས་གཉིས་སོ། །དེ་རྣམས་ཀྱིས་སྡོམ་གསུམ་སོ་སོའི་དོན་རྣམས་ཞིབ་ཏུ་བཤད་ཟིན་ཏོ། །གཉིས་
པ་རྩོད་པ་སྤོང་བ་ལ་གཉིས་ཏེ།  རྩོད་པ་དང་།  ལན་ནོ། །དང་པོ་ནི།  ཁ་ཅིག་ཐེག་པ་ཞེས་སོགས་གཉིས་ཏེ།  དམ་པ་ཕྱར་ཆུང་པ་ལ་སོགས་པ་ཁ་ཅིག །ཐེག་པ་ཆེ་ཆུང་གི་ལྟ་སྒོམ་སྤྱོད་འབྲས་ཐམས་ཅད་རང་རང་གི་གཞུང་ལུགས་ནས་བཤད་པ་བཞིན་རང་ས་ན་བདེན་པ་ཡིན་
པས།  མདོ་རྒྱུད་ནས་མ་བཤད་པས་དེ་དག་སུན་ཕྱུང་བར་མི་ནུས་སོ། །ཞེས་ཀུན་ལ་སྒྲོགས་པར་བྱེད་དོ། །གཉིས་པ་ལ་བཞི་སྟེ།  སྨྲས་ཚད་བདེན་པ་དགག་པ།  གྲུབ་མཐའ་ཐམས་ཅད་བདེན་པ་དགག་པ།  གྲངས་ངེས་ཐམས་ཅད་བདེན་པ་དགག་པ།  དེ་ལ་རྩོད་པ་སྤོང་བའོ། །
དང་པོ་ནི།  གལ་ཏེ་སྨྲས་ཚད་ཞེས་སོགས་གཉིས་ཏེ།  ཐེག་པ་རང་ས་ནས་བདེན་པའི་དོན་སྨྲས་ཚད་བདེན་པ་ལ་བྱེད་དམ།  གྲུབ་མཐའ་ཀུན་བདེན་པ་ལ་བྱེད་དམ།  སངས་རྒྱས་པའི་ཐེག་པ་ཀུན་བདེན་པ་ལ་བྱེད།  ཞེས་བརྟགས་ནས་དང་པོ་འདིས་འགོག་ཅིང་།  ཕྱི་མ་གཉིས་
འོག་ཏུ་འགོག་གོ།  གཉིས་པ་ནི།  འོན་ཏེ་གྲུབ་མཐའ་ཞེས་སོགས་བཅོ་ལྔ་སྟེ།  བརྟག་པ་གཉིས་པ་ལྟར་ན།  དབང་ཕྱུག་པ་སྲོག་གི་མཆོད་སྦྱིན་བྱས་པས་ཐར་པ་ཐོབ་ཞེས་འཚེ་བ་ཆོས་སུ་སྨྲ་བ་དང་།  རྒྱང་འཕེན་པ་འཇིག་རྟེན་ཕ་རོལ་མེད་པར་སྨྲ་བ་སོགས་ལོག་ལྟ་
ཐམས་ཅད་བདེན་པར་འགྱུར་རོ། །གལ་ཏེ་མུ་སྟེགས་སོགས་ནས།  རང་ས་ནས་ནི་བདེན་སྙམ་ན།  སྦྱིན་སོགས་ཕལ་ཆེར་བདེན་མོད་ཀྱང་།  དཀོན་མཆོག་ལ་སྐྱབས་སུ་མི་འགྲོ་བས་སྐྱབས་གནས་ཀྱི་གནད་དང་།  རྟག་ཆད་གང་རུང་དུ་འཛིན་པས་ལྟ་བའི་གནད།  མེ་ལྔ་བསྟེན་པ་སོགས་ཐར་ལམ་
9-2-143a


དུ་འདོད་པས་ཐབས་ཀྱི་གནད་རྣམས་འཁྲུལ་པས་ན།  སྦྱིན་སོགས་ཀྱི་ཆོས་གཞན་བཟང་ཡང་འཁོར་བ་ལས་སྐྱོབ་པར་མི་ནུས་སོ། །གསུམ་པ་ལ་གཉིས་ཏེ།  སངས་རྒྱས་ཀྱི་གསུང་ལ་གཉིས་སུ་ཕྱེ་བ།  དེ་དག་ཇི་ལྟར་ལེན་པའི་ཚུལ་ལོ། །དང་པོ་
ནི།  ཅི་སྟེ་སངས་རྒྱས་ཞེས་སོགས་བཅོ་བརྒྱད་དེ།  བརྟག་པ་གསུམ་པ་ལྟར་ན།  སྤྱིར་སངས་རྒྱས་ཀྱི་གསུང་ལ་བརྗོད་བྱའི་སྒོ་ནས་དྲང་དོན་དང་།  ངེས་དོན་གཉིས་སུ་ཡོད་དེ།  བློ་གྲོས་མི་ཟད་པའི་མདོ་ལས།  མདོ་གང་ལས་ཀུན་རྫོབ་ཀྱི་བདེན་པ་གསུངས་པ་འདི་ནི་དྲང་
བའི་དོན་ཡིན་ནོ། །མདོ་གང་ལས་ངེས་པའི་དོན་མངོན་སུམ་དུ་བྱ་བའི་ཕྱིར་གསུངས་པ་འདི་ནི་ངེས་པའི་དོན་ཏོ་ཞེས་དང་།  ཏིང་ངེ་འཛིན་རྒྱལ་པོ་ལས།  སྟོང་པ་བདེ་བར་གཤེགས་པས་བསྟན་པ་ལྟར། །ངེས་དོན་མདོ་སྡེ་དག་གི་བྱེ་བྲག་ཤེས། །གང་ལས་སེམས་ཅན་སྐྱེས་
བུ་གང་ཟག་བསྟན། །ཆོས་དེ་ཐམས་ཅད་དྲང་བའི་དོན་དུ་ཤེས། །ཞེས་གསུངས་པའོ། །རྗོད་བྱེད་ཀྱི་སྒོ་ནས་སྒྲ་ཇི་བཞིན་པ་དང་།  ཇི་བཞིན་མ་ཡིན་པ་གཉིས་སུ་གསུངས་ཏེ།  སྒྲ་ཇི་བཞིན་པ་ལ་ཚད་མས་གནོད་པ་འབབ་པ་དང་།  མི་འབབ་པ་གཉིས་ཡོད་པའི་ཕྱིར་རོ། །
ཐེག་པའི་སྒོ་ནས་འཇིག་རྟེན་པ་དང་།  འཇིག་རྟེན་ལས་འདས་པ་གཉིས་སུ་གནས་ཏེ།  འཇིག་རྟེན་པ་རྣམས་བསྟན་པ་ལ་འཇུག་པའི་ཆེད་དུ་གསུངས་པ་དང་།  བསྟན་པ་ལ་ཞུགས་པ་རྣམས་བྱང་ཆུབ་ཐོབ་པའི་ཆེད་དུ་གསུངས་པ་རྣམ་པ་གཉིས་སུ་ཡོད་པའི་ཕྱིར།  བཤད་ཚུལ་
གྱི་སྒོ་ནས་དགོངས་པ་དང་།  ལྡེམ་པོར་དགོངས་པ་དང་།  དྲང་པོར་དགོངས་པ་དང་གསུམ་ཡོད་དེ།  ཉེས་པ་བརྒྱད་ཀྱི་གཉེན་པོར་དགོངས་པ་ཅན་རྣམ་པ་བཞི་གསུངས་པ་དང་།  དགོངས་གཞིའི་ཆེད་དུ་ལྡེམ་དགོངས་བཞི་གསུངས་པ་དང་།  སྒྲ་ཇི་བཞིན་གྱི་དོན་ཉམས་
9-2-143b


སུ་ལེན་པའི་ཆེད་དུ་དྲང་པོར་གསུངས་པ་རྣམས་སུ་ཡོད་པའི་ཕྱིར་རོ། །དེ་ལ་དགོངས་པ་བཞི་ནི།  སངས་རྒྱས་ལ་བརྙས་པའི་གཉེན་པོར་ང་ཉིད་སངས་རྒྱས་རྣམ་གཟིགས་སུ་གྱུར་ཏོ། །ཅེས་མཉམ་པ་ཉིད་ལ་དགོངས་པ་དང་།  ཆོས་ལ་བརྙས་པའི་གཉེན་པོར།  སངས་རྒྱས་བྱེ་བ་ཕྲག་
དཔག་ཏུ་མེད་པ་ལ་བསྙེན་བཀུར་བྱས་ན་ཆོས་དེ་རྟོགས་པར་འགྱུར་རོ་ཞེས་དོན་གཞན་མངོན་སུམ་དུ་རྟོགས་པ་ལ་དགོངས་པ་དང་།  ལེ་ལོའི་གཉེན་པོར་བདེ་བ་ཅན་དུ་སྐྱེ་བར་སྨོན་ལམ་འདེབས་ན་དེར་སྐྱེའོ་ཞེས་དུས་གཞན་ལ་དགོངས་པ་དང་།  དགེ་བ་ཅུང་ཟད་ཙམ་གྱིས་ཆོག་པར་
འཛིན་པའི་གཉེན་པོར།  དགེ་བ་འདི་ལྟ་བུ་ནི་དམན་ལ་གཞན་ནི་མཆོག་གོ་ཞེས་གང་ཟག་གི་བསམ་པ་ལ་དགོངས་པའོ། །གཞན་ཡང་ང་རྒྱལ་དང་།  འདོད་ཆགས་དང་།  འགྱོད་པ་དང་།  མ་ངེས་པ་ལྡོག་པའི་གཉེན་པོར་སངས་རྒྱས་ཀྱི་སྐུ་ལ་བསྔགས་པ་དང་།  དག་པའི་ཞིང་ལ་བསྔགས་
པ་དང་།  མཚམས་མེད་བྱས་པ་ཡང་མཐོ་རིས་སུ་སྐྱེ་བར་གསུངས་པ་དང་།  ཉན་ཐོས་དགྲ་བཅོམ་པ་སངས་རྒྱས་སུ་ལུང་བསྟན་པ་རྣམས་ཀྱང་དགོངས་པ་ཅན་ནོ། །ལྡེམ་དགོངས་བཞི་ནི།  ཉན་ཐོས་པ་རྣམས་ཐེག་པ་ཆེན་པོ་ལ་གཞུག་པའི་ཕྱིར།  གཟུགས་སོགས་ཡོད་པར་གསུངས་
པ་གཞུག་པ་ལྡེམ་པོར་དགོངས་པ་དང་།  ངོ་བོ་ཉིད་གསུམ་ལ་དགོངས་ནས་ཆོས་རྣམས་ངོ་བོ་ཉིད་ཀྱིས་ཡོད་པ་མ་ཡིན་པར་གསུངས་པ་མཚན་ཉིད་ལྡེམ་དགོངས་དང་།  སྔར་གྱི་དགོངས་པ་ཅན་བཞི་པོ་གཉེན་པོར་ལྡེམ་དགོངས་དང་།  བརྗོད་བྱ་ཟབ་མོ་སྒྲ་ཇི་བཞིན་པ་མ་ཡིན་པར་
གསུངས་པ་བསྒྱུར་བ་ལྡེམ་དགོངས་རྣམས་སོ། །སངས་རྒྱས་ཀྱི་གསུང་ལ་བཤད་ཚུལ་དེ་ལྟར་འབྱུང་བའི་དཔེ་ནི།  དེ་ལ་འཇིག་རྟེན་མཐུན་འཇུག་སོགས་སོ། །གཉིས་པ་ནི།  དེས་ན་དྲང་བའི་ཞེས་སོགས་བཅུ་སྟེ་སངས་རྒྱས་ཀྱི་གསུང་ལ་དྲང་དོན་དང་།  ངེས་དོན་སོགས་ཀྱི་
9-2-144a


དབྱེ་བ་མང་དུ་ཡོད་པ་དེས་ན་དྲང་དོན་སོགས་དེ་ལྟར་བདེན་པར་མི་གཟུང་ཞིང་།  ངེས་དོན་སོགས་ཇི་ལྟར་གསུངས་པ་བཞིན་བདེན་པར་གཟུང་དགོས་པའི་ཕྱིར་ན།  དྲང་ངེས་ཤེས་པའི་སྒོ་ནས་སངས་རྒྱས་ཀྱི་གསུང་ལེན་པར་བྱའི།  ཐམས་ཅད་རང་ས་ན་བདེན་
པས་བླང་བར་བྱ་བ་ནི་མ་ཡིན་ནོ། །བཞི་པ་ལ་གཉིས་ཏེ།  རྩོད་པ་དང་།  ལན་ནོ།  དང་པོ་ནི།  གལ་ཏེ་མུ་སྟེགས་ཞེས་སོགས་དགུའོ། །གཉིས་པ་ནི།  སངས་རྒྱས་དྲང་དོན་ཞེས་སོགས་བཅུ་བཞི་སྟེ།  སངས་རྒྱས་ཀྱི་གསུང་ལ་དྲང་ངེས་གཉིས་ཡོད་ཀྱང་།  དྲང་དོན་ནི་ངེས་དོན་ལ་
འཁྲིད་པའི་ཆེད་ཡིན་ཅིང་།  མུ་སྟེགས་ལ་བདེན་པ་སྲིད་ཀྱང་དེས་བརྫུན་པ་ཉིད་ལ་སྦྱོར་བར་བྱེད་པ་དེས་ན་སོགས་སོ། །དེ་བཞིན་དུ་གངས་ཅན་འདི་ན་ཡང་།  ལུས་ངག་གི་རྣམ་ཐར་བཟང་པོ་བསྟན་ནས།  དཀར་པོ་ཆིག་ཐུབ་ལ་སོགས་པའི་ལོག་པའི་ཆོས་ལ་སྦྱར་བ་མཐོང་ནས།  མུ་
སྟེགས་བྱེད་ཀྱི་ཆོས་བཞིན་དུ་ངེད་ཀྱིས་སྤོང་ཞིང་།  སློབ་མའི་བློ་དང་འཚམ་པར་ཐོག་མར་ཐེག་པ་སྣ་ཚོགས་ཀྱི་ཚུལ་བསྟན་ནས།  སངས་རྒྱས་སྒྲུབ་པའི་ཐབས་ཤེས་ཟུང་འཇུག་དང་།  རིམ་གཉིས་ཀྱི་གནད་རྣམས་སངས་རྒྱས་ཀྱི་གསུང་བཞིན་དུ་ཡང་དག་པར་སྟོན་པར་མཛད་
པའི་བླ་མ་དེ་སངས་རྒྱས་ཉིད་དུ་བདག་གིས་གཟུང་ངོ་། །གསུམ་པ་གནད་མ་འཁྲུལ་པར་བསྒྲུབ་པར་གདམས་པའི་སྒོ་ནས་མཇུག་བསྡུ་བ་ལ་གསུམ་སྟེ།  མ་འཁྲུལ་པའི་གནད་བསྒྲུབ་པར་གདམས།  འཁྲུལ་པའི་གྲུབ་མཐའ་སུན་དབྱུང་བར་གདམས།  གློ་བུར་གྱི་ཆོས་ལ་བརྟག་
དཔྱད་བྱ་བར་གདམས་པའོ། །དང་པོ་ལ་གཉིས་ཏེ།  གནད་བཅོས་པ་ཉེས་དམིགས་ཆེ་བས་སྤང་བར་གདམས།  གནད་བཅོས་པའི་བདུད་ཤེས་ནས་སྤང་བར་གདམས་པའོ། །དང་པོ་ལ་གསུམ་སྟེ།  ཚིག་གི་གནད་བཅོས་པ་ལ་སྔོན་བྱུང་གི་དཔེ་དང་སྦྱར། 
9-2-144b


 དོན་གྱི་གནད་བཅོས་པ་ད་ལྟར་གྱི་གྲུབ་མཐའ་དང་སྦྱར།  དེས་ན་ཉེས་དམིགས་ཆེ་བས་སྤང་བར་གདམས་པའོ། །དང་པོ་ནི།  ཆོས་གཞན་ལེགས་པར་ཞེས་སོགས་ཚིགས་བཅད་བརྒྱད་དེ།  སྔར་བཤད་པ་དེ་ལྟར།  སྡོམ་པ་གསུམ་
གྱི་ཉམས་ལེན་གྱི་གནད་རྣམས་སངས་རྒྱས་ཀྱི་གསུང་བཞིན་དུ་མ་འཆུགས་པར་བསྒྲུབ་དགོས་པའི་རྒྱུ་མཚན་ནི།  ཡན་ལག་གི་ཆོས་གཞན་ལེགས་པར་སྟོན་ན་ཡང་།  ཆོས་ཀྱི་གནད་རྣམས་སོགས་སོ། །དཔེ་ནི་འདས་པའི་དུས་ན་སོགས་ཏེ།  ད་དུང་སྔར་གྱི་དངོས་གྲུབ་དེ་མ་ཡིན་པ་
ཞེས་གནད་བཅོས་པའི་ཚིག་འདི་ཡིས་སྔར་གྱི་ས་ཡ་ཕྲག་ཕྱེད་དང་བཅུ་གསུམ་ཐུབ་པའི་དངོས་གྲུབ་ཐམས་ཅད་ཡལ་ནས།  ས་ཡ་ཕྲག་ཕྱེད་ལས་མི་ཐུབ་པར་གྱུར་ཏོ། །གསེར་ཅན་གྱིས་ཞེས་སོགས་ཀྱི་དོན་ཡང་ལྷ་མ་ཡིན་གྱི་དབང་པོ་གསེར་ཅན་གྱིས།  དབང་ཕྱུག་ཆེན་པོ་ལྷའི་ལོ་
འབུམ་ཕྲག་བཅུ་དྲུག་བསྒྲུབས་པས་གྲུབ་སྟེ།  དངོས་གྲུབ་གང་འདོད་པ་སློངས་ཤིག་ཟེར་རོ། །གསེར་ཅན་གྱིས་བདག་ཁང་པའི་ནང་དང་ཕྱི་དང་ས་དང་ནམ་མཁར་མི་གསོད་པ་དུག་དང་།  མཚོན་དང་།  མི་དང་།  མི་མ་ཡིན་པ་གང་གིས་ཀྱང་མི་གསོད་པའི་དངོས་གྲུབ་ཞུ་བྱས་པས་
དེ་བཞིན་དུ་བྱིན་ནོ། །དེ་ནས་གསེར་ཅན་གྱི་བུ་ཐ་ཆུང་ཡུལ་གཞན་དུ་འཁྱམས་པ་ལ་ཁྱབ་འཇུག་གིས་ཁྱོད་རང་ཕའི་གམ་དུ་སོང་ལ།  ཐེམ་པའི་སྟེང་དུ་ཁྲི་བརྩིགས་ལ་ཕ་ཞོག །དེའི་མདུན་དུ་བསྟོད་པ་འདི་སྨྲོས་ཤིག །རི་བོ་རི་བོ་ལ་ནི་ཐུབ་པ་བཞུགས། །ཆུ་བོ་ཆུ་བོ་ལ་
ནི་ཆུ་ལྷ་གནས། །གཞི་མདོ་གཞི་མདོ་ལ་ནི་ཞི་བ་སྟེ། །ཀུན་ཏུ་ཀུན་ལ་དབང་བྱེད་ཁྱབ་འཇུག་ཡིན། །ཅེས་བསླབས་སོ། །བུས་དེ་བཞིན་དུ་བྱས་པས་ཕ་ཁྲོས་ནས།  ཐམས་ཅད་ལ་ཁྱབ་འཇུག་གནས་ན།  འདི་ལ་ཡང་ཡོད་དམ།  ཞེས་ཐེམ་པ་ལ་ཁུ་ཚུར་བསྣུན་པས།  
9-2-145a


དེ་ནས་ཁྱབ་འཇུག་ལུས་པོ་མི།  མགོ་བོ་སེང་གེ།  སྡེར་མོ་ལྕགས་ལས་བྱས་པ་ཞིག་བྱུང་སྟེ།  གསེར་ཅན་པང་དུ་བཞག་སྟེ།  སྡེར་མོས་ལྟོ་བ་ཧྲལ་ཏེ་བསད་དོ། །ཞེས་ཐོས་སོ། །དེས་ན་དེང་སང་གི་སྔགས་ལ་ཡང་།  ཨོཾ་མེད་པ་ཡི་སོགས་ཏེ།  གཞན་
ཡང་མིང་གི་སྤེལ་ཚིག་འཇུག་པའི་མཚམས་སུ་བདག་གཞན་གྱི་མིང་འགོད་ཚུལ་ནོར་བ་དང་།  ཆར་འབེབས་པ་དང་།  གཅོད་པའི་སྔགས་ཤན་འབྱེད་མ་ཤེས་པ་དང་།  ཞི་བ་ཤཱནྟིཾ་ཀུ་རུ་ཞེས་བྱས་པས།  ཞི་བ་ཞི་བར་གྱིས་ཤིག །ཅེས་པ་དང་།  མཱ་ར་ཡ་སོད་བྱས་པས།  གསོད་
བྱེད་སོད།  ཅེས་བྱ་བར་འགྱུར་བས་སྔགས་ཀྱི་གནད་རྣམས་ལ་གཡོན་ཅན་རྣམས་ཀྱིས་བཅོས་པ་ཡི་སོགས་སོ། །གཉིས་པ་ལ་གཉིས་ཏེ།  མདོར་བསྟན།  རྒྱས་པར་བཤད་པའོ། །དང་པོ་ནི།  དེ་བཞིན་ཆོས་ཀྱི་ཞེས་སོགས་བཅུ་བདུན་ཏེ།  ཚིག་གི་གནད་བཅོས་ན་དངོས་
གྲུབ་ཉམས་ཤིང་འགྱངས་པ་དེ་བཞིན་དུ།  ཆོས་ཀྱི་དོན་གྱི་གནད་རྣམས་ཀྱང་། །ཅུང་ཟད་ཅུང་ཟད་བཅོས་པ་ལ་སོགས་སོ། །གཉིས་པ་ནི།  དེ་ཡང་མདོ་ཙམ།  ཞེས་སོགས་ཚིགས་བཅད་བཅུ་གསུམ་སྟེ།  འདིར་གནད་བཅོས་པར་དོགས་པའི་གཞི་དགུ་ངོས་བཟུང་བ་དང་།
ལུས་རྣམ་གཞག་ཏུ་ཡང་བརྗོད་བྱའི་གཙོ་བོ་རྣམས་ངོས་བཟུང་བ་ནི།  ཡན་ལག་གཞན་འཁྲུལ་ཡང་གནད་འདི་རྣམས་མ་འཁྲུལ་པར་བྱས་ན་བསྒྲུབ་ནུས་ཤིང་།  གནད་འདི་རྣམས་འཁྲུལ་ན་ཡན་ལག་གཞན་རྣམས་མ་འཁྲུལ་ཡང་བསྒྲུབ་པར་མི་ནུས་སོ། །ཞེས་པའི་དོན་ཡིན་
ལ།  རྒྱས་བཤད་ཀྱི་སྐབས་སུ་འཁྲུལ་པ་ཕྲན་ཚེགས་ནས་འགོག་པ་ནི།  ཡན་ལག་ཕྲན་ཚེགས་རྣམས་ཀྱང་མ་འཁྲུལ་ན་བསྒྲུབ་ཉེ་ཞིང་འཁྲུལ་ན་གནད་རྣམས་ཀྱང་རིམ་པ་བཞིན་དུ་འཁྲུལ་བར་འགྱུར་བས།  ཕྲན་ཚེགས་ཀྱང་མ་འཁྲུལ་བར་བསྒྲུབ་དགོས་སོ། །ཞེས་
9-2-145b


པའི་དོན་ནོ། །གཞུང་གི་དོན་ལ་གཞན་རྣམས་ནི་གོ་སླ་ལ།  གལ་ཏེ་འདི་ནི་འཁྲུལ་འགྱུར་ན། །ཞེས་སོགས་ཀྱི་དོན་ནི།  ཀྱཻ་རྡོ་རྗེ་ལས།  རིགས་འཆོལ་བསྒོམ་པའི་སྦྱོར་བ་ཡིས། །དངོས་གྲུབ་མེད་ཅིང་སྒྲུབ་པོའང་མེད། །ཅེས་སོ། །བླ་མ་སྤྱི་བོར་བསྒོམ་བྱ་མ་ཡིན་ཞེས་པ་ནི།
འབྲི་ཁུང་པ་རྣམས་སོ་སོ་སྐྱེ་བོའི་བླ་མ་སྤྱི་བོར་བསྒོམས་ན་ཚེ་ལ་གནོད་ཟེར་རོ། །གསུམ་པ་ནི།  གནད་རྣམས་མིན་པའི་ཞེས་སོགས་བཅུ་བདུན་ཏེ།  ཚིག་རྐང་དང་པོ་དྲུག་གིས་གནད་བཅོས་པ་ཉེས་དམིགས་ཆེ་བར་བསྟན།  དེ་ནས་དགུས་དེའི་དཔེ་བསྟན།  ཐ་མ་གཉིས་ཀྱིས་གནད་མ་
འཁྲུལ་བར་བསྒྲུབ་དགོས་པར་བསྟན་ནོ། །གཉིས་པ་ལ་གསུམ་སྟེ།  གནད་འཆོས་པའི་བདུད་ཇི་ལྟར་བྱུང་བའི་ཚུལ།  དེས་གནད་ཇི་ལྟར་བཅོས་པའི་ཚུལ།  དེ་ཤེས་ནས་སྤང་བར་གདམས་པའོ། །དང་པོ་ལ་གསུམ་སྟེ།  རྣམ་པ་ཇི་ལྟར་སྟོན་པ།  ཐབས་གང་གིས་བསླུ་བ།  སྔོན་བྱུང་གི་
དཔེ་དང་སྦྱར་བའོ། །དང་པོ་ནི།  དེ་ལ་གནད་རྣམས།  ཞེས་སོགས་དྲུག་སྟེ།  ཆ་ལུགས་འདི་བཞིན་དུ་འབྱུང་བ་ཤེར་ཕྱིན་གྱི་མདོ་ལས་བཤད་དོ།  གཉིས་པ་ནི།  འགའ་ཞིག་རྩུབ་མོར།  ཞེས་སོགས་ཚིགས་བཅད་བདུན་དང་།  རྐང་པ་གསུམ་སྟེ།  དེ་ལྟར་བསླུ་བ་དེ་དག་བདུད་ཡིན་
པའི་རྒྱུ་མཚན་ནི།  མདོར་ན་སངས་རྒྱས་གསུང་རབ་དང་སོགས་སོ། །གསུམ་པ་ནི།  འདི་དག་ཇི་ལྟར།  ཞེས་སོགས་ཚིགས་བཅད་ཕྱེད་དང་བརྒྱད་དེ།  མངའ་རིས་མང་ཡུལ་དུ་བྱུང་བའི་སངས་རྒྱས་སྐར་རྒྱལ་དུ་མིང་བཏགས་པ་དེ་ལ་འཇིག་རྟེན་ཐམས་ཅད་གུས་པས།  དེ་ཚེ་རིན་ཆེན་
བཟང་པོ་ཡིས་སོགས་ཏེ།  སྐྱེས་བུ་དམ་པ་དེས་ཡི་དམ་ལྷ་ཡི་ལྟ་སྟངས་ཀྱིས་གཟིགས་པས་ས་ལ་ལྷུང་ནས་དྲན་པ་ཉམས་ཤིང་བརྒྱལ་བར་གྱུར་ཏོ། །དེ་ནས་ལོ་ཙཱ་བ་ཆེན་པོའི་བླ་གོས་ཀྱིས་ཁོའི་མགུལ་པ་བཅིངས།  བཀའ་བསྒོ་དྲག་པོ་མཛད་པས།  ཁོ་ན་རེ།  མང་ཡུལ་གུ་མའི་མཚོ་
9-2-146a


ལ་གནས་པའི་ཀླུ་ཡིན།  ངས་བསྟན་པའི་ཆོས་རྣམས་བོད་ཡུལ་ཐམས་ཅད་དུ་ཁྱབ་ཡོད།  གཞུང་དང་གདམས་ངག་མང་པོ་ལ་ཆུ་ལ་ཚྭ་བཏབ་པ་ལྟར་དབྱེར་མེད་དུ་འདྲེས་པས་ཕྱོགས་གཅིག་ཏུ་སྡུད་མི་ཐུབ།  ད་ཕྱིན་ཆད་ཆོས་ལོག་མི་སྟོན་པར་ཞུ།  ཞེས་
ཟེར་རོ། །གཉིས་པ་ནི།  འདི་འདྲའི་རིགས་ཀྱིས་ཞེས་སོགས་ཉེར་གཉིས་ཏེ།  ཆོས་གཞན་ཕལ་ཆེར་བཟང་པོར་སྟོན་ཅིང་།  གནད་རྣམས་ཕྱིན་ཅི་ལོག་ཏུ་བསྟན་པས་ཕ་རོལ་བསླུ་ནུས་པ་དཔེ་དང་བཅས་པ་བཤད་པའོ། །གསུམ་པ་ནི།  འདི་འདྲ་ཤེས་པར་ཞེས་སོགས་
བཅུ་བདུན་ཏེ།  གནད་ཇི་ལྟར་བཅོས་པའི་ཚུལ་དང་།  གནད་བཅོས་པའི་བདུད་འདི་འདྲ་ཤེས་པར་བྱས་ནས་ནི་སོགས་སོ། །མགོན་པོ་བྱམས་པས་རྒྱུད་བླར་གསུངས་པ་ནི།  གང་ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ། །མ་ལུས་དེ་ཉིད་མཆོག་
ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་མིན་པ། །དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུག །ཐུབ་ཚུལ་བཤིག་ཕྱིར་དེ་ཡང་དམ་ཆོས་ལ་ནི་གནོད་པ་བྱེད་པར་འགྱུར། །ཉོན་མོངས་རྨོངས་བདག་རྣམས་ཀྱིས་འཕགས་ལ་སྐུར་བ་དང་། །དེས་
གསུངས་ཆོས་ལ་བརྙས་གང་དེ་ཀུན་ཞེན་ལྟས་བྱས། །དེས་ན་ཞེན་ལྟའི་དྲི་ཅན་དེ་ལ་བློ་མི་སྦྱར། །གོས་གཙང་ཚོན་གྱིས་རྣམ་བསྒྱུར་སྣུམ་གྱིས་གོས་པ་བཞིན། །ཅེས་སོ། །གཉིས་པ་འཁྲུལ་པའི་གྲུབ་མཐའ་སུན་འབྱིན་པའི་ཚུལ་ལ་གསུམ་སྟེ།  སྔོན་བྱུང་མཁས་པས་འཁྲུལ་
པའི་གྲུབ་མཐའ་སུན་འབྱིན་པའི་ཚུལ། །རྗེས་འཇུག་མཁས་པས་འཁྲུལ་པའི་གྲུབ་མཐའ་སུན་དབྱུང་བའི་ཚུལ། །དགག་སྒྲུབ་ཀྱི་ལུང་སྦྱོར་ཇི་ལྟར་བྱ་བའི་ཚུལ་ལོ། །དང་པོ་ནི།  འཁྲུལ་པའི་གྲུབ་མཐའ།  ཞེས་སོགས་ཚིགས་བཅད་བརྒྱད་དང་།  རྐང་པ་གཅིག་སྟེ།  ཁོ་རང་གི་
9-2-146b


ཆོས་ལུགས་ལ་ཡང་།  དང་པོ་ནས་མེད་པའི་རང་བཟོ་དེ་འདྲ་དེ་ནི་ལུང་རིགས་གཞན་མི་དགོས་པར་འདི་རང་བཟོ་ཡིན་ནོ། །ཞེས་ཀུན་ལ་སྒྲོགས་པས་སུན་འབྱིན་པར་བྱའོ། །གཉིས་པ་ལ་གསུམ་སྟེ།  ལུང་རིགས་ཀྱིས་གནོད་ཚུལ་སྤྱིར་བསྟན།  ལུང་གིས་གནོད་ཚུལ་བྱེ་བྲག་ཏུ་
བཤད།  ལུང་ཁས་མི་ལེན་པ་ལ་ཇི་ལྟར་བྱ་བའོ། །དང་པོ་ནི།  གལ་ཏེ་མུ་སྟེགས།  ཞེས་སོགས་ཚིགས་བཅད་ཕྱེད་དང་དྲུག་སྟེ།  གདོད་མ་ནས་གྲུབ་པའི་ཆོས་ལོག་ལ་ནི།  རང་བཟོ་ཡིན་ཞེས་བྱར་མི་རུང་བར་རིགས་པ་གཞན་གྱིས་སུན་དབྱུང་བར་བྱ་དགོས་ལ།  རིགས་པ་
དང་འགལ་བ་ནི་རིགས་པས་སུན་ཕྱུང་ཞིང་།  ལུང་དང་འགལ་བ་ལ་ཐུན་མོང་གི་ལུང་དང་འགལ་ན་ནི་དེ་ཉིད་ཀྱིས་སུན་ཕྱུང་ཞིང་།  ཁོ་རང་གི་ལུང་དང་འགལ་ན་དེས་སུན་ཕྱུང་བར་བྱའོ། །གཉིས་པ་ལ་བཞི་སྟེ།  གཞན་གྱི་ལུང་གིས་འགོག་མི་ནུས་པ།  རང་གི་ལུང་གིས་འགོག་
ནུས་པ།  དེའི་དཔེར་བརྗོད་གསལ་བར་བཤད་པ།  དེས་རིགས་ཅན་གཞན་ཡང་མཚོན་པའོ། །དང་པོ་ནི།  དཔེར་ན་ཕ་རོལ་ཞེས་སོགས་བཅུ་གཅིག་སྟེ།  ལུང་ཁས་མི་ལེན་པ་ལུང་གཞན་གྱིས་འགོག་པར་མི་ནུས་པའོ། །གཉིས་པ་ནི།  ཉན་ཐོས་གཞུང་ལུགས།
ཞེས་སོགས་བཅུ་བདུན་ཏེ།  རང་ཉིད་ཀྱིས་ལུང་དེ་ལུང་ཚད་མར་ཁས་བླངས་ནས།  སྐབས་དེར་ལུང་དེ་དང་འགལ་བ་སྤྱོད་ན་དེས་གནོད་པའོ། །གསུམ་པ་ནི།  དེ་ཡི་དཔེར་བརྗོད་ཞེས་སོགས་ཚིགས་བཅད་བཅུ་སྟེ།  གཞན་རྣམས་ནི་གོ་སླ་ལ།  རྡོ་རྗེ་ཕག་མོའི་བྱིན་རླབས་
ཀྱིས་ཆོས་སྒོ་འབྱེད་པ་ནི།  ཀོང་ནེ་རུ་པ་ནས་བརྒྱུད་པ་ཡིན་གྱི།  དེ་ཡན་ཆད་ལ་མེད་པས།  མར་པ་ལ་བརྒྱུད་པ་འདོད་པ་དང་འགལ་ལོ། །ནཱ་རོ་ཆོས་དྲུག་ཞེས་བྱ་བའི་ཁྲིད་ནི་མི་ལ་རས་པ་ཡན་ཆད་དུ་བྱིན་རླབས་དང་འབྲེལ་བའི་ཆོས་དྲུག་དེ་ལས་མེད་པ་ལས།  ཕྱིས་བྱིན་
9-2-147a


རླབས་དང་འབྲེལ་བའི་ཆོས་དྲུག་བོར་ནས།  ཀོ་བྲག་པ་དང་།  ཡང་དགོན་པ་སོགས་ལམ་འབྲས་དང་ཕྱག་ཆེན་ལ་སོགས་པ་གཞན་གྱི་གདམས་ངག་བསྒོམ་པ་དང་།  དྭགས་པོ་ལྷ་རྗེ་རྒྱུད༷་དང་འབྲེལ་བའི་ཆོས་དྲུག་བསྒོམ་བཞིན་དུ།  ནཱ་
རོ་པ་ལ་བརྒྱུད་པ་འདེད་པར་བྱེད་པ་གཞན་དང་སོགས་སོ། །གཏེར་ནས་བྱུང་བའི་གླེགས་བམ་སོགས་རྡོ་རྗེ་འཆང་ལ་བརྒྱུད་པ་སྙེག་ཅིང་།  དེ་ལའང་གཞན་དག་ལུང་ལེན་པ་རང་ཚིག་དང་འགལ་བ་ནི།  གཏེར་ནས་བྱུང་བ་སོགས་ཀྱིས་རྡོ་རྗེ་འཆང་
ནས་མ་བརྒྱུད་ཅིང་།  གཞན་ལ་ལུང་ལེན་མི་དགོས་པར་བསྟན་པའི་ཕྱིར་རོ། །བཞི་པ་ནི།  གལ་ཏེ་འདི་འདྲའི་ཞེས་སོགས་དྲུག་གོ།  གསུམ་པ་ལ་གཉིས་ཏེ།  ལུང་ཁས་མི་ལེན་པ་གདོད་མ་ནས་ཡོད་པ་ལ་ཇི་ལྟར་བྱ་བ།  ལུང་ཁས་མི་ལེན་པ་གློ་
བུར་དུ་བྱས་པ་ལ་ཇི་ལྟར་བྱ་བའོ། །དང་པོ་ནི།  གལ་ཏེ་མུ་སྟེགས།  ཞེས་སོགས་བཅུའོ། །གཉིས་པ་ནི།  གལ་ཏེ་གདོད་ནས།  ཞེས་སོགས་ཚིགས་བཅད་བཅུ་གསུམ་སྟེ།  མཁས་པ་ཛྙཱ་ན་ཤྲཱིས་མུ་སྟེགས་དབྱངས་ཅན་དགའ་བའི་གྲུབ་མཐའ་སུན་
འབྱིན་པ་བཞིན་ནོ། །ངེད་ལའང་དེ་འདྲ་ཞེས་སོགས་ནི།  ཕྱོགས་ལྷུང་མེད་པའི་བདེན་ཚིག་སྨྲས་པའོ། །གསུམ་པ་དགག་སྒྲུབ་ཀྱི་ལུང་སྦྱོར་བའི་ཚུལ་ལ་བཞི་སྟེ།  སྐབས་མ་ཕྱེད་པའི་ལུང་སྦྱོར་བླུན་པོའི་ལུགས་སུ་བསྟན་པ།  སྐབས་ཕྱེད་པའི་ལུང་སྦྱོར་གྱི་
དཔེ་བརྗོད་དགོད་པ།  དེ་གཉིས་ཀའི་དོན་བསྡུ་བ།  མཁས་རྨོངས་ཀྱི་འཁྲུལ་པའི་ཁྱད་པར་དཔེས་བསྟན་པའོ། །དང་པོ་ནི།  བླུན་པོ་མཁས་པར།  ཞེས་སོགས་ལྔའོ། །གཉིས་པ་ལ་གཉིས་ཏེ།  ལྟ་སྒོམ་སྤྱོད་པའི་ལུང་སྦྱོར།  འཇིག་
9-2-147b


རྟེན་ལས་འདས་མ་འདས་ཀྱི་ལུང་སྦྱོར་རོ། །དང་པོ་ནི།  དཔེར་ན་ཕྱག་དང་།  ཞེས་སོགས་ཚིགས་བཅད་ཕྱེད་དང་ལྔ་སྟེ།  ཀྱཻ་རྡོ་རྗེ་ལས།  བསྒོམ་མེད་སྒོམ་པ་པོའང་མེད། །ཅེས་དང་།  དབུ་མ་ཤེས་རབ་ལ་འཇུག་པ་ལས།  ཀུན་རྫོབ་མེད་ན་དོན་དམ་མེད། །སངས་
རྒྱས་མེད་ན་སེམས་ཅན་མེད། །ལྟ་བ་མེད་ཅིང་སྒོམ་པ་མེད། །འབྲས་བུ་མེད་ཅིང་སྤྱོད་པ་མེད། །ཅེས་སོགས་གསུངས་པ་ནི།  ལྟ་བའི་ལུང་ཡིན་གྱི།  སྒོམ་པ་དང་སྤྱོད་པ་གཉིས་ཀྱི་ལུང་མིན་ནོ། །ཕྱག་ཆེན་ཐིག་ལེ་ལས།  དབང་མེད་པ་ལ་དངོས་གྲུབ་མེད་པར་
གསུངས་པ་དང་།  འདུལ་བ་ལས།  ཆོ་ག་འཁྲུགས་ན་ལས་མི་འཆགས་པར་གསུངས་པ་དང་།  སྡོམ་པ་གསུམ་གྱི་བསླབ་པ་ལས་ལོག་པར་སྤྱད་ན་ལྟུང་བ་འབྱུང་བར་བཤད་པ་དང་།  རྒྱུད་སྡེ་བཞི་ཡི་ལྟ་སྒོམ་འཁྲུགས་ན་བྱིན་གྱིས་མི་རློབ་པར་གསུངས་པ་དང་།  རྡོ་རྗེ་སྙིང་
པོ་རྒྱན་གྱི་རྒྱུད་ལས།  དག་པའི་ཆོས་ལ་སོམ་ཉི་བྱེད། །ཅེས་ལྟུང་བར་གསུངས་པ་དེས་ན་ཆོ་ག་ཅི་བྱས་ཀྱང་སོགས་སོ། །གཉིས་པ་ནི།  གཞན་ཡང་ལུང་སྦྱོར་ཞེས་སོགས་བཅུ་གསུམ་སྟེ།  སྡོམ་པ་གསུམ་གྱི་དམ་ཚིག་རྣམས་འབད་ནས་བསྲུང་བར་གསུངས་པ་དང་།  དགེ་
སྡིག་ལ་བླང་དོར་ཚུལ་བཞིན་དུ་བྱེད་པར་གསུངས་པ་ནི།  འཇིག་རྟེན་པ་སོ་སོ་སྐྱེ་བོ་ལ་གསུངས་པ་ཡིན་ལ།  ཀྱཻ་རྡོ་རྗེ་ལས།  བསླབ་དང་དབང་ལས་རྣམ་པར་གྲོལ། །ཞེས་སོགས་གསུངས་པ་རྣམས་ནི།  འཁོར་བའི་རྒྱ་མཚོ་ལས་བརྒལ་བའི་འཕགས་པ་ལ་གསུངས་པ་ཡིན་ནོ། །
གསུམ་པ་ནི།  དེ་འདྲའི་གནས་སྐབས་ཞེས་སོགས་ཚིགས་བཅད་གཅིག་གོ།  བཞི་པ་ནི།  མིག་ལྡན་ཇི་ལྟར།  ཞེས་སོགས་ཚིགས་བཅད་ཕྱེད་དང་དྲུག་གོ།  སྔར་བཤད་པ་དེ་ལྟ་བུའི་རྣམ་དབྱེ་ཤེས་ན་ལུང་སྦྱོར་འཁྲུལ་ཡང་འཁྲུལ་བ་ཕྲན་ཚེགས་ཙམ་འབྱུང་ལ།  དེ་འདྲའི་
9-2-148a


རྣམ་དབྱེ་མི་ཤེས་པར་ལུང་སྦྱོར་བྱས་ན་ལྟ་བའི་ལུང་སྤྱོད་པ་ལ་སྦྱར་ནས་དགེ་སྡིག་གི་བླང་དོར་མི་ཕྱེད་པའམ།  སྤྱོད་པའི་ལུང་ལྟ་བ་ལ་སྦྱར་ནས་ཐམས་ཅད་བདེན་པར་ལྟ་བར་འགྱུར་བས།  རྣམ་དབྱེ་ཕྱེད་པ་ལ་འབད་པར་བྱའོ། །གསུམ་པ་གློ་བུར་གྱི་ཆོས་ལ་
བརྟག་དཔྱད་བྱ་བར་གདམས་པ་ལ་བཞི་སྟེ།  གློ་བུར་གྱི་མན་ངག་ལ་བརྟག་དཔྱད་བྱ་བ།  གློ་བུར་གྱི་མདོ་རྒྱུད་ལ་བརྟག་དཔྱད་བྱ་བ།  གློ་བུར་གྱི་རྟེན་ལ་བརྟག་དཔྱད་བྱ་བ།  གློ་བུར་གྱི་ལྟས་ལ་བརྟག་དཔྱད་བྱ་བའོ། །དང་པོ་ནི།  སྙན་བརྒྱུད་དང་ནི།  ཞེས་
སོགས་ཚིགས་བཅད་ཕྱེད་དང་དྲུག་སྟེ།  སྙན་བརྒྱུད་དང་།  ཆིག་བརྒྱུད་དང་།  རྨི་ལམ་གྱི་ཆོས་ལུགས་དང་།  ཞལ་མཐོང་གི་ཡི་དམ་དང་།  ལུང་སྟོན་པའི་སངས་རྒྱས་དང་།  བླ་མའི་གསུང་སྒྲོས་རྣམས་བརྟགས་དཔྱད་བྱས་ནས།  མདོ་རྒྱུད་དང་མཐུན་ན་བླང་དུ་རུང་སྟེ།
སངས་རྒྱས་ཀྱི་བྱིན་བརླབས་ལས།  དེ་འདྲ་འབྱུང་བ་ཡང་ཡོད་པའི་ཕྱིར་རོ། །མདོ་རྒྱུད་དང་མི་མཐུན་ན་བླང་དུ་མི་རུང་སྟེ།  བདུད་ཀྱི་བྱིན་བརླབས་ལས།  དེ་འདྲ་འབྱུང་བར་རྒྱལ་བས་གསུངས་པའི་ཕྱིར་རོ། །མདོ་སྡུད་པ་ལས།  མིང་གི་གཞི་ལས་བདུད་ནི་ཉེ་བར་འོངས་གྱུར་
ནས། །འདི་སྐད་སྨྲ་སྟེ་འདི་ནི་ཁྱེད་དང་ཕ་མ་དང་། །ཁྱོད་ཀྱི་བདུན་མེས་རྒྱུད་ཀྱི་བར་གྱི་མིང་ཡིན་ཞིང་། །གང་ཚེ་ཁྱོད་ནི་སངས་རྒྱས་འགྱུར་བའི་མིང་འདི་ཡིན། །སྦྱངས་སྡོམ་རྣལ་འབྱོར་ལྡན་པ་ཅི་འདྲ་འབྱུང་འགྱུར་ལ། །ཁྱོད་སྔོན་ཡོན་ཏན་ཚུལ་ཡང་འདི་འདྲའོ་ཞེས་
བརྗོད་དེ། །དེ་སྐད་གང་ཐོས་རློམ་སེམས་བྱང་ཆུབ་སེམས་དཔའ་ནི། །བདུད་ཀྱིས་ཡོངས་སུ་བླངས་ཤིང་བློ་ཆུང་རིག་པར་བྱ། །ཞེས་གསུངས་སོ། །གཉིས་པ་ནི།  དེས་ན་སངས་རྒྱས།  ཞེས་སོགས་ཚིགས་བཅད་བདུན་ཏེ།  གློ་བུར་གྱི་ཆོས་ལ་བརྟག་དཔྱད་མ་
9-2-148b


བྱས་པར་བཟུང་དུ་མི་རུང་བ་དེས་ན།  སངས་རྒྱས་བསྟན་པ་སོགས་ཏེ།  སྐྱེས་བུ་བརྫུན་མས་སྦྱར་བའི་མདོ་རྒྱུད་གང་ཞེ་ན།  ཀོའུ་ཤི་ཀའི་མདོ་སོགས་སོ། །གཞན་ཡང་གསང་སྔགས་གསར་མ་ལ་དབང་བསྐུར་རྒྱལ་པོ་དང་།  ལམ་ལྔ་བཀོལ་བ་དང་།  དུས་འབྱུང་དང་།  ཕྱག་
ན་རྡོ་རྗེ་མཁའ་འགྲོ་དང་།  ར་ལི་ཉི་ཤུ་རྩ་བཞི་དང་།  གཉིས་མེད་རྣམ་རྒྱལ་སོགས་དང་།  རྙིང་མ་ལའང་།  ཀུན་བྱེད་རྒྱལ་པོ་དང་།  མདོ་དགོངས་འདུས་དང་།  ཞི་ཁྲོ་སྒྱུ་འཕྲུལ་དང་།  ལྷ་མོའི་སྐྱེས་རྒྱུད་དང་།  བམ་རིལ་ཐོད་མཁར་ལ་སོགས་པ་བོད་ཀྱིས་སྦྱར་བའི་རྒྱུད་སྡེ་མང་
པོ་ཡོད་ཅིང་།  སྣང་བརྒྱད་དང་།  ལས་དགེ་སྡིག་བསྟན་པ་ལ་སོགས་རྒྱ་ནག་པས་བྱས་པ་ཡིན་ནོ། །གཙུག་ཏོར་ནག་མོ་དང་།  བྱ་ཁྱུང་བསམ་ཡས་མ་ལ་སོགས་པ་བོད་ཀྱི་ལྷ་འདྲེས་སྦྱར་བ་ཡིན་ཅིང་།  ལྷ་མོ་གནས་མཁར་དང་།  ནམ་མཁའ་ལྡིང་གི་རྟོགས་པ་ལ་སོགས་པ་མུ་སྟེགས་
བྱེད་ཀྱིས་བྱས་པའི་རྒྱུད་སྡེའང་ཡོད་དོ། །དེ་དག་ལ་ནད་གདོན་ཞི་བ་སོགས་བདེན་པ་ཅུང་ཟད་ཡོད་ཀྱང་ཚད་མར་བྱར་མི་རུང་སྟེ།  དེའི་འཐད་པ་རྒྱུད་བླ་མར་མགོན་པོ་བྱམས་པ་སོགས་སོ། །ལུང་འདི་ད་ལྟའི་རྒྱུད་བླ་རྩ་འགྲེལ་ན་མེད་ཀྱང་ཕྱ་བའི་ཊཱི་ཀར་འདིའི་འབྲུ་མནན་བྱུང་བས། 
རྔོག་འགྱུར་ན་ཡོད་པར་གསལ་ཞིང་།  མར་པ་སྨོན་འགྲོ་བའི་འགྱུར་དུ་དེ་ཡང་དྲང་སྲོང་བཀའ་བཞིན་སྤྱི་བོས་བླང་ཞེས་པའི་མཇུག་ཏུ།  མ་རིག་མདོངས་རྣམས་ཀྱིས་ཀྱང་སྲིན་བུའི་ཡིག་འདྲ་མུ་སྟེགས་བསྟན་བཅོས་སུའང་། །དོན་ལྡན་ཆོས་ལྡན་ཁམས་གསུམ་ཉོན་མོངས་ཟད་
བྱེད་བརྗོད་གྱུར་གང་ཡིན་དང་། །འཇིག་རྟེན་སོ་སོའི་ལེགས་བཤད་གང་དེའང་བློ་ལྡན་དྲང་སྲོང་བཞིན་འཛིན་ན། །གསུང་གང་ཟག་མེད་བློ་མངའ་རྣམས་ཀྱིས་ཞལ་ནས་འབྱུང་བ་སྨོས་ཅི་དགོས། །ཞེས་འབྱུང་ངོ་། །དེའི་དོན་ནི།  རྐང་པ་དང་པོས་སྲིན་བུའི་ཡི་གེ་དང་འདྲ་བའི་བདེན་
9-2-149a


པ་ཅུང་ཟད་ཡོད་པའི་མུ་སྟེགས་བྱེད་ཀྱི་བསྟན་བཅོས་དང་།  གཉིས་པས་རྒྱལ་བའི་བཀའ་དང་།  གསུམ་པས་སོ་སྐྱེས་བྱས་པའི་བསྟན་བཅོས་རྣམས་ཀྱང་དྲང་སྲོང་བཞིན་དུ་གུས་པས་འཛིན་ན་ཞེས་བསྟན་ཅིང་།  བཞི་པས་འཕགས་པ་རྣམས་ཀྱིས་བྱས་པའི་
བསྟན་བཅོས་ལྟ་སྨོས་ཀྱང་ཅི་དགོས་ཞེས་པའོ། །ཡང་ན་རྐང་པ་དང་པོ་དང་གསུམ་པ་སྦྱར་ཞིང་།  གཉིས་པ་དང་བཞི་པ་སྦྱར་ཏེ།  རྒྱལ་བའི་བཀའ་དང་།  འཕགས་པས་མཛད་པའི་བསྟན་བཅོས་དྲང་སྲོང་བཞིན་དུ་འཛིན་པ་ལྟ་སྨོས་ཀྱང་ཅི་དགོས་ཞེས་པའོ། །ཁ་
ཅིག་འདིར་ས་པཎ་གྱིས་མེད་བཞིན་དུ་བྲིས་ཞེས་སྨྲས་པ་དང་།  གཞན་དག་འདུལ་བ་ལུང་ལས།  མགོན་པོ་བྱམས་པ་ཁྱོད་ཀྱིས་ནི། །བདག་ནི་ཚོང་པ་རྙེད་ལྡན་ལྟར། །ཞེས་པས་མགོན་པོ་བྱམས་པ་སངས་རྒྱས་ལ་བྱས།  སྔར་ནི་དེ་ལྟར་རྣམ་གཞག་ནས། །སླར་ཡང་
བླ་མའི་རྒྱུད་འདིར་ནི། །ཞེས་པས་རྒྱུད་བླ་མ་བཀའ་ཐ་མ་ལ་བྱས་ཏེ།  མྱང་འདས་ཀྱི་མདོ་ལྷའི་ཟླ་བས་བསྒྱུར་བ་ལས།  དཔེར་ན་ཤིང་ངམ་རྩིག་པ་ལ་སྲིན་བུས་བརྐོས་ཏེ།  ཡི་གེའི་འབྲུ་འདྲ་བར་གྱུར་པ་མཐོང་ཡང་མཁས་པ་རྣམས་ཀྱིས།  སྲིན་བུས་ཡི་གེ་ཤེས་སོ། །ཞེས་
བརྗོད་པར་མི་བགྱིད།  ཞེས་པ་དང་།  མུ་སྟེགས་པ་རྣམས་ཀྱིས་བདག་བསྟན་པ་ནི།  སྲིན་བུས་བརྐོས་པའི་ཡི་གེ་དང་འདྲ་སྟེ།  དེའི་ཕྱིར་སེམས་ཅན་ཐམས་ཅད་ལ་བདག་མེད་དོ། །ཞེས་བསྟན་པ་སྟོན་པ་མཛད་དོ།  བདག་མེད་པ་ནི་སངས་རྒྱས་ཀྱི་ཚིག་ཡིན་ནོ། །ཞེས་
གསུངས་པའི་དོན་གཞུང་དུ་བྱས་པ་ཡིན་གྱི།  བསྟན་བཅོས་རྒྱུད་བླ་ལ་བྱས་པ་མ་ཡིན་ནོ། །ཞེས་སྨྲའོ། །དེ་ལ་དང་པོ་ནི་རང་ཉིད་ཀྱིས་མ་མཐོང་བཞིན་དུ་གཞན་ལ་སྨྲ་བར་འདོད་པ་ཙམ་ཡིན་ལ།  ཕྱི་མ་ནི་ཤིན་ཏུ་མི་འཚམས་པའི་བཤད་པ་སྟེ།  སྔར་མགོན་པོ་
9-2-149b


བྱམས་པས་རྒྱུད་བླར་གསུངས་ཞེས་པའི་བསྟན་བཅོས་རྒྱུད་བླ་མ་ལ་བྱས་ནས།  འདིར་མགོན་པོ་བྱམས་པ་སྟོན་པ་དང་།  རྒྱུད་བླ་བཀའ་ཐ་མ་ལ་བྱས་ན་གདུལ་བྱ་མགོ་རྨོངས་པར་འགྱུར་བའི་ཕྱིར་དང་།  ཡོངས་སུ་གྲགས་པའི་ཐ་སྙད་བོར་ནས་ཡོངས་སུ་མ་གྲགས་པའི་བསྟན་བཅོས་ཀྱི་ནང་དུ་
འཇུག་པ་ནི་རྩོམ་པ་པོ་མི་མཁས་པའི་ཚུལ་ཡིན་པའི་ཕྱིར་དང་།  བཀའ་ཐ་མ་ན་ཚིགས་བཅད་དེ་ཡོད་པ་ཉིད་ཀྱིས་ཀྱང་དེའི་དགོངས་འགྲེལ་གྱི་བསྟན་བཅོས་ན་གཞུང་དེ་ཡོད་པ་མི་འགལ་བའི་ཕྱིར་རོ། །གསུམ་པ་ནི།  རིང་བསྲེལ་དང་ནི།  ཞེས་སོགས་ཉེར་གཅིག་སྟེ།  སྤྱིར་
རིང་བསྲེལ་ལ་བདེན་པ་མཐོང་བའི་ཡོན་ཏན་གྱི་སྟོབས་ཀྱིས་བྱུང་བ་དང་།  སྡིག་པོ་ཆེ་ལས་འབྲས་ལ་ཡིད་མི་ཆེས་པར་བྱ་བའི་ཕྱིར་རམ།  གདོན་གྱིས་བྱས་པ་དང་།  འབྱུང་བཞིའི་ནུས་པ་རུས་པའི་ནང་དུ་འཁྱིམས་པ་དང་།  བསྟན་པ་ལ་དགའ་བའི་ལྷས་གང་ཟག་དེ་ལ་རྗེས་
འཇུག་དད་པར་བྱ་བའི་ཕྱིར་སྤྲུལ་པ་དང་བཞི་ཡོད་ཅིང་།  དེ་ལས་གཞན་པ་ནི་སྐྱེས་བུ་བརྫུན་མས་གསར་དུ་བྱས་པ་ཡིན་ནོ། །ཡོན་ཏན་གྱི་སྟོབས་ཀྱིས་བྱུང་བ་ལ་ཡང་འཕགས་པ་གསུམ་ལས།  སངས་རྒྱས་འཕགས་པ་ལ་འབྱུང་བ་ནི།  མདོ་སྡེ་བསྐལ་བཟང་ལས།  སྐུ་
གདུང་རྒྱས་པ་དང་།  རིལ་པོ་གཅིག་ཏུ་འདུག་པ་གཉིས་གསུངས་པ་དང་།  རང་སངས་རྒྱས་ལ་འབྱུང་བ་ཡང་།  སྔོན་བཱ་ར་ནཱ་སཱིར་སངས་རྒྱས་འབྱུང་བ་ཐོས་ནས་རང་སངས་རྒྱས་རྣམས་ཀྱིས་ལུས་མེ་ལ་སྦར་ཏེ།  རིང་བསྲེལ་སྤྲུལ་པར་བཤད་པ་དང་།  དེ་བཞིན་དུ་ཉན་ཐོས་
དགྲ་བཅོམ་པ་འགའ་ཞིག་གིས་ཀྱང་རིང་བསྲེལ་སྤྲུལ་པར་བཤད་དོ། །ཐུགས་ལྗགས་མ་ཚིག་པར་འབྱུང་བ་དང་།  སྐུ་གཟུགས་སོགས་རུས་པ་ལས་འབྱུང་བ་ཆོས་ནས་སོགས་སོ། །འོ་ན་དཀོན་བརྩེགས་ཀྱི་ཡབ་སྲས་མཇལ་བ་ལས།  གྲགས་པ་མ་སྨད་དེ་དག་ནི། །རིང་
9-2-150a


བསྲེལ་དག་ཀྱང་རྒྱས་པར་འགྱུར། །དེ་དག་རྣམས་ཀྱི་རིང་བསྲེལ་ལའང་། །རྒྱལ་བའི་སྐུ་ལྔ་འབྱུང་བར་འགྱུར། །ཞེས་པ་དང་འགལ་ལོ་ཞེ་ན།  དེ་ནི་མ་འོངས་པ་ན།  རིང་བསྲེལ་ལ་བརྟེན་པའི་སྐུ་གཟུགས་བཞེངས་པ་འབྱུང་བ་ལ་དགོངས་པས་སྐྱོན་མེད་དོ། །
བཞི་པ་ནི།  ཉི་མ་དུ་མ།  ཞེས་སོགས་ཚིགས་བཅད་ཕྱེད་དང་དྲུག་སྟེ།  མིག་བཅུ་གཉིས་པ་ཞེས་བྱ་བའི་མདོ་ལས།  གཙུག་ལག་ཁང་གི་སྐུ་གཟུགས་འཕོས་སམ།  སྤྱན་ནས་འཆི་མ་བྱུང་ན་ཡུལ་ཁམས་དེའི་མི་དཔའ་བོ་གཅེས་པ་བུ་མང་པོ་དང་བཅས་པ་ཡུལ་ཕུད་པར་འགྱུར་ཞེས་པ་
དང་།  འཇིག་རྟེན་པའི་ལྷ་མཆོད་པའི་ཚེ་ལྷ་སྨྲའམ།  འཛུམ་ན་རྒྱལ་པོ་ལ་བགེགས་དང་།  གནོད་པ་འབྱུང་ཅེས་པ་དང་།  ཐུབ་པ་ཆེན་པོ་དྲང་སྲོང་ག་རྒས་ལྟས་ཀྱི་རྣམ་པ་བསྟན་པ་ཞེས་བྱ་བའི་གཙུག་ལག་ལས།  གལ་ཏེ་གང་དུ་འཇིག་རྟེན་པའི་ལྷའི་གཟུགས་གར་བྱེད་པ་རབ་ཏུ་
གཡོ་བར་གྱུར་པ་དང་།  སྨྲ་བར་གྱུར་པ་དང་།  མིག་མཆི་མས་གང་བ་དང་།  རྡུལ་བར་གྱུར་པ་དང་།  གས་པར་གྱུར་པ་དང་།  དུམ་བུར་གྱུར་པ་དང་།  ཐམས་ཅད་ཞིག་པར་གྱུར་པ་ལ་སོགས་པས་ནི་འཇིགས་པ་རྣམ་པ་དུ་མ་འབྱུང་བ་རིག་པར་བྱའོ། །དེ་ལ་ཡང་གར་གྱིས་ནི་དམག་
མང་པོ་འབྱུང་ངོ་། །ཞེས་པ་དང་།  གོམ་པ་འདོར་བས་ནི་ཡུལ་བོར་ཏེ་འགྲོ་བར་འགྱུར།  ཞེས་སོ། །གཉིས་པ་ཚིག་ལ་འཁྲུལ་པ་དགག་པ་ལ་གཉིས་ཏེ།  དོར་བྱ་ནོར་བའི་བཤད་པ་དགག་པ།  བླང་བྱ་མ་ནོར་བའི་བཤད་པ་བསྒྲུབ་པའོ། །དང་པོ་ལ་གཉིས་ཏེ།  བོད་སྐད་ལ་
བཤད་པ་ནོར་ཚུལ།  རྒྱ་སྐད་ལ་བཤད་པ་ནོར་ཚུལ་ལོ། །དང་པོ་ནི།  དེ་དག་དོན་ལ་ཞེས་སོགས་ཚིགས་བཅད་ཕྱེད་དང་དྲུག་སྟེ།  བཅོམ་ལྡན་འདས་ཀྱིས་བཤད་པ་ལ།  བདུད་བཞི་བཅོམ་པས་ན་བཅོམ།  སྐལ་པ་དྲུག་དང་ལྡན་པས་ན་ལྡན།  འཁོར་བའི་ཆོས་ལས་འདས་
9-2-150b


པས་ན་འདས།  ཞེས་འཆད་པ་ནོར་ཏེ།  བྷ་ག་ཝཱན་ཅེས་པའི་བྷ་ག་ནི་བཅོམ་པ་དང་།  སྐལ་བ་དང་།  ལེགས་པ་སོགས་ལ་འཇུག་ལ།  ཝཱན་ཅེས་པ་ལྡན་པའི་དོན་ཡིན་པས།  སྔ་མ་གསུམ་ཆར་ལ་སྦྱར་བར་བྱ་བ་ཡིན་པའི་ཕྱིར་དང་།  འདས་པ་ལ་སྐད་དོད་མེད་པའི་ཕྱིར་དང་།
གླེགས་བམ་གྱི་བཤད་པ་ལ།  གླེགས་ཤིང་གི་བར་དུ་གླེགས་ཐག་གིས་བམ་པོར་བསྡམས་པས་ན་གླེགས་བམ་ཞེས་བཤད་པ་ནོར་ཏེ།  གླེགས་ཤིང་གླེགས་ཐག་ཀྱང་གླེགས་བམ་ལ་ལྟོས་པའི་ཐ་སྙད་ཡིན་པའི་ཕྱིར་རོ། །ལག་པའི་སྒྲ་དོན་འཆད་པ་ནོར་བ་ནི།  མུ་དྲ་ཅེས་པ་རྒྱལ་
འཇུག་གི།  ལག་པའི་སྐད་དོད་གསར་དུ་བསྣན་པ་ཡིན་པའི་ཕྱིར་རོ། །གདོད་མའི་ཤེས་པར་འཆད་པ་ནོར་བ་ནི།  ཛྙཱ་ན་ཅེས་པ་རྟོགས་པའམ་ཁོང་དུ་ཆུད་པ་ལ་འཇུག་གི་གདོད་མའི་སྐད་དོད་མེད་པའི་ཕྱིར་རོ། །རྣལ་འབྱོར་གྱི་བཤད་པ་ནོར་བ་ནི།  ཡོ་ག་ཅེས་པ་སྦྱོར་བ་ལ་འཇུག་
གི།  རྣལ་གྱི་སྐད་དོད་མེད་པའི་ཕྱིར་རོ། །འོ་ན་འདས་དང་རྒྱ་དང་ཡ་དང་།  རྣལ་གྱི་སྒྲ་བསྣན་པའི་རྒྱུ་མཚན་ཅི་ཞེ་ན།  དེ་དག་མ་བསྣན་ན་འཇིག་རྟེན་གྱི་ལེགས་ལྡན་དང་།  འཇིག་རྟེན་གྱི་རྒྱ་དང་རྟོགས་པ་ཙམ་དང་།  གཉིས་ཟུང་དུ་འཇུག་པ་ཙམ་ལ་འཁྲུལ་བར་འགྱུར་བས་ལོ་
ཙཱ་བས་ཐབས་མཁས་ཀྱིས་བསྣན་པའོ། །དམག་གི་དཔུང་དུ་འཆད་པ་ནོར་བ་ནི།  དེའི་སྐད་དོད་མེད་པའི་ཕྱིར་རོ། །གཏུམ་མོའི་སྒྲ་བཤད་ནོར་བ་ནི།  ཙཎྜ་ལཱི་ཅེས་པ་རྣམ་རྟོག་གསོད་པའི་ཤན་པ་ལ་འཇུག་པའི་ཕྱིར་རོ། །ཀླུ་དང་རི་རབ་ནི་ཡི་གེ་ཉིད་མཐོང་བས་གསལ་ལོ། །
གཉིས་པ་ནི།  ཤཱཀྱའི་བུ་མོ། །ཞེས་སོགས་ཚིགས་བཅད་ཉེར་གཉིས་ཏེ།  དེ་དག་ལས་འགའ་ཞིག་ནི།  རྒྱ་སྐད་བོད་སྐད་དུ་བསྒྱུར་མ་ཤེས་པས་ནོར་ལ།  ཕལ་ཆེར་ནི་རྒྱ་སྐད་ཡིན་པར་མ་ཤེས་པར་དེ་ལ་བོད་སྐད་ཀྱི་སྒྲ་བྱས་པས་ནོར་བ་སྟེ།  གཞུང་ཉིད་མཐོང་བས་རྟོགས་པར་
9-2-151a


འགྱུར་རོ། །གཉིས་པ་ནི།  དེ་བཞིན་གཤེགས་པའི་ཞེས་སོགས་བཅུ་བཞི་སྟེ།  དེ་བཞིན་གཤེགས་པའི་སྒྲ་བཤད་ལ།  དེ་ཁོ་ན་ཉིད་རྟོགས་པར་འཆད་པ་སོགས་སཾ་ཀྲྀ་ཏའི་སྐད་ལ་འཐད་པའི་རྒྱུ་མཚན་ནི།  ཏ་ཐཱ་ག་ཏ་ཞེས་པ་དེ་ཁོ་ན་ཉིད་རྟོགས་པ་ལ་འཇུག་
པ་དང་།  ཨརྷ་ཏ་ཅེས་པ་ལྷ་མི་ཀུན་གྱིས་མཆོད་པར་འོས་པ་ལ་འཇུག་པ་དང་།  རཱ་ཛ་ཅེས་པ་གཟི་བརྗིད་ཆེ་བ་དང་།  མཛེས་པ་དང་།  གསལ་བ་ལ་འཇུག་པ་དང་།  ཀྵནྟེ་ཞེས་པ་རྐྱེན་ངན་པས་མི་ཕྱེད་པ་ལ་འཇུག་པ་དང་།  ཀནྡྷ་ཞེས་པ་འཁུར་ཁྱེར་བས་ཕྲག་པ་
ལ་
འཇུག་པ་དང་།  ཧེ་ཏུ་ཞེས་པ་དབྱིངས་དང་།  རྒྱུ་དང་།  ཁམས་གསུམ་ཀ་ལ་འཇུག་པ་དང་།  བྷ་ག་ཞེས་པ་སྐལ་བ་ལ་འཇུག་པ་དང་།  པུ་དུ་ར་ཛ་ཡ་ཞེས་པ་ཤིན་ཏུ་ངན་ཅིང་།  ཐུབ་པར་དཀའ་བ་ལ་འཇུག་པ་དང་།  ཨ་ནུ་ཤ་ཡ་ཅེས་པ་ཆོས་མངོན་དུ་འགྱུར་བའི་
གནས་ལ་འཇུག་པ་དང་།  ཤཱཀྱ་ནི་རྒྱ་སྐད་སོར་བཞག་པ་ཡིན་ལ།  བོད་སྐད་དུ་བསྒྱུར་ན་ཕོད་པར་འཇུག་པའི་ཕྱིར་རོ། །འདི་དག་ནི་དགྲ་བཅོམ་དང་།  རྒྱལ་པོ་སོགས་ཀྱི་ཚིག་ཇི་བཞིན་དུ་འཆད་པ་མ་ཡིན་པས་བོད་སྐད་ལ་ཅུང་ཟད་མི་བདེ་ཡང་ལེགས་པར་སྦྱར་བའི་སྒྲ་
དག་ལ་ཤིན་ཏུ་འཐད་པའི་ཕྱིར་ན་མཁས་པས་བླང་བར་བྱ་བ་ཡིན་ནོ། །གསུམ་པ་བཤད་པ་ཡོངས་སུ་རྫོགས་པའི་བྱ་བ་ལ་ལྔ་སྟེ།  བསྟན་བཅོས་བརྩམ་པའི་རྒྱུ་ངོས་གཟུང་།  འབྲས་བུ་བསྟན་བཅོས་གཟུང་བར་གདམས།  གཟུང་བྱའི་ཆོས་ཀྱི་ཆེ་བ་བརྗོད། །བརྩམས་
པའི་དགེ་བ་གཞན་དོན་དུ་བསྔོ།  བཀའ་དྲིན་རྗེས་སུ་དྲན་པའི་ཕྱག་གོ།  །དང་པོ་ལ་གསུམ་སྟེ།  དམིགས་རྐྱེན་བསྟན་པའི་འཕེལ་འགྲིབ་བྱུང་ཚུལ།  ཀུན་སློང་ཟང་ཟིང་མེད་པའི་བྱམས་པ།  བདག་རྐྱེན་ཕྱོགས་ལྷུང་མེད་པའི་ཤེས་རབ་བོ། །དང་པོ་ལ་བཞི་སྟེ།  འཕགས་པའི་ཡུལ་
9-2-151b


དུ་འཕེལ་འགྲིབ་བྱུང་ཚུལ།  བོད་ཀྱི་ཡུལ་དུ་འཕེལ་འགྲིབ་བྱུང་ཚུལ།  དེས་ན་ཆོས་ལོག་སུན་དབྱུང་དགོས་པ།  གཏན་གྱི་བྱ་བ་བརྟགས་ནས་བླང་བའོ། །དང་པོ་ལ་གཉིས་ཏེ།  ཉན་ཐོས་ཀྱི་བསྟན་པ་ལ་བཀའ་བསྡུ་བྱུང་ཚུལ།  ཐེག་ཆེན་གྱི་བསྟན་པ་ལ་འཕེལ་འགྲིབ་བྱུང་ཚུལ་ལོ། །དང་པོ་ལ་གསུམ་
སྟེ།  བཀའ་བསྡུ་དང་པོ།  གཉིས་པ།  གསུམ་པ་བྱུང་ཚུལ་ལོ། །དང་པོ་ནི།  སངས་རྒྱས་བསྟན་པ་དྲི་མ་མེད། །བསྡུ་བ་དང་པོ་བྱས།  ཞེས་པ་སྟེ།  སྟོན་པ་མེ་མོ་ཡོས་ལ་ལྷུམས་སུ་ཞུགས་ནས་ས་ཕོ་འབྲུག་ལ་སྐུ་བལྟམས་ཤིང་།  ཆུ་ཕོ་སྟག་ལ་སངས་རྒྱས་ཏེ།  མེ་མོ་ཕག་གི་དཔྱིད་ཟླ་ཐ་ཆུང་ས་གས་ཉ་བའི་ཚེ།  མྱ་
ངན་ལས་འདའ་བའི་ཚུལ་བསྟན་ཏོ། །དེའི་ལོ་ཕྱི་མ་ལ་རྒྱལ་པོའི་ཁབ་ཀྱི་ནགས་ཁྲོད་བྲི་ཛིའི་ལྗོངས་སུ་རྒྱལ་པོ་མ་སྐྱེས་དགྲས་སྦྱིན་བདག་བྱས་ཏེ།  འོད་སྲུང་ཆེན་པོ་ལ་སོགས་པ་དགྲ་བཅོམ་པ་ལྔ་བརྒྱ་འདུས་ནས་བཀའ་བསྡུ་བ་མཛད་དེ།  གང་པོས་རྫུ་འཕྲུལ་གྱིས་གཎྜི་བརྡུངས་པས།  དགྲ་བཅོམ་པ་
ལྔ་བརྒྱར་གཅིག་གིས་མ་ཚང་ནས།  བ་ལང་བདག་སུམ་ཅུ་རྩ་གསུམ་ན་ཡོད་པ་སྤྱན་དྲངས་པས་མ་བྱོན་ཏེ།  མྱ་ངན་ལས་འདས་སོ། །དེ་ནས་འོད་སྲུང་ཆེན་པོས་དགྲ་བཅོམ་པ་རྣམས་རེ་ཤིག་མྱ་ངན་ལས་མི་འདའ་བར་དམ་ཚིག་བཅས་ནས་ཀུན་དགའ་བོ་ལ་སྐྱོན་བཏགས་ཏེ་བསྐྲད་པས་རིང་པོར་
མ་ཐོགས་པར་དགྲ་བཅོམ་པར་གྱུར་ཏོ། །དེ་ནས་ཐོག་མར་དགྲ་བཅོམ་པ་རྣམས་ཀྱི་སྣམ་སྦྱར་བཏིང་བ་ལ།  འཕགས་པ་ཀུན་དགའ་བོ་བཞུགས་ཏེ་མདོ་སྡེ་བསྡུ་བ་མཛད།  དེ་བཞིན་དུ་ཉེ་བར་འཁོར་གྱིས་འདུལ་བའི་སྡེ་སྣོད་དང་།  འོད་སྲུང་ཆེན་པོས་མངོན་པའི་སྡེ་སྣོད་བསྡུས་
ཏེ།  ཀུན་དགའ་བོ་ལ་བསྟན་པ་གཏད་ནས།  རི་བྱ་རྐང་ཅན་དུ་ཕྱག་དར་ཁྲོད་ཀྱི་སྣམ་སྦྱར་གྱིས་སྐུ་གདུང་དྲིལ་ནས་བྱམས་པ་མ་བྱོན་གྱི་བར་དུ་མི་ཉམས་པར་བྱིན་གྱིས་བརླབས་ཏེ་མྱ་ངན་ལས་འདས་སོ། །ཀུན་དགའ་བོས་ལོ་བཞི་བཅུའི་བར་དུ་བསྟན་པ་བསྐྱངས་ནས་ཤ་ནའི་གོས་
9-2-152a


ཅན་ལ་བསྟན་པ་གཏད།  དེ་ནས་རིམ་པ་བཞིན་ཉེ་སྦས་དང་།  དྷི་དྷི་ཀ་དང་།  ནག་པོ་དང་།  ལེགས་མཐོང་ལ་གཏད་དེ།  བསྟན་པའི་གཏད་རབས་བདུན་ནོ། །གཉིས་པ་ནི།  དེའི་རྗེས་བསྟན་པ་དག་པར།  ཞེས་སོགས་བདུན་ཏེ།  
སངས་རྒྱས་མྱ་ངན་ལས་འདས་ནས་ལོ་བརྒྱ་དང་བཅུ་ལོན་པ་ན།  ཡངས་པ་ཅན་གྱི་དགེ་སློང་གིས།  ཧུ་ལུ་ཧུ་ལུ་ཡི་རང་དང་། །ཀུན་སྤྱོད་སྣོད་དང་ལན་ཚྭ་དང་། །ལམ་དང་སོར་གཉིས་དཀྲུགས་དང་གདིང་། །གསེར་གྱི་རུང་བ་ཞེས་བྱ་སྟེ། །འདི་དག་རུང་མིན་གཞི་བཅུ་
ཡིན། །ཞེས་མི་རུང་བའི་གཞི་བཅུ་བྱས་ཏེ།  དེ་ཡང་ཆོས་མིན་གྱི་ལས་ཆོས་ཀྱི་ལས་སུ་བྱས་ཏེ།  ཧུ་ལུ་ཧུ་ལུ་ཞེས་བརྗོད་པས་རུང་བར་བྱེད་པ་དང་།  སྔར་བཞིན་དུ་ལས་བྱས་ནས་དགེ་སློང་ཐམས་ཅད་ཀྱིས་རྗེས་སུ་ཡི་རང་ངོ་ཞེས་བརྗོད་ནས་རུང་བར་བྱེད་པ་དང་།  རང་
གི་ལག་པའི་ཀུན་སྤྱོད་ཀྱིས་ས་བརྐོས་ནས་རུང་བར་བྱེད་པ་དང་།  ཇི་སྲིད་འཚོའི་བར་དུ་སྤྱོད་པའི་ལན་ཚྭ་དུས་རུང་ལ་བསྲེས་ནས་དུས་མིན་དུ་ཟ་བ་དང་།  ལམ་དཔག་ཚད་ཕྱེད་ཙམ་དུ་ཕྱིན་ནས་འདུས་ཤིང་ཟ་བ་དང་།  ལྷག་པོར་མ་བྱས་པའི་ཟས་ཐོག་མར་སོར་མོ་གཉིས་
ཀྱིས་བཅད་ནས་ཟ་བ་དང་།  ཆང་བླུག་པའི་སྣོད་ནས་ནད་པས་སྲིན་འབུ་པད་མས་ཁྲག་གཞིབས་པ་ལྟར་ཆང་གཞིབས་ཏེ་འཐུང་བ་དང་།  འོ་མ་དང་ཞོ་བསྲེས་ནས་དཀྲུགས་ཏེ།  དུས་མིན་དུ་ལོངས་སྤྱོད་པ་དང་།  གདིང་བ་རྙིང་པ་ལས་མཐོ་གང་གིས་མ་གླན་པར་གསར་
པ་ལ་སྤྱོད་པ་དང་།  དྲི་ཞིམ་པོས་བྱུགས་པའི་ལྷུང་བཟེད་ཁྲི་སྟན་དང་བཅས་པ་དགེ་ཚུལ་གྱི་མགོ་བོར་བཞག་ནས།  ལམ་གྱི་གཞི་མདོར་ལྷུང་བཟེད་འདིར་གསེར་དངུལ་དང་།  རིན་པོ་ཆེ་བྱིན་ཅིག་ཅེས་རུང་བ་བྱེད་པའོ། །དེའི་ཚེ་གྲོང་ཁྱེར་ནོར་ཅན་ནས།  དགྲ་
9-2-152b


བཅོམ་པ་གྲགས་པ་འཁོར་ལྔ་བརྒྱ་དང་བཅས་པ།  ཡངས་པ་ཅན་དུ་འོངས་པས་མི་རུང་བའི་གཞི་བཅུ་བྱས་པར་རིག་ནས།  དགྲ་བཅོམ་པ་ཐམས་ཅད་འདོད་ཀྱི་དྲུང་ན་གླེང་སྟེ།  དམར་བུ་ཅན་གྱི་ཟླ་རྒུར་ལ་སོགས་པའི་ཕྱོགས་བཙལ་ནས།  དགྲ་བཅོམ་པ་བདུན་བརྒྱ་འདུས་ཏེ། 
གནས་ཡངས་པ་ཅན་གྱི་ཀུསྨ་པུ་རིའི་གཙུག་ལག་ཁང་དུ།  ཆོས་རྒྱལ་མྱ་ངན་མེད་ཀྱིས་སྦྱིན་བདག་བྱས་ནས་རུང་བ་མ་ཡིན་པའི་གཞི་བཅུ་སུན་ཕྱུང་སྟེ།  བཀའ་བསྡུ་བ་གཉིས་པ་བྱས་སོ། །གསུམ་པ་ནི།  དེ་ལྟར་དག་པར།  ཞེས་སོགས་ཚིགས་བཅད་བཅུ་གཅིག་དང་། 
རྐང་པ་གཅིག་སྟེ།  དེ་ཡང་རྒྱ་གར་ལྷོ་ཕྱོགས་ན་དེད་དཔོན་ཞིག་ཡོད་པའི་ཆུང་མ་ལ་བུ་བཙས་པ་དང་།  ལྷ་ཆེན་པོར་མིང་བཏགས་ནས་ཕ་དེ་རྒྱ་མཚོར་རིན་པོ་ཆེ་ལེན་དུ་སོང་།  དེའི་ཚེ་བུ་ཆེར་སྐྱེས་ཏེ་མ་དང་ལྷན་ཅིག་འདུས་ཕ་འོངས་པའི་གཏམ་ཐོས་ཏེ།  ལམ་གོལ་བར་
སོང་སྟེ་ཕ་བསད།  མ་ཡང་སྐྱེས་པ་གཞན་དང་ཉལ་པོ་བྱེད་པར་ཤེས་ནས་ཁྲོས་ཏེ་བསད།  རང་གི་སློབ་དཔོན་དགྲ་བཅོམ་པ་ཞིག་གིས་སྡིག་པའི་རྣམ་སྨིན་བཤད་པས།  འདིས་ཁོ་བོའི་བྱ་བ་དེ་དག་ཤེས་སོ་སྙམ་ནས་བཀྲོངས་ཏེ།  མཚམས་མེད་ཀྱི་ལས་
གསུམ་བྱས་ནས་ཕྱིས་དགོན་པར་བསྡད་དེ།  ཆོས་ལོག་མང་དུ་བསྟན།  ཐོ་རངས་རང་སྡིག་དྲན་ཏེ།  ཀྱེ་མ་སྡུག་བསྔལ་ལོ། །ཞེས་བསྒྲགས་པས་འཁོར་གྱི་རྒྱུ་མཚན་ཞུས་པས།  འཕགས་པའི་བདེན་པ་བཞི་བསྒོམས་པས་སྡུག་བསྔལ་བདེན་པ་མངོན་སུམ་དུ་མཐོང་ནས་
བོས་པ་ཡིན་ནོ་ཞེས་ཟེར་རོ། །དེའི་ཚེ་འཁོར་རྣམས་ཀྱིས་དཀོན་མཆོག་གསུམ་དང་།  བྱང་ཆུབ་ཀྱི་ཕྱོགས་ཀྱི་ཆོས་ལ་སོགས་པ་དྲིས་པས།  ཁོ་བོས་དགྲ་བཅོམ་པར་ཁས་བླངས་ཀྱི་སྟོན་པ་ཡིན་པར་མ་སྨྲས་སོ། །དེ་དག་ལུང་སྟོན་པ་ནི།  ཐེ་ཚོམ་དང་།  སོམ་ཉི་ལས་
9-2-153a


བརྒལ་བའི་སངས་རྒྱས་འབའ་ཞིག་གོ།  ཞེས་པ་ལ་སོགས་པའི་བརྫུན་ཚིག་གིས་ཚོགས་པ་རྣམས་ཀྱི་མགོ་བོ་བསྐོར་ནས།  ལོག་འཚོ་མང་དུ་ཟོས་པས་ཤི་ནས་སེམས་ཅན་དམྱལ་བར་འགྱུར་ཞེས་གྲག་གོ།  ཆོས་ལོག་དེ་དག་དགྲ་བཅོམ་
རྣམས་ཀྱིས་སུན་ཕྱུང་ནས།  བཀའ་བསྡུ་གསུམ་པ་བྱས་ཞེས་ཐོས་སོ། །འོན་ཀྱང་དེའི་ལེ་ལན་གྱིས་སྡེ་བ་བཅྭོ་བརྒྱད་པོ་རྣམས་ལ་ཡང་།  འཇིག་རྟེན་འདས་པར་སྨྲ་བའི་སྡེ་པས།  དགྲ་བཅོམ་ལ་ཐེ་ཚོམ་དང་།  སོམ་ཉི་ཡོད་པར་འདོད་པ་དང་།  ཐམས་ཅད་ཡོད་
པར་སྨྲ་བས།  དགྲ་བཅོམ་འབྲས་བུ་ལས་ཉམས་པ་ཡོད་པར་འདོད་པ་སོགས་ཅུང་ཟད་བསླད་པ་ཡོད་ཅེས་ཟེར་ཞིང་།  དབྱིག་གཉེན་གྱི་རྣམ་བཤད་རིག་པ་ལས།  བླ་མ་ཀུན་དགའ་འོད་ཙེལ་དང་། །སྡུག་བསྔལ་ཕུང་སྟོན་ས་སྟོན་དང་། །འཆར་ཁ་སྟོང་ཉིད་ཆུ་ལས་སྐྱེས། །
གང་པོ་ས་མཚོ་ཆུ་ཤིང་དང་། །མྱ་ངན་འདས་དང་ཡུལ་འཁོར་སྐྱོང་། །འགྲོ་བ་མདོ་དང་དེ་བཞིན་གཞན། །ཡང་དག་བསྡུས་པའི་གཞི་ཉམས་ཕྱིར། །མཐའ་དག་མིན་པར་རྟོགས་པ་ཡིན། །ཞེས་མདོ་དེ་རྣམས་འགའ་ཞིག་མ་ཚང་བ་དང་།  ལུང་ཉམས་པ་རྣམས་བཀའ་
བསྡུ་ཉམས་པའི་དབང་གིས་བྱུང་བ་ཡིན།  ཞེས་དགོངས་སོ། །བཀའ་བསྡུ་གསུམ་པ་འདི་འདུལ་བ་ལུང་ལས་གསལ་བར་མ་བཤད་པས།  འདོད་པ་མི་མཐུན་པ་དུ་མ་ཡོད་པ་ལས།  རྟོག་གེ་འབར་བར་ལུགས་གཉིས་གསུངས་པ་ལས།  དང་པོ་ནི།  སྟོན་པ་མྱ་ངན་ལས་འདས་ནས་
ལོ་བརྒྱ་དང་དྲུག་ཅུ་ན།  གྲོང་ཁྱེར་མེ་ཏོག་གིས་བརྒྱན་པར་རྒྱལ་པོ་མྱ་ངན་མེད་བྱུང་སྟེ།  དགྲ་བཅོམ་པ་རྣམས་ཀྱིས་སྐད་རིགས་མི་གཅིག་པ་བཞི་སོ་སོར་བཀླགས་པས།  སློབ་མ་རྣམས་གྲུབ་མཐའ་སྣ་ཚོགས་སུ་གྱུར།  དེ་ནས་དགྲ་བཅོམ་པ་དང་།  སོ་སོ་སྐྱེ་བོའི་མཁས་པ་རྣམས་ཛཱ་ལནྡྷ་
9-2-153b


རའི་དགོན་པར་འདུས་ནས་བསྟན་པ་བསྡུས་སོ། །དེའི་ཚེ་སྟོན་པ་མྱ་ངན་ལས་འདས་ནས།  ལོ་སུམ་བརྒྱ་སོང་ཞེས་ཟེར་ཞིང་།  འོད་ལྡན་ལས་ཀྱང་དེ་དང་མཐུན་པར་གསུངས་སོ། །ལུགས་གཉིས་པ་ནི།  སྟོན་པ་མྱ་ངན་ལས་འདས་ནས་ལོ་བརྒྱ་དང་སུམ་ཅུ་སོ་བདུན་ན།
བདུད་སྡིག་ཅན་བཟང་པོ་ཞེས་བྱ་བས་བསྟན་པ་དཀྲུགས་ནས་སོ་སོར་གྱེས།  དེ་ནས་ལོ་དྲུག་ཅུ་རྩ་གསུམ་ནས་གནས་བརྟན་གནས་མའི་བུས་བསྡུ་བ་གསུམ་པ་བྱས་ཞེས་ཟེར་རོ། །གཉིས་པ་ལ་གསུམ་སྟེ།  འགྲིབ་པའི་ཚུལ།  དར་བའི་ཚུལ།  དེའི་རྗེས་སུ་བྱུང་ཚུལ་ལོ། 
དང་པོ་ནི།  ཐེག་པ་ཆེན་པོའི།  ཞེས་སོགས་བདུན་ཏེ།  ཐེག་པ་ཆེན་པོའི་བསྟན་པ་མཐའ་དག་ཀུན་དགའ་བོས་བསྡུས་པར།  སློབ་དཔོན་སེང་གེ་བཟང་པོས་བཞེད་ཅིང་།  རྟོག་གེ་འབར་བར་ཀུན་ཏུ་བཟང་པོ་དང་།  འཇམ་དཔལ་དང་།  གསང་བའི་བདག་པོ་དང་།  བྱམས་པ་ལ་སོགས་
པ་རྣམས་རྩ་བའི་སྡུད་པ་པོ་ཡིན་པར་བཞེད་དོ། །འོན་ཀྱང་ཕྱག་ན་རྡོ་རྗེ་ཀུན་ཏུ་བཟང་པོ་ཀུན་དགའ་བོ་རྣམས་ནི་ངོ་བོ་གཅིག་པར་ཐུན་མོང་མ་ཡིན་པའི་གསང་བ་དང་།  ཕྱག་རྡོར་དབང་བསྐུར་བར་གསུངས་པས་གང་གིས་བསྡུས་ཀྱང་འགལ་བ་མེད་ལ།  ངེས་པའི་དོན་དུ་ན།  འཆད་པ་
པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པ་ང་། །ཞེས་པ་ལྟར་འཁོར་དང་སྟོན་པ་ཐ་མི་དད་པ་ཡིན་ཀྱང་གདུལ་བྱའི་ངོར་སོ་སོར་སྣང་བའོ། །དེ་ཡང་ཕ་རོལ་ཏུ་ཕྱིན་པའི་སྡེ་སྣོད་ཕལ་ཆེར་དང་།  བྱ་རྒྱུད་འགའ་ཞིག་ཀུན་དགའ་བོས་བསྡུས་ཤིང་།  སྤྱོད་རྒྱུད་དང་།  རྣལ་འབྱོར་
རྒྱུད་འགའ་ཞིག་ཕྱག་ན་རྡོ་རྗེས་བསྡུས་པར་བཤད།  བླ་མེད་ཀྱི་རྒྱུད་ཕལ་ཆེར་ནི་རང་རང་གི་ཞུ་བ་པོས་བསྡུས་ཏེ།  བསྟན་པ་ཤིན་ཏུ་དར་བར་གྱུར་ནས་ཅུང་ཟད་ཉམས་དམས་པའི་ཚེ།  སྟོན་པ་མྱ་ངན་ལས་འདས་ནས་ལོ་བཞི་བརྒྱ་ལོན་པ་ན་འཕགས་པ་ཀླུ་སྒྲུབ་བྱོན་ཏེ།  སའི་སྟེང་དུ་སེང་
9-2-154a


གེའི་སྒྲ་ལན་གསུམ་དུ་བསྒྲགས་ནས་ཤིན་ཏུ་དར་བར་གྱུར་ཏོ། །དེ་ནས་རེ་ཞིག་ན་ཆོས་མངོན་པ་ལ་དགྲ་ལན་གསུམ་དར་ཏེ།  སངས་རྒྱས་པའི་གཎྜིའི་སྒྲ་ལ་བརྟགས་པས་མུ་སྟེགས་པ་ལ་གནོད་པར་རིག་ནས།  དམག་དཔུང་བསྡུས་ཏེ་གཙུག་ལག་ཁང་མང་དུ་
བཤིག་གོ།  ཡང་ཡུལ་དབུས་ཀྱི་ཆོས་རྒྱལ་གྱིས་མཐའ་འཁོབ་སྟག་གཟིག་གི་རྒྱལ་པོ་ལ་གོས་སྲུབས་མེད་པ་རི་མོ་ཤིན་ཏུ་བཀྲ་བ་ཞིག་སྐྱེས་སུ་བསྐུར་ནས།  སྙིང་གར་རྐང་རྗེས་ལྟ་བུ་བྲིས་པ་འདི་ངན་བྱས་པ་ཡིན་ཅེས་ཟེར་ནས།  ཡུལ་དབུས་སུ་དམག་དྲངས་ཏེ་བཅོམ་ནས།  གཙུག་
ལག་ཁང་དང་།  དགེ་འདུན་གྱི་སྡེ་མང་པོ་བརླག་པར་བྱས་སོ། །ཡང་མུ་སྟེགས་བྱེད་ཀྱི་སྤྲང་པོ་ཞིག་གིས་དགེ་འདུན་གྱི་སྡེ་རྣམས་སུ་ཟས་སློང་བ་ལ་དགེ་ཚུལ་གཞོན་ནུ་རྣམས་ཀྱིས་ཐོ་འཚམས་པས་ཁྲོས་ཏེ།  ས་འོག་ཏུ་ཞུགས་ནས་ཉི་མ་བསྒྲུབ་པས་གྲུབ་ནས་བལྟས་པ་
ཙམ་གྱིས་ནང་པའི་གཙུག་ལག་ཁང་རྣམས་བསྲེགས་པའི་ཚེ།  དམ་ཆོས་མངོན་པ་ལ་སོགས་པའི་སྡེ་སྣོད་ཕལ་ཆེར་བསྲེགས་ཅེས་གྲག་གོ།  གཉིས་པ་ནི།  དེས་ན་འཕགས་པ་ཞེས་སོགས་གསུམ་སྟེ།  སངས་རྒྱས་མྱ་ངན་ལས་འདས་ནས་ལོ་དགུ༷་བརྒྱ་ལ་ཉེ་བ་ན་ཐོགས་
མེད་སྐུ་མཆེད་བྱོན་ཏེ།  གཅེན་གྱིས་བྱམས་པ་བསྒྲུབས་པས་གྲུབ་སྟེ།  དགའ་ལྡན་དུ་བྱོན་ནས་ཆོས་མངོན་པ་སྟོང་ཕྲག་བརྒྱ་པ་དང་།  བྱམས་པའི་ཆོས་ལྔ་ལ་སོགས་པ་གསན་ནས་འཛམ་བུ་གླིང་དུ་བྱོན་ཏེ།  ཤིན་ཏུ་དར་བར་མཛད་དོ། །གསུམ་པ་ནི།  དེ་ཡི་རྗེས་ལ།  ཞེས་
སོགས་གསུམ་སྟེ།  ཐོགས་མེད་ཀྱིས་དབྱིག་གཉེན་ལ་བཤད།  དེས་ཊ་ཀ་ར་ཎ་སྡེ་བརྒྱད་ལ་སོགས་པའི་བསྟན་བཅོས་མང་དུ་མཛད་དེ།  ཐེག་པ་ཆེན་པོའི་ཆོས་བཤད་པས་སློབ་མ་ལ་འདུལ་བ་འཛིན་པ་ཡོན་ཏན་འོད།  མངོན་པ་འཛིན་པ་ཁ་ཆེ་བློ་བརྟན།  རིགས་པ་སྨྲ་བ་
9-2-154b


ཕྱོགས་ཀྱི་གླང་པོ།  ཕ་རོལ་ཏུ་ཕྱིན་པའི་སྡེ་སྣོད་འཛིན་པ་འཕགས་པ་གྲོལ་སྡེ་ལ་སོགས་པ་མང་དུ་བྱོན་ནོ། །གཉིས་པ་གསུམ་སྟེ།  བསྟན་པ་སྔ་དར་གྱི་བྱུང་ཚུལ།  ཕྱི་དར་གྱི་བྱུང་ཚུལ།  སྐབས་ཀྱི་དགག་བྱའི་ཆོས་ལོག་བྱུང་ཚུལ་ལོ། །དང་པོ་ནི།  ཕྱི་ནས་གངས་རིའི་
ཞེས་སོགས་ཚིགས་བཅད་གཅིག་སྟེ།  དེ་ལ་རྒྱལ་པོའི་ཐོག་མ་གཉའ་ཁྲི་བཙན་པོ་ནི།  རྒྱ་གར་གྱི་རྒྱལ་བརྒྱུད་ཞིག་རིམ་གྱིས་བོད་དུ་འཆུགས་པ་ཡིན་ལ།  དེ་ནས་གནམ་ལ་ཁྲི་བདུན།  ས་ལ་ལེགས་དྲུག །བར་གྱི་ལྡེ་བརྒྱད་རྣམས་རིམ་གྱིས་བྱུང་ཞིང་།  དེ་ནས་བཙན་ལྔ་བྱུང་
བའི་ཐ་མ་ལྷ་ཐོ་དོ་རི་གཉན་བཙན་གྱི་རིང་ལ་དམ་པ་ཆོས་ཀྱི་དབུ་བརྙེས།  དེ་ནས་རྒྱལ་རབས་ལྔ་ན་སྲོང་བཙན་སྒམ་པོ་བྱུང་བའི་དུས་སུ།  ལྷ་མོ་དྲི་མ་མེད་པའི་འོད་ཀྱིས་ཞུས་པ་ལས།  ང་མྱ་ངན་ལས་འདས་ནས་ལོ་ཉིས་སྟོང་དང་ལྔ་བརྒྱ་འདས་པའི་འོག་ཏུ་གདོང་དམར་ཅན་
གྱི་ཡུལ་དུ་དམ་པའི་ཆོས་འབྱུང་ངོ་། །ཞེས་ལུང་བསྟན་པ་དང་མཐུན་པར་དམ་པ་ཆོས་ཀྱི་སྲོལ་བཏོད།  ར་ས་འཕྲུལ་སྣང་གི་གཙུག་ལག་ཁང་བརྩིགས།  ལོ་ཙཱ་བ་ཐོན་མི་སཾ་བྷོ་ཊས་དཀོན་མཆོག་སྤྲིན་ལ་སོགས་པའི་ཆོས་མང་དུ་བསྒྱུར་རོ། །དེ་ནས་རྒྱལ་རབས་ལྔ་ན་
ཁྲི་སྲོང་ལྡེ་བཙན་གྱི་སྐུ་རིང་ལ་དམ་པའི་ཆོས་དར་ཞིང་རྒྱས་པར་མཛད་དོ། །བསམ་ཡས་ཀྱི་གཙུག་ལག་ཁང་བརྩིགས།  མཁན་པོ་བོ་དྷི་ས་ཏྭ་དང་།  སྔགས་འཆང་པདྨ་འབྱུང་གནས་སྤྱན་དྲངས་ནས།  རྣམ་དག་ཁྲིམས་ཁང་གླིང་དུ་ཁྲིམས་ཕོག་སྟེ།  ལོ་ཙཱ་བ་སད་མི་མི་བདུན་
ལ་སོགས་པ་རྣམས་རབ་ཏུ་བྱུང་།  དགའ་ལྡན་སེམས་བསྐྱེད་གླིང་དུ་ཐེག་ཆེན་སེམས་བསྐྱེད་ཀྱི་སྡོམ་པ་འབོགས།  བདུད་འདུལ་སྔགས་པ་གླིང་དུ་སྔགས་ཀྱི་དབང་བསྐུར་ཏེ།  སྡོམ་པ་གསུམ་གྱི་ལག་ལེན་དར་བར་མཛད།  གཞན་ཡང་པཎྜི་ཏ་མང་དུ་སྤྱན་དྲངས་ཏེ།  
9-2-155a


བཀའ་དང་བསྟན་བཅོས་ཀྱི་ཆོས་མང་དུ་བསྒྱུར་ཏེ།  རྒྱལ་པོ་དེའི་སྲས་མུ་ནེ་བཙན་པོ།  དེའི་སྲས་སད་ན་ལེགས་འཇིང་ཡོན།  དེ་ལ་སྲས་གཙང་མ།  དར་མ།  རལ་པ་ཅན་གསུམ་ལས།  རལ་པ་ཅན་གྱི་རིང་ལ།  འུ་ཤང་རྡོའི་གཙུག་ལག་
ཁང་བཞེངས།  ཆོས་སྔར་མ་འགྱུར་བ་མང་དུ་བསྒྱུར།  བསྟན་པ་དར་རྒྱས་སུ་མཛད།  དེ་ནས་གླང་དར་མས་བློན་པོ་ངན་པ་དང་གྲོས་ངན་བཤམས་ཏེ་བཀྲོངས་ནས།  དར་མས་རྒྱལ་སྲིད་ལོ་ལྔ་བཟུང་ནས།  རབ་བྱུང་ལ་ལ་འབེབས།  ལ་ལ་གསོད།  
དཀོན་མཆོག་གི་མཆོད་པ་རྒྱུན་གཅོད།  ལོ་པཎ་གྱི་འགྱུར་གྲྭ་རྣམས་བཤིག །མི་དགེ་བའི་ཁྲིམས་བཅའ་བ་ལ་སོགས་པ་བྱས་ཏེ།  སངས་རྒྱས་ཀྱི་བསྟན་པ་རྣམས་བཤིག་གོ།  དེ་ནས་ལྷ་ལུང་དཔལ་གྱི་རྡོ་རྗེས།  གླང་དར་མ་བཀྲོངས་སོ། །དེའི་ཚེ།  གཡོ་དགེ་འབྱུང་།  གཙང་
རབ་གསལ།  དམར་ཤཱཀྱ་མུ་ནེ་གསུམ་མདོ་ཁམས་སུ་བྲོས་ཏེ།  དེ་གསུམ་གྱི་སྡོམ་ཕྲུག་ལ།  བླ་ཆེན་དགོངས་པ་རབ་གསལ་བྱུང་བ་ལ།  དུས་ཕྱིས་ཀྱི་མཁས་པ་མི་བཅུས་སྡོམ་པ་བླངས་ཏེ།  རབ་བྱུང་གི་སྡེ་བཙུགས་པ་ལ་བསྟན་པ་བར་དར་དུ་སྔོན་གྱི་མཁས་པ་ཁ་ཅིག་བཞེད་ཅིང་། 
ཕྱིས་ཀྱི་མཁས་པ་ཁ་ཅིག་བསྟན་པ་སྔ་དར་དང་ཕྱི་དར་གཉིས་སུ་བྱས་ནས་དེ་ཕྱི་དར་ཡིན་ཞེས་ཟེར་རོ། །གཉིས་པ་ནི།  དེ་ཚེ་བླ་མ་ཞེས་སོགས་ཉེར་གཅིག་སྟེ།  དར་མ་ལ་སྲས་ཡུམ་བརྟན་དང་།  འོད་སྲུང་གཉིས་ལས།  འོད་སྲུང་གི་སྲས།  རྗེ་དཔལ་འཁོར་བཙན།  དེ་ལ་སྲས་བཀྲ་ཤིས་
བརྩེགས་པ་དཔལ་དང་།  ཉི་མ་མགོན་གཉིས་ལས།  ཕྱི་མ་པུ་ཧྲངས་སུ་བྱོན་ཏེ།  སྲས་གསུམ་བྱུང་བའི་ཆེ་ཤོས་དཔལ་ལྡེ་རིག་པ་མགོན་གྱིས་མང་ཡུལ་བཟུང་།  བར་པ་བཀྲ་ཤིས་ལྡེ་མགོན་གྱིས།  པུ་ཧྲངས་བཟུང་།  ཆུང་བ་ལྡེ་ཙུག་མགོན་གྱིས་གུ་གེ་བཟུང་།
9-2-155b


དེ་ལ་སྲས་གཉིས་བྱུང་བས།  ཆེ་ཤོས་ཁོར་རེ་རབ་ཏུ་བྱུང་བའི་མཚན་ཡེ་ཤེས་འོད་དུ་བཏགས།  གཅུང་པོ་སྲོང་དེའི་སྲས་ལྷ་ལྡེ།  དེའི་སྲས་འོད་ལྡེ།  ཞི་བ་འོད།  ལྷ་བཙུན་བྱང་ཆུབ་འོད་གསུམ་མོ། །ལྷ་བླ་མ་ཡེ་ཤེས་འོད་ཀྱིས།  ལོ་ཙཱ་བ་རིན་ཆེན་བཟང་པོ་ལ་སོགས་པ།  ཉི་
ཤུ་རྩ་གཅིག་ཁ་ཆེར་བརྫངས་ཏེ།  ཕྱིས་ལོ་ཆེན་དང་།  ལོ་ཆུང་ལེགས་པའི་ཤེས་རབ་གཉིས་ཀྱིས།  བོད་དུ་བྱོན་ནས་བསྟན་པ་དར་རྒྱས་སུ་མཛད།  ལོ་ཆེན་གྱིས།  ཆོས་དང་།  ཆོས་མ་ཡིན་པ་རྣམ་པར་འབྱེད་པའི་བསྟན་བཅོས་མཛད་ནས།  ཆོས་ལོག་ཐམས་ཅད་ནུབ་
པར་མཛད།  དེའི་སློབ་མ་རྒྱལ་པོའི་སྲས་ཞི་བ་འོད་ཀྱིས།  སྔགས་ལོག་སུན་འབྱིན་མཛད།  འགོས་ལོ་ཙཱ་བས་ཆོས་ལོག་སུན་འབྱིན་མཛད་པ་ནས་བཟུང་སྟེ།  དུས་ཕྱིས་ཆོས་རྗེ་ས་སྐྱ་པ་བཞུགས་པ་ཡན་ཆད་དུ་ཆོས་ལོག་སྤྱོད་པ་ཉུང་ཞེས་ཐོས་སོ། །གསུམ་པ་ནི།  ཕྱི་
ནས་ཕག་མོའི་ཞེས་སོགས་ཚིགས་བཅད་གསུམ་སྟེ།  བླ་མ་ས་ཆེན་འདས་པའི་རྗེས་ནས།  ཕག་མོའི་བྱིན་རླབས་ཀྱིས་ཆོས་སྒོ་འབྱེད་པ་སོགས།  སངས་རྒྱས་ཀྱི་བསྟན་པ་དང་འགལ་བའི་ཆོས་ལོག་དུ་མ་འཕེལ་ཞིང་།  དེའི་རྗེས་སུ་བླུན་པོ་རྣམས་འབྲང་བ་ལྟ་སྨོས་ཀྱང་ཅི་
དགོས་མཁས་པ་སྦྱངས་པར་རློམ་པ་རྣམས་ཀྱང་འཇུག་པར་བྱེད་དོ། །གསུམ་པ་ལ་བཞི་སྟེ།  ཕྱོགས་ཆོས་བསྒྲུབ་པ།  ཁྱབ་པ་བསྒྲུབ་པ།  རྟགས་འགོད་པ།  དོན་བསྡུ་བའོ། །དང་པོ་ནི།  འདི་འདྲའི་རིགས་ཅན་ཞེས་སོགས་དགུ་སྟེ།  ཆོས་ལོག་དེ་དག་
གིས་བསྟན་པ་ལ་གནོད་པར་ལྡོག་པ་དང་།  རྗེས་འགྲོ་གཉིས་ཀྱི་སྒོ་ནས་བསྒྲུབ་པའོ། །གཉིས་པ་ནི།  གནོད་ཀྱང་སུན་འབྱིན་ནམ་ཞེས་སོགས་ལྔ་སྟེ།  བསྟན་པ་ལ་གནོད་ན་སུན་འབྱིན་དགོས་པའི་ཁྱབ་པ་བསྒྲུབ་པའོ། །གསུམ་པ་ནི།  བསྟན་ལ་གནོད་པའི་ཞེས་སོགས་
9-2-156a


གཉིས་ཏེ།  ཆོས་ལོག་ཀྱང་ཞེས་པ་ནི་ཆོས་ཅན་ནོ། །བསྟན་ལ་གནོད་པ་ཞེས་པ་ནི་རྟགས་སོ། །ཚིག་རྐང་ཕྱི་མ་ནི་བསྒྲུབ་བྱའི་ཆོས་སོ། །བཞི་པ་ནི།  ཅི་སླད་ཞེ་ན།  ཞེས་སོགས་ཚིག་བཅད་གཅིག་གོ།  །བཞི་པ་ལ་གཉིས་ཏེ།  གཏན་གྱི་ཉམས་ལེན་བརྟགས་
ནས་བླང་བ།  གཏན་གྱི་སྐྱབས་གནས་བརྟགས་ནས་བླང་བའོ། །དང་པོ་ནི།  ཉི་མ་གཅིག་གི་ཞེས་སོགས་ཚིགས་བཅད་བཞི་སྟེ།  དམ་པའི་ཆོས་ལ་བརྟག་དཔྱད་བྱ་དགོས་པ་དཔེའི་སྒོ་ནས་བསྟན་པའོ། །གཉིས་པ་ནི།  ཉིན་གཅིག་གི་ནི།  ཞེས་སོགས་བཅུ་གསུམ་སྟེ།  ཆོས་
སྟོན་པའི་བླ་མ་ལ་བརྟག་དཔྱད་བྱ་དགོས་པ་དཔེའི་སྒོ་ནས་བསྟན་པའོ། །གཉིས་པ་ཀུན་སློང་ཟང་ཟིང་མེད་པའི་བྱམས་པ་ལ་གསུམ་སྟེ།  ཕན་པར་བསམ་པས་ཟང་ཟིང་མེད་པ།  བྱ་བ་འོས་པས་ཟང་ཟིང་མེད་པ།  གཞན་ལ་བསྐུལ་བས་ཟང་ཟིང་མེད་པའོ། །དང་པོ་ལ་
གཉིས་ཏེ།  མདོར་བསྟན་པ་དང་།  རྒྱས་པར་བཤད་པའོ། །དང་པོ་ནི།  བདག་ནི་སེམས་ཅན།  ཞེས་སོགས་ཚིགས་བཅད་གཉིས་ཏེ།  དེ་ལྟར་བསྟན་པའི་དགག་སྒྲུབ་བྱེད་པ་ཐམས་ཅད་ཀྱང་།  གཞན་ལ་སྡང་སེམས་དང་།  རང་ཉིད་ཀྱིས་གྲགས་པ་བསྒྲགས་པའི་ཆེད་དུ་མ་
ཡིན་གྱི།  ཀུན་སློང་འདི་ལྟ་བུ་ཁོ་ནས་བྱས་སོ་ཞེས་པའོ། །གཉིས་པ་ལ་གསུམ་སྟེ།  ཕན་པ་སྡང་སེམས་ཡིན་ན་ཧ་ཅང་ཐལ། །བདུད་རིགས་ཕམ་པ་སྡང་སེམས་མིན་པར་བསྟན་པ།  ཀུན་སློང་ཟང་ཟིང་མེད་པར་བསྟན་པ་དངོས་སོ། །དང་པོ་ལ་ལྔ་སྟེ།  བསྟན་
འཛིན་ལ་ཧ་ཅང་ཐལ་བ།  སྟོན་པ་ལ་ཧ་ཅང་ཐལ་བ།  ལོང་འཁྲིད་ལ་ཧ་ཅང་ཐལ་བ།  སྨན་པ་ལ་ཧ་ཅང་ཐལ་བ།  དོན་བསྡུ་བའོ། །དང་པོ་ནི།  ཀླུ་སྒྲུབ་དང་ནི།  ཞེས་སོགས་ལྔ་སྟེ།  གཞན་གྱི་ཆོས་ལོག་སུན་ཕྱུང་བ།  གཞན་ལ་སྡང་བ་ཡིན་ན།  འོག་ནས་འཆད་པ་འདི་དག་
9-2-156b


ཐམས་ཅད་ཀྱིས་གཞན་ལ་སྡང་བར་འགྱུར་ཞེས་པའོ། །གཉིས་པ་ནི།  རྫོགས་པའི་སངས་རྒྱས།  ཞེས་སོགས་གསུམ་མོ། །གསུམ་པ་ནི།  མཁས་རྣམས་བླུན་པོའི།  ཞེས་སོགས་དགུའོ། །བཞི་པ་ནི།  ནད་པ་ལ་ནི།  ཞེས་སོགས་ལྔའོ། །ལྔ་པ་ནི།  ཆོས་ལོག་པ་
དང་།  ཞེས་སོགས་ལྔའོ། །གཉིས་པ་ནི།  སངས་རྒྱས་འཇིག་རྟེན།  ཞེས་སོགས་བཅུ་བདུན་ཏེ།  མཁས་པ་རྣམས་ཀྱིས་བཤད་པ་བྱས་པས་ཆོས་ལོག་སྤྱོད་པ་དང་།  བདུད་རིགས་ཕམ་པ་དེའི་སྐྱོན་མ་ཡིན་ཏེ།  སངས་རྒྱས་འཇིག་རྟེན་དུ་བྱོན་པ་དང་།  མཁས་པ་རྣམས་
ཀྱིས་བཤད་པ་བྱེད་པ།  ཆོས་ལོག་སྤྱོད་པ་ཕམ་པ་ལ་སོགས་པའི་འབྲས་བུ་རྣམས་འབྱུང་བ་འདི་རྟེན་འབྲེལ་གྱི་ཆོས་ཉིད་ཡིན་པའི་ཕྱིར་ཏེ།  མ་ཁོལ་གྱིས་ཀྱང་བསྟོད་པ་བརྒྱ་ལྔ་བཅུ་པ་ལས་སོགས་སོ། །དེས་ན་འབྲས་བུ་གསུམ་དང་ལྡན་པའི་བཤད་པ་འདི་འདྲས་བསྟན་པ་
སོགས་སོ། །གསུམ་པ་ནི།  བདག་ཀྱང་རྡོ་རྗེ།  ཞེས་སོགས་ཚིགས་བཅད་ལྔ་སྟེ།  ས་སྐྱ་པཎྜི་ཏ་བདག་གིས་ཀྱང་།  ཕག་མོའི་བྱིན་རླབས་ཙམ་རེ་བྱས་པ་ལ།  དཀར་པོ་ཆིག་ཐུབ་བསྟན་པ་སོགས་བྱས་ན་འཁོར་དང་།  ཟང་ཟིང་འབྱུང་བར་ཤེས་མོད་ཀྱིས།  འོན་
ཀྱང་སངས་རྒྱས་ཀྱི་བསྟན་པ་ལ་ཕན་པར་བསམས་ནས།  ཆོས་ལོག་སྤྱོད་པ་བཀག་ནས་བསྟན་པ་རྣམ་དག་བཤད་པ་ཡིན་ཏེ།  འཁོར་དང་ཟང་ཟིང་བསྒྲུབ་པའི་ཆེད་དུ་སེམས་ཅན་བསྡུས་པ་མ་ཡིན་ཞིང་།  སངས་རྒྱས་ཀྱི་བསྟན་པ་ཇི་ལྟ་བ་བཞིན་བསྒྲུབས་ན།  སངས་
རྒྱས་ཀྱི་བསྟན་པ་ལ་ཕན་པར་བསམས་པའི་ཕྱིར་རོ། །གཉིས་པ་ནི།  མུ་སྟེགས་བྱེད་དང་།  ཞེས་སོགས་ཚིགས་བཅད་ལྔ་སྟེ།  ཚིགས་བཅད་དང་པོས་ནི།  འཕགས་ཡུལ་གྱི་འཁྲུལ་པ་རྣམས་འདིར་མི་འགོག་པར་སྟོན།  དེ་ནས་གཅིག་གིས།  བོད་དུ་སྐབས་སུ་བབ་
9-2-157a


པའི་འཁྲུལ་པ་རྣམས་འགོག་པར་སྟོན།  དེ་ནས་རྐང་པ་ལྔས་སྐབས་སུ་བབ་པ་དེ་ལ་ཡང་བཤད་དུ་མི་རུང་བ་རྣམས་འདིར་མི་འགོག་པར་སྟོན།  དེ་ནས་ཚིགས་བཅད་གཅིག་གིས་བཤད་དུ་རུང་བ་རྣམས་འགོག་དགོས་པའི་རྒྱུ་མཚན་སྟོན།
དེ་ནས་རྐང་པ་གསུམ་གྱིས་གཞུང་འཚམས་པར་སྟོན་ཏེ།  དེ་ལྟར་ན་དགག་པར་འོས་པ་རྣམས་འགོག་ཅིང་།  མི་འོས་པ་རྣམས་བཞག་པས་ན་ཀུན་སློང་རྣམ་པར་དག་པའོ། །གསུམ་པ་ནི།  གལ་ཏེ་ལུང་དང་།  ཞེས་སོགས་བདུན་ཏེ།  ལུང་རིགས་ཀྱི་གནད་ཤེས་
པའི་རྗེས་འཇུག་གི་མཁས་པ་རྣམས་ཀྱིས་ཀྱང་དགག་སྒྲུབ་ཚུལ་བཞིན་དུ་གྱིས་ཏེ།  རྒྱུ་མཚན་ནི།  སངས་རྒྱས་བསྟན་དང་།  སོགས་སོ། །གསུམ་པ་བདག་རྐྱེན་ཕྱོགས་ལྷུང་མེད་པའི་ཤེས་རབ་ལ་བཞི་སྟེ།  ཐ་སྙད་མང་དུ་ཐོས་པ།  མདོ་སྡེ་མང་དུ་ཐོས་པ།  རྒྱུད་སྡེ་མང་དུ་ཐོས་པ། 
མན་ངག་མང་དུ་ཐོས་པའོ། །དང་པོ་ནི།  བདག་གིས་སྒྲ་དང་།  ཞེས་སོགས་གསུམ་སྟེ།  དེ་ལ་སྒྲ་ནི་བརྡ་སྤྲོད་པར་བྱེད་པའི་བསྟན་བཅོས་ཡིན་ལ།  དེའི་གཙུག་གི་ནོར་བུ་ལྟ་བུ་ཀ་ལཱ་པ་དང་།  ཙཎྜ་པ་དང་།  དེ་དག་གི་མིང་གི་སྒྲ་བསྒྲུབ་
པ་དང་།  སྒྲའི་བྱིངས་བསྒྲུབ་པ་དང་།  བྱེད་པའི་ཚིག་སྒྲུབ་པ་ལ་སོགས་པ་སྒྲའི་བསྟན་བཅོས་ཡན་ལག་དང་བཅས་པ་ཐོས་པ་ཡིན་ནོ། །ཚད་མ་ནི་དོན་གྱི་འགལ་འབྲེལ་གཅོད་པའི་བསྟན་བཅོས་ཡིན་ལ།  དེའི་གཙུག་གི་ནོར་བུ་ལྟ་བུ་ཚད་མ་ཀུན་ལས་བཏུས་
པ་དང་།  དེའི་ཚིག་དོན་གཏན་ལ་འབེབས་པ་རབ་ཏུ་བྱེད་པ་སྡེ་བདུན་ཡན་ལག་དང་བཅས་པ་ཐོས་པ་ཡིན་ནོ། །སྡེབ་སྦྱོར་ལ་རྒྱུད་འཕེལ་དང་།  སྐྱེད་པ་གཉིས་ལས།  དང་པོ་ལ་མཉམ་པ་དང་།  ཕྱེད་མཉམ་པ་དང་།  མི་མཉམ་པ་དང་གསུམ།  ཕྱི་མ་ལ་འཕགས་
9-2-157b


པ་དང་།  རོ་ལངས་དང་།  ཕྱི་མོ་མཉམ་པ་གསུམ་སྟེ།  དེ་དག་སོ་སོའི་རྣམ་པར་བཞག་པ་དང་བཅས་པ་ཐོས་སོ། །རྒྱན་ལ་སྙན་ངག་གི་མཚན་ཉིད་སྟོན་པར་བྱེད་པ་དང་།  དེ་དང་མི་འགལ་བར་སྟོན་པར་བྱེད་པ་གཉིས་ལས།  དང་པོ་ལ་དབྱངས་ཅན་གྱི་མགུལ་རྒྱན་ལ་
སོགས་པ་དང་།  གཉིས་པ་ལ་སྐྱེས་རབས་ལ་སོགས་པ་རྣམས་ཐོས་སོ། །མིང་གི་མངོན་བརྗོད་ནི་སོ་སོ་ཡང་དག་རིག་པའི་རྒྱུར་འགྱུར་པའི་མིང་གི་རྣམ་གྲངས།  དེ་ལ་ཡང་འཆི་མེད་མཛོད་དང་།  སྣ་ཚོགས་གསལ་བ་ལ་སོགས་པ་ཐོས་སོ། །གཉིས་པ་ནི།  འདུལ་བ་
དང་ནི་ཞེས་སོགས་གཉིས་ཏེ།  ཁ་ཆེ་པཎ་ཆེན་ལས།  འདུལ་བ་ལུང་དང་།  སོ་སོ་ཐར་པ་དང་།  མདོ་རྩ་དང་།  འོད་ལྡན་དང་།  མེ་ཏོག་ཕྲེང་རྒྱུད་དང་།  མངོན་པ་མཛོད་དང་།  ཐེག་བསྡུས།  རྣམ་བཤད་རིགས་པ།  ཉི་ཤུ་པ།  སུམ་ཅུ་པ།  ཕུང་པོ་ལྔའི་རབ་བྱེད།  མངོན་
རྟོགས་རྒྱན་རྩ་འགྲེལ།  ཤེར་ཕྱིན་བདུན་བརྒྱ་པ།  བརྒྱད་སྟོང་དོན་བསྡུས་རྣམས་གསན་ཅིང་།  ཞུ་དོན་ལས།  མངོན་རྟོགས་རྒྱན་མ་གཏོགས་པའི་བྱམས་ཆོས་རྩ་འགྲེལ།  བསླབ་པ་ཀུན་ལས་བཏུས་པའི་འགྲེལ་བཤད།  དབུ་མ་བདེན་གཉིས་ཆེ་བ།  དབུ་མ་རྒྱན། 
རིགས་ཚོགས་རྣམས་གསན་ནོ། །གསུམ་པ་ནི།  གསང་སྔགས་རྒྱུད་སྡེ་ཞེས་སོགས་ཚིགས་བཅད་གཅིག་སྟེ།  དེ་དག་ཐོས་པའི་ཚུལ་རྣམ་ཐར་དུ་བཤད་ཟིན་ཅིང་།  ཐོས་པ་དེ་དག་མིང་རྐྱང་ཙམ་མ་ཡིན་པར།  བསམ་བྱུང་གི་རིགས་པས་དཔྱད་པས་དོན་གྱི་གནད་
ཇི་ལྟ་བ་བཞིན་རྟོགས་པ་ཡིན་ཏེ།  ཆོས་རྗེ་ཉིད་ཀྱི་ཞལ་ནས།  སྦྲང་རྩི་འཛིན་པ་སྦྲང་རྩིའི་བརྟུལ་ཞུགས་ཅན། །སྦྲང་བུ་མིན་པས་སྦྲང་རྩིའི་བཅུད་མ་རྙེད། །སྡེ་སྣོད་འཛིན་པ་ཀུན་དགའ་རྒྱལ་མཚན་དཔལ། །བཟང་པོ་མིན་པས་ཤེས་བྱའི་བཅུད་མ་རྙེད། །
9-2-158a


ཞེས་སོ། །བཞི་པ་ནི།  བྱེ་བྲག་སྨྲ་དང་།  ཞེས་སོགས་ཚིགས་བཅད་བརྒྱད་དེ།  གྲུབ་མཐའ་སྨྲ་བ་བཞིའི་གདམས་ངག་བོད་དུ་འགྱུར་བ་ཕལ་ཆེ་བ་དང་།  ཕ་དམ་པའི་ཞི་བྱེད་བརྒྱུད་པ་གསུམ་དང་།  ཨ་རོའི་རྫོགས་ཆེན་དང་།  ཨ་མ་ལབ་ཀྱི་
སྒྲོན་མའི་གཅོད་དང་།  མངོན་རྟོགས་རྒྱན་གྱི་སྐབས་བརྒྱད་ཀྱི་དོན་ཅིག་ཅར་དུ་བསྒོམ་པ་ཇོ་བོ་ནས་བརྒྱུད་པ་དང་།  ཕ་རོལ་ཏུ་ཕྱིན་པའི་བློ་སྦྱོང་དོན་བདུན་མ་ལ་སོགས་པ་དང་།  བཀའ་གདམས་གཞུང་པ་དང་།  གདམས་ངག་གི་ལུགས་གཉིས་དང་།  ས་ར་ཧའི་དོ་ཧྭ་
མཛོད་ཀྱི་གླུ་ལ་སོགས་པ་སྙིང་པོ་སྐོར་དྲུག་དང་།  གྲུབ་པ་སྡེ་བདུན་རྣམས་ཀྱང་ཐོས་སོ། །དེ་ལ་སྙིང་པོ་སྐོར་དྲུག་ནི།  མཛོད་ཀྱི་གླུ་དང་།  ཏོག་རྩེ་བའི་བསམ་མི་ཁྱབ།  ལྷན་སྐྱེས་རྡོ་རྗེའི་གནས་པ་བསྡུས་པ་དང་།  ཨཱཪྱ་དེ་ཝའི་སེམས་ཀྱི་སྒྲིབ་སྦྱོང་དང་།  དེ་ཝ་ཙནྡྲའི་
ཤེས་རབ་ཡེ་ཤེས་གསལ་བ་དང་།  འཕགས་པ་ཀླུ་སྒྲུབ་ཀྱིས་མཛད་པའི་ཕྱག་རྒྱ་བཞི་པ་དང་དྲུག་གོ།  གྲུབ་པ་སྡེ་བདུན་ནི།  ཨིནྡྲ་བྷཱུ་ཏིས་མཛད་པའི་ཡེ་ཤེས་གྲུབ་པ་དང་།  ཡན་ལག་མེད་པའི་རྡོ་རྗེས་མཛད་པའི་ཐབས་ཤེས་གྲུབ་པ་དང་།  པད་མ་བཛྲའི་གསང་བ་
གྲུབ་པ་དང་།  ཌོཾ་བྷི་ཝའི་ལྷན་ཅིག་སྐྱེས་པ་གྲུབ་པ་དང་།  དཔལ་ཆེན་མོའི་གཉིས་སུ་མེད་པ་གྲུབ་པ་དང་།  ཧ་རི་ཀ་པའི་གསང་བའི་དེ་ཁོ་ན་ཉིད་གྲུབ་པ་དང་།  རྣལ་འབྱོར་མ་ཙི་ཏོས་མཛད་པའི་དངོས་པོ་གསལ་བའི་དེ་ཁོ་ན་ཉིད་གྲུབ་པ་དང་བདུན་ནོ། །ཏི་ལོ་པ་དང་།  ནག་
པོ་སྤྱོད་པའི་རྡོ་རྗེའི་རྟོགས་པ་གླུར་བླངས་པའི་དོ་ཧྭ་དང་།  རྣལ་འབྱོར་དབང་ཕྱུག་བིཪྺ་པའི་དོ་ཧྭ་སེང་གེ་ཞེས་བྱ་བ་དང་།  མི་ཏྲི་པ་དང་།  ཐ་ག་པ་སོགས་ཀྱི་དོ་ཧྭའི་བྱེ་བྲག་དུ་མ་ཐོས་སོ། །འཁོན་སྟོན་གད་པ་ཀིརྟི་ནས་བརྒྱུད་པའི་རིམ་ལྔ་སྟན་ཐོག་གཅིག་པ་དང་།  མར་པའི་
9-2-158b


སློབ་མ་མེས་སྟོན་ཆེན་པོ་དང་།  དྭགས་པོའི་སློབ་མ་རྩང་བཞེར་དང་།  རས་ཆུང་བའི་སློབ་མ་བུར་སྒོམ་པ་ལས་ཐོས་པའི་རྨོག་ཅོག་པ་ནས་བརྒྱུད་པའི་ནཱ་རོ་ཆོས་དྲུག་ལུགས་གསུམ་དང་།  གསང་བ་འདུས་པ་ཡེ་ཤེས་ཞབས་ལུགས་ཡན་ལག་དང་བཅས་པ་དང་།
འཕགས་སྐོར་གྱི་གདམས་ངག་འགོས་དང་།  ཁ་ཆེ་པཎ་ཆེན་ནས་བརྒྱུད་པ་རྣམས་དང་།  དགེས་པ་རྡོ་རྗེའི་རྒྱུད་གསུམ་ཐིག་ལེའི་སྐོར་དང་བཅས་པ་རྣམས་དང་།  གཤིན་རྗེའི་གཤེད་དམར་པོ་དང་།  དགྲ་ནག་དང་།  གདོང་དྲུག་དང་།  འཇིགས་བྱེད་ལ་སོགས་པ་རྣམས་
དང་།  དེའི་གདམས་ངག་རྣམས་དང་།  རྙིང་མ་པའི་གཤིན་རྗེ་ཚེ་བདག་དང་།  ཁ་ཐུན་སོགས་ཀྱི་གདམས་ངག་དང་།  འཁོར་ལོ་སྡོམ་པའི་གདམས་ངག་གསང་མཐའི་ལུགས་རྣམས་དང་།  དུས་ཀྱི་འཁོར་ལོའི་སྦྱོར་དྲུག་ལ་སོགས་པ་སྦྱོར་དྲུག་གི་བྱེ་བྲག་མང་པོ་དང་། 
མཚན་བརྗོད་ཀྱི་བཤད་པ་སློབ་དཔོན་འཇམ་དཔལ་བཤེས་གཉེན་གྱིས་མཛད་པའི་འགྲེལ་པ་ཆེ་ཆུང་གཉིས་དང་།  སྒེག་པའི་རྡོ་རྗེས་མཛད་པའི་སྔགས་དོན་རྣམ་གཟིགས་དང་།  དབུ་མ་ལ་དགའ་བས་བྱས་པའི་ཡེ་ཤེས་ཞབས་ལུགས་སུ་འགྲེལ་པ་དང་།  ལམ་འབྲས་ཀྱི་
ལུགས་དང་།  དུས་འཁོར་གྱི་ལུགས་ཏེ་དྲུག་དང་།  བིར་ཝ་པའི་འཆི་མེད་གྲུབ་པའི་གདམས་ངག་དང་།  བརྟག་གཉིས་ལ་བརྟེན་པའི་བིར་ཝ་པས་ལམ་འབྲས་བུ་དང་བཅས་པས་ལམ་ཡོངས་སུ་རྫོགས་པའི་གདམས་ངག་དང་།  མཚོ་སྐྱེས་ཀྱིས་བསྐྱེད་རིམ་ཟབ་པའི་ཚུལ་
དགུ་རྫོགས་རིམ་མར་མེའི་རྩེ་མོ་ལྟ་བུའི་གདམས་ངག་དང་།  སམྦུ་ཊི་ལ་བརྟེན་ནས་ཏོག་རྩེ་པས་བསམ་མི་ཁྱབ་ཀྱི་གདམས་ངག་དང་།  བདུད་རྩི་འོད་ལ་བརྟེན་ནས་ངག་དབང་གྲགས་པས་ཕྱག་རྒྱ་ཆེན་པོ་ཡི་གེ་མེད་པ་དང་།  འཁོར་ལོ་བདེ་མཆོག་ལ་བརྟེན་ནས་
9-2-159a


ནག་པོ་སྤྱོད་པས་གཏུམ་མོ་ལམ་རྫོགས་དང་།  ཡོན་པོ་བསྲང་བ་གཉིས་དང་།  གསང་བ་འདུས་པ་ལ་བརྟེན་ནས་སློབ་དཔོན་ཀླུ་སྒྲུབ་ཀྱིས་མཆོད་རྟེན་གྱི་དྲུང་དུ་སེམས་ཐག་བཅད་པ་དང་།  དབང་ཡོན་ཏན་རིམ་པ་ལ་བརྟེན་ནས་རྒྱལ་པོ་ཨིནྡྲ་བྷཱུ་ཏིས་ཕྱག་རྒྱས་ལམ་
ཡོངས་སུ་རྫོགས་པ་དང་།  བརྟག་གཉིས་ལ་བརྟེན་ནས་ཌོཾ་བྷི་ཧེ་རུ་ཀས་ལྷན་ཅིག་སྐྱེས་གྲུབ་སྟེ་ལམ་སྐོར་དགུ་དང་།  དེ་ལས་འཕྲོས་པའི་ལམ་སྦས་བཤད་དང་།  གྲུབ་ཆེན་བཅུ་དང་།  ཕྲ་མོ་བརྒྱད་ལ་སོགས་པ་དུ་མ་དང་།  གཞན་ཡང་དེང་སང་བོད་ན་གྲགས་པའི་ཁ་རག་སྐོར་གསུམ་
ལ་སོགས་པ་དང་།  རྒྱ་གར་ན་གྲགས་པའི་འབྲོག་མི་ལོ་ཙཱ་བས་མཁས་པ་སྒོ་དྲུག་ལས་གསན་པའི་གདམས་པ་ལ་སོགས་པ་འབད་དེ་ལེགས་པར་མཉན་ཅིང་།  བསླབས་པ་དེ་དག་ཀྱང་མིང་ཙམ་མིན་པར་སོ་སོའི་གནད་ཇི་ལྟ་བ་བཞིན་དུ་རྟོགས་པ་དེའི་ཕྱིར་ན།  རྒྱ་བོད་ཀྱི་ཆོས་རྣམས་ཕལ་
ཆེར་ཐོས་ཤིང་ཇི་ལྟ་བ་བཞིན་དུ་རྟོགས་པ་ཡིན་ནོ། །དེས་ན་ས་སྐྱ་པཎྜི་ཏ་བདག་ལ།  རང་གིས་ཤེས་པ་བསྒྲུབ་པར་འདོད་ཅིང་།  མི་ཤེས་པ་འགོག་པར་འདོད་པའི་ཕྱོགས་ལྷུང་ཡང་མེད།  ཤེས་པ་རྣམས་ལ་ཡང་མ་དག་པ་ནི་རང་གཞན་སུ་ལ་འདུག་ཀྱང་དོར་ཞིང་།  དག་པ་ནི་སུ་
ལ་འདུག་ཀྱང་བསྒྲུབ་པ་ཡིན་པས།  བསྟན་བཅོས་འདིའི་དགག་སྒྲུབ་ལ་ཕྱོགས་ལྷུང་མེད་དོ་ཞེས་དགོངས་སོ། །གཉིས་པ་འབྲས་བུ་བསྟན་བཅོས་གཟུང་བར་གདམས་པ་ནི།  དེ་ཕྱིར་གཟུ་བོས་ཞེས་སོགས་གཉིས་ཏེ།  ལེགས་པར་ཤེས་ཤིང་གཟུ་བོས་དཔྱད་པའི་ཕྱིར་ན།  བློ་ལྡན་རྣམས་
ཀྱིས་འདི་ནས་བཤད་པ་ལྟར་ཟུང་ཅེས་པའོ། །གསུམ་པ་གཟུང་བྱའི་ཆོས་ཀྱི་ཆེ་བ་བསྟན་པ་ནི།  ཐུབ་པའི་བསྟན་པ་ཞེས་སོགས་ཚིགས་བཅད་གཉིས་ཏེ།  དེ་ལྟ་བུའི་བསྟན་བཅོས་འདི་ནི་ཁྱད་པར་གྱི་ཆོས་དྲུག་དང་ལྡན་ཏེ་ཐུབ་པའི་བསྟན་པ་གཞིར་བྱས་པ་དང་།  ལོག་ལྟའི་མུན་པ་
9-2-159b


བསལ་བ་དང་།  བློ་གསལ་གྱི་བློ་གྲོས་བསྐྱེད་པ་དང་།  ཀུན་སློང་དག་པས་བཤད་པ་དང་།  མཁས་པ་ཀུན་གྱི་དགོངས་པ་ཕྱོགས་གཅིག་པ་ཡིན་པ་དང་།  བླུན་པོས་རྟོགས་པར་དཀའ་བའོ། །དང་པོ་གསུམ་པོ་ཉི་མའི་དཔེས་སྟོན་པ་ནི་ཚིགས་བཅད་དང་པོས་སྟོན་ནོ། །དེ་ནས་རྐང་པ་
གཉིས་ཀྱིས་བཞི་པ་སྟོན་ནོ། །དེ་ནས་གཉིས་ཀྱིས་ལྷག་མ་གཉིས་སྟོན་ནོ། །བཞི་པ་བརྩམས་པའི་དགེ་བ་གཞན་དོན་དུ་བསྔོ་བ་ནི།  ཀུན་དགའི་ཉི་མས་ཞེས་སོགས་ཚིགས་བཅད་གཅིག་སྟེ།  གཟུགས་ཅན་གྱི་རྒྱན་གྱི་སྒོ་ནས་བསྟན་བཅོས་ཀྱི་བརྗོད་བྱ་གཞན་གྱི་ཕན་བདེའི་རྒྱུར་
བསྔོ་བའོ། །ལྔ་པ་བཀའ་དྲིན་རྗེས་སུ་དྲན་པའི་ཕྱག་ནི།  གང་གིས༷་ཐུགས་བརྩེས་ཞེས་སོགས་ཚིགས་བཅད་གཅིག་སྟེ།  དེ་ལྟར་ལོག་པའི་ཆོས་རྣམས་སྤངས་ནས་སངས་རྒྱས་ཀྱི་བསྟན་པ་རྣམ་པར་དག་པ་དང་ལེགས་པར་སྤྲད་པ་ནི་གང་གིས༷་ཐུགས་བརྩེས་ཉེ་བར་བཟུང་བའི་བཀའ་
དྲིན་ཡིན་པས་འཇམ་མགོན་བླ་མ་རྗེ་བཙུན་གྲགས་པ་རྒྱལ་མཚན་དེ་ལ་འདུད་ཅེས་པའོ། །གསུམ་པ་བྱས་ཤེས་དྲིན་གཟོ་བསྐྱེད་པའི་ཆེད་དུ་མཛད་བྱང་སྨོས་པ་ནི།  སྡོམ་པ་གསུམ་གྱི་རབ་ཏུ་དབྱེ་བ་ཞེས་བྱ་བ་སོགས་སོ། །དེ་ལྟར་ན་རྣམ་བཤད་འདི་ནི་དཀྱུས་ཀྱི་ས་བཅད་པས་
བརྗོད་བྱའི་བབས་རྟོགས་པ་དང་།  དཀའ་བའི་གནས་བཤད་པས་ཐེ་ཚོམ་གྱི་མདུད་པ་གྲོལ་བ་དང་།  ཤེས་བྱེད་ཀྱི་ལུང་དྲངས་པས་དོན་ལ་ངེས་ཤེས་བསྐྱེད་པ་དང་།  གཞུང་མཐོང་བས་གོ་བ་རྣམས་མ་བཤད་པས་ཡི་གེ་ཉུང་བ་དང་།  དམ་པའི་གསུང་ལ་བརྟེན་པས་ཡིད་
ཆེས་པའི་གནས་སུ་གྱུར་པ་སྟེ་ལྔ་པོ་འདིས།  རྣམ་བཤད་གཞན་ལས་ཁྱད་པར་དུ་འཕགས་པ་ཡིན་ལ།  གཞུང་གི་ཚིག་སྦྱོར་རྣམས་ནི་ཇི་ལྟར་བདེ་བར་བཤད་པའི་སྒོ་ནས་གདུལ་བྱ་ལ་ཕན་གདགས་པར་བྱའོ། །སངས་རྒྱས་ཞལ་གྱི་བདུད་རྩི་རྫོགས་ལྡན་རྒྱུན། །དགྲ་བཅོམ་
9-2-160a


ཡིད་ཀྱི་ས་གཞིར་ལེགས་བསྡུས་ནས། །འཕགས་ཡུལ་མཁས་གྲུབ་ཀླུ་དབང་བསྟི་བའི་གནས། །གསུང་རབ་ཡན་ལག་བརྒྱད་ལྡན་གངས་ཆེན་མཚོ། །ལོ་པཎ་བློ་ཡི་མ་དྲོས་ལས་འཐོན་ཏེ། །ལུང་རིགས་མན་ངག་དྲི་མེད་གང་གཱའི་རྒྱུན། །གངས་ཅན་སྐྱེ་བོའི་
ཡིད་ཀྱི་གདུང་སེལ་ཞིང་། །དགེ་ལེགས་ལོ་ཐོག་སྤེལ་བའི་དཔལ་དུ་འབབ། །དེ་ཚེ་ངན་རྟོག་རླུང་གིས་སྨྲ་ངན་གྱི། །ས་རྡུལ་གཡོས་པས་རྙོག་མར་བྱས་པ་གང་། །ས་སྐྱ་པ་ཞེས་ས་གསུམ་གྲགས་པ་ཡིས། །སྒྲུབ་དང་སུན་འབྱིན་ནོར་བུས་འདངས་པར་མཛད། །སོ་སོ་ཐར་དང་
བྱང་སེམས་གསང་སྔགས་ཀྱི། །ཇི་བཞིན་ཉམས་ལེན་སོ་སོའི་གཞུང་ན་གསལ། །འདིར་ནི་ལོག་རྟོག་འགོག་པ་གཙོ་བོ་སྟེ། །བློ་མིག་དག་པས་ཉམས་ལེན་དོན་ཀྱང་མཐོང་། །རིས་བདུན་དུས་དང་བསྙེན་གནས་ཆོ་ག་དང་། །བསྔོ་བའི་གནད་དང་ལས་ཀྱི་འབྲས་བུ་དང་། །
བསླབ་བྱའི་གནང་བཀག་ཕྲལ་གྱི་ལག་ལེན་ལ། །འཁྲུལ་པ་འགོག་པ་སོ་ཐར་སྡོམ་པའི་སྐབས། །བྱང་སེམས་ཆོ་ག་དོན་དམ་སེམས་བསྐྱེད་དང་། །བསླབ་བྱའི་གཙོ་བོ་བདག་གཞན་བརྗེ་བའི་སེམས། །དེ་དང་འབྲེལ་བའི་ཐབས་ལམ་སྣ་ཚོགས་ལ། །འཁྲུལ་པ་
འགོག་པ་བྱང་སེམས་སྡོམ་པའི་སྐབས། །དབང་དང་དམ་ཚིག་རིམ་གཉིས་ཕྱག་ཆེན་དང་། །ཐེག་གསུམ་ལག་ལེན་རྟོགས་བྱའི་ལྟ་བ་དང་། །རྒྱུད་སྡེའི་སྒྲུབ་པ་སྤྱོད་པ་འབྲས་བུ་ལ། །འཁྲུལ་པ་འགོག་པ་རིག་འཛིན་སྡོམ་པའི་སྐབས། །སོ་སོ་ཐར་པ་ལེགས་གསུང་
འདུལ་བ་བཞིན། །བྱང་སེམས་སྡོམ་པ་ཐེག་ཆེན་མདོ་སྡེའི་ལུགས། །གསང་སྔགས་རྒྱུད་སྡེའི་དགོངས་པ་བཞིན་སྟོན་པ། །བསྟན་བཅོས་འདི་ཡི་བརྗོད་བྱར་མཁས་པས་རྟོགས། །དེ་སླད་ཐོས་བསམ་སྒོམ་པས་གསོལ་བཏབ་ན། །དགོས་འདོད་ཀུན་འབྱུང་བསྟན་
9-2-160b


བཅོས་ཡིད་བཞིན་ནོར། །ལེགས་པར་བཤད་པའི་རྒྱལ་མཚན་རྩེར་མཆོད་ནས། །དོན་གཉེར་བློ་ཡི་རེ་བ་བསྐང་བར་བྱས། །འདི་དོན་འབྱེད་པར་རློམ་པ་མང་ན་ཡང་། །དམ་པའི་གསུང་དང་རྣམ་དཔྱོད་ཉི་འོད་ཀྱིས། །ཚིག་གི་འདབ་མ་ཕྱེ་ནས་ཟབ་དོན་གྱི། །གེ་སར་
སྟོན་པ་དེང་སང་ཁོ་བོ་ཙམ། །ཀུན་གཞི་དག་པའི་ངོས་ལ་གསུང་རབ་ཚོན། །ཡོངས་འཛིན་མཁས་པའི་ཕྱག་གི་འདུ་བྱེད་དང་། །རྣམ་དཔྱོད་བརྩོན་པའི་པིར་གྱིས་བྲིས་པ་ལ། །སྣ་ཚོགས་ཤེས་བྱའི་རི་མོ་མི་འཆར་མེད། །དེ་སླད་བཀའ་དྲིན་དྲན་པས་ཡིད་གཡོས་
ཏེ། །དམ་ཆོས་འོ་མས་རྣམ་དཔྱོད་ལུས་སྐྱོང་བའི། །ཡོངས་འཛིན་མ་མའི་ཚོགས་ལ་གུས་ཕྱག་འཚལ། །ད་དུང་བྱང་ཆུབ་བར་དུ་བསྐྱོང་དུ་གསོལ། །གསུང་རབ་དགོངས་གསལ་ལེགས་བཤད་འོད་སྟོང་གིས། །བསྟན་བཅོས་ཆེན་པོའི་དེ་ཉིད་གསལ་བྱས་ཏེ། །
དགེ་བ་གང་དེས་བདག་གཞན་འགྲོ་བ་ཀུན། །ཐམས་ཅད་མཁྱེན་པའི་ས་ལ་གནས་པར་ཤོག །གོ་འཕང་མཆོག་དེ་མ་ཐོབ་དེ་སྲིད་དུ། །ཀུན་མཁྱེན་བླ་མའི་དྲུང་དུ་བདག་སྐྱེ་ཞིང་། །དགའ་དང་སྤྲོ་བའི་སྤུ་ལོང་ཆེར་གཡོས་ཏེ། །མཁྱེན་བརྩེ་བཟང་པོས་རྟག་ཏུ་སྐྱོང་
བར་ཤོག །སྐྱེས་ཆེན་དམ་པའི་ཚོགས་རྣམས་མཉེས་བྱས་ནས། །སྡོམ་གསུམ་བཀའ་དྲིན་ཚོགས་རྣམས་ལེགས་མནོས་ཏེ། །སོ་སོའི་དམ་ཚིག་ཚོགས་རྣམས་མ་ལུས་ལ། །ཉེས་ལྟུང་དྲི་མའི་ཚོགས་རྣམས་དག་གྱུར་ཅིག །གཞན་ལ་གནོད་པའི་བསམ་སྦྱོར་
རིང་དུ་སྤངས། །གཞན་ཕན་བྱང་ཆུབ་མཆོག་ཏུ་སེམས་བསྐྱེད་ནས། །དེ་ཡང་ལྷ་དང་བདེ་བའི་ཡེ་ཤེས་སུ། །བྱིན་གྱིས་བརླབས་པའི་ཉམས་ལེན་མཐར་ཕྱིན་ཤོག །གནས་སྐབས་ཀུན་ཏུ་རྗེ་བཙུན་ས་སྐྱ་པའི། །བཤད་སྒྲུབ་ཉི་ཟླའི་སྣང་བ་འཛིན་པ་ཡིས། །རྒྱ་ཆེན་
9-2-161a


ཤེས་བྱའི་མཁའ་ལ་རབ་བགྲོད་དེ། །ཐུབ་བསྟན་གླིང་བཞི་ཀུན་ཏུ་གསལ་བར་ཤོག །སྡོམ་པ་གསུམ་གྱི་རབ་ཏུ་དབྱེ་བའི་རྣམ་བཤད་རྒྱལ་བའི་གསུང་རབ་ཀྱི་དགོངས་པ་གསལ་བ་ཞེས་བྱ་བ་འདི་ནི་བདེ་བར་གཤེགས་པའི་རིང་ལུགས་པ་མཐའ་དག་གི་
གཙུག་གི་ནོར་བུར་གྱུར་པ་འཇམ་དབྱངས་བླ་མ་ཀུན་དགའ་བཟང་པོ་དང་།  ལྷར་བཅས་འགྲོ་བའི་འདྲེན་པ་དམ་པ་རྗེ་བཙུན་དཀོན་མཆོག་རྒྱལ་མཚན་དང་།  ལུང་རིགས་སྨྲ་བའི་དབང་པོ་ཀུན་མཁྱེན་སངས་རྒྱས་འཕེལ་དང་།  མཐའ་ཡས་རྒྱུད་སྡེའི་མངའ་བདག་ཤེས་རབ་
བཟང་པོ་ལ་སོགས་པ་མཁས་གྲུབ་དུ་མའི་ཞབས་རྡུལ་སྤྱི་བོས་བླངས་ནས་སྡེ་སྣོད་དང་རྒྱུད་སྡེའི་དོན་ལ་སྦྱངས་ཤིང་།  རྗེ་བཙུན་ས་སྐྱ་པ་ཡབ་སྲས་ཀྱི་གསུང་རབ་ལ་འདྲིས་པར་བྱས་ཏེ།  བྱེ་བྲག་ཏུ་བསྟན་བཅོས་འདིའི་ཚིག་དོན་ཞིབ་ཏུ་མཉན་ནས།  ཟབ་དོན་ལ་བློ་ཁ་
ཕྱོགས་པར་གྱུར་པ་དགེ་སློང་བསོད་ནམས་སེང་གེས།  ཆུ་མོ་ལུག་གི་ལོ་ནག་པ་ཟླ་བའི་ཚེས་ལ་འབྲས་ཡུལ་རྫོང་དཀར་གྱི་སྐྱེད་མོས་ཚལ་ལེགས་བཤད་སྒྲོགས་པའི་གཙུག་ལག་ཁང་དུ་སྦྱར་བའི་ཡི་གེ་པ་ནི་གཞོན་ནུ་བློ་ལྡན་ནོ། །འདིས་བསྟན་པ་དང་སེམས་ཅན་ལ་ཕན་པ་རྒྱ་ཆེན་
པོ་འབྱུང་བར་གྱུར་ཅིག།    །།འདི་བསྒྲུབས་པ་ལས་བྱུང་བ་ཡི། །དགེ་བའི་རྩ་བ་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །
བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །།དགེའོ།      །དགེའོ།    །དགེའོ།    །།
9-2-161b


empty page
9-3-1a


༄༅།  །སྡོམ་གསུམ་རབ་དབྱེའི་སྤྱི་དོན་ཡིད་བཞིན་ནོར་བུ་ཞེས་བྱ་བ་བཞུགས་སོ། །
9-3-1b


༄༅།  བློ་ཆེན་ཤེས་བྱ་ཀུན་ལ་ལེགས་སྦྱངས་ཤིང་། །བརྩེ་ཆེན་མཐའ་ཡས་འགྲོ་བ་བུ་བཞིན་གཟིགས། །རྒྱ་ཆེན་མཛད་པ་ནམ་མཁའི་མཐར་སོན་པ། །པཎ་ཆེན་འཇམ་དབྱངས་བླ་
མས་བདག་སྐྱོངས་ཤིག །གང་གི་མཁྱེན་རབ་གསལ་བའི་ཉི་འོད་ཀྱིས། །ཐུབ་བསྟན་དགའ་ཚལ་རྒྱས་པ་ལས་བྱུང་བའི། །སྡོམ་གསུམ་གསེར་གྱི་པདྨའི་འཛུམ་ཕྲེང་གིས། །བློ་ལྡན་བློ་མིག་དགའ་བ་བསྐྱེད་
པར་བྱ། །འདིར་སྡོམ་པ་གསུམ་གྱི་རབ་ཏུ་དབྱེ་བ་ཞེས་བྱ་བ་ཆོས་དང་ཆོས་མ་ཡིན་པ་རྣམ་པར་འབྱེད་པའི་བསྟན་བཅོས་ཀྱི་སྤྱིའི་དོན་གཏན་ལ་དབབ་པ་ལ་དོན་གསུམ་སྟེ།  བསྟན་བཅོས་འདི་གང་ཟག་གང་གིས་བརྩམས་
པ།  དགོས་པ་ཅིའི་ཕྱིར་བརྩམས་པ།  དེ་ལྟར་བརྩམས་པའི་བརྗོད་བྱ་གཏན་ལ་དབབ་པའོ། །དང་པོ་ནི།  རབ་དཀར་གངས་རིའི་ཕྲེང་བས་བསྐོར་བའི་ལྗོངས།  རྡོ་རྗེ་གདན་ནས་བྱང་ཕྱོགས་སུ་དཔག་ཚད་བརྒྱ་
9-3-2a


བགྲོད་པའི་གནས།  གཙང་གྲོམ་པ་ལ་སྟོད་དཔལ་ལྡན་ས་སྐྱའི་གཙུག་ལག་ཁང་དུ་སྐུ་འཁྲུངས་པ།  མི་ནས་མིར་གྱུར་པའི་སྐྱེ་བ་ཉི་ཤུ་རྩ་ལྔའི་བར་དུ་མགོན་པོ་འཇམ་པའི་དབྱངས་ཀྱིས་
རྗེས་སུ་བཟུང་ཞིང་རིག་པའི་གནས་མཐའ་དག་ལ་སྦྱངས་པས།  གཞོན་ནུའི་དུས་ཉིད་ནས་ཤེས་བྱའི་དཀྱིལ་འཁོར་མཐའ་དག་ལ་མི་འཇིགས་པའི་སྤོབས་པ་བརྙེས་ཏེ། ནང་དུ་ཏིང་ངེ་འཛིན་བསམ་གྱིས་མི་ཁྱབ་པ་
ལས་མ་གཡོས་བཞིན་དུ་འཆད་རྩོད་རྩོམ་པའི་འོད་ཟེར་གྱིས།  ཐུབ་པའི་བསྟན་པ་ཆེས་ཆེར་གསལ་བར་མཛད་ཅིང་། །སྐལ་ལྡན་གྱི་འགྲོ་བ་མང་པོ་སྨིན་གྲོལ་གྱི་ལམ་ལ་བཀོད་པར་མཛད་པ།  ཁྱད་པར་སྐྱེ་བ་འདིའི་
འོག་རོལ་ཏུ་མཁའ་ལ་གནས་པའི་རིག་པ་འཛིན་པར་གྱུར་ནས་ས་ལམ་ཕལ་ཆེར་བགྲོད་དེ།  དེ་ནས་ཤར་ཕྱོགས་མུ་མུ་ནིའི་ཞིང་ཁམས་སུ་རྒྱལ་པོ་ཉི་མའི་སྟོབས་འཕེལ་གྱི་སྲས་སུ་འཁྲུངས་ཏེ་དེ༷་བཞིན་གཤེགས་པ་དྲི་མ་
9-3-2b


མེད་པའི་དཔལ་ཞེས་བྱ་བར་འགྱུར་བར་མངོན་སུམ་དུ་ལུང་བསྟན་པ་བརྙེས་པ་མཚན་ཡོངས་སུ་གྲགས་པ་ས་སྐྱ་པཎྜི་ཏ་ཀུན་དགའ་རྒྱལ་མཚན་དཔལ་བཟང་པོ་ཞེས་བྱ་བ་ནི་བསྟན་བཅོས་འདིའི་རྩོམ་པ་པོ་ཡིན་ནོ། །གཉིས་པ་ནི།  འོ་ན་བསྟན་བཅོས་
འདིར་གཞན་གྱི་གྲུབ་པའི་མཐའ་ལ་ལུང་རིགས་ཀྱི་གནོད་བྱེད་མང་དུ་བརྗོད་ཅིང་།  ཟུར་ཟའི་ཚིག་ཀྱང་འགའ་ཞིག་སྣང་བའི་ཕྱིར་ན།  རང་ཉིད་མཁས་པའི་གྲགས་པ་བསྒྲགས་ཏེ་འཁོར་དང་ཟང་ཟིང་བསྒྲུབ་པའི་ཕྱིར་བརྩམས་པ་ཡིན་ནམ།  གཞན་གྱི་འཁོར་
དང་ལོངས་སྤྱོད་ལ་ཕྲ་དོག་གིས་ཀུན་ནས་བསླངས་ཏེ།  དེ་དག་ལ་གནོད་པའི་ཕྱིར་བརྩམས་པ་ཡིན་ནམ།  དེ་ལས་གཞན་པའི་དགོས་པ་ཁྱད་པར་ཅན་ཞིག་ཡོད་པ་ཡིན་ཞེ་ན།  དང་པོ་གཉིས་ནི་མ་ཡིན་ཏེ།  གཞུང་ལས།  འཁོར་དང་ཟང་ཟིང་སྒྲུབ་པའི་ཕྱིར། །བདག་
གིས་སེམས་ཅན་བསྡུས་པ་མིན། །ཅེས་དང་།  བདག་ནི་སེམས་ཅན་ཀུན་ལ་བྱམས། །གང་ཟག་ཀུན་ལ་བདག་མི་སྨོད། །ཞེས་གསུངས་ཞིང་།  རྣམ་ཐར་བཟང་པོ་ལས་འབྲས་མེད་ཕྱིར་ན་བརྫུན་མི་གསུང་བར་རྗེས་སུ་དཔོགས་པའི་ཕྱིར་རོ། །དེས་ན་
འདི་ལ་དགོས་པ་ཁྱད་པར་ཅན་ཞིག་ཡོད་པ་ཡིན་ཏེ།  འདི་ལྟར་སྐྱེ་རྒུ་རྣམས་ཀྱི་གནས་སྐབས་དང་།  མཐར་ཐུག་གི་ཕན་བདེ་མ་ལུས་པ་ནི་རྒྱལ་བའི་བསྟན་པ་ལ་རག་ལས་ལ། དེ་ཡང་སངས་རྒྱས་ཀྱི་དགོངས་པ་ཇི་ལྟ་བ་བཞིན་ཉམས་སུ་བླངས་པ་ལས་ཕན་བདེའི་
འབྲས་བུ་འབྱུང་ཞིང་།  ནོར་བར་སྤྱོད་པ་ལས་མི་འབྱུང་བས་ན་དམ་ཆོས་འཁྲུལ་བར་སྤྱོད་པའི་ལག་ལེན་བཀག་ནས་བསྟན་པའི་ཉམས་ལེན་མ་འཁྲུལ་བར་ཤེས་པའི་ཕྱིར་དུ་བརྩམས་པ་ཡིན་ནོ། །འོ་ན་རྒྱ་བོད་དུ་བྱུང་བའི་འཁྲུལ་བའི་ལག་ལེན་ཐམས་ཅད་འགོག་པར་བྱེད་
9-3-3a


དམ་ཞེ་ན།  འཕགས་པའི་ཡུལ་དུ་བྱུང་བའི་ཆོས་ལོག་རྣམས་ནི་འདིར་མི་འགོག་སྟེ།  དེ་ཡང་ཕྱི་རོལ་མུ་སྟེགས་བྱེད་ལ་ལྟ་བ་ངན་པས་ཀུན་ནས་བསླངས་པའི་གྲུབ་མཐའ་ཕྱིན་ཅི་ལོག་བསམ་གྱིས་མི་ཁྱབ་པ་བྱུང་བ་རྣམས།  ཕྱོགས་
གླང་ཆོས་གྲགས་ལ་སོགས་པའི་མཁས་པ་རྣམས་ཀྱིས་སུན་ཕྱུང་།  སངས་རྒྱས་པ་ཉིད་ལ་ཡང་བཀའ་བསྡུ་དང་པོའི་རྗེས་སུ་ཡངས་པ་ཅན་གྱི་དགེ་སློང་གིས་མི་རུང་བའི་གཞི་བཅུ་བྱས་པ་རྣམས་གྲགས་པ་ལ་སོགས་པའི་དགྲ་བཅོམ་པ་བདུན་བརྒྱས་སུན་ཕྱུང་ནས་
བཀའ་བསྡུ་གཉིས་པ་མཛད།  དེའི་རྗེས་སུ་དགེ་སློང་ལྷ་ཆེན་པོ་ཞེས་བྱ་བས་ཆོས་ལོག་མང་དུ་བཤད་པ་རྣམས།  དགྲ་བཅོམ་པ་ལྔ་བརྒྱ།  བྱང་ཆུབ་སེམས་དཔའ་ལྔ་བརྒྱ།  སོ་སོ་སྐྱེ་བོའི་པཎྜི་ཏ་ཁྲི་དྲུག་སྟོང་གིས་སུན་ཕྱུང་ནས་བཀའ་བསྡུ་གསུམ་པ་
མཛད།  ཐེག་པ་ཆེན་པོ་ལ་ཡང་ཆོས་མངོན་པར་དགྲ་ལན་གསུམ་དར་ནས་ཅུང་ཟད་ནུབ་པའི་ཚེ་འཕགས་པ་ཐོགས་མེད་ཀྱིས་མི་ཕམ་མགོན་པོ་ལས་གསན་ནས་ཤིན་ཏུ་དར་བར་མཛད།  གཞན་ཡང་གྲུབ་མཐའ་འོག་མ་འོག་མ་རྣམས་ལ་གོང་མ་གོང་མ་ལ་ལྟོས་པའི་ལྟ་སྤྱོད་
ནོར་བ་བྱུང་བ་རྣམས།  རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཞེས་པའི་ཚུལ་གྱིས་འཕགས་པ་ཀླུ་སྒྲུབ་ལ་སོགས་པའི་སྐྱེས་བུ་དམ་པ་རྣམས་ཀྱིས་ལེགས་པར་སུན་ཕྱུང་བས།  དེ་དག་གི་རྗེས་སུ་འཇུག་པ་ད་ལྟ་ཉུང་བའི་
ཕྱིར་རོ། །དེ་ཡང་གཞུང་ལས།  མུ་སྟེགས་བྱེད་དང་ཉན་ཐོས་དང་། །ཐེག་པ་ཆེན་པོ་འགའ་ཞིག་ལའང་། །འཁྲུལ་པ་ཡོད་མོད་མཁས་རྣམས་ཀྱིས། །སུན་ཕྱུང་ཕྱིར་ན་འདིར་མ་བཤད། །ཅེས་དང་།  སངས་རྒྱས་བསྟན་པ་དྲི་མ་མེད། །ཅེས་པ་ནས།  བསྟན་པའི་
9-3-3b


འཕེལ་འགྲིབ་དུ་མ་བྱུང་། །ཞེས་པའི་བར་གྱིས་བསྟན་ནོ། །འོ་ན་གངས་རིའི་ཁྲོད་འདིར་བྱུང་བའི་ཆོས་ལོག་ཐམས་ཅད་འདིར་འགོག་གམ་ཞེ་ན་མ་ཡིན་ཏེ། རྒྱལ་པོ་ཁྲི་སྲོང་ལྡེའུ་བཙན་གྱི་དུས་སུ་རྒྱ་ནག་དགེ་སློང་གིས་ཆོས་ལོག་བསྟན་པ་རྣམས་མཁས་པ་ཀ་མ་ལ་ཤཱི་
ལས་སུན་ཕྱུང་།  དེ་ནས་གླང་དར་མས་བསྟན་པ་བསྣུབས་ནས་སྦྱོར་སྒྲོལ་ལམ་དུ་བྱེད་པ་ལ་སོགས་འཁྲུལ་བ་མང་དུ་འཕེལ་བ་རྣམས་སྐྱེས་བུ་དམ་པ་རིན་ཆེན་བཟང་པོས་ཆོས་དང་ཆོས་མ་ཡིན་པ་རྣམ་པར་འབྱེད་པ་ཞེས་བྱ་བའི་བསྟན་བཅོས་མཛད་ནས་ཆོས་ལོག་ནུབ་པར་
མཛད།  དེའི་སློབ་མ་ཞི་བ་འོད་ཀྱིས་ཀྱང་སྔགས་ལོག་སུན་འབྱིན་མཛད།  དེའི་འོག་ཏུ་ཆོས་ལོག་ཅུང་ཟད་འཕེལ་བ་རྣམས་འགོས་ཁུག་པ་ལྷས་བཙས་ཀྱིས་ཆོས་ལོག་སུན་འབྱིན་ཞེས་བྱ་བའི་བསྟན་བཅོས་མཛད་ནས་སུན་ཕྱུང་སྟེ།  དེ་ནས་ཆོས་རྗེ་ས་སྐྱ་པ་བཞུགས་
པ་ཡན་ཆད་དུ་ཆོས་ལོག་སྤྱོད་པ་ཉུང་བའི་ཕྱིར་རོ། །དེ་ཡང་གཞུང་ལས།  ཕྱིས་ནས་གངས་རིའི་ཁྲོད་འདི་རུ། །ཞེས་པ་ནས།  ཆོས་ལོག་སྤྱོད་པ་ཉུང་ཞེས་ཐོས། །ཞེས་པའི་བར་གྱིས་བསྟན་ནོ། །འོ་ན་གང་འགོག་པ་ཡིན་ཞེ་ན།  ཕྱི་ནས་ཕག་མོའི་བྱིན་རླབས་དང་། །
སེམས་བསྐྱེད་རྨི་ལམ་མ་ལ་སོགས། །ཡི་དམ་སྒོམ་པ་དཀྲོང་བསྐྱེད་དང་། །དཀར་པོ་ཆིག་ཐུབ་ལ་སོགས་པ། །སངས་རྒྱས་བསྟན་དང་འགལ་བ་ཡི། །ཆོས་ལོག་དུ་མ་དེང་སང་འཕེལ། །ཞེས་པ་ལྟར།  ཆོས་རྗེ་ས་སྐྱ་པ་འདས་པ་
ནས་བཟུང་སྟེ་བསྟན་བཅོས་འདི་མ་བརྩམས་པའི་བར་གྱི་ཆོས་ལོག་མང་དུ་བྱུང་བ་རྣམས་གཙོ་བོར་འགོག་པའི་ཕྱིར་བསྟན་བཅོས་འདི་བརྩམས་པ་ཡིན་ནོ། །གསུམ་པ་ལ་གསུམ་སྟེ།  བསྟན་པའི་ཉམས་ལེན་ཐམས་ཅད་སྡོམ་གསུམ་གྱི་ཉམས་ལེན་དུ་འདུས་པར་བསྟན་
9-3-4a


པ།  དེ་གཞུང་གིས་ཇི་ལྟར་བསྟན་པའི་ཚུལ། བསྟན་བྱ་སྡོམ་གསུམ་གྱི་མཐའ་དཔྱད་པའོ། །དང་པོ་ནི།  འོ་ན་གཞུང་འདིར་ལག་ལེན་འཁྲུལ་པ་ཐམས་ཅད་བཀག་ནས་སངས་རྒྱས་ཀྱི་བསྟན་པའི་ཉམས་ལེན་མ་འཁྲུལ་བ་གཅིག་སྟོན་ན་བསྟན་
བཅོས་འདིའི་མཚན་ལ་སྡོམ་གསུམ་རབ་དབྱེ་ཞེས་པ་དང་།  གཞུང་གི་སྐབས་ཀྱང་སྡོམ་པ་གསུམ་གྱི་སྒོ་ནས་སོ་སོར་བཅད་པའི་རྒྱུ་མཚན་ཅི་ཡིན་ཞེ་ན་བཤད་པར་བྱ་སྟེ།  དེ་ཡང་སངས་རྒྱས་ཀྱི་བསྟན་པའི་ཉམས་ལེན་མ་ལུས་པ་སྡོམ་པ་གསུམ་གྱི་ཉམས་ལེན་གྱི་ཁོངས་
སུ་འདུས་པ་ཡིན་ཏེ།  འདི་ལྟར་བསྟན་པའི་ཉམས་ལེན་ལ་ཉན་ཐོས་འདུལ་བ་དང་ཐུན་མོང་བའི་བསྟན་པའི་ཉམས་ལེན།  ཐེག་པ་ཆེན་པོ་ཕ་རོལ་ཏུ་ཕྱིན་པ་དང་ཐུན་མོང་བའི་བསྟན་པའི་ཉམས་ལེན།  རྡོ་རྗེ་ཐེག་པའི་ཐུན་མོང་མ་ཡིན་པའི་བསྟན་པའི་ཉམས་ལེན་དང་
གསུམ་ཡོད་པ་ལས།  དང་པོ་ནི་སོ་སོར་ཐར་པའི་མདོ་ལས།  སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། །འདི་ནི་སངས་རྒྱས་བསྟན་པ་ཡིན། །ཞེས་གསུངས་པ་ལྟར།  ཐོག་མར་གཞན་གནོད་གཞིར་
བཅས་སྤོང་བའི་སྡོམ་པ་བླངས་ནས་གཙོ་བོར་དགེ་སྡིག་གི་བླང་དོར་ཚུལ་བཞིན་དུ་ཉམས་སུ་ལེན་པ་ཡིན་ལ།  དེ་ནི་སོ་ཐར་གྱི་སྡོམ་པའི་ཁོངས་སུ་འདུས་ཏེ།  སོ་ཐར་གྱི་སྡོམ་པ་ཡང་གཞན་གནོད་གཞིར་བཅས་སྤོང་བ་ལ་འཇོག་དགོས་པའི་ཕྱིར་རོ། །གཉིས་པ་ནི་རྡོ་རྗེ་
གུར་ལས།  སྟོང་ཉིད་སྙིང་རྗེ་ཐ་དད་མེད། །གང་དུ་སེམས་ནི་རྣམ་སྒོམ་པ། །དེ་ནི་སངས་རྒྱས་ཆོས་དང་ནི། །དགེ་འདུན་གྱི་ཡང་བསྟན་པའོ། །ཞེས་པ་ལྟར། སྙིང་རྗེ་ཆེན་པོས་ཀུན་ནས་བསླངས་པའི་ཀུན་རྫོབ་བྱང་ཆུབ་ཀྱི་སེམས་དང་།  སྟོང་ཉིད་རྟོགས་
9-3-4b


པའི་ཤེས་རབ་ཟུང་དུ་ཆུད་པའི་སྒོ་ནས་རྫོགས་པའི་བྱང་ཆུབ་སྒྲུབ་པའི་ཐབས་ཁྱད་པར་བ་ཡིན་ལ།  དེ་ནི་བྱང་སེམས་ཀྱི་སྡོམ་པའི་ཉམས་ལེན་གྱི་ཁོངས་སུ་འདུས་ཏེ།  བྱང་སེམས་ཀྱི་སྡོམ་པ་ནི།  རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བ་ལ་འཇོག་པའི་ཕྱིར་རོ། །གསུམ་པ་
ནི།  རྡོ་རྗེ་རྩེ་མོ་ལས།  སྨིན་པ་དང་ནི་གྲོལ་བའི་ལམ།  སངས་རྒྱས་བྱང་ཆུབ་བསྟན་པའི་མཆོག །ཅེས་པ་ལྟར།  རང་གི་ལུས་ངག་ཡིད་གསུམ་དང་རྡོ་རྗེ་འཆང་གི་སྐུ་གསུང་ཐུགས་དབྱེར་མེད་དུ་བྱིན་གྱིས་བརླབས་པའི་ས་བོན་འདེབས་པ་སྨིན་བྱེད་ཀྱི་དབང་དང་།  
དེ་ཉིད་གོང་ནས་གོང་དུ་འཕེལ་བར་བྱེད་པ་གྲོལ་བྱེད་ཀྱི་ལམ་གཉིས་སུ་འདུས་པ་ཡིན་ལ།  དེ་ནི་སྔགས་སྡོམ་གྱི་ཉམས་ལེན་གྱི་ཁོངས་སུ་འདུས་ཏེ་སྔགས་སྡོམ་གྱི་ཉམས་ལེན་ནི་སྨིན་གྲོལ་གཉིས་ལ་འཇོག་པའི་ཕྱིར་རོ། །དེས་ན་སངས་རྒྱས་ཀྱི་བསྟན་པའི་ཉམས་
ལེན་ཐམས་ཅད་སྡོམ་གསུམ་གྱི་ཉམས་ལེན་གྱི་ཁོངས་སུ་འདུས་པར་ཤེས་པའི་ཕྱིར་དུ་མཚན་འདོགས་ལུགས་དང་།  གཞུང་གི་མཚམས་གཅོད་ཚུལ་དེ་ལྟར་ཡིན་པར་ཤེས་པར་བྱའོ།།    །།གཉིས་པ་གཞུང་འདིར་ཇི་ལྟར་བསྟན་པའི་ཚུལ་
ལ་གསུམ་སྟེ།  སྐབས་དང་པོར་སོ་སོ་ཐར་པ་བསྟན་ཚུལ་ནི། །ཐོག་མར་རང་ཉིད་དམ་པའི་སྤྱོད་པ་དང་མཐུན་པར་བསྟན་པས་གཞན་བསྟན་བཅོས་ལ་འཇུག་པའི་ཆེད་དུ་མཆོད་པར་བརྗོད་པ་དང་།  རྩོམ་པ་མཐར་ཕྱིན་པའི་ཆེད་དུ་བཤད་པར་དམ་བཅའ་བ་དང་།  གང་ལ་ལོག་
རྟོག་ཞུགས་པའི་གཞི་ངོས་གཟུང་བའི་ཆེད་དུ་ལུས་རྣམ་པར་གཞག་པ་རྣམས་ནི་གཞུང་སྤྱིའི་སྔོན་འགྲོ་ཡིན་ལ།  དེ་ནས།  སོ་སོར་ཐར་པའི་སྡོམ་པ་ལ། །ཉན་ཐོས་ཐེག་ཆེན་ལུགས་གཉིས་ཡོད། །ཞེས་གཉིས་སུ་ཕྱེ་ནས།  ཉན་ཐོས་ཀྱི་སོ་སོར་ཐར་པ་ལ་གཏན་ཁྲིམས་བདུན་
9-3-5a


གྱི་གནས་སྟོང་གི་དུས་བཤད་པ་དང་།  དེ་ལ་ལོག་རྟོག་དགག་པ་དང་།  བསྙེན་གནས་བྱེ་བྲག་ཏུ་བཤད་པ་གསུམ་ནི་རིམ་བཞིན།  ཉན་ཐོས་རྣམས་ཀྱི་སྐྱབས་འགྲོ་ཞེས་སོགས་དང་།  ཁ་ཅིག་ཇི་སྲིད་འཚོ་བའི་སྒྲ། །ཞེས་སོགས་
དང་།  བྱེ་བྲག་སྨྲ་བའི་བསྙེན་གནས་ཀྱང་། །ཞེས་སོགས་ཀྱིས་བསྟན་ནོ། །གཉིས་པ་ཐེག་ཆེན་གྱི་སོ་ཐར་ལ་དང་པོ་ལེན་པའི་ཆོ་ག །བར་དུ་བསྲུང་བའི་བསླབ་བྱ།  མཐར་གཏོང་བའི་ཚུལ་གསུམ་ནི་རིམ་པ་བཞིན།  ཐེག་པ་ཆེན་པོ་ལས་བྱུང་བའི། །
ཞེས་སོགས་དང་།  དེ་ནས་བྱང་ཆུབ་སེམས་དཔའ་ཡི། །ཞེས་སོགས་དང་།  ཐེག་ཆེན་སོ་སོར་ཐར་ཡིན་ཡང་། །ཞེས་སོགས་ཀྱིས་བསྟན་ནོ། །མདོར་ན་དེ་དག་གིས་ནི་སོ་སོར་ཐར་པ་དངོས་བསྟན་ནས།  སོ་ཐར་གྱི་བསླབ་པའི་གཙོ་བོ་ནི། ལས་དགེ་སྡིག་གི་བླང་
དོར་ཚུལ་བཞིན་དུ་བྱེད་པ་ཡིན་ལ།  དེ་ལའང་ལས་འབྲས་ཀྱི་རྣམ་གཞག་ཕྱིན་ཅི་མ་ལོག་པར་ཤེས་དགོས་པས། །ལས་འབྲས་ཀྱི་རྣམ་གཞག་སྤྱིར་བསྟན་པ་ནི།  དེ་ནས་ལས་དང་རྣམ་སྨིན་གྱི། །ཞེས་སོགས་ཀྱིས་བསྟན།  དེ་ལ་ལོག་པར་རྟོག་པ་ལ་གཤིས་ལ་དགེ་
སྡིག་ཡོད་པར་འདོད་པའི་ལོག་རྟོག །ལས་ཀྱི་འབྲས་བུ་དཀར་ནག་ཟང་ཐལ་དུ་འདོད་པའི་ལོག་རྟོག །ལས་རང་གི་ངོ་བོ་ཡེ་བཀག་ཡེ་གནང་དུ་འདོད་པའི་ལོག་རྟོག་རྣམས་འགོག་པ་ནི་རིམ་བཞིན།  མུ་སྟེགས་གྲངས་ཅན་པ་རྣམས་ནི། །ཞེས་སོགས་དང་།  དཀར་ནག་ཟང་
ཐལ་ཞེས་བྱ་བའི། །ཞེས་སོགས་དང་།  ཡེ་བཀག་ཡེ་གནང་ཞེས་བྱ་བའང་། །ཞེས་སོགས་ཀྱིས་བསྟན་ནོ། །དེ་ལྟར་སོ་ཐར་ཉམས་སུ་ལེན་པ་ལའང་འཕྲལ་གྱི་སྤྱོད་པ་འདུལ་བ་དང་མཐུན་པ་དང་།  ཉན་བཤད་བྱེད་ན་བསྟན་པ་དང་མཐུན་པར་བྱ་དགོས་པ་ལས་འདུལ་
9-3-5b


བ་དང་མི་མཐུན་པའི་སྤྱོད་པ་དགག་པ་ནི།  མདོ་བསྐུལ་ལ་སོགས་བྱ་བ་ཀུན། །ཞེས་སོགས་ཀྱིས་བསྟན།  བསྟན་པ་དང་མི་མཐུན་པའི་བཤད་ཉན་དགག་པ་ནི།  ལ་ལ་རྫོགས་པའི་སངས་རྒྱས་ཀྱི། །ཞེས་སོགས་ཀྱིས་བསྟན།  བསྟན་པ་དང་མཐུན་པའི་ཐོས་བསམ་
སྒོམ་གསུམ་ཇི་ལྟར་བསྒྲུབ་པའི་ཚུལ་ནི།  དེས་ན་སངས་རྒྱས་གསུང་རབ་དང་། །ཞེས་སོགས་ཀྱིས་བསྟན་ནོ། །གཉིས་པ་སྐབས་གཉིས་པར་བྱང་སེམས་ཀྱི་སྡོམ་པའི་ཉམས་ལེན་སྟོན་ཚུལ་ནི།  སྤྱིར་སེམས་བསྐྱེད་ལ་ཉན་ཐོས་ཀྱི་ལུགས་དང་།  ཐེག་ཆེན་
གྱི་ལུགས་གཉིས་ལས།  དང་པོ་ལ་ཐེག་པ་གསུམ་གྱི་སེམས་བསྐྱེད་གསུམ།  ཕྱི་མ་ལ་དབུ་སེམས་གཉིས་ཡོད་དོ་ཞེས་སྤྱིར་བསྟན་པ་ནི། སེམས་བསྐྱེད་ལ་ནི་ཞེས་པ་ནས།  བསླབ་པར་བྱ་བའང་སོ་སོར་ཡོད། །ཅེས་པའི་བར་གྱིས་བསྟན།  དེས་ན་ཐེག་པ་
ཆེན་པོའི་སེམས་བསྐྱེད་ལ་མ་ཐོབ་པ་འཐོབ་པར་བྱེད་པའི་ཆོ་གའི་སྐབས་སུ་སེམས་ཙམ་ལུགས་ཀྱི་སེམས་བསྐྱེད་སྐྱེ་བོ་ཀུན་ལ་བྱེད་པའི་ལོག་རྟོག་དང་།  དོན་དམ་སེམས་བསྐྱེད་ཆོ་གས་ལེན་པའི་ལོག་རྟོག་འགོག་པ་ནི་རིམ་པ་བཞིན།  སེམས་ཙམ་པ་ཡི་སེམས་
བསྐྱེད་འདི། །ཞེས་སོགས་དང་།  དོན་དམ་སེམས་བསྐྱེད་ཅེས་བྱ་བ། །ཞེས་སོགས་ཀྱིས་བསྟན་ནོ། །ཐོབ་པ་མི་ཉམས་པར་བསྲུང་བའི་བསླབ་བྱ་ལ།  ལྟུང་བའི་རྣམ་གཞག་སྤྱིར་བསྟན་པ་དང་།  བསླབ་བྱའི་གཙོ་བོ་བདག་གཞན་བརྗེ་བའི་བྱང་ཆུབ་ཀྱི་སེམས་
སྒོམ་དུ་མི་རུང་བའི་ལོག་རྟོག་འགོག་པ་དང་།  མ་དག་པའི་ཐབས་ལམ་སྣ་ཚོགས་བཀག་ནས་བསྟན་པ་དྲི་མ་མེད་པ་ངོས་གཟུང་བ་རྣམས་ནི་རིམ་བཞིན།  དེ་ལྟར་སེམས་ཙམ་དབུ་མ་གཉིས། །ཞེས་སོགས་དང་།  བྱང་ཆུབ་སེམས་ཀྱི་བསླབ་པ་ལ། །ཞེས་སོགས་
9-3-6a


དང་།  སངས་རྒྱས་དགོངས་པ་མི་ཤེས་པར། །ཞེས་སོགས་ཀྱིས་བསྟན་ནོ། །གསུམ་པ་སྐབས་གསུམ་པར་སྔགས་སྡོམ་གྱི་ཉམས་ལེན་བསྟན་པའི་ཚུལ་ནི།  གཞུང་འདི་ལ་ཊཱི་དགའ་བ་གདོང་ཀ་བྱེད་པ་དག་གིས་ས་མཚམས་གཅོད་ཚུལ་མི་འདྲ་
བ་མང་དུ་སྣང་མོད་ཀྱི།  ཁོ་བོས་ནི་རྩོམ་པ་པོའི་དགོངས་པ་འདི་ལྟར་རྟོགས་ཏེ། དེའང་རྗེ་བཙུན་ས་སྐྱ་པ་རྣམས་ཀྱིས་སྤྱིར་རྒྱུད་སྡེ་བཞི་ལ་ཡེ་ཤེས་ཐིག་ལེའི་རྒྱུད་ལས་གསུངས་པ་ལྟར་སྨིན་བྱེད་ཀྱི་དབང་གི་བབ་མི་འདྲ་བ་བཞི་ཡོད་ཅིང་།  དེའི་རྒྱུ་མཚན་གྱིས་ཡེ་ཤེས་རྡོ་རྗེ་ཀུན་
ལས་བཏུས་པའི་རྒྱུད་ལས་གསུངས་པ་ལྟར་ལམ་གྱི་བབ་མི་འདྲ་བ་བཞི་ཡོད་པར་བཞེད་པ་ལས།  གཞུང་འདིར་ནི་གཙོ་བོར་བླ་མེད་ཀྱི་ལམ་གྱི་རྣམ་གཞག་བསྟན་ཏེ།  འདིར་ནི་ཉམས་ལེན་འཁྲུལ་པ་དགག་པའི་སྐབས་ཡིན་ལ།  བླ་མེད་ཀྱི་ལམ་ལ་འཁྲུལ་པ་ཞུགས་པ་ཤས་ཆེ་བར་སྣང་
བའི་ཕྱིར་རོ། །ཞར་བྱུང་གི་ཚུལ་དུ་ནི་རྒྱུད་སྡེ་འོག་མ་གསུམ་ལ་འཁྲུལ་པ་དགག་པའང་སྟོན་ཏེ།  རྒྱུད་སྡེ་འོག་མ་གསུམ་ལ་སྨིན་བྱེད་ཀྱི་སྐབས་སུ་དབང་བཞི་ཡོད་པར་འདོད་པ་དང་།  གྲོལ་བྱེད་ཀྱི་སྐབས་སུ་རིམ་གཉིས་ཡོད་པར་འདོད་པ་དང་།  བྱ་རྒྱུད་ལ་བདག་བསྐྱེད་ཡོད་པར་
འདོད་པ་སོགས་ཀྱི་འཁྲུལ་པ་འགའ་ཞིག་སྣང་བའི་ཕྱིར་རོ། །དོན་འདི་མ་རྟོགས་པར་ཁ་ཅིག །བཅོམ་ལྡན་ཁྱོད་ཀྱིས་གསང་སྔགས་ལམ། །རིམ་པ་གཉིས་སུ་བསྡུས་ཏེ་བསྟན། །ཞེས་དང་།  དབང་དང་རིམ་གཉིས་མི་ལྡན་པས། །རྡོ་རྗེ་ཐེག་པའི་བསྟན་པ་མིན། །
ཞེས་དང་།  རིམ་པ་གཉིས་པོ་མི་སྒོམ་པའི། །ཞེས་སོགས་ཀྱི་ཚིག་ཙམ་ལ་བརྟེན་ནས་རྒྱུད་སྡེ་འོག་མ་གསུམ་ལ་དབང་བཞི་མེད་པས་དེ་ལ་ལྟོས་པའི་རིམ་གཉིས་མེད་པ་ཡིན་གྱི།  སྤྱིར་རིམ་གཉིས་ཡོད་ཅེས་སྨྲ་བ་ནི་རྡོ་རྗེ་ཐེག་པ་ལ་བློ་ཁ་མ་ཕྱོགས་ཤིང་།  བྱེ་བྲག་
9-3-6b


ཏུ་རྗེ་བཙུན་ས་སྐྱ་པའི་གྲུབ་མཐའ་ལས་ཕྱི་རོལ་ཏུ་གྱུར་པ་ཡིན་ཏེ།  དབང་གོང་མ་མེད་པར་རྫོགས་རིམ་ཡོད་པར་འདོད་པ་ནི་ས་བོན་མ་བཏབ་པར་མྱུ་གུ་འབྱུང་བར་འདོད་པ་དང་མཚུངས་པའི་ཕྱིར་དང་།  བྱ་རྒྱུད་ལ་རྫོགས་རིམ་གྱི་ཐ་སྙད་མེད་པར་ཁྱེད་རང་གིས་འདོད་པ་དང་།
ཁས་བླངས་དང་འགལ་བའི་ཕྱིར་དང་།  འོག་མ་གསུམ་ལ་རིམ་གཉིས་ཡོད་པར་སྟོན་བྱེད་ཀྱི་རྒྱུད་འགྲེལ་རྣམ་དག་ཅིག་ཀྱང་མི་སྣང་བའི་ཕྱིར་དང་། རྗེ་བཙུན་རྩེ་མོའི་རྒྱུད་སྡེ་སྤྱི་རྣམ་དང་།  རྗེ་བཙུན་གྲགས་པ་རྒྱལ་མཚན་གྱི་མངོན་རྟོགས་ལྗོན་ཤིང་དང་།  ས་པཎ་
གྱི་གཞུང་འདི་དང་གསུམ་ཆར་ལས་རིམ་གཉིས་བླ་མེད་འབའ་ཞིག་གི་ཁྱད་ཆོས་སུ་གསུངས་པའི་ཕྱིར་རོ། །ཁྱེད་ཀྱི་སྒྲུབ་བྱེད་ལྟར་ན་རྒྱུད་སྡེ་འོག་མ་གསུམ་ལ་དབང་བཞི་ཡོད་པར་ཐལ།  རྡོ་རྗེ་ཐེག་པའི་ལམ་ཞུགས་ནས། །སྨིན་གྲོལ་གཉིས་ལ་འབད་པར་བྱ། །
སྨིན་པར་བྱེད་པའི་དབང་བསྐུར་ཡང་། །ཞེས་པ་ནས།  མཇུག་ཏུ།  བླ་མ་བཙལ་ལ་དབང་བཞི་བླང་། །ཞེས་པ་དང་།  གལ་ཏེ་གསང་སྔགས་བསྒོམ་འདོད་ན། །ནོར་བ་མེད་པའི་དབང་བཞི་ལོང་། །ཞེས་གསུངས་པའི་ཕྱིར།  འཁོར་གསུམ་ཁས་བླངས་
སོ། །གཞན་ཡང་བླ་མེད་ཀྱི་སྡོམ་ལྡན་གྱི་རྡོ་རྗེ་སློབ་དཔོན་གཅིག་གིས་རྣལ་འབྱོར་རྒྱུད་ཀྱི་དབང་གིས་སྨིན་པའི་སློབ་མ་སྣོད་ལྡན་ཞིག་ལ་དེའི་མཚན་མེད་ཀྱི་རྣལ་འབྱོར་སྟོན་པའི་ཚེ་ཡན་ལག་གི་ལྟུང་བ་འབྱུང་བར་ཐལ།  དེའི་ཚེ་དབང་གོང་མ་མ་བསྐུར་བར་རྫོགས་རིམ་
བསྟན་འདུག་པའི་ཕྱིར།  རྟགས་ཁས་བླངས་ཏེ།  རྣལ་འབྱོར་རྒྱུད་ལ་དབང་གོང་མ་མེད་པ་དང་མཚན་མེད་ཀྱི་རྣལ་འབྱོར་རྫོགས་རིམ་དུ་ཁས་བླངས་པའི་ཕྱིར།  གོང་དུ་མ་ཁྱབ་ན།  སྦྱོར་བ་ངེས་པར་མ་བྱས་པར། །སྐལ་མིན་གསང་བ་སྒྲོགས་པ་དང་། །ཞེས་
9-3-7a


པའི་སྐབས་ཀྱི་འཁྲུལ་སྤོང་ལྟོས་ལ་ཐུགས་རྣལ་དུ་ཞོག་ཅིག །འོ་ན་བླ་མེད་ཀྱི་ལམ་གྱི་རིམ་པ་ཇི་ལྟར་ཞེ་ན།  རྣལ་འབྱོར་གྱི་དབང་ཕྱུག་བིཪྺ་པའི་བཞེད་པས་གསང་བ་འདུས་པའི་རྒྱུད་ཕྱི་མ་ལས་རྒྱུད་ནི་རྒྱུན་ཆགས་ཞེས་བྱ་སྟེ།  རྒྱུད་
དེ་རྣམ་པ་གསུམ་དུ་འགྱུར། །གཞི་དང་དེ་ཡི་རང་བཞིན་དང་། །མི་འཕྲོགས་པ་ཡིས་རབ་ཕྱེ་བའོ། །རང་བཞིན་རྣམ་པ་རྒྱུ་ཡིན་ཏེ། །གཞི་ནི་ཐབས་ཞེས་བྱ་བར་བརྗོད། །དེ་བཞིན་མི་འཕྲོགས་འབྲས་བུ་སྟེ། །གསུམ་གྱིས་རྒྱུད་ཀྱི་དོན་བསྡུས་པའོ། །
ཞེས་གསུངས་པ་ཤེས་བྱེད་དུ་མཛད་ནས་རྒྱུད་དོན་མངོན་རྟོགས་ཀྱི་རིམ་པར་སྡེབས་ན་རྒྱུ་རྒྱུད། ཐབས་རྒྱུད།  འབྲས་བུའི་རྒྱུད་གསུམ།  ཐབས་རྒྱུད་ལ་སྨིན་བྱེད་དབང་དང་གྲོལ་བྱེད་ལམ་གཉིས།  ཕྱི་མ་ལ་མཆོག་གི་དངོས་གྲུབ་སྒྲུབ་པའི་མངོན་པར་རྟོགས་པ་ལྔ་
དངོས་གྲུབ་གཉིས་ཀ་སྒྲུབ་པའི་མངོན་པར་རྟོགས་པ་ལྔ།  གཉིས་ཀ་ལ་དགོས་པའི་གྲོགས་དམ་ཚིག་དང་སྡོམ་པ་སྟེ་བཅུ་གཅིག་ཏུ་མཛད་དོ། །འཕགས་པ་ཀླུ་སྒྲུབ་ཀྱིས་རྡོ་རྗེ་ཕྲེང་བའི་རྒྱུད་ཤེས་བྱེད་དུ་མཛད་ནས་གསང་བ་འདུས་པའི་རྒྱུད་ཀྱི་མངོན་པར་རྟོགས་པ་ལ་
བསྐྱེད་རིམ་ལུས་དབེན་དང་བཅས་པ་སྔོན་དུ་སོང་བའི་དབང་དུ་བྱས་ཏེ་རྫོགས་རིམ་ལ་རིམ་པ་ལྔར་མཛད་དོ། །དེ་ཉིད་ལ་འཕགས་པ་ལྷས་ཉམས་སུ་ལེན་པའི་དབང་དུ་མཛད་ནས་ཐོག་མར་སངས་རྒྱས་པའི་ཐེག་པའི་བསམ་པ་ལ་བསླབ་པ། །དེ་ནས་ཐེག་པ་གསར་པ་དྲན་པ་
གཅིག་པའི་མངོན་པར་རྟོགས་པ་ལ་བསླབས་པ།  དེ་ནས་རྟོགས་པའི་རྣལ་འབྱོར་ལ་བསླབ་པ།  དེ་ནས་དབེན་པ་གསུམ་དང་།  བདེན་པ་གཉིས་དང་།  ཟུང་འཇུག་ལ་བསླབས་པ་ཏེ།  རིམ་པ་དགུར་མཛད་དོ། །དཔལ་ལྡན་ཟླ་བས་ནི་རྒྱུད་དོན་མ་ལུས་པ་རིམ་པ་ལྔར་
9-3-7b


བསྡུས་པའི་དབང་དུ་བྱས་ནས་བསྐྱེད་རིམ་ལ་རིམ་པ་དང་པོ་དང་།  རྫོགས་རིམ་ལ་རིམ་པ་བཞིར་མཛད་དོ། །གཞན་ཡང་རྒྱུད་དོན་དག་པ་གསུམ་དུ་བསྡུས་པ་དང་།  བདག་ཉིད་ཅན་གསུམ་དུ་བསྡུས་པ་དང་།  གནས་པ་བཞིར་བསྡུས་པ་དང་།  སྨིན་གྲོལ་གཉིས་
སུ་བསྡུས་པ་སོགས་མང་དུ་ཡོད་པ་ལས་འདི་ནི་རྣལ་འབྱོར་དབང་ཕྱུག་གི་དགོངས་པ་གཞིར་བཞག་ནས་མཆོག་གི་དངོས་གྲུབ་སྒྲུབ་པའི་མངོན་པར་རྟོགས་པའི་གཙོ་བོ་གོ་རིམ་དུ་སྟོན་པ་ནི་གཞུང་ལས།   ཕ་རོལ་ཕྱིན་གཞུང་མི་ནུས་པར། །གལ་ཏེ་གསང་སྔགས་སྒོམ་
འདོད་ན། །ནོར་བ་མེད་པའི་དབང་བཞི་ལོང་། །འཁྲུལ་པ་མེད་པའི་རིམ་གཉིས་བསྒོམ། །དེ་ལས་བྱུང་བའི་ཡེ་ཤེས་ནི། །ཕྱག་རྒྱ་ཆེན་པོ་བསྒོམ་པར་བྱ། །དེ་ནས་འཁོར་འདས་བསྲེ་བའི་ཕྱིར། །རྣམ་པར་དག་པའི་སྤྱོད་པ་སྤྱད། །ནང་གི་ས་ལམ་ཀུན་
བསྒྲོད་ནས། །རྡོ་རྗེ་འཛིན་པའི་ས་དགེ་བ། །བཅུ་གསུམ་པ་ནི་ཐོབ་པར་འགྱུར། །ཞེས་གསུངས་པ་དང་སྦྱར་ན།  སྨིན་བྱེད་ནོར་བ་མེད་པའི་དབང་བཞི།  གྲོལ་བྱེད་འཁྲུལ་པ་མེད་པའི་རིམ་པ་གཉིས།  དབང་དང་ཡེ་ཤེས་ལས་བྱུང་བའི་ཕྱག་རྒྱ་ཆེན་པོ།  ཕྱག་ཆེན་
གོམས་པས་འཁོར་འདས་བསྲེ་བའི་སྤྱོད་པ།  དེ་ལ་བརྟེན་ནས་ས་ལམ་བསྒྲོད་དེ་འབྲས་བུ་མངོན་དུ་བྱེད་པའི་ཚུལ་དང་ལྔ་ལས།  དང་པོ་སྨིན་བྱེད་དབང་ལ་རྡོ་རྗེ་སློབ་དཔོན་མཚན་ཉིད་དང་ལྡན་པ་གཅིག་གིས་སློབ་མ་སྣོད་ལྡན་གཅིག་ལ་རྒྱུད་སྡེ་ལས་གསུངས་པའི་དཀྱིལ་འཁོར་དུ་
ཆོ་ག་འཁྲུལ་པ་མེད་པས་དབང་བསྐུར་ན་སྔགས་སྡོམ་ཐོབ་པར་འགྱུར་བ་ཡིན་མོད་ཀྱི།  བོད་འདིར་ནི་སྨིན་བྱེད་འདི་ལ་འཁྲུལ་པ་ཤིན་ཏུ་མང་བར་སྣང་སྟེ།  དེ་ཐམས་ཅད་ཀྱང་བསྡུ་ན་དབང་བསྐུར་མི་དགོས་པར་འདོད་པའི་ལོག་རྟོག །དགོས་ཀྱང་ཕྱིས་ནས་ཁས་ལེན་བྱེད་
9-3-8a


པའི་ལོག་རྟོག །ཐོག་མར་བྱེད་ཀྱང་བྱིན་རླབས་ཙམ་སྨིན་བྱེད་དུ་འདོད་པའི་ལོག་རྟོག །དཀྱིལ་འཁོར་མ་དག་པའི་དབང་བསྐུར་སྨིན་བྱེད་དུ་འདོད་པའི་ལོག་རྟོག །སློབ་མ་གྲངས་ངེས་མེད་པ་ལ་ཆོ་ག་འཁྲུལ་པར་བྱེད་པ་སྨིན་བྱེད་
དུ་འདོད་པའི་ལོག་རྟོག །རྒྱུད་སྡེ་འོག་མ་ལ་དབང་བཞི་ཡོད་པར་འདོད་པའི་ལོག་རྟོག །གཏོར་མའི་དབང་དང་ཏིང་ངེ་འཛིན་གྱི་དབང་བསྐུར་སྨིན་བྱེད་དུ་འདོད་པའི་ལོག་རྟོག །བླ་མའི་ལུས་ཀྱི་དཀྱིལ་འཁོར་ལས་སྨིན་བྱེད་ལེན་པར་འདོད་པའི་ལོག་རྟོག་སོགས་
སུ་འདུས་པ་རྣམས་ཞིབ་ཏུ་འགོག་པ་ནི།  རྡོ་རྗེ་ཐེག་པའི་ལམ་ཞུགས་ཏེ། །ཞེས་པ་ནས།   བདུད་ཀྱི་བྱིན་བརླབས་ཡིན་ཞེས་བྱ། །ཞེས་པའི་བར་གྱིས་བསྟན་ནོ། །ཞར་ལ་དབང་ལས་ཐོབ་པའི་དམ་ཚིག་བསྲུང་མི་དགོས་པར་འདོད་པའི་ལོག་རྟོག་འགོག་
པ་ནི།  ཁ་ཅིག་གསང་སྔགས་གསང་བ་ལ། །ཞེས་སོགས་སོ། །གཉིས་པ་གྲོལ་བྱེད་འཁྲུལ་པ་མེད་པའི་རིམ་གཉིས་སྟོན་པ་ནི།  ཁ་ཅིག་འཁྲུལ་དང་མ་འཁྲུལ་མེད། །ཞེས་སོགས་ཏེ།  དེ་ཡང་སྤྱིར་སངས་རྒྱ་བའི་རྒྱུ་ལ་ཐབས་ཤེས་གཉིས་དགོས་
ཤིང་།  བྱེ་བྲག་ཏུ་བླ་མེད་ཀྱི་ལམ་གྱིས་སངས་རྒྱ་བ་ལ་རིམ་པ་གཉིས་ཆར་བསྒོམ་དགོས་ཀྱང་ཁ་ཅིག །ཐབས་ལམ་རེ་རེས་སངས་རྒྱ་བ་ཡིན་གྱི་རིམ་པ་གཉིས་ཆར་བསྒོམ་པ་ལ་དགོས་པ་མེད་དོ། །ཞེས་སྨྲ་བ་རྣམས་བཀག་ནས།  བླ་མེད་ཀྱི་ལམ་རིམ་པ་
གཉིས་སུ་བསྒྲུབ་པའོ། །གསུམ་པ་དབང་དང་རིམ་གཉིས་ལས་བྱུང་བའི་ཕྱག་ཆེན་ལ་རྟོགས་བྱེད་ཕྱག་ཆེན་གྱི་ཡེ་ཤེས་དང་།  རྟོགས་བྱ་སྤྲོས་བྲལ་གྱི་ལྟ་བ་གཉིས་ལ།  དང་པོ་ནི།  དབང་གསུམ་པའི་ཐབས་དང་རིམ་གཉིས་ཀྱི་ཏིང་ངེ་འཛིན་བསྒོམས་པ་ལས་
9-3-8b


སྐྱེས་པའི་བདེ་སྟོང་ཟུང་དུ་འཇུག་པའི་ཡེ་ཤེས་རང་གི་ངོ་བོ་རྣལ་འབྱོར་པས་ཉམས་སུ་མྱོང་ཡང་འདི་ལྟ་བུའོ། །ཞེས་ཚིག་གི་སྒོ་ནས་སྟོན་པར་མི་ནུས་པས་ན།  བརྗོད་པ་དང་བྲལ་བའོ། །དེ་ལ་མཚོན་བྱེད་དཔེའི་ཡེ་ཤེས་དང་།  མཚོན་བྱ་དོན་གྱི་
ཡེ་ཤེས་གཉིས།  དང་པོ་ནི།  ཆོས་ཉིད་མངོན་སུམ་དུ་མཐོང་བ་མ་ཡིན་ཡང་།  དེ་དང་བརྗོད་པ་དང་བྲལ་ཞིང་བདེ་སྟོང་ཟུང་དུ་ཆུད་པར་ཆ་འདྲ་བས་ན་དཔེའི་ཡེ་ཤེས་ཞེས་བྱ་སྟེ།  དེ་ལ་ལོག་པར་རྟོག་པ་ལ་རྩ་འགའ་ཞིག་གི་བྱེད་པས་རྟོག་པ་ཁ་འཚོམ་
ཙམ་ལ་ཕྱག་ཆེན་དུ་འདོད་པ་འགོག་པ་ནི།  ཕྱག་རྒྱ་ཆེན་པོ་སྒོམ་ན་ཡང་ཞེས་སོགས་སོ། །གཉིས་པ་མཚོན་བྱ་དོན་གྱི་ཡེ་ཤེས་ནི་ས་དང་པོ་མཐོང་བའི་ལམ་སྐྱེས་པ་ཡིན་ལ།  དེ་ལ་ལོག་པར་རྟོག་པ་ནི་ཁ་ཅིག་གིས་ཞི་གནས་ཅུང་ཟད་
ཙམ་དང་སྣང་སྟོང་གི་རྟོག་པ་ཕྲ་མོ་ལ་མཐོང་ལམ་དུ་འདོད་པ་འགོག་པ་ནི་ལ་ལ་ཞི་གནས་ཅུང་ཟད་དང་སོགས་སོ། །ཞར་ལས་བྱུང་བ་ལ་ཐེག་པ་གསུམ་གྱི་ལག་ལེན་འཁྲུལ་བ་འགོག་པ་དང་།  ཐེག་པ་ཆེ་ཆུང་གི་བླ་མའི་དབྱེ་བ་དང་།  གཏོར་
མ་དང་ཕུད་མཆོད་ཀྱི་ལག་ལེན་འཁྲུལ་པ་དགག་པ་དང་།  ལྷའི་སྐུ་མདོག་དང་ཕྱག་མཚན་ལ་འཁྲུལ་པ་དགག་པ་དང་། རབ་གནས་དང་སྦྱིན་སྲེག་གསང་འདུས་སོགས་མདོ་ལུགས་སུ་འདོད་པ་དགག་པ་ནི།  ཐེག་པ་གསུམ་གྱི་ལག་ལེན་
ཡང་ཞེས་སོགས་སོ། །འོ་ན་འདི་རྣམས་ཕྱག་ཆེན་གྱི་སྐབས་སུ་འབྱུང་བའི་རྒྱུ་མཚན་ཅི་ཡིན་ཞེ་ན་རྟོག་པ་ཁ་འཚོམ་ཙམ་དང་སྣང་སྟོང་རྟོག་པ་ཕྲ་མོ་ཙམ་སྐྱེས་ན།  ད་ནི་ཆོས་ཐམས་ཅད་དུ་མ་རོ་གཅིག་ཡིན་པས་ལག་ལེན་འཁྲུལ་མ་འཁྲུལ་གྱི་དབྱེ་བ་
9-3-9a


མེད་དོ་ཞེས་སྨྲ་བ་རྣམས་དགག་པའི་ཆེད་དུ་ཡིན་ནོ། །གཉིས་པ་རྟོགས་བྱ་སྤྲོས་བྲལ་གྱི་ལྟ་བ་ནི་ཉན་ཐོས་རྣམས་ཀྱིས་ནི་གང་ཟག་གི་བདག་མེད་ཙམ་ལས་གཏན་ལ་འབེབས་མི་ནུས་ལ།  ཐེག་པ་ཆེན་པོ་ཕ་རོལ་ཏུ་
ཕྱིན་པ་ལས་ནི་ཆོས་ཐམས་ཅད་སྤྲོས་བྲལ་དུ་གཏན་ལ་འབེབས་པའི་ཕྱིར་ན་དེ་གཉིས་ལ་ཁྱད་པར་ཡོད་ལ།  གསང་སྔགས་རྡོ་རྗེ་ཐེག་པ་ལས་ནི་ཐོས་བསམ་གྱིས་གཏན་ལ་འབེབས་པའི་ལྟ་བ་ལ་ཕ་རོལ་ཏུ་ཕྱིན་པ་ལས་ལྷག་པ་གཞན་མེད་དོ། །
དེས་སྤྲོས་བྲལ་དུ་གཏན་ལ་མ་ཕབ་པའི་ཆོས་གང་ཡང་མེད་པའི་ཕྱིར་རོ། །དེ་ལ་ལོག་པར་རྟོག་པ་ལ་ཐེག་པ་རིམ་པ་དགུ་ལ་ལྟ་བ་ཐ་དད་ཡོད་པར་འདོད་པ་དང་།  དབུ་མ་ནས་བཟུང་སྟེ་གསང་སྔགས་རྒྱུད་སྡེ་བཞི་ལ་ལྟ་བ་ཐ་དད་ཡོད་པར་
འདོད་པ་དང་།  རྣལ་འབྱོར་བཞི་ལ་ལྟ་བ་ཐ་དད་ཡོད་པར་འདོད་པ་འགོག་པ་རྣམས་ནི་རིམ་བཞིན་ལ་ལ་ཐེག་པ་རིམ་དགུ་ལ་ཞེས་སོགས་དང་།  ཁ་ཅིག་དབུ་མའི་ལྟ་བ་ནི་ཞེས་སོགས་དང་།  གསང་སྔགས་སྔ་འགྱུར་བ་རྣམས་ནི། 
ཞེས་སོགས་སོ། །ཞར་ལ་རྒྱུད་སྡེ་བཞིའི་སྒྲུབ་པ་ལ་འཁྲུལ་པ་དགག་པ་ནི་རྒྱུད་སྡེ་བཞི་ཡི་སྒྲུབ་པ་ཞེས་སོགས་སོ། །འདི་ལྟ་བའི་སྐབས་སུ་འབྱུང་བའི་རྒྱུ་མཚན་ནི།  དེ་ལྟར་རྒྱུད་སྡེ་བཞི་ལ་ལྟ་བ་ཐ་དད་མེད་ན།  སྒྲུབ་པ་ཡང་ཐ་དད་མེད་
པར་འགྱུར་རོ་ཞེ་ན།  མ་ཡིན་ཏེ།  སྒྲུབ་པ་ཐ་དད་ནི་ལྟ་བའི་ཁྱད་པར་མ་ཡིན་པར་ཐབས་ཀྱི་ཁྱད་པར་ཡིན་ནོ་ཞེས་པའི་ཚུལ་གྱིས་སོ། །བཞི་པ་ཕྱག་ཆེན་བསྒོམས་ནས་འཁོར་འདས་བསྲེ་བའི་སྤྱོད་པ་ནི།  སྤྱིར་ས་ལམ་གྱི་རྟོགས་པ་སྐྱེ་ཚུལ་ལ་རྟེན་
9-3-9b


ལུས་ལ་གནད་དུ་བསྣུན་ནས་བསྐྱེད་པ་དང་།  བརྟེན་པ་སེམས་ལ་གནད་དུ་བསྣུན་ནས་བསྐྱེད་པ་དང་གཉིས་ལས།  ཕྱི་མ་ནི་ཕ་རོལ་ཏུ་ཕྱིན་པའི་ལུགས་ཡིན་ལ།  དང་པོ་ནི།  ནང་ལུས་ཀྱི་སྤྱི་བོ་ལ་སོགས་པའི་གནས་སུམ་ཅུ་རྩ་བདུན་གྱི་རླུང་སེམས་
དབུ་མར་གཞུག་ནས་ས་བཅུ་གསུམ་གྱི་རྟོགས་པ་བསྐྱེད་པ་ཡིན་ནོ། །དེ་ལ་ཕྱི་འཛམ་བུ་གླིང་གི་པུ་ལི་ར་མ་ལ་ཡ་ལ་སོགས་པའི་ཡུལ་རྣམས་དབང་དུ་འདུ་ཞིང་།  དེར་གནས་པའི་མཁའ་འགྲོ་མ་རྣམས་དབང་དུ་གྱུར་པ་ལས་ནང་ལུས་ཀྱི་སྤྱི་
བོ་ལ་སོགས་པའི་རླུང་སེམས་དབུ་མར་ཞུགས་པ་ཡིན་ལ།  དེའི་ཆེད་དུ་སྤྱོད་པ་བྱེད་པ་ལ་ནི་རིམ་གཉིས་ཀྱི་རྟོགས་པ་བརྟན་ཞིང་བརྡའ་དང་བརྡའི་ལན་ཤེས་པ་ཞིག་གིས་གང་དུ་རྒྱུ་བའི་གནས་ངོ་ཤེས་པར་བྱེད་དགོས་པ་ལས།   བོད་འདིར་ནི་དབང་
བསྐུར་ཙམ་ཡང་མ་ཐོབ་ན།  རིམ་གཉིས་ཀྱི་རྟོགས་པ་བརྟན་པ་ལྟ་སྨོས་ཀྱང་ཅི་དགོས་པ་དག་གིས།  གང་དུ་རྒྱུ་བའི་གནས་ཏི་སེ་ལ་གངས་ཅན་དུ་འཁྲུལ།  ཙ་རི་ལ་ཙ་རི་ཏྲ་རུ་འཁྲུལ་པ་རྣམས་འགོག་པ་ནི་དབང་བཞི་ཡོངས་སུ་རྫོགས་པ་དང་ཞེས་སོགས་
སོ། །ལྔ་པ་དེ་ལ་བརྟེན་ནས་ས་ལམ་བགྲོད་དེ་འབྲས་བུ་མངོན་དུ་བྱེད་པའི་ཚུལ་ལ།  མཐར་ཐུག་གི་དང་གནས་སྐབས་ཀྱི་འབྲས་བུ་གཉིས་ལས།  དང་པོ་ནི།  དབང་གི་དུས་སུ་ཡང་ཟུང་འཇུག་ཏུ་བླང་།  ལམ་གྱི་དུས་སུ་ཡང་ཟུང་འཇུག་ཏུ་
བསྒོམས་པ་ལས་འབྲས་བུའི་དུས་སུ་ཡང་ཟུང་འཇུག་ཏུ་འབྱུང་བ་ཡིན་མོད་ཀྱི།  དེ་ལ་ལོག་པར་རྟོག་པ་ནི་དཀར་པོ་ཆིག་ཐུབ་ལས་འབྲས་བུ་སྐུ་གསུམ་འབྱུང་བར་འདོད་པ་དང་།  ཟུང་འཇུག་བསྒོམས་པ་ལས་འབྲས་བུ་འོད་གསལ་གཅིག་པུ་འདོད་པ་དང་།
9-3-10a


  ས་ལམ་མ་བགྲོད་པར་སངས་རྒྱས་འདོད་པ་དང་།  དབང་བཞི་དང་ལམ་བཞི་མེད་པར་འབྲས་བུ་སྐུ་བཞི་འདོད་པ་དང་།  འབྲས་བུའི་མཐར་ཐུག་འོད་གསལ་དུ་འདོད་པ་རྣམས་འགོག་པ་ནི།  ཁ་ཅིག་དཀར་པོ་ཆིག་ཐུབ་
ལས་ཞེས་པ་ནས།  ལྟ་བ་མཐར་ཐུག་ཡིན་པར་གསུངས་ཞེས་པའི་བར་རོ། །གཉིས་པ་གནས་སྐབས་ཀྱི་འབྲས་བུ་ནི་ས་དང་པོ་ཡན་ཆད་ཀྱི་རྟོགས་པ་སྐྱེས་པ་ལ་གྲུབ་པ་ཐོབ་པ་ཞེས་པའི་ཐ་སྙད་ལམ་འབྲས་དང་མདོ་སྡེ་རྒྱན་ལས་གསུངས་ལ། 
དེ་ལས་གཞན་རྟོགས་ལྡན་སོགས་ཀྱི་ཐ་སྙད་གསུངས་པ་མེད་ཀྱང་།  ཁ་ཅིག་གྲུབ་ཐོབ་ལས་རྟོགས་ལྡན་བཟང་ཞེས་པ་དང་།  ཉམས་ངན་ལ་གོ་བ་འབྲིང་རྟོགས་པ་བཟང་བར་འདོད་པ་རྣམས་འགོག་པ་ནི་ལ་ལ་གྲུབ་ཐོབ་ངན་ཞེས་ཟེར་ཞེས་སོགས་སོ། །
དེས་ན་སྔར་དྲངས་པའི་གཞུང་དང་སྦྱར་ན་སྔགས་སྡོམ་གྱི་སྐབས་ཀྱི་བརྗོད་བྱའི་གཙོ་བོ་ནི་འདི་ཡན་ཆད་ཀྱིས་རྫོགས་པ་ཡིན་ལ།  འདི་ལྟ་བུའི་ལམ་གྱི་སྲོལ་འབྱེད་ཚུལ་རྟོགས་ན་རྡོ་རྗེ་ཐེག་པའི་བསྟན་པའི་བབས་ཡོངས་རྫོགས་རྟོགས་པར་འགྱུར་ཞིང་
གཞུང་འདི་ནས་བཤད་པའི་དགག་སྒྲུབ་ཐམས་ཅད་ཀྱང་ལམ་སྲོལ་ཡོངས་སུ་རྫོགས་པ་ལ་སྦྱོར་ཤེས་པར་འགྱུར་རོ། །གང་དག་འདི་ནས་བཤད་པའི་རང་ལུགས་ཀྱི་ལམ་སྲོལ་ལ་བློ་ཁ་མ་ཕྱོགས་པར་དོན་མེད་ཀྱི་ས་བཅད་འདེབས་པ་ནི་འོ་མའི་བུམ་པ་ལོགས་
སུ་བཞག་ནས་ཆུ་བསྲུབས་པ་ལས་མར་གྱི་ཉིང་ཁུ་འབྱུང་བར་འདོད་པ་དང་མཚུངས་སོ། །ཁོ་བོས་ནི་ཡོངས་འཛིན་མཁས་པའི་དྲུང་དུ་རྒྱུད་སྡེ་ལ་ལེགས་པར་སྦྱངས་ཞིང་ལུགས་འདི་ལ་ཡིད་ཆེས་པའི་མོས་པ་བརྟན་པོས་རྟོགས་པ་ཡིན་ལ་དོན་དུ་གཉེར་བ་ཡོད་
9-3-10b


ན་གཞན་དག་ཀྱང་དེ་བཞིན་དུ་གྱིས་ཤིག །དེ་ནས་ཁ་ཅིག་ཐེག་པ་རང་ས་ན་ཞེས་པ་མན་ཆད་ནི་གཞུང་སྤྱི་ལ་རྩོད་པ་སྤང་པའི་སྒོ་ནས་དོན་བསྡུ་བ་སྟོན་ཏེ།  འདི་ལྟར་སྔར་བཤད་པའི་དགག་སྒྲུབ་དེ་ཐམས་ཅད་ཀྱང་ངེས་པ་མེད་དེ་ཐེག་པ་རང་ས་ན་བདེན་
པའི་ཕྱིར་ཞེ་ན།  དེ་འགོག་པ་དང་འཁྲུལ་པ་ཕྲན་ཚེགས་ནས་འགོག་པ་ཐམས་ཅད་ཆོས་ཀྱི་གནད་མི་འཆུག་པར་བྱ་བའི་ཆེད་ཡིན་པས་གནད་མ་འཆུགས་པ་གལ་ཆེའོ་ཞེས་སྟོན་པ་དང་།   གནད་འཆོས་པའི་བདུད་ཇི་ལྟར་བྱུང་བའི་ཚུལ་གླེང་གཞི་དང་
བཅས་པ་སྟོན་པ་དང་།  འཁྲུལ་བའི་གྲུབ་མཐའ་ལུང་རིགས་ཀྱིས་སུན་འབྱིན་པའི་ཚུལ་གླེང་གཞི་དང་བཅས་སྟེ་སྟོན་པ་དང་།  བྱེ་བྲག་ཏུ་ལུང་གིས་སུན་འབྱིན་པའི་ཚུལ།  ལུང་སྦྱོར་ཇི་ལྟར་བྱེད་པའི་ཚུལ་དང་།  ཁུངས་ནས་མ་བྱུང་བའི་གདམས་
ངག་དང་མདོ་རྒྱུད་དུ་གྲགས་པ་རྣམས་ཚད་མར་མི་རུང་བར་བསྟན་པ་དང་།  སྐུ་གཟུགས་རིང་བསྲེལ་དང་གློ་བུར་གྱི་ལྟས་རྣམས་མཁས་པ་ལ་དྲིས་ནས་བརྟག་དཔྱད་བྱ་དགོས་པར་བསྟན་པ་དང་།  ཚིག་ལ་འཁྲུལ་པ་དགག་པ་རྣམས་ནི་རིམ་པ་
བཞིན།  ཁ་ཅིག་ཐེག་པ་རང་ས་ན་ཞེས་སོགས་དང་།  ཆོས་གཞན་ལེགས་པར་སྟོན་ན་ཡང་ཞེས་སོགས་དང་།  དེ་ལ་གནད་རྣམས་འཆོས་པའི་བདུད་ཞེས་སོགས་དང་།  འཁྲུལ་པའི་གྲུབ་མཐའ་སུན་འབྱིན་པའི་ཞེས་སོགས་དང་། །
བླུན་པོ་མཁས་པར་འཆོས་པ་འགའ་ཞེས་སོགས་དང་། སྙན་བརྒྱུད་དང་ནི་ཆིག་བརྒྱུད་དུ་ཞེས་སོགས་དང་།  རིང་བསྲེལ་དང་ནི་ཐུགས་དང་ལྗགས། །ཞེས་སོགས་དང་།  དེ་ནས་ཚིག་ལ་འཁྲུལ་པ་ཡི། །ཞེས་སོགས་ཀྱིས་སྟོན་ནོ། །དེ་ནས་
9-3-11a


སངས་རྒྱས་གསུང་རབ་དྲི་མ་མེད་ཞེས་སོགས་ཀྱིས་ནི་བསྟན་བཅོས་བརྩམ་པའི་དགོས་པ་བསྟན་པར་སྔར་བཤད་ཟིན།  བདག་ནི་སེམས་ཅན་ཀུན་ལ་བྱམས་ཞེས་སོགས་ཀྱིས་བསྟན་བཅོས་བརྩམ་པའི་ཀུན་སློང་བརྩེ་
བ་སྙིང་རྗེ་ཆེན་པོ་བསྟན་ལ།  བདག་གིས་སྒྲ་དང་ཚད་མ་བསླབས། །ཞེས་སོགས་ཀྱིས་མཁས་པའི་ཤེས་རབ་བསྟན་ནོ། །དེ་དག་གིས་ནི་སྡོམ་གསུམ་གྱི་ཉམས་ལེན་གཞུང་གིས་ཇི་ལྟར་བསྟན་པའི་ཚུལ་བརྗོད་ཟིན་ནོ།།        །།
གསུམ་པ་བསྟན་བྱ་སྡོམ་གསུམ་གྱི་མཐའ་དཔྱད་པ་ལ་གསུམ་སྟེ།  སྡོམ་པ་སྤྱིའི་རྣམ་བཞག །སྐབས་སུ་བབས་པའི་སྡོམ་གསུམ་ངོས་བཟུང་བ། །དེ་ཉིད་ཀྱི་དོན་གཏན་ལ་དབབ་པའོ། །དང་པོ་ལ་གསུམ་སྟེ།  སྡོམ་པ་གསུམ་གྱི་རྣམ་
གྲངས།  སྡོམ་པ་གཉིས་ཀྱི་རྣམ་གྲངས།  སྡོམ་པ་གཅིག་ཏུ་ཐམས་ཅད་འདུས་པའི་ཚུལ་ལོ། །དང་པོ་ལ་བཞི་སྟེ།  སྡེ་སྣོད་སྤྱི་ལ་གྲགས་པའི་སྡོམ་གསུམ།  ཉན་ཐོས་ཀྱི་སྡེ་སྣོད་ལ་གྲགས་པའི་སྡོམ་གསུམ།  ཐེག་ཆེན་གྱི་སྡེ་སྣོད་
ལ་གྲགས་པའི་སྡོམ་གསུམ།  གསང་སྔགས་ཀྱི་རྒྱུད་སྡེ་ལ་གྲགས་པའི་སྡོམ་གསུམ་མོ། །དང་པོ་ནི།  སོ་ཐར་བསམ་གཏན།  ཟག་མེད་ཀྱི་སྡོམ་པ་གསུམ་ལ་སྡོམ་པ་གསུམ་དུ་འཇོག་པ་ནི་ཐེག་པ་ཆེ་ཆུང་གི་མངོན་པའི་སྡེ་སྣོད་ཀུན་
མཐུན་ཏེ།  བྱང་ཆུབ་གསུམ་ཐོབ་པར་བྱེད་པ་ལ་ཟག་མེད་ཀྱི་ཤེས་རབ་ཀྱིས་རང་རང་གི་སྤང་བྱའི་ཉོན་མོངས་སྤོང་དགོས།  ཤེས་རབ་དེ་ཡང་ཏིང་ངེ་འཛིན་རྣམ་པར་དག་པའི་ཞི་གནས་ལ་བརྟེན།  ཞི་གནས་དེ་ཡང་ཚུལ་ཁྲིམས་རྣམ་པར་དག་པ་ལ་
9-3-11b


བརྟེན་དགོས་པའི་དབང་དུ་བྱས་ཏེ་ལྷག་པའི་བསླབ་པ་གསུམ་གསུངས་པ་དང་དོན་གཅིག་གོ། གཉིས་པ་ལ་མཛོད་འགྲེལ་དུ་ཚིགས་གསུམ་རིམ་ཅན་དུ་བླངས་པའི་ཚེ་སྤོང་བའི་འཕེལ་བ་དང་ལྡན་པའི་ཕྱིར་སྡོམ་པ་དེ་དག་ལྔ་དང་།  བཅུ་དང་། 
ཉི༷་ཤུ༷་ཞེས་བྱ་བ་ལྟ་བུ་དང་།  དོང་ཙེ་གཅིག་དང་།  གཉིས་ཞེས་བྱ་བ་བཞིན་དུ།  གཞན་དང་གཞན་ཞེས་བྱ་བའམ།  འོན་ཏེ་དེ་དག་ཐམས་ཅད་ཐ་དད་པ་ཉིད་གཅིག་ཏུ་སྐྱེ་ཞེ་ན་སྨྲས་པ།  ཐ་དད་དེ་དག་ནི་མ་འདྲེས་པ་ཉིད་དེ་སྡོམ་པ་གསུམ་ལ་
སྲོག་གཅོད་པ་སྤོང་བ་གསུམ་ནས་སྤྱོད་པར་འགྱུར་བའི་ལྟུང་བ་སྤོང་བ་གསུམ་གྱི་བར་དུ་མཚན་ཉིད་ཐ་དད་པར་སྐྱེ་སྟེ།  ལྷག་མ་རྣམས་ཀྱང་དེ་དང་འདྲའོ། །ཞེས་གསུངས་པའི་སྡོམ་པ་གསུམ་ནི་བསླབ་ཚིགས་གསུམ་ལ་ཐ་སྙད་མཛད་པར་སྣང་ངོ་། །
ཡང་སོར་ཐར་གྱི་མདོ་ལས།  ལུས་ངག་ཡིད་གསུམ་གྱི་སྡོམ་པའི་ཐ་སྙད་གསུངས་པ་ནི།  བྱེ་བྲག་ཏུ་སྨྲ་བས་ཡིད་ཀྱི་སྡོམ་པ་སྡོམ་པ་བཏགས་པ་བར་འདོད་ཀྱང་མདོ་སྡེ་པ་ཡན་ཆད་ཀྱིས་གསུམ་ཀར་ཡང་སྡོམ་པ་མཚན་ཉིད་པར་བཞེད་པ་སྟེ།  དེ་ལྟར་ན་
ཉན་ཐོས་ཀྱི་སྡེ་སྣོད་ལས་རྣམ་གྲངས་གཉིས་གསུངས་སོ། །གསུམ་པ་ནི་ཉེས་སྤྱོད་སྤོང་བའི་ཚུལ་ཁྲིམས།  དགེ་བ་ཆོས་སྡུད་ཀྱི་ཚུལ་ཁྲིམས།  སེམས་ཅན་དོན་བྱེད་ཀྱི་ཚུལ་ཁྲིམས་གསུམ་ལ་བྱང་ཆུབ་སེམས་དཔའི་བསླབ་པ་གསུམ་དང་། 
བྱང་ཆུབ་སེམས་དཔའི་ཚུལ་ཁྲིམས་གསུམ་དུ་གསུངས་པས་བྱང་ཆུབ་སེམས་དཔའི་སྡོམ་པ་གསུམ་གྱི་ཐ་སྙད་ཀྱང་ཐོབ་ཅིང་དཀོན་མཆོག་བརྩེགས་པའི་སྡོམ་གསུམ་བསྟན་པའི་ལེའུར།  འདི་གསུམ་གྱི་རྣམ་གཞག་རྒྱས་པར་གསུངས་ནས་སྡོམ་གསུམ་
9-3-12a


བསྟན་པའི་ལེའུ་ཞེས་གསུངས་པས་ཀྱང་གྲུབ་བོ། །བཞི་པ་ནི།  སཾ་པུ་ཊིའི་རྒྱུད་ལས།  སྡོམ་པ་གསུམ་གྱི་རྣམ་གཞག་གཉིས་གསུངས་པ་ལས།  དང་པོ་ནི།  རྗེ་བཙུན་རྩེ་མོས།  འདིར་སྡོམ་པའི་རྣམ་
པར་གཞག་པ་གསུམ་མཐོང་སྟེ།  ཞེས་གསུངས་ནས།  གསུམ་པོའི་ངོས་འཛིན་ཇི་ལྟར་དུས་གསུམ་མགོན་པོ་རྣམས་ཞེས་སོགས་ཀྱི་སྐབས་ནས་བསྟན་པ་དང་།  ཀུན་ནས་སྣ་ཚོགས་ཕྱག་རྒྱ་སྟེ། །ཀུན་ནས་སྣ་ཚོགས་སྡོམ་པ་ཡིས། །
ཞེས་པའི་སྐབས་ནས་བསྟན་པ་དང་། །རྣལ་འབྱོར་མ་ལུས་དབུས་གནས་སུ། །ཨཾ་གི་རྣམ་པ་སྡོམ་པའི་གནས། །ཞེས་པའི་སྐབས་ནས་བསྟན་པ་གསུམ་ལ་ངོས་འཛིན་པར་མཛད་པས།  བྱང་ཆུབ་སེམས་དཔའི་སེམས་བསྐྱེད་ཀྱི་
སྡོམ་པ།  བསྐྱེད་རིམ་གྱི་སྡོམ་པ།  རྫོགས་རིམ་གྱི་སྡོམ་པ་གསུམ་ལ་སྡོམ་པ་གསུམ་གྱི་ཐ་སྙད་མཛད་པར་སྣང་ངོ་། །ཡང་དམ་ཚིག་ལ།  སྐུ།  གསུང་།  ཐུགས་ཀྱི་དམ་ཚིག་ཏུ་བཤད་པས།  དེ་གསུམ་གྱིས་སྡོམ་པ་གསུམ་གྱི་
ཐ་སྙད་འཐོབ་སྟེ།  བརྟག་པ་བཅུ་པ་ལས།  བུད་མེད་དམ་ནི་སྐྱེས་པའི་ལུས། །ལས་ནི་དུ་མས་བསྐྱེད་པས་ན། །མི་ཤེས་པས་ཀྱང་མི་བྱ་སྟེ། །སྐུ་ཡི་རྡོ་རྗེའི་དམ་ཚིག་གོ།  སེམས་ཅན་སྣ་ཚོགས་གདུང་བ་དང་། །ཀུན་རྟོག་དྲྭ་བའི་རྣམ་
རྟོག་གིས། །སེམས་ལ་སྨད་པར་མི་བྱ་སྟེ། །ཐུགས་ཀྱི་རྡོ་རྗེའི་དམ་ཚིག་གོ།  ཕྲག་དོག་ཉིད་ཀྱིས་མ་རངས་པས། །ཚིག་རྩུབ་ལ་སོགས་སྨྲ་མི་བྱ། །རྣ་བ་བདེ་བར་བྱེད་པ་ཉིད། །གསུང་གི་རྡོ་རྗེའི་དམ་ཚིག་གོ།  ཞེས་དང་པོ་
9-3-12b


གཉིས་ཀྱིས་གཞན་གྱི་ལུས་དང་སེམས་ལ་མི་སྨོད་པ་དམ་ཚིག་ཏུ་དངོས་སུ་བསྟན་ནས།  རང་གི་ལུས་དང་སེམས་ཀྱིས་མི་དགེ་བ་དྲུག་སྤངས་པ་དམ་ཚིག་ཏུ་ཤུགས་ལ་བསྟན།  ཕྱི་མས་རང་གི་ངག་གི་མི་དགེ་བ་བཞི་སྤངས་པ་དམ་ཚིག་ཏུ་དངོས་
སུ་བསྟན་ནས་གཞན་གྱི་ངག་ལ་མི་སྨོད་པ་དམ་ཚིག་ཏུ་ཤུགས་ལ་བསྟན་ནོ། །གྲུབ་ཆེན་སྨན་པའི་ཞབས་ཀྱིས་ལུས་ཀྱི་ལས་བཟང་ངན་ལ་བླང་དོར་མི་བྱེད་པ་ལུས་ཀྱི་སྡོམ་པ་དང་།  དེ་བཞིན་དུ་ངག་དང་།  ཡིད་ཀྱི་ལས་བཟང་ངན་ལ་བླང་དོར་མི་
བྱེད་པ་ངག་དང་ཡིད་ཀྱི་སྡོམ་པར་གསུངས་པ་ནི་བརྟན་པ་ཐོབ་པའི་དམ་ཚིག་ལ་དགོངས་པར་སྣང་ངོ་། །ཡང་རྡོ་རྗེ་རྩེ་མོ་ལས།  སྡོམ་པ་གསུམ་ལ་གནས་པ་ནི། །དང་པོ་ཁྲུས་སུ་བཤད་པ་ཡིན། །ཅེས་དང་།  སྲོག་གཅོད་རྐུ་དང་འཁྲིག་པ་
དང་། །བརྫུན་དང་ཆང་ནི་རྣམ་སྤངས་ཏེ། །ཁྱིམ་པའི་སྡོམ་ལ་ལེགས་གནས་ནས། །གསང་སྔགས་རྒྱལ་པོ་རབ་ཏུ་བསྒྲུབ། །གལ་ཏེ་དེ་དག་རབ་བྱུང་གྱུར། །སྡོམ་པ་གསུམ་དང་ཡང་དག་ལྡན། །སོ་སོར་ཐར་དང་བྱང་ཆུབ་སེམས། །
རིག་འཛིན་རང་གི་ངོ་བོའོ། །ཞེས་སོ་ཐར།   བྱང་སེམས།  རིག་པ་འཛིན་པའི་སྡོམ་པ་གསུམ་ལ་སྡོམ་གསུམ་གྱི་ཐ་སྙད་མཛད་པ་སྟེ།  དེ་ལྟར་ན་གསང་སྔགས་ཀྱི་རྒྱུད་སྡེ་ལས་གསུངས་པའི་རྣམ་གྲངས་བཞིའོ། །གཉིས་པ་སྡོམ་པ་
གཉིས་ཀྱི་རྣམ་གཞག་ལ་གསུམ་སྟེ།  ཐུན་མོང་དང་།  ཐུན་མོང་མ་ཡིན་པའི་སྡོམ་པ་གཉིས།  བསྐྱེད་རིམ་གྱི་སྡོམ་པ་དང་།  རྫོགས་རིམ་གྱི་སྡོམ་པ་གཉིས།  ཕྱི་དང་ནང་གི་སྡོམ་པ་གཉིས་སོ། །དང་པོ་ནི།  སྨན་ཞབས་ཀྱིས་དམ་ཚིག་ལ་
9-3-13a


ཡང་རྣམ་གཉིས་ཏེ། །ཐུན་མོང་སྡོམ་པར་བསྟན་པ་དང་། །ཐུན་མོང་མ་ཡིན་སྡོམ་པའོ། །ཞེས་གསུངས་ནས།  དེ་གཉིས་ཀྱི་ངོས་འཛིན་ཞལ་ལུང་གི་འགྲེལ་པར་རིག་པའི་དབང་ལྔ་མན་ཆད་དུ་ཐོབ་པའི་སྡོམ་
པ་ལ་ཐུན་མོང་དང་ཕྱིར་མི་ལྡོག་པ་རྡོ་རྗེ་སློབ་དཔོན་གྱི་དབང་གི་སྐབས་སུ་ཐོབ་པ་ལ་ཐུན་མོང་མ་ཡིན་པར་གསུངས་སོ། །གཉིས་པ་ནི།  སྡོམ་འབྱུང་གི་རྒྱུད་ཀྱི་རིམ་པར་ཕྱེ་བ་དང་པོར།  ཀྱཻ་རྣམ་པ་ཀུན་གྱི་མཆོག་ལྡན་པའི། །བསྐྱེད་པའི་
རིམ་པའི་སྡོམ་པ་དང་། །རྫོགས་པའི་སྡོམ་པ་ཇི་ལྟ་བུ། །ཞེས་པའི་ལན་དུ་རིམ་པར་ཕྱེ་བར་གཉིས་པར་བསྐྱེད་རིམ།  གསུམ་པར་རྫོགས་རིམ་བསྟན་ནོ། །དེ་བཞིན་དུ་འདུས་པའི་རྒྱུད་ཕྱི་མར།  དེ་བཞིན་སྡོམ་པ་ཅི་ལྟ་བུ་ཞེས་དྲིས་
པའི་ལན་དུ།  སངས་རྒྱས་རྣམས་ཀྱིས་དེར་བསྟན་པ། །རིམ་པ་གཉིས་ལ་ཡང་དག་བརྟེན། །བསྐྱེད་པ་ཡི་ནི་རིམ་པ་དང་། །དེ་བཞིན་རྫོགས་པའི་རིམ་ཉིད་དོ། །ཞེས་རྩ་རྒྱུད་ལེའུ་བཅུ་བདུན་པར་བསྟན་པའི་ཉམས་ལེན་ཐམས་ཅད་རིམ་པ་
གཉིས་སུ་འདུས་པ་དེ་ཉིད་སྡོམ་པ་ཡིན་པར་གསུངས་སོ། །གསུམ་པ་ནི།  རྗེ་བཙུན་གྱིས་ཌོམ་བྷི་བའི་ལམ་ལས།  སྡོམ་པ་ལ་ཕྱིའི་སྡོམ་པ་དང་།  ནང་གི་སྡོམ་པ་གཉིས་སུ་བྱས་ནས་གསུམ་ལྡན་གྱི་གང་ཟག་གི་རྒྱུད་ཀྱི་སྡོམ་པ་གསུམ་པོ་
རེ་རེ་ལ་ཡང་ཕྱི་ནང་གི་སྡོམ་པ་གཉིས་གཉིས་གསུངས་སོ། །གཉིས་པ་ནི།  མདོ་སྡུད་པ་ལས།  ཉི་མ་མཁའ་ལ་འགྲོ་བའི་ཟེར་གྱིས་ཟིལ་ནོན་པའི། །མདུན་གྱི་བར་སྣང་ལ་ནི་མུན་པ་མི་གནས་བཞིན། །ཤེས་རབ་ཕ་རོལ་ཕྱིན་ལ་བསླབ་
9-3-13b


པ་བྱས་རྣམས་ཀྱི། །ཕ་རོལ་ཕྱིན་པ་ཐམས་ཅད་འདིར་ནི་འདུས་པར་གསུངས། །ཞེས་ཤེར་ཕྱིན་གྱི་བསླབ་པར་བསླབ་པ་ཐམས་ཅད་འདུས་པ་ལྟ་བུའོ། །དེ་ལ་སྡོམ་པའི་ཐ་སྙད་མེད་དོ་སྙམ་ན་ཡོད་དེ།  དེ་ཉིད་ལས།  གང་ལ་སྡོམ་དང་སྡོམ་པ་མ་
ཡིན་རློམ་སེམས་མེད། །འདི་ནི་ཚུལ་ཁྲིམས་སྡོམ་པར་རྣམ་པར་འདྲེན་པས་གསུངས། །ཞེས་སོ། །གཉིས་པ་སྐབས་སུ་བབ་པའི་སྡོམ་གསུམ་ངོས་འཛིན་པ་ནི།  སོ་ཐར།  བྱང་སེམས།  རིག་པ་འཛིན་པའི་སྡོམ་པ་གསུམ་སྟེ།
འདི་གསུམ་གྱིས་བསྟན་པའི་ཉམས་ལེན་མ་ལུས་པ་བསྡུས་ཀྱང་གསུམ་པོ་ཕྱོགས་གཅིག་ཏུ་བསྒྲིགས་པའི་རྣམ་པར་གཞག་པ་ནི་གསང་སྔགས་ཀྱི་རྒྱུད་སྡེ་མ་ཡིན་པར་གཞན་ལ་མེད་དེ།  ཉན་ཐོས་ཀྱི་སྡེ་སྣོད་ལ།  སྡོམ་པ་གོང་མ་གཉིས་ཀྱི་རྣམ་
གཞག་མེད།  ཕ་རོལ་ཏུ་ཕྱིན་པའི་སྡེ་སྣོད་ལ་སྔགས་སྡོམ་གྱི་རྣམ་གཞག་མེད་པའི་ཕྱིར་རོ། །དེའི་རྒྱུ་མཚན་ཉན་ཐོས་སྡེ་པ་དག་བྱང་ཆུབ་གསུམ་པོ་གང་རུང་དུ་སེམས་བསྐྱེད་ནས་སོ་ཐར་གྱི་སྡོམ་པ་བསྲུངས་ཏེ།  ཞི་ལྷག་གཉིས་བསྒོམས་པས་བྱང་
ཆུབ་དེ་དང་དེ་ཐོབ་པར་འདོད།  ཐེག་པ་ཆེན་པོ་ཕ་རོལ་ཏུ་ཕྱིན་པ་ལས་ནི་བྱང་སེམས་ཀྱི་སྡོམ་པས་བླ་ན་མེད་པའི་བྱང་ཆུབ་སྒྲུབ་ནུས་ཀྱང་དེའི་རྟེན་དུ་ཐེག་ཆེན་སོ་ཐར་ངེས་པར་དགོས་པར་འདོད།  གསང་སྔགས་ཀྱི་རྒྱུད་སྡེ་ལས་ནི་བླ་ན་མེད་པའི་བྱང་
ཆུབ་བསྒྲུབ་པ་ལ་གཙོ་བོར་སྔགས་སྡོམ་དགོས་ཀྱང་དེའི་རྟེན་དུ་ཡང་བྱང་སེམས་དང་སོ་ཐར་གཉིས་ངེས་པར་དགོས་པས་སྡོམ་པ་གསུམ་ཆར་ཉམས་སུ་ལེན་དགོས་པར་བཞེད་པའི་ཕྱིར་རོ། །འདི་ཇི་ལྟར་ཤེས་ན་དངོས་གཞིའི་སྐབས་སུ་སྔགས་སྡོམ་
9-3-14a


ལེན་པའི་ཚེ་སྔོན་འགྲོ་ལ།  སོ་ཐར་དང་།  བྱང་སེམས་གཉིས་ལེན་པའི་ཆོ་ག་ཡོད་པ་དང་།  དངོས་གཞིའི་སྐབས་སུ་བསྐྱེད་རྫོགས་བསྒོམས་པའི་ཚེ་སྔོན་འགྲོར་སོ་ཐར་དང་།   བྱང་སེམས་ཀྱི་ཉམས་ལེན་ཡོད་
པ་དང་སྔགས་སྡོམ་གྱི་རྩ་ལྟུང་བསྲུང་བའི་ཚེ་སོ་ཐར་དང་།  བྱང་སེམས་ཀྱི་རྩ་ལྟུང་ཡང་བསྲུང་དགོས་པ་ལས་ཤེས་སོ། །དང་པོ་ནི་དཀྱིལ་ཆོག་ཕལ་ཆེར་ལས།  རང་གི་བསླབ་ལྡན་འཁོར་བཞི་པོ། །ཐེག་ཆེན་བློ་ཅན་རྣམས་ལ་ནི།  དེ་བཞིན་
གཤེགས་པས་གསུངས་པ་ཡི། །ཡང་དག་ཆོ་ག་རྗེས་སུ་གནང་། །ཞེས་པའི་ཚིག་རྐང་དང་པོས་སོ་ཐར།  གཉིས་པས་བྱང་སེམས།  ཕྱི་མ་གཉིས་ཀྱི་སྔགས་སྡོམ་འབོགས་པའི་ཆོ་ག་བསྟན།  དེ་བཞིན་དུ་གསོལ་བཏབ་ཀྱི་སྐབས་
སུ།  དམ་ཚིག་དེ་ཉིད་བདག་ལ་སྩོལ། །ཞེས་པས་སྔགས་སྡོམ།  བྱང་ཆུབ་སེམས་ཀྱང་བདག་ལ་སྩོལ། །ཞེས་པས་དེའི་རྟེན་དུ་བྱང་སེམས་ཀྱི་སྡོམ་པ།  སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་
སྩོལ། །ཞེས་པས་དེའི་རྟེན་དུ་སོ་ཐར་གྱི་སྡོམ་པ་སྩོལ་བར་གསོལ་བ་གདབ་ཅིང་།  དེའི་གོ་རིམ་བཞིན་དུ་བསྒྲག་པའི་ཚེ།  རྡོ་རྗེ་རྩེ་མོར།  རིགས་ལྔ་སོ་སོའི་དམ་ཚིག་གིས་སྔགས་སྡོམ།  དེ་ལས་གཞན་ཡང་བཅུ་བཞི་ནི། །ཞེས་སོགས་
ཀྱིས་བྱང་སེམས།  ཁྱོད་ཀྱིས་སྲོག་ཆགས་བསད་མི་བྱ། །ཞེས་སོགས་ཀྱིས་སོ་ཐར་ཀྱི་སྡོམ་པ་བསྒྲག་པར་མཛད་དོ། །བཟུང་བའི་ཚེ་རྟེན་དང་བརྟེན་པ་ཡིན་པས་ཐོག་མར་རྒྱུན་བཤགས་ཀྱིས་སོ་ཐར་དང་།  བྱང་སེམས་བཟུང་། 
9-3-14b


 རིགས་ལྔའི་སྡོམ་བཟུང་གིས་བསྲུང་བར་ཁས་བླངས་པ་ཙམ་ཞིག་གཟུང་ནས།  སྡོམ་པ་རང་གི་ངོ་བོ་དངོས་གཞིའི་ཆོ་གས་བསྐྱེད་པར་མཛད་པ་འདི་ནི་དཀྱིལ་འཁོར་གྱི་ཆོ་ག་གཅིག་ཉིད་ལ་སྡོམ་གསུམ་ལེན་པའི་ཚུལ་གསལ་བ་ཡིན་ཀྱང་།  མན་ངག་
གིས་མིག་དང་བྲལ་བ་དག་གིས་ནི་མོས་པ་ཙམ་ཡང་བྱ་དཀའ་བར་སྣང་ངོ་། །དངོས་གཞི་ལ་བསྐྱེད་རྫོགས་ཉམས་སུ་ལེན་པའི་ཚེ་སྔོན་འགྲོར་སྡོམ་པ་འོག་མ་གཉིས་ཉམས་སུ་ལེན་པ་ནི་རྒྱུན་བཤགས་ཀྱི་གནད་ལས་ཤེས་ཏེ་འདིར་མ་སྤྲོས་སོ། །སྔགས་
ཀྱི་རྩ་ལྟུང་བསྲུང་པའི་ཚེ་འོག་མ་གཉིས་ཀྱི་རྩ་ལྟུང་ངེས་པར་བསྲུང་དགོས་པ་ནི།  བདེར་གཤེགས་བཀའ་འདས་ཀྱི་རྩ་ལྟུང་བསྲུང་ཚུལ་ལས་ཤེས་ཏེ།  འདི་དག་ལ་དགོངས་ནས་ས་པཎ་གྱིས།  བླ་མ་བཙལ་ལ་དབང་བཞི་བླང་།  དེ་ཡིས་
སྡོམ་པ་གསུམ་ལྡན་འགྱུར། །ཞེས་དང་།  སྡོམ་པ་གསུམ་དང་ལྡན་པ་ཡི། །རིམ་གཉིས་ཟབ་མོའི་གནད་ཤེས་ན། །ཞེས་སོགས་གསུངས་པར་ཤེས་པར་བྱའོ། །གསུམ་པ་དེ་ཉིད་གཏན་ལ་དབབ་པ་ལ་དྲུག་སྟེ།  སྡོམ་པ་
གསུམ་གྱི་ངོ་བོ་ངོས་བཟུང་བ།  མ་ཐོབ་པ་ཐོབ་པར་བྱེད་པའི་ཆོ་ག །ཐོབ་པ་མི་ཉམས་པར་བསྲུང་བའི་བསླབ་བྱ།  ཉམས་ན་ཕྱིར་བཅོས་པའི་ཚུལ།  སྡོམ་པ་གནས་གཏོང་གི་ཚུལ་དཔྱད་པ།  གསུམ་ལྡན་གྱི་གང་ཟག་གིས་སྡོམ་
གསུམ་ཉམས་སུ་ལེན་པའི་ཚུལ་ལོ། །དང་པོ་ལ་གཉིས་ཏེ།  སྡོམ་གསུམ་སོ་སོའི་ངོ་བོ།  རེ་རེ་ཡང་ལྔ་ལྔས་གཏན་ལ་དབབ་པའི་ཚུལ་ལོ། །དང་པོ་ལ་གསུམ་ལས།  དང་པོ་སོ་ཐར་ལ།  གཞན་ལུགས་དགག །རང་ལུགས་བཞག། 
9-3-15a


 རྩོད་པ་སྤོང་བའོ། །དང་པོ་ནི།  བྱེ་བྲག་ཏུ་སྨྲ་བའི་ལུགས་ལ།  སོ་ཐར་གྱི་སྡོམ་པ་ནི་ངོ་བོ་རྣམ་པར་རིག་བྱེད་དང་།  རིག་བྱེད་མ་ཡིན་པའི་གཟུགས་ཀྱིས་བསྡུས་པ།  གང་ཟག་དང་ཐོབ་པ་ཐག་པ་ལྟ་བུས་སྦྲེལ་
བ། དུས་ཇི་སྲིད་འཚོ་དང་།  ཉིན་ཞག་གི་མཐའ་ཅན་དུ་འདོད་དེ།  མཛོད་ལས།  རྣམ་རིག་མིན་རྣམ་གསུམ་ཞེས་བྱ། །སྡོམ་དང་སྡོམ་པ་མིན་དང་གཞན། །སྡོམ་པ་སོ་སོ་ཐར་ཞེས་བྱ། །ཞེས་རིག་བྱེད་མ་ཡིན་པ་དང་།  དང་པོའི་རྣམ་རིག་རྣམ་
རིག་མིན། །སོ་སོར་ཐར་དང་ཞེས་རྣམ་པར་རིག་བྱེད་ཀྱང་གསུངས་པ་དང་།  ཇི་སྲིད་འཚོ་དང་ཉིན་ཞག་ཏུ། །སྡོམ་པ་ཡང་དག་བླང་བར་བྱ། །ཞེས་གསུངས་སོ། །དགའ༷་གདོང་པ།  བོད་ཁ༷་ཅིག་ཐེག་པ་ཆེན་པོའི་སྐབས་སུ་ཡང་བྱེ་བྲག་སྨྲ་བའི་འདོད་པ་བཞིན་དུ་
སོ་ཐར་རིས་བརྒྱད་པོ་གཟུགས་ཅན་དུ་འདོད་དེ།  སྒྲུབ་བྱེད་ནི་རང་གི་ཉེར་ལེན་ལུས་ངག་ལས་སྐྱེས་པའི་ཕྱིར་དང་།  བྱེ་བྲག་ཏུ་སྨྲ་བའི་གཞུང་ལས་བཤད་པའི་ཆོ་གས་ལེན་  དགོས་ཤིང་དེ་ལས་གཟུགས་ཅན་དུ་སྐྱེ་བ་བྱེ་བྲག་སྨྲ་བ་འདོད་པའི་
ཕྱིར་རོ། །དེ་བཞིན་དུ་ཆོ་ག་ཉན་ཐོས་ཀྱི་ལུགས་བཞིན་དུ་བྱས་པའི་ཐེག་ཆེན་སོ་སོར་ཐར་པ་ཡང་གཟུགས་ཅན་ཡིན་ཏེ།  ཆོ་ག་དེ་ལས་སྐྱེས་པའི་ཕྱིར།  གལ་ཏེ་སོ་ཐར་གྱི་སྡོམ་པ་སེམས་སུ་ཁས་བླངས་ན།  སོ་སོར་ཐར་པའི་སྡོམ་པ་ནི། །སེམས་ལས་
སྐྱེས་ཕྱིར་གཟུགས་ཅན་མིན། །དེས་ན་ཇི་སྲིད་སེམས་མ་ཉམས། །དེ་ཡི་བར་དུ་སྡོམ་པ་ཡོད། །ཅེས་པ་ཡང་རང་ལ་མཚུངས་པར་འགྱུར་ཏེ།  སོ་ཐར་གྱི་སྡོམ་པ་སེམས་སུ་ཁས་བླངས་པའི་ཕྱིར་རོ། །དེས་ན་སོ་ཐར་གྱི་སྡོམ་པ་ཡིན་ན།  གཟུགས་
9-3-15b


ཅན་ཡིན་པས་ཁྱབ།  བྱང་སེམས་ཀྱི་སྡོམ་པ་ཡིན་ན་སེམས་ཡིན་པས་ཁྱབ་ཅེས་སྨྲའོ། །འདི་ནི་ཡང་དག་པ་མ་ཡིན་ཏེ།  སོ་ཐར་གྱི་སྡོམ་པ་ཉེར་ལེན་ལུས་ངག་ལས་སྐྱེ་བ་ནི་རྣམ་པར་རིག་བྱེད་མ་ཡིན་པའི་གཟུགས་སུ་འདོད་པ་དང་འགལ་ཏེ།  ལུས་
ངག་ནི་འབྱུང་འགྱུར་ཡིན་ལ།  རིག་བྱེད་མ་ཡིན་པའི་གཟུགས་ནི་རང་གི་ཉེར་ལེན་འབྱུང་བ་ལས་སྐྱེ་བར་འདོད་པའི་ཕྱིར་ཏེ།  འབྱུང་བ་ཆེ་རྣམས་རྒྱུར་བྱས་པ། །ཞེས་བཤད་པའི་ཕྱིར།  སེམས་ཙམ་ལུགས་ཀྱི་ཆོ་ག་ལས་སྐྱེས་པའི་བྱང་སེམས་
ཀྱི་སྡོམ་པ་དེ་བདེན་གྲུབ་དུ་ཐལ།  དེ་སེམས་ཙམ་ལུགས་ཀྱི་ཆོ་ག་ལས་སྐྱེས་ཤིང་།  ཆོ་ག་དེ་ལས་བྱང་སེམས་ཀྱི་སྡོམ་པ་བདེན་གྲུབ་སྐྱེ་བར་སེམས་ཙམ་པ་འདོད་པའི་ཕྱིར།  བྱང་སའི་ཚུལ་ཁྲིམས་ལེའུར་བཤད་པའི་སོ་ཐར་རིགས་བདུན་པོ་དེ་ཡང་
གཟུགས་ཅན་དུ་ཐལ། སོ་ཐར་གྱི་སྡོམ་པ་ཡིན་པའི་ཕྱིར།  འདོད་ན།  དེ་ནས་བཤད་པའི་ཉེས་སྤྱོད་སྤོང་བའི་ཚུལ་ཁྲིམས་དེ་ཡང་གཟུགས་ཅན་དུ་ཐལ།  དེའི་ཕྱིར།  ཁྱབ་སྟེ།  ཚུལ་ཁྲིམས་ལེའུ་ལས།  ཚུལ་ཁྲིམས་དེ་ཡང་མདོར་བསྡུ་ན་རྣམ་པ་
གསུམ་སྟེ།  སྡོམ་པའི་ཚུལ་ཁྲིམས་དང་།  དགེ་བ་ཆོས་སྡུད་ཀྱི་ཚུལ་ཁྲིམས་དང་།                                                  སེམས་ཅན་ལ་ཕན་འདོགས་པའི་ཚུལ་ཁྲིམས་སོ། །དེ་ལ་བྱང་ཆུབ་སེམས་དཔའི་སྡོམ་པའི་ཚུལ་ཁྲིམས་ནི།  སོ་སོར་
ཐར་པའི་སྡོམ་པ་ཡང་དག་པར་བླངས་པའི་རིགས་བདུན་པོ།  དགེ་སློང་དང་།  དགེ་སློང་མ་དང་།  དགེ་སློབ་མ་དང་།  དགེ་ཚུལ་དང་།  དགེ་ཚུལ་མ་དང་།  དགེ་བསྙེན་དང་།  དགེ་བསྙེན་མའི་ཚུལ་ཁྲིམས་གང་ཡིན་པ་སྟེ།  ཞེས་གསུངས་པས་སོ། །
9-3-16a


གོང་དུ་འདོད་ན།  དགེ་བ་ཆོས་སྡུད་དང་སེམས་ཅན་དོན་བྱེད་ཀྱི་ཚུལ་ཁྲིམས་ཀྱང་གཟུགས་ཅན་དུ་ཐལ།  འདོད་པའི་ཕྱིར།  འདོད་ན་སེམས་སུ་ཐལ།  བྱང་སེམས་ཀྱི་སྡོམ་པ་ཡིན་པའི་ཕྱིར།  ཁྱབ་
པ་ཁས་བླངས་སོ། །སེམས་ལས་སྐྱེས་ཕྱིར་གཟུགས་ཅན་མིན། །ཞེས་སོགས་སྒྲ་ཇི་བཞིན་དུ་ཁས་ལེན་ན།  ཉོན་མོངས་ཤེས་བྱའི་སྒྲིབ་པ་ནི། །སེམས་ལས་སྐྱེས་ཕྱིར་གཟུགས་ཅན་མིན། །དེས་ན་ཇི་སྲིད་སེམས་མ་ཉམས། །དེ་ཡི་བར་དུ་
སྒྲིབ་པ་ཡོད། །ཅེས་པའང་རང་ལ་མཚུངས་པར་འགྱུར་ཏེ།  སྒྲིབ་གཉིས་སེམས་ཀྱི་སྟེང་ནས་འཇོག་བའི་ཕྱིར་རོ་ཞེས་བརྗོད་ན་ལན་ཅི་ཡོད།  འོ་ན་དེའི་དོན་གང་ཡིན་ཞེ་ན།  བྱང་སེམས་ཀྱི་སྡོམ་པ་ནི་སེམས་ཇི་སྲིད་གནས་ཀྱི་བར་དུ་ཁས་
བླངས་པ་ལས་སྐྱེ་བའི་ཕྱིར།  སེམས་མ་ཉམས་པ་དེ་སྲིད་དུ་སྡོམ་པ་ཡོད་དོ། །དེ་ལ་བྱེ་བྲག་སྨྲ་བས་སྡོམ་པ་ཡིན་ན་གཟུགས་ཅན་ཡིན་དགོས་པས།  ལུས་ཞིག་པའི་ཚེ་གཏོང་ངོ་ཞེ་ན།  མ་ཡིན་ཏེ།  གཟུགས་ཅན་དུ་མི་འདོད་པའི་ཕྱིར་ཞེས་པའི་
དོན་ནོ། །ཐེག་པ་ཆེན་པོའི་སྐབས་སུ་སྡོམ་པ་རྣམ་པར་རིག་བྱེད་མ་ཡིན་པའི་གཟུགས་ཡིན་པ་ལྟ་ཞོག །རྣམ་པར་རིག་བྱེད་མ་ཡིན་པའི་གཟུགས་ཉིད་ཀྱང་ཁས་བླངས་ན།  བྱེ་བྲག་སྨྲ་བས།  རྣམ་གསུམ་དྲི་མེད་གཟུགས་གསུངས་དང་། །འཕེལ་དང་མ་བྱས་
ལམ་སོགས་ཕྱིར། །ཞེས་པའི་སྒྲུབ་བྱེད་རྣམས་སུའི་ངོར་འགོད་པ་ཡིན་སྨྲ་དགོས་སོ། །དེས་ན་བདག་ཉིད་ཆེན་པོས།  གྲུབ་མཐའི་རྣམ་དབྱེ་མ་ཕྱེད་ཅིང་། །རྒྱུད་སྡེའི་རིམ་པ་མི་ཤེས་པར། །རྣམ་གཞག་ལེགས་ལེགས་འདྲ་ན་ཡང་། །ལྷྭམ་དཔེ་ཞྭ་ལ་བཀབ་
9-3-16b


པ་ཡིན།  ཞེས་གསུངས་པའང་འདི་འདྲའི་རིགས་ཅན་ལ་དགོངས་སོ། །གཉིས་པ་རང་ལུགས་གཞག་པ་ནི།  སོ་སོར་ཐར་པའི་སྡོམ་པའི་ངོ་བོ་ནི་ངེས་འབྱུང་གི་བསམ་པས་ཀུན་ནས་བསླངས་ཏེ།   གཞན་གནོད་གཞིར་བཅས་སྤོང་བའི་སེམས་པ་མཚུངས་
ལྡན་དང་བཅས་པའོ། །ངེས་འབྱུང་གི་བསམ་པ་མེད་པའི་དགེ་སློང་གི་སྡོམ་པ་སོགས་ནི་སོ་ཐར་གྱི་སྡོམ་པར་མི་འགྱུར་ཏེ།  ཕྱི་མ་ལྷ་མིའི་གོ་འཕང་ཙམ་དོན་དུ་གཉེར་བའི་སྡོམ་པ་ནི་ལེགས་སྨོན་དང་།  ཚེ་འདིར་རྒྱལ་པོའི་ཆད་པས་འཇིགས་པ་དང་།  ནད་
གདོན་སོགས་ཀྱིས་འཇིགས་ནས་བསྲུང་བའི་སྡོམ་པ་ནི་འཇིགས་སྐྱོབ་ཀྱི་ཚུལ་ཁྲིམས་ཡིན་པའི་ཕྱིར་རོ། །དེས་ན་སོ་ཐར་དུ་འགྱུར་བ་ལ་ངེས་འབྱུང་གི་བསམ་པ་ངེས་པར་དགོས་ཏེ།  མདོ་རྩ་ལས།  ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་
བྱས་ཏེ་ཞེས་པ་དང་།  སུམ་བརྒྱ་པ་ལས།  ངེས་པར་འབྱུང་བའི་ཚུལ་ཁྲིམས་སྡུག་བསྔལ་སྤོང་། །ཞེས་དང་།  མཛོད་འགྲེལ་ལས།  ཅི་ཕྱི་རོལ་པ་རྣམས་ལ་ཡང་དག་པར་བླངས་པའི་ཚུལ་ཁྲིམས་མེད་དམ་ཞེ་ན།  ཡོད་མོད་ཀྱི།  སོ་སོར་
ཐར་པའི་སྡོམ་པ་ནི་མ་ཡིན་ནོ། །དེ་ཅིའི་ཕྱིར་ཞེ་ན།  དེ་ནི་སྲིད་པ་ལ་བརྟེན་པའི་ཕྱིར་གཏན་དུ་སྡིག་པ་ལས་སོ་སོར་ཐར་བར་བྱེད་པ་མ་ཡིན་ནོ་ཞེས་གསུངས་སོ། །དམར་སྟོན་གྱིས་མདོ་རྩར།  སྐྱབས་སུ་འགྲོ་བར་ཁས་བླངས་པའི་ཚིག་རྩོམ་པ་
དང་ཞེས་པའི་དོན།  རྒྱ་ཆེར་འགྲེལ་ལས།  སངས་རྒྱས་ལ་མྱ་ངན་ལས་འདས་པའི་ལམ་སྟོན་པའི་སྟོན་པ།  ཆོས་ལ་མྱ་ངན་ལས་འདས་པའི་ལམ་དངོས།  དགེ་འདུན་ལ་མྱ་ངན་ལས་འདས་པའི་ལམ་སྒྲུབ་པའི་ཟླ་གྲོགས་ཞུ་བའི་དོན་དུ་བཤད་པས།  སྐྱབས་
9-3-17a


འགྲོ་ཡིན་ན་ངེས་འབྱུང་གི་བསམ་པས་ཟིན་པས་ཁྱབ་པར་གྲུབ་ལ།  དེའི་རྒྱུ་མཚན་གྱིས་དགེ་བསྙེན་གྱི་སྡོམ་པ་སོགས་རིས་བརྒྱད་ཆར་ལ་ཡང་ངེས་འབྱུང་གི་བསམ་པས་ཁྱབ་པའི་ཕྱིར།  སོ་ཐར་ཁོ་ན་ཡིན་པར་གྲུབ་བོ་ཞེས་
བཤད་པ་ནི་མི་འཐད་དེ།  མདོ་རྩར་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་རིས་བརྒྱད་ལ།  སྤྱིར་འཇིགས་སྐྱོབ།  ལེགས་སྨོན།  ངེས་འབྱུང་གིས་ཟིན་པ་གསུམ་ཡོད་པ་ལས།  འདིར་ནི་ཕྱི་མ་ཁོ་ནའི་དབང་དུ་བྱས་ནས་བཤད་ཅེས་པའི་དོན་ཡིན་པས་
མདོ་རྩའི་དངོས་བསྟན་གྱི་རྩ་བ་སྐྱབས་འགྲོ་དང་།  དེ་ཉིད་རྩ་བར་བྱས་པའི་རིས་བརྒྱད་ལ་སོ་ཐར་གྱིས་ཁྱབ་ཀྱང་།  སྤྱིར་དེ་དག་ལ་སོ་ཐར་གྱིས་མ་ཁྱབ་པའི་ཕྱིར་རོ། །ཁ་ཅིག་འདིའི་དོན་དུ་བསམ་ནས།  སོ་ཐར་ལ་འཇིགས་སྐྱོབ།  ལེགས་སྨོན།  ངེས་འབྱུང་
གི་ཚུལ་ཁྲིམས་གསུམ་ཡོད་པར་སྨྲ་བ་དག་ནི་མཆུའི་རྣམ་འགྱུར་ཉུང་ན་ཁ་མཛེས་པ་ཡིན་ནོ། །གཞན་ལ་གནོད་པ་ནི་ལུས་ངག་གི་མི་དགེ་བ་བདུན་དང་།  གཞི་ནི་སྤྱིར་དོན་ལྔ་ལ་འཇུག་པ་ལས་འདིར་རྒྱུའི་དོན་ཏེ་ཡིད་ཀྱི་མི་དགེ་བ་གསུམ་མོ། །བཅས་པ་ནི་
ཕན་ཚུན་སྡུད་པ་སྟེ།  མདོར་ན་སོ་ཐར་རིས་བདུན་ཆར་ཡང་མི་དགེ་བ་བཅུ་སྤོང་དུ་གྲུབ་སྟེ།  མདོ་ལས།  དགེ་བསྙེན་སྟོན་པ་གཞན་ལ་མི་བརྟེན་པ།  ཆོས་དགེ་བ་བཅུ་སྤྱོད་པ་ཞེས་གསུངས་པའི་དགོངས་པ་ཡང་ཡིན་ལ།  བརྟག་གཉིས་ལས།  དེ་རྗེས་
བསླབ་པའི་གནས་བཅུ་སྦྱིན། །ཅེས་པའི་དོན།  གཏན་ཁྲིམས་བདུན་ཆར་མི་དགེ་བ་བཅུ་སྤོང་དུ་གསུངས་པའི་དགོངས་པ་ཡང་དེ་ཉིད་ཡིན་ནོ། །འོ་ན་སྣ་གཅིག་སྤྱོད་པ་སོགས་ལ་མ་ཁྱབ་ཅིང་།  བསྙེན་པར་རྫོགས་པ་དང་མ་རྫོགས་པའི་སྡོམ་པའི་ཁྱད་པར་སྤོང་བདུན་
9-3-17b


དང་སྤོང་བཞི་ལ་འཇོག་པ་ཡང་མི་འཐད་པར་འགྱུར་ཏེ།  བདུན་ཆར་ཡང་མི་དགེ་བ་བཅུ་སྤོང་དུ་མཚུངས་པའི་ཕྱིར་ཞེ་ན།  གཏན་ཁྲིམས་བདུན་གྱི་དགེ་བསྙེན་ནི་ཡོངས་རྫོགས་ཀྱི་དགེ་བསྙེན་ལ་འཇོགས་པས་སྐྱོན་དང་པོ་མེད་ཅིང་།  སྐྱོན་གཉིས་པ་ཡང་མེད་དེ། 
སྤོང་བདུན་དང་སྤོང་བཞི་ནི་སྤང་བྱ་ཅི་ཙམ་སྤོང་བའི་གྲངས་ཀྱིས་འཇོགས་པ་མ་ཡིན་གྱི།  དང་པོར་ཡང་དག་པར་བླངས་པའི་ཚེ་ལུས་ངག་གི་རང་བཞིན་གྱི་ཁ་ན་མ་ཐོ་བ་བདུན་ཆར་སྤོང་བ་དང་།  བཞི་སྤོང་བ་ཡང་དག་པར་བླངས་པའི་སྒོ་ནས་འཇོག་པ་ཡིན་པའི་ཕྱིར་ཏེ།  
མཛོད་འགྲེལ་ལས།  ལུས་དང་ངག་གི་ལས་སྤོང་བར་བྱ་བ་ཐམས་ཅད་སྤོང་བ་ཡང་དག་པར་བླངས་པས་ནི་དགེ་སློང་ཡིན་ནོ། །ཞེས་གསུངས་པས་སོ། །བླངས་པའི་ཚེ་ཡང་བཅས་པའི་ཁ་ན་མ་ཐོ་བའི་སྒོ་ནས་ནི་མི་འཇོག་སྟེ།  གཞན་དུ་ན་དགེ་བསྙེན་གྱི་
སྡོམ་པ་སྤོང་ལྔ་དང་།  བསྙེན་གནས་ཀྱི་སྡོམ་པ་སྤོང་བརྒྱད་སོགས་སུ་ཐལ་བའི་ཕྱིར་རོ། །གནད་འདི་དག་མ་རྟོགས་པ་ཁ་ཅིག །གཞན་གནོད་གཞི་བཅས་སྤོང་བ་དགེ་སློང་གི་སྡོམ་པར་འདོད་པ་དང་། གཞིའི་དོན་གཞི་བསམ་སྦྱོར་བ་མཐར་ཐུག་གི་ནང་ཚན་
དུ་གྱུར་པའི་གཞི་ལ་འཆད་པ་ནི་རྣམ་པར་འཁྱམས་ཏེ།  དེ་ལྟར་ན་གཞན་གནོད་གཞི་བཅས་སྤོང་བ་མི་སྲིད་པར་ཐལ་བའི་ཕྱིར་རོ། །ལ་ལ་དག་གཞན་གནོད་གཞི་བཅས་སྤོང་བ་སོ་ཐར་གྱི་སྡོམ་པར་བཤད་པ་རྒྱ་གར་གྱི་གཞུང་འགྲེལ་གང་ན་ཡང་མེད་དོ། །ཞེས་
འཛེར་བ་ནི་ཕུང་པོ་ལྔའི་རབ་བྱེད་ཀྱི་འགྲེལ་བཤད་མ་མཐོང་བར་ཟད་དོ། །དེས་ན་གཞུང་དེ་ལ་བརྟེན་ནས།  ས་སྐྱའི་རྗེ་བཙུན་གོང་མ།  མཆིམས་ནམ་མཁའ་གྲགས།  དཔང་ལོ་ཆེན་པོ།  བུ་སྟོན་ཁ་ཆེ་སོགས་མཁས་པ་རྣམས་ཀྱིས་མགྲིན་གཅིག་ཏུ་གསུངས་པ་
9-3-18a


འདི་ཉིད་བཟུང་ན་ལེགས་སོ། །སེམས་པ་མཚུངས་ལྡན་དང་བཅས་པའི་དོན་ནི།  ཀུན་ལས་བཏུས་ལས།  ཡོན་ཏན་དེ་དང་དེའི་སྐབས་སུ།  སེམས་པ་དང་།  ཏིང་ངེ་འཛིན་དང་།  ཤེས་རབ་སོགས་གང་གཙོ་བོ་
ཡིན་པ་དེ།  ཡོན་ཏན་དེ་དང་དེར་སོང་བའི་སྟོབས་ཀྱིས་མཚུངས་ལྡན་གཞན་རྣམས་ཀྱང་ཡོན་ཏན་དེ་དང་དེར་སོང་བ་ལ་དགོངས་ནས་འདི་འདྲའི་རིགས་ཅན་མང་དུ་གསུངས་པ་ལས་འདིར་ནི་སེམས་པ་གཙོ་བོ་ཡིན་པས་དེ་དང་མཚུངས་ལྡན་རྣམས་ཀྱང་སྡོམ་
པར་སོང་བའི་དོན་ཏོ། །འོ་ན་དགེ་སློང་གཉིད་མཐུག་པོ་ལོག་པའམ།  ཞེ་སྡང་དྲག་པོ་སྐྱེས་པའི་སྐབས་དང་།  འགོག་པ་ལ་སྙོམས་པར་འཇུག་པའི་ཚེ་དགེ་སློང་གི་སྡོམ་པ་མེད་པར་འགྱུར་རོ་ཞེ་ན།  བྱེ་བྲག་སྨྲ་བས་འདིའི་སྐྱོན་འབྱུང་བར་བསམ་ནས་
གཟུགས་ཅན་དུ་འདོད་ལ།  ཀུན་ལས་བཏུས་ལས་དབང་ལྡན་གྱི་ཚུལ་དུ་ཡོད་པར་འདོད་པ་ཉིད་འདིར་སྦྱར་ན་ཡང་རུང་མོད་ཀྱི།  སྤྱིར་ནི་འཐོབ་རྒྱུས་འཐོབ་ཅིང་།  གཏོང་རྒྱུས་མ་བཏང་བས་ད་ལྟ་མངོན་གྱུར་མེད་ཀྱང་ཡོད་ཅེས་པའི་ཐ་སྙད་འཐོབ་སྟེ། 
དཔེར་ན་དངོས་པོ་འགའ་ཞིག་སྐྱེད་དུ་བཏང་ཟིན་པས།  ད་ལྟ་མེད་ཀྱང་ཡོད་ཅེས་པའི་ཐ་སྙད་འཐོབ་པ་བཞིན་ནོ། །འདི་དག་ནི་འོག་མ་དག་གི་སྐབས་སུ་ཡང་དྲན་པར་བྱའོ། །སོ་ཐར་ལ་དབྱེ་ན་ཉན་ཐོས་ཀྱི་སོ་ཐར་དང་།  ཐེག་ཆེན་གྱི་སོ་ཐར་གཉིས་ལས། 
དང་པོ་ནི།  རང་དོན་དུ་དམན་པའི་བྱང་ཆུབ་ལ་དམིགས་ཏེ་གཞན་གནོད་གཞི་བཅས་སྤོང་བའི་སེམས་པ་མཚུངས་ལྡན་དང་བཅས་པའོ། །དེ་ལ་དབྱེ་ན་ཉན་ཐོས་ཀྱི་སོ་སོར་ཐར་པ་རིས་བརྒྱད་དོ། །གཉིས་པ་ནི། །སེམས་ཅན་ཐམས་ཅད་ཀྱི་དོན་དུ་རྫོགས་པའི་
9-3-18b


བྱང་ཆུབ་ལ་དམིགས་ཏེ།  གཞན་གནོད་གཞི་བཅས་སྤོང་བའི་སེམས་པ་མཚུངས་ལྡན་དང་བཅས་པའོ། །དེ་ལ་དབྱེ་ན་ཆོ་ག་ཉན་ཐོས་དང་ཐུན་མོང་བའི་ཐེག་ཆེན་གྱི་སོ་ཐར།  ཆོ་ག་ཐུན་མོང་མ་ཡིན་པའི་ཐེག་ཆེན་གྱི་སོ་ཐར།  ཆོ་ག་གོང་མ་དང་ཐུན་མོང་
བའི་ཐེག་ཆེན་གྱི་སོ་ཐར་དང་གསུམ་ལས།  དང་པོ་ནི།  བསམ་པ་ཐེག་ཆེན་སེམས་བསྐྱེད་ཀྱིས་ཀུན་ནས་བསླངས་ཏེ་ཆོ་ག་ཉན་ཐོས་ཀྱི་ལུགས་བཞིན་བྱས་པའི་སོ་ཐར་རིས་བརྒྱད་དོ། །གཉིས་པ་ལ་སྔོན་གྱི་ཆོ་ག་ལས་ཐོབ་པ་དང་།  ད་ལྟར་གྱི་ཆོ་ག་ལས་
ཐོབ་པ་གཉིས་ལས།  དང་པོ་ནི།  རྒྱལ་སྲས་བྱམས་པ་དང་།  འཇམ་དབྱངས་སོགས་ཀྱིས་འགྲོ་བ་མང་པོ་ལ་བསྙེན་རྫོགས་བྱས་པར་བཤད་པའི་སྡོམ་པ་རྣམས་དང་།  ཙན་དན་སྤོས་ཀྱི་ངད་ལྡན་པའི་དགེ་སློང་གི་རྒྱུད་ཀྱི་སྡོམ་པ་ལྟ་བུའོ། །གཉིས་པ་ནི། 
དོན་ཡོད་ཞགས་པ་ལས་བཤད་པའི་གསོ་སྦྱོང་གི་སྡོམ་པ་དང་།  མཎྜལ་ཚོམ་བུ་ལྔ་པ་ལ་བརྟེན་པའི་སེམས་བསྐྱེད་ཀྱི་ཆོ་གའི་སྔོན་འགྲོའི་སྐྱབས་འགྲོའི་སྡོམ་པ་ལྟ་བུའོ། །གསུམ་པ་ནི།  སེམས་བསྐྱེད་ཀྱི་ཆོ་གའི་སྨོན་སེམས་ཀྱི་སྐབས་སུ་ཐོབ་པའི་སོ་
ཐར་དང་།  དབང་བསྐུར་གྱི་ཆོ་གའི་སྟ་གོན་གྱི་སྐབས་སུ་ཐོབ་བའི་སྡོམ་པ་ལྟ་བུའོ། །དེས་ན་སྡོམ་པ་གསུམ་ཀ་ལ་སོ་ཐར་གྱི་སྡོམ་པས་ཁྱབ་པ་འདི་ནི་རྗེ་བཙུན་ས་སྐྱ་པ་ཡབ་སྲས་ཀྱི་དགོངས་པ་བླ་ན་མེད་པ་སྟེ།  རྗེ་བླ་མ་མུས་པ་ཆེན་པོའི་ཞལ་ལས་ཁོ་བོས་རྙེད་
པའོ། །གསུམ་པ་རྩོད་པ་སྤོང་བ་ནི།  དེ་ལྟར་སྡོམ་པ་གསུམ་ཀ་ལ་སོ་ཐར་གྱིས་ཁྱབ་ན།  སོ་ཐར་གྱི་སྡོམ་པ་ཤི་འཕོས་ནས་ཀྱང་རྗེས་སུ་འབྲང་བར་ཐལ།  སྡོམ་པ་གོང་མ་གཉིས་ཤི་འཕོས་ནས་ཀྱང་རྗེས་སུ་འབྲང་བའི་ཕྱིར་རོ། །འདོད་ན་མཛོད་ལས།  
9-3-19a


བསླབ་པ་ཕུལ་དང་ཤི་འཕོས་དང་། །ཞེས་དང་།  ཇི་སྲིད་འཚོ་དང་ཉིན་ཞག་ཏུ། །སྡོམ་པ་ཡང་དག་བླང་བར་བྱ། །ཞེས་དང་།  གཞུང་ལས།  ཤི་བའི་ཚེ་ན་སྡོམ་པ་གཏོང་། །ཞེས་དང་།  དེས་ན་སོ་སོར་ཐར་པ་ཡི། །སྡོམ་
པ་ཤི་ཡང་ཡོད་དོ་ཞེས། །སྨྲ་བའི་སྐྱེས་བུ་དེ་ལ་ནི། །སྡེ་སྣོད་རྣམ་དབྱེ་མེད་པར་ཟད། །ཅེས་བཤད་པ་དང་འགལ་ལོ་ཞེ་ན་སྐྱོན་མེད་དེ།  དེ་དག་ནི་ཆོ་ག་ཐུན་མོང་བའི་དབང་དུ་བྱས་པ་ཡིན་ལ།  ཆོ་ག་ཐུན་མོང་པའི་རིས་བདུན་ནི་ཤི་འཕོས་ནས་གཏོང་བ་
ཁོ་བོ་ཡང་འདོད་པའི་ཕྱིར་རོ། །གཉིས་པ་བྱང་སེམས་ཀྱི་སྡོམ་པའི་ངོ་བོ་ནི།  ཆོས་རྗེ་ས་པཎ་གྱིས་སེམས་བསྐྱེད་ཀྱི་ཆོ་ག་ལས་ཡང་དག་པར་བླངས་པ་བརྡ་ལས་བྱུང་བའི་ཀུན་རྫོབ་པའི་སེམས་བསྐྱེད་པ་འདི་ལ་མི་མཐུན་ཕྱོགས་སྤོང་བའི་སེམས་པ་རྒྱུན་ཆགས།
ཡོད་ན་སྡོམ་པར་འགྱུར་བས་དེ་བཤད་ན།  བྱང་ཆུབ་སེམས་དཔའི་སྡོམ་པ་སྤྱིའི་མཚན་ཉིད་དང་།  རབ་ཏུ་དབྱེ་བ་དང་།  བསླབ་པར་བྱ་བ་གསུམ་གྱིས་ངེས་པར་བྱའོ། །དང་པོ་ནི།  རྫོགས་པའི་བྱང་ཆུབ་ཀྱི་སྒྲུབ་བ་ཁྱད་པར་བ་མི་མཐུན་ཕྱོགས་སྤོང་བའི་
སེམས་པ་རྒྱུན་ཆགས་པའོ། །གཉིས་པ་ལ་སྨོན་འཇུག་གཉིས་སོ། །དེ་གཉིས་ཀྱི་མཚན་ཉིད་ལ་འཇིག་རྟེན་པའི་སེམས་སྨོན་པ་ཡིན་ལ།  ས་ཐོབ་པ་ཡན་ཆད་འཇུག་པའོ། །ཞེས་གསུངས་པ་ནི་ལུང་ཆོས་ལ་འདྲིས་ཆུང་བར་ཟད་དེ།  བསླབ་བཏུས་
སུ་འཇུག་པའི་སྡོམ་པ་སོ་སྐྱེ་ཉིད་ལ་བཤད་དོ། །དེས་ན་གཞན་དོན་དུ་སངས་རྒྱས་ཐོབ་པར་འདོད་པ་དང་།  དེའི་དོན་དུ་སྤྱོད་པ་སྒྲུབ་པར་འདོད་པའོ། །དེ་ལ་གཞན་དག་སྨོན་པ་ལ་སྡོམ་པ་མེད་དེ།  བྱང་ཆུབ་སྨོན་པའི་སེམས་ལས་ནི། །འཁོར་ཚེ་འབྲས་བུ་
9-3-19b


ཆེ་འབྱུང་ཡང་། །ཇི་ལྟར་འཇུག་པའི་སེམས་བཞིན་དུ། །བསོད་ནམས་རྒྱུན་ཆགས་འབྱུང་བ་མིན། །ཞེས་བཤད་པས་སོ། །ཞེས་ཟེར་རོ། །བདག་གི་བླ་མ་དཔལ་ས་སྐྱ་པའི་ཞལ་ནས་ནི།  སྨོན་པའི་སེམས། སྨོན་པའི་སེམས་བསྐྱེད།  སྨོན་
པ་མི་ཉམས་པར་བསྲུང་བ་གསུམ་དང་།  འཇུག་པའི་སེམས།  འཇུག་པའི་སེམས་བསྐྱེད།  འཇུག་པ་མི་ཉམས་པར་བསྲུང་བ་དང་གསུམ་ཡོད་དོ། །ཞེས་གསུངས་པ་ནི་མདོ་རྒྱུད་ཀྱི་དགོངས་པ་ཕྱིན་ཅི་མ་ལོག་པར་ངེས་པའོ། །དེའི་རྗེས་སུ་འབྲངས་ནས་
སྨོན་འཇུག་གི་སེམས་རྐྱང་པ་སྡོམ་པ་མ་ཡིན་ལ་སྨོན་འཇུག་གི་སེམས་བསྐྱེད་པ་ལ་མི་མཐུན་པ་གཞི་དང་བཅས་པའི་སྤོང་སེམས་ཡོད་ན་གཉིས་ཀ་ལ་ཡང་སྡོམ་པར་འགྱུར་ཏེ།  མཚན་ཉིད་དང་ལྡན་པའི་ཕྱིར་རོ། །སྡོམ་པའི་མཚན་ཉིད་དང་ལྡན་ཡང་སྡོམ་པར་
མི་འགྱུར་ན་སྡོམ་པ་གཞན་ཐམས་ཅད་ཀྱང་སྡོམ་པར་མི་འགྱུར་རོ། །སློབ་དཔོན་ཞི་བ་ལྷ་ནི་སྡོམ་པས་མ་ཟིན་པའི་སྨོན་པ་རྐྱང་པ་ལ་བསོད་ནམས་རྒྱུན་ཆགས་སུ་མི་འབྱུང་བར་བཞེད་པ་ཡིན་གསུངས་སོ། །དེས་ན་བྱང་ཆུབ་སེམས་དཔའི་རྒྱུད་ཀྱི་གོང་འོག་གི་
བསླབ་བྱ་ཐམས་ཅད་ཀྱང་བྱང་སེམས་ཀྱི་སྡོམ་པར་འདུས་པ་ཡིན་ཏེ།  གོང་དུ་གསུངས་པའི་མཚན་ཉིད་རྣམས་ཚང་བའི་ཕྱིར་རོ། །རྗེ་བཙུན་གྱི་བཞེད་པ་ཡང་འདི་ཡིན་ཏེ།  རྩ་ལྟུང་འཁྲུལ་སྤོང་ལས།  ལྟུང་བའི་ངོ་བོ་འདི་ལ་ཁ་ཅིག་སྨོན་པའི་སྟེང་དུ་འཇུག་
པའི་བྱང་ཆུབ་ཀྱི་སེམས་སྤོང་བ་ཡང་ཡིན་ནོ། །ཞེས་སྨྲ་བ་ཡོད་དེ།  དེ་དག་ནི་དེ་ལྟར་མ་ཡིན་ཏེ།  དེ་ལྟ་ན་གོང་འོག་ཐམས་ཅད་ཀྱང་བྱང་ཆུབ་སེམས་དཔའི་འཇུག་པ་ཡིན་པའི་ཕྱིར།  ལྔ་པའི་ཁོངས་སུ་འདུ་བའི་སྐྱོན་ཡོད་དོ། །ཞེས་གསུངས་སོ། །དེས་ན་
9-3-20a


བྱང་སེམས་ཀྱི་སྡོམ་པའི་མཚན་ཉིད།  རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བ་གང་ཞིག །མི་མཐུན་ཕྱོགས་སྤོང་བའི་སེམས་པ་མཚུངས་ལྡན་དང་བཅས་པའོ། །འདི་ལ་རྣམ་དབྱེ་ཤེས་པའི་ཆེད་དུ་ཆོ་གའི་སྒོ་ནས་དབྱེ་ན་སོ་
ཐར་དང་ཆོ་ག་ཐུན་མོང་བའི་བྱང་སེམས་ཀྱི་སྡོམ་པ།  ཆོ་ག་ཐུན་མོང་མ་ཡིན་པའི་བྱང་སེམས་ཀྱི་སྡོམ་པ།  དབང་བསྐུར་དང་ཆོ་ག་ཐུན་མོང་བའི་བྱང་སེམས་ཀྱི་སྡོམ་པ་དང་གསུམ་ལས།  དང་པོ་ནི།  སྔར་བཤད་པའི་ཐེག་ཆེན་སོ་ཐར་ཐམས་ཅད་དོ། །དེས་ན་
ཉན་ཐོས་ཀྱི་སོ་ཐར་དང་བྱང་སེམས་ཀྱི་སྡོམ་པ་གཉིས་རྣམ་པ་ཐམས་ཅད་དུ་འགལ་བ་ཡིན་གྱི་བྱང་སེམས་ཀྱི་སོ་ཐར་དང་ནི་མི་འགལ་ཏེ། གང་ལ་ཐེག་ཆེན་སོ་ཐར་གྱི་མཚན་ཉིད་ཚང་བ་དེ་ལ་བྱང་སེམས་ཀྱི་སྡོམ་པའི་མཚན་ཉིད་ཀྱང་ཚང་ལ།  གང་ལ་བྱང་སེམས་
ཀྱི་སྡོམ་པའི་མཚན་ཉིད་ཚང་བ་དེ་ལ་ཐེག་ཆེན་སོ་ཐར་གྱི་སྡོམ་པའི་མཚན་ཉིད་ཀྱང་ཚང་བའི་ཕྱིར་ཏེ།  སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་ཕྱིར་དུ་བསྲུང་བའི་སྡོམ་པ་ཡིན་ན།  བྱང་སེམས་ཀྱི་སྡོམ་པ་ཡིན་དགོས་ཤིང་།  གཞན་ལ་ཕན་པ་ཁྱད་
པར་ཅན་བསྒྲུབ་པ་ལ་གཞན་ལ་གནོད་པ་སྤོང་བས་ཁྱབ་པའི་ཕྱིར་རོ། །གཉིས་པ་ནི།  དབུ་སེམས་ཀྱི་ཆོ་ག་ལས་ཐོབ་པའི་སྨོན་འཇུག་གི་སྡོམ་པ་ལྟ་བུའོ། །གསུམ་པ་ནི།  དབང་བསྐུར་གྱི་ཆོ་གའི་སྟ་གོན་གྱི་དུས་སུ་ཐོབ་པའི་བྱང་སེམས་ཀྱི་སྡོམ་པ་དང་། 
དངོས་གཞིའི་སྐབས་སུ་ཐོབ་པའི་སྔགས་སྡོམ་ལྟ་བུའོ། །གསུམ་པ་རིག་འཛིན་གྱི་སྡོམ་པའི་ངོ་བོ་ནི།  རྩ་ལྟུང་འཁྲུལ་སྤོང་ལས།  རིག་པ་འཛིན་པ་ནི་དེ་དག་ཀྱང་ལྷའི་རྣམ་པའམ།  ཡེ་ཤེས་ཀྱི་བྱིན་གྱིས་བརླབས་ནས་ལོངས་སྤྱོད་པས་ན།  འདི་ལ་འགལ་བ་ཅི་
9-3-20b


ཡང་ཡོད་པ་མ་ཡིན་ནོ། །ཞེས་གསུངས་ལ།  སྡོམ་པ་ཉི་ཤུ་པའི་ཊཱི་ཀར།  དེའི་སྟེང་དུ་རིག་པ་འཛིན་པ་ནི་རིག་པ་འཛིན་པའི་སྡོམ་པ་ཡིན་ནོ། །ཞེས་གསུངས་པ་ནི་རྒྱུད་སྡེ་བཞི་ཆར་ལ་འཇུག་སྟེ།  རྒྱུད་སྡེ་འོག་མ་གསུམ་ལ་མཚན་བཅས་ཀྱི་རྣལ་འབྱོར་ནི་ལྷའི་རྣམ་
པས་བྱིན་གྱིས་བརླབ་པ་དང་།  མཚན་མེད་ཀྱི་རྣལ་འབྱོར་ནི་ཡེ་ཤེས་ཀྱིས་བྱིན་གྱིས་བརླབ་པའི་དོན་ཡིན་པའི་ཕྱིར་དང་།  བླ་མེད་ལ་བསྐྱེད་རིམ་ནི་ལྷའི་རྣམ་པས་བྱིན་གྱི་བརླབ་པ་དང་།  རྫོགས་རིམ་ནི་ཡེ་ཤེས་ཀྱིས་བྱིན་གྱིས་བརླབ་པའི་ཕྱིར་རོ། །གཉན་གྱི་
མུ་ཏིག་ཕྲེང་བར།  རིག་པ་ནི་དཀྱིལ་འཁོར་དུ་ཞུགས་པའི་དུས་སུ་མེ་ཏོག་གང་ལ་ཕོག་པའི་ལྷ་དང་།  དེའི་སྔགས་ཡིན་ལ་དེ་འཛིན་པ་ནི་བསྒོམ་བཟླས་ཀྱི་སྒོ་ནས་དེ་མཉེས་པར་བྱེད་པའོ། །ཞེས་གསུངས་པ་ནི་རིག་པ་འཛིན་པའི་ཉམས་ལེན་ཙམ་ལ་དགོངས་པར་
སྣང་ཞིང་།  དཀྱིལ་ཆོག་རྣམས་ལས་རིག་པའི་དབང་ལྔའི་སྒྲ་དོན་བཤད་པ་ལྟར་ན།  རིག་པ་ནི་མ་རིག་པ་ལ་སོགས་པའི་ཉོན་མོངས་པ་ལྔ་གནས་གྱུར་པའི་ཡེ་ཤེས་ལྔ་ཡིན་ལ།  དེ་འཛིན་པ་ནི་སྒྲུབ་པར་བྱེད་པ་དང་།  བསྒྲུབ་པར་བྱས་པ་གཉིས་ལ་འཇུག་གོ།
དེས་ན་དེ་དག་གི་དོན་གཏན་ལ་དབབ་པ་ནི་སྔགས་སྡོམ་གྱི་མཚན་ཉིད་དང་།  དབྱེ་བ་གཉིས་ལས།  དང་པོ་ནི།  ཡིད་མཚན་རྟོག་ལས་སྐྱོབ་པའི་ཐབས་ཁྱད་པར་ཅན་གང་ཞིག །མི་མཐུན་ཕྱོགས་སྤོང་བའི་སེམས་པ་མཚུངས་ལྡན་དང་བཅས་པའོ། །
སངས་རྒྱས་ཀྱི་ས་ལ་མ་ཁྱབ་པར་ཐལ་བའི་སྐྱོན་མེད་དེ།  སྐྱོབ་པའི་ཐབས་ཞེས་པ་སྐྱོབ་པར་བྱེད་པ་དང་།  བསྐྱབས་ཟིན་པ་གཉིས་ཀ་ལ་འཇུག་པའི་ཕྱིར་རོ། །དཔེར་ན་རྫོགས་པའི་བྱང་ཆུབ་ཀྱི་སྒྲུབ་པ་ཁྱད་པར་བ་དེ་བསྒྲུབ་བྱ་དང་སྒྲུབ་བྱེད་གཉིས་ཀ་
9-3-21a


ལ་འཇུག་པས།  སངས་རྒྱས་ཀྱི་ས་ལ་མ་ཁྱབ་པར་ཐལ་བའི་སྐྱོན་མེད་པར་ས་པཎ་ཉིད་ཀྱིས་གསུངས་པ་བཞིན་ནོ། །འདི་ལ་གང་སྐྱོབ་པ་དང་།  གང་ལས་སྐྱོབ་པ་དང་།  གང་གིས་སྐྱོབ་པ་དང་གསུམ་ལས།  དང་པོ་ནི། 
སྔགས་ཀྱི་སྐད་དོད་ལ་མནྟྲ་ཞེས་པའི་མན་ནི་མ་ནོ་སྟེ།  ཡིད་དང་།  ཏ་ར་ནི་སྐྱོབ་པ་ལ་མཇུག་པས་དབང་པོ་དང་། ཡུལ་གྱི་རྐྱེན་ལས་བྱུང་བའི་ཚོགས་དྲུག་གམ།  ཕྱི་མ་ལ་གསུམ་དུ་ཕྱེ་བས་ཚོགས་བརྒྱད་ལ་ཡིད་ཅེས་པའི་ཐ་སྙད་བྱས་པ་དེ་ཉིད་དོ། །
གཉིས་པ་ནི།  མཚན་རྟོག་ལས་ཏེ།  མཚན་མ་ནི་ཡུལ་གྱི་སྤུ་རིས་སོ་སོ་བ་ཡིན་ལ།  རྟོག་པ་ནི་དེ་དང་དེར་མངོན་པར་ཞེན་པ་སྟེ་འདི་ལ་ཐ་མལ་གྱི་མཚན་མ་ལ་མངོན་པར་ཞེན་པ་དང་ལྷའི་མཚན་མ་ལ་མངོན་པར་ཞེན་པ་གཉིས་ཡོད་དོ། །གསུམ་པ་ནི། 
ཐབས་ཁྱད་པར་ཅན་གྱིས་ཏེ་ཐེག་པ་དམན་པའི་ཉམས་ལེན་ལ་ལྟོས་ནས་ཐེག་ཆེན་གྱི་ཉམས་ལེན་ཐབས་ཁྱད་པར་ཅན་ཡིན་ལ།  དེ་ལ་ལྟོས་ནས་རྡོ་རྗེ་ཐེག་པའི་སྨིན་གྲོལ་གཉིས་ཐབས་ཁྱད་པར་ཅན་ཡིན་པ་སྟེ་དེས་སྐྱོབ་བོ། །དེ་ལྟར་ཡང་འདུས་པའི་རྒྱུད་ཕྱི་
མ་ལས།  དབང་པོ་དང་ནི་ཡུལ་རྣམ་ཀྱི། །རྐྱེན་ལས་གང་དང་གང་བྱུང་བ། །ཡིད་དེ་མན་ཞེས་བྱ་བར་བཤད། །ཏྲ་ནི་སྐྱོབ་པར་བྱེད་པའི་དོན། །འཇིག་རྟེན་སྤྱོད་ལས་རྣམ་གྲོལ་བར། །གང་བཤད་དམ་ཚིག་སྡོམ་པ་སྟེ། །རྡོ་རྗེ་ཀུན་གྱིས་སྲུང་
བ་ནི། །སྔགས་ཀྱི་སྤྱོད་པ་ཞེས་བཤད་དོ། །གཉིས་པ་ལ་གསུམ་སྟེ།  བརྗོད་བྱ་དོན་གྱི་རྒྱུད་ཀྱི་སྒོ་ནས་དབྱེ་བ།  རྗོད་བྱེད་རྒྱུད་སྡེ་བཞིའི་སྒོ་ནས་དབྱེ་བ།  གང་ལས་ཐོབ་པའི་ཆོ་གའི་སྒོ་ནས་དབྱེ་བའོ། །དང་པོ་ལ་རྒྱུ་རྒྱུད་ཀྱི།  ཐབས་རྒྱུད་ཀྱི།  
9-3-21b


འབྲས་རྒྱུད་ཀྱི་སྔགས་སྡོམ་གསུམ་ལས།  དང་པོ་ནི།  སྣང་བའི་ཆོས་ཐམས་ཅད་རང་བཞིན་ལྷན་ཅིག་སྐྱེས་པའི་ཡེ་ཤེས་ཀྱི་ངོ་བོར་སྡོམ་པ་སྟེ།  རང་བཞིན་ལྷན་ཅིག་སྐྱེས་ཞེས་བརྗོད། །རྣམ་པ་ཐམས་ཅད་སྡོམ་པ་གཅིག །ཅེས་གསུངས་
པ་ལྟར་རོ། །གཉིས་པ་ནི།  ཐབས་ཁྱད་པར་ཅན་མཚན་བཅས་མཚན་མེད་གཉིས་སམ།  བསྐྱེད་རྫོགས་གཉིས་ཏེ།  དེར་ནི་དཀྱིལ་འཁོར་འཁོར་ལོ་ཞེས། །ཐབས་ནི་བདེ་བའི་སྡོམ་པ་སྟེ། །ཞེས་དང་།  སྡོམ་པའི་དབྱེ་བའང་བཤད་པར་བྱ་
སྟེ་ཞེས་གསུངས་པ་ལྟར་རོ། །གསུམ་པ་ནི།  སྣང་བ་ཐམས་ཅད་རང་སྣང་གི་ཡེ་ཤེས་ཀྱི་ངོ་བོར་སྡོམ་པ་སྟེ།  དེ་ནས་ཆོས་ཀུན་སྡོམ་གཅིག་པའི། །རྡོ་རྗེ་སེམས་དཔའ་ཞེས་བྱར་བཤད།  ཅེས་གསུངས་པ་ལྟར་རོ། །དེ་ལྟར་གསུམ་ལས་རྒྱུ་
རྒྱུད་ནི་སྔགས་སྡོམ་བཏགས་པ་བ་དང་།  ཐབས་རྒྱུད་དང་འབྲས་རྒྱུད་ནི་མཚན་ཉིད་པ་སྟེ། །རྗེ་བཙུན་རྩེ་མོས།  དེ་ཁོ་ན་ཉིད་བསྡུས་པ་ཞེས་པའི་མིང་གིས་ཐབས་རྒྱུད་དང་།  འབྲས་རྒྱུད་དངོས་སུ་བསྟན་ནས།  རྒྱུ་རྒྱུད་ཤུགས་ལས་ཤེས་པར་གསུངས་པའི་
དོན་རྟོགས་ན་འདི་འགྲུབ་བོ། །གཉིས་པ་ལ་བྱ་རྒྱུད་ཀྱི།  སྤྱོད་རྒྱུད་ཀྱི།  རྣལ་འབྱོར་རྒྱུད་ཀྱི།  བླ་མེད་ཀྱི་སྔགས་སྡོམ་དང་བཞི་ལས།  ངོ་བོ་རིམ་པ་བཞིན།  བལྟས་པའི་བདེ་བ་ལམ་བྱེད་ཀྱིས་དང་།  དགོད་པའི་བདེ་བ་ལམ་བྱེད་ཀྱིས་དང་།  ལག་
བཅངས་ཀྱི་བདེ་བ་ལམ་བྱེད་ཀྱིས་དང་།  གཉིས་གཉིས་འཁྱུད་པའི་བདེ་བ་ལམ་བྱེད་ཀྱིས་ཡིད་མཚན་རྟོགས་ལས་སྐྱོབ་པའི་ཐབས་ཁྱད་པར་ཅན་གང་ཞིག །མི་མཐུན་ཕྱོགས་སྤོང་བའི་སེམས་པ་མཚུངས་ལྡན་དང་བཅས་པའོ། །གསུམ་པ་ལ་གསུམ་སྟེ། 
9-3-22a


 སྟ་གོན་གྱི་སྐབས་སུ་ཐོབ་པ།  འཇུག་པའི་སྐབས་སུ་ཐོབ་པ།  དངོས་གཞིའི་སྐབས་སུ་ཐོབ་པའོ། །དང་པོ་ནི།  སོ་ཐར་དང་།  བྱང་སེམས་རྒྱུན་བཤགས་ཀྱི་སྐབས་སུ་ཐོབ་པ་དང་།  སྔགས་སྡོམ་གྱི་རང་ལྡོག་
གནས་གསུམ་བྱིན་བརླབས་ཀྱི་སྐབས་སུ་ཇི་ཙམ་ཐོབ་པ་ཐམས་ཅད་སྐབས་འདིར་སྔགས་སྡོམ་གྱི་ངོ་བོར་སྐྱེ་བའོ། །གཉིས་པ་ལ་ཕྱི་འཇུག་གི་འདོད་པ་དྲིས་པའི་ལན་དང་།  ཟླ་བ་རྡོ་རྗེ་ངོ་སྤྲད་པའི་སྐབས་སུ་ཐོབ་པ་དང་།  ནང་འཇུག་གི་དམ་བཞག་དང་། 
ཡེ་ཤེས་དབབ་པ་དང་།  དཀྱིལ་འཁོར་གྱི་ལྷ་ངོ་བསྟན་པའི་སྐབས་སུ་ཐོབ་པ་རྣམས་ལ།  རྗེ་བཙུན་རྩེ་མོས།  ལྷ་དང་སྐལ་བ་མཉམ་པ་ཞེས་གསུངས་པའི་སྡོམ་པ་ཐོབ་པ་རྣམས་སོ། །གསུམ་པ་ལ་བུམ་དབང་གི་སྐབས་སུ་ཐོབ་པ་དང་།  དབང་
གོང་མའི་སྐབས་སུ་ཐོབ་པ་གཉིས་ནི་བླ་མེད་ཀྱི་དབང་དུ་བྱས་ལ།  རྒྱུད་སྡེ་འོག་མ་གསུམ་ལ་རང་རང་གི་དབང་གི་དངོས་གཞིའི་སྐབས་སུ་ཐོབ་པ་རྣམས་སོ། །གཉིས་པ་རེ་རེ་ཡང་དོན་ལྔ་ལྔས་གཏན་ལ་དབབ་པའི་ཚུལ་ནི།  རྗེ་བཙུན་རྩེ་མོས།  གང་དུ་
སྡོམ་པའི་གནས།  གང་སྡོམ་པའི་ངོ་བོ།  ཐབས་གང་གིས་སྡོམ་པ།  སྡོམ་པ་དང་ལྡན་པའི་རྟེན་གྱི་གང་ཟག་དང་བཞི་ལས།  གང་སྡོམ་པའི་ངོ་བོ་ལ་གྲངས་ཇི་སྙེད་ཅིག་སྡོམ་པ།  སྤང་བྱ་གང་སྡོམ་པ།  སྡོམ་པ་རང་གི་ངོ་བོ་དང་གསུམ་དུ་
གསུངས་ཞིང་།  དེ་དག་བསྐྱེད་རིམ་དང་།  བྱང་སེམས་ཀྱི་སྡོམ་པ་ལ་ཡང་སྦྱར་བར་གསུངས་སོ། །རྗེ་བཙུན་གྱིས་གང་དུ་སྡོམ་པའི་གནས།  གྲངས་ཇི་སྙེད་ཅིག་སྡོམ་པ།  སྤང་བྱ་གང་སྡོམ་པ།  ཐབས་གང་གིས་སྡོམ་པ།  སྡོམ་པ་རང་གི་
9-3-22b


ངོ་བོ་དང་ལྔ་གསུངས་ཤིང་།  རེ་རེ་ལ་ཡང་སོ་ཐར་དཔེར་བྱས་ནས་རྫོགས་རིམ་ལ་སྦྱར།  སྤང་བྱ་གང་སྡོམ་གྱི་སྐབས་སུ་བྱང་སེམས་ཀྱི་སྡོམ་པ་ཡང་དཔེར་མཛད་དོ། །དེ་དག་གི་དོན་སོ་ཐར།  བྱང་སེམས།  བསྐྱེད་རིམ།  རྫོགས་རིམ་གྱི་སྡོམ་པ་
དང་བཞི་ཆར་ལ་སྦྱར་ན་གོང་དུ་སྡོམ་པའི་གནས་ནི་སོ་ཐར་ལ།  ནཱལེནྡྲ་ལ་སོགས་པ་སྡེ་པ་བཞི་པོ་འདུ་བའི་གནས།  བྱང་སེམས་ལ།  རྟེན་གྱི་ཡུལ་མཆོད་པར་བྱ་བ་ཉིད་དུ་བྱེད་པ་ཞེས་པ་ལྟར།  གང་ཟག་རེ་རེ་ཡང་གང་དུ་བཞུགས་པའི་གནས། 
བསྐྱེད་རིམ་ལ།  མཉམ་གཞག་ལྟར་ན་རང་སེམས།  རྗེས་སྤྱོད་ལྟར་ན་སྣང་བའི་དངོས་པོ་གང་དུ་ཡོད་པ།  རྫོགས་རིམ་ལ་རང་བྱིན་བརླབས་ལྟར་ན།  སྤྱིར་རྩ་འཁོར་ལོ་ཐམས་ཅད་དང་།  ཁྱད་པར་དུ་ལྟེ་བའི་གནས།  དཀྱིལ་འཁོར་འཁོར་ལོ་ལྟར་
ན་དབང་གི་གནས་སོ། །གྲངས་ཇི་སྙེད་ཅིག་སྡོམ་པ་ནི་སོ་ཐར་ལ།  ལུས་ངག་གི་བསླབ་པར་བྱ་བ་ཇི་སྙེད་ཡོད་པ་རྣམས་ལྔ་དང་།  བརྒྱད་དང་།  བཅུ་དང་།  ཉིས་བརྒྱ་ལྔ་བཅུ་རྩ་གསུམ་སོགས་སུ་སྡོམ།  བྱང་སེམས་ལ།  སེམས་ཀྱི་
བསླབ་པར་བྱ་བ་ཐམས་ཅད་ཚུལ་ཁྲིམས་གསུམ་མམ།  ཕ་རོལ་ཏུ་ཕྱིན་པ་དྲུག་ཏུ་སྡོམ།  བསྐྱེད་རིམ་ལ་མཉམ་གཞག་ལྟར་ན་སྦྱང་གཞི་ཐམས་ཅད་དཀྱིལ་འཁོར་གྱི་འཁོར་ལོ་དེར་སྡོམ།  རྗེས་སྤྱོད་ལྟར་ན་ལྷག་པའི་ལྷའམ།  ལྷ་སོ་སོའི་ངོ་བོར་
སྡོམ།  རྫོགས་རིམ་ལ།  ཕྱི་རོལ་དུ་ཇི་སྙེད་ཡོད་པའི་ཆོས་ཐམས་ཅད་ནང་དུ་རྩ་འཁོར་ལོ་བཞི་ལ་སོགས་པར་སྡོམ་མོ། །སྤང་བྱ་གང་སྡོམ་པ་ནི་སོ་ཐར་ལ་ལུས་ངག་གི་ཁ་ན་མ་ཐོ་བ།  བྱང་སེམས་ལ་སེམས་ཀྱི་ཁ་ན་མ་ཐོ་བ།  བསྐྱེད་རིམ་ལ་ཐ་མལ་གྱི་
9-3-23a


རྣམ་རྟོག །རྫོགས་རིམ་ལ་གྱ་ནོམ་ལྷར་ཞེན་གྱི་རྣམ་རྟོག་སྡོམ་མོ། །ཐབས་གང་གིས་སྡོམ་པ་ནི་སོ་ཐར་ལ་གསོལ་བཞིའི་ལས་ལ་སོགས་པ་དང་།  བྱང་སེམས་ལ་དབུ་སེམས་ཀྱི་ཆོ་ག་སོགས་དང་།  བསྐྱེད་
རྫོགས་གཉིས་ལ་དང་པོར་དབང་གི་ཆོ་ག་དང་།  ཕྱིས་མངོན་དུ་བྱེད་པ་ནི་བསྐྱེད་རྫོགས་བསྒོམས་པའི་ཐབས་ཀྱིས་སོ། །སྡོམ་པ་རང་གི་ངོ་བོ་ནི་སམ་པར་ཞེས་པ་བདེ་བའི་མཆོག་ལ་འཇུག་པས།  དེས་བདེ་བར་གྱུར་པས་ན་སྡོམ་པ་སྟེ།  སོ་ཐར་
ལ་མཐུན་པ་རྣམས་ཀྱི་དཀའ་ཐུབ་བདེ་ཞེས་དང་།  བྱང་སེམས་ལ།  བདེ་བའི་འབྱུང་གནས་དེ་ལ་སྐྱབས་སུ་མཆི།  ཞེས་དང་།  བསྐྱེད་རིམ་ལ།  ཐབས་ནི་བདེ་བའི་སྡོམ་པ་སྟེ། །ཞེས་དང་།  རྫོགས་རིམ་ལ།  རང་རིག་བདེ་བ་ཆེན་པོ་ཉིད།  ཅེས་པ་ལྟ་བུའོ། །སྐབས་
འདིའི་བདེ་བ་ནི་ཚོར་བ་བདེ་བ་དང་།  ཤིན་ཏུ་སྦྱངས་པའི་བདེ་བ་སོགས་མ་ཡིན་གྱི།  རང་རང་གི་སྤང་བྱ་མི་མཐུན་པའི་ཕྱོགས་སྡོམ་པས་བདེ་བའི་མཆོག་ཏུ་གྱུར་པའོ། །གཉིས་པ་ལ་གསུམ་སྟེ།  ལེན་པའི་ཆོ་ག །བླང་བའི་ཡུལ།  རྟེན་གྱི་གང་
ཟག་གོ།  དང་པོ་ལ་གསུམ་ལས།  དང་པོ་སོ་ཐར་གྱི་ཆོ་ག་ལ་གཉིས་ཏེ།  ཉན་ཐོས་ཀྱི་སོ་ཐར་གྱི་ཆོ་ག་དང་།  ཐེག་ཆེན་གྱི་སོ་ཐར་གྱི་ཆོ་གའོ། །དང་པོ་ལ་གསུམ་སྟེ།  བསྙེན་གནས་ལེན་པའི་ཆོ་ག །སྐྱེས་པའི་བསླབ་ཚིགས་གསུམ་ལེན་པའི་
ཆོ་ག །དེ་བུད་མེད་གྱི་བསླབ་ཚིགས་བཞི་ལ་སྦྱར་བའོ། །དང་པོ་ནི།  མཛོད་ལས།  དམའ་བར་འདུག་སྨྲས་བཟླས་པ་ཡིས། །མི་བརྒྱན་ནམ་ནི་ནང་པར་དུ། །བསྙེན་གནས་ཡན་ལག་ཚང་བར་ནི། །ནང་པར་གཞན་ལས་ནོད་པར་བྱ། །ཞེས་གསུངས་
9-3-23b


པ་ལྟར་རོ། །གཉིས་པ་ནི་ཀརྨ་ཤ་ཏཾ་ལས།  སྔོན་དང་དགེ་བསྙེན་བསླབ་པ་དང་། །ཞུ་དང་མཁན་པོ་དང་པོ་དང་། །རབ་བྱུང་དགེ་ཚུལ་གྲིབ་ཚོད་དང་། །བསླབ་པ་བརྗོད་པ་ཐ་མ་ཡིན། །དང་པོར་བྱ་དང་མཁན་པོ་དང་། །ཆོས་གོས་གཉིས་དང་
ལྷུང་བཟེད་གཉིས། །སྤྲོ་བྱ་གསོལ་བ་གསང་སྟོན་དང་། །ཞུ་དང་གསོལ་དང་གསོལ་བ་དང་། །དྲི་དང་ལས་དང་གྲིབ་ཚོད་དང་། །ཉིན་མཚན་དུས་ཚོད་གནས་རྣམས་དང་། །ལྟུང་དང་དགེ་སྦྱོང་མཆོག་འདོད་དང་། །ཚུལ་ཁྲིམས་མཉམ་དང་ཚུལ་
འབྲེལ་དང་། །དུལ་དང་དགོས་དང་མ་བརྗོད་དང་། །གུས་པ་དང་ནི་བསྒྲུབ་བྱ་བ། །མུ་སྟེགས་གནས་པ་སྦྱིན་པ་ཡི། །སྡེ་ཚན་ཡང་དག་བསྡུས་པ་ཡིན། །ཞེས་གསུངས་པ་ལྟར་བཤད་ན་སྔོན་དང་ཞེས་པས་ནི་གསོལ་བ་བཏབ་པ་སྔོན་དུ་སོང་ནས་
གསོལ་བཞིའི་ལས་ཀྱིས་ཅིག་ཆར་རབ་ཏུ་བྱུང་བ་དང་བསྙེན་རྫོགས་བྱེད་པའི་སྔོན་གྱི་ཆོ་ག་བསྟན་ནོ། །དགེ་བསྙེན་ཞེས་པས་ནི་བར་ཆད་དྲི་བ་སྔོན་དུ་སོང་ནས་སྐྱབས་སུ་འགྲོ་བ་རྩོམ་བྱེད་དུ་བྱས་ཏེ་དགེ་བསྙེན་དུ་བསྒྲུབ་པའོ། །བསླབ་པ་ཅེས་པས་ནི་དེའི་འོག་ཏུ་
དགེ་བསྙེན་གྱི་བསླབ་པ་བརྗོད་པའོ། །ཞུ་དང་ཞེས་པས་ནི་བསྒྲུབ་བྱ་དེ་རབ་བྱུང་དུ་སྒྲུབ་པའི་ཞུ་བའི་དགེ་སློང་ལ་གཏད་ནས་དེས་ཀྱང་དགེ་འདུན་ལ་ཞུ་བའོ། །མཁན་པོ་ཞེས་པ་ནི་མཁན་པོར་གསོལ་བ་གདབ་པའོ། །དང་པོ་ཞེས་པ་ནི་དེའི་འོག་ཏུ་དགེ་སློང་
གཞན་ཞིག་གིས་གཙུག་ཕུད་བྲེགས་ཏེ་ཁྲུས་བྱས།  མཁན་པོར་འོས་པ་དེས་ཡོ་བྱད་ལྔ་བྱིན་ནས་མཚན་བཏགས་པའོ། །རབ་བྱུང་ཞེས་པ་ནི་དེའི་འོག་ཏུ་བར་མ་རབ་བྱུང་ཏུ་བསྒྲུབ་པའོ། །དགེ་ཚུལ་ཅེས་པ་ནི་དེའི་འོག་ཏུ་སྐྱབས་འགྲོ་རྩོམ་བྱེད་དུ་བྱས་
9-3-24a


ཏེ་དགེ་ཚུལ་དུ་སྒྲུབ་པའོ། །གྲིབ་ཚོད་ཅེས་པ་ནི་གྲིབ་ཚོད་གཞལ་ཏེ་དེའི་འོག་ཏུ་དུས་བརྗོད་པའོ། །བསླབ་པ་བརྗོད་པ་ཐ་མ་ཡིན་ཞེས་པ་ནི་དགེ་ཚུལ་གྱི་བསླབ་པའི་གཞི་བཅུ་བརྗོད་པ་སྟེ།   དེ་ཡན་ཆད་ནི་དགེ་བསྙེན་
ཉིད་དང་དགེ་ཚུལ་ཉིད་དུ་བསྒྲུབ་པའི་ཆོ་གའོ། །དང་པོར་བྱ་དང་ཞེས་པ་ནི་བསྒྲུབ་བྱ་དེ་ལོ་ཉི་ཤུ་ལོན།  ཆོས་གོས་གསུམ་དང་ལྷུང་བཟེད་ཀྱང་ཚང་།  བསྙེན་པར་རྫོགས་པར་འདོད་པ་ན་མཁན་པོར་འོས་པ་དེས།  ལས་བྱེད་པའི་སློབ་དཔོན།  གསང་སྟེ་སྟོན་
པའི་སློབ་དཔོན།  ལས་གྲལ་དུ་འདུས་པའི་དགེ་སློང་རྣམས་ལ་གསོལ་བ་བཏབ་ནས་དེ་རྣམས་ཀྱིས་ཀྱང་རང་རང་གི་ལྟུང་བ་བཤགས་པར་འོས་པ་རྣམས་བཤགས།  བྱིན་གྱིས་བརླབ་པར་འོས་པ་རྣམས་བྱིན་གྱིས་བརླབས་ནས་ལས་གྲལ་དུ་འདུས་པའོ། །
མཁན་པོ་ཞེས་པ་ནི་བསྙེན་པར་རྫོགས་པའི་མཁན་པོར་གསོལ་བ་བཏབ་པའོ། །ཆོས་གོས་དང་པོ་ནི་མཁན་པོས་ཆོས་གོས་གསུམ་བྱིན་གྱིས་བརླབས་ནས་གནང་བའོ། །ཆོས་གོས་གཉིས་པ་ནི་ཆོས་གོས་དྲུབས་ཟིན་པ་མེད་ན་ཆོས་གོས་ཀྱི་རྒྱུ་བྱིན་གྱིས་
བརླབས་ནས་གནང་བའོ། །ལྷུང་བཟེད་དང་པོ་ནི་ལྷུང་བཟེད་དགེ་འདུན་ལ་བསྟན་པའོ། །གཉིས་པ་ནི་མཁན་པོས་བྱིན་གྱིས་བརླབས་ནས་གནང་བའོ། །སྤྲོ་བྱ་ཅེས་པ་ནི་ལས་སློབ་ཀྱིས་གསང་སྟེ་སྟོན་པ་གང་ཡིན་དྲིས་ནས་སྤྲོར་གཞུག་པའོ། །གསོལ་བ་
ཞེས་པ་ནི་གསང་སྟོན་བསྐོ་བའི་ཕྱིར་དུ་གསོལ་བ་འབའ་ཞིག་པའི་ལས་བྱེད་པའོ། །གསང་སྟོན་ཞེས་པ་ནི་གསང་སྟེ་སྟོན་པའི་སློབ་དཔོན་གྱིས་བསྒྲུབ་བྱ་ལ་ལྐོག་ཏུ་བར་ཆད་དྲི་བའོ། །ཞུ་དང་ཞེས་པ་ནི་གསང་སྟོན་གྱིས་བསྒྲུབ་བྱ་བར་ཆད་ཀྱིས་དག་པར་དགེ་
9-3-24b


འདུན་ལ་ཞུ་བའོ། །གསོལ་དང་ཞེས་པ་ནི་བསྙེན་པར་རྫོགས་པའི་ཕྱིར་དུ་བསྒྲུབ་བྱས་ལས་སློབ་ཀྱི་རྗེས་ཟློས་བྱས་ཏེ་གསོལ་བ་བཏབ་པའོ། །གསོལ་བ་ཅེས་པ་ནི་ལས་སློབ་ཀྱིས་བསྒྲུབ་བྱ་ལ་སྔོན་དུ་བར་ཆད་དྲི་བའི་ཆེད་དུ་གསོལ་བ་འབའ་ཞིག་
པའི་ལས་བྱེད་པའོ། །དྲི་དང་ཞེས་པ་ནི་མངོན་དུ་བར་ཆད་དྲི་བའོ། །ལས་དང་ཞེས་པ་ནི་བསྙེན་པར་རྫོགས་པའི་དངོས་གཞིའི་གསོལ་བ་དང་བཞིའི་ལས་བྱེད་པའོ། །གྲིབ་ཚོད་ཅེས་པ་ནི་ཐུར་མ་སོར་བཞི་པས་གྲིབ་ཚོད་གཞལ་བའོ། །ཉིན་མཚན་
ཅེས་པ་ནི་ཉིན་མཚན་གྱི་ཆ་ཉི་ཤུ་རྩ་གཉིས་བརྗོད་པའོ། །དུས་ཚོད་ཅེས་པ་ནི་དགུན་གྱི་དུས་ལ་སོགས་པ་དུས་ཚིགས་ལྔ་བརྗོད་པའོ། །དེ་ལྟར་ན་འདི་དང་མདོ་རྩ་གཉིས་ཕྲ་རིམ་ནས་བརྗོད་པ་ཡིན་ལ་དེ་ཡང་ལུང་གཞི་ཇི་ལྟ་བ་བཞིན་དུ་བྲིས་པར་སྣང་
ཞིང་དེང་སང་གཞི་འགྲེལ་མཁན་པོས་བཤད་པ་ལྟར་རགས་རིམ་ནས་བརྗོད་པ་ནི་བརྗོད་བདེ་བའི་དབང་དུ་བྱས་པའོ། །གནས་རྣམས་ཞེས་པ་ནས་བསྒྲུབ་བྱ་བ་ཞེས་པའི་བར་ནི་གདམས་ངག་བཅུ་གཅིག་བརྗོད་པའོ། །མུ་སྟེགས་གནས་པ་སྦྱིན་པ་
ཞེས་པ་ནི་སྦྱོར་བའི་ཆོ་གའི་སྤྲོས་པ་སྟེ།  ཤཱཀྱ་དང་མུ་སྟེགས་རལ་པ་ཅན་མ་གཏོགས་པར་སེམས་མགུ་བར་མ་གྱུར་པའི་མུ་སྟེགས་ཅན་ལ་སེམས་མགུ་བ་བརྟག་པའི་ཆེད་དུ་ཟླ་བ་བཞིར་གནས་པ་སྦྱིན་པའི་གསོལ་གཞིའི་ལས་སོ། །འདི་དག་ནི་ལས་
ཆོག་གི་གོ་རིམ་མི་འཁྲུག་ཅིང་བློ་ལ་བཟུང་བདེ་བའི་ཕྱིར་དུ་ཀརྨ་ཤ་ཏམ་གྱི་སྡོམ་ཚིག་དྲངས་ནས་ཚིག་གི་འབྲུ་གཉེར་བ་ཙམ་ཞིག་བྱས་པ་ཡིན་ལ་ལག་ལེན་ཞིབ་པར་ནི་ཀརྨ་ཤ་ཏཾ་གྱི་སྟེང་དུ་སྦྱར་ནས་མཁས་པར་བྱ་དགོས་ཏེ།  ཆོ་ག་མ་འཁྲུལ་བས་བསྒྲུབ་བྱ་
9-3-25a


རབ་བྱུང་བསྙེན་རྫོགས་ཀྱི་སྡོམ་ལྡན་དུ་བསྒྲུབ་པ་ནི་བསྟན་པའི་རྩ་བར་སྣང་བའི་ཕྱིར་རོ། །གསུམ་པ་ནི།  དགེ་བསྙེན་མ་དང་དགེ་ཚུལ་མར་བསྒྲུབ་པའི་ཆོ་ག་ནི་བསྒྲུབ་བྱ་སྐྱེས་པའི་ཚབ་ཏུ་བུད་མེད་དང་།   སྒྲུབ་བྱེད་དགེ་
སློང་གི་ཚབ་ཏུ་དགེ་སློང་མ་སྦྱར་བ་མ་གཏོགས་གཞན་སྔར་དང་འདྲ་སྟེ།  མདོ་རྩར་དགེ་སློང་གི་གནས་སུ་དགེ་སློང་མའོ། །རབ་ཏུ་བྱུང་བ་ཐམས་ཅད་ཀྱིའོ་ཞེས་གསུངས་སོ། །དེ་ནས་བསྙེན་པར་མ་རྫོགས་པའི་ལོ་གཉིས་ཀྱི་གོང་དུ་དགེ་སློང་མའི་སྡོམ་པ་
བླང་དགོས་ལ།  དེ་ཡང་ཡུལ་དབུས་སུ་དགེ་སློང་མ་བཅུ་གཉིས་མཐའ་འཁོབ་ཏུ་དྲུག་ཚོགས་ཀྱིས་གསོལ་བ་དང་གཉིས་ཀྱི་ལས་ཀྱིས་སྦྱིན་དགོས་ཏེ།  མདོ་རྩར་བུད་མེད་ལ་ནི་དགེ་སློང་མ་ཞེས་བྱ་བའི་ཚིགས་གཞན་ཡོད་དོ་ཞེས་པ་དང་།  སྦྱིན་པ་ལས་སྐྱེའོ། །
དགེ་སློང་མའི་དགེ་འདུན་གྱིས་སོ། །ཞེས་གསུངས་སོ། །དེ་ནས་དགེ་སློང་མར་བསྒྲུབ་པ་ལ་ཆོ་ག་ཕལ་ཆེར་ནི་དགེ་སློང་གི་དང་འདྲ་བ་ལ།  ཁྱད་པར་ནི་འདིར་སྡེ་གཉིས་ཀའི་དགེ་འདུན་དགོས་པས་ཡུལ་དབུས་སུ་དགེ་སློང་བཅུ།  དགེ་སློང་མ་བཅུ་གཉིས་ཏེ་ཉི་ཤུ་
རྩ་གཉིས།  མཐའ་འཁོབ་ཏུ་དགེ་སློང་ལྔ།  དགེ་སློང་མ་དྲུག་སྟེ་བཅུ་གཅིག་དགོས་ལ།  གསང་སྟེ་སྟོན་པའི་འོག་ཏུ་ཚངས་སྤྱོད་ལ་ཉེར་གནས་ཀྱི་སློབ་དཔོན་མས་བསྒྲུབ་བྱ་ལ་བར་ཆད་དྲིས་ཏེ་གསོལ་བ་བཏབ་ནས་གསོལ་བ་དང་གཉིས་ཀྱི་ལས་ཀྱིས་ཚངས་སྤྱོད་ལ་
ཉེར་གནས་ཀྱི་སྡོམ་པ་སྦྱིན་དགོས་སོ། །ཆོས་གོས་སྦྱིན་པའི་སྐབས་སུ་སྔར་གྱི་གསུམ་པོའི་སྟེང་དུ་རྔུལ་གཟན་དང་།  ཤིང་ང་དཔུང་ཆད་གཉིས་ཏེ་ལྔ་དགོས་སོ། །གདམས་ངག་བརྗོད་པའི་སྐབས་སུ་གནས་ཤིང་དྲུང་པ་མི་བརྗོད་པ་དང་།  ལྟུང་བར་འགྱུར་བའི་རྗེས་
9-3-25b


སུ་ལྕི་བའི་ཆོས་བརྒྱད་བརྗོད་པ་སྟེ་མདོ་རྩར་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་མ་ཐོབ་པར་བསྙེན་པར་རྫོགས་པར་མི་འགྱུར་རོ། །གསང་སྟེ་སྟོན་པའི་འོག་ཏུ་དགེ་འདུན་གྱིས་དེ་སྦྱིན་པར་བྱའོ། །བར་ཆད་དྲིས་ནས་སོ། །གསོལ་བ་བྱས་ནས་སོ། །
ཆོས་གོས་དག་ནི་ལྔ་ཉིད་དོ། །གནས་རྣམས་ལ་ཤིང་དྲུང་ཉིད་མ་གཏོགས་སོ། །ལྟུང་བར་འགྱུར་བ་རྣམས་ལ་བརྒྱད་ཉིད་དོ། །ལྕི་བའི་ཆོས་རྣམས་བརྗོད་པར་བྱའོ། །ལྟུང་བར་འགྱུར་བ་དང་།  དགེ་སློང་བྱེད་པའི་བར་སྐབས་སུའོ་ཞེས་གསུངས་སོ། །
ལྕི་བའི་ཆོས་རྣམས་ནི་མེ་ཏོག་ཕྲེང་རྒྱུད་ལས།  ཚུལ་འཆལ་དགེ་སློང་མིན་པར་ནི། །མི་གླེང་ཁྲོ་བ་ཉིད་ཀྱང་ངོ་། །དགེ་སློང་རྣམས་ལས་འདི་བསྙེན་རྫོགས། །དེ་ལ་ཟླ་ཕྱེད་གདམས་ངག་གསོལ། །དགེ་སློང་བཅས་གནས་དབྱར་གནས་ནས། །
ཚོགས་གཉིས་དང་ནི་དགག་དབྱེ་བྱ། །ལྕི་བའི་ཆོས་ལས་འདས་ནས་ནི། །ཟླ་ཕྱེད་ཚོགས་གཉིས་མགུ་བྱས་ཏེ། །བསྙེན་པར་རྫོགས་པར་གསར་བུ་ལ། །དགེ་སློང་མ་ཡིས་ཕྱག་བྱའོ། །ལྕི་བའི་ཆོས་བརྒྱད་འདི་དག་ནི། །དགེ་སློང་མ་ལ་གསུངས་
པ་ཡིན། །ཞེས་གསུངས་སོ། །འདིར་སྡེ་སྣོད་ལ་སྦྱངས་པར་གྲགས་པ་འགའ་ཞིག་གིས་ལྕི་བའི་ཆོས་བརྒྱད་ལ་དགེ་སློང་མའི་ཕམ་པ་བརྒྱད་བགྲངས་འདུག་པ་ནི་ཡི་གེ་པས་ནོར་བར་གྱུར་ཅིག །གཉིས་པ་ཐེག་ཆེན་སོ་ཐར་ལེན་པའི་ཆོ་ག་ལ་ཆོ་ག་ཐུན་
མོང་བའི་སོ་ཐར་རིས་བརྒྱད་ནི་བསམ་པ་སེམས་བསྐྱེད་ཀྱིས་ཟིན་པ་མ་གཏོགས་ཆོ་ག་ནི་ཉན་ཐོས་དང་ཁྱད་མེད་དུ་དགོས་ཏེ།  ཆོ་ག་སངས་རྒྱས་སྤྱོད་ཡུལ་ཡིན། །ཞེས་པ་ལྟར་སངས་རྒྱས་ཀྱི་གསུངས་པ་གཅིག་དགོས་ལ་ཉན་ཐོས་ཀྱི་གཞུང་ལས་བཤད་པ་ལས་
9-3-26a


གཞན་པའི་ཆོ་གའི་ལག་ལེན་མི་སྣང་བའི་ཕྱིར་རོ། །དོན་ཡོད་ཞགས་པའི་རྟོགས་པ་ལས་བཤད་པའི་གསོ་སྦྱོང་ནི་སྐུ་གཟུགས་ཀྱི་མདུན་དུ་རང་ཉིད་ཀྱིས་ལེན་པར་བཤད་དོ། །གཉིས་པ་བྱང་སེམས་ཀྱི་སྡོམ་པ་ལེན་པའི་ཆོ་ག་
ལ་དབུ་མ་ལུགས་དང་།  སེམས་ཙམ་ལུགས་གཉིས་ལས།  དང་པོ་ནི།  མགོན་པོ་འཇམ་པའི་དབྱངས་ནས་འཕགས་པ་ཀླུ་སྒྲུབ་ཡབ་སྲས་ལ་བརྒྱུད་དེ།  རྒྱལ་སྲས་ཞི་བ་ལྷའི་ཕྱག་སྲོལ་ཇོ་བོ་པུཎྱ་ཤྲཱི་ལས་བྱུང་བ་རྗེ་བཙུན་ས་སྐྱ་པ་ཡབ་སྲས་ཀྱི་ཕྱག་
ལེན་དུ་མཛད་པ་དེ་ཡིན་ལ།  གཉིས་པ་ནི།  མགོན་པོ་བྱམས་པ་ནས་ཐོགས་མེད་སྐུ་མཆེད་ལ་བརྒྱུད་དེ་སློབ་དཔོན་ཙནྟྲ་གོ་མིའི་ཕྱག་སྲོལ་ཇོ་བོ་རྗེ་དཔལ་ལྡན་ཨ་ཏི་ཤ་ལས་བྱུང་བ་དགེ་བའི་བཤེས་གཉེན་བཀའ་གདམས་པ་རྣམས་ཀྱི་ཕྱག་ལེན་དུ་མཛད་པ་དེ་
ཡིན་ནོ། །དེ་ལ་ལུགས་དང་པོ་ནི་འཕགས་པ་ཀླུ་སྒྲུབ་ཀྱི་སེམས་བསྐྱེད་ཀྱི་ཆོ་ག །ཛེ་ཏ་རི་དགྲ་ལས་རྣམ་རྒྱལ་གྱི་ཡི་དམ་བླང་བའི་ཆོ་ག། སློབ་དཔོན་ཞི་བ་ལྷའི་སྤྱོད་འཇུག་རྣམས་ལས་བྱུང་བ་ཆོས་རྗེ་ས་སྐྱ་པཎྜི་ཏའི་སེམས་བསྐྱེད་ཀྱི་ཆོ་ག་ཆེན་མོར་བཀོད་པ་ལས་
ལག་ལེན་ཞིབ་ཏུ་ཤེས་པར་བྱ་ཞིང་།  ལུགས་གཉིས་པ་ནི་བྱང་ས་དང་སྡོམ་པ་ཉི་ཤུ་པ་ལས་འབྱུང་བ་རྗེ་བཙུན་གྲགས་པ་རྒྱལ་མཚན་གྱི་སྡོམ་པ་ཉི་ཤུ་པའི་ཊཱི་ཀར་བཤད་པ་ལས་ཞིབ་ཏུ་ཤེས་པར་བྱ་སྟེ་འདིར་ཡི་གེ་མང་དུ་དོགས་པས་མ་བཀོད་དོ། །འོ་ན་ལུགས་གཉིས་
པོ་ལ་ཁྱད་པར་ཅི་ཡོད་ཅེ་ན་ཆོས་རྗེ་ས་སྐྱ་པཎྜི་ཏའི་སེམས་བསྐྱེད་ཀྱི་ཆོ་ག་དང་བདག་ཉིད་ཆེན་པོ་དེའི་གསུང་སྒྲོས་ལྷོ་པ་ཐམས་ཅད་མཁྱེན་པ་རིན་ཆེན་དཔལ་གྱིས་བྲིས་པའི་སྤྱོད་འཇུག་གི་ཊཱི་ཀ་ལས་འབྱུང་བ་ལྟར་བཤད་པར་བྱ་སྟེ།  དེ་ལ་བླང་བའི་ཡུལ་དང་ལེན་པའི་
9-3-26b


གང་ཟག་གི་ཁྱད་པར་ནི་འོག་ཏུ་འཆད་ཅིང་ཆོ་ག་ལ་སྦྱོར་བའི་ཁྱད་པར་ནི་དབུ་མ་པ་རྣམས་ཀྱིས་སྤྱོད་འཇུག་ལས་འབྱུང་བ་ལྟར།  མཆོད་པ་འབུལ་བ་དང་།  སྐྱབས་སུ་འགྲོ་བ་དང་།  སྡིག་པ་བཤགས་པ་དང་།  རྗེས་སུ་ཡི་རང་བ།  ཆོས་ཀྱི་འཁོར་ལོ་
བསྐོར་བར་བསྐུལ་བ།  མྱ་ངན་ལས་མི་འདའ་བར་གསོལ་བ་འདེབས་པ།  བསྔོ་བ་སྟེ་ཡན་ལག་བདུན་དུ་མཛད་ལ།  སེམས་ཙམ་པ་རྣམས་ཀྱིས་ནི་སྡོམ་པ་ཉི་ཤུ་པ་ལས།  ཕྱོགས་བཅུའི་སངས་རྒྱས་ཐམས་ཅད་ལ། །གུས་པས་ཕྱག་འཚལ་ཅི་
ནུས་མཆོད། །ཅེས་གསུངས་པ་ལྟར་ཕྱག་འཚལ་བ་དང་།  མཆོད་པ་འབུལ་བ་གཉིས་བྱེད་ཀྱི་ལྷག་མ་རྣམས་མི་བྱེད་དོ། །དེ་ལྟར་ཡན་ལག་བདུན་པ་བྱེད་མི་བྱེད་ཀྱི་ཁྱད་པར་ཊཱི་ཀ་གསུང་སྒྲོས་མ་ལས།  དབུ་མ་ལུགས་ཀྱི་སེམས་བསྐྱེད་ནི་ཤན་པ་
ལ་སོགས་པ་སོ་ཐར་གྱི་སྡོམ་པས་མ་བསྡོམས་པ་ལ་ཡང་སྐྱེ་བའི་དབང་དུ་བྱས་ནས་དེ་དག་གི་རང་བཞིན་གྱི་ཁ་ན་མ་ཐོ་བ་ཚབ་ཆེ་བ་སྦྱངས་ནས་སྡོམ་པ་སྐྱེ་བའི་ཆེད་དུ་ཡན་ལག་བདུན་པ་མཛད་པ་ཡིན་ལ་སེམས་ཙམ་ལུགས་ཀྱི་སེམས་བསྐྱེད་སྐྱེ་བ་ལ་སོ་ཐར་གྱི་
སྡོམ་པས་རྒྱུད་བསྡམས་པ་སྔོན་དུ་སོང་བའི་དབང་དུ་བྱས་ནས་ཚོགས་སོགས་པའི་ཡན་ལག་ཕྱག་འཚལ་བ་དང་།  མཆོད་པ་འབུལ་བ་ཙམ་བྱེད་ཀྱི་སྡིག་པ་བཤགས་པ་སོགས་མི་མཛད་པར་གསུངས་སོ། །གཞན་ཡང་དབུ་མ་པ་རྣམས་ཀྱིས་ནི་བར་ཆད་དྲི་བ་
མི་མཛད་ལ།  སེམས་ཙམ་པ་རྣམས་ཀྱིས་ནི་བྱང་ཆུབ་སེམས་དཔའ་ཡིན་ནམ།  བྱང་ཆུབ་ཏུ་སྨོན་ལམ་བཏབ་བམ།  བྱང་ཆུབ་སེམས་དཔའི་སྡེ་སྣོད་ཀྱི་མ་མོ་ཤེས་སམ།  ཞེས་སོགས་བར་ཆད་དྲི་བར་མཛད་དོ། །དངོས་གཞིའི་ཁྱད་པར་ལ།  དབུ་མ་
9-3-27a


པ་རྣམས་ཀྱིས་ནི་སྨོན་འཇུག་གཉིས་པོ་སྟབས་གཅིག་ཏུ་ལེན་ལ།  སེམས་ཙམ་པ་རྣམས་ཀྱིས་ནི་ཐོག་མར་སྨོན་པ་བླངས་ནས་དེའི་རྗེས་སུ་བྱང་ཆུབ་སེམས་དཔའི་སྡེ་སྣོད་བསླབས་ཏེ་བསླབ་བྱ་རྣམས་ཉམས་འོག་ཏུ་ཚུད་པར་
བྱས་ནས་བསྒྲུབ་པར་ནུས་ན་འཇུག་སྡོམ་ལེན་ནོ། །མཇུག་གི་ཆོ་ག་ལ་དབུ་མ་པ་རྣམས་ཀྱིས་ནི། དེང་དུས་བདག་ཚེ་འབྲས་བུ་ཡོད། །ཅེས་སོགས་རང་དགའ་བ་སྒོམ་པ་དང་།  བདག་གིས་དེ་རིང་སྐྱོབ་པ་ཐམས་ཅད་ཀྱི། །ཅེས་སོགས་གཞན་དགའ་བ་
སྒོམ་དུ་འཇུག་པ་མཛད་ལ།  སེམས་ཙམ་པ་རྣམས་ཀྱིས་མཁྱེན་པར་གསོལ་བ་མཛད་དེ།  འདི་ལྟར་ནོད་པའི་བྱང་ཆུབ་སེམས་དཔའ་དེ་མ་ལངས་པར་དེ་བཞིན་གཤེགས་པའི་སྐུ་གཟུགས་དེ་ཉིད་ཀྱི་སྤྱན་སྔར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་
བཞུགས་ཤིང་འཚོ་སྐྱོང་བ་ཐམས་ཅད་ཀྱི་ཞབས་ལ་གཏུགས་ཏེ་ཐལ་མོ་སྦྱར་ནས་འདི་ལྟར་མཁྱེན་པར་མཛད་དུ་གསོལ་ཞེས་བྱ་སྟེ་བྱང་ཆུབ་སེམས་དཔའ་མིང་འདི་ཞེས་བྱ་བ་འདིས་བྱང་ཆུབ་སེམས་དཔའ་མིང་འདི་ཞེས་བགྱི་བ་ལ་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་
པ་ཡང་དག་པར་བླངས་པ་ལན་གསུམ་གྱི་བར་དུ་མནོས་ལགས་ཏེ།  བདག་མིང་འདི་ཞེས་བགྱི་བ་ནོད་པའི་བྱང་ཆུབ་སེམས་དཔའ་འདིས་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་ལ་དཔང་དུ་གྱུར་པ་ཕྱོགས་བཅུའི་འཇིག་རྟེན་གྱི་ཁམས་མཐའ་
ཡས་མུ་མེད་པ་དག་ཏུ་འཕགས་པའི་ཚོགས་ལྐོག་ཏུ་གྱུར་ཀྱང་དུས་ཐམས་ཅད་དུ་སེམས་ཅན་ཐམས་ཅད་ལྐོག་ཏུ་མ་གྱུར་པའི་ཐུགས་མངའ་བ་མཁྱེན་པ་ཅན་རྣམས་ལ་མཁྱེན་པར་གསོལ་ལོ། །ཞེས་དེ་སྐད་ལན་གཉིས་སམ་གསུམ་གྱི་བར་དུ་བརྗོད་པར་བྱའོ། །ཞེས་
9-3-27b


གསུངས་སོ། །བསླབ་བྱའི་ཁྱད་པར་དང་།  ཕྱིར་བཅོས་ཀྱི་ཁྱད་པར་ནི་འོག་ཏུ་བཤད་པར་བྱའོ། །དེ་ལྟར་ན་ལུགས་འདི་གཉིས་བླང་བའི་ཡུལ།  རྟེན་གྱི་གང་ཟག །ལེན་པའི་ཆོ་ག །བསླབ་བྱ་ཕྱིར་བཅོས་ཀྱི་སྒོ་ནས་སོ་སོར་ཕྱེ་བ་ནི།  རྗེ་བཙུན་ས་
སྐྱ་པ་ཡབ་སྲས་ཀྱི་སྲོལ་དུ་སྣང་ཞིང་།  དེང་སང་ཁོ་བོའི་བླ་མ་རྡོ་རྗེ་འཆང་དང་དབྱེར་མ་མཆིས་པ་ཀུན་དགའ་བཟང་པོ་འབའ་ཞིག་གི་ཕྱག་སྲོལ་དུ་སྣང་ངོ་། །དེ་ལ་ལོག་པར་རྟོག་པ་ཁ་ཅིག་ན་རེ།  བྱང་ས་ནས་འབྱུང་བའི་སེམས་བསྐྱེད་ཀྱི་ཆོ་ག་ལ་སེམས་
ཙམ་ལུགས་དང་སྤྱོད་འཇུག་ནས་འབྱུང་བའི་སེམས་བསྐྱེད་ཀྱི་ཆོ་ག་ལ་དབུ་མ་ལུགས་ཞེས་སོ་སོར་ཕྱེ་བ་མི་འཐད་དེ།  དབུ་སེམས་གཉིས་ཀས་ལུགས་གཉིས་ཀ་ཉམས་སུ་ལེན་དུ་རུང་བའི་ཕྱིར།  ཞེས་ཟེར་བ་ནི་སྨྲ་བས་ཕོངས་པར་ཟད་དེ།  འོ་ན་ཁྱེད་རང་གི་
བླ་མས་ཀླུ་སྒྲུབ་ནས་བརྒྱུད་པའི་ལམ་རིམ་ལ་ཟབ་མོ་ལྟ་བ་དང་།  ཐོགས་མེད་ནས་བརྒྱུད་པའི་ལམ་རིམ་ལ་རྒྱ་ཆེན་སྤྱོད་པ་ཞེས་གཉིས་སུ་ཕྱེ་བ་ཡང་མི་འཐད་པར་ཐལ།  དེ་གཉིས་ཀས་ཀྱང་ལྟ་སྤྱོད་གཉིས་ཀ་ཉམས་སུ་ལེན་དུ་རུང་བའི་ཕྱིར།  གསུམ་ཆར་ཁས།
གཞན་ཡང་བྱམས་མགོན་གྱིས་ཡུམ་དོན་འགྲེལ་པ་ལ་སྦས་དོན་མངོན་རྟོགས་ཀྱི་རིམ་པ་གཏན་ལ་འབེབས་པ་དང་།  ཀླུ་སྒྲུབ་ཀྱིས་ཡུམ་དོན་འགྲེལ་པ་ལ་དངོས་བསྟན་སྟོང་ཉིད་ཀྱི་ལྟ་བ་གཏན་ལ་འབེབས་པ་ཞེས་གཉིས་སུ་དབྱེར་མི་རུང་བར་ཐལ།  དེ་གཉིས་ཀས་ཀྱང་
མངོན་རྟོགས་ཀྱི་རིམ་པ་དང་སྟོང་ཉིད་ཀྱི་ལྟ་བ་གཉིས་ཀ་ཉམས་སུ་ལེན་དུ་རུང་བའི་ཕྱིར་རོ། །ཞེས་སོགས་མཐའ་ཡས་པ་བརྗོད་པར་བྱའོ། །དེས་ན་སེམས་ཙམ་པ་ལྟ་བ་དམའ་བས་དེ་དང་མཐུན་པར་སྤྱོད་པ་ཡང་དོག་པའི་ཆོ་ག་དང་།  དབུ་མ་པ་ལྟ་བ་མཐོ་བས་དེ་དང་
9-3-28a


མཐུན་པར་སྤྱོད་པ་ཡངས་པའི་སེམས་བསྐྱེད་ཀྱི་ཆོ་ག་གཉིས་རྫོགས་པའི་སངས་རྒྱས་ཀྱིས་གསུངས་ཤིང་རྗེས་འཇུག་གི་གྲུབ་ཆེན་རྣམས་ཀྱིས་ཀྱང་དེ་ལྟར་དུ་བཀྲལ་བར་ཤེས་པར་བྱའོ། །གསུམ་པ་སྔགས་སྡོམ་ལེན་པའི་དབང་
བསྐུར་གྱི་ཆོ་ག་ལ་བཞི་སྟེ།  གང་དུ་བསྐུར་བའི་དཀྱིལ་འཁོར།  ཇི་ལྟར་བསྐུར་བའི་ཆོ་ག །དེ་ལྟར་བསྐུར་བའི་དགོས་པ།  དེ་ལས་སྔགས་སྡོམ་ཐོབ་པའི་དུས་བསྟན་པའོ། །དང་པོ་ལ་ཡེ་ཤེས་ཀྱི་དཀྱིལ་འཁོར།  སྤྲུལ་པའི་དཀྱིལ་འཁོར།  ཏིང་
ངེ་འཛིན་གྱི་དཀྱིལ་འཁོར།  རྡུལ་ཚོན་གྱི་དཀྱིལ་འཁོར།  རས་བྲིས་ཀྱི་དཀྱིལ་འཁོར་རྣམས་ལས།  དང་པོ་ནི།  སངས་རྒྱས་རྡོ་རྗེ་འཆང་གིས་རྒྱུད་གསུངས་པའི་ཚེ་འཁོར་རྣམས་ཡེ་ཤེས་ཀྱི་དཀྱིལ་འཁོར་དུ་བཅུག་ནས་དབང་བསྐུར་བའི་ཆེད་དུ་ཡེ་ཤེས་ཀྱི་སྣང་བ་
ལས་གྲུབ་པའི་དཀྱིལ་འཁོར་རོ། །གཉིས་པ་ནི།  ས་ལ་གནས་པའི་འཕགས་པ་རྣམས་དང་།  སོ་སོའི་སྐྱེ་བོ་ལས་དག་པ་རྣམས་ཀྱི་དོན་དུ་སྤྲུལ་པ་མཆོག་གིས་དཀྱིལ་འཁོར་གྱི་འཁོར་ལོ་སྣ་ཚོགས་སུ་སྤྲུལ་པ་སྟེ།  དེ་ལས་གཙོ་བོ་གྲུབ་པའི་ས་ལ་གནས་པ་རྣམས་ཀྱིས་
དབང་བླང་ཞིང་སོ་སྐྱེ་ལས་དག་པ་འགའ་ཞིག་གིས་དབང་བླངས་པས་དེ་མ་ཐག་ཏུ་གྲུབ་པའི་ས་ཐོབ་པ་ཡང་ཡོད་དེ།  དཔལ་ལྡན་ཆོས་སྐྱོང་གིས་བདག་མེད་མའི་སྤྲུལ་པའི་དཀྱིལ་འཁོར་དུ་དབང་བླངས་པ་ལས་ས་དང་པོ་མངོན་དུ་བྱས་པ་བཞིན་ནོ། །གསུམ་པ་ནི།  ཏིང་
ངེ་འཛིན་ལ་བརྟན་པ་ཐོབ་པའི་སོ་སོའི་སྐྱེ་བོའི་རྡོ་རྗེ་སློབ་དཔོན་དང་འཕགས་པའི་གང་ཟག་འགའ་ཞིག་གིས་ལུས་ངག་གི་བྱེད་པ་མེད་པར་ཏིང་ངེ་འཛིན་འབའ་ཞིག་གིས་ས་ཆོག་ནས།  མཇུག་གི་ཆོ་ག་ཚང་བའི་སྒོ་ནས་རྡུལ་ཚོན་གྱི་དཀྱིལ་འཁོར་ཇི་ལྟ་བ་བཞིན་དུ་བཞེངས་པའོ། །
9-3-28b


འདི་ལ་ཏིང་ངེ་འཛིན་བརྟན་མི་བརྟན་གྱི་བྱེ་བྲག་གིས་དཀྱིལ་འཁོར་རང་གིས་ལྟ་ནུས་ཤིང་གཞན་ལ་ཡང་བསྟན་ནུས་པ་དང་།  རང་གིས་ལྟ་ནུས་ཀྱི་གཞན་ལ་བསྟན་མི་ནུས་པ་གཅིག་ཡོད་དོ་ཅེས་བླ་མ་གསུང་ངོ་། །དབང་བསྐུར་བ་ལ་ནི།  གཞན་ལ་བསྟན་ནུས་པ་དགོས་ཏེ་
དཔའ་བོ་རྡོ་རྗེས་འབྲོག་མི་ལོ་ཙཱ་བ་ལ་དབང་བསྐུར་བ་གསུངས་པ་ལྟ་བུའོ། །དེང་སང་བོད་འདིར་རྒྱུད་སྡེ་ལ་བློ་ཁ་མ་ཕྱོགས་པ་མང་དུ་འཚོགས་ནས་མདུན་དུ་ཚོམ་བུའི་དཀྱིལ་འཁོར་གཅིག་བཀོད་དེ་གསང་བ་འདུས་པའི་མཎྜལ་མཆོད་པའི་ཆོ་ག་བོན་པོའི་གཤེན་དབྱངས་
འཐེན་པ་ལྟར་གྱེར་འདོན་དུ་བྱེད་པ་ལ་བསམ་གཏན་སྒྲུབ་མཆོད་དུ་མིང་བཏགས་པ་ནི་གསང་སྔགས་ཀྱི་རྣམ་གཞག་ཚིག་ཙམ་ཡང་རྣ་བའི་བུ་གར་མ་སོང་བ་མཚོན་པར་བྱེད་དེ།  འདི་ལུང་དང་།  རིགས་པ་དང་།  རང་གིས་ཁས་བླངས་པའི་གྲུབ་མཐའ་དང་འགལ་
བ་གསང་སྔགས་སུ་ཁས་བླངས་པའི་ཕྱིར་རོ། །དང་པོ་ནི།  སློབ་དཔོན་ཨ་བྷྱ་ཡས།  སྔར་བཤད་པ་ལྟར་ལུས་ངག་གི་རྩོལ་བ་མེད་པར་ཡིད་འབའ་ཞིག་གིས་དཀྱིལ་འཁོར་བཞེངས་པ་ལ་ཏིང་ངེ་འཛིན་གྱི་དཀྱིལ་འཁོར་དང་།  བསམ་གཏན་གྱི་དཀྱིལ་འཁོར།
དེའི་སྒྲུབ་མཆོད་ལ་ཏིང་ངེ་འཛིན་གྱི་སྒྲུབ་མཆོད་དང་།  བསམ་གཏན་གྱི་སྒྲུབ་མཆོད་དུ་གསུངས་པ་དང་འགལ་ལོ། །གཉིས་པ་ནི།  བསམ་གཏན་གྱི་སྒྲུབ་མཆོད་ཡིན་ན་ལུས་ངག་གི་རྩོལ་བ་མེད་པར་དམིགས་པའི་དོན་ལ་རྩེ་གཅིག་པ་ཞིག་དགོས་ལ།
ཁྱོད་ཀྱི་ཆོ་ག་དེ་ནི་ལུས་ངག་གི་སྤྲོས་པའི་རང་བཞིན་དུ་སྣང་བའི་ཕྱིར་རོ། །གསུམ་པ་ནི།  ཁྱེད་རང་རྣམས་ཀྱིས་ཁས་བླངས་པའི་གསང་སྔགས་ལམ་རིམ་ལས།  ཏིང་ངེ་འཛིན་གྱི་དཀྱིལ་འཁོར་ལས་དང་པོ་པས་སྤྲུལ་མི་ནུས་པར་བཤད་པ་དང་འགལ་ལོ། །
9-3-29a


བཞི་པ་རྡུལ་ཚོན་གྱི་དཀྱིལ་འཁོར་ནི་སོ་སོ་སྐྱེ་བོའི་རྡོ་རྗེ་སློབ་དཔོན་གྱིས་སློབ་མ་སྨིན་པར་བྱེད་པའི་དབང་དུ་མཛད་ནས་རྒྱལ་བ་རྡོ་རྗེ་འཆང་གིས་རྒྱུད་སྡེ་རྣམས་ལས་འདི་རྒྱས་པར་གསུངས་སོ། །དེ་ལ་རྣལ་འབྱོར་དབང་ཕྱུག་བིར་ཝ་
པའི་བཞེད་པས་ལས་དང་པོ་པ་མ་སྨིན་པ་སྨིན་པར་བྱེད་པ་ལ་དབང་གི་མངོན་པར་རྟོགས་པ་བདུན་ལྡན་དགོས་པས་རྡུལ་ཚོན་གྱི་དཀྱིལ་འཁོར་དགོས་པར་བཞེད་དོ། །དེ་ནི་རྗེ་བཙུན་ནཱ་རོ་པ་ཡང་བཞེད་དེ།  དབང་མདོར་བསྟན་གྱི་འགྲེལ་པར་དབང་བདུན་པོ་
འདི་དག་ནི་རྡུལ་ཚོན་གྱི་དཀྱིལ་འཁོར་རྣམ་པར་སྤངས་ནས་གཞན་རས་བྲིས་ལ་སོགས་པར་བསྐུར་བར་བྱ་བ་མ་ཡིན་ནོ། །ཞེས་གསུངས་སོ། །གཞུང་འདིར་ནི་བིར་ཝ་པའི་དགོངས་པ་གཞིར་གཞག་ནས་ལས་དང་པོ་པ་སྨིན་པར་བྱེད་པ་ལ་རྡུལ་ཚོན་གྱི་དཀྱིལ་
འཁོར་དགོས་པར་གསུངས་ཏེ། དེང་སང་གང་ཟག་རབ་འབྲིང་ཀུན། །རྡུལ་ཚོན་གྱི་ནི་དཀྱིལ་འཁོར་དུ། །དབང་བསྐུར་བྱ་བར་གསུངས་མོད་ཀྱི། །གཞན་གྱི་སྨིན་བྱེད་རྒྱུད་ལས་བཀག །ཞེས་གསུངས་སོ། །ལྔ་པ་རས་བྲིས་ཀྱི་དཀྱིལ་
འཁོར་ནི།  སློབ་དཔོན་རྡོ་རྗེ་དྲིལ་བུ་པས།  རི་མོར་གནས་པའི་ལས་དང་ནི། །ཐིག་ལས་ཚོན་དགྱེའི་རིམ་པ་བསྟན། །འགྲོ་བ་འདི་དག་རང་བཞིན་གྱི། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་དང་།  སློབ་དཔོན་ཛཱ་ཡ་སེ་ནས།
རྡུལ་ཚོན་བྲི་བར་མ་ནུས་ན། །དཀྱིལ་འཁོར་དང་མཉམ་རས་ལ་ནི། །ངེས་པར་བཅོམ་ལྡན་ཧེ་རུ་ཀ།  ཕྱག་རྒྱའི་ཚོགས་དང་བཅས་པར་བྲི། །ཞེས་དང་།  སློབ་དཔོན་སྒྲ་གཅན་འཛིན་དཔལ་བཤེས་གཉེན་གྱིས་གསང་བ་འདུས་པའི་དཀྱིལ་འཁོར་གྱི་ཆོ་
9-3-29b


ག་རས་བྲིས་ལ་བརྟེན་ནས་གསུངས་པ་དང་།  སློབ་དཔོན་ཨ་བྷྱ་ཡས་རྡོ་རྗེ་ཕྲེང་བར་བཤད་པའི་དཀྱིལ་འཁོར་རྣམས་རས་བྲིས་དང་རྡུལ་ཚོན་གཉིས་གཉིས་གསུངས་པ་དང་།  རྗེ་བཙུན་རྩེ་མོས་རས་བྲིས་ལ་བརྟེན་པའི་ལུགས་འདི་ནི་བདེ་མཆོག་ཨ་བྷི་
དྷ་ན་ལ་བརྟེན་ནས།  སློབ་དཔོན་རྡོ་རྗེ་དྲིལ་བུ་པ་དང་།  སློབ་དཔོན་དགའ་རབ་རྡོ་རྗེ་ལ་སོགས་པས་གསུངས་ལ་དེང་སང་རྒྱ་གར་ན་ཡང་ཆོ་ག་ཕལ་ཆེར་འདི་ལ་བྱེད་ལ་བླ་མ་གོང་མ་རྣམས་ཀྱང་སྐབས་སྐབས་སུ་ཕྱག་ལེན་འདི་ལ་མཛད་པས།  ལུགས་འདི་ཧ་ཅང་མི་ལེགས་
པ་ཡང་མ་ཡིན་ནོ། །ཞེས་དང་།  རྗེ་བཙུན་གྲགས་པ་རྒྱལ་མཚན་གྱིས་གཞན་ཕན་སྤྱི་ཆིངས་སུ་སྦྱོངས་རྒྱུད་ནས་གསུངས་པའི་དཀྱིལ་འཁོར་བཅུ་གཉིས་ལ་རྡུལ་ཚོན་གྱི་དཀྱིལ་འཁོར་བཅུ་གཉིས།  རས་བྲིས་ཀྱི་དཀྱིལ་འཁོར་བཅུ་གཉིས།  ཏིང་ངེ་འཛིན་
གྱི་དཀྱིལ་འཁོར་བཅུ་གཉིས་གསུངས་པས་འདི་རྣམས་ཀྱི་བཞེད་པ་ལ་རས་བྲིས་ཀྱི་དཀྱིལ་འཁོར་ལ་བརྟེན་ནས་སྨིན་བྱེད་ཀྱི་དབང་བསྐུར་དུ་རུང་བར་བཞེད་དོ། །དེ་ལ་བདག་གི་བླ་མ་ནི་སྔར་རྒྱུད་མ་སྨིན་པ་གསར་དུ་སྨིན་པར་བྱེད་པ་ལ་རྡུལ་ཚོན་གྱི་དཀྱིལ་འཁོར་དགོས་ཤིང་།  དཀྱིལ་
འཁོར་གཅིག་ཏུ་སྨིན་བྱེད་ཀྱི་དབང་ཐོབ་ནས་དཀྱིལ་འཁོར་གཞན་དུ་དབང་བསྐུར་བ་ལ་རས་བྲིས་ལ་བརྟེན་ནས་ཀྱང་རུང་བར་བཞེད་དོ། །གཉིས་པ་ཇི་ལྟར་བསྐུར་བའི་ཆོ་ག་ནི་གསང་བ་སྤྱི་རྒྱུད་ལས།  རྣམ་དཔྱད་དང་པོ་ས་གཞི་གཟུང་། །གཉིས་པ་ལ་ནི་སྟ་གོན་བྱ། །
ནུབ་གསུམ་པ་ལ་འཇུག་པ་ཤིས། །ཞེས་གསུངས་པ་ལྟར་ནུབ་དང་པོ་སའི་ཆོ་ག །གཉིས་པ་སྟ་གོན་གྱི་ཆོ་ག །གསུམ་པ་དངོས་གཞིའི་ཆོ་ག་གསུམ་ལས།  དང་པོ་ལ་རྒྱུད་སྡེ་རྣམས་ལས་ཇི་སྙེད་གསུངས་པ་ཐམས་ཅད།  ས་བརྟག་པ།  ས་བླང་བ།  ས་
9-3-30a


སྦྱང་བ།  ས་བཟུང་བ་དང་བཞིར་འདུས་སོ། །གཉིས་པ་སྟ་གོན་ནི་སཾ་བྷུ་ཊིའི་བརྟག་པ་བདུན་པའི་རབ་བྱེད་བཞི་པ་ལས།  ས་ཡི་ལྷ་མོ་སྟ་གོན་དང་།  རྒྱུད་ཕྱི་མར་ལྷ་སྟ་གོན།  བུམ་པ་སྟ་གོན་གྱི་ཆོ་ག །སློབ་མ་སྟ་གོན་
བཞི་གསུངས་སོ། །གསུམ་པ་དངོས་གཞིའི་ཆོ་ག་ལ་དཀྱིལ་འཁོར་བྲི་ཞིང་རྒྱན་དགྲམ་པ།  སྒྲུབ་ཅིང་མཆོད་པ།  བདག་ཉིད་འཇུག་ཅིང་དབང་བླང་བ།  སློབ་མ་འཇུག་ཅིང་དབང་བསྐུར་བ་དང་བཞི་ལས།  དང་པོ་ལ་ཐིག་གིས་བྲི་བ་དང་།  ཚོན་གྱིས་བྲི་བ་
གཉིས་ལས།  དང་པོ་ལ་ཡང་རྒྱུད་སྡེ་ཕལ་ཆེར་གྱི་དངོས་བསྟན་དུ་གྱུར་པ་ཐིག་སྐུད་ཆ་ཕྲན་དྲུག་ཅུ་རེ་བཞི་པའི་ཕྱོགས་དང་།  ཨ་བྷྱ་ཡ་རྗེས་འབྲང་དང་བཅས་པའི་བཞེད་པ་ཆ་ཕྲན་དགུ་བཅུ་གོ་དྲུག་པའི་ཕྱོགས་གཉིས་སོ། །ཚོན་གྱིས་བྲི་བ་ལ་སྐུ་ཕྱག་རྒྱ་
ཆེན་པོ་བྲི་བ།  གསུང་ཡིག་འབྲུ་བྲི་བ།  ཐུགས་ཕྱག་མཚན་བྲི་བ།  དེ་ཡང་མ་ནུས་ན།  མཚན་མ་ཙམ་བྲི་བ་སྟེ་བཞིར་གསུངས་སོ། །གཉིས་པ་ལ་སྒྲུབ་པ་དང་།  མཆོད་པ་གཉིས་ལས།  དང་པོ་ལ་བདག་མདུན་ཐ་དད་པའི་སྒྲུབ་ཚུལ་དང་།  ཐ་མི་དད་
པའི་སྒྲུབ་ཚུལ་གཉིས་སོ། །གཉིས་པ་ལ་བྱེ་བྲག་ཇི་སྙེད་ཅིག་གསུངས་པ་ཐམས་ཅད་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་བཞིར་འདུས་སོ། །གསུམ་པ་བདག་ཉིད་འཇུག་ཅིང་དབང་བླང་བ་ནི།  སཾ་བྷུ་ཊིར།  སྔགས་ཀྱི་ལམ་གྱི་རྗེས་བཙལ་བས། །གང་ཚེ་
མཁས་པས་དབང་བསྐུར་བ། །སངས་རྒྱས་ཀུན་གྱི་མངོན་སུམ་དུ། །དཀྱིལ་འཁོར་བདེ་བར་གཤེགས་ནས་སུ། །འཇིག་རྟེན་ཁམས་ནི་མཐའ་ཡས་བདག །བློ་དང་ལྡན་པས་དེ་བཞིན་བླང་། །རང་བྱིན་བརླབས་པའི་གནས་ཐོབ་ནས། །དམ་ཚིག་
9-3-30b


ཉམས་པས་འཇིག་པ་ཡི། །རྫོགས་སངས་རྒྱས་ཀྱི་དོན་དམ་ལས། །སྔགས་ཀྱི་ལམ་ནི་དེ་བཞིན་གསུངས། །ཞེས་གསུངས་པའི་དགོངས་པར་མཛད་ནས།  སློབ་མ་ལ་དབང་བསྐུར་བའི་སྔོན་དུ་སློབ་མ་ལ་ཇི་ཙམ་བསྐུར་བ་རང་ཉིད་ཀྱིས་བདག་འཇུག་གི་
ཚུལ་དུ་ལེན་པ་ནི་རྒྱ་བོད་ཀྱི་མཁས་གྲུབ་རྣམས་ཀྱི་ཕྱག་ལེན་དུ་སྣང་ངོ་། །བཞི་པ་སློབ་མ་འཇུག་ཅིང་དབང་བསྐུར་བ་ལ་འཇུག་པའི་ཆོས་རྣམས་སྔོན་དུ་སོང་ནས་དབང་གི་དངོས་གཞི་ལ་ཡེ་ཤེས་ཐིག་ལེའི་རྒྱུད་ལས།  ཆུ་ཡི་དབང་བསྐུར་ཅོད་པན་དག །བྱ་
བའི་རྒྱུད་ལ་རབ་ཏུ་གྲགས། །རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་ལ་རབ་ཏུ་གསལ། །ཕྱིར་མི་ལྡོག་པ་ཡི་ནི་དབང་། །རྣལ་འབྱོར་རྒྱུད་དུ་གསལ་བར་ཕྱེ། །དེ་བཞིན་དྲུག་གི་བྱེ་བྲག་དབང་། །དེ་ནི་སློབ་དཔོན་དབང་ཞེས་བྱ། །རྣལ་
འབྱོར་བླ་མ་ཡི་ནི་མཚན། །གསང་བ་ཡི་ནི་དབང་རྒྱལ་བཤད། །ཤེས་རབ་ཡེ་ཤེས་བླ་ན་མེད། །བཞི་པ་དེ་ཡང་དེ་བཞིན་ནོ། །ཞེས་གསུངས་པ་ལྟར་རོ། །རྒྱུད་སྡེ་བཞི་ལ་དབང་བསྐུར་གྱི་བབས་མི་འདྲ་བ་བཞི་ཡོད་པ་ལས།  བུམ་དབང་ལ་སོགས་
པའི་དབང་རྣམ་པ་བཞི་ནི་རྣལ་འབྱོར་བླ་མེད་ཁོ་ནའི་ཁྱད་ཆོས་ཡིན་པས།  དེ་འཆད་པ་ལ་གསུམ་སྟེ་དབང་བཅུ་བཞིར་དབྱེ་བ།  དེ་བཅུ་གཅིག་ཏུ་བསྡུ་བ།  དེ་བཞིར་བསྡུ་བའོ། །དང་པོ་ནི་བཤད་རྒྱུད་རྡོ་རྗེ་ཕྲེང་བ་ལས།  དང་པོའི་དབང་ནི་གཙོ་བོ་སྟེ། །གཉིས་
པ་གསང་བའི་མིང་ཅན་ནོ། །གསུམ་པ་ཀུན་ནས་སྦྱོར་བ་སྟེ། །བཞི་པ་དོན་ནི་དམ་པའོ། །གཙོ་བོའི་དབྱེ་བ་བཅུ་གཅིག་སྟེ། །བཅུ་གཉིས་པ་ནི་གསང་བའོ། །བཅུ་གསུམ་པ་ནི་ཡང་དག་སྦྱོར། །བཅུ་བཞི་པ་ནི་དོན་དམ་སྟེ། །དབང་བསྐུར་རེ་རེ་ས་རེའོ། །
9-3-31a


རྣམ་པ་གསུམ་ནི་རྒྱུ་ཡི་དབང་། །བཞི་པ་འབྲས་བུར་ཤེས་པར་བྱ། །ཞེས་པ་དང་།  སྡོམ་འབྱུང་ལས།  རིགས་ཀྱི་ལྷར་ངེས་མེ་ཏོག་ཕྲེང་། །ཆུ་དང་ཅོད་པན་རྡོ་རྗེ་དང་། །དྲིལ་བུ་དང་ནི་མིང་གི་དབང་། །བདེར་གཤེགས་
ལྔ་ཡི་བདག་ཉིད་དབང་། །བརྟུལ་ཞུགས་དང་ནི་ལུང་བསྟན་ཉིད། །རྗེས་གནང་དང་ནི་དབུགས་དབྱུང་དང་། །ཕྱིར་མི་ལྡོག་པ་སློབ་དཔོན་དབང་། །བུམ་པ་ལས་ནི་བྱུང་བ་འོ། །གཉིས་པ་གསང་བའི་མཆོག་ཡིན་ཏེ། །གསུམ་པ་ཤེས་རབ་ཡེ་ཤེས་ཡིན། །
བཞི་པ་དེ་ལྟར་ཡང་དེ་ནི། །ཞེས་དང་ཕྱག་ཆེན་ཐིག་ལེ་ལས།  དབང་བསྐུར་བ་ཡི་རིམ་པ་ལས། །འབྲས་བུ་ཡི་ནི་གསུམ་དུ་བསྟན། །དང་པོ་སློབ་དཔོན་དབང་དང་གཅིག །གཉིས་པ་གསང་བའི་དབང་ནི་མཆོག །ཤེས་རབ་ཡེ་ཤེས་བཅུ་གསུམ་པ། །
དེ་ལྟར་དེ་ནི་བཅུ་བཞི་པའོ། །དབང་རེ་ལ་ནི་ས་རེའོ། །དེ་རྣམས་ས་ཡི་དབང་ཕྱུག་བདག །ཞེས་པ་དང་།  སངས་རྒྱས་ཐོད་པའི་རྒྱུད་ལས།  གསང་བ་སྤྱི་ཡི་ལྔ་དང་ནི། །བདུན་དང་བཅུ་བཞིར་བཤད་པ་དང་། །གཉིས་ཀར་བཅུ་བཞིར་འདུས་པ་ཡི། །
ཞེས་དང་།  དྲིལ་བུ་དཀྱིལ་ཆོག་ལས།  སློབ་དཔོན་དབང་སོགས་དབྱེ་བ་ཡིས། །དབང་བསྐུར་རྣམ་པ་བཞིར་བཤད་དེ། །ཆུ་ཡི་དབང་སོགས་དབྱེ་བ་ཡིས། །བཞི་པོ་དེ་ཡང་བཅུ་བཞིའོ། །ཞེས་གསུངས་སོ། །གཉིས་པ་དེ་བཅུ་གཅིག་ཏུ་བསྡུ་བ་ནི། 
བུམ་དབང་ལ་བརྒྱད་དུ་ཕྱེ་ནས་དབང་གོང་མ་གསུམ་དང་བཅུ་གཅིག་ཏུ་བྱེད་པའི་ལུགས་དང་།  བྱིས་པ་འཇུག་པའི་དབང་བདུན་དང་།  དབང་གོང་མ་བཞི་སྟེ་བཅུ་གཅིག་ཏུ་བྱེད་པའི་ལུགས་གཉིས་ལས། །དང་པོ་ནི་རྡོ་རྗེ་གུར་ལས།  དང་པོ་ཆུ་ཡི་དབང་བསྐུར་ཡིན། །
9-3-31b


གཉིས་པ་ཅོད་པན་དབང་ཡིན་ལ། །གསུམ་པ་དར་དཔྱངས་དབང་བསྐུར་ཡིན། །བཞི་པ་རྡོ་རྗེ་དྲིལ་བུ་འོ། །ལྔ་པ་རིགས་ཀྱི་བདག་པོ་སྟེ། །མིང་གི་དབང་བསྐུར་དྲུག་པ་ཡིན། །སངས་རྒྱས་བཀའ་བསྒོ་བདུན་པ་སྟེ། །བརྒྱད་པ་བུམ་པའི་དབང་བསྐུར་ཡིན། །
དགུ་པ་གསང་བའི་དབང་བསྐུར་ཡིན། །ཤེས་རབ་ཡེ་ཤེས་བཅུ་པ་ཡིན། །དེ་ཉིད་རྡོ་རྗེ་སྦྱོར་བ་དང་། །བརྟུལ་ཞུགས་ཐམས་ཅད་བྱིན་ནས་སུ། །བདག་ཉིད་སྟོན་པས་ལུང་བསྟན་བྱ། །ཆོ་ག་དེ་ལྟར་ཁྱོད་ལ་བཤད། །ཅེས་དང་།  ཡེ་ཤེས་ཐིག་ལེ་
ལས།  ཆུ་དང་དབུ་རྒྱན་རྡོ་རྗེ་དང་། །དྲིལ་བུ་མིང་དང་བརྟུལ་ཞུགས་དང་། །ལུང་བསྟན་པ་དང་སྐྱབས་སྦྱིན་དང་། །སྔགས་དང་ཕྱག་རྒྱ་ཡེ་ཤེས་སོ། །རྣལ་འབྱོར་རྒྱུད་ལ་མོས་པ་ལ། །དབང་བརྒྱད་ཕྱེ་ལ་སྦྱིན་པར་བྱ། །རྣལ་འབྱོར་བླ་མ་ལ་
མོས་ལ། །བཅུ་གཅིག་བདག་ཉིད་སྦྱིན་པར་བྱ། །ཞེས་གསུངས་སོ། །གཉིས་པ་ནི།  དང་པོའི་སངས་རྒྱས་མཆོག་གི་རྒྱུད་ལས།  ཆུ་དང་ཅོད་པན་དར་དང་ནི། །རྡོ་རྗེ་དྲིལ་བུ་བརྟུལ་ཞུགས་དང་། །མིང་རྒྱལ་དབང་ནི་རྣམ་པ་བདུན། །བྱིས་
པ་རྣམས་ནི་བཟུང་ཕྱིར་ཡིན། །གསུམ་པོ་འཇིག་རྟེན་ཀུན་རྫོབ་དང་། །བཞི་པ་དོན་གྱི་དམ་པ་འོ། །བུམ་པ་གསང་བའི་དབང་དང་ནི། །ཤེས་རབ་ཡེ་ཤེས་ཞེས་བྱ་དང་། །དེ་ནས་ཤེས་རབ་ཆེན་པོ་ཡི། །ཡེ་ཤེས་ཞེས་བྱ་རྫོགས་པ་དག །འགྱུར་དང་
མི་འགྱུར་བར་ཆད་ཅན། །བར་ཆད་མེད་པ་དེ་ལས་གཞན། །ཞེས་གསུངས་སོ། །དེ་ལྟར་ན་སྔར་བཤད་པའི་དབང་བཅུ་བཞི་པོ་ཡང་འདིར་བཤད་པའི་བཅུ་གཅིག་ཏུ་འདུས་ཏེ།  སྔ་མ་ནི་བུམ་དབང་ལ་བཅུ་གཅིག་ཏུ་ཕྱེ་ཞིང་།  ཕྱི་མ་ནི་བུམ་དབང་ལ་བདུན་དུ་
9-3-32a


ཕྱེ་བ་ཙམ་དུ་ཟད་པའི་ཕྱིར་རོ། །གསུམ་པ་དེ་བཞིར་བསྡུ་བ་ནི་བརྟག་གཉིས་ལས།  སློབ་དཔོན་གསང་བ་ཤེས་རབ་དང་། །བཞི་པ་དེ་ཡང་དེ་བཞིན་ཏེ། །དབང་ནི་བཞི་ཡི་གྲངས་ཀྱིས་ནི། །དགའ་བ་ལ་སོགས་
རིམ་ཤེས་བྱ། །ཞེས་པ་དང་།  དགོད་པ་དག་པ་སློབ་དཔོན་ཉིད། །ལྟ་བ་གསང་བ་དེ་བཞིན་ཏེ། །ལག་བཅངས་ལ་ནི་ཤེས་རབ་ཉིད། །གཉིས་གཉིས་འཁྱུད་པ་དེ་ཡང་ཉིད། །སེམས་ཅན་རྣམས་ཀྱིས་དངོས་གྲུབ་ཕྱིར། །དབང་ནི་རྣམ་པ་
བཞི་ཞེས་བཤད། །ཅེས་པ་དང་།  གསང་བ་འདུས་པའི་རྒྱུད་ཕྱི་མ་ལས།  དབང་ནི་རྣམ་པ་བཞི་དག་ཏུ། །རྒྱུད་འདི་ལས་ནི་རབ་ཏུ་བསྒྲགས། །བུམ་པའི་དབང་ནི་དང་པོ་སྟེ། །གཉིས་པ་གསང་བ་ཞེས་བྱར་བརྗོད། །ཤེས་རབ་ཡེ་ཤེས་
གསུམ་པ་ཡིན། །དེ་ནི་དེ་ལྟར་ཡང་བཞི་པ། །ཞེས་གསུངས་སོ། །དེས་ན་སྔར་བཤད་པའི་དབང་བཅུ་བཞི་དང་བཅུ་གཅིག་པོ་རྣམས་ཀྱང་བུམ་དབང་གིས་དབྱེ་བསྡུ་ཙམ་དུ་ཟད་པས་རྣལ་འབྱོར་བླ་མེད་ཀྱི་དབང་ཐམས་ཅད་བཞི་པོ་འདིར་མ་འདུས་པ་མེད་
དོ། །དེའི་རྒྱུ་མཚན་ཡང་སྦྱང་བྱ་དྲི་མ་བཞི་ཡིན་པ་དང་།  བསྒོམ་བྱ་ལམ་བཞི་ཡིན་པ་དང་།  ཐོབ་བྱ་འབྲས་བུ་བཞི་ཡིན་པ་སོགས་རྣལ་འབྱོར་དབང་ཕྱུག་གི་མན་ངག་བརྒྱུད་པ་ལས་ཤེས་པར་བྱའོ། །གསུམ་པ་དེ་ལྟར་བསྐུར་བའི་དགོས་པ་ལ་གཉིས་
ལས།  དང་པོ་དབང་མ་བསྐུར་བའི་ཉེས་དམིགས་ནི་དམ་པ་དང་པོ་ལས།  དབང་བསྐུར་མེད་པར་རྒྱུད་འཆད་དང་། །ཟབ་མོའི་དེ་ཉིད་སྒོམ་བྱེད་པ། །དེ་དོན་ལེགས་པར་ཤེས་ན་ཡང་། །དམྱལ་བར་འགྱུར་གྱི་གྲོལ་བ་མེད། །ཅེས་དང་།  བཤད་རྒྱུད་རྡོ་རྗེ་ཕྲེང་
9-3-32b


བ་ལས།  ཡང་དག་དབང་བསྐུར་གྱིས་དབེན་ན། །སྒྲུབ་པོས་རྒྱུད་ཀྱི་དོན་ཤེས་ཀྱང་། །སློབ་དཔོན་སློབ་མ་མཚུངས་པར་ནི། །མི་ཟད་དམྱལ་བ་ཆེན་པོར་འགྲོ། །ཞེས་དང་།  སངས་རྒྱས་ཐོད་པའི་གསུམ་པ་ལས།  དཔེར་ན་བུ་ཚ་མེད་པའི་ཁྱིམ། །
ཤི་བ་ཙམ་གྱིས་སྟོང་པ་ཉིད། །དེ་བཞིན་དབང་དང་བྲལ་ན་ནི། །ཡེ་ཤེས་ཀུན་གྱིས་སྟོང་པ་ཉིད། །དཔེར་ན་པི་ཝང་སྦྱོར་ཚོགས་ཀུན། །རྒྱུད་དང་བྲལ་ན་རྡུང་མི་ནུས། །དེ་བཞིན་དབང་དང་བྲལ་བ་ནི། །སྔགས་དང་བསམ་གཏན་འགྲུབ་མི་འགྱུར། །རྨོངས་
པ་གང་གི་དབང་མེད་པར། །བདག་ནི་དབང་བསྐུར་ཞེས་སྨྲ་བ། །ཇི་སྙེད་སངས་རྒྱས་བཞུགས་ཀྱི་བར། །སློབ་མར་བཅས་ཏེ་དམྱལ་བར་འགྲོ། །ཞེས་དང་།  བདེ་མཆོག་ལས།  དཀྱིལ་འཁོར་འདི་ནི་མ་མཐོང་བར། །རྣལ་འབྱོར་པ་ནི་དངོས་གྲུབ་
འདོད། །མཁའ་ལ་ཁུ་ཚུར་གྱིས་བརྡེག་དང་། །རྨོངས་པ་ཕུབ་མ་བརྡུང་དང་མཚུངས། །ཞེས་དང་།  སངས་རྒྱས་མཉམ་སྦྱོར་ལས།  དཀྱིལ་འཁོར་དུ་ནི་མ་ཞུགས་ཤིང་། །དམ་ཚིག་རྣམས་ནི་སྤངས་པ་དང་། །གསང་བའི་དེ་ཉིད་མི་ཤེས་པས། །
བསྒྲུབས་ཀྱང་ཅི་ཡང་མི་འགྲུབ་བོ། །ཞེས་དང་།  རྡོ་རྗེ་གུར་ལས།  དཀྱིལ་འཁོར་དུ་ནི་མ་ཞུགས་དང་། །དབང་བསྐུར་མེད་པའི་རྣལ་འབྱོར་པ། །གང་གིས་རབ་གནས་མ་མཐོང་ཞིང་། །གང་གིས་སྦྱིན་བསྲེག་མ་བྱས་ན། །འཇིག་རྟེན་འདི་དང་
གཞན་དུ་ཡང་། །དེ་ལ་དངོས་གྲུབ་མཆོག་ཉིད་མེད། །ཞེས་པ་དང་།  ཕྱག་ཆེན་ཐིག་ལེ་ལས།  དབང་མེད་ན་ནི་དངོས་གྲུབ་མེད། །བྱེ་མ་བཙིར་ཡང་མར་མེད་བཞིན། །གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་འཆད་བྱེད་པ། །
9-3-33a


སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་སྐྱེ། །ཞེས་དང་།  གཞུང་འདིར་ཡང་།  དབང་དང་རིམ་གཉིས་མི་ལྡན་པས། །རྡོ་རྗེ་ཐེག་པའི་བསྟན་པ་མིན། །ཞེས་པ་དང་།  དགེ་སློང་
སྡོམ་པ་མེད་པ་དང་།  རྒྱལ་སྲས་སེམས་བསྐྱེད་མ་ཐོབ་དང་། །སྔགས་པ་དབང་བསྐུར་མེད་པ་གསུམ། །སངས་རྒྱས་བསྟན་པའི་ཆོམ་རྐུན་ཡིན། །ཞེས་གསུངས་སོ། །གཉིས་པ་དབང་བསྐུར་བའི་ཕན་ཡོན་ནི།  གསང་བ་འདུས་
པ་འབུམ་པ་ལས།  བསྐལ་པ་ས་ཡར་བྱས་པ་ཡི། །སྔོན་དུ་ཡོད་པའི་སྡིག་པ་ཀུན། །དེ་ཀུན་འཛད་པར་གྱུར་པ་ཡི། །དཀྱིལ་འཁོར་འདི་འདྲ་མཐོང་བས་སོ། །ཞེས་པ་དང་།  སྡོམ་བྱུང་ལས།  གསང་བ་མཆོག་གི་དཀྱིལ་འཁོར་དུ། །
མཆོག་ཏུ་རབ་ཞུགས་མཐོང་བ་ན། །དེང་ཁྱོད་སྡིག་པ་ཐམས་ཅད་ལས། །རྣམ་གྲོལ་བཟང་པོར་གྱུར་པར་གནས། །ཞེས་པ་དང་། ཧེ་རུ་ཀ་སྔོན་བྱུང་ལས།  དཀྱིལ་འཁོར་རྒྱལ་པོ་མཐོང་ནས་ནི། །ཅུང་ཟད་དེ་ནི་མི་འགྲུབ་མེད། །སྡིག་པ་
ཀུན་ལས་རྣམ་པར་གྲོལ། །དངོས་གྲུབ་མྱུར་དུ་ཐོབ་པར་འགྱུར། །ཞེས་དང་།  བཤད་རྒྱུད་རྡོ་རྗེ་ཕྲེང་བའི་གཉིས་པ་ལས།  ཐོག་མར་སློབ་མ་གང་གི་ཚེ། །བློ་ལྡན་ཡང་དག་དབང་བསྐུར་ན། །རྫོགས་པའི་རིམ་པའི་རྣལ་འབྱོར་པ། །
དེ་ཡི་ཚེ་ན་སྣོད་དུ་འགྱུར། །ཅེས་དང་།  དུག་ནི་སྔགས་ཀྱིས་འཇོམས་པ་བཞིན། །སྔགས་ཀྱི་དག་བྱེད་བཅུད་ལེན་བྱེད། །དེ་བཞིན་སློབ་མ་དབང་སོགས་ཀྱིས། །མ་དག་པ་ནི་དག་པར་འགྱུར། །ཅེས་པ་དང་།  ཡང་ཕྱག་ཆེན་ཐིག་ལེ་
9-3-33b


ལས།  དང་པོ་རེ་ཤིག་གང་ཚེ་སློབ། །ལན་གཅིག་དབང་རྣམས་ཀྱིས་ནི་བསྐུར། །དེ་ཚེ་གསང་ཆེན་བཤད་པ་ཡི། །ངེས་པ་སྣོད་དུ་འགྱུར་བའོ། །ཞེས་དང་།  སྡོམ་འབྱུང་ལས།  དབང་བསྐུར་འདི་དག་ཡང་དག་ལྡན། །དེ་ནི་
དམ་ཚིག་ཅན་ཞེས་བྱ། །ཞེས་དང་།  སངས་རྒྱས་ཐོད་པ་ལས།  ཕྱི་ནང་གསང་བར་བཅས་པ་ཡི། །དབང་བསྐུར་ཙམ་གྱིས་ནམ་མཁའ་ཡི། །དཀྱིལ་ནས་རྔ་ཡི་སྒྲ་གྲག་ཅིང་། །མེ་ཏོག་ཙནྡན་ཆར་འབབ་འགྱུར། །དེ་ནས་
རྣལ་འབྱོར་མ་དེ་རྣམས། །རྩ་ཡི་འཁོར་ལོ་ལ་ནི་ཐིམ། །ཞེས་དང་།  རྡོ་རྗེ་སྙིང་པོའི་འགྲེལ་པ་ལས།  རྩི་དེས་ཇི་ལྟར་ཟངས་ཕུག་ནས། །སླར་ཡང་ཟངས་སུ་འགྱུར་མི་སྲིད། །དེ་བཞིན་ཡེ་ཤེས་ལུས་ཕུག་ནས། །སླར་ཡང་འགྲོ་
དྲུག་ལྟུང་མི་སྲིད། །ཅེས་དང་།  དཔལ་མཆོག་དང་པོ་སྟོང་ཕྲག་བཅུ་གཉིས་པ་ལས།  བུམ་པའི་དབང་བསྐུར་ས་བརྒྱད་ཡིན། །གསང་བའི་དབང་བསྐུར་ས་དགུ་ཡིན། །ཤེས་རབ་ཡེ་ཤེས་བཅུ་ཡིན་ཏེ། །བཞི་པ་བཅུ་གཅིག་པར་བཤད་
དོ། །ཅེས་དང་།  རྡོ་རྗེ་རྩེ་མོ་ལས།  རྒྱལ་བའི་སྲས་པོ་ས་བརྒྱད་པ། །དེ་སྲིད་ཐེག་པ་དམན་པས་འཇིགས། །གསང་བའི་དཀྱིལ་འཁོར་ཆེན་པོ་འདིར། །ཞུགས་པས་བདག་ཉིད་གྲོལ་བར་འགྱུར། །ཅེས་དང་།  དཀྱིལ་འཁོར་ཆོ་
ག་ཇི་ལྟ་བུ། །ཆོ་ག་ཆོས་དང་རྣལ་འབྱོར་ཏེ། །གསང་བ་ཐར་པ་ཡང་དག་འབྱུང་། །སྐྱེ་བ་འདི་ཉིད་ཁོ་ན་ལ། །རབ་དགའ་སྒྲུབ་པར་བྱེད་པ་ཡིན། །ཞེས་དང་།  ནག་པོ་པའི་དཀྱིལ་ཆོག་ལས།  དབང་བསྐུར་འདི་དག་ཐོབ་ནས་ནི། །
9-3-34a


སློབ་མ་ཡོན་ཏན་བདག་པོར་འགྱུར། །སངས་རྒྱས་ཀུན་གྱིས་རབ་ཏུ་མཆོད། །མཚམས་མེད་པ་དང་སྡིག་ཅན་ཡང་། །ཚོན་རྩི་མཐོང་བས་གྲོལ་བར་འགྱུར། །མངོན་པར་ཞུགས་པ་ཙམ་གྱིས་ནི། །གཙང་
མའི་གནས་སུ་སྐྱེ་བར་འགྱུར། །ཞེས་པ་དང་།  གསང་བའི་མཛོད་ལས།  དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། །དེ་ཡི་སྐྱེ་བ་བདུན་ནས་ནི། །མ་བསྒོམས་པར་ཡང་སངས་རྒྱས་འགྱུར། །ཞེས་པ་དང་། 
གཞུང་འདིར་ཡང་།  དབང་བསྐུར་ཆོས་སྒོ་ཙམ་མ་ཡིན། །གསང་སྔགས་རྟེན་འབྲེལ་ལམ་བྱེད་པས། །རྟེན་འབྲེལ་བསྒྲིགས་པའི་གདམས་ངག་ཡིན། །ཕུང་པོ་ཁམས་དང་སྐྱེ་མཆེད་ལ། །སངས་རྒྱས་ས་བོན་བཏབ་ནས་ནི། །ཚེ་འདིར་
སངས་རྒྱས་བྱེད་པ་ཡི། །ཐབས་ལ་དབང་བསྐུར་ཞེས་སུ་བཏགས། །ཞེས་དང་།  སངས་རྒྱས་གསུང་བཞིན་མཛད་པ་ཡི། །བླ་མ་བཙལ་ལ་དབང་བཞི་བླང་། །དེ་ཡིས་སྡོམ་པ་གསུམ་ལྡན་འགྱུར། །ཞེས་དང་། སྡོམ་པ་གསུམ་དང་ལྡན་
པ་ཡིས། །རིམ་གཉིས་ཟབ་མོའི་གནད་ཤེས་ན། །དེ་ནི་ཚེ་འདིའམ་བར་དོ་འམ། །སྐྱེ་བ་བཅུ་དྲུག་ཚུན་ཆད་དུ། །འགྲུབ་པར་རྫོགས་པའི་སངས་རྒྱས་གསུངས། །དེ་ཕྱིར་འདི་ལ་མཁས་རྣམས་གུས། །ཞེས་གསུངས་སོ། །དེ་ལྟར་དབང་མ་
བསྐུར་བའི་ཉེས་དམིགས་དང་།  དབང་བསྐུར་བའི་ཕན་ཡོན་རྣམས་རྒྱལ་བ་རྡོ་རྗེ་འཆང་གིས་གསུངས་པ་ལེགས་པར་ཤེས་པར་བྱས་ནས།  རྡོ་རྗེ་ཐེག་པའི་ལམ་གྱི་རྩ་བ་དབང་བསྐུར་བ་རྣམ་པར་དག་པ་ཞུ་ཞིང་།  དམ་ཚིག་དང་སྡོམ་པ་མི་ཉམས་
9-3-34b


པར་བསྲུང་བ་ལ་བློ་གྲོས་དང་ལྡན་པ་དག་གིས་འབད་པར་བྱའོ། །བཞི་པ་དེ་ལས་སྔགས་སྡོམ་ཐོབ་པའི་དུས་བསྟན་པ་ལ་གཉིས་ཏེ།  མི་འཐད་པའི་ཕྱོགས་དགག་པ།  འཐད་པའི་ཕྱོགས་རྣམ་པར་བཞག་པའོ། །དང་པོ་ནི།  བོད་
ཀྱི་བླ་མ་ཁ་ཅིག་ན་རེ།  རྡོ་རྗེ་ཐེག་པའི་སྡོམ་པའི་དངོས་གཞི་ནི་རིགས་ལྔའི་སྡོམ་བཟུང་ལན་གསུམ་རྗེས་ཟློས་བྱས་པའི་རྗེས་སུ་ཐོབ་པ་ཡིན་པས།  སྟ་གོན་ནམ་འཇུག་པའི་ཆོས་ཀྱི་གནས་སྐབས་སུ་ཐོབ་པ་ཡིན་ནོ་ཞེས་ཟེར་རོ། །དེ་ནི་མི་
འཐད་དེ།  དབང་བསྐུར་གྱི་ཆོ་ག་ནི་སྔགས་སྡོམ་རྒྱུད་ལ་བསྐྱེད་པའི་ཆེད་ཡིན་པས་སྟ་གོན་ནམ་འཇུག་པའི་ཆོས་ཀྱི་སྐབས་སུ་སྔགས་སྡོམ་རྫོགས་པར་ཐོབ་ན་དངོས་གཞིའི་ཆོ་ག་ལ་དགོས་པ་མེད་པར་ཐལ་བའི་ཕྱིར་རོ། །གཞན་དུ་ན་སོ་ཐར་དང་བྱང་
སེམས་གྱི་སྡོམ་པ་ཡང་ཆོ་ག་དེ་དང་དེའི་དངོས་གཞི་ལ་མ་ལྟོས་པར་སྦྱོར་བའི་སྐབས་སུ་ཐོབ་པར་འགྱུར་རོ། །གཉིས་པ་ནི།  སྤྱིར་སྔགས་སྡོམ་ལ་ཁས་བླངས་ཀྱིས་ཐོབ་པ་དང་།  ཆོ་གས་ཐོབ་པ་གཉིས་ལས།  དང་པོ་ནི་སྟ་གོན་དང་འཇུག་པའི་
ཆོས་ཀྱི་སྐབས་སུ་ཐོབ་ཀྱང་དངོས་གཞིའི་ཆོ་ག་ལ་མ་ལྟོས་པར་སྐབས་དེར་ཁས་བླངས་པའི་དམ་ཚིག་རྣམས་ཀྱང་བསྲུང་བར་དབང་བ་མ་ཡིན་ནོ། །འོ་ན་ཁས་བླངས་ཀྱིས་ཐོབ་ཚུལ་ཇི་ལྟར་སྙམ་ན།  དབང་གི་དངོས་གཞི་ལ་བརྟེན་ནས་སྔགས་སྡོམ་མཚན་ཉིད་
པ་ཐོབ་པའི་ཚེ་དམ་ཚིག་དང་སྡོམ་པ་འདི་དག་བསྲུང་བར་བྱའོ། །ཞེས་པའི་ཚུལ་གྱིས་སོ། །དོན་འདི་ལ་དགོངས་ནས་རྗེ་བཙུན་གྱིས་དགའ་སྟོན་སྤྲིང་ཡིག་ཏུ་ཚོགས་བསག་གི་སྐབས་སུ།  རིགས་ལྔའི་སྡོམ་བཟུང་ལན་གསུམ་བྱས་པས་རྡོ་རྗེ་
9-3-35a


ཐེག་པའི་སྟ་གོན་དང་། ཡོལ་བའི་ཕྱི་འཇུག་དང་ནང་འཇུག་གི་གནས་སྐབས་སུ་ཐོབ་པའི་དམ་ཚིག་དང་སྡོམ་པ་རྣམས་སོར་ཆུད་པ་ཡིན་ནོ། །ཞེས་གསུངས་སོ། །གཉིས་པ་ཆོ་གས་ཐོབ་པ་ནི་སྔགས་སྡོམ་གྱི་
གཙོ་བོ་ཡིན་པས་རྒྱུད་སྡེ་བཞི་པོ་རང་རང་གི་རྡོ་རྗེ་སློབ་དཔོན་གྱི་དབང་ཡོངས་སུ་རྫོགས་པ་ཐོབ་པ་ན་རྒྱུད་སྡེ་དེ་དང་དེའི་སྔགས་སྡོམ་གྱི་གཙོ་བོ་ཡོངས་སུ་རྫོགས་པ་ཐོབ་པ་ཡིན་ནོ། །དེ་ལ་བྱ་རྒྱུད་ལ་ནི་ཆུ་དང་ཅོད་པན་གྱི་དབང་དང་།  སྤྱོད་རྒྱུད་ལ་མིང་
གི་དབང་དང་།  རྣལ་འབྱོར་རྒྱུད་ལ་ཕྱིར་མི་ལྡོག་པའི་དབང་དང་།  བླ་མེད་ལ་དབང་བཞི་རྫོགས་པར་ཐོབ་པའི་ཚེ་རྡོ་རྗེ་སློབ་དཔོན་གྱི་དབང་བཞི་རྫོགས་པར་ཐོབ་པ་ཡིན་པས།  སྐབས་དེ་དང་དེར་རྒྱུད་སྡེ་རང་རང་གི་སྔགས་སྡོམ་རྫོགས་པར་ཐོབ་པ་
ཡིན་ནོ། །འོ་ན་བྱ་སྤྱོད་གཉིས་ལ་རྡོ་རྗེ་སློབ་དཔོན་གྱི་དབང་ཇི་ལྟར་ཡོད་སྙམ་ན་སྤྱིར་རྒྱུད་སྡེ་རང་རང་གི་རྒྱུད་འཆད་པ་དང་།  དབང་བསྐུར་དང་རབ་གནས་སོགས་རྡོ་རྗེ་སློབ་དཔོན་གྱི་ཕྲིན་ལས་བྱེད་པ་ལ་ནི་རྡོ་རྗེ་སློབ་དཔོན་གྱི་དབང་ཐོབ་དགོས་པའི་རིགས་པས་
རྒྱུད་སྡེ་བཞི་ཀ་ལ་རྡོ་རྗེ་སློབ་དཔོན་གྱི་དབང་ཡོད་པར་གྲུབ་ཅིང་།  ལུང་གིས་ཀྱང་ཤེས་ཏེ།  གསང་བ་སྤྱི་རྒྱུད་ལས།  དབང་བསྐུར་བ་ནི་རྣམ་པ་བཞི། །སློབ་དཔོན་རྣམ་པར་མཁས་པ་ཡིས། །དེ་དག་ཤེས་ནས་ཅི་རིགས་སྤྱད། །སློབ་དཔོན་གོ་འཕང་
རབ་བསྒྲུབ་ཕྱིར། །དང་པོ་ཡོངས་སུ་བསྒྲགས་པ་ཡིན། །རིགས་སྔགས་རྣམས་ནི་བསྒྲུབ་པའི་ཕྱིར། །གཉིས་པ་ལེགས་པར་བཤད་པ་ཡིན། །བགེགས་རྣམས་འཇོམས་པར་བྱ་བའི་ཕྱིར། །གསུམ་པ་ཡོངས་སུ་བསྒྲགས་པ་ཡིན། །
9-3-35b


བཞི་པ་འབྱོར་པ་ཐོབ་བྱའི་ཕྱིར། །ཆོ་ག་རྒྱས་པ་དེ་བཤད་དོ། །ཅེས་རྡོ་རྗེ་སློབ་དཔོན་གྱི་གོ་འཕང་བསྒྲུབ་བའི་ཆེད་དུ་དབང་དང་པོ་ཆུ་དང་ཅོད་པན་གྱི་དབང་།  རིགས་སྔགས་བསྒྲུབ་པའི་ཆེད་དུ་གཉིས་པ་སྔགས་ཀྱི་བཟླས་ལུང་།  བགེགས་འཇོམས་
པའི་ཆེད་དུ་གསུམ་པ་བྱབ་ཁྲུས་བསྲུང་གསུམ།  འབྱོར་པ་ཐོབ་པའི་ཆེད་དུ་བཞི་པ་བཀྲ་ཤིས་ཀྱི་རྫས་བརྒྱད་སྦྱིན་པ་རྣམས་བཤད་པའི་ཕྱིར་རོ། །རྗེ་བཙུན་གྱིས་རིགས་གསུམ་སྤྱི་དབང་གི་ཆོ་གར་རྡོ་རྗེ་སློབ་དཔོན་གྱི་འོས་སུ་གྱུར་པ་ལ་ཆུ་དབང་
རྒྱས་པ་ལོགས་སུ་བསྐུར་བར་གསུངས་པ་ནི་རྒྱུད་སྡེ་གོང་མས་རྒྱས་བཀབ་ན་ལུགས་འདི་ལ་ཡང་རྡོ་རྗེ་སློབ་མ་དང་།  སློབ་དཔོན་གྱི་དབང་སོ་སོར་རུང་བར་བཞེད་དོ། །འོ་ན་ཡེ་ཤེས་ཐིག་ལེའི་རྒྱུད་ལས་རྡོ་རྗེ་སློབ་དཔོན་གྱི་དབང་རྣལ་འབྱོར་རྒྱུད་ཀྱི་ཁྱད་
ཆོས་སུ་བཤད་པ་མིན་ནམ་སྙམ་ན།  དེ་ནི་ཕྱིར་མི་ལྡོག་པ་འཁོར་ལོའི་དབང་ལ་དགོངས་པས་སྐྱོན་མེད་དོ། །རྣལ་འབྱོར་གྱི་རྒྱུད་ལ་ནི་གྲུབ་ཆེན་ཀུན་དགའ་སྙིང་པོས་དམ་ཚིག་དང་སྡོམ་པ་འཛིན་མི་ནུས་པར་སྡིག་པ་ཞི་བ་ཙམ་གྱི་ཆེད་དུ་དབང་ཞུ་བ་དང་། 
དམ་ཚིག་དང་སྡོམ་པ་སྣ་རེ་ཙམ་བསྲུངས་ནུས་པ་དང་། མ་ལུས་པ་བསྲུང་ནུས་པ་དང་གསུམ་དུ་ཕྱེ་ནས།  དང་པོ་ལ་འཇུག་པའི་ཆོས་ཙམ་དང་།  གཉིས་པ་ལ་རྡོ་རྗེ་སློབ་མའི་དབང་དང་།  གསུམ་པ་ལ་རྡོ་རྗེ་སློབ་དཔོན་གྱི་དབང་བསྐུར་བ་གསུངས་པས་
ཡོ་གའི་དམ་ཚིག་དང་སྡོམ་པ་ཡོངས་སུ་རྫོགས་པ་ཡང་རྡོ་རྗེ་སློབ་དཔོན་གྱི་དབང་ལས་ཐོབ་པ་ཡིན་ནོ། །འོ་ན་རྒྱུད་འདིའི་དམ་ཚིག་དང་སྡོམ་པ་མ་ལུས་པ་རིགས་ལྔའི་སྡོམ་བཟུང་གི་ཁོངས་སུ་འདུས་པས།  དེ་དག་ནི་འཇུག་པའི་སྐབས་སུ་ཁས་
9-3-36a


བླངས་ཀྱིས་ཐོབ་པ་མ་ཡིན་ནམ་ཞེ་ན།  དེར་ཁས་བླངས་པ་ཙམ་ཐོབ་ཀྱང་དེ་དག་བསྲུང་བ་ལ་དབང་བ་ནི་རྡོ་རྗེ་སློབ་དཔོན་གྱི་དབང་ལ་རག་ལས་ཏེ་དཔེར་ན་བར་མ་རབ་བྱུང་གི་སྐབས་སུ་རབ་ཏུ་བྱུང་བར་ཁས་བླངས་ཀྱང་
རབ་བྱུང་གི་སྡོམ་པ་བསྲུང་བ་ནི་དགེ་ཚུལ་ལམ་དགེ་སློང་དུ་བསྒྲུབ་པའི་ཆོ་ག་ལ་ལྟོས་པ་བཞིན་ནོ། །དེས་ན་དབང་གི་དངོས་གཞིའི་སྐབས་སུ་རྡོ་རྗེ་སློབ་དཔོན་གྱི་དབང་མི་བསྐུར་ན།  སྟ་གོན་དང་འཇུག་པའི་སྐབས་སུ་རིགས་ལྔའི་སྡོམ་བཟུང་མི་བྱེད་པར་
གསུངས་པ་ཡང་གནད་འདི་ཡིན་ནོ། །བླ་མེད་ཀྱི་སྔགས་སྡོམ་ལ་ནི་ཁས་བླངས་ཀྱིས་ཐོབ་པ་སྔར་དང་འདྲ་ལ།  ཆོ་གས་ཐོབ་པ་ལ་བསྐྱེད་རིམ་གྱི་སྡོམ་པ་དང་།  རྫོགས་རིམ་གྱི་སྡོམ་པ་གཉིས་ལས།  དང་པོ་ནི།  བུམ་དབང་རྫོགས་པར་ཐོབ་པའི་ཚེ་ཐོབ་
པ་ཡིན་ཏེ།  བུམ་དབང་ནི་བསྐྱེད་རིམ་གྱི་སྔོན་འགྲོ་ཡིན་པའི་ཕྱིར།  གཉིས་པ་ནི།  དབང་གོང་མ་གསུམ་རྫོགས་པར་ཐོབ་པའི་ཚེ་ཐོབ་པ་ཡིན་ཏེ།  དབང་གོང་མ་གསུམ་ནི་རྫོགས་རིམ་གྱི་སྨིན་བྱེད་ཡིན་པའི་ཕྱིར།  བླ་མ་གོང་མའི་གསུང་
ལས་བུམ་དབང་གི་སྐབས་སུ་སྔགས་སྡོམ་རྫོགས་པར་གསུངས་པ་ནི།  དཔེར་ན་ཁྲིམས་ཉིས་བརྒྱ་ལྔ་བཅུ་རྩ་གསུམ་བསྲུང་བ་ལ་དབང་བའི་སྡོམ་པ་ལ་དགེ་སློང་གི་སྡོམ་པར་འཇོག་པ་ལྟར།  རྩ་ལྟུང་བཅུ་བཞི་དང་ཡན་ལག་གི་ལྟུང་བ་བརྒྱད་བསྲུང་བ་ལ་དབང་
བའི་སྔགས་སྡོམ་སྐབས་འདིར་རྫོགས་པར་ཐོབ་པ་ལ་དགོངས་པ་ཡིན་པས་གནད་གཅིག་པ་ཡིན་ནོ། །གལ་ཏེ་རྫོགས་རིམ་ཀྱི་སྡོམ་པ་རྣམས་ཀྱང་བུམ་དབང་གི་སྐབས་སུ་ཐོབ་ན་བུམ་དབང་ཐོབ་པའི་གང་ཟག་དེས་དབང་གོང་མ་མ་ཐོབ་བར་རྫོགས་རིམ་སྒོམ་དུ་རུང་བར་
9-3-36b


འགྱུར་རོ། །དེ་ཡང་འདོད་ན།  བུམ་དབང་མ་ཐོབ་པར་བསྐྱེད་རིམ་སྒོམ་དུ་རུང་བར་འགྱུར་བས་དབང་བཞི་དང་རིམ་པ་གཉིས་སྨིན་གྲོལ་དུ་སྦྱར་བའི་རྣམ་གཞག་ཐམས་ཅད་ཉམས་པར་འགྱུར་རོ། །འོ་ན་གོང་དུ་རྒྱུད་སྡེ་དེ་དང་དེའི་རྡོ་རྗེ་སློབ་དཔོན་གྱི་དབང་ཡོངས་སུ་
རྫོགས་པར་ཐོབ་པའི་ཚེ་སྔགས་སྡོམ་ཡོངས་སུ་རྫོགས་པར་ཐོབ་པར་བཤད་པ་དང་འགལ་ཏེ།  བླ་མེད་ཀྱི་སྔགས་སྡོམ་རྫོགས་པར་ཐོབ་པ་ལ་དབང་བཞི་ཆར་ཐོབ་དགོས་པའི་ཕྱིར་རོ་ཞེ་ན།  བླ་མེད་ཀྱི་དབང་དུ་བྱས་པའི་རྡོ་རྗེ་སློབ་དཔོན་གྱི་དབང་ལ་
གཉིས་ལས་བུམ་དབང་གི་ནང་ཚན་རིགས་ཀྱི་བདག་པོ་རྡོ་རྗེ་འཆང་དུ་བསྐྱེད་ནས་དམ་ཚིག་གསུམ་སྦྱིན་པ་ལ་རྡོ་རྗེ་སློབ་དཔོན་གྱི་དབང་དུ་བཞག་པ་ནི་ཡོ་ག་དང་སྒོ་བསྟུན་པ་ཡིན་ལ།  བླ་མེད་རང་ལུགས་ཀྱི་རྡོ་རྗེ་སློབ་དཔོན་གྱི་དབང་ཡོངས་སུ་རྫོགས་པ་ལ་ནི་དབང་
གོང་མ་གསུམ་ངེས་པར་ཐོབ་དགོས་ཏེ་བུམ་དབང་ཙམ་ཐོབ་པའི་གང་ཟག་གིས་བླ་མེད་ཀྱི་རྫོགས་པའི་རིམ་པ་རྣམས་བཤད་དུ་མི་རུང་བ་དང་།  རྗེ་བཙུན་གྱིས་མངོན་རྟོགས་ལྗོན་ཤིང་ལས་བཤད་པའི་མངོན་པར་རྟོགས་པ་བཅུ་གཅིག་པོ་རྣམས་རྡོ་རྗེ་སློབ་དཔོན་
གྱི་དབང་ཐོབ་པས་ཉམས་སུ་ལེན་རུང་བར་གསུངས་ཤིང་།  རྫོགས་རིམ་དང་སྤྱོད་པ་དང་ཉེ་རྒྱུ་རྣམས་དབང་གོང་མ་མ་ཐོབ་ན་ཉམས་སུ་ལེན་དུ་མི་རུང་བའི་ཕྱིར་རོ། །འོ་ན་བླ་མེད་ཀྱི་སྔགས་སྡོམ་ལ་བསྐྱེད་རིམ་གྱི་སྡོམ་པ་དང་རྫོགས་རིམ་གྱི་སྡོམ་པ་གཉིས་སུ་
ཕྱེ་བ་འཐད་ན་དེ་ལྟར་ཡིན་ཀྱང་།  དེ་གཉིས་ཀྱི་ཐ་སྙད་གང་ནས་བཤད་སྙམ་ན་བཤད་པར་བྱ་སྟེ།  སྐྱེས་བུ་ཆེན་པོ་བསོད་ནམས་རྩེ་མོས་ཁ་སྦྱོར་གྱི་འགྲེལ་པར་སྤྱིར་ཐེག་པ་ཆེན་པོའི་སྡོམ་པ་ལ་སེམས་བསྐྱེད་ཀྱི་སྡོམ་པ་དང་།  བསྐྱེད་རིམ་གྱི་སྡོམ་པ་དང་། 
9-3-37a


 རྫོགས་རིམ་གྱི་སྡོམ་པ་གསུམ་དུ་མཛད་ནས།  དང་པོ་ནི།  ཇི་ལྟར་དུས་གསུམ་མགོན་པོ་རྣམས། །ཞེས་པའི་སྐབས་ནས་བསྟན་པ་ལྟ་བུ།  གཉིས་པ་ནི།  ཀུན་ནས་སྣ་ཚོགས་ཕྱག་རྒྱ་སྟེ། །ཀུན་ནས་
སྣ་ཚོགས་སྡོམ་པ་ཡི། །ཞེས་པའི་སྐབས་ནས་བསྟན་པ་ལྟ་བུ།  གསུམ་པ་ནི།  སྡོམ་པའི་དབྱེ་བའང་བཤད་པར་བྱ་སྟེ། །ཞེས་པ་དང་།  རྣལ་འབྱོར་མ་ལུས་དབུས་གནས་སུ། །ཨཾ་གི་རྣམ་པ་སྡོམ་པའི་གནས། །ཞེས་པའི་
སྐབས་ནས་བསྟན་པ་ལྟ་བུ་ཡིན་པར་གསུངས་པ་ལས་ཤེས་སོ། །དེ་དག་རེ་རེ་ལ་ཡང་གནས་གང་དུ་སྡོམ་པ།  གྲངས་ཇི་སྙེད་སྡོམ་པ།  སྤང་བྱ་གང་སྡོམ་པ།  ཐབས་གང་གིས་སྡོམ་པ།  སྡོམ་པ་རང་གི་ངོ་བོ་གང་ཡིན་པ་དང་།  དོན་
ཚན་ལྔ་ལྔའི་སྒོ་ནས་ཤེས་པར་བྱ་དགོས་ཏེ།  འདིར་ནི་ཚིག་མང་དུ་དོག་པས་མ་སྤྲོས་སོ། །རྟོགས་པར་འདོད་ན་རྗེ་བཙུན་ས་སྐྱ་པའི་གསུངས་རབ་རྒྱུད་གསུམ་ལ་དགོས་པའི་ཆོས་སྣ་བཅུ་གསུམ་པོ་བཤེས་གཉེན་མཁས་པའི་དྲུང་དུ་ཉན་པར་བྱའོ། །གཉིས་
པ་གང་ལས་བླང་བའི་ཡུལ་ལ་གསུམ་ལས།  དང་པོ་སོ་ཐར་བླང་བའི་ཡུལ་ལ་བྱེ་བྲག་ཏུ་སྨྲ་བས་རིས་བརྒྱད་ཀ་ཡང་ཡུལ་དགེ་སློང་ལས་བླང་དགོས་པར་འདོད་ཅིང་མདོ་སྡེ་པས་ནི་བསྙེན་གནས་ཀྱི་སྡོམ་པ་དགེ་བསྙེན་ཡན་ཆད་གང་ཡང་རུང་བ་ལས་བླང་དུ་རུང་བར་
འདོད་དེ།  དྲང་སྲོང་གནས་འཇོག་གི་མདོ་ལས།  དགེ་སློང་ངམ་བྲམ་ཟེའམ་ཁྱིམ་པའམ་རབ་ཏུ་བྱུང་བ་གང་ཡང་རུང་བ་ཆོ་ག་ཤེས་པ་ཞིག་གི་མདུན་དུ་འདུག་ལ་ཞེས་པ་དང་།  ལུང་རྣམ་འབྱེད་ལས་ཀྱང་ཁྱིམ་བདག་མགོན་མེད་ཟས་སྦྱིན་གྱིས་སྐྱེ་བོ་
9-3-37b


མང་པོ་ལ་བསྙེན་གནས་འབོག་པར་གསུངས་པའི་ཕྱིར་རོ། །ཞེས་འདོད་དོ། །ཐེག་ཆེན་སོ་ཐར་ལ་གཉིས་ལས།  ཆོ་ག་ཐུན་མོང་བ་བླང་བའི་ཡུལ་ལ་ནི་སྔར་བཤད་པ་ལྟར་ཡིན་ལ་ཐུན་མོང་མ་ཡིན་པའི་ཐེག་ཆེན་སོ་ཐར་ལ་ནི་ཆོ་འཕྲུལ་བསྟན་
པའི་མདོ་ལས།  རྒྱལ་སྲས་བྱམས་པ།  འཇམ་དབྱངས་ལ་སོགས་པ་ཁྱིམ་པའི་ཆ་ལུགས་ཅན་ལས་དགེ་སློང་གི་སྡོམ་པ་བླང་བར་བཤད་པ་དང་།  རྣམ་པར་གཏན་ལ་དབབ་པ་བསྡུ་བ་ལས།  དེ་དག་ལས་ལ་ལ་ནི་གཞན་ལས་དང་རང་ཡང་
ལེན་བར་བྱེད་དོ། །དེ་དག་ལས་ལ་ལ་ནི་རང་ཁོ་ནས་ལེན་པར་བྱེད་དེ་དགེ་སློང་གི་སྡོམ་པ་ནི་མ་གཏོགས་སོ། །དེ་ཅིའི་ཕྱིར་ཞེ་ན།  འདི་ལྟར་དགེ་སློང་གི་སྡོམ་པ་ནི་ཐམས་ཅད་ཀྱིས་ཡང་དག་པར་བླང་པར་འོས་པ་མ་ཡིན་པའི་ཕྱིར།  ཞེས་
འཕགས་པ་ཐོགས་མེད་ཀྱིས་བཤད་དོ། །གཉིས་པ་བྱང་སེམས་ཀྱི་སྡོམ་པ་བླང་བའི་ཡུལ་ལ།  བྱང་སེམས་དབུ་མ་པ་ལྟར་ན་བྱང་སེམས་ཀྱི་སྡོམ་པ་ལེན་གསོ་གཉིས་ཀ་ལ་བླ་མར་འོས་པ་མ་རྙེད་ཀྱང་དཀོན་མཆོག་གི་དྲུང་དུ་ཆོ་ག་བྱས་པས་
ཆོག །བྱང་སེམས་སེམས་ཙམ་པ་ལྟར་ན།  སྲོག་དང་ཚངས་སྤྱོད་ལ་གནོད་ན་མ་གཏོགས་བླ་མ་ངེས་པར་དགོས་ཤིང་གལ་ཏེ་མ་རྙེད་ན་དཀོན་མཆོག་གི་དྲུང་དུ་ལེན་གསོ་གཉིས་ཀ་བྱས་པས་ཆོག་སྟེ།  བྱང་ས་ལས་དགེ་བའི་བཤེས་གཉེན་མཚན་ཉིད་
དང་ལྡན་པ་རྒྱང་གྲགས་དང་དཔག་ཚད་ཀྱི་བར་སྲོག་དང་ཚངས་སྤྱོད་ལ་མི་གནོད་ཙམ་དུ་བཙལ་ཀྱང་མ་རྙེད་ན་དཀོན་མཆོག་གི་རྟེན་གྱི་དྲུང་དུ་བདག་ཉིད་ཀྱིས་བླངས་པས་ཀྱང་སྐྱེའོ། །ཞེས་གསུངས་སོ། །བླང་བའི་ཡུལ་གྱི་མཚན་ཉིད་ཀྱང་དབུ་མ་པ་རྣམས་
9-3-38a


ཀྱིས་སྤྱོད་འཇུག་ལས།  རྟག་པར་དགེ་བའི་བཤེས་གཉེན་ནི། །ཐེག་ཆེན་དོན་ལ་མཁས་པ་དང་། །བྱང་ཆུབ་སེམས་དཔའི་བརྟུལ་ཞུགས་མཆོག །སྲོག་གི་ཕྱིར་ཡང་མི་གཏོང་ངོ་། །ཞེས་བཤད་ལ།  སེམས་
ཙམ་པ་རྣམས་ཀྱིས་ནི་སྡོམ་པ་ཉི་ཤུ་པར།  བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལས་བླང་བར་བྱ། །ཞེས་བཤད་དོ། །གསུམ་པ་སྔགས་སྡོམ་བླང་བའི་ཡུལ་ལ།  སྤྱིར་ས་ཐོབ་ནས་མཆོག་གི་སྤྲུལ་པའི་སྐུ་དང་།  ལོངས་སྤྱོད་
རྫོགས་པའི་སྐུ་ལས་བླང་བ་སོགས་མང་དུ་བཤད་ཀྱང་།  སོ་སོའི་སྐྱེ་བོའི་སློབ་མ་སྣོད་ལྡན་ཞིག་གིས་སོ་སོའི་སྐྱེ་བོའི་རྡོ་རྗེ་སློབ་དཔོན་ལ་དབང་ཞུ་བའི་དབང་དུ་བྱས་ནས།  དེའི་མཚན་ཉིད་རྒྱུད་སྡེ་རྣམས་ལས་མང་དུ་གསུངས་པ་རྣམས་མདོར་བསྡུས་ཏེ། 
བླ་མ་ལྔ་བཅུ་པ་ལས།  བརྟན་ཅིང་དུལ་ལ་བློ་གྲོས་ལྡན། །བཟོད་ལྡན་དྲང་ལ་གཡོ་རྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །སྙིང་རྗེར་ལྡན་ཞིང་བསྟན་བཅོས་མཁས། །དེ་ཉིད་བཅུ་ནི་ཡོངས་སུ་ཤེས། །དཀྱིལ་འཁོར་བྲི་བའི་ལས་ལ་
མཁས། །སྔགས་བཤད་པ་ཡི་སྦྱོར་བ་ཤེས། །རབ་ཏུ་དང་ཞིང་དབང་པོ་དུལ། །ཞེས་གསུངས་སོ། །དེ་ལ་དེ་ཉིད་བཅུ་ནི།  རྡོ་རྗེ་སྙིང་པོ་རྒྱན་གྱི་རྒྱུད་ལས།  ཕྱིར་བཟློག་གཉིས་ཀྱི་ཆོ་ག་དང་། །གསང་དང་ཤེས་རབ་ཡེ་ཤེས་དང་། །ཁ་སྦྱོར་
འབྱེད་བའི་ཆོ་ག་དང་། །གཏོར་མ་རྡོ་རྗེའི་བཟླས་པ་དང་། །དྲག་ཤུལ་སྒྲུབ་པའི་ཆོ་ག་དང་། །རབ་ཏུ་གནས་དང་དཀྱིལ་འཁོར་སྒྲུབ། །གསང་བའི་དེ་ཉིད་བཅུ་ཡིན་ནོ། །དཀྱིལ་འཁོར་ཏིང་འཛིན་ཕྱག་རྒྱ་དང་། །སྟངས་སྟབས་འདུག་སྟངས་བཟླས་
9-3-38b


བརྗོད་དང་། །སྦྱིན་སྲེག་མཆོད་པ་ལས་སྦྱོར་དང་། །སླར་བསྡུ་བ་ཡི་རྣམ་པ་ནི། །ཕྱི་ཡི་དེ་ཉིད་བཅུ་ཡིན་ནོ། །ཞེས་གསུངས་ལ།  ཆོ་གའི་དེ་ཉིད་བཅུ་ནི།  རབ་གནས་ཀྱི་རྒྱུད་ལས།  དཀྱིལ་འཁོར་དང་ནི་ཏིང་འཛིན་མཆོག །ཕྱག་རྒྱ་སྟངས་སྟབས་
གདན་དང་ནི། །བཟླས་བརྗོད་སྦྱིན་སྲེག་མཆོད་པ་དང་། །ལས་ལ་སྦྱར་དང་སླར་བསྡུ་བའོ། །ཞེས་པ་དང་།  སློབ་དཔོན་ལ་ཉེ་བར་མཁོ་བའི་དེ་ཉིད་བཅུ་ནི།  བླ་མ་ཡོངས་བཟུང་གི་རྒྱུད་ལས།  གནས་དང་དུས་དང་ལྷ་དང་སྔགས། །བགྲང་ཕྲེང་ཕྱག་
རྒྱ་སྦྱིན་སྲེག་དང་། །དབང་བསྐུར་དང་ནི་རབ་གནས་ཀྱི། །དེ་ཉིད་བཅུ་ནི་ཡོངས་སུ་ཤེས། །ཞེས་པ་དང་།  དེ་ཁོ་ན་ཉིད་ཀྱི་དེ་ཉིད་བཅུ་ནི།  རིན་ཆེན་འབར་བ་ལས།  རྡོ་རྗེ་དྲིལ་བུ་ཡེ་ཤེས་དང་། །ལྷ་དང་དཀྱིལ་འཁོར་སྦྱིན་སྲེག་དང་། །སྔགས་དང་
རྡུལ་ཚོན་གཏོར་མ་དང་། །དབང་བསྐུར་དེ་ཉིད་བཅུ་པའོ། །ཞེས་གསུངས་སོ། །མདོར་ན་དེང་སང་སྔགས་སྡོམ་ལེན་པའི་ཡུལ་གྱི་རྡོ་རྗེ་སློབ་དཔོན་ནི་གཞུང་འདི་ཉིད་ལས།  བླ་མ་བརྒྱུད་པ་མ་ཉམས་ཤིང་། །ཆོ་ག་འཁྲུགས་པར་མ་གྱུར་པ། །ཕྱི་ནང་རྟེན་
འབྲེལ་བསྒྲིག་མཁྱེན་ཅིང་། །སྐུ་བཞིའི་ས་བོན་ཐེབས་ནུས་པ། །སངས་རྒྱས་གསུང་བཞིན་མཛད་པ་ཡི། །བླ་མ་བཙལ་ལ་དབང་བཞི་བླང་། །ཞེས་གསུངས་པ་ལྟར་བཟུང་བར་བྱའོ། །གསུམ་པ་གང་གིས་བླང་བའི་རྟེན་ལ་གསུམ་སྟེ།  དང་པོ་སོ་
ཐར་གྱི་རྟེན་ལ་གཉིས་ཏེ།  ཉན་ཐོས་སོ་ཐར་གྱི་རྟེན་དང་།  ཐེག་ཆེན་སོ་ཐར་གྱི་རྟེན་ནོ། །དང་པོ་ལ་བྱེ་བྲག་ཏུ་སྨྲ་བ་ནི།  རིས་བརྒྱད་ཀ་ཡང་གླིང་གསུམ་གྱི་སྐྱེས་པ་དང་བུད་མེད་མ་ཡིན་པ་གཞན་ལ་མི་སྐྱེ་བར་འདོད་དེ།  མདོ་རྩར་མི་མ་ཡིན་བའི་འགྲོ་བ་
9-3-39a


པ་དང་།  བྱང་གི་སྒྲ་མི་སྙན་པ་གཉིས་ནི་སྡོམ་པའི་ཞིང་ཉིད་མ་ཡིན་ནོ། །ཞེས་དང་། ཟ་མ་དང་མ་ནིང་ལ་ཡང་སྡོམ་པ་སྐྱེ་བའི་ཆོས་ཉིད་མེད་པར་གསུངས་པའི་ཕྱིར་རོ། །མདོ་སྡེ་པ་ནི་བསྙེན་གནས་ཀྱི་སྡོམ་པ་དུད་
འགྲོ་སོགས་འགྲོ་བ་གཞན་ལ་ཡང་སྐྱེ་བར་འདོད་དེ།  འདུལ་བ་ལུང་ལས།  ཀླུ་གཞོན་ནུ་ཙམ་པ་ཞེས་བྱ་བ་ཚེས་བརྒྱད་ལ་བསྙེན་གནས་བསྲུང་བར་གསུངས་པ་དང་།  སྐྱེས་རབས་ལས་རི་བོང་གིས་ཀྱང་བསྙེན་གནས་བསྲུང་བར་གསུངས་པ་རྣམས་སྒྲ་ཇི་
བཞིན་པར་ཁས་ལེན་པའི་ཕྱིར་རོ། །གཉིས་པ་ཐེག་ཆེན་སོ་ཐར་གྱི་རྟེན་ལ་ཆོ་ག་ཐུན་མོང་བ་རྣམས་ནི་ཆོ་ག་ཉན་ཐོས་ཀྱི་ལུགས་བཞིན་དུ་བྱེད་དགོས་པས་བྱེ་བྲག་ཏུ་སྨྲ་བས་བཤད་པ་ལྟར་བཟུང་དགོས་ལ་ཆོ་ག་ཐུན་མོང་མ་ཡིན་པའི་ཐེག་ཆེན་སོ་ཐར་གྱི་
རྟེན་ནི་འགྲོ་བ་གཞན་རྣམས་ལ་ཡང་རུང་སྟེ།  ཐེག་ཆེན་སེམས་བསྐྱེད་གང་ལ་བརྟེན་ནས་སྐྱེ་བའི་རྟེན་དེ་ལ་ཐེག་ཆེན་སོ་ཐར་སྐྱེ་བའི་ཕྱིར་རོ། །གཉིས་པ་བྱང་སེམས་ཀྱི་སྡོམ་པའི་རྟེན་ལ་གཉིས་ལས།  དབུ་མ་ལུགས་ཀྱི་སེམས་བསྐྱེད་ནི་བརྡ་ཤེས་ཤིང་
དོན་གོ་ལ་ལེན་འདོད་ཡོད་པའི་འགྲོ་བ་ཐམས་ཅད་ལ་སྐྱེ་སྟེ།  སྡོང་པོ་བཀོད་པའི་མདོ་ལས།  འཕགས་པ་འཇམ་དཔལ་གྱིས།  གྲོང་ཁྱེར་སྐྱིད་པའི་འབྱུང་གནས་ཀྱི་ཤར་ཕྱོགས་ནགས་ཚལ་སཱ་ལ་སྣ་ཚོགས་ཀྱི་རྒྱལ་མཚན་ཞེས་བྱ་བར་ཆོས་ཀྱི་
དབྱིངས་ཀྱི་ཚུལ་སྣང་བ་ཞེས་བྱ་བའི་ཆོས་ཀྱི་རྣམ་གྲངས་བསྟན་པས་རྒྱ་མཚོའི་ཀླུ་སྟོང་ཕྲག་གསུམ་བླ་ན་མེད་པའི་བྱང་ཆུབ་ཏུ་ངེས་པར་གྱུར་ཏོ། །ཞེས་པ་དང་།  མདོ་སྡེ་བསྐལ་བཟང་ལས།  རྒྱལ་བ་ཕན་བཞེད་གྲོང་དཔོན་གྱུར་པའི་ཚེ། །དེ་བཞིན་
9-3-39b


གཤེགས་པ་བསོད་ནམས་འོད་དེ་ལ། །ཉིན་གཅིག་སྲོག་གཅོད་སྡོམ་པ་བླངས་ནས་ཀྱང་། །དང་པོ་བྱང་ཆུབ་མཆོག་ཏུ་སེམས་བསྐྱེད་དོ། །ཞེས་དང་།  ནམ་མཁའི་སྙིང་པོའི་མདོ་ལས།  བྱང་ཆུབ་སེམས་དཔའ་རྒྱལ་པོ་ལ་འབྱུང་བའི་ལྟུང་བ་
ལྔ་དང་།  བློན་པོ་ལ་ལྔ་དང་།  ལས་དང་པོ་པ་ལ་བརྒྱད་དེ་རྒྱལ་པོ་དང་བློན་པོ་ལ་ཡང་བྱང་སེམས་ཀྱི་ལྟུང་བ་འབྱུང་བར་གསུངས་པའི་ཕྱིར་དང་།  དཀོན་མཆོག་བརྩེགས་པའི་གཙུག་ན་རིན་ཆེན་གྱིས་ཞུས་པའི་མདོ་ལས།  ལྷ་དང་མི་ཡི་སྲོག་
ཆགས་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅེས་པ་དང་།  ཀླུའི་རྒྱལ་པོ་རྒྱ་མཚོས་ཞུས་པའི་མདོ་ལས།  ཀླུ་ཁྲི་ཉིས་སྟོང་གིས་བྱང་ཆུབ་ཏུ་སེམས་བསྐྱེད་པར་གསུངས་པ་དང་།  མདོ་ལས་ལྷའི་
བུ་ལ་སོགས་པ་སོ་སོར་ཐར་པའི་སྣོད་མ་ཡིན་པའང་གང་དག་སེམས་མ་བསྐྱེད་པ་དེ་དག་བསྐྱེད་པར་བགྱིའོ་ཞེས་གསུངས་པ་དང་།  བདུད་སྡིག་ཏོ་ཅན་བཅོམ་ལྡན་འདས་ཀྱི་དྲུང་དུ་བྱང་ཆུབ་ཏུ་སེམས་བསྐྱེད་པ་ན་      བཅོམ་
ལྡན་འདས་ཀྱིས་ཡོངས་སུ་དག་པའི་འཇིག་རྟེན་གྱི་ཁམས་སུ་ཆོས་སྣང་བ་ཐོབ་པ་ཞེས་བྱ་བར་འཚང་རྒྱའོ། །ཞེས་ལུང་བསྟན་ནོ། །ཞེས་ནམ་མཁའ་མཛོད་ཀྱི་མདོ་ལས་གསུངས་པའི་ཕྱིར་རོ། །གཉིས་པ་སེམས་ཙམ་ལུགས་ཀྱི་སེམས་བསྐྱེད་
སྐྱེ་བའི་རྟེན་ལ་ནི།  སོ་ཐར་རིས་བདུན་གྱི་རྟེན་ངེས་པར་དགོས་ཏེ།  ཇོ་བོ་རྗེས།  སོ་སོར་ཐར་པ་རིས་བདུན་གྱི། །རྟག་ཏུ་སྡོམ་གཞན་ལྡན་པ་ལ། །བྱང་ཆུབ་སེམས་དཔའི་སྡོམ་པ་ཡི། །སྐལ་བ་ཡོད་ཀྱི་གཞན་དུ་མིན། །ཅེས་པ་དང་།  བྱང་སའི་
9-3-40a


ཚུལ་ཁྲིམས་ལེའུར།  དེ་ལ་བྱང་ཆུབ་སེམས་དཔའི་ཚུལ་ཁྲིམས་ཐམས་ཅད་གང་ཞེ་ན་མདོར་བསྡུ་ན་བྱང་ཆུབ་སེམས་དཔའི་ཚུལ་ཁྲིམས་ཁྱིམ་པའི་ཕྱོགས་སུ་གཏོགས་པ་དང་།  རབ་ཏུ་བྱུང་བའི་ཕྱོགས་སུ་གཏོགས་པ་ནི་
ཚུལ་ཁྲིམས་ཐམས་ཅད་ཅེས་བྱའོ། །ཁྱིམ་པའི་ཕྱོགས་ལ་བརྟེན་པ་དང་།  རབ་ཏུ་བྱུང་བའི་ཕྱོགས་ལ་བརྟེན་པའི་ཚུལ་ཁྲིམས་དེ་ཡང་མདོར་བསྡུས་ན་རྣམ་པ་གསུམ་སྟེ།  སྡོམ་པའི་ཚུལ་ཁྲིམས་དང་། །དགེ་བ་ཆོས་སྡུད་གྱི་ཚུལ་ཁྲིམས་དང་།  སེམས་
ཅན་ལ་ཕན་གདགས་པའི་ཚུལ་ཁྲིམས་སོ། །དེ་ལ་བྱང་ཆུབ་སེམས་དཔའི་སྡོམ་པའི་ཚུལ་ཁྲིམས་ནི་སོ་སོར་ཐར་པའི་སྡོམ་པ་ཡང་དག་པར་བླངས་པའི་རིས་བདུན་པོ་དགེ་སློང་དང་།  དགེ་སློང་མ་དང་།  དགེ་སློབ་མ་དང་།  དགེ་ཚུལ་དང་།  དགེ་
ཚུལ་མ་དང་།  དགེ་བསྙེན་དང་།  དགེ་བསྙེན་མའི་ཚུལ་ཁྲིམས་གང་ཡིན་པ་སྟེ།  དེ་ཡང་ཁྱིམ་པ་དང་།  རབ་ཏུ་བྱུང་བའི་ཕྱོགས་ལ་ཅི་རིགས་པར་རིག་པར་བྱའོ། །ཞེས་གསུངས་སོ། །གསུམ་པ་སྔགས་སྡོམ་གྱི་རྟེན་ལ་སྐལ་དམན་རིམ་འཇུག་
པ་དང་། །སྐལ་ལྡན་གཅིག་ཆར་བ་གཉིས་ལས།  དང་པོ་ལ།  ཐོག་མར་འཆི་བ་མི་རྟག་པ་དང་།  དལ་འབྱོར་རྙེད་དཀའི་སྒོ་ནས་ཚེ་འདི་ལ་བློ་ལྡོག་སྟེ།  ཕྱི་མ་ཕན་ཆད་ཀྱི་ཆེད་དུ་བསྙེན་གནས་ཡན་ལག་བརྒྱད་པ་ཙམ་ལེན་དུ་གཞུག །དེའི་འོག་ཏུ་འཁོར་བའི་
ཉེས་དམིགས་དང་དལ་འབྱོར་རྙེད་དཀའི་སྒོ་ནས་འཁོར་བ་ལས་ཡིད་ལྡོག་སྟེ་བྱང་ཆུབ་ཀྱི་ཆེད་དུ་སོ་སོར་ཐར་པ་རིས་བདུན་པོ་གང་ལ་སློབ་པར་ནུས་པ་དེ་ལེན་དུ་གཞུག །དེ་ནས་ཐེག་པ་འོག་མ་གཉིས་ཀྱང་གཞན་དོན་བསྒྲུབ་པའི་གེགས་སུ་མཐོང་ནས་རྫོགས་པའི་
9-3-40b


བྱང་ཆུབ་ཀྱི་ཆེད་དུ་ཐེག་ཆེན་སེམས་བསྐྱེད་ཀྱི་སྡོམ་པ་ལེན་དུ་གཞུག་པའི་སྤྱོད་པ་རིམ་པ་ཅན་དང་།  དེ་ནས་གྲུབ་མཐའ་བཞི་དང་རྒྱུད་སྡེ་བཞི་ལ་རིམ་གྱིས་བསླབས་ཏེ་རྣལ་འབྱོར་བླ་མེད་ཀྱི་སྨིན་བྱེད་ཀྱི་དབང་དང་གྲོལ་བྱེད་ཀྱི་ལམ་ལ་བརྟེན་ནས་རྡོ་རྗེ་འཆང་གི་
གོ་འཕང་མངོན་དུ་བྱེད་པ་ནི་སྐལ་དམན་རིམ་འཇུག་གི་ལམ་གྱི་རིམ་པ་ཡིན་པས་འདི་ལ་ནི་སོ་ཐར་རིས་བདུན་གྱི་རྟེན་ངེས་པར་དགོས་པ་ཡིན་ནོ། །ལམ་བགྲོད་ཚུལ་དེ་ཡང་ཀྱཻ་རྡོ་རྗེ་ལས།  དང་པོ་གསོ་སྦྱོང་སྦྱིན་པར་བྱ། །དེ་ནས་བསླབ་བའི་
གནས་བཅུ་ཉིད། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །དེ་ནས་རྣལ་འབྱོར་སྤྱོད་པ་ཉིད། །དེ་ཡི་རྗེས་སུ་དབུ་མ་བསྟན། །སྔགས་ཀྱི་རིམ་པ་ཀུན་ཤེས་ནས། །དེར་རྗེས་ཀྱཻ་ཡི་རྡོ་རྗེ་བསྟན། །སློབ་མས་གུས་པས་
བླངས་ནས་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་གསུངས་པ་ལ་བརྟེན་ནས་རྣལ་འབྱོར་དབང་ཕྱུག་བརྒྱུད་པ་དང་བཅས་པ་རྣམས་ཀྱིས་གདུལ་བྱ་བཀྲི་བའི་ཚུལ་དུ་སྣང་ངོ་། །གཉིས་པ་སྐལ་ལྡན་ཅིག་ཆར་བའི་རྟེན་ནི་ངེས་པ་མེད་དེ།  རྒྱུད་
སྡེ་རྣམས་ལས་ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཐམས་ཅད་ཀྱང་རྒྱུད་ཉན་པའི་སྣོད་དུ་གསུངས་པ་དང་།  ཨུ་རྒྱན་གྱི་གནས་ཀྱི་ཀླུ་རྣམས་ལ་གསང་བ་འདུས་པའི་དཀྱིལ་འཁོར་དུ་དབང་བསྐུར་བས་གྲོལ་བར་གསུངས་པ་དང་།  སཾ་བྷུ་ཊིར་
ཤེས་རབ་མ་མངོན་དུ་མ་རྙེད་ན་བྱོལ་སོང་དག་ལ་ཡང་གོམས་པར་བྱའོ། །ཞེས་བྱོལ་སོང་གི་ཕྱག་རྒྱ་བསྟེན་པར་བཤད་ཅིང་ཕྱག་རྒྱ་དེ་ཡང་དབང་བསྐུར་ཐོབ་ཅིང་དམ་ཚིག་དང་སྡོམ་པར་ལྡན་པ་དགོས་པའི་ཕྱིར་རོ། །གསུམ་པ་ཐོབ་པ་མི་ཉམས་པར་བསྲུང་བའི་
9-3-41a


བསླབ་བྱ་ལ་གཉིས་ཏེ།  བསླབ་བྱ་སོ་སོར་བཤད་པ་དང་།  ཕན་ཚུན་འགལ་ན་ཇི་ལྟར་བསྒྲུབ་པའོ། །དང་པོ་ལ་གསུམ་ལས།  དང་པོ་སོ་ཐར་གྱི་བསླབ་བྱ་ལ་ཡང་གཉིས་ཏེ།  ཉན་ཐོས་སོ་ཐར་གྱི་བསླབ་
བྱ་དང་།  ཐེག་ཆེན་སོ་ཐར་གྱི་བསླབ་བྱའོ། །དང་པོ་ལ་རིས་བརྒྱད་ལས། བསྙེན་གནས་ཀྱི་བསླབ་བྱ་ནི་མཛོད་ལས།  ཚུལ་ཁྲིམས་ཡན་ལག་བག་ཡོད་པའི། །ཡན་ལག་བརྟུལ་ཞུགས་ཡན་ལག་སྟེ། །བཞི་གཅིག་དེ་བཞིན་གསུམ་རིམ་
བཞིན། །ཞེས་གསུངས་པ་ལྟར།  ཚུལ་ཁྲིམས་ཀྱི་ཡན་ལག་རྩ་བ་བཞི།  བག་ཡོད་ཀྱི་ཡན་ལག་ཆང་སྤོང་བ།  བརྟུལ་ཞུགས་ཀྱི་ཡན་ལག་གར་སོགས་ཕྲེང་སོགས་མལ་ཆེན་མཐོ།  ཕྱི་དྲོའི་ཁ་ཟས་གསུམ་སྤོང་བའོ། །དགེ་བསྙེན་ཕ་མའི་
བསླབ་བྱ་ལ་སྐྱབས་གསུམ་འཛིན་པའི་དགེ་བསྙེན་གྱིས་ནི་སྐྱབས་འགྲོ་བླངས་ནས་དེའི་བསླབ་བྱ་ཙམ་བསྲུང་བའོ། །སྣ་གཅིག་སྤྱོད་པས་ནི་སྲོག་གཅོད་ཙམ་སྤོང་བའོ། །སྣ་འགའ་སྤྱོད་པས་ནི་མ་བྱིན་ལེན་དང་གཉིས་སྤོང་བའོ། །ཕལ་ཆེར་སྤྱོད་པས་ནི་
བརྫུན་དང་གསུམ་སྤོང་ཞིང་ཡོངས་རྫོགས་ཀྱིས་ནི་འདོད་ལོག་དང་ཆང་སྟེ་ལྔ་ཆར་སྤོང་ངོ་། །མདོ་ལས།  དགེ་བསྙེན་སྟོན་པ་གཞན་ལ་མི་བརྟེན་པ་ཆོས་དགེ་བ་བཅུ་སྤྱོད་པ་རྣམས་གསུངས་པ་ཡང་དེ་ཡིན་ནོ། །བྱེ་བྲག་ཏུ་སྨྲ་བ་དེ་ལས་གཞན་པའི་དགེ་
བསྙེན་མི་འདོད་ལ།  མདོ་སྡེ་པ་དག །རྒྱན་གྱིས་བརྒྱན་པར་གྱུར་ཀྱང་ཆོས་སྤྱོད་ལ། །ཞེས་སོགས་ཀྱི་གཞུང་ལ་བརྟེན་ནས་དེའི་སྟེང་དུ་མི་ཚངས་སྤྱོད་སྤོང་པ་ཚངས་སྤྱོད་ཀྱི་དགེ་བསྙེན་ཡང་འདོད་ཅིང་།  འཕགས་པ་གནས་བརྟན་པའི་སྡེ་པ་དག་བསྙེན་
9-3-41b


གནས་ཡན་ལག་བརྒྱད་ཇི་སྲིད་འཚོའི་བར་དུ་བླངས་པ་གོ་མིའི་དགེ་བསྙེན་ཡང་འདོད་དོ། །ཐེག་ཆེན་གྱི་སྡེ་སྣོད་ལས་ཀྱང་འདི་འབྱུང་སྟེ།  དཀོན་མཆོག་བརྩེགས་པ་ལས།  རྒྱལ་པོའི་བུ་སྙིང་རྗེ་ཆེར་སེམས་ཀྱིས་བསྙེན་གནས་ཡན་ལག་
བརྒྱད་པ་ཇི་སྲིད་འཚོའི་བར་དུ་བླངས་པར་བཤད་པའི་ཕྱིར་རོ། །དེ་ལ་དང་པོ་ལྔ་ནི་མིང་ཆེན་གྱི་མདོ་དང་།  དྲུག་པ་ནི་ལུང་རྣམ་འབྱེད་དང་།  བདུན་པ་ནི་ཀུན་ཏུ་རྒྱུ་སེན་རིངས་ཀྱིས་ཞུས་པར་གསུངས་ཞེས་ཁ་ཅིག་ཟེར་རོ། །སློབ་དཔོན་དབྱིག་གཉེན་
གྱིས་གོ་མིའི་དགེ་བསྙེན་ཞེས་བྱ་བ་འདི་ནི་འཕགས་པ་གནས་བརྟན་པའི་མན་ངག་བརྒྱུད་པ་ལས་ཐོས་ཀྱི་བདེ་བར་གཤེགས་པས་གསུངས་པ་ནི་མ་མཐོང་ངོ་ཞེས་གསུངས་སོ། །དགེ་ཚུལ་ཕ་མའི་བསླབ་བྱ་ལ་བླངས་པ་ལས་འདས་པ་དང་།  ཉེས་མེད་
དང་།  ཕྱོགས་མཐུན་གསུམ་ལས།  དང་པོ་སུམ་བརྒྱ་པ་ལས།  གང་ཞིག་སྲོག་གཅོད་གཞན་གྱི་ནོར་འཕྲོག་དང་། །མི་ཚངས་སྤྱོད་བརྫུན་བཅོས་པའི་ཆང་ལ་སོགས།  གར་སོགས་ཕྲེང་སོགས་མལ་ཆེན་མཐོ་བ་དང་། །ཕྱི་དྲོའི་ཁ་ཟས་གསེར་
དངུལ་ལེན་པ་སྤང་། །ཞེས་གསུངས་པ་ལྟར་རོ། །གཉིས་པ་ནི་འཆང་བ་དང་།  འབྲལ་བ་དང་།  འཇོག་པ་དང་།  ལྷུང་བཟེད་འཆང་བ་དང་།  དགོན་པའི་འབྲལ་བ་དང་།  གསོག་འཇོག་བྱེད་པ་དང་།  ས་བོན་འཇོམས་པ་དང་།  སྐྱེ་བ་འཇིགས་པ་དང་། 
བྱིན་ལེན་མ་བྱས་པར་ཟ་བ་དང་།  སྤངས་པ་ཟ་བ་དང་།  གསོག་འཇོག་ཟ་བ་དང་།  རིན་པོ་ཆེ་ལ་རེག་པ་དང་།  མེ་ལ་རེག་པ་དང་། ས་རྐོ་བ་དང་། །དགེ་ཚུལ་ནང་ཉལ་བ་དང་།  ལས་ཀྱི་གནས་ནས་མ་སྨྲས་པར་འགྲོ་བ་དང་།  རྩ་སྔོན་ཡོད་པའི་ས་ཕྱོགས་སུ་མི་
9-3-42a


གཙང་བ་འདོར་བ་དང་།  ཤིང་ལ་མི་གང་ལས་ལྷག་ཙམ་མི་འཛེག་པའོ། །གསུམ་པ་ནི་བླངས་འདས་དང་ལྟུང་མེད་མ་གཏོགས་པ་དགེ་སློང་ཕ་མའི་བཅས་པ་རྣམས་སོ། །དེ་ལ་རྩ་བ་བཞི་ལས་འཆབ་སེམས་ཀྱིས་འདས་ན་སྡོམ་
པ་སླར་བླང་དུ་མེད་ཅིང་།  ཡན་ལག་དྲུག་ལས་འདས་ན་བཤགས་པར་བྱ་བ་ཡིན་ཏེ།  འོད་ལྡན་ལས་མི་གསོད་ལ་སོགས་བཞི་རྣམས་ཀྱིས། །དགེ་ཚུལ་ལས་ནི་ཉམས་གྱུར་ན། །དགེ་སློང་བཞིན་དུ་དགེ་ཚུལ་ཡང་། །ཕྱིས་ནས་སྡོམ་པ་སྐྱེ་བ་མེད། །
ཆང་འཐུང་ལ་སོགས་དྲུག་པོ་ནི། །བཤགས་ལ་ཉེས་བྱས་མཐུན་པ་ཡིན། །ཞེས་གསུངས་སོ། །ཕྱོགས་མཐུན་ལས་འདས་ན་ཡིད་ཀྱིས་སྡོམ་པར་བྱ་བ་ཡིན་ཏེ།  སུམ་བརྒྱ་པ་ལས།  བླང་བའི་ཕྱོགས་མཐུན་རྣམས་ལས་ཡིད་ཀྱིས་འགྱུར། །
ཞེས་གསུངས་པའི་ཕྱིར་རོ། །དགེ་སློབ་མའི་བསླབ་བྱ་ནི།  རྩ་བའི་ཆོས་དྲུག་དང་།  རྗེས་སུ་མཐུན་པའི་ཆོས་དྲུག་སྡོམ་པ་སྟེ།  རྒྱ་ཆེར་འགྲེལ་ལས།  གཅིག་པུ་ལམ་དུ་འགྲོ་མི་བྱེད། །ཆུ་བོའི་ཕ་རོལ་རྐྱལ་མི་བྱ། །སྐྱེས་པ་ལ་ནི་རེག་མི་བྱ། །
སྐྱེས་པ་དང་ནི་འདུག་མི་བྱ། །སྨྱན་དུ་འགྱུར་བ་མི་བྱ་ཞིང་། །ཁ་ན་མ་ཐོ་བཅབ་མི་བྱ། །ཞེས་པ་དང་།  གསེར་ལ་བཟུང་བར་མི་བྱ་ཞིང་། །འདོམས་ཀྱི་སྤུ་ནི་བྲེག་མི་བྱ། །ས་ནི་རྐོ་བར་མི་བྱ་སྟེ། །རྩ་སྔོན་དག་ནི་བཅད་མི་བྱ། །བྱིན་ལེན་མ་བྱས་བཟའ་
མི་བྱ། །གསོག་འཇོག་བྱས་པ་བཟའ་མི་བྱ། །ཞེས་གསུངས་པ་རྣམས་སོ། །དགེ་སློང་གི་བསླབ་བྱ་ནི་ཕམ་པ་བཞི།  ལྷག་མ་བཅུ་གསུམ།  སྤང་ལྟུང་སུམ་ཅུ།  ལྟུང་བྱེད་འབའ་ཞིག་པ་དགུ་བཅུ།  སོ་སོར་བཤགས་པ་བཞི།  ཉེས་བྱས་བརྒྱ་དང་
9-3-42b


བཅུ་གཉིས་སྤོང་བ་སྟེ་ཉིས་བརྒྱ་ལྔ་བཅུ་རྩ་གསུམ་མོ། །དགེ་སློང་མ་ལ་ནི་མཐའ་བརྒྱད་དགེ་འདུན་ལྷག་མ་ཉི་ཤུ་དང་། །དེ་བཞིན་སྤོང་བ་སུམ་བཅུ་རྩ་གསུམ་དང་། །གཞན་ཡང་ལྟུང་བྱེད་བརྒྱ་དང་བརྒྱད་ཅུ་དང་། །སོ་སོར་བཤགས་པར་བྱ་བ་བཅུ་
གཅིག་དང་། །བསླབ་པའི་ཕྲེང་བ་ལྷག་མར་བཅས་པ་སྟེ། །ཞི་བར་བྱེད་པ་དགེ་སློང་ཕ་དང་མཐུན། །ཞེས་པ་ལྟར་ཡིན་ལ།  བསླབ་པའི་ཕྲེང་བ་ལྷག་མར་བཅས་པ་ནི།  དགེ་སློང་གི་བརྒྱ་རྩ་བཅུ་གཉིས་ཀྱི་སྟེང་དུ།  ཤམ་ཐབས་རྐེད་
པ་སྣང་བར་མི་བགོ་བ་དང་།  ཆགས་པར་གྱུར་ཅིང་ཁྱིམ་གཞན་དུ་མི་འགྲོ་བ་གཉིས་བསྣན་པ་ཐམས་ཅད་བསྡོམས་ནས་སུམ་བརྒྱ་དང་དྲུག་བཅུ་རེ་གཉིས་སོ། །གཉིས་པ་ཐེག་ཆེན་སོ་ཐར་གྱི་བསླབ་བྱ་ལ་ཆོ་ག་ཐུན་མོང་པས་ནི་རང་གིས་གང་བླངས་པའི་
སོ་སོར་ཐར་པ་དེ་དགག་དགོས་ཁྱད་པར་ཅན་མེད་པའི་ཚེ་ཉན་ཐོས་ཀྱི་ཇི་ལྟ་བ་བཞིན་བསྲུང་དགོས་ཏེ།  སྡོམ་པ་གཉིས་ཀྱི་བཅས་པ་ལས་དགོས་པ་མེད་པར་འདའ་བ་རྡོ་རྗེ་ཐེག་པའི་སྐབས་སུ་ལྟུང་བར་གསུངས་པའི་ཕྱིར་རོ། །སེམས་ཅན་གྱི་དོན་དུ་འགྱུར་
བ་ལ་སོགས་པའི་དགོས་པ་ཁྱད་པར་ཅན་ཡོད་ན་ལུས་ངག་གི་ཁ་ན་མ་ཐོ་བ་ཐམས་ཅད་གནང་སྟེ།  སྤྱོད་འཇུག་ལས།  ཐུགས་རྗེ་མངའ་བ་རིང་གཟིགས་པས། །བཀག་པ་རྣམས་ཀྱང་དེ་ལ་གནང་། །ཞེས་པ་དང་།  སྡོམ་པ་ཉི་ཤུ་པ་ལས།   སྙིང་རྗེར་
ལྡན་ཞིང་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། །ཞེས་གསུངས་པ་ལྟར་རོ། །ཆོ་ག་ཐུན་མོང་མ་ཡིན་པ་ལ་གསོ་སྦྱོང་རང་གིས་ལེན་པ་ནི་བསྙེན་གནས་ཀྱི་སྡོམ་པ་དང་བསྲུང་བྱ་ཁྱད་པར་མེད་དོ། །གཉིས་པ་བྱང་སེམས་ཀྱི་སྡོམ་པའི་
9-3-43a


བསླབ་བྱ་ལ་གཉིས་ཏེ།  དབུ་སེམས་ཀྱི་བསླབ་བྱ་སོ་སོར་བཤད་པ་དང་།  རྩ་ལྟུང་བྱུང་བས་སྡོམ་པ་གཏོང་མི་གཏོང་དཔྱད་པའོ། །དང་པོ་ལ་དབུ་སེམས་གཉིས་ལས།  དང་པོ་དབུ་མ་པའི་ལུགས་ཀྱི་བསླབ་བྱ་ལ་
ཡང་གསུམ་སྟེ།  དབང་རྣོན་ལ་བཅུ་བཞིར་དབྱེ་བ།  དབང་འབྲིང་ལ་བཞིར་བསྟན་པ།  དབང་རྟུལ་ལ་གཅིག་ཏུ་བསྟན་པའོ། །དང་པོ་ནི།  ནམ་མཁའི་སྙིང་པོའི་མདོ་ལས་གསུངས་པ།  བསླབ་བཏུས་ལས་ཚིགས་སུ་བཅད་པར་བསྟན་པ་ནི།  དཀོན་
མཆོག་གསུམ་གྱི་དཀོར་འཕྲོགས་པ། །ཕས་ཕམ་པ་ཡི་ལྟུང་བར་འདོད། །དམ་པའི་ཆོས་ནི་སྤོང་བྱེད་པ། །གཉིས་པར་ཐུབ་པས་གསུངས་པ་ཡིན། །ཚུལ་ཁྲིམས་འཆལ་བའི་དགེ་སློང་ལ། །ངུར་སྨྲིག་འཕྲོག་དང་བརྡེག་པ་དང་། །བཙོན་རར་
འཇུག་པར་བྱེད་པ་དང་། །རབ་ཏུ་བྱུང་བ་འབེབས་པ་དང་། །སྲོག་དང་བྲལ་བྱེད་གསུམ་པ་ཡིན། །མཚམས་མེད་ལྔ་པོ་བྱེད་པ་དང་། །ལོག་པར་ལྟ་བ་འཛིན་པ་དང་། །ཞེས་རྒྱལ་པོ་ལ་འབྱུང་བ་ལྔ་དང་།  བློན་པོ་ལ་འབྱུང་བ་ནི།  དང་པོ་བཞིའི་
སྟེང་དུ།  གྲོང་ལ་སོགས་པ་འཇིགས་པ་ཡང་། །རྩ་བའི་ལྟུང་བར་རྒྱལ་བས་གསུངས། །ཞེས་པ་དང་ལྔ་ཡིན་ལ།  ལས་དང་པོ་པ་ལ་འབྱུང་བ་བརྒྱད་ནི།  བློ་སྦྱངས་མ་བྱས་སེམས་ཅན་ལ། །སྟོང་པ་ཉིད་ནི་སྟོན་པ་དང་། །སངས་རྒྱས་ཉིད་ལ་
ཞུགས་པ་དག །རྫོགས་པའི་བྱང་ཆུབ་བཟློག་པ་དང་། །སོ་སོར་ཐར་པ་ཡོངས་སྤངས་ཏེ། །ཐེག་པ་ཆེ་ལ་སྦྱོར་བ་དང་། །སློབ་པའི་ཐེག་པས་ཆགས་ལ་སོགས། །སྤོང་བར་འགྱུར་བ་མིན་ཞེས་འཛིན། །ཕ་རོལ་དག་ཀྱང་འཛིན་འཇུག་དང་། །
9-3-43b


རང་གི་ཡོན་ཏན་བརྗོད་པ་དང་། །རྙེད་པ་དང་ནི་བཀུར་སྟི་དང་། །ཚིགས་བཅད་རྒྱུ་ཡིས་གཞན་སྨོད་དང་། །བདག་ནི་ཟབ་མོ་བཟོད་པའོ་ཞེས། །ལོག་པ་ཉིད་ནི་སྨྲ་བ་དང་། །དགེ་སྦྱོང་ཆད་པས་གཅོད་པ་དང་། །དཀོན་མཆོག་གསུམ་གྱི་སྦྱིན་བྱེད་
དང་། །སྦྱིན་པ་ལེན་པར་བྱེད་པ་དང་། །ཞི་གནས་འདོར་བར་བྱེད་པ་དང་། །ཡང་དག་འཇོག་གི་ལོངས་སྤྱོད་རྣམས། །ཁ་ཏོན་བྱེད་ལ་སྦྱིན་པ་ནི། །དེ་དག་རྩ་བའི་ལྟུང་བ་སྟེ། །སེམས་ཅན་དམྱལ་བ་ཆེན་པོའི་རྒྱུ། །རྨི་ལམ་འཕགས་
པ་ནམ་སྙིང་པོའི། །མདུན་དུ་འདུག་སྟེ་བཤགས་པར་བྱ། །ཞེས་གསུངས་སོ། །འདི་དག་རྒྱལ་པོ་ལ་འབྱུང་བའི་དང་པོ་བཞི་དང་།  བློན་པོ་ལ་འབྱུང་བའི་དང་པོ་བཞི་ནི།  ལྟུང་བ་གཅིག་པས་ངོ་བོའི་སྒོ་ནས་བཅུ་བཞི་ཡིན་ལ།  བཅོ་བརྒྱད་དུ་
ཕྱེ་བ་ནི་རྟེན་གྱི་སྒོ་ནས་ཡིན་ཅིང་།  མཚམས་མེད་ལྔ་པོ་སོ་སོར་བྱས་ནས་ཉེར་གཉིས་སུ་བྱས་པ་ཡང་སྣང་ངོ་། །འོ་ན་རྟེན་གྱི་སྒོ་ནས་བཅོ་བརྒྱད་དུ་བྱེད་པ་དེ་དག་རྒྱལ་བློན་ལས་དང་པོ་པ་གསུམ་ཆར་ལ་ལྟུང་བར་འགྱུར་ན་ནི་སོ་སོར་བཅས་པ་ལ་དགོས་པ་མེད་ཅིང་གཅིག་
ལ་བཅས་པ་གཞན་ལ་མི་འབྱུང་ན་ནི་ཐམས་ཅད་ཀྱང་བྱང་སེམས་དབང་རྣོན་གྱི་དབང་དུ་བྱས་པ་འགལ་ལོ་ཞེ་ན།  རེ་རེས་ཀྱང་ཐམས་ཅད་བསྲུང་དགོས་མོད་ཀྱི་སོ་སོར་བཅས་པ་ནི་གང་ལ་འབྱུང་ཉེ་བ་དེའི་དབང་དུ་བྱས་པ་ཡིན་ཏེ།  བསླབ་བཏུས་ལས།  གལ་ཏེ་རྒྱལ་རིགས་
ལ་སོགས་པ་བྱང་སེམས་ཡིན་ན་ཇི་ལྟར་དེ་དག་གི་ལྟུང་བ་ངེས་ཤིང་གཞན་ལ་ནི་མ་ཡིན། ཅི་སྟེ་དེ་དག་སྡོམ་པ་ཅན་མ་ཡིན་ན་ནི་དེ་དག་གི་ལྟུང་བ་ཡང་ཇི་ལྟར་རྣམ་པར་བཞག་ཅིང་།  སྡོམ་པ་ཅན་དེ་དག་གི་ཉེས་པས་ཟིན་པར་འགྱུར་ཞེ་ན་འདི་ལ་ཉེས་པ་མེད་དོ། །གང་
9-3-44a


དུ་གང་ལ་མང་དུ་བྱུང་བ་དེ་ལ་དེ་རང་གི་མིང་ནས་སྨོས་ཏེ་བསྟན་པས་འཇིགས་པ་བསྐྱེད་པའི་ཕྱིར་ཏེ།  ཐམས་ཅད་ཀྱིས་ཀྱང་ཕན་ཚུན་དུ་ལྟུང་བ་ཐམས་ཅད་སྤང་བར་བྱའོ། །རང་བཞིན་གྱི་ཁ་ན་མ་ཐོ་བ་ཆེ་བས་ན་གང་གིས་ཡང་
དག་པར་བླངས་པ་ན་ཡང་སྐལ་བ་མེད་པ་དང་།  དགེ་བའི་རྩ་བ་ཆད་པར་གྱུར་པ་དེས་སྡོམ་པ་ཅན་ལ་ཆེས་ཤིན་ཏུ་འགྱུར་ཏེ།  དེ་ལྟར་དཔྱད་པས་ཆོག་གོ། །ཞེས་གསུངས་སོ། །གཉིས་པ་དབང་པོ་འབྲིང་གི་བསླབ་བྱ་བཞིར་བསྟན་པ་ནི་ཐབས་ལ་མཁས་པའི་
མདོའི་དོན་བསླབ་བཏུས་ལས།  བྱང་ཆུབ་སེམས་ནི་ཡོངས་འདོར་དང་། །ཆགས་དང་སེར་སྣ་མི་ཟད་པས། །སློང་ལ་སྦྱིན་བར་མི་བྱེད་དང་། །སྒྲིམས་དེ་དགའ་བར་བྱེད་པ་ན། །སེམས་ཅན་ལ་ནི་མི་བཟོད་པར། །ཁྲོས་པས་སེམས་ཅན་བརྡེག་པ་
དང་། །ཉོན་མོངས་པ་དང་གནས་མཐུན་པས། །ཆོས་ལྟར་བཅོས་པ་སྟོན་པའོ། །ཞེས་གསུངས་པ་རྣམས་སོ། །གསུམ་པ་དབང་རྟུལ་གྱི་བསླབ་བྱ་གཅིག་ཏུ་བསྟན་པ་ནི།  སྨོན་པ་བྱང་ཆུབ་ཀྱི་སེམས་ལ་བསླབ་པ་སྟེ།  རྒྱལ་པོ་ལ་གདམས་པའི་
མདོ་ལས།  རྒྱལ་པོ་ཆེན་པོ་ཁྱོད་ནི་འདི་ལྟར་བྱ་བ་མང་བ་བྱེད་པ་མང་བ་སྟེ།  ཐམས་ཅད་ཀྱིས་ཐམས་ཅད་དུ་སྦྱིན་པ་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལ་བསླབ་པར་མི་ནུས་ཀྱི།  དེ་བས་ན་རྒྱལ་པོ་ཆེན་པོ་ཁྱོད་ཡང་དག་པར་རྫོགས་པའི་བྱང་ཆུབ་ལ་འདུན་པ་
དང་།  དད་པ་དང་།  དོན་དུ་གཉེར་བ་དང་།  སྨོན་པ་གསུམ་འགྲོ་ཡང་རུང་།  འགྲེང་ཡང་རུང་།  འདུག་ཀྱང་རུང་།  ཉལ་ཡང་རུང་།  སད་ཀྱང་རུང་།  ཟ་ཡང་རུང་།  འཐུང་ཡང་རུང་།  རྟག་པར་རྒྱུན་དུ་དྲན་པ་ཡིད་ལ་བཟུང་སྟེ་བསྒོམ་ཤིག །གཞན་
9-3-44b


གྱི་དགེ་བ་ལ་རྗེས་སུ་ཡི་རང་བར་གྱིས་ཤིག །རྗེས་སུ་ཡི་རང་ནས་ཀྱང་སངས་རྒྱས་དང་བྱང་ཆུབ་སེམས་དཔའ་དང་།  ཉན་ཐོས་དང་རང་སངས་རྒྱས་ཐམས་ཅད་ལ་ཕུལ་གཅིག་ཕུལ་ནས་སེམས་ཅན་ཐམས་ཅད་དང་ཐུན་མོང་དུ་གྱིས་ཤིག་དེ་ནས་སེམས་ཅན་
ཐམས་ཅད་སངས་རྒྱས་ཀྱི་ཆོས་ཡོངས་སུ་རྫོགས་པར་འགྱུར་བ་ཉིན་གཅིག་བཞིན་དུ་བླ་ན་མེད་པའི་བྱང་ཆུབ་ཏུ་བསྔོས་ཤིག །རྒྱལ་པོ་ཆེན་པོ་ཁྱོད་དེ་ལྟར་ན་རྒྱལ་སྲིད་ཀྱང་བྱེད་ལ་རྒྱལ་པོའི་བྱ་བ་ཡང་ཉམས་པར་མི་འགྱུར་ལ་བྱང་ཆུབ་ཀྱི་ཚོགས་ཀྱང་ཡོངས་
སུ་རྫོགས་པར་འགྱུར་རོ། །ཞེས་གསུངས་སོ། །དེས་ན་སྨོན་པ་བྱང་ཆུབ་ཀྱི་སེམས་སྤོང་བ་ནི་བྱང་ཆུབ་སེམས་དཔའ་དབང་པོ་རྣོ་འབྲིང་རྟུལ་གསུམ་ཐམས་ཅད་ལ་རྩ་བའི་ལྟུང་བ་ཤིན་ཏུ་ལྕི་བ་ཡིན་ཏེ།  མདོ་སྡུད་པ་ལས།  གལ་ཏེ་བསྐལ་པ་བྱེ་བར་དགེ་བའི་ལས་ལམ་
བཅུ། །སྤྱོད་ཀྱང་རང་རྒྱལ་དགྲ་བཅོམ་ཉིད་དུ་སེམས་བསྐྱེད་ན། །དེ་ནི་ཚུལ་ཁྲིམས་སྐྱོན་བྱུང་ཚུལ་ཁྲིམས་ཉམས་པ་སྟེ། །སེམས་བསྐྱེད་དེ་ནི་ཕས་ཕམ་བས་ཀྱང་ཤིན་ཏུ་ལྕི། །ཞེས་དང་།  སྤྱོད་འཇུག་ལས།  དེ་ནི་བྱང་ཆུབ་སེམས་དཔའ་ལ། །ལྟུང་
བའི་ནང་ནས་ལྕི་བ་སྟེ། །འདི་ལྟར་དེ་ནི་བྱུང་གྱུར་ན། །སེམས་ཅན་ཀུན་གྱི་དོན་ལ་དམན། །ཞེས་སོ། །གཉིས་པ་སེམས་ཙམ་ལུགས་ཀྱི་སེམས་བསྐྱེད་ཀྱི་བསླབ་བྱ་ལ་གཉིས་ཏེ།  ཕམ་འདྲའི་ཉེས་བྱས་བཞི་སྤོང་བ་དང་།  ཡན་ལག་གི་ཉེས་བྱས་བཞི་བཅུ་
ཞེ་དྲུག་སྤོང་བའོ། །དང་པོ་ལ་ཕམ་འདྲ་བཞི་ནི་སྡོམ་པ་ཉི་ཤུ་པ་ལས། རྙེད་དང་བཀུར་སྟི་ཆགས་པ་ཡིས། །བདག་བསྟོད་གཞན་ལ་སྨོད་པ་དང་། །སྡུག་བསྔལ་མགོན་མེད་གྱུར་པ་ལ། །སེར་སྣས་ཆོས་ནོར་མི་སྟེར་དང་། །གཞན་གྱིས་བཤགས་ཀྱང་
9-3-45a


མི་ཉན་པར། །ཁྲོས་པས་གཞན་ལ་འཚོག་པ་དང་། །ཐེག་པ་ཆེན་པོ་སྤོང་བྱེད་ཅིང་། །དམ་ཆོས་འདྲར་སྣང་སྟོན་པའོ། །ཞེས་གསུངས་སོ། །ཙོང༷་ཁ༷་པ་ཁ༷་ཅིག་འདིའི་ཡ་གྱལ་སོ་སོར་བགྲང་ནས་བརྒྱད་དུ་བྱེད་པ་ནི་བྱང་ཆུབ་
སེམས་དཔའི་སྡེ་སྣོད་ཀྱི་མ་མོ་དང་འགལ་ཏེ།  བྱང་སར།  དེ་ལྟར་བྱང་ཆུབ་སེམས་དཔའ་ཚུལ་ཁྲིམས་ཀྱི་སྡོམ་པ་ལ་གནས་པའི་ཕམ་པའི་གནས་ལྟ་བུའི་ཆོས་བཞི་ཡོད་དེ།  བཞི་གང་ཞེ་ན་ཞེས་པ་དང་།  སྡོམ་པ་ཉི་ཤུ་པ་ལས།  དེ་ཡི་ཉེས་པ་
བཞི་པོ་ནི་ཞེས་པ་དང་།  འགྲེལ་པའི་མཚམས་སྦྱོར་དུ་ཉེས་པ་བཞི་པོ་དེ་དག་ཀྱང་གང་ཡིན་ཞེ་ན་ཞེས་བཞིར་གསུངས་ཀྱི་བརྒྱད་དུ་མ་གསུངས་པའི་ཕྱིར་རོ། །ཡ་གྱལ་སོ་སོར་འདྲེན་ན་དགུར་ཡང་འགྱུར་ཏེ།  རྙེད་པ་ལ་ཆགས་པས་བདག་བསྟོད་གཞན་སྨོད་གཉིས། 
བཀུར་སྟི་ལ་ཆགས་པས་བདག་བསྟོད་གཞན་སྨོད་གཉིས།  སེར་སྣས་ཆོས་མི་སྟེར་བ་དང་ནོར་མི་སྟེར་བ་གཉིས།  ཁྲོས་པས་འཚོག་པ་གཅིག །ཐེག་ཆེན་སྤོང་བ་དང་།  དམ་ཆོས་འདྲར་སྣང་གཉིས་སུ་འགྱུར་བའི་ཕྱིར་རོ། །གཉིས་པ་ཡན་ལག་
གི་ཉེས་བྱས་བཞི་བཅུ་ཞེ་དྲུག་ནི།  དགེ་བ་ཆོས་སྡུད་དང་འགལ་བ་སོ་བཞི།  སེམས་ཅན་དོན་བྱེད་དང་འགལ་བ་བཅུ་གཉིས།  དང་པོ་ལ་སྦྱིན་པ་དང་འགལ་བ་བདུན།  ཚུལ་ཁྲིམས་དང་འགལ་བ་དགུ།  བཟོད་པ་དང་འགལ་བ་བཞི།  བརྩོན་འགྲུས་
དང་འགལ་བ་གསུམ།  བསམ་གཏན་དང་འགལ་བ་གསུམ།  ཤེས་རབ་དང་འགལ་བ་བརྒྱད་ལས།  དང་པོ་ལ་དཀོན་མཆོག་གསུམ་ལ་གསུམ་མི་མཆོད། །ཅེས་པ་ནི།  ཟང་ཟིང་གི་སྦྱིན་པ་དང་འགལ་བའོ། །འདོད་པའི་སེམས་ཀྱིས་རྗེས་སུ་འཇུག་
9-3-45b


ཅེས་པ་ནི་སེར་སྣའི་གཉེན་པོ་ལས་ཉམས་པའོ། །རྒན་པ་རྣམས་ལ་གུས་མི་བྱེད། །དྲིས་པ་ལ་ནི་ལན་མི་འདེབས། །ཞེས་པ་གཉིས་ནི་མི་འཇིགས་པའི་སྦྱིན་པའི་རྗེས་སུ་མི་མཐུན་པའོ། །མགྲོན་པོས་བདག་གིར་མི་བྱེད་དང་། །གསེར་ལ་སོགས་པ་ལེན་
མི་བྱེད། །ཅེས་པ་གཉིས་ནི་གཞན་གྱི་སྦྱིན་པའི་རྐྱེན་མི་བྱེད་པའོ། །ཆོས་འདོད་རྣམས་ལ་སྦྱིན་མི་བྱེད། །ཅེས་པ་ནི་ཆོས་ཀྱི་སྦྱིན་པ་མི་བྱེད་པའོ། །གཉིས་པ་ལ་ཚུལ་ཁྲིམས་འཆལ་བ་ཡར་བར་འདོར། །ཕ་རོལ་དད་ཕྱིར་སློབ་མི་བྱེད། །སེམས་
ཅན་དོན་ལ་བྱ་བ་ཆུང་། །སྙིང་རྗེར་བཅས་ན་མི་དགེ་མེད། །ཞེས་པ་བཞི་ནི་གཞན་དོན་གཙོ་བོར་གྱུར་པ་དང་འགལ་བའོ། །འཚོ་བ་ལོག་པ་དང་དུ་ལེན། །འཕྱར་ནས་རབ་ཏུ་རྒོད་ལ་སོགས། །འཁོར་བ་གཅིག་ཏུ་བགྲོད་པར་སེམས། །ཞེས་པ་གསུམ་
ནི་རང་དོན་གཙོ་བོར་གྱུར་པ་དང་འགལ་བའོ། །གྲགས་པ་མ་ཡིན་མི་སྤོང་བ། །ཉོན་མོངས་བཅས་ཀྱང་འཆོས་མི་བྱེད། །ཅེས་པ་གཉིས་ནི་གཉིས་ཀ་མཉམ་པའི་ཚུལ་ཁྲིམས་དང་འགལ་བའོ། །གསུམ་པ་གཤེ་ལ་ལན་དུ་གཤེ་ལ་སོགས། །ཁྲོས་
པ་རྣམས་ནི་ཡལ་བར་འདོར། །ཕ་རོལ་ཤད་ཀྱིས་ཆགས་པ་སྦྱོང་། །ཁྲོས་པའི་སེམས་ཀྱིས་རྗེས་སུ་འཇུག །ཅེས་པའོ། །བཞི་པ་ནི་རྙེད་བཀུར་འདོད་ཕྱིར་འཁོར་རྣམས་བསྡུ། །ལེ་ལོ་ལ་སོགས་སེལ་མི་བྱེད། །ཆགས་པས་བྲེ་མོའི་གཏམ་ལ་
བརྟེན། །ཅེས་པ་གསུམ་མོ། །ལྔ་པ་ནི་ཏིང་ངེ་འཛིན་གྱི་དོན་མི་ཚོལ། །བསམ་གཏན་སྒྲིབ་པ་སྤོང་མི་བྱེད། །བསམ་གཏན་རོ་ལ་ཡོན་ཏན་ལྟ། །ཅེས་པ་གསུམ་མོ། །དྲུག་པ་ནི།  ཉན་ཐོས་ཐེག་པ་སྤོང་བར་བྱེད། །རང་ཚུལ་ཡོད་བཞིན་དེ་ལ་བརྩོན། །
9-3-46a


བརྩོན་མིན་ཕྱི་རོལ་བསྟན་བཅོས་བརྩོན། །བརྩོན་པ་བྱས་ཀྱང་དེ་ལ་དགའ། །ཞེས་པ་བཞི་ནི་ཡུལ་དམན་པ་དང་འབྲེལ་བའི་ཉེས་པའོ། །ཐེག་པ་ཆེན་པོ་སྤོང་བར་བྱེད། །བདག་ལ་བསྟོད་ཅིང་གཞན་ལ་སྨོད། །
ཆོས་ཀྱི་དོན་དུ་འགྲོ་མི་བྱེད། །དོན་ལ་སྨོད་ཅིང་ཡི་གེ་སྟོན། །ཞེས་པ་བཞི་ནི་ཡུལ་དམ་པ་དང་འབྲེལ་བའི་ཉེས་པའོ། །གཉིས་པ་སེམས་ཅན་དོན་བྱེད་དང་འགལ་བ་བཅུ་གཉིས་ནི།  དགོས་པའི་གྲོགས་སུ་འགྲོ་མི་བྱེད། །ནད་པའི་རིམ་གྲོ་བྱ་བ་སྤོང་། །
སྡུག་བསྔལ་སེལ་བར་མི་བྱེད་དང་། །བག་མེད་རྣམས་ལ་རིག་མི་སྟོན། །ཅེས་པ་བཞི་ནི་དོན་བྱ་བའི་སྤྱི་དང་འབྲེལ་པའོ། །དོན་བྱ་བའི་ཁྱད་པར་དང་འབྲེལ་བ་ལ་གཉིས་ལས།  བྱས་ལ་ལན་དུ་ཕན་མི་འདོགས། །གཞན་གྱི་མྱ་ངན་སེལ་མི་བྱེད། །
ནོར་འདོད་པ་ལ་སྦྱིན་མི་བྱེད། །འཁོར་རྣམས་ཀྱི་ནི་དོན་མི་བྱེད། །གཞན་གྱི་བློ་དང་མཐུན་མི་འཇུག །ཡོན་ཏན་སྔགས་པ་སྨྲ་མི་བྱེད། །ཅེས་པ་དྲུག་ནི་ཕན་མི་འདོགས་པའི་ཉེས་པའོ། །རྐྱེན་དུ་འཚམས་པར་ཚར་མི་གཅོད། །རྫུ་འཕྲུལ་ལ་
སོགས་སྡིག་མི་བྱེད། །ཅེས་པ་གཉིས་ནི་ཚར་མི་གཅོད་པའི་ཉེས་པའོ། །བཞི་བཅུ་ཞེ་དྲུག་པོ་འདི་དག་ལ་བྱང་ས་ལས། །ཉོན་མོངས་པ་ཅན་གྱི་ཉེས་པ་དང་། །ཉོན་མོངས་པ་མ་ཡིན་པའི་ཉེས་པ་དང་། །ཉེས་པ་མེད་པ་གསུམ་གསུམ་དུ་ཕྱེ་ནས་གསུངས་
ལ། །འདིའི་འགྲེལ་པར་ཡང་།  གལ་ཏེ་མ་གུས་པ་དང་སྙོམས་ལས་དང་། །ལེ་ལོས་ཉེས་བ་བྱུང་ན་ནི། །ཉོན་མོངས་པ་ཅན་གྱི་ཉེས་པར་འགྱུར་རོ། །གལ་ཏེ་བརྗེད་པས་ཉེས་པ་བྱུང་ན་ནི་ཉོན་མོངས་པ་ཅན་མ་ཡིན་པའི་ཉེས་པར་འགྱུར་རོ། །སེམས་འཁྲུགས་
9-3-46b


པ་ལ་ནི་ཉེས་པ་མེད་དོ། །ཞེས་གསུངས་སོ། །འདིར་ནི་ལྟུང་བའི་རྐང་གྲངས་ཙམ་ཞིག་སྨོས་པ་ཡིན་ལ།  རྣམ་གཞག་རྒྱས་པར་ནི་འཁྲུལ་བ་ཟད་པའི་བླ་མ་རྗེ་བཙུན་གྲགས་པ་རྒྱལ་མཚན་གྱིས་མཛད་པའི་སྡོམ་པ་ཉི་ཤུ་པའི་འགྲེལ་པར་ཤེས་པར་བྱའོ། །
གཉིས་པ་རྩ་ལྟུང་བྱུང་བས་སྡོམ་པ་གཏོང་མི་གཏོང་དཔྱད་པ་ནི།  ཆགས་ལོའི་དྲིས་ལན་ལས་སྡོམ་པ་གཏོང་པའི་ཚུལ་ཡང་སོ་སོར་ཐར་པ་ལའང་ལྟུང་བ་འབྱུང་བས་སྡོམ་པ་གཏོང་བ་དང་མི་གཏོང་བའི་ལུགས་གཉིས་གདའ།  དེ་བཞིན་དུ་ཐེག་པ་ཆེན་པོ་ལ་ཡང་
གཉིས་ཡོད་པའི་སེམས་ཙམ་པ་ལྟུང་བས་སྡོམ་པ་གཏོང་བའི་ལུགས་སུ་གསལ།  དབུ་མ་པ་ལ་ལུགས་གཉིས་ཀ་གདའ།  ངེད་ཅག་སྨོན་པའི་སེམས་མ་གཏང་ན་སྡོམ་པའི་རྩ་བ་མི་གཏོང་བའི་ལུགས་དེའི་རྗེས་སུ་འབྲངས་པ་ལགས།  སྤྱོད་འཇུག་
ལས།  གལ་ཏེ་དེ་ལྟར་དམ་བཅས་ནས། །ལས་ཀྱིས་བསྒྲུབ་པར་མ་བྱས་ན། །སེམས་ཅན་དེ་དག་ཀུན་བསླུས་བས། །བདག་གི་འགྲོ་བ་ཅི་འདྲར་འགྱུར། །ཞེས་བྱ་བ་ལ་སོགས་པ་གསུངས་པ་ཡང་། སྨོན་པ་མ་ཉམས་པར་འཇུག་པ་འབའ་ཞིག་ལས་
ཉམས་ན་ངན་སོང་དུ་ཅུང་ཟད་སྐྱེ་བར་གསུངས་ཀྱི་མཐར་སངས་མི་རྒྱ་བའི་ལུགས་མ་ལགས།  ཞེས་དང་།  དེའི་ཕྱིར་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ་སྙམ་པའི་སྨོན་པ་མ་ཉམས་ན་འཇུག་པ་ལ་རིམ་གྱིས་སློབ་པས་འཁོར་བ་མཐའ་ཅན་དུ་
འགྱུར་ཏེ།  དཔེར་ན་མི་རྒྱུན་མ་ཆད་ན་ཟས་ནོར་ཞོར་ལ་འབྱུང་བ་བཞིན་ནོ། །དེས་ན་སེམས་བསྐྱེད་སུས་ཐོབ་ཀྱང་སྨོན་པ་འཆོར་དཀའ་བས་མཐར་འཚང་རྒྱ་བའི་དགོངས་པ་དེར་གདའ།  བསླབ་བཏུས་ཀྱི་དགོངས་པའང་དེ་བཞིན་དུ་ཤེས་པར་བྱའོ། །དེས་ན་
9-3-47a


སེམས་བསྐྱེད་ཀྱི་བསླབ་བྱ་རྒྱས་བསྡུས་དང་བརྩོན་པ་ཆེ་ཆུང་ལས་སངས་རྒྱས་སྔ་ཕྱི་འབྱུང་བས་དེས་ན་རིམ་གྱིས་སངས་རྒྱ་བའི་སེམས་བསྐྱེད་ཀྱི་ལུགས་ལ་མྱུར་དུ་སངས་རྒྱ་བ་ལ་དགོས་པའི་བསླབ་བྱ་ཚོམ་སྦྱར་བས་སྐྱོན་དུ་
མི་འགྲོ་སྟེ།  དཔེར་ན་རིམ་གྱིས་གསོ་དགོས་པའི་ནད་པ་ལ་ཅིག་ཆར་གསོ་དགོས་པའི་སྨན་མ་གཏང་ཀྱང་སྐྱོན་དུ་མི་འགྲོ་བ་བཞིན་ནོ། །དེས་ན་བསླབ་སླ་བ་ལ་དགོངས་པ་ཡིན་གྱི་གཏན་བསླབ་མི་དགོས་པ་མ་ལགས།  དེ་དག་སྤྱོད་འཇུག་གི་སྡོམ་པའི་
ཆོ་གའི་སྐབས་སུ།  བྱང་ཆུབ་སེམས་ནི་བསྐྱེད་བགྱི་ཞིང་། །ཞེས་སྨོན་པ་བླངས་ནས།  བྱང་ཆུབ་སེམས་དཔའི་བསླབ་པ་ལ། །རིམ་པ་བཞིན་དུ་བསླབ་པར་བགྱི། །ཞེས་འཇུག་པ་ལ་རིམ་གྱིས་སློབ་པར་ཁས་བླངས་ཀྱི་བསླབ་བྱ་ཐམས་ཅད་ད་ལྟ་ཉིད་ནས་
སློབ་པར་ཁས་བླངས་པ་མེད་པས་དམ་བཅའ་ཉམས་པའི་ཉེས་པ་མེད་མཆི། །སྨོན་པ་བླངས་ནས་དགེ་བ་ཕྲ་མོ་ཙམ་ཡང་མ་སྤྱད་ན་དམ་བཅའ་ཉམས་པའི་ཉེས་པ་མཆིས་མོད།  འོན་ཀྱང་སྨོན་པ་གཏོང་བའི་རྒྱུ་ཤིན་ཏུ་དཀའ།  འཇུག་པ་ལ་དགེ་བ་ཕྲ་མོ་ཙམ་ཡང་མི་བྱེད་
པ་མི་སྲིད་པའི་ཚོད་ཙམ་དུ་མཐོང་བས།  དབུ་མ་པའི་ལུགས་ཀྱི་སེམས་བསྐྱེད་གཏོང་དཀའ་བར་གདའ།  སྤྱིར་ཆོ་ག་ལ་ཕན་ཡོན་ཤས་ཆེ་བ་གཅིག །ཉེས་དམིགས་ཤས་ཆེ་བ་གཅིག །གཉིས་ཀ་ཆ་མཉམ་པ་གཅིག་ལས་སེམས་བསྐྱེད་འདི་ཕན་ཡོན་ཤས་ཆེ་
བ་ཡིན་ནོ་ཞེས་གསུངས་སོ། །དེས་ན་བདག་ཉིད་ཆེན་པོ་འདིའི་བཞེད་པ་ལ།  དབུ་མ་ལུགས་ཀྱི་སྨོན་འཇུག་གཉིས་པོ་སྟབས་ཅིག་ཏུ་བླངས་ནས་སྨོན་པའི་བསླབ་བྱ་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ་སྙམ་པའི་བསམས་པ་མ་དོར་ན་སྨོན་པ་སེམས་
9-3-47b


བསྐྱེད་ཀྱི་སྡོམ་པ་མི་གཏོང་ཞེས་བཞེད་པ་ཡིན་གྱི།  ནམ་མཁའི་སྙིང་པོའི་མདོ་ལས་གསུངས་པའི་རྩ་ལྟུང་བྱུང་ནས་འཇུག་པའི་ཕྱོགས་འགའ་ཞིག་ལས་ཉམས་པར་གོང་དུ་བཤད་ཅིང་རྗེ་བཙུན་གྱིས་ཀྱང་དེ་བཞིན་དུ་གསུངས་སོ། །དེ་ཡང་རྩ་ལྟུང་དེ་དག་ཐམས་
ཅད་སྤོང་བར་ཁས་བླངས་པའི་དབང་རྣོན་གྱི་དབང་དུ་བྱས་པ་ཡིན་གྱི་དབང་པོ་འབྲིང་པོ་དང་རྟུལ་པོ་ལ་ནི་རང་གི་བློ་ཚོད་དང་སྦྱར་བའི་བསླབ་བྱ་དེ་དག་བསྲུངས་པས་བྱང་སེམས་ཀྱི་བསླབ་བྱ་ཉམས་པར་མི་འགྱུར་རོ། །སེམས་ཙམ་པ་ལྟུང་བ་འབྱུང་བས་སྡོམ་པ་
གཏོང་བའི་ལུགས་སུ་གསལ་ཞེས་པ་ཡང་ཀུན་དཀྲིས་དྲག་པོས་རྩ་ལྟུང་བྱུང་བའི་དབང་དུ་བྱས་ཀྱི།  ཀུན་དཀྲིས་འབྲིང་དང་ཆུང་ངུས་ཕམ་པའི་གནས་ལྟ་བུའི་ཆོས་སྤྱད་ཀྱང་སྡོམ་པ་མི་གཏོང་པར་འདོད་དེ།  བྱང་ས་ལས།  མདོར་བསྡུས་ན།  རྒྱུ་གཉིས་ཁོ་ནས་བྱང་
ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་བཏང་བར་འགྱུར་ཏེ།  བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་པ་ཡོངས་སུ་བཏང་བ་དང་།  ཕམ་པའི་གནས་ལྟ་བུའི་ཆོས་ཀྱི་ཀུན་ནས་དཀྲིས་པ་ཆེན་པོའི་ཀུན་ནས་སྤྱོད་པའོ། །བྱང་ཆུབ་
སེམས་དཔའ་གང་གིས་སྨོན་པ་ཡང་མ་གཏང་ལ་ཕམ་པའི་གནས་ལྟ་བུའི་ཆོས་རྣམས་ཀྱི་ཀུན་ནས་དཀྲིས་པ་ཆེན་པོ་ཡང་ཀུན་ཏུ་མ་སྤྱད་ན།  ཚེ་རྗེས་སུ་ཟིན་ཀྱང་འོག་དང་སྟེང་དང་ཐད་ཀ་ཐམས་ཅད་དུ་སྐྱེས་པ་ན་བྱང་ཆུབ་སེམས་དཔའི་ཚུལ་ཁྲིམས་ཀྱི་སྡོམ་པ་
ཡང་དག་པར་བླངས་པ་སྤོང་བར་མི་འགྱུར་རོ། །བྱང་ཆུབ་སེམས་དཔའ་ཚེ་བརྗེས་ཏེ་བརྗེད་ན་ཡང་དགེ་བའི་བཤེས་གཉེན་བསྟེན་པ་ལ་བརྟེན་ནས་དྲན་པ་གསོ་བའི་ཕྱིར་ཡང་དང་ཡང་ནོད་པར་ཟད་ཀྱི་གསར་དུ་ཡང་དག་པར་ལེན་པ་ནི་མ་ཡིན་ནོ། །ཞེས་པ་དང་།  ཕམ་པའི་
9-3-48a


གནས་ལྟ་བུ་བཞི་པོ་འདི་དག་ནི་ཀུན་ནས་དཀྲིས་པ་ཆུང་ངུ་དང་འབྲིང་གིས་ནི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་དེ་བྱང་ཆུབ་ཀྱི་སེམས་གཏོང་བར་མི་འགྱུར་རོ། །ཀུན་ནས་དཀྲིས་པ་ཆེན་པོས་ནི་བཏང་བར་འགྱུར་ཏེ་ཞེས་གསུངས་སོ། །
འོ་ན་ཀུན་དཀྲིས་ཆུང་ངུ་དང་འབྲིང་དང་ཆེན་པོའི་ཁྱད་པར་ཇི་ལྟ་བུ་ཞེ་ན།  བྱང་ས་ལས།  གང་གི་ཕྱིར་བྱང་ཆུབ་སེམས་དཔས་ཕམ་པའི་གནས་ལྟ་བུའི་ཆོས་བཞི་པོ་འདི་དག་རྒྱུན་མ་ཆད་པར་ཀུན་ཏུ་སྤྱོད་པ་དང་།  ངོ་ཚ་ཤེས་པ་དང་ཁྲེལ་ཡོད་པ་ཆུང་ངུ་ཡང་མི་སྐྱེད་པ་དང་། 
དེས་མགུ་བར་བྱེད་ཅིང་དེ་ལ་དགའ་བར་བྱེད་པ་དང་།  དེ་ཉིད་ལ་ཡོན་ཏན་ཏུ་ལྟ་བ་ཅན་དུ་གྱུར་པ་འདི་ནི་ཀུན་ནས་དཀྲིས་པ་ཆེན་པོ་ཡིན་པར་རིག་པར་བྱའོ་ཞེས་གསུངས་ལ།  ཡན་ལག་གསུམ་ཀ་ཚང་བ་ཆེན་པོ་བསྟན་པའི་ཤུགས་ལས་ཡན་ལག་གཉིས་ཙམ་ཚང་བ་འབྲིང་དང་། 
གཅིག་ཙམ་ཚང་བ་ཆུང་ངུར་ཤེས་པར་བྱའོ། །གནས་བརྟན་བྱང་བཟང་གི་སྡོམ་པ་ཉི་ཤུ་པའི་འགྲེལ་པར་གང་གི་ཚེ་སླར་ངོ་ཚ་དང་ཁྲེལ་ཅུང་ཟད་ཙམ་སྐྱེ་བ་དང་ཕ་རོལ་གྱིས་གསོལ་བ་བཏབ་པས་བཟློག་པ་དེ་ནི་འབྲིང་ལ་གནས་པའོ། །གང་གི་ཚེ་མྱུར་བ་ཉིད་དུ་ངོ་ཚ་བར་
བྱེད་ཅིང་རང་ཉིད་ཀྱང་རུང་སྟེ་སྐད་ཅིག་གིས་བཟློག་པ་དེ་ནི་ཆུང་ངུ་ལ་གནས་པར་རིག་པར་བྱའོ་ཞེས་གསུངས་སོ། །མདོར་ན་དབུ་མ་ལུགས་ཀྱི་སེམས་བསྐྱེད་ལ་ནི་སྨོན་པའི་སེམས་མི་ཉམས་པར་བསྲུངས་ནས་འཇུག་པའི་བསླབ་བྱ་ལ་རང་གི་བློ་ཚོད་དང་སྦྱར་ནས་ཇི་ཙམ་ནུས་པ་
བསྲུང་ཞིང་དུས་ཀྱང་ཞག་གཅིག་དང་།  ཟླ་བ་དང་།  ལོ་དང་།  ཇི་སྲིད་འཚོའི་བར་དང་།  བྱང་ཆུབ་ཀྱི་བར་ཇི་ཙམ་བློས་ལེན་པར་ནུས་པ་དེ་ཙམ་བླང་བར་རྗེ་བཙུན་རྩེ་མོས་བཤད་པ་ནི་ལུགས་འདིའི་ཁྱད་པར་གྱི་ཆོས་སུ་ཤེས་པར་བྱ་སྟེ།  བསླབ་བཏུས་ལས།  སྡོམ་
9-3-48b


པ་བདག་ཉིད་ཀྱིས་སྟོབས་དང་སྦྱར་ནས་བླང་བར་བྱ་སྟེ།  དེ་ལྟ་མ་ཡིན་ན་སངས་རྒྱས་བྱང་སེམས་ཐམས་ཅད་དང་བཅས་པའི་འཇིག་རྟེན་བསླུས་པར་འགྱུར་རོ་ཞེས་གསུངས་པའི་དགོངས་པར་སྣང་ངོ་། །སེམས་ཙམ་ལུགས་ཀྱི་སེམས་བསྐྱེད་ལ་ནི་སྨོན་སེམས་
བཏང་བ་དང་།  ཀུན་དཀྲིས་དྲག་པོས་ཕམ་པ་བྱུང་བས་སྡོམ་པ་བཏང་ཞིང་བསླབ་བྱ་ཡང་མཐའ་དག་ལ་སློབ་པ་དང་།  དུས་ཀྱང་བྱང་ཆུབ་ཀྱི་བར་དུ་ལེན་པ་ཁོ་ན་གསུངས་ཀྱི་བསླབ་བྱ་སོ་སོར་ཕྱེ་བ་དང་།  དུས་ཡུན་རིང་ཐུང་གི་རྣམ་གཞག་མ་གསུངས་
པས་ལུགས་དེ་དག་མ་འདྲེས་པར་སོ་སོར་ཤེས་པར་བྱའོ། །གསུམ་པ་སྔགས་སྡོམ་གྱི་བསླབ་བྱ་ལ་བཞི་སྟེ་བྱ་རྒྱུད།  སྤྱོད་རྒྱུད།  རྣལ་འབྱོར་རྒྱུད།  བླ་མེད་རྒྱུད་ཀྱི་བསླབ་བྱ་དང་བཞི་ལས།  དང་པོ་ལ་ཁ་ཙོང་ཅིག་ན་རེ།  བྱ་སྤྱོད་གཉིས་ལ་ཕ་རོལ་ཏུ་ཕྱིན་
པའི་སྨོན་འཇུག་གི་སེམས་བསྐྱེད་བླངས་ནས་བསྲུངས་པ་མ་གཏོགས་དམ་ཚིག་དང་སྡོམ་པ་བསྲུང་རྒྱུ་གཞན་མེད་དོ་ཅེས་པ་ནི་རྣམ་པར་འཁྱམས་པ་སྟེ།  དེ་ལྟར་ན་བྱ་སྤྱོད་གཉིས་ཀྱི་སྨིན་བྱེད་ཀྱི་དབང་ལ་བརྟེན་ནས་སྔགས་ཀྱི་དམ་ཚིག་དང་སྡོམ་པ་མི་ཐོབ་པར་
འགྱུར་ཞིང་།  འདོད་ན་རྒྱུད་སྡེ་གོང་མ་གཉིས་ཀྱི་སྨིན་བྱེད་ཀྱི་དབང་ལ་བརྟེན་ནས་ཀྱང་སྔགས་ཀྱི་དམ་ཚིག་དང་སྡོམ་པ་མི་ཐོབ་པར་འགྱུར་བས་ལུགས་འདི་ནི་འཛིན་པ་ལྟ་སྨོས་ཀྱང་ཅི་དགོས་ཐོས་པར་གྱུར་ན་ཡང་རྣ་བ་དགབ་པར་བྱའོ། །ཡང་ཁ་བུ་ཅིག །ཇོ་བོ་
རྗེས་མཛད་པར་གྲགས་པའི་དམ་ཚིག་བསྡུས་པ་ལས།  ཐུན་མོང་གི་རྩ་བའི་ལྟུང་བ་བཞི་དང་།  ཕ་རོལ་ཏུ་ཕྱིན་པའི་རྩ་བའི་ལྟུང་བ་བཅུ་གཉིས་དང་།  ཀྲི་ཡའི་རྒྱུད་ཀྱི་རྩ་བའི་ལྟུང་བ་སུམ་ཅུ་དང་།  སྤྱོད་པའི་རྒྱུད་ཀྱི་རྩ་བའི་ལྟུང་བ་བཅུ་བཞི་དང་།  རྣལ་འབྱོར་
9-3-49a


རྒྱུད་ཀྱི་རྩ་བའི་ལྟུང་བ་བཅུ་དང་།  ཡང་བཞི་དང་ཡང་བཞི་སྟེ་རྩ་བའི་ལྟུང་བ་བདུན་ཅུ་ཐམ་པའོ། །ཞེས་གསུངས་པའི་ཀྲི་ཡའི་རྒྱུད་ཀྱི་རྩ་ལྟུང་སུམ་ཅུ་ནི་ལེགས་གྲུབ་ནས་གསུངས་པའི་རིག་སྔགས་ཀྱི་འདུལ་བ་སྔ་ཕྱི་
རྣམས་ཡིན་ནམ་དཔྱད་པར་བྱའོ། །ཞེས་ཟེར་རོ། །དེ་ནི་མི་འཐད་དེ། དམ་ཚིག་བསྡུས་པ་ནི་ཇོ་བོས་མ་མཛད་པར་མཁས་པ་རྣམས་ལ་གྲགས་ཤིང་།  དེ་ནས་བཤད་པའི་རང་ལུགས་ཀྱི་གྲངས་ངེས་པ་ལ་ངེས་པ་མི་སྣང་ལ།  ལེགས་གྲུབ་ནས་
བཤད་པའི་རིག་སྔགས་ཀྱི་འདུལ་བ་སྔ་ཕྱི་རྣམས་ལ་གྲངས་བརྒྱད་ཅུ་ཙམ་སྣང་ཞིང་།  དེ་དག་རྩ་ལྟུང་དུ་བྱས་ན་ཧ་ཅང་ཐལ་བའི་ཕྱིར་རོ་ཞེས་བདག་གི་བླ་མ་གསུང་ངོ་། །འོ་ན་བྱ་རྒྱུད་ཀྱི་བསྲུང་བྱའི་དམ་ཚིག་རྣམས་གང་ཞེ་ན།  གསང་བ་སྤྱི་རྒྱུད་ལས།
དེ་ནས་བླ་མས་སློབ་མ་རྣམས། །མ་ཡེངས་ལེགས་པར་བཀོད་ནས་སུ། །ཤེས་རབ་ཕ་རོལ་ཕྱིན་བླངས་ཏེ། །དམ་ཚིག་འདི་དག་བསྒོ་བར་བྱ། །དེ་རིང་ཕན་ཆད་ཁྱེད་རྣམས་ཀྱིས། །སངས་རྒྱས་ཆོས་དང་དགེ་འདུན་དང་། །རིག་སྔགས་གསང་
སྔགས་ཚོགས་རྣམས་ལ། །དད་པས་རབ་ཏུ་བརྟེན་པར་བྱ། །རྟག་པར་ཕྱག་རྒྱ་ཆེན་པོ་ལ། །ཁྱད་པར་དུ་ནི་མོས་པར་བྱ། །དམ་ཚིག་ཅན་དང་མཛའ་བོ་དང་། །བླ་མ་ལ་ནི་བཀུར་བར་བྱ། །ལྷ་རྣམས་ཀུན་ལ་སྡང་མི་བྱ། །དུས་མཚམས་དག་ཏུ་
མཆོད་པར་བྱ། །སྟོན་པ་གཞན་གྱི་གཞུང་མི་བྱ། །རྟག་ཏུ་གློ་བུར་མགྲོན་མཆོད་བྱ། །སྲོག་ཆགས་རྣམས་ལ་བྱམས་པའི་སེམས། །རྟག་ཏུ་བརྟན་པ་ཉེ་བར་བཞག །ཐེག་པ་ལ་ནི་དགའ་རྣམས་ཀྱིས། །བསོད་ནམས་དག་ལ་ནན་ཏན་བསྐྱེད། །བཟླས་
9-3-49b


བརྗོད་བྱེད་ལ་འབད་པ་ཡིས། །གསང་སྔགས་སྤྱོད་ལ་བརྩོན་པར་བྱ། །གསང་སྔགས་རྒྱུད་ལས་བསྟན་པ་ཡི། །དམ་ཚིག་རྣམས་ཀྱང་བསྲུང་བར་བྱ། །དམ་ཚིག་མེད་པ་རྣམས་ལ་ནི། །སྔགས་དང་ཕྱག་རྒྱ་མི་སྦྱིན་ནོ། །གསང་སྔགས་རྒྱུད་ནི་ལེགས་
བསྲུང་ཞིང་། །དེ་ཡང་བདག་གིས་རྟོགས་པར་བྱ། །ཞེས་གསུངས་པ་རྣམས་ཡིན་ལ་འདིའི་དོན་ལ་སྤྱིའི་དམ་ཚིག་གསུམ་ཁྱད་པར་གྱི་དམ་ཚིག་བཅུ་གསུམ་དུ་ཕྱེ་ནས་བདག་གི་བླ་མས་བྱ་རྒྱུད་སྤྱིའི་རྣམ་གཞག་ལེགས་པར་བཤད་པའི་རྒྱ་མཚོར་རྒྱས་པར་ཡོད་པས་
དེར་བལྟ་བར་བྱའོ། །གཉིས་པ་སྤྱོད་རྒྱུད་ཀྱི་བསླབ་བྱ་ནི་རྣམ་སྣང་མངོན་བྱང་ལས།  དེ་རིང་ཕྱིན་ཆད་བུ་ཁྱོད་ཀྱིས། །དམ་པའི་ཆོས་དང་བྱང་ཆུབ་སེམས། །སྲོག་གི་ཕྱིར་ཡང་ད་ཕྱིན་ཆད། །སྔོན༷་དུ་བཏང་བར་མི་བྱའོ། །ཁྱོད་ཀྱིས་སེར་སྣ་དང་ནི་གང་། །སེམས་
ཅན་གནོད་པ་མི་བྱའོ། །དམ་ཚིག་འདི་དག་སངས་རྒྱས་ཀྱིས། །བརྟུལ་ཞུགས་བཟང་པོ་ཁྱོད་ལ་བཤད། །ཅེས་གསུངས་པ་རྣམས་སོ། །གསུམ་པ་རྣལ་འབྱོར་རྒྱུད་ཀྱི་བསླབ་བྱ་ལ།  ཁ་ཅིག་ན་རེ།  རྡོ་རྗེ་རྩེ་མོར།  དེ་ལས་གཞན་ཡང་བཅུ་བཞི་ནི། །ཞེས་
པས་རྣལ་འབྱོར་བླ་མེད་ནས་བཤད་པའི་རྩ་ལྟུང་བཅུ་བཞི་ལ་འདོད་དགོས་ཏེ།  སྦྱོང་རྒྱུད་དུ་རྡོ་རྗེ་སློབ་དཔོན་བརྙས་ན་ནི། །རྟག་ཏུ་སྡུག་བསྔལ་ཐོབ་འགྱུར་བས། །སློབ་དཔོན་ལ་ནི་བརྙས་མི་བྱ། །ཞེས་རྩ་ལྟུང་དང་པོ་དང་།  རྡོ་རྗེ་སྤུན་དང་ཞེས་གསུམ་པ་དང་།
སྲིང་མོ་དང་། །རྡོ་རྗེ་མ་རྣམས་ཉིད་ལ་ཡང་། །རྣལ་འབྱོར་ཅན་གྱིས་བརྙས་མི་བྱ། །ཞེས་བཅུ་བཞི་པ་བསྟན་ཅིང་།  ཀ་མ་དྷེ་ནུའི་སྦྱོང་རྒྱུད་ཀྱི་འགྲེལ་པར་ཡང་རྩ་ལྟུང་བཅུ་བཞིར་བཤད་པའི་ཕྱིར་དང་།  རྣལ་འབྱོར་བླ་མེད་དང་ཡོ་ག་གཉིས་ལ་ཁས་བླང་རྒྱུའམ་བཟུང་རྒྱུའི་
9-3-50a


སྡོམ་པ་རིགས་ལྔའི་སྡོམ་བཟུང་གཅིག་པུ་ལས་མེད་པས་བསྲུང་བྱའི་དམ་ཚིག་ཀྱང་རྩ་ལྟུང་བཅུ་བཞི་བསྲུང་བར་གཅིག་དགོས་བའི་ཕྱིར་རོ། །ཞེས་ཟེར་རོ་དེ་ནི་མི་འཐད་དེ།  སྲིང་མོ་དང་རྡོ་རྗེ་མ་ལ་བརྙས་པ་རྩ་ལྟུང་དུ་འཇོག་ན་གསུམ་
པར་འཇོག་དགོས་ཀྱི་བཅུ་བཞི་པར་འཇོག་པ་ནི་རྩ་ལྟུང་བཅུ་བཞི་པའི་དོན་ངོས་མ་ཟིན་པའི་ཕྱིར་དང་།  ཀ་མ་དྷེ་ནུས་རྩ་ལྟུང་བཅུ་བཞི་བཤད་པ་ནི་སྤྱོད་རྒྱུད་བླ་མེད་དུ་འགྲེལ་པའི་ལུགས་ཡིན་པས་ཡོ་ག་ལ་རྩ་ལྟུང་བཅུ་བཞི་ཡོད་པའི་ཤེས་བྱེད་དུ་མ་འབྲེལ་པའི་ཕྱིར་རོ། །
ཡང་བཅུ་གསུམ་པ་བླ་མེད་ལ་ཚོགས་རྫས་སྟོབ་པ་སྤོང་ན་རྩ་ལྟུང་དུ་འགྱུར་བ་དང་།  ཡོ་ག་ལ་དམ་ཚིག་གི་རྡོ་རྗེ་དྲིལ་བུ་སྤངས་ན་རྩ་ལྟུང་དུ་འགྱུར་བའི་ཁྱད་པར་འདོད་པ་ནི་བསྲུང་བྱའི་དམ་ཚིག་ཁྱད་པར་མེད་པར་འདོད་པ་དང་འགལ་ལོ། །གཞན་ཡང་རྩ་ལྟུང་
གསུམ་པ་མངལ་སྒོ་མི་གཅིག་ན་རྡོ་རྗེ་སྤུན་གྱི་དོན་མི་གནས་པར་འདོད་པ་དང་ཡོ་ག་ལ་རྩ་ལྟུང་བཅུ་བཞིར་འདོད་པ་ཡང་འགལ་ཏེ་ཡོ་གའི་དབང་བསྐུར་ལ་མངལ་སྒོ་གཅིག་པའི་དོན་བཤད་དུ་མེད་པའི་ཕྱིར་རོ། །དེ་ལྟར་མི་འཐད་པའི་ཕྱོགས་བཀག་ནས་རྒྱུད་འགྲེལ་
རྣམ་པར་དག་པ་ལས་བྱུང་བ་བླ་མ་དམ་པའི་གསུང་གིས་བརྒྱན་པ་བཤད་པར་བྱ་སྟེ།  སྤྱིར་ཡོ་གའི་དམ་ཚིག་ལ་ཁས་བླངས་ཀྱིས་ཐོབ་པ་དང་།  ཆོ་གས་ཐོབ་པ་གཉིས་ལས།  དང་པོ་ནི་རྡོ་རྗེ་རྩེ་མོའི་སྡོམ་པ་བསྒྲག་བཟུང་གི་སྐབས་ནས་བསྟན་པ་རྣམས་ཏེ་བཟུང་
བའི་རིམ་པ་ལྟར་བཤད་ན་རིགས་ལྔ་སྤྱིའི་དམ་ཚིག་དང་།  སོ་སོའི་དམ་ཚིག་དང་།  སྡོམ་པ་མདོར་བསྡུས་ཏེ་བསྲུང་བ་གསུམ་ལས།  དང་པོ་ནི།  ཇི་ལྟར་དུས་གསུམ་མགོན་པོ་རྣམས། །ཞེས་སོགས་ཚིགས་བཅད་གཉིས་ཀྱིས་བསྟན་ཏེ།  སྨོན་པ་དང་
9-3-50b


འཇུག་པའི་བསླབ་བྱ་རྣམས་བསྲུང་བའོ། །འདི་ལ་སྡོམ་པ་བསྒྲགས་པའི་སྐབས་སུ་རིགས་ལྔ་སོ་སོའི་དམ་ཚིག་གི་རྗེས་ལ།  དེ་ལས་གཞན་ཡང་བཅུ་བཞི་ནི། །ཞེས་སོགས་ཚིག་བཅད་གཅིག་གསུངས་ཏེ།  དེ་ལ་ཕས་ཕམ་པ་བཅུ་བཞི་ནི་དབུ་མ་ལུགས་
ཀྱི་རྩ་ལྟུང་བཅུ་བཞི་ཡིན་པར་བདག་གི་བླ་མ༷་བཞེད་ཅིང་།  རྗེ་བཙུན་རྩེ་མོས་སཾ་བྷུ་ཊིའི་འགྲེལ་པར་དེ་བཞིན་དུ་བཤད་པས་རྩ་ལྟུང་བཅུ་བཞི་སྤོང་བ་ནི་ཚུལ་ཁྲིམས་ཀྱི་བསླབ་པ་སོགས་གསུམ་གྱི་ཁོངས་སུ་འདུས་པས་རྨད་དུ་བྱུང་བའི་སྲོལ་དུ་སྣང་ངོ་། །གཉིས་པ་ནི།
སངས་རྒྱས་ཆོས་དང་དགེ་འདུན་ཏེ། །ཞེས་སོགས་ཚིགས་བཅད་ལྔ་སྟེ།  དེ་བཞིན་གཤེགས་པའི་རིགས་ཀྱི་དམ་ཚིག་ལ་དཀོན་མཆོག་གསུམ་སྐྱབས་སུ་བཟུང་བ་སྟེ་གསུམ།  རྡོ་རྗེའི་རིགས་ལ་རྡོ་རྗེ་དྲིལ་བུ།  ཕྱག་རྒྱ།  སློབ་དཔོན་བཟུང་བ་སྟེ་བཞི། 
རིན་ཆེན་རིགས་ལ་ཟང་ཟིང་།  མི་འཇིགས་པ།  ཆོས།  བྱམས་པའི་སྦྱིན་པ་དུས་དྲུག་ཏུ་གཏོང་བ་སྟེ་བཞི།  པད་མའི་རིགས་ལ་དམ་ཆོས་མ་ལུས་པར་བཟུང་བ་སྟེ་གཅིག །ལས་ཀྱི་རིགས་ལ་སྔར་གྱི་རྣམས་ཅི་ནུས་སུ་བསྲུང་བ་དང་།  མཆོད་པའི་ལས་ཅི་
ནུས་བྱེད་པ་གཉིས་ཏེ་བཅུ་བཞིའོ། །གསུམ་པ་ནི།  བྱང་ཆུབ་སེམས་ནི་བླ་མེད་མཆོག །ཞེས་སོགས་ཚིགས་བཅད་གཅིག་སྟེ།  ཚིག་རྐང་དང་པོ་གཉིས་ཀྱིས་རིགས་ལྔ་སྤྱིའི་དམ་ཚིག་མདོར་བསྡུས་ཏེ་བཟུང་ཞིང་།  ཕྱི་མ་གཉིས་ཀྱིས་སོ་སོའི་དམ་ཚིག་མདོར་བསྡུས་
ཏེ་བཟུང་བའོ། །གཞན་ཡང་ཁྱོད་ཀྱིས་སྲོག་ཆགས་བསད་མི་བྱ་ལ་སོགས་པ་དམ་ཚིག་དང་སྡོམ་པ་མ་ལུས་པ་མདོར་བསྡུས་ཏེ་བཟུང་བའོ། །གཉིས་པ་ཆོ་གས་ཐོབ་པ་ནི།  དཔལ་མཆོག་ལས།  དམ་ཚིག་སྡོམ་པ་གྲུབ་པ་འདི། །ཁྱོད་ཀྱིས་རྟག་ཏུ་བསྲུང་
9-3-51a


བར་བྱ། །སངས་རྒྱས་ཀུན་གྱིས་མཐུན་པར་གསུངས། །དམ་པ་བརྟག་པའི་བཀའ་ཡིན་ནོ། །གང་ཞིག་བསྐྱེད་པ་ཙམ་གྱིས་ནི། །སངས་རྒྱས་ཉིད་དུ་དོགས་མེད་པའི། །བྱང་ཆུབ་སེམས་ནི་བཏང་མི་བྱ། །ཕྱག་ན་རྡོ་རྗེ་
གང་ཡིན་པ། །དམ་པའི་ཆོས་ནི་མི་སྤོང་ཞིང་། །ནམ་ཡང་དོར་བར་མི་བྱའོ། །མི་ཤེས་པའམ་རྨོངས་པ་ཡིས། །དེ་ལ་སྨོད་པར་མི་བྱའོ། །རང་གི་བདག་ཉིད་ཡོངས་སྤངས་ནས། །དཀའ་ཐུབ་ཀྱིས་ནི་གདུང་མི་བྱ། །ཇི་ལྟར་བདེ་བས་བདེ་བར་བཟུང་། །
འདི་ནི་མ་བྱོན་རྫོགས་སངས་རྒྱས། །རྡོ་རྗེ་དྲིལ་བུ་ཕྱག་རྒྱ་རྣམས། །ནམ་ཡང་དོར་བར་མི་བྱའོ། །སློབ་དཔོན་སྨད་པར་མི་བྱ་སྟེ། །འདི་ནི་སངས་རྒྱས་ཀུན་དང་མཉམ། །ཞེས་དང་།  རྡོ་རྗེ་འབྱུང་བ་ནས།  དེ་ནས་ཁྱོད་ཀྱིས་གཞན་ཕྱག་རྒྱ་ལ་མི་
མཁས་པ་གང་ལ་ཡང་ཕྱག་རྒྱ་ཙམ་སྟོན་པར་མ་བྱེད་ཅིག །དེ་ཅིའི་ཕྱིར་ཞེ་ན་འདི་ལྟར་སེམས་ཅན་རྣམས་ཀྱིས་དཀྱིལ་འཁོར་མ་མཐོང་བར་སེམས་མའི་ཕྱག་རྒྱ་བཅིངས་པ་ལ་སྦྱོར་བར་བྱེད་ཀྱང་དེ་རྣམས་ཀྱིས་དངོས་གྲུབ་ཇི་ལྟ་བ་བཞིན་ཐོབ་པར་མི་འགྱུར་བ་དང་།  དེ་
ནས་སོམ་ཉི་ཟ་བར་གྱུར་པས་ཡ་ང་བ་མ་སྤངས་པར་མྱུར་བ་ཉིད་དུ་དུས་བྱས་ནས་སེམས་ཅན་དམྱལ་བ་མནར་མེད་པར་ལྟུང་བར་འགྱུར་ལ།  རྒྱུ་དེས་ཁྱོད་ཀྱང་ངན་འགྲོར་ལྟུང་བར་འགྱུར་ལ་ཞེས་བརྗོད་པར་བྱའོ། །ཞེས་དབང་བསྐུར་ཟིན་པའི་རྗེས་སུ་བརྗོད་པར་བཤད་
པས་གསང་སྒྲོགས་བསྲུང་བ་དང་བཅུ་གཅིག་ཙམ་ཡིན་ནོ། །འདི་དག་གི་དོན་ལ་རེ་རེ་ཡང་རྟེན་དང་།  ཡུལ་དང་།  བསམ་པ་དང་།  དུས་སྐབས་དང་།  ངོ་བོ་ཉིད་ཀྱི་ཡན་ལག་ལྔ་ལྔའི་སྒོ་ནས་ཤེས་དགོས་པ་ལས་འདིར་གཞུང་གི་སྟེང་དུ་ངོ་བོ་ཉིད་ཀྱི་ཡན་ལག་ཙམ་བཤད་ན་
9-3-51b


ལྟུང་བ་དང་པོ་གཉིས་ནི་བྱང་ཆུབ་སེམས་ནི་བཏང་མི་བྱ་ཞེས་པས་སྟོན་ཏེ།  དེ་ཡང་བླ་མེད་ཀྱི་དཀྱིལ་ཆོག་རྣམས་ལས་བྱང་ཆུབ་ཀྱི་སེམས་མི་བཏང་བའི་ཤེས་བྱེད་དུ་གང་ཞིག་ཞེས་སོགས་ཀྱི་ཚིག་རྐང་གཉིས་འདྲེན་པ་ཡོད་མོད་ཀྱང་གྲུབ་ཆེན་ཀུན་དགའ་སྙིང་པོའི་དཔལ་
མཆོག་གི་འགྲེལ་པ་ལས་བྱུང་བ་ལྟར་བཤད་ན་སྨོན་པ་བྱང་ཆུབ་ཀྱི་སེམས་བཏང་བ་ནི་རྩ་བའི་ལྟུང་བ་དང་པོའོ། །འཇུག་པ་བྱང་ཆུབ་ཀྱི་སེམས་བཏང་བ་སྟེ་བྱང་ས་དང་བསླབ་བཏུས་སོགས་ཕ་རོལ་ཏུ་ཕྱིན་པའི་གཞུང་ལུགས་ལས་བཤད་པའི་མགོ་དང་རྐང་ལག་གཏོང་བ་
ལ་སོགས་པ་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་འདི་དག་གིས་ཅི་ཞིག་བྱ་ཞེས་སེམས་ཀྱིས་འཐིང་སླད་བྱེད་པའི་སྒོ་ནས་སྤོང་ན་རྩ་ལྟུང་གཉིས་པའོ། །འཇུག་པའི་ཉམས་ལེན་སྤོང་བ་ནི་མ་ཡིན་ཏེ།  དེ་ལྟ་ན་ལྟུང་བ་ཐམས་ཅད་གཉིས་པའི་ནང་དུ་འདུས་པར་ཐལ་
བའི་ཕྱིར་རོ། །གསུམ་པ་ནི་ཕྱག་ན་ཞེས་སོགས་ཏེ་སྙིང་ཁར་ཟླ་བའི་སྟེང་དུ་རྡོ་རྗེ་རྩེ་ལྔ་པ་བསྒོམས་ནས་ཐམས་ཅད་རྣལ་འབྱོར་དུ་བསྐྱེད་པ་དེ་སྤངས་ན་རྩ་བའི་ལྟུང་བའོ། །དེའི་ཤེས་བྱེད་དུ་གང་ཞིག་ཞེས་སོགས་ཀྱི་ཚིག་རྐང་གཉིས་གསུངས་སོ། །བཞི་པ་ནི་དམ་པའི་
ཞེས་སོགས་ཏེ།  ཐེག་པ་གསུམ་གྱིས་བསྡུས་པའི་དམ་ཆོས་རྣམས་ལ་འདི་དག་ནི་རྒྱལ་བའི་བཀའ་མ་ཡིན།  སྟོན་པའི་བསྟན་པ་མ་ཡིན་ཞེས་སོགས་སེམས་ཀྱིས་འཐིང་སླད་བྱེད་པའི་སྒོ་ནས་སྤངས་ན་རྩ་བའི་ལྟུང་བའོ། །ལྔ་པ་ནི་ནམ་ཡང་ཞེས་སོགས་ཏེ།  འདི་དག་
བཀའ་མ་ཡིན་ནོ་ཞེས་མི་ཟེར་ཀྱང་འདི་དག་གིས་བདག་ལ་དགོས་པ་མེད་དོ་ཞེས་ངག་གིས་སྤོང་བ་དང་།  དམ་ཆོས་གླེགས་བམ་འཚོང་བ་དང་གཏེང་པར་འཇུག་པ་སོགས་ལུས་ཀྱི་སྒོ་ནས་སྤོང་ན་རྩ་བའི་ལྟུང་བའོ། །དྲུག་པ་ནི་མི་ཤེས་ཞེས་སོགས་ཏེ།  དང་པོ་ནི་ཐོས་
9-3-52a


བྱུང་གི་ཤེས་རབ་ཀྱིས་མ་བཙལ་བས་མི་ཤེས།  བར་དུ་བསམ་བྱུང་གི་ཤེས་རབ་ཀྱིས་མ་དཔྱད་པས་རྨོངས་པའི་དབང་གིས་གྲུབ་མཐའ་བཞི་པོ་རྣམས་ལ་འདི་དག་ནི་དགོས་པ་མེད་དོ། །ཞེས་སེམས་ཀྱིས་འཐིང་སླད་བྱེད་པའི་སྒོ་ནས་
སྨོད་ན་རྩ་བའི་ལྟུང་བའོ། །དེ་ལ་དང་པོ་གཉིས་ནི་རྗོད་བྱེད་སྤོང་བ་ཡིན་ཅིང་།  གསུམ་པ་ནི་ཉམས་ལེན་སྤོང་བའོ། །བདུན་པ་ནི་རང་གི་ཞེས་སོགས་རྣལ་འབྱོར་རྒྱུད་ཀྱི་དཀྱིལ་འཁོར་དུ་དབང་བསྐུར་བ་ཐོབ་ཕྱིན་ཆད་ལུས་ངག་ཡིད་གསུམ་བྱ་བ་དང་
བཅས་པ་དུམ་བུ་བཞིའི་ལྷའི་རྣལ་འབྱོར་བཞིན་དུ་བྱིན་གྱིས་བརླབས་པ་ཡིན་པས་དཀའ་ཐུབ་བཅྭོ་བརྒྱད་སོགས་ཀྱིས་གདུང་བར་བྱེད་ན་རྩ་བའི་ལྟུང་བའོ། །དེའི་ཤེས་བྱེད་ནི་འདི་ནི་མ་འོངས་རྫོགས་སངས་རྒྱས། །ཞེས་པའོ། །བརྒྱད་པ་ནི་རྡོ་རྗེ་དྲིལ་བུ་ནམ་ཡང་དོར་བར་མི་བྱ་ཞེས་
པ་སྟེ། །དམ་ཚིག་གི་རྡོ་རྗེ་དྲིལ་བུ་འདི་དག་ནི་མཆོག་གི་དངོས་གྲུབ་སྒྲུབ་པ་ལ་དགོས་པ་མེད་དོ་ཅེས་སེམས་ཀྱིས་འཐིང་སླད་བྱེད་པའི་སྒོ་ནས་སྨོད་ན་རྩ་བའི་ལྟུང་བའོ། །རིགས་གཉིས་པའི་དམ་ཚིག་དང་ཟློས་པའི་སྐྱོན་མེད་དེ།  དེ་དག་ནི་ཞག་བདུན་དུ་འབྲལ་བར་
མི་བྱ་བར་བསླབ་པ་ཡིན་པའི་ཕྱིར་རོ། །དགུ་པ་ནི་ཕྱག་རྒྱ་ནམ་ཡང་འདོར་བར་མི་བྱ་ཞེས་པ་སྟེ།  ལུས་ངག་ཡིད་གསུམ་བྱ་བ་དང་བཅས་པ་ཕྱག་རྒྱ་བཞིའི་རང་བཞིན་དུ་བྱིན་གྱིས་བརླབས་པ་སྟེ་སྤངས་ན་རྩ་བའི་ལྟུང་བའོ། །བཅུ་པ་ནི་སློབ་དཔོན་ཞེས་སོགས་ཏེ་རྣལ་
འབྱོར་རྒྱུད་ཀྱི་དཀྱིལ་འཁོར་དུ་དབང་བསྐུར་བ་དང་།  རྒྱུད་བཤད་པ་དང་།  དམ་ཚིག་བཤད་པ་དང་།  མན་ངག་སྦྱིན་པའི་རྡོ་རྗེ་སློབ་དཔོན་འདི་དག་ནི་ཚུལ་ཁྲིམས་དང་མི་ལྡན་ནོ། །ཞེས་སོགས་ཀྱི་སྒོ་ནས་སྨོད་ན་རྩ་བའི་ལྟུང་བའོ། །དེའི་ཤེས་བྱེད་དུ།  འདི་ནི་སངས་
9-3-52b


རྒྱས་ཀུན་དང་མཉམ་ཞེས་གསུངས་སོ། །བཅུ་གཅིག་པ་ནི་དབང་གིས་རྒྱུད་མ་སྨིན་པའི་གང་ཟག་ལ་སེམས་མ་རྡོ་རྗེ་མའི་ཕྱག་རྒྱ་བསྟན་པ་ལྟ་བུ་རྣལ་འབྱོར་རྒྱུད་ཀྱི་ཉམས་ལེན་བཤད་ན་རྩ་བའི་ལྟུང་བའོ། །འདི་དག་ནི་ངོ་བོ་ཉིད་ཀྱི་ཡན་ལག་ཙམ་ཞིག་བླ་མའི་གསུང་
བཞིན་བྲིས་པ་ཡིན་ལ།  ཡན་ལག་གཞན་བཞི་ཞིབ་པར་ངག་ལས་ཤེས་པར་བྱའོ། །བཞི་པ་རྣལ་འབྱོར་བླ་མེད་ཀྱི་བསླབ་བྱ་ནི།  སྤྱིར་རྒྱུད་སྡེ་སོ་སོའི་དགོངས་པ་བདེ་མཆོག་ཏུ་དམ་ཚིག་ཉི་ཤུ་རྩ་གཉིས་བཤད་པ་དང་།  གསང་བ་འདུས་པ་ལས།  དེ་
བཞིན་གཤེགས་པ་རིགས་ལྔའི་དམ་ཚིག་ཏུ་ཤ་ལྔ་བསྟེན་པ་སོགས་བཤད་པ་དང་། །རྣལ་འབྱོར་དབང་ཕྱུག་གི་མན་ངག་ལས་དབང་བཞི་ལ་དམ་ཚིག་ཉི་ཤུ་གསུངས་པ་སོགས་ཐུན་མོང་མ་ཡིན་པ་མང་དུ་ཡོད་མོད་ཀྱང་རྣལ་འབྱོར་བླ་མེད་ཀུན་མཐུན་པར་བུམ་དབང་གི་
བསྲུང་བྱའི་དམ་ཚིག་ནི་རྩ་བའི་ལྟུང་བ་བཅུ་བཞི་དང་།  ཡན་ལག་གི་ལྟུང་བ་བརྒྱད་བསྲུང་བ་ཡིན་ལ་རྩ་བའི་ལྟུང་བ་བཅུ་བཞི་པོ་འདི་ནི་ཚིག་ཅུང་ཟད་མི་འདྲ་ཡང་དོན་ཁྱད་པར་མེད་པར་དམ་པ་དང་པོའི་རྒྱུད་དང་།  དགྲ་ནག་གི་རྒྱུད་དང་།  རྡོ་རྗེ་གུར་གྱི་རྒྱུད་གསུམ་ཆར་
ལས་འབྱུང་ལ།  དེང་སང་གི་རྩ་ལྟུང་བཅུ་བཞི་པའི་གཞུང་འདི་ནི་གསང་བ་འདུས་པའི་རྒྱུད་འབུམ་པ་ན་བཞུགས་པ་གྲུབ་པའི་སློབ་དཔོན་རྣམས་ཀྱིས་ཟུར་དུ་ཕྱུང་བ་ཡིན་ནོ། །དེ་ཡང་རྣལ་འབྱོར་དབང་ཕྱུག་གི་བརྒྱུད་པ་འཛིན་པ་རྣམས་ཀྱིས་ནི་བིར་ཝ་པས་ཕྱུང་བར་བཞེད་ལ། 
ཁ་ཅིག་ནི་འཕགས་པ་ཀླུ་སྒྲུབ་ཀྱིས་ཕྱུང་བར་བཞེད་ཅིང་།  འགའ་ཞིག་ནི་བྷ་བའི་ལྷས་ཕྱུང་ངོ་ཞེས་གསུང་མོད།  གང་ལྟར་ཡང་འགལ་བ་མེད་དེ།  བཀའ་ལས་ཕྱུང་བའི་བསྟན་བཅོས་ཡིན་པའི་ཕྱིར་རོ། །འདིའི་འགྲེལ་པ་ལ་སློབ་དཔོན་འཇམ་དཔལ་གྲགས་པས་
9-3-53a


མཛད་པར་གྲགས་པའི་རྒྱ་ཆེར་འགྲེལ་པ་དང་།  ཀུན་དགའ་སྙིང་པོས་མཛད་དོ་ཞེས་ཟེར་བའི་འགྲེལ་པ་ཆུང་བ་དང་།  ལྕམ་ལེགས་སྨིས་མཛད་དོ་ཞེས་ཟེར་བའི་འགྲེལ་པ་ཆུང་བ་དང་།  ཁ་ཆེ་ལེགས་སྨིས་མཛད་པར་བྱེད་པའི་དམ་
ཚིག་གི་འགྲེལ་བ་ཉུང་ངུ་ཞེས་བྱ་བ་སྟེ།  ཚིག་དང་དོན་གྱི་འགྲེལ་པ་རྣམས་དང་།  དོན་གྱི་འགྲེལ་པ་ཡིན་ནོ་ཞེས་ཟེར་བ་དམ་ཚིག་བསྡུས་པ་ཞེས་བྱ་བ་དང་།  སློབ་དཔོན་མཚོ་སྐྱེས་ཀྱིས་མཛད་ཟེར་བའི་དམ་ཚིག་ཐམས་ཅད་ཀྱི་གསང་བའི་མཛོད་ཅེས་བྱ་བ་དང་།
སློབ་དཔོན་སྙིང་པོའི་ཞབས་ཀྱིས་མཛད་ཟེར་བ་རྡོ་རྗེ་ཐེག་པའི་ལྟུང་བའི་རྒྱ་ཆེར་འགྲེལ་པ་ཞེས་བྱ་བ་དང་དོན་འགྲེལ་གསུམ་སྟེ་གཞུང་དང་དོན་གྱི་འགྲེལ་པ་བདུན་པོ་དག་ལ་ལྟུང་བའི་ངོ་བོ་ལ་ལོག་པར་རྟོག་པ་བརྒྱད།  བཤགས་ཚད་ལ་ལོག་པར་རྟོག་པ་དྲུག་ཡོད་པ་ལས་
དང་པོ་ནི་རྩ་བ་དང་འགལ་བ་དང་།  གཞུང་གཞན་དང་འགལ་བ་དང་།  ཧ་ཅང་ཐལ་བ་དང་།  འགྲེལ་ཆེན་རང་གི་ཚིག་དང་འགལ་བ་དང་བཞིའི་སྒོ་ནས་སུན་ཕྱུང་ཞིང་།  གཉིས་པ་ནི་གཞུང་གི་དོན་དང་འགལ་བ་དང་།  གཞུང་གཞན་དང་འགལ་བ་གཉིས་
ཀྱིས་སུན་ཕྱུང་ནས་དེས་ན་འགྲེལ་པ་དེ་དག་ནི་ལོག་པར་སྨྲ་བ་འབའ་ཞིག་ཡིན་པས་མཛད་དོ་ཞེས་བྱ་བའི་སློབ་དཔོན་ཆེན་པོ་དག་གིས་ཀྱང་མ་མཛད་པ་ཉིད་དུ་རིག་པར་བྱའོ། །ཞེས་རྩ་ལྟུང་འཁྲུལ་སྤོང་ལས་རྒྱས་པར་གསུངས་སོ། །ཕྱིས་ཀྱི་བོད་ཀྱི་བླ་མ་དག་གིས་
གཞུང་འདི་ལ་འགྲེལ་པ་ཆེན་པོ་མཛད་པ་ཡོད་ཀྱང་།  རྒྱུད་འགྲེལ་རྣམ་དག་དང་མི་མཐུན་ཅིང་།  ལྟུང་བ་འགའ་ཞིག་ཇི་ལྟར་འབད་ཀྱང་བསྲུང་མི་ནུས་པ་དང་།  འགའ་ཞིག་མ་བསྲུངས་ཀྱང་འབྱུང་མི་སྲིད་པ་སོགས་སྐབས་དོན་མ་ཡིན་པ་དུ་མ་ཡོད་པ་རྣམས་ནི་བླ་མའི་
9-3-53b


གསུང་ལ་བརྟེན་ནས་ཁོ་བོས་ཀྱང་གཏན་ལ་འབེབས་པར་ནུས་སོ། །འོ་ན་གཞུང་འདིའི་སྟེང་དུ་བསྲུང་མཚམས་ཀྱི་རྣམ་པར་བཞག་པ་ཇི་ལྟར་རྟོགས་པར་བྱ་ཞེ་ན་རྒྱུད་སྡེའི་དོན་ཇི་ལྟ་བ་བཞིན་དུ་རྣལ་འབྱོར་དབང་ཕྱུག་བིར་ཝ་པའི་མན་ངག་སྙན་ནས་སྙན་དུ་བརྒྱུད་པ་རྗེ་བཙུན་
འཁྲུལ་པ་ཟད་པའི་བླ་མ་གྲགས་པ་རྒྱལ་མཚན་གྱིས་རྩ་ལྟུང་འཁྲུལ་སྤོང་དུ་བཀོད་པ་ལས་ཤེས་པར་བྱའོ། །གཉིས་པ་བསླབ་བྱ་ཕན་ཚུན་ནང་འགལ་ན་ཇི་ལྟར་བསྒྲུབ་པའི་ཚུལ་ནི་སྡོམ་པ་གསུམ་རིམ་ཅན་དུ་བླངས་བའི་དགེ་སློང་རྡོ་རྗེ་འཛིན་པ་ཞིག་གིས་སྐབས་འགའ་
ཞིག་ཏུ་སྡོམ་པ་གོང་འོག་ལ་ལྟོས་པའི་བསླབ་བྱ་རྣམས་ཕན་ཚུན་འགལ་བར་གྱུར་ན་གང་གི་དབང་དུ་བྱས་ནས་སྤྱད་སྙམ་ན།  ས་པཎ་གྱིས་བཀའ་གདམས་དོ་ཀོར་བའི་དྲིས་ལན་ལས།  སྡོམ་གསུམ་ལྡན་པའི་གང་ཟག་གིས། །བསླབ་བྱ་ཕན་ཚུན་ནང་འགལ་ཚེ། །དགག་
བྱ་དང་ནི་དགོས་པ་གཉིས། །གཙོ་བོ་གང་ཆེའི་དབང་དུ་ཐོང་། །ཞེས་གསུངས་ལ།  འཕགས་པའི་དྲིས་ལན་འགའ་ཞིག་ལས།  སྡོམ་པ་གོང་མ་གོང་མའི་དབང་དུ་བྱས་ནས་སྤྱད་པར་གསུངས་པ་ཡང་ཡོད་དོ། །དོན་ནི་འདི་ཡིན་ཏེ།  གོང་འོག་རྩ་བར་མཉམ་པའི་ཡན་
ལག་ཏུ་མཉམ་པ་ལྟ་བུ་བསླབ་བྱ་མཉམ་པ་དང་།  འོག་མའི་ཡན་ལག་དང་གོང་མའི་རྩ་བ་འགལ་བའི་ཚེ་རྣམ་པ་ཐམས་ཅད་དུ་གོང་མའི་དབང་དུ་བྱས་ནས་བསྲུང་དགོས་ཏེ།  དེའི་རྒྱུད་ཀྱི་སྡོམ་པ་འོག་མ་ཐམས་ཅད་གནས་གྱུར་ནས་གོང་མའི་ངོ་བོར་ཡོད་པའི་ཕྱིར་དང་།  དེའི་བསྲུང་
བྱའི་གཙོ་བོ་ནི་གོང་མ་ཡིན་པའི་ཕྱིར་རོ། །འདི་ལ་དགོངས་ནས་འཕགས་པས་གོང་མའི་དབང་དུ་བྱས་ནས་སྤྱད་པར་གསུངས་སོ། །འོན་ཀྱང་ལས་དང་པོ་པའི་ཚེ་སེམས་ཅན་གྱི་དོན་དུ་འགྱུར་བའི་དགག་དགོས་ཁྱད་པར་ཅན་མེད་པར་གོང་མའི་ཡན་ལག་འགའ་ཞིག་དང་།  འོག་མའི་
9-3-54a


རྩ་བ་ལྟ་བུ་འག༷ལ་བའི་ཚེ་འོག་མའི་དབང་དུ་བྱས་ནས་བསྲུང་དགོས་པ་ཡང་ཡོད་དེ་སྤྱོད་འཇུག་ལས།  ཆུང་ངུའི་ཕྱིར་ནི་ཆེ་མི་གཏང་། །གཙོ་ཆེར་གཞན་གྱི་དོན་བསམ་མོ། །ཞེས་པ་དང་།  འདི་ལྟར་སྦྱིན་པའི་དུས་དག་ཏུ། །
ཚུལ་ཁྲིམས་བཏང་སྙོམས་བྱ་བར་གསུངས། །ཞེས་བཤད་པ་ལྟར་རོ། །འདི་ལ་དགོངས་ནས་ས་པཎ་གྱིས་དགག་བྱ་དང་དགོས་པ་གང་ཆེ་བའི་དབང་དུ་གཏང་བར་གསུངས་སོ། །བཞི་པ་ཉམས་པ་ཕྱིར་བཅོས་པའི་ཆོ་ག་ལ་གསུམ་སྟེ།  སོ་ཐར་གྱི་སྡོམ་པ་དང་། 
བྱང་སེམས་ཀྱི་སྡོམ་པ་དང་།  སྔགས་ཀྱི་སྡོམ་པ་ཕྱིར་བཅོས་པའི་ཚུལ་ལོ། །དང་པོ་ནི།  དགེ་བསྙེན་གྱི་བསླབ་པ་ལ་མི་གསོད་པ་སོགས་བཞི་བྱུང་ན་སྡོམ་པ་གཏོང་བས་བསྐྱར་ནས་བླང་།  མི་མ་ཡིན་གསོད་པ་སོགས་ལྔ་བྱུང་ན།  སྡོམ་ལྡན་གཅིག་
གི་མདུན་དུ་བཤགས་ཞེས་བོད་ཀྱི་བླ་མ་དག་གསུང་མོད་ཀྱི།  དེ་ལས་གཞན་བཤད་པ་མ་མཐོང་ངོ་། །དགེ་ཚུལ་ལ་ནི་ཕམ་འདྲའི་ཉེས་བྱས་འཆབ་བཅས་བྱུང་ན་གསོར་མི་རུང་ལ།  འཆབ་མེད་ལ་ནི་བསླབ་པ་སྦྱིན་པ་འོད་ལྡན་ལས་བཤད་ཅིང་བཤགས་བྱའི་ཉེས་བྱས་
རྣམས་ནི་ཚུལ་བཞིན་བཤགས་པ་དང་།  བསྡམ་བྱའི་ཉེས་བྱས་རྣམས་ནི་ཡིད་ཀྱིས་སྡོམ་པས་འདག་པར་བྱའོ། །དགེ་སློང་ལ་ནི་ཕམ་པ་འཆབ་བཅས་གསོར་མི་རུང་ལ།  འཆབ་མེད་ལ་དགེ་འདུན་གྱིས་གསོལ་བཞིའི་ལས་ཀྱིས་བསླབ་པ་བྱིན་ནས་དེའི་དམ་ཚིག་སྤྱད་པས་
སོར་ཆུད་པར་གསུངས་སོ། །ལྷག་མ་འཆབ་བཅས་བྱུང་ན་བཅབ་ཉེས་འདག་པའི་ཕྱིར་དུ་ཇི་སྲིད་བཅབ་པ་དེ་སྲིད་དུ་སྤོ་བ་སྤྱད་པ་དང་།  དེ་ནས་ལྷག་མའི་ལྟུང་བ་འདག་པའི་ཆེད་དུ་དགེ་སློང་ཕ་མའི་བྱེ་བྲག་གིས་ཞག་དྲུག་དང་།  ཟླ་བ་ཕྱེད་དུ་མགུ་བ་སྤྱད།  དེ་ནས་རང་
9-3-54b


བཞིན་གྱི་གནས་སུ་དབྱུང་བའི་ཆེད་དུ་གསོལ་བཞིའི་ལས་ཀྱིས་དབྱུང་བར་བཤད་དོ། །ལྷག་མ་འཆབ་མེད་ལ་ནི་སྤོ་བ་མ་གཏོགས་གཞན་སྔར་བཞིན་ནོ། །སྤང་བའི་ལྟུང་བ་ལ་ནི་ཞག་གི་ཆད་ལས་དང་འབྲེལ་བའི་སྤོང་བ་སྔོན་དུ་སོང་ནས་ལྟུང་བ་རིས་མཐུན་མེད་པའི་དགེ་
སློང་གི་མདུན་དུ་བཤགས་པ་དང་།  ལྟུང་བྱེད་འབའ་ཞིག་པ་ལ་ཞག་གི་ཆད་ལས་སྔོན་དུ་མ་སོང་བར་བཤགས་པ་འབའ་ཞིག་དང་།  སོ་སོར་བཤགས་པར་བྱ་བ་རྣམས་ལ་ནི་སྨྲེ་སྔགས་དང་བཅས་ཏེ་བཤགས་པ་དང་།  བཤགས་བྱའི་ཉེས་བྱས་རྣམས་ནི་བཤགས་པ་
འབའ་ཞིག་དང་།  བསྡམ་བྱའི་ཉེས་བྱས་རྣམས་ནི་ཡིད་ཀྱིས་སྡོམ་པས་སོར་ཆུད་པར་གསུངས་སོ། །ཐེག་ཆེན་གྱི་སོ་ཐར་རྣམས་ལ་ཡང་ཆོ་ག་ཉན་ཐོས་དང་ཐུང་མོང་བ་རྣམས་ལ་ནི་ཉན་ཐོས་ཀྱི་གཞུང་ལས་བཤད་པའི་ཕྱིར་བཅོས་རྣམས་དང་།  ཐེག་ཆེན་གྱི་སྡེ་སྣོད་ལས་
བཤད་པའི་ཕྱིར་བཅོས་རྣམས་ཀྱང་ཉམས་སུ་བླང་བར་བྱ་ཞིང་དེ་ལས་གཞན་པའི་ཐེག་ཆེན་སོར་ཐར་རྣམས་ལ་ནི་ཐེག་ཆེན་སྡེ་སྣོད་ལས་བཤད་པ་ཁོ་ན་བྱའོ། །གཉིས་པ་བྱང་སེམས་ཀྱི་བསླབ་བྱ་ཉམས་པ་ཕྱིར་བཅོས་པའི་ཚུལ་ལ་གཉིས་ལས་དང་པོ་ནི་དབུ་མ་
ལུགས་ཀྱི་ཕྱིར་བཅོས་ལ་རྩ་བའི་ལྟུང་བ་ཕྱིར་བཅོས་པའི་ཚུལ་དང་།  ལྟུང་བའི་ལྷག་མ་ཞི་བར་བྱེད་པའི་ཐབས་གཉིས་ལས།  དང་པོ་ནི།  ལས་དང་པོ་པའི་བྱང་ཆུབ་སེམས་དཔའ་ལ་ནམ་མཁའི་སྙིང་པོའི་མདོ་ལས་བཤད་པ་ལྟར་གྱི་རྩ་བའི་ལྟུང་བ་གང་ཡང་རུང་བ་བྱུང་ན་བྱང་
ཆུབ་སེམས་དཔའ་ནམ་མཁའི་སྙིང་པོ་ལ་གསོལ་བ་བཏབ་པས་དེའི་རྨི་ལམ་དུ་ནམ་མཁའི་སྙིང་པོ་བྱོན་པའི་མདུན་དུ་བཤགས་པར་གསུངས་ཏེ།  དེ་ཡང་ནམ་མཁའི་སྙིང་པོའི་མདོ་ལས།  གལ་ཏེ་བྱང་ཆུབ་སེམས་དཔའ་དེ་དག་བྱང་ཆུབ་སེམས་དཔའ་ཆེན་པོ་ནམ་མཁའི་སྙིང་པོའི་
9-3-55a


མིང་ཐོས་ནས་ངན་སོང་དུ་ལྟུང་བས་འཇིགས་པའི་ཕྱིར་མཐོང་བར་འདོད་ཅིང་རྩ་བའི་ལྟུང་བ་འཆགས་པར་འདོད་ལ་གལ་ཏེ་དེ་དག་བྱང་ཆུབ་སེམས་དཔའ་ནམ་མཁའི་སྙིང་པོ་ལ་ཕྱག་འཚལ་ཞིང་དེའི་མིང་ཡང་བརྗོད་ན་རིགས་ཀྱི་བུ་དེ་
དག་གི་མདུན་དུ་བསྐལ་པ་ཇི་ལྟ་བ་བཞིན་དེ་རང་གི་གཟུགས་གནས་པར་འགྱུར་ཏེ།  བྲམ་ཟེའི་གཟུགས་ནས་ཁྱེའུའི་གཟུགས་ཀྱི་བར་གྱིས་མདུན་དུ་གནས་པར་འགྱུར་རོ། །བྱང་ཆུབ་སེམས་དཔའ་ལས་དང་པོ་པ་དེས་ལྟུང་བ་ཇི་ལྟ་བུ་བྱུང་བ་དེ་དག་འཆགས་སུ་
འཇུག་གོ།  དེ་ཐབས་ལ་མཁས་པས་ཟབ་མོ་དང་ཐེག་པ་ཆེན་པོ་ལ་སྦྱོར་བའང་ཉེ་བར་སྟོན་ཏོ། །ཕྱིར་མི་ལྡོག་པའི་བར་ལ་ཡང་རབ་ཏུ་འཇོག་གོ།  དེ་བཞིན་དུ་སྦྱར་ཏེ་གང་གསོལ་བར་བྱེད་པའི་བྱང་ཆུབ་སེམས་དཔའ་ལས་དང་པོ་པ་ཉེས་པ་དང་བཅས་པ་དེས་ཐོ་
རངས་ལངས་ལ་ཤར་ཕྱོགས་སུ་བལྟས་ཏེ་འདུག་པས་འདུག་པར་བྱ།  སྐྱ་རེངས་ཀྱི་ལྷའི་བུ་ལ་གསོལ་བ་གདབ་པར་བྱ་སྟེ་ཚིག་འདི་སྐད་དུ་སྐྱ་རེངས་སྙིང་རྗེ་ཆེན་པོ་ལེགས་པ་ཆེན་པོ་ཁྱོད་འཛམ་བུའི་གླིང་དུ་ཤར་མ་ཐག་ཏུ་སྙིང་རྗེས་བདག་ལ་ཁེབས་པར་མཛད་དུ་གསོལ་ནམ་
མཁའི་སྙིང་པོ་སྙིང་རྗེ་ཆེན་པོ་དང་ལྡན་པ་ལ་ཡང་བདག་གི་ཚིག་གིས་མྱུར་དུ་བསྐུལ་ཏེ་ཐབས་གང་གིས་བདག་གིས་ལྟུང་བ་འཆགས་པར་འགྱུར་པ་དང་།  ཐེག་པ་ཆེན་པོ་འཕགས་པ་ལ་ཐབས་དང་ཤེས་རབ་འཐོབ་པར་འགྱུར་བའི་ཐབས་དེ་བདག་གི་རྨི་ལམ་དུ་བསྟན་
དུ་གསོལ་ཞེས་སྨོས་ལ་དེའི་ཚེ་དེ་གཉིད་ལོག་ལ་ཉོལ་ཞིག་དང་འཛམ་བུའི་གླིང་འདིར་སྐྱ་རེངས་ཤར་མ་ཐག་ཏུ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དང་འཕྲད་པར་འགྱུར་ཏེ།  བྱང་ཆུབ་སེམས་དཔའ་ལས་དང་པོ་པ་དེའི་རྨི་ལམ་དུ་དེའི་གཟུགས་
9-3-55b


མདུན་དུ་འདུག་སྟེ་རྩ་བའི་ལྟུང་བ་དེ་དག་འཆགས་སུ་འཇུག་གོ།  དེ་ལ་ཐེག་པ་ཆེན་པོའི་ཐབས་ཀྱི་ཤེས་པ་འདི་ལྟ་བུའང་སྟོན་ཏེ་ཐབས་ཤེས་པ་ལ་མཁས་པ་དེས་བྱང་ཆུབ་སེམས་དཔའ་ལས་དང་པོ་ཉིད་དུ་བྱང་ཆུབ་ཀྱི་སེམས་མི་བརྗེད་པ་ཞེས་བྱ་བའི་ཏིང་ངེ་འཛིན་ཐོབ་
སྟེ།  ཐེག་པ་ཆེན་པོ་ལ་བརྟན་པར་གནས་པར་ཡང་འགྱུར་རོ། །ཞེས་བྱ་བ་ལ་སོགས་པ་ཡིན་ནོ་ཞེས་སོ། །གཉིས་པ་ལྟུང་བའི་ལྷག་མ་ཞི་བར་བྱེད་པའི་ཐབས་ནི་སྤྱོད་འཇུག་ལས།  ཉིན་དང་མཚན་མོ་ལན་གསུམ་དུ། །ཕུང་པོ་གསུམ་པ་གདོན་བྱ་
ཞིང་། །རྒྱལ་དང་བྱང་ཆུབ་སེམས་བརྟེན་པས། །ལྟུང་བའི་ལྷག་མ་དེས་ཞི་བྱ། །ཞེས་གསུངས་པ་ལྟར་ཉིན་མཚན་དུས་དྲུག་ཏུ་ཕུང་པོ་གསུམ་པའི་མདོ་འདོན་ཞིང་ཉིན་མཚན་ཏུ་བྱང་ཆུབ་ཀྱི་སེམས་བརྟན་པོར་བསྒོམས་པ་སོགས་ཀྱི་སྒོ་ནས་བཤགས་པ་
དང་།  གཞན་ཡང་སྟོབས་བཞི་ཚང་བའི་སྒོ་ནས་བཤགས་པ་དང་།  དེ་བཞིན་གཤེགས་པའི་ཡི་གེ་བརྒྱ་པ་སོགས་བཟླས་པ་སོགས་ཀྱིས་སྒོ་ནས་བཤགས་པར་ཡང་གསུངས་སོ། །གཉིས་པ་སེམས་ཙམ་ལུགས་ཀྱི་ཕྱིར་བཅོས་ནི།  སྡོམ་པ་ཉི་ཤུ་པ་ལས།  
སྡོམ་པ་སླར་ཡང་བླང་བར་བྱ། །ཟག་པ་འབྲིང་ནི་གསུམ་ལ་བཤགས། །གཅིག་གི་མདུན་དུ་ལྷག་མ་རྣམས། །ཉོན་མོངས་མི་མོངས་བདག་སེམས་བཞིན། །ཞེས་གསུངས་པའི་དོན་ནི་ཀུན་དཀྲིས་དྲག་པོས་ཕམ་པ་ལྟ་བུའི་ཆོས་བཞི་སྤྱད་ན་སྡོམ་པ་གཏོང་
བས་ཡུལ་སྡོམ་ལྡན་ནམ་དཀོན་མཆོག་གི་དྲུང་དུ་སླར་ཡང་བླང་།  ཀུན་དཀྲིས་འབྲིང་གིས་ཕམ་པ་ལྟ་བུའི་ཆོས་བཞི་སྤྱད་ན་སྡོམ་ལྡན་གསུམ་གྱི་མདུན་དུ་བཤགས།  ཀུན་དཀྲིས་ཆུང་ངུས་ཕམ་པ་ལྟ་བུའི་ཆོས་བཞི་སྤྱད་ན་སྡོམ་ལྡན་གཅིག་གི་མདུན་དུ་བཤགས། 
9-3-56a


ལྷག་མ་ཉོན་མོངས་པ་ཅན་དང་།  ཉོན་མོངས་པ་ཅན་མ་ཡིན་པ་དཀོན་མཆོག་གསུམ་ལ་མི་མཆོད་པ་སོགས་ཉེས་བྱས་བཞི་བཅུ་ཞེ་གཉིས་པོ་འདི་ཡུལ་འབྱོར་ན་སྡོམ་ལྡན་གཅིག་གི་མདུན་དུ་བཤགས་པར་བྱ་ཞིང་མ་འབྱོར་ན་བདག་
སེམས་བཞིན་ཏེ།  རང་གི་སེམས་དཔང་པོར་བྱས་ནས་བཤགས་པར་བྱ་ཅེས་པའི་དོན་ཏོ། །དེ་ལ་བཤགས་པའི་ཡུལ་གྱི་སྡོམ་ལྡན་ནི་ཉན་ཐོས་ཀྱི་སྡོམ་པའམ་བྱང་ཆུབ་སེམས་དཔའི་ཐེག་པ་གང་ཡང་རུང་བ་ཡིན་པར་གསུངས་ལ་ཉོན་མོངས་པ་ཅན་ནི་མ་གུས་པ་དང་སྙོམ་
ལས་དང་།  ལེ་ལོས་སྤྱད་པ་ཡིན་ཅིང་།  ཉོན་མོངས་པ་ཅན་མ་ཡིན་པ་ནི་བརྗེད་པས་སྤྱད་པ་ཡིན་པར་བྱང་ས་ལས་གསུངས་སོ། །ཀུན་དཀྲིས་ཆུང་འབྲིང་ཆེན་པོའི་ཁྱད་པར་ནི་གོང་དུ་བཤད་ཟིན་ཏོ། །གསུམ་པ་སྔགས་སྡོམ་ཉམས་པ་ཕྱིར་བཅོས་པའི་ཚུལ་ལ་གཉིས་ཏེ། 
ཡན་ལག་ཚང་བའི་རྩ་བའི་ལྟུང་བ་བྱུང་ན་སྡོམ་པ་ཡང་དག་པར་བླང་བ་དང་།  ཡན་ལག་མ་ཚང་བའི་རྩ་ལྟུང་བྱུང་ན་ལྟུང་བ་ལས་ལྡང་བའི་ཐབས་སོ། །དང་པོ་ནི།  རྗེ་བཙུན་གྱིས་རྩ་ལྟུང་འཁྲུལ་སྤོང་ལས།  ཡན་ལག་ཚང་བའི་རྩ་ལྟུང་བྱུང་ན་ཡུལ་རྡོ་རྗེ་
སློབ་དཔོན་གྱི་དྲུང་དུ་སླར་ཡང་སྡོམ་པ་བླང་དགོས་ཏེ།  དམ་པ་དང་པོ་ལས།  རྩ་བའི་ལྟུང་བ་བྱུང་གྱུར་ན། །སླར་ཡང་དཀྱིལ་འཁོར་འདི་རུ་ནི། །དག་པའི་རྒྱུ་རུ་འཇུག་པར་བྱ། །སླར་ཡང་གནང་བ་ཐོབ་པ་ནི། །ཚོགས་ཀྱི་ནང་དུ་འགྲོ་བ་ན། །རྒན་པའི་མིང་ནི་གཞོན་
པ་ཉིད། །ཅེས་དང་།  རྩ་ལྟུང་བཅུ་བཞི་པའི་གཞུང་ལས།  གསུམ་ལ་སྐྱབས་འགྲོ་ནས་བརྩམས་ཏེ། །བྱང་ཆུབ་སེམས་སོགས་སྡོམ་པ་ནི། །གལ་ཏེ་བདག་ལ་ཕན་འདོད་ན། །སྔགས་པས་འབད་དེ་བཟུང་བར་བྱ། །ཞེས་པ་དང་།  སཾ་བུ་ཊི་ལས།  དམ་ཚིག་
9-3-56b


ཉམས་པས་རྣལ་འབྱོར་པ་བག་མེད་པར་སྐྱེ་བར་འགྱུར་ཏེ།  ཡང་བྱང་ཆུབ་སེམས་དཔའི་དམ་ཚིག་བླངས་བར་བྱས་ནས་ཕྱིས་མི་བརྗེད་པར་སྡོམ་པ་བཟུང་བར་བྱ་སྟེ།  དེ་ཉིད་ཀུན་གྱི་སྡོམ་པ་དང་ལྡན་པས་ཕྱག་རྒྱའི་རྣལ་འབྱོར་ལ་གནས་པར་བྱའོ། །ཞེས་
པ་དང་།  གཞན་ཡང་སྐྱོན་མེད་པའི་བཀའ་དང་བསྟན་བཅོས་རྣམས་ལས་ཡན་ལག་ཚང་བའི་རྩ་ལྟུང་བྱུང་ན་སྡོམ་པ་སླར་ཡང་བླང་བར་བཤད་པའི་ཕྱིར་ཞེས་བཞེད་དོ། །བླ་ཆེན་འཕགས་པའི་དྲིས་ལན་འགའ་ཞིག་ལས་གལ་ཏེ་ཡུལ་རྡོ་རྗེ་སློབ་དཔོན་མ་འབྱོར་
ན་ཐོག་མར་ཡི་གེ་བརྒྱ་པ་བཟླས་བརྗོད་ལ་སོགས་པའི་སྒོ་ནས་སྡིག་པ་དག་པའི་མཚན་མ་མ་བྱུང་གི་བར་དུ་བཤགས་པ་བྱེད་ཅིང་།  མཚན་མ་བྱུང་བའི་ཚེ་རང་ཉིད་ཀྱི་རྡུལ་ཚོན་གྱི་དཀྱིལ་འཁོར་ཚུལ་བཞིན་དུ་བྲིས་ཏེ་བདག་འཇུག་བླངས་ན་སྡོམ་པ་སོར་ཆུད་
པ་ཡང་ཡོད་དོ། །བླ་མ་འགའ་ཞིག་ནི་རྩ་ལྟུང་དང་པོ་རྡོ་རྗེ་སློབ་དཔོན་ལ་སྨོད་པའི་རྩ་ལྟུང་བྱུང་ན་དབང་བསྐུར་བ་ཞུ་བའི་སྒོ་ནས་སྡོམ་པ་སླར་ཡང་བླང་དགོས་ཏེ་སྔགས་ཀྱི་ཉམས་ལེན་དང་མ་འབྲེལ་ཞིང་སྔགས་སྡོམ་ཐོབ་པ་ཙམ་ཞིག་བདག་འཇུག་བྱས་པས་ཀྱང་སོར་མི་
ཆུད་པར་བཞེད་དོ། །ཁོ་བོ་ནི་འདི་ལྟར་སེམས་ཏེ།  རྟེན་གྱི་གང་ཟག་དེ་སྔགས་ཀྱི་ཉམས་ལེན་གྱི་ཚུལ་མི་ཤེས་ཤིང་ཉམས་ལེན་ཅུང་ཟད་ཀྱང་མ་བྱས་ལ་དབང་བསྐུར་གྱི་སྒོ་ནས་སྔགས་སྡོམ་ཐོབ་པ་ཙམ་ཞིག་ཡིན་ན་དེ་ལ་རྩ་ལྟུང་བྱུང་བའི་ཚེ་སྡོམ་པ་སླར་བླང་དགོས་ཏེ་
སྔགས་ཀྱི་ཉམས་ལེན་དང་མ་འབྲེལ་ཞིང་སྔགས་སྡོམ་ཐོབ་པ་ཙམ་ཞིག་ཡིན་པའི་ཕྱིར་རོ། །གལ་ཏེ་ཉམས་ལེན་གྱི་ཚུལ་ལེགས་པར་ཤེས་ཤིང་རྒྱུན་དུ་ཉམས་སུ་ལེན་པའི་གང་ཟག་ཡིན་ན།  དེ་ལ་ལྟུང་བ་བྱུང་བའི་ཚེ་རང་ཉིད་ཀྱིས་བདག་འཇུག་བླངས་ཀྱང་སོར་ཆུད་པར་
9-3-57a


འགྱུར་ཏེ།  རྩ་བའི་ལྟུང་བས་དམ་ཚིག་ལ་སྐྱོན་བྱུང་བ་ཙམ་ཡིན་ཞིང་སྔགས་ཀྱི་ཉམས་ལེན་གྱི་ཚུལ་དང་འབྲེལ་བ་ཡིན་པས་བདག་འཇུག་གིས་ཀྱང་དམ་ཚིག་གི་སྐྱོན་སྦྱང་བར་ནུས་སོ་སྙམ་དུ་སེམས་སོ། །རྗེ་བཙུན་གྱིས་
ནི་སྤྱོད་པ་དོག་ཕྱོགས་ནས་བཀག་པའམ།  ཡང་ན་འདིའི་སྔ་མ་ལྟ་བུ་ལ་དགོངས་པར་མངོན་ནོ། །གཉིས་པ་ཡན་ལག་མ་ཚང་བའི་ལྟུང་བ་དང་།  ཡན་ལག་གི་ལྟུང་བ་རྣམས་ལས་ལྡང་བའི་ཐབས་ནི་སྟོབས་བཞིའི་སྒོ་ནས་བཤགས་པ་བྱེད་པ་དང་།  དམ་ཚིག་རྡོ་རྗེའི་བསྒོམ་བཟླས་བྱེད་པ་དང་།  བརྩོན་འགྲུས་
དྲག་པོས་རིམ་གཉིས་ཚུལ་བཞིན་དུ་བསྒོམ་པ་དང་།  བཞི་འབུམ་ལ་སོགས་པ་གྲངས་ཀྱི་བསྙེན་པ་བྱེད་པ་དང་།  བསྙེན་པའི་བཅུ་ཆ་སོགས་ཀྱི་སྦྱིན་སྲེག་བྱེད་པ་དང་།  དམ་ཚིག་དང་ལྡན་པའི་རྡོ་རྗེ་སྤུན་གྲོགས་ལ་ཚོགས་ཀྱི་འཁོར་ལོ་བྱེད་པ་སོགས་ཀྱི་སྒོ་ནས་
རྒྱུད་ལྟུང་བ་མེད་པར་བྱས་ནས་རྣལ་འབྱོར་ཉམས་སུ་ལེན་པ་ལ་འབད་པར་བྱའོ། །བྱུང་བ་ཕྱིར་བཅོས་པའི་ཐབས་བསྟན་ཟིན་ཏོ། །ལྔ་པ་སྡོམ་པ་གནས་གཏོང་གི་ཚུལ་དཔྱད་པ་ལ་གཉིས་ཏེ།  གནས་པའི་ཚེ་གཅིག་དང་ཐ་དད་གང་དུ་གནས་དཔྱད་པ།  གཏོང་
བའི་ཚེ་རིམ་དང་གཅིག་ཆར་གང་དུ་གཏོང་དཔྱད་པའོ། །དང་པོ་ལ་གསུམ་སྟེ།  དགག་བཞག་སྤང་གསུམ་ལས།  དང་པོ་ལ་བཞི།  ཉི་ཟླ་སྐར་གསུམ་གྱི་དཔེས་འོག་མ་བག་ལ་ཉལ་བའི་ཚུལ་དུ་འདོད་པ་དགག །སྐྱེས་བུའི་རྒྱན་གྱི་དཔེས་དུས་
མཉམ་རྫས་ཐ་དད་དུ་འདོད་པ་དགག །ཆུ་གཞོང་དུ་ནོར་བུ་བཞག་པའི་དཔེས་རྟེན་དང་བརྟེན་པ་རྫས་ཐ་དད་དུ་འདོད་པ་དགག །གཞན་ལུགས་ལ་རང་ལུགས་སུ་འཁྲུལ་ནས་གནས་གྱུར་རྫས་གཞན་དུ་འདོད་པ་དགག་པའོ། །དང་པོ་ལ་གསུམ་སྟེ།  གཞན་གྱི་གཞུང་
9-3-57b


དགོད།  དེའི་དོན་བཤད།  མི་འཐད་པའི་ཆ་དགག་པའོ། །དང་པོ་ནི།  རྒྱ་གར་སྐད་དུ།  ཏྲི་སཾ་བ་ར་པྲ་བྷོ་མཱ་ལ་ནཱ་མ།  བོད་སྐད་དུ།  སྡོམ་གསུམ་འོད་ཀྱི་ཕྲེང་བ་ཞེས་བྱ་བ།  བླ་མ་དང་འཇམ་དཔལ་དབྱངས་ལ་ཕྱག་འཚལ་ལོ། །རྣམ་དག་
ཟབ་ཡངས་ཤེས་བྱའི་རྒྱ་མཚོ་ལས། །བསྟན་པའི་གྲུ་དང་བདག་བློའི་དེད་དཔོན་གྱིས། །མཁྱེན་པའི་དར་ཕྱར་བརྩེ་བའི་རླུང་བསྐྱོད་ནས། །སྡོམ་གསུམ་ཡིད་བཞིན་ནོར་བུ་ཁོ་བོས་བླངས། །དེང་སང་བསྟན་པའི་མཇུག་འདི་རུ། །སྡོམ་པ་གསུམ་གྱི་རྣམ་
གཞག་ལ། །མཁས་པ་རྒྱུ་སྐར་འགའ་ཞིག་གིས། །ཕྱོགས་རེའི་ཆ་ཙམ་བརྗོད་གྱུར་མོད། །སོ་སོར་ཐར་དང་བྱང་ཆུབ་སེམས། །རིག་འཛིན་སྔགས་ཀྱི་སྡོམ་པ་ལ། །ཐོབ་ཚུལ་གནས་ཚུལ་གཏོང་བའི་ཚུལ། །གཉིས་ལྡན་གསུམ་ལྡན་འཐད་
པའི་གཞུང་། །ཉེས་པ་ཕན་ཡོན་རིམ་པ་དག །བདག་བློ་ཉི་མའི་དཀྱིལ་འཁོར་གྱིས། །ཕྱོགས་རྣམས་གསལ་བར་བྱ་ཕྱིར་བཀོད། །གླིང་གསུམ་སྐྱེས་པ་བུད་མེད་ཀྱིས། །རང་ཉིད་འཁོར་བ་གྲོལ་དོན་དུ། །མཁན་སློབ་ཆོ་ག་ཚད་ལྡན་ལས། །ཇི་སྲིད་
འཚོ་ཡི་བར་དག་ཏུ། །གནོད་པ་གཞི་དང་བཅས་པ་ལ། །གཙོ་ཆེར་ལུས་ངག་སྡོམ་པ་སྟེ། །ཉན་ཐོས་བྱེ་བྲག་སྨྲ་བའི་སྡོམ། །གང་ཟག་གླང་པོ་འདྲ་བ་ལ། །སྡོམ་པ་ཁལ་དང་འདྲ་བ་དེ། །ཐོབ་པའི་ཐག་པས་སྤྲེལ་བར་གནས། །སོ་སོར་ཐར་པའི་
གནས་ཚུལ་ཡིན། །བསླབ་པ་ཕུལ་དང་ཤི་འཕོས་དང་། །རྩ་བ་ཆད་དང་མཚན་འདས་དང་། །མཚན་གཉིས་གཅིག་ཆར་བྱུང་བ་ལས། །སོ་སོར་ཐར་པའི་སྡོམ་པ་གཏོང་། །གསུངས་སོ་ཕམ་པ་བྱས་པས་ཀྱང་། །སོ་ཐར་སྡོམ་པའི་གཏོང་ཚུལ་ཡིན། །
9-3-58a


ལྷ་མི་ལ་སོགས་གང་རུང་གིས། །འགྲོ་བ་མ་ལུས་སྐྱབ་པའི་ཕྱིར། །སློབ་དཔོན་ཆོ་ག་ཚད་ལྡན་ལས། །ཇི་སྲིད་བྱང་ཆུབ་སྙིང་པོའི་བར། །སྨོན་དང་འཇུག་པའི་བདག་ཉིད་ཅན། །ལུས་ངག་ཡིད་གསུམ་རང་དོན་
དང་། །གཞན་དོན་ཐབས་མ་ཡིན་པས་སྡོམ། །ཀུན་རྫོབ་བྱང་ཆུབ་སེམས་ཀྱིའོ། །དེ་ཉིད་སྣང་ལ་རང་བཞིན་མེད། །འཇིག་ཚོགས་ཤིན་ཏུ་གོམས་པ་ལས། །ཡུལ་དང་ཡུལ་ཅན་གཉིས་ལས་གྲོལ། །དོན་དམ་བྱང་ཆུབ་སེམས་ཡིན་ནོ། །
སེམས་དང་སེམས་བྱུང་སེམས་བསྐྱེད་གཉིས། །རང་དོན་གཟའ་དང་བྲལ་བ་ན། །ཉི་མ་དང་ནི་འོད་ཟེར་བཞིན། །དེ་དག་གནས་པའི་ཚུལ་ཡིན་ནོ། །རང་དོན་བླངས་དང་ནག་པོ་ཡི། །ཆོས་བཞི་ལོག་པར་ཞུགས་པ་དང་། །འབྲས་བུ་དག་ནི་ཐོབ་པ་ན། །
ཚ་གྲང་གྲུ་བཞིན་སེམས་བསྐྱེད་གཏོང་། །རིགས་བཞི་ལ་སོགས་བསོད་ནམས་ལྡན། །རང་གཞན་དགོས་འདོད་ཕུན་སུམ་ཚོགས། །བླ་མ་མཚན་ཉིད་ཚད་ལྡན་ལས། །ནམ་མཁའ་ཇི་སྲིད་གནས་པར་དུ། །ལྷན་སྐྱེས་ཡེ་ཤེས་བརྡའ་དོན་འཕྲོད། །
རྣམ་རྟོག་དྲི་མ་ཀུན་ལས་སྡོམ། །རིག་འཛིན་སྡོམ་པའི་ཐོབ་ཚུལ་ཡིན། །སྐུ་གསུང་ཐུགས་ཀྱི་རྒྱལ་མཚན་ལ། །རིམ་གཉིས་ཡིད་བཞིན་ནོར་བུས་སྤྲས། །འདོད་ཡོན་ལྔ་ཡིས་ཀུན་ནས་མཆོད། །དགོས་འདོད་ཀུན་གྱི་འབྱུང་གནས་པ། །རིག་འཛིན་
སྡོམ་པའི་གནས་ཚུལ་ཡིན། །དགོས་དོན་མེད་དོ་སྐྱོན་རྣམས་ཕྱུང་། །དཔག་བསམ་ཤིང་བུ་འགྱེལ་བ་བཞིན། །རྩ་བའི་ལྟུང་བ་བྱུང་བ་ན། །རིག་པ་འཛིན་པའི་སྡོམ་པ་གཏོང་། །རྒྱུད་ནི་སུམ་བརྒྱ་པ་ལས་ནི། །འཁོར་བཞི་པོ་ལ་རྗེས་སུ་གནང་། །རང་ཉིད་
9-3-58b


སློབ་པ་དང་ཡང་ལྡན། །དགེ་སློང་རྡོ་རྗེ་འཛིན་པ་བདུན། །གསུངས་སོ་དུས་ཀྱི་འཁོར་ལོ་ལས། །རྟེན་ནི་གསུམ་ལས་དགེ་སློང་མཆོག །འབྲིང་ནི་དགེ་ཚུལ་ཡིན་པར་འདོད། །ཁྱིམ་ན་གནས་པ་ཐ་མའོ། །གཞན་ཡང་རྡོ་རྗེ་རྩེ་མོ་ལས། །གལ་
ཏེ་དེ་ནི་རབ་བྱུང་ན། །སྡོམ་པ་གསུམ་དང་ཡང་དག་ལྡན། །སོ་སོར་ཐར་དང་བྱང་ཆུབ་སེམས། །རིག་འཛིན་སྔགས་ཀྱི་སྡོམ་པའོ། །གཞུང་འབུམ་ལས་ནི་འདི༷་སྐད་དུ། །རྡོ་ཡི་རིགས་ཀྱི་བྱེ་བྲག་བཞུས། །ལྕགས་དང་ཟངས་དང་དངུལ་དུ་འབྱུང་། །
གསེར་འགྱུར་རྩི་ཡི་དངོས་པོ་ཡིས། །ཀུན་ཀྱང་གསེར་དུ་འགྱུར་བ་བཞིན། །རིགས་ཅན་གསུམ་གྱི་སྡོམ་པ་ཡང་། །དཀྱིལ་འཁོར་ཆེན་པོ་འདིར་ཞུགས་ན། །རྡོ་རྗེ་འཛིན་པ་ཞེས་བྱའོ། །གསུངས་པའི་དོན་ལ་ཁ་ཅིག་ནི། །སྡོམ་གསུམ་གནས་
འགྱུར་ངོ་བོ་གཅིག །གོང་མའི་རྩ་ལྟུང་བྱུང་བ་ན། །འོག་མ་གཏོང་ཞེས་སྒྲོགས་པ་ཡོད། །དེ་ལ་ཅུང་ཞིག་བརྟག་པར་བྱ། །གསུམ་ལྡན་གསུངས་པའི་དགོངས་པ་ཡིས། །གཅིག་ལྡན་གཏོང་བ་དགོངས་པ་མིན། །རིགས་པས་ཀྱང་ནི་ཤིན་ཏུ་
གནོད། །བུད་མེད་ལ་སྨོད་ལྟུང་བ་ཡིས། །རེག་པའི་སྡོམ་པ་གཏོང་ངམ་ཅི། །གལ་ཏེ་གཏོང་ན་ཧ་ཅང་ཐལ། །མཁའ་ལ་སྤྲིན་ཆེན་འཁྲིགས་པ་ཡིས། །ས་ཡི་ལོ་ཐོག་སྐེམ་ཞེས་སྒྲེ། །གཞན་ཡང་སྡོམ་པ་གཏོང་ཐོབ་རྒྱུ། །སངས་རྒྱས་
གསུང་ལས་གཞན་པ་ཡི། །ཆོ་ག་མཁན་དུ་བྱེད་རིགས་སམ། །གཞན་ཡང་འགལ་བ་ལྟག་སྤྲད་ལ། །གནས་འགྱུར་བརྩི་བ་རིགས་མ་ཡིན། །རིགས་ན་ཉི་མའི་དཀྱིལ་འཁོར་འདི། །གངྒཱའི་ཆུ་བོར་འགྱུར་ཞེས་སྒྲེ། །དེས་ན་རང་གིས་བརྟགས་
9-3-59a


ནས་བླང་། །སྡོམ་གསུམ་ལྡན་ཞེས་གསུངས་པ་དེ། །ཤེས་རྒྱུད་གཅིག་ལ་བརྩི་ན་ནི། །གཅིག་ཏུ་འདོད་ཀྱང་གསུམ་དུ་འགྱུར། །ལྡན་ཆོས་རྫས་གཞན་ཐ་དད་ཕྱིར། །འོན་ཏེ་སྔ་ཕྱི་ལ་བརྩི་ན། །གསུམ་ལྡན་ཞེས་
པའི་སྒྲ་དོན་མེད། །འོན་ཏེ་སྡོམ་གསུམ་རྫས་གཅིག་ཏུ། །ཤེས་རྒྱུད་གཅིག་ལ་ལྡན་ཞེ་ན། །གཏོང་ཐོབ་ཆོ་ག་གཅིག་ཏུ་འགྱུར། །དེས་ན་སོ་ཐར་སྡོམ་པ་ཡིས། །བྱང་ཆུབ་མཆོག་གི་སེམས་བླངས་ནས། །དང་པོ་དེ་ནི་ཀུན་གཞི་ལ། །བག་
ལ་ཉལ་བའི་ཚུལ་དུ་གནས། །རིག་འཛིན་སྡོམ་པ་ཐོབ་པ་ན། །འོག་མ་གཉིས་ཀ་བག་ལ་ཉལ། །དཔེར་ན་མཁའ་ལ་རྒྱུ་སྐར་ཤར། །ཅུང་ཟད་སྣང་བར་བྱས་གྱུར་མོད། །ཟླ་བའི་དཀྱིལ་འཁོར་ཤར་གྱུར་ན། །སྐར་འོད་ཉམས་མོད་འཇིག་རྟེན་
སྣང་། །རྟ་བདུན་ཚ་ཟེར་ཤར་བ་ན། །ཟླ་བའི་འོད་ཉམས་འཇིག་རྟེན་གསལ། །གལ་ཏེ་རིག་པ་འཛིན་པ་ཡིས། །གདུལ་བྱ་གང་དང་གང་དོན་དུ། །འོག་མའི་སྡོམ་པ་བླངས་པ་ན། །གོང་མ་ཟིལ་གྱིས་མི་གནོན་མོད། །སྡོམ་པ་ཆོ་གས་
ཐོབ་པ་ཡིན། །མཁའ་ལ་ཉི་མ་གནས་གྱུར་མོད། །ཟླ་སྐར་འཆར་བ་བཀག་པ་མེད། །དེས་ན་གཏོང་ཐོབ་གནས་པའི་ཚུལ། །རང་རང་ཆོ་ག་བཞིན་དུ་གནས། །ཀུན་གཞི་བག་ཆགས་མང་པོ་ཅན། །ཡིན་ཀྱང་ཤེས་རྒྱུད་ཐ་དད་མེད། །འོག་མའི་
ལྟུང་བ་བྱུང་བ་ན། །གོང་མ་ཇི་སྲིད་གནས་ཀྱི་བར། །རྣམ་པར་སྨིན་པས་གོས་པ་མེད། །དཔེར་ན་ཟླ་སྐར་ནུབ་གྱུར་མོད། །ཉི་མ་མཁའ་ལ་གནས་ཀྱི་བར། །འོད་ནི་ཅུང་ཟད་འགྲིབ་པ་མེད། །གོང་མའི་ལྟུང་བ་བྱུང་བ་ན། །འོག་མ་ཇི་སྙེད་གནས་
9-3-59b


གྱུར་མོད། །ཅུང་ཟད་ཕན་གྱིས་སྐྱོབ་མི་ནུས། །རྟ་བདུན་རྒྱལ་པོ་ནུབ་པ་ན། །ཟླ་སྐར་གནས་ཀྱང་མུན་པའི་བག །གསེར་འགྱུར་རྩི་ཞེས་གསུངས་པའི་དོན། །ཟིལ་གནོན་ཡོན་ཏན་མཆོག་ལ་དགོངས། །ཟླ་སྐར་གཉིས་ཀྱི་འོད་ཟེར་ཡང་། །
ཉི་མའི་དཀྱིལ་འཁོར་གནས་ཀྱི་བར། །ཉི་མའི་འོད་ཅེས་ཀུན་གྱིས་སྒྲོགས། །གཞན་ཡང་ཁ་ཅིག་སྡོམ་པ་གསུམ། །ས་ཆུ་གྲུ་འདྲ་གཞི་རྟེན་དུ། །འདོད་ཅེས་སྒྲོག་པ་འཁྲུལ་པ་ཡིན། །དེ་ཡི་འཁྲུལ་གཞི་ཁོ་བོས་བསྟན། །མཁས་པ་ཆེན་པོ་
རྟ་དབྱངས་དང་། །སློབ་དཔོན་སྒེག་པའི་རྡོ་རྗེ་སོགས། །སྡོམ་གསུམ་དེ་ཉིད་རིག་པ་ཡིས། །དོན་དེ་ལྡོག་པ་དུ་མ་བྱས། །ཁྱབ་བྱ་ཁྱབ་བྱེད་གསུངས་པ་ལ། །རྟེན་དང་བརྟེན་པར་བྱེད་ན་འཁྲུལ། །བྱང་སེམས་སྡོམ་པའི་དོན་གཅིག་ལ། །ཕན་པ་
སྒྲུབ་བའི་ལྡོག་པ་དང་། །གནོད་སྤོང་ལྡོག་པ་གཉིས་འཇུག་མོད། །ཕན་སྒྲུབ་ངོ་བོ་གང་ཡིན་ལ། །གནོད་པ་སྤོང་བས་ཁྱབ་པས་ན། །ཁྱབ་བྱ་ཁྱབ་བྱེད་རྫས་གཅིག་ཏུ། །བ་གླང་རྫིས་ཀྱང་མི་གོའམ། །དེས་ན་རིག་འཛིན་གཅིག་པུ་ལ། །
གསུམ་ལྡན་སྦྱོར་བར་འཐད་མ་ཡིན། །གལ་ཏེ་འཐད་ན་འོག་མ་གཉིས། །ཆོ་ག་མི་དགོས་སྐྱེ་བར་འགྱུར། །སྡོམ་གསུམ་ཆོ་ག་ཐུན་མོང་དུ། །ཐུབ་པ་ཆེན་པོས་གསུངས་པ་མེད། །ཕྲག་དོག་ནོར་འདོད་གཏི་མུག་ཅན། །རང་བཟོ་བྱེད་པ་སུ་ཡིས་
ཁེགས། །མདོ་རྒྱུད་དཔུང་ཀྱང་ཕྱོགས་སུ་འཕེན། །སྒྲ་ཚད་བྱུང་ན་རྟགས་གཞན་བསྒྱུར། །བསྟན་པའི་བྱི་དོར་ཇི་ལྟར་བྱ། །རིག་པ་འཛིན་པ་ཁོ་ན་ལ། །གསུམ་ལྡན་བསྔགས་པའི་དགོངས་པ་ནི། །འབྲས་བུའི་སྒོ་ནས་མ་ཡིན་ཏེ། །ཡིན་ན་ཀུན་མཁྱེན་
9-3-60a


མཆོག་དམན་འགྱུར། །དེས་ན་ལམ་དུས་གདུལ་བྱའི་དོན། །གཅིག་དང་གསུམ་གྱི་ཁྱད་པར་དང་། །སྡོམ་པ་རྫས་ཆོས་གཞན་ཉམས་མོད། །སྡོམ་གཞན་ཡོད་པའི་ཁྱད་པར་ཡིན། །སྡོམ་གསུམ་གང་ཡང་
མི་ལྡན་ན། །ལྷ་མིའི་ལུས་ཀྱང་རྙེད་པར་དཀའ། །ཉམས་ན་མཐོང་ཆོས་རྣམ་སྨིན་དག །རིམ་པ་གཉིས་ཀྱིས་བསྟན་པར་བྱ། །སོ་ཐར་སྡོམ་པ་ཉམས་གྱུར་ན། །རང་གིས་རང་བསླུས་གནོད་པ་མང་། །རྒྱལ་དང་དེ་སྲས་ཐམས་ཅད་ཀྱིས། །ཅུང་
ཟད་ཁྲེལ་གྱི་ཤིན་ཏུ་མིན། །ཕམ་པའི་བྱེ་བྲག་ལྕི་ཡང་གིས། །ལོ་གྲངས་ངན་སོང་གསུམ་དུ་གནས། །བྱང་སེམས་ཉམས་ན་འགྲོ་བ་ཀུན། །བསླུས་པས་གནོད་པ་ཤིན་ཏུ་མང་། །རྒྱལ་དང་དེ་སྲས་ཐམས་ཅད་དང་། །འགྲོ་བ་ཀུན་གྱིས་
ཤིན་ཏུ་ཁྲེལ། །ཕམ་པའི་ལྕི་ཡང་བྱེ་བྲག་གིས། །བསྐལ་པའི་གྲངས་བཞིན་དམྱལ་བར་གནས། །རིག་འཛིན་སྡོམ་པ་ཉམས་གྱུར་ན། །ཡིད་དུ་མི་འོང་སྣ་ཚོགས་འབྱུང་། །རྒྱལ་དང་དེ་སྲས་ཀུན་བརྙས་པས། །མི་འཇིགས་མནར་
མེད་གནས་དག་ཏུ། །སྡུག་བསྔལ་ཆེན་པོ་དེ་ཡིས་མྱོང་། །རྩ་བ་ཀུན་ཉམས་འཆབ་པ་དག། གསོ་ལ་ཉེ་བར་མི་བརྩོན་ན། །རྡོ་རྗེ་དམྱལ་བར་དེ་ལྟུང་སྟེ། །དམྱལ་བ་ཕལ་པ་ཐམས་ཅད་ཀྱི། །སྡུག་བསྔལ་གཅིག་ཏུ་དྲིལ་བས་ཀྱང་། །དེ་ཡི་
འབུམ་གྱི་ཆར་མི་ཕོད། །འཇིག་རྟེན་ཞིག་པས་གཞན་དུ་འཕོ། །སེ་གོལ་གཅིག་གིས་ཕྱིན་པར་བྱེད། །སངས་རྒྱས་སྟོང་གིས་འོད་ཟེར་དང་། །བྱང་ཆུབ་སེམས་དཔའི་ཕྲིན་ལས་ཀུན། །རྒྱུན་དུ་མཛད་ཀྱང་ཕན་མེད་འགྱུར། །བསྐལ་པ་ཐེར་འབུམ་ལ་
9-3-60b


སོགས་སུ། །དེ་ནི་ཐོན་པར་མ་གསུངས་སོ། །སོ་ཐར་སྡོམ་པའི་ཕན་ཡོན་ནི། །གནས་སྐབས་ལྷ་མི་མཐར་ཐུག་གི།  དགྲ་བཅོམ་འབྲས་བུ་ངེས་པར་ཐོབ། །བྱང་སེམས་སྡོམ་པའི་ཕན་ཡོན་ནི། །གནས་སྐབས་བདེ་མང་མཐར་ཐུག་ནི། །
རིང་མོ་ཞིག་ནས་རྫོགས་སངས་རྒྱས། །རིག་འཛིན་སྡོམ་པའི་ཕན་ཡོན་ནི། །གནས་སྐབས་ཉིད་ནས་ཀུན་མཁྱེན་གྱི། །བདེ་བ་ཆེ་ལ་ལོངས་སྤྱོད་འགྱུར། །གལ་ཏེ་བསྒོམས་པ་དང་བཅས་ན། །ཚེ་འདིར་སངས་རྒྱས་འགྲུབ་པར་གསུངས། །མ་
བསྒོམས་གྱུར་ཀྱང་ལྟུང་མེད་ན། །སྐྱེ་བ་བཅུ་དྲུག་ཉིད་ཀྱིས་ཐོབ། །པཎ་ཆེན་བློ་ཡི་རྒྱ་མཚོ་ལས། །སྡོམ་གསུམ་ནོར་བུའི་ཕྲེང་བ་བླངས། །བདག་གཞན་འགྲོ་བ་མ་ལུས་ཀྱི། །བློ་གྲོས་གཙུག་ན་ལེགས་གནས་པ། །ཀུན་མཁྱེན་དེ་ལ་ལོངས་སྤྱོད་
ཤོག །པཎྜི་ཏ་བྷི་བྷཱུ་ཏ་ཙནྡྲས་རང་འགྱུར་དུ་མཛད་པ་རྫོགས་སོ།།    །།གཉིས་པ་ནི་གཞུང་འདིའི་མགོ་ཞབས་ཀྱི་བརྗོད་བྱ་ཐམས་ཅད་བསྡུ་ན་གསུམ་སྟེ།  རྩོམ་པ་ལ་འཇུག་པ་ཀླད་ཀྱི་དོན།  བརྩམ་པར་བྱ་བ་གཞུང་
གི་དོན། །རྩོམ་པ་མཐར་ཕྱིན་པ་མཇུག་གི་དོན་ནོ། །དང་པོ་ནི།  རྣམ་དག་ཞེས་སོགས་ཚིག་རྐང་བཅོ་ལྔ་སྟེ།  ཚིགས་སུ་བཅད་པ་དང་པོས་རྩོམ་པའི་རྒྱུ་ཤེས་རབ་བསྟན།  གཉིས་པས་བརྩམ་པའི་དགོས་པ་བསྟན།  ལྷག་མ་གཉིས་ཀྱིས་བརྗོད་བྱ་མདོར་
བསྡུས་ཏེ་ཇི་ལྟར་རྩོམ་པའི་ཚུལ་བསྟན་ནོ། །གཉིས་པ་ལ་བཞི་སྟེ།  ཐོབ་གནས་གཏོང་ཚུལ་གསུམ་གྱི་སྒོ་ནས་སྡོམ་པ་གསུམ་གྱི་རང་བཞིན་གཏན་ལ་དབབ་པ།  རྒྱུད་བཞིའི་དོན་བཤད་པའི་སྒོ་ནས་གསུམ་ལྡན་གྱི་ཚུལ་དཔྱད་པ།  འདི་ཕྱིའི་ཉེས་དམིགས་གཉིས་
9-3-61a


ཀྱི་སྒོ་ནས་ཉེས་དམིགས་བསྟན་པ།  གནས་སྐབས་དང་མཐར་ཐུག་གི་ཕན་ཡོན་གཉིས་ཀྱི་སྒོ་ནས་བསྲུངས་བའི་ཕན་ཡོན་བསྟན་པའོ། །དང་པོ་ལ་གསུམ་ལས།  དང་པོ་སོ་ཐར་གྱི་ཐོབ་གནས་གཏོང་ཚུལ་ནི་གླིང་གསུམ་
ཞེས་སོགས་ཚིག་རྐང་བཅུ་བདུན་ཏེ་ཐོབ་ཚུལ་ནི་རྟེན་གྱི་ཡན་ལག་གླིང་གསུམ་གྱི་སྐྱེས་པ་དང་བུད་མེད་གང་རུང་།  བསམ་པའི་ཡན་ལག་རང་ཉིད་འཁོར་བ་ལས་གྲོལ་བའི་དོན་དུ་ཆོ་གའི་ཡན་ལག་མཁན་སློབ་ཀྱི་ཆོ་ག་ཚད་ལྡན་ལས།  དུས་ཀྱི་ཡན་ལག་ཇི་
སྲིད་འཚོའི་བར་དུ།  སྤང་བྱ་གཞན་གནོད་གཞི་ལས་ལུས་ངག་གཙོ་བོར་སྡོམ་པའོ། །གནས་ཚུལ་རང་རྒྱུད་ལྡན་གྱི་གང་ཟག་དང་།  ཐོབ་པའི་རྫས་ཀྱིས་སྦྲེལ་ནས་གནས་ཏེ།  དཔེར་ན་གླང་ལ་ཁལ་ཐག་པས་སྦྲེལ་ནས་གནས་པ་བཞིན་ནོ། །གཏོང་ཚུལ་ནི་
གོ་སླའོ། །གཉིས་པ་བྱང་སེམས་ཀྱི་སྡོམ་པའི་ཐོབ་གནས་གཏོང་ཚུལ་ནི་ལྷ་མི་ཞེས་སོགས་ཚིགས་སུ་བཅད་པ་ལྔ་སྟེ།  ཐོབ་ཚུལ་ཀུན་རྫོབ་བྱང་ཆུབ་སེམས་ཀྱི་ཐོབ་ཚུལ་ནི་སློབ་དཔོན་གྱི་ཆོ་ག་ལས་བྱང་ཆུབ་མ་ཐོབ་ཀྱི་བར་དུ་སྨོན་འཇུག་གི་བདག་ཉིད་ཅན་ཐོབ་
པའོ། །དོན་དམ་བྱང་ཆུབ་སེམས་ཀྱི་ཐོབ་ཚུལ་ནི་དེ་ཉིད་སྣང་ལ་རང་བཞིན་མེད་པར་བསྒོམས་པ་ལས་གཉིས་འཛིན་ལས་གྲོལ་བའོ། །གནས་ཚུལ་ནི་རང་དོན་ཡིད་བྱེད་དང་བྲལ་བ་ན་སེམས་ཀྱི་དབང་དུ་བྱས་པའི་སེམས་བསྐྱེད་དང་།  སེམས་བྱུང་གི་དབང་དུ་བྱས་
པའི་སེམས་བསྐྱེད་གཉིས་ཉི་མ་དང་འོད་ཟེར་བཞིན་དུ་གནས་པའོ། །གཏོང་ཚུལ་ལ་གཉིས་ལས།  རང་དོན་ཡིད་བྱེད་ཀྱི་སེམས་བསྐྱེད་པ་དང་།  ནག་པོའི་ཆོས་བཞི་ལ་སྤྱོད་པ་ན་གཏོང་སྟེ།  ཚ་རེག་སྟོབས་ཆེ་བ་ཉེ་བ་ན་གྲང་རེག་གཏོང་བ་བཞིན་ནོ། །བླ་ན་མེད་
9-3-61b


པའི་བྱང་ཆུབ་ཐོབ་པ་ན་གཏོང་སྟེ།  ཆུའི་ཕ་རོལ་ཏུ་ཕྱིན་པ་ན་གྲུ་གཏོང་བ་བཞིན་ནོ། །གསུམ་པ་སྔགས་སྡོམ་གྱི་ཐོབ་གནས་གཏོང་ཚུལ་ནི་རིགས་བཞི་ཞེས་སོགས་ཚིགས་སུ་བཅད་པ་བཞི་སྟེ།  ཐོབ་ཚུལ་ནི་བླ་མ་ཚད་ལྡན་ལས།  ནམ་མཁའ་གནས་ཀྱི་བར་
ལྷན་སྐྱེས་ཡེ་ཤེས་ཀྱི་བརྡའ་དོན་འཕྲོད་པའོ། །གནས་ཚུལ་ནི་རིམ་གཉིས་ཀྱི་ཉམས་ལེན་ལ་བརྟེན་ནས་དགོས་འདོད་འབྱུང་བའི་ཚུལ་དུ་གནས་པའོ། །གཏོང་ཚུལ་ནི་དགོས་པ་མེད་པའི་བློ་སྐྱེས་པ་དང་།  རྩ་བའི་ལྟུང་བ་བྱུང་བ་ན་གཏོང་ངོ་། །གཉིས་པ་
རྒྱུད་བཞིའི་དོན་བཤད་པའི་སྒོ་ནས་གསུམ་ལྡན་གྱི་ཚུལ་ལ་དཔྱད་པ་ལ་བཞི་སྟེ།  རྒྱུད་བཞི་ལས་གསུམ་ལྡན་གསུངས་པའི་ཚུལ།  གཞན་གྱི་རྒྱུད་དོན་འཆད་པ་དགག་པ་དང་།  རང་ལུགས་ཀྱི་གསུམ་ལྡན་གྱི་ཚུལ་བཤད་པ།  གསུམ་ལྡན་གྱི་འདོད་
ཚུལ་གཞན་དགག་པའོ། །དང་པོ་ནི་རྒྱུད་ནི་ཞེས་སོགས་ཚིགས་སུ་བཅད་པ་ལྔ་སྟེ།  རྒྱུད་སུམ་བརྒྱ་པ་དང་།  དམ་པ་དང་པོ་དང་།  རྡོ་རྗེ་རྩེ་མོ་དང་།  རྒྱུད་འབུམ་པ་རྣམ་བཞི་ལས།  སྤྱིར་གསུམ་ལྡན་གསུངས་པའི་དོན་ནོ། །གཉིས་པ་ནི། 
གསུངས་པའི་དོན་ཞེས་སོགས་ཚིགས་སུ་བཅད་པ་ཕྱེད་དང་བརྒྱད་དོ། །འདི་དག་ནི་རྗེ་བཙུན་གྱི་རྩ་ལྟུང་འཁྲུལ་སྤོང་ལས་རྒྱུད་འབུམ་པའི་ལུང་ཤེས་བྱེད་དུ་བྱས་ནས་སྡོམ་གསུམ་གནས་འགྱུར་ངོ་བོ་གཅིག་ཏུ་འདོད་པ་ལ་དགག་པ་བརྗོད་པར་རློམ་པ་སྟེ།  འོག་རྩོད་
སྤོང་གི་སྐབས་སུ་ཞིབ་ཏུ་བཤད་ཅིང་དཔྱིས་ཕྱིན་པར་དགག་པར་བྱའོ། །གསུམ་པ་ནི་དེས་ན་སོ་ཐར་སྡོམ་པ་ཡི་ཞེས་སོགས་ཚིགས་སུ་བཅད་པ་བཅུ་སྟེ་སོ་ཐར་དང་ལྡན་པའི་གང་ཟག་གིས་སེམས་བསྐྱེད་ཀྱི་སྡོམ་པ་བླངས་པ་ན་སོ་ཐར་ཀུན་གཞི་ལ་བག་ལ་ཉལ་བའི་ཚུལ་
9-3-62a


དུ་གནས་ཀྱི་མངོན་གྱུར་དུ་མི་འབྱུང་ལ་སྔགས་སྡོམ་བླངས་པ་ན་འོག་མ་གཉིས་ཀ་ཡང་བག་ལ་ཉལ་བའི་ཚུལ་དུ་གནས་ཏེ།  དཔེར་ན་ནམ་མཁའ་ལ་རྒྱུ་སྐར་རྐྱང་པ་ཤར་བ་ན་དེའི་འོད་ཟེར་སྣང་ཞིང་།  ཟླ་བ་ཤར་བ་ན་སྐར་མའི་འོད་
ཟེར་ཉམས།  ཉི་མ་ཤར་བ་ན་ཟླ་བ་དང་སྐར་མ་གཉིས་ཀའི་འོད་ཉམས་པ་བཞིན་ནོ། །གལ་ཏེ་སྡོམ་པ་གོང་མ་དང་ལྡན་པའི་གང་ཟག་གིས་འོག་མའི་སྡོམ་པ་བླངས་བ་ན་གོང་མ་ཟིལ་གྱིས་མི་གནོན་ཀྱང་སྡོམ་པ་ཆོ་གས་ཐོབ་སྟེ་ཉི་མ་གནས་པའི་ཚེ་ཡང་ཟླ་སྐར་འཆར་
བ་བཞིན་ནོ། །གོང་མ་གནས་ཀྱི་བར་དུ་འོག་མའི་ལྟུང་བ་བྱུང་ཡང་རྣམ་སྨིན་གྱིས་མི་གོས་ཏེ།  ཉི་མ་གནས་ཀྱི་བར་དུ་ཟླ་སྐར་ནུབ་ཀྱང་འོད་མི་འགྲིབ་པ་བཞིན་ནོ། །གོང་མའི་ལྟུང་བ་བྱུང་ན་འོག་མ་གནས་ཀྱང་སྐྱོབ་མི་ནུས་ཏེ།  ཉི་མ་ནུབ་པ་ན་ཟླ་སྐར་གནས་ཀྱང་
མུན་པའི་བག་ཏུ་འགྱུར་བ་བཞིན་ནོ། །རྒྱུད་འབུམ་པ་ལས་གསེར་འགྱུར་རྩི་ཡི་དཔེ་གསུངས་པ་ཡང་གོང་མ་གོང་མས་འོག་མ་འོག་མ་ཟིལ་གྱིས་གནོན་ཅིང་འོག་མ་ལས་གོང་མ་མཆོག་ཏུ་འགྱུར་བ་ལ་དགོངས་ཏེ།  ཟླ་སྐར་གྱི་འོད་ཟེར་ཡང་ཉི་མ་གནས་གྱི་བར་དུ་ཉི་
མའི་འོད་ཟེར་ཅེས་སྒྲོགས་པ་བཞིན་ནོ། །བཞི་པ་ལ་གསུམ་སྟེ།  རྟེན་དང་བརྟེན་པར་འདོད་པའི་འཁྲུལ་གཞི།  དེ་དང་འགལ་བར་བསྟན་པ།  སྔགས་སྡོམ་ཁོ་ན་ལ་གསུམ་ལྡན་སྦྱོར་བ་དགག་པ་དང་།  སྔགས་སྡོམ་ཁོ་ན་ལ་གསུམ་ལྡན་བསྔགས་པའི་དགོངས་པ་བསྟན་
པའོ། །དང་པོ་ནི་གཞན་ཡང་ཞེས་སོགས་ཚིགས་སུ་བཅད་པ་བཞི་སྟེ།  ཁ་ཅིག །སྡོམ་པ་གསུམ་པོས་གཞི་དང་ཆུ་དང་གྲུ་དང་འདྲ་བར་རྟེན་དང་བརྟེན་པར་འདོད་པའི་འཁྲུལ་གཞི་ནི་མཁས་པ་རྟ་དབྱངས་དང་།  སློབ་དཔོན་སྒེག་པའི་རྡོ་རྗེ་ལ་སོགས་པ་སྡོམ་གསུམ་གྱི་དེ་
9-3-62b


ཁོ་ན་ཉིད་རིག་པ་རྣམས་ཀྱིས་སྡོམ་པའི་དོན་གཅིག་ལ་ཕན་པ་སྒྲུབ་པའི་དང་།  གནོད་པ་སྤོང་བའི་ལྡོག་པ་གཉིས་ཡོད་པ་ལ་བྱང་སེམས་དང་སོ་ཐར་དུ་འཇོག་པས་དེ་གཉིས་ཁྱབ་བྱ་ཁྱབ་བྱེད་དུ་གསུངས་པས་འཁྲུལ་གཞི་བྱས་སོ། །དེ་ལྟར་རྟེན་དང་བརྟེན་པར་འདོད་པ་མི་འཐད་
པར་ཐལ།  དེ་གཉིས་ཁྱབ་བྱ་ཁྱབ་བྱེད་ཡིན་ཅིང་རྟེན་དང་བརྟེན་པ་རྫས་གཞན་ཡིན་ལ།  ཁྱབ་བྱ་ཁྱབ་བྱེད་རྫས་གཅིག་དུ་བ་ལང་རྫིས་ཀྱང་གོ་བའི་ཕྱིར་རོ། །གཉིས་པ་ནི་དེས་ན་ཞེས་སོགས་ཚིག་རྐང་བཅུ་གཅིག་སྟེ།  རིག་འཛིན་གྱི་སྡོམ་པ་གཅིག་པུ་ལ་གསུམ་ལྡན་
སྦྱོར་ན་འོག་མ་གཉིས་ཆོ་ག་མི་དགོས་པར་སྐྱེ་བར་འགྱུར་རོ། །གལ་ཏེ་དབང་བསྐུར་གྱི་ཆོ་ག་ལས་གསུམ་ཀ་སྐྱེའོ་སྙམ་ན་མ་ཡིན་ཏེ།  སྡོམ་གསུམ་ཐུན་མོང་གི་ཆོ་ག་སངས་རྒྱས་ཀྱིས་མ་གསུངས་པའི་ཕྱིར་རོ། །གསུམ་པ་ནི་རིག་འཛིན་ཞེས་སོགས་ཚིགས་
སུ་བཅད་པ་གཉིས་ཏེ།  རིག་འཛིན་ཁོ་ན་ལ་གསུམ་ལྡན་བསྔགས་པའི་དགོངས་པ་ནི་འབྲས་བུའི་སྒོ་ནས་བསྔགས་པ་མ་ཡིན་ཏེ།  གལ་ཏེ་ཡིན་ན་གསུམ་ལྡན་གྱི་འབྲས་བུ་ཀུན་མཁྱེན་དང་།  སྔགས་སྡོམ་ཁོ་ནའི་འབྲས་བུ་ཀུན་མཁྱེན་ལ་མཆོག་དམན་གྱི་ཁྱད་པར་ཡོད་
པར་ཐལ་ལོ། །དེས་ན་ལམ་གྱི་དུས་སུ་གདུལ་བྱའི་ངོར་བསྔགས་པ་ཡིན་ནོ། །གསུམ་པ་ཉེས་དམིགས་ནི་སྡོམ་གསུམ་ཞེས་སོགས་ཚིགས་སུ་བཅད་པ་ཕྱེད་དང་དགུ་སྟེ་དེ་ནི་གོ་སླའོ། །བཞི་པ་ཕན་ཡོན་ནི་སོ་ཐར་ཞེས་སོགས་ཚིགས་སུ་བཅད་པ་གསུམ་སྟེ་གོ་སླའོ། །
གསུམ་པ་ནི་པཎྜི་ཏ་ཞེས་སོགས་ཚིག་རྐང་ལྔའོ། །དེ་དག་གིས་ནི་གཞུང་གི་དོན་སྒྲོ་སྐུར་མེད་པར་ཇི་ལྟ་བ་བཞིན་བཤད་ཟིན་ཏོ། །གསུམ་པ་ནི་དེ་ལ་སོ་ཐར་ལེན་པའི་བསམ་པའི་ཡན་ལག་ཏུ་རང་དོན་ཡིད་བྱེད་དགོས་པ་ཡང་མ་ཡིན་ཏེ།  སྤྱིར་ངེས་འབྱུང་གི་བསམ་
9-3-63a


པས་ཟིན་ན་སོ་ཐར་དུ་འགྱུར་བ་ལས་ངེས་འབྱུང་དེ་ལ་ཡང་བྱང་ཆུབ་ཏུ་སེམས་བསྐྱེད་པ་གསུམ་ཡོད་པའི་ཕྱིར་དང་།  བྱེ་བྲག་ཏུ་སྨྲ་བ་རང་གི་གཞུང་ལས་ཀྱང་བྱང་ཆུབ་མཆོག་ཏུ་སེམས་བསྐྱེད་པའི་སྒོ་ནས་སོ་ཐར་ལེན་པ་ཡང་ཡོད་པའི་ཕྱིར་
ཏེ།  སུམ་བརྒྱ་པ་ལས།  རྫོགས་པའི་བྱང་ཆུབ་དཔལ་ནོད་དབང་བསྐུར་ཡིན། །ཞེས་བཤད་པའི་ཕྱིར་རོ། །མཁན་སློབ་ཀྱི་ཆོ་ག་ཁོ་ན་ལས་ལེན་དགོས་པར་འདོད་པ་ཡང་མི་འཐད་དེ།  རང་བྱུང་གི་བསྙེན་པར་རྫོགས་པ་དང་།  ཡེ་ཤེས་ཁོང་དུ་ཆུད་པས་བསྙེན་པར་
རྫོགས་པ་དང་།  ཚུར་ཤོག་ལ་མ་ཁྱབ་པའི་ཕྱིར་རོ། །ཐོབ་པའི་ཐག་པས་སྦྲེལ་ནས་གནས་ཞེས་པ་ཡང་བྱེ་བྲག་ཏུ་སྨྲ་བའི་ལུགས་ཀྱི་ཐོབ་པ་ཁས་ལེན་ན།  བྱང་སེམས་དང་སྔགས་སྡོམ་ཡང་ཐོབ་པས་སྦྲེལ་ནས་གནས་པར་ཁས་ལེན་དགོས་ཏེ།  གང་ཟག་གི་རྒྱུད་
ཀྱིས་བསྡུས་པའི་ཡོན་ཏན་ཐམས་ཅད་ལ།  གང་ཟག་དེ་དང་སྦྲེལ་བྱེད་ཀྱི་ཐོབ་པ་ཡོད་པར་འདོད་པའི་ཕྱིར་ཏེ། ཐོབ་དང་མ་ཐོབ་རང་རྒྱུད་དུ། །རྟོགས་པ་རྣམས་ཀྱིའོ་ཞེས་གསུངས་པའི་ཕྱིར།  དེ་ལྟ་བུའི་ཐོབ་པ་ཁས་མི་ལེན་ན་ནི་སོ་ཐར་གྱི་སྡོམ་པ་ལའང་ཐོབ་པ་དོན་མེད་
དོ། །བྱང་སེམས་ཀྱི་སྡོམ་པ་ཐོབ་པའི་ཚུལ་ཡང་སློབ་དཔོན་གྱི་ཆོ་ག་ལས་ཐོབ་དགོས་པའི་ངེས་པ་མེད་དེ།  རྟེན་གྱི་དྲུང་དུ་རང་ཉིད་ཀྱིས་ལེན་པ་དབུ་མ་ལུགས་དང་།  སེམས་ཙམ་ལུགས་གཉིས་ཀ་ལས་བཤད་པའི་ཕྱིར་རོ། །དུས་བྱང་ཆུབ་མ་ཐོབ་ཀྱི་བར་དུ་
ལེན་པ་སྤྱིར་འཐད་ཀྱང་ཁྱེད་རང་ལ་ནང་འགལ་ཏེ།  སྔགས་སྡོམ་ནི་ནམ་མཁའ་གནས་ཀྱི་བར་ལེན་པར་ཁས་བླངས་ཤིང་།  སྔགས་སྡོམ་དང་བྱང་སེམས་ཀྱི་སྡོམ་པ་ལ་དུས་རྒྱུན་རིང་ཐུང་གི་ཁྱད་པར་གང་ནས་ཀྱང་མ་བཤད་པའི་ཕྱིར་རོ། །གཏོང་ཚུལ་ལ་རང་དོན་ཡིད་
9-3-63b


བྱེད་སྐྱེས་པ་ན་བྱང་སེམས་ཀྱི་སྡོམ་པ་གཏོང་བ་ནི་ཁྱེད་རང་གིས་ཁས་བླངས་པ་དང་འགལ་ཏེ།  བྱང་སེམས་ཀྱི་སྡོམ་ལྡན་གྱིས་སོ་ཐར་གྱི་སྡོམ་པ་བླངས་པ་ཡོད་པ་དང་།  སོ་ཐར་གྱི་སྡོམ་པ་བླངས་པའི་བསམ་པའི་ཡན་ལག་ཏུ་རང་དོན་ཡིད་བྱེད་དགོས་པར་ཁས་བླངས་
པས་སོ་ཐར་ལེན་པའི་ཚེ་གཏོང་བར་ཐལ་བའི་ཕྱིར་རོ། །བྱང་ཆུབ་ཐོབ་པ་ན་སེམས་བསྐྱེད་ཀྱི་སྡོམ་པ་གཏོང་བར་འདོད་པ་ནི་སྤྱིར་མདོ་རྒྱུད་ཀྱི་ལུང་དུ་མ་དང་འགལ་བ་ཡང་འདིར་མ་སྤྲོས་ལ།  ཁྱེད་རང་གིས་སྔགས་སྡོམ་བྱང་ཆུབ་ཐོབ་ཀྱང་གནས་པར་འདོད་པ་དང་ཡང་
འགལ་ཏེ།  སྔགས་སྡོམ་གྱི་དམ་ཚིག་ལ་རྩ་ལྟུང་བཅུ་བཞི་ལས།  ཆོས་ཀྱི་རྩ་བ་བྱང་ཆུབ་སེམས། །དེ་སྤོང་བ་ནི་ལྔ་པ་ཡིན། །ཞེས་དང་།  དཔལ་མཆོག་ལས།  བྱང་ཆུབ་སེམས་ནི་དོར་མི་བྱ། །ཞེས་པ་དང་།  དེ་བཞིན་རྣམ་སྣང་མངོན་བྱང་དང་།  
གསང་བ་སྤྱི་རྒྱུད་སོགས་རྒྱུད་ཕལ་ཆེ་བ་ལས་སྔགས་སྡོམ་གནས་པ་ལ་བྱང་ཆུབ་ཀྱི་སེམས་མི་གཏོང་བར་དགོས་པར་གསུངས་པས་སོ། །སྔགས་སྡོམ་གྱི་ངོ་བོ་ལྷན་སྐྱེས་ཡེ་ཤེས་ཀྱི་བརྡའ་དོན་འཕྲོད་པ་ལ་འདོད་པ་ཡང་རྒྱུད་སྡེ་འོག་མ་གསུམ་ལ་མ་ཁྱབ་ཅིང་བླ་མེད་
ལ་ཡང་དབང་གསུམ་པ་ནས་ཡེ་ཤེས་སྐྱེ་བ་ཡོད་ཀྱང་བརྡའ་དོན་འཕྲོད་པ་བཞི་པ་ནས་ཡོད་པ་སོགས་ནི་འདིར་སྐབས་མ་ཡིན་པས་མ་སྤྲོས་སོ། །གནས་ཚུལ་རིམ་གཉིས་ཀྱི་ཉམས་ལེན་ལ་བརྟེན་ནས་གནས་དགོས་པ་ཡང་དེར་མ་ངེས་ཏེ།  ཉམས་ལེན་མེད་ཀྱང་དབང་
བསྐུར་ཐོབ་ནས་དམ་ཚིག་དང་སྡོམ་པ་བསྲུངས་ན་སྔགས་སྡོམ་གནས་པ་སུས་ཀྱང་འགོག་མི་ནུས་པའི་ཕྱིར་རོ། །ད་ནི་གསུམ་ལྡན་གྱི་འདོད་ཚུལ་ལ་དཔྱད་པར་བྱ་སྟེ།  གོང་མ་ཐོབ་པའི་ཚེ་འོག་མ་མངོན་གྱུར་དུ་མེད་པར་བག་ལ་ཉལ་དུ་འདོད་ན་གོང་འོག་འཛིན་
9-3-64a


སྟངས་འགལ་བས་མངོན་གྱུར་དུ་མི་འབྱུང་བ་ཡིན་ནམ་ཚ་རེག་དང་གྲང་རེག་ལྟར་ལྷན་ཅིག་མི་གནས་འགལ་ཡིན་པས་མངོན་གྱུར་དུ་མི་འབྱུང་བ་ཡིན།  དང་པོ་ལྟར་ན་འཛིན་སྟངས་འགལ་བ་ནི་ཤིན་ཏུ་མི་འཐད་དེ།  བྱང་སེམས་ཀྱི་སྡོམ་པ་ནི་གཞན་ལ་
ཕན་པ་བསྒྲུབ་པ་ཡིན་ལ།  སོ་ཐར་གྱི་སྡོམ་པ་ནི་གཞན་ལ་གནོད་པ་སྤོང་བའི་བསམ་པ་ཅན་ཡིན་པ་གང་ཞིག །གཞན་ལ་ཕན་པ་སྒྲུབ་པ་ལ་གཞན་ལ་གནོད་པ་སྤོང་བས་ཁྱབ་པར་ཁྱེད་རང་གིས་ཀྱང་ཁས་བླངས་ཞིང་དོན་ལ་ཡང་གནས་པའི་ཕྱིར་རོ། །གཉིས་པ་ལྟར་
ན།  གསུམ་ལྡན་གྱི་གང་ཟག་མི་སྲིད་པར་ཐལ་བ་ལས་དེ་ལྟར་དུ་ཡང་མི་འཐད་དེ།  གོང་དུ་དྲངས་པའི་རྒྱུད་བཞི་ལས་གསུམ་ལྡན་གསུངས་པའི་ཕྱིར་རོ། །གཞན་ཡང་བྱང་སེམས་ཀྱི་སྡོམ་པ་ལྡན་པ་ལ་སོ་ཐར་གྱི་སྡོམ་པ་མངོན་གྱུར་དུ་མི་འབྱུང་ན་ཉེས་སྤྱོད་སྤོང་བའི་ཚུལ་ཁྲིམས་
ཀྱང་མངོན་གྱུར་དུ་མེད་པར་འདོད་དགོས་ཏེ།  ཉེས་སྤྱོད་སྤོང་བའི་ཚུལ་ཁྲིམས་ནི་ཐོགས་མེད་དང་།  མར་མེ་མཛད་དང་།  གནས་བརྟན་བྱང་བཟང་རྣམས་ཀྱིས་སོ་ཐར་རིས་བདུན་ལ་བཤད་པའི་ཕྱིར་རོ། །སྔགས་སྡོམ་དང་ལྡན་པའི་གང་ཟག་ལ་བྱང་སེམས་ཀྱི་སྡོམ་
པ་སྨོན་འཇུག་གཉིས་པོ་མངོན་གྱུར་དུ་འབྱུང་མི་སྲིད་ན་གང་ཟག་དེས་རྫོགས་པའི་བྱང་ཆུབ་སྒྲུབ་པ་ནི་ཤིན་ཏུ་ངོ་མཚར་ཏེ།  བྱང་ཆུབ་སེམས་དཔའི་སྤྱོད་པ་ཚུལ་ཁྲིམས་རྣམ་པ་གསུམ་ལ་མ་བསླབས་པར་རྫོགས་པའི་བྱང་ཆུབ་བསྒྲུབ་པ་ནི་ཁྱོད་ཁོ་ན་ལས་ཐོས་ཀྱི།  སངས་རྒྱས་
སྲས་དང་བཅས་པ་རྣམས་ཀྱིས་མ་གསུངས་སོ། །གཞན་ཡང་རྡོ་རྗེ་མཁའ་འགྲོ་དང་།  སཾ་བྷུ་ཊི་དང་།  རྡོ་རྗེ་རྩེ་མོ་ལས།  ཇི་ལྟར་དུས་གསུམ་མགོན་པོ་རྣམས། །ཞེས་སོགས་སྨོན་པ་སེམས་བསྐྱེད་དང་འཇུག་པ་སེམས་བསྐྱེད་གཉིས་རིགས་སྔགས་སྤྱིའི་དམ་ཚིག་ཏུ་གསུངས་
9-3-64b


པས་རྒྱུད་སྡེ་གོང་མ་གཉིས་ཀྱི་རྡོ་རྗེ་སློབ་དཔོན་གྱི་དབང་ཐོབ་པའི་གང་ཟག་ལ་རིགས་ལྔ་སོ་སོའི་དམ་ཚིག་མངོན་གྱུར་དུ་ཡོད་ཅིང་སྤྱིའི་དམ་ཚིག་བག་ལ་ཉལ་བའི་ཚུལ་དུ་ཡོད་པར་ཁས་ལེན་དགོས་པར་འགྱུར་རོ། །གཞན་ཡང་གསུམ་ལྡན་གྱི་དགེ་སློང་གི་རྒྱུད་ཀྱི་ཀུན་གཞི་ལ་གནས་པའི་
དགེ་སློང་གི་སྡོམ་པའི་བག་ཆགས་དེ་སོ་ཐར་གྱི་སྡོམ་པ་ཡིན་ནམ་མ་ཡིན་གལ་ཏེ་ཡིན་ན་དགེ་སློང་དེ་ཤི་འཕོས་པའི་ཚེ་དགེ་སློང་གི་སྡོམ་པའི་བག་ཆགས་གཏོང་བར་ཐལ།  དེའི་ཚེ་སོ་ཐར་གཏོང་བའི་ཕྱིར།  རྟགས་ཁྱབ་ཁས།  འདོད་ན་དགེ་སློང་ཤི་འཕོས་པའི་རྗེས་སུ་ཤེས་རྒྱུད་
ལ་དགེ་སློང་གི་བག་ཆགས་མེད་པར་འགྱུར་ཅིང་།  དེའང་འདོད་ན་ཐོས་བསམ་སྒོམ་པ་སོགས་ལའང་མཚུངས་པས་གཞི་ཚུལ་ཁྲིམས་ལ་གནས་ནས་ཐོས་བསམ་སྒོམ་གསུམ་བྱེད་པ་ལ་དགོས་པ་མེད་པར་འགྱུར་རོ། །ཞེས་སོགས་སྨྲས་ན་ཅང་མི་གསུང་བར་འགྱུར་རོ། །
གལ་ཏེ་ཀུན་གཞིའི་སྟེང་གི་སོ་ཐར་གྱི་སྡོམ་པའི་བག་ཆགས་དེ་ཉིད་སོ་ཐར་གྱི་སྡོམ་པ་མ་ཡིན་ན་གང་ཟག་དེའི་རྒྱུད་ལ་སོ་ཐར་གྱི་སྡོམ་པ་གཏན་མེད་པར་འགྱུར་ཏེ་བག་ཆགས་དེ་ལས་གཞན་པའི་སོ་ཐར་གྱི་སྡོམ་པ་གཞན་མེད་པར་ཁས་བླངས་པའི་ཕྱིར་རོ། །ཉི་ཟླ་སྐར་གསུམ་
གྱི་དཔེ་དང་སྦྱར་བ་ཡང་མི་འཐད་དེ།  རང་གི་རྟོགས་པས་སྦྱར་བ་ཙམ་ཡིན་གྱི་ལུང་རྣམ་པར་དག་པ་གང་ནས་ཀྱང་མ་བཤད་པའི་ཕྱིར་རོ། །སྔགས་སྡོམ་ལ་གནས་པའི་གང་ཟག་གིས་གཞན་དོན་དུ་སྡོམ་པ་འོག་མ་ལེན་པ་དོན་ལ་གནས་ཀྱང་ཁྱེད་ལ་འགལ་ཏེ།  སོ་
ཐར་ལེན་པའི་བསམས་པའི་ཡན་ལག་ཏུ་རང་དོན་ཡིད་བྱེད་དགོས་པར་ཁས་བླངས་པའི་ཕྱིར་རོ། །གོང་མ་གནས་ཀྱི་བར་དུ་འོག་མའི་ལྟུང་བ་བྱུང་ཡང་རྣམ་སྨིན་གྱིས་མི་གོས་པར་འདོད་པ་ལ་ཡང་བརྗོད་པར་བྱ་སྟེ།  སྔགས་སྡོམ་ལ་གནས་པའི་གང་ཟག་ལ་བྱང་
9-3-65a


སེམས་ཀྱི་སྡོམ་པ་ལ་ལྟོས་པའི་རྩ་ལྟུང་བྱུང་ན་བྱང་སེམས་ཀྱི་སྡོམ་པ་ཉམས་ལ་དེ་ཉམས་ན་འགྲོ་བ་ཀུན་བསླུས་པས་གནོད་པ་ཤིན་ཏུ་མང་བ་དང་། རྒྱལ་དང་དེ་སྲས་ཐམས་ཅད་དང་། །འགྲོ་བ་ཀུན་གྱིས་ཤིན་ཏུ་ཁྲེལ། །ཕམ་པའི་
ལྕི་ཡང་བྱེ་བྲག་གིས། །བསྐལ་པའི་གྲངས་བཞིན་དམྱལ་བར་གནས། །ཅེས་ཁས་བླངས་པ་དང་ཅིའི་ཕྱིར་མི་འགལ།  གལ་ཏེ་ཉེས་དམིགས་དེ་དག་ནི་སྡོམ་པ་རེ་རེ་དང་ལྡན་པ་ཉམས་པའི་དབང་དུ་བྱས་ཀྱིས་གོང་མ་དང་ལྡན་པའི་དབང་དུ་བྱས་པ་མ་ཡིན་ནོ་
སྙམ་ན་དེ་ཤིན་ཏུ་མི་འཐད་དེ།  གོང་མ་དང་ལྡན་པའི་ཚེ་ཡང་སྡོམ་པ་གསུམ་ཆར་གྱི་གཏོང་ཐོབ་གནས་པའི་ཚུལ་ཐམས་ཅད་རང་རང་གི་ཆོ་ག་བཞིན་གནས་པར་ཁས་བླངས་པ་དང་འགལ་བའི་ཕྱིར་རོ། །གོང་མའི་ལྟུང་བ་བྱུང་ན་འོག་མ་གནས་ཀྱང་སྐྱོབ་མི་ནུས་པ་ལ་
ཡང་དཔྱད་པར་བྱ་སྟེ།  བྱང་སེམས་ལས་དང་པོ་པ་འགའ་ཞིག་བྱང་སེམས་ཀྱི་སྡོམ་པ་བཏང་ནས་སོ་ཐར་ལ་གནས་ཏེ་ཉན་ཐོས་ཀྱི་བྱང་ཆུབ་ཐོབ་པ་མེད་པར་ཐལ།  གོང་མའི་ལྟུང་བ་བྱུང་ན་འོག་མས་སྐྱོབ་མི་ནུས་པའི་ཕྱིར།  འདོད་ན་བྱང་སེམས་རིགས་མ་ངེས་པ་
རྣམས་ཐེག་དམན་དུ་འཇུག་པ་མེད་པར་འགྱུར་རོ། །གཞན་ཡང་དཔེ་དང་བསྒྲིགས་པ་ལྟར་ན་སྔགས་སྡོམ་ལ་ལྟོས་པའི་རྩ་ལྟུང་བྱུང་བའི་བྱང་སེམས་ཀྱི་སྡོམ་པས་སྐྱོབ་མི་ནུས་པ་ལྟར་སྔགས་སྡོམ་མ་བླངས་པའི་བྱང་སེམས་ཀྱི་སྡོམ་པས་ཀྱང་སྐྱོབ་མི་ནུས་པར་ཐལ།  ཉི་མ་
ནུབ་ན་ཟླ་སྐར་གནས་ཀྱང་མུན་པའི་བག་ཡིན་པ་ལྟར་ཉི་མ་མ་ཤར་ན་ཟླ་སྐར་གནས་ཀྱང་མུན་པའི་བག་ཡིན་པའི་ཕྱིར།  ཁྱབ་པ་ཁས་བླངས་སོ། །འདོད་ན་བྱང་སེམས་སྡོམ་པའི་ཕན་ཡོན་ནི། །གནས་སྐབས་བདེ་མང་མཐར་ཐུག་ནི། །རིང་མོ་ཞིག་ནས་རྫོགས་སངས་
9-3-65b


རྒྱས། །ཞེས་བཤད་པ་དང་དངོས་སུ་འགལ་ལོ། །གསེར་འགྱུར་གྱི་རྩིའི་དཔེས་གསུངས་པའི་དོན་གོང་མས་འོག་མ་ཟིལ་གྱིས་གནོན་པར་འདོད་པ་ཡང་མི་འཐད་དེ།  གསེར་འགྱུར་རྩི་ཡི་དངོས་པོ་ཡིས། །ཀུན་ཀྱང་གསེར་དུ་འགྱུར་བ་ལྟར། །ཞེས་པས་སྡོམ་པ་
འོག་མ་གོང་མར་འགྱུར་བ་ལ་བཤད་དགོས་པའི་ཕྱིར་རོ། །གཞན་ལུགས་ཀྱི་གསུམ་ལྡན་དགག་པ་ལའང་བརྗོད་པར་བྱ་སྟེ།  སློབ་དཔོན་གཉིས་ཀྱིས་སྡོམ་པ་འོག་མ་གཉིས་ཁྱབ་བྱ་ཁྱབ་བྱེད་དུ་གསུངས་པ་དེ་ཁྱེད་རང་གིས་ཀྱང་ཁས་ལེན་ནམ་མི་ལེན།  མི་ལེན་
ན་ཁྱབ་བྱ་ཁྱབ་བྱེད་ཡིན་པའི་རྟགས་ཀྱིས་གཞན་གྱིས་རྟེན་དང་བརྟེན་པར་འདོད་པ་དགག་མི་ནུས་ཏེ།  གཏན་ཚིགས་རྒོལ་ཕྱིར་རྒོལ་གང་གིས་ཀྱང་ཁས་མ་བླངས་པའི་ཕྱིར་རོ། །གལ་ཏེ་ཁས་ལེན་ན་སྡོམ་པ་གཉིས་པོ་རྫས་གཅིག་ཏུ་ཐལ།  ཁྱབ་བྱ་ཁྱབ་བྱེད་
ཡིན་པའི་ཕྱིར།  འཁོར་གསུམ་ཁས་བླངས་སོ། །རིག་འཛིན་ཀྱི་སྡོམ་པ་ཁོ་ན་ལ་གསུམ་ལྡན་སྦྱོར་ན་འོག་མ་གཉིས་ཆོ་ག་ལ་མི་ལྟོས་པར་སྐྱེ་བར་འགྱུར་རོ། །ཞེས་པ་ཡང་གྱི་ན་སྟེ།  འོ་ན་ཐེག་པ་གསུམ་གྱི་རྟོགས་རིགས་འོག་མ་གཉིས་སྒོམ་མི་དགོས་པར་སྐྱེ་
བར་ཐལ།  ཐེག་ཆེན་གྱི་མཐོང་ལམ་གཅིག་པུ་ལ་རྟོགས་རིགས་གསུམ་ཚང་བའི་ཕྱིར།  གལ་ཏེ་ཐེག་ཆེན་གྱི་སྦྱོར་ལམ་བསྒོམས་པས་རྟོགས་རིགས་གསུམ་ཀ་སྐྱེའོ་སྙམ་ན་དེ་མི་འཐད་པར་ཐལ།  རྟོགས་རིགས་གསུམ་ཐུན་མོང་དུ་སྒོམ་པའི་ཐབས་སངས་རྒྱས་ཀྱིས་མ་
གསུངས་པའི་ཕྱིར་རོ། །གསུམ་ཆར་ཁས་བླངས་སོ། །སྔགས་སྡོམ་གཅིག་པུ་ལ་གསུམ་ལྡན་བསྔགས་པ་འབྲས་བུའི་སྒོ་ནས་ཡིན་ཀྱང་།  འབྲས་བུ་ལ་མཆོག་དམན་ཡོད་མི་དགོས་ཏེ།  འབྲས་བུ་མཐའ་དག་ཉེ་རིང་གི་སྒོ་ནས་བསྔགས་པ་ཡང་འབྲས་བུའི་སྒོ་ནས་
9-3-66a


བསྔགས་པར་འདུས་པའི་ཕྱིར།  གཞན་དུ་ན་འབྲས་ཡུམ་ལ་ཉེ་རིང་གི་སྒོ་ནས་བསྔགས་པ་ཡང་འབྲས་བུའི་སྒོ་ནས་སྔགས་པ་མ་ཡིན་པར་འགྱུར་བའི་སྐྱོན་གནས་སོ། །དེས་ན་འོད་ཕྲེང་འདི་ནས་བཤད་པའི་སྡོམ་གསུམ་གྱི་རྣམ་
བཞག་ཕལ་ཆེ་བ་ནི་ལུང་དང་།  རིགས་པ་དང་།  ཉམས་ལེན་གྱི་ཚུལ་གང་དང་ཡང་མི་མཐུན་ཅིང་།  ཁྱད་པར་རྗེ་བཙུན་ས་སྐྱ་པའི་ལུགས་དང་རྣམ་པ་ཐམས་ཅད་དུ་མི་མཐུན་པས་ན་ས་སྐྱ་པའི་ལུགས་ཀྱི་སྡོམ་གསུམ་གྱི་རྣམ་བཞག་འཆད་པར་རློམ་ཞིང་འདི་
ནས་བཤད་པའི་ཉི་ཟླ་སྐར་གསུམ་གྱི་དཔེ་རང་ལུགས་སུ་བྱེད་པ་དེ་དག་ནི་ཤིན་ཏུ་འཇམ་པའི་དར་ཟབ་ཀྱི་རེག་བྱ་སྤངས་ནས་དགྲ་བོའི་ལག་གི་མཚོན་ཆ་བླངས་ཏེ་རང་གི་ལུས་འདྲལ་བ་ལ་རེག་བྱ་འཇམ་པོ་འབྱུང་བར་འདོད་པ་དང་མཚུངས་སོ། །གཉིས་པ་རྒྱན་གྱི་དཔེས་དུས་
མཉམ་རྫས་ཐ་དད་དུ་འདོད་པ་དགག་པ་ལ་གཉིས་ལས།  དང་པོ་འདོད་པ་བརྗོད་པ་ནི་སློབ་དཔོན་ཨ་བྷ་ཡ་ཀ་རས་དགོངས་རྒྱན་ལས།  འོ་ན་གང་ཟག་ལ་ལ་གཅིག་དགེ་བསྙེན་གྱི་སྡོམ་པ་གསུམ་དང་།  དགེ་ཚུལ་དང་།  དགེ་སློང་དང་།  བྱང་ཆུབ་སེམས་དཔའ་དང་། 
རྡོ་རྗེ་སེམས་དཔའི་སྡོམ་པ་རིམ་པ་བཞིན་དུ་བླངས་པ་ན་མེ་དང་བྲལ་ན་གྲང་བ་ལྟར་སྡོམ་པ་ཕྱི་མ་སྐྱེ་དུས་སྔ་མ་འཇིག་གམ།  ཡང་ན་སོ་ཐར་གྱི་སྤོང་བ་འཕེལ་བ་དང་ལྡན་པ་ལྟར་སྔ་ཕྱི་ལྷན་ཅིག་གམ།  ཡང་ན་ཉིན་གཅིག་ལ་སྣ་ཚོགས་པའི་རྒྱན་བཞིན་དུ་སོ་སོར་གནས་པར་
བརྗོད་ཅེ་ན་སྡོམ་པ་ཉམས་པའི་རྒྱུ་མ་ཡིན་པའི་ཕྱིར་དང་།  འགལ་བ་མེད་པའི་ཕྱིར་བསགས་པ་ཁོ་ན་ལ་འདི་རྣམས་ཀྱི་ཐ་སྙད་འཇོག་པས་སྔ་མ་གཉིས་མིན་གྱི་སྡོམ་པ་གོང་མ་ཐམས་ཅད་བླངས་ནས་སྐྱེས་ཏེ་སོ་སོར་གནས་པ་ཁོ་ནའོ་ཞེས་གསུངས་སོ། །དེའི་དོན་ཡང་
9-3-66b


གཞན་ནི་གོ་སླ་ལ་དགེ་བསྙེན་གྱི་སྡོམ་པ་གསུམ་ནི་སྣ་གཅིག་སྤྱོད་པ།  སྣ་འགའ་སྤྱོད་པ།  ཕར་ཆེར་སྤྱོད་པ་གསུམ་ཡིན་ལ།  འདོད་པ་དང་པོ་སྡོམ་པ་ཕྱི་མ་སྐྱེས་དུས་སྔ་མ་འཇིག་པ་མ་ཡིན་ཏེ།  ཕྱི་མ་སྔ་མ་འཇིག་པའི་རྒྱུ་མ་ཡིན་པའི་ཕྱིར་རོ། །དྲི་བ་གཉིས་
པ་སྔ་ཕྱི་ལྷན་ཅིག་ཏུ་གནས་པ་ཡང་མ་ཡིན་ཏེ་རྡུལ་ཕྲན་བསགས་པའི་གཟུགས་ཅན་ཁོ་ན་ལ་སྡོམ་པ་གསུམ་གྱི་ཐ་སྙད་འཇོག་པ་ཡིན་ཅིང་།  གཟུགས་རྫས་གཞན་པ་གཉིས་གང་ཟག་གཅིག་གི་རྒྱུད་ལ་གནས་པ་ལ་འགལ་བ་མེད་པའི་ཕྱིར་རོ། །དེས་ན་འདིའི་ལུགས་
ནི་མཛོད་ལས།  ཐ་དད་དེ་དག་འགལ་བ་མེད། །ཅེས་པ་ཤེས་བྱེད་དུ་མཛད་ནས་སྡོམ་པ་གཟུགས་ཅན་རྫས་ཐ་དད་པ་སྐྱེས་བུའི་རྒྱན་སྣ་ཚོགས་པ་བཞིན་དུ་གནས་པར་མཛད་དོ། །གཉིས་པ་དེ་དགག་པ་ནི་སྤྱིར་སྡོམ་པ་གཟུགས་ཅན་དུ་འདོད་པའི་ཚུལ་ནི་བཀག་ཟིན་
ཅིང་ཁྱད་པར་བྱང་སེམས་ཀྱི་སྡོམ་པ་གཟུགས་ཅན་དུ་འདོད་པ་ནི་ཤིན་ཏུ་མི་འཐད་དེ།  སྤྱོད་འཇུག་ལས།  སྤོང་བའི་སེམས་ནི་ཐོབ་པ་ལས། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་སྤོང་སེམས་ལ་བཤད་པའི་ཕྱིར་དང་། བྱང་ཆུབ་སེམས་དཔའི་ཚུལ་
ཁྲིམས་རྣམ་པ་གསུམ་པོ་གཟུགས་ཅན་དུ་འདོད་ན་འཇུག་པ་སེམས་བསྐྱེད་གཟུགས་ཅན་དུ་འདོད་དགོས་ཤིང་།  འདོད་ན་སྨོན་སེམས་ཀྱང་གཟུགས་ཅན་དུ་ཐལ་བ་སོགས་ཧ་ཅང་ཐལ་ཞིང་།  སྔགས་སྡོམ་གཟུགས་ཅན་དུ་འདོད་པ་ཡང་མི་འཐད་དེ།  སྔགས་སྡོམ་གྱི་
ངོ་བོ་ནི་ཐ་མལ་གྱི་ལུས་ངག་ཡིད་གསུམ་ལ་རྡོ་རྗེ་འཆང་གི་སྐུ་གསུང་ཐུགས་ཀྱི་ས་བོན་བཏབ་ནས་རྒྱུ་འབྲས་ལྷུན་འགྲུབ་ཏུ་ལོངས་སྤྱོད་པའི་ཐབས་ཁྱད་པར་ཅན་ཡིན་ལ་དེ་ལ་ནི་རྡུལ་ཕྲན་བསགས་པའི་གཟུགས་ཀྱི་དགོས་པ་མེད་པའི་ཕྱིར་རོ། །ཉན་ཐོས་ཀྱི་སོ་ཐར་དང་ལྡན་པའི་
9-3-67a


གང་ཟག་གིས་སྡོམ་པ་གོང་མ་གཉིས་རིམ་ཅན་དུ་བླངས་པའི་ཚེ་གསུམ་ཀ་ཡང་སྐྱེས་བུའི་རྒྱན་བཞིན་དུ་རྫས་སོ་སོར་གནས་པར་འདོད་པ་ཡང་མི་འཐད་དེ།  དེའི་ཚེ་ཉན་ཐོས་ཀྱི་སོ་ཐར་དེ་ཐེག་ཆེན་གྱི་སོ་ཐར་དུ་འགྱུར་ན་བྱང་སེམས་ཀྱི་
སྡོམ་པར་འགྱུར་བ་ཡང་བཟློག་ཏུ་མེད་ཅིང་གལ་ཏེ་མི་འགྱུར་ན་གང་ཟག་དེའི་རྒྱུད་ལ་བྱང་སེམས་ཀྱི་སྡོམ་པ་དང་ཉན་ཐོས་ཀྱི་སོ་ཐར་གཉིས་ཀ་ཡོད་པར་འགྱུར་ཏེ་ཉན་ཐོས་ཀྱི་སོ་ཐར་གཏོང་བྱེད་ཀྱི་རྒྱུ་མ་བྱུང་ཞིང་ཐེག་ཆེན་གྱི་སོ་ཐར་དུ་གནས་འགྱུར་བ་ཡང་མེད་པའི་ཕྱིར་རོ། །
འདོད་ན་མི་འཐད་དེ།  ཉེ་བར་འཁོར་གྱིས་ཞུས་པའི་མདོ་ལས།  ཉེ་བར་འཁོར་ཉན་ཐོས་ཀྱི་ཐེག་པ་བ་རྣམས་ཀྱི་སྦྱོར་བ་ཡང་གཞན་ལྷག་པའི་བསམ་པ་ཡང་གཞན་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ཀྱི་སྦྱོར་བ་ཡང་གཞན་ལྷག་པའི་བསམ་པ་ཡང་གཞན་ཡིན་ནོ། །
ཉེ་བར་འཁོར་དེ་ལ་ཉན་ཐོས་ཀྱི་ཐེག་པ་བའི་ཚུལ་ཁྲིམས་ཡོངས་སུ་དག་པ་གང་ཡིན་པ་དེ་ནི་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་མ་དག་པ་ཡིན་ལ་བྱང་ཆུབ་སེམས་དཔའི་ཚུལ་ཁྲིམས་ཡོངས་སུ་དག་པ་དེ་ནི་ཉན་ཐོས་ཀྱི་ཚུལ་ཁྲིམས་ཡོངས་སུ་མ་དག་པ་ཉིད་ཡིན་ནོ། །
དེ་ཅིའི་ཕྱིར་ཞེ་ན།  ཉན་ཐོས་ཀྱི་ཐེག་པ་པ་ནི་སྐད་ཅིག་ཙམ་སྲིད་པར་སྐྱེ་བ་ལེན་པར་སྤྲོ་ནའང་ཉེས་པ་ཡིན་ལ་བྱང་ཆུབ་སེམས་དཔའ་ནི་སེམས་ཅན་གྱི་དོན་ལ་བསྐལ་པ་དཔག་ཏུ་མེད་པར་འཁོར་བར་གནས་པ་ལ་མི་སྐྱོ་བ་ཡིན་ནོ་ཞེས་གསུངས་པའི་ཕྱིར་རོ། །གསུམ་པ་ཆུ་གཞོང་དུ་ནོར་
བུ་བཞག་པའི་དཔེས་རྟེན་དང་བརྟེན་པ་རྫས་གཞན་དུ་འདོད་པ་དགག་པ་ནི།  བོད་ཀྱི་སྡོམ་པ་གསུམ་གྱི་རྣམ་བཞག་བྱེད་པ་ལྕང་ར་ཁ་ཅིག་ན་རེ།  དང་པོར་སོ་ཐར་རིས་བདུན།  དེ་ནས་བྱང་སེམས་ཀྱི་སྡོམ་པ།  དེ་ནས་སྔགས་སྡོམ་ཐོབ་པའི་ཚེ་སྔ་ཕྱི་རྟེན་དང་བརྟེན་པའི་ཚུལ་དུ་རྫས་
9-3-67b


གཞན་དུ་གནས་པ་ཡིན་པ་ལ་གོང་མ་གོང་མའི་རྟེན་དུ་འོག་མ་འོག་མ་སྔོན་དུ་སོང་བ་ངེས་པར་དགོས་ཏེ།  དཔེར་ན་གཞོང་པའི་ནང་དུ་ཆུ་བླུགས་ནས་དེའི་ནང་དུ་ནོར་བུ་བཞག་པ་བཞིན་ནོ་ཞེས་ཟེར་རོ། །དེ་དག་ནི་མི་འཐད་དེ།  བྱང་སེམས་ཀྱི་སྡོམ་པའི་རྟེན་དུ་སོ་ཐར་དགོས་པ་
དེ་ཉན་ཐོས་ཀྱི་སོ་ཐར་ལ་བྱེད་དམ།  ཐེག་ཆེན་གྱི་སོ་ཐར་ལ་བྱེད།  དང་པོ་ལྟར་ན་ཉན་ཐོས་ཀྱི་སོ་ཐར་ནི་བྱང་སེམས་ཀྱི་སྡོམ་པ་སྐྱེ་བ་དང་གནས་པ་གཉིས་ཀའི་རྟེན་དུ་མི་རུང་སྟེ།  ཉན་ཐོས་ཀྱི་སོ་ཐར་གཏན་མི་སྐྱེ་པའི་རྟེན་ལ་ཡང་དབུ་མ་ལུགས་ཀྱི་བྱང་སེམས་ཀྱི་སྡོམ་པ་སྐྱེ་
བར་གོང་དུ་བཤད་ཟིན་ཅིང་ཉན་ཐོས་ཀྱི་སོ་ཐར་ནི་ཤི་འཕོས་པའི་ཚེ་གཏོང་ལ་བྱང་སེམས་ཀྱི་སྡོམ་པ་ནི་ཤི་འཕོས་ནས་ཀྱང་མི་གཏོང་པའི་ཕྱིར་རོ། །གཉིས་པ་ལྟར་ན་རྟེན་དང་བརྟེན་པ་རྫས་གཞན་དུ་འདོད་པ་མི་འཐད་དེ། ཐེག་ཆེན་སོ་ཐར་ནི་རྫོགས་པའི་བྱང་ཆུབ་ལ་དམིགས་ཏེ་
གཞན་ལ་གནོད་པ་སྤོང་བ་ཡིན་ལ་བྱང་སེམས་ཀྱི་སྡོམ་པ་ནི་རྫོགས་པའི་བྱང་ཆུབ་ལ་དམིགས་ཏེ་ཕན་པ་སྒྲུབ་པ་ཡིན་ཅིང་།  གཞན་ལ་ཕན་པ་སྒྲུབ་པ་དང་གཞན་ལ་གནོད་པ་སྤོང་བ་གཉིས་ངོ་བོ་གཅིག་ཏུ་སྐྱེ་བའི་ཕྱིར་རོ། །གཞན་ཡང་ཁྱེད་ལྟར་ན་གཞོང་པ་དེ་ཆུ་མེད་པའི་
ནོར་བུ་དང་།  ཆུ་དང་བཅས་པའི་ནོར་བུ་གཉིས་ཀའི་རྟེན་ཡིན་པ་ལྟར་སོ་ཐར་རིས་བདུན་པོ་དེ་ཡང་བྱང་སེམས་ཀྱི་སྡོམ་པ་མེད་པའི་སྔགས་སྡོམ་དང་།  བྱང་སེམས་ཀྱི་སྡོམ་པ་དང་བཅས་པའི་སྔགས་སྡོམ་གཉིས་ཀའི་རྟེན་དུ་རུང་བར་ཁས་ལེན་དགོས་ལ་དེ་འདོད་ན་སྔགས་སྡོམ་དང་
བྱང་སེམས་ཀྱི་སྡོམ་པ་རྣམ་པ་ཀུན་ཏུ་རྟེན་དང་བརྟེན་པར་འདོད་པ་འགལ་ལོ། །གཞན་ཡང་དགེ་སློང་རྡོ་རྗེ་འཛིན་པས་སེམས་ཅན་གྱི་དོན་དུ་འགྱུར་བ་མཐོང་ནས་དགེ་སློང་གི་བསླབ་པ་ཕུལ་བའི་ཚེ་སྡོམ་པ་གོང་མ་གཉིས་པོ་གཏོང་བར་འགྱུར་ཏེ།  སྡོམ་པ་གོང་མ་གཉིས་ཀྱི་རྟེན་
9-3-68a


གཏོང་བའི་ཕྱིར་རོ། །རྟགས་ཁས་ཁྱབ་པ་ཡོད་དེ།  རྟེན་གཞོང་པ་མེད་ན་བརྟེན་པ་གཞོང་པའི་ཆུ་མེད་དགོས་པའི་ཕྱིར་རོ། །ཁྱབ་པ་ཁས་བླངས་སོ། །ཡང་བྱང་སེམས་ཀྱི་སྡོམ་པ་དང་གསང་སྔགས་ཀྱི་སྡོམ་པ་རྫས་གཞན་དུ། 
འདོད་པ་ནི་ཐེག་ཆེན་གྱི་སྡེ་སྣོད་ཀྱི་ཉམས་ལེན་གྱི་གནད་ངོས་མ་ཟིན་པ་ཡིན་ཏེ།  སྔགས་སྡོམ་རྒྱུད་ལྡན་གྱི་གང་ཟག་གིས་འཇུག་པ་སེམས་བསྐྱེད་ཀྱི་བསླབ་བྱ་ཚུལ་ཁྲིམས་རྣམ་པ་གསུམ་གྱི་ནང་དུ་མ་འདུས་པའི་ཐེག་ཆེན་གྱི་ཉམས་ལེན་གཞན་ཡོད་ན་ཉམས་ལེན་དེ་དགེ་
བའི་ཆོས་མ་ཡིན་པར་ཐལ་བའི་ཕྱིར་རོ། །དེས་ན་ཆུ་གཞོང་དུ་ནོར་བུ་བཞག་པ་ལྟར།  སྔགས་སྡོམ་གྱི་ཉམས་ལེན་རང་རྒྱུད་ཀྱི་སྡོམ་པ་གཞན་གཉིས་ལ་ཡང་མ་ཁྱབ་པར་ཟུར་དུ་ཅུང་ཟད་ཙམ་ཡོད་པར་འདོད་པ་དེ་ནི་བསྐྱེད་རིམ་གྱི་དུས་སུ་སྣང་བའི་དངོས་པོ་ཐམས་ཅད་ལྷ་དང་། 
རྫོགས་རིམ་གྱི་དུས་སུ་སྣང་བ་ཐམས་ཅད་བདེ་ཆེན་དུ་ཤར་བ་དགོས་སོ་ཞེས་སྨྲ་བ་ནི་འུད་གོག་འབའ་ཞིག་ཏུ་སྣང་སྟེ།  རྒྱལ་སྲས་སེམས་དཔའ་ཆེན་པོས།  འགྲོ་ལ་ཉེ་རིང་ཆགས་སྡང་མ་སྤངས་ཀྱང་། །སྲིད་ཞི་མཉམ་པར་སྨྲ་བའི་འུད་གོག་ཅན། །ཞེས་གསུངས་པ་
དང་ཆོས་མཚུངས་སམ་སྙམ་མོ། །བཞི་པ་གཞན་ལུགས་ལ་རང་ལུགས་སུ་འཁྲུལ་ནས་གནས་འགྱུར་རྫས་གཞན་དུ་འདོད་པ་དགག་པ་ལ་གཉིས་ཏེ་འདོད་པ་བརྗོད་པ་དང་།  དེ་དགག་པའོ། །དང་པོ་ནི་སྡོམ་གསུམ་རབ་དབྱེའི་འགྲེལ་བྱེད་ཁ་དགའ་ཅིག་ན་རེ།  ད་ནི་འདི་དཔྱད་
པར་བྱ་སྟེ།  ཁ་ཅིག་སྡོམ་པ་གསུམ་པོ་རྗེ་བཙུན་ཆེན་པོས་རྩ་ལྟུང་འཁྲུལ་སྤོང་དུ་ངོ་བོ་གཅིག་ཏུ་གསུངས་པ།  པཎྜི་ཏ་བི་བྷུ་ཏ་ཙནྟྲས་སྡོམ་གསུམ་འོད་ཀྱི་ཕྲེང་བར་ཉི་ཟླ་སྐར་གསུམ་གྱི་དཔེས་ངོ་བོ་གཅིག་པ་བཀག་ནས་རྫས་ཐ་དད་དུ་བཤད་ཟེར་རོ། །དེ་ནི་རི་བོང་གི་ཅལ་ལྟར་
9-3-68b


ཡིན་ཏེ། རྗེ་བཙུན་ཆེན་པོས་དགེ་སློང་རྡོ་རྗེ་འཛིན་པ་ལྟ་བུའི་སྡོམ་གསུམ་གནས་འགྱུར་བའི་ཚེ་སྒྲ་ཟིན་ལ་ངོ་བོ་གཅིག་ཅེས་གསུངས་ལ།  དེ་ཡང་དེའི་ཚེ་སྡོམ་གསུམ་རྒྱུན་རྫས་གཅིག་པ་ལ་དགོངས་པ་ཡིན་ཏེ་སྡོམ་པའི་སྐད་ཅིག་སྔ་ཕྱི་རྫས་གཅིག་པར་ནི་མི་བཞེད་དེ།
མདོ་རྒྱུད་བསྟན་བཅོས་ཚད་ལྡན་དང་མི་མཐུན་པའི་ཕྱིར་རོ། །དེ་ལ་ཁ་ཅིག་སྡོམ་གསུམ་རྫས་གཅིག་ཡིན་ཏེ་ཐ་དད་ཡིན་ན་རྒྱུད་གཅིག་ལ་སྤོང་སེམས་དུ་མ་ཅིག་ཆར་དུ་བསྐྱེད་དགོས་པའི་ཕྱིར་རོ། །དེ་ལྟར་ན་རྣམ་འགྲེལ་ལས།  རྟོག་གཉིས་གཅིག་ཆར་འཇུག་པ་མེད་
ཅེས་བཤད་པ་དང་འགལ་ལོ་ཞེ་ན།  དེ་ཡང་མི་འཐད་དེ།  གཞུང་དེའི་དགོངས་པ་ནི་གཙོ་བོ་ཡིད་ཀྱི་རྣམ་པར་ཤེས་པ་ལྟ་བུའི་སེམས་རིས་མཐུན་སྐད་ཅིག་སྔ་ཕྱི་ཅིག་ཆར་མི་སྐྱེ་བར་བཤད་པའི་ཕྱིར་རོ། །དེས་ན་སྡོམ་གསུམ་རྫས་ཐ་དད་པ་ལ་སྐྱོན་དེ་མི་འཇུག །སྡོམ་
གསུམ་རྫས་གཅིག་ན་སྐྱོན་དེ་འཇུག་སྟེ།  ད་ལྟའི་དགེ་སློང་རྡོ་རྗེ་འཛིན་པ་སྡོམ་པ་གསུམ་ལྡན་དེས་ཐེག་ཆེན་སོ་ཐར་ལ་སོགས་པའི་སྡོམ་པ་གསུམ་རང་རང་གི་མི་མཐུན་ཕྱོགས་སྤོང་སེམས་ཀྱིས་ཟིན་པའི་ཆོ་གས་ཐོབ་པའི་ཕྱིར།  གཞན་ཡང་དགེ་སློང་ཕ་མ་ལྟ་བུ་
མཚན་ཡོངས་སུ་གྱུར་པའི་ཚེ་སྡོམ་པ་དེ་གཉིས་རྫས་ཀྱི་རྒྱུན་གཅིག་པས་དགེ་སློང་ཕ་མའི་སྡོམ་པ་ནི་རྫས་གཅིག་ཅེས་མི་བྱ་སྟེ།  མཛོད་ལས།  ཐ་དད་དེ་དག་འགལ་བ་མེད། །ཅེས་བཤད།  རང་འགྲེལ་ལས་ཀྱང་།  སྡོམ་པ་དེ་དག་ལྔ་དང་བཅུ་དང་ཉི་ཤུ་
ཞེས་བྱ་བ་ལྟ་བུ་དང་།  དོང་ཙེ་གཅིག་དང་གཉིས་ཞེས་བྱ་བ་བཞིན་དུ་གཞན་དང་གཞན་ཞེས་བྱ་བའམ།  འོན་ཏེ་དེ་དག་ཐམས་ཅད་ཐ་དད་པ་ཉིད་གཅིག་ཏུ་སྐྱེ་ཞེ་ན།  སྨྲས་པ་ཐ་དད་དེ་དག་ནི་མ་འདྲེས་པ་ཉིད་དེ།  སྡོམ་པ་གསུམ་དག་ལ་སྲོག་གཅོད་སྤོང་བ་གསུམ་ནས་མྱོས་པར་
9-3-69a


འགྱུར་བའི་ལྟུང་བ་སྤོང་བ་གསུམ་གྱི་བར་མཚན་ཉིད་ཐ་དད་པར་སྐྱེ་སྟེ་ལྷག་མ་རྣམས་ཀྱང་དེ་དང་འདྲའོ། །དེ་དག་ལ་ཁྱད་པར་ཅི་ཡོད་ཅེ་ན་གཞིའི་ཁྱད་པར་ལས་ཁྱད་པར་ཡོད་དོ། །ཞེས་གསུངས་སོ། །དེས་ན་སྡོམ་པ་གསུམ་
རྫས་ཐ་དད་ཀྱང་དགེ་སློང་རྡོ་རྗེ་འཛིན་པ་ལ་སྡོམ་པ་གསུམ་ལྡན་པའི་ཚུལ་ནི་རྐྱེན་དབང་གིས་གཅིག་མངོན་གྱུར་དུ་ལྡན་པའི་ཚེ་གཅིག་ཤོས་གཉིས་དབང་ལྡན་གྱི་ཚུལ་གྱིས་ལྡན་ཏེ། ཐོབ་བྱེད་ཀྱི་རྒྱུས་ཐོབ་ལ་གཏོང་བྱེད་ཀྱི་རྒྱུས་ཉམས་པར་མ་བྱས་པའི་ཕྱིར་རོ།། གནས་
འགྱུར་བརྩི་བའི་ཚེ་ན་ཡང་སྡོམ་པ་གསུམ་ངོ་བོ་གཅིག་ཅེས་སྒྲ་ཇི་བཞིན་དུ་ཁས་མི་ལེན་ནོ། །དེས་ན་རྡོ་རྗེ་རྩེ་མོ་ལས།  སོ་སོར་ཐར་དང་བྱང་ཆུབ་སེམས། །རིག་འཛིན་སྔགས་ཀྱི་སྡོམ་པའོ། །ཞེས་དང་།  རྒྱུད་འབུམ་པ་ལས།  རྡོ་ཡི་རིགས་ཀྱི་བྱེ་བྲག་གིས། །ཞེས་
སོགས་གསུངས་པའི་དོན་རྗེ་བཙུན་ཡབ་སྲས་ཀྱི་དགོངས་པ་ཡང་ཁོ་བོས་བཤད་པ་འདི་ཁོ་ན་ལྟར་ཡིན་ལ།  གཞན་གྱིས་ཐོས་ཐོས་བོན་དུ་གྱེར་བར་མི་བྱའོ། །ཞེས་ཟེར་རོ། །གཉིས་པ་ནི་འཁྲུལ་སྤོང་ལས་ངོ་བོ་གཅིག་ཏུ་གསུངས་པ་འོད་ཕྲེང་མཁན་པོས་བཀག་པ་མ་ཡིན་ནོ། །
ཞེས་སྨྲ་བ་ནི་ཕྱོགས་སྔ་ཕྱི་གཉིས་ཀ་ལ་ཞིབ་ཏུ་མ་དཔྱད་པ་སྟེ།  འོད་ཕྲེང་ལས་རྒྱུད་འབུམ་པའི་ལུང་དྲངས་པའི་དེ་མ་ཐག་ཏུ་གསུངས་པའི་དོན་ལ་ཁ་ཅིག་ནི་གནས་འགྱུར་ངོ་བོ་གཅིག་ཟེར་ཏེ།  ཞེས་གནས་འགྱུར་ངོ་བོ་གཅིག་པ་ཕྱོགས་སྔར་བྱས་ནས་དགག་པ་རྒྱས་པར་བཤད་
ཅིང་རྒྱུད་འབུམ་པའི་ལུང་གི་དོན་ལ།  གནས་འགྱུར་ངོ་བོ་གཅིག་ཏུ་འདོད་པ་འཁྲུལ་སྤོང་མཁན་པོ་ལས་འདོད་པ་གཞན་འདི་ཡིན་ཞེས་བསྟན་རྒྱུ་མི་འདུག་པའི་ཕྱིར་དང་།  འཁྲུལ་སྤོང་ལས་སྒྲས་ཟིན་ལ་ངོ་བོ་གཅིག་པར་བཤད་པ་ཁྱེད་རང་ཁས་ལེན་ཅིང་གནས་འགྱུར་ངོ་བོ་གཅིག་
9-3-69b


པ་འཁྲུལ་སྤོང་གི་དགོངས་པ་ཡིན་པ་ཡང་འོག་ཏུ་རྒྱས་པར་འཆད་པར་འགྱུར་བའི་ཕྱིར་རོ། །ཡང་རྗེ་བཙུན་གྱི་དགོངས་པ་དགེ་སློང་རྡོ་རྗེ་འཛིན་པ་ལྟ་བུའི་སྡོམ་གསུམ་གནས་འགྱུར་བར་འདོད་པ་ཡང་ཁྱོད་ཀྱི་ལུགས་ལ་ཤིན་ཏུ་འགལ་ཏེ་སོ་ཐར་གྱི་སྡོམ་པ་གཟུགས་ཅན་དང་། 
བྱང་སེམས་ཀྱི་སྡོམ་པ་ཤེས་པར་ཁས་བླངས་པས་བེམ་པོ་ཤེས་པར་གནས་འགྱུར་བར་འདོད་དགོས་ལ།  དེ་ནི་ཆོས་ཀྱི་གྲགས་པས།  རྣམ་ཤེས་མིན་པ་རྣམ་ཤེས་ཀྱི། །ཉེར་ལེན་མིན་པའི་ཕྱིར་ཡང་གྲུབ། །ཞེས་གསུངས་པས་བཀག་གོ།  སྡོམ་གསུམ་
གནས་འགྱུར་བའི་ཚེ་རྒྱུན་རྫས་གཅིག་ཅེས་པ་ཡང་དཔྱད་ན་མི་འཐད་དེ།  རྒྱུན་གྱི་གདགས་གཞི་རྣམས་རྫས་གཅིག་ན་སྐད་ཅིག་སྔ་ཕྱི་རྫས་གཅིག་པར་ཐལ་བ་བཟློག་ཏུ་མེད་ཅིང་དེ་ལས་གཞན་པའི་རྒྱུན་རྫས་གཅིག་པ་ནི་མི་འཐད།  རྒྱུན་རྫས་སུ་མ་གྲུབ་པའི་ཕྱིར་རོ། །རྫས་གཞན་
གྱི་རྒྱུན་གཅིག་པ་དང་།  རྒྱུན་རྫས་གཅིག་པ་གཉིས་ཀྱི་ཁྱད་པར་ཤིན་ཏུ་ཡང་ཆེ་བའི་ཕྱིར་རོ། །སྡོམ་པའི་སྐད་ཅིག་སྔ་ཕྱི་རྫས་གཅིག་པར་རྗེ་བཙུན་གྱི་དགོངས་པར་འདོད་པ་ལ་དགག་པ་བརྗོད་པ་ནི་དོན་མེད་པ་ཁོ་ན་སྟེ་དེ་ལྟར་སྨྲ་མཁན་སུ་ཡང་མེད་པའི་ཕྱིར་རོ། །རྟོག་གཉིས་
ཅིག་ཆར་འཇུག་པ་མེད་ཅེས་པའི་དོན་སེམས་རིགས་མཐུན་སྐད་ཅིག་སྔ་ཕྱི་ཅིག་ཆར་མི་སྐྱེ་བ་ལ་འདོད་པ་ནི་བཞད་གད་ཀྱི་གནས་སོ། །སྡོམ་གསུམ་རྫས་གཅིག་ན་སྤོང་སེམས་དུ་མ་ཅིག་ཆར་དུ་སྐྱེ་བར་འགྱུར་རོ་ཞེས་སྨྲ་བ་ཡང་རྫས་གཅིག་པའི་དོན་མ་རྟོགས་པ་ཁོ་ན་སྟེ་
སྤོང་སེམས་གསུམ་པོ་ཡང་ངོ་བོ་གཅིག་ལ་ལྡོག་པས་ཕྱེ་བ་ཡིན་གྱི་རྫས་ཐ་དད་དུ་མེད་པའི་ཕྱིར། གལ་ཏེ་བྱང་སེམས་ཀྱི་སྡོམ་པའི་མི་མཐུན་ཕྱོགས་རང་དོན་ཡིད་བྱེད་སྤོང་བའི་སེམས་པ་དང་།  སོ་ཐར་གྱི་སྡོམ་པའི་མི་མཐུན་ཕྱོགས་གཞན་གནོད་གཞི་བཅས་སྤོང་བའི་
9-3-70a


སེམས་པ་གཉིས་པོ་རྫས་གཅིག་པ་ཡིན་པས་ཤེས་པ་གཅིག་གི་འཁོར་དུ་སེམས་བྱུང་གཉིས་ཅིག་ཆར་འབྱུང་བ་མི་སྲིད་དོ་སྙམ་ན་མི་འཐད་དེ།  དེ་ལྟར་ན་སྲོག་གཅོད་སྤོང་བའི་སྤོང་སེམས་དང་།  མ་བྱིན་ལེན་སྤོང་བའི་སྤོང་སེམས་གཉིས་
པོ་ཡང་རྫས་ཐ་དད་དུ་འགྱུར་ལ།  དེ་ལྟར་ན་སོ་ཐར་གཅིག་པོ་ལ་ཡང་མི་མཐུན་ཕྱོགས་ཇི་སྙེད་ཡོད་པ་དེ་སྙེད་ཀྱི་སྤོང་སེམས་རྫས་ཐ་དད་པ་ཁས་ལེན་དགོས་པར་འགྱུར་ཞིང་།  མ་ཆགས་པ་དང་།  ཞེ་སྡང་མེད་པ་དང་།  གཏི་མུག་མེད་པའི་སེམས་བྱུང་གསུམ་པོ་ཡང་རྫས་ཐ་དད་
དུ་ཁས་ལེན་དགོས་པས་ཤེས་པ་གཅིག་གི་འཁོར་དུ་འབྱུང་མི་སྲིད་པ་སོགས་སྐྱོན་མཐའ་ཡས་པ་གནས་སོ། །མཛོད་ཀྱི་དགོངས་པ་ལ་དགེ་སློང་ཕ་མའི་སྡོམ་པ་གཉིས་རྫས་ཐ་དད་པའི་ཤེས་བྱེད་དུ་ཐ་དད་དེ་དག་འགལ་བ་མེད་ཅེས་པའི་རྩ་འགྲེལ་དྲངས་པ་ནི་རང་གི་དེ་ཉིད་
སྟོན་པར་ཟད་དེ།  ཚིག་གསུམ་རིམ་ཅན་དུ་བླངས་པའི་གང་ཟག་གི་རྒྱུད་ཀྱི་དགེ་བསྙེན་དང་།  དགེ་ཚུལ་དང་།  དགེ་སློང་གི་སྡོམ་པ་གསུམ་རྫས་ཐ་དད་པ་དེ་དགེ་སློང་ཕ་མའི་སྡོམ་པ་རྫས་ཐ་དད་པའི་ཤེས་བྱེད་དུ་དྲངས་འདུག་པའི་ཕྱིར་དང་།  རྫས་སུ་རྣམ་པ་བཞི་ཡིན་ནོ། །
ཞེས་པ་དང་དངོས་སུ་འགལ་བའི་ཕྱིར་རོ། །སྡོམ་གསུམ་ལྡན་པའི་ཚུལ་ལ་གཅིག་མངོན་གྱུར་དུ་ལྡན་པའི་ཚེ་ཅིག་ཤོས་གཉིས་དབང་ལྡན་གྱི་ཚུལ་དུ་ལྡན་གྱི་མངོན་གྱུར་དུ་མེད་པར་འདོད་པ་ལ་ནི་སྔར་འོད་ཕྲེང་མཁན་པོས་བག་ལ་ཉལ་བའི་ཚུལ་དུ་འདོད་པ་ལ་དགག་པ་བརྗོད་པའི་
རིགས་པ་རྣམས་ནི་འདིར་ཡང་འཇུག་པར་ཤེས་པར་བྱ་སྟེ།  དེ་ཡང་ཀུན་ལས་བཏུས་ལས་ས་བོན་དང་ལྡན་པ་དང་།  དབང་དང་ལྡན་པ་དང་།  མངོན་གྱུར་དུ་ལྡན་པ་གསུམ་ལས་བག་ལ་ཉལ་བའི་ཚུལ་དུ་འདོད་པ་ལ་ནི་ལྡན་ཚུལ་དང་པོ་ཡིན་ལ།  དབང་དང་ལྡན་པར་འདོད་པ་ནི་
9-3-70b


ལྡན་ཚུལ་གཉིས་པ་ཡིན་ཅིང་དེ་གཉིས་ཀས་ཀྱང་མངོན་གྱུར་དུ་མི་ལྡན་པར་འདོད་པ་མཚུངས་སོ། །ཁྱད་པར་དུ་འདིར་འོག་མ་མངོན་གྱུར་དུ་ལྡན་པའི་ཚེ་གོང་མ་མངོན་གྱུར་དུ་མི་ལྡན་པར་འདོད་པས་ཤིན་ཏུ་སྨད་པའི་གནས་ཏེ་དགེ་སློང་རྡོ་རྗེ་འཛིན་པས་བདེར་གཤེགས་བཀའ་འདས་
ཀྱི་རྩ་ལྟུང་སྤོང་པའི་ཚེ་འོག་མ་གཉིས་ཀྱི་རྩ་བའི་ལྟུང་བ་སྤོང་བའི་སྤོང་སེམས་མེད་པར་འགྱུར་བས་རྩ་ལྟུང་གཉིས་པ་སྤོང་པའི་ཐབས་ཀྱང་མི་རྙེད་པར་འགྱུར་རོ། །གཞན་ཡང་སྨོན་སེམས་ཉམས་པ་སྤོང་བའི་སྤོང་སེམས་དང་།  རྩ་ལྟུང་ལྔ་པ་སྤོང་བའི་སྤོང་སེམས་གཉིས་
དུས་མཉམ་དུ་ལྡན་མི་སྲིད་པར་ཐལ།  སྡོམ་པ་གོང་འོག་གི་སྤོང་སེམས་དུས་མཉམ་དུ་ལྡན་མི་སྲིད་པའི་ཕྱིར།  དེ་ལ་སོགས་པ་མཐའ་ཡས་སོ། །དེས་ན་རྡོ་རྗེ་རྩེ་མོ་དང་།  རྒྱུད་འབུམ་པའི་ལུང་གི་དོན་རྗེ་བཙུན་ཡབ་སྲས་ཀྱིས་བཤད་པའི་དགོངས་པ་སྡོམ་པ་གསུམ་རྫས་ཐ་དད་པ་ལ་འདོད་
པ་ནི་དངོས་སྟོབས་ཀྱི་རིགས་པ་ལ་བསྙོན་འདིངས་པ་ཡིན་པས་གཞན་གྱི་བརྒྱུད་པའི་མན་ངག་ཐོས་ཐོས་བོན་དུ་གྱེར་བའི་རྗེས་སུ་མ་འབྲངས་ན་ལེགས་སམ་སྙམ་མོ། །གཉིས་པ་རང་ལུགས་བཞག་པ་ལ་གཉིས་ཏེ།  བཤད་བྱ་རྡོ་རྗེའི་ཚིག་འགོད་པ་དང་།  དེའི་དོན་ཚུལ་བཞིན་དུ་
བཤད་པའོ། །དང་པོ་ནི།  རྗེ་བཙུན་འཁྲུལ་པའི་དྲི་མ་སྤངས་པ་རྡོ་རྗེ་འཛིན་པ་ཆེན་པོ་གྲགས་པ་རྒྱལ་མཚན་གྱི་ཞལ་སྔ་ནས་སྡོམ་པ་ཉི་ཤུ་པའི་འགྲེལ་པར་དེ་ལྟར་ན་རྡོ་རྗེ་རྩེ་མོ་ལས།  སྡོམ་པ་གསུམ་ལ་གནས་པ་ནི། །དང་པོ་ཁྲུས་སུ་བཤད་པ་ཡིན། །ཞེས་གང་
ཟག་གཅིག་གི་རྒྱུད་ལ་སོ་སོར་ཐར་པ་དང་།  བྱང་ཆུབ་སེམས་དཔའ་དང་།  རིག་པ་འཛིན་པའི་སྡོམ་པ་གསུམ་དང་ལྡན་པར་གསུངས་པ་འགལ་ལོ་ཞེ་ན་དེའི་དོན་འདི་ཡིན་ཏེ།  སྤྱིར་སོ་སོར་ཐར་པ་ཞེས་བྱ་བའི་རང་གི་ངོ་བོ་ནི་གཞན་ལ་གནོད་པ་གཞི་དང་བཅས་པ་ལས་
9-3-71a


ལྡོག་པ་ཡིན་ལ།  དེའི་སྟེང་དུ་ཕན་འདོགས་པ་འདོད་ཅིང་ཞུགས་པ་ནི་བྱང་ཆུབ་སེམས་དཔའི་སྡོམ་པ་ཡིན་ཅིང་།  དེའི་སྟེང་དུ་རིག་པ་འཛིན་པ་ནི་རིག་པ་འཛིན་པའི་སྡོམ་པ་ཡིན་ནོ། །དེ་ལ་སོ་སོར་ཐར་པ་ནི་གཉིས་ཏེ།  ཉན་
ཐོས་ཀྱི་སོ་སོར་ཐར་པ་དང་།  བྱང་སེམས་ཀྱི་སོ་སོར་ཐར་པ་ལས།  འདིར་བྱང་ཆུབ་སེམས་དཔའི་སོ་སོར་ཐར་པ་ནི་སྡོམ་པ་ཐོབ་པ་དང་གནས་པ་གཉིས་ཀའི་རྟེན་དུ་རུང་གི་སྔ་མ་ནི་དེ་ལྟར་མ་ཡིན་པས་རྡོ་རྗེ་རྩེ་མོའི་དགོངས་པ་ནི་བྱང་ཆུབ་སེམས་དཔའི་སོ་སོར་ཐར་པའོ། །
བྱང་ཆུབ་སེམས་དཔའི་སྡོམ་པ་དེ་བླང་བའི་ཆོ་ག་གཞན་ཤིག་ཡོད་དམ་སོ་སོར་ཐར་པའི་སྡོམ་པ་ཉིད་ཡིན་ཞེ་ན།  སྔར་སོ་སོར་ཐར་པའི་སྡོམ་པ་ཐོབ་ན་ཕྱིས་བྱང་ཆུབ་སེམས་དཔའི་སྡོམ་པ་ཐོབ་པའི་དུས་སྔར་གྱི་དེ་བྱང་ཆུབ་སེམས་དཔའི་སྡོམ་པར་གནས་འགྱུར་ལ་སྔར་མ་ཐོབ་ན་ནི་བྱང་
ཆུབ་སེམས་དཔའི་སྨོན་པའི་དུས་ཉིད་དུ་བྱང་ཆུབ་སེམས་དཔའི་སོ་སོར་ཐར་པའི་སྡོམ་པ་ཐོབ་པ་ཡིན་ནོ། །རྣམ་པར་སྤྲོས་པས་ཆོག་གོ་ཞེས་པ་དང་།  རྩ་ལྟུང་འཁྲུལ་སྤོང་ལས།  འདིར་ཁ་ཅིག་འདི་སྐད་དུ།  གསུམ་ལ་སྐྱབས་འགྲོ་ནས་བརྩམས་ཏེ། །ཞེས་བྱ་བ་
ཐུན་མོང་གི་སྐྱབས་འགྲོ་དང་།  སོ་སོར་ཐར་པ་ལ་འཆད་ཅིང་།  རྡོ་རྗེ་རྩེ་མོ་ལས་ཀྱང་།  སོ་སོར་ཐར་དང་བྱང་ཆུབ་སེམས། །རིག་འཛིན་རང་གི་ངོ་བོའོ། །ཞེས་གསུངས་པའི༷་གཉིས་ཀའང་སྐྱོན་དང་བཅས་པ་ཡིན་ཏེ།  རིག་པ་འཛིན་པ་དང་བྱང་ཆུབ་སེམས་དཔའི་སྡོམ་པ་
གཉིས་ནི་ནང་མི་འགལ་མོད།  སོ་སོར་ཐར་པའི་སྡོམ་པ་འདི་ནི་བྱང་ཆུབ་སེམས་དཔའི་སྡོམ་པ་ཐོབ་པའི་རྟེན་དུ་མི་རུང་སྟེ།  སོ་སོར་ཐར་པ་ནི་གླིང་གསུམ་གྱི་སྐྱེས་པ་དང་བུད་མེད་མ་ཡིན་པ་གཞན་ལ་མི་སྐྱེ་ལ་བྱང་ཆུབ་ཀྱི་སེམས་ནི་འགྲོ་བ་མཐའ་དག་ལ་སྐྱེ་བར་གསུངས་པའི་
9-3-71b


ཕྱིར་རོ། །ཡང་གནས་པའི་རྟེན་དུ་ཡང་མི་འཐད་དེ།  སོ་སོར་ཐར་པ་ནི་ཤི་ནས་གཏོང་ལ་བྱང་ཆུབ་སེམས་ནི་ཇི་སྲིད་སངས་མ་རྒྱས་ཀྱི་བར་དུ་མི་གཏོང་བའི་ཕྱིར་རོ་ཞེ་ན་ཉན་ཐོས་དང་ཐུན་མོང་བའི་སོ་སོར་ཐར་པ་འདི་ནི་ཐོབ་པ་དང་གནས་པའི་རྟེན་དུ་མི་རུང་བར་ཁྱེད་སྨྲ་བ་
བཞིན་དུ་ཁོ་བོ་ཅག་ཀྱང་སྨྲའོ། །འོ་ན་ཁྱེད་ཀྱི་སོ་སོར་ཐར་པ་སྔོན་དུ་མ་སོང་བའི་སྡོམ་པ་གསུམ་གང་ཡིན་ཞེ་ན།  འདིར་སོ་སོར་ཐར་པའི་རང་བཞིན་ནི་གཞན་ལ་གནོད་པ་བྱེད་པ་གཞི་དང་བཅས་པ་ལས་ལོག་པར་བྱེད་པ་ཡིན་ལ།  བྱང་ཆུབ་སེམས་དཔའི་སྡོམ་པ་ནི་
དེའི་སྟེང་དུ་གཞན་ལ་ཕན་འདོགས་པར་ཞུགས་པ་ཡིན་ཅིང་རིག་པ་འཛིན་པ་ནི་དེ་དག་ཀྱང་ལྷའི་རྣམ་པར་ཡེ་ཤེས་ཀྱིས་བྱིན་གྱིས་བརླབས་ནས་ལོངས་སྤྱོད་པས་ན་འདི་ལ་འགལ་བ་ཅི་ཡང་ཡོད་པ་མ་ཡིན་ནོ། །འོ་ན་སྔར་སོ་སོར་ཐར་པའི་སྡོམ་པ་དགེ་སློང་གི་བར་ཐོབ་པ་ཞིག་གིས་
ཕྱིས་བྱང་ཆུབ་ཏུ་སེམས་བསྐྱེད་ནས་སླར་ཡང་དབང་མནོས་པར་འགྱུར་ན་འདི་ལ་སྡོམ་པ་ཇི་ལྟར་ལྡན་ཞེ་ན།  དགེ་སློང་གིས་སེམས་བསྐྱེད་པའི་ཚེ་སོ་སོར་ཐར་པ་ཐམས་ཅད་བྱང་ཆུབ་སེམས་དཔའི་སྡོམ་པར་འགྱུར་ལ།  དཀྱིལ་འཁོར་དུ་ཞུགས་པའི་ཚེ་ན་སྡོམ་པ་ཐམས་
ཅད་ཀྱང་རིག་པ་འཛིན་པའི་སྡོམ་པ་ཞེས་བྱ་བ་ཡིན་ནོ། །དེ་སྐད་དུ་རྒྱུད་འབུམ་པའི་ལུང་དེ་ཁོ་ན་ཉིད་ཀྱི་ཡེ་ཤེས་གྲུབ་པ་ཞེས་བྱ་བ་ལས་བྱུང་བ།  རྡོ་ཡི་རིགས་ཀྱི་བྱེ་བྲག་གིས། །བཞུས་པས་ལྕགས་དང་ཟངས་དངུལ་འབྱུང་། །གསེར་འགྱུར་རྩི་ཡི་དངོས་པོ་ཡིས། །ཀུན་
ཀྱང་གསེར་དུ་བསྒྱུར་བར་བྱེད། །དེ་བཞིན་སེམས་ཀྱི་བྱེ་བྲག་གིས། །རིགས་ཅན་གསུམ་གྱི་སྡོམ་པ་ཡང་། །དཀྱིལ་འཁོར་ཆེན་པོ་འདིར་ཞུགས་ན། །རྡོ་རྗེ་འཛིན་པ་ཞེས་བྱའོ། །ཞེས་གསུངས་སོ། །དཔེ་དེའི་རྡོ་ནི་ཕལ་པ་ཡིན་ལ།  ལྕགས་ནི་ཉན་ཐོས་ཀྱི་
9-3-72a


བསླབ་པར་བྱ་བ།  ཟངས་ནི་རང་རྒྱལ་གྱི་བསླབ་པར་བྱ་བ།  དངུལ་ནི་བྱང་ཆུབ་སེམས་དཔའི་བསླབ་པར་བྱ་བ་ཡིན་ཅིང་གསེར་འགྱུར་རྩི་ནི་རྡོ་རྗེ་ཐེག་པའི་བསླབ་པར་བྱ་བ་ཡིན་པར་མངོན་ནོ། །ཞེས་གསུངས་སོ། །གཉིས་པ་
ལ་གཉིས་ཏེ།  རིམ་གྱིས་བླངས་པའི་ཚེ་གནས་འགྱུར་བའི་ཚུལ།  གསུམ་ཆར་ལྡན་པའི་ཚེ་ངོ་བོ་གཅིག་པའི་ཚུལ་ལོ། །དང་པོ་ནི་སྤྱིར་སྡོམ་པ་གསུམ་ལེན་པའི་རིམ་པ་ལ་དང་པོར་ཉན་ཐོས་ཀྱི་སོ་ཐར་རིས་བདུན་གང་ཡང་རུང་བ་བླང་།  དེ་ནས་བྱང་སེམས་ཀྱི་
སྡོམ་པ་དབུ་སེམས་ཀྱི་ཆོ་གས་བླང་།  དེ་ནས་སྔགས་སྡོམ་བླང་བའི་ཚུལ་དང་།  དང་པོར་ཐེག་ཆེན་གྱི་སོ་ཐར།  དེ་ནས་སྡོམ་པ་གོང་མ་གཉིས་རིམ་གྱིས་བླང་བའི་ཚུལ་དང་།  དང་པོར་ཉན་ཐོས་ཀྱི་སོ་ཐར་གང་ཡང་རུང་བ་བླང་།  དེ་ནས་སྡོམ་པ་བར་མ་མ་བླངས་
པར་སྔགས་སྡོམ་བླང་པའི་ཚུལ་གཉིས་དང་།  དང་པོར་སོ་ཐར་སྔོན་དུ་མ་སོང་བར་བྱང་སེམས་ཀྱི་སྡོམ་པ་བླངས་ནས་སྔགས་སྡོམ་བླང་བའི་ཚུལ་དང་།  དང་པོ་ཉིད་ནས་སྡོམ་པ་འོག་མ་གཉིས་གང་ཡང་སྔོན་དུ་མ་སོང་བར་སྔགས་སྡོམ་བླང་པའི་ཚུལ་དང་། 
དང་པོར་སྔགས་སྡོམ་བླང་ནས་དེའི་རྗེས་སུ་སྡོམ་པ་འོག་མ་གཉིས་བླང་བའི་ཚུལ་དང་རྣམ་པ་བདུན་ཡོད་པ་ལས།  དང་པོ་གཉིས་ནི་ཀྱཻ་རྡོ་རྗེ་ལས།  དང་པོར་གསོ་སྦྱོང་སྦྱིན་པར་བྱ། །ཞེས་སོགས་སྐལ་དམན་རིམ་འཇུག་པའི་ལམ་གྱི་དཀྲི་ཚུལ་གསུངས་པས་
འགྲུབ་ལ།  གསུམ་པ་དང་བཞི་པ་གཉིས་ནི་རྒྱུད་འབུམ་པ་ལས།  དེ་བཞིན་སེམས་ཀྱི་བྱེ་བྲག་གིས། །རིགས་ཅན་གསུམ་གྱི་སྡོམ་པ་ཡང་། །དཀྱིལ་འཁོར་ཆེན་པོ་འདིར་ཞུགས་ན། །ཞེས་རིགས་ཅན་གསུམ་ཀའི་སྡོམ་པ་ལ་གནས་པས་སྔགས་སྡོམ་ལེན་པ་གསུངས་
9-3-72b


པས་འགྲུབ་བོ། །ལྔ་པ་ནི་སོ་ཐར་སྔོན་དུ་མ་སོང་བར་དབུ་མ་ལུགས་ཀྱི་སེམས་བསྐྱེད་བླངས་པ་ཡོད་ཅིང་།  དེའི་སྟེང་དུ་སྔགས་སྡོམ་ལེན་པ་ཡོད་པས་འགྲུབ་བོ། །དྲུག་པ་ནི་རྗེ་བཙུན་རྩེ་མོའི་དབང་ཆུར་དང་པོ་ཉིད་ནས་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པའི་
དོན་དུ་དབང་བསྐུར་ཞུའོ་ཞེས་ཟེར་ན་དེ་ལ་དང་པོ་ནས་དབང་བསྐུར་བྱེད་པར་གསུངས་པས་འགྲུབ་བོ། །བདུན་པ་ནི།  རྡོ་རྗེ་རྩེ་མོ་ལས།  སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །ཞེས་ཁྱིམ་པ་སྔགས་སྡོམ་ཐོབ་པའི་རྗེས་སུ་སྡོམ་པ་མ་
ལུས་པ་བཟུང་བ་ཡོད་པར་གསུངས་པས་འགྲུབ་བོ། །དེ་ལ་ཚུལ་དང་པོ་ལ་བྱང་སེམས་ཀྱི་སྡོམ་པ་ལེན་པའི་ཚེ་སྔར་གྱི་ཉན་ཐོས་སོ་ཐར་དེ་ཉིད་བྱང་སེམས་ཀྱི་སྡོམ་པའམ་བྱང་སེམས་ཀྱི་སོ་ཐར་དུ་གནས་འགྱུར་བ་ཡིན་ཏེ།  རང་ཉིད་གཅིག་པུ་ཞི་བདེ་དོན་གཉེར་
གྱི་དམན་སེམས་མཐའ་དག་དོར་ནས།  མི་མཐུན་ཕྱོགས་སྤོང་པའི་སྤོང་སེམས་དེ་ཉིད་བྱང་སེམས་ཀྱི་སྡོམ་པའི་ངོ་བོར་འགྱུར་བའི་ཕྱིར་རོ། །ལེན་ཚུལ་གཉིས་པ་ལ་ནི་བྱང་སེམས་ཀྱི་སྡོམ་པ་ལེན་པའི་ཚེ་སྔར་གྱི་སོ་ཐར་བྱང་སེམས་ཀྱི་སྡོམ་པར་གནས་འགྱུར་བ་ནི་མ་ཡིན་ཏེ།
དང་པོ་ཉིད་ནས་ཐེག་ཆེན་སོ་ཐར་བྱང་སེམས་ཀྱི་སྡོམ་པའི་ངོ་བོར་ཡོད་པས།  ཕྱིས་བྱང་སེམས་ཀྱི་སྡོམ་པ་སྐྱེས་པའི་ཚེ་ཡང་ཡོན་ཏན་བསྣན་པའི་ཚུལ་དུ་ངོ་བོ་གཅིག་ཏུ་སྐྱེས་པ་ཡིན་པའི་ཕྱིར་རོ། །དེས་ན་བྱང་སེམས་ཀྱི་སྡོམ་པར་གནས་འགྱུར་རྒྱུའི་སོ་སོར་ཐར་པ་ནི་ཉན་ཐོས་
ཀྱི་སོ་ཐར་ཁོ་ན་ལ་ཡིན་གྱི་བྱང་སེམས་ཀྱི་སོ་ཐར་ནི་མ་ཡིན་ཏེ།  སྡོམ་པ་འོག་མ་བར་མར་གནས་འགྱུར་བའི་དོན་ནི་དམན་སེམས་དོར་ཞིང་སྤོང་སེམས་མ་དོར་བ་ལ་འཇོག་དགོས་ཤིང་།  ཐེག་ཆེན་སོ་ཐར་ལ་དང་པོ་ཉིད་ནས་དམན་སེམས་མེད་པའི་ཕྱིར་རོ། །ལེན་ཚུལ་གསུམ་
9-3-73a


པ་བཞི་པ་ལྔ་པ་རྣམས་ལ་ནི་སྔགས་སྡོམ་ཐོབ་པའི་ཚེ་སྔར་གྱི་སྡོམ་པ་ཐམས་ཅད་སྔགས་སྡོམ་དུ་གནས་འགྱུར་བ་ཡིན་ཏེ།  སྔར་བྱང་སེམས་དང་སོ་ཐར་ཐམས་ཅད་འབྲས་བུ་ལམ་བྱེད་ཀྱི་ཐབས་ཀྱིས་མ་ཟིན་པ་ཡིན་པ་ལས་ཕྱིས་
སྔགས་སྡོམ་ཐོབ་པའི་ཚེ་སྡོམ་པ་ཐམས་ཅད་ཀྱང་འབྲས་བུ་ལམ་བྱེད་ཀྱི་ཐབས་ཀྱིས་ཟིན་པའི་སྡོམ་པར་འགྱུར་བའི་ཕྱིར་ཏེ།  དེས་ན་སྔར་ཉན་ཐོས་ཀྱི་སོ་ཐར་དང་ལྡན་པས་སྔགས་སྡོམ་ཐོབ་པའི་ཚེ་གནས་འགྱུར་གཉིས་ཀ་ཚང་ལ་སྔར་བྱང་སེམས་ཀྱི་སྡོམ་པ་དང་ལྡན་
པས་དབང་བསྐུར་ཐོབ་པ་ལ་ནི་གནས་འགྱུར་ཕྱི་མ་ཁོ་ན་བརྩི་བར་རིག་པར་བྱའོ། །ལེན་ཚུལ་དྲུག་པ་ལ་ནི་སྡོམ་པ་གསུམ་ཆར་ཡང་ཆོ་ག་གཅིག་ལས་ཐོབ་པས་ངོ་བོ་གཅིག་ཏུ་སྐྱེ་བ་ཁོ་ན་ཡིན་གྱི་གནས་འགྱུར་བརྩིར་མེད་དོ། །དེ་བཞིན་དུ་སོ་ཐར་སྔོན་དུ་མ་སོང་བར་
བྱང་སེམས་ཀྱི་སྡོམ་པ་ལེན་པའི་ཆོ་ག་ལས་བྱང་སེམས་ཀྱི་སྡོམ་པ་དང་སོ་ཐར་གྱི་སྡོམ་པ་གཉིས་ཐོབ་པ་ལའང་གནས་འགྱུར་བརྩིར་མེད་དེ།  དེ་ལ་ནི་ཐེག་ཆེན་གྱི་སོ་ཐར་ཁོ་ན་སྐྱེ་བའི་ཕྱིར་རོ། །ལེན་ཚུལ་བདུན་པ་ལ་ནི་སྡོམ་པ་འོག་མ་གཉིས་པོ་ཐོབ་པའི་ཚེ་ངོ་བོ་གཅིག་ཏུ་སྐྱེ་བ་
ཁོ་ན་ཡིན་གྱི་གནས་འགྱུར་བརྩིར་མེད་དེ།  སྔགས་སྡོམ་ལ་གནས་བཞིན་དུ་སྡོམ་པ་གང་བླང་ཀྱང་སྔགས་སྡོམ་གྱི་ངོ་བོར་སྐྱེ་བའི་ཕྱིར་རོ། །དེས་ན་ཉན་ཐོས་ཀྱི་སོ་ཐར་བྱང་སེམས་ཀྱི་སྡོམ་པར་གནས་འགྱུར་བ་དང་།  འབྲས་བུ་ལམ་བྱེད་ཀྱི་ཐབས་ཀྱིས་མ་ཟིན་པའི་སོ་ཐར་
དང་བྱང་སེམས་སྔགས་སྡོམ་དུ་གནས་འགྱུར་བ་ཡིན་གྱི་སྤྱིར་སོ་ཐར་ཙམ་ནི་བྱང་སེམས་ཀྱི་སྡོམ་པར་གནས་འགྱུར་བ་ཡང་མ་ཡིན་ཅིང་ཐེག་ཆེན་གྱི་སོ་ཐར་ཡང་བྱང་སེམས་ཀྱི་སྡོམ་པར་གནས་འགྱུར་བ་མ་ཡིན་ཏེ།  བྱང་སེམས་ཀྱི་སྡོམ་པ་ཡང་སོ་ཐར་གྱི་སྡོམ་པའི་བྱེ་
9-3-73b


བྲག་ཡིན་པའི་ཕྱིར་རོ། །དེ་བཞིན་དུ་སོ་ཐར་ཙམ་དང་བྱང་སེམས་ཀྱི་སྡོམ་པ་ཙམ་སྔགས་སྡོམ་དུ་གནས་འགྱུར་བ་ཡང་མ་ཡིན་ཏེ།  སྔགས་སྡོམ་ཡང་སྡོམ་པ་དེ་དག་གི་བྱེ་བྲག་ཡིན་པའི་ཕྱིར་རོ། །དེ་དག་གིས་ནི་གོང་དུ་དྲངས་པའི་སྡོམ་པ་ཉི་ཤུ་པའི་འགྲེལ་པར་
སྔར་སོ་སོར་ཐར་པའི་སྡོམ་པ་ཐོབ་ན།  ཕྱིས་བྱང་ཆུབ་སེམས་དཔའི་སྡོམ་པ་ཐོབ་པའི་དུས་སུ་སྔར་གྱི་དེ་བྱང་ཆུབ་སེམས་དཔའི་སྡོམ་པར་གནས་འགྱུར་ལ་ཞེས་པ་དང་།  རྩ་ལྟུང་འཁྲུལ་སྤོང་ལས་འོ་ན་སྔར་སོ་སོར་ཐར་པའི་སྡོམ་པ་དགེ་སློང་གི་བར་ཐོབ་པ་ཞིག་གིས་
ཞེས་སོགས་གསུངས་པའི་དོན་ཕྱོགས་འདི་ལ་མོས་པ་ཡོད་ཀྱང་བླ་མའི་མན་ངག་དང་བྲལ་ནས་ཁ་ཕྱི་རོལ་དུ་བལྟས་པ་རྣམས་ཀྱི་དོན་དུ་སྙིང་བརྩེ་བའི་བསམ་པས་དཔྱིས་ཕྱིན་པར་བཤད་དོ། །གཉིས་པ་ནི་སྔར་བཤད་པའི་ལེན་ཚུལ་བདུན་པོ་གང་ཡིན་ཀྱང་སྔགས་སྡོམ་རྒྱུད་ལ་
ལྡན་པའི་ཚེ་སྡོམ་པ་གསུམ་ཆར་ངོ་བོ་གཅིག་ཏུ་ལྡན་པ་ཡིན་ཏེ།  སྔར་སྡོམ་པ་འོག་མ་གཉིས་པོ་སྔོན་དུ་སོང་ན་སྔགས་སྡོམ་ཐོབ་པའི་ཚེ་གནས་འགྱུར་ནས་སྔགས་སྡོམ་གྱི་ངོ་བོ་ཡོད་པའི་ཕྱིར་དང་།  སྔོན་དུ་མ་སོང་ན་སྔགས་སྡོམ་གཅིག་པུ་ལ་གཞན་གནོད་གཞི་བཅས་སྤོང་བའི་སྡོམ་
པ་དང་།  གཞན་ལ་ཕན་པ་སྒྲུབ་པ་དང་།  དེ་ཐམས་ཅད་ཀྱང་འབྲས་བུ་ལམ་བྱེད་ཀྱིས་ཟིན་པའི་སྡོམ་པ་གསུམ་ཐོབ་པའི་ཕྱིར་རོ། །དེས་ན་སྔགས་སྡོམ་དང་ངོ་བོ་གཅིག་པའི་བྱང་སེམས་དང་སོ་ཐར་ནི་འབྲས་བུ་ལམ་བྱེད་ཀྱི་ཐབས་ཀྱིས་ཟིན་པའི་སོ་ཐར་དང་བྱང་སེམས་
ཡིན་གྱི་ཕ་རོལ་ཏུ་ཕྱིན་པའི་ཉམས་ལེན་རྐྱང་པའི་བྱང་སེམས་དང་སོ་ཐར་གཉིས་ནི་སྔགས་སྡོམ་དང་ངོ་བོ་གཅིག་པ་མ་ཡིན་ཏེ།  དེ་དག་ནི་སྔགས་སྡོམ་གྱིས་མ་ཟིན་པའི་ཕྱིར་རོ། །དེ་བཞིན་དུ་བྱང་སེམས་ཀྱི་སྡོམ་པ་དང་ངོ་བོ་གཅིག་པའི་སོ་ཐར་ཡང་བྱང་སེམས་ཀྱི་སོ་ཐར་ཁོ་ན་ཡིན་
9-3-74a


གྱི་ཉན་ཐོས་ཀྱི་སོ་ཐར་ནི་མ་ཡིན་ཏེ།  དེ་གཉིས་རྣམ་པ་ཀུན་ཏུ་འགལ་བའི་ཕྱིར་རོ། །དེས་ན་བྱང་སེམས་ཀྱི་སྡོམ་པ་དང་ལྡན་ན་གཉིས་ངེས་པར་ལྡན་ཅིང་སྔགས་སྡོམ་དང་ལྡན་ན་སྡོམ་པ་གསུམ་ཆར་དང་ལྡན་པས་གསུམ་ལྡན་གྱི་རྒྱུད་ཀྱི་
སྡོམ་པ་གསུམ་ཕན་ཚུན་ཡིན་ཁྱབ་མཉམ་ཡིན་ཅིང་།  གཉིས་ལྡན་གྱི་རྒྱུད་ཀྱི་སྡོམ་པ་གཉིས་ཀྱང་དེ་བཞིན་དུ་ཤེས་པར་བྱའོ། །འདིའི་དོན་མ་རྟོགས་པ་ཁ་དགའ་གདོང་པ་ཅིག་གནས་འགྱུར་ངོ་བོ་གཅིག་ཞེས་པའི་ཚིག་ཙམ་ལ་བརྟེན་ནས་སྔར་གྱི་གནས་འགྱུར་རྒྱུའི་སྡོམ་པ་དང་ཕྱིས་གནས་
འགྱུར་ཟིན་པའི་སྡོམ་པ་གཉིས་ངོ་བོ་གཅིག་ཡིན་ནམ་སྙམ་ནས་སྡོམ་པ་སྐད་ཅིག་སྔ་ཕྱི་རྫས་གཅིག་པ་མི་འཐད་དེ།  མདོ་རྒྱུད་བསྟན་བཅོས་ཚད་ལྡན་དང་འགལ་བའི་ཕྱིར་རོ་ཞེས་སྨྲ་བ་དང་།  ཡང་ཁ་ལྷ་འབྲི་ཅིག་གནས་འགྱུར་བ་འཐད་ཀྱང་ངོ་བོ་གཅིག་པ་མི་འཐད་དེ།  སེམས་
ཅན་གྱི་ཤེས་པ་སངས་རྒྱས་ཀྱི་ཡེ་ཤེས་སུ་གནས་འགྱུར་ཀྱང་ངོ་བོ་མི་གཅིག་པ་བཞིན་ནོ། །ཞེས་སྨྲ་བ་དེ་དག་གིས་ནི་རྗེ་བཙུན་གྱི་དགོངས་པ་མ་རྟོགས་ཤིང་རྗེས་འབྲང་གིས་ཀྱང་མ་སྨྲས་བཞིན་དུ་གཞི་མེད་ལ་དགག་པ་བྱེད་པ་ཙམ་དུ་ཟད་དོ། །སྔགས་སྡོམ་དང་ལྡན་ན་
སྡོམ་པ་གསུམ་དང་ལྡན་དགོས་པ་འདི་ཡང་མདོ་རྒྱུད་ཀྱི་དགོངས་པ་ཕྱིན་ཅི་མ་ལོག་པ་རྗེ་བཙུན་ས་སྐྱ་པ་ཡབ་སྲས་ཀྱིས་བཀྲལ་བའི་ལུགས་འབའ་ཞིག་ཏུ་སྣང་སྟེ་རྡོ་རྗེ་རྩེ་མོ་ལས།  སྡོམ་པ་གསུམ་ལ་གནས་པ་ནི། །དང་པོའི་ཁྲུས་སུ་བཤད་པ་ཡིན། །ཞེས་པ་དང་།  དམ་པ་
དང་པོ་ལས།  རྟེན་ལ་གསུམ་སྟེ་དགེ་སློང་མཆོག །འབྲིང་ནི་དགེ་ཚུལ་ཡིན་པར་འདོད། །ཁྱིམ་ན་གནས་པ་ཐ་མའོ། །ཞེས་བཤད་ཅིང་།  ཁྱིམ་ན་གནས་པའི་དོན་ཡང་རྩེ་མོ་ལས། །སྲོག་གཅོད་རྐུ་དང་འཁྲིག་པ་དང་། །རྫུན་དང་ཆང་ནི་རྣམ་སྤངས་ཏེ། །
9-3-74b


ཁྱིམ་པའི་སྡོམ་ལ་ལེགས་གནས་ནས། །གསང་སྔགས་རྒྱལ་པོར་རབ་ཏུ་བསྒྲུབ། །ཅེས་དགེ་བསྙེན་གྱི་སྡོམ་པ་བསླབ་གཞི་ལྔ་བསྲུང་བ་ལ་འཆད་ཅིང་།  དཔུང་བཟངས་ཀྱི་རྒྱུད་ལས།  རྒྱལ་བ་ངེས་གསུངས་སོ་སོར་ཐར་པ་ཡི། །དམ་ཚིག་དང་ནི་སྡོམ་པ་མ་ལུས་པ། །
སྔགས་པ་ཁྱིམ་པས་རྟགས་དང་ཆ་ལུགས་སྤང་། །ལྷག་མ་རྣམས་ནི་ཉམས་སུ་བླང་བར་བྱ། །ཞེས་པ་དང་།  སྡོམ་པ་གསུམ་ངེས་པར་བསྟན་པའི་མདོ་ལས།  དཔེ་ཇི་སྐད་དུ་བསྟན་པའི་སོ་སོར་ཐར་པ་དང་མཐུན་པར་བྱའོ། །འོད་སྲུང་གང་དག་
སོ་སོར་ཐར་པ་དང་མི་མཐུན་པར་བྱ་བར་སེམས་པ་དེ་དག་ནི་སངས་རྒྱས་ཀྱི་ཆོས་སྟོབས་དང་མི་འཇིགས་པ་དང་མི་མཐུན་པར་བྱ་བར་སེམས་པའོ། །ཞེས་པ་དང་།  སློབ་དཔོན་འཇམ་དཔལ་གྲགས་པས།  སྡོམ་གསུམ་ཆོ་གར་མི་ལྡན་པར། །སྔགས་
པའི་བདག་ཉིད་མི་འགྱུར་ཏེ། །ཞེས་སོགས་གསལ་བར་གསུངས་ཀྱང་ལུགས་གཞན་དག་གིས་ནི་དཔྱད་པ་ཙམ་ཡང་མ་ཞུགས་པར་སྣང་ཞིང་འདི་པའི་ལུགས་ཀྱི་སྡོམ་པ་འོག་མ་གཉིས་པོ་སྔོན་དུ་སོང་མ་སོང་གང་ཡིན་ཀྱང་སྔགས་སྡོམ་ཐོབ་པའི་ཚེ་སྡོམ་པ་གསུམ་
ལྡན་དུ་གཏན་ལ་ཕབ་པའི་ཕྱིར་རོ། །རྒྱུད་ལས་གསུངས་པའི་གསེར་འགྱུར་གྱི་རྩིའི་དཔེ་ནི་སྡོམ་པ་གནས་འགྱུར་བ་དང་ངོ་བོ་གཅིག་པ་གཉིས་ཀའི་དཔེ་ཡིན་ཏེ།  ལྕགས་དང་ཟངས་དང་དངུལ་གསུམ་པོ་གསེར་འགྱུར་གྱི་རྩིས་ཟིན་པ་ན་ལྕགས་ལ་སོགས་པའི་དངོས་
པོ་ཐ་དད་པ་མེད་པར་ཐམས་ཅད་ཀྱང་གསེར་གྱི་ཕུང་པོ་འབའ་ཞིག་ཏུ་འགྱུར་བ་ལྟར་རིགས་ཅན་གསུམ་གྱི་བསླབ་པ་གསུམ་པོ་ཡང་སྔགས་སྡོམ་གྱིས་ཟིན་པ་ན་ཉན་ཐོས་ཀྱི་བསླབ་པ་ལ་སོགས་པ་ཐ་དད་པ་མེད་པར་ཐམས་ཅད་ཀྱང་རྡོ་རྗེ་ཐེག་པའི་བསླབ་པ་འབའ་ཞིག་ཏུ་འགྱུར་བའི་
9-3-75a


ཕྱིར་རོ། །འོན་ཀྱང་སྔར་བླངས་པའི་སྡོམ་པ་དེ་དག་གི་བསླབ་པ་ལ་བསླབ་མི་དགོས་པར་ཐལ་བའི་སྐྱོན་མེད་དེ།  དགེ་སློང་རྡོ་རྗེ་འཛིན་པ་ལྟ་བུའི་རྒྱུད་ལ་སྡོམ་པ་འོག་མ་གཉིས་ཀྱི་དབང་དུ་བྱས་པའི་ལྟུང་བ་བྱུང་ན་སྔགས་ཀྱི་དམ་ཚིག་
དང་འགལ་བའི་ལྟུང་བ་བྱུང་བས་ཁྱབ་པའི་ཕྱིར་ཏེ།  སེམས་ཅན་གྱི་དོན་དུ་འགྱུར་བ་སོགས་ཀྱི་དགོས་ཆེད་ཁྱད་པར་ཅན་མེད་པར་འོག་མ་གཉིས་ཀྱི་རྩ་ལྟུང་བྱུང་ན་སྔགས་ཀྱི་བདེ་གཤེགས་བཀའ་འདས་འབྱུང་ཞིང་ཡན་ལག་རྣམས་ཁྱད་གསོད་དང་བཅས་ཏེ་སྤྱད་ན་བདེ་
གཤེགས་བཀའ་འདས་འབྱུང་ཞིང་ཁྱད་གསོད་མེད་ཅིང་དགོས་ཆེད་ཁྱད་པར་ཅན་ཡང་མེད་པར་སྤྱད་ན།  སྡོམ་པ་གཉིས་ཀྱི་བཅས་པ་ལས། །དགོས་པ་མེད་པར་འདའ་བ་དང་། །ཞེས་པའི་སྐབས་ནས་བསྟན་པའི་ཡན་ལག་གི་ལྟུང་བ་དང་སེམས་ཅན་གྱི་དོན་དུ་འགྱུར་བ་
སོགས་དགོས་ཆེད་ཁྱད་པར་ཅན་གྱི་སྒོ་ནས་སྤྱད་ན་ཐམས་ཅད་ལ་ལྟུང་བ་མེད་པའི་ཕྱིར་རོ། །དེས་ན་ཉི་ཟླ་སྐར་གསུམ་གྱི་དཔེ་དང་།  སྐྱེས་བུའི་རྒྱན་གྱི་དཔེ་དང་།  ཆུ་གཞོང་དུ་ནོར་བུ་བཞག་པའི་དཔེ་གསུམ་ནི་དོན་དང་འགྲིག་ན་སྦྱར་དུ་རུང་ཡང་དོན་དང་མི་འགྲིག་
ན་དོར་བར་བྱ་བ་ཡིན་ཏེ།  རང་རང་གི་རྟོག་པས་སྦྱར་བ་ཙམ་ཡིན་གྱི་མདོ་རྒྱུད་ལ་སྦྱར་བའི་དཔེ་མ་ཡིན་པའི་ཕྱིར་རོ། །གསེར་འགྱུར་གྱི་རྩིའི་དཔེ་ནི་སངས་རྒྱས་ཀྱིས་རྒྱུད་ལས་གསུངས་ཤིང་དོན་ལ་ཡང་ཇི་ལྟ་བ་བཞིན་དུ་མཐུན་པས་ན་རྣམ་པ་ཐམས་ཅད་དུ་བླངས་བར་བྱ་བ་ཁོ་ན་
ཡིན་ནོ། །དེ་དག་ནི་རྗེ་བཙུན་གྱི་སྡོམ་པ་ཉི་ཤུ་པའི་འགྲེལ་པར་སྤྱིར་སོ་སོར་ཐར་པ་ཞེས་བྱ་བའི་རང་གི་ངོ་བོ་ནི་གཞན་ལ་གནོད་པ་གཞི་དང་བཅས་པ་ལས་བཟློག་པ་ཡིན་ལ་ཞེས་སོགས་དང་། འཁྲུལ་སྤོང་ལས།  འོ་ན་ཁྱོད་ཀྱི་སོ་སོར་ཐར་པ་སྔོན་དུ་མ་སོང་བའི་སྡོམ་པ་གསུམ་
9-3-75b


པོ་གང་ཡིན་ཞེ་ན་ཞེས་སོགས་ཀྱི་དོན་རྗེ་བཙུན་བླ་མ་མུས་པ་ཆེན་པོའི་གསུང་བཞིན་དུ་བྲིས་པ་ཡིན་པས་ཡིད་ཆེས་པར་གྱིས་ཤིག །གསུམ་པ་རྩོད་པ་སྤང་བ་ནི།  འོད་ཕྲེང་མཁན་པོ་ན་རེ།  རྒྱུད་འབུམ་པའི་ལུང་གི་དོན་ལ་སྡོམ་གསུམ་གནས་འགྱུར་ངོ་བོ་གཅིག་པ་
དང་།  གོང་མའི་རྩ་ལྟུང་བྱུང་ན་འོག་མ་གཏོང་བར་འདོད་པ་མི་འཐད་དེ།  ངོ་བོ་གཅིག་ན་གཏོང་བའི་ཚེ་སྡོམ་པ་གཅིག་པོ་དེ་ཉིད་གཏོང་བར་འགྱུར་བས་གསུམ་ལྡན་ཀྱི་གཏོང་པའི་དོན་མི་གནས་པའི་ཕྱིར་རོ། །གཞན་ཡང་བུད་མེད་ལ་སྨོད་པའི་ལྟུང་བ་བྱུང་བས་བུད་མེད་ལ་རེག་
པའི་སྡོམ་པ་གཏོང་བར་ཐལ།  གོང་མའི་ལྟུང་བ་བྱུང་བས་འོག་མའི་སྡོམ་པ་གཏོང་བ་ཡོད་པའི་ཕྱིར།  འདོད་ན་མཁའ་ལ་སྤྲིན་ཆེན་འཁྲིགས་པས་ལོ་ཐོག་ཉམས་པར་འགྱུར་རོ། །གཞན་ཡང་སྡོམ་པ་ཐོབ་གཏོང་གི་རྒྱུ་སངས་རྒྱས་ཀྱིས་གསུངས་པ་ལས་གཞན་དུ་བྱེད་རིགས་
པར་ཐལ།  གོང་མའི་རྩ་ལྟུང་འོག་མའི་གཏོང་རྒྱུ་ཡིན་པའི་ཕྱིར།  གཞན་ཡང་སྡོམ་པ་འོག་མ་གོང་མར་གནས་འགྱུར་བ་མི་འཐད་པར་ཐལ།  གོང་འོག་འགལ་བའི་ཕྱིར།  འགལ་ཡང་གནས་འགྱུར་ན་ཉི་མའི་དཀྱིལ་འཁོར་འདི་གངྒཱའི་ཆུ་བོར་གནས་འགྱུར་བར་
ཐལ་ལོ། །གཞན་ཡང་སྡོམ་པ་གསུམ་ལྡན་པའི་དོན་ཤེས་རྒྱུད་གཅིག་ལ་དུས་མཉམ་དུ་ལྡན་ན་ལྡན་གཞིའི་ཤེས་རྒྱུད་དེ་ཉིད་རྫས་ཐ་དད་པ་གསུམ་དུ་ཐལ།  ལྡན་ཆོས་སྡོམ་པ་གསུམ་པོ་རྫས་ཐ་དད་ཡིན་པའི་ཕྱིར།  གལ་ཏེ་ཤེས་རྒྱུད་སྔ་ཕྱི་ལ་བརྩི་ན་སྡོམ་པ་གསུམ་དང་
ལྡན་པའི་དོན་མི་གནས་པར་ཐལ།  གང་རུང་ཅིག་སྐྱེས་པའི་ཚེ་གཅིག་འགགས་ནས་མེད་པའི་ཕྱིར་རོ། །འོན་ཏེ་སྡོམ་པ་གསུམ་ཤེས་རྒྱུད་གཅིག་ལ་རྫས་གཅིག་ཏུ་ལྡན་ན་གཏོང་ཐོབ་ཆོ་ག་གཅིག་ཏུ་འགྱུར་རོ། །ཞེས་ཟེར་རོ། །དེ་ལ་སྡོམ་པ་གསུམ་ངོ་བོ་གཅིག་ཡིན་ཀྱང་གཏོང་བའི་
9-3-76a


ཚེ་ཅིག་ཆར་དུ་གཏོང་མི་དགོས་ཏེ།  ཐུན་མོང་མ་ཡིན་པའི་གཏོང་རྒྱུ་རྣམས་ཀྱིས་སྡོམ་པ་དེ་ཉིད་གཏོང་གི་གཞན་མི་གཏོང་བའི་ཕྱིར་རོ། །གོང་མའི་རྩ་ལྟུང་བྱུང་ན་འོག་མ་གཏོང་བ་ལ་སྐྱོན་བརྗོད་པ་དེ་གོང་མའི་རྩ་ལྟུང་བྱུང་ན་འོག་མ་གཏོང་
པས་ཁྱབ་པ་ལ་སྐྱོན་བརྗོད་པ་ཡིན་ནམ།  གཏོང་སྲིད་པ་ལ་སྐྱོན་བརྗོད་པ་ཡིན།  དང་པོ་ལྟར་ན་མི་འཐད་དེ།  དེ་ལྟར་དུ་ཁས་མ་བླངས་པའི་ཕྱིར་རོ། །གཉིས་པ་ལྟར་ན་བུད་མེད་ལ་སྨོད་པའི་ལྟུང་བས་བུད་མེད་ལ་རེག་པའི་སྡོམ་པ་གཏོང་བར་ཐལ།  གོང་མའི་རྩ་ལྟུང་
བྱུང་བས་འོག་མ་གཏོང་བ་ཡོད་པའི་ཕྱིར་ཏེ།  རྩ་ལྟུང་ལྔ་པ་བྱུང་ན་བྱང་སེམས་ཀྱི་སྡོམ་པ་གཏོང་བའི་ཕྱིར།  གཞན་ཡང་སྡོམ་པ་གཏོང་ཐོབ་ཀྱི་རྒྱུ་སངས་རྒྱས་ཀྱིས་གསུངས་པ་ལས་གཞན་དུ་བྱེད་རིགས་པར་ཐལ།  བདེ་གཤེགས་བཀའ་འདས་ཀྱི་ལྟུང་བ་བྱུང་
བས་འོག་མའི་སྡོམ་པ་གཏོང་བ་ཡོད་པའི་ཕྱིར།  འགལ་བ་ལ་གནས་འགྱུར་བརྩི་བ་མི་འཐད་ཅེས་སྨྲ་བ་ནི་གནས་འགྱུར་གྱི་དོན་ཅུང་ཟད་ཙམ་ཡང་མ་རྟོགས་པ་སྟེ།  སེམས་ཅན་གྱི་ཤེས་པ་སངས་རྒྱས་ཀྱི་ཡེ་ཤེས་སུ་གནས་འགྱུར་བ་མེད་པར་ཐལ།  དེ་གཉིས་འགལ་
བའི་ཕྱིར།  གཞན་ཡང་ཁྱེད་ཀྱི་ལུགས་ལ་གནས་འགྱུར་གཏན་མི་སྲིད་པར་ཐལ།  འགལ་བ་ལ་གནས་འགྱུར་མི་སྲིད་པར་ཁས་བླངས་ཤིང་མི་འགལ་བ་ལ་གནས་འགྱུར་གྱི་དོན་མེད་པའི་ཕྱིར།  གཞན་ཡང་འགལ་བ་ལ་གནས་འགྱུར་མི་སྲིད་པའི་དོན་འདི་ལ་
སོ་སོ་སྐྱེ་བོའི་ཤེས་པ་འཕགས་པའི་ཤེས་པར་གནས་འགྱུར་བ་མི་སྲིད་པར་ཐལ་བ་དང་།  ཐེག་དམན་གྱི་རྟོགས་པ་ཐེག་ཆེན་གྱི་རྟོགས་པར་གནས་འགྱུར་བ་མི་སྲིད་པ་སོགས་ཇི་སྲིད་ལྕེའི་དབང་པོ་ངལ་བར་མ་གྱུར་གྱི་བར་དུ་བརྗོད་པར་བྱའོ། །ཡང་ལྡན་གཞིའི་ཀུན་གཞིའི་
9-3-76b


རྣམ་ཤེས་དེ་རྫས་ཐ་དད་པ་གསུམ་དུ་ཐལ།  ལྡན་ཆོས་སྡོམ་པ་གསུམ་གྱི་བག་ཆགས་རྫས་ཐ་དད་ཡིན་པའི་ཕྱིར།  གལ་ཏེ་ཀུན་གཞི་ཤེས་རྒྱུད་སྔ་ཕྱི་ལ་བརྩིའོ་སྙམ་ན་འོ་ན་གསུམ་ལྡན་གྱི་དོན་མེད་པར་ཐལ།  གང་རུང་གཅིག་སྐྱེས་པའི་ཚེ་ཅིག་ཤོས་འགགས་པའི་ཕྱིར་
འོན་ཏེ་ཀུན་གཞི་ལ་སྡོམ་གསུམ་གྱི་བག་ཆགས་ངོ་བོ་གཅིག་ཏུ་ལྡན་ནོ་ཞེ་ན།  འོ་ན་གཏོང་ཐོབ་ཀྱི་ཆོ་ག་གཅིག་ཏུ་འགྱུར་རོ་ཞེས་བརྗོད་ན་ཐལ་འགྱུར་གསུམ་གྱི་འཁོར་གསུམ་ཁས་བླངས་ཏེ།  གཞན་ལ་སྐྱོན་དེ་ལྟར་དུ་བརྗོད་ཅིང་། རང་ཉིད་ཀྱིས་ཀུན་གཞི་ལ་སྡོམ་གསུམ་བག་ལ་
ཉལ་གྱི་ཚུལ་དུ་ལྡན་པ་དང་།  ཀུན་གཞི་བག་ཆགས་མང་པོ་ཅན། །ཡིན་ཀྱང་ཤེས་རྒྱུད་ཐ་དད་མེད། །ཅེས་ཁས་བླངས་པའི་ཕྱིར་རོ། །ངོ་བོ་གཅིག་ཡིན་ན་གཏོང་ཐོབ་ཀྱི་ཆོ་ག་གཅིག་ཏུ་འགྱུར་ཞེས་པ་འདི་ཉིད་དེང་སང་ཡང་སྨྲ་བ་མང་བ་འདུག་པས་འདི་ལ་དཔྱད་པར་
བྱ་སྟེ།  སྤྱིར་ངོ་བོ་གཅིག་པ་ལ་གྲུབ་བདེ་རྫས་གཅིག་པ་དང་།  ངོ་བོ་གྲུབ་ཅིང་རྫས་ཐ་དད་དུ་མེད་པ་ཙམ་ལ་ངོ་བོ་གཅིག་པར་བྱས་པ་གཉིས་ལས།  དང་པོ་ལ་སྐྱེ་འཇིག་ཅིག་ཆར་དུ་བྱེད་པ་དགོས་ཀྱང་།  སྡོམ་གསུམ་རིམ་བཞིན་དུ་བླངས་པ་གནས་འགྱུར་ན་ངོ་བོ་གཅིག་ཏུ་གནས་པ་ནི་
གྲུབ་བདེ་རྫས་གཅིག་པ་མ་ཡིན་པས་སྐྱོན་མི་གནས་ལ་ཕྱི་མ་ལ་གཏོང་ཐོབ་ཀྱི་ཆོ་ག་གཅིག་པ་མི་དགོས་ཏེ།  གལ་ཏེ་དགོས་ན་བསླབ་ཚིག་གསུམ་རིམ་ཅན་དུ་བླངས་པའི་དགེ་སློང་གི་རྒྱུད་ཀྱི་དགེ་བསྙེན་དང་།  དགེ་ཚུལ་དང་།  དགེ་སློང་གི་སྡོམ་པའི་སྲོག་གཅོད་སྤོང་
བའི་སྤོང་སེམས་གསུམ་པོ་གཏོང་ཐོབ་ཀྱི་ཆོ་ག་གཅིག་ཏུ་ཐལ།  ངོ་བོ་གཅིག་ཡིན་པའི་ཕྱིར།  གལ་ཏེ་དེ་ཡང་ངོ་བོ་ཐ་དད་དོ་ཅེ་ན་དེ་ལྟ་བུའི་དགེ་སློང་གི་རྒྱུད་ཀྱི་གཙོ་བོ་ཡིད་ཀྱི་རྣམ་པར་ཤེས་པའི་འཁོར་དུ་དུས་ཅིག་ཆར་དུ་བསླབ་ཚིགས་གསུམ་གྱི་སྤོང་སེམས་འབྱུང་མི་སྲིད་པར་ཐལ། 
9-3-77a


 བསླབ་ཚིགས་གསུམ་གྱི་སྤོང་སེམས་རྫས་ཐ་དད་པ་གང་ཞིག །གཙོ་བོ་སེམས་གཅིག་གི་འཁོར་དུ་སེམས་བྱུང་སེམས་པ་རྫས་ཐ་དད་པ་གཉིས་དུས་མཉམ་དུ་འབྱུང་མི་སྲིད་པའི་ཕྱིར།  གཞན་ཡང་སྤང་བྱ་ཉིས་བརྒྱ་ལྔ་བཅུ་རྩ་
གསུམ་པོ་ཐམས་ཅད་སྤོང་བའི་སྤོང་སེམས་རྣམས་རྫས་ཐ་དད་དམ་རྫས་གཅིག་པ་ཡིན།  དང་པོ་ལྟར་ན་གཙོ་སེམས་གཅིག་གི་འཁོར་དུ་དུས་གཅིག་ལ་སྤང་བྱ་ཉིས་བརྒྱ་ལྔ་བཅུ་རྩ་གསུམ་སྤོང་བའི་སྤོང་སེམས་འབྱུང་མི་སྲིད་པར་ཐལ།  སྤོང་སེམས་དེ་རྣམས་སྤང་བྱའི་གྲངས་བཞིན་
དུ་རྫས་ཐ་དད་ཡིན་པའི་ཕྱིར།  འདོད་ན་དགེ་སློང་གི་རྒྱུད་ལ་ཁོ་བོས་སྤང་བྱ་ཉིས་བརྒྱ་ལྔ་བཅུ་རྩ་གསུམ་པོ་ཐམས་ཅད་སྤོང་ངོ་སྙམ་པའི་བློ་སྐྱེ་མི་སྲིད་པར་ཐལ་ལོ། །གཉིས་པ་ལྟར་ན།  སྤང་བྱ་ཉིས་བརྒྱ་ལྔ་བཅུ་རྩ་གསུམ་པོ་སྤོང་བའི་སྤོང་སེམས་རྣམས་གཏོང་ཐོབ་ཀྱི་ཆོ་ག་
གཅིག་ཏུ་ཐལ།  ངོ་བོ་གཅིག་ཡིན་པའི་ཕྱིར།  རྟགས་ཁྱབ་ཁས།  འདོད་ན་དེ་ལྟ་བུའི་དགེ་སློང་གིས་བསླབ་པ་ཕུལ་བའི་ཚེ་སྲོག་གཅོད་སྤོང་བའི་སྤོང་སེམས་གཏོང་བར་ཐལ།  གསོག་འཇོག་སྤོང་བའི་སྤོང་སེམས་གཏོང་བའི་ཕྱིར།  འདོད་ན་དེའི་ཚེ་དགེ་བསྙེན་དང་དགེ་
ཚུལ་གྱི་སྡོམ་པ་ཡང་གཏོང་བར་འགྱུར་རོ། །གཞན་ཡང་དགེ་ཚུལ་གྱི་སྡོམ་པ་ཐོབ་པའི་ཚེ་བྱིན་ལེན་མ་བྱས་པར་ཟ་བ་སྤོང་བའི་སྤོང་སེམས་ཐོབ་པར་ཐལ།  སྲོག་གཅོད་སྤོང་བའི་སྤོང་སེམས་ཐོབ་པའི་ཕྱིར།  ཁྱབ་པ་ཁས།  འདོད་ན་དེའི་ཚེ་དགེ་སློང་གི་སྡོམ་པ་
ཡང་ཐོབ་པར་འགྱུར་རོ། །དེས་ན་ངོ་བོ་གཅིག་ན་གཏོང་ཐོབ་ཅིག་ཆར་དུ་བྱེད་པར་འགྱུར་རོ་ཞེས་པ་ནི་སྐྱེ་འཇིག་ཅིག་ཆར་དུ་བྱེད་ན་གཏོང་ཐོབ་ཅིག་ཆར་དུ་བྱེད་དགོས་སྙམ་དུ་སེམས་པར་སྣང་བས་རྟོག་གེའི་གནད་མ་ཤེས་པ་སྟེ་སྐྱེ་འཇིག་ནི་སྐད་ཅིག་ལ་འཇོག་ལ།  གཏོང་ཐོབ་ནི་རྒྱུན་
9-3-77b


ལ་འཇོག་པའི་ཕྱིར་རོ། །གཞན་དུ་ན་སྡོམ་པ་ཐམས་ཅད་རང་གྲུབ་དུས་ཀྱི་སྐད་ཅིག་གཉིས་པར་གཏོང་བར་ཐལ།  རང་གྲུབ་དུས་ཀྱི་སྐད་ཅིག་གཉིས་པར་ཞིག་ཟིན་པའི་ཕྱིར་ཏེ།  དངོས་པོ་ཡིན་པའི་ཕྱིར།  །གཉིས་པ་གཏོང་བའི་ཚེ་རིམ་དང་ཅིག་ཅར་གང་དུ་གཏོང་
དཔྱད་པ་ལ་གཉིས་ཏེ།  སྡོམ་པ་གསུམ་རིམ་ཅན་དུ་བླངས་པའི་དགེ་སློང་རྡོ་རྗེ་འཛིན་པ་ལྟ་བུའི་གཏོང་ཚུལ་དང་།  དབང་བསྐུར་གྱི་ཆོ་ག་ཁོ་ན་ལས་སྡོམ་པ་གསུམ་ཆར་ཐོབ་པའི་གཏོང་ཚུལ་ལོ། །དང་པོ་ནི་སྡོམ་པ་སོ་སོའི་གཏོང་ཚུལ་ནི་གོང་དུ་ཡང་ཅུང་ཟད་
བཤད་ཟིན་གྱི་རྒྱས་པར་ནི་གཞུང་སོ་སོའི་སྟེང་དུ་ཤེས་པར་བྱས་ལ།  སྤྱིར་རིམ་གྱིས་བླངས་པའི་གསུམ་ལྡན་གྱི་གཏོང་ཚུལ་ལ་དགེ་སློང་གི་སྡོམ་པ་བཏང་ནས་གོང་མ་གཉིས་པོ་མི་གཏོང་བ་དང་།  གོང་མ་གཉིས་བཏང་ནས་དགེ་སློང་གི་སྡོམ་པ་མི་གཏོང་བ་དང་
དགེ་སློང་གི་སྡོམ་པ་དང་སྔགས་སྡོམ་གཉིས་བཏང་ནས་བྱང་སེམས་ཀྱི་སྡོམ་པ་མི་བཏང་བ་དང་།  སྔགས་སྡོམ་བཏང་ནས་འོག་མ་གཉིས་མི་བཏང་བ་དང་།  གསུམ་ཆར་དུས་མཉམ་དུ་བཏང་བ་དང་རྣམ་པ་ལྔ་ལས།  དང་པོ་ནི།  དེ་ལྟ་བུའི་དགེ་སློང་གིས་སེམས་
ཅན་གྱི་དོན་དུ་འགྱུར་བ་སོགས་དགོས་ཆེད་ཁྱད་པར་ཅན་གྱི་ཚེ་དགེ་སློང་གི་བསླབ་པ་ཕུལ་བ་དང་།  ཤི་འཕོས་པའི་ཚེ་དགེ་སློང་གི་སྡོམ་པ་གཏོང་སྟེ།  དེའི་གཏོང་རྒྱུ་བྱུང་བའི་ཕྱིར།  དེའི་ཚེ་གོང་མ་གཉིས་མི་གཏོང་སྟེ་གཏོང་རྒྱུ་མ་བྱུང་བའི་ཕྱིར།  གཉིས་པ་ནི།
དེ་ལྟ་བུའི་དགེ་སློང་གིས་སྨོན་སེམས་གཏོང་བའམ།  བྱང་སེམས་ཀྱི་སྡོམ་པའི་ཕམ་འདྲ་ཀུན་དཀྲིས་དྲག་པོས་སྤྱད་པའི་ཚེ་གོང་མ་གཉིས་གཏོང་སྟེ།  བྱང་སེམས་ཀྱི་སྡོམ་པའི་གཏོང་རྒྱུ་བྱུང་བའི་ཕྱིར་དང་།  སྔགས་སྡོམ་གྱི་རྩ་ལྟུང་ལྔ་པའམ་གཉིས་པ་བྱུང་བའི་ཕྱིར་རོ། །
9-3-78a


དགེ་སློང་གི་སྡོམ་པ་མི་གཏོང་སྟེ།  གཏོང་རྒྱུ་མ་བྱུང་བའི་ཕྱིར་རོ། །གསུམ་པ་ནི།  དེ་ལྟ་བུའི་དགེ་སློང་གིས་དགོས་ཆེད་ཁྱད་པར་ཅན་མེད་པར་དགེ་སློང་གི་ཕམ་པ་བཞི་སྤྱད་ན་དགེ་སློང་གི་སྡོམ་པ་དང་སྔགས་སྡོམ་གཉིས་ཀ་
གཏོང་སྟེ།  དགེ་སློང་གི་སྡོམ་པ་ལ་ལྟོས་པའི་ཕམ་པ་བྱུང་བའི་ཕྱིར་དང་།  སྔགས་སྡོམ་གྱི་རྩ་ལྟུང་གཉིས་པ་བྱུང་བའི་ཕྱིར་རོ། །བྱང་སེམས་ཀྱི་སྡོམ་པ་མི་གཏོང་སྟེ།  རང་གི་ཆོ་གས་ཐོབ་ཅིང་དེའི་གཏོང་རྒྱུ་མ་བྱུང་བའི་ཕྱིར་རོ། །བཞི་པ་ནི།  དེ་ལྟ་བུའི་
དགེ་སློང་གིས་རྩ་ལྟུང་བདུན་པ་དང་།  བརྒྱད་པ་ལྟ་བུ་ཐུན་མོང་མ་ཡིན་པ་རྣམས་སྤྱད་པའི་ཚེ་སྔགས་སྡོམ་གཏོང་སྟེ།  དེའི་ཚེ་རྩ་ལྟུང་བྱུང་བའི་ཕྱིར་རོ། །འོག་མ་གཉིས་མི་གཏོང་སྟེ།  དེའི་གཏོང་རྒྱུ་མ་བྱུང་བའི་ཕྱིར་རོ། །ལྔ་པ་ནི།  དེ་ལྟ་བུའི་དགེ་སློང་གིས་
སྨོན་སེམས་བཏང་ནས་སོ་ཐར་གྱི་ཕམ་པ་བཞི་སྤྱད་པའི་ཚེ་གསུམ་ཆར་གཏོང་སྟེ་དགེ་སློང་གི་སྡོམ་པའི་ཕམ་པ་བྱུང་བའི་ཕྱིར་དང་།  བྱང་སེམས་ཀྱི་སྨོན་སེམས་བཏང་བའི་ཕྱིར་དང་།  སྔགས་ཀྱི་བདེ་གཤེགས་བཀའ་འདས་བྱུང་བའི་ཕྱིར་རོ། །འདི་ལ་བྱང་
སེམས་ཀྱི་སྡོམ་པ་བཏང་ནས་སྔགས་སྡོམ་མི་གཏོང་བའི་མུ་ནི་མེད་དེ།  བྱང་སེམས་ཀྱི་སྡོམ་པ་གཏོང་བའི་རྒྱུ་ལ།  ཀུན་དཀྲིས་དྲག་པོས་བྱང་སེམས་ཀྱི་ཕམ་པ་སྤྱད་པ་དང་།  སྨོན་སེམས་གཏོང་བ་གཉིས་སུ་ངེས་པ་ལས་དང་པོ་ནི་བདེ་གཤེགས་བཀའ་འདས་ཀྱི་
རྩ་ལྟུང་དང་།  གཉིས་པ་ལ་ནི་རྩ་ལྟུང་ལྔ་པ་བྱུང་བའི་ཕྱིར་དང་།  སྔགས་སྡོམ་ཡང་བྱང་སེམས་ཀྱི་སྡོམ་པའི་བྱེ་བྲག་ཡིན་པའི་ཕྱིར།  དེ་བཞིན་དུ་དགེ་སློང་ལ་སོགས་པའི་རིས་བདུན་བཏང་ནས་གོང་མ་གཉིས་མི་གཏོང་བའི་མུ་ཡོད་པ་ཡིན་གྱི།  སོ་ཐར་བཏང་ནས་གོང་
9-3-78b


མ་གཉིས་མི་གཏོང་བའི་མུ་ནི་ཡོད་པ་མ་ཡིན་ཏེ།  གོང་མ་གཉིས་སོ་ཐར་ཀྱི་སྡོམ་པའི་བྱེ་བྲག་ཡིན་པའི་ཕྱིར་རོ། །གཉིས་པ་ནི་སྡོམ་པ་འོག་མ་གཉིས་ལེན་པའི་ཆོ་ག་སྔོན་དུ་མ་སོང་བར་དབང་བསྐུར་གྱི་ཆོ་ག་གཅིག་པུ་ལས་སྡོམ་པ་གསུམ་ཆར་ཐོབ་པ་ལ་ནི་སྔགས་ཀྱི་
རྩ་ལྟུང་བྱུང་བའི་ཚེ་སྡོམ་པ་གསུམ་ཆར་གཏོང་སྟེ།  དེ་ལྟ་བུའི་སྡོམ་པ་གསུམ་ཀ་ཡང་སྔགས་སྡོམ་གཅིག་པུ་ལ་ལྡོག་པའི་སྒོ་ནས་གསུམ་དུ་ཕྱེ་བ་ཙམ་ཡིན་པའི་ཕྱིར་དང་།  ལེན་པའི་ཆོ་ག་ཡང་དབང་བསྐུར་ཁོ་ན་ལས་ཐོབ་དགོས་པ་ཡིན་གྱི་ཆོ་ག་གཞན་ལས་
མ་ཐོབ་པའི་ཕྱིར་རོ། །འོན་ཀྱང་སྨོན་སེམས་མ་བཏང་ན་རྩ་ལྟུང་བྱུང་བས་སྡོམ་པའི་ལྡོག་པ་བཏང་ཡང་ཀུན་རྫོབ་བྱང་ཆུབ་སེམས་ཀྱི་ལྡོག་པ་མི་བཏང་བ་ནི་ཡོད་དོ། །རིགས་པ་འདི་ལ་རྟེན་ནས་སོ་ཐར་ལེན་པའི་ཆོ་ག་སྔོན་དུ་མ་སོང་བར་བྱང་སེམས་ཀྱི་སྡོམ་པ་ཐོབ་
པའི་གཉིས་ལྡན་ཡང་བྱང་སེམས་ཀྱི་སྡོམ་པ་གཏོང་བའི་ཚེ་གཉིས་ལྡན་གཏོང་བར་ཤེས་པར་བྱ་ཞིང་བྱང་སེམས་ཀྱི་སྡོམ་པ་ཆོ་གའི་སྒོ་ནས་མ་བླངས་པར་སོ་ཐར་རིས་བརྒྱད་པོ་བྱང་ཆུབ་ཀྱི་སེམས་ཀྱིས་ཟིན་པའི་སྒོ་ནས་བླངས་པའི་གཉིས་ལྡན་ལ་ཡང་སོ་ཐར་བཏང་བའི་ཚེ་སྡོམ་
པ་གཉིས་ཆར་བཏང་བར་ཤེས་པར་བྱའོ། །དེའི་ཚེ་ཀུན་རྫོབ་བྱང་ཆུབ་ཀྱི་སེམས་ཀྱི་ལྡོག་པ་ནི་མི་གཏོང་སྟེ།  གཞུང་ལས།  ཐེག་ཆེན་སོ་སོ་ཐར་ཡིན་ཡང་། །དགེ་སློང་ལ་སོགས་སྡོམ་པ་ཡི། །ལྡོག་པ་ཤི་བའི་ཚེ་ན་གཏོང་། །བྱང་ཆུབ་སེམས་ཀྱི་ལྡོག་
པ་དང་། །དེ་ཡི་འབྲས་བུ་ཤི་ཡང་འབྱུང་། །ཞེས་གསུངས་པས་སོ། །དོན་འདི་མ་རྟོགས་པར་གཞུང་འདིའི་དོན་ལ་ཐེག་ཆེན་སོ་ཐར་དང་ལྡན་པའི་དགེ་སློང་ཤི་འཕོས་པའི་ཚེ་དགེ་སློང་གི་སྡོམ་པའི་ལྡོག་པ་བཏང་ནས་ངོ་བོ་མི་གཏོང་བ་དང་།  ཡང་ཁ་ཅིག་དགེ་
9-3-79a


སློང་གི་སྡོམ་པའི་ལྡོག་པ་བཏང་བྱང་སེམས་ཀྱི་སྡོམ་པ་མི་གཏོང་བ་ཡིན་ཞེས་འཆད་པ་ནི་བབ་ཅོལ་འབའ་ཞིག་ཡིན་ཏེ།  དགེ་སློང་གི་སྡོམ་པའི་ངོ་བོ་མི་གཏོང་ན་ཤི་འཕོས་ནས་ཀྱང་དགེ་སློང་དུ་འགྱུར་བ་སོགས་ཀྱི་སྐྱོན་མཐའ་
དག་ཐོག་ཏུ་འབབ་པའི་ཕྱིར་དང་།  བྱང་སེམས་ཀྱི་སྡོམ་པ་མི་གཏོང་བར་འདོད་པ་ཡང་སྐབས་མ་ཡིན་ཏེ།  གཞུང་འདིས་བྱང་སེམས་ཀྱི་སྡོམ་པ་རང་གི་ཆོ་གས་མ་བླངས་བར་བྱང་ཆུབ་ཀྱི་སེམས་ཀྱིས་ཟིན་པའི་སོ་ཐར་རིས་བརྒྱད་ཀྱི་གཏོང་ཚུལ་འཆད་བའི་སྐབས་
ཡིན་པའི་ཕྱིར་རོ། །ཡང་ཁ་ཅིག་ན་རེ།  དགེ་སློང་རྡོ་རྗེ་འཛིན་པའི་རྒྱུད་ཀྱི་སྔགས་སྡོམ་ཡིན་ན་ཐུན་མོང་མ་ཡིན་པའི་རྩ་ལྟུང་བྱུང་བའི་ཚེ་གཏོང་བས་ཁྱབ་པར་ཐལ།  དེའི་ཚེ་དེའི་རྒྱུད་ཀྱི་སྔགས་སྡོམ་མཐའ་དག་གཏོང་བའི་ཕྱིར།  འདོད་ན་དགེ་སློང་རྡོ་རྗེ་འཛིན་པའི་
རྒྱུད་ཀྱི་དགེ་སློང་གི་སྡོམ་པ་ཆོས་ཅན།  དེར་ཐལ།  དེའི་ཕྱིར།  འཁོར་གསུམ་ཁས་བླངས་སོ་སྙམ་ན་སྔ་མ་ལ་ཁྱབ་པ་མེད་དེ།  ཉན་ཐོས་ཀྱི་དགེ་སློང་གིས་བྱང་ཆུབ་མཆོག་ཏུ་སེམས་བསྐྱེད་པའི་ཚེ་དམན་སེམས་ཀྱིས་ཟིན་པའི་ཉམས་ལེན་མཐའ་དག་གཏོང་ངམ་
མི་གཏོང་།  མི་གཏོང་ན་ཧ་ཅང་ཐལ་ཞིང་།  གལ་ཏེ་གཏོང་ན་ཉན་ཐོས་ཀྱི་དགེ་སློང་གི་རྒྱུད་ཀྱི་དམན་སེམས་ཀྱིས་ཟིན་པའི་ཉམས་ལེན་ཡིན་ན།  བྱང་ཆུབ་མཆོག་ཏུ་སེམས་བསྐྱེད་པའི་ཚེ་གཏང་བས་ཁྱབ་པར་ཐལ། དེའི་ཚེ་དེའི་རྒྱུད་ཀྱི་དམན་སེམས་ཀྱིས་ཟིན་པའི་ཉམས་
ལེན་མཐའ་དག་གཏོང་བའི་ཕྱིར།  རྟགས་ཁྱབ་ཁས་བླངས།  འདོད་ན་ཉན་ཐོས་ཀྱི་དགེ་སློང་གི་རྒྱུད་ཀྱི་དགེ་སློང་གི་སྡོམ་པ་ཆོས་ཅན།  དེར་ཐལ།  དེའི་ཕྱིར།  འདོད་ན།  གང་ཟག་དེས་བྱང་ཆུབ་མཆོག་ཏུ་སེམས་བསྐྱེད་པའི་རྗེས་སུ་དགེ་སློང་གི་སྡོམ་པ་མེད་པར་འགྱུར་
9-3-79b


རོ། །གལ་ཏེ་ཁོ་ན་རེ།  དེ་ལྟ་བུའི་དགེ་སློང་གིས་བྱང་ཆུབ་མཆོག་ཏུ་སེམས་བསྐྱེད་པའི་ཚེ་སྔར་གྱི་དགེ་སློང་གི་སྡོམ་པ་ཡང་གཏོང་སྟེ།  དེའི་ཚེ་སྔར་གྱི་དགེ་སློང་གི་སྡོམ་པ་དེ་མེད་པའི་ཕྱིར་ཞེ་ན།  འདི་ནི་སྐད་ཅིག་ཕྱི་མའི་ཚེ་སྐད་ཅིག་སྔ་མ་གཏོང་
བའི་སྒོ་ནས་སྐྱོན་བརྗོད་པར་སྣང་བས་དེའི་ལན་ལ་ཁོ་བོ་འབའ་ཞིག་གིས་ངལ་བ་ཅི་ཞིག་བྱར་ཡོད།  འོན་ཀྱང་ཁྱེད་ཀྱི་རྨོངས་པ་བསལ་བའི་དོན་དུ་རྣམ་གསལ་གྱི་དཔེ་བརྗོད་ན་དགེ་སློང་རྡོ་རྗེ་འཛིན་པ་ཤི་འཕོས་པའི་ཚེ་དེའི་རྒྱུད་ཀྱི་སྔགས་སྡོམ་གཏོང་བར་ཐལ། 
དེ་ཤི་འཕོས་ནས་ལྷར་སྐྱེས་པའི་ཚེ་དེའི་རྒྱུད་ལ་དགེ་སློང་རྡོ་རྗེ་འཛིན་པའི་རྒྱུད་ཀྱི་སྔགས་སྡོམ་མེད་པའི་ཕྱིར་ཞེས་བརྗོད་ན་ལན་ཅི་ཡོད་དམ་སོམས་ཤིག །དྲུག་པ་གསུམ་ལྡན་གྱི་གང་ཟག་གིས་སྡོམ་པ་གསུམ་ཉམས་སུ་ལེན་པའི་ཚུལ་ལ་གཉིས་ཏེ།  སོ་སོའི་བསླབ་
བྱ་ལ་སློབ་ཚུལ་དང་།  རེ་རེ་ཡང་གསུམ་ལྡན་དུ་ཉམས་སུ་ལེན་པའི་ཚུལ་ལོ། །དང་པོ་ནི།  རྟེན་གྱི་གང་ཟག་སྡོམ་གསུམ་རིམ་ཅན་དུ་བླངས་པའི་དགེ་སློང་རྡོ་རྗེ་འཛིན་པ་དེས་ཇི་སྲིད།  བསླབ་དང་དབང་ལས་རྣལ༷་འབྱོ༷ར་གྲོལ། །ཞེས་གསུངས་པ་ལྟ་བུའི་
རྟོགས་པ་མ་ཐོབ་ཀྱི་བར་དུ་རང་རྒྱུད་ཀྱི་སྡོམ་པ་གསུམ་གྱི་བསླབ་བྱ་རྣམས་ལ་སེམས་ཅན་གྱི་དོན་དུ་འགྱུར་བ་སོགས་ཀྱི་དགོས་པ་ཁྱད་པར་ཅན་མེད་པའི་ཚེ་སོ་སོའི་གཞུང་ལས་འབྱུང་བ་བཞིན་བསླབ་དགོས་ཏེ།  གསང་བ་འདུས་པའི་བཤད་རྒྱུད་ལས།  ཕྱི་རུ་ཉན་
ཐོས་སྤྱོད་པ་བསྲུང་། །ནང་དུ་འདུས་པའི་དོན་ལ་དགའ། །ཞེས་པ་དང་།  རྡོ་རྗེ་གུར་ལས།  ཉན་ཐོས་སྤྱོད་པ་སྲུང་བ་པོ། །ཞེས་པ་དང་།  ལྟུང་བ་འཆད་པའི་སྐབས་སུ་ཡང་།  སྡོམ་པ་གཉིས་ཀྱི་བཅས་པ་ལས། །དགོས་པ་མེད་པར་འདའ་བ་དང་། །
9-3-80a


ཞེས་སོགས་དགོས་མེད་དུ་བཅས་པ་ལས་འདས་པ་ཡན་ལག་གི་ལྟུང་བར་བཤད་པའི་ཕྱིར་དང་།  སྤྱོད་འཇུག་ལས།  འཇིག་རྟེན་མ་དད་གྱུར་པ་རྣམས། །མཐོང་དང་དྲིས་ཏེ་སྤང་བར་བྱ། །ཞེས་པ་དང་།  རྐང་པ་རྐྱོང་
སྟེ་མི་འདུག་ཅིང་། །ཞེས་སོགས་ཀྱི་བསླབ་བྱ་མང་དུ་གསུངས་པའི་ཕྱིར་དང་།  གཞུང་འདིར་ཡང་།  འདི་ལ་སྡིག་ཏོ་མི་དགེའི་ཕྱོགས། །ཕལ་ཆེར་ཉན་ཐོས་ལུགས་བཞིན་བསྲུངས། །ཞེས་སོགས་མང་དུ་གསུངས་པའི་ཕྱིར་རོ། །སེམས་ཅན་གྱི་དོན་དུ་འགྱུར་
བ་སོགས་དགོས་པ་ཁྱད་པ་ཅན་ཡོད་པའི་ཚེ་རྟེན་གྱི་གང་ཟག་དེ་ལྟ་བུ་ལ་ལུས་ངག་གི་བཅས་པ་ཐམས་ཅད་ཀྱང་གནང་སྟེ།  སྤྱོད་འཇུག་ལས།  ཐུགས་རྗེ་མངའ་བ་རིང་གཟིགས་པས། །བཀག་པ་རྣམས་ཀྱང་དེ་ལ་གནང་། །ཞེས་པ་དང་།  བཞི་བརྒྱ་པ་ལས།
བསམ་པས་བྱང་ཆུབ་སེམས་དཔའ་ལ། །དགེ་བའམ་ཡང་ན་མི་དགེ་བ། །ཐམས་ཅད་དགེ་ལེགས་ཉིད་འགྱུར་ཏེ། །གང་ཕྱིར་སེམས་དེ་གཙོ་བོའི་ཕྱིར། །ཞེས་པ་དང་།  གཞུང་འདིར་ཡང་།  འཇིག་རྟེན་འཇུག་པའི་རྒྱུར་གྱུར་ན། །ཐེག་ཆེན་སོ་སོར་ཐར་ལ་གནང་།།
ཞེས་སོགས་གསུངས་པའི་ཕྱིར་རོ། །གཉིས་པ་ནི།  བྱང་ཆུབ་སེམས་དཔའ་ཕྱག་ན་པདྨོའི་རྣམ་པར་འཕྲུལ་པ་རྣལ་འབྱོར་གྱི་དབང་ཕྱུག་ས་སྐྱ་པ་ཆེན་པོའི་ཞལ་ནས་དེ་ལྟར་དབང་བཞིའི་ལམ་དེ་དག་བསྡུས་ནས་ཉམས་སུ་ལེན་ན་སྡོམ་པ་གསུམ་ལྡན་གྱིས་སྒོམ་དགོས་ཏེ། 
སོ་སོར་ཐར་པའི་སྡོམ་པ་དགེ་བསྙེན་ནས་དགེ་སློང་གི་བར་དུ་ཐོབ་པ་བྱང་ཆུབ་སེམས་དཔའི་སྨོན་འཇུག་གི་སེམས་བསྐྱེད་ཐོབ་པ་གསང་སྔགས་ཀྱི་དབང་བཞིའི་སྡོམ་པ་ཐོབ་པའོ། །དེ་ལ་ཉན་ཐོས་ཉོན་མོངས་པའི་སྐྱོན་ཤེས་པར་བྱས་ནས་མྱུར་དུ་སྤོང་།  བྱང་ཆུབ་སེམས་དཔས་
9-3-80b


སྐྱོན་ཡོན་འདྲེས་པར་བྱས་ནས་གནས་གྱུར།  གསང་སྔགས་པས་ཉོན་མོངས་པ་གང་སྐྱེས་པ་དེའི་ཚེ་ཆོས་ཅན་དང་ཆོས་ཉིད། དབྱིངས་དང་ཡེ་ཤེས་གཉིས་སུ་མེད་པར་གཟུགས་ཀྱི་སྐུ་དང་ཆོས་ཀྱི་སྐུ་གཉིས་ཀྱི་ངོ་བོ་ཤེས་པར་བྱས་ནས་ལྷུན་གྲུབ་དང་གནས་འགྱུར་གྱི་སྐུ་སྒྲུབ་
པར་བྱེད་དོ། །དེ་ལྟར་ཤེས་པར་བྱས་ཏེ་མཚན་མ་དང་རྣམ་རྟོག་ཡེ་ཤེས་ཀྱིས་དབང་དུ་བསྡུ་བའི་ཕྱིར་འདི་ལྟར་བསྒོམ་སྟེ་དཔེར་ན་བདག་ལ་འདོད་ཆགས་སྐྱེས་ན་གཉེན་པོས་འདོད་ཆགས་ཀྱི་དབང་དུ་མི་གཏོང་བ་ནི་སོ་སོར་ཐར་པའི་སྡོམ་པའོ། །དེ་ནས་སེམས་ཅན་ཐམས་ཅད་ཀྱི་ཉོན་
མོངས་པ་བདག་ལ་སྨིན་ནས་སེམས་ཅན་གྱི་ཉོན་མོངས་པ་བག་ཆགས་དང་བཅས་པ་བྲལ་ནས་མངོན་པར་རྫོགས་པར་འཚང་རྒྱ་བར་གྱུར་ཅིག་ཅེས་བྱང་ཆུབ་ཀྱི་སེམས་སྒོམ་པ་ནི་བྱང་ཆུབ་སེམས་དཔའི་སྡོམ་པའོ། །དེ་ནས་རང་ཡི་དམ་ལྷར་སྒོམ།  བླ་མ་སྤྱི་བོའམ་སྙིང་ཁར་བསྒོམས་ལ་མོས་གུས་བྱ།  སེམས་
རྫོགས་རིམ་གྱི་ཡེ་ཤེས་དྲན་པར་བྱ་སྟེ་རང་གི་ལུས་ངག་ཡིད་གསུམ་སངས་རྒྱས་ཆོས་ཀྱི་སྐུ་དང་།  གཟུགས་སྐུར་སྒོམ་པ་ནི་རིག་འཛིན་སྔགས་ཀྱི་སྡོམ་པའོ། །དེ་ནས་དགེ་བའི་རྩ་བ་སངས་རྒྱས་ཐོབ་པར་གྱུར་ཅིག་ཅེས་བསྔོ་བ་དང་།  དེ་མ་རྟོགས་པའི་སེམས་ཅན་ལ་སྙིང་
རྗེ་སྒོམ་པ་དང་།  ཆོས་ཐམས་ཅད་རྨི་ལམ་ལྟ་བུའི་ངང་ལས་སྤྱོད་ལམ་བྱ་བ་སྡོམ་པ་གསུམ་མྱུར་དུ་སྨིན་པར་བྱེད་པའོ་ཞེས་གསུངས་པའི་དོན་ཉམས་ལེན་གྱི་རིམ་པ་ལ་སྦྱོར་བ་ནི་སེམས་རྒྱུད་ལ་འདོད་ཆགས་ལྟ་བུ་གཅིག་སྐྱེས་པའི་ཚེ་རང་ཉིད་རྟེན་དགེ་སློང་ལ་སོགས་པ་ཡིན་པ་རྒྱུ་
མཚན་དུ་བྱས་ནས་སྤོང་བ་ནི་སོ་ཐར་གྱི་ཉམས་ལེན།  དེའི་སྟེང་དུ་གཞན་གྱི་འདོད་ཆགས་འབྲས་བུ་དང་བཅས་པ་ཐམས་ཅད་རང་ལ་ལེན་ཅིང་རང་གི་བདེ་དགེས་སེམས་ཅན་དེ་དག་བདེ་བར་བསྒོམ་པ་ནི་བྱང་སེམས་ཀྱི་སྡོམ་པའི་ཉམས་ལེན།  དེ་ནས་བླ་མ་སྤྱི་བོའམ་སྙིང་ཁར་
9-3-81a


བསྒོམ་ནས་གུས་འདུད་དྲག་པོ་བྱས།  འདོད་ཆགས་ཀྱི་གསལ་བའི་ངོ་བོ་དེ་ཉིད་འོད་དཔག་མེད་དུ་བསྒོམ་ནས་སེམས་བདེ་སྟོང་གི་ངང་ལ་མཉམ་པར་བཞག་པ་ནི་སྔགས་སྡོམ་གྱི་ཉམས་ལེན་ནོ། །དེ་བཞིན་དུ་ཉོན་མོངས་པ་གཞན་
རྣམས་ལ་ཡང་ཅི་རིགས་པར་སྦྱར་བར་བྱའོ། །དེ་དག་ནི་སོ་ཐར་གསུམ་ལྡན་དུ་ཉམས་སུ་ལེན་པའི་ཚུལ་ཡིན་ལ།  བྱང་སེམས་ཀྱི་སྡོམ་པ་གསུམ་ལྡན་དུ་ཉམས་སུ་ལེན་ཚུལ་ནི་གཞན་ལ་སྦྱིན་པ་གཏོང་བའི་ཚེ་ཡང་ཆང་དང་དུག་དང་མཚོན་ཆ་ལ་སོགས་པ་གཞན་
ལ་གནོད་པའི་རྒྱུར་གྱུར་པའི་མ་དག་པའི་སྦྱིན་པ་སྤོང་བ་ནི་སོ་ཐར་གྱི་ཉམས་ལེན།  སྦྱིན་པས་འཁོར་དུ་བསྡུས་ནས་ཆོས་བསྟན་པས་གནས་སྐབས་དང་།  མཐར་ཐུག་གི་ཕན་བདེ་ལ་འགོད་ཅིང་དེའི་ཚེ་ཡང་འཁོར་གསུམ་མི་དམིགས་པའི་ཤེས་རབ་ཀྱིས་ཟིན་པ་ནི་
བྱང་སེམས་ཀྱི་སྡོམ་པའི་ཉམས་ལེན།  ཐམས་ཅད་ཀྱང་ལྷ་དང་ཡེ་ཤེས་སུ་བྱིན་གྱིས་བརླབས་ནས་ལོངས་སྤྱོད་པ་ནི་སྔགས་སྡོམ་གྱི་ཉམས་ལེན་ནོ། །དེ་བཞིན་དུ་ཕ་རོལ་ཏུ་ཕྱིན་པའི་སྤྱོད་པ་ཐམས་ཅད་ཀྱང་གསུམ་ལྡན་དུ་ཉམས་སུ་ལེན་པར་བྱའོ། །སྔགས་
སྡོམ་གསུམ་ལྡན་དུ་ཉམས་སུ་ལེན་པའི་ཚུལ་ནི་སྒྲུབ་ཐབས་གཅིག་ལ་ཡང་སྔོན་འགྲོ་ཐམས་ཅད་ཀྱང་སྡོམ་གསུམ་གྱི་ཉམས་ལེན་དང་།  དངོས་གཞི་ཡང་སྡོམ་གསུམ་གྱི་ཉམས་ལེན་དང་།  ལྷའི་སྐུ་དང་ཕྱག་མཚན་ཐམས་ཅད་ཀྱང་སྡོམ་གསུམ་གྱི་ཉམས་ལེན་དུ་འགྲོ་བའི་ཚུལ་བླ་
མ་དམ་པ་བསྟེན་ཅིང་།  དྲི་མ་མེད་པའི་རྒྱུད་སྡེ་ལ་སྦྱངས་ཏེ་ཤེས་པར་བྱའོ། །འདིར་ནི་ཇི་ལྟར་སྦྱོར་བའི་ཚུལ་རྒྱས་པར་སྤྲོ་བའི་སྐབས་མ་ཡིན་པས་མ་བྲིས་ལ།  དེ་ལྟར་འབྱུང་བའི་ཤེས་བྱེད་ནི་གསང་བ་འདུས་པའི་མན་ངག་འགའ་ཞིག་ལས་ལམ་རིམ་པ་ལྔ་པོ་རེ་རེ་ལ་ཡང་
9-3-81b


རིམ་པ་ལྔ་ལྡན་དུ་ཉམས་སུ་ལེན་པའི་ཚུལ་བཤད་པ་དང་།  རྗེ་བཙུན་ན་རོ་ཏ་པའི་འཁོར་ལོ་བདེ་མཆོག་གི་མན་ངག་འགའ་ཞིག་ལས་སྒྲུབ་ཐབས་སྤྱི་སྐུ་གསུམ་གྱི་ཉམས་ལེན་ལ་སྦྱོར་ཞིང་བྱེ་བྲག་ཏུ་དེ་རེ་རེ་ཡང་སྐུ་གསུམ་གྱི་ཉམས་ལེན་ལ་སྦྱོར་བའི་ཚུལ་བཤད་པ་
དང་།  རྣལ་འབྱོར་དབང་ཕྱུག་གི་མན་ངག་ལས་དབང་བཞིའི་ལམ་རེ་རེ་ཡང་དབང་བཞི་ལྡན་དུ་ཉམས་སུ་ལེན་ཚུལ་བཤད་པ་བཞིན་འདིར་ཡང་ཉོན་མོངས་པ་རེ་རེ་སྤོང་བ་ལ་སྡོམ་པ་གསུམ་ལྡན་གྱི་ཉམས་ལེན་སྦྱོར་བར་གསུངས་པས་ཤེས་པར་ནུས་སོ། །མདོར་ན་
ཕ་རོལ་ཏུ་ཕྱིན་པའི་གཞུང་ལུགས་ལས་གོ་སྒྲུབ་ཉམས་སུ་ལེན་པའི་ཚེ་ཕར་ཕྱིན་རེ་རེ་ཡང་ཕར་ཕྱིན་དྲུག་ལྡན་དུ་ཉམས་སུ་ལེན་པ་ལྟར་གསུམ་ལྡན་གྱི་གང་ཟག་གིས་སྡོམ་པ་གསུམ་པོ་རེ་རེ་ཡང་སྡོམ་པ་གསུམ་ལྡན་དུ་ཉམས་སུ་ལེན་པའི་ཚུལ་དྲི་མ་མེད་པའི་བཀའ་དང་
བསྟན་བཅོས་ཀྱི་སྟེང་དུ་བློ་གྲོས་ཀྱི་མིག་རྒྱ་སྐྱེད་དེ་ཤེས་པར་བྱས་ནས་སྒོ་གསུམ་གྱི་བྱ་བ་རེ་རེས་ཀྱང་རང་གཞན་ལ་ཕན་བདེ་བསམ་གྱིས་མི་ཁྱབ་པ་བསྒྲུབ་པར་བྱའོ། །ལེགས་གསུངས་འདུལ་བའི་རྒྱ་མཚོ་ཟབ་མོ་མདོ་སྡེའི་རིན་ཆེན་གྱིས་གཏམས་ཆོས་མངོན་གསེར་རིའི་དབུས་ན་
རྒྱུད་སྡེའི་རིན་ཆེན་ལས་གྲུབ་ཕྱི་ནང་གསུང་རབ་ལྷུན་པོའི་སྤོར། །རིམ་གཉིས་བདུད་རྩིའི་ཟས་ཀྱིས་བློ་གྲོས་སྤྱན་སྟོང་འབར་བའི་གཟི་ལྡན་ལྷ་དབང་ལྷ་ཡི་བླ་མ་ས་སྐྱ་པ་ཞེས་གྲགས་པའི་བ་དན་གཡོ་བ་གང་དེ་ཡིས། །སྒྲུབ་དང་སུན་འབྱིན་རིགས་པའི་རྡོ་རྗེ་མཆོག་བསྣམས་
གངས་ཅན་ལོག་སྨྲ་ལྷ་མིན་དཔུང་ཚོགས་བསྟན་པ་རྒྱ་མཚོའི་ཕ་མཐར་བསྐྲད་ཅིང་བློ་གསལ་ཉེ་དབང་ཚོགས་དབུས་སུ། །སྡོམ་གསུམ་ཆོས་ཀྱི་རྔ་ཆེན་བརྡུངས་པས་སྐལ་ལྡན་གདུལ་བྱ་ལྷ་བུའི་ཚོགས་ཀྱི་མི་ཤེས་གཉིད་རབ་སློང་ཞིང་དུག་གསུམ་འདོད་མེ་ཞི་བའི་དགའ་བདེའི་
9-3-82a


དཔལ་ལ་འགོད་པར་མཛད། །གང་གི་གསུང་རབ་ལྷ་ལམ་ཡངས་པ་ནས། །ལེགས་བཤད་འོད་སྟོང་ཀུན་ནས་འཕྲོ་བ་འདི། །ཁོ་བོའི་རྣམ་དཔྱོད་རྟ་བདུན་གྱིས་དྲངས་ནས། །ཐུབ་བསྟན་གླིང་བཞི་ཀུན་ཏུ་གསལ་བར་
བྱས། །སྲིད་གསུམ་བླ་མའི་དགོངས་པ་ཇི་བཞིན་དུ། །དུས་གསུམ་རྒྱལ་བའི་བསྒྲོད་པ་གཅིག་པའི་ལམ། །སྡོམ་གསུམ་ཉམས་ལེན་ཇི་བཞིན་གསལ་བྱས་པའི། །སྒོ་གསུམ་དགེ་བ་བྱང་ཆུབ་ཆེན་པོར་བསྔོ། །བདག་ཀྱང་དེང་ནས་ཚེ་རབས་ཐམས་
ཅད་དུ། །ཀུན༷་དག༷འི་ལེགས་བཤད་བཟ༷ང་པོ༷་རྟག་ཉན་ཅིང་། །དཀོ༷ན་མཆོ༷ག་དད་པའི་རྒྱ༷ལ་མཚ༷ན་རྩེར་མཆོད་ནས། །སང༷ས་རྒྱ༷ས་བསྟན་པ་འཕེ༷ལ་བའི་མཐུ་ལྡན་ཤོག །འགྲོ་ཀུན་ངག་གིས་མི་སྙན་བརྗོད་བྱེད་ཅིང་། །ལུས་ཀྱིས་ཅིག་ཆར་བརྡེག་དང་འཚོག་
ན་ཡང་། །གནོད་པའི་བསམ་པ་སྐད་ཅིག་མི་སྐྱེ་བར། །ལྷག་པར་དེ་ལ་དགའ་བ་སྒོམ་པར་ཤོག །མར་གྱུར་འགྲོ་ལ་ཕན་བདེ་སྒྲུབ་པའི་ཕྱིར། །བླ་མེད་བྱང་ཆུབ་མཆོག་གི་སེམས་བསྐྱེད་ནས། །འགྲོ་བའི་སྡུག་བསྔལ་མ་ལུས་བདག་སྨིན་ཅིང་། །
བདག་གི་བདེ་དགེས་འགྲོ་རྣམས་བདེ་བར་ཤོག །དཀྱིལ་འཁོར་བཞི་ལ་དབང་བཞིའི་ཆབ་ཀྱིས་གཏམས། །ཅིར་སྣང་ལྷ་དང་བདེ་བའི་རྣམ་པར་ཤར། །སྤྱོད་པས་བོགས་དབྱུང་ཉེ་རྒྱུས་མཚམས་སྦྱར་ནས། །རྡོ་རྗེ་འཛིན་ས་མངོན་དུ་འགྱུར་བར་ཤོག །གནས་
སྐབས་ཀུན་ཏུ་དམ་ཆོས་སྒྲུབ་པ་ཡི། །འགལ་རྐྱེན་སྤོང་ཞིང་མཐུན་རྐྱེན་ཀུན་ཚང་ནས། །མཁྱེན་རབ་དབང་ཕྱུག་རྗེ་བཙུན་ས་སྐྱ་པའི། །གསུང་རབ་ཕྱོགས་བཅུར་རྒྱས་པའི་མཐུ་ལྡན་ཤོག།  །།ཅེས་པ་འདི་ནི་རྒྱལ་བ་ཁྱབ་བདག་རྡོ་རྗེ་འཆང་དང་
9-3-82b


དབྱེར་མ་མཆིས་པ་རྗེ་བཙུན་ཀུན་དགའ་བཟང་པོའི་ཞལ་སྔ་ནས་དང་།  ཁམས་གསུམ་འགྲོ་བའི་བླ་མ་རྒྱལ་བ་མུས་པ་ཆེན་པོ་དང་།  ཆོས་ཀྱི་རྒྱལ་པོ་ཀུན་མཁྱེན་སངས་རྒྱས་འཕེལ་ལ་སོགས་པ་མཁས་གྲུབ་མང་པོའི་ཞབས་རྡུལ་སྤྱི་བོས་བླངས་པ་ལ་བརྟེན་ནས་སྡེ་སྣོད་
གསུམ་དང་རྒྱུད་སྡེ་བཞིའི་དོན་ལ་བློ་ཁ་ཅུང་ཟད་ཕྱོགས་ཤིང་ཁྱད་པར་ལུགས་འདི་ལ་གཞན་གྱིས་མི་འཕྲོགས་པའི་སྤོབས་པ་ཐོབ་པ་ཤཱཀྱའི་དགེ་སློང་བསོད་ནམས་སེང་གེས་ལྕགས་མོ་སྦྲུལ་གྱི་ལོ་དབོའི་ཟླ་བ་ལ་འབྲས་ཡུལ་རྫོང་དཀར་གྱི་སྐྱེད་མོས་ཚལ་དུ་སྦྱར་བའོ།།      །།
འདི་བསྒྲུབས་པ་ལས་བྱུང་བ་ཡི། །དགེ་བའི་རྩ་བ་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །
བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག།    །།དགེའོ།།    །།དགེའོ།།    །།དགེའོ།།          །།

9-4-1a


༄༅།  །སྡོམ་པ་གསུམ་གྱི་བསྟན་བཅོས་ལ་དྲིས་ཤིང་རྩོད་པའི་ལན་སྡོམ་གསུམ་འཁྲུལ་སྤོང་ཞེས་བྱ་བ་མཁས་པའི་དབང་པོ་བསོད་ནམས་སེང་གེས་མཛད་པ་བཞུགས་སོ། །
9-4-1b


༄༅། །དཔལ་ལྡན་རང་བཞིན་བདེ་བའི་གོ་སྐབས་གཞོམ་མེད་ནང་གི་བདག་ཉིད་ཧཱུྃ་གི་དངོས། །བདེ་བའི་ཐབས་མཆོག་སྨིན་བྱེད་དབང་གིས་བཛྲ་གསུམ་གྱི་སྲུང་བ་བླ་མེད་བསྒྲུབས། །མི་
འགྱུར་བདེ་བའི་ཕཊ་ཀྱིས་མཚན་རྟོག་འགགས་པའི་སྦུབས་ལས་སྙིང་པོ་གསལ་འཐོན་པ། །རྒྱུད་གསུམ་ངོ་བོ་དབྱེར་མེད་མངོན་གྱུར་འཇམ་དབྱངས་བླ་མའི་ཞབས་ཀྱི་པདྨོར་འདུད། །གང་གི་གསུང་རབ་ཉེས་མེད་གངྒཱའི་རྒྱུན། །
རྟོག་གེའི་བློ་ཡིས་མ་འབྲེལ་འགལ་བ་དང་། །ཡིད་ཆེས་ཁུངས་མེད་དགག་ཡུལ་མ་ངེས་ཞེས། །དྲི་བའི་ཚུལ་གྱིས་ཉེས་པ་བཀོད་པའི་ལན། །གྷེཌྜ་གྷེཌྜ་དྷ་རྨཱ་ར་ནེ་ཏ། །སཾ་པྲ་ར་ནེ་འུར་ཤུད་བེ་དཱ་ར། །ཧ་ན་ཧ་ན་ཀ་ཧ་
ཀ་ཧའི་སྒྲ། །ཀྲོག་ཀྲོག་སྒོར་ནི་ཏྲིག་ཏྲིག་སོན་པར་གྱིས། །འགྲོ་བ་མཐའ་དག་གི་ཕན་བདེའི་འབྱུང་གནས་ནི་སངས་རྒྱས་ཀྱི་བསྟན་པ་ཡིན་ཅིང་།  དེའང་ཕྱིན་ཅི་ལོག་ཏུ་སྤྱོད་པ་ལས་ཕན་བདེ་མི་འབྱུང་གི།  ཕྱིན་ཅི་མ་ལོག་
9-4-2a


པ་རྣམ་པར་དག་པ་སྤྱོད་པ་ལས་གནས་སྐབས་དང་མཐར་ཐུག་གི་ཕན་བདེ་འབྱུང་བར་དགོངས་ནས། རྒྱ་གར་འཕགས་པའི་ཡུལ་ནའང་འཛམ་གླིང་རྒྱན་དྲུག་ལ་སོགས་པའི་པཎ་གྲུབ་
རྣམས་དང་།  གངས་རིའི་ཁྲོད་འདིར་ཡང་སྐྱེས་མཆོག་རིན་ཆེན་བཟང་པོ་ལ་སོགས་པའི་མཁས་ཤིང་གྲུབ་པ་བརྙེས་པ་རྣམས་ཀྱིས་ཆོས་ལོག་སུན་ཕྱུང་ནས་བསྟན་པ་རྣམ་པར་དག་པའི་ཉམས་ལེན་ལུང་དང་རིགས་པས་
བསྒྲུབ་པར་མཛད་དོ། །ཚུལ་དེ་བཞིན་དུ་དྲང་བའི་དོན་དུ་ན། །སྐྱེ་བ་གཞན་དུ་སྦྱངས་པ་དང་། །མཁས་པ་དུ་མ་བསྟེན་པ་དང་། །རྣམ་པར་དཔྱོད་པའི་བློ་གྲོས་ཀྱིས། །ཤེས་བྱ་ཀུན་ལ་འཇིགས་མེད་ཐོབ། །ཅེས་
ཞལ་གྱིས་བཞེས་པ་ལྟར་གྱི་ཡོན་ཏན་བརྙེས་ཤིང་།  ངེས་པའི་དོན་དུ་ན་སངས་རྒྱས་ཐམས་ཅད་ཀྱི་ཡེ་ཤེས་གཅིག་དུ་བསྡུས་པ་འཇམ་པའི་དབྱངས་ཀྱི་རྣམ་པར་འཕྲུལ་པར་གདོན་མི་ཟ་བ་དཔལ་ལྡན་ས་སྐྱ་པཎྜི་ཏ་ཆེན་པོས།  
9-4-2b


ཆོས་རྗེ་ས་སྐྱ་པ་ཆེན་པོ་འདས་པ་ནས་བསྟན་བཅོས་འདི་མ་བརྩམས་ཀྱི་བར་གྱི་ཆོས་ལོག་པ་གངས་རིའི་ཁྲོད་འདིར་བྱུང་བ་ཐམས་ཅད་སུན་ཕྱུང་ནས་བསྟན་པ་རྣམ་པར་དག་པའི་ཉམས་ལེན་ཚུལ་བཞིན་དུ་སྒྲུབ་པའི་བསྟན་བཅོས་ཡིད་བཞིན་གྱི་ནོར་བུ་ལྟ་བུ་སྡོམ་པ་གསུམ་
གྱི་རབ་ཏུ་དབྱེ་བ་འདི་མཛད་དོ། །འདི་ཉིད་གསུང་རབ་ཀྱི་གནད་གོ་བར་ནུས་པའི་བློ་གྲོས་དང་།  བཀའ་སྲོལ་བཟང་པོའི་རྗེས་སུ་འཇུག་པར་རང་དབང་བའི་བསོད་ནམས་དང་ལྡན་པའི་མཁས་པ་དག་གིས་བཤད་ཉན་གྱིས་གཏན་ལ་ཕབ་སྟེ་དར་ཞིང་རྒྱས་པར་
མཛད་པའི་སྐབས་སུ།  ཐུགས་རབ་རྒྱ་ཆེ་ཞིང་སྡེ་སྣོད་ལ་སྦྱངས་པའི་བཤེས་གཉེན་ཆེན་པོ་ཤཱཀྱ་མཆོག་ལྡན་པ་ཞེས་བྱ་བས།  སྡོམ་གསུམ་རབ་དབྱེའི་བཤད་པ་དེ་དག་ནི།  ཕྱོགས་སྔ་མ་ལོངས་པ་དང་།  ལུང་ཁུངས་མེད་པ་དང་།  ཁས་བླངས་ནང་འགལ་
བ་དང་།  ཚད་ལྡན་གྱི་གཞུང་དང་འགལ་བ་དང་།  དངོས་སྟོབས་ཀྱི་རིགས་པ་དང་འགལ་བར་དོགས་ནས་དྲི་བའི་གནས་བརྒྱ་རྩ་བརྒྱད་བཀོད་པའི་ཚིགས་སུ་བཅད་པ་མང་པོ་ཞིག་སྤེལ་ཏེ་དབུས་གཙང་ཁམས་གསུམ་ན་བཞུགས་པའི་མཁས་པ་བསྟན་བཅོས་
འདིའི་རྗེས་སུ་འབྲང་བ་རྣམས་ཀྱིས་ལན་ཐོབ་ཅེས་དྲིལ་བསྒྲགས་སོ། །དེ་ལ་ཁོ་བོས་ཐོག་མར་མཐོང་བའི་ཚེ།  དོགས་པ་ཞུགས་པའི་དྲི་བ་བཞི་ཡོད་ཅིང་། རྣམ་དཔྱོད་དང་ལྡན་པ་དག་གིས་དོགས་པ་སེལ་དགོས་པའི་དཔྱོད་ལྡན་གྱི་དྲི་བ་ཡང་འགའ་ཞིག་འདུག་
མོད་ཀྱི།  ཕལ་ཆེར་ནི་ཚིག་ལ་འཁྲི་བ་ཙམ་དང་།  གཡས་ཆུང་བ་ཙམ་དང་།  འགའ་ཞིག་ནི་རང་ཉིད་ཀྱིས་མ་གོ་བས་གཞན་གོ་བ་མེད་དམ་སྙམ་པ་དང་།  ལ་ལ་ནི་ཐུག་མེད་ཀྱི་དྲི་བ་ལྟ་བུར་སྣང་བས་ལན་གྱི་སྤྲོས་པ་ལ་བརྩམ་པ་མ་བྱས་ཤིང་།  སྙིགས་
9-4-3a


དུས་ཀྱི་སྐྱེ་བོ་རང་སྐྱོན་མེ་ལོང་བསྟན་ཀྱང་མི་མཐོང་།  གཞན་སྐྱོན་སྣང་བྱེད་མེད་ཀྱང་གསལ་བ་དག་གིས་ཕྱོགས་འཛིན་གྱི་ཅ་ཅོས་རང་གཞན་གྱི་རྒྱུད་བསྲེགས་ཀྱི་དོགས་ནས་རེ་ཤིག་བཏང་སྙོམས་སུ་བཞག་པ་ཡིན་ན་ཡང་།  ལུགས་
མཆོག་འདི་ལ་ཤིན་ཏུ་སྡང་བའི་སྐྱེ་བོ་འགའ་ཞིག་གིས་ཚིག་འདི་ཙམ་གྱིས་མགྲིན་པ་བཏེགས་ནས་ཆོས་དང་།  གང་ཟག་ལ་ཤིན་ཏུ་སྨོད་པའི་ཉེས་པར་འགྱུར་བར་མཐོང་ནས་དེ་དག་ཚར་བཅད་པའི་ཕྱིར་དང་།  ལུགས་འདི་ལ་ཤིན་ཏུ་དད་ཀྱང་རང་སྟོབས་ཀྱིས་
འབྱེད་པར་མ་ནུས་པའི་སྐྱེ་བོ་ཐེ་ཚོམ་གྱི་ལང་ལོང་དུ་གྱུར་པ་དག་ངེས་པ་བསྐྱེད་པའི་སྒོ་ནས་རྗེས་སུ་བཟུང་བའི་ཕྱིར་དང་།  རྗེས་འབྲང་དག་གིས་ལན་སྨྲ་བར་མ་ནུས་སོ་ཞེས་མགྲིན་པ་བསྒྲིགས་པས་ཀྱང་ཅུང་ཟད་རྐྱེན་བྱས་ཏེ།  ད་ནི་ཁོ་བོས་ལན་རིམ་པ་བཞིན་སྨྲ་བ་
འདི་ལ་དབུས་གཙང་ཁམས་གསུམ་གྱི་མཁས་པ་ལུང་དང་རིགས་པ་མཁྱེན་པ་བློ་གཟུ་བོར་གནས་པ་དག་གིས་ཚུལ་བཞིན་དུ་དཔྱོད་ཅིག  ༼༡༽། དེ་ལ།  ཉན་ཐོས་ལུགས་ལ་སོ་ཐར་གྱི། །སྡོམ་པ་རིག་བྱེད་མིན་པའི་གཟུགས། །ཁོ་ནར་བཤད་པ་གང་ན་ཡོད། །རིག་བྱེད་
གཟུགས་ཀྱང་མ་བཤད་དམ། །ཅེས་པའི་ལན་ནི།  ཁོ་ནར་བཤད་པ་བསྟན་བཅོས་འདིའི། །ཚིག་ཟིན་དོན་ཐོབ་གང་ན་ཡོད། །ཅེས་པར་འདྲིའོ། །ཉན་ཐོས་སྡོམ་པ་རྣམ་རིག་མིན། །ཅེས་པས་བསྟན་ནོ་སྙམ་ན།  དེ་ནི་ཚིགས་བཅད་སྦྱར་བདེ་བའི་ཆེད་དུ་
རིག་བྱེད་མིན་པ་དངོས་སུ་སྨོས་ནས་རིག་བྱེད་ཀྱི་གཟུགས་ཀྱང་མཚོན་ནས་བསྟན་པ་སྟེ།  མཛོད་ལས།  དང་པོའི་རྣམ་རིག་རྣམ་རིག་མིན། །སོ་སོར་ཐར་དང་བྱ་བའི་ལམ། །ཅེས་དང་།  འཆལ་བའི་ཚུལ་ཁྲིམས་མི་དགེའི་གཟུགས། །དེ་སྤོང་ཚུལ་
9-4-3b


ཁྲིམས་རྣམ་གཉིས་སོ། །ཞེས་སྡོམ་པ་ལ་རིག་བྱེད་དང་རིག་བྱེད་མ་ཡིན་པའི་གཟུགས་གཉིས་ཡོད་པར་བཤད་བཞིན་དུ།  རྣམ་རིག་མིན་རྣམ་གསུམ་ཤེས་བྱ། །སྡོམ་དང་སྡོམ་པ་མིན་དང་གཞན། །ཅེས་པའི་སྡེབ་སྦྱོར་གྱི་ཚེ་སྡོམ་པ་རིག་བྱེད་མིན་པའི་
གཟུགས་ཀྱི་དབྱེ་བར་བཤད་པ་བཞིན་ནོ། །གཞན་དུ་ན་འདི་ལ་ཡང་དེ་ལྟར་དྲི་བར་བྱེད་དམ།  དེ་བཞིན་དུ་མངོན་རྟོགས་རྒྱན་ལས།  ཉན་ཐོས་ཞི་བ་ཚོལ་རྣམས་ཀུན་ཤེས་ཉིད་ཀྱིས་ཉེར་ཞིར་ཁྲིད་མཛད་གང་ཡིན་དང་། །ཞེས་པའི་ཉན་ཐོས་ཅེས་པའི་
ཚིག་གིས་རང་སངས་རྒྱས་ཀྱང་མཚོན་ནས་བསྟན་པར་འགྲེལ་བ་ཉིད་ལས་བཤད་པ་དང་།  འདུལ་བ་སུམ་བརྒྱ་པར།  ཕྱི་དྲོའི་ཁ་ཟས་དངུལ་ཉིད་སྤོང་བ་དེ། །ཞེས་གསུངས་པའི་དངུལ་ཞེས་པའི་ཚིག་གིས་གསེར་མཚོན་ནས་བསྟན་པར་འགྲེལ་པ་
འོད་ལྡན་ཉིད་ལས་གསུངས་པ་ལ་ཡང་།  ཐེག་ཆེན་ལུགས་ལ་ཉེར་ཞིར་ནི། །ཁྲིད་པར་བྱ་བ་ཉན་ཐོས་དག །ཁོ་ནར་བཤད་པ་གང་ན་ཡོད། །ཅེས་དང་།  འདུལ་བའི་ལུགས་ལ་དགེ་ཚུལ་གྱིས། །གསེར་མི་སྤོང་བར་དངུལ་ཉིད་ནི། །སྤོང་
བར་བཤད་པ་གང་ན་ཡོད། །ཅེས་པ་ཡང་དྲི་བར་བྱེད་དམ།  དེས་ན་བསྟན་བཅོས་ཆེན་པོའི་ཚིག་ལ་སྤྱིར་བཏང་དམིགས་བསལ་དང་། དངོས་བསྟན་ཤུགས་བསྟན་དང་།  མཚོན་བྱ་མཚོན་བྱེད་སྦྱར་མི་ཤེས་པར་ཚིག་རང་གི་ངོ་བོ་སྒྲ་ཇི་
བཞིན་པ་ཙམ་ལ་འདྲི་ན་བསྟན་བཅོས་ཆེན་པོའི་ཚིག་ཕལ་ཆེ་བ་ཆུད་སོན་པར་འགྱུར་རོ།  ༼༢༽།  ཉན་ཐོས་སོ་ཐར་མཁན་སློབ་ཀྱི། །ལུས་ངག་ལས་ནི་སྐྱེས་ཞེས་པ། །གཞུང་གི་དགོངས་པ་ཡིན་ན་ནི། །སྡོམ་པའི་ཐོབ་རྒྱུ་བཅུ་མེད་དམ། །ཞེས་
9-4-4a


པའི་ལན་ནི།  དེ་གཞུང་གི་དགོངས་པ་ཡིན་ཡང་སྡོམ་པའི་ཐོབ་རྒྱུ་བཅུ་གསུངས་པ་དང་འགལ་བ་མེད་དེ།  འདིའི་སྡོམ་པ་ཞེས་པ་སྐབས་ཐོབ་ཀྱི་ད་ལྟར་གྱི་ཆོ་ག་ལས་ཐོབ་པའི་སྡོམ་པ་ལ་འཇུག་པ་སྲིད་པའི་ཕྱིར་རོ། །
གཞན་དུ་མདོ་རྩར་རབ་ཏུ་བྱུང་བ་དང་བསྙེན་པར་རྫོགས་པ་དེའི་ཕྱིར་དགེ་སློང་འགའ་ཞིག་ལ་མཁན་པོ་ཉིད་དུ་གནས་པ་ལའོ། །ཞེས་གསུངས་པའང་སྡོམ་པའི་ཐོབ་རྒྱུ་བཅུ་གསུངས་པ་དང་འགལ་བར་ཅིའི་ཕྱིར་མི་འགྱུར།  འོན་ཀྱང་གཞུང་དེའི་དགོངས་པ་ནི་
སློབ་མའི་རྒྱུད་ཀྱི་ལུས་ངག་ལས་སོ་ཐར་གྱི་སྡོམ་པ་སྐྱེ་ཞེས་པ་སྟེ།  ཉན་ཐོས་པའི་ལུགས་ལ་སྡོམ་པ་ཡིན་ན།  ལུས་ངག་གི་ལས་ཀྱི་རང་བཞིན་ཡིན་དགོས་པར་འདོད་པའི་ཕྱིར་ཏེ།  མཛོད་ལས།  ལས་ནི་སེམས་པ་དང་དེས་བྱས། །སེམས་པ་ཡིད་
ཀྱི་ལས་ཡིན་ནོ། །དེས་བསྐྱེད་ལུས་དང་ངག་གི་ལས། །དེ་དག་རྣམ་རིག་རྣམ་རིག་མིན། །ཅེས་རིག་བྱེད་དང་རིག་བྱེད་མ་ཡིན་པའི་གཟུགས་གཉིས་ཀ་ཡང་ལུས་ངག་གི་ལས་ཀྱི་རང་བཞིན་དུ་གསུངས་པའི་ཕྱིར་རོ།  ༼༣༽།  གཟུགས་ཅན་ཡིན་པའི་རྒྱུ་མཚན་
གྱིས། །ཤི་བས་བཏང་ན་བསམ་གཏན་དང་། །ཟག་མེད་གཉིས་ལ་མི་ཐལ་ལམ། །ཞེས་པའི་ལན་ནི།  བསམ་གཏན་དང་ཟག་མེད་ཀྱི་སྡོམ་པ་ཡང་ཚེ་འདིའི་གཟུགས་ཅན་ནི་ཤི་འཕོས་པའི་ཚེ་བཏང་སྟེ།  རྟེན་བོར་བའི་ཕྱིར་རོ། །གཞན་དུ་ན་སོ་ཐར་གྱི་
སྡོམ་པ་ཤི་འཕོས་པས་གཏང་བའི་སྒྲུབ་བྱེད་དུ་རྟེན་བོར་བའི་ཕྱིར་རོ། །ཞེས་བཀོད་པ་ལ་འབྲེལ་ཅི་ཞིག་ཡོད་གཟུགས་ཅན་མ་ཡིན་པའི་ཆོས་རྣམས་ལ་ནི་ཤི་འཕོས་པའི་ཚེ་རྟེན་བོར་བའི་ཕྱིར་ཞེས་པའི་གཏན་ཚིགས་མི་འགྲུབ་ལ།  གཟུགས་ཅན་གྱི་ཆོས་རྣམས་ལ་ཤི་འཕོས་
9-4-4b


པའི་ཚེ་རྟེན་ཡོད་མེད་ཀྱི་ཁྱད་པར་ཕྱེ་བར་མི་ནུས་པས་བསྒྲུབ་བྱ་ཤི་འཕོས་པའི་ཚེ་གཏོང་བར་མཚུངས་པ་ནི་རིགས་པ་སྨྲ་བ་ཀུན་གྱི་ལུགས་ཡིན་ནོ། །འོ་ན་བསམ་གཏན་དང་ཟག་མེད་ཀྱི་སྡོམ་པ་ཐོབ་ལ་མ་ཉམས་པའི་གང་ཟག་ཚེ་ཕྱི་མར་སྡོམ་པ་དེ་གཉིས་དང་གཏན་མི་ལྡན་པར་
འགྱུར་རོ་སྙམ་ན།  ཤི་འཕོས་པའི་སྐད་ཅིག་གཉིས་པར་ཚེ་ཕྱི་མའི་ཕུང་པོ་གྲུབ་པའི་ཚེ།  ཚེ་ཕྱི་མའི་དབང་དུ་བྱས་པའི་སྡོམ་པ་དེ་གཉིས་ཀྱི་ཐོབ་པ་འབྱུང་བ་ནི་ཉན་ཐོས་པའི་ལུགས་ཏེ།  དཔེར་ན་ཕྱིར་མི་འོང་འདོད་པའི་རྟེན་ཅན་ཤི་འཕོས་ནས་གཟུགས་མེད་ཀྱི་
ཁམས་སུ་སྐྱེས་པའི་ཚེ།  འདོད་པའི་རྟེན་ལ་ཡོད་པའི་ཟག་མེད་ཀྱི་སྡོམ་པ་གཏོང་ཡང་གཟུགས་མེད་ཀྱི་རྟེན་ལ་ཡོད་པའི་ཟག་མེད་ཀྱི་སྡོམ་པ་གསར་དུ་ཐོབ་པ་བཞིན་ནོ། །གལ་ཏེ་ཟག་མེད་ཀྱི་སྡོམ་པ་སྔ་མ་བཏང་ནས་ཕྱི་མ་གསར་ཐོབ་མེད་དོ་སྙམ་ན།  འབྲས་བུ་
སྔ་མ་ལ་གནས་པས།  ཕྱི་མ་ཐོབ་པ་དང་།  དབང་པོ་རྟུལ་པོ་རྣོན་པོར་སྦྱངས་པའི་ཚེ་ཟག་མེད་ཀྱི་དགེ་བ་སྔ་མ་བཏང་ནས་ཕྱི་མ་ཐོབ་པ་མེད་པར་ཐལ་ལོ། །དེ་ཡང་འདོད་ན།  འཕགས་པ།  འབྲས་བུ་ཐོབ་སྦྱངས་ཉམས་པ་ལས། །ཞེས་པ་རྩ་འགྲེལ་གྱི་དོན་
ལུང་རིགས་སྨྲ་བའི་མདུན་དུ་བཤད་ཐུབ་པ་ཅིག་དགོས་སོ། །བསམ་གཏན་གཏོགས་པའི་དགེ་བ་ནི། །ས་འཕོས་ཉམས་པ་དག་གིས་གཏོང་། །ཞེས་པའི་སྐབས་སུ།  རྩ་བར་ཐ་སྙད་ཟོར་ཡང་པའི་ཕྱིར་དུ་ས་དེའི་དགེ་བ་གཟུགས་ཅན་དང་གཟུགས་ཅན་མ་ཡིན་
པ་ཐམས་ཅད་ཀྱི་གཏོང་རྒྱུ་འཆད་པའི་སྐབས་ཡིན་པས་ཤི་འཕོས་པ་གཏོང་རྒྱུར་མ་གསུངས་པས་འཁྲུལ་གཞི་བྱས་པར་སྣང་ཡང་། དེ་ཡི་འགྲེལ་པར་རིས་མཐུན་བཏང་བ་ལས་ཀྱང་།  ཅུང་ཟད་བཏང་བར་འགྱུར་རོ། །ཞེས་གསུངས་པའི་མཚན་གཞི་གང་ཡིན་
9-4-5a


ལེགས་པར་སྨྲ་དགོས་སོ།  ༼༤༽།  ཐེག་ཆེན་ལུགས་ལ་སྤོང་བའི་སེམས། །ཇི་སྲིད་མ་ཉམས་དེ་སྲིད་དུ། །དེ་ཡི་སྡོམ་པ་དེ་ཡོད་ན། །ཐེག་ཆེན་ལུགས་ཀྱི་བསྙེན་གནས་ཀྱང་། །ནངས་པར་ཕན་ཆད་བསྲུང་
དགོས་སམ། །ཞེས་པའི་ལན་ནི།  ཐེག་ཆེན་ལུགས་ཀྱི་བསྙེན་གནས་ལ། །ནངས་པར་ཕན་ཆད་སྤོང་བའི་སེམས། །ཡོད་ན་བསྲུང་སེམས་ཅི་ཕྱིར་མེད། །མེད་ན་ཁྱོད་ཀྱི་དྲི་བ་ལ། །འབྲེལ་པ་ཅི་ཞིག་ཡོད་དམ་སོམས། །ཞེས་བྱའོ།  ༼༥༽།  དེས་
ན་ཇི་སྲིད་སེམས་མ་ཉམས། །ཅེས་གསུངས་སེམས་བསྐྱེད་ཀྱིས་ཟིན་པའི།  དགེ་སློང་ལ་སོགས་སྡོམ་པ་ནི། །ཞེས་སོགས་མི་འགལ་ཚུལ་དེ་ཅི། །ཅེས་པའི་ལན་ནི།  ཀུན་སློང་སེམས་བསྐྱེད་ཀྱིས་ཟིན་ཀྱང་། །དགེ་སློང་སྡོམ་པའི་སྤོང་སེམས་ནི། །
ཤི་བའི་ཚེ་ན་ཉམས་པའི་ཕྱིར། །མི་འགལ་ཚུལ་ནི་དེ་ལྟར་ལགས། །ཐེག་ཆེན་སོ་སོར་ཐར་ཡིན་ཡང་། །དགེ་སློང་ལ་སོགས་སྡོམ་པ་ཡི། །ལྡོག་པ་ཤི་བའི་ཚེ་ན་གཏང་། །བྱང་ཆུབ་སེམས་ཀྱི་ལྡོག་པ་དང་། །དེ་ཡི་འབྲས་བུ་ཤི་ཡང་འབྱུང་། །
ཞེས་པའི་གཞུང་འདི་མ་གཟིགས་སམ། །ཞེས་བྱའོ།  ༼༦༽།  སོ་ཐར་སྡོམ་པ་ཤི་ནས་ཀྱང་། །ཡོད་ཅེས་སྨྲ་བའི་འབྲི་ཁུང་པས། །ཐེག་པ་ཆེན་པོའི་སོ་ཐར་གྱི། །དབང་དུ་བྱས་པ་མ་བཤད་དམ། །ཞེས་པའི་ལན་ནི།  དེ་བཤད་དུ་ཆུག་མོད།  དེས་འདིར་
གནོད་པ་ཅུང་ཟད་ཀྱང་མེད་པ་ལན་སྔ་མས་བསལ་ལོ།  ༼༧༽།  བྱེ་སྨྲའི་བསྙེན་གནས་དགེ་སློང་ལས། །ལེན་པའི་དམིགས་བསལ་གང་ན་ཡོད། །ཅེས་པའི་ལན་ནི།  མཛོད་དུ།  ནངས་པར་གཞན་ལས་ནོད་པར་བྱ། །ཞེས་པ་རྩ་འགྲེལ་དུ་གཞན་ལས་
9-4-5b


ཞེས་པ་ཙམ་ལས་མ་གསུངས་ཀྱང་།  སོ་སོར་ཐར་ཅེས་པ།  གཞན་གྱི་རྣམ་རིག་བྱེད་སོགས་ཀྱིས། །ཞེས་པའི་འགྲེལ་པར།  དེ་ཡང་དགེ་འདུན་ནམ་གང་ཟག་ལས་ཏེ།  དགེ་སློང་ཕ་མ་དང་།  དགེ་སློབ་མའི་སྡོམ་པ་རྣམས་ནི་དགེ་འདུན་ལས་སོ། །
གཞན་དག་ནི་གང་ཟག་ལས་སོ་ཞེས་གསུངས་པས་ཀྱང་སོ་ཐར་གཞན་ལྔ་ལེན་པའི་ཡུལ་དགེ་སློང་དུ་གྲུབ་སྟེ།  དགེ་འདུན་དང་གང་ཟག་གི་ཟླས་ཕྱེ་བའི་གང་ཟག་ནི་དགེ་སློང་ལ་འཇུག་པའི་ཕྱིར་རོ། །ཕྱིར་བཅོས་ཀྱི་གཞིར་ལྟུང་བ་མཐོལ་བ་དང་།  བཤགས་
པའི་ཡུལ་བསྙེན་པར་མ་རྫོགས་པས་མི་རུང་བར་བཤད་པས་ཀྱང་གྲུབ་སྟེ།  ལྟུང་བ་མཐོལ་བཤགས་ཀྱི་ཡུལ་དུ་མི་རུང་ན་སྡོམ་པ་ལེན་པའི་ཡུལ་དུ་རུང་བ་འགལ་བའི་ཕྱིར་རོ།  ༼༨༽།  འདུལ་བའི་ལུགས་ཀྱི་བསྙེན་གནས་ཀྱི། །ཆོ་ག་གསལ་པོ་གང་ན་བཞུགས། །
ཞེས་པའི་ལན་ནི།  ཀུན་མཁྱེན་བུ་སྟོན་གྱིས།  འདིའི་ཆོ་ག་འདུལ་བ་ལུང་དུ་ཡེ་མ་བྱུང་ཞིང་།  འདུལ་བའི་ཕྱོགས་ཀྱི་འགྲེལ་པ་རྣམས་སུ་ཡང་ཡེ་མ་བྱུང་ངོ་། །གནས་འཇོག་གི་མདོ་ལས།  རིགས་ཀྱི་བུའམ་རིགས་ཀྱི་བུ་མོ་དད་པ་དང་ལྡན་པ་འཕགས་
པའི་ཡན་ལག་བརྒྱད་དང་ལྡན་པའི་བསྙེན་གནས་ལ་གནས་པར་འདོད་པས་ནངས་པར་ལངས་ནས་དགེ་སློང་ངམ།  བྲམ་ཟེའམ།  གཞན་གང་ཡང་རུང་བ་ཆོ་ག་ཤེས་པ་ཞིག་གི་དྲུང་དུ་སོང་སྟེ།  བླ་གོས་ཕྲག་པ་གཅིག་ཏུ་བྱས་ལ་པུས་མོ་གཡས་པའི་ལྷ་ང་
ས་ལ་བཙུགས་ཏེ།  ཚིག་འདི་སྐད་ཅེས་བརྗོད་པར་བྱ་སྟེ།  བདག་མིང་ཆེ་གེ་མོ་ཞེས་བྱ་བ་དུས་འདི་ནས་བཟུང་སྟེ་གང་དོ་ནུབ་ཀྱི་མཚན་མོ་འདི་དང་།  སང་ཉི་མ་མ་ཤར་གྱི་བར་དུ་སྲོག་བཅད་པ་སྤངས་ཤིང་།  སྲོག་གཅོད་པ་ལས་སླར་ལྡོག་སྟེ་དབྱུག་པ་སྤངས་ཤིང་
9-4-6a


མཚོན་ཆ་སྤངས་ཏེ་ངོ་ཚ་དང་ལྡན་པར་བགྱིས་ལ་སེམས་ཅན་དང་སྲོག་ཆགས་འབྱུང་པོ་ཐམས་ཅད་ལས་ཆུང་ངུ་ན་སྲོག་ཆགས་ཕྲ་མོ་གྲོག་སྦུར་ཡན་ཆད་ཀྱི་སྲོག་གཅོད་པ་སྤངས་ཏེ།  སྲོག་གཅོད་པ་ལས་སླར་ལྡོག་པར་
བགྱིའོ། །ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ།  སྲོག་གཅོད་པ་ལས་སླར་ལོག་ནས་དབྱུག་པ་སྤངས་ཤིང་མཚོན་ཆ་སྤངས་ཏེ།  སེམས་ཅན་དང་སྲོག་ཆགས་འབྱུང་པོ་ཐམས་ཅད་ལས་ཆུང་ངུ་ན་ཕྲ་མོ་གྲོག་
སྦུར་ཡན་ཆད་ཀྱི་སྲོག་གཅོད་པ་ཡང་སྤངས་ཏེ།  སྲོག་གཅོད་པ་ལས་སླར་ལོག་པ་དེ་བཞིན་དུ་བདག་ཆེ་གེ་མོ་ཡང་དུས་འདི་ནས་བཟུང་སྟེ་དོ་ནུབ་ཀྱི་མཚན་མོ་འདི་དང་སང་ཉི་མ་མ་ཤར་གྱི་བར་དུ་སྲོག་གཅོད་པ་སྤངས་ཏེ།  སྲོག་གཅོད་པ་ལས་སླར་ལྡོག་སྟེ། དབྱུག་པ་
སྤངས་ཤིང་མཚོན་ཆ་སྤངས་ཏེ་ངོ་ཚ་དང་ལྡན་ཤིང་སྙིང་རྗེ་དང་ལྡན་པར་བགྱིས་ལ་སེམས་ཅན་སྲོག་ཆགས་འབྱུང་པོ་ཐམས་ཅད་ལས་ཆུང་ངུ་ན་སྲོག་ཆགས་ཕྲ་མོ་གྲོག་སྦུར་ཡན་ཆད་ཀྱི་སྲོག་གཅོད་པ་ཡང་སྤངས་ཏེ།  སྲོག་གཅོད་པ་ལས་སླར་ལྡོག་པར་བགྱིའོ། །ཡན་ལག་
དང་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །ཇི་ལྟར་སྲོག་གཅོད་པ་ལས་སླར་ལོག་པ་དེ་བཞིན་དུ་མ་བྱིན་པར་ལེན་པ་དང་།  མི་ཚངས་པར་སྤྱོད་པ་དང་།  བརྫུན་དུ་སྨྲ་བ་དང་།  འབྲུའི་
ཆང་དང་།  བཅོས་པའི་ཆང་དང་།  མྱོས་པར་འགྱུར་བ་བག་མེད་པའི་གནས་དང་།  གླུ་གར་དང་།  རོལ་མོའི་སྒྲ་དང་།  ཕྲེང་བ་དང་།  སྤོས་ཉུག་པ་དང་།  རྒྱན་དང་།  ཁ་དོག་འཆང་བ་དང་།  ཁྲི་སྟན་མཐོན་པོ་དང་།  ཁྲི་སྟན་ཆེན་པོ་དང་།  དུས་མ་ཡིན་
9-4-6b


པའི་ཁ་ཟས་ལས་སླར་ལོག་པ་དེ་བཞིན་དུ་བདག་ཆེ་གེ་མོ་ཡང་དུས་འདི་ནས་བཟུང་སྟེ།  གང་དོ་ནུབ་ཀྱི་མཚན་མོ་འདི་དང་སང་ཉི་མ་མ་ཤར་གྱི་བར་དུ་དུས་མ་ཡིན་པའི་ཁ་ཟས་སྤངས་ཏེ་དུས་མ་ཡིན་པའི་ཁ་ཟས་ལས་སླར་ལོག་པར་བགྱིའོ། །ཡན་ལག་
བརྒྱད་པོ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །དེ་ལྟར་ལན་གཉིས་ལན་གསུམ་དུའོ་ཞེས་འབྱུང་ལ།  སློབ་དཔོན་བྱང་ཆུབ་བཟང་པོའི་དགེ་བསྙེན་གྱི་སྡོམ་པའི་བཤད་
པའི་གཞུང་ལས་ཀྱང་།  དགེ་བསྙེན་གྱི་སྡོམ་པ་དང་སྤྲེལ་ནས་གསུངས་ཏེ།  ཇི་སྐད་དུ།  དེ་ལྟ་བུ་འདི་ནི་ཡན་ལག་ལྔ་ཡོངས་སུ་རྫོགས་པའི་དགེ་བསྙེན་གྱི་སྡོམ་པར་འགྱུར་རོ། །ཉིན་དུ་མཚན་དུ་བསྙེན་གནས་ཀྱི་སྡོམ་པ་བརྒྱད་བླང་བར་འདོད་ན།  ཉི་མ་
འཆར་བའི་སྔོན་དུ་དེ་བླང་བར་བྱའོ་བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ་ཇི་སྲིད་སང་ཉི་མ་མ་ཤར་གྱི་བར་དུ་སྲོག་གཅོད་པ་སྤངས་ཏེ།  སྲོག་གཅོད་པ་ལས་སླར་ལྡོག་པར་བགྱིའོ། །དེ་བཞིན་དུ་མ་བྱིན་པར་ལེན་པ་དང་།  མི་ཚངས་པར་སྤྱོད་པ་དང་། 
བརྫུན་དུ་སྨྲ་བ་དང་།  འབྲུའི་ཆང་དང་།  བཅོས་པའི་ཆང་དང་།  མྱོས་པར་འགྱུར་བ་བག་མེད་པའི་གནས་དང་།  མལ་སྟན་མཐོན་པོ་དང་།  མལ་སྟན་ཆེན་པོ་དང་།  ཕྲེང་བ་དང་།  སྤོས་ཉུག་པ་དང་།  རྒྱན་དང་།  ཁ་དོག་འཆང་བ་དང་།  གར་
དང་།  གླུ་དང་།  རོལ་མོའི་སྒྲ་དང་།  དུས་མ་ཡིན་པའི་ཁ་ཟས་ལས་སླར་ལྡོག་པར་བགྱིའོ། །དགྲ་བཅོམ་པའི་ཡོན་ཏན་གྱི་ཚོགས་བརྒྱད་ཀྱིས་བརྒྱན་པར་བགྱིའོ། །ཞེས་དེ་ལྟར་ལན་གསུམ་མོ། །དེ་ལྟ་བུས་ནི་ཡན་ལག་བརྒྱད་ཀྱི་བསྙེན་གནས་ཀྱི་སྡོམ་
9-4-7a


པར་འགྱུར་རོ། །ཞེས་གསུངས་ལ་དགེ་བསྙེན་གྱི་སྡོམ་པ་བརྒྱད་པར་ཡང་དེ་དང་ཆ་འདྲ་བ་ལ་ཁྱད་པར་གསུམ་ལ་སྐྱབས་སུ་འགྲོ་བ་ནི་སྔ་མ་བཞིན་ནོ། །ཞེས་པས་སྐྱབས་སུ་འགྲོ་བ་གསུམ་གྱི་རྗེས་སུ་བསླབ་པ་ལན་གསུམ་ཁས་
བླངས་པའི་རྗེས་ལ་གསོ་སྦྱོང་ཅན་དུ་བདག་སློབ་དཔོན་གྱིས་བཟུང་དུ་གསོལ།  ཞེས་བརྗོད་པར་བཤད་དོ། །དེ་དང་བྱང་བཟང་གི་གཉིས་ཕལ་ཆེན་སྡེ་པའི་གྲུབ་མཐའ་ཡིན་པར་འདྲའོ། །དེ་རྣམས་བསྙེན་གནས་ཀྱི་རྣམ་བཞག་ཤེས་པར་བྱ་བའི་ཕྱིར་སྤྱིའི་རྣམ་
བཞག་བཤད་པ་ཡིན་ལ།  ལག་ལེན་ལ་བླ་མ་གོང་མ་རྣམས་ཀྱིས་དགེ་ཚུལ་གྱི་ཆོ་ག་དང་ཆ་འདྲ་བར་བཤད་ལ་ཞེས་གསུངས་པའི་དོན་ལ་དཔྱོད་མཛོད།  འོན་ཀྱང་མཁས་པ་འདིས་སྡོམ་བརྒྱད་དང་།  བྱང་བཟང་གི་བཤད་པ་ཕལ་ཆེན་སྡེ་པའི་གྲུབ་མཐའ་བཞེད་པར་སྣང་
ཡང་།  བདག་ཉིད་ཆེན་པོའི་དགོངས་པ་ནི་བྱེ་བྲག་ཏུ་སྨྲ་བའི་ལུགས་ཀྱི་བསྙེན་གནས་ཀྱི་ཆོ་ག་འདུལ་བ་ལུང་ལས་མ་གསུངས་ཀྱང་།  དགེ་བསྙེན་དང་དགེ་ཚུལ་གྱི་ཆོ་ག་ཉིད་ལ་བསླབ་པའི་གྲངས་དང་།  དུས་ཀྱི་ཁྱད་པར་མ་གཏོགས་པ་གཞན་འདྲ་བས་དེས་མཚོན་
པར་བཞེད་ཅིང་།  གནས་འཇོག་གི་མདོ་དང་།  སྡོམ་བརྒྱད་དང་།  བྱང་བཟང་གིས་བཤད་པ་རྣམས་ནི་མདོ་སྡེ་པའི་ལུགས་སུ་བཞེད་དོ།  ༼༩༽།  དུད་འགྲོ་སོ་སོར་ཐར་པ་ཡི། །སྡོམ་པའི་རྟེན་དུ་ཁས་ལེན་པའི། །ཉན་ཐོས་སྡེ་པ་ཡོད་དམ་ཅི། །ཞེས་པའི་ལན་ནི།
ཉན་ཐོས་སྡེ་པ་ཐམས་ཅད་ཀྱིས། །མཛོད་དང་མདོ་རྩར་གསུངས་པ་ཡི། །གྲུབ་མཐའ་ཁོ་ན་ཁས་ལེན་ན། །སྡེ་པ་ཐམས་ཅད་ཡོད་སྨྲར་འགྱུར། །གཞན་དུ་དུད་འགྲོ་སོ་ཐར་གྱི། །སྡོམ་པའི་རྟེན་དུ་ཁས་ལེན་པའི། །ཉན་ཐོས་སྡེ་པ་མེད་པ་ཅི། །ཞེས་
9-4-7b


དང་།  རྒྱ་མཚོའི་ཀླུ་རྣམས་དུས་བཟང་ལ། །བསྙེན་གནས་བསྲུང་བར་བཤད་པ་དེ། །ཁས་ལེན་ཉན་ཐོས་མེད་དམ་ཅི། །ཞེས་ཀྱང་བརྗོད་པར་བྱའོ། ༼༡༠༽།  མདོ་སྡེ་པ་རྣམས་བསྙེན་གནས་ནི། །ཇི་ལྟར་འདོད་ཚེ་ལེན་ཅེས་པ། །དུས་
གཅིག་སྟབས་སུ་ལེན་ནམ་ཅི། །ཟན་ཟོས་ནས་ཀྱང་ལེན་ཅེས་པ། །དེ་ཡི་དོན་དུ་ཁས་ལེན་ན། །དེ་འདྲ་བྱེ་བྲག་སྨྲ་བ་ཡིས། །ནངས་པར་གཞན་ལས་ནོད་ཅེས་པའི། །དམིགས་བསལ་ཡིན་ཕྱིར་སྐབས་ཀྱི་ནི། །རྩོད་པའི་ལན་དུ་འགྱུར་བ་
མེད། །བསྙེན་གནས་དུས་གཅིག་ལེན་པ་དེ། །མདོ་སྡེའི་གཞུང་ལུགས་གང་ན་ཡོད། །ཅེས་པའི་ལན་ནི།  མཛོད་འགྲེལ་ལས།  ནངས་པར་ནི་རེ་ཤིག་ཉི་མ་འཆར་བའི་ཚེ་སྟེ་ཉིན་ཞག་པའི་སྡོམ་པ་ཡིན་པའི་ཕྱིར་རོ། །གང་གིས་ཚེས་
བརྒྱད་ལ་རྟག་ཏུ་བསྙེན་གནས་ལ་གནས་པར་བྱའོ། །ཞེས་སྔོན་ཡང་དག་པར་བླངས་པར་བྱས་པ་དེས་ནི་ཟན་ཟོས་ནས་ཀྱང་ནོད་པར་བྱའོ། །ཞེས་གསུངས་པ་འདིས་སྔར་དུས་གཅིག་གི་ཚེ་ཟླ་བ་བྱུང་ངོ་ཅོག་གི་ཚེས་བརྒྱད་ལ་བསྙེན་གནས་ལ་གནས་པར་
ཆོ་ག་གཅིག་གིས་སྟབས་ཅིག་ཏུ་བླངས་ནས།  ཕྱིའི་ཚེས་བརྒྱད་བྱུང་རེས་སྔར་བླངས་པ་དེ་གསལ་བར་བྱ་བའི་ཕྱིར་དུ་སླར་ཡང་གཞན་ལས་ནོད་པར་གསལ་ཏེ།  འདིའི་འགྲེལ་བཤད་དུ་སྡོམ་པ་ནི་སློང་བར་བྱེད་པ་ཡང་དག་པར་ལེན་པར་ངེས་པའི་
སེམས་པ་ཡིན་པའི་ཕྱིར།  ཉི་མ་འཆར་བའི་ཚེ་ཁོ་ན་སྐྱེའོ། །ཟན་ཟོས་ནས་ནོད་པ་ནི་གསལ་བར་བྱ་བའི་ཕྱིར་རོ། །ཞེས་གསུངས་པས་སོ། །འདི་མདོ་སྡེ་པའི་ལུགས་མ་ཡིན་ནོ་ཞེ་ན།  བྱེ་བྲག་ཏུ་སྨྲ་བས།  སྡོམ་པ་སེམས་པར་ཁས་ལེན་ནམ་ལེགས་པར་
9-4-8a


སྨྲོས་ཤིག །འོ་ན་བྱེ་བྲག་ཏུ་སྨྲ་བས་ནངས་པར་གཞན་ལས་ནོད་ཅེས་པའི་དམིགས་བསལ་དུ་ཇི་ལྟར་འགྲོ་སྙམ་ན།  མཛོད་འགྲེལ་འདིར།  བྱེ་མདོ་གཉིས་ཀའི་གྲུབ་མཐའ་འཆད་པའི་སྐབས་ཡིན་པས།  བྱེ་སྨྲས་ཉི་མ་འཆར་བའི་ཚེ་
ཁོ་ན་གཞན་ལས་ནོད་པར་འདོད་ཀྱང་མདོ་སྡེ་པ་ལྟར།  ཚེས་བརྒྱད་ལ་སོགས་པ་ཇི་ལྟར་འདོད་པའི་དུས་རྟག་ཏུ་བསྙེན་གནས་ལ་གནས་པར་དུས་གཅིག་ཏུ་བླངས་པ་དེས་ཉི་མ་འཆར་བའི་ཚེ་བརྗེད་ནས་ཟན་ཟོས་ནས་དྲན་པའི་ཚེ་གསལ་བའི་ཕྱིར་དུ་སླར་ཡང་གཞན་ལས་ནོད་
ཅེས་པ་ཡིན་གྱི་གཉིས་ཀ་བྱེ་སྨྲའི་ལུགས་ཀྱི་སྤྱིར་བཏང་དམིགས་བསལ་མ་ཡིན་ཏེ།  གཞན་དུ་ན་བྱེ་སྨྲས་སྡོམ་པ་སེམས་པར་ཁས་ལེན་པར་ཐལ་བའི་ཕྱིར་རོ། །དེས་ན་བདག་ཉིད་ཆེན་པོའི་དགོངས་པ།  འདི་མདོ་སྡེ་པ་ལ་སྦྱར་བ་ལེགས་པར་གྲུབ་བོ། །
གལ་ཏེ་ཚེས་བརྒྱད་ལ་དུས་རྟག་ཏུ་བསྙེན་གནས་ལ་གནས་པར་སྔོན་ཡང་དག་པར་བླངས་བ་ཞེས་པའི་དོན་ཁས་བླངས་པ་ཙམ་ཡིན་གྱི་ཆོ་གས་བླངས་པ་མ་ཡིན་ན་ནི།  ཕྱིས་ཟན་ཟོས་ནས་སྡོམ་པ་བླངས་པ་ལ་དེའི་སྔ་རོལ་ཉི་མ་འཆར་བའི་ཚེ་སྡོམ་པ་ཇི་ལྟར་སྐྱེ་ལུང་རིགས་
སྨྲ་བ་དག་ལེགས་པར་དཔྱོད་ཅིག །སྔར་སྟབས་ཅིག་ཏུ་ལེན་པའི་ཚེ་ཚེས་བརྒྱད་ཀྱི་སྡོམ་པ་ཐམས་ཅད་ཅིག་ཆར་སྐྱེ་བ་ནི་མ་ཡིན་ཏེ།  སྔར་གྱི་ཆོ་ག་ལས་ཕྱིས་ཚེས་བརྒྱད་བྱུང་རེས་ཀྱི་ཉི་མ་འཆར་བའི་ཚེ་སྐྱེ་བ་འགྲེལ་བཤད་ཀྱི་དགོངས་པ་ཡིན་པའི་ཕྱིར་རོ།  ༼༡༡༽།  གསང་
སྔགས་ལུགས་ཀྱི་བསྙེན་གནས་ལ། །ཡི་དམ་བསྒོམ་པ་མཆོག་ཡིན་ན། །ལྷ་དེ་བདག་མདུན་གང་ཡིན་བརྟག །བདག་བསྐྱེད་ཡིན་ན་བྱ་རྒྱུད་ཀྱི། །རང་རྐང་བདག་སྐྱེད་མེད་པ་ཅི། །མདུན་སྐྱེད་ཡིན་ན་རྣམ་རྒྱལ་སོགས། །མ་སྐྱེད་གོང་དུ་གསོ་
9-4-8b


སྦྱོང་གི།  སྡོམ་པ་ལེན་པར་མཛད་དེ་ཅི། །ཞེས་པའི་ལན་ནི།  གཞུང་གི་དགོངས་པ་མ་ལོན་པ་དང་།  དྲི་བ་ཐུག་མེད་དུ་འགྱུར་བ་དང་།  མཐའ་གཉིས་ལ་སྐྱོན་བརྗོད་པ་མི་འཐད་པ་དང་གསུམ་ལས།  དང་པོ་ནི།  འོན་ཀྱང་གསང་སྔགས་ལུགས་
བྱེད་ན། །ཞེས་པའི་དོན་གསང་སྔགས་ལུགས་ཀྱི་བསྙེན་གནས་ཞེས་པ་ལ་འཆད་པ་ནི་ནོར་ཏེ།  འདིར་ཉན་ཐོས་ཀྱི་འདུལ་བ་ནས་གསུངས་པའི་བསྙེན་གནས་ཀྱི་ཉིན་ལྷ་སྒོམ་མ་བྱས་ཀྱང་བསྙེན་གནས་ཉམས་པ་མེད་པ་ལས་འཕྲོས་ནས་ལྷ་བསྒོམ་གཏན་བཀག་པ་
ནི་མ་ཡིན་ཏེ།  གང་ཟག་དེ་གསང་སྔགས་ཀྱི་ལུགས་ཀྱི་ཉམས་ལེན་བྱེད་པ་ཞིག་ཡིན་ན།  བསྙེན་གནས་ཀྱི་ཉིན་ཡི་དམ་བསྒོམ་པ་བསོད་ནམས་ཆེ། ཞེས་པའི་དོན་ཡིན་པའི་ཕྱིར་ཏེ།  བསྙེན་གནས་སོ་སོར་ཐར་པའི་ལུགས། །གཙོ་ཆེར་ཉན་ཐོས་གཞུང་
ལུགས་ཡིན། །ཞེས་པས་ཤེས་སོ། །གཉིས་པ་ནི།  བསྙེན་གནས་ཀྱི་ཉིན་གསང་སྔགས་ཀྱི་ལུགས་བྱེད་ན་ཡི་དམ་བསྒོམ་པ་བསོད་ནམས་ཆེ།  ཞེས་པ་ལ།  ལྷ་དེ་བདག་མདུན་བརྟག་དགོས་ན།  བསྙེན་གནས་ཀྱི་ཉིན་སྔགས་བཟླས་ན་བསོད་
ནམས་ཆེ་ཞེས་བཤད་པ་ལ་ཡང་སྔགས་དེ་མ་ཎི་ཡིན་ནམ།  ཨ་ར་པ་ཙ་ན་ཡིན་ཞེས་བརྟག་དགོས་པར་འགྱུར་ཞིང་དེའི་ཉིན་དགེ་འདུན་ལ་བསྙེན་བཀུར་བྱས་ན་བསོད་ནམས་ཆེ་ཞེས་པ་ལ་ཡང་།  བསྙེན་བཀུར་དེ་མང་ཇ་ཡིན་ནམ།  གང་ན་སྣོན་ཡིན་ཞེས་པ་དང་
ཇ་དེ་རྒྱ་ཇ་ཡིན་ནམ་ཁམས་ཇ་ཡིན།  མར་དེ་འབྲི་མར་ཡིན་ནམ་བ་མར་ཡིན།  ཞེས་སོགས་ཀྱང་བརྟག་དགོས་པས་བྱིས་པས་ཨ་མ་ལ་བརྔོ་འཐག་གི་རྒྱུ་མཚན་བྲིས་པ་དང་འདྲ་བར་ཐུག་མེད་དུ་འགྱུར་རམ་སྙམ་མོ། །ཅིས་ཀྱང་ལན་བརྗོད་དགོས་ན་བསྟན་བཅོས་
9-4-9a


རྩོམ་པ་པོས་ནི་དེ་ཚོ་ཐམས་ཅད་ཐད་ཀ་ཐད་ཀ་ནས་བསོད་ནམས་ཆེ་ཞེས་གསུངས་པར་གདའ་ལགས།  གང་ཡིན་ནི་བསྙེན་གནས་སྲུང་བ་པོ་ལ་དྲིས་ཤིག །གསུམ་པ་ནི་བདག་བསྐྱེད་ཡིན་པ་ལ་སྐྱོན་བརྗོད་པའི་དོན་བྱ་རྒྱུད་ནས་
གསུངས་པའི་བསྙེན་གནས་ལ་གནས་པས་བསྒོམས་ན་བསོད་ནམས་ཆེ་བ་དེ་ཡིན་ན།  བྱ་རྒྱུད་རང་རྐང་ལ་ཡོད་དགོས་ཅེས་པར་སྣང་ལ།  དེ་ལྟར་ན་བདེ་དགྱེས་ལ་སོགས་པའི་བསྐྱེད་རྫོགས་ཐམས་ཅད་ཆོས་ཅན།  དེར་ཐལ།  དེའི་ཕྱིར།  ཡང་དེ་དག་ཆོས་ཅན།  ཕ་རོལ་
ཏུ་ཕྱིན་པའི་གཞུང་ལུགས་རང་རྐང་ལ་ཡོད་པར་ཐལ།  དེ་ནས་བཤད་པའི་སྨོན་འཇུག་གི་སེམས་བསྐྱེད་ལ་གནས་པས་བསྒོམས་ན་བསོད་ནམས་ཆེ་བ་དེ་ཡིན་པའི་ཕྱིར།  ཡང་དེ་དག་ཆོས་ཅན།  ཉན་ཐོས་ཀྱི་འདུལ་བ་རང་རྐང་ལ་ཡོད་པར་ཐལ།  ཉན་ཐོས་
ཀྱི་འདུལ་བ་ནས་བཤད་པའི་དགེ་སློང་གི་སྡོམ་པ་ལ་གནས་པས་བསྒོམས་ན་བསོད་ནམས་ཆེ་བ་དེ་ཡིན་པའི་ཕྱིར། མདུན་སྐྱེད་ཡིན་པ་ལ་རྒྱུ་མཚན་དྲི་བ་ཡང་དོན་མེད་དེ།  ཐོག་མར་གསོ་སྦྱོང་བླངས་ནས་རྣམ་རྒྱལ་དོན་ཞགས་ལ་སོགས་པའི་མདུན་སྐྱེད་བསྒོམ་པ་དེ་
ཉིད་རྒྱུ་མཚན་ཡིན་པས་དྲི་རྒྱུ་ཅི་ཡོད།  གསོ་སྦྱོང་གི་ཉིན་མདུན་སྐྱེད་བསྒོམས་ན་བསོད་ནམས་ཆེ་ཞེས་པའི་དོན་ཐོག་མར་མདུན་སྐྱེད་བསྒོམས་ནས་དེའི་འོག་ཏུ་གསོ་སྦྱོང་ལེན་པ་ལ་གོ་བ་ནི་མིན་མཆི།  འདི་འདྲའི་རིགས་ཅན་མང་དུ་འདུག་གོ  ༼༡༢༽།  རྣམ་རྒྱལ་དོན་
ཞགས་ལ་སོགས་པའི། །ཆོ་ག་བྱེད་པའི་དགེ་ཚུལ་དང་། །དགེ་སློང་དག་གིས་གསོ་སྦྱོང་ནི། །རང་གིས་བླངས་པའི་དགོས་པ་ཅི། །དགེ་བསྙེན་བཟང་པོའི་བསྙེན་གནས་ནི། །ཡན་ལག་ཚང་བར་མནོས་པའི་ཚེ། །གནད་གཅོད་པ་ཡི་ཚིག་དེ་ཡིས། །
9-4-9b


སྔར་གྱི་སྡོམ་པ་མི་འཇིག་གམ། །ཞེས་པའི་ལན་ནི།  ཆོ་གའི་ཚིག་ཏུ།  སེམས་ཅན་ཐམས་ཅད་ཀྱི་དོན་གྱི་ཕྱིར་དང་།  ཕན་པར་བྱ་བའི་ཕྱིར་དང་།  གྲོལ་བར་བྱ་བའི་ཕྱིར་དང་།  ཞེས་སོགས་གསུངས་པ་དེ་མ་གཟིགས་པ་ལགས་སམ།  གལ་ཏེ་དེ་དག་ནི་
ཀུན་སློང་གི་བསམ་པ་ཡིན་གྱི་བསླབ་པ་ལ་སློབ་པ་སྔར་ནས་ཡོད་པས་དགོས་པ་མེད་དོ་སྙམ་ན།  དབང་བསྐུར་ལན་གཅིག་ཐོབ་ནས་ཡང་ནས་ཡང་དུ་ལེན་པ་ལ་དགོས་པ་མེད་པར་འགྱུར་ཏེ།  བསླབ་པ་ལ་སློབ་པ་སྔར་ནས་ཡོད་པའི་ཕྱིར།  ལམ་དུས་ཐུན་བཞིར་
ལེན་པ་དགོས་པ་མེད་པར་འགྱུར་ཏེ།  རྒྱུ་མཚན་དེ་ཉིད་ཀྱི་ཕྱིར།  སེམས་བསྐྱེད་ལན་གཅིག་ཐོབ་ནས་སླར་ལེན་པ་ལ་དགོས་པ་མེད་པར་འགྱུར་ཏེ།  རྒྱུ་མཚན་དེ་ཉིད་ཀྱི་ཕྱིར།  དེ་བཞིན་དུ་ཐུན་མོང་མ་ཡིན་པའི་སྐྱབས་འགྲོ་སོགས་ཐེག་ཆེན་གྱི་སྡེ་སྣོད་
ལས་བཤད་པའི་སྡོམ་པ་མཐའ་དག་ལ་སྦྱར་ཏེ་བརྗོད་པར་བྱའོ། །དེས་ན་འདི་ནི་ཉན་ཐོས་ཀྱི་ལུགས་ལ་སོ་ཐར་ལན་གཅིག་སྐྱེས་ནས་མ་བཏང་བའི་བར་དུ་སླར་བླང་དུ་མེད་པ་དང་།  ཐེག་ཆེན་གྱི་སྡེ་སྣོད་ལས་བཤད་པའི་སྡོམ་པ་ཡང་ཡང་བླངས་པས་གོང་འཕེལ་
དུ་འགྲོ་བའི་ཁྱད་པར་མ་ཕྱེད་པའི་གཏམ་དུ་སྣང་ངོ་། །དགེ་སློང་དང་དགེ་ཚུལ་གྱིས་དགེ་བསྙེན་བཟང་པོའི་བསྙེན་གནས་མནོས་པས།  གནད་གཅོད་པའི་ཚིག་ཏུ་སོང་བའི་རྒྱུ་མཚན་ཅི།  དེ་ལས་གཞན་ལ་མི་སློབ་པར་ཁས་བླངས་བར་སོང་བའི་ཕྱིར་སྙམ་
ན།  འོ་ན་བླ་མེད་ཀྱི་སྔགས་སྡོམ་ལ་གནས་པས་བྱ་རྒྱུད་ཀྱི་དབང་བསྐུར་མནོས་པའི་ཚེ་གནད་གཅོད་པའི་ཚིག་ཏུ་འགྱུར་ཏེ།  རྒྱུ་མཚན་མཚུངས་པའི་ཕྱིར།  རྡོ་རྗེ་རྩེ་མོ་ལས།  ཁྱོད་ཀྱིས་སྲོག་ཆགས་བསད་མི་བྱ། །ཅེས་སོགས་བསྒྲག་པ་དེ་བསླབ་
9-4-10a


གཞི་ལྔ་པོ་དེ་ལས་གཞན་ལ་མ་སློབ་ཅིག་ཅེས་པའི་ཚིག་ཏུ་འགྱུར་ཏེ།  རྒྱུ་མཚན་མཚུངས་པའི་ཕྱིར།  སྡོམ་པ་བསྒྲག་པའི་སྐབས་སུ་བསླབ་གཞི་ལྔ་བསྒྲག་པ་དེ་བཟུང་བའི་སྐབས་སུ་བཟུང་བ་ཡོད་
དམ་མེད།  མེད་ན་བསྒྲགས་པ་ལ་དགོས་པ་ཅི་ཞིག་ཡོད་ལེགས་པར་སོམས་ཤིག །ཡོད་ན་དེའི་ཚེ་སྔར་གྱི་སྡོམ་པ་ཐམས་ཅད་འཇིག་པར་འགྱུར་ཏེ།  དགེ་བསྙེན་བཟང་པོའི་བསླབ་གཞི་བརྒྱད་མནོས་པས་གནད་གཅོད་པའི་ཚིག་ཏུ་
འགྱུར་ན་བསླབ་གཞི་ལྔ་མནོས་པ་གནད་གཅོད་པའི་ཚིག་ཏུ་འགྱུར་བ་ལྟ་ཅི་སྨོས་པའི་ཕྱིར་རོ། །གལ་ཏེ་སང་ཉི་མ་མ་ཤར་གྱི་བར་དུ་ཅེས་པའི་ཚིག་གིས་དེ་ཕན་ཆད་མི་སློབ་པར་བསྟན་པས།  གནད་གཅོད་ཀྱི་ཚིག་ཏུ་སོང་ན་ནི།  དགེ་བསྙེན་གྱིས་དེ་
བླངས་པའི་ཚེ་ན་ཡང་གནད་གཅོད་ཀྱི་ཚིག་ཏུ་འགྱུར་རོ། །འདི་འདྲའི་ཚིག་གིས་གདུལ་བྱའི་ཉམས་ལེན་རྒྱུན་གཅོད་པས་མི་གསུང་བར་ཞུ།  དེས་ན་འདི་ནི་ལང་ཀ་མགྲིན་བཅུས།  དབང་ཕྱུག་ཆེན་པོ་ལ་ད་དུང་སྔར་གྱི་མ་ཡིན་པའི་ས་ཡ་ཕྲག་ཕྱེད་ཐུབ་
པ་སློང་ཞེས་པའི་ཚིག་གནད་གཅོད་པའི་ཚིག་ཏུ་སོང་ཅེས་པས་འཁྲུལ་གཞི་བྱས་པར་སྣང་མོད།  ཚིག་དེ་ལ་ཡང་སྔར་གྱི་མ་ཡིན་པ་ཅེས་པ་གནད་གཅོད་དུ་སོང་བ་ཡིན་ནམ།  ས་ཡ་ཕྲག་ཕྱེད་སློང་ཅེས་པ་གནད་གཅོད་དུ་སོང་བ་ཡིན།  དང་པོ་ལྟར་ན།  
དགེ་སློང་དང་དགེ་ཚུལ་གྱིས་གསོ་སྦྱོང་ལེན་པའི་ཚེ་སྔར་གྱི་མ་ཡིན་པ་ཅེས་པའི་ཚིག་ཨེ་ཡོད།  ཕྱི་མ་ལྟར་ན་ས་ཡ་ཕྲག་ཕྱེད་དང་བཅུ་གསུམ་གྱི་སྟེང་དུ་ས་ཡ་ཕྲག་ཕྱེད་བསྣན་པས་ས་ཡ་ཕྲག་བཅུ་གསུམ་དུ་མི་འགྱུར་རམ།  གནད་གཅོད་པའི་ཚིག་ཇི་ལྟར་འགྱུར་
9-4-10b


ལེགས་པར་སོམས་ཤིག  ༼༡༣༽།  དགེ་བ་གང་ཡིན་ཐམས་ཅད་ཀྱིས། །རྣམ་སྨིན་བདེ་བ་བསྐྱེད་ན་ནི། །ཟག་མེད་དགེ་བའི་རྣམ་སྨིན་ཅི། །བཏང་སྙོམས་གཉིས་ཀ་མ་ཡིན་ན། །བསམ་གཏན་བཞི་པ་ཡན་ཆད་ཀྱི། །ཟག་བཅས་དགེ་བའི་རྣམ་སྨིན་དང་། །
བཏང་སྙོམས་ཅེས་པ་ལུང་མ་བསྟན། །ཡིན་ན་ཀུན་གཞིའི་ས་བོན་ལས། །རྣམ་སྨིན་འབྱུང་བ་དེ་ཅི་ཞིག །ཅེས་པའི་ལན་ནི།  མངོན་རྟོགས་རྒྱན་ལས།  དེ་མཐའ་དེ་ཡི་རྣམ་སྨིན་ནི། །ཞེས་སྐད་ཅིག་མའི་སྦྱོར་བའི་རྣམ་སྨིན་འབྲས་བུ་ཆོས་སྐུ་ཡིན་པར་
གསུངས་པ་འདི་ཟག་མེད་དགེ་བའི་རྣམ་སྨིན་ཡོད་པའི་ལུང་ཡིན་ནོ། །གལ་ཏེ་མངོན་པ་གོང་འོག་ལས་རྣམ་སྨིན་གྱི་རྒྱུ་ལ་མི་དགེ་བ་དང་།  དགེ་བ་ཟག་བཅས་ཀྱིས་ཁྱབ་པར་གསུངས་པས་དེས་སུན་འབྱིན་ན་ནི།  སློབ་དཔོན་སེང་གེ་བཟང་པོས་གང་གི་ཕྱིར་འདི་ནི་
རྣམ་པར་བཞག་པ་གཞན་ཁོ་ན་ཡིན་ཏེ།  དེའི་ཕྱིར་ཐེག་པ་གཞན་ལ་བརྟེན་ནས་ནི་གང་དུའང་སུན་འབྱིན་པ་བརྗོད་པར་མི་བྱའོ། །ཞེས་གསུངས་པ་འདི་དྲན་པར་བྱའོ། །ཚིག་རྐང་བར་པ་གསུམ་ནི་བཏང་སྙོམས་ཅེས་པ་ཚོར་བ་བཏང་སྙོམས་ལ་ངོས་བཟུང་ནས་དགག་པ་
བརྗོད་པར་སྣང་ཡང་བཏང་སྙོམས་ཅེས་པའི་ཚིག་གར་ཡོད་དེར་མ་ངེས་ཏེ།  འདུ་བྱེད་བཏང་སྙོམས་ཀྱང་ཡོད་པའི་ཕྱིར་རོ། །འོན་ཀྱང་འདིའི་བཏང་སྙོམས་ནི་དེ་གཉིས་ཀ་མ་ཡིན་ཏེ།  ཚིག་རྐང་པ་སྙོམས་པའི་ཆེད་དུ་ལུང་མ་བསྟན་ལ་བཏང་སྙོམས་སུ་བྱས་
པའོ། །དེས་ན་བཏང་སྙོམས་ཅེས་པའི་ཚིག་གཅིག་ཉིད་ཀྱང་དགེ་སྡིག་བཏང་སྙོམས་གསུམ་ཅེས་པའི་ཚེ་ལུང་མ་བསྟན་དང་།  བདེ་སྡུག་བཏང་སྙོམས་གསུམ་ཅེས་པའི་ཚེ་ཚོར་བ་བཏང་སྙོམས་དང་།  བཏང་སྙོམས་ངོ་ཚ་ཤེས་ཁྲེལ་ཡོད། །ཅེས་པའི་ཚེ་
9-4-11a


འདུ་བྱེད་བཏང་སྙོམས་ལ་འཇུག་པ་སོགས་གསུང་རབ་འཆད་ཚུལ་ལ་སྐབས་ཐོབ་ཀྱིས་འཇུག་ཚུལ་མང་དུ་ཤེས་པར་བྱའོ། །དེ་ལྟར་ན་ཚིག་རྐང་ཕྱི་མ་གསུམ་ལྟར་གྱི་དོགས་པ་མི་འབྱུང་ངམ་སྙམ་ན།  འདི་ལ་
སྐབས་དོན་དཔེ་དང་བཅས་ཏེ་བཤད་པ་དང་།  གཞན་དུ་རྟོགས་ན་ཧ་ཅང་ཐལ་བ་གཉིས་ལས།  དང་པོ་ནི།  ཀུན་གཞི་ལ་ལས་ཀྱི་ས་བོན་བཞག་པ་ནི།  སེམས་ཙམ་པའི་ལུགས་ཡིན་གྱི་མངོན་པ་འོག་མར་ནི་མི་འབྱུང་ལ་ལུགས་དེ་ལ་དགེ་མི་དགེའི་
ལས་བྱས་མ་ཐག་ཏུ་ཀུན་གཞི་ལ་ས་བོན་བཞག་པ་ཕྱིའི་རྐྱེན་གྱིས་གསོས་བཏབ་པ་ལས་རྣམ་སྨིན་འབྱུང་ཞེས་པའི་རྣམ་སྨིན་དེ་འཇོག་བྱེད་དགེ་མི་དགེའི་ལས་ཀྱི་རྣམ་སྨིན་ཡིན་གྱི་ས་བོན་གྱི་རྣམ་སྨིན་མ་ཡིན་པས་ས་བོན་ལུང་མ་བསྟན་ཡིན་པ་དང་།  དེ་ལས་
རྣམ་སྨིན་འབྱུང་བ་ལ་འགལ་བ་ཅི་ཞིག་ཡོད།  དཔེར་ན་དཔྱིད་ཀར་ཤ་པ་ནི་གསུམ་བསྐྱེད་དུ་བཏང་བ་དཔང་རྒྱ་ཡི་གེར་བྲིས་ཏེ།  སྟོན་ཡི་གེ་དེ་བསྟན་པ་ལས།  ཀཪྴ་པ་ནི་བཞི་ཁུགས་པའི་ཚེ།  ཀཪྴ་པ་ནི་གཅིག་པོ་དེ་སྔར་གྱི་ཀཪྴ་པ་ནི་གསུམ་པོ་དེའི་བེད་བསྐྱེད་
ཡིན་གྱི།  དཔང་རྒྱའི་བེད་བསྐྱེད་མ་ཡིན་པ་བཞིན་ནོ། །གཉིས་པ་ནི་གལ་ཏེ་ཚེ་ཕྱི་མའི་རྣམ་སྨིན་དེ།  ས་བོན་གྱི་རྣམ་སྨིན་ཡིན་པར་ཐལ།  ས་བོན་ལས་དེ་འབྱུང་བའི་ཕྱིར་ཞེ་ན།  འོ་ན་ཉོན་ཅིག །ལྡེར་སྐུའི་མགོ་བོ་དེ་ལྷ་བཟོའི་མགོ་བོ་ཡིན་པར་ཐལ། 
ལྷ་བཟོ་བ་ལས་ལྡེ་གུའི་མགོ་བོ་འབྱུང་བའི་ཕྱིར།  དེ་བཞིན་དུ་ཁབ་ཀྱི་མིག་དེ་མགར་བའི་མིག་ཡིན་པར་ཐལ།  དེ་ལས་དེ་འབྱུང་བའི་ཕྱིར།  ལྷྭམ་གྱི་སྣ་དེ་ལྷྭམ་མཁན་གྱི་སྣ་ཡིན་པར་ཐལ།  དེ་ལས་དེ་འབྱུང་བའི་ཕྱིར།  རྫ་མའི་ཁ་དེ་རྫ་མཁན་གྱི་ཁ་ཡིན་
9-4-11b


པར་ཐལ།  དེ་ལས་དེ་འབྱུང་བའི་ཕྱིར།  སྐྱོགས་ཀྱི་རྩིབ་མ་དེ་སྐྱོགས་མཁན་གྱི་རྩིབ་མ་ཡིན་པར་ཐལ།  དེ་ལས་དེ་འབྱུང་བའི་ཕྱིར།  ཞེས་སོགས་མཐའ་ཡས་པ་བརྗོད་པར་བྱ་སྟེ།  འདི་ཡི་རིགས་ལ་འདིའི་ཚན་མཁོའོ།  ༼༡༤༽།  ལས་དཀར་ཅེས་པ་
དགེ་བ་ལ། །ཟེར་ན་རྣམ་སྨིན་གནག་པ་ཅི། །ལས་གནག་ཅེས་པ་སྡིག་པ་ལ། །ཟེར་ན་རྣམ་སྨིན་དཀར་བ་ཅི། །ཅེས་པའི་ལན་ནི།  སྤྱིར་ལས་དཀར་ཅེས་པ་མཚན་ཉིད་པ་དགེ་བ་ཡིན་ཀྱང་སྐབས་འདིར་ལུས་ངག་གི་སྦྱོར་བ་སྦྱིན་པ་ལ་སོགས་
དགེ་བར་སྣང་བས་དགེ་བའི་མིང་གིས་བཏགས་པ་དེ།  དོན་ལ་རྒྱུ་དུས་དང་།  དེ་དུས་ཀྱི་ཀུན་སློང་གཉིས་ཀ་གནག་པས་ལས་གནག་ཡིན་པའི་ཕྱིར།  དེ་བཞིན་དུ་ལས་གནག་ཅེས་པ་ཡང་སྐབས་འདིར་ལུས་ངག་གི་སྦྱོར་བ་སྲོག་གཅོད་སོགས་མི་
དགེ་བར་སྣང་བས་ལས་གནག་གིས་མིང་བཏགས་པ་སྟེ།  དོན་ལ་ལས་དཀར་ཡིན་པ་ཡང་ཤེས་པར་བྱའོ། །གལ་ཏེ་ལས་དཀར་ལ་ལས་གནག་ཅེས་པའི་མིང་དང་།  ལས་གནག་ལ་ལས་དཀར་ཅེས་པའི་མིང་གིས་གདགས་སུ་མི་རུང་ན།  ཟག་མེད་
ཀྱི་ལས་གཅིག་ལ་མངོན་པ་འོག་མར་མི་དཀར་ཅེས་པ་དང་།  མངོན་པ་གོང་མར་དཀར་བ་ཅེས་གསུངས་པ་ཡང་འགལ་བར་འགྱུར་ཏེ།  མི་དཀར་བ་ཡིན་ན་དཀར་བ་ཅེས་དང་།  དཀར་བ་ཡིན་ན་མི་དཀར་བ་ཞེས་པའི་མིང་གིས་འདོགས་སུ་མི་རུང་བར་མཚུངས་
པའི་ཕྱིར་རོ། །མཛོད་འགྲེལ་ལས།  ཟག་མེད་ཀྱི་ལས་ལ་རྣམ་སྨིན་བདེ་བ་མི་སྐྱེད་པས་མི་དཀར་ཞེས་བརྗོད་པར་གསུངས་པའི་དེ་མ་ཐག་ཏུ་མི་དཀར་ཞེས་པ་དགོངས་པ་ཅན་དུ་བསྒྲུབ་པ་ཡང་མི་འཐད་པར་འགྱུར་ཏེ།  ལས་གནག་ལ་ལས་དཀར་གྱི་མིང་གིས་
9-4-12a


འདོགས་སུ་མི་རུང་བའི་ཕྱིར་རོ། །འདོད་ན་མཛོད་འགྲེལ་ལས།  མི་དཀར་ཞེས་བྱ་བའི་སྒྲ་འདི་ནི་དགོངས་པ་ཅན་ཡིན་ཏེ།  བཅོམ་ལྡན་འདས་ཀྱིས་སྟོང་པ་ཆེན་པོའི་མདོ་ལས་མི་སློབ་པའི་ཆོས་ལས་བརྩམས་ཏེ། 
ཀུན་དགའ་བོ་ཆོས་འདི་དག་ནི་གཅིག་ཏུ་དཀར་བ།  གཅིག་ཏུ་ཁ་ན་མ་ཐོ་བ་མེད་པ་ཡིན་ནོ། །ཞེས་གསུངས་སོ། །བསྟན་བཅོས་ལས་ཀྱང་།  ཆོས་དཀར་པོ་རྣམས་གང་ཞེ་ན།  དགེ་བའི་ཆོས་རྣམས་དང་།  མ་བསྒྲིབས་ལ་ལུང་དུ་མ་བསྟན་པ་རྣམས་
ཡིན་ནོ། །ཞེས་འབྱུང་ངོ་ཞེས་གསུངས་པ་དང་འགལ་ལོ། ༼༡༥༽།  རྒྱུ་ཡི་ཀུན་སློང་སྡིག་ཡིན་ན། །དུས་ཀྱི་ཀུན་སློང་དགེ་ཡིན་ཀྱང་། །ལས་དེ་དཀར་པོར་མི་འགྱུར་ཞེས། །མངོན་པ་འོག་མར་མ་བཤད་དམ། །ཞེས་པའི་ལན་ནི།  འདི་གང་ལ་འདྲི་བ་ཡིན། 
ལས་དཀར་རྣམ་སྨིན་གནག་པ་ཞེས་པའི་མཚན་གཞི་གསོད་ཕྱིར་སྦྱིན་པ་གཏོང་བ་སོགས་ལ་བཤད་པ་ལ་འདྲི་བ་ཡིན་ན་ནི།  དེ་ལས་དཀར་མཚན་ཉིད་པ་མ་ཡིན་པ་གོང་དུ་བཤད་ཟིན་ཅིང་།  ལས་དེ་དུས་ཀྱི་ཀུན་སློང་དགེ་བ་ཡིན་པར་འདོད་པ་ཉིད་ཀྱང་མི་འཐད་དེ། 
གཞན་དུ་ན་དཀར་གནག་འདྲེས་མའི་ལས་སུ་ཐལ་བའི་ཕྱིར་རོ། །དེ་ལས་གཞན་པའི་གཞུང་ལ་འདི་འདྲི་བའི་གནས་མི་འདུག་གོ  ༼༡༦༽།  དུས་ཀྱི་ཀུན་སློང་མི་དགེ་བ། །དག་དང་མཚུངས་ལྡན་དགེ་བ་ནི། །མོ་གཤམ་བུ་དང་འདྲའོ་ཞེས། །མངོན་པ་གོང་མར་
མི་འབྱུང་ངམ། །ཞེས་པའི་ལན་ནི།  མངོན་པ་གོང་མར་མི་དགེ་བ་དང་མཚུངས་ལྡན་གྱི་དགེ་བ་མོ་གཤམ་གྱི་བུ་དང་འདྲ་བར་གསུངས་མོད།  དེས་བསྟན་བཅོས་འདིའི་ཚིག་ཟིན་དོན་ཐོབ་གང་ལ་གནོད་པ་ཡིན་ལེགས་པར་སྨྲོས་ཤིག །བསྟན་བཅོས་འདིའི་
9-4-12b


དགོངས་པ་ནི་རྒྱུ་དུས་དང་དེ་དུས་ཀྱི་ཀུན་སློང་གནག་ན་ལས་དེ་མཐའ་གཅིག་ཏུ་གནག་པ་དང་།  གཉིས་ཀ་དཀར་ན་ལས་དེ་མཐའ་གཅིག་ཏུ་དཀར་བ་དང་།  འདྲེས་མ་ལ་ལས་དེ་འདྲེས་མར་འགྱུར་བ་ཡིན་ལ།  ལུས་ངག་གི་སྦྱོར་བ་དཀར་བར་སྣང་བ་དང་།  གནག་པར་
སྣང་བ་ནི་དཀར་གནག་ཏུ་མིང་འདོགས་པའི་གཞི་ཙམ་ཡིན་གྱི།  དེས་དཀར་གནག་གང་དུ་ཡང་མི་འགྱུར་བའི་གནད་འདི་རྟོགས་ན་འདི་འདྲ་བའི་རྣམ་རྟོག་བན་བུན་སྐྱེ་བའི་གཞི་མེད་དོ།  ༼༡༧༽།  རྒྱུ་ཡི་ཀུན་སློང་འཕེན་བྱེད་ཀྱི། །གཙོ་བོ་ཡིན་ཕྱིར་འཕེན་བྱེད་རྒྱུ། །
དུས་ཀྱི་ཀུན་སློང་འགྲུབ་བྱེད་ཀྱི། །གཙོ་བོ་ཡིན་ཕྱིར་འགྲུབ་བྱེད་རྒྱུར། །གོང་འོག་མཐུན་པར་གསུང་མིན་ནམ། །ཅེས་པའི་ལན་ནི།  དྲི་བའི་གཞི་བསྟན་བཅོས་འདི་ལ་མེད་པ་དང་། དྲིས་པའི་ཚིག་མངོན་པ་གོང་འོག་ལས་མི་འབྱུང་བ་དང་།  དྲིས་པའི་
དོན་ལ་རིགས་པའི་གནོད་བྱེད་འབབ་པ་དང་གསུམ་ལས།  དང་པོ་ནི།  འདི་ལས་དཀར་རྣམ་སྨིན་གནག་པ་དང་།  ལས་གནག་རྣམ་སྨིན་དཀར་བ་ལྟ་བུ་ལ་འདྲི་བ་ཡིན་ན་ནི།  དེའི་དོན་སྔར་བཤད་པ་ལྟར་ཡིན་པས་དོགས་པ་འདི་སྐྱེ་བའི་གཞི་མེད་ཅིང་།  གལ་ཏེ་
འཕེན་རྫོགས་མུ་བཞི་ལ་འདྲི་བ་ཡིན་ན་ནི་འཕེན་རྫོགས་གཉིས་ཀྱི་ཟླས་ཕྱེ་བའི་འཕེན་བྱེད་དེ་རྒྱུ་དུས་ཀྱི་ཀུན་སློང་དང་།  རྫོགས་བྱེད་དེ་དེ་དུས་ཀྱི་ཀུན་སློང་ལ་ངོས་འཛིན་པ་གཏན་མི་འཐད་ཅིང་།  སྐབས་དེའི་འཕེན་བྱེད་འཕེན་འགྲུབ་གཉིས་ཀྱི་ཟླས་ཕྱེ་བའི་འཕེན་བྱེད་ཀྱང་
མ་ཡིན།  རྫོགས་བྱེད་དེ་དེ་གཉིས་ཀྱི་ཟླས་ཕྱེ་བའི་འགྲུབ་བྱེད་ཀྱང་མ་ཡིན་པས་འདི་འདྲི་བའི་གཞི་མེད་དོ། །གཉིས་པ་ནི།  གོང་འོག་མཐུན་པར་མི་འབྱུང་ངམ། །ཞེས་པའི་འུར་གདངས་འདི་འདྲའི་རང་བཞིན་དེ་དཔྱད་ན་སྤྲིན་བཞིན་དུ་དེངས་ཏེ།  འདི་ལྟར་མངོན་པ་
9-4-13a


མཛོད་དུ།  རྟེན་འབྲེལ་བཅུ་གཉིས་ལ་འཕེན་གྲུབ་སྦྱར་བ་གཏན་མེད་ཅིང་།  ཀུན་སློང་རྣམ་གཉིས་རྒྱུ་དང་ནི། །དེ་ཡི་དུས་ཀྱི་སློང་ཞེས་བྱ། །གཉིས་ལས་དང་པོ་རབ་འཇུག་བྱེད། །གཉིས་པ་རྗེས་སུ་འཇུག་བྱེད་ཡིན། །
ཞེས་པའི་འགྲེལ་པར།  རྒྱུའི་ཀུན་ནས་སློང་བ་ནི་འཕེན་པར་བྱེད་པ་ཡིན་པའི་ཕྱིར་རབ་ཏུ་འཇུག་པར་བྱེད་པ་ཡིན་ནོ། །དེའི་དུས་ཀྱི་ཀུན་ནས་སློང་བ་ནི་བྱ་བའི་དུས་སུ་མཐུན་པར་འཇུག་པར་ཡིན་པའི་ཕྱིར་རྗེས་སུ་འཇུག་པར་བྱེད་པ་ཡིན་ནོ། །ད་ནི་བྱ་བ་དེ་ལ་དེའི་ནུས་པ་ཅི་
ཞིག་ཡོད།  འཕངས་སུ་ཟིན་ཀྱང་དེ་མེད་ན་ཤི་བའི་བཞིན་དུ་དེ་ཡོད་པར་མི་འགྱུར་རོ། །ཞེས་གསུངས་པ་འདི་ལ་འཁྲུལ་པ་མིན་མཆི།  དེ་ལྟར་ན་རྒྱུའི་ཀུན་སློང་འཕེན་བྱེད་དུ་གསུངས་པ་ནི་འཕེན་འགྲུབ་གཉིས་ཀྱི་ཟླས་ཕྱེ་བའི་འཕེན་བྱེད་མ་ཡིན་ཏེ།  དེ་
ཡིན་ན་རྣམ་སྨིན་གྱི་ངོ་བོ་འཕེན་བྱེད་ཡིན་དགོས་པ་གང་ཞིག །འདིའི་འཕེན་བྱེད་ནི་ལས་ཀྱི་ངོ་བོ་འཕེན་པ་ལ་གསུངས་པའི་ཕྱིར་རོ། །འདིར་དུས་ཀྱི་ཀུན་སློང་འགྲུབ་བྱེད་ལ་གསུངས་པ་གཏན་མི་སྣང་ལ་གལ་ཏེ་འགྲུབ་བྱེད་དུ་འདོད་ན་འཕེན་བྱེད་ཀྱིས་
འཕངས་ནས་འགྲུབ་བྱེད་ཀྱིས་གསོས་མ་བཏབ་པའི་གོང་དུ་ལས་དེ་ཡོད་པར་མི་འགྱུར་བར་ཐལ།  དེ་དུས་ཀྱི་ཀུན་སློང་མེད་ན་རྒྱུ་དུས་ཀྱི་ཀུན་སློང་ཡོད་ཀྱང་ལས་དེ་ཡོད་པར་མི་འགྱུར་བར་དངོས་སུ་གསུངས་འདུག་པའི་ཕྱིར།  ལེགས་པར་དཔྱོད་ཅིག །མངོན་པ་གོང་མར་
རྒྱུའི་ཀུན་སློང་འཕེན་བྱེད་དང་།  དུས་ཀྱི་ཀུན་སློང་འགྲུབ་བྱེད་དུ་སྨྲ་བ་འདི་ལ་ཆོས་མངོན་པ་ཤེས་པའམ་དེ་ཙམ་མི་ཤེས་ཀྱང་ཡན་ལག་བཅུ་གཉིས་ཀྱི་འཕེན་འགྲུབ་རྩི་མྱོང་བ་དག་གིས་ལེགས་པར་དཔྱོད་ཅིག །ཁོ་བོ་ནི་མང་པོ་མི་སྨྲ།  མ་རིག་པ་འདུ་བྱེད་རྣམ་ཤེས་
9-4-13b


གསུམ་རྒྱུ་དུས་ཀྱི་ཀུན་སློང་དང་།  སྲེད་ལེན་སྲིད་པ་གསུམ་དེ་དུས་ཀྱི་ཀུན་སློང་དུ་འདོད་པ་འདི་ལ་ཧ་ཧ་ཧེ་ཧེ་འདི་ཙམ་ཞིག་སྨྲའོ། །གསུམ་པ་ནི་མངོན་པ་གོང་མའི་ལུགས་ལ།  སྲོག་གཅོད་ལྟ་བུའི་རྒྱུའི་ཀུན་སློང་སྐྱེད་ཟིན་ནས་དུས་ཀྱི་ཀུན་སློང་མ་སྐྱེས་པའི་གོང་དུ་སྲོག་
གཅོད་ཀྱི་ལས་དེ་རྫོགས་པར་བྱས་པར་ཐལ།  སྲོག་གཅོད་ལྟ་བུའི་འཕེན་བྱེད་རྫོགས་པར་བྱས་པའི་ཚེ་སྲོག་གཅོད་ལྟ་བུའི་ལས་དེ་རྫོགས་པར་བྱས་པའི་ཕྱིར།  ཁྱབ་པ་ཨེ་སོང་།  འདོད་ན་དུས་ཀྱི་ཀུན་སློང་དེ་ལས་དེ་རྫོགས་པའི་རྗེས་སུ་འགྱུར་བར་ཐལ་ཞིང་།  མ་
གྲུབ་ན། ཡན་ལག་བཅུ་གཉིས་ཀྱི་ནང་ཚན་དུ་གྱུར་པའི་འདུ་བྱེད་རྫོགས་པའི་ཚེ་ན་ལས་དེ་མ་རྫོགས་པར་ཐལ་བའི་སྐྱོན་གནས་སོ། །གཞན་ཡང་དེ་དུས་ཀྱི་ཀུན་སློང་འགྲུབ་བྱེད་ཡིན་ན།  ལས་ཡིན་ན་འགྲུབ་བྱེད་ཀྱི་ལས་ཡིན་དགོས་པར་ཐལ།  ལས་ཡིན་ན་
དེ་དུས་ཀྱི་ཀུན་སློང་དང་བཅས་པ་ཡིན་དགོས་པས་སོ། །འདོད་ན་ཡན་ལག་བཅུ་གཉིས་ཀྱི་ནང་ཚན་དུ་གྱུར་པའི་འདུ་བྱེད་ཆོས་ཅན།  དེར་ཐལ།  དེའི་ཕྱིར།  འགྲུབ་བྱེད་ཀྱི་རྒྱུ་ཡིན་ན་རྒྱུ་མཐུན་གྱི་རྒྱུ་ཡིན་དགོས་པ་ཡང་ཤིན་ཏུ་མི་འཐད་དེ།  འགྲུབ་བྱེད་ཀྱི་རྒྱུ་ནི་སྲེད་
ལེན་སྲིད་པ་གསུམ་ལ་འཇོག་དགོས་པས།  རྒྱུ་མཐུན་གྱི་འབྲས་བུ་ཐམས་ཅད་ཉོན་མོངས་ཅན་གྱི་རྒྱུ་མཐུན་གྱི་འབྲས་བུར་ཐལ་བའི་ཕྱིར་རོ། །དེས་ན་འཕེན་བྱེད་དང་རྫོགས་བྱེད་གཉིས་ཀྱི་ཟླས་ཕྱེ་བའི་འཕེན་བྱེད་དང་།  འཕེན་བྱེད་དང་འགྲུབ་བྱེད་གཉིས་ཀྱི་ཟླས་
ཕྱེ་བའི་འཕེན་པར་བྱེད་པ་དང་།  བྱ་བའི་དུས་སུ་འཕེན་བྱེད་དང་མཐུན་པར་འཇུག་པར་བྱེད་པ་གཉིས་ཀྱི་ཟླས་ཕྱེ་བའི་འཕེན་པར་བྱེད་པ་གསུམ་མ་འདྲེས་པར་སོ་སོར་ཤེས་པར་བྱ་སྟེ།  དང་པོ་ནི།  རྣམ་སྨིན་གྱི་རྒྱུ་ཙམ་གྱི་འཕེན་འགྲུབ་གཉིས་ཀ་དང་།  གཉིས་པ་ནི།
9-4-14a


  ཡན་ལག་བཅུ་གཉིས་ཀྱི་དང་པོ་གསུམ་དང་།  གསུམ་པ་ནི།  རྒྱུ་དུས་ཀྱི་ཀུན་སློང་ལ་འཇུག་པའི་ཕྱིར་རོ།  ༼༡༨༽།  འདོད་པའི་རྟེན་ལ་དཀར་གནག་གི།  ལས་གཉིས་འདྲེས་པར་འཇོག་པ་བཞིན། །རྣམ་པར་སྨིན་
པའང་འདྲེས་སམ་ཅི། །དེ་ལྟར་ན་ནི་ངན་སོང་དང་། །མཐོ་རིས་གཉིས་ཀ་རྒྱུད་གཅིག་ལ། །སྲིད་པར་ཁས་ལེན་མི་དགོས་སམ། །ཞེས་པའི་ལན་ནི།  ལས་དཀར་གནག་བཞིའི་ཁྱད་པར་སོ་སོར་བཤད་པ།  མངོན་པ་འོག་མར་རྣམ་སྨིན་
འདྲེས་པ་བཤད་པའི་ཚུལ།  གོང་མར་རྣམ་སྨིན་འདྲེས་པ་མི་འབྱུང་བའི་ཚུལ་དང་གསུམ་ལས།  དང་པོ་ནི།  དཀར་གནག་སོགས་ཀྱི་དབྱེ་བའི་ཚུལ་འདི་ལ་མི་འདྲ་བ་གསུམ་སྣང་སྟེ།  མཛོད་ལས།  གནག་ལ་རྣམ་པར་སྨིན་པ་གནག་པའི་
ལས་ནི་མི་དགེ་བ་སྟེ།  ངོ་བོ་ཉོན་མོངས་ཅན་ཡིན་ཅིང་རྣམ་སྨིན་ཡིད་དུ་མི་འོང་བ་འབྱིན་པའི་ཕྱིར།  དཀར་ལ་རྣམ་པར་སྨིན་པ་དཀར་བའི་ལས་ནི་གཟུགས་སུ་གཏོགས་པའི་དགེ་བ་སྟེ།  མི་དགེ་བ་དང་མ་འདྲེས་ཤིང་རྣམ་སྨིན་ཡིད་དུ་འོང་བ་འབྱིན་པའི་ཕྱིར།
ཅིའི་ཕྱིར་གཟུགས་མེད་དུ་གཏོགས་པའི་དགེ་བ་མ་བཤད་ཅེ་ན།  རྣམ་པར་སྨིན་པ་སྲིད་པ་བར་མ་དང་།  སྐྱེ་བའི་སྲིད་པ་གཉིས་ཡོད་པ་དང་།  ལས་ཀྱི་ངོ་བོ་ལུས་ངག་ཡིད་གསུམ་གྱི་ལས་གསུམ་ཆར་ཡོད་པ་ཁོ་ན་ལ་དེ་བཤད་དགོས་པས་གཟུགས་མེད་དུ་
གཏོགས་པ་མ་བཤད་དོ་ཅེས་བྱེ་བྲག་ཏུ་སྨྲ་བ་རྣམས་ལ་གྲགས་ལ།  སློབ་དཔོན་གྱི་བཞེད་པ་ནི།  མདོ་གཞན་ལས་དེའང་བཤད་པར་བཞེད་དོ། །དཀར་གནག་ཏུ་གྱུར་ལ་རྣམ་པར་སྨིན་པ་དཀར་གནག་ཏུ་གྱུར་པའི་ལས་ནི་འདོད་པའི་དགེ་བ་སྟེ།  རྒྱུད་མི་
9-4-14b


དགེ་བ་དང་འདྲེས་པའི་ཕྱིར་དང་།  རྣམ་པར་སྨིན་པ་ཡང་འདྲེས་པའི་ཕྱིར།  མི་དཀར་མི་གནག་ཅིང་རྣམ་པར་སྨིན་པ་མེད་ལ་ལས་ཟད་པར་བྱེད་པའི་ལས་ནི་ཟག་པ་མེད་པའི་ལས་ཏེ།  རྣམ་པར་སྨིན་པ་དཀར་པོ་ཉིད་མེད་པས་ན་མི་དཀར་བ་དང་།  རྣམ་སྨིན་མེད་པ་
ཞེས་བྱ་ལ།  ངོ་བོ་ཉོན་མོངས་ཅན་མ་ཡིན་པས་མི་གནག་པ་དང་།  སྔར་གྱི་ལས་གསུམ་པོ་དེ་ཟད་པར་བྱེད་པས་ན་ལས་ཟད་པ་ཞེས་བརྗོད་པ་ཡིན་པའི་ཕྱིར་རོ། །མི་དཀར་ཞེས་པ་དགོངས་པ་ཅན་དུ་མདོ་དང་བསྟན་བཅོས་ཀྱི་ལུང་གཉིས་ཀྱིས་བསྒྲུབ་སྟེ།  སྔར་བཤད་
ཟིན་ཏོ། །མངོན་པ་གོང་མར་ནི་བཞི་པོ་རིམ་པ་ལྟར་མི་དགེ་བ་དང་།  ཁམས་གསུམ་པའི་དགེ་བ་དང་། འདོད་པ་དང་རབ་ཏུ་ལྡན་པའི་འདྲེན་མ་དང་།  སྦྱོར་བ་དང་།  བར་ཆད་མེད་པའི་ལམ་རྣམས་ལ་ཟག་པ་མེད་པའི་ལས་དང་བཞི་ལ་བཤད་ཅིང་།  འདོད་པ་དང་
རབ་ཏུ་ལྡན་པའི་འདྲེན་མའི་དོན་ཡང་བསམ་སྦྱོར་གང་རུང་གནག་ནས་གང་རུང་དཀར་བ་ལ་བཤད་དོ། །འདིའི་བསམ་སྦྱོར་ནི་རྒྱུ་དུས་དང་།  དེ་དུས་ཀྱི་ཀུན་སློང་གཉིས་ལ་འཇོག་པ་ནི་གནད་ཀྱི་དོན་ཏོ། །བཞི་པའི་ཐ་སྙད་ཀྱང་མི་གནག་ཅིང་།  དཀར་ལ་རྣམ་
པར་སྨིན་པར་མི་འབྱུང་ཞིང་།  ལས་ཟད་པར་འགྱུར་བའི་ལས་ཞེས་བྱ་སྟེ།  མཛོད་ལས།  མི་དཀར་ཞེས་པ་དགོངས་པ་ཅན་དུ་སྒྲུབ་པས་དོན་ལ་གནད་གཅིག་པར་སྣང་ངོ་། །དེ་དག་ནི་བཞིར་དབྱེ་བའི་ལུགས་ཡིན་ལ།  ཡང་མདོ་ལས་གཅིག་ཏུ་དཀར་བའི་ལས་ནི་
གཅིག་ཏུ་དཀར་བར་འགྱུར་རོ། །གཅིག་ཏུ་གནག་པའི་ལས་ནི་གཅིག་ཏུ་གནག་པར་འགྱུར་རོ། །འདྲེས་མའི་ལས་ཀྱང་འདྲེས་མར་འགྱུར་རོ། །ཞེས་གསུམ་དུ་གསུངས་ཤིང་།  བསྟན་བཅོས་འདི་ཡང་དེ་ཉིད་དོ། །མདོ་ལས་གསུངས་པའི་འདྲེས་མའི་དོན་ལ། 
9-4-15a


 མངོན་པ་གོང་འོག་གཉིས་ཀྱིས་དགོངས་པ་འགྲེལ་ཚུལ་གཉིས་བྱུང་ཡང་འདིར་ནི་གོང་མ་ལྟར་བཞེད་པར་གསལ་ཏེ།  འདོད་པའི་དགེ་བ་ཡང་རྒྱུ་དུས་དང་།  དེ་དུས་ཀྱི་ཀུན་སློང་གཉིས་ཀ་དཀར་ན་རྣམ་སྨིན་དཀར་པོ་འབའ་ཞིག་ཏུ་
བཞེད་པའི་ཕྱིར་རོ། །གཉིས་པ་ནི་མཛོད་ཀྱི་ལུགས་ལ།  འདོད་པའི་དགེ་བ་དཀར་ནག་འདྲེས་པའི་དོན་རྒྱུད་འདྲེས་པ་ཡིན་གྱི།  ངོ་བོ་འདྲེས་པ་མ་ཡིན་ཏེ།  ངོ་བོ་དགེ་བ་ཡིན་ན།  མི་དགེ་བ་དང་འདྲེས་པ་འགལ་བའི་ཕྱིར་རོ། །རྣམ་སྨིན་འདྲེས་པའི་
དོན་ཡང་རྒྱུད་འདྲེས་པ་ཡིན་གྱི་ངོ་བོ་འདྲེས་པ་མ་ཡིན་ནོ། །འོ་ན་འདོད་པའི་མི་དགེ་བ་ཡང་དགེ་བ་དང་འདྲེས་པ་ཡིན་པའི་ཕྱིར།  དཀར་གནག་འདྲེས་པ་མ་ཡིན་ནམ་ཞེ་ན།  འདོད་པའི་ཁམས་ན་མི་དགེ་བ་ནི་སྟོབས་དང་ལྡན་པས་དགེ་བ་དང་འདྲེས་པ་མ་ཡིན་ལ། 
དགེ་བ་ནི་སྟོབས་ཆུང་བའི་ཕྱིར་མི་དགེ་བ་དང་འདྲེས་པ་ཡིན་ནོ་ཞེས་བཤད་དོ། །མདོར་ན་ལུགས་འདི་ལ་རྒྱུད་གཅིག་ལ་དགེ་མི་དགེའི་རྣམ་སྨིན་འདྲེས་པ་ཡོད་དེ།  རྒྱུད་གཅིག་ལ་རྣམ་སྨིན་ཡིད་དུ་འོང་མི་འོང་གཉིས་ཀ་ལྡན་པ་ཡོད་པའི་ཕྱིར་རོ། །འོན་ཀྱང་བདེ་འགྲོ་
དང་ངན་འགྲོའི་རྣམ་སྨིན་རྟེན་གཅིག་ལ་འདྲེས་པར་མི་འགྱུར་ཏེ།  དགེ་བའི་རྣམ་སྨིན་ཡིན་ན།  བདེ་འགྲོའི་རྟེན་དང་།  མི་དགེ་བའི་རྣམ་སྨིན་ཡིན་ན།  ངན་འགྲོའི་རྟེན་ལ་སྨིན་པས་ཁྱབ་པའི་ཕྱིར།  དཔྱིས་ཕྱིན་པའོ། །གསུམ་པ་ནི།  མངོན་པ་གོང་མའི་
ལུགས་ལ་དཀར་གནག་འདྲེས་པའི་དོན་ནི།  སྔར་བཤད་ཟིན་ཅིང་།  རྣམ་སྨིན་འདྲེས་པའི་དོན་རྒྱུ་མཐུན་དང་བདག་པོའི་འབྲས་བུ་ལ་རྣམ་སྨིན་གྱི་མིང་གིས་བཏགས་པ་ཡིན་གྱི།  རྣམ་སྨིན་མཚན་ཉིད་པ་རྟེན་གཅིག་ལ་འདྲེས་པ་མི་སྲིད་དེ།  རྣམ་སྨིན་གྱི་གཙོ་བོ་ནི་
9-4-15b


ཀུན་གཞིའི་འཁོར་གྱི་ཚོར་བ་བཏང་སྙོམས་ཡིན་ཅིང་།  དེའི་སྟོབས་ཀྱིས་ཀུན་གཞི་འཁོར་བཅས་རྣམ་སྨིན་མཚན་ཉིད་པར་སོང་བ་ཡིན་ལ།  ཚོར་བ་བདེ་སྡུག་ལ་རྣམ་སྨིན་དུ་བཤད་པ་ནི་རྣམ་སྨིན་གྱི་མིང་གིས་གཏགས་པ་ཡིན་པས།  དེ་རྒྱུད་གཅིག་ལ་འདྲེས་པ་
ལ་རྣམ་སྨིན་འདྲེས་པར་འཇོག་པའི་ཕྱིར་རོ། །བདེ་འགྲོ་དང་།  ངན་འགྲོའི་ཀུན་གཞིའི་རྒྱུད་གཅིག་ལ་ཅིག་ཆར་དུ་འབྱུང་བ་ནི་མི་སྲིད་དེ།  ལུགས་འདི་ལ་དེ་དང་དེའི་ཀུན་གཞི་གྲུབ་པ་ལ་དེ་དང་དེའི་སྐྱེ་བ་བླང་པར་འཇོག་པའི་ཕྱིར་རོ། །འོན་ཀྱང་གནད་
འདི་དག་ཇི་ལྟ་བ་བཞིན་རྟོགས་པ་ལ་གྲུབ་མཐའ་གོང་འོག་གི་རྣམ་དབྱེ་རྒྱ་ཆེ་ལ་ཞིབ་པར་ཤེས་པ་ཅིག་དགོས་པར་སྣང་ངོ་།  ༼༡༩༽།  ཆོས་དབྱིངས་དགེ་བ་མ་ཡིན་ན། །མངོན་རྟོགས་རྒྱན་དང་རྒྱུད་བླ་དང་། །དབུས་རྣམ་འབྱེད་པར་བཤད་དེ་ཅི། །ཅེས་པའི་ལན་ནི་
མངོན་རྟོགས་རྒྱན་ལས།  ཆོས་དབྱིངས་དགེ་བར་བཤད་པ་གཏན་མི་སྣང་ལ།  ཐེག་ཆེན་བསྒྲུབ་པའི་དམིགས་པ་ཕྱི་མ་བརྒྱད་པོ་དགེ་བ་ཡིན་ན་ནི་ཧ་ཅང་ཐལ་ཞིང་རྒྱུད་བླར།  དགེ་དང་རྣམ་པར་དག་པ་དང་། །ཞེས་དང་།  དབུས་མཐར།  དགེ་གཉིས་ཐོབ་
པར་བྱ་ཕྱིར་དང་། །ཞེས་དགེ་བའི་མིང་གིས་གསུངས་པ་ཡོད་མོད།  ཆོས་དབྱིངས་ལ་དགེ་བར་གསུངས་པ་ཐམས་ཅད་བདག་ཉིད་ཆེན་པོ་འདིས་དགེ་བ་བཏགས་པ་བར་གཏན་ལ་ཕབ་བཞིན་དུ་སླར་ཡང་འདི་འདྲི་བ་ནི་ཐུག་མེད་ཀྱི་དྲི་བ་སྟེ།  དཔེར་ན་གཞུང་ཤེར་ཕྱིན་
བཏགས་པར་བཤད་ཟིན་བཞིན་དུ་རྗེས་སུ།  ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པ་ཞེས་བྱ་བ་དང་།  ཤེས་རབ་ཀྱི་ཕ་རོལ་ཏུ་ཕྱིན་པ་སྡུད་པ་ཚིགས་སུ་བཅད་པ་ཞེས་གསུངས་པ་དེ་ཅི་ལ་དགོངས་ཞེས་འདྲི་བ་དང་འདྲའོ།  ༼༢༠༽།  སྡིག་པ་མེད་ཙམ་ལ་དགོངས་ན། །མ་
9-4-16a


སྒྲིབ་ལུང་མ་བསྟན་ཀུན་ཅི། །ཅེས་པའི་ལན་ནི།  ཆོས་དབྱིངས་ལ་དགེ་བར་འདོགས་པའི་རྒྱུ་མཚན་སྡིག་པ་མེད་པ་ཙམ་ལ་དགོངས་བྱས་པ་ལ།  མ་སྒྲིབ་ལུང་མ་བསྟན་ཆོས་ཅན།  དགེ་བ་ཡིན་པར་ཐལ།  སྡིག་པ་མེད་
པ་ཙམ་ཡིན་པའི་ཕྱིར།  ཞེས་བརྗོད་པར་སྣང་བས་འདི་འདྲའི་སྟོན་པ་བཟང་ལུགས་ལ་བལྟས་ན་མཐའ་ཡས་འདུག །གཞུང་ཤེར་ཕྱིན་ལ་ཤེར་ཕྱིན་གྱི་མིང་གིས་འདོགས་པའི་རྒྱུ་མཚན་ཤེར་ཕྱིན་བརྗོད་བྱར་སྟོན་པ་ལ་དགོངས་ཞེས་པ་ལ།  བུམ་པ་བརྗོད་བྱར་སྟོན་
པའི་སངས་རྒྱས་ཀྱི་གསུང་རབ་ཆོས་ཅན།  བུམ་པ་ཡིན་པར་ཐལ།  བུམ་པ་བརྗོད་བྱར་སྟོན་པའི་ཕྱིར།  ཞེས་གསུངས་པར་འདུག་པས་ནན་ཏར་བཞེད་པར་འདུག་གོ།  གལ་ཏེ་མ་སྒྲིབ་ལུང་མ་བསྟན་ལ་དགེ་བའི་མིང་གིས་འདོགས་པའི་རྒྱུ་མཚན་ཚང་བར་འགྱུར་རོ། །
ཞེས་པའི་དོན་ཡིན་ན་དེ་ནི་འདོད་པ་ཡིན་མོད་འདོགས་པའི་རྒྱུ་མཚན་ཚང་ཡང་བཏགས་པའི་དགོས་པ་མེད་ན་མིང་དེ་མི་འདོགས་པ་ནི་རྟོག་ལྡན་གྱི་ལུགས་ཡིན་པའི་ཕྱིར་རོ།  ༼༢༡༽།  ཡོད་པ་ཉིད་ལ་མི་རྟག་པས། །ཁྱབ་པར་ཆོས་ཀྱི་གྲགས་པས་གསུངས། །ཡོད་པ་
ཙམ་ལ་དེས་ཁྱབ་པ། །རིག་པའི་གཞུང་ལུགས་གང་གིས་སྟོན། །ཞེས་པའི་ལན་ནི།  རང་བཞིན་ཡོད་པ་ཙམ་དང་། །འབྲེལ་པ་ཅན་གྱི་ངོ་བོ་ཡང་། །ཞེས་པ་འདི་ཡང་དེ་སྟོན་པའི་ལུང་ཡིན་ནོ། །རང་བཞིན་ལ་ཡང་མེད་མི་འབྱུང་། །ཡོད་པ་ཙམ་དང་
འབྲེལ་པ་ཡིན། །ཞེས་པ་འདི་ཡང་དེ་སྟོན་པའི་ལུང་ཡིན་ནོ། །དེ་ཡི་ཁྱད་པར་བཟུང་མེད་པར། །དངོས་པོ་ཙམ་ནི་བསྒྲུབ་པ་ན། །དེ་ཙམ་ཁྱབ་བྱེད་བསྒྲུབ་བྱ་ཡི། །རྗེས་སུ་འགྲོ་བ་ཉམས་པ་མེད། །ཅེས་པ་ཡང་དེ་སྟོན་པའི་ལུང་ཡིན་ཏེ། །ཡོད་ཉིད་
9-4-16b


ཅེས་པ་ལས་འཕྲོས་ནས། །གལ་ཏེ་གཏན་ཚིགས་ཡོད་རང་བཞིན། །ཡོད་པ་ཇི་ལྟར་བསྒྲུབ་བྱ་མིན། །ཞེས་རྩོད་པའི་ལན་སྟོན་བྱེད་ཡིན་པའི་ཕྱིར།  འཇིགས་པ་ཡོད་ཙམ་འབྲེལ་པ་ཅན། །ཉིད་ཕྱིར་སྒྲ་ནི་མི་རྟག་ཉིད། །ཅེས་པ་འདི་ཡང་དེ་སྟོན་པའི་
ལུང་ཡིན་ནོ། །འཇིགས་པ་དངོས་པོ་ཙམ་དང་ནི། །རྗེས་འབྲེལ་ཕྱིར་ན་རྟག་ཉིད་མིན། །ཞེས་པ་འདི་ཡང་དེ་སྟོན་པའི་ལུང་ཡིན་ནོ། །དེས་ན་ཡོད་ན་མི་རྟག་པས་ཁྱབ་པ་སྟོན་བྱེད་ཀྱི་རིག་གཞུང་།  འཇིག་ལ་འབྲས་དང་ཡོད་ཉིད་བཞིན། །ཞེས་པ་
འདི་གཅིག་པུ་ཡིན་སྙམ་ནས་དྲིས་པར་སྣང་ཡང་།  གཞུང་ལས།  བྷ་ཝ་ཅེས་པའི་ཚིག་གཅིག་ཉིད།  ཡོད་པ་དང་དངོས་པོ་གང་བདེར་བསྒྱུར་ཏེ།  སྒྲ་མི་རྟག་བསྒྲུབ་པ་ལ་འདི་གཉིས་བཀོད་ཅིང་།  གཏན་ཚིགས་ཀྱི་དབྱེ་བ་འཆད་པའི་ཚེ་འཇིག་ལ་
འབྲས་དང་ཡོད་ཉིད་བཞིན། །ཞེས་འབྲས་བུ་སྟེ་བྱས་པ་དང་།  ཡོད་པ་སྟེ་དངོས་པོ་བཀོད་པ་གཉིས་གསུངས་པ་ལ།  དཔལ་ལྡན་ས་སྐྱ་པཎྜི་ཏས།  རྟོག་ལྡན་གྱི་དོགས་པ་བསུས་ཏེ།  དབྱེ་བ་དེ་ལྟར་ཡོད་ན།  བཀོད་ཚོད་དེ་ལྟར་བཀོད་པའི་རྒྱུ་མཚན་ཅི་
ཡིན་སྙམ་ན།  ལན་དུ།  རིགས་གཏེར་རང་འགྲེལ་ལས།  གཏན་ཚིགས་ཀྱི་དོན་ལ་བཞི་ལས།  དང་པོ་རྟགས་ཀྱི་ངོ་བོ་ངོས་བཟུང་ན་ཡོད་པའམ་བྱས་པ་གང་བཀོད་ཀྱང་རུང་མོད།  འོན་ཀྱང་འགའ་ཞིག་རྡུལ་ཕྲན་དང་།  བདག་དང་།  དབང་ཕྱུག་དང་།  རིག་བྱེད་
ཀྱི་སྒྲ་ལ་སོགས་པ་བྱས་པར་མི་འདོད་པས།  ཁོའི་བློ་ངོར་རྟགས་མ་གྲུབ་ཀྱི་དོགས་ནས་ཡོད་པའི་ཕྱིར་ཞེས་བཀོད་དེ་དེ་དག་ཡོད་པར་ཁོས་ཀྱང་འདོད་པའི་ཕྱིར་རོ། །ཡང་ཡོད་པ་དེ་ཡང་རྒྱུ་རྐྱེན་གྱིས་བྱས་པ་མ་ཡིན་པ་ལ་མི་སྲིད་པའི་ཕྱིར་ཕྱིས་བྱས་པ་ཉིད་དུ་ཁོའི་བློ་ངོར་
9-4-17a


གྲུབ་ན།  བྱས་པའི་ཕྱིར་ཞེས་བཀོད་པ་ལས་གྲུབ་བོ། ཞེས་གསུངས་སོ། །འཆད་ཚུལ་འདི་ནི་ལུགས་འདི་ལ་དད་མོས་ཡོད་པའི་དེང་སང་གི་རིགས་པ་སྨྲ་བ་ཀུན་ལ་སྐྱེས་སུ་འབུལ་ལོ།  ༼༢༢༽།  ཀླུ་སྒྲུབ་ཀྱིས་ནི་དབུ་མ་ལས། །
དངོས་པོ་མེད་ལའང་འདུས་བྱས་ཀྱིས། །ཁྱབ་པར་གསུངས་པ་མིན་ནམ་ཅི། །དེ་ལྟ་ན་ནི་ཆོས་ཀྱི་དབྱིངས། །འདུས་བྱས་ཡིན་པར་མི་ཐལ་ལམ། །ཞེས་པའི་ལན་ནི།  ཆོས་དབྱིངས་ཆོས་ཅན།  འདུས་བྱས་ཡིན་པར་ཐལ།  དངོས་མེད་ཡིན་པའི་ཕྱིར། 
ཁྱབ་པ་ཀླུ་སྒྲུབ་ལ་སོང་ཟེར་བ་ཡིན་མཆི།  གཏན་ཚིགས་ཉིད་ཀྱིས་ཁས་བླངས་པ་ཡིན་ནམ།  བསྟན་བཅོས་འདིའི་ལུགས་ལ་སོང་བ་ཡིན།  དང་པོ་ལྟར་ན།  དེ་ཆོས་ཅན།  དེར་ཐལ།  དེའི་ཕྱིར།  གསུམ་ཆར་དངོས་འགལ་དུ་ཨེ་སོང་ལེགས་པར་སོམས་ཤིག།
ཕྱི་མ་ལྟར་ན་བསྟན་བཅོས་འདིར། །གལ་ཏེ་སེམས་ཅན་ཁམས་དངོས་དང་། །དངོས་མེད་གཉིས་ཀ་མ་ཡིན་པར། །སྤྲོས་བྲལ་ཡིན་ན་སྔར་བཤད་པའི། །ཆོས་ཀྱི་དབྱིངས་ལས་འདའ་བ་མེད། །ཅེས་གསུངས་པས་གཏན་ཚིགས་འདི་ཅི་ལྟར་འགྲོ་བ་ཡིན།  དགག་
སྒྲུབ་འདི་འདྲའི་རིགས་ཅན་གང་ཡིན་མི་ཤེས་པར་འདུག །ཀླུ་སྒྲུབ་ཀྱི་ལུང་གི་དོན་དངོས་མེད་ཡིན་ན།  འདུས་བྱས་ཡིན་པས་ཁྱབ་པ་ཡིན་ན།  ཆོས་དབྱིངས་ལས་རི་བོང་རྭ་ཆོས་ཅན་དུ་བཟུང་ནས་སྐྱོན་མི་བརྗོད་པའི་རྒྱུ་མཚན་ཅི་ཡིན།  དེས་ན་ཀླུ་སྒྲུབ་ཀྱི་གཞུང་གི་དགོངས་
པ་ནི་བྱེ་བྲག་ཏུ་སྨྲ་བས་མྱ་ངན་ལས་འདས་པ་སོ་སོར་བརྟགས་འགོག་རང་གི་ངོ་བོ་རྫས་སུ་ཡོད་པའི་དངོས་པོ་ཡང་ཡིན་ཅིང་།  སྤང་བྱ་སྔར་ཡོད་གཉེན་པོས་གསར་དུ་བཅོམ་པ་ལས་བྱུང་བས་སྤང་བྱའི་དངོས་པོ་མེད་པ་ཡང་ཡིན་ནོ། །ཞེས་འདོད་པ་ལ་མ་ཡིན་ཏེ།  དེ་ལྟ་བུའི་དངོས་པོ་དང་
9-4-17b


དངོས་མེད་གཉིས་ཀ་ཡང་རྒྱུ་རྐྱེན་ལ་ལྟོས་པའི་འདུས་བྱས་སུ་འདོད་དགོས་ལ་མྱ་ངན་ལས་འདས་པ་ནི།  འདུས་མ་བྱས་ཡིན་པའི་ཕྱིར་ཞེས་པའི་དོན་ཡིན་གྱི།  དངོས་མེད་ཡིན་ན་འདུས་བྱས་ཡིན་པས་ཁྱབ་པ་ཀླུ་སྒྲུབ་ཀྱི་དགོངས་པ་ཡིན་ནོ་ཞེས་བསྐུར་པ་མ་འདེབས་ཤིག  
༼༢༣༽།  རིན་ཆེན་ཕྲེང་བར་གསུངས་པ་ཡི། །ཟབ་མོ་བཀྲོལ་བ་ཅི་ལ་ཟེར། །ཞེས་པའི་ལན་ནི།  འདི་ལ་མི་ཕམ་བཤེས་གཉེན་གྱི་འགྲེལ་པ་ལས་གཞན་པའི་འགྲེལ་པ་ནི་མེད་ཅིང་དེར་ནི་གསལ་ཁ་མ་བྱུང་ལ།  རྒྱུད་བླར།  རང་བྱུང་རྣམས་ཀྱི་དོན་དམ་ནི། །དད་པ་
ཉིད་ཀྱིས་རྟོགས་བྱ་ཡིན། །ཞེས་གསུངས་པ་ལྟར་ན།  སོ་སོ་སྐྱེ་བོས་ཐོས་བསམ་ཙམ་གྱིས་བཀྲོལ་བའི་དོན་དང་ལྡན་ཞེས་པའི་དོན་དུ་མངོན་ནོ། །ཡང་གཞུང་ཁ་ཅིག་ལས།  ཟབ་མོ་བཀོལ་བའི་དོན་དང་ལྡན་ཞེས་འབྱུང་བ་ལྟར་ན།  གཞུང་དེ་ཉིད་ལས།  
དེ་ཕྱིར་སངས་རྒྱས་རྣམས་ཀྱི་ནི། །བསྟན་པ་འཆི་མེད་ཡོད་མེད་ལས། །འདས་པ་ཟབ་མོ་ཞེས་བཤད་པ། །ཆོས་ཀྱི་ཁུད་པ་ཡིན་ཤེས་གྱིས། །ཞེས་གསུངས་པ་དང་མཐུན་པར་མངོན་ནོ།  ༼༢༤༽།  སྟོང་ཉིད་སྙིང་རྗེའི་སྙིང་པོ་ཅན། །བདེ་གཤེགས་སྙིང་པོ་མ་
ཡིན་ན། །རྒྱས་འགྱུར་རིགས་ལ་བདེ་གཤེགས་ཀྱི། །སྙིང་པོར་གསུངས་པ་དེ་ཅི་ཞིག །ཅེས་པ་གོང་དུ་འོང་རྒྱུར་འདུག་ནའང་འདིར་བྲིས་འདུག་པའི་ལན་ནི།  རྒྱས་འགྱུར་གྱི་རིགས་ལ་བདེ་གཤེགས་སྙིང་པོར་གང་དུ་གསུངས་ཅེས་དྲིས་ཏེ།  ལན་བཏབ་པར་
བྱའོ། །གལ་ཏེ་རྒྱུད་བླར་ལུས་ཅན་ལ་བདེ་གཤེགས་སྙིང་པོ་ཡོད་པའི་སྒྲུབ་བྱེད་དུ།  རྫོགས་སངས་སྐུ་ནི་འཕྲོ་བ་དང་། །དེ་བཞིན་ཉིད་དབྱེར་མེད་པ་དང་། །རིགས་ཡོད་པ་གསུམ་བཀོད་ཅིང་རིགས་ཀྱི་དབྱེ་བ་ནི་འོག་ཏུ།  རིགས་དེ་རྣམ་གཉིས་ཤེས་བྱ་སྟེ། །
9-4-18a


ཐོག་མེད་རང་བཞིན་གནས་པ་དང་། །ཡང་དག་བླངས་པ་མཆོག་ཉིད་དོ། །རིགས་འདི་གཉིས་ལས་སངས་རྒྱས་ཀྱི། །སྐུ་གསུམ་ཐོབ་པར་འདོད་པ་སྟེ། །དང་པོས་སྐུ་ནི་དང་པོ་སྟེ། །གཉིས་པ་ཡིས་ནི་ཕྱི་མ་གཉིས། །
ཅེས་རིགས་ལ་ལྔར་ཕྱེ་བ་འདི་ཉིད་ཀྱིས་བསྟན་ནོ་སྙམ་ན།  འོ་ན་སངས་རྒྱས་ཀྱི་གཟུགས་སྐུ་གཉིས་པོ་དེ་ཡང་བདེ་གཤེགས་སྙིང་པོ་ཡིན་པར་འགྱུར་ཏེ།  ལྔར་ཕྱེ་བའི་ཡ་གྱལ་ཡིན་པའི་ཕྱིར།  ཟབ་མོ་སྟོང་ཉིད་སྟོན་པའི་གསུང་རབ་དང་།  བརྗོད་བྱ་སྣ་
ཚོགས་སྟོན་པའི་གསུང་རབ་གཉིས་པོ་དེ་ཡང་དེར་འགྱུར་ཏེ།  རྫོགས་སངས་སྐུ་འཕྲོ་བ་ལ་གསུམ་དུ་ཕྱེ་བའི་ཡ་གྱལ་ཡིན་པའི་ཕྱིར།  དེས་ན་བདེ་གཤེགས་སྙིང་པོ་ཡོད་པའི་སྒྲུབ་བྱེད་དུ་རིགས་ཡོད་པའི་ཕྱིར་ཞེས་བཀོད་པ་ལ་རིགས་ཡིན་ན་བདེ་གཤེགས་སྙིང་པོ་
ཡིན་པས་ཁྱབ་པར་བཟུང་ནས་འདི་ལྟར་འདྲི་བ་ནི་ཡོད་འགོད་དང་།  ཡིན་འགོད་ཀྱི་ཁྱད་པར་དང་།  ཡོད་སྒྲུབ་དང་ཡིན་སྒྲུབ་ཀྱི་ཁྱད་པར་ཕྱེད་པའི་རྟོག་གེ་ཅིག་མི་མཁྱེན་པ་ཨེ་ཡིན་སྙམ་སྟེ།  དུ་ལྡན་གྱི་ལ་ལ་ཆོས་ཅན།  མེ་ཡོད་དེ།  དུ་བ་ཡོད་པའི་ཕྱིར། 
ཞེས་པའི་ཚེ་དུ་བ་ཡིན་ན།  མེ་ཡིན་པས་ཁྱབ་པ་ཁས་ལེན་པ་ཨེ་ཡིན།  ཧེ་ཧེ།  འོ་ན་རིགས་ལ་ལྔར་ཕྱེ་བ་ལུས་ཅན་ལ་ཡོད་ཚུལ་ཇི་ལྟར་སྙམ་ན།  ཁོ་བོ་ནི་རྗེ་བཙུན་གྲགས་པ་རྒྱལ་མཚན་གྱི་གསུང་ལ་ཚད་མར་བྱེད་པས་རང་བཞིན་གནས་རིགས་མཚན་ཉིད་
ཀྱི་ཚུལ་དུ་ཡོད།  རྒྱས་འགྱུར་གྱི་རིགས་ཡོན་ཏན་གྱི་ཚུལ་དུ་ཡོད།  སྐུ་གསུམ་པོ་ནུས་མཐུའི་ཚུལ་དུ་ཡོད།  ཅེས་སྨྲ་ལ།  གཞན་དག་ཅི་སྨྲ་ཕར་འདྲི་བར་བྱའོ།  ༼༢༥༽།  ཆོས་དབྱིངས་རྫོགས་པའི་བྱང་ཆུབ་རྒྱུར། །འགྱུར་བ་མེད་ན་ཆོས་ཀྱི་དབྱིངས། །རྒྱུ་
9-4-18b


ཡི་རིགས་སུ་འཇོག་དེ་ཅི། །འཕགས་པའི་ཆོས་ཀྱི་རྒྱུ་ཡིན་ཕྱིར། །ཆོས་ཀྱི་དབྱིངས་སུ་འཇོག་གོ་ཅེས། །ཚད་ལྡན་གཞུང་ལས་བྱུང་དེ་ཅི། །ཅེས་པའི་ལན་ནི།  སྤྱིར་རྒྱུ་ལ་སྐྱེད་བྱེད་ཀྱི་རྒྱུ་དང་།  རང་བཞིན་གྱི་རྒྱུ་གཉིས་ལས།  དང་པོ་ལ་འགྱུར་བ་ཡོད་
དགོས་ཀྱང་།  ཕྱི་མ་ལ་འགྱུར་བ་ཡོད་མི་དགོས་ཏེ།  གཞན་དུ་ན་དེ་ཡང་སྐྱེད་བྱེད་ཀྱི་རྒྱུར་ཐལ་བའི་ཕྱིར་རོ། །ཆོས་དབྱིངས་རྒྱུའི་རིགས་སུ་འཇོག་པ་ནི་རང་བཞིན་གྱི་རྒྱུ་ལ་དགོངས་ཏེ།  དེ་ཉིད་ལ་གློ་བུར་གྱི་དྲི་མ་དང་བྲལ་མ་བྲལ་གྱི་ཁྱད་པར་མ་གཏོགས་རང་གི་ངོ་བོར་
འགྱུར་བ་མེད་པའི་ཕྱིར།  འཕགས་པའི་ཆོས་ཀྱི་རྒྱུ་ཡིན་པས་ཆོས་ཀྱི་དབྱིངས་སུ་འཇོག་པ་ཡང་དོན་དེ་ཉིད་དེ།  དེ་ལས་གཞན་དུ་འཕགས་ཆོས་སྐྱེད་བྱེད་ཀྱི་རྒྱུ་ཡིན་ན་འདུས་བྱས་སུ་ཐལ་བའི་ཕྱིར་རོ།  ༼༢༦༽།  ཆོས་དབྱིངས་དམ་པའི་ཆོས་དང་ནི། །དམ་པ་ཞེས་པ་
དགེ་བ་ལ། །ཚད་ལྡན་གཞུང་ལས་མ་གསུངས་སམ། །ཆོས་དབྱིངས་ངོ་བོ་དགེ་མིན་ན། །བདེ་ཆེན་སྒྱུ་མའི་སྐུ་དེ་ཡང་། །དགེ་བ་མིན་པར་བཞེད་ལགས་སམ། །དེ་ལྟ་ན་ནི་བསྟོད་པ་ལས། །དགེ་བ་ཅེས་ཀྱང་མ་གསུངས་སམ། །ཞེས་པའི་ལན་ནི།  ཐུག་
མེད་ཀྱི་དྲི་བ་ཡིན་པར་སྔར་བཤད་ཟིན་ལ།  རྣམ་གསལ་གྱི་དཔེ་ལོགས་སུ་བརྗོད་ན།  བྲམ་ཟེའི་ཁྱེའུ་རི་དྭགས་ཀྱི། །རྒྱལ་པོ་མིན་ན་སེང་གེ་ཞེས། །བརྗོད་ཅིང་སེང་གེ་ཞེས་པའི་སྒྲ། །རི་དྭགས་རྒྱལ་པོ་དེ་ཉིད་ལ། །འཇུག་པ་བཞེད་པ་མིན་ནམ་ཅི། །ཞེས་པ་དང་
མཚུངས་སོ། །བདེ་ཆེན་སྒྱུ་མའི་སྐུ་ཞེས་པ་དེ་གང་ལ་ཟེར།  ཆོས་དབྱིངས་ཡིན་ན་སྔར་གྱི་ནང་དུ་འདུས་ལ།  མིན་ན།  དེ་ལ་འབྲེལ་ཅི་ཞིག་ཡོད།  ༼༢༧༽།  ཆོས་དབྱིངས་ལུང་མ་བསྟན་ཡིན་ན། །ཆོས་ཀྱི་དབྱིངས་ལས་མ་གཏོགས་པའི། །ཆོས་གཞན་མེད་ཕྱིར་
9-4-19a


དགེ་བ་དང་། །སྡིག་པའང་ལུང་མ་བསྟན་དུ་འགྱུར། །སྙམ་པའི་དོགས་པ་མི་འབྱུང་ངམ། །ཞེས་པའི་ལན་ནི།  གཞུང་གི་དགོངས་པ་སྡིག་པ་དང་ལུང་མ་བསྟན་ཐམས་ཅད་ལ་དགེ་བ་ཡོད་པར་འགྱུར་ཏེ།  དེ་ཐམས་ཅད་ལ་ཆོས་
དབྱིངས་ཡོད་པའི་ཕྱིར།  ཁྱབ་པ་ཁས་བླངས་རྟགས་གྲུབ་སྟེ།  ཆོས་ཀྱི་དབྱིངས་ལས་མ་གཏོགས་པའི་ཆོས་གཞན་མེད་པའི་ཕྱིར་རོ། །རྩ་བར་འདོད་ན་སེམས་ཅན་ཀུན་ངན་འགྲོར་འགྲོ་བར་མི་སྲིད་པར་འགྱུར་ཏེ།  དགེ་མི་དགེ་ལུང་མ་བསྟན་གསུམ་པོ་གང་བྱས་ཀྱང་དགེ་
བ་རེ་རེ་བྱས་པའི་ཕྱིར་ཞེས་པའི་དོན་ཡིན་ལ།  དེ་ལ་ཁྱོད་ཀྱིས་དགེ་བ་དང་སྡིག་པ་ལ་ཡང་ལུང་མ་བསྟན་ཡོད་པར་ཐལ།  དེ་ལ་ཆོས་དབྱིངས་ཡོད་པའི་ཕྱིར་ཟེར་བ་ཡིན་ན།  འདོད་ལེན་འདེབས་པས་ཉེས་པ་ཅི་ཞིག་འབྱུང་།  སྔར་གྱི་ཉེས་པ་དེ་ཉིད་མཚུངས་སོ་སྙམ་ན།  མི་
མཚུངས་ཏེ།  ལུང་མ་བསྟན་ནི་བདེ་འགྲོ་དང་།  ངན་འགྲོ་གང་གི་ཡང་རྒྱུ་མ་ཡིན་པའི་ཕྱིར།  ༼༢༨༽།  ཆོས་དབྱིངས་གསུམ་ཀར་མི་རུང་ན། །དེ་མཚུངས་དོགས་པ་མི་འབྱུང་ངམ། །ཞེས་པའི་ལན་ནི།  ཆོས་དབྱིངས་གསུམ་པོ་གང་རུང་དུ་མི་རུང་བར་མ་སྨྲས་པས་དེའི་སྐྱོན་
སྤོང་མི་དགོས་མོད་ཉིད་དེ་འདྲའི་རིགས་ཅན་ཆོས་དབྱིངས་དགེ་བ་ཡིན་ན།  མི་དགེ་བ་དང་ལུང་མ་བསྟན་ཡང་དགེ་བར་འགྱུར་ཏེ།  ཆོས་ཀྱི་དབྱིངས་ལས་མ་གཏོགས་པའི་ཆོས་གཞན་མེད་པའི་ཕྱིར།  ཞེས་སྨྲས་པ་ལ།  ཆོས་དབྱིངས་གསུམ་པོ་གང་རུང་མིན་ན་དགེ་བ་ཡང་གསུམ་པོ་
གང་རུང་མིན་པར་ཐལ།  མི་དགེ་བ་ཡང་གསུམ་པོ་གང་རུང་མིན་པར་ཐལ།  ལུང་མ་བསྟན་ཡང་གསུམ་པོ་གང་རུང་མིན་པར་ཐལ།  ཆོས་ཀྱི་དབྱིངས་ལས་མ་གཏོགས་པའི་ཆོས་གཞན་མེད་པའི་ཕྱིར།  ཞེས་མཚུངས་སོ་ཞེས་སྨྲ་བ་ནི་སྔ་རྒོལ་གྱིས་ཤེས་བྱ་བུམ་པར་ཁས་བླངས་པ་
9-4-19b


ལ་ཕྱིར་རྒོལ་གྱིས་ཀ་བ་ཆོས་ཅན།  བུམ་པ་ཡིན་པར་ཐལ།  ཤེས་བྱ་ཡིན་པའི་ཕྱིར།  ཁྱབ་པ་རྐང་གསུམ་ལ་སྒྲིག་པ་ལ་ཡང་སྔ་རྒོལ་ན་རེ།  ཁྱོད་ཤེས་བྱ་བུམ་པ་མ་ཡིན་པར་ཁས་ལེན་པས་གསེར་བུམ་ཆོས་ཅན།  བུམ་པ་མ་ཡིན་པར་ཐལ།  ཤེས་བྱ་ཡིན་
པའི་ཕྱིར།  ཞེས་པའི་ཁྱབ་པའང་རྐང་གསུམ་ལ་སྒྲིག་གོ།  ཅེས་སྨྲས་པ་དང་མཚུངས་པས་སྒྲུབ་ཁྱབ་རྐང་གསུམ་ལ་འབུད་པ་ལ་དགག་ཁྱབ་ཡང་རྐང་གསུམ་ལ་འབུད་པའི་མཚུངས་པ་བྱེད་པ་འདི་དབུས་གཙང་ཁམས་གསུམ་གྱི་མཁས་པ་ཐམས་ཅད་ལ་འདྲི་ཅི་
དགོས་དེང་སང་གི་བསྡུས་རྭ་བ་རྣམས་ལ་དྲིས་ཤིག  ༼༢༩༽།  ཆོས་དབྱིངས་ཡོད་པར་མི་བཞེད་ན། །ཆོས་ཀྱི་དབྱིངས་ལས་མ་གཏོགས་པའི། །དངོས་པོ་མེད་ཕྱིར་དངོས་ཀུན་ཀྱང་། །ཡོད་པར་མི་འདོད་དེ་ཅི་ཞིག །ཅེས་པའི་ལན་ཀྱང་སྔ་མའི་ལན་དེ་ཉིད་དེ།  བསྒྲུབ་
ཁྱབ་ལ་དགག་ཁྱབ་ཀྱི་མཚུངས་པ་བྱས་པར་སྣང་ངོ་། །སྤྱིར་དངོས་པོ་ཡིན་ན།  བུམ་པ་ཡིན་པས་ཁྱབ་པ་ལ་སྐྱོན་བརྗོད་པ་དེ་ཉིད་ལ།  དངོས་པོ་མ་ཡིན་ན།  བུམ་པ་མ་ཡིན་པས་ཁྱབ་པ་ལ་ཡང་སྐྱོན་དུ་འགྲོ་བར་མཚུངས་པ་ལ་བསྒྲེ་ན་རྣམ་པ་གསལ་པོ་ག་ན་
ཡོད།  ༼༣༠༽།  ཡོད་པ་བསྒྲུབ་པར་གསུངས་པ་དེས། །ཆོས་དབྱིངས་དགེ་ལ་ཇི་ལྟར་གནོད། །ཅེས་པའི་ལན་ནི།  མདོ་དེ་ཉིད་ལས།  ཕྱོགས་བཅུའི་འཇིགས་རྟེན་ཁམས་ན་ཡོད་པ་ཡི། །དགེ་བ་དེ་དག་ཡང་དག་བསྒྲུབ་པས་ན། །འགྲོ་བ་ཀུན་ལ་ཕན་དང་བདེ་
སེམས་ཀྱིས། །ཡེ་ཤེས་མཁས་པ་དེ་དག་ཡོངས་སུ་བསྔོ། །ཞེས་གསུངས་པ་དེས་འགྲོ་ཀུན་དགེ་བ་ཇི་སྙེད་ཡོད་པ་དང་། །ཅེས་པའི་ཡོད་པ་ཆོས་དབྱིངས་ཡིན་པ་ལ་གནོད་དེ།  སྐབས་དེའི་ཡོད་པའི་དགེ་བ་རྩོལ་བས་ཡང་དག་པར་བསྒྲུབ་པ་ལ་གསུངས་ཤིང་ཆོས་
9-4-20a


དབྱིངས་རྩོལ་བས་ཡང་དག་པར་བསྒྲུབས་པ་མིན་པའི་ཕྱིར།  ཅི་ཆ།  ཁྱེད་གཞུང་དེའི་དོན།  ཆོས་དབྱིངས་དགེ་བ་མ་ཡིན་པར་ཐལ།  ཡོད་པ་སྒྲུབ་པ་ཡིན་པའི་ཕྱིར།  མ་གྲུབ་ན།  དེར་ཐལ།  ཡོད་པ་དགག་པ་མ་ཡིན་པའི་ཕྱིར།
ཞེས་པ་ལ་འཆད་ནས་དྲི་བ་འདི་བྱེད་པ་ནི་མ་ཡིན་མཆི།  དྲི་བ་འདི་འདྲ་བྱེད་ན་བརྒྱ་རྩ་བརྒྱད་ལས་མང་བ་ཡོད་པར་འདུག་གོ  ༼༣༡༽།  མི་འགྱུར་བསྔོ་བ་དོན་མེད་ན། །ཚོང་དཔོན་མཛའ་བོའི་བུ་མོའི་བུས། །སྨོན་ལམ་བཏབ་པ་དེ་ཅི་ཞིག །ཅེས་པའི་ལན་ནི།  བསྔོ་
རྒྱུའི་དགེ་རྩ་མི་འགྱུར་ན།  བསྔོ་བ་དོན་མེད་པ་དང་།  བསྔོ་བའི་འབྲས་བུ་འགྲུབ་པར་མི་འགྱུར་ན་བསྔོ་བ་དོན་མེད་པ་གཉིས་ཁྱད་པར་མ་ཕྱེད་འདུག་པས་དེ་གཉིས་ཁྱད་པར་ཕྱེ་ན་ལན་དེ་ཉིད་དོ། །གཞན་ཡང་ཚོང་དཔོན་མཛའ་བོའི་བུ་མོའི་བུ། །ཅེས་པ་དེ་གང་ན་
འདུག །མདོ་སྡེ་དྲིན་ལན་བསབ་པ་ལས་ནི།  སྔོན་ཝཱ་ར་ཎ་སཱིར་དེད་དཔོན་མཛའ་བོའི་བུ་བྱུང་ངོ་ཅོག་ཤི་ནས་ཕྱིས་གཅིག་སྐྱེས་པ་ལ་མཛའ་བོའི་བུ་མོར་བཏགས་པ་དེས་སེམས་ཅན་གྱི་ཀླད་ནད་བདག་ལ་སྨིན་པར་གྱུར་ཅིག་ཅེས་པའི་སྨོན་ལམ་བཏབ་པར་བཤད་ཀྱི།
མཛའ་བོའི་བུ་མོའི་བུ་ཅེས་པ་ནི་གང་ན་ཡང་མི་སྣང་ངོ་།  ༼༣༢༽།  ཆོས་ཉིད་བསྔོ་རྒྱུར་བྱེད་པ་ནི། །བློ་སྦྱོང་དུ་ཡང་མི་རུང་ན། །གནས་མིན་བསྔོ་བར་གསུངས་དེ་ཅི། །ཅེས་པའི་ལན་ནི།  ཆོས་ཉིད་བསྔོ་རྒྱུར་བྱེད་པ་གནས་མིན་གྱི་བསྔོ་བར་གསུངས་པ་བསྟན་
བཅོས་འདིའི་གང་ན་འདུག་ཕར་འདྲིའོ། །ཆོས་རྣམས་ཆོས་ཉིད་བསྔོ་བ་ཡིས། །མི་འགྱུར་གལ་ཏེ་འགྱུར་ན་ནི། །དང་པོའི་སངས་རྒྱས་གཅིག་ཉིད་ཀྱི། །བསྔོ་བ་དེང་སང་ཅིས་མི་འགྲུབ། །ཅེས་པས་སྟོན་ནོ་སྙམ་ན།  དེ་ནི་དཀོན་མཆོག་བརྩེགས་པའི་
9-4-20b


མདོ་ལས།  བུ་མོས་སྨྲས་པ།  རིགས་ཀྱི་བུ་ཆོས་རྣམས་ཀྱི་ཆོས་ཉིད་ནི་སྨོན་ལམ་གྱི་དབང་གིས་བསྒྱུར་བར་མི་ནུས་སོ། །གལ་ཏེ་ནུས་པར་གྱུར་ན།  དེ་བཞིན་གཤེགས་པ་རེ་རེའི་དགོངས་པ་དེ་སྨོན་ལམ་གྱི་དབང་གིས་ཇི་ལྟར་མི་འགྲུབ་སྟེ།  རྣམ་གྲངས་འདིས་
ནི་སྨོན་ལམ་གྱི་དབང་གིས་བསྒྱུར་བར་མི་ནུས་པར་རིགས་པར་བྱའོ། །ཞེས་གསུངས་པའི་དོན་ཡིན་པས་སྐབས་དེའི་ཆོས་ཉིད་དེའང་འཁོར་བའི་ཕྱི་མཐའ་མེད་པ་སོགས་ཆོས་རྣམས་ཀྱི་ཆོས་ཉིད་རྟེན་འབྲེལ་གྱི་ཆོས་ཉིད་དུ་གྲུབ་པ་ཡིན་གྱི།  སྤྲོས་བྲལ་གྱི་ཆོས་ཉིད་མ་ཡིན་
ལ།  བསྒྱུར་མི་ནུས་པའི་དོན་ཡང་བསྔོ་བའི་འབྲས་བུར་བྱས་ཀྱང་བསྒྲུབ་པར་མི་ནུས་པའི་དོན་ཡིན་གྱི།  བསྔོ་རྒྱུར་བྱས་ནས་བསྒྱུར་མི་ནུས་པའི་དོན་ནི་གཏན་མ་ཡིན་ནོ།  ༼༣༣༽།  མ་བྱས་པ་ཡི་དགེ་མེད་ན། །ཐེག་པ་ཆེན་པོ་བསྡུས་པ་ལས། །ཐོག་མེད་དུས་
ནས་མ་བྱས་པའི། །ཀུན་གཞིའི་སྟེང་གི་ཟག་མེད་ཀྱི། །ས་བོན་དགེ་བར་བཤད་དེ་ཅི། །དེ་འདྲ་མེད་ན་ཀུན་གཞི་ཡི། །གཉེན་པོར་བཤད་པ་དེ་གང་ཡིན། །ཅེས་པའི་ལན་ནི།  ཁས་བླངས་དང་འགལ་བ་དང་།  རིགས་པ་དང་འགལ་བ་གཉིས་ལས། 
དང་པོ་ནི།  སྔར་ཀུན་གཞིའི་སྟེང་གི་ས་བོན་ལུང་མ་བསྟན་དུ་ཁས་བླངས་པ་དང་འགལ་ཏེ།  ཀུན་གཞི་གཅིག་ཉིད་ཀྱི་ས་བོན་ལ་དགེ་བ་དང་ལུང་མ་བསྟན་གཉིས་ཡོད་ན།  ས་བོན་དང་ས་བོན་ཅན་ངོ་བོ་མི་མཚུངས་པར་ཐལ་བའི་ཕྱིར་རོ། །གཉིས་པ་ནི།  ཀུན་གཞིའི་སྟེང་
གི་ཐོག་མ་མེད་པའི་དུས་ནས་མ་བྱས་པའི་ས་བོན་དང་ལྡན་པའི་གང་ཟག་དེ་ལ་ལོག་ལྟས་དགེ་རྩ་ཆད་པ་མི་སྲིད་པར་འགྱུར་ཏེ།  ལོག་ལྟས་ཟག་མེད་ཀྱི་ས་བོན་ཆད་པ་མི་སྲིད་པའི་ཕྱིར།  གཞན་ཡང་དེ་ལྟ་བུའི་ཀུན་གཞི་དེ་ཆོས་ཅན།  ཁྱེད་ལུང་མ་བསྟན་མ་ཡིན་
9-4-21a


པར་ཐལ།  ཁྱོད་ཀྱི་སྟེང་གི་ཟག་མེད་ཀྱི་ས་བོན་དེ་དགེ་བ་གང་ཞིག །ཁྱོད་དེ་དང་ངོ་བོ་མཚུངས་པའི་ཕྱིར།  དེས་ན་དངོས་ཀྱི་ལན་ནི་དགེ་བའི་མིང་གིས་བཏགས་ཚད་དགེ་བ་མ་ཡིན་པར་གོང་དུ་བཤད་ཟིན་ཅིང་།  ཀུན་གཞིའི་གཉེན་པོར་
བཤད་པའི་དོན་ཡང་ཐོས་པའི་རྐྱེན་གྱིས་གསོས་བཏབ་ནས།  ཟག་མེད་དམ་ལམ་བདེན་དུ་སོང་བའི་ཚེ་ཀུན་གཞིའི་གཉེན་པོ་ཡིན་པའི་དོན་ཡིན་གྱི།  ས་བོན་དེ་ཉིད་གཉེན་པོ་མ་ཡིན་ཏེ།  གཞན་དུ་ན་ས་བོན་དེ་དང་ལྡན་པའི་གང་ཟག་ཐམས་ཅད་དང་པོ་ནས་འབད་མེད་དུ་མི་
གྲོལ་བའི་རྒྱུ་མཚན་ཅི་ཡིན་ལེགས་པར་སྨྲ་དགོས་སོ།  ༼༣༤༽།  བདེ་གཤེགས་སྙིང་པོ་གང་ཡིན་པ། །དེ་དག་འདུས་མ་བྱས་ཡིན་ན། །ཐེག་པ་ཆེན་པོ་རྒྱུད་བླ་མར། །སྙིང་པོ་དགུར་བྱས་པ་དེ་ཅི། །ཅེས་པའི་ལན་ནི།  སྔར་གསལ་བར་བསྟན་ཟིན་མོད།  རྣམ་གསལ་
གྱི་དཔེ་ལོགས་སུ་བརྗོད་ན།  མེ་ཞེས་བཤད་པ་གང་ཡིན་པ། །དེ་དག་ཚ་ཞིང་བསྲེག་ཡིན་ན། །དུ་བས་ལ་ལ་མེ་བསྒྲུབ་ཚེ། །མེ་ནི་དུ་བར་བཤད་དེ་ཅི། །ཅེས་པ་དང་།  གཟུགས་ནས་རྣམ་མཁྱེན་གྱི་བར་དུ་མཚུངས་སོ།  ༼༣༥༽།  སེམས་ཅན་མ་གཏོགས་བེམ་པོ་
ཡི། །ཆོས་དབྱིངས་སྙིང་པོ་མ་ཡིན་ན། །རྒྱུད་དང་སེམས་འགྲེལ་སྐོར་གསུམ་ལས། །བརྟན་གཡོ་ཀུན་ལ་སངས་རྒྱས་ཀྱི། །སྙིང་པོ་ཡོད་པར་གསུངས་དེ་ཅི། །ཅེས་པའི་ལན་ནི།  དྲི་བའི་གཞི་གཞུང་ལ་མེད་པ་དང་།  དྲིས་པའི་དོན་ཁས་བླངས་པ་དང་འགལ་
བ་གཉིས་ལས།  དང་པོ་ནི།  གཞུང་ལས།  གལ་ཏེ་བེམ་པོའི་ཆོས་ཀྱི་དབྱིངས། །བདེ་གཤེགས་སྙིང་པོ་མ་ཡིན་ཡང་། །སེམས་ཅན་རྣམས་ཀྱི་ཆོས་ཀྱི་དབྱིངས། །བདེ་གཤེགས་སྙིང་པོ་ཡིན་སྙམ་ན། །མ་ཡིན་ཆོས་ཀྱི་དབྱིངས་ལ་ནི། །དབྱེ་བ་མེད་པར་
9-4-21b


རྒྱལ་བས་གསུངས། །ཞེས་གསུངས་བཞིན་དུ།  ཁྱེད་ཀྱི་དྲི་བ་འདི་གང་ཟག་སུ་ལ་ཡིན།  གཞུང་གང་ལ་ཡིན།  དོན་ཅི་འདྲ་ཞིག་ལ་ཡིན།  སེམས་ཡོད་རྣམས་ཀྱིས་འདི་ལ་དཔྱོད་ཅིག །གཉིས་པ་ནི་ཁྱེད་ཉིད་བདེ་གཤེགས་སྙིང་པོ་སངས་རྒྱས་ཁོ་ན་ལ་
ཡོད་ཀྱི།  སེམས་ཅན་ལ་མེད་པར་ཁས་བླངས་ཅེས་གྲགས་པ་དེ་ལ།  སངས་རྒྱས་མ་གཏོགས་སེམས་ཅན་གྱི། །ཆོས་དབྱིངས་སྙིང་པོ་མ་ཡིན་ན། །རྒྱུད་དང་སེམས་འགྲེལ་སྐོར་གསུམ་ལས། །ཞེས་སོགས་བྲིས་ན་ཅི་སྨྲ།  ཡང་ཕྱིས་ས་དང་པོ་ཡན་ཆད་
ན་བདེ་གཤེགས་སྙིང་པོ་ཡོད་དེ།  དེ་མཐོང་བའི་ཕྱིར།  དེ་མན་ཆད་ན་དེ་མེད་དེ།  མ་མཐོང་བའི་ཕྱིར།  ཞེས་སྨྲ་བ་གྲགས་པ་དེ་ལ།  འཕགས་པ་མ་གཏོགས་སོ་སྐྱེ་ཡིས། །ཆོས་དབྱིངས་སྙིང་པོ་མ་ཡིན་ན། །རྒྱུད་དང་སེམས་འགྲེལ་སྐོར་གསུམ་ལས། །
ཞེས་སོགས་དྲིས་ན་ཅི་སྨྲ།  གཞན་ཡང་ལུགས་འདི་ལ།  རྒྱུད་བླ་མ་ནས་དཔེ་དགུ་གསུངས་པ་དེ་མ་མཐོང་ཡང་ཡོད་པར་སྒྲུབ་པའི་དཔེ་མ་ཡིན་པར་འགྱུར་ཏེ།  བདེ་གཤེགས་སྙིང་པོ་མ་མཐོང་བ་རྣམས་ལ་ནི་མེད་ཅིང་།  མཐོང་བ་རྣམས་ལ་ནི་ཡོད་པ་སྒྲུབ་མི་
དགོས་པའི་ཕྱིར།  འདོད་ན།  ཇི་ལྟར་མི་དབུལ་ཁྱིམ་ནང་ས་འོག་ན། །མི་ཟད་པ་ཡི་གཏེར་ནི་ཡོད་གྱུར་ལ། །མི་དེས་དེ་མ་ཤེས་ཏེ་གཏེར་དེ་ཡང་། །དེ་ལ་ང་འདིར་ཡོད་ཅེས་མི་སྨྲ་ལྟར། །ཞེས་དང་།  དོན་གྱི་སྐབས་སུ།  དྲི་མེད་གཞག་དང་བསལ་མེད་
ཆོས་ཉིད་ཀྱང་། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་རྒྱུན་ཏུ་སྐྱེ་དགུ་འདིས་མྱོང་ངོ་། །ཞེས་སོགས་དཔེ་དགུ་ཆར་མ་མཐོང་ཡང་།  ཡོད་པའམ་ཡོད་ཀྱང་མ་མཐོང་བའི་དཔེར་གསུངས་པ་དང་ཅིའི་ཕྱིར་མི་འགལ།  གཟུ་བོར་གནས་པ་
9-4-22a


དག་གིས་དཔྱོད་ཅིག །དྲི་བ་འདི་འདྲ་ནི་དྲི་ཡུལ་གྱི་གྲུབ་མཐའ་ཕྱིན་ཅི་ལོག་ཏུ་བཟུང་ནས་འདྲི་བ་པོ་རང་ཉིད་ཀྱི་གྲུབ་མཐའ་ཕྱིན་ཅི་ལོག་དང་སྦྱར་ཏེ་དྲིས་པར་སྣང་ངོ་།  ༼༣༦༽།  གོས་ཧྲུལ་ནང་ན་རིན་ཆེན་གྱི། །དཔེས་བསྟན་
དགོངས་པ་ཅན་ཡིན་ན། །སེམས་ཅན་རྣམས་ལ་རང་བཞིན་གྱི། །གནས་རིགས་མེད་པར་མི་འགྱུར་རམ། །ཞེས་པའི་ལན་ནི།  དེང་སང་མཁས་པར་རློམ་པ་མང་པོས་ཆོས་དེ་དྲང་དོན་དུ་གསུངས་ན་ཐ་སྙད་དུ་མེད་དགོས་ཞེས་སྨྲ་བར་སྣང་བས་ལན་ཕྱོགས་གཅིག་
ཏུ་བརྗོད་པར་བྱ་སྟེ།  ཏིང་ངེ་འཛིན་རྒྱལ་པོའི་མདོ་ལས།  སྟོང་པ་བདེ་བར་གཤེགས་པས་བསྟན་པ་ལྟར། །ངེས་དོན་མདོ་སྡེ་དག་གི་བྱེ་བྲག་ཤེས། །གང་ལས་སེམས་ཅན་གང་ཟག་སྐྱེས་བུ་བསྟན། །ཆོས་དེ་ཐམས་ཅད་དྲང་བའི་དོན་དུ་ཤེས། །ཞེས་པའི་རྗེས་
སུ་འབྲངས་ནས་བདེན་པ་གཉིས་ཀྱི་སྒོ་ནས་དྲང་ངེས་ཕྱེ་བཞིན་དུ་འདི་བཞིན་དུ་སྨྲ་བ་རྣམས་ལ་འུབ་སྟེ་དྲིལ་ནས་གནོད་བྱེད་བརྗོད་ན་ཀུན་རྫོབ་བདེན་པ་ཐམས་ཅད་ཐ་སྙད་དུ་མེད་པར་ཐལ།  དེ་ཐམས་ཅད་དྲང་དོན་དུ་གསུངས་པའི་ཕྱིར།  བྱེ་བྲག་ཏུ་ཕྱེ་སྟེ་བརྗོད་ན།  ཕུང་ཁམས་སྐྱེ་
མཆེད་དང་།  ཁམས་གསུམ་དང་།  མིང་ཐམས་ཅད་དང་།  དངོས་མེད་དང་།  དེ་མེད་པ་དང་།  འགོག་པ་དང་།  དམ་པའི་དོན་སྨྲ་བ་རྣམས་ཀྱི་མཆོག་དང་།  བསྲེག་པའི་བསྐལ་པ་དང་།  སེམས་ཅན་གྱི་ཁམས་རྣམས་ཐ་སྙད་དུ་མེད་པར་འགྱུར་ཏེ།  དེ་དག་དྲང་དོན་དུ་
གསུངས་པའི་ཕྱིར།  ཇི་སྐད་དུ།  ཤར་གྱི་རི་བོའི་སྡེ་པ་དང་མཐུན་པའི་ཚིགས་སུ་བཅད་པ་དག་ལས།  ཕུང་པོ་དག་དང་ཁམས་རྣམས་དང་། །སྐྱེ་མཆེད་རང་བཞིན་གཅིག་བཞེད་ལ། །ཁམས་གསུམ་པོ་དག་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །མིང་
9-4-22b


མེད་པ་ཡི་ཆོས་རྣམས་ཀྱི། །བསམ་དུ་མེད་པའི་མིང་དག་གིས། །སེམས་ཅན་རྣམས་ལ་ཡོངས་བརྗོད་པ། །འདི་ནི་འཇིག་རྟེན་མཐུན་འཇུག་ཡིན། །དངོས་མེད་ཉེར་བར་སྟོན་མཛད་ཅིང་། །སངས་རྒྱས་རང་བཞིན་ལ་བཞུགས་པས། །དངོས་མེད་འགའ་ཡང་
འདིར་མེད་པ། །འདི་ནི་འཇིག་རྟེན་མཐུན་འཇུག་ཡིན། །དོན་དང་དོན་མིན་མེད་གཟིགས་ལ། །འགོག་པ་དང་ནི་དམ་པའི་དོན། །སྨྲ་བ་རྣམས་ཀྱི་མཆོག་གསུངས་པ། །འདི་ནི་འཇིག་རྟེན་མཐུན་འཇུག་ཡིན། །ཞིག་པ་མེད་ཅིང་སྐྱེ་མེད་ལ། །ཆོས་
ཀྱི་དབྱིངས་དང་མཉམ་གྱུར་ཀྱང་། །བསྲེག་པའི་བསྐལ་པ་སྟོན་མཛད་པ། །འདི་ནི་འཇིག་རྟེན་མཐུན་འཇུག་ཡིན། །དུས་གསུམ་དག་ཏུ་སེམས་ཅན་གྱི། །རང་བཞིན་དམིགས་པ་མ་ཡིན་ལ། །སེམས་ཅན་ཁམས་ཀྱང་སྟོན་མཛད་པ། །འདི་ནི་འཇིག་རྟེན་
མཐུན་འཇུག་ཡིན། །ཞེས་གསུངས་པས་སོ། །འདི་དག་ནི་ཀུན་གཞི་དྲང་དོན་དུ་གསུངས་པའི་ཕྱིར།  ཐ་སྙད་དུ་མེད་པར་འདོད་པ་སོགས་བློ་གྲོས་རྩིང་པོའི་གྲུབ་མཐའ་ཐམས་ཅད་ལ་བརྗོད་པར་བྱའོ། །འོ་ན་དྲང་དོན་ཡིན་ན་ཐ་སྙད་དུ་ཡོད་པས་ཁྱབ་བམ་སྙམ་ན།   དེ་ཡང་མ་ཡིན་ཏེ། 
འཇིག་ཚོགས་ལྟ་དང་བྲལ་ཡང་སངས་རྒྱས་ཀྱིས། །ཇི་ལྟར་ང་དང་ང་ཡིར་ཞེས་བསྟན་ལྟར། །དེ་བཞིན་དངོས་རྣམས་རང་བཞིན་མེད་མོད་ཀྱི། །ཡོད་ཅེས་དྲང་དོན་ཉིད་དུ་བསྟན་པ་ཡིན། །ཅེས་གསུངས་པ་ལྟར།  སངས་རྒྱས་ལ་ང་དང་ང་ཡི་བར་འཛིན་པ་ཡོད་པ་དང་།  དངོས་
པོ་རང་བཞིན་གྱིས་ཡོད་པ་སོགས་ཀྱང་དྲང་དོན་དུ་གསུངས་པའི་ཕྱིར་རོ། །མདོར་ན་གནད་ཀྱི་གདམས་པ་འདི་ཡིན་ཏེ་རང་བཞིན་གནས་རིགས་དང་།  བདེ་གཤེགས་སྙིང་པོ་དང་།  དོན་དམ་བདེན་པ་དང་།  ཆོས་དབྱིངས་རྣམས་ནི་འཕགས་པ་སོ་སོ་རང་རང་རིག་པའི་
9-4-23a


ཡེ་ཤེས་ཀྱིས་མངོན་སུམ་དུ་གཟིགས་པར་བྱ་བ་ཡིན་པས་རང་གི་ངོ་བོ་དྲང་དོན་དང་།  ཀུན་རྫོབ་བདེན་པ་མིན་ཀྱང་དེ་བཞིན་གཤེགས་པའི་སྙིང་པོའི་མདོ་དང་།  རྒྱུད་བླ་སོགས་སུ་དཔེ་དགུས་བསྟན་པ་ལྟར་སེམས་ཅན་གྱི་རྒྱུད་ལ་དེ་དག་
རྟེན་དང་།  བརྟེན་པའི་ཚུལ་ལམ་སྒྲུབ་པའི་ཚུལ་གྱིས་ཡོད་པར་གསུངས་པ་ནི།  དྲང་བའི་དོན་ཡིན་ཏེ།  སེམས་ཀྱི་རང་བཞིན་མཐའ་བཞི་སྤྲོས་བྲལ་ལས་མ་གཏོགས་པ་དཔེས་བསྟན་པ་ལྟར་གྱིས་རྟེན་དང་བརྟེན་པའི་ཚུལ་ལམ་སྒྲུབ་པའི་ཚུལ་གྱིས་ཡོད་པ་ཅི་ཡང་མེད་པའི་
ཕྱིར་རོ། །དཔེས་བསྟན་པ་ལྟར་ཡོད་པར་གསུངས་པའི་དགོངས་གཞི་ནི།  སེམས་ཀྱི་རང་བཞིན་སྤྲོས་བྲལ་ལ་དགོངས་ཏེ།  ལང་ཀར་གཤེགས་པ་ལས།  བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་
སྟོང་པ་ཉིད་དང་།  ཡང་དག་པའི་མཐའ་དང་།  མྱ་ངན་ལས་འདས་པ་དང་།  མ་སྐྱེས་པ་དང་།  མཚན་མ་མེད་པ་དང་།  སྨོན་པ་མེད་པ་ལ་སོགས་པའི་ཚིག་གི་དོན་རྣམས་ལ་དེ་བཞིན་གཤེགས་པའི་སྙིང་པོར་བསྟན་པ་བྱས་ནས་ཞེས་གསུངས་པས་སོ། །དགོས་པ་ནི་
རྒྱུད་བླར།  སེམས་ཞུམ་སེམས་ཅན་དམན་ལ་བརྙས་པ་དང་། །ཡང་དག་མི་འཛིན་ཡང་དག་ཆོས་ལ་སྐུར། །བདག་ཆགས་ལྷག་པའི་སྐྱོན་ལྔ་གང་དག་ལ། །ཡོད་པ་དེ་དག་དེ་སྤོང་དོན་དུ་གསུངས། །ཞེས་པ་ལྟར།  སྐྱོན་ལྔ་སྤོང་བའི་ཆེད་དུ་ཡིན་ཏེ།  རྟེན་དང་
བརྟེན་པའི་ཚུལ་ལམ།  བསྒྲུབ་པའི་ཚུལ་གྱིས་ཡོད་པར་མ་གསུངས་ན་སྐྱོན་ལྔ་པོ་དེ་དག་སྤོང་མི་ནུས་པའི་ཕྱིར་རོ། །དངོས་ལ་གནོད་བྱེད་ནི།  དཔེ་དགུས་བསྟན་པ་ལྟར།  རྟེན་དང་བརྟེན་པའི་ཚུལ་ལམ།  བསྒྲུབ་པའི་ཚུལ་གྱིས་ཡོད་ན་མུ་སྟེགས་བྱེད་
9-4-23b


ཕུང་པོ་ལས་དོན་གཞན་པའི་བདག་རྫས་ཡོད་འདོད་པ་དང་མཚུངས་པར་འགྱུར་ཏེ།  ལང་གཤེགས་ལས།  བཅོམ་ལྡན་འདས་ཀྱིས་རིན་པོ་ཆེ་རིན་ཐང་ཆེན་པོ་གོས་དྲི་མ་ཅན་གྱིས་ཡོངས་སུ་དཀྲིས་པ་ལྟར་ཕུང་པོ་དང་།  ཁམས་དང་།  སྐྱེ་མཆེད་ཀྱི་
གོས་ཀྱིས་ཡོངས་སུ་དཀྲིས་པ་འདོད་ཆགས་དང་།  ཞེ་སྡང་དང་།  གཏི་མུག་གི་ཟིལ་གྱིས་ནོན་པ།  ཡོངས་སུ་རྟོག་པའི་དྲི་མས་དྲི་མ་ཅན་དུ་གྱུར་པ་རྟག་པ།  བརྟན་པ།  ཐེར་ཟུག་པ་ནི་བརྗོད་ན་བཅོམ་ལྡན་འདས་དེ་བཞིན་གཤེགས་པའི་སྙིང་པོར་སྨྲ་བ་
འདི་ནི་མུ་སྟེགས་བྱེད་ཀྱི་བདག་ཏུ་སྨྲ་བ་དང་ཇི་ལྟར་འདྲ་བ་མ་ལགས།  བཅོམ་ལྡན་འདས་མུ་སྟེགས་བྱེད་རྣམས་ཀྱང་།  རྟག་པ་བྱེད་པ།  ཡོན་ཏན་མེད་པ།  ཁྱབ་པ་མི་འཇིག་པའོ། །ཞེས་བདག་ཏུ་སྨྲ་བ་སྟོན་པ་བགྱིད་དོ། །བཅོམ་ལྡན་འདས་
ཀྱིས་བཀའ་སྩལ་པ།  བློ་གྲོས་ཆེན་པོ་དེ་བཞིན་གཤེགས་པའི་སྙིང་པོ་བསྟན་པ་ནི་མུ་སྟེགས་ཅན་གྱི་བདག་ཏུ་སྨྲ་བ་དང་མཚུངས་པ་མིན་ཏེ་བློ་གྲོས་ཆེན་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ནི་སྟོང་པ་ཉིད་ཞེས་སོགས་དགོངས་
གཞིའི་སྐབས་སུ་དྲངས་པ་ལྟར་གསུངས་པས་སེམས་ཀྱི་རང་བཞིན་སྟོང་ཉིད་ལས་མ་གཏོགས་པའི་སྙིང་པོ་ཡོད་ན་མུ་སྟེགས་བྱེད་ཀྱི་བདག་ཏུ་སྨྲ་བ་དང་།  མཚུངས་པར་ཤུགས་ལ་བསྟན་པའི་ཕྱིར་རོ། །དེས་ན་ཆོས་དབྱིངས་དང་།  བདེ་གཤེགས་སྙིང་པོ་སོགས་ངེས་དོན་
ཡིན་ཏེ།  དོན་དམ་བདེན་པ་ཡིན་པའི་ཕྱིར།  སེམས་ཅན་གྱི་རྒྱུད་ལ་དེ་དག་ཡོད་པ་ནི་དྲང་དོན་ཡིན་ཏེ།  ཀུན་རྫོབ་བདེན་པ་ཡིན་པའི་ཕྱིར།  གཏན་ཚིགས་གཉིས་པོ་འདིའི་ཁྱད་པར་གང་གིས་སྒྲུབ་སྙམ་ན།  རྒྱུད་བླར།  འགྲོ་བ་ཞི་བའི་ཆོས་ཉིད་དུ། །རྟོགས་
9-4-24a


ཕྱིར་ཇི་ལྟ་ཉིད་དེ་ཡང་། །རང་བཞིན་གྱིས་ནི་ཡོངས་དག་ཕྱིར། །ཉོན་མོངས་གདོད་ནས་ཟད་ཕྱིར་རོ། །ཤེས་བྱ་མཐར་ཐུག་རྟོགས་པའི་བློས། །ཐམས་ཅད་མཁྱེན་པའི་ཆོས་ཉིད་ནི། །སེམས་ཅན་ཐམས་ཅད་ལ་ཡོད་པར། །
མཐོང་ཕྱིར་ཇི་སྙེད་ཡོད་པ་ཉིད། །ཅེས་འགྲོ་བའི་སེམས་བདག་གཉིས་ཀྱིས་སྤྲོས་པ་ཉེ་བར་ཞི་བའི་ཆོས་ཉིད་ཇི་ལྟ་བ་ཡིན་པ་དང་།  ཆོས་ཉིད་དེ་འགྲོ་བའི་རྒྱུད་ལ་ཡོད་པ་ཇི་སྙེད་པ་ཡིན་པའི་ཁྱད་པར་གསུངས་པའི་དོན་རྟོགས་ན་དེ་དག་དོན་དམ་དང་ཀུན་རྫོབ་ཡིན་པའི་ཁྱད་པར་
དང་།  ངེས་དོན་དང་དྲང་དོན་ཡིན་པའི་ཁྱད་པར་ཡང་འབད་མེད་དུ་འགྲུབ་པར་འགྱུར་བའི་ཕྱིར་དང་།  རྒྱུད་བླ་མའི་མཐར་ཐུག་གི་དགོངས་པ་རང་སྟོང་དང་གཞན་སྟོང་གང་ཡིན་ཚུལ་ལ་ཡང་ཐེ་ཚོམ་དང་སྒྲོ་འདོགས་ཆོད་པར་འགྱུར་ལ།  བདག་ཉིད་ཆེན་པོ་འདིས་གསུང་
རབ་ཀྱི་དགོངས་པ་འགྲེལ་ཚུལ་ལ་འཁྲུལ་པའི་དྲི་མ་མེད་པར་ངེས་ཤེས་ཀྱང་གཏིང་ནས་སྐྱེ་བར་འགྱུར་རོ། །གནད་འདི་དག་ཕྱིན་ཅི་མ་ལོག་པར་རྟོགས་པ་ཡང་དེང་སང་གངས་རིའི་ཁྲོད་འདིར་ཁོ་བོ་ཙམ་ཡིན་པ་ལ་ངེས་ཤེས་ཀྱང་བློ་གཟུ་བོར་གནས་ན་མི་ཡོང་ཁ་མེད་ཡིན་ནོ། །
དེ་མ་རྟོགས་པའི་སྐྱོན་ནི་སྔ་ཕྱི་མང་པོ་དག་སེམས་ཅན་གྱི་རྒྱུད་ལ་བདེ་བར་གཤེགས་པའི་སྙིང་པོ་མེད་དེ།  བདེ་བར་གཤེགས་པའི་སྙིང་པོ་དང་ལྡན་ན་བདེ་བར་གཤེགས་པ་ཡིན་པའི་ཕྱིར་ཏེ།  རྡོ་ཡི་སྙིང་པོ་རྡོ་ཁོ་ན་ལ་ཡོད་པའི་ཕྱིར་ཞེས་སོགས་ཀྱི་ཚིག་འདྲ་མང་དུ་སྒྲིག་པ་
གྲག་གོ།  དེ་ལྟར་ན་འོ་མ་ཆོས་ཅན་ཞོ་ཡིན་པར་ཐལ།  ཞོའི་སྙིང་པོ་དང་ལྡན་པའི་ཕྱིར།  ཞོ་ཆོས་ཅན།  མར་ཡིན་པར་ཐལ།  མར་གྱི་སྙིང་པོ་དང་ལྡན་པའི་ཕྱིར།  ཞེས་སོགས་འཇིག་རྟེན་ན་གྲགས་པའི་དཔེ་དུ་མ་དང་།  གཏེར་དང་ལྡན་པའི་དབུལ་པོའི་ས་འོག་
9-4-24b


ཆོས་ཅན།  གཏེར་ཡིན་པར་ཐལ།  གཏེར་གྱི་སྙིང་པོ་ཅན་ཡིན་པའི་ཕྱིར།  ཞེས་སོགས་བསྟན་བཅོས་ན་གྲགས་པའི་དཔེ་དགུ་ཆར་གྱིས་གནོད་པས་ཚིག་འདྲའི་སྒོ་ནས་གནས་ལུགས་ཀྱི་དོན་སྒྲིབ་པར་མི་བྱའོ།  ༼༣༧༽།  བསྔོ་བའི་ཚེ་ན་ཆུ་བསྒྲེང་པ། །རང་ལུགས་
མིན་ན་འདུལ་བ་ལས། །ལག་ཆུ་བཟེད་པར་གསུངས་དེ་ཅི། །ཅེས་པའི་ལན་ནི།  འདུལ་བ་ལས་ལག་ཆུ་ཟེད་པར་གསུངས་པའི་དོན་སྐྱེས་རབས་ལས།  རྒྱལ་པོ་ཐམས་ཅད་སྒྲོལ་གྱིས་བྲམ་ཟེ་སློང་མོ་བ་ལ་གླང་པོ་ཆེ་དང་།  བུ་དང་བུ་མོ་བྱིན་པ་དང་།  བརྒྱ་
བྱིན་ལ་བཙུན་མོ་བྱིན་པའི་ཚེ་གསེར་གྱི་རིལ་བས་བཏུད་དེ་བཞེས་སུ་གསོལ།  ཞེས་མདུན་དུ་འཁོད་པ་དང་།  བྲམ་ཟེའི་ལག་པ་བརྐྱང་པ་ལ་རིལ་བ་སྤྱི་བླུགས་ཀྱིས་བཏུད་དེ།  དེ་ཡི་སྦྱིན་པའི་མཐུ་དག་གིས། །རིལ་བ་ལས་ནི་ཆུ་བྱུང་ནས། །མིག་ནི་པདྨ་དམར་འདྲ་ལས། །
མ་སྒྲིམས་པར་ཡང་མཆི་མ་བྱུང་། །ཞེས་པ་དང་། དེ་ནས་རྒྱལ་པོའི་སྲས་གཉིས་ལག་པ་བཅིངས། །བྲམ་ཟེའི་ལག་པར་ཆུ་བླུགས་དེ་ལ་བྱིན། །དེ་ཚེ་ས་གཡོས་འདོད་ལྷ་སྡིག་ཅན་གྱི། །སྙིང་ནི་མྱ་ངན་མེ་ཡིས་བསྲེག་པར་གྱུར། །ཞེས་པ་ལ་འཆད་པ་ཡིན་ན་ནི།  དེ་
ཉིད་དེའི་ཚེ་ཡུལ་དེར་རིག་བྱེད་པའི་ལུགས་དར་བའི་ལག་ལེན་ཡིན་གྱི་སངས་རྒྱས་པའི་ལུགས་མ་ཡིན་པར་བདག་ཉིད་ཆེན་པོ་འདིས་བཤད་ཟིན་ལ།  གལ་ཏེ་འདུལ་བ་ནས་བཤད་པའི་ཕྱིར་འདུལ་བའི་ལུགས་ཡིན་པར་སེམས་ན་ནི།  རྣམ་འགྲེལ་ལས་བཤད་པའི་ཕྱིར་ན་ཆོས་
གྲགས་ཀྱི་ལུགས་ཡིན་པས་ཁྱབ་པར་ཁས་ལེན་ནམ།  ཐམས་ཅད་སྒྲོལ་བྱང་ཆུབ་སེམས་དཔའ་ཡིན་ཀྱང་།  ཁྱིམ་པའི་ཚུལ་འཛིན་པ་ཡིན་པས་འཕྲལ་གྱི་ལག་ལེན་ཡུལ་དེར་ཡོད་པའི་རབ་ཏུ་བྱུང་བའི་ལུགས་བྱེད་དགོས་ལ།  དེའི་ཚེ་སངས་རྒྱས་འཇིག་རྟེན་དུ་མ་བྱོན་པའི་
9-4-25a


དུས་ཡིན་པས་རིག་བྱེད་པའི་ལག་ལེན་བྱེད་དགོས་པའི་དབང་དུ་བྱས་པ་སྟེ།  གནད་མ་འདྲེས་པར་བྱེད་དགོས་སོ། །གལ་ཏེ་འདུལ་བ་ལས་ལག་ཆུ་ཟེད་པར་གསུངས་པ།  བཙུན་པ་གལ་ཏེ་དགྲ་བཅོམ་པ་ཡིན་ན།  ཁྱིམ་དུ་ཞུགས་
ཅིག །སྟན་ལ་འདུག་ཅིག །ལག་ཆུ་ཟེད་ཅིག །ཅེས་པ་ལྟ་བུ་ལ་ཟེར་བ་ཡིན་ན་ནི།  ཟན་མ་ཟོས་པའི་གོང་དུ་ལག་པ་བཀྲུ་བ་དང་།  བསྔོ་བའི་ཚེ་ཆུ་བསྒྲེང་བ་གཉིས་ནོར་ནས་དྲིས་པར་སྣང་ངོ་། །དེ་ལས་གཞན་པའི་འདུལ་བ་ནས་ལག་ཆུ་ཟེད་པར་གསུངས་
པ་ཡོད་ན་སྟོན་པའི་དུས་ལ་བབ་བོ།  ༼༣༨༽།  ཆགས་སྡང་རྨོངས་གསུམ་གྱིས་བསྐྱེད་པའི། །ལས་ཀུན་མི་དགེ་བ་ཡིན་ན། །ཟག་བཅས་དགེ་བ་གཏི་མུག་གི།  ཀུན་སློང་དག་ལས་བྱུང་དེ་ཅི། །ཞེས་པའི་ལན་ནི།  འདྲི་བ་པོ་ཡི་བསམ་པ་བླང་བ་དང་།  ཡོངས་
སུ་གྲགས་པའི་གཏམ་ལན་དུ་མི་འགྱུར་བ་དང་།  གནད་ཀྱི་ལན་བསྟན་པའི་སྒོ་ནས་གསུང་རབ་སྤྱི་ལ་དོགས་པ་གཅོད་པ་དང་གསུམ་གྱིས་ཤེས་པར་བྱ་བ་ལས།  དང་པོ་ནི་ཀླུ་སྒྲུབ་ཀྱིས།  འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་ནི་མི་དགེ་བ། །ཅེས་
གསུངས་པ་དང་།  རྟེན་འབྲེལ་སྔ་མའི་རྐྱེན་གྱིས་ཕྱི་མ་འབྱུང་བ་བརྩི་བའི་ཚེ།  མ་རིག་པའི་རྐྱེན་གྱིས་འདུ་བྱེད་འབྱུང་བར་གསུངས་ཤིང་འདུ་བྱེད་དེ་ལ་ཡང་བསོད་ནམས་དང་།  བསོད་ནམས་མ་ཡིན་པ་དང་། མི་གཡོ་བའི་ལས་གསུམ་ཡོད་པར་མངོན་པ་གོང་མར་གསུངས་པ་
གཉིས་འགལ་ལོ་སྙམ་ནས་དྲིས་པ་སྟེ།  བསྟན་བཅོས་འདིར་མ་ཟད་གསུང་རབ་སྤྱི་ལ་དོགས་པ་འདི་གཅོད་དགོས་པས་རྣམ་དཔྱོད་དང་ལྡན་པའི་དྲི་བའོ། །གཉིས་པ་ནི།  དེང་སང་ལུང་ཆོས་པ་རྣམས་ལ་དེ་འདྲ་བའི་མ་རིག་པ་འདི་འདུ་བྱེད་ཀྱི་ཀུན་སློང་དུ་བྱས་ནས་
9-4-25b


ས་མཚུངས་དཔྱད་པའི་ཚེ།  ཀུན་སློང་གི་མ་རིག་པ་ས་གང་དུ་གཏོགས།  ཞེས་སོགས་དཔྱོད་པ་གྲགས་མོད་ཀྱི་དེ་ནི་དེའི་ཀུན་སློང་གཉིས་པོ་གང་ཡང་མ་ཡིན་ཏེ།  རྒྱུ་དུས་ཀྱི་ཀུན་སློང་མ་རིག་པ་ཡིན་ན།  ལས་དེ་མི་དགེ་བ་ཡིན་དགོས་པར་མངོན་པ་འོག་མར་གསུངས་
ཤིང་།  རྒྱུ་དུས་ཀྱི་ཀུན་སློང་དང་།  དེ་དུས་ཀྱི་ཀུན་སློང་གཉིས་ཀ་མ་རིག་པ་ཡིན་ན།  མི་དགེ་བ་ཡིན་དགོས་པ་དང་།  དེ་གཉིས་གང་རུང་གཅིག་མ་རིག་པ་ཡིན་ན།  ཅིག་ཤོས་དགེ་བ་ཡིན་ཀྱང་ལས་དེ་འདྲེས་མར་འགྱུར་བར་མངོན་པ་གོང་མར་གསུངས་པའི་
ཕྱིར་རོ། །མདོར་ན་མ་རིག་པའི་རྐྱེན་གྱིས་འདུ་བྱེད་ཅེས་པའི་སྐབས་ཀྱི་མ་རིག་པ་དེ་འདུ་བྱེད་ཀྱི།  ཀུན་སློང་རྣམ་གཉིས་རྒྱུ་དང་ནི། །དེ་ཡི་དུས་ཀྱི་སློང་ཞེས་བྱ། །ཅེས་པ་ལྟ་བུའི་ཀུན་སློང་གཉིས་པོ་གང་རུང་དུ་ཁས་ལེན་ན་སྔར་གྱི་དྲི་བ་དེ་ལ་མཁས་པའི་མདུན་སར་འཕྱར་དུ་
རུང་བའི་ལེན་ཐེབས་པ་མི་སྲིད་པའི་ཕྱིར་རོ། །མངོན་པ་གོང་མ་དང་།  རྟེན་འབྲེལ་གྱི་མདོ་འགྲེལ་ལས་ཀྱང་།  གང་གིས་འཕེན་པ་མ་རིག་པ་དང་འདུ་བྱེད་གཉིས།  ཅི་ལྟར་འཕེན་པ་རྣམ་ཤེས་ལ་བག་ཆགས་བསྒོ་བ་དང་།  གང་འཕེན་པ་མིང་གཟུགས་ནས་ཚོར་བའི་བར་ལ་
བཤད་པས་མ་རིག་པ་དང་འདུ་བྱེད་གཉིས་ཀ་འཕེན་བྱེད་དུ་གསུངས་ཀྱི།  ཀུན་སློང་དང་ཀུན་སློང་ཅན་དུ་གསུངས་པ་མི་སྣང་ངོ་། །གསུམ་པ་ནི།  འོ་ན་འདུ་བྱེད་ཀྱི་རྐྱེན་གྱིས་མ་རིག་པ་དང་།  ཀུན་སློང་གི་མ་རིག་པ་གཉིས་ཀྱི་ཁྱད་པར་གང་ཞེ་ན།  རྣ་བ་བླགས་ཏེ་ཉོན་ཅིག །དེ་
བཤད་པར་བྱའོ། །མདོར་བསྡུ་ན་རྐྱེན་གྱི་མ་རིག་པ་ནི་ཕུང་པོ་ལྔ་ལ་བརྟེན་ནས་ངའོ་སྙམ་དུ་འཛིན་པའི་ངར་འཛིན་ལྷན་སྐྱེས་ཀྱིས་བསྡུས་པའི་མ་རིག་པ་ཡིན་ལ།  ཀུན་སློང་གི་མ་རིག་པ་ནི་སྦྱོར་བ་རྩ་བ་གསུམ་ལས་སྐྱེས་ཞེས་པའི་རྩ་བ་གསུམ་གྱི་ནང་ཚན་དུ་གྱུར་པའི་མ་རིག་པའོ། །
9-4-26a


ཞིབ་ཏུ་ཕྱེ་ན་མ་རིག་པའི་དང་པོ་ལ་འདོད་ཚུལ་གཉིས་སུ་སྣང་སྟེ།  བྱེ་བྲག་སྨྲ་བ་དང་མངོན་པ་སྨྲ་བའི་མདོ་སྡེ་པ་གཉིས་ནི་འཇིག་ལྟ་ལྷན་སྐྱེས་དང་།  རྫས་ཐ་དད་དུ་གྱུར་པའི་སེམས་བྱུང་རྨོངས་པ་གཅིག་ལ་འདོད་དེ།  དང་པོས་འཇིག་
ཚོགས་ལ་ལྟ་བ་ནི་སེམས་ཀྱི་ས་མང་བཅུའི་ནང་ཚན་དུ་གྱུར་པའི་ཤེས་རབ་ཉིད་ཡིན་ལ།  མ་རིག་པ་ནི་ཉོན་མོངས་པའི་ས་མང་དྲུག་གི་ནང་ཚན་དུ་གྱུར་པའི་རྨོངས་པ་ཡིན་པས་དེ་གཉིས་རྫས་ཐ་དད་དུ་འདོད་པའི་ཕྱིར་དང་།  ཕྱི་མས་མ་རིག་པ་ཤེས་རབ་ངན་པར་འདོད་པ་ལ་
ཤེས་རབ་ངན་པ་ནི་ལྟ་བ་ཡིན་ཞིང་།  མ་རིག་པ་དེ་དང་མཚུངས་ལྡན་ཡིན་པ་དང་།  ཤེས་རབ་ནི་མ་རིག་པས་ཉོན་མོངས་པར་བྱ་བ་ཡིན་པས་མ་རིག་པ་ཤེས་རབ་ངན་པར་མི་འཐད་ཅེས་པའི་དགག་པ་མཛད་པའི་ཕྱིར་རོ། །ཚད་མ་སྨྲ་བའི་མདོ་སྡེ་པ་དང་།  སློབ་དཔོན་ཟླ་བས་
ནི་འཇིག་ལྟ་ལྷན་སྐྱེས་ཉིད་ལ་འདོད་དེ།  རྣམ་འགྲེལ་ལས།  བྱམས་སོགས་རྨོངས་དང་འགལ་མེད་ཕྱིར། །ཤིན་ཏུ་ཉེས་པ་ཚར་གཅོད་མིན། །ཉེས་ཀུན་དེ་ཡི་རྩ་བ་ཅན། །དེ་ཡང་འཇིག་ཚོགས་ལྟ་བ་ཡིན། །ཞེས་དང་།  འཇིག་ལྟ་ཉེས་པའི་རྩ་བར་འགྱུར་ཚུལ་
ཡང་།  གང་ཞིག་བདག་མཐོང་དེ་ལ་ནི། །ང་ཞེས་རྟག་ཏུ་ཞེན་འགྱུར་ཏེ། །ཞེན་པས་བདེ་ལ་སྲེད་འགྱུར་ཞིང་། །སྲེད་པས་སྐྱོན་རྣམས་སྒྲིབ་པར་བྱེད། །ཅེས་སོགས་དང་།  འཇུག་པར།  ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་
བ་བློ་ཡིས་མཐོང་འགྱུར་ཞིང་། །བདག་ནི་འདི་ཡི་ཡུལ་དུ་རྟོགས་བྱས་ནས། །རྣལ་འབྱོར་པ་ཡིས་བདག་ནི་འགོག་པར་བྱེད། །ཅེས་གསུངས་ཤིང་།  དེ་ཉིད་ཀྱང་དབུ་མ་རྩ་བར།  མ་རིག་འགགས་པར་གྱུར་པ་ལས། །འདུ་བྱེད་ལ་སོགས་རྣམས་མི་འབྱུང་། །མ་རིག་
9-4-26b


འགགས་པར་གྱུར་པ་ནི། །ཤེས་པས་དེ་ཉིད་བསྒོམས་པས་སོ། །ཞེས་པའི་དོན་དུ་བཞེད་པའི་ཕྱིར་རོ། །དེ་དག་གི་དོན་ཡང་ཕུང་པོ་ལྔ་ལ་བརྟེན་ནས་ངའོ་སྙམ་པའི་ངར་འཛིན་ལྷན་སྐྱེས་ཡོད་ན།  དེའི་དབང་གིས་བསོད་ནམས་ཀྱི་ལས་དང་།  མི་གཡོ་བའི་ལས་བསགས་པ་ཐམས་
ཅད་ཀྱང་ཟག་བཅས་ཀྱི་དགེ་བ་དང་།  འཁོར་བའི་རྒྱུར་གྱུར་པ་འབའ་ཞིག་སྟེ།  དཔེར་ན་ངར་འཛིན་ལྷན་སྐྱེས་ཀྱི་དབང་གིས་འདོད་ལྷར་སྐྱེ་བར་འདོད་ནས་གསོ་སྦྱོང་ལེན་པ་དང་།  ཁམས་གོང་དུ་སྐྱེ་བར་འདོད་ནས་སྙོམས་འཇུག་བསྒོམ་པ་ལྟ་བུའོ། །དེའི་ཚེ་ཡང་རྒྱུ་དུས་ཀྱི་
ཀུན་སློང་ནི་ངར་འཛིན་ལྷན་སྐྱེས་མ་ཡིན་ཏེ།  གསོ་སྦྱོང་ལེན་པར་བྱའོ། །སྙོམས་འཇུག་བསྒོམ་པར་བྱའོ། །སྙམ་པའི་ཐོག་མའི་ཕན་སེམས་ཉིད་ཡིན་པས་དགེ་བ་ཡོད་པའི་ཕྱིར་རོ། །གནད་འདི་ལེགས་པར་གོ་དགོས་སོ། །གཉིས་པ་ཀུན་སློང་གི་མ་རིག་པ་ནི།  སྦྱོར་བ་རྩ་བ་གསུམ་
ལས་སྐྱེས། །ཞེས་པའི་འགྲེལ་པར།  སྲོག་གཅོད་གཏི་མུག་ལས་སྐྱེས་པ་ནི་འདི་ལྟ་སྟེ།  མཆོད་སྦྱིན་བྱེད་པ་རྣམས་དང་།  རྒྱལ་པོའི་ཆོས་འདོན་པ་ཚད་མར་བྱས་ནས་ཆོས་ཀྱི་བློ་གསོད་པ་དག་དང་།  སྤར་སིག་རྣམས་ཕ་མ་རྒས་སམ་ནད་ཚབས་ཆེན་པོས་ཐེབས་ན་གསད་པར་
བྱའོ་ཞེས་ཟེར་བ་ལྟ་བུ་དང་།  མ་བྱིན་ལེན་གཏི་མུག་ལས་སྐྱེས་པ་ནི་འདི་ལྟ་སྟེ།  རྒྱལ་པོའི་ཆོས་འདོན་པ་ཚད་མར་བྱས་ནས་མི་བགྲུངས་པ་ཆད་པས་བཅད་པའི་ཕྱིར་འཕྲོག་པ་ལྟ་བུ་དང་།  བྲམ་ཟེ་རྣམས་འདི་ཐམས་ཅད་ནི་ཚངས་པས་བྲམ་ཟེ་རྣམས་ལ་བྱིན་པ་ཡིན་
པས།  བྲམ་ཟེས་འཕྲོགས་པ་ན།  བྲམ་ཟེ་བདག་ཉིད་ཀྱིས་ལེན་པ་ཡིན།  བདག་ཉིད་ཀྱིས་ཟ་བ་ཡིན།  བདག་ཉིད་ཀྱིས་གྱོན་པ་ཡིན།  བདག་ཉིད་ཀྱིས་སྦྱིན་པ་ཡིན་ནོ། །ཞེས་ཟེར་བ་ལྟ་བུ་དང་།  ལོག་གཡེམ་གཏི་མུག་
9-4-27a


ལས་སྐྱེས་པ་ནི་སྤར་སིག་ལ་སོགས་པ་མ་ལ་སོགས་པ་ལ་ཉལ་པོ་དང་།  བ་ལང་འབངས་ཀྱི་མཆོད་སྦྱིན་ལ་ཆོ་ག་ཅན་གྱིས་ཆུ་བཏུང་ངོ་། །རྩ་བཅད་དོ། །མའི་གམ་དུ་ཉལ་པོ་ལ་འགྲོའོ། །སྲིང་མོའི་གམ་དུ་འགྲོའོ། །
རུས་པ་གཅིག་པའི་གམ་དུ་འགྲོའོ། །ཞེས་བྱ་བ་དང་།  མུ་སྟེགས་གང་དག་བུད་མེད་ནི་གཏུན་དང་།  མེ་ཏོག་དང་།  འབྲས་བུ་དང་།  ཟས་སྨིན་པ་དང་།  རོ་དང་།  ལམ་དང་འདྲའོ་ཞེས་ཟེར་བ་ལྟ་བུ་དང་།  བརྫུན་སྨྲ་གཏི་མུག་ལས་སྐྱེས་པ་ནི་ཇི་སྐད་དུ།  རྒྱལ་པོ་
བཞད་གད་ལྡན་དང་བུད་མེད་དང་། །བག་མ་ལེན་པའི་ཚེ་དང་གསོད་པ་དང་། །ནོར་ཀུན་འཕྲོག་ཚེ་བརྫུན་བྱས་གནོད་མེད་དེ། །བརྫུན་ལྔ་ལྟུང་བར་བྱེད་པ་མིན་ཞེས་བཤད། །ཅེས་སྨྲ་བ་ལྟ་བུ་དང་།  ཕྲ་མ་ལ་སོགས་པ་གཏི་མུག་ལས་སྐྱེས་པ་ནི་ལོག་པའི་ལྟ་བས་རབ་
ཏུ་བཅུག་པ་དང་།  གང་ཡང་རིག་བྱེད་ལ་སོགས་པ་བསྟན་བཅོས་ངན་པ་བཏུལ་བའོ། །ཞེས་དང་།  དེ་ཡི་མཇུག་ཐོགས་ལས་བྱུང་ཕྱིར། །བརྣབ་སེམས་སོགས་རྩ་གསུམ་ལས་སྐྱེས། །ཅེས་པའི་འགྲེལ་པར།  གཏི་མུག་གི་མཇུག་ཐོགས་སུ་བྱུང་བ་ནི་གཏི་མུག་ལས་
སྐྱེས་པ་དག་གོ།  ཅེས་གསུངས་པ་རྣམས་ཏེ།  དེ་ལྟ་བུའི་གཏི་མུག་གིས་བསྐྱེད་པའི་ལུས་ངག་ཡིད་གསུམ་གྱི་ལས་རྣམས་ནི་མི་དགེ་བ་ཁོ་ན་ཡིན་པ་ལ་དགོངས་ནས།  འཕགས་མཆོག་ཀླུ་སྒྲུབ་ཀྱིས།  འདོད་ཆགས་ཞེ་སྡང་གཏི་མུག་གསུམ། །དེས་བསྐྱེད་ལས་
ནི་མི་དགེ་བ། །ཅེས་གསུངས་པར་ཤེས་པར་བྱའོ། །མདོར་ན།  འདུ་བྱེད་ཀྱི་རྐྱེན་གྱི་མ་རིག་པ་དང་།  འདུ་བྱེད་ཀྱི་ཀུན་སློང་གི་མ་རིག་པ་གཉིས་དོན་མི་གཅིག་སྟེ།  སྔ་མ་ནི་ངར་འཛིན་ལྷན་སྐྱེས་སམ་དེ་དང་མཚུངས་ལྡན་གྱི་མ་རིག་པ་ཡིན་པས་དེ་ཁོ་ན་ཉིད་ལ་རྨོངས་པའི་མ་རིག་པ་
9-4-27b


ཡིན་ལ།  ཕྱི་མ་ནི་སྔར་བཤད་པ་ལྟར་གྱི་གཏི་མུག་ཡིན་པས་ལས་རྒྱུ་འབྲས་ལ་རྨོངས་པའི་མ་རིག་པ་ཡིན་པའི་ཕྱིར་རོ།  ༼༣༩༽།  དགེ་རྩ་གསུམ་གྱིས་ཀུན་བསླངས་པའི། །ལས་ཀུན་དགེ་བ་ཡིན་ན་ནི། །རྒྱུ་ཡི་ཀུན་སློང་དགེ་བ་ཡིས། །བསླངས་ཀྱང་དུས་ཀྱི་ཀུན་
སློང་གི།  མི་དགེ་བ་དང་མཚུངས་ལྡན་པའི། །མི་དགེ་བ་དེ་ཅི་ཞིག་ཡིན། །དེ་འདྲ་མེད་ན་དེད་དཔོན་གྱིས། །ཚོང་པ་གཡོན་ཅན་བསད་དེ་ཅི། །ཞེས་པའི་ལན་ནི།  འཕགས་མཆོག་ཀླུ་སྒྲུབ་ཀྱིས།  མ་ཆགས་ཞེ་སྡང་གཏི་མུག་མེད། །དེས་བསྐྱེད་ལས་
ནི་དགེ་བ་ཡིན། །ཞེས་པའི་དོན་ལ།  ཁྱོད་ཀྱིས་རྒྱུའི་ཀུན་སློང་དགེ་རྩ་གསུམ་གྱིས་ཀུན་ནས་བསླངས་ཤིང་དུས་ཀྱི་ཀུན་སློང་མི་དགེ་བ་དང་མཚུངས་པར་ལྡན་པའི་ལས་དེ་ཆོས་ཅན།  དགེ་བ་ཡིན་པར་ཐལ།  དགེ་རྩ་གསུམ་གྱིས་ཀུན་ནས་བསླངས་པའི་ལས་ཡིན་
པའི་ཕྱིར་ཏེ།  རྒྱུའི་ཀུན་སློང་དགེ་རྩ་གསུམ་གྱིས་ཀུན་ནས་བསླངས་པའི་ལས་ཡིན་པའི་ཕྱིར།  ཞེས་ཚིག་འཁྲིའི་སྒོ་ནས་སུན་འབྱིན་པར་སྣང་མོད།  འཕགས་མཆོག་ཀླུ་སྒྲུབ་དང་བདག་ཉིད་ཆེན་པོ་འདིའི་དགོངས་པ་ནི།  དགེ་རྩ་གསུམ་གྱིས་བསྐྱེད་པའི་ལས་དགེ་བ་ཡིན་
ཞེས་པའི་དོན་རྒྱུ་དུས་དང་།  དེའི་དུས་ཀྱི་ཀུན་སློང་གཉིས་ཀ་དགེ་རྩ་གསུམ་ཡིན་པ་ལ་དགོངས་པ་ཡིན་ལ་གང་རུང་གཅིག་དགེ་བ་དང་།  ཅིག་ཤོས་མི་དགེ་བ་ཡིན་ན།  ལས་དེ་འདྲེས་མར་འགྱུར་བར་སྔར་བསྟན་ཟིན་པས་འདི་འདྲ་བའི་རྙོག་མ་ཅིའི་ཕྱིར་སློང་བར་བྱེད།  འདི་ནི་
རྣལ་མའི་ལན་ཡིན་ལ།  ཁྱོད་ཉིད་ལ་དེ་ལྟ་བུའི་ལས་དེ་ཆོས་ཅན།  མི་དགེ་བ་མ་ཡིན་པར་ཐལ།  དགེ་རྩ་གསུམ་གྱིས་ཀུན་ནས་བསླངས་པའི་ལས་ཡིན་པའི་ཕྱིར།  ཞེས་འཕངས་ན་ལན་ཅི་སྨྲ།  རྟགས་གསལ་དངོས་འགལ་ཡིན་མོད།  སླར་ཡང་འདོད་ན།  དེ་འདྲ་མེད་ན་ཅེས་
9-4-28a


སོགས་ཚིག་རྐང་གཉིས་བརྗོད་པས་འཁོར་གསུམ་དངོས་འགལ་དུ་མི་འགྱུར་རམ།  སྔ་མའི་ཁྱབ་པ་ནི་ཁོ་བོས་གསུངས་རབ་དཔང་པོར་བྱས་ནས་མཁས་པའི་མདུན་སར་ཁས་ལེན་པས་སྐྱོན་ཡོད་ན་ཐོངས་ཤིག །དེད་དཔོན་སྙིང་རྗེ་ཆེན་པོས་ཚོང་པ་གཡོན་
ཅན་བསད་པའི་ལས་དེ་རྒྱུ་དུས་ཀྱི་ཀུན་སློང་དགེ་བ་ཡིན་ཀྱང་།  དེ་དུས་ཀྱི་ཀུན་སློང་མི་དགེ་བ་དང་མཚུངས་ལྡན་ཡིན་པ་འདི་རྣམ་པར་བརྟགས་ནས་དགག་པ་དང་།  འཕགས་པ་ལ་སྐུར་པ་བཏབ་པར་ཐལ་བ་དང་།  ལུང་དང་འགལ་བས་དགག་པ་གསུམ་ལས།  དང་
པོ་ནི།  དེ་དུས་ཀྱི་ཀུན་སློང་མི་དགེ་བ་དང་མཚུངས་ལྡན་ཡིན་པའི་དོན་འདི་གསད་པར་བྱའོ་སྙམ་པའི་བློ་སྐྱེས་པ་ལ་བྱེད་དམ།  ཡུལ་ལ་ཞེ་སྡང་སྐྱེས་པ་ལ་བྱེད།  དང་པོ་ལྟར་ན་རྒྱུ་དུས་ཀྱི་ཀུན་སློང་ཡང་དེར་ཐལ།  དེའི་ཕྱིར།  ཕྱི་མ་ལྟར་ན་ཤིན་ཏུ་མི་འཐད་དེ།
དེའི་དུས་སུ་སྙིང་རྗེ་ཁྱད་པར་ཅན་སྐྱེས་པ་ཡིན་ལ།  སྙིང་རྗེ་ཁྱད་པར་ཅན་དང་མཚུངས་ལྡན་གྱི་ཞེ་སྡང་མི་སྲིད་པའི་ཕྱིར་རོ། །གཉིས་པ་ནི།  དེ་འདྲ་བའི་གྲུབ་མཐའ་དེ་འཕགས་པའི་གང་ཟག་ལ་སྐུར་བ་བཏབ་པ་ཡིན་ཏེ།  དེད་དཔོན་སྙིང་རྗེ་ཆེན་པོ་ནི་བྱེ་བྲག་ཏུ་སྨྲ་བའི་
ལུགས་ལ་ཚོགས་ལམ་པ་ཡིན་ཀྱང་།  ཐེག་པ་ཆེན་པོ་ཕ་རོལ་ཏུ་ཕྱིན་པའི་ལུགས་ལ་བྱང་སེམས་འཕགས་པ་ཡིན་པས་དེའི་རྒྱུད་ལ་མི་དགེ་བ་ཡོད་པར་ཁས་བླངས་པའི་ཕྱིར་རོ། །གཞན་ཡང་དེ་དུས་ཀྱི་ཀུན་སློང་མི་དགེ་བ་ཡིན་ནའང་རྒྱུ་དུས་ཀྱི་ཀུན་སློང་དགེ་བ་ཡིན་པས་
འདྲེས་མའི་ལས་སུ་ཁས་ལེན་པར་རིགས་ཀྱི།  མི་དགེ་བ་ཁས་ལེན་པར་ག་ལ་རིགས།  ལེགས་པར་དཔྱོད་ཅིག །གསུམ་པ་ནི།  ལུང་ལས་དེད་དཔོན་སྙིང་རྗེ་ཆེན་པོས་ཚོང་པ་གཡོན་ཅན་བསད་པའི་ལས་དེས་བསྐལ་པ་དགུ་ཁྲིའི་ཚོགས་འདུམ་པར་བཤད་པ་དང་
9-4-28b


འགལ་ཏེ།  ལས་དེ་མི་དགེ་བ་ཡིན་པའི་ཕྱིར།  མི་དགེ་བ་ཡིན་ཀྱང་ཚོགས་འདུམ་ན་སེམས་ཅན་ཐམས་ཅད་དང་པོ་ཉིད་ནས་སངས་རྒྱས་པར་འགྱུར་ཏེ།  མི་དགེ་བ་མ་བྱས་པའི་སེམས་ཅན་མི་སྲིད་པའི་ཕྱིར་རོ། །དེས་ན་ལུས་ངག་མི་དགེ་བར་སྣང་བ་ཐམས་ཅད་ལ་མི་དགེ་བ་དང་
མཚུངས་ལྡན་གྱི་ཀུན་སློང་ཡོད་དགོས་པར་འདོད་པ་དེས་ནི་ཐེག་པ་ཆེན་པོའི་སྡེ་སྣོད་ནས་བཤད་པའི་ལྟུང་བའི་རྣམ་གཞག་མུ་བཞི་མ་ཤེས་པར་ཟད་དོ།  ༼༤༠༽།  མི་མཁས་པ་ཡི་བྱམས་སྙིང་རྗེ། །ངན་སོང་རྒྱུ་རུ་བཞེད་གྱུར་ན། །འཕེན་བྱེད་རྒྱུའམ་རྫོགས་བྱེད་ཀྱི། །རྒྱུ་ཞེས་
བརྟགས་ན་ཇི་ལྟར་འགྱུར། །ཞེས་པ་འདི་གོང་དུ་འོང་རྒྱུར་འདུག་ནའང་འདིར་བྲིས་འདུག་པའི་ལན་ནི།  བྱམས་པ་དང་སྙིང་རྗེའི་ཆ་ནས་ངན་སོང་གི་རྒྱུར་སོང་བ་མ་ཡིན་ལ།  རང་གི་ཉེ་དུ་བདེ་བ་དང་འཕྲད་པ་དང་སྡུག་བསྔལ་དང་བྲལ་བར་འདོད་ནས་སྲོག་གཅོད་དང་མ་བྱིན་ལེན་
སོགས་ལ་འཇུག་པ་ལས་འབྲས་ལ་མི་མཁས་པའི་ཆ་ནས་ངན་སོང་གི་རྒྱུར་སོང་བ་ཡིན་པས་འཕེན་བྱེད་ཀྱི་རྒྱུར་འགྱུར་བའང་ཡོད་ལ།  རྫོགས་བྱེད་ཀྱི་རྒྱུར་འགྱུར་བའང་ཡོད་ཅེས་སྨྲས་ན་ཉེས་པ་ཇི་ལྟར་འགྱུར།  ༼༤༡༽  དགེ་བསྙེན་དགེ་ཚུལ་སྡོམ་བརྩོན་ལའང་། །
ཞེས་པར་ལྟུང་བ་ཐམས་ཅད་ལ། །སྡིག་པས་ཁྱབ་པར་གསུངས་པ་དང་། །རྗེ་བཙུན་ཆེན་པོས་བཅས་ལྟུང་དག །ལུང་མ་བསྟན་དུ་བཤད་པ་ཅི། །ཞེས་པ་འདི་འོག་ཏུ་འོང་རྒྱུར་འདུག་ནའང་འདིར་བྲིས་འདུག་པའི་ལན་ནི།  འཁྲུལ་གཞིའི་ལུང་དྲང་པ་དང་། 
ལུང་གི་དོན་བཤད་པའི་སྒོ་ནས་འཁྲུལ་པ་གཞི་མེད་དུ་གཏང་བ་གཉིས་ལས།  དང་པོ་ནི།  རྩ་ལྟུང་འཁྲུལ་སྤོང་ལས།  ཁ་ན་མ་ཐོ་བ་ནི་གཉིས་ཏེ་རང་བཞིན་གྱི་དང་།  བཅས་པའི་ཁ་ན་མ་ཐོ་བའོ། །དེ་ལ་རང་བཞིན་ནི་ཡིད་ཀྱི་ཉེས་པར་སྨྲ་ལ།  བཅས་པ་ནི་ལུས་ངག་
9-4-29a


གི་ཉེས་པར་སྨྲ་བ་དང་།  རང་བཞིན་ནི་ཕལ་པ་ལའང་ཉེས་པར་འགྱུར་ལ།  བཅས་པ་ནི་སྡོམ་པ་ཁས་བླངས་པ་ལ་ཉེས་པར་སྨྲ་བ་དང་།  རང་བཞིན་ནི་རྩ་བའི་ལྟུང་བ་ཡིན་ལ།  བཅས་པ་ནི་ཡན་ལག་གི་ཉེས་པར་སྨྲ་བ་སྟེ།  ཕྱོགས་གསུམ་པོ་
གང་ལའང་འགལ་བ་མ་མཐོང་སྟེ།  ཉེས་པ་ཐམས་ཅད་ཡིད་ལས་བྱུང་བའི་ཕྱིར།  ཡིད་མི་དགེ་བ་དང་ལྡན་ན་ཕལ་པ་ལའང་ལྟུང་བར་འགྱུར་ལ།  ཡིད་མི་དགེ་བ་དང་མི་ལྡན་པའི་ལུས་ངག་གི་ལས་ཕལ་ཆེར་ནི་ལུང་དུ་མ་བསྟན་པ་ཡིན་ལ།  ཉན་ཐོས་དག་ལ་ནི་ཉེས་བྱས་ཕྲ་མོར་
འགྱུར་བའི་ཕྱིར་བཅས་པ་ཡིན་ལ།  བྱང་ཆུབ་སེམས་དཔའ་ལ་ནི་བཅས་པར་མི་འགྱུར་བའི་སྐབས་ཀྱང་སྲིད་མོད།  བསམ་པ་དགེ་བ་རྒྱ་ཆེ་བ་དང་ལྡན་ན་ལྟུང་བའི་གཟུགས་བརྙན་ཉིད་དུ་འགྱུར་བའི་ཕྱིར་རོ། །དེས་ན་ཡིད་མི་དགེ་བ་རྒྱ་ཆེན་པོ་དང་ལྡན་པ་ནི་རྩ་བའམ་རང་
བཞིན་དུ་བཞག་ལ་མི་དགེ་བ་བཅུ་ཅུང་ཟད་ཕྲ་མོ་དང་ལྡན་པ་ནི་ཡན་ལག་གམ་བཅས་པར་འགྱུར་བའི་ཕྱིར་རོ། །འདི་ནི་བཅས་པའི་ཁ་ན་མ་ཐོ་བའོ། །ཞེས་གསུངས་པ་འདིས་འཁྲུལ་གཞི་བྱས་ནས་རྗེ་བཙུན་གྱིས་བཅས་ལྟུང་ཐམས་ཅད་ལུང་མ་བསྟན་དུ་གསུངས་ཞེས་
སྨྲས་པ་འདྲའོ། །གཉིས་པ་ནི།  རྗེ་བཙུན་གྱི་གསུང་དེའི་དགོངས་པ་ཡིད་མི་དགེ་བ་དང་ལྡན་པའི་ལུས་ངག་གི་ལས་ཐམས་ཅད་ལྟུང་བ་དང་།  ཡིད་མི་དགེ་བ་དང་མི་ལྡན་པའི་ལུས་ངག་གི་ལས་ཕལ་ཆེར་ལུང་མ་བསྟན་དུ་གསུངས་ཤིང་།  ཐེག་པ་ཆེན་པོ་ལ་
བཅས་པའི་ལྟུང་བར་འགྱུར་བ་ལ་ཡང་ཡིད་མི་དགེ་བ་དང་ལྡན་དགོས་པར་གསུངས་པས་བཅས་ལྟུང་མི་དགེ་བར་བཞེད་པར་གསལ་ཏེ།  ཡིད་མི་དགེ་བ་དང་ལྡན་པའི་ལུས་ངག་གི་ལས་ཡིན་པའི་ཕྱིར་རོ། །གལ་ཏེ་ཡིད་མི་དགེ་བ་དང་མི་ལྡན་པའི་ལུས་ངག་གི་ལས་
9-4-29b


ཕལ་ཆེར་ནི་ལུང་དུ་མ་བསྟན་པ་ཡིན་ལ།  ཞེས་པ་འདིས་བཅས་ལྟུང་ལུང་མ་བསྟན་དུ་བསྟན་ནོ་སྙམ་ན་དེ་ནི་ཤིན་ཏུ་ཡང་མི་རིགས་ཏེ།  མི་དགེ་བ་བཅུ་ཅུང་ཟད་ཕྲ་མོ་དང་ལྡན་པ་ནི་ཡན་ལག་གམ།  བཅས་པར་འགྱུར་བའི་ཕྱིར་རོ། །འདི་ནི་བཅས་པའི་ཁ་ན་མ་ཐོ་
བའོ། །ཞེས་གསུངས་པ་འདིས་ཡིད་མི་དགེ་བ་དང་མི་ལྡན་ན་བཅས་ལྟུང་མི་འགྱུར་བར་གསལ་བར་བསྟན་པའི་ཕྱིར་རོ། །དེ་ལས་གཞན་དུ་ན་རྗེ་བཙུན་གྱིས་བཅས་ལྟུང་ལུང་མ་བསྟན་དུ་གསུངས་པའི་ལུང་གསལ་པོ་ཡོད་ན་སྟོན་པའི་དུས་ལ་བབ་བོ།  ༼༤༢༽།  ཉན་
ཐོས་སྡེ་པ་བཅོ་བརྒྱད་ལ། །འདུལ་བ་བཅྭ་བརྒྱད་ཡོད་པ་ཡི། །བཤད་པ་གསལ་པོ་གང་ན་ཡོད། །འདུལ་བ་ཡི་གེར་བྲིས་པ་ནི། །བཀའ་བསྡུ་གསུམ་པ་ཡིན་ཞེས་གྲགས། །དུས་དེར་འདུལ་བ་བཅོ་བརྒྱད་པོ། །ཐམས་ཅད་ཡི་གེར་བྲིས་སམ་ཅི། །
ཞེས་པའི་ལན་ནི།  དགེ་ཚུལ་གྱི་ལོ་དྲི་བ་ལས།  དེ་ལྟར་བྱེ་བྲག་བཅོ་བརྒྱད་དུ། །ཤཱཀྱ་སེང་གེའི་བསྟན་པ་ནི། །གྱུར་ཏེ་འགྲོ་བའི་བླ་མ་དེའི། །སྔོན་གྱི་ཕྲིན་ལས་དབང་གིས་ཡིན། །ཞེས་པའི་སྐབས་ཀྱི་ཤཱཀྱ་སེང་གེའི་བསྟན་པ་ནི་འདུལ་བ་ཡིན་པས་སྡེ་
པ་བཅོ་བརྒྱད་ལ་འདུལ་བ་བཅོ་བརྒྱད་ཡོད་པ་གསལ་བར་བསྟན་ཅིང་།  རྒྱལ་པོ་ཀྲྀ་ཀྲིའི་རྨི་ལྟས་ལུང་བསྟན་པ་ལས་མི་བཅོ་བརྒྱད་ཀྱིས་རས་ཡུག་དྲངས་པས་མི་རེ་རེས་རས་ཡུག་རེ་རེ་ཐོབ་པར་གསུངས་པ་འདིས་ཀྱང་གསལ་བར་བསྟན་ནོ། །འདུལ་བ་ཡི་གེར་
བྲིས་པ་བཀའ་བསྡུ་གསུམ་པ་ཡིན་ཞེས་པའི་ལུང་ཁུངས་གསལ་པོ་གང་ན་ཡོད་ཁྱོད་ཉིད་ལ་འདྲི་སྟེ།  ཁྱེད་གྲགས་ཅེས་པ་ལ་ཡང་ཁུངས་གསལ་པོ་དྲི་བ་པོ་ཡིན་པའི་ཕྱིར།  འདུལ་བ་ཡི་གེར་བྲིས་པ་ཙམ་གྱིས་འདུལ་བ་བཅོ་བརྒྱད་པོ་ཐམས་ཅད་ཡི་གེར་འདྲི་དགོས་
9-4-30a


པ་ནི་གཅིག་བྲིས་ན་ཐམས་ཅད་འདྲི་དགོས་ཅེས་པ་ངོ་མཚར་བའི་གནས་སུ་སྣང་ངོ་།  ༼༤༣༽།  བྱིན་ལེན་མ་བྱས་ཟ་བ་ཡི། །ལྟུང་བ་དགེ་སློང་བསླབ་བྱིན་ལ། །འབྱུང་ཞིང་ངེས་ཀྱང་དགེ་སློང་ལ། །བྱིན་ལེན་རུང་བར་བཤད་དེ་ཅི། །
ཞེས་པའི་ལན་ནི།  བྱིན་ལེན་མ་བྱས་ཟ་བ་ཡི། །ལྟུང་བ་མི་སྐྱ་ལ་བྱུང་ན། །མི་སྐྱའི་དགེ་སློང་ཉིད་འགྱུར་བས། །ཞེས་སོགས་ཀྱི་དོན་མི་སྐྱ་དེ་དག་དགེ་སློང་དུ་ཁས་ལེན་ན།  དགེ་སློང་རང་བཞིན་དུ་གནས་པར་ཁས་ལེན་དགོས་པས་དེས་དགེ་སློང་ལ་བྱིན་ལེན་མི་
རུང་བར་འགྱུར་རོ། །ཞེས་པའི་དོན་ཡིན་གྱི་ཚིག་རིས་ལ་སྐྱོན་དེ་འདྲ་བརྗོད་ན།  སྐབས་ཐོབ་ཀྱི་འཆད་ཚུལ་མང་པོ་ལ་གནོད་པས་བརྗོད་པར་མི་བྱའོ། །བདག་ཉིད་ཆེན་པོ་འདིས་བསླབ་བྱིན་དགེ་སློང་གིས་དགེ་སློང་རང་བཞིན་དུ་གནས་པ་ལ་བྱིན་ལེན་རུང་བའི་རྣམ་
གཞག་ཙམ་མི་མཁྱེན་པ་ཙམ་ག་ལ་ཡིན།  ༼༤༤༽།  སྡུག་བསྔལ་ཀུན་གྱི་བྱེད་པ་པོ། །རྫོགས་པའི་སངས་རྒྱས་མིན་ན་ཡང་། །བདེ་བའི་བྱེད་པོ་རྫོགས་སངས་རྒྱས། །ཡིན་པར་བཤད་ན་སྐྱོན་ཅི་ཡོད། །ཅེས་པའི་ལན་ནི་བདེ་བའི་བྱེད་པོ་རྫོགས་པའི་སངས་
རྒྱས་ཡིན་པའི་རྒྱུ་མཚན་ཅི་ཡིན།  རྫོགས་པའི་སངས་རྒྱས་ཀྱིས་བཤད་པའི་བླང་དོར་གྱི་གནས་ལ།  བླང་དོར་ཚུལ་བཞིན་དུ་བྱས་པས་བདེ་བར་འབྱུང་བའི་ཕྱིར།  ཞེས་བསམ་པ་ཡིན་མོད།  དེ་ལྟར་ན་ཅིག་ཤོས་ཡང་དེར་ཐལ།  དེས་བཤད་པའི་དེ་ལ་དེ་མ་བྱས་
པས་དེ་འབྱུང་བའི་ཕྱིར།  ཨེ་གོ་བར་འདུག  ༼༤༥༽།  ཐེག་པ་ཆེན་པོའི་སེམས་བསྐྱེད་ལ། །དབུ་མ་སེམས་ཙམ་ལུགས་གཉིས་སུ། །ངེས་ཤིང་ལེན་པའི་ཆོ་ག་དང་། །ལྟུང་བ་ཕྱིར་བཅོས་ལ་སོགས་པ། །སོ་སོར་ངེས་ན་རྒྱུད་སྡེ་ལས། །གསུངས་པའི་སེམས་
9-4-30b


བསྐྱེད་ཆོ་ག་དེ། །གཉིས་པོ་གང་གི་ལུགས་དང་མཐུན། །ཅེས་པའི་ལན་ནི།  སྤྱིར་འདིའི་སྐབས་གཉིས་པར་ཐེག་པ་ཆེན་པོའི་སེམས་བསྐྱེད་ལ་དབུ་སེམས་ཀྱི་ལུགས་གཉིས་སུ་ངེས་པར་གསུངས་པ་དེ།  སྐབས་ཐོབ་ཀྱི་ཐེག་པ་ཆེན་པོ་ཕ་རོལ་ཏུ་ཕྱིན་པའི་ལུགས་
ཀྱི་སེམས་བསྐྱེད་ལ་དེ་གཉིས་སུ་ངེས་པའི་དོན་ཡིན་གྱི་མདོ་རྒྱུད་ནས་གསུངས་པའི་སེམས་བསྐྱེད་ཀྱི་ལུགས་ཐམས་ཅད་དེ་གཉིས་སུ་ངེས་པར་སྟོན་པ་ག་ལ་ཡིན།  དྲི་བ་ཕལ་ཆེར་ཚིག་རིས་ཙམ་ལ་བརྟེན་ནས་དྲི་བ་འདི་དང་འདྲ་བར་སྣང་ངོ་། །དེ་ལྟར་ན་སེམས་བསྐྱེད་
པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་པ་ལ་ཡང་སེམས་བསྐྱེད་ཐམས་ཅད་དེར་ངེས་ན།  ཐེག་དམན་ལམ་གྱི་སེམས་བསྐྱེད་དེ་ཡང་དེར་ངེས་སམ་ཞེས་དང་།  དེ་ཡང་ས་གསེར་ཟླ་བ་མེ། །ཞེས་པ་ནས།  སྒྲ་བརྙན་ཆུ་བོ་སྤྲིན་
རྣམས་ནི། །རྣམ་པ་ཉི་ཤུ་རྩ་གཉིས་སོ། །ཞེས་པ་ལ་ཡང་ས་དང་།  གསེར་ལ་སོགས་པའི་བེམ་པོ་ཉི་ཤུ་རྩ་གཉིས་པོ་དེ་ཐེག་དམན་སེམས་སྐྱེད་ཀྱི་དབྱེ་བར་བཞེད་དམ་ཅེས་སོགས་གཞུང་ལུགས་ཆེན་པོ་རྣམས་ལ་ཡང་དྲི་བ་མང་ཆེས་པ་འདྲའོ། །དེས་ན་རྒྱུད་སྡེ་
ནས་གསུངས་པའི་སེམས་བསྐྱེད་ལ་ལུགས་མང་དུ་ཡོད་དེ།  དབང་བསྐུར་གྱི་སྟ་གོན་དང་།  འཇུག་པའི་གནས་སྐབས་སུ་སེམས་བསྐྱེད་ལེན་པའི་ཆོ་ག་དང་།  སྒྲུབ་ཐབས་ཀྱི་སྔོན་འགྲོ་བསོད་ནམས་ཚོགས་བསག་གི་སྐབས་སུ་སེམས་བསྐྱེད་ལེན་པའི་ཆོ་
ག་དང་།  དབང་གི་སྔོན་འགྲོའི་སེམས་བསྐྱེད་ལེན་པའི་ཆོ་ག་བརྒྱུད་པའི་ཁྱད་པར་གཉིས་ལྡན་ལྟ་བུ་སོགས་ཡོད་པ་ལས།  དང་པོ་གཉིས་ལ་ཀྱཻ་རྡོར་འགྲེལ་པ་ལུགས་ལྟ་བུ།  དབུ་མ་ལུགས་ཀྱི་སེམས་བསྐྱེད་དང་ཚུལ་མཚུངས་པ་ཡང་ཡོད་མོད་ཀྱི་ཕལ་ཆེར་ནི་ལུགས་གཉིས་པོ་
9-4-31a


གང་དང་ཡང་མཐུན་པའི་ངེས་པ་མེད་དེ།  དངོས་གཞི་ལ་སྔགས་སྡོམ་ལེན་པའི་སྔོན་འགྲོ་གནས་སྐབས་ཀྱི་སེམས་བསྐྱེད་ཀྱི་ཆོ་ག་ཡིན་པས་ཆོ་ག་བསྡུས་པའི་ལུགས་ཡིན་པའི་ཕྱིར་དང་།  ལུགས་གཉིས་པོ་ནི་དངོས་གཞི་ལ་བྱང་
སེམས་ཀྱི་སྡོམ་པ་ལེན་པའི་སྐབས་ཡིན་པའི་ཆོ་ག་རྒྱས་པའི་ལུགས་ཡིན་པའི་ཕྱིར་རོ། །བརྒྱུད་པའི་ཁྱད་པར་གཉིས་ལྡན་གྱི་དབང་གི་སྔོན་འགྲོའི་ཆོ་ག་ནི་སྦྱོར་བའི་སྐབས་སུ་སྡིག་པ་བཤགས་པ་དང་།  རྗེས་སུ་ཡི་རངས་དང་།  བསྔོ་བ་ཡོད་པས་སེམས་ཙམ་ལུགས་
ཀྱང་མ་ཡིན།  ཡང་སྦྱོར་བའི་སྐབས་སུ་ཡན་ལག་བརྒྱད་ཚང་བ་མེད་ཅིང་སྐྱབས་འགྲོ་དངོས་གཞིར་བསྡུས་པ་དང་།  བསླབ་པ་བརྗོད་པའི་སྐབས་སུ་སེམས་ཙམ་ལུགས་ཀྱི་རྩ་ལྟུང་བཞི་བརྗོད་པས།  དབུ་མ་ལུགས་ཀྱང་མ་ཡིན་པས་རྒྱུད་སྡེ་ནས་གསུངས་པའི་སེམས་
བསྐྱེད་ཀྱི་ལུགས་དེ་ཕ་རོལ་ཏུ་ཕྱིན་པའི་དབུ་སེམས་གང་གི་ཡང་ལུགས་ཡིན་མི་དགོས་སོ།  ༼༤༦༽།  ལྟ་བས་ཆོ་ག་འབྱེད་ན་ནི། །དབུ་མའི་ལྟ་བ་དང་ལྡན་པ། །དེ་ལ་བྱང་སའི་ཆོ་ག་ཡིས། །སེམས་བསྐྱེད་སྡོམ་པ་མི་སྐྱེའམ། །ཞེས་པའི་ལན་ནི།  དེ་གཉིས་ལྟ་བ་ཐ་དད་
པས། །ཆོ་ག་ཡང་ནི་ཐ་དད་ཡིན། །ཅེས་པའི་དོན་དབུ་སེམས་གཉིས་ལ་ལྟ་བ་ཐ་དད་དུ་ཡོད་པས།  དེ་དང་མཐུན་པའི་ཆོ་ག་ཐ་དད་པ་གཉིས་རྫོགས་པའི་སངས་རྒྱས་ཀྱིས་བཅས་ཞེས་པའི་དོན་ཡིན་གྱི།  ཆོ་ག་གཉིས་པོ་ལྟ་བ་ཐ་དད་ཁོ་ནས་ལེན་དགོས་ཞེས་པའི་དོན་
ནི་མ་ཡིན་ནོ། །གལ་ཏེ་ལྟ་བ་ཐ་དད་ལ་ཆོ་ག་ཐ་དད་དུ་བཅས་པས་ལྟ་བ་ཐ་དད་ཁོ་ནས་ལེན་དགོས་ན་ཐེག་པ་ཆེན་པོའི་ལྟ་བ་དང་ལྡན་པས་ཉན་ཐོས་ཀྱི་སྡེ་སྣོད་ནས་གསུངས་པའི་གསོལ་བཞིའི་ལས་ཀྱི་སྡོམ་པ་ལེན་པར་མི་རུང་བར་འགྱུར་རོ།  ༼༤༧༽།  བསླབ་བཏུས་ལས་
9-4-31b


གསུངས་རྩ་བ་ཡི། །ལྟུང་བར་བྱང་ས་ལས་བཤད་པ། །རྩ་བའི་ལྟུང་བ་བསྡུས་སོ་ཞེས། །བསླབ་བཏུས་ཉིད་ལས་གསུངས་དེ་ཅི། །ཞེས་པའི་ལན་ནི།  བོད་ན་བཞུགས་པའི་བསླབ་བཏུས་ཀྱི་ནང་ན་ནི་བཤད་པ་དེ་མི་སྣང་ངོ་། །གལ་ཏེ་དབུ་མ་ལུགས་
ཀྱི་རྩ་ལྟུང་གི་སྡོམ་ཚིག་རྫོགས་མ་ཐག་ཏུ།  ཆགས་དང་སེར་སྣ་མི་ཟད་པས། །སློང་ལ་སྦྱིན་པར་མི་བྱེད་དང་། །ཁྲོས་ནས་སེམས་ཅན་བརྡེག་པ་དང་། །གཞན་གྱིས་བཤགས་ཀྱང་མི་ཉན་པར། །སེམས་ཅན་ལ་ནི་བརྡེག་པ་དང་། །ཉོན་མོངས་པ་དང་གཞན་
མཐུན་པས། །ཆོས་ལྟར་བཅོས་པ་སྟོན་པའོ། །ཞེས་གསུངས་པ་ལ་འཁྲུལ་པ་ཡིན་ན།  དེ་ནི་ཐབས་ལ་མཁས་པའི་མདོ་ལས་གསུངས་པའི་རྩ་ལྟུང་གི་སྡོམ་ཚིག་ཡིན་གྱི།  བྱང་ས་ནས་གསུངས་པའི་རྩ་ལྟུང་གི་སྡོམ་ཚིག་མ་ཡིན་པས་ནོར་བར་མི་བྱའོ། །རྗེ་བཙུན་
གྱི་རྩ་ལྟུང་འཁྲུལ་སྤོང་ལས།  བྱང་ས་ནས་གསུངས་པའི་རྩ་བའི་ལྟུང་བ་བཞིའི་ནང་དུ།  ནམ་མཁའི་སྙིང་པོའི་མདོ་དང་།  ཐབས་ལ་མཁས་པའི་མདོ་དང་།  དྲག་ཤུལ་ཅན་གྱིས་ཞུས་པའི་མདོ་ལས་གསུངས་པའི་རྩ་བའི་ལྟུང་བ་རྣམས་འདུས་ཚུལ་གྱི་རྣམ་གཞག་ཞིབ་པར་
གསུངས་ན།  འདིར་དེ་གཉིས་ལྟུང་བ་ཐ་དད་དུ་གསུངས་པ་ཅི་ཡིན་སྙམ་པའི་དོགས་པ་སྐྱེ་རྒྱུ་ཡིན་མོད།  དེའི་ལན་ལ་རྗེ་བཙུན་གྱིས་བསྲུང་ཚུལ་འདུས་པ་ལ་དགོངས་ཏེ།  བྱང་ས་ནས་གསུངས་པའི་རྩ་ལྟུང་བཞི་པོ་ཚུལ་བཞིན་དུ་བསྲུང་ན་མདོ་གསུམ་པོ་ནས་གསུངས་པའི་
རྩ་ལྟུང་རྣམས་ཀྱང་བསྲུངས་པར་འགྱུར་བའི་ཕྱིར་རོ། །འདིར་རྩ་ལྟུང་ཐ་དད་དུ་བཤད་པ་ནི་རྣམ་གཞག་ཐ་དད་པ་ལ་དགོངས་ཏེ།  དབུ་མ་ལུགས་ལ་ནི་རྩ་བའི་ལྟུང་བ་བཅུ་བཞིའམ།  རྟེན་གྱི་སྒོ་ནས་བཅོ་བརྒྱད་དང་།  མཚམས་མེད་ལྔ་སོ་སོར་ཕྱེ་ན་ཉི་ཤུ་རྩ་གཉིས་ཡིན་ལ།  སེམས་
9-4-32a


ཙམ་ལུགས་ལ་ནི་རྩ་བའི་ལྟུང་བ་བཞི་ཉིད་ཡིན་པའི་ཕྱིར་རོ། །གལ་ཏེ་བསྲུང་ཚུལ་གཅིག་ན་རྣམ་གཞག་ཐ་དད་པ་འགལ་ལོ་སྙམ་ན།  མི་འགལ་ཏེ་དགེ་བསྙེན་གྱི་བསླབ་གཞི་ལྔ་བསྲུང་བ་དང་།  མི་དགེ་བ་བཅུ་སྤོང་གཉིས་
བསྲུང་ཚུལ་གཅིག་ཀྱང་རྣམ་གཞག་ཐ་དད་པ་བཞིན་ནོ། །བློ་གཟུ་བོར་གནས་པ་དག་གིས་དཔྱོད་ཅིག  ༼༤༨༽  དབུ་མ་ལུགས་ཀྱི་སེམས་བསྐྱེད་ཀྱི། །རྟེན་དུ་སོ་ཐར་མི་དགོས་ན། །ཡན་ལག་བདུན་པ་སྔོན་འགྲོ་བར། །གསུངས་པའི་དགོངས་པ་
གང་ཞིག་ཡིན། །ཞེས་པའི་ལན་ནི།  དབུ་མ་ལུགས་དང་སེམས་ཙམ་ལུགས་ཀྱི་སེམས་བསྐྱེད་ལ་སོ་ཐར་སྔོན་དུ་འགྲོ་མི་དགོས་པ་དང་།  དགོས་པའི་ཁྱད་པར་གསུངས་པ་ནི།  ལུགས་དེའི་སེམས་བསྐྱེད་ཀྱི་སྦྱོར་དངོས་རྗེས་གསུམ་གྱི་ཆོ་གའི་སྔོན་དུ་སོ་
ཐར་གྱི་སྡོམ་པ་དང་ལྡན་པ་མི་དགོས་པ་དང་།  དགོས་པའི་ཁྱད་པར་ཡིན་གྱི།  སེམས་བསྐྱེད་ཀྱི་དངོས་གཞི་ལ་སྦྱོར་བའི་སྐབས་སུ་སོ་ཐར་ལེན་པ་མི་དགོས་པ་དང་།  དགོས་པའི་ཁྱད་པར་མ་ཡིན་ཏེ།  སྦྱོར་བའི་སྐབས་སུ་གཉིས་ཀ་ལ་ཡང་ཐུན་མོང་མ་
ཡིན་པའི་སྐྱབས་འགྲོའི་སྡོམ་པ་ལེན་པར་མཚུངས་པའི་ཕྱིར་རོ། །དཔེར་ན་སྐལ་དམན་རིམ་འཇུག་པ་དང་སྐལ་ལྡན་ཅིག་ཆར་བ་གཉིས་ལ་དབང་བསྐུར་གྱི་སྔོན་དུ་སྡོམ་པ་འོག་མ་གཉིས་སྔོན་དུ་འགྲོ་མི་དགོས་པ་དང་དགོས་པའི་ཁྱད་པར་ཡང་དབང་བསྐུར་གྱི་ཆོ་གའི་སྔོན་དུ་
ཡིན་གྱི་དབང་གི་དངོས་གཞིའི་སྔོན་དུ་སྟ་གོན་དང་འཇུག་པའི་སྐབས་སུ་སྡོམ་པ་འོག་མ་གཉིས་ལེན་པ་ཡོད་པ་ཁྱད་པར་མེད་པ་བཞིན་ནོ། །དེས་ན།  ༼༤༩༽།  རྗེ་བཙུན་རྩེ་མོས་རྒྱུན་བཤགས་ཀྱི། །དུས་སུ་ཉེས་སྤྱོད་སྤོང་བ་ཡི། །ཚུལ་ཁྲིམས་སྐྱེ་ཞིང་དེ་ཉིད་ཀྱང་། །སོ་སོར་
9-4-32b


ཐར་པ་བཤད་དེ་ཅི། །ཅེ༷ས་པའི་ལན་ཡང་སྔ་མ་དེ་ཉིད་ཀྱིས་གསལ་བར་བསྟན་ཅིང་།  རང་ལ་གནོད་པའི་ཚུལ་སྣང་བ་ནི་འོག་ཏུ་འཆད་དོ།  ༼༥༠༽།  སོ་སོར་ཐར་པ་རིགས་བདུན་པོ། །སེམས་ཙམ་ལུགས་ཀྱི་སེམས་བསྐྱེད་ཀྱི། །རྟེན་དུ་དགོས་ན་རྗེ་བཙུན་གྱིས། །དེ་
དག་དེ་ཡི་རྟེན་མིན་པར། །གསུངས་པའི་དགོངས་པ་གང་དུ་བཙལ། །ཞེས་པའི་ལན་ནི།  རྗེ་བཙུན་གྱིས་དེ་ལྟར་དུ་གསུངས་པ་གཏན་མེད་དེ།  སྡོམ་པ་ཉི་ཤུ་པའི་ཊཱི་ཀར།  བྱང་ས་སོགས་ནས་གསུངས་པ་ལྟར།  འཇུག་པ་སེམས་བསྐྱེད་ཀྱི་སྦྱོར་བའི་སྐབས་སུ།  སོ་སོར་
ཐར་པའི་སྡོམ་པས་བསྡམས་མམ།  ཞེས་པའི་དྲི་བ་མཛད་པར་བཞེད་པའི་ཕྱིར་རོ། །སྡོམ་པ་ཉི་ཤུ་པའི་ཊཱི་ཀར།  སོ་སོར་ཐར་པའི་སྡོམ་པ་བྱང་སེམས་ཀྱི་སྡོམ་པ་སྐྱེ་བ་དང་གནས་པ་གཉིས་ཀའི་རྟེན་དུ་མི་རུང་བར་རྒྱུ་མཚན་དང་བཅས་ཏེ་སྤྱིར་བཏང་དུ་གསུངས་པ་ནི།  ཉན་ཐོས་
དང་ཐུན་མོང་བའི་སོ་སོར་ཐར་པ་རིགས་བདུན་ལ་དགོངས་ཏེ།  རྩ་ལྟུང་འཁྲུལ་སྤོང་དུ།  དེ་ཉིད་དོགས་པར་བཀོད་ནས་ཉན་ཐོས་དང་ཐུན་མོང་བའི་སོ་སོར་ཐར་པ་འདི་སྐྱེ་བ་དང་གནས་པ་གཉིས་ཀའི་རྟེན་དུ་མི་རུང་པར་ཁྱེད་སྨྲ་བ་བཞིན་དུ་ཁོ་བོ་ཅག་ཀྱང་སྨྲའོ། །ཞེས་གསལ་བར་
གསུངས་པའི་ཕྱིར་རོ།  ༼༥༡༽།  དོན་དམ་སེམས་བསྐྱེད་བྱ་བ་ཡི། །ཆོ་ག་རྒྱལ་བས་མ་གསུངས་ན། །འཕགས་པ་ཀླུ་སྒྲུབ་སྐྱོབ་ཉིད་ཀྱིས། །བྱང་ཆུབ་སེམས་འགྲེལ་ཞེས་བྱ་བའི། །བསྟན་བཅོས་དག་ལས་གསུངས་དེ་ཅི། །ཅེས་པའི་ལན་ནི།  ཀླུ་སྒྲུབ་ཀྱིས་མཛད་པའི་
བྱང་ཆུབ་སེམས་འགྲེལ་ལས་ཀུན་རྫོབ་སེམས་སྐྱེད་ཆོ་གས་བླངས་ནས།  དོན་དམ་སེམས་སྐྱེད་བསྒོམས་པའི་སྟོབས་ཀྱིས་སྐྱེ་དགོས་པས་བསྒོམ་ཚུལ་བཤད་པ་ཙམ་ཞིག་སྣང་གི།  ཆོ་གའི་སྒོ་ནས་བསྐྱེད་པའི་ཚུལ་མི་སྣང་སྟེ།  དེ་ཉིད་ལས།  བྱང་ཆུབ་ཀྱི་སེམས་ཆེན་པོ་སངས་རྒྱས་
9-4-33a


བཅོམ་ལྡན་འདས་རྣམས་དང་བྱང་ཆུབ་སེམས་དཔའ་ཆེན་པོ་རྣམས་ཀྱིས་ཇི་ལྟར་བསྐྱེད་པ་བཞིན་དུ།  བདག་གིས་དུས་འདི་ནས་བཟུང་སྟེ་ཇི་སྲིད་བྱང་ཆུབ་སྙིང་པོ་བྱང་ཆུབ་ལ་མཆིས་ཀྱི་བར་དུ་བྱང་ཆུབ་ཀྱི་སེམས་ཆེན་པོ་བསྐྱེད་པར་བགྱི་སྟེ། 
སེམས་ཅན་མ་བསྒྲལ་བ་རྣམས་བསྒྲལ་བར་བགྱིའོ། །མ་གྲོལ་བ་རྣམས་དགྲོལ་བར་བགྱིའོ། །དབུགས་མ་ཕྱུང་བ་རྣམས་དབུགས་ཕྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་འདའ་བར་བགྱིའོ། །དེ་ལྟར་བྱང་ཆུབ་ཀྱི་སེམས་བསྐྱེད་
པ་ནི་སྨོན་ལམ་གྱི་རང་བཞིན་ཀུན་རྫོབ་ཀྱི་སྣང་བའོ། །བྱང་ཆུབ་སེམས་དཔའི་གསང་སྔགས་ཀྱི་སྒོའི་སྤྱད་པ་སྤྱོད་པ་རྣམས་ཀྱིས་དོན་དམ་པ་ཡང་བསྒོམས་པའི་སྟོབས་ཀྱིས་བསྐྱེད་པར་བྱའོ། །ད་ནི་དེའི་རང་བཞིན་འཆད་པར་བྱེད་དེ།  བྱང་ཆུབ་སེམས་ཀྱི་བདག་
ཉིད་སྐུ། །དཔལ་ལྡན་རྡོ་རྗེ་འཆང་བཏུད་ནས། །སྲིད་པ་འཇོམས་པར་བྱེད་པ་ཡི། །བྱང་ཆུབ་སེམས་བསྒོམ་བདག་གིས་བཤད། །བྱང་ཆུབ་སེམས་ཀྱི་མཚན་ཉིད་དུ། །བདག་དང་ཕུང་པོ་རྣམ་རིག་གི།  རྟོག་པ་རྣམས་ཀྱིས་མ་བསྒྲིབ་ཤིང་། །སྟོང་པ་སངས་
རྒྱས་རྟག་ཏུ་བཞེད། །ཅེས་གསུངས་ཤིང་།  འགོས་འགྱུར་དང་།  སྤ་ཚབ་འགྱུར་ལས།  བྱང་ཆུབ་སེམས་དཔའ་གསང་སྔགས་ཀྱི་སྤྱད་པ་སྤྱོད་པ་རྣམས་ཀྱིས།  དེ་ལྟར་ཀུན་རྫོབ་ཀྱི་རྣམ་པས་བྱང་ཆུབ་ཀྱི་སེམས་སྨོན་པའི་རང་བཞིན་ཅན་བསྐྱེད་ནས།  ཞེས་སོགས་
གསུངས་སོ། །ཀུན་རྫོབ་སེམས་སྐྱེད་ཆོ་གས་བླངས་པའི་རྗེས་སུ་དོན་དམ་སེམས་བསྐྱེད་བསྒོམས་པའི་སྟོབས་ཀྱིས་བསྐྱེད་པར་བྱང་ཆུབ་སེམས་འགྲེལ་ལས་འདི་ལྟར་གསུངས་བཞིན་དུ་དེ་ལས་བཟློག་སྟེ་སྨྲ་བ་ནི་འཕགས་པའི་གང་ཟག་ལ་སྐུར་པ་བཏབ་པའམ།  ཡང་
9-4-33b


ན་དེའི་དུས་སུ་དྲན་པ་གཞན་དུ་འགྱུར་བར་སྣང་ངོ་།  ༼༥༢༽།  སརྦ་ཡོ་ག་ཙིཏྟ་སོགས། །སློབ་མས་བཟླས་པས་ཀུན་རྫོབ་དང་། །དོན་དམ་སེམས་བསྐྱེད་འཛིན་བཅུག་ནས། །སུརྟི་ས་མ་ཞེས་སོགས་ཀྱིས། །སྐྱེས་ཟིན་བརྟན་པར་མཛད་དེ་ཅི། །ཅེས་པའི་ལན་ནི།  སྤྱིར་
བདག་ཉིད་ཆེན་པོ་འདིས་སེམས་བསྐྱེད་དེ།  ཆོ་གའི་སྒོ་ནས་བསྐྱེད་ན་ཆོ་ག་དེ་ལས་སེམས་བསྐྱེད་དེ་སྐྱེ་དགོས་པས།  ཕ་རོལ་ཏུ་ཕྱིན་པའི་ལུགས་ལ་ཀུན་རྫོབ་སེམས་བསྐྱེད་ལ་ཆོ་ག་ཡོད་པ་དང་།  དོན་དམ་སེམས་བསྐྱེད་ལ་ཆོ་ག་མེད་པར་བཞེད་ལ།  རྣམ་
སྣང་མངོན་བྱང་ལ་སོགས་པའི་རྒྱུད་སྡེ་འགའ་ཞིག་ལས།  རྒྱུན་བཤགས་ཀྱི་སྐབས་སུ་དོན་དམ་པའི་བྱང་ཆུབ་ཀྱི་སེམས་བསྐྱེད་པར་བྱའོ། །ཞེས་སོགས་ཀྱི་ཚིག་ཡོད་པ་རྣམས་ནི་དམ་བཅའ་ཙམ་ཡིན་གྱི།  ཆོ་གའི་སྒོ་ནས་བསྐྱེད་པ་མ་ཡིན་པར་བསྟན་བཅོས་
འདིར།  སྦྱིན་པ་བཏང་བར་བྱ།  ཚུལ་ཁྲིམས་བསྲུང་བར་བྱ།  ཅེས་སོགས་ཀྱི་དཔེ་དང་།  ཐུབ་པ་དགོངས་གསལ་ལས།  ཕྱག་རྒྱ་ཆེན་པོ་བསྒོམ་པར་བྱའོ། །ཞེས་སོགས་ཀྱི་དཔེའི་སྒོ་ནས་གསལ་བར་གསུངས་པ་དེ་ངེས་ན།  དོགས་པ་འདི་ལྟ་བུའི་གཞི་མེད་དོ། །
གཞན་དུ་ན་སརྦ་ཡོ་ག་སོགས་སློབ་མས་བཟླས་མ་ཐག་ཏུ་སློབ་མ་དེས་ཐེག་པ་ཆེན་པོའི་མཐོང་ལམ་ཐོབ་པར་འགྱུར་ཏེ།  དོན་དམ་སེམས་བསྐྱེད་སྐྱེས་པའི་ཕྱིར་རོ། །སྤྱིར་འདི་འདྲ་འདྲི་ན་འབྱུང་བ་བཞི་ཆོ་གས་བསྐྱེད་པ་ཡོད་དམ་མེད། ཞེས་ཁྱོད་ལ་འདྲི་སྟེ།  ཡོད་ན་ཆོ་ག་
ཡང་ནི་ཐུག་མེད་དུ་འགྱུར་རོ། །ཞེས་པའི་སྐྱོན་དུ་འགྱུར་ཞིང་མེད་ན།  རྐང་འོག་རླུང་དང་སུམ་མདོར་མེ། །སྙིང་ཁར་ས་དང་མགྲིན་པར་ཆུ། །བསྒོམས་ནས་ཨཱ་བེ་ཤ་ཡ་སོགས། །བརྗོད་ཅིང་རོལ་མོ་བྱེད་དེ་ཅི། །ཞེས་དྲིས་ན་ལན་ཅི་སྨྲ།  དེ་བཞིན་དུ།  ནམ་
9-4-34a


མཁའ་ཆོ་གས་བསྐྱེད་པ་ཡོད་དམ་མེད་ཡོད་ན་ཆོ་ག་ཡང་ནི་ཐུག་མེད་དུ་འགྱུར་བའི་ཕྱིར་རོ། །དེའི་འོག་གི་ཚིགས་བཅད་ཀྱང་དྲན་དགོས་སོ། །མེད་ན།  བྱིན་རླབས་འགའ་ཞིག་བྱེད་པའི་ཚེ། །རང་སེམས་ནམ་མཁའ་
དང་བསྲེས་ནས། །བླ་མ་བརྒྱུད་པའི་མཚན་བརྗོད་དེ། །བྱིན་གྱིས་རློབ་པར་བྱེད་དེ་ཅི། །ཅེས་དྲིས་ན་ལན་ཅི་སྨྲ།  དེ་བཞིན་དུ་གསང་སྔགས་ཀྱི་རྒྱུད་ཚིག་གཅིག་བཤད་མ་ཐག་ཏུ་རྡོ་རྗེ་སེམས་དཔའ་སྙིང་དྲལ་ནས་གཤེགས་སམ་མི་གཤེགས། 
གཤེགས་ན་སྔགས་ཀྱི་ཆོས་བཤད་དུ་མི་རུང་བར་འགྱུར།  མི་གཤེགས་ན་རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་འགྱུར། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཅེས་གསུངས་པ་དེ་ཅི་ལ་དགོངས།  
ཅེས་དྲི་ན་ལན་ཅི་སྨྲ།  དེས་ན་འདི་འདྲའི་རིགས་ཀྱིས་ནི་སྔགས་ཀྱི་ཆོ་ག་དང་།  ཉམས་ལེན་ཐམས་ཅད་སུན་འབྱིན་པ་ཡིན་པས་ཕྱིན་ཆད་མི་གསུང་བར་ཞུ།  ༼༥༣༽  ཉན་ཐོས་རྣམས་ཀྱིས་རྫོགས་བྱང་དུ། །བསྔོ་བ་བྱེད་ན་འཕགས་པ་ཡིས། །ཉན་ཐོས་ཐེག་པ་དེ་
ལས་ནི། །སྤྱོད་པ་ཡོངས་བསྔོ་མ་བཤད་དེས། །ཞེས་གསུངས་པ་དེ་གང་ལ་དགོངས། །ཐམས་ཅད་སྒྲོལ་གྱི་སྐྱེས་རབས་ལས། །བསྔོ་བ་བཤད་དེ་ཉན་ཐོས་ཀྱི། །བསྔོ་བ་ཡིན་པར་བཞེད་དམ་ཅི། །ཞེས་པའི་ལན་ནི།  འདྲི་བ་པོའི་བསམ་པ་བླངས་པ་དང་། 
གསུང་རབ་སྤྱི་ཡི་དགོངས་པར་དཔྱད་པ་དང་།  དེ་བདག་ཉིད་ཆེན་པོའི་བཞེད་པར་བསྒྲུབ་པ་དང་།  དེས་ལན་རྣམ་དག་ཏུ་འགྱུར་བའི་ཚུལ་དང་བཞི་ལས།  དང་པོ་ནི།  འདིར་སོ་སོར་ཐར་པའི་མདོ་བཞིན་དུ། །བསྔོ་བ་ཉན་ཐོས་རྣམས་ཀྱང་བྱེད། །ཅེས་དང་། 
9-4-34b


 ཐམས་ཅད་སྒྲོལ་གྱི་སྐྱེས་རབས་ལས། །བདག་གིས་བྲམ་ཟེ་འདོད་པ་ལ། །དགའ་བས་ཤིང་རྟ་འདི་བཏང་བས། །དངོས་པོ་ཐམས་ཅད་བཏང་ནས་ནི། །རྫོགས་པའི་བྱང་ཆུབ་ཐོབ་པར་ཤོག །ཅེས་གསུངས་པ་དེ་ཉན་ཐོས་ཀྱི་སྡེ་སྣོད་ནས་བཤད་པའི་བསྔོ་
བར་གསུངས་པ་དང་།  ཀླུ་སྒྲུབ་ཀྱི་རིན་ཆེན་ཕྲེང་བར།  ཉན་ཐོས་ཐེག་པ་དེ་ལས་ནི། །བྱང་ཆུབ་སེམས་དཔའི་སྨོན་ལམ་དང་། །སྤྱོད་པ་ཡོངས་བསྔོ་མ་བཤད་དེས། །བྱང་ཆུབ་སེམས་དཔར་ག་ལ་འགྱུར། །ཞེས་གསུངས་པ་དང་འགལ་ལོ་སྙམ་ནས་
དྲིས་པ་སྟེ།  འདི་ནི་བསྟན་བཅོས་འདིར་མ་ཟད།  ཉན་ཐོས་ཀྱི་སྡེ་སྣོད་ལས་བྱང་ཆུབ་སེམས་དཔའི་བསྔོ་བ་བཤད་པ་དང་།  ཀླུ་སྒྲུབ་ཀྱིས་དེ་མ་བཤད་པར་གསུངས་པ་གཉིས་ལ་འགལ་སྤོང་གསུང་རབ་འཆད་པ་པོ་ཐམས་ཅད་ཀྱིས་དགོས་པས་རྣམ་དཔྱོད་དང་ལྡན་པའི་
དྲི་བར་སྣང་ཞིང་།  འདི་བཞིན་དྲིས་པ་ལ་ཀླུ་སྒྲུབ་ལ་རྒལ་ལོ། །ས་པཎ་ལ་རྒལ་ལོ་ཞེས་སོགས་སྐྱོན་འདོགས་པ་དག་ནི་བླུན་པོའི་རྣམ་ཐར་སྐྱོང་བ་ཡིན་ནོ། །སོ་ཐར་གྱི་སྐབས་སུ་ཡང་སྔར་རྣམ་དཔྱོད་དང་ལྡན་པའི་དྲི་བ་ཡིན་ནོ་ཞེས་སྨྲས་པ་དེ་དང་།  བྱང་སེམས་ཀྱི་སྐབས་
སུ་འདི་དང་གཉིས་ནི་དོགས་པ་སྐྱེས་ནས་འདྲི་བ་ཡང་དཀོན་ན།  དེའི་ལན་ཚུལ་བཞིན་དུ་སྨྲ་བ་དཀོན་པ་སྨོས་ཀྱང་ཅི་དགོས།  གཉིས་པ་ནི་སྤྱིར་སྡེ་སྣོད་དང་གྲུབ་མཐས་ཕྱེ་བའི་ཐེག་པ་ཆེ་ཆུང་དང་།  ལམ་དང་འབྲས་བུས་ཕྱེ་བའི་ཐེག་པ་ཆེ་ཆུང་གཉིས་ལས།  དང་པོ་ནི།
ལང་ཀར་གཤེགས་པར།  ཆོས་ལྔ་དང་ནི་རང་བཞིན་གསུམ། །རྣམ་པར་ཤེས་པ་བརྒྱད་ཉིད་དང་། །བདག་མེད་གཉིས་ཀྱི་ནང་དུ་ནི། །ཐེག་ཆེན་མཐའ་དག་འདུས་པར་ཟད། །ཅེས་གསུངས་པའི་བརྗོད་བྱ་འདི་དག་ཁས་མི་ལེན་པའི་རང་སྡེ་རྣམས་ནི་ཉན་ཐོས་པ་ཞེས་གསུངས་
9-4-35a


ཏེ།  མཚན་གཞི་ནི་ཉན་ཐོས་རྩ་བའི་སྡེ་བཞིའམ།  དེ་ལས་གྱེས་པ་བཅོ་བརྒྱད་དོ། །བརྗོད་བྱ་དེ་དག་ཁས་ལེན་པ་ནི་ཐེག་པ་ཆེན་པོ་སྟེ།  མཚན་གཞི་ནི་དབུ་སེམས་རྣམ་པ་གཉིས་སོ། །གཉིས་པ་ནི་བློ་ཆེན་པོ་བདུན་དང་མི་ལྡན་
པའི་ལམ་ཞུགས་རྣམས་ནི་ཐེག་པ་ཆུང་ངུ་བ་སྟེ།  མཚན་གཞི་ནི་ཉན་རང་རྣམས་སོ། །དེ་དང་ལྡན་པ་ནི་ཐེག་པ་ཆེན་པོ་པ་སྟེ།  མཚན་གཞི་ནི་ཐེག་ཆེན་སློབ་པ་དང་མི་སློབ་པ་རྣམས་སོ་དེས་ན་སྡེ་སྣོད་དང་གྲུབ་མཐས་ཕྱེ་བའི་ཐེག་པ་ཆེ་ཆུང་རེ་རེས་ཀྱང་རང་རང་གི་སྡེ་
སྣོད་དང་།  གྲུབ་མཐའ་དེའི་ནང་དུ་ལམ་དང་འབྲས་བུས་ཕྱེ་བའི་ཐེག་པ་གསུམ་གསུམ་གྱི་རྣམ་གཞག་བྱེད་ཅིང་།  ཐེག་པ་གསུམ་གྱི་བྱང་ཆུབ་ཀྱང་རང་རང་གི་གྲུབ་མཐའ་དེ་ཁོ་ན་ལ་གནས་པས་ཐོབ་པར་འདོད་པས་ཉན་ཐོས་ཀྱི་སྡེ་སྣོད་འདུལ་བ་ལུང་ལྟ་བུ་ནས་ཀྱང་
ཐེག་པ་གསུམ་གྱི་གང་ཟག །ཐེག་པ་གསུམ་གྱི་སེམས་བསྐྱེད།  ཐེག་པ་གསུམ་གྱི་བསྔོ་བ་དང་སྨོན་ལམ།  ཐེག་པ་གསུམ་གྱི་ལམ་དང་འབྲས་བུ་རྣམས་བཤད་ཅིང་།  དེ་ཉིད་ཐེག་ཆེན་བཀར་མི་འདོད་པའི་ཉན་ཐོས་པ་དག་གིས་ཀྱང་ཁས་ལེན་ནོ། །དེའི་དགོངས་
པ་མཛོད་ལས་ཀྱང་།  ཐེག་པ་གསུམ་གྱི་ལམ་བགྲོད་ཚུལ་གསུམ་དང་།  འབྲས་བུ་གྲུབ་པའི་དུས་གསུམ་དང་།  ཁྱད་པར་དུ་བྱང་ཆུབ་སེམས་དཔའ་དང་པོ་སེམས་བསྐྱེད་པའི་ཚུལ་དང་།  གྲངས་མེད་གསུམ་གནས་སྐབས་གང་དུ་རྫོགས་པའི་ཚུལ་དང་། 
ཕར་ཕྱིན་དྲུག་གནས་སྐབས་གང་དུ་རྫོགས་པའི་ཚུལ་གསལ་བར་གསུངས་པས།  ཉན་ཐོས་ཀྱི་སྡེ་སྣོད་ལས།  ཉན་ཐོས་རང་ལུགས་ཀྱི་ཐེག་པ་ཆེན་པོའི་སེམས་བསྐྱེད་དང་།  བསྔོ་བ་དང་སྨོན་ལམ་སོགས་གསུངས་པར་ཤེས་པར་བྱའོ། །འོ་ན་ཀླུ་སྒྲུབ་ཀྱིས་དེ་
9-4-35b


དག་མ་བཤད་པར་གསུངས་པའི་དགོངས་པ་ཅི་སྙམ་ན།  གཞུང་འདི་རིན་ཆེན་ཕྲེང་བར་ཐེག་ཆེན་བཀར་སྒྲུབ་ཀྱི་སྐབས་སུ་གསུངས་པས་ཉན་ཐོས་པ་དག་ཐེག་པ་ཆེན་པོ་བཀའ་མ་ཡིན་པས་དེ་ལ་མ་བསླབས་ཀྱང་ཉན་ཐོས་ཀྱི་སྡེ་སྣོད་ཉིད་ལ་བསླབས་པས་
རྫོགས་པའི་བྱང་ཆུབ་སྒྲུབ་པར་འདོད་པ་ལ་དེ་ནི་མ་ཡིན་ཏེ།  རྫོགས་པའི་བྱང་ཆུབ་སྒྲུབ་ནུས་ཀྱི་བྱང་ཆུབ་སེམས་དཔའི་སྨོན་ལམ་དང་།  སྦྱིན་སོགས་ཕ་རོལ་ཏུ་ཕྱིན་པ་དྲུག་གི་སྤྱོད་པ་དང་།  འཁོར་གསུམ་མི་དམིགས་པའི་ཡོངས་སུ་བསྔོ་བ་དང་།  ཆོས་ཀྱི་
བདག་མེད་རྒྱས་པ་སོགས་ཉན་ཐོས་ཀྱི་སྡེ་སྣོད་དེ་ལས་མ་བཤད་པའི་ཕྱིར་ཞེས་པའི་དོན་ཏེ།  གྲུབ་མཐའ་ཁས་ལེན་གྱི་ཉན་ཐོས་པ་དག་ཁོ་རང་གི་གཞུང་ནས་བཤད་པའི་ཐེག་པ་ཆེན་པོའི་ལམ་གྱིས་རྫོགས་པའི་བྱང་ཆུབ་སྒྲུབ་པར་འདོད་ཀྱང་།  དབུ་མ་པས་ནི་དབུ་
མའི་གཞུང་ལས་བཤད་པའི་ལྟ་སྤྱོད་ལ་མ་བརྟེན་པར་རྫོགས་པའི་བྱང་ཆུབ་བསྒྲུབ་མི་ནུས་པར་བཞེད་པའི་གནད་ཀྱང་འདི་ཉིད་ཡིན་ནོ། །གསུམ་པ་ནི།  བདག་ཉིད་ཆེན་པོ་དཔལ་ལྡན་ས་སྐྱ་པཎྜི་ཏའི་བཞེད་པ་ཡང་འདི་ཉིད་ཡིན་ཏེ།  སོ་སོ་ཐར་པའི་མདོ་དང་། 
ཐམས་ཅད་སྒྲོལ་གྱི་སྐྱེས་རབས་ལ་སོགས་པའི་བསྔོ་བ་དེ་དག་ཉན་ཐོས་པ་རང་ལ་ཐེག་པ་གསུམ་ཡོད་པའི་ཐེག་ཆེན་གྱི་བསྔོ་བ་ཡིན་པར་འདོད་ཀྱང་དེས་རྫོགས་པའི་བྱང་ཆུབ་བསྒྲུབ་མི་ནུས་པར་གསུངས་པའི་ཕྱིར་དང་།  དེས་ན་ཐབས་མཁས་ཤེས་རབ་ཉིད། །སངས་
རྒྱས་རྒྱུ་ཡི་གཙོ་བོ་ཡིན། །ཞེས་གསུངས་པའི་ཐབས་ཤེས་རབ་གཉིས་ཀྱང་ཐེག་ཆེན་གྱི་སྡེ་སྣོད་ཁོ་ན་ལས་བཤད་པར་བཞེད་པའི་ཕྱིར་རོ། །བཞི་པ་ནི།  མདོར་ན་ཉན་ཐོས་ཀྱི་སྡེ་སྣོད་ནས་ཉན་ཐོས་རང་ལུགས་ཀྱི་ཐེག་པ་གསུམ་ཆར་གསུངས་པས་ཐེག་ཆེན་གྱི་ལམ་བགྲོད་
9-4-36a


ཚུལ་གྱི་བསམ་པ་སེམས་སྐྱེད་དང་།  སྦྱོར་བ་ཕ་རོལ་ཏུ་ཕྱིན་པ་དྲུག་དང་།  ཡོངས་སུ་བསྔོ་བ་སོགས་གསུངས་ཀྱང་།  ཐེག་པ་ཆེན་པོའི་སྡེ་སྣོད་ནས་བཤད་པའི་ཐབས་མཁས་ཁྱད་པར་ཅན་དེ་དང་ལྡན་པའི་སེམས་སྐྱེད་སོགས་མ་
གསུངས་པས་རྫོགས་པའི་བྱང་ཆུབ་བསྒྲུབ་པར་མི་ནུས་ཞེས་པ་སྟེ།  འདི་ཐམས་ཅད་ལ་ཐེག་པ་ཆེ་ཆུང་གི་དབྱེ་མཚམས་གཉིས་པོ་དེ་སོ་སོར་ཕྱེད་པ་གལ་ཆེའོ། །དེ་ཕྱེད་ན་ཐམས་ཅད་སྒྲོལ་གྱི་སྐྱེས་རབས་ལས་གསུངས་པའི་བསྔོ་བ་སྔར་བཤད་པ་དེ་དང་།  སོ་སོར་
ཐར་པའི་མདོ་ལས།  སོ་སོར་ཐར་པ་བཏོན་པ་ཡི། །བསོད་ནམས་གྲུབ་པ་གང་ཡོད་པ། །དེས་ནི་འཇིག་རྟེན་མ་ལུས་པ། །ཐུབ་དབང་གོ་འཕང་མྱུར་ཐོབ་ཤོག །ཅེས་གསུངས་པ་གཉིས་ཀ་ཡང་ཉན་ཐོས་ལུགས་ཀྱི་ཐེག་ཆེན་གྱི་བསྔོ་བ་ཡིན་པར་འབད་
མེད་དུ་ཤེས་པས་ཉན་ཐོས་བསྔོ་བར་བཞེད་དམ་ཅི་ཞེས་པའི་དྲི་བ་མི་དགོས་པ་དང་།  དྲིས་པའི་ལན་ཐོགས་མེད་དུ་ཤེས་པར་འགྱུར་རོ། །ད་ནི་འདི་ནས་མར་ལ་ལན་ཆེར་མི་དགོས་པར་སྣང་ན་ཡང་།  འགའ་ཞིག་རྨོངས་པའི་དབང་གིས་དོན་ལ་ཡང་སྐྱོན་དེ་ལྟར་གནས་སམ་སྙམ་པའི་
དོགས་པ་ཟློག་པའི་ཆེད་དུ་མདོར་བསྡུས་ཏེ་བརྗོད་པར་བྱའོ།  ༼༥༤༽།  དབང་བཞི་བླངས་པས་སྡོམ་པ་གསུམ། །ཐོབ་པར་གྱུར་ན་དབང་གོང་ལས། །ཐོབ་པའི་གསང་སྔགས་སྡོམ་པ་དང་། །དབང་ལས་ཐོབ་པའི་སོ་ཐར་དང་། །སེམས་བསྐྱེད་སྡོམ་པ་ཅིས་མི་
བཞེད། །ཞེས་པའི་ལན་ནི།  དེ་གསུམ་ཆར་ཡང་ལེགས་པར་བཞེད་དེ།  རྩ་རྒྱུད་བརྟག་གཉིས་ཀྱི་ལེའུ་དང་པོར།  སྡོམ་པའི་དབྱེ་བའང་བཤད་པར་བྱ་སྟེ།  ཞེས་དང་།  ཕྱི་མའི་གསུམ་པར།  དེ་ནས་རྡོ་རྗེ་ཅན་གྱིས་རྣལ་འབྱོར་མ་རྣམས་ལ་རྒྱུད་ཐམས་ཅད་
9-4-36b


ཀྱི་གླེང་གཞི་ཞེས་བྱ་བའི་ཐབས་བཀའ་སྩལ་པ།  སྡོམ་པ་དང་ནི་དབང་དང་ཡང་། །ཞེས་དང་།  ཕྱི་མའི་བཞི་པར།  རྣལ་འབྱོར་མ་ལུས་དབུས་གནས་སུ། །ཨ་ཡི་རྣམ་པ་སྡོམ་པའི་གནས། །ཅི་ལྟར་ཕྱི་རོལ་དེ་བཞིན་ནང་། །སྡོམ་པའི་དེ་ཉིད་རབ་ཏུ་ཕྱེ། །
ཞེས་དང་།  ཁ་སྦྱོར་དང་པོའི་གསུམ་པར།  ཀུན་ལས་སྣ་ཚོགས་ཕྱག་རྒྱ་སྟེ། །ཀུན་ནས་སྣ་ཚོགས་སྡོམ་པ་ཡི། །ཞེས་དང་།  རྒྱུད་ཕྱི་མར།  འདི་སྐད་ལ་སོགས་མཐའ་ཡས་མཆོག །སངས་རྒྱས་ཀུན་གྱི་སྡོམ་པ་མཆོག །ཅེས་པ་རྣམས་ཀྱིས་
བསྟན་ནོ། །གལ་ཏེ་འདི་དག་རྫོགས་རིམ་བསྒོམས་པའི་སྟོབས་ཀྱིས་ཐོབ་པ་ཡིན་གྱི།  དབང་ལས་ཐོབ་པ་མ་ཡིན་ནོ་སྙམ་ན།  ལམ་གྱི་སྐབས་སུ་སྡོམ་པ་ཐོབ་ཅེས་པ་ཐམས་ཅད་སྔར་ཐོབ་ཟིན་གྱི་སྡོམ་པ་ཡང་ཡང་གོམས་པ་ཡིན་པས།  དེ་དག་
ཀྱང་དབང་གི་སྐབས་སུ་ངེས་པར་ཐོབ་དགོས་ཏེ།  གཞན་དུ་དབང་བསྐུར་ཆོས་སྒོ་ཙམ་དུ་ཐལ་བའི་ཕྱིར་རོ། །དེ་བཞིན་དུ་འདུས་པའི་རྒྱུད་ཕྱི་མར།  དྲི་བ་སོ་གཉིས་པ།  དེ་ནི་སྡོམ་པ་ཇི་ལྟ་བུ། །ཞེས་པའི་ལན་དུ།  རྡོ་རྗེ་ཅན་གྱི་དེར་སྟོན་པ། །རིམ་
པ་གཉིས་ལ་ཡང་དག་བརྟེན། །བསྐྱེད་པ་ཡི་ནི་རིམ་ཉིད་དང་། །དེ་བཞིན་རྫོགས་པའི་རིམ་པའོ། །བསྒྲུབ་པ་དང་ནི་ནན་ཏན་དང་། །དམ་ཚིག་དེ་བཞིན་སྡོམ་པ་རྣམས། །སྔར་བཞིན་དེ་ཀུན་རྒྱས་པར་ནི། །རིམ་པའི་དབྱེ་བས་ཕྱེ་བ་ཡིན། །ཞེས་གསུངས་
པ་འདིས་སྡོམ་པའི་ངོ་བོ་བསྐྱེད་རྫོགས་གཉིས་ལ་མཛད་པ་དང་།  རྒྱུད་ལས་གསུངས་པའི་དམ་ཚིག་དང་།  སྡོམ་པ་ཐམས་ཅད་བསྐྱེད་རྫོགས་གཉིས་སུ་འདུས་པའི་ཚུལ་གསལ་བར་བཤད་པས།  དེ་ལྟ་བུའི་རྫོགས་རིམ་གྱི་སྡོམ་པ་དབང་གོང་མ་ལས་མ་ཐོབ་ན།  བསྐྱེད་
9-4-37a


རིམ་གྱི་སྡོམ་པ་ཡང་བུམ་དབང་ལས་མ་ཐོབ་པར་རྣམ་པ་ཀུན་ཏུ་མཚུངས་པས་རྒྱུད་ལས་གསུངས་པའི་སྡོམ་པ་གང་ཡང་དབང་ལས་མ་ཐོབ་པར་འགྱུར་རོ། །བློ་གཟུ་བོར་གནས་ལ་དཔྱོད་ཅིག །དེ་ཇི་ལྟ་བ་བཞིན་དུ་བདེ་མཆོག་
སྡོམ་འབྱུང་ལས།  ཀྱཻ་རྣམ་པ་ཀུན་མཆོག་སྡོམ་པ་ཡི། །བསྐྱེད་པའི་རྣལ་འབྱོར་མཚན་ཉིད་དང་། །རྫོགས་པ་ཡང་ནི་ཇི་ལྟར་ལགས། །ཞེས་གསང་སྔགས་ཀྱི་སྡོམ་པ་ལ་བསྐྱེད་རྫོགས་གཉིས་སུ་ཕྱེ་ནས་དེ་ཇི་ལྟར་ཞེས་དྲིས་པའི་ལན་དུ།  རིམ་པར་ཕྱེ་བ་
གཉིས་པས་བསྐྱེད་རིམ་གྱི་སྡོམ་པ་དང་།  གསུམ་པས་རྫོགས་རིམ་གྱི་སྡོམ་པ་གསལ་བར་སྟོན་པས་དོན་སྔ་མ་བཞིན་དུ་གནས་སོ། །ཡང་དེ་ཉིད་ལས།  བུམ་པ་ལས་ནི་བྱུང་བའོ། །གཉིས་པ་གསང་བ་མཆོག་ཡིན་ཏེ། །གསུམ་པ་ཤེས་རབ་ཡེ་ཤེས་ཡིན། །
བཞི་པ་དེ་ལྟར་ཡང་དེ་བཞིན། །དབང་བསྐུར་འདི་དག་ཡང་དག་ལྡན། །དེ་ནི་དམ་ཚིག་ཅན་ཞེས་བྱ། །ཅེས་དབང་བཞི་རྫོགས་པས་དམ་ཚིག་རྫོགས་པར་བསྟན་པ་འདིས་ཀྱང་དབང་གོང་མ་ལས་ཐོབ་པའི་སྔགས་ཀྱི་དམ་ཚིག་གསལ་བར་བསྟན་ནོ། །དེ་བཞིན་ཌོམྦི་པའི་
ལྷན་ཅིག་སྐྱེས་གྲུབ་ལས།  སྡོམ་པ་གསུམ་པོ་རེ་རེ་ལ་ཡང་ཕྱི་ནང་གཉིས་གཉིས་སུ་ཕྱེ་ནས་སྔགས་སྡོམ་གྱི་ཕྱིའི་སྡོམ་པ་དམ་ཚིག་ཉི་ཤུ་རྩ་གཉིས་བསྲུང་བ་དང་།  ནང་གི་སྡོམ་པ་ཞེས་པ་གཉུག་མ་མི་རྟོག་པ་ལ་བཤད་པ་དང་།  གྲུབ་ཆེན་སྨན་པའི་ཞབས་ཀྱིས་སྡོམ་པ་ལ་སྤང་
བའི་དམ་ཚིག་གི་སྡོམ་པ་དང་།  བཟའ་བ་དང་བསྲུང་བའི་དམ་ཚིག་གི་སྡོམ་པ་དང་།  རྣལ་འབྱོར་སྙིང་པོ་སྡོམ་པ་གསུམ་དུ་ཕྱེ་བའི་ནང་གི་སྡོམ་པ་དང་།  རྣལ་འབྱོར་སྙིང་པོ་སྡོམ་པ་རྣམས་དབང་གོང་མ་ལས་ཐོབ་པའི་གསང་སྔགས་ཀྱི་སྡོམ་པའོ། །རྒྱུད་དང་རྒྱ་གར་གྱི་གཞུང་
9-4-37b


བཟང་དེ་དག་གི་དགོངས་པ་རྗེ་ས་སྐྱ་པ་ཆེན་པོས་སྡོམ་པ་གསུམ་ལྡན་གྱི་སྔགས་སྡོམ་ངོས་འཛིན་པའི་ཚེ་གསང་སྔགས་ཀྱི་དབང་བཞིའི་སྡོམ་པ་ཐོབ་པའོ། །ཞེས་དང་།  རྗེ་བཙུན་རྩེ་མོས།  ཁ་སྦྱོར་གྱི་འགྲེལ་པར།  སྡོམ་པ་ཞེས་བྱ་བ་གོང་དུ་བྱང་ཆུབ་སེམས་དཔའི་
སྡོམ་པའང་གསུམ་དངོས་སུ་གསུངས།  བསྐྱེད་པའི་རིམ་པའི་སྡོམ་པའང་གསུངས་ན་འདིར་རྫོགས་པའི་རིམ་པའི་སྡོམ་པ་དེ་ཞུ་ཞེས་བྱའོ། །བཅོམ་ལྡན་འདས་ཞེས་བྱ་བ་ལ་སོགས་པས་དེའི་ལན་བསྟན་ནོ། །ཞེས་དང་།  འདིར་རྫོགས་པའི་རིམ་པ་ལ་སྦྱར་ན་གནས་ནི་ལུས་དང་རྩའི་
འཁོར་ལོའོ། །རང་གི་ངོ་བོ་ལ་གསུམ་ལས།  མི་མཐུན་པའི་ཕྱོགས་སྡོམ་པའི་དབང་དུ་བྱས་ན་མཚན་མ་དང་།  རྣམ་པར་རྟོག་པ་ཐམས་ཅད་སྡོམ་པའོ། །མང་པོ་གཅིག་ཏུ་སྡོམ་པའི་དབང་དུ་བྱས་ནས་ཆོས་མཐུན་གྱི་སྒོ་ནས་འཁོར་འདས་ཀྱི་ཆོས་ཐམས་ཅད་འདིར་ལུས་
ལ་བསྡུ་བར་བྱའོ། །ཡང་རང་བྱུང་གི་ཡེ་ཤེས་བདེ་བས་སྡོམ་པའོ། །ཞེས་དང་།  རྗེ་བཙུན་གྲགས་པ་རྒྱལ་མཚན་གྱི་ཞལ་སྔ་ནས།  སྐྱབས་གསུམ་སྔོན་དུ་འགྲོ་བའི་སོ་སོར་ཐར་བའི་སྡོམ་པ་དང་ཡང་ལྡན།  སྨོན་འཇུག་གི་སེམས་བསྐྱེད་པར་བྱས་སྟེ།  བྱང་
ཆུབ་སེམས་དཔའི་བསླབ་པ་དང་ཡང་ལྡན།  དབང་བཞི་ཡོངས་སུ་རྫོགས་ཏེ་རྡོ་རྗེ་ཐེག་པའི་སྡོམ་པ་དང་ཡང་ལྡན།  ཅེས་གསུངས་པ་ཡིན་ལ།  དེ་ཐམས་ཅད་ཀྱི་དོན་བསྡུས་ནས་བསྟན་བཅོས་འདིར།  སངས་རྒྱས་གསུང་བཞིན་མཛད་པ་ཡི། །བླ་མ་བཙལ་ལ་དབང་བཞི་བླང་། །
དེ་ཡིས་སྡོམ་པ་གསུམ་ལྡན་འགྱུར། །ཞེས་གསུངས་པ་ཡིན་པས།  དབང་གོང་མ་ལས་ཐོབ་པའི་གསང་སྔགས་ཀྱི་སྡོམ་པ་བཞེད་དམ་ཅི།  ཅེས་ཧ་ཅང་ཐལ་བའི་དྲི་བ་ངམ་ངམ་མི་དགོས་སོ། །དབང་ལས་ཐོབ་པའི་སོ་ཐར་དང་བྱང་སེམས་ལེགས་པར་ཡང་བཞེད་དེ།  སྟ་
9-4-38a


གོན་དང་འཇུག་པའི་སྐབས་ཀྱི་རྒྱུན་བཤགས་ལས་ཐུན་མོང་མ་ཡིན་པའི་སོ་ཐར་དང་།  སྨོན་འཇུག་གི་སེམས་བསྐྱེད་པ་ཐོབ་པའི་ཕྱིར་རོ། །གཞན་དུ་ན་ཁྱེད་རང་གིས།  རྗེ་བཙུན་རྩེ་མོས་རྒྱུན་བཤགས་ཀྱི། །དུས་སུ་ཉེས་སྤྱོད་སྤོང་བ་
ཡི། །སྡོམ་པ་སྐྱེ་ཞིང་དེ་ཉིད་ཀྱང་། །སོ་སོར་ཐར་པར་བཞེད་དེ་ཅི། །ཞེས་པའི་དྲི་བ་དེ་ཕར་དྲིས་པས་འཁོར་གསུམ་དུ་འགྱུར་ཞིང་།  དེ་བཞིན་དུ།  རྗེ་བཙུན་རྩེ་མོས་རྒྱུན་བཤགས་ཀྱི། །དུས་སུ་དགེ་བ་ཆོས་སྡུད་ཀྱི། །སྡོམ་པ་སྐྱེ་ཞིང་དེ་ཉིད་ཀྱང་། །བྱང་
སེམས་སྡོམ་བར་བཞེད་དེ་ཅི། །ཞེས་དྲིས་པས་སྔ་མ་བཞིན་དུ་འགྱུར་རོ།  ༼༥༥༽།  རྡོ་རྗེ་ཕག་མོ་འགའ་ཞིག་གི།  དབང་བཞི་ཚད་ལྡན་གཞུང་ལས་བཤད། །དེ་དག་སྨིན་བྱེད་དབང་བསྐུར་དུ། །རུང་ངམ་མི་རུང་གང་ཡིན་འདྲི། །ཞེས་པའི་ལན་ནི།  དེའི་དོན་ཅི། 
ཕག་མོ་མངོན་འབྱུང་གི་རྒྱུད་ལས་གསུངས་པའི་རྡུལ་ཚོན་གྱི་དཀྱིལ་འཁོར་དུ་དབང་བཞི་བསྐུར་བའི་ཆོ་ག་ལྟ་བུ་ལ་ཟེར་བ་ཡིན་ན།  དེ་ནི་སྨིན་བྱེད་དུ་རུང་སྟེ།  སངས་རྒྱས་ཀྱི་ངོས་ནས་རྡོ་རྗེ་ཕག་མོ་ལ་སྨིན་བྱེད་བླ་མ་གོང་མས་བཀག་པ་མ་ཡིན་གྱི།  ཆོ་གའི་ངོས་ནས་བྱིན་རླབ་
སྨིན་བྱེད་ཡིན་པ་བཀག་པ་ཡིན་པའི་ཕྱིར་རོ། །དཔེར་ན་རྗེ་བཙུན་རྡོ་རྗེ་བདག་མེད་མ་ལ་ཡང་རྩ་རྒྱུད་བརྟག་གཉིས་ཀྱི་ལེའུ་བཅུ་པ་ལས་གསུངས་པའི་རྡུལ་ཚོན་གྱི་དཀྱིལ་འཁོར་དུ་དབང་བསྐུར་བའི་ཆོ་ག་སྨིན་བྱེད་དུ་བཞེད་ཀྱང་།  བདག་མེད་མའི་བྱིན་རླབས་སྨིན་བྱེད་དུ་
མི་བཞེད་པ་བཞིན་ནོ། །ཕན་ཐོགས་པར་གྱུར་ཅིག  ༼༥༦༽།  རྡོ་རྗེ་ཕག་མོའི་བྱིན་རླབས་ལས། །སྡོམ་པ་འབོགས་པའི་ཆོ་ག་དང་། །དཀྱིལ་འཁོར་དང་ནི་དབང་བསྐུར་བ། །རང་ལུགས་ལ་ཡང་མི་བཞེད་དམ། །ཞེས་པའི་ལན་ནི།  སིན་དྷཱུ་ར་ཡི་དཀྱིལ་
9-4-38b


འཁོར་དུ་སློབ་མ་བཅུག་ནས་བྱིན་རླབས་ལ་དབང་བཞིའི་ཐ་སྙད་ཙམ་ཞིག་ཡོད་པ་དེང་སང་ཕྱག་ལེན་ལ་ཡོད་པ་འདི་ལ་ཟེར་བ་ཡིན་ན་ནི།  སྔགས་སྡོམ་གསར་དུ་འབོགས་པའི་ཆོ་ག་མ་ཡིན་ཏེ།  སྔར་སྔགས་སྡོམ་ཐོབ་ཟིན་པ་ལ་ཡེ་ཤེས་སྐྱེ་བའི་སྣ་འདྲེན་དུ་བྱིན་
རླབས་ཀྱི་ཆོ་ག་ཙམ་ཡིན་པར་རྩ་ལྟུང་འཁྲུལ་སྤོང་དང་།  བསྟན་བཅོས་འདི་གཉིས་ཆར་དུ་གསལ་བར་གསུངས་བཞིན་དུ།  ད་དུང་འདྲི་ན་ཧ་ཅང་ཐལ་བའི་ཕྱིར་རོ། །ཆ་གཅིག་ནས་བདེན་ཀྱང་བདེན་འདི་འདྲ་མང་པོ་ཡོད།  གལ་ཏེ་དེར་རྒྱུན་བཤགས་དང་
རིགས་ལྔའི་སྡོམ་བཟུང་ཡོད་པས་སྡོམ་པ་གསར་དུ་འབོགས་པའི་ཆོ་གར་འགྱུར་རོ་སྙམ་ན་དེ་འདྲ་བ་ནི་མངོན་རྟོགས་རེ་རེ་བསྒོམ་པའི་སྔོན་འགྲོ་ལ་ཡང་དགོས་པས་སྡོམ་པ་གསར་དུ་འབོགས་པའི་ཆོ་ག་ཡིན་ནམ་ཅི། ༼༥༧༽  བྱིན་རླབས་ཆོས་སྒོར་མི་བཞེད་ན།
།རྫོགས་རིམ་འགའ་ཞིག་ཉན་པའི་སར། །བྱིན་རླབས་ངེས་པར་མཛད་དེ་ཅི། །ཅེས་པའི་ལན་ནི།  དྭགས་པོ་བཀའ་བརྒྱུད་པ་དག་གིས་ཆོས་སྒོའི་དོན།  སྔར་སྨིན་བྱེད་མ་ཐོབ་ཀྱང་བྱིན་རླབས་དེ་ཉིད་བྱས་པས་ནཱ་རོ་ཆོས་དྲུག་ཉན་ཞིང་བསྒོམ་དུ་རུང་བར་འདོད་ལ།  དེ་འདྲའི་
ཆོས་སྒོ་ནི་འདིར་མི་བཞེད་དེ།  གཞུང་ཉིད་དུ་བཀག་པའི་ལུང་རིགས་རྣམས་ལ་བལྟས་པས་གསལ་ལོ། །ཤིན་ཏུ་སྤྲོས་མེད་དང་།  དྲིལ་བུ་རིམ་ལྔ་སོགས་རྫོགས་རིམ་འགའ་ཞིག་ཉན་པའི་སར་བྱིན་རླབས་ངེས་པར་མཛད་ཀྱང་།  དེ་སྔར་གྱི་ཆོས་སྒོར་དེ་དང་གཏན་མི་གཅིག་
སྟེ།  བྱིན་རླབས་དེ་ཉིད་ཀྱི་སྔོན་དུ་སྨིན་བྱེད་འགྲོ་དགོས་པར་བཞེད་བའི་ཕྱིར་རོ། །དྲི་བ་འདི་ཡང་གཞི་མེད་པ་ཙམ་མོ།  ༼༥༨༽།  རང་བྱུང་ནས་ནི་ཚུར་ཤོག་བར། །སྔོན་ཆོག་ཡིན་པར་གང་དུ་བཤད། །ཅེས་པའི་ལན་ནི།  དེ་དག་བསྙེན་རྫོགས་ཀྱི་སྡོམ་པ་ཐོབ་པར་བྱེད་པའི་
9-4-39a


ཆོ་ག་ཁྱད་པར་ཅན་གང་ཞིག །ད་ལྟར་གྱི་ཆོ་ག་མ་ཡིན་པ་ལ་དགོངས་ནས་སྔོན་ཆོག་ཏུ་བཞེད་པ་ཡིན་ལ།  རྒྱ་ཆེར་འགྲེལ་ལས།  མདོ་རྩའི་ཐོག་མར་འབྱུང་བའི་གསོལ་བ་དང་གཞིའི་ལས་ཀྱིས་ཅིག་ཆར་རབ་ཏུ་བྱུང་བ་དང་བསྙེན་པར་རྫོགས་པའི་ཆོ་
ག་ཁོ་ན་ལ་སྔོན་ཆོག་ཏུ་བཤད་པ་ནི་ལུང་གཞིའི་རབ་བྱུང་གི་གཞིའི་སྐབས་ནས་བཤད་པའི་ཆོ་ག་ལ་སྔོན་ཆོག་དང་།  ད་ལྟར་གྱི་ཆོ་ག་གཉིས་སུ་ཕྱེ་བའི་ཚེ་འདི་ཁོ་ན་སྔོན་ཆོག་ཡིན་ཞེས་པའི་དོན་ཡིན་གྱི་སྔོན་ཆོག་ཐམས་ཅད་དེར་ངེས་པར་སྟོན་པ་ནི་མ་ཡིན་ནོ།  ༼༥༩༽།  གསང་བ་སྤྱི་རྒྱུད་
དག་ལས་ནི། །དཀྱིལ་འཁོར་དག་ཏུ་འཇུག་པ་ཡི། །སློབ་མ་གཉིས་དང་བཞི་ལ་སོགས། །ཟུང་དུ་བཤད་པའང་འགའ་ཞིག་ཡོད། །ཅེས་པའི་ལན་ནི།  སྤྱི་རྒྱུད་ལས།  བླ་མས་སློབ་མ་གཅིག་པུ་ནི། །དཀྱིལ་འཁོར་དག་ཏུ་དབང་བསྐུར་བྱ། །མཁས་པས་
ཅིག་ཆར་སློབ་མ་གཉིས། །དབང་བསྐུར་བ་ནི་ཡོངས་མི་བྱ། །གསུམ་མམ་གཉིས་སམ་བཞི་ཡང་རུང་། །བླ་མས་དབང་བསྐུར་བྱ་བ་ནི། །ཡོ་བྱད་གསར་པ་གཞན་རྣམས་ཀྱི། །ཐམས་ཅད་སོ་སོར་སོ་སོར་བྱ། །རིག་སྔགས་དབང་ནི་ཐོས་པ་ལ། །སྒྲུབ་པའི་
དཀྱིལ་འཁོར་དབང་བསྐུར་བྱ། །དབང་བསྐུར་བ་ཡི་ཆོ་ག་དང་། །སྒྲུབ་པའི་ཆོ་གའང་དེ་བཞིན་བྱ། །ཞེས་གསུངས་པ་འདི་ལ་འཁྲུལ་པ་ཡིན་པ་འདྲ།  དེ་ལས་གཞན་སློབ་མ་གཉིས་སམ་བཞི་དཀྱིལ་འཁོར་དུ་འཇུག་པ་སྟོན་པའི་ཚིག་རྒྱུད་དེའི་ནང་ན་མི་སྣང་ངོ་། །ལུང་
དེའི་དོན་སྟ་གོན་དང་།  འཇུག་པ་དང་།  ཆུ་དང་ཅོད་པན་གྱི་དབང་རྣམས་གཅིག་ནས་ཉི་ཤུ་རྩ་ལྔའི་བར་ཟུང་དུ་མ་གྱུར་པ་ལ་ཅིག་ཆར་བྱས་ནས་བསྒྲུབ་པའི་དཀྱིལ་འཁོར་གྱི་དབང་བསྐུར་བར་བྱ་བའི་ཚེ།  སློབ་མ་གཅིག་ཁོ་ན་ལ་བྱ་བ་ཡིན་གྱི་གཉིས་དང་གསུམ་དང་བཞི་ལ་
9-4-39b


སོགས་པ་ལ་ཅིག་ཆར་མི་རུང་བར་རྒྱུད་དེར་གསལ་བར་གསུངས་ལ།  གལ་ཏེ་དུ་མ་ལ་བྱ་དགོས་ན་ཡོ་བྱད་གསར་པ་སྦྱར་ནས་རེ་རེ་བཞིན་དུ་སོ་སོར་བྱ་བར་དངོས་སུ་གསུངས་བཞིན་དུ་དེའི་དོན་གཉིས་དང་བཞི་ལ་སོགས་པ་སློབ་མ་ཟུང་དུ་གྱུར་པ་ཅིག་ཆར་འཇུག་པ་ལ་འཆད་པ་ནི་བློ་
གྲོས་རྩིངས་པའམ།  ཧམ་པ་ཆེས་པའམ།  བརྟག་དཔྱད་བྱ་ལོང་མ་བྱུང་པའམ།  རང་དགར་ཅི་དྲན་སྨྲས་པར་ཟད་དོ། །གལ་ཏེ་གཉིས་དང་བཞི་ལ་སོགས་པ་དཀྱིལ་འཁོར་དུ་དབང་བསྐུར་བར་བཤད་འདུག་པས།  དེ་དག་ཅིག་ཆར་དབང་བསྐུར་བ་ལས་འོས་མེད་པའི་ཕྱིར་ན་
གཅིག་ནས་ཉི་ཤུ་རྩ་ལྔའི་བར་གྱི་ཟུང་དུ་མ་གྱུར་པ་བཟུང་བ་ལ་གནོད་དོ་སྙམ་ན།  དེ་ནི་རྡོ་རྗེ་འཆང་ལ་ནང་འགལ་བཟུང་བར་སྣང་བས་འཇིགས་སུ་རུང་བའི་གནས་སུ་འདུག་ཅིང་།  དེ་བས་དེང་སང་ལམ་འབྲས་འཆད་པ་པོ་དག་ལ།  རྒྱུ་དུས་དབང་བསྐུར་དུས་སུ་ནི། །སློབ་མ་
ལྔ་བརྒྱ་དྲུག་བརྒྱ་སོགས། །ཟུང་དུ་གྱུར་པ་རྣམས་ལ་ནི། །དབང་བསྐུར་བྱེད་པའང་འགའ་ཞིག་མཐོང་། །ཞེས་པའི་སྒོ་ནས་ནང་འགལ་བཟུང་བར་རིགས་ཏེ།  རྒྱུ་མཚན་མེད་པ་མཉམ་པོ་ལ་འདི་དེ་ལས་ཡུལ་མི་གཉན་པའི་ཕྱིར་རོ།  ༼༦༠༽།  ལྷ་ཡང་ཉི་མ་ཤར་བ་ན། །ངེས་
པར་མཆོད་ནས་གཤེགས་དགོས་ན། །སྟ་གོན་དངོས་གཞིའི་བར་དུ་ཡང་། །མཆོད་ནས་གཤེགས་གསོལ་བྱེད་དགོས་སམ། །སློབ་མའི་དབང་དང་སློབ་དཔོན་གྱི། །དབང་གི་བར་དུ་ཞག་གིས་ནི། །ཆོད་པ་དག་ལའང་དེ་བཞེད་དམ། །ཞེས་པའི་ལན་ནི།  ལྷ་ཡང་ཉི་མ་ནུབ་
པ་ན། །ངེས་པར་བྱིན་གྱིས་རླབས་ཀྱིས་འདུ། །ཉི་མ་ཤར་བར་མ་གྱུར་བར། །མཆོད་ནས་གཤེགས་སུ་གསོལ་བ་ཤིས། །ཅེས་པའི་ཚིག་འདི་བསྟན་བཅོས་རྩོམ་པ་པོ་འདིའི་ཚིག་ཡིན་སྙམ་ནས་སུན་འབྱིན་པར་སྣང་མོད།  དེ་ནི་གསང་བ་སྤྱི་རྒྱུད་ཀྱི་རྒྱུད་ཚིག་ཡིན་པས་ཁྱོད་ཅི་
9-4-40a


སྙམ་པ་ཡིན།  གལ་ཏེ་རྒྱུད་ཚིག་ཡིན་ཀྱང་སུན་འབྱིན་ནོ་སྙམ་ན།  སངས་རྒྱས་རྡོ་རྗེ་འཆང་གི་རྗེས་སུ་འབྲང་བའི་སྔགས་པ་རྣམས་འདུས་ནས་ཅི་དྲག་བཀའ་གྲོས་ཅིག་དགོས་པར་འདུག །ད་ལན་རེ་ཤིག་བཞག་གོ  ༼༦༡༽།  དཀྱིལ་འཁོར་
གཞན་དུ་མ་ཞུགས་པར། །རྡོ་རྗེ་སློབ་དཔོན་དྲིལ་བུ་པའི། །དབང་གི་ཆོ་གས་གསང་སྔགས་ཀྱི། །སྡོམ་པ་ཐོབ་བམ་མི་ཐོབ་དྲི། །ཞེས་པའི་ལན་ནི།  སྐུ་ནས་འདིར་སོང་ནས་དྲི་བ་འདི་འདྲ་བྱེད་པ་མཐོང་ཙ་ན།  རྗེ་བླ་མའི་བཀའ་དྲིན་ཡང་ཡང་དྲན།  འདིའི་ལག་ལེན་
ཨེ་ཝྃ་ཆོས་ལྡན་གྱི་སྲང་སྦྲག་ཚོན་བྲུལ་ནས་ཀྱང་ཡོད་སྒྲུབ་མཁན་བཏང་བས་ཁྱབ  ༼༦༢༽།  རྡུལ་ཚོན་མིན་པར་སྨིན་བྱེད་ཀྱི། །དབང་བསྐུར་དེང་སང་མི་རུང་ན། །འཁོར་ལོ་སྡོམ་པའི་རས་བྲིས་ཀྱི། །དཀྱིལ་འཁོར་དག་ཏུ་དབང་བསྐུར་ནས། །ཕག་མོའི་བྱིན་རླབས་མཛད་
འདི་ཅི། །ཅེས་པའི་ལན་ནི།  འདི་ལ་རྒྱ་གར་ན་དུས་ཀྱི་འཁོར་ལོའི་རྒྱུད་ཀྱི་རྗེས་སུ་འབྲངས་ནས།  ན་རོ་པས།  དབང་མདོར་བསྟན་གྱི་འགྲེལ་པར།  དབང་བདུན་པོ་འདི་དག་ནི་རྡུལ་ཚོན་གྱི་དཀྱིལ་འཁོར་སྤངས་ནས།  གཞན་རས་བྲིས་ལ་སོགས་པར་བསྐུར་བར་བྱ་བ་མ་ཡིན་ཏེ།  ཞེས་
རྡུལ་ཚོན་ཁོ་ན་དགོས་པར་བཞེད་པ་དང་།  ཀྱཻ་རྡོ་རྗེའི་རྒྱུད་ཀྱི་རྗེས་སུ་འབྲངས་ནས།  རྣལ་འབྱོར་དབང་ཕྱུག་གིས་ཐོག་མར་རྒྱུད་སྨིན་པ་ལ་དབང་གི་མངོན་པར་རྟོགས་པ་བདུན་ལྡན་དགོས་པས་རྡུལ་ཚོན་ཁོ་ན་དགོས་པར་བཞེད་པ་ནི་སྲོལ་ཆེན་པོ་གཅིག་ཏུ་སྣང་ངོ་། །ཡང་ཨ་བྷི་དྷ་ན་ལས། 
དཀྱིལ་འཁོར་དྲུག་གསུངས་པའི་ནང་ནས་རས་བྲིས་ཀྱི་དཀྱིལ་འཁོར་གཅིག་ཏུ་གསུངས་པའི་རྗེས་སུ་འབྲངས་ནས།  སློབ་དཔོན་དགའ་རབ་རྡོ་རྗེ་དང་།  རྡོ་རྗེ་དྲིལ་བུ་པས།  སྨིན་བྱེད་ལ་རས་བྲིས་རུང་བར་གསུངས་ཤིང་།  དེ་བཞིན་དུ་གྲུབ་ཆེན་ཀླུའི་བྱང་ཆུབ་ཀྱིས།  སློབ་མའི་
9-4-40b


དོན་ཀུན་འགྲུབ་བྱའི་ཕྱིར། །འཁོར་ལོ་རྣམ་བརྒྱད་བྲི་བར་བྱ། །ཅེས་དཀྱིལ་འཁོར་བརྒྱད་གསུངས་པའི་ནང་དུ་ཡང་རས་བྲིས་ཀྱི་དཀྱིལ་འཁོར་གསུངས་པ་དང་།  སློབ་དཔོན་སྒྲ་གཅན་འཛིན་དཔལ་བཤེས་གཉེན་གྱིས་གསང་བ་འདུས་པའི་དཀྱིལ་འཁོར་གྱི་ཆོ་ག་རས་བྲིས་ལ་བརྟེན་
པ་མཛད་པ་རྣམས་ནི་སྲོལ་ཆེན་པོ་གཅིག་ཏུ་སྣང་ངོ་། །དེ་ལ་བསྟན་བཅོས་འདིར་ལམ་གྱི་རིམ་པ་ཐམས་ཅད་བིཪྺ་པའི་དགོངས་པ་གཞིར་གཞག་ནས་རྡུལ་ཚོན་དགོས་པར་གསུངས་ལ།  བདེ་མཆོག་གི་སྐབས་སུ་རྗེ་ས་ཆེན་གྱིས་ནག་པོ་དཀྱིལ་ཆོག་རས་བྲིས་ལ་བརྟེན་པ་མཛད་པ་
ལྟ་བུ།  རས་བྲིས་ཀྱང་བཞེད་པས་འཁོར་ལོ་བདེ་མཆོག་རས་བྲིས་ཀྱི་དཀྱིལ་འཁོར་དུ་དབང་བསྐུར་ནས་ཕག་མོའི་བྱིན་རླབས་མཛད་པ་ཡང་དགོངས་པ་དེ་བཞིན་དུ་ཤེས་པར་བྱའོ། །འདི་ཡང་དོགས་གཅོད་དགོས་པའི་དྲི་བར་སྣང་ངོ་། ༼༦༣༽།  སྨིན་བྱེད་མིན་པའི་དབང་
བསྐུར་ལས། །སྡོམ་གསུམ་ཐོབ་པ་ཡོད་དམ་མེད། །མེད་ན་དེ་ལས་གང་ཞིག་ཐོབ། །ཡོད་ན་དེ་ཡང་སྨིན་བྱེད་དུ། །ཐལ་བར་འགྱུར་བ་མ་ཡིན་ནམ། །དེས་ན་སྨིན་བྱེད་མིན་པ་ཡི། །དབང་བསྐུར་བཞེད་དམ་མི་བཞེད་དྲི། །ཅེས་པའི་ལན་ནི།  ཐོག་མར་སེམས་
སྐྱེད་བླངས་ནས་ནི། །དེ་རྗེས་སེམས་བསྐྱེད་ཆོ་ག་ལས། །སྡོམ་པ་ཐོབ་པ་ཡོད་དམ་མེད། །མེད་ན་དེ་ལས་གང་ཞིག་ཐོབ། །ཡོད་ན་དེ་ཡང་དང་པོ་ཡི། །སེམས་སྐྱེད་ཆོ་གར་འགྱུར་མིན་ནམ། །ཞེས་ཁྱོད་ཉིད་ལ་ཕར་འདྲི་སྟེ།  དེའི་ལན་གང་སྨྲས་པ་དེ་ཉིད་འདིའི་
ལན་གྱི་ཆེད་དུ་བཏང་བར་བྱའོ། །དེས་ཚིག་རྐང་ཕྱི་མ་གཉིས་ཀྱི་ལན་ཀྱང་འགྲུབ་མོད།  རྗེ་བཙུན་གྱི་དབང་གི་རབ་དབྱེ་བཅུ་གཉིས་གསུངས་པ་མཐོང་ན་འདི་འདྲའི་དྲི་བ་གང་ན་སྲིད།  དེ་ལ་ཡིད་མི་ཆེས་ན་ཡང་།  རྒྱུ་དུས་དང་ལམ་དུས་ཀྱི་དབང་གི་ཁྱད་པར་ཙམ་ཞིག་ཤེས་ན་ཡང་སྨིན་
9-4-41a


བྱེད་མ་ཡིན་པའི་དབང་བསྐུར་བཞེད་མི་བཞེད་དྲི་བའི་དོན་མེད་དོ། །འོ་ན་ཡང་ཐུགས་མད་དེ།  འོས་མེད་པའི་ཕྱིར་རོ།  ༼༦༤༽།  རྒྱུད་སྡེ་འོག་མ་གསུམ་པོ་ལ། །དབང་བཞི་རིམ་གཉིས་མི་རུང་ན། །རྒྱུད་སྡེ་གོང་མའི་རྒྱས་བཀབ་ནས། །
རུང་བར་འཆད་པ་འདི་ཅི་ཞིག །ཅེས་པའི་ལན་ནི།  རྒྱུད་སྡེ་འོག་མ་གསུམ་གྱི་ཆོ་ག་རང་རྐང་ལ་དབང་བཞི་རིམ་གཉིས་མེད་ཀྱང་།  རྒྱུད་སྡེ་འོག་མའི་ལྷ་ལ་རྒྱུད་སྡེ་གོང་མའི་ཆོ་གས་རྒྱས་བཀབ་པའི་ཚེ།  རུང་བ་དེ་ཉིད་ཡིན་པས་ཁྱེད་རང་གིས་རྒྱུ་མཚན་བཀོད་བཞིན་དུ་གཞན་ལ་
རྒྱུ་མཚན་དྲི་བ་འདི་རྒོལ་ཕྱིར་རྒོལ་གཉིས་ལ་དོན་མེད་དོ། །དཔེར་ན།  མགར་བས་མགར་བའི་ལས་བྱེད་ཚེ། །བྲོ་བའི་སྟང་སྟབས་མི་རུང་ན། །བྲོ་བའི་ནང་དུ་ཞུགས་པའི་ཚེ། །སྟང་སྟབས་བྱེད་པ་འདི་ཅི་ཞིག །ཅེས་པ་དང་མཚུངས་སོ། །སྤྱིར་འདི་འདྲའི་རིགས་ཅན་ཀུན་
ལ་རྒྱུད་སྡེ་དེའི་ལྷ་དང་།  རྒྱུད་སྡེ་དེའི་ཆོ་ག་གཉིས་མ་ནོར་བ་གལ་ཆེ་ཡང་ཕལ་ཆེར་ནི་དེ་གཉིས་མ་ཕྱེད་བཞིན་དུ་འཆད་རྩོད་རྩོམ་གསུམ་ལ་ཞུགས་པར་སྣང་ངོ་།  ༼༦༥༽།  རྡོ་རྗེ་ཐེག་པའི་ལམ་ཞུགས་ནས། །སྨིན་གྲོལ་གཉིས་ལ་འབད་དགོས་ཤིང་། །སྨིན་གྲོལ་
རིམ་གཉིས་ལ་བཞེད་ན། །རྒྱུད་སྡེ་འོག་མའི་རང་རྐང་ལས། །སངས་རྒྱས་བསྒྲུབ་པ་ཇི་ལྟར་བྱ། །དེ་ལའང་སྨིན་གྲོལ་མི་བཞེད་དམ། །ཞེས་པའི་ལན་ནི།  བསྟན་བཅོས་འདིའི་སྔགས་སྡོམ་གྱི་སྐབས་འདིར་རྡོ་རྗེ་ཐེག་པ་ཞེས་སྤྱིར་བཏང་བ་ཕལ་ཆེར་སྐབས་ཀྱིས་བླ་
མེད་ལ་འཇུག་པས་དེའི་སྨིན་གྲོལ་གཉིས།  དབང་བཞི་དང་།  རིམ་གཉིས་ལ་བཞེད་པ་ཡིན་གྱི།  རྒྱུད་སྡེ་འོག་མ་གསུམ་ལ་རང་རང་གི་སྨིན་གྲོལ་ཡོད་ཀྱང་།  དབང་བཞི་དང་།  རིམ་གཉིས་ཡོད་མི་དགོས་སོ། །རྒྱུད་སྡེ་འོག་མའི་རང་རྐང་ལས།  སངས་རྒྱས་
9-4-41b


བསྒྲུབ་པའི་ཚུལ་ནི་ཕ་རོལ་ཏུ་ཕྱིན་པའི་ཐེག་པ་དང་འདྲ་བར་ས་བཅུ་པའི་བར་དུ་སྒྲུབ་ནུས་པ་ཡིན་གྱི་བླ་མེད་ལ་མ་ཞུགས་པར་སྦས་པའི་ས་གསུམ་བགྲོད་མི་ནུས་པས་བཅུ་གསུམ་རྡོ་རྗེ་འཛིན་པའི་ས་སྒྲུབ་པ་ལ་དགོངས་ནས།  བླ་མེད་ཀྱི་སྨིན་གྲོལ་ཁོ་ན་དགོས་པར་གསུངས་པ་སྟེ། 
འདི་དག་གི་རྣམ་གཞག་རྒྱས་པར་གཞན་དུ་ཤེས་པར་བྱའོ། །ས་བཅུ་གཅིག་པ་ཕ་རོལ་ཏུ་ཕྱིན་པའི་འབྲས་བུར་བཞག་པ་ནི་ས་བཅུ་པ་མན་ཆད་རང་ལམ་གྱིས་བགྲོད་ནུས་ཤིང་དེ་ཡང་ལམ་དུ་འདོད་ལ།  རང་ལུགས་ཀྱི་འབྲས་བུའི་རྣམ་གཞག་གཅིག་ཀྱང་དགོས་པས་དེ་ཉིད་ཀྱི་དབང་
དུ་བྱས་པ་ཡིན་གྱི།  བླ་མེད་ལ་མ་ཞུགས་པར་ལམ་རང་ཉིད་ཀྱིས་ཐོབ་པར་མི་ནུས་པའི་གནད་ཀྱང་ཡོད་མོད་ཀྱི་ད་དུང་གཞན་གྱིས་རྟོགས་པར་དཀའོ།  ༼༦༦༽།  རང་རང་གཞུང་བཞིན་བྱས་ཆོག་ན། །དབང་དང་རིམ་གཉིས་མི་ལྡན་པས། །རྡོ་རྗེ་ཐེག་པའི་བསྟན་པ་མིན། །ཞེས་
སོགས་གསུངས་པ་ཅི་ལ་དགོངས། །ཅེས་པའི་ལན་ནི།  རྒྱུད་སྡེ་འོག་མ་གསུམ་པོ་ཆོས་ཅན།  རྡོ་རྗེ་ཐེག་པའི་བསྟན་པ་མ་ཡིན་པར་ཐལ།  དབང་དང་རིམ་གཉིས་མི་ལྡན་པའི་ཕྱིར།  འདོད་ན།  དེ་ཡིན་པར་ཐལ།  རང་རང་གི་གཞུང་བཞིན་དུ་བྱས་ཆོག་པ་གང་ཞིག། 
རང་རང་གི་གཞུང་ནས་བསྟན་པ་དེ་རྡོ་རྗེ་ཐེག་པའི་བསྟན་པ་ཡིན་པའི་ཕྱིར།  ཞེས་པ་འདི་འདྲི་བའི་དོན་ཡིན་ན་ནི།  རྡོ་རྗེ་ཐེག་པ་སྤྱི་བཏང་གི་དོན་སྔར་བཤད་པ་བཞིན་རྟོགས་ན།  ལན་རང་གྲོལ་དུ་འགྲོའོ། །དྲིས་པའི་ཚིག་ལ་དེ་ལས་གཞན་པའི་ཨརྠ་ན་ཧི།  ༼༦༧༽།  དབང་བསྐུར་སེམས་
སྐྱེད་མ་ཐོབ་ཀྱང་། །དོན་ཞགས་ལ་སོགས་བསྒྲུབ་རུང་ན། །དོ་སྐོར་བ་ཡི་དྲིས་ལན་ལས། །རྣམ་རྒྱལ་དོན་ཞགས་ལ་སོགས་ལ། །སེམས་བསྐྱེད་ཐོབ་ནས་སྤྱོད་དགོས་པར། །གསུངས་པའི་དགོངས་པ་གང་དུ་བཙལ། །ཞེས་པའི་ལན་ནི།  དབང་བསྐུར་སེམས་
9-4-42a


སྐྱེད་མ་ཐོབ་ཀྱང་།  དོན་ཞགས་ལ་སོགས་བསྒྲུབ་ཏུ་རུང་བར་གསུངས་པ་ནི་ལས་སྒྲིབ་འདག་པའི་ཆེད་དུ་སྨྱུང་གནས་ཀྱི་ཆོ་ག་ལ་དགོངས་ལ།  འཇུག་པ་སེམས་བསྐྱེད་ཐོབ་ནས་སྤྱོད་དགོས་པར་གསུངས་པ་ནི་སྒྲུབ་པའི་ཐབས་ཀྱི་སྒོ་ནས་ཚུལ་
བཞིན་དུ་བསྒྲུབ་པ་ལ་དགོངས་ཏེ།  སྤྱོད་པའི་དོན་ཡང་དབང་བསྐུར་དང་རྗེས་གནང་ཡང་ཐོབ་དགོས་པའོ།  ༼༦༨༽།  བྱ་སྤྱོད་རྣལ་འབྱོར་རྒྱུད་གསུམ་གྱི། །སྒོམ་ཆེན་གང་དེ་ཕ་རོལ་ཏུ། །ཕྱིན་པའི་སྒོམ་ཆེན་དུ་བཞེད་དམ། །ཞེས་པ་འདི་འོག་སྤྱོད་པ་ལ་ལོག་རྟོག་
འགོག་པའི་སྐབས་སུ་འོང་རྒྱུར་འདུག་ནའང་།  འདིར་བྲིས་འདུག་པའི་ལན་ནི།  གཞུང་ལས།  རིམ་པ་གཉིས་པོ་མི་བསྒོམ་པའི། །སྒོམ་ཆེན་བཟང་ཡང་ཕ་རོལ་ཏུ། །ཕྱིན་པའི་སྒོམ་ཆེན་ལས་མ་འདས། །མདོ་ལས་ཡུལ་ཆེན་དེ་དག་ཏུ། །འགྲོ་བའི་ཆོ་ག་བཤད་
པ་མེད། །ཅེས་པ་འདི་སྤྱོད་པ་བྱེད་པའི་གང་ཟག་ལ་ལོག་རྟོག་འགོག་པའི་སྐབས་ཡིན་ལ།  འདིའི་སྒོམ་ཆེན་གྱི་དོན་ས་ལམ་གྱི་རྟོགས་པ་བསྐྱེད་པ་ཡིན་པས།  སྤྱོད་པའི་སྒོ་ནས་ས་ལམ་གྱི་རྟོགས་པ་བསྐྱེད་པ་ལ་ལུས་ལ་གནད་དུ་བསྣུན་པའི་སྒོ་ནས་སྐྱེད་དགོས་ཤིང་། 
དེ་ཡང་བླ་མེད་ཁོ་ན་ལ་ཡོད་ལ།  རིམ་གཉིས་མི་བསྒོམ་པའི་ལམ་གྱི་རྟོགས་པ་བསྐྱེད་ཚུལ་ནི།  སེམས་ལ་གནད་དུ་བསྣུན་ནས་བསྐྱེད་པ་ཡིན་པས་ཕ་རོལ་ཏུ་ཕྱིན་པའི་ལུགས་ཀྱི་ས་ལམ་གྱི་རྟོགས་པ་བསྐྱེད་ཚུལ་ཡིན་པ་ལ་དགོངས་ནས་དེའི་སྒོམ་ཆེན་ཞེས་གསུངས་པ་ཡིན་གྱི།
རིམ་གཉིས་མི་བསྒོམ་པའི་ཉམས་ལེན་ཐམས་ཅད་ཕ་རོལ་ཏུ་ཕྱིན་པའི་ཉམས་ལེན་དང་།  དེའི་གང་ཟག་ཐམས་ཅད་ཕ་རོལ་ཏུ་ཕྱིན་པའི་གང་ཟག་ཏུ་སྟོན་པ་མ་ཡིན་ནོ། །དེས་ན་བྱ་སྤྱོད་རྣལ་འབྱོར་རྒྱུད་གསུམ་གྱི་ས་ལམ་གྱི་རྟོགས་པ་བསྐྱེད་ཚུལ་དེ་ཡང་ཕ་རོལ་ཏུ་ཕྱིན་པའི་ལུགས་ཀྱི་
9-4-42b


བསྐྱེད་ཚུལ་ལས་མ་འདས་པས་སྤྱོད་པའི་རྣམ་བཞག་མེད་ཅེས་པ་སྟེ་རྣམ་བཤད་དུ་གསལ་བར་བཤད་ཟིན་ཏོ། ༼༦༩༽།  ཕར་ཕྱིན་ཐེག་པས་འཚང་རྒྱ་བ། །སྔགས་ཀྱི་ཐེག་པའི་ཉེ་ལམ་ལ། །ལྟོས་པར་བཞེད་ན་འདི་ཉིད་ལས། །གཏུམ་མོ་ལ་སོགས་ཐབས་
ལམ་བྲལ། །ཕྱག་རྒྱ་ཆེན་པོའི་ཐ་སྙད་མེད། །ཅེས་སོགས་གསུངས་པ་ཅི་ལ་དགོངས། །མི་ལྟོས་ན་ནི་བདག་མེད་མའི། །བསྟོད་པའི་འགྲེལ་པར་གསུངས་དེ་ཅི། །བཅུ་གཅིག་ཀུན་ཏུ་འོད་ཀྱི་ས། །དེ་ལ་མི་ལྟོས་བཅུ་གསུམ་པ། །སྔགས་ལ་ལྟོས་པར་
བཞེད་ཅེ་ན། །ཀུན་ཏུ་འོད་ས་བཅུ་གཅིག་པ། །ཡིན་པར་སྔགས་གཞུང་གང་ལས་གསུངས། །ཅེས་པའི་ལན་ནི།  ཕར་ཕྱིན་ཐེག་པས་སྔགས་ཀྱི་ཉེ་ལམ་ལ་མི་ལྟོས་པར་ས་བཅུའི་བར་བསྒྲོད་ནུས་ཤིང་།  གྲངས་མེད་གསུམ་གྱི་དཀའ་སྤྱད་ཀྱང་དེའི་བར་དུ་ཡིན་ཏེ། 
ས་བཅུ་པ་ཐོབ་ནས་ཉེ་རྒྱུའི་སྤྱོད་པས་ཇི་ལྟར་རིང་ན་ཡང་ཞག་བདུན་གྱིས་རྡོ་རྗེ་འཛིན་པའི་ས་ཐོབ་པར་རྡོ་རྗེ་གུར་ལས་གསུངས་པས་སོ། །དེས་ན་དེའི་བར་དུ་སྔགས་ལམ་ལ་མི་ལྟོས་པ་ལ་དགོངས་ནས།  གལ་ཏེ་འདི་བཞིན་བསྒྲུབ་འདོད་ན། །རྡོ་རྗེ་ཕག་མོའི་བྱིན་རླབས་མེད། །
ཅེས་སོགས་གསུངས་པར་གཞུང་ཉིད་ན་གསལ་བས་དོགས་པ་འདིའང་གཞི་མེད་པ་ཙམ་ཡིན་ནོ། །རྫོགས་པའི་སངས་རྒྱས་ལམ་པོ་ཆེ། །ཞེས་དང་།  རྫོགས་པའི་སངས་རྒྱས་ཐོབ་པར་གསུངས། །ཅེས་པ་ནི་ཕ་རོལ་ཏུ་ཕྱིན་པ་བས་རང་ལུགས་ཀྱི་ལམ་དེ་སྤང་རྟོགས་
མཐར་ཐུག་གི་རྫོགས་པའི་སངས་རྒྱས་ཐོབ་པར་འདོད་པས་དེའི་ལུགས་བཀོད་པ་ཡིན་གྱི།  ལམ་དེས་ས་བཅུ་པའི་བར་དུ་བགྲོད་ཟིན་ནས།  ས་གོང་མ་གསུམ་བགྲོད་པ་ནི་སྔགས་ཀྱི་ཐེག་པའི་ཉེ་ལམ་ལ་ངེས་པར་ལྟོས་པས།  བདག་མེད་བསྟོད་འགྲེལ་དང་།  མི་འགལ་བའི་སྟེང་
9-4-43a


དུ་གནད་གཅིག་ཏུ་འདུས་པར་འོང་སྟེ།  འདི་དག་ཀྱང་རྒྱུད་ཀྱི་རྒྱལ་པོ་སཾ་བྷུ་ཊིའི་སྟེང་དུ།  རྗེ་བཙུན་གོང་མ་འཁྲུལ་པ་ཟད་པ་དག་གིས་བཀྲལ་བའི་སྲོལ།  ཡོངས་འཛིན་མཁས་པའི་དྲུང་དུ་ཡུན་རིང་དུ་ཉན་པ་ལས་རྟོགས་དགོས་ཀྱི།  ཡིག་ཆ་
ཟུར་རེ་རེ་མཐོང་བ་ཙམ་གྱིས་མགར་བ་གསར་པའི་ལག་པ་བཞིན་དུ།  ལྕགས་སྐམ་གང་ལ་འཇུ་ཙབ་ཙོབ་ཏུ་གྱུར་པ་དག་གིས་ད་དུང་ངེས་ཤེས་སྐྱེ་བ་དཀའོ། །བཅུ་གཅིག་ཀུན་ཏུ་འོད་ཀྱི་ས་སྔགས་ལམ་ལ་མི་ལྟོས་པར་མི་འདོད་པ་ནི་བཤད་ཟིན་ལ།  བཅུ་གཅིག་པ་ལ་ཀུན་ཏུ་
འོད་ཀྱི་སར་སྔགས་གཞུང་གང་ལས་བཤད་ན།  བདེ་མཆོག་རྩ་རྒྱུད་དང་།  སཾ་བྷུ་ཊི་ལས།  ཕ་རོལ་ཏུ་ཕྱིན་པའི་ཐེག་པ་དང་སྒོ་བསྟུན་པའི་དབང་དུ་བྱས་ནས་ཉེ་བའི་དུར་ཁྲོད་ཀྱི་བར་ས་བཅུ་ལས་མ་གསུངས་ཀྱང་།  རྩ་རྒྱུད་བརྟག་གཉིས་ལས།  དེའི་སྟེང་དུ་འཐུང་གཅོད་
དང་།  ཉེ་བའི་འཐུང་གཅོད་གཉིས་བསྣན་ནས་བཅུ་གཉིས་གསུངས་པ་ནི་བྱང་ཆུབ་སེམས་དཔའི་སའི་དབང་དུ་བྱས་པའོ། །ཕྱི་མ་འདི་གཉིས་ལ།  རྒྱུད་རྒྱས་པའི་ལུང་ཀུ་མུ་ཏིར་དྲངས་པ་ལས།  འཐུང་གཅོད་དཔེ་མེད་ཡེ་ཤེས་ཏེ། །ཉེ་བའི་འཐུང་གཅོད་ཡེ་
ཤེས་ཆེ། །ཞེས་གསུང་ཞིང་།  ཨ་བྷི་དྷ་ན་ལས་ཀྱང་།  དཔེ་མེད་ས་དང་ཡེ་ཤེས་ཆེ། །རྡོ་རྗེའི་ས་ནི་བཅུ་གསུམ་པ། །ཞེས་གསུངས་སོ། །འདི་གསུམ་ལ་དགོངས་པ་ལུང་སྟོན་པའི་རྒྱུད་ལས།  འཇིག་རྟེན་དང་ནི་འཕགས་པའི་ཆོས། །སྔ་མ་ཀུན་གྱིས་
བསྐྲུན་མེད་ཅིང་། །དེ་ཕྱིར་ཀུན་ཏུ་འོད་འགྱེད་པ། །དཔེ་མེད་ཡེ་ཤེས་ཞེས་སུ་བཤད། །ཐུབ་པའི་སྤྱོད་ཡུལ་མ་གཏོགས་པ། །རྒྱལ་སྲས་ཀུན་གྱི་ས་ལས་བརྒལ། །ཤེས་བྱ་ཀུན་ལ་འཇུག་ཆོས་ཅན། །ས་དེ་ཡེ་ཤེས་ཆེན་པོར་བཞེད། །སངས་རྒྱས་རྣམས་
9-4-43b


ཀྱིས་གང་བརྟེན་པའི། །སར་གྱུར་དེ་ནི་བཅུ་གསུམ་པ། །ཞེས་གསུངས་པ་འདིའང་དེ་སྟོན་པའི་སྔགས་གཞུང་ཡིན་ནོ། །ཡེ་ཤེས་ཐིག་ལེའི་རྒྱུད་ལས།  མོས་པས་སྤྱོད་པ་ས་དང་པོ།  གཉིས་པ་རབ་ཏུ་དགའ་བ་ཅེས་པ་ནས་དགུ་པ་ལེགས་པའི་བློ་གྲོས། 
དེ་རྣམས་ནི་བྱང་ཆུབ་སེམས་དཔའོ། །ཆོས་ཀྱི་སྤྲིན་ནི་སངས་རྒྱས་ཀྱི་ས།  ཀུན་ཏུ་འོད་ཀྱི་ས་ནི་ཡང་དག་པར་རྫོགས་པའི་སངས་རྒྱས་ཀྱི་ས།  ཀུན་ཏུ་སྣང་བ་མཆེད་པའི་འོད་ནི་དཔལ་རྡོ་རྗེ་སེམས་དཔའ་བཅོམ་ལྡན་འདས་ཀྱི་སྤྲུལ་པའི་སྐུའི་ས།  ཀུན་ཏུ་སྣང་བ་ཐོབ་
པའི་འོད་ནི་ལོངས་སྤྱོད་རྫོགས་པའི་སྐུའི་ས།  ཡང་དག་འོད་ནི་ཆོས་ཀྱི་སྐུའི་ས།  བརྗོད་དུ་མེད་པའི་ཚད་མེད་པ་ནི་བདེ་བ་ཆེན་པོའི་ས་སྟེ།  དེ་ཀུན་དགའ་བའི་བྱེ་བྲག་ལ། །སར་ནི་ཀུན་ཏུ་བཏགས་པ་ཡིན། །ཅེས་པ་འདི་ཡང་དེ་སྟོན་པའི་སྔགས་གཞུང་ཡིན་ནོ།  ༼༧༠༽། 
ས་བཅུའི་ཐ་མར་བདུད་བཏུལ་བའི། །བཤད་པ་གཞུང་ལུགས་གང་ན་བཞུགས། །ཅེས་པའི་ལན་ནི།  མངོན་རྟོགས་རྒྱན་དང་རྒྱུད་བླ་གཉིས་ན་བཞུགས་ཏེ།  རྒྱན་ལས།  ཐབས་མཁས་སྤྱོར་བའི་ཡུལ་ཐབས་མཁས་བཅུའི་ཐོག་མར།  དགྲ་རྣམས་ལས་ནི་འདས་པ་
དང་། །ཞེས་པ་དང་།  དེའི་འགྲེལ་པར་བར་ཆད་ཀྱི་ཆོས་ལས་ཡང་དག་པར་བརྒལ་བས་ལྷ་ལ་སོགས་པའི་བདུད་ལས་འདས་པ་དང་།  ཞེས་གསུངས་ཞིང་།  ཡུལ་ཐབས་མཁས་བཅུ་པོ་སངས་རྒྱས་ཀྱི་ས་ཁོ་ནར་བཞག་པས་བདུད་བཞི་སྤངས་པ་སངས་རྒྱས་ཀྱི་ས་ཁོ་ནར་
འགྲུབ་པའི་ཕྱིར་དང་།  རྒྱུད་བླར།  ལས་ཉོན་གྱི་དབང་གིས་བྱུང་བའི་སྐྱེ་རྒ་ན་འཆི་བཞི་དང་།  མ་རིག་པ་བག་ཆགས་ཀྱི་ས་དང་།  ཟག་མེད་ཀྱི་ལས་ལ་བརྟེན་ནས་བྱུང་བའི་སྐྱེ་རྒས་ན་འཆི་བཞི་སྟེ།  བཞི་ཚན་གཉིས་ལས་དང་པོ་ས་དང་པོ་ནས་སྤངས་ཏེ། འཕགས་པས་འཆི་དང་
9-4-44a


ན་བ་དང་། །རྒ་བའི་སྡུག་བསྔལ་རྩད་ནས་སྤངས། །ལས་དང་ཉོན་མོངས་དབང་གིས་སྐྱེ། །དེ་ལ་དེ་མེད་ཕྱིར་དེ་མེད། །ཅེས་གསུངས་པས་སོ། །ཕྱི་མ་སངས་རྒྱས་ཀྱི་ས་ཁོ་ནར་སྤངས་ཏེ།  སྐྱེ་བ་མེད་ཅིང་འཆི་བ་མེད། །གནོད་
མེད་རྒ་བ་མེད་པ་སྟེ། །དེ་ནི་རྟག་དང་བརྟན་ཕྱིར་དང་། །ཞི་བའི་ཕྱིར་དང་གཡུང་དྲུང་ཕྱིར། །དེ་ནི་ཡིད་ཀྱི་རང་བཞིན་གྱི། །ལུས་ཀྱི་སྐྱེ་མེད་བརྟགས་པའི་ཕྱིར། །བསམ་མི་ཁྱབ་གྱུར་འཆི་འཕོ་ཡིས། །དེ་ནི་མི་འཆི་བརྟན་པའི་ཕྱིར། །བག་ཆགས་ཕྲ་མོའི་ནད་རྣམས་
ཀྱིས། །གནོད་མེད་ཞི་བ་ཉིད་ཀྱི་ཕྱིར། །ཟག་མེད་མངོན་པར་འདུ་བྱེད་ཀྱིས། །གཡུང་དྲུང་ཕྱིར་ན་རྒ་བ་མེད། །ཅེས་གསུངས་པའི་ཕྱིར་རོ། །དེས་ན་བདུད་བཞི་ལ་ཡང་ཚན་པ་གཉིས་ཡོད་པ་ལས།  དང་པོའི་དབང་དུ་བྱས་པ་ས་དང་པོ་ནས་སྤངས་ཀྱང་ཕྱི་མའི་དབང་
དུ་བྱས་པ་སངས་རྒྱས་ཀྱི་ས་ཁོ་ནར་སྤངས་པ་གསལ་བའི་ཕྱིར་ཏེ།  འཆི་བདག་གི་བདུད་སྤངས་པ་ལ་བསམ་གྱིས་མི་ཁྱབ་པར་བསྒྱུར་བའི་འཆི་འཕོ་སྤངས་དགོས་པའི་ཕྱིར།  འདི་ཇི་ལྟར་ཤེས་ན་བྱང་ཆུབ་ཀྱི་ལེའུར་ཆོས་སྐུ་རྟག་པའི་རྒྱུ་གསུམ་གྱི་དང་པོ་འཆི་བའི་བདུད་བཅོམ་ཞེས་
གསུངས་ལ།  དེ་ཉིད་རྒྱས་བཤད་དུ།  འཆི་མེད་ཞི་བའི་གནས་ཐོབ་ལ། །འཆི་བདུད་རྒྱུ་བ་མེད་པའི་ཕྱིར། །ཞེས་གསུངས་པས་ཤེས་སོ། །སྟོན་པས་སྲོད་ལ་ལྷའི་བུའི་བདུད་བཅོམ།  ཐོ་རངས་ཉོན་མོངས་པའི་བདུད་བཅོམ།  ཡངས་པ་ཅན་དུ་སྐུ་ཚེའི་འདུ་བྱེད་བྱིན་གྱིས་
བརླབས་པའི་ཚེ་འཆི་བདག་གི་བདུད་བཅོམ།  རྩྭ་མཆོག་གི་གྲོང་དུ་མྱ་ངན་ལས་འདས་པའི་ཚེ་ཕུང་པོའི་བདུད་བཅོམ་པར་བྱེ་བྲག་ཏུ་སྨྲ་བས་བཤད་པ་ནི་ཁོ་རང་གིས།  སྟོན་དང་བསེ་རུ་བྱང་ཆུབ་བར། །བསམ་གཏན་མཐའ་སྟན་གཅིག་ལ་ཀུན། །ཅེས་གསུངས་པའི་དབང་དུ་བྱས་
9-4-44b


པ་ཡིན་ལ།  ཐེག་པ་ཆེན་པོ་པས་ནི།  བདེ་བར་གཤེགས་པ་མ་ལུས་ཕྱོགས་ཞིང་སངས་རྒྱས་ཀྱི་ཞིང་དག་ན།  ཞེས་སོགས་གསུངས་པ་ལྟར་བཞེད་པས་དེ་དག་ནི་གདུལ་བྱའི་ངོར་སྤྲུལ་པ་འབའ་ཞིག་ཏུ་བཞེད་ཀྱི་རང་རྒྱུད་པར་མི་བཞེད་དོ། །དེང་སང་སྡེ་སྣོད་འཛིན་པ་མཁས་པ་
དག་གིས་ཀྱང་ཐེག་པ་ཆེན་པོའི་ལམ་དུ་བདུད་བཞི་སྤངས་པའི་ས་མཚམས་གཞན་དུ་བཤད་འདུག་པ་དག་ལ་ལུང་ཁུངས་གསལ་བ་མི་འདུག་ཅིང་།  བདག་ཉིད་ཆེན་པོ་འདིས་ས་བཅུའི་ཐ་མར་བདུད་བཏུལ་བར་གསུངས་པ་སྔར་གྱི་གཞུང་ལུགས་ཆེན་པོ་གཉིས་ཀྱི་དགོངས་
པར་གསལ་ཚུལ་འདིས་ཀྱང་གསུང་རབ་འཆད་པ་ལ་འཁྲུལ་པ་མེད་པར་ཡིད་ཆེས་པའི་གནས་སུ་གྱུར་པས།  ཁྱེད་ད་དུང་ཟག་པ་བསོག་གསུང་གིན་ཡོད་པ་འདུག་ན་ཡང་དེ་སོག་པའི་གཞི་རང་འདི་མ་ཡིན་པ་འདྲའོ།  ༼༧༡༽།  མུ་སྟེགས་བྱེད་ལ་སྡོམ་པ་ལས། །བྱུང་
བའི་དགེ་བ་ཡོད་མིན་ན། །མངོན་པའི་གཞུང་ལས་མུ་སྟེགས་ལ། །བསམ་གཏན་སྡོམ་པ་བཤད་དེ་ཅི། །ཞེས་པའི་ལན་ནི།  མུ་སྟེགས་བྱེད་ལ་སྡོམ་པ་མེད། །ཅེས་པའི་དོན་སྐབས་ཐོབ་ཀྱིས་བྱང་ཆུབ་ཀྱི་རྒྱུར་འགྱུར་བའི་སྡོམ་པ་མེད་ཅེས་པ་ལ་འཇུག་པར་འགྱུར་བ་
གཞུང་ཉིད་ལས་གསལ་ཤིང་།  སྐབས་ཐོབ་ལ་མི་ལྟ་བར་ཚིག་ཙམ་ལ་འཁྲི་ནས་འདི་འདྲའི་སྐྱོན་བརྗོད་ན་གཞུང་ཕལ་ཆེར་འགོག་དགོས་ཏེ།  དཔེར་ན་ཐམས་ཅད་ཀྱང་དགྲ་བཅོམ་པ་ཞེས་པ་ལ།  ཐམས་ཅད་དགྲ་བཅོམ་པ་ཡིན་ན་ནི་།  བུམ་པའང་དགྲ་བཅོམ་པ་ཡིན་པར་
འགྱུར།  ཞེས་དང་གང་ཟག་གཅིག་མ་གཏོགས་པ་ནི་འདི་ལྟ་སྟེ་ཀུན་དགའ་བོ་ཞེས་པ་ལ།  གང་ཟག་གཅིག་ནི་མ་གཏོགས་པ། །མེད་དགག་ཡིན་ཕྱིར་ཀུན་དགའ་བོ། །ཇི་ལྟ་བུ་ནི་འགྲུབ་པར་འགྱུར། །ཞེས་སོགས་བརྗོད་པ་དང་འདྲའོ།  ༼༧༢༽།  རྒྱུད་སྡེ་འོག་མའི་
9-4-45a


དབང་བསྐུར་ལས། །སྔགས་ཀྱི་སྡོམ་པ་ཐོབ་བམ་ཅི། །ཐོབ་ན་དབང་བཞི་སྔགས་སྡོམ་གྱི། །ཐོབ་རྒྱུར་གསུངས་པ་ཇི་ལྟར་ཡིན། །ཞེས་པའི་ལན་ནི།  དགེ་བསྙེན་དགེ་ཚུལ་ཆོ་ག་ལས། །སོ་ཐར་སྡོམ་པ་ཐོབ་བམ་ཅི། །
ཐོབ་ན་གསོལ་བཞི་སོ་ཐར་གྱི། །ཐོབ་རྒྱུར་གསུངས་པ་ཅི་ལྟར་ཡིན། །ཞེས་ཕར་འདྲི་སྟེ་འདི་ལ་ལན་གང་སྨྲས་པའི་རིགས་པ་དེ་ཉིད་བཟུང་ནས་གླིང་བཞི་གང་དུ་སོང་ཀྱང་འདེད།  འོག་གསེར་གྱི་ས་གཞི་ནས་སྟེང་ཚངས་པའི་འཇིག་རྟེན་གྱི་བར་གང་དུ་སོང་ཀྱང་འདེད་དགྲ་
བཏང་ངོ་།  ༼༧༣༽།  རྫོགས་རིམ་སྡོམ་པ་ཞེས་པ་ཡང་། །བསྒོམས་པའི་སྟོབས་ཀྱིས་ཐོབ་མོད་ཀྱི། །དབང་ཆོག་ལས་ཐོབ་གསུངས་པ་མེད། །ཅེས་པའི་ལན་ནི།  འདི་བསྟན་བཅོས་རྩ་བའི་ཚིག་ཟིན་ལ་མེད།  དོན་ཐོབ་ལ་ཡོད་པ་ཁོ་བོའི་གྲུབ་མཐའ་བྱས་པ་ལ་འདྲི་བར་
སྣང་མོད།  སྤྱིར་གསུངས་པ་མེད་ཅེས་པ་དང་།  བཤད་པར་མེད་ཅེས་པ་རྒྱུས་ཡོད་པར་བྱས་ནས་སྨྲ་བར་བྱ་བ་ཡིན་གྱི།  རང་དགར་སྨྲར་མི་རུང་སྟེ།  རྩ་རྒྱུད་བརྟག་གཉིས་ལས།  སངས་རྒྱས་ཀུན་གྱི་སྡོམ་པ་ནི། །ཨེ་ཝྃ་རྣམ་པར་རབ་ཏུ་གནས། །ཨེ་ཝྃ་
རྣམ་པ་བདེ་ཆེན་པོ། །དབང་ལས་ཡང་དག་ཤེས་པར་འགྱུར། །ཞེས་གསུངས་པའི་སྡོམ་པའི་དོན།  རྫོགས་རིམ་གྱི་སྡོམ་པ་ལ་མི་འཆད་པའི་རྒྱ་བོད་ཀྱི་འགྲེལ་བ་བྱེད་པ་སུ་ཞིག་འདུག །ལེའུ་དེའི་སྐབས་དེར་ཡང་རྫོགས་རིམ་གྱི་སྡོམ་པ་ལ་མི་འཆད་པའི་སྐབས་
ཨེ་འདུག་ལེགས་པར་སོམས་ཤིག །ངེད་དེས་ན་དབང་ལས་ཐོབ་པ་དེ། །བསྲུང་ཞིང་འཕེལ་བར་བྱེད་པ་ལ། །སྒོམ་པ་ཞེས་ནི་བཏགས་པ་ཡིན། །ཞེས་པའི་རྗེས་སུ་འབྲང་བ་དག་གིས་ནི་ལམ་གྱི་གནས་སྐབས་སུ་སྒོམ་པའི་སྡོམ་པ་དེ་དབང་གི་སྐབས་སུ་ཐོབ་དགོས་པ་ཁྱད་
9-4-45b


ཆོས་ཡིན་པར་སེམས་སོ།  ༼༧༤༽།  རྒྱུད་སྡེ་འོག་མའི་སྔགས་སྡོམ་ནི། །མེད་པར་བཞེད་ན་འདི་ཉིད་ལས། །དབང་བསྐུར་སྡོམ་པས་མ་སྤྲེལ་ན། །བཟང་ཡང་ཕ་རོལ་ཕྱིན་པ་ཡིན། །ཅེས་གསུངས་པ་དེ་གང་ལ་དགོངས། །ཅེས་པའི་ལན་ནི།  རྒྱ་ནས་འོངས་
པའི་ཇ་དཀར་ནི། །མེད་པར་འདོད་ན་ཉི་གྲིབ་མཚམས། །སྐྱིལ་ཀྲུངས་བཅས་ནས་དཀར་ཡོལ་ནང་། །རྒྱ་ཇ་འཐུངས་པ་འདི་ཅི་ཞིག །ཅེས་ཁྱོད་ཉིད་ལ་ཕར་དྲིའོ། །རྒྱ་ནས་འོངས་བའི་ཇ་དཀར་མེད་པར་མ་སྨྲས་སོ་ཞེ་ན།  རྒྱུད་སྡེ་འོག་མའི་སྔགས་
སྡོམ་མེད་པར་སུས་སྨྲས་ལར་སེམས་རྣལ་དུ་ཕོབ་ཤིག  ༼༧༥༽།  སྡོམ་པ་མེད་ལ་དགེ་བའི་རྒྱུན། །མེད་ན་སེམས་སྐྱེད་ཆོ་ག་ལས། །དེ་ལ་དེ་ཡོད་གསུང་དེ་ཅི། །ཅེས་པའི་ལན་ནི།  སེམས་སྐྱེད་ཀྱི་ཆོ་ག་ལས་སངས་རྒྱས་ལ་དམིགས་ནས་མེ་ཏོག་འཐོར་བ་ལ་ཡང་
དགེ་བ་རྒྱུན་ཆགས་སུ་འགྱུར་བར་མདོ་ལས་གསུངས་ཞེས་གསུངས་པ་དང་།  མཛོད་འགྲེལ་ལས།  རྫས་བྱུང་གི་བསོད་ནམས་བདུན་ལས་ཇི་སྲིད་རྫས་དེ་མ་ཞིག་བར་དུ་བསོད་ནམས་རྒྱུན་ཆགས་སུ་འབྱུང་བར་གསུངས་པ་སོགས་ཀྱང་ཡོད་མོད་ཀྱི།  དེ་དང་སྡོམ་པའི་དགེ་རྒྱུན་
གཉིས་པོ་གནད་མི་གཅིག་སྟེ།  སྡོམ་པའི་དགེ་རྒྱུན་ནི།  བྱང་ཆུབ་ཀྱི་རྒྱུར་འགྱུར་བའི་དགེ་རྒྱུན་ཡིན་ལ།  ཅིག་ཤོས་རྣམས་ནི་བར་མ་དགེ་བའི་རྒྱུན་ཡིན་པའི་ཕྱིར།  ༼༧༦༽།  ཕྱག་རྒྱ་བཞི་པ་ཞེས་བྱ་བའི། །བསྟན་བཅོས་བོད་ན་བཞུགས་པ་འདི། །ཀླུ་སྒྲུབ་ཀྱིས་ནི་མ་
མཛད་པར། །ལོ་ཆེན་སོགས་ཀྱིས་བཤད་དེ་ཅི། །ཅེས་པའི་ལན་ནི།  ལོ་ཆེན་གྱིས་དེ་ལྟར་བཤད་མ་བཤད་གང་ཡང་ཁོ་བོས་མ་མཐོང་མོད།  ཁྱེད་ཀྱིས་གསུངས་པའི་ལུང་ཁུངས་འདི་ལ་ངེས་པ་ཅན་ཅིག་མེད་དེ།  བྱང་ཆུབ་སེམས་འགྲེལ་ལས།  དོན་དམ་
9-4-46a


སེམས་བསྐྱེད་ཆོ་གས་བླངས་པ་བཤད་ཅེས་དང་།  གསང་བ་སྤྱི་རྒྱུད་ལས།  སློབ་མ་གཉིས་དང་བཞི་ལ་སོགས་པ་ཟུང་དུ་གྱུར་པའང་དཀྱིལ་འཁོར་དུ་འཇུག་པ་བཤད་ཅེས་བྲིས་པ་དང་འདྲའོ། །གལ་ཏེ་ལོ་ཆེན་སོགས་ཀྱིས་
བཤད་དུ་ཆུག་ན་ཡང་།  ཕྱག་རྒྱ་བཞི་པ་ཞེས་བྱ་བའི། །བསྟན་བཅོས་བོད་ན་བཞུགས་པ་འདི། །འཕགས་པ་ཀླུ་སྒྲུབ་ཀྱིས་མཛད་པར། །ས་པཎ་སོགས་ཀྱིས་བཤད་དེ་ཅི། །ཞེས་པ་འདི་དངོས་ཐོབ་སྟེ།  དེ་འདྲའི་རིགས་ཅན་ལ་འདི་ཐུགས་
རྒྱུས་ཆེ་བའི་ཕྱིར་རོ།  ༼༧༧༽།  ལུས་རྒྱ་ཞིག་པའི་ཤི་མ་ཐག །ཡོན་ཏན་འབྱུང་བ་འགོག་མཛད་ན། །འཆི་བ་འོད་གསལ་ཆོས་སྐུ་ལས། །བར་དོ་ལོངས་སྐུ་འབྱུང་དེ་ཅི། །ཅེས་པའི་ལན་ནི།  ཚེ་འདིར་མཐོང་ལམ་ཐོབ་ནས་སྐྱེ་བ་ཕྱི་མར་
ཡོན་ཏན་འབྱུང་མི་སྲིད་པ་ཕྱོགས་སྔར་བྱས་ནས་འདྲི་བ་ཡིན་ནམ།  ཚེ་འདིར་མཐོང་ལམ་ཐོབ་ཀྱང་ཡོན་ཏན་མི་འབྱུང་བར་ཤི་ནས་ཡོན་ཏན་འབྱུང་བ་དང་།  འཆི་བ་འོད་གསལ་གྱི་ཚེ་ཆོས་སྐུ་མངོན་དུ་བྱས་ནས།  བར་དོ་ལོངས་སྐུ་འབྱུང་བ་གཉིས་རྒྱུ་
མཚན་སྟོབས་མཉམ་པའི་སྒོ་ནས་དྲི་བ་གང་ཡིན།  དང་པོ་ལྟར་ན་ས་སྐྱ་པཎྜི་ཏས་སྐྱེ་བ་སྔ་ཕྱི་མེད་པ་དང་།  ལས་རྒྱུ་འབྲས་མེད་པར་ཁས་མི་ལེན་མཆི་བས་དེ་འདྲ་བའི་སྒྲོ་སྐུར་མི་མཛད་པ་ཞུ།  ཕྱི་མ་ལྟར་ན་འཆི་བ་འོད་གསལ་གྱི་ཚེ་ཆོས་སྐུ་ཐོབ་ནས་སླར་
ཡང་བར་དོ་བླངས་ཏེ།  དེའི་རྟེན་ལ་ལོངས་སྐུ་ཐོབ་པ་ཡིན་ན།  སྔ་མ་དང་སྟོབས་ཤིན་ཏུ་མཚུངས་མོད།  དེ་ནི་མི་སྲིད་དེ།  འཆི་བ་འོད་གསལ་གྱི་ཚེ་ཆོས་སྐུ་ཐོབ་ནས་སླར་ཡང་བར་དོ་བླང་དགོས་ན་བར་དོ་ལོངས་སྐུ་ཐོབ་ནས་ཀྱང་སླར་ཡང་སྐྱེ་སྲིད་བླང་དགོས་
9-4-46b


པར་ཐལ་བ་བཟློག་ཏུ་མེད་པའི་ཕྱིར་རོ། །དེས་ན་དེའི་དོན་འཆི་བ་འོད་གསལ་གྱི་ཚེ་ཆོས་སྐུ་ཐོབ་ན་བར་དོ་མི་འབྱུང་བར་དེ་མ་ཐག་ལོངས་སྐུ་ཐོབ་པའི་དོན་ཡིན་པས་དེ་ནི་བདག་ཉིད་ཆེན་པོའི་དགོངས་པ་འདིའི་སྒྲུབ་བྱེད་ཉིད་དུ་འགྲོ་སྟེ།  ཚེ་འདིར་ཐེག་ཆེན་
གྱི་མཐོང་ལམ་ཐོབ་ན་འཆི་བ་མི་འབྱུང་བར་དེ་མ་ཐག་ཡོན་ཏན་བརྒྱ་ཕྲག་བཅུ་གཉིས་འབྱུང་བར་འབད་མེད་དུ་འགྲུབ་པའི་ཕྱིར་རོ།  ༼༧༨༽།  སྔགས་དང་ཕ་རོལ་ཕྱིན་པ་ཡི། །སངས་རྒྱས་རྒྱན་ཅན་རྒྱན་མེད་དུ། །ཐལ་བར་འདོད་པ་མ་ཡིན་ནམ། །
ཞེས་པའི་ལན་ནི།  དེ་ལ་འདོད་པའི་རྒྱུ་མཚན་ཅི་ཡིན།  ཕ་རོལ་ཏུ་ཕྱིན་པའི་སངས་རྒྱས་སྤངས་རྟོགས་མ་རྫོགས་པས་རྒྱན་མེད་དང་།  སྔགས་ཀྱི་སངས་རྒྱས་སྤངས་རྟོགས་རྫོགས་པས་རྒྱན་བཅས་ཡིན་པའི་ཕྱིར་ཞེ་ན།  བསྟན་བཅོས་འདིའི་ཕྱོགས་
སྔ་མས་སྔགས་ཀྱི་མཐོང་ལམ་རྒྱན་མེད་དང་།  ཕ་རོལ་ཏུ་ཕྱིན་པའི་མཐོང་ལམ་རྒྱན་བཅས་སུ་ཁས་བླངས་པ་ལ་བསྟན་བཅོས་མཛད་པ་པོས།  འོ་ན་སྔགས་ཀྱི་སངས་རྒྱས་རྒྱན་མེད་དང་།  ཕ་རོལ་ཏུ་ཕྱིན་པའི་སངས་རྒྱས་རྒྱན་བཅས་སུ་ཐལ་
ལོ་ཞེས་ཐལ་བར་འཕེན་པ་ཡིན་པས་འདོད་ལན་འདེབས་པ་དང་།  འདོད་ལན་འདེབས་པའི་རྒྱུ་མཚན་གཉིས་འགལ་བའི་ཕུང་པོ་མངོན་ཚན་ཆེ་བ་ཅིག་ཏུ་སོང་འདུག་གོ།  འདི་འདྲའི་རིགས་ཅན་རྟགས་དཔྱད་ཡེ་མ་བྱས་པའམ་བྱས་ཀྱང་བློ་གྲོས་རྩིངས་
ནས་གནད་ཡེ་མ་ཟིན་པ་ཕལ་ཆེ་བར་སྣང་བས་དྲི་བ་བརྒྱ་རྩ་བརྒྱད་འབྱུང་བའི་རྒྱུ་མཚན་ཡང་དེར་སྣང་ངོ་།  ༼༧༩༽།  དགེ་སློང་སྡོམ་པ་མ་ཐོབ་པར། །མཁན་པོ་བྱས་པས་ཆོག་པ་ཞིག །འདུལ་བའི་མདོ་དང་ལུང་དག་ཏུ། །གསལ་བར་
9-4-47a


གསུངས་པ་མ་ཡིན་ནམ། །ཞེས་པའི་ལན་ནི།  ལུང་ཞུ་བ་དང་།  མདོ་རྩར།  བསྙེན་པར་རྫོགས་པའི་སྡོམ་པ་མ་ཐོབ་པའམ།  ཐོབ་ཀྱང་ཉམས་པས་མཁན་པོ་བྱས་པའི་ཚེ་སྒྲུབ་བྱ་ལ་སྡོམ་པ་སྐྱེ་བར་
གསུངས་མོད།  དེ་གཞུང་འདི་དང་མི་འགལ་ཏེ།  གཞུང་འདིར།  དགེ་སློང་སྡོམ་པ་མ་ཐོབ་པར། །མཁན་སློབ་ལ་སོགས་བྱེད་པ་ནི། །གསང་སྔགས་མེད་པར་སྦྲུལ་གདུག་གི།  མགོ་ལས་རིན་ཆེན་ལེན་པ་ལྟར། །རང་
གཞན་བརླག་པའི་རྒྱུ་རུ་བས། །ཅེས་པ་ཙམ་ཞིག་གསུངས་ཀྱི་བསྒྲུབ་བྱ་ལ་སྡོམ་པ་མི་སྐྱེ་བར་མ་གསུངས་པའི་ཕྱིར་རོ། །འོ་ན་རང་གཞན་ལ་གནོད་པ་ཇི་ལྟར་འགྱུར་སྙམ་ན།  དགེ་སློང་མ་ཡིན་བཞིན་དུ་མཁན་པོ་བྱས་པས་རང་ལ་ཉེས་པ་
ཆེན་པོ་འབྱུང་ཞིང་།  བསྒྲུབ་བྱ་ལ་སྡོམ་པ་ཕུན་ཚོགས་མི་སྐྱེ་བས།  དེ་ལ་ཡང་གནོད་པའི་ཕྱིར་རོ། །འདི་ཡང་དོགས་གཅོད་དགོས་པའི་དྲི་བ་སྣང་སྟེ།  བཞི་རྫོགས་སོ།  ༼༨༠༽།  ཁ་འབར་མ་ཡི་གཏོར་མ་ལ། །དེ་བཞིན་གཤེགས་པ་
བཞི་ཡི་མཚན། །སྔོན་ལ་བརྗོད་པ་མི་འཐད་ན། །རྗེ་བཙུན་གྲགས་པས་མཛད་དེ་ཅི། །ན་མཿསརྦ་ཏ་ཐཱ་སོགས་། །དེ་བཞིན་གཤེགས་པ་ཐམས་ཅད་ལ། །ཕྱག་འཚལ་བ་ཡི་ཚིག་མིན་ནམ། །ཞེས་པའི་ལན་ནི།  རྗེ་བཙུན་
གྲགས་པས་མཛད་པའི་དེ་འདྲ་བ་ནི་ས་སྐྱ་བཀའ་འབུམ་ན་ནི་མི་བཞུགས་གང་དུ་གཟིགས་ལགས་སམ།  སྔགས་དོན་གྱི་སྒོ་ནས་སུན་འབྱིན་བརྗོད་པ་ནི།  བསྟན་བཅོས་རྩོམ་པ་པོ་འདིས་ཁ་འབར་མའི་གཏོར་མ་གཏོང་བའི་གང་ཟག་དེ་ཡིན་ན།
9-4-47b


  ཚེ་རབས་འཁོར་བ་ཐོག་མ་མ་མཆིས་པ་ནས་ཐ་མ་ད་ལྟ་ལ་ཐུག་གི་བར་དུ་དེ་བཞིན་གཤེགས་པ་ལ་ཕྱག་འཚལ་ལོ། །ཞེས་པའི་ཚིག་བརྗོད་མ་མྱོང་བ་ཅིག་དགོས་ཞེས་གསུང་པ་ཨེ་ཡིན་པ་འདུག །འདི་འདྲའི་རིགས་ཅན་ནི།  མགོ་བོ་མཇུག་མ་
ལ་གཏགས་ནས། །ཐུར་དུ་འཕྱང་བ་མི་འཐད་ན། །ཕོ་མཚན་མགོ་བོ་མཇུག་མ་ལ། །ཐུར་དུ་འཕྱང་པའི་རྒྱུ་མཚན་ཅི། །ཞེས་པ་དང་འདྲ་བར་སྣང་སྟེ། སྔར་གྱི་དེ་བཞིན་གཤེགས་པ་དེ་གཉིས་གཅིག་ན་འདིའི་མགོ་བོ་དེ་གཉིས་ཀྱང་
གཅིག་པར་འགྲུབ་པའི་ཕྱིར་རོ། །ཚིག་འདི་ཅུང་མི་མཛེས་ཙམ་དུ་འདུག་ནའང་དེ་འདྲའི་རིགས་ཅན་ལ་འདི་འདྲའི་རིགས་ཅན་ཞིག་འཚམས་པ་ཡིན་ནོ།  ༼༨༡༽།  སྨན་པའི་རྒྱལ་པོའི་མདོ་གང་དེ། །མདོ་རྒྱུད་གཉིས་ཀྱི་ཟླས་ཕྱེ་བའི། །མདོ་རུ་བཞེད་དམ་
རྒྱུད་དུ་དྲངས། །དང་པོ་ལྟར་ན་དེ་ལས་ནི། །སྔགས་ཀྱི་ཆོ་ག་འབྱུང་བ་ཅི། །གཉིས་པ་ལྟར་ན་སྐབས་ཀྱི་ནི། །རྩོད་པའི་ལན་དུ་ཇི་ལྟར་འགྱུར། །ཞེས་པའི་ལན་ནི།  གཞུང་ལས་བཤད་པའི་རྩོད་པའི་ལན་ནི།  སངས་རྒྱས་ཡིན་ན་
སྐུ་མདོག་སེར་པོ་ཡིན་པས་མ་ཁྱབ་སྟེ།  སྨན་བླ་སྐུ་མདོག་སྔོན་པོར་མདོ་ལས་གསུངས་པའི་ཕྱིར།  ཞེས་པ་ཡིན་ལ།  སྨན་བླའི་མདོ།  མདོ་རྒྱུད་གཉིས་ཀྱི་ཟླས་ཕྱེ་བའི་རྒྱུད་དུ་ཁས་བླངས་ན་འདི་སྐབས་ཀྱི་རྩོད་པའི་ལན་དུ་མི་འགྲོ།  ཅེས་
པའི་རྒྱུ་མཚན་གཞན་ནི་མི་སྣང་ལ།  མདོ་ཡིན་ན།  མདོ་རྒྱུད་གཉིས་ཀྱི་ཟླས་ཕྱེ་བའི་རྒྱུད་མ་ཡིན་དགོས་ཅེས་པའི་དོན་ཡིན་ན་ནི།  དཔུང་བཟང་གི་རྒྱུད་ཆོས་ཅན།  དེར་ཐལ།  དེའི་ཕྱིར།  གཏན་ཚིགས་གྲུབ་སྟེ།  རྒྱུད་དེ་ཉིད་ལས། 
9-4-48a


 གསང་སྔགས་མདོ་སྡེའི་ཚུལ་གྱིས་བཤད་ཀྱིས་ཉོན། །ཅེས་གསུངས་པའི་ཕྱིར།  རྣམ་འཇོམ་ཀྱི་རྒྱུད་ཆོས་ཅན།  དེར་ཐལ།  དེའི་ཕྱིར།  གཏན་ཚིག་གྲུབ་སྟེ།  མདོ་སྡེ་འདི་ནི་མཉན་བྱས་ན། །
ཞེས་གསུངས་པའི་ཕྱིར།  གཞན་ཡང་ཆོས་ཡིན་ན།  སྐྱེ་མཆེད་དྲུག་གི་ཟླས་ཕྱེ་བའི་དང་པོ་ལྔ་གང་རུང་མ་ཡིན་དགོས་པར་ཐལ་བ་དང་།  གཟུགས་ཡིན་ན།  ཡུལ་ལྔའི་ཟླས་ཕྱེ་བའི་སྒྲ་མ་ཡིན་དགོས་པར་ཐལ་བ་སོགས་སྤྱི་མིང་
བྱེ་བྲག་ལ་བཏགས་པ་ཐམས་ཅད་ལ་མཚུངས་ཤིང་།  ཟླས་ཕྱེ་བ་ཅེས་པའི་ཚིག་ལ་ནུས་པ་ཡང་མེད་པར་འགྱུར་རོ།  ༼༨༢༽།  ལྟུང་བཤགས་སྔགས་ལུགས་མི་བཞེད་ན། །བསྟན་བཅོས་མཛད་པ་འདི་ཉིད་ཀྱིས། །སངས་རྒྱས་
སུམ་ཅུ་རྩ་ལྔ་པོ། །རིགས་ལྔར་བསྡུས་པ་ཅི་ལྟར་ཡིན། །ཅེས་པའི་ལན་ནི།  མཆོག་གི་སྤྲུལ་སྐུའི་ཆ་ལུགས་ཅན་གྱི་སངས་རྒྱས་ཐམས་ཅད་ལ།  རིགས་ལྔའི་ཁ་དོག་དང་ཕྱག་རྒྱ་གང་སྦྱར་ཀྱང་ཆོག་པ་ཙམ་ཞིག་གསུངས་ཀྱི་སངས་རྒྱས་སུམ་
ཅུ་རྩ་ལྔ་ལ་རིགས་ལྔའི་རིགས་སོ་སོར་ཕྱེ་བ་བསྟན་བཅོས་མཛད་པ་པོ་འདིས་གསུངས་པ་གང་ན་ཡང་མེད་ཅིང་བཞེད་པ་ཡང་མ་ཡིན་ནོ། །སྤྱིར་ཕྱག་འཚལ་བའི་ཡུལ་ལ་རིགས་ལྔ་ཚང་བ་ཙམ་གྱིས་གཞུང་འདི་སྔགས་ལུགས་ཡིན་དགོས་ན། 
བཟང་སྤྱོད་དང་།  བྱམས་སྨོན་ཡང་སྔགས་ལུགས་སུ་འགྱུར་ཏེ།  ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །ཞེས་སོགས་དང་།  སངས་རྒྱས་ཀུན་ལ་ཕྱག་འཚལ་ལོ། །ཞེས་ཕྱག་འཚལ་བའི་ཡུལ་ལ་རིགས་ལྔ་ཚང་བའི་ཕྱིར་རོ། 
9-4-48b


 ༼༨༣༽།  ཤེར་སྙིང་སྔགས་སུ་བཀྲལ་བའི་ལུགས། །ཀླུ་སྒྲུབ་ཉིད་ཀྱིས་མ་མཛད་དམ། །ཤེར་རབ་ཕ་རོལ་ཕྱིན་པ་ཉིད། །སྔགས་ཀྱི་ལྷ་རུ་གསུངས་མིན་ནམ། །ཤེར་སྙིང་སྔགས་ལུགས་མི་བཞེད་ན། །ཤེར་སྙིང་སྔགས་ལུགས་སྲིད་
པ་ཅི། །ཅེས་པའི་ལན་ནི།  བསྟན་བཅོས་རྩོམ་པ་པོ་འདི་ཉིད་ཀྱིས།  འདི་མཐའ་འདི་ཙམ་ཁོ་ནར་གནས་སོ་ཞེས། །དེ་མཐའ་དེ་ཙམ་ཁོ་ནར་རྣམ་བརྟགས་ན། །འགྲོ་བའི་བླ་མའི་གསུང་ལས་བརྒལ་བ་སྟེ། །དེས་ན་མཐའ་མིན་
དགོངས་པ་དཔྱད་པར་བྱ། །ཞེས་གསུངས་པ་ལྟར།  སངས་རྒྱས་བཅོམ་ལྡན་འདས་ཀྱི་གསུང་རབ་གཅིག་ཉིད་ཀྱི་སྟེང་དུ་ཡང་སངས་རྒྱས་ནས་དངོས་སུ་བརྒྱུད་པའམ། ཡེ་ཤེས་ཀྱི་མཁའ་འགྲོ་མ་ལས་ཐོབ་པའི་གྲུབ་ཆེན་གྱི་མན་ངག་
ཡོད་ན་སྔགས་སུ་བཀྲལ་དུ་རུང་ལ།  འོན་ཀྱང་དེང་སང་མདོ་རྒྱུད་གཉིས་སུ་ཕྱེ་བ་ནི་གཞུང་དེར་ལྷ་བསྒོམ་པ་དང་།  སྔགས་བཟླ་བ་ལ་སོགས་པའི་ཆོ་ག་ཡོད་མེད་ཀྱི་སྒོ་ནས་ཕྱེ་བའོ། །དེས་ན་ཤེར་སྙིང་དང་།  དཔལ་མཆོག་ཤེར་དུམ་རྣམས། 
དེང་སང་མདོ་རྒྱུད་ཀྱི་ཟླས་ཕྱེ་བའི་མདོ་ཡིན་ཀྱང་སྔར་བཤད་པ་ལྟར་གྱི་མན་ངག་ཡོད་པ་དག་གིས་སྔགས་སུ་བཀྲལ་བ་མི་འགལ་ལོ། །འདིར་སྔགས་ལུགས་ཡིན་པ་འགོག་པ་ནི།  དེང་སང་མདོ་རྒྱུད་ཀྱི་ཟླས་ཕྱེ་བའི་རྒྱུད་ཡིན་པ་འགོག་པ་སྟེ།  ད་
དུང་གཞན་གྱི་བློ་ལ་ཤོང་བ་དཀའ་འོ།  ༼༨༤༽།  གསང་བ་འདུས་པའི་ལྷ་ཚོགས་ལ། །མདོ་ལུགས་ཆོ་ག་མི་སྲིད་ན། །སྤྱན་རས་གཟིགས་དང་འཇམ་དབྱངས་དང་། །ཕྱག་ན་རྡོ་རྗེ་ལ་སོགས་ལ། །མདོ་ལས་བྱུང་བའི་ཆོ་ག་ཞེས། །བྱ་བ་མཁན་
9-4-49a


ཆེན་ཞི་བ་འཚོས། །འཆད་པའི་དགོས་པ་ཅི་ཡིན་གྲང་། །ཞེས་པའི་ལན་ནི།  འདྲི་བ་པོའི་བསམ་པ་བླངས་པ་དང་།  མགོ་མཚུངས་ཀྱི་དྲི་བས་དོགས་པ་དཔྱད་པ་གཉིས།  དང་པོ་ནི།  སྤྱན་རས་གཟིགས།  
འཇམ་དབྱངས།  ཕྱག་རྡོར་གསུམ་པོ་གསང་བ་འདུས་པའི་ལྷ་སྣམ་ལ་བཀོད་པའི་ལྷ་ཡིན་པས་མདོ་ལུགས་ཀྱི་ཆོ་ག་མི་སྲིད་པ་འགྱུར་ཞིང་།  དེ་འདོད་ན།  སྨན་བླའི་མདོ་ཆོག་གི་ནང་དུ་དེ་གསུམ་ལ་ཕྱག་འཚལ་བའི་ཆོ་ག་ཞི་བ་འཚོས་མཛད་པ་
ཅི་ཡིན་ཅེས་པར་སྣང་ངོ་། །གཉིས་པ་ནི།  འདི་འདྲ་བའི་རིགས་ཅན་མཚན་ཉིད་པའི་བློ་གསར་པ་རྣམས་ལ་ཤེས་བྱ་སྒོག་གཏུན་མར་གྲགས་ལ།  དེ་ཡང་མཚོན་ན།  རྒྱལ་པོའི་ཕོ་བྲང་ཁང་བཟང་ལ། །ཆུ་ཐགས་ཁང་པ་མི་སྲིད་ན། །
ཀ་བ་དང་ནི་ཀ་ཞུ་དང་། །ལྕམ་དང་དྲལ་མ་ལ་སོགས་པ། །ཆུ་ཐགས་པ་ཡི་ཁང་པ་ལའང་། །བཀོད་པར་མཐོང་བ་འདི་ཅི་ཞིག །ཅེས་པར་དྲིས་ཏེ་དེའི་ལན་བྱུང་ན་སྒྲོ་འདོགས་ཆོད་པར་འགྱུར་རོ།  ༼༨༥༽།  རྡོ་རྗེ་སློབ་མའི་དབང་ཙམ་
ཞིག །ཐོབ་པས་རབ་གནས་མི་རུང་ན། །ལྷ་བསྒོམ་པ་ནས་བརྟན་བཞུགས་བར། །རབ་གནས་དངོས་གཞིར་བཤད་པ་དང་། །འགལ་བའི་དོགས་པ་མི་འབྱུང་ངམ། །ཞེས་པའི་ལན་ནི།  འདིར་རྡོ་རྗེ་སློབ་མའི་དབང་ཙམ་ཞིག །
ཐོབ་པས་རབ་གནས་མི་རུང་ཞེས་པའི་དོན།  རབ་ཏུ་གནས་པར་བྱ་བའི་རྟེན་ལ་རྒྱུད་ནས་གསུངས་པའི་རབ་གནས་ཀྱི་ཆོ་ག་མི་རུང་ཞེས་པའི་དོན་ཡིན་ཅིང་།  ཁྱེད་ཀྱི་འདི་ནི་བདག་བསྐྱེད་དང་མདུན་བསྐྱེད་ཙམ་གྱི་ལྷ་སྒོམ་སོགས་ལ་བསམ་པར་སྣང་
9-4-49b


བས་འགལ་བའི་དོན་མེད་དོ།  ༼༨༦༽།  རྡོ་རྗེ་སློབ་དཔོན་མ་ཡིན་པས། །དབང་བསྐུར་རབ་གནས་མི་རུང་ན། །བྱ་སྤྱོད་གཉིས་ཀྱི་དབང་བསྐུར་ཙམ། །ཐོབ་པས་དེ་དག་ཇི་ལྟར་རུང་། །རྒྱུད་སྡེ་དེ་དག་རང་རྐང་ལ། །རྡོ་རྗེ་སློབ་དཔོན་
དབང་བཞེད་དམ། །བཞེད་ན་རྒྱུད་གཞུང་གང་ལས་གསུངས། །ཅེས་པའི་ལན་ནི།  དེང་སང་འགའ་ཞིག །བྱ་སྤྱོད་གཉིས་ལ་རྡོ་རྗེ་སློབ་དཔོན་གྱི་དབང་མེད་པར་འདོད་པ་ལྟར་ན་འདིའི་ལན་ནི་མི་ཐེབས་ཅིང་།  ཁོ་བོས་ནི་རྒྱུ་མཚན་
འདི་ཉིད་སྒྲུབ་བྱེད་དུ་བཀོད་ནས་དེ་གཉིས་ལ་རྡོ་རྗེ་སློབ་དཔོན་གྱི་དབང་ཡོད་པར་སྡོམ་གསུམ་སྤྱི་དོན་དུ་བཤད་ཟིན་ཏོ། །འོ་ན་རྒྱུད་གཞུང་གང་གིས་སྟོན་སྙམ་ན།  དེ་ཡང་དེར་བཤད་ཟིན་ཏོ།  ༼༨༧༽།  བྱ་བའི་རྒྱུད་དུ་རིགས་ལྔ་ཡི། །དོན་མ་གྲུབ་ན་
རིགས་གསུམ་དང་། །ནོར་བུ་དང་ནི་རྒྱས་པའི་རིགས། །རྣམ་ལྔ་གསུངས་པ་གང་གི་དོན། །ཅེས་པའི་ལན་ནི།  དེ་དག་སྤྱིར་རིགས་ལྔའི་དོན་མ་ཡིན་ཏེ།  གལ་ཏེ་ཡིན་ན་རིགས་གསུམ་གྱི་དེ་བཞིན་གཤེགས་པའི་རིགས་རྣམ་སྣང་གི་རིགས་
སུ་འཇོག་པ་ལས་འོས་མ་འདས་ཤིང་ཁྱེད་རང་ཡང་དེ་ལྟར་བསམ་པར་སྣང་མོད།  དེའི་མཚན་གཞི་ཤཱཀྱ་ཐུབ་པ་གཙོ་འཁོར་གསུམ་པ་དང་།   འཇམ་དབྱངས་སོགས་སུ་གསུངས་པའི་ཕྱིར་རོ། །དེ་བཞིན་དུ་ནོར་བུའི་རིགས་ཀྱང་རིན་འབྱུང་གི་རིགས་མ་ཡིན་
ཞིང་།  རྒྱས་པའི་རིགས་ཀྱང་དོན་གྲུབ་ཀྱི་རིགས་མ་ཡིན་ཏེ།  མཚན་གཞི་ལས་ཤེས་སོ། །གལ་ཏེ་དེ་དག་ཡིན་དུ་ཆུག་ན་ཡང་།  བདག་ཉིད་ཆེན་པོ་འདིས་བྱ་རྒྱུད་ལ་རིགས་ལྔའི་དོན་མ་གྲུབ་པ་དང་།  སྤྱོད་རྒྱུད་ལ་དོན་གྲུབ་ཀྱང་ཐ་སྙད་མ་
9-4-50a


གྲུབ་པ་དང་།  རྒྱུད་སྡེ་གོང་མ་གཉིས་ལ་གཉིས་ཀ་གྲུབ་པར་གསུངས་པ་ནི་རྒྱུད་སྡེ་རང་རང་གི་ནང་སེལ་གྱི་དབྱེ་བ་ལ་རིགས་དེ་དག་སོ་སོར་སྟོན་པའི་རྒྱུད་ཡོད་མེད་ཀྱི་དོན་གཏན་མ་ཡིན་གྱི།  དཀྱིལ་འཁོར་གྱི་ལྷ་ལ་དེ་ལྟར་
བཀོད་པ་ཡོད་མེད་ཀྱི་དོན་ཡིན་ཏེ།  བྱ་རྒྱུད་ཀྱི་དཀྱིལ་འཁོར་གྱི་གཙོ་བོ་རིགས་གསུམ་སྤྱིའི་དཀྱིལ་འཁོར་ལ་རིགས་གསུམ་ཁོ་ན་བཀོད་པ་དང་།  སྤྱོད་རྒྱུད་ཨ་ར་པ་ཙ་ན་ལྷ་ལྔ་ལྟ་བུ་ལ་རིགས་ལྔའི་དོན་བཀོད་པ་དང་།  ཡོ་ག་དེ་ཉིད་འདུས་པ་དང་། 
བླ་མེད་གསང་བ་འདུས་པ་ལྟ་བུ་ལ་རིགས་ལྔ་དངོས་སུ་བཀོད་པ་ལྟ་བུའོ། །ཤེས་པར་འདོད་ན་ཕན་ཐོགས་པར་གྱུར་ཅིག  ༼༨༨༽།  ཛེ་ཏ་རི་པའི་ཚེ་དཔག་མེད། །ལྷ་དགུ་རྒྱུད་སྡེ་གང་གི་ལུགས། །ཅེས་པའི་ལན་ནི།  གྲུབ་ཆེན་དེས་བདག་
སྐྱེད་ལ་དཔའ་བོ་གཅིག་པ་དང་།  མདུན་སྐྱེད་ལ་ལྷ་དགུ་སྐྱེད་ནས་ཡེ་ཤེས་འཁོར་ལོ་དགུག་གཞུག་བྱས།  ཆོ་ག་ཚར་ནས་ཡེ་ཤེས་པ་གཤེགས་སུ་གསོལ་བའི་ཚུལ་གསུངས་པས་བསྟན་བཅོས་འདི་དང་།  རྗེ་བླ་མ་ཐམས་ཅད་མཁྱེན་པའི་བྱ་
རྒྱུད་སྤྱི་རྣམ་གཉིས་ཆར་ལས་བྱ་རྒྱུད་རྣལ་འབྱོར་གྱི་རྒྱུད་ལྟར་བཀྲལ་བའི་ལུགས་ཡིན་པར་གསུངས་སོ།  ༼༨༩༽།  རིགས་ལྔ་སེར་འབྱམ་མི་འཐད་ན། །དམར་འབྱམ་འཐད་པ་དཀའ་བའི་གནས། །ཅེས་པའི་ལན་ནི།  གཞུང་ལས།  བྱང་ཆུབ་
མཆོག་གི་ཕྱག་རྒྱ་སོགས། །མཛད་པའི་རིགས་ལྔ་སེར་འབྱམ་མཐོང་། །ཞེས་པ་ཕྱོགས་སྔར་མཛད་ནས་དེའི་ཕ་རོལ་ཏུ་ཕྱིན་པའི་ཐེག་པ་ནས་བཟུང་སྟེ།  དུས་ཀྱི་འཁོར་ལོའི་བར་གང་གི་ཡང་དགོངས་པ་མ་ཡིན་ཞེས་གསུངས་ཀྱི།  སྤྱིར་ཛེ་ཏ་
9-4-50b


རིས་བཀྲལ་བའི་ཚེ་དཔག་མེད་ལྟ་བུ་རིགས་ལྔ་དམར་འབྱམ་དང་།  བདག་མེད་མའི་ནང་གི་རྣལ་འབྱོར་མ་ལྔ་ལྟ་བུ་རིགས་ལྔ་ནག་འབྱམ་དང་།  སྤྱོད་རྒྱུད་ཀྱི་རིགས་ལྔ་ཇོ་བོ་ནས་བརྒྱུད་པ་དག་དཀར་འབྱམ་དུ་བཞེད་ཅིང་རྗེ་བཙུན་གྱིས་ཀྱང་དེ་རུང་བར་
བཞེད་པ་སོགས་མ་བཀག་སྟེ།  དེ་དག་ལ་བྱང་ཆུབ་མཆོག་གི་ཕྱག་རྒྱ་སོགས་ཡོ་ག་ནས་བཤད་པ་ལྟར་མེད་པའི་ཕྱིར་རོ།  ༼༩༠༽།  སྤྱོད་པའི་རྒྱུད་ལ་རིགས་ལྔ་ཡི། །དོན་གྲུབ་ན་ནི་པདྨའི་རིགས། །རྒྱུད་གཞུང་གང་གི་དོན་ཅེས་དྲི། །ཅེས་
པའི་ལན་ནི།  རྒྱུད་སྡེ་སོ་སོའི་སྟོན་ཚུལ་དང་དཀྱིལ་འཁོར་ལ་དགོད་པའི་ཁྱད་པར་སྔར་བཤད་པ་དེ་ཉིད་ཀྱིས་ལན་འབད་མེད་དུ་གྲུབ་བོ། །ཚར་རོ། །ཐལ་ལོ། །སོང་ངོ་།  ༼༩༡༽།  རྣལ་འབྱོར་རྒྱུད་ཀྱི་ཀུན་རྫོབ་ཀུན། །ལྷ་རུ་གསུངས་པ་
མེད་གྱུར་ན། །རྣལ་འབྱོར་རྒྱུད་དང་སེམས་ཙམ་པའི། །གྲུབ་མཐའ་བསྟུན་པ་ཇི་ལྟར་ཡིན། །ཞེས་པའི་ལན་ནི།  འདྲི་བ་པོའི་བསམ་པ་བླངས་ཏེ།  དེའི་ལན་གྱི་སྒོ་ནས་སྡེ་སྣོད་དང་གནད་ཀྱི་དོན་ལ་ངེས་པ་བསྐྱེད་པ་དང་།  འདྲི་བ་པོའི་དོགས་པ་སྐྱེ་བའི་
གཞི་གཞུང་གཞན་ན་མེད་པའི་ཚུལ་གཉིས་ལས།  དང་པོ་ནི།  རྣལ་འབྱོར་རྒྱུད་དང་སེམས་ཙམ་པའི་གྲུབ་མཐའ་བསྟུན་ན་ཀུན་རྫོབ་ལྷ་རུ་ཁས་ལེན་དགོས་ཅེས་པའི་དོན།  སྣང་བ་སེམས་ཡིན་ཅིང་།  སེམས་དེ་ཉིད་ལྷར་བསྒོམས་པས་དེ་ལས་ལོགས་
སུ་གྱུར་པའི་ཀུན་རྫོབ་མེད་པའི་ཕྱིར་སྙམ་དུ་བསམ་པར་སྣང་མོད།  དེའི་ཚེ་ཡང་སེམས་ཀྱི་རང་ལྡོག་ནི་ལྷར་བསྒོམ་པ་མ་ཡིན་ཏེ།  སེམས་དང་ལྷ་གཉིས་སྦྱང་གཞི་སྦྱོང་བྱེད་སྦྱོར་བ་མེད་པའི་ཕྱིར་རོ། །སེམས་ཀྱིས་ལྷ་བསྒོམས་པ་ནི་ཐབས་ཀྱི་ཁྱད་པར་
9-4-51a


ཡིན་པས་ཀུན་རྫོབ་ཀྱི་རང་ལྡོག་ལྷར་མི་བསྒོམ་པའི་གནད་འདི་ཉིད་ཡིན་ནོ། །གཉིས་པ་ནི་རྣལ་འབྱོར་རྒྱུད་དང་།  སེམས་ཙམ་པའི་གྲུབ་མཐའ་བསྟུན་པ་ཚད་མར་ཁས་བླངས་དགོས་པའི་གཞུང་ལུགས་
གང་ན་འདུག །རྗེ་བཙུན་རྩེ་མོའི་རྒྱུད་སྡེ་སྤྱི་རྣམ་ན་ཡོད་དོ་ཅེ་ན།  འདི་ལ་སྔོན་གྱི་མཁས་པ་དག་ཀྱང་བརྟགས་དཔྱད་ཞིབ་མོ་མ་མཛད་པར་རང་སངས་རྒྱས་དང་སེམས་ཙམ་པ་གྲུབ་མཐའ་གཅིག་པ་མི་འཐད་ཅེས་དགག་པ་དག་མཛད་པ་དང་།  དེང་
སང་ཡང་འདིའི་རྗེས་སུ་འབྲང་བ་དག །མཚན་ཉིད་ཀྱི་གྲུབ་མཐའ་བཞི་དང་།  རྒྱུད་སྡེ་བཞི་སྦྱར་ཞེས་པའི་ཚིག་ཙམ་ལ་བརྟེན་ནས་རྣལ་འབྱོར་རྒྱུད་དང་།  སེམས་ཙམ་པའི་གྲུབ་མཐའ་སྦྱར་བ་རང་ལུགས་སུ་ཁས་ལེན་པ་སྣང་མོད་ཀྱི།  
རྗེ་བཙུན་གྱི་གསུང་རབ་དེར་ནི་སེམས་ཙམ་པ་དང་དབུ་མའི་གྲུབ་མཐའ་གཉིས་ཀ་བླ་མེད་དང་བསྟུན་པ་ཡོད་པ་ལ་ཞིབ་ཏུ་ལྟོས་ཤིག  ༼༩༢༽།  དམ་པ་རིགས་བརྒྱར་ཕྱེ་བའི་ཚེ། །ཀུན་རྫོབ་ལྷ་རུ་ཁས་ལེན་ན། །རྡོ་རྗེ་རྩེ་མོའི་རྒྱུད་
ལས་ནི། །རིགས་ལྔ་རེ་རེའང་རིགས་ཆུང་ལྔ། །རེ་རེ་ལ་ཡང་སྙིང་པོ་དང་། །ཕྱག་རྒྱ་ལ་སོགས་བཞིར་ཕྱེ་བའི། །རིགས་བརྒྱ་ཡིན་ཞེས་གསུངས་པ་ཅི། །ཞེས་པའི་ལན་ནི།  བསྟན་བཅོས་འདིར།  རྣལ་འབྱོར་ཆེན་པོའི་རྒྱུད་སྡེ་ལས། །
ཀུན་རྫོབ་ཅི་ལྟར་སྣང་བ་འདི། །ཐབས་ལ་མཁས་པའི་ཁྱད་པར་གྱིས། །སྦྱང་གཞི་སྦྱོང་བྱེད་ངོ་སྤྲད་པ། །དེ་ཚེ་དམ་པ་རིགས་བརྒྱ་ལ། །སོགས་པའི་དབྱེ་བ་རྒྱལ་བས་གསུངས། །ཞེས་གསུངས་པ་ལ་ཁྱེད་ཀྱིས།  རྣལ་འབྱོར་རྒྱུད་ཆོས་
9-4-51b


ཅན།  ཀུན་རྫོབ་ལྷ་རུ་ཁས་ལེན་པར་ཐལ།  དམ་པ་རིགས་བརྒྱར་ཕྱེ་བའི་ཕྱིར།  ཞེས་པ་འདིའི་འཐུར་ཁྱབ་ཀྱི་སྟེང་དུ་དངོས་འགལ་ཀྲིག་གེ་སོང་འདུག་གོ།  སྤྱིར་ཡང་ཀུན་རྫོབ་ལྷ་རུ་ཁས་བླངས་པའི་དམ་པ་རིགས་བརྒྱ་དང་།  རྡོ་རྗེ་རྩེ་མོ་ལས་
གསུངས་པའི་རིགས་བརྒྱ་དོན་མི་གཅིག་སྟེ།  སྔ་མའི་དོན་ནི་གསང་འདུས་ཀྱི་དགོངས་པ་སྤྱོད་བསྡུས་སྒྲོན་མེར་སྦྱང་གཞི་ཐ་མལ་པའི་དངོས་པོ་རིགས་བརྒྱར་ཕྱེ་ནས་དེ་སྦྱོང་བྱེད་གསང་བ་འདུས་པའི་ལྷ་རིགས་བརྒྱར་ཕྱེ་བར་གསུངས་པ་དང་།  ཀྱཻ་རྡོ་རྗེ་
ལས།  སྦྱང་གཞི་རྒྱུ་རྒྱུད་རིགས་བརྒྱར་ཕྱེ་ནས་སྦྱོང་བྱེད་བསྐྱེད་རིམ་གྱི་རིགས་བརྒྱ་དང་།  རྫོགས་རིམ་གྱི་རིགས་བརྒྱར་ཕྱེ་ཞིང་དེའི་འབྲས་བུ་འབྲས་རྒྱུད་ལ་ཡང་རིགས་བརྒྱར་ཕྱེ་བ་ཡིན་ལ།  རྒྱས་པར་ན་དེ་ཐམས་ཅད་ལ་ཡང་།  ཕྱེ་བའི་རིགས་
ལ་གྲངས་ནི་མེད་པར་འགྱུར། །ཞེས་པ་ལྟར་གྱི་རིགས་བརྒྱ་ཡིན་ཅིང་།  ཕྱི་མའི་དོན་ནི་སྦྱང་གཞི་སྦྱོང་བྱེད་སྦྱར་བ་མེད་པར་ཐབས་ཀྱི་ཁྱད་པར་གྱི་རིགས་བརྒྱ་ཡིན་པའི་ཕྱིར་རོ།  ༼༩༣༽།  རྒྱུད་སྡེ་བཞི་ཡི་བསྒྲུབ་པ་ཡང་། །འཁྲུལ་བར་བྱས་པས་ཐག་
རིང་ན། །བྱ་རྒྱུད་རྣལ་འབྱོར་རྒྱུད་བཞིན་དང་། །བླ་མེད་རྒྱུད་བཞིན་བསྒྲུབ་པ་ཡང་། །དངོས་གྲུབ་རིང་བར་འགྱུར་ལགས་སམ། །དེ་ལྟ་ན་ནི་ཀླུ་སྒྲུབ་དང་། །འཕགས་ལྷ་དཔལ་མོས་མཛད་དེ་ཅི། །ཞེས་པའི་ལན་ནི།  ཐོག་མར་ཁྱོད་ཉིད་
ལ་འདི་འདྲི་སྟེ།  རིགས་འཆོལ་བསྒོམ་པའི་སྦྱོར་བ་ལས། །དངོས་གྲུབ་མེད་ཅིང་སྒྲུབ་པོ་འང་། །མེད་པར་བརྟག་གཉིས་ལས་གསུངས་ན། །རྣམ་སྣང་རིགས་ལ་མི་བསྐྱོད་དང་། །མི་བསྐྱོད་རིགས་ལ་རྣམ་སྣང་གིས། །རྒྱས་
9-4-52a


བཏབ་ཚུལ་ལའང་དངོས་གྲུབ་དང་། །སྒྲུབ་པོ་མེད་པར་འགྱུར་ལགས་སམ། །དེ་ལྟ་ན་ནི་བརྟག་གཉིས་ལས། །རྒྱས་གདབ་ཚུལ་དེ་གསུངས་དེ་ཅི། །ཞེས་འདྲིའོ། །གལ་ཏེ་དེ་ཉིད་རིགས་མ་འཆོལ་
བ་ཡིན་ནོ་སྙམ་ན།  འོ་ན་གཞན་གྱིས་ཀྱང་དེ་ཉིད་བསྒྲུབ་པ་མ་འཁྲུལ་པ་ཡིན་ནོ་ཞེས་བརྗོད་པ་ཡོད་དོ། །རྒྱུ་མཚན་གང་བཀོད་ཀྱང་མཚུངས་ཏེ།  འདི་ལ་ཡང་རྗེ་བླ་མས་བྱ་བའི་རྒྱུད་འདི་རྒྱུད་ཐམས་ཅད་ཀྱི་གཞི་མ་ཡིན་པས་བྱ་རྒྱུད་རང་རྐང་གི་
ཆོ་ག་ལྟར་སྒྲུབ་པ་དང་།  རྒྱུད་སྡེ་གོང་མའི་ཆོ་ག་ལྟར་བསྒྲུབ་ཚུལ་འཕགས་ཡུལ་གྱི་བཤད་སྲོལ་དྲི་མ་མེད་པ་བཀོད་ཡོད་པ་རྣམས་ཤེས་དགོས་སོ།  ༼༩༤༽།  ཐེག་པ་མཆོག་གི་རྣལ་འབྱོར་པས། །བྱ་རྒྱུད་ཆོ་ག་ཇི་ལྟར་བྱ། །ཞེས་པའི་ལན་ནི།
རྗེ་བཙུན་གྲགས་པ་རྒྱལ་མཚན་གྱིས་རྩ་ལྟུང་འཁྲུལ་སྤོང་ལས།  རྩ་ལྟུང་བརྒྱད་པའི་སྐབས་སུ་གསལ་བར་གསུངས་ཡོད་པས་དེར་གཟིགས་ཤིག །དེ་ལ་ཡིད་མི་ཆེས་སོ་སྙམ་ན།  འོ་ན་འམ་བུས་ཞུས་པ་ལ་དེ་ལས་ཀྱང་ཐུགས་མི་ཆེས་སམ།  
ཧེ་ཧེ།  ༼༩༥༽།  ཕྱི་རོལ་ཡུལ་ཆེན་སོ་བདུན་ཞེས། །བྱ་བ་རྒྱུད་གཞུང་ག་ནས་བཤད། །འཛམ་གླིང་ཙམ་པོ་ཡུལ་ཆེན་དུ། །ཁས་ལེན་ནུས་ན་རང་ལ་ཡང་། །མི་འདོད་པ་དག་མི་འབྱུང་ངམ། །ཞེས་པའི་ལན་ནི།  སྤྱིར་ཕྱི་རོལ་གྱི་ཡུལ་
ཆེན་ཉི་ཤུ་རྩ་བཞིར་བཤད་པའི་ཚུལ་དང་།  སུམ་ཅུ་སོ་གཉིས་སུ་བཤད་པའི་ཚུལ་དང་།  སུམ་ཅུ་སོ་བདུན་དུ་བཤད་པའི་ཚུལ་གསུམ་ཡོད་པ་ལས།  དང་པོ་ནི་བདེ་མཆོག་དང་།  སཾ་བྷུ་ཊི་ལས་ཕ་རོལ་ཏུ་ཕྱིན་པའི་ཐེག་པ་དང་སྒོ་བསྟུན་པའི་
9-4-52b


དབང་དུ་བྱས་ནས་དངོས་བསྟན་ས་བཅུའི་རྣམ་བཞག་མཛད་པའི་སྐབས་ཡིན་པས་པུ་ལི་ར་མ་ལ་ཡ་ལ་སོགས་པ་ཉི་ཤུ་རྩ་བཞི་གསུངས་སོ། །གཉིས་པ་ནི།  རྩ་རྒྱུད་བརྟག་གཉིས་ལས།  སློབ་ལམ་ས་བཅུ་གཉིས་ཀྱི་རྣམ་གཞག་
མཛད་པའི་དབང་དུ་བྱས་ནས་ལེའུ་དང་པོར།  ནང་རྡོ་རྗེའི་ལུས་ལ་རྩ་སུམ་ཅུ་རྩ་གཉིས་དང་།  ལེའུ་བདུན་པར།  ཕྱི་རོལ་གྱི་ཡུལ་ཆེན་སུམ་ཅུ་རྩ་གཉིས་གསུངས་སོ། །གསུམ་པ་ནི།  དེའི་སྟེང་དུ་རི་ཀི་ཨ་ར་ལིའི་རྒྱུད་ལས།  གནས་ནི་
ཤར་གྱི་ལུས་འཕགས་པོ། །དེ་བཞིན་དུ་ནི་བ་ལང་སྤྱོད། །གནས་ནི་བྱང་གི་སྒྲ་མི་སྙན། །གནས་ནི་དེ་བཞིན་འཛམ་བུ་གླིང་། །གླིང་བཞིར་ལྷ་མོ་བཞི་དང་་ནི། །རི་རབ་སྤྱི་བོར་རི་ཀི་བཞུགས། །ཨ་ར་ལི་དང་མཉམ་སྦྱོར་བས། །
ཅེས་གླིང་བཞི་དང་རི་རབ་དང་ལྔ་གསུངས་པ་སུམ་ཅུ་རྩ་བདུན་དུ་འགྱུར་ལ།  འགྲེལ་ཆེན་དྲི་མེད་འོད་ལས།  གནས་ནི་ཕྱོགས་བཞིར་རླུང་དང་།  མེ་དང་།  ཆུ་དང་།  སའི་རང་བཞིན་གྱིས་གནས་པ་སྟེ་ཤར་གྱི་ལུས་འཕགས་དང་འཛམ་བུ་གླིང་ཆུང་ངུ་དང་།
བྱང་གི་སྒྲ་མི་སྙན་དང་།  ནུབ་ཀྱི་བ་ལང་སྤྱོད་ཅེས་གསུངས་ལ།  འདི་ལ་གླིང་བཞི་གཅིག་ཏུ་སྡོམ་པ།  གཅིག་ཏུ་བགྲང་དགོས་པར་མཁས་པ་ཁ་ཅིག་བཞེད་དོ། །རྒྱུད་དང་འགྲེལ་པ་འདི་གཉིས་ཀྱི་ལུགས་ལ་ཡུལ་སུམ་ཅུ་སོ་གཉིས་ཀྱི་སྟེང་དུ་འདི་དག་
བསྣན་པས་སོ་བདུན་དུ་འགྱུར་བ་ནི་མིན་ཏེ།  སྔ་མར་གནས་དང་ཉེར་གནས་སོགས་བཅུ་གསུངས་པའི་གནས་ཀྱི་དབྱེ་བ་དང་།  ཕྱི་མར་གནས་དང་ཉེ་བའི་གནས།  ཞིང་དང་ཉེ་བའི་ཞིང་།  འདུན༷་པ་དང་ཉེ་བའི་འདུན༷་པ།  འདུས་པ་ཅན་དང་ཉེ་བའི་འདུས་
9-4-53a


པ་ཅན།  ཁང་པ་དང་ཉེ་བའི་ཁང་པ།  དུར་ཁྲོད་དང་ཉེ་བའི་དུར་ཁྲོད་སྟེ་བཅུ་གཉིས་གསུངས་པའི་གནས་ཀྱི་དབྱེ་བར་འདི་དག་གསུངས་པའི་ཕྱིར་རོ། །འོན་ཀྱང་རྩ་རྒྱུད་བརྟག་གཉིས་ལྟ་བུ་གནས་སོགས་བཅུ་གཉིས་ཀྱི་དབྱེ་བར་པུ་
ལི་ར་མ་ལ་ཡ་སོགས་སོ་གཉིས་གསུངས་པའི་ཚེ་སྔར་གྱི་ལྔ་པོ་དེ་དག་བསྣན་ནས་སོ་བདུན་དུ་ལེགས་པར་གྲུབ་སྟེ་སྔར་གྱི་རྒྱུད་འགྲེལ་གཉིས་ཀྱིས་དེ་དག་གནས་ཆེན་དུ་གྲུབ་ཅིང་།  སོ་གཉིས་སུ་མ་འདུས་པས་དེ་དག་བསྣན་དགོས་པར་སྒྲུབ་པའི་ཕྱིར་
དང་།  རྒྱུད་དེར་ལྷ་བཅུ་གསུམ་གྱི་ནང་མ་ལྔ་བཞུགས་པར་གསུངས་པས་ཀྱང་ཤེས་ནུས་པའི་ཕྱིར་རོ། །རྗེ་བཙུན་གྱིས་ཨིནྡྲ་བྷུ་ཏིའི་ལམ་སྐོར་དུ་གླིང་བཞི་གནས་ཆེན་དུ་གསུངས་པ་དེས་ཀྱང་གྲུབ་ཚུལ་སྔ་མ་དང་འདྲའོ། །དེར་ཡང་སོ་བདུན་དུ་བགྲངས་པའི་
སྐབས་ནི་མ་ཡིན་ཏེ།  ཉེར་བརྒྱད་ཀྱི་སྟེང་དུ་འདི་བཞི་བསྣན་པས་ས་བཅུ་གཉིས་པ་དང་སྦྱོར་བར་མཛད་པའི་ཕྱིར་རོ། །དེ་ལྟར་ན་འཛམ་གླིང་ཙམ་པོ་གནས་ཆེན་དུ་ཁས་བླངས་པས་རང་ལ་མི་འདོད་པ་དག་མི་འབྱུང་ངམ་ཞེས་པའི་དོན་ཏི་སེ་དང་།  ཙཱ་རི་
ཆོས་ཅན།  གནས་ཆེན་ཡིན་པར་ཐལ།  འཛམ་གླིང་ཙམ་པོའི་ཁོངས་སུ་འདུས་པའི་ཕྱིར།  ཞེས་པ་ཡིན་མཆི།  འདི་ལ་འཇིག་རྟེན་གྱི་དཔེ་བསྟན་པར་བྱ་སྟེ།  ས་སྐྱའི་ལྷ་ཁང་ཆེན་མོའི་མཐོང་ཁུངས་ཀྱི་དཀྱིལ་གྱི་རྟེན་འབྲེལ་ཁང་པ་དེ་ཆོས་ཅན། 
གཙུག་ལག་ཁང་ཡིན་པར་ཐལ།  ལྷ་ཁང་ཆེན་མོའི་ཁོངས་སུ་འདུས་པའི་ཕྱིར།  མ་ཁྱབ་ན་ལྷ་ཁང་ཆེན་མོ་གཙུག་ལག་ཁང་དུ་ཁས་མི་ལེན་པ་ལགས་སམ།  དེ་བཞིན་དུ་བསྟན་བཅོས་ཀྱི་བརྡ་ཆད་ལ་ཡང་སྤྱི་ཙམ་དང་ཁོངས་སུ་འདུས་པའི་རྣམ་གཞག་
9-4-53b


མི་འདྲ་བ་མང་སྟེ།  མི་མཇེད་འཇིག་རྟེན་གྱི་ཁམས་འདི་ཆོས་ཅན།  འོག་མིན་སྟུག་པོ་བཀོད་པའི་ཞིང་ཁམས་ཡིན་པར་ཐལ།  དེའི་ཁོངས་སུ་འདུས་པའི་ཕྱིར་ཏེ།  དེར་བཞུགས་པའི་རྣམ་པར་སྣང་མཛད་གང་ཆེན་མཚོའི་ཕྱག་མཐིལ་ན་ཡོད་པའི་
ཕྱིར་རོ། །དེ་ལས་གཞན་པའི་མི་འདོད་པ་འབྱུང་བ་ནི་མ་མཐོང་ངོ་།  ༼༩༦༽།  མ་ཕཾ་མ་དྲོས་མིན་གྱུར་ན། །གཾ་གཱའང་དེ་ཉིད་མིན་པར་འགྱུར། །ཞེས་པའི་ལན་ཡང་འདོན་དགོས་སོ། །ཞེས་པའི་ལན་ནི།  ལེགས་པར་འདོན་ཏེ། དེ་ཉིད་མ་
ཡིན་པར་འགྱུར་ཞེས་བྱ་བའི་དོན་མ་དྲོས་དེ་ཉིད་མིན་པར་འགྱུར།  ཞེས་པའི་དོན་ཡིན་ནམ།  གཾ་གཱ་དེ་ཉིད་མིན་པར་འགྱུར། །ཞེས་པའི་དོན་ཡིན།  དེ་ལས་གཞན་པ་ནི་ཡོང་དོན་མི་འདུག་གོ།  དང་པོ་ལྟར་ན་ཨ་ལ་ལ་ཧོ། །ཤིན་ཏུ་ཞིམ་པར་གྱུར་ཏོ། །
ཕྱི་མ་ལྟར་ན་གཾ་གཱ་གཾ་གཱ་མ་ཡིན་པར་ཐལ།  མ་ཕཾ་མ་དྲོས་མ་ཡིན་པའི་ཕྱིར།  ཞེས་པའི་ཐལ་འགྱུར་ལ་གཞན་དག་རྟ་རྟ་མ་ཡིན་པར་ཐལ།  བ་ལང་གཡག་མ་ཡིན་པའི་ཕྱིར།  ཞེས་གཏོང་ཉེན་ཡོད་དོ།  ༼༩༧༽།  མངོན་པ་ནས་གསུངས་གངས་
ཅན་དེ། །ཏི་སེ་ཡིན་པར་ཕྱོགས་སྔ་མས། །ཁས་བླངས་ཤམ་བྷཱ་ལ་ཡི་ནི། །གངས་ཅན་ཏི་སེར་མ་སྨྲས་པས། །རྩོད་ལས་འབྲེལ་པ་གང་ཡིན་བརྟག །རང་གི་ལུགས་ལ་མངོན་པ་ནས། །གསུངས་པའི་གངས་ཅན་རྒྱུད་སྡེ་ལས། །
བཤད་པའི་གངས་ཅན་དེར་བཞེད་དམ། །གཞན་ཡང་བདེ་མཆོག་ཀྱཻ་རྡོར་ལས། །གསུངས་པའི་གངས་ཅན་གང་ཡིན་པ། །ཤཾ་བྷ་ལ་ཡི་གངས་ཅན་དུ། །ངེས་པར་ཞལ་གྱིས་བཞེས་ནུས་སམ། །ཞེས་པའི་ལན་ནི།  སྐབས་འདིའི་རྩོད་ལན་
9-4-54a


གྱི་རྣམ་གཞག་བཤད་པ་དང་།  འབྲེལ་མེད་དུ་མི་འགྱུར་བའི་ཚུལ་དཔེས་བསྟན་པ་དང་།  གངས་ཅན་གྱི་འདོད་ཚུལ་མ་འདྲེས་པར་བཤད་པ་དང་གསུམ་གྱིས་རྟོགས་པར་བྱ་བ་ལས།  དང་པོ་ནི།  ཕ་རོལ་པོས་ད་ལྟའི་
ཏི་སེ་འདི་གསུང་རབ་ནས་བཤད་པའི་གངས་ཅན་དུ་འདོད་པ་ལ་བདག་ཉིད་ཆེན་པོ་འདིས་དེ་ནི་མ་ཡིན་ཏེ།  སྤྱིར་གངས་ཅན་ལ་དུས་འཁོར་ནས་བཤད་པ་དང་།  མངོན་པ་ནས་བཤད་པ་དང་།  མུ་སྟེགས་ཀྱི་གཞུང་ནས་བཤད་པ་དང་།  རྨ་བྱ་ཆེན་
མོའི་མདོ་ནས་བཤད་པ་དང་།  ཕལ་པོ་ཆེའི་མདོ་ལས་བཤད་པའི་ཚུལ་རྣམས་སུ་ངེས་པ་ལས།  དེ་དག་གང་ཡང་མ་ཡིན་ཏེ།  རེ་རེ་བཞིན་དུ་དེ་དག་གི་མཚན་ཉིད་མ་ཚང་བའི་ཕྱིར།  ཞེས་པའི་དོན་ཡིན་གྱི་མངོན་པ་ནས་བཤད་པའི་གངས་ཅན་
མ་ཡིན་ཏེ།  དུས་འཁོར་ནས་བཤད་པའི་གངས་ཅན་གྱི་མཚན་ཉིད་མ་ཚང་པའི་ཕྱིར།  ཞེས་པའི་དོན་ག་ལ་ཡིན་རྩོད་ལན་གྱི་ཚུལ་འདི་བཞིན་མ་ཤེས་ན་དོགས་པ་དེ་ནི་སྐྱེ་བ་ཡང་བདེན་ནོ། །གཉིས་པ་ནི་གངས་ཅན་དེ་དག་གཅིག་པའམ་མི་གཅིག་པ་
གང་ཡིན་ཀྱང་འདྲ།  རྩོད་ལན་གྱི་ཚུལ་འབྲེལ་མེད་དུ་མི་འགྱུར་ཏེ།  དཔེར་ན་ཕ་རོལ་པོས་ཏི་སེ་རི་རབ་ཡིན་པར་སྨྲས་པ་ལ་དེ་ནི་མ་ཡིན་ཏེ།  མངོན་པ་ནས་བཤད་པའི་རི་རབ་ཀྱི་མཚན་ཉིད་ཀྱང་མ་ཚང་།  བདེ་མཆོག་སོགས་ནས་བཤད་པའི་རི་རབ་
ཀྱི་མཚན་ཉིད་ཀྱང་མ་ཚང་།  དུས་འཁོར་ནས་བཤད་པའི་རི་རབ་ཀྱི་མཚན་ཉིད་ཀྱང་མ་ཚང་པའི་ཕྱིར།  ཞེས་པ་བཞིན་ནོ། །གསུམ་པ་ནི།  དུས་འཁོར་ནས་བཤད་པའི་གངས་ཅན་དང་།  མངོན་པ་ནས་བཤད་པའི་གངས་ཅན་གཏན་མི་གཅིག་སྟེ།
9-4-54b


  དེ་གཉིས་སྤྱིར་རི་རབ་དང་།  རི་གླིང་། རྒྱ་མཚོ་སོགས་ཀྱི་འཆགས་ཚུལ་གཏན་མི་གཅིག་པའི་ཕྱིར་དང་།  ཁྱད་པར་འཛམ་བུའི་གླིང་གི་འཆགས་ཚུལ་གཏན་མི་གཅིག་པའི་ཕྱིར་དང་།  དུས་འཁོར་ལས་གངས་ཅན་གྱི་འགྲམ་ན་ཤམ་བྷ་ལ་ཡོད་པར་
གསུངས་ལ།  མངོན་པ་ལས་ཤམྦྷ་ལ་ཁས་མི་ལེན་པའི་ཕྱིར་རོ། །གསང་སྔགས་གཞན་ནས་གསུངས་པའི་གངས་ཅན་ནི་མངོན་པ་ནས་གསུངས་པ་དང་གཅིག་ཏུ་ཁས་བླངས་དགོས་ཏེ།  རི་རབ་གླིང་བཞི་སོགས་ཀྱི་འཆགས་ཚུལ་ཐམས་ཅད་
མངོན་པ་ནས་གསུངས་པ་དང་མཐུན་པར་རྣམ་གཞག་རིམ་པ་སོགས་ཚད་ལྡན་གྱི་གཞུང་ལུགས་མང་པོ་ལས་འབྱུང་བའི་ཕྱིར་རོ། །བློ་གཟུ་བོར་གནས་པ་རྣམས་ལ་ཕན་ཐོགས་པ་ཡོད་དོ།  ༼༩༨༽།  དེ་ནས་ཀླ་ཀློས་རྫུ་འཕྲུལ་གྱིས། །ཤམྦྷ་
ལ་རུ་དམག་འདྲེན་པའི། །བཤད་པ་གསལ་བོ་ག་ན་བཞུགས། །རིགས་ལྡན་དྲག་པོ་ཞེས་བྱ་བ། །ཕྱག་རྡོར་སྤྲུལ་པར་གང་དུ་བཤད། །ཅེས་པའི་ལན་ནི།  འདི་གཞན་དག་གི་ཁ་ཟེགས་བསྡུས་ནས་བཀོད་པར་སྣང་མོད།  འདི་བཞིན་
གསན་པར་ཞུ།  རིགས་ལྡན་དྲག་པོ་དེ་ཕྱག་རྡོར་གྱི་སྤྲུལ་པ་ཡིན་པ་ནི་དུས་འཁོར་རྩ་རྒྱུད་ལས་བཤད་དེ།  རིགས་ལྡན་དྲག་པོ་འཇམ་དབྱངས་གྲགས་པའི་སྤྲུལ་པ་ཡིན།  འཇམ་དབྱངས་གྲགས་པ་ཟླ་བ་བཟང་པོའི་སྤྲུལ་པ་ཡིན།  ཟླ་བ་
བཟང་པོ་ཕྱག་ན་རྡོ་རྗེའི་སྤྲུལ་པ་ཡིན་པར་དེར་བཤད་པའི་ཕྱིར་རོ། །གཏན་ཚིགས་དང་པོ་གྲུབ་སྟེ།  འགྲེལ་ཆེན་དྲི་མེད་འོད་དུ།  རྩ་རྒྱུད་ཀྱི་ལུང་དྲངས་པ་ལས།  རིགས་ལྡན་ཉི་ཤུ་རྩ་བཞི་པ་རྫོགས་པའི་རྗེས་སུ།  གྲགས་པ་རིགས་ལྡན་དེ་ནས་
9-4-55a


སླར། །དེ་སྲས་འཁོར་ལོ་ཆེན་པོ་ཅན། །རིགས་ལྡན་དྲག་པོ་འབྱུང་འགྱུར་ཏེ། །ཀླ་ཀློའི་ཆོས་ནི་མཐར་བྱེད་པའོ། །ཞེས་འཇམ་དབྱངས་གྲགས་པ་སླར་ཡང་རིགས་ལྡན་དྲག་པོར་སྤྲུལ་པར་བཤད་པའི་ཕྱིར་རོ། །
གཉིས་པ་གྲུབ་སྟེ།  དེ་ཉིད་ལས།  དེ་ཡི་ཟླ་བཟང་རྩ་རྒྱུད་ལས། །ཁྱོད་ནི་སྡུད་པར་བྱེད་པ་སྟེ། །འགྲེལ་བཤད་བྱེད་པ་པད་འཛིན་དང་། །ཞེས་བསྡུས་རྒྱུད་མཛད་པ་གྲགས་པ་དང་།  འགྲེལ་བཤད་མཛད་པ་པད་དཀར་གཉིས་
ཀ་ཡང་ཟླ་བ་བཟང་པོའི་སྤྲུལ་པར་བཤད་པའི་ཕྱིར་རོ། །གསུམ་པ་གྲུབ་སྟེ།  དེ་ཉིད་ལས།  ཕྱག་ན་རྡོ་རྗེ་ཟླ་བཟང་ཁྱོད། །ཞེས་གསུང་པའི་ཕྱིར་རོ། །གལ་ཏེ་རིགས་ལྡན་དྲག་པོ་ཆོས་ཅན།  ཕྱག་རྡོར་གྱི་སྤྲུལ་པ་མ་ཡིན་པར་ཐལ། 
འཇམ་དབྱངས་ཀྱི་སྤྲུལ་པ་ཡིན་པའི་ཕྱིར་སྙམ་ན།  དེ་ཉིད་འདུས་པར་གསུངས་པའི་རྡོ་རྗེ་རྣོན་པོ་ཆོས་ཅན།  དེར་ཐལ།  དེའི་ཕྱིར།  འདོད་ན།  དེ་ཉིད་སྣང་ཆེན་དུ།  སེམས་དཔའ་བཅུ་དྲུག་གི་བསྟོད་པ་ཚིགས་སུ་བཅད་པ་བཅུ་དྲུག་པ་དེ་ཉིད་ལ་
རྡོ་རྗེ་སེམས་དཔའམ་ཕྱག་ན་རྡོ་རྗེའི་མཚན་བརྒྱ་རྩ་བརྒྱད་ཚང་བར་བཤད་པ་དང་འགལ་ལོ། །གཞན་ཡང་གསང་སྔགས་རྒྱུད་སྡེ་བཞིའི་འཁོར་གྱི་ལྷ་ཐམས་ཅད་གཙོ་བོ་ཉིད་ཀྱི་རྣམ་འཕྲུལ་ཡིན་པ་རྒྱུད་སྡེའི་ལུགས་ཡིན་པས།  ཕྱག་རྡོར་གཙོ་བོར་བྱས་
ནས་འཇམ་དབྱངས་འཁོར་དུ་བྱས་པ་དང་།  འཇམ་དབྱངས་གཙོ་བོར་བྱས་ནས་ཕྱག་རྡོར་འཁོར་དུ་བྱས་པ་ཐམས་ཅད་སྔར་གྱི་ཐལ་བ་དེ་ལ་དངོས་སྐྱོན་དུ་འགྲོ་བ་བསྙོན་དུ་མེད་པས་དེ་འདྲའི་ཐལ་བ་འཕངས་ནས་ཁྱབ་པ་རང་སོར་འབུད་ན་ལོག་པར་རྟོག་པ་ཆེན་པོ་
9-4-55b


ཡིན་ནོ། །དཔེར་མཚོན་ན་གསང་བ་འདུས་པའི་ལྷ་ཐམས་ཅད་ལ་གཙོ་བོ་གོ་འཕོ་བའི་དཀྱིལ་འཁོར་འཕགས་ལུགས་པ་དང་།  ཡེ་ཤེས་ཞབས་ལུགས་པ་གཉིས་ཅར་བཞེད་པས་དེའི་ཚེ་སྔར་གྱི་རྣམ་གཞག་དེ་སྙོན་དུ་མེད་དོ། །འདི་དག་
ཀྱང་སངས་རྒྱས་ཐམས་ཅད་ངོ་བོ་གཅིག་པ་ཙམ་ལ་བསམ་ནས་སྨྲས་པ་མ་ཡིན་གྱི།  གནས་སྐབས་དེ་དང་དེའི་བརྡ་ཆད་འཇོག་མཚམས་ལ་གྲུབ་པ་སྨྲས་པ་ཡིན་ཀྱང་།  དུས་ཀྱི་སྟོབས་ཀྱིས་བློ་གཟུ་བོར་གནས་པ་དཀོན་ནོ། །ཀླ་ཀློས་རྫུ་
འཕྲུལ་གྱིས་ཤམྦྷ་ལ་རུ་དམག་འདྲེན་པ།  རིགས་ལྡན་དྲག་པོས་ཀླ་ཀློ་མཐར་བྱེད་པ་རྩ་རྒྱུད་ལས་གསུངས་པ་དེ་ཉིད་ཀྱིས་འགྲུབ་པར་སྣང་སྟེ།  དེའི་ཚུལ་ཡང་རྒྱལ་པོ་ཟླ་བ་བཟང་པོས་རྩ་རྒྱུད་ལོ་གཅིག་བསྟན།  དེ་རྗེས་ལྷ་དབང་།  གཟི་བརྗིད་
ཅན། ཟླ་བས་བྱིན།  ལྷའི་དབང་ཕྱུག །སྣ་ཚོགས་གཟུགས།  ལྷའི་དབང་ལྡན་རྣམས་ཀྱིས་ལོ་གྲངས་བརྒྱ་བརྒྱར་རྩ་རྒྱུད་བསྟན་པ་རྣམས་ནི་ཤམྦྷ་ལར་རིགས་བཞི་ཡོད་པའི་རྡོ་རྗེའི་རིགས་ཁོ་ན་ལ་བསྟན་གྱི།  གཞན་གསུམ་ལ་བསྟན་པར་
མ་ནུས་པས།  རིགས་ལྡན་དུ་མི་འཇོག་ལ།  དེ་ནས་འཇམ་དབྱངས་གྲགས་པས།  རིགས་བཞི་ཆར་རྡོ་རྗེའི་རིགས་གཅིག་ཏུ་བྱས་ཏེ་བསྟན་པས་རིགས་ལྡན་གྱི་རྒྱལ་པོར་འཇོག་སྟེ་རྩ་རྒྱུད་ལས།  རིགས་བཞི་རིགས་གཅིག་བྱས་གང་དེས། །རིགས་
ལྡན་ཚངས་པའི་རིགས་ཀྱིས་མིན། །ཞེས་གསུངས་པས་སོ། །དེ་ནས་བཟུང་སྟེ་རིགས་ལྡན་དྲག་པོའི་བར་ཤམྦྷ་ལར་ཀླ་ཀློའི་རིགས་གཏན་མེད་ཅིང་རིགས་ལྡན་དྲག་པོའི་ཀླ་ཀློའི་ཆོས་མཐར་བྱེད་པར་བཤད་པས་དེའི་ཚེ་ལོགས་ནས་དམག་འདྲེན་ཏེ་
9-4-56a


འོངས་པར་གསལ་སྙམ་དུ་སེམས་ཏེ་དཔྱད་པར་བྱའོ།  ༼༩༩༽།  ཇི་ལྟར་འདུད་པའི་བྱེ་བྲག་གིས། །ཞེས་སོགས་དགྲ་བཅོམ་རང་རྒྱལ་གྱིས། །སྟོང་ཉིད་རྟོགས་པའི་སྒྲུབ་བྱེད་དུ། །རུང་ན་མདོ་སྡེ་རྒྱན་གྱི་ལུང་། །
སེམས་ཙམ་གཞུང་དུ་ཇི་ལྟར་འགྱུར། །ཞེས་པའི་ལན་ནི།  གཞུང་ལས།  དགྲ་བཅོམ་པ་དང་རང་སངས་རྒྱས། །རྫོགས་པའི་སངས་རྒྱས་རྣམ་པ་གསུམ། །རྣམ་པར་གྲོལ་བར་མཚུངས་ན་ཡང་། །བཟང་ངན་ཐབས་ཀྱིས་ཕྱེ་བ་ཡིན། །
ཅེས་པའི་ཤེས་བྱེད་དུ་ལུང་འདི་དྲངས་པས་དོགས་པའི་གཞི་མ་ངེས་པའི་དྲི་བར་སྣང་ངོ་། །སེམས་ཙམ་པའི་ལུགས་ལ་ཉན་རང་གིས་སྟོང་ཉིད་མ་རྟོགས་པར་འདོད་པ་ཡང་གྲུབ་མཐའ་སྨྲ་བ་སོ་སོ་ལ་སྟོང་ཉིད་ངོས་འཛིན་ཚུལ་སོ་སོར་ཡོད་པ་མ་ངེས་པའི་
སྐྱོན་དུ་སྣང་སྟེ།  སྟོང་ཉིད་ལྟ་བས་གྲོལ་འགྱུར་གྱིས། །སྒོམ་པ་ལྷག་མ་དེ་དོན་ཡིན། །ཞེས་པ་འདི་མདོ་སེམས་གཉིས་ཅར་གྱིས་ཐེག་པ་གསུམ་ཆར་ལ་སྦྱར་བའི་ཚུལ་ཡང་མ་ངེས་པར་སྣང་བའི་ཕྱིར་རོ།  ༼༡༠༠༽།  ཡི་དམ་བསྒོམ་པ་དཀྲོང་
བསྐྱེད་ཀྱིས། །སྦྱང་གཞི་སྦྱོང་བྱེད་མི་འཕྲོད་ན། །ཤིན་ཏུ་ཟབ་པ་བཅོས་མིན་གྱི། །བསྐྱེད་པའི་རིམ་པ་དེ་ཅི་ཞིག །ཅེས་པའི་ལན་ནི།  གོང་རིམ་གཉིས་ལ་འཁྲུལ་བ་དགག་པའི་སྐབས་སུ།  རྒྱ་ལ་བསྐྱེད་རིམ་བསྒོམ་ན་ཡང་། །སྦྱང་གཞི་
སྦྱོང་བྱེད་ལེགས་འཕྲོད་པའི། །ཆོ་གའི་ཡན་ལག་ཀུན་བོར་ནས། །རང་བཟོའི་དཀྲོང་བསྐྱེད་བསྒོམ་པར་ཟད། །ཅེས་པ་ལ་འདྲི་བ་འདྲ་སྟེ།  དེ་ལྟ་ན་ཤིན་ཏུ་ཟབ་པ་བཅོས་མིན་གྱི་བསྐྱེད་རིམ་དེ་རང་བཟོའི་དཀྲོང་བསྐྱེད་ཨེ་ཡིན་པ་འདུག །ད་དུང་འདིའི་
9-4-56b


ཕྱོགས་སྔ་སྨྲ་བ་སུ་ཡིན་ཁྱེད་ཀྱིས་མི་མཁྱེན་ལགས་སོ།  ༼༡༠༡༽  །རིམ་པ་ལྔ་པར་འོད་གསལ་དང་། །ཟུང་འཇུག་ཅེས་བྱ་ཆོས་སྐུ་དང་། །སྒྱུ་མའི་སྐུ་ལ་བཤད་པས་ན། །འོད་གསལ་འབྲས་བུའི་མཐར་ཐུག་ཏུ། །ཁས་བླངས་པ་ལ་འགལ་
ཅི་ཡོད། །ཅེས་པའི་ལན་ནི།  བདག་ཉིད་ཆེན་པོ་འདིས་སྤྱིར་འོད་གསལ་ཡིན་ན།  འབྲས་བུ་མཐར་ཐུག་མ་ཡིན་པས་ཁྱབ་པར་བཞེད་པ་མ་ཡིན་ཏེ།  མདོ་ལས།  ཟབ་ཞི་སྤྲོས་བྲལ་འོད་གསལ་འདུས་མ་བྱས། །ཞེས་དང་།  རྒྱུད་བླར།  སེམས་
ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཅེས་སོགས་འོད་གསལ་ཆོས་དབྱིངས་ཀྱི་མིང་གི་རྣམ་གྲངས་སུ་བཤད་ཅིང་།  རྒྱུད་བླའི་ལུང་དེ་ཉིད་བསྟན་བཅོས་འདིར་ཡང་བདེ་གཤེགས་སྙིང་པོ་འགྱུར་བ་མེད་པའི་
ཁུངས་སུ་དྲངས་པས་འབྲས་དུས་ཀྱི་བདེ་གཤེགས་སྙིང་པོ་དག་པ་གཉིས་ལྡན་གྱི་ཆོས་དབྱིངས་དེ་ཡང་འོད་གསལ་དུ་ཞལ་གྱིས་བཞེས་པའི་ཕྱིར་རོ། །འོད་གསལ་དང་ཟུང་འཇུག་རྣམ་གྲངས་སུ་བཤད་པ་ཡང་འདི་ལ་དགོངས་སོ། །འདིར་དགག་བྱ་ནི་
སྔོན་གྱི་གསང་འདུས་པ་ཁ་ཅིག །རིམ་ལྔའི་ནང་ཚན་དུ་གྱུར་པའི་འོད་གསལ་འབྲས་བུའི་མཐར་ཐུག་ཏུ་སྨྲ་བ་དེ་ཉིད་ཡིན་ཏེ།  གཞུང་ལས།  འདི་ནི་འཕགས་པའི་དགོངས་པ་མིན། །རིམ་ལྔ་དང་ནི་སྤྱོད་བསྡུས་སུ། །འོད་གསལ་བ་ལས་ཟུང་འཇུག་
སྐུར། །ལྡང་བ་མཐར་ཐུག་ཡིན་པར་གསུངས། །ཞེས་གསལ་བར་གསུངས་པའི་ཕྱིར་རོ། །རིམ་པ་ལྔའི་ཟླས་ཕྱེ་བའི་འོད་གསལ་དང་ཟུང་འཇུག་དང་།  སྒྱུ་མའི་སྐུ་གསུམ་རྣམ་གྲངས་སུ་བཤད་པ་རིམ་ལྔ་ལས་གཏན་མེད་དེ།  དབེན་གསུམ་
9-4-57a


གྱི་རྗེས་སུ་རླུང་སེམས་ཙམ་ལས་ལོངས་སྐུའི་རིགས་འདྲ་སྒྱུ་མའི་སྐུ་བསྒྲུབས་ཤིང་དེ་ཉིད་ལ་བསྒྱུར་འཛིན་གྱི་དྲི་མ་ཡོད་པ་འོད་གསལ་གྱི་མེས་སྦྱངས་ནས་དེའི་འོག་ཏུ་ཟུང་འཇུག་གི་སྐུར་བཞེངས་པར།  རིམ་ལྔ།  སྤྱོད་བསྡུས། 
སྒྲོན་གསལ་སོགས་འཕགས་ལུགས་ཀྱི་གཞུང་རྣམས་ཀྱི་དགོངས་པ་ཡིན་པ་ལ་དེང་སང་ཁོ་བོ་རྒྱུས་ཆེ་བའི་ཕྱིར་རོ།  ༼༡༠༢༽།  བྱང་ཆུབ་བར་དུ་བླངས་པ་ཡིས། །སོ་སོར་ཐར་པ་འཇིག་འགྱུར་ན། །ཇི་སྲིད་བྱང་ཆུབ་སྙིང་པོའི་བར། །ཚུལ་ཁྲིམས་
ཀྱི་ནི་བསླབ་པ་དང་། །ཞེས་སོགས་གསུངས་པ་ཇི་ལྟར་ཡིན། །ཞེས་པའི་ལན་ནི།  ཉན་ཐོས་ཀྱི་ལུགས་ཀྱི་སོ་ཐར་བྱང་ཆུབ་བར་དུ་བླངས་པ་བཀག་པ་དང་།  ཐེག་པ་ཆེན་པོའི་ལུགས་ཀྱི་སོ་ཐར་བྱང་ཆུབ་བར་དུ་བླངས་པ་གཉིས་འགལ་
པའི་དོན་མེད་མཆི།  ཉན་ཐོས་པའི་ལུགས་ཀྱི་སོ་ཐར་ཞེས་པའི་ཚིག་གི་ཁྱད་པར་མེད་དོ་སྙམ་ན།  མདོར་བསྟན་ཏེ། དེས་ན་ཉན་ཐོས་ཐེག་པ་ལ། །སྡོམ་པ་དང་ནི་བདེན་བཞིའི་གནད། །བཅོས་ན་ཉན་ཐོས་ཆོས་ཀུན་འཇིག །ཅེས་པའི་
རྒྱས་བཤད་ཀྱི་དབང་དུ་བྱས་ནས་དུས་ཕྱིས་འདི་འདྲའི་སྟོན་བཟང་ཨེ་ཡོང་མི་མཁྱེན་པ་ཡིན་ནམ།  བསྟན་བཅོས་སྤྱིའི་རྩོམ་ལུགས་བྱས་གདའ་འོ།  ༼༡༠༣༽།  ཕག་མོའི་བྱིན་རླབས་མར་པ་ལ། །མེད་པའི་རྒྱུ་མཚན་གསལ་པོ་ཅི། །མར་
པས་རིམ་ལྔ་གདན་རྫོགས་ཀྱི། །ཐོག་མར་ཕག་མོའི་བྱིན་རླབས་ནི། །ངེས་པར་བྱེད་ཅེས་ཟེར་བ་ཐོས། །ཅེས་པའི་ལན་ནི།  ཕག་མོའི་བྱིན་རླབས་མར་པ་ལ། །ཡོད་པའི་རྒྱུ་མཚན་གསལ་པོ་ཅི། །དྭགས་པོས་ནཱ་རོ་ཆོས་དྲུག་གི།  
9-4-57b


ཐོག་མར་ཀོང་པོ་ནེ་རུ་པས། །བྱིན་རླབས་གསར་དུ་བྱས་ཞེས་ཐོས། །ཐོས་ཚད་ཚད་མ་མིན་སྙམ་ན། །དེས་ཀྱང་དེ་ཡང་དེར་འགྱུར་རོ། །ཞེས་བྱའོ།  ༼༡༠༤༽།  རྗེ་བཙུན་མི་ལ་མན་ཆད་ལ། །ཆོས་དྲུག་ཡོད་དམ་མེད་ན་ནི། །གཞུང་
གི་དགོངས་པ་གང་ཡིན་དྲིས། །ཡོད་ན་ནཱ་རོའི་བརྒྱུད་པ་ནི། །འདེད་ན་འགལ་བ་ཅི་ཞིག་ཡོད། །མེད་ན་ཆོས་དྲུག་ལུགས་གསུམ་པོ། །གསན་ཚུལ་ཇི་ལྟར་ཡིན་པ་དྲི། །ཅེས་པའི་ལན་ནི།  གཞུང་གི་དགོངས་པ་ནཱ་རོ་ཆོས་དྲུག་
མི་ལ་ཡན་ཆད་དུ་ཆོས་དྲུག་དེ་ལས་མ་གཏོགས་པ་གདམས་ངག་གཞན་དང་བསྲ་བསྲེས་བྱས་པ་དེ་མེད་ཅེས་པའི་དོན་ཡིན་གྱི།  ཆོས་དྲུག་མི་ལ་ཡན་ལ་ཡོད་དེ་མན་ཆད་ལ་མེད་ཅེས་པའི་དོན་མ་ཡིན་ཏེ་གཞུང་དེའི་མཇུག་ཏུ་ཆོས་དྲུག་བོར་ནས་ལམ་འབྲས་དང་། །
ཕྱག་རྒྱ་ཆེན་པོ་ལ་སོགས་པ། །གཞན་གྱི་གདམས་ངག་བསྒོམ་བཞིན་དུ། །ནཱ་རོའི་བརྒྱུད་པ་འདེད་བྱེད་པ། །གཞན་དང་འགལ་བ་ལྟ་ཅི་སྨོས། །ཞེས་གསུངས་པའི་ཕྱིར་རོ། །དེས་ན་ཆོས་དྲུག་ལུགས་གསུམ་གསན་ཚུལ་སོགས་ཀྱང་མི་
འགལ་བར་ཤེས་པར་བྱའོ།  ༼༡༠༥༽།  བདེ་མཆོག་སྙན་བརྒྱུད་ཅེས་བྱ་བ། །བརྫུན་མའི་ཆོས་སུ་མཁས་རྣམས་བཞེད། །ཅེས་པའི་ལན་ནི།  འདི་འདྲི་བའི་གཞི་གཞུང་ན་མི་འདུག །ནཱ་རོ་ཆོས་དྲུག་ལུགས་གསུམ་གྱི་ཕྱི་མ་རས་ཆུང་བའི་
སློབ་མ་བུར་སྒོམ་ནས་བརྒྱུད།  ཅེས་པ་རས་ཆུང་སྙན་བརྒྱུད་ལ་ངོས་བཟུང་ནས་དྲིས་པ་འདྲ།  དེ་ལྟར་ན་ནཱ་རོ་ཆོས་དྲུག་དང་བདེ་མཆོག་སྙན་བརྒྱུད་ནོར་འདུག་གོ།  བརྫུན་མའི་ཆོས་སུ་མཁས་རྣམས་བཞེད་པ་ཡང་མ་གྲུབ་སྟེ།  མཁས་པ་མང་པོས་
9-4-58a


ཆོས་རྣམ་དག་ཏུ་བཞེད་པའི་ཕྱིར་རོ།  ༼༡༠༦༽།  ཕྱག་རྒྱ་ཆེན་པོ་སྒོམ་བཞིན་དུ། །ན་རོའི་བརྒྱུད་པ་འདེད་པ་ལ། །འགལ་བ་ཅི་ཞིག་ཡོད་པ་དྲི། །ཞེས་པའི་ལན་ནི།  སྤྱིར་ཕྱག་རྒྱ་ཆེན་པོ་བསྒོམ་ནས་ནཱ་རོའི་
བརྒྱུད་པ་འདེད་པ་ལ་འགལ་བ་ཡོད་པར་གསུངས་པ་མ་ཡིན་གྱི།  ནཱ་རོའི་ཆོས་དྲུག་གཙང་མ་བོར་ནས་ཆོས་དྲུག་དང་།  མར་པ་ལ་གཾ་ག་མཻ་ཏྲི་ནས་བརྒྱུད་པའི་ཕྱག་ཆེན་བསྲེས་ནས་སྒོམ་བཞིན་དུ་ནཱ་རོ་ཆོས་དྲུག་ཁོ་ནའི་བརྒྱུད་པ་འདེད་པ་བཀག་
པའོ།  ༼༡༠༧༽།  བཅོམ་ལྡན་འདས་ཀྱི་བཤད་པ་ལ། །བཞི་བཅོམ་དྲུག་ལྡན་མི་དགོས་ན། །གང་རུང་རེ་རེས་ཆོག་གམ་ཅི། །དེ་ལྟར་ན་ནི་དགྲ་བཅོམ་དང་། །ལེགས་ལྡན་སོགས་ལ་མི་ཐལ་ལམ། །ཞེས་པའི་ལན་ནི།  གཞུང་གི་
དགོངས་པ་མ་ལོན་པར་བསྟན་པ་དང་།  སུན་འབྱིན་བརྗོད་པ་མི་འཐད་པ་གཉིས་ཀྱིས་རྟོགས་པར་བྱ་བ་ལས།  དང་པོ་ནི།  བཅོམ་ལྡན་འདས་ཀྱི་བཤད་པ་ལ་བཞི་བཅོམ་དྲུག་ལྡན་གཉིས་ཀ་མི་དགོས་ཅེས་པ་གཞུང་གི་དོན་གཏན་མ་ཡིན་ཏེ།  བོད་སྐད་
ཀྱི་བཅོམ་ལྡན་འདས་ཅེས་པའི་བཅོམ་པ་བདུད་བཞི་བཅོམ་པ་དང་།  ལྡན་པ་དབང་ཕྱུག་གི་ཡོན་ཏན་དྲུག་དང་ལྡན་པ་ལ་སོ་སོར་བཤད་པ་དགག་པ་ཙམ་ཡིན་པའི་ཕྱིར་རོ། །འོ་ན་བཞི་བཅོམ་དྲུག་ལྡན་གཉིས་ཀ་ཇི་ལྟར་དགོས་བོད་སྐད་ཀྱི་བཅོམ་པ་དང་
ལྡན་པ་གཉིས་ལ་དེ་གཉིས་སོ་སོར་བཤད་དུ་མི་རུང་བའི་རྒྱུ་མཚན་ཅི་སྙམ་ན།  བྷ་ག་ཅེས་པའི་ཚིག་གཅིག་ཉིད་བཅོམ་པ་དང་།  སྐལ་བ་གཉིས་ལ་འཇུག་པ་དེའི་ཚེ་བཅོམ་པ་ནི་བདུད་བཞི་བཅོམ་པ་སྐལ་བ་ནི་དབང་ཕྱུག་གི་ཡོན་ཏན་དྲུག་གི་སྐལ་
9-4-58b


བ་ཡིན་པས་དེ་གཉིས་ཀ་ཡང་བོད་སྐད་ཀྱི་བཅོམ་ཞེས་པའི་ཚིག་གཅིག་ཉིད་ཀྱིས་སྟོན་ནོ། །ཝཱན་ཞེས་པ་དང་།  ཝཱ་ཏེ་ཞེས་པ་བོད་སྐད་ཀྱི་ལྡན་པ་ཡིན་ལ།  དེའི་ཚེ་བདུད་བཞི་བཅོམ་པ་དང་ལྡན་པས་ན་བཅོམ་ལྡན།  དབང་ཕྱུག་གི་
ཡོན་ཏན་དྲུག་གི་སྐལ་བ་དང་ལྡན་པས་ན་བཅོམ་ལྡན་ཞེས་གཉིས་ཀ་ལ་སྦྱར་བར་བྱ་བ་ཡིན་གྱི།  དབང་ཕྱུག་གི་ཡོན་ཏན་དྲུག་ཁོ་ན་ལ་སྦྱར་བར་བྱ་བ་མ་ཡིན་ཏེ།  རྩ་རྒྱུད་བརྟག་གཉིས་ལས།  སངས་རྒྱས་འདི་ལ་བྷ་ག་མངའ། །བཅོམ་ལྡན་
འདས་ཞེས་བརྗོད་པར་བྱ། །བྷ་ག་རྣམ་པ་དྲུག་དུ་བརྗོད། །དབང་ཕྱུག་ལ་སོགས་ཡོན་ཏན་ཀུན། །ཡང་ན་ཉོན་མོངས་ལ་སོགས་བདུད། །འཇོམས་ཕྱིར་བཅོམ་ལྡན་འདས་ཤེས་བྱ། །ཞེས་དང་།  སངས་རྒྱས་ཡེ་ཤེས་ཞབས་ཀྱི་
སྡུད་འགྲེལ་ལས།  བཅོམ་ལྡན་འདས་ཅེས་པ་ནི་བདུད་བཞི་བཅོམ་པའི་ཕྱིར་རམ།  དབང་ཕྱུག་ལ་སོགས་པའི་ཡོན་ཏན་དང་ལྡན་པའི་ཕྱིར་རོ། །སྐལ་པའི་སྒྲ་ནི་དབང་ཕྱུག་ལ་སོགས་པ་བརྗོད་པར་བྱེད་པ་ཡིན་ཏེ།  དབང་ཕྱུག་དང་ནི་གཟུགས་
བཟང་དང་། །གྲགས་དང་དཔལ་དང་ཡེ་ཤེས་དང་། །བརྩོད་འགྲུས་ཕུན་སུམ་ཚོགས་ལྡན་པ། །དྲུག་པོ་དག་ལ་སྐལ་ཞེས་བརྗོད། །ཅེས་གང་བཤད་པ་ཡིན་ནོ། །ཞེས་གསུངས་པས་སོ། །སྒྲའི་གནད་ཀྱི་ཚུལ་འདི་ལྟ་བུ་ལ་དགོངས་
ནས།  བཅོམ་ལྡན་འདས་ཀྱི་བཤད་པ་ལ། །བཞི་བཅོམ་དྲུག་ལྡན་འཆད་པ་དང་། །ཞེས་བོད་སྐད་ལ་བཤད་པ་ནོར་ཚུལ་དུ་གསུངས་པ་ཡིན་པས་འདི་ནི་མང་བ་ཞིག་ལ་མཁོ་བ་ཡོད་དོ། །གཉིས་པ་ནི།  གང་རུང་རེ་རེས་ཆོག་ན་ཡང་།  དགྲ་
9-4-59a


བཅོམ་པ་དང་།  ལེགས་ལྡན་ལ་སོགས་ལ་ཐལ་བར་མི་འགྱུར་ཏེ།  ཉན་ཐོས་དགྲ་བཅོམ་གྱི་བདུད་བཞི་མ་ལུས་པར་མ་བཅོམ་པར་བཤད་ཟིན་པའི་ཕྱིར་དང་།  འཇིག་རྟེན་པའི་ལེགས་ལྡན་ལ་དབང་ཕྱུག་གི་ཡོན་
ཏན་དྲུག་མེད་པའི་ཕྱིར་ཏེ།  དབང་ཕྱུག་ནི།  དབྱིངས་དག་པ་གཉིས་ལྡན་དང་།  གཟུགས་བཟང་ནི་མེ་ལོང་ལྟ་བུའི་ཡེ་ཤེས་དང་།  གྲགས་པ་དང་དཔལ་གཉིས་ནི་མཉམ་པ་ཉིད་ཀྱི་ཡེ་ཤེས་དང་།  ཡེ་ཤེས་ནི་སོ་སོར་རྟོག་པའི་ཡེ་ཤེས་དང་། 
བརྩོན་འགྲུས་ཕུན་སུམ་ཚོགས་པ་ནི་བྱ་བ་གྲུབ་པའི་ཡེ་ཤེས་ཡིན་པར་སངས་རྒྱས་ཡེ་ཤེས་ཞབས་ཀྱིས་བཤད་པའི་ཕྱིར་རོ། །འོན་ཀྱང་བློའི་ངོར་དེ་གཉིས་ནོར་གྱི་དོགས་ནས་འདས་ཞེས་པའི་ཚིག་ལོ་ཙྪ་བ་སངས་རྒྱས་དང་འདྲ་བ་དག་གིས་
བསྣན་པར་ཤེས་པར་བྱའོ།  ༼༡༠༨༽།  ཕྱག་རྒྱ་ཆེན་པོའི་སྒྲ་དོན་ལ། །ལག་པའི་སྒྲ་དོན་འཁྲུལ་གྱུར་ན། །བརྟག་པ་གཉིས་པར་བརྡ་དང་ནི། །བརྡ་ཡི་ལན་ལ་ཕྱག་རྒྱ་ཞེས། །གསུངས་པའི་དགོངས་པ་གང་ཡིན་བཙལ། །རྡོ་
རྗེ་འབྱུང་བར་ལྷ་རྣམས་ཀྱི། །ལག་པའི་རྣམ་འགྱུར་མི་འདྲ་ལ། །ཕྱག་རྒྱ་ཆེན་པོ་བཤད་དེ་ཅི། །ཞེས་པའི་ལན་ནི།  གཞུང་གི་དགོངས་པ་བཤད་པ་དང་།  དེ་མ་རྟོགས་ནས་སུན་འབྱིན་བརྗོད་པ་ལ་ལན་བཏབ་པ་གཉིས་ལས། 
དང་པོ་ནི།  མ་ཧཱ་མུ་ཏྲ་ཞེས་པའི་མ་ཧཱ་ཆེན་པོ་དང་།  མུ་ཏྲ་རྒྱ་ལ་འཇུག་པ་ཡིན་གྱི་ལག་པའི་སྐད་དོད་མེད་པས་ཚིག་དྲང་པོར་བསྒྱུར་ན་རྒྱ་ཆེན་པོ་ཞེས་པ་ལ་འཇུག་གོ།  འོན་ཀྱང་དེའི་དོན་ནི་དབང་དང་རིམ་གཉིས་ལས་བྱུང་བའི་ཡེ་ཤེས་ལ་འཇུག་
9-4-59b


པས་རྒྱ་ཆེ་ཆུང་གཉིས་ཀྱི་ཟླས་ཕྱེ་བའི་རྒྱ་ཆེན་པོ་ལ་ནོར་གྱིས་དོགས་ནས་ལོ་ཙྪ་བ་སངས་རྒྱས་དང་འདྲ་བ་དག་གིས་ཕྱག་ཅེས་པའི་ཚིག་བསྣན་པ་ཡིན་གྱི།  རྒྱ་གར་གྱི་སྐད་ལ་དེའི་སྒྲ་དོན་འཆད་དུ་མེད་ཅེས་པའི་དོན་ཏོ། །གཉིས་པ་ནི།  བརྟག་པ་
གཉིས་པར་བརྡ་དང་བརྡའི་ལན་ལ་ཕྱག་རྒྱ་ཞེས་བཤད་པའི་རྒྱུ་མཚན་གྱིས་ལག་པའི་སྒྲ་དོན་འཆད་དུ་ཡོད་ན།  གོས་དང་རྩེ་གསུམ་དང་།  ནུ་མ་དང་།  སྐྲ་མཚམས་དང་།  སོ་དང་།  ཁ་དང་།  ཁྲོ་གཉེར་དང་།  གཙུག་ཕུད་དང་།  དཔྲལ་བ་
དང་།  རྒྱབ་དང་།  རྐང་མཐིལ་དང་།  ལྟོ་བ་རྣམས་ལ་ཡང་ལག་པའི་སྒྲ་དོན་འཆད་དུ་ཡོད་པར་འགྱུར་ཏེ།  དེ་དག་ལ་ཡང་ཕྱག་རྒྱ་དང་།  ཕྱག་རྒྱའི་ལན་ཅེས་གསུངས་པའི་ཕྱིར་ཏེ།  དེ་ཉིད་ལས།  གང་གིས་གོས་ནི་སྟོན་པ་ལ། །དེ་ཡིས་
རྩེ་གསུམ་རབ་ཏུ་བསྟན། །གང་ཞིག་ནུ་མ་སྟོན་པ་ལ། །དེ་ཡིས་མཚམས་ནི་རབ་ཏུ་བསྟན། །གང་ཞིག་སོ་ནི་སྟོན་པ་ལ། །དེ་ཡིས་ཁ་ནི་རབ་ཏུ་བསྟན། །གང་ཞིག་ཁྲོ་གཉེར་སྟོན་པ་ལ། །གཙུག་ཕུད་བཀྲོལ་བ་བརྗོད་པར་བྱ། །གང་
ཞིག་དཔྲལ་བ་སྟོན་པ་ལ། །དེ་ཡིས་རྒྱབ་ནི་རབ་ཏུ་བསྟན། །གང་ཞིག་རྐང་མཐིལ་སྟོན་པ་ལ། །ལྟོ་ཡི་རྣམ་པར་བརྩེ་བར་བྱ། །ཕྱག་རྒྱ་ཕྱག་རྒྱའི་ལན་གྱིས་ནི། །དམ་ཚིག་གིས་ནི་རྣམ་པར་དབྱེ། །ཞེས་གསུངས་པའི་ཕྱིར་རོ། །རྡོ་རྗེ་
འབྱུང་བར་ལྷ་རྣམས་ཀྱི་ལག་པའི་རྣམ་འགྱུར་མི་འདྲ་བ་ལ་ཕྱག་རྒྱ་ཆེན་པོར་བཤད་པས་ཀྱང་མི་གནོད་དེ་བོད་འདིར་ཕྱག་རྒྱ་ཞེས་པའི་ཚིག་དེ་ཡིན་ན།  ལག་པ་ལ་མི་འཇུག་པས་ཁྱབ་པར་མ་གསུངས་པའི་ཕྱིར་རོ། །ཏི་ལི་ཏེ་ལོར་མི་རུང་ན། །ཨི་ཡི་ཡི་གེ་
9-4-60a


ཨེ་ཞེས་པར། །ཀཱ་ལཱ་པ་ལས་བྱས་དེ་ཅི། །ཅེས་པའི་ལན་ནི་དེ་སྟོན་པའི་ཀཱ་ལཱ་པའི་ཚིག་གང་ཡིན།  ཨའི་ཡི་གེ་ཨིའི་ཡི་གེ་ལ་ཨེའོ་ཞེས་པ་ཡིན་ན།  དེའི་དོན་སྔ་མའི་སྲོག་ཡིག་ཨའི་ཡི་གེ་དེ་ཕྱི་མར་ཨའི་ཡི་
གེ་ལ་བརྟེན་ནས་སྔ་མའི་ཨ་ཡིག་ཨེར་འགྱུར་ལ།  ཕ་རོལ་ཡང་དབྱིའོ། །ཞེས་པས་ཕ་རོལ་གྱི་ཨི་ཕྱིས་ཏེ་སྔ་མ་མཚམས་སྦྱར་ཞེས་པའི་དོན་ཏེ།  དཔེར་ན་ཤཱི་ལ་ཨིནྟྲ་ཞེས་པའི་ལའི་སྲོག་ཡིག་ཨ་དེ་ཉིད་ཕ་རོལ་གྱི་ཨི་མཐོང་བས་ཨེར་འགྱུར་
ལ།  ཨེ་ཡིག་ཕྱིས་ཏེ་མཚམས་སྦྱར་བས་ཤི་ལེནྟྲ་ཞེས་དང་།  དེ་བཞིན་དུ་ན་ལ་ཨིནྟྲ་ལ་ན་ལེནྟྲ་དང་།  ཨིརྟྱ་ཨིན་དུ་ལ་ཨནྟྱེ་དུ་ཞེས་པ་ལྟ་བུའོ། །མཚམས་སྦྱོར་གྱི་ཚུལ་འདི་ཙམ་ལ་ཡང་ཨིའི་ཡི་གེ་ཨེའི་ཡིན་ཅེས་པར་འཁྲུལ་ན་ཀཱ་ལཱ་
པ་མཁྱེན་པར་ཞལ་གྱིས་བཞེས་ཀྱང་ཅི་ལྟར་འགྱུར་ལགས་སམ།  གལ་ཏེ་དེ་ཉིད་ཀཱ་ལཱ་པའི་དགོངས་པ་ཡིན་ན།  གི་གུ་ཡིན་ན་འགྲེང་བུ་ཡིན་པས་ཁྱབ་པར་ཐལ།  ཨི་ཡིག་ཡིན་ན་ཨེ་ཡིན་པས་ཁྱབ་པའི་ཕྱིར།  བསྟན་བཅོས་འདིར་མ་
ཟད་ཀཱ་ལཱ་པ་ཡང་སུན་འབྱིན་ཏེ་ཕུང་བར་བྱེད་དམ། ༼༡༠༩༽།  ན་རོ་ཞེས་བྱ་བྲམ་ཟེ་ཡི། །བྱེ་བྲག་ཡིན་མོད་ཏ་ཞེས་པ། །ཞེས་པའི་ཚིག་ཏུ་སྦྱར་མིན་ནམ། །ཅེས་པའི་ལན་ནི།  ཏ་ཞེས་པ་ཉིད་ཅེས་པའི་དོན་ཡིན་ལ།  དེ་སྦྱར་བ་འམ་མ་སྦྱོར་བ་
གང་ཡིན་ཀྱང་རུང་།  ན་དང་རོ་གཉིས་ཀྱི་སྒྲ་སྐད་ནོར་བར་འཆད་པ་སྐབས་ཀྱི་དོན་ཡིན་ཏེ།  དཀའ་བ་སྤྱད་པས་ཨ་ན་ན། །རོ་རུ་སོང་ཞེས་འཆད་པ་དང་། །ཞེས་གསུངས་པས་སོ།  ༼༡༡༠༽།  ཀཽའུ་ཤི་ཀའི་མདོ་ཞེས་པ། །བརྫུན་མ་དེ་ཡི་མཚན་གཞི་དྲི། །
9-4-60b


ཅེས་པའི་ལན་ནི།  ཤེར་ཕྱིན་གྱི་མདོའི་ནང་ཚན་དུ་གྱུར་པའི་ཀཽའུ་ཤི་ཀས་ཞུས་པའི་མདོ་མ་ཡིན་པར་དེ་ལས་གཞན་པ་ཡོད་པར་གསལ་མོད་ཀྱི་ཁོ་བོས་ནི་མ་མཐོང་སྟེ།  ཁྱེད་དང་འདྲའོ།  ༼༡༡༡༽།  མུ་སྟེགས་བྱེད་ཀྱི་རྒྱུད་ཡིན་པས། །ལུང་
དུ་བྱ་བ་མི་རུང་ན། །དབྱངས་འཆར་རྒྱུད་དང་སྨན་དཔྱད་དང་། །ཀཱ་ལཱ་པ་དང་ཌཎྜི་ཡི། །ཚིག་རྒྱན་གཞུང་དང་འཆི་མེད་ཀྱི། །བང་མཛོད་ལ་སོགས་མཁས་རྣམས་ལ། །གྲགས་པའི་ལུང་དག་འདོར་དགོས་སམ། །ཞེས་པའི་ལན་ནི།  
གཞུང་དེ་དག་མུ་སྟེགས་བྱེད་ཀྱི་རྒྱུད་ཡིན་ཞེས་པ་ཡང་ཀཱ་ལཱ་པ་སོགས་ལ་སྐུར་པ་བཏབ་པར་སྣང་ཞིང་གཞན་ཡང་ཁྱོད་སྐྱོན་འཛིན་ལུགས་འདི་ལྟར་མཛད་ན་ཁོ་བོས་ལན་འདེབས་ལུགས་འདི་འདྲ་ཅིག་བྱ་སྟེ།  མུ་སྟེགས་བྱེད་ཀྱི་རྒྱུད་ཡིན་པས་
ལུང་དུ་བྱ་བར་མི་རུང་བར་ཐལ།  མུ་སྟེགས་བྱེད་ཀྱི་རྒྱུད་ཡིན་པས་ལུང་དུ་བྱ་བར་མི་རུང་བའི་ཕྱིར།  འདོད་ན།  སྔར་བརྗོད་པའི་སྐྱོན་ཐམས་ཅད་ལོག་ཁྱབ་པ་ནི་ཚད་འགལ་ཡིན།  མ་གྲུབ་ན།  རྒྱང་འཕེན་པས་སྐྱེ་བ་སྔ་ཕྱི་མེད་པར་སྟོན་པའི་ལུང་
དང་།  གྲངས་ཅན་གྱིས་གཙོ་བོ་རྟག་དངོས་ཡོད་པར་སྟོན་པའི་ལུང་ལ་སོགས་པ་མུ་སྟེགས་བྱེད་ཀྱི་རྒྱུད་ཐམས་ཅད་ཆོས་ཅན།  དེར་ཐལ།  དེའི་ཕྱིར།  ཁོ་བོ་ནི་སྒྲུབ་ཁྱབ་རྐང་གསུམ་ལ་འབུད།  དྲུང་ཆེན་པོ་པ་ནི་དགག་ཁྱབ་རྐང་གསུམ་ལ་འབུད་
པར་སྣང་ངོ་།  ༼༡༡༢༽།  མ་རིག་ཅེས་སོགས་རྒྱུད་བླ་ཡི། །ལུང་དེ་གང་ན་ཡོད་པ་དྲི། །བཤད་དང་གང་ཞིག་ཅེས་པའི་བར། །ཡོད་ན་རྗེ་བཙུན་ཉིད་ཀྱིས་ནི། །ཇི་ལྟར་ནོར་བུ་མན་ཆད་ཀྱི། །ཚིགས་བཅད་གྲངས་ངེས་མཛད་དེ་ཅི། །ཞེས་པའི་
9-4-61a


ལན་ནི།  བཤད་དང་གང་ཞིག་ཅེས་པའི་བར་དུ་ཡོད་པ་མ་ཡིན་གྱི།  མར་པ་སྨོན་འགྲོའི་འགྱུར་དུ།  དེ་ཡང་དྲང་སྲོང་བཀའ་བཞིན་སྤྱི་བོས་བླང་། །ཞེས་པའི་མཇུག་ཏུ།  མ་རིག་མདོངས་རྣམས་ཀྱིས་ཀྱང་སྲིན་བུའི་
ཡིག་འདྲ་མུ་སྟེགས་བསྟན་བཅོས་སུའང་། །དོན་ལྡན་ཆོས་ལྡན་ཁམས་གསུམ་ཉོན་མོངས་ཟད་བྱེད་མངོན་གྱུར་གང་ཡིན་དང་། །འཇིག་རྟེན་སོ་སོའི་ལེགས་བཤད་གང་དེའང་བློ་ལྡན་དྲང་སྲོང་བཞིན་འཛིན་ན། །གསུང་གང་ཟག་མེད་བློ་མངའ་རྣམས་
ཀྱི་ཞལ་ནས་བྱུང་བ་སྨོས་ཅི་དགོས། །ཞེས་འབྱུང་ཞིང་།  ཕྱྭ་པའི་ཊཱི་ཀར་ཡང་ཚིགས་སུ་བཅད་པ་འདི་གཞུང་ཁ་ཅིག་ལས་འབྱུང་བ་ལྟར་ན་ཞེས་གསུངས་ནས་འབྲུ་བསྣོན་མཛད་དོ། །དེ་ལྟར་ན་ཇི་ལྟར་སྒྲོན་ཀློག་ནོར་བུ་ཞེས་པ་མན་ཆད་ཀྱི་ཚིགས་
བཅད་ཀྱི་གྲངས་ངེས་རྗེ་བཙུན་ཉིད་ཀྱིས།  གང་ལས་རྒྱུ་མཚན་གང་ཕྱིར་ཉིད། །ཇི་ལྟ་བུར་ནི་གང་བཤད་དང་། །རྒྱུ་མཐུན་པ་ནི་གང་ཡིན་དེ། །ཚིགས་སུ་བཅད་པ་བཞིས་བསྟན་ནོ། །གཉིས་ཀྱི་བདག་ཉིད་དག་པ་ཡི། །ཐབས་དང་གཅིག་གིས་ཉམས་
པའི་རྒྱུ། །དེ་ནས་ཚིགས་སུ་བཅད་པ་ནི། །གཉིས་ཀྱིས་འབྲས་བུ་བསྟན་པ་ཡིན། །འཁོར་གྱི་དཀྱིལ་འཁོར་བཟོད་པ་དང་། །བྱང་ཆུབ་ཐོབ་པའི་ཆོས་བརྗོད་པའི། །མདོར་ན་འབྲས་བུ་རྣམ་གཉིས་ནི། །ཐ་མ་ཡིས་ནི་བསྟན་པ་ཡིན། །
ཞེས་གསུངས་པ་ཉིད་ཀྱིས་ཚིགས་སུ་བཅད་པ་འདི་ཉིད་ཡོད་པ་ལེགས་པར་གྲུབ་པར་སྣང་སྟེ།  གང་ལས་བཤད་ན།  ཇི་ལྟར་སྒྲོན་ཀློག་ནོར་བུ་ཅེས་སོགས་ཚིགས་བཅད་གཅིག་སྟེ་ཐུབ་པ་ལ་བརྟེན་ནས་བཤད་ཅེས་པའི་དོན་ཏོ། །རྒྱུ་མཚན་གང་གི་
9-4-61b


ཕྱིར་བཤད་ན་གང་ཞིག་དོན་ལྡན་ཞེས་སོགས་ཚིགས་བཅད་གཅིག་སྟེ།  རྒྱལ་བའི་བཀའ་འདིའི་ཕྱིར་བཤད་དང་། །ཅེས་པའོ། །ཇི་ལྟ་བུར་གང་བཤད་པ་ནི་གང་ཞིག་རྒྱལ་བའི་ཞེས་སོགས་ཚིགས་བཅད་གཅིག་སྟེ།  དྲང་སྲོང་གི་བཀའ་དང་
འདྲ་བར་བསྟན་བཅོས་བཤད་ཅེས་པའོ། །དྲང་སྲོང་གི་བཀའ་བཞིན་དུ་སྤྱི་བོས་བླང་བྱ་ཡིན་པའི་རྒྱུ་མཚན་རིགས་པ་དང་མཐུན་པ་གང་ཞེ་ན།  མ་རིག་མདོངས་རྣམས་ཀྱིས་ཀྱང་ཞེས་སོགས་ཚིགས་བཅད་གཅིག་སྟེ།  ཕྱིར་རོལ་པའི་བསྟན་
བཅོས་དང་།  འཇིག་རྟེན་སོ་སོའི་ལེགས་བཤད་ཀྱང་དྲང་སྲོང་གི་བཀའ་བཞིན་དུ་འཛིན་ན་ཟག་མེད་བློ་མངའི་བསྟན་བཅོས་སྨོས་ཅི་དགོས་ཞེས་པའོ། །གང་ཕྱིར་རྒྱལ་ལས་ཅེས་སོགས་ཚིགས་བཅད་གཉིས་ཀྱིས་རྒྱལ་བའི་བསྟན་པ་
ལ་མ་ལྟོས་པར་བདག་ཉིད་ཀྱི་ཞེན་ལྟ་དག་པའི་ཐབས་བསྟན་ནོ། །བློ་དམན་ཕྱིར་དང་།  ཞེས་སོགས་ཚིགས་བཅད་གཅིག་གིས་ཆོས་ལས་ཉམས་པའི་རྒྱུ་བསྟན།  ཇི་ལྟར་ཟབ་མོའི་ཆོས་ཉམས་ཞེས་སོགས་ཚིགས་བཅད་གཉིས་ཀྱིས་
ཉམས་པའི་འབྲས་བུ་བསྟན།  དཀོན་མཆོག་རྣམ་པར་བྱང་ཁམས་ཞེས་སོགས་ཚིགས་བཅད་གཅིག་གིས་བསྟན་བཅོས་རྩོམ་པའི་འབྲས་བུ་གཉིས་བསྟན་ཏེ།  དེ་ལྟར་ན་ཚིགས་སུ་བཅད་པ་འདི་ངེས་པར་ཡོད་པར་གྲུབ་བོ། །གཞན་དུ་ན་ཇི་
ལྟར་སྒྲོན་ཀློག་ནོར་བུ་མན་ཆད་ལ་ཚིགས་བཅད་ཀྱི་གྲངས་ངེས་ཇི་ལྟར་ཚང་བལྟས་པས་གསལ་ལོ། །ཁྱེད་ཀྱིས་བསྟན་བཅོས་འདི་ལ་ཞབས་ཏོག་བསྒྲུབ་པ་འདི་འབའ་ཞིག་སྣང་ངོ་། །ཀཽའུ་ཤི་ཀའི་མདོ་ཞེས་པ་མན་ཆད་ཀྱི་དྲི་བ་འདི་གསུམ་གོང་དུ་
9-4-62a


འོང་རྒྱུར་འདུག་ནའང་འདིར་བྲིས་འདུག་གོ  ༼༡༡༣༽།  བཀའ་བསྡུ་གསུམ་གྱི་ཐ་སྙད་ནི། །གཞུང་ལུགས་གང་ནས་འབྱུང་བ་དྲི། །ལྷ་ཆེན་ཆོས་ལོག་སུན་འབྱིན་ལ། །བསྡུ་བ་གསུམ་པར་གང་ལས་བཤད། །
ཉི་མའི་དངོས་གྲུབ་ཅེས་པ་ཡི། །གཏམ་རྒྱུད་འདིའང་གང་ལས་འབྱུང་། །ཞེས་པའི་ལན་ནི།  བཀའ་བསྡུ་གསུམ་པ་འདུལ་བ་ལུང་ལས་གསལ་བར་མ་བཤད་པས་འདོད་པ་མི་མཐུན་པ་དུ་མ་ཡོད་པས།  རྟོག་གེ་འབར་བར་ལུགས་གཉིས་གསུངས་
པའི་དང་པོ་ནི།  སྟོན་པ་མྱ་ངན་ལས་འདས་ནས་ལོ་བརྒྱ་དང་དྲུག་ཅུ་ན་གྲོང་ཁྱེར་མེ་ཏོག་གིས་བརྒྱན་པར་རྒྱལ་པོ་མྱ་ངན་མེད་འབྱུང་སྟེ།  དགྲ་བཅོམ་པ་རྣམས་ཀྱིས་སྐད་རིགས་མི་གཅིག་པ་བཞི་སོ་སོར་བཀླགས་པས་སློབ་མ་རྣམས་གྲུབ་མཐའ་སྣ་ཚོགས་
པར་གྱུར།  དེ་ནས་དགྲ་བཅོམ་པ་དང་།  སོ་སོའི་སྐྱེ་བོའི་མཁས་པ་རྣམས་ཛཱ་ལེན་དྷ་རའི་དགོན་པར་འདུས་ནས་བསྟན་པ་བསྡུས་སོ། །དེའི་ཚེ་སྟོན་པ་མྱ་ངན་ལས་འདས་ནས་ལོ་སུམ་བརྒྱ་སོང་ཞེས་ཟེར་ཞིང་།  འོད་ལྡན་ལས་ཀྱང་དེ་དང་མཐུན་པར་
གསུངས་སོ། །ལུགས་གཉིས་པ་ནི།  སྟོན་པ་མྱ་ངན་ལས་འདས་ནས་ལོ་བརྒྱ་དང་སུམ་ཅུ་སོ་བདུན་ན་བདུད་སྡིག་ཅན་བཟང་པོ་ཞེས་བྱ་བས་བསྟན་པ་དཀྲུགས་ནས་སོ་སོར་གྱེས།  དེ་ནས་ལོ་དྲུག་ཅུ་རྩ་གསུམ་ནས་གནས་བརྟན་གནས་མའི་བུས་བསྡུ་བ་
གསུམ་པ་བྱས་ཞེས་ཟེར་རོ། །བསྟན་བཅོས་རྩོམ་པ་པོ་འདིས་བླ་མའི་གསུང་སྒྲོས་ལས་ལྷ་ཆེན་གྱི་ཆོས་ལོག་སུན་ཕྱུང་བ་ལ་བཀའ་བསྡུ་གསུམ་པར་ཐོས་ཞེས་གསུངས་སོ། །གཏམ་རྒྱུད་དང་གྲག་གོ་ཅེས་དང་།  ཐོས་སོ་ཞེས་པ་ཐམས་ཅད་
9-4-62b


ལ་ལུང་ཁུངས་སྟོན་དགོས་པའི་ངེས་པ་མེད་དེ།  གཏམ་རྒྱུད་ཅེས་པའི་སྒྲ་དོན་ཉིད་ཀྱིས་ཤེས་སོ། །དཔེར་ན་རྒྱུད་སྡེ་སྤྱི་རྣམ་ལས།  རྒྱུད་སྡེ་བཞི་ཡི་གྲངས་ངེས་ཀྱི་ཚུལ་གཉིས་བཀོད་ནས་ཀླུ་སྒྲུབ་ཡབ་སྲས་བཞེད་པར་གྲག་གོ་ཅེས་དང་།  རབ་འབྱོར་
སྐྱོང་དང་།  ཀུན་དགའ་སྙིང་པོ་ལ་སོགས་པ་བཞེད་པར་གྲག་གོ་ཅེས་དང་།  རིགས་གཏེར་རང་འགྲེལ་ལས་མངོན་གསུམ་འགྲོས་གསུམ་པ་བྲམ་ཟེའི་བཞེད་པ་ཡིན་པར་ཐོས་སོ། །ཞེས་པ་ལྟ་བུའོ། །གཞན་དུ་ངེས་པར་དགོས་ན་ཁྱེད་ཉིད་ཀྱིས་འདུལ་བ་
ཡི་གེར་བྲིས་པ་ནི།  བཀའ་བསྡུ་གསུམ་པ་ཡིན་ཞེས་གྲག །ཅེས་སྨྲས་པ་དེའི་ལུང་ཁུངས་སྟོན་ཅིག  ༼༡༡༤༽།  དར་མས་བསྟན་པ་བསྣུབས་པ་ནས། །མངའ་བདག་ཡེ་ཤེས་འོད་ཀྱི་བར། །ཆོས་ལོག་དུ་མ་འཕེལ་དེ་གང་། །
ཞེས་པའི་ལན་ནི།  གསང་སྔགས་པ་སྦྱོར་སྒྲོལ་ལམ་དུ་བྱེད་པ་དང་།  འདུལ་བ་ལ་ངལ་ཞིང་དུབ་པའི་མཐར་ལྷུང་བ་སོགས་སུ།  བུ་སྟོན་དང་།  བླ་མ་དམ་པ་ལ་སོགས་པའི་སྐྱེས་ཆེན་རྣམས་ཀྱིས་བཤད་པ་ལྟར་རོ།  ༼༡༡༥༽།  རིན་ཆེན་
བཟང་པོའི་བསྟན་བཅོས་ན། །སྦྱོར་སྒྲོལ་བཀག་པ་ཙམ་ཞིག་ནི། །མ་གཏོགས་ཆོས་ལོག་ཐམས་ཅད་ནི། །ནུབ་པར་མཛད་པའི་གཞུང་མིན་ཞིང་། །ཞེས་པའི་ལན་ནི།  ལོ་ཐོག་གི་ལྷག་མ་ཅུང་ཟད་བརྔས་པ་ལ་ལོ་ཐོག་ཐམས་ཅད་བརྔས་ཟིན་
ཞེས་སོགས་འཇིག་རྟེན་གྱི་ཐ་སྙད་དང་།  སྒྲིབ་པའི་ལྷག་མ་ཅུང་ཟད་སྤངས་པ་ལ་སྒྲིབ་པ་ཐམས་ཅད་སྤངས་ཞེས་སོགས་བསྟན་བཅོས་ཀྱི་ཐ་སྙད་ཐམས་ཅད་ཚིག་འཁྲིའི་སྒོ་ནས་སུན་འབྱིན་པར་སྣང་སྟེ།  དཔེར་ན་ས་བཅུ་རྒྱུན་མཐའི་གནས་སྐབས་ན། །
9-4-63a


བག་ཆགས་སྒྲིབ་པ་ཙམ་ཞིག་ནི། །མ་གཏོགས་སྒྲིབ་པ་ཐམས་ཅད་ནི། །སྤོང་བར་མཛད་པའི་ཚུལ་མིན་ཞིང་། །ཞེས་པ་ལྟ་བུའོ།  ༼༡༡༦༽།  ཕོ་བྲང་ཞི་བ་འོད་དང་ནི། །འགོས་ཀྱིས་སྔགས་ལོག་སུན་འབྱིན་ན། །
རང་ལ་གནོད་པ་འགའ་ཡང་སྣང་། །ཞེས་པའི་ལན་ནི་ཅི་འདྲ་འདུག་དྲིས་ན་ངེས་པ་ཅན་ཅིག་མེད་དམ།  གལ་ཏེ་གྲུབ་མཐའ་མི་མཐུན་པ་རེ་ཙམ་ཡོད་ཀྱང་།  སྔོན་གྱི་དམ་པ་རྣམས་ཀྱིས་བསྟན་པ་ལ་བྱ་བ་བྱས་ཚུལ་སྨྲས་པའི་སྐབས་ཡིན་གྱི་རྣམ་པ་ཐམས་
ཅད་དུ་ཡིད་ཆེས་པའི་ལུང་ཁུངས་སྨོས་པ་མ་ཡིན་པས་སྐྱོན་མེད་དོ།  ༼༡༡༧༽།  དཔའ་བོ་ཁྱོད་ཀྱི་བསྟན་པ་ནི། །ཞེས་སོགས་འདི་ནི་སུ་ལ་བསྟོད། །རང་རེའི་སྟོན་པ་ཐུགས་རྗེ་ཅན། །ཉིད་ཀྱི་བསྟོད་པ་ཡིན་ལགས་སམ། །ཞེས་པའི་ལན་ནི། 
དེ་ཡིན་ཏེ།  སློབ་དཔོན་དཔའ་བོས་མཛད་པའི་བསྟོད་པ་བརྒྱ་ལྔ་བཅུ་པ་དེ་རང་རེ་ཚང་གི་སྟོན་པ་ཐུགས་རྗེ་ཅན་གྱི་བསྟོད་པ་ཡིན་པའི་ཕྱིར།  ཁྱེད་ཡིན་ལགས་སམ་ཞེས་དྲིས་པའི་དོན་སློབ་དཔོན་དཔའ་བོས་མཛད་པའི་སངས་རྒྱས་སུམ་ཅུ་སོ་ལྔའི་བསྟོད་
པའི་ནང་གི་དཔའ་བོའི་སྡེའི་བསྟོད་པ་ཡིན་སྙམ་པ་ཡིན་ནམ།  བསྟན་པའི་བསྟོད་པ་ཡིན་པས་སྟོན་པའི་བསྟོད་པ་མ་ཡིན་སྙམ་པ་ཡིན་ནམ།  དེ་ལས་གཞན་པའི་རྒྱུ་མཚན་གཅིག་ཡོད་པ་ཡིན།  དང་པོ་ལྟར་ན།  དཔའ་བོའི་སྡེའི་བསྟོད་པ་ནི།  དཔའ་བོ་ཁྱོད་
ཀྱི་བསྟན་པ་ནི། །བདུད་དང་མུ་སྟེགས་སྐྲག་མཛད་ཅིང་། །གདུལ་བྱ་ཀུན་མཁྱེན་འགོད་མཛད་པ། །དཔའ་བོའི་སྡེ་ལ་ཕྱག་འཚལ་ལོ། །ཞེས་པ་ཡོད་ལ།  སྤྱིར་སངས་རྒྱས་གཅིག་ལ་བསྟོད་པ་གཞན་གྱི་བསྟོད་པ་མི་འགྱུར་བ་ག་ལ་ཡིན།  གཉིས་
9-4-63b


པ་ལྟར་ན་སངས་རྒྱས་ཀྱི་དབུའི་གཙུག་ཏོར་ལ་བསྟོད་ན་ནི།  གཙུག་ཏོར༷་གྱི་བསྟོད་པ་ཡིན་པས་སངས་རྒྱས་ཀྱི་བསྟོད་པར་མི་འགྱུར།  དེ་བཞིན་དུ་སྐུ་ལ་བསྟོད་ན་ནི་སྐུའི་བསྟོད་པ་ཡིན་གྱི།  དེར་མི་འགྱུར།  གསུང་དང་།  ཐུགས་དང་།  ཡོན་ཏན་
དང་།  ཕྲིན་ལས་ལ་བསྟོད་ན་ནི་དེ་དག་གི་བསྟོད་པ་ཡིན་པས་སྟོན་པའི་བསྟོད་པར་མི་འགྱུར་ན།  ད་ནི་སྟོན་པའི་བསྟོད་པ་གང་ཞིག་ཡིན་སྨྲོས་ཤིག །གསུམ་པ་ལྟར་ན་སྨྲ་བའི་དུས་ལ་བབ་བོ། ༼༡༡༨༽།  རིག་འཛིན་སྡོམ་པའི་སྐབས་ཞེས་
པའི། །ལེའུ་མཚན་ཡང་མི་འབྱུང་ཞེས། །ཞེས་པའི་ལན་ནི།  སྤྱིར་གསུང་རབ་རྣམས་ལ་མངོན་རྟོགས་རྒྱན་ལྟ་བུ་སྐབས་བརྒྱད་ཀྱི་མཚན་སོ་སོར་བྱས་ནས་དེའི་འོག་ཏུ་ཡང་གཞུང་འགའ་ཞིག་འབྱུང་བ་ལྟ་བུ་དང་།  སཾ་བྷུ་ཊིའི་རྒྱུད་ཀྱི་རྒྱལ་པོ་
ལྟ་བུ་བརྟག་པ་རེ་རེ་ལ་རབ་བྱེད་བཞི་བཞིར་བྱེད་པའི་རབ་བྱེད་དང་པོ་གསུམ་ལ་རབ་བྱེད་ཀྱི་མཚན་སོ་སོར་བྱས་ནས་བཞི་པ་ལ་རབ་བྱེད་ཀྱི་མཚན་མི་འབྱུང་བར་བརྟག་པའི་མཚན་འབྱུང་བ་ལྟ་བུ་དུ་མ་ཡོད་པ་ལས།  བསྟན་བཅོས་འདིའང་དེ་དང་འདྲ་བར་
སྐབས་དང་པོ་གཉིས་ལ་མཚན་སོ་སོར་བྱས་ནས་སྐབས་གསུམ་པ་ལ།  རིག་འཛིན་སྡོམ་པའི་སྐབས་ཞེས་མི་འབྱུང་བར་བསྟན་བཅོས་སྤྱིའི་མཚན་འབྱུང་བ་སྟེ་གཅིག་ལ་ཨ་འཐས་སུ་མི་བྱ་བར་ཕྱོགས་མཐའ་དག་མཐོང་བར་བྱའོ།།        །།
དེ་ལྟར་ལེགས་པར་དྲིས་པའི་དོན། །གཞུང་ལུགས་འདི་ལ་དད་པ་དང་། །རྣམ་དཔྱོད་ཐོས་པ་མང་ལྡན་ཞིང་། །ལྕེ་བདེ་དོན་གསལ་སྨྲ་མཁས་པ། །དེ་དག་ཀུན་གྱིས་དྲིས་པ་དང་། །དེ་ལན་སོ་སོར་མ་འདྲེས་པར། །
9-4-64a


ལེགས་པར་བཤད་པའི་དགའ་སྟོན་གྱིས། །བསྟན་བཅོས་འདི་ལ་དད་ཐོབ་པའི། །བློ་གསལ་དེ་དག་ཐམས་ཅད་ཀྱི། །བློ་ཡི་རེ་བ་སྐོང་བར་ཤོག །ཅེས་པའི་ལན་ནི།  དེ་ལྟར་དྲིས་པའི་བསྟན་
བཅོས་འདི་ལ་དད་པ་ཐོབ་པའི་དྲི་བ་རང་མ་ཡིན་པ་འདྲ།  སྨོན་ལམ་གྱི་དོན་ནི།  དྲིས་ལན་གྱི་ཡིག་ཆ་འདི་ལ་ལེགས་པར་ཚང་ཡོད་དོ། །མི་ཤེས་གཅིག་ནས་གཅིག་བརྒྱུད་པའི། །ཁ་ཟེགས་བསྡུས་པའི་ཅལ་ཅོལ་གྱིས། །མཁས་པའི་
བསྟན་བཅོས་ཆུད་གསན་པར། །མཐོང་ནས་ལེགས་པར་དྲིས་པ་ཡིན། །ཞེས་པའི་ལན་ནི།  འདི་ནི་རྗེ་མུས་ཆེན་ནས་བརྒྱུད་པའི་བཤད་པའི་རྒྱུན་ལ་ཟུར་ཟ་བ་གྲགས་ན་ཡང་།  ངེད་ནི་ཆོས་ལ་བརྒྱུད་པ་ཡོད་པ་དང་།  གང་ཟག་ཡོངས་འཛིན་གྱིས་
ཟིན་པ་འདི་ཡོན་ཏན་ཡིན་པར་སེམས་སོ། །འདི་ལན་ཇི་བཞིན་མི་མཁྱེན་ན། །སླར་ཡང་འདྲི་བོ་ཉིད་ལ་དྲིས། །དེ་དག་ལེགས་པར་བཤད་པ་ཡི། །དགའ་སྟོན་ཕྱོགས་བཅུར་སྤེལ་བར་འགྱུར། །ཞེས་པའི་ལན་ནི།  འདྲི་ལུགས་འདིས་དགའ་
སྟོན་ཡང་ཅི་འདྲ་ཡོད་ལགས་སམ།  གང་དག་གཞུང་དོན་རྟོགས་སླ་ཞེས། །བཏང་སྙོམས་འཇོག་པ་དེ་དག་གིས། །འདི་དོན་ཤེས་པར་མ་མཐོང་ནས།  དཀའ་གནས་འགའ་ཞིག་དྲིས་པ་ཡིན། །ཞེས་པའི་ལན་ནི།  འདི་ཁོ་བོའི་རྣམ་
བཤད་ལ་ཟུར་ཟ་བར་གྲག་ན་ཡང་ཁོ་བོའི་རྣམ་བཤད་ནི་ཤེས་ནས་བརྩམས་པ་ཡིན་པས།  བཤད་མི་དགོས་པ་རྣམས་མ་བཤད།  དགོས་པ་རྣམས་བཤད།  དོགས་པར་དཔྱད་མི་དགོས་པ་རྣམས་མ་དཔྱད།  དགོས་པ་རྣམས་དཔྱད།  མདོར་ན་ཚིག་ཉུང་ལ་དོན་རྒྱས་པ་
9-4-64b


གསུང་རབ་ཀྱི་དགོངས་པར་ཞུགས་པ་ཞིག་གོ།  དྲི་བ་དང་ནི་སུན་འབྱིན་གྱི། །གནས་སྐབས་ལེགས་པར་མི་ཤེས་པའི། །མཁས་འདོད་མུན་སྤྲུལ་ཕྲེང་བ་ཅན། །དེ་དག་ཚིག་ལེར་བྱས་འདི་ཡིས། །བསྟན་བཅོས་འདི་ནི་དགག་གོ་
ཅེས། །སྨྲ་བ་རང་གི་སྐྱོན་ཡིན་ནོ། །ཞེས་པའི་ལན་ནི།  དྲི་བ་དང་སུན་འབྱིན་གྱི་གནད་མི་ཤེས་ན་དངོས་དྲི་བ་ཡིན།  སུན་འབྱིན་མ་ཡིན་ཟེར་བ་འདྲ་སྟེ།  ཡིད་ཆེས་པའི་ལུང་དང་འགལ་ལོ་ཞེས་སྨྲས་ན་ཅི་ཟེར།  དངོས་
སྟོབས་ཀྱི་རིགས་པ་དང་འགལ་ལོ་ཞེས་སྨྲས་ན་ཅི་ཟེར།  ཁས་བླངས་ནང་འགལ་ལོ་ཞེས་སྨྲས་ན་ཅི་ཟེར།  ཞེས་སོགས་ལ་དྲི་བ་ཙམ་དུ་འདོད་པར་སྣང་བའི་ཕྱིར་རོ། །དེ་གཉིས་ཀྱི་གནད་ལེགས་པར་ཤེས་ན་སུན་འབྱིན་མིན་ཟེར་བ་འདྲ་སྟེ། 
སུན་ཕྱུང་ཅི་ནུས་ནུས་སུ་བྱས་འདུག་པའི་ཕྱིར་རོ། །སྐྱོན་འདི་ལྟ་བུ་ཡོད་དོ། །ཅེས་བརྗོད་ན་ཁྱོད་ལན་ཅི་ཟེར་ཞེས་པ་དང་།  སྐྱོན་འདི་ལྟ་བུ་ཡོད་དོ་ཅེས་སྨྲས་པ་གཉིས་ལ་དྲི་བ་དང་སུན་འབྱིན་གྱི་ཁྱད་པར་ནི་མེད་དེ།  དཔེར་ན་མི་ཉེས་
མེད་ཞིག་ལ་ཁྱོད་ཀྱིས་ནོར་རྐུས་སོ་ཞེས་བརྗོད་ན་ལན་ཅི་ཟེར་ཞེས་སྨྲས་པ་དང་།  ཁྱོད་ཀྱིས་ནོར་རྐུས་སོ་ཞེས་ཅིག་རྐྱང་དུ་སྨྲས་པ་གཉིས་ཀ་ལ་ཀླན་ཀར་འགྱུར་མི་འགྱུར་གྱི་ཁྱད་པར་མེད་པར་བཞིན་ནོ་འདི་འདྲའི་རིགས་ཅན་ལ་དགོངས་ནས་རིགས་པའི་རྒྱལ་པོས་
འགའ་ཞིག་ལམ་ནི་འདི་ཡིན་ཞེས། །སྡོང་དུམ་འདི་ནི་སྨྲས་འགྱུར་ཞེས། །གཞན་ནི་བདག་ཉིད་སྨྲ་དེ་ལྟར། །དེ་དག་བྱེ་བྲག་བརྟག་པར་གྱིས། །ཞེས་གསུངས་པས་ཤེས་པར་བྱའོ། །གང་དག་མཁས་པ་ངོ་མཚར་ཅན། །གཞུང་
9-4-65a


ལུགས་གང་དང་གང་འཆད་ཚེ། །དེ་དང་དེ་ཡི་དཀའ་བའི་གནས། །མ་ལུས་ལེགས་པར་བླངས་ནས་སུ། །དཔྱད་ཅིང་དྲི་བའི་ཚུལ་གྱིས་ནི། །གཞན་ལ་འཆད་ཅིང་འདོམས་པ་ཡིན། །ཞེས་པའི་
ལན་ནི།  དཀའ་བའི་གནས་ལ་དཔྱད་ཅིང་དྲི་བ་ཙམ་གྱིས་གཞན་ལ།  ཕྱིན་ཅི་མ་ལོག་པར་འཆད་ཅིང་འདོམས་པར་ནུས་པ་མ་ཡིན་གྱི་དཀའ་བའི་གནས་ལ་དོགས་པ་གཅོད་པའི་སྒོ་ནས་གཞན་ལ་འཆད་ཅིང་འདོམས་དགོས་པ་ཡིན་ནོ། །
དེ་ལྟར་ན་དམ་བཅའ་མ།  སྒྲུབ་བྱེད་དམ།  གྲུབ་མཐའམ།  དེ་དག་སྟོན་པའི་བསྟན་བཅོས་གང་ཡིན་ཀྱང་རུང་བརྗོད་དོན་ནོར་བ་སྟོན་པ་ཞིག་ཡིན་ན་གཞན་གྱིས་སུན་འབྱིན་བརྗོད་མི་དགོས་པར་དེ་བཤད་པའམ།  སྒྲུབ་བྱེད་འགོད་
པ་ཙམ་གྱིས་སྐྱོན་ཇེ་གསལ་དུ་སོང་ནས་དོར་བྱར་གོ་བར་འགྱུར་ལ།  བརྗོད་བྱའི་དོན་དེ་མ་ནོར་བ་ཞིག་ཡིན་ན་ནི་གཞན་གྱིས་དྲི་བའམ་སུན་འབྱིན་བརྗོད་པས་ཡོན་ཏན་ཇེ་གསལ་དུ་སོང་ནས་བླང་བྱར་གོ་བར་འགྱུར་བས།  རྗེ་བཙུན་ས་སྐྱ་པ་ཡབ་སྲས་ཀྱི་
གྲུབ་མཐའི་རྗེས་སུ་འབྲང་བའི་བློ་གྲོས་དང་དད་པ་དང་ལྡན་པ་དག་གིས་དྲིས་ལན་གྱི་ལེགས་བཤད་འདི་ལ་བརྟེན་ནས་ཀྱང་བསྟན་བཅོས་འདི་ལ་སླར་ཡང་ཡིད་ཆེས་ཤིང་འཇུག་པར་བྱའོ། །དེ་ལྟར་བསྟན་བཅོས་རིན་ཆེན་གཞལ་མེད་ཁང་། །ཚིག་
དོན་རྣམ་བཀྲའི་རི་མོ་གསར་མཐོང་ཚེ། །བརྡ་དོན་ཕྲད་པར་འདོད་ནས་འདི་ཅི་ཞེས། །མཁས་ལ་འདྲི་ན་ཀུན་གྱི་ལན་འདི་ཡིན། །གལ་ཏེ་ལུགས་འདིར་སྡང་བས་ཞུགས་པ་ཡི། །དབུས་གཙང་མཁས་རློམ་འགའ་ཡི་ཁ་ཟེགས་རྣམས། །བསྡུས་
9-4-65b


ནས་བསྟན་བཅོས་ཆེ་ལ་ཅོ་འདྲི་ན། །ཁྱོད་ཉིད་འདི་ཡི་རྗེས་སུ་འབྲང་དང་འགལ། །འོན་ཏེ་རང་ཉིད་ཚུལ་འདི་ངེས་གྱུར་ཀྱང་། །གཞན་དག་ངེས་པ་མེད་སྙམ་འདྲི་ན་ནི། །ང་རྒྱལ་ལག་པས་རང་རིག་མིག་བཀབ་ནས། །ཆོས་བརྒྱད་འདོད་
ཕྱོགས་ཡོས་ལ་རྐུ་བར་ཟད། །རྣམ་དཔྱོད་ལྡན་པའི་གྲགས་འདོད་འདྲི་ན་ནི། །དྲི་ཚིག་ཕལ་ཆེར་དེ་གཟུགས་སྟོན་པར་སྣང་། །རང་ཉིད་མི་ཤེས་སློབ་འདོད་འདྲི་ན་ནི། །འདྲི་པོས་དགའ་སྟོན་ཕྱོགས་བཅུར་སྤེལ་དང་འགལ། །དེ་ལས་གཞན་
དུ་མདོ་རྒྱུད་མ་ལུས་པའི། །ལུས་སྲུང་བསྟན་བཅོས་གསེར་གྱི་གོ་ཆ་ལ། །ཉེས་བརྒྱས་སྨོད་པའི་ཚིག་གི་མཚོན་རྩེ་ནི། །སྣ་ཚོགས་བཏོད་པའི་དགོས་པ་ཅི་ཞིག་ཡིན། །སྙིགས་དུས་ཕྱོགས་འཛིན་ཅ་ཅོར་འགྱུར་དོགས་ནས། །བཏང་སྙོམས་
བཞག་ཚེ་ལན་མ་བྱུང་ཞེས་སྒྲོགས། །ལན་སྨྲས་ཚེ་ན་སྡང་བས་ཞུགས་སོ་ཞེས། །སྨྲ་ན་ད་ནི་བདག་གིས་ཅི་ལྟར་བྱ། །དྲི་ཚིག་ཡིན་ནམ་སུན་འབྱིན་ཡིན་ཀྱང་རུང་། །བསྟན་བཅོས་ཡིད་བཞིན་ནོར་བུ་འདམ་རྫབ་ཀྱིས། །སྦགས་པར་མཐོང་
ནས་དག་བྱེད་ལུང་རིགས་འདི། །ལྷག་བསམ་དག་པས་ཚམ་ཚོམ་མེད་པར་བྲིས། །འདི་ཉིད་སྟོན་པ་དགེས་པའི་མཆོད་པ་སྟེ། །བསྟན་པ་པད་མཚོ་གསལ་བའི་ཉི་འོད་ཡིན། །བསྟན་འཛིན་སྐྱེས་བུའི་རྣར་སྙན་ཕྲིན་ཡིག་སྟེ། །བསྟན་སྲུང་རྒྱ་མཚོ་
མཉེས་པའི་དམ་རྫས་ཡིན། །ཐུབ་པའི་རྒྱལ་ཚབ་རྗེ་བཙུན་ས་སྐྱ་པའི། །བསྟན་ལ་རབ་དགའི་ལྷ་རྣམས་ས་སྟེང་ནས། །འོག་མིན་བར་དུ་དགེས་པའི་གར་བསྒྱུར་ཞིང་། །སྣ་ཚོགས་གླུ་ཡིས་འདི་དོན་སྒྲོགས་པར་ངེས། །དེ་ཡི་བསྟན་འཛིན་ལྗོངས་འདིའི་
9-4-66a


སྐྱེས་ཆེན་རྣམས། །བཞིན་རས་གསལ་བའི་སྤྱན་གྱིས་གཟིགས་པར་མཛོད། །དེ་ཡི་རྗེས་འབྲང་བློ་གསལ་གཞོན་ནུ་རྣམས། །དགའ་ཞིང་སྤྲོ་བའི་བ་སྤུ་གཟིངས་པར་མཛོད། །དེ་ཡི་སྦྱིན་བདག་དཔལ་འབྱོར་ལྡན་པ་རྣམས། །
ཡི་གེར་འབྲི་ཞིང་མཆོད་དང་སྦྱིན་པར་མཛོད། །དེ་ཡི་བཀའ་སྲུང་འཇིགས་རུང་སྐུར་སྟོན་རྣམས། །བར་ཆད་བསལ་ཞིང་མཐུན་རྐྱེན་བསྒྲུབ་པར་མཛོད། །འདི་སྦྱར་དགེ་ཚོགས་ལྷ་དབང་རྡོ་རྗེ་དེས། །ལོག་སྨྲའི་ལྷ་མིན་ཚོགས་ཀུན་རབ་བཅོམ་ནས། །
ཐུབ་བསྟན་རྒྱ་མཚོའི་གོས་ཅན་མཐར་ཐུག་པར། །དམ་ཆོས་རྔ་སྒྲ་རྒྱུན་དུ་སྒྲོགས་པར་ཤོག །སྡོམ་པ་གསུམ་གྱི་རབ་ཏུ་དབྱེ་བ་ལ་དྲིས་ཤིང་བརྩོད་པའི་ལན་སྡོམ་གསུམ་འཁྲུལ་སྤོང་ཞེས་བྱ་བ་འདི་ནི།  དཀྱིལ་འཁོར་རྒྱ་མཚོའི་རིགས་བདག་རྒྱལ་བ་རྡོ་
རྗེ་འཆང་དང་དབྱེར་མ་མཆིས་པ།  ཐམས་ཅད་མཁྱེན་པ་ཀུན་དགའ་བཟང་པོ་ཡབ་སྲས་ཀྱི་ཞབས་རྡུལ་ཡུན་རིང་དུ་བསྟེན་པས་སྡེ་སྣོད་དང་།  རྒྱུད་སྡེ་དང་།  མན་ངག་མང་དུ་ཐོས་ཤིང་།  དངོས་སྟོབས་ཀྱི་རིགས་པ་སྨྲ་བ་ཤཱ་ཀྱའི་དགེ་སློང་བསོད་ནམས་སེང་གེས་
སྟོན་པ་ཆོས་ཀྱི་དབྱིངས་སུ་བཞུགས་ནས་ལོ་སུམ་སྟོང་དྲུག་བརྒྱ་དང་བཅུ་ཐམ་པ་ལོན་པ།  མེ་ཕོ་སྤྲེའུའི་ལོ་སྨིན་དྲུག་ཟླ་བའི་དཀར་ཕྱོགས་ལ་རྟ་ནག་རིན་ཆེན་རྩེ་ཐུབ་བསྟན་རྣམ་པར་རྒྱལ་བའི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ། །འདིས་བསྟན་བཅོས་
ཡིད་བཞིན་ནོར་བུ་བཤད་བསྒྲུབ་ཀྱི་སྒོ་ནས་མི་ནུབ་ཅིང་དར་བའི་རྒྱུར་གྱུར་ཅིག།    །།འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག།    །།དགེའོ།།
9-4-66b


empty page
9-5-1a


༄༅།  །མདོ་རྒྱུད་ཀུན་གྱི་དོན་བསྡུས་པ་སྙིང་པོ་ཡིད་ཀྱི་མུན་པ་རྣམ་པར་སེལ་བ་ཞེས་བྱ་བ་བཞུགས་སོ། །
9-5-1b


༄༅།  །གསུང་རབ་རྒྱ་མཚོའི་དབུས་ན་གནས་བཅས་ཤིང་། །ལྔ་རིག་བློ་གྲོས་གདེངས་ཀས་སྤྱི་བོ་མཛེས། །མཁྱེན་བརྩེའི་འོད་ཟེར་ལོག་སྨྲས་མི་བཟོད་པ། །འཇམ་མགོན་བླ་མ་གདེངས་ཅན་དབང་
པོ་རྒྱལ། །གང་གི་གསུང་རབ་མདོ་རྒྱུད་མ་ལུས་པའི། །གནད་རྣམས་འཁྲུལ་མེད་སྟོན་པ་རིན་ཆེན་སྒྲོན། །ལམ་བཟང་གསལ་མཛད་བསྟན་བཅོས་ཆེན་པོ་དེའི། །བསྡུས་དོན་ཡིད་ཀྱི་མུན་སེལ་བྲི་བར་བྱ། །སྡོམ་པ་གསུམ་
གྱི་རབ་ཏུ་དབྱེ་བ་འདི་ལ་དོན་གསུམ་སྟེ།  བརྗོད་བྱ་བདེ་བླག་ཏུ་རྟོགས་པའི་ཆེད་དུ་མཚན་གྱི་དོན།  བསྟན་པ་རྣམ་དག་ཏུ་བསྒྲུབ་པའི་དོན་དུ་གཞུང་གི་དོན།  བྱས་ཤེས་དྲིན་བཟོ་བསྐྱེད་པའི་ཕྱིར་དུ་མཛད་བྱང་སྨོས་པའོ། །
གཉིས་པ་ལ་གསུམ་སྟེ།  བཤད་པ་ལ་འཇུག་པའི་ཡན་ལག །བཤད་པ་རང་གི་ངོ་བོ།  བཤད་པ་ཡོངས་སུ་རྫོགས་པའི་བྱ་བའོ། །དང་པོ་ལ་གཉིས་ཏེ།  མཆོད་པར་བརྗོད་པ་དང་།  བརྩམས་པར་དམ་
9-5-2a


བཅའ་བའོ། །དང་པོ་ལ་གསུམ་སྟེ།  བླ་མ་དམ་པ་སྤྱི་ལ་མཆོད་པར་བརྗོད་པ།  སྡོམ་གསུམ་སྟེར་བའི་བླ་མ་ལ་མཆོད་པར་བརྗོད་པ།  སྡོམ་གསུམ་གྱི་བསླབ་པ་འཆའ་བ་པོ་སངས་རྒྱས་
ལ་མཆོད་པར་བརྗོད་པའོ། །གཉིས་པ་ལ་གཉིས་ཏེ།  དོན་ལ་འཁྲུལ་པ་དགག་པ་དང་།  ཚིག་ལ་འཁྲུལ་བ་དགག་པའོ། །དང་པོ་ལ་གསུམ་སྟེ།  བརྗོད་བྱའི་གཙོ་བོ་ངོས་བཟུང་བའི་སྒོ་ནས་ལུས་མདོར་བསྟན།  སྡོམ་
གསུམ་གྱི་ཉམས་ལེན་ཞིབ་ཏུ་བསྟན་པའི་སྒོ་ནས་ཡན་ལག་རྒྱས་པར་བཤད་པ།  གནད་མ་འཁྲུལ་བ་བསྒྲུབ་པར་གདམས་པའི་སྒོ་ནས་མཇུག་བསྡུ་བའོ། །གཉིས་པ་ལ་གཉིས་ཏེ།  དངོས་དང་།  དེ་ལ་རྩོད་པ་
སྤང་བའོ། །དང་པོ་ལ་གསུམ་སྟེ།  སོ་ཐར།  བྱང་སེམས།  སྔགས་སྡོམ་གྱི་ཉམས་ལེན་བཤད་པའོ། །དང་པོ་ལ་གསུམ་སྟེ།  བརྗོད་བྱའི་གཙོ་བོ་སོ་ཐར་གྱི་རྣམ་གཞག །བསླབ་བྱའི་རང་བཞིན་ལས་
9-5-2b


འབྲས་ཀྱི་རྣམ་གཞག །ཐོས་བསམ་བསྒོམ་གསུམ་མ་ནོར་བས་མཇུག་བསྡུ་བའོ། །དང་པོ་ལ་གསུམ་སྟེ།  དབྱེ་བའི་སྒོ་ནས་མདོར་བསྟན།  སོ་སོའི་རང་བཞིན་རྒྱས་པར་བཤད།  གདམས་པའི་སྒོ་ནས་མཇུག་བསྡུ་བའོ། །གཉིས་པ་ལ་གཉིས་ཏེ། །
ཉན་ཐོས་སོ་ཐར་དང་།  ཐེག་ཆེན་གྱི་སོ་ཐར་རོ། །དང་པོ་ལ་གཉིས་ཏེ།  རིས་བདུན་གྱི་དུས་ཀྱི་རྣམ་གཞག །བསྙེན་གནས་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ།  བསྙེན་གནས་སྤྱིར་བསྟན་པ།  དུས་ལ་ལོག་རྟོག་དགག་པའོ། །དང་པོ་ལ་གཉིས་ཏེ། 
དམ་བཅའ་འགོད་པ་དང་།  སྒྲུབ་བྱེད་བཤད་པའོ། །དང་པོ་ལ་གཉིས་ཏེ།  རིས་བདུན་ཤི་འཕོ་བའི་ཚེ་གཏོང་བའི་སྒྲུབ་བྱེད།  དེའི་ཡན་ལག་ཏུ་སྡེ་སྣོད་ཀྱི་རྣམ་དབྱེ་བསྟན་པའོ། །གཉིས་པ་དུས་ལ་ལོག་རྟོག་དགག་པ་ལ་གཉིས་ཏེ།  ལོག་རྟོག་བརྗོད།  དེ་དགག་
པའོ། །འདི་ལ་གསུམ་སྟེ།  སྒྲུབ་བྱེད་མེད་པ།  གནོད་བྱེད་ཡོད་པ།  དམན་པའི་གནས་སུ་བསྟན་པའོ། །བར་པ་ལ་གཉིས་ཏེ།  གནོད་བྱེད་ཀྱི་རིགས་པ་དངོས།  དེའི་ཉེས་སྤོང་གི་ལན་དགག་པའོ། །འདི་ལ་གཉིས་ཏེ།  ཉེས་སྤོང་བརྗོད།  དེ་
དགག་པའོ། །འདི་ལ་གསུམ་སྟེ།  གཏོང་རྒྱུ་གཞན་ལའང་མཚུངས་པ།  ཧ་ཅང་ཐལ་བས་དགག་པ།  སེམས་བསྐྱེད་ལྡན་པའི་བསྙེན་གནས་ལའང་མཚུངས་པའོ། །གཉིས་པ་བསྙེན་གནས་བྱེ་བྲག་ཏུ་བཤད་པ་ལ་གཉིས་ཏེ།  རྣམ་གཞག་སྤྱིར་
བསྟན་པ་དང་།  ལོག་རྟོག་བྱེ་བྲག་ཏུ་དགག་པའོ། །དང་པོ་ལ་གཉིས་ཏེ།  ཉན་ཐོས་སྡེ་གཉིས་ཀྱི་བསྙེན་གནས་ཀྱི་ཁྱད་པར།  ཐེག་པ་ཆེ་ཆུང་གི་བསྙེན་གནས་ཀྱི་ཁྱད་པར་རོ། །གཉིས་པ་ལ་གསུམ་སྟེ།  བསྙེན་གནས་འབུལ་བ་དགག་པ།
9-5-3a


  བསྙེན་གནས་འཆོལ་བ་དགག་པ།  ལྷ་སྒོམ་ཐ་དད་དགག་པའོ། །གཉིས་པ་ཐེག་ཆེན་སོ་ཐར་ལ་གཉིས་ཏེ།  མཉན་པར་གདམས་པ་དང་།  དོན་དངོས་སོ། །འདི་ལ་གསུམ་སྟེ།  ལེན་པའི་ཆོ་ག །བསླབ་བྱའི་ཁྱད་པར།  གཏོང་
བའི་ཚུལ་ལོ། །དང་པོ་ལ་གཉིས་ཏེ།  ཆོ་ག་ཐུན་མོང་མ་ཡིན་པ་དང་།  ཆོ་ག་ཐུན་མོང་བའོ། །དང་པོ་ལ་གཉིས་ཏེ།  ད་ལྟར་གྱི་ཆོ་ག་དང་།  སྔོན་གྱི་ཆོ་གའོ། །དང་པོ་ལ་གཉིས་ཏེ།  ཆོ་ག་ནུབ་པ་དང་།  ཆོ་ག་མ་ནུབ་པའོ། །གཉིས་པ་
བསླབ་བྱའི་ཁྱད་པར་ལ་གཉིས་ཏེ།  མཉན་པར་གདམས་པ་དང་།  ཁྱད་པར་སོ་སོར་བཤད་པའོ། །གསུམ་པ་བསླབ་བྱའི་རང་བཞིན་ལས་འབྲས་ཀྱི་རྣམ་བཞག་ལ་གཉིས་ཏེ།  ལས་འབྲས་ཀྱི་རྣམ་གཞག་སྤྱིར་བསྟན།  འཁྲུལ་པ་དགག་
པ་བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ།  མཉན་པར་གདམས་པ།  དབྱེ་བ་དངོས།  མཇུག་བསྡུ་བའོ། །བར་པ་ལ་ལྔ་སྟེ།  གསུམ་དུ་དབྱེ་བ།  གཉིས་སུ་དབྱེ་བ།  བཞིར་དབྱེ་བ།  གཉིས་སུ་དབྱེ་བ་གཞན་བསྟན་པ། 
གསུམ་དུ་དབྱེ་བ་གཞན་བསྟན་པའོ། །དང་པོ་ལ་གཉིས་ཏེ།  དབྱེ་བ་དངོས་དང་།  དབྱེ་བའི་དགོས་པའོ། །གཉིས་པ་འཁྲུལ་པ་དགག་པ་བྱེ་བྲག་ཏུ་བཤད་པ་ལ་བཞི་སྟེ།  བསྔོ་བའི་གནས་ལ་འཁྲུལ་པ་དགག་པ།  འབྲས་བུ་དཀར་
ནག་ཟངས་ཐལ་དགག་པ།  ཉམས་ལེན་ཡེ་བཀག་ཡེ་གནང་བཀག་པ།  འཕྲལ་གྱི་ལག་ལེན་འཁྲུལ་པ་དགག་པའོ། །དང་པོ་ལ་བཞི་སྟེ།  བསྔོ་རྒྱུའི་དགེ་རྩ་ལ་འཁྲུལ་པ་དགག་པ།  བསྔོ་ཚུལ་གྱི་ལག་ལེན་ལ་འཁྲུལ་པ་དགག་པ། 
9-5-3b


 བསྔོ་བའི་འབྲས་བུ་ལ་འཁྲུལ་པ་དགག་པ།  དོན་བསྡུས་ཏེ་ལས་འབྲས་ཀྱི་གནད་བསྟན་པའོ། །དང་པོ་ལ་གཉིས་ཏེ།  ཕྱོགས་སྔ་མ་བརྗོད་པ་དང་།  དེ་དགག་པའོ། །འདི་ལ་ལྔ་སྟེ།  ཆོས་དབྱིངས་བསྔོ་རྒྱུའི་སྙིང་པོར་འདོད་པ་དགག་པ།  ཆོས་
དབྱིངས་ལས་གཞན་པའི་ཁམས་བསྔོ་རྒྱུའི་སྙིང་པོར་འདོད་པ་དགག་པ།                                                            ཆོས་དབྱིངས་ལ་བསྔོ་རྒྱུའི་སྙིང་པོ་ཡིན་མིན་གྱི་དབྱེ་བ་ཡོད་པ་དགག་པ།  དེས་ན་སྤྲོས་བྲལ་ལ་
སྙིང་པོར་འཇོག་པའི་འཐད་པ།  སྤྲོས་བྲལ་ལས་གཞན་པའི་སྙིང་པོ་དྲང་དོན་དུ་བསྟན་པའོ། །དང་པོ་ལ་གསུམ་སྟེ།  ལུང་རིགས་གཉིས་ཀྱིས་དགག་པ།  དེའི་ཉེས་སྤོང་གི་ལན་དགག་པ།  ལུང་ཚིག་སྔ་ཕྱི་འགལ་བས་དགག་པའོ། །
དང་པོ་ལ་གསུམ་སྟེ།  མདོར་བསྟན།  རྒྱས་པར་བཤད།  དོན་བསྡུ་བའོ། །བར་པ་ལ་གཉིས་ཏེ། ཡིད་ཆེས་པའི་ལུང་གིས་དགག་པ།  དངོས་སྟོབས་ཀྱི་རིགས་པས་དགག་པའོ། །དང་པོ་ལ་གསུམ་སྟེ།  ཆོས་དབྱིངས་བསྔོ་རྒྱུའི་དགེ་བར་
མི་འཐད་པའི་ལུང་དྲང་བ།  དེ་བཞིན་ཉིད་ལ་དགེ་བར་གསུངས་པའི་ལུང་དོན་བཤད་པ།  འཁྲུལ་གཞིའི་ལུང་དོན་ཇི་ལྟར་འཆད་པའི་ཚུལ་ལོ། །དང་པོ་ལ་གསུམ་སྟེ།  ཆོས་དབྱིངས་བསྔོ་བས་མི་འགྱུར་བའི་ལུང་།  ཆོས་དབྱིངས་ལ་དགེ་སྡིག་མེད་པའི་
ལུང་།  ཞར་ལ་སྙིང་པོའི་སྦྱོང་བྱེད་སྙིང་པོར་འདོད་པ་དགག་པའོ། །གཉིས་པ་ལ་ལྔ་སྟེ།  ལུང་ལས་ཇི་ལྟར་བཤད་པའི་ཚུལ།  དེའི་དགོངས་པ་བཤད་པ།  དེ་ཉིད་དཔེའི་སྒོ་ནས་བསྒྲུབ་པ།  གཞན་དུ་རྟོག་ན་ཧ་ཅང་ཐལ་བ།  ཞར་ལ་གཤིས་ཀྱི་
9-5-4a


དགེ་བ་གཞན་དགག་པའོ། །གསུམ་པ་འཁྲུལ་གཞིའི་ལུང་དོན་ཇི་ལྟར་འཆད་པའི་ཚུལ་ལ་གསུམ་སྟེ།  འཆད་ཚུལ་མདོར་བསྟན།  གཞན་གྱི་འཆད་ཚུལ་དགག །རང་ཉིད་ཇི་ལྟར་འཆད་པའི་ཚུལ་ལོ། །གཉིས་པ་ལ་
གཉིས་ཏེ།  མདོར་བསྟན་པ་དང་།  རྒྱས་པར་བཤད་པའོ། །འདི་ལ་གསུམ་སྟེ།  ཇི་སྙེད་ཀྱི་སྒྲ་མི་འཐད་པར་ཐལ་བ།  ཡོད་ཅེས་བྱ་བའི་སྒྲ་མི་འཐད་པར་ཐལ་བ།  འགྲོ་ཀུན་གྱི་སྒྲ་མི་འཐད་པར་ཐལ་བའོ། །གསུམ་པ་རང་ཉིད་ཇི་ལྟར་འཆད་
པའི་ཚུལ་ལ་གསུམ་སྟེ།  ལུང་དོན་ཕྱིན་ཅི་མ་ལོག་པར་བཤད་པ།  དེ་ཉིད་དཔེའི་སྒོ་ནས་སྒྲུབ་པ།  ལུང་གིས་སྒྲུབ་པའོ། །གཉིས་པ་དེའི་ཉེས་སྤོང་གི་ལན་དགག་པ་ལ་གཉིས་ཏེ།  འདོད་པ་བརྗོད་པ།  དེ་དགག་པའོ། །འདི་ལ་བཞི་སྟེ། །
དམིགས་བཅས་ཀྱི་བསྔོ་བ་དུག་ཅན་དུ་བསྟན་པ།  དམིགས་མེད་ཀྱི་བསྔོ་བ་བློ་སྦྱོང་དུ་བསྟན་པ།  དམིགས་བཅས་ཀྱི་བསྔོ་བ་བློ་སྦྱོང་དུ་མི་རུང་བའི་རྒྱུ་མཚན། དམིགས་མེད་དམིགས་པར་བྱས་ན་ཧ་ཅང་ཐལ་བའོ། །གཉིས་པ་ཆོས་དབྱིངས་ལས་
གཞན་པའི་ཁམས་བསྔོ་རྒྱུའི་སྙིང་པོར་འདོད་པ་དགག་པ་ལ་ལྔ་སྟེ།  ཕྱོགས་སྔ་མ་བརྗོད་པ།  དེ་མཐ༷འ་མཐའ་གསུམ་དུ་བརྟགས་པ།  དང་པོ་རྣམ་པར་བརྟགས་ནས་དགག་པ།  གཉིས་པ་ཁས་བླངས་འགལ་བས་དགག་པ།  གསུམ་པ་
ལྟར་ན་འདོད་པ་གྲུབ་པའོ། །བཞི་པ་དེས་ན་སྤྲོས་བྲལ་ལ་སྙིང་པོར་འཇོག་པའི་འཐད་པ་ལ་གཉིས་ཏེ།  འཐད་པ་དངོས་དང་།  ཤེས་བྱེད་ཀྱི་ལུང་ངོ་། །འདི་ལ་གསུམ་སྟེ།  ཀླུ་སྒྲུབ་ཀྱི་ལུང་།  བྱམས་པའི་ལུང་།  བརྒྱད་སྟོང་པའི་ལུང་ཁུངས་འགོད་
9-5-4b


པའོ། །ལྔ་པ་སྤྲོས་བྲལ་ལས་གཞན་པའི་སྙིང་པོ་དྲང་དོན་དུ་བསྟན་པ་ལ་གཉིས་ཏེ།  ཆོས་གསུམ་གྱི་སྒོ་ནས་དྲང་དོན་དུ་གཏན་ལ་ཕབ་པ་དང་།  ཤེས་བྱེད་ཀྱི་ལུང་ཁུངས་འགོད་པའོ། །དོན་བསྡུས་ཏེ་ལས་འབྲས་ཀྱི་གནད་བསྟན་པ་ལ་གཉིས་ཏེ།  ལས་འབྲས་
སྤྱིའི་གནད་བསྟན་པ།  ཐེག་པ་ཆེ་ཆུང་གི་ལས་འབྲས་ཀྱི་གནད་བསྟན་པའོ། །འདི་ལ་གཉིས་ཏེ།  མདོར་བསྟན་པ་དང་།  རྒྱས་པར་བཤད་པའོ། །གཉིས་པ་འབྲས་བུ་དཀར་གནག་ཟང་ཐལ་དགག་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་
པའོ། །འདི་ལ་གསུམ་སྟེ།  དཀར་གནག་ཟང་ཐལ་དྲང་དོན་དུ་སྒྲུབ་པ།  ངེས་དོན་ཡིན་པ་ལ་གནོད་བྱེད་བསྟན་པ།  ཤེས་བྱེད་ཀྱི་ལུང་རིགས་དང་་སྦྱར་བའོ། །གཉིས་པ་ལ་གཉིས་ཏེ།  ཐལ་བ་གསུམ་འགོད་པ།  ཕྱི་མ་རྒྱས་པར་བཤད་པའོ། །འདི་
ལའང་བཞི་སྟེ།  སྤྲུལ་གཞི་ངོས་བཟུང་བ།  དེའི་སྤྲུལ་པ་ངོས་བཟུང་བ།  ཇི་ལྟར་སྤྲུལ་པའི་ཚུལ།  སྐབས་ཀྱི་དོན་ལ་སྦྱར་བའོ། །གསུམ་པ་ཉམས་ལེན་ཡེ་བཀག་ཡེ་གནང་དགག་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །
འདི་ལ་གསུམ་སྟེ།  གནང་བཀག་ཐ་དད་དུ་བསྟན་པ།  དེ་ལ་གནོད་པ་སྤོང་བ།  མ་འཁྲུལ་བའི་གནང་བཀག་ཇི་ལྟར་སྒྲུབ་པའི་ཚུལ་ལོ། །དང་པོ་ལ་གསུམ་སྟེ།  དམ་བཅའི་སྒོ་ནས་མདོར་བསྟན།  འཐད་པའི་སྒོ་ནས༷་རྒྱས་པར་བཤད།  ¤དཔེའི་སྒོ་ནས་དོན་
བསྡུ་བའོ། །གཉིས་པ་ལ་བཞི་སྟེ།  ཉན་ཐོས་ནང་ཕན་ཚུན་གནང་བཀག་ཐ་དད་དུ་བསྟན་པ།  ཁྱིམ་པ་དང་རབ་བྱུང་གནང་བཀག་ཐ་དད་དུ་བསྟན་པ།  ཐེག་པ་ཆེ་ཆུང་གནང་བཀག་ཐ་དད་དུ་བསྟན་པ།  ཐེག་ཆེན་ནང་ཕན་ཚུན་གནང་བཀག་ཐ་དད་དུ་བསྟན་
9-5-5a


པའོ། །དང་པོ་ལ་གསུམ་སྟེ།  ཐ་དད་དུ་བསྟན་པ་དངོས།  དེའི་ཉེས་སྤོང་གི་ལན་དགག་གཅིག་པ་ལ་གནོད་བྱེད་བསྟན་པའོ། །གཉིས་པ་ལ་གཉིས་ཏེ།  གྱེས་པ་བཅོ་བརྒྱད་ལ་བདེན་རྫུན་གྱི་དབྱེ་བ་ཡོད་པའི་ལན་དགག། 
བསླབ་པ་ཤེས་ན་གནང་བཀག་གཅིག་ཏུ་འགྱུར་བའི་ལན་དགག་པའོ། །གཉིས་པ་ཁྱིམ་པ་དང་རབ་བྱུང་གནང་བཀག་ཐ་དད་དུ་བསྟན་པ་ལ་གཉིས་ཏེ།  འདོད་པ་བརྗོད།  དེ་དགག་པའོ། །གཉིས་པ་དེ་ལ་གནོད་པ་སྤོང་བ་ལ་གཉིས་ཏེ།  ཐུབ་པས་
རབ་བྱུང་ལ་སྙིང་ནད་བྱས་པར་ཐལ་བ་སྤོང་བ།  བདེ་སྡུག་གི་བྱེད་པ་པོ་སངས་རྒྱས་སུ་ཐལ་བ་སྤོང་བའོ། །དང་པོ་ལ་གཉིས་ཏེ།  རྩོད་པ་དང་།  ལན་ནོ། །འདི་ལ་གཉིས་ཏེ།  བཅས་ལྟུང་ལ་རང་བཞིན་གྱི་མི་དགེ་བ་ཡོད་པ་དགག །བརྟུལ་ཞུགས་ལ་རང་
བཞིན་གྱི་དགེ་བ་ཡོད་པ་དགག་པའོ། །དང་པོ་ལ་གསུམ་སྟེ།  མགོ་མཚུངས་ཀྱི་རིགས་པས་དགག །དངོས་སྟོབས་ཀྱི་རིགས་པས་དགག །ཧ་ཅང་ཐལ་བས་དགག་པའོ། །འདི་ལ་ལྔ་སྟེ།  རྒྱལ་བ་སྲས་བཅས་ལྟུང་ཅན་དུ་འགྱུར་བ།  གྲུབ་ཐོབ་བརྟུལ་
ཞུགས་བོར་བ་ལྟུང་ཅན་དུ་ཐལ་བ།  ལྷས་ལྟས་ཀྱི་དགེ་སློང་ལྟུང་ཅན་དུ་ཐལ་བ།  དགེ་བསྙེན་དང་དགེ་ཚུལ་ལྟུང་མེད་མི་སྲིད་པར་ཐལ་བ།  རྩ་རྒྱུད་ཀྱི་བླ་མ་སྨད་པར་ཐལ་བའོ། །གཉིས་པ་ལ་གསུམ་སྟེ།  དངོས་ཀྱི་དོན།  ཤེས་བྱེད་ཀྱི་ལུང་།  རིགས་
པས་གྲུབ་པའི་ཚུལ་ལོ། །གཉིས་པ་བདེ་སྡུག་གི་བྱེད་པ་པོ་སངས་རྒྱས་སུ་ཐལ་བ་སྤོང་བ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །འདི་ལ་གཉིས་ཏེ།  མགོ་བསྒྲེའི་ལན་དང་།  རྣལ་མའི་ལན་ནོ། །འདི་ལ་གསུམ་སྟེ། 
9-5-5b


 སྤྱིར་བསླབ་པ་འཆའ་བའི་རྒྱུ་མཚན།  བསླབ་པ་མི་འདྲ་བ་འཆའ་བའི་རྒྱུ་མཚན།  དེས་གྲུབ་པའི་དོན་ནོ། །བཞི་པ་འཕྲལ་གྱི་ལག་ལེན་འཁྲུལ་པ་དགག་པ་ལ་གསུམ་སྟེ།  མ་འཁྲུལ་པའི་ལག་ལེན་བསྒྲུབ་པར་གདམས་པ།  འཁྲུལ་པའི་ལག་
ལེན་བྱུང་བའི་ཚུལ།  དེ་ལ་གནོད་བྱེད་བསྟན་པའོ། །འདི་ལ་བཞི་སྟེ།  ཤེས་བྱེད་མེད་པར་བསྟན་པ།  ཉེས་དམིགས་ཆེ་བར་བསྟན་པ།  སྨད་པའི་གནས་སུ་བསྟན་པ།  འཁྲུལ་པ་གཞན་ལ་ཡང་མཚུངས་པར་ཐལ་བའོ། །གསུམ་པ་
ཐོས་བསམ་སྒོམ་གསུམ་མ་ནོར་བས་མཇུག་བསྡུ་བ་ལ་གཉིས་ཏེ།  ནོར་བ་སྤོང་བར་གདམས།  མ་ནོར་བ་སྒྲུབ་པར་གདམས་པའོ། །དང་པོ་ལ་གཉིས་ཏེ།  སྤང་བྱ་ངོས་བཟུང་།  སྤོང་དགོས་པའི་འཐད་པའོ། །སོ་སོར་ཐར་པའི་
སྡོམ་པའི་སྐབས་ཀྱི་བསྡུས་དོན་ནོ།།      །།གཉིས་པ་བྱང་སེམས་ཀྱི་སྡོམ་པའི་ཉམས་ལེན་ལ་གསུམ་སྟེ།  སེམས་བསྐྱེད་ཀྱི་དབྱེ་བ་སྤྱིར་བསྟན།  ཐེག་ཆེན་སེམས་བསྐྱེད་བྱེ་བྲག་ཏུ་བཤད།  བསྟན་པ་རྣམ་དག་ཏུ་བསྟན་པའི་སྒོ་ནས་
མཇུག་བསྡུ་བའོ། །གཉིས་པ་ལ་གསུམ་སྟེ།  མ་ཐོབ་པ་ཐོབ་པར་བྱེད་པའི་ཆོ་ག །ཐོབ་པ་མི་ཉམས་པར་བསྲུང་བའི་བསླབ་བྱ།  དེ་དག་དང་འབྲེལ་བའི་ཐབས་ལམ་རྣམ་དག་ཏུ་སྒྲུབ་པའོ། །དང་པོ་ལ་གཉིས་སྟེ།  ཀུན་རྫོབ་
སེམས་བསྐྱེད་སྐྱེ་བའི་ཆོ་ག་བཤད།  དོན་དམ་སེམས་བསྐྱེད་ཆོ་གས་སྐྱེ་བ་དགག་པའོ། །དང་པོ་ལ་བཞི་སྟེ།  ལུགས་གཉིས་རྟེན་གྱི་ཁྱད་པར་ལུང་གིས་བསྒྲུབ།  དེ་གཉིས་དཔེ་ཡི་སྒོ་ནས་གསལ་བར་བཤད། 
9-5-6a


 ལུང་གི་དོན་ལ་ལོག་པར་རྟོག་པ་དགག །ལུགས་གཉིས་ཆོ་གའི་ཁྱད་པར་སོ་སོར་བཤད་པའོ། །དང་པོ་ལ་གཉིས་ཏེ།  སེམས་ཙམ་ལུགས་ཀྱི་སེམས་བསྐྱེད་སྐྱེ་བའི་ཡུལ་ངེས་པར་བསྟན།  དབུ་མ་ལུགས་ཀྱི་སེམས་བསྐྱེད་
ཀུན་ལ་སྐྱེ་བར་བསྟན་པའོ། །དང་པོ་ལ་གསུམ་སྟེ།  དངོས་ཀྱི་དོན།  དེ་ལ་ལོག་པར་རྟོག་པའི་ཚུལ་བརྗོད།  དེ་ཉིད་ལུང་དང་རིགས་པས་དགག་པའོ། །གཉིས་པ་དོན་དམ་སེམས་བསྐྱེད་ཆོ་གས་སྐྱེ་བ་དགག་པ་ལ་གསུམ་སྟེ།  མདོར་བསྟན།  རྒྱས་
པར་བཤད།  དོན་བསྡུ་བའོ། །གཉིས་པ་ལ་བཞི་སྟེ།  ཆོ་གས་སྐྱེ་བ་ལ་གནོད་བྱེད་བསྟན།  ཆོ་གས་སྐྱེ་བའི་སྒྲུབ་བྱེད་མེད།  ཆོ་གས་མི་སྐྱེ་བ་དཔེའི་སྒོ་ནས་བསྒྲུབ།  དེ་ལ་ལུང་དང་འགལ་བ་སྤོང་བའོ། །གཉིས་པ་ཐོབ་པ་མི་ཉམས་པར་བསྲུང་བའི་
བསླབ་བྱ་ལ་གཉིས་ཏེ།  ལྟུང་བའི་རྣམ་གཞག་མུ་བཞི་བསྟན་པ།  བསླབ་བྱའི་གཙོ་བོ་ལ་ལོག་རྟོག་དགག་པའོ། །དང་པོ་ལ་གཉིས་ཏེ།  མུ་བཞིར་འགྱུར་བའི་ཚུལ་དང་།  མུ་བཞིར་འགྱུར་བའི་ཚུལ་འཐད་པའོ། །གཉིས་པ་ལ་གསུམ་སྟེ།  
བསླབ་བྱའི་གཙོ་བོ་འགོག་པའི་ལོག་རྟོག་བརྗོད།  དེ་ཉིད་རིགས་པས་རྣམ་པར་བརྟགས་ནས་དགག །བསླབ་བྱའི་གཙོ་བོ་ཡིན་པའི་སྒྲུབ་བྱེད་འགོད་པའོ། །གཉིས་པ་ལ་གཉིས་ཏེ།  བསྒྲུབ་བྱ་ལ་བརྟགས་ནས་དགག །སྒྲུབ་བྱེད་ལ་བརྟགས་ནས་
དགག་པའོ། །གསུམ་པ་ལ་བཞི་སྟེ།  ཡིད་ཆེས་པའི་ལུང་གིས་བསྒྲུབ།  སྒོམ་པའི་ཕན་ཡོན་གྱིས་བསྒྲུབ།  མ་སྒོམ་པའི་ཉེས་དམིགས་ཀྱིས་བསྒྲུབ།  དེས་གྲུབ་པའི་དོན་བསྟན་པའོ། །དང་པོ་ལ་གསུམ་སྟེ།  ཀླུ་སྒྲུབ་ཀྱི་ལུང་གིས་བསྒྲུབ།
9-5-6b


  ཞི་བ་ལྷའི་ལུང་གིས་བསྒྲུབ།  མདོ་དང་བསྟན་བཅོས་གཞན་གྱི་ལུང་གིས་བསྒྲུབ་པའོ། །གསུམ་པ་དེ་དག་དང་འབྲེལ་པའི་ཐབས་ལམ་རྣམ་དག་ཏུ་བསྒྲུབ་པ་ལ་གཉིས་ཏེ།  སྤང་བྱ་མ་དག་པའི་ལྟ་སྤྱོད་ངོས་བཟུང་།  དེ་ཤེས་ནས་སྤོང་བར་གདམས་
པའོ། །དང་པོ་ལ་གཉིས་ཏེ།  མདོར་བསྟན།  རྒྱས་པར་བཤད་པའོ། །འདི་ལ་བཅུ་གཅིག་སྟེ།  མ་དག་པའི་སྦྱིན་པ།  མ་དག་པའི་ཚུལ་ཁྲིམས།  མ་དག་པའི་བཟོད་པ།  མ་དག་པའི་བརྩོན་འགྲུས།  མ་དག་པའི་བསམ་གཏན།  མ་དག་པའི་ཤེས་
རབ།  མ་དག་པའི་དད་པ།  མ་དག་པའི་སྙིང་རྗེ།  མ་དག་པའི་བྱམས་པ།  མ་དག་པའི་ཐབས་ལམ།  མ་དག་པའི་སྨོན་ལམ་མོ། །བྱང་ཆུབ་སེམས་དཔའི་སྡོམ་པའི་སྐབས་ཀྱི་བསྡུས་དོན་ནོ།།    །།གསུམ་པ་སྔགས་སྡོམ་གྱི་ཉམས་ལེན་ལ་གཉིས་ཏེ། 
མདོར་བསྟན།  རྒྱས་པར་བཤད་པའོ། །འདི་ལ་ལྔ་སྟེ།  སྨིན་བྱེད་ནོར་བ་མེད་པའི་དབང་བཞི།  གྲོལ་བྱེད་འཁྲུལ་པ་མེད་པའི་རིམ་གཉིས།  དབང་དང་རིམ་གཉིས་ལས་བྱུང་བའི་ཡེ་ཤེས་ཕྱག་རྒྱ་ཆེན་པོ།  ཕྱག་ཆེན་གོམས་པས་འཁོར་འདས་བསྲེ་
བའི་སྤྱོད་པ།  དེ་ལ་བརྟེན་ནས་ས་ལམ་བསྒྲོད་དེ་འབྲས་བུ་མངོན་དུ་བྱེད་པའི་ཚུལ་ལོ། །དང་པོ་ལ་གསུམ་སྟེ།  མ་འཁྲུལ་བའི་སྨིན་བྱེད་བསྒྲུབ་པར་གདམས།  འཁྲུལ་པའི་སྨིན་བྱེད་དོར་བར་གདམས།  དབང་ལས་ཐོབ་པའི་དམ་ཚིག་ལ་འཁྲུལ་པ་
དགག་པའོ། །གཉིས་པ་ལ་བཞི་སྟེ།  སྨིན་བྱེད་མ་ཡིན་པ་སྨིན་བྱེད་དུ་འདོད་པ་དགག །སྨིན་བྱེད་དབང་མི་དགོས་པར་འདོད་པ་དགག །དགོས་ཀྱང་འཁྲུལ་བར་སྤྱོད་པ་དགག །དབང་བསྐུར་མུ་བཞི་འདོད་པ་དགག་པའོ། །དང་པོ་ལ་
9-5-7a


བཞི་སྟེ།  བྱིན་བརླབས་སྨིན་བྱེད་ཡིན་པ་དགག །གྲངས་ངེས་མེད་པའི་དབང་བསྐུར་སྨིན་བྱེད་ཡིན་པ་དགག །དཀྱིལ་འཁོར་མ་དག་པའི་དབང་བསྐུར་སྨིན་བྱེད་ཡིན་པ་དགག །ཆོ་ག་མ་དག་པའི་དབང་བསྐུར་སྨིན་བྱེད་ཡིན་པ་དགག་
པའོ། །དང་པོ་ལ་གཉིས་སྟེ།  ཕྱོགས་སྔ་མ་བརྗོད་པ་དང་།  དེ་དགག་པའོ། །དང་པོ་ལ་གསུམ་སྟེ།  བྱིན་བརླབས་སྨིན་བྱེད་ཡིན་པ་ལ་གནོད་བྱེད་བསྟན།  བྱིན་བརླབས་སྨིན་བྱེད་ཡིན་པའི་སྒྲུབ་བྱེད་དགག །བྱིན་རླབས་ཆོས་སྒོར་བྱེད་ན་ཧ་ཅང་
ཐལ་བའོ། །གཉིས་པ་ལ་གཉིས་ཏེ།  ལག་ལེན་གྱི་སྒྲུབ་བྱེད་དགག །རང་གཟོའི་སྒྲུབ་བྱེད་དགག་པའོ། །གཉིས་པ་གྲངས་ངེས་མེད་པའི་དབང་བསྐུར་སྨིན་བྱེད་ཡིན་པ་དགག་པ་ལ་བཞི་སྟེ།  གྲངས་ངེས་མེད་པ་གསང་སྔགས་ནུབ་པའི་
དཔེར་བརྗོད་པ།  དེ་ཉིད་རྒྱུད་ལས་དཀག་པའི་ཚུལ།  རྒྱུད་དེའི་དོན་བཤད་པ།  གཞན་གྱི་དོགས་པ་སྤོང་བའོ། །གཉིས་པ་སྨིན་བྱེད་དབང་མི་དགོས་པར་འདོད་པ་དགག་པ་ལ་བཞི་སྟེ།  དབང་བསྐུར་མེད་པར་ཟབ་ལམ་བསྒོམ་པ་དགག །
དབང་བསྐུར་མེད་པར་དབང་རབ་སྨིན་པ་དགག །སེམས་བསྐྱེད་ཙམ་གྱིས་གསང་སྔགས་བསྒོམ་པ་དགག། ཞར་ལ་སྨིན་བྱེད་ནོར་བ་གཞན་ཡང་དགག་པའོ། །གསུམ་པ་ལ་གཉིས་ཏེ།  འདོད་པ་བརྗོད།  དེ་དགག་པའོ། །འདི་ལ་གསུམ་
སྟེ།  བྱ་རྒྱུད་ལ་རྣམ་པར་ཕྱེ་སྟེ་ལན་གདབ་པ།  ལྷག་མ་གསུམ་ལ་མགོ་གཅིག་ཏུ་ལན་གདབ་པ།  སྒྲུབ་བྱེད་ཀྱི་སྒོ་ནས་མཇུག་བསྡུ་བའོ། །གསུམ་པ་དགོས་ཀྱང་འཁྲུལ་པར་སྤྱོད་པ་དགག་པ་ལ་ལྔ་སྟེ།  དབང་བསྐུར་བའི་དུས་ལ་འཁྲུལ་
9-5-7b


པ་དགག །སློབ་མའི་རྒྱུད་ལ་འཁྲུལ་པ་དགག་པ།  བསྐུར་བྱེད་ཀྱི་དཀྱིལ་འཁོར་ལ་འཁྲུལ་པ་དགག་པ།  རྒྱུད་སྡེའི་ཁྱད་པར་ལ་འཁྲུལ་པ་དགག་པ།  ཆོ༷ས་སྒོའི༷་མིང་ལ་འཁྲུལ་པ་དགག་པའོ། །གསུམ་པ་ལ་གཉིས་ཏེ།  འདོད་པ་
བརྗོད།  དེ་དགག་པའོ། །འདི་ལ་གསུམ་སྟེ།  ཆོ་ག་མེད་པ་ལ་གནོད་བྱེད་བསྟན།  ཆོ་ག་ཡོད་པའི་སྒྲུབ་བྱེད་བསྟན།  བདེན་གཉིས་ཀྱི་སྒོ་ནས་ཆོ་ག་མཚུངས་པར་བསྟན་པའོ། །བཞི་པ་ལ་གཉིས་སྟེ།  ཕྱོགས་སྔ་མ་བརྗོད།  དེ་དགག་པའོ། །
ལྔ་པ་ལ་གསུམ་སྟེ།  མོས་པ་ཆོས་སྒོ་ཡིན་པ་དགག །དབང་ལས་གསང་སྔགས་ལོགས་ན་ཡོད་པ་དགག །དབང་ལས་གསང་སྔགས་ལོགས་ན་མེད་པའི་རྒྱུ་མཚན་ནོ། །དང་པོ་ལ་གཉིས་ཏེ།  འདོད་པ་བརྗོད།  དེ་དགག་པའོ། །གསུམ་པ་ལ་
གསུམ་སྟེ།  མདོར་བསྟན།  རྒྱས་པར་བཤད།  དོན་བསྡུ་བའོ། །བཞི་པ་དབང་བསྐུར་མུ་བཞིར་འདོད་པ་དགག་པ་ལ་གཉིས་ཏེ།  འདོད་པ་བརྗོད།  དེ་དགག་པའོ། །འདི་ལ་བཞི་སྟེ།  མུ་བཞི་སྒྲུབ་བྱེད་ཀྱི་ལུང་མེད་པ།  རིགས་པས་བསྒྲུབས་ན་ཀུན་ལ་མཚུངས་
པ།  མུ་བཞི་ཡོད་ཀྱང་ཤེས་པར་མི་ནུས་པ།  ནུས་ན་དབང་བསྐུར་དགོས་པར་གྲུབ་པའོ། །གསུམ་པ་དབང་ལས་ཐོབ་པའི་དམ་ཚིག་ལ་འཁྲུལ་པ་དགག་པ་ལ་གཉིས་ཏེ།  འདོད་པ་བརྗོད།  དེ་དགག་པའོ། །གཉིས་པ་གྲོལ་བྱེད་འཁྲུལ་པ་མེད་པའི་རིམ་གཉིས་ལ་
བཞི་སྟེ།  ལམ་གྱི་གཙོ་བོ་མི་དགོས་པར་འདོད་པ་དགག་པ།  དགོས་པའི་ལམ་གྱི་གཙོ་བོ་ངོས་བཟུང་བ།  སངས་རྒྱས་འདོད་པས་དེ་ལ་བསླབ་པར་གདམས་པ།  དེ་དག་མ་འབྲེལ་བའི་ཆོས་ལུགས་དགག་པའོ། །དང་པོ་ལ་གཉིས་ཏེ།  འདོད་པ་བརྗོད།  དེ་དགག་
9-5-8a


པའོ། །འདི་ལ་ལྔ་སྟེ།  ཕྱོགས་དེའི་ཐབས་ཀྱིས་གྲོལ་བ་དགག །རིམ་གཉིས་ཐབས་ཀྱི་གཙོ་བོར་བསྟན་པ།  གཙོ་བོ་ཡིན་པའི་སྒྲུབ་བྱེད་འགོད།  ཕྱོགས་དེའི་ཐབས་ཀྱི་དགོས་པ་བསྟན།  སྒྲོ་བསྐུར་སྤངས་ནས་གཙོ་བོ་བསྒྲུབ་པར་གདམས་པའོ། །གཉིས་
པའི་ལམ་གྱི་གཙོ་བོ་ངོས་བཟུང་བ་ལ་གཉིས་ཏེ།  དཔེའི་སྒོ་ནས་འབྲས་བུར་འགྲུབ་པའི་དུས་བསྟན།  ཉམས་ལེན་གྱི་སྒོ་ནས་ལམ་བསྒྲོད་ཚུལ་སོ་སོར་བཤད་པའོ། །འདི་ལ་གཉིས་ཏེ།  ཕ་རོལ་ཏུ་ཕྱིན་པའི་ལམ་གྱི་བསྒྲོད་ཚུལ།  རྡོ་རྗེའི་ཐེག་པའི་ལམ་གྱི་བགྲོད་ཚུལ་ལོ། །
བཞི་པ་དེ་དག་དང་མ་འབྲེལ་བའི་ཆོས་ལུགས་དགག་པ་ལ་བདུན་ཏེ།  བསྟན་པ་དང་མ་འབྲེལ་བའི་ཆོས་པ་དགག་པ།  སྡོམ་པ་དང་མ་འབྲེལ་བའི་ཐར་ལམ་དགག །ངེས་འབྱུང་དང་མ་འབྲེལ་བའི་སོ་ཐར་དགག །སྡེ་སྣོད་དང་མ་འབྲེལ་བའི་སེམས་བསྐྱེད་དགག །རྒྱུད་སྡེ་དང་
མ་འབྲེལ་བའི་གསང་སྔགས་དགག །དབང་བསྐུར་དང་མ་འབྲེལ་བའི་བླ་མ་དགག །དམ་ཆོས་དང་མ་འབྲེལ་བའི་ཆོས་པ་དགག་པའོ། །གཉིས་པ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །འདི་ལ་གཉིས་ཏེ།  སྡོམ་གསུམ་གྱིས་དབེན་པའི་དགེ་
བས་སངས་རྒྱས་མི་འགྲུབ་པར་བསྟན་པ།  སྡོམ་གསུམ་གྱི་དགེ་བས་སངས་རྒྱས་འགྲུབ་པར་བསྟན་པའོ། །ལྔ་པ་ལ་གཉིས་ཏེ།  མདོར་བསྟན།  རྒྱས་པར་བཤད་པའོ། །དྲུག་པ་ལ་གསུམ་སྟེ།  དབང་མ་བསྐུར་བ་ལ་བླ་མ་དམ་པ་མི་རུང་བར་བསྟན།
དམ་པ་མ་ཡིན་པས་སངས་རྒྱས་སྦྱིན་མི་ནུས་པར་བསྟན།  མདོ་སྔགས་ཀྱི་བླ་མའི་ཁྱད་པར་བསྟན་པའོ། །གསུམ་པ་དབང་དང་རིམ་གཉིས་ལས་བྱུང་བའི་ཡེ་ཤེས་ཕྱག་རྒྱ་ཆེན་པོ་ལ་གཉིས་ཏེ།  རྟོགས་བྱེད་ཕྱག་ཆེན་གྱི་ཡེ་ཤེས་ལ་འཁྲུལ་པ་དགག་པ། 
9-5-8b


 རྟོགས་བྱ་སྤྲོས་བྲལ་གྱི་ལྟ་བ་ལ་འཁྲུལ་པ་དགག་པའོ། །དང་པོ་ལ་གསུམ་སྟེ།  མཚོན་བྱེད་དཔེའི་ཕྱག་ཆེན་ལ་འཁྲུལ་པ་དགག་པ།  མཚོན་བྱ་དོན་གྱི་ཕྱག་ཆེན་ལ་འཁྲུལ་པ་དགག་པ།  ཞར་ལ་ཐེག་པ་གསུམ་གྱི་ལག་ལེན་ལ་འཁྲུལ་པ་དགག་
པའོ། །དང་པོ་ལ་གསུམ་སྟེ།  སྟོང་རྐྱང་དུ་ལྟ་བའི་ལྷག་མཐོང་ལྟར་སྣང་ལ་ཕྱག་ཆེན་དུ་འདོད་པ་དགག་པ།  མོས་གུས་ཀྱིས་སེམས་བསྒྱུར་བའི་ཞི་གནས་ལྟར་སྣང་ལ་ཕྱག་ཆེན་དུ་འདོད་པ་དགག་པ།  ཞར་ལ་ཕྱག་ཆེན་གྱི་རྒྱུ་ལ་ལོག་རྟོག་དགག་
པའོ། །དང་པོ་ལ་བཞི་སྟེ།  གཞན་ལུགས་ཀྱི་ཕྱག་ཆེན་དགག་པ་དངོས།  རང་ལུགས་ཀྱི་ཕྱག་ཆེན་ངོས་བཟུང་བ།  གཞན་ལུགས་ཀྱི་ཕྱག་ཆེན་རྒྱ་ནག་ལུགས་སུ་བསྟན་པ།  རང་ལུགས་ཀྱི་ཕྱག་ཆེན་རྒྱ་གར་ལུགས་སུ་བསྟན་པའོ། །འདི་ལ་བཞི་སྟེ།  ན་རོ་དང་མེ་ཏྲི་པའི་
ལུགས་དང་མཐུན་པ།  འཕགས་པ་ཀླུ་སྒྲུབ་ཀྱི་ལུགས་དང་མཐུན་པ།  རྒྱུད་དང་བསྟན་བཅོས་གཞན་དང་མཐུན་པ།  དེ་ལྟ་བུའི་ཕྱག་ཆེན་རྟོགས་པའི་ཕན་ཡོན་ནོ། །གཉིས་པ་ལ་གཉིས་ཏེ།  འདོད་པ་བརྗོད།  དེ་དགག་པའོ། །གསུམ་པ་ལ་གསུམ་སྟེ།  ཁས་
བླངས་བརྗོད་པ།  མགོ་མཚུངས་ཀྱིས་དགག་པ།  སྨད་པའི་གནས་སུ་བསྟན་པའོ། །གཉིས་པ་མཚོན་བྱ་དོན་གྱི་ཕྱག་ཆེན་ལ་འཁྲུལ་པ་དགག་པ་ལ་གསུམ་སྟེ།  ཡོན་ཏན་མེད་པའི་མཐོང་ལམ་དགག །དེ་ལ་ལུང་དང་འགལ་བ་སྤང་།  དེས་ན་འཕགས་
པའི་མཁྱེན་པར་གྲུབ་པའོ། །དང་པོ་ལ་གསུམ་སྟེ།  ཕྱོགས་སྔ་མ་བརྗོད་པ།  དེ་དགག་པ།  དེའི་ཉེས་སྤོང་གི་ལན་དགག་པའོ། །གཉིས་པ་ལ་གཉིས་ཏེ།  ན་རོ་པའི་ལུང་དང་འགལ་བ་སྤང་བ།  འཕགས་པ་ལྷའི་ལུང་དང་འགལ་བ་སྤང་བའོ། །
9-5-9a


གསུམ་པ་ཞལ་ལ་ཐེག་པ་གསུམ་གྱི་ལག་ལེན་འཁྲུལ་པ་དགག་པ་ལ་གཉིས་ཏེ།  མདོར་བསྟན།  རྒྱས་པར་བཤད་པའོ། །འདི་ལ་ལྔ་སྟེ།  ལམ་གྱི་རྩ་བ་བླ་མ་བསྟེན་ཚུལ།  ལམ་གོ་རིམ་ཐོད་རྒལ་དུ་སྤྱོད་པ་དགག་པ།  ལམ་གྱི་
ཡན་ལག་མཆོད་གཏོར་བྱ་ཚུལ།  ལམ་གྱི་དམིགས་བརྟེན་སྐུ་གཟུགས་བཞེངས་ཚུལ།  ལམ་གྱི་ངོ་བོ་མདོ་སྔགས་འཆོལ་བ་དགག་པའོ། །དང་པོ་ལ་གཉིས་ཏེ།  བླ་མའི་མཚན་ཉིད་དང་།  གསོལ་བ་བཏབ་པའི་ཚུལ་ལོ། །གསུམ་པ་ལ་གསུམ་སྟེ།
གཏོར་མའི་མཚན་སྔགས་ལ་འཁྲུལ་པ་དགག །ཆུ་སྦྱིན་གྱི་རྫས་ལ་འཁྲུལ་པ་དགག །ཕུད་མཆོད་ཀྱི་དབྱིབས་ལ་འཁྲུལ་པ་དགག་པའོ། །འདི་ལ་བཞི་སྟེ།  ཕུད་མཆོད་བྱ་ཚུལ།  དེའི་ལག་ལེན་འཁྲུལ་ཚུལ།  དེ་ཉིད་འཁྲུལ་པར་བསྟན་པ།  མ་འཁྲུལ་
བར་བསྒྲུབ་པར་གདམས་པའོ། །བཞི་པ་ལ་གཉིས་ཏེ།  ཕྱག་མཚན་ལ་འཁྲུལ་པ་དགག །ཁ་དོག་ལ་འཁྲུལ་པ་དགག་པའོ། །འདི་ལ་གཉིས་ཏེ།  དངོས་དང་།  ལུང་འགལ་སྤང་པའོ། །ལྔ་པ་ལ་གསུམ་སྟེ།  རང་བསྒོམ་པའི་ཡན་ལག་འཆོལ་བ་
དགག །གཞན་རྗེས་སུ་འཛིན་པའི་ཡན་ལག་འཆོལ་བ་དགག །དེ་གཉིས་ཀ་འཆོལ་བ་དགག་པའོ། །འདི་ལ་གསུམ་སྟེ།  འཁྲུལ་པ་བརྗོད།  སོ་སོར་དགག །མ་འཆོལ་བ་བསྒྲུབ་པར་གདམས་པའོ། །གཉིས་པ་ལ་གསུམ་སྟེ།  རབ་གནས་མདོ་
ལུགས་དགག །ཕྱག་རྡོར་མདོ་ལུགས་དགག །ལྟུང་བཤགས་སྔགས་ལུགས་དགག་པའོ། །དང་པོ་ལ་བཞི་སྟེ།  མདོར་བསྟན་པ།  ཞར་ལས་བྱུང་བ།  རྒྱས་པར་བཤད་པ།  དོན་བསྡུ་བའོ། །གཉིས་པ་རྟོགས་བྱ་སྤྲོས་བྲལ་གྱི་ལྟ་བ་ལ་འཁྲུལ་པ་
9-5-9b


ལ་གཉིས་ཏེ།  དངོས་ཀྱི་དོན་དང་།  ཞར་ལ་རྒྱུད་སྡེ་བཞིའི་སྒྲུབ་པ་ལ་འཁྲུལ་པ་དགག་པའོ། །དང་པོ་ལ་བཞི་སྟེ།  ཐེག་པ་རིམ་དགུ་ལ་ལྟ་བ་ཐ་དད་ཡོད་པ་དགག་པ།  རྣལ་འབྱོར་བཞི་པོ་ཐེག་པའི་རིམ་པར་འདོད་པ་དགག་པ།  དེས་ན་དབུ་མ་ཡན་ཆད་ལྟ་བ་
གཅིག་ཏུ་བསྟན་པའོ། །དང་པོ་ལ་གཉིས་ཏེ།  འདོད་པ་བརྗོད་པ་དང་།  དེ་དགག་པའོ། །འདི་ལ་གསུམ་སྟེ།  ལྟ་སྒོམ་གྱི་ཁྱད་པར་བྱེ་བྲག་ཏུ་བཤད་པ།  དེས་ན་ཀུན་རྫོབ་ལྟ་བར་མི་འཐད་པའོ། །གཉིས་པ་ལ་གཉིས་ཏེ།  བསྒོམ་ཚུལ་དམིགས་པའི་
ཁྱད་པར།  བསྒོམ་གཞི་ཀུན་རྫོབ་ཀྱི་ཁྱད་པར་རོ། །འདི་ལ་གཉིས་ཏེ། རྒྱུད་སྡེ་འོག་མར་ཀུན་རྫོབ་ལྷར་མི་བསྒོམ་པ།  རྣལ་འབྱོར་ཆེན་པོར་ཀུན་རྫོབ་ལྷར་བསྒོམས་པའོ། །གསུམ་པ་ལ་བཞི་སྟེ།  སྔ་འགྱུར་བའི་ལུགས་བརྗོད།  ཕྱི་འགྱུར་བའི་ལུགས་
བརྗོད།  ཕྱིས་འགྱུར་བའི་ལུགས་འཐད་པར་བསྒྲུབ་པ།  དེས་སྔ་འགྱུར་བའི་ལུགས་མི་འཐད་པར་གྲུབ་པའོ། །གཉིས་པ་ཞར་ལ་རྒྱུད་སྡེ་བཞིའི་སྒྲུབ་པ་ལ་འཁྲུལ་པ་དགག་པ་ལ་གསུམ་སྟེ།  འཁྲུལ་པ་དགག་པ་མདོར་བསྟན།  མ་འཁྲུལ་བའི་སྒྲུབ་
པ་རྒྱས་པར་བཤད།  དེ་དག་དཀྲུགས་པ་སྨད་པས་དོན་བསྡུ་བའོ། །གཉིས་པ་ལ་གསུམ་སྟེ།  བྱ་བའི་རྒྱུད་ཀྱི་སྒྲུབ་པ།  རྒྱུད་སྡེ་བར་པ་གཉིས་ཀྱི་སྒྲུབ་པ།  རྣལ་འབྱོར་ཆེན་པོའི་སྒྲུབ་པ་བཤད་པའོ། །བཞི་པ་ཕྱག་ཆེན་གོམ་པས་འཁོར་འདས་བསྲེ་བའི་སྤྱོད་
པ་ལ་གཉིས་ཏེ།  སྤྱོད་པའི་རྣམ་གཞག་སྤྱིར་བསྟན་པ།  ལོག་རྟོག་དགག་པ་བྱེ་བྲག་ཏུ་བཤད་པའོ། །འདི་ལ་གསུམ་སྟེ།  གང་གིས་རྒྱུ་བའི་གང་ཟག་ལ་འཁྲུལ་པ་དགག །གང་དུ་རྒྱུ་བའི་གནས་ལ་འཁྲུལ་པ་དགག །དེ་གཉིས་ཀའི་མཇུག་བསྡུ་བའོ། །
9-5-10a


དང་པོ་ལ་གསུམ་སྟེ།  མཚན་ཉིད་དང་མི་ལྡན་པའི་གང་ཟག་སྤྱོད་པ་སྤྱད་པ་དགག་པ།  མཚན་ཉིད་དང་ལྡན་པའི་གང་ཟག་སྤྱོད་པ་སྤྱད་པའི་དགོས་པ།  དེས་གྲུབ་པའི་དོན་བསྟན་པའོ། །གཉིས་པ་ལ་གཉིས་ཏེ།  ཏི་སེ་གངས་ཅན་དུ་འདོད་པ་དགག། 
ཙ་རི་གནས་ཆེན་དུ་འདོད་པ་དགག་པའོ། །དང་པོ་ལ་གསུམ་སྟེ།  དགག་པ་སྤྱིར་བསྟན།  ལུང་འགལ་བྱེ་བྲག་ཏུ་བཤད།  ཉེས་སྤང་གི་ལན་དགག་པའོ། །གཉིས་པ་ལ་ལྔ་སྟེ།  དུས་ཀྱི་འཁོར་ལོའི་ལུང་དང་འགལ་བ།  མངོན་པའི་ལུང་དང་འགལ་བ།  མུ་
སྟེགས་བྱེད་ཀྱི་གཞུང་དང་འགལ་བ།  རྨ་བྱ་ཆེན་མོའི་ལུང་དང་འགལ་བ།  ཕལ་པོ་ཆེའི་མདོ་དང་འགལ་བའོ། །གསུམ་པ་ལ་གཉིས་ཏེ།  ཉེས་སྤོང་བརྗོད།  དེ་དགག་པའོ། །འདི་ལ་གཉིས་ཏེ།  འཆད་ཚུལ་གཉིས་ཀྱི་རང་བཞིན་བཤད།  དེ་ཉིད་སྐབས་ཀྱི་
ལན་ལ་སྦྱར་བའོ། །དང་པོ་ལ་གཉིས་ཏེ།  སྒྲོ་བསྐུར་སྐྱོན་དུ་འགྱུར་མི་འགྱུར་དཔྱད།  དེའི་དཔེར་བརྗོད་གསལ་བར་བཤད་པའོ། །ལྔ་པ་དེ་ལ་བརྟེན་ནས་ས་ལམ་འགྲོད་དེ་འབྲས་བུ་མངོན་དུ་བྱེད་ཚུལ་ལ་གཉིས་ཏེ།  མཐར་ཐུག་གི་འབྲས་བུ་ལ་འཁྲུལ་པ་དགག་པ། །
གནས་སྐབས་ཀྱི་འབྲས་བུ་ལ་འཁྲུལ་པ་དགག་པའོ། །དང་པོ་ལ་ལྔ་སྟེ།  རྒྱུ་འབྲས་རིགས་མི་མཐུན་དགག་པ།  རྒྱུ་འབྲས་ཕྱིན་ལོག་དགག་པ།  རྒྱུ་མེད་པར་འབྲས་བུ་འབྱུང་བ་དགག་པ།  རྒྱུ་མ་ཚང་བར་འབྲས་བུ་འབྱུང་བ་དགག་པ།  འབྲས་བུའི་ངོ་བོ་ལ་འཁྲུལ་
པ་དགག་པའོ། །དང་པོ་ལ་གཉིས་ཏེ།  ཆིག་ཐུབ་ལས་སྐུ་གསུམ་འབྱུང་བ་དགག་པ།  ཆིག་ཐུབ་རང་གི་ངོ་བོ་དགག་པའོ། །འདི་ལ་བཞི་སྟེ།  ཆིག་ཐུབ་ཐབས་དང་བཅས་ན་ཁས་བླངས་འགལ།  ཐབས་དང་བྲལ་ན་ལུང་རིགས་གཉིས་དང་འགལ་བ།  དེས་ན་ཐབས་
9-5-10b


མཁས་ལམ་གྱི་གཙོ་བོར་བསྒྲུབ་པ།  སྟོང་ཉིད་ཁོ་ན་བསྒོམས་པའི་ཉེས་དམིགས་བསྟན་པའོ། །དང་པོ་ལ་གཉིས་ཏེ།  དངོས་དང་།  ལུང་འགལ་སྤང་བའོ། །གཉིས་པ་ལ་གཉིས་ཏེ།  རིགས་པ་དང་འགལ།  ལུང་དང་འགལ་བའོ། །གསུམ་པ་ལ་གསུམ་
སྟེ།  རྣམ་གྲོལ་བཟང་ངན་ཐབས་ཀྱིས་བྱེད་པར་བསྟན། དེ་ལ་ཡིད་ཆེས་ལུང་གིས་སྒྲུབ་བྱེད་འགོད།  རྣམ་གྲོལ་བཟང་པོ་འདོད་པས་ཐབས་ལ་འབད་པར་གདམས་པའོ། །གཉིས་པ་ལ་གཉིས་ཏེ།  བྱམས་པའི་ལུང་།  དཔའ་བོའི་ལུང་ངོ་། །གཉིས་པ་
གནས་སྐབས་ཀྱི་འབྲས་བུ་ལ་འཁྲུལ་པ་དགག་པ་ལ་གསུམ་སྟེ།  གྲུབ་ཐོབ་ལས་རྟོགས་ལྡན་བཟང་བ་དགག་པ།  ཉམས་ལས་གོ་རྟོགས་བཟང་བ་དགག་པ།  རྣལ་འབྱོར་བཞི་པོ་འཕགས་པའི་ས་ལམ་ལ་སྦྱར་བ་དགག་པའོ། །དང་པོ་ལ་གཉིས་ཏེ།  འདོད་
པ་བརྗོད།  དེ་དགག་པའོ། །གཉིས་པ་ལ་གཉིས་ཏེ།  འདོད་པ་བརྗོད།  དེ་དགག་པའོ། །གསུམ་པ་ལ་གཉིས་ཏེ།  འདོད་པ་བརྗོད།  དེ་དགག་པའོ། །འདི་ལ་གཉིས་ཏེ།  ཆོས་མཐུན་བརྩི་ན་དཔྱད་པར་བྱ་བ།  འཕགས་པའི་སར་བྱེད་
ན་མདོ་རྒྱུད་དང་འགལ་བའོ། །སྔགས་སྡོམ་ཀྱི་སྐབས་ཀྱི་བསྡུས་དོན་ནོ།།    །།སྤྱིའི་གཉིས་པ་རྩོད་པ་སྤང་བ་ལ་གཉིས་ཏེ།  རྩོད་པ་དང་།  ལན་ནོ། །འདི་ལ་བཞི་སྟེ།  སྨྲས་ཚད་བདེན་པ་དགག་པ།  གྲུབ་མཐའ་ཐམས་ཅད་བདེན་པ་དགག་པ། 
དྲངས་ངེས་ཐམས་ཅད་བདེན་པ་དགག་པ།  དེ་ལ་རྩོད་པ་སྤོང་བའོ། །གསུམ་པ་ལ་གཉིས་ཏེ།  སངས་རྒྱས་ཀྱི་གསུང་ལ་གཉིས་སུ་ཕྱེ་བ།  དེ་དག་ཇི་ལྟར་ལེན་པའི་ཚུལ་ལོ། །བཞི་པ་ལ་གཉིས་ཏེ།  རྩོད་པ་དང་།  ལན་ནོ། །གསུམ་པ་གནད་
9-5-11a


མ་འཁྲུལ་བར་བསྒྲུབ་པར་གདམས་པའི་སྒོ་ནས་མཇུག་བསྡུ་བ་ལ་གསུམ་སྟེ།  མ་འཁྲུལ་བའི་གནད་བསྒྲུབ་པར་གདམས་པ།  འཁྲུལ་པའི་གྲུབ་མཐའ་སུན་འབྱིན་པར་གདམས་པ།  གློ་བུར་གྱི་ཆོས་ལ་བརྟགས་དཔྱད་བྱ་བར་གདམས་
པའོ། །དང་པོ་ལ་གཉིས་ཏེ།  གནད་བཅོས་པ་ཉེས་དམིགས་ཆེ་བས་སྤང་བར་གདམས།  གནད་བཅོས་པའི་བདུད་ཤེས་ནས་སྤང་བར་གདམས་པའོ། །དང་པོ་ལ་གསུམ་སྟེ།  ཚིག་གི་གནད་བཅོས་པ་སྔོན་བྱུང་གི་དཔེ་དང་སྦྱར།  དོན་གྱི་གནད་བཅོས་
པ་ད་ལྟར་གྱི་གྲུབ་མཐའ་དང་སྦྱར།  དེས་ན་ཉེས་དམིགས་ཆེ་བས་སྤང་བར་གདམས་པའོ། །གཉིས་པ་ལ་གཉིས་ཏེ།  མདོར་བསྟན།  རྒྱས་པར་བཤད་པའོ། །གཉིས་པ་གནད་བཅོས་པའི་བདུད་ཤེས་ནས་སྤང་བར་གདམས་པ་ལ་གསུམ་སྟེ།  གནད་
བཅོས་པའི་བདུད་ཇི་ལྟར་བྱུང་བའི་ཚུལ།  དེས་གནད་ཇི་ལྟར་བཅོས་པའི་ཚུལ།  དེ་ཤེས་ནས་སྤོང་བར་གདམས་པའོ། །དང་པོ་ལ་གསུམ་སྟེ།  རྣམ་པ་ཇི་ལྟར་སྟོན་པ།  ཐབས་གང་གིས་བསླུ་བ།  སྔོན་བྱུང་གི་དཔེ་དང་སྦྱར་བའོ། །གཉིས་པ་འཁྲུལ་
པའི་གྲུབ་མཐའ་སུན་འབྱིན་པར་གདམས་པ་ལ་གསུམ་སྟེ།  སྔོན་བྱུང་མཁས་པས་འཁྲུལ་པའི་གྲུབ་མཐའ་སུན་ཕྱུང་བའི་ཚུལ།  རྗེས་འཇུག་མཁས་པས་འཁྲུལ་པའི་གྲུབ་མཐའ་སུན་འབྱིན་པའི་ཚུལ།  དགག་བསྒྲུབ་ཀྱི་ལུང་སྦྱོར་ཇི་ལྟར་བྱ་
བའི་ཚུལ་ལོ། །གཉིས་པ་ལ་གསུམ་སྟེ།  ལུང་རིགས་ཀྱིས་གནོད་ཚུལ་སྤྱིར་བསྟན།  ལུང་གིས་གནོད་ཚུལ་བྱེ་བྲག་ཏུ་བཤད།  ལུང་ཁས་མི་ལེན་པ་ལ་ཇི་ལྟར་བྱ་བའོ། །གཉིས་པ་ལ་བཞི་སྟེ།  གཞན་གྱི་ལུང་གིས་འགོག་མི་ནུས་པ། 
9-5-11b


 རང་གི་ལུང་གིས་འགོག་ནུས་པ།  དེའི་དཔེར་བརྗོད་གསལ་བར་བཤད་པ།  དེས་རིགས་ཅན་གཞན་ཡང་མཚོན་པའོ། །གསུམ་པ་ལུང་ཁས་མི་ལེན་པ་ལ་ཇི་ལྟར་བྱ་བ་ལ་གཉིས་ཏེ།  ལུང་ཁས་མི་ལེན་པ་གདོད་ནས་ཡོད་པ་ལ་ཇི་ལྟར་བྱ་བ། །
ལུང་ཁས་མི་ལེན་པ་གློ་བུར་དུ་བྱས་པ་ལ་ཇི་ལྟར་བྱ་བའོ། །གསུམ་པ་དགག་བསྒྲུབ་ཀྱི་ལུང་སྦྱོར་ཇི་ལྟར་བྱ་བའི་ཚུལ་ལ་བཞི་སྟེ།  སྐབས་མ་ཕྱེད་པའི་ལུང་སྦྱོར་བླུན་པོའི་ལུགས་སུ་བསྟན། སྐབས་ཕྱེད་པའི་ལུང་སྦྱོར་གྱི་དཔེར་བརྗོད་དགོད།  དེ་གཉིས་
ཀའི་དོན་བསྡུས་ཏེ་བསྟན་པ།  མཁས་རྨོངས་ཀྱི་འཁྲུལ་པའི་ཁྱད་པར་དཔེས་བསྟན་པའོ། །གཉིས་པ་ལ་གཉིས་ཏེ།  ལྟ་སྒོམ་སྤྱོད་པའི་ལུང་སྦྱོར།  འཇིག་རྟེན་ལས་འདས་མ་འདས་ཀྱི་ལུང་སྦྱོར་རོ། །གསུམ་པ་གློ་བུར་གྱི་ཆོས་ལ་བརྟགས་
དཔྱད་བྱ་བར་གདམས་པ་ལ་བཞི་སྟེ།  གློ་བུར་གྱི་མན་ངག་ལ་བརྟགས་དཔྱད་བྱ་བ།  གློ་བུར་གྱི་མདོ་རྒྱུད་ལ་བརྟགས་དཔྱད་བྱ་བ།  གློ་བུར་གྱི་རྟེན་ལ་བརྟགས་དཔྱད་བྱ་བ།  གློ་བུར་གྱི་ལྟས་ལ་བརྟགས་དཔྱད་བྱ་བའོ། །གཉིས་པ་ཚིག་ལ་འཁྲུལ་པ་དགག་
པ་ལ་གཉིས་ཏེ།  མཉན་པར་གདམས་པ་དང་།  དོན་དངོས་སོ། །འདི་ལ་གཉིས་ཏེ།  དོར་བྱ་ནོར་པའི་བཤད་པ་དགག །བླངས་བྱ་མ་ནོར་པའི་བཤད་པ་བསྒྲུབ་པའོ། །དང་པོ་ལ་གཉིས་ཏེ།  བོད་སྐད་ལ་བཤད་པ་ནོར་ཚུལ།  རྒྱ་སྐད་ལ་བསྒྱུར་བ་
ནོར་ཚུལ་ལོ། །གསུམ་པ་བཤད་པ་ཡོངས་སུ་རྫོགས་པའི་བྱ་བ་ལ་ལྔ་སྟེ།  བསྟན་བཅོས་བརྩོམ་པའི་རྒྱུ་ངོས་བཟུང་།  འབྲས་བུ་བསྟན་བཅོས་བཟུང་བར་གདམས།  བཟུང་བྱའི་ཆོས་ཀྱི་ཆེ་བ་བརྗོད།  བརྩམས་པའི་དགེ་བ་གཞན་དོན་དུ་བསྔོ། །བཀའ་
9-5-12a


དྲིན་རྗེས་སུ་དྲན་པའི་ཕྱག་གོ།  དང་པོ་ལ་གསུམ་སྟེ།  དམིགས་རྐྱེན་བསྟན་པའི་འཕེལ་འགྲིབ་བྱུང་ཚུལ།  ཀུན་སློང་ཟང་ཟིང་མེད་པའི་བྱམས་པ།  བདག་རྐྱེན་ཕྱོགས་ལྷུང་མེད་པའི་ཤེས་རབ་བོ། །དང་པོ་ལ་བཞི་སྟེ།  འཕགས་པའི་ཡུལ་དུ་
འཕེལ་འགྲིབ་བྱུང་ཚུལ།  བོད་ཡུལ་དུ་འཕེལ་འགྲིབ་བྱུང་ཚུལ།  དེས་ན་ཆོས་ལོག་སུན་དབྱུང་དགོས་པ།  གཏན་གྱི་བྱ་བ་བརྟགས་ནས་བླང་བའོ། །དང་པོ་ལ་གཉིས་ཏེ།  ཉན་ཐོས་ཀྱི་བསྟན་པ་ལ་བཀའ་བསྡུ་བྱུང་ཚུལ།  ཐེག་ཆེན་གྱི་བསྟན་པ་ལ་འཕེལ་
འགྲིབ་བྱུང་ཚུལ་ལོ། །དང་པོ་ལ་གསུམ་སྟེ།  བཀའ་བསྡུ་དང་པོ་དང་།  གཉིས་པ་དང་།  གསུམ་པ་བྱུང་ཚུལ་ལོ། །གཉིས་པ་ལ་གསུམ་སྟེ།  དང་པོར་འགྲིབ་པའི་ཚུལ།  བར་དུ་དར་བའི་ཚུལ།  དེ་རྗེས་བྱུང་ཚུལ་ལོ། །གཉིས་པ་ལ་གསུམ་སྟེ།  བསྟན་པ་སྔ་དར་གྱི་ཚུལ།
བསྟན་པ་ཕྱི་དར་གྱི་ཚུལ།  སྐབས་ཀྱི་དགག་བྱ་ངོས་བཟུང་བའོ། །གསུམ་པ་དེས་ན་ཆོས་ལོག་སུན་དབྱུང་དགོས་པ་ལ་བཞི་སྟེ།  ཕྱོགས་ཆོས་བསྒྲུབ།  ཁྱབ་པ་བསྒྲུབ།  གཏན་ཚིགས་འགོད།  དོན་བསྡུ་བའོ། །བཞི་བ་གཏན་གྱི་བྱ་བ་བརྟགས་ནས་
བླངས་པ་ལ་གཉིས་ཏེ།  གཏན་གྱི་ཉམས་ལེན་བརྟགས་ནས་བླང་བ།  གཏན་གྱི་སྐྱབས་གནས་བརྟགས་ནས་བླང་བའོ། །གཉིས་པ་ཀུན་སློང་ཟང་ཟིང་མེད་པའི་བྱམས་པ་ལ་གསུམ་སྟེ།  ཕན་པར་བསམ་པས་ཟང་ཟིང་མེད་པ།  བྱ་བར་འོས་པས་
ཟང་ཟིང་མེད་པ།  གཞན་ལ་བསྐུལ་བས་ཟང་ཟིང་མེད་པའོ། །དང་པོ་ལ་གཉིས་ཏེ།  མདོར་བསྟན།  རྒྱས་པར་བཤད་པའོ། །འདི་ལ་གསུམ་སྟེ།  ཕན་པ་སྡང་སེམས་ཡིན་ན་ཧ་ཅང་ཐལ།  བདུད་རིགས་ཕམ་པ་སྡང་སེམས་མིན་པར་བསྟན།
9-5-12b


  ཀུན་སློང་ཟང་ཟིང་མེད་པར་བསྟན་པ་དངོས་སོ། །དང་པོ་ལ་ལྔ་སྟེ།  བསྟན་འཛིན་ལ་དང་།  སྟོན་པ་ལ་དང་།  ལོང་ཁྲིད་ལ་དང་།  སྨན་པ་ལ་ཧ་ཅང་ཐལ་བ་དང་།  དོན་བསྡུ་བའོ། །གསུམ་པ་བདག་རྐྱེན་ཕྱོགས་ལྷུང་མེད་པའི་ཤེས་རབ་ལ་བཞི་
སྟེ།  ཐ་སྙད་མང་དུ་ཐོས་པ།  སྡེ་སྣོད་མང་དུ་ཐོས་པ།  རྒྱུད་སྡེ་མང་དུ་ཐོས་པ།  མན་ངག་མང་དུ་ཐོས་པའོ། །གཞུང་ལུགས་རྒྱ་མཚོའི་འཇིང་གསལ་ཞིང་། །བློ་གྲོས་པད་མོ་ཁ་ཕྱེ་སྟེ། །རྟོགས་པའི་ལོ་ཐོག་རྒྱས་བྱེད་ཕྱིར། །བསྡུས་དོན་འདི་ནི་ཉི་འོད་
ཡིན། །ཚུལ་འདི་སྲིད་གསུམ་འགྲོ་བའི་མགོན། །འཁྲུལ་མེད་བླ་མ་བརྒྱུད་བཅས་པའི། །གསུང་རབ་སྤྱི་བོའི་ཅོད་པན་ལྟར། །བསྟེན་པ་བསོད་ནམས་སེང་གེས་སྦྱར། །དགེ་བ་འདི་དང་སྲིད་ཞི་ཡི། །དགེ་ཚོགས་གཅིག་ཏུ་ཟླུམ་བྱས་ནས། །མཁའ་མཉམ་
འགྲོ་བའི་བྱང་ཆུབ་རྒྱུར། །ནམ་མཁའ་བཞིན་དུ་ཁྱབ་པར་ཤོག།    །།དགེའོ་དགེའོ་དགེའོ།།    །།

9-6-1a


༄༅།  །སྡོམ་པ་གསུམ་གྱི་རབ་ཏུ་དབྱེ་བའི་ཁ་སྐོང་གཞི་ལམ་འབྲས་གསུམ་གསལ་བར་བྱེད་པའི་ལེགས་བཤད་འོད་ཀྱི་སྣང་བ་ཞེས་བྱ་བ་བཞུགས། །
9-6-1b


༄༅། །སྡོམ་པ་གསུམ་གྱི་རབ་ཏུ་དབྱེ་བའི་ཁ་སྐོང་གཞི་ལམ་འབྲས་གསུམ་གསལ་བར་བྱེད་པའི་ལེགས་བཤད་འོད་ཀྱི་སྣང་བ་ཞེས་བྱ་བ།  རྗེ་བཙུན་བླ་མ་ཐུགས་རྗེ་ཆེན་པོ་དང་ལྡན་པ་རྣམས་
དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་གུས་པས་ཕྱག་འཚལ་ལོ། །ཡོན་ཏན་ལྷུན་གྲུབ་གཞིར་གནས་ཆོས་ཀྱི་དབྱིངས། །སྒྲིབ་པའི་དྲི་མ་སེལ་བར་བྱེད་པའི་ལམ། །གནས་གྱུར་བྲལ་དང་རྣམ་པར་
སྨིན་པའི་འབྲས། །དབྱེར་མེད་སྙིང་པོ་དེ་ལ་གུས་བཏུད་ནས། །རྒྱལ་བའི་བཀའ་དང་ཚད་ལྡན་གཞུང་ལུགས་དང་། །འཁྲུལ་ཟད་དམ་པའི་མན་ངག་ལ་བརྟེན་ནས། །གཞི་ལམ་འབྲས་གསུམ་གསལ་བྱེད་སྣང་བ་
འདི། །གཟུར་གནས་གཞན་ལ་ཕན་ཕྱིར་བརྩེ་བས་བཤད། །རང་བཞིན་འོད་གསལ་ཤེལ་གྱི་ཁམས། །བག་ཆགས་ཚོན་གྱིས་བསྒྱུར་བ་ལས། །གནས་སྐབས་དུ་མར་སྣང་བ་ཡི། །དབྱིངས་ཉིད་འཁོར་འདས་ཀུན་གྱི་
9-6-2a


གཞི། །ཐེག་གསུམ་བསླབ་པ་ལྕགས་ཟངས་དངུལ། །རིག་འཛིན་རྩི་ཡིས་གསང་ཆེན་གྱི། །གསེར་དུ་བསྒྱུར་བའི་ཉམས་ལེན་ནི། །དྲི་མ་སེལ་བྱེད་ལམ་གྱི་མཆོག །གནས་གྱུར་ནམ་
མཁར་བྲལ་འབྲས་ཀྱི། །ཡོན་ཏན་ཟླ་བ་ཤར་བ་ལས། །གདུལ་བྱ་དག་པའི་ཆུ་གཙང་དུ། །གཟུགས་སྐུ་འཆར་བ་འབྲས་བུའོ། །གཞི་ལ་གྲུབ་མཐའི་བྱེ་བྲག་གིས། །སེམས་བྱུང་ཟག་མེད་ས་བོན་དང་། །སྐྱེ་
མཆེད་དྲུག་གི་ཁྱད་པར་སོགས། །འདོད་པ་ཡོད་ཀྱང་འདུས་བྱས་ཡིན། །འདིར་ནི་བྱམས་མགོན་ཀླུ་སྒྲུབ་ཀྱིས། །གསལ་བ་རྒྱུན་ཆགས་མ་འགགས་པ། །མཐའ་བཞིའི་སྤྲོས་པས་སྟོང་པ་ཡི། །ཟུང་འཇུག་འདུས་
མ་བྱས་ལ་བཞེད། །དེ་ཡང་ཐེག་ཆེན་རྒྱུད་བླ་མར། །གཞི་ལམ་འབྲས་བུའི་ཡོན་ཏན་གྱི། །ལྡོག་པ་མ་ལུས་ཚང་བ་ནི། །སྒྲུབ་བྱེད་གསུམ་གྱིས་ཡོད་པར་བསྒྲུབ། །རྣམ་གཞག་བཅུ་ཡིས་གཏན་ལ་དབབ། །
9-6-2b


དྲི་མས་སྒྲིབ་ཚུལ་དཔེ་དགུས་བསྟན། །བྱང་ཆུབ་ཡོན་ཏན་ཕྲིན་ལས་ཀྱིས། །འབྲས་བུའི་གནས་ཚུལ་ཁྱད་པར་བཤད། །ཀླུ་སྒྲུབ་ཞབས་ཀྱི་རིགས་ཚོགས་ལས། །རྟེན་འབྲེལ་མཐའ་བཞིའི་སྤྲོས་པ་ཡིས། །སྟོང་ཚུལ་རིགས་པས་གཏན་ཕབ་ནས། །སྟོང་
ཉིད་བྱ་བྱེད་རུང་བར་གསུངས། །བསྟོད་པའི་ཚོགས་ལས་སྟོང་ཉིད་དེའང་། །ཅི་ཡང་མེད་ཙམ་ཡིན་སྤངས་ནས། །འཁོར་འདས་ལྷུན་གྲུབ་སེམས་ཉིད་ཀྱི། །ཡིན་ཕྱིར་བྱ་བྱེད་རུང་བར་གསུངས། །དེས་ན་ཐེག་ཆེན་དབུ་མ་ཡི། །ལུགས་ཀྱི་གཞི་ཡི་
འདོད་ཚུལ་ལ། །རྒྱལ་ཚབ་རྒྱལ་བས་ལུང་བསྟན་པའི། །སྲོལ་འབྱེད་འདི་གཉིས་དགོངས་པ་མཐུན། །ཆོས་དབྱིངས་དྲི་བཅས་དེ་བཞིན་ཉིད། །འོད་གསལ་བདེ་གཤེགས་སྙིང་པོ་དང་། །སེམས་ཀྱི་རང་བཞིན་དག་པ་སོགས། །མཚན་གྱི་རྣམ་
གྲངས་དུ་མས་བསྟན། །ལང་གཤེགས་སྟུག་པོ་བཀོད་པ་དང་། །རྣལ་འབྱོར་དབང་ཕྱུག་མན་ངག་དང་། །དཔལ་ལྡན་ཟླ་བའི་ཞབས་སོགས་ཀྱིས། །ཀུན་གཞིའི་སྒྲ་ཡང་འདི་ལ་བཞེད། །ཟབ་མོའི་རྒྱུད་དུ་འཇམ་དཔལ་དང་། །ཡེ་ཤེས་ཆེན་པོ་ལྷན་སྐྱེས་དང་། །
རྡོ་རྗེ་རྡོ་རྗེ་སེམས་དཔའ་དཔལ། །ཀུན་བཟང་ལ་སོགས་བགྲང་ཡས་གསུང་། །དེང་སང་ཚིག་ཙམ་སྨྲ་བ་ལ། །ངོ་མཚར་འཛིན་པའི་མཁས་རློམ་འགའ། །དྲི་བཅས་སེམས་ལ་རིགས་པ་ཡིས། །བདེན་པ་བཀག་ཙམ་སྙིང་པོར་འདོད། །འདི་ཉིད་ཐོགས་བཅས་བསལ་
བ་ལ། །ནམ་མཁའ་ཞེས་ནི་བཏགས་པ་དང་། །མགོ་བོར་འབིགས་ནུས་བསལ་བ་ལ། །རྭ་མེད་ཅེས་ནི་བཏགས་པ་ལྟར། །རྟོག་པས་དགག་བྱ་བཅད་ཙམ་གྱིས། །གཞན་སེལ་ཡིན་ཕྱིར་གནས་ལུགས་ཀྱང་། །མིན་ན་རང་བཞིན་གནས་རིགས་དང་། །བདེ་
9-6-3a


གཤེགས་སྙིང་པོར་ག་ལ་འཐད། །འདི་ལ་འཁོར་བ་ཇི་ལྟར་ཚང་། །འདི་ལ་ལམ་ཉིད་ཇི་ལྟར་བསྒོམ། །འདི་ལ་འབྲས་བུ་ཇི་ལྟར་འབྱུང་། །ངན་རྟོག་དྲ་བ་འདི་དོར་ཅིག །ཁ་ཅིག་སེམས་ཀྱི་སྟོང་
གསལ་གཉིས། །འདུས་མ་བྱས་དང་འདུས་བྱས་ཀྱི། །རང་བཞིན་གནས་རིགས་སོ་སོར་བཞེད། །འདི་ཡང་རེ་ཞིག་བརྟག་པར་བྱ། །ཟུང་འཇུག་སྒྲུབ་ཕྱིར་གནས་སྐབས་སུ། །འཁྱོག་པོ་བསྲང་བའི་ཚུལ་ཡིན་ན། །འགལ་བ་མེད་
དེ་ཟུང་འཇུག་ལ། །ཡ་གྱལ་གཉིས་པོ་དགོས་ཕྱིར་རོ། །གཞན་དུ་ངེས་པའི་དོན་ཡིན་ན། །རང་བཞིན་གནས་རིགས་འདུས་བྱས་སུ། །འདོད་པ་དངོས་སྨྲའི་ལུགས་ཡིན་གྱི། །དབུ་མ་པ་ཡི་ལུགས་ལ་མེད། །འགའ་ཞིག་ཆོས་ནི་ཐམས་
ཅད་ཀྱི། །སྙིང་པོ་རང་རང་ལ་ཡོད་ཕྱིར། །བདེ་གཤེགས་སྙིང་པོ་བདེ་གཤེགས་ལ། །ཡོད་ཀྱི་འགྲོ་བའི་རྒྱུད་ལ་མེད། །འགྲོ་ལ་ཡོད་པར་གསུངས་པ་ནི། །བདག་ཉིད་ཆེན་པོ་ས་པཎ་གྱིས། །ཆོས་གསུམ་སྒོ་ནས་དྲང་དོན་དུ། །གཏན་
ལ་དབབ་ཅེས་སྒྲོ་འདོགས་བྱེད། །འདི་ནི་འཇིག་རྟེན་བསྟན་བཅོས་ཀྱི། །ཐ་སྙད་གཉིས་ལས་འདས་པ་སྟེ། །སྦྲུལ་གྱི་སྙིང་པོ་སྦྲུལ་ཉིད་དང་། །མར་གྱི་སྙིང་པོ་མར་ཉིད་ལ། །ཡོད་ཕྱིར་ཙནྡན་སྦྲུལ་སྙིང་དང་། །མར་ནི་འོ་མའི་སྙིང་པོ་
སོགས། །འཇིག་རྟེན་ཀུན་ལ་གྲགས་པ་ཡི། །ཐ་སྙད་ཀུན་དང་འགལ་ཕྱིར་དང་། །དྲི་མེད་བཀའ་དང་བསྟན་བཅོས་ལས། །བདེ་གཤེགས་སྙིང་པོས་འགྲོ་ཀུན་ཁྱབ། །ལུས་ཅན་སངས་རྒྱས་སྙིང་པོ་ཅན། །ཞེས་གསུངས་པ་དང་འགལ་
9-6-3b


ཕྱིར་རོ། །དེ་ཉིད་དྲང་དོན་ཡིན་སྙམ་ན། །བདེན་གཉིས་སྒོ་ནས་དྲང་ངེས་ཀྱི། །རྣམ་གཞག་བྱེད་ཚེ་དྲང་དོན་ཀུན། །ཐ་སྙད་དུ་ཡང་མེད་ན་ནི། །ཕུང་པོ་ཁམས་དང་སྐྱེ་མཆེད་སོགས། །ཀུན་རྫོབ་བདེན་པའི་རྣམ་གཞག་ཀུན། །ཐ་སྙད་དུ་ཡང་མེད་
འགྱུར་ཏེ། །དེ་དག་དྲང་དོན་ཡིན་ཕྱིར་རོ། །འཇམ་དབྱངས་དགོངས་པར་འདོད་ན་ནི། །དེས་ན་དེ་བཞིན་གཤེགས་པ་ཡི། །སྙིང་པོ་སྤྲོས་བྲལ་ཡིན་པའི་ཕྱིར། །སེམས་ཅན་རྣམས་ལ་སངས་རྒྱས་དང་། །འཁོར་བ་གཉིས་ཀ་འབྱུང་བ་
འཐད། །ཅེས་གསུངས་གཞན་ཡང་དེ་ཉིད་ལས། །སེམས་ནི་རང་གནས་སྙེགས་པའི་ཕྱིར། །མེ་ཡི་སྒྲུབ་བྱེད་ཚ་བ་ལྟར། །བདེ་གཤེགས་ཁམས་ཀྱི་སྒྲུབ་བྱེད་འཐད། །ཅེས་གསུངས་པ་དང་ཅིས་མི་འགལ། །གཞན་ཡང་བེམ་པོའི་
ཆོས་དབྱིངས་དང་། །སེམས་ཅན་སེམས་ཀྱི་ཆོས་དབྱིངས་གཉིས། །སྙིང་པོ་ཡིན་པར་ཁྱད་མེད་དེ། །ཆོས་དབྱིངས་དབྱེ་བ་མེད་ཕྱིར་རོ། །ཞེས་གསུངས་པས་ཀྱང་གནོད་པ་སྟེ། །སེམས་ཅན་སེམས་ཀྱི་ཆོས་དབྱིངས་དང་། །སངས་རྒྱས་
སེམས་ཀྱི་ཆོས་དབྱིངས་གཉིས། །སྙིང་པོ་ཡིན་པར་ཁྱད་མེད་དེ། །ཆོས་དབྱིངས་དབྱེ་བ་མེད་ཕྱིར་རོ། །ཞེས་པ་ཀུན་ཏུ་མི་མཚུངས་སམ། །རང་གི་ངན་རྟོག་ཁྭ་ཏ་ཡིས། །ལྟ་ངན་མི་གཙང་ཟོས་པའི་མཆུ། །འཇམ་དབྱངས་གཞུང་བཟང་པདྨོའི་
ཚལ། །དྲི་ཞིམ་ལྡན་ལ་བསྒོ་བ་མཚར། །དེས་ན་གཞུང་ལུགས་ཆེན་པོ་ཡི། །དགོངས་པ་ཁོ་བོས་ཚུལ་བཞིན་བཤད། །ཕྲག་དོག་ཕྱོགས་འཛིན་ཡིད་དོར་ལ། །གཟུ་བོར་གནས་པའི་བློ་ཡིས་དཔྱོད། །ཆོས་དབྱིངས་བདེ་གཤེགས་སྙིང་
9-6-4a


པོ་དང་། །སྟོང་ཉིད་ལ་སོགས་རྣམ་གྲངས་ནི། །དོན་དམ་བདེན་པ་ཡིན་པའི་ཕྱིར། །ངེས་དོན་ཡིན་གྱི་དྲང་དོན་མིན། །འོན་ཀྱང་དཔེ་དགུས་བསྟན་པ་ལྟར། །དེ་ཉིད་འགྲོ་བའི་རྒྱུད་ལ་ནི། །རྟེན་དང་བརྟེན་པའི་
ཚུལ་གྱིས་སམ། །སྒྲུབ་པའི་ཚུལ་གྱིས་ཡོད་པ་ནི། །དྲང་དོན་ཡིན་གྱི་ངེས་དོན་མིན། །ཀུན་རྫོབ་བདེན་པ་ཡིན་ཕྱིར་རོ། །དགོངས་གཞི་མཐའ་བཞི་སྤྲོས་བྲལ་དང་། །དགོས་པ་སྐྱོན་ལྔ་སྤོང་བ་ཡང་། །སྒྲུབ་པའི་ཚུལ་གྱིས་ཡོད་ལ་འཐད། །དེ་ཉིད་ངེས་
པའི་དོན་ཡིན་ན། །མུ་སྟེགས་བདག་དང་མཚུངས་པ་སོགས། །དངོས་ལ་གནོད་བྱེད་སྐྱོན་རྣམས་འབྱུང་། །འདི་ཉིད་ཐེག་ཆེན་རྒྱུད་བླ་ལས། །འགྲོ་བའི་སེམས་རྒྱུད་བདག་གཉིས་ཀྱི། །སྤྲོས་པ་ཞི་བར་མཐོང་བ་ལ། །ཇི་ལྟར་མཐོང་བར་གསུངས་པ་དང་། །
སྤྲོས་བྲལ་ཆོས་ཉིད་དེ་ཉིད་ཀྱང་། །སེམས་ཅན་ཐམས་ཅད་ལ་ཡོད་པར། །མཐོང་ལ་ཇི་སྙེད་མཐོང་བར་ནི། །གསུངས་པ་རྟོགས་ན་འབད་མེད་འགྲུབ། །ཁ་ཅིག་རང་བཞིན་རྣམ་དག་དང་། །གློ་བུར་དྲི་བྲལ་ཆོས་དབྱིངས་གཉིས། །ཕན་ཚུན་སྤངས་
ཏེ་གནས་པའི་ཕྱིར། །གློ་བུར་དྲི་བྲལ་ཆོས་དབྱིངས་ནི། །རང་བཞིན་རྣམ་དག་མིན་ཅེས་ཐོས། །དེ་སྨྲ་ཁ་ཡི་བུ་ག་ནི། །བུ་ག་དོན་མེད་གཞན་དང་མཚུངས། །གང་ཕྱིར་དྲི་མ་བདེན་གྲུབ་ཀྱིས། །དག་པའི་དབྱིངས་དང་གློ་བུར་གྱི། །དྲི་མ་
གཉེན་པོས་བཅོམ་པ་ཡི། །དབྱིངས་ཀྱི་གཞི་མཐུན་མེད་པའི་ཚིག །འབྱུང་བའི་བུ་ག་ཡིན་ཕྱིར་རོ། །དག་ཆ་གཉིས་པོ་འགལ་བའི་ཕྱིར། །དག་པ་གཉིས་པོ་འགལ་སྙམ་ན། །སྐྱེས་དང་འཇིག་པའི་ཆ་འགལ་ཕྱིར། །བྱས་དང་མི་
9-6-4b


རྟག་འགལ་བར་འགྱུར། །དག་པ་དང་པོ་མངོན་གྱུར་ཚེ། །གཉིས་པ་མཐའ་དག་མངོན་འགྱུར་ཏེ། །གཉིས་པ་དང་པོ་ཡིན་ཕྱིར་རོ། །སྙམ་ན་ཚིག་གི་སྒྲིབ་གཡོགས་ཏེ། །བདག་མེད་དང་པོ་མངོན་གྱུར་ཚེ། །གཉིས་པ་མཐའ་དག་མངོན་འགྱུར་
ཏེ། །གཉིས་པ་དང་པོ་ཡིན་པའི་ཕྱིར། །ཞེས་སོགས་ཀུན་ཏུ་མཚུངས་ཕྱིར་རོ། །དེས་ན་འཕགས་མཆོག་ཀླུ་སྒྲུབ་ཀྱིས། །ཆོས་ཀྱི་དབྱིངས་སུ་བསྟོད་པ་ལས། །གང་ཞིག་ཀུན་ཏུ་མ་ཤེས་ན། །སྲིད་པ་གསུམ་དུ་རྣམ་འཁོར་བ། །སེམས་
ཅན་རྣམས་ལ་ངེས་གནས་པའི། །ཆོས་ཀྱི་དབྱིངས་ལ་ཕྱག་འཚལ་འདུད། །གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱང་བ་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཉིད་དོ། །ཞེས་གསུངས་སྔོན་གྱི་མཁས་
རྣམས་ཀྱང་། །ཆོས་དབྱིངས་རང་བཞིན་རྣམ་དག་ལ། །གློ་བུར་དྲི་མ་དང་བྲལ་བའི། །དག་པ་གཉིས་ལྡན་ཞེས་གསུངས་པ། །ཚད་མར་བྱས་ནས་ཆོས་དབྱིངས་ཀུན། །རང་བཞིན་རྣམ་དག་ཤེས་པར་གྱིས། །མཁྱེན་རབ་གཤོག་ཡངས་རྒྱས་
པ་ཡིས། །གསུང་རབ་མཁའ་ལ་བགྲོད་གྱུར་ཀྱང་། །རྣམ་རིག་བག་ཆགས་ཀྱིས་བསྒྲིབས་པའི། །སྐྱེས་ཆེན་འགའ་ཞིག་འདི་སྐད་གསུངས། །ཤེས་བྱ་ཀུན་ལ་བདེན་གཉིས་དང་། །མཚན་ཉིད་གསུམ་དུ་ཕྱེ་བ་ལས། །ཀུན་བརྟགས་གཞན་
དབང་ཀུན་རྫོབ་སྟེ། །ཡོངས་གྲུབ་དོན་དམ་བདེན་པའོ། །ཆོས་རྣམས་ཀུན་གྱི་དོན་དམ་ནི། །སངས་རྒྱས་ཡིན་པར་ཁྱད་མེད་ཕྱིར། །སེམས་ཅན་ཀུན་ལ་སངས་རྒྱས་ཉིད། །ཡོད་ཀྱི་སེམས་ཅན་སངས་རྒྱས་མིན། །དོན་དམ་ཆོས་སྐུ་རང་འཁྲུངས་
9-6-5a


ནི། །ཚོགས་གཉིས་བསགས་པས་ཐོབ་མི་དགོས། །ཀུན་རྫོབ་ཚོགས་གཉིས་བསགས་པ་ཡིས། །ཀུན་རྫོབ་གཟུགས་སྐུ་ཐོབ་པར་འདོད། །དོན་དམ་ཀུན་རྫོབ་ཆོས་ཀྱིས་སྟོང་། །རང་གི་ངོ་བོས་མི་སྟོང་
སྟེ། །རྟག་བརྟན་ཐེར་ཟུག་བདེན་གྲུབ་ཕྱིར། །ཀུན་རྫོབ་རང་གི་ངོ་བོས་སྟོང་། །དོན་དམ་འདི་ནི་གཞི་དུས་དང་། །འབྲས་བུའི་སྐབས་སུ་དྲི་མ་ཡིས། །དག་དང་མ་དག་མ་གཏོགས་པ། །ཡོན་ཏན་ལྡོག་པ་ཁྱད་པར་མེད། །འདི་ནི་
བདེན་པའི་གཅིག་ཏུ་གྲུབ། །སྟོབས་སོགས་ཆོས་སྐུའི་ཡོན་ཏན་དང་། །གཟུགས་སྐུའི་ཡོན་ཏན་མཚན་དཔེ་སོགས། །དམ་པའི་དོན་དུ་འདི་ལ་ཚང་། །དཔལ་ཕྲེང་མྱང་འདས་སྙིང་པོའི་མདོ། །སོར་ཕྲེང་ལ་ཕན་ལང་གཤེགས་དང་། །དགོངས་
འགྲེལ་ལ་སོགས་ངེས་དོན་གྱི། །མདོ་སྡེའི་དགོངས་པ་འདི་ཉིད་དེ། །བྱམས་པའི་གསུང་རབ་རྣམ་ལྔ་དང་། །ཐོགས་མེད་སྐུ་མཆེད་ཕྱོགས་གླང་དང་། །ཆོས་ཀྱི་གྲགས་པའི་གཞུང་ལུགས་རྣམས། །དབུ་མ་ཆེན་པོའི་ལུགས་ཡིན་པས། །དེ་དག་
དགོངས་པའང་འདི་ཉིད་ཡིན། །ཀླུ་སྒྲུབ་ཡབ་སྲས་ཀྱང་ནི་བཞེད། །ཟབ་མོའི་རྒྱུད་སྡེ་ཐམས་ཅད་ཀྱི། །དགོངས་པ་ཕྱོགས་གཅིག་པ་ཞེས་སྨྲ། །འདི་ལ་སྒྲོ་སྐུར་སྤངས་ནས་ནི། །ལུང་དང་རིགས་པས་དཔྱད་པར་བྱ། །གཞི་འབྲས་ཀུན་ཏུ་དབྱེར་མེད་
པའི། །ཆོས་དབྱིངས་བདེ་གཤེགས་སྙིང་པོ་དང་། །རང་བཞིན་ལྷུན་གྱིས་གྲུབ་པ་ཡི། །དོན་དམ་སངས་རྒྱས་ཡིན་པར་ནི། །ཐེག་པ་ཆེན་པོའི་མདོ་རྒྱུད་ཀྱི།  དགོངས་པ་ཡིན་པར་ཁོ་བོའང་འདོད། །ལྷག་མ་ཐ་སྙད་དོན་དམ་པ། །གཉིས་དང་
9-6-5b


འགལ་བ་འདི་ལྟར་མཐོང་། །ཐ་སྙད་སྒོ་ནས་གསུང་རབ་དོན། །འཆད་ཚེ་དྲི་མས་མ་དག་པའི། །ཆོས་དབྱིངས་སངས་རྒྱས་ཡིན་སྨྲ་བ། །ཐ་སྙད་ཉིད་དང་འགལ་བ་སྟེ། །ཐ་སྙད་ཚེ་ན་དམན་མཉམ་དང་། །ཁྱད་འཕགས་ཡོད་མེད་སྐྱེ་འགག་སོགས། །
སོ་སོར་ཕྱེ་ནས་སྨྲ་དགོས་ཕྱིར། །དེ་སྐད་དུ་ཡང་ཀླུ་སྒྲུབ་ཀྱིས། །སྟོང་ཉིད་བདུན་བཅུ་པ་ལས་ནི། །གནས་པའམ་སྐྱེ་འཇིག་ཡོད་མེད་དམ། །དམན་པའམ་མཉམ་དང་ཁྱད་པར་ཅན། །སངས་རྒྱས་འཇིག་རྟེན་བསྙད་དབང་གིས། །གསུང་གི་ཡང་
དག་དབང་གིས་མིན། །ཞེས་སོགས་རྒྱས་པར་གསུངས་ཕྱིར་རོ། །ཐ་སྙད་ཚེ་ན་དེ་ཡིན་མོད། །དེ་ཉིད་ཚད་མར་བྱེད་ན་ནི། །རྟོན་པ་བཞི་ཡི་གོ་རིམས་རྣམས། །ལོག་པ་ཉིད་དུ་འགྱུར་ཞེ་ན། །དེ་ཡི་གོ་རིམ་འདི་ལྟར་ཡིན། །ཐོག་མར་ཐ་སྙད་ཁས་
བླངས་ནས། །ཕྱི་ནས་དམ་པའི་གནས་ལུགས་ལ། །འཇུག་པ་ཡིན་གྱི་ཐ་སྙད་ཉིད། །དང་པོ་ཉིད་ནས་དོར་ན་ནི། །ཐ་སྙད་དོན་མེད་འགྱུར་བའམ། །གོ་རིམ་ལོག་པར་ཁྱོད་ལ་འགྱུར། །དེ་སྐད་དུ་ཡང་རྩོད་ཟློག་ལས། །ཐ་སྙད་ཁས་ནི་མ་བླངས་
པར། །ངེད་ཅག་འཆད་པར་མི་བྱེད་དོ། །ཞེས་གསུངས་རྩ་བའི་ཤེས་རབ་ལས། །ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་འགྱུར། །དམ་པའི་དོན་ནི་མ་རྟོགས་ན། །མྱ་ངན་འདས་པ་ཐོབ་མི་འགྱུར། །ཞེས་གསུངས་ཟླ་བ་གྲགས་
པས་ཀྱང་། །ཀུན་རྫོབ་དོན་དམ་ཐབས་དང་ནི། །ཐབས་བྱུང་ཡིན་ཕྱིར་དེ་གཉིས་ཀྱི། །རྣམ་དབྱེ་མི་ཤེས་ལམ་ངན་ཞུགས། །གསུངས་པའང་འདི་ཉིད་ཡིན་ཕྱིར་རོ། །གལ་ཏེ་ཐ་སྙད་ཚེ་ན་ཡང་། །མ་དག་དབྱིངས་ཉིད་སངས་རྒྱས་སུ། །
9-6-6a


སྨྲ་བ་ཡིན་པས་སྐྱོན་མེད་ན། །འདི་ནི་འཕགས་པའི་གཞུང་དང་འགལ། །ཅི་སླད་ཅེ་ན་རྒྱུད་བླ་མར། །མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་
དང་། །དེ་བཞིན་གཤེགས་པ་ཞེས་བརྗོད་དོ། །ཞེས་གསུངས་ཆོས་དབྱིངས་བསྟོད་པ་ལས། །ཇི་ལྟར་སོས་ཀའི་དུས་སུ་ཆུ། །དྲོའོ་ཞེས་ནི་བརྗོད་པར་བྱེད། །དེ་ཉིད་གྲང་བའི་དུས་སུ་ནི། །གྲང་ངོ་ཞེས་ནི་བརྗོད་པ་བཞིན། །ཉོན་མོངས་དྲ་བས་
གཡོགས་པ་ན། །སེམས་ཅན་བྱ་བར་བརྗོད་པ་ཡིན། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱེད། །ཅེས་གསུངས་གཞན་ཡང་དེ་ཉིད་ལས། །ཇི་ལྟར་སྦུན་པས་གཡོགས་པ་ན། །སོ་བ་འབྲས་བུར་མི་འདོད་ལྟར། །
དེ་བཞིན་ཉོན་མོངས་ཀྱིས་གཡོགས་པས། །དེ་ནི་སངས་རྒྱས་ཞེས་མི་རྟག༷། ཇི་ལྟར་སྦུན་པ་ལས་གྲོལ་ན། །འབྲས་ཉིད་སྣང་བར་འགྱུར་བ་ལྟར། །དེ་བཞིན་ཉོན་མོངས་བྲལ་གྱུར་ན། །ཆོས་ཀྱི་སྐུ་ཡང་རབ་ཏུ་གསལ། །ཞེས་སོགས་ཐ་སྙད་
སོ་སོར་གསུངས། །དེས་ན་དཔལ་ལྡན་རྩེ་མོ་ཡིས། །ཀྱེ་རྡོར་ཞེས་བྱའི་མཚན་གྱིས་ནི། །འབྲས་རྒྱུད་དངོས་བསྟན་རྒྱུ་དང་ལམ། །ཤུགས་ལས་ཤེས་པའི་མཐུན་པའི་དཔེར། །ཕྱོགས་ཀྱི་གླང་པོས་ཤེར་ཕྱིན་དངོས། །འབྲས་བུ་སངས་རྒྱས་ཡེ་ཤེས་
ཏེ། །གཞུང་དང་ལམ་གཉིས་བཏགས་པ་བར། །གསུངས་པ་བཀོད་འདི་གུས་པས་ལོངས། །གལ་ཏེ་འདི་ལའང་རྒྱུད་གསུམ་ཀ།  ཀྱེ་རྡོར་ཉིད་དུ་བཞེད་ཅེ་ན། །རྒྱུད་ཀྱི་མཚན་དོན་འཆད་པའི་ཚེ། །བརྗོད་བྱ་དོན་གྱི་ཀྱེ་རྡོ་རྗེ། །རྒྱུད་ནི་གསུམ་
9-6-6b


ཆར་ལ་འཇུག་ཀྱང་། །དེ་ཉིད་དངོས་བཏགས་ཕྱེ་བའི་ཚེ། །ཧེ་ནི་སྙིང་རྗེ་ཆེན་པོ་ཉིད། །བཛྲའང་ཤེས་རབ་བརྗོད་པར་བྱ། །ཞེས་པའི་དོན་ནི་དངོས་ཡིན་ལ། །ཐབས་དང་ཤེས་རབ་བདག་ཉིད་རྒྱུད། །ཅེས་པའི་དོན་ནི་ཚང་བས་ན། །རྒྱུ་དང་ལམ་
ལའང་ཀྱེ་རྡོར་སྒྲ། །འཇུག་ཕྱིར་དེ་གསུམ་འཆད་པ་ལ། །ཀྱེ་རྡོར་འཆད་ཅེས་གསུངས་པ་ཡི། །དོན་ཡིན་གཞན་དུ་རྒྱུད་གསུམ་ཀ།  ཀྱེ་རྡོར་ཡིན་ན་དེ་ཡི་སྒྲས། །འབྲས་རྒྱུད་དངོས་བསྟན་རྒྱུ་དང་ལམ། །ཤུགས་ལས་བསྟན་པ་མི་འཐད་དེ། །
གསུམ་ཀ་ཀྱེ་རྡོར་ཡིན་ཕྱིར་རོ། །དཔེར་ན་བུམ་པ་ཞེས་པའི་སྒྲས། །གསེར་བུམ་དངོས་བསྟན་དངུལ་བུམ་ནི། །ཤུགས་ལས་བསྟན་པར་མི་འཐད་བཞིན། །དེས་ན་ཧ་རི་བྷ་དྲ་ཡིས། །དངོས་དང་བཏགས་པར་གསུངས་པ་དང་། །དཀོན་མཆོག་འབངས་
ཀྱིས་གཙོ་ཕལ་དུ། །གསུངས་པ་དེ་གཉིས་དོན་གཅིག་སྟེ། །དངོས་བཏགས་གཙོ་ཕལ་དོན་གཅིག་པ། །གཞུང་ལུགས་ཆེན་པོའི་ལུགས་ཡིན་ཕྱིར། །དེ་སྐད་དུ་ཡང་རྣམ་འགྲེལ་ལས། །ཇི་ལྟར་གྲགས་ལས་གྲུབ་གང་ཡིན། །དངོས་
དང་དེ་དང་མཚུངས་པའི་ཕྱིར། །གང་ལ་དེ་སྐད་བརྗོད་ཕལ་པ། །དངོས་ལ་དངོས་མེད་བཏགས་ཕྱིར་རོ། །ཞེས་སོགས་དུ་མ་གསུངས་ལ་ལྟོས། །གཞུང་ལམ་ཤེར་ཕྱིན་མཚན་ཉིད་པར། །འདོད་པ་ངེས་དོན་རྒྱ་མཚོ་ཡི། །དགོངས་པ་ཉིད་
ཀྱང་མ་ཡིན་ཏེ། །དེར་ནི་གཞི་འབྲས་དབྱེར་མེད་པའི། །གཉིས་མེད་ཡེ་ཤེས་མཚན་ཉིད་པར། །བྱས་ན་གཞུང་དང་ལམ་གཉིས་ལ། །བཏགས་པ་བར་ནི་གསུངས་ཕྱིར་རོ། །འོན་ཀྱང་འདི་ཡང་མི་འཐད་དེ། །གཞི་དུས་གཉིས་སུ་མེད་ཡེ་ཤེས། །ཤེར་
9-6-7a


ཕྱིན་ཡིན་ན་དེ་བཞིན་གཤེགས། །ཞེས་པས་རྟེན་གྱི་ཁྱད་པར་ནི། །བསྟན་པ་དོན་མེད་འགྱུར་ཕྱིར་རོ། །དེ་ཉིད་རྣམ་གྲངས་ཡིན་སྙམ་ན། །གཞི་དུས་དེ་བཞིན་གཤེགས་ཡོད་ལ། །ཐ་སྙད་དང་འགལ་སྔར་
བསྟན་ཟིན། །གཞན་ཡང་གཞུང་དང་ལམ་གཉིས་ལ། །མཚན་ཉིད་གསུམ་དུ་ཕྱེ་བ་ཡི། །ཡོངས་གྲུབ་ཤེར་ཕྱིན་མ་ཡིན་ན།  རང་གི་གྲུབ་མཐའ་ཉིད་དང་འགལ། །ཡིན་ན་འདི་དོན་བཤད་དང་འགལ། །དེས་ན་གཞུང་དེའི་དགོངས་པ་ནི། །འཕགས་
ཡུལ་མཁས་གྲུབ་ཀུན་མཐུན་པར། །ས་སྐྱའི་རྗེ་བཙུན་གོང་མ་ཡིས། །ཚུལ་བཞིན་བཤད་པ་གུས་པས་ལོངས། །ཆོས་སྐུ་གློ་བུར་དྲི་བྲལ་ཆ། །ཚོགས་གཉིས་བསགས་པས་ཐོབ་དགོས་ན། །དོན་དམ་ཆོས་སྐུ་མིན་པར་འགྱུར། །ཚོགས་
གཉིས་བསགས་ལ་མི་ལྟོས་ན། །འགྲོ་ཀུན་དང་པོ་ཉིད་ནས་ཀྱང་། །གློ་བུར་དྲི་མ་བྲལ་འགྱུར་བས། །སྙིང་པོ་དྲི་མས་སྒྲིབ་པའི་ཚུལ། །དཔེ་དགུས་བསྟན་པ་དོན་མེད་འགྱུར། །དོན་དམ་གནས་ལུགས་དང་འགལ་བ། །འདི་ལྟར་མཐོང་སྟེ་ཆོས་ཀྱི་
དབྱིངས། །ཡོངས་གྲུབ་བདེན་པར་གྲུབ་པ་ནི། །ངེས་པའི་དོན་གྱི་མདོ་སྡེ་དང་། །ཀླུ་སྒྲུབ་དགོངས་པ་མ་ཡིན་ཏེ། །མདོ་ལས་ཟབ་ཞི་སྤྲོས་བྲལ་དང་། །འོད་གསལ་འདུས་མ་བྱས་པ་ལྔ། །རྣམ་གྲངས་ཉིད་དུ་གསུངས་ཕྱིར་དང་། །དེ་ཉིད་མགོན་པོ་
ཀླུ་སྒྲུབ་ཀྱིས། །སྐྱེ་དང་གནས་དང་འཇིག་པ་དག །མ་གྲུབ་ཕྱིར་ན་འདུས་བྱས་མེད། །འདུས་བྱས་རབ་ཏུ་མ་གྲུབ་པས། །འདུས་མ་བྱས་ནི་ཇི་ལྟར་འགྲུབ། །ཅེས་གསུངས་འདི་ཡི་འདུས་བྱས་དང་། །འདུས་མ་བྱས་གཉིས་བདེན་མེད་པར། །མཚུངས་
9-6-7b


པ་ཉིད་དུ་བསྟན་ཕྱིར་རོ། །སངས་རྒྱས་གཉིས་པ་ཀླུ་སྒྲུབ་ཀྱིས། །དངོས་སྨྲ་འགོག་པའི་རིགས་པ་རྣམས། །རང་ལ་ལོག་པ་ཉིད་འགྱུར་ཏེ། །བདེན་གྲུབ་ཆོས་ནི་དམ་བཅས་ཕྱིར། །དེ་སྐད་དུ་ཡང་རྩོད་ཟློག་ལས། །གལ་ཏེ་ངས་དམ་བཅས་འགའ་
ཡོད། །དེས་ན་ང་ལ་སྐྱོན་དེ་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཅེས་གསུངས་པ་ཡི་དམ་བཅའི་དོན། །བདེན་གྲུབ་དམ་བཅས་ཉིད་ལ་ནི། །རང་ཉིད་ཀྱང་ནི་འཆད་ཕྱིར་རོ། །དེ་ལ་སྐྱོན་སྤོང་འདི་སྐད་དུ། །
འདུས་མ་བྱས་ནི་མ་གྲུབ་དང་། །བདེན་གྲུབ་དམ་བཅའ་མེད་པ་ནི། །མཉམ་གཞག་ལ་ཟློའི་སྐབས་ཡིན་གྱི། །རྗེས་ཐོབ་ཤན་འབྱེད་སྐབས་མིན་ཕྱིར། །ངེད་ལ་གནོད་པ་མེད་ཅེས་ཟེར། །གདུལ་བྱས་གནས་ལུགས་རྟོགས་དོན་དུ། །རིགས་པས་གཏན་
འབེབས་གནས་སྐབས་དང་། །དབུ་མ་པ་ཡི་སྐྱེས་ཆེན་གྱིས། །དངོས་སྨྲའི་རྩོད་པ་ཟློག་པའི་སྐབས། །མཉམ་པར་བཞག་པའི་སྐབས་ཡིན་གྱི། །རྗེས་ཐོབ་གནས་སྐབས་མིན་ནོ་ཞེས། །སྨྲ་བ་འདི་ལའང་བདེན་འཛིན་ཡོད། །རྗེས་ཐོབ་རྩོད་པ་
མི་བྱེད་པར། །མཉམ་གཞག་རྩོད་པ་བྱེད་ཅེས་པ། །རྩ་བའི་གྲུབ་མཐའ་ཤེལ་སྒོང་ལ། །སྒྲུབ་བྱེད་ལྟར་སྣང་ཚོན་རྣམས་ཀྱིས། །རེ་ཞིག་ནོར་བུར་ཁ་བསྒྱུར་ཡང་། །དངོས་སྟོབས་རིགས་པའི་ཆུ་གཙང་དང་། །ཕྲད་ཚེ་རང་མདོག་འདི་ལྟར་སྟོན། །
ཤེས་རབ་ཕ་རོལ་ཕྱིན་མདོ་ལས། །ཆོས་རྣམས་ཐམས་ཅད་རྣམ་ཀུན་ཏུ། །སྟོང་པ་ཞེས་ནི་གསུངས་པ་དང་། །འཁོར་ལོ་ཕྱི་མར་སེམས་ཅན་ལ། །སྙིང་པོ་ཡོད་པར་གསུངས་པ་གཉིས། །འགལ་ལོ་སྙམ་དུ་དོགས་པའི་ལན། །སྔ་མ་ངེས་པའི་དོན་
9-6-8a


ཡིན་ཞིང་། །ཕྱི་མ་སྐྱོན་ལྔ་སྤོང་ཕྱིར་དུ། །གསུངས་པས་དྲང་དོན་ཉིད་ཡིན་པར། །མགོན་པོ་བྱམས་པས་རྒྱུད་བླར་གསུངས། །དེས་ན་དྲང་དོན་ངེས་དོན་གྱི། །མདོ་སྡེ་མ་འདྲེས་སོ་སོར་སྨྲོས། །ཆོས་དབྱིངས་གཉིས་
མེད་ཡེ་ཤེས་སོགས། །བདེན་པར་གྲུབ་པ་རྒྱུད་སྡེ་ཡི། །དགོངས་པ་ཉིད་ཀྱང་མ་ཡིན་ཏེ། །རང་རིག་ཡེ་ཤེས་མཁའ་མཉམ་དང་། །རྡུལ་བྲལ་སྟོང་པ་ལ་སོགས་པ། །བདེན་གྲུབ་ལོག་རྟོག་བཟློག་ཕྱིར་དུ། །གཅིག་དང་དུ་མ་བྲལ་བའང་དེ། །ཞེས་པ་ཀྱེ་
རྡོར་རྒྱུད་ལས་གསུངས། །བྱམས་ཆོས་ཕྱི་མ་རྣམ་གསུམ་དང་། །ཐོགས་མེད་སྐུ་མཆེད་རང་གཞུང་དང་། །ཕྱོགས་གླང་གྲགས་པའི་མདོ་དང་ནི། །སྡེ་བདུན་ལ་སོགས་གཞུང་ལུགས་རྣམས། །དབུ་མ་ཆེན་པོའི་ལུགས་ཡིན་ན། །འཕགས་པའི་
ཡུལ་ནས་གངས་ཅན་འདིར། །སེམས་ཙམ་གཞུང་ལུགས་མ་འགྱུར་རམ། །འགྱུར་ན་གང་ཞིག་ཡིན་པར་སྨྲོས། །བདག་ནི་དཔལ་ལྡན་དུས་འཁོར་གྱི། །སྲོལ་འཛིན་ཉམས་རྟོགས་མཐར་ཕྱིན་པའི། །སྐྱེས་ཆེན་བརྒྱུད་པ་འདི་དག་ལ། །ཡིད་ནི་
ཤིན་ཏུ་དད་མོད་ཀྱི། །འོན་ཀྱང་རྒྱ་བོད་ཀུན་མཐུན་པའི། །ལྟ་བ་སྤྲོས་བྲལ་སྒྲུབ་པའི་ཕྱིར། །སྒྲོ་སྐུར་སྤངས་ནས་འདི་ཙམ་ཞིག །རྣམ་པར་དཔྱད་པ་དྲང་པོར་ཟུང་། །མདོར་ན་ཆོས་རྣམས་སེམས་སུ་འདུས། །སེམས་ཉིད་མཐའ་བཞིའི་སྤྲོས་དང་
བྲལ། །དེ་ཡང་གསལ་ལ་མ་འགགས་པའི། །བརྗོད་བྲལ་སྙིང་པོར་ཤེས་པར་གྱིས། །གཞིའི་སྐབས་ཏེ་དང་པོའོ། །༈། །ལམ་ལ་གྲུབ་མཐའ་རྣམ་བཞི་ཡི། །རང་རང་གཞུང་ལས་ཐེག་གསུམ་གྱི། །ལམ་གྱི་རྣམ་གཞག་བྱེད་མོད་ཀྱི། །
9-6-8b


རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མས་གནོད་པའི་ཚེ། །དབུ་མའི་གཞུང་ལུགས་མ་རྟོགས་པར། །ཐེག་གསུམ་ལམ་ཉིད་ཚང་བར་ནི། །མེད་ཅེས་དབུ་མ་པ་རྣམས་བཞེད། །ཕ་རོལ་ཕྱིན་ལས་ཆེས་འཕགས་པའི། །ཟབ་མོ་སྔགས་ཀྱི་
སྒོར་ཞུགས་ཚེ། །སྡོམ་གསུམ་ལྡན་པས་འབྲས་བུ་མཆོག །སྒྲུབ་ཅིང་སྡོམ་གསུམ་དེ་ཉིད་ཀྱང་། །རང་རང་ཆོ་གས་རིམ་བཞིན་དུ། །བླངས་སམ་དབང་བསྐུར་ཆོ་ག་ལས། །གསུམ་ཆར་ཐོབ་པ་ཉིད་ཀྱང་རུང་། །གསུམ་ལྡན་ཚེ་ན་ངོ་བོ་གཅིག །དེ་ལ་
ཁ་ཅིག་སོ་ཐར་གྱི། །སྡོམ་པ་གཟུགས་ཅན་དུ་འདོད་ཅིང་། །གྲངས་ཀྱང་རིགས་བརྒྱད་ཁོ་ནར་ངེས། །འཆི་ཚེ་གཏོང་བས་ཁྱབ་པར་འདོད། །མདོ་རྒྱུད་གཞུང་མང་མ་མཐོང་བར། །བྱེ་སྨྲའི་འདུལ་མངོན་མཐོང་ཙམ་གྱིས། །ཁྲོན་པའི་སྦལ་ཆུང་ཇི་བཞིན་
དུ། །རང་སྣང་ཙམ་གྱིས་ཚིམ་པར་ཟད། །བྱེ་སྨྲས་སྡོམ་པ་གཟུགས་ཅན་དུ། །འདོད་པ་མདོ་སྡེའི་མཁས་རྣམས་ཀྱིས། །བཀག་ན་དབུ་སེམས་གཞུང་བཟང་དང་། །ཟབ་མོའི་རྒྱུད་སྡེར་སྨོས་ཅི་དགོས། །གཞན་དུ་རྒྱུད་རྒྱས་འབུམ་པ་ལས། །
རིགས་ཅན་གསུམ་གྱི་བསླབ་པ་ཡང་། །དཀྱིལ་འཁོར་ཆེན་པོ་འདིར་ཞུགས་ན། །རིག་འཛིན་སྡོམ་པར་འགྱུར་ཞེས་པའི། །ལུང་གིས་དངོས་སུ་གནོད་པ་སྟེ། །བེམ་པོ་ཤེས་པར་འགྱུར་བ་ནི། །རྒྱང་འཕེན་པ་ཡི་ལུགས་ཡིན་གྱི། །སངས་རྒྱས་
གཞུང་ལས་མི་སྲིད་ཕྱིར། །རིགས་བརྒྱད་ཁོ་ནར་ངེས་ན་ནི། །ཉེ་བར་འཁོར་གྱིས་ཞུས་པ་དང་། །བྱང་སེམས་སོ་སོར་ཐར་པ་དང་། །ཆོས་བཞི་བསྟན་པའི་མདོ་རྣམས་ལས། །གསུངས་པའི་སོ་སོར་ཐར་པ་རྣམས། །བརྒྱད་པོ་གང་དུ་འདོད་པ་སྨྲོས། །
9-6-9a


སྔགས་སྡོམ་བྱང་སེམས་སྡོམ་པ་ཡི། །བྱེ་བྲག་ཡིན་ཞིང་དེ་ཉིད་ཀྱང་། །གཞན་ལ་ཕན་པ་བསྒྲུབ་པ་ལ། །གཞན་ལ་གནོད་པ་སྤོང་བ་ཡིས། །ཁྱབ་ཕྱིར་སོ་སོར་ཐར་པ་ཡི། །དོན་ཚང་གཉིས་པོ་གང་དུ་འདུས། །འོན་
ཀྱང་རྡོ་རྗེ་རྩེ་མོ་ལས། །གསུངས་པའི་ཁྱིམ་པའི་སྡོམ་པ་དང་། །སྟ་གོན་འཇུག་པའི་གནས་སྐབས་སུ། །ཐུན་མོང་མིན་པའི་སྐྱབས་འགྲོ་ལས། །ཐོབ་པའི་སོ་ཐར་སྡོམ་པ་རྣམས། །དགེ་བསྙེན་སྡོམ་པར་བླ་མ་བཞེད། །འདི་ལ་འཐད་པ་མང་
ཡོད་ཀྱང་། །གཞུང་མང་དོགས་པས་རེ་ཞིག་བཞག །དེས་ན་ཇི་སྐད་བཤད་པ་ཡི། །སོ་སོར་ཐར་པའི་སྡོམ་པ་རྣམས། །བྱང་ཆུབ་བར་དུ་བླངས་བའི་ཕྱིར། །ཤི་འཕོས་ཚེ་ན་ཇི་ལྟར་གཏོང་། །ལ་ལ་སོ་སོར་ཐར་པ་ལ། །འཇིགས་སྐྱོབ་ལེགས་
སྨོན་ངེས་འབྱུང་གི།  ཚུལ་ཁྲིམས་གསུམ་དུ་དབྱེ་བར་འདོད། །རྒྱུ་ཡི་ཀུན་སློང་མྱང་འདས་ཀྱི། །བསམ་པས་ཟིན་པས་གསུམ་ཆར་ནི། །སོ་སོར་ཐར་པ་ཁྱད་མེད་ཀྱང་། །དུས་ཀྱི་ཀུན་སློང་སྒོ་ནས་ནི། །གསུམ་པོ་སོ་སོར་དབྱེ་ཞེས་ཟེར། །འོ་ན་ཕྱི་རོལ་པ་
རྣམས་ལ། །འཇིགས་སྐྱོབས་ལེགས་སྨོན་ཡོད་པའི་ཕྱིར། །ཀླུ་སྒྲུབ་ངག་དབང་ཆོས་གྲགས་ཆོས་རྣམ་པ་སོགས་ཀྱི་བཞེད་པས།  དུས་ཀྱི་ཀུན་སློང་མྱང་འདས་ཀྱི། །ཞེས་དང་།  རྒྱུ་ཡི་ཀུན་སློང་སྒོ་ནས་ནི། །ཞེས་ཚིག་བསྒྱུར་དགོས་པའི་སྒྲུབ་བྱེད་མཛད་ཀྱང་ཁ་སྐོང་གི་དཔེ་ཕལ་ཆེར་ན་གོང་བཞིན་ཡོད། །
སོ་ཐར་སྡོམ་པ་ཡོད་པར་འགྱུར། །འདོད་ན་ཕྱི་རོལ་པ་དག་ལ། །ཡང་དག་བླངས་པའི་ཚུལ་ཁྲིམས་ནི། །ཡོད་ཀྱང་སྲིད་པ་ལ་བརྟེན་ཕྱིར། །སོ་སོར་ཐར་པ་མེད་དོ་ཞེས། །མཛོད་ཀྱི་འགྲེལ་པར་གསུངས་དང་འགལ། །འཇིགས་སྐྱོབ་དང་ནི་ལེགས་
9-6-9b


སྨོན་གཉིས། །སོ་སོར་ཐར་པ་མ་ཡིན་ཏེ། །སྲིད་པ་ལ་བརྟེན་ཕྱིར་ཞེས་པའི། །སྐྱོན་ཡང་ལུང་དེས་གསལ་བར་བསྟན། །དེས་ན་ངེས་འབྱུང་ཚུལ་ཁྲིམས་དང་། །སོ་ཐར་དོན་གཅིག་འདུལ་བའི་ལུགས། །གལ་ཏེ་སྐྱབས་འགྲོའི་དུས་ཀྱི་ཚེ། །
ངེས་འབྱུང་བསམ་པས་ཁྱབ་པའི་ཕྱིར། །གཉིས་པོའང་སོ་ཐར་ཡིན་སྙམ་ན། །དེ་ཡང་བསྒྲུབ་བྱ་དང་མཚུངས་ཏེ། །སྐྱབས་འགྲོ་ཉིད་ལ་འཇིགས་སྐྱོབ་དང་། །ལེགས་སྨོན་སྐྱབས་འགྲོ་ཡོད་ཕྱིར་རོ། །གཞན་ཡང་འདི་ལ་ལུང་རིགས་ཀྱི། །གནོད་
བྱེད་ཆར་ལྟར་འབབ་ན་ཡང་། །ཀུན་གྱིས་ནོར་བར་གོ་བའི་ཕྱིར། །འདིར་ནི་རེ་ཞིག་མི་སྤྲོའོ། །ཁ་ཅིག་སོ་ཐར་སྡོམ་པ་ཡི། །ངོ་བོ་གཞན་གནོད་གཞི་དང་བཅས། །སྤོང་བར་འཕགས་ཡུལ་གཞུང་འགྲེལ་ལས། །བཤད་པ་མེད་ཅེས་སྒྲོག་པ་ཐོས། །
དཔལ་ལྡན་ཁ་ཆེ་བློ་བརྟན་གྱིས། །བྱེ་བྲག་བཤད་པ་ལས་གསུངས་གང་། །བོད་ཀྱི་མཁས་པ་སྔ་མ་རྣམས། །སྤྱི་བོའི་ཐོད་བཞིན་ཁུར་བར་མཛད། །ལ་ལ་གཞན་གནོད་གཞི་དང་བཅས། །སྤོང་བ་དགེ་སློང་སྡོམ་པ་ཡི། །ངོ་བོ་ཡིན་གྱི་སོ་སོར་ཐར། །སྤྱི་
ཡི་ངོ་བོ་མིན་ཞེས་སྨྲ། །ངེད་ཀྱི་ལུགས་འདི་བློ་བརྟན་དང་། །ས་སྐྱའི་རྗེ་བཙུན་ཡབ་སྲས་དང་། །དཔང་ལོ་མཆིམས་སྟོན་ནམ་མཁའ་གྲགས། །བུ་སྟོན་ཁ་ཆེ་ལ་སོགས་ཀྱིས། །མགྲིན་གཅིག་ཉིད་དུ་གསུངས་པ་ཡིན། །ཁྱེད་ཀྱི་ལུགས་འདི་ཁྱེད་
ཉིད་ལས། །གཞན་པའི་རྒྱ་བོད་སུ་ཞིག་གིས། །བཤད་པ་ཡོད་ན་ཁུངས་སྟོན་ཅིག །འགའ་ཞིག་སྐྱེས་ཚོགས་ཁོ་ན་ཡིས། །དེང་སང་བུད་མེད་བསྙེན་རྫོགས་བྱེད། །དངོས་གཞི་གསོལ་བཞིའི་ལས་ཀྱི་ཚེ། །ཚོགས་གཉིས་ཕན་ཚུན་བསྣོར་བ་དང་། །
9-6-10a


ལས་ཚིགས་ཕན་ཚུན་བསྣོར་བས་ཀྱང་། །འཆགས་པར་ལས་གཞི་ཉིད་ལས་གསུངས། །འོན་ཀྱང་ད་ལྟའི་ཆོ་ག་ཡིས། །བུད་མེད་བསྙེན་པར་རྫོགས་པ་ལ། །ཚངས་སྤྱོད་ཉེར་གནས་མ་སོང་བར། །བསྙེན་པར་
རྫོགས་པར་མི་འགྱུར་ཞིང་། །ཚངས་སྤྱོད་ཉེར་གནས་མ་ཚོགས་ནི། །ཁོ་ནས་སྟེར་བར་གཞུང་ལས་གསུངས། །འདི་ལ་དམིགས་བསལ་མ་གསུངས་ཤིང་། །སྒྲུབ་བྱེད་གཞན་ཡང་མེད་པས་ན། །འདི་འདྲའི་ཆོ་ག་བྱེད་པ་ནི། །བསྟན་པ་དཀྲུག་པའི་སྙད་
ཀར་ཟད། །དེ་ལ་ཁ་ཅིག་ཚིགས་སྔ་མ། །མེད་པར་སྐྱེ་ལ་ཉེས་བྱས་སུ། །གསུངས་པས་འདི་ཉིད་འགྲུབ་ཅེས་ཟེར། །ཚངས་སྤྱོད་ཉེར་གནས་བསླབ་ཚིགས་སུ། །འདོད་པ་མཁས་པའི་བཞད་གད་གནས། །ཅི་ཕྱིར་ཞེ་ན་བུད་མེད་ལ། །དགེ་སློབ་
མ་ལས་མ་གཏོགས་པའི། །བསླབ་ཚིགས་ལྷག་པོ་མ་གསུངས་ཕྱིར། །བསླབ་ཚིགས་དོན་ཡང་མི་གནས་ཏེ། །ཚངས་སྤྱོད་ཉེར་གནས་ཐོབ་ནས་ནི། །བསྙེན་པར་རྫོགས་པ་མ་ཐོབ་པའི། །བར་དེར་བསླབ་མཚམས་མེད་ཕྱིར་རོ། །དེས་ན་ཁྱོད་
ལས་མཁྱེན་བརྩེའི་ཚོགས། །ཆེ་བ་སྔོན་གྱི་ཞི་འཚོ་དང་། །བར་གྱི་བླ་ཆེན་མཁན་བརྒྱུད་དང་། །ཐ་མར་པཎ་ཆེན་ཤཱཀ་ཤྲཱི་སོགས། །བོད་ཡུལ་འདུལ་བའི་སྲོལ་འབྱེད་རྣམས། །ལྗོངས་འདིར་བུད་མེད་བསྙེན་པར་རྫོགས། །མཛད་པ་མེད་པ་འདི་ཉིད་
ལ། །བསམ་ནས་བསྟན་པ་མ་དཀྲུགས་ཤིག །ལ་ལ་བསྙེན་རྫོགས་བསྒྲུབ་བྱ་ནི། །གསུམ་ལས་མང་བར་མི་རུང་ཡང་། །རབ་བྱུང་དགེ་ཚུལ་དག་ལ་ནི། །གསུམ་ལས་མང་བ་འཇུག་རུང་སྟེ། །ཚོགས་ཀྱིས་ཚོགས་ལ་མི་ཆགས་པར། །གསུངས་པ་
9-6-10b


ལས་བརྒྱ་རྩ་གཅིག་པོ། །ཁོ་ནའི་དབང་དུ་བྱས་ཕྱིར་དང་། །གཉིས་ལ་དེ་དག་མེད་ཅེས་ཟེར། །འོ་ན་དངོས་གཞི་གསོལ་བཞི་ལས། །མ་གཏོགས་བསྙེན་རྫོགས་ཆོ་གའི་སྐབས། །གཞན་ལའང་དེ་དག་རུང་འགྱུར་ཏེ། །རྒྱུ་མཚན་ཀུན་ཏུ་མཚུངས་ཕྱིར་རོ། །འདུལ་
བར་གསུངས་པའི་ལས་ལ་ནི། །བརྒྱ་རྩ་གཅིག་ཏུ་མ་ངེས་ཏེ། །རབ་བྱུང་ཞུ་བ་ལ་སོགས་ལའང་། །ལས་སུ་གཞུང་ལས་གསུངས་ཕྱིར་རོ། །འདི་ནི་རྗེ་བཙུན་རྩེ་མོ་དང་། །དཔལ་ལྡན་ས་སྐྱ་པཎྜི་ཏས། །ཉན་ཐོས་བསྟན་པ་ནུབ་གྱུར་ཀྱང་། །གཟུགས་བརྙན་ཙམ་ཞིག་སྣང་
བའི་དཔེར། །རབ་བྱུང་གང་ཟག་གསུམ་ལས་ནི། །མང་བ་མི་འཇུག་བཀོད་གྱུར་ཀྱང་། །ད་ནི་འདི་ལའང་བརྒལ་བར་སྣང་། །ཀྱེ་མ་བསྟན་པ་འདི་ལྟར་གྱུར། །དེས་ན་བྱང་ཆུབ་རྒྱུར་འགྱུར་བའི། །སོ་ཐར་ཉམས་སུ་ལེན་འདོད་ན། །ཡང་ན་ཉན་ཐོས་འདུལ་བ་ལས། །ཇི་ལྟར་
གསུངས་པ་ཉམས་སུ་ལོངས། །འདི་ཉིད་ཐེག་ཆེན་སེམས་བསྐྱེད་ཀྱིས། །ཟིན་ན་བྱང་སེམས་སྡོམ་པར་འགྱུར། །ཡང་ན་ཐེག་པ་ཆེན་པོ་ལས། །བྱུང་བའི་སྐྱབས་འགྲོའི་སྡོམ་པ་ལ། །བྱང་ཆུབ་བར་དུ་བསླབ་པའི་གཞི། །ལྔ་ཆར་འཛིན་པ་ཐོབ་པའམ། །དོན་
ཞགས་རྟོག་པ་ནས་བཤད་པའི། །ཉིན་ཞག་གསོ་སྦྱོང་ཉམས་སུ་ལོངས། །སོ་སོར་ཐར་པའི་སྡོམ་པའི་སྐབས་ཏེ་གཉིས་པའོ།།    ༈      །།བྱང་ཆུབ་སེམས་དཔའི་སྡོམ་པ་ནི། །ཕ་རོལ་ཕྱིན་པའི་དབུ་སེམས་ཀྱི། །སྲོལ་ཆེན་གཉིས་ལས་ཐོབ་
པའམ། །གསང་སྔགས་རྒྱུད་སྡེ་ལས་གསུངས་པའི། །ཆོ་ག་དག་ལས་ཐོབ་ཀྱང་རུང་། །སྨོན་འཇུག་སེམས་བསྐྱེད་ཐོབ་ནས་ནི། །ཚུལ་ཁྲིམས་བསླབ་པ་རྣམ་པ་གསུམ། །བསྲུང་བ་ཉམས་ལེན་དངོས་གཞི་ཡིན། །དེ་ཡི་གཙོ་བོ་སྤྱོད་པའི་ཆ། །བདག་གཞན་
9-6-11a


བརྗེ་བའི་བྱང་སེམས་དང་། །ལྟ་བ་མཐའ་བཞིའི་སྤྲོས་བྲལ་གཉིས། །ཟུང་འཇུག་ཉམས་སུ་ལེན་པ་ཡིན། །དེ་ལ་ཁ་ཅིག་བརྗེ་བའི་དོན། །གཅེས་འཛིན་བརྗེ་བ་ཉིད་ཡིན་གྱི། །དགེ་སྡིག་བདེ་སྡུག་བརྗེ་མིན་ཏེ། །
བརྗེ་བར་མི་ནུས་ཕྱིར་ཞེས་ཟེར། །འོ་ན་གཅེས་འཛིན་བརྗེ་བ་ཡང་། །བརྗེ་བའི་དོན་ཉིད་མིན་འགྱུར་ཏེ། །བརྗེ་བར་མི་ནུས་མཚུངས་ཕྱིར་རོ། །དངོས་སུ་བརྗེ་བར་མི་ནུས་ཀྱང་། །བློ་ཡི་སྟེང་དུ་སྦྱོར་ཞེ་ན། །དེ་ནི་ཅིག་ཤོས་ལ་མཚུངས་ཏེ། །རང་གཞན་བདེ་དང་སྡུག་
བསྔལ་གཉིས། །དངོས་སུ་བརྗེ་བར་སུ་ཡིས་ནུས། །བློ་ལ་བདེ་སྡུག་མི་བརྗེ་ན། །གཅེས་འཛིན་བརྗེ་བ་འགལ་བ་སྟེ། །ཁ་ཟས་གཞན་ལ་མ་བྱིན་པར། །རང་གིས་ཟོས་པ་ཇི་བཞིན་ནོ། །དགེ་སྡིག་བརྗེ་བ་བཀག་པ་ནི། །སངས་རྒྱས་གཉིས་པ་ཀླུ་སྒྲུབ་
ཀྱིས། །བདག་ལ་དེ་དག་སྡིག་སྨིན་ཅིང་། །བདག་དགེ་མ་ལུས་དེར་སྨིན་ཤོག །ཅེས་གསུངས་པ་དང་ཅིས་མི་འགལ། །བདེ་སྡུག་བརྗེ་བ་བཀག་པ་ནི། །བྱང་ཆུབ་སེམས་དཔའི་སྤྱོད་འཇུག་ལས། །བདག་བདེ་གཞན་གྱི་སྡུག་བསྔལ་དག །ཡང་
དག་བརྗེ་བ་མ་བྱས་ན། །སངས་རྒྱས་ཉིད་དུ་མི་འགྲུབ་ཅིང་། །འཁོར་བ་ན་ཡང་བདེ་བ་མེད། །ཅེས་གསུངས་པ་དང་ཅིས་མི་འགལ། །སྤྱོད་འཇུག་ལུང་དོན་དེ་ཉིད་ལ། །ཁྱོད་ཀྱི་གྲུབ་མཐའ་ཆོས་ཅན་དུ། །བཟུང་ནས་ཐལ་བ་འཕེན་ན་ནི། །ཆོས་མཐུན་
ལན་ཉིད་གང་ལ་འདེབས། །མདོར་ན་བློ་ལ་འདོད་མི་འདོད། །གཉིས་སུ་ཕྱེ་བའི་འདོད་པ་ཀུན། །གཞན་ལ་སྟེར་ཞིང་མི་འདོད་ཀུན། །རང་ལ་ལེན་པར་གོམས་པ་ནི། །མདོ་སྡེ་དབྱུག་གསུམ་ཕྲེང་བ་དང་། །བསྟན་བཅོས་བསླབ་བཏུས་སྤྱོད་འཇུག་
9-6-11b


སོགས། །དགོངས་པ་དཔལ་ལྡན་ཨ་ཏི་ཤས། །ཟབ་དོན་ཉམས་ཁྲིད་སྒོ་ནས་ནི། །བཤེས་གཉེན་སྟོན་པ་ཉིད་ལ་གནང་། །ཕྱི་ནས་གངས་རིའི་ཁྲོད་འདིར་འཕེལ། །སངས་རྒྱས་བསྒོམ་པ་ལ་སོགས་ཀྱི། །བསྒོམ་ཚུལ་ཞིབ་ཏུ་བཤད་པའང་མཐོང་། །
ས་སྐྱའི་རྗེ་བཙུན་མཆོག་རྣམས་ལ། །རྣལ་འབྱོར་དབང་ཕྱུག་བིཪྺ་པའི། །མན་ངག་གཉིས་ལས་འདི་ཉིད་ཀྱི། །ཉམས་ལེན་གསལ་བའི་བཀའ་བབས་བཞུགས། །དེ་དང་སྔར་གྱི་བཀའ་སྲོལ་གཉིས། །ཁྱད་པར་མེད་པ་སངས་རྒྱས་ཀྱི། །
བསྟན་པའི་སྙིང་པོ་ཡིན་པའི་ཕྱིར། །མོས་པ་ཙམ་ལའང་བྱིན་རླབས་འབྱུང་། །ཁ་ཅིག་མཐའ་བཞིའི་སྤྲོས་བྲལ་ནི། །རྒྱ་ནག་དགེ་སློང་ལྟ་བ་དང་། །ཁྱད་པར་མེད་ཕྱིར་ནོར་བ་ཡིན། །རིགས་པས་བདེན་པ་བཀག་རྗེས་སུ། །བདེན་མེད་ཉིད་
ལ་ཞེན་པ་ནི། །དབུ་མའི་ལྟ་བ་མཐར་ཐུག་སྟེ། །ཐེག་པ་གསུམ་ཆར་འདི་ཉིད་ནི། །རྟོགས་ཕྱིར་ལྟ་བ་ཁྱད་པར་མེད། །བདེན་ཚད་དེ་ཡང་རང་རྒྱུད་པས། །བློ་ལ་མ་ལྟོས་ཡུལ་ངོས་ནས། །གྲུབ་པ་ཉིད་ལ་འདོད་གྱུར་ཀྱང་། །དེ་ནི་དགག་བྱ་
ཐུན་མོང་སྟེ། །མིང་གིས་བཏགས་དོན་བཙལ་བའི་ཚེ། །རྙེད་པ་བདེན་ཚད་དུ་བྱས་ནས། །དེ་ཉིད་འགོག་པ་ཐལ་འགྱུར་བའི། །ཐུན་མོང་མ་ཡིན་ཁྱད་ཆོས་ཡིན། །དགག་བྱའི་ཁྱད་པར་འདི་རྟོགས་ན། །བློ་ཡིས་གང་དུ་ཞེན་པའི་ཡུལ། །
རིགས་པས་དཔྱད་ནས་འགོག་པ་ཡི།  	།  ལོག་རྟོག་ཐམས་ཅད་ཁེགས་པར་འགྱུར། །གཞན་དུ་བདེན་པ་བཀག་རྗེས་སུ། །བདེན་མེད་ཞེན་པའང་འགོག་དགོས་ན། །བློ་ནི་སྔ་མ་གནོད་བཅས་དང་། །ཕྱི་མ་ཐུག་མེད་ཉིད་དུ་འགྱུར། །བདེན་
9-6-12a


པར་མེད་པ་འགོག་ན་ནི། །བདེན་པར་ཡོད་པ་ཉིད་འགྱུར་ཏེ། །དགག་པ་གཉིས་ཀྱི་རྣལ་མ་ནི། །གོ་བའི་ཕྱིར་ཞེས་འཛེར་བར་བྱེད། །ལྟ་བའི་སྙིགས་མ་འདི་དག་ནི། །ལུང་དང་རིགས་པས་དགག་པར་བྱ། །
རྒྱ་ནག་དགེ་སློང་མ་དཔྱད་པར། །རང་དགར་རྟོག་པ་བཀག་པ་ལ། །སྒོམ་གྱི་མཆོག་ཏུ་སྨྲ་བ་དང་། །འདི་ནི་རིགས་པས་དཔྱད་པའི་ཚེ། །མཐའ་བཞིའི་སྤྲོས་པ་མ་རྙེད་པའི། །འཛིན་མེད་ལྟ་བར་སྨྲ་བ་གཉིས། །མཚུངས་ཞེས་སྨྲ་བ་སྟོང་པ་
ཉིད། །ཟབ་མོ་སྤོང་བའི་བདུད་ཚིག་ཡིན། །གཞན་ཡང་དཀོན་མཆོག་བརྩེགས་པ་ལས། །ཡོད་མེད་གཉིས་པོ་མཐའ་རེ་རེ། །བྱས་ནས་དབུས་ནི་དབུ་མ་སྟེ། །དེ་ཡང་བསྟན་མེད་བརྗོད་མེད་པར། །གསུངས་པ་དེ་ཡང་རྒྱ་ནག་གི།  ལྟ་བ་
ཉིད་དང་ཁྱད་མེད་འགྱུར། །དེ་བཞིན་ཏིང་འཛིན་རྒྱལ་པོ་ལས། །ཡོད་མེད་གཙང་དང་མི་གཙང་སོགས། །མཐའ་གཉིས་ཡིན་ཕྱིར་དེ་སྤངས་ནས། །དབུས་ལའང་མི་གནས་གསུངས་པ་དང་། །ཡུམ་ལས་སྟོང་དང་མི་སྟོང་སོགས། །གཉིས་ལ་
སྤྱོད་པ་ཐམས་ཅད་ནི། །མཚན་མར་སྤྱོད་པ་གསུངས་པ་དང་། །ཡང་དག་སྦྱོར་བའི་རྒྱུད་ལས་ཀྱང་། །སྟོང་པ་བསྒོམ་པར་མི་བྱ་སྟེ། །སྟོང་མིན་བསྒོམ་པར་མི་བྱའོ། །སྟོང་པ་མི་སྤོང་རྣལ་འབྱོར་པས། །སྟོང་མིན་ཡོངས་སུ་མི་སྤང་ངོ་། །སྟོང་
དང་མི་སྟོང་གཟུང་བ་ལ། །རྟོག་པ་ཉུང་མིན་སྐྱེ་བར་འགྱུར། །ཞེས་གསུངས་པ་ཡང་རྒྱ་ནག་གི། །ལྟ་བ་ཉིད་དང་ཁྱད་མེད་འགྱུར། །མགོན་པོ་བྱམས་པས་རྒྱུད་བླ་མར། །འགོག་བདེན་ཡོད་དང་མེད་པ་དང་། །གཉིས་དང་གཉིས་མིན་རྣམ་
9-6-12b


པ་བཞིར། །བརྟག་པར་མི་ནུས་གསུངས་པ་དང་། །དབུ་མ་རྩ་བའི་བསྟན་བཅོས་ལས། །སྟོང་ངོ་ཞེས་ཀྱང་མི་བརྗོད་དེ། །མི་སྟོང་ཞེས་ཀྱང་མི་བྱ་ཞིང་། །གཉིས་དང་གཉིས་མིན་མི་བྱ་སྟེ། །ཞེས་གསུངས་གཞན་ཡང་དེ་ཉིད་ལས། །བཅོམ་
ལྡན་བཞུགས་དང་མྱ་ངན་ལས། །འདས་པ་གཉིས་ལ་མཐའ་བཞི་ཡི། །སྤྲོས་པ་བཀག་པར་མཛད་པ་དང་། །རིགས་ལྡན་པདྨ་དཀར་པོ་དང་། །འཕགས་པ་ལྷ་ཡིས་འདི་སྐད་དུ། །ཡོད་མིན་མེད་མིན་ཡོད་མེད་མིན། །གཉིས་ཀའི་བདག་
ཉིད་ཀྱང་མིན་པ། །མཐའ་བཞི་ལས་གྲོལ་དབུ་མ་པ། །མཁས་པ་རྣམས་ཀྱིས༷་དེ་ཁོ་ན། །ཞེས་གསུངས་པ་ཡང་རྒྱ་ནག་གི།  ལྟ་བ་ཉིད་དང་ཁྱད་མེད་འགྱུར། །དེ་ལ་ཡོད་མིན་མེད་མིན་དོན། །ཀུན་རྫོབ་དོན་དམ་ལ་དགོངས་པས། །ངེད་ལ་
གནོད་པ་མེད་ཅེས་ཟེར། །འོ་ན་སྣང་བའི་དངོས་པོ་ཀུན། །དོན་དམ་ཡོད་དང་ཀུན་རྫོབ་ཏུ། །མེད་པ་གཉིས་ཀར་ཐལ་འགྱུར་ཏེ། །གཉིས་ཀ་མིན་པ་མིན་པའི་ཕྱིར། །རྣམ་གསུམ་ཁས་བླངས་དྲན་པར་གྱིས། །ཁ་ཅིག་ཡོད་མེད་ལ་སོགས་བཞི། །
བདེན་པར་མེད་པའི་དོན་ཡིན་ཟེར། །བཞི་པོ་ཆོས་ཅན་དུ་བཟུང་ནས། །བདེན་པ་བཀག་པ་སྒྲུབ་ཆོས་སུ། །ཡབ་སྲས་གཞུང་ལས་མ་གསུངས་ཏེ། །ཐམས་ཅད་བཅོམ་ལྡན་གཤེགས་བཞུགས་དང་། །གཉིས་མེད་ཡེ་ཤེས་ལ་སོགས་ལ། །བཞི་པོ་
བཀག་པར་གསུངས་ཕྱིར་རོ། །བདེན་པ་བཀག་པའི་མེད་དགག་ལ། །དབུ་མའི་ལྟ་བར་ཞེན་པ་ནི། །སྔར་བཤད་ཡིད་ཆེས་ལུང་གིས་གནོད། །རྒྱུད་ལས་རྩ་བའི་ལྟུང་བར་གསུངས། །ཐེག་གསུམ་ལྟ་བ་ཁྱད་མེད་ན། །མི་ཕམ་མགོན་པོས་ཐེག་གསུམ་ལ། །
9-6-13a


བདག་མེད་རྟོགས་པ་རིམ་གསུམ་དང་། །ཐེག་ཆེན་སྦྱོར་མཐོང་བསྒོམ་པ་གསུམ། །དམན་པའི་སྦྱོར་མཐོང་བསྒོམ་གསུམ་ལས། །ལྟ་བས་འཕགས་ཚུལ་གསུང་དང་འགལ། །ཀླུ་སྒྲུབ་ཞབས་ཀྱིས་མཚན་མེད་ནི། །ཚང་
བར་རྟོགས་དང་མ་རྟོགས་པའི། །ཁྱད་པར་གསུངས་ཤིང་ཟླ་བས་ཀྱང་། །འཁོར་གསུམ་མི་དམིགས་ཤེས་རབ་དང་། །བསམ་གྱིས་མི་ཁྱབ་ཆོས་ཉིད་སོགས། །ལྟ་བའི་ཁྱད་པར་གསུང་དང་འགལ། །རིགས་པས་ཀྱང་ནི་གནོད་པ་སྟེ། །དམན་པའི་མཐོང་
བའི་ལམ་ཉིད་ནས། །བདེ་གཤེགས་སྙིང་པོ་མཐོང་བར་འགྱུར། །འདོད་ན་ལས་ཉོན་ལས་བྱུང་བའི། །སྐྱེ་སོགས་རྣམས་ལས་འདས་འགྱུར་ཞིང་། །ཉན་རང་སྙིང་པོ་ལྟ་བ་ལ། །མིག་དང་མི་ལྡན་གང་ཟག་ཏུ། །ཐོགས་མེད་ཞབས་ཀྱིས་གསུང་དང་
འགལ། །བློ་ལ་མ་ལྟོས་ཡུལ་ངོས་ནས། །གྲུབ་པ་རང་རྒྱུད་ཀུན་འགོག་ན། །བྷ་བྱས་ཕྱི་དོན་རང་ངོས་ནས། །གྲུབ་པར་ཁས་བླངས་སྨྲས་དང་འགལ། །བཏགས་དོན་བཙལ་ཚེ་མ་རྙེད་དོན། །ཐ་སྙད་དོན་དམ་གང་དུ་འདོད། །ཐ་སྙད་ཡིན་ན་འདོགས་བྱེད་ཀྱི། །
མིང་ཡང་ཐ་སྙད་མེད་འགྱུར་ཏེ། །དེ་དག་ཕན་ཚུན་ལྟོས་གྲུབ་ཕྱིར། །དེ་སྐད་དུ་ཡང་དབུ་མ་ལས། །བྱེད་པོ་ལས་ལ་བརྟེན་བྱས་ཤིང་། །ལས་ཀྱང་བྱེད་པོ་དེ་ཉིད་ལ། །བརྟེན་ནས་འབྱུང་བར་མ་རྟོགས་པར། །འགྲུབ་པའི་རྒྱུ་ནི་མ་མཐོང་ངོ་། །བྱེད་པ་པོ་དང་ལས་དབང་
གིས། །དངོས་པོ་ལྷག་མ་ཤེས་པར་བྱ། །ཞེས་གསུངས་དངོས་པོ་ལྷག་མ་ནི། །བརྗོད་བྱ་རྗོད་བྱེད་ལ་སོགས་པ། །ལྟོས་གྲུབ་ཀུན་ལ་འཇུག་པར་གསུངས། །དམ་པའི་དོན་དུ་མ་རྙེད་པ། །དེ་དོན་ཡིན་ན་ཆོས་ཐམས་ཅད། །དམ་པའི་དོན་དུ་མི་རྙེད་
9-6-13b


པར། །ཐལ་རང་གཉིས་ཀ་མཐུན་པའི་ཕྱིར། །གཅིག་གི་ཁྱད་ཆོས་ཇི་ལྟར་འགྱུར། །བློ་ཡིས་གང་དུ་ཞེན་པའི་ཡུལ། །རིགས་པས་དཔྱད་ནས་འགོག་པ་ནི། །ལོག་རྟོག་ཡིན་ན་སངས་རྒྱས་ནས། །བཟུང་སྟེ་རྒྱ་བོད་མཁས་གྲུབ་ཀུན། །ལོག་
རྟོག་དེ་དང་ལྡན་གྱུར་ཏེ། །དེ་དག་སྟོང་དང་མི་སྟོང་སོགས། །གཉིས་འཛིན་ཞེན་ཡུལ་བཀག་ཕྱིར་རོ། །གཅིག་དང་དུ་བྲལ་གཏན་ཚིགས་ཀྱིས། །རྟོག་བློས་ཞེན་ཡུལ་བདེན་གྲུབ་པ། །འགོག་ན་ཁྱོད་ཀྱི་དམ་བཅའ་ཉམས། །མི་འགོག་ན་ནི་བདེན་
འཛིན་གྱི་། །ལོག་རྟོག་གང་གིས་ཁེགས་པར་འགྱུར་། །ཅི་སྲིད་རྟོག་བློས་ཡུལ་གྱི་ནི། །གནས་ལུགས་དཔྱོད་པར་བྱེད་པའི་ཚེ། །སྔ་ཕྱི་གནོད་བཅས་ཐུག་མེད་གཉིས། །འདོད་ཐོག་ཡིན་ན་གང་གིས་གནོད། །འདི་ལ་གནོད་བྱེད་གང་བརྗོད་པ། །
དབུ་མ་རྩ་བའི་བསྟན་བཅོས་ལས། །བདག་གོ་ཞེས་ཀྱང་བཏགས་འགྱུར་ཞིང་། །བདག་མེད་ཅེས་ཀྱང་བསྟན་པར་འགྱུར། །སངས་རྒྱས་རྣམས་ཀྱིས་བདག་དང་ནི། །བདག་མེད་འགའ་མེད་ཅེས་ཀྱང་བསྟན། །ཅེས་གསུངས་གཞན་ཡང་དེ་ཉིད་ལས། །
ཐམས་ཅད་ཡང་དག་ཡང་དག་མིན། །ཡང་དག་ཡང་དག་མ་ཡིན་ཉིད། །ཡང་དག་མིན་མིན་ཡང་དག་མིན། །འདི་ནི་སངས་རྒྱས་རྗེས་བསྟན་པའོ། །ཞེས་གསུངས་པ་ལ་ཅིས་མི་གནོད། །འོན་ཀྱང་འཕགས་པའི་མཉམ་གཞག་ངོར། །སྤྲོས་
པ་ཐམས་ཅད་ཉེར་ཞིའི་ཚེ། །གཉིས་པོའི་སྐྱོན་ཡོད་མ་ཡིན་ཏེ། །སྔ་མས་ཞེན་པ་མེད་ཕྱིར་རོ། །རིགས་པས་གནས་ལུགས་དཔྱད་པའི་ཚེ། །དགག་པ་གཉིས་ཀྱི་རྣལ་མ་ནི། །གོ་བ་མགོན་པོ་ཀླུ་སྒྲུབ་ཀྱིས། །ཡང་དག་ཇི་བཞིན་ཡོངས་ཤེས་
9-6-14a


པས། །མེད་དང་ཡོད་པར་མི་འདོད་པ། །དེ་ཕྱིར་མེད་པ་པར་འགྱུར་ན། །ཅི་ཕྱིར་ཡོད་པ་པར་མི་འགྱུར། །གལ་ཏེ་ཡོད་པ་སུན་ཕྱུང་བས། །དོན་གྱིས་འདི་ནི་མེད་པར་བསླན། །དེ་བཞིན་མེད་པ་སུན་ཕྱུང་བས། །
ཡོད་པར་ཅི་ཡི་ཕྱིར་མི་བསླན། །ཞེས་གསུངས་པ་དང་ཅིས་མི་འགལ། །དབུ་མའི་ཐ་སྙད་མི་རུང་སྟེ། །རྟག་མཐའ་བཀག་ཚེ་ཆད་མཐའ་སོགས། །མཐའ་གཉིས་གང་རུང་བཀག་པའི་ཚེ། །ཅིག་ཤོས་དེར་ནི་འགྱུར་ཕྱིར་རོ། །ཁ་ཅིག་ཐ་སྙད་ཚེ་ན་
ཡང་། །ཡོད་མིན་མེད་མིན་ལ་སོགས་པ། །མཐའ་བཞིའི་སྤྲོས་བྲལ་སྨྲ་བར་བྱེད། །འདི་ནི་མདོ་ལས་སྟོན་པ་ཡི། །འཇིག་རྟེན་ང་དང་རྩོད་བྱེད་ཀྱི། །ང་ནི་འཇིག་རྟེན་མི་རྩོད་དེ། །འཇིག་རྟེན་ཡོད་མེད་གང་སྨྲ་བ། །ང་ཡང་སྨྲ་ཞེས་གསུངས་དང་
འགལ། །འདི་ལ་དགོངས་ནས་ཟླ་བས་ཀྱང་། །ཐ་སྙད་འཇོག་ཚེ་ཡོད་མེད་སོགས། །འགོག་ན་འཇིག་རྟེན་གྱིས་གནོད་པས། །ཡོད་མེད་སོ་སོར་སྨྲོས་ཞེས་གསུངས། །རིགས་པས་ཀྱང་ནི་གནོད་པ་སྟེ། །ཀུན་རྫོབ་ཐམས་ཅད་མཐའ་
བཞི་ཡི། །སྤྲོས་པ་ཉིད་ལས་མ་འདས་ཕྱིར། །ཀུན་རྫོབ་རྣམ་གཞག་མི་རུང་འགྱུར། །མྱོང་བ་དང་འགལ་བཤད་པར་བྱ། །ཟས་གོས་མེ་ཆུ་ལ་སོགས་པ། །ཡོད་མེད་དྲིས་ཚེ་དབུ་མ་པས། །ཡོད་མིན་མེད་མིན་སྨྲ་བྱེད་ན། །སྐབས་ཀྱི་དོན་ཡང་
མི་འགྲུབ་ཅིང་། །གཞན་ལ་ཀླན་ཀར་འགྱུར་བ་མཐོང་། །ཀུན་རྫོབ་ལ་ཡང་སྐལ་དོན་དང་། །རྒྱུ་ཡི་དུས་ན་འབྲས་བུ་སོགས། །ཡོད་མིན་མེད་མིན་དགོས་པའང་ཡོད། །ལྷག་མ་སྣང་རུང་ཆོས་རྣམས་ལ། །ཡོད་མེད་ཡིན་མིན་ལ་སོགས་
9-6-14b


པ། །སོ་སོར་སྨྲ་བ་དབུ་མའི་ལུགས། །ལ་ལ་བདག་དང་གང་ཟག་གཉིས། །རྣམ་གྲངས་ཡིན་སྨྲ་མུ་སྟེགས་གཞུང་། །ཡིན་ཕྱིར་ཐ་སྙད་དུ་ཡང་བདག །མེད་ཕྱིར་གང་ཟག་ཡོད་པར་འདོད། །སྒྲུབ་བྱེད་བདག་མེད་རྟོགས་པའི་བློས། །
ཡུལ་གྱི་གནས་ཚུལ་རྟོགས་ཕྱིར་དང་། །བདག་འཛིན་ཡུལ་གྱི་གནས་ཚུལ་ལ། །མ་ཞུགས་ཕྱིར་ཞེས་སྨྲ་བ་ཐོས། །འོ་ན་ཡུམ་གྱི་མདོ་རྣམས་དང་། །ཀླུ་སྒྲུབ་ཡབ་སྲས་གཞུང་ལུགས་རྣམས། །མུ་སྟེགས་གཞུང་ལུགས་སུ་འགྱུར་ཏེ། །
དེ་དག་རྣམ་གྲངས་གསུངས་ཕྱིར་རོ། །དེ་ཡང་མདོ་ལས་བདག་དང་ནི། །སེམས་ཅན་སྲོག་དང་གང་ཟག་དང་། །གསོ་བ་སྐྱེས་བུ་ཤེད་བདག་དང་། །ཤེད་སྐྱེས་བྱེད་པོ་ཚོར་པོ་དང་། །ཤེས་པ་པོ་དང་མཐོང་པོ་སྟེ། །བྱེད་པའི་སྐྱེས་བུ་བཅུ་གཉིས་
གསུངས། །དེ་དོན་འཕགས་པ་ཀླུ་སྒྲུབ་ཀྱིས། །ཇི་སྲིད་ཕུང་པོར་འཛིན་ཡོད་པ། །དེ་སྲིད་ངར་འཛིན་ཡོད་ཅེས་པའི། །ངར་འཛིན་དམིགས་ཡུལ་ང་ཙམ་ལ། །བྱེད་པའི་སྐྱེས་བུ་བཅུ་གཉིས་ཀྱི། །མིང་གི་རྣམ་གྲངས་བཏགས་པར་བཞེད། །དེ་
ཉིད་ཕུང་པོ་རྣམས་ལ་ནི། །རྣམ་པ་ལྔའམ་རྣམ་བདུན་གྱིས། །བཙལ་བའི་ཚེ་ན་མི་རྙེད་ཀྱང་། །མ་དཔྱད་འཇིག་རྟེན་གྲགས་པའི་ངོར། །རང་གིས་ཉེ་བར་བླང་བྱ་དང་། །ཆ་ཤས་དང་ནི་ཡན་ལག་ལ། །བརྟེན་ནས་ལེན་པ་པོ་དང་ནི། །ཆ་ཤས་ཅན་
དང་ཡན་ལག་ཅན། །འཇོག་པ་ཤིང་རྟའི་དཔེ་དང་ནི། །སྦྱར་བར་དཔལ་ལྡན་ཟླ་བས་གསུངས། །རྩོད་ཚེ་འདི་ལ་མ་བསྙོན་ཅིག །འཆད་ཚེ་སློབ་མ་མ་བསླུ་ཞིག །སྒྲུབ་བྱེད་ཀྱང་ནི་ལྟར་སྣང་སྟེ། །སྐྱེ་མེད་མཚན་མེད་སྤྲོས་མེད་རྣམས། །རྟོགས་
9-6-15a


པའི་བློ་ལ་མཚུངས་པ་སྟེ། །སྐྱེ་སོགས་ཐ་སྙད་དུ་ཡོད་ཕྱིར། །གཞན་ལ་སྐྱོན་བརྗོད་ཚེ་ན་བདག །དོན་དམ་མེད་མཐོང་གྲོལ་འགྱུར་ན། །མོ་གཤམ་བུ་མེད་མཐོང་བས་ཀྱང་། །གྲོལ་བར་འགྱུར་
ཞེས་སུན་འབྱིན་སྨྲ། །སུན་འབྱིན་འདི་ནི་ཀླུ་སྒྲུབ་ཀྱིས། །བདག་ཡོད་བདག་གི་ཡོད་ཅེས་པ། །འདི་ནི་དམ་པའི་དོན་དུ་ལོག །གང་ཕྱིར་ཡང་དག་ཇི་ལྟ་བ། །ཡོངས་སུ་ཤེས་པས་གཉིས་མི་འབྱུང་། །ཞེས་གསུངས་པ་ལ་བརྗོད་པར་སྣང་། །
རགས་པའི་རྣམ་གཞག་འདི་འདྲ་ལའང་། །འཁྲུལ་ན་ཕྲ་མོ་ཇི་ལྟར་འགྱུར། །རང་ལུགས་ཐ་སྙད་བདག་མེད་དང་། །ཕུང་སོགས་དོན་དམ་མེད་པ་ལའང་། །ཐལ་བ་དེ་ནི་མཚུངས་འགྱུར་ཏེ། །རིགས་པའི་རྣམ་གཞག་ཤེས་ན་དཔྱོད། །གཞུང་
ལུགས་རྣམ་གཞག་དོར་ནས་ནི། །ཕལ་པའི་ངག་ཙམ་ལ་བརྟེན་ནས། །གྲུབ་མཐའི་རྣམ་གཞག་འཇོག་བྱེད་པ། །མཁས་པས་མཐོང་ན་བཞད་གད་གནས། །ཆོས་དང་གང་ཟག་ཚིག་ཟུར་ལ། །སྦྱར་བའི་བདག་དང་ཆོས་ཐམས་ཅད། །བདག་
མེད་ཅེས་པའི་བདག་གི་དོན། །སངས་རྒྱས་བསྐྱངས་དང་ཟླ་བ་ཡིས། །ངོ་བོས་གྲུབ་པ་ལ་བཤད་ནས། །ཐ་སྙད་དུ་ཡང་མེད་པར་བཞེད། །དེ་དང་བྱེད་པའི་སྐྱེས་བུ་ལ། །བདག་ཅེས་བརྗོད་པར་སོ་སོར་སྨྲོས། །ལ་ལ་གང་ཟག་བདག་འགོག་
པའི། །རིགས་པའི་གཙོ་བོ་གང་ཟག་ཉིད། །ཕུང་པོ་ལྔ་ལ་རྣམ་བདུན་གྱིས། །བཙལ་ཚེ་མ་རྙེད་པ་ཡིན་པས། །གང་ཟག་དང་ནི་གང་ཟག་བདག །ཁྱད་པར་མེད་ཕྱིར་གཉིས་ཀ་ཡང་། །ཐ་སྙད་དུ་ཡོད་དོན་དམ་དུ། །མེད་པ་དབུ་མའི་ལུགས་
9-6-15b


ཞེས་སྨྲ། །གཉིས་པོ་ཁྱད་མེད་མུ་སྟེགས་དང་། །མང་བཀུར་ལུགས་ཡིན་གཞན་ལ་མེད། །གཞན་དུ་ཆོས་ཀྱང་ཆོས་བདག་ཏུ། །འགྱུར་ཏེ་བཙལ་ཚུལ་མཚུངས་ཕྱིར་རོ། །འདོད་ན་འཕགས་པའི་རྗེས་ཐོབ་ཀྱིས། །ཆོས་ཀྱི་བདག་མེད་རྟོགས་
པའི་ཚེ། །ཆོས་ཙམ་མེད་པ་རྟོགས་པར་འགྱུར། །སྒྲུབ་བྱེད་བློ་གྲོས་རྩིང་བ་ཡི། །འབྲས་རྟགས་ཉིད་དུ་ཤེས་བྱ་སྟེ། །དེ་དོན་གང་ཟག་རྣམ་བདུན་གྱིས། །བཙལ་ཚེ་རྙེད་ན་གང་ཟག་གི།  བདག་ཏུ་འགྱུར་བའི་དོན་ཡིན་ཕྱིར། །ཁ་ཅིག་དབུ་
མའི་ལྟ་བ་ཡིས། །གདུལ་བྱའི་སེམས་རྒྱུད་འཁྲིད་པའི་ཚེ། །ཐོག་མར་ང་ཞེས་བརྗོད་པ་ཡི། །རྗེས་འབྲང་རྟོག་པའི་ཕྲེང་བ་ཉིད། །གོམས་པས་ངར་འཛིན་ལྷན་སྐྱེས་ཀྱི། །ཞེན་ཡུལ་ང་ཉིད་རྙེད་པའི་རྟགས། །མཚན་མ་ཅི་རིགས་འབྱུང་བར་
འདོད། །དེར་རྗེས་ང་མེད་ཅེས་བརྗོད་པའི། །རྗེས་འབྲང་རྟོག་པ་གོམས་པ་ལས། །མེད་དགག་བློ་ལ་ཤར་བ་ཉིད། །གནས་ལུག་མཐར་ཐུག་རྟོགས་པ་ཡི། །ལྷག་མཐོང་ཡིན་ཞེས་སྒྲོག་པར་བྱེད། །བདག་ལྟའི་ཞེན་ཡུལ་གོམས་པ་
ཡི། །སྒོམ་པ་མུ་སྟེགས་ལུགས་ཡིན་གྱི། །ཁ་ཆེ་བྱེ་བྲག་སྨྲ་བ་ནས། །དབུ་མའི་བར་ལ་ལུགས་འདི་མེད། །འདི་ཉིད་མགོན་པོ་བྱམས་པ་ཡིས། །བདག་ཏུ་ལྟ་བ་བསྐྱེད་མི་དགོས། །གོམས་པ་ཐོག་མ་མེད་དུས་ཅན། །ཞེས་གསུངས་
པ་ཡིས་འདི་བཀག་ཟིན། །ང་མེད་ཅེས་ནི་བརྗོད་པ་ཡི། །རྗེས་འབྲང་རྟོག་པ་གོམས་ཙམ་གྱིས། །དབུ་མའི་ལྟ་བ་རྟོགས་ན་ནི། །དབུ་མའི་གཞུང་ལུགས་རྒྱ་མཚོ་ལས། །གསུངས་པའི་རིགས་པའི་རྣམ་གཞག་ལ། །ཐོས་བསམ་དོན་མེད་ཉིད་འགྱུར་
9-6-16a


ཏེ། །སྒོམ་པའི་ཚུལ་འདི་བླུན་པོ་དང་། །མཁས་པ་གཉིས་ལ་ཁྱད་མེད་ཕྱིར། །འདི་འདྲ་ལྷག་མཐོང་ཡིན་ན་ནི། །འདི་དང་ཞི་གནས་ཟུང་འབྲེལ་དུ། །སྒོམ་པ་མི་སྲིད་ཉིད་འགྱུར་ཏེ། །བརྗོད་པའི་རྗེས་འབྲང་ཉིད་མིན་ཕྱིར། །
ཀྱེ་མ་སྙིགས་མའི་དུས་འདི་མཚར། །འདི་འདྲ་བླུན་པོས་འཛིན་སྲིད་ནའང་། །དབུ་མའི་གཞུང་ལ་སྦྱངས་པས་ཀྱང་། །འདི་ལ་ཡིད་ཆེས་ཅི་ཞིག་ཡིན། །མདོར་ན་ཐེག་ཆེན་ལྟ་སྤྱོད་གཉིས། །མ་འཁྲུལ་ཉམས་སུ་ལེན་འདོད་ན། །མཐའ་བཞིས་དབེན་པའི་
སྟོང་པ་ཉིད། །སྙིང་རྗེའི་སྙིང་པོ་ཅན་ཡིན་ནོ། །བྱང་ཆུབ་སེམས་དཔའི་སྡོམ་པའི་སྐབས་ཏེ་གསུམ་པའོ། །༈། །རིག་འཛིན་སྡོམ་པ་དབང་བསྐུར་ལས། །ཐོག་མར་ཐོབ་པ་སྨིན་བྱེད་དང་། །དེ་ཉིད་བསྲུང་ཞིང་སྤེལ་བ་ལ། །གྲོལ་བྱེད་ཅེས་ནི་རྒྱུད་
ལས་གསུངས། །སྨིན་བྱེད་རྒྱུད་སྡེ་བཞི་པོ་ལ། །དབང་གི་དངོས་གཞིའི་རིམ་པ་བཞི། །ཡེ་ཤེས་ཐིག་ལེར་གསུངས་པའི་ཕྱིར། །སྡོམ་པའི་ཐོབ་ཚུལ་རྣམ་བཞིར་ངེས། །ཁ་ཅིག་རྒྱུད་སྡེ་མཐའ་དག་ལ། །རང་བཟོའི་ཆོག་ཁྲིགས་སྦྱར་ནས་ནི། །བཀའ་
ལུང་ཡོད་པའི་སྒྲུབ་བྱེད་དུ། །རྣལ་འབྱོར་ཆེན་པོའི་དབང་བསྐུར་ཅིག །ཐོབ་པས་དཀྱིལ་འཁོར་ཀུན་གྱི་དབང་། །ཐོབ་པར་འགྱུར་ཏེ་བདེ་མཆོག་ལས། །རྒྱུད་འདི་རུ་ནི་དབང་བསྐུར་གང་། །རྒྱུད་རྣམས་ཀུན་གྱི་སྒྲུབ་པོར་འགྱུར། །ཞེས་གསུངས་
རིག་པའི་དབང་ལྔ་ཡི། །ངོ་སྤྲོད་ཚེ་ན་བྱ་སྤྱོད་གཉིས། །འཆད་དང་རྣལ་འབྱོར་རྒྱུད་ཉན་པར། །དབང་བར་གསུངས་པའི་ཕྱིར་ཞེས་ཟེར། །འདི་ནི་ཕག་མོ་མངོན་འབྱུང་དང་། །མི་གཡོ་བླ་མེད་རྒྱུད་དག་ལས། །དཀྱིལ་འཁོར་དུ་ནི་མ་ཞུགས་ལ། །
9-6-16b


རྒྱུད་འདི་བསྟན་པར་མི་བྱ་སྟེ། །དཀྱིལ་འཁོར་གཞན་དུ་ཞུགས་པ་ལའང་། །རྒྱུད་འདི་བསྟན་པར་མི་བྱའོ། །ཞེས་གསུངས་པ་དང་འགལ་བའི་ཕྱིར། །བཞི་མདོའི་རྩྭ་བཞིན་དོར་བར་བྱ། །དབང་བསྐུར་གཅིག་གིས་དབང་བསྐུར་ཀུན། །ཐོབ་ན་
སྟོན་པས་རྒྱུད་སྡེ་ལས། །དབང་ཆོག་གཅིག་ཉིད་ཅིས་མ་གསུངས། །དཔེར་ན་འདུལ་བའི་ལས་ཆོག་བཞིན། །རྒྱུད་ལས་སྤྲོ་བ་བསྐྱེད་ཕྱིར་དུ། །ཕན་ཡོན་གསུངས་པའི་གནས་སྐབས་དང་། །འཇིགས་པ་བསྐྱེད་ཕྱིར་ལ་དོར་གྱིས། །ཚིག་རྣམས་
ཇི་བཞིན་སྒྲ་ཡིན་ན། །ཀྱེ་རྡོ་རྗེ་ཡི་རྩ་རྒྱུད་ལས། །གལ་ཏེ་སངས་རྒྱས་གསང་བའི་སྐད། །མི་གསུངས་ན་ཡང་འགྲོངས་པར་འགྱུར། །ཞེས་པའང་ཇི་བཞིན་སྒྲ་རུ་འགྱུར། །གོང་མའི་དབང་བསྐུར་ནང་དུ་ནི། །འོག་མའི་དབང་དང་ནུས་མཉམ་པ། །འདུས་
ཕྱིར་གོང་མའི་དབང་ཐོབ་ན། །འོག་མ་འཆད་དང་ཉན་པར་གསུངས། །དེ་ཙམ་གྱིས་ནི་འོག་མའི་དབང་། །ཐོབ་པར་འགྱུར་ན་ཐེག་ཆེན་གྱི། །མཐོང་ལམ་ཐོབ་ཚེ་ཉན་ཐོས་དང་། །རང་རྒྱལ་མི་སློབ་ལམ་ཐོབ་འགྱུར། །སླར་ཡང་དམ་བཅའ་སྒྲུབ་ཕྱིར་
དུ། །ཁོ་བོས་བདག་འཇུག་བླངས་པའི་ཚེ། །དཀྱིལ་འཁོར་གཙོ་བོ་རྡོར་སེམས་ལས། །ཐོབ་པས་ཁོ་བོ་གཅིག་བརྒྱུད་ཡིན། །ཁོ་བོ་ལས་ནི་བླངས་པ་རྣམས། །གཉིས་བརྒྱུད་ལ་སོགས་ཡིན་ཞེས་སྨྲ། །འདི་དང་སྒྲུབ་བྱེད་གོང་མ་གཉིས། །གཅིག་
གིས་གྲུབ་ན་ཅིག་ཤོས་ནི། །དོན་མེད་ཉིད་དུ་འགྱུར་བ་སྟེ། །བདག་འཇུག་བླངས་པས་ཀུན་གྱི་དབང་། །མ་ཆད་པར་ནི་སྒྲུབ་དགོས་ན། །གཅིག་གིས་ཀུན་ཐོབ་དོན་མེད་འགྱུར། །སློབ་མའི་བརྒྱུད་པ་གཞན་དག་ཀྱང་། །གཉིས་བརྒྱུད་སོགས་ཀྱིས་
9-6-17a


ཅི་ཞིག་བྱ། །རང་ཉིད་བདག་འཇུག་བླངས་ནས་ནི། །གཅིག་བརྒྱུད་འབའ་ཞིག་ཅིས་མི་བྱེད། །འཕགས་ཡུལ་གྲུབ་པའི་དབང་ཕྱུག་རྣམས། །སེམས་ཅན་ཡིན་ཕྱིར་འཁྲུལ་པ་སྲིད། །དེས་ན་མ་འཁྲུལ་ཆོ་ག་ནི། །
ཁོ་བོས་རྒྱུད་ལས་འདོན་ཞེས་ཟེར། །འཕགས་ལ་སྐུར་འདེབས་འདི་འདྲའི་ཚིག །ཐོས་པར་གྱུར་ནའང་རྣ་བ་དགབ། །འོ་ན་ཁྱོད་ཀྱང་སེམས་ཅན་ཕྱིར། །ཅི་སྨྲས་ཚད་མར་སུ་ཡིས་བཟུང་། །ཟག་མེད་བློ་མངའི་བསྟན་བཅོས་རྣམས། །དྲང་སྲོང་བཀའ་
བཞིན་སྤྱི་བོར་ནི། །བླང་བྱ་ཡིན་པར་བྱམས་པས་གསུངས། །ཀུ་ཀུ་རི་པ་ཀུན་སྙིང་སོགས། །རྒྱལ་བའི་བསྟན་པ་འཛིན་པ་ལ། །འཁྲུལ་པ་མེད་པར་སངས་རྒྱས་གསུངས། །དེ་དག་འཁྲུལ་ལོ་ཞེས་བརྗོད་པ། །རྫོགས་སངས་རྒྱས་ལའང་བརྒལ་
བར་སྣང་། །དེས་ན་བདག་ཉིད་ལེགས་འདོད་རྣམས། །རྡོ་རྗེ་འཆང་ནས་འཕགས་ཡུལ་གྱི། །གྲུབ་ཆེན་རྣམས་ལས་རིམ་བརྒྱུད་ཅིང་། །ལོ་པཎ་ཁྱད་པར་ཅན་གྱིས་བསྒྱུར། །དེ་ནས་རྩ་བའི་བླ་མའི་བར། །བརྒྱུད་པ་མ་ཉམས་དབང་བསྐུར་
ཞུས། །དབང་དང་དམ་ཚིག་ལ་གནས་པ། །རྡོ་རྗེ་ཐེག་པའི་བསྟན་པ་ཡིན། །དེང་སང་སྔགས་པར་རློམ་པ་འགའ། །དབང་གིས་མ་སྨིན་སྐྱེ་བོ་ལ། །རྣལ་འབྱོར་ཆེན་པོའི་གསང་སྤྱོད་ཀུན། །འཛེམ་བག་མེད་པར་གསང་སྒྲོག་བྱེད། །འདི་ནི་
དམ་པ་དང་པོ་དང་། །རྡོ་རྗེ་གུར་དང་དགྲ་ནག་དང་། །རྩ་བའི་ལྟུང་བའི་གཞུང་རྣམས་ལས། །རྩ་བའི་ལྟུང་བ་ཉིད་དུ་གསུངས། །རྩ་ལྟུང་དོན་ཡང་མ་བསྲུང་ན། །ཉེས་པ་ཀུན་གྱི་རྩ་བ་དང་། །བསྲུང་ན་དངོས་གྲུབ་རྩ་བར་ནི། །གསུངས་ཕྱིར་ལེགས་
9-6-17b


འདོད་བག་ཡོད་མཛོད། །ཁ་ཅིག་སྔགས་ཀྱི་སྡོམ་ལྡན་ཀུན། །རྡོ་རྗེ་སྤུན་དུ་བྱས་ན་ནི། །ཧ་ཅང་རྒྱ་ཆེས་སྐྱོན་ཡོད་ཕྱིར། །བླ་མ་གཅིག་དང་དཀྱིལ་འཁོར་ནི། །གཅིག་ལས་དུས་གཅིག་དབང་ཐོབ་པ། །རྡོ་རྗེའི་སྤུན་ཡིན་གཞན་དུ་ན། །མངལ་གྱི་སྒོ་ནི་མི་
གཅིག་ཕྱིར། །སྤུན་གྱི་དོན་མི་གནས་ཞེས་ཟེར། །འོ་ན་བསླབ་གསུམ་ལྡན་པ་ཀུན། །ཚངས་པ་མཚུངས་སྤྱོད་མིན་འགྱུར་ཏེ། །ཧ་ཅང་རྒྱ་ཆེས་སྐྱོན་ཡོད་ཕྱིར། །འདོད་ན་རྣམ་བཤད་རིགས་པ་ལས། །ཚངས་པ་མྱ་ངན་འདས་ཡིན་ཏེ། །དེ་ཡི་ཆེད་དུ་སྤྱོད་
པ་ནི། །བསླབ་གསུམ་ཡིན་ཏེ་དེ་ལྡན་ཀུན། །ཚངས་པ་མཚུངས་སྤྱོད་གསུང་དང་འགལ། །ཡུལ་ཆེན་སུམ་ཅུ་རྩ་གཉིས་སུ། །སྤྱོད་པའི་ཚེ་ན་བརྡ་དང་ནི། །བརྡ་ཡི་ལན་ཤེས་གང་ཟག་ཀུན། །རྡོ་རྗེ་སྤུན་དང་སྲིང་མོ་ནི། །མ་ཡིན་འགྱུར་ཏེ་དེ་དག་ལ། །
སྔར་གྱི་མཚན་ཉིད་མ་ཚང་ཕྱིར། །འདོད་ན་བདེ་མཆོག་ཀྱེ་རྡོར་གྱི། །རྩ་བའི་རྒྱུད་དང་ཁ་སྦྱོར་ལས། །གང་གིས་སྤུན་དང་སྲིང་མོར་ཡང་། །ཐེ་ཚོམ་མེད་པར་ཤེས་པར་བྱ། །ཞེས་གསུངས་པ་དང་འགལ་བའི་ཕྱིར། །གཞན་གྱི་ཉམས་རྐྱེན་མ་བྱེད་ཅིག །
མངལ་སྒོ་གཅིག་དང་མི་གཅིག་དོན། །དྲིས་ན་རང་བཟོ་མ་ཡིན་པར། །ལུང་དང་མཐུན་པ་ཁྱོད་ལ་མེད། །འཇིག་རྟེན་ཐ་སྙད་དང་འགལ་ཏེ། །འཁོར་ལོས་སྒྱུར་བ་གཅིག་ཉིད་ཀྱི། །བཙུན་མོ་ལྔ་བརྒྱའི་སྲས་རྣམས་ཀུན། །རིགས་ཀྱི་སྤུན་ཡང་མ་ཡིན་པར། །
འགྱུར་ཏེ་མངལ་སྒོ་མི་གཅིག་ཕྱིར། །ཁ་ཅིག་ཐེག་པ་གསུམ་ཆར་གྱི། །ཚོགས་ལམ་ཆེན་པོ་ཡན་ཆད་ནི། །སྔགས་ལམ་ཁོ་ནས་ཐོབ་པར་འདོད། །སྒྲུབ་བྱེད་ཆོས་རྒྱུན་ཏིང་འཛིན་ལ། །བརྟེན་ནས་སངས་རྒྱས་ཞིང་བགྲོད་ཚེ། །ལམ་གྱི་ཟབ་ཤོས་གདུལ་
9-6-18a


བྱས་ཀྱང་། །ཉན་འདོད་ཡོད་ཅིང་སངས་རྒྱས་ལ། །དེ་སྟོན་མཁྱེན་བརྩེ་མངའ་ཕྱིར་དང་། །ཀུན་རིག་ཁྱམས་ལ་བཀོད་པ་ཡི། །ཉན་རང་རྣམས་ཀྱང་སྔགས་ལམ་གྱིས། །ཐོབ་པའི་ཉན་རང་མཚན་ཉིད་པ། །ཡིན་པའི་
ཕྱིར་ཞེས་སྨྲ་བར་བྱེད། །འདི་ནི་མདོ་རྒྱུད་བསྟན་བཅོས་དང་། །རིགས་པ་ཀུན་དང་འགལ་བ་སྟེ། །མི་ཕམ་མགོན་པོས་ཐེག་ཆེན་གྱི། །ལམ་དུ་ཆོས་རྒྱུན་ཏིང་ངེ་འཛིན། །གསུངས་ཀྱི་དམན་པའི་ལམ་དག་ལ། །ཆོས་རྒྱུན་ཏིང་འཛིན་ཐོབ་པ་ནི། །ཚད་
ལྡན་གཞུང་ལས་གསུངས་པ་མེད། །རིགས་པས་ཀྱང་ནི་གནོད་པ་སྟེ། །དམན་པའི་མཐོང་ལམ་སྔ་རོལ་དུ། །ཆོས་རྒྱུན་ཏིང་ངེ་འཛིན་ཐོབ་ན། །བསམ་གཏན་དངོས་གཞི་ཐོབ་དགོས་པས། །དེ་ཡིས་འཕགས་ལམ་ཐོབ་པའི་ཚེ། །རྒྱུན་ཞུགས་
ཕྱིར་འོང་མི་སྲིད་དང་། །འབྲས་བུ་གསུམ་པ་ལ་གནས་པའི། །ཆགས་བྲལ་སྔོན་སོང་ཁོ་ནར་འགྱུར། །གཞན་ཡང་འདུལ་བ་ལུང་དག་ལས། །ཉན་ཐོས་སློབ་པ་ལྟ་ཞོག་གི།  དགྲ་བཅོམ་ཐོབ་ཀྱང་རྫུ་འཕྲུལ་ནི། །མ་ཐོབ་མང་དུ་བསྟན་པ་དང་། །
ཁྱོད་ཀྱི་གྲུབ་མཐའ་འདི་ཉིད་འགལ། །ལམ་གྱི་ཟབ་ཤོས་ཡིན་ཙམ་གྱིས། །གདུལ་བྱས་ཉན་འདོད་ཡོད་པར་ནི། །མ་ངེས་གཞན་དུ་ཐེག་གསུམ་གྱི། །རིམ་པ་བསྟན་པ་དོན་མེད་འགྱུར། །སངས་རྒྱས་དངོས་ཀྱིས་གདུལ་བྱ་ལ། །སྔགས་ལམ་
སྟོན་པར་མ་ངེས་ཏེ། །གདུལ་བྱའི་བློ་ཡི་རིམ་པ་དང་། །འཚམས་པར་སྟོན་པས་གསུངས་ཕྱིར་རོ། །དེ་ཡང་ཀྱེ་རྡོར་རྩ་རྒྱུད་ལས། །གདུལ་བྱ་བཀྲི་བའི་རིམ་པའི་ཚུལ། །སྡོམ་པ་རིམ་བཞིན་བླངས་ནས་ནི། །གྲུབ་མཐའ་བཞི་དང་རྒྱུད་སྡེ་བཞིར། །རིམ་
9-6-18b


གྱིས་བསླབ་པའི་བཀྲི་ཚུལ་གསུངས། །ལང་ཀར་གཤེགས་པའི་མདོ་ལས་ཀྱང་། །ཇི་ལྟར་ནད་པ་ནད་པ་ལ། །སྨན་པས་སྨན་རྣམས་གཏོང་བ་ལྟར། །དེ་བཞིན་སངས་རྒྱས་སེམས་ཅན་ལ། །ཅི་ཙམ་བཟོད་པའི་ཆོས་སྟོན་ཏོ། །ཞེས་གསུངས་མགོན་པོ་ཀླུ་
སྒྲུབ་ཀྱིས། །བརྡ་སྤྲོད་པ་དག་ཇི་ལྟ་བུ། །ཡི་གེའི་ཕྱི་མོ་ཀློག་འཇུག་ལྟར། །དེ་བཞིན་སངས་རྒྱས་གདུལ་བྱ་ལ། །ཅི་ཙམ་བཟོད་པའི་ཆོས་སྟོན་ཏོ། །ཞེས་གསུངས་འཕགས་པ་ལྷ་ཡིས་ཀྱང་། །ཡོད་དང་མེད་དང་ཡོད་མེད་དང་། །གཉིས་ཀ་མིན་ཞེས་ཀྱང་
བསྟན་ཏེ། །ནད་ཀྱི་དབང་གིས་ཐམས་ཅད་ཀྱང་། །སྨན་དུ་འགྱུར་བ་མ་ཡིན་ནམ། །ཞེས་སོགས་གསུངས་པ་ཚད་མ་ཡིན། །ལམ་གྱི་མཐར་ཐུག་སྔགས་ལམ་ལས། །འབྲས་བུའི་དམན་ཤོས་ཐོབ་བོ་ཞེས། །སྨྲ་བ་རྒྱུ་དང་འབྲས་བུ་ལ། །སྐུར་པ་འདེབས་པའི་
སྨྲ་ངན་ཡིན། །རྡོ་རྗེ་ཐེག་པའི་དཀྱིལ་འཁོར་གྱི། །ལྷ་ལ་ཉན་རང་མཚན་ཉིད་པ། །ཡོད་ན་སྔགས་སྡོམ་ལྡན་པ་ཡིས། །ཉན་ཐོས་དག་ཏུ་རློམ་བྱེད་པའི། །ནང་དུ་ཞག་བདུན་གནས་པ་ལ། །ལྟུང་བ་འབྱུང་བའི་རྒྱུ་མཚན་ཅི། །ཀུན་རིག་ཁྱམས་ཀྱི་ཉན་རང་
རྣམས། །ཐེག་དམན་རང་རྒྱུད་པ་ཡིན་ན། །རིགས་ལྔའི་གདན་གྱི་སེང་གེ་སོགས། །དུད་འགྲོ་རང་རྒྱུད་པར་འགྱུར་ཞིང་། །ཟླ་བ་ཉི་མ་ལ་སོགས་ཀྱང་། །ནམ་མཁའི་ཉི་ཟླ་སོགས་སུ་འགྱུར། །གྲུབ་མཐའ་གྱི་ན་སྨྲ་བ་པོ། །འདིས་ནི་དབང་བསྐུར་
དུས་སུ་ཡང་། །རྒྱུན་བཤགས་སྡོམ་བཟུང་སྔོན་རོལ་དུ། །བྱང་ཆུབ་གསུམ་པོ་གང་འདོད་ལ། །དམིགས་ནས་རྗེས་ཟློས་གྱིས་ཞེས་ཟེར། །སྡོམ་པ་བསྒྲག་ཚེ་རྩེ་མོ་ལས། །ཐེག་པ་དམན་ལ་འདོད་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །
9-6-19a


འཁོར་བ་དག་ཀྱང་ཡོངས་མི་སྤོང་། །ཞེས་པ་བསྒྲགས་ནས་བཟུང་བའི་ཚེ། །ཐེག་པ་དམན་ལ་འདོད་པ་སོགས། །འགལ་ཟླ་གསུམ་པོ་བཟུང་བ་འགལ། །ཀུན་སློང་ཐེག་དམན་སེམས་བསྐྱེད་ཀྱིས། །བླངས་ནས་
བྱང་ཆུབ་སེམས་བླ་མེད། །དམ་པ་བདག་གིས་བཟུང་བར་བགྱི། །ཞེས་སྨྲ་འདི་ནི་ཅི་ཞིག་ཡིན། །ཉན་ཐོས་ས་རུ་སེམས་བསྐྱེད་ན། །ཐེག་ཆེན་སྨོན་སེམས་སྤོང་དགོས་ཤིང་། །སྨོན་སེམས་སྤངས་ན་རྩ་ལྟུང་དུ། །འགྱུར་བར་རྒྱུད་སྡེ་བཞི་ཆར་མཐུན། །
གཞན་ཡང་རྒྱུད་སྡེ་ཕལ་ཆེར་དང་། །གྲུབ་པའི་དབང་ཕྱུག་གཞུང་བཟང་རྣམས། །འདི་ལ་གཅིག་ཏུ་གནོད་པ་སྟེ། །གཞུང་ལུགས་མཐོང་ཚེ་གསལ་བར་འགྱུར། །ཁ་ཅིག་བྱ་རྒྱུད་སྐྱེད་ཆོག་ལ། །བདག་བསྐྱེད་སྤྱོད་རྒྱུད་གཞུང་འགྲེལ་གྱི། །ལུང་
གིས་བསྒྲུབ་ཅིང་རིགས་པ་ཡང་། །བལྟས་པའི་བདེ་བ་ལམ་བྱེད་དང་། །རྣམ་སྣང་མངོན་བྱང་གཞི་གཉིས་པོ། །བདག་མདུན་གཉིས་ལ་བཤད་རུང་ན། །བསམ་གཏན་ཕྱི་མའི་གཞི་གཉིས་ཀྱང་། །བདག་མདུན་གཉིས་སུ་རུང་བར་མཚུངས། །
བདག་བསྐྱེད་མེད་པར་བཤད་པ་ནི། །བྱ་རྒྱུད་ཕལ་ལ་དགོངས་པའམ། །སྲོག་རྩོལ་ལ་སོགས་བསམ་གཏན་གྱི། །ཡན་ལག་བསྒོམ་པར་མི་ནུས་པའི། །གདུལ་བྱ་རྣམས་ལ་དགོངས་ཞེས་ཟེར། །སྤྱོད་རྒྱུད་ལུང་གིས་བྱ་རྒྱུད་ལ། །བདག་
བསྐྱེད་འགྲུབ་ན་བླ་མེད་ཀྱི། །ལུང་གིས་བསྐྱེད་རྫོགས་ཅིས་མི་འགྲུབ། །བྱ་སྤྱོད་གཉིས་ཀྱི་སྐྱེད་ཆོག་ལ། །བདག་བསྐྱེད་ཡོད་པར་ཁྱད་མེད་ན། །ཉམས་ལེན་ཁྱད་པར་གང་གིས་འབྱེད། །རྒྱུད་སྡེ་གོང་མའི་ལུང་དང་འགལ། །བལྟས་པའི་
9-6-19b


བདེ་བ་ལམ་བྱེད་ཀྱིས། །བདག་བསྐྱེད་ཡོད་པར་མི་འགྲུབ་སྟེ། །མདུན་བསྐྱེད་ཕོ་མོ་བལྟས་པ་ལ། །དམིགས་པས་ལམ་བྱེད་དེ་འགྲུབ་ཕྱིར། །རྒྱུད་སྡེ་གཉིས་ཀྱི་གཞི་ཡི་དོན། །བདག་མདུན་གཉིས་སུ་མི་མཚུངས་ཏེ། །རྣམ་སྣང་མངོན་པར་བྱང་ཆུབ་
ལས། །ཡི་གེ་དང་ནི་ཡི་གེ་སྦྱར། །དེ་བཞིན་གཞི་ལས་གཞིར་གྱུར་པ། །ཞེས་གསུངས་བསམ་གཏན་ཕྱི་མ་ལས། །སྒྲ་དང་སེམས་དང་གཞི་ལ་གཞོལ། །ཞེས་པ་གཞི་ནི་གཅིག་གསུངས་ཕྱིར། །ཡི་གེ་གཉིས་དང་སྒྲ་སེམས་གཉིས། །སྔོན་
འགྲོའི་དོན་དུ་མཚུངས་པས་ན། །དངོས་གཞི་གཞི་གཉིས་གཅིག་གི་ནི། །ཁྱད་པར་ཡོད་པས་དེ་གཉིས་ཀྱི། །བདག་བསྐྱེད་ཡོད་མེད་ཁྱད་འགྲུབ་སྟེ། །བསམ་གཏན་ཕྱི་མའི་གཞི་ཡི་དོན། །མདུན་བསྐྱེད་ཉིད་ལ་བཤད་དགོས་ཕྱིར། །སྐྱོན་སྤོང་
གཉིས་ཀྱང་མི་འཐད་དེ། །བྱ་རྒྱུད་ཕལ་ལ་བལྟས་པ་ཡི། །བདེ་བ་ལམ་བྱེད་མེད་འགྱུར་བའམ། །ལམ་དང་གདུལ་བྱའི་གཙོ་བོ་གཉིས། །གོ་རིམ་ལོག་པའི་སྐྱོན་དུ་འགྱུར། །ཁ་ཅིག་ངན་སོང་སྦྱོང་རྒྱུད་ལས། །གསུངས་པའི་གཙོ་བོ་ཕྱག་རྡོར་ལ། །
རྒྱལ་ཆེན་བཞི་སོགས་ཀྱིས་བསྐོར་བའི། །དཀྱིལ་འཁོར་དྲུག་གི་འཁོར་གྱི་ལྷ། །འཇིག་རྟེན་རང་རྒྱུད་པ་ཞེས་སྨྲ། །སྒྲུབ་བྱེད་དྲིས་ཚེ་དམ་བཅའ་འགོད། །ལ་ལ་བླ་མ་གསུངས་ཞེས་ཟེར། །སྲོག་སྙིང་ཕུལ་ནས་དཀྱིལ་འཁོར་ལ། །བཀོད་པའི་ཕྱིར་
དང་འཇིག་རྟེན་པ། །ཞེས་པའི་མིང་དང་ལྡན་ཕྱིར་དང་། །རྒྱུད་གསུངས་འཁོར་གྱི་ཚངས་པ་སོགས། །ཡིན་པའི་ཕྱིར་ཞེས་འགོད་པར་བྱེད། །དེ་བཞིན་དཔལ་མཆོག་ལས་གསུངས་པའི། །མིང་པོ་ཁ་སྐོང་གི་དཔེ་ཕལ་ཆེར་ལས་འདི་བཞིན་འབྱུང་ཡང་། །
9-6-20a


མིང་པོ་གསུམ་དང་སྲིང་མོ་བཞི་དཔལ་མཆོག་ན་ཡོད་ཅིང་།  ངག་དབང་ཆོས་གྲགས་ཀྱི་རྣམ་བཤད་ནའང་དེ་བཞིན་གསུངས་སོ། །སྲིང་མོ་བཞི་བཞི་དང་། །སྨན་བླའི་ཁྱམས་ལ་བཀོད་པ་ཡི། །གནོད་སྦྱིན་ཚངས་པ་ལ་སོགས་པ། །བཅུ་བདུན་
ལྷ་ཚོགས་འཇིགས་བྱེད་ཀྱི། །འཁོར་གྱི་གཤིན་རྗེ་ཕོ་མོ་དང་། །ལྷ་མོ་འདོད་ཁམས་དབང་ཕྱུག་དང་། །དཔལ་མགོན་གདོང་བཞི་གཉེན་པོ་དང་། །པུ་ཏྲ་ལ་སོགས་ལས་མཁན་དང་། །བྱ་ནག་ཁྱི་ནག་ལ་སོགས་པ། །སྤྲུལ་པའི་ཕོ་ཉ་ཐམས་ཅད་ཀྱང་། །
འཇིག་རྟེན་རང་རྒྱུད་པ་ཞེས་སྨྲ། །འདི་དག་སངས་རྒྱས་རྣམ་འཕྲུལ་ལ། །སྐུར་འདེབས་ཡིན་པས་དགག་པར་བྱ། །རྒྱུད་སྡེ་བཞི་ཡི་དཀྱིལ་འཁོར་གྱི། །གཙོ་བོ་ནས་བཟུང་མེ་རིའི་བར། །གཙོ་བོ་ཉིད་ཀྱི་རྣམ་འཕྲུལ་ལས། །མ་གཏོགས་རྒྱུད་ནི་ཐ་
དད་དང་། །རྟེན་དང་བརྟེན་པ་རྫས་ཐ་དད། །གནས་པའི་དཀྱིལ་འཁོར་རྣམ་གཞག་ནི། །རྒྱུད་དང་གྲུབ་པའི་གཞུང་བཟང་དང་། །དམ་པའི་གསུངས་ལས་ཐོས་པ་མེད། །འདི་ནི་འདུས་པ་རྣམ་གཉིས་སོགས། །རྒྱུད་ཀྱི་དཀྱིལ་འཁོར་སྤྲུལ་བཤད་ཀྱི། །
སྐབས་དང་རྩ་རྒྱུད་བརྟག་གཉིས་ལས། །འཆད་པ་པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པ་ང་། །ཞེས་སོགས་རྟོགས་ན་འབད་མེད་འགྲུབ། །ཁྱད་པར་དཀྱིལ་འཁོར་དྲུག་པོ་ཡི། །འཁོར་རྣམས་འཇིག་རྟེན་པ་ཡིན་ན། །བདག་བསྐྱེད་བསྙེན་
པ་རྒྱས་པའི་ཚེ། །སྐྱེད་ཆོག་ཚུལ་ལུགས་ཇི་ལྟར་བྱ། །ཕྱག་རྡོར་ཐུགས་ཀར་བསྐྱེད་པ་ཡི། །འཇིག་རྟེན་པ་དེ་ངོ་མཚར་ཆེ། །དཀྱིལ་འཁོར་དྲུག་པོ་འདི་དག་ལ། །བསྙེན་པ་རྒྱས་པ་མི་འཇུག་ན། །གྲགས་པ་རྒྱལ་མཚན་གསུང་རབ་ལས། །སྦྱོང་
9-6-20b


རྒྱུད་དཀྱིལ་འཁོར་བཅུ་གཉིས་ལ། །དཀྱིལ་འཁོར་སུམ་ཅུ་སོ་དྲུག་ཏུ། །ཕྱེ་བའི་མཚན་གཞི་གང་ཡིན་སྨྲོས། །བདག་བསྐྱེད་ཚེ་ན་གཙོ་བོས་སྤྲུལ། །སྒྲུབ་ཚེ་ཡེ་ཤེས་དགུག་གཞུག་དང་། །མཆོད་ཚེ་སྒེག་སོགས་ཀྱིས་མཆོད་དང་། །བསྟོད་ཚེ་ཕྱག་འཚལ་
ཚིག་བརྗོད་དང་། །རྒྱུན་བཤགས་སྐྱབས་འགྲོའི་ཡུལ་བྱས་དང་། །འཇུག་ཚེ་མེ་ཏོག་འདོར་བ་དང་། །སྔགས་བཟླས་བུམ་ཆུས་དབང་བསྐུར་བ། །རྒྱུད་དང་གོང་མའི་གསུང་རབ་ལས། །འབྱུང་ཕྱིར་འཇིག་རྟེན་པ་ཡིན་ཞེས། །སེམས་ལྡན་སུ་ཞིག་
སྨྲ་བར་ནུས། །དེ་དག་གཙོ་འཁོར་ཁྱད་པར་ལ།  ཡོད་མེད་སྨྲ་ན་རྒྱུད་དང་འགལ། །སྤྲུལ་པ་མཆོག་གི་དཀྱིལ་འཁོར་དུ། །དབང་ཐོབ་ཙམ་གྱིས་གྲུབ་པའི་ས། །ཐོབ་དང་དཀྱིལ་འཁོར་དེ་ཡི་ལྷ། །འཇིག་རྟེན་རང་རྒྱུད་པ་ཡོད་འགལ། །རྡོ་རྗེ་ལྕགས་
ཀྱུ་ལ་སོགས་ཀྱིས། །སྒོ་སྲུང་བྱས་པའི་དཀྱིལ་འཁོར་ནང་། །སྡོད་པར་ནུས་པའི་འཇིག་རྟེན་པ། །རང་རྒྱུད་པ་དེ་ཅི་འདྲ་ཞིག །སྒྲུབ་བྱེད་ལ་ཡང་དཔྱད་པར་བྱ། །དམ་བཅས་དམ་བཅའ་སྒྲུབ་ན་ནི། །ཕ་རོལ་དམ་བཅའ་བཟློག་པ་ཡིས། །དམ་
བཅའ་དེ་ཉིད་འགོག་པར་འགྱུར། །རྗེ་བཙུན་མཁྱེན་པའི་དབང་པོ་དེས། །བསྙེན་པ་རྒྱས་པའི་ཆོ་གར་ནི། །རིགས་བཞི་ནས་ནི་འཁོར་ཡུག་བར། །ཀུན་རིག་ཐུགས་ཀར་བསྐྱེད་ནས་ནི། །སོ་སོར་བཀོད་པ་སྤྲུལ་པའི་སྐུ། །ཉམས་ལེན་ཡིན་གསུངས་
ཁྱད་པར་དུ། །སངས་རྒྱས་གང་ལ་གང་འདུལ་བ། །དེ་དང་དེ་ཡི་སྐུར་སྟོན་ཅེས། །འཁོར་ཡུག་བར་དུ་སྦྱར་ཏེ་གསུངས། །འདི་དང་ཁྱེད་ཀྱི་གསུང་སྒྲོས་འགལ། །དེ་ལ་སྐྱོན་སྤོང་འདི་སྐད་དུ། །ཀུན་རིག་འཁོར་ཡུག་ལྷ་རྣམས་ནི། །སངས་
9-6-21a


རྒྱས་ཡིན་ཞིང་ཅིག་ཤོས་ནི། །འཇིག་རྟེན་རང་རྒྱུད་པ་ཞེས་སྨྲ། །ཀྱེ་མ་འདི་འདྲའི་ཚིག་གིས་ཀྱང་། །ཤེས་ལྡན་ངེས་པ་སྐྱེ་བ་རེ། །ཀུན་རིག་དཀྱིལ་འཁོར་ཕྱི་རོལ་ཏུ། །འཁོར་ཡུག་ལ་བཀོད་ལྷ་ཀླུ་
སོགས། །སངས་རྒྱས་ཡིན་ཞིང་ཕྱག་རྡོར་གྱི། །དཀྱིལ་འཁོར་ནང་བཀོད་ཡེ་ཤེས་པས། །སྒོ་སྲུང་བྱས་པའི་ལྷ་རྣམས་ཀྱང་། །འབྱུང་པོ་ཡིན་ན་འདི་ཙམ་གྱི། །ཁྱད་པར་ཀུན་རིག་ཕྱག་རྡོར་གཉིས། །བཟང་ངན་དབང་ཆ་ཆེ་ཆུང་གང་། །
བླ་མས་འཆད་ཚེ་ཟོར་ཡང་ཕྱིར། །འཇིག་རྟེན་པ་ཞེས་གསུངས་ཙམ་ལ། །བླ་མའི་གསུང་སྒྲོས་ཡིན་ནོ་ཞེས། །བླ་མ་མཆོག་ལ་སྐུར་མི་བྱ། །སྲོག་སྙིང་ཕུལ་བའི་ཚུལ་སྟོན་པ། །ཙམ་གྱིས་འཇིག་རྟེན་པར་འགྱུར་ན། །གདུལ་བྱ་དྲག་པོ་
དབང་ཕྱུག་ཆེ། །འདུལ་བྱེད་ཧེ་རུ་ཀས་འདུལ་བའི། །རྣམ་འཕྲུལ་ཆ་ཤས་ཙམ་གྱིས་ཀྱང་། །དེ་གཉིས་རྒྱུད་གཅིག་ཇི་ལྟར་འགྱུར། །དེ་སོགས་སངས་རྒྱས་རྣམ་འཕྲུལ་ལ། །རང་གི་བློ་ཚོད་སྦྱར་མི་རུང་། །འཇིག་རྟེན་པ་ཞེས་བྱ་བ་ཡི། །མིང་
གིས་འཇིག་རྟེན་པར་འགྱུར་ན། །མི་ལ་སེང་གེའི་མིང་བཏགས་ཚེ། །སྣ་ཉག་རལ་པ་སྤྲུག་པར་འགྱུར། །མིང་དོན་ངོ་བོ་ཉིད་ཀྱིས་ནི། །འབྲེལ་བར་འདོད་པ་རིག་བྱེད་གཞུང་། །ཡིན་ཕྱིར་རིགས་པའི་རྒྱལ་པོས་བཀག །མིང་ལ་དངོས་མིང་བཏགས་
མིང་གཉིས། །གསུང་རབ་འཆད་པ་ཀུན་ལ་གྲགས། །འཇིག་རྟེན་ཐ་སྙད་ལ་ཡང་ཡོད། །འོན་ཀྱང་སྒྲུབ་བྱེད་གཙོ་བོ་ནི། །འདི་ཉིད་ལ་ནི་རེ་བར་སྣང་། །སྟོན་པས་རྒྱུད་སྡེ་གསུངས་པའི་ཚེ། །འཁོར་ལ་རང་རྒྱུད་པས་ཁྱབ་ན། །སྤྲུལ་པ་དང་ནི་རང་
9-6-21b


རྒྱུད་པའི། །འཁོར་གཉིས་རྒྱུད་ལས་གསུང་དང་འགལ། །སྟོན་པས་རྒྱུད་སྡེ་འདི་གསུངས་ཚེ། །འཁོར་གྱི་ཚངས་སོགས་སྤྲུལ་པ་ཉིད། །ཡིན་ཕྱིར་ཀུན་རིག་འཁོར་ཡུག་ཏུ། །ཚང་བར་བཀོད་ཅིང་ཕྱག་རྡོར་གྱིས། །བརྟག་པ་ཕྱི་མ་གསུངས་པའི་
ཚེ། །སྲོག་སྙིང་ཕུལ་ནས་རང་ཉིད་ཀྱི། །དཀྱིལ་འཁོར་ལ་ནི་སོ་སོར་བཀོད། །དེ་ཚེ་དཀྱིལ་འཁོར་རྣམ་དྲུག་འབྱུང་། །དཔལ་མཆོག་ལས་གསུངས་ལྷ་རྣམས་ཀྱང་། །འཇིག་རྟེན་རང་རྒྱུད་པ་ཡིན་པའི། །སྒྲུབ་བྱེད་སྔ་མ་ལས་གཞན་མེད། །
ཀུན་དགའ་སྙིང་པོས་སྤྲུལ་པར་བཤད། །སྨན་བླའི་གནོད་སྦྱིན་ལ་སོགས་པ། །འཇིག་རྟེན་རང་རྒྱུད་པ་ཡིན་ན། །སྨན་བླའི་ཆོ་ག་བྱས་པ་ཀུན། །སྐྱབས་འགྲོའི་སྡོམ་པ་འཆོར་འགྱུར་ཏེ། །འཇིག་རྟེན་པ་ཡི་ལྷ་རྣམས་ལ། །ཕྱག་འཚལ་སྐྱབས་
འགྲོ་བྱས་པའི་ཕྱིར། །ཞི་འཚོས་མདོ་ལས་གསུངས་པ་ཡི། །བདེ་གཤེགས་བརྒྱད་པོ་སངས་རྒྱས་སུ། །བྱས་ནས་སྐབས་དེར་དམ་ཆོས་བསྣན། །ལྷག་མ་སྐྱབས་གྲོལ་ལ་སོགས་པ། །འཇིག་རྟེན་འདས་དང་འཇིག་རྟེན་པའི། །སྐུར་སྟོན་
དགེ་འདུན་དུ་བྱས་ནས། །སྐྱབས་གནས་གསུམ་ལ་ཕྱག་མཆོད་སོགས། །ཡན་ལག་དྲུག་པོ་དངོས་སུ་སྦྱར། །བདུན་པ་མདོ་ཡི་སྨོན་ལམ་ཉིད། །སྦྱར་བ་སྨན་བླའི་ཆོ་ག་ཡིན། །དོན་ཡོད་རྡོ་རྗེས་འཇིགས་བྱེད་ཀྱི། །གསུང་ལས་རྡོར་སེམས་
ཡབ་ཡུམ་གྱི། །མངལ་ནས་གཤིན་རྗེ་ཕོ་བརྒྱད་ཕྱུང་། །སྲུང་འཁོར་རྩིབས་བརྒྱད་ལ་བཀོད་ནས། །རྡོར་སེམས་ཞུ་བའི་གཞལ་ཡས་དབུས། །འཇིགས་བྱེད་གཤིན་རྗེ་མོ་བརྒྱད་དང་། །བཅས་པ་བསྐྱེད་པར་གསུངས་པའི་ཕྱིར། །དེ་དག་
9-6-22a


འབྱུང་པོ་སུས་སྨྲ་ནུས། །འདོད་ཁམས་དབང་ཕྱུག་འཇིག་རྟེན་པ། །ཡིན་ན་བྲམ་ཟེ་མཆོག་སྲེད་ཀྱིས། །དུས་གསུམ་སངས་རྒྱས་བསྐྱེད་པ་དང་། །རིགས་ལྔའི་ཡུམ་དུ་བཤད་དང་འགལ། །གདོང་བཞི་གཉེན་
པོ་འཇིག་རྟེན་པ། །ཡིན་ན་རྡོ་རྗེ་འཆང་དབང་གི།  ཐུགས་ཀྱི་ཕྲིན་ལས་ལས་སྤྲུལ་དང་། །སྟོན་པའི་ཉིང་སྤྲུལ་དུ་བཤད་འགལ། །ལས་མགོན་ལྔ་པོ་འཇིག་རྟེན་པ། །ཡིན་ན་མགོན་པོ་ལྕམ་དྲལ་གྱི། །ཐུགས་ཀའི་ས་བོན་ལས་བརྒྱུད་དེ། །རིམ་པ་
བཞིན་དུ་བསྐྱེད་པ་འགལ། །སྤྲུལ་པའི་བྱ་ནག་ཁྱི་ནག་སོགས། །འཇིག་རྟེན་རང་རྒྱུད་པ་ཡིན་ན། །སྤྲུལ་པའི་ཕོ་ཉ་ཞེས་བརྗོད་པའི། །ཚིག་དང་འགལ་བར་མི་འགྱུར་རམ། །དེས་ན་བརྩེ་ཆེན་ས་པཎ་གྱིས། །ཀྱེ་མ་བསོད་ནམས་དམན་པའི་
མི། །ལྷ་སྐལ་ཆད་པ་འབྱུང་པོ་བསྒྲུབ། །ཅེས་གསུངས་ཡིད་ལ་བཞག་ནས་ནི། །ཡི་དམ་ཆོས་སྐྱོང་ཕལ་ཆེ་བ། །འབྱུང་པོ་ཡིན་ཞེས་མ་སྨྲ་ཞིག །སྐྱབས་གནས་མཆོག་ལ་ཐེ་ཚོམ་གྱི། །རྒྱུ་ཡིན་ཕྱིར་ན་ཉེས་དམིགས་ཆེ། །དེས་ན་ཕན་པའི་
གདམས་ངག་ནི། །ཉན་ཐོས་རང་རྒྱལ་སྐུར་སྟོན་ལ། །སངས་རྒྱས་བྱང་སེམས་སྤྲུལ་པ་དང་། །རང་རྒྱུད་པ་དང་རྣམ་གསུམ་ཡོད། །ཚངས་དང་བརྒྱ་བྱིན་ལ་སོགས་པ། །འཇིག་རྟེན་ཆེ་དགུ་མཐའ་དག་དང་། །དུར་ཁྲོད་བདག་པོ་ཤ་ཟའི་ཚོགས། །
འཇིག་རྟེན་ཆ་ལུགས་ལྡན་རྣམས་དང་། །རི་བོང་སྟག་དང་སེང་གེ་སོགས། །རིགས་དྲུག་འགྲོ་བའི་གཟུགས་སྟོན་ཀུན། །སྔ་མ་བཞིན་དུ་རྣམ་གསུམ་ཡོད། །དེ་འདྲའི་རྣམ་དབྱེ་མདོ་རྒྱུད་ཀྱི། །དགོངས་པ་ཡིན་ཕྱིར་སངས་རྒྱས་ཀྱི། །རྣམ་
9-6-22b


འཕྲུལ་མཐའ་ཡས་ཤེས་པར་བྱ། །ལ་ལ་རྒྱུད་སྡེ་འོག་མ་ལ། །དབང་བཞི་མེད་པས་དེ་ལ་ནི། །ལྟོས་པའི་རིམ་པ་གཉིས་མེད་ཀྱང་། །རིམ་གཉིས་ངེས་པར་འདོད་དགོས་ཏེ། །རྡོ་རྗེ་ཐེག་པའི་གཞུང་ཡིན་ཕྱིར། །དེ་ཡང་སངས་རྒྱས་ཕྲིན་
ཡིག་ལས། །བཅོམ་ལྡན་ཁྱོད་ཀྱིས་གསང་སྔགས་ལམ། །རིམ་པ་གཉིས་སུ་བསྡུས་ཏེ་བསྟན། །ཞེས་གསུངས་སྡོམ་གསུམ་རབ་དབྱེ་ལས། །དབང་དང་རིམ་གཉིས་མི་ལྡན་པས། །རྡོ་རྗེ་ཐེག་པའི་བསྟན་པ་མིན། །ཞེས་གསུངས་པ་ཡི་
ཕྱིར་ཞེས་ཟེར། །འོ་ན་རྒྱུད་སྡེ་འོག་མ་ལའང་། །དབང་བཞི་ཡོད་པ་ཉིད་འགྱུར་ཏེ། །རྡོ་རྗེ་ཐེག་པའི་གཞུང་ཡིན་ཕྱིར། །དེ་ཡང་བསྟན་བཅོས་འདི་ཉིད་ལས། །རྡོ་རྗེ་ཐེག་པའི་ལམ་ཞུགས་ནས། །མྱུར་དུ་སངས་རྒྱས་ཐོབ་འདོད་ན། །སྨིན་
གྲོལ་གཉིས་ལ་འབད་དགོས་པའི། །སྨིན་བྱེད་དབང་བཞི་ཉིད་ལ་ནི། །གསུངས་ཤིང་གཞན་ཡང་དེ་ཉིད་ལས། །གལ་ཏེ་གསང་སྔགས་བསྒོམ་འདོད་ན། །ནོར་བ་མེད་པའི་དབང་བཞི་ལོངས། །ཞེས་སོགས་མཚུངས་པར་གསུངས་ཕྱིར་རོ། །
དབང་བསྐུར་བཞི་ལ་མ་ལྟོས་པའི། །རིམ་གཉིས་སྔོན་མེད་གཏམ་ཡིན་ཏེ། །ས་བོན་འདེབས་ལ་མ་ལྟོས་པའི། །མྱུ་གུ་སྔོན་པོ་ཇི་བཞིན་ནོ། །བློ་ཡིས་རིམ་གྱིས་ལྷ་བསྐྱེད་ཙམ། །བསྐྱེད་པའི་རིམ་པའི་དོན་མིན་ཏེ། །བསྐྱེད་རིམ་སྦྱང་གཞི་
སྦྱོང་བྱེད་གཉིས། །སྦྱར་བ་ཉིད་ལ་གསུངས་ཕྱིར་རོ། །མཚན་མེད་རྣལ་འབྱོར་བསྒོམ་པ་ཙམ། །རྫོགས་པའི་རིམ་པའི་དོན་མིན་ཏེ། །རྫོགས་རིམ་ལུས་ངག་ཡིད་གསུམ་ནི། །རྫོགས་པ་ཉིད་ལ་གསུངས་ཕྱིར་རོ། །ཁ་ཅིག་བསྐྱེད་རྫོགས་
9-6-23a


རྣམ་གཉིས་ལ། །སྣང་བ་ལྷ་རུ་འཆར་བའི་དོན། །ཡིད་ངོར་རྟེན་དང་བརྟེན་པ་ཡི། །ལྷ་དང་ཡེ་ཤེས་བསྒོམ་པའི་ཚེ། །རྟོག་གཉིས་ཅིག་ཆར་མི་འཇུག་པས། །ཡིད་ངོའི་སྣང་བ་དེར་འཆར་བའི། །དོན་
ཡིན་ཕྱི་རོལ་སྣང་བ་ཀུན། །ལྷ་རུ་འཆར་བ་མ་ཡིན་ཏེ། །ལོག་ཤེས་ཉིད་དུ་ཐལ་ཕྱིར་དང་། །ཕྱིར་རོལ་སྣང་བ་ལྷར་བསྒོམ་པས། །ལྷ་རུ་འགྱུར་བ་མ་ཡིན་ཏེ། །རང་བཞིན་རྣམ་དག་ལྷ་མིན་ཕྱིར། །སོལ་བ་བརྡར་བས་དུང་བཞིན་ནོ། །
ཞེས་པས་གྲུབ་མཐའ་འཛུགས་པ་མཐོང་། །འདི་ནི་རྣལ་འབྱོར་བླ་མེད་ཀྱི། །གནད་བཅོས་པ་ཡི་བདུད་ཀྱི་ཚིག །ཡིན་ཕྱིར་ལུང་དང་རིགས་པ་དང་། །ཁས་བླངས་འགལ་བས་དགག་པར་བྱ། །དེ་ཡང་གསང་བ་འདུས་པ་ལས། །མདོར་
ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་བསྒྲགས། །རྡོ་རྗེའི་སྐྱེ་མཆེད་ཉིད་དག་ཀྱང་། །བྱང་ཆུབ་སེམས་དཔའི་དཀྱིལ་འཁོར་མཆོག །ས་ནི་སྤྱན་ཞེས་བྱ་བར་བཤད། །ཆུ་ཡི་ཁམས་ནི་མཱ་མ་ཀཱི། །གོས་དཀར་མོ་དང་སྒྲོལ་
མ་ནི། །མེ་དང་རླུང་དུ་རབ་ཏུ་གྲགས། །ཞེས་གསུངས་དེ་དོན་སྤྱོད་བསྡུས་ལས། །ཐ་མལ་དངོས་པོ་རིགས་རྣམས་བརྒྱར། །ཕྱེ་ནས་དེ་དག་འདུས་པ་ཡི། །དམ་པ་རིགས་བརྒྱར་བསྒོམ་ཚུལ་གསུངས། །འདི་དང་ཁྱོད་ཀྱི་གྲུབ་མཐའ་
འགལ། །དེ་བཞིན་ཀྱེ་རྡོར་རྩ་རྒྱུད་ལས། །ཕུང་པོ་ལྔ་དང་ཉོན་མོངས་ལྔ། །ཁམས་ལྔ་བཞི་དང་སྐྱེ་མཆེད་དྲུག །བདག་མེད་ལྷ་མོ་བཅོ་ལྔ་ཡི། །ལྷ་རུ་བསྒོམ་པར་གསུངས་པ་འདི། །ཁྱོད་ཀྱི་གྲུབ་མཐའི་གཉེན་པོ་ཡིན། །དེ་བཞིན་བདེ་མཆོག་
9-6-23b


བཤད་རྒྱུད་ལས། །ཕུང་པོ་སྐྱེ་མཆེད་ཁམས་བཅུ་བདུན། །རྣམ་སྣང་ལ་སོགས་སངས་རྒྱས་སུ། །བསྒོམ་པར་གསུངས་ཤིང་སོ་སེན་སོགས། །ལུས་ཀྱི་ཁམས་ནི་ཉི་ཤུ་བཞི། །དཔའ་བོ་ཉི་ཤུ་རྩ་བཞིར་ནི། །བསྒོམ་པར་གསུངས་དང་དེ་
བཞིན་དུ། །འཕགས་ཡུལ་གྲུབ་ཐོབ་གསུངས་རྣམས་དང་། །བོད་ཡུལ་སྔོན་གྱི་སྔགས་འཆང་གི། །མན་ངག་ཐམས་ཅད་ཁྱོད་ཀྱི་ནི། །གྲུབ་མཐའ་འདི་ཡི་གཉེན་པོ་ཡིན། །དེས་ན་སྤང་བྱ་དེ་དོར་བྱ། །སྣང་བ་ལྷ་ཡི་ངོ་བོར་ནི། །རང་བཞིན་
གྱིས་ནི་རྣམ་དག་ན། །དེ་བསྒོམ་ལྷ་རུ་མི་འགྱུར་དང་། །དེ་འཆར་ལོག་ཤེས་ཡིན་པ་འགལ། །ལྷ་ཡི་ངོ་བོ་རང་བཞིན་གྱིས། །རྣམ་དག་མ་ཡིན་བརྟག་གཉིས་ལས། །ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱི་ནས་
རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་བརྗོད་པར་བྱ། །ཞེས་གསུངས་དེ་ཡི་སྒྲུབ་བྱེད་དུ། །ཕུང་པོ་ལྔ་དང་དབང་པོ་དྲུག །སྐྱེ་མཆེད་དྲུག་དང་འབྱུང་ཆེན་ལྔ། །རང་བཞིན་གྱིས་ནི་རྣམ་པར་དག །ཉོན་མོངས་ཤེས་བྱའི་སྒྲིབ་སྦྱང་བྱ། །ཞེས་
གསུངས་པ་དང་འགལ་བར་འགྱུར། །དེ་ཉིད་དག་པ་དང་པོ་ཡི། །སྒྲུབ་བྱེད་ཡིན་གྱི་ལྷ་ཡི་ནི། །དག་པའི་སྒྲུབ་བྱེད་མིན་སྙམ་ན། །ལྷ་ཡི་རྣམ་པའི་གཟུགས་ཀྱིས་ནི། །བཞིན་ལག་ཁ་དོག་གནས་པ་ནི། །སྐྱེས་པ་ཙམ་གྱིས་རྣམ་པར་
གནས། །འོན་ཀྱང་བག་ཆགས་ཕལ་པས་སོ། །ཞེས་གསུངས་པ་དང་ཅིས་མི་འགལ། །གཞན་ཡང་ལུགས་འདི་སྨྲ་བ་པོས། །སྦྱང་གཞི་མ་འོངས་འབྱུང་འགྱུར་གྱི། །སྐྱེ་འཆི་བར་དོ་ཁོ་ན་དང་། །སྦྱོང་བྱེད་གནས་སྐབས་དེ་ཉིད་ཀྱི། །
9-6-24a


བསྐྱེད་པའི་རིམ་པ་ཁོ་ན་དང་། །སྦྱོང་ཚུལ་ཆོས་གསུམ་དོད་དུ་ནི། །སྐུ་གསུམ་འབྱུང་བར་སྒྲོ་བཏགས་པ། །གཞན་དུ་བཀག་ཟིན་བལྟ་བར་བྱ། །ཁ་ཅིག་སྣང་བའི་དངོས་ཀུན་ལ། །མཚན་ཉིད་གསུམ་དུ་ཕྱེ་བ་ཡི། །
ཀུན་བརྟགས་གཞན་དབང་ཀུན་རྫོབ་ཉིད། །ཡིན་ཕྱིར་ལྷ་རུ་བསྒོམ་བྱ་མིན། །ཡོངས་གྲུབ་དོན་དམ་ལྷ་ཡིན་ཕྱིར། །བསྒོམས་པས་ལྷ་རུ་འགྱུར་བ་སྟེ། །གློ་བུར་དྲི་མ་བྲལ་བའི་ཚེ། །དོན་དམ་ལྷ་ཉིད་མངོན་འགྱུར་ཕྱིར། །རྒྱུད་ལས་ཕུང་ཁམས་
སྐྱེ་མཆེད་སོགས། །དངོས་ཀུན་ལྷ་རུ་གསུངས་པ་ཡང་། །འདི་ལ་དགོངས་ཏེ་དེ་དག་གི།  ཡོངས་གྲུབ་ལྷ་ཉིད་ཡིན་ཕྱིར་རོ། །ཡེ་ཤེས་ཚོགས་བསག་དུས་སུ་ཡང་། །སྤྲོས་བྲལ་ཉིད་ལ་ཨ་ཧཾ་ཞེས། །ང་རྒྱལ་འཇོག་པའང་འདི་ཉིད་དེ། །འོག་
ཏུ་ལྷ་ནི་བསྒོམ་ཕྱིར་ལོ། །འདི་ལ་ལུང་རིགས་ཁས་བླངས་དང་། །འགལ་བ་གསུམ་ལས་ལུང་འགལ་ནི། །ཀྱེ་རྡོར་རྩ་བའི་རྒྱུད་ཉིད་ལས། །ངེས་པར་དངོས་པོ་ཐམས་ཅད་ཀྱི། །ཞེས་སོགས་དེ་བཞིན་ཉིད་ཀྱི་ནི། །ཕྱི་ནས་ཀུན་རྫོབ་
སྤྲོས་པ་ཀུན། །ལྷ་རུ་བསྒོམ་པར་གསུངས་པ་དང་། །ཁྱོད་ཀྱི་གྲུབ་མཐའ་འདི་ཉིད་འགལ། །བསྒོམ་གཞི་ཆོས་དབྱིངས་ཉིད་ཡིན་ན། །རེ་རེ་ཞེས་པ་དང་འགལ་ཏེ། །རེ་རེ་ཞེས་པ་སོ་སོའི་ཚིག །ཆོས་དབྱིངས་སོ་སོར་མེད་ཕྱིར་རོ། །
དེ་བཞིན་བརྟག་པ་ཕྱི་མར་ཡང་། །ཀུན་རྫོབ་གཟུགས་སུ་གནས་ནས་ནི། །དེ་རྣམས་བདེ་གཤེགས་རིགས་སུ་འགྱུར། །བུད་མེད་རྣམས་ཀྱི་མཚན་ཉིད་འདི། །ཇི་ལྟར་སྐྱེས་པ་དེ་བཞིན་ནོ། །ཀུན་རྫོབ་ཐ་སྙད་ཚུལ་ལས་ནི། །དེ་ཡི་
9-6-24b


རིགས་སུའང་དེ་འགྱུར་རོ། །ཞེས་གསུངས་བཤད་རྒྱུད་གུར་ལས་ཀྱང་། །དོན་ལ་འགལ་བ་ཡོད་མིན་ཡང་། །རྒྱལ་བའི་དངོས་པོས་སྦྱངས་པ་ཡོད། །ཀུན་རྫོབ་གཟུགས་སུ་གནས་ནས་ནི། །འཁོར་ལོའི་གཟུགས་ཀྱི་ཆོས་ཙམ་བརྟག །ཅེས་
གསུངས་དེ་བཞིན་གསང་འདུས་ལ། །སོགས་པའི་རྒྱུད་སྡེ་ཐམས་ཅད་ལས། །ཀུན་རྫོབ་སྤྲོས་པའི་དབྱེ་བ་ཀུན། །ལྷ་རུ་བསྒོམ་པར་གསུང་དང་འགལ། །རིགས་པས་ཀྱང་ནི་གནོད་པ་སྟེ། །གཞན་དབང་གིས་བསྡུས་ཆོས་ཅན་ལ། །ཐ་
མལ་རྣམ་རྟོག་ཡོད་པའི་ཕྱིར། །དེ་དག་ལྷ་རུ་བསྒོམ་དགོས་ཏེ། །གཞན་དུ་སྲིད་པའི་འཆིང་བ་ལས། །གྲོལ་བའི་ཐབས་ནི་མེད་པར་གསུངས། །དེ་ཡང་ཡེ་ཤེས་ཞབས་ཉིད་ཀྱིས། །ཐ་མལ་རྣམ་རྟོག་རྒྱུན་དེ་ལས། །གཞན་དུ་སྲིད་པའི་
འཆིང་བ་མེད། །དེ་དང་རྣམ་པ་འགལ་བའི་སེམས། །གང་ཡིན་ཀུན་རྟོག་སྣང་མི་འགྱུར། །ཞེས་གསུངས་པ་ཡིས་ལེགས་པར་གྲུབ། །ཆོས་དབྱིངས་སྤྲོས་བྲལ་རང་ངོས་ནས། །ལྷ་རུ་བསྒོམ་ན་སྤྲོས་མེད་ལ། །སྤྲོས་པར་བྱས་ཕྱིར་
སྤྲོས་པ་གཞན། །འགོག་པའི་ཐབས་ནི་མེད་པར་འགྱུར། །དེ་སྐད་དུའང་བརྟག་གཉིས་ལས། །བསྐྱེད་པའི་རིམ་པའི་རྣལ་འབྱོར་གྱི༷ས། །བརྟུལ་ཞུགས་ཅན་གྱིས་སྤྲོས་པ་བསྒོམ། །ཞེས་གསུངས་གཞན་ཡང་དེ་ཉིད་ལས། །སྒོམ་པ་པོ་
མེད་བསྒོམ་པའང་མེད། །ལྷ་མེད་སྔགས་ཀྱང་ཡོད་མ་ཡིན། །ཞེས་པ་སྤྲོས་པ་སྤྲོས་མེད་དུ། །བྱེད་པའི་ལུང་ཡིན་བཟློག་པ་མིན། །སྒྲ་དང་རྟོག་པའི་ཡུལ་གྱུར་པའི། །ཆོས་དབྱིངས་ཀུན་རྫོབ་ཡིན་པའི་ཕྱིར། །ཐ་མལ་རྣམ་རྟོག་བཟློག་ཆེད་དུ། །
9-6-25a


རྡོ་རྗེ་སེམས་དཔའ་འམ་ཆོས་དབྱིངས་མར། །བསྒོམ་པར་རྒྱུད་གཞུང་རྣམས་ལས་གསུངས། །འདི་ཡང་ཀུན་རྫོབ་ལྷར་བསྒོམ་ཞིང་། །དོན་དམ་སྤྲོས་བྲལ་རང་ངོས་ནས། །ལྷར་མི་བསྒོམ་པའི་རིགས་པ་
ཡིན། །གང་ལ་སྨད་ན་རྩ་བ་ཡི། །ལྟུང་བ་བརྒྱད་པ་འབྱུང་བའི་གཞི། །ཆོས་ཉིད་ཡིན་ན་རིགས་པས་གནོད། །ཆོས་ཅན་ཡིན་ན་ཁས་བླངས་འགལ། །ཁས་བླངས་འགལ་བ་བསྟན་བྱ་སྟེ། །བསྐྱེད་པའི་རིམ་པས་ཐུན་མོང་ཉིད། །
འགྲུབ་ཀྱི་མཆོག་མི་འགྲུབ་པ་དང་། །བསྐྱེད་པའི་རིམ་པས་གང་བསྒོམ་པ། །དོན་དམ་ཆོས་སྐུ་ཡིན་པ་འགལ། །བསྐྱེད་རིམ་བསྒོམ་པའི་འབྲས་བུ་ནི། །གཟུགས་སྐུ་ཡིན་ན་ཆོས་ཉིད་ནི། །གཟུགས་སྐུར་འགྱུར་བ་བཟློག་ཏུ་མེད། །དེ་ཡང་འདོད་ན་
གཟུགས་ཀྱི་སྐུ། །ཀུན་རྫོབ་ཡིན་ཞིང་ཆོས་ཀྱི་སྐུ། །དོན་དམ་ཡིན་པར་ཁས་བླངས་པའི། །རང་གི་གྲུབ་མཐའ་ཉིད་དང་འགལ། །བསྐྱེད་རིམ་གཟུགས་སྐུའི་རྒྱུ་མིན་ན། །རྫོགས་རིམ་ཆོས་སྐུའི་རྒྱུ་ཉིད་དུ། །འགྲུབ་པར་མི་འགྱུར་བསྐྱེད་རྫོགས་
གཉིས། །སྐུ་གཉིས་རྒྱུར་ནི་རྒྱུད་ལས་གསུངས། །སྦྱང་གཞི་སྦྱོང་བྱེད་འཆོལ་བ་ཡི། །རྣམ་གཞག་ངན་པ་འདི་དོར་ལ། །དོན་དམ་སྤྲོས་བྲལ་མ་རྟོགས་པས། །ཀུན་རྫོབ་འཁོར་བའི་ཕུང་སོགས་ཀྱི། །སྣང་བ་སྣ་ཚོགས་འབྱུང་བ་ཀུན། །འཆིང་
གྲོལ་ཀུན་གྱི་གཞི་ཡིན་པས། །ལྷ་ཡི་ངོ་བོར་རང་བཞིན་གྱི། །རྣམ་པར་དག་ཕྱིར་ལྷར་བསྒོམས་པས། །ལྷ་རུ་འགྱུར་བར་གསུངས་པ་འདི། །རྒྱུད་དང་གྲུབ་པའི་གཞུང་བཟང་གི། །དགོངས་པ་ཡིན་ཕྱིར་གསེར་རྒྱན་ལྟར། །བློ་གྲོས་ལུས་ལ་
9-6-25b


འདོགས་པར་གྱིས།      ༈      །ད་ནི་ལམ་གྱི་ཡན་ལག་དང་། །འཕྲལ་གྱི་ལག་ལེན་འགའ་ཞིག་ཀྱང་། །འཁྲུལ་ན་བསྟན་ལ་གནོད་མཐོང་ནས། །ཆེ་ལོང་ཙམ་ཞིག་བརྗོད་པར་བྱ། །ལྷ་རྣམས་ཚིམ་པར་བྱ་བ་དང་། །སྔགས་ཀྱི་འབྲས་བུ་འབྱིན་པའི་
ཕྱིར། །རྫས་སྔགས་གྲངས་མཉམ་བགྲངས་པ་ཡི། །སྦྱིན་བསྲེག་བྱ་བར་རྒྱུད་ལས་གསུངས། །དེང་སང་སྦྱིན་སྲེག་བྱེད་པ་འགའ། །རྫས་སྔགས་བཅུ་ཙམ་ཡུན་ཚོད་ལ། །གཅིག་བཅུ་ཉི་ཤུ་སུམ་ཅུ་སོགས། །བརྗོད་ནས་བརྒྱ་ཐམ་ཐལ་ལོ་ཞེས། །
སྐད་པོ་ཆེ་ཡིས་ལོགས་ནས་བགྲངས། །དེ་ཡང་སྦྱིན་སྲེག་གྲངས་སུ་བྱེད། །འཆི་བསླུའི་ཚེ་ན་འཆི་བདག་ལ། །བྲེ་སྲང་ཞོ་ཆས་རྫས་གཞལ་ཚེ། །འདི་འདྲའི་མགོ་སྐོར་བྱེད་པ་བཤད། །སོ་སོ་སྐྱེ་བོས་སངས་རྒྱས་ལ། །མགོ་སྐོར་བྱེད་པ་ཨེ་
མ་མཚར། །འདི་ཡིས་འབྲས་བུ་ཅི་ཞིག་འགྲུབ། །དེས་ན་རྫས་སྔགས་རེ་རེ་བཞིན། །བགྲངས་པའི་གྲངས་ཀྱིས་ལས་བཞི་ལ། །སོ་སོའི་རྫས་སྔགས་གཙོར་བྱས་པའི། །བསྙེན་པའི་བཅུ་ཆ་བསྒྲུབ་པར་བྱ། །ཁ་ཅིག་གཏོར་མགྲོན་ལ་སོགས་པའི། །
མདུན་བསྐྱེད་གཤེགས་ཚེ་དམ་ཚིག་པ། །གཤེགས་ནས་ཡེ་ཤེས་པ་རང་ལ། །བསྡུ་སྟེ་དེ་ཡི་རྒྱུ་མཚན་ཡང་། །དེ་གཉིས་བཟང་ངན་ཐ་དད་ཕྱིར། །ངན་པ་གཤེགས་ནས་བཟང་པོ་ནི། །རང་ལ་བསྡུ་བ་ཡིན་ཞེས་ཟེར། །འདི་འདྲ་བླུན་པོའི་རིགས་
པ་སྟེ། །འོ་ན་མགྲོན་བཟང་བོས་པའི་ཚེ། །བསྙེན་བཀུར་བྱས་རྗེས་མགྲོན་བཟང་ཉིད། །འཁོར་དུ་བསྡུས་ནས་དེའི་ཚབ་ཏུ། །གཡོག་ངན་གཞན་ཞིག་གཏོང་དགོས་འགྱུར། །ཡོ་གར་བདག་ཉིད་དམ་ཚིག་པར། །བསྐྱེད་ནས་ཡེ་ཤེས་པ་
9-6-26a


བཅུག་སྟེ། །ཆོ་ག་ཚར་ནས་གཤེགས་པའི་ཚེ། །ཚུལ་འདི་ཅི་ཡི་ཕྱིར་མི་མཚུངས། །ལུང་རིགས་མན་ངག་མེད་པ་ཡི། །གྲུབ་མཐའ་བླུན་པོའི་ཁྱད་ནོར་ཡིན། །དེ་གཉིས་བཟང་ངན་ཐ་དད་དུ། །
འཛིན་པ་ཡོད་པ་དེ་ཉིད་ཀྱིས། །སྤྱན་དྲངས་པ་ཉིད་གཤེགས་དགོས་ཏེ། །ཚོགས་བསག་ཞིང་ཙམ་ཡིན་པའི་ཕྱིར། །བཟང་ངན་ཐ་དད་འཛིན་མེད་ན། །དེ་འདྲའི་བླང་དོར་བྱ་ཅི་དགོས། །མི་འཁྲུགས་མགོན་པོའི་དཀྱིལ་འཁོར་སོགས། །
ཚུལ་བཞིན་བྲིས་ནས་གནམ་རྒྱན་ལ། །བཏགས་པས་དེ་འོག་འགྲོ་རྣམས་ཀྱི། །བསོད་ནམས་སྤེལ་ཕྱིར་མཁས་རྣམས་མཛད། །འདི་ལ་ཁ་ཅིག་འཁོར་གྱི་དབུ། །ཕྱིར་བསྟན་བྲིས་ན་བློས་སློང་ཚེ། །དབུ་རྣམས་ཐུར་བསྟན་འབྱུང་བས་
ན། །ལྷ་མགོ་ནང་དུ་བསྟན་ཞེས་ཟེར། །འོ་ན་གཞལ་ཡས་ཁང་ལ་ཡང་། །མདའ་ཡབ་པུ་ཤུ་ལ་སོགས་པ། །ནང་ནས་རིམ་བཞིན་བྲིས་ནས་ནི། །རྩིག་པ་ཕྱི་རུ་འདྲི་དགོས་འགྱུར། །དེ་ལྟར་བྱས་ཀྱང་གཞལ་ཡས་ཀྱི། །སྟེང་དུ་འོག་གཞི་
འབྱུང་བའི་ཕྱིར། །ལྷ་སོགས་མཚན་མ་གཏན་མེད་པར། །འོག་གཞི་ཁོ་ན་འདྲི་དགོས་འགྱུར། །གཙོ་ཞལ་ཤར་བསྟན་འདྲི་ན་ནི། །བློས་སློང་ཚེ་ན་ནུབ་བསྟན་འགྱུར། །ནུབ་བསྟན་འདྲི་ན་དེ་འདྲ་བའི། །དཀྱིལ་འཁོར་རྒྱ་བོད་སུ་ཡིས་བྱས། །འོག་
གཞིར་སྤྱི་གཙུག་བསྟད་ནས་ནི། །ཕྱི་ནས་སློང་ན་མགོ་མཇུག་བསྒྱུར། །ནང་ནས་སློང་ན་གཙོ་བོ་ལ། །རྒྱབ་བསྟན་གསུམ་ལས་མ་འདས་པས། །འདི་འདྲའི་དཀྱིལ་འཁོར་ཡུལ་ཕྱོགས་དེའི། །གཙོ་འཁོར་ཀུན་གྱི་རྟེན་འབྲེལ་ལ། །
9-6-26b


གནོད་ཕྱིར་རྒྱལ་པོའི་ཁྲིམས་ཡོད་ན། །རྣམ་པ་ཀུན་ཏུ་དགག་པར་རིགས། །ལོགས་ལ་དཀྱིལ་འཁོར་འདྲི་བ་ལ། །བློས་སློང་ཚེ་ན་ཇི་ལྟར་འགྱུར། །དེ་བཅོས་པ་ཡི་ཐབས་སུ་ནི། །འདྲི་ལུགས་ཅི་ཡིན་སྨྲ་དགོས་སོ། །དེས་ན་ས་ལ་བཀྲམ་
པའམ། །ལོགས་ལ་འགྲེམས་སམ་གནམ་རྒྱན་ལ། །འདོགས་པ་གང་ཞིག་ཡིན་ཡང་རུང་། །འདྲི་ལུགས་ཁྱད་མེད་ཤེས་དགོས་སོ། །སྨན་བླའི་ཕོ་བྲང་ཞེས་བྱ་བ། །དཀྱིལ་འཁོར་ལྷ་རྣམས་ཙ་ཀ་ལིར། །བྲིས་པ་ཁ་ཕྱིར་བསྟན་ནས་
ནི། །མཆོད་རྟེན་བང་རིམ་ལྟ་བུར་བྱེད། །མིག་ལམ་མཛེས་པ་ལྟར་སྣང་བས། །ཉང་ཤབ་གཙང་གི་ཕྱོགས་འདིར་དར། །འདི་ཡང་ཉང་སྟོད་སྒོམ་ཆེན་གྱི། །ཉམས་སྣང་ལས་བྱུང་ཡིན་པར་གྲགས། །ཉམས་སྣང་བདུད་ཀྱི་མིན་ན་རུང་། །
མདོ་རྒྱུད་བསྟན་བཅོས་རྣམ་དག་ལས། །འདི་འདྲའི་དཀྱིལ་འཁོར་གསུངས་པ་མེད། །དེས་ན་ཅིར་འགྱུར་བརྟག་དགོས་སོ། །རྟེན་གྱི་གཞལ་ཡས་ཁང་མེད་པར། །ལྷ་ཡི་བཀོད་པ་ཙམ་ཡིན་ན། །རུང་མོད་འདི་ལ་གཙོ་བོ་མེད། །ཁོང་
སྟོང་བཞག་པས་མི་ཤེས་སོ། །གལ་ཏེ་སྟེང་དུ་པོ་ཏི་ཉིད། །བཞག་པ་གཙོ་བོ་ཡིན་སྙམ་ན། །དེ་ལྟ་ཡིན་ན་གཙོ་བོ་ལ། །འཁོར་གྱི་ལྷ་རྣམས་རྒྱབ་བསྟན་པས། །ཕྱི་ནང་རྟེན་འབྲེལ་ཀུན་ལ་གནོད། །བོད་ཀྱི་འབངས་རྣམས་རྒྱལ་
པོ་ལ། །ངོ་ལོག་བྱེད་པ་ལ་སོགས་ཀྱང་། །དེ་ནས་དར་བས་སྤང་བར་བྱ། །མཆོད་རྟེན་ལོགས་ལ་ལྷ་བྲི་བ། །བཤད་པ་མེད་མོད་བྱེད་ན་ཡང་། །དཀྱིལ་འཁོར་རྣམ་གཞག་མ་ཡིན་པས། །བསོད་ནམས་གསག་ཕྱིར་འགལ་བ་
9-6-27a


མེད། །འདི་ཡི་ཚུལ་ལུགས་ཞི་བ་འཚོས། །བྱ་རྒྱུད་སྤྱི་ཡི་དཀྱིལ་འཁོར་དང་། །མཐུན་པའི་རྣམ་གཞག་གསུངས་པ་ཉིད། །ཉམས་སུ་བླངས་ན་དགེ་ལེགས་འབྱུང་། །ཁ་ཅིག་ངན་སོང་སྦྱོང་རྒྱུད་
ནས། །གསུངས་པའི་ཆོ་ག་མི་བྱེད་པར། །གཤིན་པོའི་མིང་བྱང་བསྲེགས་པ་ཡིས། །དད་རྫས་མང་དུ་ལེན་པ་མཐོང་། །དཀོན་མཆོག་བརྩེགས་པའི་མདོ་སྡེ་ལས། །དད་རྫས་ཟ་བའི་ཉེས་མཐོང་ནས། །དགེ་སློང་ལྔ་བརྒྱས་བསླབ་པ་ཕུལ། །
དེ་ལ་སྟོན་པས་ལེགས་ཞེས་གསུངས། །གཞན་ཡང་འདུལ་བའི་གཞུང་ལུགས་ལས། །མི་སློབ་པ་ནི་བདག་པོར་སྤྱོད། །སློབ་པ་བྱིན་པར་སྤྱོད་པ་སྟེ། །བསམ་གཏན་ཀློག་དང་ལྡན་པ་ནི། །རྗེས་གནང་སྤྱོད་པས་ཉེས་པ་མེད། །ལྷག་མ་ལེ་
ལོས་བཅོམ་པ་ཡི། །བདག་ཉིད་རྣམས་ནི་བུ་ལོན་སྤྱོད། །ཅེས་གསུངས་སྔོན་གྱི་སྐྱེས་ཆེན་འགས། །སྟོང་ཉིད་འཇུ་རྩི་མ་རྟོགས་པ། །དད་རྫས་འཇུ་བ་ངས་མ་མཐོང་། །ཞེས་གསུངས་ཡིད་ལ་བཞག་ནས་ནི། །དད་རྫས་འཇུ་བར་འདོད་གྱུར་
ན། །ཚུལ་ཁྲིམས་རྣམ་དག་དང་ལྡན་པས། །བསམ་གཏན་ཀློག་ལ་བརྩོན་པར་བྱ། །ཁྱད་པར་གཤིན་པོ་རྗེས་འཛིན་ན། །ངན་སོང་སྦྱོང་རྒྱུད་ལ་སོགས་ལས། །གསུངས་པའི་ཆོ་ག་ཚུལ་བཞིན་དུ། །བྱ་བར་རྫོགས་པའི་སངས་རྒྱས་གསུངས། །
དེ་ཕྱིར་འདི་ལ་གཟབ་པར་བྱ། །དཀྱིལ་འཁོར་ལྷ་བཀོད་ཚངས་དབང་དང་། །གནོད་སྦྱིན་བཅུ་གཉིས་རྒྱལ་ཆེན་རྣམས། །སངས་རྒྱས་འཇིག་རྟེན་སྐུར་སྟོན་པ། །ཡིན་ཕྱིར་ཕྱག་མཆོད་སྐྱབས་འགྲོ་དང་། །འཁོར་གྱི་བདུན་འབུམ་དང་
9-6-27b


བཅས་ལ། །ཕྱག་མཆོད་སྐྱབས་འགྲོ་མི་བྱེད་ཀྱང་། །ཕྲིན་ལས་འཆོལ་བ་ཞི་འཚོས་གསུངས། །དེང་སང་རྣམ་དབྱེ་མི་ཤེས་པར། །ཁ་ཅིག་དཀྱིལ་འཁོར་ནང་བཀོད་ཀྱང་། །འཇིག་རྟེན་པར་འདོད་སྔར་བཀག་ཟིན། །ལ་ལ་འཁོར་
གཡོག་བདུན་འབུམ་ལ། །ཕྱག་འཚལ་སྐྱབས་སུ་འགྲོ་བ་མཐོང་། །འདི་ནི་སྐྱབས་འགྲོའི་བསླབ་བྱ་ལ། །གནོད་པས་ཞི་འཚོས་མི་བཞེད་དེ། །འཁོར་གཡོག་བདུན་འབུམ་ཕལ་ཆེ་བ། །འཇིག་རྟེན་རང་རྒྱུད་པ་ཡིན་ཕྱིར། །དེ་དག་
འདུལ་བའི་ཆེད་དུ་ནི། །དེ་དང་མཐུན་པའི་སྐུར་སྟོན་པ། །སངས་རྒྱས་འཇིག་རྟེན་སྐུར་སྟོན་པའི། །དགོས་པ་ཡིན་ཕྱིར་གཞན་ལའང་སྦྱར། །རྟེན་གྱི་ནང་རྫོང་གཟུངས་དྲིལ་ཚེ། །ཕལ་ཆེར་མཐའ་ནས་སྒྲིལ་བ་མཐོང་། །དེ་ཚེ་
ཨོཾ་སོགས་སྔགས་ཀྱི་མགོ།  ཕྱི་རུ་འབྱུང་ཞིང་སྔགས་མཇུག་རྣམས། །དབུས་སུ་འབྱུང་ཕྱིར་འདི་ཡང་ནི། །ཕྱི་ནང་རྟེན་འབྲེལ་ཀུན་ལ་གནོད། །མགོ་ནས་སྒྲིལ་ན་སྔགས་ཀྱི་མགོ།  དབུས་སུ་འབྱུང་ཕྱིར་བླང་བར་བྱ། །འདི་ནི་རྡོ་རྗེ་རྩེ་མོ་
ལས། །ཡི་གེ་ཨོཾ་ནི་ཅི་ཡིན་བརྗོད། །དཔལ་དང་གྲགས་དང་གཡང་དང་ནི། །སྐལ་བཟང་རྣམ་པ་དང་ལྡན་པ། །དམ་བཅའ་བ་དང་བཀྲ་ཤིས་དོན།      །ཁ་སྐོང་གི་དཔེ་ཕལ་ཆེར་དུ་འདི་བཞིན་སྣང་ཡང་ཚིག་འདི་སྒྲ་ཇི་བཞིན་ད་ལྟའི་རྩེ་མོ་ན་མེད།  འགྱུར་གཞན་ཡོད་ན་
མ་ངེས་སོ།   །ནོར་བུ་འཛིན་པའི་སྙིང་པོ་ཡིན། །ཞེས་གསུངས་པ་དང་མཐུན་པ་སྟེ། །དམ་པ་གོང་མའི་ཕྱག་ལེན་ཡིན། །གནོད་སྦྱིན་ཕོ་མོའི་འཁོར་ལོ་གཉིས། །ཁ་སྦྱར་རྟེན་གྱི་ཞབས་སྡོམ་དུ། །བྱས་ན་དཔལ་འབྱོར་འབྲས་འབྱུང་
9-6-28a


བར། །དཔའ་བོ་གྲུབ་པའི་རྒྱུད་ལས་གསུངས། །འདི་ལ་ཁ་ཅིག་སྔགས་ཀྱི་མགོ།  ནང་བསྟན་བྱེད་པ་སྔར་བཀག་ཟིན། །ལ་ལ་ཕོ་འཁོར་འོག་ཏུ་འདོད། །ཕོ་འཁོར་གཙོ་བོ་ཡིན་ན་ནི། །ཚུལ་འདི་ཤིན་ཏུ་འཐད་
གྱུར་ཏེ། །གཤེད་དམར་ལྷ་ལྔའི་བྲིས་སྐུ་བཞིན། །རྒྱུད་ལས་མོ་འཁོར་གཙོ་བོར་གསུངས། །དེ་ཚེ་མོ་འཁོར་འོག་ཉིད་དུ། །འབྱུང་སྟེ་སྒྲོལ་མ་བླ་མེད་བཞིན། །དེས་ན་གཙོ་མོ་ནོར་རྒྱུན་མའི། །མདུན་དང་རྟེན་གྱི་མདུན་གཉིས་པོ། །ཕྱོགས་
གཅིག་འབྱུང་ན་འཁྲུལ་པ་མེད། །དེ་སོགས་གསུང་རབ་ནས་བཤད་པའི། །འཕྲལ་གྱི་ལག་ལེན་ཐམས་ཅད་ཀྱང་། །མཁས་ལ་དྲིས་ནས་དག་པར་བྱ། །དེ་ལས་དཔལ་འབྱོར་ཕུན་ཚོགས་འབྱུང་། །རིམ་མམ་ཅིག་ཆར་བླངས་ཀྱང་རུང་། །
སྡོམ་གསུམ་ཆོ་གར་ལྡན་བྱས་ནས། །རྡོ་རྗེ་ཐེག་པའི་ཉམས་ལེན་དུ། །གསུམ་ཆར་བསྲུང་བ་སྔགས་སྡོམ་ཡིན། །རིག་པ་འཛིན་པའི་སྡོམ་པའི་སྐབས་ཏེ་བཞི་པའོ།།      ༈      །།དེ་ལྟར་སྡོམ་གསུམ་ལྡན་པ་ཡིས། །རིམ་གཉིས་ཟབ་མོའི་
ལམ་བསྒོམས་ན། །ཚེ་འདིའམ་བར་དོ་ལ་སོགས་སུ། །ཐམས་ཅད་མཁྱེན་པའི་གོ་འཕང་འགྲུབ། །འདི་ལ་སོ་སོ་སྐྱེ་བོ་ཡིས། །དབང་དང་རིམ་གཉིས་ལས་བྱུང་བའི། །ཡེ་ཤེས་ཕྱག་རྒྱ་ཆེ་བསྒོམས་པས། །མཚོན་བྱ་དོན་གྱི་ཡེ་ཤེས་
འཐོབ། །འཕགས་པའི་ས་ལ་ཀྱེ་རྡོ་རྗེར། །གནས་སོགས་བཅུ་གཉིས་གསུངས་པ་ནི། །བྱང་ཆུབ་སེམས་དཔའི་སར་གསུངས་ཕྱིར། །སློབ་པའི་ལམ་གྱི་དབྱེ་བ་ཡིན། །དེ་ཚེ་ཕྱི་ནང་ཡུལ་ཆེན་ནི། །སུམ་ཅུ་རྩ་གཉིས་འདུས་པ་ལས། །
9-6-28b


གནས་ནས་ཉེ་བའི་འཐུང་གཅོད་བར། །བཅུ་གཉིས་ས་རྣམས་འགྲུབ་པར་གསུངས། །བདེ་མཆོག་ཉུང་ངུ་ཁ་སྦྱོར་ལས། །ཕ་རོལ་ཕྱིན་དང་སྒོ་བསྟུན་ནས། །གནས་ནས་ཉེ་བའི་དུར་ཁྲོད་བར། །ཉི་ཤུ་རྩ་བཞི་ས་བཅུར་བསྡུས། །འདི་ལའང་
དཔེ་མེད་ཡེ་ཤེས་ལྡན། །བསྣན་པར་ཨ་བྷི་དྷ་ནར་གསུངས། །དེ་ཕྱིར་སློབ་ལམ་ས་བཅུ་གཉིས། །རྒྱུད་རྒྱལ་གཉིས་ཀ་དགོངས་པ་མཐུན། །ནང་དུ་སྦས་པའི་རྩ་ལྔ་དང་། །ཕྱི་རུ་ཡུལ་ཆེན་ལྷག་མ་ལྔ། །འདུས་པས་བཅུ་གསུམ་ས་བསྐྱེད་
པར། །རྣལ་འབྱོར་ཆེན་པོའི་རྒྱུད་ལས་གསུངས། །འདི་ལ་ཁ་ཅིག་ཕ་རོལ་ཏུ། །ཕྱིན་པའི་ས་བཅུ་ལས་གཞན་པའི། །སློབ་ལམ་མེད་པས་ལྷག་མ་གཉིས། །བཅུ་པའི་ནང་དུ་འདུས་ཞེས་སྨྲ། །ཕྱི་རོལ་ཡུལ་ཆེན་སུམ་ཅུ་བདུན། །དབང་དུ་
འདུས་པས་ལུས་ཀྱི་ནི། །རྩ་ཁམས་སུམ་ཅུ་སོ་བདུན་གྱི། །རླུང་སེམས་དབུ་མར་འདུས་པ་ལས། །ས་རྣམས་འགྲུབ་པའི་རྣམ་གཞག་ནི། །རྣལ་འབྱོར་ཆེན་པོའི་རྒྱུད་སྡེ་ལས། །གསུངས་པས་ཁས་ལེན་དེ་ཡི་ཚེ། །ལྷག་གཉིས་བཅུ་པར་ཇི་ལྟར་
འདུས། །རྣལ་འབྱོར་ཆེན་པོའི་ས་ལམ་གྱི། །རྣམ་གཞག་མི་བྱེད་དེ་ཡི་ཚེ། །བཅུ་གསུམ་ས་ཡི་ཐ་སྙད་མེད། །དེ་ཚེ་དབྱེ་བསྡུ་དོན་མེད་དེ། །གཞན་ཡང་དཔེ་མེད་ཡེ་ཤེས་ལྡན། །ཆོས་ཀྱི་སྤྲིན་དུ་མི་འདུས་ན། །གཉིས་པོ་བཅུ་པར་ཇི་ལྟར་འདུས། །
འདུས་ན་འཐུང་གཅོད་སོགས་གཉིས་ལས། །ཕྱེ་བའི་ཕྱི་ནང་ཡུལ་ཆེན་བརྒྱད། །ཉེ་བའི་དུར་ཁྲོད་དུ་འདུས་འགྱུར། །དགུ་པ་བཅུ་པ་གཉིས་ཀྱང་ནི། །བརྒྱད་པར་འདུས་ཞེས་མགོ་བསྒྲེ་ན། །ཆོས་མཐུན་ལན་ཉིད་ཇི་ལྟར་འདེབས། །ཕ་རོལ་ཕྱིན་པའི་
9-6-29a


གཞུང་ལུགས་ཀྱིས། །རྡོ་རྗེ་ཐེག་ལ་གནོད་མི་ནུས། །ནུས་ན་ཕ་རོལ་ཕྱིན་པ་ལའང་། །གྲུབ་མཐའ་འོག་མ་འོག་མ་ཡིས། །གོང་མ་གོང་མར་གནོད་པར་འགྱུར། །བསྐྱེད་རིམ་ལྷ་ཡི་རྣམ་གཞག་དང་། །འགལ་བའི་ཚུལ་ཡང་བརྗོད་པར་
བྱ། །བདག་མེད་ལྷ་མོ་བཅོ་ལྔ་ཡི། །སྟེང་འོག་དབུས་ཀྱི་ལྷ་མོ་གསུམ། །གྷསྨ་རཱི་རུ་མི་འདུ་ན། །ས་གཉིས་བཅུ་པར་ཇི་ལྟར་འདུས། །འདུས་ན་ལྷ་མོའི་གྲངས་ངེས་ཉམས། །ས་ལམ་དེ་ལྟར་མི་སྦྱོར་ན། །རྩ་བའི་རྒྱུད་ལས་རྩ་སོ་གཉིས། །གསུངས་པ་བརྟག་པ་ཕྱི་མར་ནི། །རྩ་
ནི་གཉིས་གཉིས་རྣལ་འབྱོར་མ། །རེ་རེའི་རྣམ་པ་རྣམས་སུ་བརྗོད། །རྐྱང་མ་རོ་མ་ཀུན་འདར་མ། །བདག་མེད་མར་གསུངས་འདི་དང་འགལ། །འཁོར་ལོ་སྡོམ་པའི་དཀྱིལ་འཁོར་གྱི། །བདེ་ཆེན་དམ་ཚིག་འཁོར་ལོ་ཡི། །ལྷ་རྣམས་གཞན་དུ་འདུས་མི་འདུས། །དཔྱད་པའི་
རིགས་པ་སྔར་བཞིན་མཚུངས། །མདོར་ན་ཕ་རོལ་ཕྱིན་པ་ཡི། །ས་ལམ་རྣམ་གཞག་ཕྱེད་པའི་ཚེ། །བཅུ་གསུམ་ས་ཡི་ཐ་སྙད་མེད། །རྣལ་འབྱོར་ཆེན་པོའི་རྒྱུད་སྡེ་ལས། །གསུངས་པའི་ས་ལམ་རྣམ་གཞག་ལ། །བཅུ་གསུམ་ས་རུ་འབྱེད་པའི་ཚེ། །ཕ་རོལ་ཕྱིན་ལ་མངོན་ཞེན་ནས། །
དེ་ཡི་ལུགས་དང་བསྟུན་མི་བྱ། །གསང་བ་ཆེན་པོའི་རྒྱུད་སྡེ་ལས། །ཕ་རོལ་ཕྱིན་དང་སྒོ་བསྟུན་པའི། །རྣམ་གཞག་གསུངས་པའང་དེ་ཉིད་ལས། །མངོན་ཞེན་ཆེ་རྣམས་དྲངས་ཕྱིར་གསུངས། །དཔལ་ལྡན་ཟླ་བ་གྲགས་པ་ཡིས། །མདོ་སོགས་ལ་ནི་རབ་ཞུགས་པའི། །འགྱོད་པ་ཟློག་པར་
བྱེད་པ་དང་། །ཞེས་གསུངས་པ་ཡང་འདི་ལ་དགོངས། །ཁ་ཅིག་ཕ་རོལ་ཕྱིན་པ་ནས། །བཤད་པའི་སྐུ་གསུམ་ཡེ་ཤེས་བཞི། །རྡོ་རྗེ་ཐེག་པའི་བཅུ་གཅིག་ས། །ཡིན་ཕྱིར་དེ་ཡི་གོང་དུ་ཡང་། །བཅུ་གཉིས་བཅུ་གསུམ་བགྲོད་ཅེས་ཟེར། །འདི་ཡང་ཕ་རོལ་ཕྱིན་པ་ལས། །བཅུ་གཅིག་
9-6-29b


པར་བཤད་ལ་འཁྲུལ་ནས། །གྲངས་དང་མཚན་གཞི་ནོར་བར་ཟད། །བྱེ་བྲག་སྨྲ་བའི་གཞུང་ལུགས་ནས། །རྣལ་འབྱོར་ཆེན་པོའི་རྒྱུད་སྡེའི་བར། །འབྲས་བུའི་རྣམ་གཞག་གང་བཤད་རྣམས། །རང་རང་གདུལ་བྱའི་བློ་ཉིད་ལ། །འཚམས་པའི་ཡོན་ཏན་ལྡོག་པ་ཉིད། །
སྨོས་པའི་ཁྱད་པར་མ་གཏོགས་པ། །མཐར་ཐུག་འབྲས་བུར་ཁྱད་པར་མེད། །དཔེར་ན་ཤཱཀ་ཐུབ་ཡོན་ཏན་བཞིན། །གཞུང་དེར་འབྲས་བུར་བཤད་པ་རྣམས། །དེ་ཡི་ལམ་གྱིས་ཐོབ་དགོས་ན། །དངོས་སྨྲའི་གཞུང་ལས་བཤད་པ་ཡི། །འབྲས་བུ་ས་མཚམས་
གང་དུ་འཇོག །འབྲས་བུ་སྐུ་ཡི་རྣམ་གཞག་ལ། །བྱེ་སྨྲས་རྣམ་གྲོལ་ཆོས་སྐུ་དང་། །གཟུགས་སྐུ་གཉིས་འདོད་ལོངས་སྤྲུལ་གྱི། །དོན་དང་ཐ་སྙད་གཉིས་ཀ་མེད། །མདོ་སྡེ་པ་སོགས་གོང་མ་གསུམ། །སྐུ་གསུམ་ཡེ་ཤེས་བཞི་རུ་འདོད། །རྒྱུད་སྡེ་འོག་མ་གསུམ་
པོར་ཡང་། །སྐུ་གསུམ་འདི་དང་ཆ་འདྲ་ལ། །རྣམ་པའི་འདོད་ཚུལ་སོ་སོར་ཡོད། །གཟུགས་སྐུ་རིགས་ལྔར་འདོད་པའི་ཚེ། །འབྱུང་བ་ལྔ་དང་ཡེ་ཤེས་ལྔ། །དག་བྱ་དག་བྱེད་སྦྱར་ནས་གསུངས། །རྣལ་འབྱོར་ཆེན་པོའི་རྒྱུད་སྡེ་ལས། །རྒྱུ་ཡི་སྐབས་སུ་དབང་བཞི་དང་། །
བསྐྱེད་རིམ་ལ་སོགས་ལམ་བཞི་པོ། །བསྒོམས་པར༷་སྐུ་བཞི་འབྱུང་བར་བཞེད། །རྣལ་འབྱོར་དབང་ཕྱུག་མན་ངག་ལས། །དྲུག་ཚན་བཞི་རུ་སྦྱར་བ་དང་། །སྐུ་ལྔའི་རྣམ་གཞག་གསུངས་པ་ཡོད། །གསང་ཆེན་ཡིན་ཕྱིར་འདིར་མ་བཤད། །འཇམ་དཔལ་རང་གི་ལྟ་བ་ཡི། །
འདོད་པ་མདོར་བསྟན་མདོ་ལས་ཀྱང་། །སྐུ་གཅིག་ནས་ནི་ལྔ་ཡི་བར། །རྣམ་གཞག་རྣམ་པ་ལྔ་རུ་གསུངས། །སྐུ་གཅིག་ཡེ་ཤེས་སྐུ་ཡིན་ཏེ། །ཡེ་ཤེས་མིག་གཅིག་དྲི་མ་མེད། །སྐུ་གཉིས་རང་དོན་དོན་དམ་དང་། །གཞན་དོན་ཀུན་རྫོབ་སྐུ་ཉིད་ཡིན། །སྐུ་གསུམ་ཆོས་དང་ལོངས་སྤྱོད་
9-6-30a


རྫོགས། །སྤྲུལ་པའི་སྐུ་ཉིད་ཡིན་པར་གསུངས། །སྐུ་བཞི་ཉིད་ཀྱང་བཤད་བྱ་སྟེ། །ངོ་བོ་ཉིད་ལོངས་རྫོགས་བཅས་དང་། །དེ་བཞིན་གཞན་པ་སྤྲུལ་པ་དང་། །ཆོས་སྐུ་མཛད་པར་བཅས་པ་སྟེ། །རྣམ་པ་བཞིར་ནི་ཡང་དག་བརྗོད། །ཅེས་པ་མདོ་དེའི་
ལུང་ཚིག་ཡིན། །བྱམས་པས་ནི་ཞེས་ཚིག་སྦྱོར་ཚེ། །སྐུ་གསུམ་ཆོས་སྐུའི་དབྱེ་བར་བཞེད། །འདིར་ནི་དང་ཞེས་འབྱེད་པའི་ཚེ། །ཆོས་སྐུ་དབྱེ་བའི་གྲངས་སུ་བཞེད། །སྐུ་ལྔ་ཉིད་ཀྱང་ལུང་དེར་ནི། །སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །སངས་རྒྱས་
ལྔ་བདག་ཅོད་པན་ཅན། །སྤྱན་ལྔ་ཆགས་པ་མེད་པ་འཆང་། །ཞེས་པའི་ཚིག་གིས་གསུངས་པ་ཡིན། །དེ་འདྲའི་རྣམ་དབྱེ་མི་ཤེས་པར། །ཁ་ཅིག་ཕ་རོལ་ཕྱིན་པ་ལའང་། །སྐུ་བཞི་བྱམས་པའི་ལུང་ཉིད་ཀྱིས། །འགྲུབ་པར་སྨྲ་བ་ལུང་ཚིག་ལ། །དཔྱད་པའི་ནུས་པ་མེད་པར་ཟད། །
དེས་ན་ལེགས་པར་དཔྱོད་ལ་སྨྲོས། །མདོར་ན་ཉན་ཐོས་ཐེག་པ་ནས། །གསང་ཆེན་བླ་ན་མེད་པའི་བར། །འབྲས་བུ་དོན་གཅིག་བཤད་པའི་ཚུལ། །ཐ་དད་སྤྲོ་བ་བསྐྱེད་ཕྱིར་ཡིན། །འབྲས་བུའི་སྐབས་ཏེ་ལྔ་པའོ།།    །།དེ་ལྟར་ཚུལ་བཞིན་བཤད་པ་འདི། །བདག་ཉིད་གྲགས་
པ་བསྒྲགས་པའམ། །གཞན་ལ་གནོད་པའི་ཕྱིར་མིན་ཏེ། །གཅིག་ཏུ་བསྟན་ལ་ཕན་ཕྱིར་ཡིན། །རྒྱལ་བས་ལུང་བསྟན་ཀླུ་སྒྲུབ་སོགས། །འཛམ་གླིང་མཛེས་པའི་རྒྱན་རྣམས་ཀྱིས། །འཕགས་པའི་ཡུལ་དུ་ཕྱི་ནང་གི།  ལོག་སྨྲའི་མུན་པ་བསལ་བར་མཛད། །ལྗོངས་འདིར་
རིན་ཆེན་བཟང་པོ་དང་། །བླ་ཆེན་འབྲོག་དང་འགོས་སོགས་ཀྱིས། །རྡོ་རྗེ་ཐེག་པའི་བསྟན་པ་མཆོག །བཤད་སྒྲུབ་ཆུ་བོའི་རྒྱུན་བཞིན་མཛད། །དེ་རྗེས་ཆོས་ལོག་འཕེལ་བ་རྣམས། །ས་སྐྱའི་འཇམ་དབྱངས་གྲགས་ཐོབ་དེས། །ལུང་རིགས་འོད་ཀྱིས་རབ་བསལ་ནས། །ལམ་བཟང་
9-6-30b


སྣང་བ་གསལ་བར་མཛད། །མགོན་པོ་དེ་ཉིད་སློབ་ཚོགས་དང་། །བཅས་པ་ཞིང་གཞན་གཤེགས་གྱུར་ནས། །རིང་ཞིག་ལོན་ནས་བོད་ཡུལ་འདིར། །ལུང་རིགས་མན་ངག་དང་བྲལ་བའི། །རང་བཟོའི་ཆོས་ལུགས་དུ་མ་ཡིས། །བསྟན་པའི་ཉམས་ལེན་སྡོམ་གསུམ་ལ། །གནད་ཀྱི་དོན་
རྣམས་བཤིགས་ནས་ནི། །ཐོས་ཆུང་མགོ་སྐོར་མང་དུ་བྱུང་། །དེ་དག་ལུང་དང་རིགས་པ་ཡིས། །རྣམ་པར་བསལ་ནས་གནད་རྣམས་ལ། །སྐལ་ལྡན་མ་འཁྲུལ་སྤྱོད་པའི་ཕྱིར། །བསྟན་བཅོས་ཆེན་པོ་འདི་བྱས་སོ། །ཕྱོགས་ཞེན་རབ་རིབ་དང་བྲལ་ཞིང་། །རྣམ་དཔྱོད་གསལ་བའི་མིག་ལྡན་པས། །
ཚུལ་བཞིན་བལྟས་ན་ལམ་བཟང་གི།  སྣང་བ་གསལ་བར་འགྱུར་རོ་ཞེས། །ཁོ་བོས་གསང་མཐོའི་སྐད་ཀྱིས་སྒྲོགས། །ཅི་ཕྱིར་ཞེ་ན་མདོ་རྒྱུད་ཀྱི། །གནད་ལ་བློ་གྲོས་དྲི་མེད་ཀྱིས། །དཔྱད་ནས་སྨྲས་པ་ཡིན་ཕྱིར་རོ། །དེ་སླད་སྙིགས་མའི་དུས་འདི་རུ། །སྐལ་ལྡན་ཟབ་དོན་དོན་གཉེར་
རྣམས། །ལེགས་བཤད་འདི་ཡིས་འཁྲིད་བྱས་ནས། །གསུང་རབ་གྲོང་ཁྱེར་བགྲོད་པར་རིགས། །བསོད་ནམས་འདི་ཡིས་ཚོགས་གཉིས་རི་བོའི་རྩེར། །སྤངས་རྟོགས་ནུས་པའི་ལུས་སྟོབས་རབ་རྒྱས་ཏེ། །མཐའ་ཡས་འགྲོ་ལ་སྲིད་པའི་མཐར་ཐུག་པར། །དམ་ཆོས་སེ༷ང་གེ༷འི་སྒྲ་དབྱངས་སྒྲོགས་
པར་ཤོག །གང་སྐུ་འཇིགས་རུང་སྤྲིན་སྔོན་ཀློང་དཀྱིལ་ནས། །ཞལ་དམར་རྣམ་པར་གཡོ་བའི་གློག་ཕྲེང་འཁྱུག ། ཧཱུྃ་ཕཊ་འབྲུག་གི་འུར་ཆེམ་སྒྲོགས་པ་ཅན། །སྲུང་མའི་དབང་པོས་ལེགས་བཤད་འདི་སྤེལ་ཅིག།    །།  སྡོམ་པ་གསུམ་གྱི་རབ་ཏུ་དབྱེ་བའི་ཁ་སྐོང་གཞི་ལམ་འབྲས་གསུམ་
གསལ་བར་བྱེད་པའི་ལེགས་བཤད་འོད་ཀྱི་སྣང་བ་ཞེས་བྱ་བ་འདི་ནི།  དཀྱིལ་འཁོར་རྒྱ་མཚོའི་རིགས་བདག་རྡོ་རྗེ་འཆང་དང་དབྱེར་མ་མཆིས་པ་ཐམས་ཅད་མཁྱེན་པ་ཀུན་དགའ་བཟང་པོ་ལ་སོགས་པ་ཡོངས་འཛིན་དུ་མའི་ཞབས་རྡུལ་སྤྱི་བོས་བླངས་པ་ལ་བསྟེན་ནས། །སྡེ་སྣོད་དང་རྒྱུད་སྡེའི་དོན་ལ་མ་
9-6-31a


འཁྲུལ་བའི་ངེས་པ་གཏིང་ནས་རྙེད་པ།  ཤཱཀྱའི་དགེ་སློང་བསོད་ནམས་སེང་གེས་དཔལ་ལྡན་ས་སྐྱ་པཎྜི་ཏ་ཆོས་ཀྱི་དབྱིངས་སུ་ཞུགས་ནས་ལོ་ཉིས་བརྒྱ་དང་ཉི་ཤུ་རྩ་ལྔ་འདས་པ་ས་ཕོ་ཁྱིའི་ལོ་ལ་རྟ་ནག་རིན་ཆེན་རྩེ་ཐུབ་བསྟན་རྣམ་པར་རྒྱལ་བའི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ། །འདིས་
བསྟན་པ་དང་སེམས་ཅན་ལ་ཕན་པ་དཔག་ཏུ་མེད་པར་འབྱུང་བར་གྱུར་ཅིག། ༈། །ཨོཾ་སྭ་སྟི། །རྒྱལ་བསྟན་མངའ་བདག་ས་སྐྱ་པཎྜི་ཏས། །རྒྱལ་བསྟན་འཁྲུལ་སེལ་བསྟན་བཅོས་ཁྱད་པར་ཅན། །རྒྱལ་བསྟན་གསལ་བྱེད་སྡོམ་གསུམ་རབ་དབྱེ་ཞེས། །རྒྱལ་བའི་བསྟན་འཛིན་ཡོངས་ཀྱི་ལམ་
བཟང་མཛད། །མཁས་པ་དག་གིས་སླར་ཡང་བསྟན་པ་ལ། །མཁས་པའི་བྱ་བ་འཆད་རྩོད་རྩོམ་པ་ཡིས། །མཁས་པའི་ཕྱག་རྗེས་འཁྲུལ་མེད་བསྟན་པའི་རྒྱུན། །མཁས་པ་དག་གིས་གསལ་བར་གྱིས་ཞེས་གདམས། །ཀུན་མཁྱེན་རྒྱལ་བའི་བསྟན་པའི་སྲོག་ཤིང་མཆོག །ཀུན་གཟིགས་ཆོས་ཚུལ་རྒྱ་མཚོའི་
བདག་ཉིད་ཆེ། །ཀུན་མཁྱེན་བླ་མ་བསོད་ནམས་སེང་གེ་ཡི། །ཀུན་ཕན་ལེགས་བཤད་བསམ་འཕེལ་རིན་པོ་ཆེ། །ཆོས་སྦྱིན་མི་འཛད་པར་དུ་བསྐྲུན་འདིས་དགེས། །རྒྱལ་བའི་བསྟན་དང་བསྟན་འཛིན་སྤྱི་ཁྱད་པར། །ས་སྐྱའི་འཇམ་མགོན་ཡབ་སྲས་སྐུ་མཆེད་དང་། །མཁན་ཆེན་ཐམས་ཅད་མཁྱེན་
གཟིགས་ཡོངས་འཛིན་མཆོག །བྱམས་པ་སྨོན་ལམ་མཚན་ཅན་ཞབས་པད་བརྟན། །ས་ངོར་བསྟན་པ་མདོ་སྔགས་བཤད་སྒྲུབ་རྒྱུན། །འཕེལ་རྒྱས་སྣོད་བཅུད་བདེ་ཞིང་བདག་འཁོར་བཅས། །མི་མཐུན་ཕྱོགས་ལས་རྒྱལ་ཞིང་ལུགས་ཟུང་གི། །འདོད་དགུ་ལྷུན་གྲུབ་ངུར་སྨྲིག་རྒྱལ་མཚན་འཛིན། །དོན་
གཉིས་ལྷུན་གྲུབ་དཔལ་ལ་སྤྱོད་པར་ཤོག །བླ་མ་མཆོག་གསུམ་ཆོས་སྲུང་ནོར་ལྷ་ཡིས། །ལུགས་ཟུང་ལེགས་ཚོགས་འཕེལ་བརྟན་བཀྲ་ཤིས་སྩོལ། །ཞེས་ལུགས་བརྒྱའི་འདུན་ས་སྡེ་དགེ་ལྷུན་གྲུབ་སྟེང་གི་ཆོས་གྲྭར་པར་དུ་འགོད་ཚེ་སྡེ་དགེ་ས་སྐྱོང་ལྷ་བཙུན་ཨཱ་ན་སྣྲས་སྨྲས་པ་དགེ།།    །།
9-6-31b


empty page
9-7-1a


༄༅།  །སྡོམ་གསུམ་ཁ་སྐོང་གི་བསྡུས་དོན་བཞུགས་སོ།།    །།
9-7-1b


༄༅། །བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །སྡོམ་པ་གསུམ་གྱི་རབ་ཏུ་དབྱེ་བའི་ཁ་སྐོང་གཞི་ལམ་འབྲས་གསུམ་གསལ་བར་བྱེད་པའི་ལེགས་བཤད་
འོད་ཀྱི་སྣང་བ་ཞེས་བྱ་བ་འདི་ལ་དོན་གསུམ་སྟེ། །བརྩམ་པ་ལ་འཇུག་པ་ཀླད་ཀྱི་དོན། །བརྩམ་པར་བྱ་བ་གཞུང་གི་དོན། །བརྩམ་པ་མཐར་ཕྱིན་པ་མཇུག་གི་དོན་ནོ། །དང་པོ་ལ་གསུམ་སྟེ། །མཚན་གྱི་དོན།  སྡོམ་པ།
མཆོད་པར་བརྗོད་པ། །བརྩམ་པར་དམ་བཅའ་བའོ། །  རྒྱལ་བའི། །གཉིས་པ་ལ་གཉིས་ཏེ། །འགྱུར་ཕྱག་དང་མཚུངས་པའི་མཆོད་བརྗོད་དང་། །  རྗེ་བཙུན།  བརྗོད་བྱ་དང་མཐུན་པའི་མཆོད་བརྗོད་དོ།  ཡོན་ཏན།  གཉིས་པ་བརྩམ་
པར་བྱ་བ་གཞུང་གི་དོན་ལ་གཉིས་ཏེ།  དོན་གསུམ་ངོས་གཟུང་བའི་སྒོ་ནས་ལུས་མདོར་བསྟན། །ལུང་རིགས་ཀྱིས་རྣམ་པར་དཔྱད་པའི་སྒོ་ནས་ཡན་ལག་རྒྱས་པར་བཤད་པའོ། །དང་པོ་ལ་གསུམ། །གཞི་ངོས་གཟུང་།  རང་བཞིན།  ལམ་
9-7-2a


ངོས་གཟུང་།  ཐེག་གསུམ།  འབྲས་བུ་ངོས་གཟུང་བའོ། །གནས་གྱུར། །གཉིས་པ་ལ་གསུམ་སྟེ།  གཞིའི་སྐབས། །ལམ་གྱི་སྐབས།  འབྲས་བུའི་སྐབས་སོ། །དང་པོ་ལ་གསུམ་སྟེ། །རྣམ་གཞག་
སྤྱིར་བསྟན། །ལོག་རྟོག་བྱེ་བྲག་ཏུ་དགག །གནད་ཀྱི་དོན་བསྡུས་ཏེ་བསྟན་པའོ། །མདོར་ན། །དང་པོ་ལ་གཉིས་ཏེ། །དངོས་པོར་སྨྲ་བའི་ལུགས།  གཞི་ལ།  དབུ་མ་པའི་ལུགས་སོ། །འདི་ལ་བཞི་སྟེ། །བཀའ་སྲོལ་གཉིས་ཀྱི་
ལུགས་ངོས་གཟུང་།  འདིར་ནི།  ཡོན་ཏན་གྱི་ལྡོག་པ་སོ་སོར་འཆད་པའི་ཚུལ། །དེས་ན་དགོངས་པ་གཅིག་ཏུ་གྲུབ་པ།  དེས་ན།  དེ་ཉིད་ཀྱི་མཚན་གྱི་རྣམ་གྲངས་བསྟན་པའོ། །གཉིས་པ་ལ་གསུམ་སྟེ།  རྒྱུད་བླར་ཇི་སྙེད་པའི་
ལྡོག་པ་བཤད་ཚུལ།  དེའང་།  རིགས་ཚོགས་ལས་ཇི་ལྟ་བའི་ལྡོག་པ་བཤད་ཚུལ།  ཀླུ་སྒྲུབ།  བསྟོད་ཚོགས་ལས་ཟུང་འཇུག་གི་ལྡོག་པ་བཤད་ཚུལ་ལོ། །  བསྟོད་པའི།  བཞི་པ་ལ་གཉིས་ཏེ། །ཕར་ཕྱིན་ཐེག་པ་ནས་གསུངས་པའི་མཚན་
9-7-2b


གྱི་རྣམ་གྲངས།  ཆོས་དབྱིངས།  རྡོ་རྗེ་ཐེག་པ་ནས་གསུངས་པའི་མཚན་གྱི་རྣམ་གྲངས་སོ། །  ཟབ་མོའི།  གཉིས་པ་ལོག་རྟོག་བྱེ་བྲག་ཏུ་དགག་པ་ལ་ལྔ་སྟེ། །དགག་བྱ་གཅད་པའི་མེད་དགག་སྙིང་པོར་འདོད་པ་དགག་པ།  སྙིང་པོ་གཉིས་སུ་ཕྱེ་བ་ལ་དཔྱད་པ།  འགྲོ་ཀུན་
སྙིང་པོས་སྟོང་པར་འདོད་པ་དགག་པ།  དག་པ་གཉིས་པོ་འགལ་བར་འདོད་པ་དགག་པ། །སྙིང་པོ་དཔྱད་བཟོད་ཀྱི་བདེན་གྲུབ་ཏུ་འདོད་པ་དགག་པའོ། །དང་པོ་ལ་གཉིས་ཏེ། །ཕྱོགས་སྔ་མ་བརྗོད་པ་དང་། །  དེང་སང་།  དེ་དགག་པའོ། །འདི་ལ་གཉིས་ཏེ། 
བདེན་པ་བཀག་ཙམ་གཞན་སེལ་ཡིན་པ།  འདི་ཉིད།  དེས་ན་འཁོར་འདས་ཀྱི་གཞིར་མི་རུང་བའོ། །  འདི་ལ།  གཉིས་པ་ལ་གསུམ་སྟེ། །ཇི་ལྟར་གསུངས་པའི་ཚུལ།  ཁ་ཅིག་དགོངས་པ་ངོས་གཟུང་བ།  ཟུང་འཇུག །གཞན་དུ་རྟོག་པ་དགག་པའོ། །གནས་སུ། །གསུམ་པ་ལ་
གཉིས་ཏེ།  ཕྱོགས་སྔ་མ་བརྗོད་པ་དང་།  འགའ་ཞིག་དེ་དགག་པའོ། །འདི་ལ་གསུམ་སྟེ།  ལུང་རིགས་ཀྱི་གནོད་བྱེད་བསྟན་པ། །འཇམ་དབྱངས་བླ་མའི་དགོངས་པར་མི་འཐད་པ།  འཇམ་དབྱངས།  མ་འཁྲུལ་པའི་གདམས་པ་སྦྱིན་པའོ། །དང་པོ་ལ་གཉིས་ཏེ། 
མདོར་བསྟན།  འདི་ནི།  རྒྱས་པར་བཤད་པའོ། །འདི་ལ་གཉིས་ཏེ།  འཇིག་རྟེན་གྱི་ཐ་སྙད་དང་འགལ་བ།  སྦྲུལ་གྱི།  བསྟན་བཅོས་ཀྱི་ཐ་སྙད་དང་འགལ་བའོ། །དྲི་མེད། །གསུམ་པ་མ་འཁྲུལ་བའི་གདམས་པ་སྦྱིན་པ་ལ་གསུམ་སྟེ།  ཕྱོགས་འཛིན་དོར་ནས་
གཟུང་བར་གདམས་པ།  དེས་ན།  དྲང་ངེས་ཀྱི་དགོངས་པ་ངོས་གཟུང་བ།  ཆོས་དབྱིངས།  ཤེས་བྱེད་ཀྱི་ལུང་དང་སྦྱར་བའོ། །འདི་ཉིད།  བཞི་པ་དག་པ་གཉིས་པོ་འགལ་བར་འདོད་པ་དགག་པ་ལ་གཉིས་ཏེ། །འདོད་པ་བརྗོད་པ་དང་།  ཁ་ཅིག་རང་།  དེ་དགག་པའོ། །འདི་ལ་
9-7-3a


གསུམ་སྟེ། །འགལ་བར་འདོད་པ་སྨད་བདེ་སྨྲ།  འགལ་བའི་རྒྱུ་མཚན་དགག་པ།  དག་ཆ།  མི་འགལ་བའི་རྒྱུ་མཚན་བསྟན་པའོ། །དེས་ན།  ལྔ་པ་སྙིང་པོ་དཔྱད་བཟོད་ཀྱི་བདེན་གྲུབ་ཏུ་འདོད་པ་དགག་པ་ལ་གཉིས་ཏེ། །ཕྱོགས་སྔ་མ་བརྗོད། 
དེ་ལ་དཔྱད་པ་བྱ་བའོ། །དང་པོ་ལ་གཉིས་ཏེ།  སྒྲོ་སྐུར་སྤངས་ནས་སྨྲ་བ་པོ་ངོས་གཟུང་།  མཁྱེན་རབ།  དེས་སྨྲས་པའི་གྲུབ་མཐའི་རྣམ་གཞག་གོ།  འདི་ལ་ལྔ་སྟེ།  གཞིའི་གནས་ཚུལ།  ཤེས་བྱ།  འབྲས་བུ་ཐོབ་ཚུལ།  དོན་དམ།  རང་སྟོང་གཞན་སྟོང་གི་ཁྱད་པར།
གཞི་འབྲས་དབྱེར་མེད་པའི་དོན།  དོན་དམ།  མདོ་རྒྱུད་བསྟན་བཅོས་གྱི་དགོངས་པར་བསྟན་པའོ། །དཔལ་ཕྲེང་། །གཉིས་པ་ལ་གསུམ་སྟེ། །སྒྲོ་སྐུར་སྤངས་ནས་དཔྱད་པར་དམ་བཅའ་བ།  འདི་ལ།  སྒྲོ་སྐུར་སྤངས་པའི་དཔྱད་པ་དངོས།  སྒྲོ་སྐུར་སྤངས་ནས་དཔྱད་པའི་དན་དམ་
རྒྱུ་མཚན་ནོ། །བདག་ནི།  གཉིས་པ་ལ་གཉིས་ཏེ།  འདོད་པ་མཐུན་པ་བླང་བྱར་བསྟན།  གཞི་འབྲས།  ལྷག་མ་ཐ་སྙད་དོན་དམ་དང་འགལ་བའོ། །འདི་ལ་གཉིས་ཏེ།  མདོར་བསྟན།  ལྷག་མ།  རྒྱས་པར་བཤད་པའོ། །འདི་ལ་གཉིས་ཏེ།  གཞི་འབྲས་ཀྱི་འདོད་ཚུལ་
ཐ་སྙད་དང་འགལ་བ།  གནས་ལུགས་ཀྱི་འདོད་ཚུལ་དོན་དམ་དང་འགལ་བའོ། །དང་པོ་ལ་གཉིས་ཏེ།  གཞིའི་འདོད་ཚུལ་ཐ་སྙད་དང་འགལ་བ།  འབྲས་བུའི་འདོད་ཚུལ་རིགས་པ་དང་འགལ་བའོ། །ཆོས་སྐུ།  དང་པོ་ལ་བཞི་སྟེ།  དྲི་བཅས་སངས་རྒྱས་
ཡིན་ན་ཐ་སྙད་མི་རུང་བར་ཐལ་བ།  ཐ་སྙད་དང་འགལ་བ་སྐྱོན་དུ་མི་འགྱུར་བ་དགག་པ།  ཐ་སྙད་ཚེ།  ཐ་སྙད་ཉིད་ལ་ཡང་སྔ་མ་ཁས་ལེན་པ་དགག་པ།  གལ་ཏེ་ཐ།  དེས་ན་མཚན་གཏགས་ཕྱེ་བ་གནད་དུ་གཅེས་པའོ། །འདི་ལ་བཞི་སྟེ།  མཚན་བཏགས་ཕྱེ་བ་དཔེ་
9-7-3b


དང་བཅས་ཏེ་བསྟན།  དེས་ན་དོན་ལ་མཚན་བཏགས་མི་ཕྱེ་བ་ལུང་རིགས་དང་འགལ།  གལ་ཏེ།  དཔེ་ལ་མཚན་བཏགས་མི་ཕྱེད་པ་རྒྱ་བོད་ཀྱི་གཞུང་དང་འགལ།  དེས་ན་འཁྲུལ་མེད་ཀྱི་གནད་བླང་བྱར་བསྟན་པའོ། །དེས་ན་གཞུང་།  གསུམ་པ་ལ་གསུམ་སྟེ།  རྒྱ་གར་མཁས་
པའི་ལུང་དང་འགལ།  དེས་ན།  རང་གི་ཁས་བླངས་པའི་བོད་གཞུང་དང་འགལ།  གཞུང་ལས།  དེའི་དགོངས་པའང་དཔྱད་དུ་ཡོད་པའོ། །འོན་ཀྱང་།  གཉིས་པ་གནས་ལུགས་ཀྱི་འདོད་ཚུལ་དོན་དམ་དང་འགལ་བ་ལ་བཞི་སྟེ།  ངེས་དོན་གྱི་གཞུང་དང་འགལ་བ།  དོན་དམ། 
དངོས་སྨྲ་འགོག་པའི་རིགས་པ་དང་འགལ་བ།  སངས་རྒྱས།  མདོ་སྡེ་སྔ་ཕྱིའི་དོགས་སྤོང་དང་འགལ་བ།  ཤེས་རབ།  མདོ་རྒྱུད་བསྟན་བཅོས་ཀྱི་དགོངས་པར་མི་འཐད་པའོ། །ཆོས་དབྱིངས།  གཉིས་པ་ལམ་གྱི་སྐབས་ལ་གཉིས་ཏེ།  ལམ་གྱི་རྣམ་གཞག་སྤྱིར་བསྟན།  སྡོམ་གསུམ་
གྱི་ལམ་སོ་སོར་བཤད་པའོ། །དང་པོ་ལ་གཉིས་ཏེ།  ཕ་རོལ་ཏུ་ཕྱིན་པའི་ལམ་གྱི་འདོད་ཚུལ།  ལམ་ལ།  རྡོ་རྗེ་ཐེག་པའི་ལམ་གྱི་འདོད་ཚུལ་ལོ། །ཕ་རོལ། །གཉིས་པ་ལ་གསུམ་སྟེ།  སོ་ཐར་གྱི་སྡོམ་པའི་སྐབས།  བྱང་སེམས་ཀྱི་སྡོམ་པའི་སྐབས།  རིག་པ་
འཛིན་པའི་སྡོམ་པའི་སྐབས་སོ། །དང་པོ་ལ་གཉིས་ཏེ།  ནོར་བའི་མཐའ་བཀག །མ་ནོར་བའི་གནད་བསྟན་པའོ། །  དེས་ན་བྱང་།  དང་པོ་ལ་གཉིས་ཏེ།  ངོ་བོ་ལ་ལོག་རྟོག་དགག །ཆོ་ག་ལ་ལོག་རྟོག་དགག་པའོ། །དང་པོ་ལ་བཞི་སྟེ།  ཉན་ཐོས་
པའི་ལུགས་ངེས་དོན་དུ་འཛིན་པ་དགག །དེ་ལ་ཁ།  སོ་ཐར་ལ་ངེས་འབྱུང་གིས་མ་ཁྱབ་པ་དགག །ལ་ལ་སོ། །སོ་ཐར་གྱི་ངོ་བོ་ལ་ལོག་རྟོག་དགག །ཁ་ཅིག་སོ། །སྤྱིའི་ངོ་བོ་བྱེ་བྲག་ལ་སྦྱར་བ་དགག་པའོ། །ལ་ལ་གཞན། །གཉིས་པ་ལ་གཉིས་ཏེ།  སྒྲུབ་བྱེད་ཀྱི་ཚོགས་ལ་འཁྲུལ་པ་
9-7-4a


དགག །འགའ་ཞིག །བསྒྲུབ་བྱའི་གྲངས་ལ་འཁྲུལ་པ་དགག་པའོ། །ལ་ལ་བརྟེན། །གཉིས་པ་བྱང་སེམས་ཀྱི་སྡོམ་པའི་སྐབས་ལ་བཞི་སྟེ།  རྣམ་གཞག་སྤྱིར་བསྟན།  ཕ་རོལ། །ཉམས་ལེན་གྱི་གཙོ་བོ་ངོས་གཟུང་།  དེ་ཡི།  དེ་ལ་ལོག་པར་རྟོག་པ་
དགག །གནད་ཀྱི་དོན་བསྡུས་ཏེ་བསྟན་པའོ། །མདོར་ན། །གསུམ་པ་ལ་གཉིས་ཏེ།  སྤྱོད་པ་བདག་གཞན་བརྗེ་བ་ལ་ལོག་རྟོག་དགག །ལྟ་བ་མཐའ་བཞིའི་སྤྲོས་བྲལ་ལ་ལོག་རྟོག་དགག་པའོ། །དང་པོ་ལ་གསུམ་སྟེ།  ཕྱོགས་སྔ་མ་བརྗོད།  དེ་ལ་ཁ།  དེ་དགག །
མ་འཁྲུལ་བའི་གནད་བསྟན་པའོ། །བར་པ་ལ་གསུམ་སྟེ།  མགོ་མཚུངས་ཀྱི་རིགས་པས་དགག །འོ་ན་ཁས་བླངས་འགལ་བས་དགག །བློ་ལ།  ལུང་དང་འགལ་བས་དགག་པའོ། །  སངས་རྒྱས། །གསུམ་པ་མ་འཁྲུལ་བའི་གནད་བསྟན་པ་ལ་གསུམ་སྟེ།  ཕ་
རོལ་ཏུ་ཕྱིན་པའི་བཀའ་བབས་ལ་བཞུགས་པ།  མདོར་ན་བློ།  རྡོ་རྗེ་ཐེག་པའི་བཀའ་བབས་ལ་བཞུགས་པ།  ས་སྐྱའི།  དེ་གཉིས་དགོངས་པ་གཅིག་པས་བསྟན་པའི་སྙིང་པོ་ཡིན་པའོ། །དེ་དང་། །གཉིས་པ་ལྟ་བ་མཐའ་བཞིའི་སྤྲོས་བྲལ་ལ་ལོག་རྟོག་དགག་པ་ལ་གཉིས་ཏེ། 
ཐོས་བསམ་གྱིས་ངེས་ཤེས་བསྐྱེད་ཚུལ་ལ་ལོག་རྟོག་དགག །བསྒོམས་པས་ཉམས་སུ་བླང་ཚུལ་ལ་ལོག་རྟོག་དགག་པའོ། །དང་པོ་ལ་བཞི་སྟེ། །དོན་དམ་པར་མཐའ་བཞིའི་སྤྲོས་བྲལ་མི་འདོད་པར་དགག །ཀུན་རྫོབ་མཐའ་བཞིའི་སྤྲོས་བྲལ་དུ་སྨྲ་བ་དགག །
བྱེད་པའི་སྐྱེས་བུའི་རྣམ་གྲངས་ལ་ཡོད་མེད་སོ་སོར་ཕྱེ་བ་དགག་ཆོས་དང་གང་ཟག་གི་བདག་ཐ་སྙད་དུ་ཡོད་པ་དགག་པའོ། །དང་པོ་ལ་གཉིས་ཏེ།  ཕྱོགས་སྔ་མ་བརྗོད་བ་དང་།  ཁ་ཅིག་མཐའ།  དེ་དགག་པའོ། །འདི་ལ་གཉིས་ཏེ།  དགག་པར་དམ་བཅའ་
9-7-4b


བ་དང་།  ལྟ་བའི།  དགག་པ་དངོས་སོ། །འདི་ལ་ལྔ་སྟེ།  མཐའ་བཞིའི་སྤྲོས་བྲལ་རྒྱ་ནག་པའི་ལྟ་བར་འདོད་པ་དགག །བདེན་པ་བཀག་ཙམ་ལྟ་བ་མཐར་ཐུག་ཏུ་འདོད་པ་དགག །བདེན་པ་བཀག །ཐེག་པ་གསུམ་གྱི་རྟོགས་བྱའི་ལྟ་བ་ལ་ཁྱད་པར་མེད་པ་དགག །ཐལ་
རང་གཉིས་ཀྱི་དོན་དམ་གྱི་ལྟ་བ་ལ་ཁྱད་པར་ཡོད་པ་དགག །དབུ་མའི་ལྟ་བ་འཚོལ་བའི་ཚེ་དགག་པ་གཉིས་ཀྱི་རྣལ་མ་གོ་བ་དགག་པའོ། །དང་པོ་ལ་གཉིས་ཏེ།  རིགས་པས་དཔྱད་པ་དང་མ་དཔྱད་པའི་ཁས་ལེན་ཚུལ་མི་མཚུངས་པར་བསྟན།  རྒྱ་ནག །དེ་
གཉིས་མཚུངས་ན་ཧ་ཅང་ཐལ་བའོ། །འདི་ལ་གསུམ་སྟེ།  དཀོན་མཆོག་བརྩེགས་པའི་མདོ་ལ་ཧ་ཅང་ཐལ་བ།  གཞན་ཡང་།  ཏིང་ངེ་འཛིན་རྒྱལ་པོ་སོགས་ལ་ཧ་ཅང་ཐལ་བ།  དེ་བཞིན།  བསྟན་བཅོས་ཆེན་པོ་རྣམས་ལ་ཧ་ཅང་ཐལ་བའོ། །འདི་ལ་གཉིས་ཏེ།  ཧ་
ཅང་ཐལ་བ་དངོས།  མགོན་པོ།  དེའི་ཉེས་སྤོང་གི་ལན་དགག་པའོ། །འདི་ལ་གཉིས་ཏེ།  ཡོད་མིན་མེད་མིན་བདེན་གཉིས་ལ་འཆད་ན་ཁས་བླངས་འགལ་བ།  དེ་ལ་ཡོད།  ཡོད་མེད་སོགས་བཞི་པོ་ཆོས་ཅན་ལ་འདོད་ན་གཞུང་དང་འགལ་བའོ། །  ཁ་ཅིག་ཡོད། །གསུམ་པ་ཐེག་
པ་གསུམ་པོ་རྟོགས་བྱའི་ལྟ་བ་ལ་ཁྱད་པར་མེད་པ་དགག་པ་ལ་གཉིས་ཏེ།  ལུང་དང་འགལ་བ།  རིགས་པ་དང་འགལ་བའོ། །རིགས་པས། །དང་པོ་ལ་གཉིས་ཏེ།  བྱམས་མགོན་གྱི་ལུང་དང་འགལ་བ།  ཐེག་གསུམ།  ཀླུ་སྒྲུབ་ཡབ་སྲས་ཀྱི་ལུང་དང་འགལ་བའོ། །  ཀླུ་སྒྲུབ། །བཞི་
པ་ཐལ་རང་གཉིས་ཀྱི་དོན་དམ་གྱི་ལྟ་བ་ལ་ཁྱད་པར་ཡོད་པ་དགག་པ་ལ་གསུམ་སྟེ།  རང་རྒྱུད་པའི་དགག་བྱ་འགོག་ཚུལ་ཁས་བླངས་དང་འགལ་བ།  བློ་ལ།  ཐལ་འགྱུར་བའི་དགག་བྱ་འགོག་ཚུལ་རིགས་པ་དང་འགལ་བ།  ཞེན་ཡུལ་དགག་བྱར་བྱེད་པ་ལོག་
9-7-5a


རྟོག་ཡིན་ན་ཧ་ཅང་ཐལ་བའོ། །གཉིས་པ་ལ་གཉིས་ཏེ།  ཐ་སྙད་དུ་མ་རྙེད་པ་ཡིན་ན་གཞུང་དང་འགལ་བ།  བཏགས་དོན།  དོན་དམ་དུ་མ་རྙེད་པ་ཡིན་ན་ཁྱད་ཆོས་སུ་མི་རུང་བའོ། །དམ་པའི། །གསུམ་པ་ལ་བཞི་སྟེ།  རྒྱ་བོད་ཀྱི་མཁས་གྲུབ་ལ་
སྐུར་བ་བཏབ་པར་ཐལ་བ།  བློ་ཡིས།  ཞེན་ཡུལ་བདེན་གྲུབ་འགོག་ཏུ་མི་རུང་བར་ཐལ་བ།  གཅིག་དང་།  གནོད་བཅས་ཐུག་མེད་རྟོག་པ་ལ་སྐྱོན་དུ་མི་འགྱུར་བ།  ཅི་སྲིད།  འཕགས་པའི་མཉམ་གཞག་ལ་དེ་དག་མེད་པའི་རྒྱུ་མཚན་ནོ། །འོན་ཀྱང་། །ལྔ་པ་དབུ་མའི་ལྟ་བ་འཚོལ་
བའི་ཚེ་དགག་པ་གཉིས་ཀྱི་རྣལ་མ་གོ་བ་དགག་པ་ལ་གཉིས་ཏེ།  ལུང་དང་འགལ་བ།  རིགས་པས།  རིགས་པ་དང་འགལ་བའོ། །དབུ་མའི། །གཉིས་པ་ཀུན་རྫོབ་མཐའ་བཞིའི་སྤྲོས་བྲལ་དུ་སྨྲ་བ་དགག་པ་ལ་གཉིས་ཏེ།  ཕྱོགས་སྔ་མ་བརྗོད།  ཁ་ཅིག་ཐ།  དེ་དགག་པའོ། །
འདི་ལ་བཞི་སྟེ།  ལུང་དང་འགལ་བ།  འདི་ནི།  རིགས་པ་དང་འགལ་བ།  རིགས་པས།  མྱོང་བ་དང་འགལ་བ།  མྱོང་བ།  ཁས་ལེན་ཚུལ་སོ་སོར་དབྱེ་བའོ། །ཀུན་རྫོབ། །གསུམ་པ་བྱེད་པའི་སྐྱེས་བུའི་རྣམ་གྲངས་ལ་ཡོད་མེད་སོ་སོར་དབྱེ་བ་དགག་པ་ལ་གཉིས་ཏེ།  ཕྱོགས་སྔ་
མ་བརྗོད།  ལ་ལ།  དེ་དགག་པའོ། །འདི་ལ་བཞི་སྟེ།  ཧ་ཅང་ཐལ་བས་དགག །རང་གི་སྒྲུབ་བྱེད་མི་འཐད།  སྒྲུབ་བྱེད།  གཞན་ལ་སུན་འབྱིན་མི་འཐད།  གཞན་ལ།  ཚིག་དོན་མ་འདྲེས་པར་གཟུང་བར་གདམས་པའོ། །ཆོས་དང་། །དང་པོ་ལ་གཉིས་ཏེ།  ཧ་ཅང་ཐལ་བ་
དགོད།  འོ་ན།  དེ་ཉིད་འཇུག་པའི་རྒྱུ་མཚན་བཤད་པའོ། །འདི་ལ་གསུམ་སྟེ།  མདོ་ལས་བྱེད་པའི་སྐྱེས་བུ་བཅུ་གཉིས་རྣམ་གྲངས་སུ་གསུངས་པའི་ཚུལ།  དེའང་།  དེ་ཉིད་འཇུག་པའི་གཞི་ཀླུ་སྒྲུབ་ཀྱིས་ངོས་གཟུང་ཚུལ།  དེ་དོན།  དེ་ཉིད་འཇོག་ཚུལ་ཟླ་བས་
9-7-5b


རྣམ་པར་གཞག་པའོ། །དེ་ཉིད། །བཞི་པ་ཆོས་དང་གང་ཟག་གི་བདག་ཐ་སྙད་དུ་ཡོད་པ་དགག་པ་ལ་གཉིས་ཏེ།  འདོད་པ་བརྗོད།  ལ་ལ་གང་།  སུན་འབྱིན་བཤད་པའོ། །འདི་ལ་གསུམ་སྟེ།  གཞུང་ལུགས་ཀྱི་དགོངས་པ་མ་ཡིན་པ།  གཉིས་པོ།  མགོ་མཚུངས་ཀྱི་རིགས་
པས་དགག་པ།  གཞན་དུ།  སྒྲུབ་བྱེད་བློ་གྲོས་འཆལ་བའི་རྟགས་སུ་བསྟན་པའོ། །སྒྲུབ་བྱེད། །གཉིས་པ་བསྒོམས་པས་ཉམས་སུ་བླང་ཚུལ་ལ་ལོག་རྟོག་དགག་པ་ལ་གཉིས་ཏེ།  ལོག་རྟོག་བརྗོད།  ཁ་ཅིག་དབུ།  སུན་འབྱིན་བཤད་པའོ། །འདི་ལ་ལྔ་སྟེ།  གྲུབ་
མཐའ་བཞིའི་ལུགས་མིན་པ།  བདག་ལྟའི།  དུས་གསུམ་མཁྱེན་པས་སྔར་བཀག་པ།  འདི་ཉིད།  ཐོས་བསམ་དོན་མེད་དུ་འགྱུར་བ།  ང་མེད།  བསྒོམ་པའི་གནད་འཁྲུལ་པ།  འདི་འདྲ།  སྨད་པའི་གནས་སུ་བསྟན་པའོ། །  ཀྱེ་མ། །གསུམ་པ་རིག་འཛིན་སྡོམ་པའི་སྐབས་
ལ་གསུམ་སྟེ།  སྨིན་གྲོལ་གྱི་རྣམ་གཞག་སྤྱིར་བསྟན།  རིག་འཛིན།  དེ་ཉིད་རྣམ་དག་ཏུ་བསྒྲུབ་པ་རྒྱས་པར་བཤད།  གྲུབ་པའི་འབྲས་བུ་བསྡུས་ཏེ་བསྟན་བའོ། །རིམ། །གཉིས་པ་ལ་གཉིས་ཏེ།  ལམ་གྱི་གཙོ་བོ་རྣམ་དག་ཏུ་བསྒྲུབ།  ལམ་གྱི་ཡན་ལག་རྣམ་དག་
ཏུ་བསྒྲུབ་པའོ། །དང་པོ་ལ་གཉིས་ཏེ།  སྨིན་བྱེད་རྣམ་དག་ཏུ་བསྒྲུབ་པ།  གྲོལ་བྱེད་རྣམ་དག་ཏུ་བསྒྲུབ་པའོ། །དང་པོ་ལ་གསུམ་སྟེ།  རྒྱུད་སྡེ་བཞིའི་སྨིན་བྱེད་སྤྱིར་བསྟན།  སྨིན་བྱེད།  འཁྲུལ་པ་དགག་པ་བྱེ་བྲག་ཏུ་བཤད།  དབང་ལས་ཐོབ་
པའི་དམ་ཚིག་ལ་འཁྲུལ་པ་དགག་པའོ། །གཉིས་པ་ལ་གཉིས་ཏེ།  ཁས་བླངས་བརྗོད།  ཁ་ཅིག་རྒྱུད།  དེ་དགག་པའོ། །འདི་ལ་ལྔ་སྟེ།  གཅིག་གིས་ཀུན་ཐོབ་པ་ལ་ལུང་རིགས་ཀྱིས་གནོད།  འདི་ནི།  དེའི་སྒྲུབ་བྱེད་མ་ངེས་པར་བསྟན།  རྒྱུད་ལས།  བདག་
9-7-6a


འཇུག་ཙམ་གྱི་ཆིག་བརྒྱུད་ཡིན་ན་གཞན་ལའང་མཚུངས།  སླར་ཡང་།  དགོངས་འགྲེལ་མཛད་པོ་འཁྲུལ་པ་ཡིན་ན་ཧ་ཅང་ཐལ།   འཕགས་ཡུལ།  དེས་ན་སོ་སོའི་དབང་ལ་ནན་ཏན་བྱ་བར་གདམས་པའོ། །དེས་ན། །གསུམ་པ་དབང་
ལས་ཐོབ་པའི་དམ་ཚིག་ལ་འཁྲུལ་བ་དགག་པ་ལ་གཉིས་ཏེ།  རྩ་ལྟུང་བདུན་པ་མི་བསྲུང་བ་དགག །དེང་སང་།  གསུམ་པའི་ཡུལ་ལ་འཁྲུལ་པ་དགག་པའོ། །འདི་ལ་གཉིས་ཏེ།  འདོད་པ་བརྗོད།  ཁ་ཅིག་སྔགས།  དེ་དགག་པའོ། །འདི་ལ་གསུམ་སྟེ། 
བསྟན་བཅོས་ཀྱི་ཐ་སྙད་དང་འགལ་བ།  འོ་ན།  རྒྱུད་ཀྱི་དོན་དང་འགལ་བ།  ཡུལ་ཆེན།  འཇིག་རྟེན་གྱི་ཐ་སྙད་དང་འགལ་བའོ། །  འཇིག་རྟེན་པ། །གཉིས་པ་གྲོལ་བྱེད་རྣམ་དག་ཏུ་བསྒྲུབ་པ་ལ་གཉིས་ཏེ།  སྔགས་ལམ་ཉམས་སུ་ལེན་པའི་ས་མཚམས་ལ་འཁྲུལ་པ་
དགག །རྒྱུད་སྡེ་བཞིའི་སྔགས་ལམ་གྱི་ངོ་བོ་ལ་འཁྲུལ་པ་དགག་པའོ། །དང་པོ་ལ་གཉིས་ཏེ།  འདོད་པ་བརྗོད།  ཁ་ཅིག་ཐེག །དེ་དགག་པའོ། །འདི་ལ་གཉིས་ཏེ།  དགག་པ་མདོར་བསྟན། འདི་ནི།  དགག་པ་རྒྱས་པར་བཤད་པའོ། །འདི་ལ་གསུམ་
སྟེ།  དམན་ལམ་ལ་ཆོས་རྒྱུན་གྱི་ཏིང་ངེ་འཛིན་ཡོད་པ་ལུང་རིགས་དང་འགལ་བ།  མི་ཕམ།  གདུལ་བྱ་ཟབ་ལམ།  ཁོ་ནས་བཀྲི་བ་མདོ་རྒྱུད་དང་འགལ་བ།  ལམ་གྱི།  སྔགས་ཀྱི་དཀྱིལ་འཁོར་ལ་ཐེག་དམན་དགོད་པ་རྒྱུད་སྡེ་དང་འགལ་བའོ། །རྡོ་རྗེ།  གཉིས་པ་རྒྱུད་སྡེ་
བཞིའི་སྔགས་ལམ་གྱི་ངོ་བོ་ལ་འཁྲུལ་པ་དགག་པ་ལ་གཉིས་ཏེ།  རྒྱུད་སྡེ་འོག་མ་གསུམ་གྱི་ཉམས་ལེན་ལ་འཁྲུལ་པ་དགག །རྣལ་འབྱོར་ཆེན་པོའི་ཉམས་ལེན་ལ་འཁྲུལ་པ་དགག་པའོ། །དང་པོ་ལ་གསུམ་སྟེ།  བྱ་སྤྱོད་ཀྱི་བསྐྱེད་ཆོག་ལ་འཁྲུལ་པ་དགག །རྣལ་འབྱོར་རྒྱུད་ཀྱི་ལྷ་ལ་འཁྲུལ་པ་
9-7-6b


དགག །ཐུན་མོང་དུ་ལམ་ལ་འཁྲུལ་པ་དགག་པའོ། །དང་པོ་ལ་གཉིས་ཏེ།  འདོད་པ་བརྗོད།  ཁ་ཅིག་བྱ།  དེ་དགག་པའོ། །འདི་ལ་གསུམ་སྟེ།  གནོད་བྱེད་བརྗོད།  སྤྱོད་རྒྱུད།  སྒྲུབ་བྱེད་དགག །སྐྱོན་སྤོང་།  སྐྱོན་
སྤོང་མི་འཐད་པའོ། །འདི་ལ་གཉིས་ཏེ།  བལྟས་པའི་བདེ་བ་ལམ་བྱེད་ཀྱིས་མི་འགྲུབ།  བལྟས་པའི།  གཞིའི་དོན་གྱིས་མི་འགྲུབ་པའོ། །རྒྱུད་སྡེ། །གཉིས་པ་ལ་གསུམ་སྟེ།  ཕྱོགས་སྔ་མ་བརྗོད།  དེ་དགག །ཕན་པའི་གདམས་པ་བསྟན་པའོ།  དེས་ན།
དང་པོ་ལ་གཉིས་ཏེ།  དངོས་ཀྱི་ཕྱོགས་སྔ།  ཁ་ཅིག་ངན།  ཞར་བྱུང་གི་ཕྱོགས་སྔའོ། །སྨན་བླའི། །གཉིས་པ་ལ་གཉིས་ཏེ།  དགག་པ་སྤྱིར་བསྟན།  འདི་དག །དགག་པ་སོ་སོར་བཤད་པའོ། །འདི་ལ་གཉིས་ཏེ།  དངོས་ཀྱི་ཕྱོགས་སྔ་དགག །ཞར་བྱུང་གི་ཕྱོགས་
སྔ་དགག་པའོ། །དང་པོ་གཉིས་ཏེ།  གནོད་བྱེད་བརྗོད།  ཁྱད་པར།  སྒྲུབ་བྱེད་དགག་པའོ། །འདི་ལ་དྲུག་སྟེ།  དམ་བཅའ་མི་འགྲུབ།  སྒྲུབ་བྱེད།  མ་ཟིན་པའི་སྒྲོས་ཀྱིས་མི་གྲུབ།  རྗེ་བཙུན།  ཚུལ་སྟོན་པས་མི་འགྲུབ།  སྲོག་སྙིང་།  འཇིག་རྟེན་
པའི་མིང་གིས་མི་འགྲུབ།  འཇིག་རྟེན།  རྒྱུད་གསུངས་པའི་འཁོར་གྱིས་མི་འགྲུབ།  སྟོན་པས།  རྒྱུད་སྡེ་གཞན་གྱིས་མི་འགྲུབ་པའོ། །དཔལ་མཆོག །གཉིས་པ་ཞར་བྱུང་གི་ཕྱོགས་སྔ་དགག་པ་ལ་གསུམ་སྟེ།  སྨན་བླའི་དཀྱིལ་འཁོར་གྱི་ལྷ་འཇིག་རྟེན་པར་མི་
འཐད།  སྨན་བླའི།  འཇིགས་བྱེད་ཀྱི་དཀྱིལ་འཁོར་གྱི་ལྷ་འཇིག་རྟེན་པར་མི་འཐད།  དོན་ཡོད།  སྲུང་མ་ཁྱད་པར་ཅན་འཇིག་རྟེན་པར་མི་འཐད་པའོ། །འདོད་ཁམས།  གསུམ་པ་ལ་གཉིས་ཏེ།  ཕྱོགས་སྔ་མ་བརྗོད།  ལ་ལ་རྒྱུད།  དེ་དགག་པའོ། །འདི་ལ་གསུམ་
9-7-7a


སྟེ།  མགོ་མཚུངས་ཀྱི་རིགས་པས་དགགའོ་ན།  དངོས་པོའི་རིགས་པས་དགག  །དབང་བསྐུར།  སྒྲུབ་བྱེད་མ་གྲུབ་པར་བསྟན་པའོ། །བློ་ཡིས། །གཉིས་པ་རྣལ་འབྱོར་ཆེན་པོའི་ལམ་ལ་འཁྲུལ་པ་དགག་པ་ལ་
གཉིས་ཏེ།  སྣང་བ་ལྷ་རུ་མི་སྒོམ་པ་དགག །བསྒོམ་པའི་གཞི་ལ་འཁྲུལ་པ་དགག་པའོ། །དང་པོ་ལ་གཉིས་ཏེ།  ཕྱོགས་སྔ་མ་བརྗོད།  ཁ་ཅིག་བསྐྱེད།  དེ་དགག་པའོ། །འདི་ལ་གཉིས་ཏེ།  དགག་དགོས་པས་དགག་
པར་དམ་བཅའ་བ།  འདི་ནི།  འགོག་བྱེད་ཀྱི་ལུང་རིགས་བཤད་པའོ། །འདི་ལ་གསུམ་སྟེ།  ལུང་དང་འགལ་བ།  དེའང་།  རིགས་པ་དང་འགལ་བ།  སྣང་བ།  ཁས་བླངས་འགལ་བ་གཞན་དུ་བཀག་ཟིན་པའོ། །གཞན་ཡང་། །གཉིས་པ་བསྒོམ་
པའི་གཞི་ལ་འཁྲུལ་པ་དགག་པ་ལ་གཉིས་ཏེ།  ཕྱོགས་སྔ་མ་བརྗོད།  ཁ་ཅིག་སྣང་།  དེ་དགག་པའོ། །འདི་ལ་གཉིས་ཏེ།  མདོར་བསྟན།  འདི་ལ།  རྒྱས་པར་བཤད་པའོ། །འདི་ལ་གསུམ་སྟེ།  ལུང་དང་འགལ་བ།  ལུང་འགལ།
རིགས་པ་དང་འགལ་བ།  རིགས་པས།  ཁས་བླངས་དང་འགལ་བའོ།  ཁས་བླངས།  གཉིས་པ་ལམ་གྱི་ཡན་ལག་རྣམ་དག་ཏུ་བསྒྲུབ་པ་ལ་གཉིས་ཏེ།  དཔྱད་པ་བརྗོད་པར་དམ་བཅའ་བ།  ད་ནི།  དཔྱད་པ་ཞིབ་མོར་བརྗོད་པའོ། །འདི་ལ་
དྲུག་སྟེ།  སྦྱིན་སྲེག་གི་རྫས་སྔགས་ལ་དཔྱད་པ།  ལྷ་རྣམས།  གཏོར་མགྲོན་གྱི་གཤེགས་ཚུལ་ལ་དཔྱད་པ།  ཁ་ཅིག །དཀྱིལ་འཁོར་གྱི་བཀོད་པ་ལ་དཔྱད་པ།  གཤིན་པོ་རྗེས་འཛིན་ལ་དཔྱད་པ།  ཁ་ཅིག་ངན།  ཕྱག་མཆོད་ཀྱི་ཡུལ་ལ་དཔྱད་པ།  དཀྱིལ་
9-7-7b


འཁོར།  རྟེན་གྱི་གཟུངས་བརྫོང་ལ་དཔྱད་པའོ། །གསུམ་པ་ལ་གཉིས་ཏེ།  མགོ་མཇུག་བཟློག་པ་དགག  །མི་འཁྲུགས།  མདུན་རྒྱབ་བཟློག་པ་དགག་པའོ། །སྨན་བླའི།  དྲུག་པ་ལ་གཉིས་ཏེ།  གཟུངས་སྒྲིལ་ཚུལ་ལ་དཔྱད།  རྟེན་གྱི།  
འཁོར་ལོའི་སྟེང་འོག་ལ་དཔྱད་པའོ། །གནོད་སྦྱིན། །གསུམ་པ་འབྲས་བུའི་སྐབས་ལ་བཞི་སྟེ།  འབྲས་བུ་འགྲུབ་ཚུལ་གྱི་རྣམ་གཞག་སྤྱིར་བསྟན།  དེ་ལྟར།  ལོག་རྟོག་དགག་པ་བྱེ་བྲག་ཏུ་བཤད།  འབྲས་བུའི་ངོ་བོ་རྣམ་པར་གཞག་པས་
གནད་ཀྱི་དོན་བསྡུས་ཏེ་བསྟན་པའོ། །མདོར་ན། །གཉིས་པ་ལ་གཉིས་ཏེ་སྦས་པའི་ས་གཉིས་བཅུ་པར་འདུས་པ་དགག །མཐར་ཐུག་གི་འབྲས་བུའི་མཚན་གཞི་ལ་འཁྲུལ་པ་དགག་པའོ། །ཁ་ཅིག་ཕ་རོལ། །དང་པོ་ལ་གཉིས་ཏེ། 
ཕྱོགས་སྔ་མ་བརྗོད།  འདི་ལ་ཁ་ཅིག །དེ་དགག་པའོ། །འདི་ལ་གཉིས་ཏེ།  རྫོགས་རིམ་གྱི་རླུང་སེམས་ཐིམ་ཚུལ་དང་འགལ་བ།  ཕྱི་རོལ།  བསྐྱེད་རིམ་གྱི་ལྷ་བསྒོམ་ཚུལ་དང་འགལ་བའོ། །བསྐྱེད་རིམ། །གསུམ་པ་འབྲས་བུའི་ངོ་བོ་རྣམ་པར་གཞག་
པ་ལ་གསུམ་སྟེ།  སྡེ་སྣོད་ནས་གསུངས་པའི་འབྲས་བུའི་རྣམ་གཞག །རྒྱུད་སྡེ་ལས་གསུངས་པའི་འབྲས་བུའི་རྣམ་གཞག །ཐུན་མོང་དུ་མདོ་གཅིག་ལས་གསུངས་པའི་ཚུལ་ལོ། །འཇམ་དཔལ།  དང་པོ་ལ་གཉིས་ཏེ།  སྐུ་གཉིས་སུ་ངེས་པ་དང་།  བྱེ་
སྨྲས།  སྐུ་གསུམ་དུ་ངེས་པའི་ཚུལ་ལོ། །  མདོ་སྡེ། །གཉིས་པ་ལ་གཉིས་ཏེ།  རྒྱུད་སྡེ་འོག་མར་བཤད་ཚུལ།  རྒྱུད་སྡེ།  རྣལ་འབྱོར་ཆེན་པོར་བཤད་ཚུལ་ལོ། །འདི་ལ་གཉིས་ཏེ།  སྐུ་བཞིར་གསུངས་ཚུལ།  རྣལ་འབྱོར།  སྐུ་ལྔར་གསུངས་པའི་
9-7-8a


ཚུལ་ལོ།  རྣལ་འབྱོར།  གསུམ་པ་བརྩམ་པ་མཐར་བྱིན་པ་མཇུག་གི་དོན་ལ་གཉིས་ཏེ།  ཅི་ལྟར་བཤད་པའི་ཚུལ།  གང་ཟག་གང་གིས་བཤད་པའོ།  སྡོམ་པ། །དང་པོ་ལ་བདུན་ཏེ།  རྒྱུ་གང་གིས་བཤད་པ།  དེ་ལྟར།  རྐྱེན་
གང་ལ་བརྟེན་ནས་བཤད་པ།  རྒྱལ་ནས།  དགོས་པ་གང་གི་ཕྱིར་བཤད་པ།  དེ་དག །བཤད་པ་རང་གི་ངོ་བོ།  ཕྱོགས་ཞེན།  དེ་ལ་གཞན་འཇུག་པར་རིགས་པ།  དེ་སླད།  བཤད་པའི་དགེ་བ་བྱང་ཆུབ་ཏུ་བསྔོ་བ།  བསོད་ནམས།  སྲུང་མ་ལ་ཕྲིན་ལས་འཆོལ་བའོ།  གང་སྐུ། །
སྡོམ་པ་གསུམ་གྱི་རབ་ཏུ་དབྱེ་བའི་ཁ་སྐོང་གཞི་ལམ་འབྲས་གསུམ་གསལ་བར་བྱེད་པའི་ལེགས་བཤད་འོད་ཀྱི་སྣང་བའི་བསྡུས་དོན་འདིའང་རྩ་བའི་རྩོམ་པ་པོ་དེ་ཉིད་ཀྱིས་ཐུབ་བསྟན་རྣམ་རྒྱལ་གླིང་དུ་བྲིས་པའི་ཡི་གེ་པ་ནི་གཞོན་ནུ་བཟང་པོའོ།།      ༈    །།འདི་བསྒྲུབས་
པ་ལས་བྱུང་བ་ཡི། །དགེ་བ་གང་དང་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་མྱུར་ཐོབ་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ།།    །།
དགེའོ།།    །།  དགེའོ།།    །།