13-1-1a


༄། །མདྷྱཱམཀཱལཾཀཱརསྱབིབྷཱ་ཥིཏམཉྫུགྷོཥགུརྭཱམོདསྱཱགམནཱམབིཧརཏིསྨ།།
༄༅། །དབུ་མ་རྒྱན་གྱི་རྣམ་བཤད་འཇམ་དབྱངས་བླ་མ་དགྱེས་པའི་ཞལ་ལུང་ཞེས་བྱ་བ་བཞུགས་སོ། །
13-1-1b


༄༅༅།  །གང་གིས་རྨད་བྱུང་རྟེན་འབྲེལ་ལམ། །གསུང་མཆོག་མཚུངས་པ་མེད་པ་ཡིས། །སྲིད་པའི་འཆིང་བ་བཀྲོལ་མཛད་པ། །སྐྱོབ་པ་ཤཱཀྱ་སེང་གེར་འདུད། །
གང་མཚན་དྲན་པས་ཐོག་མེད་སྲིད་པའི་སྨག །སྙིང་ལ་ཡུན་རིང་ཉལ་བའི་དགྲ་འཇོམས་པ། །གཞོན་ནུ་སྨྲ་བའི་ཉི་མ་གང་དེ་དང་། །དབྱེར་མེད་དྲིན་ཅན་བླ་མས་བདག་སྐྱོངས་ཤིག །
གང་ཞིག་ལྟ་ངན་མུན་པའི་རུམ་ན་སྣ་ཚོགས་གྱ་གྱུས་རྩེན་པ་གློག་བཞིན་གཡོ་བའི་སྨྲ་བ་ངན་པའི་ལྕེ། །ཚངས་དབང་མཚོན་ལས་ཤུགས་དྲག་རིགས་པའི་དཔལ་གྱིས་དུམ་བུར་ཆོད་ཅེས་འཇམ་དབྱངས་
ཕྱག་གི་རལ་གྲིས་དབང་བསྐུར་བས། །འཕགས་པའི་ཡུལ་དང་བསིལ་ལྡན་སོགས་གནས་བདག་ཏུ་ལྟ་བའི་རི་སུལ་བརྟེན་པ་བོན་དང་མུ་སྟེགས་རི་དྭགས་ཚོགས། །གང་གི་མཚན་ཙམ་ཐོས་
13-1-2a


པས་རྣམ་པ་སྟོང་དུ་འཇིགས་མཛད་འཇིགས་མེད་སྨྲ་བའི་སེང་གེ་གང་དེ་རྒྱལ་གྱུར་ཅིག །གང་གི་ལེགས་གསུང་ཟབ་མོ་དབུ་མའི་རྒྱན། །རིགས་པའི་ཆུ་ཀླུང་འབུམ་ཕྲག་
འཁྱིལ་བའི་མཚོ། །མཁས་མཆོག་ཀླུ་དབང་བྱེ་བའི་རོལ་གནས་དེར། །དམན་པ་བདག་ཀྱང་དགའ་བའི་ཡིད་ཀྱིས་ཞུགས། །མཚུངས་མེད་བློ་མཆོག་མངའ་བ་རྣམས་ཀྱིས་ཀྱང་། །བསྒྲིམས་ཏེ་རབ་
ཏུ་འབད་པས་རྟོགས་བྱ་བ། །མཁས་པའི་གཞུང་ལུགས་བཟང་པོ་མ་ཉམས་པའི། །ཚུལ་རྣམས་ཅུང་ཟད་བླ་མའི་དྲིན་གྱིས་ཕྱེ། །ཤིང་རྟའི་ལམ་སྲོལ་མཆོག་གི་རིགས་པའི་ཞུགས། །དུས་ཀྱི་
ཁམས་སུ་བག་ལ་ཉལ་གྱུར་ཀྱང་། །ཚང་ཚིང་ནགས་ལ་མེ་བཞིན་འདིར་བསླངས་ན། །རང་གར་སྨྲ་བ་རྣམས་ཀྱིས་བག་ཡོད་མཛོད། །དེའང་བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་ཉིད་ཀྱིས་
13-1-2b


བྱང་ཆུབ་མཆོག་ཏུ་ཐུགས་བསྐྱེད་ནས། ཚོགས་གཉིས་རྒྱ་མཚོ་ལྟ་བུས་རྒྱུད་ཡོངས་སུ་སྦྱངས་པས་གཟིགས་པ་རྣམ་པར་དག་པའི་མཐར་སོན་ཏེ། དེ་བཞིན་གཤེགས་པ་ཉིད་ཀྱི་སེང་གེའི་སྒྲ། མུ་སྟེགས་བྱེད་ཀྱི་གླང་པོ་དང་རི་དྭགས་ཀྱི་ཚོགས་སྐྲག་པར་
བྱེད་པ། སྟོང་པ་ཉིད་ཀྱི་ཚུལ་ཕྱིན་ཅི་མ་ལོག་པར་སྟོན་པའི་ཆོས་ཀྱི་འཁོར་ལོ་ལེགས་པར་བསྐོར་བའི་བཀའ་དྲི་མ་མེད་པ་རྣམས་ཀྱི་དགོངས་པ། རིག་པའི་ལམ་ནས་དྲངས་ཏེ་མི་འཕྲོག་པའི་ཤེས་རབ་མཆོག་གི་མིག་བསྒྲུབས་ནས། དངོས་པོའི་རྣམ་པ་
མ་བརྟགས་གཅིག་པུ་ན་ཉམས་དགའ་བ་མ་ལུས་པ་གཟུགས་བརྙན་ལ་སོགས་པ་ལྟ་བུར་ཡང་དག་པར་རང་བཞིན་མེད་པར་ཤེས་ཤིང་། ཉོན་མོངས་པ་དང་ཤེས་བྱའི་སྒྲིབ་པ་མཐའ་དག་སྤངས་ནས་བདག་དང་གཞན་གྱི་དོན་ཕུན་སུམ་ཚོགས་པའི་འབྱོར་པ་ལ་
དབང་སྒྱུར་བར་འདོད་པ་རྣམས་ཀྱི་འཇུག་ངོགས་བླ་ན་མེད་པའི་ཚུལ་ལུགས་འདི་ལྟ་བུ་ལ་རང་ཉིད་གོམས་པར་བྱ་བ་དང་། རང་དང་སྐལ་པ་མཉམ་པ་གཞན་ལའང་སྐུལ་བར་བྱེད་པའི་རྐྱེན་ཙམ་དུ་དམིགས་ནས་གཞུང་འདི་ཉིད་ཀྱི་དོན་ཅུང་ཟད་རྣམ་པར་དབྱེ་བ་ལ། 
བཤད་བྱའི་ཡན་ལག་དང་། བཤད་བྱ་དངོས་གཉིས་ལས།  དང་པོ། སྔོན་གྱི་མཁས་པ་དག་གི་རྗེས་སུ་འབྲངས་ཏེ་རྩིས་མགོ་ལྔའི་ཚུལ་དུ་ཅུང་ཟད་བཤད་པར་བྱ་སྟེ།  དེ་ལ་གཞུང་འདི་སུ་ཞིག་གིས་མཛད་ན། མཁས་བཙུན་བཟང་པོའི་རྣམ་ཐར་
གྱི་ཡང་རྩེར་སོན་ནས་གྲུབ་པའི་གོ་འཕང་མཐོན་པོར་རྩོད་མེད་དུ་གཤེགས་པ།  རྒྱ་བོད་གཉིས་ན་ཉི་ཟླ་ལྟར་གྲགས་པའི་སློབ་དཔོན་ཆེན་པོ་ཞི་བ་འཚོས་མཛད།  སུའི་དོན་དུ་ན། ཐེག་པ་ཆེན་པོའི་གཞུང་ལུགས་མཐའ་དག་གི་དོན་ལ་ཡང་དག་
13-1-3a


པའི་རིགས་ལམ་ནས་དྲངས་པའི་གཞན་གྱིས་བཀྲི་བར་མི་ནུས་པའི་ཟབ་པ་དང་རྒྱ་ཆེ་བའི་ཤེས་རབ་དོན་དུ་གཉེར་བ་དག་གི་ཆེད་དུ་མཛད།  ཕྱོགས་གང་དུ་གཏོགས་ན། ཐེག་ཆེན་གྱི་བཀའ་སྤྱི་དང་། ཟླ་སྒྲོན་སོགས་ཟབ་མོའི་
མདོ་སྡེ་རྣམས་ཀྱི་ཕྱོགས་སུ་གཏོགས།  དབུ་ཞབས་ཀྱི་བསྡུས་དོན་ནི། བདེན་པ་གཉིས་ཀྱི་དེ་ཁོ་ན་ཉིད་ཕྱིན་ཅི་མ་ལོག་པའི་ཚུལ་གཉིས་ཀྱིས་བསྡུས་པའི་རྣམ་གཞག་གསལ་པོར་སྟོན་པའོ། དགོས་པ་ཐེག་པ་ཆེན་པོ་མཐའ་དག་གི་དོན་ལ་ངེས་པ་བདེ་བླག་
ཏུ་རྙེད་ནས་བྱང་ཆུབ་མཆོག་ཐོབ་པའི་དོན་དུའོ། །དེ་རྣམས་ཅུང་ཟད་སྤྲོས་ན། དང་པོ་མཛད་པ་པོ་འདི་ནི། འཇམ་དཔལ་རྩ་རྒྱུད་ལས། བསྟན་པའི་སྦྱིན་བདག་དང་། སྡོམ་བརྩོན་དང་། བྲམ་ཟེ་རྣམས་ལུང་བསྟན་པའི། སྡོམ་བརྩོན་གྱི་ཐོག་མར། སྟོན་
པའི་གསུང་རབ་ས་སྟེང་དུ། །དུས་མཐར་འཇིག་རྟེན་ཉམས་པ་ན། །སྡོམ་བརྩོན་རྒྱལ་པོའི་ཚུལ་གྱིས་ནི། །འབྱུང་བར་འགྱུར་བ་ཐེ་ཚོམ་མེད། །ཅེས་སྡོམ་བརྩོན་གྱི་རྒྱལ་པོའམ་གཙོ་བོ་དུ་མ་ཞིག་འབྱུང་ངོ་ཞེས་སྤྱིར་བསྟན་ནས། བྱེ་བྲག་དམ་པ་
མང་པོ་ཞིག་ལུང་བསྟན་པའི་ནང་ནས། ཡི་གེ་བ་ཞེས་སྡོམ་བརྩོན་བསྒྲགས། །ཞེས་མཚན་གྱི་ཐོག་མ་གསལ་བར་བསྟན་ཅིང་། མཇུག་ཏུ་དེ་ཐམས་ཅད་སྔགས་གྲུབ་ནས་བྱང་ཆུབ་ཏུ་ལུང་བསྟན་པ་དང་། ལང་ཀར་གཤེགས་པ་ལས། ཕྱི་དུས་
མུ་སྟེགས་ཀྱི་ལྟ་ངན་འབྱུང་བའི་གཉེན་པོ་ལྟ་བུར། དེ་ཡི་འོག་ཏུ་བྱས་དུས་ལ། །འདྲེན་པ་བློ་གྲོས་ཞེས་བྱ་བ། །ཤེས་བྱ་ལྔ་རྣམས་སྟོན་པ་པོ། །དཔའ་བོ་ཆེན་པོ་འབྱུང་བར་འགྱུར། །ཞེས་བློ་གྲོས་ནི་མཁན་པོའི་མཚན་གྱི་རྣམ་གྲངས་སུ་
13-1-3b


སྔོན་གྱི་མཁས་པ་དག་གིས་བཤད་ལ། ཞི་འཚོ་ནི་རབ་ཏུ་བྱུང་བའི་མཚན་དུ་མངོན་ཞིང་། གཞན་ཡང་མཚན་གྱི་རྣམ་གྲངས་དུ་མ་སྣང་ངོ་། །ཤེས་བྱ་ལྔ་ནི་ཆོས་ལྔ་རིགས་པས་གཏན་ལ་ཕབ་ནས་ཐེག་ཆེན་མཐའ་དག་དགོངས་པ་གཅིག་ཏུ་སྒྲུབ་པར་
ལུང་བསྟན་པའོ། །དེ་བཞིན་དུ་ཏིང་འཛིན་རྒྱལ་པོ་ལས། ཟད་དུས་མི་བཟད་པ་ལ་བྱང༷་ཆུབ༷་སེ༷མས་དཔ༷འ་གང་། བདེ་བར་གཤེགས་པའི་བསྟན་པའི་ཆོས་མཆོག་འདི་སྲུང༷་བ། །དེ་དག་ང་ཡི་སྲས་ཏེ་ཕྱི་དུས་ཆོས་སྐྱོང་བ། །དེ་དག་སངས་རྒྱས་
བྱེ་བ་སྟོང་གིས་ཡོངས་སུ་གཏད། །ཅེས་བོ་དྷི་ས་ཏྭ་རཀྵི་ཏ་ཞེས་པའི་མཚན་ཚང་བར་བསྟན་ཏེ། མཁན་པོའི་མཚན་རྒྱ་སྐད་སོར་གཞག་ཏུ་ཀློག་པ་དེ་ལྟར་ན་འདིར་ཡང་། ཟད་དུས་མི་བཟད་པ་ལ་བོ་དྷི་ས་ཏྭ་གང་། །ཞེས་པ་ཀླགས་ན་བདེའོ། །རཀྵི་
ཏའི་སྒྲ་འཚོ་བའམ་སྲུང་བ་ལ་འཇུག་པས་སྒྲ་དེའང་བརྗོད་བྱའི་དོན་དང་ལྷན་ཅིག་ཏུ་འཐོན་པར་མཛད་པ་སྟེ། དངོས་ཤུགས་ཟུར་གྱི་རྣམ་པ་དུ་མ་འདྲེན་དུ་རུང་བ་ནི་སངས་རྒྱས་ཀྱི་བཀའི་ཁྱད་ཆོས་སོ། །མདོ་འདི་གཉིས་ཀྱི་དགོངས་པ་དྲི་མེད་རིགས་པའི་ལམ་
དུ་སློབ་དཔོན་འདིས་དྲངས་ནས་ཚུལ་གཉིས་ཤིང་རྟའི་སྲོལ་ཕྱེ་བར་མཛད་པས་ན་མདོ་དེ་གཉིས་སུ་ལུང་སྟོན་པའི་རྒྱུ་མཚན་ཡང་དེ་ཉིད་དོ། །དེ་ལ་སོགས་པ་མདོ་རྒྱུད་དུ་མ་ནས་ཡང་ཡང་ལུང་བསྟན་པའི་ཤིང་རྟ་ཆེན་པོ་འདིའི་ཡོན་ཏན་གྱི་ཁྱད་པར་ནི། ཇི་སྐད་
དུ། སློབ་དཔོན་ཞི་བ་འཚོ་བདག་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པ། འཕགས་པ་ངག་གི་དབང་ཕྱུག་གི་ཞབས་ཀྱི་པདྨོ་རྙོག་པ་མེད་པའི་ཟེའུ་འབྲུ་སྤྱི་བོས་ལེན་པ། ཞེས་གསུངས་པ་ལྟར། སྔོན་གྱི་ལོ་རྒྱུས་ཁུངས་མ་ལས་
13-1-4a


འདི་ལྟར་མཐོང་སྟེ། དེའང་སློབ་དཔོན་འདི་ཤར་ཕྱོགས་ཟ་ཧོར་རྒྱལ་པོའི་སྲས་སུ་འཁྲུངས་ནས་ནཱ་ལེནྡྲའི་ཐམས་ཅད་ཡོད་སྨྲའི་སྡེ་པའི་མཁན་པོ་ཡེ་ཤེས་སྙིང་པོ་ལས་རབ་ཏུ་བྱུང་ཞིང་། མཚན་བོ་དྷི་སཏྭ་ཤཱནྟ་རཀྵི་ཏ་ཞེས་གསོལ།  རིག་
པའི་གནས་མཐའ་དག་ལ་མཁས་པར་གྱུར་ཏེ། ནཱ་ལེནྡྲའི་མཁན་པོ་མཛད་ཅིང་རྒོལ་བ་ངན་པ་མཐའ་དག་ཚར་བཅད་དེ། མཁས་པའི་གྲགས་པ་སེང་གེའི་སྒྲ་ཆེན་པོས་སའི་སྟེང་ཐམས་ཅད་ཁྱབ་པར་གྱུར་ཏེ། དེའི་ཚེ་ལྷོ་ཕྱོགས་ནས་བྲམ་ཟེ་མུ་སྟེགས་
སོགས་ཀྱི་རིག་བྱེད་མཐའ་དག་ལ་མཁས་པ་ཞིག་གིས་ཕྱི་ནང་གཉིས་ཀའི་རྒོལ་བ་རྣམས་ཕམ་པར་བྱས་ཏེ་སུས་ཀྱང་འགྲན་མི་བཟོད་པ་ན། ད་ནི་ནཱ་ལེནྡྲར་སོང་ལ་མཁན་པོ་ཞི་བ་འཚོ་ཕམ་པར་བྱས་ན་ས་སྟེང་ན་འགྲན་པའི་ཟླ་མེད་པར་འགྱུར་རོ་སྙམ་དུ་སེམས་
ཤིང་། མཁན་པོའི་བཞུགས་སར་རིམ་གྱིས་འོངས་ཏེ་བལྟས་པས་མཁན་པོ་མི་སྣང་ཞིང་འཇམ་པའི་དབྱངས་ཀྱི་སྐུ་གསེར་བཙོ་མའི་མདོག་ལྟར་འབར་བ་ཞིག་བཞུགས་པར་མཐོང་སྟེ་ཕྱིར་འོངས་ནས་གཞན་ལ་དྲིས་པས་མཁན་པོ་དེ་ཉིད་ན་བཞུགས་ཡོད་ཟེར།
སླར་ལོག་ནས་བལྟས་པས་སྔར་གྱི་ས་དེ་ན་མཁན་པོ་བཞུགས་པར་མཐོང་བས།  ལྷག་པའི་ལྷ་དངོས་སུ་གྲུབ་པས་སུས་ཀྱང་རྩོད་པས་མི་ཐུབ་པར་ཤེས་ནས་ཤིན་ཏུ་དད་པར་གྱུར་ཏེ་རྩོད་པའི་བསམ་པ་དོར་ནས་གུས་པས་ཞབས་སྤྱི་བོར་བླངས་ཏེ་བསྟན་པའི་སྒོར་ཞུགས་པར་གྱུར་པ་དེ་ལྟ་བུ་
ལ་སོགས་མཁས་པའི་རྣམ་པར་ཐར་པ་འགྲན་པའི་ཟླ་ཐམས་ཅད་དང་བྲལ་ཞིང་། བོད་དུ་བྱོན་པའི་ཚེའང་བཙད་པོ་ལ། གལ་ཏེ་སངས་རྒྱས་པའམ་གཞན་པར་གྱུར་པ་སུ་ཞིག་ལ་འགྲན་ཟླ་ཚོལ་བ་ན། རྫུ་འཕྲུལ་ནི་འཛམ་བུའི་གླིང་ན་པདྨ་སཾ་བྷ་ཝ་ཉིད་ལས་ཆེ་བ་སུ་ཡང་མེད་པས་དེ་
13-1-4b


དང་འགྲན་དུ་གཞུག་ལ། གཏན་ཚིགས་ནི་བདག་དང་ཤགས་སུ་བཀྱེ་བ་ན་ད་ལྟ་སའི་སྟེང་ན་ཁོ་བོ་ལས་མཁས་པ་མེད་པས་རྒོལ་བ་ཐམས་ཅད་ཚར་བཅད་ནས་སངས་རྒྱས་ཀྱི་བསྟན་པ་ཚུགས་ཤིང་བཙད་པོའི་དགོངས་པ་འགྲུབ་ཅེས་མཁས་པར་བདག་ཉིད་ཀྱིས་
ཀྱང་ཞལ་གྱིས་བཞེས་སོ།  །དེ་ལྟ་བུའི་སློབ་དཔོན་འདི་ཉིད་ཀྱིས་དབུ་མ་རྣལ་འབྱོར་སྤྱོད་པའི་ཤིང་རྟའི་སྲོལ་ཕྱེས་ཤིང་། པཎྜི་ཏ་ཐམས་ཅད་ཀྱི་ནང་ན་རྒྱལ་མཚན་གྱི་རྩེ་མོའི་ཏོག་ལྟར་གསལ་བར་བླ་ན་འཕགས་པ་ནི་མཁས་པའི་རྣམ་ཐར་མདོ་ཙམ་སྟེ། ཤིང་རྟ་
ཆེན་པོ་འདིའི་རིང་ལུགས་སྐྱོང་བ་ཡང་། འཕགས་ཡུལ་དུ་སློབ་དཔོན་སེང་གེ་བཟང་པོ། ཀ་མ་ལ་ཤཱི་ལ། ཆོས་ཀྱི་བཤེས་གཉེན་ལ་སོགས་པ་དང་། གཞན་ཡང་པཎྜི་ཏ་རྣམས་ལས་མང་ཤོས་ཞིག་ཡིན་ལ། ཡེ་ཤེས་ཞབས། འཕགས་གྲོལ་སྡེ། སེང་བཟང་
ཨ་བྷ་ཡཱ་ཀ་ར་སོགས་ཀྱིས་ཤེར་ཕྱིན་གྱི་ལྟ་བ་འདི་ཁོ་ན་ལྟར་གཏན་ལ་ཕབ་པར་མཛད། དེ་ལས་འཕགས་གྲོལ་སོགས་སློབ་དཔོན་འདིའི་སྔོན་དུ་རྣལ་འབྱོར་སྤྱོད་པའི་དབུ་མ་བཞེད་མཁན་འགའ་ཙམ་ཡོད་ཀྱང་། དངོས་སུ་ཕྱི་དོན་མེད་པར་རྣམ་རིག་པའི་ཚུལ་དང་
མཐུན་པའི་དབུ་མའི་ཤིང་རྟའི་སྲོལ་ཕྱེ་བ་པོ་ནི་སློབ་དཔོན་འདི་ཡིན་པར་མཁས་དབང་ཐམས་ཅད་མགྲིན་གཅིག་ཏུ་བཞེད་ལ། དེ་ལྟར་རིགས་པས་ཀྱང་འགྲུབ་པ་རྒྱ་གཞུང་རྣམས་ལ་བལྟས་པས་ཤེས་སོ། །དེས་ན་ཀླུ་སྒྲུབ་ཡབ་སྲས་གཞུང་ཕྱི་མོའི་དབུ་མ་པ་དང་། 
ཟླ་བ་གྲགས་པ་ཐལ་འགྱུར་དང་། ལེགས་ལྡན་འབྱེད་མདོ་སྡེའི་དབུ་མ་དང་།  སློབ་དཔོན་འདི་རྣལ་འབྱོར་སྤྱོད་པའི་དབུ་མའི་ཤིང་རྟའི་སྲོལ་འབྱེད་ཡིན་པར་བཤད་དོ། །བོད་དུ་ནི་སྔ་རབས་པ་ཕལ་མོ་ཆེ་དང་། ཁྱད་པར་ལུགས་འདི་གཙང་མར་འཛིན་པ་
13-1-5a


རྔོག་ལོ་ཆེན་པོ། ཕྱ་བ་ཆོས་སེང་། རོང་སྟོན་ཆོས་རྗེ་ལ་སོགས་པ་ཡིན་ལ། འདིའི་འཆད་ཉན་ཀྱང་རྗེ་ཡབ་སྲས་ཀྱི་སྐུ་དུས་བར་དུ་རྒྱ་ཆེར་བྱུང་བར་བཤད་ལ། རྗེ་བརྒྱུད་འཛིན་དང་བཅས་པས་ཤིན་ཏུ་ཐུགས་གཙིགས་ཆེ་ཞིང་ཟིན་
བྲིས་སོགས་ཅི་རིགས་མཛད། གཞན་ཡང་ཆོས་རྗེ་ས་པཎ་སོགས་དབུ་མར་སྨྲ་བ་ཀུན་གྱིས་ཞི་འཚོ་ཡབ་སྲས་ཀྱི་གསུང་ཐུགས་ཀྱི་བཅུད་དུ་མཛད། མདོར་ན་གང་ཟག་ཆོས་སྤྱན་ལྡན་པ་རྣམས་ནི། འདིའི་རིགས་པའི་གནད་ཟབ་མོའི་དགའ་སྟོན་མྱོང་
བ་ན་ཡིད་དབང་མེད་དུ་ཕྲོགས་ཏེ་པད་ཚལ་ལ་བུང་བ་བཞིན་དང་དུ་ལེན་པ་ཡིན་ནའང་། དེང་སང་ནི་གྲུབ་མཐའི་ཕྱོགས་སུ་ལའང་འཆད་ཉན་ལྟ་ཅི་གླེགས་བམ་ལ་ལྟ་རྟོག་བྱེད་མཁན་ཙམ་ཡང་དཀོན་པར་སྣང་བས་ན་བློ་ལྡན་རྣམས་ཀྱིས་ཕྱོགས་དུས་ཀྱི་མུ་མཐར་ཁྱབ་
ཅིང་རྒྱས་པའི་ཐུགས་ཁུར་མཛད་པར་རིགས་སོ། །མདོར་ན་ཐེག་པ་ཆེན་པོའི་ཚུལ་གཉིས་རིས་སུ་མ་ཆད་པར་འཛིན་ཅིང་། ཁྱད་པར་དབུ་མ་པ་གང་ཞིག་ཚད་མ་ལ་ཐུགས་ཞེན་ཆེ་བ་རྣམས་ནི་ཤིང་རྟ་ཆེན་པོ་འདིའི་སྲོལ་ལ་ངང་གིས་དགའ་ཞིང་འཇུག་པར་
འགྱུར་བ་ཞིག་གོ། གཉིས་པ་བཙུན་པའི་རྣམ་ཐར་ནི། འཕགས་ཡུལ་ན་འདུལ་འཛིན་དམ་པ་མང་པོ་གསེར་རིའི་ཕྲེང་བ་ལྟ་བུའི་ནང་ན་འདུལ་བའི་རྣམ་ཐར་གཙང་མ་སྐྱོང་བ་ལ་རི་དབང་ལྟར་མཐོ་ཞིང་སྡོམ་བརྩོན་ཐམས་ཅད་ཀྱི་རྒྱལ་པོ་ཚུལ་ཁྲིམས་གཙང་
བའི་ཚད་དུ་གླེང་བར་གྲགས། གསུམ་པ་གྲུབ་པའི་ཚུལ་ནི། གཙོ་བོར་འཕགས་ས་མངོན་སུམ་མཛད་པའི་སྤང་རྟོགས་ལ་འཇོག་དགོས་ཀྱང་། དེ་ཕལ་པའི་སྤྱོད་ཡུལ་དུ་མི་འགྱུར་བས།  ཕྱིར་མི་ལྡོག་པའི་བྱང་སེམས་ལུས་ངག་གི་རྟགས་ལས་དཔགས་
13-1-5b


པར་གསུངས་པ་ལྟར། མཁན་ཆེན་འདི་ཉིད་འཛམ་གླིང་སྤྱི་དང་ཁྱད་པར་མཐའ་འཁོབ་མུན་པའི་གླིང་གདུལ་བ་དང་། ཐེག་པ་ཆེན་པོའི་བཀའི་དགོངས་པ་ཤིང་རྟ་གཉིས་ཀྱིས་ལེགས་པར་ཕྱེས་ཟིན་ནའང་དེ་དག་དགོངས་པ་གཅིག་ཏུ་སྒྲུབ་པའི་ཤིང་རྟའི་ལམ་སྲོལ་གསུམ་པ་
ཕྱེ་བའི་དོན་དུ་བསམ་བཞིན་དུ་སྤྲུལ་ནས་བོད་ཡུལ་གྱི་ལྷ་བཙད་པོ་ཁྲི་སྲོང་ལྡེའུ་བཙན་འཁྲུངས་ནས་བཅོམ་ལྡན་འདས་ཀྱི་བསྟན་པ་བྱང་དུ་དར་བར་ལུང་བསྟན་པའི་དུས་ལ་མ་བབས་ཀྱི་བར་དེ་ཉིད་དུ་སྐུ་ཚེའི་འདུ་བྱེད་བྱིན་གྱིས་བརླབས་པས་ལོ་དགུ་བརྒྱར་བཞུགས་པར་བཤད་
པས་ནང་ཚེ་ལ་དབང་ཐོབ་ཅིང་། བསམ་ཡས་ལ་རབ་གནས་མཛད་པའི་ཚེ་བཙད་པོས་མཁན་པོ་ཉིད་འཇམ་པའི་རྡོ་རྗེར་དངོས་སུ་གཟིགས་ཤིང་། རྟེན་ལྷ་རྣམས་ཡེ་ཤེས་པར་དངོས་སུ་གྱུར་ནས་རྫུ་འཕྲུལ་གྱི་རྣམ་པར་རོལ་པ་ཚད་མེད་པ་མཛད་པ་ཀུན་གྱི་མཐུན་སྣང་
དུ་གྱུར་པ་སོགས་ཕྱི་རོལ་ལ་དབང་ཐོབ་ཅིང་། ཁྱད་པར་སུས་ཀྱང་མ་ཐུལ་བའི་བོད་ཡུལ་འདིར་སངས་རྒྱས་ཀྱི་བསྟན་པ་ཉི་མ་ལྟར་སྣང་བར་མཛད་ནུས་པ་ནི་རྒྱལ་སྲས་སེམས་དཔའ་གཞན་ལས་འཕགས་པའི་གྲུབ་པའི་འབྲས་རྟགས་ཡང་དག་གོ། བཞི་པ་བཟང་
པོའི་རྣམ་ཐར་ནི། བསྟན་འགྲོ་ལ་ཕན་པའི་མཛད་པ་བཟང་པོ་སྟེ། དེའང་མཁན་པོ་འདི་རྒྱུ་བྱང་ཆུབ་ཀྱི་ཐུགས་ལེགས་པར་འབྱོངས་པས་བོདྷི་སཏྭ་ཞེས་པའི་མཚན་དོན་དང་ལྡན་པར་ཉི་ཟླ་ལྟར་གྲགས་ཤིང་། འཇམ་པའི་དབྱངས་དང་ངོ་བོ་དབྱེར་མེད་པའི་སྡོམ་བརྩོན་ཆེན་
པོ་འདི་དགུང་ལོ་བརྒྱ་ཕྲག་དུ་མར་བཞུགས་ནས། ནཱ་ལེནྡྲ་དང་། རྒྱ་གར་ཤར་ཕྱོགས་དང་། རྒྱ་ནག་ལ་སོགས་པར་སངས་རྒྱས་ཀྱི་བསྟན་པ་ལེགས་པར་བསྐྱངས་པར་བཤད་ལ། གཙོ་བོར་ནི་ཚུལ་གཉིས་ཟུང་དུ་འབྲེལ་བའི་ཤིང་རྟའི་ལམ་སྲོལ་དྲི་མ་མེད་པ་ཕྱེ་ཞིང་།
13-1-6a


དངོས་སྟོབས་ཀྱི་རིགས་པས་ལོག་སྨྲ་ཚར་གཅོད་ཅིང་སྐལ་ལྡན་རྗེས་སུ་གཟུང་བ་འཆད་རྩོད་རྩོམ་གསུམ་དང་། འདུལ་བའི་རྣམ་ཐར་གཙང་མར་སྐྱོང་བ་སྟེ་མཁས་བཙུན་གྱི་ངང་ཚུལ་ཟླ་མེད་པས་བཟང་པོའི་ཕྲིན་ལས་སའི་སྟེང་ཀུན་ཏུ་ཁྱབ་པར་གྱུར་
ཅིང་། ཁྱད་པར་དུ་སྔོན་གྱི་སྨོན་ལམ་དང་རྒྱལ་བ་སྲས་དང་བཅས་པའི་ཐུགས་བསྐྱེད་དུས་སུ་སད་པའི་མཐུ་ལས། སུས་ཀྱང་གདུལ་དཀའ་བ་གངས་ཅན་མུན་པའི་སྨག་རུམ་འདིར་བྱོན་ནས་ལྷ་བཙད་པོ་ཁྲི་སྲོང་ལྡེའུ་བཙན་དང་མཇལ། དེའི་ཚེ་སྔོན་ཉིད་དང་ཆོས་རྒྱལ་
ལྷན་ཅིག་ཏུ་སྨོན་ལམ་བཏབ་པའི་ཚུལ་དང་རྒྱལ་པོའི་སྐུ་ཆས་ཀྱི་རྟེན་འབྲེལ་ལ་བརྟགས་ནས་རྒྱལ་རྒྱུད་ཆགས་འཇིག་གི་ལུང་བསྟན་སོགས་མཛད། དགེ་བ་བཅུ་དང་ཁམས་བཅོ་བརྒྱད་རྟེན་འབྲེལ་བཅུ་གཉིས་ཀྱི་ཆོས་བཤད། རེ་ཞིག་ཞི་བས་མི་འདུལ་བའི་ལྷ་འདྲེ་རྣམས་གདུལ་
བའི་དོན་དུ་པདྨ་སཾ་བྷ་ཝ་སྤྱན་དྲོངས་ཤིག་པར་ལུང་བསྟན་གནང་། མཁན་སློབ་ལྷན་ཅིག་ཏུ་བསམ་ཡས་ལ་ས་དཔྱད་མཛད་ནས་ཕྱི་གཙུག་ལག་རྟེན་དང་བརྟེན་པར་བཅས་པ་བཞེངས་པའི་རབ་གནས་སོགས་མཛད།  སད་མི་མི་བདུན་རབ་ཏུ་ཕྱུང་སྟེ་བསྟན་རྩ་འདུལ་
བའི་སྲོལ་བཏོད། ལོ་ཙཱ་བ་རྣམས་ལ་སྐད་ཀྱི་བསྒྱུར་ཚུལ་དང་ཕྱི་ནང་གི་ཆོས་མ་ལུས་པ་བསླབས། བཀའ་དང་དགོངས་པ་འགྲེལ་བའི་བསྟན་བཅོས་ཀྱི་ཚོགས་མ་ལུས་པ་འཆད་ཉན་གྱིས་གཏན་ལ་ཕབ་པས་བོད་ཡུལ་ཆོས་ཀྱི་སྣང་བ་ཆེན་པོས་ཁྱབ་པར་མཛད།
བསྟན་པ་འདི་ལས་ཕྱི་རོལ་དུ་གྱུར་པའི་བོན་གྱི་ཚོགས་རྣམས་རིགས་པས་ཚར་བཅད་ཅིང་མིང་གི་ལྷག་མ་ཙམ་དུ་མཛད་པས་བསྟན་པ་དྲི་མེད་དུ་གྱུར། འདའ་ཁར་ཡང་སྐུ་གདུང་གི་རྟེན་འབྲེལ་ལས་བོད་ན་རབ་བྱུང་འབྱུང་ཚུལ་དང་། ནམ་ཞིག་ལྟ་བ་རྩོད་པ་ཅན་དུ་གྱུར་ཚེ་
13-1-6b


པཎྜི་ཏ་ཀ་མ་ལ་ཤཱི་ལ་སྤྱན་དྲོངས་ལ་བསྟན་པ་རྣམ་དག་ཏུ་སྒྲུབས་ཤིག་ཅེས་པཎྜི་ཏ་ལ་ཕྱག་ཡིག་བསྩལ་བ་སོགས་དུས་གསུམ་སྒྲིབ་མེད་དུ་མཁྱེན་པའི་ངང་ལས་བོད་ཡུལ་ལ་ཐུགས་བརྩེ་བ་ཆེན་པོ་ལྷག་པར་བསྐྱེད་དེ་བཀའ་དྲིན་བསམ་མི་ཁྱབ་པ་མཛད། སློབ་དཔོན་
པདྨའི་ངང་ཚུལ་འདི་མཁན་པོའི་སློབ་མ་ཡིན་ཅིང་། དེ་ཉིད་ཀྱི་ཕྱིར་མཁན་པོའི་དབུ་ཚད་ཀྱི་གཞུང་ལ་འགྲེལ་བའང་མཛད་དོ། །དེ་ལྟར་མདོར་ན་མཁན་པོ་འདི་ཉིད་ཀྱིས་བོད་ཡུལ་དུ་དང་པོར་བསྟན་པའི་སྲོལ་བཏོད། བར་དུ་དར་ཞིང་རྒྱས་པར་མཛད། ཐ་མར་བསྟན་
པ་དེ་ཉིད་སྐྱོང་བའི་སྤྲུལ་པ་ཡང་ནས་ཡང་དུ་བསྟན་པ་ནམ་གནས་ཀྱི་བར་དུ་རྒྱུན་མི་འཆད་དེ། ཇོ་བོ་ཆེན་པོས་བོད་དུ་བསྟན་པ་འཛུགས་པའི་མཁན་ཆེན་ཉིད་དང་། མཁན་རྒྱུད་དང་། མ་འོངས་བསྟན་པ་གནས་པ་དེ་སྲིད་དུ་མཁན་རྒྱུད་ལ་སྤྲུལ་པ་བྱོན་པ་དེ་ཀུན་ཇོ་
བོ་ཉིད་དང་ངོ་བོ་གཅིག་པར་གསུང་བ་བཞིན་ནོ། །དེས་ན་བོད་དུ་བསྟན་པ་གནས་པ་འདི་མཁན་ཆེན་ཉིད་ཀྱི་ཐུགས་བསྐྱེད་དང་སྨོན་ལམ་ཁོ་ནའི་མཐུ་ལས་བྱུང་བར་གོར་མ་ཆག་ཀྱང་། གང་ཟག་སོ་སོའི་སྣང་བ་ལ་རང་རང་གི་བླ་མ་རེ་དང་དགོན་སྡེ་རེའི་མཛད་པའི་སྟབས་
ཀྱིས་བྱུང་བར་སེམས་པ་ནི། སྐྲ་ལ་གྲི་འཇུ་བ་དང་གོས་ལ་ཚོན་འཛིན་པ་ཚུན་ཆད་སངས་རྒྱས་ཀྱི་ཕྲིན་ལས་ཡིན་ཀྱང་སུས་མི་ཤེས་པ་དང་འདྲའོ། །དེ་ལྟ་བུའི་ཤིང་རྟ་ཆེན་པོ་འདིའི་ཡོན་ཏན་གྱི་སྙན་པ་དང་། མཛད་པ་བཟང་པོས་སའི་སྟེང་འདི་མ་ལུས་པ་ཁྱབ་ཅིང་ཉི་
ཟླ་ལྟར་གྲགས་པ་སྟེ། དེའང་དེང་སང་བོད་ན་སྟེས་དབང་གིས་གྲགས་འུར་ཐོབ་པ་དེ་འདྲ་མིན་པར་འཕགས་ཡུལ་ན་ཕྱི་ནང་གི་པཎྜི་ཏ་དུ་མས་ཡང་དང་ཡང་དུ་བསྲེགས་བཅད་བརྡར་བའི་གསེར་བཞིན་བརྟགས་ནས་ཐེ་ཚོམ་དང་བྲལ་བ་ཞིག་ལ་བླ་མར་འཛིན་པ་ཡིན་ནོ། །
13-1-7a


འཕགས་ཡུལ་དུ་དེ་སྐབས་པཎ་གྲུབ་གཅིག་ལས་གཅིག་མཚར་བགྲང་ལས་འདས་པ་བཞུགས་ཀྱང་། དང་པོ་ནས་ཆོས་རྒྱལ་སྤྲུལ་པའི་ལོ་པཎ་རྣམས་ཀྱིས་རྒྱུས་མེད་ཀྱི་ཡུལ་ནའང་རྒྱུས་ཡོད་བཞིན་དུ་ཐེ་ཚོམ་མེད་པར་མཁན་པོ་འདི་ཉིད་ཁོ་ན་
སྙེགས་ཤིང་སྤྱན་དྲངས་པ་ནི། རྒྱུ་སྐར་གྱི་ཁྲོད་ན་ཟླ་བ་ལྟར་ཕྱོགས་ཀྱི་ཐ་གྲུ་ཁྱབ་པའི་ཤིང་རྟ་ཆེན་པོའི་རྣམ་ཐར་མཚུངས་པ་མེད་པའི་སྙན་གྲགས་ཀྱི་རང་འོད་མ་བསྒྲིབས་པར་གསལ་བའི་མཐུས་ཡིན་ལ། སྤྱིར་བདག་ཅག་གི་སྟོན་པའི་བསྟན་པ་འདི་ལ་བྱ་བ་ཆེར་
མཛད་པའི་གཙོ་བོ་ནི། ཉེ་སྲས་བརྒྱད་དང་གནས་བརྟན་བཅུ་དྲུག་ཡིན་པས་དེ་རྣམས་ཀྱི་རྣམ་འཕྲུལ་རྒྱན་དྲུག་ལ་སོགས་པའི་དམ་པ་མང་ཞིག་བྱོན་པ་ལས། ཤིང་རྟ་ཆེན་པོ་འདི་ནི་རྒྱལ་བ་ཀུན་གྱི་ཐུགས་རྡོ་རྗེ་གསང་ཆེན་བཀའི་སྡུད་པོ་གཅིག་པུར་གྱུར་པ་གསང་བའི་
བདག་པོ་ཡིན་པས་འདིའི་རྣམ་ཐར་དང་ཡོན་ཏན་ས་ལ་གནས་པའི་སྤྱོད་ཡུལ་དུའང་མི་འགྱུར་ན་ཕལ་བས་ལྟ་ཅི་སྨོས། འོན་ཀྱང་ཐུན་མོང་གི་སྣང་ངོར་ཡང་འཕགས་བོད་ཀུན་ཏུ་མཛད་པའི་རོལ་མོ་ཆེས་མཚུངས་པ་མེད་པའི་ངོ་མཚར་བསམ་མི་ཁྱབ་པ་ཡོད་ཀྱང་ཞིབ་
པར་ཡི་གེར་བཀོད་པ་སོགས་མི་སྣང་ཡང་།  འདིར་ནི་ལོ་རྒྱུས་རྙིང་མ་རྣམས་ལས་ཅུང་ཟད་བསྡུས་ཏེ་བསྟན་པ་ནི་མཁན་པོ་དེ་ཉིད་ཀྱི་བཀའ་དྲིན་རྗེས་སུ་དྲན་པར་བྱ་བའི་ཕྱིར་དུ་ཡིན་ལ། བློ་དང་ལྡན་པ་རྣམས་ཀྱིས་ནི་ལེགས་པར་བཤད་པའི་གསུང་རྣམས་དང་བཀའ་
དྲིན་ཚད་མེད་པའི་ཕྱག་རྗེས་ལས་དཔགས་ན་སངས་རྒྱས་དངོས་ཀྱི་འདུ་ཤེས་སྐྱེ་བར་འགྱུར་རོ། །མདོར་ན་འཕགས་བོད་གཉིས་ན་ཤིང་རྟ་ཆེན་པོར་རྩོད་མེད་དུ་གྲགས་པའི་སློབ་དཔོན་དེ་ལྟ་བུ་ནི་གཞུང་འདི་མཛད་པ་པོ་ཡིན་པར་ཤེས་པར་བྱའོ། །རྒྱལ་བ་སྐྱོབ་པ་
13-1-7b


དེ་ཡི་ལེགས་གསུང་ཆོས། །རྒྱ་ཆེན་སྤྱོད་པའི་གཞུང་བཟང་ཐོགས་མེད་དང་། །ཟབ་མོ་ལྟ་བའི་ཆ་རྣམས་ཀླུས་བཀྲལ་བས། །ཤིང་རྟ་གཉིས་ཞེས་ཉི་ཟླ་ལྟར་གྲགས་ཀྱང་། །དེ་ཚུལ་སྐྱོང་བའི་བློ་ལྡན་སེམས་དཔའ་རྣམས། །ལེགས་བཤད་
ཆུ་ཀླུང་ཕྱོགས་སུ་བཀྲམ་མོད་ཀྱི། །ད་དུང་ཐུབ་པ་ཆེན་པོའི་ཐེག་མཆོག་མཚོ། །རྫོགས་པར་མྱོང་བའི་དགའ་སྟོན་ཐོབ་པ་མེད། །ཁྱོད་ཀྱིས་ཚུལ་གཉིས་ཤིང་རྟའི་རྒྱ་མཚོ་ནི། །རྣམ་དཔྱོད་རིགས་པའི་ཧུབ་ཆེན་གཅིག་གིས་འཐུང་། །དེ་ཚེ་ཁྱོད་
ནི་ནམ་མཁའི་ཁམས་བཞིན་དུ། །མཐའ་དག་ཐེག་ཆེན་ཆོས་ཡངས་སྤྲིན་གྱིས་མཛེས། །དོན་དམ་མཁའ་ལྟར་ཞི་བའི་ཐུགས་བརྙེས་པས། །དཔ༷ལ་ལྡ༷ན་ཟླ༷་བ༷་འཇིག་རྟེན་གསུམ་ན་མཛེས། །ཐ་སྙད་འཇའ་ལྟར་མ་འདྲེས་གསལ་གཟིགས་པས། །
ཆོས༷་ཀྱི༷་གྲ༷གས་པ༷ས་ས་ཆེན་འདི་ཁྱབ་ཀྱང་། དེ་ཚུལ་གསལ་བར་བྱེད་པའི་མཁྱེན་མཆོག་རྣམས། ། གཞུང་ལུགས་བཞོན་པ་བཟང་པོའི་ཁྱོགས་བརྟེན་མོད། །དྲི་མེད་ཚད་མ་གཉིས་ཀྱི་གནས་ཡངས་པོ། །བདེ་བླག་དུས་གཅིག་གཞལ་བའི་
སྟོབས་ཤུགས་ཞན། །ཁྱོད་ཀྱི་བདེན་གཉིས་རིགས་པའི་ས་ཆེན་འདི། །རྣམ་དཔྱོད་གོམ་པའི་སྟབས་ཆེན་ཐ་སྙད་པའི་ཚད་མ་དང་། དོན་དམ་ལ་རྣམ་གྲངས་ཡིན་མིན་གཉིས་སུ་ཕྱེ་བ་གསུམ་མོ། །མཆན། གསུམ་གྱིས་བཅད། །དེ་ཚེ་ཁྱོད་ནི་འཛིན་མའི་ཁྱོན་བཞིན་དུ། །མཐའ་དག་རིགས་པའི་ཚུལ་མང་བཀོད་པས་མཛེས། །དེ་ཕྱིར་ཚུལ་གཉིས་
ཤིང་རྟའི་ལམ་སྲོལ་དང་། །དེ་དག་གཅིག་ཏུ་བསྒྲུབས་པའི་སྲོལ་ཆེན་ཏེ། །ཐུབ་པའི་ཐེག་མཆོག་བསྟན་པའི་འཇུག་ངོགས་ལ། །གསུམ་པོ་འདི་ལས་གཞན་པའི་སྲོལ་མི་སྲིད། །རྒྱལ་ཀུན་བཀའ་
13-1-8a


ཡི་སྡུད་པོ་ཁྱོད་ཡིན་ཕྱིར། །འདིར་ནི་ཐེག་མཆོག་རིགས་པའི་ཚུལ་གྱིས་བསྡུས། །ཟབ་གནད་སྙིང་པོའི་ཉི་མ་འདི་གཅིག་གིས། །ས་སྟེང་གནས་པའི་རབ་རིབ་རྣམ་པར་བཅོམ། །ཚད་མེད་བསམ་གྱིས་མི་ཁྱབ་ཐེག་མཆོག་
གནད། །ཆེས་ཉུང་རིགས་པའི་འཕྲུལ་ཐབས་གཅིག་གིས་ནི། །བདེ་བླག་སྟོན་པའི་གཞུང་བཟང་འདི་ལྟ་བུ། །རྡོ་རྗེའི་རིག་སྔགས་ཆེན་པོར་བདག་གིས་འཚལ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་སུའི་དོན་དུ་མཛད་པ་ལ།
ཐེག་པ་ཆེན་པོ་ནི་གང་། དེའི་གཞུང་ལུགས་ནི་གང་། དེའི་དོན་ལ་རིགས་པས་དྲངས་པའི་ཤེས་རབ་ཇི་ལྟར་སྐྱེ་སྙམ་ན།  ཐེག་པ་ཆེན་པོ་ནི་རྒྱུ་བསམ་པ་བྱང་ཆུབ་སེམས་ཀྱིས། ལམ་ཕར་ཕྱིན་བཅུ་དང་ལྡན་པས་རྫོགས་སྨིན་སྦྱངས་གསུམ་མཐར་སོན་པར་བྱས་ཏེ། 
འབྲས་བུ་སྐུ་གཉིས་ཟུང་འཇུག་གི་སངས་རྒྱས་འགྲུབ་པར་བྱེད་པ་ཡིན་ལ། དེའི་གཞུང་ལུགས་ནི་དབུ་མ་དང་སེམས་ཙམ་སྟེ་ཚུལ་གཉིས་སུ་གྲགས་པ་ཁོ་ནའོ། །དེ་འདྲ་བའི་གཞུང་ལུགས་བཟང་པོ་དེ་ནི་མུ་སྟེགས་དང་ཉན་རང་གི་ཡང་སྤྱོད་ཡུལ་ལས་འདས་པ། ཤིན་
ཏུ་བདེན་ཞིང་ཟབ་མོའི་མཐར་ཐུག་པ་ཡིན་ལ། དེ་ལྟར་བདེན་ཞིང་ཟབ་མོའི་དོན་དེ་ལ་དད་པས་མོས་པ་ཙམ་མིན་པར། ཡང་དག་པའི་རིགས་ལམ་ནས་ངེས་པ་གཏིང་ཚུགས་པ་སྐྱེད་པ་ནི་རྒྱུ་ཡིན་ལ། དེ་ལས་བྱུང་བའི་ཤེས་རབ་དྲི་མེད་ཀྱི་ངོ་བོ་ནི་ཟབ་པ་དང་རྒྱ་ཆེ་བ་གཉིས་སོ། །
དེ་ལ་ཟབ་པ་ནི་ཆོས་ཐམས་ཅད་སྦྲང་རྩི་རོ་གཅིག་པ་བཞིན་དུ་མཐའ་ཀུན་དང་བྲལ་བའི་དབུ་མ་ཆེན་པོར་གཏན་ལ་ཕབ་པ་ཡིན་ལ། རྒྱ་ཆེ་བ་ནི་ཐེག་ཆེན་དབུ་སེམས་གཉིས་ཀྱི་སྡེ་སྣོད་དག་གི་གཞུང་ལུགས་ཡི་གེ་འབྲུ་གཅིག་ཀྱང་དོར་རྒྱུ་མེད་པར་ཐམས་ཅད་གནད་གཅིག་ཏུ་
13-1-8b


དྲིལ་ཤེས་པ་ནི་གཞུང་མཐའ་དག་རྫོགས་པས་ན་རྒྱ་ཆེ་བ་ཞེས་བྱའོ། །ཤེས་རབ་དེའི་བྱེད་ལས་ནི་རང་གིས་བསླབས་པའི་ས་ལ་ཡིད་ཆེས་ནས་གཞན་གྱིས་དཀྲི་བར་མི་ནུས་པས་ན་ཤེས་ནས་དད་པ་ཐོབ་པ་ཞེས་བྱ་སྟེ་ལམ་མཚན་ཉིད་པ་ལ་ཞུགས་པའོ། །དེ་ལྟར་ལམ་
གྱི་ཐོག་མར་མིག་ཏུ་གྱུར་པའི་ལྟ་བ་རྣམ་པར་དག་པའི་ཤེས་རབ་དེ་འདྲ་བ་མེད་དུ་མི་རུང་བར་ཤེས་ནས་ཚོལ་ཞིང་དོན་དུ་གཉེར་བ་ནི་འདི་ཡི་ཆེད་དུ་བྱ་བའི་གདུལ་བྱའོ། །གསུམ་པ་ཕྱོགས་གར་གཏོགས་ན། བསྟན་བཅོས་འདིས་ཤེས་བྱ་ཆོས་ལྔའི་རང་བཞིན་གཏན་ལ་
ཕབ་པ་ཡིན་ཞིང་། དེར་ཐེག་ཆེན་མཐའ་དག་འདུ་ཚུལ་འོག་ཏུ་འཆད་འགྱུར་ལྟར་ཡིན་པས་ཐེག་ཆེན་མཐའ་དག་གི་དགོངས་འགྲེལ་ཡིན་ཀྱང་། ཁྱད་པར་ལང་ཀར་གཤེགས་པ་དང་། ཟླ་བ་སྒྲོན་མེས་ཞུས་པའི་ཏིང་འཛིན་སོགས་ཟབ་མོའི་མདོ་སྡེ་རྣམས་ཀྱི་བསྟན་དོན་དྲི་
མ་མེད་པ་ཡིན་ཏེ།  དེའང་ཐ་སྙད་དུ་སེམས་ཙམ་ཞལ་གྱིས་བཞེས་ཚུལ་འདི་ནི། ལང་གཤེགས་ལས། ཕྱི་རོལ་གྱི་ནི་གཟུགས་མེད་དེ། །རང་གི་སེམས་ནི་ཕྱི་རོལ་སྣང་། །སེམས་ནི་ཁོང་དུ་མི་ཆུད་ཕྱིར། །བྱིས་པ་རྣམས་ནི་འདུས་བྱས་རྟོག །ཅེས་པ་ལ་
སོགས་པས་ཡང་ཡང་གསལ་བར་བསྟན་ལ། བདེན་པ་གཉིས་ཀྱི་འདོད་ཚུལ་ཡང་མདོ་དེ་ཉིད་ལས། ཀུན་རྫོབ་ཏུ་ནི་དངོས་རྣམས་ཡོད། །དོན་དམ་དུ་ན་རང་བཞིན་མེད། །རང་བཞིན་མེད་ལ་གང་ནོར་བ། །དེ་ནི་ཀུན་རྫོབ་བདེན་པ་ཡིན། །ཞེས་དང་། ཚུལ་གཉིས་
ཟུང་འཇུག་གི་འདོད་ཚུལ་ཡང་མདོ་དེ་ལས། །སེམས་ཙམ་ལ་ནི་བརྟེན་ནས་སུ། །ཕྱི་རོལ་དོན་ལ་མི་བརྟག་གོ། ཡང་དག་དམིགས་པར་གནས་ནས་སུ། །སེམས་ཙམ་ལས་ཀྱང་ཤིན་ཏུ་བཟླ། །སེམས་ཙམ་ལས་ནི་བཟླས་ནས་ཀྱང་། །སྣང་བ་མེད་ལས་ཤིན་ཏུ་
13-1-9a


བཟླ། །སྣང་མེད་གནས་པའི་རྣལ་འབྱོར་པ། །དེ་ཡིས་ཐེག་པ་ཆེན་པོ་མཐོང་། །འཇུག་པ་ལྷུན་གྱིས་གྲུབ་ཅིང་ཞི། །སྨོན་ལམ་དག་གིས་རྣམ་པར་སྦྱངས། །ཡེ་ཤེས་དམ་པ་བདག་མེད་པ། །སྣང་བ་མེད་ལ་མི་མཐོང་ངོ་། །ཞེས་
གསུངས་པ་དང་། །དོན་དམ་པར་རང་བཞིན་མེད་ཚུལ་མདོ་དེ་དང་། ཁྱད་པར་ཏིང་འཛིན་རྒྱལ་པོ་ལས། སེམས་ཀྱི་རང་བཞིན་ཤེས་པས་ན། །ཕྱིར་ཡང་ཡེ་ཤེས་འབྱུང་བར་འགྱུར། །ཞེས་དང་། མཁས་པས་འདུས་བྱས་འདུས་མ་བྱས་རིག་སྟེ། །མཚན་མའི་
འདུ་ཤེས་དག་ནི་རྣམ་བཤིག་ནས། །མཚན་མ་མེད་པ་ལ་ནི་དེ་གནས་ན། །ཆོས་རྣམས་ཐམས་ཅད་སྟོང་པར་རབ་ཏུ་ཤེས། །ཞེས་དང་། ཡོད་དང་མེད་ཅེས་བྱ་བ་གཉིས་ཀ་མཐའ། །གཙང་དང་མི་གཙང་འདི་ཡང་མཐའ་ཡིན་ཏེ། །དེ་ཕྱིར་གཉིས་ཀའི་
མཐའ་ནི་རབ་སྤངས་ནས། །མཁས་པ་དབུས་ལའང་གནས་པར་ཡོང་མི་བྱེད། །ཅེས་དང་། སྒྲ་དང་ཚིག་གི་ལམ་བྲལ་བརྗོད་དུ་མེད། །ནམ་མཁའ་ཇི་བཞིན་ཆོས་ཀྱི་རང་བཞིན་ཏེ། །འདི་ལྟ་བུ་ཡི་ཚུལ་མཆོག་རྣམ་རིག་ན། །དེ་ཡི་སྤོབས་པ་དག་ཀྱང་མི་
ཟད་འགྱུར། །ཞེས་སོགས་ཇི་སྐད་གསུངས་པའི་ཚུལ་དུ་རྣམ་གྲངས་དང་རྣམ་གྲངས་མ་ཡིན་པའི་དོན་དམ་པའི་རང་བཞིན་ཤིན་ཏུ་གསལ་བར་མཛད་པ་ཡིན་ཏེ། རང་འགྲེལ་ལས། རིགས་དང་མདོ་སྡེ་སྣ་ཚོགས་ཀྱི། །རིན་ཆེན་བཀོད་པས་མཛེས་པར་བྱས། །ཞིབ་
བའི་བློ་ཡིས་འདི་རྟོགས་ནས། །ཟླ་སྒྲོན་ལ་སོགས་མདོ་ཟབ་རྣམས། །སྐྱེ་བོ་བློ་ཡི་ནོར་ལྡན་ཞིང་། །བརྟན་རྣམས་འཇིགས་མེད་སྒོམ་པར་ཤོག །ཅེས་གསུངས་པ་ལྟར་བཀའ་དྲི་མ་མེད་པའི་དགོངས་པ་དེ་དག་ཚུལ་འདི་ཉིད་ཀྱི་ཡང་དག་པའི་ཚད་མས་
13-1-9b


གཞན་གྱིས་དྲང་དུ་མེད་པར་གཏན་ལ་ཕབ་པའི་ཤིང་རྟའི་ལམ་སྲོལ་ཕྱེས་པའི་གནད་ཟིན་པར་བྱའོ། །བཞི་པ་དབུ་ཞབས་ཀྱི་དོན་ལ། བདེན་པ་གཉིས་ཀྱི་དེ་ཉིད་མ་ནོར་བ་ནི་ཅི།  ཚུལ་གཉིས་ནི་གང་ཡིན་སྙམ་ན། བདེན་གཉིས་ཀྱི་རང་བཞིན་གང་ཡིན་པ་ནི་
ཤེས་པར་བྱ་བ་ཡིན་ལ། ཚུལ་གཉིས་ནི་དེའི་དོན་ཇི་ལྟ་བར་ངེས་པའི་ལམ་ཡིན་ནོ། །དེ་ལ་ཤེས་བྱ་འདི་དག་ཡང་དག་པ་ཡིན་མིན་གཉིས་ཀྱིས་ཕྱེ་བས་ན་བདེན་པ་གཉིས་སུ་ཟད་པར་འདུ་ཞིང་། དོན་དེ་གཉིས་ལ་བློས་འཇལ་ཚུལ་ཕྱིན་ཅི་ལོག་དང་། ཕྱོགས་
ཙམ་དང་། ཡང་དག་པར་རྟོགས་ཚུལ་གྱིས་ཕྱི་ནང་སོ་སོའི་གྲུབ་མཐའ་སྣ་ཚོགས་བྱུང་སྟེ། འདི་ལྟར་ཕྱི་རོལ་སེར་སྐྱ་པ་དག་ནི། ཡོན་ཏན་གསུམ་མཉམ་པར་གྱུར་པའི་རང་བཞིན་ཅན་གྱི་གཙོ་བོ་དང་།  བདག་གཉིས་ནི་དོན་དམ་པ་ཡིན་ཞིང་། གཙོ་བོ་དེའི་རྣམ་
འགྱུར་རྣམས་ནི་ཀུན་རྫོབ་བསླུ་བའི་ཆོས་ཅན་དུ་འདོད་ལ། ནམ་ཞིག་ལམ་བསྒོམས་པས་བསམ་གཏན་གྱི་མིག་ཐོབ་ནས་བལྟས་པས་རྣམ་འགྱུར་རྣམས་ཀྱི་མཚང་མངོན་སུམ་དུ་རིག་སྟེ་རྣམ་འགྱུར་རྣམས་གཙོ་བོའི་ཀློང་དུ་ཐིམ་ནས་བདག་ཤེས་རིག་གི་སྐྱེས་བུ་འདྲིད་
ཅིང་བསླུ་བ་ལྟ་བུའི་ཡུལ་དང་འབྲེལ་བ་མེད་པས་རང་གཅིག་པུ་ཡན་གར་དུ་གནས་པ་ནི་ཐར་པའོ་ཞེས་འདོད་པ་དང་། གསང་བ་པ་དག་བདག་དམ་པ་གཅིག་པུ་རྣམ་ཤེས་ཙམ་གྱི་རང་བཞིན་ཀུན་ལ་ཁྱབ་པས་ནམ་མཁའ་ཆེན་པོ་དང་འདྲ་བ་ནི་དོན་དམ། དུ་མར་སྣང་ཡང་
དེ་ལྟར་མི་བདེན་པར་བདག་ཤེས་རིག་ཙམ་དུ་གཅིག་པས་ན་སྣོད་བཅུད་སོགས་ཀྱི་དངོས་པོ་སོ་སོར་རིས་ཆད་དུ་སྣང་བ་ནི་ཀུན་རྫོབ། བདག་དམ་པ་དེ་ཚུལ་བཞིན་རྣལ་འབྱོར་པས་བསྒོམས་པས་གཉུག་མ་དང་གཉུག་མ་མ་ཡིན་པའི་མ་རིག་པ་དང་བྲལ་ནས་བུམ་པ་
13-1-10a


ཆག་ན་དེའི་ནང་གི་ནམ་མཁའ་ནམ་མཁའ་ཆེན་པོར་འདུ་བ་བཞིན་དུ་བདག་ཆེན་པོ་དེར་ཐིམ་སྟེ་གྲོལ་བར་འདོད་པ་དང་། རིག་བྱེད་པ་སོགས་སོ་སོ་རང་རང་གི་ལྷར་བཟུང་བའི་ཚངས་པ་དང་ཁྱབ་འཇུག་དབང་ཕྱུག་ལ་སོགས་པ་རྣམས་ནི་
རྟག་པ་དོན་དམ་པ། དེའི་རྣམ་འཕྲུལ་ལས་བྱུང་བའི་དངོས་པོ་རྣམས་མི་བརྟན་བསླུ་བའི་རང་བཞིན་དུ་ཁས་ལེན་ཅིང་། ལྷ་དེ་དག་གི་གོ་འཕང་ཐོབ་ན་གཏན་དུ་རྣམ་པར་གྲོལ་བ་ཡིན་པར་རློམས་ནས། དེ་སྒྲུབ་པའི་ལམ་དཀའ་ཐུབ་དང་བརྟུལ་ཞུགས་སྣ་ཚོགས་
དང་། མཆོད་སྦྱིན་དང་། བསམ་གཏན་དང་རླུང་ལ་སོགས་པའི་རྣལ་འབྱོར་སྒོམ་པའི་ཐབས་དུ་མ་ལ་རྟེན་པར་བྱེད་དོ། །གཞན་ཡང་རྟག་པའི་བདག་དང་ནམ་མཁའ་སོགས་ཡེ་ནས་རང་བཞིན་གྱིས་ཡོད་པར་སྨྲ་བ་ཡེ་སྲིད་པའི་ལུགས་ཞེས་པ་སོགས་
གྲུབ་མཐའི་མིང་དང་འདོད་ཚུལ་བྱེ་བྲག་པ་ཆེས་མང་པོ་ཡོད་ཀྱང་དེ་དག་ཐམས་ཅད་མདོར་བསྡུ་ན་འཁོར་བར་བཅིངས་གྲོལ་གྱི་རྒྱུ་རྟག་པའི་དངོས་པོ་ཞིག་ཁས་ལེན་པ་ཡིན་ལ། རྟག་སྨྲ་བ་འདི་དག་ཐར་པ་ཡོད་པར་སྨྲ་བའི་ལུགས་ཡིན་པས་ན་དེའི་ལམ་ཡང་
བསྒྲུབ་པར་རློམས་པའི་ཕྱིན་ཅི་ལོག་གི་བརྟུལ་ཞུགས་ལ་བརྩོན་པ་ཡིན་ནོ། །དེ་ཐམས་ཅད་རྟག་དངོས་བཀག་པས་ཁེགས་ཤིང་སོ་སོར་འགོག་པའང་གཞུང་གི་སྐབས་སུ་ཤེས་པར་བྱའོ། །རྒྱང་འཕེན་པ་ནི།  མངོན་སུམ་གྱི་ཡུལ་དུ་སྣང་བའི་འབྱུང་བ་
བཞི་པོ་འདི་ཙམ་ཡོད་ཅིང་འདི་ཡུལ་དབང་རྣམ་ཤེས་ཀུན་གྱི་རྒྱུ་ཡིན་པས་དོན་དམ་ཡིན་ལ། འདི་ལས་སྐྱེ་ཞིང་སླར་འཇིག་པའི་ཆོས་ཅན་གྱི་དངོས་པོ་འདི་རྣམས་མི་བརྟན་སླུ་བའི་རང་བཞིན་དུ་ཁས་ལེན་ཅིང་། ལམ་གོམས་པ་སོགས་ཚེ་སྔ་ཕྱིའི་ལས་འབྲས་
13-1-10b


མི་སྲིད་དེ།  ད་ལྟའི་རིག་པ་འདི་མངལ་གྱི་གནས་སྐབས་ཀྱི་འབྱུང་བ་འདུས་པ་མེར་མེར་པོ་ལ་སོགས་པ་ལས། ཆན་ལས་མྱོས་བྱེད་ཀྱི་ནུས་པ་གསར་དུ་སྐྱེ་བ་ལྟར་གློ་བུར་དུ་བྱུང་གི་ཚེ་སྔ་མའི་རིག་པ་སྔོན་དུ་སོང་བ་ལས་བྱུང་བ་མིན་ཞིང་། འཇིག་རྟེན་འདིར་ཇི་ཙམ་སྡོད་
པ་དེ་སྲིད་དུ་བློ་དང་དབུགས་ཀྱང་འབྱུང་ལ། འཆི་བ་ན་མར་མེ་རྒྱུན་ཆད་པ་ལྟར་ལུས་རྡུལ་དུ་དེངས། སེམས་ནམ་མཁར་ཐིམ་པ་དེས་ན་སྐྱེ་བ་ཕྱི་མ་མེད་ལ། དེས་ན་ལས་འབྲས་དང་ལམ་དང་ཐར་པ་ནི་མེད་ཅིང་། བདེ་སྡུག་སོགས་མི་འདྲ་བ་སྣང་བ་ནི་སྲན་མ་ཟླུམ་པ་དང་
ཚེར་མ་རྣོ་བ་སུས་ཀྱང་མ་བྱས་པ་བཞིན་དུ་རྒྱུ་མེད་པར་ངོ་བོ་ཉིད་ཀྱིས་དེ་ལྟར་བྱུང་ངོ་ཞེས་ཟེར། དེས་ན་ལུས་དང་བློ་ཚོགས་པ་མ་ཤིའི་བར་ཇི་སྲིད་དུ་བདག་ལ་ཕན་པ་ཙམ་ཁོ་ན་དོན་དུ་གཉེར་བ་ཡིན་ནོ། །འདི་འགོག་པ་ལ་འབྱུང་བཞི་ཡོད་པར་འདོད་པ་ལ་རྡུལ་ཕྲན་འགོག་
པའི་རིགས་པ་དང་། སྐྱེ་བ་སྔ་ཕྱི་མེད་པར་འདོད་པ་འགོག་ཚུལ་རྒྱུ་མེད་འགོག་པའི་རིགས་པ་དང་། ཀུན་རྫོབ་ཀྱི་རྣམ་གཞག་འཆད་པའི་སྐབས་ཀྱི་གཞུང་གི་རིགས་པ་ལས་ཤེས་པར་བྱའོ། །དེ་ལྟར་ཕྱི་རོལ་པའི་འདོད་པ་དེ་དག་ནི་ཐམས་ཅད་དངོས་པོར་ལྟ་བ་འབའ་
ཞིག་ཡིན་ཏེ། རྟག་སྨྲ་བ་རྣམས་ཀྱི་ནི་བདག་ལ་སོགས་པ་རྟག་དངོས་སུ་འདོད་ཅིང་། ཆད་ལྟ་བའང་འདིར་མངོན་སུམ་མཐོང་བའི་དངོས་པོ་རྣམས་ལ་བདེན་འཛིན་འཐུག་པོ་དང་བཅས་བཞིན་དུ་འདི་འགགས་ཤིང་ཞིག་ནས་སྐྱེ་བ་སྔ་ཕྱི་མཚམས་མི་སྦྱོར་བ་ཙམ་
ཡིན་ནོ། །དེས་ན་དེ་དག་གི་ཆོས་འགའ་ཞིག་བརྫུན་པ་དང་སླུ་བའི་ཆོས་སུ་བཞག་ནའང་མཐར་གཏུགས་ན་དངོས་པོ་ཞིག་ལ་བརྟེན་ཏེ་འཇོག་པ་ཁོ་ན་ཡིན་ཏེ། འཇིག་རྟེན་པའི་ལམ་ཐམས་ཅད་ཐོག་མེད་ནས་ལྷན་ཅིག་ཏུ་ཞུགས་པའི་མ་རིག་པ་དང་མཚུངས་པར་
13-1-11a


ལྡན་པའི་ཚུར་མཐོང་གི་ཤེས་པ་རང་ག་མ་འདི་ཙམ་གྱིས་བཞག་པས་ན། འདོད་ཚུལ་སྣ་ཚོགས་མཐའ་མེད་པ་ཡོད་ཀྱང་དངོས་ཞེན་ལས་འདའ་མི་སྲིད་དེ། མཁྲིས་ནད་ཅན་གྱིས་དུང་དང་ཟླ་བ་དངུལ་ལ་སོགས་པ་མི་འདྲ་བ་མཐོང་ཡང་སེར་པོ་ལས་གཞན་དུ་མི་མཐོང་
བ་བཞིན་ནོ། །དེས་ན་ཕྱིན་ཅི་ལོག་གི་ལྟ་བ་གནས་པ་དེ་རྣམས་ལ་བདག་མེད་པ་སེང་གེའི་སྒྲ་ཆེན་པོ་བཟོད་པ་སུའང་མེད་ཅིང་དེ་དག་གིས་ཡང་དག་པ་དང་ཡང་དག་པ་མ་ཡིན་པ་གཉིས་སུ་ཕྱེ་བའི་རྣམ་གཞག་སྣ་ཚོགས་བྱས་ཀྱང་དངོས་
འཛིན་གྱི་རྩ་བ་ལ་ཅིའང་མི་གནོད་པའི་ཉི་ཚེ་བའི་སྟོང་པ་ཞེས་བྱ་སྟེ་བདེན་གཉིས་ལ་རྨོངས་ཤིང་ལོག་པར་རྟོག་པ་ཡིན་ནོ། །གཉིས་པ་འཇིག་རྟེན་གྱི་ལམ་ལས་འཕགས་པ་རང་སྡེ་ནང་པ་སངས་རྒྱས་པ་ལའང་། བདེན་པ་གཉིས་ཀྱི་དོན་ལ་ཕྱོགས་མཐུན་ཙམ་རྟོགས་པ་དང་། 
ཡང་དག་པ་ཇི་ལྟ་བ་བཞིན་དུ་རྟོགས་ཚུལ་གྱིས་གོང་ནས་གོང་དུ་ཁྱད་ཞུགས་ཏེ། དེ་ལས་དོན་སྨྲ་སྡེ་གཉིས་པོ་ལ་བྱེ་བྲག་འདོད་ཚུལ་མི་འདྲ་བ་ཡོད་ཀྱང་། དོན་དུ་འདི་ལྟར་འདོད་དེ། བཅོམ་ཞིང་གཞན་བསལ་བར་གྱུར་ན་རང་འཛིན་གྱི་བློ་འདོར་དུ་རུང་བའི་རགས་པ་རྣམས་ཀུན་རྫོབ།
མི་འདོར་བ་ཤེས་པ་སྐད་ཅིག་ཆ་མེད་ཙམ་དང་། བེམ་པོ་རྡུལ་ཕྲན་ཆ་མེད་ཙམ་དོན་དམ་དུ་ཡོད་དགོས་ཏེ། དེ་མེད་ན་བེམ་ཤེས་རགས་པ་འདི་ཀུན་རྩོམ་གཞི་མེད་པས་ན་འདི་ལྟར་སྣང་བར་ཡང་མི་འཐད་དེ་སྣལ་མ་མེད་པའི་སྣམ་བུ་བཞིན་ནོ་སྙམ་པའོ། །དེས་ན་རྡུལ་ཕྲ་རབ་
དང་ཤེས་པ་སྐད་ཅིག་མ་དུ་མ་ཚོགས་པའི་ཉེར་ལེན་གྱི་ཕུང་པོ་ལྔ་སྐད་ཅིག་གིས་སྐྱེ་ཞིང་འཇིག་པའི་བདག་ཉིད་ཅན་འདི་ལ་དམིགས་ནས་ངའོ་སྙམ་དུ་རློམ་པར་ཟད་ཀྱི། འདི་ལས་ལོགས་སུ་བདག་མ་དམིགས་ཤིང་འདི་ཇི་ལྟར་རློམ་པའི་བདག་དེའི་མཚན་ཉིད་དང་མི་མཐུན་པས་
13-1-11b


དེ་དང་ངོ་བོ་གཅིག་མིན་པ་དེའི་ཕྱིར་ན། རྟག་གཅིག་རང་དབང་ལ་སོགས་པའི་རྣམ་པར་བཟུང་བའི་བདག་དེ་ནི་མེད་ལ། བདག་དེས་སྟོང་པའི་རྡུལ་དང་ཤེས་པའི་ཕྲ་བ་མཐར་ཐུག་པ་རྣམས་ཡོད་པར་འདོད་ཅིང་རྡུལ་ཕྲ་རབ་ཀྱང་སྐད་ཅིག་མར་འདོད་ལ།  ལམ་གང་ཟག་གི་བདག་
མེད་གོམས་པས་འཇིག་ལྟའི་རྩ་བ་ཅན་གྱི་འཁོར་བའི་ཉོན་མོངས་པ་རྣམས་ཟད་ནས་འབྲས་བུ་ཁམས་གསུམ་འཁོར་བ་ལས་རྣམ་པར་གྲོལ་ཏེ་ལེན་པ་མེད་པར་ཡོངས་སུ་མྱ་ངན་ལས་འདའ་བར་འདོད་ཅིང་།  རང་སྡེ་དངོས་སྨྲ་བ་འདི་དག་དངོས་པོ་མེད་པ་ལ་སོགས་པའི་མདོའི་ཚིག་
འཆད་པ་ན། སྨད་པ་དང་ཉུང་བའི་དོན་ལ་སོགས་པར་འཆད་དེ། དངོས་པོ་རྣམས་ངན་པ་ཡིན་པས་དངོས་པོ་མེད་པ་སྟེ། ད་ལྟར་གྱི་གནས་སྐབས་ན་མི་བརྟན་པའི་ཕྱིར་རོ། །ཡང་དངོས་པོ་རྣམས་ལ་དངོས་པོ་མེད་པ་མང་བས་དངོས་པོ་མེད་པར་གསུངས་ཏེ།
སྔོན་དང་ཕྱི་མའི་མཐར་མ་སྐྱེས་པ་དང་། འདས་པ་ཡིན་པས་སོ་ཞེས་འདོད་དོ། །སེམས་ཙམ་པ་ནི། གཟུང་འཛིན་གཉིས་སུ་སྣང་བ་འདི་མེད་བཞིན་ཀུན་ཏུ་བཏགས་པ་ཙམ་ཡིན་པས་ཀུན་རྫོབ། དེ་དག་གི་སྣང་གཞི་གཞན་དབང་གི་རྣམ་ཤེས་མཐར་ཐུག་པ་
ཤེས་པ་རང་རིག་རང་གསལ་ཙམ། ཕྱི་རོལ་གཟུང་བ་དང་དེར་འཛིན་པས་སྟོང་པ་ནི་ཡོངས་གྲུབ་སྟེ་དོན་དམ་པ་ཡིན་ལ། འཁོར་འདས་གཉིས་ཀྱི་སྣང་ཆ་འདི་རྣམས་ལ་སྣང་གཞི་རྣམ་ཤེས་ཞིག་ཀྱང་མེད་ན་ནམ་མཁའི་མེ་ཏོག་ལྟར་འགྱུར་རོ་སྙམ་དུ་རྣམ་རིག་ཙམ་དོན་
དམ་དུ་སྨྲའོ། །དེ་ལ་དེ་དག་གིས་འདི་ལྟར་ཤེས་པ་ལས་ངོ་བོ་ཐ་དད་དུ་གྱུར་པའི་བེམ་པོ་ནི་རྡུལ་ཕྲན་འགོག་པའི་རིགས་པ་སོགས་ཀྱིས་ཁེགས་པས་ཕྱི་དོན་མི་འགྲུབ་ལ། འོ་ན་རི་རབ་ཁང་ཁྱིམ་ལ་སོགས་བསླུ་མེད་བསྙོན་མེད་དུ་སྣང་བ་འདི་ཅི་ཡིན་སྙམ་ན། འདི་
13-1-12a


རྣམས་ནི་ཕྱི་རོལ་ན་བེམ་པོའི་བདག་ཉིད་དུ་མེད་ཀྱང་འཁྲུལ་པའི་ངོ་ན་ཡོད་པ་ལྟར་སྣང་བ་སྟེ། དཔེར་ན་རྨི་ལམ་གྱི་སྣང་བ་བཞིན་ནོ། །དེ་ལྟར་སྣང་བའི་རྒྱུ་མཚན་ཡང་ཤེས་པ་གསལ་རིག་གི་ངོ་བོ་ཙམ་ནོར་བུ་དྲི་མ་དང་བྲལ་བ་ལྟ་བུ་ལ། དག་
དང་མ་དག་པའི་བག་ཆགས་སྣ་ཚོགས་ཀྱི་ཚོན་གྱིས་ཁ་བསྒྱུར་བས་ཤེས་པ་ཉིད་དེ་དང་དེའི་རྣམ་པར་སྣང་བ་ནི་གཞན་དབང་གི་རྣམ་ཤེས་ཞེས་བྱ་སྟེ་རྟེན་འབྲེལ་དང་དོན་འདྲའོ། །དེ་ལྟར་འདོད་འཇིགས་དང་མི་སྡུག་པ་སོགས་གོམས་པ་བཞིན་དུ་ཐོག་མེད་གོམས་པའི་བག་ཆགས་
ཀྱི་རྐྱེན་ལས་ཤེས་པ་ཉིད་ལུས་དང་ལོངས་སྤྱོད་གནས་ལ་སོགས་པར་སྣང་ཡང་བྱིས་པ་སོ་སོའི་སྐྱེ་བོས་དེ་རང་གི་སེམས་ཀྱི་བདག་ཉིད་དུ་ཁོང་དུ་མ་ཆུད་པར། ཡུལ་ཕར་ཀ་དང་། སེམས་ཚུར་ཀ་ལྟ་བུར་གཟུང་འཛིན་གཉིས་ཐ་དད་པར་རྒྱང་ཆད་དུ་དོན་ལ་གྲུབ་པར་འཛིན་པ་ནི་
དངོས་པོའི་ཡིན་ལུགས་མ་ཡིན་པའི་ཀུན་ཏུ་བཏགས་པའམ་འཁྲུལ་པ་སྟེ། རྨི་ལམ་གྱི་གླང་ཆེན་ལ་རང་སྣང་དུ་མ་ཤེས་པར་ཕྱི་རོལ་གྱི་གླང་པོ་དངོས་སུ་འཛིན་པ་ལྟ་བུའོ། །དེ་ལྟར་གཟུང་འཛིན་དུ་སྣང་བཞིན་པ་གཞན་དབང་གི་རྣམ་ཤེས་དེའི་རང་བཞིན་མཐར་ཐུག་པ་
རང་རིག་རང་གསལ་ཙམ་ལས་མ་འདས་པས་དེ་ཙམ་བདག་གཉིས་ཀྱིས་སྟོང་པའི་ལྡོག་ཆ་ནས་ཡོངས་སུ་གྲུབ་པ་དངོས་པོའི་ཡིན་ལུགས་གཏིང་སླེབས་པ་ཉིད་དུ་འདོད་དེ། ཤེས་ཉིད་སྣང་བ་སྣ་ཚོགས་སུ་ཇི་ལྟར་སྣང་བའི་ཚུལ་རྒྱས་པར་ཕྱེ་ན་རྣམ་པར་ཤེས་པ་ཚོགས་
བརྒྱད་ཀྱི་ཚུལ་ལས་བརྩམས་ཏེ་ཤེས་དགོས་པས་དེ་དག་ཞིབ་པར་འཕགས་པ་ཐོགས་མེད་ཀྱི་གཞུང་ལས་ཤེས་པར་བྱའོ། །དེས་ན་གཞན་དབང་དོན་དམ་དང་ཀུན་རྫོབ་ཏུ་བཤད་ཚུལ་གཞུང་སོ་སོར་བྱུང་བ་གནད་མ་ཤེས་ན་བློ་བལ་བ་ཛ་བཞིན་འཁྲུགས་པར་འགྱུར་བས་ན། 
13-1-12b


གཞན་དབང་ཉིད་ལ་གནས་ཚུལ་མཐར་ཐུག་པའི་དོན་དབང་བཙན་དུ་བྱས་ན་དོན་དམ་དང་། སྣང་ཚུལ་དབང་བཙན་དུ་བྱས་ཏེ་གཞལ་ན་ཀུན་རྫོབ་ཏུ་བསྡུར་རུང་བ་གནད་ཀྱི་དོན་ཏོ། །དེ་ལྟ་བས་ན་སེམས་ཀྱི་རང་བཞིན་མ་ཡིན་པའི་དྲི་མ་གློ་བུར་བ་རྣམས་སྤངས་ཀྱང་། རང་
བཞིན་འོད་གསལ་གྱི་རྣམ་ཤེས་ཙམ་ནི་སངས་རྒྱས་ཀྱི་ས་ནའང་མི་ལྡོག་པར་ཞིང་དང་སྐུར་སྣང་བའི་གཞིར་འདོད་དོ། །འདི་པ་རང་གི་ལུགས་ལ་བདག་མེད་གཉིས་ཀ་རྫོགས་པར་འདོད་དོ༷། ཀུན་བཏགས་ཀྱིས་སྟོང་པ་དང་སྐྱེ་བ་ངོ་བོ་ཉིད་མེད་པ་སོགས་ཆོས་
བདག་མེད་ཀྱི་དོན་དུ་འདོད་ཀྱང་དབུ་མ་པས་དཔྱད་ན་སྣང་གཞི་ཤེས་པ་ཉིད་བདེན་པར་ཁས་བླངས་པས་ཆོས་བདག་མེད་ཀྱི་མཚན་ཉིད་ཡོངས་སུ་མ་རྫོགས་པས་ཉི་ཚེ་བར་ཤེས་སོ། །ལམ་ཚོགས་གཉིས་ལ་འབད་པས་འབྲས་བུ་གནས་གྱུར་བའི་ཡེ་ཤེས་
ལྔའི་བདག་ཉིད་སངས་རྒྱས་སུ་འགྲུབ་པར་འདོད་དོ། །དེ་ལ་ཀུན་རྫོབ་ཙམ་དུ་བྱང་ཆུབ་སེམས་དཔས་སེམས་ཅན་ཐམས་ཅད་མྱ་ངན་ལས་བཟླ་བར་བྱའོ་སྙམ་པའི་གོ་ཆ་ཆེན་པོ་བགོས་ཤིང་། ལམ་ཚོགས་གཉིས་ཚད་མེད་པ་ལ་བསྐལ་པ་གྲངས་མེད་
དུ་མར་ཡང་ནས་ཡང་དུ་སྤྱད་ནས། འབྲས་བུ་རྣམ་མཁྱེན་གྱི་ཡེ་ཤེས་ཐོབ་སྟེ་གདུལ་བྱའི་རེ་བ་ཡིད་བཞིན་དུ་སྐོང་བ་ཡང་། སྐྱེ་བ་རེ་རེ་དང་ལུས་རེ་རེ་ཙམ་གྱིས་མ་ཡིན་ལ།  ཐུགས་ཀྱི་རྒྱུད་ཡོན་ཏན་གྱི་ཁྱད་པར་གྱིས་གོང་ནས་གོང་དུ་འཕགས་ཤིང་། 
མཐར་ཡེ་ཤེས་དང་ཡོན་ཏན་མཐའ་དག་ལ་མངའ་དབང་འབྱོར་དགོས་པའི་རྒྱ་ཆེ་བའི་ལམ་ལུགས་འདི་ལ་འོས་ཤིང་མཛེས་པ་ཡིན་པས་ཐ་སྙད་ཀྱི་འཇོག་ཚུལ་འདི་ལྟ་བུས་གཞི་བཏིང་ནས་རྒྱ་ཆེ་བའི་ལམ་གྱི་གཞུང་བསྲང་དགོས་པ་ཡིན་པས། འཕགས་པ་
13-1-13a


ཐོགས་མེད་ཀྱིས་རྒྱ་ཆེན་སྤྱོད་པའི་སྲོལ་ཕྱེས་སོ་ཞེས་གྲགས་པ་བཞིན་ཐེག་ཆེན་པ་ཀུན་ལ་དགོས་པའི་གནད་གཅིག་ཡིན་པར་ཤེས་པར་བྱའོ། །དེས་ན་སེམས་ཙམ་པའི་ཚུལ་འདི་ཀུན་རྫོབ་ཐ་སྙད་ཀྱི་དེ་ཁོ་ན་ཉིད་ཤིན་ཏུ་བདེན་པ་ཡིན་མོད། 
འོན་ཀྱང་འདིའི་རྣམ་ཤེས་རང་གསལ་གྱི་རང་བཞིན་ལ་བདེན་གྲུབ་ཏུ་ཞེན་པའི་ཆ་དེ་དགག་བྱ་ཡིན་ནོ། །ཕྱི་ནང་གི་གྲུབ་མཐའི་སྐབས་འདིར་སོ་སོའི་འདོད་པའི་རྣམ་གཞག་ཅུང་ཟད་གཞུང་དུ་འཆད་པར་འགྱུར་ལ། འདིར་བདེན་གཉིས་ཀྱི་འདོད་ཚུལ་སྙིང་པོ་ཙམ་
བརྗོད་པ་ཡིན་ནོ། །བློ་འཆལ་མང་དུ་སྨྲ་བས་ཅི་བགྱི་སྟེ། །དབང་པོ་ཀུན་གྱི་རྩ་བ་སྲོག་བཞིན་དུ། །གྲུབ་མཐའི་ཟབ་གནད་རྗེན་ཅེར་ཟིན་པའི་བློ། །ཆུ་ལས་འོ་མ་འབྱེད་པའི་ངང་མོ་བཞིན། །ཞེས་བྱ་བ་བར་སྐབས་ཀྱི་ཚིགས་བཅད་དོ། །དེ་ལྟར་རང་
གི་སྡེ་པ་དེ་དག་ལ་བློའི་རྩལ་ཆེ་ཆུང་གིས་སྟོང་པར་རྟོགས་ཚུལ་ལ་ཁྱབ་ཆེ་ཆུང་ཡོད་པས་བདེན་གཉིས་ཀྱི་ཡིན་ལུགས་དང་ཇེ་ཉེར་སོང་བས་གོང་ནས་གོང་དུ་ཁྱད་ཞུགས་ཀྱང་། དེ་ཐམས་ཅད་མཚུངས་པར་སྣང་གཞི་བདེན་གྲུབ་གཅིག་ལས་འདའ་མ་ནུས་པས་ཉི་ཚེའི་སྟོང་པ་
ཞེས་བྱ་ལ། གཞུང་འདིར་ནི་ཤེས་བྱའི་ཆོས་ཀྱི་ཁོང་འདི་ན་རང་བཞིན་བདེན་གྲུབ་ཀྱི་དངོས་པོ་ཅུང་ཟད་ཅིག་ཀྱང་ཁས་མི་ལེན་པ་ཡིན་ཏེ། ཟླ་སྒྲོན་ལས། ཆོས་རྣམས་ཐམས་ཅད་རྟག་ཏུ་རང་བཞིན་སྟོང་། །རྒྱལ་སྲས་རྣམས་ཀྱིས་དངོས་པོ་རྣམས་བཤིག་ན། །སྲིད་
པ་ཐམས་ཅད་ཡོང་ཡེ་སྟོང་པ་སྟེ། །ཉི་ཚེའི་སྟོང་པ་མུ་སྟེགས་ཅན་རྣམས་ཀྱི། །ཞེས་པ་ལ་སོགས་པས་བསྟན་པ་དེ་ལྟ་བུའི་དབུ་མའི་གཞུང་འཛུགས་ལ། དབུ་མ་དེ་ལའང་སྣང་ཚོད་ཀུན་རྫོབ་ཀྱི་དངོས་པོ་འདི་མ་བརྟགས་མ་དཔྱད་པའི་བློ་ངོར་སྣང་ཙམ་འཇིག་རྟེན་ལ་
13-1-13b


གྲགས་པ་ལྟར་ཁས་ལེན་པ་དང་། དཔྱད་པའི་གྲུབ་མཐའ་མདོ་སྡེ་པ་སོགས་དོན་སྨྲའི་ལུགས་ལྟར་ཁས་ལེན་པ་ཡོད་ཀྱང་།  གཞུང་འདིར་ནི་ཐ་སྙད་ཀྱི་འདོད་ཚུལ་སེམས་ཙམ་པ་དང་མཐུན་པར་བཞེད་པས་དབུ་མ་རྣལ་འབྱོར་སྤྱོད་པའི་ཤིང་རྟའི་སྲོལ་དང་པོར་ཕྱེ་བར་
མཛད་པ་ཡིན་ནོ། །ཀུན་རྫོབ་ཀྱི་འཇོག་ཚུལ་འདི་རིགས་པས་དཔྱད་ན་ཐ་སྙད་ཀྱི་དེ་ཁོ་ན་ཉིད་མཐར་ཐུག་པ་ཡིན་ཅིང་། དཔལ་ལྡན་ཆོས་ཀྱི་གྲགས་པའི་དགོངས་པའང་ཡིན་ནོ། །དེ་ལ་ཐ་སྙད་དང་དོན་དམ་པའི་ཚད་མ་སོ་སོས་རྙེད་དོན་སོ་སོ་བ་ཡིན་ཅིང་ཐ་སྙད་ཀྱི་
རྣམ་གཞག་ལ་རྩེ་མོར་གྱུར་པ་སེམས་ཙམ་པ་ཡིན་པས།  ལུགས་འདི་ལྟ་བུར་ཁས་ལེན་པ་ནི་ཐ་སྙད་བདེ་ཞིང་གཞན་ཡང་དགོས་པའི་མཆོག་དུ་མ་ཡོད་པ་ཅུང་ཟད་ཅིག་འོག་ནས་འཆད་པར་འགྱུར་རོ། །དེ་ལ་འདི་ལྟ་བུའི་ཐ་སྙད་ཀྱི་འདོད་ཚུལ་ཡང་དོན་དམ་པར་
སྣང་བ་སེམས་སུ་གྲུབ་མ་གྲུབ་ཀྱི་དཔྱད་པ་མ་ཡིན་ལ། བསླུ་མེད་སྣང་ཙམ་གྱི་ཆོས་འདི་རྣམས་ལ་ཐ་སྙད་ཀྱི་ཚད་མས་གཞལ་ཚུལ་ཡིན་ཏེ། དཔེར་ན་རྨི་ལམ་གྱི་སྣང་བ་འདི་དག་ནང་གི་སེམས་ཡིན་ནམ། འོན་ཏེ་ཕྱི་རོལ་ན་ཡོད་ཅེས་དྲི་ན། བློ་དང་ལྡན་པ་ཁ་ཅིག་
གིས་བརྟགས་ཤིང་དཔྱད་ནས་དེ་ཕྱི་རོལ་ན་ཡོད་པར་མི་འཐད་པས་རང་སྣང་ཙམ་མོ་ཞེས་སྨྲ་བ་དང་འདྲ་ཡང་། གང་དག་ཚད་མ་གཉིས་ཀྱིས་གཞལ་ཚུལ་བསྲ་བསྲེར་གྱུར་ཏེ། མ་བརྟགས་མ་དཔྱད་པའི་སྣང་ཙམ་ལས་དཔྱད་པའི་གྲུབ་མཐའ་ཞིག་ཁས་ལེན་ན་ཐལ་འགྱུར་པའི་
ལུགས་དང་ཆེས་འགལ་སྙམ་དུ་སེམས་པར་མི་བྱ་སྟེ། དེ་ཡང་འདིར་སུ་ཞིག་གིས་ཆོས་འདི་དག་རང་གི་མཚན་ཉིད་ཀྱིས་གྲུབ་བམ་ཞེའམ། དེའི་ངོ་བོ་ཚད་མས་གྲུབ་པ་སོགས་གང་ཡིན་ཀྱང་རུང་སྟེ། འཇལ་བྱེད་ཀྱི་ཚད་མ་ཤན་ཕྱེད་པ་གལ་ཆེ་སྟེ། དོན་དམ་པའི་ཚད་
13-1-14a


མའི་ངོས་ནས་གཞལ་བ་ཡིན་ན་ནི། སྣང་བའི་མདུན་ན་མུན་པ་ལྟར་དེའི་ངོར་ནམ་ཡང་མི་འགྲུབ་པས་ན་ཅུང་ཟད་ཀྱང་གྲུབ་པ་གཞག་ཏུ་མེད་ལ།  ཐ་སྙད་པའི་ཚད་མའི་ངོས་ནས་གཞལ་བ་ཡིན་ན་ནི། དེའི་ངོར་བསླུ་མེད་བསྙོན་མེད་དུ་གྲུབ་པས་
དེས་ཐ་སྙད་ཀྱི་སྣང་ཚུལ་དང་མཐུན་པར་ཇི་ཙམ་དཔྱད་ཀྱང་ཚད་མའི་གཞུང་ནས་སྐྱེ་བ་སྔ་ཕྱི་སོགས་ཡོད་པར་སྒྲུབ་པའི་དཔྱད་པ་ལ་སོགས་པ་ཇི་ལྟ་བ་བཞིན་དུ་དོན་དམ་དཔྱོད་བྱེད་དུ་མི་འགྲོའོ། །མདོར་ན་མཐུན་སྣང་གི་དངོས་པོ་འདི་ཙམ་དགག་པའི་དབུ་མ་པ་སུ་ཡང་
མེད་ལ། རང་བཞིན་བདེན་གྲུབ་ཀྱི་དངོས་པོ་འདོད་པའི་དབུ་མ་པ་སུ་ཡང་མེད་ཀྱང་། བདེན་གཉིས་ཟུང་དུ་ཆུད་ཚུལ་གྱི་རྟོགས་པའི་རྩལ་འཕངས་ལས་དོན་དམ་པ་གཏན་ལ་འབེབས་ཚུལ་ལ་ཁྱད་ཡོད་པ་ལས། ཐ་སྙད་བཞེད་ཚུལ་ཙམ་གྱི་གྲུབ་མཐའི་མཐོ་དམན་མི་
རུང་ངོ་། །དེས་ན་བུམ་པ་རང་བཞིན་མེད་པ་དང་། །སྟོང་པ་ཡིན་པ་ལྟ་བུ་ལ་དངོས་སུ་དོན་དམ་གྱི་ཁྱད་པར་སྦྱར་བ་མེད་ཀྱང་། གྲུབ་མཐའ་དང་ཐ་སྙད་མཁས་པ་དག་གིས་སྐབས་ཀྱི་དོན་ལས་དོན་དམ་དཔྱོད་པའི་དབང་དུ་བྱས་པར་གོ་ཞིང་། བུམ་པ་ཚད་མས་གྲུབ་པ་དང་རང་
མཚན་གྱིས་གྲུབ་པའང་ཐ་སྙད་དུ་གོ་བར་འགྱུར་གྱི། ཕན་ཚུན་འཆོལ་བའི་རྨོངས་པ་མི་སྐྱེ་ཡང་། ཚིག་གིས་རྨོངས་ནས་བྱ་རོག་གི་ཁུ་འཕྲིགས་ཞུགས་པ་ཅན་དག་ལ་རང་བློ་ལ་རྟག་ཏུ་ཞེན་པའི་ཚིག་ཙམ་ལྷུར་བྱེད་ཀྱང་། དོན་དུ་མ་ལ་ཐུན་མོང་དུ་གྲགས་པའི་ཚིག་
རྣམས་ནི་དོན་གྱི་རྣམ་པར་བཅད་པ་ལ་མི་ལྟོས་པར་དངོས་པོ་གཅིག་གི་རྗོད་བྱེད་དུ་ངེས་པ་མེད་དེ། དཔེར་ན་བདེན་གྲུབ་ཅེས་པའང་། དོན་དམ་དཔྱོད་པས་དཔྱད་བཟོད་དུ་གྲུབ་པ་ལ་གྲགས་ཆེ་བས་ཕལ་ཆེར་དེ་ལྟར་གོ་བ་ཡིན་གྱི། གཞན་དུ་བདེན་པ་ཞེས་པ་བདེན་པ་
13-1-14b


གཉིས་ཀར་ཡང་གོ་རུང་བ་བཞིན།   གྲུབ་ཅེས་པའང་དེའི་ཚིག་མཐའ་ཙམ་དུ་བསམས་ན། ཐ་སྙད་ལ་གོ་མི་རུང་བའི་རྒྱུ་མཚན་ཡང་མེད་པ་དེ་བཞིན་ཁྱད་པར་སྦྱར་བ་འགའ་ཞིག་ཀྱང་གཞན་དུ་འཁྲུལ་མི་སྲིད་པ་མ་ཡིན་པས་སྐབས་ཀྱི་དོན་ལས་ཐ་སྙད་བདེ་བླག་ཏུ་
ངེས་པ་རྒྱ་གཞུང་ཆེན་པོ་རྣམས་ཀྱི་སྒྲོས་བཞིན་རྗོད་པ་ལེགས་ཤིང་། གོ་བ་ལ་ཕན་སླད་ཁྱད་པར་སོགས་སྦྱར་ཡང་འགལ་བ་མེད་དེ༷། ངག་ནི་བརྗོད་འདོད་ཀྱི་རྒྱུ་ཅན་ཡིན་པའི་ཕྱིར་རོ། །དེས་ན་གཞུང་རྣམས་སུ་བདེན་གྲུབ་དང་རང་མཚན་གྱིས་གྲུབ་པ་སོགས་ལ་
ཁྱད་མེད་དུ་དགག་པ་དང་། ཁྱད་པར་ཕྱེ་སྟེ་བཤད་པ་ལྟ་བུ་སོགས་སྐྱེ་བོ་རྣམས་མི་རྨོངས་པར་བྱ་བའི་ཕྱིར་ཚད་མ་སོ་སོས་གཞལ་ཚུལ་གྱི་གནད་རེ་ཡོད་པ་ཤན་མ་ཕྱེད་པར་ཚིག་གི་ཟེར་སྒྲོས་ཙམ་གྱིས་གྲུབ་མཐའ་ཕྱེ་བ་ཤིན་ཏུ་ཐང་ཆད་དོ། །དེས་ན་རྗེས་ཐོབ་ཤན་
འབྱེད་པའི་སྐབས་སུ་ཚད་མ་གཉིས་ཀྱིས་གཞལ་བའི་རྣམ་གཞག་མ་འཁྲུགས་པར་འཇོག་དགོས་ཀྱི། ཤན་ཕྱེད་པ་མེད་པར་ཐ་སྙད་དུའང་དཔྱད་པ་ཙམ་གྱིས་དོན་དམ་དཔྱོད་པར་འགྲོ་བ་ལྟ་བུ་ན། ཐེག་ཆེན་ལ་ཞུགས་པའི་གང་ཟག་འཚང་རྒྱ་བ་ཡོད་ཅེས་ཁས་
བླངས་པའང་དོན་དམ་པར་ཡོད་པར་ཁས་བླངས་པ་ལྟ་བུར་འགྱུར་ཞིང་། ཀུན་རྫོབ་བདེན་པ་ཞེས་སྨྲ་ནའང་ནེམ་ནུར་དགོས་པའི་འགགས་ལ་ཐུག་ཅིང་། ལམ་དང་འབྲས་བུ་གྲུབ་པའི་མཐའ་སྨྲ་བར་དཀའོ། །གལ་ཏེ་གང་ཟག་འཚང་རྒྱ་བ་ཡོད་པར་སྨྲ་བ་ནི་
ཐ་སྙད་ཙམ་གྱི་དབང་དུ་བྱས་སོ་སྙམ་ན། དེ་ལྟར་ན་བདེན་གཉིས་སོ་སོར་ཕྱེས་ནས་སྨྲ་བ་ཉིད་ཀྱི་ལུགས་ཁས་བླངས་པར་གྱུར་པ་སྟེ། ལུགས་དེས་ཀྱང་ཐ་སྙད་ཙམ་དུ་དངོས་པོའི་མཚན་ཉིད་གྲུབ་པ་དང་། སེམས་ཙམ་དུ་སྨྲ་བའང་དེ་ལྟར་ཤེས་པར་གྱིས་ཤིག ། 
13-1-15a


ཁོ་ན་རེ། གལ་ཏེ་དེ་ནི་གཞན་ངོ་ཙམ་དུ་ཁས་བླང་གི་རང་ལུགས་མིན་ནོ་སྙམ་ན་རང་ལ་རྗེས་ཐོབ་ཀྱི་སྐབས་ན་ལམ་འབྲས་ཀྱི་རྣམ་གཞག་དང་རྟེན་འབྲེལ་ཙམ་དུ་ཁས་ལེན་ཡོད་པར་བཤད་པ་སོགས་དང་འགལ་ལོ། །དེས་ན་ཐ་སྙད་ཚད་གྲུབ་
འདོད་པའི་ལུགས་ལ་བདེན་གཉིས་ཕྱེ་སྟེ་སྨྲ་ཞིང་། མ་ཕྱེས་པར་དཔྱད་ཙམ་གྱིས་དོན་དམ་དཔྱོད་པར་མི་འགྲོ་བའི་ཚུལ་ཤེས་པར་བྱའོ། །མདོར་ན་མཉམ་བཞག་སྒྲ་དང་རྟོག་པའི་ཡུལ་ལས་འདས་པའི་གཞལ་དོན་ལྟར་མཐར་ཐུག་གི་གནས་ཚུལ་བདེན་པ་དབྱེར་མེད་
ཀྱི་དབང་དུ་བྱས་ན་ནི་བདེན་གཉིས་ཕྱེ་མི་དགོས་པས་འདི་ལྟར་སྣང་བའི་ཆོས་ཐམས་ཅད་ཡེ་ནས་ཡོད་མེད་ཡིན་མིན་སོགས་དགག་སྒྲུབ་ཀྱི་ཁས་ལེན་གང་ཡང་མེད་པས་ཅིའང་མི་གསུང་བའི་ཚུལ་གྱིས་ལན་བཏབ་པ་དང་འདྲ་བར་ཡང་དག་པར་ན་ཐ་སྙད་ཐམས་ཅད་ལས་འདས་
ཤིང་བརྗོད་དུ་མེད་པ་དང་སྤྲོས་པ་དང་བྲལ་བ་དང་མཉམ་པ་ཉིད་ཀྱི་ཕྱིར་ཁས་ལེན་མེད་པར་གྲུབ་ཀྱང་། རྗེས་ཐོབ་སྒྲ་རྟོག་གི་ཡུལ་དུ་གྱུར་པ་སྣང་ཚུལ་གྱི་དབང་དུ་བྱས་ཏེ་གཞི་ལམ་འབྲས་བུ་སོགས་ཀྱི་རྣམ་གཞག་ཞིག་རང་གིས་བསམ་ཞིང་གཞན་ལའང་སྨྲ་དགོས་ན་ནི་ཚད་
མ་གཉིས་ཕྱེ་སྟེ་དགག་སྒྲུབ་ཀྱི་ཚུལ་ལ་འཇུག་པ་ལས་འདའ་བ་མི་སྲིད་དོ། །དེ་ལྟར་ན་འདི་དང་ཐལ་འགྱུར་གཉིས་ཆེས་མི་འདྲའོ་སྙམ་དུ་རྟོག་པར་མི་བྱ་སྟེ། ཐ་སྙད་ཞལ་གྱིས་བཞེས་ཚུལ་ཙམ་མི་འདྲ་ཡང་། ཤིང་རྟ་ཆེན་པོའི་དགོངས་པ་མཐར་ཐུག་གནད་གཅིག་ཏུ་དབྱེར་
མེད་པར་རིགས་པས་གྲུབ་པས་སོ། །དེ་ལྟར་ཤེས་ན་གངས་ཅན་འདིར་ཡང་མཁས་པ་ལ་ལས་ཀུན་རྫོབ་ཚད་གྲུབ་ཏུ་བཞེད་པ་ལ། གཞན་དག་གིས་དེ་མི་སྲིད་པའི་གཏམ་ངན་དུ་རྩི་བ་དང་། མཁས་པ་སྔ་མའི་བཞེད་ཚུལ་ལ་ཁ་ཅིག་གིས་དེ་རྣམས་ཀྱིས་ཐལ་
13-1-15b


འགྱུར་བའི་ལྟ་བ་རྣལ་མ་མ་རྟོགས་པའི་སྐུར་འདེབས་སོགས་དང་། གཞན་ཡང་ཤིང་རྟ་ཆེན་པོ་རྣམས་ཀྱི་ལུགས་ལ་རྨོངས་པའི་དྲི་མ་མང་ཞིག་རང་གྲོལ་དུ་འགྱུར་རོ། །དེ་ཡང་འདི་ལྟ་བུའི་བདེན་གཉིས་ཀྱི་རྣམ་པར་གཞག་པ་གཏན་ལ་འབེབས་པའི་ཚེ་ན་འདི་སྙམ་
དུ། ཀུན་རྫོབ་ཅེས་པ་ཡང་དག་པའི་དོན་ལ་བསྒྲིབས་པའམ་འགེབས་པ་ལྟ་བུར་བཤད་ན། མ་དག་པའི་ཆོས་རྣམས་ནི་དེ་ལྟར་ཡིན་མོད་ཀྱི། གཏི་མུག་དང་བྲལ་བ་ཡང་དག་པའི་ཆོས་སངས་རྒྱས་ཀྱི་སྐུ་དང་ཡེ་ཤེས་ལ་སོགས་པ་ཀུན་རྫོབ་མ་ཡིན་ལ།  དེའི་ཕྱིར་
ན་མི་སྟོང་ངོ་སྙམ་དུ་སེམས་ན་དེ་ནི། རྒྱལ་ལ་སོགས་ལ་ཆགས་པ་ཕྲ། །ཞེས་གསུངས་པ་ལྟར་ཡིན་པས་བདེན་ཞེན་སྤང་དགོས་ཏེ། ཆོས་མཆོག་མྱ་ངན་ལས་འདས་པ་ལས་ལྷག་པའི་ཆོས་ཞིག་ཡོད་ན་དེའང་སྒྱུ་མ་དང་རྨི་ལམ་ལྟར་བལྟའོ་གསུངས་པའི་དོན་
བཞིན་ངེས་པ་བསྐྱེད་པར་བྱའོ། །དེའང་བཀའ་དང་བསྟན་བཅོས་རྣམས་ན་བདེན་གཉིས་འཇོག་ཚུལ་གཉིས་སུ་གནས་ཏེ། གནས་ལུགས་དོན་དམ་ལ་དཔྱོད་པའི་ཚད་མའི་དབང་དུ་བྱས་ཏེ། སྟོང་པ་ལ་དོན་དམ་དང་། སྣང་བ་ལ་ཀུན་རྫོབ་ཅེས་བཞག་པ་དང་། སྣང་
ཚུལ་ལ་དཔྱོད་པ་ཀུན་ཏུ་ཐ་སྙད་པའི་ཚད་མའི་དབང་དུ་བྱས་ཏེ། གནས་སྣང་མཐུན་པ་མི་བསླུ་བའི་ཡུལ་དང་ཡུལ་ཅན་ལ་དོན་དམ་དང་། ལྡོག་ཕྱོགས་ལ་ཀུན་རྫོབ་ཏུ་འཇོག་པའི་ཚུལ་གཉིས་ལས། ཕྱི་མའི་དོན་དམ་ཡིན་ཀྱང་ངོ་བོ་སྟོང་པ་ཡིན་ལ།  སྐབས་འདིར་ནི་སྔ་མ་
ལྟར་ཡིན་ཅིང་། དེའང་ཀུན་རྫོབ་ཀྱི་དོན་ཡང་དག་པ་ཡིན་མིན་གཉིས་སུ་ཕྱེ་བའི་མིན་པ་ལ་འཇོག་པའི་ཚུལ་ནི། ཡང་དག་པ་ཞེས་བྱ་བའི་དོན་དངོས་པོའི་ཡིན་ལུགས་ཏེ་རང་བཞིན་གྱིས་མ་གྲུབ་པའི་སྟོང་པ་ཉིད་ལ་བརྗོད་པས་ན། ཀུན་རྫོབ་ཅེས་པ་སྐྱེ་བ་སོགས་སུ་སྣང་
13-1-16a


བའི་ཚུལ་གྱིས་བྱིས་པ་རྣམས་ཀྱི་ངོར་སྟོང་པ་ཉིད་སྦས་ཤིང་བསྒྲིབས་པར་གྱུར་པ་ལྟ་བུ་ཞིག་ཁོ་ན་ལ་གོ་དགོས་ཀྱི། རྣམ་པ་ཐམས་ཅད་དུ་བསླུ་ཞིང་བརྫུན་པའོ་ཞེས་གོ་བར་མི་བྱ་ཞིང་། དེས་སྟོང་པ་ཉིད་ལ་རྟག་ཏུ་བསྒྲིབས་པར་ཡང་གོ་བར་མི་བྱ་
སྟེ། འཕགས་པ་རྣམས་ལ་སྟོང་དང་རྟེན་འབྱུང་གཅིག་གིས་གཅིག་གསལ་བའི་ཕྱིར་རོ། །དེས་ན་སྣང་ཙམ་གྱིས་སྟོང་ཉིད་ལ་བསྒྲིབས་པ་མ་ཡིན་ཡང་སྣང་བ་ལ་བདེན་འཛིན་ཞུགས་པའི་གཏི་མུག་གི་དབང་གིས་ཡུལ་རྣམས་ཀྱི་རང་བཞིན་ཕྱིན་ཅི་ལོག་ཏུ་དམིགས་པའོ། །
དེས་ན་གདུལ་བྱ་རྣམས་ཀྱི་ལོག་རྟོག་བཟློག་པའི་དོན་དུ་སྟོན་པ་ཐབས་མཁས་ལ་ཐུགས་རྗེ་ཆེན་པོ་མངའ་བས་གདུལ་བྱའི་རྒྱུད་དང་བསྟུན་ནས་སྣང་བ་ལ་ཀུན་རྫོབ་ཅེས་དོན་དམ་པ་རྟོགས་པའི་ཚིག་བླ་དྭགས་དེ་སྐད་དུ་བཏགས་མོད། སྣང་བ་དང་ཀུན་རྫོབ་དོན་དུ་གཅིག་སྟེ།  སྣང་
ནི་སྣང་ཡང་སྣང་བ་ལྟར་བདེན་པར་གྲུབ་པ་མེད་པ་ལ་གོ་དགོས། བདེན་པ་མེད་ཅེས་རྗོད་པ་དེས་ཀྱང་ཕྱིན་ཅི་ལོག་གི་སྣང་བ་ཡིན་པར་སྟོན་མི་དགོས་ཏེ། སྟོང་པ་ཡིན་པ་ལ་བདེན་པ་མེད་ཅེས་བཏགས་པ་གོ་དགོས། དེ་དེ་ལྟར་སྣང་བ་ལྟར་གྲུབ། སྣང་བ་ལྟར་བདེན་ན་ཀུན་
རྫོབ་ཅེས་གདགས་པར་མི་རུང་ལ། དེ་ལྟར་ན་མི་སྟོང་པར་འགྱུར་ཞིང་། མི་སྟོང་པའི་དངོས་པོ་ཞིག་ཤེས་བྱར་མི་སྲིད་པའི་ཚུལ་རིགས་པས་ཡང་དག་པར་གྲུབ་པ་དེས་ན་ཤེས་བྱའི་ཁོང་འདི་ན་སྣང་སྟོང་གཉིས་རིས་སུ་ཆད་པའི་ཕྱོགས་གཅིག་ཁོ་ནར་གྱུར་པའི་ཆོས་ཞིག་མི་
སྲིད་ལ། དངོས་པོའི་གཤིས་ལ་མེད་པས་ན་རིགས་པར་སྨྲ་བས་དེ་ལྟ་བུ་ཡོད་པར་ཁས་ཀྱང་མི་ལེན་པ་དེས་ན། མདོར་ན་ཀུན་རྫོབ་ཅེས་པའི་ཚིག་གིས་ནི་སྣང་བཞིན་པ་དེ་སྟོང་པར་བསྟན་པ་ཁོ་ནའི་དོན་ཡིན་གྱི། གཞན་ཀུན་རྫོབ་ཅེས་ཚིག་ཙམ་ལ་བསམས་ཏེ་སྐྱོན་
13-1-16b


ཅན་ངན་པ་ལྟ་བུ་ཞིག་ལ་བཟུང་ནས། དེ་དང་སྟོང་ཉིད་ལ་རྩིས་ཆེ་ཆུང་བྱེད་པ་རྣམས་ལ་ནི་ཟབ་མོ་དབུ་མའི་ལྟ་བ་རྣམ་དག་ཅིག་འབྱུང་དཀའོ། །དེས་ན་མི་བདེན་པའི་སྣང་བ་ལ་ཀུན་རྫོབ་ཅེས་བརྡ་གདགས་ཤིང་། རང་བཞིན་མ་གྲུབ་པའི་སྟོང་པ་ལ་དོན་དམ་ཞེས་
བཏགས་པ། དེ་གཉིས་པོ་ལ་རྩིས་ཆེ་ཆུང་མེད་པར་གཟུགས་ནས་རྣམ་མཁྱེན་གྱི་བར་དུ་མགོ་སྙོམས་སུ་སྦྱོར་བ་འདི་ཤེས་ན་ཤེས་བྱའི་ཁོང་ན་དེ་ལས་ཤེས་རྒྱུ་གལ་ཆེ་བ་གཅིག་ཀྱང་མེད་པར་ངེས་སོ། །དེས་ན་དབྱིངས་དང་གཉིས་སུ་མེད་པའི་ཡེ་ཤེས་ཀྱི་སྣང་བ་རྣམས་
ཀྱང་ངོ་བོ་མི་སྟོང་ན་དབྱིངས་ལས་ཐ་དད་པར་འགྱུར་བས་ན་དབྱིངས་དང་མཉམ་པ་ཉིད་ཀྱི་ཕྱིར་སྣང་སྟོང་དབྱེར་མེད་ཤིན་ཏུ་རྣམ་པར་དག་པའི་བདག་ཉིད་དུ་རིག་པར་བྱའོ། །དེ་ལྟར་བདེན་པ་གཉིས་ཀྱི་གནས་ལུགས་ཡང་དག་པར་རྟོགས་པ་ནི་དབུ་མའི་ལམ་ཁོ་ན་ཡིན་ནོ། །དེས་
བདེན་གཉིས་ཀྱི་ཚུལ་འཕྲོས་དོན་དང་བཅས་པ་མདོ་ཙམ་བསྙད་ནས། ད་ནི་དེ་ལྟ་བུའི་བདེན་པ་གཉིས་ཀྱི་རང་བཞིན་དེ་ཉམས་སུ་ལེན་པའི་ཐེག་པ་ཆེན་པོ་པ་དག་གིས་ཇི་ལྟར་ཤེས་ཤིང་ཇི་ལྟར་རྣལ་འབྱོར་དུ་བྱ་སྙམ་ན། ཚུལ་གཉིས་ཀྱི་ཤིང་རྟ་ཆེན་པོའི་ལམ་སྲོལ་དྲི་མ་
མེད་པ་ལ་རྗེས་སུ་ཞུགས་པས་ཐོབ་སྟེ། དེ་ལ་ཐེག་པ་ཆེན་པོ་ནི་ཟབ་ཅིང་རྒྱ་ཆེ་ཡང་། མདོར་བསྡུ་ན། ལང་ཀར་གཤེགས་པ་ལས། ཆོས་ལྔ་དང་ནི་རང་བཞིན་གསུམ། །རྣམ་ཤེས་བརྒྱད་པོ་ཉིད་དག་དང་། །བདག་མེད་དོན་ནི་རྣམ་གཉིས་པོར། །
ཐེག་ཆེན་ཐམས་ཅད་བསྡུས་པ་ཡིན། །ཞེས་གསུངས་པ་ལྟར། མིང་། རྒྱུ་མཚན། རྣམ་རྟོག །ཡང་དག་པའི་ཡེ་ཤེས། དེ་བཞིན་ཉིད་དེ་ཆོས་ལྔ་དང་། ཀུན་བཏགས། གཞན་དབང་།  ཡོངས་གྲུབ་སྟེ་མཚན་ཉིད་གསུམ་དང་། རྣམ་པར་ཤེས་པའི་
13-1-17a


ཚོགས་བརྒྱད་དང་། གང་ཟག་དང་ཆོས་ཀྱི་བདག་མེད་པ་གཉིས་ཏེ་དེ་རྣམས་སུ་འདུ་ལ།  མཚན་ཉིད་གསུམ་སོགས་ཕྱི་མ་དེ་དག་ཀྱང་ཆོས་ལྔའི་ནང་དུ་རྫོགས་པར་འདུ་ཚུལ། མདོ་ཉིད་ལས་ཇི་སྐད་འབྱུང་བ་ལྟར་ཤེས་པར་བྱ་སྟེ། དེ་
ལ་རྒྱུ་མཚན་ནི་དབྱིབས་དང་གཟུགས་ལ་སོགས་པའི་མཚན་ཉིད་དུ་སྣང་བའོ། །མཚན་ཉིད་དེ་ལ་བུམ་སོགས་ཀྱི་མིང་གིས་གཞན་རྣམ་པར་བཅད་ནས་དེ་དང་དེར་ཞེན་ཅིང་གདགས་པ་ནི་མིང་ངོ་། །དེ་ལྟར་མིང་བཏགས་ནས་རྒྱུ་མཚན་རྣམས་གསལ་བར་བྱེད་
པའོ། །དེ་གཉིས་ནི་ཀུན་བཏགས་ཡིན་ཏེ་སྒྲ་རྟོག་གི་སྤྱོད་ཡུལ་ཅན་གཟུང་འཛིན་གཉིས་སུ་སྣང་བ་བརྟགས་ན་མི་བདེན་པའི་ཕྱིར་རོ། །དེ་ལྟར་གཟུང་ཡུལ་འཛིན་པའི་སེམས་སེམས་བྱུང་གི་ཆོས་རྣམས་ལ་རྣམ་པར་རྟོག་པ་ཞེས་བྱ་ཞིང་། དེ་ལ་ཕྱེ་ན་རྣམ་
པར་ཤེས་པའི་ཚོགས་བརྒྱད་ཡོད་དོ། །དེ་ནི་གཞན་གྱི་དབང་ཉིད་ཡིན་ཏེ་ཐ་སྙད་ཙམ་དུ་སྣང་བ་སྣ་ཚོགས་ཀྱི་སྣང་གཞིར་གྱུར་པའོ། །དེ་ལྟར་ཕྱི་ནང་གིས་བསྡུས་པའི་ཆོས་དེ་དག་ལ་བདག་གཉིས་ཀྱི་རང་བཞིན་ཅུང་ཟད་གྲུབ་པ་མེད་པའི་ཆོས་ཀྱི་དབྱིངས་ནི་དེ་བཞིན་
ཉིད་ཡིན་ལ།  དེའི་རྗེས་སུ་ཞུགས་པ་ཡང་དག་མིན་རྟོག་དང་བྲལ་བའི་ཡུལ་ཅན་སོ་སོ་རང་རིག་པ་ནི་ཡང་དག་པའི་ཡེ་ཤེས་ཞེས་བྱའོ།  ཕྱི་མ་ཡུལ་ཡུལ་ཅན་འདི་གཉིས་ནི་ཡོངས་སུ་གྲུབ་པ་ཞེས་བྱ་སྟེ། ངོ་བོ་བདེན་པར་གྲུབ་པ་ནི་མིན་གྱི་ཡིན་ལུགས་མ་
ནོར་བས་ན་ཚིག་དེ་སྐད་བླ་དྭགས་སུ་བཏགས་པ་ཡིན་ནོ། །དེས་ན་དེ་ལྔ་ཡི་ནང་དུ་སེམས་ཙམ་དང་དབུ་མའི་གཞུང་ལུགས་མཐའ་དག་འདུས་པར་རིགས་པས་གྲུབ་པའི་ཕྱིར་ན་ཐེག་ཆེན་མཐའ་དག་ཀྱང་དེ་ཙམ་དུ་ཟད་པར་ཤེས་པར་བྱ་ཞིང་། དེ་ལ་མིང་རྒྱུ་མཚན་གྱིས་
13-1-17b


བསྡུས་པའི་ཕྱི་རོལ་གྱི་སྣང་བ་སྣ་ཚོགས་པར་སྣང་བ་འདི་ནི་ཕྱི་རོལ་གྱི་དོན་དུ་བདེན་པར་གྲུབ་པ་མེད་དེ། འདི་ལྟར་སྣང་བ་ནི་ཀུན་གཞིའི་རྣམ་པར་ཤེས་པའི་ཁམས་ལ་གནས་པའི་བག་ཆགས་སྣ་ཚོགས་པ་སྨིན་པའི་དབང་ལས་བྱུང་སྟེ་རྨི་ལམ་གྱི་སྣང་བ་ལྟ་བུར་ཤེས་པ་ནི་
ཐ་སྙད་རྣམ་རིག་པའི་ཚུལ་ཏེ་ཚུལ་དང་པོ་ཡིན་ལ། ཆོས་ལྔ་ལས་སྔ་མ་གསུམ་དེར་འདུའོ། །དེ་ལྟར་ཐ་སྙད་དུ་སེམས་ཉིད་སྣང་བ་སྣ་ཚོགས་པར་སྣང་ཡང་སེམས་ཀྱང་རང་བཞིན་གྱིས་བདེན་པར་མེད་པས་ན། གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་
ཅད་བདེན་མེད་སྐྱེ་མེད་དུ་ཤེས་པ་ནི་དོན་དམ་དབུ་མའི་ཚུལ་ལམ་ཚུལ་གཉིས་པ་སྟེ། ཆོས་ལྔ་ལས་ཕྱི་མ་གཉིས་དེར་འདུའོ། །དེ་ལྟ་བུའི་ཚུལ་གཉིས་པོ་དེ་ནི་འགལ་བ་མ་ཡིན་ཏེ། དགོངས་པ་ངེས་པར་འགྲེལ་པའི་མདོ་ལས། འདུ་བྱེད་ཁམས་དང་དོན་དམ་
མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་དུ་ཡང་གང་རྟོག་པ། །དེ་དག་ཚུལ་བཞིན་མ་ཡིན་ཞུགས་པ་ཡིན། །ཞེས་གསུངས་པ་ལྟར་གཅིག་དང་ཐ་དད་གང་དུའང་ཁས་མི་ལེན་པར་ཐ་སྙད་དང་དོན་དམ་པའི་བདེན་པ་
གཉིས་ཟུང་དུ་ཞུགས་པའི་ལམ་ཚུལ་གང་ཡིན་པ་དེ་ནི་ཐེག་པ་ཆེན་པོ་ཡིན་ལ། དེ་ལ་གནས་པའི་གང་ཟག་ནི་ཐེག་པ་ཆེན་པོ་པ་ཞེས་པའི་མིང་དོན་དང་ལྡན་པ་ཉིད་དོ། །དེ་ལྟར་དང་པོར་ཐོས་བསམ་གྱི་སྒྲ་རྟོག་གི་ཡུལ་དུ་གྱུར་པའི་ཐ་སྙད་དུ་སྐྱེ་བ་དང་། དོན་དམ་པར་
མི་སྐྱེ་བ་ལྟ་བུ་ཚུལ་གཉིས་ཟུང་དུ་བཞག་པའི་ཡ་གྱལ་རྣམ་གྲངས་པའི་དོན་དམ་ནི། ཀུན་རྫོབ་ཡོད་པའི་ཟླ་ལ་སྦྱར་བའི་ཅིག་ཤོས་ཀྱི་ཟླས་དྲངས་པའི་ཕྱིར་རམ། དོན་དམ་པའི་གྲངས་སུ་གཏོགས་པས་ན་རྣམ་གྲངས་ཏེ། བདེན་པ་གཉིས་ཞེས་པའི་ཀུན་རྫོབ་ཀྱི་
13-1-18a


ཟླར་བགྲང་རྒྱུ་དེ་ཡིན་ལ། དེ་ནི་དོན་དམ་མཐར་ཐུག་དང་མཐུན་པའི་སྒོ་ཙམ་མམ། དེ་གོམས་པས་ཐོག་མེད་ནས་གོམས་པའི་བག་ཆགས་ཀྱི་མཐུ་བརྟས་པའི་དངོས་པོར་འཛིན་པ་གཞོམ་ནུས་པའི་ཕྱིར་ན་དོན་དམ་ཡང་ཡིན་ལ། དེའི་ངོ་
ལ་ལྟོས་ན་སྐྱེ་བ་མེད་ཅེས་པའི་ཁས་ལེན་ཡང་ཡོད་པར་ཤེས་པར་བྱའོ། །དེའི་དཔྱད་པ་ཚད་དུ་ཕྱིན་ཀྱང་རྗེས་ཐོབ་ཀྱི་ངེས་པ་སྐྱེ་ཚུལ་ཙམ་ཡིན་ནོ། །ཡང་དག་པའི་གནས་ལུགས་མཐར་ཐུག་པའི་དབང་དུ་ན། སྐྱེ་བས་དྲངས་པའི་སྐྱེ་མེད་ཅེས་པའང་བློས་གཞན་
བསལ་བའི་རྣམ་རྟོག་གི་གཟུགས་བརྙན་ཙམ་ཡིན་པས། སྐྱེ་བ་ཡོད་མེད་སོགས་མཐའ་ཐམས་ཅད་ལས་འདས་ཤིང་སྒྲ་དང་རྟོག་པའི་སྤྱོད་ཡུལ་ཐམས་ཅད་སྤངས་པའི་འཕགས་པའི་མཉམ་བཞག་ཡེ་ཤེས་ཤིན་ཏུ་དྲི་མ་མེད་པའི་གཟིགས་དོན་ནི་རྣམ་གྲངས་མ་ཡིན་
པའི་དོན་དམ་བླ་ན་མེད་པ་ཡིན་ལ། དེའི་ངོ་ལ་ལྟོས་ན་ཁས་ལེན་ཀུན་དང་བྲལ་བའང་ཡིན་ནོ། །རྣམ་གྲངས་པའི་དོན་དམ་ནི་འདི་དང་ཉེ་ཞིང་མཐུན་པས་ན་དེའང་དོན་དམ་གྱི་གྲངས་སུ་བགྲང་སྟེ་མཐུན་པའི་དོན་དམ་ཞེས་བྱ་བ་ཡིན་ནོ། །ཚུལ་འདི་ལྟ་བུ་ལ་བསྒོམས་
པས་ཉམས་མྱོང་གིས་སུས་རེག་ཀྱང་གང་ཟག་དེས་རྗེས་ཐོབ་ཀྱི་ཁས་ལེན་མཛད་ཚུལ་ལ་ལྟོས་ཏེ་ཐལ་རང་སོགས་མིང་ཅི་བཏགས་ཀྱང་རུང་། རྟོགས་པའི་མཐོ་དམན་རྡུལ་ཙམ་མེད་པར་འཕགས་པའི་གཟིགས་པ་གནད་གཅིག་ཏུ་འབབ་པ་ཤེས་པར་བྱའོ། །འདི་གལ་ཆེ་
བས་འོག་ཏུ་དགོས་པའི་སྐབས་སུའང་ཅུང་ཟད་འཆད་དོ། །འཕགས་པའི་མཉམ་བཞག་གི་ཡེ་ཤེས་དེ་ལྟ་བུའི་རྒྱུ་ནི་བདེན་གཉིས་ཕྱིན་ཅི་མ་ལོག་པར་ཁོང་དུ་ཆུད་པ་ལས་གཞན་ཅུང་ཟད་ཙམ་ཡང་མེད་དེ། དཔེར་ན། གཙུབ་ཤིང་དང་གཙུབ་སྟན་ཟུང་དུ་མ་ཚོགས་
13-1-18b


པར་གང་རུང་རེ་རེས་མེ་འབྱུང་བ་མི་སྲིད་པ་ལྟར། འདིར་ཡང་ཚུལ་གཉིས་པོ་མཉམ་པར་མ་སྦྱར་ན་མཐའ་བཞི་སྤྲོས་བྲལ་ལ་ངེས་པ་མི་སྐྱེ་བས་བསམ་བརྗོད་ལས་འདས་ཞེས་བརྗོད་ཀྱང་བརྗོད་དུ་མེད་པའི་བདག་བསྒོམ་པ་ལྟ་བུ་ལས་སོ་སོ་རང་རིག་པའི་ཡེ་ཤེས་
ཀྱིས་ཆོས་ཀྱི་གཏིང་སླེབ་པ་མི་སྲིད་པས་ཡང་དག་པའི་རིགས་ལམ་དང་མ་བྲལ་བའི་ཐོས་བསམ་གྱི་མིག་བསྒྲུབས་ནས་ངེས་ཤེས་སྐྱེ་བར་བྱས་ནས་དེའི་དོན་སྒོམ་པས་ཉམས་སུ་མྱོང་བར་བྱའི། ངེས་ཤེས་མ་སྐྱེས་པའི་མཐའ་བྲལ་དང་བརྗོད་བྲལ་ཞེས་མིག་ཧུར་ཧུར་བྱེད་པ་
རྣམས་ནི་མིང་ཙམ་ལ་མངོན་རློམ་དང་བཅས་ཏེ་དམིགས་པ་ཙམ་ཡིན་པས། དེས་སྲིད་རྩ་ལ་གནོད་ན་དུ་མ་རོ་མཉམ་དུ་སྨྲ་བ་གསང་བ་པ་སོགས་ཀྱང་ལམ་དེས་གྲོལ་བར་ཅིས་མི་འགྱུར། དེས་ན་ཤིང་རྟ་ཆེན་པོའི་ལུགས་བཞིན་དུ་ཐ་སྙད་དང་དོན་དམ་ལ་དཔྱོད་པའི་ཚད་མ་དྲི་
མེད་ཀྱི་ཚུལ་གཉིས་མཉམ་པར་སྦྱར་བའི་ཡེ་ཤེས་ཀྱི་མེས་གཉིས་སྣང་ཤེས་བྱའི་བུད་ཤིང་མ་ལུས་པ་ལྷག་མེད་དུ་བསྲེགས་ནས་མཐའ་བྲལ་ཆོས་ཀྱི་དབྱིངས་མཉམ་པ་ཉིད་ལ་གནས་པར་འགྱུར་ཏེ། གཙུབ་ཤིང་གཙུབ་སྟན་བསྲུབས་པ་ལས་མེ་བྱུང་ནས་དེ་གཉིས་ཉིད་
ཀྱང་བསྲེགས་པ་ལྟར། བདེན་གཉིས་མཉམ་པར་སྦྱར་བའི་ཡེ་ཤེས་ཀྱི་མེས་བདེན་གཉིས་སོ་སོར་ཞེན་པའང་བསྲེགས་ནས་སྣང་སྟོང་རིས་སུ་མ་ཆད་པའི་དབྱིངས་དམིགས་པའི་མཐའ་ཐམས་ཅད་དང་བྲལ་བ་ལ་རབ་ཏུ་གནས་པ་སྟེ། ཡོན་ཏན་རིན་པོ་ཆེ་སྡུད་པ་ལས། 
གང་ཚེ་འདུས་བྱས་འདུས་མ་བྱས་དང་དཀར་ནག་ཆོས། །ཤེས་རབ་རྣམ་པར་བཤིག་ནས་རྡུལ་ཙམ་མི་དམིགས་ཚེ། །འཇིག་རྟེན་དག་ན་ཤེས་རབ་ཕ་རོལ་ཕྱིན་གྲངས་འགྲོ། །ནམ་མཁའ་གང་ལའང་ཅུང་ཟད་མི་གནས་དེ་དང་འདྲ། །ཞེས་དང་། དེ་ལྟར་སྤྱོད་པའི་བྱང་ཆུབ་སེམས་
13-1-19a


དཔའ་མཁས་གསལ་བ། །ཆགས་པ་བཅད་ནས་འགྲོ་ལ་ཆགས་པ་མེད་པར་འགྲོ། །ཉི་མ་སྒྲ་གཅན་གཟའ་བྲལ་ལྷང་ངེར་འདུག་པ་དང་། །མེ་བཏང་རྩྭ་དང་ཤིང་དང་ནགས་ཚལ་སྲེག་པ་བཞིན། །ཆོས་རྣམས་ཐམས་ཅད་རང་བཞིན་དག་ཅིང་
ཡོངས་དག་པར། །བྱང་ཆུབ་སེམས་དཔའ་ཤེས་རབ་ཕ་རོལ་ཕྱིན་ལྟ་ན། །བྱེད་པ་པོ་ཡང་མི་དམིགས་ཆོས་ཀུན་མི་དམིགས་ཏེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་གསུངས་པ་ལྟར་མཐའ་བཞིའི་སྤྲོས་བྲལ་སོ་སོར་རང་གི་ཡེ་ཤེས་ཀྱི་སྤྱོད་
ཡུལ་ཙམ་ལས་སྒྲ་དང་རྟོག་པས་བསམ་ཞིང་སྨྲ་བར་མི་ནུས་ཏེ། ཕལ་པོ་ཆེ་ལས། ཇི་ལྟར་བར་སྣང་གནས་ཀྱི་བྱ་ཡི་རྗེས། །ཤིན་ཏུ་སྨྲ་དཀའ་བསྟན་པར་མི་ནུས་པ། །དེ་ལྟར་བདེ་གཤེགས་སྲས་ཀྱི་ས་རྣམས་ཀྱང་། །ཡིད་དང་སེམས་ཀྱི་ཡུལ་གྱིས་ཤེས་
མི་ནུས། །ཞེས་གསུངས་པ་ལྟར་འཕགས་པ་རྣམས་ཀྱི་ཆོས་ཀྱི་དབྱིངས་ལ་གསལ་སྣང་ཐོབ་ཚུལ་ལས་ས་ནས་སར་འཕར་ཞིང་། མཐར་སྒྲིབ་གཉིས་མཐའ་དག་བྲལ་བའི་ཆོས་ཀྱི་དབྱིངས་མངོན་སུམ་མཛད་པ་ནི། ཇི་སྐད་དུ་རྒྱ་ཆེར་རོལ་པ་ལས། ཟབ་ཞི་
རྡུལ་བྲལ་འོད་གསལ་འདུས་མ་བྱས། །བདུད་རྩིའི་ཆོས་ནི་བདག་གིས་ཐོབ་པར་གྱུར། །བདག་གིས་བསྟན་ཀྱང་གཞན་གྱིས་མི་ཤེས་དེ། །མི་སྨྲ་ནགས་འདབ་གནས་པར་བྱ་བ་སྙམ། །ཞེས་གསུངས་པ་ལྟར། མདོར་ན་དུས་གསུམ་གྱི་རྒྱལ་བ་སྲས་དང་
བཅས་པ་ཐམས་ཅད་ཀྱི་འབྱུང་གནས་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཇི་ལྟར་རྣལ་འབྱོར་དུ་བྱ་བའི་ཚུལ་ནི་སོ་སོའི་སྐྱེ་བོའི་ས་ན་ཐོས་བསམ་གྱིས་སྒྲོ་འདོགས་བཅད་དེ། རིགས་པས་དྲངས་པའི་ངེས་ཤེས་ཁྱད་པར་ཅན་ལ་མཉམ་པར་འཇོག་པ་ཁོ་ན་ཡིན་པ་
13-1-19b


ཤེས་པར་བྱའོ། །དེ་ལྟར་བདེན་པ་གཉིས་ཀྱི་ཚུལ་རྣམ་པར་གཞག་པ་འདི་ལྟ་བུ་ནི་ལུགས་སོ་སོ་བ་ཙམ་མ་ཡིན་གྱི། ཐེག་ཆེན་སྤྱིའི་ལམ་པོ་ཆེ་ཡིན་ཏེ། ཆོས་ཐམས་ཅད་རང་བཞིན་གྱིས་སྟོང་ཞིང་ཐ་སྙད་སྣང་ཙམ་པ་འདི་ལ་སེམས་ཙམ་ལས་རྒྱུ་
གཞན་ཁས་མི་ལེན་པའི་ཕྱིར་ནའོ། །དེའང་ལང་ཀར་གཤེགས་པ་ལས། །ཐོག་མ་མེད་པའི་བློས་བགོས་པས། །སེམས་ནི་གཟུགས་བརྙན་ལྟ་བུ་སྟེ། །དོན་གྱི་རྣམ་པར་སྣང་ཡང་ནི། །ཡང་དག་ཇི་བཞིན་མཐོང་དོན་མེད། །ཅེས་ཕྱི་དོན་མེད་པར་སེམས་
ཙམ་དུ་བསྟན་པ་དང་། གང་ཟག་རྒྱུན་དང་ཕུང་པོ་དང་། །རྐྱེན་དང་དེ་བཞིན་རྡུལ་རྣམས་དང་། །གཙོ་བོ་དབང་ཕྱུག་བྱེད་པོ་དག །སེམས་ཙམ་པོ་ལས་རྣམ་པར་བརྟག །ཅེས་བྱེད་པོ་གཞན་མེད་པར་སེམས་ཙམ་དུ་བསྟན་པ་གཉིས་ཀྱི་ཕྱི་མ་ལྟར། སྣང་
བ་སྣ་ཚོགས་པ་ཅན་གྱི་སྲིད་པ་ཐོག་མཐའ་མེད་པ་འདི་རྒྱུ་མེད་ངོ་བོ་ཉིད་ཀྱིས་བྱུང་བ་མ་ཡིན་ལ། འདི་ལ་རྒྱུར་གྱུར་པ་གཞན་དུས་དང་། རྡུལ་དང་། དབང་ཕྱུག་དང་། བདག་ལ་སོགས་པའི་བྱེད་པོ་གཞན་མེད་པར་རང་གི་སེམས་ཀྱི་དབང་ལས་བྱུང་བར་སྨྲ་བ་ཙམ་ལ་
ནང་པ་སངས་རྒྱས་པའི་ཐེག་ཆེན་གྱི་ཤིང་རྟ་སུ་ལའང་མི་འདྲ་བ་མེད་དེ། ཟླ་བའི་ཞབས་ཀྱིས་ཀྱང་། སེམས་ཉིད་ཀྱིས་ནི་སེམས་ཅན་འཇིག་རྟེན་དང་། སྣོད་ཀྱི་འཇིག་རྟེན་ཤིན་ཏུ་དཔག་ཡས་འགོད། །འགྲོ་བ་མ་ལུས་ལས་ལས་སྐྱེས་པར་གསུངས། །
སེམས་སྤངས་ན་ནི་ལས་ཀྱང་ཡོད་མ་ཡིན། །ཞེས་གསུངས་ཤིང་། གལ་ཏེ་སུ་ཞིག་སྲིད་པའི་སྣང་བ་འདི་རྣམས་རང་སེམས་ལས་མ་བྱུང་བར་སྨྲ་ན་དེའི་རྒྱུ་སེམས་ལས་ལོགས་སུ་འདོད་དགོས་ལ། དེ་ལྟར་ན་གང་ཟག་གི་སེམས་འཁོར་བར་བཅིང་གྲོལ་གྱི་རྒྱུ་གཞན་ཞིག་ཁས་
13-1-20a


བླངས་པས་གདོན་མི་ཟ་བར་མུ་སྟེགས་ཀྱི་གྲུབ་མཐར་ལྟུང་བར་འགྱུར་རོ། །དེས་ན་བྱེད་པོ་གཞན་མེད་ཅིང་ཕྱི་དོན་མེད་པར་སེམས་ཀྱི་སྣང་བ་ཙམ་དུའང་རིམ་གྱིས་འགྲུབ་པས་ནི། ཐ་སྙད་སེམས་ཙམ་དུ་འདོད་པ་འདི་ཐེག་ཆེན་སྤྱི་ལུགས་ལ་གྲུབ་པ་ཡིན་ནོ། །
འོ་ན་དཔལ་ལྡན་ཟླ་བ་སོགས་ཀྱིས་ཀྱང་ཐ་སྙད་ཀྱི་རྣམ་གཞག་དེ་ལྟར་ཅིའི་ཕྱིར་མ་མཛད་སྙམ་ན། གོང་དུ་ཇི་སྐད་བཤད་པ་ལྟ་བུའི་རྣམ་གྲངས་མ་ཡིན་པའི་དོན་དམ་འཕགས་པའི་མཉམ་བཞག་ཡེ་ཤེས་ཀྱི་སྤྱོད་ཡུལ་དང་རྗེས་སུ་མཐུན་པར་གཏན་ལ་ཕབ་ཚེ། སྣང་སྲིད་
འཁོར་འདས་ཀྱི་ཆོས་འདི་ཀུན་མ་བརྟགས་མ་དཔྱད་པར་འཇིག་རྟེན་ན་སྣང་ཚོད་གྲགས་ཚོད་ལྟར་གཞལ་བྱར་བྱས་པས་ཆོག་གི འདི་ཀུན་མཐའ་བཞིའི་སྤྲོས་བྲལ་ཆེན་པོར་ཡེ་ནས་གནས་པའི་ཕྱིར་སྣང་ཚུལ་ཐ་སྙད་ལ་གྲུབ་མཐའི་དཔྱད་པ་ཞིབ་མོར་གཞུག་
དགོས་པ་མིན་ཅིང་། སྣང་བ་དེ་ལ་སྒྲ་རྟོག་གིས་གཞལ་ཏེ་ཡོད་དོ་ཞེའམ། མེད་དོ་ཞེའམ། སེམས་ཡིན་ནོ་ཞེའམ། མིན་ནོ་ཞེས་པ་ལ་སོགས་པའི་ཕྱོགས་གང་དུ་ཁས་ལེན་ནའང་དེ་དང་དེ་ལྟར་གནས་ལུགས་ལ་གྲུབ་པ་མེད་པས་དོན་དམ་ལ་དཔྱོད་
པའི་རིགས་པའི་ཐལ་འགྱུར་གྱིས་རྒོལ་བའི་ལོག་རྟོག་དགག་པ་ཙམ་ཡིན་གྱི། རང་ལུགས་ལ་མཚན་མའི་དམིགས་གཏད་ཅིའང་མེད་པས་ཁས་ཀྱང་ཅི་ཞིག་ལེན་ཏེ་མི་ལེན་ནོ། །ཚུལ་དེ་ལྟར་ན་ཡོད་པ་དང་མེད་པ་ལ་སོགས་པ་གང་དུ་དམ་བཅས་ཀྱང་བདེན་
པ་གཉིས་སོ་སོར་ཕྱེ་མི་དགོས་པར་དགག་ནུས་ཏེ། འདིར་བདེན་གཉིས་སོ་སོ་བ་རེ་རེའི་ཚད་མས་གཞལ་ན་ཤན་མ་ཕྱེད་པར་དགག་སྒྲུབ་མི་ནུས་ཀྱང་། འདིར་རྣམ་གྲངས་མ་ཡིན་པའི་དོན་དམ་པའི་བདེན་གཉིས་ཟུང་དུ་འཇུག་པའི་གནས་ལུགས་དཔྱོད་པའི་རིག་ཤེས་
13-1-20b


ཚད་མར་བྱས་ཏེ་གཞལ་བའི་ཕྱིར་རོ། །འཇུག་འགྲེལ་ལས། དོན་དམ་པར་ན་བདེན་པ་གཉིས་སུ་མེད་པར། དགེ་སློང་དག་བདེན་པ་དམ་པ་འདི་ནི་གཅིག་སྟེ། ཞེས་སོགས་ལུང་དྲངས་ནས་གསུངས་པ་བཞིན་ནོ། །དེས་ན་ཟླ་བའི་ཞབས་ཀྱིས་དང་པོ་
ནས་རྣམ་གྲངས་མ་ཡིན་པའི་དོན་དམ་རྩལ་དུ་བཏོན་ནས་གཏན་ལ་དབབ་པས་རྐྱེན་ཉིད་འདི་པ་ཙམ་གྱི་སྣང་བ་འགོག་ཏུ་མེད་པ་འདི་ཙམ་ཞིག་བརྟག་གཞིའམ། དོན་དམ་རྟོགས་པའི་ཐབས་སམ་སྒོ་ཡིན་པས་དེ་ཙམ་རྩོད་གཞིར་བཟུང་སྟེ་སྤྲོས་བྲལ་ཆེན་པོར་གཏན་ལ་
ཕབ་ནས། རྗེས་ཐོབ་ཏུ་ལམ་དང་འབྲས་བུའི་རྣམ་པར་གཞག་པ་ཐམས་ཅད་ཚད་མ་གཉིས་ཀྱིས་ཇི་ལྟར་གཞལ་བ་ལྟར་དགག་སྒྲུབ་ཀྱི་ཐ་སྙད་ཀྱང་གནོད་མེད་དུ་མཛད་ལ། དེའང་རྐྱེན་ཉིད་འདི་པ་ཙམ་མམ། རྟེན་ཅིང་འབྲེལ་འབྱུང་ཙམ་དུ་ཁས་ལེན་པ་ཡིན་ནོ། །
རྐྱེན་ཉིད་འདི་པ་ཙམ་དེ་ལ་ཐ་སྙད་ཀྱི་ཚད་མས་གཞལ་ན་སྲིད་པའི་ཡན་ལག་བཅུ་གཉིས་འབྱུང་ལྡོག་གིས་ཀུན་ཉོན་དང་རྣམ་བྱང་འགྲུབ་ཚུལ་མི་བཞེད་པ་མ་ཡིན་ལ། སེམས་ཉིད་དག་པ་དང་མ་དག་པའི་གཞན་དབང་གིས་རྟེན་ཅིང་འབྲེལ་བར་འབྱུང་བར་བསྟན་པས་
སེམས་ཙམ་གྱི་གྲུབ་མཐའ་གསལ་བར་བྱས་པ་ཡིན་ནོ། །མཁན་ཆེན་གྱི་གཞུང་འདིར་རྣམ་གྲངས་ཀྱི་དོན་དམ་རྩལ་དུ་བཏོན་ནས། དང་པོ་བདེན་གཉིས་སོ་སོར་ཕྱེས་ཏེ་ཚད་མ་སོ་སོས་གཞལ་བའི་རང་རང་གི་ཁས་ལེན་ཡོད་པར་བསྒྲུབས་ནས་མཐར་ཁས་ལེན་
ཀུན་དང་བྲལ་བའི་རྣམ་གྲངས་མིན་པའི་དོན་དམ་ལ་སྦྱོར་བར་མཛད་པས། འདི་གཉིས་རིམ་ཅིག་ཅར་ལྟ་བུ་ཡིན་པས་འདིའི་གནད་ཟིན་ན་ཐལ་འགྱུར་བའི་ཟབ་གནད་མཐར་ཐུག་པའང་ཟིན་ཅིང་། གཞུང་འདིར་ཡང་། དངོས་པོ་ཀུན་གྱི་རང་བཞིན་ནི། །རིགས་
13-1-21a


པའི་ལམ་གྱི་རྗེས་འབྲང་བར། །ཞེས་པ་ནས། ཀུན་རྫོབ་ཏུ་འགྱུར་ཡང་དག་མིན། །ཞེས་པའི་བར་གྱི་དོན་དཔལ་ལྡན་ཟླ་བ་དང་དགོངས་པ་གཅིག་དང་དབྱངས་གཅིག་ཏུ་གྱུར་པ་ཡིན་ནོ། །དེས་ན་ཇི་སྲིད་ཆོས་གཅིག་གི་སྟེང་དུ་
བདེན་པ་གཉིས་སོ་སོར་ཞེན་པ་ཡོད་ཀྱི་རིང་ལ་དེའི་ངོར་ཐ་སྙད་ཚད་གྲུབ་དང་། དེའི་བདེན་མེད་གཉིས་མི་བཟློག་པར་མགོ་མཉམ་ལ། བདེན་གཉིས་སོ་སོར་ཞེན་པའི་ཡུལ་རིགས་པས་སུན་ཕྱུང་ནས་འཛིན་པ་ཕྲ་མོ་དང་བྲལ་བ་ན། དེ་གཉིས་མགོ་མཉམ་དུ་ཁེགས་ཏེ་སྤྲོས་པ་
དང་བྲལ་བར་འགྱུར་རོ། །དེ་ལྟར་ན་གནས་སྐབས་བློ་ངོར་བདེན་པ་གཉིས་སུ་ཕྱེ་ཡང་། མཐར་ཐུག་དོན་ལ་གཉིས་སུ་མེད་པར་སྤྲོས་བྲལ་དུ་གྲུབ་པའི་གནད་ཀྱིས་མཉམ་བཞག་རྣམ་པར་མི་རྟོག་པའི་ཡེ་ཤེས་ཀྱི་སྤྱོད་ཡུལ་གཏན་ལ་འབེབས་པའི་སྐབས་དང་།
རྗེས་ཐོབ་ཤན་འབྱེད་པའི་ཤེས་རབ་ཀྱི་སྤྱོད་ཡུལ་གཏན་ལ་འབེབས་པའི་སྐབས་དང་། ཁས་ལེན་ཡོད་ཚུལ་དང་མེད་ཚུལ་སོགས་ཤན་ཕྱེད་པ་གལ་ཆེའོ། །དེས་ན་འཁོར་འདས་འཆིང་གྲོལ་གྱི་ཚུལ་རྣམས་མཉམ་བཞག་གི་ཡེ་ཤེས་ཀྱི་ངོ་ན་མི་གནས་ཀྱང་། རྗེས་
ཐོབ་ཤེས་རབ་ཀྱིས་གཞལ་བྱར་ཡོད་པ་དེས་ན་ཟླ་བའི་ཞབས་ཀྱང་ལམ་ལ་སློབ་ཚུལ་དང་འབྲས་བུ་སངས་རྒྱས་ཚུལ་རྣམས་བཞེད་ཀྱི་འཇིག་རྟེན་ཐ་མལ་པའི་སྣང་ངོ་ན་སྣང་བ་ཁོ་ན་ལས་དེར་མ་གྲགས་པ་ཐམས་ཅད་ཁས་མི་ལེན་ཏོ་ཞེས་མ་གསུངས་སོ། །དེ་ལ་ཐལ་འགྱུར་
བས་འཇིག་རྟེན་གྲགས་པ་ལྟར་ཁས་ལེན་ཚུལ་དེའང་། གྲུབ་མཐས་བློ་བསྒྱུར་མ་བསྒྱུར་གཉིས་ཀྱི་ནང་གི་མ་བསྒྱུར་བའི་འཇིག་རྟེན་ཕལ་པ་ལྟར་རོ་ཞེས་འཆད་པ་ནི་ཤིན་ཏུ་ཡ་མཚན་པ་ཞིག་གོ། འདིའི་འཇིག་རྟེན་ཞེས་པ་ལམ་ཞུགས་མ་ཞུགས་གཉིས་ཀ་ལ་འཛིན་
13-1-21b


དགོས་ཏེ། ཞི་བ་ལྷས། རྣལ་འབྱོར་འཇིག་རྟེན་དང་འཇིག་རྟེན་ཕལ་པ་ཞེས་གསུངས་པ་བཞིན་ནོ། །དེས་ན་ལམ་ལ་ཞུགས་མ་ཞུགས་ཀྱི་འཇིག་རྟེན་དེ་དག་ལ། དག་པ་དང་མ་དག་པའི་རྟེན་འབྲེལ་གྱི་དབང་གིས། རང་རང་ལ་གྲགས་ཤིང་གྲུབ་པའི་སྣང་ཚུལ་སྣ་
ཚོགས་ཡོད་པའི་རང་ངོའི་སྣང་བ་དེ་དག་ཐད་ཀ་རང་སར་སྤྲོས་བྲལ་དུ་གཏན་ལ་འབེབས་པ་ཡིན་གྱི། རྐྱེན་ཉིད་འདི་པ་ཙམ་གྱི་ཐ་སྙད་དེ་ལ་གྲུབ་མཐའི་དཔྱད་པ་ཞིབ་མོར་གཞུག་མི་དགོས་པར་མ་དཔྱད་པར་གྲགས་པ་ལྟར་ཁས་ལེན་པ་ཡིན་པའི་ཤན་འདི་ལྟར་ཕྱེད་པ་
གལ་ཆེ་སྟེ། གཞན་རྣལ་འབྱོར་པ་རང་གི་ལམ་དང་འབྲས་བུའི་རྣམ་གཞག་འཇོག་ཚེ། ཐ་མལ་པ་གཞན་གྱི་བློ་ལ་རེ་ལྟོས་འཆའ་དགོས་པ་མཚར་རོ། །དེས་ན་དོན་དམ་གཏན་ལ་འབེབས་ཚུལ་ཞིག་ཡིན་གྱི། སྤྱིར་ཤིང་རྟ་ཆེན་པོ་རྣམས་ནི་མཉམ་རྗེས་ཀྱི་
དགོངས་པ་གནད་གཅིག་པར་ཤེས་པར་བྱའོ། །ཚུལ་འདི་ལྟ་བུ་ཟབ་པ་གང་དག་སྐྱེས་སྦྱངས་ཕུན་སུམ་ཚོགས་པའི་དབང་ཕྱུག་རྣམས་ཀྱིས་ཀྱང་རྟོགས་དཀའ་བའི་གནས་སུ་མཛད་ན། བདག་ལྟ་བུ་རྟོག་གེ་ཅོལ་ཆུང་དག་གིས་ལོ་བརྒྱར་བསམས་ཀྱང་ཟབ་གནད་
ཕིགས་པར་དཀའ་བས་ན་རང་སྟོབས་ཀྱིས་བཤད་པར་ག་ལ་ནུས་ཀྱང་། དཔལ་རོང་ཟོམ་པ་དང་ཀློང་ཆེན་ཆོས་ཀྱི་རྒྱལ་པོའི་ལེགས་བཤད་ལ་སོགས་པ་རིག་འཛིན་བརྒྱུད་པའི་ལུང་ལ་བརྟེན་ནས་བློ་གྲོས་ཀྱི་འཇུག་པ་ཅུང་ཟད་ཐོབ་པའི་མཐུས་སྨྲས་པ་ཡིན་པས། རྡུལ་
བྲལ་ཡང་དག་པའི་མཐའ་ལ་མཉམ་པར་བཞག་པ་རྣམས་དང་། ཟབ་ཅིང་རྒྱ་ཆེའི་གནས་ལ་སྦྱངས་པ་མཐར་སོན་པ་རྣམས་ཤིན་ཏུ་ཡིད་ཆེས་པར་འགྱུར་རོ། །རྒྱ་ཆེར་འཆད་ཅེས་སྨྲ་བ་མང་མོད་ཀྱི། །ཟབ་དོན་ཤེས་ཤིང་མྱོང་བ་ཤིན་ཏུ་དཀོན། །ཟབ་ལས་ཆེས་
13-1-22a


ཟབ་རིག་པའི་ལྗགས་མཆོག་ཅན། །ཡོད་ན་ཟབ་དོན་རོ་མཆོག་འདི་མྱོངས་ཤིག །ཅེས་བར་སྐབས་ཀྱི་ཚིགས་བཅད་དོ། །སེམས་ཙམ་དུ་བཞེད་ཚུལ་དེ་ལའང་། ཕྱིས་སུ་གཞུང་འཆད་པ་དག་གིས། མཁན་ཆེན་འདི་ཉིད་
ཀྱིས་ཚོགས་དྲུག་ལས་ཐ་དད་པའི་ཀུན་གཞི་མི་བཞེད་ལ། སྤྱིར་ཡིད་རྣམ་ལ་ཆ་ཕྱེ་བའི་ཕྲ་མོ་འགའ་ཞིག་ལ་ཀུན་གཞིའི་སྒྲས་བསྟན་པ་དབུ་མ་པ་ཆེན་པོ་འགའ་དང་སྔགས་ཕྱོགས་སུའང་མང་པོ་འབྱུང་ངོ་ཞེས་གསུངས་ཀྱང་།  སྤྱིར་གཞུང་འདི་ན་ཀུན་གཞི་བཞེད་
པའི་ཚིག་ཟིན་གསལ་ཁ་མི་སྣང་བས་རང་འདོད་དང་བསྟུན་ཏེ་དེ་ལྟར་བཞག་ཀྱང་རེ་ཞིག་ཆོག་མོད། ལར་སྣང་བ་སེམས་སུ་འདོད་པ་ལ་བག་ཆགས་འཛིན་པའི་ཀུན་གཞི་ཞིག་ངེས་པར་ཁས་མ་བླངས་ན་མི་རུང་བས། ལང་གཤེགས་དང་དགོངས་འགྲེལ་ལ་སོགས་
པའི་བསྟན་དོན་ཇི་ལྟ་བ་བཞིན་དུ་སེམས་ཙམ་མཚན་ཉིད་པ་ཞིག་ཁས་ལེན་ན་ཀུན་གཞི་ངེས་པར་འདོད་དགོས་ཏེ། ཀུན་གཞི་ནི་སེམས་ཙམ་གྱི་གྲུབ་མཐའི་སྙིང་པོ་ལྟ་བུ་ཡིན་ཅིང་། དེ་གྲུབ་ན་ཉོན་ཡིད་ཀྱང་ཡོད་པ་ལ་འགལ་བ་མེད་པས་ཚོགས་བརྒྱད་འདོད་དགོས་
ལ། གཞུང་འདིར་ཡང་། ཚུལ་གཉིས་ཀྱིས་བསྡུས་པའི་ཐེག་པ་མདོར་བསྟན་པ་ནི་འདི་ལྟ་སྟེ། ཞེས་ཆོས་ལྔ་རང་བཞིན་གསུམ་སོགས་ཀྱི་ལུང་དྲངས་པ་ལྟར་སེམས་ཙམ་སྤྱི་ལུགས་ཀྱི་ཀུན་གཞིའང་ཅིའི་ཕྱིར་མི་བཞེད་དེ་བཞེད་དོ་སྙམ་མོ། །དེ་ལ་ཡིད་རྣམ་
ཕྲ་བ་ལ་སྔགས་སོགས་སུ་ཀུན་གཞིར་བརྗོད་པ་འདི་ཅི་ཞིག །ཚོགས་དྲུག་ལས་ཐ་དད་ཅེས་པ་འདི་ཅི་ཞིག་སྟེ། དེ་ལ་ཡིད་རྣམ་ལ་ཕྱེ་ཡང་རུང་སྟེ་རྟེན་དང་བརྟེན་པའི་ཚུལ་དུ་བག་ཆགས་འཛིན་ནུས་ཀྱི་ཤེས་པ་ཀུན་གཞི་ལ་ཇི་སྐད་བཤད་པའི་མཚན་ཉིད་དེ་ལ་ཡོད་ན་ནི།
13-1-22b


ཡིད་རྣམ་ཕྲ་བ་བྱས་ཀྱང་རུང་སྟེ་དོན་ཀུན་གཞི་ལས་མ་འདས་པས་མིང་ཙམ་དུ་ཟད་ལ། གལ་ཏེ་དེ་ལ་ཀུན་གཞིའི་མཚན་ཉིད་མེད་ན་ནི་རྟ་ལ་བ་ལང་དུ་བཏགས་པ་ལྟར་མིང་ཙམ་དུ་ཟད་པས་དགོས་པ་ཅིའང་མེད་ལ། ཚོགས་དྲུག་ལས་ཐ་དད་ཅེས་པའང་། ངོ་བོའམ།
ལྡོག་པ་གང་ཡིན། དང་པོ་ལྟར་ན་རྒྱུད་ཐ་དད་དམ། བྱེད་ལས་སོགས་ཐ་དད་པ་གང་ལ་ཟེར། ཚོགས་དྲུག་དང་རྒྱུད་ཐ་དད་པའི་ཤེས་པ་ལ་ཟེར་ན་ནི། དབུ་མ་པར་མ་ཟད་དེ་འདྲ་བ་འདོད་མཁན་གྱི་སེམས་ཙམ་པ་སུའང་མེད་དེ། ཤེས་པ་རྣམས་ཤེས་པའི་ངོ་བོ་ཙམ་
དུ་རྒྱུད་མི་གཅིག་ན། གང་ཟག་གཅིག་ལ་ཤེས་རྒྱུད་གཉིས་ཡོད་པར་ཐལ་བའི་ཕྱིར་རོ། །བྱེད་ལས་སོགས་ཐ་དད་དུ་མེད་ན་དེར་བཏགས་པས་ཅི་བྱ་སྟེ་དགོས་པ་མེད་པས་སོ། །ཐ་སྙད་ཙམ་དུ་ལྡོག་པ་ལ་བསམས་ན་ནི། ཀུན་གཞི་མེད་བྱས་པས་ཆོག་གི ཚོགས་
དྲུག་ལས་ཐ་དད་ཅེས་པའི་སྒྲ་ལ་རྣམ་བཅད་མེད་པས་དེ་བརྗོད་པ་ལ་དགོས་ནུས་མེད་པར་འགྱུར་ཏེ། ལྡོག་པ་ཙམ་དུའང་ཚོགས་དྲུག་ལས་ཐ་དད་དུ་བཞག་པ་མེད་ན་ཀུན་གཞི་ཞེས་གང་ལ་གདགས་ཏེ་ཀུན་གཞི་དང་ཚོགས་དྲུག་བཏགས་པའི་ཐ་སྙད་ཙམ་དུའང་ཐ་དད་དུ་མེད་པས་
སོ། །བརྟག་པའི་སྒོ་ཙམ་བརྗོད་པ་ལ་དྲང་པོར་དཔྱོད་ཅིག །དེ་ལ་བདག་ཅག་ནི་མཁན་པོ་འདི་ཉིད་ཚོགས་བརྒྱད་ཀྱང་བཞེད་དོ་ཞེས་འདོད་ལ། དེར་དངོས་སུ་དབྱུག་པ་སོགས་ཀྱི་གནོད་པ་མ་བྱུང་ན་རིགས་པའི་གནོད་པ་ནི་འབྱུང་བར་མི་སེམས་སོ། །དེ་ལྟར་ན་ཚོགས་
བརྒྱད་གནས་གྱུར་པའི་ཡེ་ཤེས་ལྔ་འདོད་དགོས་པ་སོགས་ཀྱི་ཕྱིར་དུ་གཞུང་ལུགས་འདི་ཐེག་ཆེན་སྤྱིའི་ལུགས་ལ་ཤིན་ཏུ་མཛེས་ཏེ། ཐ་སྙད་ཙམ་དུ་ཉོན་མོངས་པའི་ཡིད་དང་། བྱེ་བྲག་སོ་སོའི་རྣམ་ཤེས་སུ་ཕྱོགས་མ་བཅད་པའི་ཤེས་པ་གསལ་རིག་གི་ངོ་བོ་ཙམ། ཐོག་མ་
13-1-23a


མེད་པའི་དུས་ཀྱི་བག་ཆགས་འཛིན་པའི་སེམས་ཞིག་ཡོད་པ་ལ་འགལ་བ་མེད་པར་མ་ཟད་ཡོད་དགོས་པར་རིགས་པས་གྲུབ་པ་ཡིན་ནོ། །འོན་ཀྱང་དེ་ཀུན་བཏགས་ཀྱི་གཞིར་གྱུར་པའི་གཞན་དབང་གི་ངོ་བོར་བདེན་པར་ནི་མི་གྲུབ་པས་ཟླ་
བའི་ཞབས་སོགས་ཀྱིས་བཀག་པའང་དེ་ལྟར་དུ་ཤེས་པར་བྱ་སྟེ། རང་རིག་དང་ཀུན་གཞི་འགོག་པའི་རིགས་པ་འདི་ཀུན་སེམས་ཙམ་པ་རང་རིག་བདེན་གྲུབ་ཏུ་འདོད་པ་ལ་འཇུག་གི། ཀུན་གཞི་དང་རང་རིག་ཐ་སྙད་ཙམ་དུ་ཁས་ལེན་པའི་ལུགས་ལ་རྣམ་པ་ཀུན་ཏུ་མི་འཇུག་
པར་ཤེས་པར་བྱ་སྟེ། དཔེར་ན་ཕུང་ཁམས་སྐྱེ་མཆེད་དང་ལམ་དང་འབྲས་བུ་ཐམས་ཅད་བདེན་གྲུབ་འགོག་པའི་རིགས་པ་དེས། དབུ་མ་པ་ཐ་སྙད་ཙམ་དུ་ཕུང་ཁམས་ཀྱི་རྣམ་གཞག་དང་ལམ་འབྲས་ཁས་ལེན་པ་ལ་མི་གནོད་པ་བཞིན་ནོ། །མུ་སྟེགས་བྱེད་ཀྱིས་
སྨྲས་པ་རྟག་དངོས་ཀྱི་བདག་ལྟ་བུ་ལ་སོགས་པ་ནི་ཐ་སྙད་དུའང་མི་སྲིད་པར་ཤེས་པར་བྱ་སྟེ།  མདོར་ན་ཐ་སྙད་ཀྱི་ཚད་མའི་ངོར་ཡོད་པར་གྲུབ་ན་དེ་ཐ་སྙད་དུ་སུས་ཀྱང་དགག་མི་ནུས་ལ། ཐ་སྙད་པའི་ཚད་མས་གནོད་པ་ཡོད་ན་དེ་ཐ་སྙད་དུ་ཡོད་པར་སུས་ཀྱང་སྒྲུབ་མི་ནུས་
ཤིང་། དོན་དམ་པའི་ཚད་མས་མེད་པར་གྲུབ་པ་དེ་དོན་དམ་པར་ཡོད་དོ་ཞེས་སུས་ཀྱང་སྒྲུབ་མི་ནུས་པ་ནི་དངོས་པོ་རྣམས་ཀྱི་ཆོས་ཉིད་དོ། །དེ་ལྟར་ཤན་ཕྱེད་པ་ནི་ཐེག་ཆེན་མདོ་སྔགས་སྤྱི་ལ་གལ་པོ་ཆེ་ཞིག་ཡིན་ནོ། །དེས་ན་མདོ་ཙམ་དུ་མ་ཟད་སྔགས་སུའང་
སྣང་བ་ཐམས་ཅད་རང་སྣང་དང་དེའང་སེམས་ཉིད་བདེ་བ་ཆེན་པོར་གཏན་ལ་འབེབས་པ་ཡིན་པས་མདོར་ན་ཐེག་ཆེན་མདོ་སྔགས་མཐའ་དག་གི་བཞེད་པའི་རྩ་བར་གྱུར་པའི་གནད་སྟོན་པ་ནི་གཞུང་འདི་ཡིན་ཏེ། ཐེག་ཆེན་མཐའ་དག་ཆོས་ལྔ་རང་བཞིན་གསུམ་ལ་སོགས་པར་
13-1-23b


འདུ་བར་རྒྱལ་བས་གསུངས་པ་བཞིན་ཐེག་ཆེན་པ་ཀུན་དེ་ལྟར་འདོད་ཀྱང་། དེ་ཇི་ལྟར་ཉམས་སུ་ལེན་པའི་ལམ་ནི་སློབ་དཔོན་འདི་ཁོ་ནས་ཤིང་རྟའི་སྲོལ་ཕྱེས་པ་ཡིན་པས་གཞུང་འདི་ཤིན་ཏུ་གལ་ཆེ་ལ།  ཐ་སྙད་དུ་དངོས་པོ་ཡོད་པར་བཞེད་ཅིང་གཏན་ཚིགས་རང་
རྒྱུད་དུ་སྦྱར་བའི་ཁས་ལེན་ཡོད་པའི་རྣམ་གྲངས་པའི་དོན་དམ་རྩལ་དུ་བཏོན་ཏེ་གཞུང་བསྲངས་པས་རང་རྒྱུད་ཀྱི་སློབ་དཔོན་དུ་བགྲང་བ་ཡིན་ནའང་། ལྟ་བ་ཐལ་འགྱུར་ལས་དམན་ནོ་སྙམ་དུ་བསམ་པར་མི་བྱ་སྟེ། ཚུལ་གཉིས་ཟུང་དུ་འཇུག་པའི་ཐེག་ཆེན་སྤྱིའི་ལམ་
སྲོལ་དེ་ལྟར་ཕྱེས་ནས་དོན་གྱི་བདེན་གཉིས་ཟུང་འཇུག་རབ་ཏུ་མི་གནས་པའི་དབྱིངས་ལ་གནད་མཐུན་པར་གྱུར་པ་ལ་ཁྱད་པར་གང་ཡང་མེད་པའི་ཕྱིར་རོ། །དེས་ན་དཔལ་ལྡན་ཟླ་བའི་དགོངས་པ་སྣང་བ་འདི་ཀུན་ཐད་ཀ་རང་སར་དག་པས་ཐ་སྙད་ཀྱི་རྫུན་རིས་དབྱིངས་སུ་ཡལ་
བའི་ཟབ་མོའི་ལྟ་བ་ནི། རྫོགས་ཆེན་གྱི་གཞུང་ནས་ཀ་དག་གཏན་ལ་འབེབས་ཚུལ་དང་མཚུངས་པ་དེ་ཉིད་ཀྱི་ཕྱིར་ན་རིག་འཛིན་བརྒྱུད་པའི་རང་ལུགས་སུ་དོན་གྱིས་མཛད་པ་ཡིན་པས་དམན་པ་བདག་ཀྱང་དེ་ཁོ་ན་ལྟར་སྨོན་ནའང་། འདི་ལྟ་བུའི་གཞུང་ནི་ཐེག་ཆེན་
སྤྱིའི་ལམ་པོ་ཆེ་ཡིན་ཏེ། ཤིང་རྟ་རྣམ་པ་གཉིས་ཀྱི་གཞུང་དགོངས་པ་ཆུ་བོ་གཅིག་འདྲེས་སུ་སྦྱར་ཞིང་། ཁྱད་པར་དོན་དམ་པའི་ཚད་མ་དཔལ་ལྡན་ཀླུ་ཡིས་ཇི་ལྟར་བཞེད་པ་དང་། ཐ་སྙད་ཀྱི་ཚད་མ་དཔལ་ཆོས་ཀྱི་གྲགས་པས་ཇི་ལྟར་བཞེད་པ་གཉིས་
རིགས་པའི་རྒྱ་མཚོ་ཆེན་པོར་རོ་གཅིག་ཏུ་བསྐྱིལ་ཞིང་།  མཐར་ཐུག་མཐའ་བཞི་སྤྲོས་བྲལ་གྱི་དབུ་མ་ཆེན་པོར་སྐྱེལ་བའི་གཞུང་འདི་ལ་བཀའ་ཐེག་ཆེན་གྱི་དོན་རྒྱན་དྲུག་ལ་སོགས་པ་ཤིང་རྟ་ཆེན་པོ་རྣམས་ཀྱིས་ཇི་ལྟར་བཀྲལ་བའི་ཟབ་གནད་མ་ཚང་བ་མེད་པར་རྫོགས་
13-1-24a


པས། སའི་སྟེང་ན་འགྲན་ཟླ་དང་བྲལ་བའི་ལེགས་བཤད་ཆེན་པོ་འདི་ཕྱོགས་རེ་རེ་བ་འཛིན་པ་ཀུན་གྱིས་ཀྱང་སྤྱི་པ་ཉིད་དུ་ཅིའི་ཕྱིར་མི་བཀུར་ཏེ་སྒོ་ཀུན་ནས་འབད་པས་འཇུག་པར་གྱིས་ཤིག །དེའི་ཕྱིར་སངས་རྒྱས་བཅོམ་ལྡན་འདས་ཀྱི་དགོངས་
པའི་བབས་སོ་ཆེན་པོ། ཤིང་རྟ་མཆོག་གི་ལུགས་སྲོལ་མ་ལུས་པ་འཁྱིལ་པའི་རྒྱ་མཚོ་ནི་འདི་ཡིན་པས་ན། ཆོས་ཀྱི་དབྱིངས་དང་རྗེས་སུ་མཐུན་པའི་མཉམ་བཞག་གི་མྱོང་བ་ཐུན་གཅིག་ལ་གནས་པ་ལྟ་ཅི། ཐོས་བསམ་གྱི་དུས་ན་དགག་སྒྲུབ་ཀྱི་རིགས་པ་ཤིན་ཏུ་
ཕྲ་བའི་གནད་ཀྱང་མ་ཟིན་པར། ཐལ་འགྱུར་ཞེས་མཐོ་སྙེགས་བྱས་པ་ཙམ་གྱིས་ཕན་དཀའ་བས་གཞུང་འདི་ལྟ་བུའི་ལམ་ནས་དབུ་མའི་གནད་ཟིན་པ་ལ་མཁས་པར་བྱའོ། །དེས་ན་འདི་ལྟ་བུའི་གཞུང་ལ་སྦྱངས་པ་ལེགས་པར་ཐོན་ན་དབུ་ཚད་སེང་གེ་མཇིང་བསྣོལ་
ཞེས་བོད་ལ་གྲགས་པ་ལྟར་མིང་དོན་དང་ལྡན་པར་ཐོབ་ལ། བདེན་པ་གཉིས་ཀྱི་ཚད་མ་གཅིག་གྲོགས་སུ་གཅིག་འཆར་བའི་ལེགས་བཤད་འགྲན་མེད་དུ་སྨྲ་བའི་དབང་ཕྱུག་ཆེན་པོའི་གོ་འཕང་གི་མཆོག་སྦྱིན་པའི་གཞུང་དག་ནི་འཕགས་ཡུལ་དུའང་འདི་ཁོ་ན་
ཙམ་ཡིན་ཏེ། ཅིའི་ཕྱིར་ན་ཤིང་རྟའི་ལུགས་སྲོལ་སོ་སོ་བ་གཅིག་ཏུ་བསྡུས་པའི་རིགས་པའི་སྙིང་པོ་མཆོག་དམ་པ་འདི་གཅིག་པུ་ལས་གཞན་དུ་མ་དམིགས་པའི་ཕྱིར་རོ། །དེ་ལྟར་ཚུལ་གཉིས་ཀྱི་དོན་དེ་གཞུང་གིས་ཇི་ལྟར་སྟོན་པ། གཞུང་འཆད་པའི་བསྡུས་
དོན་གྱིས་གསལ་བར་བཤད་པ་དེ་ལྟ་བུ་ནི་འདིའི་དབུ་ཞབས་ཀྱི་དོན་ཏོ། །དེ་འདྲ་བའི་ཚུལ་གཉིས་སུ་བཞག་པ་འདི་སློབ་དཔོན་ཀླུ་སྒྲུབ་ཀྱིས་བཞེད་པ་ཡིན་ནམ་སྙམ་ན་ཡིན་ཏེ། རིགས་པ་དྲུག་ཅུ་པ་ལས། འབྱུང་བ་ཆེ་ལ་སོགས་བཤད་པ། །རྣམ་པར་ཤེས་སུ་
13-1-24b


ཡང་དག་འདུ། །དེ་ཤེས་པས་ནི་འབྲལ་འགྱུར་ན། །ལོག་པར་རྣམ་བརྟག་མ་ཡིན་ནམ། །ཞེས་ཚིག་རྐང་དང་པོ་གཉིས་ཀྱིས། བཅོམ་ལྡན་འདས་ཀྱིས་འབྱུང་བ་ཆེན་པོ་བཞི་ལ་སོགས་པ་སྟེ་འབྱུང་གྱུར་དང་བཅས་པར་བཤད་པ་དེ། རྣམ་ཤེས་ལས་དོན་
ལོགས་སུ་མེད་པར་ཤེས་ཉིད་དེ་དག་གི་རྣམ་པར་སྣང་བ་ལ་བཞག་པས་རྣམ་ཤེས་སུ་འདུ་ལ། རྐང་པ་ཕྱི་མ་གཉིས་ཀྱིས།  འབྱུང་བ་རྣམས་ཕྱི་རོལ་ལམ། དེ་མིན་པར་རྣམ་ཤེས་ཀྱི་བདག་ཉིད་ཡིན་ཀྱང་རུང་སྟེ་དོན་ལ་ཡོད་དོ་སྙམ་ན། ཤེས་པ་དེའི་རང་བཞིན་
ཤེས་པའི་ཡེ་ཤེས་ཀྱི་ངོ་ན་འབྲལ་ཞིང་སྤོང་བ་སྟེ། ཡང་དག་པའི་ཡེ་ཤེས་ལ་དེ་མི་སྣང་བའི་ཕྱིར་ན་ལོག་པར་རྣམ་པར་བརྟག་པ་ཙམ་མ་ཡིན་ནམ། ཞེས་སོ། །ཚུལ་གཉིས་ཤིང་རྟ་ཆེན་པོའི་ལམ་སྲོལ་གང་། །ཚུལ་གཅིག་ཉིད་དུ་བསྒྲུབས་པའི་གཞུང་
ལུགས་ལ། །ཚུལ་བཞིན་རྗེས་སུ་ཞུགས་པ་གང་ཡིན་དེས། །ཚུལ་བཟང་ཐེག་མཆོག་ཆོས་ཀྱི་རྒྱལ་སྲིད་ཐོབ། །ཡིན་ནམ་མིན་ཀྱང་གཞན་ཟེར་རྗེས་ཟློས་ན། །དེ་ཕྱོགས་འཛིན་པའི་ཡིད་ལ་འཐད་མོད་ཀྱང་། །ཤིང་རྟའི་གཞུང་བཟང་དྲང་པོར་བཤད་པ་
འདི། །གང་ལ་གཟེན་པོར་གྱུར་རྣམས་བཟོད་པར་མཛོད། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །ལྔ་པ་དགོས་པ་ལ། ཐེག་ཆེན་མཐའ་དག་གི་དོན་ལ་ངེས་པ་ཇི་ལྟར་སྐྱེ། དེའང་བདེ་བླག་ཅེས་བྱ་བ་ནི་ཇི་ལྟ་བུ། དེས་བྱང་ཆུབ་ཆེན་པོ་
ཇི་ལྟར་ཐོབ་སྙམ་ན། སྤྱིར་ཐེག་པ་ནི་རྣམ་གྲོལ་བྱང་ཆུབ་གསུམ་ལ་སྦྱོར་བར་བྱེད་པའི་བཞོན་པར་གྱུར་པའི་མིང་ཡིན་ལ། དེ་ལ་དམན་པའི་ཐེག་པ་ལས་དམིགས་པ་སོགས་ཆེན་པོ་བདུན་གྱིས་འཕགས་པ་ནི་དབུ་སེམས་ཀྱི་གཞུང་ལུགས་སོ། །དེའང་དབུ་སེམས་
13-1-25a


དེ་གཉིས་སོ་སོའི་ཕྱོགས་རེ་བ་མིན་པར་གཉིས་ཀའི་དགོངས་པ་ཟུང་གཅིག་ཏུ་ཆུད་པ་ནི་མཐའ་དག་གོ། །དེ་དག་གི་དོན་ལ་ངེས་པ་སྐྱེ་བའི་ཚུལ་ནི།  སྤྱིར་གོམས་ཤིང་ཉམས་སུ་མྱོངས་པའི་ཤེས་རབ་ཀྱིས་མཐར་ཐུག་གི་འབྲས་བུ་ལ་སྦྱོར་བར་བྱེད་
ལ། དེ་དག་གི་མེད་ན་མི་འབྱུང་གི་རྒྱུ་ནི་ཚུལ་བཞིན་བརྟགས་ནས་ངེས་པ་རྙེད་པ་བསམ་པའི་ཤེས་རབ་ཡིན་ལ། དེའི་རྒྱུ་ནི་ལེགས་པར་བཤད་པའི་གཞུང་ཐོས་པ་ལས་ཡིན་ཞིང་། དེའང་གཞུང་ཐོས་ཙམ་དང་། དེའི་དོན་ལ་མོས་པ་ཙམ་གྱིས་ས་ལམ་བགྲོད་མི་ནུས་ཏེ།
ཡང་དག་པའི་དོན་ལ་ངེས་ཤེས་ཚུལ་བཞིན་སྐྱེས་ནས་རང་རྒྱུད་ཀྱི་ཕྱིན་ཅི་ལོག་གི་རྟོག་པ་ངན་པ་རྣམས་སྤང་དགོས་པའི་ཕྱིར་རོ། །དེས་ན་དཔྱད་གསུམ་གྱིས་དག་པའི་སངས་རྒྱས་ཀྱི་བཀའི་དོན། རིགས་པ་ཚད་མས་བསྒྲུབས་པའི་ལམ་འདི་ལྟ་བུའི་རྗེས་སུ་ཞུགས་ན་རང་ལ་
ཡིད་ཆེས་ཁྱད་པར་ཅན་སྐྱེས་ནས། གཞན་གྱི་དྲིང་ལ་མི་འཇོག་པ་དང་། གཞན་གྱིས་དྲང་དུ་མི་བཏུབ་པའི་ཤེས་རབ་ཀྱི་སྣང་བ་ཆེན་པོས་སངས་རྒྱས་བཅོམ་ལྡན་འདས་རྣམས་གཤེགས་ཤིང་རྗེས་སུ་གཤེགས་པའི་ལམ་པོ་ཆེ་མཐོང་ནས་དེར་ལྡོག་མེད་དུ་ཞུགས་པར་འགྱུར་ཏེ།
དེ་ལ་གཞན་ཟེར་ཙམ་དང་། མོས་པ་ཙམ་མིན་པར་རང་གི་རིགས་པའི་སྟོབས་ཀྱིས་ཡིད་ཆེས་པ་ནི་གཞན་ལ་ལྟོས་པའམ། གཞན་གྱི་མཐུ་ལ་ལྟོས་པ་འཇོག་མི་དགོས་པར་རང་དབང་འབྱོར་བ་ནི་གཞན་གྱི་དྲིང་ལ་མི་འཇོག་པ་ཞེས་བྱ་ལ། ཤེས་ནས་དད་པ་ཐོབ་པའི་རྒྱུ་མཚན་
གྱིས་བདུད་དང་ཕྱིར་རྒོལ་བ་ཀུན་གྱིས་ཀྱང་ལམ་དེ་ལས་གཞན་དུ་ཁ་ལོ་དྲང་བར་མི་ནུས་པ་ནི་གཞན་གྱིས་དྲང་དུ་མི་བཏུབ་པ་ཞེས་བྱ་སྟེ། དེ་ལྟ་བུའི་ཤེས་རབ་ཀྱི་སྤྱན་མངའ་བའི་གང་ཟག་དེས། ཡང་དག་པའི་ཆོས་ལ་གཞན་ལས་ཁྱད་པར་དུ་འཕགས་པའི་ངེས་ཤེས་རྙེད་པ་དང་།
13-1-25b


ཡང་དག་མིན་པ་ཆོས་མིན་གྱི་ཕྱོགས་སུན་འབྱིན་པས། ཆོས་དང་ཆོས་མིན་རྣམ་པར་འབྱེད་པའི་བློའི་མཐུ་ཐོབ་པ་ནི་མིག་གསལ་བས་གཟུགས་ལ་ལྟ་བ་བཞིན་ནོ། །དེ་སྐད་དུའང་མགོན་པོ་བྱམས་པས། ཆོས་བཟང་རིགས་པས་རྣམ་དཔྱད་བསམ་པ་ཅན། །རྟག་
ཏུ་བདུད་ཀྱིས་བར་ཆད་བྱེད་པ་མེད། །ཁྱད་པར་རྙེད་དང་གཞན་གྱི་ཕྱོགས་སུན་འབྱིན། །མི་འཕྲོག་ཡོངས་སུ་སྨིན་པའི་མཚན་ཉིད་དོ། །ཞེས་གསུངས་པ་བཞིན་ནོ། །དེའི་ཕྱིར་ན་ཡང་དག་པའི་ལམ་ཐམས་ཅད་ནི་ཤེས་ཤིང་མཐོང་ནས་གོམས་པ་ཡིན་གྱི། རང་གིས་ངེས་
པ་མ་རྙེད་བཞིན་དུ་གོམས་ཤིང་འབྲས་བུ་ལ་སྦྱོར་བའི་ལམ་རྣམ་དག་མི་སྲིད་པར་ཤེས་པར་བྱའོ། །དེས་ན་ཚུལ་འདི་ཚད་མ་གཉིས་ཀྱི་གཞུང་གི་རིགས་པའི་སྙིང་པོ་ཡིན་པས་གནད་འདི་ཙམ་ཟིན་ན། འདིས་སངས་རྒྱས་ཀྱི་བཀའ་ཟབ་ཅིང་རྒྱ་ཆེ་བའི་ཐེག་ཆེན་མཐའ་དག་འབད་མེད་
རང་གྲོལ་དུ་ཤེས་ཤིང་དད་པར་ཡང་འགྱུར་ཏེ། ཕྱོགས་ཀུན་ནས་ཤེས་རབ་མཆེད་པར་འགྱུར་བ་ནི། མེ་སྟག་ཆུང་ངུའི་མེ་ནགས་ལ་ཟིན་པ་བཞིན་ནོ། །དེ་ལྟ་བུའི་གཞུང་འདི་ཀུན་ལས་འཕགས་པར་རིགས་པས་གྲུབ་པ་ལྟར་ལུང་གིས་ཀྱང་གྲུབ་སྟེ། ལང་ཀར་གཤེགས་
པ་ལས།  ཆོས་ལྔའི་དོན་གོང་དུ་ཇི་སྐད་བཤད་པ་དེ་དག་གཞུང་དེ་ཉིད་ཀྱིས་རྒྱས་པར་བསྟན་ཏེ་མཇུག་ཏུ།  སུ་ཞིག་ཚུལ་འདི་རིགས་པས་དཔོག་བྱེད་པ། །དད་ལྡན་རྣལ་འབྱོར་བརྩོན་ཞིང་མི་རྟོག་པ། །མི་གནས་དོན་ལ་བརྟེན་པར་གྱུར་པ་དེ། །ཆོས་ཀྱི་རྣམ་པར་
གསེར་བཞིན་སྤྱད་པར་བྱ། །ཞེས་སོགས་གསུངས་པ་ནི། ཚུལ་གཉིས་གཅིག་ཏུ་སྦྱོར་ཞིང་རིགས་པས་གཏན་ལ་དབབ་པའི་གཞུང་འདི་ལྟ་བུ་ལས་གཞན་མ་བྱུང་བས། འོས་མེད་ཀྱི་རིགས་པས་གཞུང་འདི་ཆེ་ཐང་དུ་བསྔགས་པར་གྲུབ་བོ། །ཞིབ་ཏུ་ནི་ལང་གཤེགས་
13-1-26a


རྒྱན་སྟུག་པོ།  དགོངས་པ་ངེས་འགྲེལ། ཡབ་སྲས་མཇལ་བ། ཟླ་བ་སྒྲོན་མེའི་ཏིང་འཛིན། གླང་པོའི་རྩལ་གྱི་མདོ། བློ་གྲོས་མི་ཟད་པ། ཆོས་ཡང་དག་པར་སྡུད་པ། ཀླུའི་རྒྱལ་པོ་རྒྱ་མཚོས་ཞུས་པ། དཀོན་ཅོག་སྤྲིན། རྒྱལ་བའི་ཡུམ་ལ་
སོགས་པ་ཐེག་ཆེན་གྱི་བཀའ་རྣམས་ཀྱི་དགོངས་པ་དྲི་མ་མེད་པ་ལ་ཞིབ་མོར་བསམས་ན་འདི་ལ་སླར་ཡང་ཡིད་ཆེས་པར་འགྱུར་རོ། །བྱེ་བྲག་གི་ངེས་པ་སྐྱེ་ཚུལ་གྱི་དབང་དུ་ན། གཞུང་འདི་ལ་དབུ་མ་གཞན་ལས་ཁྱད་པར་དུ་འཕགས་པ་རང་ལུགས་ཐུན་མིན་གྱི་བཞེད་པ་ལྔ་
ཡོད་དེ། ཡུལ་གཞལ་བྱ་མཚན་ཉིད་པ་དོན་བྱེད་ནུས་ཀྱི་དངོས་པོ་ཁོ་ན་ལ་འཇོག་པ་དང་། ཤེས་པ་ཡུལ་མེད་རང་རིག་རང་གསལ་གྱི་འདོད་ཚུལ་ཐུན་མོང་མ་ཡིན་པ་དང་། ཕྱི་རོལ་གྱི་སྣང་བ་སྣ་ཚོགས་རང་སེམས་ཀྱི་དབང་ལས་སྣང་བས་སེམས་ཙམ་དུ་འདོད་པ་དང་། དོན་
དམ་ལ་རྣམ་གྲངས་དང་རྣམ་གྲངས་མ་ཡིན་པ་གཉིས་སུ་ཕྱེ་བ་དང་། རྣམ་གྲངས་པའི་དོན་དམ་གཏན་ལ་འབེབས་པའི་སྐབས་སུ་ཚད་མ་སོ་སོའི་རྙེད་དོན་འགལ་མེད་དུ་འཛིན་པའོ། །དེ་རྣམས་སོ་སོའི་དགོས་པའང་། དང་པོ་ཡུལ་གཞལ་བྱ་མཚན་ཉིད་པ་ཀུན་རྫོབ་ནི་དོན་
བྱེད་ནུས་པ་ཡིན་གྱི། དངོས་མེད་ཀྱི་ཆ་རྣམས་ནི་རང་དབང་གིས་སྣང་མི་ནུས་པར་དངོས་པོ་ལ་བརྟེན་ཏེ་གཞན་སེལ་གྱི་བློས་བཏགས་པ་ཡིན་པར་ཤེས་པས། ཚུར་མཐོང་གི་རྣམ་གཞག་འཐད་པ་དང་། དེས་ཚུར་མཐོང་གི་ཡུལ་དུ་སྣང་བའི་ཤེས་བྱ་ཐམས་ཅད་མི་རྟག་པར་གཏན་
ལ་ཕེབ་པ་ཡིན་ཏེ། འདི་ལྟར་ནམ་མཁའ་སོགས་ནི་རྟག་པར་རློམ་པར་ཟད་ཀྱི། དེ་ལ་དངོས་པོ་མེད་པའི་བཏགས་པ་ཙམ་དུ་གྲུབ་ན། གང་དངོས་པོ་ཡིན་ན་དོན་བྱེད་ནུས་པ་ཡིན་དགོས་ལ། དེ་ཡིན་ན་སྐད་ཅིག་མར་གྲུབ་པས།  དངོས་ཀུན་མི་རྟག་པར་བདེ་བླག་ཏུ་འགྲུབ་
13-1-26b


བོ། །ཡུལ་རྫས་བཏགས་ལ་སྣང་སེལ་གྱི་སྒོ་ནས་འཇུག་ཚུལ་ཤེས་ན་འདི་ལ་གོ་བ་གཏིང་ལོངས་པ་སྐྱེ་ཞིང་ཚད་མའི་གཞུང་གི་སྙིང་དང་མིག་ལྟ་བུའོ། །ཐ་སྙད་རང་ལ་ནང་གསེས་ཡང་དག་ཡིན་མིན་གཉིས་ཕྱེ་བའི་དོན་བྱེད་ནུས་དོན་དམ་དུ་ཡོད་པར་འདོད་པ་འདི་མདོ་སྡེ་པ་
དང་མཐུན་ལ། ཆོས་ཀྱི་གྲགས་པས་ཀྱང་། གལ་ཏེ་ཕྱི་རོལ་དཔྱོད་ལ་འཇུག་པ་ན། །ཁོ་བོ་མདོ་སྡེའི་སྐས་ལ་རྣམ་པར་བརྟེན། །ཞེས་གསུངས་པར་གྲག །འདིར་ཕྱི་དོན་ལྐོག་ན་མོ་མི་འདོད་ཀྱང་སེམས་ཀྱི་དབང་གིས་སྣང་བ་སྣ་ཚོགས་སུ་ཤར་བའི་སྣང་ཚུལ་དེ་ལ་ཐ་སྙད་
ཀྱི་གཞལ་ཚུལ་འདི་ལྟར་བྱེད་དགོས་སོ། །གཉིས་པ་ཐ་སྙད་ཙམ་དུ་རང་རིག་ཡོད་ཅིང་། དེའང་རང་གི་ངོ་བོ་གཅིག་ལ་རིག་བྱ་རིག་བྱེད་དུ་ཕྱེ་བའི་ཡུལ་རིག་པ་མིན་ཀྱང་། བེམ་པོ་ལས་ལྡོག་སྟེ་མྱོང་བ་གསལ་རིག་གི་ངོ་བོར་སྐྱེས་ཙམ་གྱི་དོན་ལ་རང་རིག་གི་ཐ་སྙད་འཐད་པའི་རྣམ་
གཞག་བསྟན་པས། རང་གིས་རང་ལ་བྱེད་པ་འགལ་སོགས་ཀྱི་ཀླན་ཀ་ཅིའང་མི་འཇུག་པར་རང་རིག་ཐ་སྙད་དུ་གནོད་མེད་གྲུབ་ཅིང་། དེས་སྣང་བ་སེམས་སུ་བསྒྲུབ་པ་དང་། ཡུལ་མྱོང་བའི་ཐ་སྙད་གནོད་མེད་དུ་འགྲུབ་པ་ཡིན་ལ། འདི་ལྟར་ཁས་མ་བླངས་ན་འབྲེལ་
བ་མེད་པས་ཕྱི་དོན་ཉམས་སུ་མྱོང་བ་སོགས་མི་འགྲུབ་པས་ཚུར་མཐོང་གི་རྣམ་གཞག་ཀུན་འཇིག་པས་ན་རང་རིག་ནི་ཀུན་ཏུ་ཐ་སྙད་པའི་ཚད་མའི་གནད་གཅིག་པུར་གྱུར་པའོ། །གསུམ་པ་སྣང་བ་སྣ་ཚོགས་པ་སེམས་ཀྱི་རྣམ་འཕྲུལ་དུ་ཁས་བླངས་པས་ཐ་སྙད་ཀྱི་
ཡིན་ལུགས་མཐར་ཐུག་པ་ཤེས་ཤིང་འཁོར་བར་འཇུག་ལྡོག་གི་ཚུལ་ལ་ཡིད་ཆེས་ཐོབ་སྟེ། དེ་ལ་དམིགས་མཚན་སྤྲོས་པ་ཐམས་ཅད་དང་བྲལ་བའི་གནས་ལུགས་ཀྱི་དབང་དུ་ན། སྣང་བ་སེམས་ཡིན་ནོ་ཞེས་ཀྱང་མི་དམིགས་མོད། དེ་ནི་ཐ་སྙད་ལས་འདས་པའི་དོན་དམ་པ་
13-1-27a


ཡིན་ལ། ཐ་སྙད་སྣང་བའི་ངང་ཚུལ་འདི་ལ་གནས་ན་ནི། ཕྱི་དོན་ཡོད་པ་ལ་རིགས་པས་གནོད་ཅིང་། སེམས་ཙམ་ཡིན་པ་ལ་རིགས་པའི་སྒྲུབ་བྱེད་ཡོད་པས་ཚུར་མཐོང་གི་ས་ལས་མ་བརྒལ་བར་ཐ་སྙད་ཞིག་ཁས་ལེན་ན་འདི་ལས་
གོང་དུ་གྱུར་པ་མེད་དེ། རྟོག་པའི་དབང་གིས་བཞག་པ་ཙམ་གྱི་ཆོས་རྣམས་དཔྱད་ན་གང་དུའང་མ་གྲུབ་ཀྱང་། རང་ངོར་མྱོང་བའི་ཚུལ་གྱིས་བསླུ་མེད་དུ་སྣང་བ་འགོག་ཏུ་མེད་པ་འདི་སེམས་ཀྱི་སྣང་བའམ་རང་སྣང་ཙམ་དུ་དངོས་པོའི་སྟོབས་ཀྱིས་གྲུབ་པ་ཡིན་ནོ། །དེ་ལས་བརྒལ་ན་ཐ་
སྙད་ལས་འདས་པའི་དོན་དམ་པའི་ས་ཡིན་གྱི། འདིའི་གོང་དུ་གྱུར་པའི་ཐ་སྙད་ཀྱི་རྣམ་གཞག་ཞིག་མི་སྲིད་པར་ཤེས་པར་བྱའོ།  །དེས་ན་དཔལ་ཆོས་ཀྱི་གྲགས་པས་ཀྱང་། བཅོམ་ལྡན་འདས་ཀྱི་ཡེ་ཤེས་ཀྱི་སྤྱན་གྱིས་དངོས་པོའི་གནས་ཚུལ་ཇི་ལྟ་བར་གཟིགས་
པའི་དགོངས་དོན་ཐ་སྙད་ཀྱི་རྣམ་གཞག་གསལ་བར་མཛད་པའི་སྙིང་པོ་ནི་དེ་ཙམ་ཡིན་ནོ། །དེ་ལྟ་ནའང་ཐ་སྙད་པའི་ཚད་མ་དང་དོན་དམ་པ་སྦྱར་ཏེ་སྟོན་པ་ནི་གཞུང་འདིའི་ཁྱད་ཆོས་སོ། །དེ་ལྟར་སྣང་བ་སེམས་ཉིད་ཀྱི་རོལ་པར་ཤེས་ན་འཁོར་བར་འཇུག་ལྡོག་གི་
ཚུལ་ལ་ངེས་པ་རྙེད་ཚུལ་ཡང་། འདི་ལྟར་སེམས་ལ་ཕྱིན་ཅི་ལོག་གི་བག་ཆགས་སྣ་ཚོགས་བཞག་པའི་དབང་གིས་སྲིད་པའི་རྒྱུན་བར་མ་ཆད་དུ་རྨི་ལམ་ལྟ་བུའི་སྣང་བ་སྣ་ཚོགས་སུ་ཤར་ཡང་། དེ་ཉིད་ལ་སེམས་ལས་རྒྱུ་གཞན་མེད་པའི་རྒྱུ་མཚན་གྱིས་སེམས་ཉོན་
མོངས་པའི་དབང་དུ་གྱུར་པ་སྲིད་པའི་ཁམས་སུ་འཇུག་པ་ལ་དེ་བཞིན་གཤེགས་པའི་ཕྱག་གིས་ཀྱང་དགག་ཏུ་མི་སྤྱོད་ཅིང་། རང་སེམས་ལ་དབང་ཐོབ་ན་དེ་ཁོ་ནས་ཆོས་ཀུན་ལ་དབང་བསྒྱུར་བ་ཡིན་གྱི།  ཕྱི་རོལ་ནས་དབང་ཕྱུག་སོགས་མཉེས་པ་དང་། ཡུལ་དུས་ངན་
13-1-27b


པ་ནས་བྱོལ་ཏེ་བཟང་པོ་གཤེད་དུ་འགྲོ་བ་སོགས་རྒྱུ་གཞན་ལ་མི་ལྟོས་པར། བཟོད་པ་ཐོབ་ནས་དེ་ཕན་ཆད་ངན་སོང་དུ་མི་འགྲོ་བ་སོགས་ལམ་དང་འབྲས་བུའི་ཡོན་ཏན་སྣང་བ་ཡིན་གྱི། གཞན་དུ་རང་གི་སེམས་ཉིད་ཀྱི་དབང་གིས་མིན་པར། ཕྱི་རོལ་གྱི་དངོས་པོའི་
མཐུ་ཡིས་ཡིན་ན་ནི་བཟང་ངན་གྱི་དངོས་པོ་སྣ་ཚོགས་པ་ནི་རྟག་ཏུ་སྣང་བ་རྒྱུན་མི་འཆད་པས། ལམ་ཉམས་སུ་བླངས་པའི་གང་ཟག་ལ་ཕྱི་རོལ་གྱི་དབང་ལས་བྱུང་བའི་སྡུག་བསྔལ་བ་སོགས་གཏན་དུ་སྤངས་པ་མི་སྲིད་པ་ལ་སོགས་པའི་ཕྱིར་ན། སྣང་བ་སེམས་སུ་
ཤེས་པ་དེས་འཁོར་བར་འཇུག༷་ལྡོག་ལ་ཤིན་ཏུ་ཡིད་ཆེས་ཀྱི་ངེས་པ་བརྟན་པོ་རྙེད་པ་ཡིན་ནོ། །དེས་ན་རང་གི་སེམས་ཉིད་ཀྱི་སྟེང་དུ་ཆོས་ཀུན་གཏན་ལ་འབེབས་པ་ནི་སངས་རྒྱས་པ་རྣམས་ཀྱི་གྲུབ་མཐའི་ཁྱད་ཆོས་མཆོག །དངོས་པོའི་སྣང་ཚུལ་གྱི་ཡིན་ལུགས།
བསྒོམ་པའི་མན་ངག་གི་གནད་དམ་པ། སྲིད་པའི་འཁྲུལ་འཕྲུལ་འཁོར་འཇིག་པ་ལ་ཤན་པ་སྲོག་གི་གནད་དང་། ཤིང་མཁན་ཤིང་གི་གནད་ལ་མཁས་པ་ལ་སོགས་པ་ལྟ་བུ་ཡིན་ལ། ཐབས་ཁྱད་པར་བས་ཟིན་ན་མཐར་ཐུག་རྡོ་རྗེ་ཐེག་པའི་སྐབས་སུ་མན་ངག་གི་སྙིང་པོའང་
འདི་ཁོ་ན་ཡིན་ནོ། །དེང་སང་ནི་ཆོས་ཀྱི་རྩ་བ་མྱོང་བས་མ་རྙེད་པར་ཚིག་ཙམ་ཁ་ལ་ཁྱེར་བ་རྣམས་ཀྱིས་སེམས་ལ་གདར་ཤ་གཅོད་པ་ཙམ་གྱི་ཆོས་དེ་རླབས་ཆུང་ཞིང་། དེ་ལས་རླབས་ཆེ་བའི་གཏན་ཚིགས་དང་། བཤད་རྒྱ་ཆེས་བསྐྱེད་དེ་ལམ་བསྒྲུབ་པར་བྱའོ་སྙམ་ནའང་།
ལར་ཐོས་བསམ་གྱི་སྤྱི་རྒྱ་གཅོད་དགོས་མོད་ཀྱང་། ཉམས་ལེན་སྙིང་པོར་ཡང་དྲིལ་དགོས་ཚོད་གདའ་སྟེ། ཆོས་ལག་ཏུ་ལོན་པའི་དམ་པ་རྣམས་ཀྱིས་གཟིགས་ན། རྒྱལ་བའི་ཡུམ་ལས། རྩ་བ་བོར་ནས་ཡལ་ག་ཚོལ་བ། ཟས་མཆོག་རྙེད་ནས་ཟས་ངན་ཚོལ་བ།
13-1-28a


གླང་པོ་རྙེད་ནས་གླང་རྗེས་ཚོལ་བ། བཟང་མང་སྟེར་བའི་རྗེ་བོ་ལ་མི་སློང་བར་ངན་ཉུང་སྟེར་བའི་བྲན་ལ་སློང་བ་ལ་སོགས་པའི་དཔེ་གསུངས་པ་དེའི་ཚུལ་དུ་ཆོས་ཀྱི་རྩ་བ་བོར་ནས་ཚིག་གི་སྤུན་པ་ཙམ་མྱངས་པའི་དྲེགས་པས། གནད་
དང་ལྡན་པ་གཞན་ལའང་བརྙས་པར་བྱེད་པ་རྣམས་ཀྱིས་ནི་ཆོས་རླབས་ཆེ་ཆུང་གོ་བསྣོལ་བར་བཟུང་བའི་ཚོད་དུ་གདའོ། །དེས་ན་སྣང་བ་ཐམས་ཅད་རང་སྣ ང་དུ་ཤེས་པ་འདི་ནི་མདོ་སྔགས་གང་གི་ཡང་ལམ་དོན་དུ་གཉེར་བ་ཞིག་ཡིན་ཕན་ཆད་ཤིན་ཏུ་ཡིད་ཆེས་དགོས་པ་
ཞིག་ལ་འདི་ལས་གལ་ཆེ་བ་མེད་དེ། མཚན་གཅིག་གི་རྨི་ལམ་ན་སྣང་བའི་ཚུལ་སྣ་ཚོགས་ལའང་། ཐབས་གཞན་གྱིས་སྤང་བར་རྩོམ་ན་ཟད་དུ་མེད་ཀྱང་། སེམས་ཉིད་ལས་བྱུང་བར་ཤེས་ན་དེ་ཐམས་ཅད་ཅིག་ཅར་རང་ཞིར་འགྱུར་བ་བཞིན་དུ་སྲིད་པའི་སྣང་
བ་དུས་ཀྱི་མཐའ་དང་ཕྱོགས་ཀྱི་མུ་མེད་པའང་དེ་དང་འདྲ་བར་ཤེས་པར་བྱའོ། །བཞི་པ་རྣམ་གྲངས་དང་རྣམ་གྲངས་མ་ཡིན་པའི་དོན་དམ་གཉིས་སུ་ཕྱེ་བ་ནི་ཆེས་མཆོག་ཏུ་གྱུར་པའི་ལུགས་སྲོལ་བཟང་པོ་སྟེ། འདི་ལྟར་ཐོག་མ་ཁོ་ནར་བདེན་མེད་དུ་མ་
བསྟན་ན་ནི་ཐོག་མེད་ནས་གོམས་པའི་དངོས་འཛིན་ཕྱིན་ཅི་ལོག་འཇིལ་བའི་ཐབས་མེད་ལ། དེ་ཙམ་ཞིག་དོན་དམ་དུ་བསྟན་ན་ནི་བློ་ཆུང་བ་ཁ་ཅིག་དགག་བྱ་བཀག་པའི་མེད་པ་ཙམ་གནས་ལུགས་སོ་སྙམ་དུ་སྟོང་པ་ཉིད་ལ་ཞེན་ནས་གསོར་མི་རུང་བའི་ལྟ་བར་འགྱུར་
ལ། ཞེན་ཚུལ་ལའང་སྟོང་ཉིད་ལ་དངོས་པོར་ཞེན་པ་དང་དངོས་མེད་དུ་ཞེན་པ་གཉིས་ཡོད། མཐའ་གང་དུའང་ཞེན་མི་རུང་ངོ་ཞེས་སྨྲས་ན། སྲིད་པའི་རིམས་ནད་མཐའ་དག་གི་གཉེན་པོ་སྟོང་ཉིད་ཟབ་མོའི་བདུད་རྩིའི་འབྱུང་གནས་རིགས་པའི་རྣམ་དཔྱོད་ཀྱིས་
13-1-28b


དྲངས་པའི་ངེས་ཤེས་ནི་བོར་ཏེ། ཅི་ཡང་ཡིད་ལ་བྱས་ན་མི་རུང་ངོ་སྙམ་དུ་དྲན་མེད་མུན་པའི་འཐིབས་པོར་ཞུགས་པ་དེ་ལྟ་བུས་ན། ཆོས་ཟབ་མོ་འདི་བལྟ་ཞིང་མཐོང་བ་དང་རྟོག་ཅིང་ཉམས་སུ་མྱོང་དཀའ་བ་ཡིན་ཏེ། དབུ་མའི་བསྟན་བཅོས་ལས། སྟོང་པ་ཉིད་
ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཇི་ལྟར་སྦྲུལ་ལ་བཟུང་ཉེས་དང་། །རིག་སྔགས་ཉེས་པར་བསྒྲུབས་པ་བཞིན། །དེ་ཕྱིར་ཞན་པས་ཆོས་འདི་ཡི། །གཏིང་རྟོགས་དཀའ་བར་མཁྱེན་གྱུར་ནས། །ཐུབ་པའི་ཐུགས་ནི་ཆོས་བསྟན་ལས། །
རབ་ཏུ་ལོག་པར་གྱུར་པ་ཡིན། །ཞེས་གསུངས་པ་བཞིན་ནོ། །དེས་ན་དང་པོར་རྣམ་གྲངས་ཙམ་གྱི་དོན་དམ་པ་འདིས་དངོས་ཞེན་བཤིག་ནས། དེའི་རྗེས་སུ་རྣམ་གྲངས་མིན་པའི་དོན་དམ་བསྟན་པས་དངོས་མེད་ལ་དེར་ཞེན་གྱི་ཆའང་བཀག་སྟེ། མདོར་ན་ཡོད་པ་དང་། མེད་
པ་དང་། གཉིས་ཡིན་དང་། གཉིས་མིན་གྱི་མཐའ་བཞི་ཀ་ལ་བདེན་གྲུབ་སོགས་ཀྱི་ཁྱད་པར་གང་ཡང་མ་སྦྱར་བར་དེ་དག་གི་དམིགས་གཏད་ཞིག་པའི་སྤྲོས་བྲལ་ཆེན་པོ་སོ་སོ་རང་གིས་རིག་པར་བྱ་བའི་དོན་ཟབ་མོ་བདེ་བླག་ཏུ་ངོས་ཟིན་པའི་དགོས་པ་ཡོད་དོ། །ཚུལ་དེ་དག་
ནི་ཞི་བ་ལྷས། སྟོང་ཉིད་བག་ཆགས་གོམས་པས་ནི། །དངོས་པོའི་བག་ཆགས་སྤོང་འགྱུར་ཞིང་། །ཅི་ཡང་མེད་ཅེས་གོམས་པས་ནི། །དེ་ཡང་ཕྱི་ནས་སྤོང་བར་འགྱུར། །གང་ཚེ་གང་ཞིག་མེད་དོ་ཞེས། །བརྟག་བྱའི་དངོས་པོ་མི་དམིགས་པ། །དེ་ཚེ་
དངོས་མེད་རྟེན་བྲལ་བ། །བློ་ཡི་མདུན་ན་ཇི་ལྟར་གནས། །གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་གསུངས་པ་བཞིན་དུ་ཤེས་པར་བྱའོ། །འོ་ན་མཐའ་
13-1-29a


བཞི་ལས་གཞན་པའི་བསམ་བྱ་ཞིག་མི་སྲིད་པས་མཐའ་བཞི་ཆར་བཀག་ན་ཅིའང་ཡིད་ལ་མི་བྱེད་པ་ཧ་ཤང་གི་ལུགས་དང་ཁྱད་ཅི་ཡོད་སྙམ་ན། ཧ་ཤང་ལ་སོགས་པ་ནི་དངོས་ཞེན་ཐམས་ཅད་ཁེགས་ནས་དམིགས་གཏད་ཀྱི་མཚན་མ་
ཅི་ཡང་མ་མཐོང་ནས་ཡིད་ལ་མི་བྱེད་པ་མིན་གྱི། སེམས་ལ་འགྱུ་འཕྲོ་ཐམས་ཅད་བཀག་པ་ཙམ་ལ་མཐའ་ཐམས་ཅད་སེལ་བ་ལྟ་ཅི། ཡོད་མཐའ་ཡང་སེལ་བའི་རྒྱུ་མཚན་མེད་ལ། རྣམ་པར་མི་རྟོག་པ་ནི་དེ་ལྟ་བུ་མ་ཡིན་ཏེ། ཆོས་ཉིད་རྣམ་འབྱེད་ལས། 
ཡིད་ལ་མི་བྱེད་ཡང་དག་འདས། །ཉེ་བར་ཞི་དང་ངོ་བོའི་དོན། །མངོན་རྟགས་འཛིན་པ་རྣམ་པ་ལྔ། །སྤང་བའི་རང་གི་མཚན་ཉིད་དོ། །ཞེས་འཇིག་རྟེན་པའི་ཡིད་ལ་མི་བྱེད་པ་སོགས་ལྔ་དང་མ་འདྲེས་པའི་ཚུལ་གྱིས་བསྟན་པ་ལྟར་ཤེས་པར་བྱའོ། །མེད་
པར་རིགས་པས་དཔྱད་ནས་འཛིན་སྟངས་དང་བཅས་ཏེ་བསྒོམས་ན་ཡོད་ཞེན་གྱི་གཉེན་པོ་བྱེད་ཀྱང་དངོས་མེད་ལ་དམིགས་པ་མ་དོར་བས་སྤྲོས་བྲལ་དང་སྟོང་ཉིད་རྟོགས་པའི་ཡེ་ཤེས་མཚན་ཉིད་པ་ནི་ག་ལ་ཡིན། ལ་ལས་བདེན་གྲུབ་བཀག་པའི་མེད་དགག་ལ་ཞེན་ན་
ཆད་ལྟའོ་ཞེས་ཟེར་ཡང་དངོས་ཞེན་དང་བཅས་བཞིན་དུ་རྒྱུ་འབྲས་ལ་སྐུར་པ་འདེབས་པར་ཆད་ལྟ་ཞེས་གྲགས་པས་ན་འདི་ཆད་ལྟའང་ག་ལ་ཡིན་ཏེ། འདི་བདེན་པར་ཡོད་ཞེན་གྱི་གཉེན་པོར་འཛིན་སྟངས་དོན་མཐུན་ཡིན་པས་མི་རྟག་པ་དང་མི་སྡུག་པ་སོགས་
བཞིན་དུ་ལས་དང་པོ་པའི་བསྒོམ་པར་བྱ་བའང་ཡིན་མོད། ལྟ་དང་ཁས་ལེན་ཀུན་བྲལ་གྱི་དབུ་མ་ཆེན་པོ་མི་རྟོག་ཡེ་ཤེས་ཀྱི་བདག་ཉིད་ལ་བསྒྲུན་ན་ཤིན་ཏུ་དམན་ཏེ་རྣམ་པར་རྟོག་པའི་རང་བཞིན་ཅན་གྱི་མེད་པར་ལྟ་བ་ནི་ཡིན་ནོ། །དེའང་ལས་དང་པོ་པའི་དགག་
13-1-29b


བྱ་བཀག་པའི་མེད་རྐྱང་ཙམ་ཞིག་བློ་ཡུལ་དུ་འཆར་སྲིད་ཀྱང་། དབུ་མས་དཔྱད་པ་གནད་དུ་སོང་བའི་གང་ཟག་གིས། རང་བཞིན་མེད་པ་དང་། མེད་པ་ཙམ་གྱི་ཁྱད་ལེགས་པར་ཕྱེད་པའི་སྒོ་ནས། རང་བཞིན་མེད་པ་དང་རྟེན་འབྱུང་དོན་དུ་དབྱེར་མེད་པའི་ངེས་ཤེས་ཁྱད་
པར་ཅན་གྱི་འཛིན་སྟངས་ནི། གཡང་ས་ལྟ་བུ་རྟག་ཆད་ཀྱི་མཐའ་གཉིས་སེལ་བའི་གཉེན་པོ་ཡིན་མོད། ཇི་སྲིད་དགག་སྒྲུབ་ཀྱི་འཛིན་སྟངས་དང་བཅས་པ་དེ་སྲིད་དུ་རྣམ་པར་རྟོག་པའི་སྤྲོས་པ་མཐའ་བཞི་བྲལ་བའི་རང་བཞིན་མ་ཡིན་ནོ། ། མཐའ་བཞིའི་གང་
དུའང་གནས་པ་མེད་པར་རིགས་པས་རྩད་དར་ཆོད་པའི་ངེས་ཤེས་ཀྱིས་དྲངས་པའི་ཆོས་ཀྱི་དབྱིངས་ལ་སོ་སོ་རང་རིག་པའི་ཚུལ་དུ་མཉམ་པར་བཞག་པས་ནི་སྤྲོས་པའི་མཐའ་ཐམས་ཅད་སེལ་བར་ནུས་ལ། དེ་ལས་སྒྲོ་འདོགས་གཅོད་པ་དང་བོགས་དབྱུང་དུ་མེད་
པའི་ཡང་དག་མཐའ། ཡུམ་ནས་བཤད་པའི་ཡིད་ལ་མི་བྱེད་པའི་དོན་རྣལ་མ་ལ་ཡིད་ཆེས་པར་འགྱུར་རོ། །དེ་ལྟར་མཉམ་བཞག་གི་སྤྱོད་ཡུལ་དུ་གྱུར་པའི་གནས་ལུགས་མཐར་ཐུག་གི་དབང་དུ་ན། མཐའ་བཞིའི་དམིགས་གཏད་མེད་ཅིང་སྒྲ་རྟོག་གི་ཡུལ་མིན་
པས་ཁས་ཀྱང་མི་ལེན་པ་ཡིན་གྱི། དམིགས་གཏད་ཡོད་བཞིན་དུ་ཁས་མི་ལེན་པ་ནི་གཡོ་སྒྱུའི་ལྟ་བ་ཡིན་ཏེ། དེ་གཉིས་ཁས་མི་ལེན་པ་ཙམ་འདྲ་ཡང་། དོན་ལ་བདེན་རྫུན་གྱི་ཁྱད་ཡོད་དེ། རྐུན་པོ་ཡིན་པ་ཞིག་གིས་བརྐུས་པར་ཁས་མི་ལེན་པ་དང་།
རྐུན་པོ་མིན་པ་ཞིག་གིས་བརྐུས་པར་ཁས་མ་བླངས་པ་ལྟར་ཡིན་ནོ། །དེའང་མཉམ་བཞག་གི་སྤྱོད་ཡུལ་བརྗོད་དུ་མེད་པའི་དོན་དེ་ཉིད་ལ་འཇུག་པའི་ཐབས་སུ་རྗེས་ཀྱི་ངེས་པས་རྗོད་པ་ཚིག་གི་ཐ་སྙད་དུ་བརྡར་བཏགས་ཏེ།  སྐྱེ་མེད་དང་རང་བཞིན་མེད་པ་
13-1-30a


སྟོང་ཉིད་སྤྲོས་བྲལ་དམིགས་མེད་མཐའ་བྲལ་ལ་སོགས་པའི་མིང་གིས་སྒྲུབ་པའི་ཚུལ་གྱིས་བརྗོད་པའི་ཚེ། ཚིག་རྣམས་ནི་རང་གི་བརྗོད་བྱ་ཉིད་ངེས་པར་གཟུང་བའི་ཚུལ་གྱིས་འཇུག་པས་ན། དེ་ལས་ལྡོག་སྟེ་ནམ་ཡང་མི་
སྨྲ་བས། དོན་དེ་ཉིད་དུ་ཁས་བླངས་པ་ལྟ་བུར་སྟོན་པ་ལས་འོས་མེད་ཅིང་བློས་ཀྱང་དེ་ལྟར་འཛིན་པར་བྱེད་མོད། དོན་དུ་ཚིག་དེ་དག་ནི་ཁས་ལེན་དང་དམིགས་པའི་སྤྱོད་ཡུལ་ཐམས་ཅད་སེལ་བའི་སླད་དུ་བསྟན་པ་སྟེ། དཔེར་ན། ང་ལ་ཁས་ལེན་མེད་པས་
ན། ཞེས་པ་དང་། སངས་རྒྱས་ཀྱི་ཡེ་ཤེས་ནི་བསམ་བརྗོད་ཀྱི་ཡུལ་མ་ཡིན་ནོ། །ཞེས་ཁས་བླངས་པའི་ཚིག་དེ་དག་ནི་ཁས་ལེན་ཡོད་པ་དང་བསམ་བརྗོད་ཀྱི་ཡུལ་ཡིན་པ་འགོག་པའི་སླད་དུ་བརྗོད་པ་བཞིན་ནོ། །དེ་ལྟ་ནའང་མཛུབ་མོས་ཟླ་བ་བསྟན་པ་ན་
ཟླ་བ་ལ་མི་བལྟ་བར་མཛུབ་མོ་ལ་ལྟ་བ་ལྟར། རྨོངས་པས་ཚིག་ལ་འཆེལ་ནས་ཁས་ལེན་མེད་པར་ཁས་བླངས་པ་དང་། བསམ་མི་ཁྱབ་ཏུ་བསམ་པ་དང་། བརྗོད་དུ་མེད་པར་བརྗོད་པའི་ཕྱིར་སྙམ་དུ་གསུང་རབ་ཀྱི་ཚིག་དེ་དག  །རྒྱང་འཕེན་པས་རྗེས་དཔགས་ཚད་མ་
མིན་པར་ཁས་བླངས་པ་ལྟར་འགལ་བར་གོ་བ་ནི་ཆེས་འཁྲུལ་པ་སྟེ་ཤིན་ཏུ་མི་རུང་བ་བཞིན་དུ་འདིར་ཡང་བརྗོད་དུ་མེད་པའི་དོན་མཚོན་བྱེད་བརྗོད་པའི་བརྡར་བྱས་པ་དང་། ཁས་ལེན་མེད་པའི་དོན་ངེས་བཟུང་གི་ཚིག་གིས་ཁས་བླངས་པ་གཉིས་འགལ་བ་ཅན་དུ་མི་བཟུང་བར་
གནད་གཅིག་ཏུ་གོ་བ་གལ་ཆེ་སྟེ། འདི་ལྟར་སྐྱེ་མེད་ལ་སོགས་པའི་ཚིག་གིས་དམིགས་པའི་སྤྱོད་ཡུལ་མཐའ་དག་སྟོང་པར་སྟོན་ཅིང་། ཆོས་གང་སྟོང་པ་དེ་ལ་དེར་ཞེན་ལྡོག་པས་ན་དམིགས་པ་མེད་པར་བསྟན་པར་ཟད་དོ། །དེས་ན་བདེན་མེད་ཅེས་པའི་ཚིག་གིས་
13-1-30b


དངོས་པོ་རྣམས་དཔྱད་ན་མ་གྲུབ་པ་ཙམ་ཞིག་སྟོན་གྱི། བདེན་གྲུབ་ཅེས་དགག་རྒྱུ་གཞན་ཞིག་གིས་བུམ་སོགས་སྟོང་པ་ལྟ་བུ་མིན་ཞིང་། ཆོས་གང་ལ་བདེན་པ་མེད་པ་དེ་ལ་དེར་ཞེན་ལྡོག་དགོས་པས་ན། ཆོས་ཐམས་ཅད་བདེན་པ་མེད་པར་རྟོགས་ནས་འཛིན་སྟངས་
ཐམས་ཅད་ཞིག་དགོས་ཀྱི། བདེན་མེད་ཀྱི་སྒྲ་དོན་ཙམ་ལ་ཞེན་པའི་འཛིན་པ་ཡོད་ན་ད་རུང་ལྟ་བ་མ་ཞིག་པ་ཡིན་ནོ། །དེ་ལ་གཞི་གང་གི་སྟེང་དུ་དེ་དག་གི་སྟོང་ཉིད་ལ་བདེན་གྲུབ་འགོག་པའི་རིགས་པ་དེས། དེ་རང་བཞིན་མེད་ཅེས་འཛིན་པའི་ཞེན་ཡུལ་ཀྱང་མ་གྲུབ་པར་ངེས་
ནུས་ལ། རང་བཞིན་མེད་པ་ལའང་བདེན་གྲུབ་མེད་ཀྱང་དེར་འཛིན་ཞིག་པར་མི་བྱ་ན། བུམ་སོགས་དངོས་པོ་ཀུན་ཀྱང་དེ་དང་འདྲ་ལ། དེ་ལྟར་ན་དོན་དམ་དཔྱོད་པའི་རིགས་པས་བདེན་གྲུབ་ཅེས་པ་དེ་ཁོ་ན་འགོག་གི་ཆོས་ཅན་གཅིག་ཀྱང་མི་ཁེགས་ལ། དེའི་ཡུལ་ཅན་གྱི་འཛིན་པ་
མཐའ་དག་ཀྱང་མི་བཟློག་ན། གཟུང་འཛིན་གྱི་སྤྲོས་པ་མཐའ་དག་སྟོང་ཉིད་ཀྱིས་མི་ཁེགས་ལ། གཞན་ཡང་འཕགས་པའི་མཉམ་བཞག་དངོས་པོའི་འཇིག་རྒྱུར་ཐལ་བ་སོགས་གསུམ་པོ་འཇུག་ཅིང་། དོན་དམ་དཔྱོད་པས་དཔྱད་ནས་མི་བཟློག་པའམ་མི་ཁེགས་པ་ཞིག་ཡོད་
ན་བདེན་གྲུབ་ཏུ་འགྱུར་བས་ན། སྐྱེ་མེད་ལ་སོགས་པའི་ཚིག་གིས་སྤྲོས་པ་མཐའ་དག་ཞི་བའི་དོན་ལ་འཇུག་པར་བྱའོ། །དེས་ན་དམིགས་གཏད་གང་ཡང་མེད་པའི་ཤེར་ཕྱིན་ཟབ་མོ་ནི། ཧ་ཤང་གི་དེ་དང་ག་ལ་འདྲ་སྟེ། མཐའ་བཞིའི་སྤྲོས་བྲལ་ནི་ཡོད་མེད་གཉིས་ཀའི་
ཕྱོགས་སུ་མ་ལྷུངས་པ་སྟེ། སོ་སོ་རང་ཤེས་ཀྱི་སྤྱོད་ཡུལ་ལས་ཇི་ལྟ་བ་བཞིན་སྒྲ་རྟོག་གིས་བསྟན་པར་མི་ནུས་ཀྱང་། མཚོན་པའི་ཚིག་ཏུ། སྣང་སྟོང་དབྱེར་མེད་དམ།  བདེན་གཉིས་ཟུང་འཇུག་གི་དབུ་མ་ཞེས་གྲགས་པ་དེའོ། །དེའང་འཛིན་སྟངས་ནི་རྟག་ཏུ་རང་གི་
13-1-31a


གཟུང་ཡུལ་དང་བཅས་པ་ཡིན་ལ། དེ་དང་བྲལ་བས་ཡང་དག་པའི་དོན་མི་མཐོང་ན།  ཇི་ལྟ་བའི་ཡུལ་ཅན་མཉམ་བཞག་གིས། གཉིས་སྣང་མཐའ་དག་ནུབ་པའི་ཚུལ་གྱིས་གནས་ལུགས་གཟིགས་པར་མི་འགྱུར་བས། 
བསྟན་པ་འདི་ལ་གུས་པ་དག་གིས་དེ་ལྟར་བརྗོད་པར་མི་བྱའོ། །སྐབས་འདི་ཤིན་ཏུ་དོན་ཆེ་ཡང་། ཟབ་མོ་རྟོགས་པར་དཀའ་བའི་ངོ་བོ་ཇི་ལྟར་བཤད་ཀྱང་ནམ་མཁའ་ལ་མདའ་འཕངས་པ་ལྟར་བྱིས་པའི་བློ་འཇུག་པའི་གནས་མི་རྙེད་པར་གསུངས་པས་ན། མང་དུ་བརྗོད་
པས་ཅི་བྱ་སྟེ། ཚུལ་འདིའི་གནད་ལ་མི་འཕྱུགས་པར་རེག་པའི་ཐབས་བདེན་གཉིས་ཟུང་དུ་འཇུག་པའི་རིགས་ལམ་ལ་ངེས་པ་བསྐྱེད་པར་བྱ་སྟེ། དང་པོ་སྣང་བ་ཐམས་ཅད་སྟོང་པར་གཏན་ལ་ཕབ། དེ་ནས་སྟོང་པ་རྟེན་འབྱུང་དུ་འཆར་ཚུལ་ལ་ཡིད་ཆེས། དེ་ནས་
སྟོང་བཞིན་དུ་སྣང་ལ། སྣང་བཞིན་དུ་སྟོང་པའི་སྟོང་པ་དང་རྟེན་འབྱུང་ཟུང་དུ་འཇུག་པའི་ཚུལ་ལ་བརྟེན་ནས་མཉམ་པ་ཉིད་སྤྲོས་པ་དང་བྲལ་བ་འདི་ཉམས་སུ་མྱང་བ་མེད་པའི་ཚུལ་གྱིས་མྱོང་བར་བྱེད་དོ། །དེས་ན་ཡོད་པར་ཞེན་པ་དགག་པའི་དོན་དུ་ཕྱི་སྟོང་པ་ཉིད་ལ་
སོགས་པ་དང་། དེ་ལྟར་བཀག་པའི་དངོས་མེད་ལ་ཞེན་པ་དགག་པའི་ཆེད་དུ་སྟོང་པ་ཉིད་སྟོང་པ་ལ་སོགས་པ་ཇི་སྐད་གསུངས་པའི་ཚུལ་གྱིས་མཐའ་ཀུན་བྲལ་བ་ནི་རྣམ་གྲངས་མིན་པའི་དོན་དམ་འདི་ཡིན་ནོ། །དེ་ལ་རང་རྒྱུད་པ་དག་ནི་བློ་ཡི་ནུས་པའི་དབང་གིས་
དང་པོར་རེ་ཞིག་རྣམ་གྲངས་པའི་དོན་དམ་ལ་ཞེན་ཏེ། དངོས་འཛིན་འདིས་སྲིད་པར་བསླུས་ཤིང་འདིའི་ཡུལ་ཡང་དག་པ་མ་ཡིན་པས། དོན་དམ་པར་ན་ངོ་བོ་ཉིད་གྲུབ་པ་གང་ཡང་མེད་དོ་སྙམ་དུ་མེད་དགག་གི་འཛིན་སྟངས་ལ་རྩིས་ཆེར་བཟུང་། འདི་པས་མཐའ་
13-1-31b


བཞི་ག་དགག་ཀྱང་། དོན་དམ་པའམ་རང་བཞིན་གྱིས་ཞེས་སམ། བདེན་གྲུབ་ལྟ་བུའི་ཁྱད་པར་མ་སྦྱར་བར་དགག་པ་མིན་ལ། བདེན་གཉིས་ཕྱེས་ནས་ཡོད་མེད་ཀྱི་མཐའ་སེལ་ཚུལ་སོགས་ཤན་ཕྱེས་ཏེ་སྨྲའོ། །ཚུལ་དེའི་དབང་གིས་དོན་དམ་པར་མ་གྲུབ་སྙམ་
པའི་མེད་འཛིན་དང་། ཀུན་རྫོབ་ཏུ་དངོས་པོ་རྣམས་རང་གི་མཚན་ཉིད་ཀྱིས་གྲུབ། དེ་མ་གྲུབ་པར་འཛིན་ན་ཀུན་རྫོབ་ཀྱི་སྣང་བ་ལ་སྐུར་པ་བཏབ་པར་འགྱུར་རོ་སྙམ་དུ་ཡོད་འཛིན་དང་བཅས་པའོ། །དེ་ལ་རྣམ་གྲངས་པའི་སྐྱེ་མེད་ནི་སྐྱེ་བའི་ཟློག་ཕྱོགས་ཙམ་ཡིན་པས།
སྐྱེ་བ་དང་སྐྱེ་མེད་དེ་དག་གཞི་གཅིག་གི་སྟེང་དུ་ཕན་ཚུན་སྤོང་བའི་ཚུལ་གྱིས་འགལ་བར་ཅི་སྟེ་མི་འགྱུར་སྙམ་ན། ས་བོན་ལས་མྱུ་གུ་སྐྱེ་ཡང་བདེན་པའི་སྐྱེ་བ་མེད་པ་དང་། ཐ་སྙད་དུ་རང་མཚན་གྲུབ་པའང་བདེན་པར་མ་གྲུབ་པ་ནི།  སྣང་ཚུལ་ཀུན་རྫོབ་དང་། གནས་
ཚུལ་དོན་དམ་གྱི་དབང་དུ་བྱས་པས་ན།  འགལ་བ་མེད་པར་མ་ཟད་ཆེས་འཐད་པ་དངོས་པོའི་ཆོས་ཉིད་ཀྱི་སྟོབས་ལས་གསལ་པོར་གྲུབ་པའི་ཕྱིར། ཚུལ་དེ་གཉིས་གཅིག་གིས་གཅིག་མི་འགོག་ལ།  གང་རུང་རེའི་ཡུལ་ཅན་ཚད་མའི་ངོར་བྱས་ན། རང་རང་གིས་
ཇི་ལྟར་བཅད་པ་ལས་ལྡོག་ཕྱོགས་ནམ་ཡང་མི་སྒྲུབ་པས། སོ་སོའི་སྒྲུབ་བྱེད་གཏན་ཚིགས་རང་རྒྱུད་དུ་འགོད་པའང་དེ་ལྟར་འཐད་དོ། །དེས་ན་བདེན་གཉིས་སོ་སོར་ཞེན་ཅིང་། སོ་སོའི་ལུགས་སུ་ཁས་ལེན་པས་ན། རང་རྒྱུད་ཀྱི་ཁས་ལེན་ཀྱང་ཡོད་དེ། དོན་དམ་
པར་མེད་ཀྱང་། ཀུན་རྫོབ་ཏུ་ཡོད་དོ་ཞེས་བཞེད་དོ། །དེ་ལྟར་བདེན་གཉིས་སོ་སོར་ཞེན་པའི་ཆ་དེ་ཐལ་འགྱུར་བའི་དགག་བྱ་ཐུན་མོང་མིན་པ་ཡིན་ཏེ། གལ་ཏེ་རང་རྒྱུད་པ་དག་བདེན་གཉིས་སོ་སོར་ཞེན་པའི་དགག་བྱ་དང་བྲལ་བར་གྱུར་ན། ཐལ་འགྱུར་བ་སོགས་ལའང་
13-1-32a


ལྟ་བ་དེ་ལས་སྐྱེད་ཅུང་ཟད་ཀྱང་འདོན་རྒྱུ་མེད་པར་ཤེས་པར་བྱ་སྟེ། མཐའ་བཞིའི་སྤྲོས་བྲལ་ཁས་ལེན་ཐམས་ཅད་དང་བྲལ་བ་ལས་ལྷག་པའི་སྤྲོས་པ་གཅོད་རྒྱུ་ཞིག་ཡོད་པར་རིགས་པས་ནམ་ཡང་འགྲུབ་དཀའོ། །དེས་ན་ཇི་སྲིད་འཛིན་
པ་དང་བཅས་ཤིང་བདེན་གཉིས་རོ་གཅིག་ཏུ་མ་གྱུར་པ་དེ་སྲིད་དུ་རྣམ་པར་རྟོག་པའི་བློའི་སྤྱོད་ཡུལ་ལས་མ་འདས་པས་སྒྲོ་འདོགས་སོ་གཉིས་དང་བྲལ་བའི་ཤེར་ཕྱིན་མཚན་ཉིད་པ་རྣམ་པར་མི་རྟོག་པའི་ཡེ་ཤེས་མི་འཐོབ་པས། ཐལ་འགྱུར་པས་དང་པོ་ནས་སྣང་སྟོང་ཟུང་འཇུག་
སྤྲོས་བྲལ་དུ་གཏན་ལ་ཕབ་པ་ཡིན་ཏེ། དེ་ལ་བདེན་གྲུབ་མེད་ཀྱང་ཀུན་རྫོབ་ཙམ་དུ་རང་གི་མཚན་ཉིད་ཀྱིས་གྲུབ་པ་ཡོད་སྙམ་པའི་ཞེན་ཆ་དེ་རིགས་པས་སུན་ཕྱུངས་བས། བདེན་གཉིས་སོ་སོ་རང་ས་ན་འདུག་པ་ལྟ་བུའི་ཐ་དད་དུ་ཞེན་པ་ཞིག་ནས། བདེན་གཉིས་རོ་
གཅིག་ཏུ་འདྲེས་པར་འགྱུར་ལ། དེས་ཡོད་པ་དང་མེད་པ་ལ་སོགས་པར་འཛིན་པའི་འཛིན་སྟངས་ཐམས་ཅད་ཞིག་པར་འགྱུར་ཏེ། དེ་ལྟར་ན་འདི་པའི་ལུགས་ལ་མཐའ་བཞི་པོར་བདེན་གྲུབ་དང་དོན་དམ་སོགས་ཀྱི་བདེན་གཉིས་སོ་སོའི་ཁྱད་པར་སྦྱར་མི་དགོས་པར་མཐའ་བཞིའི་
ཞེན་ཡུལ་ཁེགས་པས་ཡུལ་ཅན་བློས་དམིགས་པ་དང་། ཁས་ལེན་ཐམས་ཅད་དང་བྲལ་བའི་སྟོང་པ་ཆེན་པོ་མཐར་ཐུག་པའི་གནས་ལུགས་འཕགས་པའི་མཉམ་བཞག་ཡེ་ཤེས་དང་རྗེས་སུ་མཐུན་པར་ལ་ཟློ་བ་ཡིན་ཀྱང་། རྗེས་ཐོབ་ཏུ་ལམ་དང་འབྲས་བུའི་ཆོས་
ཐམས་ཅད་བདེན་པ་གཉིས་ཀྱི་ཚད་མས་ཇི་ལྟར་གཞལ་བ་ལྟར་གནོད་མེད་དུ་འཇོག་པའང་ཆེས་འཐད་པ་ཡིན་ནོ། །དེས་ན་ཐལ་འགྱུར་བ་ལ་ཁས་ལེན་ཡོད་མེད་མཐའ་གཅིག་ཏུ་མི་གཟུང་བར་རྣམ་པར་ཕྱེ་སྟེ་སྨྲ་བ་འདི་ཀུན་མཁྱེན་ཀློང་ཆེན་རབ་འབྱམས་ཀྱི་བཞེད་པ་
13-1-32b


ཐུན་མོང་མིན་པ་སྟེ། གཞན་སྐྱེ་འགོག་པའི་ཐལ་ཟློག་སོགས་ལ་ཞིབ་ཏུ་དཔྱད་ན་ཡིད་ཆེས་སྐྱེའོ། །མཁན་པོའི་གཞུང་འདིར་ནི། ཐོག་མར་བདེན་གཉིས་སོ་སོར་འཇལ་པའི་ཤེས་རབ་དྲི་མ་མེད་པས་ཚུལ་གཉིས་བསྒྲུབས་ནས། མཐར་རྣམ་གྲངས་མ་ཡིན་པའི་དོན་དམ་ཆེན་པོར་བདེན་གཉིས་སོ་སོར་ཞེན་པའང་
བཀག་ནས་མཉམ་བཞག་རྣམ་པར་མི་རྟོག་པའི་ཡེ་ཤེས་དང་རྗེས་སུ་མཐུན་པར་ཁས་ལེན་ཐམས་ཅད་དང་བྲལ་བར་གཏན་ལ་ཕབ་པས་གཞུང་དེ་གཉིས་མཐར་ཐུག་གི་དགོངས་པ་ལ་དབྱེ་བསྲི་མེད་པར་མཉམ་པ་ཉིད་དོ། །འོ་ན་ཐལ་འགྱུར་བའི་གཞུང་དོན་མེད་དུ་འགྱུར་རོ་སྙམ་ན་མི་འགྱུར་ཏེ། ཁས་ལེན་ཀུན་བྲལ་
གྱི་སྟོང་པ་ཉིད་རིགས་པས་རྒྱ་ཆེར་བསྒྲུབས་པའི་ཕྱིར་རོ། །དེས་ན་རྣམ་གྲངས་པའི་དོན་དམ་ཁས་ལེན་དང་བཅས་པ་དེ་རྩལ་དུ་བཏོན་ནས་འཆད་པ་རང་རྒྱུད་པའི་མཚན་ཉིད་ཡིན་ལ། རྣམ་གྲངས་མ་ཡིན་པའི་དོན་དམ་ཁས་ལེན་ཀུན་བྲལ་རྩལ་དུ་བཏོན་ནས་འཆད་པ་ཐལ་
འགྱུར་བ་ཡིན་པ་ཤེས་པར་བྱའོ། །འདི་གཉིས་ཀྱི་མཚན་ཉིད་འཇོག་པའི་སྐབས་སུ་ཐ་སྙད་དུ་རང་མཚན་གྱིས་གྲུབ་པ་འདོད་མི་འདོད་དང་གཏན་ཚིགས་འགོད་ཚུལ་སོགས་ཀྱི་ཁྱད་པར་ཕྱེས་ཏེ་འཇོག་པ་ནི་ཡན་ལག་གི་དབྱེ་བ་ཙམ་སྟེ་གོང་གི་མཚན་ཉིད་འདིར་འདུ་བ་
ཡིན་ཏེ། ཁས་ལེན་ཡོད་མེད། ཐ་སྙད་དུ་རང་མཚན་གྱིས་གྲུབ་པ་ཞལ་གྱིས་བཞེས་མི་བཞེས། རང་བཞིན་མེད་སྒྲུབ་ཀྱི་གཏན་ཚིགས་ཐལ་རང་དུ་འགོད་ཚུལ། དགག་བྱ་ལ་དོན་དམ་གྱི་ཁྱད་པར་སྦྱར་མི་སྦྱར་གྱི་གནད་ཀྱང་བཤད་མ་ཐག་པའི་ཚུལ་དེ་ཉིད་ཀྱི་
དབང་གིས་ཡིན་ནོ། །དེས་ན་ཐལ་འགྱུར་བ་རྣམ་གྲངས་པའི་དོན་དམ་ལ་གནས་ནས་བདེན་གཉིས་སོ་སོའི་ཁས་ལེན་དང་བཅས་པ་ཞིག་རྣམ་པ་ཀུན་ཏུ་ཡིན་ན། རང་རྒྱུད་པ་དང་ཁྱད་ཕྱེ་མི་ནུས་ཏེ། རང་མཚན་གྱིས་གྲུབ་པ་ཐ་སྙད་དུའང་འགོག་པའི་རིགས་པ་ཇི་
13-1-33a


རྣམ་དག་གང་ལའང་གནད་ཟིན་ན་ལག་མཐིལ་དུ་སྐྱུ་རུ་ར་བཞག་པ་ལྟར་གྲུབ་མཐའི་གཏིང་སླེབས་ནས་སོམ་ཉི་ལས་བརྒལ་བར་འགྱུར་གྱི། གཞན་དུ་ན་ཤིན་ཏུ་དཀའ་བ་ཡིན་ནོ། །བོད་འདིར་ཐལ་འགྱུར་བ་རྣམས་ཀྱི་དགོངས་
བཞེད་ཀྱང་རང་རྒྱུད་པའི་ཕྱོགས་སུ་འཁོར་བ་ནི་སྔོན་གྱི་རྟེན་འབྲེལ་གྱི་ཁྱད་ཞིག་ལས་ཡིན་ནམ་སྙམ་མོ། །མངོན་སུམ་ཐག་ཆོད་རིགས་པའི་མན་ངག་འདི། །འཇམ་དབྱངས་རྣམ་པར་དགྱེས་པའི་འབྲུག་སྒྲ་ཡིན། །གྲུབ་མཐའ་ཤན་མ་ཕྱེད་པའི་རྨི་
ལམ་གཉིད། །འདི་དང་ཕྲད་ན་སྐད་ཅིག་ཉིད་ལ་སློང་། །བར་གྱི་ཚིགས་བཅད་དོ། །ལྔ་པ་བདེན་གཉིས་སོ་སོའི་ཁས་ལེན་མ་འཁྲུགས་པའི་དགོས་པ་ནི། མཉམ་བཞག་གི་ཡེ་ཤེས་ནི་སྨྲ་བསམ་བརྗོད་པ་དང་བྲལ་བས་སྒྲ་རྟོག་གི་ཡུལ་ལས་
འདས་པའི་ཕྱིར། བདེན་གཉིས་ཀྱི་ཚད་མ་ཤེས་རབ་དྲི་མེད་ཚུལ་བཞིན་དུ་མ་སྐྱེས་པར་ཡེ་ཤེས་དེ་ལྟ་བུ་ལ་འཇུག་ཀྱང་མི་ནུས་ལ། འཕགས་པ་རྣམས་ཞུགས་ཀྱང་རྗེས་ཐོབ་ཏུ་ཡོད་མེད་ཡིན་མིན་སོགས་དགག་སྒྲུབ་ཀྱི་ཆ་ཐམས་ཅད་སྒྲ་རྟོག་གི་སྤྱོད་ཡུལ་ལས་
མ་འདས་པས་ན་གཞན་ལ་འདོམས་ཤིང་རྗེས་སུ་སྟོན་པ་དང་། རྒོལ་བ་ལ་རྩོད་པའི་གཏམ་སྨྲ་བ་སོགས་ལ། འདི་ལྟར་ན་ཡོད། འདི་ལྟར་ན་མེད། ཅེས་པ་ལ་སོགས་པའི་དོན་ཐམས་ཅད་མ་འདྲེས་མ་ནོར་བར་ཆོས་རབ་ཏུ་རྣམ་པར་འབྱེད་པའི་ཤེས་
རབ་ཀྱིས་བརྟགས་ནས་སྨྲས་པས། ལས་རྒྱུ་འབྲས་དང་ལམ་དང་འབྲས་བུའི་ཚུལ་ཐམས་ཅད་ལ་དགག་པ་དང་སྒྲུབ་པ་མ་ལུས་པ་རིགས་པའི་ལམ་གྱིས་གྲུབ་པའི་ཡང་དག་པའི་ཐ་སྙད་གནོད་མེད་དུ་འཇོག་ནུས་པ་དང་། ཤེས་བྱའི་རྣམ་པ་མ་ལུས་པ་ཤན་འབྱེད་པའི་
13-1-33b


སོ་སོར་རྟོག་པའི་ཤེས་རབ་ཀྱི་སྤྱན་ཐོབ་པ་དེ་ལ་བརྟེན་ནས་སྤྲོས་པ་ཐམས་ཅད་དང་བྲལ་བ་མཉམ་པ་ཉིད་ཀྱི་དོན་མངོན་སུམ་མཐོང་བའི་ཡེ་ཤེས་ཀྱི་གཟིགས་པ་ལ་མངའ་དབང་འབྱོར་བར་འགྱུར་རོ། །དེའང་སྣང་སྟོང་མཉམ་ཉིད་ཆེན་པོ་མཐའ་བཞིའི་སྤྲོས་བྲལ་རྣམ་གྲངས་
མ་ཡིན་པའི་དོན་དམ་འཇལ་བའི་རིག་ཤེས་ཀྱི་དབང་དུ་བྱས་ན་བདེན་གཉིས་སོ་སོར་ཞེན་པའང་རྟོག་པ་ཙམ་དུ་ཟད་པས་ཐ་སྙད་དུའང་ཀུན་རྫོབ་རང་མཚན་གྱིས་གྲུབ་པ་ཁེགས་པ་ཡིན་གྱི། རྣམ་གྲངས་པའི་དོན་དམ་མེད་རྐྱང་ཙམ་ལ་གནས་ནས་ཐ་སྙད་ཚད་མས་རྙེད་དོན་གྱི་
ཀུན་རྫོབ་མཚན་ཉིད་ཀྱིས་གྲུབ་པ་ནམ་ཡང་འགོག་མི་ནུས་ལ། གལ་ཏེ་བཀག་ནས་མེད་པ་ཙམ་བསྒོམས་ན་བདེན་གཉིས་ཕྱོགས་སུ་ལྷུང་སྟེ་སྣང་ཕྱོགས་ལ་སྐུར་པ་བཏབ་པས། ཕུར་བུ་པས་ཀུན་རྫོབ་ཀྱང་མེད་པར་སྒོམ་པ་སོགས་བསམ་གཏན་དད་པ་བདུན་གྱི་གཞུང་དང་
ཚུལ་འདྲ་བའི་རྣམ་པ་དེ་ལྟ་བུ་ལ་དགོངས་ནས། ཡིད་བཞིན་རིན་པོ་ཆེའི་མཛོད་ལས་ཀྱང་། ཚུལ་འདི་མི་ཤེས་སྟོང་པ་ཕྱང་ཆད་པ། །ཚིག་ཏུ་ཡོད་མེད་མཐའ་བྲལ་ཞེས་སྨྲ་ཡང་། །བྲལ་གཞི་མི་ཤེས་སྲིད་རྩེའི་ལྟ་བ་ཅན། །བསྟན་པ་འདི་ལས་ཕྱི་རོལ་གྱུར་པའི་
ཕྱིར། །ནམ་མཁའི་ཡིད་ཅན་ཐལ་བས་བྱུགས་པ་རུང་། །ཞེས་གསུངས་ལ། དེ་ལྟ་བུའི་མཐའ་བཞིའི་སྤྲོས་བྲལ་རྒྱུད་ལ་སྐྱེ་ཚུལ་ཡང་། ལས་དང་པོ་པ་རིམ་གྱིས་འཇུག་པའི་དབང་དུ་ན། ཡང་དག་པའི་རིགས་པ་དྲི་མེད་ཀྱིས་དང་པོར་འདུས་བྱས་འདུས་མ་བྱས་
ཀྱི་ཆོས་ཐམས་ཅད་ལ་དངོས་པོ་ཡོད་འཛིན་གྱི་ཞེན་ཡུལ་སུན་ཕྱུང་ལ། ཕྱིས་ནས་མེད་པ་སོགས་ལྷག་མ་གསུམ་གྱི་ཞེན་ཡུལ་ཡང་བཀག་ནས། ཕྱོགས་རེ་བའི་ཞེན་ཡུལ་ལ་མི་གནས་པའི་ངེས་ཤེས་ཁྱད་པར་ཅན་རྗེས་མཐུན་དུ་བསྒོམས་པས་ནམ་ཞིག་རེས་འཇོག་མེད་པར་
13-1-34a


སྙེད་པ། རང་གི་ཀུན་རྫོབ་ཚད་གྲུབ་ལའང་མཚུངས་ཏེ། གང་ཡང་དཔྱད་མི་བཟོད་པར་མཚུངས་པའི་ཕྱིར། རང་མཚན་གྱིས་གྲུབ་པ་ཐ་སྙད་དུའང་བཀག་པས་ཐ་སྙད་ཀྱི་རྣམ་གཞག་མི་བདེ་བ་ཙམ་ལས། ཡོན་ཏན་གྱི་ཁྱད་པར་ཅིའང་
མི་འཐོབ་ལ། རང་རྒྱུད་པས་ཀྱང་རང་མཚན་གྱིས་གྲུབ་པ་དོན་དམ་དཔྱད་བཟོད་དུ་བསྒྲུབ་པ་མིན་པས། དོན་དམ་རྟོགས་ཚུལ་ལ་དོན་གྱི་ཁྱད་པར་ཅི་ཞིག་གིས་འཕགས་པའང་འདིའོ་ཞེས་ཡིད་ཆེས་གཏིང་ཚུགས་པ་རྙེད་པར་མི་འགྱུར་རོ། །དེ་ལྟར་མཁན་
ཆེན་གྱི་དབུ་མའི་རྒྱན་འདིར་ནི་ཐལ་རང་གཉིས་ཀ་དོན་གྱིས་འདུ་བས་དབུ་མ་ཀུན་གྱི་རྒྱན་ཡིན་ནོ། །དེ་ལ་ཐལ་རང་ཞེས་འདོགས་པའི་རྒྱུ་མཚན་ཡང་། བདེན་གཉིས་སོ་སོའི་ཚད་མས་ཇི་ལྟར་གཞལ་བ་ལྟར་སོ་སོར་ཁས་ལེན་པ་ལ་རང་ཉིད་གནས་ནས། 
གཞན་ལ་ཚད་མས་གྲུབ་པའི་གཏན་ཚིགས་རང་རྒྱུད་པ་གཙོ་ཆེར་སྦྱོར་བའི་སྒོ་ནས་རྒོལ་བའི་སྤོབས་པ་འཇོམས་པ་ལ་རང་རྒྱུད་པ་ཞེས་བྱ་ཞིང་། རང་མཐའ་བཞི་སྤྲོས་བྲལ་ཁས་ལེན་ཐམས་ཅད་དང་བྲལ་བ་ལ་གནས་ནས། གཞན་ཁས་ལེན་ཅན་གྱི་རྒོལ་
བ་ལ་ཁོ་རང་གིས་ཁས་བླངས་པའི་གཏན་ཚིགས་ཐལ་འགྱུར་དུ་བཀོད་པའི་སྒོ་ནས་ལོག་རྟོག་བཟློག་པས་ན་ཐལ་འགྱུར་བ་ཞེས་བྱ་ལ། དེའང་སློབ་དཔོན་གྱིས། གལ་ཏེ་མངོན་སུམ་ལ་སོགས་པའི། །དོན་གྱིས་འགའ་ཞིག་དམིགས་ན་ནི། །བསྒྲུབ་པའམ་བཟློག་
པར་བྱ་ན་དེ། །མེད་ཕྱིར་ང་ལ་ཀླན་ཀ་མེད། །ཅེས་དང་། གང་ལ་སྟོང་མིན་ཅུང་ཟད་ཡོད། །སྟོང་པའང་ཅུང་ཟད་ཡོད་པར་འགྱུར། །མི་སྟོང་ཅུང་ཟད་ཡོད་མིན་ན། །སྟོང་པ་ཡོད་པར་ག་ལ་འགྱུར། །ཞེས་གསུངས་པ་བཞིན། རྐྱེན་ཉིད་འདི་པ་ཙམ་གྱི་དངོས་པོ་
13-1-34b


ཐམས་ཅད་ལ་རང་མཚན་གྱིས་གྲུབ་པ་དང་སྐྱེ་བ་སོགས་ཐ་སྙད་དུའང་མེད་པར་གདོད་ནས་རང་བཞིན་མེད་པའི་ངང་ཚུལ་དུ་གནས་པར་མཐོང་བའི་ཚེ། བསྒྲུབ་ཅིང་དམིགས་པར་བྱ་བའམ། དགག་ཅིང་བསལ་བར་བྱ་བ་ཅུང་ཟད་མེད་པར་སྤྲོས་པའི་མཐའ་ཐམས་ཅད་དང་
བྲལ་བ་ཉིད་དུ་ཁོང་དུ་ཆུད་པར་གྱུར་ནས། ཁས་ལེན་དང་འཛིན་སྟངས་ཐམས་ཅད་དང་བྲལ་བ་ཟུང་འཇུག་རབ་ཏུ་མི་གནས་པའི་དོན་ལ་རེག་པར་གྱུར་པ་ནི་ཟླ་བའི་གཞུང་གི་བསྟན་དོན་དྲི་མ་མེད་པའོ། །དབུ་མ་ཤེས་རབ་ལ་འཇུག་པ་ལས་ཀྱང་། དགག་སྒྲུབ་
གཉིས་ཀ་དགག་འབའ་ཞིག །དངོས་ལ་དགག་སྒྲུབ་གང་ཡང་མེད། །ཅེས་གསུངས་སོ། །སྤྱིར་གདོད་ནས་མ་སྐྱེས་པ་ལ་བསལ་གཞག་མེད་པར་སྟོན་པའི་ཤིན་ཏུ་ཟབ་པའི་དོན་ཅན་གྱི་ཚིག་རྣམས་ཀྱི་བསྟན་དོན་ཇི་བཞིན་རྗེན་པར་འཆར་དཀའ་བས་གོམས་
པ་ཡུན་བསྲིང་བར་བྱའོ། །ཐལ་འགྱུར་བའི་ལུགས་རྣལ་མ་འཛིན་ན་བཤད་མ་ཐག་པའི་ཚིགས་སུ་བཅད་པ་དེ་རྣམས་ཀྱི་དོན་ལྟར་ཡེ་སྟོང་སྤྲོས་བྲལ་ཆེན་པོའི་ཚུལ་དུ་འཛིན་པར་མཛོད་ཅིག །དེ་ཕྱིར་ཐལ་རང་དེ་དག་མཉམ་བཞག་བདེན་གཉིས་རོ་གཅིག་
པའི་ཡེ་ཤེས་དང་། རྗེས་ཐོབ་བདེན་གཉིས་སོ་སོར་འབྱེད་པའི་ཤེས་རབ་ལ་རྩལ་དུ་བཏོན་ནས་འཆད་པའི་ཚུལ་དེ་ལྟར་ཡིན་པ་ཤེས་པར་བྱའོ། །དེས་ན་དོན་དམ་ལ་གཉིས་སུ་ཕྱེ་བ་འདིས་ཐལ་རང་གི་གཞུང་ཡང་ཆུ་བོ་གཅིག་འདྲེས་སུ་སྦྱར་ཞིང་། རྗེས་ཐོབ་ཏུ་
ཤན་འབྱེད་སོ་སོར་རྟོགས་པའི་ཤེས་རབ་ཀྱིས་རྣམ་པར་དཔྱད་པའི་འབྲས་བུ། མཉམ་བཞག་ཏུ་མཐའ་ཀུན་ཏུ་རྣམ་པར་མི་རྟོག་པའི་ཡེ་ཤེས་ལ་འཇུག་པ་སོགས་དགོས་པའི་རབ་དམ་པ་དུ་མ་ཡོད་པ་ཡིན་ནོ། །དེ་ལྟར་ཇི་སྐད་བཤད་པས་མཚོན་སྤྱིར་གྲུབ་པའི་མཐའ་
13-1-35a


སྤྲོས་པའི་མཐའ་ཀུན་ཅིག་ཅར་ཁེགས་ནས་ཆོས་ཀྱི་དབྱིངས་ལ་གསལ་སྣང་འཐོབ་པར་འགྱུར་ཏེ།  ཀུན་མཁྱེན་ཆེན་པོ་བསོད་ནམས་སེང་གེའི་ཞལ་སྔ་ནས། གནས་ལུགས་དཔྱོད་པའི་སོ་སྐྱེའི་བློ་གྲོས་ཀྱིས། །མཐའ་བཞིའི་
སྤྲོས་པ་ཅིག་ཅར་མི་ཁེགས་ཀྱང་། །རེས་འཇོག་ཚུལ་གྱིས་བཞི་ཆར་བཀག་ནས་ནི། །ཚུལ་བཞིན་བསྒོམས་པའི་མཐོང་ལམ་སྐྱེས་པའི་ཚེ། །ལྟ་བ་ཆོས་དབྱིངས་མཐོང་བའི་ཐ་སྙད་མཛད། །ཅེས་གསུངས་པ་བཞིན་ནོ། །དེ་ལྟ་བུའི་མཐའ་བཞིའི་
སྤྲོས་བྲལ་བདེན་པ་དབྱེར་མེད་ཀྱི་གནས་ལུགས་འདི་ལ་སྔ་འགྱུར་གྱི་མཁས་གྲུབ་རྣམས་ཀྱིས་རང་ལུགས་དྲི་མ་མེད་པར་བཟུང་ནས། རྡོ་རྗེ་ཐེག་པའི་མན་ངག་ཟབ་མོའི་གནད་དང་ལྡན་པའི་སྒོ་ནས་དེ་ཁོ་ན་ཉིད་མངོན་དུ་བྱེད་པའི་ཐབས་རྟོགས་པ་བཞིའི་གཏན་ཚིགས་སོགས་
རིགས་པ་རྣམ་དག་གི་ལམ་ནས་ངེས་ཤེས་བསྐྱེད་དེ་བསྒོམས་པས་ཀ་དག་ལྷུན་གྲུབ་བདེན་པ་དབྱེར་མེད་ཀྱི་དོན་ལ་ངེས་པའི་གདིང་ཐོབ་པས་གྲུབ་བརྙེས་བར་མ་ཆད་པར་བྱོན་ཅིང་། ཐུགས་ནས་ཆོས་གཏེར་འབུམ་ཕྲག་རྡོལ་བ་དང་། འཇའ་ལུས་ཟང་ཐལ་གྱི་ས་
ལ་གཤེགས་པ་མང་ཞིག་བྱོན་པ་ནི་ལམ་གྱི་འདྲེན་པ་ལྟ་བ་རྣམ་པར་དག་པའི་འབྲས་རྟགས་ཡང་དག་གོ། །འོ་ན་འདི་རྙིང་མ་ཁོ་ནའི་བཞེད་པ་ཡིན་ནམ་སྙམ་ན་མ་ཡིན་ཏེ། རྒྱལ་བས་ཟབ་མོའི་མདོ་རྒྱུད་རྣམས་སུ་ཡང་ཡང་བསྟན་པའི་མཐའ་བཞིའི་སྤྲོས་
བྲལ་དེ་ཉིད་རྒྱན་དྲུག་ལ་སོགས་པའི་མཁས་པ་རྣམས་ཀྱིས་དངོས་དང་བརྒྱུད་པའི་ཚུལ་དུ་ཤིན་ཏུ་གསལ་བར་བྱས་ཤིང་། གྲུབ་ཆེན་རིག་པ་འཛིན་པ་མཐའ་དག་གི་ཐུགས་ཉམས་སུ་བསྟར་བ། རྣམ་པ་ཐམས་ཅད་མཁྱེན་པའི་ལམ་བགྲོད་པ་གཅིག་པུ་པ་ཡིན་པས་
13-1-35b


གསར་རྙིང་ཐམས་ཅད་ཀྱི་དགོངས་པའི་མཐིལ་ཡིན་ཏེ། དེའི་ཚུལ་མཚོན་ཙམ་བཤད་ན། དགྱེས་མཛད་ལོ་ཙཱ་བ་ཆེན་པོས། མཐར་ཐུག་ལྟ་བ་ཁྱད་པར་ཅན། །ཟུང་འཇུག་རབ་ཏུ་མི་གནས་པ། །དུས་གསུམ་རྒྱལ་བའི་དགོངས་པ་ཡིན། །ཐབས་ཤེས་
ཡ་བྲལ་འདོད་པ་གང་། །མཐའ་རུ་ལྷུང་བས་དགག་བྱའི་ཕྱིར། །ཞེས་པ་ལ་སོགས་པ་དང་། བོད་ཡུལ་གྲུབ་པའི་རྒྱལ་པོ་བཞད་པ་རྡོ་རྗེས། །སྣང་དང་སྟོང་པ་དབྱེར་མེད་ན། །ལྟ་བ་ཀློང་དུ་གྱུར་པ་ཡིན། །ཞེས་དང་། ཡོད་པ་དངོས་པོར་སྣང་བ་དང་།
མེད་པ་སྟོང་པའི་ཆོས་ཉིད་གཉིས། །ངོ་བོ་དབྱེར་མེད་རོ་གཅིག་པས། །རང་རིག་གཞན་རིག་ཡོད་མིན་ཏེ། །ཞེས་སོགས་དང་། བླ་མ་ས་སྐྱ་པ་ཆེན་པོ་ལ་འཇམ་པའི་དབྱངས་ཀྱིས་གདམས་པ་ཞེན་པ་བཞི་བྲལ་གྱི་མན་ངག་ལས། འཛིན་པ་བྱུང་ན་ལྟ་བ་
མིན། །ཅེས་དང་། གངས་ཅན་མཁས་པའི་དབང་པོ་ས་སྐྱ་པཎྜི་ཏས། འདིར་འཐད་པའི་ཕྱོགས་གང་ཡིན་ཞེ་ན། གང་ཟག་གང་ལ་ལྟོས་ཀྱང་བླ་སྟེ། སྣང་བའི་ཆ་ཀུན་རྫོབ། སྟོང་པའི་ཆ་དོན་དམ། དབྱེར་མི་ཕྱེད་པའི་ཆ་ཟུང་འཇུག་སྟེ། རིམ་ལྔ་ལས། 
སྣང་བ་དང་ནི་སྟོང་པ་གཉིས། །སོ་སོའི་ཆར་ནི་ཤེས་གྱུར་ནས། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པར་དེ་བཤད་དོ། །ཞེས་གསུངས་པས་སོ། །ཚུལ་གསུམ་པོ་འདི་འང་དོན་ཇི་ལྟར་ཡིན་པ་རྟོགས་པ་ཤེས་བྱའི་གནས་སོ། །དེ་ཐབས་ཤེས་
རབ་ཟུང་དུ་འཇུག་པའི་སྒོ་ནས་ཉམས་སུ་ལེན་པ་བསྒོམ་པར་བྱ་བའི་ལམ། དེ་རྟོགས་ནས་གནས་སྐབས་ས་དང་ལམ་བགྲོད་དེ། མཐར་ཐུག་སྐུ་གསུམ་ཐོབ་པ་འབྲས་བུའོ། །ཚུལ་འདི་ལུང་དང་རིགས་པ་དང་མི་འགལ་བ་ངེས་པའི་དོན་གྱི་སྡེ་སྣོད་ཐམས་
13-1-36a


ཅད་ཀྱི་དགོངས་པ་ཡིན་ནོ། །ཞེས་དང་། རྗེ་ཙོང་ཁ་པས་ཀྱང་། ལས་དང་པོ་པ་རིགས་པས་དཔྱད་པའི་ངེས་ཤེས་མེད་པར་སྤྲོས་བྲལ་ཚིག་ཙམ་དུ་ཤོར་བས་དངོས་ཞེན་ལ་ཅིའང་མི་གནོད་པས་ལམ་གོལ་བར་གྱུར་པ་རྣམས་
ཐུགས་རྗེའི་ཕྱག་གིས་བསྐྱབ་པའི་ཆེད་དུ་དཔྱད་པས་དྲངས་པའི་རང་བཞིན་མེད་པའི་འཛིན་སྟངས་ཉིད་རེ་ཞིག་གལ་ཆེ་བར་གསུངས་ནས་མཐར་ཐུག་གི་གདམས་པར། སྣང་བ་རྟེན་འབྱུང་བསླུ་བ་མེད་པ་དང་། །སྟོང་པ་ཁས་ལེན་བྲལ་བའི་གོ་བ་གཉིས། །ཇི་སྲིད་
སོ་སོར་སྣང་བ་དེ་སྲིད་དུ། །ད་དུང་ཐུབ་པའི་དགོངས་པ་རྟོགས་པ་མེད། །ནམ་ཞིག་རེས་འཇོག་མེད་པར་ཅིག་ཅར་དུ། །རྟེན་འབྲེལ་མི་བསླུར་མཐོང་བ་ཙམ་ཉིད་ནས། །ངེས་ཤེས་ཡུལ་གྱི་འཛིན་སྟངས་ཀུན་ཞིག་ན། །དེ་ཚེ་ལྟ་བའི་དཔྱད་པ་རྫོགས་པ་
ལགས། །ཞེས་པ་ལ་སོགས་པ་དང་། དཔལ་རང་བྱུང་ཞབས་ཀྱིས་ཀྱང་། ཡོད་པ་མ་ཡིན་རྒྱལ་བས་ཀྱང་མ་གཟིགས། །མེད་པ་མ་ཡིན་འཁོར་འདས་ཀུན་གྱི་གཞི། །འགལ་འདུ་མ་ཡིན་ཟུང་འཇུག་དབུ་མའི་ལམ། །མཐའ་བྲལ་སེམས་ཀྱི་
ཆོས་ཉིད་རྟོགས་པར་ཤོག །ཅེས་དང་།  རྟོགས་པའི་དབང་ཕྱུག་དོལ་པོ་པས་ཀྱང་། རྗེས་ཐོབ་ཤན་འབྱེད་པའི་ཤེས་རབ་ཀྱིས་དཔྱད་ཚེ། མཐར་འབྲས་སྐུ་དང་ཡེ་ཤེས་ཀྱི་རང་བཞིན་བདེ་གཤེགས་སྙིང་པོ་ཉིད་རྟག་བརྟན་ཞི་བ་གཡུང་དྲུང་གི་བདག་ཉིད་མི་བསླུ་
བའི་བདེན་པ་དམ་པ་ཡིན་ཅིང་། མཉམ་བཞག་ལ་ཟློ་བའི་ཚེ་ན་སྤྲོས་པ་ཀུན་བྲལ་བསྒོམ་པར་གསུངས་པའང་ཤིན་ཏུ་གནད་ཟབ་ཅིང་། གཞན་ཡང་གསང་བདག་སྒྲོལ་བའི་མགོན་པོས། དེ་ལྟར་འཇིག་རྟེན་རྨོངས་འདི་རྣམས། །རི་བོང་རྭ་ལྟར་ཅང་མེད་
13-1-36b


དམ། །བདེན་པའི་དངོས་པོར་རྣམ་བརྟགས་པས། །རྟག་ཆད་གཉིས་སུ་ལྷུང་བར་འགྱུར། །རྟེན་འབྲེལ་གྱིས་ཆད་སྟོང་པས་རྟག །སྤོང་ཞིང་རྟེན་ཅིང་འབྱུང་ཕྱིར་སྟོང་། །སྟོང་ཉིད་ཕྱིར་ན་ཀུན་འབྱུང་བས། །སྟོང་དང་རྟེན་འབྲེལ་གཉིས་མེད་པ། །
ཞེས་པ་ལ་སོགས་པས་མཚོན་ཏེ་དམ་པ་རྣམས་ནི་སངས་རྒྱས་དང་གྲུབ་ཐོབ་དགོངས་པ་གཅིག་ཟེར་བ་ལྟར་གྱུར་ཏོ། །འོན་ཀྱང་མེད་པ་དང་ཡོད་པའི་ཕྱོགས་རེ་རེ་རྩལ་དུ་བཏོན་པའི་གཞུང་རྣམས་ཀྱང་ཀུན་ཉོན་ཕྱོགས་འཇོམས་པ་དང་། རྣམ་བྱང་ཕྱོགས་སྒྲུབ་
པའི་ཐབས་མཁས་ཁྱད་པར་བ་ཡིན་ཀྱང་། མཐར་ཐུག་གི་གནས་ལུགས་ལ་དེ་ཁོ་ན་ལྟར་གྲུབ་པ་ནི་མ་ཡིན་ཏེ། དཔེར་ན། སྲིད་པའི་སྡུག་བསྔལ་ལ་འཇིགས་པའི་ཡིད་དང་། ཞི་བ་ལ་དགའ་བའི་ཡིད་གཉིས། ལས་དང་པོ་པས་བསྐྱེད་དགོས་པ་ཡིན་
ཀྱང་། བྱང་སེམས་བདག་ཉིད་ཆེན་པོ་རྣམས་ཀྱིས་སྲིད་ཞི་མཉམ་པ་ཉིད་དུ་གཟིགས་པའི་སྐབས་ན། འཁོར་འདས་ལ་འཇིགས་སྲེད་ཀྱང་སྤང་དགོས་པ་བཞིན་ནོ། །དེས་ན་མཐར་ཐུག་གི་གནས་ལུགས་དཔྱོད་པའི་ཚེ་ན། རྟོན་པ་བཞི་དང་ལྡན་པ་རྣམས་ཀྱིས། 
མཐའ་བཞི་སྤྲོས་བྲལ་ཉིད་བསྒྲུབས་ནས། དེ་དང་འགལ་བ་རྣམས་དགག་པར་བྱེད་ལ། ཡང་འགའ་ཞིག་གིས་མཐར་ཐུག་མཐའ་བཞི་སྤྲོས་བྲལ་ལ་ཞེ་ཕུག་མཛད་ནས་དགོས་པའི་དབང་གིས་ཡོད་མེད་ཕྱོགས་རེ་བ་རྩལ་འདོན་མཛད་པའང་ཡོད་ལ། རྟོན་པ་
བཞི་དང་བྲལ་བ་གཞན་ཁ་ཅིག་ནི་ཕྱོགས་རེ་བའི་ལམ་དེ་ཉིད་གནས་ལུགས་མཐར་ཐུག་ཏུ་བརློམས་ནས། དོན་ལ་མཉམ་པར་བཞག་པ་ཅུང་ཟད་ཀྱང་མེད་པའི་ཚིག་གི་དགག་སྒྲུབ་ཙམ་གྱི་སྤྲོས་པ་ལ་འཆེལ་བ་དག་གིས་ནི། མདོ་ལས་སྨྲ་ལ་དགའ་བའི་ཉེས་པ་
13-1-37a


དུ་མ་གསུངས་པ་དང་། ཁྱད་པར་ཆོས་སྤོང་བ་དང་། རང་དང་གཞན་གྱི་ཕྱོགས་སུ་བཟུང་བའི་དམ་པ་རྣམས་ལ་སྐུར་པ་བཏབ་པའི་ཕུང་ཁྲོལ་ཆེན་པོ་བྱས་པ་ཡིན་ནོ། །དེ་ལ་གཞན་ལ་སྐུར་པ་ཡིན་ཀྱང་རུང་། རང་ཕྱོགས་ཀྱི་དམ་པ་
རྣམས་ལ་ཇི་ལྟར་སྐུར་པ་བཏབ་སྙམ་ན། ཕྱོགས་རེའི་མིག་ཅན་དེ་དག་གིས་ནི་རང་ཕྱོགས་ཀྱི་གང་ཟག་རྣམས་ལ་མཆོག་ཏུ་བསྟོད་ཀྱང་དོན་གྱིས་ཆེས་སྨད་པ་ཡིན་ཏེ། དེའི་རྒྱུ་མཚན་ཡང་། དཔེར་ན། ཕྱི་རོལ་པ་རྣམས་ཀྱིས་རང་རང་གི་སྟོན་པར་བཟུང་བ་དབང་
ཕྱུག་དང་ཁྱབ་འཇུག་སོགས་ལ། བུད་མེད་དང་རོལ་བ། གཞན་འཇོམས་པའི་ཁྲོ་བ་དང་གཡོ་སྒྱུའི་སྟོབས་ཆེ་བས་བསྔགས་པ་ནི། མཁས་པ་དག་གིས་བལྟས་ན་ཉོན་མོངས་པའི་དྲི་མས་དབང་དུ་བྱས་པར་བསྟན་པའི་ཕྱིར་སྨད་པ་ལས་མ་འདས་པ་བཞིན་དུ། འདིར་
ཡང་དེ་དག་གིས། རྒྱལ་བའི་མདོ་རྒྱུད་ཟབ་མོའི་མཐར་ཐུག་པ་རྣམས་ནས་ཡང་ཡང་གསུངས་ཤིང་། གནས་ལུགས་མཐར་ཐུག་དཔྱོད་པའི་རིག་ཤེས་ཀྱིས་བསླུ་མེད་བསྙོན་མེད་དུ་གྲུབ་པའི་མཐའ་བཞི་སྤྲོས་བྲལ་ཉིད་རང་རང་གི་ཕྱོགས་སུ་བཟུང་བའི་གང་ཟག་དེ་དག་
གིས་ཁོང་དུ་ཆུད་མ་ནུས་ཞེས་དོན་གྱིས་ཁས་བླངས་པའི་ཕྱིར་རོ། །དེ་འདྲ་བའི་ལམ་ངན་པ་བྱུང་དང་འབྱུང་གྱུར་རྣམས་སྤང་བའི་ཕྱིར། ཡིད་བཞིན་མཛོད་ལས། གཞུང་ལུགས་ཀུན་ལས་མི་རྟོག་ཡེ་ཤེས་མཆོག །ཟབ་ཞི་སྤྲོས་བྲལ་གནས་ལུགས་བསྒོམ་པར་
གསུངས། །དེ་དང་འགལ་གྱུར་ལམ་ངན་ཇི་སྙེད་པ། །དེང་སང་དར་བས་ཐར་འདོད་རྣམས་ཀྱིས་སྤོངས། །ཞེས་གསུངས་པ་ཡིན་ནོ། །གཉིས་པ་བདེ་བླག་ཏུ་ཞེས་པ་ཅི་ཡིན་ན། ངེས་པ་དེའང་མྱུར་དུ་འདྲེན་ནུས་པ་སྟེ། འདི་ལྟར་ཚེགས་ཆུང་ངུས་དོན་ཆེན་པོ་
13-1-37b


ངེས་པར་ཐོབ་པ་བདེ་བླག་ཅེས་བྱ་སྟེ། དེའང་གཞུང་འདི་ཚིག་ཉུང་ཞིང་གསལ། དོན་ཟབ་ཅིང་རྒྱ་ཆེ་སྟེ། དེའང་བརྗོད་བྱ་རྒྱ་ཆེན་པོ་ལ་ལྟོས་ན་གཞུང་འདི་ཤིན་ཏུ་ཉུང་ཡང་། རང་སྡེ་རྣམ་རིག་སྨྲ་བ་མན་ཆད་ཀྱི་ཕྱི་རོལ་པ་དང་ནང་པས་བརྟགས་པའི་གྲུབ་མཐའི་སྐྱོན་
ཐམས་ཅད་ལྷག་མ་མེད་པར་མེ་རྫས་ལ་མེ་སྟག་ཞུགས་པ་བཞིན་དུ་གཏོང་ནུས་པའི་རིགས་པ་རྣོ་ལ་ཧུར་ཆེ་བ་བདེན་གཉིས་དཔྱོད་པའི་ཚད་མ་རྩ་ཤེས་དང་རྣམ་འགྲེལ་ལྟ་བུའི་གཞུང་གི་སྙིང་པོའི་བཅུད་མ་ལུས་པ་འདུས་པ་ཤིན་ཏུ་ཕྲ་ཞིང་ཟབ་པའི་དོན་མཐར་ཐུག་པ་
སྟོན་ཀྱང་། གཏན་ཚིགས་དང་ངག་གི་སྡེབ་སྦྱོར་ཆེས་གསལ་བས་བདེ་བླག་ཏུ་ཁོང་དུ་ཆུད་ནུས་པ་ལ་དེ་སྐད་ཅེས་བྱ་སྟེ། རང་འགྲེལ་ལས་ཀྱང་། གསལ་བའི་ལུང་དང་རིགས་པ་དག་གིས་གང་ཞིག་འདིར་བརྗོད་པ། །རྒྱལ་བ་ཁྱུ་མཆོག་དམ་པའི་གསུང་རབ་སྒྲོན་
ཆེན་ཡང་དག་པར། གསལ་བྱེད་འདི་ནི། ཞེས་གསུངས་པ་ལྟར་རོ། །དེ་ལ་སྤྱིར་དབུ་མའི་གཞུང་ན་གཏན་ཚིགས་ལྔའམ་བཞིར་གྲགས་ཀྱང་། དེ་རྣམས་ཀྱི་གཙོ་བོ་ལྟ་བུ་རིགས་པའི་རྒྱལ་པོ་རྟེན་འབྲེལ་ཆེན་པོ་ཡིན་ལ། གཞན་དེ་ཉིད་དུ་འདུ་བ་ཡིན་ཀྱང་།
གཅིག་དུ་བྲལ་གྱི་རིགས་པ་འདི་ནི་རིགས་པ་དེ་རྣམས་ལས་རལ་གྲིའི་སོ་དང་མདུང་གི་རྩེ་ལྟ་བུ་ཡིན་ཏེ། གཅིག་དུ་མའི་ཚུལ་ཙམ་རྟོགས་སླ་ཞིང་། བརྟག་བདེ་བ། ཆོད་ཆེ་བ་སོགས་ཁྱད་པར་དུ་མས་འཕགས་པ་ཡིན་པས་སློབ་དཔོན་འདི་ཉིད་ཀྱིས། རིགས་པ་དེ་
གཅིག་པུས་ཤེས་བྱ་ཐམས་ཅད་བདེན་སྟོང་དུ་གཏན་ལ་འབེབས་ཚུལ་འདི་ནི། ནད་ལ་སྨན་ཐེབས་པའམ། གནད་ལ་མཚོན་བསྣུན་པ་ལྟར་ཆེས་དགོས་པའི་གཏིང་དུ་སླེབ་པ་ཞིག་སྟེ། རྩ་ཤེས་རབ་བྱེད་གཞན་ཉེར་དྲུག་པོའི་ཉམས་ལེན་སྙིང་པོར་དྲིལ་བ་ལྟ་བུའི་རབ་བྱེད་
13-1-38a


བཅོ་བརྒྱད་པ་ལས་གཅིག་ཏུ་བྲལ་གྱི་རིགས་པ་གསུངས་ཤིང་། དབུ་མའི་གནད་དྲིལ་བ་ཤེས་རབ་ལ་འཇུག་པ་སོགས་སུའང་གཅིག་ཏུ་བྲལ་ཁོ་ནས་དངོས་ཀུན་བདེན་མེད་དུ་བསྒྲུབ་པ་སོགས་གཞུང་འདི་དང་མཚུངས་པ་ཁོ་ནར་མངོན་པ་
སོགས་གཞུང་ཀུན་གྱི་རིགས་པའི་རྣོ་སོ་ཆེན་པོ་ཡིན་ནོ། །དེ་ལ་ཆོས་འདི་ཀུན་རྟེན་འབྲེལ་ཡིན་པའི་གནད་ཀྱིས་གཅིག་དང་དུ་མ་བྲལ་བ་ཡིན་ལ། གཅིག་དང་དུ་མ་བྲལ་བའི་གནད་ཀྱིས་རང་དབང་ཚུགས་ཐུབ་ཏུ་མ་གྲུབ་པར་རྐྱེན་གྱིས་བཅོས་ནས་སྒྱུ་མ་ལྟར་སྣང་བ་
ནི་རྟེན་འབྲེལ་ཡིན་ལ། རྟེན་འབྲེལ་མ་ཡིན་པར་ངོ་བོ་ཉིད་ཀྱིས་གྲུབ་ན་གཅིག་དང་དུ་མར་བྲལ་བ་མི་སྲིད། གཅིག་དང་དུ་མར་བདེན་པ་ལ་རྟེན་འབྲེལ་མི་སྲིད་པའི་གནད་ཀྱིས༷་གཏན་ཚིགས་གཞན་ཀུན་ཀྱང་དོན་གྱིས་འདིར་བསྡུས་ཀྱང་རུང་སྟེ་མདོར་ན། གང་གིས་
སྟོང་དང་རྟེན་འབྱུང་དག །དབུ་མའི་ལམ་དུ་དོན་གཅིག་པར། །གསུང་མཆོག་མཚུངས་པ་མེད་པ་ཡི། །ཐུབ་དབང་དེ་ལ་ཕྱག་འཚལ་ལོ། །ཞེས་གསུངས་པ་ལྟར་སྟོང་པར་སྒྲུབ་པའི་གཏན་ཚིགས་ཐམས་ཅད་གཅིག་གི་དོན་གཅིག་ལ་ཚང་བར་ཐམས་ཅད་རྟེན་
འབྱུང་གི་གནད་ཁོ་ནར་ཐུག་པར་ཤེས་པ་ནི་དབུ་མར་སྨྲ་བ་རྣམས་ཀྱིས་ཤེས་པར་བྱ་བའི་གནད་གལ་པོ་ཆེ་ཡིན་ནོ། །དེ་སྐད་དུའང་རང་འགྲེལ་ལས། རྒྱལ་བ་གང་དག་རྟེན་འབྲེལ་འབྱུང་། །རྟོག་པ་མི་བཟད་དྲྭ་བ་ཀུན། །རྣམ་གྲོལ་གསུང་བ་དེ་དག་ལ། །རྟག་པར་
རྒྱུན་དུ་ཕྱག་འཚལ་ལོ། །ཞེས་གསུངས་སོ། །དེ་ལྟར་གཞུང་འདི་ཚད་མ་གཉིས་ཀྱི་སྙིང་པོའི་གནད་ཟིན་པའི་བསྟན་བཅོས་ཡིན་པས་ན། འཛམ་གླིང་མཛེས་པར་བྱེད་པའི་རྒྱན་དྲུག་རྗེས་འབྲངས་དང་བཅས་པའི་ལེགས་པར་བཤད་པ་ཐམས་ཅད་ཀྱི་དོན་བཅུད་འདུས་པ་
13-1-38b


འདི་ཉིད་ཤེས་པ་ཙམ་གྱིས་གཞུང་ལུགས་འབུམ་ཕྲག་དུ་མའི་དཀའ་གནད་རང་གྲོལ་ཏེ། འཇམ་དཔལ་སྨྲ་བའི་སེང་གེ་ངག་དང་ཡིད་ལ་ཞུག་ནས་ཤེས་རབ་ཀྱི་རྩལ་འབར་བར་བྱེད་པ་ནི་བློ་གྲོས་དང་ལྡན་པ་རྣམས་ཀྱིས་སྨན་དང་རིག་སྔགས་ཀྱི་ནུས་པ་བཞིན་དུ་མངོན་སུམ་ཡིད་
ཆེས་པར་འགྱུར་ན་མང་དུ་སྨྲ་ཅི་དགོས་ཏེ། རང་འགྲེལ་ལས་ཀྱང་། བརྟན་རྣམས་འདི་འཛིན་བྱེད་པ་དང་། །མཁས་ལ་སྟོན་པར་བྱེད་པ་ནི། །བདག་དང་གཞན་ལ་ཁྱབ་མཆོག་གིས། །ཡོངས་སུ་མགུ་བར་རབ་ཏུ་བྱེད། །དམིགས་པ་ཅན་ཀུན་སྤྱི་བརྟོལ་གྱིས། །
རློམ་པ་རྣམ་པར་བསལ་བྱས་ནས། །སྤོབས་པ་སོ་སོ་རིག་པ་ཡིས། །ཤིན་ཏུ་མཐོ་བར་འགྱིང་བར་བྱེད། །ཟབ་མོའི་ཆོས་ཀྱི་ཡང་དག་ཉིད། །སྟོན་པར་མཛད་པའི་ཐུབ་ཆེན་གྱི། །གྲགས་པ་དག་ནི་ཕྱོགས་རྣམས་ཀྱི། །རབ་འབྱམས་ཀུན་ཏུ་རྒྱས་པར་བྱེད།
ཅེས་གསུངས་པ་ལྟར། རང་ཉིད་ཀྱིས་ཡང་དག་པའི་ལམ་ལ་ཡིད་ཆེས་རྙེད་ནས། སྐལ་ལྡན་རྗེས་སུ་འཛིན་པ་དང་། རྒོལ་བ་ཚར་གཅོད་པའི་སྤོབས་པ་ཕྱོགས་ཀུན་ལས་རྣམ་པར་རྒྱལ་བ་ཐོབ་སྟེ་སངས་རྒྱས་ཀྱི་བསྟན་པ་སྤེལ་བར་བྱེད་དོ། །ཞེས་སོ། །གསུམ་
པ་བྱང་ཆུབ་ཆེན་པོ་ཇི་ལྟར་ཐོབ་ཚུལ། ཐེག་པ་ཆེན་པོའི་གཞུང་ལམ་ཡོངས་སུ་རྫོགས་པའི་བཞོན་པ་བཟང་པོ་ཞོན་ནས་འབྲས་བུ་བྱང་ཆུབ་ལ་སྦྱོར་བར་བྱེད་དེ། དེའང་མཆོག་གསུམ་ལ་ཤེས་ནས་དད་པ་ཐོབ་ཅིང་། རང་བཞིན་མེད་པར་རྟོགས་པས་སྲིད་པ་ལ་
འཇིགས་པ་དང་། ཞི་བ་ལ་དགའ་བའི་ཡིད་སྤངས་ཏེ་སྒྱུ་མ་ལྟ་བུའི་སྙིང་རྗེ་མཁའ་དང་མཉམ་པའི་བྱང་ཆུབ་ཀྱི་སེམས་རིན་པོ་ཆེས་རྒྱུ་བྱས་ཏེ། ལམ་ཚོགས་གཉིས་དྲི་མ་མེད་པ་ལ་འབད་པས་རང་གཞན་དོན་གཉིས་འབྱོར་པའི་རྒྱལ་བ་ཆོས་ཀྱི་དབང་ཕྱུག་ཏུ་འགྱུར་བ་ནི་
13-1-39a


རྒྱུ་དང་འབྲས་བུའི་ཚུལ་བསླུ་བ་མེད་པའོ། །དེ་འདྲ་བའི་མཐར་ཐུག་གི་འབྲས་བུ་དེའང་སྒོམ་བསམ་ཐོས་པའི་ཤེས་རབ་དང་རིམ་པས་རྒྱུ་འབྲས་སུ་འབྲེལ་ཞིང་། ཐོས་པའང་རིགས་པའི་ལམ་ཚུལ་དྲི་མེད་འདི་ལྟ་བུས་མ་ནོར་ཞིང་ངེས་པ་
རྙེད་པར་གཏན་ལ་འབེབས་དགོས་པས། གཞུང་འདི་འདྲ་བ་ཐོས་ཤིང་ཐོས་དོན་བསམས་ལ། བསམ་ཞིང་བསམ་པས་ངེས་པ་རྙེད་པའི་དོན་ལ་གོམས་པར་བྱས་ན་ཟབ་མོའི་ལམ་ལ་བཟོད་པ་རིམ་གྱིས་སྐྱེ་བར་འགྱུར་ཏེ། ཟླ་བ་སྒྲོན་མེའི་མདོ་ལས་བཟོད་པ་གསུམ་
གྱི་སྐབས་སུ་ཇི་སྐད་བཤད་པ་ལ་སོགས་པ་བཞིན་ནོ། །དེ་ལྟ་བུའི་དགོས་པ་དེ་རྣམས་ཀྱང་གཞུང་ཉིད་ཀྱིས་དངོས་ཤུགས་ལ་གསལ་པོར་བསྟན་པའི་ཚུལ་གཞུང་ཉིད་འཆད་པའི་སྐབས་སུ་ཤེས་པར་འགྱུར་རོ། །དེ་ལྟ་བུའི་རྩིས་མགོ་ལྔ་པོ་དེ་ཚང་བར་བསྟན་བཅོས་ཀྱི་
གཞུང་ན་དངོས་སུ་སྟོན་མི་སྟོན་ཅི་རིགས་ཡོད་ཀྱང་། འདིར་ནི་མཛད་པ་པོ་མཛད་བྱང་གིས་གསལ་ཞིང་། ཆེད་དུ་བྱ་བའི་ཡུལ་ཟབ་རྒྱས་ཀྱི་དོན་འཛིན་པའི་སྣོད་ཤུགས་ལས་བསྟན་ཏེ། ཚུལ་གཉིས་ཤིང་རྟ་ཞོན་ནས་སུ། །ཞེས་པ་ལ་སོགས་པས་སོ། །གཞན་
གསུམ་གཞུང་དངོས་ཀྱི་དོན་ཡིན་ནོ། །དེ་ལྟར་ཡན་ལག་ལྔའི་ཚུལ་གྱིས་སྤྱི་དོན་དང་བརྒལ་ལན་དགོས་པ་ལ་སོགས་པ་དོན་མང་པོ་ཞིག་གསལ་ཞིང་ཟབ་པར་བསྟན་པ་ཡིན་ལ། དེ་དག་གིས་གཞུང་འདི་ཉིད་ཀྱི་ཆེ་བའང་ཕྱོགས་ཙམ་ཤེས་པར་འགྱུར་རོ། །
ཡུལ་དུས་དམན་པར་གྱུར་ཀྱང་བདག་ཅག་གིས། །ཤིང་རྟ་ཆེན་པོའི་བཞེད་སྲོལ་དྲི་མེད་གང་། །རང་འདོད་འཁྱོག་བཤད་ཉེས་པས་མ་སྦགས་པར། །ཕྲ་ཞིང་ཟབ་མོའི་ཟབ་གནད་གསལ་བར་བཤད། །དེང་དུས་སྐྱེ་བོ་བློ་དང་ཐོས་པ་དམན། །ཕྱོགས་ལྷུང་
13-1-39b


ཕྲག་དོག་སྙེམས་པའི་འདུ་ཤེས་མཐོ། །དེ་ཕྱིར་གཞན་དོན་འགྱུར་བར་དཀའ་ན་ཡང་། །རང་བློ་ལེགས་བཤད་གོམས་པའི་ཆེད་དུ་བྲིས། །གསེར་དང་བོང་བ་མཉམ་པའི་འཕགས་མཆོག་ལ། །གླིང་བཞིའི་ཕུན་ཚོགས་བསྟབ་ཀྱང་ཅི་བགྱི་སྟེ། །དེ་ཡི་
ཐུགས་ལ་བརྣག་པའི་ཆོས་བཟུང་ན། །དགོངས་པ་ཡོངས་སུ་རྫོགས་པར་འགྱུར་ཞེས་གྲགས། །དེ་ཕྱིར་གངས་ཅན་མིག་གཅིག་མགོན་པོ་དེ། །རེ་ཞིག་ཞི་བར་གཟིམས་པའི་ཚུལ་མཛད་ཀྱང་། །སྣ་ཚོགས་སྡུག་བསྔལ་འཁྲུགས་པའི་འགྲོ་བ་ལ། །
ཐུགས་རྗེའི་སྤྱན་རས་ནམ་ཡང་ཡོལ་བ་མེད། །དེ་སླད་ཞིང་མཆོག་གང་ན་ཞི་བའི་སྤྱན། །པདྨའི་འདབ་ལྟར་མཛེས་པས་དགྱེས༷་བཞིན་དུ། །མངོན་སུམ་གཟིགས་པ་གང་གི་མདུན་ས་རུ། །ལེགས་བཤད་དབྱངས་འདིའི་མཆོད་པས་མཉེས་གྱུར་ཅིག །
གཉིས་པ་བཤད་བྱ་གཞུང་གི་དོན་རྣམ་པར་དབྱེ་བ་ལ། དངོས་དང་། དེ་ལྟར་ཕྱེ་བའི་དགོས་པ་གཉིས། དང་པོ་བཤད་བྱའི་གཞུང་བདེན་པ་གཉིས་ཀྱི་དེ་ཁོ་ན་ཉིད་གསལ་བར་བྱེད་པ་དབུ་མའི་རྒྱན་འདི་འཆད་པ་ལ། མཚན་དོན། འགྱུར་ཕྱག །གཞུང་དོན།
མཇུག་དོན་བཞི་ལས། དང་པོ། རྒྱ་གར་སྐད་དུ། མ་དྷྱཱ་མ་ཀ་ཨ་ལཾ་ཀཱ་ར་ཀཱ་རི་ཀཱ བོད་སྐད་དུ། དབུ་མ་རྒྱན་གྱི་ཚིག་ལེའུར་བྱས་པ། ཞེས་གསུངས་ཏེ། ལེགས་པར་སྦྱར་བའི་སྐད་དུ་སྨྲོས་པ་དེ་དག་བོད་སྐད་དང་ཤན་སྦྱར་ན། མ་དྷྱཱ་མ་ཀ་ནི་དབུ་མ། ཨ་ལཾ་ཀཱ་
ར་རྒྱན། ཀཱ་རི་ཀཱ་ཚིགས་སུ་བཅད་པའམ་ཚིག་ལེའུར་བྱས་པ་ཞེས་བྱའོ། །དེ་ལ་དབུ་མ་ཞེས་པ་མཐའ་གང་ལའང་མི་གནས་པའི་མིང་ཡིན་ལ། མིང་དེ་གང་ལ་འཇུག་པའི་དོན་ལ་དབྱེ་ན། བརྗོད་བྱ་དོན་གྱི་དབུ་མ་དང་། རྗོད་བྱེད་ཚིག་གི་དབུ་
13-1-40a


མ་གཉིས་སུ་ཡོད་ཅིང་། དང་པོ་ལ་གཞི་དང་ལམ་དང་འབྲས་བུ་གསུམ་དུ་དབྱེར་ཡོད་ལ།  ཕྱི་མ་ལ་རྒྱལ་བའི་ཡུམ་ལ་སོགས་པ་ལྟ་བུ་བཀའ་དང་།  དེ་དག་གི་དགོངས་པ་འགྲེལ་བ་རྩ་བ་ཤེས་རབ་ལྟ་བུ་བསྟན་བཅོས་ཏེ་གཉིས་སུ་ཡོད་
ཅིང་། རྗོད་བྱེད་ཚིག་གི་དབུ་མ་ལ་གཞུང་དབུ་མ་ཞེས་གྲགས་སོ། །རྒྱན་གྱི་དོན་ནི་མཛེས་ཤིང་གསལ་བར་བྱེད་པ་ཡིན་ལ། དེ་ལ་འདི་དབུ་མའི་རྒྱན་དུ་ཇི་ལྟར་འགྱུར་ན། བརྗོད་བྱ་དོན་གྱི་དབུ་མ་སྐྱེས་བུ་ལུས་མཛེས་པ་ལྟ་བུ་ལ་རྗོད་བྱེད་གཞུང་གི་དབུ་མ་རིན་པོ་ཆེའི་
རྒྱན་གྱིས་བརྒྱན་པ་དང་འདྲ་བར་གནས་པ་དེ། ཚུལ་འདི་ཉིད་ཀྱིས་གསལ་བར་བྱེད་པས་ན་འདི་ནི་རྒྱན་དང་བཅས་པའི་ལུས་གསལ་བར་འཆར་བའི་མེ་ལོང་ལྟ་བུ་སྟེ་གསལ་བྱེད་ཀྱི་རྒྱན་ནོ། །དེས་ན་འདི་ནི་དབུ་མ་མཐའ་དག་གི་རྒྱན་ཡིན་གྱི་ཕྱོགས་རེ་བ་མིན་ནོ། །
འོ་ན་འདི་དབུ་མ་ཐལ་འགྱུར་བའི་གཞུང་གི་རྒྱན་དུ་འགྱུར་རམ་མི་འགྱུར། འགྱུར་ན་འདི་ཐལ་འགྱུར་བར་འདོད་དགོས་ལ། མི་འགྱུར་ན་དབུ་མ་མཐའ་དག་གི་རྒྱན་དུ་ཁས་བླངས་པ་དང་འགལ་ཞིང་། ཁྱད་པར་གཞུང་དབུ་མའི་དགོངས་པ་མཐར་ཐུག་པ་ནི་ཐལ་
འགྱུར་བའི་ལུགས་ལྟར་ཡིན་ན། དེའི་རྒྱན་དུ་མ་གྱུར་ན་དབུ་མའི་རྒྱན་དུ་ཡང་དག་པ་ཞིག་འགྱུར་བར་དཀའོ་སྙམ་ན། འདི་ཐལ་འགྱུར་བའི་རྒྱན་དུ་འགྱུར་ཡང་ཐལ་འགྱུར་བའི་གཞུང་ཡིན་པར་ཐལ་བ་མེད་དེ། འདིར་རྗེས་ཐོབ་ཁས་ལེན་དང་བཅས་པ་རྣམ་
གྲངས་པའི་དོན་དམ་རིགས་པས་སྒྲུབ་ཚུལ་གཙོ་བོར་འཆད་པའི་གཞུང་ཡིན་པའི་ཕྱིར་རོ། །རྗེས་ཐོབ་བདེན་གཉིས་སོ་སོའི་གནས་ཚུལ་གཏན་ལ་ཕེབ་ན་དེས་བདེན་གཉིས་ཟུང་འཇུག་ཁས་ལེན་དང་བྲལ་བའི་དབུ་མ་ཚེགས་མེད་པར་འགྲུབ་པས་ན་རྣམ་གྲངས་མིན་
13-1-40b


པའི་དོན་དམ་མདོ་ཙམ་བསྟན་པ་དེ་ཉིད་དབུ་མ་ཐལ་འགྱུར་བ་དང་དགོངས་པ་གཅིག་ཡིན་ནོ། །དེ་དག་གི་གནད་ནི་སྤྱི་དོན་གྱི་སྐབས་སུ་བཤད་ཟིན་ལ། མཐའ་དཔྱད་དགོས་པ་མང་དུ་སྣང་ཡང་བློ་ལྡན་རྣམས་ལ་དོན་གྱི་སྙིང་པོ་ཙམ་བསྟན་པས་ཆོག་པ་དེས་ན་གཞུང་
གི་འབྲུ་གནོན་པའི་སྐབས་འདིར་ཚིག་ཉུང་ངུས་འཆད་པར་འདོད་དོ། །མདོར་ན་ཐལ་རང་གི་སྲོལ་འདི་དག་རྗེས་ཐོབ་བདེན་གཉིས་སོ་སོར་སྣང་བའི་སྐབས་དང་།  མཉམ་བཞག་བདེན་གཉིས་རོ་མཉམ་པའི་གནས་སྐབས་ལ་རྩལ་འདོན་མཛད་པ་ཙམ་དུ་གོ་བ་ནི་
ཤིན་ཏུ་འགང་ཆེ་ཞིང་དོན་ཆེ་བ་ཡིན་ནོ། །དེས་ན་དབུ་མའི་མཐར་ཐུག་མཉམ་བཞག་ཡེ་ཤེས་དང་མཐུན་པ་ཐལ་འགྱུར་བའི་ལུགས་ལྟར་ངེས་ཀྱང་། དེའི་རྗེས་ཐོབ་བདེན་གཉིས་ཚད་མའི་གནས་ཚུལ་རང་རྒྱུད་པའི་ལུགས་དེ་ཡིན་པས། མདོ་རྣམས་ནའང་
ལ་ལར་ཡོད་མེད་སོགས་མཐའ་ཐམས་ཅད་བྲལ་བའི་སྨྲ་བསམ་བརྗོད་མེད་རྣམ་གྲངས་མིན་པའི་དོན་དམ་བསྟན། ལ་ལར་གཟུགས་མེད་རྣམ་ཤེས་མེད་ཅེས་མེད་དགག་ཙམ་གྱི་རྣམ་གྲངས་པའི་དོན་དམ་བསྟན། སློབ་དཔོན་ཀླུ་སྒྲུབ་ཀྱིས་མདོའི་དགོངས་
པ་དེ་བཞིན་དུ་རྒྱུ་རྐྱེན་འབྲས་བུའི་ཆོས་ཐམས་ཅད་བདེན་མེད་དུ་བསྒྲུབས་ནས། མཐར་མཐའ་ཐམས་ཅད་དང་བྲལ་བ་སྤྲོས་བྲལ་ཆེན་པོར་རིགས་པས་བསྒྲུབས་ལ། ཚུལ་དེ་བཞིན་དུ་ཐལ་རང་གི་སློབ་དཔོན་རྣམས་ཀྱིས་མཉམ་རྗེས་ཀྱི་དབུ་མ་ལ་སོ་སོའི་རྩལ་འདོན་མཛད་ཚུལ་
གྱིས་དེ་ལྟར་མིང་ཐོགས་པ་ཡིན་གྱི། རང་རྒྱུད་པ་རྣམས་ཀྱིས་མདོ་དང་བསྟན་བཅོས་ཀྱི་དོན་ཇི་བཞིན་མ་བཀྲལ་བ་ནི་མ་ཡིན་ནོ། །དེ་ལ་དང་པོར་རྗེས་ཐོབ་བདེན་གཉིས་སོ་སོར་འབྱེད་པའི་དབུ་མ་འདི་ཙམ་ཞིག་ལ་མ་བརྟེན་ན་རྒྱུ་མེད་པས་འབྲས་བུ་མཉམ་བཞག་དབུ་
13-1-41a


མ་ཐོབ་པར་མི་ནུས་ཏེ། ཐ་སྙད་བདེན་པ་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་པ་སྟེ། །ཞེས་དང་། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མི་འགྱུར། །ཞེས་གསུངས་པ་ཡིན་ལ། འདིའི་
ཐ་སྙད་ཅེས་པ་རྣམ་གྲངས་པའི་དོན་དམ་གྱི་ཟླར་གྱུར་པའི་ཀུན་རྫོབ་ཙམ་ལ་མི་གཟུང་གི ཤེས་བརྗོད་འཇུག་གསུམ་གྱི་ཐ་སྙད་ཅན་སྒྲ་རྟོག་གི་སྤྱོད་ཡུལ་བདེན་གཉིས་སོ་སོར་སྣང་བ་འདི་ཡིན་པས་རྣམ་གྲངས་པའི་དོན་དམ་ཡང་ཐ་སྙད་དང་ཀུན་རྫོབ་ཀྱི་ཁོངས་སུ་གཏོགས་སོ། །
དེ་འདྲ་བའི་བདེན་གཉིས་ཀྱི་ཚུལ་རྟོགས་པའི་ཐ་སྙད་ལ་བརྟེན་ནས། ཐ་སྙད་ཐམས་ཅད་དང་བྲལ་བའི་ཟུང་འཇུག་རབ་ཏུ་མི་གནས་པའི་དབུ་མ་ཆེན་པོའམ་སྤྲོས་བྲལ་བློ་འདས་ནི་དོན་དམ་བདེན་པའམ། དམ་པའི་དོན་ཞེས་བྱ་སྟེ་རྣམ་གྲངས་མིན་པའི་དོན་དམ་ཡིན་ནོ། །
དེ་ལྟར་ན་དོན་དམ་ཞེས་པའི་སྒྲ་གང་བྱུང་ཡང་། གཞུང་གི་བདེན་གཉིས་ཀྱི་ཆོས་སྐད་སོགས་ལ་གོམས་པའི་དབང་གིས་ཐོས་བསམ་པ་རྣམས་ཀྱིས་མེད་དགག་ཞིག་ལ་གོ་བ་སྐྱེ་སླ་འདུག་པ་དེ་ལ་བརྟེན་ནས་འཁྲུལ་པ་འབྱུང་སྲིད་པས་སོ་སོའི་ཐད་དུ་ཤན་འབྱེད་དགོས་ཏེ། 
དོན་དམ་ལ་དངོས་བཏགས་ཆེ་ཆུང་། རྣམ་གྲངས་ཡིན་མིན་སོགས་དུ་མ་ཡོད་དེ་དགྲ་བཅོམ་དང་མྱང་འདས་བཞིན་ནོ། །དེ་བཞིན་དུ་སྐྱེ་མེད་སྟོང་ཉིད་ལ་སོགས་པའི་ཚིག་རྣམས་ཀྱང་ངེས་པར་བྱའོ། །དེ་ལྟར་ཐ་སྙད་ཁས་ལེན་ཀུན་བྲལ་དོན་དམ་ཆེན་པོ་རྩལ་འདོན་དུ་མཛད་
པ་ཐལ་འགྱུར་བའི་ལུགས་ཐུན་མིན་ཡིན་ཀྱང་། གཞུང་འདིར་ཡང་རང་འགྲེལ་ལས། སྐྱེ་བ་མེད་པ་ལ་སོགས་པའང་ཡང་དག་པའི་ཀུན་རྫོབ་ཏུ་གཏོགས་པ་ཡིན་དུ་ཟིན་ཀྱང་། ཞེས་སོགས་དང་། སྐྱེ་ལ་སོགས་པ་མེད་པའི་ཕྱིར། །ཅེས་པ་ལ་སོགས་པའི་
13-1-41b


སྔ་འགྲེལ་དུ། ཅིའི་ཕྱིར་དངོས་སུ་དོན་དམ་པ་མ་ཡིན་པ་བསྟན་པ་ཞེས་དང་། དོན་དམ་པ་ནི་དངོས་པོ་དང་དངོས་པོ་མེད་པ་དང་། སྐྱེ་བ་དང་མི་སྐྱེ་བ་དང་། སྟོང་པ་དང་མི་སྟོང་པ་ལ་སོགས་པའི་སྤྲོས་པའི་དྲྭ་བ་མཐའ་དག་སྤངས་པའོ། །སྐྱེ་བ་མེད་པ་ལ་སོགས་པ་ནི།
དེ་ལ་འཇུག་པ་དང་མཐུན་པའི་ཕྱིར་དོན་དམ་པ་ཞེས་ཉེ་བར་འདོགས་སོ། །ཞེས་པ་ལ་སོགས་པས་གསལ་བར་བསྟན་པ་ཡིན་ནོ། །དེ་ལྟར་དབུ་མ་ཐམས་ཅད་ཀྱི་རྒྱན་དུ་འགྱུར་ཚུལ་ཤེས་པར་བྱའོ། །དེ་ལ་ཁ་ཅིག་འདི་སྙམ་དུ། སློབ་དཔོན་ཀླུ་སྒྲུབ་ཀྱི་དགོངས་པ་
ཐལ་རང་གི་སློབ་དཔོན་སོ་སོས་འགྲེལ་ཚུལ་ཐ་དད་པ་ཡིན་ན། དེ་གཉིས་སྦྱར་མི་དགོས་སྙམ་ན། ཤིང་རྟ་ཆེན་པོ་རྣམས་ཀྱི་དགོངས་པ་འགལ་མེད་དུ་རྟོགས་ནུས་པའི་བློ་ལྡན་རྣམས་ལ་ཤིན་ཏུ་དགོས་པའི་ཕྱིར་ཅི་ནས་ཀྱང་སྦྱར་ཏེ་བཤད་དོ། །ཚིག་ལེའུར་བྱས་པ་ཞེས་
བྱ་བ་ཚིག་རྐང་པར་གྲངས་སུ་བཅད་པ་སྟེ་ལྷུག་པ་མ་ཡིན་པའི་དོན་ཏོ། །གཉིས་པ་འགྱུར་ཕྱག་ནི། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཞེས་ལོ་ཙཱ་བ་ཆེན་པོ་ཡེ་ཤེས་སྡེས་འགྱུར་མཛད་པའི་སྔ་ལོགས་སུ་དོན་དམ་པའི་ཆོས་མངོན་པ་རྣམ་པར་
གཞག་པའི་གཞུང་འདིའི་ཀླད་དུ་བཀས་བཅད་དང་མཐུན་པར་ཕྱག་མཛད་པའི་ཚིག་བཀོད་པའོ། །དེ་ལ་གང་གི་ཐུགས་ཆོས་ཀྱི་དབྱིངས་དང་མཉམ་པ་ཉིད་དུ་གྱུར་པ་ལ་སྤྲོས་པའི་ཟུག་རྔུ་ཐམས་ཅད་དང་བྲལ་བ་ནི་འཇམ་པ་ཡིན་ལ། མཁྱེན་གཉིས་ཡེ་ཤེས་ཀྱི་སྐུ་ནམ་མཁའ་ཇི་
སྲིད་དུ་འགྲོ་བའི་དོན་རྟག་ཁྱབ་ལྷུན་གྲུབ་ཏུ་མཛད་པ་ནི་དོན་གཉིས་འབྱོར་པའི་དཔལ་ཡིན་ནོ། །དེ་ལྟ་བུ་ནི་རྒྱལ་བ་ཐམས་ཅད་ཀྱི་རྣམ་པར་མི་རྟོག་པའི་ཡེ་ཤེས་ཀྱི་ངོ་བོ་ཡིན་ཀྱང་། རྣམ་པ་ས་བཅུའི་སེམས་དཔའ་ཆེན་པོའི་ཚུལ་དུ་སྣང་ནས་འཁོར་བ་ཇི་སྲིད་དུ་རྟག་བརྟན་བགྲེས་
13-1-42a


རྒུད་བྲལ་བའི་གཞོན་ནུའི་གཟུགས་སུ་བཞུགས་པས་ན་གཞོན་ནུར་གྱུར་པ་ཞེས་བྱ་ལ། དེ་ལྟ་བུའི་མགོན་པོ་གང་ལ་སྒོ་གསུམ་འདུད་པར་བྱེད་པ་ནི་ཕྱག་འཚལ་བའོ། །གསུམ་པ་གཞུང་དོན་ལ་ཤེས་བྱ་བདེན་གཉིས་ཀྱི་དོན་
གཏན་ལ་དབབ་པ་དང་། དེ་ལྟ་བུའི་ཚུལ་ལ་བསྔགས་པས་དོན་བསྡུ་བ་གཉིས། དང་པོ་ལ་བདེན་གཉིས་ཀྱི་ཚུལ་ངོས་གཟུང་བ། དེ་ལ་རྩོད་པ་སྤོང་བ། དེ་ལྟར་རྟོགས་པའི་ཕན་ཡོན་གསུམ། དང་པོ་ལ་དོན་དམ་པར་དངོས་པོ་མེད་པར་བསྟན་པ། ཀུན་
རྫོབ་ཏུ་ཡོད་པར་བསྟན་པ་གཉིས། དང་པོ་ལ་རྩ་བའི་རྟགས་འགོད་པ་དང་། དེའི་ཚུལ་སྒྲུབ་པ་གཉིས། དང་པོ། བདག་དང་གཞན་སྨྲས་དངོས་འདི་དག །ཡང་དག་ཏུ་ན་གཅིག་པ་དང་། །དུ་མའི་རང་བཞིན་བྲལ་བའི་ཕྱིར། །རང་བཞིན་མེད་དེ་གཟུགས་
བརྙན་བཞིན། ཞེས་གསུངས་ཏེ། འདི་ལྟར་བད༷ག་རང་སྡེ་ནང་པ་སངས་རྒྱས་པ་ད༷ང་། གཞ༷ན་ཕྱི་རོལ་མུ་སྟེགས་རྣམས་ཀྱིས་གང་བདེན་གྲུབ་ཏུ་སྨྲས༷་པའི་དངོ༷ས་པོ་འདི༷་དག༷་ཐམས་ཅད་ནི། ཡ༷ང་དག༷་པའི་དོན་དུ༷་ན༷། རིགས་པས་ལེགས་པར་དཔྱད་པའི་ཚེ་གཅི༷ག་པ་
ད༷ང་དུ༷་མ༷འི་ར༷ང་བཞི༷ན་གཉིས་ཀ་དང་བྲལ༷་བའི༷་ཕྱིར། འདི་རྣམས་ལ་ར༷ང་བཞི༷ན་གྱིས་གྲུབ་པ་ཅུང་ཟད་ཀྱང་མེ༷ད་དེ༷། དཔེར་ན་སྣང་ཡང་མི་བདེན་པ་གཟུག༷ས་བརྙན༷་བཞི༷ན་ནོ་ཞེས་སོ། །ངག་དོན་དུ་འགོད་ན། རང་གཞན་གྱི་སྡེ་པས་བདེན་པར་སྨྲས་པའི་ཕྱི་ནང་གི་
དངོས་པོ་འདི་ཀུན་ཆོས་ཅན། ཡང་དག་པར་རང་བཞིན་མེད་དེ། བདེན་པའི་གཅིག་དང་དུ་མ་བྲལ་བའི་ཕྱིར། མེ་ལོང་ནང་གི་གཟུགས་བརྙན་བཞིན་ཞེས་སོ། །དེ་ལ་རང་སྡེས་སྨྲས་པ་ཕུང་པོ་ལ་སོགས་པ་དང་། གཞན་སྡེས་སྨྲས་པ་གཙོ་བོ་ལ་སོགས་པའོ། །དེ་
13-1-42b


ལ་གལ་ཏེ་བདེན་པ་ཞིག་ཡོད་ན་གཅིག་དང་དུ་མ་གང་རུང་གི་ཚུལ་དུ་ཡོད་དགོས་ཏེ། གཅིག་དང་དུ་མ་ནི་ཕན་ཚུན་སྤངས་ཏེ་གནས་པ་ཡིན་པས་དེ་གཉིས་མ་ཡིན་པའི་བདེན་ཚུལ་ཕུང་གསུམ་པ་ཞིག་ཤེས་བྱ་ལ་མི་སྲིད་པ་དེས་ན་རྟགས་འདི་བདེན་པའི་ཁྱབ་བྱེད་མ་
དམིགས་པ་ཡིན་ནོ། །འདིར་འཕྲོས་དོན་ཅུང་ཟད་བཤད་ན། ཆོས་ཅན་ལ་དཔྱད་པ། གཏན་ཚིགས་ལ་དཔྱད་པ། དཔེའི་ཚུལ་བཤད་པ་གསུམ། དང་པོ་ཁ་ཅིག་འདི་སྙམ་དུ། འདིར་གྲུབ་མཐས་སྨྲས་པའི་དངོས་པོ་རྣམས་བཀག་པར་མཛད་པས་
ཐོག་མེད་ནས་གོམས་པ་བདག་འཛིན་ལྷན་སྐྱེས་ལ་གནོད་ཚུལ་ཇི་ལྟར་ཡིན་སྙམ་ན། གཞུང་འདིར་རང་གཞན་གྱི་སྡེ་པས་འདོད་པ། རྟག་དངོས། འདུས་མ་བྱས། གང་ཟག །ཁྱབ་པ། རགས་པ། ཕྲ་བ། ཤེས་པ་རྣམས་ཆོས་ཅན་དུ་བཟུང་བས།  དེ་རྣམས་
སུ་རྟག་མི་རྟག །ཕྱི་དང་ནང་། ཡུལ་ཡུལ་ཅན། ཁྱབ་མ་ཁྱབ། རགས་པ་ཕྲ་བ། ཤེས་བྱ་དང་ཤེས་པ་སོགས་འདུས་བྱས་འདུས་མ་བྱས་ཀྱི་ཆོས་ཀུན་འདུ་བ་ཡིན་པས་དེ་རྣམས་རིགས་པས་བདེན་མེད་དུ་གྲུབ་ན་དེས་བདག་འཛིན་ལྷན་སྐྱེས་གཉིས་པོ་དྲུང་ནས་འབྱིན་
ནུས་ཏེ། སྤྱིར་འགྲོ་བ་རྣམས་ཀྱི་རྒྱུད་ལ་ལྷན་སྐྱེས་ཀྱི་རྨོངས་པའི་དབང་གིས་བུམ་སོགས་དངོས་པོ་རྣམས་ལ་དེ་དང་དེར་གྲུབ་པར་འཛིན་ཞིང་། དངོས་པོ་ལ་བརྟེན་ནས་དངོས་མེད་ཀྱི་ཐ་སྙད་ཀྱང་བྱེད་ལ། དངོས་དང་དངོས་མེད་ལ་དེ་ཉིད་དུ་ཞེན་པ་དང་། རང་རྒྱུད་ཀྱི་ཕུང་པོ་
ལྔ་ལ་བརྟེན་ནས་ངའོ་སྙམ་དུ་མ་བརྟགས་མ་དཔྱད་པར་འཛིན་པའི་འཇིག་ལྟ་ལྷན་སྐྱེས་ཀྱང་འབྱུང་ཞིང་། དེ་ལྟར་ཆོས་དང་གང་ཟག་གྲུབ་གྲུབ་ལྟར་ཞེན་པའི་ངོ་བོ་དེ་དག་གི་གདགས་གཞི་ནི་ཕུང་སོགས་ཡིན་ལ། གཞན་ཡང་ཐ་སྙད་དུ་མེད་བཞིན་ལོག་པའི་རྒྱུ་མཚན་བཟུང་
13-1-43a


སྟེ་རང་བློས་ནན་གྱིས་བཏགས་པ་རྟག་དངོས་ཀྱི་བདག་ལ་སོགས་པ་འདུ་ཤེས་སྣ་ཚོགས་འཇུག་ཅིང་ཞེན་པའི་སྲད་བུས་བྱིས་པ་རྣམས་བཅིངས་པར་གྱུར་ཏོ། །དེ་ལ་དེ་རྣམས་གཅིག་བཀག་པས་གཅིག་ཁེགས་པ་དང་མི་ཁེགས་པའི་ཚུལ་ནི།
རྟག་དངོས་སུ་ཞེན་པའི་ཡུལ་རྣམས་དེ་དང་དེ་འགོག་པའི་རིགས་པས་བཀག་ཀྱང་། དེ་ངར་འཛིན་ལྷན་སྐྱེས་ཀྱི་རྟེན་མ་ཡིན་པས་ད་རུང་ངར་འཛིན་ལྷན་སྐྱེས་མི་ཁེགས་ཀྱང་། ངར་འཛིན་ལྷན་སྐྱེས་ཀྱིས་གཟུང་བ་ལྟར་གྱི་ཡུལ་བདག་མེད་པར་ཤེས་ན། བདག་དེ་རྟག་པ་
དང་བྱེད་པོ་སོགས་སུ་འདོད་པའི་ཀུན་བཏགས་ཐམས་ཅད་ཁེགས་ཏེ། མོ་གཤམ་གྱི་བུ་མེད་པར་ཤེས་ན་དེའི་ཁ་དོག་ཀྱང་མེད་པར་ཐག་ཆོད་པ་བཞིན་ནོ། །དེ་ལྟར་འདིར་ཡང་གང་ཟག་དང་འདུས་བྱས་འདུས་མ་བྱས་ཀྱི་ཆོས་ཐམས་ཅད་བདེན་པའི་གཅིག་དུ་བྲལ་གྱིས་རང་
བཞིན་མེད་པར་གྲུབ་ན་བདག་གཉིས་ཀྱི་འཛིན་པ་ག་ལ་འབྱུང་སྟེ། ཤེས་བྱ་ཐམས་ཅད་རང་བཞིན་མེད་པར་གཏན་ལ་ཕབ་གྲུབ་པའི་ཕྱིར་རོ། །དེས་ན་ཀུན་བཏགས་དང་ལྷན་སྐྱེས་ཀྱི་གཟུང་ཡུལ་རྣམས་བསྡོམས་ཏེ་ཆོས་ཅན་དུ་མཛད་པ་སྟེ། འཇིག་རྟེན་གནོད་
མེད་ཀྱི་ཤེས་པ་ལ་སྣང་བའི་དངོས་པོ་ཙམ་དུ་མ་ཟད་ཕྱི་རོལ་པས་ཀུན་ཏུ་བཏགས་པ་སོགས་ཀྱང་བསྡུ་བའི་ཆེད་ཡིན་ནོ། །གཉིས་པ་གཏན་ཚིགས་ཐལ་རང་གང་ཡིན། དོན་སྒྲུབ་དང་ཐ་སྙད་སྒྲུབ་གང་ཡིན། མེད་དགག་དང་མ་ཡིན་དགག་གང་ཡིན་དཔྱད་
པའོ། །དང་པོ་གཏན་ཚིགས་འདི་ཐལ་འགྱུར་དུ་འགོད་དམ། རང་རྒྱུད་དུ་འགོད། དང་པོ་ལྟར་ན་རྟགས་ཕ་རོལ་པོས་ཁས་བླངས་པས་གྲུབ་པ་ཞིག་དགོས་པ་ལ། འདིར་ནི་ཕ་རོལ་པོས་གཅིག་དང་དུ་མ་བྲལ་བར་ཁས་མ་བླངས་པས་མི་འཐད་ཅིང་། གལ་ཏེ་རང་
13-1-43b


རྒྱུད་དུ་འགོད་ན་རྟགས་ལ་ཚུལ་གསུམ་ཚང་བས་ཚད་མས་གྲུབ་པ་ཞིག་དགོས་པ་ལ། འདིར་ཆོས་ཅན་རྟག་བདག་དང་རྟག་པའི་དབང་ཕྱུག །རྡུལ་དང་ཤེས་པ་ཆ་མེད་རྣམས་མ་གྲུབ་པས་ཆོས་ཅན་མི་འགྲུབ་ལ། དེ་མ་གྲུབ་ན་ཕྱོགས་ཆོས་འགྲུབ་ཐབས་མེད་
པས་ཚུལ་གསུམ་མི་ཚང་བར་འགྱུར་རོ་སྙམ་ན། རྒྱ་བོད་ཀྱི་མཁས་པ་ལ་ལས་གཞན་སྡེས་བརྟགས་པ་མ་གྲགས་པ་ལ་ཐལ་བར་སྒྲུབ་པ་དང་། གྲགས་པའི་ངོ་བོ་རྣམས་ལ་གཉིས་ཀ་ལྟར་ཡང་རུང་གསུངས་ཀྱང་། དབུ་མ་སྣང་བ་སོགས་ལས་བཤད་པ་ལྟར་ཁྱད་
ཕྱེ་མི་དགོས་པར་ཐལ་རང་གང་ལྟར་བཀོད་ཀྱང་རུང་ངོ་། །དེ་ལ་ཐལ་འགྱུར་དུ་འགོད་ན། ཕ་རོལ་པོས་དངོས་སུ་གཅིག་དུ་བྲལ་ཡིན་ནོ་ཞེས་ཁས་མ་བླངས་ཀྱང་། ཁྱབ་བྱ་དངོས་སུ་ཁས་བླངས་པ་དེ་ཐལ་འགྱུར་དུ་བཀོད་ནས་བསྒྲུབས་པས་རྟགས་དེ་ལས་གཞན་ལ་
ལྟོས་མི་དགོས་པར་གཅིག་དུ་བྲལ་དུ་ཁས་ལེན་དགོས་པ་ལས་འོས་མེད་པ་ཡིན་ཏེ། དཔེར་ན་དབང་ཕྱུག་རྟག་པར་ཁས་ལེན་ཀྱང་དེའི་འབྲས་བུ་རྣམས་དུ་མར་ཁས་བླངས་པས་ན། དུ་མར་ཁས་བླངས་པའི་འབྲས་བུ་དེ་ཉིད་ཀྱིས་དབང་ཕྱུག་གཅིག་ཡིན་པ་འགོག་
ནུས་ཤིང་། གཅིག་ཡིན་པ་ཁེགས་ན་དུ་མའང་ཁེགས་པས། དོན་དུ་རྒོལ་བ་རང་གིས་ཁས་བླངས་ཀྱི་རྟགས་ཀྱིས་གཅིག་བྲལ་བསྒྲུབས་པ་ཡིན་ལ། དུ་མར་ཁས་བླངས་པས་གཅིག་བྲལ་དུ་གྲུབ་བོ། །དེ་བཞིན་དུ་ཀུན་ལ་འགྲེའོ། །ཡང་རང་རྒྱུད་དུ་སྦྱོར་
ཡང་རུང་སྟེ། ཆོས་ཅན་དབང་ཕྱུག་རྟག་པ་སོགས་དོན་ལ་མི་སྲིད་ཀྱང་། བློ་ངོར་དབང་ཕྱུག་རྟག་པ་མིན་པ་ལས་ལོག་ཙམ་གྱིས་གཞན་སེལ་འགྲུབ་ལ། དེ་ལ་བདེན་མེད་ཀྱི་ཐ་སྙད་གྲུབ་པས། ཕྱི་རོལ་ན་རྟག་དངོས་ཀྱི་དབང་ཕྱུག་ཞིག་ཡོད་པར་ཞེན་པའང་
13-1-44a


ཁེགས་ཏེ། རྟག་པའི་སྒྲ་ཆོས་ཅན་དུ་བཞག་པ་ལ་སོགས་པའང་དེ་དང་འདྲ་བར་རང་རང་གི་བློས་ཇི་ལྟར་བཞག་པ་དེ་ཙམ་ལ་དགག་པ་འཇུག་པ་ཆེས་འཐད་པ་ཡིན་ཏེ། རང་གི་བློ་ངོར་གཞན་སེལ་གྱིས་བཟུང་ཙམ་དང་། ཕྱི་རོལ་གྱི་སྣང་
བ་གཉིས་སྣང་བཏགས་གཅིག་ཏུ་བསྲེས་ནས་འཛིན་པ་ལ་དགག་སྒྲུབ་ཀྱི་ཐ་སྙད་ཐམས་ཅད་འཇུག་པ་ཚད་མ་སྤྱིའི་ལུགས་དམ་པ་ཡིན་པའི་ཕྱིར་རོ། །དེས་ན་ཆོས་ཅན་དོན་དུ་མི་སྲིད་པ་རྣམས་ལ་བརྟག་བྱ་དོན་གྱི་རང་མཚན་མེད་ཀྱང་ཡོད་པ་ལྟར་ཞེན་པའི་སྣང་
ངོའི་ཡུལ་དེ་ལ་བདེན་མེད་ཀྱི་ཐ་སྙད་གྲུབ་པས་དེ་དོན་དུ་མེད་པར་ཤེས་ནུས་སོ། །གཉིས་པ་དོན་དང་ཐ་སྙད་སྒྲུབ་གང་ཡིན་དཔྱད་པ་ལ། གལ་ཏེ་འདི་དོན་སྒྲུབ་ཀྱི་གཏན་ཚིགས་ཡིན་ན། རང་བཞིན་མེད་པའི་དོན་ནི་དགག་བྱའི་རང་བཞིན་མེད་པར་དགག་པ་
ཙམ་སྟེ། བཀག་པའི་ཤུལ་དུ་ཆོས་གཞན་མི་འཕེན་པས། དེ་ཙམ་ཞིག་འདིས་སྒྲུབ་ན་བསྒྲུབ་པར་བྱ་བའི་གཞི་ཆོས་ཅན་རྣམས་རྙེད་པར་མི་འགྱུར་ཏེ་ནམ་མཁའི་མེ་ཏོག་བཞིན་ནོ། །དེ་ལྟར་ན་ཆོས་དང་ཆོས་ཅན་ཐ་དད་དུ་མེད་པར་འགྱུར་རོ། །གལ་
ཏེ་འདིས་ཐ་སྙད་སྒྲུབ་བོ་ཞེ་ན། རང་བཞིན་མེད་པའི་ཐ་སྙད་དངོས་པོའི་ཆོས་རྣམས་ཀྱི་སྟེང་དུ་བསྒྲུབ་ཚེ། བུམ་མེད་ཀྱི་ས་ཕྱོགས་བཞིན་དུ་རང་བཞིན་མེད་པ་དང་ལྡན་པའི་གཞི་ཉིད་གྲུབ་པར་འགྱུར་རོ་ཞེ་ན། འདི་དོན་སྒྲུབ་ཡིན་ཀྱང་བསྒྲུབ་གཞི་རྣམས་
མེད་པར་མི་འགྱུར་ཏེ། ཐོག་མེད་དངོས་ཞེན་གྱི་དབང་གིས་ཇི་ལྟར་སྣང་བ་དེ་ལ་བདེན་པར་ཞེན་པའི་དངོས་པོ་རྣམས་རང་བཞིན་མེད་པ་ཙམ་དུ་བསྒྲུབ་ཀྱི། ཆོས་གཞན་ངོ་བོས་དམིགས་སུ་ཡོད་པ་རྡུལ་ཙམ་བསྒྲུབ་པ་མེད་ཀྱང་། འཇིག་རྟེན་ན་རབ་ཏུ་གྲགས་
13-1-44b


པའི་དངོས་ལ་ཞེན་པ་ཅན་གྱི་ངོར་སྣང་བ་འདི་རྣམས་ལ་བརྟེན་ནས། རང་བཞིན་མེད་པའི་ཆོས་ཅན་དང་བསྒྲུབ་བྱའི་ཐ་སྙད་འཐད་དོ། །གལ་ཏེ་ཕྱི་ནང་གི་དངོས་པོ་སྒྱུ་མ་ལྟ་བུའི་སྣང་བ་འདི་སྣང་ཚོད་གྲགས་ཚོད་དང་བསྟུན་ཏེ་ཆོས་ཅན་དུ་གཟུང་བ་ལ་
རྟགས་ཡང་དག་གི་སྒོ་ནས་རང་བཞིན་མེད་པའི་སྒྲ་བློའི་ཐ་སྙད་བསྒྲུབ་སྟེ། ནོག་སོགས་འདུས་པ་ལ་བ་ལང་གི་ཐ་སྙད་དུ་གདགས་པ་བཞིན། ངེས་ཟིན་ལ་ཡང་ཡང་དྲན་པར་བྱ་བ་དང་། མ་ངེས་པ་རྣམས་ལ་རྟགས་ལས་རྗེས་སུ་དཔོགས་པར་བྱས་ཀྱང་། ཆོས་
དང་ཆོས་ཅན་ཐ་དད་དུ་མི་འགྱུར་ཏེ། རང་བཞིན་མེད་ཀྱང་སྣང་བར་མི་འགལ་བ་ནི་དངོས་པོའི་ཆོས་ཉིད་དོ། །སྔ་ཕྱི་གཉིས་ཀྱི་དཔེ་ནི་ཆུ་ནང་གི་ཟླ་བའི་གཟུགས་བརྙན་བཞིན་ནོ། །འདི་ལ་དཔེ་ཆ་གཞན་ཀུན་ན་ཕྱོགས་གང་རུང་རེར་འཛིན་པ་ལས་མི་སྣང་ཡང་། འདི་བཞིན་
ཤེས་ན་སྤྱི་དང་ཁྱད་པར་སྐབས་འདིར་གོ་བ་ཤིན་ཏུ་ལེགས་པ་གལ་ཆེ་བ་ཞིག་ཡིན་ནོ། །གསུམ་པ་རྟགས་དང་དགག་བྱ་གཉིས་ཀ་མེད་དགག་ཡིན་ནམ། མ་ཡིན་དགག་ཡིན། དང་པོ་ལྟར་ན་དགག་བྱ་བཅད་ཙམ་ལས་རང་གི་ངོ་བོ་མེད་པའི་དངོས་མེད་རྐྱང་
པ་ཙམ་ལ་འབྲེལ་བ་མི་སྲིད་པས། བསྒྲུབ་བྱ་གོ་བྱ་དང་། གཏན་ཚིགས་གོ་བྱེད་དུ་མི་རུང་ལ། མ་ཡིན་དགག་ཡིན་ན་ནི་དགག་བྱ་བཀག་ཤུལ་དུ་སྒྲུབ་ཆོས་དངོས་པོ་ཞིག་ཁས་ཅིའི་ཕྱིར་མི་ལེན་སྙམ་ན། འདི་ལ་མཁས་པ་དག་རྣམ་པར་ཕྱེ་སྟེ་སོ་སོར་སྒྲུབ་
པ་མང་ཡང་། རྟགས་གཅིག་དུ་བྲལ་དང་། བསྒྲུབ་བྱ་བདེན་མེད་གཉིས་ཀ་མེད་དགག་ཡིན་ཏེ།  དགག་བྱ་རྣམ་པར་བཅད་ཙམ་གྱི་མེད་པ་ཡིན་ཀྱང་རྟགས་དང་བསྒྲུབ་བྱ་འབྲེལ་མེད་དུ་མི་འགྱུར་ཏེ། དགག་བྱ་བཅད་ལྡོག་གི་གཞན་སེལ་གཉིས་ཀ་བདག་མེད་ཀྱི་ངོ་བོར་
13-1-45a


འདྲ་བས་ངོ་བོ་གཅིག་གི་འབྲེལ་བ་གྲུབ་བོ། །དེས་ན་འདོད་ཚུལ་སྣ་ཚོགས་པ་དེ་དག་དགག་སྒྲུབ་ཀྱི་ངལ་བ་མང་པོ་བྱེད་ཀྱང་། སྣང་སེལ་ལེགས་པར་ཕྱེད་ན་ཐེ་ཚོམ་གྱི་སྨག་དྭངས་པར་འགྱུར་གྱི། གཞན་དུ་ཇི་ལྟར་དཔྱད་ཀྱང་ཇི་བཞིན་
པའི་ངེས་པ་རྙེད་དཀའོ། །སྤྱིར་རྟགས་རིགས་འདི་སྐབས་གཞན་སེལ་དང་ཚུལ་གསུམ་དང་དགག་སྒྲུབ་ཀྱི་རྣམ་གཞག་དཔྱིས་ཕྱིན་པ་གལ་ཆེ་ཡང་འདིར་ཡི་གེ་མང་གིས་དོགས་ནས་མ་བྲིས་ཀྱང་ཞིབ་ཏུ་ཚད་མའི་གཞུང་ལས་ཤེས་པར་བྱའོ། །གསུམ་པ་སྣང་ཡང་
བདེན་པ་མེད་པའི་དཔེ་ནི་གཟུགས་བརྙན་ལ་སོགས་པ་སྟེ། དེའང་ཡབ་སྲས་མཇལ་བའི་མདོ་ལས། མེ་ལོང་ཤིན་ཏུ་ཡོངས་དག་ལ། །ཇི་ལྟར་རང་བཞིན་མེད་པ་ཡི། །གཟུགས་བརྙན་སྣང་བ་དེ་བཞིན་དུ། །ལྗོན་པ་ཆོས་འདི་ཤེས་པར་གྱིས། །ཞེས་གསུངས་པ་ལྟར། གཟུགས་
བརྙན་ལ་སོགས་པ་འདི་རྣམས་སྣང་ཡང་མི་བདེན་པར་འཇིག་རྟེན་པ་རྣམས་ཀྱིས་ཀྱང་ཁས་ལེན་པ་དེ་ལ་དཔེར་བྱས་ནས་ཆོས་ཀུན་ཀྱང་དེ་དང་འདྲ་བར་གཏན་ཚིགས་ཀྱིས་ཤེས་པར་བྱེད་པ་ཡིན་ལ། དེའང་མེ་ལོང་དང་བཞིན་ཕན་ཚུན་རྟེན་འབྲེལ་དུ་གྱུར་པ་ན། 
གདོང་གི་རྣམ་པ་ཇི་ལྟ་བུའི་གཟུགས་བརྙན་འབྱུང་སྟེ། གཟུགས་ལ་ཇི་ལྟར་ཡོད་པའི་མདོག་དང་དབྱིབས་ལ་སོགས་པ་མ་འདྲེས་པར་མངོན་སུམ་དམིགས་ཤིང་། དེ་མ་བརྟགས་མ་དཔྱད་པར་མཐོང་ཙམ་སྣང་ཙམ་དེ་ཉིད་དུ་བཞག་ན། གཟུགས་དངོས་དང་ཁྱད་མེད་
པ་ལྟ་བུར་སྣང་ཡང་དཔྱད་ན་དེ་ལ་གདོང་ལ་སོགས་པའི་གཟུགས་དངོས་ཡིན་པའི་ཆ་རྡུལ་ཕྲ་བ་ཙམ་ཡང་མི་རྙེད་ལ་དེ་ཙམ་དུ་མ་ཟད་སྣང་ཙམ་འགོག་མེད་དུ་རང་གིས་ཉམས་སུ་མྱོང་ཡང་བརྟགས་ན་གཟུགས་བརྙན་དེ་གང་དུ་མཐོང་བའི་གོ་ས་མེ་ལོང་གི་ཕྱི་ནང་བར་གསུམ་དང་། ཤེས་
13-1-45b


པ་དང་ཡུལ་གྱི་བར་སྟོང་པའི་ཆ་དང་། ནང་གི་ཤེས་པ་ཉིད་ཀྱི་ཆ་ཀུན་ཏུ་ཡང་མེད་ན་ཕྱོགས་གཞན་དུ་ག་ལ་ཡོད། མ་རྙེད་བཞིན་དུ་ཡོད་པར་འཛིན་པའང་རིགས་པ་མིན་ཏེ། གལ་ཏེ་མ་རྙེད་པར་ཡང་ཡོད་པར་བཟུང་བས་ཆོག་ན་མོ་གཤམ་བུ་ཡང་ཡོད་པར་ཅིས་མི་འཛིན། 
དེས་ན་སྣང་ཡང་བདེན་པ་མེད་པ་དཔེ་དེའི་ཚུལ་དུ་ཤེས་པར་བྱའོ། །དེ་བཞིན་དུ་ཏིང་འཛིན་རྒྱལ་པོ་ལས། ཇི་ལྟར་མཚན་མོ་ཆུ་ཡི་ཟླ་བ་དག །དྭངས་ཤིང་རྙོག་པ་མེད་པའི་ཆུ་ནང་སྣང་། །ཆུ་ཟླ་སྟོང་པ་གསོག་སྟེ་གཟུང་དུ་མེད། །ཆོས་རྣམས་ཐམས་ཅད་
དེ་བཞིན་ཤེས་པར་གྱིས། །ཞེས་གསུངས་སོ། །དེ་ལ་འདི་སྐབས་དཔེ་ལ་ལོག་པར་རྟོག་པ་ཅུང་ཟད་དགག་ན། རྒྱལ་དཔོགས་པ་ལ་སོགས་པ་ན་རེ། འདི་ལྟར་གཟུགས་བརྙན་མཐོང་བ་ནི། མེ་ལོང་གི་ངོས་ལ་རང་གི་མིག་གི་འོད་ཟེར་ཕོག་
ནས་ཕྱིར་ལོག་པས་རང་གི་བཞིན་ལ་སོགས་པ་དེ་ལྟར་དམིགས་པ་ཡིན་པ་ལ་གཟུགས་བརྙན་གྱི་ཐ་སྙད་བཏགས་སོ་ཞེས་ཟེར་རོ། །དེ་དག་གི་ལྟར་ན་ཐ་སྙད་དུ་གཟུགས་བརྙན་ཞེས་མཐོང་ཚུལ་ལ་བརྟེན་ནས་བཏགས་པ་མ་གཏོགས་ངོ་བོ་གཟུགས་དངོས་དང་བདག་
གཅིག་ཏུ་འབྲེལ་བ་ལྟ་བུར་འདོད་པ་ལ། དེ་མི་འཐད་དེ་ལུགས་དེ་ལྟར་ན་མེ་ལོང་གི་ངོས་བྱང་དུ་བལྟས་ན་གཟུགས་བརྙན་ལྷོ་ཕྱོགས་སུ་བལྟས་པ་མ་མཐོང་བས་གཟུགས་དང་གཟུགས་བརྙན་གཉིས་ཕྱོགས་འགལ་བ་དང་། མེ་ལོང་གི་ངོས་ཆུང་ངུ་ལ་རང་གི་བཞིན་
ཆེན་པོའི་གཟུགས་བརྙན་ཆུང་ངུར་སྣང་བས་ཚད་མི་འདྲ་བ་དང་། གཟུགས་བརྙན་མེ་ལོང་གི་ནང་དུ་སོན་པར་སྣང་བས་གནས་མི་འདྲ་བ་དང་། ཡང་ཆུ་དྭངས་པའི་མཚོ་འགྲམ་གྱི་རི་དང་ཤིང་གི་ཡལ་ག་དང་རྩེ་མོ་གྱེན་དུ་བལྟས་པ་མང་པོའི་གཟུགས་བརྙན་ཡལ་ག་དང་རྩེ་མོ་
13-1-46a


ཐུར་དུ་བསྟན་པར་དམིགས་པས་གནས་སྐབས་མི་མཐུན་པ་དེས་ན་གཟུགས་བརྙན་འཛིན་པའི་ཤེས་པ་དང་། གཟུགས་འཛིན་པའི་ཤེས་པ་གཉིས་ཀྱི་དམིགས་པ་མི་འདྲ་བས་ན། དཔེར་ན་སྒྲ་ཤེས་དང་གཟུགས་ཤེས་བཞིན་དུ་སྤྱོད་ཡུལ་
ཐ་དད་པ་ཡིན་གྱི། གཟུགས་བརྙན་འཛིན་པའི་ཤེས་པས་རང་གི་བཞིན་ལ་སོགས་པ་གཟུགས་དངོས་བཟུང་བ་མིན་པར་ཤེས་པར་བྱའོ། །ཡང་བྱེ་བྲག་ཏུ་སྨྲ་བ་ན་རེ། གཟུགས་བརྙན་ནི་མེ་ལོང་ལ་སོགས་པའི་ནང་དུ་ཤིན་ཏུ་དྭངས་པའི་གཟུགས་གཞན་ཞིག་བྱུང་བ་
ཡིན་ནོ་ཞེས་ཟེར་བ་དེ་མ་ཡིན་ཏེ། གཟུགས་རྡུལ་ཕྲན་གྱི་རང་བཞིན་ཡིན་པས་ལུས་ཅན་རྣམས་ནི་ཕན་ཚུན་གཅིག་གི་གོ་སར་གཅིག་འབྱུང་བ་ལ་གེགས་མི་བྱེད་པ་མི་སྲིད་པས་ཡུལ་ཕན་ཚུན་སྤངས་ཏེ་གནས་པ་ཡིན་ལ། དེ་ལྟར་མིན་པར་གོ་ས་གཅིག་ཏུ་ཞུགས་ན་ཕན་
ཚུན་ཐ་དད་མེད་པར་འདྲེས་ཤིང་ངོ་བོ་གཅིག་གི་བདག་ཉིད་དུ་འགྱུར་བར་འདོད་དགོས་པས། འདིར་གཟུགས་བརྙན་ནི་མེ་ལོང་ལ་སོགས་པའི་ངོས་ཀྱི་ཕྱོགས་དེ་ཉིད་ན་དམིགས་པར་གྱུར་པས་གཟུགས་བརྙན་ཡང་གཟུགས་ཡིན་པར་གྱུར་ན། གཟུགས་གཉིས་གོ་ས་
གཅིག་ཏུ་ཇི་ལྟར་གནས་ཏེ། བུམ་པ་གཉིས་བུམ་པ་གཅིག་གི་གོ་སར་གནས་མི་སྲིད་པ་བཞིན་ནོ། །གཏན་ཚིགས་འདི་རླུང་དང་ཉི་མ་ལ་སོགས་པས་མ་ངེས་པའང་མ་ཡིན་ཏེ། རླུང་དང་ཉི་མ་ལ་སོགས་པའི་རྡུལ་ཕྲ་མོ་རྣམས་ཐལ་བ་དང་རྩམ་པ་ལྟར་འདྲེས་པ་
ཡིན་མོད་ཀྱི། ཡུལ་ཕན་ཚུན་སྤངས་ཏེ་གནས་པ་ཡིན་གྱི་གཅིག་ཏུ་སོང་བ་མིན་ནོ། །དེ་ལྟར་རྒྱལ་དཔོགས་པ་དང་བྱེ་སྨྲ་བ་གཉིས་གཟུགས་བརྙན་ལ་གཟུགས་སུ་ཞེན་པས་དེ་མ་བཀག་ན། བསྒྲུབ་པར་བྱ་བ་དང་སྒྲུབ་པའི་ཆོས་གཉིས་ཀ་དང་ལྡན་པའི་དཔེ་
13-1-46b


གཟུགས་བརྙན་བཀོད་པ་མ་གྲུབ་པར་འགྱུར་བའི་ཕྱིར་བཀག་ལ། ཡང་གཟུགས་བརྙན་ཤེས་པར་འདོད་པ་མདོ་སྡེ་པ་ལ་སོགས་པ་ན་རེ། དངོས་པོའི་ནུས་པ་བསམ་གྱིས་མི་ཁྱབ་པའི་མཐུས་མེ་ལོང་སོགས་ཀྱི་རྐྱེན་ལས་ཤེས་པ་ཉིད་གཟུགས་བརྙན་དེའི་
རྣམ་པར་སྣང་བ་ཙམ་དུ་བྱུང་བ་ཡིན་ནོ་ཞེས་ཟེར་རོ། །དེ་ལ་གཟུགས་བརྙན་འདི་ནི་ཡུལ་མེད་ཀྱི་ཤེས་པ་དེ་ལྟར་སྣང་བའོ་ཞེས་འདོད་ན། གཟུགས་ལ་སོགས་པ་བདེན་པར་འདོད་པའང་ཡུལ་མེད་བཞིན་དུ་སྣང་བ་ཡིན་ནོ་ཞེས་ཅིའི་ཕྱིར་མི་འདོད་དེ། གཟུགས་གཟུགས་
བརྙན་གཉིས་ཀའི་སྣང་བ་ནི་རྣམ་པ་ཙམ་དུ་འདོད་པས་སོ། །གལ་ཏེ་གཟུགས་བརྙན་ནི་རྣམ་པ་གཏོད་བྱེད་ཀྱི་ཡུལ་ཉིད་དུ་མི་འཐད་དེ་གཟུགས་བརྙན་ཉིད་མི་འགྲུབ་པས་ཡུལ་མེད་ལ་ཤེས་པ་ཙམ་མོ་སྙམ་ན། དེ་ལྟར་ན་རྣམ་པ་གཏོད་བྱེད་ཀྱི་ཡུལ་ཕྱི་རོལ་ན་ཡོད་པར་འདོད་
པ་གཟུགས་སོགས་ཀྱང་རྡུལ་ཕྲ་རབ་ཉིད་དུའང་མ་གྲུབ་པ་སོགས་གཟུང་བ་འགོག་པའི་རིགས་པས་ཡུལ་ལ་གནོད་པ་ཡོད་པས་གཟུགས་བརྙན་དང་ཁྱད་མེད་དུ་ཐལ་ལོ། །དེ་བཞིན་དུ་སྒྱུ་མ། རྨི་ལམ། སྨིག་རྒྱུ། དྲི་ཟའི་གྲོང་ཁྱེར་དང་། མགལ་མེའི་འཁོར་
ལོ་ལ་སོགས་པའི་དཔེའང་དེའི་ཚུལ་གྱིས་གྲུབ་པར་བཤད་དོ། །དེ་ལ་གཞོན་ནུ་མ་ལེན་ལ་སོགས་པ་ན་རེ། སྒྱུ་མ་ལ་སོགས་པ་མི་བདེན་པ་ནི་མ་ཡིན་ཏེ། དཔེར་ན་འཇིམ་པའི་དུམ་བུ་ལ་སྒྱུ་མའི་སྒྲར་བརྗོད་དམ། འོན་ཏེ་དེ་ལྟར་སྣང་བའི་ཤེས་པ་ལ་ཟེར། 
དང་པོ་ལྟར་ན་གཟུགས་ཡིན་ལ། ཕྱི་མ་ལྟར་ན་ཤེས་པ་ཡིན་པས་གང་ལྟར་ཡང་སྒྱུ་མའི་རྟ་གླང་སོགས་མེད་པར་མི་གྲུབ་སྟེ། དེ་བཞིན་དུ་རྨི་ལམ་ལ་སོགས་པ་ཐམས་ཅད་ལ་རྒྱུར་གྱུར་པའི་གཟུགས་སམ་ཤེས་པ་གང་རུང་བདེན་པར་ཡོད་པས་ན་ཐམས་ཅད་
13-1-47a


བདེན་མེད་ཀྱི་དཔེར་མི་རུང་ངོ་ཞེས་ཟེར་རོ། །དེ་མི་འཐད་དེ། འདི་ལྟར་སྒྱུ་མ་སོགས་ཀྱི་སྣང་བ་ནི། རྣམ་བཅས་པ་ཤེས་པའི་རྣམ་པ་སྣང་བར་འདོད་པའམ། རྣམ་མེད་པ་ཡུལ་དངོས་སུ་རིག་པར་འདོད་པའི་ཕྱོགས་གཉིས་པོ་
གང་ཡིན་ཀྱང་རུང་སྟེ། བློ་ངོ་ལ་ཇི་ལྟར་སྣང་བའི་དམིགས་ཡུལ་དེ་ཉིད་ལ་འཇོག་གི། དེའི་རྒྱུ་ཙམ་ལ་སྒྱུ་མ་སོགས་ཀྱི་སྣང་བར་གདགས་པ་མིན་ཏེ། རྒྱུ་ཙམ་ལ་གདགས་ན་མིག་སོགས་ཀྱང་རྒྱུ་ཡིན་པས་དེ་རྣམས་ཀྱང་སྒྱུ་མ་སོགས་སུ་ཐལ་བའི་ཕྱིར་རོ། །
དེས་ན་རྒྱུ་དང་དམིགས་པ་ཐ་དད་ཡིན་པས་ན། སྒྱུ་མ་སོགས་ཀྱི་རྒྱུར་གྱུར་པ་གཟུགས་དང་ཤེས་པ་དག་ཡོད་དུ་ཟིན་ཀྱང་དེ་ལ་དཔེར་བྱས་པ་མིན་ཏེ། དཔེར་ན་འཇིམ་པའི་དུམ་བུ་ཡོད་དུ་ཟིན་ཀྱང་དེ་རྟ་གླང་སོགས་སུ་མ་དམིགས་ན། དེ་ལ་སྒྱུ་མའི་སྣང་བ་ཞེས་
མི་བརྗོད་ཅིང་དཔེར་ཡང་མི་བྱེད་ལ། འཇིམ་དུམ་དེ་ཉིད་རྟ་གླང་སོགས་སུ་དམིགས་ཚེ་དེ་ལ་སྒྱུ་མ་ཞེས་གདགས་ཤིང་དཔེར་བྱེད་པའོ། །དེ་ལ་སྤྱིར་དོན་ཤེས་ཉིས་ཆར་ཡང་བདེན་མེད་དུ་གྲུབ་པས་རྒྱུ་བདེན་པའོ་ཞེས་སྒྲུབ་པར་མི་ནུས་ལ། གལ་ཏེ་རེ་ཞིག་རྒྱུ་གཟུགས་
ཤེས་དག་ལ་བདེན་པར་རློམ་དུ་ཆུག་ནའང་། དེས་དམིགས་པ་ཉིད་བརྫུན་པ་ལ་བདེན་པར་བྱ་མི་ནུས་ཏེ། དཔེར་ན་སྒྱུ་མས་མིག་བསླད་ཀྱང་སྒྱུ་མ་ཡིན་པར་ཤེས་པ་དག་ལ་སྒྱུ་མའི་སྣང་བ་ཡོད་ཀྱང་། གཞི་དེར་རྟ་གླང་སོགས་ཡོད་པར་འཛིན་པ་ཅུང་ཟད་ཀྱང་མི་སྐྱེ་བ་
ཡིན་གྱི། འདིའི་རྒྱུ་འཇིམ་དུམ་དང་མིག་ཤེས་དང་སྒྱུ་མ་མཁན་སོགས་ཡོད་པས་འདིའང་བདེན་ནོ་སྙམ་དུ་མི་འཛིན་པ་བཞིན་ནོ། །དེས་ན་དམིགས་པ་ཉིད་ཐད་ཀ་རང་ས་ན་ཡིན་ཡིན་ལྟར་སྣང་འདུག་པ་སྟེ། སྣང་བ་ལྟར་མ་གྲུབ་པར་ཤེས་པ་ལ་དཔེར་བྱས་པས་
13-1-47b


དཔེ་མ་གྲུབ་པ་མིན་ནོ། །དེ་དག་རང་འགྲེལ་ལས་གསུངས་པ་རྣམས་གསལ་པོར་ཕྱེ་སྟེ་བཤད་པ་ཡིན་ནོ། །གཉིས་པ་རྩ་བའི་རྟགས་བཀོད་པ་དེའི་ཚུལ་སྒྲུབ་པ་ལ། ཕྱོགས་ཆོས་སྒྲུབ་པ་དང་། ཁྱབ་པ་སྒྲུབ་པ་གཉིས། དང་པོ་ལ་བདེན་
པའི་གཅིག་བྲལ་སྒྲུབ་པ་དང་།  བདེན་པའི་དུ་བྲལ་སྒྲུབ་པ་གཉིས། དང་པོ་ལ་ཁྱབ་པའི་གཅིག་དགག །མ་ཁྱབ་པའི་གཅིག་དགག་པ་གཉིས། དང་པོ་ལ་ཁྱབ་བྱེད་བྱེ་བྲག་པ་གཅིག་བདེན་དགག །མཁའ་སོགས་ཁྱབ་བྱེད་སྤྱི་གཅིག་བདེན་དགག་པ་
གཉིས། དང་པོ་ལ་རྟག་དངོས་གཅིག་བདེན་དགག །གང་ཟག་གཅིག་བདེན་དགག་པ་གཉིས། དང་པོ་ལ་གཞན་སྡེས་བཏགས་པའི་རྟག་དངོས་དགག །རང་སྡེས་བཏགས་པའི་རྟག་དངོས་དགག །དེ་ལྟར་བཀག་པའི་མཇུག་བསྡུ་བ་གསུམ། 
དང་པོ། འབྲས་བུ་རིམ་ཅན་ཉེར་སྦྱོར་བས། །རྟག་རྣམས་གཅིག་པུའི་བདག་ཉིད་མིན། །འབྲས་བུ་རེ་རེ་ཐ་དད་ན། །དེ་དག་རྟག་ལས་ཉམས་པར་འགྱུར། །ཞེས་གསུངས་ཏེ། དེ་ལ་སྤྱིར་གོང་དུ་ཇི་སྐད་བཤད་པའི་གཅིག་དུ་བྲལ་གྱི་
རྟགས་དེ་རང་གཞན་གྱི་སྡེ་པས་སྨྲས་པའི་དངོས་པོ་ཤེས་འདོད་ཆོས་ཅན་རྣམས་ཀྱི་སྟེང་དུ་གྲུབ་པ་ནི་ཚུལ་དང་པོ་ཕྱོགས་ཆོས་ཞེས་བྱ་ཞིང་། གཅིག་དུ་བྲལ་གྱི་རྟགས་དེ་ཡོད་ན་བསྒྲུབ་བྱ་བདེན་མེད་ཡོད་དགོས་པ་ནི་ཚུལ་གཉིས་པ་རྗེས་འགྲོའོ། །བསྒྲུབ་བྱ་བདེན་
མེད་མེད་ན་གཅིག་དུ་བྲལ་གྱི་རྟགས་ཀྱང་ལྡོག་པ་ནི་ཚུལ་གསུམ་པ་ལྡོག་ལྡན་ནོ། །དེ་ལྟར་བསྒྲུབ་བྱ་དང་རྟགས་གཉིས་རྗེས་སུ་འགྲོ་ཞིང་ལྡོག་པའི་འབྲེལ་པ་ཁྱད་པར་ཅན་ངེས་པས་ན་རྟགས་དེས་བསྒྲུབ་ཆོས་དེ་འགྲུབ་ངེས་པའི་ཁྱབ་པ་ཡོད་པ་ནི་ཁྱབ་པ་ཞེས་བྱ་སྟེ། 
13-1-48a


ཁྱབ་པ་གྲུབ་པའི་རྟགས་དེ་ཕྱོགས་ཤེས་འདོད་ཆོས་ཅན་གང་གི་ཆོས་སུ་འགྲུབ་ན་དེས་བསྒྲུབ་བྱ་འགྲུབ་པ་ལ་བསླུ་བ་མེད་པས་ཚུལ་གཉིས་དང་དྲུག་ལ་སོགས་པའི་མང་ཉུང་གི་མཐའ་ཡང་ཁེགས་པ་ཡིན་པ་དེས་ན། ཚུལ་གསུམ་
རྟགས་ལས་དོན་མཐོང་བའོ། །ཞེས་དང་། ཕྱོགས་ཆོས་དེ་ཆས་ཁྱབ་པ་ཡི། །ཞེས་གསུངས་པ་བཞིན་ནོ། །དེས་ན་རྩ་བའི་རྟགས་འགོད་པའི་ཚེ་གཅིག་དུ་བྲལ་གསུངས་པ་དེ། རང་གཞན་གྱི་སྡེ་པས་སྨྲས་པའི་དངོས་པོ་རྣམས་ཀྱི་སྟེང་དུ་གྲུབ་པའི་
ཚུལ་རིམ་པར་འཆད་པར་འདོད་ནས། འདི་ཐད་ཀྱི་སྔ་འགྲེལ་དུ་གཏན་ཚིགས་འདི་མ་གྲུབ་བོ་སྙམ་དུ་མ་སེམས་ཤིག །ཅེས་གསུངས་ལ། ཇི་ལྟར་གྲུབ་སྙམ་ན། དང་པོ་བདེན་པའི་གཅིག་བྲལ་བསྒྲུབ་པ་ཡིན་ཏེ། གཅིག་མ་གྲུབ་ན་དུ་མ་གྲུབ་པ་མི་སྲིད་ཅིང་དུ་
མའི་བརྩམ་གཞི་གཅིག་ཡིན་པས་དེ་དང་པོར་སྒྲུབ་བོ། །དེ་ལ་སྤྱིར་ཤེས་བྱའི་ཁོངས་ན་མཐའ་གཅིག་ཏུ་བདེན་པར་གྲུབ་པ་ཞིག་ཡོད་ན་སྣང་བ་དང་མི་སྣང་བ་སོགས་ཀྱི་ཆ་དབྱེ་རྒྱུ་མེད་པར་གཅིག་པུའི་བདག་ཉིད་དུ་ཕྱོགས་དུས་ཐམས་ཅད་ན་ཡོད་དགོས་ལ། དེ་
ལྟར་ན་མཐར་ཕྱོགས་དུས་ཀྱིས་བསྡུས་པའི་ཤེས་བྱ་ཐམས་ཅད་ཀུན་སོ་སོར་མི་སྣང་བར། རིལ་གཅིག་ཏུ་ནམ་མཁའ་འབའ་ཞིག་ལྟ་བུར་འགྱུར་དགོས་ན། དེ་ལྟར་མ་ཡིན་པར་ཕྱོགས་དུས་ཀྱི་སྣང་བ་སྣ་ཚོགས་ཚད་མེད་པ་ཆེས་བཀྲ་བ་མངོན་སུམ་དུ་སྣང་བ་འདི་དག་
གཅིག་ཏུ་བདེན་པ་མེད་པའི་གནད་ཀྱིས་སྣང་བ་ཁོ་ན་ཡིན་པས། གང་སྣང་སྲིད་འཁོར་འདས་ཀྱིས་བསྡུས་པའི་ཤེས་བྱ་ཡིན་ནོ་ཅོག་ལ་གཅིག་དུ་བྲལ་གྱི་རིགས་པ་མི་འཇུག་པ་ཞིག་མི་སྲིད་དོ། །དེས་ན་འདིར་བདག་གཞན་གྱིས་སྨྲས་པའི་དངོས་པོ་རྣམས་ཀྱི་སྟེང་དུ་
13-1-48b


རྟགས་གྲུབ་ཚུལ་རིམ་པས་སྟོན་པ་ལ་ས་བཅད་ཀྱི་དབང་དུ་ན། རྟག་མི་རྟག་གཉིས་སམ། ཕྱི་གཟུང་ཡུལ་དང་། ནང་འཛིན་སེམས་གཉིས་སམ། ཤེས་བྱའི་ཡུལ་དང་། ཤེས་བྱེད་ཀྱི་བློ་གཉིས་ཀྱིས་བསྡོམས་ཀྱང་རུང་མོད། འདིར་དཀའ་འགྲེལ་ལས།
ཁྱབ་པ་ནི་བདག་དང་ནམ་མཁའ་ལ་སོགས་པའོ། །མི་རྟག་པ་རྣམས་ནི་མ་ཁྱབ་པའི་ཕུང་པོར་བསྡུ་བར་བཤད་པ་ལྟར། དེ་གཉིས་ཀྱིས་སྡོམ་དུ་བྱས་པ་ཡིན་ལ། རྟག་དངོས་དང་གང་ཟག་ཡོད་པར་སྨྲ་བའི་ལུགས་ལ་དེ་དག་ཡུལ་ཐ་དད་ན་རིས་སུ་བཅད་པར་
མཐའ་གཅིག་ཏུ་གཟུང་མི་ནུས་པའི་ཁྱབ་པའི་ཁོངས་སུ་གཏོགས་པར་བསྡུའོ། །རང་འགྲེལ་ལས། ཐ་དད་ཕྱོགས་ཅན་ཞེས་སོགས་ཀྱི་ཚིགས་བཅད་ཀྱི་ཐད་ཁོ་ནར་ཁྱབ་མ་ཁྱབ་ཞེས་གསུངས་པ་ཁྱབ་པ་མཚན་ཉིད་པའི་དབང་དུ་བྱས་པར་གསལ་ལོ། །དེས་ན་
ཁྱབ་པ་བྱེ་བྲག་པའི་ནང་ཚན་དང་པོ་རྟག་དངོས་སྨྲ་བའི་ཕྱི་རོལ་པ་རྣམས་ཀྱིས་སྨྲས་པའི་དངོས་པོ་ལ་བདེན་པའི་གཅིག་བྲལ་གྲུབ་ཚུལ་གོང་དུ་ཇི་སྐད་སྨྲས་པའི་ཚིགས་སུ་བཅད་པས་བསྟན་ཏེ། དེ་ལ་མུ་སྟེགས་ཁ་ཅིག་དབང་ཕྱུག་ལ་སོགས་པ་ངོ་བོ་ནི་རྟག་པ་ཡིན་ལ།
དེའང་ནམ་མཁའ་ལ་སོགས་པ་ལྟར་དོན་མི་བྱེད་པ་ནི་མ་ཡིན་གྱི། དོན་བྱེད་པའི་དངོས་པོ་ཞིག་ཏུ་ཁས་བླངས་སོ། །རྒྱུ་དབང་ཕྱུག་ལ་སོགས་པ་དེ་ནི་དུས་གསུམ་དུའང་འགྱུར་བ་མེད་པས་རྟག་བཞིན་དུ་དེས་སྣོད་བཅུད་ཀྱི་དངོས་པོ་འདི་རྣམས་རྫ་མཁན་གྱིས་རྫ་
བུམ་བྱས་པ་བཞིན་དུ་བྱེད་པར་བློས་བཏགས་སོ། །དེ་ལ་སྣོད་བཅུད་ཀྱི་དངོས་པོ་རྣམས་ནི་ཅིག་ཅར་དུ་འབྱུང་བ་ཞིག་ནམ་ཡང་མི་སྲིད་པས་རིམ་ཅན་དུ་སྣང་བ་ལྟར་རིམ་ཅན་དུ་ཁས་ཀྱང་མི་ལེན་པའི་ཐབས་མེད་དོ། །དེས་ན་ཁྱོད་ཀྱིས་རྟག་པར་འདོད་པའི་རྒྱུ་གང་
13-1-49a


དེས་འབྲ༷ས་བུ༷་འདི་རྣམས་དུས་ཅིག་ཅར་དུ་མི་བསྐྱེད་པར་གཅིག་རྗེས་སུ་གཅིག་མཐུད་དེ་རིམ༷་པ་ཅ༷ན་དུ་ཉེ༷་བར༷་སྦྱོར༷་བའམ་སྐྱེད་པར་སྣང་བས༷་ན། རྒྱུ་དབང་ཕྱུག་སོགས་རྟག༷་པའི་དངོས་པོར་ཁས་བླངས་པ་དེ་རྣམ༷ས་གཅི༷ག་པུ༷འི་
བད༷ག་ཉི༷ད་དུ་བདེན་པ་མི༷ན་ནོ། །ཞེས་སོ། །དེ་ལ་རྒྱུ་རྟག་པ་གཅིག་པུ་ཆ་མེད་པའི་རིལ་པོ་གཅིག་གིས་འབྲས་བུ་འདི་ཀུན་སྐྱེད་ན། རྒྱུ་དེའི་སྟེང་ན་འབྲས་བུ་གང་ཇི་སྙེད་པ་སྐྱེད་པའི་ནུས་པ་མ་ཚང་བ་མེད་པར་ཡོད་དགོས་པས་འབྲས་བུ་བདེ་སྡུག་བཏང་
སྙོམས་ལ་སོགས་པ་ཐམས་ཅད་ཀྱང་དུས་ཅིག་ཅར་དུ་ཅིའི་ཕྱིར་མི་འབྱུང་སྟེ། འབྲས་བུ་རྣམས་ནི་རྒྱུ་མ་ཚང་ན་མི་སྐྱེ་ལ། རྒྱུའི་ནུས་པ་ཐོགས་མེད་དུ་གྱུར་ན་དེའི་ཚེ་འབྲས་བུ་ཤོལ་པ་ག་ལ་སྲིད། ཤོལ་ན་ནི་རྒྱུའི་རྗེས་སུ་འགྲོ་ལྡོག་མི་བྱེད་པས་དེའི་འབྲས་བུ་ཡིན་
པར་ཡང་གཞག་ཏུ་མི་རུང་ངོ་། །དེ་ལ་ཁོ་ན་རེ། དེ་ལྟར་འབྲས་བུ་རྣམས་དུས་ཅིག་ཅར་དུ་མི་སྐྱེ་བ་ནི་ལྷན་ཅིག་བྱེད་པའི་རྐྱེན་སོ་སོའི་དབང་གིས་ཡིན་ནོ་ཟེར་ན་ནི། རྟག་པ་གང་ཡིན་པ་གནས་སྐབས་གཅིག་ལས་འགྱུར་མི་སྲིད་པས་ལྷན་ཅིག་བྱེད་པའི་རྒྱུ་ལ་ལྟོས་པ་
མི་འཐད་དེ་རྐྱེན་གྱིས་བསྒྱུར་དུ་མི་རུང་བའི་ཕྱིར་ཏེ། དཔེར་ན་ནམ་མཁའ་ལ་ཚོན་བྱུགས་པ་བཞིན་ནོ། །ལྟོས་ཤིང་བསྒྱུར་དུ་ཡོད་ན་ནི་རྟག་པ་ཡིན་པ་ཉམས་སོ། །གལ་ཏེ་ལྟོས་སུ་ཆུག་ནའང་ལྷན་ཅིག་བྱེད་རྐྱེན་དང་ལྡན་པའི་སྐབས་ཀྱི་རྟག་དངོས་དང་བྲལ་བའི་
སྐབས་ཀྱི་རྟག་དངོས་དེ་ལ་ཁྱད་པར་ཡོད་དམ་མེད། ཡོད་ན་ནི་རྟག་པ་ཉམས་ལ། ཁྱད་མེད་ན་ནི་དང་པོའི་གནས་སྐབས་ཇི་ལྟ་བ་བཞིན་དུ་ཕྱི་མས་ཀྱང་ལྷན་ཅིག་བྱེད་རྐྱེན་རྣམས་འབྲལ་བའི་དབང་མེད་པར་མགུལ་ནས་ཐག་པས་བཏགས་པ་བཞིན་སྟོབས་ཀྱིས་
13-1-49b


དྲངས་ཏེ་གནས་ནས་སྔ་མས་བྱས་པའི་འབྲས་བུ་གང་ཡིན་པ་དེའང་རྒྱུ་མ་ཚང་བ་མེད་པས་ན་ནམ་ཡང་ལྡོག་པར་མི་འགྱུར་རོ། །ཚུལ་འདིས་ལྷན་ཅིག་བྱེད་རྐྱེན་ལ་རྒྱུ་དབང་ཕྱུག་སོགས་ཀྱི་ནུས་པར་མིང་བཏགས་ནས་དེས་འབྲས་བུ་རྣམས་རིམ་པས་བྱས་སོ་ཞེས་ཟེར་
བའང་ཁེགས་ཏེ། ཁོ་རང་གི་ངོ་བོ་དང་ནུས་པ་གཉིས་ཐ་དད་ན་ནི་ལྷན་ཅིག་བྱེད་པའི་རྒྱུ་ལ་ནུས་པའི་མིག་གིས་བཏགས་པར་ཟད་ལ། ཐ་མི་དད་ན་ནི་བཤད་མ་ཐག་པ་ལྟར་རྟག་ཏུ་འབྲས་བུ་མི་ལྡོག་པ་སོགས་ཀྱིས་གནོད་དོ། །དེས་ན་འབྲས་བུ་རིམ་ཅན་དུ་སྐྱེད་པར་ཁས་བླངས་
ཕན་ཆད་རྒྱུ་རྟག་པ་གང་ཡིན་པ་གཅིག་པུར་བདེན་པ་ཞིག་མི་སྲིད་པར་ཤེས་པར་བྱའོ། །སྔ་ཕྱི་གཅིག་པུར་མ་བདེན་ཕན་ཆད་རྟག་པ་མ་ཡིན་པར་ངེས་སོ། །ཡང་དེ་དག་ཇི་སྐད་བཤད་མ་ཐག་པའི་ཉེས་པ་དེ་དག་བཟློག་ཏུ་མེད་པར་མཐོང་ནས། རྒྱུ་རྟག་པ་ཡིན་ཀྱང་གཅིག་
པུ་མ་ཡིན་ཏེ། འབྲ༷ས་བུ༷་རེ༷་རེ༷་བཞིན་དུ་རྒྱུ་དེ་དག་གི་རང་བཞིན་ཡང་གཞན་དང་གཞན་དུ་རིམ་ཅན་ཐ༷་ད༷ད་པའི་ཚུལ་གྱིས་ཡོད་པར་འདོད་ན༷་ནི། དབང་ཕྱུག་སོགས་ཀྱི་དངོས་པོ་དེ༷་ད༷ག་རྟག༷་པ་ཡིན་པ་ལ༷ས་ཉམ༷ས་པ༷ར་ཅིའི་ཕྱིར་མི་འགྱུར༷་ཏེ། གནས་སྐབས་གཞན་དང་
གཞན་དུ་འགྱུར་བའི་ཕྱིར་རོ། །ཞེས་སོ། །དེ་ལ་ཕ་རོལ་པོས། རིལ་པོ་གཅིག་མིན་ཀྱང་རུང་རང་བཞིན་ནམ་རྒྱུད་ལྟ་བུ་གཅིག་ཡིན་པས་གནས་སྐབས་ཐ་དད་ནའང་རྟག་པ་ཡིན་པ་ཅི་འགལ་སྙམ་དུ་སེམས་པ་སྟེ། དཔེར་ན་འཇིག་རྟེན་ན་གར་གྱི་ཆས་སྣ་
ཚོགས་སུ་ཞུགས་ཀྱང་སྔ་དྲོའི་གར་མཁན་དེ་ཕྱི་དྲོའི་དེ་དང་གཅིག་པར་འདོད་པ་ལྟ་བུར་འདོད་དོ། །དེ་ལ་དཔྱད་ན་གཅིག་པུ་ཆ་མེད་པ་མིན་ཕན་ཆད་རྟག་པ་མི་འཐད་པས་ཚིགས་བཅད་ཀྱི་ཕྱེད་སྔ་མས་རྟག་པར་འདོད་པ་ལ་གཅིག་བདེན་བཀག །ཕྱེད་ཕྱི་མས་གཅིག་མིན་
13-1-50a


པ་ལ་རྟག་པ་བཀག་པ་ཡིན་ནོ། །འདི་ལ་འགྲེལ་ལུགས་སྣ་ཚོགས་མཛད་འདུག་ཀྱང་གཞུང་དོན་མ་ནོར་བ་འདི་ཁོ་ནའོ། །དེ་ལ་རང་བཞིན་དང་རྒྱུད་ལྟ་བུ་ནི་འདྲ་བ་ལ་གཅིག་ཏུ་བཏགས་པ་ཡིན་གྱི། བདེན་པའི་གཅིག་ཅིག་
ཡོད་པར་ནམ་ཡང་མི་གྲུབ་ལ། བདེན་གཅིག་ཡིན་ན་སྔར་གྱི་སྐྱོན་ལས་མི་འདའ་ཞིང་།  བཏགས་པའི་གཅིག་ཙམ་ནི་འདིར་དགག་པ་མ་ཡིན་ལ། དེ་དོན་དུ་མེད་པས་རྟག་པར་བཞག་ཏུའང་མེད་དེ། དེས་ན་གནས་སྐབས་ཐ་དད་ཕན་ཆད་གཅིག་པུར་
མ་བདེན་པ་ཡིན་གྱི། དེ་ལ་ཆ་ཕྱེས་ཏེ་ལོགས་སུ་རྟག་གཅིག་ཏུ་བཞག་རྒྱུ་ནམ་ཡང་མི་སྲིད་དོ། །གཉིས་པ་རང་སྡེས་བཏགས་པའི་རྟག་དངོས་དགག་པ་ལ། འགོག་བྱེད་ཀྱི་རིགས་པ་མདོར་བསྟན་པ་དང་། དེའི་ཚུལ་རྒྱས་པར་བཤད་པ་གཉིས།
དང་པོ། བསྒོམས་ལས་བྱུང་བའི་ཤེས་པ་ཡིས། །ཤེས་བྱ་འདུས་མ་བྱས་སྨྲ་བའི། །ལུགས་ལའང་གཅིག་མིན་དེ་དག་ནི། །རིམ་ཅན་ཤེས་དང་འབྲེལ་ཕྱིར་རོ། །ཞེས་གསུངས་ཏེ། རང་སྡེ་བྱེ་བྲག་སྨྲ་བ་རྣམས་ཀྱིས་འདུས་མ་བྱས་གསུམ་
རྟག་པའི་དངོས་པོར་འདོད་དེ། དེའང་ནམ་མཁའ་དང་། སོ་སོར་བརྟགས་པའི་སྟོབས་ཀྱིས་ཁེགས་པ་མིན་ཡང་རང་བཞིན་གྱི་རྐྱེན་མ་ཚང་བས་གང་སྐྱེ་བ་མིན་པ་ལ་དེ་མ་སྐྱེས་པའི་ཆ་དེ་ག་ལ་དངོས་པོ་དེ་སྐྱེ་བའི་གེགས་བྱེད་པའི་འདུས་མ་བྱས་སོ་སོར་བརྟགས་མིན་ཞེས་
རྫས་སུ་རློམ་པ་དང་། ཡང་ལམ་བསྒོམས་པའི་སྟོབས་ཀྱིས་ཉོན་མོངས་བྲལ་བའི་ཆ་ལ་སོ་སོར་བརྟགས་པས་འགོགས་པ་ཞེས་རྫས་སུ་ཞེན་པ་ཡིན་ལ། དེ་གསུམ་གྱི་ནང་ནས་འདིར་སོ་སོར་བརྟགས་འགོག་གཅིག་བདེན་བཀག་པས། རིགས་པ་དེ་ཉིད་ཀྱིས་
13-1-50b


གཞན་གཉིས་ཀྱང་གཅིག་བདེན་ཁེགས་པ་ཡིན་ནོ། །དེ་ལ་བྱེ་བྲག་ཏུ་སྨྲ་བ་རྣམས་ན་རེ། བསྒོམས་པའི་སྟོབས་ཀྱིས་བྱུང་བ་རྣལ་འབྱོར་མངོན་སུམ་གྱི་ཤེས་པའི་ཡུལ་དུ་གྱུར་པ། འདུས་བྱས་ཀྱི་མཚན་ཉིད་ཀུན་དང་བྲལ་བའི་སོ་སོར་བརྟགས་འགོག་འདུས་མ་
བྱས་ནི་དོན་དམ་པར་ཡོད་དོ། །དེ་ནི་རྣལ་འབྱོར་པའི་ཤེས་པ་དམ་པའི་ཡུལ་ཡིན་པའི་ཕྱིར་དོན་དམ་པར་ཡོད་ཀྱང་དེ་རང་བཞིན་གྱི་གནས་པ་ཉིད་རྣལ་འབྱོར་པའི་ཤེས་པས་རིག་པ་ཙམ་ཡིན་གྱི། དེས་རང་ལ་དམིགས་པའི་ཡིད་སྐྱེད་པ་ནི་མ་ཡིན་ཏེ། འབྲས་བུ་བསྐྱེད་པ་
འདུས་བྱས་ཀྱི་ཚུལ་ཡིན་ན་འདི་འདུས་མ་བྱས་ཡིན་པས་སོ་ཞེས་ཟེར་ཏེ། དེ་དག་གི་བསམ་ངོ་ལ། ཡུལ་ཡིན་ན་རྒྱུའི་ངོ་བོ་ཁོ་ནར་འགྱུར་བ་མ་ཡིན་པར་བསམས་ནས། ཡུལ་འདུས་མ་བྱས་དེ་ཤེས་པ་སྔ་ཕྱི་རིམ་ཅན་གྱིས་ཤེས་ཀྱང་དེ་ཤེས་པ་དང་འབྲེལ་བ་མེད་
པས་སོ་སོར་བརྟགས་འགོག་རང་གི་ངོ་བོ་ནི་འདུས་མ་བྱས་ཀྱི་ངོ་བོར་གཅིག་བདེན་དུ་རྟག་པར་གནས་སོ་སྙམ་པའོ། །དེ་ལ་འདི་ལྟར། བསྒོ༷མས་པ་ལ༷ས་བྱུང༷་པའི༷་རྣལ་འབྱོར་མངོན་སུམ་གྱི་ཤེས༷་པ༷་དེ་ཡིས༷། ཤེས༷་བྱ༷་སོ་སོར་བརྟགས་འགོག་འདུ༷ས་མ༷་
བྱས༷་བདེན་པར་གྲུབ་པར་འདོད་པའི་གྲུབ་མཐའ་སྨྲ༷༷་བའི༷་ལུག༷ས་ལ༷འ༷ང་རིགས་པས་བརྟགས་ན་ཡུལ་འདུས་མ་བྱས་དེ་གཅི༷ག་ཏུ་བདེན་པ་མི༷ན་ཏེ། གང་གི་ཕྱིར་ན་ཡུལ་འདུས་མ་བྱས་དེ༷་ད༷ག་ནི༷། སྔ་ཕྱི་རི༷མ་པ་ཅ༷ན་གྱི་ཤེ༷ས་པ་ད༷ང་། ཤེས་བྱ་ཤེས་བྱེད་དུ་འབྲེ༷ལ་
པའི་ཕྱིར༷་རོ༷། །ཞེས་སོ། །འང་ཞེས་པ་རྟག་དངོས་ཀྱིས་བུམ་སོགས་འབྲས་བུ་བསྐྱེད་པར་འདོད་པ་ཕྱི་རོལ་པའི་ལུགས་མི་འཐད་པར་མ་ཟད། འབྲས་བུ་མི་བསྐྱེད་ཀྱང་རང་བཞིན་གྱིས་རྟག་པར་འདོད་པ་བྱེ་སྨྲའི་ལུགས་ལའང་མི་འཐད་པ་ཡོད་ཅེས་གོང་མ་དང་ཕྱོགས་
13-1-51a


སྦྱར་ཏེ། འབྲས་བུ་བསྐྱེད་དམ་མི་བསྐྱེད་པ་སོགས་གང་ཡིན་ཀྱང་རུང་སྟེ། རྟག་དངོས་གཅིག་བདེན་ནམ་ཡང་མི་སྲིད་ཅེས་པའི་ཚིག་གི་ནུས་པ་འདོན་པའོ། །དེ་ལ་ཕ་རོལ་པོའི་བསམ་ངོར། ཡུལ་ཁོ་རང་རྟག་པ་ཡིན་པའམ་གཅིག་
བདེན་ཡིན་ན། ཡུལ་ཅན་གྱི་ཤེས་པ་དང་ངོ་བོས་འབྲེལ་བ་མ་ཡིན་ལ་ཤེས་བྱ་ཤེས་བྱེད་དུ་འབྲེལ་བ་ཙམ་ཡིན་པས། ཡུལ་ཅན་གྱི་སྟོབས་ཀྱིས་ཡུལ་མི་རྟག་པ་དང་དུ་མར་ག་ལ་འགྱུར་སྙམ་དུ་སེམས་ཏེ། འདི་ནི་རང་སྡེ་ཆོས་ཉིད་རྟག་པར་འདོད་པ་དང་།  གཞན་
སྡེ་ཆོས་ཅན་བུམ་པ་སོགས་འཇིག་པའི་རྒྱུ་མ་བྱུང་གི་བར་དུ་རྟག་པར་འདོད་པ་ལ་སོགས་པ་ཡུལ་གང་ཞིག་རྟག་པར་འདོད་པ་ཐམས་ཅད་ཀྱི་ཞེ་འདོད་གཅིག་པུ་པ་ཡིན་ཏེ། དཔེར་ན་ཁར་སང་མཐོང་བའི་བུམ་པ་དང་དེ་རིང་མཐོང་བའི་བུམ་པ་གཉིས་ཡུལ་ཅན་ཤེས་པ་
མི་འདྲ་ཡང་། ཡུལ་བུམ་པ་གཅིག་ཡིན་ནོ་སྙམ་དུ་འཛིན་པ་བཞིན་ནོ། །དེ་ལ་ཡུལ་ཅན་ཐ་དད་ན་ཡུལ་ཡང་གཅིག་པུ་ཉིད་དུ་བདེན་པར་མི་འགྱུར་བའི་ཚུལ་རྒྱས་པར་བཤད་དགོས་པས། ས་བཅད་གཉིས་པ་དེའི་ཚུལ་རྒྱས་པར་བཤད་པ་ལ། ཤེས་པ་
སྔ་མའི་ཡུལ་ཕྱི་མའི་རྗེས་སུ་འབྲང་ན་མི་འཐད། མི་འབྲང་ན་མི་འཐད་པས་དགག་པའོ། །དང་པོ། རྣམ་ཤེས་སྔ་མས་ཤེས་བྱ་བའི། །རང་བཞིན་རྗེས་སུ་འབྲང་ན་ནི། །ཤེས་པ་སྔ་མའང་ཕྱི་མར་འགྱུར། །ཕྱི་མའང་དེ་བཞིན་སྔ་མར་འགྱུར། །
ཞེས་གསུངས་ཏེ། དེ་ལ་འདུས་མ་བྱས་རྟག་པར་འདོད་པ་ཁྱོད་ཀྱི་ཤེས་པ་སྔ་མའི་ཡུལ་དུ་གྱུར་པའི་འདུས་མ་བྱས་དེ་ཁོ་ན་ཤེས་པ་ཕྱི་མའི་ཡུལ་དུ་འགྱུར་བ་ཡིན་ནམ་མིན་ཅེས་དྲིའོ། །དེ་ལ་དེ་དག་གིས་ཡུལ་འདུས་མ་བྱས་ཡོད་པར་ནི་ཁས་བླང་ཡོད་པ་ལ་ཤེས་པས་
13-1-51b


དམིགས་པ་ལས་གཞན་ཚད་མ་མི་སྲིད་ཅིང་། ཤེས་པས་དམིགས་པ་ལ་རིམ་ཅན་གྱིས་ཁྱབ་པ་དང་། རིམ་ཅན་ལ་སྔ་མའི་ཡུལ་ཕྱི་མའི་རྗེས་སུ་འབྲང་མི་འབྲང་གང་རུང་ལས་ཁས་ལེན་གཞན་མི་སྲིད་པས་ན།  ཕྱོགས་དང་པོ་ལྟར་ཁས་བླངས་ཏེ། འདི་ལྟར།
རྣམ༷་ཤེས༷་སྔ༷་མ༷ས་ཤེ༷ས་པར་བྱ༷་བའི༷་ཡུལ་འདུས་མ་བྱས་ཀྱི་ར༷ང་བཞི༷ན་གང་ཡིན་པ་དེ་ཁོ་ན་ཤེས་པ་ཕྱི་མའི་རྗེ༷ས་སུ༷་འབྲ༷ང་བའམ། ཕྱི་མའི་དུས་ནའང་ཡོད་ཅིང་དེ་ལ་དམིགས་པ་ཡིན་ན༷་ནི༷། འོ་ན་ཡུལ་ལ་ཁྱད་པར་ཅུང་ཟད་ཀྱང་མེད་པའི་གཅིག་པུ་ལ་དམིགས་པ་ཡིན་པས་
དེ་འཛིན་པའི་བློ་ལའང་ཁྱད་ཡོད་པར་མི་རིགས་ཏེ། ཡུལ་གང་དང་གང་ཤེས་པ་ལ་དེ་དང་དེའི་ཤེས་པ་ཞེས་འཇོག་གི། གཞན་དུ་ཤེས་པའི་དབྱེ་བ་དུ་མ་འཇོག་པར་མི་ནུས་སོ། །དེ་ལྟར་ན་སྐྱེས་བུ་གཅིག་གི་རྒྱུད་ཀྱི་བུམ་འཛིན་ཤེས་པ་སྐད་ཅིག་མ་ལ་བུམ་པའི་ཡུལ་ཅན་གྱི་བློ་
མི་འདྲ་བ་དུ་མ་མེད་པ་དང་།  འདུས་མ་བྱས་ཤེས་པའི་ཤེས་པ་སྔ་མ་རང་གི་ངོ་བོ་ལ་ཡུལ་གཅིག་ལ་དམིགས་པའི་འདུས་མ་བྱས་ཤེས་པར་བཞག་གི། ཆོས་གཞན་གྱི་ཡུལ་ཅན་གྱི་ཤེས་པར་གཞག་ཏུ་མི་རུང་བས་ཤེས་པ་དེ་ལ་གཉིས་སུ་དབྱེ་བ་མེད་པ་ལྟར། འདིར་ཡང་
ཤེས་པ་སྔ་ཕྱི་གཉིས་ཀྱི་ཡུལ་གཅིག་གི་ངོ་བོར་བདེན་པ་དེས་ན། ཤེས༷་པ༷་སྔ༷་མ༷འ༷ང་ཕྱི༷་མ༷ར་འགྱུར༷་ལ། ཕྱི༷་མའ༷ང་དེ༷་བཞི༷ན་སྔ༷་མ༷ར་འགྱུར༷་དགོས་པས། དེ་ལྟར་ན་རྣམ་ཤེས་སྔ་མའི་ཡུལ་འདུས་མ་བྱས་ནི་ཕྱི་མའི་དུས་ནའང་ཡོད་ལ་རྣམ་ཤེས་སྔ་མ་ནི་མེད་ཅིང་། རྣམ་
ཤེས་ཕྱི་མའི་ཤེས་བྱ་ནི་སྔ་མའི་དུས་ན་ཡོད་ལ་རྣམ་ཤེས་ཕྱི་མ་ནི་མེད་དོ་ཞེས་བྱ་བའང་མི་རུང་ངོ་། །ཡུལ་དེ་ལ་དུས་སྔ་ཕྱིའི་ཁྱད་ཡོད་ན་སྔ་ཕྱི་གཅིག་པར་མི་རུང་ལ། ཡུལ་ལ་ཁྱད་མེད་ཀྱང་ཡུལ་ཅན་བློ་སྐད་ཅིག་མ་ཡིན་པས་སྔ་ཕྱི་དུ་མས་དེ་གཅིག་པུ་ཡང་ཡང་དམིགས་སོ་སྙམ་
13-1-52a


ན། བློ་རང་རང་གིས་དམིགས་ཡུལ་དུ་གྱུར་པའི་ཆ་དེ་ཡུལ་ཅན་མེད་པའི་སྔ་ལོགས་དང་། ཡུལ་ཅན་འགགས་པའི་ཕྱི་ལོགས་སུ་ཡོད་ན་དེའི་ཡུལ་ཅན་ཡང་ཅིའི་ཕྱིར་མེད་དེ། སོ་སོའི་ཡུལ་གྱི་དམིགས་པ་དེ་དང་དམིགས་བྱེད་བློ་ཁ་བྲལ་ནས་ཡུལ་
འཛིན་པ་མི་སྲིད་པས་སོ། །སོ་སོའི་ཡུལ་དེ་དང་དེ་མིན་པའི་གཅིག་བདེན་གཞན་མེད་དེ། དེ་ཡོད་ན་སྐད་ཅིག་མའི་བློའི་ཡུལ་མིན་པར་ཐལ་ལ། དེ་ལྟར་ན་དེ་གཅིག་བདེན་དུ་བློ་ངོར་གྲུབ་པའང་མི་སྲིད་པར་ཤེས་པར་བྱའོ། །འདི་ལ་ཡུལ་གཅིག་ཡིན་པ་ཙམ་གྱིས་དེ་
འཛིན་པའི་ཤེས་པ་རིམ་ཅན་མི་སྲིད་པ་མ་ཡིན་གྱི། ཡུལ་བདེན་པའི་གཅིག་ཡིན་ན་དེ་འཛིན་པའི་ཤེས་པ་རིམ་ཅན་དུ་འབྱུང་མི་ཤེས་པ་ཡིན་ཏེ། དེ་ལ་ཡུལ་བུམ་པ་ལྟ་བུ་གཅིག་ཁར་སང་ཡང་ཤེས་དེ་རིང་ཡང་ཤེས་སོ་ཞེས་རློམ་པ་ནི། བུམ་པའི་རང་མཚན་སྐད་ཅིག་མ་
འདྲ་བ་རྒྱུན་མ་ཆད་དུ་བྱུང་བ་ལ་འཁྲུལ་གཞི་བྱས་ཏེ་གཅིག་ཅེས་བཏགས་པ་ཙམ་ཡིན་གྱི། དོན་ལ་གཅིག་ཡིན་པར་བདེན་ནོ་སྙམ་ན་རིགས་པ་འདིས་ཁེགས་པས་ལྟོས་མེད་དང་གནོད་པ་ཅན་ལ་སོགས་པའི་གཏན་ཚིགས་མང་པོ་ཞིག་ཀྱང་ཚུལ་འདིས་ཚེགས་མེད་པར་
འགྲུབ་པ་ཡིན་ནོ། །དེས་ན་འདུས་མ་བྱས་ཡིན་ཀྱང་རུང་འདུས་བྱས་ཡིན་ཀྱང་རུང་སྟེ་གཅིག་ཏུ་བདེན་པར་ཁས་བླངས་ན། དེ་ལ་དམིགས་པའི་བློ་རིམ་ཅན་འབྱུང་མི་ཤེས་པར་གྲུབ་པའི་རིགས་པ་འདིས་འགོག་པ་ཡིན་གྱི། བཏགས་པ་ཙམ་གྱི་གཅིག་དང་དུ་མ་ནི་རྣམ་པ་
ཀུན་ཏུ་དགག་པ་མ་ཡིན་ཏེ། རང་གིས་ཀྱང་འདོད་པ་ཡིན་པའི་ཚུལ་ཤན་ཕྱེད་པ་འདི་རྣམ་པ་ཀུན་ཏུ་གལ་ཆེའོ། །ཚུལ་འདི་དང་མཚུངས་པར་རྟག་བདེན་འགོག་པའང་། རྣམ་འགྲེལ་ལས། བརྟན་གང་རྡོ་རྗེ་རྡོ་སོགས་ཀྱི། །དོན་ཡང་གཞན་ལ་ལྟོས་མེད་ཕྱིར། །
13-1-52b


འགྲོ་བ་ཀུན་གྱི་ཤེས་པ་ནི། །ཅིག་ཅར་རང་ཉིད་བསྐྱེད་པར་འགྱུར། །ལྷན་ཅིག་བྱེད་པས་ཕན་འདོགས་ཕྱིར། །འདི་ཡི་དེ་དག་རིམ་འབྱུང་ན། །སྐད་ཅིག་སོ་སོར་གཞན་ཡིན་བརྗོད། །ཅེས་པ་ལྟར་ཡུལ་གཅིག་བདེན་དུ་བསྒྲུབ་པ་ལ་བློས་དེར་དམིགས་ནས་བཞག་
དགོས་ཤིང་། དམིགས་ན་དམིགས་རྐྱེན་དེས་རང་འཛིན་ཤེས་པ་བསྐྱེད་པ་ལ་རང་གི་ངོ་བོ་ཡུལ་དུས་ཀྱི་ཆ་མི་འདྲ་བ་ཅིའང་དབྱེར་མེད་པས་གཅིག་བདེན་ལྟོས་མེད་ཡིན་པས་ཡུལ་ན་མི་གཅིག་པ་དུ་མ་ཡང་ཡང་བསྐྱེད་པ་མི་སྲིད་དོ། །དེ་ལ་གོང་དུ་བཤད་པ་དེ་དག་གིས་ལེགས་
པར་གྲུབ་ཀྱང་འདི་ལ་འཁྲུལ་རྒྱུས་བསྒྲིབས་ཏེ། ད་དུང་ཡུལ་གཅིག་བདེན་ལ་དམིགས་པའི་བློ་ཐ་དད་ཡོད་པ་ཅི་འགལ་ཏེ། བུམ་པ་གཅིག་ལ་དམིགས་པའི་བློ་དུ་མ་བཞིན་ནོ་སྙམ་དུ་ཞེན་པ་ལྡོག་དཀའ་བས། གོང་གི་དོན་རྒྱས་པར་ཕྱེ་ན། ཤེས་པ་སྔ་མའི་དུས་ན་
ཡོད་པའི་ཤེས་བྱ་དེ་ཤེས་པ་སྔ་མས་ཤེས་བཞིན་པའི་སྐབས་དེ་ན་ཕྱི་མས་ཤེས་སམ་མ་ཤེས། ཤེས་པར་མི་སྲིད་དེ་དེ་དུས་ཤེས་པ་ཕྱི་མ་མ་སྐྱེས་ལ། མ་ཤེས་ན་ཤེས་པ་སྔ་མའི་ཤེས་བྱར་སོང་ལ། ཕྱི་མའི་ཤེས་བྱར་མ་སོང་བའི་སྐབས་ཤིག་སྲིད་དགོས་ལ།  དེ་ལྟར་
ན་ཕྱི་མའི་རང་དུས་སུའང་ཤེས་པར་མི་རུང་སྟེ། ཡུལ་དེ་གཅིག་པུ་ཆ་མེད་པའི་རྟག་པ་ཡིན་པར་འདོད་པ་ལ་དང་པོ་ཇི་ལྟར་ཡོད་པ་དེ་ཁོ་ན་ལྟར་ཕྱིས་ཀྱང་ཡིན་དགོས་ཀྱི། དེ་ལས་གཞན་ཞིག་ཡོད་ན་ཆ་མེད་པ་དང་རྟག་པ་ལས་ཉམས་པར་འགྱུར་རོ། །ཡང་ཕྱི་མའི་དུས་
ལ་སྔ་མས་ཤེས་མི་ཤེས་དེ་ལྟར་དཔྱད་ནས་སྔ་ཕྱིའི་ཡུལ་གཅིག་ཡིན་ནོ་སྙམ་པ་འགོག་པ་ཡིན་ནོ། །དེས་ན་ཤེས་པ་སྔ་ཕྱིའི་རང་དུས་ཀྱི་ཡུལ་དེ་གཉིས་ཐ་དད་ཡིན་ཏེ། སྔ་མའི་ཡུལ་ཕྱི་མས་མ་ཤེས་ལ། ཕྱི་མའི་ཡུལ་སྔ་མས་མ་ཤེས་པའི་ཁྱད་པར་ཡོད་པའོ། །
13-1-53a


དེ་ལྟར་ཁྱད་ཕྱེ་རྒྱུ་མེད་པར་སྔ་མའི་ཡུལ་ཕྱི་མས་ཤེས། ཕྱི་མའི་ཡུལ་སྔ་མས་ཤེས་ན། ཕྱི་མའི་ཡུལ་ཤེས་པའི་ཤེས་པ་ཡིན་པས་ན་སྔ་མའང་ཕྱི་མའི་ཤེས་པར་འགྱུར་ལ། སྔ་མའི་ཡུལ་ཤེས་པའི་ཤེས་པ་ཡིན་པས་ན་ཕྱི་མའང་སྔ་
མའི་ཤེས་པར་འགྱུར་ཏེ་རིམ་ཅན་གྱི་ཤེས་པ་དང་། འདས་མ་འོངས་དང་། ཡུལ་ཡུལ་ཅན་སོགས་ཀྱི་རྣམ་གཞག་མཐའ་དག་འཇིག་པར་འགྱུར་རོ། །དེས་ན་ཡུལ་གཅིག་པུ་ཆ་མེད་དུ་བདེན་ཕན་ཆད་དེ་ལ་དམིགས་པའི་བློ་ཡང་གཅིག་པུ་གཅིག་ཁོ་ན་ལས་དུ་མ་མི་སྲིད་པར་ཤེས་
པར་བྱའོ། །དེ་ལའང་འདི་སྙམ་དུ་ཤེས་ངོ་ལ་སྣང་བའི་ཡུལ་ཐ་དད་ཡིན་ཡང་དོན་གྱི་ཡུལ་གཅིག་ཡིན་ནོ་ཞེས་ཤིན་ཏུ་བླུན་པ་དག་ཞེན་ན་དེའང་མི་རུང་སྟེ། བྱེ་སྨྲའི་ལུགས་ལ་ཡུལ་རྣམ་མེད་དུ་འདོད་པས་གྲུབ་མཐའ་དང་འགལ་ལ། གཞན་རྟག་སྨྲ་བས་དེ་ལྟར་ཁས་
བླངས་ཀྱང་རུང་སྟེ། ཕྱི་དོན་གྱི་རྣམ་པ་གཏོད་བྱེད་གཅིག་ཡིན་པས་སྣང་ངོའི་ཡུལ་ལའང་མི་འདྲ་བ་ག་ལ་འོང་སྟེ་འོང་མི་རིགས་སོ། །ཡང་དེ་དག་འདི་སྙམ་དུ། གང་ཟག་དུ་མའི་བློས་ཡུལ་བུམ་པ་གཅིག་ལ་དམིགས་པ་ལྟར་བློ་ཐ་དད་ཀྱང་ཡུལ་གཅིག་ཡིན་པ་ཅི་
འགལ་སྙམ་ན། བུམ་པ་གཅིག་ཅེས་པ་ནི་ལྟོ་ལྡིར་བའི་རྣམ་པར་སྣང་བ་ལ་བུམ་མིན་གཞན་རྣམ་པར་བཅད་པའི་བློས་བུམ་པ་ཞེས་ཐ་སྙད་བཏགས་ཏེ།  རང་མཚན་གྱི་ཆོས་རྡུལ་དུ་མ་འདུས་པ་ལ་གཅིག་ཅེས་བཏགས་པ་ཙམ་ཡིན་གྱི་དེ་གཅིག་བདེན་མ་ཡིན་ལ། གཅིག་
བདེན་ཡིན་ན་གང་ཟག་དུ་མའི་བློ་ཐ་དད་ཀྱིས་དམིགས་མི་རུང་བར་རིགས་པ་འདིས་གནོད་པ་ཡིན་པས་དེ་དཔེར་མི་རུང་ངོ་། །མདོར་ན་འདུས་བྱས་གཅིག་ལ་ཡུལ་དུས་ཐ་དད་པའི་བློས་དམིགས་པར་སྣང་བ་ནི་རྡུལ་དང་སྐད་ཅིག་ལ་སོགས་པའི་ཆ་དུ་མ་འདུས་པ་ལ་གཅིག་
13-1-53b


ཅེས་ཞེན་ནས་དེ་ལ་དམིགས་པར་རློམ་པ་ཡིན་ལ། འདུས་མ་བྱས་གཅིག་ལ་བློ་དུ་མས་དམིགས་པར་སེམས་པ་ནི། དགག་བྱ་བཅད་པའི་དངོས་མེད་ཀྱི་ཆ་ལ་དེར་ཞེན་པ་ཙམ་ལས་ཡུལ་གཞན་མེད་ཀྱང་། དངོས་པོ་ཡོད་པ་བཅད་པའི་གཞན་སེལ་གྱི་བློས་འདུས་མ་
བྱས་ཞེས་པ་ལ་སོགས་པའི་ཐ་སྙད་བཏགས་པ་དེ་ལ་ཡུལ་དུ་ཞེན་ནས་ནམ་དེའི་ཐ་སྙད་དྲན་པ་ན་བློའི་ཡུལ་རྣམས་འདྲ་བ་ལྟ་བུར་སྣང་བ་ལ་གཅིག་ཏུ་བདེན་པར་ཞེན་པ་ཙམ་ཡིན་ནོ། །རིགས་པ་འདིས་ཆོས་ཉིད་རྟག་པ་བདེན་གྲུབ་དྲི་མ་རིམ་གྱིས་སྦྱོང་ཞིང་ཤེས་པ་སྔ་
ཕྱིའི་ཡུལ་དུ་འདོད་པ་ལ་གནོད་པ་འདི་བས་ཐུ་བ་གཞན་མི་འདུག་ཅེས་མཁས་པ་རྣམས་གསུངས་པ་ལྟར། ཆོས་ཉིད་ཡིན་ཀྱང་རུང་སྟེ་རྟག་བདེན་དེ་ལས་མཁན་ཆེན་གྱི་རིགས་པ་འདི་ཆེས་སྟོབས་དང་ལྡན་པ་ཞིག་གོ། དེའང་ངོ་བོ་སྟོང་པའི་གནད་ཀྱིས་བདེ་བར་གཤེགས་
པའི་སྐུ་དང་ཡེ་ཤེས་ཀྱི་ཆོས་རྣམས་ཤེས་བྱའི་ཁོངས་ན་དེ་བས་མཆོག་གཞན་མེད་པ་མི་བསླུ་བའི་དམ་པ་དང་། དུས་ཚད་མེད་དང་ཕྱོགས་ཚད་མེད་དུ་འཇུག་པ་སོགས་ཇི་སྐད་བཤད་པའི་ཡོན་ཏན་ཐམས་ཅད་རིགས་པས་གནོད་མེད་དུ་འཇོག་ནུས་པའི་ཕྱིར་རོ། །དེ་ལ་
གཞུང་འདིར་དུས་ལ་བརྟེན་པའི་ཤེས་པ་སྔ་ཕྱི་རིམ་ཅན་གྱི་ཡུལ་དུ་འགྱུར་ན་གཅིག་བདེན་མི་འགྲུབ་པ་ཙམ་གྱིས་འདུས་མ་བྱས་བདེན་གྲུབ་བཀག་ཀྱང་། དོན་དུ་ཕྱོགས་དུས་ཐ་དད་ལ་བརྟེན་པའི་ཤེས་པ་མཐའ་དག་གི་ཡུལ་དུ་འགྱུར་མི་འགྱུར་ལ་དཔྱད་ནས་འདུས་བྱས་
འདུས་མ་བྱས་སམ། གལ་ཏེ་དེ་གཉིས་མིན་པར་སྨྲ་ཡང་རུང་སྟེ་དོན་དུ་ཤེས་བྱ་བདེན་གྲུབ་ཞིག་ཡིན་ཚད་འགོག་པ་ཡིན་ནོ། །དེ་ལ་ཕྱོགས་དུས་གང་ན་གཅིག་ཅེས་གང་ཡོད་པ་ཐམས་ཅད་ལ་གཅིག་བདེན་ནི་མི་སྲིད་ལ། ཆོས་དུ་མ་ལ་གཅིག་ཅེས་བཏགས་པ་
13-1-54a


ཙམ་དུ་ཟད་དེ། ཤེས་བྱ་མིན་པ་བཅད་ནས་ཤེས་བྱ་ཞེས་གཅིག་ཏུ་བཞག་པ་དང་། དེ་བཞིན་དུ་དངོས་པོ་བཅད་པའི་དངོས་མེད། དངོས་མེད་བཅད་པའི་དངོས་པོ་སོགས་མདོར་ན་རང་མ་ཡིན་པ་རྣམ་པར་བཅད་པའི་སྒྲ་དང་། རྟོག་
པས་གཅིག་ཅེས་བཞག་མོད་ཀྱི། སོ་སོའི་གཅིག་ལའང་ནང་གསེས་མང་པོ་དབྱེ་བ་ཡོད་ཅིང་དབྱེ་བ་རེ་རེ་ལ་གཅིག་ཅེས་བཏགས་པའང་། མཐར་བེམ་ཤེས་རྡུལ་དང་སྐད་ཅིག་ཆ་མེད་ཀྱི་བར་དུ་དུ་མར་དབྱེར་ཡོད་ཀྱི་གཅིག་པུ་ཞིག་མི་རྙེད་ལ། ཆ་མེད་གཉིས་པོའང་
ཇི་སྲིད་དམིགས་པ་དང་མ་བྲལ་གྱི་བར་དུ་གཅིག་པུར་བདེན་པ་མི་འགྲུབ་པ་དེས་ན་གཅིག་ཅེས་གང་བཞག་པ་ཀུན་ལ་དཔྱད་ན་ཐ་སྙད་དུ་བཏགས་པ་ཙམ་ལས་གཅིག་པུར་བདེན་པ་ཞིག་མི་འགྲུབ་བོ། །དེས་ན་ཤེས་པ་སྔ་མའི་ཡུལ་ཡང་འདི། ཕྱི་མའི་ཡུལ་ཡང་འདི་
ཞེས་པ་ལྟ་བུ་ནི་སྐད་ཅིག་མའི་ཆོས་དུ་མ་ལ་གཅིག་ཏུ་བཏགས་པར་ཟད་ལ། ཁྱོད་ཀྱིས་མཐོང་བ་འདི་ངས་མཐོང་བའང་འདི་ཞེས་པ་ལྟ་བུའི་དུས་གཅིག་ཏུ་ཕྱོགས་ཐ་དད་ཀྱི་ཤེས་པའི་ཡུལ་གཅིག་པུར་གཟུང་བ་ནི། ཡུལ་དེ་ཉིད་ཀྱི་གདགས་གཞིའི་ཆོས་དུ་མ་ལ་
གཅིག་ཏུ་བཏགས་པར་ཟད་ཀྱི། མདོར་ན་ཕྱོགས་དུས་ཀྱི་ཤེས་པའི་ཡུལ་གང་ཡིན་ཀྱང་གཅིག་བདེན་ནི་མི་སྲིད་དོ། །འོ་ན་དངོས་མེད་ལ་ཆ་དབྱེ་རྒྱུ་མེད་དོ་སྙམ་ན།  སྤྱིར་དངོས་མེད་ལ་བུམ་མེད་གཏན་མེད་སོགས་དབྱེར་ཡོད་ལ། བྱེ་བྲག་བུམ་མེད་ལྟ་བུ་ལའང་གསེར་བུམ་མེད་པ་
སོགས་དངོས་པོ་ཇི་སྙེད་ཀྱི་གྲངས་བཞིན་ལྡན་ལ། རང་རང་གི་དགག་བྱ་དེ་བཅད་ཙམ་གྱི་ཆ་ཞིག་ལ་བློས་དེ་ལྟར་བཟུང་བ་ཙམ་ཡིན་པས། བློ་ངོ་ན་སྣང་བའི་ཡུལ་ལྟ་བུ་དེ་ལས་ཕྱི་རོལ་ན་རང་དབང་གིས་གནས་པ་ཅུང་ཟད་ཀྱང་མེད་དོ། །དེས་ན་དངོས་པོ་དང་དངོས་མེད་
13-1-54b


ཀྱི་ཆོས་གང་དག་ཤེས་པ་ཐ་དད་པས་ཡུལ་དུ་གྱུར་ཕན་ཆད་ཡུལ་དེ་ལ་བདེན་པར་གྲུབ་པའམ། གཅིག་པུའི་བདག་ཉིད་དུ་བདེན་པ་མེད་པར་ཤེས་པར་བྱ་སྟེ། གལ་ཏེ་བརྟགས་པའི་མཐའ་བཟུང་ན་འདི་ལྟར་རྡུལ་ཕྲ་རབ་ལྟ་བུ་ཞིག་གཅིག་པུར་བདེན་ན། དེ་རང་ས་ན་ཕྲ་མོར་
བདེན་འདུག་རྒྱུ་ཡོད་པ་མ་ཡིན་ཏེ། དེའི་སྟེང་ན་ཆོས་གཞན་ཞིག་དབྱེ་བ་མི་སྲིད་པ་དགོས་ལ། དེ་ལྟར་ན་དེ་འབའ་ཞིག་ཙམ་ལས་ཤེས་བྱ་གཞན་ཐམས་ཅད་མི་སྲིད་པར་འགྱུར་དགོས་ཏེ་ཤེས་བྱའི་ཁོངས་ན་ཆོས་གང་བདེན་པར་ཡོད་ཀྱང་དེ་དང་འདྲའོ། །དེ་ལ་རྡུལ་
ལྟ་བུ་གཅིག་པུའི་ཆོས་སུ་བདེན་པར་གཞག་པ་དེ་ལ། ཕྱོགས་ཀྱི་དབང་དུ་ན་སེམས་ཅན་གྱི་རྒྱུད་ཀྱིས་བསྡུས་པའི་ཤེས་པ་ཐ་དད་ཀྱི་ཐ་སྙད་གཞག་ཏུ་རུང་ངོ་ཅོག་ལས་གང་དུ་ཞིག་གིས་ཡུལ་དེ་མ་དམིགས་པ་ཡོད་ན་ཡུལ་དེའི་སྟེང་དུ་དེ་སྙེད་ཀྱིས་མ་དམིགས་པའི་
ཆོས་ཀྱི་དབྱེ་བ་རུང་ལ། དུས་ཀྱི་དབང་དུ་ན་སེམས་ཅན་ཐམས་ཅད་ཀྱི་བསྐལ་པ་ལོ་ཟླ་ཞག་དུས་སྐད་ཅིག་གི་སེམས་ཚད་མེད་པ་ལས་དུ་ཞིག་གིས་མ་དམིགས་ན་དེ་དང་དེའི་གྲངས་ཀྱིས་མ་དམིགས་པའི་ཆོས་སུ་དབྱེ་རུང་ཞིང་། ཤེས་པ་མིན་པ་བུམ་པ་མིན་པ་
སོགས་ཁོ་རང་མིན་པའི་ཤེས་བྱའི་ཆ་ཇི་སྙེད་ཡོད་པ་དེ་སྙེད་ཀྱི་གྲངས་སུ་དབྱེར་རུང་ལ། ཡང་ལྡོག་ཕྱོགས་ནས་ཕྱོགས་དུས་ཀྱི་ཤེས་པ་དུ་ཞིག་གིས་དམིགས་ཀྱང་དེ་དང་དེས་དམིགས་པའི་རྡུལ་ཕྲན་ཞེས་དུ་མའི་ཆོས་སུ་གཞག་རུང་ལ། ཕྲ་མོ་ཡིན་པ། ཆུང་ངུ་
ཡིན་པ། ཤེས་བྱ་ཡིན་པ་སོགས་བློས་བཏགས་ཡིན་པའི་ཆ་ཇི་ཡོད་པ་དེ་སྙེད་ཀྱི་གྲངས་སུའང་འགྱུར་ཞིང་དུ་མར་བཤིག་ཏུ་ཡོད་ན། དེ་རྣམས་ཀྱི་ནང་ནས་གཅིག་པུར་བདེན་པ་དེ་གང་ལ་ངོས་འཛིན། དེ་རྣམས་ཀྱི་ནང་ནས་གང་ཡང་མིན་པར་ལོགས་ཤིག་ཏུ་གཅིག་
13-1-55a


པུར་བདེན་པ་ཞིག་འདོད་ན་ནི། ཕྱོགས་དུས་ཀྱི་ཤེས་པ་གང་གི་ཡང་ཤེས་བྱར་མི་རུང་བས་གཅིག་པུར་བདེན་ནོ་ཞེས་པའང་དམ་བཅའ་ཙམ་མ་ཡིན་ནམ། དེ་རྣམས་ནི་དུ་མ་ཚད་མེད་པ་ཡིན་པས་དེ་རྣམས་ཆོས་གཅིག་གི་ངོ་བོར་གཅིག་ཏུ་
བདེན་པའང་ག་ལ་སྲིད། དེ་རྣམས་ལས་གང་ཡང་རུང་བ་ཞིག་བཟུང་ནས་འདིའོ་ཞེས་དེ་ལ་སླར་ཡང་ཆ་དབྱེ་རྒྱུ་མེད་པ་ཞིག་ནི་མི་རྙེད་ལ། ཆོས་དུ་མར་དབྱེར་ཡོད་པ་ལ་གཅིག་མ་ཡིན་པ་དང་། དབྱེ་བ་མེད་པ་ལ་གཅིག་པུར་བདེན་ཞེས་མི་འདོགས་ན་གཅིག་པའི་
ཆོས་སུ་འཇོག་པའི་རྒྱུ་གཞན་ཤེས་བྱའི་ཁོངས་ན་རྙེད་པར་དཀའ་བ་མ་ཡིན་ནམ། མདོར་ན་ཤེས་བྱའི་ཁོངས་འདི་ན་ངོ་བོ་ཅི་འདྲ་བ་ཞིག་ཡིན་ཡང་རུང་སྟེ། གཅིག་པུར་བདེན་པའི་ཆོས་ཤིག་ཡོད་ན། ཕྱོགས་དུས་ཀྱི་ཤེས་པ་ཚད་མེད་པ་ཀུན་གྱིས་དེ་འབའ་ཞིག་
དམིགས་པ་ལས་གཞན་ཆོས་གཅིག་ཀྱང་དམིགས་པ་མི་སྲིད་པ་དང་། དེ་འབའ་ཞིག་མ་གཏོགས་ཕྱོགས་དུས་ཀྱི་ཆོས་གཞན་གཅིག་ཀྱང་མེད་དགོས་ལ། མཐར་འདི་ནི་གཅིག་པུའོ་ཞེས་ཤེས་པ་རང་ལས་ཐ་དད་པའི་ཡུལ་ཅན་ཀྱང་མེད་དགོས་ཏེ། གལ་ཏེ་ཡོད་
ན་ཡུལ་གཅིག་པུ་དེ་མིན་པའི་ཆ་ཞིག་དབྱེར་ཡོད་པའི་ཕྱིར་རོ། །རང་ཡུལ་དུ་བྱེད་པའི་ཤེས་པ་དེའང་མེད་ན་ཡུལ་གཅིག་བདེན་དེའང་སུ་ཞིག་གིས་དམིགས་ཏེ་དམིགས་མི་སྲིད་ལ། དེ་ལྟར་ན་ཤེས་བྱའི་སྣང་བ་སྣ་ཚོགས་པ་གང་ཡང་རི་བོང་གི་རྭ་ལྟར་གཏན་མེད་དུ་
འགྱུར་རོ། །དེའི་ཕྱིར་ན་ཤེས་བྱའི་ཁོངས་ན་གཅིག་པུར་བདེན་པའི་ཆོས་ཤིག་གཞི་མ་གྲུབ་མི་འགྲུབ་འགྲུབ་པར་མི་འགྱུར་བས་ན་ཕྱོགས་དུས་ཀྱི་སྣང་བ་སྣ་ཚོགས་ཆེས་བཀྲ་བ་འདི་འཐད་པ་ཡིན་ནོ། །ཤེས་བྱའི་ཁོངས་ན་བདེན་གྲུབ་གཅིག་ཡོད་ན། །ཤེས་བྱ་འདི་
13-1-55b


ཀུན་གཏན་ནས་མི་སྣང་འགྱུར། །ཤེས་བྱ་གཅིག་ཀྱང་བདེན་པར་མ་གྲུབ་པས། །མཐའ་མེད་ཤེས་བྱའི་ཆོས་ཚུལ་རྣམ་པར་བཀྲ། །ཨེ་མ་ཆོས་རྣམས་ཀྱི་ཆོས་ཉིད་ནི་བསམ་གྱིས་མི་ཁྱབ་ཅིང་ངོ་མཚར་ཆེ་ལ་དེ་མཁྱེན་པའི་དེ་བཞིན་གཤེགས་པའི་མཉམ་
པ་ཉིད་སྟོན་པའི་སེང་གེའི་སྒྲ་ཐོས་པ་ལས་བློ་གྲོས་ཀྱི་ལུས་སྟོབས་ཆེས་ཆེར་རྒྱས་པས་མཐའ་མེད་པའི་ནམ་མཁའ་ཉིད་ཁམ་གཅིག་གིས་ཟ་བར་བཟོད་པ་ལྟ་བུ་གང་གིས། སྣང་སྲིད་ལ་སྤྲོས་པ་ཅིག་ཅར་གཅོད་པ་ཤིན་ཏུ་ཟབ་ཅིང་དཔགས་པར་དཀའ་བའི་རིགས་པ་
འཇམ་དབྱངས་ཕྱག་གི་རལ་གྲི་འདི་ཐོགས་ལ། ཆོས་གཅིག་ཀྱང་བདེན་པར་མ་གྲུབ་པས་ཐམས་ཅད་སྣང་བའི་ཕྱིར་སྟོང་པ་རྟེན་འབྱུང་དུ་འཆར་ཚུལ་ཁྱད་པར་ཅན་ལ་ཡིད་ཆེས་ལྡོག་པ་མེད་པ་ཀུན་ལ་བསྐྱེད་པར་མཛོད་ཅིག །དེ་ལྟར་གཞུང་གི་རིགས་པ་ལས་འཕྲོས་ཏེ་
བདེན་སྟོང་ཆེན་པོའི་རིགས་པ་འདི་ནི་རང་བློས་རྩལ་དུ་བཏོན་ཏེ་སྐལ་ལྡན་རྣམས་ལ་བཤད་པ་ཡིན་ནོ། །ས་བཅད་གཉིས་པ་རྗེས་སུ་མི་འབྲང་ན་མི་འཐད་པ་ལ། ཡུལ་འདུས་མ་བྱས་སྐད་ཅིག་མར་ཐལ་བ་དང་། དེ་ལྟར་ཁས་ལེན་ན་སྐྱོན་ཡོད་པར་བསྟན་པ་
གཉིས། དང་པོ། སྔོན་དང་ཕྱི་མའི་གནས་རྣམས་སུ། །དེ་ཡི་ངོ་བོ་མི་འབྱུང་ན། །འདུས་མ་བྱས་དེ་ཤེས་པ་བཞིན། །སྐད་ཅིག་འབྱུང་བར་ཤེས་པར་བྱ། །ཞེས་གསུངས་ཏེ། གལ་ཏེ་ཕྱོགས་གཉིས་པ་ལྟར་ཁས་བླངས་ཏེ།  ཤེས་པ་སྔོ༷ན་མ་ད༷ང་ཕྱི༷་
མའི༷་གན༷ས་སྐབས་རྣ༷མས་སུ༷་ཡུལ་དེ༷་ཡི༷་ངོ༷་བོ༷་གཅིག་ཁོ་ན་མི༷་འབྱུ༷ང་བར་ཤེས་པ་སྔ་མ་རང་དུས་ཀྱི་ཡུལ་འདུས་མ་བྱས་དེ་ཤེས་པ་ཕྱི་མའི་གནས་སྐབས་ན་མེད། ཕྱི་མའི་ཡུལ་སྔ་མའི་དུས་ན་མེད་པར། མདོར་ན་རང་ཡུལ་བྱེད་ཀྱི་ཤེས་པ་སོ་སོའི་ཡུལ་སོ་སོ་བ་ཡིན་གྱི་གཅིག་
13-1-56a


གི་ཡུལ་གཅིག་ལ་རྗེས་སུ་འབྲང་བ་མིན་ན༷་ནི། ཡུལ་འདུ༷ས་མ༷་བྱས༷་དེ༷་ཡང་། དཔེར་ན་སྐྱེས་མ་ཐག་ཏུ་འགགས་ནས་དུས་གཞན་དུ་མི་གནས་པའི་རྣམ་པར་ཤེས༷་པ༷་ཇི་ལྟ་བ་བཞི༷ན་དུ། སྐ༷ད་ཅི༷ག་མའི་རང་བཞིན་དུ་འབྱུང༷་བ་ལས་མི་འདའ་བར༷་
བློ་དང་ལྡན་པ་རྣམས་ཀྱིས་ཤེས༷་པ༷ར་བྱ༷འོ། །གཉིས་པ་དེ་ལྟར་ཁས་ལེན་ན་སྐྱོན་བསྟན་པ་ལ། རྐྱེན་ལ་ལྟོས་ན་འདུས་བྱས་སུ་ཐལ་བ། མི་ལྟོས་ན་རྟག་ཏུ་ཡོད་པའམ་མེད་པར་ཐལ་བ་གཉིས། དང་པོ།  སྔ་མ་སྔ་མའི་སྐད་ཅིག་གི། མཐུ་
ཡིས་འབྱུང་བར་འགྱུར་པ་ན། །འདུས་མ་བྱས་སུ་འདི་མི་འགྱུར། །སེམས་དང་སེམས་ལས་བྱུང་བ་བཞིན། །ཞེས་གསུངས་ཏེ། དེ་ལྟར་ཡུལ་ཅན་སོ་སོའི་ཡུལ་འདུས་མ་བྱས་དེ་སོ་སོ་བར་གྲུབ་པས་སྐད་ཅིག་མར་གྲུབ་ལ། དེ་ལྟར་ནའང་ད་རུང་འདུས་མ་
བྱས་ཡོད་དོ་ཞེས་རློམ་པ་དེ་དག་ལ་འདི་དྲི་སྟེ། དེ་ལྟ་བུའི་ཡུལ་ཅན་སོ་སོའི་ཡུལ་དུ་གྱུར་པའི་འདུས་མ་བྱས་དེ་རྣམས་རྐྱེན་ལ་ལྟོས་སམ་མི་ལྟོས་ཞེས་དྲིའོ། །ཕྱོགས་དང་པོ་ལྟར་ཡུལ་འདུས་མ་བྱས་རང་གི་སྔ༷་མ༷་སྔ༷་མའི༷་སྐ༷ད་ཅི༷ག་མ་རིམ་པར་འབྱུང་བ་གང་གི་མཐུ༷་ཡི༷ས་
སྐད་ཅིག་ཕྱི་མ་ཕྱི་མ་རྣམས་འབྱུང༷༷་བར༷་འགྱུར༷་བ༷་ཡིན་ན༷་ནི། རྒྱུ་དང་རྐྱེན་ལས་སྐྱེས་པའི་དངོས་པོ་ཡིན་པའི་ཕྱིར་འདུ༷ས་མ༷་བྱ༷ས༷་སུ༷་འདི༷་མི༷་འགྱུར༷་ཏེ། དཔེར་ན་འདུས་བྱས་སེ༷མས་ད༷ང་སེ༷མས་ལ༷ས་བྱུང༷་བ༷་ཇི་ལྟ་བ་བཞི༷ན་དུ་འགྱུར་རོ། །གཉིས་པ། སྐད་ཅིག་མ་རྣམས་
འདི་དག་ཏུ། །རང་དབང་འབྱུང་བར་འདོད་ན་ནི། །གཞན་ལ་ལྟོས་པ་མེད་པའི་ཕྱིར། །རྟག་ཏུ་ཡོད་པའམ་མེད་པར་འགྱུར། །ཞེས་ཕྱོགས་གཉིས་པ་ལྟར་ཁས་བླངས་ཏེ། འདི་ལྟར་ཡུལ་འདུས་མ་བྱས་ཀྱི་སྐ༷ད་ཅི༷ག་མ༷་རྣམ༷ས་རང་ཡུལ་བྱེད་ཀྱི་ཤེས་པ་སོ་སོའི་
13-1-56b


རང་དུས་ལ་སོགས་པ་འདི༷་ད༷ག་ཏུ༷་སྐད་ཅིག་སྔ་མ་སོགས་རྐྱེན་ལ་ལྟོས་མི་དགོས་པར་ར༷ང་དབ༷ང་དུ་འབྱུང༷་བ༷ར་འདོ༷ད་ན༷་ནི༷། རྒྱུ་གཞ༷ན་ལ༷་ལྟོས༷་པ༷་ཅུང་ཟད་ཀྱང་མེ༷ད་པ༷འི་ཕྱིར༷་ན། དུས་རྟག༷་ཏུ༷་ཡོ༷ད་པ༷འ༷མ། ཡང་ན་རྟག་ཏུ་མེ༷ད་པ༷ར་འགྱུར༷་བ་ཁོ་ནར་ཟད་དོ། །དེ་ལ་རྒྱུ་མེད་པའི་
དངོས་པོ་ཞིག་ཁས་ལེན་ན་རྟག་ཏུ་ཡོད་མེད་གང་རུང་དུ་འགྱུར་དགོས་ཚུལ་ནི། བརྟགས་མཐའ་བཟུང་སྟེ་གལ་ཏེ་རྒྱུ་མེད་བཞིན་པའི་དངོས་པོ་ཞིག་ཡོད་སྲིད་ན་དེ་རྟག་ཏུ་ལྡོག་པ་མེད་པར་ཡོད་པར་ཅིས་མི་འགྱུར་ཏེ། དངོས་པོ་གཞན་སྔར་ཡོད་ལ་ཕྱིས་མེད་པ་རྣམས་
ནི་རྒྱུ་ལོག་སྟོབས་ཀྱིས་འབྲས་བུ་ལྡོག་པའི་སྟོབས་ཀྱིས་ཡོད་པ་དང་མེད་པའི་གནས་སྐབས་སྲིད་པ་ཡིན་ལ། འདི་ལ་རྒྱུ་མེད་པས་དེ་ལོག་པ་མེད་ལ་རང་གི་ངོ་བོ་ནི་ལན་ཅིག་སྲིད་ཟིན་པས་མ་འོངས་པ་ནའང་ལྡོག་པ་མི་སྲིད་ལ། འདི་མ་བྱུང་བའི་དུས་ཀྱང་མི་སྲིད་དེ། དངོས་
པོ་གཞན་མ་སྐྱེས་པ་ནི་རྒྱུ་མ་ཚང་བས་ཤོལ་བ་ཡིན་ལ། འདི་ལ་རྒྱུ་མི་དགོས་པས་ནམ་ཡང་ཡོད་པར་ཅིས་མི་འགྱུར་ལ་དེ་བཞིན་དུ་ཕྱོགས་ཀུན་ནའང་ཡོད་དགོས་ལ། ཡང་ན་དངོས་པོ་རྣམས་ཡོད་པ་འདི་དག་ནི་རང་རང་གི་རྒྱུ་ཡིས་བྱས་པ་སྟེ། ས་བོན་མ་བཏབ་བཞིན་དུ་ལོ་
ཏོག་ཉེ་བར་སྣང་ནས་ལོངས་སྤྱོད་པ་མེད་ནའང་། ས་བོན་བཏབ་ན་ལོ་ཏོག་མངོན་སུམ་ཡོད་པར་བྱར་རུང་བ་བཞིན་རྒྱུ་ལ་ལྟོས་ཚད་ཀྱི་དངོས་པོ་རྒྱུའི་སྟོབས་ཀྱིས་མངོན་སུམ་དུ་ཡོད་ཅིང་སྣང་དུ་རུང་མོད་ཀྱི། གང་ལ་རྒྱུ་མེད་པ་དེ་དག་རྒྱུའི་རྗེས་སུ་མི་བྱེད་པ་ཡིན་པས་དེ་ནམ་
དུའང་ཡོད་པར་བྱར་མི་ནུས་ཤིང་ཡོད་པར་མི་རུང་སྟེ་རི་བོང་གི་རྭ་ལ་སོགས་པ་བཞིན་ནོ། །དེས་ན་འདུས་མ་བྱས་སྐད་ཅིག་མ་རྣམས་འདུས་བྱས་སུ་འགྱུར་དུ་དོགས་ནས་རྒྱུ་ལ་ལྟོས་མེད་དུ་ཁས་ལེན་པ་དེ་དག་གིས་རྟག་ཏུ་ཡོད་པའི་སྐད་ཅིག་མའམ། རྟག་ཏུ་ཡོད་མ་མྱོངས་
13-1-57a


བའི་སྐད་ཅིག་དུ་མ་ཞིག་ཁས་ལེན་དགོས་པས་འགལ་འདུ་ལ་དེ་ལས་ཆེ་བ་མེད་ཅིང་བཞད་གད་ཀྱི་གནས་སོ། །དེས་ན་དངོས་པོ་བསལ་ཙམ་གྱི་གཞན་སེལ་རྟོག་པའི་གཟུགས་བརྙན་ལ་ཡུལ་འདུས་མ་བྱས་ཞེས་གཅིག་བདེན་
དུ་བརློམས་པར་ཟད་ཀྱི། ཡུལ་ཁོ་རང་གི་ངོ་བོ་ལ་ཐ་སྙད་དུ་དོན་བྱེད་པའི་ནུས་པའང་མེད་ན་དོན་དམ་པར་གྲུབ་པ་ལྟ་ཅི་སྨོས། དེས་ན་དོན་བྱེད་ནུས་ཀྱི་དངོས་པོ་གནོད་མེད་ཀྱི་དབང་པོ་ལ་མངོན་སུམ་སྣང་བའི་ཆོས་རྣམས་ལ་དེ་དང་དེར་ཞེན་པའི་འགྲོ་བ་རྣམས་ནི་འོས་ཤིང་།
མངོན་སུམ་དུ་མ་སྣང་། ཚད་མས་མི་འགྲུབ་པའི་རྟག་དངོས་སོགས་ལ་བློ་རྟེན་འཆའ་བ་རྣམས་ནི་ཆེས་མི་འོས་པ་ཉིད་དོ། །གསུམ་པ་རྟག་དངོས་བཀག་པའི་མཇུག་བསྡུ་བ་ནི། དོན་བྱེད་ནུས་པ་མ་ཡིན་ལ། །དེ་འདོད་བརྟགས་པས་ཅི་ཞིག་བྱ། །མ་ནིང་གཟུགས་
བཟང་མི་བཟང་ཞེས། །འདོད་ལྡན་རྣམས་ཀྱིས་བརྟགས་ཅི་ཕན། །ཞེས་གསུངས་ཏེ། དེ་ལྟར་རྟག་བདག་དང་དབང་ཕྱུག་འདུས་མ་བྱས་སོགས་ལ་རློམ་པས་གཞག་པ་ཙམ་ལས་ཡུལ་རང་ལ་དོ༷ན་བྱེད་པའི་ནུ༷ས་པ༷་ཅུང་ཟད་ཀྱང་ཡོད་པ་མ༷་ཡི༷ན་པ་དེ་འདྲ་བ་ལ༷། ཡུལ་
དེ༷་ལྟ་བུ་བྱེད་པ་པོ་སོགས་སུ་འདོ༷ད་པའི་བློས་ནན་གྱིས་དེ་ཡོད་པར་བརྟག༷ས་པ༷ས་ཅི༷་ཞི༷ག་བྱ༷་སྟེ། དཔེར་ན་འཁྲིག་པ་བརྟེན་མི་ནུས་པའི་མ༷་ནི༷ང་ཞིག་ལ་དམིགས་ནས་འདི་གཟུ༷གས་བཟ༷ང་ངམ་མི༷་བཟ༷ང་ཞེ༷ས། འཁྲིག་པའི་འདོ༷ད་པ་དང་ལྡ༷ན་ཞིང་དོན་དུ་གཉེར་བའི་བུད་མེད་
རྣམ༷ས་ཀྱིས༷་ཡུལ་དེ་བརྟག༷ས་པས་ཅི༷་ཞིག་ཕ༷ན་ཏེ། དེ་དག་གིས་གྲུབ་ཏུ་རེ་བའི་འདོད་དོན་ནི་འཁྲིག་པ་ཡིན་ན། མ་ནིང་དེ་འཁྲིག་པའི་དོན་བྱེད་པའི་ནུས་པ་དང་བྲལ་བས་རེ་བ་སྒྲུབ་མི་ནུས་པ་དང་འདྲ་བར་རྟག་དངོས་ཀྱི་ཡུལ་དེ་འདྲ་བ་ནི་དོན་བྱེད་པའི་ནུས་པས་སྟོངས་པས་དེ་ཁས་
13-1-57b


བླངས་ཀྱང་། ཁས་བླངས་པའི་དོན་ལྟར་ཐོབ་པ་ནམ་ཡང་མེད་དོ། །དེས་ན་བློ་དང་ལྡན་པ་རྣམས་ནི་དོན་བྱེད་ནུས་པའི་དངོས་པོ་རྣམས་ལ་དགག་པ་དང་བསྒྲུབ་པའི་རྣམ་གཞག་བྱེད་ཀྱི། མེད་བཞིན་ནན་གྱིས་བཏགས་པའི་དོན་མེད་ཀྱི་ངལ་བ་དང་དུ་མི་ལེན་ཞིང་མི་བསྒྲུབ་
ལ། དེ་ཉིད་ཀྱི་ཕྱིར་ན་ནད་མེད་ལ་སྨན་བཏུང་མི་དགོས་པ་ལྟར་དགག་དགོས་པའང་མེད་པས་བཏང་སྙོམས་སུ་བྱ་བ་ཡིན་ནོ། །འོ་ན་གོང་དུ་རྟག་དངོས་མ་བཀག་གམ་ཞེ་ན། དེ་ནི་གཞན་གྱི་ལོག་རྟོག་དགག་པ་སྟེ། གལ་ཏེ་གཞན་གྱིས་དེ་ལྟར་བརྟགས་སུ་
ཟིན་པ་མིན་ན་དགག་པའང་བྱེད་མི་དགོས་པས་དགག་པ་དེ་ནི་གཞན་དབང་གིས་བྱུང་བར་ཤེས་པར་བྱའོ། །དེས་ན་དོན་བྱེད་ནུས་པ་དངོས་པོའི་མཚན་ཉིད་ཅེས་སྨྲ་ཞིང་། དངོས་པོ་དེ་ལྟ་བུ་ལ་གང་ཟག་དང་ཆོས་ལ་བདག་མེད་པ་ལ་སོགས་པ་ཚད་མ་གཉིས་
ཀྱི་སྒྲུབ་པ་ཕྱིན་ཅི་མ་ལོག་པ་སྟོན་ཅིང་། དེ་ལས་བཟློག་པ་སྒྲོ་བཏགས་པའི་དངོས་པོ་དགག་པར་བྱེད་དེ། དོན་བྱེད་ནུས་པ་བརྟག་གཞིར་བྱས་པ་ལ་དགག་སྒྲུབ་ཀྱི་ཚད་མས་བཅད་པ་ལྟར་སྐྱེས་བུའི་དོན་བསླུ་མེད་དུ་ཐོབ་ནུས་པ་ཡིན་ཏེ། འདོད་ལྡན་བུད་མེད་
ཀྱིས་སྐྱེས་པ་ལ་བརྟག་པ་བཞིན་ནོ། །འོ་ན་དངོས་པོ་ཙམ་ལ་བདག་མེད་བསྒྲུབ་པ་ཡིན་པས་ཆོས་ཐམས་ཅད་བདག་མེད་པར་མ་བསྟན་ནོ་སྙམ་ན་མ་ཡིན་ཏེ། ཐམས་ཅད་ཅེས་པའི་སྒྲས་བརྗོད་པར་འདོད་པའི་དོན་མ་ལུས་པ་བརྗོད་ལ། བརྗོད་པར་འདོད་པ་
ནི་དོན་བྱེད་ནུས་ཀྱི་དངོས་པོ་ལ་འཛིན་ནོ། །དངོས་པོ་ལ་བདག་མེད་པར་རྟོག་ན་དངོས་མེད་ལ་ཅིའི་ཕྱིར་མི་རྟོག་སྟེ། དངོས་མེད་ནི་དངོས་པོ་བཅད་པའི་མེད་དགག་ཙམ་ལས་གཞན་དུ་མེད་པས་ན་ཐ་སྙད་ཀྱི་ཚད་མས་ཀྱང་དོན་བྱེད་ནུས་སྟོང་ལ་ཡུལ་རང་དབང་དུ་
13-1-58a


གྲུབ་པ་ཅུང་ཟད་ཀྱང་མེད་པར་ངེས་ནས། དངོས་མེད་ཁོ་རང་རང་རྐྱ་ཐུབ་པར་གཞིར་བཞག་ལ་དགག་སྒྲུབ་མི་བྱེད་པར་བསྟན་ན་དོན་དམ་པར་མ་གྲུབ་པ་ལྟ་ཅི་སྨོས།  དངོས་པོ་ལ་རྣམ་པར་དཔྱད་དེ་དངོས་པོ་གང་དགག་པ་དེ་ལ་
དངོས་མེད་ཅེས་བཏགས་ཀྱི། དེ་ལས་ལོགས་སུ་དངོས་མེད་ཅེས་རང་དབང་གིས་བློར་འཆར་བ་ནམ་ཡང་མི་སྲིད་ན་མཁས་པ་དག་གིས་དེ་རང་རྐྱ་ཐུབ་པར་ཡོད་པར་ཇི་ལྟར་འཛིན། མ་བཟུང་ན་དེ་ཁོ་ན་ལ་དགག་ཀྱང་ཅི་དགོས་ལ། བསྒྲུབ་ཀྱང་ཅི་སྒྲུབ་སྟེ་མོ་གཤམ་
གྱི་བུ་ལ་སོགས་པ་བཞིན་དུ་བཏང་སྙོམས་སུ་གཞག་པ་ཞེས་བྱའི།  དངོས་མེད་སོགས་ཀྱི་ཐ་སྙད་ནི་ཡོད་ཅིང་དེ་དངོས་པོ་ལ་བརྟེན་ནས་འབྱུང་གི་ལོགས་སུ་འབད་པ་རྩོམ་དགོས་པ་མིན་ནོ། །དེས་ན་ཀུན་རྫོབ་ནི་དོན་བྱེད་ནུས་ཀྱི་དངོས་པོ་ཁོ་ན་ལ་འཇོག་ལ། དེ་ནི་
དོན་བྱེད་ནུས་པ་ཡིན་པའི་ཕྱིར་ན་སྐད་ཅིག་མ་ཡིན་པས་ཁྱབ་སྟེ། གཞན་སྐད་ཅིག་མ་མིན་པ་ནི་རིམ་དང་ཅིག་ཤོས་ཀྱི་དོན་བྱེད་པ་དང་འགལ་བའི་ཕྱིར་རོ། །ཚུལ་འདི་ཀུན་རྫོབ་བཤད་པའི་སྐབས་སུ་གནད་ཆེའོ། །དེ་ལྟར་ཐ་སྙད་ལ་དཔྱད་ནས་རྫས་ཡོད་ལ་
ཀུན་རྫོབ་ཏུ་འཛིན་པའི་ལུགས་ལ། བཏགས་ཡོད་ཙམ་ནི་རང་རྐྱ་ཐུབ་པའི་ངོ་བོར་མེད་པས། དེ་དག་དོན་གཞན་ཤིག་ཏུ་གཞག་མི་དགོས་ཏེ། བུམ་པ་དང་བུམ་པའི་སྤྱི་ལ་སོགས་པ་བཞིན་ནོ། །དེའང་དོན་དམ་པར་རྟག་མི་རྟག་གཉིས་གང་དུའང་མ་གྲུབ་ཀྱང་། ཐ་
སྙད་དུ་དངོས་པོ་རྣམས་མི་རྟག་པར་ངེས་པ་ཡིན་ཅིང་རྟག་པའི་ཐ་སྙད་ནི་མི་རྟག་པ་ལས་ལོག་ཙམ་ལ་རྟག་པར་བཞག་པ་དང་། རིགས་འདྲ་རྒྱུན་མི་འཆད་པ་ལ་རྟག་པ་ཞེས་བཏགས་པ་ཙམ་དུ་ཤེས་པར་བྱའོ། །དེས་ན་གནས་ཚུལ་ལ་དཔྱོད་པའི་ངོར་ཆོས་ཐམས་ཅད་
13-1-58b


བརྟེན་ནས་བཏགས་པ་ཙམ་དུ་གནས་ལ། རྟེན་ཅིང་འབྲེལ་བའི་ངང་ཚུལ་ཅན་གྱི་སྣང་བ་རྣམས་ནི་མ་གྲུབ་བཞིན་དུ་འགོག་ཏུ་མེད་པ་ཆུ་ནང་གི་ཟླ་བ་ལྟ་བུ་ཡིན་པ་དེས་ན་གང་གཅིག་པུར་བདེན་པ་མི་སྲིད་དོ། །དེས་ན་གཅིག་དུ་བྲལ་འདིས་དུས་དང་རྣམ་པ་ཀུན་ཏུ་གཅིག་
བདེན་འགོག་གི། ཐ་སྙད་བཏགས་པའི་གཅིག་ཙམ་འགོག་པ་མིན་པར་ཤེས་པར་བྱའོ། །བཏགས་པའི་གཅིག་ཙམ་ནི་དུ་མ་ལ་གཅིག་ཅེས་བཏགས་པ་ཙམ་ཡིན་པས་དོན་དུ་གཅིག་པུར་གྲུབ་པ་མ་ཡིན་པས་དེས་གཅིག་བདེན་ལ་མི་གནོད་དོ། །དེ་བཞིན་དུ་ཡང་
དག་པར་བདེན་གྲུབ་དང་། ཐ་སྙད་བཏགས་ཙམ་གྱི་གྲུབ་པ་སོགས་ཤན་ཕྱེད་པ་རྣམ་པ་ཀུན་ཏུ་གལ་ཆེ་སྟེ།  སེནྡྷ་པའི་སྒྲ་བཞིན་དུ་ཐད་ཀར་གོ་བ་ཤན་ཕྱེད་པ་ཞིག་ལེན་མ་ཤེས་ན་གཞུང་གང་འཆད་ཉན་སེམས་ཀྱང་རྩྭ་པལ་བ་ཛ་བཞིན་འཛིངས་ནས་ཅིར་ཡང་ངོས་མི་
ཟིན་པ་འབྱུང་བས་ཤན་ཕྱེད་པར་བྱའོ། །གཉིས་པ་གང་ཟག་གཅིག་བདེན་དགག་པ། སྐད་ཅིག་སྐད་ཅིག་མ་ཡིན་པར། །གང་ཟག་བསྟན་དུ་མི་རུང་བས། །གཅིག་དང་དུ་མའི་རང་བཞིན་དང་། །བྲལ་བར་གསལ་བར་རབ་ཏུ་ཤེས། །ཞེས་
གསུངས་ཏེ། དེ་ལ་འཁོར་བ་གཅིག་ནས་གཅིག་ཏུ་བརྒྱུད་ཅིང་བཅིང་གྲོལ་གྱི་ཐ་སྙད་གདགས་པའི་གཞིར་གྱུར་པ་སེམས་ཅན་རྣམས་ཀྱི་རྒྱུད་ལ་གཅིག་པུར་ཞེན་ནས་གང་ཟག་ཅེས་ཐ་སྙད་བཏགས་ཏེ། གང་ཟག་འཁོར་བར་འཁྱམས། ཐར་པ་ཐོབ་ཅེས་
སྔ་ཕྱིའི་སྐད་ཅིག་དུ་མ་བསྡོམས་པ་ལ་འཇོག་པའི་ཕྱིར་རོ། །དེ་ལ་བློས་དམིགས་ནས་བདག་དང་སྐྱེས་བུ་ལ་སོགས་པའི་རྣམ་གྲངས་ཀྱིས་བརྗོད་ཅིང་རང་རྒྱུད་དུ་གཏོགས་པ་གང་ཡིན་པ་དེ་ལ། འགྲོ་བ་རྣམས་ནི་མ་བརྟགས་མ་དཔྱད་པར་ངའོ་སྙམ་དུ་འཛིན་ཞིང་།
13-1-59a


དེའང་ཕྱི་རོལ་པ་རྣམས་ནི་བདག་དེ་ཉིད་ཟ་བ་པོ་དང་། རྟག་པའི་དངོས་པོ་དང་། རྣམ་འགྱུར་གྱི་བྱེད་པ་པོ་མིན་པ་སོགས་ཀྱི་མཚན་ཉིད་དང་ལྡན་པར་འདོད་ལ། ངོ་བོ་ཡང་མ་སྐྱེས་ཡེ་ཡོད་ལྟ་བུར་ཞེན། དེ་ལ་ལས་ཐམས་ཅད་
ལ་ཁྱབ་པ་དང་། ལ་ལས་མ་ཁྱབ་པ་དང་། ལ་ལས་བེམ་པོ། ལ་ལས་ཤེས་པ་སོགས་ལྷན་སྐྱེས་ཀྱི་ལྕགས་སྒྲོག་ལ་ཀུན་བཏགས་ཀྱི་གཟེར་སྣ་ཚོགས་བཏབ་པའི་གྲུབ་མཐའ་སྨྲའོ། །གནས་མ་བུའི་སྡེ་པ་དག་ནི་བདག་དེ་ནི་དངོས་པོར་ཡོད་ཅིང་ལས་འབྲས་
ཀྱི་རྟེན་ཡིན་ལ། དེ་ཕུང་པོ་དང་གཅིག་ཀྱང་མ་ཡིན་ལ་ཐ་དད་དུའང་བརྗོད་དུ་མེད་ཅིང་། དེ་བཞིན་དུ་རྟག་མི་རྟག་སོགས་གང་དུའང་བརྗོད་དུ་མེད་པར་འདོད་དོ། །སངས་རྒྱས་པའི་གྲུབ་མཐའ་མཚན་ཉིད་པ་འཛིན་པའི་ནང་པ་ཐམས་ཅད་ནི་ཕུང་པོ་ལྔའི་ཚོགས་
པ་དང་རྒྱུན་ལ་ངའོ་སྙམ་དུ་རློམ་པར་ཟད་ཀྱི། བདག་རང་ངོས་ནས་གྲུབ་པ་མེད་པར་འདོད་པའི་དེ་ཡི་ཚུལ་རིགས་པས་གཏན་ལ་ཕབ་ན། འདི་ལྟར་སྐ༷ད་ཅི༷ག་སྐ༷ད་ཅི༷ག་གིས་སྐྱེ་ཞིང་འཇིག་པ་ཉེར་ལེན་གྱི་ཕུང་པོ་ལྔ་པོ་འདི་མ༷་ཡི༷ན་པ༷ར། གཞན་ཞིག་ནས་ག༷ང་ཟ༷ག་ཅེས་
བྱ་བ་ཞིག་རྡུལ་ཙམ་ཡང་རིགས་པ་དང་མཐུན་པར་བསྟན༷་དུ༷་མི༷་རུ༷ང་བ༷ས་ན། གང་ཟག་ཅེས་བྱ་བ་གདགས་གཞི་ཕུང་པོ་ལ་བརྟེན་ནས་བཏགས་པ་ཙམ་ལས་དོན་དུ་བདེན་པའི་གཅི༷ག་ད༷ང་དུ༷་མ༷འི་རང༷་བཞི༷ན་ད༷ང་བྲལ༷་བ༷ར་བློ་དང་ལྡན་པ་རྣམས་ཀྱིས་ཆེས་ཤིན་ཏུ་གས༷ལ་བ༷ར་ར༷བ་
ཏུ༷་ཤེ༷ས་པ་ཡིན་ཏེ། ཕུང་པོ་ལས་ཐ་དད་པའི་བདག་མ་གྲུབ་ལ་ཕུང་པོ་ནི་དུ་མ་དང་མི་རྟག་པ་ཡིན་པས་བདག་གཅིག་བདེན་གྱི་རང་བཞིན་དུ་མི་རུང་ངོ་། །གཞན་ཡང་བདག་དེ་སྐད་ཅིག་མ་ཉིད་ཡིན་པར་གྱུར་ན་ནི་རང་བཞིན་གཞན་དང་གཞན་འབྱུང་བས་དུ་མར་འགྱུར་
13-1-59b


ཞིང་བྱེད་པོ་སྤྱོད་པོ་ཐ་དད་ལ། སྐད་ཅིག་མ་མིན་ན་ནི་སྔ་མ་མི་འཇིག་ལ་ཕྱི་མ་གཞན་མི་འབྱུང་བར་རྟག་པ་གཅིག་པུའི་རང་བཞིན་དུ་འགྱུར་ལ། དེ་ལྟར་ན་བཅིང་གྲོལ་བདེ་སྡུག་སོགས་མི་འཐད་ཅིང་མ་སྐྱེས་པ་ལ་དངོས་པོ་ཡོད་པའི་སྐབས་མི་སྲིད་དེ་མོ་གཤམ་གྱི་
བུ་ལྟར་འགྱུར་ཞིང་སྤྱིར་རྟག་དངོས་འགོག་པའི་རིགས་པས་ཁེགས་སོ། །བརྗོད་མེད་ཀྱི་བདག་ནི་བདེན་པའི་ཁྱབ་བྱེད་ལོག་པས་ཁྱབ་བྱ་བདེན་པར་གནས་ག་ལ་སྲིད་དེ། གཅིག་དང་ཐ་དད་གང་དུ་མེད་པ་དེ་ཉིད་ཀྱི་ཕྱིར་ན་ནམ་མཁའི་མེ་ཏོག་ལ་སོགས་ལྟར་བསྒྲིམ་མི་
དགོས་པར་གྲུབ་ལ་ཐ་སྙད་དུའང་དངོས་པོ་ཡིན་ན་གཞི་གཅིག་ལ་ལྟོས་ནས་གཅིག་དང་ཐ་དད་གང་རུང་དུ་གཞག་ཏུ་ཡོད་པས་ཁྱབ་པ་ལ་བདག་ལ་དེ་མེད་པས་ན་བདག་དངོས་པོར་ཡོད་ཅེས་དམ་བཅའ་བ་ཁྱབ་བྱེད་མེད་པའི་ཁྱབ་བྱ་ཁས་ལེན་པ་ནི་ཤིན་ཏུ་བླུན་པ་སྟེ། 
ཤིང་མེད་པར་ཁས་བླངས་ནས་ཤ་པ་ཡོད་པར་འདོད་པ་བཞིན་ནོ། །དེས་ན་བཅོམ་ལྡན་འདས་ཀྱིས། དཔེར་ན་ཡན་ལག་ཚོགས་རྣམས་ལ། །ཤིང་རྟ་ཞེས་ནི་བྱ་བར་འདོད། །དེ་བཞིན་ཕུང་པོ་རྒྱུར་བྱས་ནས། །ཀུན་རྫོབ་ཏུ་ནི་སེམས་ཅན་བརྗོད། །
ཅེས་གསུངས་པ་ལྟར་གང་ཟག་ཅེས་བྱ་བ་གཅིག་དང་དུ་མའི་རང་བཞིན་དང་བྲལ་བས་དོན་དམ་པར་བདེན་པ་མེད་ཀྱང་། ཀུན་རྫོབ་ཐ་སྙད་དུ་ཕུང་པོ་ལྔ་རྒྱུར་བྱས་ནས་བདག་ཏུ་དམིགས་པ་སྟེ། ཕུང་པོ་ལྔ་ཆ་མ་ཕྱེས་པ་ཙམ་ལ་གཅིག་ཏུ་བཟུང་བ་ལ་གང་ཟག་
ཅེས་བཏགས་པ་དང་། ཕུང་པོ་ལྔའི་རྒྱུན་སྐད་ཅིག་མ་རྣམས་ལ་གཅིག་ཏུ་བཟུང་སྟེ་རྒྱུད་ཅེས་བྱ་ཞིང་། ཕྱོགས་དང་དུས་ཀྱི་ཆ་ཕྱེས་པ་མ་ཡིན་པར་དེའི་རྒྱུད་དུ་གཏོགས་པའི་ཆོས་རྣམས་ལ་གཅིག་པུར་བཏགས་ཏེ། གང་ཟག་འདི་ནི་སྔར་འདི་ནས་འཕོས། །
13-1-60a


ཕྱིས་འདིར་སྐྱེ་ཞེས་ཐ་སྙད་རུང་བ་བཞིན་ནོ། །དེ་ལ་ངར་འཛིན་ལྷན་སྐྱེས་ཀྱི་ཕུང་པོ་ལྔ་ལ་བརྟེན་ནས་བཏགས་པའི་ང་ཙམ་ལ་དམིགས་ཀྱི། ཕུང་པོ་ལྔ་ལ་ཆ་ཕྱེས་ནས་གསལ་པོར་དམིགས་པ་མ་ཡིན་ཏེ། དེ་དམིགས་རྣམ་སོ་
སོར་མི་ཕྱེད་པར་གོམས་པའི་ཤུགས་ཀྱིས་འཇུག་པ་ཙམ་ཡིན་པའི་ཕྱིར་རོ། །འོན་ཀྱང་བཏགས་ཆོས་གང་ཟག་དེའི་གདགས་གཞི་ཕུང་པོ་ལྔ་ཡིན་པས་ཕུང་པོ་ལྔ་ཙམ་ལ་གང་ཟག་ཏུ་བཏགས་ཞེས་དམིགས་རྣམ་ཕྱེ་ཞིང་དཔྱད་ན་དེ་ལྟར་འཇོག་དགོས་ཏེ། བུམ་
འཛིན་གྱི་བློས་དམིགས་ཡུལ་བཏགས་པའི་བུམ་པ་ཙམ་ཡིན་ཀྱང་། གདགས་གཞི་གཟུགས་ལ་སོགས་པའི་རང་མཚན་དམིགས་པར་འཇོག་པ་བཞིན་ནོ། །དེས་ན་ལས་འབྲས་ཀྱི་རྟེན་དུ་གྱུར་པའི་བདག་དེ་གང་ཡིན་དཔྱད་ན། ཁ་ཅིག་གིས་ཡིད་རྣམ་གྱི་རྒྱུན་
དང་། ཁ་ཅིག་གིས་ཕུང་པོའི་རྒྱུན་སོགས་འདོད་ཀྱང་། དོན་དུ་ལས་བྱེད་པ་པོ་ཉིད་ལ་སྨིན་གྱི་གཞན་དུ་སྨིན་མི་སྲིད་པ་ལ། ལས་བྱེད་པ་པོ་ཞེས་བྱ་བའང་དུ་མ་ཚོགས་པའི་ཆོས་ཞིག་ལ་བྱེད་པོ་ཞེས་གཅིག་ཏུ་བཏགས་པ་ཙམ་ལས་དོན་དམ་པར་ནི་ལས་བྱེད་པོ་དང་
ལས་འབྲས་སོགས་བདེན་པར་གྲུབ་པ་མེད་ལ་དེ་མེད་པའི་གནད་ཀྱིས་ལས་རྒྱུ་འབྲས་བྱས་པ་ཆུད་མི་ཟ་ཞིང་། མ་བྱས་པ་དང་མི་ཕྲད་པ་ཡིན་ཏེ། བཏགས་ཙམ་མིན་པར་ལས་བྱེད་པ་པོ་ཡོད་ན། དེ་རྟག་པ་ཡིན་ན་ནི་ལས་བྱར་མི་རུང་ལ་འབྲས་བུ་སྨིན་ཡང་རུང་བ་མི་
འཐད། མི་རྟག་པ་ཡིན་ན་ནི་བྱེད་པོ་དང་སྤྱོད་པོ་ཐ་དད་པས་རྣམ་སྨིན་མྱོང་བར་མི་འཐད་པ་དེས་ན་ཆོས་དུ་མ་ལ་གཅིག་ཏུ་བཏགས་པའི་ང་ཙམ་དེ་ཉིད་བྱེད་པོར་ཡང་རུང་ལ་རྣམ་སྨིན་མྱོང་བ་པོར་འཐད་དེ། སྔར་ངས་འདི་བྱས།  ད་ལྟ་ས་བོན་འདི་འདེབས། སང་སྟོན་དུས་
13-1-60b


བཟའོ་ཞེས་དུས་ཀྱི་ཆ་མི་ཕྱེ་བར་གཅིག་ཏུ་ཞེན་པ་མ་བརྟགས་མ་དཔྱད་པའི་ང་ཙམ་དེ་ཡི་དབང་དུ་བྱས་ཏེ་ལས་རང་གིར་བྱ་བར་གསུངས་པ་ཡིན་གྱི། དོན་དམ་པར་ད་ལྟའི་ང་ཙམ་པོ་འདི་ཡང་མེད་པར་གསུངས་པའི་ཕྱིར་ན་ལས་འབྲས་ཀྱི་རྟེན་དཔྱོད་རིགས་ཀྱིས་རྙེད་
དགོས་པ་མ་ཡིན་ནོ། །དེ་ལ་བདག་སྔར་སྡུག་བསྔལ་འདི་མྱོང་སྙམ་པ་དང་།  ད་ལྟ་བདེའོ་སྙམ་པ་སྔར་གྱི་ཕུང་པོ་ལྔ་དང་ད་ལྟའི་ཕུང་པོ་ལྔ་ཆ་མ་ཕྱེས་པར་གཅིག་ཏུ་བཏགས་པ་དེ་བཞིན་སྲིད་པ་ཐོག་མཐའ་མེད་པའི་བར་དུ་རིལ་པོ་གཅིག་ཏུ་བཏགས་ནས་ངའོ་སྙམ་པ་
དེའི་དབང་དུ་ན་ཡུལ་དང་དུས་ལ་སོགས་པའི་ཆ་སོ་སོར་བརྟགས་ཤིང་དཔྱད་ནས་མ་ཕྱེས་པའི་ང་ཙམ་ཞིག་ལས་འབྲས་ཀྱི་རྟེན་དུ་འཐད་དེ། ཆ་ཕྱེས་ན་ནི་རྒྱུ་དང་འབྲས་བུ་དུས་མཉམ་པ་ནི་མི་སྲིད་པས་ལས་བྱེད་པ་པོ་ཉིད་ལ་རྣམ་པར་སྨིན་པ་འབྱུང་བར་བསྒྲུབ་མི་ནུས་
སོ། །དེ་ལྟར་སྔར་གྱི་ལས་བྱེད་པ་པོ་དང་། ད་ལྟའི་མྱོང་བ་པོ་དང་། མ་འོངས་ན་མྱོང་བར་འགྱུར་བ་པོ་རྣམས་བདག་གོ་ཞེས་གཅིག་ཏུ་བཏགས་པ་དེས་ན་བདག་དེ་ནི་དུ་མ་ལ་གཅིག་ཏུ་བཏགས་པ་ཡིན་གྱི། ལེགས་པར་དཔྱད་ན་སྔར་དང་ད་ལྟ་མ་འོངས་པའི་ཕུང་
པོ་ཐམས་ཅད་རིམ་པས་སྐད་ཅིག་མ་མ་གཏོགས་གཅིག་ཡིན་པ་མི་སྲིད་པས་དཔྱད་པའི་དབང་དུ་ན་ལས་བྱེད་པོ་དང་མྱོང་པོ་རྒྱུན་གཅིག་ལ་བཏགས་པས་རྒྱུན་ཙམ་བཞག་ཀྱང་གཞལ་ལུགས་གཅིག་ཏུ་ན་འགལ་བ་མེད་མོད། འོན་ཀྱང་རྒྱུན་ཙམ་ཞེས་པའི་ཕུང་
པོའང་དཔྱད་ན་བཏགས་པ་ཙམ་ཡིན་ལ། མཐར་དུ་མ་ལ་མ་བཏགས་པའི་གཅིག་བདེན་མི་རྙེད་པས། མདོར་ན་གང་ཟག་གཅིག་བདེན་མི་སྲིད་པར་དུ་མ་ལ་གཅིག་ཏུ་བཏགས་པའི་གང་ཟག་ཙམ་གྱི་ཚུལ་འདིས་ལས་འབྲས་ཀྱི་འཇོག་ཚུལ་སོགས་གནད་ཀྱི་དོན་དུ་མ་
13-1-61a


ཤེས་པར་བྱའོ། །འདི་སྐབས་ལས་འབྲས་ཀྱི་རྟེན་ཞེས་པ་ལས་ཀྱི་རྣམ་པར་སྨིན་པ་ནི་ལས་བསགས་པ་པོ་རང་ལ་སྨིན་པར་གསུངས་པའི་བདག་དེ་གང་ལ་ངོས་འཛིན་དཔྱད་པ་ཡིན་གྱི། བག་ཆགས་ཀྱི་བགོ་གཞི་སོགས་ཀྱི་
རྟེན་དུ་གོ་བར་མི་བྱའོ། །གཉིས་པ་ཁྱབ་བྱེད་ཀྱི་སྤྱི་གཅིག་བདེན་དགག་པ་ནི། ཐ་དད་ཕྱོགས་ཅན་དང་འབྲེལ་ཕྱིར། །ཁྱབ་རྣམས་གཅིག་པུར་ག་ལ་འགྱུར། །ཞེས་གསུངས་ཏེ། དེ་ལ་སྤྱིར་ཁྱབ་པ་ཞེས་བྱ་བ་ཆོས་དུ་མ་ལ་དེའི་རང་བཞིན་རྗེས་སུ་
སོང་བ་ངོ་བོ་གཅིག་གི་ཚུལ་གྱིས་ཁྱབ་པ་སྤྱི་བྱེ་བྲག་ལྟ་བུ་དང་། ཆོས་གང་གི་མཐའི་བར་དུ་གང་གནས་པར་གྱུར་པ་ངོ་བོ་ཐ་དད་པའི་ཚུལ་གྱིས་ཁྱབ་པ་གོས་ལ་ཚོན་གྱིས་ཁེབས་པ་ལྟ་བུ་གཉིས་ཡོད་ཅིང་། དེ་ལས་ཐམས་ཅད་ལ་སྤྱིར་ཁྱབ་པ་ནམ་མཁའ་དང་དུས་དང་
ཕྱོགས་རྣམས་ལ་ཆེན་པོ་དང་ཚད་མེད་པའི་འདུ་ཤེས་ཀྱིས་དངོས་པོར་ཞེན་ནས་དུས་རྒྱུར་སྨྲ་བ་སོགས་ཕྱི་རོལ་པའི་འདོད་ཚུལ་བྱུང་ཞིང་།  ཡང་བྱེ་བྲག་པ་ལ་སོགས་པ་ནི་རང་གིས་གསལ་བའམ་བྱེ་བྲག་དུ་མ་ལ་རྗེས་སུ་འགྲོ་བའི་སྤྱི་ནི་ཁྱབ་པ་རྟག་པ་མི་སྣང་བའི་རང་
བཞིན་ཅན་དུ་ཡོད་ཅིང་དེས་གསལ་བ་རྣམས་བ་ལང་དུ་མ་ཐག་པ་གཅིག་གིས་བཏགས་པ་བཞིན་དུ་སྦྲེལ་ཞིང་གནས་ལ། དེའང་སྤྱི་ཆེན་པོ་ཡོད་པ་ལྟ་བུ་ཐམས་ཅད་ལ་ཁྱབ་པ་དང་།  ཉི་ཚེ་བ་བ་ལང་གི་སྤྱི་ལྟ་བུ་གཉིས་སུ་ཡོད་ཅིང་སྤྱི་གསལ་རྫས་ཐ་དད་དུ་འདོད།
གྲངས་ཅན་པ་སྤྱི་གསལ་རྫས་གཅིག་ཏུ་འདོད་དོ། །དེ་ལ་སོགས་པ་ཁྱབ་བྱེད་རྣམས་གང་ཡིན་ཡང་རུང་རིགས་པ་འདིས་འགོག་པ་ཡིན་ཏེ། ཐ༷་ད༷ད་པའི་ཕྱོག༷ས་ཅ༷ན་ནམ། ཕྱོགས་ཐ་དད་པ་ཅན་ཏེ་ཁྱབ་བྱའི་དངོས་པོ་མི་འདྲ་བ་ཤིང་ལ་སོགས་པ་ད༷ང་
13-1-61b


འབྲེལ༷་བའི་ཕྱིར༷་ན། ཁྱབ༷་པའི་དངོས་པོར་འདོད་པ་དེ་རྣམ༷ས་ཀྱང་གཅི༷ག་པུ༷ར་བདེན་པར་ག༷་ལ༷་འགྱུར༷་ཏེ། གལ་ཏེ་ནམ་མཁའ་དང་སྤྱི་ལ་སོགས་པ་ཁྱབ་པའི་དངོས་པོ་དེ་དག་ཁྱབ་བྱ་ཕྱོགས་དང་དུས་ཀྱིས་བསྡུས་པའི་དངོས་པོ་དེ་དག་དང་མ་འབྲེལ་ན་ནི་ཁྱབ་པར་འཇོག་མི་རུང་ལ།
འབྲེལ་ན་ནི་ཤར་ཕྱོགས་ཀྱི་ཤིང་ལ་ཁྱབ་པའི་ཆ་དེ་ནུབ་ཕྱོགས་ཀྱི་ཤིང་ལ་ཁྱབ་པའི་ཆ་དེ་དང་གཅིག་ཡིན་ནམ་མིན། ཡིན་ན་ནི་ཁྱབ་བྱེད་ཀྱི་དངོས་པོ་གཅིག་ཡིན་པ་དེ་བཞིན་དུ་དེ་དང་འདྲེས་ཤིང་དབྱེར་མེད་དུ་འབྲེལ་བའི་ཁྱབ་བྱ་གསལ་བ་དང་ཤིང་དེ་དག་ཀྱང་ཐ་དད་མེད་པར་ངོ་བོ་གཅིག་
ཏུ་འགྱུར་བ་དང་། གཞན་ཡང་ཁྱབ་བྱ་བྱེ་བྲག་པ་ཤིང་ལྟ་བུ་གཅིག་སྐྱེས་ན་ཡུལ་དུས་ཐ་དད་པའི་ཤིང་རྣམས་ཅིག་ཅར་སྐྱེ་དགོས་པ་སོགས་ཀྱིས་གནོད་ལ། ཆ་སོ་སོ་གཅིག་མིན་ན་ནི་ཁྱབ་པ་གཅིག་པུར་ག་ལ་འགྱུར་ཏེ་ཁྱབ་བྱ་དང་གསལ་བ་ཐ་དད་པའི་གྲངས་
བཞིན་དུ་མར་འགྱུར་རོ། །དེས་ན་སྤྱི་གསལ་སོགས་ལ་འདོད་ཚུལ་དུ་མ་ཡོད་ཀྱང་དོན་དུ་དེ་གཉིས་མ་འབྲེལ་ན་ཁྱབ་བྱ་ཁྱབ་བྱེད་དུ་མི་རུང་ལ། འབྲེལ་ཕན་ཆད་རིགས་པ་འདི་གཅིག་པུས་ཁྱབ་པ་ཡིན་ནོ་ཅོག་གཅིག་བདེན་འགོག་ནུས་སོ། །དེ་ལྟར་ཁྱབ་བྱེད་
སྤྱི་ཞེས་པ་དེ་མིན་རྣམ་པར་བཅད་ཙམ་གྱི་གཞན་སེལ་ཡིན་གྱི་དོན་ལ་གྲུབ་པ་མེད་དེ། དཔེར་ན་ཡལ་ག་ལོ་མ་ལྡན་པ་མཐོང་བ་ན་དེ་མིན་རྣམ་པར་བཅད་ནས་ཤིང་ཞེས་བཏགས་པ་དེ་ལ་སྤྱིའི་ཐ་སྙད་བཏགས་པ་སྟེ། དེ་ཡུལ་དུས་ཐ་དད་པའི་བྱེ་བྲག་ལ་
རྗེས་སུ་འགྲོ་བའང་ཡིན་ཅིང་། སྤྱི་དེ་ལ་རང་མཚན་དུ་ཞེན་ནས་སྣང་བཏགས་གཅིག་ཏུ་བསྲེས་ཏེ་དགག་སྒྲུབ་བྱས་པའི་སྤྱི་ཁེགས་པས་བྱེ་བྲག་ཁེགས་པ་དང་དེ་གཉིས་གཅིག་དང་ཐ་དད་ལ་སོགས་པའི་སྐྱོན་ལས་གྲོལ་བ་ཡིན་ནོ། །དེ་ལ་གཞན་ལས་ལྡོག་པར་སྣང་བའི་ལྡོག་
13-1-62a


པ་ཆིག་རྐྱང་སྤྱི་དང་། གཞན་དང་རང་གི་རིགས་མཐུན་མཐའ་དག་ལས་ཀྱང་ལྡོག་པའི་ལྡོག་པ་ཉིས་ཚོགས་ནི་རང་མཚན་ལ་འབབ་པས་བྱེ་བྲག་ཡིན་ལ་གཉིས་པོ་དེའང་ཆོས་དུ་མ་ལ་གཅིག་ཏུ་བཏགས་པ་ཙམ་ཡིན་པས་
གཅིག་བདེན་མི་སྲིད་ལ། ནམ་མཁའ་ནི་དངོས་པོར་མི་གྲུབ་པའི་ཚུལ་འོག་ཏུའང་འཆད་དོ། །གཉིས་པ་མ་ཁྱབ་པའི་གཅིག་བདེན་དགག་པ་ལ། ཕྱི་རོལ་གཅིག་བདེན་དགག །ཤེས་པ་གཅིག་བདེན་དགག་པའོ། །དང་པོ་ལ་རགས་
པ་གཅིག་བདེན་དང་། རྡུལ་ཕྲན་གཅིག་བདེན་དགག་པ་གཉིས། དང་པོ། བསྒྲིབས་དང་མ་བསྒྲིབས་དངོས་སོགས་ཕྱིར། །རགས་པ་རྣམས་ཀྱང་གཅིག་པུ་མིན། །ཞེས་གསུངས་ཏེ། དེ་ལ་རགས་པ་ཞེས་བྱ་བ་རྡུལ་ཕྲ་རབ་དུ་མ་ཚོགས་
པའི་ཆ་སྟེ། དེའང་ནང་གི་ལུས་ལ་སོགས་པ་དང་། ཕྱི་རོལ་དུ་བུམ་སྣམ་ཁང་པ་རི་གླིང་ལྷུན་པོ་སྟོང་ཆེན་པོའི་གནས་ཀྱི་བར་དུ་སྣ༷ང་བ་དེ་དག་གང་ཡང་རུང་སྟེ། དེ་དག་ལ་གོས་ལ་སོགས་པས་བསྒྲི༷བས་པ་ད༷ང་མ༷་བསྒྲི༷བས་པའི་དངོ༷ས་པོ་སོག༷ས་ཐ་དད་པ་ཡོད་
པའི་ཕྱིར་ན། ར༷གས་པ༷་རྣམ༷ས་ཀྱང༷་བདེན་པའི་གཅི༷ག་པུ༷་ཉིད་དུ་འགྱུར་བ་མི༷ན་ནོ། །དེའང་ལུས་ལྟ་བུ་ལ་དཔེར་མཚོན་ན། གོས་ཀྱིས་བསྒྲིབས་པའི་ཆ་དང་མ་བསྒྲིབས་པའི་ཆ་དང་། དེ་བཞིན་དུ་སོགས་ཁོངས་ནས། གཡོ་བ་དང་མི་གཡོ་བ། ཚོན་
གྱིས་བསྒྱུར་བ་དང་མ་བསྒྱུར་བ། ཚིག་པ་དང་མ་ཚིག་པ་ལ་སོགས་པ་མི་མཐུན་པའི་ཆོས་དུ་མ་ཡོད་པས་དེ་དག་གཅིག་པུའི་རང་བཞིན་དུ་ག་ལ་འགྱུར། གལ་ཏེ་བསྒྲིབས་མ་བསྒྲིབས་སོགས་ནི་ཡན་ལག་རྐང་པ་སོགས་ལ་ཡིན་གྱི། ཡན་ལག་ཅན་ལ་མིན་
13-1-62b


ནོ་ཞེ་ན། ཅི་ཡན་ལག་ཅན་ཞེས་པ་དེ་ཡན་ལག་རྣམས་དང་གཅིག་གམ་ཐ་དད། གཅིག་ན་ནི་མི་འདྲ་བ་དུ་མའི་ཆོས་སུ་གནས་པ་དེ་ཁོ་ན་ལྟར་གྲུབ་ལ། ཐ་དད་ན་སྣང་དུ་རུང་དགོས་པ་ལ་མ་དམིགས་པས་ཁེགས་ཤིང་། གཞན་ཡང་དེ་གཉིས་ཀ་
བུམ་བཞིན་དུ་འབྲེལ་མེད་དུ་འགྱུར་རོ། །དེ་གཉིས་འདུ་བའི་མཚན་ཉིད་ཀྱིས་འབྲེལ་བས་ལོགས་ཤིག་ཏུ་དམིགས་མི་དགོས་ཤེ་ན། རྐང་པ་ལ་འདུ་བས་འབྲེལ་བ་གང་ཡིན་པ་ལག་པ་དང་འདུ་བ་གཉིས་མི་གཅིག་ན་ནི་རགས་པ་རྣམས་གཅིག་པུར་མི་རུང་ལ།
གཅིག་ན་ནི་དུ་མའི་ཆོས་སུ་དམིགས་པའི་ཕྱིར་འགལ་བ་ལྷག་པར་ཡང་དེ་ལ་གནས་པ་ཉིད་དོ། །དེས་ན་ཡན་ལག་ཅན་ཞེས་པ་ཡན་ལག་དུ་མ་ཚོགས་པ་ལ་གཅིག་ཏུ་ཞེན་པའི་བློས་བཏགས་པ་ཙམ་ལས་གཅིག་བདེན་མི་གྲུབ་པས་ཐ་སྙད་རྣམས་འཐད་ཀྱི། 
གཞན་དུ་ཡན་ལག་ཅན་གཅིག་བདེན་དུ་ཡོད་ན་ཡན་ལག་དང་གཅིག་ཐ་དད་སོགས་ཀྱི་བརྟགས་པ་མི་འཇུག་མི་སྲིད་དོ། །གཉིས་པ་ལ་རྡུལ་ཕྲན་འགོག་པའི་རིགས་པ་བསྟན་པ་དང་། དེ་ཁེགས་པས་དངོས་པོ་དུ་མ་ཁེགས་པར་བསྟན་པའོ། །དང་པོ་
ལ་ཕྱོགས་སྔའི་འདོད་ཚུལ་བརྗོད་པ་དང་། དེ་དགག་པ་གཉིས། དང་པོ། འབྱར་བ་དང་ནི་བསྐོར་བའམ། །བར་མེད་རྣམ་པར་གནས་ཀྱང་རུང་། །ཞེས་གསུངས་ཏེ། དེ་ལ་འདིར་ཡུལ་ལྔ་དང་དབང་པོ་ལྔ་སྟེ་གཟུགས་ཅན་གྱི་ཁམས་བཅུ་པོ་འདི་
དག་ནི་གང་ཡང་རུང་སྟེ། རགས་པར་སྣང་བ་ལ་དུ་མར་བཤིག་ཏུ་ཡོད་ཅིང་ཕན་ཚུན་གཅིག་གི་གོ་སྐབས་སུ་གཅིག་འདུག་པ་ལ་གེགས་བྱེད་པ་དུ་མ་བསགས་པའི་རང་བཞིན་ཅན་དུ་མཐོང་བས་དེ་དག་རྡུལ་ཕྲ་རབ་ཀྱི་བར་དུ་གཞིག་ཏུ་རུང་སྟེ། དཔེར་ན་རྫ་བུམ་གྱོ་མོར་
13-1-63a


བྱས། གྱོ་མོ་ཕྱེ་མར་བཏག །ཕྱེ་མའང་རྩིང་པོ་ཞིབ་མོར་བྱས་པ་ལྟ་བུའི་ཚུལ་གྱིས་གཟུགས་ཅན་རྣམས་སིལ་མར་བཅད་དུ་ཡོད་པ་ལྟ་བུ་ཡིན་པས་ན་མིང་དུའང་གཟུགས་ཞེས་བཙུགས་སུ་རུང་བ་ལྟ་བུ་ཡིན་ཏེ། དོན་དུ་ན་ཐོགས་
རེག་གི་རྣམ་པར་ཡོད་པས། རྣམ་ཤེས་ལྟ་བུ་མ་ཡིན་པར་འཛིན་དུ་ཡོད་པ་གནོད་པ་བྱར་རུང་བ་ཞིག་གི་བླ་དྭགས་སུ་གཟུགས་ཞེས་བཤད་དེ་གྲི་གཟུགས་ཟེར་བ་ལྟ་བུའོ། །འོ་ན་རྡུལ་ཕྲ་རབ་ལ་དེ་མ་གྲུབ་སྙམ་ན་རགས་པ་ལ་ཡོད་པས་སྐྱོན་མེད་དོ། །རྣམ་
རིག་མིན་པའི་གཟུགས་འདོད་པ་ལྟར་ནའང་རྟེན་ལ་གནོད་པ་བྱར་ཡོད་པས་དེ་སྐད་གདགས་སུ་རུང་སྟེ། སྤྱིར་སྒྲ་ལ་བཤད་འཇུག་གཉིས་ཀ་ཡོད་པ་དང་། གང་རུང་རེ་ལས་མེད་པ་སྟེ་མུ་གསུམ་དུ་ཡོད་པ་ཡིན་ནོ། །དེས་ན་གཟུགས་སུ་རུང་བ་གཟུགས་ཀྱི་མཚན་
ཉིད་ཅེས་ཀྱང་བྱ་ལ། གཟུགས་དེ་ལས་ཀྱང་ཆེས་རགས་པ་མིག་གི་ཡུལ་ལ་གཟུགས་ཞེས་བྱེ་བྲག་ཏུ་བཏགས་པའོ། །དེ་ལ་བེམ་པོ་དེ་དག་རགས་པ་ཕྲ་བར་གསིལ་ནས་ཕྲ་བ་མཐར་ཐུག་པ་ལ་ཆ་གསིལ་རྒྱུ་མེད་པ་ལ་རྡུལ་ཕྲ་རབ་ཅེས་བྱའོ། །དེའང་དེ་ལས་
ཆུང་ངུར་གཏོང་དུ་མེད་པ་རྡུལ་ཕྲ་བའི་རབ་བམ། ཕྲ་བའི་མཐར་ཐུག་དང་། དེ་བདུན་ལ་རྡུལ་ཕྲན་སོགས་འགྱུར་ཏེ། རིམ་པས་ལྕགས་ཆུ་རི་བོང་ལུག་གླང་ཉི་ཟེར་རྡུལ་རྣམས་དང་སྲོ་མ་ཤིག་ནས་སོར་ཚད་ཀྱི་བར་བདུན་འགྱུར་དུ་རྩི་བ་ཡིན་ནོ། །དེ་ལ་འདོད་ཁམས་
ན་དབང་པོ་ལ་སྣང་རུང་གི་རྡུལ་ཆུང་ངུ་ཞིག་ལ་མ་མཐའ་ཡང་དབང་པོ་དང་སྒྲ་མེད་པའི་རྡུལ་ཕྲ་རབ་བརྒྱད་འདུས་ཡོད་ཅིང་། དབང་པོ་ལ་སོགས་ཡོད་ན་དེ་དེས་ཀླགས་ཏེ་ཤེས་པར་བྱའོ། །དེས་ན་མཐར་ཆ་མེད་པའི་རྡུལ་ནི་འབྱུང་བ་དང་འབྱུང་གྱུར་གྱི་རྡུལ་རེ་རེ་བ་དམིགས་
13-1-63b


ཀྱིས་བཀར་ནས་གཟུང་བའི་དབང་དུ་ཡིན་གྱི་ཆ་སོ་སོ་བ་མེད་ལ། རགས་པ་རྣམས་ལ་ཆེ་ཆུང་གི་དབང་གིས་རྡུལ་ཕྲ་རབ་ཀྱང་དེ་སྙེད་དུ་མང་ཉུང་ཡོད་པར་འདོད་དོ། །བོད་ཁ་ཅིག་རྡུལ་ཕྲན་ཐུག་མེད་དུ་འདོད་པའང་བྱུང་ལ། དེ་ལྟར་ན་རགས་པ་རྩོམ་པ་མི་སྲིད་པ་
སོགས་ཀྱིས་གནོད་པས་མི་འཐད་དོ། །མདོར་ན་རགས་པ་ཆ་གསིལ་དུ་ཡོད་པས་ཇེ་ཕྲ་ཇེ་ཕྲར་གཏོང་བ་ཡིན་ལ།  མཐར་གཞི་མེད་དུ་གྱུར་ན་རགས་པ་ཡེ་མེད་དུ་འགྱུར་བར་བསམས་ནས་རྡུལ་ཕྲ་རབ་དེ་ལས་ཆུང་ངུར་གཏོང་རྒྱུ་མེད་པ་ཞིག་ཡོད་པར་འདོད་པ་ནི་རྡུལ་ཕྲ་
རབ་འདོད་པ་སྤྱིའི་ལུགས་ཡིན་ལ། གཞན་སྡེ་རྣམས་ནི་རྡུལ་དེ་རྟག་པར་འདོད་ལ། རང་སྡེ་རྣམས་ནི་སྐད་ཅིག་མར་འདོད་པ་ཁྱད་པར་རོ། །རྡུལ་ཕྲ་རབ་དེས་རགས་པ་རྩོམ་པའི་སྐབས་ན་རྡུལ་དེ་དག་ལ་བར་ཡོད་པ་དང་། མེད་པ་གང་རུང་གི་ཚུལ་དུ་རྩོམ་དགོས་
པས། དེ་ལ་འདོད་ལུགས་གསུམ་བྱུང་སྟེ།  གཟེགས་ཟན་པ་ན་རེ། ཕྲད་ནས་ཚོགས་པ་རྩོམ་དགོས་ཀྱི། མ་ཕྲད་ན་རགས་པའི་དངོས་པོ་གཅིག་ཏུ་མི་རུང་བས་རྡུལ་རྣམས་ནི་གཅིག་ལ་གཅིག་འབྱར་ཏེ་གནས་པ་ཁོ་ནའོ་ཞེས་ཟེར་རོ། །དེ་ལ་ཆ་མེད་པ་ལ་
ཕྱོགས་ཐ་དད་ཅིག་གིས་འབྱར་ན་ནི་འབྱར་བ་དང་མ་འབྱར་བའི་ཆ་ཡོད་པས་ཆ་མེད་དུ་མི་རུང་ལ། མ་འབྱར་བའི་ཆ་གཏན་ནས་མི་སྲིད་ན་ནི་དེ་གཉིས་ལ་ཐ་དད་ཀྱི་གོ་སྐབས་ག་ལ་ཡོད་དེ་གཅིག་ཏུ་གྱུར་ནས་མཐར་རིའི་རྒྱལ་པོ་རི་རབ་ཀྱང་ཆ་མེད་པའི་རྡུལ་གཅིག་ཏུ་འགྱུར་
བས་མི་འཐད་དོ། །ཡང་བྱེ་སྨྲ་སོགས་ཕལ་ཆེ་བ་ཞིག་གིས་ཕན་ཚུན་མཐུས་མི་འཐོར་བར་འཛིན་གྱི། གཅིག་ཏུ་འབྱར་བ་གོང་ལྟར་མི་འཐད་པས་རྡུལ་གཅིག་ལ་རྡུལ་གཞན་གྱིས་བསྐོར་བ་ཙམ་དུ་བར་དང་བཅས་པར་གཡག་རྔ་དང་ནེའུ་གསེང་ལྟར་གནས་སོ་ཞེས་ཟེར།
13-1-64a


དེའང་མི་འཐད་དེ།  བར་ཡོད་ན་དེར་སྣང་མུན་གྱི་རྡུལ་ཕྲ་རབ་འཇུག་པའི་གོ་སྐབས་ཡོད་པར་འགྱུར་ལ། དེ་དང་ཡང་ཕན་ཚུན་ཕྲད་མི་ཤེས་པས་དེའི་བར་དུའང་རྡུལ་གཞན་ཡོད་དགོས་པ་སོགས་མཐར་རྡུལ་ཕྲ་རབ་གཉིས་ཚོགས་
པའི་བར་དུ་སྲིད་པ་གསུམ་ཡང་ཤོང་བར་འགྱུར་བའི་ཕྱིར་རོ། །དེ་ལ་མདོ་སྡེ་པ་སོགས་ནི་རེག་ལ་མ་འབྱར་བར་འདོད་དེ། གོང་ལྟར་འབྱར་མ་འབྱར་གཉིས་ཀ་མི་འཐད་པས་རྡུལ་མང་པོ་དག་ལ་དོན་དུ་གཅིག་གཅིག་ལ་རེག་པའམ་འབྱར་བ་མེད་ཀྱང་བར་
མེད་པས་རེག་པར་འདུ་ཤེས་པ་ཡིན་ནོ་ཞེས་ཟེར་ཡང་། གཅིག་གཅིག་ལ་རེག་ཅིང་བར་མེད་ན་འབྱར་བ་དང་དོན་གཅིག་ལས་དབྱེ་བ་ཅུང་ཟད་ཀྱང་མི་སྲིད་དེ། ཇི་སྲིད་གཅིག་ཏུ་མ་གྱུར་པ་དེ་སྲིད་བར་མེད་པ་མི་སྲིད་པས་ན། ཕྲད་པ་དང་འབྱར་བ་དོན་དུ་གཅིག་
ཡིན་པར་ཤིང་རྟ་ཆེན་པོ་རྣམས་ཀྱིས་བསྒྲུབས་ཟིན་ཏོ། །དེས་ན་རེག་པའམ་བར་མེད་ན་མ་འབྱར་བ་མི་སྲིད། མ་འབྱར་ན་རེག་པའམ་བར་མེད་པ་མི་སྲིད་པས་འདི་ཡང་གོང་གི་ཕྲད་མ་ཕྲད་བརྟགས་པས་ཁེགས་སོ། །དེ་ལ་རགས་པ་རྩོམ་པའི་གཞི་ཕྲ་
རབ་ཀྱི་རྡུལ་དེ་དག་གཅིག་ལ་གཅིག་འབྱར༷་བ༷་ཉིད་དུ་འདོད་པའི་ལུགས་དེ་ད༷ང་ནི༷། གཞན་མ་འབྱར་བར་བར་དང་བཅས་ཏེ་བསྐོ༷ར་བ༷་ཙམ་དུ་འདོད་པའ༷མ། ཡང་མ་འབྱར་ལ་བ༷ར་མེ༷ད་པའི་རྣམ༷་པ༷ར་གན༷ས་པར་འདོད་པའི་ལུགས་དེ་གསུམ་པོ་གང་ཡིན་ཀྱང༷་རུ༷ང་སྟེ། 
ཕྱོགས་ཆ་ལ་བརྟགས་པའི་རིགས་པ་འདིས་འགོག་པ་ཡིན་ནོ་ཞེས་སོ། །གཉིས་པ་རྡུལ་ཕྲ་རབ་བདེན་པར་འདོད་པ་དེ་དགག་པ་ལ། ཆ་མེད་ན་རགས་པ་མི་འགྲུབ། ཡོད་ན་ཕྲ་རྡུལ་མི་འགྲུབ་པར་བསྟན་པའོ། །དང་པོ། དབུས་གནས་
13-1-64b


རྡུལ་ཕྲན་རྡུལ་གཅིག་ལ། །བལྟས་པའི་རང་བཞིན་གང་ཡིན་པ། །རྡུལ་ཕྲན་གཞན་ལ་ལྟ་བ་ཡང་། །དེ་ཉིད་གལ་ཏེ་ཡིན་བརྗོད་ན། །དེ་ལྟ་ཡིན་ན་ས་ཆུ་སོགས། །ཇི་ལྟར་རྒྱས་འགྱུར་མ་ཡིན་ནམ། །ཞེས་གསུངས་ཏེ། དེའང་ཕྱོགས་ཆ་
ལ་བརྟགས་པའི་ཚུལ་ནི། རགས་པ་རྩོམ་པའི་ཚེ་དབུས་ན་གནས་པའི་རྡུལ་ཕྲན་ལྟ་བུ་དེ་ལ་ཕྱོགས་ཕྱོགས་ནས་རྡུལ་དུ་མ་ཚོགས་ནས་འདུ་དགོས་ལ། དེའང་དཔེར་ན་ཁང་པ་ལྟ་བུ་ཞིག་ལ་ཤར་ངོས་སུ་བལྟས་པའི་ཆ་དང་། དེ་བཞིན་དུ་ཕྱོགས་གཞན་ལ་ལྟ་བའི་ངོས་
དེ་དང་དེ་ལ་འདི་ཕྱོགས་འདི་ལ་བལྟས་པའི་ངོས་ཡིན་ནོ་ཞེས་གདགས་པ་དེ་བཞིན་དུ་རྡུལ་དུ་མ་འདུས་ནས་རགས་པ་རྩོམ་པའི་ཚེའང་། དབུ༷ས་ན་གན༷ས་པའི་རྡུལ༷་ཕྲན༷་དེ་ལ། ཤར་ཕྱོགས་ཀྱི་རྡུ༷ལ་ཕྲན་ལྟ་བུ་གཅི༷ག་ལ༷་བལྟས༷་པ༷འི་ར༷ང་བཞི༷ན་ག༷ང་ཡི༷ན་པ༷་དེ་ཁོ་ན་ལས་
ཆ་གཞན་མེད་པས། ཕྱོགས་ལྷག་མའི་རྡུལ༷་ཕྲན༷་གཞ༷ན་ལ༷་ལྟ༷་བ༷་ཡ༷ང་། ཤར་ལ་ལྟ་བའི་ངོས་སམ་ཆ་དེ༷་ཉི༷ད་ཁོ་ན་ཡི༷ན་ནོ་ཞེས་ག༷ལ་ཏེ༷་བརྗོ༷ད་ན༷་ནི། ཁྱོད་ཀྱིས་ཁས་བླངས་པའི་ཚུལ་དེ༷་ལྟ་ན༷་ནི༷། ས༷་དང་ཆུ༷་ལ་སོ༷གས་པ་འདི་དག་ཇི༷་ལྟར༷་རྒྱས༷་འགྱུར༷་མ༷་ཡི༷ན་
པ་ཉིད་དུ་ཁས་ལེན་ན༷མ་ཅི། འོན་ཏེ་རྡུལ་ཕྲན་བསགས་པས་ས་དང་ཆུ་ལ་སོགས་པ་ཇེ་ཆེ་ཇེ་རྒྱས་སུ་འགྱུར་བར་འདོད་ན་ནི་རྡུལ་གཅིག་ལ་གཏད་པའི་ངོས་གང་ཡིན་པ་དེ་གཞན་ལའང་བལྟས་སོ་ཞེས་པའི་དམ་བཅའ་འདི་འདོར་བར་བྱ་སྟེ་འདི་གཉིས་འགལ་བའི་ཕྱིར་རོ། །
ཇི་ལྟར་འགལ་ན་རགས་པ་རྩོམ་དུས་ཀྱི་དབུས་ན་གནས་པའི་རྡུལ་དེ་ལ་ཕྱོགས་བཅུའི་རྡུལ་བཅུས་ཅིག་ཅར་བསྐོར་བའི་ཚེ་དེ་ལ་ཆ་དུ་མ་དབྱེ་རྒྱུ་མེད་པས་ཕྱོགས་གཅིག་གི་རྡུལ་ལས་རྡུལ་གཞན་ལ་གོ་ས་གཞན་ཐོབ་པ་མེད་པས་ཕྱོགས་ལྷག་མ་དོན་མེད་པར་ཕྱོགས་
13-1-65a


གཅིག་ཏུ་འགྱུར་ཞིང་། སླར་ཡང་རྡུལ་ཇི་ཙམ་ཚོགས་ཀྱང་སྔ་མ་བཞིན་དུ་འགྱུར་བ་ལས་མི་སྲིད་པས་རགས་པ་རྩོམ་མི་ཤེས་ལ། ད་རུང་ཞིབ་ཏུ་དཔྱད་ན་རྡུལ་གཅིག་གི་གོ་ས་རྙེད་པ་དེའང་རྡུལ་སྔ་མའི་ཆ་ཐམས་ཅད་ལ་ཕྱི་མའི་ཆ་
ཐམས་ཅད་ཀྱིས་མ་ཁྱབ་ན་ནི་གཉིས་ཀ་ཕྲ་རྡུལ་ཡིན་པ་ཉམས་ཏེ། ཁྱབ་མ་ཁྱབ་ཀྱི་ཆ་གཉིས་སུ་འགྱུར་ལ། ཐམས་ཅད་དུ་ཁྱབ་ན་ནི་བར་གྱི་གོ་སྐབས་ཅུང་ཟད་མེད་པས་གཅིག་ཏུ་འགྱུར་ལ། གཅིག་ཏུ་སོང་ཡང་ཇེ་ཆེར་འགྲོ་བ་ནི་མེད་དེ། ཇེ་ཆེར་སོང་ན་ཆ་མེད་
མ་ཡིན་པར་གྱུར་པས་ཆ་མེད་གཅིག་གིས་ཅིག་ཤོས་ཁྱབ་པའང་མི་རིགས་པ་དེས་ན་རྡུལ་ཕྲན་ཆ་མེད་གཅིག་བདེན་ཞིག་ཡོད་ན། སའི་དཀྱིལ་འཁོར་ཆེན་པོ་དང་། ཆུ་རྒྱ་མཚོ་ཆེན་པོར་ལོངས་པའི་རྡུལ་ཕྲན་ཚོགས་ཀྱང་། རྡུལ་ཇི་ཙམ་མང་བ་དེ་ཙམ་ཆེ་ཞིང་རྒྱས་
པར་མི་འགྱུར་བར་རྡུལ་ཕྲན་གཅིག་གི་ཚད་ཁོ་ནར་འགྱུར་རོ། །འདི་སྐབས་རྡུལ་ཕྲན་ཞེས་པ་ཕྲ་རབ་ཀྱི་རྡུལ་ཆ་མེད་ལ་གོ་དགོས་ཀྱི། དེ་བདུན་བསགས་པའི་རྡུལ་ཕྲན་ལ་གོ་བར་མི་བྱའོ། །སྤྱིར་རྡུལ་ཕྲན་དང་རྡུལ་ཕྲ་རབ་ལ་ཁྱད་ཡོད་དེ། རྡུལ་ཕྲན་ཆ་བདུན་དང་
བཅས་པ་ཡིན་ལ། ཕྲ་རབ་ཅེས་ཕྲ་བའི་རབ་ཏུ་གྱུར་པའམ་མཐར་ཐུག་པ་ཡིན་མོད། རྡུལ་ཕྲ་མོ་དང་། དེ་སྒྲ་བསྡུས་པའི་རྡུལ་ཕྲན་ཞེས་པ་སྤྱི་མིང་ཡིན་པས་བྱེ་བྲག་སོ་སོའི་ཐད་དུ་འཇུག་ཡུལ་ཤན་ཕྱེད་དགོས་སོ། །གཉིས་པ་ཆ་ཡོད་ན་ཕྲ་རྡུལ་དུ་མི་
འཐད་པར་བསྟན་པ། རྡུལ་ཕྲན་གཞན་ལ་ལྟ་བའི་ངོས། །གལ་ཏེ་གཞན་དུ་འདོད་ན་ནི། །རབ་ཏུ་ཕྲ་རྡུལ་ཇི་ལྟ་བུར། །གཅིག་པུ་ཆ་ཤས་མེད་པར་འགྱུར། །ཞེས་གསུངས་ཏེ། གོང་ལྟར་དཔྱད་པས་འཇིགས་ནས། དབུས་རྡུལ་གྱི་རྡུལ་ཕྲན་
13-1-65b


གཅིག་ལ་ལྟ་བའི་རང་བཞིན་གཅིག་པུ་དེ་གཞན་ལ་ལྟ་བ་མ་ཡིན་གྱི། རྡུལ༷་ཕྲན༷་གཞ༷ན་ལ༷་ལྟ༷་བའི༷་ངོ༷ས་ག༷ལ་ཏེ༷་གཞན་དང་གཞ༷ན་དུ༷་ཡོད་པར་འདོ༷ད་ན༷་ནི༷། ར༷བ་ཏུ༷་ཕྲ༷་བའི་རྡུལ༷་དེ་ཇི༷་ལྟ༷་བུར༷་ན་གཅི༷ག་པུ༷་ཆ༷་ཤས༷་མེ༷ད་པའི་རང་བཞིན་དུ་བདེན་པར༷་འགྱུར༷་ཏེ་ཕྱོགས་བཅུའི་ཆ་དང་
ལྡན་པས་སོ། །དེས་ན་ཕྲ་བ་རྣམས་ཀྱང་རགས་པ་ལ་ལྟོས་ནས་བཞག་ཅིང་། དེའི་གདགས་གཞིའང་དུ་མ་ལ་དམིགས་ནས་བཞག་གི། ཆ་མེད་གཅིག་བདེན་གྱི་རང་མཚན་མི་སྲིད་པར་ཤེས་པར་བྱའོ། །གཉིས་པ་རྡུལ་ཕྲན་དེ་ཁེགས་པས་དངོས་པོ་
དུ་མ་ཁེགས་པར་བསྟན་པ་ལ།  རྟགས་འགོད་པ་དང་། ཁྱབ་པ་སྒྲུབ་པ་གཉིས། དང་པོ། རྡུལ་ཕྲན་རང་བཞིན་མེད་གྲུབ་པ། །དེ་ཕྱིར་མིག་དང་རྫས་ལ་སོགས། །བདག་དང་གཞན་སྨྲས་མང་པོ་དག །རང་བཞིན་མེད་པར་མངོན་པ་ཡིན། །
ཞེས་གསུངས་ཏེ། གང་དེ་ལྟར་རྡུལ༷་ཕྲན༷་ར༷ང་བཞིན་མེ༷ད་པར་གྲུབ༷་པ༷་དེ༷་ཡི་ཕྱིར༷་ན།  མི༷ག་ད༷ང་རྫ༷ས་ལ༷་སོག༷ས་པ་བད༷ག་ད༷ང་གཞ༷ན་གྱི་སྡེ་པས་སྨྲས༷་པའི་ཆོས་མ༷ང་པོ༷་ད༷ག་ཀྱང་ར༷ང་བཞི༷ན་མེ༷ད་པར༷་མངོ༷ན་པ༷འམ་གསལ་བ་ཡི༷ན་ཏེ། འཇིམ་པ་མེད་པར་རྫ་བུམ་
མི་འབྱུང་བ་བཞིན་ནོ། །དེ་ལ་རང་སྡེས་སྨྲས་པ་མིག་དང་གཟུགས་དང་དེའི་རྣམ་པར་ཤེས་པ་སོགས་དོན་དམ་པར་འདོད་པའོ། །གཞན་སྡེ་གཟེགས་ཟན་སོགས་ཀྱིས་སྨྲས་པ་རྫས་དང་ཡོན་ཏན་ལ་སོགས་པའོ། །གཉིས་པ་ཁྱབ་པ་
སྒྲུབ་པ། དེ་ཡི་རང་བཞིན་དེས་བརྩམ་དང་། །དེ་ཡི་ཡོན་ཏན་དེ་ལས་བདག །དེ་ཡི་སྤྱི་དང་ཁྱད་པར་ཡང་། །དེ་དག་དེ་དང་འདུ་བ་ཅན། །ཞེས་གསུངས་ཏེ། དེ་ལ་རྡུལ་ཕྲན་མེད་པས་མིག་སོགས་དེ་དག་རང་བཞིན་མེད་པའི་འཐད་པ་
13-1-66a


ཅི་ཡིན་ན། འདི་ལྟར་རང་སྡེ་དག་ནི་གཟུགས་ཅན་གྱི་ཁམས་བཅུ་པོ་རྡུལ་བསགས་པ་ཡིན་པས་ན་རྡུལ་ཕྲན་དེ༷་ཡི༷་ར༷ང་བཞི༷ན་དུ་འདོད་པ་དང་། ཕྱི་རོལ་པ་དག་གིས་འདོད་པའི་རྡུལ་གཉིས་ལ་སོགས་པའི་ཡན་ལག་ཅན་གྱི་རྫས་
རྣམས་ཀྱང་དངོས་དང་བརྒྱུད་པའི་སྒོ་ནས་རྡུལ་དེ༷ས་བརྩམ༷་པར་འདོད་པ་ད༷ང་། གཟུགས་དང་དྲི་དང་རོ་ལ་སོགས་པ་ཕལ་ཆེར་རྡུལ་དེ༷་ཡི༷་ཡོ༷ན་ཏན༷་ཡིན་པ་དང་། འདེགས་འཇོག་བརྐྱངས་བསྐུམ་འགྲོ་བའི་ལས་ནི་ལུས་ཅན་ལ་བརྟེན་པའི་ཕྱིར་ན་རྡུལ་དེ༷་ཡི་
ལ༷ས་ཀྱི་བད༷ག་ཉིད་ཡིན་པ་དང་། ཡོད་པ་དང་བ་ལང་ལྟ་བུ་སོགས་སྤྱི་ཆེན་པོ་དང་ཉི་ཚེ་བ་དང་། བྱེ་བྲག་གམ་ཁྱད་པར་ས་ལ་སོགས་པ་དག་ཀྱང་ཕལ་ཆེར་དེ་དང་འབྲེལ་བ་དང་རྟེན་པ་ཡིན་པས། རྡུལ་དེ༷་ཡི༷་སྤྱི་ཡིན་པ་ད༷ང་རྡུལ་དེ་ཉིད་ཁྱ༷ད་པ༷ར་ཡ༷ང་ཡིན་ལ།
རྡུལ་དེ༷་དག༷་ཅིག་ཤོས་ཀྱི་དངོས་པོ་དེ༷་ད༷ང་ལྷན་ཅིག་འདུ༷་བ༷་ཅ༷ན་ཡང་ཡིན་པར་འདོད་པ་དེའི་ཕྱིར་དེ་མེད་པས་དེ་ལ་དངོས་སམ་བརྒྱུད་པས་འབྲེལ་བ་དེ་རྣམས་ཀྱང་རྡུལ་ཕྲན་གྱི་རྩ་བ་ཅན་ཡིན་པས་ན་མེད་པར་འགྱུར་ཏེ། འདི་ལྟར་རྡུལ་ཕྲ་རབ་མེད་པས་གཟུགས་ཅན་གྱི་
ཁམས་བཅུ་བདེན་པར་མེད་ལ་དེ་ལྟར་ན་དབང་ལྔ་ལ་བདག་རྐྱེན་དང་ཡུལ་ལྔ་ལ་དམིགས་རྐྱེན་བྱས་ཏེ་སྐྱེས་པའི་མིག་ཤེས་སོགས་ལྔའང་བདེན་པར་མི་འགྲུབ་ལ། དེ་མ་གྲུབ་ན་དེ་མ་ཐག་རྐྱེན་དེས་མངོན་པར་བསྒྲུབས་པའི་ཡིད་ཤེས་ཀྱང་བདེན་པར་མི་འགྲུབ་ཅིང་།
དེ་ལྟར་ཚོགས་དྲུག་མ་གྲུབ་ན་དེ་འདས་མ་ཐག་པའི་ཡིད་ཀྱང་བདེན་པར་མེད་ལ། སེམས་བདེན་པར་མེད་པ་དེའི་ཚེ་དེ་དང་གྲུབ་བདེ་རྫས་གཅིག་པའི་འདུ་ཤེས་དང་། ཚོར་བ་དང་། སེམས་པ་ལ་སོགས་པའི་སེམས་བྱུང་རྣམས་ཀྱང་རང་བཞིན་མེད་པར་བདེ་བླག་
13-1-66b


ཏུ་ཤེས་ནུས་སོ། །ལྡན་མིན་འདུ་བྱེད་རྣམས་ཀྱང་གཟུགས་ལ་སོགས་པ་ལ་དངོས་སམ་བརྒྱུད་པས་འབྲེལ་བ་ཅན་དེ་དག་ཀྱང་བདེན་མེད་དུ་གྲུབ་ཅིང་། ལྡན་མིན་དེ་དག་བློས་བཏགས་པ་ཙམ་ལས་དོན་དུ་མེད་པར་མཁས་པ་རྣམས་ཀྱིས་དུམ་བུ་དུམ་བུར་ལན་
བརྒྱར་བཤིག་པས་ཤི་ཟིན་པ་ལ་བརྣན་ཏེ་མཚོན་འདེབས་མི་དགོས་པ་བཞིན་ནོ། །རྣམ་པར་རིག་བྱེད་མིན་པའང་འབྱུང་བ་རྣམས་རྒྱུར་བྱས་ནས་གྲུབ་པར་སྨྲ་བ་དེ་ལྟར་ན་འབྱུང་བ་མེད་པས་དེའང་མེད་དོ། །མཁའ་སོགས་འདུས་མ་བྱས་ནི་སྔར་བསལ་ཟིན་ཏོ། །
དེས་ན་ཁམས་བཅོ་བརྒྱད་པོའང་རང་བཞིན་མེད་པར་གསལ་བས་ན་རང་སྡེས་སྨྲས་པ་མང་པོ་ཞིག་བདེན་མེད་གྲུབ་ཚུལ་དེ་ལྟར་ཡིན་ནོ། །གཞན་སྡེས་སྨྲས་པའི་དངོས་པོ་མང་པོ་ཞིག་བདེན་མེད་གྲུབ་ཚུལ་ཡང་། རྡུལ་གཉིས་ལ་སོགས་པ་དུ་མ་འདུས་
པ་ལ་ཡན་ལག་ཅན་དུ་བཏགས་པ་ཡིན་པས་རྩ་བ་རྡུལ་མེད་ན་དེ་མེད་པ་དང་། སྒྲ་ནམ་མཁའི་ཡོན་ཏན་ཡིན་པ་མ་གཏོགས་གཟུགས་སོགས་འབྱུང་བཞིའི་ཡོན་ཏན་དུ་ཁས་ལེན་པའི་འབྱུང་བཞི་བདེན་པར་མ་གྲུབ་ན་དེ་མི་འགྲུབ་པ་དང་། འདེགས་སོགས་
ལས་ནི་ལུས་ཅན་ལ་བརྟེན་ལ་ལུས་ཀྱི་རྩོམ་གཞི་རྡུལ་མེད་པས་དེའང་མེད་པར་ཤེས་པ་དང་། སྤྱི་ཆེན་པོ་ཡོད་པ་དང་བ་ལང་གི་སྤྱི་ལྟ་བུའང་གཟུགས་སོགས་དང་འབྲེལ་བའི་དེའི་སྤྱི་ཡིན་པ་དང་། བྱེ་བྲག་ཤིང་དང་ས་ལ་སོགས་པ་གཟུགས་སུ་
གཏོགས་པ་ཐམས་ཅད་རྡུལ་ལ་རག་ལས་ཤིང་རྟེན་བརྟེན་པ་ཡིན་པ་དང་། ཕན་ཚུན་འདུ་བར་ཁས་བླངས་པ་དག་ཀྱང་ཕལ་ཆེར་རྡུལ་ཕྲན་ལ་རག་ལས་པ་དེས་ན་ཕྱི་རོལ་པ་དེ་དག་གི་འདོད་པ་རྣམས་ཀྱང་འཇིག་གོ། མདོར་ན་ལེགས་པར་དཔྱད་ན་ཤེས་
13-1-67a


དང་ཤེས་བྱ་ཕན་ཚུན་རྟེན་འབྲེལ་དུ་གྱུར་པའི་གནད་ཀྱིས་རྡུལ་མ་གྲུབ་པས་བེམ་པོ་མི་འགྲུབ་ལ། དེས་སེམས་ཀྱང་བདེན་པར་གྲུབ་པ་མེད་པར་ཤེས་ཤིང་མཐར་ཆོས་ཀུན་ལའང་བདེན་པའི་ཞེན་པ་འཇིག་ནུས་ཏེ། དཔེར་ན་ལྕུགས་ཕྲན་གྱི་ཕོན་པོ་
ལས་གང་ཡང་རུང་བ་ཞིག་ཕྱུང་བས་གཞན་མི་བརྟན་ཞིང་རིམ་གྱིས་འཐོར་འགྲོ་བ་བཞིན་ནོ། །གཉིས་པ་ཤེས་པ་གཅིག་བདེན་དགག་པ་ལ། ཕྱི་དོན་ཡོད་པར་འདོད་པའི་ལུགས་ལ་ཤེས་པ་གཅིག་བདེན་དགག་པ་དང་། ཕྱི་དོན་མི་འདོད་པའི་ལུགས་ལ་ཤེས་པ་
གཅིག་བདེན་དགག་པའོ། །དང་པོ་ལ་ཐུན་མིན་སོ་སོའི་འདོད་པ་འགོག་པ་དང་། ཐུན་མོང་དུ་གཅིག་བདེན་གྱི་ཤེས་པ་མི་སྲིད་པར་བསྟན་པས་མཇུག་བསྡུ་བ་གཉིས། དང་པོ་ལ་རང་སྡེ་དོན་སྨྲ་སྡེ་གཉིས་ཀྱི་ལུགས་དགག་པ་དང་། ཕྱི་རོལ་པའི་ལུགས་དགག་པ་གཉིས། དང་པོ་ལ་
རྣམ་མེད་བྱེ་སྨྲ་བའི་ལུགས་དགག་པ་དང་། རྣམ་བཅས་མདོ་སྡེ་པའི་ལུགས་དགག་པ་གཉིས། དང་པོ་ལ་རང་རིག་འཐད་པར་སྒྲུབ། དོན་རིག་མི་འཐད་པར་སྒྲུབ། དེས་ན་རྣམ་མེད་པའི་ལུགས་མི་འཐད་པར་བསྟན་པ་གསུམ། དང་པོ་ལ་རང་རིག་གི་ངོ་བོ་ངོས་
གཟུང་། དེ་རང་རིག་ཡིན་པའི་འཐད་པ་བསྟན་པ་གཉིས། དང་པོ།  རྣམ་ཤེས་བེམ་པོའི་རང་བཞིན་ལས། །བཟློག་པ་རབ་ཏུ་སྐྱེ་བ་སྟེ། །བེམ་མིན་རང་བཞིན་གང་ཡིན་པ། །དེ་འདི་བདག་ཉིད་ཤེས་པ་ཡིན། །ཞེས་གསུངས་ཏེ། དེ་ལ་སྤྱིར་ཕྱི་དོན་
འདོད་པ་དང་མི་འདོད་པ་གཉིས། འདོད་པ་ལའང་ཤེས་པ་རྣམ་མེད་པ་དང་། རྣམ་བཅས་པ་གཉིས་ཡོད་དེ། དང་པོ་རྣམ་མེད་དུ་སྨྲ་བ་བྱེ་བྲག་སྨྲ་བ་རྣམས་ནི། ཕྱི་དོན་ཡོད་ཀྱང་དེ་དབང་པོས་མཐོང་བ་ཡིན་གྱི།  རྣམ་ཤེས་ནི་ཤེལ་སྒོང་ལྟ་བུ་ཡུལ་གྱི་རྣམ་པ་མི་འཛིན་པར་
13-1-67b


འདོད་དེ། འདི་ལྟར་གཟུགས་ལ་སོགས་པ་ནི་རྟེན་བཅས་ཀྱི་དབང་པོས་ཡུལ་ཁོ་རང་རྗེན་ཅེར་དུ་གཟུང་བ་ཡིན་གྱི། ཡུལ་དང་ཡུལ་ཅན་གྱི་བར་ན་མཚམས་སྦྱོར་བའི་རྣམ་པ་ཞིག་ག་ལ་དགོས་ཏེ། བུམ་པ་ལྟ་བུ་མཐོང་ན་ཡུལ་གྱི་གོ་ས་དེ་ན་གནས་པའི་བུམ་པའི་རང་མཚན་ཉིད་མངོན་སུམ་རྗེན་ནེ་མཐོང་
བ་འདི་ཙམ་མོ་སྙམ་པ་སྟེ་འཇིག་རྟེན་པ་རྣམས་ཀྱི་བསམ་ངོ་དང་མཐུན་ཏེ། དེ་དག་གིས་ངས་མིག་གིས་བུམ་པ་མཐོང་ཞེས་མཐོང་བྱེད་མིག་དང་མཐོང་བྱ་བུམ་པ་ཁོ་ནར་ཞེན་ནས་མངོན་སུམ་སྣང་བཞིན་པ་འདི་ཡུལ་ཁོ་རང་གི་ངོ་བོ་རྗེན་ཅེར་མཐོང་བའོ་སྙམ་དུ་སེམས་པས་དེ་ལྟར་ན་གང་ཟག་བརྒྱས་བུམ་པ་
གཅིག་ལ་བལྟས་ན་ཐམས་ཅད་ཀྱིས་མཐོང་རྒྱུ་བུམ་པ་གཅིག་པུ་དེ་ཡིན་པར་འདོད་དོ། །དེ་ལ་མདོ་སྡེ་པ་སོགས་ཀྱིས་དཔྱད་ན། ཡུལ་ཐམས་ཅད་རང་གི་ཤེས་ངོ་ལ་སྣང་ནས་གཟུང་བ་ཁོ་ན་ཡིན་གྱི། ཤེས་པས་མ་བཟུང་ན་དེ་ཤེས་པར་ཡང་ག་ལ་རུང་སྟེ་བེམ་པོ་ལ་
ཡུལ་ཤེས་པ་མི་སྲིད་དོ། །དེས་ན་མིག་དབང་གིས་མཐོང་བ་མ་ཡིན་ཏེ། དེ་བེམ་པོ་ཡིན་པས་ལྟ་བྱེད་དུ་མི་རུང་ལ་ཤེལ་སོགས་དྭང་བའི་གཟུགས་ཀྱིས་བར་ཆོད་ནའང་མཐོང་བའི་ཕྱིར་རོ། །དེས་ན་ཡུལ་གང་དང་གང་ཡིན་པ་ཐམས་ཅད་ཤེས་པས་མཐོང་
ཞིང་ཤེས་པ་ཡིན་གྱི། ཤེས་པ་དང་བྲལ་ནས་ཇི་ལྟར་ཤེས་སུ་རུང་སྟེ་ཤེས་མི་སྲིད་དོ། །དེས་ན་དབང་པོ་མིག་ཤེས་ཡུལ་ལ་འཇུག་པའི་རྐྱེན་ཙམ་སྟེ་ཡུལ་འཛིན་པའི་ནུས་པ་ཞིག་ཡིན་པར་རྗེས་སུ་འགྲོ་ལྡོག་གི་ངེས་པས་གྲུབ་ལ། དེ་ཕྱིར་དཔེར་ན་མེ་ལོང་གི་
ནང་དུ་གཟུགས་བརྙན་ཤར་བ་ནི་མེ་ལོང་ནང་ལ་ཤར་རྒྱུའི་གཟུགས་དང་འདྲ་བར་སྐྱེས་པའི་གཟུགས་བརྙན་ཡིན་གྱི། གཟུགས་དངོས་ག་ལ་ཡིན། དེ་བཞིན་དུ་ཤེས་པ་ལ་སྣང་བའི་ཆ་ཐམས་ཅད་ནི་ཤེས་པ་དོན་དེའི་རྣམ་པར་སྣང་བ་ཙམ་ཡིན་ཏེ།  མི་བརྒྱས་བུམ་
13-1-68a


པ་གཅིག་ལ་བལྟས་ན་སོ་སོ་རང་རང་གི་ཤེས་པ་བུམ་པའི་རྣམ་པར་སྣང་བ་སྟེ། མེ་ལོང་བརྒྱའི་ནང་དུ་བུམ་པ་གཅིག་གི་གཟུགས་བརྙན་སོ་སོར་ཤར་བ་བཞིན་ནོ། །དེ་ལྟར་མ་ཡིན་ན་གང་ཟག་བརྒྱ་པོ་དེ་སོ་སོ་རང་རང་གི་རྒྱུད་ན་བུམ་
པ་ཤེས་པའི་སྣང་ཆའམ་ཤེས་ཆ་རེ་མེད་ན་ནི་བུམ་པ་ཤེས་པར་ཡང་མི་རུང་ལ། ཡོད་ན་སོ་སོའི་བློ་ངོ་ལ་སྣང་བའི་ཆ་དེ་ཅིག་ཤོས་ལ་སྣང་མི་སྲིད་དེ་རྒྱུད་ཐ་དད་པའི་ཕྱིར་རོ། །དེས་ན་གང་སྣང་ཕན་ཆད་རང་སྣང་ཡིན་པར་བཟློག་ཏུ་མེད་ཀྱང་། འོན་ཀྱང་སྣང་བའི་
རྣམ་པ་དེ་ལྟ་བུ་རྒྱུ་མེད་དུ་མི་འབྱུང་བས་རྣམ་པ་གཏོད་བྱེད་ཀྱི་ཕྱི་དོན་ནི་ཡོད་དེ། དེ་ལས་དེའི་རྣམ་པ་འབྱུང་བ་ནི། རྒྱ་ལས་རྒྱའི་འབུར་ལྟ་བུའམ། གཟུགས་ལས་གཟུགས་བརྙན་ལྟ་བུ་སྟེ། དཔེར་ན། མེ་ལོང་གི་ནང་དུ་གཟུགས་
ཀྱི་རྣམ་པ་ཤར་ན། གཟུགས་དངོས་ནི་མེ་ལོང་ལ་ནམ་ཡང་འཆར་མི་སྲིད་ཀྱང་། གཟུགས་ལ་ཇི་ལྟར་ཡོད་པ་ལྟར་སྣང་བ་བཞིན་དུ། རང་སེམས་ལ་གང་སྣང་བ་དེ་ནི་ཕྱི་དོན་གྱི་རྣམ་པ་ལས་འོས་མེད་ཀྱང་རྣམ་པ་དེ་ལ་ཇི་ཡོད་པ་མ་ལྷག་
མ་ཆད་པར་ཕྱི་རོལ་ལའང་ཡོད་དགོས་ལ། དེ་ལྟར་རང་གི་བློ་ངོ་ལ་སྣང་བའི་རྣམ་པ་དང་། རྣམ་པ་གཏོད་བྱེད་ཀྱི་ཕྱི་དོན་གཉིས་གཅིག་ཏུ་འཁྲུལ་པ་ཡིན་གྱི། དོན་དུ་སྣང་ངོའི་འདི་རྣམ་པ་ཡིན་གྱི་དོན་དངོས་མིན་པས། ཕྱི་དོན་དངོས་ནི་ལྐོག་ན་མོའི་
ཚུལ་ཏེ་རྣམ་པ་དེའི་ཕག་ཏུ་ཡིབ་པ་ལྟ་བུའི་ཚུལ་གྱིས་མཐོང་བ་མེད་པར་འདོད། ལུགས་འདི་ཕྱི་དོན་ཡོད་པར་འདོད་ཕན་ཆད་འདི་ལྟར་ཁས་ལེན་པ་ལས་འོས་མེད་པས་ཤིན་ཏུ་འཐད། འདི་དག་གིས་དཔེར་ན། ཚོན་གྱིས་བསྒྱུར་བའི་ཤེལ་མངོན་
13-1-68b


སུམ་བཟུང་ན། ཤེལ་མངོན་སུམ་ཚོན་གཟུགས་བརྙན་བཟུང་བ་ཡིན་པ་ལྟར། མངོན་སུམ་སྣང་བ་ཤེས་པ་ཁོ་ན་ཡིན་ལ་ཁ་དོག་དང་དབྱིབས་སུ་སྣང་བའི་གཞི་ནི་ཤེས་པ་ལས་ཐ་དད་པའི་རྡུལ་ཕྲ་རབ་ཚོགས་པའི་ཕྱི་དོན་ཡིན་པར་འདོད་པ་དེས་ན་དབང་པོས་
ཡུལ་མི་འཛིན་པར་ཤེས་པས་འཛིན་པར་འདོད་པའོ། །དེ་ལ་ཁ་ཅིག་གིས་ཕྱི་དོན་གཏན་ནས་མ་སྣང་ན་ཤ་ཟ་སོགས་ཀྱི་རྣམ་པའང་ཅིས་མི་འཛིན་ཏེ། བུམ་པ་དང་ཤ་ཟ་གཉིས་ལྐོག་གྱུར་ཡིན་པ་ལ་ཁྱད་མེད་པའི་ཕྱིར་ན་སྐད་ཅིག་དང་པོ་ལ་ཕྱི་དོན་སྣང་ཞིང་
དེ་ཕན་ཆད་ལྐོག་གྱུར་ཡིན་ཟེར་ཀྱང་མདོ་སྡེ་པའི་གྲུབ་མཐའ་གཏན་མ་ཆུབ་པ་སྟེ། སྐད་ཅིག་དང་པོ་ལ་ཡུལ་དངོས་སུ་རིག་ན་གཉིས་པ་སོགས་སུའང་ཅིས་མི་རིག །ལྐོག་གྱུར་ཡིན་ཡང་གང་གི་རྣམ་པ་གཏད་པ་དེའི་རྣམ་པ་འཛིན་པ་ལས་གཞན་མི་
སྲིད་དེ། མེ་ལོང་གི་ནང་དུ་གཟུགས་དངོས་ཤར་བ་ནམ་ཡང་མི་སྲིད་ཀྱང་།  གང་མེ་ལོང་ལ་ཕྱོགས་པ་དེ་འཆར་བ་ལས་གང་རུང་རུང་མི་འཆར་བ་བཞིན་ནོ། །དེ་ལ་སྐབས་འདིར་གཟུགས་བརྙན་གྱི་དཔེར་བརྗོད་པ་འདི་ནི་བློ་ལ་གོ་སླ་བར་བརྗོད་པ་ཙམ་ཡིན་ནོ། །
དེ་ལྟར་ཤེས་པ་རྣམ་བཅས་སུ་སྨྲ་བ་ལ་སེམས་ཙམ་པ་དང་འདི་གཉིས་འདྲ་ཡང་། ཕྱི་དོན་ལོགས་སུ་ཡོད་པར་འདོད་མི་འདོད་ཀྱི་ཁྱད་པར་ཙམ་མོ། །དེ་ལ་རྣམ་བཅས་པ་ལ་གཟུང་བའི་རྣམ་པ་དང་། དེ་འཛིན་པའི་ཤེས་པ་གཉིས་ལ་བརྟགས་པའི་མུ་གསུམ་
ཡོད་པ་ནི་འོག་ཏུ་འཆད་པར་འགྱུར་ལ། གཞུང་འདིར་ཐ་སྙད་དུ་དེ་གསུམ་གྱི་ནང་ནས་གང་བཞེད་ཅེ་ན། དགེ་ལྡན་གྱི་མཁས་པ་རྣམས་ནི་ཚད་མ་དང་འདི་ཀུན་མཐུན་པར་སྣ་ཚོགས་གཉིས་མེད་པར་བཞེད་ཅེས་གསུངས་ཀྱང་། སྤྱིར་ཁ་ནང་ལྟ་རང་རིག་
13-1-69a


གི་དབང་དུ་བྱས་ནས་ཤེས་རྒྱུད་ཙམ་ལ་བསམས་ན། སྣང་བ་སྣ་ཚོགས་སེམས་སུ་གཉིས་མེད་ཅེས་པ་དེའི་ཐ་སྙད་རུང་བའི་སྐབས་ཙམ་ཞིག་ཡོད་མོད་ཀྱི། མུ་གསུམ་པོའི་སྐབས་འདིར་ནི་དེ་ཙམ་མིན་པར་ཟླའི་སྟོབས་ཀྱིས་
རྣམ་པ་འཛིན་ཚུལ་ལ་གོ་དགོས་པས་ན་ཤིན་ཏུ་མི་འཐད་པས་ལུགས་འདིར་ནི་ཐ་སྙད་ཀྱི་ཚད་མས་གྲུབ་ཅིང་གནོད་པ་མེད་པ་ནི་གཟུང་འཛིན་གྲངས་མཉམ་པ་ཁོ་ནར་མཐོང་བས་བདག་ནི་དེ་ཁོ་ན་ལྟར་སྨྲ་ལ། གཞུང་གི་དགོངས་པའང་འདི་ཡིན་ཏེ། དེ་ལ་
སེམས་ཙམ་གཟུང་འཛིན་གྲངས་མཉམ་པ་འགོག་པའི་སྐབས་སུ། སྔོན་གྱི་སློབ་དཔོན་ཁ་ཅིག་སྔོ་སོགས་འཛིན་པའི་སེམས་རིགས་འདྲ་ཤ་སྟག་པ་དུ་མ་ལྷན་ཅིག་སྐྱེ་བར་འདོད་པ་ལ། དེ་ལྟར་ན་བཅོམ་ལྡན་འདས་ཀྱིས། གང་སྔ་ཕྱི་མེད་པར་སེམས་
གཉིས་འབྱུང་བ་འདི་གནས་མ་ཡིན་གོ་སྐབས་མེད་དོ། །ཞེས་དང་། ཡང་སེམས་ཅན་ཐམས་ཅད་ནི་རྣམ་པར་ཤེས་པའི་རྒྱུད་གཅིག་པའོ། །ཞེས་འབྱུང་བའི་ལུང་དང་འགལ་བ་བསྟན་པ་ལ། དེ་དག་གིས་ཀླན་ཀ་སྤང་པའི་དོན་དུ་ལུང་དེ་འདྲ་བ་
རྣམ་སྨིན་གྱི་རྣམ་ཤེས་ཀུན་གཞི་ལ་དགོངས་སོ་ཟེར་བའང་མི་འཐད་དེ། ཀུན་གཞིའང་གནས་ལུས་ལོངས་སྤྱོད་སྣ་ཚོགས་ཀྱི་རྣམ་པར་སྣང་བས་དུ་མར་ཐལ་བ་དང་། ལུང་ཡང་སྔོན་གྱི་སློབ་དཔོན་ཆོས་ཀྱི་གྲགས་པས། དེ་དག་རྣམས་ལས་རིགས་
མཐུན་པའི། །ཞེས་པ་ལ་སོགས་ཀྱིས་མདོའི་དགོངས་པ་རིགས་མཐུན་གྱི་ཤེས་པ་གཉིས་ལྷན་ཅིག་འབྱུང་བར་མི་སྲིད་པ་ལ་བཤད་པས་ཁྱོད་ཀྱི་ཚུལ་དེ་བོར་ནས་འཆད་པ་དེ་ལྟར་ན་མདོའི་དོན་འདི་ལྟར་ཁོ་བོས་རིགས་པས་གསལ་པོར་སྨྲས་ཀྱང་ཆོག་སྟེ། སེམས་
13-1-69b


གཉིས་ལྷན་ཅིག་མི་འབྱུང་བར་གསུངས་པ་ནི་མི་མཐུན་ཕྱོགས་དང་གཉེན་པོའི་དབང་དུ་མཛད་ནས་གསུངས་པ་དང་། སེམས་རྒྱུད་གཅིག་པ་ཞེས་པའང་གྲངས་ཀྱི་གཅིག་མ་ཡིན་པར་འབའ་ཞིག་པའི་དོན་ཏེ། དེ་ལ་ཕྱི་རོལ་གྱི་དོན་མེད་པར་བདག་དང་བདག་
གི་དང་གཟུང་འཛིན་དང་བྲལ་པའི་སེམས་ཉིད་འབའ་ཞིག་ཡོད་དོ་ཞེས་བསྟན་པར་གྱུར་ནའང་རུང་ཞིང་འཐད་པ་ཉིད་དོ། །དེ་ལྟར་སྨྲས་པ་མི་འཐད་པ་མེད་ཀྱང་རུང་། དགོས་པ་ཡོན་ཏན་ཅི་ཡོད་ཅེ་ན།  རྣམ་སྨིན་ཀུན་གཞིའི་ཤེས་པ་གནས་ལུས་ལོངས་སྤྱོད་སྣ་
ཚོགས་སུ་སྣང་བའི་རྣམ་པ་ཐ་དད་པས་ཐ་དད་པར་འགྱུར་བའི་ཉེས་པ་ནི་མི་བསྐྱེད་པས་ཁྱོད་ཀྱི་ཁས་ལེན་ཚུལ་ལས་འཕགས་སོ། །འོ་ན་ཕ་རོལ་པོས་འདོད་པ་བཀག་ཀྱང་དེ་ལྟ་བུའི་ཚུལ་བཟུང་ན་ཅི་ལུགས་འདི་རྨ་མེད་པ་ཡིན་ནམ་ཞེ་ན། མ་ཡིན་པར་བརྗོད་པ་
ཞེས་གཟུང་འཛིན་གྲངས་མཉམ་འགོག་པའི་རིགས་པ་བསྟན་འདུག་པ་འདིས་གཟུང་འཛིན་གྲངས་མཉམ་འདོད་ཚུལ་གཞན་གྱི་ལུགས་དགག་པའི་ཤུགས་ཀྱིས། རང་ལུགས་ཀྱི་གྲངས་མཉམ་ཁས་ལེན་ཚུལ་བཅས་བསྟན་པ་ཡིན་ནོ། །དེ་ལ་སྒོང་ཕྱེད་ཚལ་
པའི་ལུགས་ལ་སྐྱོན་བརྗོད་པ་དེ་དོན་དམ་པར་མ་ཟད་ཐ་སྙད་དུའང་འཇུག་ལ། སྣ་ཚོགས་གཉིས་མེད་པའི་ལུགས་ལའང་ནམ་མཁའི་གོས་ཅན་ལུགས་སམ་ཅི་ཞེས་སུན་འབྱིན་གྱི་ཚིག་དང་བཅས་ཏེ་བཀག་པ་དེའང་ཐ་སྙད་དུ་འཇུག་ལ་གཟུང་འཛིན་གྲངས་
མཉམ་འགོག་པའི་རིགས་པ་ནི་དོན་དམ་པར་འཇུག་གི་ཐ་སྙད་ཙམ་དུ་མི་འཇུག་པས་ལུགས་འདི་ཁས་ལེན་པ་འཐད་དོ། །དེ་ལ་སྐབས་འདིར་ཕལ་ཆེར་རྟོག་པ་དང་རྟོག་མེད་ཀྱི་བྱེད་པ་འདྲེས་ཏེ་ཚུལ་བཞིན་སྨྲ་བ་དཀོན་པར་འདུག་ནའང་། དོན་དུ་རྟོག་མེད་ཀྱི་
13-1-70a


ཤེས་ངོར་ཡུལ་གྱི་རྣམ་པ་ཐ་དད་ལ་གཅིག་ཏུ་མི་སྣང་། གཅིག་ལ་ཐ་དད་དུ་སྣང་མི་སྲིད་དེ། སྣང་ན་བློ་དོན་མཐུན་དུ་མི་འགྱུར་པས་ན་དོན་ཇི་ལྟར་སྣང་བ་ལྟར་ཤེས་པའང་དེ་ལྟར་འགྱུར་དགོས་པ་ནི། དཔེར་ན་བུམ་པའི་རང་མཚན་མཐོང་ཚེ་
དེ་དག་ཡུལ་དུས་རྣམ་པ་མ་འདྲེས་པར་འཛིན་དགོས་པས་བུམ་པའི་ཁ་དང་ལྟོ་བ་ཞབས་སོགས་ཆ་སོ་སོ་ནས་རྣམ་པ་གཏད་པ་ལྟར་འཛིན་གྱི།  གཅིག་ཏུ་བསྲེས་ཏེ་འཛིན་པ་ནི་མི་སྲིད་ལ། ཁ་ཁྱེར་འཛིན་པའི་ཤེས་པ་དང་།  ཞབས་ཀྱི་ཆ་འཛིན་པ་གཉིས་གཅིག་ཏུ་རིགས་
པ་མ་ཡིན་པས་ཤེས་པ་དུ་མའི་ཐ་སྙད་ཐོབ་ཀྱི་གཅིག་གི་ཐ་སྙད་ག་ལ་ཐོབ། འོན་ཀྱང་དེ་ཀུན་བསྡོམས་ནས་བཟུང་བ་བུམ་འཛིན་གྱི་ཤེས་པར་རིགས་གཅིག་པ་ལས་གཞན་མེད་ལ། བྱེ་བྲག་ཁ་ཁྱེར་འཛིན་པ་ལྟ་བུའང་ཁ་ཁྱེར་འཛིན་པར་དོན་མཐུན་གྱི་གཞན་ལ་
མི་མཐུན་ལ། ཁ་ཁྱེར་གྱིའང་སྟེང་འོག་འཛིན་པའི་ཆ་སོ་སོ་ནང་རིགས་མི་མཐུན་ཡང་ཁ་ཁྱེར་གྱི་ཤེས་པ་གཅིག་པུའི་གདགས་གཞིར་རུང་བ་ཡིན་པ་སོགས་ཀུན་ལ་སྦྱར་ན། རིགས་མཐུན་གྱི་ཤེས་པ་གཉིས་ནམ་ཡང་དུས་གཅིག་ཏུ་སྐྱེ་བ་མེད་དེ། གལ་ཏེ་
ཡུལ་བུམ་པ་ལྟ་བུ་གཅིག་ལ་དམིགས་པའི་ཚེ་བུམ་འཛིན་གྱི་ཤེས་པ་རྟོག་མེད་རིགས་མཐུན་ནམ། རྟོག་བཅས་གཉིས་དུས་སྔ་ཕྱི་མེད་པར་སྐྱེ་ན་ཡུལ་ཅན་གཉིས་སུ་སོང་བས་རྒྱུད་ཐ་དད་པར་འགྱུར་དགོས་པ་ཡིན་ལ། རིགས་མི་མཐུན་དུ་མ་སྐྱེ་ཡང་རྒྱུད་དང་
རྣམ་ཤེས་ཐ་དད་པར་མི་འགྱུར་བའི་ཚུལ་ལ་ཡིད་ཆེས་པར་འགྱུར་ཏེ། དེ་ལ་ཁ་ཁྱེར་འཛིན་པའང་བུམ་འཛིན་ཤེས་པ་གཅིག་ཡིན། ལྟོ་བ་འཛིན་པའང་དེ་གཅིག་པ་ལྟ་བུར་གོ་བ་བྱས་ན་ཆེས་ལོག་པར་འཁྱམས་པ་ཡིན་ནོ། །དེས་ན་ཁ་ཁྱེར་ཤེས་པ་དང་ལྟོ་
13-1-70b


བ་ཤེས་པ་སོགས་མཐོང་བའི་སྤྱོད་ཡུལ་ཡོངས་སུ་རྫོགས་པ་ལ་གཅིག་ཏུ་བསྡོམས་ཏེ་བུམ་འཛིན་ཤེས་པར་བཞག་པས་ན་ཤེས་པ་ཐ་དད་དུ་མི་འགྱུར་ཏེ། འཕང་ལོ་དང་ལྟེ་བ་རྩིབས་མུ་ཁྱུད་སོགས་ལ་ཤིང་རྟར་བཏགས་ཚེ། ཡན་ལག་དེ་རྣམས་ནང་ཕན་
ཚུན་གཅིག་མིན་ཀྱང་། དེས་ཡན་ལག་ཅན་ཤིང་རྟ་གཉིས་སུ་མི་འགྱུར་བ་བཞིན་ནོ། །དེས་ན་བུམ་པའོ་སྙམ་དུ་རྟོགས་པའི་ཚེ། བུམ་མིན་ཐམས་ཅད་རྣམ་པར་མ་བཅད་ན་དེ་མི་གྲུབ་པས་དེ་ག་རང་གཅིག་པུ་ལས་རྟོག་པ་གཞན་དང་དུས་མཉམ་
འགྲོགས་པ་མི་སྲིད། དེ་བཞིན་ཁྲ་འཛིན་ཙམ་དང་། ཁྲ་བོའི་བྱེ་བྲག་སྔོ་འཛིན་དང་། སྔོན་པོའི་བྱེ་བྲག་དབུས་ཀྱི་སྔོན་པོ་སོགས་ཇི་སྲིད་བློས་ཕྱེ་བ་སྲིད་དུ་དེ་ལྟར་ཤེས་པར་བྱའོ། །དེས་ན་ཤེས་པ་རྒྱུད་གཅིག་པ་དང་ངོ་བོ་གཅིག་པ་སོགས་འཇོག་ཚུལ་དེ་ལྟ་བུ་ཡིན་གྱི། ནང་གསེས་
དུ་མ་མེད་པ་ཞིག་ལ་འཇོག་ན་ཡུལ་ཆ་མེད་དང་རྣམ་ཤེས་ཆ་མེད་གཅིག་བདེན་ཞིག་ཁས་ལེན་ན་མ་གཏོགས་ཇི་ལྟར་བསྒྲུབ་སོམས་ཤིག །གཞན་ཡང་བུམ་པའི་ཁ་ཁྱེར་དང་ལྟོ་བ་སོགས་ཡུལ་སོ་སོ་བ་ཡིན་པས་ཡུལ་ཅན་ཤེས་པ་རིགས་མི་མཐུན་མིན་པར་
སྨྲ་ན་བུམ་འཛིན་དང་ཆུ་འཛིན་ཤེས་པའང་གཅིག་ཏུ་འགྱུར་ཞིང་།  མཐར་ཡུལ་ཅན་ཤེས་པ་ཙམ་དུ་འདྲ་བས་སྒྲ་ཤེས་གཟུགས་ཤེས་སོགས་ཤེས་པ་ཡིན་ནོ་ཅོག་གཅིག་ཏུ་འགྱུར་བས། དེ་ལྟར་ན་རིགས་མི་མཐུན་པའི་ཤེས་པ་གཞི་མ་གྲུབ་པས་སློབ་དཔོན་
གྱིས་ཤེས་པ་རིགས་མཐུན་མི་མཐུན་དུ་ཕྱེ་བ་ལ་དགོས་པ་མེད་པར་འགྱུར་རོ། །དེས་ན་ལུགས་འདི་ལ་ཕྱེ་མ་ལེབ་ཁྲ་སོགས་ཀྱི་ཁ་དོག་ཅིག་ཅར་དམིགས་པ་སྲིད་ཀྱི། གཞན་དུ་དེ་མི་སྲིད་དེ་རིམ་ཅན་དུ་དམིགས་ན་སྒོ་ང་ཕྱེད་ཚལ་བ་ལ་བརྗོད་པའི་ལྕུགས་སྒྲ་སོགས་
13-1-71a


ཀྱི་རིགས་པས་གནོད་ལ། ཅིག་ཅར་དམིགས་བཞིན་དུ་ཡང་རྣམ་པ་སོ་སོའི་འཛིན་པ་མེད་ན་ཤེས་རྣམ་གཉིས་འབྲེལ་མེད་དུ་འགྱུར་བ་སོགས་ཀྱི་སྐྱོན་ཡོད་པས་སྣ་ཚོགས་གཉིས་མེད་པའང་ཆེས་མི་འཐད་ཅིང་། མཐར་སྣང་ཡུལ་
སྔོན་པོ་ལྟ་བུ་གཅིག་ལའང་དབུས་མཐའ་ལ་སོགས་པའི་དབྱེ་བ་ཡོད་པས། དེ་ཇི་བཞིན་འཛིན་པའི་ཡུལ་ཅན་རྣམ་པ་ཐ་དད་མེད་པ་མི་སྲིད་དེ། སྲིད་ན་ཆ་ཡོད་ཀྱི་རྣམ་པ་ལ་ཆ་མེད་དུ་འཛིན་པ་ཚད་མར་ག་ལ་འཐད། ཤེས་པ་དུ་མར་འདོད་པའི་ལུགས་འདི་
ལ་ཐ་སྙད་དུ། གཞལ་བྱ་འཛིན་པའི་ཚད་མ་རུང་བར་འགྱུར་ཏེ། བུམ་པ་རྡུལ་དུ་མའི་བདག་ཉིད་དུ་འདོད་པ་རྣམས་ཀྱིས་ཆ་མེད་ཀྱི་བུམ་པ་ཁས་མི་ལེན་ཅིང་དེའི་རྒྱུ་མཚན་ཆ་བཅས་སུ་ཤེས་ངོ་ལ་སྣང་བས་འཇོག་པ་བཞིན་ནོ། །ལུགས་དེར་ཡང་གཟུང་རྣམ་
འཛིན་རྣམ་རིགས་མཐུན་གྱི་ཤེས་པ་གཉིས་དུས་གཅིག་ཏུ་སྐྱེས་པར་མི་འགྱུར་ཏེ། དེ་གཉིས་བཏགས་པའི་ཐ་སྙད་དུ་ཕྱེ་བ་ལས། དོན་ལ་ཐ་དད་མེད་པའི་ཕྱིར་རོ། །དེ་ལྟར་གཞན་ན་མ་མཐོང་ཡང་ཚུལ་འདི་ཁོ་ན་ཐ་སྙད་དུ་ཁས་ལེན་ནོ་ཞེས་བདག་གཅིག་པུ་
འཇིགས་པ་མེད་པར་སྨྲའོ། །དཔལ་ཆོས་གྲགས་ཀྱི་བཞེད་པ་མཐར་ཐུག་པའང་དེར་གནས་སུ་ཟིན་མོད།  ཚུལ་བཞིན་གང་ན་གསལ་བློ་ལྡན་རྣམས་ཀྱིས་རྒྱ་བོད་ཀྱི་གཞུང་བཀླགས་ན་འབྱིན་ཏོ། །འདི་ལ་བརྗོད་དགོས་པ་མང་ཡང་རེ་ཞིག་མདོ་ཙམ་བསྟན་
པའོ། །དེ་ལ་རྣམ་མེད་པའི་ལུགས་ནི་ཆེས་འབྲེལ་བ་མེད་པར་སྟོན་དགོས་པ་ལ། དང་པོ་རང་རིག་འཐད་པར་བསྒྲུབ་དགོས་པས། དེའང་གཟུང་ཆར་སྣང་བའི་རྣམ་པ་དེའང་ཤེས་པ་ཡིན། དེ་འཛིན་པའང་ཤེས་པ་ཡིན་ཅིང་དེ་གཉིས་ངོ་བོ་གཅིག་
13-1-71b


ཡིན་ན་རང་གིས་རང་ལ་བྱེད་པར་འགལ་བས་དེ་མི་འཐད་སྙམ་ན། འདི་ལྟར་གཞལ་བྱ་སྣ་ཚོགས་པ་སྣང་བའི་ཡུལ་དང་། དེ་འཛིན་པའི་ཡུལ་ཅན་སོ་སོར་ཡོད་པ་ལྟ་བུའི་སྣང་ཚུལ་གྱི་དབང་དུ་བྱས་ཏེ་གཟུང་རྣམ་དང་འཛིན་རྣམ་ཞེས་བཞག་ཀྱང་དོན་ལ་རྣམ༷་
པར་ཤེས༷་པ་གང་ཞིག་ཤིང་རྟ་དང་རྩིག་པ་ལ་སོགས་པ་བེ༷མ་པོ༷འི་ར༷ང་བཞི༷ན་གསལ་རིག་དང་བྲལ་བ་དག་ལ༷ས་བཟློག༷་པ༷་གསལ་ཞིང་རིག་པའི་མཚན་ཉིད་ཅན་དུ་རབ༷་ཏུ་སྐྱེ༷་བ༷་སྟེ༷། དེ་ལྟར་བེ༷མ་པོ་མི༷ན་པའི་རང༷་བཞི༷ན་ག༷ང་ཡི༷ན་པ༷་དེ༷་ལྟ་བུ་འདི༷་ནི་བད༷ག་རང་ཉི༷ད་
ཤེས༷་པ༷འམ་རང་རིག་རང་གསལ་ཞེས་པ་ཡི༷ན་ནོ། །གཉིས་པ་དེ་ལ་རང་རིག་ཏུ་གདགས་པའི་འཐད་པ། གཅིག་པ་ཆ་མེད་རང་བཞིན་ལ། །གསུམ་གྱི་རང་བཞིན་མི་འཐད་ཕྱིར། །དེ་ཡི་རང་གིས་རིག་པ་ནི། །བྱ་དང་བྱེད་པའི་དངོས་པོར་མིན། །
དེ་ཕྱིར་འདི་ནི་ཤེས་པ་ཡི། །རང་བཞིན་ཡིན་པས་བདག་ཤེས་རུང་། །ཞེས་གསུངས་ཏེ། འདི་ལྟར་རྣམ་ཤེས་རང་ཉིད་ཅེས་བྱ་བ་དངོས་པོ་གཞན་བཅད་ནས་གཅི༷ག་པ༷་ཉིད་དུ་གྱུར་ཅིང་།  རང་ལས་གཞན་པའི་ཆ༷་མེ༷ད་པའི་ར༷ང་བཞི༷ན་ཞིག་ཡིན་དགོས་པ་
ལ༷། དངོས་སུ་ན་སྐྱེད་པར་བྱེད་པ་པོ་རྣམ་འཇོག་གི་རྒྱུ་རིག་པར་བྱ་བའི་ཡུལ་དང་། དེས་བསྐྱེད་བྱ་ཡུལ་རིག་པ་པོ་དང་། བསྐྱེད་འབྲས་སམ་རིག་པ་སྟེ་བྱ་བྱེད་ལས་གསུ༷མ་གྱི༷་ར༷ང་བཞི༷ན་ཡོད་པར་མི༷་འཐ༷ད་པའི་ཕྱིར༷་ན། ཤེས་པ་དེ༷་ཡི༷་ར༷ང་གི༷ས་རང་རི༷ག་པ༷་
ཞེས་རྗོད་པ་གང་ཡིན་པ་ནི༷། སྟྭ་རེ་ཤིང་ལ་གདབ་པ་ལྟ་བུར་དངོས་སུ་རང་ལས་ཐ་དད་པའི་རང་འཛིན་ཤེས་པ་བསྐྱེད་པའམ། ཤེས་པས་རིག་པར་བྱ༷་བ་ཡུལ༷་ད༷ང་། ཡུལ་དེ་རིག་པར་བྱེ༷ད་པའི༷་དངོ༷ས་པོ༷ར་འདོད་པ་མིན༷་པ་དེ༷་ཡི་ཕྱིར༷་ན་འ༷དི་ནི༷་ཤེས༷་པ༷་ཡི་ར༷ང་བཞི༷ན་ཡི༷ན་
13-1-72a


པ༷ས་བད༷ག་ཤེ༷ས་ཀྱི་ཐ་སྙད་འཐད་ཅིང་རུ༷ང་བ་ཡིན་ནོ། །དེ་ལ་དངོས་སུ་རང་རིག་པ་ཞེས་ཡུལ་ཅན་དང་ཡུལ་བསྐྱེད་བྱ་སྐྱེད་བྱེད་ཀྱི་རང་བཞིན་དུ་འདོད་ན་མི་འཐད་དེ། དངོས་པོ་བདག་ཉིད་བསྐྱེད་ན་མ་སྐྱེས་པའམ། སྐྱེས་ཟིན་པ་བསྐྱེད། 
དང་པོ་ལྟར་ན་མི་འཐད་དེ་སྐྱེས་པའི་སྔ་ལོགས་ན་དེ་མེད་པས་སྐྱེད་པའི་ནུས་པ་མེད་ལ། ཇི་སྟེ་སྐྱེས་ཟིན་ནས་ནུས་པ་ཡོད་པའི་དུས་ན་དེ་དང་ངོ་བོ་གཅིག་ཏུ་བསྐྱེད་བྱ་ཡང་གྲུབ་ཅིང་། རང་གིས་རང་ལ་བྱེད་པར་འགལ་ཏེ་རལ་གྲིས་རང་མི་གཅོད་པ་སོགས་བཞིན་ནོ། །
དེ་ལྟ་བས་ན་ཡུལ་བུམ་པ་སོགས་བེམ་པོ་ཡིན་པས་དེ་དག་ལ་གསལ་ཞིང་རིག་པ་མི་སྲིད་ལ། དེས་ན་དེ་དག་གི་ངོ་བོར་རིག་པར་བྱེད་པ་རང་ལས་གཞན་པ་གསལ་ཞིང་རིག་པའི་བློ་ལ་ལྟོས་དགོས་ཀྱང་། ཤེས་པ་འདི་ནི་རང་གི་ངོ་བོ་བེམ་པོ་ལྟ་བུ་མ་ཡིན་པས་
རང་གི་ངོ་བོ་རིག་པར་བྱ་བ་རྐྱེན་གཞན་ལ་ལྟོས་མི་དགོས་པ་དེ་ཕྱིར་རང་རིག་ཅེས་བཞག་པ་ཐ་སྙད་ཆེས་འཐད་དེ། ཁོ་རང་སྐྱེས་ཙམ་ནས་གསལ་རིག་གི་རང་བཞིན་ཅན་ཡིན་པས། ཁོས་གཞན་རིག་ཀྱང་ཁོ་ལ་རིག་མཁན་གཞན་མེད་ན་རང་མི་རིག་པ་
མ་ཡིན་པས། གྲུ་པ་རང་གིས་རང་ཆུ་ལས་བསྒྲལ་ཟེར་བ་དང་། མར་མེ་རང་གིས་རང་གསལ་ཟེར་བ་དང་འདྲ་སྟེ། དེའང་མུན་ཁང་ནང་གི་བུམ་པ་སོགས་མར་མེས་སྣང་བར་བྱས་ཀྱང་། མར་མེ་རང་སྣང་བར་བྱེད་པ་ལ་རྒྱུ་གཞན་མི་དགོས་པས་རང་
གསལ་ཞེས་ཐ་སྙད་བཏགས་པ་ལས་མར་མེས་རང་གིས་རང་ཡུལ་དུ་བྱས་ནས་གསལ་བ་མིན་པ་ལྟ་བུའོ། །དེས་ན་མྱོང་བ་གསལ་རིག་གི་ངོ་བོར་སྐྱེས་པ་ལ་རང་རིག་ཅེས་བཏགས་པ་ཡིན་པས་སྤྱིར་ཤེས་པ་ཡིན་ན་ངོ་བོའི་དབང་དུ་བྱས་ཏེ་རང་གིས་རང་རིག་པ་
13-1-72b


ཡིན་པས་ཁྱབ་ཀྱང་། གཟུང་འཛིན་གཉིས་སུ་ཕྱེ་བའི་འཛིན་རྣམ་ལ་རང་རིག་ཏུ་བཞག་པའི་ལྡོག་ཆ་ནས་དེ་ཡིན་པས་མ་ཁྱབ་པ་ལྟ་བུར་སྣང་བ་སོགས་ཤེས་པར་བྱའོ། །དེས་ན་རང་རིག་ཅེས་པའི་ཐ་སྙད་ཙམ་ཞིག་སྒྲུབ་ཚུལ་དེ་ལྟར་ཤེས་ན་ཀུན་རྫོབ་ཏུ་རང་
རིག་འཐད་པ་ལ་གནོད་པ་གང་ཡང་མི་འབབ་སྟེ། ཤེས་པས་རང་གསལ་ན་མིག་གིས་རང་མཐོང་བ་དང་། ཡང་ཟོར་ཅན་རང་གི་ཕྲག་པར་ཞོན་པ་སོགས་མི་རུང་བ་ལྟ་བུའི་ཚུལ་དུ་གསུངས་པ་དང་། མར་མེས་རང་གསལ་ན་མུན་པས་རང་བསྒྲིབས་པར་ཐལ་བ་
སོགས་ཀྱི་རིགས་པ་ཐམས་ཅད། རང་རིག་བདེན་པར་ཁས་བླངས་ན་འཇུག་སྟེ། རང་ཡིན་ན་ཡུལ་ཡིན་པ་འགལ། ཡུལ་ཡིན་ན་རང་ཡིན་པ་འགལ། གལ་ཏེ་མི་འགལ་ན་མུན་པས་རང་བསྒྲིབས་དགོས་པ་སོགས་གནོད་པ་བཟློག་མེད་དུ་འབབ་ཀྱི། ཡུལ་མྱོང་བའི་
སྣང་ཚུལ་ལས་གཟུང་འཛིན་ལྟ་བུར་བཏགས་ཀྱང་དོན་ལ་ཐ་དད་མེད་པའི་ཆ་ནས་བཞག་པའི་ཐ་སྙད་ཙམ་གྱི་འཇོག་ཚུལ་འདི་ལ་སྐྱོན་གང་ཡང་མེད་དོ། །དཔེར་ན་རྨི་ལམ་གྱི་བློ་ངོར་ཡུལ་རྟ་གླང་ཕྱི་རོལ་ན་ཡོད་པ་ལྟ་བུ་དང་། དེར་འཛིན་དབང་པོའི་བློ་ནང་ན་ཡོད་པ་ལྟར་
སྣང་ཡང་། དོན་ལ་ཤེས་པ་དེར་སྣང་གི་གསལ་ཆ་ཙམ་ཡིན་པས་གཟུང་ཆ་དང་འཛིན་ཆར་སྣང་བ་དེ་དག་ཤེས་པ་རང་ལས་གཞན་མིན་ཅིང་གསལ་བར་ཉམས་སུ་མྱོང་བའང་ཡོད་པའི་ཕྱིར་རང་རིག་ཅེས་པའི་ཐ་སྙད་འཐད་དེ། བདག་རང་ལ་རང་དོན་དུ་འབྲེལ་མི་སྲིད་ཀྱང་
ལྡོག་པ་ཐ་དད་ཀྱི་རྣམ་པ་གང་དག་དོན་གང་གི་ངོ་བོར་གཅིག་པ་ལ་བདག་གཅིག་འབྲེལ་ཞེས་གཞག་པ་བཞིན་ནོ། །དེས་ན་གང་ཤེས་བྱའི་རྣམ་པ་ཉམས་སུ་མྱོང་ངོ་ཅོག་ཐམས་ཅད་མྱོང་བ་གསལ་རིག་གི་ངོ་བོར་སྐྱེས་པས། ཐ་སྙད་དུ་ཤེས་པས་ཡུལ་མཐའ་
13-1-73a


དག་ཉམས་སུ་མྱོང་བར་འཐད་ཅིང་ལྟོས་ཏེ་ཡུལ་དང་ཡུལ་ཅན་དུ་བཏགས་པ་ཙམ་ལ་རང་རིག་པར་ཆེས་འཐད་དོ། །དེའང་རྗེས་དཔག་ཚད་མའི་མཐའ་མངོན་སུམ་ལ་ཐུག་ཅིང་། མངོན་སུམ་དོན་རིག་ཀྱང་མཐར་གསལ་བར་
ཉམས་སུ་མྱོང་བའི་རང་རིག་གིས་ཚར་ཕྱིན་པ་ཡིན་པས་ཚུར་མཐོང་ཚད་མའི་རྣམ་གཞག་ཞིག་འདོད་ན་རང་རིག་མེད་དུ་མི་རུང་བ་ཡིན་པས། རང་རིག་མི་འདོད་པའི་ཕྱོགས་སུན་འབྱིན་པ་དང་། དེ་ཡང་དག་པར་གྲུབ་པའི་ཚུལ་རྣམས་རིགས་པའི་དབང་ཕྱུག་གི་གཞུང་ལས་
ཤེས་པར་བྱའོ། །གཉིས་པ་དོན་རིག་མི་འཐད་པར་བསྟན་པ། དོན་གྱི་རང་བཞིན་གཞན་དག་ལ། །དེ་ཡིས་ཇི་ལྟར་ཤེས་པར་འགྱུར། །དེ་ཡི་རང་བཞིན་གཞན་ལ་མེད། །གང་གིས་དེ་ཤེས་གཞན་ཡང་ཤེས། །ཤེས་དང་ཤེས་པར་བྱ་བའི་
དོན། །ཐ་དད་པར་ནི་འདོད་ཕྱིར་རོ། །ཞེས་གསུངས་ཏེ། དེ་ལྟར་གསལ་ཞིང་རིག་པ་ཡིན་པས་བདག་ཤེས་སུ་རུང་གི གསལ་རིག་མ་ཡིན་པའི་དོ༷ན་གྱི༷་ར༷ང་བཞི༷ན་ཤེས་པ་ལས་གཞ༷ན་དུ་གྱུར་པ་ད༷ག་ལ༷། ཤེས་པ་དེ༷་ཡི༷ས་ཇི༷་ལྟར༷་ཤེས༷་པར༷་འགྱུར༷་ཏེ་འབྲེལ་
བ་མེད་པའི་ཕྱིར་རོ། །དེ་ལ་ཇི་ལྟར་ན་ཤེས་པ་དེ༷་ཡི༷་ར༷ང་བཞི༷ན་མྱོང་བ་གསལ་རིག་གི་མཚན་ཉིད་དེ་ནི་གཞ༷ན་དོན་ལ༷་མེ༷ད་ན། རྒྱུ་མཚན་གང༷་གིས༷་ཤེས་པ་དེ༷་རང་གིས་རང་ཤེས༷་སུ་རུང་བ་བཞིན་དུ་དོན་གཞ༷ན་ཡ༷ང་དངོས་སུ་མྱོང་ཞིང་ཤེས༷་པར་ག་ལ་རུང་སྟེ། དོན་
རིག་སྨྲ་བ་ཁྱོད་ཤེས༷་པ་ད༷ང་ཤེས༷་པ༷ར་བྱ༷་བའི༷་དོ༷ན་གཉིས། ངོ་བོ་ཐ༷་ད༷ད་པ༷ར་ནི༷་འདོ༷ད་པའི་ཕྱིར༷་རོ༷། །དེ་ལ་ཡུལ་ཡོངས་སུ་གཅོད་པ་ཞེས་བྱ་བ་ནི་ཤེས་པའི་ཐུན་མོང་མིན་པ་སྟེ། བདེ་སོགས་ཉམས་སུ་མྱོང་བ་ལྟ་བུ་ཡིན་པས་དེ་དོན་ལ་ཡོད་པར་མི་རིགས་ལ། གང་
13-1-73b


ཤེས་པས་ཉམས་སུ་མྱོང་བའམ་ཤེས་ངོ་ལ་སྣང་ཕན་ཆད་གསལ་ཞིང་རིག་ནས་ཤེས་དགོས་ཀྱི་གསལ་རིག་དང་བྲལ་ན་ཤེས་པར་ག་ལ་རུང་། དེས་ན་བུམ་འཛིན་ཤེས་པའི་ངོ་ལ་བུམ་པ་གསལ་བར་སྣང་བ་དེ་ཤེས་པ་ཉིད་མ་ཡིན་པར་ལོགས་ཤིག་ན་བེམ་པོའི་དོན་དུ་གྲུབ་
ཡོད་པ་ལྟར་ན། བེམ་པོའི་ཆོས་ཤེས་པ་ལ་མེད། ཤེས་པའི་ཆོས་བེམ་པོ་ལ་མེད་པས་དེ་གཉིས་གསལ་རིག་ཡིན་མིན་གྱིས་ཕན་ཚུན་སྤངས་ཏེ་གནས་པས་ཐ་དད་ལ། ཐ་དད་ཀྱིས་ཐ་དད་ནམ་ཡང་དངོས་སུ་མྱོང་བར་ག་ལ་འཐད་དེ། སྣང་མུན་བཞིན་འབྲེལ་མེད་དུ་
འགྱུར་བས་ན། ཤེས་པ་ནི་རྟག་ཏུ་རང་གི་མཚན་ཉིད་གསལ་རིག་ཙམ་ལས་འདའ་བ་མ་ཡིན་པའི་ཕྱིར། དེ་ལ་གསལ་རིག་དང་བྲལ་བའི་བེམ་པོ་ཉམས་སུ་མྱོང་བའི་གོ་སྐབས་ནམ་ཐོབ། དེས་ན་བུམ་འཛིན་ཤེས་པའི་ངོ་ན་སྣང་རྒྱུའི་བུམ་པ་ལྟ་བུའི་རྣམ་པ་དེའང་
གསལ་རིག་ཤེས་པའི་རང་བཞིན་ལས་ལོགས་སུ་གྱུར་པ་མི་སྲིད་དོ། །དེ་ཕྱིར་ཤེས་པ་དང་ཡུལ་ལ་འབྲེལ་བ་མེད་ན་ཡུལ་མྱོང་བར་མི་འཐད་ལ། ཡུལ་ཡོངས་སུ་གཅོད་པ་དང་ཤེས་པ་གཉིས་མྱོང་བ་གསལ་རིག་གི་ངོ་བོར་གཅིག་ཏུ་འབྲེལ་ན་ཤེས་པས་དོན་རིག་པར་
འགྱུར་བ་ཞིག་ནའང་། ཕྱི་དོན་ལ་མངོན་ཞེན་གྱི་དུག་གིས་མ་རུངས་པར་བྱས་པའི་བསམ་པ་ཅན་གྱི་ལུགས་ལ་ཚུལ་དེ་འདྲ་བ་མི་སྲིད་དེ། དོན་ཤེས་གཉིས་ཐ་དད་པར་འདོད་པའི་ཕྱིར་རོ། །དེས་ན་བདག་གཅིག་གི་འབྲེལ་བ་མེད་ཕན་ཆད་ཡུལ་མྱོང་བར་
འཐད་དེ། ཤེས་པའི་ངོ་ན་གང་སྣང་སྣང་དང་གང་ཉམས་སུ་མྱོང་མྱོང་ཐམས་ཅད་ཤེས་པ་གསལ་རིག་གི་རང་བཞིན་ཁོ་ན་ཡིན་དགོས་པའི་ཕྱིར། དེ་བྱུང་གི་འབྲེལ་བ་ཙམ་གྱིས་ནི་དོན་མྱོང་བར་མི་འགྲུབ་སྟེ། དུས་མཉམ་པའི་མིག་ལ་སོགས་པའང་མྱོང་བར་
13-1-74a


ཐལ་བར་འགྱུར་བའི་ཕྱིར་དང་། རྣམ་མེད་པ་ལ་ཡུལ་གྱིས་བསྐྱེད་པའི་འབྲས་བུ་རྣམ་པ་མེད་ན་ཅི་ཞིག་བསྐྱེད་དེ་དེ་མི་སྲིད་པའི་ཕྱིར་རོ། །གང་ཕྱི་རོལ་པ་དག་དོན་གྱི་རྣམ་པ་ལ་རིག་པ་མེད་པར་འདོད་པར་མ་ཟད་རང་རིག་པའང་མེད་པར་
འདོད་པ་དེ་ལྟར་ན། དོན་ཤེས་གཉིས་ཀའི་ཐ་སྙད་ཀྱང་མེད་པར་འགྱུར་ཏེ། ཤེས་པ་ནི་གསལ་བ་ཡིན་དགོས་ན། དེ་གསལ་བ་མ་ཡིན་ན་མི་གཞན་གྱི་མངོན་སུམ་གྱི་ཡུལ་རང་གི་སྤྱོད་ཡུལ་དུ་མ་གྱུར་པ་བཞིན་དུ། རང་གི་མདུན་ན་འདུག་པའི་དོན་ཡང་མངོན་
སུམ་མྱོང་བར་མི་འགྱུར་ཏེ་དོན་ཤེས་ལ་འབྲེལ་བའི་རྒྱུ་མཚན་མེད་པའི་ཕྱིར་རོ། །དེས་ན་དོན་བུམ་པ་ལྟ་བུ་མངོན་སུམ་མཐོང་བ་ལས་ཀྱང་རང་བློ་རང་ལ་ལྐོག་ཏུ་མ་གྱུར་པ་འདི་རང་རིག་པའི་བདག་ཉིད་མིན་ན་བློས་ཡུལ་རིག་པའམ་མྱོང་བ་ཐམས་ཅད་མི་སྲིད་པས་རང་རིག་
ཆེས་འཐད་དོ། །གསུམ་པ་རྣམ་མེད་པའི་ལུགས་མི་འཐད་པར་བསྟན་པ་ལ། རྣམ་བཅས་པ་ལ་དོན་མྱོང་བའི་ཐ་སྙད་ཙམ་འཐད་པར་བསྟན་པ། རྣམ་མེད་པ་ལ་དོན་མྱོང་བའི་ཐ་སྙད་ཙམ་ཡང་མི་འཐད་པས་ཆེས་དམན་པར་བསྟན་པ་གཉིས། 
དང་པོ། ཤེས་པ་རྣམ་བཅས་ཕྱོགས་ལ་ནི། །དངོས་སུ་དེ་གཉིས་ཐ་དད་ཀྱང་། །དེ་དང་གཟུགས་བརྙན་འདྲ་བས་ན། །བཏགས་པ་ཙམ་གྱིས་ཚོར་བར་རུང་། །ཞེས་ཕྱི་དོན་འདོད་ཀྱང་ཤེས༷་པ༷་རྣམ༷་པ་དང་བཅ༷ས་པར་སྨྲ་བའི་ཕྱོག༷ས་ལ༷་ནི༷། དངོ༷ས་སུ༷་དོན་
དང་ཤེས་པ་དེ༷་གཉི༷ས་ཐ༷་ད༷ད་ཡིན་པར་འདོད་ཀྱང༷་། ཕྱི་རོལ་གྱི་དོན་དེ༷་དང༷་དེའི་རྣམ་པ་གཉིས་གཟུགས་དང་གཟུག༷ས་བརྙན༷་འདྲ༷་བས༷་ན༷། བཏག༷ས་པ༷་ཙམ༷་གྱིས༷་ཤེས་པས་ཡུལ་དེ་ཤེས་པའམ། ཉམས་སུ་ཚོར་བར༷་གདགས་རུ༷ང་སྟེ། ཡུལ་དངོས་སུ་མ་མྱོངས་ཀྱང་འདྲ་
13-1-74b


བ་ཉམས་སུ་ཚོར་བ་ལ་བུམ་པ་མཐོང་། སྒྲ་ཐོས་སོགས་ཀྱི་ཐ་སྙད་ཙམ་ཞིག་བྱས་ཆོག་པའོ། །གཉིས་པ། དོན་གྱི་རྣམ་པས་བསྒྱུར་ལྡན་པའི། །རྣམ་ཤེས་སུ་ཞིག་མི་འདོད་པ། །དེ་ལ་ཕྱི་རོལ་རིག་པ་ཡི། །རྣམ་པ་འདི་ཡང་ཡོད་མ་
ཡིན། །ཞེས་བུམ་སོགས་ཕྱི་དོ༷ན་གྱི༷་རྣམ༷་པས༷་བསྒྱུར༷་བ་དང་ལྡ༷ན་པའི༷་རྣམ༷་ཤེས༷་སུ༷་ཞི༷ག་གིས་མི༷་འདོ༷ད་པ༷། རྣམ་མེད་བྱེ་སྨྲ་སོགས་ཀྱི་ལུགས་དེ༷་ལ༷་ཡུལ་ཤེས་ཀྱི་འབྲེལ་བ་མི་འཐད་པས་ཕྱི༷་རོ༷ལ་གྱི་དོན་དུ་འདོད་པ་སྔོ་སེར་སོགས་འདི་དང་འདིའོ་ཞེས་
ཤེས་ཤིང་རི༷ག་པ༷་ཡི༷། རྣམ༷་པ༷་མངོན་སུམ་པ་འདི༷་ཡ༷ང་དུས་ཀུན་ཏུ་ཡོ༷ད་པ་མ༷་ཡི༷ན་ནོ། །དེའང་དཔེར་ན་ཤེལ་གོང་ཚོན་གྱིས་བསྒྱུར་དུ་མི་རུང་ན་དེ་ལ་སྔོ་སེར་སོགས་ཀྱི་ཁ་དོག་ཇི་བསྟན་ཀྱང་རང་མདོག་གཅིག་པུ་ལས་གཡོ་བ་མེད་པ་བཞིན་དུ། འདི་དག་གི་ལུགས་ལྟར་ན་
ཕྱི་དོན་ནི་བེམ་པོ་རིག་པ་མེད་པ་ཡིན། ཤེས་པ་ནི་རིག་པ་ཡིན་པས་དོན་ཤེས་གཉིས་ཐ་དད་རྒྱང་རིང་དུ་གྱུར་པ་ཡིན་པས་དངོས་སུ་མྱོང་བ་མེད་པར་མ་ཟད། དེ་གཉིས་འབྲེལ་བའི་རྒྱུ་གཟུགས་བརྙན་ལྟ་བུའི་རྣམ་པའང་ཁས་མི་ལེན་པའི་ཐ་སྙད་ཙམ་དུའང་མཐོང་ཐོས་སོགས་
མི་སྲིད་པར་འགྱུར་བས། རྣམ་བཅས་པའི་ལུགས་ལེགས་པར་བརྟགས་ན་ཕྱི་དོན་ཡོད་པར་འདོད་པས་ཤིན་ཏུ་འབྲེལ་མེད་པ་དེ་བས་ཀྱང་འདི་ནི་ཆེས་དམན་ཏེ་མངོན་སུམ་ལ་སྐུར་བ་འདེབས་པར་འགྱུར་རོ། །དེ་ལ་དེ་དག་གི་རྣམ་པ་མེད་ཀྱང་མངོན་སུམ་སྣང་བ་ཡོད་
སྙམ་པ་ཡིན་ནའང་། རྣམ་པ་མེད་ན་ཕྱི་དོན་མངོན་སུམ་མྱོང་བ་མེད་དགོས་པར་རིགས་པས་གྲུབ་པ་ཡིན་ནོ། །དེ་ལྟར་རྣམ་པ་མེད་པའི་ཤེས་པ་མི་སྲིད་པར་བསྟན་ནས། རྣམ་པ་སྣ་ཚོགས་ཤེས་པའི་རྣམ་པ་དང་ལྡན་པའི་ཤེས་པ་དེ་ལ་གཅིག་བདེན་འགོག་པའི་ཚུལ་
13-1-75a


སོ་སོའི་ལུགས་དང་བསྟུན་ཏེ་རིགས་པས་གཏན་ལ་དབབ་པར་བྱེད་པ་ཡིན་ནོ། །གཉིས་པ་མདོ་སྡེ་པའི་ལུགས་དགག་པ་ལ། སྣ་ཚོགས་གཉིས་མེད་པ། སྒོ་ང་ཕྱེད་ཚལ་པ། རྣམ་ཤེས་གྲངས་མཉམ་པའི་ལུགས་
དགག་པ་གསུམ། དང་པོ་ལ་ཤེས་པ་བཞིན་དུ་རྣམ་པ་གཅིག་ཏུ་ཐལ་བ། རྣམ་པ་བཞིན་དུ་ཤེས་པ་དུ་མར་ཐལ་བ། དེ་ལྟ་མིན་ན་ཤེས་རྣམ་ཐ་དད་དུ་ཐལ་བས་དགག་པ་གསུམ། དང་པོ། ཤེས་གཅིག་ཐ་དད་མ་ཡིན་པས། །རྣམ་པ་མང་པོར་མི་འགྱུར་
ཏེ། །དེ་ཕྱིར་དེ་ཡི་མཐུ་ཡིས་ནི། །དོན་ཤེས་འགྱུར་བར་གཞག་པ་མེད། །ཅེས་གསུངས་ཏེ། དེ་ལ་རྣམ་བཅས་པའི་ལུགས་དེ་ལའང་། གཟུང་རྣམ་གཅིག་ཏུ་འདོད་པ་དང་། དུ་མར་འདོད་པ་གཉིས། དུ་མར་འདོད་པ་ལ་རྣམ་པའི་གྲངས་བཞིན་དུ་ཤེས་
པ་དུ་མར་འདོད་པ་དང་། མི་འདོད་པར་ཤེས་པ་གཅིག་ཏུ་འདོད་པ་སྟེ་མུ་གསུམ་ལས་རྟོག་ཚུལ་གཞན་མི་སྲིད་པས། དེ་གསུམ་ལས། དང་པོ་རྣམ་པ་དུ་མ་ཡོད་ཀྱང་ཤེས་པ་གཅིག་སྐྱེ་བར་འདོད་པ་རྣམས་ནི། ཡུལ་སྔོན་པོ་དང་གྲུབ་བདེ་རྫས་གཅིག་པའི་བྱས་པ་
མི་རྟག་སོགས་ཇི་སྙེད་ཀྱི་རྣམ་པ་ཤར་ཡང་། ཡུལ་ཅན་ཤེས་པ་སྔོན་པོ་ཁོ་ནའི་རྣམ་ལྡན་དུ་སྐྱེ་བ་དང་། ཁྲ་འཛིན་མིག་ཤེས་ལ་ཡུལ་ཁྲ་བོས་སྔོ་སེར་སོགས་དུ་མས་རྣམ་པ་གཏད་ཀྱང་མིག་ཤེས་དེ་སྙེད་ཀྱི་གྲངས་ལྡན་དུ་མི་སྐྱེ་བར་ཁྲ་ཙམ་འཛིན་པའི་མིག་ཤེས་གཅིག་
སྐྱེ་བར་འདོད་པ་ལ། རྣམ་པར་དུ་མ་ཡུལ་ཅན་ཤེས་པ་གཅིག་གི་ངོ་བོར་གྱུར་པ་ལྟ་བུས་ན། ལུགས་དེ་ལ་སྣ་ཚོགས་གཉིས་མེད་པ་ཞེས་མིང་དུའང་གདགས་སོ། །དེ་ལ་ལུགས་དེ་དག་གི་འདོད་པ་ལྟར་ན། ཤེས༷་པ་གཅི༷ག་པུ་པ་དེ་དང་རྣམ་པ་གཉིས་རྫས་ཐ༷་
13-1-75b


ད༷ད་པ་མ༷་ཡི༷ན་པ༷ས། རྣམ༷་པ༷་ཡང་གཅིག་ལས་སྔོ་སེར་དཀར་དམར་སོགས་མ༷ང་པོ༷ར་མི༷་འགྱུར༷་ཏེ༷་གཅིག་ཏུ་འགྱུར་དགོས་ལ། རྣམ་པ་མང་པོར་མི་འགྱུར་བ་དེ༷་ཕྱིར༷་ན་རྣམ་པ་སོ་སོ་སྣ་ཚོགས་པ་དེ༷་ཡི༷་མཐུ༷་ཡི༷ས་ནི༷། ཕྱི་རོལ་ན་སྔོ་སེར་སོགས་དོན་སོ་སོ་སྣ་ཚོགས་ཡོད་
པ་ཤེ༷ས་པར་འགྱུར༷་བར༷་གཞ༷ག་པ༷་དེའང་མེ༷ད་པར་འགྱུར་ཏེ། དེ་ལ་རི་མོ་བརྐྱངས་པ་མཐོང་བའི་ཚེ་རི་མོ་དེ་ལ་ཡོད་པའི་སྔོ་སེར་སོགས་སོ་སོའི་རྗེས་སུ་བློ་མ་ཞུགས་ན་བློ་དོན་དང་མི་མཐུན་པར་འགྱུར་ལ། དེ་ལྟར་ན་འདི་ནི་སྔོན་པོའོ། །འདི་ནི་སེར་པོའི་ཞེས་རྣམ་པ་སྣ་ཚོགས་
སུ་གདགས་པའི་རྒྱུའང་རྣམ་པར་གཞག་པ་མེད་དོ། །གཉིས་པ། རྣམ་པ་རྣམས་དང་མ་བྲལ་བས། །རྣམ་ཤེས་གཅིག་པུར་མི་འགྱུར་རོ། །ཞེས་གསུངས་ཏེ། དེ་ལྟར་རྣམ་པ་སྣ་ཚོགས་མེད་པར་ཁས་བླངས་ན་མངོན་སུམ་དང་འགལ་ཞིང་མཐར་ཐ་སྙད་ཐམས་
ཅད་འཇིག་པས་དེ་ནི་ངེས་པར་ཁས་བླང་ངོ་སྙམ་ན། དེ་ལྟར་ན་སྣ་ཚོགས་དུ་མའི་བདག་ཉིད་དང་ལྡན་པའི་རྣམ༷་པ༷་རྣམ༷ས་ད༷ང་མ༷་བྲལ༷་བས༷་རྣམ༷་ཤེས༷་དེའང་གཅི༷ག་པུ་ཉིད་དུ་མི༷་འགྱུར༷་ཏེ་རྣམ་པའི་གྲངས་བཞིན་དུ་དུ་མར་འགྱུར་རོ༷། །གསུམ་པ། དེ་ལྟ་མིན་ན་འདི་གཉིས་ལ། །
གཅིག་ཅེས་ཇི་སྐད་བརྗོད་པར་བྱ། ཞེས་གསུངས་ཏེ། དེ་ལྟར་མདོར་ན་ཤེས་རྣམ་གཅིག་ཏུ་ཁས་བླངས་ནས་ཤེས་པ་གཅིག་དང་རྣམ་པ་དུ་མར་འདོད་ན། ཡང་ན་རྣམ་པ་དུ་མར་འདོད་པ་སྤང་བའམ། ཡང་ན་ཤེས་པ་གཅིག་ཡིན་པར་འདོད་པ་དེ་འདོར་དགོས་པར་རིགས་པ་བཤད་མ་ཐག་
པས་འགྲུབ་ལ། བཤད་མ་ཐག་པ་དེ༷་ལྟ༷་བུར་འགྱུར་དགོས་པ༷་མི༷ན་ན༷་ནི་ཁྱོད་ཀྱིས་ཤེས་རྣམ་འདི༷་གཉི༷ས་ལ་ངོ་བོ་གཅི༷ག་ཡིན་ཞེ༷ས་ཇི༷་སྐ༷ད་བརྗོ༷ད་པར༷་བྱ༷་སྟེ། ཤེས་པ་གཅིག་ཡིན་ལ་རྣམ་པ་དུ་མ་ཡིན་པས་གཅིག་དང་ཐ་དད་འགལ་བའི་ཆོས་སུ་གནས་པ་ངོ་བོ་གཅིག་ཡིན་པ་སྲིད་
13-1-76a


ན་ཁྱོད་ཀྱི་ལུགས་ལ་མི་སྲིད་པ་ཅི་ཞིག་ཡོད་དེ་མོ་གཤམ་གྱི་བུ་སོགས་ཀྱང་སྲིད་པར་ཐལ་ལོ། །གཉིས་པ་སྒོ་ང་ཕྱེད་ཚལ་བའི་ལུགས་དགག་པ་ལ། འདོད་པ་བརྗོད་པ་དང་།  དེ་དགག་པ་གཉིས། དང་པོ། དཀར་པོ་དག་ལ་
སོགས་པ་ལ། །ཤེས་པ་དེ་ནི་རིམ་འབྱུང་སྟེ། །མགྱོགས་པར་འབྱུང་ཕྱིར་བླུན་པོ་དག །ཅིག་ཅར་སྙམ་དུ་ཤེས་པ་ཡིན། །ཞེས་རྣམ་པའང་གཅིག་ལ་ཤེས་པ་གཅིག་ཡིན་པར་སྨྲ་བ་རྣམས་ནི་འདི་ལྟར། ཡུལ་སྔོན་པོ་དང་གྲུབ་བདེ་རྫས་གཅིག་གི་བྱས་མི་རྟག་
སོགས་ཀྱི་རྣམ་པ་སོ་སོར་མི་གཏོད་པར་སྔོ་ཙམ་ཞིག་གི་རྣམ་པ་གཏོད་ཅིང་ཤེས་པའང་སྔོ་ཙམ་ཞིག་གི་རྣམ་ལྡན་དུ་སྐྱེ། ཁྲ་འཛིན་མིག་ཤེས་ལའང་ཡུལ་ཁྲ་བོའི་སྔོ་སེར་སོགས་དུ་མས་རྣམ་པ་དུས་གཅིག་ཏུ་མ་གཏད་པར་ཁྲ་ཙམ་ཞིག་གི་རྣམ་པ་གཏད། ཡུལ་ཅན་ཡང་
ཁྲ་ཙམ་ཞིག་གི་རྣམ་ལྡན་དུ་སྐྱེ་བས་ཤེས་པ་གཅིག་གི་ངོ་བོ་ལ་གཟུང་རྣམ་གཅིག་དང་འཛིན་རྣམ་གཅིག་ཐད་ཀར་གནས་པར་འདོད་པས་སྒོ་ང་ཕྱེད་ཚལ་བ་ཞེས་འདྲ་བ་རྒྱུ་མཚན་དུ་བྱས་པའི་མིང་ངོ་། །འོ་ན་ཕྱེ་མ་ལེབ་ཁྲ་བོ་དང་། རས་གཞིའི་སྟེང་ན་རི་མོ་སྣ་ཚོགས་
བརྐྱངས་པའམ་བཀྲམ་པ་ལ་དུས་ཅིག་ཅར་མིག་ཤེས་ཀྱིས་དམིགས་སུ་རུང་བས་གནོད་དོ་སྙམ་ན། དེ་དག་ན་རེ། སེར་པོ་དང་དཀར༷་པོ༷་ད༷ག་ལ༷་སོག༷ས་པ༷་ལ༷། དེ་དང་དེའི་ཡུལ་ཅན་གྱི་ཤེས༷་པ༷་དེ༷་ནི༷་དུས་ཅིག་ཅར་འཇུག༷་པ་མེ༷ད་ལ་བྱེ་བྲག་སོ་སོ་བ་རེ་རེ་བཀར་ཏེ་རིམ༷་
གྱིས་འབྱུང༷་བ་ཁོ་ན་སྟེ༷། འོན་ཀྱང་ཅིག་ཅར་དམིགས་པ་ལྟར་སྣང་བ་ནི། མེ་ཏོག་ཨུཏྤ་ལའི་འདབ་མ་བརྒྱ་བརྩེགས་པ་ལ་ཁབ་ཀྱི་མདས་བཏབ་པ་ལྟར། ཤེས་པ་ཡུལ་ལ་འཇུག་པ་ཤིན་ཏུ་མགྱོག༷ས་པར༷་འབྱུང༷་བའི་ཕྱིར༷་ན། བྱིས་པ་བླུན༷་པོ༷་དག༷་སྡོ་སེར་སོགས་དུས་
13-1-76b


ཅི༷ག་ཅར༷་དམིགས་སོ་སྙམ༷་དུ༷་ཤེས༷་པ༷་ཡི༷ན་ཏེ། དཔེར་ན་མགལ་མེ་མགྱོགས་པར་བསྐོར་ན་འཁོར་ལོར་སྣང་ཡང་མགལ་མེ་དུམ་བུ་ཆུང་ངུ་ཞིག་ཡིན་པས་ཕྱོགས་ཐམས་ཅད་དུ་རྒྱུན་མ་ཆད་པའི་སྣང་བ་འབྱུང་མི་རིགས་པ་ལ་དེ་ལྟར་འབྱུང་བ་ནི་མགལ་མེའི་སྐད་ཅིག་སྔ་ཕྱིར་དམིགས་
པའི་བློ་རྣམས་བསྔོམས་ཏེ། འཁོར་ལོ་ལྟར་སྣང་བ་བཞིན་ནོ་སྙམ་དུ་ལོག་པར་རློམ་པའོ། །གཉིས་པ་དེ་དགག་པ་ལ། དོན་དགག་པ་དང་། དཔེ་དགག་པ་གཉིས། དང་པོ་ལ། ཡི་གེ་ལ་དམིགས་པའི་བློས་མ་ངེས། ཡིད་རྟོག་འབའ་ཞིག་ཡུལ་ལ་
འཇུག་ཚུལ་གྱིས་མ་ངེས། བློ་ཐམས་ཅད་ཀྱིས་མ་ངེས་པར་བསྟན་པའོ། །དང་པོ། ལྕུགས་མའི་སྒྲ་ལ་སོགས་པའི་བློ། །རབ་ཏུ་མགྱོགས་པར་འབྱུང་ཡིན་ན། །དེ་ཕྱིར་ཅིག་ཅར་འབྱུང་བ་ཡི། །འདིར་ཡང་ཅི་ཕྱིར་འབྱུང་མི་འགྱུར། །ཞེས་དེ་ལྟར་
མགྱོགས་པ་ཙམ་གྱིས་དུས་ཅིག་ཅར་དམིགས་པའི་གསལ་སྣང་ལྟ་བུ་བསྐྱེད་ན། ལྕུག༷ས་མ༷འི་སྒྲ༷་ལ༷་སོག༷ས་པ་འཛིན་པའི༷་བློ༷་ཡང་ར༷བ་ཏུ༷་མགྱོག༷ས་པར༷་འབྱུང༷་བ་ཡི༷ན་ན༷། རབ་ཏུ་མགྱོགས་པ་དེ༷་ཡི་ཕྱིར༷་ན་ཅི༷ག་ཅར༷་འབྱུང༷་བ༷་ཡི༷་བློ་སྐབས་འདི༷ར་ཡ༷ང་ཅི༷་ཡི་ཕྱིར༷་འབྱུང༷་
བར་མི༷་འགྱུར༷་ཏེ་འབྱུང་དགོས་སོ། །དེ་ལ་ཡུལ་སྔོ་སེར་སོགས་ལ་རིམ་གྱིས་མགྱོགས་པར་དམིགས་པ་དེ་བཞིན་ཡུལ་ཡི་གེའི་སྒྲ་ལ་དམིགས་པའང་དེ་དང་འདྲ་དགོས་ན། དེ་ལྟར་ན། ལ་ཏ་ཞེས་པ་ལྕུགས་མའི་མིང་དང་། ཏ་ལ་ཞེས་པ་ཤིང་ཏ་ལའི་མིང་ཡིན་པ་ལ་ཡིག་
འབྲུ་དེ་གཉིས་ལ་བློ་རིམ་གྱིས་ཞུགས་ཀྱང་འཇུག་པ་མགྱོགས་པས་ཅིག་ཅར་ལྟ་བུར་སྣང་ན་ནི། ལ་སྔོན་དུ་བྱས་པ་དང་ཏ་སྔོན་དུ་བྱས་པ་ལ་ཁྱད་མེད་པར་འགྱུར༷་ཏེ། གང་ལྟར་ཡང་དེ་གཉིས་སྔོ་སེར་གྱི་རི་མོ་དུས་མཉམ་དུ་མཐོང་བ་བཞིན་དུ་སྔ་ཕྱི་མེད་པར་སྣང་བས་ན། ལ་ཏ་ལ་
13-1-77a


དམིགས་པའི་བློའང་ཏ་ལ་ལ་ནོར་སྲིད་ལ། ཏ་ལ་ལ་དམིགས་པའི་བློའང་ལྕུགས་མ་ལ་གོ་བས་ཡིག་འབྲུའི་གོ་རིམ་དོན་མེད་ལ། ཡང་ན་ནི་གཉིས་ཀར་ཡང་གོ་བར་མི་རུང་ངོ་། །དེ་བཞིན་དུ་ས་ར་ཞེས་པ་རྒྱ་མཚོའི་མིང་དང་། ར་ས་རོ་བྲོ་བ་སོགས་ཡིག་འབྲུ་གོ་རིམ་བསྣོལ་བའི་ཅིག་ཤོས་
གོ་ནུས་པ་ཐམས་ཅད་རོ་མཉམ་པར་འགྱུར་ཏེ་གང་ལྟར་བརྗོད་ཀྱང་སྔ་ཕྱི་མེད་པ་ལྟར་སྣང་བའི་ཕྱིར་རོ། །དེས་ན་ཡིག་འབྲུ་སིལ་བུ་བ་ལྟ་བུ་ལ་རིམ་ཅན་དུ་དམིགས་པའི་བློ་ལས་ཀྱང་མགྱོགས་པའི་རིམ་ཅན་ཞིག་ནི་འདི་ལྟ་བུའོ་ཞེས་མྱོང་བར་དཀའ་ན། ཉམས་སུ་མ་མྱངས་
བཞིན་རིམ་ཅན་ཡིན་ནོ་ཟེར་བའང་དོན་མེད་ཅིང་། མགྱོགས་པར་འབྱུང་བར་འདྲ་ཡང་ཅིག་ཅར་གྱི་སྣང་བ་མི་བསྐྱེད་ན་དེ་ཉིད་དེའི་རྒྱུ་ཡིན་པར་ཡང་གཞག་མི་རུང་སྟེ། རྒྱུ་ཡིན་ཕན་ཆད་འབྲས་བུ་དེའི་རྗེས་སུ་འགྲོ་ཞིང་ལྡོག་པས་ཁྱབ་པའི་ཕྱིར། གཉིས་པ། ཡིད་ཀྱི་
རྟོག་པ་འབའ་ཞིག་ལའང་། །རིམ་དུ་ཤེས་པར་མི་འགྱུར་རོ། །རིང་དུ་གནས་པ་མ་ཡིན་པས། །བློ་རྣམས་ཀུན་ཀྱང་མགྱོགས་འབྱུང་འདྲ།  །ཞེས་གསུངས་ཏེ། འདི་ལྟར་ཡུལ་གྱི་ངོ་བོ་ལ་སེམས་པ་དང་། དེའི་ཁྱད་པར་ལ་དཔྱོད་པ་དང་། བློ་སྦྱོང་བའི་
ཡིད་ལ་སེམས་པ་སོགས་ཡི༷ད་ཀྱི༷་རྟོག༷་པ༷་རྐྱང་པ་འབ༷འ་ཞིག༷་པ་སྟེ༷། མིག་ཤེས་སོགས་དང་མ་འདྲེས་པ་དག་རྒྱུན་བར་མ་ཆད་དུ་འབྱུང་བ་དེ་དག་ལ༷འ༷ང་སྔ་ཕྱི་གཉིས་ཀ་ཅིག་ཅར་སྣང་བའི་ཤེས་པ་བྱུང་སྟེ།  རི༷མ་ཅན་དུ༷་བྱུང་བར་ཤེས༷་པར༷་མི༷་འགྱུར༷་རོ༷། །དེ་ཅིའི་ཕྱིར་ཞེ་ན། སྐད་
ཅིག་སྐད་ཅིག་གིས་སྐྱེ་འགག་བྱེད་པས་ཡུན་རིང༷་དུ༷་གན༷ས་པ༷་མ༷་ཡི༷ན་པ༷ས། བློ༷་རྣམ༷ས་ཀུ༷ན་ཀྱང༷་མགྱོག༷ས་པར་འབྱུང༷་བ་ལ་འདྲ༷་ཞིང་ཁྱད་མེད་པའི་ཕྱིར་རོ། །ཕ་རོལ་གྱི་ལུགས་ལས་ཀྱང་བློ་ཐམས་ཅད་མྱུར་དུ་འཇིག་པར་ཁས་བླངས་པ་ཡིན་ནོ། །གསུམ་པ། 
13-1-77b


དེ་ཕྱིར་ཡུལ་རྣམས་ཐམས་ཅད་ལ། །རིམ་གྱིས་འཛིན་པར་མི་འགྱུར་གྱི། །རྣམ་པ་དག་ནི་ཐ་དད་ལྟར། །ཅིག་ཅར་འཛིན་པར་སྣང་བར་འགྱུར། །ཞེས་གསུངས་ཏེ། དེ་ལྟར་བློ་ཐམས་ཅད་ཀྱང་མགྱོགས་པར་འབྱུང་བ་ལ་འདྲ་ཞིང་ཁྱད་མེད་པ་དེ༷་ཕྱིར་བློ་ཡི་ཡུལ༷་
རྣམ༷ས་ཐམ༷ས་ཅ༷ད་ལ༷་ཡང་རི༷མ་གྱིས༷་འཛི༷ན་པ་ཡིན་པའི་ཚུལ་ཤེས་པ༷ར་མི༷་འགྱུར༷་གྱི༷། སྔོ་སེར་སོགས་ཀྱི་རྣམ༷་པ༷་དག༷་ནི༷་ཐ༷་ད༷ད་པ་ལ་དུས་ཅིག་ཅར་བཟུང་བར་སྣང་བ་དེ་ལྟར༷། ཅི༷ག་ཅར༷་འཛི༷ན་པར༷་སྣང༷་བར༷་འགྱུར༷་རོ། །དེ་ལ་ཡུལ་རི་མོ་བརྐྱངས་པ་ལ་སྔོ་སེར་སོགས་ལྷན་ཅིག་
ཡོད་དུ་ཟིན་ཀྱང་བློ་རིམ་གྱིས་འཇུག་པ་མ་གཏོགས་ཅིག་ཅར་མི་འཇུག་པས་ཡི་གེ་ལ་དམིགས་པ་སོགས་དང་ཁྱད་མེད་ལ། འཇུག་པའང་ཡི་གེ་སྔ་མའི་བློ་འགགས་ནས་ཕྱི་མ་སྐྱེ་བའི་ཐོག་མཐའ་སྐད་ཅིག་མ་ཡིན་གྱི། དེ་ལས་རིང་དུ་སྡོད་པ་མི་སྲིད་པའི་ཚུལ་དེ་བཞིན་
རིམ་ཅན་གྱི་བློ་སྔ་ཕྱི་མཚམས་སྦྱོར་ལ་དཔྱད་ན་འདིའི་གོ་བ་གཏིང་ཚུགས་པ་སྐྱེའོ། །དེ་ལ་བློ་ངོར་སྔ་ཕྱི་རིམ་ཅན་དུ་སྣང་ཕན་ཆད་དེས་ཅིག་ཅར་སྣང་བ་ཁེགས་ལ། ཅིག་ཅར་སྣང་བ་དེས་སྔ་ཕྱིར་བྱུང་བ་དམིགས་མི་ཤེས་པས་བློ་ངོར་རིམ་ཅན་ལ་ཅིག་ཅར་སྣང་ངོ་ཞེས་
ནམ་ཡང་མངོན་སུམ་གྱིས་གྲུབ་པ་མེད་ལ། དེ་ཤེས་བྱ་གང་ལ་སྦྱར་ཡང་དེའི་ངང་ཚུལ་ལས་འདའ་མི་སྲིད་པས་རྗེས་དཔགས་དང་དཔེ་མི་རྙེད་དོ། །གཉིས་པ་དཔེ་དགག་པ་ལ། རྟགས་འགོད་པ་དང་། དེ་སྒྲུབ་པ་གཉིས། དང་པོ། མགལ་
མེ་ལ་ཡང་ཅིག་ཅར་དུ། །འཁོར་ལོར་སྣང་བའི་འཁྲུལ་པ་འབྱུང་། །གསལ་བར་རབ་ཏུ་སྣང་བའི་ཕྱིར། །མཐོང་བས་མཚམས་སྦྱོར་མ་ཡིན་ནོ། །ཞེས་ཁྱོད་ཀྱི་དཔེ་དེའང་མི་འཐད་དེ། །འདི་ལྟར་མག༷ལ་མེ༷་ལ༷་ཡ༷ང་དུས་ཅིག་ཅར༷་དུ༷་འཁོ༷ར་ལོ༷ར་སྣང༷་
13-1-78a


བའི༷་འཁྲུལ་པ༷་འབྱུང༷་བ་ཡིན་གྱི། འདི་རྟོག་མེད་ཀྱི་ཤེས་པ་ལ་གས༷ལ་བ༷ར་རབ༷་ཏུ་སྣང༷་བ༷འི་ཕྱིར༷་མངོན་སུམ་མཐོང་བ་ཡིན་ལ།  མངོན་སུམ་གྱི་མཐོང་བས་དུས་སྔ་ཕྱི་གཅིག་ཏུ་སྦྲེལ་ཏེ་མཚ༷མས་སྦྱོར༷་སྲིད་པ་མ༷་ཡི༷ན་ནོ༷། །
མགལ་མེ་ཉིད་མྱུར་དུ་བསྐོར་བས་རྗེས་སུ་ཞུགས་པ་ཉིད་ཅིག་ཅར་དུ་གསལ་བར་སྣང་བའི་དངོས་པོ་འཁོར་ལོ་ལ་འཁྲུལ་པ་སྐྱེད་ནུས་ཀྱི་འཁྲུལ་སྣང་ཞིག་ཡིན་གྱི། སྔ་ཕྱིའི་ཡུལ་སྐད་ཅིག་དུ་མ་བློས་མཚམས་སྦྱར་ཏེ་འཁོར་ལོར་འཁྲུལ་བ་ནི་མིན་པར་ཤེས་པར་བྱའོ། །
གཉིས་པ་དེའི་ཁྱབ་པ་སྒྲུབ་པ་ལ། མཐོང་དྲན་ཡུལ་འགལ་བར་བསྟན་པ།  དེས་ན་མཚམས་སྦྱོར་ཡིན་ན་གསལ་སྣང་མི་རིགས་པར་བསྟན་པའོ། །དང་པོ། འདི་ལྟར་མཚམས་རྣམས་སྦྱོར་བ་ནི། །དྲན་པས་བྱེད་པ་ཉིད་ཡིན་གྱི། །
མཐོང་བས་མ་ཡིན་འདས་པ་ཡི། །ཡུལ་ལ་འཛིན་པ་མིན་ཕྱིར་རོ། །ཞེས་ཅི་གསལ་སྣང་དང་མཚམས་སྦྱོར་འགལ་ལམ་ཞེ་ན་འགལ་ཏེ། འདི༷་ལྟར༷་སྔ་ཕྱིའི་མཚ༷མས་རྣམ༷ས་སྦྱོར༷་བ༷་ནི༷་སྔར་འདས་པ་དེ་དྲན་ནས་མཚམས་སྦྱོར་གྱི། མ་དྲན་པ་ལ་
མཚམས་སྦྱོར་མི་ནུས་པ་དེ་ཕྱིར་དྲ༷ན་པ༷ས་མཚམས་སྦྱོར་བར་བྱེ༷ད་པ༷་ཉི༷ད་ཡི༷ན་གྱི། ད་ལྟ་མཐོ༷ང་བས༷་མཚམས་སྦྱོར་བ་མ༷་ཡི༷ན་ཏེ། མཐོང་བ་དེར་ད་ལྟ་བའི་ཡུལ་ལ་འཇུག་གི འད༷ས་པ༷་ཡི༷་ཡུལ༷་ལ༷་འཛི༷ན་པ༷་མིན༷་པའི་ཕྱིར༷་རོ༷། །གཉིས་པ། དེ་ཡི་ཡུལ་
དུ་གང་གྱུར་པ། །དེ་ནི་ཞིག་པས་གསལ་མ་ཡིན། །དེ་ཕྱིར་འཁོར་ལོར་སྣང་བ་འདི། །གསལ་བ་མ་ཡིན་འགྱུར་བའི་རིགས། །ཞེས་མགལ་མེ་ལ་འཁོར་ལོར་སྣང་བ་འདི་ཁྱོད་ཀྱི་ཞེ་འདོད་ལྟར་སྔ་ཕྱིའི་སྐད་ཅིག་དུ་མ་མཚམས་སྦྱར་ནས་གཅིག་ཏུ་སྣང་བ་ཡིན་ན་
13-1-78b


དྲན་པས་མཚམས་སྦྱོར་དགོས་ལ། དྲན་པ་དེ༷་ཡི༷་ཡུལ༷་དུ༷་གང༷་གྱུར༷་པ༷་དེ༷་ནི༷་སྔར་ཞིག༷་ཟིན་པས༷་ན་དྲན་པར་བྱེད་པ་ཙམ་ལས་གས༷ལ་བར་མྱོང་ནུས་པ་མ༷་ཡི༷ན་ཏེ། དེ་ཕྱིར་དྲན་པ་ནི་འདས་པའི་ཡུལ་ཅན་ཁོ་ན་ཡིན་པས་མདུན་ན་འདུག་པའི་དངོས་པོ་ལའང་ཤིན་ཏུ་གསལ་
བར་མི་རྟོག་སྟེ་ད་ལྟ་བའི་ཡུལ་ཅན་མིན་པའི་ཕྱིར་རོ། །རྒྱུ་མཚན་དེ༷་ཕྱིར༷་མཚམས་སྦྱོར་ཡིན་དགོས་ན་ད་ལྟར་གྱི་འཁོར་ལོ༷ར་སྣང༷་བ༷་འདི༷་ཡང་། མི་གསལ་བ་དྲན་པའི་ཡུལ་ཙམ་དུ་འགྱུར་གྱི། མངོན་སུམ་དུ་གས༷ལ་བ༷་འདི་འདྲ་བ་མ༷་ཡི༷ན་པར་འགྱུར༷་བའི༷་རི༷གས་སོ། །
ཨུཏྤ་ལའི་འདབ་མ་བརྒྱ་འབིགས་པར་ཤེས་པ་གང་ཡིན་པ་དེ་ནི་མགལ་མེའི་འཁོར་ལོ་ལ་སོགས་པ་མཐོང་བ་ལྟར་ཅིག་ཅར་གསལ་པོར་སྣང་བ་མ་ཡིན་ཏེ། ཅིག་ཅར་འབིགས་མི་སྲིད་པས་བློ་ལྡན་རྣམས་ཀྱིས་རིམ་ཅན་དུ་ངེས་པར་བྱེད་དེ། དཔེར་ན་ཟངས་མའི་གླེགས་མ་སོགས་
ཕུག་པ་བཞིན་དུ་བླ་འོག་བརྩེགས་པ་མང་པོ་དག་བྱེད་པ་པོ་གཅིག་གིས་འབིགས་ཚེ་ཅིག་ཅར་ཕུག་པ་ལ་ཚད་མས་གནོད་པ་ཡོད་པས་ཨུཏྤལ་འབིགས་པའང་མི་གཅིག་གིས་བྱེད་པ་ལ་རྗེས་སུ་དཔགས་པ་ཡིན་ནོ། །གསུམ་པ་རྣམ་ཤེས་གྲངས་མཉམ་པ་
དགག་པ་ལ། འདོད་པ་བརྗོད། དེ་དགག་པའོ། །དང་པོ། རི་མོ་བརྐྱངས་པ་མཐོང་བའི་ཚེ། །དེ་ལ་དེ་བཞིན་སེམས་མང་པོ། །ཇི་སྟེ་གཅིག་ཆའི་ཚུལ་གྱིས་སུ། །འབྱུང་བར་འགྱུར་བར་འདོད་ན་ཀོ། ཞེས་གསུངས་ཏེ། དེ་ལ་གཟུང་རྣམ་གྱི་
གྲངས་བཞིན་ཤེས་པའང་དུ་མ་ཡོད་པར་འདོད་པའི་ལུགས་ལ། ཡུལ་སྔོན་པོ་དང་གྲུབ་བདེ་རྫས་གཅིག་པའི་བྱས་མི་རྟག་སོགས་ཇི་སྙེད་ཡོད་པ་དེ་སྙེད་ཀྱི་རྣམ་པ་གཏད་ལ་ཤེས་པའང་དེ་སྙེད་ཀྱི་རྣམ་ལྡན་དུ་སྐྱེ། ཡུལ་ཁྲ་བོས་ཀྱང་རང་འཛིན་མིག་ཤེས་ལ་སྔོ་སེར་སོགས་
13-1-79a


ཡུལ་ལ་ཇི་སྙེད་ཡོད་པའི་རྣམ་པ་གཏད་ལ་ཤེས་པའང་དེ་སྙེད་ཀྱི་རྣམ་ལྡན་དུ་སྐྱེ་བར་འདོད་པ་སྟེ། དཔེར་ན་རི༷་མོ༷་བརྐྱང༷ས་པ༷་མཐོ༷ང་བའི༷་ཚེ༷་ཡུལ་དེ༷་ལ༷་སྔོ་སེར་སོགས་ཇི་ཡོད་པ་དེ༷་བཞི༷ན་སེམ༷ས་མ༷ང་པོ༷་ཅི༷་སྟེ༷་ཅིག་ཅར་རམ་གཅི༷ག་ཆ༷འི༷་ཚུལ༷་
གྱིས༷་སུ༷་འབྱུང༷་བར༷་འགྱུར༷་བར༷་འདོ༷ད་ན༷་ཀོ༷་ཞེས་ཕྱོགས་སྔའི་ཚུལ་བརྗོད་པའོ། །དེའང་སྐབས་འདིར་ལེགས་པར་དཔྱད་ན། སྣང་ཡུལ་རྫས་ཀྱི་རྣམ་པ་སོ་སོར་འཆར་རུང་གི་ཆ་ཇི་སྙེད་པའི་གྲངས་བཞིན་ཤེས་པ་སྐྱེ་ཡང་། རྫས་དང་ངོ་བོ་ཐ་དད་དུ་མེད་པའི་ལྡོག་པའི་ཆ་རྣམས་ནི། ཡུལ་
གྱི་ངོ་བོ་སྣང་བ་ཉིད་ཀྱིས་ལྡོག་ཕྱོགས་སུ་སྒྲོ་མ་བཏགས་པའི་ཆ་ནས་དེའི་ཡུལ་ཅན་ལའང་དེའི་རྣམ་པ་ཅན་དུ་ལྡོག་པས་ཕྱེ་བ་ཙམ་ཡིན་ནོ། །དེ་ལ་གཟུང་འཛིན་གྲངས་མཉམ་པའམ།  རྣམ་ཤེས་གྲངས་མཉམ་པ་འདི་དག་ཕལ་ཆེར་ཤེས་པ་དེ་དག་རིགས་མཐུན་
ཡང་། རིགས་མི་མཐུན་པ་བཞིན་དུ་དུ་མ་འབྱུང་བ་ལ་འགལ་བ་མེད་དོ་སྙམ་དུ་སེམས་པ་ཡིན་ཀྱང་རིགས་མཐུན་དུ་མ་ལྷན་ཅིག་འབྱུང་བ་མེད་དེ། འཛིན་རྣམ་དུ་མ་ཡོད་ཀྱང་རིགས་མཐུན་དུ་མ་མེད་ཚུལ་གྱི་རང་ལུགས་སྔར་བཤད་ཟིན་ཏོ། །གཉིས་
པ་དེ་དགག་པ་ལ། བློ་ཐམས་ཅད་དུ་མའི་རྣམ་པ་ཅན་དུ་སྒྲུབ། ཆ་མེད་ཀྱི་གཅིག་བདེན་མི་སྲིད་པར་བསྟན་པ་གཉིས། དང་པོ། དེ་ལྟ་ཡིན་ན་དཀར་ལ་སོགས། །རྣམ་པ་སྣ་གཅིག་ཤེས་པ་ཡང་། །ཐོག་མ་དབུས་མཐའ་ཐ་དད་པས། །དམིགས་
པ་སྣ་ཚོགས་ཉིད་དུ་འགྱུར། །ཞེས་བཤད་མ་ཐག་པའི་ལུགས་དེ༷་ལྟ༷་ཡི༷ན་ན༷འང་ཁྲ་བོའི་གཞི་མཐོང་བ་ལ་སྔོ་སེར་སོགས་རྣམ་པ་མང་བ་དེ་བཞིན་དུ་དེའི་བྱེ་བྲག་ཡུལ་དཀར༷་པོ་ལ༷་སོག༷ས་པ་རྣམ༷་པ༷་སྣ༷་གཅི༷ག་ཤེས༷་པ༷་དེ་ལ་ཡ༷ང་། ཐོག༷་མ༷་སྟེ་སྟེང་དང་དེ་བཞིན་དུ་འོག་དང་
13-1-79b


ཕ་རོལ་ཚུ་རོལ་དང་དབུས༷་དང་མཐ༷འ་ཡི་ཆ་ཐ༷་ད༷ད་པས༷་ན་དམི༷གས་པ༷་སྣ༷་ཚོ༷གས་པ་ཉི༷ད་དུ༷་འགྱུར༷་གྱི། གཅིག་ཅེས་བདེན་པ་ཞིག་མི་སྲིད་དོ། །གཉིས་པ་ལ། དམིགས་བྱ་བེམ་པོ་ལ་བརྟགས་ན་གཅིག་པུར་དམིགས་པ་མེད་ཚུལ་དང་། དམིགས་བྱེད་བློ་
ལ་བརྟགས་ན་དེ་མེད་ཚུལ་གཉིས། དང་པོ། རྡུལ་ཕྲན་བདག་ཉིད་དཀར་ལ་སོགས། །གཅིག་པུའི་བདག་ཉིད་ཆ་མེད་པ། །ཤེས་པ་གང་ལ་སྣང་གྱུར་པར། །བདག་གིས་རབ་ཏུ་ཚོར་བ་མེད། །ཅེས་གསུངས་ཏེ། དེ་ལྟར་རྣམ་པ་གཅིག་ལ་རྣམ་པ་དུ་མར་དབྱེར་ཡོད་ན་གཅིག་
པུར་གྱུར་པ་གང་ཡིན་ཏེ་མི་རིགས་སོ། །གང་ཡན་ལག་དབྱེ་བར་མི་ནུས་པའི་རྡུལ་ཕྲ་རབ་ཙམ་ཡོད་ལ་དེ་ལ་དམིགས་པའི་རྣམ་པ་གཅིག་པུ་ཡིན་ནོ་སྙམ་ན། བདག་གིས་ཇི་ལྟར་ནན་ཏན་དུ་འབད་ནས་བཏུད་དེ་བལྟས་ཀྱང་། རྡུལ༷་ཕྲན༷་
གྱི་བད༷ག་ཉི༷ད་ཅན་གྱི་དཀར༷་པོ་ལ༷་སོག༷ས་པ་གཞན་དང་མ་འདྲེས་པའི་རང་གཅི༷ག་པུའི༷་བད༷ག་ཉི༷ད་ཡིན་པ་དེའང་ཕྱོགས་ཀྱི་ཆ༷་དབྱེ་རྒྱུ་མེ༷ད་པ༷་ཞིག་ནི། ཤེས༷་པ༷་ཡིན་ནོ་ཅོག་ག༷ང་ལ༷་སྣང༷་བར་གྱུར༷་པ༷ར། འདིའོ་ཞེས་བད༷ག་གི༷ས་ར༷བ་ཏུ༷་ཚོར༷་བ༷་མེ༷ད་ཅེས་མདོར་ན། རྡུལ་ཕྲ་
རབ་ཆ་མེད་པ་མངོན་སུམ་ཉམས་སུ་མྱོང་བ་ནི་གང་ན་མི་སྲིད་ཅེས་སོ། །དེ་ལྟར་ན་རྟོག་ལྡན་རྣམས་ཀྱིས་ཡོད་པར་ཁས་ལེན་པའི་རྒྱུ་ཚད་མས་དམིགས་པ་ཡིན་ན་མ་དམིགས་བཞིན་དུ་ཡོད་དོ་ཞེས་ཁས་བླངས་ནས་རང་གིས་རང་ལ་ཇི་ལྟར་བསླུ། དེས་ན་
བཅོས་མ་རས་ཁྲ་བོ་སོགས་དང་བཅོས་མིན་ཕྱེ་མ་ལེབ་ཁྲ་བོ་ལ་སོགས་པ་ཇི་བཞིན་དུ་རྣམ་པ་སྣ་ཚོགས་པའི་ཤེས་པའང་གཅིག་པུར་བདེན་པ་མེད་དོ། །གཉིས་པ། རྣམ་ཤེས་ལྔ་ཡི་ཁམས་རྣམས་ནི། །བསགས་ལ་དམིགས་པའི་རྣམ་པ་ཡིན། །
13-1-80a


སེམས་དང་སེམས་བྱུང་དམིགས་པ་ནི། །དྲུག་པར་བཞག་པ་བྱས་པ་ཡིན། །ཞེས་ཡུལ་ཅན་གྱི་སེམས་ཀྱང་མིག་སོགས་དབང་པོའི་རྣམ༷་པར་ཤེས༷་པ་ལྔ༷་ཡི་ཁ༷མས་རྣམ༷ས་ནི༷་རང་རང་གི་ཡུལ་རྡུལ་ཕྲ་རབ་བསག༷ས་པ་ལ༷་དམིག༷ས་པ༷འི་རྣམ༷་པ༷་ཅན་ཡི༷ན་པས་
རྣམ་པ་དེ་སྙེད་དུ་དུ་མར་འགྱུར་ལ། ཡིད་ཤེས་ཀྱང་དེ་དང་མཐུན་ཏེ་དེ་དང་གྲུབ་བདེ་གཅིག་པའི་ཕྱིར་རོ། །ཆོས་ཁམས་ཀྱང་རྣམ་རིག་མིན་པ་དང་འདུས་མ་བྱས་ནི་ལོགས་སུ་ཡོད་པར་མི་རིགས་པར་བཏགས་པ་ཙམ་ཡིན་པས་རྣམ་བཅད་ཀྱི་སྒོ་ནས་མིང་ལ་དམིགས་པ་ཡིན་ལ། ཚོར་
འདུ་འདུ་བྱེད་ཀྱི་ཕུང་པོ་གསུམ་ཙམ་གྱི་བདག་ཉིད་དེ། དེ་ལ་དམིགས་པའི་ཡིད་ཀྱང་སེམས་བྱུང་འབའ་ཞིག་མི་འཛིན་གྱི། སེམས་སེམས་བྱུང་གི་ཚོགས་ལ་དམིགས་པ་ཡིན་པས་ན། སེམ༷ས་ད༷ང་སེམ༷ས་བྱུང༷་ལྷན་དུ་ཚོགས་པའི་དམི༷གས་པ༷་ནི༷་ཡིད་ཤེས་སམ། རྣམ་ཤེས་
དྲུག༷་པར༷་བཞ༷ག་པ༷འམ། དེའི་དམིགས་སྐལ་དུ་བྱས༷་པ༷་ཡི༷ན་པར་འདོད་དོ། །དེའང་རང་སྡེའི་བཞེད་ཚུལ་ལྟར་བརྗོད་པ་ཡིན་ནོ། །དེ་ལྟར་ན་གཅིག་ལ་དམིགས་པའི་ཤེས་པ་མི་སྲིད་དོ། །གཉིས་པ་ཕྱི་རོལ་པའི་ལུགས་དགག་པ་ལ། རིག་པ་ཅན་
སོགས་ཀྱི་དགག་པ་སྤྱིར་བསྟན། བྱེ་བྲག་སོ་སོའི་འདོད་པ་དགག་པའོ། །དང་པོ། ཕྱི་གཞུང་རྣམས་ལའང་རྣམ་ཤེས་ནི། །གཅིག་ཏུ་སྣང་བར་མི་འགྱུར་ཏེ། །ཡོན་ཏན་ལ་སོགས་ལྡན་པ་ཡི། །རྫས་ལ་སོགས་པར་དམིགས་ཕྱིར་རོ། །ཞེས་གསུངས་ཏེ། གང་དག་བསྟན་པ་
འདི་ལས་ཕྱི་རོལ་ཏུ་གྱུར་པ་གཟེགས་ཟན་དང་སེར་སྐྱ་ལ་སོགས་པའི་རྗེས་སུ་འཇུག་པ་ལ་ཕྱི་རོལ་པའམ་མུ་སྟེགས་ཞེས་བྱ་ཞིང་། སྐྱེ་བོའི་ལོག་པར་རྟོག་པ་ལ་མཐའ་མེད་པའི་ཕྱིར་གྲུབ་མཐའི་ལྟ་ངན་ལའང་བྱེ་བྲག་དེ་ཙམ་སྲིད་མོད་ཀྱི་སྤྱི་རིགས་ནས་རྟག་ཆད་ལས་འདའ་མི་སྲིད་ལ་རྟག་སྨྲ་བའང་
13-1-80b


རྣམ་པ་མང་དུ་ཡོད་པས། ལྟ་བ་སུམ་བརྒྱ་དྲུག་ཅུ། དྲུག་ཅུ་རྩ་གཉིས། སྡེ་ཚན་བཅུ་གཅིག་སོགས་དབྱེ་སྒོ་མང་ཡང་། ཕྱོགས་བསྡུས་པས་ཏརྐ་སྡེ་ལྔ་ལ་བསྡུར་རུང་བ་ཡིན་ལ། སྤྱིར་མུ་སྟེགས་ཞེས་པ་སྒྲ་བཤད་པའི་དབང་དུ་བྱས་ཏེ་ཕྱི་ནང་གཉིས་ཀའི་དངོས་སྨྲ་
བ་རྣམས་ལའང་འཇུག་པ་དང་།  ཕལ་ཆེར་ཕྱི་རོལ་པའམ་མུ་སྟེགས་སྤྱི་ལ་གྲགས་ཤིང་། སྒྲ་འདོམ་པ་སོགས་ཀྱི་ཚེ་རྟག་སྨྲ་བ་ལ་བྱེ་བྲག་ཏུ་གོ་བ་དང་། རྒྱང་འཕེན་ཡང་དེ་བཞིན་ཕྱི་རོལ་པ་སྤྱི་དང་། བྱེ་བྲག་ཆད་སྨྲ་པ་ལ་སྒེར་དུ་འཇུག་པ་སོགས་ཡོད་པ་དེ་བཞིན་གྲངས་
ཅན་པ་སོགས་སོ་སོའི་མིང་ཡང་སྤྱི་དང་བྱེ་བྲག་གི་འཇུག་ཚུལ་གྱི་དབང་དུ་བྱས་ཏེ་གཞུང་སོ་སོ་ན་ལ་ལར་གཅིག་ལྟ་བུ་དང་ལ་ལར་མི་གཅིག་པ་ལྟ་བུ་མང་པོ་ཡོད་པ་རྣམས་སྤྱིར་འདྲ་བ་ལས་བྱེ་བྲག་ཏུ་འདོད་ཚུལ་ཕྲ་མོའི་དབྱེ་སྒོ་ཡིན་པ་སོགས་དང་། སྒྲ་བཤད་འཇུག་གི་རྒྱུ་མཚན་ལ་
བརྟེན་པ་སོགས་ཤེས་པར་བྱས་ཏེ་སྐབས་ཐོབ་ཀྱི་གོ་བ་ལེན་པ་ཞིག་མ་བྱུང་བར་མིང་གཅིག་ལ་འཐོམས་ན་གཞུང་འཆད་པ་འཁྲུགས་ནས་ཅིར་ཡང་ངོས་མི་ཟིན་པར་འགྱུར་བས་ཤན་ཕྱེད་པར་བྱ་དགོས་སོ། །དེ་ལ་གཟེགས་ཟན་སྟོན་པར་འཛིན་པའི་ལུགས། བྱེ་བྲག་པའམ་
འུག་ཕྲུག་པ་དང་རིག་པ་ཅན་པ་ཞེས་སོགས་སུ་གྲགས་པ་རྣམས་ནི་ཚིག་གི་དོན་དྲུག་ཏུ་འདོད་དེ། ས་ལ་སོགས་པའི་རྫས་དགུ་དང་།  གཟུགས་ལ་སོགས་པའི་ཡོན་ཏན་ཉེར་བཞི། བརྐྱངས་བསྐུམ་སོགས་ཀྱི་ལས་ལྔ། དེ་གསུམ་ལ་ཡོད་པའི་ཁྱབ་བྱེད་སྤྱི་ཆེན་པོ་
དང་ཆུང་ངུ་། སྤྱི་དེའི་བྱེ་བྲག་གམ་ནང་གསེས་ཀྱི་དབྱེ་བ་གསལ་བ། ཐ་དད་པའི་འདུ་བ་མགོ་ལ་རྭ་ལྟ་བུ་དང་། ཐ་མི་དད་དུ་འདུ་བ་དུང་ལ་དཀར་ཟླུམ་ལྟ་བུ་སྟེ། དེ་ལྟར་ཚིག་གི་དོན་དྲུག་གིས་ཐམས་ཅད་བསྡུས་པར་འདོད་པ་སྟེ། དེའང་གཟེགས་ཟན་པས་དཀའ་ཐུབ་ཀྱི་སྒོ་
13-1-81a


ནས་དབང་ཕྱུག་བསྒྲུབས་པས་རྟེན་རྡོའི་ཕོ་མཚན་གྱི་སྟེང་དུ་འུག་པ་བབས་པ་ལ་དབང་ཕྱུག་ཏུ་བཟུང་ནས་དེ་ལ་རྫས་ཡོད་དམ་ཞེས་སོགས་དྲུག་པོ་དྲིས་པ་ལ་མགོ་གུག་རེ་བྱས་མཐར་འཕུར་བས དྲུག་པོ་དེ་ཁོ་ནའོ་སྙམ་པའོ། །འདི་དག་དབང་ཕྱུག་
ལྷར་འཛིན་ཅིང་དབང་ཕྱུག་དེ་རྟག་པ་སོགས་ཡོན་ཏན་ལྔའམ། ཕྲ་ཡང་སོགས་ཡོན་ཏན་བརྒྱད་དང་ལྡན་པ་གཞན་འཕྲུལ་ན་གནས་པར་འདོད། ཚིག་གི་དོན་དྲུག་ཤེས་ནས་བསྒོམས་ན་ཐར་བར་འདོད་ཅིང་། ཐར་ཚེ་བདག་དེ་ཡོད་མེད་སོགས་ཐམས་ཅད་བྲལ་བར་འདོད། 
གཞུང་ཞི་བའི་རྒྱུད་ལ་སོགས་པ་ལ་བརྟེན་ཏེ་བདག་བེམ་པོ་ཡིན་ཅིང་རྟག་པར་འདོད་པའོ། །དེའང་རྫས་དགུ་སྟེ། བདག་དང་དུས་དང་ཕྱོགས་དང་ནམ་མཁའ་དང་རྡུལ་ཕྲ་རབ་སྟེ་རྟག་པའི་རྫས་ལྔ། ས་ཆུ་མེ་རླུང་སྟེ་མི་རྟག་པའི་རྫས་བཞིའོ། །ཡོན་ཏན་ཉེར་བཞི་
ནི། གཅིག་ལ་སོགས་པའི་གྲངས་དང་། རིང་ཐུང་སོགས་བོང་ཚད་དང་། ཕན་ཚུན་འཕྲད་པ་དང་། སོ་སོར་དབྱེ་བ་དང་། ཐ་དད་པ་གཞན་དང་། ཐ་མི་དད་པ་གཞན་མིན་པ་སྟེ་དྲུག་ནི་ཐུན་མོང་སྤྱིའི་ཡོན་ཏན་དང་། སྒྲ་ནམ་མཁའི་ཡོན་ཏན་
རེག་བྱ་རླུང་གི་ཡོན་ཏན། གཟུགས་མེའི་ཡོན་ཏན། རོ་ཆུའི་ཡོན་ཏན། དྲི་སའི་ཡོན་ཏན་ཏེ་ཡུལ་ཡོན་ཏན་ལྔ་ནི་འབྱུང་བ་སོ་སོའི་ཡོན་ཏན་ཡིན་ལ། དེ་ཕྱིར་སྒྲ་ནི་ནམ་མཁའི་ཁྲོད་ན་རྟག་ཏུ་གནས་ཀྱང་རླུང་རློན་པས་གཡོགས་ནས་མ་ཐོས་པ་ཡིན་
ལ། སྐྱེས་བུས་ཨོཾ་ལྟ་བུ་བརྗོད་ཚེ་ཁོག་པ་ནང་སྟོང་པའི་ཆའི་རླུང་དེ་བསལ་ནས་ཐོས་ཤིང་སླར་རླུང་ཤུལ་དུ་ཞུགས་ནས་རྟག་ཏུ་མི་ཐོས་པར་འདོད། བདག་ལ་གནས་པའི་ཡོན་ཏན་བཅུ་གསུམ་སྟེ། མིག་གི་བློ་སོགས་དབང་བློ་ལྔ། བདེ་བ་སྡུག་བསྔལ། 
13-1-81b


འདོད་པ་སྡང་བ།  ཆོས་དང་ཆོས་མིན། འབད་རྩོལ་དང་། འདུ་བྱེད་པའི་ཤུགས་ཏེ་བདག་གི་ཡོན་ཏན་དེ་དག་དམིགས་པའི་སྒོ་ནས་བདག་ཡོད་པར་སྒྲུབ། ལས་ནི་དངོས་པོ་གང་ཡང་རུང་སྟེ། ཕར་བརྐྱངས་པ་དང་། ཚུར་བསྐུམ་པ་དང་། གྱེན་དུ་འདེགས་པ་
དང་། གནས་གཞན་དུ་འཇོག་པ་དང་། གནས་གཅིག་ལས་བརྒལ་ཏེ་འགྲོ་བ་དང་ལྔའོ། །ཡོན་ཏན་དང་ལས་དེ་དག་གི་རྟེན་ནི་རྫས་ཡིན་ལ། དེ་དག་ལ་ཁྱབ་བྱེད་སྤྱི་སྟེ་བྱེ་བྲག་རིགས་མཐུན་ལ་སྒྲ་བློ་མཐུན་པར་འཇུག་པའི་གཞིར་གྱུར་པ་དང་། ཁྱབ་བྱ་སོ་
སོར་འབྱེད་པའི་བྱེད་ལས་ཅན་གྱི་བྱེ་བྲག་དང་། ཕན་ཚུན་འབྲེལ་བར་བྱེད་པའི་འདུ་བའོ། །དེ་ལྟར་ན་བདེ་སོགས་ནང་གི་བདག་ལ་གནས་པའི་བེམ་པོར་འདོད། གྲངས་ཅན་པས་ཕྱིའི་སྣམ་བུ་སོགས་ཀྱི་སྟེང་ན་དེའི་རང་བཞིན་བདེ་སོགས་གནས་པས་ན་ཕྱིའི་བེམ་
པོར་འདོད་ཀྱང་། བདེ་སོགས་དེ་དག་མྱོང་བའི་ཚེ་བདག་གིས་མྱངས་སྙམ་པའང་ཤེས་པ་དང་འདྲེས་ནས་ཆ་མི་ཕྱེད་པའི་ཚུལ་གྱིས་མྱོང་བར་འདོད། དེའང་བདག་ལ་ཤེས་པ་མེད་ཀྱང་བདག་ཡོན་ཏན་ཤེས་པ་དང་འབྲེལ་བའི་སྟོབས་ཀྱིས་བདག་གིས་ཤེས་སོ་སྙམ་དུ་རྟོག་ལ། 
མུ་སྟེགས་པ་འདི་པའི་ལུགས་ཀྱི་བེམ་པོ་ཞེས་པ་འདི་རྡུལ་གྲུབ་ཀྱི་བེམ་པོ་ལ་མཐའ་གཅིག་ཏུ་མི་གོ་བར། ཤེས་པ་མིན་ཚད་ལ་སྤྱི་ཁྱབ་ཏུ་གོ་དགོས་པས་ན། བྱེ་བྲག་པའི་འདོད་པའི་བདག་དེ་ནི་ནམ་མཁའ་དང་ཕྱོགས་ལ་སོགས་པ་བཞིན་དུ་ཁྱབ་ཅིང་ངོ་བོ་ཤེས་པའི་རང་
བཞིན་མ་ཡིན་པ་ཞིག་ལ་འདོད་དོ། །དེ་ལ་སོགས་པ་བསྟན་པ་འདི་ལས་ཕྱི༷་རོལ་ཏུ་གྱུར་པའི་གཞུང༷་རྣམ༷ས་ལ༷འང་རྣམ༷་ཤེས༷་ནི༷་གཅི༷ག་པུ་ཉིད་དུ༷་སྣང༷་བ༷ར་མི༷་རུང༷་སྟེ༷། རྒྱུ་མཚན་གང་གིས་ན་ཕྱི་རོལ་པ་དེ་དག་ཀྱང་ཡོན༷་ཏན༷་དང་ལས་དང་ཡན་ལག་ལ༷་སོག༷ས་པ་ལྡ༷ན་པ་ཡི། །
13-1-82a


རྫས༷་དང་རྣམ་འགྱུར་དང་ལུས་ལ༷་སོག༷ས་པ༷་དམིག༷ས་པར་འདོད་པའི་ཕྱིར༷་རོ༷། །ཞེས་ཕྱི་གཞུང་རྣམས་ན་གང་ལ་དམིགས་པའི་ཡུལ་རྫས་ལ་སོགས་པ་གང་ཡིན་པ་དེའང་ཡོན་ཏན་ལ་སོགས་པའི་ཁྱད་པར་དུ་མ་ཅན་ཡིན་གྱི། ཁྱད་པར་དབྱེ་
བ་མེད་པའི་གཅིག་པུ་བ་ཞིག་སྣང་མི་ཤེས་པའི་ཕྱིར་ན་ཤེས་པ་གཅིག་པུ་ཞིག་སྲིད་པ་མིན་ནོ། །ཞེས་སོ། །གཉིས་པ་བྱེ་བྲག་ཏུ་དགག་པ་ལ། རྒྱལ་བ་དང་རྒྱལ་དཔོགས་པའི་ལུགས་དགག་པ། རྒྱང་འཕེན་པའི། གྲངས་ཅན་པའི། གསང་བ་པའི་ལུགས་དགག་པ་བཞི། དང་པོ། 
ནོར་བུ་གཟི་ཡི་བདག་ཉིད་ལྟར། དངོས་པོ་ཀུན་ཅེས་ལྟ་བ་ལ། །དེ་ལ་འཛིན་པའི་སེམས་ཀྱང་ནི། །གཅིག་པུའི་ངོ་བོར་སྣང་མི་རིགས། །ཞེས་གསུངས་ཏེ། དེ་ལ་བྲམ་ཟེ་རྒྱལ་བ་སྟོན་པར་འཛིན་པས་ན་རྒྱལ་བ་པ་ཞེས་བྱ་ཞིང་། གཞུང་རྒྱལ་བྱེད་སོགས་
ལ་ཚད་མར་འདོད་པ་དེ་དག་ལ། ཟད་བྱེད་པ། གཅེར་བུ་པ། ཚངས་པ་པ། ཀུན་ཏུ་རྒྱུ་སོགས་མིང་དུ་མ་ཡོད་ལ། དེ་དག་ཚངས་པ་ལྷར་འཛིན་ཅིང བདག་འཆིང་གྲོལ་གྱི་རྒྱུ་ལས་ཁོ་ན་ཡིན་པས་དེ་ཟད་པ་ན་ཐར་པར་འདོད། གཞུང་ཚིག་གི་དོན་བདུན་གྱིས་ཐམས་ཅད་
བསྡུས་པར་འདོད་དེ། དཀའ་ཐུབ་སྡོམ་པ་ཉོན་མོངས་བཅིང་བ་གྲོལ་བ་སྲོག་སྲོག་མིན་ནོ། །དེ་ལ་དཀའ་ཐུབ་ནི་གཅེར་བུར་རྒྱུ་བ་ཟས་མི་ཟ་བ་མེ་ལྔ་བརྟེན་པ་ཕྱུགས་ཀྱི་བརྟུལ་ཞུགས་ལ་སོགས་པའོ། །སྡོམ་པ་ནི་ཟག་པ་འགོག་པ་དང་ལས་གསར་དུ་མི་གསོག་པའི་
ཕྱིར་དགེ་བཅུ་སྤྱོད་པ་སྟེ། རྐང་འོག་ཏུ་སྲོག་ཆགས་ཤི་བའི་སྡིག་གིས་དོགས་ནས་རྐང་པར་དྲིལ་གཡེར་འདོགས་ཤིང་ཤིང་ཡང་མི་གཅོད། ལུང་སྟོང་དུ་ཆུ་ཡང་སྟེར་མཁན་གཞན་མ་བྱུང་ན་མི་འཐུང་།  བརྫུན་ལ་སྐྲག་པས་མི་སྨྲ་བའི་བརྟུལ་ཞུགས་འཛིན་པ་སོགས་སོ། །
13-1-82b


ཉོན་མོངས་ནི་དུག་གསུམ་ལ་སོགས་པའོ། །དེ་དག་སྡོམ་པའི་མི་མཐུན་ཕྱོགས་སོ། །བཅིང་བ་ནི་ལས་མ་ཟད་པས་བདག་འཁོར་བ་ན་གནས་པའི་ཐ་སྙད་དོ། །གྲོལ་བ་ནི་ལས་ཟད་ནས་ཐར་ཏེ་འཇིག་རྟེན་ཐམས་ཅད་ཀྱི་སྟེང་ན་གདུགས་བཀན་པའི་དབྱིབས་འདྲ་བ་
ཟླུམ་ཞིང་མདོག་བ་ཞོ་དང་ཁ་བ་རྒྱ་སྤོས་ཀྱི་མེ་ཏོག་སོགས་དང་འདྲ་བར་དཀར་བའི་གཟུགས་ཅན་ཞིག་ཏུ་འགྱུར་བར་འདོད། སྲོག་ནི་སེམས་ཡོད་པ་ལ་འདོད་དེ། དེ་ལ་འབྱུང་བ་བཞི་ནི་སེམས་དང་དེ་སྟེང་ལུས་དབང་གཅིག་པུ་ལྡན། ཆུ་ཤིང་ལ་རྣ་དབང་ཡོད་དེ་འབྲུག་སྒྲ་
ཐོས་ན་སྐྱེ་བ་སོགས་དབང་པོ་སོ་སོ་ཡོད་པའི་ཤིང་འདོད་ལ། དེ་བཞིན་དུ་སྲིན་བུ་དུང་ཉ་ཕྱིས་སོགས་ལ་ལུས་ལྕེ་གཉིས་ཡོད། མེ་ཁྱེར་གྲོག་མ་སོགས་ལུས་ལྕེ་སྣ་གསུམ་སྟེ་དབང་པོ་གསུམ་དང་ལྡན། བུང་བ་སྦྲང་བུ་མཆུ་རིང་སོགས་མིག་ལས་དབང་པོ་གཞན་བཞི་ཚང་།
མི་རྟ་སོགས་ལ་མིག་ཀྱང་ཚང་བས་དབང་པོ་ལྔ་ལྡན་ནོ་ཞེས་འདོད། སྲོག་མིན་ནི་སེམས་མེད་པ་སྒྲ་དྲི་རོ་འོད་ནམ་མཁའ་གྲིབ་མ་འཇའ་གཟུགས་བརྙན་ལ་སོགས་པའོ། །གཞན་ཡང་ཚིག་གི་དོན་དགུར་བཤད་པ་ཡོད་དེ། སྲོག་ཟག་པ་སྡོམ་པ་ངེས་པར་རྒས་པ་འཆིང་
བ་ལས་སྡིག་པ་བསོད་ནམས་ཐར་པ་དང་དགུ་ལ་བཤད་ཀྱང་། ངེས་པར་རྒས་པ་ལུས་གདུང་བའི་དཀའ་ཐུབ་ཡིན་པས་དཀའ་ཐུབ་ཀྱི་ནང་དུ་འདུ་ལ། ལས་ལ་མྱོང་འགྱུར་གྱི་ལས་དང་མིང་རུས་ཚེ་དང་བཞིར་བཤད་ཀྱང་ཕལ་ཆེར་འཆིང་བ་དང་དོན་གཅིག་ལ། ཟག་པ་
དང་ཉོན་མོངས་དོན་གཅིག །བསོད་ནམས་དང་སྡོམ་པའང་འདྲ་ཞིང་། སྡིག་པ་ནི་ཟག་པ་དང་འཆིང་བར་བསྡུ་རུང་བས་དོན་སྔ་མ་བདུན་དང་གཅིག་གོ། འདི་དག་གིས་ཤེས་བྱ་སྤྱིའི་གནས་ལུགས་ཡུལ་དུས་གྲངས་ཀྱི་དུ་མ་རང་བཞིན་གཅིག་པ་ཞེས་འདོད་དོ། །
13-1-83a


གཉིས་པ་རྒྱལ་དཔོགས་པ་ཞེས་པ། བྲམ་ཟེ་རྒྱལ་དཔོགས་པ་སྟོན་པར་འཛིན་ཅིང་ཁྱབ་འཇུག་ལྷར་འདོད་པ། གཞུང་རྟོག་པ་ལ་ཕན་པའི་ཡལ་ག་ལོ་མ་ཅན་གྱི་གསང་ཚིག་ལ་སོགས་པའི་རྗེས་སུ་འབྲང་བ་ལ་སྤྱོད་པ་པ། རིག་བྱེད་པ།
ཁྱབ་འཇུག་པ་སོགས་སུ་གྲགས་ལ། བརྡ་སྤྲོད་པ་དག་ཀྱང་འདིའི་བྱེ་བྲག་གོ། དེ་ལ་རིག་བྱེད་པ་དེ་དག་གི་འདོད་པ་མང་ཡང་བསྡུ་ན། འབྲས་བུ་དོན་དུ་གཉེར་བྱ་ནི་རིག་བྱེད་ལས་གྲགས་པའི་སྐྱེས་བུ་དེ་མཐོང་ཞིང་རྟོགས་ན་འཆི་བ་མེད་པའི་གནས་ཐོབ་པར་འདོད་དེ། དེའང་
སའི་དཀྱིལ་འཁོར་ལས་ཤིན་ཏུ་འདས་པའི་མུན་པའི་དཀྱིལ་འཁོར་ན་གནས་པ་ཉི་མའི་འོད་ལྟ་བུ་དང་ལྡན་པ། ཁ་དོག་དཀར་སྔོ་དམར་པོ་བ་བླ་ཡུང་བ་ཕུག་རོན་བཙོད་དང་ཀ་པི་ཛ་ལའི་ཁ་དོག་འཛིན་པ་ཞིག་ཏུ་ཡོད་ལ། དེའི་མིང་གི་རྣམ་གྲངས་ཀྱང་། ཚངས་པ་དང་།
བདག་དང་། དབང་ཕྱུག་དང་། ཀུན་ལ་ཁྱབ་པ་དང་། རྟག་པ་ཞེས་ཀྱང་བྱའོ། །ཞེས་ཟེར་ཞིང་། གཞན་ཡང་ཚངས་དབང་ཁྱབ་འཇུག་ལ་སོགས་སོ་སོར་རྩལ་དུ་བཏོན་ཏེ། བྱེད་པ་པོར་བརློམས་ཤིང་ལམ་ཡང་མཆོད་སྦྱིན་ཞི་དྲག་དང་རླུང་དང་བསམ་གཏན་སོགས་མང་དུ་
ཡོད་དོ། །འདོད་པ་གཙོ་ཆེ་བ་བརྗོད་ན་དམ་བཅའ་བཅུ་ལས་རྣམ་གྲོལ་བསྒྲུབ་པར་འདོད་དེ། ཉ་ལ་སོགས་པའི་འཇུག་པ་བཅུ་ལྡན་གྱི་ཁྱབ་འཇུག་ལྷར་ཁས་ལེན་པ། དེ་བཞིན་སྐྱེས་བུས་མ་བྱས་པའི་རིག་བྱེད་ཚད་མ། གངྒཱའི་ཁྲུས་ཀྱིས་སྡིག་པ་འདག་པ། 
བུད་མེད་ལ་བུ་ཡོད་ན་མཐོ་རིས་སུ་སྐྱེ་བར་འདོད་པས་བུ་བསྐྱེད་དགོས་པ། གཡུལ་དུ་ཞུགས་ན་བསོད་ནམས་ཆེ་ལ་གཡུལ་དུ་ཤི་ན་མཐོ་རིས་སུ་སྐྱེ་བས་གཡུལ་ལ་རྩིས་སུ་བྱེད་པ་གཡུལ་བསྲུངས་པས་དག་པ། སྲོག་སྲུང་བ་དཔེར་ན་མུ་གེས་ཤི་ལ་ཐུག་པ་ན་བརྐུས་ན་
13-1-83b


དེས་དག་པ་དང་ཕན་པར་འགྱུར་ཏེ་སྲོག་གལ་ཆེ་བ་དེ་བསྲུངས་པས་སོ་ཟེར་བ་དང་། དངོས་མེད་རྒྱུ་མེད་དུ་བྱུང་བར་འདོད་པ།  བྲམ་ཟེ་དང་རིག་བྱེད་དང་བླ་མ་ལ་གནོད་པ་བསད་ན་དག་པར་འདོད་པ་ཆོས་བསྲུངས་པས་དག་པ། ཀུ་རུའི་ཡུལ་སོགས་སུ་སྐྱེས་པའམ་ཐ་ན་དེའི་རྡུལ་
གྱིས་རེག་ཀྱང་མཐོ་རིས་སུ་སྐྱེ་བ། ཤེས་པས་རང་མི་རིག་པ་དང་བཅུའོ། །དེའང་མུ་སྟེགས་པ་དེ་དག་རང་རང་གི་གཞུང་ལ་འཆེལ་ནས་ལྟར་སྣང་བའི་གཏན་ཚིགས་ཀྱིས་བསྒྲུབས་ཤིང་། ཕལ་ཆེར་བྲམ་ཟེ་གདུག་པའི་གསང་ཚིག་ལ་བརྟེན་པའི་ཕྱོགས་རྣམས་ལ་འགལ་བ་
བསྟན་ཡང་ཕ་རོལ་མངོན་སུམ་མཐོང་བའི་དྲང་སྲོང་རྣམས་ཀྱི་ཚིག་ལ་རྗེས་དཔག་གིས་མི་གནོད་ཅེས་ཤིན་ཏུ་བླུན་པའི་རང་མཚང་སྟོན་ཅིང་། ནང་གསེས་ཀྱི་འདོད་ཚུལ་ཕྲ་མོ་ཤིན་ཏུ་མང་པོ་ཡོད། ཕྱི་རོལ་པ་འདི་དག་གི་ལུགས་དེ་ལ་སྒྲོ་འདོགས་པའི་རྒྱུ་མཚན། དེ་ལ་བརྟེན་
ནས་གྲུབ་མཐའི་ཞེ་འདོད། དེ་མི་འཐད་པའི་ཚུལ་རྣམས་ཞིབ་པར་བཤད་ན་བློ་སྐྱེད་ལ་ཕན་སྲིད་ཅིང་། གྲངས་ཅན་ལ་སོགས་ཀྱི་ཞེ་འདོད་གསལ་པོར་ཕྱེ་ནུས་ནའང་འདིར་ཡི་གེ་མང་པོར་འགྱུར་བས་བཞག་ལ། གྲུབ་མཐའི་འདོད་པ་ཕྱོགས་ཙམ་མ་སྨྲས་ན་ཕྱོགས་སྔ་གང་ལ་
མཛུབ་མོ་འཛུགས་སྟོར་གྱིས་དོགས་ནས། ཏརྐ་སྡེ་ལྔ་གསང་བ་པ་དང་བཅས་པའི་ཚུལ་མཚོན་ཙམ་སོ་སོའི་ཐད་དུ་འདྲི་བ་ཡིན་ནོ། །དེ་ལ་སྐབས་འདིར་ཤེས་པ་ཡུལ་ལ་འཇུག་ཚུལ་ཙམ་གྱི་སྟེང་ནས་དགག་པ་གཙོར་མཛད་པས་རྒྱལ་བ་པ་དང་རྒྱལ་དཔོགས་པའི་ལུགས་དེ་གཉིས་
མཐུན་པར་འདི་ལྟར་དཔེར་ན། ཁ་དོག་སྣ་ཚོགས་པ་ཅན་གྱི་ནོ༷ར་བུ༷་གཟི༷་ཡི༷་བད༷ག་ཉི༷ད་ཇི་ལྟར༷་དུ། ཡུལ་དངོས་པོ་མི་གཅིག་པ་རྣམ་པ་སྣ་ཚོགས་པ་ཀུན་ཀྱང་ངོ་བོ་གཅིག་ཡིན་ནོ་ཞེས༷་གཅིག་ཏུ་བསྡོམས་ནས་ཞེན་ཅིང་ལྟ༷་བ༷་དེ་དག་གི་ལུགས་ལ༷་ཡང་ཡུལ་དངོས་པོ་སྣ་ཚོགས་
13-1-84a


པ་དེ༷་ལ༷་འཛི༷ན་པའི༷་སེམ༷ས་དེ་དག་ཀྱང༷་ནི༷། གཅི༷ག་པུའི༷་ངོ༷་བོ༷ར་སྣང༷་མི༷་རི༷གས་ཏེ། ཡུལ་སྣ་ཚོགས་ལ་སྣ་ཚོགས་སུ་མ་བཟུང་ན་ཤེས་པ་ཡུལ་དང་མཐུན་པར་ཇི་ལྟར་འགྱུར། མ་མཐུན་ན་དེས་དེ་ཤེས་པར་ཡང་གཞག་ཏུ་མི་རུང་བའི་ཕྱིར་རོ། །
དེ་ལ་དེ་དག་གི་འདོད་ཚུལ་ནི་ཤེས་བྱ་ཐམས་ཅད་རང་བཞིན་རིལ་པོ་གཅིག་ཡིན་པར་ལྟ་བ་སྟེ་ནོར་བུ་དང་། ཁྲ་བོ་ཙམ་བཞིན་ནོ་ཞེས་འཛེར་ཏོ། །འོ་ན་ཐམས་ཅད་ཀྱིས་རྟོགས་པ་འདྲ་བར་འགྱུར་ཏེ་དམིགས་པ་གཅིག་ཡིན་པས་སོ་ཟེར་ན་མི་འགྱུར་ཏེ། དེ་ལ་སྒྲ་ཡིས་བརྗོད་
ཚུལ་དང་ཡིད་ཀྱིས་འཇུག་ཚུལ་གཉིས་ལས། དང་པོ། དུ་མའི་ངོ་བོ་ཅན་གྱི་དངོས་པོ་གཅིག་པུ་དེ་ལ་གཅིག་ཉིད་དུ་མར་བརྗོད་པར་འདོད་པས་སྔོ་སེར་ལ་སོགས་པ་སོ་སོའི་ངོ་བོ་དེ་དང་དེར་འདོད་པའམ་བཞག་པ་ཡིན་ཏེ། མང་པོའམ་ཐམས་ཅད་ལྟ་བུ་ཅིག་ཅར་བརྗོད་པའམ། 
གཟུགས་སྒྲ་ཞེས་པ་སོགས་དངོས་པོ་དེ་རིམ་གྱིས་བརྗོད་ཚུལ་གཉིས་ལས་ཚིག་གིས་བརྗོད་པར་བྱ་བའི་ཚུལ་གཞན་ནི་མེད་དོ། །དེས་ན་བརྗོད་འདོད་ཀྱི་དངོས་པོའི་བྱེ་བྲག་རེ་རེ་རིམ་གྱིས་བརྗོད་ཀྱང་རུང་། ཅིག་ཅར་ཁོ་རང་བརྗོད་ཀྱང་རུང་སྟེ་དོན་དུ་དངོས་པོའི་རང་བཞིན་གཅིག་པུ་
དེ་ལས་མ་འདས་སོ། །དེ་བཞིན་བློས་འཛིན་ཚུལ་ཡང་། དཔེར་ན་ཡུལ་ཁྲ་བོ་གཅིག་གི་ངོ་བོ་ཡིན་པ་ལ་འདྲ་ཡང་དེའི་ཁ་དོག་ལ་རང་རང་གིས་ཇི་ལྟར་འདོད་པ་བཞིན་དུ་དེའི་བྱེ་བྲག་རེ་རེ་བ་སྔོ་སེར་སོགས་བཀར་ཏེ་འཛིན་པ་དེ་ལྟར་དངོས་པོ་དེའང་གཅིག་མིན་པར་སྣ་ཚོགས་
པའི་རང་བཞིན་ཅན་ཡིན་པས་བློས་དེ་ལ་ཐ་དད་མིན་པར་གཅིག་ཏུ་འཛིན་པ་དང་། ཐ་དད་དུ་ཕྱེ་སྟེ་འཛིན་པའི་ཚུལ་གཉིས་བྱུང་བ་ཡིན་ཞེས་གཅེར་བུ་པ་སོགས་སྨྲ་བར་བྱེད་དེ། རང་འགྲེལ་ན་ཕྱོགས་སྔས་བརྗོད་པའི་ཤྭ་ལོ་ཀ་གཉིས་བཀོད་འདུག་པའང་དེ་ཡིན་ནོ། །
13-1-84b


དེ་ལ་དེ་དག་གི་ཞེ་འདོད་ལ་ཁྲ་བོ་ཞེས་རང་བཞིན་གཅིག་ཡིན་ལ། ཁྲ་བོ་དེ་ལ་ཁ་དོག་སྣ་ཚོགས་མེད་ན་ཁྲ་བོར་མི་རུང་བས་ཁ་དོག་སྣ་ཚོགས་པ་ཅན་གྱི་ཁྲ་བོ་གཅིག་ཅེས་འཇོག་པ་དེ་བཞིན་ཆོས་སྣ་ཚོགས་པ་ཅན་གྱི་དངོས་པོ་གཅིག་ཅེས་ལྟ་བ་ཡིན་ཏེ། དེ་
དག་བཏགས་པ་ཙམ་གྱི་གཅིག་ཡིན་པར་ཁོང་དུ་མ་ཆུད་ནས་གཅིག་བདེན་ཞིག་ཏུ་ལྟ་བ་ཡིན་པས། གཅིག་བདེན་ལ་དུ་མ་སྲིད་ན་མི་སྲིད་པ་ཅིའང་མེད་པར་ཐལ་བ་སོགས་རིགས་པ་བརྒྱ་ཕྲག་གི་མཚོན་རྣོན་ཅིག་ཅར་ཕོག་པ་ཡིན་ནོ། །ཚིགས་བཅད་འདིའི་ཐད་དུ། ལ་
ལས་ནོར་བུའི་གཟི་ཞེས་ཡུལ་དུ་མར་འདོད་པའི་དཔེར་གོ་བ་བླངས་པ་ནི་མི་འཐད་དེ། ཕྱོགས་སྔའི་འདོད་པ་དང་མི་འབྲེལ་བས་སོ། །གཉིས་པ་རྒྱང་འཕེན་པའི་ལུགས་དགག་པ། ས་ལ་སོགས་པ་འདུས་པ་ལ། །ཡུལ་དང་དབང་པོ་ཀུན་འཇོག་
པ། །སུ་འདོད་དེ་ཡི་ལུགས་ལ་ཡང་། །དངོས་པོ་གཅིག་དང་མཐུན་འཇུག་མེད། །ཅེས་གསུངས་ཏེ། དེའང་སྔོན་ལྷ་དང་ལྷ་མིན་འཐབ་པའི་ཚེ་ལྷ་རྣམས་རང་བཞིན་གྱིས་ཆོས་ལ་དཀར་བས་འཐབ་མ་སྤྲོ་ནས་ལྷ་ཕམ་དུ་ཉེ་བ་ན། ལྷ་ཕུར་བུས་འཇིག་
རྟེན་སྔ་ཕྱི་མེད་པའི་བསྟན་བཅོས་བརྩམས་པ་རིམ་གྱིས་གྲོག་མཁར་བ་ལ་སོགས་པས་མི་ཡུལ་དུ་དར་བར་བྱས་པ་སོགས་ལ་ཚད་མར་བྱེད་པ་ཕུར་བུ་པ། རྒྱང་འཕེན་པ། ཚུ་རོལ་མཛེས་པ་པ་ཞེས་སོགས་སུ་གྲགས་པ་དེ་དག་གི་འདོད་ཚུལ་མདོར་བསྡུས་ན། ཚེ་
སྔ་ཕྱི་ལས་རྒྱུ་འབྲས་ཐམས་ཅད་མཁྱེན་པ་མ་མཐོང་བའི་འགྲོ་བ་སོགས་མི་འདོད་ཅིང་། ཚེ་འདི་གང་ཙམ་ལ་ཕན་ཕྱིར། བརྒྱ་བྱིན་དང་། ཉི་ཟླ་ལྷར་འཛིན་ལ། ལྟ་བའི་སྙིང་པོ་དང་ཕུར་བུའི་རྒྱུད་སྡེ་དྲུག་ལ་སོགས་པ་ཚད་མར་འཛིན་ཅིང་།  གྲུབ་
13-1-85a


མཐའ་ཡང་རིགས་པའི་སྒོ་གཅིག་དཔེ་གསུམ་ཚུལ་བཞིས་རྟོགས་པར་བྱེད་དེ། ཚེ་སྔ་ཕྱི་སོགས་མེད་དེ་རང་གི་དབང་པོའི་སྤྱོད་ཡུལ་དུ་མ་མཐོང་བའི་ཕྱིར་ཞེས་པ་རིགས་པའི་སྒོ་གཅིག་ཡིན་ལ། དཔེ་གསུམ་ནི། རྒྱུ་མེད་པའི་དཔེ་
སྤང་ལ་ཤ་མོ་རྡོལ་བ། འབྲས་བུ་མེད་པའི་དཔེ་ཐལ་བ་རླུང་གིས་གཏོར་བ། ངོ་བོ་ཉིད་ལས་བྱུང་བའི་དཔེ་ཉི་ཤར་དང་ཆུ་བོ་ཐུར་འབབ་དང་སྲན་ཟླུམ་ཚེར་མ་རྣོ་བ་སོགས་སོ། །ཚུལ་བཞི་ནི། ཚེ་སྔ་ཕྱི་མེད་ཀྱང་ད་ལྟའི་འཇིག་རྟེན་བདེ་སྡུག་སོགས་ཡོད་པའི་ཚུལ།
བདག་གཙོ་བོ་ལྟ་བུ་སྔ་ཕྱིར་འཕོ་བ་མེད་ཀྱང་གློ་བུར་ལུས་གྲུབ་དུས་རང་ཆས་ཡོད་ཚུལ། ས་སོགས་འབྱུང་བར་རིག་པ་སྐྱེད་ནུས་ཀྱི་རྒྱུ་ཡོད་པ་འདུས་པ་ལས་ཆན་ལས་མྱོས་བྱེད་ཀྱི་ནུས་པ་ལྟར་ཤེས་པ་གསར་དུ་གྲུབ་ཚུལ། ལམ་སྦྱོང་དཀའ་ཐུབ་ཀྱིས་གྲོལ་བ་མེད་
ཀྱང་རང་བཞིན་ཤི་བ་ན་ཐམས་ཅད་གྲོལ་བ་གཅིག་པའི་དབྱིངས་སུ་གནས་པའི་རྒྱུ་འབྲས་མེད་པའི་ཚུལ་ཤེས་ན་གྲོལ་བའི་ཆེད་དུ་ངལ་དུབ་སོགས་ལ་མི་བརྟེན་པའི་རྒྱང་འཕེན་གྱི་གཞུང་བསྟན་པ་དོན་མེད་མིན་པའི་ཚུལ་ཏེ་དེ་ལྟར་འདོད་དོ། །འདི་དག་གི་གྲུབ་མཐའ་རྣམ་
པར་གཞག་པའི་རྒྱུ་རྩ་བ་འཇིག་རྟེན་ཕ་རོལ་མངོན་སུམ་དུ་མི་འགྱུར་བས་དེ་མེད་ལ་ད་ལྟ་འདི་གང་ཙམ་མོ་སྙམ་པའོ། །ཀྱེ་མ་བླུན་པོ་གང་དག་ད་ལྟ་མངོན་སུམ་དུ་མ་གྱུར་པ་ཐམས་ཅད་མེད་པར་དཔོགས་ན་སང་དང་གནང་གི་དུས་ཀྱང་མེད་པས་ཟས་སོགས་ཉེར་བསྡོགས་
ཀྱང་མི་འོས་ལ། འཇིག་རྟེན་ཕ་རོལ་ཡོད་པར་མངོན་སུམ་མ་མཐོང་ཡང་མེད་པར་ཡང་མཐོང་བ་མེད་ན་མེད་ཅེས་ཅི་ཞིག་གིས་དཔོགས། རང་གིས་རྗེས་དཔགས་ཚད་མར་མི་འདོད་བཞིན་གྲུབ་མཐའི་རྗེས་དཔགས་ལོག་པ་ལ་འཇུ་བ་སྙིང་རྗེའི་བཤུམ་མོ་དང་ངོ་མཚར་གྱི་
13-1-85b


ཁྲེལ་བགད་དུས་གཅིག་འོས་པ་ལུགས་འདི་ཀྱེ་མ་སྙམ་མོ། །དེ་ལྟ་བུའི་ལུགས་ལ་དགོངས་ནས་གང་དོན་དམ་པར་ཡོད་པར་འདོད་པའི་ས༷་ལ༷་སོག༷ས་པ༷་འབྱུང་བ་ཆེན་པོ་བཞི་འདུ༷ས་པ༷་ལ༷། ཡུ༷ལ་ལྔ་ད༷ང་དབ༷ང་པོ༷་ལྔ་པོ་ཀུ༷ན་འཇོ༷ག་པ༷་སུ༷་ཞིག་གིས་འདོ༷ད་པ་དེ༷་ཡི༷་
ལུག༷ས་ལ༷་ཡ༷ང་། འདུས་པ་ཞེས་པ་འདུས་པ་ཅན་དུ་མ་ཚོགས་པ་ཡིན་པས་ན། འདུས་པ་འཛིན་པའི་ཤེས་པ་དེའང་དུ་མར་འགྱུར་གྱི་ཡུལ་དངོ༷ས་པོ༷་གཅི༷ག་ད༷ང་མཐུ༷ན་པར་འཇུ༷ག་པ་མེ༷ད་དོ། །ཞེས་སོ། །གསུམ་པ་གྲངས་ཅན་པའི་ལུགས་ལ་ཤེས་པ་
བདེན་གཅིག་མི་སྲིད་པར་བསྟན་པ་ལ། དགག་པ་བརྗོད་པ་དང་། ཉེས་སྤོང་གི་ལན་དགག་པ་གཉིས། དང་པོ། སྙིང་སྟོབས་ལ་སོགས་བདག་སྒྲ་སོགས། །ཕྱོགས་ལའང་དོན་གཅིག་སྣང་བ་ཅན། །ཤེས་པ་རིགས་པ་མ་ཡིན་ཏེ། །གསུམ་གྱི་བདག་ཉིད་
ཡུལ་སྣང་ཕྱིར།  །ཞེས་གསུངས་ཏེ། དེའང་དྲང་སྲོང་སེར་སྐྱ་ཞེས་བྱ་བ་དཀའ་ཐུབ་ཀྱི་ཡོན་ཏན་ཐོབ་པ། རྒྱལ་པོ་ཡུལ་འཁོར་སྐྱོང་གི་དུས་སུ་བྱུང་བ་གངས་རི་ན་ཡོད་པའོ། །དེས་རང་གི་བསམ་གཏན་གྲུབ་པའི་ཉམས་དང་མཐུན་པར་བརྩམས་པའི་གཞུང་དབང་ཕྱུག་
ནག་པོ་རྒྱུད་དྲུག་ཅུ་པ། མཚན་ཉིད་ལྔ་བཅུ་པ་སོགས་དང་།  ཚད་མ་གསུམ། འགྲེལ་པ་བདུན་ལ་སོགས་པ་སྟོན་པར་བྱེད་པའི་གཞུང་ལ་ཚད་མར་བྱེད་པ་ལ་སེར་སྐྱ་པའམ། གྲངས་ཅན་པ་ཞེས་གྲགས་སོ། །དེ་དག་གིས་ཤེས་བྱ་ཐམས་ཅད་དེ་ཉིད་ཉེར་ལྔར་སྨྲ་སྟེ། 
དེའང་བེམ་ཤེས་གཉིས་ལས།  བདག་ཤེས་རིག་གི་སྐྱེས་བུ་ཤེས་པ་ཡིན་ལ་རྟག་དངོས་ལ་སོགས་པའི་ཁྱད་པར་ལྔ་ལྡན་ནོ། །བེམ་པོ་ཐམས་ཅད་ཀྱི་འབྱུང་ཁུངས་གཙོ་བོ་རྟག་གཅིག་བེམ་པོ་ཟ་པོ་མིན་ལ་བྱེད་པོ་ཡིན་པའོ། །དེའི་ངོ་བོ་རྡུལ་མུན་སྙིང་སྟོབས་གསུམ་ཆ་མཉམ་
13-1-86a


པས་རྟོགས་དཀའ་བ་སྟེ། རྡུལ་ནི་སྡུག་བསྔལ་ལམ་གདུང་བ། སྙིང་སྟོབས་བདེ་བ། མུན་པ་བཏང་སྙོམས་ཏེ་ཡོན་ཏན་གསུམ་མོ། །དེ་གསུམ་ཤས་ཆེ་ཆུང་མེད་པས་གང་གི་ཕྱོགས་སུ་མ་ལྷུང་བ་རྒྱུ་གཙོ་བོ་སྟེ་བུམ་པ་སོགས་ཀྱི་རྒྱུ་འཇིམ་
པ་ལྟ་བུ། དེ་ལས་རྣམ་འགྱུར་ཉེར་གསུམ་བྱུང་བར་འདོད་དེ། དེའང་གཙོ་བོ་ལས་ཆེན་པོའམ་བློ་མེ་ལོང་དྭངས་བ་ལྟ་བུ་ཕྱི་ནས་ཡུལ་དང་ནང་ནས་ཤེས་རིག་གི་སྐྱེས་བུ་གཉིས་ཀྱི་གཟུགས་བརྙན་ཤར་ནས་སྐྱེས་བུ་ཡུལ་ལ་ལོངས་སྤྱོད་པའི་མཚམས་སྦྱོར་ཡིན་ནོ། །དེ་ལས་ཡོན་ཏན་གསུམ་འཕེལ་
ནས་ཆེན་པོ་ལས་ང་རྒྱལ་གསུམ་བྱུང་སྟེ་རྣམ་པར་འགྱུར་བ་ཅན་གྱི་ང་རྒྱལ་དང་། སྙིང་སྟོབས་ཅན་གྱི་ང་རྒྱལ་དང་། མུན་པ་ཅན་གྱི་ང་རྒྱལ་ལོ། །དེ་གསུམ་གཅིག་ཏུ་བརྩིའོ། །ང་རྒྱལ་དང་པོ་ལས་དེ་ཙམ་ལྔ་བྱུང་སྟེ། སྒྲ་རེག་རོ་གཟུགས་དྲི་རྣམས་སོ། །དེ་ཙམ་ལྔ་ལས་
འབྱུང་བ་ནམ་མཁའ་སོགས་ལྔ་བྱུང་སྟེ། རིམ་པས་ཡོན་ཏན་གཅིག་ནས་ལྔའི་བར་དུ་ཡོད་པས་རྒྱུ་དེ་དག་ལས་མཁའ་སོགས་སུ་གཞག་པ་སྟེ། གཟུགས་དང་རོ་སོགས་ལས་འོ་མར་གཞག་པ་བཞིན་ནོ། །སྙིང་སྟོབས་ཅན་བདག་མཆོག་འཛིན་ལྟ་བུའི་ང་རྒྱལ་ལས་
དབང་པོ་བཅུ་གཅིག་བྱུང་སྟེ། མིག་རྣ་སྣ་ལྕེ་ལུས་ཏེ་བློའི་དབང་པོ་ལྔ་དང་། སྨྲ་བ་ལ་དབང་བ་ངག་གི་དབང་པོ། དེ་བཞིན་དུ་བྱིན་ལེན་ལག་པ། འགྲོ་བ་རྐང་པ། སྙིགས་མ་འདོར་བ་རྐུབ། དགའ་བར་བྱེད་པ་འདོམས་ཀྱི་དབང་པོ་སྟེ་ལས་ཀྱི་དབང་པོ་ལྔ།  
ཐམས་ཅད་ལ་དབང་བ་བློའི་དབང་པོ་སྟེ་དབང་པོ་བཅུ་གཅིག་བྱུང་ངོ་། །མུན་ཅན་གྱི་ང་རྒྱལ་གྱིས་དེ་གཉིས་ཀྱི་གྲོགས་བྱེད་དོ། །དེ་ལྟར་ཡུལ་དང་ཡུལ་ཅན་དུ་འབྲེལ་ནས་གནས་པ་དེ་སྲིད་སྲིན་བུ་བལ་གྱིས་བཏུམ་པ་ལྟར་འཁོར་བར་འཁྱམས་ལ། ནམ་ཞིག་ཡུལ་
13-1-86b


གྱི་ཉེས་དམིགས་རིག་ནས་ནང་དུ་རྩེ་གཅིག་མཉམ་པར་བཞག་པའི་བསམ་གཏན་གྱི་མིག་ཐོབ་ནས་བལྟས་པས་གཙོ་བོ་སྐྱེངས་པའི་ཚུལ་གྱིས་རྣམ་འགྱུར་རྣམས་བསྡུས་པའི་ཚེ་བདག་ཤེས་རིག་གི་སྐྱེས་བུ་ཡུལ་དང་མི་འབྲེལ་བར་ཡན་གར་དུ་གནས་པ་འཆིང་བྱེད་ཡུལ་
དང་བྲལ་ཏེ་ཐར་བར་འདོད་དོ། །འདིས་ཀུན་གཞི་ལ་གཙོ་བོ་དང་ཡིད་ཤེས་ལ་བདག་ཏུ་འཁྲུལ་གཞི་བྱས་པ་ཡིན་ཅིང་། གཙོ་བོའི་ཀློང་ལས་རྣམ་འགྱུར་མཆེད་ཚུལ་སོགས་ཤེས་པ་མཆེད་པའི་ཚུལ་ལྟ་བུ་ཡིན་ལ། ཞིབ་ཏུ་གྲུབ་མཐའི་བབ་སེམས་ཙམ་རྣམ་བརྫུན་པ་
དང་ཆེས་ཉེ་བ་ཡིན་ནོ་ཞེས་བཤད། ཕྱི་རོལ་པའི་ནང་ན་གྲུབ་མཐའ་ལེགས་ཤོས་ཡིན་ཅིང་། ཁོ་རང་རང་ལུགས་ཙམ་གྱི་དབར་དུ་གོ་རྒྱུ་ཡང་ལེགས་པོ་ཡོད་པ་ཡིན་ནོ། །དེ་ལྟར་སེར་སྐྱ་པའི་རྗེས་འབྲངས་རྣམས་ཡུལ་ཐམས་ཅད་ཡོན་ཏན་གསུམ་གྱི་རང་བཞིན་འདོད་པ་
དེ་ལ་དགོངས་ནས་འདི་སྐད་དུ། གང་སྙིང༷་སྟོབ༷ས་ལ༷་སོག༷ས་པ་ཡོན་ཏན་གསུམ་གྱི་བད༷ག་ཉིད་དུ་གྱུར་པའི་སྒྲ༷་དང་རེག་བྱ་ལ་སོག༷ས་པ་རྣམ་འགྱུར་རྣམས་དམིགས་པའི་ཡུལ་དུ་འདོད་པའི་ཕྱོག༷ས་ཁས་ལེན་པ་དེ་ལ༷འང༷་དོ༷ན་གཅི༷ག་པུ་ཁོ་ན་ཞིག་སྣང༷་བ༷་ཅ༷ན་གྱི་ཤེས༷་པ༷་ཡོད་པར་
རིགས༷་པ༷་མ༷་ཡི༷ན་ཏེ༷་འདི་ལྟར་ཡོན་ཏན་གསུམ༷་གྱི༷་བད༷ག་ཉི༷ད་ཅན་གྱི་ཡུལ༷་སྣང༷་བར་ཁས་བླངས་པའི་ཕྱིར༷་ཞེས་འདི་པའི་ལུགས་ལ་ཡུལ་ཐམས་ཅད་ཡོན་ཏན་གསུམ་གྱི་རང་བཞིན་ཅན་ཡིན་པས་ཁྱབ་ལ། གསུམ་ལ་དམིགས་པ་གཅིག་ཡིན་པར་མི་རུང་ངོ་། །གཉིས་པ།
དངོས་པོའི་ངོ་བོ་རྣམ་གསུམ་ལ། །དེ་ནི་གལ་ཏེ་རྣམ་གཅིག་སྟེ། དེ་དང་མི་མཐུན་སྣང་ན་ཀོ། དེ་ནི་དེར་འཛིན་ཇི་ལྟར་འདོད། །ཅེས་གསུངས་ཏེ། དེ་ལ་གྲངས་ཅན་པ་དེ་དག་ཡུལ་དངོ༷ས་པོ༷འི་ངོ༷་བོ༷་ཡོན་ཏན་རྣམ༷་པ་གསུམ༷་ཡིན་པ་ལ༷། ཤེས་པ་དེ༷་ནི༷་ག༷ལ་ཏེ༷་
13-1-87a


རྣམ༷་པ་གཅི༷ག་པུར་སྣང་བ་སྟེ༷། ཡུལ་དེ༷་ད༷ང་ཡུལ་ཅན་གཉིས་མི༷་མ༷ཐུན་པའི་ཚུལ་གྱིས་ཡུལ་སྣང༷་བར་འདོད་ན༷་ཀོ༷ འོ་ན་ཤེས་པ་དེ༷་ནི༷་ཡུལ་དེ༷ར་འཛི༷ན་པའི་ཡུལ་ཅན་ཀྱང་ཡིན་པར་ཇི༷་ལྟར༷་འདོ༷ད་དེ་འདོད་མི་རིགས་སོ། །གྲངས་ཅན་པ་
ན་རེ། ཡུལ་གསུམ་ཀ་ཚང་པར་ཡོད་ཀྱང་དམིགས་པའི་ཚེ་དེ་གསུམ་ལས་གང་ཤས་ཆེ་བ་ཁོ་ན་དམིགས་པས་དམིགས་པ་གཅིག་ཏུ་འགྱུར་རོ་ཞེ་ན་དེ་ལྟར་མི་འཐད་དེ། སེམས་ཅན་རྣམས་ཀྱི་རིགས་དང་མོས་པ་དང་ལམ་བསྒོམས་པའི་ཁྱད་པར་གྱིས་སྒྲ་ལྟ་བུ་གཅིག་
ལའང་སོ་སོས་ཞུམ་གདུང་བདེ་བར་དམིགས་པས་ཡོན་ཏན་གསུམ་ལ་ཡུལ་གྱི་སྟེང་ན་ཤས་ཆེ་ཆུང་མི་རུང་ལ། གང་ཤས་ཆུང་བ་མི་སྣང་བའི་དབང་གིས་ཤེས་པས་མ་བཟུང་ཞེ་ན། ཡུལ་ཇི་ལྟར་གནས་པའི་རང་བཞིན་དང་མཐུན་པར་ཞུགས་ན་ཡུལ་དེ་ཤེས་པའི་ཤེས་པར་
གཞག་རུང་གི ཡུལ་དང་མ་མཐུན་ན་དེ་དེར་འཛིན་གྱི་ཤེས་པ་ཡིན་པར་མི་རུང་སྟེ། སྔོ་འཛིན་གྱི་ཤེས་པ་ཁྲ་འཛིན་དུ་མི་རུང་བ་བཞིན་ནོ། །དེ་ལྟར་ན་སྒྲ་ཤེས་པ་འདིའང་སྒྲ་ཤེས་ཡིན་པར་མི་རུང་སྟེ། སྒྲ་ནི་གསུམ་གྱི་རང་བཞིན་ཡིན་པ་ལ་འདི་ནི་གཅིག་པུ་འཛིན་པ་
ཡིན་པས་ཡུལ་དེ་འཛིན་པ་མ་ཡིན་པར་འགྱུར་རོ། །དེས་རྟོག་གེ་སྡེ་ལྔ་སྤྱིར་བསྟན་ཏེ། དེ་ལ་ཡང་དག་པའི་ཡེ་ཤེས་སྤངས་པའི་ཚུ་རོལ་མཐོང་བ་ཙམ་གྱིས་དཔྱད་ནས་བཞག་པའི་ཕྱིར་གྲུབ་མཐའ་དེ་ཐམས་ཅད་རྟོག་གེ་ཞེས་བྱ་བ་ཡིན་ནོ། །བཞི་པ། ཕྱི་
རོལ་ཡུལ་རྣམས་མེད་པར་ཡང་། །སྣ་ཚོགས་སྣང་ལ་རྟག་པ་སྟེ། །གཅིག་ཆའམ་ཅི་སྟེ་རིམ་འབྱུང་བའི། །རྣམ་ཤེས་རུང་བ་ཤིན་ཏུ་དཀའ། །ཞེས་གསུངས་ཏེ། དེ་ལ་རིག་བྱེད་ཀྱི་མཐའ་གསང་བ་སྨྲ་བའི་ལུགས་འདི་ནི་སྤྱིར་གོང་བརྗོད་རིག་བྱེད་པའི་ཁོངས་
13-1-87b


སུ་གཏོགས་ཀྱང་རིག་བྱེད་ཀྱི་ཟབ་གནད་མཐར་ཐུག་གསང་བ་དམ་པ་ཡིན་ནོ་ཞེས་ཁོ་རང་ལ་ཐུན་མིན་གྱི་འདོད་ཚུལ་དུ་མ་ཡོད་པ་དང་། ཁྱད་པར་གོང་བཤད་ལྔ་པོ་ཡུལ་དང་ཡུལ་ཅན་སོ་སོར་ཡོད་པར་ཁས་ལེན་པ་ལ། འདི་ནི་ཡུལ་དང་ཡུལ་ཅན་སོ་སོར་མེད་པར་ཐམས་
ཅད་རིལ་གཅིག་ཏུ་འདོད་པ་ཡིན་པས་དེའི་ལུགས་ལའང་རྣམ་ཤེས་གཅིག་བདེན་མི་སྲིད་ཅེས་སྟོན་དགོས་པས་ཡིན་ལ། དེའང་དངོས་པོ་དུ་མ་དག་གཅིག་ཏུ་རློམ་ཚུལ་རིག་བྱེད་པའི་སྐབས་སུ་བཤད་པ་བཞིན་ལ་ཁྱད་པར་འདི་པའི་དྲན་པར་བྱེད་པ་བསླབ་པའི་འཁོར་ལོ་ལ་
སོགས་པའི་གཞུང་ལ་བརྟེན་ནས་མཁའ་ལྟར་ཤེས་བྱ་ཐམས་ཅད་ལ་ཁྱབ་ཅིང་ཐམས་ཅད་དེ་གཅིག་གི་རང་བཞིན་དུ་གྱུར་པའི་བདག་ཁྱད་པར་དགུ་ལྡན་ཞིག་འདོད་དེ། ངོ་བོ་སེམས་ཅན་ཡིན་པ། ལུས་ཡོད་པ། ཁྱབ་པ། རྟག་པ། གཅིག་པུ། འབྱུང་འཇིག་གི་
རྟེན་དུ་གྱུར་པ། ལུས་ཅན་གྱི་སྐྱོན་ཡོན་གྱིས་མ་གོས་པ། བློའི་སྤྱོད་ཡུལ་དུ་མ་གྱུར་པ། ངག་གིས་བརྗོད་དུ་མེད་པ། ལུས་སུ་སྣང་ཡང་ངོ་བོ་ལ་ལུས་མེད་པ་ཤེས་རིག་ཙམ་མོ་ཞེས་འདོད་དེ། འདི་དག་གིས་འཁྲུལ་གཞི་ཕྱི་ནང་སྣོད་བཅུད་ཀྱི་དངོས་པོ་ཐམས་ཅད་
ཤེས་བྱ་ཙམ་གྱི་རང་བཞིན་དུ་གཅིག་པའི་བཏགས་ཙམ་གྱི་གཅིག་དེ་ལ་བློ་ཡི་རྟེན་འཆོས་ནས་བདག་ཏུ་བཏགས་ཏེ་ཁྱད་པར་དུ་མའི་རང་བཞིན་ཅན་དུ་བལྟས་པའོ། །དེའང་ལུས་ནི་སྟེང་ཕྱོགས་སྐྱེས་བུའི་མགོ འོག་ཕྱོགས་རྐང་པ། ནམ་མཁའ་ལྟོ་བ། ཕྱོགས་བཞི་
ལག་པ། གཟའ་སྐར་སྐྲ། རི་རབ་བྲང་། གངྒཱ་སོགས་ཆུ་རྣམས་རྩ། ནགས་ཚལ་སྤུ་སེན། མཐོ་རིས་རྒྱབ། ཚངས་པ་དཔྲལ་བ། ཆོས་སྨིན་མ་གཡས། ཆོས་མིན་སྨིན་གཡོན། འཆི་བདག་ཁྲོ་གཉེར། ཉི་ཟླ་མིག་གཡས་གཡོན། རླུང་དབུགས།
13-1-88a


དབྱངས་ཅན་ལྕེ། ཉིན་མོ་མིག་ཕྱེ། མཚན་མོ་མིག་བཙུམ། སྐྱེས་པ་གཡས་ཀྱི་ཆ། བུད་མེད་གཡོན། ཁྱབ་འཇུག་རྐང་པ། ཁ་དོག་རྣམས་ཁྲག །འཇིག་རྟེན་པ་ནུ་བར་གཡས། འདས་པ་གཡོན། དགའ་བའི་
རང་བཞིན་ནི་སྐྱེ་རྒུའི་བདག་པོ་ལ་སོགས་པ་དེ་ལྟ་བུའི་ཚུལ་གྱིས་ཐམས་ཅད་དེ་ལས་བྱུང་། དེ་ལ་གནས་དེ་ལ་ཐིམ་ཀྱང་དེ་གཅིག་པུ་རང་གི་ངོ་བོ་ལ་འགྱུར་བ་མེད་པའི་རྟག་པ་ཡིན་ཅིང་ཤེས་པ་ཡིན་ནོ། །དེས་ན་བདག་དེའི་རང་བཞིན་ཐམས་ཅད་ལ་ཁྱད་མེད་པར་ཁྱབ་
ཀྱང་། སོ་སོར་རིས་ཆད་དུ་སྣང་བ་ནི་ཆོས་ཅན་གྱི་དབང་གིས་ཐ་དད་པར་སྣང་བ་སྟེ་བུམ་པའི་ནང་གི་ནམ་མཁའ་བཞིན་ནོ། །དེའང་དམ་པའི་དོན་དུ་བདག་དེའི་རང་བཞིན་གཅིག་པུ་ཤེས་པའི་རང་བཞིན་བཅིང་ཐར་སྐྱེ་འགག་མེད་པ་ལ་དེ་ལྟར་མ་ཤེས་པར་ཐག་པ་ལ་
སྤྲུལ་བཞིན་འཁྲུལ་ཏེ་གཟུང་འཛིན་གཉིས་སུ་སྣང་ཞིང་། སྲིད་པ་འདི་རྨི་ལམ་སྒྱུ་མ་དྲི་ཟའི་གྲོང་ཁྱེར་བཞིན་དུ་མཐོང་བ་ཡིན་ཏེ། ལ་ལས་འབྱུང་བར་བརྟག །ལ་ལས་ཡོན་ཏན་རིག་ནས་དེར་བཏགས་པ་ཡིན་ལ། དག་དང་མ་དག་པར་སྣང་བ་ཡང་ནམ་མཁའ་
སྤྲིན་གྱིས་ཁེབས་མ་ཁེབས་ལྟ་བུ་ཡིན་ཅིང་། བདག་བདེན་པ་རྟོགས་ཏེ་མི་རྟོག་པ་ལ་གནས་ན་ཡིད་མེད་པར་འགྱུར་ལ་དེའི་ཚེ་གཉིས་སྣང་ཡང་ལོག་པར་འགྱུར་བ་ཡིན་ནོ་ཞེས་སྨྲ་བ་སྟེ། རང་འགྲེལ་ལས་ཕྱོགས་སྔའི་གཞུང་བཀོད་པ་བཞིན་ནོ། །དེ་ལྟར་དེ་མ་རྟོགས་ན་
འཁོར་བར་འགྱུར་ལ། གང་གིས་དེ་རྟོགས་ན་ཆོས་ཐམས་ཅད་རོ་གཅིག་ཏུ་འགྱུར་བ་ཡིན་ཏེ། བྱིས་པ་དང་མཁས་པ། སྡིག་པ་དང་བསོད་ནམས། བྲམ་ཟེ་དང་གདོལ་པ་མཉམ་པ་ཉིད་དེ་དགེ་སྡིག་གིས་མི་གོས་ལ། བདག་ཆེན་པོ་དེར་ཐིམ་ན་ཡང་སྲིད་མི་ལེན་
13-1-88b


པས། རྣལ་འབྱོར་པས་ཤེས་བྱའི་རང་བཞིན་འཇིགས་མེད་སྟོང་ཉིད་ཀྱི་བདག་དེའི་ངང་དུ་ཅིའང་མི་བསམ་མི་བརྗོད་པར་བཞག་པས་གཉུག་མའི་མ་རིག་པ་བྱ་དང་རི་དྭགས་སོགས་ཀྱི་རྒྱུད་ནའང་རང་བཞིན་གྱིས་ཡོད་པ་དང་། གཉུག་མ་མིན་པའི་མ་རིག་པ་ནི་དོན་
དམ་པ་དེའི་རང་བཞིན་དང་མི་མཐུན་པའི་བསྟན་བཅོས་མཉན་པ་ལས་སྐྱེས་པའི་སྒྲོ་བཏགས་གཉིས་དང་བྲལ་ནས་བུམ་པ་ཆག་ན་བུམ་པའི་ནང་གི་ནམ་མཁའ་ཉི་ཚེ་བ་ནམ་མཁའ་ཆེན་པོར་རོ་གཅིག་ཏུ་འགྱུར་བ་ལྟར་གཉིས་སུ་མེད་པའི་བདག་ཆེན་པོ་དེར་ཐིམ་ནས་
གྲོལ་བར་འདོད་པའོ། །བདེན་སྟོང་བདར་ཤ་མ་ཆོད་པར་སེམས་ཉིད་རྟག་ཁྱབ་ཀྱི་དངོས་པོར་དམིགས་པའང་ཚུལ་འདི་འདྲར་འགྱུར་ཉེ་བས་ཤིང་རྟ་ཆེན་པོའི་ལུགས་དྲི་མེད་ལ་ཐོས་བསམ་རྩད་གདར་ཆོད་པ་རེ་བྱས་ན་ལེགས། འོན་ཀྱང་ཆོས་ཀྱི་དབྱིངས་དང་སངས་
རྒྱས་ཀྱི་ཡེ་ཤེས་ལ་མིང་ཙམ་གྱི་སྒོ་ནས་ཞེན་ནའང་སངས་རྒྱས་ལ་དམིགས་པ་ཆུད་མི་ཟ་བར་གསུངས་པས་མུ་སྟེགས་པའི་ལམ་དང་ཁྱད་མེད་ཅེས་སྨྲ་བར་ཡང་བདག་ཅག་མི་སྤོབས་ཏེ། རྒྱུ་འབྲས་བསམ་གྱིས་མི་ཁྱབ་པའི་ཕྱིར་རོ། །དེ་ལྟར་ནའང་དངོས་
ཞེན་དང་བཅས་པ་དེ་འདྲ་བ་རྒྱལ་བ་དགྱེས་པའི་ལམ་ཡང་དག་པ་མིན་ནོ་ཞེས་ལུང་དང་རིགས་པས་གསལ་བར་གྲུབ་བོ། །དེ་ལ་གསང་བ་པའི་ལུགས་འདི་ལ་གཅིག་གྲོལ་ན་ཐམས་ཅད་གྲོལ་བར་ཐལ་བ་དང་། མ་གྲོལ་ན་སུ་ཡང་གྲོལ་མི་སྲིད་པ་དང་། ལམ་དོན་
མེད་དུ་འགྱུར་ཏེ་སྤང་གཉེན་ཡོད་ན་གལ་ཏེ་སྤང་བྱ་ཕྱིན་ཅི་ལོག་བདག་དེའི་རང་བཞིན་ལ་ལྡན་ན་ནི་དེ་སྤང་བར་མི་རུང་བ་དང་། ཡེ་ཤེས་ཕྱིན་ཅི་མ་ལོག་པ་ལྡན་དུ་ཟིན་ན་བསྐྱེད་ཀྱང་མི་དགོས་པ་དང་། ཡུལ་དུས་རྣམ་པ་ཐ་དད་པའི་རང་བཞིན་མི་འཐད་དེ། 
13-1-89a


མདོར་ན་རྟག་པ་གཅིག་པུའི་རང་བཞིན་དུ་བདེན་པའི་ཕྱིར་རོ། །ནམ་མཁའི་དཔེ་ཡང་རྟག་དངོས་འགོག་པས་ཁེགས་སོ། །དེ་ལྟར་ཡུལ་ཡུལ་ཅན་ཤེས་པ་རྟག་པ་གཅིག་པུའི་རང་བཞིན་སྣ་ཚོགས་སུ་ཤར་བར་ཁས་ལེན་པའི་
ལུགས་ལ་གཅིག་བདེན་གྱི་རྣམ་ཤེས་མི་སྲིད་པར་སྟོན་ཏེ། འདི་ལྟར་ཕྱི༷་རོལ༷་གྱི་ཡུལ༷་རྣམ༷ས་ལོགས་སུ་མེ༷ད་པར༷་ཡང༷་། ཤེས་པ་གཅིག་པུ་ཉིད་དངོས་པོའི་རྣམ་པ་སྣ༷་ཚོག༷ས་སུ་སྣང༷་བས་ཐམས་ཅད་རིལ་པོ་བདག་ཤེས་པ་གཅིག་གི་རང་བཞིན་ཡིན་ལ༷། དེའང་རྟག་
ཏུ་འགྱུར་བ་མེད་པའི་རྟག༷་པ༷་སྟེ༷། གཅིག་པུ་བདེན་པའི་བདག་ཉིད་དུ་འདོད་པའི་ལུགས་དེ་ལྟར་ན། སྣང་བ་སྣ་ཚོགས་པའི་རྣམ་པར་གཅི༷ག་ཆའ༷མ། ཇི༷་སྟེ༷་དེ་མིན་པར་རི༷མ་གྱིས་འབྱུང༷་བ༷འི་རྣམ༷་ཤེས༷་གཅིག་བདེན་ཞིག་འཇོག་ཏུ་རུང༷་བ༷་ཤི༷ན་ཏུ་དཀ༷འ་སྟེ། ཅིག་ཅར་
དུ་མ་སྣང་ནའང་དུ་མའི་བདག་ཉིད་དང་ཐ་མི་དད་པའི་ཕྱིར་དུ་མར་འགྱུར་ལ་རིམ་གྱིས་སྣང་ཡང་རུང་། གཟུགས་དང་སྒྲ་སོགས་རྣམ་པ་སོ་སོའི་གྲངས་བཞིན་དུ་དུ་མར་ཅི་སྟེ་མི་འགྱུར། གཞན་ཡང་རིམ་གྱིས་སྣང་ན་དང་པོ་སྔོན་པོར་སྣང་བའི་ཤེས་པ་དང་། རྗེས་སུ་དམར་
པོར་སྣང་བའི་ཤེས་པ་གཉིས་ངོ་བོ་ཐ་མི་དད་པས་ན་དང་པོའི་དུས་སུའང་ཕྱི་མ་སྣང་བར་ཐལ་ཏེ། རྟག་པ་འགྱུར་མེད་ཀྱི་ཤེས་པ་གཅིག་གི་ངོ་བོར་གཅིག་པའི་ཕྱིར་རོ། །གལ་ཏེ་སྣ་ཚོགས་པའི་སྣང་བ་བཞིན་དུ་ཤེས་པའང་སྣ་ཚོགས་སུ་མི་འགྱུར་ན་འདི་གཉིས་གཅིག་ཡིན་
པར་ཡང་མི་རུང་ངོ་། །གསང་བ་པ་འདིས་རྣམ་ཤེས་ཀུན་ལ་ཁྱབ་པར་འདོད་ཀྱང་འདིར་མ་ཁྱབ་པ་འགོག་པའི་ས་ཁོངས་སུ་བཞག་པ་ནི་མི་འགལ་ཏེ་དངོས་པོའི་གནས་ཚུལ་དབང་བཙན་དུ་བྱས་པའི་ཕྱིར་རོ། །ཕྱི་དོན་ཡང་ཤེས་པ་ཡིན་པར་སྨྲ་ཡང་དོན་འདོད་པའི་ཁོངས་
13-1-89b


སུ་བྱས་པ་ནི་མུ་སྟེགས་གཞན་གྱི་ཤུགས་ལ་བསྟན་པའི་ཕྱིར་རོ། །དེ་ལྟར་ཏརྐ་སྡེ་ལྔ་དང་རིག་བྱེད་གསང་བ་སྨྲ་བ་སོགས་ཀྱི་ཞེ་འདོད་མུན་པའི་དྲྭ་བ་འཇིགས་སུ་རུང་བ་དཀྲིགས་ནའང་དངོས་པོའི་ཆོས་ཉིད་ལྷ་དང་བཅས་པའི་འཇིག་རྟེན་གྱིས་འཁྲུགས་པར་བྱ་མི་ནུས་པ་དེ་ནི་ཁས་
ལེན་ཅི་བྱས་ཀྱང་ལྕགས་བསྲེགས་སྤྲ་བས་དྲིལ་བ་ལྟར་སྦ་བར་མ་ནུས་ནས་སླར་ཕྱིན་ཅི་ལོག་གི་གྲུབ་མཐའ་དེ་དག་འཇིག་པར་བྱེད་པ་ཡིན་ལ། དངོས་པོ་སྟོབས་ཞུགས་ཀྱི་རིགས་པ་སྨྲ་བ་དག་ནི་འཇིག་རྟེན་ན་འཇིགས་པ་དང་བག་ཚ་བ་མེད་པར་སེང་གེ་བཞིན་དུ་རྒྱུ་བར་བྱེད་དོ། །གཞན་
ཡང་ཡང་དག་པའི་ཡེ་ཤེས་མངའ་བའི་གསུངས་པ་དཔྱད་གསུམ་གྱིས་དག་པའི་ལུང་མེད་བཞིན་དུ་རང་གར་ལམ་ཚོལ་བར་ཞུགས་པ་དག་ལ་འཇིག་རྟེན་གྱི་ལྟ་བར་བརྟེན་པའི་འཁྲུལ་པ་དུ་མ་སྔར་དང་ད་ལྟར་བྱུང་། མ་འོངས་པ་ནའང་འབྱུང་བ་ནི་སེམས་ཀྱི་འཇུག་པ་སྲིད་དུ་
མང་མོད་ཀྱི། ཤེས་བྱའི་གཤིས་ལ་གཅིག་བདེན་མེད་པས་ན་ཕྱོགས་དུས་གང་ན་གཅིག་བདེན་སྒྲུབ་ནུས་པའི་གྲུབ་མཐའ་མི་སྲིད་པར་ཤེས་པའི་ཆེད་དུ་དེ་ལྟར་བསྟན་པ་ཡིན་ནོ། །མུ་སྟེགས་པའི་ལུགས་འདིར་ཕལ་ཆེར་བསམ་གཏན་ཙམ་གྱི་ཉམས་ལ་བརྟེན་པ་དང་། འགའ་
ཞིག་རིགས་པས་དཔྱད་པ་ལ་བརྟེན་པ་དང་། ཕལ་ཆེར་བྲམ་ཟེ་གདུག་པས་རང་གི་ཞེ་འདོད་གྲུབ་པའི་སླད་དུ་གཡོ་སྒྱུའི་ཚིག་སྦྱར་བ་ཡིན་ནོ། །བོད་དུའང་བོན་ཞེས་པ་དང་པོ་ཆོས་ཡེ་མ་དར་གོང་དུ་བོད་ཕྲུག་ཞིག་འདྲེས་བརླམས་ནས་ལྷ་འདྲེ་མཆོད་ཐབས་སོགས་རྡོལ་ཐབས་
སུ་ཤེས་པ་ཞིག་བྱུང་བ་ལས་རིམ་པས་ཇེ་རྒྱས་སུ་བྱུང་བར་མངོན་ཞིང་། དེང་སང་ནི་ནང་པའི་གྲུབ་མཐའ་ཐམས་ཅད་ལ་མིང་བསྒྱུར་གྱི་དོད་རེ་ཡོད་པར་འདུག་ལ། ཁ་ཅིག་བོན་ཆོས་དང་རྙིང་མ་འདྲའོ་ཞེས་ཟེར་ཡང་། ཆོས་སྐད་ལ་སོགས་པ་འདྲ་བའང་མང་དུ་འདུག་མོད། 
13-1-90a


དེ་དག་གིས་བན་ཆོས་ལ་ཕྱོགས་བསྟུན་ནས་བྲིས་པས་ན་འདྲ་བར་ཅིས་མི་འོང་སྟེ། དཔེར་ན། རྒྱ་གར་དུ་ནང་པའི་གྲུབ་མཐའ་ཉན་ཐོས་ལ་མགོ་སྙོམས་པ་ཐ་སྙད་པ་དང་། དེ་བཞིན་རང་རྒྱལ་སེམས་ཙམ་དང་། བྱ་སྤྱོད་རྣལ་འབྱོར་ཕ་རྒྱུད་མ་རྒྱུད་
གཉིས་མེད་ལ་མགོ་སྙོམས་པ་བཅུ་བཤད་པ་སོགས་བཞིན་དུ། བོད་དུའང་བོན་པོ་ལ་དབུ་ཕར་འདུལ་མཛོད་སྔགས་ཀྱི་གཞུང་རྣམས་ཀུན་དང་། བདེ་མཆོག་འཇིགས་བྱེད་ཕུར་པ་སོགས་ལྷ་རྣམས་དང་། གཏུམ་མོ་ཕྱག་ཆེན་རྫོགས་ཆེན་སོགས་བན་ཆོས་ལ་ཇི་
ཡོད་འདྲ་བཟོ་རེ་ཡོད་པར་འདུག་ལ་དེ་དག་གདོད་ནས་ཡོད་པ་མ་ཡིན་པས་གློ་བུར་ཀུན་བཏགས་མཐའ་མེད་ལ་དགག་པར་ག་ལ་ལངས། འོན་ཀྱང་ཕྱྭ་གཤེན་དང་སྔགས་ལ་སོགས་པ་འཕྲལ་དུ་ཕན་པ་དག་ཀྱང་སྣང་བ་རྣམས་ནི་སངས་རྒྱས་བྱང་སེམས་ཀྱི་ཕྲིན་ལས་དང་
སྤྲུལ་པས་བསྟན་པ་ཡིན་ཀྱང་སྲིད་དེ། རྒྱལ་བ་དང་རྒྱལ་སྲས་རྣམས་ཀྱི་ཐབས་ལ་མཁས་པའི་སྤྱོད་ཡུལ་བསམ་གྱིས་མི་ཁྱབ་པའི་ཕྱིར་ཀུན་ཏུ་རྒྱུ་བདེན་སྨྲའི་རྣམ་ཐར་བཞིན་ནོ། །དེ་ལྟར་ནའང་འདི་དག་གིས་ཀྱང་ཆོས་འདི་པའི་སྟོན་པ་དང་བསྟན་པ་རྣམ་དག་ལ་སྐྱབས་སུ་
ཁས་འཆེ་བའམ། ཡང་ན་ཁོ་རང་གི་བསྟན་པ་རང་རྐྱ་ཐུབ་པ་ཞིག་བཟུང་ན་བནྡེའི་མཁས་པ་རྣམས་དང་གཏན་ཚིགས་འགྲན་པའི་འོས་སུ་འགྱུར་གྱི། བརྟགས་ན་ཅིའང་མ་ཡིན་པ་ནི་བྱིས་པ་འདྲིད་པ་ཙམ་ལ་གྲུབ་མཐའི་དབང་དུ་བྱས་པའི་སྡང་ཞེན་གང་ཡང་བསྐྱེད་པར་མི་
རིགས་སོ། །ལར་རྒྱ་གར་ན་ཕྱི་བ་ནང་པ། བོད་ན་མུ་སྟེགས་དངོས་སུ་མེད་ཀྱང་བནྡེ་བོན་པོ། རྒྱ་ནག་ན་ཧཱ་ཤང་ཧྭོ་ཤང་ཞེས་ཟུང་དུ་བྱུང་བའང་རྟེན་འབྲེལ་གྱིས་ཡིན་པར་གསུངས་སོ། །དེས་ན་ལུགས་གཞན་དག་ཀྱང་། བསྟན་པ་ལ་མ་གནོད་ན་རང་གར་གཞག་པར་བྱ་སྟེ། 
13-1-90b


ཟླ་བ་སྒྲོན་མེའི་མདོ་ལས། འཇིག་རྟེན་དག་ན་མུ་སྟེགས་ཅན་གཞན་གང་། །འཁོད་པ་དེ་དག་རྣམས་ལ་ཡིད་མི་སྡང་། །དེ་དག་རྣམས་ལ་སྙིང་རྗེ་ཉེར་འཇོག་པ། །འདི་ནི་བཟོད་པ་དང་པོའི་ཁྱད་པར་ཡིན། །ཞེས་གསུངས་པ་ལྟར་ལ། འོན་ཀྱང་དགའ་
བར་ནི་མི་བྱ་སྟེ། བློ་ངན་ལྷའི་བདུད་རྩི་བོར་ནས་བ་ཚྭའི་ཆུ་བོ་ལ་རེ་བ་བཞིན་ནོ། །ཁྱད་པར་དུ་མཁན་ཆེན་གྱི་རིང་ལུགས་ཤཱཀྱའི་བསྟན་པ་གཙང་མར་འཛིན་པ་རྣམས་ནི་མཁན་ཆེན་གྱི་བཀའ་རྟགས་ཕྱག་རྒྱས་བཅད་པ་བཞིན་བོན་པོ་ལ་དགའ་བར་མི་བྱ་སྟེ་བོན་པོ་
རྣམས་ཀྱང་མཁན་པོ་འདི་དགྲ་བོའི་དང་མར་བལྟ་བ་ཡིན་ནོ། །གཉིས་པ་ཐུན་མོང་དུ་མཇུག་བསྡུ་བ་ལ། ཕྱི་རོལ་ལ་གཅིག་བདེན་དུ་ཞེན་པ་དགག་པ། ཤེས་པ་ལ་གཅིག་བདེན་དགག་པ། དེ་གཉིས་ཀྱི་དོན་བསྡུ་བ་གསུམ། དང་པོ། ནམ་
མཁའ་ལ་སོགས་ཤེས་པ་དག །མིང་ཙམ་དུ་ནི་སྣང་བ་རྣམས། །ཡི་གེ་དུ་མ་སྣང་བའི་ཕྱིར། །སྣ་ཚོགས་སྣང་བར་གསལ་བ་ཡིན། །ཞེས་གསུངས་ཏེ། དེའང་ཕྱི་རོལ་གྱི་ཡུལ་ནམ་མཁའ་ལ་སོགས་པ་ཆ་མེད་པས་ན་དེ་ལ་དམིགས་པའི་རྣམ་
ཤེས་གཅིག་པུར་འགྱུར་སྙམ་ན་མ་ཡིན་ཏེ། འདི་ལྟར་ནམ༷་མཁ༷འ་ལ༷་སོག༷ས་པ་དངོས་མེད་ཤེས་པའི་ཤེས༷་པ༷་གང་དག༷་ཡུལ་རྗེན་ཅེར་དུ་མྱོང་བ་ནམ་ཡང་མེད་པས་དེ་དང་དེའི་མི༷ང་གི་རྣམ་པ་དང་འབྲེལ་བའི་རྟོག་པའི་གཟུགས་བརྙན་ཙམ༷་ཞིག་ཏུ་ནི༷་སྣང༷་བ༷་རྣམ༷ས། ཡི༷་གེ༷་
དུ༷་མ༷་སྣང༷་བའི༷་ཕྱིར༷་ན། སྣ༷་ཚོག༷ས་པའི་བདག་ཉིད་ཅན་དུ་སྣང༷་བར༷་གས༷ལ་བ༷་ཡི༷ན་ནོ། །དེ་ལ་གཟུགས་ཐོགས་རེག་གི་རྣམ་པ་མེད་ཙམ་ལ་ནམ་མཁའ་ཞེས་སྒྲོ་བཏགས་པ་ཡིན་ལ་ནམ་དེ་དྲན་པ་ན་མིང་དང་བཅས་ཏེ་དྲན་པར་བྱེད་ཀྱི། བུམ་སོགས་བཞིན་དུ་མིང་དང་
13-1-91a


མ་འདྲེས་པར་དེ་ལ་དམིགས་པ་མེད་དེ། དེ་རང་མཚན་དང་བྲལ་བའི་ཕྱིར་ན་དབང་པོས་མངོན་སུམ་དུ་རྣམ་པ་ཀུན་ཏུ་རུང་བ་མིན་ཏེ།  དཔེར་ན་རི་བོང་གི་རྭ་ཞེས་པ་མིང་དང་བྲལ་ཏེ་ཡིད་ངོར་འཆར་ཚུལ་ནམ་ཡང་མེད་པ་བཞིན་ནོ། །དེ་
ལ་མིང་ནི་དོན་རང་གི་སྟེང་ན་མ་གྲུབ་པའི་བཏགས་པ་གློ་བུར་བ་ཡིན་ལ། བརྗོད་བྱ་དེ་དག་མིང་དང་ཡི་གེ་སྣ་ཚོགས་པ་དག་གིས་གདགས་སུ་རུང་བ་ཡིན་ནོ། །དངོས་མེད་ཐམས་ཅད་ཀྱང་རི་རྭ་ལ་སོགས་པ་དེ་བཞིན་དུ་དངོས་པོ་བཅད་པའི་སེལ་ཆ་ཞིག་ཡིན་པར་འདྲའང་
མདུན་གྱི་རྩིག་པ་སོགས་ཀྱི་ཐོགས་རེག་མེད་པའི་བར་སྟོང་སང་ངེ་བ་དེ་ནི་ཕྱི་རོལ་གྱི་རྩིག་པ་སོགས་ཀྱི་དབང་གིས་དབྱིབས་ལྟ་བུར་དམིགས་པར་སྣང་བ་ནི་ནམ་མཁའ་ཡོད་པར་འདོད་པའི་འཁྲུལ་གཞིའོ། །དེ་ལ་ལེགས་པར་དཔྱད་ན་གཟུགས་མ་མཐོང་བ་ཙམ་ཡིན་གྱི་
དེ་ནམ་མཁའ་ཡོད་པ་མིན་པའི་བུ་གའི་ནམ་མཁའ་ནམ་མཁའི་སྒྲུབ་བྱེད་དུ་མི་རུང་ལ། སྟེང་གི་གནམ་སྔོ་སིང་ངེ་བ་རྒྱན་གྱི་ནམ་མཁའ་ཞེས་གྲགས་པ་ནི་རི་རབ་ལ་ཉི་འོད་ཕོག་པའི་གཟུགས་ཡིན་པས་ནམ་མཁའ་མ་ཡིན་ནོ།       །གཉིས་པ། རྣམ་
ཤེས་སྣ་ཚོགས་མིན་སྣང་བ། །འགའ་ཞིག་ཡོད་པར་གཞུགས་ན་ཡང་། །འོན་ཀྱང་ཡང་དག་གཞག་མི་རུང་། །མཚན་ཉིད་བཅས་ལ་གནོད་མཐོང་ཕྱིར། །ཞེས་རྣམ༷་པར་ཤེས༷་པ་གང་ཞིག་ཡུལ་སྣ༷་ཚོག༷ས་མི༷ན་པར་སྣང༷་བ༷་འག༷འ་ཞི༷ག་ཡོད་དོ་ཟེར་ན། གལ་
ཏེ་དེ་ལྟར་ཡོ༷ད་པར༷་གཞུ༷གས་པའམ་ཡོད་དུ་ཆུག་ན༷་ཡང༷་། འོ༷ན་ཀྱང༷་དེ་ལྟར་བཏགས་པ་ཙམ་ལས་ཡ༷ང་ད༷ག་པར་གཅིག་བདེན་དུ་གཞ༷ག་མི༷་རུང་སྟེ། རྣམ་ཤེས་གཅིག་བདེན་གྱི་མཚན་ཉིད་ཅན་ནམ། མཚ༷ན་ཉི༷ད་དང་བཅས༷་པ་ལ༷་རིགས་པས་གནོ༷ད་པ་བཟློག་
13-1-91b


མེད་དུ་མཐོ༷ང་བའི་ཕྱིར༷། ཞེས་གཅིག་བདེན་གྱི་རྣམ་ཤེས་ཞིག་ཡོད་ན། རྟག་དངོས་ལ་ཇི་སྐད་བརྗོད་པ་སོགས་དོན་བྱེད་ཀྱི་ནུས་པས་སྟོང་པ་འབའ་ཞིག་ཏུ་འགྱུར་བས་དེ་རྣམ་ཤེས་སུའང་མི་རུང་ངོ་། །དེས་ན་གྲུབ་མཐས་ཇི་ལྟར་བརྟགས་ཇི་ལྟར་བརྗོད་ཀྱང་
ཡུལ་དུས་ཐམས་ཅད་དུ་ཤེས་པ་གཅིག་བདེན་ཞིག་བསྒྲུབ་མི་ནུས་པས། དེ་སྒྲུབ་མཁན་ལ་གྲུབ་འབྲས་མཐོང་བའི་དབུགས་ནམ་ཡང་མི་ཕྱིན་ཏོ། །གསུམ་པ། དེ་ཕྱིར་སྣ་ཚོགས་སྣང་བ་ཡི། །ཤེས་པ་རྣམ་པ་ཀུན་ཏུ་གནས། །དེ་ནི་རྣམ་
པ་ཐ་དད་ལྟར། །གཅིག་པུའི་རང་བཞིན་མི་རིགས་སོ། །ཞེས་གོང་དུ་ཇི་སྐད་བཤད་པ་དེ་ལྟར་དཔྱད་ན། ཡུལ་གཅིག་བདེན་མི་སྲིད་པའི་གནད་དེ༷་ཡི་ཕྱིར༷་ན་རྣམ་པ་སྣ༷་ཚོ༷གས་སུ་སྣང༷་བ༷་ཡི༷་རྣམ་པར་ཤེས༷་པ༷་འདི་ནི་དུས་རྣམ༷་པ༷་ཀུན༷་ཏུ། གན༷ས་སམ་དམིགས་
ཡུལ་དེ་ནི་རྣམ༷་པ༷་ཐ༷་ད༷ད་པ་ལྟར༷་ཤེས་པ་རང་ཡང་གཅི༷ག་པུའི༷་ར༷ང་བཞི༷ན་དུ་བདེན་པར་མི༷་རི༷གས་སོ༷། །ཡང་ན་གནས་ཞེས་གནས་སྐབས་ཀྱི་དོན་ཏོ། །ཞེས་མཇུག་བསྡུས་པའོ། །གཉིས་པ་ཕྱི་དོན་མི་འདོད་པ་རྣམ་རིག་པའི་ལུགས་དགག་པ་ལ་
ཕྱོགས་སྔ་བརྗོད་པ་དང་། ཚུལ་དེ་ལ་བརྟག་པ་གཉིས། དང་པོ། ཇི་སྟེ་ཐོག་མ་མེད་རྒྱུད་ཀྱི། །བག་ཆགས་སྨིན་པས་སྤྲུལ་པ་ཡི། །རྣམ་པ་དག་ནི་སྣང་བ་ཡང་། །ནོར་བས་སྒྱུ་མའི་རང་བཞིན་འདྲ། །ཞེས་གསུངས་ཏེ། དེ་ལ་རང་སྡེ་སེམས་
ཙམ་གྱི་ཚུལ་ལ་བརྟེན་ནས་བློ་གྲོས་དཀར་པོ་མངའ་བ་རྣམས་ཀྱིས་ཕྱི་རོལ་གྱི་སྣང་བ་སྣ་ཚོགས་པ་འདི་དག །རྡུལ་ཕྲ་རབ་ཏུ་འདོད་པ་ཉན་ཐོས་དང་། རྫས་དང་ཡོན་ཏན་ལས་སུ་འདོད་པ་བྱེ་བྲག་པ་སོགས་མཆོག་དང་མཆོག་མིན་གྱི་ལྟ་བའི་རྗེས་སུ་འབྲངས་པ་
13-1-92a


རྣམས་ཀྱི་བརྗོད་པ་མི་རིགས་པར་སྒྲུབ་པ་སྟེ། དེའང་ཕྱི་རོལ་གྱི་དོན་མེད་པར་སྒྲུབ་པའམ། གཟུང་འཛིན་རྫས་གཞན་དུ་འདོད་པ་འགོག་པ་ལ། སེམས་ཙམ་པ་རྣམས་ཀྱིས་སྐྱེས་ལ་འདྲ་བ་འགོག་པའི་རིགས་པ་ཞེས་བྱ་སྟེ། དེའང་མངོན་
སུམ་གྱི་སྣང་བ་དེ་ཕྱི་རོལ་གྱི་དོན་ལས་སྐྱེས་ཤིང་དེ་དང་འདྲ་བར་འདོད་པ་ལ་དེ་མི་འཐད་པའི་རིགས་པས་འགོག་པ་ལ་དེ་སྐད་དུ་བཏགས་པ་ཡིན་ལ། དེའང་ཐེག་བསྡུས་སོགས་སུ་རིགས་པའི་རྣམ་གྲངས་དུ་མ་གསུངས་ཀྱང་། གཙོ་བོར་དེ་དང་འདྲ་བར་སྐྱེས་ཙམ་
གྱི་ཕྱི་དོན་ཡོད་པར་མི་འགྲུབ་སྟེ། ཟླ་བ་གཉིས་སྣང་ལ་སོགས་པ་བཞིན་དུ་མ་ངེས་པར་བསྟན་པ་དང་། ཕྱི་དོན་ཕྲ་རགས་གང་ཡང་མི་འགྲུབ་པའི་ཕྱིར་དང་། ཆ་མེད་ཀྱི་ཕྲ་བ་དབང་ཤེས་ཀྱི་ཡུལ་དུ་མངོན་སུམ་མི་དམིགས། རགས་པ་མི་འགྲུབ་པས་ཕྱི་དོན་
མེད་པར་བསྒྲུབ་ལ། གཟུང་འཛིན་རྫས་ཐ་དད་མ་ཡིན་པར་བསྒྲུབ་པའི་གཙོ་བོ་སྣང་བ་ཐམས་ཅད་ཤེས་པ་གསལ་རིག་གི་ངོ་བོར་སྐྱེས་པའི་གཏན་ཚིགས་དང་། ལྷན་ཅིག་དམིགས་ངེས་ཀྱིས་སྒྲུབ་པར་བྱེད་པ་ཡིན་ཏེ། དེ་ལ་ཡུལ་སྔོན་པོ་དང་སྔོ་འཛིན་གྱི་ཤེས་པ་
གཉིས་དུས་ལྷན་ཅིག་ཏུ་ཚད་མས་དམིགས་པ་དང་། དེའང་རེས་འགའ་བ་མ་ཡིན་པར་གཏན་དུ་ཁྱབ་པའམ་ངེས་པ་སྟེ་འདི་ལྟར། ཡུལ་སྔོན་པོ་དང་སྔོ་འཛིན་གྱི་བློ་ཆོས་ཅན། རྫས་གཞན་མ་ཡིན་ཏེ། ལྷན་ཅིག་དམིགས་པ་ངེས་པའི་ཕྱིར། ཟླ་བ་
གཉིས་སྣང་བཞིན། ཞེས་འགོད་པའོ། །དེ་ལ་ལྷན་ཅིག་དམིགས་པར་ངེས་ན་ཅིའི་ཕྱིར་རྫས་གཅིག་ཡིན་དགོས་སོ་སྙམ་ན། གང་རྫས་གཅིག་མ་ཡིན་ན་རྫས་ཐ་དད་ཡིན་དགོས་ལ། རྫས་ཐ་དད་ལ་རྟགས་དེ་ཞུགས་པ་མི་སྲིད་དེ་སྔོ་སེར་ལ་སོགས་པ་བཞིན་ནོ། །
13-1-92b


ཐ་དད་པ་གང་དག་རེས་འགའ་ལྷན་ཅིག་དམིགས་ནའང་། དུས་རྟག་ཏུ་གཅིག་དམིགས་ན་ཅིག་ཤོས་ཀྱང་དེ་དང་ལྷན་ཅིག་དམིགས་པར་ངེས་པའི་ཁྱབ་པ་མ་ཡིན་ལ། སྔོན་པོ་དང་དེ་འཛིན་གྱི་བློ་གཉིས་ནི་ནམ་ཡང་ཅིག་ཤོས་མ་དམིགས་པར་གཅིག་ཡན་གར་དུ་
དམིགས་པ་མི་སྲིད་ཅིང་། གལ་ཏེ་དེ་གཉིས་རྫས་ཐ་དད་ན་དུས་རེས་འགའ་སོ་སོར་དམིགས་པའང་སྲིད་དགོས་པའི་ཕྱིར་རོ། །འདི་སྐབས་རྟགས་འདི་ལ་མ་གྲུབ་པ་སོགས་ཀྱི་སྐྱོན་གསུམ་སྤོང་བའི་ཚུལ་སོགས་ཞིབ་པར་བཤད་ན་གོ་བ་ལ་ཕན་པར་འོང་ཡང་རྩ་བའི་གནད་
ཙམ་བསྟན་པ་ཡིན་ནོ། །མདོར་ན་ལྷན་ཅིག་དམིགས་ངེས་ལ་སོགས་པ་གཟུང་འཛིན་རྫས་གཅིག་ཏུ་སྒྲུབ་པའི་རིགས་པ་ཐམས་ཅད་ཀྱི་ཕུག་གཏུགས་ནས་ཁོ་ཐག་གཅོད་ས་ནི། ཤེས་པ་ལ་སྣང་བ་ཡིན་ན་ཤེས་པ་ཡིན་དགོས་ཏེ། མ་ཤེས་ན་རང་གིས་མྱོང་བར་
ཡང་མི་རུང་བའི་གནད་གཅིག་པུ་དེ་ཟིན་ན་ལྷན་ཅིག་དམིགས་ངེས་སོགས་རིགས་པ་བརྒྱ་ཕྲག་གི་གྲོས་ཐག་ནང་ནས་ཆོད་པ་ཡིན་པས་ན། གཞུང་འདིར། རང་གིས་གྲུབ་པ་གང་ཡིན་པ། ཞེས་གསུངས་པ་དེ་ཙམ་ཞིག་ལ་ཟད་པར་འདུ་བས་དེར་བཤད་པར་བྱའོ། །
དེ་ལྟར་ན་རང་གི་རྣམ་པར་ཤེས་པ་གསལ་རིག་ཙམ་འཇུག་ཤེས་སོ་སོ་བའི་ཕྱོགས་སུ་མ་ལྷུངས་པ་ཞིག་ལ་བག་ཆགས་ཀྱི་རྟེན་དུ་གྱུར་པའི་ཀུན་གཞིའི་རྣམ་པར་ཤེས་པ་ཞེས་གདགས་པ་སྟེ། དེའང་ངོ་བོ་ལུང་མ་བསྟན་ཡུལ་གྱི་དོན་ཙམ་རིག་པ་རྒྱུན་སྐད་ཅིག་མར་
འབྱུང་བ། འཁོར་རེག་སོགས་ཀུན་འགྲོ་ལྔ་ཙམ་དང་ལྡན་པ། དམིགས་པ་མི་གསལ་བ། སྣོད་བཅུད་རྒྱ་ཆེན་པོ་ལ་དམིགས་པ་ཡིན་པར་འདོད་ལ། དབྱེ་ན་རྣམ་སྨིན་གྱི་ཆ་དང་ས་བོན་གྱི་ཆ་གཉིས་ཡོད་དོ། །དེ་དག་གི་ངོ་བོ་འཁོར་དམིགས་ཡུལ་སོགས་དེ་ལྟར་ཡིན་པའི་
13-1-93a


རྒྱུ་མཚན་ཡང་འཇུག་ཤེས་སོ་སོའི་ཕྱོགས་སུ་མ་ལྷུངས་པའི་ཤེས་པ་གསལ་རིག་གི་ངོ་བོ་ཙམ་ལ་གཟུང་བའི་གནད་ཟིན་ན་ཀུན་གཞིའི་ཁྱད་པར་ཐམས་ཅད་བདེ་བླག་ཏུ་ཤེས་ནུས་ཀྱི། གཞན་ལོགས་ཤིག་ཏུ་ཀུན་གཞི་ཞེས་པ་ནི་དམིགས་པ་
དང་ངོ་བོ་འདི་འདྲའོ་ཞེས་འཆད་ཅིང་བསམས་ན་བསྐལ་པར་བརྟགས་ནའང་གནད་ཕིགས་དཀའོ། །དེ་དག་གི་རྣམ་གཞག་ཞིབ་པར་གཞུང་གཞན་ལས་ཤེས་པར་བྱ་ལ། དེ་ལྟ་བུའི་ཀུན་གཞིའི་རྣམ་པར་ཤེས་པ་རྒྱ་མཚོ་ཆེན་པོ་དང་འདྲ་བ་ལས། རླབས་བཞིན་དུ་
ཚོགས་བདུན་འཁོར་དང་བཅས་པ་སྐྱེ་ཞིང་འགག་པའི་ནུས་པའམ་བག་ཆགས་ཏེ།  མདོར་ན་རང་འབྲས་ཕྱི་མ་སྐྱེད་ནུས་ཞིག་ཀུན་གཞི་ལ་བཞག་པ་དེ་ཉིད་མ་སྨིན་པ་ན་ས་བོན་གྱི་ཚུལ་དུ་གནས་ལ། སྨིན་པ་ན་ལུས་གནས་ལོངས་སྤྱོད་སྣ་ཚོགས་པར་སྣང་བ་སྟེ། 
ཡུལ་མེད་བཞིན་དུའང་གོམས་པའི་བག་ཆགས་ཀྱིས་སྣང་བ་སྣ་ཚོགས་ཉམས་སུ་མྱོང་བ་ནི་རྨི་ལམ་གྱི་ཤེས་པ་དང་མི་སྡུག་པ་ལ་སོགས་པ་གོམས་པའི་བློ་བཞིན་ནོ་ཞེས་འདོད་དོ། །དེ་ལ་སྣང་བ་སེམས་སུ་མི་འདོད་ན་མ་གཏོགས། འདོད་ཕན་ཆད་ཀུན་གཞི་ངེས་
པར་ཁས་བླང་དགོས་ཏེ། འཇུག་ཤེས་རྣམས་སོ་སོ་བ་ཕྱོགས་སུ་ལྷུང་བ་ཅན་ཡིན་པས། དེ་རེ་རེ་ནས་ཕྱི་ནང་གི་དངོས་པོ་གནས་ལུས་ལོངས་སྤྱོད་ཐམས་ཅད་ཀུན་གྱི་གཞིར་མི་རུང་ལ་སྣང་བ་སྣ་ཚོགས་པ་སེམས་ཙམ་མོ་ཞེས་པའི་སེམས་དེ་ཡུལ་ཤེས་ལུས་ཀུན་གྱི་གཞི་
ཡིན་དགོས་པས་སེམས་གསལ་རིག་ཙམ་ལས་འདའ་བ་མེད་དོ། །དེ་ལྟ་བུའི་ལུགས་དེ་དག་མདོར་བསྡུས་སུ་བརྗོད་པར་དགོངས་ནས། ཇི༷་སྟེ༷་ཐོག༷་མ༷་མེ༷ད་པ་ནས་གནས་པའི་རང་གི་སེམས་ཀྱི་རྒྱུ༷ད་ཀྱི༷། དངོས་ཞེན་གྱི་བག༷་ཆག༷ས་སྣ་ཚོགས་ཡོངས་སུ་སྨི༷ན་པ༷ས་
13-1-93b


སྤྲུལ༷་པ༷་ཡི༷་ཡུལ་གཟུགས་ལ་སོགས་པའི་རྣམ༷་པ༷་ད༷ག་ནི༷་སྣང༷་བ༷་འདི་ཡ༷ང་། ཚོར་བ་པོ་དང་ཚོར་བར་བྱ་བའི་ཡུལ་གཉིས་སུ་རྒྱང་ཆད་དུ་གྲུབ་པ་ཅུང་ཟད་མེད་ཀྱང་ཡུལ་དང་ཡུལ་ཅན་ལྟ་བུར་སྣང་བ་ནི། སེམས་འཁྲུལ་པའམ་ནོ༷ར་བས༷་མེད་བཞིན་སྣང་བ། སྒྱུ༷་མའི༷་ར༷ང་
བཞི༷ན་དང་། དེ་བཞིན་དུ་རྨི་ལམ་དྲི་ཟའི་གྲོང་ཁྱེར་མགལ་མེའི་འཁོར་ལོ་སྤྲུལ་པ་ཆུ་ཟླ་རྣམས་དང་འདྲ༷འོ་ཞེས་སེམས་ཙམ་པ་རྣམས་འདོད་དོ་ཞེས་སོ། །གཉིས་པ་ཚུལ་དེ་ལ་བརྟག་པ་ལ། དེ་དག་གི་སྐྱོན་ཡོན་ལ་བརྟག་པ་དང་། སྐྱོན་གྱི་ཆ་དགག་
པའོ། །དང་པོ། དེ་དགེ་འོན་ཀྱང་དེ་དག་གི། དངོས་དེ་ཡང་དག་ཉིད་དམ་ཅི། །འོན་ཏེ་མ་བརྟགས་གཅིག་པུ་ན། །དགའ་བར་ཁས་ལེན་འདི་བསམ་མོ། །ཞེས་དེ་ལྟ་བུའི་ལུགས་དེ༷་ཐ་སྙད་ཀྱི་རིགས་པས་གྲུབ་པ་ཡིན་ལ། གཟུང་འཛིན་ཐ་དད་དུ་ཞེན་
པའི་ལྟ་བ་ངན་པ་རྣམས་སེལ་བའི་གཉེན་པོ་རྣམ་པར་དཀར་བ་ཡིན་ཞིང་། ལང་ཀར་གཤེགས་པ་ལ་སོགས་པའི་ལུང་ཡང་དག་དང་ལྡན་པ་ཡིན་པས་ན་དགེ༷་བའམ་ལེགས་པ་ཡིན་མོད་ཀྱི། འོ༷ན་ཀྱང༷་ཤེས་པ་ཉིད་རྣམ་པ་སྣ་ཚོགས་པར་སྣང་བ་དེ༷་དག༷་གི༷་དངོ༷ས་པོ་དེ༷་ཡང༷་དག༷་
པ་ཉི༷ད་དམ༷་ཅི༷། འོ༷ན་ཏེ༷་མ༷་བརྟག༷ས་གཅི༷ག་པུ༷་ཡི་དབང་དུ་ན༷་ཉམས་དགའ༷་བར༷་བྱེད་པའི་བདག་ཉིད་དུ་ཁས༷་ལེན༷་པ་གང་ཡིན་པའི་ཚུལ་འདི༷་བས༷མ་པའམ་བརྟག་པར་བརྩམ་མོ༷། །དེ་ལ་སེམས་ཙམ་པ་དག་མ་བརྟགས་སྣང་ཙམ་གྱི་ཐ་སྙད་ཀྱི་འཇོག་ཚུལ་ཁོ་ནའི་དབང་
དུ་མ་ཡིན་པར་དོན་དམ་པ་ལའང་རྣམ་ཤེས་དེ་ནི་ངོ་བོས་གྲུབ་པར་འདོད་པས་ཡང་དག་པར་ཁས་ལེན་པ་ཡིན་ནོ། །དེས་ན། གཉིས་པ་སྐྱོན་གྱི་ཆ་རྣམ་ཤེས་བདེན་གྲུབ་དགག་པ་ལ། རྣམ་བདེན་པའི་ལུགས་དང་། རྣམ་བརྫུན་པའི་ལུགས་དགག་པ་གཉིས།
13-1-94a


དང་པོ་ལ་སྒོ་ང་ཕྱེད་ཚལ་བ། རྣམ་ཤེས་གྲངས་མཉམ་པ། སྣ་ཚོགས་གཉིས་མེད་པའི་ལུགས་དགག་པ་གསུམ། དང་པོ་ལ་འགལ་བ་སྟོན་པ་དང་། འགལ་སྤོང་མི་ནུས་པའི་ཚུལ་བཤད་པ་གཉིས། དང་པོ། 
གལ་ཏེ་ཡང་དག་རྣམ་པར་ཤེས། །དུ་མར་འགྱུར་རོ་ཡང་ན་ནི། །དེ་དག་གཅིག་འགྱུར་འགལ་ལྡན་པས། །གདོན་མི་ཟ་བར་སོ་སོར་འགྱུར། །ཞེས་གོང་ལྟར་ཐ་སྙད་ཙམ་དུའམ། དོན་དམ་པར་ཡང་ཁས་ལེན་པ་གང་ཡིན་བརྟག་པའི་ཚེ་ན། ག༷ལ་ཏེ༷་
ཡང༷་དག༷་པའི་དོན་དུའང་རྣམ་ཤེས་ནི་ཡོད་དོ་ཞེ་ན། ཞེས་སེམས་ཙམ་སྤྱིའི་འདོད་པ་སྐབས་ཀྱི་དགག་བྱ་སྟན་ནས། སེམས་དོན་དམ་དུ་གྲུབ་པར་འདྲ་ཡང་། སྣང་བའི་རྣམ་པ་འདི་དག་སེམས་སུ་བདེན་པར་ཁས་ལེན་པ་རྣམ་བདེན་པ་དང་། དེ་སེམས་སུ་
བདེན་པར་ཁས་མི་ལེན་པའི་རྣམ་བརྫུན་པ་གཉིས་སུ་ཡོད་ལ་དེ་གཉིས་ལས་རྟོགས་ཚུལ་གཞན་པ་མི་སྲིད་དོ། །རྣམ་བདེན་པ་ལའང་རྣམ་པ་དང་ཤེས་པ་གཉིས་མང་ཉུང་ལ་འདོད་ཚུལ་མུ་གསུམ་བྱུང་བ་ནི་མདོ་སྡེ་པ་དང་འདྲ་བ་ལ། མདོ་སྡེ་པས་རྣམ་པ་གཏོད་བྱེད་
ཀྱི་ཕྱི་དོན་ལོགས་སུ་ཡོད་པར་ཁས་ལེན་ལ། སེམས་ཙམ་པས་རྣམ་པ་སྣང་བ་དེ་ཉིད་ཡུལ་དུ་བཏགས་ཀྱི། དེ་ལས་ཕ་རོལ་ན་ལོགས་སུ་ཕྱི་དོན་མི་འདོད་པ་ཙམ་གྱི་ཁྱད་པར་རོ། །དེས་ན་དེ་གསུམ་གྱི་འདོད་ལུགས་སྔར་མདོ་སྡེ་པའི་སྐབས་སུ་བཤད་པ་
བཞིན་ཡིན་པས་འདིར་ལོགས་སུ་སྨོས་མ་དགོས་ལ། དེ་གསུམ་གྱི་ནང་གི་སྒོ་ང་ཕྱེད་ཚལ་བའི་ལུགས་ལྟར་ན་མི་འཐད་དེ། སེམས་དང་རྣམ་པ་གཅིག་ཡིན་ན་ཆ་མེད་གཅིག་པུའི་རྣམ་པ་ཁོ་ན་སྣང་བར་མི་རིགས་པས་རྣམ་པ་ལ་སྣ་ཚོགས་ཡོད་པ་བཞིན་དུ་
13-1-94b


རྣམ༷་པ༷ར་ཤེ༷ས་པའང་དུ༷་མར༷་འགྱུར་རོ༷། །ཡ༷ང་ན༷་ནི༷་རྣམ་ཤེས་གཅིག་ཏུ་འདོད་པ་དེ་བཞིན་རྣམ་པ་དེ༷་དག༷་ཀྱང་གཅི༷ག་ཏུ་འགྱུར༷་གྱི། དུ་མར་སྣང་མི་རིགས་ལ། དེ་ལྟ་བུར་མི་འགྱུར་ན་གཅིག་ནི་དུ་མ་དང་ཅིག་ཤོས་དུ་མ་མ་ཡིན་པའི་དེ་གཉིས་འགལ་བ་དང་ལྡན༷་པས༷་
གདོ༷ན་མི༷་ཟ༷་བར༷་སོ༷་སོ༷ར་འགྱུར༷་དགོས་པས་གཅིག་ཡིན་པར་ཁས་བླངས་པའང་དོན་མེད་དོ། །དེ་ལ་རྣམ་པ་རྣམས་ནི་སྤྱིར་གཅིག་ཁོ་ན་མ་ཡིན་པར་དུ་མ་སྣ་ཚོགས་སུ་སྣང་བ་ལ་བསྙོན་དུ་མེད་ཅིང་རྒོལ་བ་རང་ཡང་ཁས་ལེན་མོད། འོན་ཀྱང་རྣམ་ཤེས་བདེན་པར་
འདོད་པ་ཡིན་ལ། བདེན་ན་གཅིག་དུ་མ་གང་རུང་དུ་བདེན་དགོས་ལ། དུ་མར་བདེན་པའང་གཅིག་བདེན་ལ་བརྟེན་ནས་ཡོད་དགོས་པས། གལ་ཏེ་བདེན་པ་ཡོད་ན་གཅིག་བདེན་ལས་འདའ་མི་སྲིད་པ་ནི་སྤྱིར་བཏང་ཡིན་པས། འདིར་སྤྱིར་རྣམ་ཤེས་གཅིག་བདེན་
འགོག་པ་ལ་རྣམ་པ་དུ་མ་ཡིན་པ་ཙམ་གྱིས་ཆོག་གི། དུས་རིམ་ཅིག་ཅར་གྱི་ཁྱད་པར་ཕྱེ་ནས་དགག་དགོས་པ་མ་ཡིན་པས། ཤེས་པ་གཅིག་གིས་རྣམ་པ་གཅིག་དུས་རིམ་ཅན་དུ་ཤེས་ཀྱང་རུང་། རྣམ་པ་སྔ་ཕྱི་གཅིག་མིན་པས་དེ་གཉིས་འཛིན་པའི་ཤེས་པ་གཅིག་བདེན་
མི་འགྲུབ་པ་ཡིན་ཞིང་། སྐབས་འདིར་སྐད་ཅིག་མའི་རྣམ་ཤེས་གཅིག་བདེན་དོན་དམ་པར་དགག་པ་ལ་ནི་མདོ་སྡེ་པའི་སྐབས་སུ་བཤད་པ་བཞིན་རྣམ་པ་རེ་རེ་བ་ཐ་སྙད་དུའང་མི་འཐད་པར་བསྟན་ཟིན་པ་ཡིན་ཏེ། དེའང་དོན་སྨྲ་བས་ཕྱི་དོན་ཁྲ་བོའི་སྟེང་ན་སྔོ་སེར་སོགས་
དུས་མཉམ་དུ་ཡོད་ཀྱང་བློ་རིམ་ཅན་དུ་འཇུག་པ་ཡིན་ནོ་སྙམ་པ་བཀག་ཟིན་ལ། འདིར་ཕྱི་དོན་མི་འདོད་པས་ཀུན་གཞིའི་བག་ཆགས་སྨིན་ཟིན་གྱི་སྣང་བ་ཁྲ་བོའི་རྣམ་པ་ལ་སྔོ་སོགས་དུས་མཉམ་དུ་ཡོད་དགོས་པར་གྲུབ་པས་དེ་རྣམ་པ་དུ་མ་ཡིན་པ་ཙམ་གྱིས་ཆོག་གོ །
13-1-95a


དེས་ན་སེམས་ཙམ་པ་སྒོ་ང་ཕྱེད་ཚལ་བའི་ལུགས་འདིར་ཁྲ་བོའི་རྣམ་པའི་གཟུང་རྣམ་དེའང་ཁྲ་ཙམ་གཅིག་ཡིན་པར་འདོད་པ་ནི་ཁྱད་པར་ཡིན་ལ། དེར་གཅིག་མིན་པའི་སྐྱོན་ནི་དེ་མ་ཐག་ཏུ་འཆད་པར་འགྱུར་རོ། །སྤྱིར་ཐ་སྙད་དུའང་
མ་གྲུབ་ན་དོན་དམ་པར་ལྟ་ཅི་སྨོས་ཏེ། མའི་མངལ་ནས་ཤི་ཟིན་པ་ལ་བཙས་པའི་ཚེ་གསོད་མི་དགོས་པ་བཞིན་ནོ། །གཉིས་པ་ལ་ཐལ་བ་འགོད་པ་དང་། སྐྱོན་དེ་ཕྱི་དོན་ཁས་ལེན་པའི་རྣམ་བཅས་པ་ལའང་མཚུངས་པར་སྟོན་པའོ། །དང་པོ་
འགལ་བ་དེ་ནམ་ཡང་སྤོང་མི་ནུས་པའི་རྒྱུ་མཚན། རྣམ་པ་ཐ་དད་མ་ཡིན་ན། །གཡོ་དང་མི་གཡོ་ལ་སོགས་པ། །གཅིག་གིས་ཐམས་ཅད་གཡོ་ལ་སོགས། །ཐལ་བར་འགྱུར་ཏེ་ལན་གདབ་དཀའ། །ཞེས་གསུངས་ཏེ། གོང་དུ་ཤེས་
རྣམ་ལ་བརྗོད་པའི་སྐྱོན་བཤད་མ་ཐག་པ་དེ་རྣམ་ཤེས་བདེན་གྲུབ་ཏུ་སྨྲ་ཞིང་རྣམ་པ་གཅིག་ཤེས་པ་གཅིག་གིས་ཤེས་པར་འདོད་པའི་ལུགས་ལ་བཟློག་མེད་དུ་འཇུག་སྟེ། འདི་ལྟར་དེ་དག་གི་ཡང་རྣམ༷་པ༷་དུ་མ་ཡོད་པ་རྣམས་ཐ་ད༷ད་མ༷་ཡི༷ན་པར་བསྡོམས་ཏེ་
གཅིག་གི་ངོ་བོར་འདོད་ན༷་ནི། གཡོ༷་བ་ད༷ང་མི༷་གཡོ༷་བ་དང་ཚོན་གྱིས་བསྒྱུར་བ་དང་མ་བསྒྱུར་བ་ལ༷་སོག༷ས་པ༷་གཅི༷ག་གི༷ས། གཞན་ལྷག་མ་ཐམ༷ས་ཅ༷ད་ཀྱང་གཡོ༷་བ་མི་གཡོ་བ་ལ༷་སོགས་སུ་འགྱུར་དགོས་ཏེ། མདོར་ན་རྣམ་པ་གཅིག་ལ་ཅི་མཐོང་བ་
གཞན་ཀུན་ལའང་མཐོང་བར་ཐལ༷་བར༷་འགྱུར༷་ཏེ། རང་གི་རྣམ་པ་ཐ་དད་མིན་ནོ་ཞེས་ཁས་བླངས་ཟིན་པས་ད་ལྟ་དེ་ལྟར་མི་འགྱུར་བར་ཁ་ཅིག་ནི་གཡོ་ཡང་ཁ་ཅིག་ནི་མི་གཡོ་བའི་ཐ་དད་པར་སྨྲ་མི་ནུས་པས། ཐལ་བ་འདི་ལ་ལན༷་གད༷བ་པར་དཀའ༷་འོ། །དེ་
13-1-95b


ལྟར་རྣམ་པའི་ཁྲ་བོ་ལའང་གཅིག་བཏགས་ཙམ་མིན་པར་བདེན་གཅིག་ཡིན་ན་གཅིག་པུ་ཆ་མེད་ཡིན་པའི་ཕྱིར། དེའི་ནང་གི་དཀར་པོ་ལྟ་བུ་གཅིག་ཚོན་གྱིས་བསྒྱུར་ན་ཆ་ཤས་གཞན་རྣམས་ཀྱང་བསྒྱུར་བར་ཐལ་བ་སོགས་སུ་མཐོང་དགོས་ན་དེ་ལྟར་ཡིན་པར་ཁས་ལེན་
སུས་ཀྱང་མི་ནུས་ལ།  དེ་ལྟར་རྣམ་པ་རྣམས་ཐ་དད་པ་ཡིན་ཕན་ཆད་གོང་གི་ཐལ་བ་དེ་བཟློག་མེད་དུ་འབབ་པ་ཡིན་གྱི། ད་རུང་དེ་ལ་གྲོགས་སུ་དགོས་པ་ཅུང་ཟད་ཀྱང་མེད་དོ། །གཉིས་པ། ཕྱི་རོལ་དོན་གྱི་ཚུལ་ལ་ཡང་། །དེ་ལྟར་རྣམ་པ་མ་བྲལ་ན། །
གཅིག་གི་ཆོས་སུ་ཐམས་ཅད་ཀྱང་། །འཇུག་པར་འགྱུར་ཏེ་བཟློག་པ་མེད། །ཅེས་དེ་འདྲ་བའི་ཐལ་བ་དེ་ཕྱི་དོན་མི་འདོད་པའི་སེམས་ཙམ་གྱིས་འདོད་པའི་རྣམ་པ་ཁོ་ན་ལ་འཇུག་གི གཞན་དོན་སྨྲ་བས་འདོད་པའི་ཕྱི་དོན་དངོས་ལ་མི་འཇུག་པའང་མ་ཡིན་ཏེ།
སེམས་ལས་གུད་ན་ཡོད་པར་འདོད་པ་ཕྱི༷་རོ༷ལ་དོ༷ན་གྱི༷་ཚུལ༷་ལམ་དངོས་པོ་ལ༷་ཡ༷ང་། སེམས་ཙམ་པའི་འདོད་པ་དེ༷་ལྟར༷་རྣམ༷་པ༷་དུ་མ་དང་ལྷན་ཅིག་པའི་རང་བཞིན་དང་མ༷་བྲལ༷་བར་རྣམ་བཅས་སུ་ཁས་ལེན་ན༷། རྣམ་པ་རྣམས་གཅིག་པར་འདོད་པ་དེའི་ཕྱིར། རྣམ་
པའི་རྒྱུ་ཕྱི་རོལ་གྱི་དོན་རྣམས་ཀྱང་། དེའི་ནང་གི་ཆ་ཤས་གང་ཡང་རུང་བ་གཅི༷ག་གི༷་ཆོས༷་སུ༷་གཞན་ཐམ༷ས་ཅ༷ད་ཀྱང༷་འཇུ༷ག་པར༷་འགྱུར༷་ཏེ༷་ཐལ་བ་དེ་བཟློ༷ག་ཏུ༷་མེ༷ད་དོ། །རྣམ་པ་རྣམས་ནི་ཕྱི་དོན་ཇི་འདྲ་བ་ཡིན་ན་རྣམ་པ་གཅིག་པ་དེ་བཞིན་ཕྱི་དོན་ཡང་དེ་ལྟར་ཅིས་མི་
འགྱུར་ཏེ་ཕྱི་དོན་ཁྲ་བོའི་ནང་གི་དཀར་པོ་ལྟ་བུ་གཅིག་ལ་ཚོན་བྱུགས་ན་གཞན་སྔོ་སོགས་ཐམས་ཅད་ལའང་དེ་ཁོ་ན་ལྟར་ཡོད་དགོས་པར་འགྱུར་རོ། །ཞེས་སོ། །དེ་ལྟར་རྣམ་པ་དེ་དག་གཅིག་བདེན་ཡིན་མི་སྲིད་པའི་གོ་བ་སྤྱིར་བཏང་བ་གལ་ཆེའོ། །དུ་མ་ལ་གཅིག་
13-1-96a


ཏུ་ཞེན་པས་སྒྲོ་འདོགས་པ་ཅིའང་སྲིད་ཀྱང་རིགས་པའི་ཚུལ་གྱིས་གཅིག་བདེན་ལ་ཐ་དད་དུ་སྣང་མི་སྲིད་པ་དང་།  གཅིག་ཏུ་བཏགས་པ་ལ་དེ་ལྟར་རུང་བ་དང་། དེ་བཞིན་དུ་དུ་མར་བདེན་པ་ལ་གཅིག་ཏུ་གཞག་མི་རུང་བ་དང་། 
དུ་མར་བཏགས་པ་ལ་གཅིག་ཏུ་གདགས་རུང་བ་སྟེ་དངོས་བཏགས་ཀྱིས་ཁྱད་ཕྱེ་ཞིང་བཏགས་པ་ལ་ཐ་སྙད་འཐད་པར་ཡིད་ཆེས་པ་འདིའི་དབུ་ཞབས་བར་གྱི་སྐབས་ཐམས་ཅད་དུ་གལ་ཆེ་ཤོས་ཡིན་ནོ། །གཉིས་པ་རྣམ་ཤེས་གྲངས་མཉམ་པའི་
ལུགས་དགག་པ། ཇི་སྟེ་རྣམ་པའི་གྲངས་བཞིན་དུ། །རྣམ་པར་ཤེས་པ་ཁས་ལེན་ན། །དེ་ཚེ་རྡུལ་ཕྲན་འདྲར་འགྱུར་བ། །དཔྱ༷ད་པ་འདི་ལས་བཟློག་པར་དཀའ། །ཞེས་གསུངས་ཏེ། སྐབས་འདིར་སྔོན་གྱི་རྣམ་རིག་སྨྲ་བའི་སློབ་དཔོན་ཁ་
ཅིག་དུས་ཅིག་ཅར་རིགས་མཐུན་པའི་ཤེས་པ་དུ་མ་སྐྱེ་བར་འདོད་པ་ནི་ཐ་སྙད་དུའང་མི་འཐད་ལ། རང་ལུགས་ལ་རྣམ་པའི་གྲངས་བཞིན་ཤེས་པ་དུ་མ་སྐྱེ་ཡང་རིགས་མཐུན་དུ་མི་འགྱུར་བས་རིགས་མཐུན་དུ་མ་ལྷན་ཅིག་མི་སྐྱེ་བའི་ཚུལ། རྟོག་དང་རྟོག་མེད་ཀྱི་བྱེད་
པ་ཤན་ཕྱེས་ཏེ་སྔར་ཅུང་ཟད་བཀོད་པ་ལྟར་ཡིན་ལ། དེ་ལྟར་རང་ལུགས་ཀྱི་ཁས་ལེན་ཐུན་མོང་མིན་པ་དེ་ལྟར་ན་བཏགས་པའི་ཐ་སྙད་དུ་མི་འཐད་པ་ཅུང་ཟད་ཀྱང་མེད་པའི་ལུགས་འདི་དབུ་མ་ལ་མཛེས་པ་ཡིན་ནོ། །འོན་ཀྱང་སེམས་ཙམ་པའི་ལུགས་ལ་ཇི༷་སྟེ་
རྣམ༷་པའི༷་གྲང༷ས་བཞིན༷་དུ༷་རྣམ༷་པར༷་ཤེས༷་པ༷་ཡང་དུ་མར་ཁ༷ས་ལེ༷ན་ན༷་ཡང་། ཁོ་རང་གི་རྣམ་ཤེས་བདེན་གྲུབ་ནི་མི་འགྲུབ་སྟེ། དེ་ལྟར་དུ་མར་སྣང་བ་དེ༷་ཡི་ཚེ༷་ན། དུ་མའི་ནང་གི་གཅིག་ལའང་མཐའ་དབུས་ཕྱོགས་ཀྱི་ཆར་སྣང་བའི་རྣ མ་པ་དུ་མ་ཡོད་པ་དཔེར་ན། 
13-1-96b


རྡུལ༷་ཕྲན༷་ལ་བརྟག་པ་ཇི་འདྲ་དེ་འདྲ༷ར་འགྱུར༷་བ༷་ཁོ་ན་ཡིན་ཏེ། བརྟགས་པ་དེ་རྡུལ་ལ་འཇུག་ཀྱང་ཤེས་པ་ལ་མི་འཇུག་ཅེས་པ་སོགས་ལན་གྱི་གོ་སྐབས་ཀྱང་མེད་དེ། དེ་གཉིས་སྣང་ལུགས་ལ་ཁྱད་མེད་པའི་ཕྱིར་ན་དཔྱ༷ད་པ༷་འདི༷་ལ༷ས་བཟློ༷ག་པ༷ར་དཀ༷འ་སྟེ་བཟློག་མི་ནུས་
སོ་ཞེས་སོ། །དེ་ལ་རང་ལུགས་རྣམ་པའི་གྲངས་བཞིན་ཤེས་པ་དུ་མ་ཡོད་པར་འདོད་པའི་དུ་མ་ནི་བཏགས་པ་ཡིན་ཀྱང་རྣམ་པ་དུ་མར་སྣང་བ་མི་འགོག་པར་རྟེན་འབྲེལ་ཙམ་དུ་ཡོད་དེ། དཔེར་ན་བུམ་པ་ལྟ་བུ་གཅིག་ལའང་ཆ་དུ་མ་དང་། ཆ་ལ་རྡུལ་ཕྲན་དུ་མ།
རྡུལ་ལ་གཅིག་བདེན་གང་ཡང་མེད་བཞིན་སྣང་བཏགས་ཀྱི་བྱ་བྱེད་བསླུ་མེད་བསྙོན་མེད་དུ་འཇོག་ནུས་པ་སོགས་ཤེས་བྱ་རབ་འབྱམས་ཀུན་ཀྱང་དེ་ཁོ་ན་འདྲ་བ་ཡིན་ནོ། །དེ་ལ་ཁྲ་བོ་འཛིན་པའི་རྣམ་པ་དུ་མའི་ནང་གི་སྔོན་པོ་ལྟ་བུ་གཅིག་ལའང་དབུས་ཀྱི་ཆ་ན་སྣང་
བའི་རྣམ་པ་དེ་ལ་བར་མེད་དུ་བསྐོར་བར་སྣང་བའི་ཕྱོགས་ཆ་སོ་སོར་གཏད་པའི་ངོས་གཅིག་ཡིན་ན་ཕྱོགས་ཆར་སྣང་བའི་རྣམ་པ་རྣམས་གཅིག་ཏུ་ཐལ་བ་དང་། ངོས་སོ་སོར་ཡོད་ན་དབུས་ཀྱི་རྣམ་པའི་རང་བཞིན་གྱི་རྣམ་ཤེས་དུ་མར་ཐལ་ལོ། །བར་མེད་རིགས་
གཅིག་པའི་རྡུལ་དུ་མ་བཟུང་བ་ན་རགས་པ་ལ་གོང་བུ་གཅིག་ཏུ་འཁྲུལ་བ་དང་། བར་མེད་པར་དུ་མ་མྱངས་པའི་སྔོན་པོ་ལ་སོགས་པའི་རིག་པ་ལ་རྣམ་པ་གཅིག་ཏུ་འཁྲུལ་ཞེས་བྱ་བ་འདི་ལ་བྱེ་བྲག་ཇི་ཡོད་དེ། སྔོན་པོ་སོགས་བར་མེད་དུ་སྣང་བ་དེ་ཉིད་ཁ་
ཅིག་གིས་རྡུལ་ཕྲ་རབ་ཀྱི་བདག་ཉིད་དུ་ཁས་བླངས་ལ། གཞན་རིག་པའི་ངོ་བོར་འདོད་པ་ཙམ་ལས་ཕྱོགས་ཀྱི་ཆ་དང་བཅས་པར་སྣང་ཞིང་ཕྱོགས་སོ་སོ་བ་གཅིག་ཡིན་པར་ནི་སུས་ཀྱང་འདོད་མི་ནུས་པས་དཔྱད་པ་འཇུག་པའི་སྐྱོན་མཚུངས་པ་ཉིད་ལས་མི་འདའོ། །
13-1-97a


རིགས་མཐུན་ནམ་མི་མཐུན་པ་གང་ཡིན་ཀྱང་བར་མེད་དུ་སྣང་བའི་དོན་སྣང་གི་རྣམ་པ་ཐམས་ཅད་ལ་བརྟག་པ་འདི་འདུག་འཇུག་གོ། །གསུམ་པ་སྣ་ཚོགས་གཉིས་མེད་པ་དགག་པ་ལ། སུན་འབྱིན་གྱི་དམ་བཅའ་འགོད་པ་
དང་། དེའི་འཐད་པ་སྒྲུབ་པའོ། །དང་པོ། གལ་ཏེ་སྣ་ཚོགས་དེ་གཅིག་ན། །ནམ་མཁའི་གོས་ཅན་ལུགས་སམ་ཅི། །སྣ་ཚོགས་གཅིག་པའི་རང་བཞིན་མིན། །རིན་ཆེན་སྣ་ཚོགས་ལ་སོགས་འདྲ། །ཞེས་གསུངས་ཏེ། གང་དག་ནོར་
བུ་གཟི་བཞིན་དུ་རྣམ་པར་ཤེས་པ་གཅིག་ཁོ་ནས་སྣ་ཚོགས་ཀྱི་ངོ་བོ་བཟུང་ངོ་ཞེས། གལ༷་ཏེ༷་རྣམ་པ་སྣ༷་ཚོག༷ས་ཡོད་ཀྱང་དེ༷་ཀུན་ཤེས་པ་གཅི༷ག་གི་རང་བཞིན་ཡིན་ན༷་དངོས་ཀུན་གཅིག་ཡིན་ནོ་ཞེས་དུ་མ་གཅིག་པར་སྨྲ་བ། གོས་མེད་པས་ན་ནམ༷་མཁ༷འི་གོ༷ས་ཅ༷ན་ཞེས་
བཏགས་པ་གཅེར་བུ་པའི་ལུག༷ས་ས༷མ་ཅི༷་ཞིག་སྟེ། སྣ་ཚོགས་པའི་དངོས་པོ་ནི་དུ་མ་ཡོད་པའི་དབང་གིས་ཡིན་ན་དེ་གཅིག་ཏུ་ག་ལ་རུང་སྟེ། དེས་ན་སྣ༷་ཚོ༷གས་པ་དག་གཅི༷ག་པ༷འི་ར༷ང་བཞི༷ན་དུ་བདེན་པ་མི༷ན་ཏེ། དཔེར་ན། གསེར་དངུལ་བྱེ་རུ་མུ་མེན་ལ་སོགས་
པ་རིན་ཆེན༷་སྣ༷་ཚོག༷ས་པ་དང་ལ༷་སོག༷ས་པའི་སྒྲས་སེམས་རྒྱུད་སྣ་ཚོགས་ལ་ཡོད་པའི་ཤེས་པའི་རང་བཞིན་དང་འདྲ༷འོ། །ཞེས་སོ། །དེ་ལ་གཅེར་བུ་པ་དང་འདི་གཉིས་སྣ་ཚོགས་ལ་གཅིག་ཏུ་བཟུང་བར་འདྲ་བ་དང་། དེ་བཞིན་གསང་བ་པས་ཀྱང་ཐམས་ཅད་
ཤེས་པའི་རང་བཞིན་དུ་སྨྲ་ཡང་འདིས་རྣམ་ཤེས་གཅིག་པུ་མི་འདོད་པར་ཚོགས་བརྒྱད་འདོད་ལ། དེའང་འགྲོ་བ་སོ་སོའི་རྒྱུད་ལ་རེ་རེ་བཞིན་ཡོད་པ་དང་དེའང་སྐད་ཅིག་མར་འདོད་ལ། གསང་བ་པས་རྣམ་ཤེས་གཅིག་པུ་རྟག་པ་འགྲོ་བ་ཐམས་ཅད་ལ་ཐ་དད་དུ་མེད་པར་
13-1-97b


འདོད་པའི་ཁྱད་པར་ཙམ་མོ། །དེས་ན་སུན་འབྱིན་འདི་ཐུན་མོང་དུ་ཡིན་པར་བཤད་དོ། །དེའང་རྩོད་ངག་ཡན་ལག་གཉིས་ལྡན་དུ་འགོད་ན། གང་སྣ་ཚོགས་སུ་སྣང་བ་དེ་གཅིག་པུར་བདེན་པ་མ་ཡིན་པས་ཁྱབ། དཔེར་ན། རིན་ཆེན་སྣ་ཚོགས་ལ་སོགས་པ་བཞིན།
རྣམ་པར་ཤེས་པ་འདིའང་སྣ་ཚོགས་པ་ཡིན་ནོ། །ཞེས་སོ། །དེ་ལ་རྟགས་འདི་རང་བཞིན་འགལ་བ་དམིགས་པ་ཡིན་ཏེ། གཅིག་པུའི་རང་བཞིན་དང་འགལ་བ་སྣ་ཚོགས་པ་དག་ཉེ་བར་དམིགས་པ་རྟགས་སུ་བཀོད་པ་ཡིན་ནོ། །དཔེ་འདི་གཅེར་བུ་པའི་ལུགས་
ལ་ཡིན་གྱི། སེམས་ཙམ་པ་ལ་རིན་པོ་ཆེ་མ་གྲུབ་པའི་དཔེ་སེམས་རྒྱུད་སྣ་ཚོགས་ལ་ཡོད་པའི་ཤེས་པ་བཞིན་ནོ་ཞེས་འགོད་པར་ཀ་མ་ལ་ཤཱི་ལས་གསུངས་སོ། །འོན་ཀྱང་སྣང་ཚུལ་གྱི་དབང་དུ་ན་རིན་ཆེན་སྣ་ཚོགས་བཀོད་ཀྱང་མི་འགལ་ལོ། །གཉིས་པ་འཐད་
པ་ནི། སྣ་ཚོགས་གཅིག་པའི་རང་བཞིན་ན། །སྣ་ཚོགས་ངོ་བོར་སྣང་བ་དང་། །བསྒྲིབས་དང་མ་བསྒྲིབས་ལ་སོགས་པ། །ཐ་དད་འདི་ནི་ཇི་ལྟར་འགྱུར། །ཞེས་སྣ༷་ཚོ༷གས་པའི་རྣམ་པ་ཐམས་ཅད་ངོ་བོ་གཅི༷ག་པའི༷་རང༷་བཞི༷ན་ཡིན་ན༷། འདི་ལྟར་རང་
བཞིན་མི་མཚུངས་པ་སྣ༷་ཚོ༷གས་ཀྱི་ངོ༷་བོ༷ར་སྣང༷་བ༷་ད༷ང་། ལ་ལ་ནི་བསྒྲི༷བས་པ་ད༷ང་། ལ་ལ་མ༷་བསྒྲི༷བས་པ་དང་། ལ་ལ་སྐྱེ་བ་དང་། ལ་ལ་འགག་པ་ལ༷་སོག༷ས་པ༷་མདོར་ན་མི་འདྲ་བའམ། ཐ༷་ད༷ད་པ་དག་ཏུ་སྣང་བ་འདི༷་ནི༷་ཇི༷་ལྟར༷་འགྱུར༷་ཏེ། དཔེ་རིན་པོ་ཆེ་གཟི་ལ་
སོགས་པ་ལའང་ཐ་དད་པའི་ངོ་བོ་གཅིག་ཏུ་འདྲེས་པ་ལྟ་བུར་གྱུར་ན་ཐ་དད་པའི་ཆ་ཡང་དམིགས་པར་ག་ལ་རུང་། གང་གནོད་མེད་ཀྱི་ཤེས་ངོར་ཐ་དད་དུ་སྣང་བ་དེ་དག་ཐ་དད་དུ་གྲུབ་པ་ལ་འཁྲུལ་པ་མེད་དེ། རིན་ཆེན་ཐ་དད་པ་དང་མཚུངས་སོ། །ཐ་དད་མིན་ན་གཅིག་རྟོག་པས་
13-1-98a


ཐམས་ཅད་རྟོག་པར་ཐལ་བ་དང་། གཅིག་གཡོ་བས་ཐམས་ཅད་གཡོ་བ། གཅིག་སྐྱེ་བས་ཐམས་ཅད་སྐྱེ་བ་སོགས་སུ་འགྱུར་བ་ཡིན་ནོ། །གཉིས་པ་རྣམ་བརྫུན་པའི་ལུགས་དགག་པ་ལ། འདོད་པ་བརྗོད་པ་
དང་། དེ་དགག་པ་གཉིས། དང་པོ། ཇི་སྟེ་ངོ་བོ་ཉིད་དུ་དེའི། །རྣམ་པ་འདི་དག་མེད་པ་སྟེ། །ཡང་དག་ཏུ་ན་རྣམ་མེད་པའི། །རྣམ་པར་ཤེས་ལ་ནོར་བས་སྣང་། །ཞེས་ཇི༷་སྟེ༷་ཤེས་པ་རང་གི་གཤིས་སམ་ངོ༷་བོ༷་ཉི༷ད་དུ༷་ནི་ཤེས་པ་དེ༷འི་རྣམ༷་པ༷་འདི༷་དག༷་
ཀྱང་མེ༷ད་པ༷་སྟེ༷། རྣམ་པར་ཤེས་པ་རང་གི་ངོ་བོ་རྣམ་པ་ཀུན་དང་བྲལ་བ་ཤེལ་སྒོང་དག་པ་ལྟ་བུ་ཞིག་ཏུ་འདོད་ལ། འོ་ན་སྣ་ཚོགས་པའི་རྣམ་པ་འདི་སེམས་ལ་སྣང་བ་མ་ཡིན་ནམ་ཞེ་ན། སྣང་མོད་ཀྱི་ཡ༷ང་ད༷ག་པའི་དོན་དུ༷་ན༷་རྣམ༷་པ་མེ༷ད་པའི༷་རྣམ༷་པ༷ར་ཤེས༷་པ་ལ༷་འཁྲུལ་
པའམ་ནོ༷ར་བས༷་སྣང༷་བ་ཡིན་ཏེ། དཔེར་ན། སྔགས་ལ་སོགས་པས་དཀྲུགས་པའི་མིག་ཅན་རྣམས་ཀྱིས་འཇིམ་དུམ་སོགས་ལ་རྟ་གླང་དུ་སྣང་བ་བཞིན་ནོ། །དེས་ན་རྣམ་པ་དེ་དག་སེམས་ཀྱི་རང་བཞིན་དུ་ཁས་མ་བླངས་པར་མཁའ་ལ་སྐྲ་ཤད་ཀྱི་སྣང་བ་ལྟ་
བུ་བརྫུན་པ་ཡིན་པས་ན་སེམས་དེ་སྙེད་ཀྱི་གྲངས་སུ་འགྱུར་བ་མ་ཡིན་ཏེ། རྣམ་པ་རྣམས་བདེན་ན་གཅིག་ཏུ་འགལ་ཡང་། བརྫུན་པ་ལ་གཅིག་ཐ་དད་སོགས་ཀྱི་འགལ་བ་མེད་པ་དེས་ན་གོང་གི་རྣམ་བདེན་པ་ལ་བརྗོད་པའི་སྐྱོན་ཐམས་ཅད་མེད་པར་གསལ་རིག་
གི་ཤེས་པ་བདེན་གྲུབ་ཏུ་ཁས་བླངས་བས་ཆོག་གོ་སྙམ་ན། གཉིས་པ་དེ་དགག་པ་ལ། དགག་པ་མདོར་བསྟན། དེའི་དོན་རྒྱས་པར་བཤད།  དེ་ལ་སྐྱོན་སྤོང་གི་ལན་དགག་པ་གསུམ། དང་པོ། གལ་ཏེ་མེད་ན་ཇི་ལྟ་བུར།  །དེ་དག་འདི་
13-1-98b


ལྟར་གསལ་བར་ཚོར། །དེ་ཡི་དངོས་ལས་ཐ་དད་པའི། །ཤེས་པ་དེ་འདྲ་མ་ཡིན་ནོ། །ཞེས་གསུངས་ཏེ། གལ༷་ཏེ༷་རྣམ་པ་དེ་དག་མེ༷ད་ན༷་ཚུལ་ཇི༷་ལྟ༷་བུ༷ར་རྣམ་པ་དེ༷་ད༷ག་བྱིས་ནས་མཁས་པའི་བར་གྱིས་འདི༷་ལྟར༷་མངོན་སུམ་བསླུ་མེད་བསྙོན་མེད་དུ་གསལ་
བར༷་ཉམས་སུ་མྱོང་ཞིང་ཚོར༷་བ་འདི་འཐད་པར་འགྱུར་རམ། གང་མེད་པ་དེ་དག་ཉམས་སུ་མྱོང་བ་མེད་པས་ཁྱབ་སྟེ། རི་བོང་རྭས་ཕུག་པའི་རེག་བྱ་དང་། ནམ་མཁའི་མེ་ཏོག་གི་དྲི་དང་། མོ་གཤམ་གྱི་བུའི་གཟུགས་ཉམས་སུ་མྱོང་མི་སྲིད་པ་བཞིན་ནོ། །དེ་ལ་རྣམ་
བརྫུན་པ་དག་གིས་སྣང་ངོའི་རྣམ་པ་འདི་གཏན་ནས་མི་འཆར་བར་ཁས་བླང་མི་ནུས་པས་དེ་སྣང་ངོ་ན་མེད་ཟེར་བ་མ་ཡིན་པས། མེད་ཀྱང་ཉམས་སུ་མྱོང་བ་ཙམ་ཡོད་པར་འཐད་དེ་སྐྲ་ཤད་མེད་ཀྱང་དེ་བློ་ངོར་འཆར་རྒྱུ་ཡོད་པ་བཞིན་ནོ་སྙམ་པའོ། །དེ་མི་འཐད་དེ་འདི་ལྟར་ཞིབ་པར་
དཔྱད་ན་གང་སྣང་ཐམས་ཅད་སེམས་ལ་སྣང་བ་ཙམ་ལས་གཞན་དུ་འོས་མེད་པས། ཤེས་རྣམ་གཉིས་ཀ་སེམས་ཡིན་པར་འདྲ་མོད། ལྟོས་ནས་ཕྱེ་ན་འཛིན་པའི་ཤེས་པ་དང་། གཟུང་བའི་རྣམ་པ་གཉིས་སུ་ཐ་སྙད་གདགས་རུང་ནའང་། དེ་གཉིས་ལྟོས་ནས་བློས་ཕྱེ་
བ་ཙམ་མ་གཏོགས་ངོ་བོ་གཅིག་ཡིན་པས་བཟང་ངན་བདེན་བརྫུན་ཡོད་མེད་ལ་སོགས་པའི་ཁྱད་པར་ཅིའང་མེད་དེ་གཅིག་མེད་ན་གཅིག་མེད་དགོས་པ་ཡིན་པ་ལ། རྣམ་བརྫུན་པས་ཤེས་པ་ནི་ཡོད་ལ། རྣམ་པ་ནི་མེད་དོ་ཞེས་ཡོད་མེད་ཀྱི་ཁྱད་ཕྱེས་པ་ཡིན་ཏེ། དེའང་
སེམས་ཙམ་སྤྱིའི་ལུགས་ལ་ཤེས་པ་ལས་རྫས་གཞན་དུ་གྱུར་པའི་དངོས་པོ་ཞིག་ཁས་བླངས་ན་སེམས་ཙམ་གྱི་ར་བ་ལས་འདའ་བས་དེ་འདྲ་སུས་ཀྱང་ཁས་མི་ལེན་པས། ཆོས་གང་ཡོད་ན་ཤེས་པའི་བདག་ཉིད་དུ་ཡོད་དགོས་པ་ཡིན་ཀྱང་། རྣམ་བརྫུན་པ་འདིས་རྣམ་
13-1-99a


པ་དེ་ཤེས་པའི་རང་བཞིན་དུ་མི་འཐད་པར་བལྟས་ནས་དེ་མེད་ཅེས་སྨྲ་བ་ཡིན་ཏེ། དེ་མེད་ཅེས་མ་བཞག་ན་ཡོད་ན་ཤེས་པ་ལས་རྫས་གཞན་དུ་ཡོད་པར་མི་རིགས་ལ། ཤེས་པ་དང་རྫས་གཅིག་ཏུ་ཡོད་ན་རྣམ་བདེན་པ་དང་ཁྱད་
པར་མེད་པར་འགྱུར་བའི་ཕྱིར། རྣམ་པ་མེད་པའམ། རྣམ་པ་ཤེས་པའི་རང་བཞིན་དུ་མི་བདེན་པའམ། རྣམ་པ་བརྫུན་ལ་ཤེས་པ་བདེན་པར་ཁས་ལེན་པའོ། །དེ་ལ་རྣམ་བརྫུན་པ་ཁྱོད་ཀྱིས་རྣམ་པ་མེད་ཅེས་ཟེར་བ་ལྟར་རྣམ་པ་དེ་མེད་དུ་ཆུག་ནའང་། འོན་
ཀྱང་ཡོད་པར་འདོད་པའི་ཤེས་པ་ཤེལ་སྒོང་འདྲ་བ་དེ་ག་རང་གྲོགས་མེད་གཅིག་པུ་འབའ་ཞིག་ལས་རྣམ་པ་སྣ་ཚོགས་ཀྱི་རྣམ་པ་གསལ་ཞིང་ཉམས་སུ་མྱོང་བ་ག་ལ་སྲིད་དེ། རྣམ་པ་མེད་ན་ཤེས་པ་དེ་གང་ལ་དམིགས་ནས་དེའི་བདག་ཉིད་ཅན་དུ་སྐྱེ་བར་འཐད་
དམ་སོམས་ཤིག །དཔེར་ན། མཁའ་ལ་སྐྲ་ཤད་སྣང་བའི་ཚེ། སྐྲ་ཤད་མེད་ཀྱང་སྐྲ་ཤད་དུ་སྣང་བ་ནི་ཤེས་པ་ཉིད་སྐྲ་ཤད་ཀྱི་རྣམ་པར་སྣང་བ་ཡིན་ནོ་ཞེས་སྨྲས་ན། སྐྲ་ཤད་མེད་ཀྱང་དེར་སྣང་གི་མྱོང་བ་ཙམ་ཡོད་པ་མི་འགལ་ཡང་། སྐྲ་ཤད་དུ་སྣང་
བའི་རྣམ་པ་དེའང་མེད་ཟེར་ན། རང་བློ་སྐྲ་ཤད་ཀྱི་རྣམ་པ་ཅན་དུ་སྐྱེས་པའི་མྱོང་བ་དེའང་གཏན་ནས་མེད་དགོས་པ་དང་འདྲ་བ་ཡིན་ནོ། །དེས་ན་རྣམ་པ་མེད་ཟེར་བ་དང་། རྣམ་པ་ཅིའང་འཆར་མི་སྲིད་པར་ཁས་བླངས་པ་གཉིས་སྐབས་འདིར་མགོ་མཉམ་སྟེ། ཅིའང་
མ་ཤར་ན་རྣམ་པ་མེད་པ་ཡིན་གྱི། གལ་ཏེ་རྣམ་པ་ཞིག་ཤར་ཕན་ཆད་དེ་ཉིད་རྣམ་པ་ཡིན་ལ་ཤེས་པའང་ཡིན་གྱི། ཤེས་པ་མ་ཡིན་ཞེས་གཞག་མི་རུང་ངོ་། །ཤེས་པ་མ་ཡིན་ན་ཤེས་པའི་ར་བ་ལས་འདས་པའི་མོ་གཤམ་གྱི་བུའི་ཁ་དོག་བཞིན་དུ་ཤེས་པ་གང་གི་
13-1-99b


ཡང་ཡུལ་དུ་འགྱུར་མི་སྲིད་པ་ནི་སྤྱིར་བཏང་ངོ་། །དེས་ན་འདི་ལྟར་ཤིན་ཏུ་གསལ་པོར་མྱོང་བ་གང་ཡིན་པ་དེ་ནི་རྫུན་ལ་ཉམས་སུ་མྱོང་བ་མེད་པ་གང་ཡིན་པ་དེ་ནི་བདེན་ནོ་ཞེས་པ་འདི་ལ་ལེགས་པར་སྨྲས་པ་ཅི་ཞིག་ཡོད་དེ་མེད་དོ། །མདོར་ན་ཤེས་རྣམ་ཐ་དད་དུ་ལྟོས་ནས་ཕྱེ་བ་ཙམ་ཡིན་གྱི།
དངོས་སུ་ཁྱད་ཕྱེས་ནས་ཡོད་མེད་ཅིག་རྣམ་པ་ཀུན་ཏུ་འཇོག་མི་ནུས་ཏེ། རྣམ་པ་ཞེས་པ་ཤེས་པས་ཡུལ་སོ་སོར་རིག་པའི་གསལ་རིག་གི་ཆ་ཙམ་ལས་ལོགས་སུ་དབྱེ་བ་མེད་པས་ན། རྣམ་པ་དེ༷་ཡི༷་དངོ༷ས་ལ༷ས་ཐ༷་ད༷ད་པའི༷་ཤེས༷་པ་ཡན་གར་བ་དེ༷་འདྲ༷་ཞིག་རྣམ་པ་ཀུན་ཏུ་སྲིད་
པ་མ༷་ཡི༷ན་ནོ༷། །དེས་ན་མེད་པ་མི་སྣང་བའི་ཐལ་བ་འཇུག་ཚུལ་འདི་ཤན་ཕྱེད་ནས་ཞིབ་མོར་བསམ་པ་གལ་ཆེ་སྟེ། གཞན་དུ་ངོ་བོ་མེད་པ་ཙམ་ལ་བཟུང་ནས་གཏོལ་མེད་དུ་འདུག་པ་གང་དག་མཐར་རང་ལའང་མཚུངས་པའི་ལྟག་ཆོད་སྨྲ་བ་རྣམས་ནི་ཕྲ་
ཞིང་ཞིབ་པ་དབུ་མའི་ལམ་ལས་རྒྱང་རིང་བ་ཡིན་ནོ། །དེ་ལྟར་ན་སེམས་ཙམ་མཚན་ཉིད་པ་ནི་རྣམ་བདེན་པ་ཡིན་པས་རྣམ་བདེན་པ་འདི་གཞུང་བརླིང་ཞིང་། རྣམ་བརྫུན་པ་ཕྱི་དོན་སེམས་སུའང་མི་བདེན་པར་འདོད་པས་བདེན་སྟོང་ལ་ཅུང་ཉེ་བས་དབུ་མ་དང་
མཚམས་སྦྱོར་ལྟ་བུ་ཡིན་པས་གོ་རིམ་གྱིས་འདི་གོང་མར་བཞག་ཀྱང་། ཐ་སྙད་ལ་མི་འཐད་པ་ཆེན་པོ་འོང་བས་ཐ་སྙད་རྣམ་བདེན་པ་ཁོ་ན་ལྟར་ཁས་བླང་བར་བྱ་བ་ཡིན་ནོ། །དེ་ལྟར་རྩ་བའི་གནད་ཟིན་ན་དགག་པ་འོག་མ་རྣམས་སུའང་དེའི་ཚུལ་གྱིས་
བདེ་བླག་ཏུ་ཤེས་ནུས་སོ། །གཉིས་པ་རྒྱས་བཤད་ལ་རྣམ་པ་མེད་པ་མི་འཐད། འཛིན་རྣམ་རྐྱང་པ་མི་འཐད་པའོ། །དང་པོ་ལ་ཡུལ་ཤེས་ཚུལ་ལ་བརྟགས་ན་མི་འཐད། འབྲེལ་པ་ལ་བརྟགས་ན་མི་འཐད། རྒྱུ་ལ་བརྟགས་
13-1-100a


ན་མི་འཐད་པའོ། །དང་པོ་ལ་སྤྱི་དང་བྱེ་བྲག་གཉིས། དང་པོ། འདི་ལྟར་གང་ལ་དངོས་གང་མེད། །དེ་ལ་དེ་ཤེས་ཡོད་མ་ཡིན། །བདེ་བ་མིན་ལ་བདེ་སོགས་དང་། །དཀར་བ་རྣམས་ལའང་མི་དཀར་བཞིན། །
ཞེས་གསུངས་ཏེ། འདི༷་ལྟར༷་ཡུལ་དང་ཡུལ་ཅན་གཉིས་སུ་ཕྱེ་བའི་ཡུལ་གང༷་ལ༷་དངོ༷ས་པོ་གང༷་ཞིག་མེ༷ད་པར་གྱུར་པ་ན། ཡུལ་ཅན་གྱི་ཤེས་པས་ཀྱང་རང་སྟོབས་ཀྱི་ཡུལ་དེ༷་ལ༷་མེད་པའི་དངོས་པོ་དེ༷་ཤེས༷་པར་བྱར་ཡོ༷ད་པ་མ༷་ཡི༷ན་ཏེ། དཔེར་ན་བདེ༷་བ་མིན༷་པ་
སྡུག་བསྔལ་ལ༷་བདེ༷་བ་དང་སོག༷ས་པའི་སྒྲས་བདེ་བ་ལ་སྡུག་བསྔལ་དུ་ཤེས་པར་བྱར་མེད་པ་དང༷་། དེ་བཞིན་དུ་ཡུལ་དཀར༷་པོ༷་རྣམས་ལའང་མི༷་དཀར༷་བ་ནག་པོར་ཤེས་སུ་མི་རུང་བ་བཞིན༷་ནོ་ཞེས་སྤྱིར་བསྟན་ནས། གཉིས་པ་བྱེ་བྲག་ལ། དངོས་སུ་
ཤེས་པ་མི་འཐད། བཏགས་ཙམ་དུའང་ཤེས་པ་མི་འཐད་པའོ། །དང་པོ། རྣམ་པ་འདི་ལ་ཤེས་པའི་དོན། །དངོས་སུ་འཐད་པ་མ་ཡིན་ཏེ། །ཤེས་པའི་བདག་དང་བྲལ་བའི་ཕྱིར། །ནམ་མཁའི་མེ་ཏོག་ལ་སོགས་བཞིན། །ཞེས་གསུངས་ཏེ་
དེ་ལ་ཤེས་པས་ཡུལ་ཤེས་ཚུལ་ལ་དངོས་སུ་ཤེས་པའམ། བཏགས་པའི་ཚུལ་གྱིས་ཤེས་པ་གང་རུང་ལས་འདའ་མི་སྲིད་ལ། དངོས་སུ་ཤེས་པ་ནི་རྣམ་ཤེས་བེམ་པོའི་རང་བཞིན་ལས་ལོག་པའི་བདག་ཉིད་ཡུལ་གང་གི་རྣམ་པར་གསལ་ཞིང་རིག་པར་སྐྱེས་པ་ལ་
དངོས་སུ་རིག་པ་ཞེས་བྱ་ཞིང་། དོན་སྨྲ་བའི་འདོད་པ་ལྟར་ཡུལ་བུམ་པ་ལྟ་བུ་དངོས་སུ་མ་རིག་ཀྱང་ཕྱི་དོན་གྱི་སྟོབས་ཀྱིས་དེ་དང་འདྲ་བར་དེར་སྣང་གི་ཤེས་པ་སྐྱེས་པ་ལ་ཡུལ་རིག་པར་ཐ་སྙད་བཏགས་པ་ཡིན་ནའང་། རྣམ་མེད་པའི་ལུགས་ལ་དེ་གཉིས་གང་ཡང་མི་
13-1-100b


སྲིད་དེ། དང་པོ་འདི་ལྟར་མངོན་སུམ་གསལ་པོར་མྱོང་བ་སྔོ་སེར་སོགས་ཀྱི་རྣམ༷་པ༷་འདི༷་ལ༷། འདི་དང་འདིའོ་ཞེས་མངོན་སུམ་རིག་ཅིང་ཤེས༷་པའི༷་དོན༷་དངོ༷ས་སུ༷་འཐ༷ད་པ༷་མ༷་ཡི༷ན་ཏེ༷། དངོས་སུ་ཤེས་པ་ནི་ཤེས་པའི་རང་བཞིན་དང་གཅིག་པའི་ཚུལ་གྱིས་ཤེས་
དགོས་ན། ཁྱོད་ཀྱི་ལུགས་ལ་རྣམ་པ་དེ་ཤེས་པ་མ་ཡིན་པར་ཁས་ལེན་པས་ཤེས༷་པའི༷་བད༷ག་ཉིད་ད༷ང་བྲལ༷་བའི་ཕྱིར༷་ན་ནམ་ཡང་དངོས་སུ་མྱོང་བ་ག་ལ་འཐད་དེ། དཔེར་ན་ནམ༷་མཁ༷འི་མེ༷་ཏོག༷་དང་མོ་གཤམ་གྱི་བུ་ལ་སོགས་པའི་ཁ་དོག་མངོན་སུམ་དུ་མྱོང་མི་
སྲིད་པ་བཞི༷ན་ནོ། །གཉིས་པ་བཏགས་ཙམ་དུའང་མྱོང་མི་སྲིད་དེ། མེད་ལ་ནུས་པ་མེད་པས་ན། །གདགས་པའང་མི་རུང་རྟ་རུ་བཞིན། །མེད་པ་བདག་སྣང་ཤེས་སྐྱེད་པར། །ནུས་པ་རུང་བ་མ་ཡིན་ནོ། །ཞེས་གལ་ཏེ་ཆོས་གང་
ཡོད་པར་གྱུར་ན་དངོས་སུ་མ་མྱོངས་པར་འདོད་ཀྱང་རུང་། རྣམ་པ་གཏོད་བྱེད་ཀྱི་ཡུལ་བདག་ཉིད་སྣང་བའི་ཤེས་པ་བསྐྱེད་པའི་ནུས་པ་ཡོད་པས། ཤེས་པ་དོན་དང་འདྲ་བར་སྐྱེས་པ་ལ་ཡུལ་དེ་མཐོང་ངམ་ཤེས་ཞེས་རུང་ནའང་། གང་མེ༷ད་པ་ལ༷་ནི་བདག་སྣང་གི་ཤེས་པ་
བསྐྱེད་པའི་ནུས༷་པ༷་མེ༷ད་པས༷་ན༷། གད༷གས་པ༷་ཙམ་དུའང༷་འདི་དང་འདི་མྱོང་བའམ་ཤེས་ཞེས་བྱར་མི༷་རུ༷ང་སྟེ། དཔེར་ན་རྟ་རུ༷་བཞི༷ན་ནོ། །དེའང་རྟའི་རྭ་ཅོ་ལ་ཁོ་རང་སྣང་བའི་ཤེས་པ་བསྐྱེད་པའི་ནུས་པ་མེད་པས། དེ༷འི་རྣམ་པ་འདི་ལྟ་བུའོ་ཞེས་རང་མཚན་འཛིན་
པའི་ཤེས་པ་ཞིག་ཐ་སྙད་དུའང་མི་སྲིད་པ་བཞིན་ནོ། །དཔེ་དེ་དང་འདྲ་བར་རྣམ་པའང་མེ༷ད་པ༷་ཡིན་ན་དེ་ལ་སྔོ་སེར་སོགས་འདི་དང་འདི་ལྟ་བུའོ་ཞེས་བད༷ག་ཉིད་སྣང༷་བའི་ཤེས༷་པ་སྐྱེད༷་པ༷ར་བྱེད་པའི་ནུས༷་པ༷་ཡོད་པར་རུང་བ༷་མ༷་ཡི༷ན་ནོ༷། །དེ་ལ་སེམས་
13-1-101a


ཙམ་རྣམ་བརྫུན་པས་དོན་ལོགས་སུ་ཡོད་ཅིང་ཤེས་པས་འདྲ་བ་ཉམས་སུ་མྱོང་བའི་བཏགས་པས་མྱོང་བ་ཁས་ལེན་པ་མ་ཡིན་མོད་ཀྱི་འདིར་དངོས་བཏགས་གང་གི་ཚུལ་དུའང་མྱོང་བ་མི་སྲིད་ན་མྱོང་ཚུལ་གཞན་མེད་པས་རྣམ་པ་མྱོང་བའི་
ཤེས་པ་གཏན་མེད་དུ་ཐལ་བ་འཇུག་པའི་ཆེད་དུ་མཐའ་བཀག་པ་ཡིན་ནོ། །གཉིས་པ་འབྲེལ་བ་མི་འཐད་པ། གང་ཕྱིར་དེ་ཡོད་ངེས་ཚོར་བ། །ཤེས་དང་འབྲེལ་བ་ཅི་ཞིག་ཡོད། །བདག་མེད་དེ་ཡི་བདག་ཉིད་དང་། །དེ་ལས་བྱུང་བ་མ་
ཡིན་ནོ། །ཞེས་གསུངས་ཏེ། ཡུལ་གང་ཉམས་སུ་མྱོང་བ་ཐམས་ཅད་ལ་འབྲེལ་བ་ཡོད་དགོས་ཀྱི། འབྲེལ་མེད་དུ་ཚོར་མི་སྲིད་པ་ཡིན་ལ། གང༷་གི་ཕྱིར༷་སྔོ་སེར་སོགས་ཀྱི་རྣམ་པ་དེ༷་ཡོ༷ད་པ་དང་། ཡུལ་ཅན་ཤེས་པ་དེས་ངེ༷ས་པར་ཚོ༷ར་བ༷་འགོག་མེད་དུ་
སྣང་བ་འདི་ལ་ཁྱོད་ལྟར་ན། ཤེས༷་པ་ད༷ང་འབྲེལ༷་བ༷་ཅི༷་ཞིག༷་ཡོ༷ད་དེ་ཡོད་པར་མི་འཐད་དོ། །དེ་གང་གི་ཕྱིར་ཞེ་ན། འདི་ལྟར་རྣམ་པ་བད༷ག་རང་ཉིད་མེད་པ་ཡིན་པར་འདོད་ལ་ཤེས་པ་ཡོད་པར་འདོད་པས། ཤེས་པ་དེ༷་ཡི༷་བད༷ག་ཉི༷ད་དུ་གྱུར་པའི་འབྲེལ་བ་མི་
འཐད་དེ། གལ་ཏེ་བདག་གཅིག་ཏུ་གྱུར་ན་ནི། རྣམ་པ་བཞིན་དུ་ཤེས་པ་མེད་པའམ། ཤེས་པ་བཞིན་དུ་རྣམ་པ་ཡོད་པར་འགྱུར་བར་གདོན་མི་ཟ་བ་ད༷ང་། ཤེས་པ་དེ༷་ལ༷ས་བྱུང༷་བ༷འང་མ༷་ཡི༷ན་ཏེ་མེད་པ་ནི་ཆོས་གང་གི་འབྲས་བུར་མི་རུང་ངོ་། །དེ་ལས་བྱུང་བ་ཡིན་དུ་
ཆུག་ནའང་སྔ་ཕྱི་ཡོད་པས་ཅིག་ཅར་དུ་རིག་པ་མེད་པའི་སྐྱོན་དུ་འགྱུར་བ་སོགས་མཐའ་ཡས་པ་ཡོད་ཀྱང་། དེ་བྱུང་གི་འབྲེལ་བ་ཙམ་གྱིས་ཡུལ་མི་མྱོང་བའི་སྐབས་སྤྱི་ལ་དེ་དག་དཔྱད་དགོས་ཀྱི་སྐབས་འདིར་ནི་རྣམ་བརྫུན་པས་དེ་བྱུང་དུ་ཁས་ལེན་པར་མི་རིགས་པས་དཔྱད་
13-1-101b


པ་དེ་འདིར་དགོས་པ་མ་ཡིན་ནོ༷། །དེས་ན་རྣམ་པ་ཉམས་སུ་མྱོང་ཡང་འབྲེལ་མེད་དུ་ཁས་ལེན་དགོས་པས་འགལ་བ་ཆེས་ལྕི་བ་ཡིན་ནོ། །དེ་ལ་ཆོས་གང་ཞིག་ཆོས་གཞན་མི་འདོར་བ་ལ་འབྲེལ་བ་ཞེས་བཏགས་ལ། ཕྱི་རོལ་པའི་ལྡན་འབྲེལ་འདུ་འབྲེལ་
སོགས་གསལ་བའི་དབྱེ་བ་བྱས་པའི་སྤྱི་རིགས་ཀྱི་མཐའ་མ་ཆོད་ལ། དཔལ་ཆོས་ཀྱི་གྲགས་པ་ནི། ཆོས་གང་ལ་ངོ་བོ་གཅིག་དང་ཐ་དད་གང་རུང་གིས་ཁྱབ་པའི་ཕྱིར་ན། དང་པོ་ལ་བདག་གཅིག་འབྲེལ་དང་། ཐ་དད་འབྲེལ་བ་ལ་དེ་བྱུང་གི་འབྲེལ་བ་སྟེ་གྲངས་
གཉིས་སུ་ངེས་པར་མཛད་དེ། དེའང་གཞི་བུམ་པ་ལྟ་བུ་གཅིག་ལ་རྟག་པ་ཡིན་པ་བསལ་བའི་ལྡོག་ཆ་ནས་མི་རྟག་པ། མ་བྱས་པ་བསལ་བའི་ཆ་ནས་བྱས་པ། དངོས་མེད་བསལ་ཆ་ནས་དངོས་པོ་ཞེས་གཞན་སེལ་གྱིས་ལྡོག་ཕྱོགས་སུ་སྒྲོ་འདོགས་པ་བསལ་
བའི་ཆ་སོ་སོར་ཡོད་པ་རང་རང་གི་མིང་གིས་གོ་བར་ནུས་པ་དེ་གཞན་གྱིས་གོ་མི་ནུས་པས་སྒྲ་རྟོག་གི་ཡུལ་དུ་སོ་སོར་བཞག་པ་དེ་ཉིད་དོན་བུམ་པ་ཙམ་གྱི་ངོ་བོར་གཅིག་པས་བྱས་པ་དང་མི་རྟག་པ་བུམ་པའི་སྟེང་ན་བདག་གཅིག་གི་འབྲེལ་བར་བཞག་སྟེ། གཞན་སེལ་
གྱི་རྟོག་ངོར་དབྱེ་བསྡུའི་དབང་གིས་ཡིན་གྱི། དོན་ལ་བདག་གཅིག་ཡིན་པས་རང་ལ་རང་འབྲེལ་མི་སྲིད་དེ། སོར་མོའི་རྩེ་མོས་རང་མི་གཟུང་བ་ལ་སོགས་པ་བཞིན་ནོ། །དེ་བྱུང་ནི་རྒྱུ་འབྲས་ཀྱི་ཚུལ་ཡིན་ཏེ། དེ་ལ་ཉེར་ལེན་གྱི་རྒྱུ་དང་། ལྷན་ཅིག་བྱེད་པའི་
རྒྱུ་གཉིས་ཡོད་ཅིང་། གཞུང་གཞན་དུ་རྒྱུ་དྲུག་དང་རྐྱེན་བཞི་ལ་སོགས་པའི་ཚུལ་དུ་འབྲས་བུ་བསྐྱེད་ཚུལ་སོགས་ཡོད་པའང་ཤེས་པར་བྱ་ཞིང་། སྤྱིར་རྒྱུ་ལ་རྣམ་པ་ལྔ་སོགས་སུ་བཤད་ཀྱང་དངོས་ནི། རྣམ་པར་གཞག་འཇོག་གི་རྒྱུ་དང་། སྐྱེད་བྱེད་ཀྱི་རྒྱུ་གཉིས་སུ་
13-1-102a


འདུ་ལ། གང་མེད་ན་འབྲས་བུ་མི་འབྱུང་བ་ཞིག་ལ་རྒྱུ་ཞེས་གདགས་སོ། །ཞར་བྱུང་འགལ་བ་ལའང་དངོས་པོ་གཉིས་ཕན་ཚུན་གནོད་བྱ་གནོད་བྱེད་དུ་གྱུར་ཏེ། རྒྱུན་ནུས་མཚུངས་སུ་འགྲོགས་སུ་མི་རུང་བ་ལ་ལྷན་ཅིག་མི་གནས་
འགལ་ཞེས་གྲགས་པ་དང་། འགལ་ཟླ་དངོས་མེད་ཡིན་པ་སྔོ་དང་སྔོ་མིན་ལྟ་བུ་ཕན་ཚུན་སྤང་འགལ་གཉིས་སུ་ངེས་ཤིང་། དང་པོ་ལ་སྣང་མུན་ལྟ་བུ་དོན་འགལ་དང་། བདག་འཛིན་དང་བདག་མེད་རྟོགས་པ་ལྟ་བུ་བློ་འགལ་གཉིས་ཡོད། ཕན་ཚུན་སྤངས་
འགལ་ལ་དངོས་འགལ་དང་བརྒྱུད་འགལ་གཉིས་ཡོད་དེ། དང་པོ་གཉིས་ཀ་དངོས་སུ་འགལ་བ་རྟག་མི་རྟག་ལྟ་བུ། གཉིས་པ་ཕན་ཚུན་དངོས་སུ་ལྡོག་ཕྱོགས་སུ་གྱུར་པ་མིན་ཀྱང་ཅིག་ཤོས་ཀྱི་ལྡོག་ཕྱོགས་ཅིག་ཤོས་ཀྱི་ཁྱབ་བྱེད་དུ་གྱུར་པས་གཉིས་ཀ་ཡིན་པ་མི་
སྲིད་པ། བྱས་པ་རྟག་པ་ལྟ་བུ་སྟེ། རྟག་པའི་ཁྱབ་བྱེད་མ་བྱས་པ་ཡིན་པ་ལྟ་བུའོ། །འདི་ཐད་འགལ་འབྲེལ་གྱི་གོ་བ་གཏིང་ལོང་བ་གལ་ཆེ་ཡང་། ཡི་གེས་འཇིགས་ནས་བཞག་ལ་འགལ་འབྲེལ་འདི་གཏན་ཚིགས་ཐམས་ཅད་ལ་ཁྱབ་བྱེད་དུ་འགྲོ་དགོས་པས། 
སྐབས་འདིར་མཚོན་ཙམ་བཤད་པ་ཡིན་ནོ། །གསུམ་པ་རྒྱུ་ལ་བརྟག་ན། རྒྱུ་མེད་ན་ནི་གང་ཞིག་གིས། །རེས་འགའ་འབྱུང་བ་འདི་རུང་འགྱུར། །རྒྱུ་དང་ལྡན་ན་གང་ཞིག་གིས། །གཞན་གྱི་དབང་ལས་ལྡོག་པར་འགྱུར། །ཞེས་གསུངས་ཏེ། 
སྔོ་སེར་སོགས་ཀྱི་རྣམ་པ་འདི་ལ་རྒྱུ་ཡོད་དམ་མེད་ཅེས་དྲིས་ན། དེ་གཉིས་གང་རུང་ཁས་ལེན་པ་ལས་འོས་མེད་པ་ཡིན་ལ། རྣམ་པ་ལ་རྒྱུ༷་མེ༷ད་དོ་ཞེ་ན༷་ནི༷་རྒྱུ་མཚན་གང༷་ཞིག༷་གིས༷་རྟག་ཏུ་ཡོད་པའམ་མེད་པ་གང་རུང་མ་ཡིན་པར་སྐབས་ལ་ལ་ན་ཡོད་ཅིང་
13-1-102b


ལ་ལར་མེད་པའི་དུས།  རེ༷ས་འག༷འ་འབྱུང༷་བ༷་འདི༷་ལྟ་བུ་རུང༷་བར་ག་ལ་འགྱུར༷་ཏེ། རྒྱུ་ལ་མི་ལྟོས་ན་རེས་འགའ་བ་མི་རུང་བར་གོང་དུ་བཤད་ཟིན་ཏོ། །གལ་ཏེ་རྣམ་པ་འདི་རྒྱུ་དང༷་ལྡན༷་པར་གྱུར་ན༷འང་རྐྱེན་ལས་སྐྱེས་པའི་ཕྱིར། རྟེན་ཅིང་འབྲེལ་བར་འབྱུང་བ་
གཞན་གྱི་དབང་ཉིད་དུ་འགྱུར་ཏེ། རྒྱུ་མཚན་ག༷ང་ཞི༷ག་གི༷ས་གཞ༷ན་གྱི༷་དབ༷ང་ཡིན་པ་ལ༷ས་ལྡོག༷་པ༷ར་འགྱུར༷་ཏེ་ཟློག་ཏུ་མེད་དོ། །དེ་ལ་རྐྱེན་ལས་བྱུང་ན་ཡོད་པ་ཡིན་ཅིང་། དེའང་སེམས་ཙམ་པས་ཤེས་པ་ལས་གཞན་གྱི་རྒྱུ་ནི་ཁས་མི་ལེན་པས་འདིའང་ཀུན་བརྟགས་
སུ་མི་འགྱུར་བར་གཞན་དབང་དུ་ཐལ་བ་ཟློག་པར་མི་ནུས་སོ། །གཉིས་པ་འཛིན་རྣམ་རྐྱང་པ་མི་འཐད་པར་བསྟན་པ། དེ་མེད་ན་ནི་ཤེས་དེ་ཡང་། །རྣམ་པ་མེད་པ་ཉིད་ཀྱིས་འགྱུར། །ཤེལ་སྒོང་དག་པ་འདྲ་བ་ཡི། །ཤེས་པ་རབ་ཏུ་ཚོར་བ་མེད། །
ཅེས་གསུངས་ཏེ། གལ་ཏེ་ཡུལ་རྣམ་པ་དེ༷་མེ༷ད་ན༷་ནི༷་ཡུལ་ཅན་འབའ་ཞིག་པའི་ཤེས༷་པ་དེ༷་ཡང༷་། གཉིས་སྟོང་རང་གསལ་གྱི་རྣམ༷་པ༷་ཅན་དུ་འདོད་པ་ཁོ་རང་རྣམ་པ་མེ༷ད་པ༷་ཡི་ཚུལ་ཉི༷ད་ཀྱིས༷་མྱོང་བར་འགྱུར་རིགས་ནའང་། ཡུལ་གྱི་ཚོན་གྱིས་ཁ་བསྒྱུར་བ་དང་བྲལ་བ་
ཡུལ་ཅན་རྐྱང་པའི་རང་བཞིན་ཤེལ༷་སྒོང༷་དག༷་པ༷་འདྲ༷་བ༷་ཡི༷་ཤེས༷་པ༷་ཞིག་དམིགས་རུང་ནའང་མ་དམིགས་ཏེ་ཉམས་སུ་མྱོང་བའམ་ར༷བ་ཏུ༷་ཚོར༷་བ༷་མེ༷ད་དོ། །དེ་ལ་སྤྱིར་ཡུལ་གང་དང་གང་སོ་སོར་རྣམ་པར་རིག་པ་ལ་རྣམ་ཤེས་ཞེས་གདགས་པ་སྟེ། དེའང་མིག་ཤེས་ལྟ་བུ་
ལའང་གཟུགས་ཀྱི་རྣམ་པ་མཐའ་དག་མ་དམིགས་ན་མིག་ཤེས་ཁོ་རང་འདིའོ་ཞེས་གཟུང་བར་མི་ནུས་པ་དེ་བཞིན་རྣམ་པ་མེད་པའི་ཤེས་པ་རྐྱང་པ་ཉམས་སུ་མྱོང་བ་མེད་དེ། དེ་ལ་གསལ་རིག་ཙམ་ཤེལ་སྒོང་འདྲ་བ་ཞེས་ཟེར་བའང་ཤེས་པ་ཉིད་ཡུལ་དུ་བྱས་པའི་རྣམ་པ་ལ་
13-1-103a


དམིགས་པ་ཡིན་ནོ། །དེས་ན་འདི་དང་འདི་འདྲའོ་ཞེས་གང་དམིགས་ན་དེ་དང་དེའི་རྣམ་པར་འཆར་དགོས་ཀྱི། རྣམ་པ་མ་ཤར་བར་དེ་དང་དེར་བཞག་པ་ནི་དམ་བཅའ་ཙམ་སྟེ། མོ་གཤམ་གྱི་བུ་མདོག་དཀར་པོ་ཡིན་ནོ་ཟེར་བ་དང་འདྲའོ། །
དེས་ན་རྣམ་པ་མེད་པའི་རང་བཞིན་དེ་འདྲ་བ་ཉམས་སུ་མྱོང་རིགས་པ་ལ་མ་མྱོངས་པས་དེ་འདྲ་བ་མེད་པར་ཤེས་སོ། །དེ་ལ་དེ་འདྲ་བ་ད་ལྟ་དམིགས་སུ་མི་རུང་བའི་རྒྱུ་མཚན་ཅིའང་མེད་དེ། ཁྱོད་ཀྱི་ལུགས་ལ་རྣམ་པ་ནི་གང་ཅུང་ཟད་ཅིག་ཕྱི་ནའང་མེད་ནང་ནའང་མེད་པར་འདོད་ན། 
ཁ་བསྒྱུར་ཞིང་བསླད་པ་ལྟ་བུའི་རྣམ་པ་དེ་མེད་ན་ཤེལ་སྒོང་དག་པ་འདྲ་བའི་ཤེས་པ་གཉིས་སུ་མེད་པ་རང་ཅིའི་ཕྱིར་མི་མྱོང་། མྱོང་བཞིན་དུ་བློས་མ་ངེས་པའང་ག་ལ་སྲིད་དེ་མི་ངེས་པའི་བསླད་རྒྱུ་གཞན་མེད་པའི་ཕྱིར་རོ། །ཡང་དེ་དག་ན་རེ། ཇི་ལྟར་སྨིག་རྒྱུ་སོགས་ལ་ཆུའི་རྣམ་པ་མེད་
བཞིན་དུ་མྱོང་བས་གཏན་ཚིགས་དེ་མ་ངེས་སོ་སྙམ་ན། སྨིག་རྒྱུ་སོགས་ལའང་བརྒལ་ཞིང་བརྟག་པ་དེ་མཚུངས་པས་ན་མ་ངེས་པ་མ་ཡིན་ཏེ། འདི་ལྟར་སྨིག་རྒྱུ་སོགས་ལའང་ཆུ་སོགས་ཀྱི་རྣམ་པ་ཕྱི་ན་མེད་དུ་ཆུག་ནའང་ནང་ཤེས་པ་ལ་དེའི་རྣམ་པར་འཁྲུལ་པའི་རྣམ་པ་ཙམ་
ཞིག་མེད་ན་ཤིན་ཏུ་མེད་པ་ཉིད་ཇི་ལྟར་མྱོང་སྟེ་མྱོང་བར་མི་རིགས་སོ།  །གསུམ་པ་སྐྱོན་སྤོང་གི་ལན་དགག་པ། འདི་ནི་འཁྲུལ་པས་ཤེས་ཞེ་ན། །དེ་ཅི་འཁྲུལ་ལ་རག་ལས་སམ། །དེ་ཡི་མཐུ་ཡིས་བྱུང་ན་ནི། །དེ་ཡང་གཞན་གྱི་དབང་ཉིད་དོ། །
ཞེས་གསུངས་ཏེ། དེ་ལ་དེ་ལྟར་རྣམ་པ་མེད་ན་མྱོང་བར་མི་འཐད་པར་བསྟན་པ་ལ་རྣམ་བརྫུན་པ་རྣམས་ན་རེ། དེ་ལྟར་རྣམ་པ་མེད་ཀྱང་ཤེས་མྱོང་གི་ཐ་སྙད་ཙམ་རྒྱུན་ཆད་མི་དགོས་ཏེ། རྣམ་པ་འདི༷་ནི༷་མེད་ཀྱང་བློ་ནོར་བའི་བག་ཆགས་ཀྱི་སྟོབས་ཀྱིས་སམ་འཁྲུ༷ལ་པ༷ས་དེ་
13-1-103b


ལྟར་ཤེས༷་པ་ཡིན་ཏེ། དཔེར་ན། མིག་སེར་གྱི་ནད་ཀྱིས་བཏབ་པའི་ཚེ་མེད་བཞིན་དུ་དུང་ལ་གསེར་གྱི་རྣམ་པར་རིག་པ་དེ་བཞིན་དུ་འཁྲུལ་པའི་བག་ཆགས་ཀྱི་དབང་གིས་མེད་ཀྱང་སེར་པོ་ལ་སོགས་པའི་རྣམ་པ་བདེན་པ་ལྟར་སྣང་བར་འདོད་དོ་ཞེ༷་ན༷། རྣམ་པ་དེ༷་ནི་ཅི༷་སྟེ་
འཁྲུལ༷་པ་ལ༷་བདག་ཉིད་གཅིག་ཏུ་འབྲེལ་བའི་ཚུལ་གྱིས་ར༷ག་ལ༷ས་པ་ཡིན་པར་ངེས་སམ༷། འོན་ཀྱང་འཁྲུལ་པ་དེ༷་ཡི༷་མཐུ༷་ཡིས༷་བྱུང༷་བ་དེ་བྱུང་གི་འབྲེལ་བ་ཡིན། དེ་གཉིས་པོ་གང་ཡིན་ཀྱང་རུང་དེ་ལྟར་འབྲེལ་བ་ཡོད་ན༷་ནི༷། རྣམ་པ་དེ༷་ཡ༷ང་གཞ༷ན་གྱི༷་དབ༷ང་ཉི༷ད་དུ་འགྱུར་བ་
ཁོ་ན་ཉིད་དོ༷། །དེ་ལ་འཁྲུལ་པ་ཞེས་པ་འཁྲུལ་པའི་རྒྱུ་བག་ཆགས་དང་། འབྲས་བུ་འཁྲུལ་པ་རང་གི་ངོ་བོ་དང་གཉིས་སུ་ཡོད་པ་ལས། རྒྱུ་བག་ཆགས་དང་རྣམ་པ་གཉིས་བདག་ཉིད་གཅིག་འབྲེལ་མི་རིགས་ཏེ། བག་ཆགས་ནི་འབྲས་བུ་མ་བྱུང་བ་ཡིན་པས་དེས་རྣམ་པ་
མྱོང་བར་མི་འཐད་ལ། འབྲས་བུ་འཁྲུལ་པ་དང་ནི་དེ་བྱུང་གི་འབྲེལ་མི་རིགས་ཏེ་རྣམ་པ་དང་འཁྲུལ་པ་གཉིས་དུས་མི་མཉམ་པར་འགྱུར་བའི་སྐྱོན་ཡོད་པར་ཐལ་པའི་ཕྱིར་རོ། །དེས་ན་གལ་ཏེ་འཁྲུལ་པའི་དབང་གིས་སྣང་ན་རྣམ་པ་དེ་བག་ཆགས་དང་དེ་བྱུང་དང་འཁྲུལ་པ་དང་
བདག་གཅིག་གིས་འབྲེལ་དགོས་པར་ཟད་ན། དེ་ལྟར་འབྲེལ་ཕན་ཆད་རྣམ་པ་དེའང་གཞན་དབང་ཉིད་དུ་འགྱུར་ཏེ། འདི་ལྟར་གཞན་དབང་གཞན་དབང་ཞེས་བྱ་བ་དག་དང་མ་དག་གི་རྟེན་འབྲེལ་འདི་ལས་གུད་ན་ཅུང་ཟད་ཙམ་ཡང་ཡོད་པ་མ་ཡིན་པའི་ཕྱིར་རོ། །དེས་ན་
འཁྲུལ་པས་ཤེས་ཞེས་པ་དེའང་རྣམ་པ་མེད་པ་ལ་མི་རུང་སྟེ། རུང་ན་འབྲེལ་བ་ཡོད་དགོས་པས་རྣམ་པ་མེད་པར་ཡང་མི་རུང་ཞིང་གཞན་དབང་དུ་འགྱུར་ལ། འབྲེལ་བ་ཅིའང་མེད་ན་འཁྲུལ་པས་ཀྱང་ཤེས་པར་བྱར་མི་རུང་སྟེ་མོ་གཤམ་གྱི་བུའི་ཁ་དོག་བཞིན་ནོ། །དེས་ཐག་
13-1-104a


རིང་ན་ཆུང་ངུ་ཆེན་པོར་སྣང་བ་ལྟ་བུའི་དཔེ་སོགས་ཀྱི་ལན་ཡང་བཏབ་ཟིན་ཏོ། །གཞན་ཡང་སློབ་དཔོན་དགེ་སྲུང་ན་རེ། རྣམ་ཤེས་རིག་པ་ཙམ་ཉིད་དེ། །བག་ཆགས་ཉེས་པས་དཀྲུགས་པས་ན། །སྔོན་པོ་ལ་སོགས་ཚོར་བ་ཡི། །
རྣམ་པ་འབའ་ཞིག་འབྱུང་བར་འགྱུར། །དེ་ནི་སྔོ་སོགས་རྟོགས་པ་དེ། །སྔོ་ལ་སོགས་པའི་མཚན་ཉིད་མིན། །དེ་ཡི་མཇུག་ལ་རྨོངས་པའི་བདག །ཕྱི་རོལ་སྔོ་ལ་སོགས་པར་སེམས། །ཞེས་སྨྲ་བ་དེ་དག་གི་ལན་ཡང་བཏབ་པ་ཡིན་ཏེ། དེ་དག་གིས་སྔོ་
སོགས་ཀྱི་རྣམ་པ་ནི་ཡུལ་མེད་ཀྱང་འཛིན་པའི་རྣམ་པ་ཙམ་ཁོ་ན་ཡིན་གྱི། དམིགས་པའི་རྣམ་པ་མ་ཡིན་ནོ། །དེས་ན་སོ་སྐྱེའི་ཤེས་པ་ཐམས་ཅད་ཀྱང་དམིགས་པ་སྔོ་སོགས་ཀྱིས་རྣམ་པར་བསྒྱུར་བ་མ་ཡིན་པས་ན་རྣམ་མེད་ཀྱི་ཤེས་པ་གཅིག་ཡིན་ནོ་ཞེས་རྣམ་པར་
གཞག་པ་ཉམས་པར་མི་འགྱུར་རོ་སྙམ་པའོ། །དེ་ལ་སྔོ་སོགས་ཀྱི་རྣམ་པ་བཟུང་ཕན་ཆད་སྣང་ངོར་ཡུལ་ཡོད་ལ་ཡུལ་དེ་ཕྱི་དོན་དང་ནང་གི་ཤེས་པ་གང་དུའང་གྲུབ་པ་མེད་ན་དངོས་བཏགས་གང་གི་ཚུལ་དུའང་མྱོང་བ་མེད་པ་དང་། འཁྲུལ་བའི་དབང་གིས་སྣང་ནའང་དེ་
གཉིས་ཀྱི་འབྲེལ་བ་ལ་བརྟགས་པ་འདིས་སྨྲ་བ་དེ་དག་བསལ་ཟིན་ཏེ་རྒོལ་བ་དེ་དག་གིས་བརྗོད་ཚུལ་ལ་ཁྱད་ཡོད་ཀྱང་དོན་ལ་ཁྱད་ཕྱེས་ནས་རྣམ་མེད་དུ་སྒྲུབ་མི་ནུས་སོ། །དེའང་རྣམ་མེད་དུ་འདོད་པ་རྣམས་ལ་རྨི་ལམ་དང་དོན་སྤྱིའི་སྔོ་སྣང་ལྟ་བུས་མ་ངེས་པར་བསྟན་པའི་ཚེ། 
དེ་དག་གིས་རྣམ་པ་མེད་ཀྱང་འཁྲུལ་པའི་དབང་གིས་དེར་སྣང་བར་ལན་འདེབས་པ་ཀུན་གོང་གི་རིགས་པའི་ཚུལ་དེས་སེལ་བར་ཤེས་པར་བྱའོ། །ཡང་ཁ་ཅིག་ཡོངས་སུ་མ་དག་པའི་སྐབས་ན་ཤེས་པ་སྣ་ཚོགས་སུ་སྣང་བ་འདི་བརྫུན་པ་ཡིན་དུ་ཆུག་ནའང་། དག་པའི་
13-1-104b


སྐབས་ན་རང་བཞིན་གཅིག་པ་གཉིས་སུ་མེད་པའི་ངོ་བོར་འགྱུར་བས་ན་ཤེས་པ་གཅིག་བདེན་འགོག་པའི་གཏན་ཚིགས་ལ་ཐེ་ཚོམ་ཟ་བས་མ་གྲུབ་པ་ཡིན་ནོ་སྙམ་ན། གལ་ཏེ་དག་པའི་སྐབས་ན་རྣམ་པ་ཐམས་ཅད་ལྡོག་པར་སྲིད་ན་དེ་ཚེ་ཁྱོད་ལྟར་ན་འདི་འང་སྲིད་དགོས་ཏེ། 
འཁྲུལ་པ་ལོག་ཀྱང་རྣམ་པ་རྣམས་ལྡོག་པར་མི་སྲིད་དེ། རྣམ་པ་རྣམས་ནི་མེད་པར་འདོད་པས་ན་འཁྲུལ་པ་དང་དེའི་བག་ཆགས་དང་ཡང་འབྲེལ་བ་མེད་པའི་ཕྱིར་ཏེ། དཔེར་ན། རྟ་མེད་པས་བ་ལང་ལྡོག་པར་མ་ངེས་པ་བཞིན་ནོ། །སྐྱོན་གཞན་ཡང་མ་དག་པའི་སྐབས་ན་ཤེས་པ་
བརྫུན་པ་ཁོ་ན་ཡིན་ཀྱང་། དག་པའི་སྐབས་ན་རྣམ་པ་སྣ་ཚོགས་མེད་པས་གཅིག་པུར་བདེན་པར་གྲུབ་པ་ཁོ་ནའོ། །ཞེས་འདོད་ན། སྔར་མེད་པའི་བདེན་པའི་ཤེས་པ་དེ་རྒྱུ་གང་ལས་སྐྱེ་བ་བརྗོད་དགོས་སོ། །དེ་ལ་སྔར་གྱི་བརྫུན་པའི་ཤེས་པ་ལས་མ་ཡིན་ཏེ། བདེན་པའི་
ལྡོག་ཕྱོགས་སུ་གྱུར་པ་དེ་ལ་བདེན་པ་སྐྱེད་པའི་ནུས་པ་མེད་པས་སོ། །ནུས་ན་དེ་བརྫུན་པར་ཡང་མི་འགྱུར་ལ། ནུས་བཞིན་དུ་བདེན་པ་མིན་ན་བདེན་པར་འདོད་པ་དེའང་བདེན་པར་མི་འགྱུར་རོ། །དག་པའི་སྐབས་ཀྱི་བདེན་པར་གྲུབ་པའི་ཤེས་པ་དེ་རྒྱུ་མེད་པ་ཅན་ནི་མ་ཡིན་ཏེ།
རྟག་ཏུ་ཡོད་མེད་དུ་ཐལ་བའི་ཕྱིར་རོ། །ཤེས་པ་དེ་རང་བཞིན་གྱིས་བདེན་པའི་གནས་སྐབས་གཅིག་པུར་གྲུབ་པ་ནི་མི་སྲིད་དེ།  དབང་ཕྱུག་རྟག་དངོས་སོགས་འགོག་པའི་རིགས་པའི་གནོད་པ་སྔ་ཕྱི་ཁྱད་མེད་དུ་ཐལ་བ་དེ་འདི་ལའང་མཚུངས་པའི་ཕྱིར་རོ། །སྐད་ཅིག་སྔ་མའི་
མཐུ་ཡིས་སྐྱེ་བར་ཁས་ལེན་ནའང་། བདེན་པའི་ཤེས་པ་དོན་དམ་པར་གྲུབ་པ་ལ་དེ་མི་རུང་སྟེ། དོན་དམ་པར་རྒྱུ་འབྲས་འབྲེལ་བའི་དངོས་པོ་མ་གྲུབ་པའི་ཕྱིར་ཏེ། འདི་ལྟར་དུས་མཉམ་པ་ལ་ནི་རྒྱུ་འབྲས་སུ་མི་འཐད་དེ། འབྲས་བུ་སྐྱེ་བའི་སྔ་རོལ་ན་རྒྱུ་མེད་པས་ནུས་པ་མེད་ཅིང་
13-1-105a


རང་གྲུབ་ནས་ནུས་ཚེ་འབྲས་བུའང་གྲུབ་ཟིན་པས་དེ་གཉིས་རྒྱུ་འབྲས་སུ་འཇོག་མི་རུང་ངོ་། །དུས་སྔ་ཕྱི་ཐ་དད་ཀྱང་རྒྱུ་འབྲས་བདེན་གྲུབ་ཏུ་འཐད་པ་མ་ཡིན་ཏེ། དུས་གཞན་གྱིས་བར་ཆོད་པ་དང་མ་ཆོད་པ་གང་ལས་ཀྱང་མི་སྐྱེ་སྟེ། འདི་ལྟར་དུས་
གཞན་གྱིས་བར་ཆོད་ན་རྒྱུ་དང་འབྲས་བུ་གཉིས་ཀྱི་བར་དུ་ཞིག་པ་ཡོད་དགོས་ཏེ་རྒྱུ་མ་ཞིག་ན་བར་ཆོད་པའང་མི་སྲིད་པའི་ཕྱིར་རོ། །དེས་ན་རྒྱུ་ཞིག་ཟིན་པའི་ཞིག་པ་ཁོ་ན་ལས་སྐྱེ་དགོས་ན་དེའང་མི་རིགས་ཏེ། ཞིག་པ་ནི་མེད་པ་ཡིན་ལ་མེད་པ་ནི་ནུས་པ་ཐམས་ཅད་དང་
བྲལ་བའི་ཕྱིར་རོ། །ཞིག་པ་མེད་པའི་མཚན་ཉིད་ཅན་དེ་ལྟ་མ་ཡིན་ན་རྒྱུ་ཇི་ལྟར་ཞིག་པར་འགྱུར་ཏེ་མ་ཞིག་པར་འགྱུར་རོ། །གལ་ཏེ་ཞིག་པ་དངོས་པོ་ཡིན་ན། བསྲེགས་ཟིན་པའི་ཤིང་ལ་སོགས་པ་སྔར་གྱི་དངོས་པོ་རྣམས་ད་ལྟ་ཡོད་པར་ཅིས་མི་འགྱུར་ཏེ། ཞིག་པ་
ལས་མ་གཏོགས་པར་དེ་དག་ད་ལྟ་དངོས་མེད་དུ་འཇོག་པའི་རྒྱུ་མཚན་གཞན་མེད་པས་ན་དངོས་པོ་ཐམས་ཅད་རྟག་པར་འགྱུར་ཞིང་། རྒྱུ་མ་འགགས་ན་འབྲས་བུ་སྐྱེ་བ་མི་འཐད་པས་འབྲས་བུ་རྒྱུན་ཆད་ཅིང་། ཞིག་པ་ཁོ་རང་རྒྱུ་ལས་མ་བྱུང་བའི་དངོས་པོར་འགྱུར་བ་སོགས་
གནོད་པ་མཐའ་ཡས་པ་དེས་ན་རྒྱུ་ཞིག་ནས་མེད་པའི་ཆ་ལ་ཞིག་པ་ཞེས་བཏགས་པ་ཡིན་གྱི། ཞིག་པ་རང་གི་ངོ་བོ་ལ་དངོས་པོ་ཅུང་ཟད་ཀྱང་མེད་དོ། །གལ་ཏེ་ཡོད་ན་དངོས་མེད་ཤེས་བྱ་ལ་མི་སྲིད་པར་འགྱུར་ཏེ། དངོས་པོ་དགག་པའི་ཆ་ལ་དངོས་མེད་དུ་བཏགས་པ་
ཙམ་ལས་དངོས་མེད་ཅེས་གང་ཡང་ལོགས་སུ་ཡོད་པ་མ་ཡིན་ནོ། །དེ་ལྟར་དངོས་མེད་དངོས་མེད་མ་ཡིན་ན། མཐར་དགག་པ་དང་སྒྲུབ་པ། དངོས་དང་དངོས་མེད། ཡོད་པ་དང་མེད་པ་སོགས་ཐམས་ཅད་ཕན་ཚུན་སྤང་བའི་ཆོས་ཉིད་དུ་མི་འགྱུར་བར་འཁྲུགས་ནས་
13-1-105b


ཤེས་བྱའི་རྣམ་གཞག་མ་ལུས་པ་ནུབ་པར་འགྱུར་རོ། །དེས་ན་ཞིག་པ་ཞེས་བྱ་བ་རྒྱུ་ཞིག་པའི་ཆ་མེད་དགག་ཙམ་ཡིན་པས་དེ་རང་ལ་ནུས་པ་གང་ཡང་མེད་ཅིང་། རྒྱུ་ནི་ད་ལྟ་ཡོད་པ་མ་ཡིན་པས་བར་དུ་ཆོད་པ་ལས་ཀྱང་སྐྱེ་བར་མི་འཐད་དོ། །གནོད་པ་འདི་དང་ཆུ་རྒྱུ་
འབྲས་མ་ཕྲད་ནས་སྐྱེ་བ་མི་འཐད་པར་བསྟན་པ་གཉིས་དོན་འདྲ་ལ། གལ་ཏེ་ཞིག་པ་ལས་སྐྱེ་བར་འདོད་པ་ལྟར་ན་མ་ཕྲད་ནས་སྐྱེ་ཞེས་ཁས་བླང་བ་ཡིན་ནོ། །གལ་ཏེ་རྒྱུ་འབྲས་ཀྱི་བར་དུ་དུས་གཞན་གྱིས་མ་ཆོད་ན་དུས་མཉམ་པར་འགྱུར་ཏེ་སྐད་ཅིག་པ་ཡན་ལག་མེད་པ་གཉིས་
བར་མ་ཆད་པ་ལ་དུས་མཉམ་པ་ལས་གཞན་མི་སྲིད་ལ། དེ་ལྟར་བར་ཅུང་ཟད་ཀྱང་མེད་ན་གཅིག་ཏུ་འགྱུར་ཏེ། དེ་ལྟར་ན་རང་ལ་རང་བསྐྱེད་པར་ཡང་མི་འཐད་ལ། དུས་ཀྱང་བསྐལ་པའང་སྐད་ཅིག་ཙམ་དུ་འགྱུར་རོ། །འོ་ན་རྒྱུ་འབྲས་ཀྱི་འབྲེལ་བ་མི་འཐད་པ་འདིས་ཀུན་རྫོབ་ཀྱི་
རྒྱུ་འབྲས་ལའང་མི་འཐད་པར་བསྟན་པ་མ་ཡིན་ནམ་ཞེ་ན་མ་ཡིན་ཏེ། འདི་ལྟར་རྒྱུ་དང་འབྲས་བུར་སྣང་ཡང་དེ་ལྟར་བརྟག་མི་བཟོད་པ་ཡིན་པའི་ཕྱིར་ཀུན་རྫོབ་ཏུ་བཞག་གི རྒྱུ་འབྲས་དཔྱད་བཟོད་ཀྱི་དངོས་པོ་ཡིན་ན་དོན་དམ་དུ་འགྱུར་གྱི་ཀུན་རྫོབ་ཏུ་ག་ལ་འགྱུར། དེ་ལྟ་བས་ན་
ཀུན་རྫོབ་ལ་ནི་བརྒལ་ཞིང་བརྟགས་པ་མཚུངས་པ་མ་ཡིན་ནོ། །ཞེས་དེ་དག་ཀ་མ་ལ་ཤཱི་ལའི་དཀའ་འགྲེལ་ལས་ཇི་སྐད་བཤད་པ་བཞིན་གསལ་བར་བསྡུས་ཏེ་བསྟན་པའོ། །འོ་ན་དེ་ལྟར་རྒྱུ་འབྲས་ཕྲད་མ་ཕྲད་གང་ལས་ཀྱང་མི་སྐྱེ་ན་རྒྱུ་དང་འབྲས་བུ་རྣམ་པར་གཞག་པ་དོན་
མེད་པར་མི་འགྱུར་རམ་ཞེ་ན་མི་འགྱུར་ཏེ། དེའི་རྒྱུ་མཚན་རྒྱུ་འབྲས་གཉིས་བདེན་གྲུབ་ཏུ་ཁས་ལེན་པའི་ཕྱོགས་ལ་བདེན་པར་གྲུབ་ན་རིགས་པས་དཔྱད་བཟོད་དགོས་ལ། དེ་ལྟར་ན་ཕྲད་མ་ཕྲད་དམ་བར་ཆོད་མ་ཆོད་གཉིས་ལས་མཐའ་གཞན་མི་སྲིད་པས་དེ་གཉིས་
13-1-106a


གང་རུང་གི་ཚུལ་དུ་བསྐྱེད་དགོས་པ་ཡིན་ཞིང་། དེ་གཉིས་དང་བྲལ་ན་རྒྱུ་འབྲས་བསྐྱེད་ཚུལ་གཞན་མེད་པས་རྒྱུ་འབྲས་ཀྱང་མི་འཐད་པ་ཡིན་ནའང་། གང་རྒྱུ་འབྲས་བདེན་པར་ཁས་མི་ལེན་པའི་ཕྱོགས་ལ་རྒྱུ་དེ་ཉིད་འབྲས་བུ་དེའི་མེད་ན་
མི་འབྱུང་གི་རྒྱུར་གྱུར་པ་དངོས་པོའི་ཆོས་ཉིད་ཡིན་པ་ཙམ་གྱིས་ཆོག་གི། ཕྲད་མ་ཕྲད་ཀྱི་བསྐྱེད་ཚུལ་གཉིས་གང་དུའང་ཁས་ལེན་མི་དགོས་ལ། དེ་ལྟར་ཁས་མ་བླངས་ཀྱང་རྒྱུ་འབྲས་མི་འཐད་པར་འགྱུར་བ་མ་ཡིན་པར་མ་ཟད་རྒྱུ་འབྲས་ཆེས་འཐད་པའང་ཡིན་ཏེ་འོག་ཏུ་
ཀུན་རྫོབ་ཀྱི་རྣམ་གཞག་སྟོན་པ། བདག་རྒྱུ་སྔ་མ་སྔ་མ་ལ། །ཞེས་སོགས་ཀྱི་སྐབས་སུ་བཤད་པར་བྱའོ། །དེ་ལྟར་རྣམ་བརྫུན་པ་འགོག་པའི་རིགས་པ་འདི་རྣམས་ཤིན་ཏུ་སྟོབས་དང་ལྡན་ཅིང་། ཐུན་མོང་མིན་པའི་ཟབ་གནད་ཡོད་པ་ལེགས་པར་མྱོང་ནུས་
ན་སེམས་ཙམ་གྱི་གྲུབ་མཐའི་ཕུ་ཐག་ཆོད་ཅིང་དབུ་མའི་གནད་གསང་སྟོན་པར་བྱེད་པ་ཡིན་པས་ཚུལ་གཉིས་ཀྱི་ལུགས་ལ་འདི་ལས་དོན་ཆེ་བ་མེད་དོ། །གཉིས་པ་བདེན་པའི་དུ་བྲལ་སྒྲུབ་པ་ནི། དངོས་པོ་གང་གང་རྣམ་དཔྱད་པ། །དེ་དང་དེ་ལ་
གཅིག་ཉིད་མེད། །གང་ལ་གཅིག་ཉིད་ཡོད་མིན་པ། །དེ་ལ་དུ་མ་ཉིད་ཀྱང་མེད། །ཞེས་གསུངས་ཏེ། དེ་ལྟར་བདག་གཞན་གྱི་སྡེ་པས་ཁས་བླངས་པ་རྟག་མི་རྟག་ཁྱབ་མ་ཁྱབ་རྡུལ་རགས་པ་ཤེས་དང་ཤེས་བྱ་ལ་སོགས་པ་དངོ༷ས་པོ༷་གང༷་དང་གང༷་
ཡིན་པ་ཐམས་ཅད་ལ་གཅིག་པུར་གྲུབ་པ་ཡོད་མེད་དེ་ལྟར་རྣ༷མ་པར་དཔྱ༷ད་པ༷་དེའི་ཚེ་ན། མ་དཔྱད་པའི་ངོར་གཅིག་པུ་ལྟར་སྣང་བའི་དངོས་པོ་ལྦུ་བ་རྡོས་པ་ལྟ་བུ་རྣམས་ལ། བརྟག་པའི་ཁུར་རྡོ་རྗེའི་རི་བོ་འབུམ་ལས་ལྕི་ཞིང་བརླིང་བ་དེ་བཟོད་ནུས་པ་རྡུལ་ཕྲ་རབ་
13-1-106b


ཙམ་ཡང་མེད་པས་དུམ་བུ་དུམ་བུ་བརྒྱ་ཚལ་དུ་ཞིག་ཅིང་འཐོར་བ་ཁོ་ན་ལས། དངོས་པོ་དེ༷་ད༷ང་དེ༷་ལ༷་གཅི༷ག་ཉི༷ད་དུ་གྲུབ་པ་གང་ཡང་མེ༷ད་དོ། །ག༷ང་ལ༷་གཅི༷ག་པ་ཉི༷ད་ཡོ༷ད་པ་མིན༷་པ༷་དེ༷་ལ༷་དུ༷་མ༷་ཉི༷ད་ཀྱང༷་མེ༷ད་དེ། དུ་མ་ནི་གཅིག་ལས་རྩོམ་དགོས་ན་གཅིག་མེད་པའི་དུ་མ་
ག་ལ་སྲིད་དེ། ཤིང་མེད་ན་ནགས་མེད་པ་ལ་སོགས་པ་བཞིན་ནོ། །དེ་ལྟར་ཡང་ལངྐར་གཤེགས་པ་ལས། བློ་ཡིས་རྣམ་པར་གཞིག་ན་ནི། །ངོ་བོ་ཉིད་ནི་གཟུང་དུ་མེད། །དེ་ཕྱིར་དེ་དག་བརྗོད་མེད་དང་། །ངོ་བོ་ཉིད་ཀྱང་མེད་པར་བཤད། །བློ་ཡིས་
རྣམ་པར་གཞིག་ན་ནི། །གཞན་དབང་མེད་ཅིང་བརྟག་པ་མེད། །གྲུབ་པའི་དངོས་པོ་ཡོངས་མེད་ན། །བློ་ཡིས་ཇི་ལྟར་རྣམ་པར་བརྟག །རང་བཞིན་མེད་ཅིང་རྣམ་རིག་མེད། །དངོས་པོ་མེད་ཅིང་ཀུན་གཞི་མེད། །རོ་མཚུངས་བྱིས་པའི་རྟོག་གེ་པ། །ངན་
པ་རྣམས་ཀྱིས་འདི་དག་བརྟག །མཚན་མ་དངོས་པོ་རྣམ་རིག་དང་། །ཡིད་ཀྱི་གཡོ་བ་གང་ཡིན་ལས། །ང་ཡི་སྲས་རྣམས་རབ་འདས་ནས། །དེ་དག་རྣམ་པར་མི་རྟོག་སྤྱོད། །ཅེས་གསུངས་ཏེ། བློས་བརྟགས་ཤིང་དཔྱད་ན་གཅིག་དང་དུ་མའི་ངོ་བོ་ཉིད་གཟུང་
དུའམ་རྙེད་པ་མེད་ལ། དེའི་ཕྱིར་ན་དངོས་པོ་དེ་དག་ངག་གིས་འདི་དང་འདིའོ་ཞེས་གཅིག་དང་དུ་མར་བདེན་པ་བརྗོད་དུ་མེད་པ་དང་། ཡིད་ཀྱིས་དེ་དང་དེར་བཟུང་བའི་ངོ་བོ་ཉིད་ཀྱང་མེད་པ་ཡིན་ནོ་ཞེས་ཕྱི་དོན་མེད་པར་བསྟན་ནས། ཡང་ཤེས་བྱ་ནང་གི་ཡིན་པར་བལྟ་བ་ལའང་དོན་དེ་
བསྟན་པའི་ཕྱིར། བློས་གཞིག་ན་གཞན་དབང་དང་ཀུན་བརྟགས་ཡོངས་གྲུབ་ཀྱི་དངོས་པོ་གསུམ་ཡང་ཡོངས་སུ་མེད་ན། དེ་ཡོད་པར་བློས་ཇི་ལྟར་བརྟག་པར་བྱ་ཞེས་པ་དང་། ཡང་དེ་ལྟར་མེད་ན་ཕྱི་ནང་གི་དངོས་པོ་འདི་དག་འཇིག་རྟེན་ལ་ཇི་ལྟར་གྲགས་པ་ཡིན་སྙམ་
13-1-107a


ན། ཕྱི་རོལ་གྱི་གཟུགས་ལ་སོགས་པའི་རང་བཞིན་མེད་ཅིང་།  ཡུལ་ཅན་མིག་གི་ཤེས་པ་ལ་སོགས་པའི་རྣམ་རིག་ཀྱང་མེད་ལ། ཕྱི་ནང་གནས་ལུས་ལོངས་སྤྱོད་དུ་སྣང་བའི་དངོས་པོ་མེད་ཅིང་། དེ་དག་གི་ས་བོན་འཛིན་པའི་ཀུན་
གཞི་འང་མེད་མོད་ཀྱི། ཡང་དག་པའི་དོན་ལ་རྟོག་པའི་རིག་པ་ཡེ་ཤེས་དང་བྲལ་བས་སམ། ཆོས་ཡང་དག་པ་ཇི་ལྟ་བ་བཞིན་དུ་རྣམ་པར་འབྱེད་པའི་ཤེས་རབ་ཀྱི་གཡོ་བ་དང་བྲལ་བས་ཤི་ཟིན་པའི་རོ་དང་འདྲ་བ། བྱིས་པ་ལ་རྟོག་གེ་ངན་པའི་དབང་གིས་གྲགས་ཏེ།
དེ་དག་གིས་དེ་ལྟར་བདེན་པར་རྣམ་པར་བརྟག་པ་ཡིན་གྱི་ཡང་དག་པར་ནི་མ་ཡིན་ནོ་ཞེས་སོ། །ཡང་། འོ་ན་ཆོས་ཀྱི་ཚུལ་ཡང་དག་པ་ལ་མཁས་པ་རྣམས་ཇི་ལྟ་བུའི་གནས་པ་ལ་གནས་པར་འགྱུར་སྙམ་ན། སྔོ་སེར་སོགས་ཀྱི་མཚན་མ་དང་། ཕྱི་ནང་གི་སྐྱེ་
མཆེད་ཀྱི་དངོས་པོ་དང་། མིག་ཤེས་སོགས་ཀྱི་རྣམ་པར་རིག་པ་དང་། གཞན་དབང་གི་ཡིད་ཀྱི་གཡོ་བ་ལ་སོགས་པ་རྣམ་པར་རྟོག་པ་ཡིན་ནོ་ཅོག་གི་སྤྲོས་པ་ཀུན་ལས་ངའི་སྲས་རྣམས་འདས་ནས་མཁས་པ་དེ་དག་གང་ལའང་རྣམ་པར་མི་རྟོག་པར་སྤྱོད་དོ། །ཞེས་སོ། །
གཞན་ཡང་བློ་གྲོས་རྣམ་པར་དཀར་བ་སློབ་དཔོན་ཆོས་ཀྱི་གྲགས་པས་ཀྱང་། གང་གིས་དངོས་རྣམས་ངེས་བརྟགས་ན། །ཡང་དག་ཏུ་ན་དངོས་དེ་མེད། །འདི་ལྟར་དེ་དག་གཅིག་པ་དང་། །དུ་མའི་རང་བཞིན་ཡོད་མ་ཡིན། །སྣ་ཚོགས་དངོས་པོའི་དོན་རྣམས་ལ། །
གལ་ཏེ་གཅིག་ཉིད་མི་རིགས་ན། །དེ་བློ་སྣ་ཚོགས་སྣང་བ་ཡང་། །ཇི་ལྟ་བུར་ན་གཅིག་པུར་འགྱུར། །ཇི་ལྟ་ཇི་ལྟར་དོན་བསམས་ན། །དེ་ལྟ་དེ་ལྟར་རྣམ་པར་བྲལ། །དེ་བས་མཚན་ཉིད་སྟོང་པའི་ཕྱིར། །རང་བཞིན་མེད་པར་རབ་བཤད་ཅེས། །མཁས་
13-1-107b


པ་རྣམས་ཀྱིས་གང་གསུང་བ། །དེ་ནི་གསལ་བར་འོང་བ་ཡིན། །ཞེས་གསུངས་པའང་ཚུལ་དེ་དང་འདྲའོ། །གཉིས་པ་ཁྱབ་པ་སྒྲུབ་པ་ནི། གཅིག་དང་དུ་མ་མ་གཏོགས་པར། །རྣམ་པ་གཞན་དང་ལྡན་པ་ཡི། །དངོས་པོ་མི་རུང་འདི་གཉིས་ནི། །
ཕན་ཚུན་སྤངས་ཏེ་གནས་ཕྱིར་རོ། །ཞེས་གསུངས་ཏེ། དེའང་རང་གཞན་གྱི་སྡེ་པས་གང་སྨྲས་པའི་ཕྱོགས་ཤེས་འདོད་ཆོས་ཅན་གྱི་སྟེང་དུ་རྟགས་དེ་གྲུབ་ཅིང་མཐུན་དཔེ་ལ་རྗེས་སུ་འགྲོ་བ་ཡིན་པར་གྲུབ་ཀྱང་། ད་རུང་གཅིག་དང་དུ་མ་དང་བྲལ་ཡང་བདེན་པ་ཞིག་སྲིད་
དམ་སྙམ་ནས། རྟགས་མི་མཐུན་ཕྱོགས་ལས་ལྡོག་པའི་ལྡོག་ཁྱབ་ལ་ཐེ་ཚོམ་ཟ་བས་རྟགས་འདིའི་ཁྱབ་པ་མ་ངེས་པར་ལན་ཐེབས་སྙམ་པའི་རེ་བ་བྱེད་པ་ནི་རེ་བ་འབྲས་མེད་བརྫུན་པ་བསླུ་བ་ཁོ་ན་ཡིན་ཏེ། གལ་ཏེ་གཅིག་དང་དུ་མ་གང་ཡང་མ་ཡིན་པའི་དངོས་པོ་
ཞིག་ཡོད་སྲིད་ན་ནི། གཅིག་དང་དུ་མ་གཉིས་ཀར་བདེན་པ་མེད་ཀྱང་། ད་རུང་ཤེས་བྱ་ཐམས་ཅད་བདེན་མེད་ཡིན་དགོས་པའི་ཁྱབ་པ་མེད་ནའང་། གང་ཕྱིར་གཅི༷ག་ད༷ང་དུ༷་མ༷་གཉིས་མ༷་གཏོག༷ས་པར༷། རྣམ༷་པ༷་གཞ༷ན་ད༷ང་ལྡན༷་པ༷་གཅིག་དུ་མ་གང་ཡང་མིན་པ་ཡི༷་
དངོ༷ས་པོ༷་ཞིག་ཡོད་པར་མི༷་རུ༷ང་བ་ཡིན་ཏེ། རྒྱུ་མཚན་གཅིག་དང་དུ་མ་འདི༷་གཉི༷ས་ནི༷། ཕན༷་ཚུན༷་སྤང༷ས་ཏེ༷་གན༷ས་པའི་མཚན་ཉིད་ཡིན་པས་ཕུང་པོ་གཞན་མི་སྲིད་པ་ཡིན་པའི་ཕྱིར༷་རོ༷། །དེ་ལྟར་ན་ཤེས་བྱའི་ཆོས་རང་གཞན་གྱི་སྡེ་པས་གང་སྨྲས་པ་དེ་དག་ལ་བདེན་པའི་
གཅིག་དང་དུ་བྲལ་གྱི་རྟགས་དེ། ཕྱོགས་ཀྱི་ཆོས་སུ་གྲུབ་ཅིང་ཁྱབ་པ་ངེས་པས་ན་ཆོས་ཐམས་ཅད་རང་བཞིན་མེད་པར་གྲུབ་པ་ཡིན་ནོ། །དེ་ལ་ཁ་ཅིག་གཅིག་དང་དུ་མ་གཉིས་ནི་དངོས་པོའི་རྣམ་གྲངས་ཡིན་ཞིང་། དེ་ལས་བཟློག་པའི་གཅིག་དུ་བྲལ་ནི་དངོས་པོ་མེད་པ་
13-1-108a


ཡིན་ལ། དེ་ལྟར་ན་བསྒྲུབ་བྱ་དང་སྒྲུབ་པ་གཉིས་ཀ་དངོས་པོ་མེད་པར་ཐ་མི་དད་ཡིན་པས། ཆོས་ཅན་དེའི་སྟེང་དུ་བསྒྲུབ་བྱ་རང་བཞིན་མེད་པ་མ་གྲུབ་ན་ནི་དེ་དང་ངོ་བོ་ཐ་མི་དད་པའི་གཏན་ཚིགས་ཀྱང་མ་འགྲུབ་ལ། གཏན་ཚིགས་གྲུབ་ན་ནི་བསྒྲུབ་
བྱ་དངོས་པོ་རྣམས་ཀྱི་རང་བཞིན་མེད་པའང་གྲུབ་ཟིན་ཏེ། དཔེར་ན། གཅིག་དང་དུ་མ་བྲལ་བ་ཉིད་ངེས་ནས་རི་བོང་གི་རྭ་ལ་སོགས་པ་ལ་དངོས་པོ་ཡོད་པར་སུ་ཡང་ཁས་མི་ལེན་པ་བཞིན་ནོ་སྙམ་ནས་གཏན་ཚིགས་འདི་དམ་བཅའ་བའི་དོན་གྱི་ཕྱོགས་གཅིག་
པ་ཉིད་དུ་འགྱུར་རོ་ཞེ་ན། དེ་ལྟ་མ་ཡིན་ཏེ། དངོས་པོ་རྣམས་རང་བཞིན་མེད་པར་གནས་སུ་ཟིན་ཀྱང་། ཐོག་མེད་ཀྱི་རྨོངས་པས་དེ་ལྟར་མི་ཤེས་པ་ལ་གཏན་ཚིགས་གཅིག་དུ་བྲལ་ལ་བརྟེན་ནས་དེ་ལྟར་ཤེས་སུ་གཞུག་པ་སྟེ། ནོག་སོགས་འདུས་པ་ལ་བ་ལང་དུ་མི་
ཤེས་པ་ལ་ནོག་ལྐོག་ཤལ་དང་ལྡན་པའི་ཕྱིར་འདི་ནི་བ་ལང་ངོ་ཞེས་པ་ལྟ་བུའམ།  མདུན་འདིར་དམིགས་པའི་རིག་བྱར་གྱུར་པའི་བུམ་པ་མེད་དེ། ཡོད་ན་དམིགས་དགོས་པ་ལ་དེ་མ་དམིགས་པའི་ཕྱིར་རོ་ཞེས་པ་ལྟ་བུ་སྟེ། གང་རང་བཞིན་མེད་པར་མ་རྟོགས་
པའི་ཤེས་ངོར་སྣང་བའི་ཆོས་ཅན་དེ་ཉིད་ལ། ཤིང་ལོག་པས་ཤ་པ་ལྡོག་པ་ལྟ་བུར་བདེན་པའི་ཁྱབ་བྱེད་གཅིག་བདེན་དང་དུ་མར་བདེན་པ་ལོག་པས་ཁྱབ་བྱ་བདེན་པར་ལྡོག་པ་ཡིན་པས་ན། བསྒྲུབ་བྱ་དང་གཏན་ཚིགས་གཉིས་རྟོགས་ཚུལ་ལ་ཁྱད་མེད་པ་མ་ཡིན་པས་
རྟགས་དེས་ཆོས་ཅན་ལ་བདེན་མེད་སྒྲུབ་པ་ཡིན་གྱི། ཇི་ལྟར་བུམ་པ་རང་བཞིན་མེད་པ། བུམ་པ་བདེན་མེད་ཡིན་པའི་རྟགས་ཀྱིས་སྒྲུབ་པ་ལྟ་བུར་རྟགས་དང་བསྒྲུབ་བྱ་འདྲ་བའི་རྣམ་གྲངས་སུ་འགྱུར་བ་མ་ཡིན་ཏེ། གཏན་ཚིགས་དེས་མ་ཤེས་པ་ལ་ཤེས་པར་བྱེད་ཅིང་
13-1-108b


ཤེས་ཟིན་གསལ་འདེབས་ཡིན་པས་རང་བཞིན་མེད་པའི་ལྡོག་ཕྱོགས་ཀྱི་སྒྲོ་འདོགས་སེལ་བའི་ནུས་པ་ཡོད་པའི་ཕྱིར་རོ། །གཉིས་པ་ཀུན་རྫོབ་ཏུ་དངོས་པོ་ཡོད་པར་བསྟན་པ་ལ། སྣང་ཙམ་བདེན་སྟོང་གི་ཀུན་རྫོབ་ངོས་གཟུང་། དེའི་རང་བཞིན་ཕྱེ་སྟེ་
བཤད་པ་གཉིས། དང་པོ།  དེ་ཕྱིར་དངོས་པོ་འདི་དག་ནི། །ཀུན་རྫོབ་ཁོ་ནའི་མཚན་ཉིད་འཛིན། །གལ་ཏེ་འདི་བདག་དོན་འདོད་ན། །དེ་ལ་བདག་གིས་ཅི་ཞིག་བྱ། །ཞེས་གསུངས་ཏེ། དེ་ལྟར་གཅིག་དང་དུ་མ་གང་དུའང་བརྟག་མི་བཟོད་པ་དེ༷་ཡི་ཕྱིར༷་ན་
དངོ༷ས་པོ༷་འདི༷་དག༷་ཐམས་ཅད་ནི༷། སྒྱུ་མའི་རྟ་གླང་དང་མི་ལ་སོགས་པ་བཞིན་དུ་མ་བརྟགས་ཉམས་དགའ་བའི་ཀུན་རྫོ༷བ་ཁོ༷་ན༷འི་མཚ༷ན་ཉི༷ད་འཛི༷ན་པ་ཡིན་ནོ། །གལ༷་ཏེ༷་དངོ༷ས་པོ་འདི༷་ཀུན་ཀྱང་བརྫུན་པ་ཀུན་རྫོབ་ཀྱི་མཚན་ཉིད་མ་བཟུང་བར་སྣང་བ་ལྟར་གྱི་བད༷ག་གམ་
ངོ་བོ་ཞིག་དོ༷ན་དུ་ཡོད་པར་འདོ༷ད་ན༷། དེ༷་ལ༷་བད༷ག་གི༷ས་དགག་པས་ཅི༷་ཞིག༷་བྱ༷་སྟེ། དངོས་པོའི་ཆོས་ཉིད་ནི་ཁོ་རང་གི་ཡིན་ལུགས་ཡིན་གྱི། གཞན་དག་གིས་འདོད་པས་དེ་ལ་ཅུང་ཟད་ཀྱང་བཅོས་སུ་ཡོད་པ་མིན་ཏེ། དཔེར་ན། སྒྱུ་མའི་རྟ་གླང་སྣང་བ་དེ་སྣང་བ་ལྟར་
རྟ་གླང་དུ་གྲུབ་པར་གྱུར་ན་དེ་བརྫུན་པའོ་ཞེས་གཞག་པར་མི་རུང་བ་དང་འདྲའོ། །དེས་ན་སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་བྱུང་ཡང་རུང་། མ་བྱུང་ཡང་རུང་སྟེ་ཆོས་རྣམས་ཀྱི་ཆོས་ཉིད་འདི་ནི་གནས་པའོ། །ཞེས་གསུངས་པ་ལྟར། དངོས་པོ་རྣམས་
ཀྱི་ཡིན་ལུགས་ལ་བློས་བཞག་པས་བཅོས་སུ་མེད་དེ།  དངོས་པོའི་ཡིན་ལུགས་དང་བློ་མཐུན་པར་གྱུར་ན་བློ་དོན་མཐུན་ཡང་དག་པ་ཡིན་ལ། གལ་ཏེ་དངོས་པོའི་ཡིན་ལུགས་དང་མི་མཐུན་པར་ཅི་བརྟགས་ཀྱང་རང་གི་བློ་ཡུལ་ལ་ཕྱིན་ཅི་ལོག་ཏུ་རྟོག་པའི་སྒྲོ་འདོགས་
13-1-109a


པར་འགྱུར་གྱི། ཡུལ་དེ་ནི་དེས་འདོད་པས་བཞག་པའི་རྗེས་སུ་འབྲང་བ་མ་ཡིན་ནོ། །དེས་ན་གཞན་གྱིས་མ་བཅོས་པར་རང་གི་ངོ་བོའི་ཡིན་ལུགས་ཡིན་ན་དངོས་པོ་དེའི་ཆོས་ཉིད་དམ། ཁོ་རང་གི་ཡིན་ལུགས་སམ། རང་བཞིན་
དེ་འདྲ་བ་ཁོ་རང་གི་རང་གིར་བྱས་པ་ཡིན་པས། སུ་དག་གིས་ཀྱང་དེ་ལས་གཞན་དུ་དྲང་བར་མི་ནུས་པས་ལྕགས་ཀྱུ་མེད་པའམ་ལྕགས་ཀྱུ་དང་བྲལ་བ་ཞེས་བྱ་སྟེ། ལྕགས་ཀྱུ་ནི་འཛིན་བྱེད་ཡིན་ལ་རང་འདོད་ཀྱིས་བཞག་པའི་ལྕགས་ཀྱུས་བཟུང་མི་ནུས་ཞེས་པའི་དོན་ཏེ།
དཔེར་ན། མེ་ཚ་བ་ཡིན་པ་ལ་སུས་ཀྱང་དེ་ཚ་བ་མིན་པར་བསྒྲུབ་མི་ནུས་པ་ལྟ་བུའོ། །དེ་ལ་ཀུན་རྫོབ་ཁོ་ནའི་ཞེས་པའི་སྒྲས་ཡང་དག་པ་ཡིན་མིན་གཉིས་སུ་ཕྱེ་བའི་ཡང་དག་མིན་པ་བརྫུན་པའི་ངོ་བོ་འཛིན་གྱི། ཡང་དག་པའི་ངོ་བོ་བདེན་པར་གྲུབ་པ་ནམ་ཡང་མེད་
ཅེས་ཡང་དག་པ་གཅོད་པ་ཡིན་ནོ། །གལ་ཏེ་འདི་དག་ཅེས་གཉིས་ཚིག་བྱས་པ་དཔེ་ལ་ལར་སྣང་ཡང་བ་འཕུལ་ཆད་ནས་ཡི་གེ་མ་དག་པ་སྟེ། དཔེ་རྙིང་ཤིན་ཏུ་དག་པ་རྣམས་ན་འདི་བདག་ཅེས་ཡོད་པ་དེ་ཁོ་ནར་གཟུང་དགོས་སོ། །ཚིག་རྐང་ཕྱི་མ་གཉིས་ཀུན་
རྫོབ་ཚད་གྲུབ་མི་བཀག་པ་ལ་བཤད་མཁན་འདུག་ཀྱང་། སྤྱིར་རྣམ་གྲངས་པའི་དོན་དམ་འཆད་པའི་སྐབས་སུ་ཀུན་རྫོབ་ཀྱི་རང་མཚན་ཐ་སྙད་ཀྱི་ཚད་མས་གྲུབ་པ་དང་།  དོན་དམ་བདེན་གྲུབ་མེད་པར་དགག་པ་ལ་བྱེད་པ་རང་རྒྱུད་པའི་བསྒྲུབ་བྱའི་གཙོ་བོ་ཡིན་པས་ཐ་
སྙད་ཚད་གྲུབ་མི་དགག་པ་ནི་བདེན་ཀྱང་། སྐབས་འདིའི་ཚིགས་སུ་བཅད་པའི་དོན་དེ་ལྟར་འགྲེལ་བ་མི་འཐད་དེ་རྒྱས་པར་མ་སྤྲོས་སོ།  །ཚིགས་སུ་བཅད་པ་འདི་ནི་དོན་ཆེ་ཞིང་ཤིན་ཏུ་བརླིང་བ་ཡིན་པས་བཤད་དགོས་པ་མང་དུ་འདུག་ཀྱང་མཚོན་ཙམ་བརྗོད་ན། དེ་
13-1-109b


ཕྱིར་ཞེས་པ་དང་། ཁོ་ན་ཞེས་པ་དང་། དཔེ་ལ་ལར་འགྱུར་གྱི་དབང་གིས་ཀུན་རྫོབ་པ་ཉིད་ཅེས་ངེས་གཟུང་བྱས་པ་དེ་གཉིས་དོན་དུ་འདྲ་ལ། ཡང་། གལ་ཏེ་ཞེས་པ་རྣམས་ལ་ཟུར་མྱོང་རྒྱུ་ཆེན་པོ་ཡོད་པ་ཡིན་ཞིང་། དོན་དམ་པའི་དཔྱད་པས་དགག་པ་ཇི་སྙེད་
པ་ཀུན་ཀྱང་ཀུན་རྫོབ་ཀྱི་མཚན་ཉིད་ཤེས་པའི་ཐབས་སུ་འགྲོ་བ་དང་། ཀུན་རྫོབ་སྣ་ཚོགས་པའི་སྣང་བ་ཐམས་ཅད་དོན་དམ་པ་རྟོགས་པའི་ཐབས་སུ་གྱུར་པ་སྟེ། དེ་གཉིས་གཅིག་གྲོགས་སུ་གཅིག་འཆར་བ་ཞིག་གི་གོ་བ་འདི་ལ་ལེན་རྒྱུ་ཡོད་པ་ཡིན་ནོ། །དེ་
ལ་སྣང་ཙམ་བདེན་པས་སྟོང་པ་འདི་ཀུན་རྫོབ་ཀྱི་ངོ་བོ་ཡིན་ལ། གལ་ཏེ་འདི་སྣང་བ་ལྟར་གྲུབ་པ་ཞིག་ན་ནི་འདི་ཀུན་རྫོབ་མ་ཡིན་ལ། དེ་ལྟར་ན་དོན་དམ་ཡང་མེད་པར་འགྱུར་ཞིང་། འདིར་སྣང་ཡང་དེ་ལྟར་མ་གྲུབ་པ་ཁོ་ན་ཡིན་པས་འདི་ཀུན་རྫོབ་ཡིན་ལ་དེ་ལྟར་ན་
དོན་དམ་པའང་དེ་ཉིད་ཀྱིས་གྲུབ་པ་ཡིན་པ་དང་། ཆོས་ཐམས་ཅད་གཅིག་དང་དུ་མར་བྲལ་བའི་དོན་དམ་པར་རང་བཞིན་མེད་པ་དེའི་ཕྱིར། སྣང་ཙམ་འདི་ལ་ཀུན་རྫོབ་ཀྱི་མཚན་ཉིད་ཐོབ་པར་གྱུར་པ་ཡིན་པས། བདེན་པ་གཉིས་པོ་འདི་དག་གཅིག་གིས་གཅིག་
གསལ་བར་བྱས་པ་ཡིན་གྱི། ཕན་ཚུན་གནོད་པ་ཅན་ག་ལ་ཡིན་ཏེ། ཞིབ་ཏུ་གོང་འོག་ཏུ་བཤད་པ་ཐམས་ཅད་བསྒྲིགས་ནས་སྟོང་དང་རྟེན་འབྱུང་གཅིག་གྲོགས་སུ་གཅིག་འཆར་ཞིང་གཅིག་མེད་ན་གཅིག་ཤོས་ཀྱང་མི་སྲིད་པའི་གོ་བ་ལ་སྒོ་ཀུན་ནས་འབད་པ་ལས་
ལྷག་པའི་དོན་ཆེན་པོ་ཤེས་བྱའི་ཁོངས་ན་ཡོད་པ་མ་ཡིན་ནོ། །དེས་ན་དངོས་པོ་འདི་དག་གི་ཡིན་ལུགས་ཅི་འདྲ་ཞིག་ཡིན་སྙམ་ན། རྣམ་པ་སྣ་ཚོགས་སུ་སྣང་ཡང་རང་བཞིན་མེད་པ་ཞིག་ཡིན་ནོ།  །དེས་ན་རང་བཞིན་མེད་པར་དཔྱད་པ་དེས་ཀྱང་ཀུན་རྫོབ་ཀྱི་ཡིན་
13-1-110a


ལུགས་ལ་ཟློག་ཕྱོགས་སུ་སྒྲོ་འདོགས་པ་སེལ་བ་ཡིན་པས་ཀུན་རྫོབ་ཀྱི་ཡིན་ལུགས་གསལ་བར་བྱས་པ་ཡིན་ཏེ། སྣང་བ་དང་སྟོང་པ་ཟུང་དུ་མ་འབྲེལ་ན་དངོས་པོའི་ཡིན་ལུགས་མ་ཤེས་པ་ཡིན་ལ་དེ་གཉིས་འདུ་འབྲལ་མེད་པར་ཤེས་
ན་དངོས་པོའི་ཡིན་ལུགས་ཤེས་པ་སྟེ། སྒྱུ་མའི་རྟ་གླང་གི་རང་བཞིན་རྟ་གླང་དུ་སྣང་ནི་སྣང་བ་དང་། བདེན་ནི་མི་བདེན་པའི་བརྫུན་པ་ཡིན་པ་ཟུང་དུ་ཚོགས་པ་བཞིན་ནོ། །དེས་ན་ཇི་སྐད་གནས་པའི་དངོས་པོའི་དེ་ཁོ་ན་ལ་མཁས་པའི་སངས་རྒྱས་བཅོམ་ལྡན་འདས་
རྣམས་ཀྱིས་དེ་དང་དེ་དག་ཏུ་རབ་ཏུ་བཤད་དེ།  ཇི་སྐད་དུ་ཆོས་ཡང་དག་པར་སྡུད་པ་ལས། བྱང་ཆུབ་སེམས་དཔས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཐ་སྙད་དུ་སྟོན་པ་རྣམ་པ་བཅུར་ཁོང་དུ་ཆུད་པར་བྱ་སྟེ། 
བཅུ་གང་ཞེ་ན། འདི་ལྟ་སྟེ།  ཕུང་པོ་སྟོན་པ་དང་། ཁམས་སྟོན་པ་དང་། སྐྱེ་མཆེད་སྟོན་པ་ལ་སོགས་པ་གསུངས་པ་དང་། དཀོན་མཆོག་སྤྲིན་ལས་ཀྱང་། རིགས་ཀྱི་བུ་ཆོས་བཅུ་དང་ལྡན་ན་བྱང་ཆུབ་སེམས་དཔའ་ཀུན་རྫོབ་ལ་མཁས་པ་
རྣམས་ཡིན་ནོ། །བཅུ་གང་ཞེ་ན། འདི་ལྟ་སྟེ། གཟུགས་སུའང་འདོགས་ལ་དོན་དམ་པར་ན་གཟུགས་སུའང་མི་དམིགས་ཤིང་མངོན་པར་ཞེན་པ་མེད་དོ། །དེ་བཞིན་དུ་ཚོར་བ་སོགས་ལ་སྦྱར་ཏེ་རྒྱས་པར་གསུངས་སོ། །འཕགས་པ་བློ་གྲོས་མི་
ཟད་པས་བསྟན་པ་ལས་ཀྱང་། ཚུལ་བཞིན་ཞེས་བྱ་བ་ནི་ཆོས་ཐམས་ཅད་བདག་མེད་པ་སྟེ།  དེ་བཞིན་དུ་ཆོས་ཐམས་ཅད་རིགས་པས་མཐོང་བའོ། །ཞེས་པ་ལ་སོགས་པ་དང་། རྒྱལ་བ་སྐྱེད་མ་ཡུམ་ཆེན་མོ་ལས་ཀྱང་། མཚན་ཉིད་སྟོང་པ་
13-1-110b


ཉིད་ཀྱི་ཕྱིར་རྣམ་པར་ཤེས་པའི་བར་དུ་རྣམ་པར་ཤེས་པའི་ངོ་བོ་ཉིད་ཀྱིས་སྟོང་ངོ་། །ཞེས་གསུངས་པ་ལྟ་བུའོ། །དེ་ལ་སེམས་ཙམ་པ་ན་རེ། སྟོང་པར་གསུངས་པ་འདི་ནི་ཀུན་བཏགས་པའི་ངོ་བོས་སྟོང་པར་གསུངས་པ་ཡིན་ནོ་ཞེ་ན། དེ་བདེན་ཏེ་ཡང་དག་པར་ན་ཤེས་
པ་རང་བཞིན་ཡོད་དོ་ཞེས་བྱ་བ་དེའང་ཀུན་བརྟགས་ཡིན་པར་བདག་ཅག་འདོད་དོ། །གཞན་དབང་གི་ངོ་བོ་བདེན་པར་གྲུབ་ན་གཟུང་འཛིན་གཉིས་སུ་སྣང་བ་ཁོ་ན་ཀུན་བརྟགས་སོ་ཞེས་བྱ་བ་དེ་འགྲུབ་ནའང་སྔར་ཇི་སྐད་བཤད་པའི་ཚད་མས་གནོད་པ་ཡོད་པས་དེའང་ཀུན་
བརྟགས་ཉིད་དུ་གྲུབ་པ་ཡིན་ནོ། །གླང་པོའི་རྩལ་གྱི་མདོ་ལས་ཀྱང་། ཤཱ་རིའི་བུ་འདི་ཇི་སྙམ་དུ་སེམས། གང་ཆོས་རྣམས་ཀྱི་ངོ་བོ་ཉིད་ཤེས་པ་དེ་ཡོད་པ་ཡིན་ནམ་འོན་ཏེ་མེད་པ་ཡིན། གསོལ་བ། བཅོམ་ལྡན་འདས་གང་ཆོས་ཐམས་ཅད་ཀྱི་ངོ་བོ་
ཉིད་འཚལ་བ་དེ་ནི་འཚལ་བ་མ་མཆིས་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཀྱིས་ཆོས་ཐམས་ཅད་ནི་སྒྱུ་མའི་ངོ་བོ་ཉིད་དོ་ཞེས་བསྟན་པའི་སླད་དུ་སྟེ། སྒྱུ་མ་ལྟ་བུ་གང་ལགས་པ་དེ་ནི་མ་མཆིས་པའོ། །འདི་ལྟ་སྟེ། ཆོས་ཐམས་ཅད་ཀྱང་ངོ་བོ་
ཉིད་འཚལ་བ་དེ་ནི་འཚལ་བ་མ་མཆིས་པའོ། །དེ་ཅིའི་སླད་དུ་ཞེ་ན། འདི་ལ་གང་ཡང་ཡང་དག་པར་ཆོས་གང་ཡང་མི་དམིགས་པའི་སླད་དུའོ། །ཞེས་བྱ་བ་ལ་སོགས་པ་གསུངས་པ་ལྟར་རོ། །དེས་ན་རང་བཞིན་མེད་པ་དང་རྟེན་འབྱུང་གི་སྣང་བ་གཉིས་པོ་ངོ་བོ་
དབྱེར་མེད་པ་ཆུ་ཟླ་ལྟར་སྟོང་བཞིན་སྣང་བའི་ངེས་པ་ཁྱད་པར་ཅན་སྐྱེས་ནས་དེ་ལྟ་བུར་འཛིན་སྟངས་ཀྱི་སྒོ་ནས་ཡིད་ལ་བྱེད་པ་ནི་སྣང་བ་དང་བཅས་པའི་སྤྱོད་ཡུལ་ཅན་གྱི་སྒྱུ་མ་ལྟ་བུའི་ངེས་ཤེས་བྱ་བ་ཡིན་ལ། དེའང་གནས་ཚུལ་དང་མཐུན་པར་བཟུང་བ་ཡིན་
13-1-111a


མོད། སྟོང་པའི་གཞི་ཉིད་དང་དེའི་རང་བཞིན་མེད་པ་བློས་སྦྱར་ནས་བཟུང་བ་ཙམ་སྟེ། དགག་སྒྲུབ་ཀྱི་རྟོག་པ་གཉིས་པོའི་ཞེན་ཡུལ་རིགས་པས་སུན་ཕྱུང་ནུས་ཤིང་བོག་དབྱུང་དུ་ཡོད་པ་ཡིན་པས་རྣམ་པར་རྟོག་པ་ལ་བརྟེན་པས་ན་
ཀུན་རྫོབ་ཅེས་བྱ་བ་ཡིན་ནོ། །གནས་ལུགས་ཇི་བཞིན་བསྒོམ་པ་ནི་དགག་སྒྲུབ་ཀྱི་རྟོག་པའི་སྤྲོས་པ་ཀུན་དང་བྲལ་བ་ཉིད་དེ། སྣང་བ་མེད་པའི་སྤྱོད་ཡུལ་ཅན་གྱི་མཉམ་བཞག་ནམ་མཁའ་ལྟ་བུ་ཞེས་སོ། །མཉམ་བཞག་སྣང་བཅས་སུ་འདོད་པའི་ལུགས་
ལྟར་ནའང་སྤྲོས་བྲལ་ཡིན་ཚུལ་ལ་ནི་ཁྱད་ཅིའང་མེད་དོ། །གཉིས་པ་ཀུན་རྫོབ་དེའི་རང་བཞིན་ཕྱེ་སྟེ་བཤད་པ་ལ། སྣང་ཙམ་བསླུ་མེད་དུ་ཡོད་པ་དང་། སྣང་གཞི་བདེན་སྟོང་དུ་ངེས་པ་གཉིས། དང་པོ་ལ་ཚུལ་ཇི་ལྟར་སྣང་བ་དང་། རྒྱུ་གང་གིས་
སྣང་བའི་ཚུལ་གཉིས། དང་པོ། མ་བརྟགས་གཅིག་པུ་ཉམས་དགའ་ཞིང་། །སྐྱེ་དང་འཇིག་པའི་ཆོས་ཅན་པ། །དོན་བྱེད་པ་དག་ནུས་རྣམས་ཀྱི། །རང་བཞིན་ཀུན་རྫོབ་པ་ཡིན་རྟོགས། །ཞེས་གསུངས་ཏེ། ཀུན་རྫོབ་ཅེས་བྱ་བ་དེ་རི་བོང་གི་རྭ་ལ་སོགས་
པ་དང་། རྟག་པའི་དབང་ཕྱུག་ལ་སོགས་པ་བཞིན་དུ་མིང་ཙམ་ཞིག་ཡིན་ནམ། འོན་ཏེ་རྟེན་ཅིང་འབྲེལ་བ་བྱ་བྱེད་བསླུ་མེད་དུ་ནུས་པ་གནག་རྫི་ཡན་ཆད་ལ་ཤིན་ཏུ་གྲགས་པའི་དོན་དེ་ལ་བརྡའི་དབང་གིས་ཀུན་རྫོབ་ཅེས་བཞག་པ་གང་ཡིན་སྙམ་ན། ཀུན་རྫོབ་
འདི་ནི་རི་བོང་གི་རྭ་ལ་སོགས་པ་བཞིན་དུ་སྒྲ་ཙམ་གྱིས་བཞག་པའི་དངོས་མེད་མཐོང་བ་དང་འདོད་པའི་དོན་མི་བྱེད་པ་མ་ཡིན་ཏེ། འདི་ལྟར་རྟེན་ཅིང་འབྲེལ་བར་འབྱུང་བའི་ངོ་བོ་བརྟགས་ན་དཔྱད་མི་བཟོད་ཀྱང་མ༷་བརྟག༷ས་གཅི༷ག་པུ༷འམ་ཁོ་ནའི་དབང་དུ་ན་ཉམ༷ས་
13-1-111b


དགའ་དགའ་ལྟར་མངོན་སུམ་དུ་སྣང་ཞིང༷་། རྒྱུ་དང་འབྲས་བུའི་ངོ་བོ་སྐད་ཅིག་གིས་སྐྱེ༷་བ་ད༷ང་འཇིག་པ༷འི་ཆོས༷་ཅ༷ན་ཡིན་པ༷་དང་མཐོང་བ་དང་འདོད་པའི་དོ༷ན་བསླུ་མེད་དུ་བྱེ༷ད་པ༷་ད༷ག་ནུས༷་པའི་དངོས་པོ་འདི་རྣམ༷ས་ཀྱི༷་ར༷ང་བཞིན་ནི་ཀུན༷་རྫོབ༷་པ༷་ཞེས་བྱ་བ་ཡི༷ན་པར་
རྟོག༷ས་པའམ་ཤེས་དགོས་པ་ཡིན་ནོ། །དེ་ལ་ཀུན་རྫོབ་ཀྱི་མཚན་ཉིད་ལ་རྣམ་བཅད་ཀྱི་དབང་དུ་གསུམ་བསྟན་པ། ཡོངས་གཅོད་ཀྱི་དབང་དུ་གཅིག་ཏུ་བསྒྲུབ་པ་ཡིན་ཏེ། འདི་ལྟར་ཀུན་རྫོབ་འདི་དག་བདེན་པས་སྟོང་བཞིན་དུ་སྣང་བ་མ་ཡིན་པ་བསལ་བའི་ཆ་
ནས་མ་བརྟགས་ཉམས་དགའ་ཞེས་གསུངས་ཏེ། བརྟགས་ན་མི་རྙེད་ཀྱང་མ་དཔྱད་པའི་ངོར་འགོག་མེད་དུ་སྣང་བ་ཆུ་ནང་གི་ཟླ་བ་ལྟ་བུའོ། །དེ་དག་ནི་སྣང་བ་བསླུ་མེད་འདི་ལ་བདེན་སྟོང་སྒྲུབ་པའི་རིགས་པ་གོང་དུ་ཇི་སྐད་བཤད་པ་དེ་དག་གིས་ངེས་སོ། །སྐད་
ཅིག་མ་མ་ཡིན་པ་རྣམ་པར་གཅོད་པའི་དོན་དུ་སྐྱེ་འགག་གི་ཆོས་ཅན་ཡིན་པ་བསྟན་ཏེ། དེ་དག་ནི་རྟག་དངོས་འགོག་པའི་རིགས་པ་ལ་སོགས་པས་གསལ་བར་གྲུབ་ཀྱང་། འདིར་ཅུང་ཟད་སྤྲོས་ཏེ་བཤད་ན། སྐད་ཅིག་མར་སྒྲུབ་པའི་རིགས་པ་ལ། ལྟོས་
མེད་དང་།  གནོད་པ་ཅན་གཉིས་སུ་ཡོད་ལ། དང་པོ། གང་དངོས་པོར་ཡོད་པ་དེ་འཇིག་རྒྱུ་གཞན་ལ་མི་ལྟོས་པར་རང་སྐད་ཅིག་གིས་འཇིག་པས་ཁྱབ། དཔེར་ན། གློག་དང་མེ་ལྕེ་ལ་སོགས་པ་བཞིན། སྒྲའང་དངོས་པོར་ཡོད་པས་སོ། །ཞེས་པ་ལྟ་
བུ་སྟེ། དེ་ལ་ཁ་ཅིག་བུམ་པ་ལྟ་བུ་འཇིག་རྒྱུ་དང་མ་ཕྲད་ཀྱི་བར་དུ་རྟག་པ་ཡིན་ཏེ། ཇི་སྲིད་ཐོ་བ་སོགས་ཀྱིས་གྱོ་མོར་མ་བྱས་པ་དེ་སྲིད་ཁར་སང་གི་བུམ་པ་དེ་རིང་གི་འདིའང་ཡིན། དེ་རིང་གི་འདི་སང་གི་དེའང་ཡིན་སྙམ་པའོ། །དེ་ལ་འཇིག་པར་བྱ་རྒྱུའི་དངོས་པོ་
13-1-112a


དང་། ཞིག་པ་དངོས་མེད་གཉིས་ཀ་ལ་འཇིག་ཅེས་པའི་སྒྲ་འཇུག་མོད་ཀྱི། གང་ལྟར་ཡང་རྒྱུ་གཞན་མི་དགོས་ཏེ། དང་པོ་ལྟར་ན་རང་སྐྱེད་བྱེད་ལས་གཞན་མི་དགོས་ལ། ཕྱི་མ་ལྟར་ན་རྒྱུ་གཏན་མི་སྲིད་པས་སོ། །བུམ་
པ་གཅིག་སྐྱེས་ནས་སྐད་ཅིག་བརྒྱའི་བར་དུ་འཇིག་རྒྱུ་དང་མ་ཕྲད། དེ་ནས་ཕྲད་དེ་ཞིག་པ་ལ་དཔེར་མཚོན་ན། སྐད་ཅིག་དང་པོ་སྐྱེས་མ་ཐག་པའི་སྐབས་དང་། དེ་ནས་རིམ་བཞིན་སྐད་ཅིག་གཉིས་པ་སོགས་ཀྱི་སྐབས་ཡོད་དགོས་ཏེ། གལ་ཏེ་དེ་ལྟར་མེད་པར་
སྐད་ཅིག་དེ་དག་གི་གནས་སྐབས་ཀྱི་བུམ་པ་གཅིག་ཡིན་ན། སྐྱེས་མ་ཐག་པའི་སྐད་ཅིག་དང་རྒྱུན་འགག་ཁ་མའི་སྐད་ཅིག་གི་དུས་ཀྱི་བུམ་པ་གཉིས་གཅིག་ཡིན་དགོས་ལ། དེ་ལྟར་ན་བུམ་པ་དེ་སྐད་ཅིག་གཅིག་གིས་ཞིག་པར་གྱུར་པ་ལས་སྐད་ཅིག་བརྒྱར་མི་གནས་
པར་འགྱུར་ལ། དེ་བཞིན་དུ་བར་གྱི་སྐད་ཅིག་གཅིག་སོ་སོ་ཐ་དད་མ་ཡིན་པར་སོང་ན་སྐད་ཅིག་དེ་མི་ཚང་བར་འགྱུར་བ་ཡིན་ཏེ། སྐད་ཅིག་ཅེས་པ་དེའང་བུམ་པ་དང་ངོ་བོ་ཐ་དད་པར་བུམ་པ་རྟག་ནས་སྐད་ཅིག་ལོགས་སུ་བགྲང་རྒྱུ་ཡོད་པ་ལྟ་བུ་མི་སྲིད་དོ། །དེ་བཞིན་དུ་
ཞག་ལོ་བསྐལ་པ་ཇི་ཙམ་གནས་ཀྱང་དེ་སྐད་ཅིག་མར་གྲུབ་སྟེ། སྐད་ཅིག་མ་མ་བསགས་པའི་ལོ་སོགས་གྲུབ་མི་ཤེས་པ་བཞིན་ནོ། །མི་ལོ་བརྒྱར་སྡོད་དོ་ཞེས་པའང་ལོ་རེ་རེ་བ་བརྒྱ་བརྩིས་པ་ཡིན་ལ། ལོ་ལའང་ཟླ་བ་བཅུ་གཉིས་མ་ཚང་ན་ལོར་མི་
རུང་ལ། ཟླ་བ་ལའང་ཞག་སུམ་ཅུ། ཞག་ལ་དབྱུ་གུ་དྲུག་ཅུ། དབྱུ་གུ་རེ་ལ་སྲང་དྲུག་ཅུ། སྲང་རེ་ལ་དབུགས་དྲུག །དབུགས་རེ་ལ་འབྱིན་རྡུབ་གཉིས། དེའི་རེ་རེ་ལའང་སྐད་ཅིག་དུ་མ་ཡོད་དེ། ཨུཏྤ་ལའི་འདབ་མ་བརྒྱ་བརྩེགས་པ་ཁབ་ཀྱིས་
13-1-112b


སྐྱེན་པར་ཕུག་པ་བཞིན་དུ་སྐད་ཅིག་རྣམས་རིམ་པས་འབྱུང་བ་མ་གཏོགས། གོ་རིམ་འཆོལ་བར་འབྱུང་མི་ཤེས་ལ། དེའི་ནང་གི་སྐད་ཅིག་གཅིག་ལྟ་བུ་མ་ཚང་ཡང་།  དེའི་གྲངས་ཀྱིས་སྡོད་ཡུན་ཐུང་མི་འགྲོ་བ་མི་སྲིད་ཅིང་། སྐད་
ཅིག་དང་པོ་དང་གཉིས་པའི་དུས་ཀྱི་དངོས་པོ་དེ་གཅིག་ཡིན་པར་གྱུར་ན། སྐད་ཅིག་དང་པོ་ཁོ་ན་བཞིན་ལས་གཉིས་པ་དོན་མེད་པར་འགྱུར་ལ། དེ་སྐད་ཅིག་དང་པོ་དེ་ལས་གཡོ་བ་མེད་ཅིང་མི་འཇིག་ན་མཐར་འགྱུར་བའང་མི་སྲིད་ཅིང་། མདོར་ན་སྐད་ཅིག་དང་པོ་ལ་
ཆོས་ཅི་དམིགས་པ་དེ་ལས་གཞན་དུ་དམིགས་ཀྱང་མི་རུང་སྟེ། སོ་རྙིང་དང་སྔ་ཡོད་ད་ཡོད་ཀྱི་ཁྱད་པར། སུའི་དབང་པོའི་ཡུལ་དུ་གྱུར་མ་གྱུར། བྱ་བ་བྱེད་པ་དང་མི་བྱེད་པའི་དངོས་པོ་ཐ་དད་མེད་པར་འགྱུར་དགོས་ན། དེ་ལྟར་མ་ཡིན་པས་སྔ་མ་ཞིག་ནས་ཕྱི་མའི་
གནས་སྐབས་སྐྱེ་བར་ངེས་ཏེ། གང་བུམ་པ་ལྟ་བུ་ལའང་སྔ་མ་ཆུ་མེད་པའི་དུས་དང་། ད་ལྟ་ཆུ་ཡོད་པའི་དུས་ཀྱི་བུམ་པ་གཅིག་ཡིན་ན། ཆུ་མེད་པའི་གནས་སྐབས་ཡིན་བཞིན་ཆུ་ཡོད་པ་ཡིན་དགོས་ལ་དེ་མི་སྲིད་པའི་སྔ་མ་ཆུ་མེད་ཀྱི་སྐབས་ཀྱི་བུམ་པ་དེ་འགགས་
པར་ཤེས་པར་བྱ་སྟེ། དེ་མ་འགགས་ན་ཆུ་ཡོད་འབྱུང་བའི་གོ་སྐབས་མི་སྲིད་པ་ཡིན་ནོ། །དེ་བཞིན་དུ་དངོས་པོའི་ཆོས་གང་ཞིག་དོན་བྱེད་པར་སྣང་བ་ཐམས་ཅད་སྐད་ཅིག་སྔ་མ་མ་འགགས་ན་ཕྱི་མ་མི་སྐྱེ་བས་དངོས་པོ་རང་གི་སྐྱེ་འགག་གཉིས་རྒྱུ་གཅིག་གིས་འཕེན་པ་
ལས། འགག་པ་ལ་རྒྱུ་གཞན་མ་དགོས་པར་ཤེས་པར་བྱའོ། །དེ་ལྟར་སྐད་ཅིག་གིས་སྐྱེ་ཞིང་འགག་པ་ཡིན་མོད་ཀྱི། འདྲ་བ་བར་མ་ཆད་དུ་བྱུང་བ་ལ་འཁྲུལ་པའི་རྒྱུ་བྱས་ཏེ་གཅིག་པུར་བཟུང་བ་ཡིན་པ། དཔེར་ན། ན་ནིང་བདག་ཆུ་འདིར་བརྒལ། སང་ཡང་བརྒལ་
13-1-113a


ལོ་སྙམ་དུ་ན་ནིང་དང་ད་ལོ་སང་ཕོད་ཀྱི་ཆུ་བོ་དེ་གཅིག་རྟག་ལྟ་བུར་སེམས་ཀྱང་། བརྟགས་ན་ན་ནིང་དང་སང་ཕོད་ཕར་ཞོག །ད་ནང་གི་ཆུ་ཡི་ཤུལ་ན་ཟིལ་པ་ཙམ་ཡང་མེད་པར་ཆུ་གསར་པ་ཞིག་བྱུང་བ་ཡིན་པ་བཞིན་ནོ། །དེས་ན་བུམ་པ་ལྟ་
བུ་ཐོ་བས་འཇིག་གོ་ཞེས་སེམས་པ་ནི། བུམ་པའི་སྐད་ཅིག་མ་འོངས་པ་རྒྱུན་མཐུད་དེ་སྐྱེ་བ་བཀག་སོང་བ་ལ་བུམ་པ་བཤིག་ཅེས་བརྗོད་ཀྱི། དངོས་སུ་བུམ་འཇིག་གི་རྒྱུ་ནི་མ་ཡིན་ཏེ། ཐོ་བས་ཐོ་བ་རང་ངམ། གྱོ་མོའམ། དེ་ལས་གཞན་ཞིག་བྱེད་པ་ཡིན་ཞེས་
བརྟགས་ན། རང་བྱེད་མི་སྲིད་ལ། བུམ་པའི་ཉེར་ལེན་དང་ཐོ་བས་ལྷན་ཅིག་བྱེད་རྐྱེན་བྱས་ནས་གྱོ་མོ་སྐྱེ་བར་བྱེད་མོད། འོན་ཀྱང་གྱོ་མོ་བྱས་པ་ཡིན་གྱི་བུམ་པ་ཅི་ཞིག་བཤིག །ཐོ་བ་གཅིག་གིས་བུམ་པ་དངོས་མེད་དུ་འཇིག་པ་དང་། གྱོ་མོ་དངོས་པོ་གཉིས་
ཅིག་ཅར་བསྐྱེད་དོ་སྙམ་ན། དངོས་དངོས་མེད་གཉིས་བྱ་བའི་ཡུལ་དུ་མི་རུང་ལ། གྱོ་མོ་ལས་གཞན་བྱས་པས་བུམ་པ་མི་འཇིག་སྟེ།  ཀ་བ་བྱས་པས་བུམ་པ་མི་འཇིག་པ་བཞིན་ནོ། །གང་ཐོ་བས་བུམ་པ་བཤིག་གི་གྱོ་མོ་མེ་བུས་པའི་ཐལ་བ་ལྟར་ཤུགས་ལས་
བྱུང་ངོ་སྙམ་ན། རྫ་མཁན་གྱིས་ཀྱང་འཇིམ་པ་བཤིག་པར་འགྱུར་གྱི་བུམ་པ་བྱས་པར་མི་འགྱུར་བ་སོགས་ཧ་ཅང་ཐལ་ལོ། །དེས་ན་འཇིག་པ་དངོས་མེད་རྒྱུ་ཡིས་བྱེད་དོ་ཞེས་གང་སྨྲ་བ་དེས་དོན་ལ་རྒྱུ་ཡིས་ཅི་ཡང་མི་བྱེད་པར་ཁས་བླངས་པ་སྟེ། མེད་པར་བལྟ་
ཟེར་བ་དང་། ལྟ་རྒྱུ་མེད་ཟེར་བ་གཉིས་དོན་དུ་འདྲ་བ་བཞིན་ནོ། །གཉིས་པ་གནོད་པ་ཅན་གྱི་གཏན་ཚིགས་ནི། ཁ་ཅིག་གིས་བྱ་རོག་ཕལ་ཆེར་ནག་པོ་ཡིན་ཀྱང་དཀར་པོ་ཡོད་སྲིད་པ་ལྟར་དངོས་པོ་ཕལ་ཆེར་མི་རྟག་ཀྱང་། དབང་ཕྱུག་ལ་སོགས་པ་
13-1-113b


འགའ་ཞིག་དངོས་པོ་ཡིན་ཀྱང་རྟག་པའང་ཡིན་སྲིད་དོ་ཟེར་ན། གང་རིམ་དང་ཅིག་ཅར་དུ་དོན་བྱེད་ནུས་པས་སྟོང་པའི་རྟག་པ་ཡིན་ན་དངོས་པོ་མ་ཡིན་པས་ཁྱབ། དཔེར་ན་ནམ་མཁའ་བཞིན། དབང་ཕྱུག་རྟག་པའང་དོན་བྱེད་པས་སྟོང་ངོ་། །ཞེས་གང་དོན་བྱེད་ན་ནི་
རིམ་ཅན་དང་སྐད་ཅིག་མ་ཉིད་ཡིན་དགོས་ལ། རྟག་པ་ལ་འགྱུར་བ་མི་འཐད་པས་དོན་བྱེད་པས་སྟོང་ཞིང་གང་དོན་བྱེད་པས་སྟོང་པ་དེ་ལ་དངོས་པོ་མི་སྲིད་དེ། མདོར་ན་རྟག་ན་དངོས་པོ་ཡིན་པ་འགལ། དངོས་པོ་ཡིན་ན་རྟག་པ་འགལ་ཏེ། དེ་གཉིས་ཀྱི་གཞི་མཐུན་
ཤེས་བྱ་ལ་མི་སྲིད་པར་ཤེས་པར་བྱའོ། །དེ་ལྟར་ན་རྟག་པའི་དངོས་པོ་མི་སྲིད་ཅིང་དངོས་པོ་གང་ཡོད་འཇིག་པ་རྒྱུ་གཞན་ལ་མི་ལྟོས་པར་གྲུབ་པས་ཤེས་བྱའི་ཁྱོན་གང་ནའང་དངོས་པོ་རྟག་པ་ཞིག་མེད་པར་ཤེས་པར་བྱ་སྟེ། གང་དོན་བྱེད་མི་ནུས་པ་ནམ་མཁའ་ལ་སོགས་པ་
ནི་དོན་དུ་ཡོད་པ་མ་ཡིན་ཏེ།  དངོས་པོ་གཞན་བསལ་བའི་ཆ་ལ་སྒྲོ་བཏགས་པ་ཙམ་ཡིན་ལ། ནམ་མཁའ་རྟག་པ་སོགས་ཀྱི་དཔེར་བྱས་པ་ནི་མི་རྟག་པ་མ་ཡིན་པ་ཙམ་ལ་བཞག་པ་ཡིན་གྱི། རྟག་པའི་རང་བཞིན་དུ་གྲུབ་པ་ནི་ཅིའང་མེད་དོ། །དེ་ལྟ་བུའི་
ཚུལ་གྱིས་སྐྱེས་པ་ཉིད་འཇིག་པའི་དོན་དུ་གོ་བ་འདི་ཐ་སྙད་ཀྱི་ཚད་མའི་ནང་ན་དོན་ཕུལ་དུ་བྱུང་བ་ཡིན་ཏེ། འདི་ལ་བརྟེན་ནས་བྱ་བྱེད་རྒྱུ་འབྲས་ཀྱི་རྣམ་གཞག་འཁྲུལ་མེད་དང་ཐ་སྙད་ཀྱི་ཡིན་ལུགས་ཤེས། སྲིད་ལ་ཞེན་པ་དང་རྟག་དངོས་སོགས་ཕྱིན་ཅི་ལོག་གི་
རྟོག་པ་མ་ལུས་པ་བཟློག །དངོས་པོ་མེད་པའི་སྟོང་ཉིད་ལ་བདེ་བླག་ཏུ་འཇུག་ནུས་པ་སོགས་རྣམ་བྱང་གི་ཆོས་དཀར་ཐམས་ཅད་ཀྱི་རྩ་བ་ཡིན་པས། བཅོམ་ལྡན་འདས་ཀྱིས་ཀྱང་། རྗེས་ཐམས་ཅད་ཀྱི་ནང་ནས་གླང་པོ་ཆེའི་རྗེས་མཆོག་ཡིན་པ་བཞིན་དུ། 
13-1-114a


འདུ་ཤེས་ཐམས་ཅད་ཀྱི་ནང་ནས་མི་རྟག་པའི་འདུ་ཤེས་མཆོག་ཡིན་ནོ། །ཞེས་གསུངས་སོ།     །གསུམ་པ་དོན་བྱེད་ནུས་པའི་ཚུལ་ཡང་། རི་བོང་གི་རྭ་ལ་སོགས་པ་དག་མིང་ཙམ་ལས་རང་གི་ངོ་བོ་ཅུང་ཟད་མེད་
པ་བཞིན་དུ་དངོས་མེད་ཐམས་ཅད་ཀྱང་དོན་དུ་དེ་དང་འདྲ་སྟེ་དངོས་པོ་གང་དགག་པ་ཙམ་ཡིན་གྱི། རང་དབང་དུ་གྲུབ་པ་ཅུང་ཟད་ཀྱང་མེད་དོ། །དེས་ན་དོན་བྱེད་མི་ནུས་པ་ནམ་མཁའ་ལ་སོགས་པ་ནི་ཐ་སྙད་ཀྱི་ཚད་མས་ཡོད་པར་མི་འགྲུབ་པས་ན་དོན་དུ་མེད་པར་ཤེས་
པར་བྱ་སྟེ། དེས་ན་སྐྱེས་བུས་འཇུག་ལྡོག་གི་ཡུལ་ནི་ཐ་སྙད་དུ་རང་མཚན་ཡོད་པའི་དངོས་པོ་དོན་བྱེད་ནུས་པ་ཁོ་ན་ཡིན་པས་འདིར་དེ་ཀུན་རྫོབ་ཏུ་གཟུང་བར་བྱ་བ་ཡིན་ཏེ། ཇི་སྐད་དུ། གཅིག་བསྒྲུབ་པ་ན་དེ་རྟེན་དང་། །གཞན་རྣམས་བཏང་སྙོམས་ལྟ་བུ་
དང་། །ཞེས་གསུངས་པ་ལྟར། སྐབས་འདིར་ཤེས་པར་བྱ་བའི་གཞིར་གྱུར་པ་མཁས་པ་པཎྜི་ཏ་ནས་བླུན་པོ་བ་ལང་རྫི་ཡན་ཆད་ལ་གྲགས་པ་དོན་བྱེད་ནུས་པའི་དངོས་པོ་གནོད་མེད་ཀྱི་དབང་པོ་ལ་རང་མཚན་སྣང་ནུས་ཤིང་རང་འབྲས་ཕྱི་མ་བསྐྱེད་ནུས་པ་རྣམས་ནི་
ཐ་སྙད་ཀྱི་ཚད་མས་གཞལ་བྱ་དངོས་ཡིན་ལ། དེ་ལ་བརྟེན་ནས་དངོས་དངོས་མེད། དགག་དང་སྒྲུབ་པ། སྤྱི་དང་བྱེ་བྲག །འགལ་དང་འབྲེལ་བ། རྫས་དང་ལྡོག་པ། བརྗོད་བྱ་རྗོད་བྱེད།  སྣང་དང་སེལ་འཇུག་ལ་སོགས་པའི་རྣམ་པར་དབྱེ་བ་མཐའ་
ཡས་པ་འཇུག་ཅིང་ཐ་སྙད་བྱེད་པ་ཡིན་པས་ཀུན་རྫོབ་ཅེས་བྱ་བའི་སྒྲའི་དངོས་ཡུལ་ནི་དོན་བྱེད་པ་ཁོ་ནའོ། །འོ་ན་རྒྱུན་འགག་ཀའི་སྐད་ཅིག་ཐ་མ་ལ་དོན་བྱེད་ནུས་པའི་མཚན་ཉིད་མ་ཞུགས་སྙམ་ན། རྐྱེན་དང་ཕྲད་ན་ནུས་པས་ན་སྐྱོན་དེ་མེད་པར་གསུངས་
13-1-114b


ཀྱང་། རྐྱེན་དང་མ་ཕྲད་ནའང་རང་འབྲས་ཕྱི་མ་མི་བསྐྱེད་མོད་ཀྱི། སྤྱིར་དོན་མི་བྱེད་པར་ཡང་མི་འགྱུར་རོ། །དེ་ལ་གཞུང་གཞན་དུ་ཀུན་རྫོབ་ལ་ཡང་ལོག་གི་ཐ་སྙད་མཛད་ལ། སྣང་ཚུལ་གྱི་དབང་དུ་ན་འདིར་ཡང་དེའི་ཐ་སྙད་ཙམ་བྱས་པ་ལ་འགལ་བ་མེད་མོད་
ཀྱི། འོན་ཀྱང་གཞུང་འདི་ཡིས་ཐ་སྙད་ཀྱི་གནས་ཚུལ་ལ་ཚད་མས་དཔྱད་ནས་འཇོག་ཚུལ་རྣམ་པ་ཀུན་ཏུ་ཚད་མའི་གཞུང་ཁོ་ན་ལྟར་བྱ་དགོས་པས། ཐ་སྙད་དུའང་དོན་བྱེད་པ་མེད་པ་རྣམས་ལ་ཐ་སྙད་ཚད་མའི་འཇུག་ཡུལ་དུ་གཞག་པའང་མི་རུང་བས་དོན་བྱེད་ནུས་
པ་ཁོ་ན་ཀུན་རྫོབ་ཏུ་འཛིན་དགོས་པ་ཡིན་ཏེ། ལོག་པའི་ཞེན་སྣང་གི་ཡུལ་ཟླ་གཉིས་ལ་སོགས་པ་ལྟ་བུ་ལ། དེར་སྣང་བ་ནི་ཤེས་པ་ཉིད་དེར་སྣང་བ་ཙམ་ཡིན་པས་ཀུན་རྫོབ་ཏུ་མ་འདུས་པའི་སྐྱོན་མེད་ལ། སྣང་བ་ལྟར་གྱི་དོན་ཁོ་རང་གི་ངོ་བོ་གྲུབ་མ་གྲུབ་ལ་f
བསམས་ན་ནི་མེད་པ་ཙམ་ཡིན་གྱི། གལ་ཏེ་དེ་དོན་དུ་ཡོད་པར་བཟུང་ནས་དེ་ལ་ཀུན་རྫོབ་ཀྱི་མཚན་ཉིད་མ་ཞུགས་པས་བདེན་པ་གཉིས་སུ་མ་འདུས་པའི་ཤེས་བྱ་ཕུང་གསུམ་པར་འགྱུར་རོ་སྙམ་ན། དེ་ཡོད་ཅིང་སྐད་ཅིག་མ་མིན་པར་ཁས་ལེན་ན་དེ་རྟག་
པའི་སྣང་བ་ཉིད་དུ་འགྱུར་ཞིང་བརྫུན་པ་ཉིད་དུའང་མི་འགྱུར་ཏེ། དེ་ལྟར་ན་བདེན་མེད་སྒྲུབ་པའི་དཔེ་མཐུན་སྣང་བ་མི་སྲིད་པ་སོགས་སུ་ཐལ་བས། འཇིག་རྟེན་ཐ་མལ་པ་ལས་ཀྱང་ཤིན་ཏུ་བླུན་པ་ཕྱུགས་ཀྱི་ངང་ཚུལ་བཟུང་ནས། དངོས་པོའི་དེ་ཉིད་ལ་མཁས་
པ་ལས་ཀྱང་ཤིན་ཏུ་མཁས་པ་རྣམས་ལ་རྩོད་པ་སྨྲ་བར་བྱེད་པ་ནི་བཞད་གད་ཀྱི་རྒྱུ་ཕུན་སུམ་ཚོགས་པ་ཞིག་གོ། དེ་བཞིན་སེལ་བའི་སྟོབས་ཀྱིས་དངོས་མེད་ཀྱི་རྣམ་པར་བཟུང་བ་ལའང་སྦྱར་བར་བྱ་སྟེ། དངོས་པོ་མེད་པའི་ངོ་བོ་ཉིད་སྟོང་པ་ཞེས་པ་ལ་སོགས་
13-1-115a


པ་བཞིན་ནོ། །དེ་ལ་ཚད་མ་གཞུང་གི་གོ་བ་བྱང་མ་ཆུབ་པ་རྣམས་ལ་ཀུན་རྫོབ་ཡང་ལོག་ཕྱེ་བ་དེ་བློ་ལ་བཟུང་བདེ་ཡང་སྐབས་འདིར་ཀུན་རྫོབ་ལ་དོན་བྱེད་ནུས་པས་ཁྱབ་པར་འདོད་པ་ལ་ཐ་སྙད་ཚད་མའི་གནད་ཤིན་ཏུ་ཟབ་པ་ཡོད་པ་
ནི་ཆོས་ཀྱི་གྲགས་པའི་རིང་ལུགས་ལ་ཡུན་རིང་དུ་གོམས་པ་དག་གི་སྤྱོད་ཡུལ་ལོ། །དེ་ལྟར་རྣམ་བཅད་ཀྱི་དབང་དུ་མཚན་ཉིད་གསུམ་དུ་བསྟན་ཀྱང་། ཡོངས་གཅོད་དུ་ཀུན་རྫོབ་གཅིག་གི་ངོ་བོ་ལ་དེ་གསུམ་ཀ་ཚང་དགོས་ཏེ། ཐ་སྙད་ཀྱི་ཚད་མས་རྙེད་དོན་ནམ། 
རང་མཚན་སྣང་རུང་གི་དངོས་པོ་ཐམས་ཅད་ལ་གྲགས་པའམ། སྣང་ཡང་གྲུབ་པ་མེད་པ་འདི་ཀུན་རྫོབ་ཀྱི་ངོ་བོ་ཡིན་ནོ་ཞེས་ཡང་ཡང་བཤད་པ་དེའོ། །དེ་ལ་རྣམ་བཅད་ཡོངས་གཅོད་ཀྱི་ཚུལ་མདོར་བསྡུས་སུ་བརྗོད་ན། དེ་མིན་བསལ་བའམ་གཞན་སེལ་བའི་ཚུལ་
གྱིས་འདི་དག་གི་ཐ་སྙད་བྱེད་པ་སྟེ། སེལ་ཚུལ་ལ་བུམ་མེད་ལྟ་བུ་མེད་དགག་གི་གཞན་སེལ་དང་། བུམ་མིན་ལྟ་བུ་མ་ཡིན་དགག་གི་གཞན་སེལ་གཉིས་ཡོད་ལ།  དེའང་རང་མིན་པ་བསལ་བའི་ཚུལ་གྱིས་དེའི་ངོ་བོ་ཤེས་པར་བྱ་བ་རྣམ་བཅད་དང་། རང་གི་
ངོ་བོ་སྒྲུབ་པའི་ཚུལ་གྱིས་རང་མིན་མཐའ་དག་བསལ་བ་ཡོངས་གཅོད་དེ། དེས་ན་དེ་མ་ཡིན་པ་རྣམ་བཅད་ཀྱིས་ཁེགས་ན། དེའི་ངོ་བོ་ཡོངས་གཅོད་དུ་གྲུབ་པ་དང་། དེ་བཞིན་བཟློག་སྟེ་གྲུབ་ཚུལ་ཀྱང་ཤེས་པར་བྱ་བ་སྤྱིར་བཏང་ནས། བྱེ་བྲག་ཏུ་དབྱེ་ན་སྒྲ་དང་
དོན་གྱི་རྣམ་བཅད་གཉིས་སུ་ཡོད་དེ། འདི་ལྟར་སྒྲ་ཐམས་ཅད་ནི་གཞན་སེལ་བའི་ཡུལ་ཅན་ཡིན་པས། སྒྲ་དེས་རང་གི་བརྗོད་བྱ་མིན་པ་རྣམ་པར་བཅད་པའི་སྟོབས་ཀྱིས། བརྗོད་བྱའི་ངོ་བོ་ཡོངས་གཅོད་དུ་གྲུབ་པ་ཉིད་གོ་བ་ལྟ་བུར་སྣང་བ་ཡིན་ཏེ། དོན་ལྡན་གྱི་
13-1-115b


རྗོད་བྱེད་རྣམས་ལྟ་ཅི་སྨོས། དོན་མི་མཐུན་རི་བོང་གི་རྭ་ཞེས་བརྗོད་པ་ལྟ་བུ་ལའང་། རི་བོང་མིན་པ་དང་རྭ་མིན་བཅད་ནས་བརྗོད་བྱའི་ངོ་བོ་སྒྲུབ་པ་ལྟ་བུ་མེད་ན། ཡུལ་དེའི་སྒྲ་བློ་མི་སྐྱེ་ལ། དེ་མ་སྐྱེས་ན་དེ་གཏན་མེད་དུ་འཛིན་པའི་སྒྲ་བློའང་མི་སྲིད་པ་ལྟ་བུ་ཡིན་ཀྱང་།
སྒྲའི་སྟོབས་ཙམ་ལས་བློ་ཡུལ་དུ་འཕང་བ་མ་གཏོགས་རི་བོང་རྭའི་ངོ་བོ་ལ་ནི། བཅད་གཉིས་ཀས་གྲུབ་པ་གཞན་མེད་པས་དོན་ལ་ཐ་སྙད་དུའང་མེད་དོ། །དོན་གྱི་རྣམ་བཅད་ལ་ནི། ཡོངས་གཅོད་དང་རྣམ་བཅད་ཀྱིས་གྲུབ་པ་གཉིས་ཡོད་དེ། དེའང་དངོས་མེད་
རྣམས་དངོས་པོ་རྣམ་པར་བཅད་པ་ཙམ་གྱི་རྩ་བ་ཅན་ཏེ། དགག་བྱ་བཅད་པ་ལ་ལྟོས་ནས་ཐ་སྙད་དུ་དེའི་ངོ་བོ་ཡོངས་གཅོད་དུ་གྲུབ་པ་ལྟ་བུར་སྣང་ཡང་། དོན་ལ་རྣམ་བཅད་ཀྱི་སྟོབས་ཀྱིས་གྲུབ་པ་མ་གཏོགས་རང་གི་ངོ་བོ་ཡོངས་གཅོད་དུ་གྲུབ་པ་ཅུང་ཟད་ཀྱང་མེད་
དོ། །དངོས་པོ་རྣམས་ནི་རང་གི་ངོ་བོ་ཡོངས་གཅོད་དུ་གྲུབ་པའི་ཤུགས་ཀྱིས། རང་མིན་ཐམས་ཅད་རྣམ་བཅད་དུ་ཁེགས་པས་བཅད་གཉིས་ཀས་གྲུབ་ཀྱང་། གཙོ་བོར་ཡོངས་སུ་གཅོད་པའི་སྟོབས་ཀྱིས་རྣམ་པར་བཅད་པ་ཤུགས་ལ་གྲུབ་པར་འགྱུར་རོ། །
དེས་ན་སྒྲ་དང་དོན་གྱི་རྣམ་བཅད་ཁྱད་མ་ཕྱེད་ན། མིང་གིས་བརྗོད་པའི་དོན་དག་ལ་ཐ་སྙད་དུ་ཡོད་མེད་ཀྱི་ཁྱད་མི་ཕྱེད་ལ། དོན་གྱི་ངོ་བོ་ལ་རྣམ་བཅད་ཀྱིས་གྲུབ་པ་དང་། ཡོངས་གཅོད་ཀྱིས་གྲུབ་པའི་ཁྱད་མ་ཕྱེད་ན། དངོས་དངོས་མེད་ཀྱི་ཁྱད་མི་ཕྱེད་པས་དེ་
གཉིས་ཤན་འབྱེད་ཚུལ་འདི་ལྟ་བུ་ཤིན་ཏུ་གལ་ཆེའོ། །དེ་ལ་ཁྱད་གཞི་ཞིག་གི་སྟེང་དུ་ཁྱད་པར་གྱི་ཆོས་གང་ཡང་རུང་བ་སྒྲུབ་པ་ན། ཆོས་དེ་གཞི་དེ་ལ་མི་ལྡན་པ་བཅད་ནས་ལྡན་པར་སྒྲུབ་པ་དང་། དེ་ལས་གཞན་ལ་ལྡན་པ་བཅད་ནས་དེ་ཉིད་ལ་ལྡན་
13-1-116a


པའི་ཚུལ་དུ་སྒྲུབ་པ་གཉིས་ཡོད་ཅིང་། དེའང་མཚན་ཉིད་ལྟ་བུ་ལ་སྦྱར་ན། གཞི་དེར་ལྡན་ཚུལ་ལའང་། གཏན་ནས་མི་སྲིད་པ་ཤེས་པའི་མཚན་ཉིད་དུ་རྡུལ་དུ་གྲུབ་པ་བཀོད་པ་ལྟ་བུ་བཅད་ནས། དེ་ལ་སྲིད་པར་གྱུར་པ་བཀོད་
པ་ལ་མི་སྲིད་རྣམ་གཅོད་ཟེར་ཞིང་། གཞི་དེའི་ཕྱོགས་གཅིག་ལ་སྲིད་ཀྱང་གཞིའི་ཕྱོགས་གཞན་ལ་མ་ཁྱབ་པ་ཤེས་པ་ཙམ་གྱི་མཚན་ཉིད་དུ་མིག་དབང་ལ་བརྟེན་ནས་སྐྱེས་པའི་ཡུལ་རིག་པ་བཀོད་པ་ལྟ་བུ། གཞིའི་ཕྱོགས་མཐའ་དག་ལ་མི་ལྡན་པ་བཅད་ནས། 
ཀུན་ཏུ་ཁྱབ་པར་གྱུར་པ་བཀོད་པ་ལ་མི་ལྡན་རྣམ་གཅོད་དང་། གཞི་ལ་ཁྱབ་ཀྱང་མཚོན་འདོད་མེད་པའི་ཆོས་གཞན་ལའང་ཁྱབ་ཆེས་པ་ཤེས་པའི་མཚན་ཉིད་དུ་བློའི་ཡུལ་དུ་བྱར་རུང་བཀོད་པ་ལྟ་བུ།  གཞན་ལ་ལྡན་པ་བཅད་ནས། དེ་ཁོ་ན་ལ་ལྡན་པར་གྱུར་པ་
བཀོད་པ་ལ་གཞན་ལྡན་རྣམ་གཅོད་ཅེས་བྱ་སྟེ། རྣམ་གཅོད་རྣམ་པ་གསུམ་གྱིས་སྐྱོན་གསུམ་སྤངས་པའི་མཚན་ཉིད་ནི་སྐྱོན་མེད་པར་འདོད་དོ། །དེ་ལྟར་ཁྱད་གཞི་ལ་ཁྱད་ཆོས་སྒྲུབ་པ་ཐམས་ཅད་དེ་ཁོ་ན་ལ་ལྡན་པའམ། གཞན་ལའང་ལྡན་པ་སྟེ་རྣམ་གཅོད་
རྣམ་པ་གཉིས་ཀྱི་ཚུལ་གྱིས་བརྗོད་པར་འདོད་པའི་དོན་བཞིན་སྒྲུབ་པར་བྱེད་དོ། །དེས་ན་གཞི་གང་ལ་ཁྱད་པར་གྱི་ཆོས་གང་དག་ཅི་མཆིས་པའི་ལྡོག་ཆ་ནས་རྣམ་བཅད་དེ་སྙེད་དུ་ཕྱེ་རུང་ལ། རང་མིན་མཐའ་དག་བཅད་པའི་ངོ་བོ་ནི་ཡོངས་གཅོད་དང་གཅིག་གོ །
དེའང་ཁྱད་གཞི་དང་ཁྱད་ཆོས་སུ་ཕྱེ་བའི་དབང་དུ་ན། ཁྱད་གཞི་སྔོན་པོ་ཙམ་གྱི་ལྡོག་པ་དང་། སྔོན་པོའི་སྟེང་གི་བྱས་མི་རྟག་སོགས་ཁྱད་ཆོས་ཀྱི་ལྡོག་པར་འགྱུར་ཞིང་། མཚན་མཚོན་གཞི་གསུམ་དུ་ཕྱེ་ན། དེ་གསུམ་གྱི་ལྡོག་པ་ལ་དོན་ལྡོག །རང་ལྡོག །གཞི་
13-1-116b


ལྡོག་ཅེས་གྲགས་པ་ལ་སོགས་པ་ལྟ་བུ་སྟེ། མདོར་ན་ལྡོག་པ་ཐམས་ཅད་དེ་མིན་གཞན་རྣམ་པར་བཅད་པའམ་སེལ་བའི་ཆ་ནས་འཇོག་པ་ཡིན་ནོ། །བཅད་གཉིས་ཀྱི་ཚུལ་ཤིན་ཏུ་གསལ་བར་འདིར་བསྟན་པའོ། །དེ་ལ་ཀུན་རྫོབ་ཡིན་ན་གོང་གི་
ཆོས་གསུམ་པོ་དེ་གཞི་གཅིག་ལ་འབྲལ་མི་རུང་དུ་ཚང་དགོས་བྱས་པ་ལ། ཁ་ཅིག་ན་རེ། དེ་མི་འཐད་དེ། གལ་ཏེ་འཐད་ན། ཚོར་བ་ཡིད་མི་འོང་གི་དངོས་པོ་ཆོས་ཅན། མ་བརྟགས་ཉམས་དགའ་བ་ཡིན་པར་ཐལ། ཀུན་རྫོབ་ཡིན་པའི་ཕྱིར། 
འདོད་མི་ནུས་ཏེ། ཉམས་མི་དགའ་བ་ཡིན་པའི་ཕྱིར་ཞེ་ན། ཚངས་དབང་འཁོར་སྒྱུར་གྱི་སྲིད་པའི་བདེ་བ་ཆོས་ཅན། སྡུག་བསྔལ་ཡིན་པར་ཐལ། ཟག་བཅས་ཐམས་ཅད་སྡུག་བསྔལ་གྱི་རང་བཞིན་ཡིན་པའི་ཕྱིར། འདོད་མི་ནུས་ཏེ། བདེ་བ་ཡིན་པའི་
ཕྱིར། གཞན་ཡང་དེ་འདྲ་མང་ངོ་། །དགོངས་པ་ཕྱེ་ན་གཅིག་ཤོས་ཀྱང་ཕྱེའོ། །ཡང་ཁོ་ན་རེ། མེད་པར་དགག་པ་ཙམ་གྱི་སྟོང་ཉིད་ཆོས་ཅན། སྐད་ཅིག་མར་ཐལ། ཀུན་རྫོབ་ཡིན་པའི་ཕྱིར། རྟགས་གྲུབ་སྟེ། རང་འགྲེལ་ལས།  ཀུན་རྫོབ་ཅེས་བྱ་
བའི་རྣམ་པར་རྟོག་པའི་བློ་ལ་བརྟེན་པའི་ཕྱིར་མི་སྐྱེ་བ་ལ་སོགས་པ་ནི་ཀུན་རྫོབ་པར་འགྱུར་གྱི། དོན་དམ་པ་ནི་མ་ཡིན་ཏེ། ཤིང་ལ་སོགས་པའི་སྒྲའི་དོན་བཞིན་ནོ། །ཞེས་དང་། སྐྱེ་བ་མེད་པ་ལ་སོགས་པའང་ཡང་དག་པའི་ཀུན་རྫོབ་ཏུ་གཏོགས་པ་ཡིན་
དུ་ཟིན་ཀྱང་ཞེས་གསུངས་པའི་ཕྱིར། འདོད་མི་ནུས་ཏེ། དངོས་མེད་ཡིན་པའི་ཕྱིར་ཞེ་ན། སྟོང་ཉིད་མེད་དགག་ཆོས་ཅན། ཁྱོད་བསམ་ཞིང་བརྗོད་དུ་མི་རུང་བར་ཐལ། ཁྱོད་དོན་དམ་ཡིན་པའི་ཕྱིར། ཁྱབ་པ་ཡོད་དེ། དོན་དམ་པའི་བདེན་པ་
13-1-117a


ནི་གང་ལ་སེམས་ཀྱི་རྒྱུ་བའང་མེད་ན་ཡི་གེ་རྣམས་ལྟ་སྨོས་ཀྱང་ཅི་དགོས་ཞེས་གསུངས་པའི་ཕྱིར། འདོད་མི་ནུས་ཏེ་མངོན་སུམ་དང་འགལ་ལོ། །ཡང་ཁོ་ན་རེ། ནམ་མཁའ་སོགས་འདུས་མ་བྱས་ཆོས་ཅན། དོན་
བྱེད་ནུས་པར་ཐལ། ཀུན་རྫོབ་ཡིན་པའི་ཕྱིར། རྟགས་གྲུབ་སྟེ། ཤེས་བྱ་ལ་བདེན་གཉིས་སུ་གྲངས་ངེས་པ་གང་ཞིག །མཁའ་སོགས་དོན་དམ་མ་ཡིན་པའི་ཕྱིར། འདོད་མི་ནུས་ཏེ་དོན་བྱེད་ནུས་སྟོང་ཡིན་པའི་ཕྱིར་ཞེ་ན། འདི་ལ་རྟགས་དོན་གྱིས་གོ་
བ་ལས་ཚིག་ཤུགས་དོན་ཅན་དུ་སོང་བ་ཡིན་ནའང་། དེ་ལྟར་ན་འཇིག་རྟེན་ཐ་སྙད་དུའང་མེད་པ་མོ་གཤམ་གྱི་བུ་དང་མགོ་བསྒྲེས་ན། ཁོ་རང་ལའང་དེ་གཏན་མེད་དུ་ཤེས་པར་བྱ་བ་ཡིན་པའི་ཕྱིར། ཚིག་གིས་མཚུངས་ཤིང་དོན་གྱི་ངོ་བོ་མེད་པ་དངོས་མེད་ཀུན་ལ་
འདྲ་བས། ཞེ་འདོད་སོགས་ཀྱི་ཁྱད་པར་ཕྱེ་ན་ཅིག་ཤོས་ལའང་ཕྱེ་བས་ཆོག་གོ། དེ་གཉིས་མི་མཚུངས་ཏེ་ཐ་སྙད་དུ་ཡོད་མེད་ལ་ཁྱད་ཡོད་པས་སོ་སྙམ་ན། དོན་རང་མཚན་གྱི་སྟེང་ནས་ཁྱད་ཡོད་དུ་སྒྲུབ་མ་ནུས་ན། རྣམ་བཅད་ཀྱིས་གྲུབ་པ་ཙམ་ནི་དོན་ལ་
དཔྱོད་པའི་སྐབས་སུ་དཔྱད་གཞིར་མཚུངས་པར་འགྱུར་རོ། །དེ་ལྟར་མཚར་སྐྱེད་ཙམ་དུ་ཐལ་ཕྲེང་ཅུང་ཟད་བཀོད་ནས་དོན་ནི་འདི་ཡིན་ཏེ། མ་བརྟགས་ཉམས་དགའ་ཞེས་པའང་སྒྱུ་མའི་སྣང་བ་ལྟར་མ་བརྟགས་བག་ཡངས་སུ་བཞག་ན་ཡིན་ཡིན་ལྟར་འདུག་པ་
ལ་ཉམས་དགའ་ཞེས་བཤད་རུང་གི། སྒྱུ་མའི་སྣང་བ་ཡིན་ཚད་ཉམས་དགའ་བ་ཡིན་པས་མ་ཁྱབ་སྟེ། འཇིག་སྐྲག་གི་སྣང་བའང་འཆར་བ་ཡོད་པ་ལྟར། འདིར་ཡང་མ་བརྟགས་ན་གྲུབ་གྲུབ་ལྟ་བུའི་རང་འཛིན་གྱི་ཤེས་པ་འདྲིད་པའམ་ཉམས་དགའ་བར་བྱེད་
13-1-117b


པ་ལ་བརྡ་དེ་ལྟ་བུ་སྦྱོར་གྱི།  ལུས་སེམས་ཚོར་བ་བདེ་བའི་ཉམས་དགའ་བ་ཁོ་ན་ལ་གཟུང་བར་མི་བྱའོ། །དེས་ན་རྩོད་པ་དང་པོ་དེ་འདྲ་བ་ཚིག་འཁྲི་ཙམ་ལས་དོན་ཆེར་མེད་ཀྱང་། ཕྱི་མ་གཉིས་ལ་གོ་བ་ཆེན་པོ་སློང་རྒྱུ་ཡོད་དེ། སྟོང་ཉིད་མེད་དགག་ནི་ཐ་སྙད་ཀུན་
བྲལ་གྱི་དོན་དམ་མཚན་ཉིད་པ་ལ་ལྟོས་ཏེ་ཀུན་རྫོབ་ཏུ་བཞག་གི། རྣམ་གྲངས་པའི་དོན་དམ་གྱི་ཟླ་བོ་ཀུན་རྫོབ་དེ་ག་ལ་ཡིན་ཏེ་དེའི་དབང་དུ་ན་དོན་དམ་ཡིན་ནོ། །དེས་ན་ཐ་སྙད་དང་དོན་དམ་ལ་རྣམ་གྲངས་ཕྱེ་དགོས་པ་འདི་གཞུང་འཆད་པ་ལ་མིག་དང་འདྲ་སྟེ་དེ་མེད་
ན་གར་ཡང་མི་ཕྱིན་ཏོ། །རྩོད་པ་གསུམ་པའི་བསྟན་དོན་ལྟར། མཁའ་སོགས་ནི་དངོས་མེད་ཡིན་ལ་དེ་ཡོད་པའི་ཐ་སྙད་ཙམ་ནི་གང་གཅད་བྱ་ཟླ་བོ་དངོས་པོ་དེའི་མཐུ་ལས་བྱུང་བས་ན། སྤྱིར་ཤེས་བྱ་མིན་པ་དང་དེ་དག་གི་ཐ་སྙད་མེད་པར་མི་འགྱུར་བས་དེ་ལྟར་
རྣམ་པ་ཀུན་ཏུ་ཁས་མི་ལེན་ཀྱང་། ཀུན་རྫོབ་ཏུ་མ་བསྡུས་པས་བདེན་གཉིས་གང་ཡང་མིན་པར་ཡང་མི་འགྱུར་ཏེ། ཤེས་བྱ་རྟག་མི་རྟག་གཉིས་སུ་ཁ་ཚོན་བཅད་པ་ལ་བསམ་གྱིས་མི་ཁྱབ་པའི་བདག་གང་རུང་དུ་མ་འདུས་ཞེས་གླགས་བཙལ་དུ་མེད་པ་ལྟར། 
འདིར་ཀུན་རྫོབ་དང་དོན་དམ་གཉིས་སུ་ནམ་མཁའ་སོགས་མ་འདུས་པར་རློམ་པའང་དེ་དང་འདྲ་བར་ཤེས་པར་བྱ་སྟེ། ནམ་མཁའ་ནི་གཟུགས་ཐོགས་རེག་མེད་པའི་ཆ་ལ་བཏགས་པ་ཙམ་ཡིན་པས། ནམ་མཁའ་དང་མོ་གཤམ་གྱི་བུ་གཉིས་ལ་ཐ་སྙད་
ཙམ་གྱིས་ཡོད་མེད་ཀྱི་ཁྱད་པར་བྱས་ནའང་དོན་ལ་དཔྱད་ན་རང་མཚན་ཡོད་མེད་ཁྱད་པར་གང་ཡང་མེད་དོ། །དེས་ན་རི་བོང་རྭ་ཞེས་བརྗོད་པའི་ཚེ། སྒྲ་ཡིས་རི་བོང་རྭ་མེད་བཅད་པ་ལྟར་བློས་ཀྱང་དེ་ལྟར་དམིགས་པ་ལྟར་སྣང་ནའང་། རི་བོང་རྭའི་རང་མཚན་ཤེས་
13-1-118a


བྱ་ལ་མི་སྲིད་པས་ཤེས་བྱ་མ་ཡིན་ཞེས་སྨྲ་བར་ཟད་ཀྱི། དེ་ལྟར་མིན་པར་མིང་ཙམ་ལ་དམིགས་པས་དེ་ཤེས་བྱར་སོང་ན་རི་བོང་རྭའང་ཤེས་བྱར་འགྱུར་ཞིང་། མཐར་ཤེས་བྱ་མ་ཡིན་པ་གཞི་མ་གྲུབ་ལ། དེ་ལྟར་ན་མི་སྲིད་པའི་
དངོས་པོ་ཅིའང་མེད་པར་འགྱུར་རོ། །དེ་བཞིན་དུ་མཁའ་སོགས་དངོས་མེད་རྣམས་མིང་ཙམ་ལ་དམིགས་པར་ཟད་ཀྱི། དོན་དུ་མི་འགྲུབ་པས་དོན་གྱི་དབང་དུ་བྱས་པའི་རྣམ་གཞག་དེ་ལྟར་འཐད་དེ། གཞུང་གཞན་ནས་ཀྱང་། ནམ་མཁའ་མོ་གཤམ་བུ་
དང་མཚུངས། །ཞེས་གྲགས་སོ། །འོ་ན་ནམ་མཁའ་མེད་ན་འཇིག་རྟེན་ན་འབྱུང་བ་ལྔའི་ཡ་གྱལ་གཅིག་ཏུ་བགྲང་ཞིང་། བསྟན་བཅོས་ལས་ཀྱང་དཔེར་མཛད་པ་སོགས་དང་མི་འགལ་ལམ་ཞེ་ན། གོང་བཤད་ལྟར་ཐོགས་རེག་མེད་པའི་ཆ་ལ་བཏགས་
པ་དེ་ཙམ་ལ་མ་བརྟགས་པར་རློམ་པའི་ངོར་བྱས་ནས་དེ་ལྟར་བརྗོད་པར་ཟད་ཀྱི། བརྟགས་ཤིང་དཔྱད་ན་ནམ་མཁའ་ཡོད་པར་སྒྲུབ་པར་བྱེད་པ་ལ་ཚད་མ་མེད་དེ། ནམ་མཁའ་ལ་རང་མཚན་མེད་པས་མིག་ཤེས་སོགས་དོན་རིག་གི་མངོན་སུམ་ཚད་མས་མི་
འགྲུབ་སྟེ། འགྲུབ་ན་གཟུགས་སོགས་སུ་འགྱུར་ལ། །རང་རིག་གིས་གྲུབ་ན་ཤེས་པར་འགྱུར་རོ། །མྱོང་བའི་ཕྱིར་གྲུབ་སྙམ་ན་ཐོགས་རེག་མ་དམིགས་པ་ཙམ་ཡིན་གྱི། ངོ་བོ་མིགས་རྒྱུ་ཡོད་ན་ནམ་མཁར་ཡང་མི་རུང་ངོ་། །རང་གི་ངོ་བོ་མེད་པ་དེ་ལ་འབྲེལ་
བ་གཉིས་པོ་གང་ཡང་མི་སྲིད་པས་རྗེས་དཔགས་ཀྱིས་འགྲུབ་པ་མ་ཡིན་ནོ། །དེས་ན་ནམ་མཁའ་ཞེས་པ་ཚིག་ཙམ་ལྷག་མར་ལུས་པར་འགྱུར་རོ། །དེ་ལྟར་ཤེས་ན་ཆོས་ཀུན་རྟོག་པའི་དབང་གིས་བཞག་པ་ཙམ་ལས་ངོ་བོ་ཉིད་མེད་པའི་དཔེ་ཉིད་ཤེས་པར་འགྱུར་
13-1-118b


ཏེ། ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་སྟེ་དོན་འདི་བརྟག་པར་གྱིས། །ཞེས་གསུངས་པ་བཞིན་ནོ། །རྒྱན་དང་བུ་གའི་ནམ་མཁའ་ནམ་མཁའ་ཡོད་པའི་སྒྲུབ་བྱེད་དུ་མི་རུང་བ་ནི་གོང་དུ་སྨོས་ཟིན་ཏོ། །
དེས་ན་ཐ་སྙད་ཀྱི་ཚད་མས་ངོ་བོ་ཉིད་མེད་པར་ཐ་སྙད་བཏགས་པ་ཙམ་དུ་རྟོགས་ཟིན་ན་ནི་དོན་དམ་པའི་ཚད་མས་སླར་ཡང་བརྣན་ཏེ་སྒྲུབ་མི་དགོས་སོ། །གྲུབ་མཐའ་གོང་འོག་གི་ཚུལ་ཡང་དེ་འདྲའོ། །དེས་ན་དོན་བྱེད་ནུས་པའི་དངོས་པོ་རྣམས་ལ་དགག་སྒྲུབ་
ཕྱིན་ཅི་མ་ལོག་པར་བསྒྲུབ་ཅིང་། ཕྱིན་ཅི་ལོག་ཏུ་སྒྲོ་འདོགས་པའི་བདག་གཉིས་ཀྱང་སེལ་བ་ཡིན་ཏེ། སྐྱེས་བུ་ལང་ཚོ་ཅན་གྱི་གཟུགས་ལ་མིག་དང་ལྡན་པས་དཔྱོད་པ་བཞིན་ནོ། །དེ་ལ་དངོས་པོ་བཀག་པས་དངོས་མེད་ཉིད་བློ་ཡུལ་དུ་གྲུབ་ཀྱི། དངོས་མེད་
ཅེས་དགག་སྒྲུབ་ཀྱི་གཞིར་གྱུར་པ་གཞན་མེད་དོ། །འོན་ཀྱང་དེའི་སྒྲ་དོན་ཙམ་ལ་ཐ་སྙད་སྣ་ཚོགས་བྱེད་ཀྱང་དེ་ལྟ་བུ་ནི་ནམ་མཁའི་མེ་ཏོག་ལའང་འཇུག་པ་བཞིན་ནོ། །དེའང་ཀུན་རྫོབ་དེའི་མཚན་གཞིར་གྱུར་པ་ནི། གཟུགས་ལ་སོགས་པ་སྐྱེ་མཆེད་བཅུ་
གཉིས་ཏེ་ཤེས་བྱ་ཐམས་ཅད་དེ་ཙམ་དུ་འདུ་བས་སོ། །དེ་ལ་སྤྱིར་བཏང་དུ་ནང་གི་སྐྱེ་མཆེད་དྲུག་དང་། ཕྱིའི་སྐྱེ་མཆེད་དྲུག་ཡོད་ལ། མཚན་ཉིད་ནི་རིམ་པ་ལྟར་གཟུགས་འཛིན་གྱི་ཤེས་པའི་བདག་རྐྱེན་ཐུན་མོང་མིན་པ་དང་། མིག་ཤེས་ཀྱི་དམིགས་རྐྱེན་དུ་གྱུར་པ་
སོགས་ཡིད་ཤེས་ཁོ་ནའི་དམིགས་རྐྱེན་དུ་གྱུར་པའི་བར་དུའོ། །གསལ་ཞིང་རིག་པ་ཤེས་པའི་མཚན་ཉིད། དེ་ལ་དབྱེ་ན་ཚོགས་བརྒྱད་དེ། བདག་རྐྱེན་མིག་དབང་ལ་བརྟེན་ནས་སྐྱེས་པའི་རིག་པ་སོགས་མཚན་ཉིད་ཡིན་ལ། བག་ཆགས་སྣ་ཚོགས་པའི་
13-1-119a


རྟེན་གཞིར་གྱུར་པའི་གསལ་རིག་ཙམ་དང་། ཤེས་པའི་རྒྱུད་ལ་ངར་འཛིན་པ་གཉིས་ནི་ཀུན་གཞི་དང་ཉོན་ཡིད་ཀྱི་མཚན་ཉིད་དོ། །སྤྱིར་མཚན་ཉིད་ཅེས་བྱ་བ་དངོས་པོ་དེའི་ཐ་སྙད་མཚོན་བྱ་རྣམ་འཇོག་གི་རྒྱུ་ཡིན་པས་དོན་ལྡོག་དང་རང་
ལྡོག་དབྱེ་ཞིང་དོན་དང་ཐ་སྙད་ལ་མི་རྨོངས་པའི་སླད་དུ་ལྟོ་ལྡིར་བ་བུམ་པའི་མཚན་ཉིད་དུ་གསུངས་པ་ལྟར་ཡིན་གྱི། མཚན་ཉིད་དེ་དང་ཚིག་གི་རྣམ་པ་མཚུངས་པའི་སྒོ་ནས་མཐའ་གཞན་དུ་སྒྲོ་འདོགས་པའི་སྐྱེས་བུའི་བློའི་འཇུག་པ་མཐའ་དག་བཟློག་པ་ངག་རྒྱུན་གཅིག་
གིས་ཁྱབ་དགོས་པར་བསམས་ནས་ཚིག་ཇེ་མང་གི་སྤྲོས་པ་ལྷུར་ལེན་པ་ལས། མདོ་དང་བསྟན་བཅོས་ཆེན་པོ་རྣམས་ཀྱི་གཞུང་ཚིག་གི་སྒྲོས་བཞིན་དོན་གྱི་གནད་ཟིན་པ་ཤིན་ཏུ་གལ་ཆེའོ། །ཀྱེ་མ། དེང་དུས་བླུན་པོ་གང་དག་རང་གིས་དོན་དང་ཐ་སྙད་ཀྱི་ཚུལ་ཡང་
དག་མ་ངེས་པའི་དབང་གིས་ཟུར་ཆོད་མ་ཆོད་ཅེས་སངས་རྒྱས་ཀྱི་བཀའ་ལའང་སྐྱོན་འདོགས་པར་ཉེ་ནའང་། མཚན་ཉིད་འདི་ལ་དོན་ལྡོག་གི་གནད་ཟིན་ཚུལ་ལ་ཁྱད་ཡོད་ཀྱི། ཚིག་གི་ཆ་ནས་མཐའ་གཞན་དུ་བརྟགས་པའི་སྒྲོ་བཏགས་སྤོས་རྒྱའི་རི་མོ་འབྲི་བ་
ཕལ་ཆེར་ལ་སྙིང་པོ་ཅིའང་མེད་ཀྱང་། གཞན་ཟེར་གྱི་ཚིག་འབྲུ་ཁ་ཤས་བྲམ་ཟེ་རྣམས་ཀྱིས་སྔགས་བློ་ལ་བཟུང་བ་ལྟ་བུས་ཚིམ་པར་བྱས་ནས། སྔོན་གྱི་དམ་པ་མཆོག་དག་གི་གཞུང་ལའང་བརྙས་པར་བྱེད་པ་ནི་ཤིན་ཏུ་ཡ་མཚན་ནོ། །ཁྱད་པར་སྦྱར་མ་སྦྱར་སོགས་
གོ་བའི་གནད་རྣམས་ཀྱང་དེ་བཞིན་དུ་ངེས་པར་བྱའོ། །དེས་ན་གང་ལ་དོན་གྱི་ཉེས་པ་ཡོད་པ་ནི་ཚིག་གང་གིས་ཀྱང་བཟློག་པར་མི་ནུས་ལ། ཚིག་གི་བརྗོད་ཚུལ་ཙམ་ནི་བདག་ཉིད་ཀྱི་ལག་ན་ཐོགས་པའི་ཞགས་པ་ལ་སོགས་པ་བཞིན་དུ། ཤེས་རབ་ཀྱི་ནུས་པ་
13-1-119b


དང་བསྟུན་ཏེ་བརྗོད་པར་འདོད་པའི་རྗེས་སུ་བྱེད་པའི་ཕྱིར། མཁས་པ་རྣམས་དངོས་སྟོབས་ཀྱིས་རྩོད་པ་དག་དོན་ལ་རྟོན་གྱི། ཚིག་གི་བརྗོད་ཚུལ་ཙམ་གཙོ་བོ་མ་ཡིན་ཀྱང་། བྱིས་པ་རྣམས་ཚིག་ལམ་གྱིས་རྩོད་པ་ལ་ནི། བློ་ཡི་ནུས་པའི་ལྕགས་ཀྱུ་དང་བྲལ་
བར་གྱུར་ན། ཚིག་རྣམས་ཀྱང་གླང་ཆེན་མྱོས་པ་བཞིན་དུ་རང་དབང་དུ་མ་གྱུར་ཞིང་འཇིགས་པའི་གནས་སུ་ལྟ་དགོས་པས་རྟག་ཏུ་དེ་འབའ་ཞིག་མིག་རས་ཀྱིས་བཙའ་བ་རྣམས་ལ་ཤེས་རབ་ཀྱི་ལུས་སྟོབས་མཆོག་ཏུ་གྱུར་པ་དེ་སྲིད་དུ་རེ་ཞིག་གཞན་གྱིས་དབུགས་
འབྱིན་མི་ནུས་མོད་ཀྱི། འོན་ཀྱང་ཚིག་གི་འཇུག་པ་གཙོ་བོར་བྱེད་པའི་འཆད་པ་དང་། རྩོད་པ་དང་། རྩོམ་པ་ཐམས་ཅད་བརྗོད་པ་མང་ལ་དོན་ཆུང་གནད་ཀྱི་རྟོགས་པ་སྐྱེ་བ་བུལ་བས་ན། བློ་ལྡན་རྣམས་ཀྱིས་དོན་ལ་རྟོན་པའི་སྒོ་ནས་གཞུང་ལུགས་རྣམས་ཀྱི་
གོ་བ་རྣལ་མ་གཙོ་བོར་བྱས་ཏེ་ཟབ་མོའི་ཤེས་རབ་ལ་དབང་འབྱོར་བར་གྱུར་པས། ངག་གི་རྗོད་པ་རྣམས་ལ་རང་དབང་ཤུགས་ཀྱིས་ཐོབ་པའི་སྒོ་ནས་གཞུང་གི་གནད་རྣམས་ཐལ་འགྱུར་གྱི་ངག་གི་ཕྲེང་བར་སྤེལ་ཏེ་ཕས་རྒོལ་གྱི་སྤོབས་པ་འཇོམས་པའི་ཚུལ་སོགས་
ལའང་མཁས་པར་བྱའོ། །དེས་ན་མཚན་ཉིད་སོགས་ཀྱི་ཟུར་ཆོད་ཚུལ་ཅུང་ཟད་བརྗོད་ན། གང་མཚོན་བྱ་རྒྱུ་མཚན་ཅན་གྱི་སྒྲ་བློའི་ཐ་སྙད། བུམ་པ་ལ་སོགས་པ་དེ་དག་གང་ལ་གདགས་པའི་དོན་གྱི་ལྡོག་པ་དེ་ནི་བུམ་སོགས་སུ་འཇོག་པའི་རྒྱུ་མཚན་
ཡིན་ལ། དེས་ན་ལྟོ་ལྡིར་བ་བུམ་པའི་མཚན་ཉིད་དུ་བཞག་ན། དེ་བུམ་པའི་འཇོག་བྱེད་ཡིན་ལ། གདུང་འདེགས་ཀྱི་དོན་བྱེད་པ་སོགས་ནི་དེའི་མཚན་ཉིད་མ་ཡིན་པ་བཞིན་དུ། གཞི་ལྡོག་རང་ལྡོག་གཉིས་དང་མ་འདྲེས་པ་མཚན་ཉིད་རང་གི་ངོ་བོ་རྗེན་ཅེར་དུ་
13-1-120a


ངེས་པ་སྐྱོན་མེད་ཅིག་ཟིན་ཚེ། མ་ཁྱབ་ཁྱབ་ཆེས་མི་སྲིད་པ་གསུམ་བྲལ་བའམ། མི་ལྡན་གཞན་ལྡན་མི་སྲིད་རྣམ་གཅོད་གསུམ་ཚང་བ་ཡིན་ཏེ། དེའི་ཚེ་ན་མཚན་ཉིད་དང་མཚོན་བྱའི་འབྲེལ་བ་ནམ་ངེས་པ་ན་དོན་གྱི་རྣམ་བཅད་
ཀྱི་སྟོབས་ཀྱིས་ཟུར་ཐམས་ཅད་ལྷག་མ་མ་ལུས་པ་དེར་ཆོད་པ་ཡིན་ལ། ཚིག་གི་སྤྲོས་པ་མང་པོ་མེད་ཀྱང་གནད་ཟིན་པ་ལ་དེས་ཆོག་གོ། དཔེར་ན། ཤིང་འོན་ཅིག་ཅེས་པས་དོན་གྱི་རྣམ་བཅད་ཀྱིས་མདུན་གནས་ཀྱི་ཤིང་གོ་ནུས་ཀྱི། ཤིང་གི་བྱེ་བྲག་དང་དེའི་
ཡུལ་དུས་རང་བཞིན་མ་འདྲེས་པའི་རྣམ་པ་ཐམས་ཅད་བརྗོད་མི་དགོས་པ་བཞིན་ནོ། །མཚན་མཚོན་འབྲེལ་བར་རྟོགས་མ་ནུས་ན། མཚན་ཉིད་རྗོད་པའི་ཚིག་གི་སྟེང་ནས་ངག་མང་བ་ཙམ་ཞིག་གིས་ཕན་དཀའ་སྟེ།  དཔེར་ན། རིན་པོ་ཆེ་ཤེལ་དང་བ་
ལ་བལྟས་ནས་མི་ཞིག་ན་རེ། འདི་ཨིནྡྲ་ནཱི་ལ་ཡིན་ནམ་ཞེས་དྲི་ན། གཞན་ཞིག་གིས་དེ་མ་ཡིན་ཏེ། ཨིནྡྲ་ནཱི་ལ་ནི་ཁ་དོག་སྔོན་པོ་ཡིན་ནོ་ཞེས་སྨྲས་ན། དེས་ཚིག་ཙམ་ལ་བརྟགས་ནས། འོ་ན་རས་སྔོན་པོའང་ཨིནྡྲ་ནཱི་ལ་ཡིན་ནམ་ཞེས་
དྲི་ན། དེ་ནི་མ་ཡིན་ཏེ། རིན་པོ་ཆེ་སྔོན་པོ་ཡིན་ནོ། །འོ་ན་ནོར་བུ་མཐིང་ཀའང་དེ་ཡིན་ནམ། དེ་ནི་མ་ཡིན་ཏེ། ཨིནྡྲ་ནཱི་ལ་ནི་དེ་ལས་རིན་ཐང་ཆུང་ངོ་། །འོ་ན་ཤེལ་སྔོན་པོ་ཡིན་ནམ། དེ་ནི་མ་ཡིན་ཏེ། ཤེལ་ཕལ་པ་ལས་རིན་ཆེའོ། །ཞེས་པ་ལ་
སོགས་པ་ཇི་བརྗོད་ཀྱང་ཨིནྡྲ་ནཱི་ལའི་ཐུན་མོང་མ་ཡིན་པའི་ཆོས་ཀུན་རྫོགས་པར་བརྗོད་ནས་དེ་ངོས་ཟིན་པ་མི་འོང་སྟེ། དམུས་ལོང་ལ་གླང་ཆེན་གྱི་ཚུལ་བཤད་པ་དང་འདྲ་ལ། སྔོན་པོ་ཞེས་བརྗོད་པའི་དུས་ན་ཡུལ་དོན་གྱི་སྟེང་གི་ཆོས་སྔོན་པོ་དང་ཨིནྡྲ་ནཱི་ལ་འབྲེལ་བར་
13-1-120b


རྟོགས་ན་དེ་ཉིད་དུ་སྒྲོ་འདོགས་ཆོད་པ་དང་འདྲ་བར་མཚན་ཉིད་ཀྱི་གནད་ཟིན་པས་ཐུན་མོང་མིན་པའི་ཡིན་ལུགས་ཀུན་དེས་ཤུགས་ཀྱིས་ངེས་ཤིང་སྒྲོ་འདོགས་གཞན་འགག་ཐུབ་པ་ནི་སྲོག་འགགས་པས་དབང་པོ་གཞན་འགག་པ་ལྟ་བུ་ཡིན་པས་གནད་ཟིན་པར་བྱ་བ་ལ་
མཁས་པར་བྱ་སྟེ། རྣམ་པ་ཀུན་ཏུ་དོན་གྱིས་རྣམ་པར་བཅད་པའི་གོ་བ་རྣལ་མ་ཞིག་ལ་བློ་གཞག་པ་གལ་ཆེའོ། །དཔེར་ན། བུམ་པ་ཞེས་བརྗོད་པའི་ཚེ་ལྟོ་ལྡིར་བའི་རྣམ་པར་ཡིད་ལ་ཤར་ཀྱང་། ལྟོ་ལྡིར་བ་གཞན་ཡོད་ཚད་ལ་འཁྲུལ་མི་སྲིད་པ་དང་འདྲའོ། །
དེས་ན་མཚན་ཉིད་དེས་བཞག་པའི་མཚོན་བྱ་བུམ་པ་ལྟ་བུ་དེ་གཞི་གང་གི་སྟེང་དུ་བསྒྲུབ་ན། གསེར་བུམ་ལྟ་བུ་སོགས་མཚོན་བྱའི་བྱེ་བྲག་གང་རུང་གཅིག་ལ་དམིགས་ཀྱིས་མ་བཀར་ན། མཚོན་བྱ་དང་མཚན་གཞི་སྒྲ་དོན་གྱི་རྣམ་པ་ཐ་དད་དུ་མི་འཆར་བས་གཞི་
ལྡོག་ངོས་མི་ཟིན། མཚན་གཞི་གསེར་བུམ་དེ་ཡིན་ན་མཚན་མཚོན་གཉིས་ཀྱི་རྟེན་གཞིར་འགྱུར་དགོས་པས་ལྟོ་ལྡིར་དང་བུམ་པ་གཉིས་ཀ་ཡིན་པས་ཁྱབ་ཀྱང་། གདགས་གཞི་ལ་དེ་མི་དགོས་ཏེ། བུམ་པའི་ཁ་ཁྱེར་ལྟོ་བ་ཞབས་ཀྱི་ཆ་དང་གཟུགས་རྡུལ་
སོགས་བུམ་པའི་གདགས་གཞི་ཡིན་ཀྱང་དེ་རེ་རེ་ནས་བུམ་པ་ཡིན་མི་དགོས་པ་བཞིན་ནོ། །འོན་ཀྱང་མཚན་གཞིའི་སྐབས་སུ། བུམ་པའི་དོན་མཐོང་ཡང་ཐ་སྙད་མི་ཤེས་པ་ལ། ཐ་སྙད་སྒྲུབ་པའི་མཚོན་སྦྱོར་རྣམ་དག་འགོད་པ་ལྟ་བུ་ལ། གསེར་བུམ་
དང་བུམ་པ་གཉིས་ཀ་བུམ་པ་ཙམ་ལྡོག་ཏུ་སྒྲ་བློ་མཐུན་པས། དེའི་ཚེ་གསེར་གྱི་ལྟོ་ལྡིར་ཞབས་ཞུམ་ཆུ་སྐྱོར་གྱི་དོན་བྱེད་ནུས་པ་མཚན་གཞིར་འཛིན་པ་བདེ་ཞིང་། དེ་དང་རིགས་མཐུན་ཀུན་དེས་འགྲེས་ཏེ། ཀ་བའི་མཚན་གཞིར་ཤར་གྱི་གདུང་འདེགས་ཀྱི་དོན་བྱེད་
13-1-121a


ནུས་པ་འཛིན་པ་ལྟ་བུའོ། །མི་རྟག་པའི་མཚན་གཞིར་སྒྲ་ལྟ་བུ་ནི་མིང་ཐ་དད་པས་སོར་གཞག་བྱས་པས་ཆོག་གོ། རྟོག་གེའི་གསང་ཚིག་རྣམས་གཞན་དུ་ཤེས་པར་བྱའོ། །དེ་ལྟར་ཀུན་རྫོབ་ཅེས་པ་རྣམ་བཅད་ཀྱི་སྒོ་ནས་བསྟན་པའི་
མཚན་ཉིད་གསུམ་ལྡན་ཐ་སྙད་པའི་ཚད་མའི་ངོར་བསླུ་མེད་བསྙོན་མེད་དུ་སྣང་ཡང་རང་བཞིན་བདེན་པར་གྲུབ་པ་ཅུང་ཟད་ཀྱང་མེད་པ། དེའི་སྣང་ཆ་ཀུན་རྫོབ། སྟོང་ཆ་དོན་དམ་སྟེ་དེ་ལྟར་རྟེན་ཅིང་འབྲེལ་བར་འབྱུང་བའི་མཚན་ཉིད་ཅན་ནོ། །དེ་སྐད་དུའང་འཕགས་པ་ཀླུས། རྟེན་
ཅིང་འབྲེལ་བར་གང་འབྱུང་བ། །དེ་ནི་སྟོང་པ་ཉིད་དུ་བཤད། །དེ་ནི་རྒྱུར་བྱས་གདགས་པ་སྟེ། །དེ་ནི་དབུ་མའི་ལམ་ཡིན་ནོ། །ཞེས་གསུངས་སོ། །གཉིས་པ་རྒྱུ་གང་གིས་སྣང་ན། བརྟག་པ་མ་བྱས་ཉམས་དགའ་བའང་། །བདག་རྒྱུ་སྔ་མ་སྔ་
མ་ལ། །བརྟེན་ནས་ཕྱི་མ་ཕྱི་མ་ཡི། །འབྲས་བུ་དེ་འདྲ་འབྱུང་བ་ཡིན། །ཞེས་གསུངས་ཏེ། འོ་ན་དེ་ལྟ་བུའི་མཚན་ཉིད་ཅན་གྱི་ཀུན་རྫོབ་འདི་རྣམས་འགོག་མེད་དུ་སྣང་བ་དེ་རྒྱུ་ཅི་ཞིག་གི་དབང་གིས་སྣང་སྙམ་ན་འདི་ལ་རྒྱུ་གཞན་ཅིའང་མེད་དེ། རྟེན་ཅིང་འབྲེལ་
བར་འབྱུང་བ་ཁོ་ནའི་ཚུལ་དུ་སྣང་ངོ་ཞེས་སྟོན་པའི་ཕྱིར། བརྟག༷་པ༷་མ༷་བྱས༷་ན་ཉམ༷ས་དག༷འ་བ༷་ཙམ་གྱི་སྣང་བ་འདིའང༷་། སྣང་བའི་རྒྱུ་ལོགས་སུ་མེད་ཀྱི་དེ་ལྟར་སྣང་བ་དེ་བད༷ག་ཉིད་ཀྱི་རྒྱུ༷་སྔ༷་མ༷་སྔ༷་མ༷་ལ༷་བརྟེན༷་ནས༷་ཕྱི༷་མ༷་ཕྱི༷་མ༷་ཡི༷་འབྲ༷ས་བུ༷་དེ༷་འདྲ༷་བ་འབྱུང༷་བ་ཁོ་ན་ཡིན་ནོ། །
ཞེས་སོ། །དེ་ལ་གང་ལྟོས་པ་མེད་པ་དེ་ནི་ནམ་མཁའི་མེ་ཏོག་བཞིན་དུ་སྣང་མི་རིགས་ལ། གང་ཤེས་བྱར་གྱུར་ན་ལྟོས་པས་ཁྱབ་སྟེ་དངོས་པོ་རྣམས་ལྟོས་ཏེ་སྐྱེས་པ་ཁོ་ན་ཡིན་ལ། དངོས་མེད་རྣམས་ལྟོས་ཏེ་བཏགས་པ་ཁོ་ན་ཡིན་ནོ། །དེ་ལ་ཇི་ལྟར་བརྟེན་ནས་
13-1-121b


འབྱུང་ན། ཕྱི་དང་ནང་གི་ཆོས་གཉིས་ལས། ཕྱིའི་ཆོས་ནི་ས་བོན་ལས་མྱུ་གུ་ལ་སོགས་པའི་ཚུལ་དུ་རྟེན་ཅིང་འབྲེལ་ཏེ་འབྱུང་ལ། ནང་གི་ཆོས་རྣམས་ནི་རྟེན་འབྲེལ་ཡན་ལག་བཅུ་གཉིས་ཀྱི་ཚུལ་དུ་རྒྱུ་འབྲས་བར་མ་ཆད་དུ་འབྱུང་སྟེ། དེ་ལ་གང་ཆོས་རྣམས་ཀྱི་
རང་བཞིན་ཇི་ལྟ་བ་བཞིན་དུ་མ་ཤེས་པ་ནི་རྨོངས་པ་སྟེ། དེའང་ཤེས་པ་མེད་ཙམ་མ་ཡིན་པར། དངོས་སུ་རིག་པ་ཡེ་ཤེས་ཀྱི་འགལ་ཟླ་མི་མཐུན་ཕྱོགས་སུ་གྱུར་པའི་སེམས་བྱུང་རྨོངས་པའོ། །དེ་ལྟར་རྨོངས་ནས་བདག་གཞན་ལ་སོགས་པ་ཕྱིན་ཅི་ལོག་གི་
རྟོག་པ་དེས་ལས་བསགས་པ་ནི་འདུ་བྱེད་པ་དང་། འདུ་བྱེད་པ་དེས་བག་ཆགས་རྣམ་པར་ཤེས་པ་ལ་བགོ་ཞིང་ནམ་ཞིག་མངོན་དུ་གྱུར་པ་ན་འཕང་འབྲས་ཀྱི་ཤེས་པ་གྲུབ་པར་བྱེད་དོ། །རྣམ་ཤེས་དེ་ཉིད་ལ་བརྟེན་ནས་མིང་བཞི་དང་མངལ་གྱི་གནས་སྐབས་ཀྱི་མེར་མེར་
པོ་ལ་སོགས་པ་གཟུགས་ཏེ་ཕུང་པོ་ལྔ་གྲུབ་ལ།  མིང་གཟུགས་ལ་བརྟེན་ནས་མིག་སོགས་ནང་གི་སྐྱེ་མཆེད་དྲུག་འབྱུང་ཞིང་། སྐྱེ་མཆེད་དེ་ཡོད་ན་ཡུལ་དྲུག་པོ་དང་ཕྲད་པའི་རེག་པ་འབྱུང་ངེས་ལ། རེག་པ་ན་སིམ་གདུང་བར་མའི་ཚོར་བ་ངེས་པར་སྐྱེ་ཞིང་།
ཚོར་ན་ཇི་མི་སྙམ་དུ་འཇོག་པ་མི་སྲིད་པར་སྲེད་པ་འབྱུང་བ་དང་། སྲེད་པ་སྐྱེས་པ་ན་དེ་ཙམ་དུ་མི་བཞག་པར་གང་སྲེད་པའི་ཡུལ་དོན་དུ་གཉེར་ནས་དང་དུ་བླང་བའི་ལེན་པ་འབྱུང་ལ། དེ་ལྟར་དང་དུ་བླང་ཕན་ཆོད་ལས་བསགས་པ་ཡིན་པ་དེ་ལ་སྲིད་པ་ཞེས་བྱ་ལ། ལས་
དེ་ནམ་ཡང་བར་མ་དོར་ཆུད་ཟ་བ་མེད་པས་དཀར་ནག་གི་རྒྱུ་དང་མཐུན་པར་མཐོ་རིས་དང་ངན་སོང་དུ་སྐྱེ་བ་ནི་སྐྱེ་བ་ཞེས་བྱ་ཞིང་། དེ་ལྟར་སྐྱེས་ནས་བརྩམས་ཏེ་རིམ་པས་རྒྱུན་འགྱུར་བའི་རྒ་བ་དང་། རྒྱུན་འགགས་པའི་འཆི་བ་གཉིས་ཡོད་པ་ནི་མི་རྟག་པའི་ཆ་ནས་འདྲ་བས་
13-1-122a


རྒ་ཤི་ཞེས་བྱ་ཞིང་། དེ་རྣམས་ཀྱང་ཉོན་མོངས་ལས་དང་སྡུག་བསྔལ་གསུམ་དུ་འདུ་ལ། དེ་དག་ཕན་ཚུན་རྒྱུ་འབྲས་སུ་གྱུར་ནས་སྲིད་པ་མགལ་མེའི་འཁོར་ལོ་ལྟར་རྒྱུན་མི་ཆད་དུ་འཁོར་བ་ཡིན་ནོ། །དེ་དག་སྣང་དུ་རུང་བ་ཡང་མི་སྟོང་བའི་
རྒྱུ་ཞིག་ལ་བརྟེན་ནས་སྣང་བ་མ་ཡིན་ཏེ། ཇི་སྐད་དུ། སྟོང་པ་ཁོ་ནའི་ཆོས་རྣམས་ལས། །སྟོང་པའི་ཆོས་རྣམས་འབྱུང་བར་ཟད། །ཁ་ཏོན་མར་མེ་མེ་ལོང་རྒྱ། །མེ་ཤེལ་ས་བོན་སྐྱུར་དང་སྒྲས། །ཕུང་པོ་ཉིང་མཚམས་སྦྱོར་བ་ཡང་། །མི་
འཕོ་བར་ཡང་མཁས་རྟོགས་བྱ། །ཞེས་གསུངས་པ་ལྟར། གང་གིས་ཁ་ཏོན་ཀློག་པ་གཞན་ཞིག་གི་ཡང་ཡིད་ལ་འཇག་པར་གྱུར་ན། ཕ་རོལ་པོའི་ཡིད་ལ་ཡོད་རྒྱུའི་མདོ་སྡེ་ལ་སོགས་པ་དེ་ཅིག་ཤོས་ཀྱི་ཡིད་ལ་འཕོས་པ་མ་ཡིན་ལ། ཚུ་རོལ་གྱི་རྒྱུད་
ཀྱི་ཁ་ཏོན་དེ་ཤེས་པའི་བློ་ཅིག་ཤོས་ཀྱི་ཁ་ཏོན་གྱི་སྒྲ་ལ་བརྟེན་ནས་འབྱུང་བ་ཡིན་གྱི། རྒྱུ་མེད་མ་ཡིན་པ་དེ་བཞིན་དུ་ཕུང་པོ་སྔ་མ་ཕྱི་མར་འཕོས་པ་མ་ཡིན་ཏེ་རྟག་པར་ཐལ་བའི་ཕྱིར་རོ། །ཕྱི་མ་སྔ་མ་ལ་མ་བརྟེན་པར་བྱུང་བ་མ་ཡིན་ཏེ་རྒྱུ་མེད་དུ་ཐལ་བའི་ཕྱིར་རོ། །
དེ་བཞིན་མར་མེ་ལས་མར་མེ་མཆོད་པ། མེ་ལོང་ལ་གཟུགས་བརྙན་ཤར་བ། རྒྱ་ལས་རྒྱ་ཡི་འབུར་གཤོང་གི་རྣམ་པ་འབྱུང་བ། མེ་ཤེལ་ལས་མེ་མཆེད་པ། ས་བོན་ལས་མྱུ་གུ་སྐྱེ་བ། སྐྱུར་བའི་རོ་ལས་འགྲམ་ཆུ་ལྡང་བ། སྒྲ་ལས་སྒྲ་བརྙན་
འབྱུང་བའི་དཔེ་རྣམས་བཞིན་དུ། རྒྱུ་འབྲས་བུར་འཕོས་ཏེ་ངོ་བོ་གཅིག་པ་མ་ཡིན་ཞིང་། འབྲས་བུ་རྒྱུ་སྔ་མ་ལ་མ་བརྟེན་པར་བྱུང་བ་མ་ཡིན་པར། རྒྱུ་མེད་ན་འབྲས་བུ་སྐྱེ་བ་མི་སྲིད་ཅིང་། རྒྱུ་ཚང་ན་འབྲས་བུ་ལྡོག་པ་མི་སྲིད་པའི་རྟེན་ཅིང་འབྲེལ་བར་འབྱུང་བ་ཡིན་
13-1-122b


ལ། དེ་ལྟ་བུའི་དངོས་པོའི་ཡིན་ལུགས་ཇི་ལྟ་བ་བཞིན་དུ་མ་ནོར་བར་སྨྲ་བ་ནི་དགེ་སྦྱོང་ཆེན་པོ་སངས་རྒྱས་བཅོམ་ལྡན་འདས་ཁོ་ནའི་ཁྱད་ཆོས་བླ་ན་མེད་པ་ཡིན་ནོ། །རྒྱུ་དེ་དག་གིས་འབྲས་བུ་བསྐྱེད་ཚུལ་ཡང་དངོས་པོའི་ནུས་པའི་ཆོས་ཉིད་བསམ་གྱིས་མི་ཁྱབ་
པས་རྒྱུ་སོ་སོས་འབྲས་བུ་སོ་སོ་བསླུ་མེད་དུ་བསྐྱེད་ནའང་། དོན་ལ་བསྐྱེད་བྱ་སྐྱེད་བྱེད་དང་བྲལ་བའི་སྣང་སྟོང་ཉིས་ཚོགས་ཞིག་ཡིན་ཏེ། འདི་ལྟར་རྒྱུ་དང་འབྲས་བུ་ཕྲད་ནའང་བསྐྱེད་པར་མི་འཐད། མ་ཕྲད་ནའང་བསྐྱེད་པར་མི་འཐད་ལ་དེ་གཉིས་ལས་གཞན་པའི་བསྐྱེད་
ཚུལ་མི་སྲིད་མོད་ཀྱི། འོན་ཀྱང་རྒྱུ་འབྲས་བསླུ་མེད་དུ་སྣང་བ་ཆེས་འཐད་པའི་ཚུལ་ནི། རྒྱུ་འདི་ལས་འབྲས་བུ་འདི་བསླུ་མེད་དུ་འབྱུང་ངོ་ཞེས་པ་དེ་ཙམ་གྱིས་ཆོག་པ་ལས། འབྱུང་ན་ཇི་ལྟར་འབྱུང་། འབྱུང་བའི་རྒྱུ་མཚན་ཅི་ཡིན་ལ་སོགས་པའི་འཐད་པ་
རྙེད་དགོས་པ་མ་ཡིན་ཏེ། མེ་ཚ་བ་ཡིན་པ་དངོས་པོའི་ཆོས་ཉིད་ཡིན་གྱི། དེ་ཚ་བའི་རྒྱུ་མཚན་ཅི་ཞེས་འཐད་པ་ལོགས་སུ་ཚོལ་དགོས་པ་མིན་པ་བཞིན་ནོ། །དེས་ན་དངོས་པོ་རྣམས་ཀྱི་ཡིན་ཚུལ་གཞལ་བྱ་ཡིན་ལ། དེ་དང་མཐུན་པར་གཞལ་
བ་ནི་ཚད་མའམ་རིགས་པ་ཡིན་ནོ། །རིགས་པ་དེ་ལའང་ཡུལ་རྒྱུ་འབྲས་ངོ་བོ་ཉིད་གསུམ་ལ་གཞལ་བའི་ཆ་ནས་བྱ་བ་བྱེད་པ་ལྟོས་པ་ཆོས་ཉིད་ཀྱི་རིགས་པ་གསུམ་གསུངས་ལ། གཞལ་བྱ་དེ་དག་ལ་སྒྲོ་འདོགས་པ་བཅད་ནས་དགག་པ་དང་སྒྲུབ་པའི་ཚུལ་
ཕྱིན་ཅི་མ་ལོག་པར་བྱེད་པ་ལ་འཐད་པ་སྒྲུབ་པའི་རིགས་པ་ཞེས་གསུང་ཞིང་། དེ་ལ་ཡུལ་མངོན་སུམ་དུ་གྱུར་པ་འཇལ་བྱེད་མངོན་སུམ་ཚད་མ་དང་། ལྐོག་ཏུ་གྱུར་པ་འཇལ་བྱེད་རྗེས་དཔགས་ཚད་མ་གཉིས་སུ་ཡོད་ལ། རྗེས་དཔགས་ཀྱང་ཡུལ་
13-1-123a


ལྐོག་གྱུར་དེ་དཔོགས་ནུས་ཀྱི་རྒྱུ་མཚན་ཅན་གྱི་ཆོས་ཚད་མས་བཟུང་བ་ཡིན་པས་མཐར་མངོན་སུམ་ལ་གཏུགས་ཤིང་། མངོན་སུམ་དེའང་ཆོས་ཉིད་འབའ་ཞིག་ལ་གཏུགས་དགོས་ཏེ་འདི་ལྟར་བྱ་བྱེད་ལྟོས་པ་གཉིས་ཀྱང་དངོས་
པོའི་ཆོས་ཉིད་ཡིན་པས་ཆོས་ཉིད་ཀྱི་རིགས་པ་ཁོ་ནར་འདུ་ཞིང་། དེས་ན་རིགས་པ་ཐམས་ཅད་ཀྱི་གྲོས་ཐག་གཅོད་ཅིང་ཟད་སར་སྐྱེལ་བ་ནི་ཆོས་ཉིད་ཀྱི་རིགས་པ་ཡིན་ལ། དེར་ཐུག་ནས་དེ་ཕན་ཆད་འཐད་པ་གཞན་སྒྲུབ་དགོས་པ་མ་ཡིན་ཏེ། མེ་ཚ་བའི་རྒྱུ་
མཚན་བཤད་དུ་མེད་པ་བཞིན་ནོ། །དེས་ན་དངོས་པོའི་ཆོས་ཉིད་དང་མཐུན་པ་དེ་ལ་དངོས་པོ་སྟོབས་ཞུགས་ཀྱི་རིགས་པ་ཞེས་བྱ་སྟེ། དངོས་པོའི་ཡིན་ལུགས་མ་ནོར་བར་གཞལ་བ་ཡིན་པས་དེ་རིགས་པ་གཞན་གྱིས་འཕྲོག་ཏུ་མེད་པའི་དོན་ཡིན་ལ། ཐ་སྙད་
དང་དོན་དམ་པའི་ཚད་མ་གཉིས་ཀ་ལ་དངོས་པོ་སྟོབས་ཞུགས་ཞེས་བྱའོ། །དེ་ལ་མེའི་རང་བཞིན་ཚ་བ་ལྟ་བུ་ཀུན་རྫོབ་ཀྱི་ཆོས་ཉིད་དམ་ཡིན་ལུགས་དང་།  མེ་རང་བཞིན་མེད་པ་ལྟ་བུ་དོན་དམ་གྱི་ཆོས་ཉིད་དམ་ཡིན་ལུགས་ཡིན་ནོ། །དེས་ན་ཚད་མ་གཉིས་པོ་
འདི་ཟུང་དུ་ཚོགས་པས་དངོས་པོའི་ཡིན་ལུགས་མ་ནོར་བ་གཏན་ལ་འབེབས་པ་ཡིན་གྱི། ཆིག་རྐྱང་རེ་རེས་ནི་མ་ཡིན་ནོ། །སངས་རྒྱས་བཅོམ་ལྡན་འདས་ཀྱིས་ཇི་སྐད་གསུངས་པའང་བདེན་པ་གཉིས་པོ་འདི་ལས་བརྩམས་ཏེ་དངོས་པོའི་གནས་ཚུལ་མ་ནོར་བར་
དོན་བཞིན་བསྟན་པ་ཡིན་ལ། རྗེས་འཇུག་རྣམས་ཀྱིས་ཀྱང་དེ་བཞིན་རིགས་པས་གཏན་ལ་ཕབ་དགོས་པ་ནི་ཤཱཀྱའི་རིང་ལུགས་མ་ནོར་བ་ཡིན་གྱི། སྤྱིར་རིགས་པས་དཔྱད་པ་དང་། ཁྱད་པར་དུ་ཚད་མ་སོགས་ནང་རིག་པ་ལ་མི་མཁོ་ཞེས་ཟེར་བ་ནི། དཔྱད་གསུམ་
13-1-123b


གྱིས་དག་པའི་སངས་རྒྱས་ཀྱི་བཀའ་ཚད་མའི་མྱང་བྱ་ཕུན་སུམ་ཚོགས་པ་ཉམས་སུ་བསྟར་བ་ལ་བར་དུ་གཅོད་པའི་བདུད་ཀྱི་གསང་ཚིག་རྔམ་ཆེན་པོ་སྟེ། སངས་རྒྱས་བཅོམ་ལྡན་འདས་ཀྱིས་དངོས་པོའི་གནས་ལུགས་མ་ནོར་བར་གཟིགས་ནས་བརྩེ་བས་གཞན་ལ་
རྗེས་སུ་བསྟན་པའི་དོན་ལ་ངེས་ཤེས་སྐྱེ་བའི་སྒོ་རིགས་པ་ལ་སྨད་པའི་ཚིག་འདི་ལ་བདེན་ཆ་ཞིག་སྲིད་ན་ཕྱིན་ཅི་ལོག་གི་ཚིག་གཏན་ནས་མི་སྲིད་པར་འགྱུར་རོ། །དེས་ན་རིགས་པའི་གྲོས་ཐག་གཅོད་ཚུལ་དེ་ལྟར་ཤེས་དགོས་པ་ཚད་མ་གཉིས་ཀའི་སྐབས་སུ་གལ་
ཆེ་བ་ཡིན་ལ། དེ་འདྲ་སྤྱིར་བཏང་དུ་ཤེས་པར་བྱས་ནས་སྐབས་འདིར་རྒྱུ་འབྲས་ལ་དཔྱད་པའི་ཚེ་ན། ལས་འགགས་པ་དང་། ལས་ཀྱི་འབྲས་བུ་གཉིས་ཀྱི་བར་དུ་དུས་ཡུན་རིང་པོས་ཆོད་པས་རྒྱུ་དང་འབྲས་བུ་ཇི་ལྟར་འབྲེལ་སྙམ་པའི་དོགས་པ་སྐྱེས་ནས་དངོས་སྨྲ་
བ་རྣམས་ཀྱིས་དེ་གཉིས་བར་འབྲེལ་བར་བྱེད་པ་ཐོབ་པ་དང་ཆུད་མི་ཟ་བའི་རྫས་ལ་སོགས་པ་ཁས་ལེན་ཀྱང་། དབུ་མ་པ་རྟེན་འབྲེལ་ཙམ་དུ་སྨྲ་བ་ལ་དེ་གཉིས་བར་འབྲེལ་བའི་རྫས་གཞན་ཅིའང་མི་དགོས་པར་ལས་སྔོན་སོང་གིས་གང་དུ་ཚོགས་པ་ཚང་བའི་རྒྱུད་དེར་
འབྲས་བུ་སྨིན་པ་ཆུད་མི་ཟ་བས་རྒྱུ་འབྲས་སུ་ཆེས་འཐད་དེ། འདི་ལྟར་རྒྱུན་བར་མ་ཆད་དུ་སྣང་བ་ས་བོན་དང་མྱུ་གུ་ལྟ་བུ་ཡིན་ཀྱང་རུང་སྟེ། ཕྲད་ནས་ནི་བསྐྱེད་མི་ཤེས་པས་ན་ས་བོན་དང་མྱུ་གུ་ལྟར་རྒྱུན་བར་མ་ཆད་པ་ཡིན་པས་རྒྱུ་འབྲས་སུ་རུང་བ་དང་།  ལས་
དང་འབྲས་བུ་ལྟ་བུ་རྒྱུན་བར་མ་ཆད་དུ་མ་བྱུང་བ་ཡིན་པས་རྒྱུ་འབྲས་སུ་མི་རུང་བ་ཅུང་ཟད་ཀྱང་མེད་པར་དེ་གཉིས་མགོ་མཉམ་པར་ཤེས་པ་ནི་གོ་བ་འགང་ཆེ་ཤོས་ཞིག་ཡིན་ནོ། །དེས་ན་ས་བོན་དེ་ཉིད་ཀྱིས་མྱུ་གུ་བསྐྱེད་པར་རྟོགས་པ་ནི་བྱ་བ་བྱེད་པའི་རིགས་པ་ཡིན་ལ། 
13-1-124a


དེ་ས་བོན་གྱི་ཆོས་ཉིད་ཀྱང་ཡིན་ཏེ། མེའི་རང་བཞིན་ཚ་བ་བཞིན་ནོ། །དེས་ན་རྒྱུ་ནུས་པ་ཐོགས་མེད་དེས་རང་འབྲས་མི་བསྐྱེད་པའམ། འཆོལ་བར་བསྐྱེད་པའམ། ཐུག་མེད་དུ་བསྐྱེད་པ་སོགས་མིན་པ་ནི་དངོས་པོའི་
ཆོས་ཉིད་དོ། །དེས་ན་མྱུ་གུ་དེ་ས་བོན་ཞིག་པ་ལས་སྐྱེའམ། འོན་ཏེ་མ་ཞིག་པ་ལས་སྐྱེ་བརྟགས་ན་གཉིས་ཀའང་མི་འཐད་མོད་ཀྱི། འོན་ཀྱང་རྒྱུ་ས་བོན་གྱི་སྐད་ཅིག་སྔ་མ་སྔོན་དུ་སོང་བ་ལས་སྐྱེ་བ་ཙམ་ཡིན་ལ། དེའང་རྒྱུ་སྔོན་སོང་གི་ས་བོན་དེ་མྱུ་གུ་སྐྱེད་པའི་
རྒྱུར་གདགས་པ་ཡིན་གྱི། དེའི་སྟེང་གི་དངོས་པོ་མ་ཞིག་པ་དང་། དངོས་མེད་ཞིག་པ་གཉིས་ཀ་སོ་སོར་ཕྱེ་ནས་གང་རུང་གིས་བསྐྱེད་པར་མི་རིགས་ཏེ། མྱུ་གུའི་རྒྱུ་ས་བོན་ཙམ་ཡིན་གྱི། དེའི་སྟེང་གི་གཟུགས་ཀྱི་ཆའམ་དངོས་མེད་ལས་ལྡོག་པའི་ལྡོག་ཆ་ལྟ་བུ་རེ་རེ་
རྐྱང་པ་རྒྱུ་རུ་མི་གཞག་པ་བཞིན་ནོ། །ཕྱོགས་དུས་ཀྱི་ཆ་ཕྱེ་སྟེ་རྒྱུར་བཞག་ན་དམིགས་སུ་བཀར་བ་དེ་ལས་གཞན་རྒྱུར་མི་རུང་བའི་ཐ་སྙད་ཀྱི་རྣམ་གཞག་འཇིག་སྟེ། བུམ་པ་ཞེས་པ་གཟུགས་རྡུལ་ཁོ་ན་ཡིན་ཟེར་བ་ལྟ་བུ་དང་འདྲ་ལ། དེས་ན་རྒྱུ་འབྲས་ཕྲད་མ་ཕྲད་
གང་དུའང་མི་རུང་མོད། རྒྱུ་ཡིས་འབྲས་བུ་འཕེན་པ་མི་བསླུ་བ་ཆོས་ཉིད་དེ། དཔེར་ན། ཉི་ཟླའི་གཟུགས་བརྙན་ཆུ་ལ་ཤར་བ་ལ་ཉི་ཟླ་དངོས་ལ་ཡོད་པའི་རྣམ་པ་རྣམས་སྣང་ཞིང་། གཟུགས་དང་གཟུགས་བརྙན་ཕྲད་མ་ཕྲད་ཀྱི་འཐད་པ་བྲལ་ཡང་མངོན་སུམ་
སྣང་བ་དེ་དཔེར་བྱས་ནས་རྒྱུ་འབྲས་ཀྱི་ཚུལ་ཡང་བརྟེན་ནས་འབྱུང་བ་དེ་འདྲའོ། །ཞེས་བསྟན་པ་བཞིན་དུ་རྒྱུ་ཉིད་ཀྱི་ནུས་པས་འབྲས་བུ་འབྱུང་བ་རྟེན་འབྱུང་གི་ཆོས་ཉིད་ཡིན་པ་ཙམ་ལས་འདས་ནས་ཇི་ལྟར་ཁས་བླངས་ཀྱང་མི་རུང་སྟེ། ས་བོན་ལས་མྱུ་གུ་སྐྱེ། 
13-1-124b


ལས་ལས་འབྲས་བུ་འབྱུང་ཞེས་པ་ཙམ་ལས་ཞིག་མ་ཞིག་ཆ་ཕྱེ་ན། མ་ཞིག་པ་ལ་རྒྱུ་འབྲས་དུས་མཉམ་གྱི་སྐྱོན་སྔར་བཤད་ལྟར་དང་། ཞིག་པ་ལས་སྐྱེ་ན་ས་མྱུག་གི་བར་དུ་ཞིག་པ་སྐད་ཅིག་མས་ཆོད་པས་རྒྱུ་འབྲས་རྒྱུན་མི་ཆད་དུ་མི་འབྱུང་བའི་སྐྱོན་ཡོད་
ལ། བར་དེར་ཞིག་པ་སྐད་ཅིག་མས་མ་ཆོད་ན་རྒྱུ་ཞིག་པར་ཡང་ག་ལ་རུང་། ཡང་ཞིག་པ་སྐད་ཅིག་དང་པོ་དེ་མ་ཞིག་བཞིན་དུ་མྱུ་གུ་སྐྱེད་དམ་ཞིག་ནས་སྐྱེད། དང་པོ་ལྟར་ན་རྒྱུ་ཞིག་པ་དང་འབྲས་བུ་མྱུ་གུ་གཉིས་དུས་མཉམ་པས་མི་འཐད་ལ། གཉིས་
པ་ལྟར་ན་ཞིག་པ་སྐད་ཅིག་དང་པོ་འགགས་ནས། ཡང་ཞིག་པ་སྐད་ཅིག་གཉིས་པ་འབྱུང་ལ། དེ་དང་མྱུ་གུ་དུས་མཉམ་ན་རྒྱུ་འབྲས་དུས་མཉམ་དུ་འགྱུར་བས་མི་འཐད་པས། དེ་ལྟར་ན་མཐར་ཞིག་པ་གང་ལས་ཀྱང་སྐྱེ་བ་མི་འཐད་ལ། ཞིག་པ་སྐད་ཅིག་
མ་མིན་ན་ནི་རྟག་དངོས་ཀྱི་གཞི་མཐུན་ནམ། ཡང་ན་ནི་དོན་བྱེད་ནུས་པས་སྟོང་པའི་ཕྱིར་འབྲས་བུ་སྐྱེད་པའི་རྒྱུར་ཡང་ག་ལ་རུང་ངོ་། །དེ་ལྟར་ན་ས་བོན་འགགས་སུ་ཆུག་ནའང་ཞིག་པ་དག་གིས་གོ་བཀག་ནས་མྱུ་གུ་ནམ་ཡང་མི་སྐྱེ་བར་ཞིག་པ་སྲིད་མཐར་
ཐུག་པར་སྐྱེ་བ་ལ་སོགས་པ་དང་། གཞན་ཡང་རྒྱུ་འབྲས་ཡིན་ནོ་ཅོག་རྒྱུན་ཆད་དེ་ཤེས་བྱ་ཐམས་ཅད་གཏན་མེད་དུ་འགྱུར་རོ། །དེས་ན་དཀའ་འགྲེལ་ལས་ཇི་སྐད་བཤད་པ་ལྟར། ས་བོན་ཞིག་པ་དང་མ་ཞིག་པའི་ཆ་གཉིས་ཀ་ལས་སྐྱེ་བར་མི་རིགས་པས་
རྒྱུ་ལས་འབྲས་བུ་འབྱུང་བ་ཆོས་ཉིད་ཀྱི་རིགས་པ་འདི་ཙམ་ལ་ཡིད་ཆེས་པར་བྱ་སྟེ། འདི་ལྟར་ས་མྱུག་ལྟ་བུ་ལ་ཐ་སྙད་དུ་རྒྱུ་ཞིག་ནས་སམ་འགགས་ནས་འབྲས་བུ་བསྐྱེད་ཅེས་ཁས་ལེན་པ་ནི་རྒྱུ་ཉིད་འབྲས་བུའི་དུས་ན་མ་འགགས་པར་ཡོད་པ་བསལ་བའི་
13-1-125a


ཆ་ནས་བཞག་པ་ཙམ་སྟེ། རྒྱུའི་སྐད་ཅིག་ལོག་པ་དང་འབྲས་བུའི་སྐད་ཅིག་སྐྱེ་བ་གཉིས་ཀྱི་བར་གཞན་གྱིས་མ་ཆོད་པར་སྐྱེ་འགག་བྱེད་པ་བརྟགས་ན་དབེན་པ་ཡིན་གྱི། སྔར་གྱི་རྒྱུ་ཉིད་མ་གཏོགས་པར་འབྲས་བུ་སྐྱེད་ནུས་ཀྱི་
ཞིག་པ་ཞེས་རྒྱུ་འགགས་པའི་ཤུལ་ན་དངོས་པོར་གྱུར་པ་ཅིའང་མེད་དེ། འབྲས་བུ་རྣམས་རྒྱུ་སྔོན་སོང་ལས་སྐྱེ་ཡང་སྔོན་སོང་ཞེས་རྒྱུ་ལས་གཞན་པའི་འབྲས་བུ་སྐྱེད་ནུས་ཀྱི་དངོས་པོ་ཅིའང་མེད་པ་ལྟར་ཤེས་པར་བྱའོ། །གཉིས་པ་སྣང་གཞི་
བདེན་སྟོང་དུ་ངེས་པར་བསྟན་པ་ནི། དེ་ཕྱིར་ཀུན་རྫོབ་རྒྱུ་མེད་ན། །རུང་མིན་ཞེས་པའང་ལེགས་མ་ཡིན། །གལ་ཏེ་འདི་ཡི་ཉེར་ལེན་པ། །ཡང་དག་ཡིན་ན་དེ་སྨྲོས་ཤིག །ཅེས་གསུངས་ཏེ། དེ་ལྟར་རང་བཞིན་ཅུང་ཟད་མེད་བཞིན་རྒྱུ་
དང་འབྲས་བུའི་ཚུལ་དུ་འགོག་མེད་དུ་སྣང་བ་དེ༷་ཕྱིར༷་ཆོས་འདི་དག་རང་བཞིན་མ་གྲུབ་བཞིན་དུ་སྣང་བ་ཁོ་ན་ཡིན་གྱི། དངོས་སྨྲ་བ་རྣམས་ཀྱིས་འདི་ལྟར་མངོན་སུམ་ཉམས་སུ་མྱོང་བའི་ཀུན་རྫོ༷བ་འདི་དག་ལ་སྣང་གཞིའམ་རྒྱུ༷་བདེན་པ་ཞིག་མེ༷ད་ན༷། འདི་
ལྟར་སྣང་དུ་རུང༷་བ་མི༷ན་ཞེ༷ས་བརྗོད་པ༷འ༷ང་ལེག༷ས་པ་མ༷་ཡི༷ན་ཏེ། གལ༷་ཏེ༷་ཀུན་རྫོབ་འདི༷་ཡི༷་སྣང་གཞིའམ་རྒྱུ་ཉེར༷་ལེན༷་དུ་གྱུར་པ༷་ཞིག་ཡ༷ང་ད༷ག་པར་ཡོད་པ་ཡི༷ན་ན༷་དེ༷་སྨྲོས༷་ཤིག༷་དང་རིགས་པས་གནོད་པ་མེད་པར་གྲུབ་ན་དེ་རྒྱུ་ཡིན་པར་བདག་ཀྱང་ཁས་ལེན་
མོད། གོང་དུ་ཇི་སྐད་བཤད་པའི་རིགས་པས་ཤེས་བྱ་ཡིན་ནོ་ཅོག་བདེན་གྲུབ་མེད་པར་གྲུབ་ཟིན་པ་དེས་ན་རྒྱུ་བདེན་པ་གཞག་པར་མི་ནུས་སོ། །དེའང་འཕགས་པ་ཀླུས། སྔགས་དང་སྨན་དང་སྒྱུ་མའི་དཔེའི་ཚུལ་གྱིས་རྟེན་འབྲེལ་གྲུབ་པའི་ཚིགས་སུ་བཅད་པ། 
13-1-125b


ཡི་གེ་གཅིག་སྔགས་གང་ཡང་མེད། །ཅེས་པ་ལ་སོགས་པ་ཐ་སྙད་གྲུབ་པ་ལས་བསྟན་པ་བཞིན་ནོ། །དེ་ལ་དངོས་སྨྲ་བ་དག་ནི་སྣལ་མ་མེད་པའི་སྣམ་བུ་ལྟར་ཀུན་རྫོབ་སྣང་བ་སྣ་ཚོགས་ལ་སྣང་བའི་རྒྱུ་མེད་ན་སྣང་མི་རུང་བར་བསམས་ནས། རྡུལ་དང་
ཤེས་པ་ཆ་མེད་དམ། གཉིས་སྟོང་གི་ཤེས་པ་སོགས་སྣང་གཞིའམ་རྒྱུ་ཉིད་དུ་ཁས་ལེན་ཅིང་། སངས་རྒྱས་བཅོམ་ལྡན་འདས་ཀྱིས་ཤིང་རྟའི་ཡན་ལག་ལ་བརྟེན་ནས་ཤིང་རྟར་བཏགས་པ་བཞིན། ཕུང་པོ་རྒྱུར་བྱས་ནས་སེམས་ཅན་དུ་གདགས་པར་གསུངས་
པ་ཡིན་ནོ་ཞེས་ཟེར་ལ། དབུ་མ་པ་ནི་སྣང་བའི་གཞིར་གྱུར་པའི་བདེན་པ་ཞིག་མེད་པ་དེ་ཉིད་ཀྱིས་སྣང་བ་མི་འགག་པར་ཤར་བར་མཁྱེན་ནས་ཆོས་ཐམས་ཅད་སྟོང་པ་ལས་རང་སྣང་བར་འདོད་དེ། གཟུགས་བརྙན་སྟོང་བཞིན་དབང་པོའི་སྤྱོད་ཡུལ་དུ་འགྱུར་བ་ལ་
སོགས་པ་བཞིན་དུ་སྟོན་པར་བྱེད་དོ། །དེའང་བྱིས་པ་ལས་དང་པོ་པའི་བློར་སྟོང་པ་དང་སྣང་བའམ། ཡོད་པ་མེད་པ་འདི་གཉིས་ཕན་ཚུན་སྤངས་པའི་ཚུལ་གྱིས་གཅིག་གིས་གཅིག་བཀག་པ་ལྟ་བུ་ལས་འཆར་མི་སྲིད་པས་ཟུང་དུ་ཆུད་པར་རྟོགས་དཀའ་ནའང་།
ངོ་བོ་ནི་མདུན་དུ་བཞག་པའི་བུམ་པ་ལྟ་བུ་གཅིག་ལ་གཅིག་ཏུ་བྲལ་གྱི་རིགས་པས་དཔྱད་ཚེ་རང་བཞིན་གྲུབ་པ་རྡུལ་ཙམ་ཡང་མེད་པར་མཐོང་ན། སྟོང་པ་དེ་ད་ལྟ་དཔྱད་པའི་དུས་ན་བྱུང་གི་སྔ་ན་མེད་པ་ལྟ་བུ་མ་ཡིན་པས་བུམ་པ་དེ་སྐྱེ་འགག་གནས་གསུམ་དུ་སྣང་བའི་
སྐབས་ནའང་རང་བཞིན་མེད་པའི་ངང་ཚུལ་ལས་ཅུང་ཟད་གཡོ་བ་མེད་པ་ཡིན་པས་སྟོང་བཞིན་དུ་དེ་ལྟར་སྣང་བ་སྟེ་ཡིན་ལུགས་སྣང་སྟོང་ཟུང་དུ་འཇུག་པ་ཞིག་ཡིན་པར་ངེས་ཤེས་བསྐྱེད་དགོས་ཏེ། སྤྱིར་བདེན་མེད་ཀྱི་རིགས་པས་སྟོང་པར་རྟོགས་པ་སླ་ཡང་།
13-1-126a


སྟོང་པ་རྟེན་འབྱུང་དུ་འཆར་བ་ལ་ཡིད་ཆེས་ཐོན་དཀའ་བ་ཡིན། དེ་ཐོན་ནས་མདོ་སྔགས་ཐམས་ཅད་ཀྱི་ལྟ་བའི་རྨང་འགྲིགས་པ་ཡིན་ནོ། །དེས་ན་སྣང་གཞི་ཐད་ཀར་བདེན་མེད་ཟང་ཐལ་དུ་ངེས་པའི་ངེས་ཤེས་ཀྱི་ངང་ནས་སྣང་བ་
རྟེན་འབྲེལ་བསླུ་མེད་དུ་འཆར་ཚུལ་མཐོང་བ་འདི་རྨད་བྱུང་བས་ཀྱང་རྨད་དུ་བྱུང་བ་ཡིན་ལ། དེ་རྟོགས་ཚུལ་ཡང་ཚིགས་སུ་བཅད་པ་འདིས་རྫོགས་པར་སྟོན་ཏོ། །གཉིས་པ་རྩོད་སྤོང་ལ། ཀླན་ཀ་མེད་པའི་ཚུལ་མདོར་བསྟན། དེའི་དོན་རྒྱས་པར་བཤད་པ་གཉིས། 
དང་པོ་ལ་ཕས་རྒོལ་འཇོམས་ནུས་པ་དང་། ཚུར་ལ་གང་གིས་མི་ཚུགས་པའི་ཚུལ་གཉིས། དང་པོ། དངོས་པོ་ཀུན་གྱི་རང་བཞིན་ནི། །རིགས་པའི་ལམ་གྱི་རྗེས་འབྲངས་པར། །གཞན་དག་འདོད་པ་སེལ་བར་བྱེད། །དེ་ཕྱིར་རྒོལ་ངན་གནས་མེད་དོ། །
ཞེས་འདི་ལྟར་ཤེས་བྱའི་དངོ༷ས་པོ༷་ཀུན༷་གྱི༷་རང༷་བཞི༷ན་མ་ནོར་བ་ཡི་ཚུལ་ནི༷། དངོས་སྟོབས་ཀྱི་རི༷གས་པའི༷་ལམ༷་གྱི༷་རྗེས༷་སུ་འབྲང༷ས་པ༷ར་བྱས་ནས། གཞ༷ན་སེར་སྐྱ་པ་ལ་སོགས་པ་དངོས་པོའི་རང་བཞིན་ཕྱིན་ཅི་ལོག་ཏུ་རྟོག་པ་ད༷ག་གིས་འབྲས་བུ་ཡོད་པ་དང་མེད་པ་
སོགས་སུ་འདོ༷ད་པ༷་རྣམས་སེ༷ལ་བར༷་བྱེ༷ད་པ་ཡིན་པས་དེ༷་ཡི་ཕྱིར༷་ན་ཕ་རོལ་གྱི་རྒོ༷ལ་བ་རྣམས་ཀྱི་སྨྲ་བ་ང༷ན་པ་དག་འཇུག་པའི་གན༷ས་མེ༷ད་ཅིང་གོ་སྐབས་མེད་པར་འཇོམས་ནུས་ཏེ། སྤྲིན་མེད་པའི་མཁའ་ལ་ཉི་མའི་དཀྱིལ་འཁོར་ཤར་བའི་མདུན་ན་མུན་པ་བཞིན་དུ་བྱེད་
དོ༷། །དེ་ལ་འབྲས་བུ་རང་བཞིན་གྱིས་ཡོད་པར་སྨྲ་བ་སེར་སྐྱ་པ། མེད་པར་སྨྲ་བ་བྱེ་བྲག་པ། གཉིས་ཀར་སྨྲ་བ་གཅེར་བུ་པ་ལ་སོགས་པའོ། །དེ་དག་གི་འདོད་པ་དངོས་པོའི་གནས་ཚུལ་དང་མི་མཐུན་པས་ཚད་མ་མེད་ལ། དབུ་མ་པའི་ལུགས་ནི་དངོས་
13-1-126b


པོ་སྟོབས་ཞུགས་ཀྱི་རིགས་པ་དང་ལྡན་པས་ན་དེ་དག་གི་འདོད་པ་སེལ་བ་ལ་ཚེགས་མེད་ཅིང་ཤིན་ཏུ་སྟོབས་དང་ལྡན་པ་ཡིན་ནོ། །གཉིས་པ། ཡོད་དང་མེད་དང་ཡོད་མེད་ཅེས། །ཁས་མི་ལེན་པ་གང་ཡིན་པ། །དེ་ལ་ནན་ཏན་ལྡན་པས་ཀྱང་། །
ཅིར་ཡང་ཀླན་ཀ་བྱར་མི་ནུས། །ཞེས་གསུངས་ཏེ། གང་བྱིས་པའི་གནས་སྐབས་ནས་བཟུང་སྟེ་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་མྱོང་བ་སྣང་ཙམ་བསླུ་མེད་ཀྱི་རྟེན་འབྲེལ་ནི་བཀག་པ་མེད་ལ། དེ་དག་ལ་རང་བཞིན་གྱིས་གྲུབ་པ་ཅིའང་མེད་པ་ཡིན་པས། 
མཐའ་གཅིག་ཏུ་ཡོ༷ད་པར་སྨྲ་བ་ད༷ང་། མེ༷ད་པར་སྨྲ་བ་ད༷ང་། ཡོ༷ད་མེ༷ད་གཉིས་ཀ་ཡིན་པ་དང་།  གཉིས་ཀ་མ་ཡིན་པའི་གཞི་ཞིག་ཡོད་ཅེ༷ས་མཐའ་བཞིའི་ཕྱོགས་གང་ཡང་ཁ༷ས་མི༷་ལེ༷ན་པ༷་ག༷ང་ཡི༷ན་པ༷་དེ༷་ལ༷་གླགས་བཙལ་བའི་བསམ་པ་དྲག་པོས་ཀུན་ནས་
བསླངས་ཏེ་འབད་པ་ན༷ན་ཏན༷་ཆེན་པོ་དང་ལྡ༷ན་པ༷ས་ཀྱང༷་། ཅིར༷་ཡང༷་ཀླན༷་ཀ༷་བྱར༷་མི༷་ནུས༷་ཏེ་ནམ་མཁའ་འབིགས་པར་འདོད་པ་དང་འདྲའོ། །དེ་ལྟར་དམིགས་པ་ཅན་གྱི་ལྟ་བ་རྣམ་པར་བཟློག་ནས་རང་ཉིད་ལྟ་ཀུན་རབ་ཏུ་བྲལ་བའི་དབུ་མའི་ལམ་ལ་གནས་པ་དེ་ལ་ཆོས་
ཐམས་ཅད་དངོས་པོ་མེད་ན་ནམ་མཁའི་མེ་ཏོག་ལྟ་བུ་ལས་མཐོང་ཐོས་བྱེ་བྲག་ཕྱེད་པ་འཕགས་འཕགས་མིན་སོགས་ཀྱི་ཐ་སྙད་དང་གྲུབ་པའི་མཐའ་རྣམ་པར་གཞག་པ་དང་འགལ་སྙམ་པའི་ཀླན་ཀ་བྱེད་པ་ནི་སྙིང་པོ་ཅིའང་མེད་པའི་ཚིག་ཙམ་དུ་འགྱུར་རོ། །དེ་
སྐད་དུའང་འཕགས་པ་ལྷས། གང་གི་ཕྱོགས་ལ་ཡོད་པ་དང་།  མེད་དང་ཡོད་མེད་ཡོད་མིན་པ། །དེ་ལ་ཀླན་ཀ་བྱ་བར་ནི། །ཡུན་རིང་དུ་ཡང་བརྗོད་མི་ནུས། །ཞེས་གསུངས་སོ། །གཉིས་པ་རྒྱས་པར་བཤད་པ་ལ། དོན་དམ་ལ་རྩོད་
13-1-127a


སྤོང་དང་། ཀུན་རྫོབ་རྩོད་སྤོང་གཉིས། དང་པོ་ལ་མཐའ་བཞིའི་སྤྲོས་བྲལ་གྱི་དོན་དམ་ལ་ཁས་ལེན་མེད་ཚུལ་དང་། དེ་ལ་རྩོད་པ་སྤོང་བའོ། །དང་པོ་ལ་ཁས་ལེན་དང་བཅས་པ་རྣམ་གྲངས་པའི་དོན་དམ་བཤད་པ་དང་། ཁས་
ལེན་ཀུན་བྲལ་རྣམ་གྲངས་མ་ཡིན་པའི་དོན་དམ་བཤད་པ་གཉིས། དང་པོ་ལ་རིགས་པ་དང་ལུང་གིས་གྲུབ་ཚུལ།  དེའི་སྒྲ་དོན་གཉིས། དང་པོ། དེ་ཕྱིར་ཡང་དག་ཉིད་དུ་ན། །དངོས་པོ་གང་ཡང་གྲུབ་པ་མེད། །དེ་ཕྱིར་དེ་བཞིན་གཤེགས་རྣམས་
ཀྱིས། །ཆོས་རྣམས་ཐམས་ཅད་མ་སྐྱེས་གསུངས། །ཞེས་གསུངས་ཏེ། གོང་དུ་ཇི་སྐད་བཤད་པའི་རིགས་པས་གཅིག་དུ་མར་མེད་པ་དེ༷་ཡི་ཕྱིར༷་ན་ཡ༷ང་དག༷་པའི་དོན་ཉི༷ད་ཀྱི་དབང་དུ༷་ན་དངོ༷ས་པོ༷་ག༷ང་ཡ༷ང་གྲུབ༷་པ༷་མེ༷ད་པ་དེ༷་ཕྱིར༷་དེ༷་བཞི༷ན་གཤེ༷གས་པ་རྫོགས་པའི་
སངས་རྒྱས༷་རྣམ༷ས་ཀྱིས༷་ཆོས༷་རྣམ༷ས་ཐམ༷ས་ཅ༷ད་མ༷་སྐྱེས༷་པའོ་ཞེས་དངོས་པོའི་ཡིན་ལུགས་ཇི་ལྟ་བ་བཞིན་དུ་གསུ༷ངས་པ་ཡིན་ཏེ། བློ་གྲོས་རྒྱ་མཚོས་བསྟན་པ་ལས། གང་དག་རྟེན་ཅིང་འབྲེལ་འབྱུང་བ། །དེ་དག་དངོས་ཉིད་ཅི་ཡང་མེད།  །གང་དག་ངོ་བོ་
ཉིད་མེད་པ། །དེ་དག་གང་དུའང་འབྱུང་བ་མེད། །ཅེས་དང་། གླང་པོའི་རྩལ་གྱི་མདོ་ལས། གང་ཞིག་སྐྱེ་བར་འགྱུར་བ་ཡི། །ཆོས་དེ་གང་ཡང་མི་དམིགས་ན། །འབྱུང་བ་མེད་པའི་ཆོས་རྣམས་ལ། །བྱིས་པ་དག་ནི་འབྱུང་བར་འདོད། །ཅེས་དང་།
དཀོན་མཆོག་འབྱུང་གནས་ཀྱི་མདོ་ལས་ཀྱང་། གང་ལ་རང་བཞིན་ཡོད་པ་མ་ཡིན་ཏེ། །རང་བཞིན་མེད་པས་གཞན་རྐྱེན་ཇི་ལྟར་འགྱུར། །རང་བཞིན་མེད་པས་གཞན་གྱིས་ཇི་ལྟར་བསྐྱེད། །རྒྱུ་འདི་བདེ་བར་གཤེགས་པས་བསྟན་པ་ཡིན། །ཞེས་དང་། 
13-1-127b


ཡབ་སྲས་མཇལ་བ་ལས། རྟེན་ཅིང་འབྲེལ་བར་འབྱུང་བ་ལ་འཇུག་པས་ཆོས་ཀྱི་དབྱིངས་ལ་འཇུག་པ་སྟོན་པས་བསྟན་ཏེ། བཅོམ་ལྡན་འདས་དེ་ལ་མ་རིག་པ་ནི་མ་རིག་པ་ཉིད་ཀྱིས་མ་མཆིས་སོ། །ཞེས་པ་ལ་སོགས་པས་རྒྱ་ཆེར་བསྟན་པ་དང་། ཡང་། ཆོས་འདི་དག་ཐམས་ཅད་ནི་དུས་
གསུམ་དུ་མཉམ་པ་ཉིད་ཀྱིས་མཉམ་པ་སྟེ། འདས་པའི་དུས་ནའང་ཆོས་ཐམས་ཅད་རང་བཞིན་དང་བྲལ་བའོ། །ཞེས་སོགས་དང་།  ཡང་། ཆོས་ཐམས་ཅད་ནི་ངོ་བོ་ཉིད་ཀྱིས་སྟོང་པ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་འདས་པ་མ་ལགས། 
མ་འོངས་པ་མ་ལགས་ལ་སོགས་པ་ཇི་སྐད་གསུངས་པ་ལྟ་བུའོ། །དེ་ལྟར་རྟེན་ཅིང་འབྲེལ་བར་འབྱུང་བ་དུས་གསུམ་དུ་བདེན་པའི་སྐྱེ་བ་མེད་པ་དེ་ལྟར་ན། ཆོས་ཀྱི་འཁོར་ལོ་བསྐོར་བ་ན། །གཟོད་ནས་ཞི་ཞིང་མ་སྐྱེས་ལ། །རང་བཞིན་མྱ་ངན་
འདས་པ་ཞེས། །མགོན་པོ་ཁྱོད་ཀྱིས་ཆོས་རྣམས་བཤད། །ཅེས་པའི་ཚིགས་སུ་བཅད་པ་འདི་ཉིད་ལེགས་པར་བཤད་པར་འགྱུར་ཏེ། རང་བཞིན་དང་བྲལ་བའི་ཕྱིར་གཟོད་མ་མ་འོངས་པའི་དུས་ན་ཞི་ཞིང་། ད་ལྟར་བྱུང་བའི་དུས་ན་མ་སྐྱེས་ཏེ་ངོ་བོ་ཉིད་དང་བྲལ་
བའི་ཕྱིར་རོ། །འདས་པའི་དུས་ནའང་རང་བཞིན་གྱིས་མྱ་ངན་ལས་འདས་པ་སྟེ་ངོ་བོ་མེད་པའི་སླད་དུའོ། །འདིས་ནི་ཆོས་ཐམས་ཅད་དུས་གསུམ་མཉམ་པ་ཉིད་དུ་བསྟན་པ་ཡིན་ནོ། །དེ་ལྟར་རིགས་པས་གང་གྲུབ་པ་དེ་ནི་དོན་བཞིན་ཡང་དག་པར་སྟོན་པ་
སངས་རྒྱས་རྣམས་ཀྱིས་གསུངས་ལ། གང་སངས་རྒྱས་རྣམས་ཀྱིས་གསུངས་པ་དེ་ནི་དེ་ལྟར་ཡང་དག་པའི་རིགས་པས་གྲུབ་པ་ཡིན་ནོ། །གཉིས་པ་སྒྲ་དོན། དམ་པའི་དོན་དང་མཐུན་པའི་ཕྱིར། །འདི་ནི་དམ་པའི་དོན་ཞེས་བྱ། །
13-1-128a


ཞེས་གསུངས་ཏེ་དེ་ལྟར་ཡོད་མེད་ཀྱི་ཟླས་ཕྱེ་བའི་དགག་བྱ་བདེན་གྲུབ་བཀག་པའི་མེད་རྐྱང་འདི་ནི་ངེས་པའི་དོན་དུ་ཐ་སྙད་དམ་ཀུན་རྫོབ་ཏུ་གཏོགས་པ་ཡིན་གྱི། གནས་ལུགས་མཐར་ཐུག་པ་མ་ཡིན་ཀྱང་། དམ༷་པ༷འི་དོ༷ན་ནམ་གནས་ལུགས་
མཐར་ཐུག་པའི་དོན་དམ་མཚན་ཉིད་པ་དེ་ད༷ང་མཐུ༷ན་པའི༷་ཕྱིར༷། འབྲས་མིང་རྒྱུ་ལ་བཏགས་པའི་ཚུལ་དུ་བདེན་ཡོད་ཀྱི་ལྡོག་ཕྱོགས་བདེན་མེད་རྐྱང་པ་འདི༷་ལའང་ནི༷་དམ༷་པའི༷་དོན༷་ཞེ༷ས་བྱ༷་བར་བརྗོད་ནའང་རྣམ་གྲངས་པའི་དོན་དམ་མམ་བཏགས་པ་བ་ཡིན་ནོ། །
དེ་ལ་དོན་དམ་པ་མཚན་ཉིད་པ་ནི་མེད་རྐྱང་ཙམ་མ་ཡིན་ཏེ། མཐའ་བཞིའི་སྤྲོས་བྲལ་ཡིན་ནའང་གཞན་སེལ་གྱི་རྟོག་པའི་བློ་ཡུལ་ན་གནས་པའི་དངོས་པོའི་བདེན་མེད་ཙམ་པོ་བ་རྣམ་གྲངས་པའི་དོན་དམ་འདི་མེད་ན་དོན་དམ་ཆེན་པོ་རྟོགས་པའི་ཐབས་མེད་ལ།
དེ་རྟོགས་བྱེད་ཀྱི་ཐབས་སམ་རྒྱུ་ཡིན་ཅིང་དེ་ལ་གཏོགས་པ་ཡིན་པས་དོན་དམ་ཞེས་བརྡ་སྦྱར་བ་ཡིན་ཏེ། དབུ་མ་སྙིང་པོ་ལས། ཡང་དག་ཀུན་རྫོབ་རྣམས་ཀྱི་སྐས། །མེད་པར་ཡང་དག་ཁང་ཆེན་གྱི། །སྟེང་དུ་འགྲོ་བར་བྱ་བ་ནི། །མཁས་ལ་རུང་
བ་མ་ཡིན་ནོ། །ཞེས་གསུངས་པ་བཞིན་ནོ། །དེས་ན་དགག་བྱ་བཅད་ཙམ་གྱི་བདེན་སྟོང་མེད་དགག་གི་ཆ་དང་།  རྟེན་འབྱུང་གི་ཆ་སོ་སོར་རང་ས་ན་མ་འདྲེས་པར་ཡོད་པ་ལྟ་བུའི་ཕྱིར་ན་ལུགས་དེ་ལ་འཛིན་པའང་ཡོད་ཁས་ལེན་ཀྱང་ཡོད་ལ། དེའི་ནང་གི་བདེན་
མེད་ཀྱི་ཆ་དེ་གནས་ལུགས་མཐར་ཐུག་ཡིན་ཞིང་། དེ་ལ་དམིགས་པའི་བློའང་དོན་དམ་མཐར་ཐུག་གི་རྗེས་སུ་ཞུགས་པ་ཡིན་ན་གཞིའམ་གནས་ལུགས་སྣང་སྟོང་ཟུང་འཇུག་མིན་ཞིང་སྟོང་ཆ་ཁོ་ནའི་ཕྱོགས་སུ་ལྷུང་ཞིང་དེའི་ཡུལ་ཅན་ཡང་འཛིན་པའམ། 
13-1-128b


རྣམ་པར་རྟོག་པ་ལས་འདའ་བ་མི་སྲིད་ལ། རིགས་པས་བདེན་གྲུབ་ཙམ་བཀག་པའི་བདེན་སྟོང་གི་ཤུལ་ན་མི་འགོག་རྒྱུའི་ཆོས་ཅན་དེ་ལ་རང་མཚན་མེད་པ་གཞག་ཏུ་མི་རུང་བས། རང་མཚན་གྱིས་གྲུབ་པའི་ཆོས་ཅན་དེ་མི་འགོག་ན། ཐ་སྙད་བདེན་པ་རིགས་
པས་དཔྱད་བཟོད་དུ་ཐལ་བ། དོན་དམ་པའི་སྐྱེ་བ་མི་ཁེགས་པར་ཐལ་བ། འཕགས་པའི་མཉམ་བཞག་དངོས་པོའི་འཇིག་རྒྱུར་ཐལ་བ་གསུམ་གྱིས་གནོད་པས་ན་རང་མཚན་གྱིས་གྲུབ་པ་དང་། བདེན་སྟོང་དུ་བཞག་པའང་ཐ་སྙད་ཙམ་སྟེ་གནས་ལུགས་ལ་སྣང་སྟོང་
དབྱེར་མེད་དུ་གྲུབ་བོ། །དེས་ན་མཉམ་བཞག་ཡེ་ཤེས་ཀྱི་དབུ་མ་དཔལ་ལྡན་ཟླ་བའི་དགོངས་པ་ཟབ་མོ་དེ། ཚུལ་འདི་ལྟ་བུའི་ལམ་ལ་མ་བརྟེན་པར་རྟོགས་དཀའ་བ་མིན་ནམ་བློ་ལྡན་རྣམས་ཀྱིས་ལེགས་པར་སོམས་ཤིག གཉིས་པ་རྣམ་གྲངས་མིན་
པ་ལ་མདོར་བསྟན། རྒྱས་བཤད་གཉིས། དང་པོ། ཡང་དག་ཏུ་ན་སྤྲོས་པ་ཡི། །ཚོགས་རྣམས་ཀུན་ལས་དེ་གྲོལ་ཡིན། །ཞེས་གསུངས་ཏེ། དངོས་པོ་ཡོད་པ་དགག་པའི་དོན་དམ་དེ་ཅིའི་ཕྱིར་དོན་དམ་དངོས་མ་ཡིན། མཐར་ཐུག་པའི་དོན་དམ་
མཚན་ཉིད་པ་དེ་ལས་བོགས་དབྱུང་དུ་མི་སྲིད་པ་གང་ཡིན་སྙམ་ན། དངོས་པོ་དགག་བྱ་རྣམ་པར་བཅད་པ་འདི་ནི་ཡོད་པ་བསལ་བའི་གཞན་སེལ་རྟོག་པའི་གཟུགས་བརྙན་ཙམ་ཡིན་པས་སྤྲོས་པ་ལས་མ་འདས་ལ། ཡ༷ང་ད༷ག་པ་མཐར་ཐུག་གི་དོན་དུ༷་ན༷་
ཡོད་མེད་ཡིན་མིན་ལ་སོགས་པའི་མཐར་འཛིན་གྱི་སྤྲོ༷ས་པ༷་ཡི༷་ཚོ༷གས་རྣ༷མས་ཀུ༷ན་ལ༷ས་ཀྱང་། དོན་དམ་མཚན་ཉིད་པ་དེ༷་ནི་རྣམ་པར་གྲོ༷ལ་བ་ཡི༷ན་ནོ་ཞེས་མདོར་བསྟན་ནས། གཉིས་པ་དེའི་ཚུལ་རྒྱས་པར་བཤད་པ་ལ། དོན་དམ་སྒྲ་རྟོག་
13-1-129a


གི་ཡུལ་ལས་འདས་པར་བསྟན་པ། སྒྲ་རྟོག་ཀུན་རྫོབ་ཀྱི་སྤྱོད་ཡུལ་ཡིན་པར་བསྟན་པ་གཉིས། དང་པོ། སྐྱེ་ལ་སོགས་པ་མེད་པའི་ཕྱིར། །སྐྱེ་བ་མེད་ལ་སོགས་མི་སྲིད། །དེ་ཡི་ངོ་བོ་བཀག་པའི་ཕྱིར། །
དེ་ཡི་ཚིག་གི་སྒྲ་མི་སྲིད། །ཡུལ་མེད་པ་ལ་དགག་པ་ཡི། །སྦྱོར་བ་ལེགས་པ་ཡོད་མ་ཡིན། །ཞེས་གསུངས་ཏེ། དོན་དམ་པར་དངོས་དངོས་མེད། སྐྱེ་མི་སྐྱེ། སྟོང་མི་སྟོང་ལ་སོགས་པ་སྤྲོས་པའི་དྲྭ་བ་མཐའ་དག་སྤངས་པ་སྟེ། འདི་ལྟར་སྐྱེ༷་
བ་དང་གནས་པ་འགག་པ་ལ༷་སོག༷ས་པ༷་མེ༷ད་པ༷འི་ཕྱིར༷་ན། དེ་དག་གི་ལྡོག་ཕྱོགས་སྐྱེ༷་བ༷་མེ༷ད་གནས་པ་མེད་ཅེས་པ་ལ༷་སོ༷གས་པ་མི༷་སྲི༷ད་ལ། སྐྱེ་བ་ཡོད་པ་དང་མེད་པ་ལ་སོགས་པ་དེ༷་ཡི༷་ངོ༷་བོ༷་བཀ༷ག་པའི༷་ཕྱིར༷་ན། བརྗོད་བྱ་དེ་དང་དེ༷་ཡི༷་རྗོད་བྱེད་ཚི༷ག་གི༷་སྒྲ༷་ཡང་མི༷་
སྲི༷ད་ལ། དགག་བྱའི་ཡུལ༷་མེ༷ད་པ༷་ཡིན་པ་ལ༷། དེ་དགག༷་པ༷་ཡི༷་གཏན་ཚིགས་སྦྱོར༷་བ༷འང་བརྫུན་པ་ཙམ་ལས་ལེག༷ས་པ༷འམ་དོན་དུ་གནས་པ་ཡོ༷ད་པ་མ་ཡི༷ན་ཏེ། དགག་བྱ་ཡོད་པ་དགག་པའམ། མེད་པ་དགག་པའམ། གཉིས་ཡིན་གཉིས་བྲལ་
ཅི་དགག་ཀྱང་དགག་བྱ་དེ་དག་གི་ངོ་བོ་གདོད་ནས་མ་སྐྱེས་པ་ཡིན་པས། དེ་དགག་པའི་གཏན་ཚིགས་དང་། དེ་རྗོད་པའི་སྒྲ་དང་། དེ་ལྟར་ཡིད་ཀྱིས་སེམས་པ་གང་ཡིན་པ་ཐམས་ཅད་མོ་གཤམ་གྱི་བུ་བསད་པར་རློམ་པའི་སྒྲ་དང་ཚིག་ལ་སོགས་པ་དང་འདྲ་
བར་རྣམ་པར་རྟོག་པ་ཙམ་གྱི་འཁྲུལ་འཁོར་དུ་ཟད་ཀྱི། དངོས་པོའི་ཆོས་ཉིད་འབའ་ཞིག་ལ་རེག་པ་མ་ཡིན་ནོ། །དེས་ན་མེད་པར་དགག་པའི་གཏན་ཚིགས་ཐམས་ཅད་ཀྱང་རྨི་ལམ་ན་བུ་བྱུང་ཞིང་ཤི་བ་ལ་མྱ་ངན་བྱེད་པའི་ཚེ། བུ་མེད་དོ་ཞེས་རྟོག་པ་བཞིན་དུ། 
13-1-129b


དངོས་པོའི་གནས་ལུགས་ལ་ཕྱིན་ཅི་ལོག་ཏུ་རྟོག་པའི་ཡོད་དོ་སྙམ་པའི་ཞེན་པ་ཞིག་བྱུང་བ་ལ། དེ་དོན་དུ་ངེས་པ་མ་ཡིན་པར་བསྟན་པའི་མེད་དགག་ཏུ་འཛིན་པ་དེས་རྟོག་པས་རྟོག་པ་བཤིག་པ་ཙམ་ཡིན་གྱི། མེད་པ་རང་ཡང་རྟོག་པས་ཕར་བཞག་པ་ལས་
མ་འདས་པས་གནས་ལུགས་ལ་མེད་པ་ཞེས་སུའང་གྲུབ་པ་མེད་དེ། ཞི་བ་ལྷས། བརྟག་པའི་དངོས་ལ་མ་རེག་པར། །དེ་ཡི་དངོས་མེད་འཛིན་མ་ཡིན། །དེ་ཕྱིར་བརྫུན་པའི་དངོས་གང་ཡིན། །དེ་ཡི་དངོས་མེད་གསལ་བར་བརྫུན། །དེས་ན་རྨི་ལམ་བུ་
ཤི་ལ། །དེ་མེད་སྙམ་པའི་རྣམ་རྟོག་ནི། །དེ་ཡོད་རྣམ་པར་རྟོག་པ་ཡི། །གེགས་ཡིན་དེ་ཡང་བརྫུན་པ་ཡིན། །ཞེས་དང་། དཔྱད་བྱ་རྣམ་པར་དཔྱད་བྱས་ན། །རྣམ་དཔྱོད་ལ་ནི་རྟེན་ཡོད་མིན། །རྟེན་མེད་ཕྱིར་ན་མི་སྐྱེ་སྟེ། །དེ་ཡང་མྱ་ངན་འདས་
པར་བརྗོད། །ཅེས་གསུངས་པ་བཞིན་ནོ། །དེས་ན་སྒྲ་དང་རྟོག་པའི་སྤྱོད་ཡུལ་གྱི་གཡོ་བ་ཇི་སྲིད་པ་དེ་སྲིད་དུ་ཀུན་རྫོབ་དང་ཐ་སྙད་ལས་མ་འདས་ཀྱང་། རྣམ་པར་རྟོག་པ་ལ་བརྟེན་ནས་མི་རྟོག་པའི་ཡེ་ཤེས་འབྱུང་བ་དང་། ཐ་སྙད་ལ་བརྟེན་ནས་དོན་དམ་པ། 
གཉིས་སུ་འབྱེད་པའི་ཤེས་རབ་ལ་བརྟེན་ནས་གཉིས་སུ་མེད་པའི་ཡེ་ཤེས་འཐོབ་དགོས་པ་ཡིན་ནོ། །དེས་ན་ཆོས་ཉིད་མཐར་ཐུག་པའི་ངོ་བོ་ནི་མཐའ་བཞིའི་སྤྲོས་པ་ཀུན་དང་བྲལ་བའི་ཕྱིར། འདི་ཞེས་ཚིག་གིས་བརྗོད་པ་དང་། འདི་ཞེས་བློས་དམིགས་པར་མི་ནུས་ཏེ། 
སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །ཞེས་གསུངས་པ་ལྟ་བུའོ། །ངོ་བོ་ནི་སྣང་སྟོང་ཕྱོགས་སུ་མ་ལྷུང་བ་སྐྱེ་འགག་སྤྲོས་པ་ཐམས་ཅད་བྲལ་བའི་རང་བཞིན་རབ་ཏུ་ཞི་ཞིང་འོད་གསལ་བ་སྟེ། མ་སྐྱེས་མི་འགག་ནམ་མཁའི་ངོ་བོ་ཉིད། ཅེས་
13-1-130a


གསུངས་པ་བཞིན་ནོ། །དེ་ལྟར་ཀུན་རྫོབ་སྒྲ་དང་རྟོག་པ་བློའི་སྤྱོད་ཡུལ་ཐམས་ཅད་ལས་འདས་ཀྱང་མཐར་འཛིན་གྱི་ལྟ་བ་ངན་པའི་སྨག་ཐམས་ཅད་སེལ་ནུས་པའི་རང་བཞིན་ཆོས་ཀྱི་དབྱིངས་རྣལ་འབྱོར་པའི་སོ་སོ་རང་རིག་པའི་ཡེ་ཤེས་
ཀྱིས་མཐོང་བ་མེད་པའི་ཚུལ་གྱིས་མཐོང་ཞིང་། གནས་པ་མེད་པའི་ཚུལ་གྱིས་གནས་པ་ཡོད་ཀྱི། གཉིད་འཐུག་དང་བརྒྱལ་བ་ལ་སོགས་པ་ལྟ་བུ་མ་ཡིན་པས། སོ་སོ་རང་རིག་ཡེ་ཤེས་སྤྱོད་ཡུལ་བ། །ཞེས་གསུངས་པ་ལྟ་བུའོ། །དེ་ལ་དོན་དམ་བློ་
ཡི་སྤྱོད་ཡུལ་མིན་པར་བསྟན་པ་འདི་ལ་གོ་དགོས་པ་འདི་ཡོད་དེ། དོན་དམ་རྣམ་གྲངས་པ་བདེན་གྲུབ་མེད་པར་དགག་པ་ཙམ་ནི་བློའི་ཡུལ་ཡིན་སྒྲའི་ཡུལ་ཡིན།  རྣམ་གྲངས་མིན་པ་ལ་ནི་སྣང་སྟོང་རེ་རེའི་ཕྱོགས་སུ་མ་ལྷུངས་པའི་སྣང་སྟོང་ཟུང་འཇུག་བདེན་གཉིས་
ཟུང་འཇུག་སྤྲོས་བྲལ་དབུ་མ་སོགས་མིང་བཏགས་པ་ནི་མཚོན་བྱེད་ཙམ་སྟེ་མཛུབ་མོས་ཟླ་བ་བསྟན་པ་དང་འདྲ་བ་ལས་དོན་དུ་སྒྲ་རྟོག་གི་ཡུལ་ལས་ཤིན་ཏུ་འདས་པ་ཡིན་ནོ། །འོན་ཀྱང་མཐར་འཛིན་གྱི་ཞེན་ཡུལ་ཐམས་ཅད་རིགས་པས་རྣམ་པར་དཔྱད་པས་
སུན་ཕྱུང་བའི་འབྲས་བུ་རྟོག་པའི་དྲྭ་བ་མཐའ་དག་ལོག་པའི་ཚུལ་གྱིས་དགག་སྒྲུབ་ལས་འདས་པའི་ཆོས་ཉིད་ལ་བསལ་གཞག་མེད་པར་འཇུག་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ཉམས་ལེན་དངོས་གཞི་སྟེ། འདི་ལ་བསལ་བྱ་ཅི་ཡང་མེད། །གཞག་པར་
བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ནས་རྣམ་པར་གྲོལ། །ཞེས་གསུངས་པ་བཞིན་ནོ། །དེའང་དཔེར་ན། ཅིའང་མ་མཐོང་ཞེས་མཐོང་བ་དགག་པའི་ཚུལ་གྱིས་བརྗོད་པ་དང་། ཅིའང་མེད་པར་མཐོང་ཞེས་
13-1-130b


མཐོང་བ་སྒྲུབ་པ་ལྟ་བུའི་ཚིག་གཉིས་ལ་དོན་ལ་ཁྱད་པར་མེད་དེ། ཕྱི་མས་ཀྱང་མཐོང་རྒྱུ་ཡོད་པར་མི་སྟོན་པ་བཞིན་ནོ། །དོན་དམ་བློ་འདས་སམ། བློའི་སྤྱོད་ཡུལ་མིན་ཞེས་འདོད་པ་དང་། རྣམ་པར་མི་རྟོག་པའི་སྤྱོད་ཡུལ་ཡིན་ཞེས་འདོད་པ་ལ་དོན་ལ་ཁྱད་མེད་
དེ། རྣམ་པར་མི་རྟོག་པ་ནི་སྤྲོས་པ་ཐམས་ཅད་ལོག་ཅིང་གཟུང་འཛིན་མེད་པས་རབ་ཏུ་ཕྱེ་བ་ཡིན་པས་ན། དེའི་སྤྱོད་ཡུལ་དུ་དམིགས་པར་བྱར་ཡོད་པར་མི་སྟོན་ཏེ། གང་ཚེ་སྐྱེ་མེད་དེ་ཉིད་ཡིན་ཅིང་བློ་ཡང་སྐྱེ་བ་དང་བྲལ་བ། །ཞེས་པ་ལ་སོགས་པའི་
ཚིགས་སུ་བཅད་པའི་དོན་བཞིན་དུ་བལྟའོ། །གལ་ཏེ་གཟུགས་རྣ་ཤེས་ཀྱི་སྤྱོད་ཡུལ་མིན་ཀྱང་མིག་ཤེས་ཀྱི་ཡིན་པ་བཞིན་དུ། རྣམ་པར་མི་རྟོག་པའི་ཡུལ་དུ་དོན་དམ་དམིགས་པའི་ཚུལ་གྱིས་བསྒྲུབས་ན། རྣམ་པར་མི་རྟོག་པ་དང་གཟུང་འཛིན་མེད་པའི་
ཚུལ་ཡང་འཇིག་པར་འགྱུར་བས་ན་དོན་དམ་བློ་འདས་སུ་སྨྲ་བ་ལ་རྣམ་པ་ཀུན་ཏུ་གནོད་པ་མེད་དེ། མདོ་ལས་རྣམ་ཀུན་མཆོག་ལྡན་གྱི་ཡེ་ཤེས་ཀྱི་བར་གྱི་ཤེས་པའི་སྤྱོད་ཡུལ་ལས་འདས་པའི་ཚུལ་རྒྱ་ཆེར་གསུངས་པ་ལྟ་བུའོ། །དེས་ན་ཐ་སྙད་ཐམས་ཅད་དང་
བྲལ་བ་མཐར་ཐུག་གི་དོན་དམ་དངོས་སུ་གཞལ་བ་ལ་ཀུན་རྫོབ་ཀྱི་ཡུལ་ཅན་འཇིག་རྟེན་པའི་ཤེས་པ་ཚད་མ་མིན་ཞིང་། དེ་ནི་རྟེན་ཅན་ཞིག་མ་གཏོགས་ཅི་ལའང་མི་བརྟེན་པ་ཆོས་ཀྱི་དབྱིངས་འཇིག་རྟེན་ལས་འདས་པའི་ཡེ་ཤེས་ཀྱི་སྤྱོད་ཡུལ་ལ་དམིགས་མི་
ནུས་ཏེ། བཙས་པའི་བུ་ཆུང་གིས་ཉི་མ་ལ་ལྟ་བ་དང་། དམུས་ལོང་གིས་གཟུགས་ལ་ལྟ་བ་ལྟ་བུར་གསུངས་ལ། རྟེན་ཅན་ཡོད་དོ་སྙམ་པའམ། མེད་དོ་སྙམ་པ་ཞིག་དམིགས་ཡུལ་དུ་བྱས་ཏེ་འཛིན་སྟངས་ཀྱིས་ཡུལ་དེ་གནས་ལུགས་སོ་སྙམ་ན་མ་
13-1-131a


ཡིན་ཏེ། བློས་རྟེན་འཆའ་བའི་ཡུལ་གང་ཡིན་པ་དབུ་མའི་རིགས་པས་སུན་ཕྱུང་མི་ནུས་པ་མི་སྲིད་དེ། ཆོས་ཉིད་ཀྱི་རིགས་པ་ལ་ཉེ་རིང་མི་མངའ་བའི་རྒྱུ་མཚན་གྱིས། གང་གི་ངོར་བྱས་ནས་མཚན་མ་ལ་དགའ་བ་
རྣམས་ཀྱིས་དམིགས་པའི་ཡུལ་ཉིད་དུ་གཟུང་བའང་གཞག་པར་མི་བྱེད་ལ། དེ་ལྟར་ན་སྟོང་ཉིད་མཐའ་བྲལ་གྱི་རྒྱ་མཚོ་ཆེན་པོར་དངོས་ཞེན་གྱི་གྲུ་གཟིངས་འཇིག་པའི་ཚེ། དམིགས་པ་སྣ་ཚོགས་ཀྱི་མཚན་མའི་གཟེབ་ལ་ཆགས་པའི་སྲིད་པའི་ཡིད་
ཀྱི་ཚོང་པ་རྣམས་སྐྲག་ཅིང་རྟབ་རྟབ་པོར་གྱུར་ནས་ཡུལ་གྱི་རྟེན་ཞིག་ལ་འཇུ་བར་བརྩམས་ཀྱང་། རྟེན་ཉིད་ཀྱང་མི་བརྟན་པ་ཆོས་ཉིད་ཡིན་ནོ། །ཆོས་དབྱིངས་ཕ་མཐའ་དང་བྲལ་བའི་རྒྱ་མཚོ་ཆེན་པོར། ཐོག་མེད་ནས་འཁོར་བར་འཆིང་བྱེད་རྣམ་པར་
རྟོག་པ་མཐའ་དག་ཤི་ཡང་སུ་དག་ལ་མི་དགའ་བ་ཅི་ཞིག་ཡོད་དེ། མི་གནས་པའི་མྱང་འདས་ཀྱི་རྒྱལ་ཐབས་ལ་དབང་འབྱོར་བའི་རྣམ་པར་མི་རྟོག་པའི་ཡེ་ཤེས་སྐྱེས་པ་ཡིན་པས་ན་ཟབ་མོ་ལ་མོས་པ་རྣམས་ནི་ཚུལ་དེ་ལ་མི་སྐྲག་ཅིང་ཤིན་ཏུ་དགའ་བར་འགྱུར་རོ། །
དེ་ལ་དབུ་མའི་གཞུང་ཀུན་གྱིས་དངོས་པོ་རང་བཞིན་མེད་པར་སྟོན་པ་ཡིན་ཀྱང་། རང་བཞིན་མེད་པ་དང་སྟོང་པ་ཉིད་ལ་རྣམ་གྲངས་དང་རྣམ་གྲངས་མིན་པའི་གོ་བའི་དབང་གིས་ཕྱི་མ་ལྟར་ན་སྤྲོས་ཀུན་ལོག་པ་སྟེ། སྟོང་པ་ཉིད་ཅེས་བྱ་བ་ནི་ཅིའང་མ་མཐོང་བའི་ཚིག་བླ་
དགས་སོ། །ཞེས་གསུངས་པ་ལྟར་ངེས་པར་བྱས་ནས་རང་བཞིན་མེད་པའི་ཚིག་གིས་དེར་ཞེན་པར་མི་བྱ་སྟེ། དེ་ནི་སྤྲོས་པ་ལྡོག་པའི་དོན་དུ་བསྟན་པའི་ཕྱིར་ཏེ། ཚིག་གསལ་ལས།  ཁྱོད་ལ་སྟེར་བའི་ཟོང་ཅིའང་མེད་ཅེས་སྨྲས་པ་ལ། ཀྱེ་བདག་ལ་ཅིའང་
13-1-131b


མེད་པ་ཞེས་བྱ་བའི་ཟོང་དེ་བྱིན་ཅིག་ཟེར་ན། དེ་ལ་ཟོང་མེད་པར་འཛིན་དུ་གཞུག་པར་ཐབས་གང་གིས་ནུས། སྟོང་པ་ཉིད་དུ་ཞེན་པའང་དེ་དང་འདྲ་བར་གསུངས་པ་ལྟར་ཤེས་པར་བྱ་སྟེ། མདོར་ན་དངོས་པོ་རང་བཞིན་མེད་པའི་འཛིན་སྟངས་དང་བཅས་པ་རྣམ་གྲངས་པའི་
དོན་དམ་གྱི་ཡུལ་ཅན་དང་། ཕྱི་མ་ལྟར་ཁས་ལེན་དང་སྤྲོས་པ་བྲལ་བ་གང་ཡིན་ལས་དོན་གྱི་གནད་ཤན་ཕྱེད་དགོས་ཀྱི། རང་བཞིན་མེད་པ་སོགས་ཀྱི་ཚིག་རིས་ཙམ་ལས་ངོས་མི་ཟིན་ནོ། །དེས་ན་ཐལ་རང་གི་འཆད་ཚུལ་ལྟོ་སྦྱར་ཏེ། མཐར་ཐུག་གི་དགོངས་
གནད་སྤྲོས་བྲལ་དུ་གཅིག་ཀྱང་། རྗེས་ཐོབ་ཤན་འབྱེད་ཚེ་རང་རྒྱུད་པ་ལྟར་དོན་དམ་ལ་གཉིས་སུ་ཕྱེ་བ་བདེ་ཞིང་། མཉམ་བཞག་མི་རྟོག་པའི་ཡེ་ཤེས་ལ་འཇུག་པ་ན་ཕྱེ་མི་དགོས་པར་སྤྲོས་བྲལ་ཆེན་པོར་བསྒྲུབ་པ་ཉིད་ཡིན་པར་ཤེས་ན་དབུ་མའི་གནད་མཐར་
ཐུག་ཟིན་ནུས་ཀྱི་གཞན་དུ་དཀའོ། །དེའང་རྣམ་གྲངས་པའི་དབང་དུ་ན་སྐྱེ་བ་དང་སྐྱེ་མེད་ཅེས་པ་དེ་དག་ཕན་ཚུན་ལྟོས་ནས་བཞག་པ་ཙམ་སྟེ། གཉིས་ཀའང་རིགས་པས་དཔྱད་ན་མ་གྲུབ་པར་མཚུངས་པ་ལ། ཞེན་ཡུལ་སུན་ཕྱུང་ནུས་བཞིན་དུ་སྐྱེ་མེད་ལ་དེར་འཛིན་
མཐར་ཡང་མི་གཏོང་ན་དངོས་པོའི་ཆོས་ཉིད་དབང་བཙན་པར་མ་སོང་བས་སྐྱེ་སོགས་ཀྱི་ཞེན་པའང་སྤོང་བར་མི་འགྱུར་རོ། །དེ་ལ་འདི་སྙམ་དུ། བུམ་མེད་དུ་འཛིན་པ་ལྟ་བུ་ལའང་དགག་བྱ་བུམ་པའི་རྣམ་པ་དང་། དེ་བསལ་བའི་རྟོག་པ་གཉིས་མེད་པར་དེར་འཛིན་
མི་ཤེས་ཀྱང་། དེའི་རྟོག་པ་ནི་དགག་རྐྱང་གི་ཡུལ་ཅན་ཡིན་ཏེ། བུམ་པས་དབེན་པའི་ཕྱོགས་སུ་བུམ་པ་ཐ་སྙད་དུའང་མེད་པས་སྟོང་རྟེན་འབྱུང་ཟུང་འཇུག་གི་དོན་མེད་ལ། སྐྱེ་སོགས་ཐ་སྙད་དུ་ཡོད་ཀྱང་བདེན་པའི་སྐྱེ་མེད་ཡིན་པ་དེ་ནི་སྟོང་རྟེན་འབྱུང་གི་གནས་
13-1-132a


ལུགས་ཡིན་ལ། དེ་དང་མཐུན་པའི་བློ་ཡིན་པས་སྐྱེ་མེད་དུ་འཛིན་པ་ནམ་ཡང་བཟློག་པར་མི་རུང་སྙམ་པའང་ལེགས་པ་མིན་ཏེ། ཟུང་འཇུག་ཡིན་པས་ན་དེའི་ངོ་བོ་ཇི་ལྟ་བ་ནི་སྨྲ་བརྗོད་དང་བྲལ་བར་གནས་ཀྱི། གཞན་དུ་ན་དམིགས་པར་
བྱར་ཡོད་པར་ཡང་ཅིས་མི་འགྱུར། འོན་ཀྱང་རྣམ་པར་རྟོག་པས་སྣང་སྟོང་སྦྱར་ཏེ་བཟུང་བ་ཙམ་ནི་གནས་ལུགས་མཐར་ཐུག་དང་མཐུན་པའི་བློར་མི་འགྱུར་རོ། །དེའང་དོན་དམ་ལ་དཔྱོད་པའི་རིགས་པས་དཔྱད་ན་མི་བཟློག་པའི་ཐ་སྙད་ཀྱི་སྐྱེ་བ་དང་། དེའི་སྟེང་གི་སྐྱེ་མེད་
གཉིས་གང་ཡང་མི་རྙེད་པར་མགོ་མཉམ་པའི་ཕྱིར་རྣམ་གྲངས་མིན་པའི་དོན་དམ་གྱི་སྐབས་འདིར་ཐལ་རང་དགོངས་པ་གཅིག་ཏུ་གྱུར་པ་ཡིན་ནོ། །གལ་ཏེ་སྒྲ་དོན་གྱི་རྣམ་པར་རྟོག་པས་རང་བཞིན་མེད་ཅེས་འཛིན་པ་སོགས་ལོག་པས་གནས་ལུགས་མི་མཐོང་ན་འཕགས་
པ་རྣམས་ཀྱིས་ཀྱང་རྟོག་པ་དང་བྲལ་བའི་མངོན་སུམ་གྱིས་གནས་ལུགས་གཟིགས་པར་དཀའ་འོ། །འོན་ཏེ་སོ་སྐྱེའི་ས་ན་བསྒོམ་པ་དེ་ལས་འོས་མེད་སྙམ་ནའང་རྣམ་པར་མི་རྟོག་པ་རྗེས་མཐུན་བསྐྱེད་དུ་ཅིའི་ཕྱིར་མེད། དེ་ལྟར་མི་ནུས་པས་རེ་ཞིག་འཛིན་སྟངས་མི་འདོར་
སྙམ་ན། བཙན་ཐབས་ཀྱིས་དེ་འདོར་དུ་འཇུག་པ་སུ་ཞིག་ཡོད་དེ། འོན་ཀྱང་ཆོས་ཉིད་བསམ་གྱིས་མི་ཁྱབ་པའི་ཚུལ་ལ་ཡིད་ཆེས་བསྐྱེད་དགོས་ཀྱི། ཟབ་མོ་ཅིའི་ཕྱིར་ན་རྟོག་གེའི་ཡུལ་མ་ཡིན་སྙམ་དུ། ཡེ་ཤེས་དམ་པའི་སྤྱོད་ཡུལ་རྣམ་ཤེས་ཀྱི་ཡུལ་དུ་ཁྲིད་ན་
དེ་བཞིན་གཤེགས་པའི་བསྟན་པའི་སྙིང་པོའི་གནད་ཉམས་པར་འགྱུར་བས་ན་རང་གི་བློ་ལ་སྦྱར་བདེ་བའི་ཕྱོགས་བཟུང་ནས་ཟབ་མོའི་ཆོས་སྤང་བར་མི་བྱ་སྟེ། བདེན་གཉིས་ཀྱི་ཚུལ་ལ་རིང་དུ་འདྲིས་པར་བྱས་ན་ཡེ་ཤེས་དང་རྗེས་སུ་མཐུན་པའི་བཟོད་པ་སྐྱེ་ལ། དེའི་ཚེ་བློ་འདས་
13-1-132b


ལ་ཡིད་ཅུང་ཟད་ཆེས་ནས་གོམས་པའི་དབང་གིས་གདོད་མངོན་དུ་འགྱུར་རོ་ཞེས་རྒྱལ་བ་སྲས་བཅས་ཀྱིས་དབུགས་དབྱུང་བའི་གསུང་གི་ཚུལ་ལ་བསམས་ཏེ་ཚུར་མཐོང་ཙམ་ལ་རེ་བའི་བློས་ཨུ་ཚུགས་དང་ཞུམ་པ་གཉིས་ཀ་སྤོངས་ལ་བསམ་གྱིས་མི་ཁྱབ་པའི་ཡེ་ཤེས་ཀྱི་ཚུལ་
ལ་རིམ་བཞིན་འཇུག་པར་འཚལ་ལོ། །ལང་ཀར་གཤེགས་པ་ལས་ཀྱང་། ཡོད་པའི་ཟླས་དྲངས་མེད་པ་སྟེ། །ཡོད་པའང་མེད་པའི་ཟླས་དྲངས་སོ། །དེ་བས་མེད་པར་བརྗོད་མི་བྱ། །ཡོད་པ་ཉིད་དུའང་མི་བརྟག་གོ། གང་ལ་ཅི་ཡང་མི་སྐྱེ་བ། །ཅི་ཡང་
འགག་པར་མི་འགྱུར་ཏེ། །འཇིག་རྟེན་རྣམ་པར་དབེན་མཐོང་བ། །དེ་ལ་ཡོད་དང་མེད་པ་མེད། །ཅེས་གསུངས་ཤིང་། གཞན་སྡེ་གཞོན་ནུ་མ་ལེན་ལ་སོགས་པ་དག་ཀྱང་། འོ་མ་ལ་ཞོ་མེད་པ་སྔ་ན་མེད་པ། ཞོ་ལ་འོ་མ་མེད་པ་ཞིག་ནས་མེད་པ། རི་བོང་
གི་མགོ་ལ་རྭ་མེད་པ་གཏན་ནས་མེད་པ། བ་ལང་ལ་རྟ་མེད་པ་ཕན་ཚུན་གཅིག་ལ་མེད་པའོ། །ཞེས་མེད་པ་བཞི་པོ་དེ་དངོས་པོ་གཞན་འགྱུར་དུ་འདོད་པ་ཡིན་ནོ། །དེ་ལ་ཡོད་པའི་ཟླས་དྲངས་ནས་མེད་པ་བཞག་སྟེ་ཞིག་ནས་མེད་པ་ལ་སོགས་པ་གསུམ་ལྟ་བུའོ། །
དེས་ན་དངོས་མེད་ཀྱང་དངོས་པོའི་ཟླས་དྲངས་ནས་བཞག་པ་ཡིན་ལ། གལ་ཏེ་མོ་གཤམ་དང་། སྤྱིར་བུ་ཡོད་པར་མ་ངེས་ན་མོ་གཤམ་གྱི་བུ་ཞེས་པའི་སྒྲ་བློ་ཙམ་པོ་དེའང་མེད་ལ་སྒྲ་བློ་ཙམ་ལ་བརྟེན་ནས་དེ་མེད་པའི་ཐ་སྙད་ཀྱང་བྱེད་དོ། །རི་བོང་རྭ་ལ་སོགས་པའང་
དེ་དང་འདྲའོ། །མེད་པའི་ཟླས་དྲངས་ནས་ཡོད་པ་སྟེ། དཔེར་ན། སྐྱེ་བ་ཞེས་བྱ་བ་སྔ་ན་མེད་པའི་དབང་གིས་གྲགས་སོ། །སྔ་ན་ཡོད་ན་ནི་སྐྱེ་བ་འགལ་ཏེ། ཡོད་པ་སྐྱེ་ན་སྐྱེས་པ་དེའང་སླར་སྐྱེ་བས་ཐུག་མེད་དུ་འགྱུར་རོ། །དེས་ན་ཡོད་མེད་བདེན་མི་བདེན་
13-1-133a


སྟོང་མི་སྟོང་སོགས་དེ་དག་ཐམས་ཅད་རྟོག་པའི་དབང་གིས་བཞག་པ་ཙམ་ལས་ཆོས་ཉིད་སྤྲོས་པ་བྲལ་བའི་གནས་ལུགས་མ་ཡིན་ལ། ནམ་རྣམ་པར་མི་རྟོག་པའི་ཡེ་ཤེས་ཐོབ་ནས་སྤྲོས་བྲལ་ལ་གནས་པ་ན། ཀུན་རྟོག་གཡོ་
བའི་བདུད་ཀྱི་ས་ལས་རིང་དུ་འདས་ཤིང་རྒྱལ་བ་དགྱེས་པའི་ལམ་ལ་ཞུགས་པར་ཤེས་པར་བྱའོ། །དེ་སྐད་དུ་ཡང་ཕལ་པོ་ཆེ་ལས། ཕྲ་ལ་ཤེས་དཀའ་དྲང་སྲོང་ཆེན་པོའི་ལམ། །མི་རྟོག་རྟོག་ཡུལ་མ་ཡིན་བལྟ་བར་དཀའ། །རང་བཞིན་ཞི་ཞིང་འགག་
མེད་འབྱུང་བ་མེད། །མཁས་གསལ་ཤེས་པས་ཁོང་དུ་ཆུད་པ་ཡིན། །ངོ་བོ་ཉིད་སྟོང་ཞི་ཞིང་སྡུག་བསྔལ་ཟད། །རྒྱུད་ལས་རྣམ་གྲོལ་མཉམ་པར་མྱ་ངན་འདས། །མཐའ་དང་དབུས་མེད་ཚིག་གིས་བརྗོད་དུ་མེད། །དུས་གསུམ་གྲོལ་བ་ནམ་
མཁའ་འདྲ་ཞིང་མཚུངས། །ཞེས་དང་། དཀོན་མཆོག་བརྩེགས་པ་ལས། དོན་དམ་པར་ན་འཕགས་པའི་ཤེས་རབ་དང་ཡེ་ཤེས་ཀྱི་མདུན་ན་ཆོས་གང་ཡང་ཡོངས་སུ་ཤེས་པའམ། སྤང་བའམ། བསྒོམ་པའམ། མངོན་དུ་བྱ་བར་འགྱུར་བའི་
ཆོས་གང་ཡང་མི་འདུག་གོ། ཞེས་དང་། ཀླུའི་རྒྱལ་པོ་རྒྱ་མཚོས་ཞུས་པ་ལས། སྔོན་མཐའ་སྟོང་ཞིང་ཕྱི་མའི་མཐའ་ཡང་སྟོང་། །སྐྱེ་དང་འཇིག་དང་གནས་པའི་དངོས་པོས་སྟོང་། །འདི་ནི་དངོས་པོ་ཡོད་མིན་དངོས་མེད་མིན། །གང་ཕྱིར་
ཆོས་ཀུན་ངོ་བོ་ཉིད་ཀྱིས་སྟོང་། །ཞེས་དང་། བློ་གྲོས་རྒྱ་མཚོས་བསྟན་པའི་མདོ་ལས། ཚངས་པ་ཆོས་གང་ཡང་ཡོངས་སུ་མ་གྲུབ་པ་དེ་ཡོད་པ་ཉིད་དོ་ཞེའམ། མེད་པ་ཉིད་དོ་ཞེས་ཁས་མི་ལེན་ཏོ། །ཞེས་དང་། ཡེ་ཤེས་སྣང་བ་རྒྱན་གྱི་མདོ་ལས། 
13-1-133b


དོན་འཚལ་རྣམས་ཀྱིས་མཆིས་མི་བརྗོད། །མ་མཆིས་ཞེས་ཀྱང་བརྗོད་མི་བགྱི། །ལན་མེད་ཚིག་ལམ་མ་མཆིས་པ། །མི་བརྟེན་ཁྱོད་ལ་ཕྱག་འཚལ་ལོ། །ཞེས་དང་། ཡོན་ཏན་རིན་པོ་ཆེ་སྡུད་པ་ལས། གལ་ཏེ་མི་ཤེས་བཞིན་དུ་གཟུགས་
སུ་འདུ་ཤེས་ཤིང་། །ཚོར་བ་སེམས་པ་རྣམ་ཤེས་ཕུང་པོར་སྤྱོད་བྱེད་ཅིང་། །ཕུང་འདི་སྟོང་ཞེས་རྟོག་ནའང་བྱང་ཆུབ་སེམས་དཔའ་ནི། མཚན་མ་ལ་སྤྱོད་སྐྱེ་མེད་གནས་ལ་དད་མ་ཡིན། །ཞེས་དངོས་དངོས་མེད་གང་དུ་ཞེན་ཀྱང་མི་རུང་བར་བསྟན་པ་དང་།
གང་ཞིག་ཡོད་པ་མ་ཡིན་དེ་ནི་མེད་ཅེས་བྱ། །བྱིས་པ་རྣམས་ཀྱིས་དེ་བརྟག་ཡོད་དང་མེད་པར་བྱེད། །ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ། །བྱང་ཆུབ་སེམས་དཔའ་གང་གིས་འདི་ཤེས་ངེས་པར་འབྱུང་། །ཞེས་མཐའ་གཉིས་སྤངས་པའི་ཤེར་
ཕྱིན་གྱིས་ལྟ་བ་ཀུན་ལས་ངེས་པར་འབྱུང་བ་བསྟན་པ་དང་། སྐྱེ་བ་མེད་དང་སྐྱེ་བ་གཉིས་ཀར་མི་རྟོག་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་གསུངས་ཤིང་། རྒྱན་སྟུག་པོ་བཀོད་པ་ལས། ལྟ་བ་ཇི་སྙེད་གང་ཡང་རུང་། །ལུས་
ཅན་རྣམས་ལ་ཡོད་པ་ཡི། །ལྟ་བ་རྣམ་པར་སྤང་བའི་ཕྱིར། །སྟོང་པ་ཉིད་ཀྱི་ཚུལ་བསྟན་ཏོ། །སྟོང་པ་ཉིད་ཀྱི་ལྟ་ཐོས་ཀྱང་། །ལ་ལའི་ལྟ་བ་མ་ཞིག་ན། །གསོར་མི་རུང་བའི་ལྟ་ཅན་ཏེ། །སྨན་པས་བཏང་བའི་ནད་པ་བཞིན། །ཇི་ལྟར་བསྲེག་
པ་ཚིག་པའི་མེ། །བསྲེག་པ་མེད་པས་མི་གནས་སོ། །དེ་བཞིན་བསྲེག་བྱ་ལྟ་ཚིག་ན། །སྟོང་ཉིད་མེ་ཡང་འགག་པར་འགྱུར། །ལྟ་བ་འགོག་པའི་དུས་སུ་ཡང་། །ཡེ་ཤེས་ཡང་དག་མེ་འབྱུང་སྟེ། །ཉོན་མོངས་ཐམས་ཅད་སྲེག་པར་བྱེད། །
13-1-134a


ཉོན་མོངས་བསྲེགས་པས་རྣམ་པར་མཛེས། ཞེས་དང་། འཕགས་པ་བློ་གྲོས་མི་ཟད་པས་བསྟན་པ་ལས། དེ་ལ་ཀུན་རྫོབ་ཀྱི་བདེན་པ་གང་ཞེ་ན། འཇིག་རྟེན་གྱི་ཐ་སྙད་ཇི་སྙེད་པ་དང་ཡི་གེ་དང་སྐད་དང་བརྡ་བསྟན་པའོ། །
དོན་དམ་པའི་བདེན་པ་ནི། གང་ལ་སེམས་ཀྱི་རྒྱུ་བའང་མེད་ན་ཡི་གེ་རྣམས་ལྟ་སྨོས་ཀྱང་ཅི་དགོས། ཞེས་གསུངས་ཏེ། འདིར་བྱེད་པའི་སྒྲུབ་པ་ཡོངས་སུ་གཟུང་སྟེ། འདི་ལྟར་སྣོད་བཅུད་ཀྱི་འཇིག་རྟེན་མྱང་བྱའམ་ཤེས་བྱ་གཟུགས་ལ་སོགས་པ་དང་། མྱོང་བའི་
ངོ་བོའམ་ཤེས་པ་སྟེ་བདེ་བ་ལ་སོགས་པ་མདོར་ན་འཇིག་རྟེན་པའམ་ལུང་ལས་འབྱུང་བའང་རུང་སྟེ། འདི་ནི་ཤེས་པའོ། །འདི་ནི་ཤེས་བྱའོ། །འདི་ཡོད་དོ། །འདི་མེད་དོ་ལ་སོགས་པ་ཐ་སྙད་དུ་གདགས་ཏེ་སྐད་དང་ཡི་གེ་བརྡས་བརྗོད་དུ་རུང་བ་ཇི་སྙེད་པ་ཐམས་ཅད་
ཀུན་རྫོབ་ཡིན་ལ། དོན་དམ་ལ་ནང་གི་ཡིད་ཀྱིས་རྗོད་པ་དང་། ཕྱི་རོལ་ཏུ་ངག་གི་རྗོད་པ་གཉིས་དང་བྲལ་བའོ། །ཇི་ལྟར་ན་ཡིད་ཀྱིས་རྗོད་པ་ཡིན་སྙམ་ན། ཡིད་ཀྱིས་བརྒྱ་བྱིན་ལ་ཆོས་མངོན་པར་བཤད་པ་དང་། ཡིད་ཀྱིས་ཚིགས་སུ་བཅད་པའི་ལན་བཏབ་
པ་མདོ་ལས་འབྱུང་བ་ལྟ་བུའོ། །ཡང་། མདོ་མྱང་འདས་ཆེན་པོ་ལས། རིགས་ཀྱི་བུ་བྱམས་པ། གང་ཞིག་ཡོད་པ་དང་མེད་པ་དང་། ཡོད་པའང་མ་ཡིན་མེད་པའང་མ་ཡིན་པ་དང་བཅས་པ་དེ་ནི་ཉན་ཐོས་དང་རང་སངས་རྒྱས་ཐམས་ཅད་ཀྱིས་དཔག་ནུས་པ་མ་ཡིན་ནོ། །
ཞེས་དང་། མདོ་ཏིང་ངེ་འཛིན་དམ་པ་ནས། སྔོན་སྟོན་པ་མང་དུ་ཐོས་པའི་སྐྱེ་བོར་གྱུར་ཚེ་འཇམ་དཔལ་དང་བརྩད་དེ། འཇམ་དཔལ་གྱིས་ཡོད་པ་དང་། སྟོན་པས་མེད་ཅེས་སྨྲས་ཏེ་ཡོད་མེད་ཀྱི་བདེན་པ་ལ་རྩོད་པར་གྱུར་ཏེ་གཅིག་ཏུ་མ་ཆད་དོ། །མཐའ་མ་ཚེ་
13-1-134b


འཕོས་ནས་བསྐལ་པ་གྲངས་མེད་ཀྱི་བར་དུ་ལྕགས་ཀྱི་ཐོ་ལུམ་ཟ་བའི་དམྱལ་བར་སྐྱེས། དེ་ལས་ཐར་ཏེ་སངས་རྒྱས་འོད་སྲུངས་དང་ཕྲད་ནས་འོད་སྲུངས་ཀྱིས་ཡོད་པ་དང་མེད་པའི་བདེན་པ་གཉིས་འདི་སྐད་དུ་བཤད་དོ། །ཆོས་ཐམས་ཅད་ཀྱི་རང་བཞིན་ནི་གཅིག་
ཏུ་ངེས་ཤིང་ཆད་པ་མེད་དེ། ཁྱོད་ཡོད་པ་དང་མེད་པར་སྨྲ་བ་ནི་དོན་དེ་ལྟ་བུ་ནི་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་སྟོང་པ་ཉིད་ཀྱིས་ཞི་བ་སྟེ། བདེན་པ་འདི་གཉིས་ནི་ཡོད་པའང་མ་ཡིན་ལ་མེད་པའང་མ་ཡིན་ཏེ། ཁྱེད་ཤེས་པ་ནི་ཡི་གེའི་དོན་ཤེས་
པར་ཟད་ཀྱི། དོན་ཟབ་མོ་མི་ཤེས་པས་དོན་འདི་ལྟ་བུ་ལ་ཁྱེད་དམུས་ལོང་ངམ་འོན་པ་ལྟ་བུ་ཡིན་ན། དོན་ཟབ་མོ་འདི་ལྟ་བུ་ཇི་ལྟར་ཤེས་ཤིང་རྟོགས་པར་འགྱུར་ཞེས་བཤད་པ་ཐོས་ནས། དབེན་པར་ཞག་བདུན་ཏིང་འཛིན་བྱས་པས་སྟོང་པ་ཉིད་ཁོང་དུ་ཆུད་པར་
གསུངས་པ་ལྟར། སྣང་སྟོང་རིས་སུ་མ་ཆད་པའི་དབུ་མ་མཐའ་བྲལ་ལ་མཉམ་པར་བཞག་ན་ལེགས་ཀྱི། ཆོས་དབྱིངས་སྟོང་པ་ཉིད་མཐའ་ཐམས་ཅད་དང་བྲལ་བ་ལ་ཡོད་མེད་ཀྱི་སྤྲོས་པའི་ཕྱོགས་བཟུང་ནས། ཕན་ཚུན་དགྲ་བཞིན་ལྟ་བའི་རྩོད་པ་ཅན་བོད་ན་མང་
ཡང་ཕྱོགས་ལྷུང་དང་བྲལ་བར་བདེ་བར་གཤེགས་པའི་གཞུང་ལམ་སྲོང་བ་དག་ཨེ་མ་སྐལ་བ་བཟང་ངོ་། །དེ་ལྟར་མདོ་སྡེ་རྣམས་ཀྱིས་བསྟན་པའི་དོན་དེ་ཉིད་བློ་གྲོས་བཟང་པོ་འཕགས་པ་ཀླུས་ཀྱང་གསུངས་པ། གལ་ཏེ་དངོས་པོ་མ་གྲུབ་ན། དངོས་པོ་མེད་
པ་འགྲུབ་མི་འགྱུར། །དངོས་པོ་གཞན་དུ་གྱུར་པ་ནི། །དངོས་པོ་མེད་ཅེས་སྐྱེ་བོ་སྨྲ། །ཞེས་དངོས་པོ་གཞན་གྱུར་ལ་འཇིག་རྟེན་ན་མེད་པར་གྲགས་པ་སྔ་ན་མེད་པ་སོགས་གོང་དུ་བཤད་པ་བཞིན་ནོ། །ཡང་སློབ་དཔོན་དེ་ཉིད་ཀྱིས། བློ་ཆུང་གང་དག་
13-1-135a


དངོས་རྣམས་ལ། །ཡོད་པ་ཉིད་དང་མེད་ཉིད་དུ། །ལྟ་བ་དེ་ནི་བལྟ་བྱ་བ། །ཉེ་བར་ཞི་བ་ཞི་མི་མཐོང་། །ཞེས་དང་། ཡོད་ཅེས་བྱ་བ་རྟག་པར་འཛིན། །མེད་ཅེས་བྱ་བ་ཆད་པར་ལྟ། །དེ་ཕྱིར་ཡོད་དང་མེད་པ་ལ། །
མཁས་པས་གནས་པར་མི་བྱའོ། །ཞེས་དང་། ཐམས་ཅད་ཡང་དག་ཡང་དག་མིན། །ཡང་དག་ཡང་དག་མ་ཡིན་ཉིད། །ཡང་དག་མིན་མིན་ཡང་དག་མིན། །དེ་ནི་སངས་རྒྱས་རྗེས་བསྟན་པའོ། །ཞེས་དང་། གང་དག་བདག་དངོས་གཞན་དངོས་
དང་། །དངོས་དང་དངོས་པོ་མེད་མཐོང་བ། །དེ་དག་སངས་རྒྱས་བསྟན་པ་ལ། །ཡང་དག་མཐོང་བ་མ་ཡིན་ནོ། །ཞེས་དང་། གང་དག་བརྟེན་ནས་དངོས་པོ་རྣམས། །ཆུ་ཡི་ཟླ་བ་ལྟ་བུར་ནི། །ཡང་དག་མ་ཡིན་ལོག་མིན་པར། །འདོད་པ་དེ་
དག་ལྟས་མི་འཕྲོག །ཅེས་དང་། ཐམས་ཅད་རྟག་མིན་མི་རྟག་པའང་། །ཅི་ཡང་མེད་དེ་དེ་རྟག་ན། །དངོས་ཡོད་རྟག་དང་མི་རྟག་པར། །འགྱུར་ན་དེ་ནི་ག་ལ་ཡོད། །གང་ཅི་བརྗོད་པ་ཐམས་ཅད་ནི། །ངོ་བོ་ཉིད་ཀྱིས་སྟོང་རིག་བྱ། །སྟོང་
ཞེས་བྱ་བ་དེ་ཡང་སྟོང་། །འདི་ལྟར་མི་སྟོང་ཡོད་མ་ཡིན། །ཞེས་དང་། སུ་ལ་སྟོང་ཉིད་འདི་འབྱུང་བ། །དེ་ལ་དོན་རྣམས་ཐམས་ཅད་འབྱུང་། །སུ་ལ་སྟོང་ཉིད་མི་འབྱུང་བ། །དེ་ལ་ཅི་ཡང་འབྱུང་བ་མེད། །ཅེས་དང་། རྒྱལ་བ་ཀུན་གྱིས་སྟོང་
པ་ཉིད། །ལྟ་ཀུན་ངེས་པར་འབྱིན་པར་གསུངས། །གང་དག་སྟོང་པ་ཉིད་ལྟ་བ། །དེ་དག་བསྒྲུབ་ཏུ་མེད་པར་གསུངས། །ཞེས་དང་། ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། སྟོང་པ་ཉིད་ཀྱིས་འགག་པར་འགྱུར། །
13-1-135b


ཞེས་དང་། བརྗོད་པར་བྱ་བ་ལྡོག་པ་སྟེ། །སེམས་ཀྱི་སྤྱོད་ཡུལ་ལྡོག་པས་སོ། །མ་སྐྱེས་པ་དང་མ་འགགས་པ། །ཆོས་ཉིད་མྱ་ངན་འདས་དང་མཚུངས། །ཞེས་དང་། གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །
རྣམ་རྟོག་མེད་དོན་ཐ་དད་མེད། །དེ་ནི་དེ་ཉིད་མཚན་ཉིད་དོ། །ཞེས་གསུངས་སོ། །གཉིས་པ་སྒྲ་རྟོག་ཀུན་རྫོབ་ཀྱི་སྤྱོད་ཡུལ་ཡིན་པར་བསྟན་པ། །རྣམ་པར་རྟོག་ལ་བརྟེན་ན་ཡང་། །ཀུན་རྫོབ་པར་འགྱུར་ཡང་དག་མིན། །ཞེས་གསུངས་
ཏེ།  གལ་ཏེ་དོན་དམ་པ་རང་གི་ངོ་བོ་སྒྲ་རྟོག་གི་ཡུལ་ལས་འདས་ཀྱང་། ཐོག་མེད་གོམས་པའི་དབང་གིས་སྣང་བ་བསླུ་མེད་དུ་འཆར་བ་འདི་དག་དགག་སྒྲུབ་ཀྱི་ཡུལ་ཉིད་དུ་བཟུང་ནས། རྣམ༷་པ༷ར་རྟོག༷་པ་ལ༷་བློ་བརྟེན༷་པར་བྱས་ཏེ་ཡོད་མེད་ལ་སོགས་པ་ཉིད་དུ་སེམས་
པས་ན། དོན་དེ་ཉིད་བློ་ལ་བསྐྱེད་པའི་ཕྱིར་སྐྱེ་མེད་ལ་སོགས་པའི་སྒྲ་སྦྱོར་བ་ཡོད་དོ་ཞེ་ན༷་ཡ༷ང་། དེ་ལྟར་ཡོད་མོད་ཀྱི་རྣམ་པར་རྟོག་པ་ཙམ་ནི་ཡུལ་གྱི་ངོ་བོ་མ་ཡིན་པ་རྟོག་པའི་གཟུགས་བརྙན་ཙམ་ཡིན་པས་ཤེས་པ་ལས་ལོགས་སུ་མེད་ལ་ཤེས་པ་ཉིད་ཡང་དག་པ་མ་
ཡིན་པར་དཔྱད་མ་ཟིན་ནམ། གཞན་ཡང་ཡུལ་གྱི་གནས་ལུགས་མ་མཐོང་བའི་བློ་ནི་ཀུན་རྫོབ་ཀྱི་ངོ་བོ་ཡིན་ལ། དེའི་སྤྱོད་ཡུལ་སྒྲོ་བཏགས་པའི་ངོ་བོ་ཀུན་རྫོབ་པ་ཡིན་པས་མི་སྐྱེ་བ་ལ་སོགས་པ་ནི་ཀུན༷་རྫོབ༷་པ༷ར་འགྱུར༷་གྱི། ཡ༷ང་ད༷ག་པ་མི༷ན་ཏེ་ཤིང་ལ་སོགས་
པའི་སྒྲ་དོན་བཞིན་ནོ། །དེའང་ཆོས་འདི་ཀུན་བརྟེན་ནས་འབྱུང་བ་ཡིན། བདེན་མེད་ཡིན། དེ་གཉིས་ཟུང་འཇུག་ཡིན། སྤྲོས་བྲལ་ཡིན་ཡང་དེ་དག་གི་སྒྲ་དོན་ཙམ་ལ་དམིགས་པའི་འཛིན་སྟངས་བསྐྱེད་པས་གནས་ལུགས་རྟོགས་པའི་གོ་མི་ཆོད་དེ། མིང་དེས་
13-1-136a


བརྗོད་པར་བྱ་བའི་དོན་དངོས་སམ་རྗེས་མཐུན་པ་མྱངས་ནས་སྤྲོས་པ་འགགས་པའི་རྣམ་པར་མི་རྟོག་པའི་ཡེ་ཤེས་བསྐྱེད་དགོས་པའི་ཕྱིར་རོ། །དེའི་ཕྱིར་ན། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་
སྨྲའོ། །དེ་ལ་དངོས་པོ་རང་བཞིན་མེད་པར་བསྟན་པ་ནི་མེད་པར་དགག་པ་སྟེ། མ་ཡིན་དགག་ནི་ཆོས་གཞན་གྱི་ངོ་བོ་སྒྲུབ་པས་དེ་འདྲ་ལ་ཟུང་འཇུག་གི་དོན་མེད་ལ། སྣང་བ་རང་བཞིན་མེད་པར་གདགས་པའང་། སྣང་བ་ལས་ལོགས་ན་སྟོང་རྒྱུ་ཡོད་པ་ལྟ་བུར་གོ་ན་
མེད་དགག་ཟེར་ཡང་མ་ཡིན་དགག་ཏུ་སོང་བ་ཡིན་ལ། སྣང་བ་ཉིད་མེད་བཞིན་སྣང་བ་ནི་ཟུང་འཇུག་སྟེ་ངོ་མཚར་ཆེ་ཞིང་། དེ་ལྟར་སྣང་སྟོང་དབྱེར་མེད་བརྗོད་བྲལ་དུ་གནས་པས་ན་མཐར་ཐུག་གི་དོན་ལ་དགག་སྒྲུབ་དང་བྲལ་བས་བློ་ལས་འདས་པ་ཡིན་ནོ། །མདོ་ལས། 
དོན་དམ་པ་ལུས་ངག་ཡིད་ཀྱི་སྤྱོད་ཡུལ་དུ་འགྱུར་ན་དེ་ཀུན་རྫོབ་ཏུ་འགྱུར་གྱི། དོན་དམ་པར་མི་འགྱུར་བའི་ཚུལ་རྒྱ་ཆེར་གསུངས་སོ། །དེའི་ཕྱིར་ན་སྤྲོས་པའི་སྤྱོད་ཡུལ་དུ་དགག་བྱ་ཆོས་ཅན་སོ་སོ་ལ་ལྟོས་པའི་ཆོས་ཉིད་ཐ་དད་པ་ལྟ་བུའི་ཉི་ཚེ་བ་ནི། ཕྱོགས་དུས་ཀྱི་དབྱེ་
བ་སོགས་རྣམ་པ་ཐ་དད་པའི་ཚུལ་དུ་གྱུར་པ་ཡིན་ཞིང་བློས་བཏགས་པ་ཙམ་སྟེ། དེ་དག་ཀུན་རྫོབ་དང་གཉིས་ཆོས་ཀྱི་རང་བཞིན་ལས་མ་འདས་པས་ཆོས་དབྱིངས་མཉམ་པ་ཉིད་ཀྱི་དོན་མེད་ལ། ཆོས་ཐམས་ཅད་ཡེ་ནས་སྐྱེ་འགག་ལ་སོགས་པ་མེད་པའི་ཕྱིར་སྤྲོས་
པ་ཐམས་ཅད་ལས་འདས་པའི་དབྱིངས་སུ་ཚུལ་གཅིག་ཅིང་། ཐ་དད་དང་གཉིས་སུ་བྱར་མེད་པར་རོ་མཉམ་པ་ཉིད་ནི་ཆོས་ཀྱི་དབྱིངས་ཞེས་བྱ་སྟེ། དེ་ཁོ་ན་ཉིད་ཉག་གཅིག་ཅེས་ཀྱང་བྱའོ། །གཉིས་པ་རྩོད་སྤོང་ལ། རང་བཞིན་སྟོང་པ་ཡིན་ན་ཀུན་
13-1-136b


གྱིས་མངོན་སུམ་རྟོགས་པར་ཐལ་བ། སྟོང་ཡང་མི་སྣང་ན་དེ་སུས་ཀྱང་མི་རྟོགས་པས་གཏན་ཚིགས་དོན་མེད་དུ་ཐལ་བ། རང་བཞིན་མེད་པ་ལ་ཕྱོགས་ཆོས་སོགས་མི་འགྲུབ་པས་བསྒྲུབ་བྱ་དང་གཏན་ཚིགས་ཀྱི་ཐ་སྙད་མི་སྲིད་པར་རྩོད་པ་གསུམ། དང་པོ་ལ་རྩོད་པ་དང་།
ལན་གཉིས། དང་པོ། འོ་ན་དེ་ནི་རྟོགས་གྱུར་པས། །དེ་ཡི་རང་བཞིན་མངོན་སུམ་ཕྱིར། །མི་མཁས་རྣམས་ཀྱང་དངོས་རྣམས་ཀྱི། །དངོས་པོ་འདི་འདྲ་ཅིས་མི་རྟོགས། །ཞེས་དཔེར་ན་བུམ་མེད་ཀྱི་ས་གཞི་མངོན་སུམ་དམིགས་ན། གཞི་དེར་
བུམ་པ་མེད་པ་རྟོགས་པ་བཞིན་དུ། ཆོས་ཐམས་ཅད་ཀྱི་རང་བཞིན་སྒྲོ་འདོགས་ཐམས་ཅད་དང་བྲལ་བའི་སྟོང་པ་ཉིད་ཡིན་པ་དེ་ལྟར་ན། འོ༷་ན༷་ཆོས་ཅན་བུམ་པ་ལ་སོགས་པ་དེ༷་ནི༷་མངོན་སུམ་དུ་རྟོག༷ས་པར་གྱུར༷་པ༷ས་ཀྱང་། ཆོས་ཅན་དེ༷་ཡི༷་ར༷ང་བཞི༷ན་ཁོ་རང་ལས་
ལོགས་སུ་གྲུབ་མི་ཤེས་པ་དེའང་མངོ༷ན་སུམ༷་ཡིན་དགོས་པའི་ཕྱིར༷་ན། ལྟ་བ་དཀར་པོ་མ་ཡིན་པ་བྱིས་པ་སོ་སོའི་སྐྱེ་བོ་གཏན་ཚིགས་སོགས་མི་ཤེས་པའི་མི༷་མཁ༷ས་པ་རྣམ༷ས་ཀྱིས་ཀྱང༷་། དངོ༷ས་པོ་རྣམ༷ས་ཀྱི༷་དངོ༷ས་པོ༷འམ་ངོ་བོ་ཡིན་ལུགས་འདི༷་འདྲ༷་ཅིས༷་མི༷་རྟོག༷ས་
ཏེ། མ་རྟོགས་ན་དེའི་རང་བཞིན་མ་ཡིན་པར་འགྱུར་ལ། རང་བཞིན་ཡིན་ན་མི་རྟོགས་པ་མི་སྲིད་དོ། །ཞེས་རྩོད་པའོ། །གཉིས་པ་ལན་ནི། མ་ཡིན་ཐོག་མེད་རྒྱུད་ལྕི་བར། །དངོས་པོར་སྒྲོ་བཏགས་དབང་བྱས་པ། །དེ་ཕྱིར་སྲོག་ཆགས་ཐམས་ཅད་
ཀྱིས། །མངོན་སུམ་རྟོགས་པར་མི་འགྱུར་རོ། །ཞེས་གསུངས་ཏེ། དངོས་པོའི་རང་བཞིན་དེ་ལྟ་ཡིན་མོད་ཀྱི། ཐམས་ཅད་ཀྱིས་རྟོགས་པར་འགྱུར་བ་མ༷་ཡི༷ན་ཏེ། གང་གི་ཕྱིར་ན་དུས་འདི་ཙམ་ནས་བྱུང་། འདི་ཕན་ཆད་མེད་ཅེས་པའི་མཐའ་མི་རྙེད་པའི་ཐོག༷་
13-1-137a


མ་མེ༷ད་པའི་སྲིད་པར་ཡང་ནས་ཡང་དུ་སྐྱེས་པའི་སེམས་ཀྱི་རྒྱུ༷ད། དངོས་པོ་ལ་མངོན་པར་ཞེན་པའི་དུག་གིས་སྤགས་ཤིང་ཡང་ནས་ཡང་དུ་གོམས་པའི་བག་ཆགས་ཤིན་ཏུ་བརྟན་ཞིང་ལྕི༷་བ༷ར་གྱུར་པས་སྤང་དཀའ་བ་ཡོད་པས་ན་བུམ་
སོགས་མངོན་སུམ་མཐོང་ཡང་དེའི་རང་བཞིན་ཡིན་ལུགས་ཀྱི་རྣམ་པ་ངེས་པར་མི་ནུས་ཏེ། ཡུལ་དེ་ཉིད་ལ་དངོ༷ས་པོ༷ར་སྒྲོ༷་བཏག༷ས་པའི་ཕྱིན་ཅི་ལོག་གི་རྟོག་པས་དབ༷ང་དུ་བྱས༷་པ༷་དེ༷་ཡི་ཕྱིར༷་ན་སྲོག༷་ཆག༷ས་ཐམ༷ས་ཅ༷ད་ཀྱིས༷་དངོས་པོའི་རང་བཞིན་སྟོང་པ་ཉིད་མངོ༷ན་སུམ༷་
རྟོག༷ས་པ༷ར་མི༷་འགྱུར༷་རོ༷། །དེའང་དཔེར་ན་འདྲ་བ་གཅིག་ནས་གཅིག་ཏུ་བརྒྱུད་པར་དམིགས་པས་བློ་བསླད་པ་དག་གིས་སྐད་ཅིག་མ་མི་རྟོགས་པ་བཞིན་ནོ། །དེས་ན་ཡུལ་གྱི་རང་བཞིན་སྟོང་པ་དང་འགལ་བའི་མི་སྟོང་པ་ཞིག་མངོན་སུམ་གྱུར་པ་མ་ཡིན་ཀྱང་ཕྱིན་ཅི་
ལོག་གི་རྟོག་པས་བསླད་པས་ཕྱིན་ཅི་ལོག་ཏུ་བཟུང་བ་ཡིན་ནོ། །དེས་ན་མངོན་སུམ་གྱིས་གནོད་པ་མ་ཡིན་ནོ། །གཞན་ཡང་མངོན་སུམ་སྣང་བ་ལ་ཕྱིན་ཅི་ལོག་ཏུ་བཟུང་སྟེ། དངོས་པོར་ཞེན་པ་འདི་མེད་བཞིན་བཟུང་བ་ཡིན་པས་འགལ་བ་ལྟར་སྣང་བ་ལ་
ཡ་མཚན་ཡོད་མོད་ཀྱི། འོན་ཀྱང་མངོན་སུམ་སྣང་བ་ཙམ་ལ་ཞེན་པས་དེ་ཙམ་ངོ་མཚར་མི་ཆེ་སྟེ། འདི་ལྟར་བ་ལང་ཉིད་དང་། བུམ་པ་ཉིད་དམ། དེ་གཉིས་ཀྱི་སྤྱི་ཡིས་དབེན་པའི་བ་ལང་སོགས་ཀྱི་དབྱིབས་གསལ་པོར་མཐོང་བ་ན། སེར་སྐྱ་དང་གཟེགས་ཟན་པ་
སྤྱོད་པའི་ལུགས་ཀྱི་བློ་གྲོས་ཕྱིན་ཅི་ལོག་ཏུ་གྱུར་པ་དག་མཐོང་བ་དེ་ལྟར་རྟོག་པར་མི་བྱེད་ཀྱི། མ་མཐོང་བའི་སྤྱི་ཉིད་དེ་ལ་ཡོད་དོ་ཞེས་རྟོག་པ་འདི་ནི་ཡ་མཚན་ཆེའོ། །རྩོད་པ་གཉིས་པའི་ལན་ནི། དེ་ལ་སྒྲོ་བཏགས་གཅོད་བྱེད་པ། །ཤེས་པར་
13-1-137b


བྱེད་པའི་གཏན་ཚིགས་ཀྱིས། །རྗེས་སུ་དཔོགས་རྣམས་ཤེས་པར་བྱེད། །རྣལ་འབྱོར་དབང་རྣམས་མངོན་སུམ་གསལ། །ཞེས་གསུངས་ཏེ། ཚིགས་སུ་བཅད་པ་འདི་ཉིད་ཀྱིས་ཕྱོགས་སྔའི་རྩོད་པ་ཤུགས་ལ་འཕང་སྟེ། དེའང་དེ་ལྟར་ཆོས་ཀུན་གྱི་རང་
བཞིན་སྟོང་པ་ཡིན་ཀྱང་། རང་བཞིན་དེ་རང་བཞིན་ཅན་གྱི་ཆོས་སུ་ངེས་པ་མེད་ན་དེ་རང་བཞིན་ཡིན་ཀྱང་རུང་ཅི་ཞིག་ཕན་ཏེ་སུས་ཀྱང་རྟོགས་པ་མི་སྲིད་དོ་སྙམ་ན། དེ་ལྟ་མ་ཡིན་ཏེ། དངོས་པོའི་རང་བཞིན་དེ༷་ལ༷་ཕྱིན་ཅི་ལོག་ཏུ་སྒྲོ༷་བཏག༷ས་པ་གཅོ༷ད་པའམ་སེལ་བར་
བྱེ༷ད་པ༷་དང་། དངོས་པོའི་རང་བཞིན་ཉིད་མ་ནོར་བར་ཤེས༷་པ༷ར་བྱེ༷ད་པ༷འི་གཏན༷་ཚིག༷ས་གཅིག་དང་དུ་བྲལ་གོང་དུ་ཇི་སྐད་བཤད་པ་དེ་ལྟ་བུ་ཐོས་ནས་དེ་དག་གི་དོན་ཚུལ་བཞིན་བསམ་པའི་ཤེས་རབ་ཀྱིས༷་རྗེས༷་སུ༷་དཔོག༷ས་པར་བྱེད་པའི་ཚོགས་སྦྱོར་བ་རྣམ༷ས་ཀྱིས་དངོས་
པོའི་རང་བཞིན་སྟོང་པ་ཉིད་དོན་སྤྱིའི་ཚུལ་དུ་ཤེས༷་པ༷ར་བྱེ༷ད་ལ། དེའི་དོན་ལ་རབ་ཏུ་གོམས་པའི་རྣལ༷་འབྱོར༷་གྱི་དབ༷ང་པོ་རྣམ༷ས་ཀྱིས་ཕྱིན་ཅི་མ་ལོག་པའི་ཡེ་ཤེས་ཀྱི་སྤྱན་གྱིས་ཆོས་ཐམས་ཅད་རང་བཞིན་མཐར་ཐུག་པ་མཉམ་པ་ཉིད་དུ་མངོ༷ན་སུམ༷་དུ་གས༷ལ་པོར་
གཟིགས་པ་ཡིན་ཏེ། དེའང་འཇིག་རྟེན་ལས་འདས་པའི་ཡེ་ཤེས་ཀྱིས་མཉམ་པ་ཉིད་མངོན་སུམ་དུ་མཐོང་བ་ས་དང་པོ། དེ་ནས་ཆོས་ཀྱི་དབྱིངས་ལ་གསལ་སྣང་ཇེ་ཆེར་མཆེད་དེ། མཐར་གནས་ལུགས་ཇི་ལྟ་བ་བཞིན་རྫོགས་པར་མངོན་དུ་གྱུར་པ་ནི་དེ་བཞིན་
གཤེགས་པ་ཉིད་དོ། །དེ་ལྟར་ཡང་ཆོས་ཐམས་ཅད་མཉམ་ཉིད་དུ་རྣམ་པར་འབྱེད་པའི་ཏིང་ངེ་འཛིན་ལ་སོགས་པ་ལས་བྱུང་བའི་ཡེ་ཤེས་གང་ཞིག་རྣམ་རྟོག་གི་དྲི་མ་དང་བྲལ་བ་ཉིད་ཀྱིས། ཕྱི་ནང་གི་དངོས་པོ་མ་བརྟགས་ཉམས་དགའ་བ་སྙིང་པོ་མེད་པ་ཆུ་
13-1-138a


ཤིང་གི་སྡོང་པོ་ལྟར་ཐམས་ཅད་ཇི་ལྟར་སྒྲོ་བཏགས་པའི་ས་བོན་ཡང་མི་སྐྱེ་བ་དེ་ལྟར་ཐུགས་སུ་ཆུད་དེ། སྙིང་རྗེ་ཆེན་པོ་ལ་འཇུག་པའི་མདོ་ལས། ཇི་ལྟར་ཆུ་ཤིང་རློན་པའི་སྡོང་པོ་ལ། །སྙིང་པོ་འདོད་མིས་རིམ་པར་བཤིག་བྱས་ཀྱང་། 
ཕྱི་དང་ནང་ན་སྙིང་པོ་མེད་པ་ལྟར། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་པ་ལ་སོགས་པ་ཇི་སྐད་གསུངས་པ་ལྟ་བུའོ། །ཆེད་དུ་བརྗོད་པ་ལས་ཀྱང་། གང་ཞིག་ཨུ་དུམྺཱར་དག་ལ་མེ་ཏོག་ལྟར།  སྲིད་པ་དག་ལ་སྟིང་པོ་ཡོད་
པར་མ་རྟོགས་པ།  དགེ་སློང་དེ་ནི་ཕ་རོལ་མིན་པའི་ཕ་རོལ་སོང་།  སྦྲུལ་རྒས་པ་ཡི་པགས་པ་རྙིང་པ་བརྗེ་བ་བཞིན།  ཞེས་གསུངས་ཏེ།  ཨུ་དུམྺཱར་ལ་མེ་ཏོག་ནམ་ཡིན་དུ་མི་སྐྱི་བས་མེ་ཏོག་མེད་པའི་དུས་ན་ཡོད་ཀྱང་ཕྲ་བ་སོགས་ཀྱི་ཕྱིར་མ་མཐོང་བ་
ནི་མ་ཡིན་གྱི། མེད་ནས་མ་མཐོང་བ་ཡིན་པ་ལྟར་སྲིད་པ་ལའང་སྙིང་པོ་གཏན་ནས་མེད་པར་མཐོང་ན་ཕ་རོལ་མིན་པའམ་ཚུ་རོལ་འཁོར་པའི་འཇིག་རྟེན་འདིའི་ཕ་རོལ་མྱང་འདས་ལ་སོན་ཏེ་འཁོར་བ་འདོར་ཞེས་སོ། །དེ་ལྟར་གཞུང་གི་རྩོད་ལན་གྱི་ཤོ་ལོ་ཀ་འདི་
གཉིས་ཀྱིས་ཐོག་མེད་གོམས་པའི་དངོས་ཞེན་བཟློག་དཀའ་བ་དང་། དེ་དག་གི་གཉེན་པོར་རིགས་པའི་དཔྱད་པ་བྱས་པ་ཁོ་ན་ཡིན་པ་དང་། དེ་གོམས་པས་ཉོན་མོངས་པ་སྤོང་ནུས་ཀྱང་། མ་གོམས་ན་སྤོང་མི་ནུས་པས་ནན་ཏན་ལ་སྙིང་པོར་གྱིས་ཤིག་ཅེས་པ་ལ་སོགས་
པ་དོན་གྱིས་བསྟན་པ་ཡིན་ཏེ། འདི་ལྟར་གློ་བུར་དུ་ཆགས་པའི་ཡུལ་ལྟ་བུ་ལ་བློ་ཞུགས་ནས་ཡིད་ལ་ལན་ཁ་ཡར་བྱས་པའང་འཕྲལ་དུ་སྤོང་དཀའ་ན་ཐོག་མེད་ནས་གོམས་པའི་ཉོན་མོངས་ལྟ་ཅི་སྨོས། དེས་ན་ཆོས་ཤེས་པའི་འབྲས་བུ་འཇིགས་དང་སྡུག་བསྔལ་ཉོན་
13-1-138b


མོངས་ལ་སྨན་དུ་འགྲོ་བ་ཞིག་མ་བྱུང་ན་དགོས་པ་སྟོར་བ་སྟེ། དཔེར་ན། བཀྲེས་པ་སེལ་བའི་ཆེད་དུ་ཁ་ཟས་ཕུན་སུམ་ཚོགས་པ་སྦྱར་ནས་མ་ཟོས་པར་ལྟོག་གྲིར་ཤི་བ་བཞིན་ནོ། །དེས་ན་ཆོས་རྣམས་ཀྱི་རང་བཞིན་སྟོང་པ་ལ་རིགས་པའི་དཔྱད་པས་གོ་བ་སྐམ་
པོ་ཙམ་གྱིས་གར་ཡང་མི་ཕྱིན་པས་རྩེ་གཅིག་ཏུ་མཉམ་པར་བཞག་ནས་མྱོང་བ་ཐོན་པར་བྱ་བ་ནི་ཆོས་ཤེས་པ་རྣམས་ཀྱིས་བགྱི་བར་འོས་པ་གཅིག་པུ་ཡིན་ནོ། །དེ་སྐད་དུའང་ཆེད་དུ་བརྗོད་པའི་ཚོམ་ལས། གལ་ཏེ་རིགས་བཅས་མང་དུ་སྨྲས་ཀྱང་ནི། །
བག་མེད་མི་དག་དེ་ལྟར་བྱེད་མི་འགྱུར། །དཔེར་ན་ཕྱུགས་རྫིས་གཞན་གྱི་ཕྱུགས་བགྲང་ལྟར། །དེ་དག་དགེ་སྦྱོང་སྐལ་པ་ཐོབ་མ་ཡིན། །གལ་ཏེ་རིགས་བཅས་ཉུང་དུ་སྨྲ་བྱེད་ཀྱང་། །ཆོས་ཀྱི་རྗེས་སུ་ཆོས་ལ་སྤྱོད་པ་དག །འདོད་ཆགས་ཞེ་སྡང་གཏི་
མུག་སྤོང་བྱེད་པ། །དེ་དག་དགེ་སྦྱོང་སྐལ་པ་ཐོབ་པ་ཡིན། །ཞེས་གསུངས་པ་ལྟ་བུའོ། །དེའང་ཕྲ་ཞིང་ཟབ་པ་སངས་རྒྱས་ཉིད་ཀྱི་ལམ་རྣམས་ལ་ཐབས་ཚུལ་དང་རིགས་པ་བརྒྱ་དག་གིས་མ་འབད་ན་ཡང་དག་པའི་གནས་ལུགས་དང་མཐུན་པའི་ངེས་པ་
མི་སྐྱེ་བས་ཐོས་བསམ་གྱི་ཤེས་རབ་ནགས་ལ་མེ་མཆེད་པ་ལྟ་བུ་བརྩོན་པའི་རླུང་གིས་སྦར་ཞིང་དངོས་སྟོབས་ཀྱི་རིགས་པ་ཁོ་ནས་སྒྲོ་འདོགས་པའི་ཚང་ཚིང་ལྷག་མེད་དུ་བསྲེག་དགོས་པ་ཡིན་ནོ། །དེ་ལྟར་ན་བླུན་སྒོམ་མུན་པའི་རུམ་དུ་གཉིད་ལ་མ་ཡུར་ཞིང་།
ཐོས་པ་ཁ་ཁྱེར་གྱི་རླུང་གིས་གཡེངས་ཏེ་རང་གར་མ་འཁྱམས་པར། ཐེག་པ་མཆོག་གི་ཁང་བཟང་གི་ནང་དུ་སྣ་ཚོགས་པའི་ཆོས་ཀྱི་རོ་མྱོང་ཞིང་། ཡང་དག་པའི་དགེ་བའི་བཤེས་གཉེན་མཉེས་པའི་སྒོ་ནས་བསྟེན་ཞིང་དམ་པའི་གྲོགས་བཟང་པོ་དུ་མས་མདུན་
13-1-139a


བལྟས་ཏེ། ལྷག་པའི་ལྷ་ལ་བཟོད་མེད་ཀྱི་གདུང་ཤུགས་དང་འགྲོ་བ་ཀུན་ལ་བརྩེ་བའི་སེམས་ཀྱིས་སྲེད་པ་ཆེར་འཕེལ་བས། སྣང་སྲིད་སྒྱུ་མ་ལྟ་བུའི་གཟིགས་མོ་ལ་རྩེན་པའི་དགའ་བ་ཉམས་སུ་མྱོང་བ་ཞིག་བྱུང་ན་ཆོས་ལ་ཐོས་
བསམ་བྱས་པའི་འབྲས་བུའང་སྨིན་པ་ཡིན་པས། དེ་ལྟ་བུའི་དམ་པ་མཆོག་རྣམས་ཀྱི་རྗེས་སུ་བདག་ཅག་རྣམས་ཀྱིས་ཀྱང་སྨོན་ཞིང་འཇུག་པར་འཚལ་ལོ། །དེ་སྐད་དུའང་རང་འགྲེལ་གྱི་མཇུག་རྩོམ་དུ། བདག་ཀྱང་ཡུལ་གྱི་ལོངས་སྤྱོད་མྱངས་པས་བརྒྱལ་
བའི་མུན་བསལ་ཞིང་། །ཡང་དག་དམ་པ་རིག་ལ་ཡང་དག་རིག་དང་འགྲོགས་པ་དང་། །གཞན་གྱི་དོན་ལ་གཅིག་ཏུ་གཞོལ་ཞིང་འཇམ་པའི་དབྱངས་ཀྱི་ཞབས། །གཙང་མ་པདྨར་བརྟེན་ཅིང་ཤིན་ཏུ་བརྟན་པར་གུས་པར་ཤོག །ཅེས་གསུངས་པ་བཞིན་ནོ། །
དེ་ལ་སྐབས་འདིར་བདག་མེད་གསལ་བར་རྟོགས་པའི་རྣལ་འབྱོར་མངོན་སུམ་དེ་ལ་ཅུང་ཟད་དཔྱད་ན། ངོ་བོ། དབྱེ་བ། སྒྲ་དོན། རྩོད་སྤོང་བཞི་ལས། དང་པོ་སྐབས་འདིའི་རྣལ་མངོན་གྱི་ངོ་བོ་ནི། ཡུལ་བདག་མེད་གསལ་པོར་སྣང་བ་ཡིན་ལ། དེའང་སྤྱིར་
བསྒོམས་པ་ལ་བརྟེན་ནས་སྐྱེས་པའི་རྟོག་བྲལ་འཁྲུལ་མེད་ཀྱི་ཤེས་པ་རྣལ་འབྱོར་མངོན་སུམ་གྱི་མཚན་ཉིད་ཅེས་བྱའོ། །གཉིས་པ་སྤྱི་རིགས་ཙམ་དུ་དབྱེ་ན། ཉན་རང་ཐེག་ཆེན་འཕགས་པ་གསུམ་གྱི་མངོན་སུམ་གསུམ་མམ། ཉན་ཐོས་དང་ཐེག་ཆེན་
ལ་སློབ་མི་སློབ་གཉིས་སུ་ཕྱེ་བའི་ལྔར་ཡང་འགྱུར་ཏེ། རང་རྒྱལ་ནི། བསམ་གཏན་མཐའ་བརྟེན་གཅིག་ལ་ཀུན། །ཞེས་གསུངས་པ་ལྟར་ཡིན་པས་སློབ་པ་ལོགས་སུ་མི་བརྩི་ལ། གྲུབ་མཐའ་འགའ་ཞིག་ན་ཡོད་པར་འདོད་པ་དེའང་ཉན་ཐོས་དང་
13-1-139b


ཐེག་ཆེན་གང་རུང་ལས་མི་འདའ་བས། འདིར་རང་རྒྱལ་ལ་མི་སློབ་པ་གཅིག་ཏུ་བརྩིའོ། །དེ་ལྔ་ལའང་རྗེས་ཐོབ་སྣང་བཅས་ཀྱི་རྣལ་འབྱོར་མངོན་སུམ་དང་། མཉམ་བཞག་སྣང་མེད་ཀྱི་དབྱེ་བས་བཅུར་འགྱུར་རོ། །དེའང་སངས་རྒྱས་ལ་མཉམ་རྗེས་
ཐ་དད་དུ་མེད་ཀྱང་ཇི་ལྟ་ཇི་སྙེད་གཟིགས་པའི་ལྡོག་ཆ་ནས་ཕྱེ་བའོ། །དེ་ལ་སྣང་བཅས་ནི་མངོན་པར་ཤེས་པས་མཐོང་བ་སྟེ། དགྲ་བཅོམ་བསེ་རུ་སྟོན་རྣམས་ཀྱིས། །སྟོང་གཉིས་གསུམ་དང་གྲངས་མེད་མཐོང་། །ཞེས་པ་ལ་སོགས་པ་བཞིན་ནོ། །སྣང་
མེད་ནི། ཉན་ཐོས་གང་ཟག་གི་བདག་མེད་གཅིག་དང་། རང་རྒྱལ་གཟུགས་རང་བཞིན་མེད་པར་རྟོགས་པའི་བདག་མེད་ཕྱེད་གཉིས་དང་། ཐེག་ཆེན་བདག་མེད་གཉིས་ཀ་རྫོགས་པ་དང་། སངས་རྒྱས་བག་ཆགས་ཀུན་སྤངས་པའི་ཡེ་ཤེས་སོ། །
གསུམ་པ་ངེས་པའི་ཚིག་གི་དབང་དུ་བྱས་ན། བོད་སྐད་ལྟར། དོན་རྣལ་མ་ལ་བློ་གནས་པའམ་འབྱོར་པ་ལ་བྱ་ཞིང་། མངོན་སུམ་ནི་གསལ་བར་སྣང་བ་ཙམ་མོ། །རྒྱ་གར་གྱི་སྐད་ལ། མངོན་སུམ་གྱི་སྐད་དོད་པྲ་ཏི་དང་ཨཀྵ་མཚམས་སྦྱར་བས་པྲ་ཏྱཀྵ་
ཞེས་ཡོད་དེ། དེ་ལ་པྲ་ཏི་ནི་ཉེར་བསྒྱུར་ཏེ་སོ་སོ་སོགས་དོན་མང་པོ་ལ་འཇུག །ཨཀྵ་དབང་པོའི་སྐད་དོད་ཡིན་པས་དོན་དུ་དབང་པོ་སོ་སོ་ལ་བརྟེན་པའམ། དབང་པོ་བརྟེན་ཞེས་བྱ་བ་ཡིན་ལ། དེའང་སྒྲ་བཤད་འཇུག་གི་མུའི་དབང་དུ་བྱས་ཏེ། དཔེར་ན་མཚོ་
སྐྱེས་ཞེས་པའི་སྒྲ། མཚོ་ལས་སྐྱེས་པའི་པདྨ་ལ་བཤད་འཇུག་གཉིས་ཀ་ཡོད། སྐམ་ལས་སྐྱེས་པའི་པདྨ་ལ་འཇུག་པ་ཁོ་ན། མཚོ་ལས་སྐྱེས་པའི་སྲོག་ཆགས་ལ་བཤད་པ་ཁོ་ན་ཡོད་ཀྱི། འཇུག་པ་མེད་པ་བཞིན་དུ་འདིར་པྲ་ཏྱཀྵ་ཞེས་པའི་སྒྲ་དེ་བཤད་ན་
13-1-140a


དབང་པོ་ལ་བརྟེན་པ་ཡིན་ཀྱང་། འཇུག་རང་མཚན་འཛིན་པའི་ཤེས་པ་ཐམས་ཅད་ལ་འཇུག་སྟེ།  དེའང་དབང་ཡིད་ཀྱི་མངོན་སུམ་གཉིས་ལ་བཤད་འཇུག་གཉིས་ཀ་ཡོད། རང་རིག་དང་རྣལ་འབྱོར་མངོན་སུམ་གཉིས་ལ་འཇུག་པ་
ཁོ་ན་ཡོད་ཀྱི་སྒྲ་བཤད་དུ་མེད། དབང་ཤེས་འཁྲུལ་པ་ལ་བཤད་པ་ཡོད་ཀྱང་འཇུག་པ་མེད་དོ། །བཞི་པ་རྩོད་སྤོང་ལ་སྤྱི་དང་བྱེ་བྲག་གཉིས། དང་པོ་ལ་རྒྱུ་ལ་རྩོད་པ་དང་།  འབྲས་བུ་ལ་རྩོད་པ་གཉིས། དང་པོ་ལ་ངོ་བོ་དང་བྱེད་པ་ལ་རྩོད་པ་གཉིས་
ལས། དང་པོ། ཕྱི་རོལ་པ་ཁ་ཅིག་གོམས་ཀྱང་གསལ་སྣང་རབ་ཀྱི་མཐར་ཐུག་པ་མི་སྲིད་དོ་ཞེ་ན། བདེན་སྟོང་རྟོགས་པའི་ཡེ་ཤེས་གོམས་བྱེད་ཀྱི་ཐབས་དང་མ་བྲལ་བར་བསྒོམ་པ་ཆོས་ཅན། ནམ་ཞིག་གསལ་བ་རབ་ཀྱི་མཐར་ཐུག་པ་འབྱུང་རུང་སྟེ། རང་
གི་རྟེན་བརྟན་ཅིང་གོམས་པ་ངང་གིས་ཁྱད་པར་དུ་གྱུར་པའི་བསྒོམ་པ་ཡིན་པའི་ཕྱིར། དཔེར་ན་འདོད་འཇིགས་གོམས་པའི་བློ་བཞིན་ཞེས་བྱ་སྟེ། དེ་ལ་རྟེན་བརྟེན་པ་ཞེས་བྱ་བ་སྔ་མའི་ནུས་པ་ཕྱི་མར་བགོས་ནས་སྔ་མ་ལས་ཕྱི་མ་ཁྱད་པར་དུ་གྱུར་ཏེ་རྒྱུན་མི་འཆད་པའི་
དོན་ཡིན་ཏེ། སྔ་མས་ཕྱི་མ་ལ་ཕན་མི་གདགས་པ་ལྟ་བུ་མིན་པ་ལ་བྱའོ། །དེ་ལ་རྒྱང་འཕེན་སོགས་རྟགས་དེ་མ་གྲུབ་སྟེ། སྐྱེ་བ་སྔ་ཕྱི་མེད་པས་རྟེན་བརྟེན་པ་མི་འགྲུབ་སྙམ་པའི་ཚུལ་ནི་འོག་ཏུ་འགོག་ལ། རྟེན་བརྟན་ཕན་ཆད་གོམས་པ་ཇེ་གསལ་དུ་
འགྲོ་རྒྱུ་ཡོད་པ་འདོད་འཇིགས་གོམས་པའི་བློ་བཞིན་དུ་མྱོང་བས་གྲུབ་བོ། །གཉིས་པ། གོམས་པ་ཡོད་དུ་ཆུག་ཀྱང་བདག་མེད་དེས་བྱེད་ལས་སྲིད་པ་ལ་གནོད་མི་ནུས་སྙམ་ན་ནུས་ཏེ། འདི་ལྟར་འབྲས་བུ་རྣམས་ནི་རྒྱུ་མེད་ན་རྣམ་པ་ཀུན་ཏུ་འབྱུང་མི་
13-1-140b


སྲིད་པ་ཡིན་ནོ། །དེ་ལ་འཁོར་བའི་རྒྱུ་གང་ཡིན་སྙམ་ན།  གཞན་ཕྱི་རོལ་པ་ཕལ་ཆེ་བ་དག་ན་རེ། ལས་དང་ལུས་དང་སེམས་གསུམ་ག་ཚོགས་པ་འཁོར་བའི་རྒྱུ་ཡིན་པས། གང་རུང་ལ་གནོད་པ་བྱས་ན་འབྲས་བུ་མི་བསྐྱེད་དེ་ཆུ་ལུད་མེད་པའི་ས་བོན་
བཞིན་ནོ། །དེ་ཕྱིར་ལས་དང་ལུས་གཉིས་པོ་འཛད་པར་བྱ་བའི་ཕྱིར་དཀའ་བ་སྤྱོད་དོ་ཞེས་འཛེར་ཏོ། །དེ་ལ་ལས་སྤང་མི་ནུས་ཏེ་མཐའ་ཡས་པའི་ཕྱིར་དང་། བདག་སྲེད་མ་སྤངས་ན་དེ་སྤངས་ཀྱང་སླར་སྐྱེ་བ་ཡིན་ཏེ། རྩ་བ་མ་བཅད་པའི་ཡལ་ག་བྲེགས་པ་ལྟར་ཅིའང་
མི་ཕན་པའི་ཕྱིར་དང་། བདག་སྲེད་སྤངས་ན་བུད་ཤིང་ཟད་པའི་མེ་ལྟར་དེ་ངང་གིས་འགགས་པ་ལས་ལོགས་སུ་སྤང་མི་དགོས་པས་དེ་ལྟ་བུའི་ལམ་ནི་སྲིད་པ་ལྡོག་པའི་ལམ་མ་ཡིན་ནོ། །དེས་ན་འཁོར་བའི་རྒྱུ་ནི་ཆོས་རྣམས་ཀྱི་རང་བཞིན་མི་ཤེས་པའི་མ་རིག་པ་ཡིན་
ལ། དེ་ལས་ཀྱང་ཁྱད་པར་དུ་འཇིག་ལྟ་ལྷན་སྐྱེས་ཉིད་ཡིན་ཏེ། དེ་ཡོད་ཕན་ཆད་དེ་ལ་བརྟེན་ནས་ཉོན་མོངས་པ་དང་ལས་དང་སྡུག་བསྔལ་འབྱུང་བ་ཡོད་ལ། དེ་ལྡོག་ན་དེ་ཀུན་ཀྱང་མི་འབྱུང་བར་དངོས་སྟོབས་ཀྱི་རིགས་པས་འགྲུབ་པ་ཡིན་ནོ། །དེས་ན་ལས་
དང་སྡུག་བསྔལ་གྱི་རྩ་བ་ཉོན་མོངས་པ་ཡིན་ཏེ། འདིར་ནི་ཉོན་མོངས་ས་བོན་བཞིན། །ཀླུ་བཞིན་རྩྭ་བཞིན་ལྗོན་ཤིང་བཞིན། །ཞེས་གསུངས་པ་དང་། ཉོན་མོངས་པ་ཀུན་གྱི་རྩ་བ་འཇིག་ལྟ་ཡིན་ཏེ། ཉེས་ཀུན་དེ་ཡི་རྩ་བ་ཅན། །ཞེས་གསུངས་
པ་བཞིན་ནོ། །དེས་ན་རྩ་བ་དེ་སྤོང་ནུས་སམ་སྙམ་ན་ནུས་ཏེ། དེ་སྒྲོ་བཏགས་པ་ཙམ་ཡིན་པའི་ཕྱིར་རོ། །དེས་ན་དེ་སྤོང་བའི་གཉེན་པོའང་། བྱམས་པ་དང་མི་སྡུག་པ་སོགས་བདག་འཛིན་དང་མཚུངས་ལྡན་དུ་གནས་ཆོག་པས་འགལ་བ་མ་ཡིན་ལ།
13-1-141a


བདག་མེད་རྟོགས་པའི་ཤེས་རབ་ནི་དེ་དང་རྣམ་པ་ཀུན་ཏུ་འགལ་ཏེ་སྣང་མུན་བཞིན་ནོ། །དེས་ན་བདེན་པས་བརྫུན་པ་སེལ་ནུས་པས་ན་འཁོར་བའི་རྩ་བ་གཅོད་པའི་ལམ་དངོས་སྟོབས་ཀྱི་རིགས་པས་གྲུབ་པ་ཡིན་པས་ས་བོན་
ལ་ཐོག་མ་མེད་ཀྱང་མེ་ལ་བསྲེགས་ན་ཕྱི་མཐའ་མཐོང་བ་ལྟར། འཁོར་བ་ཐོག་མ་མེད་ཀྱང་། འཁོར་བར་སྐྱེ་བའི་གེགས་བདག་མེད་རྟོགས་ན་ཕྱི་མཐའ་འགྲུབ་པ་ཡིན་ནོ། །གཉིས་པ་འབྲས་བུ་ལ་སྤོང་བ་དང་། རྟོགས་པ་ལ་རྩོད་པ་གཉིས་ལས། དང་པོ།
མུ་སྟེགས་པ་ཁ་ཅིག་ན་རེ། དྲི་མ་སེམས་ཀྱི་རང་བཞིན་ཡིན་པས་སྤོང་མི་ནུས་པ་དང་། གལ་ཏེ་ནུས་སུ་ཆུག་ཀྱང་སོ་སྐྱེས་སྤོང་བའི་ཐབས་མི་ཤེས་པ་དང་། གལ་ཏེ་ཤེས་ནས་སྤངས་ཀྱང་ལུས་ཀྱི་དྲི་མ་ལྟར་སླར་འགྱུར་བས་མི་བརྟན་པའི་ཕྱིར། དྲི་མ་སྤངས་པའི་རྣམ་གྲོལ་གཏན་དུ་བ་མི་སྲིད་
ཅེས་ཟེར་རོ། །དྲི་མ་སེམས་ཀྱི་རང་བཞིན་མ་ཡིན་ཏེ། དེ་ཀུན་རྟོག་གློ་བུར་བ་ཡིན་ལ་སེམས་ཀྱི་རང་བཞིན་འོད་གསལ་བ་ཡིན་པའི་ཕྱིར་དང་། དྲི་མ་སྤོང་བའི་ཐབས་བདག་མེད་རྟོགས་པ་ཡོད་པ་ཤེས་པའི་ཕྱིར་དང་། རྒྱུ་རྩད་ནས་སྤངས་པ་ལ་སླར་ལྡོག་པ་མེད་དེ་བུད་ཤིང་ཟད་པའི་མེ་དང་
འདྲ་བས་རྣམ་པར་གྲོལ་བ་འཐད་པ་ཡིན་ནོ། །གཉིས་པ་རྟོགས་པ་ཡེ་ཤེས་ལ་རྩོད་པ་ནི། ཕྱི་རོལ་པ་ཁ་ཅིག་ན་རེ། སྟོང་ཉིད་དང་སྙིང་རྗེ་སོགས་ལ་བློ་ཇི་ལྟར་གོམས་ཀྱང་ཚད་མེད་པར་གྱུར་ནས་དེའི་ངང་དུ་འགྱུར་མི་སྲིད་དེ། མཆོངས་པ་ཇི་ལྟར་
གོམས་ཀྱང་མཐའ་མེད་དུ་མཆོངས་མི་ནུས་པ་དང་། ཆུ་ཇི་ལྟར་བསྐོལ་ཡང་མེའི་རང་བཞིན་དུ་འགྱུར་མི་སྲིད་པ་དང་། གསེར་ཇི་ལྟར་བཞུས་ཀྱང་རྐྱེན་མེ་དང་བྲལ་ན་སླར་འཁྱགས་པ་བཞིན་ནོ། །ཞེས་ཟེར། དཔེ་དེ་རྣམས་དང་མི་མཚུངས་ཏེ། མཆོངས་
13-1-141b


གོམས་པ་ཐད་ཀའི་འབད་པར་ལྟོས་པས་རྒྱུན་བར་མ་ཆད་དུ་འཕེལ་མི་ནུས་ཤིང་ལུས་ཀྱི་སྟོབས་ཐུག་བཅས་སུ་གནས་པ་དང་། སེམས་ནི་བརྩེ་སོགས་ཀྱི་ངོ་བོར་རྒྱུན་བར་མ་ཆད་དུ་གོམས་པས་འཕེལ་བ་ཡོད་པ་ས་བོན་ལས་ས་བོན་བཞིན་ཡིན་ཅིང་བློའི་རང་
བཞིན་ཚད་མེད་པའི་ཕྱིར་དང་། ཆུ་བསྐོལ་བ་སྔ་མ་བསྐམས་ནས་རྟེན་བརྟེན་པ་མིན་ཡང་སེམས་སྔ་མའི་ནུས་པས་ཕྱི་མ་ཁྱད་པར་དུ་འཕེལ་ཞིང་དེའི་ངང་དུ་འགྱུར་བ་བུད་ཤིང་མེའི་རང་བཞིན་དུ་གྱུར་པ་ལྟ་བུ་ཡིན་པའི་ཕྱིར་དང་། གསེར་སྲ་བར་སླར་ལྡོག་པའི་རྒྱུ་
གསེར་ཉིད་ཡོད་པ་ཡིན་ནའང་། སེམས་དྲི་མར་སླར་ལྡོག་པའི་རྒྱུ་མེད་པའི་ཕྱིར་མི་ལྡོག་སྟེ། གཉེན་པོས་སྤངས་ཟིན་པའི་ཕྱིར་ཤིང་བསྲེགས་པ་བཞིན་ནོ། །གཉིས་པ་བྱེ་བྲག་ཏུ་རྣལ་འབྱོར་མངོན་སུམ་ཐམས་ཅད་ཀྱི་རྒྱལ་པོ་མཐར་ཐུག་པ་རྣམ་མཁྱེན་
གྱི་ཡེ་ཤེས་ལ་རྩོད་པ་ལ། རྒྱུ་ལ་རྩོད་པ་དང་། འབྲས་བུ་ལ་རྩོད་པ་གཉིས། དང་པོ། ཕྱི་རོལ་པ་དག་ན་རེ། རྟག་པ་རང་བྱུང་གི་ཐམས་ཅད་མཁྱེན་པ་མ་གཏོགས་པ་རྣམ་པ་ཐམས་ཅད་མཁྱེན་པའི་ཡེ་ཤེས་དེ་གསར་དུ་བསྒྲུབ་པར་མི་ནུས་ཏེ་དེའི་རྒྱུ་མེད་པའི་
ཕྱིར་ཞེ་ན། བསམ་གཏན་དང་སྙིང་རྗེ་ལ་སོགས་པའི་ཐབས་དང་། ཤེས་རབ་དམིགས་པ་མེད་པ་གཉིས་ཕན་ཚུན་རྒྱུ་རྐྱེན་དུ་གྱུར་པས་མཁྱེན་པ་གཉིས་འགྲུབ་པ་སྟེ། ཐབས་སྙིང་རྗེ་ཆེན་པོ་གསལ་བའི་ཡེ་ཤེས་ཀྱིས་ཉེར་ལེན་གྱི་རྒྱུ་བྱས། ཤེས་རབ་སྟོང་པ་
ཉིད་ཀྱིས་ལྷན་ཅིག་བྱེད་པའི་རྐྱེན་བྱས་ནས་ཇི་སྙེད་མཁྱེན་པའི་ཡེ་ཤེས་དང་། ཤེས་རབ་སྟོང་པ་ཉིད་ཀྱི་ཡུལ་ཅན་གྱིས་ཉེར་ལེན་གྱི་རྒྱུ་བྱས་ཤིང་། ཐབས་སྙིང་རྗེ་ཆེན་པོས་ལྷན་ཅིག་བྱེད་རྐྱེན་བྱས་ནས་ཇི་ལྟ་བ་གཟིགས་པའི་ཡེ་ཤེས་འགྲུབ་ལ། གང་ཤེས་བྱའི་རང་
13-1-142a


བཞིན་ཇི་ལྟ་བ་བཞིན་དུ་མི་ཤེས་པ་ནི་ཤེས་བྱའི་སྒྲིབ་པ་ཡིན་ལ་དེའི་ངོ་བོ་ནི་རྨོངས་པའོ། །དེ་དང་འགལ་བ་ཆོས་བདག་མེད་དུ་རྟོགས་པའི་ཤེས་རབ་བསྟེན་དུ་ཡོད་པ་སོགས་གོང་གི་སྐབས་ལྟར་དཔྱད་པས་རྣམ་མཁྱེན་གྱི་ཡེ་ཤེས་
རྒྱུ་ལས་བྱུང་བར་གྲུབ་ཅིང་། རྒྱུ་དང་འབྲས་བུ་མི་འཁྲུལ་བའི་བདག་ཉིད་ཀྱིས་སྟོན་པ་ཚད་མའི་སྐྱེས་བུར་དངོས་སྟོབས་ཀྱི་རིགས་པས་འགྲུབ་སྟེ། ཚད་མར་གྱུར་པ་འགྲོ་ལ་ཕན་བཞེད་པ། །སྟོན་པ་བདེ་གཤེགས་སྐྱོབ་ལ་ཕྱག་འཚལ་ལོ། །ཞེས་སུངས་
པ་བཞིན་ནོ། །གཉིས་པ་འབྲས་བུ་རྣམ་པ་ཐམས་ཅད་མཁྱེན་པ་མི་སྲིད་དེ། ཤེས་བྱ་ཀུན་ལ་མཐའ་མེད་པ་ཡིན་པས་མཐའ་མེད་པ་ཤེས་ན་མཐའ་རྙེད་པར་འགྱུར་བས་དེའང་ལོག་ཤེས་སུ་འགྱུར་ལ། མཐའ་མེད་པ་ལ་ཤེས་པའི་བློ་མི་སྲིད་དེ་ནམ་མཁའ་
ཚད་ལ་གཞལ་བས་ཤེས་མི་ནུས་པ་བཞིན་ནོ་ཟེར། དེ་ལ་མཐའ་མེད་པ་ལ་མཐའ་འདིའོ་ཞེས་ཚད་གཟུང་བའི་ཚུལ་གྱིས་གཟིགས་པ་མ་ཡིན་ཏེ། ནམ་མཁའ་ཀུན་ལ་ཁྱབ་ཅེས་པའང་མཐའ་མེད་ལ་ཁྱབ་པ་སྲིད་པ་བཞིན་དུ་ཤེས་བྱ་ཐམས་ཅད་འབད་མེད་རོ་མཉམ་
དུ་མཁྱེན་པ་ཡིན་གྱི། མཁྱེན་ཚུལ་མཐའ་དག་ཚུར་མཐོང་གི་ར་བ་ལས་བརྒལ་བ་ཡིན་ལ། མི་རྟོག་བཞིན་དུ་མཁྱེན་པ་དང་། དུས་གསུམ་མཁྱེན་ཚུལ་ལ་ངེས་པ་སྐྱེ་བའི་ཚུལ་ཅུང་ཟད་གཞན་དུ་བཤད་དོ། །འདིར་ཚུར་མཐོང་གིས་ཐམས་ཅད་མཁྱེན་པ་ཡིན་པ་
ཙམ་སྒྲུབ་ན། གང་ཟག་གང་གིས་དོན་དུ་གཉེར་བྱའི་གཙོ་བོ་ལམ་བདེན་བཞིའི་འཇུག་ལྡོག་མ་ནོར་བར་སྟོན་པ་དེ་ལ་ཐམས་ཅད་མཁྱེན་ཞེས་བྱ་སྟེ། སྨན་ཀུན་ཚོགས་དང་མི་ཀུན་ཚོགས་ཞེས་པ་བཞིན་ནོ། །གཞན་དགོས་མེད་ཀྱི་སྲིན་བུའི་གྲངས་ལ་སོགས་པ་
13-1-142b


ནི་ཐར་པ་དོན་དུ་གཉེར་བ་ལ་ཉེར་མཁོ་ཅིའང་མེད་པས་སྟོན་པས་མཁྱེན་དུ་ཟིན་ཀྱང་གདུལ་བྱ་ལ་དེ་ཀུན་བསྟན་པས་ཅི་ཞིག་བྱ། བསྟན་ཀྱང་དེ་སྙེད་གཟུངས་ནུས་པ་མ་ཡིན་ནོ། །དེས་ན་ལམ་དངོས་སྟོབས་ཀྱི་རིགས་པས་གྲུབ་པ་འདི་འདྲ་སྟོན་པ་དེ་ནི་སྐྱེས་བུའི་དོན་
ཐམས་ཅད་མཁྱེན་པའི་སྟོན་པ་ཡིན་པར་བདག་ཅག་གིས་ཁས་ལེན་ལ། དེ་ལ་རྗེས་སུ་དཔགས་ན། གཞན་ཤེས་བྱ་ཐམས་ཅད་ཀྱང་མཁྱེན་པར་ངེས་ཏེ། གང་ཟབ་ཅིང་ཕྲ་བའི་དོན་མཐར་ཐུག་པ་མཁྱེན་པ་དེས་རགས་པ་རྟོགས་ནུས་པར་གདོན་མི་ཟ་སྟེ། རིང་
བའི་རྡུལ་ཕྲ་མོ་མཐོང་བའི་མིག་གིས་ཉེ་བའི་བུམ་པ་མཐོང་བ་ལ་ཐེ་ཚོམ་མེད་པ་བཞིན་ནོ། །དེ་དག་གིས་ཐར་པ་དང་ཐམས་ཅད་མཁྱེན་པའི་ལམ་དང་འབྲས་བུ་སྒྲུབ་པའི་ཚུལ་རིགས་པའི་དབང་ཕྱུག་ཆོས་ཀྱི་གྲགས་པའི་རྗེས་སུ་འབྲངས་ནས་སྔོན་གྱི་མཁས་པ་རྣམས་
ཀྱིས་བསྡུས་པ་བཞིན་ཅུང་ཟད་བཀོད་པ་ཡིན་ལ། སྤྱིར་ཕྱོགས་སྔ་མུ་སྟེགས་སོགས་འགོག་པ་ཐམས་ཅད་ཁ་ཕྱིར་བལྟས་ཀྱི་ཤག་བཀྱེ་བའི་ཆེད་ཙམ་མ་ཡིན་ཏེ། མུ་སྟེགས་ལ་སོགས་པ་འདི་དག་གི་ཞེ་འདོད་འདི་བཞིན་ཕྱིན་ཅི་ལོག་གི་རྟོག་པ་ངན་པ། རང་
ལའང་ཚུལ་དེ་དང་མཚུངས་པར་གནས་པ་དེ་ཉིད་ངོས་བཟུང་ནས། དགག་སྒྲུབ་ཀྱི་རིགས་པ་དྲི་མ་མེད་པས་རང་རྒྱུད་ཀྱི་བག་ཆགས་དང་ཀུན་རྟོག་ངན་པ་རྣམས་སུན་ཕྱུང་ན། བློ་ནོར་ལྡན་པས་ལུགས་གཞན་ལ། །ཞེས་སོགས་ཀྱི་ཚིགས་སུ་བཅད་པའི་དོན་བཞིན། 
རང་གི་ལམ་དང་སྟོན་པ་ལ་མི་འཕྲོག་པའི་ཡིད་ཆེས་སྐྱེ་བ་ཡིན་པས་བསམ་པར་བྱ་བ་གལ་པོ་ཆེ་ཡིན་ནོ། །དེ་ལྟར་མདོར་ན་སྲིད་པའི་རྩ་བ་གཅོད་པ་དང་། ཐར་པ་དང་ཐམས་ཅད་མཁྱེན་པ་སྒྲུབ་པའི་རྒྱུ་ནི་བདེན་གཉིས་དཔྱོད་པའི་ཤེས་རབ་དྲི་མེད་ཡིན་ལ། ཤེས་རབ་
13-1-143a


དེའང་སྤྱངས་པ་སོགས་ལ་ལྟོས་མེད་དུ་གནམ་ལས་བབས་པའམ། ས་རུམ་ནས་འཐོན་པ་ལྟར་འབྱུང་བ་མི་སྲིད་པས་འདི་ལྟར་ལམ་དོན་གཉེར་གྱི་གང་ཟག་རྣམས་ཀྱིས་བསམ་པ་བྱང་ཆུབ་ཀྱི་སེམས་དང་ལྡན་པས། ཐོག་མ་ཁོ་
ནར་ཕྱི་ནང་གི་དངོས་པོ་ཐམས་ཅད་གཅིག་དང་དུ་མ་བྲལ་བའི་རིགས་པ་དེ་དག་གི་ཚུལ་གྱིས་ལེགས་པར་བརྟགས་པའི་རྗེས་དཔགས་ཚད་མ་ལས་རང་བཞིན་མེད་པ་ཡིན་པར་ངེས་སྙམ་པའི་ངེས་ཤེས་སྐྱེ་བ་ཡིན་ལ། ངེས་ཤེས་དེ་དང་དངོས་པོ་ལ་ཕྱིན་ཅི་ལོག་ཏུ་རྟོག་པའི་སྒྲོ་འདོགས་
གཉིས་སྣང་མུན་ལྟར་འགལ་བ་ཡིན་པས་ངེས་ཤེས་དེས་སྤང་བྱ་སྒྲོ་འདོགས་རྣམས་གཅོད་པ་ཡིན་ལ། ངེས་ཤེས་དང་བྲལ་བའི་སྒོམ་ནི་དམུས་ལོང་གིས་གཟུགས་གཞལ་བ་ལྟར་དོན་ལ་མི་གནས་པས་སྒོམ་པ་ངེས་ཤེས་དང་མ་བྲལ་བ་ཞིག་དགོས་སོ་ཞེས་ཕྱོགས་བཅུ་ཀུན་ན་
གནས་པ་ལ་དུས་ཀུན་ཏུ་ཐལ་མོ་སྦྱར་ཏེ་ཞུ་ཞིང་ངེས་པའི་ཤེས་པ་ཐེ་ཚོམ་དང་བྲལ་བར་གྱུར་ཅིག་ཅེས་སྨོན་ལམ་དུའང་བྱེད་པ་ཡིན་ནོ། །ངེས་པའི་ཤེས་པ་དང་བྲལ་ན་ཡང་དག་པའི་དོན་རྟོགས་དཀའ་ཞིང་། རིགས་པ་ཚད་མ་དང་བྲལ་ན་ངེས་པ་མི་སྐྱེ་བ་འདི་ཁོ་ན་
ལམ་དོན་གཉེར་རྣམས་ཀྱིས་སྙིང་ལ་གཞག་པའི་མན་ངག་གོ། དེས་ན་ཐེ་ཚོམ་ཆོད་པ་ཐོས་བསམ་གྱི་འབྲས་བུ། གདིང་དང་ལྡན་པ་བསྒོམས་པའི་འབྲས་བུ་ཡིན་པ་ལ། འབྲས་བུ་དེ་གཉིས་མེད་པའི་བཤད་སྒྲུབ་ནི་གཟུགས་བརྙན་ཙམ་མོ། །ཞར་
བྱུང་དུ་ངེས་པ་དང་སྒྲོ་འདོགས་ལ་དཔྱད་པ་ཅུང་ཟད་དམ་པ་རྣམས་ཀྱི་གསུང་བཞིན་འབྲི་ན། འདི་ལྟར་བུམ་པ་ལྟ་བུ་གཅིག་ལ་དངོས་པོ་མེད་པའི་ངེས་ཤེས་དང་། དངོས་པོ་ཡོད་རྟོག་གི་སྒྲོ་འདོགས་གཉིས་ཡུལ་མི་གཅིག་ན་བསལ་བྱ་སེལ་བྱེད་དུ་མི་འཐད་
13-1-143b


དེ། ཕྱི་ནང་གི་སྣང་མུན་བཞིན། གཅིག་ན་ནི་ཡུལ་དེ་གྲུབ་བམ་མ་གྲུབ། ཡུལ་དེ་གྲུབ་ན་ནི་བསལ་བྱ་མ་འཁྲུལ་བར་ཐལ། ཡུལ་བདེན་པའི་ཕྱིར་ཚད་མ་བཞིན། མ་གྲུབ་ན་སེལ་བྱེད་ཚད་མར་མི་འགྱུར་ཏེ་གཞལ་བྱ་མེད་པའི་སྒྲོ་འདོགས་བཞིན་ནོ་ཞེས་
དང་། གཞན་ཡང་། ཡུལ་གཅིག་ན་ཡུལ་དེ་བདེན་ནམ་བརྫུན། བདེན་ན་སྒྲོ་འདོགས་བདེན་ལ། བརྫུན་ན་ཚད་མ་བརྫུན་ནོ་ཞེས་ཟེར་ན། དངོས་དངོས་མེད་ཀྱི་ཁྱད་པར་དུ་མ་བྱས་པའི་གཞན་སེལ་གྱི་བློས་བཟུང་བའི་བུམ་པ་ཙམ་ཞིག་ཡུལ་གཞལ་བྱ་ཡིན་པས་
ཞེན་ཡུལ་གཅིག་པས་བསལ་བྱ་སེལ་བྱེད་དུ་མི་འཐད་པའི་སྐྱོན་མེད་ལ། ཞེན་སྟངས་ཐ་དད་དེ་སོ་སོར་ཡོད་པས་ཚད་མ་དང་ཚད་མིན་དུ་འཇོག་པ་འཐད་དོ། །དེས་ན་ངེས་སྒྲོ་འདོགས་གཉིས་ཀྱི་བདེན་བརྫུན་ཀྱང་ཞེན་སྟངས་དོན་ལ་མཐུན་མི་མཐུན་གྱིས་འཇོག་གི་
ཡུལ་རང་དབང་བ་གཅིག་ཏུ་མི་གཟུང་ངོ་། །དེ་ལ་མི་གཉིས་ཀྱི་ཉན་ཤེས་ལ་དུང་གི་སྒྲ་གཅིག་སྣང་བ་ན། གཅིག་གིས་རྟག་གཅིག་གིས་མི་རྟག་སྙམ་ན། གཉིས་ཀ་རང་གིས་བཟུང་བའི་ཞེན་པའི་འཛིན་སྟངས་དང་། ཡུལ་དུང་སྒྲ་སྣང་བཏགས་གཅིག་ཏུ་
བསྲེས་ཏེ་བཟུང་བ་ཡིན་པས་ཚད་མ་དང་ཚད་མིན་གྱི་ཡུལ་གཅིག་ཐ་དད་བརྟགས་པའི་སྐྱོན་མེད་པ་ཡིན་ནོ། །འདི་ལེགས་པར་རྟོགས་ན་ཚད་མའི་གནད་མང་པོ་ཞིག་ཀྱང་འགྲོལ་ལོ། །ཡང་ངེས་སྒྲོ་འདོགས་གཉིས་བློའི་ངོ་བོར་གཅིག་གམ་མི་གཅིག  །གཅིག་
ན་རལ་གྲིས་རང་མི་གཅོད་པ་ལྟར་བསལ་བྱ་སེལ་བྱེད་དུ་མི་འཐད་ལ། ཐ་དད་ན་སངས་རྒྱས་ཀྱི་ཡེ་ཤེས་ཀྱིས་སེམས་ཅན་གཞན་རྒྱུད་ཀྱི་མི་ཤེས་པ་མ་བསལ་བ་བཞིན་དུ་ཡང་བསལ་བྱ་སེལ་བྱེད་དུ་མི་འཐད་དོ་ཞེ་ན། བློའི་རྒྱུན་ཙམ་དུ་གཅིག་པས་རྒྱུད་ཐ་དད་ལྟར་
13-1-144a


མི་འགྱུར་ལ། རྣམ་པ་ཐ་དད་པས་རང་ལ་རང་གིས་བྱ་བ་ལྟར་ཡང་མི་འགྱུར་རོ། །ཡང་དེ་གཉིས་དུས་གཅིག་གམ་མི་གཅིག །དུས་གཅིག་ནི་མི་སྲིད་དེ་སྤང་གཉེན་གྱི་རྟོག་པ་གཉིས་ཅིག་ཅར་ཡོད་པར་ཐལ་བས་གནོད་ལ། མི་
གཅིག་ན་གནོད་བྱ་གནོད་བྱེད་དུ་མི་འཐད་དེ༷། ཉི་ཟེར་དང་མཚན་མོའི་མུན་པ་བཞིན་ནོ་ཟེར་ན། དེ་གཉིས་དུས་མི་གཅིག་པས་ཕྲད་མི་སྲིད་ཀྱང་། བློའི་རྒྱུན་གཅིག་ལ་དང་པོ་སྒྲོ་འདོགས་སྐྱེས། ཕྱིས་ངེས་ཤེས་སྐྱེས་པས་སྒྲོ་འདོགས་ཀྱི་རྒྱུན་སྐྱེ་མ་ནུས་པ་ལ་སྒྲོ་
འདོགས་བསལ་ཞེས་ཐ་སྙད་བཏགས་པ་སྟེ། བློའི་ངོ་བོར་གྱུར་པའི་སྤང་གཉེན་ཐམས་ཅད་དེ་དང་འདྲ་སྟེ། འདས་པ་འགགས་ཟིན་པ་དང་། ད་ལྟ་གྲུབ་ཟིན་པས་དེ་ལ་གནོད་པ་བྱར་མི་རུང་ལ། མ་འོངས་པ་མ་སྐྱེས་པ་ལའང་གནོད་པ་བྱར་མེད་པས་དོན་དུ་
སྐད་ཅིག་མ་ལ་བསལ་བྱ་སེལ་བྱེད་མ་གྲུབ་ཀྱང་། སྤང་བྱའི་རྒྱུན་མ་འོངས་པ་འཕྲོ་མཐུད་དུ་སྐྱེ་བའི་གེགས་བྱས་སོང་བ་ལ་བསལ་བྱ་སེལ་བྱེད་དུ་བཏགས་པའོ། །འདི་ལ་ཁ་ཅིག་སྤང་གཉེན་ལྷན་ཅིག་ཏུ་བསྐལ་པ་གྲངས་མེད་དུ་མར་འགྲོགས་པ་ཡོད་
དེ། བྱང་སེམས་འཕགས་པའི་རྒྱུད་ཀྱི་ཡེ་ཤེས་དང་། སྒྲིབ་པའི་བག་ཆགས་གཉིས་ཡུན་རིང་དུ་འགྲོགས་པའི་ཕྱིར་ཟེར་ཡང་། མིང་ཙམ་ལ་བསམས་ན་མ་གཏོགས་དོན་དུ་ལྷན་ཅིག་གནས་ན། དེས་དེ་བསལ་ག་ལ་ནུས་ཏེ། དེས་ན་བྱང་འཕགས་ཀྱི་
རྒྱུད་ཀྱི་སྒྲིབ་པ་རང་རང་གི་གཉེན་པོ་དང་སྤང་བྱ་ནི་འགྲོགས་པ་མེད་ལ། གཟུང་འཛིན་འཁྲུལ་པའི་བག་ཆགས་ཕྲ་མོ་ནི་འཕགས་པ་སློབ་པའི་ཡེ་ཤེས་གཞན་གྱི་སྤང་བྱ་ག་ལ་ཡིན་ཏེ། རྡོར་ཏིང་གི་སྤང་བྱ་ཡིན་ནོ། །དེ་ལྟར་ངེས་ཤེས་དང་སྒྲོ་འདོགས་གཉིས།
13-1-144b


ཡུལ་དང་ངོ་བོ་དུས་གསུམ་ལ་བརྟགས་པ་འདིའང་དོགས་སློང་ལེགས་པོ་ཡིན་པས། རྗེས་སུ་དཔོགས་རྣམས་ཤེས་པར་བྱེད། །ཅེས་པའི་མཐའ་དཔྱོད་དུ་བཀོད་པ་ཡིན་ནོ། །རྩོད་པ་གསུམ་པའི་ལན་ལ། ལན་དངོས་དང་། དེ་ལྟ་མིན་ན་མི་འཐད་
པར་བསྟན་པའོ། །དང་པོ། གཞུང་གིས་བསྐྱེད་པའི་བྱེ་བྲག་གི། ཆོས་ཅན་སྤངས་ནས་མཁས་པ་དང་། །བུད་མེད་བྱིས་པའི་བར་དག་ལ། །གྲགས་པར་གྱུར་པའི་དངོས་རྣམས་ལ། །བསྒྲུབ་དང་སྒྲུབ་པའི་དངོས་པོ་འདི། །མ་ལུས་ཡང་དག་འཇུག་པར་འགྱུར། །
ཞེས་གསུངས་ཏེ། འོ་ན་ཁྱོད་ཀྱིས་ཆོས་ཐམས་ཅད་རང་བཞིན་མེད་པར་ཁས་བླངས་ནས་མེད་དོ་ཞེས་བརྗོད་པ་དེ་ལྟར་ན་བསྒྲུབ་བྱ་ཆོས་ཅན་དང་། དེ་སྒྲུབ་པ་གཏན་ཚིགས་སྦྱོར་བའང་དོན་མེད་དུ་འགྱུར་ཏེ། ཆོས་ཅན་གཞི་མ་གྲུབ་པ་སོགས་ཀྱི་ཕྱིར་རོ། །གལ་ཏེ་སྒྲུབ་
པ་གཏན་ཚིགས་མི་བརྗོད་དོ་སྙམ་ན། དམ་བཅས་པ་ཙམ་གྱིས་དོན་མི་འགྲུབ་པའི་ཕྱིར་རོ། །གཏན་ཚིགས་བརྗོད་ན་ནི་གཏན་ཚིགས་ཡོད་པས་ཐམས་ཅད་རང་བཞིན་མེད་པ་ཉིད་དུ་མི་འགྱུར་ལ། དེ་ལྟར་ན་འགལ་བར་འགྱུར་རོ་སྙམ་ན། དེ་འདྲ་བའི་
རྩོད་པ་འདི་ནི་གྱི་ན་སྟེ། འདི་ལྟར་བསྒྲུབ་བྱ་ཆོས་ཅན་དུ་བཞག་པ་གང་ཡིན་པ་དེ་ནི། གྲུབ་མཐའི་གཞུ༷ང་གིས༷་བཞག་པའམ་བསྐྱེ༷ད་པའི༷་བྱེ༷་བྲག༷་གི༷་ཆོས༷་ཅ༷ན་སྤང༷ས་ནས༷་ཏེ་དེ་ཤེས་འདོད་དུ་མ་བཟུང་བར། མཁ༷ས་པ༷་ད༷ང་མི་མཁས་པ་ཐ་མལ་གྱི་
བུ༷ད་མེ༷ད་དང་བྱིས༷་པའི༷་བར༷་དག༷་ལ༷། མཐུན་པར་སྣང་ཞིང་ཡོངས་སུ་གྲ༷གས་པ༷ར་གྱུར༷་པའི༷་དངོ༷ས་པོ་རྣམ༷ས་ཆོས་ཅན་དུ་བཟུང་བ་ལ༷། བསྒྲུ༷བ་བྱ་ད༷ང་དེ་སྒྲུ༷བ་པ༷འི་གཏན་ཚིགས་དག་གི་ཐ་སྙད་ཀྱི་དངོ༷ས་པོ༷་འདི༷། མ༷་ལུ༷ས་པ་གནོད་མེད་ཡ༷ང་ད༷ག་པར་འཇུ༷ག་
13-1-145a


པ༷ར་འགྱུ༷ར་བ་ཡིན་ནོ། །དེ་ལ་གཞུང་གི་འདོད་པ་མི་མཐུན་པ་ལས་བྱུང་བའི་ཆོས་ཅན་རྩོད་གཞིར་བཟུང་ན་ཐུན་མོང་མཐུན་སྣང་གི་ཆོས་ཅན་མི་འགྲུབ་པས་གཏན་ཚིགས་ཐམས་ཅད་ཆོས་ཅན་གཞི་མ་གྲུབ་པར་འགྱུར་ལ། དེ་ལྟར་
ན་བསྒྲུབ་བྱ་དང་སྒྲུབ་པའི་ཆོས་གཉིས་ལྡན་གྱི་དཔེ་ཡང་མི་སྲིད་པས་རྟགས་ཐམས་ཅད་ནུབ་པར་འགྱུར་རོ། །གལ་ཏེ་གཞུང་གིས་བསྐྱེད་པའི་བྱེ་བྲག་ལ་ཁས་ལེན་མཐུན་པར་གྱུར་ན་ནི་ཅི་ཞིག་རྩོད་དེ་རྩོད་པའང་མེད་དོ། །མཐུན་བཞིན་དུའང་རྩོད་ན་ནི་རང་
གི་ཕྱོགས་ལ་མི་ལྟ་བར་སུན་ཅི་ཕྱིན་དུ་འགྱུར་རོ། །གཉིས་པ་དེ་ལས་བཟློག་ན་མི་འཐད་པ།  དེ་ལྟ་མིན་ན་གཞི་མ་གྲུབ། །ལ་སོགས་ལན་ནི་ཇི་སྐད་གདབ། །ཇི་སྐད་བཤད་པ་འདོད་པ་མི་མཐུན་པ་དངོས་པོ་ཡོད་པ་དང་མེད་པ་ལྟ་བུས་ཁྱད་
པར་དུ་མ་བྱས་པར་སྣང་ཙམ་གྱི་ཤེས་འདོད་ལ་ཆོས་ཅན་དུ་བཟུང་བ་དེ༷་ལྟ༷་མི༷ན་ན༷་ཁྱོད་ཀྱི་གཏན་ཚིགས་ཀྱི་གཞི༷་མ༷་གྲུབ་པ་དང་། དཔེ་མི་འགྲུབ་བོ་ཞེས་པ་ལ༷་སོ༷གས་པའི་ལ༷ན་ནི༷་ཇི༷་སྐ༷ད་གད༷བ་སྟེ་གདབ་པར་མི་ནུས་ཏེ། དཔེར་ན་སངས་རྒྱས་པས་ཕ་རོལ་པོའི་ངོར་།
སྒྲ་ཆོས་ཅན། མི་རྟག་སྟེ། དངོས་པོར་ཡོད་པའི་ཕྱིར། ཞེའམ། ལ་ལ་ཆོས་ཅན། མེ་ཡོད་དེ། དུ་བ་ཡོད་པའི་ཕྱིར། ཞེས་བཀོད་པ་ལྟ་བུ་ལ། ཕ་རོལ་མུ་སྟེགས་ཀྱི་གཞུང་གིས་བསྐྱེད་པའི་ཆོས་ཅན་བྱེ་བྲག་པ་བཟུང་ན། ཡན་ལག་ཅན་གྱི་ལ་
དང་། ནམ་མཁའི་ཡོན་ཏན་གྱི་སྒྲ་གཟུང་དགོས་ན། དེ་མི་སྲིད་པས་ཆོས་ཅན་གཞི་མི་འགྲུབ་ལ། དེ་མ་གྲུབ་པའི་དེ་ལ་བརྟེན་པའི་རྟགས་ཀྱང་མི་སྲིད་དེ་རི་བོང་རྭའི་གཉེར་མ་བཞིན་ནོ། །དེས་ན་ཆོས་ཅན་དང་མཐུན་པའི་ཕྱོགས་སུ་སྦྱོར་བའི་དཔེ་ཡང་མི་
13-1-145b


སྲིད་པས་མཐར་རྗེས་སུ་དཔགས་པར་བྱ་བ་ཆོས་ཅན་དང་། རྗེས་སུ་དཔགས་པའི་རྟེན་ནམ་སྒྲུབ་བྱེད་གཏན་ཚིགས་ཐམས་ཅད་མི་འགྲུབ་བོ། །དེས་ན་ཐུན་མོང་མཐུན་སྣང་གི་དངོས་པོ་ཙམ་དང་། དེ་ལའང་འཛིན་སྟངས་ཞིབ་ཏུ་བྱེད་ནས་ཐ་སྙད་བསྒྲུབ་པའི་ཚེ་
ན། གོང་གི་ངེས་ཤེས་དང་སྒྲོ་འདོགས་ཀྱི་ཡུལ་ལ་ཇི་སྐད་དཔྱད་པ་ལྟར་བྱས་ན་རིགས་པའི་མཐིང་ལོན་པ་ཡིན་ནོ། །གཉིས་པ་ཀུན་རྫོབ་ཏུ་རྩོད་སྤོང་ལ། སྒྲུབ་དང་བསྒྲུབ་བྱའི་རྣམ་གཞག་སྤྱིར་འཐད་པ། ཚེ་སྔ་ཕྱིའི་རྒྱུ་འབྲས་རྟེན་འབྲེལ་གྱི་
རྣམ་གཞག་འཐད་ཚུལ་བྱེ་བྲག་ཏུ་བཤད་པ། དེ་ལྟར་རྟག་ཆད་དང་བྲལ་བར་བསྔགས་པས་མཇུག་བསྡུ་བ་གསུམ། དང་པོ། བདག་ནི་སྣང་བའི་ངང་ཅན་གྱི། །དངོས་པོ་དགག་པར་མི་བྱེད་དེ། །དེ་ལྟ་བས་ན་སྒྲུབ་པ་དང་། །བསྒྲུབ་བྱ་གཞག་པ་
འཁྲུགས་པ་མེད། །ཅེས་གསུངས་ཏེ། བད༷ག་ནི༷་མཁས་ནས་བྱིས་པའི་བར་གྱི་འགྲོ་བ་རྣམས་ལ་ཐུན་མོང་དུ་མིག་དང་རྣ་བ་སོགས་ལ་སྣང༷་བའི་ང༷ང་ཚུལ་ཅ༷ན་གྱི༷་དངོ༷ས་པོ༷་རྟེན་ཅིང་འབྲེལ་བར་འབྱུང་བ་ཙམ་འདི་ནི་དག༷ག་པ༷ར་མི༷་བྱེ༷ད་དེ༷། འདི་ལ་ཤེས་རབ་
དང་ཡེ་ཤེས་ཀྱིས་དཔྱད་ན་ཆུ་ཤིང་གི་སྡོང་པོ་བཞིན་དུ་སྙིང་པོ་བག་ཙམ་ཡང་མི་སྣང་བས་དོན་དམ་པར་གྲུབ་པར་མི་འདོད་དོ། །སྣང་བའི་དོན་མ་བཀག་པ་དེ༷་ལྟ༷་བ༷ས་ན༷་དངོས་པོ་ལ་ཕྱིན་ཅི་ལོག་ཏུ་སྒྲོ་འདོགས་པ་སེལ་ཞིང་ཕྱིན་ཅི་མ་ལོག་པར་སྒྲུ༷བ་པ༷་རྗེས་སུ་
དཔོགས་པ་གཏན་ཚིགས་ད༷ང་། གཏན་ཚིགས་དེས་བསྒྲུ༷བ་པར་བྱ༷་བའམ་རྗེས་སུ་དཔོགས་པར་བྱ་བ་ཉིད་ཀྱི་རྣམ་པར་གཞ༷ག་པ༷་ལ། རྣམ་གཞག་འཁྲུ༷གས་ཤིང་རྙོག་པར་གྱུར་པའི་སྐྱོན་གྱི་ཆ་ཅུང་ཟད་ཀྱང་གནས་པ༷་མེ༷ད་པའི་ཕྱིར་རང་བཞིན་མེད་པ་ཉིད་
13-1-146a


དུ་འགྲུབ་བོ། །འདིའི་ལྡོག་ཕྱོགས་ཀྱི་ཕྱོགས་སྔ་ནི་ཤུགས་ཀྱིས་གསལ་བས་སྨོས་མི་དགོས་ཏེ། རང་བཞིན་མེད་ཅེས་པས་སྣང་བ་འདིའང་འགོག་པའི་དོན་དུ་གོ་ནས་དེ་ལྟར་ན་སྒྲུབ་དང་བསྒྲུབ་བྱའི་རྣམ་གཞག་ཐམས་ཅད་མི་འཐད་
སྙམ་དུ་སེམས་པ་གང་ཡིན་པའོ། །དེ་ལྟར་ན་འདིའི་སྐབས་དང་སྤྱིར་དབུ་མ་ཐམས་ཅད་མཚུངས་པར་སྣང་བ་མི་འགོག་ཅེས་པའི་དུས་སུ་རང་བཞིན་སྟོང་པས་མ་ཁྱབ་པའི་སྣང་བ་ལོགས་སུ་ཡོད་པ་ལྟ་བུར་གོ་བར་མི་བྱ་སྟེ། དཔེར་ན་ཆུ་ཟླ་ཉིད་སྣང་བཞིན་པ་དེ་
སྟོང་གི། སྣང་བ་དེ་བཞག་ནས་ལོགས་སུ་སྟོང་རྒྱུ་ཞིག་མེད་པ་བཞིན་དུ། སྟོང་ཡང་དེས་སྣང་ཙམ་ཡང་མེད་མི་དགོས་ཏེ། གལ་ཏེ་སྣང་བའང་མེད་ན་དེའི་སྟོང་པའང་མེད་པས། སྟོང་པ་དང་སྣང་བ་གཉིས་པོ་ཕན་ཚུན་གཅིག་མེད་ན་གཅིག་མི་སྲིད་ལ། 
གཅིག་ཡོད་ན་གཅིག་ཡོད་པས་ཁྱབ་ཅིང་། ཡོད་ཚུལ་ཡང་སྲད་བུ་དཀར་ནག་བསྒྲིམས་པ་ལྟ་བུ་སོ་སོར་ཡོད་པའམ། གཅིག་བསལ་རྗེས་གཅིག་འོང་བ་ལྟ་བུའི་རེས་འཇོག་མིན་པར་སྟོང་པ་ལ་སྣང་བས་ཁྱབ། སྣང་བ་ལ་སྟོང་པས་ཁྱབ། དེ་གཉིས་ནམ་ཡང་
འདུ་འབྲལ་མི་ཤེས་པའི་ཡིན་ལུགས་ལ་ཡིད་ཆེས་པ་སངས་རྒྱས་སྟོང་གིས་བཀག་ཀྱང་ཡིད་ཕྱིར་མི་ལྡོག་པ་ཞིག་བྱུང་ན་དབུ་མའི་གཞུང་ལ་ཐོས་བསམ་གྱི་དཔྱད་པ་གཏིང་སླེབས་པ་ཡིན་ཏེ། དེ་ནས་མདོ་སྔགས་གང་གི་ལམ་ལ་ནན་ཏན་བྱས་ཀྱང་སྲོག་རྩ་ཚུགས་པ་
ཡིན་ནོ། །དེ་ལྟར་སྐབས་འདིར་སྣང་བ་མི་འགོག་ཅེས་པ་མཐུན་སྣང་ཆོས་ཅན་ཁས་ལེན་པ་ཙམ་ཞིག་གི་དོན་དུ་བསྟན་ཀྱང་གནད་བསླངས་ཏེ་ཅི་ཕྱིར་སྣང་བ་མི་འགོག་སྙམ་ན་རྩོད་པ་ཙམ་གྱི་ཆེད་དུ་ཁས་བླངས་པ་ནི་མིན་གྱི། རང་གི་གྲུབ་པའི་མཐའ་དང་མི་
13-1-146b


འགལ་བར་སྣང་བ་མི་འགོག་ཅེས་གོ་བའི་ཕུ་ཐག་གཅོད་དགོས་པ་ཡིན་ནོ། །དེ་ལྟ་བུའི་ཚུལ་རྟོགས་ན་ཐ་སྙད་དུའང་ཁས་ལེན་ཤིན་ཏུ་བདེ་སྟེ། གྲུབ་མཐའ་སྣ་ཚོགས་པའི་འཛིན་པ་སྡུག་པོ་ལ་མ་བརྟེན་པས་འཇིག་རྟེན་གྲགས་པའི་ཚད་མ་གནོད་མེད་དུ་འཇུག་
སྟེ། ཇི་སྐད་དུ། འཛིན་པ་སྟུག་ལ་མི་བརྟེན་ན། །ཐ་སྙད་རབ་ཏུ་འགྲུབ་པར་འགྱུར། །ཐ་སྙད་རྣམས་ལ་མཁས་གྱུར་ན། །བསྟན་བཅོས་དོན་ལ་རྨོངས་པ་མེད། །ཅེས་བཤད་པ་བཞིན་ནོ། །དེའང་རྣམ་པར་མི་རྟོག་པའི་དོན་ལ་རིམ་གྱིས་འཇུག་
པ་དག་གིས་དབུ་མའི་གནད་ངེས་པའི་ཚུལ་ནི། ལས་དང་པོ་པས་གཅིག་དུ་བྲལ་སོགས་ཀྱིས་བརྟགས་ཚེ་བུམ་སོགས་མི་རྙེད་པའི་དོན་ལ་བསམས་ན། མ་དཔྱད་པའི་ངོར་ཡོད་པ་འདི་ཡི། དཔྱད་ན་མེད་པ་ཉིད་གནས་ལུགས་སོ་སྙམ་པའི་སྣང་སྟོང་རེས་འཇོག་
གི་ཚུལ་དུ་སྟོང་པའི་རྣམ་པ་ཞིག་འཆར་ཞིང་། དེའི་ཚེ་དེའི་མེད་པ་ཉིད་ཀྱང་མ་གྲུབ་པའམ། ཡེ་ནས་སྟོང་བཞིན་དུ་སྣང་བ་ཡིན་པའི་ཚུལ་ལ་བསམས་པས་ཆུ་ཟླ་ལྟར་སྣང་བཞིན་སྟོང་ལ་སྟོང་བཞིན་སྣང་བའི་ངེས་པ་ཁྱད་པར་ཅན་སྐྱེ་སྟེ། དེའི་ཚེ་རང་བཞིན་མེད་པ་དང་རྟེན་འབྱུང་
འགལ་མེད་དུ་ཤར་བའམ། ཟུང་འཇུག་ཏུ་གོ་བ་ཞེས་བྱ་ཞིང་། དེ་དུས་དེ་གཉིས་ཚིག་གིས་བརྗོད་ཚུལ་ལ་ཐ་དད་ཡོད་ཀྱང་། ངོ་བོ་ལ་ཐ་དང་ཅུང་ཟད་མེད་པར་དབྱེར་མེད་པའི་ཚུལ་ལ་ངེས་ཤེས་བསྐྱེད་པས། དགག་གཞི་སྣང་བ་དང་། དགག་བྱ་བཅད་པ་སྦྱར་ནས་འཛིན་པའི་
རྣམ་རྟོག་རང་སར་ཞིག་སྟེ། དགག་སྒྲུབ་བསལ་གཞག་མེད་པར་སོར་གཞག་ཏུ་ནུས་པ་ལྟ་བུའི་སྤྲོས་བྲལ་གྱི་རྣམ་པར་འཆར་ཞིང་། དེ་འདྲའི་སྤྲོས་བྲལ་ལ་གོམས་པས་ཆོས་ཅན་ལ་ལྟོས་པའི་ཆོས་ཉིད་སོ་སོ་བ་ལྟ་བུའི་བློ་རིས་ཆད་ཀྱི་དམིགས་པའི་སྤྱོད་ཡུལ་དག་ནས།
13-1-147a


ཆོས་ཐམས་ཅད་རང་བཞིན་མཉམ་པ་ཉིད་ལ་ངེས་ཤེས་ཁྱད་པར་ཅན་སྐྱེ་བས་མཐར་ཕྱིན་ཏོ། །དེ་ལྟར་སྟོང་པ་དང་། ཟུང་འཇུག་དང་། སྤྲོས་བྲལ་དང་། མཉམ་པ་ཉིད་དེ། དབུ་མའི་འཆར་རིམ་བཞི་པོ་དེ་དག་སྔ་མ་སྔ་མ་རིམ་བཞིན་
གོམས་པ་ལ་བརྟེན་ནས། ཕྱི་མ་ཕྱི་མའི་ཚུལ་ལ་ངེས་པ་སྐྱེ་བ་ཉིད་དེ། འདི་དག་ནི་ཤིན་ཏུ་གལ་ཆེ་བའི་མན་ངག་གི་གནད་དམ་པའོ།     །གཉིས་པ་ལ་དམ་བཅའ་མདོར་བསྟན། རིགས་པས་རྒྱས་པར་སྒྲུབ་པ་གཉིས།  དང་པོ། དེ་ཕྱིར་ཐོག་
མེད་སྲིད་རྒྱུད་ནས། །དངོས་དང་དངོས་མེད་རྟོག་སོགས་ཀྱི། །རིགས་དང་མཐུན་པའི་ས་བོན་ཉིད། །རྗེས་སུ་དཔགས་པར་བྱ་བ་ཡིན། །ཞེས་གསུངས་ཏེ། དེ་ལྟར་གོང་དུ་ཇི་སྐད་བརྗོད་པ་བཞིན་དུ་དངོས་པོ་རང་བཞིན་གྱིས་གྲུབ་པ་ཅུང་ཟད་མི་སྲིད་ཀྱང་། སྲིད་
པའི་སྣང་བ་སྣ་ཚོགས་འགོག་མེད་དུ་བཀྲ་བ་དེ༷་ཡི་ཕྱིར༷་ན། ཐོ༷ག་མ་མེ༷ད་པའི་སྲི༷ད་པའི་སེམས་ཀྱི་རྒྱུ༷ད་ན༷ས་ཀྱང་། དངོ༷ས་ད༷ང་དངོ༷ས་མེ༷ད་བདག་དང་གཞན་དུ་རྟོག༷་པ་སོག༷ས་རང་ཉིད་ཀྱི༷་རི༷གས་ད༷ང་མཐུ༷ན་པའི༷་ས༷་བོ༷ན་ཉི༷ད་ཡོད་པར་གཏན་ཚིགས་ལ་བརྟེན་ནས་རྗེ༷ས་སུ་དཔ༷གས་
པ༷ར་བྱ༷་བ༷་ཡི༷ན་ཏེ། ཞེས་སོ། །འདི་ལ་སྡེབ་སྦྱོར་གོ་བདེ་བར་བསྡེབས་ན། དངོས་དངོས་མེད་ཀ་བ་དང་བུམ་པ་ནམ་མཁའ་སོགས་སྣང་རྟོག་སྣ་ཚོགས་པ་འདི་དག་སྣང་བའི་རྒྱུ། རང་རང་གི་རིགས་དང་མཐུན་པའི་རྟོག་པའི་ས་བོན་ནམ་བག་ཆགས་ཐོག་མ་མེད་པའི་རྒྱུད་
ནས་ཀྱང་རྗེས་སུ་ཞུགས་པ་ཞིག་ཡོད་པར་རིགས་པས་དཔག་ནུས་སོ། །ཞེས་གསུངས་པ་ཡིན་ནོ། །དེའང་དོན་དམ་པར་ཆོས་ཐམས་ཅད་སྤྲོས་པ་དང་བྲལ་བ་ཡིན་ནའང་དངོས་དང་དངོས་མེད་ཀྱི་འདུ་ཤེས་སྤྲོས་པ་སྣ་ཚོགས་པས་བློ་གྲོས་མི་དཀར་བ་རྣམས་ཀྱི་
13-1-147b


སེམས་ཡོངས་སུ་བསླད་དེ་དེ་དང་དེ་དག་ཏུ་སྣང་བ་ཕ་མཐའ་མེད་པ་འདི་ལ། རྒྱུ་མེད་པ་མི་སྲིད་པས་རྒྱུ་ཡོད་དགོས་ལ། རང་རང་གི་རིགས་མཐུན་གྱི་ས་བོན་བོར་ནས་རྒྱུ་གཞན་རིགས་པས་མི་འགྲུབ་པ་དེའི་ཕྱིར་ན་རིགས་མཐུན་གྱི་ས་བོན་ཙམ་སྣང་བ་སྣ་ཚོགས་པ་འདིའི་
རྒྱུ་ཡིན་པར་གྲུབ། ཅེས་སོ།     །གཉིས་པ་དེ་རིགས་པས་སྒྲུབ་པ་ལ། མི་འཐད་པ་དགག །འཐད་པ་སྒྲུབ་པའོ། །དང་པོ། འདི་ནི་དངོས་པོའི་མཐུ་སྟོབས་ཀྱིས། །འབྱུང་བ་མ་ཡིན་དེ་མེད་ཕྱིར། །དངོས་པོ་རྣམས་ཀྱི་བདག་ཉིད་དེ། །
རྒྱ་ཆེར་རབ་ཏུ་བཀག་པ་ཡིན། །རིམ་གྱིས་འབྱུང་ཕྱིར་གློ་བུར་མིན། །རྟག་འབྱུང་མ་ཡིན་རྟག་མ་ཡིན། །ཞེས་གསུངས་ཏེ།  སྣང་བ་སྣ་ཚོགས་པ་འདི་ལ་རིགས་མཐུན་གྱི་ས་བོན་མ་ཡིན་པའི་རྒྱུ་གཞན་ཅིའི་ཕྱིར་མེད་སྙམ་ན། དེ་མེད་པའི་རྒྱུ་མཚན་ནི།
གལ་ཏེ་བུམ་པ་སོགས་དངོས་པོ་རྣམས་རང་དབང་དུ་གྲུབ་ན་དེ་ལ་བརྟེན་ཏེ་དེ་དང་དེར་རྟོག་པ་འབྱུང་དུ་ཆུག་ནའང་། བུམ་སོགས་རྟོག་པའམ་སྣང་བ་འདི༷་ནི༷་སེམས་ལ་སྣང་ཙམ་ལས་ལོགས་སུ་ཐ་དད་པར་ཡོད་པའི་དངོ༷ས་པོ༷འི་མཐུ༷་སྟོབ༷ས་ཀྱིས༷་འབྱུང༷་བ༷་མ༷་ཡི༷ན་
ཏེ། དེ༷་མེ༷ད་པའི་ཕྱིར༷་རྟགས་མ་གྲུབ་སྙམ་ན། གོང་དུ་ཇི་སྐད་བཤད་པའི་རིགས་པས་ཤེས་བྱའི་དངོ༷ས་པོ༷་རྣམ༷ས་ཀྱི༷་བད༷ག་ཉི༷ད་དེ༷་དག་རྒྱ༷་ཆེར༷་ར༷བ་ཏུ༷་བཀ༷ག་ཟིན་པ༷་ཡི༷ན་པས་ན་རྟགས་ཅི་ཕྱིར་མི་འགྲུབ་སྟེ་གྲུབ་བོ། །དེས་ན་དངོས་པོ་རྣམས་རང་ངོར་སྣང་ཙམ་
འདི་ལས་རང་དབང་གིས་མ་གྲུབ་པས་ཡང་དག་པར་ན་དེ་དག་གིས་བཞག་པའི་སྣང་བའང་མི་སྲིད་དེ་རྒྱ་མེད་པའི་འབུར་བཞིན་ནོ།  །འོ་ན་དངོས་པོ་མེད་ཀྱང་རྒྱུ་མེད་དུ་སྣང་བའམ། དངོས་པོ་རང་ཉིད་མ་ཡིན་པའི་རྒྱུ་གཞན་ཞིག་གིས་དེར་སྣང་བ་ཡིན་ནམ་
13-1-148a


སྙམ་ན་མ་ཡིན་ཏེ། སྣང་བ་འདི་དག་ནི་རི༷མ་གྱི༷ས་འབྱུང༷་བའི་ཕྱིར༷་ན་རྒྱུ་མེད་པར་གློ༷་བུ༷ར་རང་གར་བྱུང་བའང་མི༷ན་ཏེ། རྒྱུ་མེད་གློ་བུར་དུ་འབྱུང་ན་རེས་འགའ་འབྱུང་བའམ། རིམ་གྱིས་འབྱུང་བ་མི་འཐད་དེ། རྟག་ཏུ་ཡོད་པའམ།
རྟག་ཏུ་མེད་པར་འགྱུར་དགོས་པ་གོང་དུ་ཇི་སྐད་བཤད་པ་ལྟར་ཡིན་པའི་ཕྱིར་རོ། །འོ་ན་བུམ་སོགས་སྣང་བ་ལ་རྒྱུ་གཞན་དབང་ཕྱུག་སོགས་ཀྱིས་བྱས་པའམ། བདག་དང་ཤེས་པ་སོགས་རྟག་པ་ལས་སྐྱེ་ན་ཅི་འགལ་སྙམ་ན་འགལ་ཏེ། སྣང་རྟོག་འདི་དག་
སྐད་ཅིག་གིས་སྐྱེ་འགག་ཅན་ཡིན་གྱི། མི་འགག་མི་འགྱུར་བར་རྟག༷་ཏུ་འབྱུང༷་བ་མ༷་ཡི༷ན་པའི་ཕྱིར་ན། རྒྱུ་རྟག༷་པ་ཞིག་ལས་བྱུང་བ་མ༷་ཡི༷ན་ནོ། །དེས་ན་སྣང་རྟོག་སྣ་ཚོགས་པ་སྣང་བ་ཙམ་ལ་བསྙོན་དུ་མེད་པ་འདི་ལ་རྒྱུ་མེད་པ་མི་སྲིད་ཅིང་། རྒྱུ་ཡོད་པའང་
ཕྱི་དོན་གྱི་དངོས་པོ་རང་གི་མཐུའམ། དངོས་པོ་ལས་གཞན་པའི་རྒྱུ་གཉིས་གང་ལས་ཀྱང་འབྱུང་མི་སྲིད་པས་སེམས་ལ་གནས་པའི་བག་ཆགས་ཀྱི་ཁམས་ཡོངས་སུ་སྨིན་པ་ལས་གྱུར་པར་རིགས་པས་ཆེས་གསལ་པོར་གྲུབ་པ་ཡིན་ནོ། །གཉིས་པ། 
དེ་བས་གོམས་འདྲ་དེ་ཉིད་ཕྱིར། །དང་པོ་རང་གི་རིགས་ལས་སྐྱེས། །ཞེས་གསུངས་ཏེ། བཤད་མ་ཐག་པའི་རྒྱུ་མཚན་དེ༷་ལྟ་བ༷ས་ན་ཕྱི་ནང་གི་སྣང་བ་སྣ་ཚོགས་པའང་གོ༷མས་པའི་བག་ཆགས་ཀྱི་དབང་གིས་བྱུང་བ། དཔེར་ན་འདོད་པ་དང་འཇིགས་པ་
བློ་ལ་གོམ༷ས་པ་དང་འདྲ༷འོ། །དེ་ལྟ་ཡིན་པ་དེ༷་ཉི༷ད་ཀྱི་ཕྱིར༷་ན་སྐྱེ་བ་སྔ་ཕྱི་ཡོད་པར་ཡང་འགྲུབ་སྟེ། འདི་ལྟར་སྐྱེས་མ་ཐག་པའི་སེམས་སྐད་ཅིག་ད༷ང་པོ༷་དེའང་ར༷ང་གི༷་རིག༷ས་མཐུན་གྱི་སེམས་སྔ་མ་ལ༷ས་སྐྱེས༷་པར་ཡང་དག་པའི་རིགས་པ་དེ་ཉིད་ཀྱིས་གྲུབ་ཅིང་།
13-1-148b


དེའི་ཚུལ་གྱིས་ཆགས་བཅས་ལ་ཡང་སྲིད་ཕྱི་མའང་ཡོད་པར་གྲུབ་པ་ཡིན་ནོ། །དེའང་སྐྱེ་བ་འདི་ཉིད་ལ་མཚོན་ན། སྔར་ཡུལ་གཞོན་ནུ་མའི་རེག་པ་ཉམས་སུ་མྱངས་པའི་སེམས་ཀྱི་བག་ཆགས་རྒྱུད་ལ་གནས་པས་ད་ལྟའང་ཡུལ་རེག་པ་དེ་ལྟ་བུ་དོན་
དུ་གཉེར་བའི་སེམས་ཀུན་ནས་སློང་ནུས་པ་དང་། ད་ལྟ་དེ་ལྟ་བུའི་འཁྲིག་པ་ཉམས་སུ་མྱངས་པའི་སེམས་ཀྱིས་དུས་ཕྱིས་ཀྱི་ཆགས་སེམས་སློང་ནུས་ལ། དེ་བཞིན་དུ་གང་དང་གང་ལ་གོམས་པ་དེ་ཇི་ལྟར་གོམས་པའི་ཤུགས་དང་མཐུན་པར་ཕྱིས་གསལ་བ་
དང་མི་གསལ་བའི་རྣམ་པར་སྣང་སྟེ། ཀློག་སོགས་བསླབས་པ་བཞིན་ནོ། །དེས་ན་གང་འདོད་ལྡན་དག་གིས་ཡུལ་བུད་མེད་བཟང་མོ་ཡང་ནས་ཡང་དུ་ཡིད་ལ་བྱས་པ་དང་། སྡར་མ་དག་གིས་སྦྲུལ་ལ་སོགས་པ་འཇིགས་པ་དག་ཡང་ཡང་ཡིད་ལ་བྱས་ནས་གོམས་པའི་
ཤུགས་ཀྱིས་མཐར་མདུན་ན་གནས་པ་ལྟ་བུའི་གསལ་སྣང་འབྱུང་བ་བཞིན་དུ། བསམ་གཏན་དང་མི་སྡུག་པ་སྒོམ་པ་སོགས་བློ་འདུ་བྱེད་ཀྱི་འཇུག་པ་ཐམས་ཅད་ཀྱང་དེ་དང་འདྲ་བ་ཡིན་ནོ། །དེ་ཉིད་ཀྱི་ཕྱིར་སྐྱེས་སེམས་སྐད་ཅིག་དང་པོའང་ཕྱི་རོལ་གྱི་དངོས་པོའི་མཐུ་ལས་མི་འབྱུང་།
རྟག་པའི་རྒྱུ་ལས་མི་འབྱུང་། རྒྱུ་མེད་དུ་མི་འབྱུང་བར་རང་གི་རིགས་འདྲ་སྔ་མ་དངོས་པོ་སོགས་སུ་རྣམ་པར་རྟོག་པ་ལས་བྱུང་བ་ཡིན་ཏེ། ད་ལྟའི་ཤེས་པ་འདི་དངོས་པོ་སོགས་སུ་རྣམ་པར་རྟོག་པ་ཡིན་པའི་ཕྱིར་ནའོ། །འདི་ལ་ཚད་མ་གྲུབ་པ་ལས་རིགས་པའི་རྣམ་གྲངས་མང་དུ་གསུངས་པ་བྲིས་ན་ཡི་གེ་མང་བར་
འགྱུར་བས་བཞག་ལ་དོན་གྱི་སྙིང་པོ་གསལ་ཞིང་རིག་པ་ཤེས་པའི་ཉེར་ལེན་གྱི་རྒྱུ་ནི་རིག་པ་ཉིད་ལས་གཞན་བེམ་པོ་སོགས་འཐད་པ་མ་ཡིན་པས་སེམས་ལས་གཞན་ལ་ལྟོས་པ་མེད་པའི་རྟགས་ཀྱིས་སྔ་མཐའ་ཐུག་མེད་དུ་བསྒྲུབ་པའི་གནད་དེ་དག་འདིར་གསུངས་པའི་རིགས་པ་
13-1-149a


འདིས་ཚར་ཕྱིན་པ་ཡིན་ནོ། །དེ་ལྟར་སྔོན་མཐའ་ཐུག་མེད་དུ་གྲུབ་པ་དེ་བཞིན་དུ། འདོད་ཆགས་དང་མ་བྲལ་བ་འཆི་བའི་སེམས་ཀྱང་བདག་དང་བདག་གི་ལ་ཆགས་པ་ཕྱིན་ཅི་ལོག་གི་བག་ཆགས་དང་འབྲེལ་བའི་ཕྱིར་སེམས་གཞན་
གྱི་མཚམས་སྦྱོར་ནུས་ཏེ་སྔ་མ་བཞིན་ནོ། །དེ་ལ་རྒྱུ་ཚང་ཞིང་གེགས་མེད་ན་འབྲས་བུ་སྐྱེ་བ་ལ་ཐེ་ཚོམ་མེད་པས། ད་ལྟའི་ཤེས་པ་སྔ་མས་ཕྱི་མ་བསྐྱེད་པ་བཞིན་དུ་འཆི་བའི་ཚེ་ནའང་རྒྱུ་རྩ་བ་བདག་འཛིན་དང་དེས་བྱས་པའི་ལས་ཉོན་གཉིས་ཀ་ཚང་ཞིང་གེགས་
བདག་མེད་རྟོགས་པ་མེད་པའི་ཕྱིར་སྲིད་པར་མཚམས་ཅིའི་ཕྱིར་མི་སྦྱོར། དེས་ན་བདག་མེད་པ་མ་རྟོགས་བར་དུ་སྲིད་པ་མི་ལྡོག་ལ། སེམས་གསལ་བ་ཙམ་ནི་བདག་འཛིན་སོགས་ལ་མི་ལྟོས་པར་རང་གི་རིགས་འདྲ་སྔ་མ་ལས་སྐྱེ་བ་ཡིན་པས་བདག་མེད་གཉིས་ཀ་
རྟོགས་ཀྱང་གེགས་མེད་ལ་རྒྱུ་ཚང་བས་ལྡོག་པ་མེད་དོ་ཞེས་རིགས་པའི་བདག་ཉིད་རྣམས་བཞེད་ལ། ཚུར་མཐོང་ཚད་མའི་ལུགས་ལྟར་ན། མ་དག་པའི་སེམས་འགགས་ཀྱང་ཡེ་ཤེས་རྒྱུན་མི་འཆད་པའི་ཚུལ་འདི་ལྟ་བུས་སྒྲུབ་དགོས་པ་ཡིན་ནོ། །དེ་དག་
འཕྲོས་དོན་དུ་སྨོས་པ་ཡིན་ལ། དེ་ལྟར་ཐ་སྙད་ཀྱི་རྣམ་གཞག་སྤྱིར་འཐད་པ་ཙམ་དུ་མ་ཟད། ཤེས་བྱ་ནང་གིར་སྨྲ་བའི་ཚུལ་གྱིས་ཐ་སྙད་འཇོག་པ་འདི་དངོས་སྟོབས་ཀྱི་རིགས་པས་གྲུབ་ཅིང་དེ་ཉིད་ཀྱི་ཕྱིར་རྟེན་ཅིང་འབྲེལ་བར་འབྱུང་བའི་དངོས་པོའི་གནས་ཚུལ་དང་མི་
མཐུན་པ་རྒྱུ་འབྲས་ཀྱི་ལམ་ལ་སྐུར་བ་འདེབས་པ་ཐམས་ཅད་ལྷག་མེད་དུ་བཅོམ་ནས་རྒྱུ་འབྲས་ཀྱི་ཚུལ་ལ་ལམ་གཞན་ལས་འཕགས་པའི་ངེས་པ་གཏིང་ཚུགས་པ་སྐྱེ་བ་ཡིན་ནོ། །བྱེ་སྨྲ་སོགས་དོན་དམ་པའི་ཚུལ་ལ་སྡང་བས་དབང་སྒྱུར་བ་དག་ན་རེ། ཆོས་
13-1-149b


ཐམས་ཅད་རང་བཞིན་མེད་པ་ཉིད་དུ་ལྟ་བ་འདི་ནི་རྒྱུ་འབྲས་སོགས་དངོས་པོ་ཐམས་ཅད་འགོག་པ་ལ་སྟོབས་མཆོག་ཏུ་གྱུར་པ་ཡིན་པས་མེད་པར་སྤྱི་བོ་ནས་དབང་བསྐུར་བའོ་ཞེས་ཟེར་ཞིང་། ཇི་སྐད་དུ། དེ་ལྟས་རྒྱུ་དང་འབྲས་བུར་སྐུར་འདེབས་པ། །ལོག་ལྟས་དཀར་
ཕྱོགས་དྲུང་འབྱིན་དམ་ཆོས་ཀྱི། །ལོ་ཏོག་སེར་བ་ནམ་མཁའི་མེ་ཏོག་འདི། །ལེགས་འདོད་རྣམས་ཀྱིས་རྒྱང་བསྲིང་སྤང་བར་བྱ། །ཞེས་རྗོད་པར་བྱེད་པ་དེ་དག་དངོས་པོ་རང་བཞིན་ཡོད་པ་ཞིག་ན་རྒྱུ་འབྲས་མི་འཐད་ལ། མེད་ན་རྒྱུ་འབྲས་ཆེས་འཐད་པའི་གནད་མ་
རྟོགས་པ་ཡིན་པས་དེ་དག་གི་སྨྲ་བ་ངན་པའང་ཚུལ་འདི་ཉིད་ཀྱིས་སེལ་བ་ཡིན་ནོ། །གསུམ་པ་བསྔགས་པའི་ཚུལ་གྱིས་མཇུག་བསྡུ་བ། དེ་ཕྱིར་རྟག་ཆད་ལྟ་བ་རྣམས། །གཞུང་འདི་ལ་ནི་རིང་དུ་གནས། །ལྡོག་དང་རྗེས་སུ་འཇུག་པ་ཡང་། །
ས་བོན་མྱུ་གུ་ལྕུགས་སོགས་བཞིན། །ཞེས་གསུངས་ཏེ། གང་རྒྱུ་མེད་ན་འབྲས་བུ་མི་འབྱུང་ལ། རྒྱུ་ཚང་ན་འབྲས་བུ་མི་ལྡོག་པའི་རྒྱུ་འབྲས་རྟེན་འབྲེལ་བསླུ་བ་མེད་པའི་སྣང་ཚུལ་དེ་ལྟ་ཡིན་པ་དེ༷་ཡི་ཕྱིར༷་ན། དངོས་པོ་སྐད་ཅིག་མ་མ་ཡིན་པའི་རྟག༷་པར་ལྟ་བ་དང་། 
དངོས་པོ་རྒྱུ་འབྲས་སུ་མི་འབྲེལ་བར་རྒྱུན་ཆ༷ད་པར་ལྟ༷་བ༷་རྣམ༷ས། ཚུལ་གཉིས་རྣམ་པར་གཞག་པའི་དབུ་མའི་གཞུ༷ང་འདི༷་ལ༷་ནི༷་ལྷན་ཅིག་ཏུ་མི་གནས་པར་རྒྱང་རིང༷་དུ༷་གན༷ས་པ་ཤེས་པར་བྱ་སྟེ། དཔེར་ན། སྣང་བའི་མདུན་ན་མུན་པ་སྐབས་མི་ཐོབ་པ་བཞིན་ནོ། །དེའང་
རྟག་ཆད་ནི་དངོས་པོ་ལ་བརྟེན་ཏེ་འབྱུང་བ་ཡིན་པའི་ཕྱིར། དོན་དམ་པར་དངོས་པོ་མེད་ན་རྟག་ཆད་དུ་ལྟ་བའང་ག་ལ་ཡོད་ཀྱང་། ཀུན་རྫོབ་རང་ལ་ལྟོས་པའི་རྟག་ཆད་ཀྱང་མི་སྲིད་པའི་ཚུལ་རྒྱུ་སྔ་མ་སྔ་མ་སྐད་ཅིག་གིས་ལྡོ༷ག་པ་ད༷ང་།  འབྲས་བུ་ཕྱི་མ་ཕྱི་མ་དག་རྒྱུའི་
13-1-150a


རྗེ༷ས་སུ༷་འཇུ༷ག་ཅིང་། རྒྱུ་ཚོགས་པ་ཚང་ན་འབྲས་བུ་ངེས་པར་སྐྱེ་བའི་རྒྱུ་འབྲས་བར་མ་ཆད་པ༷་ཡ༷ང་། དཔེར་ན་ས༷་བོ༷ན་ལས་མྱུ༷་གུ༷་དང་། དེ་ལས་ལྕུགས་ཕྲན་སྐྱེ་བ་སོག༷ས་བཞི༷ན་ཡིན་ནོ། །དེ་སྐད་དུའང་དཀོན་མཆོག་སྤྲིན་
ལས། ཇི་ལྟར་ན་བྱང་ཆུབ་སེམས་དཔའ་ཐེག་པ་ཆེན་པོ་ལ་མཁས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་བསླབ་པ་ཐམས་ཅད་ལ་ཡང་སློབ་ལ། སློབ་པའང་མི་དམིགས། བསླབ་པའི་ལམ་ཡང་མི་དམིགས། གང་སློབ་པ་དེའང་མི་
དམིགས་ཏེ། རྒྱུ་དེ་དང་རྐྱེན་དེ་དང་གཞི་དེས་ཆད་པར་ལྟ་བར་ཡང་མི་ལྟུང་། ཞེས་གསུངས་པ་དང་། ཡང་མདོ་དེ་ལས། རིགས་ཀྱི་བུ་འདི་ལ་བྱང་ཆུབ་སེམས་དཔའ་ཡང་དག་པའི་ཤེས་རབ་ཀྱིས་གཟུགས་ལ་རྟོག །ཚོར་བ་དང་འདུ་ཤེས་དང་འདུ་བྱེད་དང་།
རྣམ་པར་ཤེས་པ་ལ་རྟོག་སྟེ། དེ་གཟུགས་ལ་རྟོག་པ་ན་གཟུགས་ཀྱི་སྐྱེ་བ་མི་དམིགས། ཀུན་འབྱུང་བ་མི་དམིགས་སོ། །ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་སྐྱེ་བ་མི་དམིགས། ཀུན་འབྱུང་བ་མི་དམིགས། འགོག་པ་མི་དམིགས་
སོ། །དེའང་དོན་དམ་པར་སྐྱེ་བ་མེད་པར་དཔྱོད་པའི་ཤེས་རབ་ཀྱིས་ཡིན་གྱི། ཐ་སྙད་ཀྱི་རང་བཞིན་དུ་ནི་མ་ཡིན་ནོ། །ཞེས་གསུངས་པ་ལ་སོགས་པ་བཞིན་ནོ། །དེ་ལ་རྟག་ཆད་རགས་པ་ནི། དངོས་པོ་སྐད་ཅིག་མ་མ་ཡིན་པའི་རྟག་པ་དང་། ད་ལྟའི་
ཕུང་པོ་ལས་ཕྱི་མའི་ཕུང་པོ་མི་སྐྱེ་བའམ། ལས་ལས་འབྲས་བུ་མི་འབྱུང་བ་ལྟ་བུར། དངོས་པོའི་རྒྱུ་ཡོད་ཀྱང་དེས་རང་འབྲས་མི་བསྐྱེད་པར་འཛིན་པའི་ཆད་ལྟ་སྟེ། ཤིན་ཏུ་གཡང་ས་ལྟ་བུར་གྱུར་པའི་ཕྱི་རོལ་པའི་ལྟ་བ་ངན་པ་སེལ་བའི་གཉེན་པོར། 
13-1-150b


དངོས་པོ་རྣམས་སྐད་ཅིག་གིས་འགགས་ཤིང་། རྒྱུ་ཚང་ན་འབྲས་བུ་ངེས་པར་སྐྱེ་བའི་ཚུལ་དུ་འཛིན་པ་སྟེ། དེའང་རྒྱུ་སྔ་མའི་སྐད་ཅིག་འགགས་པར་འཛིན་པ་ནི་ཆད་ལྟ་མིན་ལ་རྟག་མཐའ་སེལ་བའི་གཉེན་པོ་ཡིན་ཞིང་། རྒྱུ་ལས་སྐད་ཅིག་ཕྱི་མའི་དངོས་པོ་སྐྱེ་
བར་འཛིན་པ་ནི་རྟག་མཐའ་མིན་ལ་ཆད་པའི་གཉེན་པོ་ཡིན་ཞིང་། དེ་གཉིས་ཐ་སྙད་ཀྱི་གནས་ཚུལ་དང་མཐུན་པར་འཛིན་པའི་བློ་ཡིན་ཀྱང་། དེ་ཙམ་གྱིས་འཇིག་རྟེན་ལས་འདས་པའི་ལྟ་བ་ཚུལ་བཞིན་སྐྱེད་མི་ནུས་པས། དངོས་པོ་རང་བཞིན་མེད་པར་ཤེས་
དགོས་ལ། དེའི་ཚེ་དེ་ལ་ལྟོས་པའི་རྟག་ཆད་ནི། དངོས་པོ་བདེན་པར་ཡོད་པ་དང་ཐ་སྙད་དུའང་མེད་པར་འཛིན་པ་ཡིན་ལ། དེའི་གཉེན་པོར། ཐ་སྙད་ཀྱིས་ཡོད་པ་ནི་མེད་མཐའ་སེལ་བའི་གཉེན་པོ་སྟེ། དེ་ཡོད་མཐའ་དང་རྟག་མཐའ་མིན་ལ། རང་བཞིན་མེད་པ་ནི་
ཡོད་མཐའ་སེལ་བའི་གཉེན་པོ་སྟེ། མེད་མཐའ་དང་ཆད་མཐའ་མིན་ཡང་། དེར་འཛིན་པ་དེ་དག་གཟུང་འཛིན་གྱི་རྣམ་པར་རྟོག་པའི་རང་བཞིན་ཙམ་སྟེ། ད་རུང་མཉམ་བཞག་རྣམ་པར་མི་རྟོག་པའི་ཡེ་ཤེས་བསྐྱེད་དགོས་པས། དེ་ལྟར་ཡོད་མེད་ཀྱི་རྣམ་པར་རྟོག་པ་
ལས་འདས་པའི་མི་རྟོག་སྤྲོས་བྲལ་མཉམ་པ་ཉིད་དུ་འཛིན་སྟངས་ཐམས་ཅད་ཞིག་པའི་ཚེ་ན། ཐ་སྙད་ཀྱིས་ཡོད་པ་དང་། རང་བཞིན་མེད་པར་འཛིན་པའི་སྤྲོས་པའི་མཐའ་གཉིས་པོ་དང་ཡང་བྲལ་ནས། དེའི་ཚེ་མཐར་འཛིན་པའི་ལྟ་བ་མ་ལུས་པ་ཞིག་ནས། 
ལྟ་ཀུན་ངེས་པར་འབྱིན་པར་གྱུར་པ་ཡིན་ཏེ། དེས་ན་མཐའ་རགས་པ་དང་། ཕྲ་བ། ཤིན་ཏུ་ཕྲ་བ་དེ་དག་སེལ་བའི་ལྟ་བ་སྔ་མ་སྔ་མ་ཕྱི་མ་ཕྱི་མའི་རྟེན་དུ་གྱུར་ཅིང་སྤྲོས་བྲལ་དུ་མཐར་ཕྱིན་ནས་དེ་ལས་བོགས་དབྱུང་དུ་མེད་པའི་གནས་ལུགས་དང་མཐུན་པའི་ལྟ་བའོ། །
13-1-151a


དེས་ན། ཡོད་དང་མེད་པ་འདི་གཉིས་མཐའ་ཡིན་ཏེ། །ཞེས་གསུངས་པ་སོགས་མཉམ་བཞག་གཉིས་སུ་མེད་པའི་ཡེ་ཤེས་དང་། རྗེས་ཐོབ་རྣམ་པར་འབྱེད་པའི་ཤེས་རབ་ཀྱིས་བསལ་བྱའི་མཐའ་ཕྲ་རགས་གཉིས་ལ་སྦྱོར་
ཚུལ་ཤེས་པར་བྱའོ། །གསུམ་པ་དེ་ལྟར་རྟོགས་པའི་ཕན་ཡོན་ལ། དོན་དམ་རང་བཞིན་མེད་རྟོགས་ཀྱི་ཕན་ཡོན། ཀུན་རྫོབ་དོན་བྱེད་ནུས་སྣང་གི་ཕན་ཡོན། དེ་གཉིས་ཟུང་འཇུག་ཏུ་གོམས་པའི་ཕན་ཡོན་གསུམ། དང་པོ། ཆོས་ལ་
བདག་མེད་མཁས་པ་ནི། །རང་བཞིན་མེད་པ་གོམས་བྱས་པས། །ཕྱིན་ཅི་ལོག་ལས་བྱུང་བ་ཡི། །ཉོན་མོངས་བསྒྲིམས་པ་མེད་པར་སྤོང་། །ཞེས་གསུངས་ཏེ། གང་ཟག་དང་བུམ་སོགས་ཤེས་བྱའི་ཆོ༷ས་རྣམས་ལ༷་བད༷ག་མེ༷ད་པའི་ཚུལ་ཡང་དག་
པའི་རིགས་པས་གཏན་ལ་ཕབ་ནས་ངེས་པའི་ཤེས་པ་ཐེ་ཚོམ་དང་བྲལ་བའི་མཁ༷ས་པ༷་རྣམས་ནི༷། ར༷ང་བཞི༷ན་མེ༷ད་པ༷་དེ་ཉིད་ལ་གོ༷མས་ཤིང་འདྲིས་པར་བྱས༷་པ༷ས། དངོས་པོའི་གནས་ཚུལ་ལ་ཕྱིན༷་ཅི༷་ལོག༷་ཏུ་སྒྲོ་བཏགས་པའི་བདག་གཉིས་ཀྱི་ཡུལ་ཅན་
གྱི་རྟོག་པ་ལ༷ས་བྱུང༷་བ༷་ཡི༷། སེམས་སྒྲིབ་ཅིང་འཆིང་བར་བྱེད་པའི་ཉོ༷ན་མོང༷ས་པ་རྣམས་ནམ་ཞིག་ཆེད་དུ་བསྒྲིམ༷ས་པ༷་མེ༷ད་པ༷ར་ཡང་ཉི་མའི་མདུན་ན་མུན་པ་ལྟར་ངང་གིས་སྤོ༷ང་བར་འགྱུར་རོ། །ཞེས་སོ། །དེའང་ལས་དང་པོ་པ་དངོས་ཞེན་གོམས་པ་ཤུགས་
དྲག་ལ། གཉེན་པོ་སྔར་མ་འདྲིས་པ་ཡིན་པས་ཆེད་དུ་བསྒྲིམས་ཀྱང་སྤོང་མི་ནུས་པ་ལྟ་བུར་གནས་ཀྱང་ནམ་ཞིག་གཉེན་པོ་གོམས་པ་ཤུགས་དྲག་པའི་ཚེ་ན་བསྒྲིམ་མི་དགོས་པར་གཉེན་པོ་སྐྱེ་ཞིང་སྤང་བྱ་འགག་ལ། མཐར་སྤང་བྱ་ཡོངས་སུ་ཟད་ནས་ཤེས་བྱའི་
13-1-151b


རྣམ་པ་མ་ལུས་པའི་རང་བཞིན་ལག་མཐིལ་དུ་སྐྱུ་རུ་ར་རློན་པའི་འབྲས་བུ་བཞག་ན་ཕྱི་ནང་མི་སྒྲིབ་པར་མཐོང་བ་བཞིན་དུ་འགྱུར་བར་དངོས་སྟོབས་ཀྱི་རིགས་པས་འགྲུབ་སྟེ། ཡུལ་ཅན་གྱི་ཡེ་ཤེས་ཡོད་པ་གང་ཞིག །དེ་ལ་ཡུལ་ཤེས་བྱ་ཐམས་ཅད་ལ་སྒྲིབ་
པའི་སྒྲིབ་པ་ཕྲ་མོའང་མེད་པས་གེགས་མེད་ཅིང་མཁྱེན་པའི་རྒྱུ་ཚང་བའི་ཕྱིར་རོ། །དེ་ལ་ལམ་རྣམས་ནི་སྤང་བྱའི་གཉེན་པོར་རིགས་པས་འགྲུབ་སྟེ། ཇི་སྐད་དུ་འཕགས་པ་ཀླུས། དངོས་པོར་ཁས་ལེན་ཡོད་ན་ནི། །འདོད་ཆགས་ཞེ་སྡང་མི་བཟད་འབྱུང་། །
ལྟ་བ་མ་རུངས་ཡོངས་སུ་འཛིན། །དེ་ལས་བྱུང་བའི་རྩོད་པར་འགྱུར། །དེ་ནི་ལྟ་བ་ཀུན་གྱི་རྒྱུ། །དེ་མེད་ཉོན་མོངས་མི་འབྱུང་སྟེ། །དེ་བས་དེ་ནི་ཡོངས་ཤེས་ན། །ལྟ་དང་ཉོན་མོངས་ཡོངས་སུ་འབྱོངས། །གང་གིས་དེ་ཤེས་འགྱུར་ཞེ་ན། །རྟེན་
ཅིང་འབྱུང་བ་མཐོང་བས་ཏེ། །བརྟེན་ནས་སྐྱེས་པ་མ་སྐྱེས་ཞེས། །ཡང་དག་མཁྱེན་པ་མཆོག་གིས་གསུངས། །ཞེས་དང་། ཟླ་བ་སྒྲོན་མེ་ལས། དེས་གང་ཆགས་པ་དང་། གང་ལ་ཆགས་པ་དང་།  གང་གིས་ཆགས་པའི་ཆོས་དེ་ཡང་དག་
པར་རྗེས་སུ་མི་མཐོང་། ཞེས་གསུངས་པ་ལ་སོགས་པ་ལྟ་བུའོ། །གཉེན་པོ་ལ་སྤང་བྱས་སླར་ཚུགས་པའི་སྐབས་ཀྱང་མི་སྲིད་དེ། རྣམ་འགྲེལ་ལས། འཚེ་བ་མེད་དང་ཡང་དག་དོན། །རང་བཞིན་ཉིད་ལ་ཕྱིན་ལོག་གིས། །འབད་དུ་ཟིན་ཀྱང་
མི་བཟློག་སྟེ། །བློ་ནི་དེ་ཕྱོགས་འཛིན་ཕྱིར་རོ། །ཞེས་པ་ལ་སོགས་པ་བཞིན་ནོ། །འདིར་ས་ལམ་གྱི་རྣམ་གཞག་ནི་སྤྱིར་གྲགས་པ་ལྟར་གཞན་དུ་ཤེས་པར་བྱ་ལ། སྤང་བྱ་སྤོང་ཚུལ་གྱི་འཕྲོས་དོན་ཅུང་ཟད་སྨོས་ན། བདག་མེད་རྣམ་གཉིས་རྟོགས་པའི་
13-1-152a


ཡེ་ཤེས་ཀྱིས་སྤང་བྱ་སྤོང་ཚུལ་གྱི་གནད་ལ་ནི་ཐེག་ཆེན་གྱི་ཤིང་རྟ་ཆེན་པོ་རྣམས་དགོངས་པ་འགལ་མེད་དུ་འཇུག་པ་ཁོ་ན་ཡིན་པས་དེ་དག་གི་ཚུལ་ཅུང་ཟད་བཤད་ན། སྤྱིར་ས་བཅུའི་ཡེ་ཤེས་ནི་བསམ་གྱིས་མི་ཁྱབ་ཅིང་། དེ་
དག་གི་སྤང་བྱ་ཕྱིན་ཅི་ལོག་གི་སྒྱུ་འཕྲུལ་ཡང་ཚད་མེད་པ་ཡོད་པས། མདོ་རྣམས་ནའང་ཚུལ་མང་དུ་བཀའ་སྩལ་ཀྱང་། སྤྱི་རིགས་ནས་ཉོན་མོངས་པ་དང་ཤེས་བྱའི་སྒྲིབ་པ་གཉིས་སུ་གྲངས་ངེས་པར་དངོས་སྟོབས་ཀྱི་རིགས་པས་འགྲུབ་སྟེ། སྐྱེས་བུས་དོན་
དུ་གཉེར་བྱའི་མཆོག་ཐར་པ་དང་ཐམས་ཅད་མཁྱེན་པ་གཉིས་ཡིན་པས་ན། དེ་དག་ལ་བར་དུ་གཅོད་པའི་ཆ་ནས་བཞག་པའི་ཕྱིར་སྒྲིབ་པའང་སྤྱི་རིགས་ལ་གཉིས་སུ་གྲངས་ངེས་པ་ལས་གཞན་པ་ཞིག་བཞག་དགོས་པ་མ་ཡིན་ནོ། །དེ་སྐད་དུའང་དབུས་
དང་མཐའ་རྣམ་པར་འབྱེད་པ་ལས། ཉོན་མོངས་པ་ཡི་སྒྲིབ་པ་དང་། །ཤེས་བྱའི་སྒྲིབ་པ་ཉིད་དུ་བསྟན། །དེར་ནི་སྒྲིབ་པ་ཐམས་ཅད་དེ། །དེ་ཟད་ནས་ནི་གྲོལ་བར་འདོད། །ཅེས་པ་ལ་སོགས་པ་མདོ་བསྟན་བཅོས་ཐམས་ཅད་ཞལ་འཆམ་
པར་འདི་གཉིས་ལས་དོན་གྱིས་གཞན་པའི་སྒྲིབ་པ་ཕུང་གསུམ་པ་ཞིག་གསུངས་པ་མེད་དོ། །བག་ཆགས་ཀྱི་སྒྲིབ་པ་ཤིན་ཏུ་ཕྲ་མོ་རྣམས་ཀྱང་དོན་ཤེས་བྱའི་རང་བཞིན་ཇི་ལྟ་བ་བཞིན་མངོན་དུ་འགྱུར་བ་ལ་གེགས་བྱེད་པ་ཡིན་པས་ཤེས་སྒྲིབ་ལས་མ་འདས་སོ། །དེའང་ཐར་པ་
ལ་གང་གིས་སྒྲིབ་ན། བདག་དང་བདག་གིར་འཛིན་པ་སོགས་ཉོན་མོངས་པ་དག་གིས་སྒྲིབ་ལ། ཆོས་ཐམས་ཅད་ཤེས་པ་ལ་གང་གིས་སྒྲིབ་ན། ཆོས་རྣམས་ཀྱི་རང་བཞིན་མངོན་དུ་མ་གྱུར་པའི་རྨོངས་པས་སྒྲིབས་སོ། །དེ་ལ་ཉོན་ཤེས་ཀྱི་སྒྲིབ་
13-1-152b


པ་གཉིས་ཀྱི་ཁྱད་པར་རྒྱུ་དང་ངོ་བོ་བྱེད་ལས་ལ་སོགས་པའི་དབྱེ་ཚུལ་དུ་མ་ཞིག་གཞུང་སོ་སོར་བྱུང་ཡང་དོན་དུ་གནད་གཅིག་ལ། མདོ་དོན་སྙིང་པོར་དྲིལ་ན་འདི་ལྟ་སྟེ། འཁོར་བར་འཁྱམས་པའི་རྒྱུའི་གཙོ་བོ་ཆགས་སོགས་ཉོན་མོངས་པ་རྣམས་ཡིན་ལ། དེ་རྣམས་ཀྱི་
མེད་ན་མི་འབྱུང་གི་རྩ་བ་ནི་འཇིག་ལྟ་ལྷན་སྐྱེས་ཡིན་པར་གསུངས་ཤིང་དེ་ལྟར་རིགས་པས་ཀྱང་འགྲུབ་པ་བཞིན། གང་ཟག་གི་བདག་ཏུ་འཛིན་པའི་རྩ་བ་ཅན་གྱི་ཉོན་མོངས་པ་ཐམས་ཅད་ཉོན་མོངས་པའི་སྒྲིབ་པ་ཡིན་ལ། ཇི་ལྟ་ཇི་སྙེད་ཀྱི་ཆོས་ཐམས་ཅད་ཇི་
བཞིན་དུ་མི་ཤེས་པ་ནི། ཆོས་རྣམས་ཀྱི་རང་བཞིན་ལ་རྨོངས་པའི་མ་རིག་པ་ཡིན་པས། ཆོས་ཀྱི་བདག་འཛིན་གྱི་རྩ་བ་ཅན་གྱི་རྨོངས་པ་ཕྲ་རགས་ཐམས་ཅད་ཤེས་བྱའི་སྒྲིབ་པ་ཡིན་ནོ། །དེ་ལྟར་ཡིན་པའི་གོ་བ་གཏིང་སླེབས་ནས་ལམ་ཉམས་ལེན་གྱི་སྐབས་
དང་སྦྱར་ན། བདག་ཏུ་འཛིན་པ་ལས་བྱུང་བའི་སེར་སྣ་སོགས་ཕྱིན་དྲུག་རང་རང་གི་མི་མཐུན་ཕྱོགས་སུ་གྱུར་པ་གང་ཞིག་དེ་ཡོད་ན་གཉེན་པོའི་ཕར་ཕྱིན་སོ་སོ་ལ་མི་འཇུག་པ་ནི་ཉོན་མོངས་པའི་སྒྲིབ་པ་ཡིན་ལ། ཞུགས་ཀྱང་ཆོས་བདག་མེད་དུ་མ་རྟོགས་པའི་ཆོས་
བདག་གི་རྩ་བ་ཅན་གྱི་འཁོར་གསུམ་དུ་བདེན་པར་རྣམ་པར་རྟོག་པ་ནི་ཤེས་བྱའི་སྒྲིབ་པ་སྟེ། དེ་སྐད་དུའང་རྒྱུད་བླ་མ་ལས། འཁོར་གསུམ་རྣམ་པར་རྟོག་པ་གང་། །དེ་ནི་ཤེས་བྱའི་སྒྲིབ་པར་འདོད། །སེར་སྣ་ལ་སོགས་རྣམ་རྟོག་གང་། །དེ་ནི་ཉོན་མོངས་
སྒྲིབ་པར་འདོད། །ཅེས་གསུངས་པ་བཞིན་ནོ། །དེས་ན་གང་ཟག་གི་བདག་མེད་རྟོགས་ན། བདག་འཛིན་དེ་ཡི་རྩ་བ་ཅན་གྱི་ཉོན་མོངས་པ་ཐམས་ཅད་ལྡོག་པར་རིགས་པས་འགྲུབ་སྟེ། གང་བདག་མེད་པར་མཐོང་ན་དེར་འཛིན་པའི་དབང་གིས་ཆགས་པ་དང་སྡང་བ་
13-1-153a


ང་རྒྱལ་ལ་སོགས་པ་མི་སྲིད་ལ་བདག་འཛིན་ཡོད་ན་དེ་དག་ཀྱང་ཡོད་པར་ངེས་སོ། །དེ་སྐད་དུའང་རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །
ལས་ལས་ཀྱང་ནི་སྐྱེ་བ་ཡིན། །ཞེས་དང་། རྣམ་འགྲེལ་ལས། བདག་ཡོད་ན་ནི་གཞན་དུ་ཤེས། །བདག་གཞན་ཆ་ལས་འཛིན་དང་སྡང་། །དེ་དག་དང་ནི་ཡོངས་འབྲེལ་ལས། །ཉེས་པ་ཐམས་ཅད་འབྱུང་བར་འགྱུར། །ཞེས་དང་།
དེས་ན་བདག་ལ་མངོན་ཆགས་པ། །དེ་སྲིད་དེ་ནི་འཁོར་བར་འགྱུར། །ཞེས་དང་། དབུ་མ་ལ་འཇུག་པ་ལས།  ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་བར་བློ་ཡིས་མཐོང་གྱུར་ནས། །ཞེས་པ་ལ་སོགས་པ་བཞིན་
ནོ། །དེ་ལྟ་བུའི་བདག་འཛིན་དེ་ནི་གཉེན་པོ་བདག་མེད་རྟོགས་པའི་ཤེས་རབ་ཀྱིས་སྤོང་བ་ཡིན་ལ།  དེའང་མཐོང་ལམ་དུ་བདེན་པའི་ཆོས་ཉིད་མངོན་སུམ་དུ་གཟིགས་ཏེ་བདེན་དོན་ལ་ཕྱིན་ཅི་ལོག་པར་ཀུན་ཏུ་བཏགས་པ་ཐམས་ཅད་སྤོང་ལ། དེ་ཕན་ཆད་སྒོམ་
ལམ་དུ་ལྷན་སྐྱེས་སྤོང་ངོ་། །ཀུན་བཏགས་ལྷན་སྐྱེས་འདི་གཉིས་ཀྱི་གོ་བའི་གནད་རྣམས་གཞན་དུ་ཤེས་པར་བྱའོ། །དེས་ན་ཉན་རང་གིས་ཉོན་སྒྲིབ་ཀྱི་གཉེན་པོ་གང་ཟག་གི་བདག་མེད་འབའ་ཞིག་བསྒོམས་པས་ཉོན་མོངས་ཐམས་ཅད་ཟད་ནུས་ཏེ་བུད་ཤིང་ཟད་
པའི་མེ་བཞིན་སྲིད་པའི་རྒྱུ་མེད་པས་འཁོར་བར་སླར་ལྡོག་པ་ནམ་ཡང་མི་སྲིད་ཀྱང་། ཆོས་ཀྱི་བདག་མེད་བསྒོམ་པ་མ་རྫོགས་པས་ཤེས་སྒྲིབ་སྤོང་བར་མི་འགྱུར་རོ། །སྤྱིར་ཤེས་བྱའི་རང་བཞིན་ལ་སྒྲིབ་པའི་རྨོངས་པ་ཐམས་ཅད་ཀྱང་ཉོན་མོངས་པའི་མིང་གིས་
13-1-153b


བསྙད་རུང་བ་ཡིན་མོད་ཀྱི། ཉོན་ཤེས་གཉིས་ཀྱི་ཟླས་ཕྱེ་བའི་ཉོན་མོངས་མ་ཡིན་པ་སོགས་སྐབས་ཐོབ་ཤན་ཕྱེད་པ་རྣམ་པ་ཀུན་ཏུ་གལ་ཆེའོ། །ཐེག་ཆེན་འཕགས་པས་ནི་མཐོང་ལམ་ནས་བརྩམས་ཏེ་ཉོན་ཤེས་གཉིས་ཀ་མཉམ་དུ་སྤོང་བར་བྱེད་ལ། ས་
བརྒྱད་པའི་སྐབས་སུ་ཡུལ་ཆོས་ཉིད་ལ་འབད་མེད་དུ་ཞུགས་པའི་ཚུལ་གྱིས་ངར་འཛིན་གྱི་རྒྱུ་བ་ཕྲ་མོའང་ཟད་པས་ན་ཉོན་མོངས་ཐམས་ཅད་ཟད་ནས་དེ་ཕན་ཆད་དག་ས་གསུམ་དུ་གཉིས་སྣང་གི་བག་ཆགས་སམ། ཤེས་སྒྲིབ་འབའ་ཞིག་སྤོང་བ་ཡིན་ནོ། །འོན་ཀྱང་
ཡུལ་ཆོས་ཀྱི་དབྱིངས་ལ་སྒྲིབ་པ་ཕྲ་མོས་ཀྱང་བར་ཆོད་པ་མེད་པས་མཉམ་པ་ཉིད་ནི་སངས་རྒྱས་ཁོ་ན་མ་གཏོགས་སློབ་པ་ལ་མི་སྲིད་དོ། །དེ་སྐད་དུའང་འཇུག་པ་ལས། ཆགས་པ་མེད་པའི་བློ་ནི་སྐྱོན་རྣམས་དག་དང་ལྷན་ཅིག་མི་གནས་ཕྱིར། །ས་བརྒྱད་
པ་ལ་དྲི་མ་དེ་དག་རྩ་བཅས་ཉེ་བར་ཞི་འགྱུར་ཞིང་། །ཉོན་མོངས་ཟད་ཅིང་ས་གསུམ་བླ་མར་གྱུར་ཀྱང་སངས་རྒྱས་རྣམས་ཀྱི་ནི། །འབྱོར་པ་མཁའ་ལྟར་མཐའ་བྲལ་མ་ལུས་འཐོབ་པར་ནུས་མ་ཡིན། །ཞེས་གསུངས་པ་སྟེ། ཚུལ་འདི་ཐལ་འགྱུར་བ་ཁོ་
ནའི་ལུགས་ནི་མ་ཡིན་ཏེ། ཐེག་ཆེན་གྱི་མདོ་སྡེ་རྣམས་ནས་འབྱུང་བ་ཤིང་རྟ་ཆེན་པོ་རྣམས་ཀྱི་བཞེད་པ་ཡིན་ནོ། །དེ་ལ་མ་དག་ས་བདུན་དུ་ཉོན་སྒྲིབ་འབའ་ཞིག་སྤངས་པར་འདོད་པའི་ལུགས་ཀྱང་བོད་འདིར་བྱུང་མོད། གཉེན་པོ་བདག་མེད་གཉིས་རྟོགས་ཀྱི་
ཡེ་ཤེས་ཡོད་པས་ན་ཤེས་སྒྲིབ་ཀྱང་ཅིའི་ཕྱིར་མི་སྤོང་སྟེ། དབུས་མཐའ་ལས། ཆོས་ཀྱི་དབྱིངས་ལ་མ་རིག་པ། །ཉོན་མོངས་ཅན་མིན་སྒྲིབ་པ་བཅུ། །ས་བཅུའི་མི་མཐུན་ཕྱོགས་རྣམས་ཀྱི། །གཉེན་པོ་དག་ནི་ས་ཡིན་ནོ། །ཞེས་གསུངས་པ་
13-1-154a


སོགས་བཀའ་དང་བསྟན་བཅོས་ཐམས་ཅད་ནས་ས་བཅུའི་ངོ་སྐལ་གྱི་སྤང་བྱ་ཤེས་སྒྲིབ་ཇི་སྙེད་གསུངས་པ་བཞིན་ཤེས་པར་བྱའོ། །དེར་ཡང་ལུགས་དེས་ཤེས་སྒྲིབ་སྤོང་བའི་མགོ་ས་བརྒྱད་པ་ནས་རྩོམ་ཞིང་། ཉན་རང་དགྲ་བཅོམ་
པ་ཆོས་ཀྱི་བདག་མེད་རྫོགས་པར་རྟོགས་ཤིང་ཉོན་སྒྲིབ་མཐའ་དག་སྤངས་ཟིན་པར་འདོད་པས་ན། དེ་ལ་མཁས་པ་གཞན་དག་གིས་བརྒལ་བ། དེ་ལྟར་ན་ཉན་རང་དགྲ་བཅོམ་ཐེག་ཆེན་ལ་ཞུགས་ཚེ་མ་དག་ས་བདུན་དུ་གཉེན་པོའི་ཡེ་ཤེས་ཐོབ་པ་ན་སྤང་བྱ་མེད་
པར་འགྱུར་ཞིང་། ས་དེའི་བར་ཆད་མེད་ལམ་གང་གི་གཉེན་པོ་ཡིན་པ་དང་། རྣམ་གྲོལ་ལམ་ཅི་ལས་གྲོལ་བར་ཡང་གཞག་ཏུ་མེད་ལ། གཞན་ཡང་། བྱང་ཆུབ་སེམས་དཔས་སྙིང་རྗེ་ཆེན་པོའི་ཐབས་མཐའ་ཡས་པ་དང་བཅས་པས་གྲངས་མེད་གཉིས་ཀྱི་
ཡུན་དུ་བདག་མེད་གོམས་པས་སྤང་བྱ་གང་ཡིན་པ། ཉན་རང་གིས་ཐབས་དང་བྲལ་ཏེ་བསྒོམས་པས་ཚེ་གསུམ་ལ་སོགས་པས་སྤོང་ནུས་ན་འཚང་རྒྱ་བ་ལ་ཐེག་ཆེན་ལས་ཐེག་དམན་མྱུར་བར་འགྱུར་བ་སོགས་རྣམ་དཔྱད་མང་པོ་མཛད་པ། ཕྱོགས་སྔ་ཕྱི་ཐམས་ཅད་
དཔྱོད་ལྡན་ཡིན་པས་རིགས་པའི་སྒྱུ་རྩལ་འགྲན་པའི་ཚུལ་ལ་ཕྱོགས་ལྷུང་བྲལ་བའི་བློས་ཉམས་མཚར་གྱི་ཚུལ་དུ་ལྟད་མོར་བྱའོ། །དེ་ལྟར་ཉོན་ཤེས་ཀྱི་སྒྲིབ་པ་གཉིས་པོའང་རྒྱང་ཆད་དུ་འཇུག་པ་མིན་ཞིང་། གཉེན་པོ་བདག་མེད་གཉིས་ཀྱང་འདྲེ་མི་
རུང་བ་མ་ཡིན་ནོ། །དེ་ལ་དཔལ་རོང་ཟོམ་པ་ཆེན་པོས་འདི་སྐད་དུ་གསུངས་ཏེ། སྡུག་ཀུན་གྱི་སྤང་བྱའི་ཉོན་མོངས་པ་དེ་དག་གཅིག་གམ་ཐ་དད་གང་ཡིན་བརྟགས་ན། གལ་ཏེ་གཅིག་ན་གཉེན་པོ་ཕྱི་མ་དོན་མེད་ལ། ཐ་དད་ན་ཁམས་དང་འགྲོ་བ་ཆོས་
13-1-154b


ཇི་སྙེད་ལ་དམིགས་པའི་ཉོན་མོངས་པ་ཐ་དད་པ་དག་ཀྱང་སྤང་དགོས་པས་སྤོང་བར་མི་ནུས་སོ་སྙམ་ན། འདི་ལྟར་བསྟན་པར་འགྱུར་ཏེ། ཉོན་མོངས་པ་རྣམས་ནི་བདག་ཏུ་ལྟ་བའི་གནས་ནས་དངོས་པོ་དང་མཚན་མར་འཛིན་པའི་ཡུལ་ལ་འབྱུང་སྟེ། དེ་དག་ལྡན་གྱི་
བར་དུ་དམིགས་པ་ཇི་སྙེད་པ་དེ་སྲིད་དུ་ཉོན་མོངས་པ་དེ་སྙེད་འབྱུང་བར་འགྱུར་རོ། །བདག་ལྟའི་གནས་ཞིག་ན་སྒྱུ་མ་མཁན་མེད་པས་དེའི་སྒྱུ་འཕྲུལ་ཉོན་མོངས་རྣམས་ཀྱང་འབྱུང་བར་མི་འགྱུར་རོ། །དེས་ན་ཉོན་མོངས་དེ་དག་གཅིག་ཐ་དད་ལས་གྲོལ་བ་ཡིན་ཏེ། 
དེས་ན་ཉན་ཐོས་རྣམས་ཆོས་རང་དང་སྤྱིའི་མཚན་ཉིད་ལ་ཞེན་པ་དག་གདུལ་བའི་ཕྱིར། འཁོར་བ་རྒྱུ་འབྲས་དང་མྱང་འདས་རྒྱུ་འབྲས་སུ་ཕྱེ་བའི་བྱེ་བྲག་གིས་བསྡུས་ནས་བདེན་བཞིར་ཕྱེ་སྟེ་བསྟན་པའི་བྱེ་བྲག་ལ་དམིགས་ནས་ཡེ་ཤེས་དང་ཉོན་མོངས་པ་གཉིས་ཀ་ཐ་
དད་དུ་རྣམ་པར་ཕྱེ་བར་ཟད་དེ། དངོས་སུ་ཡེ་ཤེས་ཐམས་ཅད་ཀྱང་གཅིག་ཡིན་ཏེ། ཆོས་ཐམས་ཅད་ལ་བདག་མེད་པར་རྟོགས་པའི་ཤེས་རབ་བོ། །ཉོན་མོངས་པ་ཐམས་ཅད་ཀྱང་གཅིག་ཡིན་ཏེ། འདི་ལྟར་བདག་ཏུ་རྨོངས་པའི་རྟོག་པའོ། །དེས་ན་གང་
ཟག་ལ་དམིགས་པའི་ཤེས་རབ་ཀྱིས་ཉོན་མོངས་པ་མི་སྤོང་ལ།  ཆོས་ལ་དམིགས་པའི་ཤེས་རབ་ཀྱང་ཕྱིན་ཅི་ལོག་གི་སྤྲོས་པ་བཅད་པའི་ཕྱོགས་ཀྱི་མཐུས་སྤོང་བར་འགྱུར་གྱི། དངོས་པོར་ལྟ་བའི་ཕྱོགས་ཀྱིས་སྤོང་བར་མི་འགྱུར་རོ། །འོ་ན་ཉན་ཐོས་དམིགས་
པ་དང་བཅས་པའི་ས་ལ་གནས་པའི་དངོས་པོར་ལྟ་བ་དང་མ་བྲལ་བ་ཡིན་ན། དེ་དག་གིས་ཉོན་མོངས་ཟད་ཅིང་བྱང་ཆུབ་ཇི་ལྟར་འཐོབ་ཅེ་ན། དེ་ལ་འདི་སྐད་དུ་བསྟན་པར་འགྱུར་ཏེ། ཉན་ཐོས་རྣམས་རང་གི་གྲུབ་མཐའ་ལས་ཉོན་མོངས་ཟད་ཅིང་འདུས་མ་བྱས་
13-1-155a


ཐོབ་པར་འདོད་ཀྱང་། ཐེག་པ་ཆེན་པོ་ལས། ཉོན་མོངས་ཀྱི་དངོས་པོ་ཟད་པ། བག་ལ་ཉལ་མ་ཟད་པ། རྣམ་སྨིན་གྱི་ཕུང་པོ་ལས་མ་འདས་པའི་གང་ཟག །ཁམས་གསུམ་ཀུན་ཏུ་སྦྱོར་བ་རྣམས་སྤངས་པས་སེམས་
ཅན་ལས་ཀྱི་ཚེ་བཀག་པ་ཞེས་བྱ་བར་འདོད་དེ། ཇི་སྐད་དུ་རྣམ་སྣང་སྒྱུ་འཕྲུལ་དྲྭ་བ་ལས། །ཐབས་དང་ཤེས་རབ་རྣམས་སྤངས་ཤིང་། །ཕྱི་རོལ་དངོས་ལ་མངོན་ཞེན་པའི། །ཐེག་པ་དམན་པ་པ་རྣམས་ཀྱིས། །བླ་མེད་བྱང་ཆུབ་ཇི་ལྟར་འཐོབ། །ཅེས་
པའི་ལན་དུ། བྱང་ཆུབ་རྣམ་པ་གཉིས་གསུངས་ཏེ། །ལྷག་མ་དང་བཅས་ལྷག་མ་མེད། །ལྷག་བཅས་ཕུང་པོའི་ངོ་བོ་སྟེ། །ཉོན་མོངས་པ་རྣམས་ཡོངས་སུ་བསྲེགས། །ལྷག་མེད་བག་ཆགས་མེད་པ་སྟེ། །མཁའ་ལྟར་དྲི་མེད་དག་པ་ཡིན། །
བྱང་ཆུབ་རྣམ་པ་འདི་ལྟ་བུར། །རྒྱལ་བ་རྣམས་ཀྱིས་ཐབས་ཀྱིས་བསྟན། །ཞེས་གསུངས་པ་ལྟ་བུར་རིག་བར་བྱའོ། །གཞན་ཡང་བྱང་ཆུབ་ནི་ཟད་མི་སྐྱེ་ཤེས་པ་ཞེས་གསུངས་ལ། འདུས་མ་བྱས་ཀྱིས་ཕྱེ་བ་ནི་འཕགས་པའི་གང་ཟག་གོ། ཞེས་
ཀྱང་འབྱུང་ན། བྱང་ཆུབ་རྣམ་པ་གསུམ་དུ་བསྟན་པ་རྣམས། ཅི་ཞིག་ཟད་ཅིང་མི་སྐྱེ་བ་ཤེས་ཞེ་ན། དེ་ལ་འདི་སྐད་དུ། ཁམས་གསུམ་ཀུན་ཏུ་སྦྱོར་བའི་ཉོན་མོངས་པ་རྣམས་སྤངས་པས་དགྲ་བཅོམ་པའོ། །གང་ཅིའང་རུང་སྟེ་ཀུན་འབྱུང་གི་ཆོས་དེ་དག་འགོག་
པའི་ཆོས་སུ་ཤེས་པས་རང་བྱང་ཆུབ་བོ། །བག་ཆགས་ཀྱི་མཚམས་སྦྱོར་བའི་ཉོན་མོངས་ཐམས་ཅད་སྤངས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །ཞེས་གསུངས་པ་ལྟ་བུའོ། །ཞེས་པ་ལ་སོགས་པ་རོང་ཟོམ་པས་གསུངས་པ་དེ་བཞིན་དུ་
13-1-155b


མགོན་པོ་ཀླུ་སྒྲུབ་དང་ཟླ་བའི་ཞབས་ལ་སོགས་པ་དགོངས་པ་གཅིག་དང་དབྱངས་གཅིག་ཏུ་གྱུར་པ་ཡིན་ཏེ། ཉོན་མོངས་པ་ཐམས་ཅད་ཀྱི་རྩ་བ་མཐར་ཐུག་ནི་རྨོངས་པ་ཙམ་ཡིན་ལ། དེའི་ཕྲ་བ་ནི་རྒྱུན་མཐའི་རྡོར་ཏིང་གི་སྤང་བྱ་གཅིག་པུ་ལ་ཐུག་པ་ཡིན་ཅིང་།
ཆོས་ཐམས་ཅད་ཀྱི་གནས་ལུགས་མཐར་ཐུག་པའང་དེ་ཁོ་ན་ཉིད་སངས་རྒྱས་ཀྱི་ཡེ་ཤེས་ཀྱི་ཡུལ་གཅིག་ལས་མི་སྲིད་ལ། དེ་ཇི་ལྟ་བ་བཞིན་དུ་གཟིགས་པའི་ཡེ་ཤེས་ཀྱང་གཅིག་སྟེ་རྣམ་པ་ཐམས་ཅད་མཁྱེན་པ་ཁོ་ནའོ། །དེ་ལྟ་བུའི་ཕྱིར་ན་རྡོ་རྗེ་ཐེག་པ་ལས།
སངས་རྒྱས་དང་སེམས་ཅན་ནི་རིག་དང་མ་རིག་པ་ཙམ་གྱི་ཁྱད་པར་རོ། །ཞེས་གསུངས་པའང་ཟབ་པར་ཤེས་ནུས་ལ། དེ་ལྟར་ཡིན་པའི་གནད་ཀྱིས་ཉན་རང་བྱང་སེམས་རྣམས་གོང་ནས་གོང་དུ་གནས་ལུགས་ལ་གཟིགས་པའི་སྒྲིབ་པ་དག་ཅིང་། བྱང་སེམས་
རྣམས་ལའང་སའི་ཁྱད་པར་གྱིས་གོང་ནས་གོང་དུ་འཕགས་ལ། མཐར་གནས་ལུགས་ཇི་ལྟ་བ་བཞིན་དུ་མངོན་དུ་གྱུར་པ་སྤང་རྟོགས་མཐར་ཕྱིན་པའི་སངས་རྒྱས་སོ། །དེས་ན་གནས་ལུགས་ཀྱི་དོན་རྟོགས་པ་དེ་ཉིད་ཡེ་ཤེས་ཡིན་ལ། དེས་གནས་ལུགས་ལ་
སྒྲིབ་པའི་ཆ་སྤངས་པའི་སྒོ་ནས་ཡུལ་ཆོས་ཀྱི་དབྱིངས་ཉིད་ལ་གཟིགས་པ་རྣམ་པར་དག་ཚུལ་གྱིས་ཁྱད་ཞུགས་པར་ཤེས་པར་བྱའོ། །དེ་ལྟར་ཡིན་པ་དེའི་གནད་ཀྱིས་མཐར་ཐུག་ཐེག་པ་གཅིག་ཏུ་འགྲུབ་པ་ཡིན་པའི་ཚུལ་མདོ་དང་བསྟན་བཅོས་རྣམས་ནས་ཡང་
ཡང་གསུངས་པ་དོན་བསྡུས་ན་འདི་ལྟ་སྟེ། དཔལ་ལྡན་ཟླ་བའི་ཞབས་ཀྱིས། གང་ཕྱིར་འདི་ན་དེ་ཉིད་ཤེས་ལས་དྲི་མ་མཐའ་དག་སེལ་བ་ནི། ལྷུར་བྱེད་གཞན་མེད་ཆོས་རྣམས་དེ་ཉིད་རྣམ་འགྱུར་དབྱེ་ལའང་བརྟེན་མིན་ཞིང་། དེ་ཉིད་ཡུལ་ཅན་བློ་གྲོས་
13-1-156a


འདི་ཡང་ཐ་དད་འགྱུར་བ་མ་ཡིན་པ། དེ་ཡི་ཕྱིར་ན་ཁྱོད་ཀྱིས་འགྲོ་ལ་ཐེག་པ་མི་མཉམ་དབྱེར་མེད་བསྟན། ཅེས་པ་ལ་སོགས་པ་མཐར་ཐུག་ཐེག་པ་གཅིག་ཏུ་འགྲུབ་པའི་རིགས་པ་རྣམས་གྲུབ་ཀྱི། གཞན་དུ་ཐེག་པ་
གཅིག་ཏུ་འགྲུབ་པའི་ཐབས་མེད་དོ། །དེས་ན་ཉན་ཐོས་དགྲ་བཅོམ་པ་རྣམས་སྤང་རྟོགས་མཐར་ཕྱིན་པའི་བྱང་ཆུབ་མ་ཡིན་པར་ཐམས་ཅད་ཀྱང་འདོད་དེ། མཐར་ཐུག་གི་ཐར་བ་མྱང་འདས་སངས་རྒྱས་ཁོ་ན་ཡིན་པའང་། རྒྱུད་བླ་མ་ལས། དེས་ན་སངས་རྒྱས་
མ་ཐོབ་པར། །མྱ་ངན་འདས་པ་མི་འཐོབ་སྟེ། །འོད་དང་འོད་ཟེར་སྤངས་ནས་ནི། །ཉི་མ་བལྟ་བར་མི་ནུས་བཞིན། །ཞེས་གསུངས་པ་བཞིན་ནོ། །དེས་ན་ཉན་རང་གིས་ཉོན་མོངས་པ་སྤངས་པའང་འཕགས་པའི་ཡེ་ཤེས་ཀྱིས་སྤངས་པ་
ཡིན་པས་སླར་ལྡོག་པ་དང་འཁོར་བར་ལས་ཉོན་གྱིས་སྐྱེ་བ་མེད་དེ་ལས་ཀྱི་ཚེ་བཀག་པ་ཡིན་པའི་ཕྱིར་རོ། །དེར་མ་ཟད་སྤང་བྱའི་ས་བོན་མ་ཟད་ཀྱང་བཟོད་པ་ཐོབ་ནས་ངན་སོང་དུ་མི་འགྲོ་བ་སོགས་ཀྱང་དེ་ལྟར་འཐད་པ་ཡིན་ནོ། །དེས་ན་ས་དང་པོར་ཐེག་ཆེན་
འཕགས་པས་བདེན་དོན་མངོན་སུམ་གཟིགས་པས་ཕྱིན་ཅི་ལོག་གི་སྒྲོ་འདོགས་ནམ་ཡང་མི་སྲིད་ལ། གོམས་པ་ལྷན་སྐྱེས་ཀྱི་སྤང་བྱ་ཕྲ་མོ་མ་སྤངས་ཀྱང་། སྦྲུལ་སྐེད་པ་བཅད་པ་ལྡང་མི་ནུས་པ་ལྟར་ལས་ཉོན་གྱིས་སྲིད་པར་སྐྱེ་བ་སོགས་རང་དབང་མེད་པ་
ནམ་ཡང་མི་སྲིད་དེ། ཇི་སྐད་དུ། འཕགས་པའི་ལམ་དང་འབྲེལ་བ་ལས། །འཇིག་ཚོགས་སྙིང་པོ་བཅོམ་རྣམས་ཀྱིས། །སྒོམ་ལམ་ཡེ་ཤེས་སྤང་བྱ་རྣམས། །གོས་ཧྲུལ་དག་དང་མཚུངས་པར་བསྟན། །ཞེས་གསུངས་པ་བཞིན་ནོ། །
13-1-156b


དེས་ན་འཕགས་ས་ཐོབ་ནས་ལས་ཉོན་གྱི་གཞན་དབང་གིས་མ་དག་པའི་འཇིག་རྟེན་དུ་སྐྱེ་བ་སོགས་ལེན་དགོས་པ་མ་ཡིན་ཀྱང་། སྙིང་རྗེའི་དབང་གིས་མ་དག་པའི་འཇིག་རྟེན་དུ་སྐྱེ་གནས་བཞིར་སྐྱེ་བ་ལེན་པ་སོགས་འཇིག་རྟེན་ཐ་མལ་པ་དང་མཐུན་པར་བསྟན་
ནས་འགྲོ་བའི་དོན་བྱེད་པ་སྟེ། ཇི་བཞིན་ཡང་དག་མཐོང་བའི་ཕྱིར། །སྐྱེ་སོགས་རྣམས་ལས་འདས་གྱུར་ཀྱང་། །སྙིང་རྗེའི་བདག་ཉིད་སྐྱེ་བ་དང་། །འཆི་དང་རྒ་དང་ན་བར་སྟོན། །ཞེས་གསུངས་པ་བཞིན་ནོ། །དེ་ལ་སྐྱེ་བ་ལེན་པའི་རྒྱུ་ནི། 
མ་དག་ས་བདུན་ལ་གནས་པ་རྣམས་ནི་གཙོ་བོར་ཐབས་མཁས་དང་སྙིང་རྗེ་དང་སྨོན་ལམ་གྱི་དབང་གིས་སྐྱེ་བ་ལེན་ལ། དག་ས་ལ་གནས་པ་རྣམས་ནི་དབང་འབྱོར་བའི་ཡེ་ཤེས་ཀྱིས་སྐྱེ་བ་སོགས་སུ་སྟོན་ཏོ། །འོ་ན་དེ་ལྟར་གཞན་དོན་དུ་སྐྱེ་བ་སོགས་སུ་
སྟོན་ན་དེའི་ཚེ་ལུས་སེམས་ལ་སྡུག་བསྔལ་གྱི་ཚོར་བ་རང་མཚན་པ་ཡོད་དམ་སྙམ་ན་མེད་དེ། མདོ་སྡེ་རྒྱན་ལས། དེ་ཡིས་ཆོས་ཀུན་སྒྱུ་མ་ལྟ་བུ་དང་། །སྐྱེ་བ་སྐྱེད་མོས་ཚལ་འགྲོ་ལྟར་རྟོགས་ནས། །འབྱོར་པའི་དུས་དང་རྒུད་པའི་དུས་ནའང་འདི། །
ཉོན་མོངས་སྡུག་བསྔལ་དག་གིས་འཇིགས་པ་མེད། །རང་གི་ཡོན་ཏན་སེམས་ཅན་ཕན་འདོགས་དགའ། །བསམ་བཞིན་སྐྱེ་བ་རྫུ་འཕྲུལ་རྣམ་པར་འཕྲུལ། །རྒྱན་དང་སྟོན་མོ་ས་མཆོག་རྩེ་དགའ་བ། །སྙིང་རྗེའི་བདག་ཉིད་མིན་པ་རྣམས་ལ་
མེད། །གཞན་དོན་བརྩོན་ལྡན་སྙིང་རྗེའི་བདག་ཉིད་འདི། །གང་ཚེ་མནར་མེད་པ་ལའང་དགར་འཛིན་པ། །དེ་འདྲ་བ་དག་སྲིད་ན་གཞན་རྟེན་ཕྱིར། །སྡུག་བསྔལ་འབྱུང་བ་རྣམས་ཀྱིས་ག་ལ་འཇིགས། །ཞེས་པ་ལ་སོགས་པ་བཞིན་ནོ། །འོ་ན་སའི་
13-1-157a


སྤང་བྱ་དེ་ལྟར་ཡིན་དུ་ཆུག་ནའང་གཉེན་པོའི་ཡེ་ཤེས་ཀྱི་དབང་དུ་ན་ཉན་རང་དགྲ་བཅོམ་ལ་ཆོས་ཀྱི་བདག་མེད་རྟོགས་པ་ཡོད་དམ་མེད་ཅེ་ན། ཆོས་ཀྱི་རྒྱལ་པོ་དྲི་མེད་འོད་ཟེར་གྱི་ཞལ་ནས་འདི་སྐད་དུ་གསུངས་ཏེ། ཉན་རང་ལ་
ཆོས་ཀྱི་བདག་མེད་རྟོགས་པ་ཡོད་མེད་ལ་སྔོན་གྱི་སློབ་དཔོན་རྣམས་རྩོད་པར་གྱུར་ནའང་། རང་ལུགས་ལ་ཉན་ཐོས་སྡེ་པ་ལ་སྔོན་ཡང་བདག་ཡོད་མེད་དུ་སྨྲ་བ་གཉིས་བྱུང་བ་ལྟར་ཅི་རིགས་སྣང་ཡང་། དགྲ་བཅོམ་པ་ཐོབ་པ་ལ་ནི་ཕུང་པོར་འཛིན་པའི་བདག་
མེད་མ་རྟོགས་པར་འབྲས་བུ་འཐོབ་མི་སྲིད་མོད། འོན་ཀྱང་དེ་དག་གི་བདག་མེད་ནི་ཡུངས་འབྲུ་སྲིན་གྱིས་ཟོས་པའི་ནང་གི་ནམ་མཁའ་བཞིན་དུ་རྒྱ་ཆུང་བར་མདོ་སྡེ་རྣམས་ནས་གསུངས་པ་ལྟར་བདག་མེད་རྫོགས་པ་མ་ཡིན་ནོ། །ཞེས་གསུངས། འདི་
ལྟ་བུའི་ལེགས་བཤད་སྨྲ་མཁན་སུའང་གངས་ཅན་ན་མ་བྱུང་ངོ་། །དེ་ལ་དེ་དག་གི་དོན་ཅུང་ཟད་བཤད་ན། དབུ་མའི་རིགས་པས་ཕུ་ཐག་བཅད་ཚེ་ཆོས་དང་གང་ཟག་གཉིས་ལ་སྟོང་གཞི་ཆོས་ཅན་གྱི་དབྱེ་བ་ཙམ་མ་གཏོགས་སྟོང་ཚུལ་ལ་ཁྱད་པར་གང་ཡང་མེད་
པས། ཕུང་པོར་བཟུང་བ་ལ་བརྟེན་ནས་བཏགས་པའི་ངའོ་སྙམ་པའི་ངར་འཛིན་ལྷན་སྐྱེས་ཀྱི་ཞེན་ཡུལ་སུན་མ་ཕྱུང་ན། རྟག་བདག་ཙམ་སྤངས་པས་ཉོན་མོངས་སྤོང་མི་ནུས་པར་རིགས་པས་གྲུབ་པ་ཡིན་ལ། དེའི་ཕྱིར་ན་ཆོས་ཀྱི་བྱེ་བྲག་ང་ཙམ་པོ་སྟོང་པར་
མཐོང་བ་ལ་ཆོས་ཀྱི་བདག་མེད་རྟོགས་པའི་ཐ་སྙད་རུང་སྟེ།  རྒྱ་མཚོ་ཧུབ་གང་འཐུངས་པ་ལ་རྒྱ་མཚོ་འཐུངས་ཞེས་བརྗོད་དུ་རུང་བ་ལྟར།  ཉན་རང་ལའང་ཆོས་ཀྱི་བདག་མེད་རྟོགས་པ་ཡོད་དོ་ཞེས་གསུངས་ཏེ། ཉན་རང་སྟོང་ཉིད་ལ་སྐྲག་ཅིང་གང་ཟག་གི་
13-1-157b


བདག་མེད་ལ་འཇུག་པ་དག་ལ་སྟོང་པ་ཉིད་སྤོང་ན་རང་ལམ་གྱི་འབྲས་བུའང་འཐོབ་མི་ནུས་ཏེ། བྱང་ཆུབ་གསུམ་པོ་སྟོང་ཉིད་རྟོགས་པ་ལ་བརྟེན་ནས་འབྱུང་བ་ཡིན་པའི་ཚུལ་བསྟན་པ་ཡིན་ལ། འོན་ཀྱང་ཉན་རང་དགྲ་བཅོམ་པ་དེ་དག་ཤེས་བྱའི་ཆོས་ཐམས་ཅད་ལ་
བདག་མེད་རྫོགས་པ་མ་ཡིན་ཏེ། ཧུབ་གཅིག་འཐུངས་ཀྱང་རྒྱ་མཚོ་ཆེན་པོའི་ཆུ་རྫོགས་པར་ཁོང་དུ་སོང་བ་མིན་པ་ལྟར། དམན་པ་ལ་དགག་པའི་སྒྲ་སྦྱར་ཏེ་ཆོས་ཀྱི་བདག་མེད་མ་རྟོགས་ཞེས་མདོ་བསྟན་བཅོས་ཀུན་ནས་གསུངས་པ་ཡིན་ལ། ཆོས་
བདག་མེད་ཡོངས་སུ་རྫོགས་པ་ཇི་ལྟ་བུ་ཞིག་ཡིན་ན། ཆོས་ཞེས་པ་དོན་བཅུ་ལ་འཇུག་ཀྱང་འདི་སྐབས་ཤེས་བྱ་ཡིན་ཏེ། དངོས་པོ་དང་དངོས་པོ་མེད་པ་འདུས་བྱས་དང་འདུས་མ་བྱས་ལ་སོགས་པ་ཐམས་ཅད་ཡིན་ནོ། །དེ་ཐམས་ཅད་སྟོང་པར་ཤེས་ན་ཆོས་
བདག་མེད་རྫོགས་པ་སྟེ། འཇུག་པ་ལས། སྤྲོས་དང་བཅས་པར་སྟོང་པ་ཉིད། །བཅུ་དྲུག་བཤད་ནས་མདོར་བསྡུས་ཏེ། །སླར་ཡང་བཞི་བཤད་དེ་དག་ནི། །ཐེག་ཆེན་དུ་ཡང་བཞེད་པ་ཡིན། །ཞེས་དེ་ཐེག་ཆེན་གྱི་ལམ་ཡིན་པར་བསྟན་ཏོ། །
འོ་ན་ཉན་རང་གིས་ཆོས་གཅིག་གི་སྟོང་པ་ཉིད་ཤེས་ན་ཐམས་ཅད་སྟོང་པར་ཅིའི་ཕྱིར་མི་ཤེས་སྙམ་པ་ནི་གྱི་ན་སྟེ། དོན་ལ་ཆོས་ཐམས་ཅད་ཀྱི་རང་བཞིན་སྟོང་པ་ཉིད་དུ་གནས་སུ་ཟིན་ཀྱང་། གཅིག་སྟོང་པར་ཤེས་ན་ཐམས་ཅད་དེ་ལྟར་མཐོང་ངེས་པའི་ཁྱབ་པ་
མེད་དེ། གང་ཟག་གི་བདག་མེད་ཙམ་ལ་ཞེན་ནས་ཆོས་བདག་མེད་དོན་དུ་མི་གཉེར་བ་དང་། ཕྱི་ནང་གི་ཡོངས་འཛིན་དང་། སྤྱོད་པ་དང་། ཡོངས་བསྔོའི་རྐྱེན་མ་ཚང་བས་རྟོགས་པ་བུལ་བ་ཡིན་པའི་ཕྱིར་རོ། །ཐེག་ཆེན་གྱི་ལུང་རིགས་འཛིན་པ་དག་
13-1-158a


ཀྱང་བློའི་རྩལ་འཕང་གིས་ཆོས་བདག་མེད་ཡོངས་སུ་རྫོགས་པར་གཏན་ལ་ཕེབས་མ་ཕེབས་དང་། སྒོམ་པའི་སྐབས་ན་སྤྲོས་བྲལ་ཇི་ལྟ་བ་བཞིན་དུ་བསྒོམ་ནུས་མི་ནུས་ཡོད་པ་བཞིན་ནོ། །གང་གིས་དངོས་པོ་
གཅིག་གི་དེ་བཞིན་ཉིད་མཐོང་ན་ཐམས་ཅད་དེ་བཞིན་དུ་མཐོང་བར་གསུངས་པ་ནི་ཉི་ཚེ་བ་མ་ཡིན་པའི་རང་བཞིན་མཉམ་པ་ཉིད་ཐམས་ཅད་ལ་འདྲ་བར་གནས་པ་ཉིད་མཐོང་ནུས་པའི་གང་ཟག་གི་དབང་དུ་བྱས་པ་ཡིན་ནོ། །གཞན་ཡང་གང་ཟག་ཐམས་ཅད་
ཀྱིས་ཆོས་གཅིག་སྟོང་པར་ཤེས་ན་ཆོས་ཀུན་སྟོང་པར་དེ་མ་ཐག་ཏུ་ཤེས་དགོས་ན། ཕྱི་དོན་རྡུལ་ཕྲན་སྟོང་པར་རྟོགས་པའི་བློ་དེས་ཀྱང་ཆོས་ཐམས་ཅད་སྟོང་པར་གཏན་ལ་ཕེབས་དགོས་ཤིང་། དེ་ལྟར་ན་དབུ་མའི་གཞུང་གི་རིགས་པ་རྒྱས་པ་ཀུན་དོན་མེད་
དུ་འགྱུར་རོ། །དེས་ན་ཐེག་ཆེན་འཕགས་པ་ཆོས་བདག་མེད་ལ་དོན་དུ་གཉེར་ཞིང་ཕྱི་ནང་གི་ཡོངས་སུ་འཛིན་པས་བཟུང་བ་རྣམས་ཀྱིས་ཀྱང་གྲངས་མེད་གཅིག་ལ་མངོན་སུམ་མཐོང་མི་ནུས་ན། ཉན་རང་དེ་ལས་ལྡོག་པས་ལྟ་ཅི་སྨོས་ཏེ། ཆོས་གཅིག་སྟོང་ཉིད་
དུ་མཐོང་ན་ཀུན་ཀྱང་མཐོང་སྙམ་པའི་ཁྱབ་མཐའ་འཆའ་ན། གྲུབ་མཐའ་བཞི་པོ་ཐམས་ཅད་དབུ་མ་འབའ་ཞིག་ཏུ་འགྱུར་བས་དེ་ལྟར་ཡིན་ན་ལས་སླ་བར་འདུག་གོ། དེའང་ཉན་རང་དགྲ་བཅོམ་པས་ཀྱང་ནམ་ཞིག་རྟོགས་དགོས་ཏེ། བསྐལ་པ་སྟོང་ཕྲག་
བཅུའི་མཐར་འགོག་པའི་དབྱིངས་ནས་སངས་རྒྱས་ཀྱི་མཐུས་བསྐུལ་ཏེ་ཐེག་ཆེན་ལ་འཇུག་པ་ཡིན་ནོ། །ཆོས་བདག་མེད་ཅེས་པའང་ཆོས་ཡིན་ནོ་ཅོག་ལ་བདག་མེད་པར་རྟོགས་པ་ཡིན་གྱི། གང་རུང་རེ་རེ་ཙམ་ལ་རྟོགས་པས་ཆོས་བདག་མེད་རྫོགས་པ་མ་ཡིན་ནོ། །
13-1-158b


དེས་ན་དངོས་དངོས་མེད་གཉིས་ཀའམ། བདེན་བདེན་མེད་གཉིས་ཀའང་བློས་ཡུལ་དུ་བྱར་རུང་གི་ཆོས་ཡིན་པས་ཐམས་ཅད་རང་བཞིན་མེད་པར་རྟོགས་ནས་སྟོང་ཉིད་བཅུ་དྲུག་ཡོངས་སུ་རྫོགས་པའི་ཡུལ་ཅན་འཛིན་པའི་མཐའ་ཐམས་ཅད་དང་བྲལ་བའི་འཕགས་
པའི་མཉམ་བཞག་ཡེ་ཤེས་ཀྱི་ཡུལ་དེ་ལ་ཆོས་བདག་མེད་པ་ཅེས་བྱ་ལ། དེ་ནི་དངོས་དངོས་མེད་གཉིས་ཀ་ལས་འདས་པའི་སྟོང་ཉིད་སྤྲོས་བྲལ་མཉམ་པ་ཉིད་ཡིན་གྱི། དངོས་པོ་བདེན་པ་བཀག་ཀྱང་དངོས་པོ་བདེན་མེད་རང་ལ་བློ་ཡི་རྟེན་བཅས་ནས་དེ་
ལས་འདའ་མ་ནུས་པ་རྣམ་བཅད་དགག་རྟོག་གི་ཡུལ་དུ་གྱུར་པའི་སྟོང་ཉིད་ཙམ་མ་ཡིན་ཏེ། དེའི་ཕྱིར་ན་ཉན་ཐོས་ཀྱིས་གང་ཟག་གི་བདག་སྟོང་པར་ཕུ་ཐག་ཆོད་མོད། དེའི་ཡུལ་ཅན་ཉི་ཚེ་བའི་མཁྱེན་པ་དེ་ལྟ་བུ་ནི་ཐེག་ཆེན་གྱི་མཐའ་ཐམས་ཅད་དང་བྲལ་བའི་མཉམ་
བཞག་ཡེ་ཤེས་ལ་བསྒྲུན་ན་རྒྱ་མཚོ་དང་བ་ལང་གི་རྨིག་རྗེས་ཀྱི་ཆུའམ། ནམ་མཁའ་དང་ཡུངས་འབྲུ་སྲིན་གྱིས་ཟོས་པའི་ནང་གི་ནམ་མཁའ་ལྟ་བུའི་ཁྱད་ཡོད་པར་གསུངས་ཤིང་། ཡེ་ཤེས་ལ་དེ་ལྟར་ཁྱད་ཡོད་པ་དེ་ཉིད་ཀྱིས་ལམ་མཐོ་དམན་དུའང་གྱུར་པ་ཡིན་
གྱི། རྟོགས་པ་ལ་ཁྱད་མེད་ན་སྤོང་བ་ལའང་ཁྱད་ཡོད་པར་མི་རིགས་ཏེ། སྤང་རྟོགས་རྗེས་སུ་འགྲོ་ལྡོག་མི་མཚུངས་ན། སྤང་བྱ་དང་གཉེན་པོའི་ཡེ་ཤེས་འགལ་བར་སྒྲུབ་པའི་ཚད་མ་མེད་པར་འགྱུར་ལ། དེ་ལྟར་ན་ལམ་དང་འབྲས་བུའི་རྣམ་པར་གཞག་པ་ལ་
ཡང་དག་པའི་རིགས་པས་བསྒྲུབ་ཏུ་མེད་པར་འགྱུར་བས་ཤིན་ཏུ་སྐུར་པ་བཏབ་པ་ལྟ་བུར་དོན་གྱིས་འགྲོ་བས་ན་ཅིས་ཀྱང་ཁས་ལེན་དཀའ་འོ། །དེས་ན་སྤང་བྱ་སྒྲིབ་པ་དང་བཅས་བཞིན་དུ་མ་བསྒྲིབས་པ་ལྟར་རྟོགས་པའམ། སྤང་བྱ་སྒྲིབ་པ་མེད་ཀྱང་བསྒྲིབས་པ་
13-1-159a


ལྟར་མ་རྟོགས་པ་གཉིས་ཀ་གང་ཡང་མི་འཐད་དེ། མུན་པ་དང་བཅས་བཞིན་དུ་ཉི་མ་ཤར་བའམ། ཉི་མ་ཤར་ཡང་གཟུགས་མི་མཐོང་བར་ཁས་བླངས་པ་དང་འདྲ་བས་རིགས་པ་སྨྲ་བ་ལ་མི་འོས་པ་ཞིག་གོ། འོ་ན་ཟླ་བས་ས་དང་
པོར་ཉན་རང་བློས་ཟིལ་གྱིས་མི་ནོན་པ་མདོ་ལས་གསུངས་པ་ཉིད་ཉན་རང་ལ་སྟོང་ཉིད་རྟོགས་པ་ཡོད་པའི་ཤེས་བྱེད་དུ་མཛད་པ་ཅི་ཞེ་ན། དེ་ནི་ཉན་རང་གིས་ཀྱང་བདག་རྐྱེན་ཉིད་འདི་བ་ཙམ་དུ་མ་མཐོང་ན་ཕྱི་རོལ་པ་བཞིན་དུ་འཕགས་པར་ཡང་མི་འགྱུར་བས་དེ་ཟིལ་གྱིས་
ནོན་པར་རིགས་ལ། བདག་མེད་མཐོང་བའི་འཕགས་པ་དེ་དག་སེམས་སེམས་བྱུང་གི་རྒྱུ་བ་འགོག་པའི་དབྱིངས་ལ་དམིགས་པའི་འདུ་བྱེད་དང་བཅས་པར་འཇུག་པ་ལ་ས་དྲུག་པ་མན་དང་ཉན་རང་དགྲ་བཅོམ་ལ་ཁྱད་མེད་པས་ཡིན་ལ། ས་བདུན་པར་འགོག་པ་
ཡང་དག་པའི་མཐའ་ལ་འདུ་བྱེད་མེད་པར་འཇུག་པའི་ཚུལ་གྱིས་བློས་ཀྱང་ལྷག་པར་བཤད་པའི་ཕྱིར་རོ། །དེ་ལ་བློས་ཟིལ་གྱིས་གནོན་ཚུལ་འདི་འགོག་པ་ལ་སྐད་ཅིག་གིས་འཇུག་ལྡངས་ནུས་མི་ནུས་ཀྱི་ཁྱད་ཡིན་ཞེས་དེའི་རྒྱུ་མཚན་དང་བཅས་ཏེ་རེད་མདའ་བ་སོགས་
བཞེད་ལ། མཁས་པ་བསོད་ནམས་སེང་གེ་སོགས་ཀྱིས་དེ་ཆེས་མི་འཐད་པའི་རིགས་པའི་གནོད་པ་བསྟན་ནས། རང་ལུགས་མཚན་འཛིན་སླར་མི་སྐྱེ་བའི་ཆོས་ཅན་ས་བདུན་པ་ན་ཐོབ་པ་ལ་བཤད་ཀྱང་། བདག་ནི་འདི་ལྟར་སེམས་ཏེ། འཕགས་པ་ལང་
ཀར་གཤེགས་པ་ལས། བློ་གྲོས་ཆེན་པོ། ས་དྲུག་པ་ནས་བཟུང་སྟེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ཉན་ཐོས་དང་། རང་སངས་རྒྱས་རྣམས་འགོག་པ་ལ་སྙོམས་པར་འཇུག་སྟེ། ས་བདུན་པ་ལ་ནི་སེམས་སྐད་ཅིག་སྐད་
13-1-159b


ཅིག་ལ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དངོས་པོ་ཐམས་ཅད་ཀྱི་ངོ་བོ་ཉིད་ཀྱི་མཚན་ཉིད་བསལ་བས་སྙོམས་པར་འཇུག་སྟེ། ཉན་ཐོས་དང་རང་སངས་རྒྱས་རྣམས་ནི་མ་ཡིན་ནོ། །ཉན་ཐོས་དང་རང་སངས་རྒྱས་དེ་དག་འགོག་པ་ལ་
སྙོམས་པར་འཇུག་པ་མངོན་པར་འདུ་བྱེད་པ་ཅན་གྱི་གཟུང་བ་དང་འཛིན་པའི་མཚན་ཉིད་དུ་ལྷུང་བའོ། །ཞེས་གསུངས་པ་དེ་སངས་རྒྱས་ཉིད་ཀྱི་དགོངས་པ་ཉིད་ཀྱིས་བཤད་པ་འདི་མཐོང་ནས་ཐེ་ཚོམ་ཆོད་དོ། །དེའང་ཉན་རང་དགྲ་བཅོམ་པ་སྤྱིར་འགོག་པ་
ལ་སྙོམས་པར་འཇུག་པ་དང་། བྱང་སེམས་ས་དྲུག་པ་ནས་འཇུག་པར་གསུངས་པའོ། །སྐབས་འདིར་བརྗོད་དགོས་པ་མང་ཡང་མདོ་ཙམ་མོ། །མདོར་ན་ཆོས་བདག་མེད་ཀྱི་ཁོངས་སུ་གང་ཟག་གི་བདག་མེད་འདུས་པ་ཡིན་གྱི། གང་ཟག་ཆོས་སུ་མ་འདུས་
པ་ཞིག་མ་ཡིན་ཀྱང་། གཙོ་བོར་འཁོར་བར་སྐྱེ་བའི་རྒྱུ་གང་ཟག་གི་བདག་ཏུ་འཛིན་པ་ཡིན་པས་དེ་ཁེགས་ན་ལས་ཉོན་གྱིས་སྲིད་པར་སྐྱེ་བ་ཁེགས་ཤིང་། ལམ་གང་གིས་ཁེགས་ན་གང་ཟག་དེ་སྟོང་པར་ཤེས་པས་འགོག་དགོས་ལ། ཚུལ་ཇི་ལྟར་འགོག་ན། 
ཕུང་པོར་འཛིན་པའམ། དམིགས་ཡུལ་གྱི་ཕུང་པོ་ལ་བརྟེན་ནས་བཏགས་པའི་ང་ཙམ་ངར་འཛིན་ལྷན་སྐྱེས་ཀྱི་ཡུལ་དུ་གྱུར་པ་དེ་བརྟེན་ནས་བཏགས་པའམ། བརྟེན་ནས་འབྱུང་བའམ། རྐྱེན་ཉིད་འདི་པ་ཙམ་ལས་རང་གི་ངོ་བོས་གྲུབ་པ་ཅུང་ཟད་ཀྱང་མེད་
པར་ཤེས་པས།  ཐག་པ་ལ་སྦྲུལ་འཛིན་ལྡོག་པ་བཞིན་དུ་བདག་འཛིན་ལྡོག་སྟེ། རྡུལ་དང་སྐད་ཅིག་དུ་མའི་ཆ་ནི་བདག་འཛིན་ལྷན་སྐྱེས་ཀྱི་འཛིན་སྟངས་ཀྱི་ཞེན་ཡུལ་དང་དངོས་སུ་འགལ་བས་དེ་རྣམས་བདག་གིས་སྟོང་པ་ཡིན་པར་ཤེས་ཤིང་གོམས་པས་བདག་
13-1-160a


འཛིན་རྩ་བ་ནས་ལྡོག་ལ། དེས་ཉོན་མོངས་པ་རྣམས་ཀྱང་ལྡོག་པ་དེ་ཙམ་གྱིས་འཁོར་བ་ལས་ཐར་བར་མཐོང་ནས་ཐེག་དམན་པ་དག་གཞན་ཆོས་ཐམས་ཅད་ལ་བདག་མེད་དོན་དུ་མི་གཉེར་མི་བསྒོམ་པ་དེས་ན་མངོན་དུ་གྱུར་པའང་
མེད་ལ། དེ་མེད་པས་སྤང་བྱ་ཤེས་སྒྲིབ་སྤངས་པའང་མེད་དོ། །དེས་ན་ཇི་སྲིད་རང་རྒྱུད་ཀྱི་ཕུང་པོ་རྒྱུན་དང་ཚོགས་པ་བློས་མ་ཕྱེ་བ་ཙམ་ལ་ང་ཞེས་གདགས་ཤིང་འཛིན་པས་ན། ཕུང་པོ་དེ་དག་དུ་མར་བསིལ་ཞིང་བློས་བཤིགས་པར་མ་གྱུར་པ་ཞིག་ན། གང་ཟག་
གི་བདག་མེད་ཀྱང་རྟོགས་ཐབས་མེད་དེ། བདག་ཏུ་གདགས་པའི་རྒྱུ་ཕུང་པོ་ལ་དམིགས་པས་ན། རིན་ཆེན་ཕྲེང་བ་ལས། ཉན་ཐོས་ཀྱི་དབང་དུ་བྱས་ནས་ཕུང་པོ་ནི་དུ་མ་འདུས་པའི་རང་བཞིན་ཉིད་ཀྱི་ཕྱིར་དོན་དམ་པར་དོན་དུ་མེད་ཚུལ་གྱི་རིགས་པ་གསུངས་ཏེ། ཉན་
ཐོས་ལ་བསྟན་པའི་མདོ་ལས། གཟུགས་ནི་ལྦུ་བ་རྡོས་པ་འདྲ། །ཞེས་པ་ལ་སོགས་པའི་དོན་བཞིན་ཕུང་པོ་ཉིད་དུ་མའི་ཆ་ལ་བཏགས་པའི་ཚུལ་རྟོགས་པ་དེས་གང་ཟག་གི་བདག་མེད་པ་ཡོངས་སུ་རྫོགས་པར་འགྱུར་རོ། །དེའང་འཇུག་པ་རང་འགྲེལ་དུ། 
བདག་མེད་འདི་ནི་འགྲོ་བ་རྣམས་གྲོལ་ཕྱིར། །ཞེས་པའི་ཐད་དུ། དེ་ལ་གང་ཟག་གི་བདག་མེད་ནི་ཉན་ཐོས་རྣམས་གྲོལ་བའི་ཕྱིར་བསྟན་ལ། བྱང་སེམས་རྣམས་ཐམས་ཅད་མཁྱེན་པ་འཐོབ་པའི་ཕྱིར་གཉིས་ཀ་བསྟན་ཏོ། །ཉན་རང་གིས་ཀྱང་རྟེན་ཅིང་
འབྲེལ་བར་འབྱུང་བ་རྐྱེན་ཉིད་འདི་པ་ཙམ་མཐོང་མོད་ཀྱི། དེ་ལྟ་ནའང་དེ་དག་ལ་ཆོས་ཀྱི་བདག་མེད་པ་ཡོངས་སུ་རྫོགས་པར་སྒོམ་པ་མེད་དེ། ཁམས་གསུམ་ན་སྤྱོད་པའི་ཉོན་མོངས་སྤོང་བའི་ཐབས་ཙམ་ཞིག་ནི་ཡོད་དོ། །དེ་དག་ལ་གང་ཟག་གི་བདག་མེད་
13-1-160b


པ་མ་ལུས་པར་སྒོམ་པ་ནི་ཡོད་པར་རྣམ་པར་བཞག་གོ། ཞེས་གསུངས་པའི་ལུང་འདིས་ཉན་རང་ལ་ཆོས་བདག་མེད་རྫོགས་པར་རྟོགས་པ་མེད་པའང་ངེས་ནུས་ཏེ། ཆོས་བདག་མེད་རྫོགས་པར་རྟོགས་པ་མིན་ཚེ་ཉོན་མོངས་མི་སྤོང་ན། ཉན་ཐོས་ཀྱིས་ཀྱང་དེ་
རྫོགས་པར་མ་བསྒོམས་ན་ཉོན་མོངས་ག་ལ་སྤོང་སྟེ། དེ་གཉིས་འགྲོ་ལྡོག་མཚུངས་སོ། །རིགས་པའང་གང་ཟག་གི་བདག་མེད་པ་ཙམ་ཁོ་ནས་ཉོན་མོངས་སྤོང་ཚུལ་རྣམ་འགྲེལ་དང་རིགས་ཚོགས་ཀྱིས་བསྟན་པ་ལྟར་རྒྱ་ཆེ་ཞིང་། ཆོས་བདག་མེད་མ་
རྫོགས་ནའང་དེ་རྟོགས་པ་ཡོད་པར་རྣམ་བདུན་ཤིང་རྟའི་རིགས་པ་སོགས་ཀྱིས་གྲུབ་ཅིང་། དེ་གོམས་པས་གསལ་སྣང་རབ་ཀྱང་འབྱུང་བར་གྲུབ་བོ། །དེའང་ཚོགས་མཐའ་ཡས་པ་སོགས་མདོར་ན་ཐབས་ཁྱད་པར་ཅན་གྱི་རྒྱུ་མ་ཚང་ན་རྟོགས་པ་ཁྱད་པར་
ཅན་མི་སྐྱེ་བར་ངེས་ཤིང་། གང་དུ་རྒྱུ་ཚང་བ་ལ་ས་དང་པོའི་ཡེ་ཤེས་སོགས་རྟོགས་པ་ཁྱད་པར་ཅན་སྐྱེ་ཞིང་། དེ་སྐྱེས་པའི་ཚེ་དེའི་ངོས་སྐལ་གྱི་སྤང་བྱའང་མེད་པར་ཤེས་པར་བྱ་ལ། སྤང་བྱ་དང་བྲལ་ན་དེའི་ངོས་སྐལ་གྱི་ཡོན་ཏན་ཀྱང་རྫོགས་པ་སྟེ། དེ་
གསུམ་རྣམ་པ་ཀུན་ཏུ་རྗེས་སུ་འགྲོ་ལྡོག་མཚུངས་པ་ཡིན་ངེས་ཀྱི། དེ་ལྟར་མིན་ན་དེའི་ནང་གི་གང་རུང་ཡོད་ལ་གང་རུང་མེད་པ་སོགས་མུ་ཇི་སྙེད་པ་སྲིད་པར་འགྱུར་ལ། དེ་ལྟར་ན་སྤང་བྱ་ཐམས་ཅད་སྤངས་ལ་རྟོགས་བྱ་མཐའ་དག་མ་རྟོགས་པ་སོགས་མུ་རྣམས་
སོ་སོ་ནས་སྲིད་པར་སྨྲ་བའི་རྒོལ་བ་ལ། དངོས་སྟོབས་ཀྱི་རིགས་པའི་ལམ་ནས་དགག་པ་ཡང་དག་བསྟན་དུ་མེད་པར་འགྱུར་བས་ན་དེ་ལྟར་ཁས་ལེན་པ་དཀའ་འོ། །མདོར་ན་ཉན་རང་ལ་ཆོས་བདག་མེད་རྫོགས་པར་རྟོགས་པ་ཡོད་ན་བཀའ་དང་དགོངས་འགྲེལ་
13-1-161a


མཐའ་དག་གི་ལུང་དང་། རིགས་པ་བརྒྱ་ཕྲག་གིས་གནོད་པ་འདའ་དཀའ་ཞིང་། ཐེག་པ་ཆེ་ཆུང་གི་མཐོང་ལམ་སོགས་ལམ་དང་འབྲས་བུའི་ཡོན་ཏན་ནི་ཉི་མ་དང་མེ་ཁྱེར་ལ་གསལ་མི་གསལ་གྱི་ཁྱད་བཞིན་དུ་མཆིས་ན།
དེ་དག་གང་ལ་བརྟེན་པ་རྟོགས་པ་ཡེ་ཤེས་འོད་ལྟ་བུ་ལ་ཁྱད་ཞུགས་པ་ཤེས་པར་བྱའོ། །དེ་ལྟར་རིགས་པའི་གནད་ཙམ་བསྟན་པས་བློ་ལྡན་རྣམས་ལ་ཆོག་གི། ཞེན་ལྟ་ཅན་ནི་འཁྲུད་དཀའ་འོ། །སྤྱིར་འདི་རིགས་སྐོར་ཐེག་གསུམ་ལམ་གྱི་འགྲོས་ཆེ་བ་ཡིན་
ཅིང་། ཚུལ་དེ་ལ་ཤིང་རྟ་ཆེན་པོ་གཉིས་ལ་སོགས་པའི་དགོངས་པ་འགལ་བ་ལྟ་བུར་འཛིན་དགོས་ན་ཡིད་ལ་ཟུག་རྔུ་ལྟར་མཆི་ཞིང་། གང་ཅི་ལའང་ཤིང་རྟ་ཆེན་པོ་རྣམས་ཀྱི་དགོངས་པའི་གནད་འབྲས་ཆན་ལ་མངར་གསུམ་གྱི་ཕྱེ་བཏབ་པ་བཞིན་ལྷན་ཅིག་ཡི་གས་
བདེ་བར་འཇུ་བ་བྱུང་ཞིང་། གཞན་ལ་ཟེར་འདོད་ཀྱི་འགྲམ་ཆུ་མི་ལྡང་ལ། གཞན་མཐོང་གི་ཡིད་སྨོན་ཡང་མི་དགོས་པར། རང་མལ་ན་རང་བློ་བདེ་བ་ཞིག་བྱུང་ན་ཐོས་བསམ་པ་དག་ལ་རྙེད་པའི་མཆོག་ཞིག་སྟེ། གཞན་དག་སུ་མ་མགུ་ཡང་ཞེ་བློ་བདེ། །
ཞེས་པ་བཞིན་ནོ། །ཀྭ་ཡེ། མཁན་སློབ་ཆོས་གསུམ་གྱི་རྗེས་འཇུག་སྔ་འགྱུར་པ་རྣམས། རྒྱལ་བའི་བཀའ་དྲི་མེད་དང་། རྒྱན་དྲུག་རྗེས་འབྲངས་དང་བཅས་པའི་གཞུང་བཟང་པོ་སྔ་འགྱུར་འདི་ཙམ་གདའ་བས། ཐོས་བསམ་དེ་ལ་བྱས་པས་ཆོག་གི། གཞན་
ཟེར་རྗེས་བརྗོད་ལ་དགའ་བ་ཙམ་གྱིས་ཅི་བྱ་སྟེ། བླ་མ་དང་ལྷག་པའི་ལྷ་དང་དམ་པའི་གཞུང་གི་སྣང་བ་དང་རྟག་ཏུ་འགྲོགས་པར་མཛོད་ཅིག །གཉིས་པ་ཀུན་རྫོབ་དོན་བྱེད་ནུས་སྣང་དུ་ཁས་བླངས་པའི་ཕན་ཡོན། རྒྱུ་དང་འབྲས་བུའི་དངོས་པོ་ནི། ཀུན་
13-1-161b


རྫོབ་ཏུ་ནི་མ་བཟློག་པས། །ཀུན་ནས་ཉོན་མོངས་རྣམ་བྱང་སོགས། །རྣམ་པར་གཞག་པ་འཁྲུགས་པ་མེད། །ཅེས་གསུངས་ཏེ། དེ་ལ་དངོས་སྨྲ་བ་རྣམས་ན་རེ། རང་བཞིན་མེད་ན། ཀུན་ནས་ཉོན་མོངས་པ་དང་། རྣམ་པར་བྱང་བའི་ཁྱད་པར་དང་། དེ་
བཞིན་དུ་དགེ་མི་དགེ། ལས་རྒྱུ་འབྲས།  རྟེན་ཅིང་འབྲེལ་བར་འབྱུང་བ་ལུགས་འབྱུང་ལྡོག །རྗེས་སུ་དཔགས་བྱ་དང་དཔོགས་བྱེད་དང་། རྟགས་ལས་རྟགས་ཅན་གྱི་བློ་འབྱུང་བ་ལྟ་བུ་བསྐྱེད་བྱ་སྐྱེད་བྱེད་སོགས་ཤེས་བྱ་རྒྱུ་འབྲས་སོ་སོའི་མཚན་ཉིད་མ་འདྲེས་པར་གཞག་
ཏུ་མི་རུང་ངོ་སྙམ་པ་ལ་སོགས་པའི་ཀླན་ཀ་ངན་པའི་ཡིད་དང་སྨྲ་བ་ཐམས་ཅད་བསལ་ནས་རྒྱུ་འབྲས་འཐད་པར་བསྟན་པའི་ཚིགས་སུ་བཅད་པ་འདི་གསུངས་སོ། །དེའང་སྐྱེད་བྱེད་རྒྱུ༷་ད༷ང་བསྐྱེད་བྱ་འབྲ༷ས་བུ༷འི་དངོ༷ས་པོ༷་དོན་བྱེད་ནུས་ཀྱི་སྣང་བ་འགོག་མེད་འདི་ནི༷། ཀུ༷ན་རྫོ༷བ་ཙམ་
དུ༷་ཡོད་པ་ནི༷་མ༷་བཟློ༷ག་པར་ཐ་སྙད་ཀྱི་ཚད་མས་དེ་ལྟར་གཞལ་ནས་འཇོག་པ་ཡིན་པ༷ས་ན། ཀུ༷ན་ན༷ས་ཉོ༷ན་མོ༷ངས་པ་དང་རྣ༷མ་པར་བྱང༷་བ་སོ༷གས་ཀྱི་རྒྱུ་འབྲས་རྗེས་སུ་འགྲོ་ལྡོག་གི་ཚུལ་རྣ༷མ་པ༷ར་གཞ༷ག་པ༷་ཀུན་སོ་སོ་རང་གི་མཚན་ཉིད་མ་ཉམས་པར་གནས་ཀྱི་རང་བཞིན་
མེད་པར་བསྟན་པས་ཀུན་རྫོབ་ཀྱི་མཚན་ཉིད་དེ་དག་འཁྲུག༷ས་ཤིང་འཆོལ་བར་གྱུར་པ༷་ནི་ཅུང་ཟད་ཀྱང་མེ༷ད་དོ་ཞེས་སོ། །འོ་ན་དངོས་པོ་རྣམས་ཀྱི་མཚན་ཉིད་གྲ་མ་ཉམས་པར་འཇོག་ནུས་ན་ཁོ་བོ་ཅག་དང་འདོད་པ་གཅིག་པར་འགྱུར་རོ་སྙམ་ན། ཁྱེད་ཅག་འདི་ལྟར་
སྣང་བ་ལྟར་དོན་དམ་པར་གྲུབ་པར་འདོད་པས། དེ་ལྟར་ན་རྡུལ་ཕྲ་རབ་ནས་རྣམ་པར་ཤེས་པ་ལ་ཐུག་གི་བར་གཅིག་པའམ་དུ་མའི་རང་བཞིན་དུ་སྒྲུབས་ལ། སྔར་བརྗོད་པ་རྣམས་ཀྱི་ལན་ཐོབས་ཤིག་དང་དེ་ཚེ་རིགས་པས་གནོད་མེད་དུ་འགྲུབ་ནུས་ན། ཁོ་བོ་ཅག་དང་ཁྱོད
13-1-162a


མཐུན་པར་འགྱུར་ཏེ། དངོས་པོ་འདི་དག་དོན་དམ་པར་ཡང་བརྫུན་པ་མ་ཡིན་པ་མི་བསླུ་བའི་ཆོས་ཅན་ནོ། །ཞེས་བདག་ཅག་ཀྱང་ཁས་ལེན་ཏོ། །ཡང་ན། ཁོ་བོ་ཅག་གིས་ཇི་སྐད་བསྟན་པའི་རིགས་པའི་རྗེས་སུ་ཞུགས་
ལ་འདི་སྣང་ཡང་བརྫུན་པར་ཁས་ལོངས་དང་འུ་བུ་ཅག་མཐུན་ནོ། །གཞན་དུ་ཇི་ལྟར་དོན་གཅིག་པ་ཡིན་ཞེས་སྨྲ་བར་ནུས་པ་མ་ཡིན་ནོ། །དེ་ལྟར་རང་བཞིན་སྟོང་པ་ལ་ངེས་པ་རྣལ་མ་ཞིག་འདྲོངས་ན་རྒྱུ་དང་འབྲས་བུ་ལ་ཡིད་ཆེས་མི་ལྡོག་པ་ཞིག་སྐྱེ་ངེས་
པ་ཡིན་ནོ། །དེ་ལྟར་མ་ཡིན་པར་རྒྱུ་དང་འབྲས་བུ་མི་འཐད་པ་འདྲ་བའི་ཚུལ་དུ་གོ་ན། དེ་དབུ་མ་ནས་བཤད་པའི་སྟོང་པ་ཉིད་ནི་མ་ཡིན་ཏེ། ཆད་ལྟ་ལ་སྟོང་པའི་མིང་གིས་བཏགས་པའི་ལམ་ཡིན་པར་ཤེས་ནས་རིང་དུ་སྤང་བར་བྱའོ། །ཇི་སྐད་དུ་སློབ་དཔོན་
ཀླུས། རྣམ་པར་དབེན་དོན་མི་ཤེས་ལ། །ཐོས་པ་ཙམ་ལ་འཇུག་བྱེད་ཅིང་། །གང་དག་བསོད་ནམས་མི་བྱེད་པ། །སྐྱེས་བུ་ཐ་ཤལ་དེ་དག་བརླག །ལས་ཀྱི་འབྲས་བུ་ཡོད་པ་དང་། །འགྲོ་བ་དག་ཀྱང་ཤིན་ཏུ་བརྗོད། །དེ་ཡི་རང་བཞིན་
ཡོངས་ཤེས་དང་། །སྐྱེ་བ་མེད་པ་དག་ཀྱང་བསྟན། །འཇིག་རྟེན་དབང་དུ་རྒྱལ་བ་རྣམས། །ང་དང་ང་ཡི་ཞེས་གསུངས་ལྟར། །ཕུང་པོ་ཁམས་དང་སྐྱེ་མཆེད་རྣམས། །དེ་བཞིན་དགོངས་པའི་དབང་གིས་གསུངས།  །ཞེས་སོ། །གཞན་ཡང་
སྟོང་པ་ཉིད་ཤིན་ཏུ་ཟབ་པས་བལྟ་དཀའ་ཞིང་། བློ་གྲོས་ཆུང་བ་རྣམས་གོ་བ་ཕྱིན་ཅི་ལོག་ཏུ་གྱུར་ན་ཕུང་བར་འགྱུར་བའི་ཚུལ་མང་དུ་གསུངས་པ་བཞིན་ནོ། །གསུམ་པ་ལ། ཚོགས་རྣམ་དག་འབྱུང་བར་མདོར་བསྟན། །དེའི་ཚུལ་རྒྱས་པར་བཤད་པ་
13-1-162b


གཉིས། །དང་པོ། འདི་ལྟར་རྒྱུ་དང་འབྲས་བུ་ཡི། །ཆོས་འདི་རྣམ་པར་བཞག་པས་ན། །ཚོགས་རྣམས་དྲི་མ་མེད་པ་ཡང་། །གཞུང་འདི་ཉིད་ལ་རུང་བ་ཡིན། །ཞེས་གསུངས་ཏེ། འདི༷་ལྟར༷་རང་བཞིན་མེད་པའི་ཚུལ་གྱི་རྒྱུ༷་ད༷ང་འབྲ༷ས་
བུ༷་ཡི༷། ཆོ༷ས་འདི༷་རྣམ༷་པ༷ར་བཞ༷ག་པ༷ས་ན༷། སྦྱིན་སོགས་བསོད་ནམས་ཀྱི་ཚོ༷གས་རྣ༷མས་ཀྱང་ཀུན་རྨོངས་ཀྱི་དྲི༷་མ༷་མེ༷ད་པའི་ཡེ་ཤེས་ཀྱི་ཚོགས་དང་ཟུང་དུ་འབྲེལ་བའི་ལམ་རྣམ་པར་དག་པ༷་ཡ༷ང་། གཞུ༷ང་འདི༷་ལྟ་བུ་ཉི༷ད་ལ༷་རུ༷ང་བ༷་ཡི༷ན་གྱི། གཞན་དངོས་པོར་སྨྲ་
བ་སོགས་ལ་ནི་མ་ཡིན་ནོ། །དེའང་དོན་དམ་པར་རང་བཞིན་མེད་ཀྱང་ཀུན་རྫོབ་སྣང་ཆའི་རྟེན་འབྲེལ་བསླུ་བ་མེད་པའི་ཡིན་ཚུལ་ཤེས་ནས་ལམ་ལ་སློབ་པ་ནི་དངོས་པོའི་གནས་ལུགས་ལ་ཕྱིན་ཅི་ལོག་གིས་བློ་བསླད་པ་མེད་པས་ན་རྣམ་པར་དག་པ་ཉིད་དུ་འགྱུར་བ་
ཡིན་ནོ། །དེ་ལ་དམིགས་པ་ཅན་རྣམས་ན་རེ། སྦྱིན་པ་གང་ཞིག་ཕན་གདགས་དང་། །མཆོད་པའི་ཕྱིར་ཡང་སྦྱིན་བྱེད་པ། །དེ་ནི་ཤིན་ཏུ་དད་པར་བྱེད། །མཐོང་མེད་གནས་པས་མ་ཡིན་ནོ། །མེད་པའི་ཕྱིར་ནི་མི་དམིགས་སམ། །འོན་
ཏེ་ཡུལ་མིན་ཕྱིར་རམ་ཅི། །མེད་ན་བསོད་ནམས་འཇིག་པར་འགྱུར། །ངལ་བའི་དོན་ཡང་མེད་པར་འགྱུར། །གསུམ་ཆར་རྒྱལ་བས་གཟིགས་པས་ན། །དེ་བས་ཡུལ་མིན་མ་ཡིན་ནོ། །རང་གི་སེམས་དང་སེམས་བྱུང་གང་། །དེ་དག་
རང་གིས་རིག་པར་བྱེད། །ཅེས་སྦྱིན་པ་ནི་ཕན་འདོགས་པའམ་མཆོད་པའི་སེམས་ཀྱིས་ཡུལ་དམིགས་ནས་སྦྱིན་པ་ནི་ཤིན་དུ་དྭང་བ་བསྐྱེད་ཀྱི། ཡུལ་མ་དམིགས་པས་མ་ཡིན་ནོ། །དེ་ལ་ཡུལ་མེད་ནས་མ་དམིགས་ན་ནི་བྱང་སེམས་རྣམས་སེམས་ཅན་གྱི་
13-1-163a


དོན་དུ་ངལ་བའང་དོན་མེད་དེ་སེམས་ཅན་རྣམས་མེད་པའི་ཕྱིར་རོ། །ཡུལ་མ་ཡིན་པའང་མིན་ཏེ། སྦྱིན་པོ་སྦྱིན་བྱ་ལེན་པོ་གསུམ་ཆར་དེ་བཞིན་གཤེགས་པས་གཟིགས་པའི་ཕྱིར་རོ། །གཞན་ཡང་སྦྱིན་བྱ་བུ་ལ་སོགས་
པ་དང་། ལེན་པོ་དང་གཏོང་པོ་དག་གི་རང་གི་སེམས་དང་སེམས་བྱུང་དག་རང་གིས་རིག་པར་བྱེད་ན་དེ་ཇི་ལྟར་ཡུལ་མིན་ཞེས་རྒོལ་བ་དེ་དག་ལ་སྙིང་པོ་ཅིའང་མེད་དེ། ཀུན་རྫོབ་ཏུ་རྒྱུ་འབྲས་ཀྱི་རྟེན་འབྲེལ་མེད་ཅེས་དགག་པ་མ་ཡིན་ན། གསུམ་ཆར་རྒྱལ་
བས་གཟིགས་པ་དང་། རང་རིག་ཅེས་པའང་ཀུན་རྫོབ་ཏུ་ཡིན་གྱི། དོན་དམ་པར་གཅིག་དང་དུ་མའི་རང་བཞིན་དང་བྲལ་བས་དེ་དག་ག་ལ་ཡོད་དོ། །གཉིས་པ་ལ། རྒྱུ་འབྲས་རྗེས་སུ་འགྲོ་ལྡོག་ཡིན་པའི་དཔེ་སྤྱིར་བསྟན་པ། ལྟ་བ་རྣམ་དག་
གིས་ཟིན་མ་ཟིན་གྱི་རྒྱུ་འབྲས་བྱེ་བྲག་ཏུ་བཤད་པ་གཉིས། དང་པོ། རྣམ་པར་དག་པའི་རྒྱུ་ལས་ནི། །འབྲས་བུ་རྣམ་པར་དག་པ་འབྱུང་། །ཡང་དག་ལྟས་བྱུང་ཚུལ་ཁྲིམས་ཀྱི། །ཡན་ལག་ལ་སོགས་རྣམ་དག་བཞིན། །དེ་བཞིན་རྣམ་དག་མ་
ཡིན་ལས། །འབྲས་བུ་རྣམ་དག་མ་ཡིན་འབྱུང་། །ལོག་ལྟའི་སྟོབས་ལས་བྱུང་བ་ཡི། །ལོག་པར་གཡེམས་ལ་སོགས་པ་བཞིན། །ཞེས་གསུངས་ཏེ། འབྲས་བུ་ཐམས་ཅད་ནི་རྒྱུའི་རྗེས་སུ་འགྲོ་བ་དང་། ལྡོག་པ་དང་། མཐུན་པར་བྱེད་
པས་ན། རྒྱུ་རྣམ་པར་དག་མ་དག་གི་འབྲས་བུའང་རྣམ་པར་དག་མ་དག་ཏུ་འགྱུར་བ་ཡིན་ཏེ། དེའང་རྣ༷མ་པ༷ར་ད༷ག་པའི་རྒྱུ༷་ལ༷ས་ནི༷། འབྲ༷ས་བུ༷འང་རྣམ༷་པ༷ར་ད༷ག་པ༷་འབྱུང༷་སྟེ། དཔེར་ན་ལེགས་པར་སྤྱད་པ་དང་ཉེས་པར་སྤྱད་པའི་ལས་རྣམས་ཀྱི་འབྲས་བུ་ཡོད་
13-1-163b


པར་ལྟ་བ་འཇིག་རྟེན་པའི་ཡ༷ང་ད༷ག་པར་ལྟ༷་བ་ལ༷ས་བྱུང༷་བའི་སྲོག་མི་གཅོད་པ་སོགས་ཚུལ༷་ཁྲི༷མས་ཀྱི༷་ཡན་ལག་དང་། དེ་བཞིན་དུ་བག་ཡོད་ཀྱི་ཡ༷ན་ལ༷ག་ལ༷་སོ༷གས་པའང་རྣམ༷་པར་ད༷ག་པ་ཉིད་དུ་འགྱུར་བ་བཞིན་དང་། རྒྱུ༷་ལྟ་བུའི་རྗེས་སུ་འབྲས་བུ་ཚུལ་ཁྲིམས་
ཀྱི་ཡན་ལག་སོགས་ཀྱང་འབྲངས་ནས་རྣམ་པར་དག་པ་དེ༷་བཞི༷ན་དུ། གལ་ཏེ་རྒྱུ་རྣམ༷་ད༷ག་མ༷་ཡི༷ན་པ་ཞིག་ན་དེ་ལ༷ས། འབྲ༷ས་བུ༷་དག་ཀྱང་རྣ༷མ་ད༷ག་མ༷་ཡི༷ན་པ་འབྱུ༷ང་སྟེ། དཔེར་ན་ལས་འབྲས་མེད་པར་ལྟ་བ་ལོ༷ག་ལྟའི༷་སྟོབ༷ས་ལ༷ས་བྱུང༷་བ༷་ཡི༷་ལོ༷ག་པ༷ར་
གཡེ༷མས་པ་ལ༷་སོག༷ས་པའི་མི་དགེ་བ་སྤྱོད་པ༷་བཞི༷ན་ནོ། གཉིས་པ། ཚད་མའི་གནོད་པ་ཡོད་པས་ན། །དངོས་པོར་དམིགས་པ་ཡོད་པ་ནི། །སྨིག་རྒྱུ་ལ་སོགས་ཤེས་པ་བཞིན། །ཕྱིན་ཅི་ལོག་པར་ཡོངས་སུ་རྟོག །དེ་ཕྱིར་དེ་མཐུས་བྱུང་
བ་ཡི། །ཕ་རོལ་ཕྱིན་པ་སྒྲུབ་པ་ཀུན། །བདག་དང་བདག་གིར་ལོག་པ་ལས། །བྱུང་བ་བཞིན་དུ་སྟོབས་ཆུང་ངོ་། །དངོས་པོར་དམིགས་པ་མེད་པ་ལས། །བྱུང་བ་འབྲས་བུ་ཆེན་པོ་སྟེ། །རྒྱས་པའི་རྒྱུ་ལས་བྱུང་བའི་ཕྱིར། །ས་བོན་གྲུང་པོའི་
མྱུག་སོགས་བཞིན། །ཞེས་གསུངས་ཏེ། གོང་དུ་འབྲས་བུ་རྣམ་པར་དག་མི་དག་རྒྱུ་ལ་རག་ལས་པའི་ཚུལ་སྤྱིར་བསྟན་ནས། སྐབས་སུ་བབས་པ་དངོས་པོར་དམིགས་པ་ཅན་གྱི་སྦྱིན་སོགས་ཚོགས་རྣམ་དག་མ་ཡིན་ཞིང་། དངོས་པོར་དམིགས་པ་མེད་
པའི་སྦྱིན་སོགས་ལ་སྤྱད་པ་ཚོགས་རྣམ་དག་ཡིན་པར་སྟོན་ལ། དེའང་ཅིའི་ཕྱིར་དངོས་པོར་དམིགས་པས་ཚོགས་མི་དག་སྙམ་ན། འདི་ལྟར་ཡང་དག་པའི་རིགས་པས་དཔྱད་ན། ཚ༷ད་མ༷འི་གནོ༷ད་པ༷་ཡོ༷ད་པ༷ས་ན༷་དངོས་པོར་ཡོད་པ་མ་ཡིན་ལ། དངོས་པོ་
13-1-164a


མེད་བཞིན་དུ་དངོ༷ས་པོ༷ར་དམི༷གས་པ༷་ཡོ༷ད་པ༷་ཅན་ནི༷། ཕྱིན་ཅི་ལོག་གི་རྟོག་པས་བསླད་པ་སྟེ། དཔེར་ན་སྨི༷ག་རྒྱུ༷་ལ་ཆུར་ཤེས་པ་དང་མགལ་མེ་ལ་འཁོར་ལོར་འཛིན་པ་ལ༷་སོ༷གས་པའི་ཤེ༷ས་པ༷་བཞི༷ན་དུ་ཡུལ་གྱི་གནས་ཚུལ་
ཕྱིན༷་ཅི༷་ལོ༷ག་པ༷ར་ཡོ༷ངས་སུ༷་རྟོག༷་པ་ཡིན་ནོ། །དེ་ལྟར་དངོས་པོར་འཛིན་པ་ལོག་ཤེས་ཡིན་པ་དེ༷་ཡི་ཕྱིར་ན། དངོས་འཛིན་གྱི་ལྟ་བ་དེ༷་ཡི་མཐུ༷་ལ༷ས་བྱུང༷་བ༷་ཡི༷་སྦྱིན་སོགས་ཕ༷་རོ༷ལ་ཕྱིན༷་པ༷་སྒྲུབ༷་པ༷་ཀུན༷་ཀྱང་དངོས་པོའི་རང་བཞིན་ལ་སྒྲིབ་པར་བྱེད་པ་ཕྱིན་ཅི་ལོག་གི་
རྟོག་པས་བསླད་པས། དཔེར་ན་མུ་སྟེགས་རྣམས་ཀྱིས་བདག་མེད་པ་ལ་བད༷ག་ད༷ང་བད༷ག་གི༷ར་བཟུང་སྟེ་ལོ༷ག་པར་ཞེན་པའི་འཇིག་ཚོགས་ལྟ་བ་ལ་གནས་བཞིན་པ༷་ལ༷ས་བྱུང༷་བའི་དཀའ་ཐུབ་ལ་སོགས་པ་རྫོགས་བྱང་གི་ཡན་ལག་ཡང་དག་པའི་ལམ་དུ་མི་རུང་བ༷་
བཞི༷ན་དུ༷། དངོས་ཞེན་ཅན་གྱིས་ལམ་བསྒྲུབས་པ་འདིའང་ནོར་བའི་བློ་ཡི་དབང་དུ་སོང་ནས་སྟོབ༷ས་ཆུང༷་ངོ༷་། །དེ་ལས་བཟློག་སྟེ་དངོ༷ས་པོ༷ར་དམི༷གས་པ༷་མེ༷ད་པ་ལ༷ས་བྱུང༷་བ༷་སྦྱིན་སོགས་ནི་མཐར་ཐུག་གི་འབྲ༷ས་བུ༷་ཆེ༷ན་པོ༷་སངས་རྒྱས་ཉིད་སྦྱིན་པར་བྱེད་པ་སྟེ། 
དངོས་པོའི་ཡིན་ཚུལ་མ་ནོར་བའི་ཡེ་ཤེས་ཀྱི་དབང་དུ་བྱས་པས་ན། འབྲས་བུ་སྨིན་དུ་རུང་བའམ། རྒྱས༷་པར་བྱེད་པའི༷་རྒྱུ༷་རྣམ་དག་ལ༷ས་བྱུང༷་བའི༷་ཕྱིར༷། དཔེར་ན་ས༷་བོ༷ན་གྲུ༷ང་པོ༷་སྟེ༷། སྐྱོན་མ་ཞུགས་པའི༷་མྱུ༷་གུ་དང་སྙེ་མ་ལ་སོ༷གས་པ་བཞི༷ན་ནོ། །ཞེས་སོ། །
དེ་ལ་བདག་ཏུ་དམིགས་བཞིན་དུ་རྫོགས་བྱང་དོན་གཉེར་གྱི་དགེ་བ་རྣམས་ཀྱང་རྣམ་མཁྱེན་གྱི་རྒྱུར་འགྱུར་བ་སྲིད་ཀྱང་། བརྒྱུད་ནས་འགྱུར་བ་ཙམ་ཡིན་གྱི་དངོས་སུ་ནི་མ་ཡིན་ཏེ། དངོས་སུ་བདག་ལྟ་དང་མ་བྲལ་བཞིན་དུ་ཐར་ལམ་རྣལ་མ་མི་འབྱུང་བ་ཡིན་ལ། དེ་
13-1-164b


མི་འབྱུང་བའི་གནད་ཀྱང་ཕྱིན་ཅི་ལོག་གི་ལྟ་བས་བསླད་པའི་ཕྱིར་རོ། །དེས་ན་རང་འགྲེལ་ལས། དེ་མ་ཐག་ཏུ་ཡང་དག་པར་རྫོགས་པའི་བྱང་ཆུབ་ཀྱི་ཡན་ལག་ཏུ་མི་འགྱུར་ཞེས་དེ་མ་ཐག་པའི་དོན་བར་དུ་གཞན་བརྒྱུད་དགོས་པའི་དོན་ཏོ། །དེས་ན་མཆོད་དང་
ཕན་གདགས་པར་འདོད་པས་གང་སྦྱིན་པ་དེའང་འཁོར་གསུམ་དག་པར་བྱིན་ན་དེ་ཉིད་བློ་གྲོས་དང་ལྡན་པ་རྣམས་ཀྱིས་ཡི་རང་བའི་གནས་སུ་འགྱུར་ཏེ། ཕྱིན་ཅི་མ་ལོག་པར་ཤེས་ཤིང་ཚུལ་བཞིན་ཞུགས་པ་གཏི་མུག་མེད་པའི་དགེ་བའི་རྩ་བ་ཡིན་པའི་ཕྱིར་རོ། །དེ་ཡང་།
ཆོས་ཡང་དག་པར་སྡུད་པ་ལས། བཅོམ་ལྡན་འདས་ཆོས་ཐམས་ཅད་མི་མཐོང་བ་ནི་ཡང་དག་པར་མཐོང་བའོ། །ཞེས་དང་། རྒྱལ་བའི་ཡུམ་སུམ་བརྒྱ་པ་ལས། རབ་འབྱོར་འདི་ཇི་སྙམ་དུ་སེམས། །ཤར་ཕྱོགས་ཀྱི་ནམ་མཁའ་ཚད་གཟུང་བར་སླའམ། 
རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །ཞེས་བྱ་བ་ནས། རབ་འབྱོར་དེ་བཞིན་དུ་བྱང་ཆུབ་སེམས་དཔའ་གང་མི་གནས་པར་ཡོངས་སུ་མི་གནས་པར་སྦྱིན་པ་གཏོང་བ་དེའི་བསོད་ནམས་ཀྱི་ཕུང་པོའང་ཚད་གཟུང་བར་སླ་བ་མ་ཡིན་ནོ། །
ཞེས་བྱ་བའི་བར་དུ་གསུངས་སོ། །ཡང་དེ་ཉིད་ལས། རབ་འབྱོར་འདི་ལྟ་སྟེ། དཔེར་ན་མིག་དང་ལྡན་པའི་མི་ཞིག་མུན་པར་ཞུགས་ན་ཅིའང་མི་མཐོང་བ་དེ་བཞིན་དུ་གང་དངོས་པོར་ལྟུངས་པའི་སྦྱིན་པ་ཡོངས་སུ་གཏོང་བའི་བྱང་ཆུབ་སེམས་དཔར་བལྟའོ། །
རབ་འབྱོར་འདི་ལྟ་སྟེ། དཔེར་ན་ནམ་ལངས་ཏེ་ཉི་མ་ཤར་ནས་མིག་དང་ལྡན་པའི་མིས་གཟུགས་རྣམ་པ་སྣ་ཚོགས་དག་མཐོང་བ་དེ་བཞིན་དུ་གང་དངོས་པོར་མ་ལྷུངས་པས་སྦྱིན་པ་ཡོངས་སུ་གཏོང་བའི་བྱང་ཆུབ་སེམས་དཔར་བལྟའོ། །ཞེས་གསུངས་སོ། །
13-1-165a


གཉིས་པ་བདེན་གཉིས་དེ་འདྲ་བའི་ཚུལ་ལ་བསྔགས་པའི་དོན་བསྡུ་བ་ལ།  ཚུལ་གཉིས་ཤིང་རྟའི་སྲོལ་རྣམ་པར་གཞག་པ་དང་། དེ་ལ་བསྔགས་པ་གཉིས། དང་པོ་ལ་ཐ་སྙད་ཀྱི་དེ་ཁོ་ན་ཉིད་རྣམ་པར་གཞག་པ་དང་། 
ཚུལ་གཉིས་ཟུང་དུ་འབྲེལ་བའི་ལམ་རྣམ་པར་གཞག་པ་གཉིས། དང་པོ། རྒྱུ་དང་འབྲས་བུར་གྱུར་པ་ཡང་། །ཤེས་པ་འབའ་ཞིག་ཁོ་ན་སྟེ། །རང་གིས་གྲུབ་པ་གང་ཡིན་པ།  །དེ་ནི་ཤེས་པར་གནས་པ་ཡིན། །ཞེས་གསུངས་ཏེ། འོ་ན་དེ་ལྟར་
རྒྱུ་དང་འབྲས་བུར་གྱུར་པ་རྟེན་ཅིང་འབྲེལ་བར་འབྱུང་བའི་སྣང་ཚུལ་དེ་དག་སེམས་དང་སེམས་བྱུང་ཙམ་གྱི་བདག་ཉིད་ཁོ་ནའམ། ཅི་སྟེ་ཕྱིའི་བདག་ཉིད་ཡིན་ཞེ་ན། །དེ་ལ་སློབ་དཔོན་ལེགས་ལྡན་འབྱེད་ལ་སོགས་པ་ནི་ཕྱིའི་བདག་ཉིད་དུ་བཞེད་དེ། མདོ་ལས་
སེམས་ཙམ་ཞེས་གསུངས་པ་བྱེད་པ་པོ་དང་ཟ་བ་པོ་དགག་པའི་ཆེད་ཡིན་ནོ། །ཞེས་གསུངས་ཀྱང་། དེ་ལས་གཞན་པ་གཞུང་འདིར་ནི། རྒྱུ༷་ད༷ང་འབྲ༷ས་བུ༷ར་གྱུར༷་པ༷་ཡ༷ང་། ཤེ༷ས་པ༷་འབ༷འ་ཞི༷ག་ཁོ༷་ན༷་མ་གཏོགས་ཕྱི་རོལ་གྱི་དོན་གུད་ན་མེད་པར་འདོད་པ་སྟེ། ཤེས་
པ་ར༷ང་གི༷ས་གསལ་པོར་ཉམས་སུ་མྱོངས་པས་གྲུ༷བ་པ༷་ག༷ང་ཡི༷ན་པ༷་དེ༷་ནི༷་ཤེ༷ས་པ༷ར་གན༷ས་པ༷་ཡི༷ན་གྱི་གཞན་དུ་མི་འཐད་དོ། །དེ་ལ་གང་སྣང་ཞིང་ཤེས་པ་དེ་དག་ཤེས་པ་རང་གིས་མྱོང་བ་དང་ཐ་མི་དད་ཀྱི། རང་གིས་གསལ་པོར་མྱོངས་བས་གྲུབ་པའི་ངོ་བོ་དེ་སྤངས་ནས། 
དོན་གཞན་དེ་ཉིད་རྟོག་པའི་ཚུལ་ནམ་ཡང་མི་སྲིད་དེ། གལ་ཏེ་སྲིད་ན་གསལ་རིག་དང་བྲལ་བཞིན་རྟོག་དགོས་ལ། གསལ་རིག་དང་བྲལ་ན་ཤེས་པ་ཉིད་དུ་མི་རུང་ཞིང་། དེ་ལྟ་བས་ན་ཤེས་པ་ནི་མེད་ལ་དོན་གསལ་བ་ནི་ཡོད་པ་ཞིག་མི་རུང་བས། གང་མྱོང་བ་
13-1-165b


ཐམས་ཅད་ཤེས་པ་ཉིད་ཡིན་པར་གྲུབ་སྟེ། རྨི་ལམ་དང་སྒྱུ་མ་ལ་སོགས་པའི་གཟུགས་བཞིན་ནོ། །གལ་ཏེ་གཟུགས་ལ་སོགས་པའི་ཕྱི་རོལ་གྱི་དོན་རྣམས་རྣམ་ཤེས་ལས་གུད་དུ་ཡོད་པར་ཆུག་ནའང་། མིག་ལ་སོགས་པ་བཞིན་དུ་དུས་མཉམ་པ་དང་མི་མཉམ་
པའི་ཚེ་ནའང་འབྲེལ་བའི་རྒྱུ་མེད་པས་མངོན་སུམ་གྱིས་གྲུབ་པར་མི་འགྱུར་རོ། །དེ་བས་ན་སྔོ་སོགས་མྱོང་བ་ནི་ཤེས་པ་དང་ཐ་དད་མ་ཡིན་པའི་ངོ་བོ་མྱོང་སྟེ། རྨི་ལམ་ལ་སོགས་པའི་གཟུགས་མྱོང་བ་བཞིན་ནོ། །གལ་ཏེ་རྣམ་པ་མྱོང་བ་ནི་ཤེས་པ་ཡིན་དགོས་
ཀྱང་། རྣམ་པ་དེ་གཏོད་བྱེད་ཀྱི་ཕྱི་དོན་ཡོད་དགོས་པར་རྗེས་སུ་དཔགས་སོ་སྙམ་ན། དེ་ལྟར་ན་ཕྱི་དོན་རྡུལ་ཕྲ་མོ་ལ་སོགས་པ་མེད་པར་ཡང་རྗེས་སུ་དཔགས་པའི་ཕྱིར་དེ་ཡོད་པར་མི་འཐད་དེ།  ཡོད་པར་དཔགས་པའི་ལུགས་ལའང་མངོན་སུམ་དུ་ནི་མི་འགྲུབ་
པའི་ལྐོག་གྱུར་ལ་རྗེས་དཔགས་ཙམ་ཡིན་ལ། ཕྱི་དོན་མེད་པའི་རྗེས་དཔགས་དང་མངོན་སུམ་མྱོང་བ་སེམས་རང་གིས་གྲུབ་པ་ཙམ་ནི་ཤིན་ཏུ་སྟོབས་དང་ལྡན་པས་ཕྱོགས་གཞན་གྱིས་འཕྲོག་པར་མི་ནུས་སོ། །དེ་ལྟར་བྱས་ན་རྒྱན་སྟུག་པོ་བཀོད་པ་དང་།
དགོངས་པ་ངེས་འགྲེལ། ལང་ཀར་གཤེགས་པ་ལ་སོགས་པའི་མདོ་རྣམས་དང་ཡང་མཐུན་པ་ཡིན་ནོ། །དེས་ན་རྗེས་ཐོབ་ཤན་འབྱེད་པའི་ཚེ་དབུ་མ་པ་ལ་ཐ་སྙད་དུ་ཕྱི་དོན་འདོད་པ་དང་མི་འདོད་པ་གཉིས་ལས་མཐའ་གཞན་སེལ་བ་ཡིན་ནོ། །
གཉིས་པ། སེམས་ཙམ་ལ་ནི་བརྟེན་ནས་སུ། །ཕྱི་རོལ་དངོས་མེད་ཤེས་པར་བྱ། །ཚུལ་འདིར་བརྟེན་ནས་དེ་ལ་ཡང་། །ཤིན་ཏུ་བདག་མེད་ཤེས་པར་བྱ། །ཞེས་གསུངས་ཏེ། སྣང་ཚོད་པ་འདི་ཀུན་སེ༷མས་ཙ༷མ་ལས་ཕྱི་རོལ་དོན་དུ་མེད་པར་
13-1-166a


ཤེས་པའི་ཚུལ་ལ༷་ནི༷་བརྟེན༷་ནས༷་སུ༷། ཕྱི༷་རོ༷ལ་གྱི་དོན་དངོ༷ས་མེ༷ད་དུ་ཤེ༷ས་པ༷ར་བྱ༷་ཞིང་། དེ་ནས་ཚུ༷ལ་འདི༷ར་ཇི་སྐད་བཤད་པའི་གཅིག་དང་དུ་མར་བྲལ་བའི་གཏན་ཚིགས་ལ་བརྟེ༷ན་ན༷ས་སེམས་དེ༷་ལ༷་ཡ༷ང་། ཤིན༷་ཏུ༷་བད༷ག་མེ༷ད་པ་མཐའ་
ཐམས་ཅད་སྤངས་པ་སྤྲོས་བྲལ་དབུ་མའི་ཚུལ་ཉིད་དུ་ཤེས༷་པ༷ར་བྱ༷འོ། །དེ་ལྟར་ན་འཇིག་རྟེན་ལས་འདས་པའི་ལེའུ་ལས། ཀྱེ། རྒྱལ་བའི་སྲས་ཁམས་གསུམ་པོ་ནི་སེམས་ཙམ་དུ་རྟོགས་ཏེ། དུས་གསུམ་ཡང་སེམས་དང་མཚུངས་པར་རྟོགས་སོ། །
སེམས་དེའང་མཐའ་དང་དབུས་མེད་པར་ཁོང་དུ་ཆུད་དོ། །ཞེས་བསྟན་པ་འདི་ལེགས་པར་བཤད་པར་འགྱུར་ཏེ། ཕྱོགས་དུས་ཀྱི་སྣང་བ་ཐམས་ཅད་སེམས་སུ་ཤེས་ཤིང་། སེམས་དེའང་སྐྱེ་བ་དང་འཇིག་པའི་མཐའ་དང་། ད་ལྟ་གནས་པའི་མཚན་ཉིད་དབུས་མེད་པར་
མཐའ་བྲལ་དུ་ཤེས་པའི་ཕྱིར་རོ། །ཆོས་ཡང་དག་པར་སྡུད་པ་ལས་ཀྱང་། བཅོམ་ལྡན་འདས་ཆོས་ཐམས་ཅད་ནི་ཀུན་བརྟགས་པའི་སྙིང་པོ་སྟེ། སེམས་ཙམ་དུ་བས་པ། རྫས་མ་མཆིས་པ། སྒྱུ་མ་ལྟ་བུ་རྩ་བ་མ་མཆིས་པའོ། །ཞེས་དང་། ཤེས་རབ་
ཀྱི་ཕ་རོལ་ཏུ་ཕྱིན་པ་ལས། འདི་ལྟར་སེམས་དེ་ནི་སེམས་མ་མཆིས་པ་སྟེ། སེམས་ཀྱི་རང་བཞིན་ནི་འོད་གསལ་བ་ལགས་སོ། །ཞེས་གསུངས་སོ། །གཉིས་པ་དེ་ལ་བསྔགས་པ་ལ། མདོར་བསྟན་རྒྱས་བཤད་གཉིས། དང་པོ། ཚུལ་
གཉིས་ཤིང་རྟ་ཞོན་ནས་སུ། །རིགས་པའི་སྲབ་སྐྱོགས་འཇུ་བྱེད་པ། །དེ་དག་དེ་ཕྱིར་ཇི་བཞིན་དོན། །ཐེག་པ་ཆེན་པོ་པ་ཉིད་འཐོབ། །ཅེས་གསུངས་ཏེ། དེ་ལྟར་ཐ་སྙད་སེམས་ཙམ་གྱི་ཚུལ་དང་། དོན་དམ་དབུ་མའི་ཚུལ་ཏེ། ཚུ༷ལ་དེ་གཉི༷ས་ཟུང་དུ་འབྲེལ་བའི་
13-1-166b


ལམ་ཤི༷ང་རྟ༷་ཆེན་པོ་ལ་ཞོ༷ན་ན༷ས་སུ༷། བདེན་གཉིས་དཔྱོད་པའི་ཚད་མ་ཤེས་རབ་དྲི་མེད་ཀྱི་རི༷གས་པའི་སྲ༷བ་སྐྱོག༷ས་མི་གཏོང་བར་འཇུ༷་བར་བྱེ༷ད་པ༷་དེ༷་ད༷ག །རྨད་དུ་བྱུང་བའི་ཚུལ་བཟང་པོ་ལ་གནས་པ་དེ༷་ཉིད་ཀྱི་ཕྱིར༷། ཇི༷་བཞི༷ན་དོ༷ན་དང་ལྡན་པའི་ཐེ༷ག་པ༷་ཆེན༷་པོ༷་པ༷་ཞེས་པའི་
མིང་ཉི༷ད་འཐོ༷བ་པ་ཡིན་ནོ། །དེ་ལ་སངས་རྒྱས་ཀྱི་ཐེག་པ་ཆེན་པོ་ནི་གཉིས་ཏེ། ཟབ་པ་དང་རྒྱ་ཆེ་བའོ། །དེ་དག་སྟོན་པར་བྱེད་པའང་དབུ་སེམས་ཀྱི་གཞུང་ལུགས་སྟོན་པར་བྱེད་པའི་བཀའ་རྣམས་སོ། །དེ་དག་གི་དགོངས་པ་འགྲེལ་པའང་ཀླུ་སྒྲུབ་དང་ཐོགས་
མེད་དེ་ཤིང་རྟ་རྣམ་པ་གཉིས་ཀྱི་ལམ་སྲོལ་དྲི་མ་མེད་པའོ། །ལམ་དེ་དག་ཀྱང་རང་རང་གིས་གང་འདོད་པ་ཉིད་རྩལ་དུ་བཏོན་ཏེ་ཕྱོགས་བཅད་པ་ལྟ་བུ་ནི་མ་ཡིན་ཏེ། སངས་རྒྱས་ཀྱི་བཀའ་ཟབ་མོའི་ཆ་དང་། རྒྱ་ཆེ་བའི་ཆ་གཉིས་གསལ་བར་བྱས་པ་ཙམ་མོ། །
དེས་ན་དེ་དག་གི་དགོངས་པ་ཟུང་གཅིག་ཏུ་ཆུད་ན། བཅོམ་ལྡན་འདས་ཀྱིས་ཐ་སྙད་ཀུན་རྫོབ་བདེན་པའི་རྣམ་གཞག་ཀུན་ཉོན་དང་རྣམ་བྱང་གིས་བསྡུས་པ་ཇི་སྙེད་བཀའ་སྩལ་པའི་མཐར་ཐུག་པ་སེམས་ཙམ་གྱི་ཚུལ་རྟོགས་པ་ལ་རག་ལས་ཤིང་། གཟུགས་ནས་རྣམ་
མཁྱེན་བར་གྱི་ཆོས་ཐམས་ཅད་རང་བཞིན་སྤྲོས་བྲལ་ཆེན་པོར་གཏན་ལ་འབེབས་པ་མཐར་ཐུག་དབུ་མ་ལ་ཐུག་པའི་ཕྱིར་ན། ཟབ་པ་དང་རྒྱ་ཆེ་བའི་ཕྱོགས་རིས་སུ་ཆད་པ་མེད་པའི་ཐེག་པ་ཆེན་པོ་ལ་ཞུགས་པ་ཡིན་ནོ། །དེས་ན་ཚུལ་གཉིས་ཤིང་རྟ་ཆེན་པོའི་
གཞུང་མཁའ་དང་མཚོ་ལྟར་ཟབ་ཅིང་རྒྱ་ཆེ་བ་ཉིད་ཕྱོགས་རིས་སུ་མ་ཆད་པར་རྫོགས་པར་ཁོང་དུ་བསྐྱིལ་བ་ནི་རྒྱ་གར་དུའང་དཀོན་ན་བོད་དུ་ལྟ་ཅི་སྨོས། དེས་ན་འཕགས་ཡུལ་ཉིད་ན་ཤིང་རྟའི་ལུགས་སྲོལ་སོ་སོ་བ་སྐྱོང་བ་དེའི་ཚེ་ན། སློབ་དཔོན་འདི་ཉིད་ཀྱིས་ཟབ་པ་དང་
13-1-167a


རྒྱ་ཆེ་བ་གཉིས་ཀ་ཐེག་པ་ཆེན་པོའི་ཁྱད་ཆོས་མེད་དུ་མི་རུང་བ་ཡིན་པས་ཚུལ་གཉིས་ཤིང་རྟའི་ལམ་སྲོལ་གཞུང་གཅིག་ཏུ་བསྐྱིལ་བ་འདི་ནི་གཞན་ལས་ཆེས་ཁྱད་པར་དུ་འཕགས་པ་ཡིན་ཏེ། དེ་བས་ན་ཚུལ་འདི་ལྟ་བུའི་གཞུང་
བཟུང་བ་ནི། དཔེར་ན་ཤིང་རྟ་བཟང་པོ་ལ་ཞོན་པ་ལྟ་བུའོ། །དེའང་ཤིང་རྟ་དང་ཇི་ལྟར་འདྲ་ན། སྤྱིར་ཐེག་པ་ནི་བཞོན་པ་དང་འདྲ་སྟེ། དེ་ལ་གནས་ན་རང་འདོད་པའི་འབྲས་བུ་ལ་ཕྱིན་པར་བྱེད་པ་ཡིན་ལ། དེ་ལས་ཐེག་པ་ཆེན་པོ་ནི། ཇི་སྐད་དུ། ཐེག་པ་
འདི་ནི་མཁའ་འདྲ་གཞལ་མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག །དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། །ཞེས་གསུངས་པ་ལྟར། མཁའ་འདྲ་ཟབ་པ་སྟོང་ཉིད་ཉི་ཤུ་དང་། གཞལ་མེད་ཁང་འདྲ་བ་རྒྱ་ཆེ་བའི་
བཀོད་པས་མངོན་པར་མཛེས་པ་ནི་ཐེག་པ་ཆེན་པོ་ཞེས་གསུངས་པ་དེ་བཞིན་དུ་འདིར་ཡང་བཞོན་པ་གཞན་ལས་འཕགས་ཤིང་། ཆེན་པོ་ལ་འོས་པ། དཀའ་བ་མེད་པ། འབྱོར་བའི་ཁྱད་པར་དུ་མ་དང་བཅས་ཏེ་འགྲོ་བ་སོགས་ཀྱིས་ཤིང་རྟའི་ཚུལ་དང་འདྲ་བར། 
ཕྱོགས་རེ་རེ་འཛིན་པ་ལས་འཕགས་ཤིང་། ཟབ་ཅིང་རྒྱ་ཆེ་བ་གཉིས་ཀའི་བློ་ལྡན་ཆེན་པོ་ལ་འོས་པ། བདེན་གཉིས་ཀྱི་དེ་ཁོ་ན་ཉིད་ཟུང་དུ་ཆུད་པས་སངས་རྒྱས་ཀྱི་གོ་འཕང་སྒྲུབ་པ་ལ་དཀའ་བ་མེད་པ། ཐ་སྙད་ཀྱི་ཚད་མ་དང་དོན་དམ་པའི་ཚད་མ་སྟེ་རིགས་
པའི་རྣམ་པ་ཚད་མེད་པའི་དགའ་བདེའི་འབྱོར་བ་ཆེན་པོ་དང་བཅས་ཏེ་གནས་པ་སོགས་ཡིན་པའི་ཕྱིར་ན་ཤིང་རྟ་དང་འདྲའོ། །དེ་འདྲ་བའི་གཞུང་ལ་གནས་པའི་ཚེ་ནའང་རིགས་པ་ཚད་མས་གཞུང་གི་དོན་ཉམས་སུ་བསྟར་དགོས་པ་ཡིན་ཏེ། རང་འགྲེལ་
13-1-167b


ལས། དེ་ལ་ལུང་དངོས་པོའི་སྟོབས་ཀྱིས་ཞུགས་པའི་རྗེས་སུ་དཔགས་པ་དང་བྲལ་བ་ནི་དད་པས་རྗེས་སུ་འབྲངས་པ་དག་ཀྱང་ཤིན་ཏུ་ཡོངས་སུ་ཚིམ་པར་མི་འགྱུར་ཞེས། གཞུང་དེ་ཉིད་ལ་དད་པས་མི་མོས་པ་དག་ལྟ་ཅི་སྨོས། དད་པའི་སྒོ་ནས་
ལུང་དེ་ལ་རྗེས་སུ་ཞུགས་ཀྱང་རིགས་པ་དང་བྲལ་ན་དེའི་དོན་རང་གི་ཉམས་སུ་བསྟར་བའི་ངེས་པ་རྙེད་ནས་ཡོངས་སུ་ཚིམ་པར་མི་འགྱུར་ཏེ། ཟས་དང་རིན་པོ་ཆེ་སྣ་ཚོགས་པ་ཞེན་པས་བཅིངས་ཀྱང་དེ་དག་ལོངས་སྤྱོད་མ་ཤེས་པ་ལྟ་བུའོ། །དེས་ན་ཤིང་རྟ་འདྲེན་པའི་རྟ་དེ་
ཉིད་ཁ་ལོ་གང་དུ་སྒྱུར་བ་སྲབ་སྐྱོགས་ལ་རག་ལས་པ་བཞིན་དུ། དངོས་སྟོབས་ཀྱི་རིགས་པས་གང་གྲུབ་པ་དེ་ཉིད་ལས་གཞན་དུ་དྲང་མི་ནུས་པར་ལམ་དེ་དང་དེར་ངེས་ཤེས་ཀྱིས་འཇུག་པས་ན། ཐ་སྙད་དང་དོན་དམ་ལ་དཔྱོད་པའི་རིགས་པའི་སྲབ་སྐྱོགས་གཡས་
གཡོན་གཉིས་ལ་འཇུ་བར་བྱེད་པ་དེ་ནི། ཟབ་ཅིང་རྒྱ་ཆེ་བའི་དོན་ལ་ཚད་མ་གཉིས་ཀྱི་ངེས་པས་འཇུག་པ་ཡིན་པས་ཐེག་པ་ཆེན་པོ་པ་ཞེས་པའི་མིང་དོན་དང་ལྡན་པ་ཐོབ་སྟེ། ཐེག་པ་ཆེན་པོ་ནི་ཟབ་ཅིང་རྒྱ་ཆེ་བ་གཉིས་ལྡན་ཡིན་ལ། དེ་ལ་མོས་པ་ཙམ་མིན་
པར་ཚད་མ་གཉིས་ཀྱི་སྒོ་ནས་ངེས་པའི་གང་ཟག་ཡིན་པའི་ཕྱིར་ན། གང་ཐེག་ཆེན་དེ་དང་ལྡན་པ་ལ་བདག་སྒྲ་སྦྱར་ཏེ་ཐེག་ཆེན་པ་ཞེས་སོ། །དེས་ན་འཐད་པ་དང་བྲལ་བའི་ལུགས་ཀྱང་ཞེན་ལྟས་འཛིན་པ་དང་། འཐད་ལྡན་གཞན་གྱི་ལུགས་ལ་སུན་ཅི་
ཕྱིན་བྱས་ན་བསྟན་པ་ཉིད་ལ་ཕངས་པའི་སེམས་སུ་མ་བྱས་པར་གྱུར་པས་ན་དངོས་སྟོབས་ཀྱི་རིགས་པ་དྲི་མེད་དང་ལྡན་པའི་སྒོ་ནས་བསྟན་པའི་རྗེས་སུ་ཞུགས་པའི་བློ་ལྡན་རྣམས་ཀྱིས་ནི། བསྟན་པ་ཉིད་ཀྱི་དབང་དུ་བྱས་ཏེ་རྣམ་པར་དཔྱོད་པ་དྲང་པོས་ཚུལ་བཞིན་
13-1-168a


དཔྱད་པར་བྱ་སྟེ། དེ་ལྟར་ན། བསྟན་བཅོས་ལས་དཔྱད་རྩོད་ལ་ཆགས་པའི་ཕྱིར། །མ་མཛད་རྣམ་གྲོལ་ཕྱིར་ནི་དེ་ཉིད་བསྟན། །གལ་ཏེ་དེ་ཉིད་རྣམ་པར་བཤད་པ་ན། །གཞན་གཞུང་འཇིག་པར་འགྱུར་ན་ཉེས་པ་
མེད། །ཅེས་པ་ལ་སོགས་པ་བཞིན་ཡིན་ཞིང་ཆོས་སྲུང་བ་དང་གཟུང་བའི་མཆོག་དམ་པར་འགྱུར་རོ། །གཉིས་པ་ཚུལ་གཉིས་ཀྱི་ལམ་དེ་ལ་བསྔགས་པ་ལ། ཀུན་གྱི་ཐུན་མོང་མིན་པའི་ཡོན་ཏན་དང་། དེ་ལ་བརྟེན་ནས་དཀར་ཆོས་གཞན་
སྐྱེ་བའི་ཡོན་ཏན་གཉིས། དང་པོ། ཁྱབ་དང་དབང་ལ་སོགས་མ་མྱངས། །དཔག་ཏུ་མེད་པར་གནས་པའི་རྒྱུ། །འཇིག་རྟེན་སྤྱི་བོར་གྱུར་པས་ཀྱང་། །ཤིན་ཏུ་མྱངས་པ་མ་ཡིན་པ། །ཡང་དག་བདུད་རྩི་དག་པ་འདི། །ཐུགས་རྗེ་དག་
པའི་རྒྱུ་ཅན་གྱི། །དེ་བཞིན་གཤེགས་པ་མ་གཏོགས་པ། །གཞན་གྱི་ལོངས་སྤྱོད་མ་ཡིན་ནོ། །ཞེས་གསུངས་ཏེ། དེ་ལྟ་བུའི་ཚུལ་གཉིས་པོ་དེ་ནི་གཞན་གྱི་སྤྱོད་ཡུལ་ཐུན་མོང་བ་མ་ཡིན་ཏེ། འདི་ལྟར་འཇིག་རྟེན་ན་ཆེ་ཞིང་བློ་གྲོས་གསལ་
བར་གྱུར་པ། ཁྱབ༷་འཇུག་ད༷ང་དབ༷ང་ཕྱུག་དང་། ཚངས་པ་དང་སེར་སྐྱ་ལ༷་སོ༷གས་པས་ཕྱོགས་ཙམ་ཡང་མ༷་མྱང༷ས་པ་ཡིན་ལ། དེར་མ་ཟད་ཡོན་ཏན་གྱི་མཐའ་བློས་དཔ༷ག་ཏུ༷་མེ༷ད་པར༷་གན༷ས་པར་བྱེད་པ༷འི་རྒྱུ༷་འདི་ནི། འཇི༷ག་རྟེན༷་པ་ཀུན་གྱི་སྤྱི་བོར༷་གྱུར༷་པ༷་འཇིག་
རྟེན་འདས་པའི་ལམ་ཅན་ཉན་རང་འཕགས་པ་རྣམས་ཀྱིས༷་ཀྱང༷་། ཤི༷ན་ཏུ་མྱང༷ས་པ༷་མ༷་ཡི༷ན་པ༷། ཡ༷ང་ད༷ག་པའི་གནས་ལུགས་མ་ནོར་བ་བདེན་པ་གཉིས་ཀྱི་བདུ༷ད་རྩི༷་སྐྱོན་མཐའ་དག་གིས་ད༷ག་པ༷་འདི༷་ནི། འགྲོ་བ་ཀུན་ལ་བརྩེ་བའི་ཐུ༷གས་རྗེ༷་ཆེན་པོ་སྒྲིབ་
13-1-168b


གཉིས་ཀྱི་དྲི་མས་ཡོངས་སུ་ད༷ག་པ༷འི་རྒྱུ༷་ཅ༷ན་གྱི༷། དེ༷་བཞི༷ན་གཤེ༷གས་པ༷་འབའ་ཞིག་མ༷་གཏོག༷ས་པ༷། གཞ༷ན་གྱི༷་ལོ༷ངས་སྤྱོ༷ད་དུ་འགྱུར་བ་མ༷་ཡི༷ན་ནོ༷། །ཞེས་སོ། །དེ་ལ་རྣམ་དོར་ཏེ་ཚངས་པ་དང་། ཁྱབ་འཇུག་གམ་ནོར་ལྷའི་བུ་དང་། མིག་མི་
བཟང་ངམ་དབང་ཕྱུག་ལ་སོགས་པས་ཚུལ་གཉིས་ཀྱང་བཤད་པའི་ཕྱིར་འདི་དང་འདྲའོ་སྙམ་ན་མ་ཡིན་ཏེ། དེ་དག་གིས་བཤད་པ་ཉི་ཚེ་བའི་སྟོང་པ་ཡིན་པའི་ཕྱིར་རོ། །འདི་ལྟར་རྣམ་འདོར་གྱིས་བཤད་པ་རྣམ་རིག་ཙམ་གྱི་ཚུལ་ནི། བདུད་རྩིའི་ཐིགས་པ་
གསང་བ་ལས་བསྟན་པ། རྣམ་རིག་ཙམ་ནི་རྟག་ཏུ་རྣམ་པར་དག །འདི་ལྟར་སངས་རྒྱས་རྟག་ཏུ་གྲོལ་བ་ཡིན། །བླང་དང་དོར་བ་མེད་ཅེས་རབ་བརྟགས་ལ། །ཚངས་པ་མྱ་ངན་མེད་པར་རྟག་གནས་བྱོས། །ཞེས་དོན་གྱི་རྣམ་རིག་ཙམ་གྱི་རང་བཞིན་
གྱི་བདག་ཚངས་པ་མྱ་ངན་མེད་པའམ།  རྣམ་པར་གྲོལ་བ་རྟག་པའི་འབྲས་བུ་དེ་དོན་དུ་གཉེར་བྱ་ཡིན་ལ། ལམ་ནི། རྣམ་རིག་ཙམ་གྱི་རང་བཞིན་དེ་ནི་རྟག་ཏུ་རང་བཞིན་གྱིས་དག་པ་དང་། མ་རིག་པའི་གཉིད་དང་བྲལ་བའི་སངས་རྒྱས་པ་དང་། འདོད་ཆགས་
སོགས་ཀྱི་འཆིང་བ་ལས་གྲོལ་བ་ཡིན་ཏེ། དེ་དག་ནི་དོན་དམ་ཡིན་ལ། མ་རིག་པ་དང་ཆགས་སོགས་གློ་བུར་བ་ཡིན་པའི་ཕྱིར་རོ། །དེས་ན་འདི་ལས་མ་གཏོགས་པའི་བླང་དོར་ཅིའང་མེད་པར་བརྟགས་པའམ་ཤེས་པར་བྱས་ནས་བསྒོམ་པར་བྱའོ། །ཞེས་
བཤད་དོ། །གཞན་ཡང་དེའི་ཕྱོགས་སུ་གཏོགས་པ་སེར་སྐྱའི་གཞུང་ནི།  ཡོན་ཏན་རྣམས་ཀྱི་རང་བཞིན་མཆོག །མཐོང་བའི་ལམ་དུ་འགྲོར་མ་ཡིན། །མཐོང་བའི་ལམ་དུ་གང་གྱུར་དེ། །སྒྱུ་མ་ལྟ་བུར་ཤིན་ཏུ་གསོག །ཅེས་རྡུལ་མུན་སྙིང་སྟོབས་མཉམ་པའི་གཙོ་བོ་ནི་མིག་
13-1-169a


སོགས་ཀྱིས་མཐོང་བའི་ལམ་དུ་མི་འགྱུར་བའི་རང་བཞིན་ནམ་གཙོ་བོ་དོན་དམ། མཐོང་བའི་ལམ་དུ་འགྱུར་བའི་གཟུགས་ལ་སོགས་པ་རྣམ་འགྱུར་ཐམས་ཅད་བརྫུན་པ་སྒྱུ་མ་ལྟ་བུའོ། །ཞེས་དང་། བདག་ཤེས་རིག་གི
སྐྱེས་བུ་ཙམ་མཐར་ཐུག་གི་འབྲས་བུར་འདོད་དོ། །གསང་བ་པ་དག་ནི། ཕྱི་ནང་གི་དངོས་པོ་ཐམས་ཅད་ཤེས་པ་རྟག་པ་གཅིག་ཁོ་ནའི་རང་བཞིན་དུ་བལྟ་སྟེ། དེ་དག་གི་གཞུང་ལས། བུམ་པ་ལ་སོགས་ཞིག་པ་ན། །བུམ་པའི་ནམ་མཁའ་ལ་
སོགས་པ། །ཇི་ལྟར་ནམ་མཁར་འདུ་འགྱུར་བ། །དེ་བཞིན་སྲོག་ཀྱང་བདག་འདིར་འདུ། །གཟུགས་དང་འབྲས་བུར་རབ་བརྗོད་པ། །དེ་དང་དེར་ནི་ཐ་དད་ཀྱང་། །ནམ་མཁའ་ལ་ནི་ཐ་དད་མེད། །དེ་བཞིན་སྲོག་ཀྱང་ངེས་པ་ཡིན། །ཞེས་པ་
ལ་སོགས་པ་ལྟར། །གཟུགས་ཞེས་པ་ཕྱིའི་གཟུགས་ལ་སོགས་པ་དང་། འབྲས་བུ་ནི་ནང་གི་ལུས་ཏེ། དེ་ལྟར་ཕྱི་ནང་གི་སྣང་བ་སྣ་ཚོགས་པ་དག་ཀྱང་ནམ་མཁའི་ངང་དུ་མ་འདུས་པ་མི་སྲིད་ཅིང་། ནམ་མཁའ་ལ་ཐ་དད་མེད་པ་ལྟར། སྲོག་གམ་
བདག་ཆེན་པོ་དེའི་ངང་དུ་གཅིག་པར་འདོད་ཅིང་། དག་དང་མ་དག་སྣ་ཚོགས་སུ་སྣང་བ་ནི་མེད་བཞིན་འཁྲུལ་བ་ཐག་པ་ལ་སྦྲུལ་འཛིན་དང་། རྨི་ལམ་ལྟ་བུའོ་ཞེས་ཟེར་ཞིང་། བདག་ནི་བདེན་པར་རྟོག་གྱུར་པས། །གང་ཚེ་ཀུན་ཏུ་མི་རྟོག་པ། །དེ་ཚེ་
ཡིད་ནི་མེད་འགྱུར་ཏེ། །གཟུང་བ་མེད་པས་དེ་འཛིན་མེད། །ཅེས་དང་། རིག་བྱེད་མཐའ་ལ་ངེས་རྣམས་ཀྱིས། །རྨི་ལམ་སྒྱུ་མ་ཇི་འདྲ་དང་། །དྲི་ཟའི་གྲོང་ཁྱེར་ཇི་འདྲ་ཐོང་། །དེ་ལྟར་འཇིག་རྟེན་འདི་དག་མཐོང་། །འགག་པ་མེད་ཅིང་སྐྱེ་བ་མེད། །བཅིང་
13-1-169b


བ་མེད་ཅིང་སྒྲུབ་པ་མེད། །ཐར་འདོད་མེད་ཅིང་ཐར་པ་མེད། །འདི་ནི་དོན་དམ་ཉིད་ཡིན་ནོ། །ཆགས་དང་འཇིགས་དང་ཁྲོ་བྲལ་བ། །རིག་བྱེད་མཐར་ཕྱིན་ཐུབ་རྣམས་ཀྱིས། །སྤྲོས་པ་ཉེར་ཞི་གཉིས་མེད་པའི། །རྣམ་པར་མི་རྟོག་འདི་མཐོང་ངོ་། །ཞེས་ཟེར་ལ།
འདི་དག་ཐམས་ཅད་ནི་མདོར་བསྡུས་ན་རྣམ་པར་རིག་པ་ཙམ་གྱི་རང་བཞིན་གྱི་རྟག་བདག་སྨྲ་བ་ལས་མ་འདས་པས་མི་འཐད་པར་གོང་དུ་བསྟན་ཟིན་ལ། སྒྱུ་མ་ལྟ་བུ་དང་། རྣམ་པར་མི་རྟོག་པ་ལ་སོགས་པ་ཇི་སྐད་བརྗོད་པ་དེ་བདེ་བར་གཤེགས་པའི་གསུང་
རབ་སྤྲོས་པའི་དྲི་མ་ཐམས་ཅད་དང་བྲལ་བ་ལ་དེ་ལྟར་འོང་བ་འཐད་ཀྱི། དེ་དག་གི་ལུགས་ལ་དེ་ལྟར་བརྗོད་ཀྱང་རང་གི་གྲུབ་མཐའ་སུན་འབྱིན་པ་ཙམ་དུ་ཟད་དོ། །ཡང་ཁྱབ་འཇུག་གིས་བཤད་པ་དབུ་མའི་ལུགས་ནི། ཞག་ལྔ་པ་ལས། མིང་ཙམ་ལས་ནི་
རབ་འདས་ཤིང་། །དངོས་དང་དངོས་མེད་རྣམ་པར་སྤངས། །འབྱུང་དང་བསྡུ་ལས་ངེས་གྲོལ་བ། །དེ་ནི་ནོར་ལྷའི་བུ་ཞེས་བྱ། །དངོས་ལ་དངོས་ཉིད་ཡོད་མ་ཡིན། །དངོས་མེད་ལ་ཡང་དངོས་ཉིད་མེད། །དངོས་དང་དངོས་མེད་རྣམ་གྲོལ་བ། །
གང་དེ་ཤེས་དེ་རིག་བྱེད་རིག །ཅེས་རིག་བྱེད་དམ་ཚངས་པའམ་ནོར་ལྷའི་བུ་བདག་དམ་པ་དེ་ནི་ཐ་སྙད་ཀྱི་མིང་ཙམ་ལས་ཀྱང་འདས་ཤིང་། གཟུགས་ལ་སོགས་པའི་དངོས་དང་། དེ་མེད་པའི་དངོས་མེད་གཉིས་ཀ་སྤངས་པ། འབྱུང་བ་སྐྱེ་བ་དང་བསྡུ་
བ་སྟེ་འཇིག་པ་ལས་གྲོལ་བའི་རྟག་པ་ཡིན་ནོ། །དེས་ན་ཐ་སྙད་ལས་འདས་པ་དེའི་རང་བཞིན་ལས་མ་གཏོགས་པའི་གཟུགས་ལ་སོགས་པའི་དངོས་པོ་ལ་དངོས་ཉིད་མེད་དེ་དེ་བརྫུན་པའི་ཕྱིར་རོ། །དངོས་པོ་མ་གྲུབ་ན་དེ་ལ་ལྟོས་པའི་དངོས་མེད་ཀྱང་
13-1-170a


མེད་ལ། དེ་ལྟར་དངོས་དངོས་མེད་གཉིས་དང་བྲལ་བའི་བདག་དམ་པ་དེ་ཤེས་པ་ནི་རིག་བྱེད་དམ་ཚངས་པ་ཤེས་པ་ཡིན་ནོ་ཞེའོ། །ཡང་མིག་མི་བཟང་གིས་བཤད་པ་དབུ་མའི་ཚུལ་ནི། ཞི་བའི་མཛེས་པ་སྦྱར་བའི་
གཞུང་གི་ཕ་དང་བུའི་སྦྱར་བ་ལས། བུ་གཅིག་ཚངས་པ་མཆོག་ཏུ་བདེན། །རིག་པའི་དབང་ཕྱུག་མུ་མཐའ་ཡས། །འབའ་ཞིག་ཡོད་པ་ཉིད་སྨྲ་བ། །དེ་ཡང་ཞགས་པར་རབ་ཏུ་བརྗོད། །ཅེས་བུ་གཅིག་ཅེས་བོས་ནས། ཚངས་པ་དེ་ཁོ་
ན་མཆོག་ཏུ་བདེན་གྱི་གཞན་ཐམས་ཅད་བརྫུན་པའོ། །གང་དེ་ནི་རིག་པའི་དབང་ཕྱུག་ཡིན་ཅིང་ཐམས་ཅད་ལ་ཁྱབ་པའི་མུ་མཐའ་ཡས་པའོ། །དེ་ལྟ་མོད་ཀྱི་སྐྱེ་བོ་གང་གིས་དེ་འབའ་ཞིག་ཡོད་པ་ཉིད་དུ་སྨྲ་ཞིང་། དེ་ལ་ཇི་ཙམ་ཡོད་དོ་སྙམ་དུ་མངོན་པར་
ཞེན་པ་དེ་ཙམ་དུ་དེའང་འཆིང་བའི་རྒྱུ་ཡིན་པའི་ཕྱིར་ཞགས་པ་དང་འདྲ་བས་ཞགས་པར་རབ་ཏུ་བརྗོད་དོ། །ཞེས་སོ། །ལུགས་དེ་དག་ཀྱང་མཐའ་དང་བྲལ་བ་སྐད་དུ་འཆད་ཀྱང་། མཐར་གཏུགས་ན་བདག་གམ་ཚངས་པ་སོགས་བློ་ཡི་གཏད་སོ་ཞིག་ལ་མུ་
བརྟེན་ནས་ཡོད་པས་དབུ་མའི་ཚུལ་ག་ལ་ཡིན་ཏེ་རྒྱས་པར་བཀག་ཟིན་ཏོ། །དེས་ན་རྫོགས་པ་ཆེན་པོ་ཤིན་ཏུ་ཟབ་མོའི་མཐར་ཐུག་པ་ཡིན་སླད་རྟོགས་དཀའ་བས་ན། ཐོས་བསམ་གྱི་གནས་ལུགས་ལ་སྒྲོ་འདོགས་ཆོད་པ་མཐར་ཕྱིན་པའམ། ཟབ་
མོའི་མན་ངག་གི་གནད་དང་ལྡན་པར་མ་གྱུར་པའི་བླུན་སྒོམ་གྱིས་བསྒོམས་པ་ཕལ་ཆེ་བ་འདི་དང་འདྲ་བར་འགྱུར་ཉེ་སྟེ། ཀ་དག་ལ་ངེས་པ་མ་རྙེད་པར་ཡོད་པའང་མིན་ལ་མེད་པའང་མིན་པའི་གཞི་ཞིག་སྙིང་ལ་བརྣག་པ་ཙམ་གྱིས་ནི་གར་ཡང་མི་ཕྱིན་ཏེ། དེ་
13-1-170b


འདྲ་བའི་ཡོད་མེད་གཉིས་ཀྱིས་སྟོང་པའི་སྟོང་གཞི་ལོགས་སུ་ངོ་བོས་གྲུབ་པར་བཟུང་ན། དེའི་མིང་ལ་བསམ་མི་ཁྱབ་པའི་བདག་གམ། ཚངས་པའམ། ཁྱབ་འཇུག་གམ། དབང་ཕྱུག་གམ།  ཡེ་ཤེས་སོགས་ཇི་བཏགས་ཀྱང་མིང་ཙམ་ལས་དོན་
འདྲ་བ་ཡིན་ནོ། །མཐའ་བཞིའི་སྤྲོས་བྲལ་གྱི་གནས་ལུགས་སོ་སོ་རང་གིས་རིག་པར་བྱ་བའི་འོད་གསལ་རྫོགས་པ་ཆེན་པོ་ནི་དེ་འདྲ་བ་ཞིག་ཡིན་ཚོད་མི་གདའ་བས་ཡང་དག་པའི་ལམ་དང་སྟོན་པ་ལ་བརྟེན་པ་གལ་ཆེའོ། །དེས་ན་ཚིག་ཙམ་ལ་སྒྱུ་མ་ལྟ་བུ་
དང་། དངོས་པོ་མེད་པ་དང་། སྤྲོས་བྲལ་སོགས་ཟེར་ཡང་། རིགས་པས་དྲངས་པའི་ངེས་ཤེས་ཕུ་ཐག་ཆོད་པའི་སྒོ་ནས་ཉི་ཚེ་བའི་སྟོང་པ་མུ་སྟེགས་རྣམས་ཀྱི་བླ་ན་འཕགས་པའི་དེ་བཞིན་གཤེགས་པའི་སྟོང་པ་ཉིད་ཀྱི་ཚུལ་མ་ཤེས་ན་ཅིའང་མི་ཕན་ལ།
ཤེས་ན་སངས་རྒྱས་ཀྱིས་གང་གསུངས་པ་འདི་ནི་ཁྱབ་འཇུག་ལ་སོགས་པ་དེ་དག་གིས་ཅུང་ཟད་ཀྱང་མ་མྱངས་ཏེ། དེ་དག་གིས་རྣམ་རིག་དང་དབུ་མའི་ལུགས་བཤད་པ་ནི་མིང་ཙམ་དུ་ཤེས་པར་འགྱུར་རོ། །དེ་ལྟར་ཕྱི་ནང་གི་གྲུབ་མཐའ་འདི་ཚིག་ཙམ་གྱིས་ཕྱེ་
མི་ནུས་པར་ཟབ་མོའི་གནད་གནམ་ས་ལྟར་མི་མཚུངས་པ་ཡོད་པས། ཇོ་བོ་རྗེས་ཀྱང་ཁོང་བོད་དུ་བྱོན་རྗེས་ད་ལྟ་རྒྱ་གར་ན་ཕྱི་ནང་གི་གྲུབ་མཐའ་ཕྱེ་ནུས་པ་དཀའ་གསུངས་པ་ལྟར། བོད་དུའང་བནྡེ་དང་བོན་པོ་ཡང་དེ་དང་འདྲའོ། །དེ་ལྟར་ཕྱི་རོལ་པའི་འདོད་པའི་གཞུང་
གི་ཚིགས་བཅད་ཅུང་ཟད་རང་འགྲེལ་ན་བཀོད་པ་ཀ་མ་ལ་ཤཱི་ལའི་དཀའ་འགྲེལ་གྱིས་བཤད་པ་ལྟར་འདིར་མདོར་བསྡུས་སུ་བཀོད་པའོ། །དེ་དག་གིས།  ཁྱབ་དང་དབང་ལ་སོགས་མ་མྱངས། །ཞེས་པའི་དོན་བཤད་ཟིན་ཏོ། །དེ་ནས་དཔག་ཏུ་མེད་པར་གནས་
13-1-171a


པའི་རྒྱུ་ཞེས་པ་ཐ་སྙད་ཀྱིས་དཔག་ཏུ་མེད་པ་སྟེ། ཇི་ལྟར་དཔག་ཏུ་མེད་ན་དེ་བཞིན་གཤེགས་པའི་འོད་ཟེར་གཅིག་དང་། བ་སྤུའི་བུ་ག་གཅིག་ལའང་ཕྱོགས་འདི་ཙམ་ཞེས་པའི་ཚད་དང་། དུས་འདི་ཙམ་དུའོ་ཞེས་པའི་ཚད་གཟུང་མི་
ནུས་པ་ཆོས་ཀྱི་དབྱིངས་དང་མཉམ་པར་འཇུག་པའོ། །དེ་ལྟ་བུའི་དཔག་ཏུ་མེད་པའི་ཆོས་ཉིད་དེ་ལྟ་བུ་ལ་གནས་པར་བྱེད་པའི་རྒྱུ་ནི་ཆོས་ཀྱི་དབྱིངས་དང་རྗེས་སུ་མཐུན་པ་བདེན་གཉིས་ཟུང་དུ་འཇུག་པའི་དབུ་མའི་ཚུལ་ལ་གནས་པས་སོ། །དེའང་དཔེར་ན་ཕྱོགས་གཅིག་གི་
དབང་དུ་བྱས་ན། དེ་བཞིན་གཤེགས་པ་དུས་དཔག་ཏུ་མེད་པ་འཁོར་བ་ཇི་སྲིད་དུ་བཞུགས་པར་བྱེད་པའི་རྒྱུ་ནི། སྲིད་ཞི་མཉམ་ཉིད་དུ་རྟོགས་པའི་ཤེར་ཕྱིན་འདི་ཡིན་པ་བཞིན་ནོ། །དེས་ན་ཟླ་བའི་འོད་ཟེར་ལྟར་དག་པ་བདག་མེད་པ་གཉིས་ཀྱི་རང་བཞིན་ཉི་ཚེ་བ་མ་ཡིན་
པའི་སྟོང་པ་ཉིད་ཀྱི་བདུད་རྩི་འདི་སྔོན་གྱི་ཚེ་སྐྱོབ་པ་བཅོམ་ལྡན་འདས་ཉིད་ཀྱིས་ཤིན་ཏུ་གསོལ་ཏེ། རྒྱུ་དེས་རྣམ་པ་ཐམས་ཅད་ཀྱི་མཆོག་དང་ལྡན་པའི་ཤེས་རབ་དང་ཐུགས་རྗེའི་རྡུལ་ཕྲ་རབ་འདུས་པའི་སྐུ། སྒྲིབ་པ་གཉིས་ཀྱི་ཕུང་པོ་མ་ལུས་པ་དང་བྲལ་བ། སེམས་
ཅན་ཐམས་ཅད་ཀྱི་མཆོག་ཉིད་དུ་འཁོར་བ་ཇི་སྲིད་དུ་བཞུགས་པ་སྟེ། སེམས་ཅན་ཀུན་མཆོག་ཉིད་སེམས་དང་། །སྤང་དང་རྟོགས་དང་གསུམ་པོ་ལ། །ཆེན་པོ་གསུམ་གྱི་རང་བྱུང་གི། ཆེད་དུ་བྱ་བ་འདི་ཤེས་བྱ། །ཞེས་གསུངས་པ་བཞིན་ནོ། །
དེའང་ཉོན་མོངས་པའི་བག་ཆགས་དེ་ལས་ཕྲ་བ་མེད་པའི་མཐར་ཐུག་པ་ལྟ་བུ་མ་རིག་བག་ཆགས་ཀྱི་ས་དང་། ལས་དང་ཕུང་པོ་སྡུག་བསྔལ་གྱི་རྩ་བ་གཏན་ནས་ཡོངས་ཟད་དུ་བྱེད་པ་ལ། ཟག་མེད་ཀྱི་ལས་དང་། ཡིད་ཀྱི་རང་བཞིན་གྱི་ལུས་དང་། བསམ་
13-1-171b


གྱིས་མི་ཁྱབ་པའི་འཆི་འཕོ་བ་དག་ཀྱང་ལོག་པས་ཕྱོགས་དུས་མཉམ་པ་ཉིད་ཡེ་ཤེས་ཀྱི་སྐུ་སྐྱེ་འགག་དང་རྟག་མི་རྟག་ཡོད་མེད་ལ་སོགས་པའི་མཐའ་ཐམས་ཅད་སྤངས་པའི་སངས་རྒྱས་འབའ་ཞིག་འགྲུབ་པའོ། །ཅིའི་ཕྱིར་ཡང་དག་པའི་ལམ་ལ་བདུད་རྩི་ཞེས་
བརྗོད་སྙམ་ན། གཏན་དུ་འཆི་བ་མེད་པའི་རང་བཞིན་དུ་བྱེད་པས་དེ་སྐད་དུ་བརྗོད་དེ། དེའང་བདུད་རྩི་འབའ་ཞིག་མ་གཏོགས་རྙོག་མའི་བསྲེ་བསླད་མེད་པས་ཡོངས་སུ་དག་པ་ལ་བདུད་རྩི་དག་པ་ཞེས་བྱའོ། །དེ་ལ་ཁ་ཅིག་འདི་སྙམ་དུ། དཔག་ཏུ་མེད་པར་
གནས་པའི་རྒྱུ། །ཞེས་པའི་ཚིག་རྐང་འདི། ཡང་དག་བདུད་རྩི་ཞེས་སོགས་ཀྱི་ཚིག་རྐང་འདིའི་གོང་དུ་བཀོད་ན་འགྱུར་མི་བདེའམ་སྙམ་ན། སྔོན་གྱི་ལོ་པཎ་ཆེན་པོ་རྣམས་ནི་བསམ་བཞིན་སྤྲུལ་པའི་གང་ཟག་ཡེ་ཤེས་ཀྱི་སྤྱན་དང་ལྡན་པ་ཡིན་པས་ཚིག་འདི་
དག་གི་གོ་རིམ་ཙམ་ལའང་ནུས་པ་ཞིག་འདོན་རྒྱུ་ཡོད་པས་དེ་ལྟར་བསྒྱུར་བ་སྟེ། དེའང་དུས་ལྟ་བུ་ལ་མཚོན་ན་སངས་རྒྱས་ནི་སྲིད་པ་ཇི་སྲིད་པར་འཁོར་བར་བཞུགས་ལ། ཉན་རང་གིས་དེ་མི་ནུས་ཏེ། མི་ནུས་པའི་རྒྱུ་མཚན་ཡང་སྲིད་ཞི་མཉམ་ཉིད་དུ་རྟོགས་པའི་ཤེས་རབ་མེད་
པས་འཁོར་བ་ལ་འཇིགས་པ་དང་། ཞི་བ་ལ་དགའ་བའི་ཡིད་དང་ལྡན་པས་ཡིན་ལ། གཞན་ཡང་བསམ་མི་ཁྱབ་པའི་སངས་རྒྱས་ཀྱི་ཆོས་རྫོགས་པར་བརྙེས་མི་ནུས་པ་ཐམས་ཅད་བདེན་གཉིས་ཟུང་འཇུག་དབུ་མའི་ཚུལ་འདི་ལྟ་བུ་མ་ཤེས་པས་ལེན་པ་ཡིན་ནོ། 
ཞེས་པ་སོགས་ཀྱི་ཚིག་གི་ནུས་པ་ཁོང་ནས་འདོན་པའི་ཆེད་ཡིན་ནོ། །དེ་ལྟར་ན་འཇིག་རྟེན་པའི་སྤྱི་བོར་གྱུར་པ་ཉན་རང་དག་གིས་ཀྱང་མ་མྱངས་ན། འཇིག་རྟེན་པ་ཚངས་དབང་ཁྱབ་འཇུག་ལ་སོགས་པས་ལྟ་ཅི་སྨོས་ཞེས། འདིར་ཤིན་ཏུ་རབ་ཏུ་སོགས་བསྔགས་
13-1-172a


པའི་ཡུལ་ཁོ་ན་ལ་སྦྱོར་དགོས་པ་མ་ཡིན་ཏེ། བརྗོད་བྱ་གང་ལ་སྦྱར་བ་དེ་ཉིད་ལྷག་པར་བརྣན་པའི་དོན་ཡིན་ནོ། །ཐུགས་རྗེ་དག་པ་ཞེས་སོགས་ཀྱི་ཐུགས་རྗེ་ནི་འགྲོ་བ་ཀུན་ལ་བརྩེ་བ་ཆེན་པོས་ཉིད་ཀྱིས་ཇི་ལྟར་གཟིགས་
པའི་ལམ་སྟོན་པ་ཡིན་ལ། ཐུགས་རྗེ་ཆེན་པོ་དེའང་གཟིགས་པ་རབ་རིབ་ཀྱི་དྲི་མ་མཐའ་དག་དང་བྲལ་བ་ནི་དག་པའོ། །དེ་ལྟ་བུའི་ཐུགས་རྗེ་ཆེན་པོ་ཡོངས་སུ་དག་པའི་རྒྱུ་སྔོན་དུ་སོང་བ་ཅན་ནམ་འབྲས་བུ་ནི་དེ་བཞིན་གཤེགས་པ་ཡིན་ལ་དེ་ཁོ་ནས་བདེན་གཉིས་
ཀྱི་བདུད་རྩི་འདི་གསོལ་ཏོ། །ཞེས་སོ། །དེ་ལ་མཁས་པ་རྣམས་ཀྱིས་གང་བཤད་པ་དངོས་སྟོབས་ཀྱི་རིགས་པ་དང་འབྲེལ་པ་ཁོ་ན་ཡིན་པས། འདིར་ཡང་ཚིག་འདི་ཉིད་ཀྱི་ནུས་པས་དེ་བཞིན་གཤེགས་པ་ཉིད་ཀྱིས་གཞན་ལ་ལམ་སྟོན་པའི་བརྩེ་བ་འདི་དང་།
གཟིགས་པ་རྣམ་པར་དག་པའི་ཡེ་ཤེས་ཀྱིས་བསྟན་པའི་ལམ་དྲི་མ་མེད་པ་འདི་ལྟ་བུ་ནི། བདེན་གཉིས་མ་ནོར་བའི་ཚུལ་ལ་ཡང་དག་པར་ཞུགས་པའི་རྒྱུ་སྔོན་དུ་སོང་བ་ཡིན་པས། ཡང་དག་པའི་ཚུལ་གཉིས་པོ་འདི་སངས་རྒྱས་ཉིད་ལས་གཞན་གྱི་ཡུལ་
མིན་པར་འབྲས་བུའི་རྟགས་ཀྱིས་རྗེས་སུ་དཔགས་པ་ལ་སོགས་པའི་དོན་ཆེས་མང་པོ་ཞིག་བསྟན་པ་ཡིན་མོད་ཀྱི། ཚིག་འདི་རྣམས་སྒྲོམ་ཆེ་བས་ཞིབ་ཏུ་ནུས་པ་བཏོན་ཏེ་བཤད་ན་ཡིག་ཚོགས་ལྕི་བར་འགྱུར་བས་མ་སྨོས་སོ། །གཉིས་པ་ལ།
སེམས་ཅན་ལ་སྙིང་རྗེ་དང་། སྟོན་པ་ལ་གུས་པ་སྐྱེ་བའི་ཕན་ཡོན་གཉིས། དང་པོ། དེ་ཕྱིར་ལོག་པར་བསྟན་པ་ཡིན། །གྲུབ་མཐར་འཆེལ་བའི་བློ་ཅན་ལ། །དེ་ལུགས་རྗེས་འཇུག་བློ་ཅན་རྣམས། །སྙིང་རྗེ་ཉིད་ནི་རབ་ཏུ་སྐྱེ། །ཞེས་གསུངས་
13-1-172b


ཏེ། དེ་ལྟར་དེ་བཞིན་གཤེགས་པ་ལས་གཞན་གྱིས་ལམ་འདི་སྟོན་མི་ནུས་པ་དེ༷་ཡི་ཕྱིར༷་ཕྱི་རོལ་པའི་སྟོན་པ་རྣམས་ཀྱིས་ལམ་ཡང་དག་པ་མ་ཡིན་པ་ལོ༷ག་པ༷ར་བསྟ༷ན་པ༷་ཡི༷་གྲུབ༷་མཐ༷ར་ཞེན་པའམ་འཆེ༷ལ་བའི༷་བློ༷་ཅ༷ན་རྣམས་ལ༷། དེ་བཞིན་གཤེགས་པ་དེ༷་ཡི་
ལུགས་དམ་པའི་རྗེ༷ས་སུ་འཇུ༷ག་པའི་བློ༷་ཅ༷ན་རྣམ༷ས་ནི། ཀྱེ་མ་ལམ་འདོད་པ་གང་དག་ལམ་ལོག་པར་གྱུར་པ་འདི་དག་སྙིང་རེ་རྗེ་སྙམ་དུ་སྙིང༷་རྗེ༷་ཤུགས་དྲག་པོ་ཉི༷ད་ནི༷་ར༷བ་ཏུ༷་སྐྱེ༷་བ་ཡིན་ནོ། །དེ་ལ་འདི་ལྟར་གཞན་གྱི་ལུགས་ལ་བརྟགས་ན། ཉི་མའི་འོད་ཟེར་
ཤིན་ཏུ་རྣོ་བ་དག །ཁ་བའི་དུམ་བུ་ལ་སྒྲིབ་པ་མེད་པར་བབས་པ་བཞིན་དུ། ཕ་རོལ་པོའི་འདོད་པ་གཏིང་མི་ཚུགས་པར་མཐོང་ཞིང་། ལྟ་བ་དེས་དེ་དག་བསླུས་པར་ཤེས་ནས་བརྩེ་བ་འཕེལ་ཞིང་། དེས་མཚོན་ཏེ་རང་གིས་དེ་ཁོ་ན་ཉིད་གཏན་ལ་ཕེབས་
པ་ན་གཞན་ཡང་དག་པའི་ལམ་དང་བྲལ་བས་སྲིད་པ་ན་ཡང་ཡང་སྐྱེ་ཞིང་མགོན་མེད་པ་རྣམས་ལའང་སྙིང་རྗེ་ཆེན་པོ་མི་མཐུན་པའི་ཕྱོགས་ཆུང་ངུ་དང་ཡང་མ་འདྲེས་པ་ངང་གིས་སྐྱེ་ཞིང་ཚད་མེད་པར་འཕེལ་བར་འགྱུར་ཏེ། སྙིང་རྗེ་ཆེན་པོའི་རྒྱུ་བདག་གཞན་
མཉམ་པ་ཉིད་དུ་རྟོག་ཅིང་གཞན་རྨོངས་པའི་སྡུག་བསྔལ་ལ་གནས་པ་མཐོང་བ་དང་། སྙིང་རྗེའི་གེགས་ཀུན་ནས་མནར་སེམས་པ་སོགས་ཀྱི་གཞིར་གྱུར་པ་བདག་རྟོག་གི་དྲི་མ་བྲལ་བའི་ཕྱིར། རྒྱུ་ཚང་ཞིང་གེགས་མེད་པའི་རིགས་པས་ཀྱང་གྲུབ་བོ། །
དེ་ལ་སྙིང་རྗེའི་རིགས་ཀྱི་གཞི་བཟུང་ནས་འགྲོ་བ་རྣམས་ཁུར་དུ་ཁྱེར་བ། རང་དོན་ཡིད་བྱེད་དང་མཚན་མའི་དམིགས་པའི་དྲི་དང་བྲལ་བ་ལ། དེ་བཞིན་གཤེགས་པའི་བསྟན་པ་སྙིང་རྗེའི་རིགས་ཀྱི་ཁྱིམ་ཁས་ལེན་པ། སྐྱེས་བུའི་ལྗིད་ཁྱེར་བ་ཡང་དག་པའི་བརྩེ་
13-1-173a


བ་ཅན་ཞེས་བྱའོ། །དེ་ལྟར་ན་གཞན་སྡུག་བསྔལ་དང་བྲལ་བར་འདོད་པའི་སྙིང་རྗེ་ལྡན་པ་གང་གིས། སྡུག་བསྔལ་དང་དེའི་རྒྱུ་འཕེལ་བར་མཐོང་ན་སྙིང་རྗེ་ལྷག་པར་འཕེལ་ཏེ་བུད་ཤིང་བསྣན་པའི་མེ་བཞིན་ནོ། །དེའང་དོན་
དམ་པའི་ཆོས་ལ་སྡང་བ་རྣམས་ནི་སྡུག་བསྔལ་གྱི་རྒྱུའི་མཆོག་ལ་གནས་པ་སྟེ། འདི་ལྟར་ཉ་དང་བྱ་ལ་སོགས་པ་གསོད་པ་སོགས་ནི་བདག་དང་གཞན་གྱི་དགྲ་ཆེན་པོ་མ་ཡིན་ཏེ། དེ་དག་ནི་མ་བསད་ཀྱང་རླུང་གིས་བསྐྱོད་ནས་ཆུའི་ཆུ་བུར་ལྟར་ཤིན་ཏུ་མི་རྟག་
པ། བདག་ལ་ཕན་པ་ཅུང་ཟད་ཀྱང་མི་ནུས་པའི་ལུས་རྣག་ཅན། གྲངས་ཡོད་པ་ཞིག་གསོད་པར་ཟད་ལ། དོན་དམ་པའི་ཆོས་ལ་སྡང་བ་དག་ནི། འཁོར་བ་ཇི་སྲིད་བར་བཞུགས་པ། བདག་གཞན་གྱི་དོན་ཕུན་སུམ་ཚོགས་པས་མཛེས་པ། 
གྲངས་ལས་འདས་པའི་རྒྱལ་བ་དང་འབྲེལ་བའི་ཆོས་ཀྱི་སྐུ་ལ་གནོད་པ་སྟེ། ཆོས་སྐུ་དེའི་ས་བོན་དེ་ཁོ་ན་ཉིད་ལ་མོས་པ་ལ་གནོད་པར་ཞུགས་པའི་ཕྱིར་རོ། །དེ་ཉིད་ཀྱི་ཕྱིར་དམ་པའི་ཆོས་སྤངས་པའི་རྣམ་སྨིན་ཤིན་ཏུ་མི་བཟད་པ་རྣམ་པ་མང་དུ་མདོ་སྡེ་ལས་བརྗོད་དོ། །
དེ་སྐད་དུའང་སློབ་དཔོན་ཀླུས། ཤིན་ཏུ་རྒྱ་ཆེ་རབ་ཟབ་ལ། །སྒྱིད་ལུག་ཤིན་ཏུ་མ་སྦྱངས་པ། །བདག་གཞན་དགྲ་དག་གཏི་མུག་གིས། །ད་ལྟར་ཐེག་པ་ཆེ་ལ་སྨོད། །ཅེས་གསུངས་པ་ལ་སོགས་པ་བཞིན་ནོ། །
དེས་ན་རིགས་དང་བློ་མ་སྦྱངས་པའི་གང་ཟག་རྣམས་ཇི་ལྟ་ཇི་ལྟར་ཟབ་པའི་ཐེག་པ་ཆེན་པོ་ལ་དེ་ལྟ་དེ་ལྟར་སྐྲག་ཅིང་སྨོད་པ་ཡིན་ཏེ། མདོ་ལས། རང་ཉིད་ཀྱི་ཉམས་དང་སྦྱར་བའི་ཤེར་ཕྱིན་ལྟར་སྣང་ལ་བརྟེན་ནས། ཟབ་ཅིང་དཔགས་པར་དཀའ་བའི་
13-1-173b


ཤེར་ཕྱིན་ལ་འདི་སངས་རྒྱས་ཀྱི་བསྟན་པ་མིན་ནོ་ཞེས་སོགས་སུན་འབྱིན་པ་མང་དུ་འབྱུང་བར་གསུངས་ལ། མདོ་སྡེ་རྒྱན་ལས། དམན་པར་མོས་ཤིང་ཁམས་ཀྱང་ཤིན་ཏུ་དམན། །གྲོགས་པོ་དམན་པ་དག་གིས་ཡོངས་བསྐོར་བ། །ཟབ་ཅིང་རྒྱ་ཆེ་
ལེགས་པར་བཤད་པའི་ཆོས། །འདི་ལ་གལ་ཏེ་མོས་མེད་གྲུབ་པ་ཡིན། །ཞེས་གསུངས་པ་ལྟར་ཟབ་པའི་རྒྱུ་མཚན་ཉིད་ཀྱིས་བློ་ཡུལ་དུ་མ་གྱུར་ནས་ཐེག་ཆེན་ལ་སྡང་བ་རྣམས་ལ་སྙིང་རྗེ་ཆེན་པོས་རྗེས་སུ་བཟུང་བའི་ཐབས་མི་འདོར་བར་བྱའོ། །
གཉིས་པ། བློ་ནོར་ལྡན་པས་ལུགས་གཞན་ལ། །ཇི་ལྟར་སྙིང་པོ་མེད་མཐོང་བ། །དེ་ལྟར་དེ་དག་སྐྱོབ་པ་ལ། །གུས་པ་ཤིན་ཏུ་སྐྱེ་བར་འགྱུར། །ཞེས་གསུངས་ཏེ། འཕགས་ནོར་གྱི་ཕུལ་དུ་གྱུར་པ་བློ༷་ཤེས་རབ་ཀྱི་ནོ༷ར་དང་ལྡ༷ན་པ༷ས་བསྟན་པ་
འདི་ལས་ཕྱི་རོལ་ཏུ་གྱུར་པའི་ལུ༷གས་གཞ༷ན་ལ༷་ཇི༷་ལྟར༷་སྙིང༷་པོ༷་མེ༷ད་པ་མཐོ༷ང་བ༷་དེ༷་ལྟར༷་བློ་ལྡན་སྐལ་བཟང་དེ༷་ད༷ག །ལམ་འདི་ནི་བཅོམ་ལྡན་འདས་ཁོ་ནས་བསྟན་ཏོ་སྙམ་དུ། བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་སྐྱོབ༷་པ༷་ཉིད་ལ༷། གུ༷ས་པ༷་
ཤི༷ན་ཏུ༷་སྐྱེ༷་བར༷་འགྱུར༷་ཏེ། ཚ་བས་ཇི་ལྟ་ཇི་ལྟར་གདུང་བ་དེ་ཙམ་དུ་བསིལ་བའི་ཆུ་ལ་དགའ་བ་འཕེལ་བ་བཞིན་ནོ། །དེའང་འདི་ལྟར་གཞན་གྱི་ལུགས་ནི་རིགས་ངན་བླུན་པོའི་སྐྱེ་བོ་ལའང་གྲགས་པའི་ཡུལ་རགས་པ་ལའང་འཁྲུལ་པར་མཐོང་ལ། དེ་བཞིན་
གཤེགས་པའི་གསུང་རབ་ཐོག་མ་དང་བར་དང་ཐ་མར་དགེ་བ། གསེར་བཟང་པོ་ལྟ་བུར་བསྲེགས་པ་དང་བཅད་པ་དང་བདར་བ་དང་འདྲ་བའི་མངོན་སུམ་དང་རྗེས་དཔགས་དང་། རང་གི་ཚིག་རྣམས་ཀྱིས་གནོད་པར་མ་གྱུར་པའི་དཔྱད་གསུམ་གྱིས་དག་པ་དེ་ནི་ཤིན་
13-1-174a


ཏུ་ཐིབ་པོ་དང་ལྡན་པའི་འཁོར་བ་ན་མ་འདྲེས་པའི་ཡེ་ཤེས་ཀྱིས་དེ་ཁོ་ན་ཉིད་ལ་ཅུང་ཟད་ཀྱང་འཁྲུགས་པའམ་རྙོག་པ་མེད་པར་མཐོང་ནས། མི་དང་ལྷ་ཡུལ་བའི་གཙོ་བོ་མཐའ་དག་གི་ཅོད་པན་གྱི་ཕྲེང་བས། ཞབས་པདྨ་
གཉིས་མཛེས་པར་བྱས་པ་དང་ལྡན་པའི་འཇིག་རྟེན་གྱི་བླ་མ་སངས་རྒྱས་བཅོམ་ལྡན་འདས་ལ་བདག་ཤེས་པ་སུ་ཞིག་དོན་དམ་པར་མངོན་པར་མ་ཞེན་པའི་ཚུལ་གྱིས་སྒྲུབ་པ་སྙིང་པོར་བྱེད་པའི་དད་པ་ཅི་ཕྱིར་མི་བསྐྱེད་དེ་བསྐྱེད་པར་རིགས་སོ། །དེ་ལྟར་ན་ཡང་
དག་པའི་ལྟ་བ་དེ་ལས་སེམས་ཅན་ལ་སྙིང་རྗེ་སྐྱེ་ཞིང་། སྙིང་རྗེ་དེ་ལའང་སེམས་ཅན་ཙམ་ལ་དམིགས་པ་དང་། ཆོས་ལ་དམིགས་པ་དང་། དམིགས་པ་མེད་པའི་སྙིང་རྗེ་གསུམ་གྱི་ནང་ནས་གཙོ་བོར་གྱུར་པ་དམིགས་པ་མེད་པའི་སྙིང་རྗེ་འབྱུང་བ་ཡིན་
ཞིང་། ལམ་དེ་ཉིད་སྟོན་པའི་སངས་རྒྱས་ལ་གུས་པ་སྐྱེས་པ་དེ་ལའང་། དང་འདོད་ཡིད་ཆེས་གསུམ་ཡོད་པའི་ནང་ནས་རྒྱལ་པོ་ལྟ་བུ་ཡིད་ཆེས་ཀྱི་དད་པ་སྐྱེ་བས་གཞན་གཉིས་ཀྱང་འཁོར་གྱི་ཚུལ་དུ་འབྱུང་ངོ་། །མི་ལྡོག་པའི་དད་པ་ནི་ཡིད་ཆེས་པ་མི་མཐུན་
ཕྱོགས་ཀྱིས་འཕྲོག་མི་ནུས་པའི་ཁྱད་པར་ཙམ་ཡིན་ནོ། །དེ་ལྟར་ན་དཀར་པོའི་ཆོས་ཐམས་ཅད་ཀྱི་རྩ་བ་ནི་དད་པ་དང་སྙིང་རྗེ་ཡིན་པས། དེ་རེ་རེ་ཡོད་ན་རྣམ་བྱང་གི་ཆོས་ཐམས་ཅད་ཀྱང་འབྱུང་བར་གསུངས་པ་ཡིན་ཏེ། ཤེས་བྱ་སྲིད་ཞི་གཉིས་ལ་དམིགས་
པའི་བློ་ཡིན་ནོ་ཅོག་གི་ནང་ན། སྲིད་པ་ལ་དམིགས་པ་ལ་སྙིང་རྗེ་ལས་བཟང་བ་གཞན་མེད་ཅིང་། ཞི་བ་ལ་དམིགས་པའི་བློ་ལ་དད་པ་ལས་བཟང་བ་མེད་ལ། དེ་གཉིས་ཡོད་པར་གྱུར་ན། དེ་གཉིས་ཟུང་དུ་འབྲེལ་བ་བྱང་ཆུབ་ཀྱི་སེམས་རིན་པོ་ཆེ་འབྱུང་སྟེ། 
13-1-174b


བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་གཅིག་མ་ཞེས་གྲགས་པ་ཡིན་ནོ། །དེ་ལྟ་བུའི་ཀུན་རྫོབ་བྱང་ཆུབ་ཀྱི་སེམས་དེ་ཉིད་ནི། དོན་དམ་བྱང་ཆུབ་ཀྱི་སེམས་མཚན་ཉིད་པ་རྟོགས་པའི་གང་ཟག་ལ་ནམ་ཡང་འབྲལ་མི་ཤེས་སུ་འབྱུང་སྟེ། དེས་དངོས་
པོའི་གནས་ཚུལ་མ་ནོར་བ་མཐོང་བ་ན། རང་དོན་ཡིད་བྱེད་ཀྱི་དྲི་མ་དང་བྲལ་ཏེ། གནས་ཚུལ་ལ་རྨོངས་པའི་འགྲོ་བ་རྣམས་ཀྱི་དོན་དུ་གནས་ལུགས་མངོན་སུམ་མཛད་པའི་སངས་རྒྱས་འཐོབ་འདོད་ཀྱི་བསམ་པ་ནམ་ཡང་ལྡོག་པ་མི་སྲིད་ལ། དོན་དམ་
པར་ནི་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་གཉིས་པོ་ངོ་བོ་འདུ་འབྲལ་མེད་པར་གནས་པ་ཉིད་གཏན་ལ་འབེབས་པ་ནི་སྔགས་ཀྱི་རྒྱུད་སྡེ་རྣམས་ནས་འབྱུང་ངོ་། །དེ་ལྟར་ན་སྟོང་པ་ཉིད་དང་སྙིང་རྗེ་ཟུང་དུ་འཇུག་པས་ས་དང་ལམ་གྱི་བགྲོད་པ་མཐར་ཕྱིན་ཏེ།
རང་དོན་དུ་ཆོས་ཀྱི་སྐུ་དང་། གཞན་དོན་དུ་གཟུགས་ཀྱི་སྐུ་སྟེ། སྐུ་གཉིས་ཟུང་དུ་འཇུག་པ་བརྙེས་ནས། ནམ་མཁའ་ཇི་སྲིད་དུ་ཕྲིན་ལས་རྒྱུན་མི་འཆད་པ་འབད་རྩོལ་མེད་པར་ཡིད་བཞིན་གྱི་ནོར་བུ་དང་། དཔག་བསམ་གྱི་ཤིང་བཞིན་དུ་འགྲོ་བ་
རྣམས་ཀྱི་གནས་སྐབས་དང་མཐར་ཐུག་གི་དགོས་པ་ཡིད་བཞིན་དུ་སྩོལ་བ་ཡིན་ནོ། །དེའང་སྐུ་གཉིས་པོ་གཙོ་ཆེ་ཆུང་གི་སྒོ་ནས་རང་དོན་གཞན་དོན་ཞེས་བཞག་ཀྱང་། དོན་དུ་ངོ་བོ་ཟུང་འཇུག་འབྲལ་མི་ཤེས་པའི་ཡེ་ཤེས་ཀྱི་སྐུ་ཡིན་ནོ། །
དེའང་རང་འགྲེལ་ལས། ཡང་དག་ཤེས་ཚོལ་སྔོན་བཏང་སྟེ། །དོན་དམ་རྣམ་པར་ངེས་གྱུར་ནས། །ལྟ་ངན་ཐིབ་གནས་འཇིག་རྟེན་ལ། །སྙིང་རྗེ་ཀུན་ཏུ་བསྐྱེད་ནས་སུ། །འགྲོ་དོན་བྱེད་པར་དཔའ་གྱུར་པ། །བྱང་ཆུབ་བློ་རྒྱས་མཁས་
13-1-175a


པ་ནི། །བློ་དང་སྙིང་རྗེས་བརྒྱན་པ་ཡིས། །ཐུབ་པའི་བརྟུལ་ཞུགས་ཡང་དག་སྤྱོད། །ཅེས་སྔོན་དུ་དེ་ཁོ་ན་ཉིད་གཏན་ལ་ཕེབས་ནས་དེས་སྙིང་རྗེ་ཆེན་པོ་དྲངས་ཏེ་རྫོགས་བྱང་ལ་འཇུག་པ་དང་། ཡང་། 
གང་དག་དད་པས་རྗེས་འབྲང་བ། །རྫོགས་པའི་བྱང་ཆུབ་སེམས་བསྐྱེད་ནས། །ཐུབ་པའི་བརྟུལ་ཞུགས་མངོན་བྱས་ཏེ། །དེ་ནི་ཡང་དག་ཤེས་ཚོལ་བརྩོན། །ཞེས་གསུངས་པ་ལྟར་སྔོན་དུ་སྙིང་རྗེས་དྲངས་པས་བྱང་ཆུབ་ཀྱི་སེམས་བསྐྱེད་ནས། 
བྱང་ཆུབ་དོན་གཉེར་ལ་མེད་དུ་མི་རུང་བ་ཡང་དག་པའི་དེ་ཁོ་ན་ཉིད་ཚོལ་བར་ཞུགས་པའི་ཚུལ་གཉིས་ཡོད་ལ། གང་ལྟར་ཡང་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་ནི་དངོས་པོའི་ཆོས་ཉིད་ཀྱིས་ཕན་ཚུན་གཅིག་
གྲོགས་སུ་གཅིག་འོང་ཞིང་མི་འབྲལ་བ་ཡིན་ནོ། །བཞི་པ་མཇུག་དོན་ལ། སློབ་དཔོན་གང་གིས་མཛད་པའི་མཛད་བྱང་དང་། ལོ་པཎ་གང་གིས་བསྒྱུར་བའི་འགྱུར་བྱང་གཉིས། དང་པོ། དབུ་མ་རྒྱན་གྱི་ཚིག་ལེའུར་བྱས་པ། སློབ་དཔོན་ཞི་བ་འཚོ་
བདག་དང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པ། འཕགས་པ་ངག་གི་དབང་ཕྱུག་གི་ཞབས་ཀྱི་པདྨ་རྙོག་པ་མེད་པའི་ཟེའུ་འབྲུ་སྤྱི་བོས་ལེན་པས་མཛད་པ། ཞེས་འཇིག་རྟེན་དང་འཇིག་རྟེན་ལས་འདས་པའི་གྲུབ་པའི་མཐའ་
དང་། དེས་མཚོན་ཏེ་རིག་བྱེད་ཀྱི་གནས་རྒྱ་མཚོ་ལྟ་བུ་ཚད་མེད་པ་དག་ལ་ལྷག་མ་ཅུང་ཟད་ཀྱང་མེད་པར་མཁྱེན་པ་དང་། རྗེ་བཙུན་འཇམ་པའི་དབྱངས་དངོས་ལས་ཆོས་གསན་པར་བསྟན་པའོ། །རྫོགས་སོ་ཞེས་པ་གཞུང་མ་ཚང་བ་མེད་པའི་དོན་ཏོ། །
13-1-175b


གཉིས་པ། རྒྱ་གར་གྱི་མཁན་པོ་སུ་རེནྡྲ་བོ་དྷི་སྟེ་ལྷ་དབང་བྱང་ཆུབ་དང་། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་ཚིག་རྒྱ་སྐད་ལས་བོད་སྐད་དུ་བསྒྱུར་ཞིང་། སླར་ཡང་ཚིག་དོན་གྱི་ཆ་ལ་དག་ཐེར་མཛད་ནས་ཞུས་ཏེ་འཆད་ཉན་གྱི་སྒོ་ནས་གཏན་ལ་ཕབ་
པའོ། །ཞེས་སོ། །འདི་ལ་རྗེ་ཙོང་ཁ་པས་ཚིགས་བཅད་ལྷུག་གཉིས་ཀ་རྩ་བར་བཞེད་པ་ནི། འགྲེལ་པ་འདིའང་ཤིང་རྟ་ཆེན་པོ་རང་གི་གསུང་ཤིན་ཏུ་དོན་གྱི་མྱང་བྱ་ཕུལ་དུ་བྱུང་བ་ཞིག་ཡོད་པས་རྩ་འགྲེལ་ལྷན་དུ་འཆད་ཉན་བྱུང་ན་ལེགས་པས་རྩ་བ་
ཡིན་ནོ་ཞེས་གསུངས་ནའང་དོན་གྱི་འགལ་བ་མེད་པ་སོགས་བདག་ཉིད་ཆེན་པོ་དེས་བསྟན་པ་ཐུགས་ལ་གཞག་པའི་དགོས་པ་ཁྱད་པར་བ་ཡོད་པར་གདོན་མི་ཟ་ཡང་། སྤྱིར་ནི་དོན་རེས་འགའ་ཚིགས་བཅད་ཀྱིས་བསྟན་པའམ། རེས་འགའ་ཚིག་ལྷུག་
པས་བསྟན་པ་ལྟ་བུའི་སྤེལ་མ་མ་ཡིན་པར། རྩ་བ་ཚིགས་བཅད་ཀྱི་དོན་དེ་སླར་ཡང་འགྲེལ་པས་བཀྲོལ་ཏེ་བཤད་པ་ཁོ་ན་ཡིན་པ་འདི་ལྟར་ལགས་སོ། །དེས་ན་འདིར་རང་འགྲེལ་ཉིད་འགྲེལ་པའི་ལུགས་སུ་བྱས་ན་ཚིག་ཤིན་ཏུ་མང་བས་གཞན་དག་
འཇུག་དཀའ་བའི་ཕྱིར་འགྲེལ་པའི་ཚིག་འབྲུ་གཉེར་བ་མ་ཡིན་ཀྱང་། དོན་དུ་འགྲེལ་བའི་གནད་ཀུན་གསལ་པོར་བཀྲོལ་ཡོད་པས། འདི་ལ་བརྟེན་ཏེ་འགྲེལ་པ་ཉིད་ཀྱི་ཚིག་གི་ནུས་པ་རྣམས་ཀྱང་མྱོང་ནུས་པས། སླར་ཡང་རང་འགྲེལ་དང་དཀའ་
འགྲེལ་གཉིས་ལའང་བལྟ་བར་བྱས་ན་ལེགས་སོ། །ད་ནི་གོང་གི་ས་བཅད་གཉིས་པ་ནི། དེ་ལྟར་ཡོན་ཏན་གྱི་ཁྱད་པར་དུ་མས་འཕགས་པའི་གཞུང་འདི་ཆོས་ཅན། རྣམ་པར་འགྲེལ་ཞིང་བཤད་པ་ལ་དགོས་པ་ཡོད་དེ། ཐུན་མོང་དང་
13-1-176a


ཐུན་མོང་མིན་པའི་ཕན་ཡོན་གྱི་ཁྱད་པར་འཐོབ་པའི་ཕྱིར། དཔེར་ན་ཡིད་བཞིན་གྱི་ནོར་བུ་བྱི་དོར་བྱས་པ་བཞིན་ནོ། །དེ་ལ་ཐུན་མོང་དུ་འདི་ལྟར་སངས་རྒྱས་ཀྱི་བཀའི་དགོངས་པ་དྲི་མ་མེད་པ་དེ་དག་རིགས་པའི་ལམ་ནས་
དྲངས་ཏེ་ངེས་པ་སྐྱེ་བའི་ཚུལ་འདི་ལྟ་བུས་བཟུང་ན། ཚུལ་གཉིས་ཀྱིས་བསྡུས་པའི་ཐེག་པ་ཆེན་པོ་མཐའ་དག་བཟུང་བའི་ཕན་ཡོན་ལ་རེ་བ་ཡང་དག་བྱར་ཡོད་དེ། ཆོས་གཟུང་བའི་མཆོག་ནི་རྟོགས་པའི་ཆོས་ཡིན་ལ། དེ་འཛིན་པ་ནི་ཇི་ལྟ་བ་བཞིན་
དུ་རང་གིས་རྟོགས་ནས་ཉམས་སུ་ལེན་པ་ཁོ་ན་ཡིན་པའི་ཕྱིར་རོ། །དེ་ལྟར་ཆོས་ཀྱི་དབྱིངས་རྣམ་པར་དག་པ་ལ་ཕྱིན་ཅི་ལོག་ཏུ་རྟོག་པ་ཐམས་ཅད་རིགས་པ་དྲི་མ་མེད་པས་བསལ་ནས། རང་གིས་རྟོགས་པ་ལྟར་གཞན་ལ་སྟོན་པར་བྱེད་པ་དེའི་ཕན་ཡོན་
ཀྱང་། ཏིང་འཛིན་རྒྱལ་པོ་ལས། ཏིང་འཛིན་འདི་ནི་སུ་དག་སྟོན་བྱེད་པ། །དེ་ནི་ནམ་ཡང་བྱང་ཆུབ་ཐེ་ཚོམ་མེད། །བསོད་ནམས་ཕུང་པོ་མཆོག་དང་གང་ལྡན་ཞིང་། །གང་ལ་ཚད་མེད་བསམ་གྱིས་མི་ཁྱབ་པ། །འཇིག་རྟེན་སློབ་དཔོན་
སངས་རྒྱས་རྣམ་པར་འདྲེན། །རང་བྱུང་ཐུགས་རྗེ་ཆེན་པོ་མ་གཏོགས་པ། །དེ་ཡི་འོག་ཏུ་སེམས་ཅན་སུ་དག་ཀྱང་། །སྟོང་ཆེན་འདི་ན་བསོད་ནམས་ཕུང་པོ་དང་། །མཚུངས་མེད་བསམ་གྱིས་མི་ཁྱབ་ཡེ་ཤེས་ཀྱིས། །མཉམ་པར་གྱུར་པ་ནམ་
ཡང་ཡོད་མེད་དོ། །ཞེས་པ་ལ་སོགས་པས་མཚོན་ཏེ་ཤེས་པར་བྱའོ། །ཐུན་མོང་མ་ཡིན་པའི་དབང་དུ་ན། རྗེ་བཙུན་འཇམ་པའི་དབྱངས་དང་ངོ་བོ་ཐ་མི་དད་པའི་ཤིང་རྟ་ཆེན་པོ་འདིས། སུས་ཀྱང་གདུལ་བར་དཀའ་བའི་རང་རེ་བོད་ཡུལ་རྒྱལ་
13-1-176b


བསྟན་གྱི་སྣང་བ་དཀར་པོས་ཁྱབ་པར་མཛད་པའི་སྨོན་ལམ་དང་། ཐུགས་རྗེའི་རྟེན་འབྲེལ་གྱིས་རང་ཅག་རྣམས་ལ་ལྷག་པར་བྱིན་རླབས་འཇུག་པ་དང་། ཁྱད་པར་དུ་གཞུང་ཚིག་ཚོགས་ཉུང་ཡང་རིགས་པ་རྣོ་ལ་ཆོད་ཆེ་བ་ཕྱོགས་གཅིག་ཏུ་སྣང་བ་འདི་འདྲ་
རྒྱ་གཞུང་གཞན་ནའང་དཀོན་པར་འདུག་པ་ནི་མང་དུ་བརྗོད་པས་ཅི་བྱ་སྟེ། གསེར་གྱི་མདངས་དང་བུ་རམ་གྱི་རོ་བཞིན་དུ་གཞུང་མང་ཐོས་ཟབ་རྒྱས་ཀྱི་བློ་ཅན་རྣམས་ལ་མངོན་སུམ་གྲུབ་པ་འདི་ལྟར་ལགས་པས་བློ་གྲོས་ཀྱི་སྒོ་མྱུར་དུ་འབྱེད་པའི་ཕྱིར་དང་། 
མགོན་པོ་དེའི་བཀའ་དྲིན་རྗེས་སུ་དྲན་ནས་དྲིན་གཟོ་བ་ལ་སོགས་པའི་དགོས་པའང་ཡོད་དོ། །དེ་སྐད་དུའང་དཔལ་ས་སྐྱ་པཎྜི་ཏས། སྡོམ་བརྩོན་དམ་པ་དཔལ་ལྡན་ཞི་བ་འཚོ། །བརྟུལ་ཞུགས་གྲུབ་པ་པདྨ་སཾ་བྷ་ཝ། །བློ་གསལ་དབང་པོ་པདྨའི་ངང་ཚུལ་
སོགས། །སྙིགས་མའི་དུས་ཀྱི་རྒྱལ་བ་གཉིས་པ་ཡིན། །ཞེས་དང་། རྗེ་ཙོང་ཁ་བ་ཆེན་པོས། འཇམ་དཔལ་དབྱངས་ཀྱིས་རྗེས་བཟུང་བས། །རང་གཞན་གྲུབ་མཐའི་ཕ་རོལ་སོན། །ཟབ་མོའི་དོན་ལ་མངའ་བརྙེས་པ། །དཔལ་ལྡན་ཞི་
བ་འཚོ་ལ་འདུད། །མགོན་དེས་གངས་ཅན་ཁྲོད་འདིར་རྒྱལ་བའི་བསྟན། །ཐོག་མར་ལེགས་པར་བཙུགས་ཚེ་ཀླུ་སྒྲུབ་ལུགས། །ཕྱོགས་འདིར་དར་བའི་རྟེན་འབྲེལ་ལེགས་བསྒྲིགས་པས། །ད་དུང་དུ་ཡང་ཟབ་མོ་དབུ་མ་ལ། །མོས་པའི་
ཕྱོགས་འཛིན་རྒྱུན་མི་ཆད་པར་བྱུང་། །དེ་ཕྱིར་མཁས་པའི་དབང་པོ་དེ་ཡི་གཞུང་། །བདག་ཅག་རྣམས་ཀྱིས་མི་ཉམས་སྤེལ་བ་ནི། །བཀའ་དྲིན་གཟོ་བའི་མཆོད་པ་བླ་མེད་ཡིན། །རྣམ་དཔྱོད་ནམ་མཁའི་ཁྱོན་ལྟར་མཐའ་ཡས་ཤིང་། །
13-1-177a


དམིགས་མེད་བརྩེ་བའི་སྟོབས་ནི་ཤུགས་དྲག་པས། །ཡོངས་སུ་དྲངས་པའི་གཞུང་མཆོག་དབུ་མའི་རྒྱན། །འདི་ཡི་རིགས་པའི་དགའ་སྟོན་མྱངས་པ་ན། །སྐྱེ་བ་མང་པོར་རིགས་པའི་ལམ་དུ་ནི། །ངལ་བ་མང་
བྱས་སྒྲུབ་དང་སུན་འབྱིན་ལ། །ལེགས་པར་བྱང་བའི་རྒོལ་བ་མཁས་མང་གི། །གཙུག་ན་གཙུག་རྒྱན་ནོར་བུ་ལྟར་མཐོ་བས། །སྨྲ་བ་ངན་པའི་ཚོགས་རྣམས་མཐར་མཛད་པ། །འཕགས་པའི་ཡུལ་ནའང་ཆེས་དཀོན་འདི་འདྲ་ནི། །བོད་ཀྱི་
རྗེ་རྒྱལ་བཙན་པོས་སྤྱན་འདྲོངས་པ། །ཨེ་མ་བདག་ཅག་བོད་འབངས་སྐལ་བཟང་ཞེས། །ཡིད་ནི་རྨད་བྱུང་བདེ་ལ་རོལ་པ་ཡིས། །ཡོངས་སུ་བསྐྱོད་པས་གཞན་གྱི་དབང་གྱུར་པས། །ཞེས་སོགས་བསྔགས་པ་རྣམས་ནི་བསྔགས་པའི་ཡུལ་
མཆོག་གི་ཡོན་ཏན་མཁྱེན་པ་ནི་བསྔགས་པ་པོ་རང་ཉིད་རྣམ་ཐར་མཆོག་ལ་གནས་པའི་འབྲས་རྟགས་ཡིན་ཏེ། རིན་པོ་ཆེའི་རིན་ཐང་ནི་འབྱོར་ལྡན་ཤེས་རབ་དང་ལྡན་པ་འབའ་ཞིག་གི༷ས་ཤེས་པ་བཞིན་ནོ། །གཞན་ཡང་བཀའ་ཆེམས་ཀྱི་ཡི་གེ་
རྙིང་པ་རྣམས་ནས་མཁན་ཆེན་གྱི་ལུགས་ལ་ཡིད་ཆེས་ཤིང་འཛིན་པ་ཡོད་པ་དེ་སྲིད་དུ་གངས་ཅན་ན་བསྟན་པའི་སྣང་བ་མི་ནུབ་པར་གསུངས་པ་དང་། མཁྱེན་བརྩེ་ནུས་པའི་བདག་ཉིད་མཁན་ཆེན་བྱང་ཆུབ་སེམས་དཔའ་རང་ཉིད་ཀྱི་ཞལ་གདམས་
མཆོག་གླིང་གཏེར་བྱོན་ལས་ཀྱང་། སྟོན་པའི་བསྟན་པ་རིན་ཆེན་འདི༔ གངས་ཅན་ལྗོངས་སུ་ངས་གསལ་བས༔  བདག་གི་རྗེས་སུ་ཞུགས་ནས་ཀྱང་༔ སྟོན་པའི་བསྟན་པ་མཆོག་ཏུ་ཟུངས༔  ལྷ་ཅིག་ཁྲི་སྲོང་ལྡེའུ་བཙན་དང་༔ 
13-1-177b


རྗེ་བཙུན་པདྨ་སཾ་བྷ་ཝ༔ ཁོ་བོ་བོ་དྷི་སཏྭ་ཡིས༔ བཀའ་ཁྲིམས་བཅས་པ་ཇི་བཞིན་དུ༔ ཚེ་དང་ལྡན་རྣམས་བྱ་དགོས་སོ༔  རྒྱལ་བའི་བསྟན་པ་ཉམས་དམའ་ཞིང ༔ ཚེ་དང་ལྡན་པ་ཉམ་ཐག་ན༔ སྟོན་པའི་ཐུགས་རྗེ་བསྐུལ་བར་
གྱིས༔ ང་ལ་གསོལ་བ་ཡང་ཡང་ཐོབ༔ ཕྱི་ལྟར་འདུལ་ཁྲིམས་ལེགས་པར་བསྲུང་༔ ནང་ལྟར་བྱང་ཆུབ་སེམས་འབྱོངས་ནས༔ གསང་བ་སྔགས་ཀྱི་གྲུབ་པ་བརྙེས༔ ལྕང་ལོ་ཅན་དུ་མངོན་འཚང་རྒྱ༔ གསང་བའི་བདག་པོར་
དབྱེར་མེད་ཅིང་༔ སྤྲུལ་པས་བོད་ཀྱི་བསྟན་པ་སྐྱོང་༔ དེ་ཕྱིར་བྱིན་རླབས་ངེས་པར་འཇུག༔ སྤྱིར་ནི་རྒྱལ་བའི་སྐུ་གསུང་ཐུགས༔ ལེགས་པར་བཞེངས་ལ་བཀུར་སྟི་བྱ༔ རྟེན་འབྲེལ་བདག་གི་སྐུ་བཞེངས་ནས༔ བཀའ་ཆེམས་
བསྒྲགས་ལ་སེམས་བསྐྱེད་བྱ༔ མདུན་གྱི་ནམ་མཁར་སྤྱན་དྲངས་ལ༔ ཕྱག་འཚལ་མཆོད་བསྟོད་གསོལ་འདེབས་ན༔ རྣམ་དག་ཚུལ་ཁྲིམས་ལེགས་པར་འགྱུར༔ རང་གི་སྙིང་གར་གསལ་བསྒོམས་པས༔ བྱང་ཆུབ་སེམས་
མཆོག་འབྱོངས་པར་འགྱུར༔ དབྱེར་མེད་སྐུ་ཡི་ང་རྒྱལ་བཟུང་༔ དངོས་གྲུབ་ཐོབ་ཅིང་དགེ་འདུན་འདུ༔ ཞེས་པ་ལ་སོགས་པ་བཞིན་དུ་དུས་མཐར་རྒྱལ་བསྟན་ལ་ཕན་པའི་རྟེན་འབྲེལ་སོགས་དགོས་པའི་མཆོག་དུ་མ་ཡོད་པ་ཡིན་ནོ། །
འདིར་སྨྲས་པ།  ཐེག་མཆོག་ཁང་བཟངས་ཡངས་པར་ཟབ་གསལ་བློ་ཡི་སྨིན་ལེགས་མ། །གཞུང་མང་རྒྱན་གྱིས་ཉེར་མཛེས་ལྷག་བསམ་ཟུར་མིག་གཡོ་བཞིན་དུ། །བདེན་གཉིས་རིགས་པའི་རྒྱུད་མངས་རྣམ་དཔྱོད་སོར་མོས་བསྣུན་ནས་
13-1-178a


ཀྱང་། །ལེགས་བཤད་མགྲིན་པའི་གླུ་དབྱངས་འཇམ་མགོན་དགྱེས་པའི་ཆེད་དུ་སྤེལ། །ཀྱེ་མ་བོད་གཞུང་ཚིག་མང་དོན་ཆུང་ཚེགས་ཆེ་ཇི་ཙམ་སྦྱངས་ཀྱང་ཐེ་ཚོམ་རྒྱ། །བཀྲོལ་ལ་ནུས་པ་མི་རྣོ་རྣམས་ལ་ཡུན་
རིང་འབད་ནས་གཞུང་མཆོག་འདི་ལྟ་བུ། །སྤོབས་པའི་མཆོག་སྦྱིན་ཡིད་གཉིས་གཅོད་ལ་འཇམ་དབྱངས་ཕྱག་གི་རལ་གྲི་ལྟར་རྣོ་བ། །གུས་པས་མི་འཛིན་དེ་དག་སྐལ་པ་ཅི་ཞིག་གྱུར་སྙམ་བདག་ནི་ཡིད་སྐྱོ་འཕེལ། །དེ་ཕྱིར་རྙེད་དང་གྲགས་པའི་བློ་
མེད་པར། །བླ་མའི་བཀའ་དང་ལྷག་བསམ་བཟང་པོ་དང་། །མཆོག་དང་མཆོག་གི་བསྟན་ལ་གུས་པ་ཡིས། །རིགས་པའི་ལམ་མཆོག་རིགས་པའི་ཚུལ་གྱིས་བཀྲལ། །རྒྱལ་བའི་ཆོས་ཚུལ་ནམ་མཁའི་མཐའ་ལྟ་བུ། །སློབ་པའི་འཕགས་
རྣམས་ཀྱིས་ཀྱང་གཞལ་དཀའ་ན། །བྱིས་པའི་བློ་ཅན་བདག་གིས་སྨོས་ཅི་འཚལ། །དེ་ཕྱིར་ནོངས་པར་གྱུར་ན་མཐོལ་ཞིང་བཤགས། །ལུང་བཟང་རིན་ཆེན་སྣང་བ་ལ་བརྟེན་ནས། །རིགས་པའི་འདྲེན་བྱེད་གསལ་པོར་བགྲད་བྱས་པས། །ཚུལ་
ལུགས་བཟང་པོ་མཐོང་ནས་གང་སྦྱར་བའི། །ལེགས་བྱས་སྟོན་ཀའི་ཟླ་འདྲ་དྲི་མེད་དེས། །སོ་སོ་ཡང་དག་རིག་པ་བཞི་ཡི་སྒོ། །རིགས་པའི་གཞུང་བཟང་ཟབ་མོ་འདི་ལྟ་བུ། །རང་གིས་རྟོགས་ནས་གཞན་ལ་འདོམས་པ་ལ། །སྨྲ་བའི་སེང་
གེའི་བརྟུལ་ཞུགས་འགྲུབ་གྱུར་ཅིག །གང་གིས་གཞུང་འདི་འཆད་ཉན་ཀློག་པ་ཡི། །སྙིང་ལ་འཇམ་དཔལ་དགྱེས་པའི་འོད་ཞུགས་ནས། །མཁན་ཆེན་ཆོས་ཀྱི་རྒྱལ་པོའི་རིང་ལུགས་གང་། །མི་ཉམས་ཕྱོགས་དུས་ཀུན་ཏུ་སྤེལ་གྱུར་ཅིག །
13-1-178b


གྲུབ་མཐའ་ཀུན་གྱི་གནད་གསང་འབྱིན་བྱེད་ཅིང་། །ཕྲ་ཞིང་ཟབ་མོའི་དོན་ཀུན་རྗེན་པར་སྟོན། །རིགས་ལམ་འདི་འདྲའི་ཚུལ་དང་གང་གི་བློ། །མཚུངས་པར་སྦྱོར་པ་སྨྲ་བའི་སེང་གེ་ཡིན། །གཞུང་བཟང་ནོར་བུའི་རྒྱན་མཆོག་འདི་མཐོང་ན། །རྣམ་མང་བསྟོད་པའི་འུད་
ལྡན་གཞན་གྱི་གཞུང་། །བྱིས་པའི་སྙེམས་པ་སྤེལ་བྱེད་མཆིང་བུའི་རྒྱན། །བཟང་པོར་རློམས་པའི་ཞེ་འདོད་ཅིས་མི་ལྷོད། །སྙིང་གི་པདྨོ་རབ་ཏུ་བཞད་པར་མཁན་ཆེན་མཆོག་དང་འཇམ་པའི་དབྱངས། །དབྱེར་མེད་ཞལ་གྱི་གཟི་བྱིན་བྱེ་བས་རྨོངས་པའི་མུན་པ་མཐར་བྱས་
ཏེ། །མཁའ་ཁྱབ་འགྲོ་ལ་གཅིག་ཏུ་བརྩེ་བས་མཁའ་བཞིན་རྟག་ཏུ་སྲིད་པ་འདིར། །མཁའ་འདྲ་དྲི་མེད་ཟབ་མོའི་ཆོས་ཀྱི་རྒྱལ་རྔ་མཆོག་ཏུ་བརྡུང་གྱུར་ཅིག །མི་བཟད་དུས་ཀྱི་སྙིགས་མ་ཉི་འོད་ནུབ་པའི་སྨག་བཞིན་ཆེས་ཆེར་འཁྲིགས་ན་ཡང་། །
རྒྱལ་དང་རྒྱལ་སྲས་ཐུགས་བསྐྱེད་སྤྲིན་མེད་མཁའ་ལ་ཟླ་བ་བྱེ་བ་ལྟར་གསལ་ནས། །བཀའ་དང་བཀའ་ཡི་དགོངས་འགྲེལ་དྲི་མ་མེད་རྣམས་བཤད་དང་སྒྲུབ་པའི་ཕྲིན་ལས་ཀྱིས། །བསྟན་དང་འགྲོ་བའི་དགེ་ལེགས་སྣང་བ་གོང་ནས་གོང་དུ་
འཕེལ་ཞིང་རྒྱས་གྱུར་ཅིག །ཅེས་དབུ་མ་རྒྱན་གྱི་གཞུང་རྣམ་པར་བཤད་པ་འདིའང་གོང་དུ་ཇི་སྐད་སྨོས་པ་ལྟ་བུས་མཚོན་ཏེ་དགོས་པའི་དབང་དུ་མ་གཟིགས་ནས། མཁན་སློབ་ཆོས་གསུམ་གྱི་ཐུགས་རྗེ་གཅིག་ཏུ་བསྡུས་པ་མཁས་ཤིང་གྲུབ་བརྙེས་
ཐམས་ཅད་ཀྱི་རྒྱལ་པོ། མཁྱེན་མཆོག་ཟུར་ཕུད་ལྔ་པ་ཉིད་ངུར་སྨྲིག་འཛིན་པའི་དགེ་སློང་གི་གཟུགས་སུ་རྣམ་པར་རོལ་པ། བདག་ཅག་གི་འདྲེན་མཆོག་མཚུངས་མེད་ཚད་མེད་པའི་བཀའ་དྲིན་གྱི་མངའ་བདག་མཚན་བརྗོད་པར་དཀའ་བ། 
13-1-179a


འཇམ་དབྱངས་མཁྱེན་བརྩེའི་དབང་པོ་ཞེས་སྙན་པའི་བ་དན་སྲིད་པར་ཡོངས་སུ་གྲགས་པ་དེ་ཉིད་ཀྱིས། རྒྱ་བོད་ཀྱི་འགྲེལ་པའི་ཡིག་ཆ་རྣམས་གནང་ནས་ཞིབ་ཏུ་ལྟོས་ལ་འགྲེལ་བཤད་ཅིག་གྱིས་ཞེས་པའི་རྡོ་རྗེའི་
བཀའ་ལུང་སྤྱི་བོར་ཕེབས་པ་གུས་པས་དང་དུ་བླངས་པའི་མོད། ཤིན་ཏུ་ཕྲ་བའི་གཞུང་ལུགས་འདི་ལྟ་བུ་ལ་འགྲེལ་བ་རྩོམ་པའི་ནུས་པ་ནི་དམན་པ་བདག་ལྟ་བུ་ལ་མེད་ནའང་། རྗེ་བཙུན་བླ་མའི་བྱིན་རླབས་ཀྱིས་ཅུང་ཟད་འབྲི་བའི་སྤོབས་པ་སྐྱེས་
པའི་ཚེ། སྔ་འགྱུར་གྱི་རིང་ལུགས་པ་ཆེན་པོ་པདྨའི་མཚན་གྱིས་ཀྱང་ནན་ཏན་དུ་བྲིས་ཤིག་པའི་གསུང་གནང་བས་ཀྱང་བརྩོན་པ་བསྐྱེད་དེ། རང་ལོ་སོ་གཅིག་པ་རབ་ཚེས་མེ་བྱིའི་བགྲང་བྱ་གསར་དུ་ཤར་བའི་ནག་པ་ཟླ་བའི་ཚེས་གསུམ་ལ་མགོ་བརྩམས་
ནས། སྔ་ཐུན་རྣམས་སུ་བརྒྱུད་མར་བྲིས་ཏེ་ཟླ་བ་དེ་ཉིད་ཀྱི་ཚེས་ཉེར་བཞི་ལ་རྫོགས་པར་བགྱིད་པ་པོ་ནི། རྗེ་མཚུངས་མེད་མཁྱེན་བརྩེའི་དབང་པོ་དེ་ཉིད་ཀྱི་ཞབས་རྡུལ་ལ་སྤྱི་བོས་རེག་པའི་མཐུ་ལས་བློ་གྲོས་ཀྱི་འཇུག་པ་ཅུང་ཟད་ཐོབ་ཅིང་། གཞན་
ཡང་ངེས་པ་དོན་གྱི་རྡོ་རྗེ་འཆང་ཆེན་པོ་དབང་ཆེན་དགྱེས་རབ་རྡོ་རྗེ་དང་། གནས་ལྔ་རིག་པའི་པཎྜི་ཏ་ཀརྨ་ངག་དབང་ཡོན་ཏན་རྒྱ་མཚོ་དང་། རྒྱལ་སྲས་མཁས་པའི་ཁྱུ་མཆོག་འཇིགས་མེད་ཆོས་ཀྱི་དབང་པོ་སོགས་དམ་པ་དུ་མའི་བཀའ་དྲིན་གྱིས་
བསྐྱངས་པས་རྒྱལ་བསྟན་ལ་དད་པའི་སྣང་བ་ཅུང་ཟད་ཐོབ་པ། རིག་བྱེད་ཀྱི་བཏགས་མིང་དུ་འཇམ་དཔལ་དགྱེས་པའི་རང་མདངས་མཚོ་བྱུང་བཞད་པའི་གེ་སར་དུ་འབོད་པ་བདག་གིས་བྲིས་ཤིང་། སླར་ཡང་སྐྱབས་རྗེ་དམ་པ་ཉིད་ལས་དག་སྣང་
13-1-179b


ཉེ་བརྒྱུད་ཀྱི་བཤད་ལུང་ཟབ་མོ་ལེགས་པར་མནོས་ནས། དེ་མ་ཐག་སྡོམ་བརྩོན་སྡེ་སྣོད་འཛིན་པ་ཆེན་པོ་བཀྲ་ཤིས་ཀྱི་གྲངས་ལ་ཞག་ཉེར་གཅིག་གི་རིང་དུ་བཤད་ཁྲིད་བགྱིས་པའི་སྐབས་སུ་ཅུང་ཟད་ཞུས་དག་ཏུ་བྱས་པ་འདིས། རྒྱལ་བ་ཉི་མའི་
གཉེན་གྱི་རིང་ལུགས་ཡང་དག་པའི་རིགས་ལམ་སེང་གེའི་སྒྲ་བོ་ཆེ་འཇིག་རྟེན་གྱི་ཁམས་ཀུན་ན་རྟག་ཏུ་ཁྱབ་པར་བསྒྲགས་པས། བདུད་དང་། མུ་སྟེགས་དང་། ཀླ་ཀློ་ལ་སོགས་པ་ཕ་རོལ་གྱི་རྒོལ་བའི་སྤོབས་པ་མ་ལུས་པ་ལྷག་མེད་དུ་བཅོམ་
ནས། སངས་རྒྱས་ཀྱི་བསྟན་པ་རིན་པོ་ཆེ་ཕྱོགས་དུས་ཀུན་ན་རྒྱལ་ཞིང་རྒྱས་པའི་རྟེན་འབྱུང་དུ་གྱུར་ཅིག་མངྒ་ལཾ།།           །།ཨོཾ་སྭ་སྟི།     སྲས་བཅས་རྒྱལ་བའི་མཁྱེན་རབ་འཇམ་པའི་དབྱངས། །ངུར་སྨྲིག་འཛིན་པའི་
གཟུགས་སུ་རྣམ་རོལ་པས། །ཐུབ་བསྟན་ཆོས་ཀྱི་རྒྱལ་མཚན་ལེགས་འཛུགས་པ། །མཁན་ཆེན་ཆོས་ཀྱི་རྒྱལ་པོ་རྒྱལ་གྱུར་ཅིག །༡ གང་དེའི་རྣམ་དཔྱོད་མཚོ་ཆེན་ལས་འོངས་པ། །ལེགས་བཤད་ཉི་མ་བརྒྱ་པའི་སྣང་བ་ཡིས། །
སྲིད་པའི་སྨག་རུམ་གཏན་དུ་ཟད་བྱེད་པའི། །གཞུང་ལུགས་རྒྱལ་བསྟན་མཛེས་པའི་རྒྱན་གཅིག་གང་། །༢ མཁས་ཤིང་གྲུབ་བརྙེས་བྱེ་བའི་བློ་གྲོས་ཀྱིས། །ཡང་ཡང་བཟུང་བྱས་རིག་ལམ་སེང་གེའི་སྒྲ། །རྒྱུན་མར་བསྒྲགས་པས་
འཕགས་བོད་འཛིན་མའི་ཁྱོན། །ཀུན་དགའི་དཔལ་དང་ལྡན་པར་གྱུར་མོད་ཀྱི། །༣ དུས་ཀྱི་དབང་གིས་འཆད་དང་ཉན་པའི་སྒོ། །རེ་ཞིག་ངལ་བསོས་བཞིན་དུ་གྱུར་ན་ཡང་། །རིགས་གསུམ་སེམས་དཔའི་རྣམ་ཐར་གཅིག་བསྡུས་པ། །
13-1-180a


སྙིགས་མའི་རྒུད་པ་ཀུན་སེལ་བསྟན་འགྲོའི་མགོན། །༤ འཇམ་དབྱངས་མཁྱེན་བརྩེའི་དབང་པོ་ཞེས་གྲགས་པའི། །སྙན་པའི་བ་དན་སྲིད་ན་མངོན་མཐོ་བ། །གང་གི་ཐུགས་བསྐྱེད་ཟབ་མོའི་བྱིན་རླབས་དང་། །
དགྱེས་པའི་གསུང་གི་སྣང་བ་ལ་བརྟེན་ནས། །༥ མདོ་སྔགས་བསྟན་པ་ཡོངས་སུ་རྫོགས་པ་ཡི། །བཤད་དང་སྒྲུབ་པའི་ལམ་སྲོལ་དྲི་མེད་པ། །སྔོན་གྱི་དུས་བཞིན་སླར་ཡང་གསལ་བ་ན། །ད་གདོད་ཐུབ་བསྟན་བདུད་རྩིའི་མྱོང་བ་ཤེས། །
༦ ཐེག་མཆོག་དབུ་མ་ཆེན་པོའི་རིགས་པའི་གནད། །གཞུང་བཟང་འདི་འདྲའི་ཚུལ་ལ་བརྟེན་ནས་སུ། །ཐེ་ཚོམ་སྨག་དང་བྲལ་བར་ངེས་བྱེད་པའི། །བློ་ལྡན་བློ་ཡི་སྣང་བ་འཕེལ་བྱའི་ཕྱིར། །༧ ཟབ་མོ་དབུ་མའི་རྒྱན་གྱི་གཞུང་ཉིད་ལ། །གསལ་
ཞིང་གོ་བདེར་བཤད་པའི་འགྲེལ་པ་འདིའི། །འཛད་མེད་ཆོས་ཚར་སྦར་གྱི་བཀོད་པ་ཡང་། །མཚུངས་མེད་དཔལ་ལྡན་བླ་མའི་ཕྲིན་ལས་ལགས། །༨འདི་ཡི་དགེ་བས་ས་གསུམ་འགྲོ་བ་ཀུན། །ཟབ་ཅིང་རྒྱ་ཆེའི་ཤེས་རབ་གཏེར་གྲོལ་ནས། །
བདེ་བར་གཤེགས་པའི་ཆོས་མཛོད་མ་ལུས་པ། །འཆད་ཉན་རྩོམ་པས་འཇིག་རྟེན་མཛེས་གྱུར་ཅིག །༩ ཐུབ་བསྟན་ཡོངས་སུ་རྫོགས་པའི་ལུས་སྟོབས་རྒྱས། །རིགས་ལམ་རྣོ་དབལ་འཁོར་ལོའི་སྣ་ཞགས་ཅན། །ལེགས་བཤད་འཆི་མེད་
བཞོན་པ་འདིར་བརྟེན་ནས། །རྒྱལ་བསྟན་ཕྱོགས་ལས་རྣམ་པར་རྒྱལ་གྱུར་ཅིག །༡༠ ཅེས་པའང་སྤར་བྱང་སྨོན་ཚིག་བཅས་རྗེ་བླ་མའི་བཀའ་ཡི་སྣང་བས་སྐྱོང་བ་འཇམ་དཔལ་དགྱེས་པས་བྲིས་པ་དགེའོ།།    །།སརྦ་དཱ་ཀ་ལྱཱ་ཎཾ་བྷ་བ་ཏུ།
13-1-180b


༄༅། །རྡོ་གྲུབ་པ་དམ་ཆོས་ཞེས་པས་གཞན་གྱི་ཟེར་སྒྲོས་བསྡུས་ནས་མཁས་སུ་རེ་བའི་འཁྱལ་ངག་དེ་དག་མི་མཁས་མཚང་ཕུད་དུ་ཁོ་རང་ནས་བསྐུལ་བ་བཞིན་ཉམས་མཚར་དུ་བཀོད་པ་བཞུགས།  ༈ ན་མོ་མཉྫུ་ཤྲཱི་ཡེ། བདག་ཉིད་གྲགས་ཕྱིར་གཞན་ལ་ཐོ་བཙམ་ཕྱིར། །བབ་བབ་བྲིས་
དང་ཁེངས་པའི་རྣམ་པ་སོགས། །གཙོར་བྱས་མ་ཡིན་ཕན་པའི་སེམས་ཀྱིས་འདི། །འཇམ་མགོན་དགྱེས་པའི་ཞལ་ལུང་བདག་གིས་བྲིས། །གཞན་ཟེར་རྗེས་བརྗོད་འདུ་ཤེས་སྣ་ཚོགས་ཀྱིས། །དེ་ལ་སྤྱི་དོན་དམ་ཆོས་མིང་གིས་བརྩམས། །ཀུན་སློང་བཟང་ངོ་བར་
སྐབས་ཚིག་ལས་རྟོགས། །རྣམ་དཔྱོད་གསལ་ལོ་གཞུང་གི་དོན་ལས་ཤེས། །ང་རྒྱལ་མེད་དོ་རྩོམ་པའི་གཤིས་ལས་གསལ། །བསྟན་བཅོས་བཟང་ངོ་རློམ་པའི་སྤྱི་བརྟོལ་ཅན། །དེ་ཕྱིར་ལེགས་ཉེས་འབྱེད་ནུས་དཔང་པོའི་དྲུང་། །གླེང་བར་བྱ་ཞེས་ནན་
ཏན་ལྷུར་བླངས་ཀྱང་། །སློབ་དཔོན་བརྙས་པར་འགྱུར་ན་མི་རུང་ཞེས། །ཕ་རྗེས་བུ་འཇུག་ཡ་རབས་ཚིག་གིས་བཟློག །ད་རུང་དོགས་སེལ་ཡི་གེར་བྲིས་ཞེས་བསྐུལ། །སྐྱེ་བོའི་གང་དྲན་ངག་ལ་གང་དྲན་ལན། །འདེབས་དང་ཀུན་རྟོག་སློང་བའི་ངག་སྣ་
ཚོགས། །བསྐྱུངས་ནས་དབེན་སར་རྩེ་གཅིག་གནས་འདོད་ལ། །དོན་མེད་ཉིན་མཚན་འདའ་བས་ཅི་བྱ་ཡང་། །མདོར་བསྡུས་ཚིག་གི་སྣང་བ་རྣམ་པར་འབྱེད། །དང་པོར་དབུ་མ་ལ་གཞི་ལམ་འབྲས་གསུམ་རེ་རེ་ནས་དབུ་མ་མིན་པར་སྨྲ་བ་ནི་རྣམ་པར་འཁྱམས་
ཏེ། སློབ་དཔོན་ཕྱོགས་གླང་སོགས་འབྲས་བུའི་དབུ་མ་དབུ་མ་མཚན་ཉིད་པ་དང་། གཞན་བཏགས་པར་བཞེད། གཞན་དག་ལམ་དབུ་མ་མཚན་ཉིད་པར་བཞེད། གཞན་གཉིས་བཏགས་པ་བར་འདོད་པ་དང་། ཡང་ཁ་ཅིག་གཞི་དབུ་མ་དབུ་མ་མཚན་ཉིད་པར་
13-1-181a


བཞེད་པ་ཡང་དོན་གྱིས་ཐོབ་ཀྱང་། དེ་དག་སོ་སོའི་དགོངས་པ་རིགས་ལམ་ནས་སྒྲུབ་ཏུ་ཡོད་པ་ལ། དེར་མི་འཐད་པ་སྟོན་བྱེད་དུ་ཟུང་འཇུག་འདུས་བྱས་སུ་གོ་ནས། དབུ་མ་དོན་དམ་བདེན་པ་སྟོང་རྐྱང་ལ་ངོས་བཟུང་ཞིང་། ཟུང་འཇུག་ཞེས་
པ་སྣང་སྟོང་གཉིས་ཚོགས་སྲད་བུ་བསྒྲིལ་བ་ལྟ་བུ་ལ་བསམས་ནས་རང་མཚངས་བསྟན་པར་ཟད་དེ། དེ་ལྟ་ན་བདེན་གཉིས་དབྱེར་མེད་དོན་དམ་བདེན་པ་མཐར་ཐུག་མིན་པར་སླར་ཀུན་རྫོབ་ཏུ་འགྱུར་བའི་གོ་བ་འདི་ལ་ལྟོས་དང་དབུ་མ་ཤེས་པར་འདུག་གོ ། ཧ་ཧ།
རང་གི་གོ་བ་དེ་སྒྱུ་མ་རིགས་གྲུབ་དང་འདྲ་སོང་བའི་སྒྱུ་མ་རིགས་གྲུབ་པ་མི་འཐད་ཅེས་བཤད་པ་ནི་ཟུང་འཇུག་རབ་ཏུ་མི་གནས་པའི་དབུ་མ་དང་། སྒྱུ་མ་རིགས་གྲུབ་པ་ཞེས་གཉིས་སུ་སློབ་དཔོན་དཔའ་བོའི་སྒོམ་རིམ་སོགས་རྒྱ་བོད་ན་རླུང་ལྟར་གྲགས་ཤིང་།
ཡིད་བཞིན་མཛོད་དུའང་རང་རྒྱུད་འོག་མའི་སྐབས་སུ་བདེན་པ་གཉིས་ཆར་སྒྱུ་མ་ལྟར་འདོད་མཁན་གྱི་ལུགས་བཤད་པ་ཡོད་བཞིན། འདི་རྨོངས་པས་བྱས་པའི་རྣམ་དབྱེའོ་ཞེས་བཤད་པའི་སྤོབས་པ་དགེ་བ་ལ་ལྟོས། གཞན་ཡང་བདེན་གཉིས་ཟུང་འཇུག་དབུ་མ་
ཡིན་ན། གཞི་གྲུབ་ཚད་དབུ་མར་ཐལ་ཏེ་གཞི་གྲུབ་ན་བདེན་གཉིས་ཟུང་འཇུག་ཡིན་པའི་ཕྱིར་ཟེར་བ་ནི། རང་གི་སྤྲོས་མཐའ་བརྒྱད་དང་བྲལ་བའི་སྟོང་ཉིད་ལའང་མཚུངས་ཏེ། གཞི་གྲུབ་ན་སྤྲོས་པའི་མཐའ་བརྒྱད་དང་བྲལ་བའི་སྟོང་ཉིད་ཡིན་པའི་ཕྱིར། དེ་མིན་
ཏེ་གཞི་གྲུབ་ན་དེའི་རང་བཞིན་སྤྲོས་མཐའ་དང་བྲལ་བ་ཡིན་ཀྱང་། དེ་ཁོ་རང་དེ་ལྟར་མིན་ནོ་སྙམ་ན། གཞི་གྲུབ་ན་དེའི་རང་བཞིན་གྱི་ཁྱད་པར་བདེན་གཉིས་ཟུང་འཇུག་ལའང་སྦྱར་དུ་ཡོད་པའང་རྐུན་པོས་ཁྱེར་རམ་ཅི། སྤྲོས་མཐའ་བརྒྱད་དང་བྲལ་ཚུལ་དེ་སྣང་སྟོང་
13-1-181b


ཟུང་འཇུག་རབ་ཏུ་མི་གནས་པ་ལ་འོང་གི། སྟོང་རྐྱང་ལ་འོང་ཚུལ་མེད་པར་ནི་མ་ཤེས། སྤྲོས་མཐའ་བརྒྱད་བྲལ་ཞེས་པའི་ཚིག་ཙམ་ནི་ཤེས་ནས་བརྗོད་བྱ་དོན་གྱི་དབུ་མ་འཇལ་བ་འདི་ཤིན་ཏུ་མཛེས་སོ། ། ཧ་ཧ། སྤྲོས་མཐའ་བརྒྱད་དང་བྲལ་བའི་སྟོང་པ་ཉིད་རྣམ་གྲངས་
མིན་པའི་དོན་དམ་ལ་བདེན་གཉིས་ཟུང་འཇུག་གི་དབུ་མ་ཞེས་བརྡ་བཏགས་པ་ཡིན་ལ་དེ་བརྗོད་བྱ་དོན་གྱི་དབུ་མ་མཚན་ཉིད་པ་ཡིན་པར་འགྱུར་ན་དེ་ལ་དམིགས་པའི་ཡུལ་ཅན་སོགས་བཏགས་པ་བ་ཡིན་པའང་གྲུབ་པའི་གཞིར་བརྗོད་པ་གཞན་ལ་དགོས་པ་མེད་དོ། །རྩ་
ཤེས་ཀྱི་རྒྱན་དུ་འགྱུར་ཚུལ་སོགས་ནི་དེ་ལྟར་བཤད་ཀྱང་ལེགས་སོ། །ཐལ་རང་གི་རྒྱན་དུ་འགྱུར་ཚུལ་ལ་ཞི་འཚོ་རང་གི་གཞུང་ལས། ཐལ་འགྱུར་བས་རྩ་ཤེས་ཀྱི་དོན་ལྷག་པར་བཀྲལ་བ་ཡོད་པར་མི་འདོད་པ་ནི་བདེན་ཏེ། འགྲེལ་པར་ཡང་དེ་ལྟར་
དགོངས་མཐུན་ཡིན་པར་བསྒྲུབས་མོད། དོན་གྱིས་ཐལ་འགྱུར་བའི་བཤད་པ་ལྟར་རྩ་ཤེའི་དགོངས་པ་མ་ལོན་ན། དབུ་མ་རྩ་ཤེས་ཀྱི་རྒྱན་དུ་མི་འགྱུར་ལ། ཐལ་རང་དགོངས་པ་འགལ་བ་ཡིན་ན། ཐལ་འགྱུར་བས་རང་མཚན་གྱིས་གྲུབ་པ་ཐ་སྙད་དུ་
མི་བཞེད་པ་སོགས་མགོན་པོ་ཀླུ་སྒྲུབ་ཀྱི་དགོངས་པ་མིན་པར་སྒྲུབ་དགོས་ན་ཡང་། དེ་འདྲ་རང་རྒྱུད་པ་སུས་ཀྱང་མ་སྨྲས་ལ། མཐར་ཐུག་རྣམ་གྲངས་མིན་པའི་དོན་དམ་ལས་སུ་ལའང་བོགས་འདོན་དུ་མེད་པས་ན་མཐར་ཐུག་དགོངས་པ་གཅིག་པས་ན་དོན་གྱིས་
ཐལ་འགྱུར་བའི་རྒྱན་དུའང་འགྱུར་རོ་ཞེས་བདག་གིས་གསང་མཐོན་པོར་བསྒྲགས་པ་ཡིན་ཀྱང་། བདེན་སྟོང་མེད་དགག་ཙམ་ལ་དོན་དམ་འདོད་པ་དང་། ཐ་སྙད་ཚད་གྲུབ་འདོད་པ་ཁྱོད་ཀྱིས་མི་འགྱུར་བར་སྒྲུབ་ནུས་ན། ཁྱོད་འདྲའི་ཐལ་འགྱུར་བའི་ལུགས་ཏེ་
13-1-182a


རང་རྒྱུད་པའི་རྣམ་གྲངས་མིན་པའི་དོན་དམ་འདོད་པའི་སྐབས་ཕར་ཞོག །རྣམ་གྲངས་པའི་དོན་དམ་ཙམ་ལས་འཕགས་ཚུལ་ཞིག་རིགས་པ་དང་མཐུན་པར་སྒྲུབས་དང་ངོ་མཚར་ཆེའོ། །དེ་འཕྲོས་རྣམས་ལ་དཔྱད་འོས་ཆེར་མེད་དོ། །
མཐའ་བཞི་སྐྱེ་འགོག་གི་སྐབས་སུ་བདག་སྐྱེ་ཁོ་ནའི་ཐལ་བཟློག་ལས་གཞན་གསུམ་ལ་མེད་པར་རློམ་ནས་ཚིག་གསལ་ཙམ་ཡང་ལྟ་མ་མྱོང་བར། ལི་ཐང་མཁས་མཆོག་བྱམས་པ་སོགས་ཀྱིས་ཀྱང་ཐལ་ཟློག་རྣལ་མ་མ་རྟོགས་ཞེས་ངོ་ཚ་མེད་པའི་བརྗོད་པ་ལ་ལྟོས། ཤེས་རབ་
སྒྲོན་མེའི་སྐྱོན་བརྗོད་ལ་ཟླ་བས་སུན་ཕྱུང་ཚུལ་ཙམ་མཁས་པ་སུས་ཀྱང་ལོས་ཤེས་དེ་ཙམ་དཔེ་བཅད་པ་ལ་ང་རྒྱལ་ཅི་ཡོད། ཐལ་རང་གཉིས་ཀའི་ལུགས་ལ་ཆོས་ཅན་མཐུན་སྣང་ཡོད་མེད་དཔྱད་པའི་སྐབས་སུ་ཐལ་འགྱུར་པའི་ལུགས་ལ་དངོས་སྨྲ་བ་དང་ཆོས་ཅན་
མཐུན་སྣང་མེད་ཚུལ་ཟླ་གྲགས་ཀྱིས་བསྒྲུབས་པ་རྣམས་ལམ་རིམ་བཞིན་བྲིས་སོ་ཟེར་བ་ནི་ཤིན་ཏུ་བདེན་ཏེ། ཟླ་གྲགས་ཀྱི་གཞུང་ལྟར་རྗེས་མ་ནོར་བར་གཏན་ལ་ཕབ་པ་ཡིན་ནོ། །འདི་ལའང་ཅུང་ཟད་དཔྱད་ཏུ་ཡོད་ཀྱང་བཞག་ལ། དེ་ལྟར་འཁྲུལ་རྒྱུའི་བསླད་པ་
ཕྱིན་ཅི་ལོག་གི་མཐོང་བ་ཆ་ཙམ་ཡང་ཡང་དག་པའི་མཐོང་ངོ་ན་མི་དམིགས་པའི་ཕྱིར་ཆོས་ཅན་མཐུན་སྣང་བ་མེད་པར་སྒྲུབ་པ་འདིར། ཁྱོད་ཀྱི་ཐ་སྙད་ཚད་གྲུབ་ག་ན་སོང་། མིག་སོགས་ཡུལ་ཅན་དང་། གཏན་ཚིགས་དང་དཔེ་དགག་པའི་རིམ་པ་ཟླ་གྲགས་ཀྱིས་བསྟན་པ་
འདིས། ཁྱོད་ཀྱི་བདེན་པས་སྟོང་ཤུལ་གྱི་བུམ་པ་དང་། དེ་སྒྲུབ་བྱེད་མིག་ཤེས་ལ་སོགས་པ་དང་། དགག་བྱ་ལ་དོན་དམ་གྱི་ཁྱད་པར་མ་སྦྱར་ན་མི་རུང་བར་བསྒྲུབས་པ་ཐམས་ཅད། ཐ་སྙད་འཇིག་རྟེན་པས་མཐོང་བའི་ཀུན་རྫོབ་འདི་ཆད་དུ་དོགས་པས་བཞག་
13-1-182b


པ་ཡིན་ན། རང་མཚན་གྱིས་གྲུབ་པ་ལ་ཚད་མར་མ་སོང་ཞིང་། གཟུགས་ཙམ་ལ་ཚད་མར་སོང་བ་མེད་པར་བསྟན་པ་ལ་སོགས་པ་འདིས་འཇིག་རྟེན་པའི་མཐོང་བའི་གཞལ་བྱ་བུམ་པ་དང་། འཇལ་བྱེད་མིག་ཤེས་ལྟ་བུའི་རྣམ་གཞག་བཀག་ནས་ཁྱོད་ཀྱིས་སྟོང་མི་བྲ་རྒྱུའི་བུམ་
པ་དེ་ཚུལ་ཇི་ལྟ་བུས་བཞག །དེའི་ཚུལ་བརྗོད་དང་ཡ་མཚན་ཆེའོ། །ཐལ་རང་གི་ཁྱད་པར་དགག་བྱ་ཕྲ་བ་འདི་ལ་ཐུག་པ་ཡིན་གྱི་དགག་བྱ་ལ་དོན་དམ་སྦྱར་དགོས་མི་དགོས་སོགས་ཟེར་བ་ལྟར་མིན་ཏེ།  དེང་དུས་མཁས་པར་གྲགས་པས་མ་རྟོགས་པ་ཁོ་བོའི་སྐལ་
བར་བཞག་གོ་ཞེས་ཁ་སྟངས་མཐོ་བ་འདི་ལ་ལྟོས། ཆོས་ཅན་མཐུན་སྣང་བ་མེད་ཅེས་པ་ཙམ་ཞིག་ནི་རྗེས་བརྗོད་ཤེས། ཡང་དག་པའི་གཟིགས་ངོར་ཅི་ཡང་མ་རྙེད་པ་སྐྲ་ཤད་མེད་པའི་མཐོང་བ་ལྟ་བུའི་ངོར་ཆོས་ཅན་མཐུན་སྣང་བ་མེད་པ་དང་། གནད་དེ་ལས་
དགག་བྱ་ལ་ཁྱད་པར་སྦྱོར་མི་དགོས་པ་ནི་མ་གོ་བར་ངོ་ཚ་མེད་པའི་སྨྲ་བ་འདི་འདྲ་འབྱུང་བ་ཧ་ཧ། དགག་བྱ་ལ་བདེན་གྲུབ་སོགས་ཀྱི་ཁྱད་པར་ནི་ཐ་སྙད་དུ་ཡོད་པ་ཀུན་ལ་རྣམ་པ་ཀུན་ཏུ་སྦྱར་དགོས་པར་སྒྲུབ་པ་ནི། དགེ་ལྡན་གྱི་མཁས་པ་རྣམས་ཀྱི་གསུང་སྒྲོས་ཡང་
བསྐྱར་མ་བྱས་ཀྱང་ཐོས་མྱོང་ལ།  བདག་གིས་ཀྱང་རྗེས་ཐོབ་སྒྲ་དང་རྟོག་པའི་སྤྱོད་ཡུལ་དུ་དཔྱད་ཅིང་སྨྲ་བ་ཀུན་ལ་ཁྱད་པར་སྦྱར་ཏེ་ཤན་ཕྱེད་པ་རང་རྒྱུད་པའི་གཞུང་ལྟར་བདེ་ཞེས་བསྒྲུབས་པས་སྐབས་འདི་ན་ཕན་པའི་ངག་ཏུ་གནས་ཤིང་། མདོ་དང་བསྟན་བཅོས་
རྣམས་ན་དགག་བྱ་ལ་ཁྱད་པར་སྦྱར་བ་མང་བའི་ཕྱོགས་དྲངས་པའང་བདེན་མོད། རྣམ་པ་ཀུན་ཏུ་ཁྱད་པར་མ་སྦྱར་ན་བདེན་གཉིས་ཀྱི་རྣམ་དབྱེ་མེད་པར་འགྱུར་རོ། །ཞེས་པ་འདི་ཅི་ལ་བསམས་ནས་ཟེར་ཚིག་གིས་དངོས་སུ་སྦྱར་བ་མེད་ཀྱང་། དོན་དམ་དཔྱོད་པའི་དབང་
13-1-183a


དུ་བྱས་པར་གོ་བའི་ཕྱིར་ཐལ་འགྱུར་བའི་དོན་དམ་དཔྱོད་པའི་སྐབས་སུ་ཁྱད་པར་སྦྱར་མི་དགོས་ཏེ། ཆོས་ཅན་མཐུན་སྣང་བ་མེད་པར་བཤད་པ་ལྟར་གནས་ལུགས་ཡང་དག་པའི་གཟིགས་ངོ་ན་མི་བཀག་རྒྱུ་དེ་གང་ཡིན་བསམ་པར་གྱིས་ཤིག །
ཡང་དག་པའི་དོན་དུ་དམིགས་པ་ཐམས་ཅད་འགོག་གི། བདེན་གྲུབ་སོགས་ཀྱི་དམིགས་པ་འགའ་ཞིག་ནི་འགོགས་ལ། རང་མཚན་གྱིས་མ་གྲུབ་པའི་བུམ་པ་སོགས་མི་འགོག་པས། བདེན་གྲུབ་སོགས་ཀྱིས་ཁྱད་པར་རྣམ་པ་ཀུན་ཏུ་སྦྱོར་དགོས་སྙམ་པ་ནི། དོན་དམ་
དཔྱོད་པའི་ངོར་བུམ་པ་ཁེགས་ན་བུམ་པ་གཏན་ནས་མེད་པར་གོ་བའི་དངོས་སྨྲ་བའི་གོ་ལུགས་རང་གི་སྙིང་ལ་འཆང་བའི་གདོན་གྱིས་ཟིན་པ་མ་ཚོར་ནས་དོན་དམ་དུ་ཁྱད་པར་གང་ཡང་མ་སྦྱར་ཀྱང་རུང་སྟེ་དམིགས་པའམ་སྤྲོས་པ་ཐམས་ཅད་ཁེགས་ཀྱང་། ཐ་སྙད་དུ་བུམ་
སོགས་སྤྲོས་པའི་རྣམ་པ་འཇོག་ཤེས་པའི་དབུ་མ་པ་གཞན་ལ་གཤེ་བ་འདི་མ་དག་པས་དག་པ་འཕྱ་བ་ངོ་ཚ་བར་འདུག་གོ། ཡང་བུམ་པ་མེད་ཅེས་པ་ལྟ་བུ་དོན་དམ་དཔྱོད་པའི་སྐབས་ཡིན་པས་དོན་དམ་དཔྱད་པའི་ངོར་མི་སྣང་བར་གོ་ཡང་དེས་བདེན་གཉིས་ཕྱེས་པར་སོང་
ཟེར་བ་དེ་ནི་རང་རྒྱུད་པ་ལ་མཁོ་བས། བདག་གི་རྒྱན་གྱི་སྤྱི་དོན་དུ་ཡང་དེ་ལྟར་བཤད་པ་ཡིན་མོད། ཚིག་དངོས་སུ་སྦྱར་དགོས་པའི་ངེས་པ་མེད་དེ་དོན་གྱིས་གོ་བའི་ངག་ཡིན་པའི་ཕྱིར་རོ། །དོན་དམ་དཔྱོད་པའི་སྐབས་དོན་དམ་མ་ཡིན་ཀྱང་། དོན་དམ་ལ་
དཔྱོད་པའི་སྐབས་སུ་དཔྱད་པ་དེའི་ངོར་མེད་པ་དོན་དམ་དུ་མེད་པ་ཡིན་ན་དོན་དམ་དུ་གཟུགས་སྒྲ་སོགས་འདོད་པའི་དབུ་མ་པ་སུ་ཡང་མེད་པས་དེ་ཐལ་འགྱུར་བའི་ཁྱད་ཆོས་སུ་ག་ལ་རུང་ཞེས་པ་ཤིན་ཏུ་བདེན་ཚིག་སྟེ། ངས་ཀྱང་ཁྱོད་ལ་དེ་འདྲི་སྟེ།
13-1-183b


དོན་དམ་པར་རང་མཚན་གྱིས་གྲུབ་པ་རང་རྒྱུད་པས་ཀྱང་མི་འདོད་ན་ཁྱོད་འདྲའི་ཐལ་འགྱུར་བ་དེ་བཀག་པའི་ཁྱད་ཆོས་སུ་ཅི་ཞིག་ཐེ། རང་བཞིན་གྱིས་གྲུབ་པ་དང་རང་གི་མཚན་ཉིད་གྲུབ་པ་ཞེས་གཞན་ལ་ལྟོས་མེད་དུ་གྲུབ་པའི་དོན་དུ་འདོད་ན།  དེ་རྟེན་འབྲེལ་
གྱིས་གྲུབ་པ་མིན་པར་འགྱུར་བས་རང་གི་ངོ་བོ་ཉིད་ཀྱིས་ཡོད་པས་བདེན་གྲུབ་དང་བརྗོད་ཚུལ་ཙམ་ལས་དོན་ཁྱད་མེད་པས་དེ་ལྟ་ན་དེ་རང་རྒྱུད་པས་ཀྱང་ཁས་ཅི་ལྟར་ལེན། དེ་མ་བླངས་ན་ཐལ་འགྱུར་བའི་ཁྱད་ཆོས་ཅི་ཞིག་ཡིན། རང་རང་གི་འཇོག་
བྱེད་ཐུན་མིན། ས་སྲ་བ་ཆུ་གཤེར་བ་སོགས་ཐ་སྙད་དུ་གྲུབ་པ་འདི་ནི་དཔལ་ལྡན་ཟླ་བས་ཀྱང་ཞལ་གྱིས་བཞེས་ཏེ། གཟུགས་ནས་རྣམ་མཁྱེན་བར་གྱི་མཚན་ཉིད་བཞག་པའི་ཕྱིར། དེ་བཀག་པ་ག་ལ་ཡིན་ཞེས་ཟེར་བ་ནི་བདེན་གཉིས་ཕྱེ་དགོས་པར་
ནན་གྱིས་སྒྲུབ་བཞིན་དུ་བདེན་གཉིས་མ་ཕྱེ་བར་མིག་བསྒྲད་ཀྱང་ཅེ་རེ་ལོང་བ་སྟེ། ཟླ་བས་དོན་དམ་པར་གཟུགས་ནི་གཟུགས་སུ་རུང་བར་ཡོད་པའི་མཚན་ཉིད་བཞག་པའམ། ཐ་སྙད་དུ་གཟུགས་ལ་གཟུགས་རུང་མེད་པར་བཀག་པར་ཁྱོད་ཀྱིས་
ཁས་ལེན་པ་ཡིན་ནམ་སོམས་ཤིག །ངེད་ཀྱིས་ནི་དོན་དམ་པར་གཟུགས་སུ་རུང་བ་ལ་སོགས་པའི་མཚན་ཉིད་ཅན་གྱི་གཟུགས་སོགས་རྡུལ་ཙམ་མི་དམིགས་ཀྱང་། ཐ་སྙད་དུ་གཟུགས་ནི་གཟུགས་སུ་རུང་བའི་མཚན་ཉིད་ཅན་དུ་སྨྲ་བ་མི་འགལ་བར་གྲུབ་
པ་ཡིན་ན། ཁྱོད་ལྟར་ན་དོན་དམ་པར་མཚན་མཚོན་བདེན་གྲུབ་མེད་ཀྱང་བདེན་པར་མ་གྲུབ་པའི་མཚན་མཚོན་དོན་དམ་པར་ཡོད་ཅེས་ཁས་ལོངས་ཤིག་ཐ་སྙད་དུ་བདེན་པར་མ་གྲུབ་པའི་མཚན་མཚོན་ཡོད་པར་རང་རྒྱུད་པས་ཁས་ལེན་པ་ཡིན་
13-1-184a


ན་ཁྱོད་འདྲའི་ཐལ་འགྱུར་བས་དེ་ལས་ལྷག་ཅི་ཞིག་རྟོགས། རང་བཞིན་གྱིས་གྲུབ་པའམ་རང་མཚན་གྱིས་གྲུབ་པའམ། ངོ་བོ་ཉིད་ཀྱིས་གྲུབ་པ་ནི་བློས་ཕར་བཏགས་པ་མིན་པར་ཡུལ་རང་གི་སྡོད་ལུགས་ཀྱིས་གྲུབ་པ་ལ་འཇོག་
སྙམ་ན་བློས་ཕར་བཏགས་པ་མིན་པར་ཡུལ་རང་ངོས་གྲུབ་ན་བདེན་གྲུབ་ཏུ་འགྱུར་བའི་ཕྱིར་དེ་ལྟ་བུ་རང་རྒྱུད་པས་ཀྱང་ག་ལ་འདོད། ཐ་སྙད་དུ་འདོད་དམ་སྙམ་ན་ཡང་མ་ཡིན་ཏེ། དབུ་མ་པ་ཐམས་ཅད་ཀྱིས་ཀྱང་ཆོས་ཐམས་ཅད་དཔྱད་ན་བཏགས་ཡོད་ཙམ་དུ་
ཁས་ལེན་གྱིས། ངོ་བོས་གྲུབ་པར་འདོད་མཁན་ག་ལ་ཡོད། དེས་ན་ཁྱོད་ཀྱི་ལུགས་ལ་བདེན་གྲུབ་དང་། རང་མཚན་གྱིས་གྲུབ་པ་ཁྱད་མེད་པར་འགྱུར་རོ། །ཡང་ཕྱོགས་སྔའི་འདོད་པ་བཀོད་ནས་དེ་དགག་པ་ལ། ཁོ་ན་རེ་དོན་དམ་དཔྱོད་བྱེད་ཀྱི་དཔྱད་
མ་བཟོད་པ་དང་མ་རྙེད་པ་གཉིས་དོན་གཅིག་ཡིན་ལ། དེས་མ་རྙེད་པ་ཙམ་གྱིས་དེས་དེ་མེད་པར་ཁེགས་པའམ་མེད་པར་རེག་པ་མིན་ནོ། །དཔེར་ན་མིག་ཤེས་ཀྱིས་སྒྲ་མ་རྙེད་ཀྱང་མེད་པར་གཞལ་བ་མིན་པ་བཞིན། དེ་བཞིན་འཕགས་པའི་ཡེ་ཤེས་ཀྱིས་སྐྱེ་
འགགས་དང་བུམ་སོགས་མ་གཞལ་བ་ཡིན་གྱི་མེད་པར་གཞལ་བ་མིན་ཏེ། བུམ་སོགས་འདི་དག་གི་ཡུལ་ཅན་མིན་པའི་ཕྱིར་ཞེས་ཟེར། མཁས་རྟགས་ཡང་དག་གི་ཚིག་འདི་མཁས་པ་རྣམས་ཀྱི་མདུན་སར་སོང་དང་དགྱེས་པའི་བཞད་སྒྲ་ཆེམ་ཆེམ་མཛད་པར་
གདོན་མི་ཟ་སྟེ། མ་རྙེད་པ་ཙམ་གྱིས་དོན་དམ་རྟོགས་པ་འདི་སྔ་ན་མེད་པའི་ངོ་མཚར་ཅན་ཞིག་སྟེ། དེ་དེའི་སྤྱོད་ཡུལ་དུ་མ་གྱུར་ནས་མ་རྙེད་པ་ཙམ་ཞིག་གིས་མེད་པར་ངེས་པ་བསྐྱེད་མི་ནུས་ཏེ། ལག་པས་སྦྲུལ་བཙལ་ནས་མ་རྙེད་ཀྱང་སྦྲུལ་མེད་ཀྱི་
13-1-184b


འཛིན་སྟང་མི་འདྲེན་ལ། རྣ་བ་གཏད་པས་གཟུགས་མ་གཞལ་ཀྱང་གཟུགས་མེད་པར་ངེས་མི་ནུས་པ་དང་འདྲ་བར་བུམ་སོགས་ཆོས་ཀུན་དོན་དམ་དཔྱོད་པས་བཙལ་ན་མ་རྙེད་ཀྱང་དོན་དམ་པར་མེད་པར་མི་ཁེགས་པས། མ་མཐོང་ཕྱིར་ན་མེད་པ་མིན། ཞེས་པ་ལྟར་
དོན་དམ་དཔྱོད་བྱེད་ཀྱི་རིགས་པ་འདི་རྙེད་ཀྱིས་བཙལ་ཀྱང་མ་རྙེད་རུང་། བུམ་སོགས་ནི་དེ་ཡིས་མི་མཐོང་མི་གཞལ་བའི་གནས་ཤིག་ཏུ་ཡོད་སྙམ་ཁྱོད་ཀྱི་ཞེལ་ད་དུང་ཆགས་འདུག་པས་དབུ་མ་ཤེས་ངེས་པ་རེད་སྙམ་དགའ་བ་འཕེལ། བདག་གིས་ནི་དོན་དམ་དཔྱོད་པའི་
རིགས་པ་དེས་བདེན་པ་གཉིས་ཆར་དུ་ཡང་མ་སྐྱེས་པ་དང་མེད་པར་གཞལ་ཅེས་འདོད་དེ། ཟླ་བའི་ཞབས་ཀྱིས། བདེན་པ་གཉིས་སུའང་རང་བཞིན་མེད་པའི་ཕྱིར། །འདི་དག་རྟག་པ་མ་ཡིན་ཆད་པ་མིན། །ཞེས་དང་། མོ་གཤམ་བུ་ལ་རང་གི་བདག་ཉིད་ཀྱིས། །སྐྱེ་བ་དེ་ཉིད་
དུ་མེད་འཇིག་རྟེན་དུའང་། །ཡོད་མིན་དེ་བཞིན་དངོས་འདི་ཀུན་ངོ་བོ། །ཉིད་ཀྱིས་འཇིག་རྟེན་དེ་ཉིད་དུ་མ་སྐྱེ། །ཞེས་དང་། དེ་ནི་དེ་ཉིད་དུའམ་འཇིག་རྟེན་དུ། །རྣམ་པ་བདུན་གྱིས་འགྲུབ་འགྱུར་མིན་མོད་ཀྱི། །རྣམ་དཔྱད་མེད་པར་
འཇིག་རྟེན་ཉིད་ལས་འདིར། །རང་གི་ཡན་ལག་བརྟེན་ནས་འདོགས་པ་ཡིན། །ཞེས་གསུངས་པ་བཞིན་ནོ། །དེས་ན་ཁྱོད་ལྟར་ན་རྒྱང་འཕེན་པས་ཚེ་སྔ་ཕྱི་དཔྱད་ནས་མ་རྙེད་པས་ཀྱང་ཚེ་སྔ་ཕྱི་སྟོང་པར་མཐོང་བ་ལྟར་ཐལ་ལོ། །དེ་དོན་དམ་དཔྱད་པའི་རིགས་པ་མིན་
སྙམ་ན་དོན་དམ་དཔྱོད་རིགས་ཀྱིས་ཀྱང་མ་རྙེད་པ་ཙམ་ཡིན་གྱི་མེད་པར་མི་ཁེགས་ཞེས་ཁྱོད་ཀྱིས་ཁས་བླངས་བས་སོ། །རྣམ་ངེས་ལས། ཡང་དག་པའི་ཚད་མ་ལོག་པ་ནི་རྣམ་པ་ཀུན་དུ་མེད་པར་ཤེས་པར་བྱ་སྟེ། ཞེས་དང་། ཚད་མས་མ་དམིགས་པ་མེད་པའི་
13-1-185a


མཚན་ཉིད་ཅེས་རླུང་ལྟར་གྲགས་པ་ཙམ་ཡང་ཐོས་མ་མྱོང་བ་ཁྱོད་ནི་ཟླ་གྲགས་ཀྱིས། དངོས་ཀུན་ཡང་དག་རྫུན་པར་མཐོང་བ་ཡིས། །དངོས་རྙེད་ངོ་བོ་གཉིས་ནི་འཛིན་པར་འགྱུར། །ཞེས་དང་། ཐ་སྙད་དང་དོན་དམ་དཔྱོད་བྱེད་ཀྱི་
ཚད་མའི་རྙེད་དོན་ཞེས་རླུང་ལྟར་གྲགས་པ་ཙམ་ལ་བསམ་གཞིགས་མེད་པ་རིགས་པའི་ལམ་ལ་བློ་ནུས་ཅུང་ཟད་མེད་པའི་རྟགས་ཡང་དག་སྟེ། གཅིག་དུ་བྲལ་ལ་སོགས་པའི་རྟགས་ཀྱིས་ཆོས་ཅན་བུམ་སོགས་ཡུལ་དུ་བྱས་ནས་མི་འཇལ་བར། ཆོས་ཉིད་རྗེན་
ཅེར་བ་ལྟོས་མེད་དུ་འཇལ་ཤེས་ན་ཁྱོད་ཀྱི་སྙིང་ལ་དགྲ་ལྟར་བརྣག་ཅིང་ཚིག་གི་དུག་མདའ་འཕེན་པའི་ཡུལ་དུ་གྱུར་པ་གཞན་སྟོང་པ་ཞེས་པ་དེ་ཡང་མི་འདོད་བཞིན་དུ་ཁྱོད་ཀྱི་སྐེ་ལ་འཁོར་འདུག་གོ། །ཧ་ཧ། འདུས་མ་བྱས་བདེན་གྲུབ་འགོག་པའི་ཐད་ནས།
རྟག་བདེན་ཀུན་ལ་རིགས་པ་དེ་འཇུག་པ་བདེན་ཀྱང་། གཞན་སྟོང་སྨྲ་བའི་གང་ཟག་འཕགས་ཆེན་བརྒྱུད་མར་བྱོན་པ་དེ་རྣམས་ལ་ཐེག་ཆེན་གྱི་མདོ་དང་བསྟན་བཅོས་མིག་གིས་མཐོང་ཡང་མ་མྱོང་ཞེས་པའི་བརླང་ཚིག་དང་། འདི་འདྲའི་ལུགས་དེ་རྒྱལ་
བསྟན་སུན་འབྱིན་དང་རང་ཕྱོགས་ཕུང་བྱེད་དང་། བདུད་ཀྱི་རྒྱལ་མཚན་འབྱུང་པོའི་ཕོ་ཉ་ཡིན་ནོ་ཞེས་ངག་གི་ཉེས་པ་ཚན་པོ་ཆེ་སྨྲས་པ་འདི་ལ་བདག་ནི་ཡ་ང་སྟེ། རང་རེ་ཅོལ་ཆུང་བྱིས་པ་ལོང་བ་ལྟ་བུས། རྔ་བོ་ཆེ་ཆེན་པོའི་མདོ་ལ་སོགས་པའི་དོན་ཚུལ་
བཞིན་གཟིགས་ཤིང་། སྔགས་ཀྱི་རྟོགས་པ་ཟབ་མོ་བརྙེས་པའི་ཀུན་མཁྱེན་དོལ་པོ་ཡབ་སྲས་ལ་སོགས་པའི་དམ་པ་མཆོག་རྣམས་ཀྱིས་རྒྱལ་བའི་མདོ་ལས་ས་བཅུའི་སེམས་དཔའ་ཆེན་པོས་ཀྱང་ཇི་བཞིན་རྟོགས་དཀའ་བར་གསུངས་པའི་བདེ་གཤེགས་སྙིང་པོའི་
13-1-185b


གཏམ་གྱི་སེང་གེའི་སྒྲ་བསྒྲགས་པ་ལ། མི་བཟོད་པའི་ཚིག་གིས་སུན་འབྱིན་པ་ནི་ལེགས་པར་བརྟགས་ན། ཐེག་ཆེན་གྱི་མདོ་ཟབ་མོ་རྟོགས་པར་དཀའ་བ་ནི་དམ་པ་དེ་དག་གིས་གཟིགས་ལ། ཁྱོད་ཀྱིས་མ་མཐོང་བ་འདྲ་སྟེ། ལུང་དེ་འཛིན་པ་རྣམས་ནི་མཁས་
གྲུབ་གཉིས་འཛོམ་པའི་གང་ཟག་ཨུ་དུམ་ཝ་ར་ལྟ་བུ་ཤ་སྟག་ཏུ་མཐོང་བའི་ཕྱིར་རོ། །དེས་ན་རིགས་པའི་གནོད་པ་དེ་ལའང་ལན་སྐབས་སུ་མ་བབས་ཀྱང་། འཁྱོགས་པའི་བབ་ཀྱིས་འཁྱོགས་པོར་ཁྲིད་པའི་ཚུལ་གྱིས་ཉམས་མཚར་ཙམ་དུ་ཅུང་ཟད་སྤྲོས་ན། 
ཆོས་ཉིད་དེ་བཞིན་ཉིད་ནི་རྒྱུད་ལས། ཆ་མེད་ཀུན་འགྲོ་ཁྱབ་པ་པོ། །ཞེས་པ་ལ་སོགས་པ་བཞིན་དུ་བློ་སྤྲོས་པའི་ཡུལ་དུ་ཆ་དང་བཅས་པར་སྣང་བ་ཐམས་ཅད་ནི་དེ་བཞིན་ཉིད་མིན་ལ། དེ་བཞིན་ཉིད་ནི་སྤྲོས་པ་གང་གི་ཡང་ངོ་བོར་མི་གནས་པའི་ཕྱིར་
དེ་ལ་ཆ་ཇི་ལྟར་འཇོག །དེས་ན་དུས་སྔ་ཕྱིར་འཕགས་པ་སློབ་པའི་ས་བཅུར་རིམ་གྱིས་དམིགས་པ་དང་། རྣམ་གྲོལ་གསུམ་གྱི་སྤངས་པ་ཐ་དད་པའི་ཚུལ་དུ་སྣང་བ་ནི་སྣོད་ཀྱི་དབྱེ་བས་ནམ་མཁའ་ལ་ཐ་དད་བྱས་པ་ལྟ་བུར་དངོས་པོ་ལ་ཆ་མེད་ཀྱང་རང་གི་
རྟོག་པས་ཆ་ཅན་དུ་བྱས་པར་ཟད་དེ། བྱམས་པས། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །བརྟེན་པའི་ཆོས་ཀྱི་བྱེ་བྲག་གིས། །དེ་ཡི་དབྱེ་བ་ཡོངས་སུ་བརྗོད། །ཞེས་གསུངས་པ་བཞིན་ནོ། །དེས་ན་དེ་བཞིན་
ཉིད་དུ་མ་ཆ་བཅས་སུ་ཡོད་ན། དཔལ་ལྡན་ཟླ་བས། ཆོས་རྣམས་དེ་ཉིད་རྣམ་འགྱུར་དབྱེ་ལའང་རྟེན་མིན་ཞིང་། །ཞེས་དེ་བཞིན་ཉིད་གཅིག་ལས་དུ་མ་མེད་པའི་སྒོ་ནས་ཐེག་གཅིག་ཏུ་སྒྲུབ་པ་དང་དངོས་སུ་འགལ་ལོ། །དེས་ཆ་མེད་དུ་གྲུབ་ཀྱང་
13-1-186a


གཅིག་བདེན་དུ་ག་ལ་གྲུབ་སྙམ་ན། གྲུབ་མཐའ་ཞེ་འདོད་ཀྱིས་སྨྲ་བ་འགའ་ཞིག་དང་བསྟུན་ན་ཅིས་མི་འགྲུབ་སྟེ། དོན་དམ་བློའི་སྤྱོད་ཡུལ་དུ་ནན་གྱིས་སྒྲུབ་པ་ལྟར་ན། དོན་དམ་པའི་ཡུལ་ཅན་འཕགས་པའི་ཡེ་ཤེས་
ཀྱི་ཡུལ་དུ་ཡོད་པའི་ཆོས་དབྱིངས་དེ་དོན་དམ་པར་མ་གྲུབ་ཅེས་སུ་ཞིག་གིས་སྨྲ་ནུས་ཏེ། ཆོས་དབྱིངས་དོན་དམ་ཡིན་པར་མ་གྲུབ་ན་དོན་དམ་མིན་པར་ཐལ་བ་ལས་འོས་མེད་དེ། བདེན་གྲུབ་མེད་པ་མིན་ན་བདེན་གྲུབ་ཏུ་འགྱུར་བར་སྨྲ་བ་དང་
ཚུལ་གཅིག་པས་སོ། །དོན་དམ་པར་གྲུབ་ན་བདེན་པར་གྲུབ་པའང་ཡིན་ཏེ། དོན་དམ་དཔྱོད་བྱེད་ཀྱི་རིགས་པས་རྙེད་དོན་མཐར་ཐུག་ཡིན་པ་གང་ཞིག་མཐར་ཐུག་དཔྱོད་པའི་རིག་ངོར་བདེན་ཞིང་། དེ་ཡོངས་གཅོད་སྒྲུབ་པའི་ཚུལ་གྱིས་
དེའི་ཡུལ་དུ་གྲུབ་པའི་ཕྱིར།  དེ་དེའི་ངོར་མི་བདེན་ལ་མ་གྲུབ་ན་དོན་དམ་ནམ་དུ་ཡང་བློའི་སྤྱོད་ཡུལ་དུ་མི་འགྱུར་བ་སོགས་སྐྱོན་མཐའ་ཡས་སོ། །དེས་དེ་གཟིགས་ཀྱང་བདེན་གྲུབ་མིན་ཏེ། བདེན་པར་མ་གྲུབ་པར་གཟིགས་པའི་ཕྱིར་སྙམ་
ན་བདེན་པར་མ་གྲུབ་པར་གཟིགས་པ་ཉིད་བདེན་གྲུབ་ཡིན་ཏེ། བདེན་མེད་ཀྱང་བདེན་གྲུབ་མེད་མོད་སྤྱིར་བདེན་གྲུབ་མེད་པ་ཡིན་པར་ཁས་བླང་དགོས་པ་བཞིན་དུ། བདེན་པར་མ་གྲུབ་པར་གཟིགས་ཀྱང་བདེན་མེད་ཉིད་བདེན་པར་གྲུབ་པར་
ཁས་ལེན་དགོས་ཏེ་ཚུལ་མཚུངས་སོ། །གཞན་ཡང་ཁྱོད་ལྟར་ན་བདེན་པར་མེད་དོ་སྙམ་པའི་བློ་ལོག་ན་དོན་དམ་མི་མཐོང་བར་འདོད་ལ། དེ་ལྟ་ན་འཕགས་པ་སློབ་པའི་མཉམ་བཞག་ཏུ་སྟོང་པ་ཉིད་ལ་གཉིས་སྣང་ནུབ་པའི་སྐབས་སུ་བུམ་སོགས་
13-1-186b


མི་སྣང་ཡང་། དེའི་ཆོས་ཉིད་ནི་སྣང་དགོས་ལ། དེ་ཡང་བདེན་གྲུབ་བཅད་པ་ལ་ལྟོས་ནས་འཛིན་ན་ནི་སྒྲ་དོན་འདྲེས་འཛིན་གྱི་རྟོག་བཅས་ཀྱི་སེམས་ཡིན་པས་གཉིས་སྣང་མི་ནུབ་ལ། དགག་བྱ་བློ་ཡུལ་དུ་ཤར་བ་ལ་མི་ལྟོས་པར་བདེན་སྟོང་ཙམ་གྱི་
ཆོས་ཉིད་རང་གི་རང་མཚན་རྗེན་ཅེར་དུ་འཛིན་ཚུལ་ཞིག་ཡོད་པར་འདོད་པའི་ལུགས་ལྟར་ན། ཆོས་ཅན་ཀུན་རྫོབ་གཞན་ལ་མ་རེག་ཅིང་མ་བརྟེན་པའི་ཕྱིར་ན་ཀུན་རྫོབ་སྤྲིན་དང་འདྲ་བ་རང་གིས་སྟོང་ལ། དོན་དམ་ཆོས་ཉིད་ནམ་མཁའ་དང་འདྲ་བར་
གཞན་གྱིས་སྟོང་ཏེ་རང་གི་ངོ་བོས་མི་སྟོང་བ་དེ་གསལ་ས་ལེ་བར་གྲུབ་པ་ཡིན་ནོ། །དེས་ན་ཟུང་འཇུག་སྤྲོས་བྲལ་མིན་པར་སྟོང་ཕྱོགས་རྐྱང་པ་ལ་གཉིས་སྣང་ནུབ་པའི་ཚུལ་གྱིས་བློ་ཡུལ་དུ་འགྱུར་ཚུལ་ཞིབ་ཏུ་སོམས་ལ་བྲིས་ཤིག་དང་། གཞན་སྟོང་པ་
རྣམས་ཀྱིས་ཀྱང་ཧ་ཅང་སྤྲོས་པས་ཆོག་པར་འདུག་གོ། །དེའི་ཚུལ་གྱིས་ཟུང་འཇུག་ལ་ཆོས་དབྱིངས་སུ་འདོད་པ་རྣམས་དང་བསྟུན་ཀྱང་གཞན་སྟོང་པས་ལན་འདེབས་ཚུལ་ཤེས་པར་བྱའོ། །ཧ་ཧ། གཞན་ཡང་ཆོས་ཉིད་དེ་བཞིན་ཉིད་ནི་རྟག་པའང་ཡིན་ལ་
བདེན་གྲུབ་ཀྱང་ཡིན། གཅིག་པུའང་ཡིན་ལ་ཆ་མེད་ཀྱང་ཡིན་ཏེ། དེའི་རྒྱུ་མཚན། དེ་བཞིན་ཉིད་ཀྱི་རང་མཚན་ནི་གཉིས་སྣང་ནུབ་པའི་ཚུལ་གྱིས་རྟོགས་པར་བྱ་བ་ཁོ་ན་ཡིན་ལ། གཉིས་སྣང་མེད་པ་ལ་ཇི་ལྟར་ཆ་བཅས་སུ་སྨྲ། དེ་ལ་གཅིག་དུ་བྲལ་ལ་སོགས་
པའི་རྟགས་ཀྱིས་དཔྱད་བཟོད་མིན་པར་ཅི་ལྟར་སྒྲུབ་ནུས་ཏེ། རང་གི་རང་མཚན་དེ་ཉིད་འཕགས་བློས་མངོན་སུམ་དུ་མཐོང་ལ། དེ་ལ་སྤྲོས་པའི་དཔྱད་པ་གང་ཡང་འཇུག་པའི་གཞི་མི་སྲིད་པའི་ཕྱིར། དེ་སྤྲོས་པའི་ཡུལ་དུ་མ་གྱུར་ན་དེ་སྒྲུབ་བྱེད་ཀྱི་ཚད་མ་
13-1-187a


གང་གིས་དམིགས་ཤེ་ན། ཀུན་རྫོབ་སྤྲིན་དང་འདྲ་བ་རྣམས་གཅིག་དུ་བྲལ་ལ་སོགས་པའི་གཏན་ཚིགས་ཀྱིས་དཔྱད་ནས་དེ་དག་སུན་ཕྱུང་བ་ན། ཇི་ལྟར་རླུང་གིས་སྤྲིན་གཏོར་བའི་རྗེས་སུ་མཁའ་དང་ཉི་མ་མངོན་པ་ལྟར། འཕགས་
པ་རྣམས་ཀྱི་བློའི་ཡུལ་དུ་དེ་བཞིན་ཉིད་ཡོངས་གཅོད་དུ་འབད་མེད་གྲུབ་པ་ཡིན་ཏེ། ཀུན་རྫོབ་རྣམ་བཅད་ལ་ཁེགས་པས་དོན་དམ་ཡོངས་གཅོད་དུ་གྲུབ་པ་ཆོས་ཉིད་ཡིན་པས་སོ། །གལ་ཏེ་ཆོས་ཉིད་དེ་བཞིན་ཉིད་འདི་མེད་པར་གྱུར་ན་ནི། འཕགས་པ་རྣམས་ཀྱིས་
དེ་ལ་དམིགས་པས་སྤང་རྟོགས་ཀྱི་ཡོན་ཏན་འབྱུང་བའང་མི་འཐད་ཅིང་བློའི་ཡུལ་མིན་པ་ལ་ཤེས་བྱའི་ཐ་སྙད་ཀྱང་མེད་པས་འདི་ནི་འཕགས་བློའི་ཡུལ་དུ་ཡོད་པ་ཡིན་ལ། ཡོད་པ་ལ་རྟག་པ་དང་མི་རྟག་པ་གང་རུང་གིས་ཁྱབ་པ་ལས། མི་རྟག་པ་ནི་དུས་གསུམ་གྱི་
འགྱུར་བ་ཅན་ལ་འཇོག་ན། འདི་ལ་སྔ་ཕྱི་བར་གྱི་ཁྱད་པར་མེད་པར་འདུས་མ་བྱས་ཡིན་པས་རྟག་པ་ཐེར་ཟུག་པ་མི༷ན་ནོ། །འདི་ལམ་གྱི་དགག་བྱའང་མིན་ཏེ་ཐོབ་བྱ་ཡིན་ལ། རིགས་པའི་དགག་བྱའང་མིན་ཏེ་རྒྱུ་རྐྱེན་ལ་མི་ལྟོས་པར་ཡེ་ནས་རང་བྱུང་
ཡིན་པའི་ཕྱིར་དང་། ཆ་ཅན་མིན་པའི་ཕྱིར་དང་། དུས་སྐད་ཅིག་གི་མཚན་ཉིད་ཅན་མིན་པའི་ཕྱིར། གཅིག་དུ་བྲལ་དང་རྟེན་འབྱུང་ལ་སོགས་པའི་གཏན་ཚིགས་ཀྱི་འཇུག་ཡུལ་མ་ཡིན་ཏེ། དེས་གཞལ་བྱ་མ་ཡིན་པའི་ཕྱིར་རོ། །གལ་ཏེ་ཤེས་བྱ་ཡིན་ན་གཅིག་
དུ་བྲལ་ལ་སོགས་པའི་རྟགས་ཀྱིས་བདེན་མེད་དུ་བསྒྲུབ་བྱ་མིན་པ་མི་སྲིད་དེ། ཤེས་བྱའི་རྣམ་པ་བློ་ཡུལ་དུ་ཤར་བ་དེ་ལ་དཔྱད་པ་དེ་དག་མི་འཇུག་པ་མི་སྲིད་པའི་ཕྱིར་སྙམ་ན། ཤིན་ཏུ་བདེན་ཏེ་བློ་གཉིས་སྣང་དང་བཅས་པའི་སྤྱོད་ཡུལ་དུ་གྱུར་པ་ལ་དེ་ལྟ་ཡིན་
13-1-187b


ཀྱང་། གཉིས་སྣང་མེད་པའི་བློའི་སྤྱོད་ཡུལ་དུ་གྱུར་པ་ལ་ཇི་ལྟར་ན་དཔྱད་པ་འཇུག་སྟེ། གཉིས་སྣང་ནུབ་པའི་ཚུལ་གྱིས་དེ་བཞིན་ཉིད་མངོན་སུམ་མཇལ་བ་ཙམ་ཡིན་པའི་ཕྱིར། ཆོས་ཉིད་ཀྱི་དོན་སྤྱི་ལྟ་བུ་བློ་ཡུལ་དུ་ཤར་བ་ལ་ནི་དཔྱད་བཟོད་མེད་དེ། དེ་ནི་ཀུན་རྫོབ་
ཡིན་པའི་ཕྱིར། ཞི་བ་ལྷས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་གསུངས་པ་བཞིན་ནོ། །དོན་དམ་བློ་ཡི་སྤྱོད་ཡུལ་མིན་ཞེས་པའང་བློ་གཉིས་སྣང་དང་བཅས་པའི་སྤྱོད་ཡུལ་མིན་པ་ཁོ་ན་ཡིན་གྱི། བློ་གང་གི་ཡང་
སྤྱོད་ཡུལ་མིན་ན་རི་རྭ་དང་ནམ་མཁའི་མེ་ཏོག་ལྟ་བུར་ཁས་ལེན་དགོས་པས་དེ་བཞིན་ཉིད་རྟོགས་པའི་འཕགས་པ་རྣམས་གཏན་ནས་འབྱུང་བར་ཡང་མི་སྲིད་དོ། །དེ་ལྟ་བུའི་དེ་བཞིན་ཉིད་དོན་དམ་དེ་ནི་བདེན་པར་གྲུབ་པ་ཡིན་ཏེ། ཀུན་རྫོབ་རྣམས་མི་བདེན་པ་རྫུན་
པ་བསླུ་བའི་ཆོས་སུ་གྲུབ་ལ། དེ་དང་བྲལ་བ་དོན་དམ་ནི་བདེན་པ་རྫུན་མེད་པ་མི་བསླུ་བའི་ཆོས་སུ་གྲུབ་སྟེ། དེ་མ་གྲུབ་ན་འཕགས་པའི་བདེན་པ་མཐོང་བའང་མི་སྲིད་དེ་རྫུན་པ་བསླུ་བའི་དོན་མཐོང་བས་ཐ་མལ་པ་ལྟར་སུ་ཡང་གྲོལ་བར་མི་འགྱུར་རོ། །
མགོན་པོ་ཀླུས། བཅོམ་ལྡན་འདས་ཀྱིས་ཆོས་གང་ཞིག །རྫུན་པ་དེ་ནི་བསླུ་བར་གསུངས། །ཞེས་དང་། མྱ་ངན་འདས་པ་བདེན་གཅིག་པུར། །རྒྱལ་བ་རྣམས་ཀྱིས་གང་གསུངས་པ། །དེ་ཚེ་ལྷག་མ་ལོག་པ་ཞེས། །མཁས་པ་སུ་ཞིག་རྟོག་
མི་བྱེད། །ཅེས་གསུངས་པ་བཞིན་ནོ། །ཁ་ཅིག་འདི་སྙམ་དུ། བདེན་པ་ཡིན་ཀྱང་བདེན་གྲུབ་ཡིན་མི་དགོས་ཏེ། བདེན་གྲུབ་ནི་རིགས་པས་དཔྱད་བཟོད་ལ་ཟེར་བས་སོ་སྙམ་ན། ཡང་དག་ཀུན་རྫོབ་ལྟ་བུ་ཐ་སྙད་དུ་བདེན་པ་ཡིན་ཀྱང་གཉིས་
13-1-188a


སྣང་དང་བཅས་པའི་བློ་ཡི་ཡུལ་ཀུན་རྫོབ་པ་དེ་དག་རིགས་པས་དཔྱད་མི་བཟོད་པ་ཡིན་པའི་ཕྱིར་བདེན་གྲུབ་མིན་ལ། ཆོས་ཉིད་དོན་དམ་པ་གང་ཡིན་པ་ནི་བདེན་གྲུབ་ཡིན་ཏེ། གཉིས་སྣང་མེད་པའི་བློ་ཡེ་ཤེས་ཀྱི་
ཡུལ་དུ་གྲུབ་པ་གང་ཞིག །དེ་ལ་རིགས་པ་གང་གིས་ཀྱང་གཞིག་ཅིང་གཞོམ་པའི་རྒྱུ་བ་མི་འཇུག་པའི་དཔྱད་བཟོད་པ་ཡིན་པའི་ཕྱིར།  དེས་ན་རིགས་པའི་དཔྱད་མི་བཟོད་པ་ཇི་སྲིད་དུ་ནི་དོན་དམ་མ་ཡིན་ཏེ། ཀུན་རྫོབ་ཏུ་ཐལ་བའི་ཕྱིར། ཐ་སྙད་
དཔྱོད་པའི་ཚད་མ་གཉིས་སྣང་གི་བློས་རྙེད་དོན་དུ་འགྱུར་གྱི། དོན་དམ་གཟིགས་པའི་ཚད་མ་གཉིས་སྣང་དང་བྲལ་བའི་བློས་རྙེད་དོན་མ་ཡིན་ནོ། །དེས་ན་སྒྲིབ་བྱེད་ཀུན་རྫོབ་སྤྲོས་པའི་རྣམ་པ་མ་ལུས་པ་སྤྲིན་ལྟ་བུ་དང་བྲལ་བ་ན། དེ་བྲལ་
སྟོབས་ཁོ་ནས་ཆོས་ཉིད་འདུས་མ་བྱས་པ་ནམ་མཁའ་ལྟ་བུ་ནི་རང་བཞིན་གྱིས་མངོན་དུ་སྣང་སྟེ། རང་གི་ངོ་བོ་ཡེ་ནས་ཡོད་པའི་ཕྱིར་ལམ་དང་རིགས་པའི་དཔྱད་པ་སོགས་ལ་ལྟོས་པ་ཅུང་ཟད་ཀྱང་མེད་དོ། །འོ་ན་རིགས་པའི་རྣམ་དཔྱད་
འདི་སྙེད་བྱས་པ་དང་། ལམ་རྒྱུད་ལ་བརྟེན་པ་དོན་མེད་དུ་ཐལ་ཟེར་བ་ནི་ཕྱོགས་མ་གོ་བའི་རྣམ་འགྱུར་ཏེ།  མེད་བཞིན་རང་གི་ངོ་བོས་སྟོང་པའི་ཀུན་རྫོབ་སྐྲ་ཤད་ལྟ་བུའི་སྒྲིབ་པ་འདི་དག་མེད་ན་ལམ་བརྟེན་ཅི་དགོས་ཀྱང་། འདི་རྣམས་
དང་མ་བྲལ་ན་ཉི་མ་སྤྲིན་གྱིས་བསྒྲིབས་པ་ལྟར་དེ་ཉིད་མངོན་དུ་མི་སྣང་བའི་ཕྱིར། ཀུན་རྫོབ་རང་གི་ངོ་བོ་ཉིད་སྟོང་པར་གཏན་ལ་ཕབ་ནས་ལམ་གོམས་པས་འཁྲུལ་པའི་སྒྲིབ་པ་ཟད་པ་ན་བྲལ་འབྲས་འདུས་མ་བྱས་བདེ་གཤེགས་སྙིང་པོ་ཉི་མ་ལྟར་སྣང་
13-1-188b


བ་ཉིད། ཀུན་རྫོབ་པའི་ཆོས་གཞན་གྱིས་སྟོང་པའི་དེ་ཉིད་མངོན་དུ་འགྱུར་ཏེ། མགོན་པོ་ཀླུ་སྒྲུབ་ཀྱིས། སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་གང་། །དེ་དག་ཀུན་གྱིས་ཉོན་མོངས་ལྡོག །ཁམས་དེ་ཉམས་པར་བྱེད་མ་
ཡིན། །ཞེས་གསུངས་པ་བཞིན་ནོ། །དེ་ལ་ཁ་ཅིག་འདི་སྙམ་དུ་ས་དང་པོ་པའི་སྤྱོད་ཡུལ་དུ་གྱུར་པའི་དེ་བཞིན་ཉིད་དང་སངས་རྒྱས་ཀྱིས་གཟིགས་པའི་དེ་བཞིན་ཉིད་ཆ་མེད་གཅིག་ཡིན་ན། དབུ་མ་རྒྱན་གྱི་འདུས་མ་བྱས་བདེན་གྲུབ་འགོག་
པའི་རིགས་པ་དེས་འགོག་གོ་སྙམ་ན། བདག་རང་གིས་ཉམས་མཚར་གྱི་ཚུལ་དུ་ལན་ཞིག་སྨྲ་ན་ཉོན་ཅིག །འཕགས་པ་སློབ་པ་དང་མི་སློབ་པ་ཐམས་ཅད་ཀྱིས་གཟིགས་པའི་དེ་བཞིན་ཉིད་ནི་འདུས་མ་བྱས་ཆ་མེད་གཅིག་བདེན་ཡིན་ཞེས་བྱའོ། །
དེ་ལྟ་ན་ས་དང་པོ་པ་དང་སངས་རྒྱས་ལ་དེ་བཞིན་ཉིད་རྟོགས་པ་ལ་ཁྱད་མེད་པར་ཐལ་ཟེར་ན། མཉམ་བཞག་གི་སྐབས་སུ་ཁྱད་མེད་པར་འདོད་ཅེས་བྱའོ། །དེ་ལྟ་ན་བློ་སྔ་མའང་ཕྱི་མ། ཕྱི་མའང་སྔ་མར་འགྱུར་པའི་རྒྱན་གྱི་རིགས་པ་འཕེན་ན། 
ཆུ་ཐམས་ཅད་རྒྱ་མཚོར་འདྲེས་པ་ན་རོ་གཅིག་པ་བཞིན་དུ། མཉམ་བཞག་ལ་གཉིས་སྣང་ནུབ་པའི་ཕྱིར། རྒྱུད་དང་བློས་རིས་སུ་ཕྱེ་བ་མེད་པར་ཡུལ་ཆོས་ཉིད་ལ་ཞུགས་པའི་ཕྱིར། མཉམ་བཞག་གི་སྐབས་ན་བློ་སྔ་ཕྱི་མེད་དེ། ཐམས་ཅད་ཡེ་
ཤེས་ཀྱི་སྐུ་གཅིག་ཡིན་ཞེས་བྱའོ། །དེ་ལྟ་ན་མཐོང་ལམ་པ་དང་སངས་རྒྱས་ལ་ཡོན་ཏན་ཁྱད་མེད་པར་འགྱུར་རོ་ཞེ་ན། འགྱུར་མི་དགོས་ཏེ། མཉམ་བཞག་ཏུ་ཇི་ལྟ་བ་རྟོགས་པ་ལ་མཐོ་དམན་མེད་ཀྱང་། སྒྲིབ་པ་ལྷན་སྐྱེས་དང་བག་ཆགས་མ་ཟད་པས་
13-1-189a


མཉམ་བཞག་གི་ངང་ལས་སླར་ལྡངས་ནས་གཉིས་སྣང་གི་རྣམ་པ་སྐྱེ་བའི་ཕྱིར་དང་། དེའི་དབང་གིས་མཉམ་པར་བཞག་བཞིན་དུ་ཇི་སྙེད་མཁྱེན་པ་སོགས་ཡོན་ཏན་མ་རྫོགས་ཞེས་བྱའོ། །མཉམ་བཞག་གི་རྟོགས་པ་དེས་གཉིས་སྣང་གི་
བག་ཆགས་ཅིས་མི་སེལ་ཏེ། རྒྱུན་མཐའི་རྡོར་ཏིང་དང་མཉམ་བཞག་ལ་ཁྱད་མེད་པའི་ཕྱིར་སྙམ་ན། ཁྱད་མེད་ཅེས་པ་འདི་ཅི་ཞིག །དེ་བཞིན་ཉིད་རྟོགས་པ་ལ་ཁྱད་མེད་པ་ཙམ་ཡིན་ནམ། ཚོགས་མཐའ་ཡས་པས་བརྒྱན་པ་ལ་ཁྱད་མེད་ཟེར་བ་ཡིན། 
དང་པོ་ལྟར་ན། འདོད་དེ། སྔར་བཤད་མ་ཐག་པ་བཞིན་ནོ། །གཉིས་པ་ལྟར་ན་ཚོགས་མཐའ་ཡས་པ་བསགས་པའི་སྒོ་ནས་རྒྱུན་མཐའ་པ་དང་སྐལ་བ་མི་མཉམ་པའི་ཐལ་བ་དེ་གཏན་ནས་འདི་ལ་མི་འཇུག་གོ། གལ་ཏེ་རྟོགས་པ་ལ་ཁྱད་མེད་ན་སྤངས་
པ་དང་ཡོན་ཏན་ལ་ཁྱད་མེད་པར་འགྱུར་རོ་སྙམ་དུ་ནི་སེམས་པར་མི་བྱ་སྟེ། སྤང་བྱ་སྤངས་པ་དང་ཡོན་ཏན་ཐོབ་པ་རྟོགས་པ་ཁོ་ནའི་སྟོབས་ཀྱིས་མ་ཡིན་ཏེ། ཚོགས་མཐའ་ཡས་པས་བརྒྱན་པ་དང་། བསྐལ་བ་དུ་མར་གོམས་པའི་སྟོབས་ཀྱིས་མཉམ་བཞག་ཇེ་
བརྟན་ཇེ་བརྟན་དང་ཀུན་རྫོབ་འཁྲུལ་བའི་སྣང་བ་ཇེ་ཆུང་ཇེ་ཆུང་དུ་སོང་ནས། མཐར་རྒྱུན་མཐའི་རྡོར་ཏིང་གིས་གཉིས་སྣང་འཁྲུལ་པའི་བག་ཆགས་ཕྲ་མོའང་ལྡོག་པར་གྱུར་པ་ན། ཆོས་ཀྱི་དབྱིངས་ལས་སླར་ལྡང་བ་མེད་པར་གཉིས་སྣང་ནུབ་པའི་མཉམ་
བཞག་ཁོ་ནར་དེ་གནས་པའི་ཚེ་སངས་རྒྱས་སུ་འགྲུབ་པ་ཡིན་ཏེ། རྣམ་འགྲེལ་ལས། རྣམ་པ་དུ་མར་ཐབས་མང་པོ། །ཡུན་རིང་དུས་སུ་གོམས་པ་ལས། །དེ་ལ་སྐྱོན་དང་ཡོན་ཏན་དག །རབ་ཏུ་གསལ་བ་ཉིད་དུ་འགྱུར། །རྒྱུ་ཡི་བག་ཆགས་སྤངས་
13-1-189b


པའི་ཕྱིར། །དེས་ན་ཐུགས་ཀྱང་གསལ་བ་ཡིན། །ཐུབ་ཆེན་གཞན་དོན་འཇུག་ཅན་གྱི། །བསེ་རུ་སོགས་ལས་ཁྱད་འདི་ཡིན། །ཞེས་གསུངས་པ་བཞིན་ནོ། །རྣམ་པར་མི་རྟོག་པའི་ཡེ་ཤེས་ཆོས་སྐུ་དེའི་བྱིན་རླབས་ལས། གཞན་ངོར་རྩོལ་བ་
མེད་པར་སྐུ་གཉིས་སུ་འཆར་ཞིང་། ཕྲིན་ལས་ཀྱི་འཇུག་པ་ནམ་མཁའ་ཇི་སྲིད་དུ་འཇུག་པ་ཡིན་ནོ། །འབྲས་བུའི་སྐབས་འདིར་ས་བཅུ་པའི་མདོ་དང་ཀླུ་བྱང་གི་སྐུ་གསུམ་ལ་འཇུག་པ་བཞིན་དུ་ཤེས་པར་བྱའོ། །དེ་ལྟར་རིགས་པ་འཕེན་པ་
འདི་ནི་ཡང་དག་པར་ངེས་སོ་ཞེས་རང་གི་འདོད་པ་མ་ཡིན་ཀྱང་། ཁྱོད་གཞན་སྟོང་དགྲ་ལྟར་མཐོང་བ་ལ་རིགས་པའི་སྒྱུ་རྩལ་ཉམས་མཚར་ཙམ་དུ་འགྲན་པ་ཡིན་ན། ཁྱོད་རང་གི་འདོད་པ་དང་མི་འགལ་བར་འདི་ལ་དགག་པར་གྱིས་དང་བདག་
ཀྱང་ཉམས་མཚར་བའི་སྤྱོད་ཡུལ་དུ་འགྱུར་རོ། །གཞན་ཡང་ལུང་གི་དབང་དུ་བྱས་ན། སངས་རྒྱས་རང་ཉིད་ཀྱིས་མདོ་ལས་གསུངས་པ། ངས་སྟོང་པ་ཉིད་དུ་བསྟན་པ་ཇི་སྙེད་པ་ནི་དྲང་དོན་ཡིན་ལ། བདེ་གཤེགས་སྙིང་པོ་བསྟན་པ་ནི་
ངེས་དོན་ཡིན་ནོ། །ཞེས་དང་། དགོངས་པ་ངེས་འགྲེལ་ལས། འཁོར་ལོ་ཐ་མ་ངེས་དོན་དུ་གསུངས་པ་སོགས་ལུང་མཐའ་ཡས་སོ། །ཉམས་མཚར་ཙམ་དུ་བྲིས་པ་ཡིན་ན་ཡང་། །རང་བཟོས་བདེ་གཤེགས་དམ་ཆོས་བསླད་མི་རུང་། །
འཆལ་ངག་སོང་ན་རྒྱལ་བ་རྣམས་ལ་བཤགས། །རང་བཟོས་བཤད་ན་ཅི་ཡང་ཟད་མཐའ་མེད། །བདག་ལ་གཞན་སྟོང་སྒྲུབ་པའི་ཁུར་ཀྱང་མེད། །རོང་ཀློང་རྣམ་གཉིས་ཀླུ་སྒྲུབ་གཞུང་དང་མཐུན། །དམན་པ་བདག་ཀྱང་རྩེ་གཅིག་དེར་
13-1-190a


འདུན་ཀྱང་། །མ་བྲིས་དབང་མེད་ཕ་རོལ་ཚིག་གིས་བསྐུལ། །གཞན་སྟོང་དགྲ་ལྟར་ལྟ་བའི་བུམ་སྐྲ་འགྲེང་། །དེ་ལ་འཕང་བ་ཁྱབ་འཇུག་མདུང་ཐུང་འདི། །ཇི་སྲིད་ཕ་རོལ་ཁས་ལེན་རྗེས་འབྲངས་ན། །ཡང་ནས་
ཡང་དུ་རྒྱུ་ཞིང་འབིགས་པར་བྱེད། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །གང་ཟག་གི་མཚན་གཞི་དཔྱད་པ་སོགས་ལ་དཔྱད་དགོས་པ་གཞན་མེད། ཕྱི་དོན་འགོགས་པའི་རིགས་པ་རྣམས་ཀྱི་སྐོར་ཀྱང་སྤྱིར་གྲགས་པ་ལས་དཔྱད་
མི་དགོས། འདི་སྐབས་ནམ་མཁའ་དགག་པ་ལ་རང་མཚན་མེད་པར་དགག་པ་ཡིན་ཚུལ་བཤད་པ་ནི་བདེན་ཏེ། ནམ་མཁའ་རང་མཚན་མི་འགྲུབ་ཚུལ་འགྲེལ་པར་རྒྱས་པར་བཤད་པ་བཞིན་ཡིན། རང་མཚན་མེད་པའི་སྤྱི་མཚན་ཙམ་མིང་བརྡས་
བཞག་པའི་རྣམ་པ་ཙམ་སྟེ། དེའི་ཕྱིར་ནམ་མཁའ་ལ་སོགས་པའི་ཐ་སྙད་མེད་ཅེས་སུས་ཀྱང་སྨྲས་པ་མེད་ན་ཅི་ཞིག་འགོག །སོ་སོར་བརྟགས་འགོག་ཀྱང་མེད་པར་ཐལ་ཞེས་པ་ཅི་ལ་ཟེར། བྲལ་གཞི་འཕགས་པ་གསུམ་གྱི་ཐུགས་རྒྱུད་ལ་སྒྲིབ་པ་
བྲལ་བའི་སྤངས་པ་མེད་པར་སུ་ཞིག་གིས་སྨྲས། འདིར་ཀུན་རྫོབ་ཅེས་པ་རང་མཚན་ཡོད་པའི་དངོས་པོ་རྣམས་ལ་འཛིན་པའི་སྐབས་ཡིན་པས། དེའི་དབང་དུ་དངོས་མེད་རྣམས་ནི་བརྟགས་པ་ཙམ་ལས་རང་མཚན་གྱི་རྫས་མེད་པར་དངོས་པོའི་ཆོས་
གཞན་བཀག་སྟོབས་ཀྱིས་གྲུབ་པ་ཙམ་དུ་སྒྲུབ་པ་ཡིན་ན་དེ་ལ་འགལ་བ་ཅི་ཞིག་ཡོད། གལ་ཏེ་སོ་སོར་བརྟགས་འགོག་རང་གི་ལྡོག་ཆ་ནས་དངོས་པོར་སྒྲུབ་ན། ཐར་པ་དངོས་པོའི་འདུ་ཤེས་ཅན་མུ་སྟེགས་གཅེར་བུ་པའི་ལྟ་བ་དེ་ལྟ་བུ་མདོ་སྡེ་
13-1-190b


པས་ག་ལ་འཛིན། བཞི་བརྒྱ་པ་ལས། ནམ་མཁའ་ལ་སོགས་རྟག་གོ་ཞེས། །སོ་སོའི་སྐྱེ་བོ་དག་གིས་རྟོག །མཁས་པ་རྣམས་ཀྱིས་དེ་དག་ལ། །འཇིག་རྟེན་པས་ཀྱང་དོན་མ་མཐོང་། །ཞེས་གསུངས་པ་ལྟར་སྐབས་འདིར་ཀུན་རྫོབ་ཏུ་ཡོད་མེད་ཅེས་
པ་དོན་བྱེད་ནུས་པར་ཡོད་མེད་དམ་རང་མཚན་ཡོད་མེད་ལ་འཛིན་པས་གཏན་མེད་དུ་ཅི་ལ་གོ། །རྒྱན་གྱི་ཀུན་རྫོབ་ཀྱི་མཚན་ཉིད་བཤད་པ་འདི་ཡང་དག་པའི་ཀུན་རྫོབ་ཀྱི་དབང་དུ་བྱས་ཟེར་ཀྱང་ཆེར་མི་འགལ་མོད། འོན་ཀྱང་ལོག་པའི་ཀུན་རྫོབ་ཀྱང་ཀུན་རྫོབ་ཡིན་
པའི་ཕྱིར། དེའི་མཚན་ཉིད་ལ་མ་ཁྱབ་པའི་སྐྱོན་སྤོང་དཀའ་ལ། སོ་སོར་བརྟགས་པའི་འགོག་པ་ཡང་ལོག་པའི་ཀུན་རྫོབ་ཡིན་ཟེར་ན་ཐར་པ་ལ་སྐུར་བ་དེས་ཀྱང་བཏབ་བོ། །དེ་བཞིན་དུ་བདེན་སྟོང་སོགས་ལ་སྦྱར་བར་བྱའོ། །རྣལ་འབྱོར་སྤྱོད་
པའི་ལུགས་ལ་བེམ་པོ་མི་འདོད་དམ་ཞེ་ན་སོགས། བེམ་པོ་འདོད་ཚུལ་རྒྱས་པར་བྲིས་པ་ནི་དོན་ལ་རྟོག་པ་དང་བྲལ་བའི་ཚིག་སྟེ། རྡུལ་ཕྲན་ཆ་མེད་འགོག་བྱེད་ཀྱི་རིགས་པ་སོགས་གང་གིས་ཀྱང་བེམ་པོ་མི་འགོག་ཅེས་པ་འདི་ཅི་ཞིག །བེམ་པོར་སྣང་
བ་ཡིན་ནམ། བེམ་པོ་རང་མཚན་པ་ཡིན། དང་པོ་མ་བཀག་ཀྱང་ཕྱི་མ་དཔྱད་ངོར་ཅིས་མི་ཁེགས་ཏེ། རྡུལ་ཕྲན་ཆ་མེད་ཁེགས་ན་བེམ་པོའི་རྩོམ་གཞི་མེད་པའི་ཕྱིར། དེས་བེམ་པོ་མི་ཁེགས་ན། བེམ་པོ་དང་ཤེས་པ་འགོག་པའི་རིགས་པ་ཞིག་ཡོད་དམ་
མེད། ཡོད་ན་གང་ཡིན་སྨྲ་དགོས་སོ། །གལ་ཏེ་འདི་དག་བེམ་པོ་བདེན་གྲུབ་འགོག་པའི་རིགས་པ་ཡིན་ལ། བེམ་པོ་འགོག་པ་མིན་སྙམ་ན་ནི། སྔར་ཆོས་ཅན་མཐུན་སྣང་བ་དཔྱད་པའི་སྐབས་སུ་བཤད་པ་ལྟར་དང་། གཅིག་དུ་བྲལ་
13-1-191a


ལ་སོགས་པས་ཀྱང་ཆོས་གང་ཡང་མི་འགོག་སྟེ་ཚད་མས་མ་དམིགས་ཀྱང་མི་ཁེགས་པའི་ཕྱིར་རོ། །རྣམ་ཤེས་སྐད་ཅིག་ཏུ་གྲུབ་པའང་སྐད་ཅིག་ཆ་མེད་ཀྱིས་འགོག་ནུས་ཏེ། དེ་མ་ཁེགས་ན་རང་རྒྱལ་དང་སེམས་ཙམ་པ་
འདྲ་བར་འགྱུར་རོ། །དེས་ན་སེམས་ཙམ་པའི་ལུགས་ལ་གཟུང་འཛིན་གཉིས་སྟོང་གི་རང་རིག་བདེན་པར་ཁས་ལེན་གྱི་འཛིན་པ་སྐད་ཅིག་མ་བདེན་གྲུབ་ཏུ་མི་འདོད་དེ། གཟུང་བ་མེད་ན་འཛིན་པ་མེད་ཅེས་འདོད་ཅིང་། གཟུང་འཛིན་ལས་འདས་
པ་སྤྲོས་པའི་ཡུལ་མིན་པའི་རང་རིག་གམ། དྲི་མ་མེད་པའི་རྣམ་ཤེས་སམ། ཡེ་ཤེས་ཉིད་ཡོད་པར་འདོད་པ་ཡིན་ལ། དེ་བློ་ལ་མ་ཤར་ནས་དོན་མེད་ཀྱི་སྨྲ་བ་བརྗོད་འདུག་པའི་ཕྱིར་རོ། །ཐ་སྙད་ཀུན་བཏགས་ཀྱི་སྣང་ངོར་ཆ་བཅས་ཀྱི་རྡུལ་དང་ཆ་
བཅས་ཀྱི་ཤེས་པ་ཡོད་ཀྱང་། གནས་ལུགས་ཡོངས་གྲུབ་ལ་ག་ལ་ཡོད། རྣལ་འབྱོར་སྤྱོད་པ་རང་ལུགས་ཀྱི་ཡན་ལག་ལམ་གྱི་དམིགས་པ་མཐར་ཐུག་གི་སྤྱོད་ཡུལ་ལམ། དོན་དམ་དཔྱོད་པའི་རིགས་པས་ཁེགས་ན་དེའི་ཆོས་དེ་དག་ཐ་སྙད་དུ་མེད་པར་ག་
ལ་འགྱུར། འདི་ཡང་འདི་པའི་ལུགས་ཀྱི་བདེན་གཉིས་ཕྱེ་མ་ཤེས་པའི་སྐྱོན་ཁོ་ན་ལས་ཡང་དག་པར་སྨྲས་པ་ཅི་ཡང་མེད་དོ། །ཡང་ཁོ་ན་རེ་ལྷས་བྱིན་གྱི་བློ་ལ་ཤེས་བྱ་ཀུན་གྱི་ཡུལ་དོན་སྤྱི་ཤར་ཚེ། བློ་ལ་ཤར་བའི་ཡུལ་དེ་ལས་གཞན་
པའི་ཤེས་བྱའི་ཆོས་ཡོད་དམ་མེད། ཡོད་ན་སྣང་ཡུལ་གྱི་བེམ་པོའང་ཡོད་དགོས་ལ།  མེད་ན་གསང་བ་པའི་གྲུབ་མཐར་ཐལ་ཞེས་པ་མཚར་ཏེ། ལྷས་བྱིན་གྱི་བློ་ལ་ཤེས་བྱ་ཐམས་ཅད་ཀྱི་དོན་སྤྱི་ཤར་ཚེ་བློ་ལ་ཤར་བ་དེ་ལས་གཞན་པའི་ཤེས་
13-1-191b


བྱའི་ཆོས་ཡོད་ན་སྣང་ཡུལ་གྱི་ཕྱི་དོན་ཀྱང་ཡོད་ལ། མེད་ན་གསང་བ་པའི་གྲུབ་མཐར་དེ་ལ་ཐལ་ཞེས་སྨྲས་ན་འཁོར་གསུམ་རང་ལ་འཁོར་བ་མིན་ནམ། ཡང་སངས་འཕགས་ཀྱིས་སྡུག་བདེན་གཟིགས་ཤིང་དེ་རྣམ་མཁྱེན་ལས། གཞན་མིན་ན་སངས་འཕགས་
ཀྱི་རྣམ་མཁྱེན་སྡུག་བདེན་ཡིན་པར་ཐལ་ལ། སྡུག་བདེན་དེ་རྣམ་མཁྱེན་ལས་གཞན་དུ་ཡོད་ན། དེ་བཞིན་བེམ་པོའང་རང་གི་ཤེས་པ་ལས་གཞན་དུ་ཡོད་དོ་ཞེས་ཟེར་བའང་བཤད་མ་ཐག་པ་དང་མཚུངས་སྟེ།  དཔེ་དེས་ཕྱི་དོན་ཀྱང་རང་གི་ཤེས་པ་ལས་
གཞན་དུ་ཡོད་ཅེས་སྨྲས་ན་ཅིས་འགོག །དེ་བཞིན་ཕུང་ལྔ་མེད་པར་ཐལ་བ་སོགས་ཀུན་ཀྱང་གནད་གཅིག་སྟེ།  སེམས་ཙམ་པའི་ལུགས་ལ་ཐ་སྙད་སྣང་ཚུལ་དང་བསྟུན་ན་ཕུང་པོ་ལྔའི་རྣམ་གཞག་ཀྱང་ཡོད། བེམ་ཤེས་ཀྱི་རྣམ་གཞག་ཀྱང་ཡོད། ཕྱི་
དོན་དང་ནང་གི་འཛིན་པའི་རྣམ་གཞག་ཀྱང་ཡོད་པ་ལ་སོགས་སྣང་ཚུལ་ཐམས་ཅད་མ་ཉམས་པར་འཇོག་ཤེས་དགོས་ཀྱི། དེ་མེད་ཅེས་སུ་ཞིག་གིས་སྨྲས། གནས་ཚུལ་ལ་ཡང་དག་པར་དཔྱད་པའི་དབང་དུ་ན། གཟུགས་ལ་སོགས་པ་བེམ་པོས་བསྡུས་པའི་
ཕྱི་དོན་མེད་དེ། ཕྱི་རོལ་དོན་ནི་ཡོད་མེད་དེ། །ཞེས་པ་ལ་སོགས་པར་གསུངས་པ་བཞིན་ནོ། །བེམ་པོ་ཕྱི་དོན་ཡོད་མཉམ་མེད་མཉམ་མིན་ཏེ། བེམ་པོ་ཐ་སྙད་དུ་ཡོད་ལ་ཕྱི་དོན་ནི་ཐ་སྙད་དུ་ཡང་ཁས་མི་ལེན་པས་སོ་སྙམ་ན། ཀ་ཡེ་གཞུང་ལུགས་ཆེན་པོའི་
ཚིག་རིས་ཙམ་བརྗོད་ཤེས་པ་ཁྱོད་ཀྱིས་དོན་ལ་རྟོག་པ་དང་བྲལ་ནས་ཚིག་གི་དམིགས་བུ་ཁོ་ནས་གཞུང་ལུགས་རྒྱ་མཚོའི་ཕ་རོལ་འགྲོ་འདོད་པ་བཞད་གད་ཀྱི་གནས་ཏེ། དང་པོར་ཕྱི་དོན་ཞེས་པ་དེ་གཏན་ལ་ཕོབ་དང་། དེ་ནས་ཕྱི་དོན་དུ་གྱུར་པའི་གཟུགས་དང་
13-1-192a


བེམ་པོ་སོགས་མེད་ཅེས་ཤེས་བྱ་ཀུན་ལ་སྦྱར་ཤེས་ན་ལེགས་འདུག་པས། ཕྱི་ཞེས་པ་དེ་ནང་གི་ཤེས་པ་ལས་ཕྱི་རོལ་དུ་གྱུར་པ་དང་། དོན་ཞེས་པ་དེ་གཟུགས་སོགས་ཡིན་ནམ་མིན། མ་ཡིན་ན་ནི་ཕྱི་རོལ་གྱི་གཟུགས་མེད་དེ། རང་སེམས་
ཕྱི་རོལ་ལྟར་སྣང་ངོ་ཞེས་པའི་རྣལ་འབྱོར་སེམས་ཙམ་པའི་གྲུབ་པའི་མཐའ་ལ་གང་ཡང་མི་ཕན་པའི་ཕྱི་དོན་མེད་ཅེས་པའི་ཚིག་ཙམ་དེ་བརྗོད་པས་ཅི་བྱ་སྟེ། རྣམ་འགྲེལ་ལས། བརྗོད་བྱས་སྟོང་པ་བརྗོད་རྣམས་ཀྱི། །འདི་དེ་མི་ཤེས་ཀྱིས་བསླད་ཡིན། །
ཞེས་གསུངས་པ་བཞིན་ནོ། །གལ་ཏེ་ཡིན་ན་ནི་ཐ་སྙད་དུ་ཡང་ཕྱི་དོན་མེད་ན། འདི་ལྟར་སྣང་བའི་གཟུགས་ལ་སོགས་པ་འདི་ནང་གི་ཤེས་པའི་རྫས་ཡིན་ནམ་མིན། མིན་ན་ཕྱི་དོན་ཀྱང་དེས་གྲུབ་ལ། ལྷན་ཅིག་དམིགས་ངེས་ལ་སོགས་པའི་རྟགས་ཀྱིས་
གཟུང་འཛིན་རྫས་གཞན་མིན་པར་སྒྲུབ་པའི་རིགས་པ་ཇི་སྙེད་པའང་དོན་མེད་པར་འགྱུར་རོ། །རྫས་གཞན་མིན་ཀྱང་གཅིག་ཀྱང་མིན་པར་སྒྲུབ་ན་ནི། རྣམ་རྫུན་པ་ཁོ་ན་ལས་རྣམ་བདེན་པ་ལྟར་ན་ཇི་ལྟར་སྒྲུབ་སོམས་ཤིག །གལ་ཏེ་བློ་རྫས་སུ་གྲུབ་ན། བློ་
རྫས་ལ་རྡུལ་དུ་གྲུབ་པ་ཞིག་ཐ་སྙད་དུ་འཐད་དམ་བློ་རྣལ་དུ་གནས་ན་ཅུང་ཟད་སོམས་ཤིག །བེམ་ཤེས་ཀྱི་གཞི་མཐུན་ཁས་ལེན་ནམ། དེས་ན་རྨི་ལམ་གྱི་རྟ་གླང་དེ་སྣང་ཚུལ་ལ་བེམ་པོ་དང་གཟུགས་ལྟར་སྣང་བ་ཡོད་ཅིང་། དེའི་ངོར་དེ་ལྟར་བཏགས་ཀྱང་དོན་ལ་
རྡུལ་གྲུབ་ཀྱི་གཟུགས་མེད་ཀྱི་ཤེས་པ་ཉིད་གཟུགས་ལྟར་སྣང་བའོ་ཞེས་རྣལ་འབྱོར་སྤྱོད་པའི་ལུགས་སྤྱི་ལས་གྲགས་ན་སྔོན་མེད་ཁྱོད་ཀྱི་ལུགས་འདི་ཡ་མཚན་ཆེའོ། །དེས་ན་ཕྱི་དོན་ཐ་སྙད་དུ་ཡང་མེད་ཅེས་པ་གནས་ཚུལ་ལ་དཔྱོད་པའི་དབང་དུ་བྱས་པ་སྟེ། བེམ་
13-1-192b


པོའང་དེ་དང་འདྲ་ལ། ཐ་སྙད་སྣང་ཚུལ་གྱི་དབང་དུ་ན་ཕྱི་དོན་གྱི་ཐ་སྙད་ཀྱང་མི་བྱ་ན། མདོ་སྡེ་རྒྱན་ལས། རྣམ་གསུམ་རྣམ་གསུམ་སྣང་བ་ཅན། །ཞེས་གསུངས་པའི་རྣམ་གསུམ་ནང་གི་དོན་དང་། ལུས་ཞེས་གསུངས་པ་སྟེ་ཐ་སྙད་དུ་སེམས་ལས་གཞན་པའི་
ཕྱི་དོན་མིན་ན་ལུས་སེམས་རྫས་གཅིག་པ་རྒྱང་འཕེན་པའི་གྲུབ་མཐའ་ཁས་ལེན་དགོས་ན་དེ་འདྲའི་སེམས་ཙམ་པ་སུ་ཞིག་ཡོད། དེས་ན་གནས་སྣང་སོགས་མི་ཕྱེད་པར་རི་ལ་སོགས་པ་སེམས་ཡིན་ནོ་ཞེས་ཟེར་བའི་བླུན་པོ་རྣམས་ལ་དགོངས་ནས། སྐྱོང་བྱེད་
ཀྱི་ལུགས་ངན་ཞེས་ཡིད་བཞིན་མཛོད་དུ་རྒྱས་པར་བཀག་པ་ཡིན་ནོ། །ཁོ་ན་རེ་ཁོ་བོའི་བླ་མས་རང་བཞིན་མེད་པར་ཤེས་ནས་རྒྱུ་འབྲས་འཇོག་ཚུལ་འདི་ཤེས་དཀའ་ཞེས་སོགས་ཟེར། རང་བཞིན་མེད་པར་ཤེས་ན་རྒྱུ་འབྲས་འཇོག་ཅི་དཀའ། 
གཟུང་འཛིན་མེད་པར་ཤེས་ན་གཟུང་བ་ལྟར་སྣང་བའི་ཡུལ་ཡོད་པར་ཤེས་ཅི་དཀའ། རང་བཞིན་མེད་པ་སྟོང་པ་ཕྱང་ཆད་ལ་གོ་ན་རྟེན་འབྱུང་འཇོག་མི་ཤེས་ལ། གཟུང་འཛིན་མེད་པ་གོ་ལུགས་ཉེས་ན་ཡུལ་འཇོག་མི་ཤེས་པ་ལ་བླ་མ་མཁས་པས་
དེ་ལྟར་གསུང་བར་མངོན་ཏེ། དེ་ནི་ཁྱོད་རང་ལ་གདམས་པ་ཡང་དག་པ་རེད་ངས་ཀྱང་སྙམ་མོ། །རང་རིག་གི་ཐད་ནས་ཁྱོད་རང་མཚན་ཉིད་སྐྱོན་ཅན་ལ་བློ་འདྲིས་པར་བྱས་ནས་དེ་དང་མི་མཐུན་པ་གཞན་ལ་གཤེ་བ་ནི་མི་གཙང་བ་ཟོས་པའི་ལུག་གི་དཔེ་
སྟེ། ཁ་ནང་ཁོ་ནར་ཕྱོགས་ཤིང་འཛིན་རྣམ་ཡན་གར་བ་ཞེས་པ་ནི། སྔོ་འཛིན་དྲན་པ་ལ་ཁྱབ་ཆེས་ཤིང་ཡན་གར་བ་ཞེས་པས་མཚན་གཞི་ལ་མི་སྲིད་དེ། ཡུལ་མེད་དུ་རང་མྱོང་བ་ལ་ཡན་གར་བ་ག་ལ་ཡོད། ཡོད་ན་གཞན་མྱོང་གི་ཤེས་པར་འགྱུར་
13-1-193a


གྱི་རང་རིག་ག་ལ་ཡིན། གཟུང་རྣམ་ནི་ཡན་གར་བ་འཛིན་རྣམ་གྱིས་རིག་པ་ལས་ཁོ་རང་གིས་ཁོ་རང་མི་རིག་པས་ཤེས་པའི་མཚན་ཉིད་གསལ་རིག་དང་ཡང་བྲལ་བར་འགྱུར་ཏེ། རྒྱས་པར་རྣམ་འགྲེལ་གྱི་རིགས་པ་བཞིན་བྲིས་ན་མང་
བས་རེ་ཞིག་བཞག་གོ། ཤེས་པ་ཡིན་ན་རང་གི་ངོ་བོ་ལ་བསམས་ན་རང་གིས་རང་རིག་པས་ཁྱབ་སྟེ། བེམ་པོ་ལས་ལོག་ཙམ་གྱི་ཤེས་པ་གསལ་རིག་གི་ངོ་བོར་གྱུར་པས་རང་ལ་རང་ལྟོས་མེད་དུ་གསལ་བ་རང་རིག་གི་མཚན་ཉིད་དུ་གསུངས་ན་དེ་ནི་ཤེས་
པ་ཀུན་ལ་ཡོད་པའི་ཕྱིར་དང་། རིག་ཐིག་ལས། སེམས་དང་སེམས་བྱུང་རྣམས་ཀྱིས་བདག་གིས་བདག་ཉིད་རིག་པ་གང་ཡིན་པ་ཞེས་སོགས་སྡེ་བདུན་ན་རྒྱ་ཆེར་གསུངས་པ་བཞིན་ནོ། །འོན་ཀྱང་རང་རིག་ཅེས་པ་འཛིན་རྣམ་གྱི་ཆ་ལ་བརྗོད་པའི་
ལྡོག་ཆ་ནས་ཤེས་པ་ཡིན་ན་རང་རིག་ཡིན་པས་མ་ཁྱབ་པ་ལྟར་སྣང་ངོ་ཞེས་འགྲེལ་པར་བྲིས་པ་འདི་བློ་ལ་མ་འཁྱོང་ན་གོ་བ་ལེགས་པ་ཞིག་ཡིན་ལ། འཇམ་དབྱངས་ས་སྐྱ་པ་ཕལ་མོ་ཆེས་ནི་ཁྱད་ཕྱེ་བ་མེད་པར་ཤེས་པ་ཡིན་ན་རང་རིག་ཡིན་པས་ཁྱབ་ཅེས་
གཞུང་སྒྲ་ཇི་བཞིན་འཛིན་པར་མཛད་དོ། །ཤེས་པ་ཡིན་ན་རང་རིག་ཡིན་པས་ཁྱབ་ན། ཤེས་པ་ཡིན་ན་རྟོག་མེད་ཡིན་པས་ཁྱབ་ཟེར་བ་ནི། རང་རིག་རྟོག་མེད་ཅེས་པ་ཙམ་ཞིག་གོ་མྱོང་ནས་རང་རིག་གི་དོན་ཅི་ཡང་མ་ངེས་པའི་རྣམ་འགྱུར་ཏེ། རྟོག་བཅས་
ཀྱི་ཤེས་པའང་ཕྱི་རོལ་ཡུལ་ལ་ལྟོས་ཏེ་རྟོག་བཅས་ཡིན་ཀྱང་ནང་རང་རིག་པའི་ཆ་ནས་རྟོག་མེད་ཡིན་པ་འགལ་བ་མེད་དོ། །ཞེས་ཆོས་ཀྱི་གྲགས་པའི་གཞུང་ན་རྒྱ་ཆེར་བཤད་པ་ད་སྔ་མ་ཐོས་པ་འདི་ན་གསལ་ཏེ། ད་ལྟོས་ལ་གཟོད་མཁས་པ་གཞན་དང་གླེང་ན་
13-1-193b


མི་མཛེས་སམ། དེས་ན་ཐལ་བ་དེ་འདྲ་བ་ནི་བུམ་པ་ཡིན་ན་མི་རྟག་པ་ཡིན་པས་ཁྱབ་ན། བུམ་པ་ཡིན་ན་ལྡན་མིན་འདུ་བྱེད་ཡིན་པས་ཁྱབ་པར་ཐལ་ཟེར་བ་ལྟ་བུའི་བྱིངས་མ་གོ་བའི་རྣམ་འགྱུར་གྱི་ཚིག་འདི་འདྲ་བ་འཛེམ་པ་མེད་པར་ངོ་མཐོན་དུ་སུ་ཞིག་གིས་
སྨྲ་བཅུག །འདི་སྐབས་ཐལ་བ་གཞན་ཀུན་ཀྱང་དེ་དང་འདྲ་བ་དེས་ཤེས་པར་འགྱུར་རོ། །ཀུན་གཞིའི་ཐད་ནས་མཁན་ཆེན་གྱིས་ཚོགས་བརྒྱད་མི་བཞེད་དེ་གཞུང་དུ་མི་གསལ་བའི་ཕྱིར། བཞེད་ན་ཚོགས་དགུ་བ་དྲི་མེད་ཀྱི་རྣམ་ཤེས་ཀྱང་བཞེད་དགོས་
ཟེར་ཀྱང་། དྲི་མེད་ཀྱི་རྣམ་ཤེས་བདེ་གཤེགས་སྙིང་པོ་ལ་ཟེར་ན་བཞེད་མི་ཆོག་པ་ཅི་ཡོད། བཞེད་པར་ཁྱོད་ཀྱིས་སྒྲུབས་དང་ལེགས་སོ། །ཀུན་མཁྱེན་ཆེན་པོས་སེམས་ཙམ་པ་ཚོགས་དྲུག་འདོད་མཁན་གྱི་ཡིད་རྟོག་མེད་ལས་གནས་དོན་ལུས་སུ་སྣང་
བར་འདོད་གསུངས་པ་ལྟར་རྒྱ་གཞུང་འགའ་ན་ཡང་ཡོད་པ་ཡིན་ལ། དེའི་ལུགས་ཀྱི་ཀུན་གཞི་ཡིད་རྣམ་ལ་བསྡུས་ནས་ཚོགས་དྲུག་གི་རྣམ་གཞག་མཛད་པ་ཡིན་མོད། དེས་ཀུན་གཞི་ཐ་སྙད་དུ་ཁེགས་པར་ག་ལ་འགྱུར་ཏེ། ཡིད་རྣམ་རྟོག་མེད་
ལ་ཡིད་ཀྱི་ཡུལ་ཁོ་ན་འཛིན་པའི་ཤེས་པ་དང་། གནས་དོན་ལུས་ཀྱི་བག་ཆགས་འཛིན་པ་དང་།  སྨིན་པའི་ཆ་གཉིས་སུ་ཕྱེ་བའི་ཕྱི་མ་དེ་དོན་ཀུན་གཞི་ལས་མ་འདས་པའི་ཕྱིར་ཏེ། གཞན་དུ་འཆི་བ་དང་སྙོམས་འཇུག་གཉིས་ལ་སོགས་པའི་
སྐབས་སུ་ཡིད་རྟོག་མེད་སྔ་མའི་ཆ་ཡོད་པར་སུ་ཞིག་གིས་སྒྲུབ་ནུས། དེས་ན་རྒྱལ་དབང་ཀློང་ཆེན་པའི་དགོངས་པ་ཟབ་མོ་མ་བརྟག་པར་དེས་སེམས་ཙམ་གྱི་གྲུབ་མཐའ་མ་དགོངས་ཞེས་བདག་གིས་སྨྲ་མི་ཕོད་དེ། བཀའ་དྲིན་ཅན་འདིའི་རྗེས་
13-1-194a


སུ་ཞུགས་པའི་ཕྱིར་དང་། རྒྱལ་བའི་གསུང་ལྟར་ཚད་མར་གྱུར་པ་ལ་རིགས་པས་གནོད་མི་སྲིད་པས་ཕ་རྗེས་བུ་འཇུག་གི་དཔེ་ཅི་ནུས་སྐྱོང་བ་ལས་སྡིག་པའི་ཕྲུ་གུ་མ་ཡི་གཤེད་ལྟ་བུའི་ཚིག་འཛེམ་པ་མེད་པར་སུ་ཞིག་གིས་
སྨྲ་སྟེ། ངོ་ཚ་མེད་པ་ཁྱོད་ཀྱིས་སྨྲ་བསམ་ན། སྨྲོས་ཤིག་དང་རིགས་པའི་སྟོབས་དང་ནུས་པའི་མཐུ་ཅི་ལ་བབ་ཀྱང་འགྲན་འདོད་བྱུང་ཚེ་ངེས་པར་འགྲན་པས་སྒུགས་ཤིག་ཨང་། ཡིད་ཤེས་ཕྲ་བ་ལ་ཀུན་གཞིར་བརྗོད་ན་ངོ་བོའམ་ལྡོག་པ་གང་ལ་
ཟེར་སོགས་འགྲེལ་པར་བརྟགས་པའི་ལན་དུ་ཁྱོད་ཀྱིས་རྟེན་བརྟེན་པའི་ཚུལ་དུ་བག་ཆགས་འཛིན་ནུས་ན། དེ་ཀུན་གཞི་ལས་མ་འདས་ལ། དེ་ལྟ་མིན་ན་བཏགས་པ་ཙམ་དུ་ཟད་པས་ཀུན་གཞིའི་དགོས་ནུས་མེད་པར་བརྟགས་པ་གཉིས་པོའི་སྔ་
མའི་ལན་ནི་ཀུན་མཁྱེན་ཀློང་ཆེན་པས་གོང་གི་གསུང་དེས་བཏབ་ཟེར་བ་ནི་དངོས་ལན་མེད་པར་ཀུན་མཁྱེན་ཆེན་པོའི་དགོངས་པ་ཆུད་གསོན་པ་སྟེ་ཀུན་མཁྱེན་གྱིས་དེ་ལྟར་གསུངས་ཀྱང་རང་བཞེད་ནི་མིན་པར། ཀུན་གཞི་ཐ་སྙད་དུ་མེད་ན་མི་འཐད་ཚུལ་
པད་དཀར་ལས་རྒྱ་ཆེར་བསྒྲུབས་པ་བཞིན་ལ། དེ་ལྟར་ཚོགས་དྲུག་འདོད་མཁན་བྱུང་ཞེས་པ་གྲུབ་མཐའི་བཞེད་པ་དེ་ལྟར་བྱུང་ཞེས་གསུང་བ་ཙམ་སྟེ། དེ་ལྟ་ན་ཡང་དེ་དག་གི་ཁས་བླངས་ཚོད་ལ་དེ་ལྟར་ཡིན་ཀྱང་། མཐར་གྲུབ་དོན་ལ་ཀུན་
གཞི་ལས་མ་འདས་པར་གོང་དུ་བཤད་མ་ཐག་པ་ཉིད་ཀྱི་ཕྱིར་རོ། །ཡང་ཁོ་ན་རེ་གཉིས་པའི་ལན་བཅོམ་ལྡན་འདས་ཀྱིས་བཏབ་སྟེ། རྒྱན་སྟུག་པོ་ལས། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། །སྙིང་
13-1-194b


པོ་དེ་ལ་ཀུན་གཞིས་སྒྲས། །དེ་བཞིན་གཤེགས་རྣམས་སྟོན་པར་མཛད། །ཅེས་གསུངས་པའི་ལུང་སོགས་དྲང་བ་ནི་ཕར་སོང་ཟེར་བ་ལ་དེར་འོང་ངམ་ཞེས་པའི་ལན་བཏབ་པ་དང་འདྲ་སྟེ། སྐབས་འདིར་ཚོགས་བརྒྱད་ཀྱི་ནང་ཚན་ཀུན་གཞི་ཉིད་དཔྱད་པ་
ཡིན་ན་འཁོར་བའི་གནས་དོན་ལུས་ཀྱི་བག་ཆགས་འཛིན་ནུས་ཡིན་མིན་དཔྱད་པ་ཡིན་གྱི་དོན་གྱི་ཀུན་གཞི་བདེ་གཤེགས་སྙིང་པོ་ལྟ་བུ་ཅི་ལ་དྲང་། བདེ་གཤེགས་སྙིང་པོ་འཁོར་བའི་ཀུན་གཞིར་གསུངས་པར་འདུག་སྙམ་པའི་ལུང་འདྲེན་འདི་རང་
མཚང་སྟོན་པར་ཟད་དོ། །ཀུན་གཞིའི་སྒྲས་བརྗོད་རུང་ཀུན་གྱིས་འཁོར་བའི་བག་ཆགས་འཛིན་མི་ནུས་བཞིན་འཁོར་བའི་བག་ཆགས་འཛིན་པ་ཚོགས་བརྒྱད་ཀྱི་ཡ་གྱལ་ཀུན་གཞིར་བཏགས་པ་ཁོ་ནར་ངེས་སྙམ་པ་ནི་ནོར་བ་རྔམ་པོ་ཆེ་སྟེ། བདེ་
གཤེགས་སྙིང་པོ་ཟག་མེད་ཀྱི་ཆོས་ཀུན་གྱི་གཞི་ཡིན་ལ། འཁོར་བའི་ཀུན་གཞི་ཟག་བཅས་ཀྱི་ཆོས་ཀུན་གྱི་གཞི་ཡིན་པས་ཀུན་གཞིར་གསུངས་ན། ད་ལན་ཡིད་ཤེས་རྟོག་མེད་ལ་ཀུན་གཞིར་བཏགས། བཏགས་པའི་དོན་ཀུན་གཞི་ཡིན་
ཚུལ་ནི་ཅི་ཡང་བཤད་དུ་མེད་པ་ཞིག་ཡོད་ན་དེས་ཁྱོད་ཀྱི་དགོས་པ་འགྲུབ་ཀྱི། བདེ་གཤེགས་སྙིང་པོས་ཅི་ཕན་ཏེ། མིང་ཙམ་གྱིས་འཁྲུལ་པ་སྐྱེས་ནས་བརྗོད་པའི་ངག་ཡིན་པའི་ཕྱིར་རོ། །དེས་ན་ཀུན་གཞིར་གྲགས་ཚད་ཅི་ལ་དཔྱད། སྐབས་
འདིར་བག་ཆགས་འཛིན་པའི་ཀུན་གཞིར་བཏགས་པའི་དགོས་པ་ཡོད་མེད་དཔྱད་པ་ཡིན་ནོ། །ངོ་བོ་ཐ་དད་པ་ཙམ་གྱིས་རྒྱུད་ཐ་དད་པར་འགྱུར་དགོས་པར་བདག་གིས་ནི་མ་སྨྲས། ངོ་བོ་ཐ་དད་ལ་རྒྱུད་ཐ་དད་དམ། བྱེད་ལས་ཐ་དད་གང་ཡིན་ཞེས་
13-1-195a


བརྒལ་ཞིང་བརྟག་པ་ཡིན་མོད་སྐྱེས་བུ་གཅིག་གི་རྒྱུད་ཀྱི་ཤེས་པ་ཐམས་ཅད་ངོ་བོ་ཐ་དད་ཀྱང་རྒྱུད་གཅིག་ཏུ་མི་འགྱུར་ན་འགྲོ་ལ་ཤེས་རྒྱུད་གཉིས་མི་མངའ། ཞེས་སོགས་ལུང་དང་། ཁྱེད་ཀྱི་མིག་ཤེས་རྣ་ཤེས་ལ་སོགས་སྐྱེས་བུ་དྲུག་
གི་རྒྱུད་ཀྱིས་ཤེས་པ་བཞིན་དུ་འགྱུར་གྱི། ཁྱོད་གཅིག་པུས་ཡུལ་དྲུག་ཤེས་པའི་ཐ་སྙད་གཞག་ཏུ་མེད་པར་འགྱུར་རོ། །ཁྱོད་ཀྱི་གསང་མཐོན་པོས་དབུ་མ་བས་ཀུན་གཞི་བཞེད་མི་རུང་བའི་སྒྲུབ་བྱེད་སྨྲ་ནུས་ན་མི་ལེགས་པ་ཅི་ཡོད་དེ། ཀུན་གཞི་མེད་ན་ངེད་
ལ་ལྷག་པར་མི་རུང་བ་མེད་ཀྱང་། ཤིང་རྟ་ཆེན་པོ་ཐོགས་མེད་ཀྱིས། འཆི་བ་དང་སྙོམས་འཇུག་གི་གནས་སྐབས་མི་རུང་བ་སོགས་རིགས་པས་སྒྲུབ་པ་དང་།  ལང་ཀར་གཤེགས་པ་ལ་སོགས་པའི་མདོ་སྡེའི་དོན་དགོངས་པ་ཅན་དུ་རིགས་པས་བསྒྲུབས་
ལ་ཐ་སྙད་དུ་ཡང་མེད་པ་རི་རྭ་དང་གཙོ་བོ་ལ་སོགས་པ་བཞིན་དུ་བསྒྲུབ་ནུས་ན་དེ་ནས་གསང་མཐོན་པོར་བསྒྲག་ཆོག་གི། རིགས་པ་མེད་པར་རྗེས་བརྗོད་ཙམ་ནི་གསང་མཐོ་ཡང་རུང་ཁྱི་རྒན་ངུ་འབོད་ཀྱི་དཔེ་ལས་མ་འདས་སོ། །མཚན་ཉིད་
གསུམ་དང་དྲང་ངེས་སོགས་བཤད་པ་ཡོངས་གྲགས་ལྟར་བྲིས་པ་ལ་དཔྱད་འོས་ཆེར་མེད། གཞན་དབང་དོན་དམ་དུ་མི་བསྡུ་བར་བཤད་པ་འདི་ལའང་ལུགས་སྣ་ཚོགས་ཡོད་དེ། དོན་དམ་ཡོངས་གྲུབ་གཅིག་པུ་ལ་བཤད་པ་ནི་ཡོངས་སུ་གྲགས་ལ། 
གཞན་དབང་ཆོས་ཅན་དོན་དམ་ཞེས་སོགས་སུ་བཤད་པའང་ཡོད་མོད། གཅིག་དང་དུ་མ་བྲལ་བ་ཡི། །རྣམ་ཤེས་དམ་པའི་དོན་དུ་འདོད། །ཅེས་པ་དང་། གཞན་དབང་གི་ཤེས་པ་ཉིད་ལ་ཀུན་བཏགས་ཀྱིས་སྟོང་པའི་མ་ཡིན་དགག་གི་སྟོང་ཉིད་འདི་རྣལ་འབྱོར་
13-1-195b


སེམས་ཙམ་པའི་འདོད་པ་ཐུན་མིན་ཡིན་པའི་ཕྱོགས་བཟུངས་ནས་གནས་ཚུལ་ལ་གཉིས་སྟོང་གི་རྣམ་རིག་ཉིད་དོན་དམ་དུ་བཞག་པ་ལ་གོ་བ་འགང་ཆེ་སྟེ་གཞན་དུ་ཀུན་བཏགས་རང་གི་ངོ་བོས་སྟོང་ལ། གཞན་དབང་ཀུན་བཏགས་ཀྱིས་སྟོང་པར་མ་བསྒྲུབས་ན། 
བདག་གཉིས་དང་བྲལ་བའི་སྟོང་ཆ་འབའ་ཞིག་ཙམ་གྱི་ཡོངས་གྲུབ་ལ་རྣམ་རིག་བདེན་གྲུབ་ཀྱི་དོན་ག་ལ་ཡོད། གཉིས་སྟོང་གི་ཤེས་པ་དེ་ཡོངས་གྲུབ་ཡིན་གྱི་གཞན་དབང་མིན་ཟེར་ན་ཚུལ་དེ་ལྟར་གོ་བའི་འདོད་པ་ལྟར་ན་ཁྱོད་ཀྱིས་དོན་དམ་ཡིན་ན་
འདུས་བྱས་མ་ཡིན་པས་ཁྱབ་ཟེར་བ་དེ་བདེན་མོད། ཤེས་པ་འདུས་མ་བྱས་ཁས་ལེན་ཚུལ་ཡོད་ན་དེ་ལྟར་གྱིས།  མིན་ན་གཉིས་སྟོང་གི་རྣམ་རིག་བདེན་པར་གྲུབ་ཚུལ་གང་ལྟར་ཡིན་སྨྲ་དགོས་སོ། །ཤེས་པ་སྐད་ཅིག་མ་འདུས་བྱས་བདེན་
པར་གྲུབ་པོ་སྙམ་ན། སྐད་ཅིག་མ་སྐྱེ་འགག་སོགས་དང་ལྡན་པ་ལ་འཛིན་པ་ཡིན་ཞིང་། འདུས་བྱས་དང་ནང་གི་ཆོས་ཡིན་པས་སེམས་ཙམ་པའི་ལུགས་ཀྱི་གཉིས་སྟོང་གི་དེ་བཞིན་ཉིད་དོན་དམ་པ་ལ་སྟོང་ཉིད་བཅུ་དྲུག་རྫོགས་ཚུལ་དེ་ཞོག་
དང་ཤིན་ཏུ་ལེགས་སོ། །ཚུལ་འདིས་སྨྲ་བ་ཉབ་ཉོབ་མང་པོ་གཞན་ཡང་བསལ་བར་ཤེས་པར་བྱའོ། །གལ་ཏེ་ཆོས་ཅན་གཞན་དབང་གི་ཤེས་པ་སྐད་ཅིག་མ་དེ་ཡང་ཀུན་རྫོབ་ཡིན་གྱི་དོན་དམ་མིན་ཏེ་དེ་ལས་སྐྱེ་བ་སོགས་མ་གྲུབ་པར་
རྟོགས་ན། བདེན་གྲུབ་ཡིན་རྒྱུའི་རྣམ་ཤེས་གང་ཡིན་སྨྲ་དགོས་སོ། །དེས་ན་གཟུང་འཛིན་གྱི་སྤྲོས་པ་ཀུན་དང་བྲལ་བའི་ཤེས་པ་ཉིད་གནས་ལུགས་སུ་གྲུབ་པར་སེམས་ཙམ་པས་འདོད་པ་ཤེས་པར་བྱ་སྟེ། འཇུག་པ་ལས། དེ་ཕྱིར་
13-1-196a


གཞན་གྱི་དབང་གི་ངོ་བོ་གང་། །དངོས་པོ་བཏགས་པར་ཡོད་པའི་རྒྱུར་འགྱུར་ཞིང་། །ཡོད་དང་སྤྲོས་ཀུན་ཡུལ་མིན་རང་བཞིན་ཡོད། །ཅེས་ཕྱོགས་སྔའི་འདོད་པ་བརྗོད་པ་ལྟར་དེ་འདྲའི་དེ་བཞིན་ཉིད་དེ་འདུས་བྱས་འདུས་
མ་བྱས་ལ་སོགས་པ་སྤྲོས་པའི་ཡུལ་ལས་འདས་ཀྱང་རང་གི་ངོ་བོས་མི་སྟོང་པའི་བདག་ཉིད་དུ་ཡོད་ཅེས་འདོད་པར་ཤེས་པར་བྱའོ། །ཞིག་པ་དངོས་པོ་ཡིན་པར་སྒྲུབ་བྱེད་དུ་དྲངས་པའི་ལུང་།  སྐྱེ་བའི་རྐྱེན་གྱིས་རྒ་ཤི་ཞེས་གསུངས་པ་ནི་
དངོས་པོ་ཕུང་པོ་ཉིད་འགྱུར་བ་དང་འགག་པའི་དོན་ལ་རྒ་ཤིར་བཏགས་ཏེ། ཕུང་པོ་སྐད་ཅིག་མ་མི་བརྟན་པ་དང་འགག་པ་ལས་མ་གཏོགས་པར། འགག་པའི་ཆ་དངོས་མེད་རྐྱང་པ་དེ་ཁོ་ན་སྐྱེ་བའི་རྐྱེན་གྱིས་བསྐྱེད་ཅེས་གསུངས་པ་ག་ལ་ཡིན་ཏེ། 
ཕུང་པོ་སྐད་ཅིག་མའི་དངོས་པོ་དེ་ལས་གཞན་པའི་ཞིག་པའི་དངོས་པོ་ཞིག་ལོགས་སུ་སྐྱེ་ཚུལ་མེད་པས་སོ། །ལོགས་སུ་མེད་ཀྱང་དངོས་པོ་དེ་སྐད་ཅིག་གཉིས་པར་མི་སྡོད་པའི་ཆ་ལས་བཏགས་པའི་ཕྱིར་བཏགས་ཡོད་ཙམ་གྱི་སྒོ་ནས་དངོས་
པོར་འཇོག་གོ་སྙམ་ན་བུམ་པའི་སྤྱི་དང་བདག་མེད་ལ་སོགས་པ་ཐམས་ཅད་ཀྱང་དངོས་པོར་འགྱུར་རོ། །ཁོས་རིགས་པ་སྨྲས་པ། འཇིག་རྟེན་ན་ཆུ་མེད་པས་འབྲས་ཉེས། ཟན་མེད་པས་བུ་ཤི་ཞེས་གྲགས་པ་ཡོད་ལ། དེ་དག་ནི་ཞིག་པ་
དངོས་པོའི་སྒྲུབ་བྱེད་ཡིན་ནོ་ཟེར། མྱ་ངམ་གྱི་ཐང་ན་ཆུ་མེད་པས་མི་ཤི་བ་ལྟ་བུ་ཕན་ཚུན་མེད་པའང་དངོས་པོ་ཡིན། ཟན་ཆད་པས་བུ་ཤི་བ་ལྟར་ཞིག་ནས་མེད་པའང་དངོས་པོ་ཡིན། ཉོན་མོངས་སྤངས་པས་རྣམ་པར་གྲོལ་བ་ཐོབ་པ་ལྟ་བུ་སྤངས་
13-1-196b


ནས་མེད་པའང་དངོས་པོ་ཡིན། གཙོ་བོ་མེད་པའི་ཕྱིར་གྲངས་ཅན་གྱི་གྲུབ་མཐའ་རྫུན་པ་དང་། རྟ་ལ་རྭ་མེད་པས་སྲབ་བཅུག་བདེ་བ་ལྟ་བུ་གཏན་ནས་མེད་པའང་དངོས་པོ་ཡིན།  མདོ་ལས་སྣང་བ་དང་མིག་དང་ནམ་མཁའ་རྣམས་གཟུགས་དམིགས་
པའི་རྐྱེན་དུ་གསུངས་པས་ནམ་མཁའ་ཡང་དངོས་པོ་ཡིན། བདག་མེད་པས་འཇིག་ལྟ་ལྡོག་པ་སོགས་མེད་པའི་ཐ་སྙད་ལ་བརྟེན་ནས་བཞག་པའི་རྣམ་གཞག་འདི་དངོས་མེད་ཀུན་ལ་འོང་ཤེས་པས་ན། དངོས་མེད་ཡིན་ནོ་ཅོག་ཀུན་དངོས་པོར་འགྱུར་བའི་
ཕྱིར་དངོས་མེད་ཅེས་པ་གཞི་མ་གྲུབ་པར་འགྱུར་བས་ན་ཁྱོད་ཀྱི་ལུགས་ལ་དངོས་མེད་ཀྱི་མཚན་གཞི་གང་ལ་བྱ་སྨྲ་དགོས་སོ། །ལར་དངོས་དངོས་མེད་ཀྱི་ཁྱད་པར་འདི་རྒྱུ་ལས་སྐྱེ་བ་སོགས་ཡོད་མེད་ཀྱི་ཡིན་ནམ་མིན། ཡིན་ན་ཞིག་པ་དངོས་པོར་ཁས་
ལེན་དུས་ས་བོན་ཞིག་པའི་རྒྱུ་དེ་ས་བོན་ཡིན་ནམ་མིན། ཡིན་ན་ས་མྱུག་གི་བར་དུ་ཞིག་པས་ཆོད་མ་ཆོད་ཞིག་སྨྲ་མ་ཤེས་བཞིན་ཏུ་ཞིག་པ་དངོས་པོར་རྒྱུ་གང་གིས་འཇོག  །མ་བརྟགས་མ་དཔྱད་པར་འཇོག་ན་དངོས་དངོས་མེད་ཀྱང་མ་དཔྱད་པར་རྒྱུ་
ལས་འབྲས་བུ་སྐྱེ་བ་ཙམ་ཁས་བླང་ཆོག་གི་ཡོངས་སུ་མ་གྲགས་པའི་ཞིག་དངོས་སྒྲུབ་པའི་ཚེགས་ཀྱིས་ཅི་བྱ། ཁོ་ན་རེ་ས་མྱུག་གི་བར་དུ་ཞིག་པས་ཆོད་མ་ཆོད་ཅེས་བརྟགས་པ་འདི་བཅོམ་ལྡན་འདས་ལ་དྲི་བར་གྱིས་ཟེར་ཀྱང་། བཅོམ་ལྡན་འདས་ཀྱིས་ཤི་བ་རྒྱུས་
བསྐྱེད་པ་དང་། རྒ་ཤིས་མ་རིག་པ་བསྐྱེད་པ་སོགས་ནི་རྟེན་ཅིང་འབྲེལ་བར་འབྱུང་བ་ཙམ་དུ་བསྟན་གྱི་རྒྱུ་ཉིད་ཞིག་པའི་རྒྱུར་གསུངས་ནས་ཞིག་པ་ཉིད་འབྲས་བུའི་རྒྱུར་གསུངས་པའི་དོན་མ་ཡིན་ན། དེ་ལ་བཀའ་འདྲི་ཅི་ཞིག་ཞུ། བརྟགས་ན་མཐའ་བཞིའི་སྐྱེ་བ་
13-1-197a


དང་ཞིག་མ་ཞིག་སོགས་ཀྱི་འཐད་པ་བྲལ་ཡང་རྟེན་འབྱུང་བསླུ་མེད་ཀྱི་ཚུལ་གསུངས་པ་ཤིང་རྟ་ཆེན་པོ་རྣམས་ཀྱིས་ཀྱང་དེ་ལྟར་བཀྲལ་བ་བཞིན་བདག་ཅག་གིས་ཀྱང་རྒྱུ་འབྲས་ལ་རྣམ་པར་དཔྱད་པའི་སྒོ་ནས་འཐད་པ་མི་བཙལ་བར་མ་བརྟགས་མ་
དཔྱད་པར་འཇུག་ཆོག་གི་དཔྱད་ནས་དངོས་པོར་ནན་གྱིས་སྒྲུབ་པ་ཁྱོད་ཡིན་པས་ན། ས་བོན་མ་ཞིག་བཞིན་སྐྱེ་བ་མི་སྲིད་པས་ཞིག་པ་འབྲས་བུའི་སྔོན་དུ་འགྲོ་ངེས་པར་དགོས་ལ། དེ་ཡང་ས་བོན་ལས་ཐ་དད་པའི་དངོས་པོར་ཁས་བླངས་པས་ན་ཞིག་པའི་རྒྱུ་ས་བོན་
ཡིན་མིན་ཙམ་ཞིག་ཅིས་ཀྱང་སྨྲ་དགོས་ཏེ། ཚུར་མ་བརྟགས་མ་དཔྱད་པར་སྐྱབས་བྱས་པ་ནི་དགྲ་ལ་ཕྱག་འཚལ་བ་དང་འདྲ་བས་ན་མི་འོས་ཁུར་ཆེན་བླངས་ཕན་ཆོད་སྒྱིད་པ་མ་འདར་ན་ལེགས་སྙམ་མོ། །ཉན་རང་ལ་ཆོས་བདག་མེད་རྟོགས་པ་ཡོད་མེད་ཐད།
རང་རྒྱུད་པའི་ལུགས་ལ་འཁོར་བ་སྤོང་བ་ལ། འཁོར་བའི་རྩ་བ་སྤོང་མི་དགོས་པར་འདོད་ཅེས་པ་འདི་ཅི་ཞིག །ས་བོན་དྲུང་ནས་མ་ཕྱུང་བར་འཁོར་བ་ལྡོག་པའི་ཚུལ་ཤིང་རྟ་ཆེན་པོའི་ལུགས་ག་ལ་ཡིན། ཡང་གང་ཟག་བདེན་མེད་དུ་རྟོགས་ན་ཆོས་ཅན་
ཀུན་བདེན་མེད་དུ་རྟོགས་ནུས། དེ་མ་ནུས་ན་ཤེས་བྱའི་གྲངས་བཞིན་རྟོགས་དགོས་པས་ཐུག་མེད་དུ་འགྱུར་རོ་ཟེར། འདི་རྣམ་པར་འཁྱམས་ཏེ། ཆོས་གང་ཡང་རུང་བའི་སྟེང་དུ་དགག་སྒྲུབ་ལས་འདས་པ་རྣམ་གྲངས་མིན་པའི་སྤྲོས་བྲལ་སྟོང་པ་ཉིད་
མཐོང་ན། དངོས་གཅིག་དངོས་པོ་ཀུན་གྱི་དེ་བཞིན་ཉིད་ཡིན་པས། ཆོས་ཀུན་གྱི་དེ་ཉིད་མཐོང་ནུས་ཏེ། །གཅིག་གི་སྟོང་ཉིད་གང་ཡིན་པ། །དེ་ནི་ཀུན་གྱི་སྟོང་ཉིད་ཡིན། །ཞེས་གསུངས་པ་ལྟར་རོ། །ཉན་ཐོས་ཀྱི་བདག་མེད་མཐོང་བ་ནི། གང་ཟག་རང་
13-1-197b


བཞིན་མེད་པར་རྟོགས་པའི་རྣམ་གྲངས་པ་མེད་པར་དགག་པའི་སྟོང་པ་ཉི་ཚེ་བ་ཙམ་མཐོང་བས། ཆོས་ཐམས་ཅད་བདག་མེད་དུ་མཐོང་ག་ལ་ནུས་ཏེ། གྲུབ་མཐའི་རིམ་པ་སྣ་ཚོགས་བཞིན་སྟེ། ཉན་རང་འཕགས་པའི་རྟོགས་རིགས་གསུམ་མངོན་རྟོགས་རྒྱན་ན་
གསུངས་པ་བཞིན་ནོ། །དེ་རང་རྒྱུད་པའི་ལུགས་ཡིན་ལ་རིགས་པས་དཔྱད་ན་མི་འཐད་པའི་ཕྱིར་ཁས་མི་ལེན་ནོ་སྙམ་ན། ཀ་ཡེ་བཞིན་བཟང་རིགས་པ་དེ་བརྗོད་ཅིག  །ཁོ་ཡིས་སྨྲས་པ། ཉན་ཐོས་པས་རགས་པ་རྣམས་མི་བདེན་པར་ཆ་མེད་ཙམ་དུ་རྟོགས་
པ་དང་། རང་རྒྱལ་གྱིས་གཟུང་ཡུལ་རྡུལ་ཆ་མེད་ཀྱང་མེད་པར་རྟོགས་པ་དང་། སེམས་ཙམ་པས་གཟུང་འཛིན་གཉིས་སྟོང་དུ་རྟོགས་པ་འདིས་དབུ་མ་ནས་བཤད་པ་ལྟར་གྱི་བདེན་སྟོང་རྟོགས་པ་མིན་ནོ་ཞེས་ཟེར། དེ་ལྟ་ན་ཁྱོད་ལ་འདི་འདྲི་སྟེ། རགས་པ་དང་
གཟུང་ཡུལ་མ་གྲུབ་པར་དཔྱད་པའི་རིགས་པ་དེ་དག་གྲུབ་མཐའ་འོག་མ་དང་གོང་མའི་ཐུན་མོང་ཡིན་ཞིང་། སྔ་མས་རྟོགས་ཟིན་ལ་ཕྱི་མས་སྐྱེད་འདོན་རྒྱུ་ཡང་མེད། སྔ་མས་བཞག་པ་ཕྱི་མས་མི་བཤིག་པར་རིམ་གྱིས་སྔ་མའི་མ་རྟོགས་པའི་ཆ་གོང་མས་
སུན་ཕྱུང་བ་ཡིན་ནམ་མིན།  ཡིན་ན་ནི་རགས་པ་བདེན་པར་མ་གྲུབ་པར་རྟོགས་པ་ཙམ་ལ་གོང་འོག་ཁྱད་མེད་ལ། མིན་ན་ནི་གྲུབ་མཐའ་འོག་མའི་སྐབས་སུ་རགས་པ་མ་གྲུབ་པར་དཔྱད་པའི་རིགས་པ་དེ་ལས་ལྷག་པའི་དབུ་མའི་སྒྲུབ་ཚུལ་དེ་སྨྲ་བར་བྱ་དགོས་
སོ། །གལ་ཏེ་ཆ་མེད་འགོག་པའི་རིགས་པ་དེ་ཡིན་ནོ་ཟེར་ན། དེ་ཉིད་ཕྲ་མོ་འགོག་པའི་རིགས་པ་ཡིན་གྱི་རགས་པ་སྔ་ནས་བཀག་ཟིན་པའི་ཕྱིར་ད་དགག་ཅི་དགོས། དགོས་ན་ཐུག་མེད་དུ་འགྱུར་རོ། །གཞན་ཡང་ཆ་མེད་མ་གྲུབ་པར་རང་རྒྱལ་
13-1-198a


གྱིས་ཀྱང་རྟོགས་ནུས་ན་དེ་དབུ་མའི་སྐབས་ནས་བཤད་པའི་ཆ་མེད་མ་གྲུབ་པར་རྟོགས་ཚུལ་དང་ཁྱད་ཅི་ཞིག་ཡོད། གལ་ཏེ་རྡུལ་ཆ་མེད་ལ་ཕྱོགས་ཆ་བརྟགས་པ་དེས་མ་གྲུབ་པར་རྟོགས་ཀྱང་ཆ་མེད་བདེན་མེད་དུ་རྟོགས་པའི་
གོ་མི་ཆོད་ན་དབུ་མའི་སྐབས་ཀྱི་ཆ་མེད་ལ་དཔྱད་པ་དེས་ཀྱང་གོ་མི་ཆོད་དེ། དེ་གཉིས་རིགས་པ་ཚུལ་གཅིག་པ་ཡིན་པའི་ཕྱིར་རོ། །རྣམ་ཤེས་བདེན་མེད་མ་ཤེས་ཕན་ཆད་རྡུལ་བདེན་མེད་མི་ཤེས་པའི་ཤེས་བྱེད་ཅི་ཞིག་ཡོད་དེ། བ་ལང་མ་དམིགས་
པའི་ཚད་མས་བ་ལང་ཁེགས་ཀྱི། རྟ་ཡོད་པས་བ་ལང་མི་ཁེགས་པར་ག་ལ་འགྱུར། ཆོས་གཞན་བདེན་མེད་དུ་མ་ཤེས་པས་འབྲེལ་མེད་གཞན་བདེན་མེད་དུ་མཐོང་ཐབས་མེད་ན། བུམ་སོགས་ཡོད་པའི་ཕྱིར་གཙོ་བོ་སོགས་ནམ་ཡང་མི་ཁེགས་
པར་ཐལ་ལོ། །ཁྱོད་ཀྱི་ཞེ་འདོད་འདི་ལྟ་ན། གྲུབ་མཐའ་འོག་མའི་རང་ལམ་ན་རྣམ་གྲོལ་གྱི་སྒོར་གྱུར་པའི་ལམ་མེད་ངེས་སུ་སོང་བས། གྲུབ་མཐའ་དེའི་རང་ལམ་ཁོ་ན་ལ་ཞུགས་པའི་གང་ཟག་ལ་རང་ལམ་དེས་ནམ་ཡང་ཐར་པ་མི་ཐོབ་ལ། ཐལ་
འགྱུར་གྱི་གཞུང་ནི་དེས་མ་ཐོས་མ་བསམས་མ་མོས་བཞིན་དུ་རྟོགས་པར་ལྟ་ག་ལ་འགྱུར། དེས་ན་གྲུབ་མཐའ་འོག་མ་གསུམ་གྱི་རང་ལམ་ན་ཐར་བ་མེད་ཅེས་སྨྲ་བའི་སྔགས་ཀྱི་རྩ་ལྟུང་ལྟ་བུ་འདི་ཁྱོད་ལ་དགེ་བའི་བཤེས་གཉེན་སུ་ཞིག་གིས་བསླབས།
ཡང་ཆ་མེད་འགོག་པའི་རིགས་པས་རྡུལ་ཕྲན་ཆ་མེད་ཤེས་བྱ་ལ་མི་སྲིད་ཅིང་། ཆ་བཅས་ཡིན་ནོ་ཞེས་ཟེར་བ་ལ། སྨྲས་པ། ཆ་མེད་མེད་ན་ཆ་བཅས་ཀྱང་མི་སྲིད་དོ་ཞེས་སྨྲས་ན་ཅི་ཟེར། ཆ་མེད་མེད་ཀྱང་ཆ་བཅས་ཡོད་དེ། ཆ་མེད་མི་སྣང་
13-1-198b


ཞིང་ཆ་བཅས་སྣང་བའི་ཕྱིར་ཟེར་ན་ཆ་བཅས་ཀྱི་རྩོམ་གཞི་ཕྲ་བ་ཡོད་དམ་མེད། ཡོད་ན་དེའི་རྩོམ་གཞི་ཡང་ཆ་བཅས་ལས་འོས་མེད་པས་རྡུལ་ཕྲན་ཐུག་མེད་དུ་འགྱུར་པའི་ཕྱིར་རྩྭ་འཇག་གཅིག་གི་རྡུལ་གྱི་གྲངས་ཀྱང་མཐའ་མི་ཆོད་པར་འགྱུར་དགོས་
ན། གང་གཱའི་ཀླུང་གི་རྡུལ་ལ་སོགས་པ་མདོ་ལས་གྲངས་ཀྱི་ཁྱད་པར་གསུངས་པ་དེ་ཀུན་མི་འཐད་པར་འགྱུར་རོ། །དེ་ལྟ་ན་གཟུགས་ཆེན་པོ་དང་ཆུང་ངུའི་རྡུལ་ལ་མང་ཉུང་གང་གིས་འཇོག་སྨྲ་བར་བྱ་དགོས་སོ། །དེས་ན་གཤིས་ལ་ཆ་བཅས་ཆ་མེད་
གཉིས་ཀ་མ་གྲུབ་ཀྱང་། ལྕགས་རྡུལ་ལ་སོགས་པའི་རྣམ་གཞག་མདོ་དང་བསྟན་བཅོས་ན་བཤད་པ་འདི་སུས་དགག་ནུས་པ་མི་འདྲའོ། །དེ་དག་ནི་ཞར་བྱུང་མཚར་སྐྱེད་ཙམ་ཡིན་གྱི་དོན་ལ་ཆ་མེད་ཡོད་ཀྱང་རུང་མེད་ཀྱང་རུང་རགས་པ་ཆ་བཅས་སུ་བསིལ་བའི་རིགས་
པ་དེས་རགས་པ་བདེན་མེད་དུ་ཅིས་མི་རྟོགས། མ་རྟོགས་ན་དབུ་མས་ཀྱང་བདེན་སྟོང་མི་རྟོགས་པར་མཚུངས་ཞེས་བསྒྲེས་ན་རྟོགས་པར་ཅིས་སྒྲུབ། རིགས་པའི་སྒོ་ནས་ངེས་པའི་ཕྱིར་སྙམ་ན། གྲུབ་མཐའ་འོག་མ་འདི་དག་གིས་ཀྱང་རང་
རང་གི་རྟོགས་བྱ་རིགས་པ་དེའི་སྒོ་ནས་ངེས་པ་ལ་ཁྱད་མེད་དོ། །དཔེར་ན་སེམས་ཙམ་རྣམ་རྫུན་པས་འདོད་པ་ལྟར་ཕྱི་རོལ་གྱི་སྣང་བ་འདི་རྣམས་མཁའ་ལ་སྐྲ་ཤད་ཀྱི་སྣང་བ་ལྟར་ཕྱི་དོན་དང་ནང་གི་ཤེས་པ་གང་དུ་མ་གྲུབ་པར་མེད་བཞིན་སྣང་བ་
ཡིན་པར་ཕྱོགས་ཆ་བརྟགས་པའི་རིགས་པ་སོགས་ཀྱིས་ངེས་པ་བསྐྱེད་དེ་གོམས་ན་གོམས་པ་རབ་ཀྱི་མཐར་ཐུག་པའི་གསལ་སྣང་འབྱུང་བ་ཡོད་དེ། མི་རྟག་པ་གོམས་པས་མི་རྟག་པ་མངོན་སུམ་རྟོགས་པ་ཡོད་པ་བཞིན་ནོ། །དེས་ཕྱི་དོན་མེད་པར་མངོན་
13-1-199a


ནམ་མི་རྟོགས་ན་ཆོས་ཐམས་ཅད་རང་བཞིན་མེད་པར་ཤེས་ནས་གོམས་ཀྱང་མངོན་སུམ་མི་རྟོགས་པར་འགྱུར་རོ། །དེས་ན་ཆོས་གང་དང་གང་ཡིན་ཀྱང་དོན་དམ་དཔྱོད་པའི་རིགས་པས་བདེན་པར་མ་གྲུབ་པར་ངེས་པ་བཞིན་གོམས་པར་
བྱས་ན། དེ་དང་དེ་ལ་གསལ་སྣང་ཐོབ་པ་ཡོད་པས་ན་ཐེག་པ་རང་རང་གི་རྟོགས་རིགས་མི་འདྲ་བ་འཐད་པར་ཤེས་པར་བྱའོ། །ཡང་མདོ་སྡེ་པས་སྤྱི་མཚན་རང་བཞིན་མེད་པར་རྟོགས་པ་དེ། སྤྱི་མཚན་ལ་རང་མཚན་མངོན་སུམ་མཐོང་དུ་མེད་པ་ལ་བྱེད་
དམ། དབུ་མ་པ་ལྟར་རང་བཞིན་མེད་པ་ལ་བྱེད། དང་པོ་ལྟར་ན་མི་འཐད་དེ་ཞེས་སོགས་ཟེར་བ་ནི་རྣམ་པར་འཁྱམས་ཏེ། སྤྱི་མཚན་དོན་བྱེད་མི་ནུས་པའི་ཆ་ནས་བཏགས་པ་དང་། རང་མཚན་དོན་བྱེད་ནུས་པའི་རྫས་ཡོད་ལ་བཞེད་པ་ལ། དབུ་མ་ལྟར་
གྱི་ཞེས་སྦྱར་བ་ལ་དོན་དང་དྲི་རྒྱུ་ཅི་ཡོད། བློ་ངོར་སྣང་བའི་བུམ་པའི་དོན་སྤྱི་ནི་བུམ་པ་མ་ཡིན་ལ། བུམ་པའི་རང་མཚན་དང་སྣང་བཏགས་གཅིག་ཏུ་ཞེན་པའི་བློ་ཞིག་ཡིན་པས་དེ་དབུ་མའི་རང་བཞིན་མེད་པ་དང་འདྲ་ཞེས་སུས་ཀྱང་སྨྲས་པ་མེད་ན། རང་
ལ་རང་གིས་ཅོ་འདྲི་བར་ཟད་དོ། །འདིར་དོན་སྨྲ་སྡེ་གཉིས་ཀྱིས་བདག་མེད་དང་། གཟུགས་ཝུ་བ་རྡོས་པ་ལྟ་བུ་ལས་རིལ་པོ་གཅིག་པུའི་རྣམ་པར་མ་གྲུབ་པ་སོགས་རྟོགས་པ་ཡིན་ལ་དེ་ལྟར་རྟོགས་པའི་ཆ་ནས་གང་ཟག་གི་བདག་མེད་ལྟ་བུ་ལ། ཐེག་ཆེན་
དང་ཉན་ཐོས་མི་མཐུན་པར་རྩོད་པ་གང་ན་མཐོང་། འོག་མ་རང་གིས་མ་རྟོགས་པའི་ཆོས་ཐམས་ཅད་རང་བཞིན་མེད་པ་ལ་རྩོད་པ་ཡིན་ན་དབུ་མའི་གཞུང་ནས་བཤད་པའི་བདེན་སྟོང་རྟོགས་ན་རྩོད་དོན་མེད་ཟེར་བ་ཕྱོགས་སྔ་མ་ལ་སོགས་པའི་འབྲེལ་མེད་ཁོ་
13-1-199b


ནའོ། །ཡང་སེམས་ཙམ་པས་གཟུང་བ་མེད་པར་རྟོགས་པ་དེ་གཟུང་བ་ཕྱི་དོན་དུ་མེད་པར་རྟོགས་པ་ཡིན་གྱི་དབུ་མ་ནས་བཤད་པ་ལྟར་གཟུང་བ་རང་བཞིན་མེད་པ་མིན་པས་ན་རྒོལ་བ་པོའི་ཐལ་བ་འབྲེལ་མེད་ཡིན་ནོ་ཞེས་ཟེར་བ་ནི་མ་བརྟགས་པ་སྟེ། སེམས་ཙམ་
པས་གཟུང་བ་གཟུགས་ལ་སོགས་པར་སྣང་བ་ཐམས་ཅད་སྣང་ཡང་དེ་ལྟར་མ་གྲུབ་པ་སྒྱུ་མ་རྨི་ལམ་ལྟར་ཤེས་པས་ཕྱི་དོན་བདེན་མེད་དུ་ཤེས་པའི་གོ་མི་ཆོད་ན། དབུ་མས་ཀྱང་གཟུགས་སྒྱུ་མ་ལྟ་བུ་རྨི་ལམ་ལྟ་བུ་ཞེས་སོགས་སུ་ཤེས་ཀྱང་བདེན་
སྟོང་རྟོགས་པའི་གོ་ག་ལ་ཆོད། སེམས་ཙམ་པས་གཟུང་བ་ཕྱི་དོན་དུ་མེད་པར་རྟོགས་ན། ཕྱི་དོན་ཞེས་པ་དེ་བདེན་པར་གྲུབ་པར་འདོད་དམ་མི་འདོད། འདོད་ན་ཕྱི་དོན་མི་ཁེགས་ལ་མི་འདོད་ན་ཕྱི་དོན་བདེན་མེད་དུ་མ་ཤེས་པའི་རྒྱུ་མཚན་
འགོད་པ་དོན་མེད་དོ། །དེའི་ཕྱིར་དབུ་སེམས་གཉིས་ཕྱི་དོན་ཡོད་མེད་ལ་མི་རྩོད་ཀྱང་། རྣམ་ཤེས་བདེན་པར་གྲུབ་མ་གྲུབ་ལ་རྩོད་པ་ཡིན་ནོ། །སྤྱིར་ཉན་ཐོས་སྡེ་པས་བཏགས་ཡོད་དང་། དབུ་མས་རྟོག་བཏགས་ཙམ་དུ་འདོད་པའི་བཏགས་
ཡོད་མི་འདྲ་བ་བདེན་ཀྱང་། ཁྱོད་ཀྱིས་ཉན་ཐོས་སྡེ་པས་རྒྱུན་སོགས་བརྟགས་ཡོད་དུ་འདོད་པ་དེ་རྣམས་དོན་དམ་པར་མེད་པའི་དོན་ཡིན་ན། ལས་ལམ་རྫོགས་པ་རྒྱུན་ལ་འཇོག་པས་ན་དབུ་མ་པ་ལ་ལས་འབྲས་མི་འཐད་པར་རྩོད་པ་དོན་མེད་དོ་
ཞེས་སྨྲས་པ་ནི་དཔྱད་པར་བྱ་སྟེ། ལས་རྒྱུ་འབྲས་འགྲོ་འོང་ལ་སོགས་པ་ཐམས་ཅད་སྐད་ཅིག་ལ་བཞག་མི་ནུས་ལ་རྒྱུན་ལ་འཇོག་པ་ཡིན་ཀྱང་། རྒྱུན་གྱི་རྩོམ་གཞི་སྐད་ཅིག་མ་ཉིད་མེད་ན་དེ་དག་མི་འཐད་ཅེས་རྩོད་པ་ཡིན་གྱི། རྒྱུན་དང་རགས་པ་དོན་དམ་
13-1-200a


པར་མེད་ན་མི་འཐད་ཅེས་རྩོད་པ་ག་ལ་ཡིན་ཏེ་རྒྱུན་དང་རགས་པ་འདི་པས་ཀྱང་ཀུན་རྫོབ་ཏུ་འདོད་པ་མིན་ནམ་སྟེ། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་
དམ་ཡོད་གཞན་ནོ། །ཞེས་འདོད་པའི་ཕྱིར། འདིས་ཀུན་རྫོབ་ཏུ་འདོད་ཀྱང་དབུ་མའི་ཀུན་རྫོབ་དང་མི་འདྲ་སྟེ་བདེན་གྲུབ་ཏུ་འདོད་དོ་ཟེར་ན། རྒྱུན་བདེན་གྲུབ་ཏུ་འདོད་ན་ཕྲ་བ་སྐད་ཅིག་གིས་མི་རྟག་པ་རྟོགས་ཚུལ་མེད་ལ། རགས་པ་རིལ་པོ་བདེན་
གྲུབ་ཏུ་འདོད་ན་རྟག་གཅིག་རང་དབང་ཅན་གྱི་བདག་མེད་པར་རྟོགས་ཚུལ་མེད་དེ། རྒྱུན་གྱིས་རྟག་པ་དང་། རགས་པ་གཅིག་པུར་གྱུར་པའི་ཕུང་པོ་དེ་བདག་ཡིན་པ་ལ་རིགས་པས་གནོད་པ་གང་ཡང་སྟོན་ཚུལ་མེད་དོ། །དེས་ན་རྟག་བདག་སོགས་མེད་
པར་ཤེས་སོ་ཞེས་ཀྱང་སྨྲ་བར་མ་བྱེད་ཅིག །གལ་ཏེ་རྟག་བདག་སོགས་མེད་པར་ནི་ཤེས་ཀྱང་། བདེན་པ་མེད་པར་མ་ཤེས་སོ་སྙམ་ན་རྟག་བདག་མེད་ཀྱང་བདེན་པར་ཡོད་ལས་ཆེ་སྙམ་པའི་གང་ཟག་ཞིག་སྲིད་དགོས་ན་དེ་སུ་ཡིས་བཞག་པའི་གྲུབ་
མཐའ་ཡིན་སྨྲོས་ཤིག །འདི་རྣམས་དོགས་པའི་གནས་སུ་འདུག་པས་དེ་ལྟར་བཅད་པའང་དོན་ཡོད་དོ། །ཉན་ཐོས་སྡེ་པས་རྒྱུན་དང་རགས་པ་ཙམ་བདེན་མེད་ཤེས་ཀྱང་དེས་ཆོས་ཐམས་ཅད་བདེན་མེད་དུ་ག་ལ་ཤེས་ཏེ། རྒྱུན་དང་རགས་པའི་
རྩོམ་གཞི་སོགས་བདེན་པར་འདོད་པས་ན། ཐལ་བ་རང་ལ་མི་མཚུངས་སོ། །འཛིན་པ་བདེན་སྨྲའི་རང་རྒྱལ་དང་སོགས་ཀྱི་ཚིགས་བཅད་རྩོམ་པ་པོ་ནི། བུ་སྟོན་ཆེན་པོ་ཡིན་པས་དེ་ལ་སེམས་ཙམ་པའི་ལུགས་ཁོང་དུ་མ་ཆུད་པའི་བླུན་པོ་ཕྲག་
13-1-200b


དོག་ཅན་ཞིག་གིས་སྨྲས་པས་སྙིང་པོ་ཅི་ཡང་མེད་ཅེས་སྨྲ་བ་ཁྱོད་རང་སྤྱི་བརྟོལ་ཆེས་པ་ཏེ། དབྱིག་གཉེན་གཉིས་པ་ཞེས་ཡོངས་སུ་གྲགས་པས་ན་དེ་ཙམ་སྨྲ་བ་དེ་ནི་རང་ཕྲག་དོག་ཡོད་པ་མིན་ནམ་སྙམ། ཡང་ཐལ་འགྱུར་བའི་ལུགས་ལ་ཉན་རང་
གི་ཆོས་བདག་མེད་རྟོགས་པར་སྒྲུབ་པ་ལ། ཟླ་བའི་ཞབས་ཀྱིས་རིགས་པ་གསུམ་བཀོད་པའི། དང་པོ་ཉན་རང་གིས་ཆོས་ཀྱི་བདག་མེད་མ་རྟོགས་ན་ས་དང་པོ་པས་ཀྱང་ཟིལ་གྱིས་གནོན་རིགས་ཏེ། དངོས་པོ་རང་བཞིན་མེད་པར་ཡོངས་སུ་
ཤེས་པ་དང་བྲལ་བའི་ཕྱིར། འཇིག་རྟེན་པའི་འདོད་ཆགས་དང་བྲལ་བ་ལྟར་སེམས་དང་པོ་བསྐྱེད་པའི་སེམས་དཔས། རང་གི་བློས་རྣམ་པར་དཔྱད་པས་ཀྱང་ཟིལ་གྱིས་ནོན་པར་འགྱུར་རིགས་ན། དེ་ལྟར་མིན་པར་མདོ་ལས་གསུངས་པ་
བཀོད་པའི་དགོངས་པ་ནི་ཁྱོད་ལྟར་མ་ཡིན་ཏེ། དངོས་པོ་རང་བཞིན་མེད་པར་ཡོངས་སུ་ཤེས་པ་དང་བྲལ་བའི་ཕྱིར། འཇིག་རྟེན་པའི་འདོད་ཆགས་བྲལ་བ་ལྟར་ཞེས་པ་འདིས་གསལ་བར་ཤེས་ཏེ། ཆོས་རགས་པ་དང་རྒྱུན་ལ་སོགས་པ་མི་
བདེན་པར་ཤེས་པའི་ཆོས་བདག་མེད་པའི་ཆ་ཉི་ཚེ་བ་ལ་མ་བརྟེན་པར་གང་ཟག་གི་བདག་རང་བཞིན་མེད་པར་ཁོང་དུ་མི་ཆུད་ལ་དེ་ལྟར་དངོས་པོའི་རང་བཞིན་ཤེས་པ་དང་བྲལ་ན། རྟག་བདག་སོགས་མེད་པར་ཤེས་ཀྱང་དེས་ངར་འཛིན་ལྷན་
སྐྱེས་མི་སྤོང་བས་ཕྱི་རོལ་པའི་ཆགས་བྲལ་བཞིན་དུ་འགྱུར་ལ་དེ་ལྟ་ན་འཕགས་པར་ཡང་མི་འགྱུར་བའི་ཕྱིར། ས་དང་པོར་བདེན་པ་མཐོང་བས་བློ་ཡི་སྒོ་ནས་ཟིལ་གྱིས་ནོན་རིགས་སམ་ཞེས་སོ། །རིགས་པ་གཉིས་པ་དེ་ལྟ་ན་ཕྱི་རོལ་པ་
13-1-201a


བཞིན་དུ་ཁམས་གསུམ་ན་སྤྱོད་པའི་ཕྲ་རྒྱས་མི་སྤོང་བའང་གནད་དེ་ལ་ཐུག་ཅིང་། རིགས་པ་གསུམ་པ་གཟུགས་ལ་སོགས་པ་རང་གི་ངོ་བོ་ལ་དམིགས་པ་ཕྱིན་ཅི་ལོག་ཏུ་གྱུར་བའི་ཕྱིར་གང་ཟག་གི་བདག་མེད་མི་རྟོགས་སྟེ་
བདག་ཏུ་གདགས་པའི་གཞི་ཕུང་པོ་ལ་དམིགས་པའི་ཕྱིར་རོ། །ཞེས་པའང་གཟུགས་ལ་སོགས་པ་རང་གི་ངོ་བོ་ལ་ཕྱིན་ཅི་ལོག་ཏུ་གྱུར་པ་ནི་རིལ་པོ་དང་རྟག་པར་འཛིན་པ་ཡིན་ལ། དེ་རིལ་པོ་དང་རྟག་པར་དམིགས་བཞིན་ཏུ་བདག་མེད་མཐོང་
མི་ཤེས་ཏེ། རྟག་པ་དང་གཅིག་པུའི་རྣམ་པར་གཟུང་བའི་བདག་དེ་དང་མི་འགལ་བས་ན་བདག་ཏུ་གདགས་པའི་གཞི་ཕུང་པོ་རྟག་གཅིག་ཏུ་འཛིན་པའི་ཕྱིར་རོ་ཞེས་གསུངས་པ་སྟེ། དེ་ཡང་རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ་
སོགས་ཀྱི་ལུང་དང་། འཇུག་པ་ལས་ཀྱང་དེ་ལྟར་རིགས་པས་སྒྲུབ་པར་མཛད་ཀྱི་ཕུང་པོ་ཆ་མེད་དུ་ཞིག་ཕན་ཆོད་དུ་མ་དང་མི་རྟག་པ་དེ་ལ་དམིགས་ནས་ངར་མི་འཛིན་ཏེ། འཛིན་ན་བདག་དུ་མ་དང་མི་རྟག་པར་ཡང་འཛིན་དགོས་ལ།
དེའི་ཆ་རེ་རེ་དམིགས་ཀྱིས་བཀར་ནས་བདག་གོ་སྙམ་དུའང་མི་རྟོག་གོ། དེ་ལྟར་མི་འཛིན་ཀྱང་དུ་མའི་ཆ་ཚོགས་པ་ནི་ཡོད་པས་དེས་ངར་འཛིན་མི་ལྡོག་སྙམ་ན། རྣམ་བདུན་ཤིང་རྟའི་རིགས་པ་ཁོ་ནས་གང་ཟག་གི་བདག་མེད་གཏན་ལ་ཕེབས་མི་ནུས་
པར་འགྱུར་ཏེ། དེ་ནི་ཕུང་པོ་དུ་མ་དང་མི་རྟག་པའི་ཚུལ་ལས་བརྩམས་པའི་རིགས་པ་ཤ་སྟག་ཡིན་པའི་ཕྱིར། གཞན་ཡང་ཉན་རང་དགྲ་བཅོམ་པའི་རྒྱུད་ལའང་ལྷག་བཅས་ཀྱི་ཚེ་ངར་འཛིན་མི་ལྡོག་པར་ཐལ་ཏེ། ཕུང་པོའི་ཚོགས་པ་སྣང་བ་
13-1-201b


ཉིད་མ་ལོག་པའི་ཕྱིར། ཕུང་པོར་སྣང་ཡང་བདེན་པར་མ་བཟུང་ན་ངར་འཛིན་མི་སྐྱེ་སྙམ་ན། རྡུལ་ཕྲན་ཚོགས་པར་སྣང་ཡང་དེ་ལ་བདག་མེད་པར་མཐོང་ན་ངར་འཛིན་མི་སྐྱེ་བ་མཚུངས་ཏེ། ཐག་པར་སྣང་ཡང་སྦྲུལ་མེད་པར་ཤེས་པ་བཞིན་ནོ། །ཡུལ་
ཅན་བློས་བཟུང་བ་དེ་དང་མཚན་ཉིད་མི་མཐུན་པའི་སྒོ་ནས། ཐག་པ་ལ་སྦྲུལ་མེད་པ་ལྟར་ཕུང་པོ་ལ་བདག་མེད་པར་རྟོགས་ནུས་ཀྱི། འཁྲུལ་པའི་སྒྲོ་འདོགས་པའི་གཞི་མ་ལོག་ཚུན་ཆད་སྒྲོ་བཏགས་དེ་མི་ལྡོག་ན་ཐག་པ་མ་ལོག་པར་དུ་སྦྲུལ་
འཛིན་མི་ལྡོག་པར་འགྱུར་རོ། །འོ་ན་ཆ་མེད་གཉིས་པོ་བསགས་པ་ཙམ་ལ་གཟུགས་རགས་པར་སྒྲོ་བཏགས་པ་ཙམ་དུ་ཉན་ཐོས་སྡེ་པས་ཀྱང་འདོད་ན། དེ་དབུ་མས་སྒྲུབ་ཅི་ལ་དགོས་སྙམ་ན། ཆོས་བདག་མེད་ལ་རྩོད་པ་བྱེད་པའི་ངོར། གཟུགས་
རགས་པ་ཝུ་བ་རྡོས་པ་ལྟ་བུ་ལ་སོགས་པ་ཁྱེད་ལ་གྲགས་པ་འདི་ཡང་ཆོས་བདག་མེད་ཉི་ཚེ་བ་ཡིན་ལ་འདི་ལ་མ་བརྟེན་པར་གང་ཟག་གི་བདག་མེད་ཀྱང་རྟོགས་མི་ནུས་པས་ཆོས་ཀྱི་བདག་མེད་ལ་རྩོད་པ་དོན་མེད་ཅེས་བསྟན་པའི་ཆེད་དུའོ། །ཡང་ཁོ་ན་རེ། 
ཡང་ཉན་རང་ལ་ཆོས་བདག་མེད་ཡོད་པར་སྒྲུབ་པའི་རིགས་པ་ཐམས་ཅད་ཀྱི་གཙོ་བོ་ཕུལ་དུ་བྱུང་བ་ནི། བདེན་འཛིན་ལ་མ་རིག་པས་ཁྱབ་ལ། མ་རིག་དེ་ཡང་རྟེན་འབྲེལ་ཡན་ལག་བཅུ་གཉིས་ཀྱི་ཐོག་མའི་མ་རིག་པ་ཉོན་མོངས་ཅན་དེ་ཡིན་པ་འདི་
ཡིན། ཞེས་ཟེར། བདེན་འཛིན་ལ་མ་རིག་པས་ཁྱབ་ཀྱང་། བདེན་འཛིན་ཡིན་ན་རྟེན་འབྲེལ་བཅུ་གཉིས་ཀྱི་དང་པོར་གྱུར་པའི་མ་རིག་པ་ཉོན་མོངས་ཅན་ཡིན་པས་ཁྱབ་པ་ཅི་ཡིས་འགྲུབ་སྟེ་མི་འགྲུབ་བོ། །ཁོ་ན་རེ་སྟོང་ཉིད་བདུན་ཅུ་པ་དང་བཞི་བརྒྱ་པ་རྩ་
13-1-202a


འགྲེལ་དང་འཇུག་འགྲེལ་སོགས་ལས། དངོས་པོ་ལ་ལྷག་པར་སྒྲོ་འདོགས་པའི་མ་རིག་པ་ལོག་པས་འཁོར་བ་ལྡོག་པར་གསུངས་པའི་ལུང་རྣམས་དྲངས་ནས་དེའི་ཕྱིར་བདེན་འཛིན་ཉོན་མོངས་ཅན་ཡིན་ནོ་ཞེས་ཟེར། དེ་འདྲའི་
ལུང་གང་ཡིན་ཀྱང་མ་རིག་པ་ལྡོག་ན་འཁོར་བ་ལྡོག་པར་གསུངས་པ་ནི་སྤྱིར་བསྟན་པ་སྟེ། མ་རིག་པ་མེད་ན་འཁོར་བ་ཅིའི་ཕྱིར་མི་ལྡོག །མ་རིག་པས་དངོས་པོ་ལ་སྒྲོ་བཏགས་པ་ལས་རྟེན་འབྲེལ་ཡན་ལག་བཅུ་གཉིས་ཀྱི་ཚུལ་དུ་འཁོར་བ་
འགྲུབ་པ་གཞུང་སྤྱི་ལས་གྲགས་པ་སུས་ཀྱང་ཁས་ལེན་མོད། དངོས་པོ་ལ་ལྷག་པར་སྒྲོ་འདོགས་ལུགས་ལ་གང་ཟག་ཏུ་སྒྲོ་འདོགས་པ་དང་། ཆོས་སུ་སྒྲོ་འདོགས་པ་གཉིས་ཡོད་པའི་དང་པོ་ནི་ཉོན་མོངས་ཅན་གྱི་མ་རིག་པ་རྟེན་འབྲེལ་བཅུ་
གཉིས་ཀྱི་ཐོག་མར་གྱུར་པ་ཡིན་ཞིང་། དེས་ཉོན་སྒྲིབ་གཞན་ཀུན་ཀྱང་སྐྱེད་ལ། ཕྱི་མ་ནི་ཉོན་མོངས་ཅན་མིན་པའི་མ་རིག་པ་ཤེས་སྒྲིབ་ཀྱི་རྩ་བ་ཡིན་ཅིང་། མ་རིག་པ་དེ་གཉིས་ཀ་ལའང་ཉོན་མོངས་ཞེས་པའི་མིང་སྤྱིར་འཇུག་ཀྱང་། 
ཉོན་ཤེས་གཉིས་ཀྱི་ཟླས་ཕྱེ་བའི་ཉོན་མོངས་ནི་ཉོན་མོངས་ཅན་མིན་པའི་མ་རིག་པ་ལ་མི་འཇུག་པ་སོགས་འདི་འདྲའི་ཚུལ་མཐའ་ཡས་པ་སྐབས་འདི་ཙམ་དུ་མ་ཟད་ཐམས་ཅད་ལ་སྦྱར་དུ་ཡོད་ན་འདི་འདྲའི་ལུང་གིས་མ་རིག་པ་ཡིན་ཚད་
འཁོར་བའི་རྩ་བར་ཅིའི་ཕྱིར་འགྲུབ། གལ་ཏེ་བདེན་འཛིན་ལ་ཉོན་མོངས་ཅན་གྱི་མ་རིག་པས་ཁྱབ་ཅིང་། དེའི་བག་ཆགས་ཤེས་སྒྲིབ་ཡིན་ན། དགྲ་བཅོམ་པ་རྣམས་ཀྱིས་ཀྱང་འཁོར་བར་སྐྱེ་བའི་ས་བོན་ཕྲ་བ་ཉོན་མོངས་པའི་
13-1-202b


བག་ཆགས་དྲུང་ནས་མ་ཕྱུང་བར་འགྱུར་རོ། །གཞན་ཡང་དམན་ལམ་སྔོན་སོང་ལ་སྤང་བྱ་ཡོད་མེད་སོགས་མཁས་པའི་དཔྱད་པ་སྣ་ཚོགས་བཀོད་པའི་ལན་ཀྱང་འདེབས་རིགས་པ་ལ་རིགས་པ་མེད་པའི་ཚིག་ཙམ་གྱིས་རང་ཕྱོགས་སྒྲུབ་པར་མི་
ནུས་སོ། །ཉི་ཁྲི་ལས། ཤཱ་རིས་བུས་ཞུས་པ་འཕགས་པ་བཞིས་སྟོང་པར་བསྒོམས་ཀྱང་བྱང་སེམས་ཀྱི་ཤེས་རབ་ཉིན་གཅིག་བསྒོམས་པ་དེས་ཉན་ཐོས་ཀྱི་ཤེས་རབ་ཇི་ལྟར་ཟིལ་གྱིས་གནོན་ཞེས་དྲིས་པ་ན། སྟོན་པས། སེམས་བསྐྱེད་
ཀྱིས་ཟིན་མ་ཟིན་ལས་ཡིན་ནམ། །ཞེས་གསུང་གི་བདག་མེད་རྫོགས་མ་རྫོགས་ཀྱི་སྒོ་ནས་ལན་མ་བཏབ་པའི་ཕྱིར། ཞུ་བ་པོས་ཞུ་ཚུལ་དང་སྟོན་པས་ལན་གསུངས་ཚུལ་ལས་ཆོས་བདག་མེད་རྟོགས་པ་ཡོད་དོ་ཞེས་ཟེར། སྒྲུབ་པའི་སྐབས་སོགས་
ནས་སེམས་བསྐྱེད་ཀྱིས་ཟིན་མ་ཟིན་ལས་ཁྱད་པར་འགྱུར་ཚུལ་ཀྱང་གསུངས་མོད། འབྲས་ཡུམ་ལ་ཉེ་རིང་གི་གཞི་ཤེས་ཀྱི་མདོ་ཡི་སྐབས་ནས་སྲིད་ཞི་མཉམ་པར་རྟོགས་པའི་རྟོགས་པ་ཁོ་ནའི་སྒོ་ནས་བྱང་སེམས་ཀྱི་ཤེར་ཕྱིན་བསྒོམ་པ་མཆོག་
ཏུའང་གསུངས། རྟོགས་པ་ལ་ཁྱད་མེད་ན་དེ་ལྟར་གསུངས་པའང་མི་རིགས་སོ། །ཡང་ཐེག་ཆེན་གྱི་མདོ་འཆད་པའི་སྐབས་སུ་ཤཱ་རིའི་བུ་ལ་སོགས་པས་དྲིས་ཤིང་འཆད་པ་ཡིན་ན་དེ་དག་གིས་དེ་མི་རྟོགས་ན། དེའི་ཆེད་དུ་བྱ་བའི་གདུལ་
བྱ་མིན་པར་ཐལ་བ་སོགས་འཕེན་པ་ནི་འབྲེལ་མེད་དེ། སྟོང་ཉིད་དུ་མ་ཟད་ཀུན་རྫོབ་སེམས་བསྐྱེད་སོགས་ཐེག་ཆེན་གྱི་ལམ་ཐམས་ཅད་ཀྱང་དེ་དག་གིས་མ་ཐོས་པར་སྨྲའོ། །ཐོས་ན་དེའི་ཆེད་དུ་བྱ་བའི་གདུལ་བྱར་ཁྱོད་ཀྱིས་ཁས་
13-1-203a


ལེན་ནམ། གཞན་ཡང་སངས་རྒྱས་བྱང་སེམས་ཀྱི་མཛད་པ་ལ་ཚུར་མཐོང་གིས་བསམ་མི་ནུས་ཏེ། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང་། །སོགས་ཀྱི་ལུང་དང་། བདུད་སྡིག་ཅན་ཡང་སེང་
གེའི་ཁྲི་ལ་བསྡད་ནས་བདུད་ཀྱི་ལས་སྤོང་བའི་ཕྱིར་ཐེག་པ་ཆེན་པོའི་མདོ་འཆད་པ་སོགས་ཡོད་ན་དེ་ཐམས་ཅད་འདི་ལྟ་ཡིན་ནོ་ཞེས་ཁ་ཚོན་གཅོད་ཅི་ལ་དགོས། ཤཱ་རིའི་བུ་སོགས་སྤྲུལ་པའི་ཉན་ཐོས་ཡིན་པར་སངས་རྒྱས་ཀྱིས་གསུངས་
པ་ཡིན་གྱི་གཞན་སུས་ཞེ་འདོད་ཀྱིས་བསྒྲུབས་པ་ཡིན་ན་དེ་ལ་འགལ་བར་སེམས་པས་སངས་རྒྱས་ལ་ཅོ་འདྲི་བར་ཟད་དོ། །ལྔ་སྡེ་སོགས་ཐེག་དམན་གྱི་ཆེད་དུ་བྱ་བའི་གདུལ་བྱ་མིན་ན་ཉན་ཐོས་མཚན་ཉིད་པའི་མཚན་གཞི་བཟུང་རྒྱུ་མི་
འདུག་ཟེར་བ་མནོ་བསམ་རང་གིས་མ་བཏང་བ་སྟེ། ཐེག་ཆེན་ཐེག་དམན་གྱིས་ཆེད་དུ་བྱ་བའི་གདུལ་བྱ་འཁོར་འདུས་པ་རེ་རེའི་ནང་དུའང་། དགེ་སློང་བརྒྱད་ཁྲི་ནི་ཟག་པ་ཐམས་ཅད་ལས་ལེན་པ་མེད་པར་རྣམ་པར་གྲོལ་ལོ། །
དགེ་སློང་མ་དགུ་ཁྲི་ནི་ཆོས་ལ་ཆོས་ཀྱི་མིག་རྣམ་པར་དག་པ་ཐོབ་བོ། །ལྷ་དང་མིའི་སྐྱེ་བོ་དུ་མས་བྱང་ཆུབ་ཏུ་སེམས་བསྐྱེད་དོ། །ཞེས་པ་ལྟ་བུ་གསུངས་པ་ཡོད་ན་ལྔ་སྡེ་ཙམ་ལས་ཐེག་དམན་གྱི་ཆེད་དུ་བྱ་བའི་གདུལ་བྱའི་མཚན་
གཞི་བཟུང་རྒྱུ་མེད་པ་ནི། འཁོར་འདུས་པ་གསུམ་གྱི་གྲངས་ཙམ་ཡང་མ་ཐོས་པ་ལྟ་བུའི་གཏམ་དུ་ཟད་དོ། །ཡང་ཉན་རང་ལ་ཆོས་བདག་མེད་རྟོགས་པ་ཡོད་པར་ལུང་གིས་སྒྲུབ་པ་ནི། འཇུག་འགྲེལ་དུ་ས་བཅུ་པའི་མདོ་དྲངས་པ། 
13-1-203b


རྒྱལ་བུ་མཚན་ལྡན་སྐྱེས་པ་ཙམ་གྱིས་རིགས་ཀྱི་སྟོབས་ཀྱིས་བློན་པོའི་ཚོགས་ཟིལ་གྱིས་ནོན་ཀྱང་། བློའི་སྟོབས་ཀྱིས་མི་ནོན་པའི་དཔེ་བཞིན། ས་དང་པོའི་བྱང་སེམས་ཀྱིས་ཉན་རང་རྣམས་བསོད་ནམས་ཀྱི་ཟིལ་གྱིས་ནོན་ཀྱང་། བློས་མི་
ནོན་ལ། ས་བདུན་པར་ནི་བློས་ཀྱང་ཟིལ་གྱིས་གནོན་ཞེས་གསུངས་པའི་ལུང་འདི་ལས་ཉན་རང་རྣམས་ལ་ཆོས་ཐམས་ཅད་རང་བཞིན་མེད་པར་ཤེས་པ་ཡོད་ཅེས་གསུངས་པ་འདི། ཉན་རང་ལ་ཆོས་བདག་མེད་རྟོགས་པ་ཡོད་པའི་ཤེས་བྱེད་
མིན་ན་དྲང་དོན་མེད་ཅེས་སྨྲ་བར་བྱེད་དོ། །དེ་ལ་ལུང་འདི་ས་དང་པོ་པའི་རྟོགས་པ་ཉན་རང་དང་མཐོ་དམན་མེད་པའི་ཤེས་བྱེད་ཁོ་ནར་དགོངས་ནས་དྲངས་པ་ཡིན་ན། ས་བདུན་པར་བློས་ཀྱང་ཟིལ་གྱིས་གནོན་ཞེས་པ་དེ། བདག་མེད་གཉིས་
ལས་ལྷག་པ་ཞིག་རྟོགས་རྒྱུ་ཡོད་པའི་དོན་དུའང་ཚིག་གི་ཤུགས་ཀྱིས་གྲུབ་ན། ས་བདུན་པར་བདག་མེད་གཉིས་ལས་ལྷག་པ་ཅི་ཞིག་རྟོགས། དེས་ན་འདི་ནི་འགོག་པ་ལ་འཇུག་ཚུལ་གྱིས་ཡིན་པར་ཟླ་བས་ཀྱང་གསུངས་ལ། འགོག་
པ་ལ་འཇུག་པ་ལ་འཇུག་པ་དེ་བདག་མེད་མངོན་སུམ་དུ་མ་མཐོང་ན་འཇུག་མི་ནུས་ལ། ཕུང་པོ་རགས་པ་བདེན་མེད་དུ་མ་ཤེས་ན་བདག་མེད་པ་མི་མཐོང་བའི་ཚུལ་གོང་གི་རིགས་པའི་གནད་དེ་ལ་ཐུག་པ་ཁོ་ན་ཡིན་ནོ། །ཡང་ཆོས་ཐམས་ཅད་རང་
བཞིན་མེད་པར་རྟོགས་པ་ཡོད་དོ་ཞེས་བྱ་བར་གསལ་བར་ངེས་ཏེ་ཞེས་གསུངས་པས་ན། ཐམས་ཅད་ཀྱི་སྒྲས་ཆོས་ཀུན་བཟུང་བ་ཡིན་ནོ་ཟེར་བ་ཡང་མ་ངེས་ཏེ། ཐམས་ཅད་ཀྱི་སྒྲ་ནི་རང་གི་རྟོགས་བྱ་གང་ཟག་གི་བདག་མེད་
13-1-204a


རྫོགས་པར་རྟོགས་པ་ལ་མཁོ་བའི་ཆ་བཅས་དང་མི་རྟག་པ་ལྟ་བུའི་སྒོ་ནས་རིལ་པོ་དང་རྟག་པ་བདེན་མེད་དུ་ཤེས་པ་ལ་ཡང་འཇུག་སྟེ། སྨན་ཀུན་ཚོགས་དང་མི་ཀུན་ཚོགས་ཞེས་པ་བཞིན་ནོ། །ཡང་ལེགས་
ལྡན་གྱིས་སངས་རྒྱས་བསྐྱངས་ལ་ཐེག་ཆེན་བསྟན་པ་དོན་མེད་དུ་ཐལ་ཞེས་བརྒལ་བ་ནི། ཆོས་བདག་མེད་ཡོངས་སུ་རྫོགས་པར་ཉན་རང་གིས་ཀྱང་རྟོགས་པར་བཞེད་འདུག་སྙམ་དུ་བརྒལ་བ་ལ། དེ་མི་བཞེད་པར་ཟླ་བས་ལན་
བཏབ་པ་དེ་ཡིན་སྟེ། ཐེག་ཆེན་དུ་ཆོས་ཀྱི་བདག་མེད་བསྟན་པ་དོན་མེད་དུ་འགྱུར་ཟེར་ན་ཁྱབ་པ་མེད་དེ། ཉན་ཐོས་ཀྱི་སྡེ་སྣོད་ལས་ནི་ཉོན་སྒྲིབ་ཙམ་སྤང་པའི་ཕྱིར་དུ་ཆོས་ཀྱི་བདག་མེད་པ་མདོར་བསྡུས་པ་ཙམ་ཞིག་བསྟན་ལ། 
ཐེག་ཆེན་ལས་ནི་ཤེས་སྒྲིབ་མ་ལུས་པར་སྤང་བའི་ཕྱིར་ཆོས་ཀྱི་བདག་མེད་རྒྱས་པར་བསྟན་པའི་ཁྱད་ཡོད་པའི་ཕྱིར་ཞེས་ལན་གསུངས་པ་འདི་ཁྱོད་ཀྱིས་ཀྱང་དྲངས་འདུག་པ་འདི་ངས་ཀྱང་ཁྱོད་ལ་དྲངས་བར་འདོད་པའི་ལུང་ཡིན་ཏེ། 
ཉོན་སྒྲིབ་སྤོང་བའི་ཕྱིར་བསྡུས་པ་དང་། ཤེས་སྒྲིབ་སྤོང་བའི་ཕྱིར་རྒྱས་པར་བསྟན་པ་ཞེས་པ་འདིས་ཆོས་བདག་མེད་རྫོགས་མ་རྫོགས་ཀྱི་ཁྱད་ཡོད་པར་བསྟན་པ་ཡིན་གྱི་ཆོས་བདག་མེད་ཡང་དག་རྟོགས་ཕན་ཆོད། དེ་རྟོགས་བྱེད་ཀྱི་རིགས་པ་མང་
བས་ལྷག་པར་རྟོགས་རྒྱུ་དང་། ཉུང་བས་ཉུང་ངུ་རྟོགས་རྒྱུ་ཡོད་ན། གཅིག་དུ་བྲལ་གྱིས་བདག་མེད་རྟོགས་རྗེས་རྟེན་འབྲེལ་ཆེན་མོས་དཔྱད་ན་དེ་ལས་ལྷག་ཞིག་རྟོགས་དགོས་ཤིང་། དེ་ལྟར་ན་ཆོས་བདག་མེད་རྟོགས་པ་དེ་དག་ཡང་ནས་
13-1-204b


ཡང་རྟོགས་ཐུག་པ་མེད་པར་འགྱུར་རོ། །གཞན་ཡང་ཚིག་གསལ་ལས། བདག་ཏུ་ཞེན་པའི་གཞིར་གྱུར་པ་ཉེར་ལེན་ཕུང་ལྔ་ལ། ཕུང་པོའི་མཚན་ཉིད་ཡོད་པ་ཞིག་གམ་འོན་ཏེ་མེད་ཅེས་དཔྱད་ན། དེ་ཐར་འདོད་རྣམས་ཀྱིས་མ་དམིགས་པའི་ཕྱིར་བདག་མེད་ཅིང་།
བདག་མེད་ན་བདག་ཏུ་གདགས་པའི་གཞི་བདག་གི་བའང་མི་དམིགས་ཏེ་ཤིང་རྟ་ཚིག་ན་ཡན་ལག་མེད་པའི་དཔེ་གསུངས་པ་སོགས། འདི་འདྲའི་ལུང་ཐམས་ཅད་ནི་ཕུང་ལྔ་ལ་གཟུགས་རང་དང་། ཚོར་བ་སོགས་ཀྱི་མཚན་ཉིད་སྐད་ཅིག་དང་རྡུལ་ཕྲན་གྱི་ཆར་ཕྱེ་ན་རིལ་པོ་
དང་རྟག་པའི་རྣམ་པར་མེད་པས་ཉེ་བར་ལེན་པ་ཉིད་དུ་འང་མི་གྲུབ་ལ་དེས་གང་ཟག་གི་བདག་མེད་རྟོགས་པའི་ཉན་ཐོས་ཀྱི་འདོད་པ་ལྟར་དུའང་བཤད་རུང་ལ། ཕུང་ལྔ་ཆ་ཕྲ་བའང་མ་དམིགས་པའི་ཆོས་བདག་མེད་རྟོགས་པའི་སྒོ་ནས་གང་ཟག་གི་བདག་མེད་རྟོགས་
ཚུལ་ཡང་བཤད་རུང་སྟེ། གང་ལྟར་ཀྱང་འདིས་གང་ཟག་གི་བདག་མེད་བསྟན་ལ། བདག་མེད་ན་བདག་གི་བ་ཡང་མི་སྲིད་དེ། བདག་གི་བ་ནི་བདག་གྲུབ་ནས་དེའི་ཡོངས་སུ་བཟུང་པར་གྲུབ་དགོས་པའི་ཕྱིར་གསུངས་ན། ཚུལ་དེས་སྐབས་ཀྱི་དོན་ལ་སྒྲུབ་བྱེད་ཅི་
ཡང་མི་འོང་ངོ་། །ཕུང་སོགས་ཕྲ་བའང་རང་བཞིན་མེད་པར་མ་ཤེས་ཀྱང་གང་ཟག་གི་བདག་ཕྱེད་མེད་པར་རྟོགས། ཕྱེད་མེད་པར་མ་རྟོགས་པར་ཅིས་འོང་སྟེ། བདག་མེད་མ་ཚོགས་པར་རྟོགས་ན་ཕུང་སོགས་ལ་བདག་གི་བར་འཛིན་དོན་མེད་དེ། བུམ་པ་ཡོད་
ཀྱང་། མོ་གཤམ་བུའི་བུམ་པ་ཞེས་སུས་ཀྱང་མི་འཛིན་པ་བཞིན་ནོ། །གཞན་ཡང་ཁྱོད་ཀྱིས་མ་དྲངས་ཀྱང་རྩ་ཤེས་རབ་བྱེད་བཅོ་བརྒྱད་པའི་ཐད་ཀྱི་ཚིག་གསལ་ན། ལེགས་ལྡན་ལ་དགག་པ་བརྗོད་ནས་ཉན་རང་གིས་ཀྱང་རྟེན་ནས་འབྱུང་བ་སྤྲོས་པ་ཐམས་ཅད་
13-1-205a


བྲལ་བ་རྟོགས་པ་ཡོད་ཅེས་གསུངས་པའང་ཡོད་མོད། དེའི་སྐབས་དོན་ནི་རྟག་གཅིག་རང་དབང་བའི་བདག་གིས་ཕུང་པོ་སྟོང་པ་ལྟ་བུར་མ་ཟད་ཀྱི་ཉན་རང་གིས་ཀྱང་རྟེན་ནས་འབྱུང་བར་ཤེས་པའི་
སྒོ་ནས་བདག་རང་བཞིན་གྱིས་ཡོད་པར་སེམས་པའི་སྤྲོས་པ་མ་ལུས་པ་ཆོད་པའི་སྤྲོས་བྲལ་ལམ། བདག་མེད་ཕྲ་མོ་རྟོགས་པ་པོས་ཞེས་པའི་དོན་ཡིན་གྱི་རྣམ་གྲངས་མིན་པའི་སྤྲོས་བྲལ་མིན་ཏེ། རྒྱུ་མཚན། 
བདག་མེད་འདི་ནི་འགྲོ་བ་ཀུན་དགྲོལ་ཕྱིར། ཞེས་པའི་ཐད་ཀྱི་འཇུག་པ་རང་འགྲེལ་དུ་ཉན་རང་ལ་ཆོས་བདག་མེད་སྒོམ་པ་རྫོགས་པ་མེད་ཚུལ་བཤད་པ་སོགས་ཀྱིས་ཤེས་ནུས་པར། རྒྱན་འགྲེལ་སོགས་སུ་བཤད་པས་འདིར་
སླར་ཡང་མི་བསྐྱར་རོ། །མདོར་ན་ལུང་གང་ལ་རིགས་པའི་གནོད་པ་ཡོད་ན་རྒྱལ་བའི་གསུངས་ཡང་དྲང་དོན་དུ་འགྲེལ་བ་དམ་པ་སྤྱི་ཡི་ལུགས་ཡིན་ན། རིགས་པས་གནོད་པ་ཡོད་པ་ཉན་རང་ལ་ཆོས་བདག་མེད་རྫོགས་
པར་རྟོགས་པ་ལྟ་བུ་ནི་ནན་གྱིས་བསྒྲུབ་པས་ཅི་ཞིག་བྱ། གལ་ཏེ་ཟླ་བས་གསུངས་པས་སོ་ཞེ་ན་ཟླ་བའི་གསུངས་ནི་མ་འཁྱོགས་པར་བཤད་ན་གོང་དུ་མདོ་ཙམ་བསྟན་པ་བཞིན་ཆོས་བདག་མེད་རྫོགས་པའི་དོན་མིན་པར་གྲུབ་ལ། 
དེ་ལྟར་གྲུབ་ཀྱང་གཞན་དུ་ཁས་བླངས་ཟིན་པས་ན་མི་འདོར་རོ་ཟེར་ན་ཅི་དགྱེས་མཛོད་ཅིག །བདག་ཅག་རྣམས་ནི་རིགས་པས་ཀྱང་མི་གནོད་ལ་ལུང་སྤྱི་ལའང་གྲགས་ཤིང་། ཁྱད་པར་རྒྱལ་ཚབ་ས་བཅུའི་སེམས་དཔའ་ཆེན་པོས་
13-1-205b


བཀྲལ་བའི་ལུགས་འདིའི་རྗེས་སུ་འབྲང་བ་ཡིན་དེས་ཤེར་ཕྱིན་གྱི་དགོངས་པ་ཕྱེས་པ་ལས་ལྷག་པར་གཞན་ཡོད་པ་ཁྱེད་ཀྱིས་ཀྱང་སྨྲ་བར་དཀའོ། །ཁོ་ན་རེ། རྒྱལ་ཚབ་ཀྱིས་ཀྱང་མངོན་རྟོགས་རྒྱན་དུ། ཆོས་ཀྱི་དབྱིངས་ལ་དབྱེར་མེད་
ཕྱིར། །ཞེས་གསུངས་པས་ཉན་རང་གིས་ཀྱང་ཡུལ་ཆོས་དབྱིངས་ལ་དམིགས་པར་གསུངས་པས་ཉན་རང་ལ་ཆོས་བདག་མེད་རྟོགས་པ་ཡོད་པར་ཡང་བསྟན་ཟེར་བ་ནི་དེ་ལྟ་མིན་ཏེ།  ཆོས་དབྱིངས་ལ་དབྱེར་མེད་ཀྱང་། དེ་ལ་ཇི་བཞིན་དམིགས་
ནུས་མི་ནུས་ཀྱི་ཡུལ་ཅན་རྟོགས་པའི་ཁྱད་པར་ལས་དེ་ཡི་དབྱེ་བ་བརྗོད་ཅེས་པ་ཡིན་གྱི་ཆོས་དབྱིངས་ཁྱད་མེད་པར་རྟོགས་ཞེས་པ་ག་ལ་ཡིན། ཡིན་ན་ཐེག་གསུམ་གྱི་རྟོགས་རིགས་མཐོ་དམན་བཤད་པ་དང་རང་ཚིག་དངོས་སུ་འགལ་
ལོ། །དེ་ལྟ་ནའང་རྣམ་འགྲེལ་ན་ཕྱི་དོན་ཡོད་མེད་གཉིས་བཤད་པ་བཞིན་ཏུ་མི་སྐྱོན་ཟེར་བ་ཡང་མ་བརྟགས་པ་སྟེ། རྣམ་འགྲེལ་ན་མ་བརྟགས་འཇིག་རྟེན་དང་མཐུན་པའི་ཚད་འབྲས། ཅུང་ཟད་བརྟགས་པ་མདོ་སྡེ་པ་དང་
མཐུན་པའི་ཚད་འབྲས། ཤིན་ཏུ་བརྟགས་པ་སེམས་ཙམ་པ་དང་མཐུན་པའི་ཚད་འབྲས་གསུམ་རིམ་གྱིས་བཤད་ནས། དེ་དག་གོང་ནས་གོང་དུ་འཕགས་ལ། རང་ལུགས་ནི་ཕྱི་དོན་མེད་པ་ལ་བཟུང་བར་མཛད་པས་དེ་དག་
མི་འགལ་ལ། མངོན་རྟོགས་རྒྱན་ན་ལུགས་གཉིས་པོ་དེ་དག་མི་འགལ་བར་སྒྲུབ་མི་ཤེས་པས་གཅིག་དྲང་དོན་བྱེད་དགོས་ལ། དེ་ལྟ་ན་རྒྱན་གྱི་ཐོག་མཐའ་བར་གསུམ་ཀུན་ན་ཐེག་པ་གསུམ་གྱི་རྟོགས་རིག་ལ་བཟང་ངན་ཡོད་པར་
13-1-206a


ཡང་ཡང་གསུངས་ནས། ཡང་ཚིག་གཅིག་གིས་གང་གསུངས་ཚད་འབྲས་བུ་མེད་པར་གཏོང་བ་དེ་འདྲ་བ་སྟོན་ནས་ཀྱི་འགལ་བ་མིན་ན་རང་ཚིག་འགལ་བ་བཙལ་ཀྱང་མི་རྙེད་པར་འགྱུར་རོ། །དེ་འདྲའི་འགལ་འདུ་
དངོས་སུ་གསུངས་བཞིན་དེས་དྲང་བར་བྱ་བ་དེ་སུ་ཞིག་ཡིན་ཏེ། དེང་སང་གི་གང་བྱུང་བབ་བབ་སྨྲ་བ་ཁྱོད་ལྟ་བུ་འདྲ་མ་གཏོགས། གཞན་རྟོག་ལྡན་སུ་ཞིག་ཚིག་དེས་དྲང་ནུས་ཏེ། དཔེར་ན་མི་ཞིག་གིས་བརྒྱ་བྱིན་གྱི་ཡོན་ཏན་རྣམ་པ་མང་
པོར་བརྗོད་བརྗོད་ནས། དེ་མ་ཐག་ཏུ་བརྒྱ་བྱིན་མེད་དོ་ཞེས་སྨྲས་ན། ཇི་སྐད་སྨྲས་པའི་བརྒྱ་བྱིན་ལ་ཡོན་ཏན་ཅན་དུ་ལྟ་བ་སུ་ཞིག་ཡོད། དེ་དང་འདྲ་བར་ས་བཅུའི་སེམས་དཔའི་གསུང་ཡང་འཁྱོགས་པོར་བཤད་ནས་བདག་ཉིད་
ཆེན་པོ་ལ་འགལ་བའི་ཁུར་འགེལ་བ་ཀྱེ་མ་སྙམ་མོ། །རྒྱུད་བླའི་བདེ་གཤེགས་སྙིང་པོ་བསྟན་པའི་དགོས་པ་ལྔ་གསུངས་པའང་བདེ་གཤེགས་སྙིང་པོ་དྲང་དོན་དུ་སྟོན་བྱེད་ཡིན་ཟེར་བའང་ཚུལ་དེ་དང་འདྲའོ། །གཞན་སྤྱོད་འཇུག་
སོགས་ཀྱི་ལུང་དྲངས་པའི་དོན་ནི་གཞན་དུ་བཤད་ཟིན་པས་འདིར་མི་སྤྲོའོ། །ཡང་ཁོ་ན་རེ། རྒྱུད་བླ་ཐལ་འགྱུར་བའི་གཞུང་ཡིན་པའི་སྒྲུབ་བྱེད་དུ། རང་བྱུང་རྣམས་ཀྱི་དོན་དམ་དེ། །དད་པ་ཉིད་ཀྱིས་རྟོགས་བྱ་ཡིན། །ཞེས་
གསུངས་པས་ཉན་རང་གིས་ཀྱང་བདེ་གཤེགས་སྙིང་པོ་དད་པས་རྟོགས་བྱར་གསུངས་ལ། དད་པའི་སྒོ་ནས་རྟོག་རྟོགས་ནས་རྟོགས་དགོས་པའི་ཕྱིར་དང་། ཉི་མའི་དཀྱིལ་འཁོར་འོད་འབར་བ། །མིག་མེད་པས་ནི་མཐོང་བ་མེད།།
13-1-206b


ཅེས་པས་སོ་སྐྱེ་ཉན་རང་ཐེག་པ་ལ་གསར་དུ་ཞུགས་པའི་བྱང་སེམས་བཞིས་མི་རྟོགས་པར་གསུངས་པ་ནི། མངོན་སུམ་མི་རྟོགས་ཞེས་པའི་དོན་ཡིན་ཞེས་ཟེར། རྒྱུད་བླ་མ་དབུ་མའི་དགོངས་དོན་སྟོན་པའི་གཞུང་ཡིན་པ་བདེན་ཏེ། མཐར་
ཐུག་ཐེག་གཅིག་ཏུ་སྒྲུབ་པ་སོགས་མཁས་པ་ཀུན་ལ་གྲགས་ཀྱང་མངོན་སུམ་དུ་ནི་མ་རྟོགས་ལ། དད་པས་ཡོད་པར་ཡིད་ཆེས་པའི་རྟོག་པ་ཙམ་གྱིས་དབུ་མ་ཐལ་འགྱུར་བ་རེད་འགྲོ་ན། གཞན་སྟོང་གི་ཕྱོགས་འཛིན་པ་རྣམས་ཆེས་
ཐལ་འགྱུར་བར་གྲུབ་ལ། དེ་ལ་སྨོད་པ་རྣམས་ནི་ཐལ་འགྱུར་བའི་གྲལ་ནས་ལྷུང་བར་གདའོ། །ཡང་ཁོ་ན་རེ། མདོ་བསྟན་བཅོས་རྣམས་ནས་ཉན་རང་ལ་ཆོས་བདག་མེད་མ་རྟོགས་པར་བཞེད་པའི་ལུགས་དང་འགལ་བས་ཤིང་རྟ་
ཆེན་པོ་རྣམས་ཀྱི་དགོངས་པ་འགལ་མེད་དུ་འཛིན་དགོས་སོ་ཞེ་ན། གཞན་དབང་ཡོངས་གྲུབ་བདེན་གྲུབ་ཏུ་གསུངས་པའི་ལུང་དང་འགལ་ཕྱིར་དེ་ཡང་ཁས་ལེན་དགོས་སོ་ཞེས་སྨྲས་ན་ཅི་སྨྲ་ཟེར། དེ་ལ་འདི་སྨྲ་སྟེ། མདོ་གཅིག་གི་
དགོངས་པ་འགྲེལ་བ་ལ་རྒྱལ་ཚབ་ས་བཅུའི་སེམས་དཔའ་དང་མགོན་པོ་ཀླུ་སྒྲུབ་ལྟ་བུ་དགོངས་པ་འགལ་མེད་དུ་འཛིན་དགོས་ཀྱི། མདོ་ཐ་དད་དང་གྲུབ་མཐའ་ཐ་དད་པ་མཐའ་དག་གཅིག་ཏུ་སྒྲུབ་ཀྱང་མི་དགོས་ལ། ཕན་ཚུན་
དགོངས་པ་སྤྱོམ་ནས་མདོ་སྡེ་དཀྲུགས་པར་ཡང་མི་བྱ་ཞེས་བདག་ཅག་གིས་སྨྲ་ལ། ཉན་རང་ལ་ཆོས་བདག་མེད་རྫོགས་པར་རྟོགས་པ་ཡོད་པ་ནི། བཀའ་དང་ཟླ་བའི་ཞབས་ལ་སོགས་པའི་བསྟན་བཅོས་གང་ནས་
13-1-207a


ཀྱང་མ་བཤད་ཀྱང་རང་བློས་གཞུང་གི་དོན་གཞན་དུ་བཤད་ནས་སྒྲུབ་པའོ། །ཞེས་དཔལ་ས་སྐྱའི་མཁས་པ་ཆེན་པོ་རྣམས་དང་གཞན་ཡང་དམ་པ་མང་པོ་ཞིག་གིས་གསུང་གསང་མཐོན་པོའི་རིགས་པ་དང་
བཅས་ཏེ་སྨྲ་བར་བྱེད་དོ། །དེ་སྐོར་ལུང་ཁ་ཤས་དྲངས་པ་ནི་སྔར་བཤད་པར་འཐུས་ཀྱི་གཞན་བརྗོད་འོས་མེད་དོ། །ས་དང་ལམ་གྱི་རྣམ་གཞག་བྱམས་ཆོས་ལྟར་བྱ་མི་དགོས་ཟེར་བ་ཡ་མཚན་ཏེ། རྒྱ་ཆེ་བ་ས་ལམ་གྱི་རྣམ་གཞག་
འདི་དག་བྱམས་པ་ཐོགས་མེད་ཀྱི་གཞུང་གི་འགྲོས་བཞིན་རྒྱ་བོད་གཉིས་ཀས་མཛད་པ་ཡིན་ན། སྤྱི་འགྲོས་འདྲ་ཡང་གནད་ཐུན་མིན་སྤང་བའི་ས་ལམ་གྱི་རྣམ་གཞག་གསར་པ་དེ་དགོས་པ་མི་འདུག་པས་བཞག་ན་ལེགས་སྙམ་མོ། །
འབྲས་བུའི་སྐབས་ལ་དཔྱད་དགོས་པ་མི་འདུག་གོ །              ༈           །།རྒྱལ་བའི་དབང་པོ་ཀློང་ཆེན་རབ་འབྱམས་སོགས། །སྔ་རབས་མཁས་པའི་ལེགས་བཤད་ཚུལ་ཡོད་ལ། །རྒྱལ་བ་གཉིས་པ་བློ་བཟང་གྲགས་པ་
སོགས། །ཕྱི་རབས་མཁས་པའི་ལེགས་བཤད་ལུགས་ཀྱང་མཆིས། །དེ་འདྲ་བཞེད་མང་འཕགས་བོད་ཀུན་གྲགས་ཕྱིར། །མཁས་པའི་གཞུང་ལ་མཐའ་གཅིག་བཟུང་དཀའ་ཡང་། །བདག་སོགས་སྐྱེ་བ་འདི་ལ་སྔ་
རབས་པའི། །རྗེས་སུ་སྐྱེས་ཕྱིར་དེ་ལུགས་རྗེས་བརྗོད་ཙམ། །བྱས་ཀྱི་གཞན་ལ་གཤེ་བ་མ་ལགས་ཀྱང་། །མི་མཐུན་བཞེད་པའི་ཅིག་ཤོས་སྒྲུབ་པ་ན། །གཞན་པ་དེ་ལ་འཕྲིགས་པར་མ་འོས་ཀྱང་། །ཅུང་ཟད་མ་བརྗོད་
13-1-207b


ཕྱོགས་ཆ་མི་མཐོང་ཕྱིར། །ཕ་རྗེས་བུ་འཇུག་ཡིན་ཁུལ་ཅུང་ཟད་སྨྲས། །ད་དུང་བརྗོད་པར་བྱ་བ་མང་མོད་ཀྱི། །གཞན་ལུགས་སུན་འབྱིན་འདྲ་བར་འགྱུར་དོགས་ནས། །རྒྱ་ཆེར་སྤྲོས་ཏེ་མི་སྨྲ་སྙམ་ན་ཡང་། །འདྲེ་ཉལ་ཕཊ་ཀྱིས་བསླང་
བའི་དཔེ་བཞིན་ཏུ། །ཅུང་ཟད་བརྗོད་པར་ཐལ་ལ་ཉེས་པའི་ཆ། །གང་མཆིས་བཤགས་ཤིང་ད་ནི་སྙིགས་མའི་དུས། །ཚུལ་བཞིན་བཤད་ཀྱང་ཆགས་སྡང་དུག་མདའི་རྒྱུ། །དེ་ཕྱིར་བཤད་པས་ཅི་བྱ་བསྟན་པ་ཡི། །ཉི་མ་ནུབ་
རིར་ལྷུང་བཞིན་ཀླ་ཀློའི་སྤྲིན། །ཆེས་ཆེར་གཡོ་བའི་གནས་སྐབས་འདི་མཐོང་ནས། །སྣ་ཚོགས་སྨྲ་བའི་ཞེ་འདོད་སྙིང་ནས་བསྐྱུང་། །མ་བབ་ཁུར་ལེན་བྱ་བའི་ནང་ནས་དམན། །སྡང་སེམས་ཡུལ་ལ་བླ་མ་དམ་པ་གཉན། །ངག་
གི་ལས་ལ་ཆོས་སྤངས་ཉེས་པ་ལྕི། །དེ་འདྲར་འགྱུར་དོགས་སྨྲ་བ་བསྐྱུང་སྙམ་གནས། །ཟུག་རྔུའི་རྩོད་པ་སྒྲ་དང་སྒྲ་བརྙན་བཞིན། །མང་པོར་འཕེལ་ཞིང་སྣ་ཚོགས་འབྲེལ་མེད་ངག །བབ་ཅོལ་སྨྲ་ལ་མཁས་ལས་བླུན་
པོ་ཐུ། །དེ་ཕྱིར་དོན་མེད་ངལ་བ་ད་མི་བྱ། །གལ་ཏེ་དོན་ཆེན་ནན་གྱིས་འཇུག་འདོད་ན། །ལུང་གི་གཞུ་ལ་རིགས་པའི་མདའ་སྦྱར་ཏེ། །མཁས་པའི་ཚོགས་ཀྱི་དབུས་སུ་དངོས་སྟོབས་ཀྱི། །ཤེ་མོང་ངོམས་ལ་
ནམ་ཡང་མི་མོས་མེད། །རིགས་པས་གྲུབ་ཀྱང་བསྙོན་འདིང་ངས་མི་བྱེད། །ཚུལ་བཞིན་སྨྲས་ན་ཁྲོ་བ་ག་ལ་སྐྱེ། །གལ་ཏེ་དམ་སྲིས་ཡིད་དཀྲུགས་སྡང་བའི་སེམས། །ངེད་ལ་ཕྱོགས་བཞིན་རྒྱལ་དབང་ཀློང་ཆེན་པའི། །
13-1-208a


དགོངས་པ་དྲི་མ་མེད་པའི་ཡིད་བཞིན་ནོར། །རྟོག་གེ་ཟོལ་མའི་འདམ་དང་བསྲེ་བྱེད་ན། །མིག་གཅིག་མ་དང་མིག་སྟོང་བསྒྲད་པས་ཀྱང་། །ལྟ་བར་བྱེད་སྲིད་བག་ཡོད་བྱས་ན་འོས། །མཁས་པ་
གཞན་གྱི་ཟེར་སྒྲོས་འབད་པ་ཡིས། །འབའ་སམ་བསྡུས་ནས་སྦྱར་བའི་ཚིག་ཚོགས་ལ། །དོགས་སེལ་དགོས་ཞེས་རྩོམ་པ་པོ་ཉིད་དང་། །འགའ་ཡིས་བསྐུལ་ཕྱིར་འདི་ལྟར་བྲིས་པ་དགེ། ཞེས་པའང་རྙིང་
བཙུན་དམ་ཆོས་བཟང་པོའི་དོགས་སེལ་དུ། མི་ཕམ་རྣམ་པར་རྒྱལ་བས་ཉིན་གཉིས་ལ་ཤར་མར་བྲིས་པ་མངྒ་ལཾ། །དགེ་ལེགས་འཕེལ།།  །།
13-1-208b


empty page
13-2-1a


༄༅། །སློབ་དཔོན་ཆེན་པོ་པདྨ་འབྱུང་གནས་ཀྱིས་མཛད་པའི་མན་ངག་ལྟ་བའི་ཕྲེང་བའི་མཆན་འགྲེལ་ནོར་བུའི་བང་མཛོད་ཅེས་བྱ་བ་བཞུགས་སོ། །
13-2-1b


ན་མོ་གུ་རུ་པདྨ་མཉྫུ་ཤྲཱི་ཡེ། དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །ཐེག་པ་སྣ་ཚོགས་སྟོན་པ་པོ། །ཨོ་རྒྱན་དུས་གསུམ་མཁྱེན་པས་སྐྱོངས། །འདིར་
སློབ་དཔོན་ཆེན་པོ་པདྨ་འབྱུང་གནས་ཀྱི་ཞལ་སྔ་ནས་བསྩལ་བའི་བསྟན་བཅོས་རྩོད་པ་དང་བྲལ་བ་མན་ངག་ལྟ་བའི་ཕྲེང་བ་ཉིད་འཆད་པ་ལ་གསུམ། ཀླད་ཀྱི་དོན། གཞུང་གི་དོན། མཇུག་གི་དོན་ནོ། །དང་པོ་ལ་གཉིས། མཚན་
བསྟན་པ་དང་། མཆོད་པར་བརྗོད་པའོ། །དང་པོ་ནི། ཆོས་ཐམས་ཅད་ཡེ་ནས་རྫོགས་པ་ཆེན་པོར་ལྷུན་གྱིས་གྲུབ་པའི་ཚུལ་བསྟན་པ་རྒྱུད་དང་ལུང་ཐམས་ཅད་ཀྱི་སྤྱི་དཔལ་གསང་བའི་སྙིང་པོ་ལས། མ་རྟོགས་པ་
དང་ལོག་པར་རྟོག །ཕྱོགས་རྟོགས་ཡང་དག་ཉིད་མ་རྟོགས། །འདུལ་བ་དགོངས་པ་གསང་བ་དང་། །རང་བཞིན་གསང་བའི་དོན་རྣམས་ནི། །ཡི་གེ་སྒྲས་བཏགས་མིང་ཚོགས་ལ། །བརྟེན་པའི་ཚིག་གིས་རབ་
13-2-2a


མཚོན་ཏེ། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །ཞེས་གསུངས་པ་ལྟར། གང་ཟག་གི་བློ་རིམ་དང་མཐུན་པར། །མ་རྟོགས་པ་འཇིག་རྟེན་ཕྱལ་པ་དང་
རྒྱང་འཕེན་གཉིས། །ལོག་པར་རྟོགས་པ་ཕྱི་རོལ་མུར་རྟུག་པ་དང་མུ་སྟེགས་གཉིས། ཕྱོགས་ཙམ་རྟོགས་པ་ཉན་ཐོས་དང་རང་རྒྱལ་བ་གཉིས། ཡང་དག་ཉིད་མ་རྟོགས་པ་ཕ་རོལ་ཏུ་ཕྱིན་པའི་ཚུལ་ལ་གནས་པའི་བྱང་
སེམས། འདུལ་བ་བྱ་བའི་རྒྱུད། དགོངས་པ་རྣལ་འབྱོར་གྱི་རྒྱུད། གསང་བ་རྣལ་འབྱོར་ཆེན་པོའི་ཚུལ་སྔགས་ནང་པ་བསྐྱེད་རྫོགས་གཉིས། རང་བཞིན་གསང་བ་རྫོགས་པ་ཆེན་པོའི་ཚུལ་ཏེ། འཇིག་རྟེན་
ལས་འདས་མ་འདས་ཀྱི་ལྟ་བ་དང་། ཁྱད་པར་དུ་ཉན་རང་བྱང་སེམས་ཏེ་མཚན་ཉིད་ཀྱི་ཐེག་པ་གསུམ་དང་། བྱ་སྤྱོད་རྣལ་འབྱོར་ཏེ་སྔགས་ཕྱི་པ་གསུམ་དང་། བསྐྱེད་རྫོགས་རྫོགས་ཆེན་ཏེ་ནང་པ་གསུམ་བཅས་
13-2-2b


རྣམ་གྲོལ་གྱི་ལམ། ཐེག་པ་རིམ་པ་དགུ་ལ་སྩོགས་པ་སྟེ་དེ་རྣམས་ཀྱི་འབྲས་བུའང་སྟོན་པའི། རྣམ་པ་མི་འདྲ་བའི་ཁྱད་པར་མཐའ་དག་གཞུང་ཉུང་ངུར་བསྡུས་ཏེ་སྔོན་གྱི་ལས་ཅན་རྒྱལ་འབངས་ཉེར་ལྔ་སོགས་ཀྱིས་བརྗེད་པར་དོགས་པའི་འཇིགས་
པ་སེལ་བའི་ཕྱིར་བསྐྱུད་བྱང་དུ་གུ་རུ་ཉིད་ཀྱིས་མཛད་པ་སྟེ་དོན་དང་མཐུན་པར་མཚན་བཏགས་པའོ། །གཉིས་པ་ནི། སྒྲིབ་པ་གཉིས་བག་ཆགས་དང་བཅས་པ་བཅོམས་ཤིང་རྒྱུ་འབྲས་ཕར་ཕྱིན་གྱི་ལེགས་པའི་ཡོན་ཏན་དྲུག་དང་ལྡན་པས་སྲིད་ཞིའི་
མཐའ་གཉིས་ལས་འདས་པ་ཐུགས་ཆོས་ཉིད་སྤྲོས་པའི་ཟུག་རྔུ་དང་བྲལ་བས་འཇམ་ཞིང་དོན་གཉིས་ཀྱི་འབྱོར་པའི་དཔལ་དང་ལྡན་པ་རྒྱལ་སྲས་གཞོན་ནུ་ཡི་ཚུལ་ཅན་ཏེ་རྒྱུ་མཚན་ཉིད་ཀྱི་ཐེག་པ་དང་སྒོ་བསྟུན་པའི་ཤེས་རབ་ཀྱི་ལྷ་དང་། གནས་ལུགས་
སྟོང་པ་ཉིད་ཀྱི་རྡོ་རྗེ་སྤྲོས་མཚན་གང་གིས་ཀྱང་མི་ཕྱེད་ཅིང་ཐུགས་རྗེ་མ་འགགས་པའམ་གསུང་ཆོས་ཀྱི་བདག་ཉིད་དུ་སྟོན་པ་གསང་བའི་བདག་པོ་དེ་ལ་ཕྱག་འཚལ་ལོ་ཞེས་འབྲས་བུ་གསང་སྔགས་ཀྱི་ཚུལ་དང་སྒོ་མཐུན་པར་ལྷག་པའི་ལྷ་ལ་ཕྱག་མཛད་
པའོ། །གཉིས་པ་ལ། ལྟ་བའི་ཁྱད་པར་དང་། བརྟུལ་ཞུགས་ཀྱི་ཁྱད་པར་བཤད་པ་གཉིས་ལས། དང་པོ་ལའང་། ཕྱི་རོལ་པ་དང་། ཆོས་འདི་པ་རྣམས་ཀྱི་ལྟ་བ་བཤད་པ་གཉིས། དང་པོ་ལ་བསྟན་བཤད་གཉིས་ལས། 
དང་པོ་ནི། འཇིག་པའི་ཆོས་དང་ལྡན་པའི་འཇིག་རྟེན་གྱི་ཁམས་སམ་ཕྱི་སྣོད་ཀྱི་རིས་ན། ནང་ཕུང་ལྔའི་རྒྱུན་བློས་མ་ཕྱེ་ཙམ་ལ་བཏགས་པའི་སེམས་ཅན་ནམ་གང་ཟག་མ་རིག་པ་དང་མཚུངས་པར་ལྡན་པས་ཡང་དག་པའི་དོན་ལས་གོལ་བ་ཕྱིན་ཅི་ལོག་
13-2-3a


གི་ཤེས་རབ་དང་མོས་པའི་བྱེ་བྲག་གིས་ལྟ་བ་གྲངས་མེད་པ་ཡོད་དེ་ལོག་རྟོག་མཐའ་མེད་པའི་ཕྱིར་རོ། །འོན་ཀྱང་དེའི་མདོ་རྣམ་པ་བཞིར་འདུས་ཏེ་དེ་ལ་རྣམ་པའི་སྒྲ་ནི་རྒྱུ་བྱེ་བྲག་འདྲ་བ་སྣང་བ་གྲངས་རྐྱེན་རྣམས་ལ་འཇུག་
པ་ལས་འདིར་གྲངས་ཉིད་བཟུང་བར་བྱའོ། །དེ་ཡང་གྲུབ་མཐའ་དང་ཐེག་པ་མེད་པས་སམ། དོན་ལ་ཞེ་འདོད་ཀྱི་གཏད་སོ་མེད་པས་ཕྱལ་བ་དང་བསམ་སྦྱོར་གྱི་སྟེང་ནས་འཇིག་རྟེན་ཕ་རོལ་ལ་རྩིས་མི་འཇོག་པར་རྒྱང་རིང་དུ་འཕེན་པ་ལྟར་བྱེད་
པས་ན་རྒྱང་འཕེན་ནམ་ཡང་ན་འཇིག་རྟེན་ཇི་ཙམ་ཞེས་ཚེ་འདིར་སྣང་རྒྱང་རྒྱང་ངམ་བྲེང་བྲེང་པོའི་ངོར་ཕན་པ་ཙམ་སྒྲུབ་པ་ལས་དོན་ཆེན་པོ་དང་བྲལ་བས་ན་རྒྱང་ཕན་པ་དང་། མྱ་ངན་ལས་འདས་པའི་རྒྱ་མཚོར་འབབ་པའི་ལམ་གྱི་ཆུ་རྒྱུན་གྱི་མུ་
ལ་སྟེགས་བཅས་ཤིང་རྟེན་པ་སྐད་དུ་འཆད་པས་མུ་སྟེགས་པའོ། །དེ་ཡང་རྒྱང་ཕན་ཞེས་པ་སྒྲ་མ་འདོམ་པའི་ཚེ་སངས་རྒྱས་པ་མིན་པའི་ཕྱི་རོལ་པ་ཐུན་མོང་ལ་འཇུག་སྟེ། མྱང་འདས་ལས། བཅོམ་ལྡན་འདས་ཀྱི་ལྟར་ན་ཞེའམ། 
འཇིག་རྟེན་རྒྱང་ཕན་པའི་ལྟར་ན་ཞེས་གསུངས་པ་ལྟ་བུ་ཡིན་ལ།  འདིར་ལྟ་བ་རྣམ་པ་བཞི་འདོམ་པའི་སྐབས་སུ་སྤྱིའི་སྒྲ་བྱེ་བྲག་ལ་འཇུག་པར་སྦྱར་ཏེ། ཇི་སྐད་གསུངས་པའི་ལྟ་བ་ཕྱོགས་གཅིག་ཏུ་སྦྱར་རོ། །ཡང་རྒྱན་འཕེན་ཞེས་ཕུར་
བུའི་ལུགས་ཀྱི་རྗེས་འབྲང་ཆད་པར་ལྟ་བ་རྣམས་ནི་ལོག་རྟོག་སྟེ།  མུར་ཐུག་པ་ལྟ་བུ་མ་ཡིན་ལ། འདི་ནི་མ་རྟོགས་པ་སྟེ། འདི་དང་ཕྱལ་བ་གཉིས་ཀྱིས་རྒྱུ་འབྲས་ཀྱི་དངོས་པོ་རྣམ་པར་མ་དཔྱད་པར་འདྲ་ཡང་། འདི་ལ་ཚེ་འདིའི་དོན་ལ་འཇུག་
13-2-3b


པའི་བློ་གྲོས་ཅུང་གསལ། ཅིག་ཤོས་མི་གསལ་བའི་ཁྱད་པར་ཡོད་དེ། ཕྱི་མ་ནི་བདེ་འགྲོ་ཕལ་ཆེ་བའོ། །དེས་ན་འཇིག་རྟེན་འདིར་ཕན་ཅེས་པའི་སྒྲ་སྐབས་ཀྱིས་གོ་བར་བྱ་དགོས་ཏེ་མཐའ་གཅིག་ཏུ་ཕུར་བུ་པ་སོགས་ལ་བཟུང་ན་གཞུང་གི་དགོངས་པ་
མ་ཤེས་པ་སྟེ། དེས་ན་སེནྡྷ་པའི་སྒྲ་བཞིན་དུ་ཚིག་ལ་གནས་སྐབས་ཀྱི་གོ་བ་ལེན་པ་ནི་བསྟན་བཅོས་ཐམས་ཅད་འཆད་པ་ལ་མེད་དུ་མི་རུང་ངོ་། །དེ་བཞིན་མུར་ཐུག་ཀྱང་འོད་སྲུང་གིས་ཞུས་པའི་མདོ་ལས། འོད་སྲུང་ངའི་བསྟན་པ་ནི་མུ་ཐུག་
དགུ་བཅུ་རྩ་དྲུག་གིས་ནི་འཇིག་པར་བྱེད་མི་ནུས་ཏེ། ངའི་དགེ་སློང་ང་དང་འདྲ་བས་འཇིག་པར་བྱེད་པར་འགྱུར་རོ། །ཞེས་ཕྱི་རོལ་པ་ཐུན་མོང་དུ་བཤད་པ་དང་། མུ་སྟེགས་ཀྱང་རྟག་ཆད་དུ་སྨྲ་བའི་ཕྱི་རོལ་པ་སྤྱི་ལ་འཇུག་ཀྱང་། འདིར་དེ་
གཉིས་རིམ་པ་ལྟར་ཆད་པ་དང་རྟག་པར་སྨྲ་བའི་ཕྱི་རོལ་པ་སྤྱི་མིང་དུ་སྦྱར་བར་བྱས་ན་སྒྲ་དོན་ལེགས་པར་འཕྲོད་ཅིང་གཞུང་འདིའི་དགོངས་པ་ཡིན་ནོ། །དེ་ལ་ཡང་ལམ་གྱི་གཞི་མདོར་ནོར་བུ་རིན་པོ་ཆེ་གཅིག་གནས་པ་ལ། ལ་ལས་གཞི་
ནས་མ་མཐོང་། ཁ་ཅིག་གིས་འཆིང་བུར་མཐོང་། ཁ་ཅིག་གིས་རིན་པོ་ཆེ་ཕལ་པར་མཐོང་། ཁ་ཅིག་གིས་ཇི་ལྟ་བ་བཞིན་མཐོང་ན། གཞི་ནས་མ་མཐོང་བ་རྣམས་ཀྱང་། མཐོང་སྟངས་ཀྱི་མདོ་རིས་གཅིག་ཏུ་བྱེད་པ་དང་འདྲ་བར་རྒྱང་ཕྱལ་
གཉིས་ཡང་དག་པའི་མཐར་ཐུག་གི་གནས་ལུགས་མ་རྟོགས་པས་གཅིག་ཏུ་བཞག་ལ། དེ་དག་ནི་ངན་སོང་གསུམ་གཙོ་བོར་གྱུར་པའི་འགྲོ་བ་སྐྱེ་བ་སྔ་ཕྱི་ལ་དཔྱོད་པ་ཙམ་ཡང་མི་ཤེས་པའི་རང་གར་བླུན་པ་ཕྱུགས་ལྟ་བུའོ། །དེ་ནི་ལྟ་བའི་དམའ་
13-2-4a


ཤོས་ཏེ་དེ་ལས་དམན་པ་མི་སྲིད་པས་སོ། །དེ་ལམ་ལ་མ་ཞུགས་པ་ཡིན་པས་ལྟ་བར་མི་རུང་སྙམ་ན་མ་རིག་མཚུངས་ལྡན་གྱི་སེམས་ཀྱིས་ལྟ་བ་མ་རྟོགས་པ་ཡིན་པས། ལྟ་བ་གཏན་ལ་ཕབ་པའི་སྐབས་སུ་སྤང་བྱར་ཤེས་དགོས་པའི་
ཕྱིར་དུའོ། །དེ་ལ་སེམས་ཅན་ཕལ་མོ་ཆེ་དེ་དག །དངོས་པོ་ལ་ཞེན་ཅིང་འཇིགས་ཚོགས་ལ་ལྟ་བ་ལ་གནས་སུ་ཟིན་ཀྱང་འདུ་ཤེས་དང་ཤེས་རབ་ཀྱི་ཆ་ཞན་པས་རྒྱུ་འབྲས་ཀྱི་དངོས་པོ་རྣམས་ལ་མཚན་མར་བཟུང་ནས་བྱེ་བྲག་མ་ཕྱེད་པའི་ལྟ་བའི་
འཐིབ་པོས་ནོན་པའི་ཕྱིར་དེ་སྐད་ཅེས་བྱའོ། །གཉིས་པ་ལ་གཉིས་ལས། དང་པོ་ཕྱལ་རྒྱང་གཉིས་བཤད་པ་ནི། དེ་ལ་ཕྱལ་བ་ནི་གང་ཞེ་ན། འདི་ལྟར་ཕྱི་ནང་གི་ཆོས་འདི་དག་ཐམས་ཅད་གང་འབྱུང་བའི་རྒྱུ་དང་གང་བྱུང་བའི་འབྲས་བུ་
འདི་དག་ཡོད་པའམ་མེད་པ་དག་ཏུ་ཡང་མ་རྟོགས་ཏེ་རང་གར་གནས་པ་སྟེ་དེ་དག་ནི་རྒྱུ་འབྲས་ལ་ཀུན་ཏུ་རྨོངས་པའི་མ་རིག་པ་དང་མཚུངས་པར་ལྡན་པའོ། །རྒྱང་འཕེན་ནམ་རྒྱང་ཕན་པ་ནི། ཚེ་སྔ་ཕྱི་ཡོད་པའམ་མེད་པ་དག་ཏུ་མ་རྟོགས་ཤིང་
ཚེ་གཅིག་ལ་བཙན་ཕྱུགས་དང་མཐུ་སྟོབས་སྒྲུབ་པ་ཡི་ཐབས་སྣ་ཚོགས་པ་ལ་འབད་པར་བྱེད་པ་སྟེ། དེ་ཡང་རྣམ་གྲོལ་གྱི་སྒོར་མ་གྱུར་པ་འཇིག་རྟེན་པས་བཤད་པ། འཇིག་རྟེན་གྱི་བྱ་བ་སྒྲུབ་པ་འཚོ་རྩིས་དང་སྲིད་སྐྱོང་དཔྱད་སོགས་དང་། གར་ཤིའི་
ངན་སྔགས་དང་མོ་བོན་འདྲེ་མནན་ས་བདག་མཆོད་པ་གཡང་ལེན་སོགས་རང་ངམ་གཞན་ལ་བྱེད་དུ་འཇུག་པ་ལྟ་བུ་འཇིག་རྟེན་པའི་གསང་ཚིག་ལ་བརྟེན་པའོ། །གཉིས་པ་མུར་ཐུག་དང་མུ་སྟེགས་ཀྱི་གྲུབ་མཐའ་བཤད་པ་ནི། མུར་ཐུག་པ་ནི། ལྟ་ཡུལ་
13-2-4b


ཤེས་བྱའི་ཆོས་ཐམས་ཅད་ལ་རྒྱུ་དང་འབྲས་བུ་མེད་པ་སྟེ། དེ་ཡང་ཚེ་གཅིག་ལ་སྐྱེས་པའི་ཆོས་ཐམས་ཅད་ཚེ་སྔ་མའི་ལས་ཀྱིས་མ་འཕང་བར་སྤང་ལ་ཤྭ་མོ་དང་ཆུ་ལ་ཆུ་བུར་བཞིན་གློ་བུར་དུ་སྐྱེས་ལ་མཐའ་མར་མེ་རྒྱུན་ཆད་པ་ལྟར་ཆད་པར་བལྟ་བའོ། །མུ་
སྟེགས་པ་ནི། རྒྱུ་འབྲས་ཀྱི་དངོས་པོའི་ཆོས་ཐམས་ཅད་ལ་མེད་བཞིན་དུ་ཀུན་ཏུ་བརྟག་པའི་བདག་ནི་རྟག་པ་ཞིག་ཡོད་པར་ལྟ་བ་སྟེ། དེ་ལའང་རང་བཞིན་རྒྱུར་ལྟ་བས། རང་བཞིན་རྒྱུ་རྐྱེན་མེད་པ་དེའི་ངོ་བོར་ཆོས་ཀུན་གྱུར་པས་རང་བཞིན་རྣམ་
པ་ཐ་མི་དད་པར་འདོད་པས་བདག་གཅིག་པུ་རིལ་པོར་འཛིན་པ་ཞེས་བྱ་སྟེ། སྣང་བའི་དངོས་པོ་ཡེ་ནས་གྲུབ་པ་ཡིན་ལ། དེ་བསྐྱེད་པའི་རྒྱུ་གཞན་མེད་པར་བལྟ་བས་རྒྱུ་མེད་པ་ལ་འབྲས་བུ་ཡོད་པར་ལྟ་བ་དང་ཞེས་བྱ་སྟེ། དེ་ཡང་རྒྱུ་ལ་མ་ལྟོས་ན་
འབྲས་བུ་ཇི་ལྟར་བཞག་ཅེ་ན་ཡོད་པ་ཉིད་འབྲས་བུའམ་གྲུབ་པ་སྟེ། ནམ་མཁའ་གདོད་ནས་གྲུབ་པ་ཞེས་བྱ་བ་བཞིན་ཏེ། འདི་ནི་དམིགས་པ་གཅིག་པུ་ཡིན་ནོ། །རྒྱུ་འབྲས་ལོག་པར་ལྟ་བ་དང་། ཞེས་པ་ནི་དབང་ཕྱུག་ཅེས་བྱ་བའི་གང་ཟག་
གདོད་ནས་གྲུབ་པ། རྟག་པ་དེས། གཡོ་མི་གཡོའི་དངོས་པོ་ཐམས་ཅད་ལ་དབང་བསྒྱུར་ཞིང་རྣམ་པར་འཕྲུལ་ལོ་ཞེས་བྱ་ཞིང་། དབང་ཕྱུག་མཉེས་པའི་སླད་དུ་སྲོག་ཆགས་དུ་མའི་མཆོད་སྦྱིན་སོགས་བྱེད་ལ། འདི་ནི་དམིགས་པ་གཉིས་
དང་ལྡན་ཏེ། དབང་ཕྱུག་རྟག་ལ་སྤྲུལ་པ་མི་རྟག་ཅེས་འདོད་པའོ། །འདིས་མི་དགེའི་ལས་ཀྱིས་མཐོ་རིས་སྒྲུབ་པས་སམ། རྒྱུ་རྟག་པས་འབྲས་བུ་མི་རྟག་པ་བསྐྱེད་པས་དེ་སྐད་ཅེས་བརྗོད་དོ། །རྒྱུ་ཡོད་ལ་འབྲས་བུ་མེད་པར་ལྟ་བ་སྟེ་ཞེས། 
13-2-5a


འདིས་ནི་བྱེད་པ་པོ་རྒྱུར་ལྟ་བ་སྟེ། བདག་རྟག་པ་མཐེ་བོང་ཙམ་སོགས་རྫ་བཅག་བྱེའུ་འཕུར་བཞིན་དུ་འདོད་པ་སྟེ། འདི་ནི་དམིགས་པ་གསུམ་དང་ལྡན་ཏེ། བདག་རྟག་པ་རྒྱུའི་བྱ་བ་ཁོ་ན་བྱེད་པར་འདོད་པ་དང་། དེས་
བྱས་འབྲས་ཕུང་པོའི་ངོ་བོ་མི་རྟག་འགྱུར་བའི་ཆོས་ཅན་དུ་འདོད་པ་དང་། འབྲས་བུ་དེ་ཡང་ཐེབས་གཅིག་གི་འབྲས་བུ་ཙམ་སྟེ་དེས་ཕུང་པོ་གཞན་སྐྱེད་པའི་རྒྱུ་མེད་ཅིང་རྒྱུན་ཆད་པའོ། །རྟག་ཆད་ཀྱི་ལྟ་བ་དེ་གཉིས་ཀྱི་ཁོངས་སུ་ཕྱི་རོལ་བའི་འདོད་
པའི་རྟག་ཆད་ཀྱི་རྣམ་པ་མ་ལུས་པ་ཟད་པར་འདུའོ། །གོང་བསྟན་བཞི་པོ་འདི་དག་ནི་རིག་པའི་མི་མཐུན་ཕྱོགས་སུ་གྱུར་པ་མ་རིག་པ་དང་མཚུངས་པར་ལྡན་པའི་ལྟ་བའོ། །དེ་ལ་འཇིག་རྟེན་པའི་ལྟ་བའི་སྐབས་འདིར་ནི་ལྟ་བ་ཙམ་ཞིག་བསྟན་
གྱི། ལམ་དང་འབྲས་བུ་མ་བསྟན་པ་ནི་དོན་མེད་པར་དགོངས་པར་ཟད་དོ། །གཉིས་པ་ལ་མདོར་བསྟན་པ་དང་། རྒྱས་པར་བཤད་པ་གཉིས། དང་པོ་ནི། ཟག་མེད་ཀྱི་ལམ་དང་རྗེས་སུ་འབྲེལ་པ་འཇིག་རྟེན་ལས་འདས་པའི་ལམ་
ལའང་དབྱེ་ན་རྣམ་པ་གཉིས་ཏེ། ཆོས་རྣམས་ཀྱི་རང་སྤྱི་དང་ཀུན་བྱང་གི་མཚན་ཉིད་རྣམས་སོ་སོར་མ་འདྲེས་པར་སྟོན་ཅིང་དེ་ལ་སྤང་བླང་དུ་སྟོན་པ་མཚན་ཉིད་ཀྱི་ཐེག་པ་དང་། ཀུན་བྱང་གཉིས་ངོ་བོ་དབྱེར་མེད་སྐུ་གསུང་ཐུགས་ཀྱི་དཀྱིལ་འཁོར་དུ་
མི་ཕྱེད་པར་སྟོན་པ་རྡོ་རྗེའི་ཐེག་པའོ། །གཉིས་པ་ལ་མཚན་ཉིད་ཐེག་པ་དང་། སྔགས་ཀྱི་ཐེག་པའི་རྣམ་གཞག་གཉིས། དང་པོ་ལའང་གཉིས་ལས། མདོར་བསྟན་པ་ནི། མཚན་ཉིད་ཀྱི་ཐེག་པ་ལའང་སྐལ་པ་དང་མོས་པ་དབང་པོའི་བྱེ་
13-2-5b


བྲག་གིས་མཚན་ཉིད་དེ་ལ་མངོན་པར་ཞེན་མ་ཞེན་གྱི་དབང་གིས་རྣམ་པ་གསུམ་སྟེ། རང་ཉིད་ཀྱིས་གདམས་ངག་གཞན་ལས་ཉན་ཅིང་གཞན་ལ་ཐོས་པར་བྱེད་པ་ཉན་ཐོས་ཀྱི་ཐེག་པ་དང་། སྲིད་པ་ཐ་མའི་དུས་སུ་རང་ཉིད་ཀྱིས་བདེན་པའི་འབྲས་བུ་ཁོང་དུ་
ཆུད་པ་རང་སངས་རྒྱས་ཀྱི་ཐེག་པ་དང་། བྱང་ཆུབ་ཀྱི་ཕྱིར་བསམ་པ་བརྟན་པའམ་བྱང་ཆུབ་དང་སེམས་ཅན་ལ་དམིགས་པ་ཡོད་པས་བྱང་ཆུབ་སེམས་དཔའི་ཐེག་པའོ། །གཉིས་པ་ལ། ཉན་ཐོས། རང་རྒྱལ། བྱང་སེམས་ཀྱི་ཐེག་པ་བཤད་
པ་གསུམ་ལས། དང་པོ་ནི། དེ་ལ་ཉན་ཐོས་ཀྱི་འབྲས་བུ་ཐོབ་པར་བྱེད་པ་རང་ལམ་གྱི་ཐེག་པ་ལ་ཞུགས་པ་ཡི་གང་ཟག་རྣམས་ཀྱི་ལྟ་བ་ནི་གྲུབ་པའི་མཐའ་སྟེ་ཤེས་རབ་ཀྱིས་བཅད་པ་ལྟར་མོས་པས་ངེས་པའོ། །འདིར་ལྟ་སྒོམ་འབྲས་བུ་གསུམ་
དུ་སྟོན་ཏེ། དེ་ལ་ལྟ་བ་ཡང་། ཕུང་ཁམས་སྐྱེ་མཆེད་ཀྱིས་བསྡུས་པའི་ཆོས་ཐམས་ཅད་ལ་ཕྱི་རོལ་མུ་སྟེགས་པ་ལ་སོགས་པས་མེད་པ་ལ་རྟག་པར་སྒྲོ་བཏགས་པ་དང་། ཡོད་པ་ལ་མེད་པར་སྐུར་པའི་རྣམ་པ་ཅན་གྱི་ཀུན་ཏུ་བརྟག་པ་ཡེ་མེད་
པའམ་གཏན་ནས་མེད་པ་ཆད་པའི་ལྟ་བ་དང་། རྟག་པ་ལ་སྩོགས་པའི་ཡོད་པར་ལྟ་བ་ནི་ཐག་པ་ལ་སྦྲུལ་དུ་མཐོང་བ་ཡི་སྦྲུལ་བཞིན་དུ་མེད་དེ།  སྣང་གཞི་ཐག་པ་ལྟ་བུའི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་བདག་ཉིད་ནི་ཕྱི་
རོལ་གྱི་གཟུགས་སོགས་བེམ་པོ་ནི་རགས་པར་སྣང་བའི་རྒྱུ་འབྱུང་བ་ཆེན་པོ་བཞིའི་རྡུལ་ཕྲ་རབ་དང་། ནང་གི་རྣམ་པར་ཤེས་པ་སྐད་ཅིག་མ་ནི་དོན་དམ་པར་རམ་བདེན་པར་ཡོད་པར་ལྟ་ཞིང་། འདི་ལ་བྱེ་སྨྲ་དང་མདོ་སྡེ་པ་གཉིས་པོ་སྔ་མས་
13-2-6a


འདུས་མ་བྱས་རྟག་པར་འདོད་པ་དང་། ཕྱི་མས་མོ་གཤམ་གྱི་བུ་བཞིན་གཏན་མེད་དུ་འདོད་པ་སོགས་ནང་ཅུང་མི་མཐུན་ཞིང་བྱེ་སྨྲ་ལའང་སོ་སོའི་འདོད་པ་ཕྲ་མོ་མི་མཐུན་པ་མང་ཡང་། དོན་དུ་རྡུལ་དང་སྐད་ཅིག་བདེན་
པར་ཁས་ལེན་པ་འདྲ་བས་གཅིག་ཏུ་བཞག་གོ། བསྒོམ་པ་བསམ་གཏན་གྱི་རིམ་པ་དང་། སྡུག་ཀུན་འགོག་ལམ་སྟེ་འཕགས་པའི་བདེན་པ་བཞི་བསྒོམས་པ་སྟེ། དེ་ཡང་ངོ་བོ་ཇི་ལྟ་བ་ཡིན་པས་ཕྱིན་ཅི་ལོག་མེད་པས་བདེན་ལ།  འཕགས་
པ་རྣམས་ཀྱིས་ཐུགས་སུ་ཆུད་པའམ་འཕགས་པའི་རང་བཞིན་ཡིན་པས་ཀྱང་ངོ་། །བདེན་པ་དེ་དག་ཀྱང་ཁམས་གསུམ་གྱི་བདེན་བཞི་ལ་དམིགས་ནས་རྣམ་པ་བཅུ་དྲུག་གི་ཚུལ་ཅན་དུ་གོམས་པ་དང་། ནམ་ཞིག་ཤེས་བཟོད་སྐད་ཅིག་མ་བཅུ་དྲུག་གི་རང་བཞིན་
ཅན་གྱི་ཡེ་ཤེས་མཐོང་བའི་ལམ་སྐྱེ་ཞིང་། དེ་ནས་རིམ་གྱིས་ཁམས་གསུམ་ས་དགུའི་ཉོན་མོངས་པ་སྒོམ་སྤང་རྣམས་རིམ་པར་སྤང་སྟེ། དེ་ཡང་འདོད་ཉོན་དགུའི་རྣམ་པ་གསུམ་པ་བཞི་པ་ཡན་ཆད་ལས་གྲོལ་བ་རྒྱུན་ཞུགས། དྲུག་པ་སྤང་པ་
ལན་གཅིག་ཕྱིར་འོང་། དགུ་པ་སྤང་པ་ཕྱིར་མི་འོང་། སྲིད་རྩེའི་ཉོན་མོངས་པ་མ་ལུས་པ་སྤང་བ་དགྲ་བཅོམ་སྟེ་འབྲས་བུ་རྣམ་པ་བཞི་འགྲུབ་པ་ཡིན་ནོ། །གཉིས་པ་ནི་རང་སངས་རྒྱས་ཀྱི་འབྲས་བུའི་ངོ་བོ་འདུས་མ་བྱས་པའི་མཚན་ཉིད་དེ་
ཐོབ་པར་བྱེད་པའི་ལམ་གྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི། ཆོས་ཐམས་ཅད་ལ་མུ་སྟེགས་ལ་སོགས་པས་སྒྲོ་དང་སྐུར་པའི་ཀུན་ཏུ་བརྟག་པའི་བདག་རྟག་པ་དང་ཆད་པ་ལ་སོགས་པ་མེད་པར་ལྟ་བ་ཉན་ཐོས་དང་མཐུན་ཞིང་། དེ་ལས་
13-2-6b


ཁྱད་པར་དུ་ཕུང་པོ་ལྔ་ལས་གཟུགས་ཀྱི་ཕུང་པོའི་སྐྱེ་མཆེད་དང་ཁམས་ལས་གཟུགས་ཅན་བཅུ་དང་ཆོས་ཀྱི་ཁམས་ཀྱི་ཕྱོགས་གཅིག་རྣམ་པར་རིག་བྱེད་མིན་པའི་གཟུགས་ཏེ་མདོར་ན་གཟུགས་ཀྱི་ཕུང་པོར་གཏོགས་པའི་ཆོས་ལ་བདག་མེད་པར་རྟོགས་
ཤིང་དེ་གོམས་པས་ནམ་ཞིག་སྲིད་པ་ཐ་མར་རང་བྱང་ཆུབ་ཀྱི་འབྲས་བུ་ཐོབ་པའི་དུས་ནའང་ཉན་ཐོས་ལྟར་དགེ་བའི་བཤེས་གཉེན་ལ་མི་ལྟོས་པར། ཇི་ལྟར་སྒོམ་པའི་ཚུལ། སྔོན་དཀར་པོ་རྣམ་པར་མཐོང་བའི་ས་སོགས་སུ་སངས་རྒྱས་ལ་བསྟེན་
ཅིང་སྦྱངས་པ་གོམས་པའི་ཤུགས་ཀྱིས་བདེན་བཞིའི་རང་བཞིན་ཅན་གྱི་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་ཀྱི་དོན་རྟོགས་ཏེ། དེ་ཡང་སྡུག་བསྔལ་བདུན་སྡུག་བདེན་ཉོན་མོངས་གསུམ་དང་ལས་གཉིས་ཀུན་འབྱུང་། ཀུན་ཉོན་དེ་
དག་བྲལ་བ་འགོག་བདེན།  དེར་འགྲོ་བའི་ལམ་རྟེན་འབྲེལ་གྱི་དོན་རྟོགས་ནས་གོམས་པ་ལམ་མོ། །རྣམ་པ་གཅིག་ཏུ་ན་ཡན་ལག་བཅུ་གཉིས་རེ་རེ་ལའང་བཞི་བཞི་ལྡན་ཏེ། དེ་དག་རང་གི་བདག་ཉིད་ཐོབ་པ་སྡུག་བདེན། དེ་དག་གཅིག་རྐྱེན་གཅིག་
གིས་འགྲུབ་པ་ཀུན་འབྱུང་། གཅིག་འགག་པས་གཅིག་འགོག་པ་འགོག་བདེན། དེ་དག་འགོག་པའི་ཕྱིར་དེ་ཉིད་ཕྱིན་ཅི་མ་ལོག་པར་སྒོམ་པ་ལམ་སྟེ། དེ་ལྟར་ན་བདེན་བཞི་ལ་དམིགས་པའི་ཡེ་ཤེས་སྐད་ཅིག་མ་བཅུ་དྲུག་ཀྱང་། ཡན་ལག་རེ་རེ་ལ་
འབྱུང་བས། །ཡེ་ཤེས་སྐད་ཅིག་མ་བརྒྱ་དགུ་བཅུ་རྩ་གཉིས། སྟན་གཅིག་གི་སྟེང་དུ་སྐྱེས་ནས་རང་བྱང་ཆུབ་ཀྱི་འབྲས་བུ་ཐོབ་བོ། །དེ་ལྟ་བུའི་སྒོ་ནས་སྒྱུ་མ་ལྟ་བུའི་ཆོས་ཉིད་ཟབ་མོའི་དོན་རྟོགས་ཏེ། དེ་ཡང་བརྗོད་དུ་མེད་པའི་ངག་ཤིན་ཏུ་
13-2-7a


འགོག་པའི་ཏིང་ངེ་འཛིན་ལ་གནས་ཀྱང་། བརྗོད་དུ་མེད་དོ་སྙམ་པའི་འདུ་ཤེས་ནི་འཇུག་སྟེ་འཛིན་པའི་རྟོག་པ་མ་སྤངས་བས་སོ། །དེ་ཡང་རྟེན་འབྲེལ་ནི་ཀུན་གྱི་ལམ་ཐུན་མོང་སྟེ། ཉན་ཐོས་པས་རྒྱུ་འབྲས་ཀྱི་མཚན་ཉིད་ལ་
མངོན་པར་ཞེན་པས་ཕྱི་རོལ་པས་རྒྱུ་འབྲས་ལ་ལོག་པར་རྟོག་པ་སེལ། རང་རྒྱལ་གྱིས་དེ་ལས་ཟབ་ཏུ་རྟོགས་ཏེ། རྒྱུ་འབྲས་ཀྱི་ངོ་བོ་གཟུང་བའི་དོན་དུ་ཡང་མེད་པར་རྟོགས། རྣལ་འབྱོར་སྤྱོད་པས་དེ་བས་ཀྱང་ཟབ་ཏུ་རྟོགས་ཏེ། རྒྱུ་འབྲས་ཀྱི་དངོས་
པོ་འཛིན་པའི་བདག་ཏུ་ཡང་མེད་པར་རྟོགས། དབུ་མ་པས་རྒྱུ་དང་འབྲས་བུའི་དངོས་པོ་རང་རིག་པའི་བདག་ཉིད་དུ་ཡང་མེད་པར་རྟོགས་པས་སྤྲོས་པ་ཉེ་བར་ཞི་བའོ། །དེ་ལྟར་ལམ་སྒོམ་ཚུལ་བསྟན་ནས། འབྲས་བུ་ནི། ཚོགས་ན་སྤྱོད་པ་དང་
བསེ་རུ་ལྟ་བུའི་རང་བྱང་ཆུབ་ཀྱི་འབྲས་བུ་ཐོབ་པ་ཡིན་ནོ། །གསུམ་པ་ནི། བྱང་ཆུབ་སེམས་དཔའི་ཐེག་པ་ཞེས་རྒྱུའི་སྒོ་ནས་སྨོས་པ་སྟེ།  འབྲས་བུ་ནི་གསང་སྔགས་དང་བྱེ་བྲག་མེད་པས་སྔགས་ཕར་ཕྱིན་གཉིས་ཀ་ཐེག་པ་ཆེན་པོར་གཅིག་
ཀྱང་། ལམ་གྱིས་བྱེ་བྲག་ཏུ་བྱ་བའི་ཕྱིར་མཚན་ཉིད་ཀྱི་ཐེག་པ་དེ་ལ་ཞུགས་པ་རྣམས་ཀྱི་ལྟ་བ་ནི། ཀུན་ནས་ཉོན་མོངས་པ་འཁོར་བ་རྒྱུ་འབྲས་དང་བཅས་པ་དང་། རྣམ་པར་བྱང་བའི་ཆོས་མྱང་འདས་རྒྱུ་འབྲས་དང་བཅས་པ་དེ་ཐམས་ཅད་
དོན་དམ་པར་ནི་བདེན་པའི་རང་བཞིན་དུ་གྲུབ་པ་གང་ཡང་མེད་པ་ཡིན་ལ། དེ་ཡང་དོན་དམ་རང་གི་ངོ་བོ་ནི་སྤྲོས་པ་དང་བྲལ་བ་ལ་བྱ་སྟེ། སྒྲ་དོན་ཡེ་ཤེས་དམ་པའི་ཡུལ་ཡིན་པས་སམ་ཐོབ་བྱ་རྣམས་ཀྱི་ནང་ནས་དམ་པ་ཡིན་པས་དེ་སྐད་ཅེས་
13-2-7b


བརྗོད་དེ། འདི་ལ་དབྱེ་ན་སྤྲོས་པ་ཕྱོགས་རེ་ཆད་པ་རྣམ་གྲངས་ཀྱི་དོན་དམ་དང་། སྤྲོས་པ་མཐའ་དག་ཡོངས་སུ་ཞི་བ་རྣམ་གྲངས་མ་ཡིན་པའི་དོན་དམ་གཉིས་སུ་ཡོད་དོ། །ཀུན་རྫོབ་ནི་འཁྲུལ་པའི་ཤེས་པ་སྣང་བ་དང་བཅས་པ་སྟེ། ཡང་
དག་པའི་དོན་ལ་སྒྲིབ་པས་སམ་གློ་བུར་འཁྲུལ་པའི་བློས་བརྫབས་ཤིང་བརྟགས་ཏེ་རྣམ་པར་བཞག་པས་དེ་སྐད་ཅེས་བརྗོད་དེ། དབྱེ་ན་ཡང་དག་དང་ལོག་པའི་ཀུན་རྫོབ་གཉིས་ཡོད། ཀུན་རྫོབ་དེའི་དབང་དུ་བདེན་མེད་ཀྱི་སྣང་བ་
སྒྱུ་མ་ཙམ་དུ་སྣང་སྟེ། འདིར་ཙམ་སྒྲས་ཡང་དག་པར་གྲུབ་པ་གཅོད་དོ། །སྣང་ཙམ་པོ་དེའི་ངོར་རང་རང་གི་བྱ་བ་བྱེད་པ་སོགས་ཀྱི་ནུས་པ་མེད་ཅེས་སྐུར་པ་གདབ་ཏུ་མི་རུང་བས་སྤྱོད་ཡུལ་ཡོངས་སུ་དག་མ་དག་སོགས་སོ་སོའི་མཚན་ཉིད་མ་
འདྲེས་པར་ཡོད་དེ་རང་གཞལ་བྱེད་ཐ་སྙད་ཀྱི་ཚད་མའི་ངོར་གྲུབ་པས་སོ། །དེ་ལྟར་གནས་སྐབས་ཚད་མ་གཉིས་ཀྱི་ངོར་ངེས་པར་བྱ་བ་དང་། མཐར་ཐུག་སྣང་སྟོང་ཟུང་འཇུག་བདེན་གཉིས་དབྱེར་མེད་སྤྲོས་བྲལ་མཉམ་པ་ཆེན་པོའི་ཚུལ་དུ་ལེགས་
པར་གཏན་ལ་ཕབ་ནས་སྒོམ་པའི་ལམ་བསྟན་པའི་ཕྱིར་ཤེས་རབ་ཐམས་ཅད་ཀྱི་ནང་ནས་དམ་པར་གྱུར་ཅིང་མཐར་ཕྱིན་པ་ནི་གཉིས་སུ་མེད་པའི་ཡེ་ཤེས་ཡིན་པས། དེས་ཟིན་པའི་སྦྱིན་སོགས་དགེ་བའི་ཆོས་བཅུ་ལ་ཕ་རོལ་དུ་ཕྱིན་པ་བཅུ་ཞེས་བྱ་
སྟེ། འདི་ལ་ཕར་ཕྱིན་གྱི་སྒྲ་ཤེས་རབ་ལས་འདས་ཏེ་ཡུལ་དུ་མ་གྱུར་པ་ནི། ཆོས་ཉིད་སྤྲོས་བྲལ་ལ་བྱ་སྟེ་འདི་ཕ་རོལ་དུ་ཕྱིན་པས་དང་། འདིར་འཁོར་བའི་རྒྱ་མཚོའི་ཕ་རོལ་དུ་ཕྱིན་པས་དེ་སྐད་ཅེས་བརྗོད་དེ་ལམ་ལ་སྦྱར་བའི་ཚུལ་
13-2-8a


གཉིས་ཡོད་དོ། །དེ་ལྟར་སྤྱོད་པའི་གནས་སྐབས་ཀྱི་འབྲས་བུ་ས་བཅུ་པོ་རིམ་གྱིས་བགྲོད་པའི་མཐར་མཐར་ཐུག་གི་འབྲས་བུ་ཉན་རང་སོགས་ལས་ཁྱད་པར་དུ་གྱུར་པའི་སྟོབས་དང་མི་འཇིགས་པ་ལ་སོགས་པའི་ཡོན་ཏན་
གྱི་ཚོགས་ཐམས་ཅད་ཡོངས་སུ་རྫོགས་པའི་མཚན་ཉིད་ཅན་གྱི་བླ་ན་མེད་པའི་བྱང་ཆུབ་ཏུ་འགྲུབ་པར་འདོད་པ་ཡིན་ནོ། །གཉིས་པ་ལ། བསྟན་བཤད་གཉིས་ལས། དང་པོ་ནི། རྡོ་རྗེ་ཐེག་པ་དེ་ལའང་དབྱེ་ན་རྣམ་པ་གསུམ་སྟེ། ནང་གི་
ཏིང་ངེ་འཛིན་རྒྱུའི་གཙོ་བོ་ཡིན་མོད་ཀྱི་ཕྱིའི་གཙང་སྦྲ་དང་དཀའ་ཐུབ་སོགས་ཀྱི་བྱ་བ་ལ་མ་ལྟོས་པར་དངོས་གྲུབ་མི་ཐོབ་པར་འདོད་པ་བྱ་བའི་རྒྱུད་ཀྱི་ཐེག་པ་དང་། ཕྱིའི་བྱ་བ་དང་ནང་གི་ཏིང་ངེ་འཛིན་གཉིས་ཀས་གྲུབ་པར་འདོད་པ་གཉིས་ཀའི་
རྒྱུད་ཀྱི་ཐེག་པ་དང་། ཕྱིའི་བྱ་བ་ལ་མ་ལྟོས་ཀྱང་ནང་གི་ཏིང་ངེ་འཛིན་འབའ་ཞིག་གིས་གྲུབ་པར་འདོད་པ་རྣལ་འབྱོར་རྒྱུད་ཀྱི་ཐེག་པའོ། །གཉིས་པ་ལ། བྱ་རྒྱུད། སྤྱོད་རྒྱུད། རྣལ་འབྱོར་རྒྱུད་ཀྱི་རྣམ་པར་གཞག་པ་གསུམ་ལས། དང་པོ་ནི། 
དེ་ལ་བྱ་བའི་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི། དོན་དམ་པར་ཆོས་ཐམས་ཅད་རང་གི་ངོ་བོ་སྐྱེ་འགག་མེད་པ་ལས།  ཀུན་རྫོབ་ཏུ་ལྷའི་གཟུགས་ཀྱི་སྐུར་སྒོམ་ཞིང་ཞེས་བྱང་ཆུབ་ཀྱི་སེམས་དང་དེ་ཉིད་གསུམ་དང་ལྡན་པ་ནི་དངོས་གྲུབ་ཀྱི་
སྣོད་དུ་བཤད་དོ། །དེ་ལ་དེ་ཉིད་གསུམ་ནི། བདག་གི་དེ་ཁོ་ན་ཉིད་དང་། ལྷའི་དེ་ཁོ་ན་ཉིད་དང་། བཟླས་བརྗོད་ཀྱི་དེ་ཁོ་ན་ཉིད་དེ། དེ་གསུམ་གྱིས་རིམ་པར་འཁོར་བའི་ཆོས་ཀྱི་རང་བཞིན་དང་། མྱ་ངན་ལས་འདས་པའི་མཚན་ཉིད་དང་། དེ་སྒྲུབ་
13-2-8b


པའི་ཐབས་ཀྱི་མཚན་ཉིད་རྣམས་བསྡུས་པ་སྟེ། དེ་ལ་བདག་གི་དེ་ཁོ་ན་ཉིད་ཕུང་ལྔའི་དོན་བློས་རྣམ་པར་མ་ཕྱེ་ཙམ་ནི་བདག་ཡིན་ལ། དེའི་དེ་ཉིད་ནི་ཉན་ཐོས་དང་སྒོ་བསྟུན་ན། མུ་སྟེགས་པས་བརྟགས་པའི་བདག་དང་བདག་གི་དང་རྟག་ཆད་སོགས་
ཀུན་ཏུ་བརྟགས་པས་སྟོང་པ། ཕུང་སོགས་ཀྱི་ཆོས་ཙམ་མེད་པར་སྐུར་བ་གདབ་ཏུ་མི་རུང་བའོ། །རྣལ་འབྱོར་སྤྱོད་པས་ནི། ཉན་ཐོས་ཀྱིས་བརྟགས་པའི་གཟུང་འཛིན་ཀུན་བརྟགས་ཀྱིས་སྟོང་པ། སེམས་དང་སེམས་བྱུང་རང་རིག་པ་
ཙམ་མེད་པར་སྐུར་པ་གདབ་ཏུ་མི་རུང་བ་ཙམ་མོ། །དབུ་མ་པས་ནི། སེམས་ཙམ་པས་རྣམ་པར་མི་རྟོག་པའི་ཡེ་ཤེས་དོན་དམ་པར་ཡོད་པར་བརྟགས་པས་ཀྱང་སྟོང་སྟེ་སྤྲོས་པའི་མཚན་མ་ཐམས་ཅད་ཡོངས་སུ་ཞི་བ་ཉིད་དུ་འདོད་པའོ། །
ལྷའི་དེ་ཁོ་ན་ཉིད་ནི་ཆོས་ཉིད་དང་སྒྲ་ལ་སོགས་པ་གསང་སྔགས་ཀྱི་དངོས་པོ་ལྷ་དྲུག་ཏུ་གྲགས་པ་རྣམས་ཏེ། དེ་ཡང་བདག་གི་དེ་ཁོ་ན་ཉིད་གསེར་གྱི་གླེགས་མ་ལྟ་བུ་ལ། ལྷའི་དེ་ཉིད་དངུལ་ཆུ་ཞུན་མ་ལྟ་བུས་བགོས་ཏེ་སླར་བསྒོམ་པར་བཞེད་དོ། །
བཟླས་བརྗོད་ཀྱི་དེ་ཁོ་ན་ཉིད་ནི་དེ་ཉིད་གསུམ། གཟུགས་བརྙན་ཆེན་པོ་གསུམ། དམིགས་པ་གསུམ། ཡན་ལག་བཞི་ལྡན་ཏེ། དེ་ལ་དེ་ཉིད་གསུམ་ནི་ཡེ་ཤེས་མིང་གཟུགས་གསུམ་ཏེ། དེ་ཡང་དོན་དམ་པར་ལྷའི་ཆོས་ཉིད་དག་པ་དང་བདག་
གི་ཆོས་ཉིད་མ་དག་པ་གཉིས་རང་བཞིན་བྱེ་བྲག་མེད་པར་རྟོགས་ནས། དེ་བཞིན་དུ་སྒོམ་པ་སྟེ། ལྷའི་ཡེ་ཤེས་རང་རིག་དག་པ་དང་བདག་གི་ཤེས་པ་རང་རིག་མ་དག་པ་གཉིས་རང་བཞིན་དབྱེར་མེད་པ་དང་།  དེ་བཞིན་དུ་ལྷའི་སྐུ་དང་གསུང་ཁྱད་
13-2-9a


པར་དུ་འཕགས་པར་སྣང་བ་དང་། རང་གི་ལུས་དང་ངག་ཁྱད་པར་ཅན་མིན་པར་སྣང་བའང་བྱེ་བྲག་མེད་པར་ཤེས་ཏེ། དེ་ལ་བརྟེན་ནས་ཀུན་རྫོབ་ཏུའང་ལྷར་བསྒྱུར་ཞིང་བསྐྱེད་དེ་བསྒོམས་པས།  འཁྲུལ་པ་དག་པ་ཉིད་
འབྲས་བུའི་ངོ་བོར་ལྷར་གྲུབ་པར་ལྟ་བའོ། །གཟུགས་བརྙན་ཆེན་པོ་གསུམ་ནི། ཚུལ་དེ་དང་མཐུན་པར་བསྒོམ་པ་སྟེ་སྐུ་མཚན་དཔེར་གསལ་བ་སྐུའི་གཟུགས་བརྙན། དེའི་ཐུགས་ཀར་བྱང་ཆུབ་སེམས་ཀྱི་རྟགས་ཟླ་དཀྱིལ་བསྒོམ་པ་ཐུགས་ཀྱི་གཟུགས་
བརྙན། དེ་ལ་སྙིང་པོ་བཀོད་པ་གསུང་གི་གཟུགས་བརྙན་ནོ། །དམིགས་པ་གསུམ་ནི་བཟླས་བརྗོད་ཀྱི་དུས་སུ་ཡེ་ཤེས་སེམས་དཔའ་མདུན་དུ་དམིགས་པ་ལ། གཟུགས་བརྙན་གསུམ་པོ་དེ་ཀུན་ཀྱང་དམིགས་པར་བྱ་བ་ཡིན་པས་དམིགས་པ་གསུམ་མོ། །
ཡན་ལག་བཞི་ནི། དམིགས་པ་གསུམ་བདག་དམ་ཚིག་སེམས་དཔའ་ཟློས་པ་པོ་དང་བཞི་ཆར་ཡང་བཟླས་བརྗོད་ཀྱི་ཡན་ལག་རེ་རེ་ཡིན་པས་བཞིའོ། དམིགས་པ་གཉིས་དང་ཡན་ལག་གསུམ་སོགས་དེ་ཡིས་བསྡུས་པར་ཟད་དོ། །དེས་ན་རང་ཉིད་
ལྷར་མིན་ཀྱང་རྒྱུ་རྐྱེན་གྱིས་ནམ་ཞིག་འགྱུར་སྣང་བས་རྒྱུད་དེ་ལྷར་ལྟ་བའོ། །དེའི་གྲོགས་སུ་རིགས་གསུམ་གང་ལ་མོས་པའི་སྐུའི་གཟུགས་བརྙན་བྲིས་སམ་བླུགས་མ་དང་། རིགས་གསུམ་ཐུགས་ཀྱི་གཟུགས་བརྙན་ནམ་མཚན་མ་དང་སྟེ། འཆིང་
བ་དམ་ཚིག་གི་ཕྱག་རྒྱ། འཛིན་པ་དམ་ཚིག་གི་ཕྱག་རྒྱ། བསམ་པ་དམ་ཚིག་གི་ཕྱག་རྒྱ་གསུམ་ལས། དང་པོ་རྣལ་འབྱོར་པས་རྡོར་དྲིལ། གཉིས་པ་ཡེ་ཤེས་སེམས་དཔའི་ཐུགས་མཚན་པདྨ་རྡོ་རྗེ་རལ་གྲི་སོགས། གསུམ་པ་དམ་ཡེའི་ཐུགས་མཚན་
13-2-9b


བསྒོམ་པ་ལ་བྱའོ། །གསུང་གི་གཟུགས་བརྙན་བཟླས་བརྗོད་དང་སྟེ། འདི་ལ་ངེས་པ། བར་མ་ཆད་པ། ཚང་བ་གསུམ། དང་པོ་ཇི་ལྟར་དམ་བཅས་པ་ལྟར། གཉིས་པ་བཟླ་ཚེ་གཡལ་ལུ་མི་ཚིག་སོགས་ཀྱི་སྐྱོན་མེད་པ། གསུམ་པ་གྲངས་
མཐར་ཕྱིན་པའོ། །ཕྱིའི་སྤྱོད་ལམ་ཕྱི་ནང་གི་ཁྲུས་སོགས་སྤྱོད་ཡུལ་དག་པའི་གཙང་སྦྲ་དང་། བྱ་བ་དང་འཇུག་པའི་དུས་ཚིག་དང་། གཟའ་ཕུར་བུ་སོགས་དང་རྒྱུ་སྐར་རྒྱལ་ལ་སོགས་རྩིས་ཀྱི་ལ་ཉེ་ཐམས་ཅད་པ་གཙོ་བོར་ཕྱིའི་ཡོ་བྱད་དང་།
རྒྱུ་ལྟ་བ་དང་རྐྱེན་ཕྱི་ནང་གི་ཡོ་བྱད་སོགས་ཚོགས་པའི་མཐུ་ལས་དངོས་གྲུབ་འགྲུབ་པར་འདོད་པའོ། །འདིར་དོན་དམ་སྐྱེ་འགག་མེད་པ་དང་། ཀུན་རྫོབ་ཏུ་ལྷར་བསྒོམ་པའི་ཚུལ་སོ་སོ་ཙམ་བསྟན་གྱིས། ཀུན་རྫོབ་ཀྱི་སྤྱོད་ཡུལ་ལ་དག་མ་དག་
ཇི་ལྟར་བལྟ་བའི་ཚུལ་དང་། འབྲས་བུའི་ཁྱད་པར་དག་ནི་མ་གསུངས་ཏེ། འདིའི་དགོངས་པ་ནི། ཀུན་རྫོབ་ཏུ་ལྷར་བསྒོམ་མོ་ཞེས་གསུངས་པ་ཉིད་ཀྱིས། ཀུན་རྫོབ་ཏུ་ལྷར་བལྟའོ་ཞེས་སྨོས་མི་དགོས་ཏེ། ལྟ་བས་ཇི་
ལྟར་བཅད་པ་བཞིན་དུ་ཏིང་ངེ་འཛིན་གྱིས་གོམས་པར་བྱེད་པ་ཡིན་ཏེ། གང་གི་ཕྱིར་ལྟ་བ་དང་སྒོམ་པ་ནི་འགལ་དུ་མི་རུང་སྟེ། རིག་པ་དང་རྐང་པར་ལྡན་དགོས་པའི་ཕྱིར་དང་། གསང་སྔགས་ཀྱི་གཞུང་དམིགས་པ་རྣམ་པར་དག་པའི་
སྤྱོད་ཡུལ་ཅན་ཡིན་པའི་ཕྱིར་རོ། །གྲུབ་པའི་འབྲས་བུ་ནི། ཐུན་མོང་གི་ལས་དང་དངོས་གྲུབ་དག་མི་མཐུན་ཡང་། མཆོག་གི་དངོས་གྲུབ་བླ་ན་མེད་པའི་བྱང་ཆུབ་མཚུངས་པས་གུད་དུ་མ་སྨོས་སོ། །གཉིས་པ་ནི། གཉིས་ཀའི་རྒྱུད་ཀྱི་
13-2-10a


ཐེག་པ་ལ་ཞུགས་པ་རྣམས་ཀྱི་ལྟ་བ་ནི་དོན་དམ་པར་སྐྱེ་འགག་མེད་པ་ལས་ཀུན་རྫོབ་ཏུ་ལྷའི་གཟུགས་ཀྱི་སྐུར་བསྒོམ་ཞིང་དེ་ཉིད་རྣམ་པ་བཞི་དང་ལྡན་པར་བསྒོམ་པའི་ཏིང་ངེ་འཛིན་ཞེས་བདག་གི་དེ་ཁོ་ན་ཉིད་དང་། ལྷའི་
དེ་ཁོ་ན་ཉིད་དང་། ཏིང་ངེ་འཛིན་གྱི་དེ་ཁོ་ན་ཉིད། བཟླས་པའི་དེ་ཁོ་ན་ཉིད་བཞི།  དང་པོ་ནི་བདག་དམ་ཚིག་པར་བསྐྱེད་པའོ། །གཉིས་པ་ཡེ་ཤེས་པ་སྤྱན་དྲངས་ནས་སྨིན་ཐད་བཞུགས་པའོ། །གསུམ་པ་ནི། བདག་མདུན་གྱི་ཐུགས་ཀ་ན་ཟླ་
བ་དང་ཡིག་འབྲུ་བཀླག་སྔགས་བཀོད་པའོ། །བཞི་པ་ནི་དབུགས་དང་སྤྲད་དེ་ཕར་འཕྲོས་ཐུགས་དམ་བསྐུལ། ཚུར་བྱུང་དངོས་གྲུབ་སྩོལ་བའི་དམིགས་པ་དང་བཅས་སྐྱོན་བཅུ་སྤང་ལ་བཟླས་པའོ། །ནང་གི་ཏིང་འཛིན་དེ་དང་། ཕྱིའི་ཡོ་བྱད་དང་
རྒྱུ་རྐྱེན་ཚོགས་པ་དང་དམ་ཚིག་མ་ཉམས་པ་ལ་སྩོགས་པ་གཉིས་ཀ་བསྟེན་པ་ལས་ཐུན་མོང་གི་གྲུབ་པ་དང་མཆོག་གི་རིགས་བཞི་རྡོ་རྗེ་འཆང་གི་ས་འགྲུབ་པར་འདོད་པའོ། །གསུམ་པ་ལ་བསྟན་བཤད་གཉིས་ཀྱི། དང་པོ་ནི། ཆོས་ཉིད་ཀྱི་དོན་ལ་
རེག་པ་རྣལ་འབྱོར་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི་རྣམ་པ་གཉིས་ཏེ། ཀུན་རྫོབ་ཏུ་བདག་དང་སངས་རྒྱས་མཉམ་པར་མི་ལྟ་བ་དང་། སྤྱོད་པ་མཉམ་པའི་བརྟུལ་ཞུགས་དང་དུ་མི་ལེན་པ་ནི་རྣལ་འབྱོར་ཕྱི་པ་སྟེ་བསྲུང་མེད་ཀྱི་དམ་ཚིག་ཉམས་
སུ་ལེན་མི་ནུས་པར་ཐུན་མོང་གི་སྡོམ་པ་རྣམས་དང་མ་བྲལ་བས་སམ་སྒོ་གསུམ་གསང་གསུམ་དུ་སྒོམ་ནས་མི་མཐུན་པའི་ཕྱོགས་ཀྱི་དབང་དུ་མི་འགྱུར་བས་ན་ཐུབ་པ་རྒྱུད་ཀྱི་ཐེག་པ་དང་། གོང་ལས་བཟློག་སྟེ་རྣལ་འབྱོར་ནང་པ་ཅིར་སྣང་བདེ་བ་ཆེན་པོར་
13-2-10b


དབང་སྒྱུར་བའི་ཐབས་མཁས་ཀྱི་རྒྱུད་ཀྱི་ཐེག་པའོ། །གཉིས་པ་ལ་རྣལ་འབྱོར་ཕྱི་རྒྱུད་དང་། བླ་མེད་རྒྱུད་ཀྱི་རྣམ་གཞག་གཉིས། དང་པོ་ནི། དེ་ལ་རྣལ་འབྱོར་ཕྱི་བ་ཐུབ་པའི་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི། ཀྲི་ཡ་ལྟར་ཕྱིའི་ཡོ་བྱད་ལ་
གཙོ་བོར་མི་འཛིན་པར་དོན་དམ་པར་སྐྱེ་འགག་མེད་པའི་རང་བཞིན་སྣང་ཆར་ཤར་བ་ལྷ་དང་ལྷ་མོ་དང་། སྒོམ་པ་ལྟ་བ་དེ་དང་རྣམ་པ་འདྲ་བའི་རྒྱུད་ཡོངས་སུ་དག་པའི་ཏིང་ངེ་འཛིན་གྱིས་འཕགས་པའི་གཟུགས་ཀྱི་སྐུ་ཞེས། དོན་དམ་པའི་ལྷ་དང་།
སེམས་པའི་བྱེ་བྲག་གི་ལྷ་གཉིས་ནི། དོན་དམ་པ་དང་། ཀུན་རྫོབ་ཀྱི་སྣང་ཆའི་ལྷ་གཉིས་ཡིན་ལ།  དེའི་ཆར་གཏོགས་པའི་རྒྱུ་མཐུན་པའི་ལྷར་བསྒོམ་པ་དམ་ཚིག་ཅན་གྱི་སྐྱེ་བོས་བཏགས་པའི་ལྷ་སྟེ། དེ་ལྟར་གོམས་ན་བདེན་གཉིས་ལྷའི་
རང་བཞིན་ཡིན་ཚུལ་མངོན་དུ་གྱུར་པར་བྱེད་པའི་ཏིང་ངེ་འཛིན་ལ་ཡང་མངོན་བྱང་ལྔ་དང་ཆོ་འཕྲུལ་ཆེན་པོ་བཞིའི་སྒོ་ནས་བསྐྱེད་ཅིང་ཕྱག་རྒྱ་བཞི་དང་ལྡན་པར་བྱ་སྟེ། སྐུ་ཕྱག་རྒྱ་ཆེན་པོ་སྐུ་དངོས་དང་། དེའི་རྒྱུ་ཡིག་འབྲུ་དང་ཕྱག་མཚན་སོགས་
སོ། །གསུང་ཆོས་ཀྱི་ཕྱག་རྒྱ་ལྗགས་སྟེང་རྡོ་རྗེ་རྩེ་ལྔ་སོགས་བསྒོམ་པ། ཐུགས་དམ་རྒྱ་ལ་འཛིན་འཆང་གཉིས་ལས། འཛིན་པ་ཡེ་ཤེས་ལྔ་ཐུགས་སུ་ཆུད་པའི་རྟགས་རྡོ་རྗེ་རྩེ་ལྔ་སོགས་རྣམ་པ་དང་། འཆང་བ་རྡོར་དྲིལ། ཕྲིན་ལས་ལས་རྒྱ་
ཐུགས་ཀར་ཟླ་སྟེང་རྡོ་རྗེ་རྒྱ་གྲམ་ལས་འོད་ཟེར་འཕྲོ་འདུས་འཕགས་པ་སྤྱན་དྲངས་པ་འགྲོ་བའི་དོན་བྱེད་པ་སོགས་ཏེ་དེ་དག་གིས་བདག་ཉིད་ཆེན་པོ་རྣམས་ཀྱི་སྐུ་གསུང་ཐུགས་ཕྲིན་ལས་དང་བཅས་པའི་ངང་ཚུལ་ལས་མི་འདའ་ཞིང་བརྩོན་པར་བྱེད་
13-2-11a


པའམ། དེ་དང་ངོ་བོ་གཅིག་པར་རྒྱས་འདེབས་པའི་ཚུལ་གྱིས་བསྒོམས་པའི་ནང་གི་རྣལ་འབྱོར་གཙོ་བོར་བྱས་པ་ལས་ཐུན་མོང་དང་མཆོག་གི་དངོས་གྲུབ་འགྲུབ་པར་འདོད་པའོ། །གཉིས་པ་ལ། བསྟན་བཤད་
གཉིས་ལས། དང་པོ་ནི། རྣལ་འབྱོར་ནང་པ་ཐབས་ཀྱི་རྒྱུད་ཀྱི་ཐེག་པ་ལ་ཞུགས་པ་རྣམས་ཀྱི་ལྟ་བ་ནི་རྣམ་པ་གསུམ་སྟེ།  ཐབས་བསྐྱེད་པ་གཙོ་བོར་སྟོན་པ་བསྐྱེད་པའི་ཚུལ་མ་ཧཱ་ཡོ་ག་དང་། ཤེས་རབ་རྫོགས་རིམ་ཤས་ཆེར་སྟོན་པ་རྫོགས་
པའི་ཚུལ་ཨ་ནུ་ཡོ་ག་དང་། གཉིས་མེད་ཟུང་འཇུག་གཙོ་བོར་སྟོན་པ་ཨ་ཏི་རྫོགས་པ་ཆེན་པོའི་ཚུལ་ལོ། །གཉིས་པ་ལ། ཚུལ་གསུམ་སྤྱིར་བཤད་པ་དང་། དེ་ལ་འཇུག་པའི་སྒོ་བྱེ་བྲག་ཏུ་བཤད་པ་གཉིས་ལས། དང་པོ་ལ། བསྐྱེད་
པ་དང་། རྫོགས་པ་དང་། རྫོགས་པ་ཆེན་པོའི་ཚུལ་གསུམ་ལས། དང་པོ་ནི། དེ་ལ་བསྐྱེད་པའི་ཚུལ་ནི། ནང་རྒྱུད་གསུམ་པོ་འདི་དག་གིས་བསྐྱེད་ན་ནི་ལྷ་ཡིན་ལ། མ་བསྐྱེད་ན་ལྷར་མི་ལྟ་བ་མ་ཡིན་ཏེ། རྒྱུ་འབྲས་དབྱེར་མེད་པར་
ལྷུན་གྱིས་གྲུབ་པའི་དཀྱིལ་འཁོར་དུ་ལྟ་བར་མཐུན་པས་སོ། །འོན་ཀྱང་ཏིང་ངེ་འཛིན་གྱིས་རྩལ་སྦྱང་བ་ལ་རིམ་གྱིས་སྦྱང་བར་བྱ་བ་ཙམ་དུ་ཟད་དོ། །དེ་ལ་ཆོས་ཐམས་ཅད་གཟུགས་བརྙན་གྱི་དཀྱིལ་འཁོར་དུ་སངས་རྒྱས་པར་ལྟ་
བ་ལ། རང་བཞིན་གྱི་སངས་རྒྱས་དང་། རྟོགས་པའི་སངས་རྒྱས་དང་། གྲུབ་པའི་སངས་རྒྱས་གསུམ། དང་པོ་སེམས་ཅན་རྣམས་ཏེ། དེ་ལའང་། སྐྱེ་བ་རྒྱུའི་སངས་རྒྱས། སྐྱེ་བ་རྟེན་པའི་སངས་རྒྱས།  སྐྱེ་བ་མངོན་པར་གྲུབ་
13-2-11b


པའི་སངས་རྒྱས་སོ། །དེའི་དང་པོ་ལུས་འགྲུབ་པའི་རྒྱུ་ཁུ་རྡུལ་སེམས་གསུམ། གཉིས་པ་ཕ་མ་གཉིས་ཀྱི་ལུས་སེམས་ཀྱི་ཁམས་ཐམས་ཅད། གསུམ་པ་རང་གི་ལུས་མངོན་པར་གྲུབ་པའི་སྐབས་ཏེ། དེ་གསུམ་པོ་ཀུན་ཏུ་རང་བཞིན་
གྱིས་སངས་རྒྱས་པའོ། །གཉིས་པ་རྟོགས་པའི་སངས་རྒྱས་ནི་རིག་འཛིན་གྱི་ས་ལ་གནས་པ་རྣམས་སོ། །གསུམ་པ་གྲུབ་པའི་སངས་རྒྱས་ནི་དེ་ཉིད་མངོན་དུ་གཟིགས་པའོ། །འདི་རྣམས་ཀྱང་རང་བཞིན་དང་གནས་སྐབས་ཀྱི་བྱེ་བྲག་
ཏུ་འདོད་དོ། །དེས་ན་སངས་མ་རྒྱས་པའི་ཆོས་མ་དམིགས་ཀྱང་། མ་རྟོགས་པ་རྟོགས་པར་བྱ་བ་དང་། མ་གོམས་པ་གོམས་པར་བྱ་བའི་ཕྱིར། སངས་རྒྱས་ཀྱི་ས་གསུམ་ལ་བློ་སྦྱང་བར་འདོད་དེ། དེ་ཡང་ཀུན་ཏུ་འོད་ཀྱི་ས་ལ་བློ་སྦྱང་
བའི་ཕྱིར་དེ་བཞིན་ཉིད་ཀྱི་ཏིང་ངེ་འཛིན་རྣམ་པར་མི་རྟོག་པ་སྒོམ་པ་དང་། པདྨ་ཅན་གྱི་ས་ལ་གོམས་པར་བྱ་བའི་ཕྱིར་ཀུན་ཏུ་སྣང་བའི་ཏིང་ངེ་འཛིན་ཤེས་རབ་དང་སྙིང་རྗེ་འབྲེལ་བ་དང་། ཡི་གེ་འཁོར་ལོ་ཚོགས་ཆེན་གྱི་ས་ལ་གོམས་པར་བྱ་
བའི་ཕྱིར་རྒྱུའི་ཏིང་ངེ་འཛིན་ཡིག་འབྲུ་བསྒོམ་པ་སྟེ་ཏིང་ངེ་འཛིན་རྣམ་པ་གསུམ་རིམ་གྱིས་བསྐྱེད་དེ། དེ་གོམས་པ་ན་རྟེན་དང་བརྟེན་པའི་དཀྱིལ་འཁོར་རིམ་གྱིས་བཀོད་ཅིང་བསྒོམས་པས་འགྲུབ་པར་འདོད་པའོ།  །གཉིས་པ་ནི། རྫོགས་
པའི་ཚུལ་ཨ་ནུ་ཡོ་ག་ནི། རྣལ་འབྱོར་རྒྱུད་ཀྱི་གཞུང་ལས་གྲགས་པའི་སྒོམ་ཞིང་ཉམས་སུ་བླང་བར་བྱ་བའི་དོན་ཐམས་ཅད། བྱང་ཆུབ་སེམས་ཀྱི་རང་བཞིན་རིག་པ་སྐད་ཅིག་མ་གཅིག་ལ་རྫོགས་པར་གསལ་བར་སྒོམ་ནུས་པའི་དབང་
13-2-12a


དུ་གསུངས་པ་སྟེ། དེ་ཡང་གཉིས་ལས་མ་གཡོས་བཞིན་དུ་གཅིག་ཏུ་གསལ། གཅིག་ཏུ་དབྱེར་མེད་བཞིན་དུ་གསུམ་དུ་མ་འདྲེས་པ་སྟེ།  རྒྱ་མཚོ་ལ་གཟའ་སྐར་ཤར་བའམ། རྫུ་འཕྲུལ་ཅན་གྱི་སྤྱོད་ལམ་བཞི་དུས་
གཅིག་ཏུ་སྟོན་པ་བཞིན་ནོ། །དེ་ལ་དོན་དམ་པར་སྐྱེ་འགག་མེད་པའི་རང་བཞིན་དུ་ལྷུན་གྱིས་གྲུབ་པའི་གཟུགས་བརྙན་གྱི་དཀྱིལ་འཁོར་ལྷ་དང་ལྷ་མོ་ཡི་རང་བཞིན་སྣང་སྲིད་ཐམས་ཅད་སངས་རྒྱས་པའི་དགོངས་དོན་ལས་མ་གཡོས་པ་
དང་གཅིག །མཐའ་གང་དུ་ཡང་རྣམ་པར་མི་རྟོག་པའི་དོན་དབུ་མ་ཆོས་ཀྱི་དབྱིངས་ལས་ཀྱང་མ་གཡོས་པ་གཉིས་ནི་མ་གཡོས་པ་གཉིས་ཞེས་བྱ་ལ། དེ་ལས་མ་གཡོས་བཞིན་དུ་ཀུན་རྫོབ་ཏུ་ཕུང་ཁམས་སྐྱེ་མཆེད་ཐམས་ཅད་ལྷག་པའི་ཏིང་
ངེ་འཛིན་གྱིས་དཀྱིལ་འཁོར་འཕགས་པའི་གཟུགས་ཀྱི་སྐུའང་གསལ་བར་བསྒོམས་པ་ནི། གསལ་བ་གཅིག་ཞེས་བྱ་ཞིང་། ཅིར་སྣང་ཅི་སྒོམ་ཐམས་ཅད་ཆོས་ཉིད་བྱང་ཆུབ་སེམས་སྐྱེ་འགག་མེད་པའི་དབྱིངས་སུ་མཉམ་པ་ནི་
གཅིག་ཏུ་དབྱེར་མེད་ཞེས་བྱ་ལ། མ་འདྲེས་པ་གསུམ་ནི། ཐམས་ཅད་ལྷུན་གྱིས་གྲུབ་པའི་དཀྱིལ་འཁོར་དུ་བསྒོམ་པའང་ཏིང་ངེ་འཛིན་གཞན་དང་མ་འདྲེས། ལྷག་ཏིང་གི་དཀྱིལ་འཁོར་དུ་སྐུ་མདོག་ཕྱག་མཚན་སོགས་གསལ་བ་ཡང་
གཞན་དང་མ་འདྲེས། གཙོ་གཟུངས་འཁོར་གྱི་དཀྱིལ་འཁོར་དང་བཅས་པ་སོ་སོར་མ་འདྲེས་པར་བྱང་ཆུབ་སེམས་ཀྱི་རང་བཞིན་རིག་པ་སྐད་ཅིག་མ་གཅིག་ལ་གསལ་བ་སྟེ། དེ་ལྟར་སྒོམ་པས་འགྲུབ་བོ། །དེ་ཡང་བཙལ་མེད་ལྷུན་གྱིས་
13-2-12b


གྲུབ་པར་སྦྱོར་ནུས་ཤིང་། ཕྱོགས་དུས་མཉམ་པ་ཉིད་དུ་སྦྱོར་ནུས་ན་ནི་རྫོགས་ཆེན་དང་ཁྱད་མེད་ཀྱང་། འདིར་སྦྱོར་བ་རྩོལ་བ་དང་བཅས་པ་དང་། རིག་པ་ཕྱོགས་སུ་སྦྱོར། སྐད་ཅིག་མ་དུས་སུ་སྦྱོར་ཏེ་སྐད་ཅིག་ལ་དོན་ཐམས་ཅད་
རྫོགས་པར་སྦྱར་རོ། །བསྐྱེད་རྫོགས་འདི་གཉིས་ཀྱི་སྐབས་སུ་ལམ་སྒོམ་ཚུལ་ཙམ་ལས། སྤྱིའི་ལྟ་བ་དང་འབྲས་བུའི་ཁྱད་པར་མ་གསུངས་པ་ནི།  དགོངས་པ་གོང་དུ་བསྟན་པ་ལྟར། དོན་དམ་པར་སྐྱེ་འགག་མེད་པ་དང་། ཀུན་
རྫོབ་སྒྱུ་མ་ཡོངས་སུ་དག་པའི་ལྷའི་དཀྱིལ་འཁོར་དུ་ལྟ་བ་དང་། བདེན་གཉིས་དབྱེར་མེད་པར་ལྟ་བ་དང་། འབྲས་བུ་བླ་མེད་ཀྱི་བྱང་ཆུབ་ལ་ཐེག་ཆེན་ཐམས་ཅད་ཁྱད་མེད་པས་དབྱེ་མི་དགོས་སོ་ཞེས་དགོངས་པའོ། །གསུམ་པ་རྫོགས་
པ་ཆེན་པོའི་ཚུལ་ནི། དེ་ལ་རྫོགས་པ་ཆེན་པོ་ནི་དོན་དང་ཚུལ་གཉིས་ལས། དོན་ནི་ཆོས་ཐམས་ཅད་རང་བྱུང་གི་ཡེ་ཤེས་བྱང་ཆུབ་ཀྱི་རང་བཞིན་དུ་བསྟན་པ་ཡིན་ལ། ཚུལ་ནི་དེ་ལ་འཇུག་པའི་ཐབས་དང་སྒོ་སྟེ། དེ་གཉིས་མདོར་
བསྟན་པར་དགོངས་ནས། འཇིག་རྟེན་དང་འཇིག་རྟེན་ལས་འདས་པའི་ཆོས་ཀུན་རྫོབ་དང་དོན་དམ་རང་མཚན་དང་སྤྱི་མཚན། དཀར་པོ་དང་ནག་པོ་སོགས་འདི་དང་འདིའོ་ཞེས་དབྱེ་བ་ཇི་སྙེད་པ་ཐམས་ཅད་རྣམ་དབྱེར་མེད་པར་ཏེ་
གང་དུ་དབྱེར་མེད་ན་སྐུ་གསུང་ཐུགས་ཀྱི་དཀྱིལ་འཁོར་གྱི་རང་བཞིན་དུ་དབྱེར་མེད་དེ་དཔེར་ན་འཇིག་རྟེན་ཕལ་པ་དང་། ཕྱི་རོལ་མུ་སྟེགས་ཅན་གྱིས་རྣམ་པར་གཞག་པའི་ཐ་སྙད་ཀྱི་མཚན་ཉིད་ཐམས་ཅད་དང་། གང་ཟག་གི་མཚན་ཉིད་
13-2-13a


ཐམས་ཅད་ཀྱང་། སངས་རྒྱས་པའི་ཆོས་སུ་བསྡུས་ཏེ་བསྟན་པ་བཞིན་ནོ། །ཇི་ལྟར་དབྱེར་མེད་ན་དེའི་རང་བཞིན་ཡེ་ནས་ཡིན་པར་རྟོགས་ནས་བསྒོམ་པ་ཡིན་པའི་ཕྱིར་ཏེ་ཞེས་ཚུལ་མདོར་བསྟན་ནས། 
དེ་ཡང་རྒྱུད་གསང་བ་སྙིང་པོ་ལས། སྐུ་གསུང་ཐུགས་རྡོ་རྗེའི་རང་བཞིན་ཡིན་པས་རྡོ་རྗེའི་སྒྲས་བསྟན་ཏེ། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་
སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་རྣམ་པར་དག །ཅེས་འབྱུང་སྟེ། དེའི་དོན་སློབ་དཔོན་གྱིས་རྣམ་པར་སྦྱར་བར་
མཛད་པ། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་རིག་པ་བྱང་ཆུབ་སེམས་ཀྱི་རང་བཞིན་ཡིན་པས་ཡེ་ནས་མ་སྐྱེས་ལ་སྐྱེ་མེད་སྟོང་པ་ཆེན་པོར་གནས་བཞིན་སྣང་ཆ་རྣམས་འགགས་མེད་དུ་ཤར་བའི་ས་སོགས་རང་རང་གི་བྱ་བ་
བྱེད་ནུས་པའི་སྒྱུ་མ་རྣམས་བདེ་བར་གཤེགས་པ་ཡབ་ཡུམ་བཅུ་དང་སེམས་དཔའ་སེམས་མ་ལ་སྩོགས་པའི་རང་བཞིན་ལམ་གྱིས་བཅོས་ཤིང་བསྒྱུར་བ་ལྟ་བུ་མ་ཡིན་པར་ཡེ་ནས་ཡིན་པའི་ཕྱིར། ཆོས་ཐམས་ཅད་རང་བཞིན་གྱི་མྱ་ངན་ལས་
འདས་པ་སྟེ། ས་སོགས་འབྱུང་བ་ཆེན་པོ་ལྔ་ནི་ཡུམ་ལྔའི་རང་བཞིན་ཏེ་ས་སངས་རྒྱས་སྤྱན་མ། ཆུ་མཱ་མ་ཀཱི། མེ་གོས་དཀར་མོ། རླུང་དམ་ཚིག་སྒྲོལ་མ། ནམ་མཁའ་དབྱིངས་ཕྱུག་མའོ། །དེ་བཞིན་དུ་ཕུང་པོ་ལྔ་ནི་རིགས་ལྔའི་སངས་རྒྱས་ཏེ།
13-2-13b


རྣམ་ཤེས་མི་བསྐྱོད་པ། ཚོར་བ་རིན་འབྱུང་། འདུ་ཤེས་སྣང་མཐའ། འདུ་བྱེད་དོན་གྲུབ། གཟུགས་རྣམ་སྣང་ངོ་། །རྣམ་པར་ཤེས་པ་བཞི་ནི་བྱང་ཆུབ་སེམས་དཔའ་བཞིའི་རང་བཞིན་ཏེ། མིག་ཤེས་ས་སྙིང་། རྣ་ཤེས་ཕྱག་རྡོར། སྣ་ཤེས་
ནམ་སྙིང་། ལྕེ་ཤེས་སྤྱན་རས་གཟིགས་སོ། །ཡུལ་བཞི་ནི་ཤེས་བཞིར་དགྱེས་བསྐྱེད་མཛེས་པའི་ལྷ་མོ་བཞིའི་རང་བཞིན་ཏེ། གཟུགས་སྒེག་མོ། སྒྲ་གླུ་མ། དྲི་ཕྲེང་བ་མ། རོ་གར་མའོ། །དབང་པོ་བཞི་ནི་བྱང་ཆུབ་སེམས་དཔའ་བཞིའི་
རང་བཞིན་ཏེ། མིག་དབང་བྱམས་པ། རྣ་དབང་སྒྲིབ་སེལ། སྣ་དབང་ཀུན་བཟང་། ལྕེ་དབང་འཇམ་དཔལ་ལོ། །དུས་བཞི་ནི་མཆོད་པའི་ལྷ་མོ་བཞིའི་རང་བཞིན་ཏེ། དུས་འདས་པ་ནི་བདུག་སྤོས་མ།  ད་ལྟ་ནི་པུཥྤེ་མ། མ་འོངས་པ་
ནི་སྣང་གསལ་མ། འབྱུང་བར་མ་ངེས་པ་ནི་དྲི་ཆབ་མའོ། །ལུས་ཀྱི་དབང་པོ་དང་རྣམ་པར་ཤེས་པ་དང་། ཡུལ་རེག་བྱ་དང་དེ་ལས་བྱུང་བའི་རེག་པ་སྟེ། བདེ་ཆེན་བྱང་ཆུབ་ཀྱི་སེམས་ནི་ཁྲོ་བོ་བཞིའི་རང་བཞིན་ཏེ། དེ་ཡང་ལུས་དབང་གི་
གསང་བའི་རྡོ་རྗེ་ཡུལ་དང་ཕྲད་པས་དབང་ཤེས་གཞན་བཅོམས་ཤིང་མི་གནས་པར་བྱེད་པའི་ཕྱིར་སྟོབས་ཆེན་ཁྲོ་བོ་བཞིར་བཞག་སྟེ། རེག་པ་བདུད་རྩི་འཁྱིལ། རེག་བྱེད་ཀྱི་ལུས་དབང་རྟ་མགྲིན། རེག་ཡུལ་སྟོབས་ཆེན། རེག་ཤེས་གཤིན་
རྗེ་གཤེད་དོ། །རྟག་ཆད་མུ་བཞི་ནི་ཁྲོ་མོ་བཞིའི་རང་བཞིན་ཏེ། རྟག་པར་ལྟ་བ་གནས་སུ་དག་པ་ལྕགས་ཀྱུ་མ། དེ་བཞིན་དུ་ཆད་པར་ལྟ་བ་ཞགས་པ་མ། བདག་ཏུ་ལྟ་བ་ལྕགས་སྒྲོགས་མ། མཚན་མར་ལྟ་བ་དྲིལ་བུ་མའོ། །ཡིད་ཀྱི་རྣམ་
13-2-14a


པར་ཤེས་པ་ནི་བྱང་ཆུབ་ཀྱི་རང་བཞིན་ཅན་གྱི་སེམས་མི་ཕྱེད་པ་རྡོ་རྗེ་ལྟ་བུ་ཐམས་ཅད་དུ་དོར་བྱའི་ཆོས་མེད་པའི་ཀུན་ཏུ་བཟང་པོའི་རང་བཞིན། ཡིད་དེའི་ཡུལ་ཆོས་འདུས་བྱས་དང་འདུས་མ་བྱས་ནི་ཆོས་བྱ་བ་མོ་ཀུན་ཏུ་བཟང་
མོའི་རང་བཞིན་ཏེ། དེ་དག་ཀྱང་ཡེ་ནས་མངོན་པར་རྫོགས་པར་སངས་རྒྱས་པའི་རང་བཞིན་ཡིན་གྱི། དེ་ལམ་གྱིས་གསར་དུ་བསྒྲུབ་པ་ནི་མ་ཡིན་ནོ། །དེ་ལྟར་རང་གི་རྒྱུད་ཀྱི་གཞུང་དྲངས་ནས། དེ་དང་མཐུན་པའི་ལུང་གཞན་དག་དྲངས་
པའི་ཕྱིར། དཀྱིལ་འཁོར་གསུམ་དུ་སྣང་བའང་རྩ་བ་བྱང་ཆུབ་ཀྱི་སེམས་རང་བྱུང་གི་ཡེ་ཤེས་ཐིག་ལེ་ཉག་གཅིག་ཏུ་བསྟན་པ་དེ་ལྟར་ཕྱོགས་བཅུ་དུས་གསུམ་དང་ཁམས་གསུམ་ལ་སོགས་པ་འདུས་བྱས་དང་འདུས་མ་བྱས་པའི་ཆོས་ཐམས་
ཅད་རང་གི་སེམས་ལས་གུད་ན་མེད་དེ་ཇི་སྐད་དུ། ཁམས་གསུམ་རྣམ་རྒྱལ་གྱི་རྟོགས་པ་ལས། རང་སེམས་ཕྱིན་ཅི་མ་ལོག་པའམ། བློའི་རྩལ་བཞིན་དུ་སོ་སོར་རྟོགས་པ་ནི། སངས་རྒྱས་དང་བྱང་ཆུབ་སེམས་དཔའ་སོགས་དེ་ཉིད་དོ་ཞེས་
རྟོགས་ན་སངས་རྒྱས། མ་རྟོགས་ན་འཁོར་བའི་སྣོད་བཅུད་དུ་སྣང་སྟེ་འཇིག་རྟེན་གསུམ་པོ་དེ་ཉིད་དོ། །འབྱུང་བ་ཆེ་རྣམས་དེ་ཉིད་དོ། །ཞེས་འབྱུང་ངོ་། །ཇི་སྐད་དུ་གསང་བ་འདུས་པ་ལས། ཆོས་ཐམས་ཅད་ནི་སེམས་ལ་གནས་སོ། །ཞེས་
ཅིར་སྣང་རང་སེམས་ཀྱི་སྣང་བ་ཙམ་དུ་ཟད་ལ། སེམས་ནི་ནམ་མཁའ་ལ་གནས་སོ། །ཞེས་སེམས་ཀྱི་རང་བཞིན་སྐྱེ་མེད་ནམ་མཁའ་དང་འདྲའོ་ཞེས་སོ། །ནམ་མཁའ་ནི་མཚན་ཉིད་ཐམས་ཅད་དང་བྲལ་བས་ཅི་ལའང་མི་གནས་སོ། །ཞེས་འབྱུང་
13-2-14b


བ་དང་། ལུང་གཞན་ལས་ཀྱང་། ཆོས་ཐམས་ཅད་ནི་ཆོས་ཅན་དང་ཆོས་ཉིད་རྣམ་པར་སྒྲུབ་པ་དང་བྲལ་བས་འདི་ལ་འདིས་སྟོང་ཞེས་རྣམ་གཞག་བྲལ་བས་ངོ་བོ་ཉིད་ཀྱིས་སྟོང་པའོ། །ཆོས་ཐམས་ཅད་ནི་ཉོན་མོངས་པའི་དྲི་མ་ཉིད་ཡེ་ནས་གྲུབ་
མ་མྱོང་བས་གདོད་མ་ནས་རྣམ་པར་དག་པའོ། །ཆོས་ཐམས་ཅད་ནི་སྒྲིབ་པའི་མུན་པ་ཉིད་ཡེ་ནས་མ་གྲུབ་པས་ཡོངས་ཀྱིས་འོད་གསལ་བའོ། །ཆོས་ཐམས་ཅད་ནི་མི་མཐུན་པ་དང་གཉེན་པོ་གཉིས་སུ་མེད་པས་རང་བཞིན་གྱིས་མྱ་ངན་ལས་འདས་
པའོ། །ཆོས་ཐམས་ཅད་ནི་སྒྲིབ་གཉིས་བྲི་བ་དང་ཚོགས་གཉིས་བསགས་པ་བྲལ་བས་མངོན་པར་རྫོགས་པར་སངས་རྒྱས་པའོ། །ཞེས་གསུངས་སོ། །འདི་ནི་རྫོགས་པ་ཆེན་པོའོ། །སྐབས་འདིར་རྩ་བའི་མཆན་རྙིང་གྲུབ། རྫོགས་པ་ཆེན་པོའི་ཚུལ་ནི། 
བསོད་ནམས་དང་ཡེ་ཤེས་ཀྱི་ཚོགས་རྫོགས་པ། འབྲས་བུའི་ཆོས་ལྷུན་གྱིས་གྲུབ་པའི་ཚུལ་འདི་ནི་དོན་ལ་འཇུག་པའོ། །ཞེས་ཀྱང་འབྱུང་ངོ་། །གཉིས་པ་ལའང་། རྟོགས་པ་བཞི་དང་། མཚན་ཉིད་གསུམ་དང་། ཡན་ལག་བཞི་དང་།
དཀྱིལ་འཁོར་དུ་འཇུག་པའི་རིམ་པ་སྟེ་ཚུལ་བཞིས་བཤད་དེ། དེ་ཡང་རྟོགས་པ་བཞི་ཡུལ་གྱི་ཚུལ་ཏེ་མཚན་གཞིར་བཞག་མཚན་ཉིད་གསུམ་ཐབས་ཀྱི་ཚུལ་ཏེ་དེའི་མཚན་ཉིད་དུ་བཞག །བསྙེན་སྒྲུབ་བཞི་ནི་འབྲས་བུའི་ཚུལ་ཏེ་ལ་བཟླ་བའི་མན་ངག་
ཏུ་བཞག །ལྷུན་གྱིས་གྲུབ་པའི་དཀྱིལ་འཁོར་དུ་འཇུག་པའི་ཚུལ་ནི་འཇུག་རིམ་དུ་བཞག་གོ། དེ་ལའང་རྒྱུ་གཅིག་པ་དང་ཡིག་འབྲུའི་ཚུལ་གཉིས་ནི་ཡུལ་གྱི་ཚུལ། བྱིན་གྱིས་བརླབས་པར་རྟོགས་པ་ནི་ཐབས་ཀྱི་ཚུལ། མངོན་སུམ་པར་རྟོགས་
13-2-15a


པ་ནི་འབྲས་བུའི་ཚུལ་ལོ། །དེ་བཞིན་དུ་མཚན་ཉིད་གསུམ་ལ་ཡང་། ཤེས་པའི་མཚན་ཉིད་ནི་ཡུལ་གྱི་ཚུལ། འཇུག་པའི་མཚན་ཉིད་ནི་ཐབས་ཀྱི་ཚུལ། འབྲས་བུའི་མཚན་ཉིད་ནི་འབྲས་བུའི་ཚུལ་ལོ། །བསྙེན་སྒྲུབ་
བཞི་ལ་ཡང་། བསྙེན་པ་ནི་ཡུལ་གྱི་ཚུལ། ཉེ་བར་བསྙེན་པ་དང་སྒྲུབ་པ་ནི་ཐབས་ཀྱི་ཚུལ། སྒྲུབ་པ་ཆེན་པོ་ནི་འབྲས་བུའི་ཚུལ་ལོ། །དེ་བཞིན་དུ་འཇུག་རིམ་གསུམ་ལ་ཡང་། ཐོས་པས་མིག་ཕྱེ་བ་ནི་ཡུལ་གྱི་ཚུལ། གོམས་པར་བྱེད་པས་
དཀྱིལ་འཁོར་དུ་ཞུགས་པ་ནི་ཐབས་ཀྱི་ཚུལ། གོམས་པའི་མཐུས་མངོན་དུ་གྱུར་པས་དངོས་གྲུབ་ཆེན་པོ་ཐོབ་པ་ནི་འབྲས་བུའི་ཚུལ་ལོ། །དེ་ལྟར་ངེས་པར་བྱས་ནས། དང་པོ་ནི། ཚོགས་གཉིས་རྫོགས་པས་རྫོགས་པ་ཞེས་བྱ་ལ། 
དེ་ཡང་ཐེག་པ་འོག་མ་ལྟར་བགྲོད་ཅིང་སྦྱང་བ་ལ་ལྟོས་པ་མ་ཡིན་གྱི། སྐུ་གསུང་ཐུགས་འབྲས་བུའི་ཆོས་སུ་གདོད་ནས་ལྷུན་གྱིས་གྲུབ་པས་ཆེན་པོའི་སྟེ་དེའི་དོན་ལ་འཇུག་པའི་ཐབས་དང་སྒོ་ནི་ཚུལ་ཏེ། དེ་ནི་རྟོགས་པ་རྣམ་པ་བཞིའི་
ལམ་གྱིས་ཡིད་ཆེས་པར་བྱ་དགོས་ཏེ། རྟོགས་པ་བཞི་ནི། རྩ་རྒྱུད་ལེའུ་བཅུ་གཅིག་པ་ལས། །རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་རླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་
རྒྱལ་པོ་ཆེ། །ཞེས་གསུངས་པ་ལྟར། རྒྱུ་གཅིག་པར་རྟོགས་པ་དང་། ཡིག་འབྲུའི་ཚུལ་གྱིས་རྟོགས་པ་དང་། བྱིན་གྱིས་རླབས་ཀྱིས་རྟོགས་པ་དང་། མངོན་སུམ་པར་རྟོགས་པའོ། །དེ་ཡང་རྟོགས་པ་བཞི་འདི་ལ་རིམ་ཅིག་ཅར་གཉིས་
13-2-15b


ཀྱི་བཤད་པ་འབྱུང་ཡང་འདིར་རྫོགས་པ་ཆེན་པོ་རང་བྱུང་གི་ཡེ་ཤེས་ཐིག་ལེ་ཉག་གཅིག་ཏུ་གཏན་ལ་ཕེབས་པས་ཅིག་ཆར་བ་ལྟར་དུ་བཤད་དེ། དེ་ལ་རྒྱུ་སྟེ་རང་བཞིན་ནམ་གཞི་གཅིག་པར་རྟོགས་པ་ནི་ཆོས་ཐམས་ཅད་དོན་དམ་པར་མ་སྐྱེས་
པས་ཞེས་མ་སྐྱེས་པའི་རང་བཞིན་དུ་སོ་སོ་མ་ཡིན་པ་དང་། ཀུན་རྫོབ་ཏུ་སྣང་བ་བདེན་སྟོང་སྒྱུ་མའི་མཚན་ཉིད་དུ་སོ་སོ་མ་ཡིན་པ་ནི་ཐེག་པ་ཆེན་པོ་ཐུན་མོང་དུ་གྲགས་པ་དང་། མ་སྐྱེས་པ་ཉིད་མ་སྐྱེས་བཞིན་དུ་ཆུ་ཟླ་ལྟར་རྒྱུ་དག་
མ་དག་སྣ་ཚོགས་སུ་སྣང་ཞིང་རང་རང་གི་བྱ་བ་བྱེད་ནུས་པ་དང་། སྒྱུ་མ་ལྟར་སྣང་བ་ཉིད་སྣང་བཞིན་དུའང་ངོ་བོ་མེད་དེ་མ་སྐྱེས་པས་ན་ཀུན་རྫོབ་དང་དོན་དམ་པར་དབྱེར་མེད་པས་ཟུང་འཇུག་རང་བྱུང་གི་ཡེ་ཤེས་རྒྱུ་གཅིག་པར་རྟོགས་པ་ནི་
ལུང་ཟབ་མོ་ལས་གྲགས་པའི་ཐུན་མོང་མ་ཡིན་པའོ། །མདོར་ན་རང་བྱུང་ཡེ་ཤེས་བྱང་ཆུབ་སེམས་ཀྱི་ངོ་བོ་ནི་སྣང་སྟོང་དབྱེར་མི་ཕྱེད་པའི་རང་བཞིན་ཡིན་ལ། འཁོར་འདས་ཐམས་ཅད་དེའི་ཚུལ་གཅིག་ལས་མི་འདའ་བ་ནི་རྒྱུ་
གཅིག་པའོ། །ཡིག་འབྲུའི་ཚུལ་གྱིས་རྟོགས་པ་ནི། དེ་ལྟ་བུའི་སྣང་སྟོང་དབྱེར་མེད་ཀྱི་རང་བཞིན་དེ་ཉིད་ཀྱང་གདོད་མ་ནས་སྐུ་གསུང་ཐུགས་འབྲས་བུའི་ཆོས་སུ་སངས་རྒྱས་པར་བསྟན་པ་སྟེ། དེ་ལ་ཆོས་ཐམས་ཅད་མ་སྐྱེས་པ་ནི་ཨ་ཡིས་
མཚོན་ཏེ་གསུང་གི་རང་བཞིན། མ་སྐྱེས་པ་ཉིད་སྒྱུ་མར་སྣང་ཞིང་བྱ་བ་བྱེད་ནུས་པ་ནི་ཨོ་ཡིས་མཚོན་ཏེ་སྐུའི་རང་བཞིན། དེ་ལྟར་རྟོགས་པའི་རིག་པ་སྒྱུ་མའི་ཡེ་ཤེས་མཐའ་དབུས་མེད་པ་ནི་ཨོཾ་གྱིས་མཚོན་ཏེ་ཐུགས་ཀྱི་རང་བཞིན་དུ་རྟོགས་
13-2-16a


པའོ། །དེ་ཡང་གདོད་ནས་སྣང་སྟོང་ཟུང་འཇུག་གི་ཡེ་ཤེས་དེ་ལ་བསལ་བཞག་གི་བྲི་གང་ནམ་ཡང་མེད་ཅིང་། དེ་ཉིད་རང་བཞིན་རྣམ་པར་དག་པས་འཁོར་བ་ཡེ་སངས་ཆེན་པོ་ཡིན་ལ། དེ་ཉིད་ཀྱི་རོལ་པ་ནི་གདོད་
ནས་དཀྱིལ་འཁོར་གསུམ་དུ་གནས་པ་ཡིན་པར་ནི་ཡིག་འབྲུའི་ཚུལ་གྱིས་རྟོགས་པའོ། །བྱིན་གྱིས་རླབས་ཀྱིས་རྟོགས་པ་ནི། རྟོགས་པ་རྣམ་པ་གཉིས་པོ་དེའི་མཐུ་དང་བྱིན་རླབས་ཤེས་པ་སྟེ། དཔེར་ན་རས་དཀར་པོ་ལ་དམར་པོར་བྱིན་གྱིས་
རློབས་པའི་མཐུ་བཙོད་ལ་ཡོད་པ་བཞིན་དུ། ཆོས་ཐམས་ཅད་གདོད་མ་ནས་སངས་རྒྱས་པར་བྱིན་གྱིས་རློབས་པའི་མཐུ་ཡང་རྒྱུ་གཅིག་པ་དང་ཡིག་འབྲུའི་ཚུལ་གྱི་མཐུས་བྱིན་གྱིས་རློབས་པར་ཤེས་ཤིང་རྟོགས་པའོ། །དེ་ལ་ཆོས་ཐམས་
ཅད་ཡེ་ནས་སངས་རྒྱས་པ་ཡིན་མོད་ཀྱི་རྟོགས་པ་གཉིས་དང་མི་ལྡན་པ་རྣམས་ལ། དེས་ཕན་འདོགས་པར་མི་འགྱུར་ལ། དེ་གཉིས་དང་ལྡན་ན་ནི་ཕན་ཐོགས་པར་སྣང་བར་འགྱུར་བས། རྟོགས་པ་གཉིས་ཀྱི་མཐུས་ཆོས་ཐམས་ཅད་
ཡེ་ནས་སངས་རྒྱས་པར་བྱིན་གྱིས་རློབས་པ་ལྟར་སྣང་བར་འགྱུར་པས་བྱིན་གྱིས་རློབས་པར་རྟོགས་པ་ཞེས་བྱའོ། མངོན་སུམ་པར་རྟོགས་པ་ནི། སྤྱིར་དབང་པོའི་མངོན་སུམ་སོགས་ཡོད་ཀྱང་འདིར་ཤེས་རབ་ཀྱི་དབང་པོའི་མངོན་སུམ་
སྟེ། དེ་ཡང་སོ་སོར་རྟོགས་པའི་ཤེས་རབ་ཉིད་ལ་གོ་བར་བྱ་སྟེ། ཆོས་ཐམས་ཅད་ཡེ་ནས་སངས་རྒྱས་པར་གནས་པ་དེ་ཡང་ཡིད་ཆེས་པའི་ལུང་དང་བླ་མ་བརྒྱུད་པའི་མན་ངག་དང་འགལ་བའང་མ་ཡིན་ལ་སྟེ། དཔེར་ན་བསྲེག་བཅད་བརྡར་
13-2-16b


བས་གསེར་ཡིན་མིན། སྐྱོན་ཡོད་མེད་གསེར་བཟང་ངན་ཤེས་པ་བཞིན་དུ། ལུང་གིས་སྤྱི་ལ་མི་འཁྲུལ། ལུང་ལ་དྲང་ངེས་ལྡེམ་དགོངས་སྣ་ཚོགས་པ་ལ་མན་ངག་གིས་དེའི་སྐྱོན་བསལ་བས་ཡིད་ཆེས། ལུང་དང་མན་ངག་ཡོད་ཀྱང་ཚིག་
ཙམ་གྱི་སྒྲ་ཕྱིར་འབྲང་བས་བློའི་གཏིང་དུ་ཉམས་སུ་མ་ལོན་པ་ཡང་ཡོད་པས། ལུང་དང་མན་ངག་གི་ཚིག་ཙམ་ལ་བརྟེན་པའང་མ་ཡིན་པར་སོ་སོར་རྟོག་པའི་ཤེས་རབ་བམ་རང་གི་རིག་པས་བློའི་གཏིང་དུ་ཡིད་ཆེས་པས་མངོན་སུམ་དུ་རྟོགས་
པའོ། །ཞེས་འདིས་ནི་ལུང་གི་དོན་སྤྱི་ཕྱིན་ཅི་མ་ལོག་པ་ཤེས་པར་འགྱུར་ལ། མན་ངག་གིས་ལུང་གི་དགོངས་པ་གཞན་དུ་འདྲེན་པ་གཅོད་ཅིང་། ཤེས་རབ་ཀྱིས་མངོན་སུམ་དུ་རྟོགས་པས་ཐོས་པ་ཙམ་ལ་སོགས་པ་ཉིད་དུ་ཞེན་པ་སེལ་ཞིང་
གཅོད་པར་བྱེད་པ་ཡིན་ནོ། །དེ་ལྟར་ལམ་གྱིས་ཡིད་ཆེས་པ་ནི། རྟོགས་པ་རྣམ་བཞིའི་དོན་དེ་ཉིད་ཤེས་ཤིང་རིག་པ་ཉིད་རྣལ་འབྱོར་པའི་ལམ་སྟེ།  དེའང་མཚན་ཉིད་ཐེག་པར་རྒྱུ་སྔོན་དུ་བསྒྲུབས་པའི་འབྲས་བུ་སངས་རྒྱས་ཉིད་ཕྱིས་ནམ་ཞིག་
ན་འབྱུང་བའི་དུས་ལ་ལྟོས་པ་ལྟ་བུ་མ་ཡིན་གྱི། ད་ལྟ་ཉིད་དུ་ཤེས་རབ་ཀྱི་དབང་པོས་རང་གིས་མངོན་སུམ་དུ་རྟོགས་ཤིང་ཡིད་ཆེས་པའོ། །གཉིས་པ་ནི། དེ་ལ་ཤེས་པ་དང་འཇུག་པ་དང་མངོན་དུ་གྱུར་པ་སྟེ་མཚན་ཉིད་གསུམ་གྱིས་ཇི་ལྟར་
རྟོགས་པའི་རྫོགས་པ་ཆེན་པོའི་དོན་མཐར་ཕྱིན་པར་འགྱུར་ཏེ། དེ་ཡང་། རྟོགས་པ་བཞིའི་ཚུལ་རིག་པ་ནི་གཏན་ལ་དབབ་བྱ་རྒྱུ་ཤེས་པའི་མཚན་ཉིད་དོ། །ཡང་ནས་ཡང་དུ་དེ་ལ་གོམས་པར་བྱེད་པ་ནི་རྐྱེན་འཇུག་པའི་མཚན་ཉིད་དོ། །དེ་ལྟར་
13-2-17a


གོམས་པའི་མཐུས་དོན་ཇི་ལྟ་བ་བཞིན་མངོན་དུ་གྱུར་པ་ནི་མཐར་ཕྱིན་འབྲས་བུའི་མཚན་ཉིད་དོ། །དེ་ལ་རྒྱུ་ཤེས་པའི་མཚན་ཉིད་ལྟ་བ་དང་། རྐྱེན་འཇུག་པའི་མཚན་ཉིད་སྒོམ་པ་དང་མངོན་དུ་གྱུར་པ་འབྲས་བུའི་ཚུལ་གསུམ་པོ་
འདིས་དོན་མཐར་ཕྱིན་པར་བྱེད་པས་ན་འདི་དང་མི་ལྡན་དུ་མི་རུང་བས་ན། མཚན་ཉིད་གསུམ་གྱིས་འབྲེལ་བ་དང་། དགོས་པ་དང་། དགོས་པའི་ཡང་དགོས་པ་སྟོན་ཏེ། དེ་ལ་འབྲེལ་པ་ནི། ཀུན་ནས་ཉོན་མོངས་པ་དང་རྣམ་པར་བྱང་བའི་
ཆོས་སུ་བཏགས་པ་ཐམས་ཅད་ཡིག་འབྲུའི་ཚུལ་གྱིས་ཡེ་ནས་སྐུ་གསུང་ཐུགས་ཀྱི་བདག་ཉིད་དང་། རྒྱུ་གཅིག་པར་རྟོགས་པས་རང་བཞིན་གྱིས་སངས་རྒྱས་པའི་དབྱིངས་དང་བྱིན་གྱིས་བརླབས་པར་རྟོགས་པ་དང་མངོན་སུམ་པར་རྟོགས་པའི་དོན་
གྱིས་བྱིན་གྱིས་རློབས་པའི་དོན་མངོན་སུམ་དུ་རྟོགས་པ་ནི་རྒྱུ་ཤེས་པའི་མཚན་ཉིད་དེ། དེ་ནི་གང་དང་འབྲེལ་ན་བླ་ན་མེད་པའི་སངས་རྒྱས་སུ་འགྲུབ་པའི་རྒྱུ་ཡིན་པའི་ཕྱིར་དོན་དུ་འབྲེལ་བའོ། །དགོས་པ་ནི་འཇུག་པའི་མཚན་ཉིད་དེ། ཀུན་
ནས་ཉོན་མོངས་པ་དང་རྣམ་པར་བྱང་བའི་ཆོས་དང་། སྨན་ལྔ་དང་། བདུད་རྩི་ལྔ་དང་གཉེན་པོ་ལྔ་དང་དུག་ལྔ་ལ་སོགས་པར་བརྟགས་པ་གཙང་མི་གཙང་དང་དག་མ་དག་ཐམས་ཅད་ཡེ་ནས་སངས་རྒྱས་པའི་རང་བཞིན་ཡིན་པས་མཉམ་པ་ཆེན་པོ་
ལ་བླང་དོར་མེད་པར་སྤྱོད་པ་ནི་འཇུག་པའི་མཚན་ཉིད་དོ། །དེ་ལྟར་ཞུགས་པ་དེ་ནི་གང་གི་ཕྱིར་དགོས་ཤེ་ན་བླ་ན་མེད་པའི་སངས་རྒྱས་སུ་འགྲུབ་པའི་རྒྱུ་ཐུན་མིན་ཏེ་བླང་དོར་མཉམ་ཉིད་དུ་མ་རྟོགས་པར་སངས་རྒྱས་པའི་ཐབས་ཡོད་པ་མ་ཡིན་པའི་ཕྱིར་
13-2-17b


དགོས་པའོ། །དགོས་པའི་ཡང་དགོས་པ་ནི་འབྲས་བུའི་མཚན་ཉིད་དེ། ཀུན་ནས་ཉོན་མོངས་པ་དང་། རྣམ་པར་བྱང་བའི་ཆོས་སྤྱི་དང་། སྨན་ལྔ་དང་བདུད་རྩི་ལྔ་སོགས་སྤྱོད་བྱར་ཁྱད་པར་དུ་བཏགས་པ་ཐམས་ཅད་ཡེ་ནས་སངས་རྒྱས་པའི་
མཉམ་པ་ཆེན་པོའི་ངང་དུ་བླང་དོར་མེད་པར་ལྷུན་གྱིས་གྲུབ་པའི་ཕྱིར། སྲིད་པའི་འཁོར་བ་ཉིད་ཡེ་ནས་བླ་ན་མེད་པར་སངས་རྒྱས་པའི་རང་བཞིན་མྱ་ངན་ལས་འདས་པའི་མཚན་ཉིད་དུ་ལྷུན་གྱིས་གྲུབ་པ་མངོན་དུ་གྱུར་པ་ཡིན་པའི་ཕྱིར་འབྲས་
བུའི་མཚན་ཉིད་དེ། སྐུ་གསུང་ཐུགས་དུས་རྟག་ཁྱབ་ཏུ་མི་ཟད་པ་རྒྱན་གྱི་ཞེས་ཆོས་ཀྱི་དབྱིངས་གང་བར་ཡེ་ཤེས་ཀྱི་རོལ་པ་ཚད་མེད་པ་སྟེ། དཔེ་གསེར་མིག་གཡུས་སྤྲས་པ་ལྟར་དང་། འཁོར་ལོ་ཞེས་གདུལ་བྱའི་རྒྱུད་ལ་འཇུག་ཅིང་སྒྲིབ་པ་
རྣམས་གཅོད་པར་བྱེད་པ་སྟེ། དེ་ལྟ་བུ་མངོན་སུམ་དུ་གྱུར་པ་ནི་དགོས་པའི་ཡང་དགོས་པའོ། །དེ་ལ་རྫོགས་པ་ཆེན་པོ་ཡེ་ནས་སངས་རྒྱས་པ་ལ་རྒྱུ་རྐྱེན་འབྲས་བུར་བཞག་པ་མི་འགལ་ལམ་ཞེ་ན། དེ་ལྟར་མ་ཧཱ་སོགས་ཐེག་པ་འོག་མའི་གཞུང་
གིས་ལམ་བསྙེན་སྒྲུབ་ཡན་ལག་བཞིའི་སྒོ་ནས་འབྲས་བུ་འགྲུབ་པར་འདོད་ལ། སྐབས་འདིར་ནི་དེ་ལྟར་བྱ་མི་དགོས་ཏེ། བསྙེན་སྒྲུབ་རྣམ་པ་བཞི་ཡང་རྩོལ་མེད་ལྷུན་གྱིས་གྲུབ་པའི་རྣལ་འབྱོར་ལ་རྫོགས་པས། རྒྱུ་རྐྱེན་འབྲས་བུར་
གྱུར་པའི་དངོས་པོར་དངོས་སུ་ན་མེད་དོ་ཞེས་ལ་བཟླ་བའི་མན་ངག་དུ་སྦྱར་རོ། །དེས་ན་ཤེས་པའི་ཡུལ་དང་། དེ་ལ་འཇུག་པ་དང་། དེ་མངོན་དུ་གྱུར་པ་གསུམ་ནི་ཆོས་ཉིད་བྱང་ཆུབ་སེམས་ཀྱི་རང་བཞིན་ལ་ཁྱད་པར་མེད་པས་གཞི་འབྲས་
13-2-18a


དབྱེར་མེད་རང་བཞིན་ལྷུན་གྲུབ་ཆེན་པོའོ། །གསུམ་པ་ནི། དེ་ལ་བསྙེན་པ་དང་། ཉེ་བའི་བསྙེན་པ་དང་། སྒྲུབ་པ་དང་། སྒྲུབ་པ་ཆེན་པོའི་དོན་ཏེ་བསྙེན་སྒྲུབ་ཡན་ལག་བཞི་པོ་ཡང་རྩོལ་བ་མེད་པར་ལྷུན་གྱིས་གྲུབ་པར་
གྱུར་པའི་རྣལ་འབྱོར་ལ་བརྩོན་པར་བྱའོ། །ཞེས་སྤྱིར་བསྟན་ཏེ། དེ་ལ་མ་ཧཱ་ཡོ་གའི་བསྙེན་སྒྲུབ་བཞི་ལས་རྫོགས་པ་ཆེན་པོར་ལ་བཟླ་བའི་ཚུལ་རྒྱུ་འབྲས་སུ་གྱུར་པའི་འབྱུང་བ་དང་ཕུང་པོའམ། རྣམ་ཐར་གསུམ་མམ། ཐབས་ཤེས་
ཟུང་འཇུག་གམ། སྣང་སྟོང་དབྱེར་མེད་སོགས་ཡབ་ཡུམ་གྱི་ཆར་སྣང་བ་ཐམས་ཅད་ལ་རང་བཞིན་རྩོལ་མེད་ལྷུན་གྲུབ་ཀྱི་ཚུལ་དུ་སྦྱོར་དགོས་ཏེ། དེ་ལ་བསྙེན་པ་ནི། གཞི་ཀ་དག་དང་ལྷུན་གྲུབ་ཟུང་དུ་འཇུག་པའི་བྱང་ཆུབ་ཀྱི་སེམས་ཤེས་པ་སྟེ། 
དེ་ཡང་ཀུན་བྱང་གི་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དུ་ལམ་གྱིས་གསར་དུ་བསྒྲུབ་ཅིང་གཉེན་པོས་བཅོས་སུ་མེད་པར་རྟོགས་པའོ། །ཉེ་བའི་བསྙེན་པ་ནི། ལྟ་བ་དེའི་ངང་ནས་ཕུང་པོ་ལྔའི་རང་བཞིན་ཅན་བདག་ཉིད་ལྷར་ཤེས་
པ་སྟེ། དེའང་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་ཡིན་པས། བདག་ཉིད་ཀྱང་ཡེ་ནས་ལྷའི་རང་བཞིན་ཡིན་གྱི། མ་ཧཱ་སོགས་ཀྱི་ལྟ་བའི་ངང་ནས་བདག་ལྷར་བསྐྱེད་པ་ལྟར་ད་ལྟ་བསྒྲུབ་པ་ནི་མ་ཡིན་པར་རྟོགས་པའོ། །
སྒྲུབ་པ་ནི་ཡུམ་བསྐྱེད་པ་སྟེ། དེའང་མ་ཧཱ་སོགས་ཀྱི་ཡུམ་བསྐྱེད་པ་ལྟ་བུ་མིན་གྱི་ཡུམ་ཆེན་མོ་ནམ་མཁའི་དབྱིངས་ལས། ནམ་མཁའ་ཉིད་ཡུམ་ཆེན་མོ་ས་ཆུ་མེ་རླུང་བཞིར་སྣང་ཞིང་། དེ་ཡང་གོ་འབྱེད་པ་དང་། རྟེན་བྱེད་པ་དང་། སྡུད་པ་དང་།
13-2-18b


སྨིན་པ་དང་། གཡོ་བའི་བྱ་བ་བྱེད་པའི་ཡུམ་ཡེ་ནས་ཡིན་པར་རྟོགས་པའོ། །སྒྲུབ་པ་ཆེན་པོ་ནི། ཐབས་དང་ཤེས་རབ་འབྲེལ་བ་སྟེ། དེའང་ཅི་ལྟར་འབྲེལ་ན། ཡུམ་འབྱུང་བ་ཆེན་པོ་ལྔའི་རང་བཞིན་མེད་པའི་ཤེས་རབ་དང་ཡུམ་གྱི་མཁའ་
སྟོང་པ་ཉིད་ཀྱི་རྣམ་པར་ཐར་པ་ལས། མ་འགགས་པར་སྣང་བའི་ཕུང་པོ་ལྔའི་སངས་རྒྱས་ཐབས་ཀྱི་ཡབ་སྨོན་པ་མེད་པའི་རྣམ་པར་ད་ལྟ་ལམ་གྱིས་ཟུང་དུ་སྦྲེལ་བ་ལྟ་བུ་མིན་པར་ཡེ་ནས་ཟུང་དུ་གྱུར་པའི་འབྲེལ་པ་ལས། བྱང་ཆུབ་སེམས་
སུ་དབྱེར་མེད་པའི་རང་བཞིན་ལས་སྐྱེ་མཆེད་ཐམས་ཅད་སྲས་སྤྲུལ་པ་ལྕམ་དྲལ་དུ་གྱུར་པའི་རང་བཞིན་ནི། མ་ཧཱ་སོགས་ཀྱི་ཡབ་ཡུམ་འབྲེལ་བའི་བྱང་ཆུབ་སེམས་ལས་སྲས་ལྕམ་དྲལ་འཕྲོ་བ་ལྟ་བུ་མ་ཡིན་ཏེ་ཡེ་ནས་སངས་རྒྱས་པའི་དོན་ལ། 
ཡུལ་ཆོས་ཀྱི་དབྱིངས་ཡུམ་སྒྱུ་མ་ལྟ་བུ་ལ་རིག་པའི་ཡེ་ཤེས་ཡབ་སྒྱུ་མ་ལྟ་བུར་རོལ་ཅིང་དེ་ལ་མ་འགགས་མི་དམིགས་དབྱེར་མེད་ཕྱོགས་ཞེན་ཐམས་ཅད་དང་བྲལ་བའི་བདེ་བའི་ཡེ་ཤེས་ཅིར་ཡང་འཆར་བ་རོལ་མོ་ལྟ་བུའི་དགོངས་པ་ཉམས་སུ་
མྱོང་བ་ནི། གཉིས་འཛིན་གྱི་ཞེན་པ་རྡུལ་ཕྲན་ཙམ་ཡང་མེད་པས་ཡེ་ཤེས་དགྱེས་པ་དེ་ནི་བདེ་བའི་མཆོག་ཡིན་པ་དེ་འདྲ་བའི་སྒྱུ་མའི་རྒྱུན་ལ་རོལ་ཞིང་ཉམས་སུ་མྱོང་བའི་ཚུལ་གྱིས་ཏེ། དེ་ཡང་སྐད་ཅིག་མ་དང་བྲལ་བའི་ངོ་བོ་ཉིད་ཀྱི་རྒྱུན་
ནམ་མཁའ་ལྟ་བུའོ། །བདེ་བའི་དུས་ཉིད་ན་སྤྲོས་པ་ཀུན་བྲལ་མཚན་མ་མེད་པའི་རྣམ་ཐར་གྱི་དོན་མཐའ་གང་དུའང་མི་དམིགས་ཤིང་མཁའ་དང་སྙོམས་པ། བཏང་སྙོམས་ཆེན་པོའི་ར་བ་ལས་མི་འདའ་བ་ནི་ཆོས་ཉིད་རང་བྱུང་གི་ཡེ་ཤེས་
13-2-19a


ཉག་གཅིག་གི་ཀློང་དུ་གྱུར་ནས་བྱེད་སྩོལ་མེད་པར་ལྷུན་གྱིས་གྲུབ་པ་སྟེ། དེ་ལ་ཟག་པའི་རྒྱུ་གཟུང་འཛིན་རང་བྱུང་གི་ཡེ་ཤེས་སུ་དག་ཅིང་མི་འགག་པར་ངོ་བོ་ཉིད་ཀྱི་རྒྱུན་སྣང་བ་བསོད་ནམས་ཀྱི་ཚོགས་དང་། དེ་ཡང་སྤྲོས་
མཚན་འཛིན་ཞེན་ཅུང་ཟད་ཀྱང་མེད་པ་ཡེ་ཤེས་ཀྱི་ཚོགས་སོ། །དེ་ལྟ་བུའི་ཚོགས་གཉིས་ལྷུན་གྱིས་གྲུབ་པ་རང་བྱུང་གི་ཡེ་ཤེས་ཆེན་པ་དེས་བདུད་རྣམ་པ་བཞིའང་བརྟུལ་ནས་མཐར་ཕྱིན་པའི་དོན་འགྲུབ་པའོ། །དེ་ལ་བདུད་བཞི་
བརྟུལ་ཚུལ་ནི། བསྙེན་པ་བྱང་ཆུབ་ཀྱི་སེམས་ཤེས་པའི་མཚན་ཉིད་མ་སྐྱེས་པའི་ཏིང་འཛིན་གྱིས་འཆི་བདག་གི་བདུད་བཅོམ། ཉེར་བསྙེན་བདག་ཉིད་ལྷར་ཤེས་པའི་མཚན་ཉིད་སྒྱུ་མ་ལྟ་བུའི་ཏིང་འཛིན་གྱིས་ཕུང་པོའི་བདུད་བཅོམ། 
སྒྲུབ་པ་ཡུམ་བསྐྱེད་པའི་མཚན་ཉིད་རྡུལ་དང་བྲལ་བའི་ཏིང་ངེ་འཛིན་གྱིས་ཉོན་མོངས་པའི་བདུད་བཅོམ། སྒྲུབ་པ་ཆེན་པོ་ཐབས་ཤེས་ཟུང་དུ་འབྲེལ་བའི་མཚན་ཉིད་མི་དམིགས་མཁའ་དང་སྙོམས་པའི་ཏིང་ངེ་འཛིན་གྱིས་ལྷའི་བུའི་བདུད་བར་
ཆད་གཡེང་པའི་བདུད་བཅོམ། དེ་ལྟར་ན་གང་ལ་བདུད་རྣམ་པ་བཞི་འདུལ་བར་བྱེད་པའི་མཐུ་ཡོད་པའི་ལམ་དེ་ནི་རྣམ་པར་དག་པའི་ལམ་ཡིན་ལ། དེ་ཡང་རྩོལ་བ་མེད་པར་ལྷུན་གྱིས་གྲུབ་པའི་ལམ་ཆེན་པོའོ། །བཞི་པ་ནི། རྫོགས་
པ་ཆེན་པོའི་དཀྱིལ་འཁོར་དུ་འཇུག་པའི་རིམ་པ་སྟེ། དེ་ཡང་ཐེག་པ་འོག་མ་ལྟར་དཀྱིལ་འཁོར་བཞེངས་བཀོད་སོགས་ཀྱི་རྩོལ་བ་ལ་ལྟོས་པ་མ་ཡིན་ཏེ། ཆོས་ཐམས་ཅད་གདོད་མ་ནས་རྣམ་པར་དག་པའི་སྒྱུ་འཕྲུལ་འདོད་དགུར་འཇོ་བ་
13-2-19b


ཡིད་བཞིན་གྱི་གཞལ་ཡས་ཁང་ཕྱོགས་དུས་ཀྱི་རྣམ་པས་རྒྱ་ཡོངས་སུ་མ་ཆད་པའི་འཁོར་ལོ་ཡེ་ནས་བླ་ན་མེད་པའི་སྟེ་རྡུལ་ཚོན་སོགས་དང་གཟུགས་བརྙན་ཐམས་ཅད་ལས་འདས་པའི་དཀྱིལ་འཁོར་དུ་འཇུག་པའང་ཡེ་སངས་རྒྱས་པའི་དོན་
རྟོགས་བྱེད་གསང་སྙིང་ལེའུ་བཅུ་གསུམ་པ་མན་ངག་དང་བཅས་པ་རྫོགས་ཆེན་སོགས་ཐབས་ཀྱི་ཐེག་པའི་གཞུང་རྣམས་ཐོག་མར་ཉན་པའི་ཤེས་རབ་ཀྱིས་བླ་མ་ལས་ཐོས་པ་ནི་མིག་ཕྱེ་བའོ། །བསམ་པའི་ཤེས་རབ་ཀྱིས་དེའི་དོན་རྟོགས་པ་ནི་
དཀྱིལ་འཁོར་མཐོང་བའོ། །སྒོམ་པའི་ཤེས་རབ་ཀྱིས་རྟོགས་ནས་གོམས་པར་བྱེད་པ་ནི་དཀྱིལ་འཁོར་དུ་ཞུགས་པ་སྟེ་དབང་བསྐུར་ཐོབ་པའོ། །དེ་ལྟར་ཞུགས་ནས་མངོན་དུ་གྱུར་པ་ནི་དངོས་གྲུབ་ཆེན་པོ་ཐོབ་པའོ། །ད་ནི་རྫོགས་པ་
ཆེན་པོའི་ཚུལ་འདི་ཀུན་གྱི་ཐུན་མོང་མ་ཡིན་པར་སྟོན་པའི་ཕྱིར་གསུངས་པ། དེ་ལྟར་ཚུལ་འདི་ནི་མཉམ་ཉིད་རྫོགས་པ་ཆེན་པོ་རྒྱུ་འབྲས་ཀྱི་ཐེག་པ་ཐམས་ཅད་མཐར་ཕྱིན་པ་སྟེ་དེ་ལས་གོང་དུ་བགྲོད་དུ་མེད་པའི་དོན་ཏོ། །ལམ་འདིའི་
འབྲས་བུ་ནི་ཡི་གེ་འཁོར་ལོ་ཚོགས་ཆེན་གྱི་ས་ལ་རྩོལ་མེད་ལྷུན་གྱིས་འཇུག་པ་སྟེ། དེ་ཡང་སྤྱིར་མཚན་ཉིད་ཀྱི་ཐེག་པ་སྤྱི་ལས་སངས་རྒྱས་ཀྱི་ས་ཀུན་ཏུ་འོད་ཅེས་བྱ་སྟེ། འདི་ལྟར་འོད་ཟེར་མང་པོ་བཀྱེ་བས་འདུལ་བའི་འགྲོ་བ་
སྣོད་དུ་རུང་བར་མཛད་པའི་ཕྱིར་དེ་སྐད་ཅེས་གྲགས་སོ། །རྡོ་རྗེ་ཐེག་པ་སྤྱི་ལས་ནི་སངས་རྒྱས་ཀྱི་ས་གསུམ་དུ་གྲགས་ཏེ།  དེ་ལ་ཀུན་ཏུ་འོད་ནི་ཆོས་ཀྱི་སྐུ་མཚན་མ་མེད་པ་རང་བཞིན་གྱིས་འོད་གསལ་བས་ཀུན་ལ་ཁྱབ་པའོ། །པདྨ་ཅན་
13-2-20a


ནི་དམིགས་པ་མེད་པའི་ཤེས་རབ་ཀྱིས་ཆོས་ཀྱི་སྐུའི་དོན་ཅིར་ཡང་མ་གཟིགས་པ་ཉིད་མ་ཆགས་པའི་ཐུགས་རྗེའི་གཞི་ཡིན་པའོ། །ཡི་གེ་འཁོར་ལོ་ཚོགས་ཆེན་ནི། དེ་ཉིད་ཀྱི་དུས་ན་ཡེ་ཤེས་དང་མཚན་མའི་
དཀྱིལ་འཁོར་གྱི་བདག་ཉིད་རྩོལ་བ་མེད་པར་ལྷུན་གྱིས་གྲུབ་པ་སྟེ། དེ་ལ་ཡི་གེ་ནི་གཉིས་ཏེ། ཡེ་ཤེས་དང་མཚན་མའོ། །མཚན་མ་ལའང་གཉིས་ཏེ་མིང་དང་གཟུགས་སོ། །གཟུགས་ཀྱང་རྣམ་པ་གཉིས་ཏེ། ཡོངས་སུ་རྫོགས་པ་དང་ཆ་ཤས་
སུ་སྣང་བའོ། །འདི་ལྟ་བུའི་འབྲས་བུའི་ཆོས་ཀྱི་དཀྱིལ་འཁོར་གྱི་ཚོགས་ཆེན་པོར་ལྷུན་གྱིས་གྲུབ་པ་ནི་ཡི་གེ་འཁོར་ལོ་ཚོགས་ཆེན་གྱི་ས་ཞེས་ཀྱང་བྱ། སངས་རྒྱས་ཀྱི་ས་བཅུ་གསུམ་པ་ཞེས་ཀྱང་བྱའོ། །དེ་ནི་སྐྱེས་བུ་བློ་རྩལ་རབ་ཀྱིས་ཡེ་ནས་
སངས་རྒྱས་པའི་དོན་ལ་ཡེ་ནས་སངས་རྒྱས་པར་རིག་ནས་ལམ་གྱི་བྱ་རྩོལ་ལ་མི་ལྟོས་པར་སྐད་ཅིག་གིས་གོམས་པ་དྲག་བརྡལ་ཏེ་ཅིག་ཆར་དུ་འགྲོ་བ་ཡིན་གྱི། གང་ཟག་ཕལ་གྱི་བསམ་ཞིང་གོམས་པར་བྱ་བ་ནི་མ་ཡིན་ནོ། །སྐྱེ་བོ་ཕལ་གྱིས་འདི་ལྟ་བུའི་
དོན་ཐོས་ཏེ་ནན་ཏན་དུ་ཇི་ལྟར་བསམས་ཀྱང་དོན་འདི་ནི་བདེན་ཞིང་ཆེས་ཟབ་པར་ཡིད་ཆེས་པར་མི་འགྱུར་རོ། །ཡིད་ཆེས་པ་དང་ཕལ་གྱི་བློ་ལ་གོ་དཀའ་ཞིང་བདེན་པ་དང་ཟབ་པར་མ་ཤེས་པའི་དབང་གིས་རང་གི་ཉམས་དང་སྦྱར་ནས་གང་ཟག་
གཞན་ཀུན་ཀྱང་དེ་དང་འདྲ་སྙམ་ནས་ཡོངས་ཏེ་རྫོགས་པ་ཆེན་པོ་རྟོགས་པ་རྣམས་དང་ཆོས་ཐམས་ཅད་ཡེ་ནས་སངས་རྒྱས་པ་ནི་རྫུན་ཞེས་སྐྱེས་བུ་རབ་རྣམས་ལ་སྐུར་པ་འདེབས་ཤིང་ཐེག་པ་ཆེན་པོ་སུན་འབྱིན་པའི་བློ་སྐྱེ་བར་འགྱུར་བས་རབ་ཏུ་གསང་
13-2-20b


བར་བྱ་དགོས་པའི་ཕྱིར་ཡང་རང་བཞིན་གསང་བའི་ཐེག་པ་ཞེས་སྟོན་པ་ཉིད་ཀྱིས་བཀའ་སྩལ་ཏོ། །དེ་བས་ན་ཆོས་ཐམས་ཅད་ཡེ་ནས་སངས་རྒྱས་པའི་དོན་ལ་ཇི་བཞིན་པར་རྟོགས་ནུས་པའི་བློ་མ་སྐྱེས་བར་དུ་ཐེག་པ་འོག་མ་བས་ཞེས་ལྷ་མི་ཉན་རང་སོགས་
ཀྱི་ལམ་གྱིས་འགྲོ་བའི་དོན་བྱས་ན་གདུལ་བྱ་རྣམས་ཀྱི་རྒྱུད་ཆུད་མི་ཟ་བས་ན། སློབ་དཔོན་གྱིས་བློ་དམན་རྣམས་ལ་འཁོར་བའི་སྐྱོན་དང་། མྱ་ངན་ལས་འདས་པའི་ཡོན་ཏན་ལ་བསྔགས་པ་དང་།  ཐེག་པ་ཐམས་ཅད་ཀྱི་རིམ་པ་མཐའ་དག་ལ་
མཁས་པར་བྱ་བ་དང་། དེའི་དོན་སློབ་མའི་ཉམས་དང་སྦྱར་ལ་རིམ་པས་དྲང་བར་བྱ་བ་ཡིན་གྱི། ཐེག་པའི་ཕྱོགས་འགའ་མི་ཤེས་པའི་སློབ་དཔོན་གྱིས་བཟུང་དུ་མི་རུང་བར་མདོ་རྒྱུད་དག་ན་རྒྱ་ཆེར་འབྱུང་ངོ་། །གཉིས་པ་ལ། མདོར་བསྟན་པ་
དང་། རྒྱས་པར་བཤད་པ་གཉིས་ལས། དང་པོ་ནི། དེ་ལྟར་ལྟ་བའི་ཁྱད་པར་གྱིས་ཡོན་ཏན་གྱི་འབྲས་བུ་འདོད་པའི་ཕྱིར་ལུས་ཀྱི་དཀའ་ཐུབ་དང་རང་གི་ངང་ཚུལ་སྔ་མའི་གནས་སྐབས་ལས་གཞན་དུ་བསྒྱུར་བའི་སྤྱོད་པ་བརྟུལ་ཞུགས་
ཀྱང་མི་འདྲ་བའི་བྱེ་བྲག་ཏུ་འགྱུར་ཏེ་ལྟ་བ་མིག་དང་འདྲ་བས་ཇི་ལྟར་བཅད་པ་བཞིན་དུ། དཀའ་ཐུབ་དང་བརྟུལ་ཞུགས་རྐང་པ་དང་འདྲ་བ་རྗེས་སུ་འགྲོ་བར་འགྱུར་བའི་ཕྱིར་རོ། །དེ་ལ་ལྟ་བའི་བྱེ་བྲག་གིས་དཀའ་ཐུབ་ཡོད་མེད་གཉིས་སུ་འགྱུར་
ཏེ། དཀའ་ཐུབ་མེད་པ་ནི་གཉིས་ཏེ། ལྟ་བ་ལ་བསྒྲུབ་བྱ་མེད་པའི་དབང་གིས་འཇིག་རྟེན་ཕྱལ་བ་དང་ཕྱི་རོལ་མུར་ཐུག་གོ། གང་ལྟ་བ་ལ་བསྒྲུབ་པར་བྱ་བ་ཡོད་པའི་དབང་གིས་དཀའ་ཐུབ་ཡོད་པ་ནི་རྣམ་པ་བཞི་སྟེ། འཇིག་རྟེན་རྒྱང་འཕེན་པ་དང་
13-2-21a


ཕྱི་རོལ་མུ་སྟེགས་པ་སྟེ་ཐར་པའི་ལམ་དང་རྗེས་སུ་མ་འབྲེལ་བ་འཇིག་རྟེན་གྱི་དཀའ་ཐུབ་དང་། འཇིག་རྟེན་ལས་འདས་པའི་ལམ་དུ་གྱུར་པ་ཉན་ཐོས་ཀྱི་དཀའ་ཐུབ་དང་བྱང་ཆུབ་སེམས་དཔའི་དཀའ་ཐུབ་དང་། བླ་ན་མེད་
པའི་དཀའ་ཐུབ་བོ། །གཉིས་པ་ནི། དེ་ལ་གོང་དུ་ལྟ་བའི་སྐབས་སུ་སྨོས་པའི་འཇིག་རྟེན་ཕྱལ་བ་ནི་རྒྱུ་དང་འབྲས་བུ་ལ་རྨོངས་པའི་ཕྱིར་བླང་དོར་གྱི་གནས་ཅི་ཡང་མི་ཤེས་པས་དཀའ་ཐུབ་མེད་པའོ། །ཕྱི་རོལ་མུར་ཐུག་པ་ནི་རྒྱུ་འབྲས་ཆད་པར་ལྟ་བའི་
ཕྱིར་ཚེ་ཕྱི་མ་ལ་ཕན་པ་དོན་དུ་མི་གཉེར་བས་དཀའ་ཐུབ་མེད་པའོ། །དེ་གཉིས་ནི་དཀའ་ཐུབ་མེད་པ་སྟེ། དཀའ་ཐུབ་ཡོད་པའི་ཕྱོགས་ལ།  འཇིག་རྟེན་རྒྱང་འཕེན་པ་ནི་ཚེ་འདིའི་བཙན་ཕྱུགས་སོགས་གཞན་ལས་ཁྱད་པར་དུ་འཕགས་པ་
བསྒྲུབས་པའི་ཕྱིར་གཙང་སྦྲ་ལ་སོགས་པའི་དཀའ་ཐུབ་ཅན་ནོ། །ཕྱི་རོལ་མུ་སྟེགས་པ་ནི། བདག་རྟག་པ་ཞིག་ཡོད་པ་དེ་དག་པར་བྱ་བའི་ཕྱིར། ཚ་གྲང་སོགས་ཀྱིས་ལུས་སུན་འབྱིན་ཅིང་ཕྱོགས་བཞིར་མེ་དང་སྟེང་ནས་ཉི་མ་སྟེ་མེ་ལྔ་བརྟེན་
པ་ལ་སོགས་པའི་དཀའ་ཐུབ་དང་། ཁྱི་ཕག་སོགས་ཀྱི་བརྟུལ་ཞུགས་དམན་པ་ངལ་བ་དོན་མེད་ཕྱིན་ཅི་ལོག་པར་སྤྱོད་པའོ། །ཉན་ཐོས་ཀྱི་དཀའ་ཐུབ་ནི་འདུལ་བ་ལས། བསླབ་པ་གསུམ་མདོར་བསྡུས་ཏེ། སྡིག་པ་ཅི་ཡང་མི་བྱ་སྟེ། 
ཞེས་ཚུལ་ཁྲིམས་ཀྱི་བསླབ་པའི་དབང་དུ་བྱས་ཏེ། མི་དགེ་བ་བཅུའི་ལས་ཀྱི་ལམ་ལས་ཀྱང་། ཤིན་ཏུ་ལྕི་བ། སྲོག་གཅོད། མ་བྱིན་ལེན། མི་ཚངས་སྤྱོད། རྫུན་སྨྲ་ལྟ་བུ་ཕམ་པར་གྱུར་པའི་ཆོས་བཞི་སོགས་བྱ་བ་མ་ཡིན་པ་ལས་ལྡོག་པའོ། །
13-2-21b


དགེ་བ་ཕུན་སུམ་ཚོགས་པར་སྤྱད། ཅེས་ཤེས་རབ་ཀྱི་བསླབ་པའི་དབང་དུ་བྱས་ཏེ་བདེན་པ་བཞིའི་དོན་ཕྱིན་ཅི་མ་ལོག་པར་རྟོགས་པའི་ཤེས་རབ་ཀྱིས་བསྡུས་པ། འཕགས་པའི་ལམ་དང་འབྲས་བུའི་ཆོས་སྤྱད་ཅིང་ཐོབ་པར་བྱ་བ་རྣམས་སོ། །
རང་གི་སེམས་ནི་ཡོངས་སུ་གདུལ། །ཞེས་སེམས་ཀྱི་བསླབ་པའི་དབང་དུ་བྱས་ཏེ་སེམས་ཕྱི་རོལ་གྱི་གཡེངས་བ་ལས་བཟློག་སྟེ་རྩེ་གཅིག་མཉམ་པར་བཞག་པའི་བསམ་གཏན་ལ་བསླབ་པའོ། །ཚུལ་འདི་ནི་སངས་རྒྱས་བསྟན་པ་ཡིན། ཞེས་ཚད་
མར་བྱེད་པའི་ཚིག་སྟེ། ཕྱི་རོལ་དབང་ཕྱུག་སོགས་ཀྱི་ལུང་དང་མི་འདྲ་སྟེ། ཀུན་གྱིས་ཡིད་བརྟན་དུ་རུང་བའི་ཚད་མ་སངས་རྒྱས་ཀྱིས་བསྟན་པ། དམ་པའི་ཆོས་འདུལ་བ་ལེགས་པར་གསུངས་པ་ཡིན་ནོ། །ཞེས་འབྱུང་སྟེ། དེའི་དབང་གིས་
དགེ་བ་དང་མི་དགེ་བའི་ཆོས་ཐམས་ཅད་ཀུན་རྫོབ་དང་དོན་དམ་པར་གཉིས་ཀ་ཡོད་པར་ལྟ་བ་དང་ཞེས་འདི་ལྟར་ཀུན་རྫོབ་ཀྱི་ཤེས་པ་ལ་སྣང་བའི་ཆོས་གང་དག །དོན་དམ་པའི་ཤེས་པ་ལའང་སྣང་སྟེ། དེ་བས་ན་གཉིས་ཀར་ཡོད་པ་ཞེས་བྱའོ། །
དེའི་དབང་གིས་ལུས་ངག་གིས་དགེ་བ་ནི་སྤྱོད། མི་དགེ་བ་ནི་སྤོང་པའི་དཀའ་ཐུབ་དང་བརྟུལ་ཞུགས་ལ་སྤྱོད་པའོ། །གོང་དུ་རང་སངས་རྒྱས་ལྟ་བའི་སྐབས་སུ་གུད་དུ་བཞག་ནས། འདིར་དཀའ་ཐུབ་མ་སྨོས་པ་ནི་ཉན་ཐོས་དང་མཐུན་
པའི་ཕྱིར་རོ། །བྱང་ཆུབ་སེམས་དཔའི་དཀའ་ཐུབ་ནི།  སེམས་ཅན་ཐམས་ཅད་འཁོར་མཚོ་ལས་བསྒྲལ་བའི་ཕྱིར། ཐམས་ཅད་མཁྱེན་པའི་ཡེ་ཤེས་ཀྱི་སེམས་བསྐྱེད་པ་ནི་སྡོམ་པའི་དངོས་གཞི་ཡིན་ལ། ཐམས་ཅད་མཁྱེན་པའི་ཡེ་ཤེས་
13-2-22a


དེ་མ་ཐོབ་པར་སེམས་ཅན་གྱི་དོན་བྱེད་མི་ནུས་པས་དེ་ཐོབ་པར་བྱ་ན་རྒྱུ་ནི་བྱང་ཆུབ་ཀྱི་སེམས། རྩ་བ་སྙིང་རྗེ་ཆེན་པོ། མཐར་ཕྱིན་པ་ཐབས་ལ་མཁས་པ་སྟེ། འདི་གསུམ་ནི་མི་ཚང་མི་རུང་ངོ་། །དེའི་མི་མཐུན་ཕྱོགས་
རང་བཞིན་གྱི་ཁ་ན་མ་ཐོ་བ། བྱང་སེམས་ལ་ཕམ་པ་བཞི་སྟེ། བྱང་ཆུབ་ཀྱི་སེམས་གཏོང་བ་ནི་བྱང་སེམས་ཡོངས་གཟུང་གི་མི་མཐུན་ཕྱོགས་དང་། སེར་སྣའི་དབང་གིས་སེམས་ཅན་མི་སྐྱོབ་པ་དང་། གནོད་སེམས་ཀྱིས་སེམས་ཅན་
ལ་གནོད་པ་བྱེད་པ་གཉིས་ནི་སྙིང་རྗེའི་མི་མཐུན་ཕྱོགས་དང་། དམ་པའི་ཆོས་སྤོང་བ་ནི་ཐབས་མཁས་ཀྱི་མི་མཐུན་ཕྱོགས་ཏེ། དེ་བཞིས་མ་ཟིན་པར་སྙིང་རྗེས་ཟིན་ན་ལུས་ངག་གིས་ཚར་གཅོད་པ་ཡང་བྱ་དགོས་ཏེ། བྱང་ཆུབ་སེམས་
དཔའི་སྡོམ་པ་ཉི་ཤུ་པ་ལས། བྱང་ཆུབ་སེམས་དཔས་ཚར་བཅད་པའི་ལས་ཀྱིས་འགྲོ་བ་འདུལ་བའི་རྐྱེན་དུ་འཚམས་པར་འགྱུར་ཡང་། ཚར་གཅོད་པའི་ལས་ཀྱིས་འགྲོ་བའི་དོན་མི་བྱེད་ན་ཡང་ཉམས་པར་འགྱུར་རོ། །རྫུ་འཕྲུལ་བསྟན་པས་
བྲིད་པ་དང་སྤྱོ་བ་དང་བསྡིགས་པ་ལ་སོགས་པ་སྦྱོར་བ་དམ་པ་མིན་པས་འདུལ་ཀྱང་དེ་ལྟར་མི་བྱེད་ན་ཡང་ཉམས་སོ། །དེ་ཅིའི་ཕྱིར་ན། བསམ་པ་སྙིང་རྗེར་ལྡན་ཞིང་བྱམས་པའི་ཕྱིར་དང་། སེམས་དགེ་བ་ལ་སྦྱོར་བ་རྩུབ་ཀྱང་ཉེས་པ་མེད།
ཅེས་འབྱུང་སྟེ། ཀུན་སློང་སྙིང་རྗེ་ཆེན་པོས་ཟིན་ན་ཆོས་ཐམས་ཅད་དགེ་བ་དང་། ལྟར་སྣང་མི་དགེ་བ་གང་སྤྱད་ཀྱང་བྱང་སེམས་ཀྱི་སྡོམ་པ་ཉམས་པར་མི་འགྱུར་ཏེ། བྱང་ཆུབ་སེམས་དཔའི་སྡོམ་པ་ནི་མདོར་ན་སྙིང་རྗེ་ཆེན་པོས་གཞི་
13-2-22b


བཟུང་ནས་སྤྱོད་དོ། །གསང་བ་བླ་ན་མེད་པའི་དཀའ་ཐུབ་ནི། དམ་ཚིག་ཆེན་པོའི་མདོ་ཉིད་ལས། ཐབས་ཤེས་མཉམ་པ་ཆེན་པོ་བླ་ན་མེད་པ་སངས་རྒྱས་ཀྱི་ཐེག་པར་བློ་རབ་ཏུ་ངེས་པའམ་གདེང་དུ་གྱུར་ན། ཉོན་མོངས་པ་ལྔ་དང་། འདོད་
ཡོན་ལྔ་ཀུན་ལ་སྤྱད་ཀྱང་། པདྨ་ལ་ནི་འདམ་གྱིས་མི་གོས་པ་བཞིན་ཏེ། གང་ཟག་མཆོག་དེ་ལ་ཉན་ཐོས་ཀྱི་ཚུལ་ཁྲིམས་དང་བྱང་ཆུབ་སེམས་དཔའི་སྡོམ་པ་ཐམས་ཅད་ཀྱང་ཕུན་སུམ་ཚོགས་པར་འགྱུར་བའོ། །ཞེས་འབྱུང་སྟེ། ཆོས་ཐམས་
ཅད་ཡེ་ནས་མཉམ་པ་ཉིད་ཀྱི་ཕྱིར། དེ་ལ་སྙིང་རྗེ་ནི་ཡེ་ལྡན་ཡིན་པས་འབྲལ་དུ་མི་རུང་བས་བསྟེན་དུ་མེད་ལ། ཞེ་སྡང་ནི་རང་མཚན་པ་མེད་པས་སྤང་དུ་མེད་དེ་ཡེ་ནས་མཉམ་ཉིད་ཡིན་པའི་ཕྱིར། དེ་ལྟ་བུའི་མཉམ་ཉིད་ཀྱི་བློས་ཟིན་ན་ཅི་ཡང་
མི་འགལ་ལོ་ཞེས་དགོངས་པའོ། །མདོར་ན་ཉན་ཐོས་ཀྱི་སྡོམ་པ་ནི་སེམས་ཅན་ལ་གནོད་སྦྱོར་ལས་ལོག་པའོ། །བྱང་སེམས་ཀྱི་སྡོམ་པ་ནི། དེའི་སྟེང་དུ་ཕན་འདོགས་ལ་ཞུགས་སོ། །གསང་སྔགས་ཀྱི་སྡོམ་པ་ནི་དེ་གཉིས་ཀྱི་སྟེང་དུ་དེ་
བཞིན་གཤེགས་པའི་མཛད་སྤྱོད་ཉམས་སུ་བླང་སྟེ་སྤྱོད་པའོ། །གཞན་ཡང་། ཉན་ཐོས་ཀྱི་སྡོམ་པ་ནི་འདུ་ཤེས་དང་དངོས་གཞིའི་སྒོ་ནས་ལས་གཙོ་བོ་ཡིན་ལ། བྱང་སེམས་ནི་སྙིང་རྗེ་གཙོ་བོ་ཡིན་ཞིང་། གསང་སྔགས་ནི་ཤེས་རབ་གཙོ་
བོ་ཡིན་པར་འདོད་དོ། །ཡང་ཉན་ཐོས་ཀྱིས་ནི། སྔོན་གྱི་འཕགས་པ་དགྲ་བཅོམ་པ་རྣམས་ཀྱི་རྗེས་སུ་སློབ་ཅིང་། བྱང་སེམས་ནི་ས་ཆེན་པོ་ལ་གནས་པའི་བྱང་འཕགས་རྣམས་ཀྱི་རྗེས་སུ་སློབ་ལ། གསང་སྔགས་ཀྱིས་ནི་དེ་བཞིན་གཤེགས་
13-2-23a


པ་ཉིད་ཀྱི་རྗེས་སུ་སློབ་པའོ། །དེ་ལྟར་ཆོས་མཉམ་པ་ཉིད་མངོན་དུ་གྱུར་ཀྱང་དེ་ལྟར་གཏན་ནས་མ་རྟོགས་པ་དང་ཕྱོགས་རེ་ལས་མ་རྟོགས་པ་ཐེག་བརྒྱད་ལ་གནས་པ་རྣམས་ལ་ཐུགས་རྗེ་མི་འབྱུང་བ་མ་ཡིན་ཏེ་དམིགས་མེད་
ཀྱི་ཐུགས་རྗེ་ངོ་བོ་ཉིད་ལྷུན་འགྲུབ་ཏུ་འབྱུང་ངོ་། །མདོར་ན་གསང་སྔགས་མཉམ་པ་ཆེན་པོའི་དམ་ཚིག་ལ་སྤྱོད་པ་ཐམས་ཅད་ཀྱི་ཐམས་ཅད་དུ་རྣམ་པར་མ་དག་པ་མེད་དེ། ཇི་ལྟར་ལྟ་བས་ཡེ་ནས་རྣམ་པར་དག་པར་རྟོགས་པ་བཞིན་དུ་དཀའ་ཐུབ་
དང་བརྟུལ་ཞུགས་ཀྱང་དེ་ལྟར་རྣམ་པར་དག་པར་སྤྱོད་དོ་ཞེས་གསང་སྔགས་མཉམ་པ་ཆེན་པོའི་དམ་ཚིག་གི་སླར་སྡུད་པའི་ཚིག་ཏུ་སྦྱར་བར་མཛད་དེ་ཐེག་པ་འོག་མའི་དཀའ་ཐུབ་དང་བརྟུལ་ཞུགས་ལས་ཁྱད་པར་དུ་གྱུར་པར་བསྟན་པའོ། །གསུམ་
པ་མཇུག་གི་དོན་ལ། གདམས་ངག་གང་ལ་གཏད་པའི་སྣོད་དང་། བརྩམས་ཟིན་པའི་མཐའ་བྱང་གདགས་པ་གཉིས་ལས། དང་པོ་ནི། ལྟ་བ་མཐོ་དམན་གྱི་བྱེ་བྲག་རྣམས་ཕྲེང་བ་བཞིན་དུ་རྒྱུན་ཆགས་སུ་བཀོད་ཅིང་དགོས་པ་བསྡུས་པས་ན། ལྟ་
བའི་ཕྲེང་བ་ཞེས་བྱ་བ་ལ་གསང་བ་ནི་ཐེག་པ་མཐའ་དག་གི་དོན་ཚིག་ཉུང་ངུར་བསྡུས་ནས་བློ་ལ་འཆང་བའི་མན་ངག་བཞག་པ་ཡིན་པ་དང་། ཚིག་ཉུང་ངུ་འདིས་དོན་མང་པོ་རྟོགས་པར་བྱེད་པའི་སྒོ་ནས་སྒྲོན་མ་ཡིན་པས་ནོར་བུ་རིན་པོ་ཆེ་བཞིན་དུ་
སྦས་ཤིང་བཅང་བར་བྱ་བའམ།  རྣམ་པ་གཅིག་ཏུ་ན་རྫོགས་པ་ཆེན་པོའི་དོན་ནི་ཀུན་གྱི་ཐུན་མོང་མ་ཡིན་པས་ཐུགས་རྗེ་ཆེན་པོའི་ཐབས་ཀྱིས་ཀྱང་གསང་བར་བྱ་བའི་ཆོས་ཟབ་མོ་འདི་ནི།  ཇི་ལྟར་དམུས་ལོང་གཟུགས་མི་མཐོང་བ་དག་ནམ་ཞིག་རང་གི་
13-2-23b


བསོད་ནམས་ཀྱིས་ནོར་བུ་རིན་པོ་ཆེ་རྙེད་པའམ་རང་བཞིན་གྱིས་ཕྱེ་ནས་མིག་རྙེད་པ་ལྟར། ཐོག་མེད་མ་རིག་གིས་མདོངས་པའི་སྐྱེ་བོ་ཡང་དག་པའི་དོན་མཐོང་མ་མྱོང་བ་ལས་ནམ་ཞིག་སྔོན་གྱི་བསོད་ནམས་ཀྱིས་དགེ་བའི་བཤེས་གཉེན་དང་ཕྲད་ནས། དེའི་
དབང་གིས་ཤེས་རབ་གསུམ་གྱི་མིག་རྙེད་དེ། ཤེས་རབ་དང་ཐབས་ཀྱི་རྩལ་རྙེད་པའམ་འཆང་བའི་རང་བཞིན་རྫོགས་པ་ཆེན་པོའི་སྣོད་དུ་གྱུར་པའི་སྐྱེས་མཆོག་ཡོད་ན་དེའི་དོན་དུ་གྱུར་པའི་གདམས་ངག་རིན་པོ་ཆེ་འདི་དེ་དང་ཕྲད་པར་གྱུར་ཅིག །ཅེས་སྨོན་
ལམ་དུ་མཛད་པའོ། །གཉིས་པ་ནི། ལྟ་བའི་ཕྲེང་བ་ཞེས་བྱ་བའི་མན་ངག་སློབ་དཔོན་ཆེན་པོ་པདྨ་འབྱུང་གནས་བོད་ཡུལ་ནས་སླར་གཤེགས་ཀར་བྲག་དམར་མཚོ་མོ་འགུལ་གྱི་ནེ་ཐང་དུ་དགུང་གསུམ་བཞེས་ནས་ལྷ་སྲས་ཁྲི་སྲོང་ལྡེ་བཙན་དང་རྗེ་འབངས་ལ་
འགྱེས་ཕྱག་གི་དུས་སུ་མཛད་པ་རྫོགས་སོ། །ཞེས་པའོ། །འདི་བྲིས་དགེ་བས་ཚེ་རབས་ཐམས་ཅད་དུ། །པདྨ་འཇམ་པའི་རྡོ་རྗེ་སྙིང་ལ་ཞུགས། །ཡང་དག་ལྟ་བའི་ཟབ་གནད་ཀུན་རྟོགས་ནས། །འགྲོ་ལ་རྒྱལ་བའི་ལམ་བཟང་སྣང་གྱུར་ཅིག །མི་ཕམ་པས་
ཐུན་བར་གཅིག་ལ་བྲིས་པ་མངྒ་ལཾ། །ཞེས་འཇམ་མགོན་སྨྲ་བའི་སེང་གེ་མི་ཕམ་འོད་གསལ་རྡོ་རྗེའི་ཕྱག་མཆན་སོར་བཞག་ལ་གསང་བའི་བདག་པོ་བློ་གྲོས་མཐའ་ཡས་ཀྱིས་མཛད་པའི་འགྲེལ་བའི་ས་བཅད་ཀྱིས་བརྒྱན་ཏེ་རབ་ཚེས་དོན་འགྲུབ་
ཅེས་པ་ས་མོ་ལུག་གི་ལོར་ཞེ་ཆེན་རི་ཁྲོད་དུ་ཞལ་བཤུས་ཤིང་སྡེ་སྣོད་འཛིན་པ་ཆེན་པོ་མཁན་ཆེན་བླ་མ་ཀུན་བཟང་དཔལ་ལྡན་ནས་ཞུས་ཆེན་མཛད་དེ་ལེགས་པར་གཏན་ལ་ཕབ་པའོ། །རྒྱལ་བ་རིག་འཛིན་བརྒྱུད་པའི་མན་ངག་བཅུད། །རྒྱལ་དབང་
13-2-24a


པདྨའི་ཐུགས་མཚོར་བསྐྱིལ་བ་ལས། །རྒྱལ་བློན་ལས་ཅན་འཁོར་ལ་གདམས་པའི་ཕུལ། །རྒྱལ་བསྟན་འཛིན་པ་རྣམས་ཀྱི་གཅེས་ནོར་ལགས། །དུས་ཀྱི་མཐར་ཡང་སྐྱོབ་པ་མཆོག་དེ་ཡི། །ཐུགས་བསྐྱེད་སྨོན་པའི་རེ་
ཁཱ་མ་རྨས་པས། །ཉེ་བརྒྱུད་བྱིན་རླབས་ངད་ལྡན་བདུད་རྩིའི་ཆབ། །ལོངས་སུ་སྤྱོད་འདི་སྐལ་བ་ཅིས་མི་བཟང་། །དེ་སླད་འཇམ་མགོན་བླ་མའི་ཕྱག་མཆན་གཞུང་། །གུས་པས་བཤུས་ལ་རང་བློས་མ་བསླད་སྙམ། །འོན་ཀྱང་ནོངས་
གྱུར་གང་མཆིས་བདག་བློའི་སྐྱོན། །ཆོས་སྤྱན་ལྡན་པ་རྣམས་ཀྱིས་བཟོད་པར་མཛོད། །དེ་ལས་བྱུང་བའི་རབ་དགེ་དྲི་མེད་ཀྱིས། །ཐེག་མཆོག་བསྟན་པའི་པད་ཚལ་རྒྱས་པ་དང་། །བདག་ཀྱང་སྐྱེ་ཀུན་པདྨའི་བྲན་གྱུར་ཏེ། །ཡང་དག་ལྟ་
བའི་ལམ་བཟང་སྣང་གྱུར་ཅིག །ཅེས་པའང་འཇམ་དབྱངས་བློ་གྲོས་རྒྱ་མཚོས་སྨྲས་པ་དགེ།    །།
13-2-24b


empty page
13-3-1a


༄༅།  །བྱང་ཆུབ་སེམས་བསྒོམ་པ་རྡོ་ལ་གསེར་ཞུན་གྱི་མཆན་འགྲེལ་དེ་ཁོ་ན་ཉིད་གསལ་བའི་སྒྲོན་མེ་ཞེས་བྱ་བ་བཞུགས་སོ། །
13-3-1b


ན་མོ་གུ་རུ་མཉྫུ་ཤྲཱི་ཡེ། ཤེས་དང་ཤེས་བྱ་རོ་མཉམ་པའི། །ཟུང་འཇུག་འདུས་མ་བྱས་པའི་དབྱིངས། །འོད་གསལ་སེམས་ཀྱི་རྡོ་རྗེ་ལ། །འདུ་འབྲལ་སྤོང་པའི་ཕྱག་གིས་འདུད། །འདིར་གྲུབ་པའི་དབང་ཕྱུག་ཆེན་པོ་སློབ་
དཔོན་འཇམ་དཔལ་བཤེས་གཉེན་གྱིས་མཛད་པའི་རྫོགས་པ་ཆེན་པོ་སེམས་སྡེ་སྤྱིའི་སྙིང་པོའི་བསྟན་བཅོས་བྱང་ཆུབ་སེམས་བསྒོམ་པ་རྡོ་ལ་གསེར་ཞུན་འདི་ཉིད་འཆད་པ་ལ་ཀླད་གཞུང་མཇུག་གི་དོན་གསུམ་ལས། དང་པོ་ལ་མཚན་དོན་དང་འགྱུར་ཕྱག་གཉིས་
ཀྱི། དང་པོ་ནི། རྒྱ་ག༷ར་སྐ༷ད་དུ། བོ༷་དྷི༷་ཙི༷ཏྟ༷་བྷཱ༷་བ༷་ནོ༷་པ༷་ལ༷་སུ༷་ཝ༷་རྞྞ་དྲུ༷་ཏ༷། བོ༷ད་སྐ༷ད་དུ༷། དོན་དམ་ཆོས་ཉིད་བྱང༷་ཆུབ༷་སེ༷མས་ཀྱི་རང་བཞིན་ལྷུན་མཉམ་རྫོགས་པ་ཆེན་པོའི་དོན་ཕྱིན་ཅི་མ་ལོག་པར་གཏན་ལ་དབབ་ནས་ཇི་ལྟར་བསྒོམ༷་པ༷་ཡི་མན་
ངག་དཔེ་གསེར་རྡོ༷་ལ༷་གསེ༷ར་གྱི་ཁམས་གནས་པ་མགར་བ་མཁས་པས་ཐབས་ཀྱིས་ཞུན༷་མར་བཞུས་ཏེ་དངོས་སུ་འབྱིན་པ་ལྟ་བུའི་བསྟན་བཅོས་ཏེ་དཔེ་དོན་འབྲེལ་བའི་ཚུལ་གྱིས་སོ། །གཉིས་པ་ནི། བྱིས་པའི་ས་ལས་འདས་པའི་འཕ༷གས་
པ༷་སྤྲོས་པའི་ཟུག་ངུ་ཞི་བས་འཇ༷མ་ཞིང་། དོན་གཉིས་ཀྱི་དཔ༷ལ་དང་ལྡན་པའི་སྐུ་བགྲེས་རྒུད་དང་བྲལ་བས་གཞོ༷ན་ནུ༷ར་གྱུར༷་པ༷་དེ་ལ༷་ཕྱག༷་འཚ༷ལ་ལོ༷། །ཞེས་ལོ་ཙཱ་བས་འགྱུར་ཕྱག་མཛད་པ་དེ། དཔེ་ལ་ལར། བཅོམ་ལྡན་འདས་དབྱིངས་
གསུམ་རྣམ་པར་དག་པ་ལ་ཕྱག་འཚལ་ལོ། །ཞེས་ཀྱང་འབྱུང་ངོ་། །གཉིས་པ་གཞུང་དོན་དངོས་ལ་བཅུ་གཉིས་ཏེ། དཀོན་མཆོག་གསུམ་ལ་ཕྱག་འཚལ་བ་སྔོན་དུ་འགྲོ་བས་རྩོམ་པ་ལ་འཇུག་པ། ཅིའི་ཕྱིར་རྟོགས་པར་བྱ་བ། ཅི་
13-3-2a


ཞིག་རྟོགས་པར་བྱ་བ། ཐབས་གང་གིས་རྟོགས་པར་བྱེད་པ། གང་ལ་བརྟགས་ཏེ་རྟོགས་པར་བྱ་བ། བརྟགས་ནས་ངེས་པའི་དོན། ངེས་པའི་དོན་བསྒོམ་པ། བརྒྱུད་པའི་ཐབས་ཀྱིས་ངེས་པའི་དོན་རྟོགས་པར་
བྱ་བའི་ཐབས།  བྱང་ཆུབ་སེམས་ཀྱིས་མ་ཟིན་པའི་སྐྱོན། འདི་ལ་མོས་པ་ཙམ་སྐྱེས་པའི་ཕན་ཡོན། ལོག་པར་ཞུགས་པ་རྣམས་སྙིང་རྗེའི་གནས་སུ་བསྟན་པ། དགེ་བ་བྱང་ཆུབ་ཏུ་བསྔོ་བའོ། །དང་པོ་ནི། གང་ཟག་དང་ཆོས་ལ་
བད༷ག་མེ༷ད་པ་གཉི༷ས་ཉི༷ད་མ་ནོར་བར་རྟོགས་པ་ནི་བདེ༷་བར་གཤེག༷ས་པའི་ཐུགས་རྣམ་པར་མི༷་རྟོག༷་པའི་ཡེ༷་ཤེས༷་ཡིན་ལ།  དེ་ཐོབ་པས་དེའི་ཤེས་བྱ་ཡུལ་ཆོ༷ས་ཀྱི་དབྱིང༷ས་དང་དབྱེར་མེད་པའི་ཡེ༷་ཤེ༷ས་ཀྱི་སྐུ༷་བརྙེས༷་པ༷་སངས་རྒྱས་དཀོན་མཆོག་
དང་། ཀུན་བྱང་གིས་བསྡུས་པའི་ཆོས་ཀུན༷་གྱི༷་ར༷ང་བཞི༷ན་ཆོས་དབྱིངས་སྤྲོས་པའི་མཚན་མ་ཐམས་ཅད་ཞི༷་བ༷་འདི༷་ལ༷་སྐྱོན་བས༷ལ་ཞིང༷་ཡོན་ཏན་བླང༷་བ་མེ༷ད་ལ་དེ་ལྟར་རྟོགས་པས་བླང་དོར་མཉམ་ཉིད་དུ་རོལ་པ་ནི་ལམ་གྱི་ནང་ན་ལ༷མ་མཆོ༷ག་
སྟེ༷་འགོག་ལམ་གྱི་བདེན་པ་ཆོས་དཀོན་མཆོག་དང་། བདག་མེད་མངོན་སུམ་རྟོགས་པས་འཁོར་བར་ཡོངས་སུ་མི༷་ལྡོག༷་པ་ས་དང་པོ་རབ་ཏུ་དགའ་བ་དང་ས་བརྒྱད་པར་མཚན་མར་མི་ལྡོག་པ་ལ༷་སོག༷ས་ཏེ་ས་བཅུ་ལ་གནས་པའི་རྒྱལ་སྲས་མོས་པ་
སོགས་དབ༷ང་བཅུ༷་ཐོབ་པ་རྒྱལ༷་བ༷་ཀུན༷་དང༷་ཆོས་དབྱིངས་རྟོགས་པའི་སྒོ་ནས་སྤྱོད་ཡུལ་གཅི༷ག་པ་བརྙེས༷་པ༷་བྱང་སེམས་འཕགས་པའི་དགེ་འདུན་དང་། དེ་ལྟར་ཤེས་བྱ་ཆོས་ཤེས་བྱེད་སངས་རྒྱས་དང་དགེ་འདུན་ཏེ་སྟོན་པ་བསྟན་པ་སློབ་པའི་གན༷ས་
13-3-2b


གསུ༷མ་པོ་དེ་ལ་ཀུན་རྫོབ་ཏུ་འབྲེལ་པ་གྲུབ་པའི་སྒོ་ནས་སྐྱབས་སུ་མཉམ་ཞིང་།  དོན་དམ་པར་ཐ་དད་དུ་མི་འབྱེད་པའི་མཉམ༷་པ་ཉི༷ད་དུ་གྱུར་པ་དེ༷་ལ༷་མཚ༷ན་འཛིན་མེ༷ད་པའི་ཡི༷ད་ཀྱིས༷་ར༷བ་ཏུ༷་དངས་བའི་ད༷ད་པ༷ས་དོན་ཇི་ལྟ་བ་བཞིན་དུ་ངེས་པར་བཟུང་
བའི་མོ༷ས་པས་ཕྱག་འཚལ་བའོ། །སྤྱི་དོན་གཉིས་པ་ཅིའི་ཕྱིར་རྟོགས་པར་བྱ་བ་ལ་ཕན་ཡོན་དང་ཆེ་བ་གཉིས་ལས།  དང་པོ་ལ་གསུམ། རྒྱུར་གནས་པའི་ཕན་ཡོན། མངོན་གྱུར་འབྲས་བུའི་ཕན་ཡོན། རྣམ་པར་གྲོལ་བའི་འབྲས་
བུ་ཐམས་ཅད་ཀྱི་མཆོག་ཏུ་བསྟན་པའོ། །དང་པོ་ནི། ལྷ་མི་ལ་སོགས་པའི་སྟོན༷་པ༷་འཇི༷ག་རྟེན༷་ཀུན་གྱི་ཕྱི་དང་ནང་གི་མུན་པ་སེལ་བའི་ཡེ་ཤེས་ཀྱི་སྒྲོན༷་མར༷་གྱུར༷་པ༷་ཀུན༷་གྱིས༷་དགོངས་པ་གཅིག་དང་དབྱངས་གཅིག་གིས་མཚུང༷ས་པར༷་རབ༷་ཏུ་
བསྔག༷ས་པ༷་ནི་བྱང་ཆུབ་ཀྱི་སེམས་ཡིན་ཏེ། ཇི་ལྟར་ན་ཤེས་བྱའི་ཆོ༷ས་ཐམས་ཅད་ཀུན་ལ༷་ཡེ་ནས་གནས་པའི་ཆོས༷་ཀྱི༷་སྙིང༷་པོ༷ར་མཐར་ཐུག་པར་གྱུར༷་པ༷་བྱང་ཆུབ་ཀྱི་སེམས་སྤྲོས་པའི་ཟུག་ངུ་མེད་པའི་འཇ༷མ་པ་དེ་རྟོགས་ན་སེམས་ཅན་གྱི་དཔ༷ལ་དུ་གྱུར་པ་
སྐྱོན་དང་དྲི་མ་བྲལ་བའི་གཞོ༷ན་ནུ༷་ཤེས་བྱའི་ཆོས་ཀྱི་ནང་ན་མཆོག་ཏུ་གྱུར་པའི་སྙིང༷་པོ༷་ཉི༷ད་དེ། དེ་ལྟར་བྱང་ཆུབ་སེམས་ངེས་དོན་འཇམ་དཔལ་གཞོན་ནུའི་རང་བཞིན་མ་ནོར་བར་རྟོགས་པ་ནི་དུས་གསུམ་གྱི་བདེ༷་གཤེ༷གས་མ༷་ལུས༷་པ་འབྱུང་བའི་ཡུམ་དུ༷་གྱུར༷་
པ༷འི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ་ཚུལ་འདི་ལས་གཞན་གྱིས་འཚང་མི་རྒྱ་བས་རྒྱལ༷་བ༷་ཀུན༷་གྱི༷་ལ༷མ་གཅི༷ག་པུར་གྱུར་པ་དག་གོ༷། སངས་རྒྱས་ཀྱི་རྒྱུ་ཚོགས་ཚུལ༷་ཁྲིམ༷ས་ལ༷་སོག༷ས་པ་ཕ༷་རོ༷ལ་ཏུ་ཕྱིན༷་པ་བཅུའི་དགེ་བའི་ལ༷མ་སྤྱོ༷ད་པ༷་བསོད་ནམས་
13-3-3a


ཀྱི་ཚོགས་རྒྱ༷་མཚོ༷འི་གཞི༷ར་གྱུར༷་པ༷་ཡིན་ཏེ་བྱང་ཆུབ་སེམས་ཀྱིས་མ་ཟིན་ན་སངས་རྒྱས་སུ་མི་འགྲུབ་པས་ཚོགས་དེ་དག་གི་གཞིའོ། །གཉིས་པ་ནི། སྤྲོས་པ་རྣམ་པར་དག༷་པའི་བྱང༷་ཆུབ༷་སེམས་ཀྱི༷་རང་བཞིན་ནམ་
ང༷ང་ཚུལ༷་མ་ནོར་བར་བསྒོམ༷་པ་དང༷་དེ་མངོན་དུ་གྱུར་པའི་ཡོ༷ན་ཏན༷་གྱི་ཁྱ༷ད་པ༷ར་ནི༷། ཆོས་དབྱིངས་རྟོགས་ནུས་པའི་བློ༷་ལྡན༷་དེས་ནམ༷་ཞི༷ག་དོན་དམ་བྱང་ཆུབ་སེ༷མས་ཀྱི༷་ད༷མ་པ༷་དེ༷་ནི༷་གཉིས་སུ་མེད་པའི་ཚུལ་དུ་མངོ༷ན་དུ༷་གྱུར༷་པ༷་ན༷། དེ༷་ལ༷་ནི་ཆོས་
ལོངས་སྤྲུལ་པ་སྟེ་སྐུ༷་གསུ༷མ་གྱི་ནང་ན་ཡེ་ཤེས་དང་ཕྲིན་ལས་གཟུགས་སྐུ་གཉིས་པོའི་རྟེན་དུ་གྱུར་པ་སོགས་མཆོ༷ག་ཏུ་གྱུར༷་པ༷་ཆོས༷་ཀྱི༷་སྐུ༷་ཞེ༷ས་རྒྱལ༷་བ༷ས་གསུང༷ས་སོ། །ཡུལ་ཤེས་བྱ་ཐམས་ཅད་ཤེས་པར་བྱེད་པའི་ནང་ན་ཤེ༷ས་བྱེ༷ད་ད༷མ་པ༷ར་གཅིག་པུ་
གྱུར༷་པ་སྟེ་དེའི་ཡུལ་ནི་ཤེས་བྱ་ཐམས་ཅད་ཀྱི་མཆོག་ཏུ་གྱུར་པ༷ས་ན་ཡུལ་ཅན་དེའང་ཤེ༷ས་ར༷བ་སྤྱན༷་ཞེ༷ས་ཀྱང༷་ནི༷་དེ༷་ལ༷་བྱ༷་སྟེ་ཤ་ཡི་སྤྱན་སོགས་ལས་ཁྱད་པར་དུ་འཕགས་ཤིང་བླ་ན་མེད་པའོ། །མི་ཕྱེད་ཅིང་གཞན་གཅོད་པས་རྡོ༷་རྗེ༷་དང་ཀུན་གྱི་བླ་ན་ཡོད་
པས་རྩེ་མོ༷་མཆོ༷ག་ཉི༷ད་ཀྱང་ཡིན་ལ་ཡེ་ཤེས་ཀུན་གྱི་གཞི་རྟེན་རྣམ་པར་མི༷་རྟོག༷་པའི་ཡེ༷་ཤེ༷ས་དེ༷་ཡ༷ང་བྱང་ཆུབ་ཀྱི་སེམས་དེ༷་ཉི༷ད་དོ༷།། གསུམ་པ་ནི། ཕྱོགས་དུས་ཀྱི་བསྡུས་པ་ཇི༷་སྙེད༷་ན་འཕ༷གས་པ༷འི་སྟེ་ཉན་རང་བྱང་སེམས་སངས་རྒྱས་བཞིའི་
འཁོར་བ་སོགས་ལས་རྣམ༷་པར་གྲོལ༷་བའི་འབྲས་བུའི་ཡོན་ཏན་གྱི་ཆོས༷་སུ༷་བསྟན་ཅིང་བསྙད༷་པ༷་དེ༷་ད༷ག་ཐ༷མས་ཅ༷ད་ཀྱང༷་། བྱང༷་ཆུབ༷་སེ༷མས་ཉི༷ད་མཐར་ཕྱིན་པར་རྟོགས་ཤིང་རྫོ༷གས་པ་ལ༷ས་འབྱུང་ཞིང་འབྲིང་དང་ཆུང་ངུ་རྟོགས་ནའང་སོ་སོའི་རྣམ་
13-3-3b


གྲོལ་དེ༷་ཡི༷་ཡོ༷ན་ཏན༷་དེ༷་ད༷ག་ནི་བྱང་ཆུབ་ཀྱི་སེམས་དེ༷་ལ༷ས་འབྱུང༷་བར་ཟད་དོ། །དེས་ན་རྣམ་གྲོལ་གྱི་འབྲས་བུའི་གཞི་ཡིན་ནོ། །གཉིས་པ་ཆེ་བ་བསྟན་པ་ནི། ཉན་ཐོས་ལ་སོགས་པའི་རིགས་ཀུན་གྱི་ནང་ན་འབྲས་བུའི་ཡོན་ཏན་ཆེ་བའི་ཐེག་ཆེན་གྱི་རིགས་
ནི་འཕ༷གས་པ༷འི་རི༷གས་ཆེ༷ན་པོ་ཅན་གཏན་དུ་འཆི༷་བ་མེ༷ད་པ་དེ་ཡི་གོ་འཕང་བྱང༷་ཆུབ༷་ཆེན་པོ་ལ་དམིགས་ནས་དེ་སྒྲུབ་པ་ལ་སེ༷མས་དཔ༷འ་བ་ཇི་སྙེད་པ་དེ༷་ད༷ག་ཐ༷མས་ཅ༷ད་ཀྱང༷་། བྱང་ཆུབ་སེམས་དེ༷་མེ༷ད་ན་མི༷་འབྱུང༷་བ་དེ༷་ཕྱིར༷་བྱང་ཆུབ་སེམས་དེ༷་ནི༷་རྣམ༷་པར་གྲོ༷ལ་
བ་མཆོ༷ག་གི༷་ལ༷མ་གོང་ན་མེད་པ་ཉི༷ད་དོ༷། །སྤྱི་དོན་གསུམ་པ་ཅི་ཞིག་རྟོགས་པར་བྱ་བ་ནི། སེམས་ཀྱི་མཚན་ཉིད་མ་རིག་པའི་སྒྱུ་ཐབས་ཀྱིས་ཀུན་ཉོན་གྱི་ཆོས་ཐམས་ཅད་སྣང་ལ་སེམས་ཀྱི་རང་བཞིན་མ་བཅོས་པའི་རྡོ་རྗེ་ལ་སེམས་པ་དེའི་ཚེ་རྣམ་
གྲོལ་གྱི་འབྲས་བུ་ཕུན་ཚོགས་རྣམས་སུ་སྣང་བ་དེ༷ས་ན༷་བྱང་ཆུབ་ཀྱི་སེམས་ནི་དོན་ཆེ་ཞིང་བསམ་བརྗོད་ལས་འདས་པས་ན་དུས་དང་གནས་སྐབས༷་ཀུན་ཏུ་ཡང་གང་ཅིས་ཀྱང་མི་ཤིགས་ལ་སྒྲིབ་པའི་དྲ་བ་གཅོད་པས་རྡོ༷་རྗེ༷་སེམས་ཀྱི་ཆོས་ཉིད་མ་ནོར་བ་ལ་
དམིགས་པའི་སེ༷མས་དཔ༷འ་འམ་བྱང་ཆུབ་སེམས་དེ་ནི་ཅི༷་འདྲར༷་བསྒོམ༷་པ༷ར་བྱ༷་བ༷ར་འགྱུར༷་ཞེས་དྲི་ན། བློ་རྩིང་བས་མི་རྟོགས་པས་ཟབ་ཕྱིར་ཕྲ༷་ཞིང༷་འཇིག་རྟེན་པའི་ལམ་གྱིས་ཤེས༷་པར་དཀ༷འ་བ་རང་དྲང་པོའི་ལམ་དུ་ཞུགས་ཤིང་གཞན་དེ་ལ་འཛུད་
པས་དྲ༷ང་སྲོང༷་ཆེ༷ན་པོ༷འི་སྟེ་སངས་རྒྱས་པའི་ལ༷མ་འདི༷་ནི་ཡུལ་ཐ་དད་པར་མི༷་རྟོག༷་པའི་ཡུལ་དུ་འདིའོ་ཞེས་འཛིན་པ་དང་རྟོག༷་པའི་ཡུལ་དུ་འདིའོ་ཞེས་འཛིན་པ་གཉིས་ཀའི་ཡུལ་ལ༷ས་འད༷ས་པས་ན། ཡུལ་དུ་གཞལ་བའི་བློ་གང་གིས་ཀྱང་དམིགས་རྣམ་
13-3-4a


གྱི་ཚུལ་དུ་བརྟག༷་པ༷ར་ད༷ཀའ་ཞིང༷་གཞན་ལ་འདི་ཞེས་ཇི་ལྟ་བ་བཞིན་དུ་བསྟན༷་པ༷ར་དཀ༷འ་ལ༷་དོན་སྤྲོས་པ་མེད་ཅིང་ཚིག་གིས་མི་མཚོན་པས་བརྗོ༷ད་པ༷འི་ཐ༷་སྙད༷་རྣམ༷ས་ད༷ང་བྲ༷ལ་བས་ན། ཚི༷ག་གི༷ས་ཇི་ལྟ་བ་བཞིན་དུ་མི༷་ལེ༷གས་
ཤིང་ཐེག་ཆེན་ལས་གཞ༷ན་ཉན་ཐོས་ལ་སོགས་པ་ད༷ང་བྱིས༷་པ༷་སོ་སྐྱེ་ཀུན༷་གྱི༷་སྤྱོ༷ད་ཡུ༷ལ་མ༷་ཡི༷ན་མོད་དེ་ལྟ་ན་ཡ༷ང་རྟོགས་ཐབས་མེད་པ་ནི་མ་ཡིན་ནོ། །སྤྱི་དོན་བཞི་བ་གང་གིས་རྟོགས་པར་བྱེད་པ་ནི། འོ་ན་གང་གིས་རྟོགས་ཤེ་ན་སྟོན༷་པ༷འི་གསུང་དྲང་དོན་
མ་ཡིན་པ་དོན་དམ་ངེ༷ས་པ༷འི་དོན་གྱི་ལུ༷ང་ད༷ང་བླ༷་མ༷་མཁས་པ་རྣམ༷ས་ཀྱི༷་མ་ནོར་བར་རྟོགས་པའི་ཉམས་ཀྱི་མ༷ན་ང༷ག་ནི་བྱང་ཆུབ་སེམས་གཏན་ལ་འབེབ་ཅིང་རྟོགས་བྱེད་ཀྱི་ཐབས་སམ་དོན༷་མ་ནོར་བས་སྐབས་འདི༷ར་སྟེ་འདིའི་དོན་ཡིན་པར་ཤེས་པའམ་བལྟ་
བར་བྱའོ། །དེ་ལ་འཁྲུལ་ཤེས་ཚད་མ་མིན་ཏེ་འདིར་མངོ༷ན་སུམ༷་དང་ལ༷་སོ༷གས་པ་སྟེ་རྗེས་དཔག་གི་རྒྱུའ༷མ་གཏན་ཚིག་དེ་ཡི༷ས་ཀུན་བྱང་གི་དངོ༷ས་པོ༷་རྣམས་ལ་འཇི༷ག་ཅི༷ང་ཡོད་མེད་ཇི་ལྟ་བུར་གྲུ༷བ་པ༷འི་མཐ༷འ་རྣམ་པར་དཔྱོ༷ད་པ་ན། དཔྱོད་པ་དེ༷་ཉི༷ད་
ཕྱིན་ཅི་ལོག་གི་རྣམ་པར་རྟོག༷་པ༷འི་རྒྱུན༷་གྱི་རྗེས་སུ་འབྲང༷ས་ཏེ་ནོར་བའི་བློས་ལོག་པར་མཐོང་བའི་སྤྱོ༷ད་ཡུལ༷་ཚ༷ད་མ༷ར་བཞ༷ག་ན༷ས་ལོག་པའི་བློ༷་ཡི༷ས་འཇི༷ག་ཅིང་དཔྱོད་པར་བྱེ༷ད་དེ༷། དཔེར་ན་ཐག་པ་སྦྲུལ་དུ་མཐོང་བ་ལ་བདག་གིས་མངོན་སུམ་མཐོང་
བས་ཅིའི་ཕྱིར་སྦྲུལ་མེད་ཅེས་རང་གི་འཁྲུལ་པས་ཚད་མར་བཟུང་བ་ཚད་མར་མི་རུང་བ་ལྟ་བུའོ། །ཅིའི་ཕྱིར་ན། དེ་ལ་རྟོག༷་པའི་སེམས་དོན་དམ་པའི་དོན་དུ་བརྟགས་ན་མཐ༷འ་འམ་འདི་ཞེས་གྲུབ་པ་ཅུང་ཟད་མེ༷ད་པའི་ཕྱིར༷་རྟོག་པ་དེས་དཔྱོ༷ད་པའི་
13-3-4b


མཐ༷འ་ཡང་མེ༷ད་དེ༷་དེ་ལྟར་ན་འཇོག་བྱེད་ཀྱི་ཚད་མ་ཞེས་དཔྱད་བཟོད་ཀྱི་སྙིང༷་པོ༷་ཅན་ཅི་ཡང་མེ༷ད་ན༷་ཡུལ་འཇོག་བྱེད་ཀྱི་ཚད༷་མ༷་ནི་གང༷་ཡིན་ཏེ་ཡང་དག་པར་གྲུབ་མི་སྲིད་དོ། །ཡང་དག་དཔྱོད་པ་ལ་འཇིག་རྟེན་ཚད་མར་མི་རུང་བ་དེ༷་ཕྱིར༷་འཇི༷ག་རྟེན༷་པས་བརྟ༷གས་
པ༷འི་ཐ༷་སྙད༷་ལ་ཚད་མར་འཇོག་པ་ཡོད་མོད་ཀྱི་ཡང་དག་པའི་དོན་ལ་རྣལ༷་འབྱོར༷་དུ་བྱེད་པའི་ལ༷མ་གྱི་སྐབས་འདི༷ར་འཇིག་རྟེན་འཁྲུལ་པའི་ཐ་སྙད་ཚད་མར་བཟུང་མི༷་དགོ༷ས་སོ༷། །སྤྱི་དོན་ལྔ་པ་གང་ལ་བརྟགས་ཏེ་རྟོགས་པར་བྱ་བ་ལ་གཉིས། ཀུན་ནས་
ཉོན་མོངས་པ་དང་། རྣམ་པར་བྱང་བའི་དངོས་པོ་ལ་བརྟགས་པའོ། །དང་པོ་ལ། འཁྲུལ་པའི་བདག་ཉིད་ཡིན་ཚུལ་དང་། འཁྲུལ་པ་དེ་ཇི་ལྟར་སྣང་བའི་ཚུལ་གཉིས། དང་པོ་ནི། བརྟག་བྱ་ཀུན་ཉོན་གྱི་དངོ༷ས་པོ༷་ཇི་ལྟར་གྲུབ་པའི་མཐའ་བརྟག་པ་
ཡི༷་རྒྱུ༷་ནི༷་དངོས་པོ་རྣམས་ཀྱི་ལོ༷་རྒྱུས༷་ཇི་ལྟ་བ་མ་ནོར་བར་བརྟག་པ་དག༷་ལ༷ས་བླ་མེད་ཀྱི་ལ༷མ་ཚོལ་བའི་སྐབས་འདི༷ར་མ་ནོར་བ་ལ་བརྟག༷་པ༷ར་བྱ༷་སྟེ། སྐྱེ་བོ༷་ཀུན༷་གྱི༷་སེ༷མས་ལ༷་ཡུལ་དུ་མངོ༷ན་པར་སྣང༷་ཞིང་རིག་པ་ཕྱི༷་ཡུལ་དྲུག་དང་ནང༷་གི་དབང་པོ་དྲུག་ཡོད་པར་
གྲག༷ས་པའི༷་ཆོ༷ས་འདི༷་ནི༷། ལེགས་པར་བརྟགས་ན་འཇུག་ཤེས་འཛི༷ན་པ༷་དྲུག༷་གི༷ས་ཇི༷་ལྟར༷་མཐོ༷ང་ཞི༷ང་ཐོས་སོགས་ཀྱི་སྒོ་ནས་ཡུལ་དུ་ཡོད་པར་བརྟག༷་པ༷་དེ་ནི་ཅི་ལྟར་སྣང་ཞིང་བཏགས་པ་དེ༷་ལྟར༷་ཡོད་པ་མ༷་ཡི༷ན་ཏེ་འཁྲུལ༷་བའི་ཕྱིར་རོ། །ར༷ང་གི༷་མ་རིག་པའི་རྟོག༷་
པ༷ས་མྱོང༷ས་ཤི༷ང་བཟུང༷་བ༷་དེ་དེ༷་བཞི༷ན་དུ་དངོས་པོའི་གནས་ལའང་བདེ༷ན་པ༷ར་གྱུར༷་ན༷་ནི༷། སོ་སྐྱེ་དེ༷་ད༷ག་དངོས་པོའི་རང་བཞིན་མཐོང་བས་བདེན་པ་མཐོང་བར་བྱེ་བྲག་མེད་པས་དངོ༷ས་པོ༷་མེ༷ད་པར་རྟོག༷་པའི་དགྲ༷་བཅོ༷མ་རྣམས་དང་འདྲ༷་བ༷ར་འཁོར་བ་ལས་རྣམ་
13-3-5a


པར་གྲོ༷ལ་བ༷ར་འགྱུར༷་བ༷འི་རི༷གས་ཏེ་འགྱུར་རིགས་ན་ཡང་། སོ་སྐྱེ་དེ༷་ད༷ག་ན་འཆི་སོགས་དུས༷་ཀྱི་དགྲས༷་འཇོ༷མས་པ་ད༷ང་སྡུག༷་བསྔ༷ལ་གསུམ་དང་བརྒྱད་ཀྱིས་ཉེན༷་པ་ལ༷ས་དེ༷ས་འཁྲུལ༷་བ་ཡིན་པར་གསལ་བའམ་མངོ༷ན་པ༷ར་འགྱུར༷་
རོ། །གཞ༷ན་དུ༷་འཁྲུལ་བ་མིན་པར་མིག་སོགས་སྐྱེ༷་མཆེ༷ད་བཅུ་གཉིས་ཀྱི་སྒོ༷་ནས༷་རི༷ག་པ༷་དེ༷་ད༷ག་ཚད༷་མ༷ར་གྱུར༷་པ་ཡིན་ན༷་ནི༷། སེམས་ཅན་གྱི་མཐོང་བ་དེ༷་ད༷ག་ཚ༷ད་མ༷ར་གྱུར༷་པ༷ས་སེམས་ཅན་རྣམས་ལ་འཕགས་ལམ་རང་ཆས་སུ་ཡོད་པས་ན་འཕ༷གས་པ༷འི་
ལ༷མ་དེ༷་གསར་དུ་སུ་ལ༷འ༷ང་དགོ༷ས་པ་མི༷་འགྱུར༷་ན་ཡང་། སེམས་ཅན་གྱིས་མཐོང་བའི་ལ༷མ་དེ༷་རྣམ༷་པར་གྲོལ༷་བའི་ལ༷མ་དུ༷་བསྟན༷་ཅིང༷་དབང་པོ་བེམ་པོ་ལ་བརྟེན་ནས་སྐྱེས་པ་དབ༷ང་པོ༷འི་ཤེ༷ས་པ༷ས་འཁོར་བའི་སྡུག་བསྔལ་ལས་མི༷་ཐ༷ར་ཏེ༷། དེ་ཅིས་ན་སེམས་ཅན་
གྱི་མཚན་མ་སྣ་ཚོགས་སུ་མཐོང་བའི་ཤེས་པ་དེས་ནི་སྡུག༷་བསྔ༷ལ་འག༷འ་ཡ༷ང་མི༷་འཇི༷ལ་བར་མ་ཟད་དེ་ལྟ་བུའི་རྣམ༷་རི༷ག་གི་ཤེས༷་པ་དེ༷་ནི་ཉོ༷ན་མོ༷ངས་འབྱུང༷་བ༷འི་གན༷ས་ཡིན་ནོ། །དེ༷་ཕྱིར༷་སོ་སོའི་སྐྱེ༷་བོ༷ས་མཐོ༷ང་བ༷་དེ༷་ད༷ག་དངོས་སྟོབས་ཀྱི་རིགས་པས་འཁྲུལ༷་བ༷ར་
མངོ༷ན་ཞི༷ང་ལུང་ལས་ཀྱང་རྒྱལ༷་བ༷ས་འཁྲུལ་བར་གསུང༷ས་སོ། །གཉིས་པ་ལ་ས་བཅད་རྙིང་པར་རྣམ་གྲངས་དགུར་གསུངས་ཀྱང་འདིར་འཆད་བདེ་བའི་དབང་དུ་བྱས་ཏེ་གཉིས། ཐ་སྙད་དུ་ཇི་ལྟར་སྣང་བར་བསྟན་པ་དང་། དོན་དམ་པ་རང་བཞིན་མ་
གྲུབ་པར་བསྟན་པའོ། །དང་པོ་ལ་གསུམ། གང་ལས་སྣང་བའི་གཞི་ངོས་བཟུང་བ། དེ་ལས་གཞན་དུ་འདོད་པ་གོལ་བར་བསྟན་པ། དེའི་རང་བཞིན་ཇི་བཞིན་པ་ཇི་ལྟ་བ་གཏན་ལ་ཕབ་པའོ། །དང་པོ་ནི། འཁྲུལ་པར་མངོན་པ་དེ༷ས་ན༷་འཁྲུལ་
13-3-5b


བའི་སྣང་བ་འདི༷་ད༷ག་སེམས་ཅན་རྣམས་ལ་འཁྲུལ༷་བ༷འི་དབ༷ང་གི༷ས་ཇི༷་ལྟར༷་སྣང༷་བ༷ར་འགྱུར༷་ཞེ༷་ན༷། སེམས་ཅན་རྣམས་ཀྱི་སེམས་ནི་རང་བཞིན་གྱིས་ཀུན༷་ཏུ༷་རྟོག༷་པ་ཅ༷ན་ཡིན་ལ་དེ་ཡང་ཡང༷་དག༷་མ༷་ཡི༷ན་པ་གཟུང་འཛིན་དུ་རྟོག་པའི་ཀུན༷་ཏུ༷་རྟོགས༷་པ༷ས་ཐོག་མེད་ནས་
ཀྱང་རྩོལ༷་བ་མེ༷ད་པར་རང་བཞིན་གྱིས་ཉམ༷ས་ཏེ་འཁྲུལ་བའོ། །དེ་ལྟར་ཡང་དག་པའི་དོན་མ་མཐོང་བས་བློ༷་གྲོ༷ས་ཕྱིན༷་ཅི༷་ལོ༷ག་ཏུ༷་གྱུར༷་ཅི༷ང་དངོས་པོའི་གནས་ཚུལ་ལས་གོལ་བའི་མ༷་རི༷ག་པའི་རྐྱེན༷་གྱི༷་དབ༷ང་དུ་སོང༷་བ༷ས་བདེན་པ་མཐོང་བའི་སྟོབས་དང་མི་ལྡན་
པས། སེ༷མས་རྣམ་ཤེས་ཚོགས་བརྒྱད་ད༷ང་སེ༷མས་ལ༷ས་བྱུང༷་བ༷་ལྔ་བཅུ་རྩ་གཅིག་དེ༷་ཉི༷ད་འོག་ནས་འབྱུང་བའི་ལུས༷་གསུམ༷་གྱི་དོ༷ན་གཟུགས་བདག་ཤེས་གསུམ་དུ༷་སྣང༷་བ༷་ཡི༷ན་ནོ། །དགེ་སྡིག་གི་ལས་ཀྱི་འདུ༷་བྱེ༷ད་སྣ༷་ཚོ༷གས་ད༷ག་གི༷ས་བ༷ག་ཆ༷གས་
བས༷གས་ལ༷ས་ག༷ང་གོ༷མས་པའི་དབང་གིས་སྔ་མའི་བག་ཆགས་མཐུ༷་བརྟས༷་ཏེ་འབྲས་བུ་འབྱིན་པའི་མཐུ་དང་ལྡན་པའི་ཚེ། རང་གི་སེ༷མས་ཉི༷ད་ཕྱི་ཡུལ༷་ད༷ང་ནང་གི་ལུས༷་འདྲར༷་སྣང༷་བ༷་ནི་དཔེར་ན་མི་སྡུག་པ་གོམས་པས་ས་ཕྱོགས་ཐམས་ཅད་རུས་
པ༷ས་གང༷་བར༷་སྣང་བ་བཞི༷ན་དུ༷་རང་སེམས་དེར་སྣང༷་བ་ཡིན་ནོ། །ཀུན་གཞི་བག༷་ཆག༷ས་སྣ་ཚོགས་བས༷གས་པ་དང་བཅས་པ༷འི་རྒྱུན༷་ལ༷་ངའོ་སྙམ་པའི་དམི༷གས་པ་སྐྱེས༷་པ་ཡིན་གྱི་ངའོ་སྙམ་པའི་ཡི༷ད་ཙམ་ལ༷ས་ནན་ལྟར་བརྟག༷ས་པ༷འི་ཡུལ་བད༷ག་
ནི༷་མེ༷ད་དེ་ཐག་པར་སྦྲུལ་དུ་འཁྲུལ་པ་ན་སྦྲུལ་འཛིན་ཙམ་ལས་སྦྲུལ་མེད་པ་བཞིན་ནོ། །སེམས་ཀྱིས་འ༷དུ་བྱེ༷ད་ཀྱི་ཆོས་རགས་པར་སྣང་བའི་མཐུ༷་ཡི༷ས་ཀུན་གཞི་ཕྲ་བ་དེ་རྟོགས་དཀའ་བ་བསྒྲི༷བས་ཤིང༷་ཕྲ༷་བ༷་མ༷་མཐོ༷ང་བ་ཀུན་གཞི་དེ༷་ལ༷ས་རྣམ༷་པར་རི༷ག་
13-3-6a


པ་ཐམས་ཅད་སྐྱེ༷་བ་ལ་རྣམ་པར་རིག་པར་སྒྲོ་བཏགས་པ་སྨིག་རྒྱུ་ལ་ཆུ་བཞིན་ནོ། །གཉིས་པ་ནི། ཅིའི་ཕྱིར་སྣང་ན་ཐག་པའི་རང་བཞིན་མ་མཐོང་བ་ལས་སྦྲུལ་དུ་འཁྲུལ་པ་ལྟར་བག་ཆགས་སྣ་ཚོགས་པ་འཛིན་ཞིང་རྒྱུན༷་དང་
བཅས༷་པ༷འི༷་བདག་ཉིད་ཀུན་གཞི་སེ༷མས་ཀྱི༷་མཐུ༷་ཡིས་རྣམ་པ་སྣ་ཚོགས་སུ་སྣང་བར་ནི༷་མ༷་རྟོག༷ས་པར་སྣང་བ་ཐམས་ཅད་རང་གི་ངོ་བོས་ཡོད་པར་བཟུང་བའི་ཕྱིན་ཅི་ལོག་གི་རྟོག༷་པའི་རྗེ༷ས་སུ་འབྲང༷་ན༷ས། ལོག་པའི་རྗེས་སུ་འབྲང་བ་དེ༷་ལ༷ས་འཁོར་བར་
ཟག་པ་དང་བཅ༷ས་པའི་རང༷་བཞི༷ན་ཏེ་འཁོར་བའི་རྒྱུར་གྱུར་པའི་རྟོག༷་པ༷ས་མེད་བཞིན་བརྟགས་པའི་བད༷ག་ད༷ང་ཕྱི་ནང་གི་ཆོ༷ས་རྣམ༷ས་གྲུབ་གྲུབ་ལྟར་རྒྱས༷་པ༷ར་འགྲུབ་པར་བྱེ༷ད་དེ། བག་ཆགས་དང་ལྡ༷ན་པ༷ར་འབྱུང༷་བ༷་ཤིན༷་ཏུ༷་ཕྲ༷་བ༷ར་རྒྱུ༷་བ༷་ཀུན་གཞི་སྐད་
ཅིག་མའི་ཕྲེང་བ་དེ༷་ནི༷་མ༷་མཐོ༷ང་བ༷ས། བད༷ག་ཏུ༷་ལྟ༷་བ་ལ་སོག༷ས་པ་མུ༷་སྟེག༷ས་པའི་ལྟ༷་བ༷་སྣ༷་ཚོག༷ས་པ་སྐྱེ་ཞིང༷་ལམ་དང་དེ་ལས་ཐ༷ར་བ༷ར་ཡང་རྟོག༷་གོ། དེ་ཅིའི་ཕྱིར་ན། སེ༷མས་ཀུན་གཞི་འདི༷་ནི་དགེ་སྡིག་གི་ལ༷ས་རྣམ༷ས་ཀྱི་བག་ཆགས་མཐ༷འ་ཡ༷ས་
པའི་གན༷ས་སུ་གྱུར༷་པས་ན་ཀུན་གཞི་ལ་བག༷་ཆག༷ས་གནས་པའང་མཐ༷འ་མེ༷ད་པས་བག་ཆགས་འདི་མི་གནས་ཞེས་ངེ༷ས་པ༷་བཟུང་དུ་མེ༷ད་ལ། རྒྱུར་གྱུར་པའི་བག༷་ཆག༷ས་དེ་དག་བརྟས༷་ཤིང༷་འབྲས་བུའི་ངོ་བོར་སད༷་པ༷ར་བྱེ༷ད་པ༷འི་རྐྱེན༷་ཡ༷ང་རྣམ༷་པ༷་སྣ༷་ཚོ༷གས་
ཏེ༷་དགེ་བས་མཐོ་རིས་དང་ཉོན་མོངས་དང་མི་དགེ་བས་ངན་སོང་དུ་སྐྱེ་བའི་བག་ཆགས་སད་པ་མང་ཞིང་། མིར་སྐྱེ་བའི་རྐྱེན༷་འག༷ས་ཚེ་སྔ་མ་ལ་མིར་སྐྱེས་པའི་བག༷་ཆ༷གས་ཀུན་གཞི་ལ་བཞག་པ་འག༷འ་ཞི༷ག་སྨིན༷་ན༷ས་ད་ལྟ་མི༷་ཡི༷་རྒྱུ༷ད་ཀྱི༷་ལུས༷་བླང༷་ལ། རྐྱེན་
13-3-6b


གཞ༷ན་ལྷ་ལ་སོགས་སུ་སྐྱེ་བ་ད༷ག་གི༷ས་ལྷ་སོགས་སུ་སྐྱེ་འགྱུར་གྱི་བག༷་ཆག༷ས་གཞ༷ན་ས༷ད་པར་བྱས༷་ཚེ༷་གནས་སྐབས་སྔ་མ་ལས་སྲིད་པ་གཞན་དུ་འགྱུར༷་བ༷འི་མཐུ༷་མཐོ༷ང་ན༷ས། དབ༷ང་ཕྱུག༷་ལ༷་སོ༷གས་པ་འཇིག་རྟེན་གྱི་བྱེ༷ད་པ༷ར་འདོ༷ད་པ༷འི་བློ་ངན་སྐྱེ་ཞིང་ཚུལ་
དེས་བཞག་པའི་ལ༷མ་དེ༷ས་སྡུག་བསྔལ་ཕྲ་མོའང་མི༷་ཞི༷་ཞིང་ཁམས་གསུམ་ལས་གྲོལ་བར་མི༷་འགྱུར༷་རོ། །ཡང་དག་པའི་དོན་ལ་རྣལ༷་འབྱོར༷་དུ་བྱེད་པའི་ལམ་ལས་ལོག་ཅིང་ཕྱིན་ལོག་གི་རྟོག་པས་ལ༷མ་བསླ༷ད་པ་དང་ལམ་དེ་ལ་ཐེ༷་ཚོམ༷་སྐྱེ་བའི་རྒྱུ༷་ཡ༷ང་ཀུན་
གཞིའི་རྒྱུན༷་འདི༷་ཕྲ༷་བ༷་རབ་ཀྱི་ངང་ཚུལ་དུ་རྒྱུ་བ་མ༷་རྟོག༷ས་པ་ལས་སྐྱེ༷་སྟེ་ཐག་པར་མ་ཤེས་པ་སྦྲུལ་དུ་འཛིན་པའམ་ཐེ་ཚོམ་ཟ་བ་ལྟ་བུའོ། །མ་རྟོགས་པའི་ཉེས་པ་ནི་བད༷ག་ཏུ༷་བརྟག༷ས་པ༷ས་རང་རྒྱུད་ཡོ༷ངས་སུ༷་བསྒྲིབ༷་སྟེ༷་བདག་ཏུ་མི་རྟོག་པ་འཕ༷གས་པའི་རི༷གས་
ད༷ང་རྣམ༷་པ༷ར་བྲ༷ལ༷་ཏེ་སོ་སྐྱེ་ཉིད་ལས་མི་འདའ་ལ། སྣ་ཚོགས་པའི་ཆོས༷་སུ༷་བཏག༷ས་པ༷འི་ལས་སྣ་ཚོགས་སྤྱད་ནས་སྡུག༷་བསྔལ༷་སྣ༷་ཚོག༷ས་འབྱུང༷་ཞིང༷་མི་དགེ་བའི་ལས་ཀྱིས་ང༷ན་སོ༷ང་གསུམ་སྲི༷ད་པ༷ར་འགྱུར༷་བ་ཡིན་ནོ། །གསུམ་པ་ལ་དངོས་དང་
འཐད་པ་གཉིས། དང་པོ་ནི། རྣམ༷་པ༷ར་ཤེས༷་པ་དེ༷་ཡ༷ང་གཟུགས་སྒྲ་སོགས་འདུ༷་བྱེ༷ད་རྒྱུན༷་ལ༷་མཚན་ཉིད་སོ་སོའི་མཚ༷ན་མ༷་ཐ༷་ད༷ད་དུ་འཛི༷ན་པ༷ས་ན༷། ཡུལ་ཤེས་བྱ་བརྒྱད་ཡོད་པས་མཐོང་བར་བྱེད་པ་སོགས་བྱེད་ལ༷ས་ཀྱི༷་ཁྱ༷ད་པ༷ར་དག་གི༷ས་
རྣམ་པར་ཤེས་པ་ཚོགས་བརྒྱ༷ད་དུ༷་སྣང༷་གི༷་ཤེས་ཤིང་རིག་པའི་རིགས་སུ་གཅིག་པས་རིག༷ས་ལ༷་ནི་དུ༷་མ༷་མེ༷ད་དོ། །སེམས་ལ་དུ་མ་མེད་པ་དེ༷་ཡི་ཕྱིར༷་སེ༷མས་ཀྱི༷་སྐ༷ད་ཅི༷ག་ད༷ང་པོ༷་སྟེ་ཀུན་བསྐྱེད་པའི་གཞིར་གྱུར་པ་ཀུན་གཞིའི་སྐད་ཅིག་མ་ཁོ་ན་དེ༷་ལ༷་དབང་
13-3-7a


པོ་དང་བཅས་པའི་ལུས༷་ད༷ང་མ་ལུས་པའི་ཆོ༷ས་ཀུན༷་གན༷ས་སོ། །སྔ་མ་དེ༷་དག་ལ༷་བས༷མ་པ༷་ཇི་ལྟ་ཇི་ལྟར་ཞེ༷ན་ཅིང་ཆགས་པའི་ཕྱིར༷་བློ་ཕྱི༷་མ༷་དེ༷་ལ༷་སྔ་མ་དེ༷་ལྟ་བུར་འབྱུང༷་ཞིང་དེ༷་ལ༷་བག་ཆགས་སྨིན་པས་སྣ་ཚོགས་སུ་སྣང༷་བར་
འགྱུར་རོ། །དེ་ལྟར་ར༷ང་སེ༷མས་སྐད་ཅིག་མའི་རྒྱུན༷་ལ༷ས་འཕགས་པ༷་དང་སོ་སོའི་སྐྱེ༷་བོ༷འི་ཆོ༷ས་ནི༷་གཞ༷ན་ན༷་ཡོ༷ད་པ་མ༷་ཡི༷ན་ཏེ་ཆོས་ཀུན་སེམས་ལ་གནས་པའི་ཕྱིར་རོ། །ལྷ་ལ་སོགས་པའི་རྒྱུད་དྲུག་གི་རི༷གས་དྲུག་ཡོད་ལ༷་དེ༷་ལ་ཡ༷ང་ནང་གསེས་སྣ༷་ཚོག༷ས་སུ་
ཡོད་པ་དེ༷་དག༷་ནི་རང༷་རང་གི༷་ཐོག་མེད་ནས་གོམ་གོམས་པའི་ཏིང༷་ངེ་འཛི༷ན་གྱི་མཐུས་སྣང་བར་གྱུར་ཏོ༷། །གཉིས་པ་ལ་གཉིས་འཐད་པ་བསྟན། མི་འཐད་པ་བརྒལ་ནས་བཤད་པའོ། །དང་པོ་ནི། ཀུན་བྱང་ཀུན་རང་སེམས་ཡིན་ལ་སེ༷མས་
རྒྱུན༷་དེ༷་ནི༷་ཡོད་མེད་ལ་སོགས་པའི་ཕྱོགས་དང་ཤར་ལ་སོགས་པའི་ཕྱོག༷ས་དང་ཕྱོགས་གང་དུ་གནས་པ་དག་ཀྱང༷་ཅུང༷་ཟ༷ད་མེ༷ད་པས༷་གཅིག་ཏུ་བསྟན་དུ་མེད་པས་གཅི༷ག་ལ༷འང༷་བསྟན༷་པ་མེ༷ད་དེ༷། སེམས་དེ༷་ལ༷་ཕྱོག༷ས་ཅུང་ཟད་མེད་པའི་ཕྱིར༷་ན༷་ཐ་དད་
དུ་དབྱེར་མེད་པས་དག་མ་དག་གི་ཕྱོགས་གཅིག་ཡོད་ན་ནི་གཅིག་གི་མཚན་ཉིད་དུ་བསྟན་མི་རུང་སྟེ་དངོས་པོ་ལྟ་ཅི་ནམ་མཁའ་ལྟ་བུའི་དངོས་མེད་ཞིག་ཡིན་ནོ་ཞེ་ནའང་ནམ་མཁའ་སྟོང་པའི་ཤར་ནུབ་ལ་སོགས་པ་མཐའ་དབུས་བྱེ་བྲག་ཐ་དད་པས་
གཅིག་ཏུ་མི་རུང་ཡང་སེམས་ནི་ཇི་ལྟ་བུའི་ཕྱོགས་ཀྱང་མེད་པས་ན་ཐ་དད་དབྱེར་མེད་དོ། །དེས་ན་མཐ༷འ་ཡ༷ས་ཞིང༷་རྣམ༷ས་ཐ༷མས་ཅ༷ད་བད༷ག་གི༷་ལུ༷ས་ཡིན་ཏེ་དམིགས་སུ་མེད་པར་གཅིག་པས་ཐམས་ཅད་ཀྱང་བདག་ཡིན་ལ། བདག་ཀྱང་ཐམས་ཅད་
13-3-7b


ཡིན་ཏེ་བད༷ག་གི༷་ལུ༷ས་ནི༷་མཐ༷འ་ཡ༷ས་ཞིང༷་ད༷ང་སྐྱེ༷་བོ༷འི་ལུས༷་སུ་ར༷བ་ཏུ་སྣང༷་བས་གདོད་མ་ཐོབ་པའི་ཐོབ་བྱའི་ཆོས་ནི་མེད་ན་ཡ༷ང་། སེ༷མས་ད༷ང་བ༷ག་ཆག༷ས་ནི་དབྱིབས་དང་ཁ་དོག་བཞིན་དུ་གཅི༷ག་མི༷ན་ལ་ཐ༷་ད༷ད་ཀྱང་མ༷་ཡི༷ན་པས་བརྟག༷་པ༷ར་ར༷བ་ཏུ༷་དཀ༷འ་འོ། །
གཉིས་པ་ནི། ཐམས་ཅད་སེམས་ཡིན་ན་ཕྱིའི་རྒྱུ་རྐྱེན་གཞན་ལས་སྐྱེ་བར་ཅིས་སྣང་ཞེ་ན། ཆོས་འདི༷་ཀུན༷་རྒྱུ་རྐྱེན་རྟེན༷་ཅིང༷་འབྲེལ༷་ཏེ་འབྱུང༷་བའི་ཚུལ༷་ཏེ༷་སེམས་ལ་རྒྱུ་ཚོགས་ཚང་ན་སྐྱེ༷་བ་ད༷ང་རྒྱུ་ལྡོག་ན་འག༷ག་པ༷ར་འགྱུར༷་རོ་ཞེས༷་བརྗོད་པ་ནི། དོན་དམ་
པར་བརྟག་ན། དཔེར་ན་ཚིག༷་པ༷འི་ས༷་བོ༷ན་ལས་འབྲས་བུ་མི་སྐྱེ་བ་བཞི༷ན་དུ་རྒྱུ་བདེན་པ་མེ༷ད་པ་ལ༷ས་འབྲས་བུ་མེ༷ད་པ༷་ཞིག་དོན་དམ་པར་ན་མི༷་འབྱུང༷་སྟེ་དེས་ན་འདི་ནི་རྒྱུ༷་འདི་ནི་འབྲས༷་བུ་ཞེས་བཞག་ཏུའང་མེ༷ད་དོ། །ཅིའི་ཕྱིར་རྒྱུ་ལས་འབྲས་བུ་འབྱུང་ཞེས་
ན་ཐོག་མེད་ནས་རྒྱུ་འབྲས་བདེན་པའི་དངོ༷ས་པོ༷ར་ཞེན༷་ཅིང༷་རྒྱུ༷་ད༷ང་འབྲས༷་བུར༷་སོ༷་སོར༷་རྟོག༷་པར་བྱེད་པ༷འི་ནང་གི་སེ༷མས་ཉི༷ད་ནི༷། ཕྱིའི་རྒྱུ༷་དང༷་རྐྱེན༷་ལྟར་དུ༷་སྣང༷་སྟེ༷་རྨི་ལམ་དུའང་རྟོག་པའི་དབང་གིས་གཟུགས་སོགས་སྐྱེ་འགག་ལྟར་མཐོང་ཞིང་སྣང་
བ་ལྟ་བུ་སྟེ་རྒྱུ་དང་འབྲས་བུ་དེ༷་གཉི༷ས་མེ༷ད་ཕྱིར༷་རྒྱུ་ལས་སྐྱེ་བ་མེད་པ་ད༷ང་སྐྱེ་བ་མེད་ན་དེ་ལོག་པའི་འཇི༷ག་པ༷འང་མེ༷ད་དོ། །སྐྱེ༷་བ་དང་འཇི༷ག་པ་མེ༷ད་པའི་ཕྱིར༷་ན་བད༷ག་དང་གཞ༷ན་དུ་གྲུབ་པ་མེ༷ད་དེ༷་དེ་མེད་ན་སུ་ཞིག་འཆི༷་སུ་ཞིག་འཕོ༷་སྟེ་དེ་གཉིས་མེད་ལ་དེ་
གཉིས་མེ༷ད་ཕྱིར་འཕོ་བ་མེད་པས་རྟག༷་པ་དང་འཆི་བ་མེད་པས་ཆ༷ད་པ་མེ༷ད་དོ། །སྐྱེ་སོགས་མེ༷ད་པ་དེ༷ས་ན་གཅིག་ནས་གཅིག་ཏུ་འཁྲུལ༷་ཞིང་འཁོ༷ར་བ་མེ༷ད་ཅིང༷་དེས་ན་འཁོར་བ་དང་བྲལ་བའི་མྱ༷་ངན༷་ལས་འད༷ས་པ༷འ༷ང་མེ༷ད་པ༷་ཉི༷ད་དུ༷་མངོ༷ན་ཏེ་ཆུ་རུ་མ་
13-3-8a


གྲུབ་ན་ཆུ་ལོག་པ་མི་འགྲུབ་པ་བཞིན་ནོ། །གཉིས་པ་སྣང་གཞི་སེམས་ཉིད་དོན་དམ་པར་མ་གྲུབ་པར་བསྟན་པ་ནི། བག་ཆགས་ཀྱི་གན༷ས་ཀྱི༷་ཀུན་གཞི་སྐ༷ད་ཅི༷ག་མ༷་དང་བག་ཆགས་གཉིས་ནི་ནམ༷་ཡ༷ང་མི༷་འབྲལ༷་ཏེ་གཅིག་
མེད་ན་གཅིག་མེད་དགོས་ཏེ་གང་རུང་མེད་པར་མི་སྲིད་པ་དེ༷་ཚེ༷་དེ་གཉིས་ཡོད་མེད་མཉམ༷་པར་གྱུར༷་པ་ཡིན་ལ་གང་ཚེ་བག་ཆགས་དེ༷་མེ༷ད་ན་ཀུན་གཞི་དེ་ཡང་མེ༷ད་དེ་རྒྱ་མེད་པའི་འབུར་བཞིན་ནོ། །དེ་ཡིན་མོད་ཀྱང་བག་ཆགས་ཅིའི་ཕྱིར་མེད་ཅེ་ན། 
དངོས་པོའི་གནས་ཚུལ་དང་མི་མཐུན་པས་ཡ༷ང་ད༷ག་པ་མ༷་ཡི༷ན་པའི་ཀུན་ཏུ་རྟོག༷་པ༷ས་བསྐྱེ༷ད་ཕྱིར༷་བ༷ག་ཆག༷ས་ཡོ༷ད་པ༷་མ༷་ཡི༷ན་པ་དང༷་།  བག་ཆགས་མེད་ན་ཀུན་གཞིའི་སྤྱོད་ཡུལ་བག་ཆགས་ཡིན་པས་ན་སྤྱོ༷ད་ཡུ༷ལ་མིན་ཅིང་དེ་མེ༷ད་པའི་ཕྱིར༷་ཀུན་གཞི༷་
མེད་ཅི༷ང་ཞེན་ཡུལ་མེད་ན་ཤེས་པ་མི་འབྱུང་བའི་ཕྱིར་རྣམ༷་རི༷ག་དེ༷་ཐམས་ཅད་པོ་ཡ༷ང་མེ༷ད་པ༷་ཁོ་ན་ཡི༷ན་ནོ། །གོང་ལྟར་ཕྱོག༷ས་རྣམ༷ས་མེ༷ད་ཕྱིར༷་དམི༷གས་པ་བག་ཆགས་ད༷ང་དེ་གནས་པའི་གན༷ས་ཀུན་གཞི་གཉིས་ཀ་མེ༷ད་ན་དེ་ལ་བརྟེན་པའི་རྣམ༷་པར་ཤེ༷ས་
ཤིང་རི༷ག་པ༷་རྣམས་ཇི༷་ལྟར༷་སྐྱེ༷། དེ༷་ཕྱིར༷་སེ༷མས་དང་སེམས་བྱུང་འདི༷་རྣམས་ནི་ཡོ༷ད་པ་དང་མེ༷ད་པའི་མཐ༷འ་ལ༷ས་འད༷ས་ཤིང༷་གཅི༷ག་ད༷ང་དུ༷་མ༷་བྲལ༷་ཏེ་ཅི་ལྟ་བུར་ཡང་མི་གནས་སོ། །གཉིས་པ་རྣམ་པར་བྱང་བའི་དངོས་པོ་ལ་བརྟག་པ་ལ་བསྟན་བཤད་
གཉིས་ཀྱི་དང་པོ་ནི། བདེ༷་གཤེ༷གས་ཀྱི་བྱང༷་ཆུབ༷་མེ༷ད་པའི་ཕྱིར༷་ན་སངས་རྒྱས་དེ༷་ཡི༷རྫུ༷་འཕྲུ༷ལ་ནི་སྣང་ཡང་མི་བདེན་པ་སྒྱུ༷་མ༷་དང་འདྲར༷་འཁྲུལ༷་བ་ལ༷་སྣང་བ་ཡིན་ནོ། །གཉིས་པ་ལ་རྣམ་པར་མི་རྟོག་པའི་ཡེ་ཤེས་མ་གྲུབ་པར་བསྟན་པ་དང་། དག་པ་འཇིག་
13-3-8b


རྟེན་ལས་འདས་པའི་ཡེ་ཤེས་མ་གྲུབ་པར་བསྟན་པ་གཉིས་ཀྱི་དང་པོ་ནི། དེ༷་བཞི༷ན་དུ་རྣམ་པར་མི་རྟོག་པ་ཡང་ད༷ག་པ༷འི་ཡེ༷་ཤེ༷ས་དེ༷་ད༷ག་ཤི༷ན་ཏུ༷་དག༷་པ༷འི་རྩ་བ་ཚད་མེད་པའི་རྒྱུན༷་ཉི༷ད་ད༷ང་། ཆོས༷་ཀྱི༷་དབྱི༷ངས་མ་ནོར་བ་ཉི༷ད་ལ༷་ནི༷་ཡེ་ཤེས་དེ༷་ད༷ག་དམི༷གས་ཤི༷ང་སྐྱེ༷་བ༷ར་
བརྟག༷་པ༷་ཡ༷ང་དཔྱད་ན་མ་གྲུབ་སྟེ་འདི་ལྟར་རྡོ༷་རྗེ༷འི་སྟེ་རྣམ་པར་མི་རྟོག་པའི་ཡེ་ཤེས་དེའི་གན༷ས་སམ་རྒྱུ་སེམས་ཡིན་ལ་དེ་མེ༷ད་པའི་ཕྱིར༷་ན༷་འབྲས་བུ་ཡེ་ཤེས་ཀྱང་མེད་པ་དེས་ན་དེ་གཉིས་མ་གྲུབ་པར་མཉམ༷་པར་གན༷ས་པས་སེམས་མ་གྲུབ་པའི་ར༷ང་བཞི༷ན་དང་
ཀུན་ཏུ་འདྲར༷་གྱུར༷་ཏེ་མཚུངས་པར་གྱུར་པ་ད༷ང་། རྣམ་རིག་པས་ཡེ་ཤེས་སྐད་ཅིག་མ་དོན་དམ་དུ་འདོད་པ་མ་གྲུབ་སྟེ་ཆོས༷་དབྱི༷ངས་རྟོགས་པའི་ཡེ་ཤེས་རྡོ༷་རྗེ༷་ལྟ་བུར་ཡེ་ཤེས་ཀྱི་རྩེ༷་མོ་རུ་གྱུར་པ་དེ༷་ད༷ག་ཅི་ལྟ་བུའི་ཕྱོག༷ས་ཉི༷ད་དུའང་དམིགས་སུ་མེ༷ད་པ༷ས་ན་
ཡེ་ཤེས་དེ་ནི་སྐ༷ད་ཅི༷ག་མ་མི༷ན་ནོ། །གཉིས་པ་ནི། འཁོར་གསུམ་ད༷ག་པའི༷་དགེ༷་རྩ༷་ནི་གཟུ༷གས་བརྙན༷་དང་འདྲ་སྟེ་བདེན་པར་མེ༷ད་པ༷ས་དེ་ལ་བརྟེན་པའི་དག་པ་འཇིག༷་རྟེན༷་པའི་ཡེ༷་ཤེ༷ས་ཀྱང་ཡོ༷ད་པར་མི༷་འགྱུར༷་རོ། །སྤྱི་དོན་དྲུག་པ་སོ་སོར་བརྟགས་ནས་ངེས་
པའི་དོན་བསྟན་པ་ལ་གསུམ། བསམ་པ་མཉམ་པ། སྤྱོད་པ་མཉམ་པ། དོན་བསྡུས་ཏེ་བྱང་སེམས་བསྟན་པའོ། །དང་པོ་ལའང་། གཞི་བདེན་གཉིས་མཉམ་པས་བླང་ངོར་མེད་པར་བསྟན་པ།  ལམ་བདེན་རྫུན་མཉམ་པས་ཆགས་སྡང་མེད་པ །
ཡོད་མེད་མཐའ་དང་བྲལ་བས་ཀུན་ཏུ་མཉམ་པ་གསུམ་གྱི། དང་པོ་ནི། ཀུན་བྱང་གཉིས་ཀ་མ་གྲུབ་པ་དེ༷་ཡི་ཕྱིར༷་བྱང༷་ཆུབ༷་སྟེ་སངས་རྒྱས་པ་དང་མ༷་ཆུབ༷་སྟེ་སེམས་ཅན་གཉིས་ཀ་མཚ༷ན་ཉི༷ད་མེ༷ད་པ༷ར་མཉམ་ཞིང་གཅི༷ག་པ༷ས་སངས་རྒྱས་བླང༷་བ་དང་སེམས་
13-3-9a


ཅན་དོ༷ར་བ་མེ༷ད་དོ། །དོན་དམ་པ་ཞེས་བྱ་བ་ཉིད་ཀྱང་མེད་ན་དེ་འདི་ལྟ་བུའོ་ཞེས་བསྟན་པའི་ཚིག་རྣམས་ཀྱང་ལྟ་ག་ལ་ཡོད་དེ་གོང་དུ་ཇི་སྐད་བསྟན་པའི་དོ༷ན་དེ༷འི་ཚུལ༷་གྱིས༷་དཔྱད་ན་དོ༷ན་ད༷མ་པའི་རྣམ༷་གྲང༷ས་སུ་བྱ་བ་སྐྱེ༷་འག༷ག་མེ༷ད་ཅེས་བྱ་
བ་ད༷ང་མཉམ༷་པ་ཉི༷ད་ཅེས་བྱ་བ་དང༷་། གཉི༷ས་སུ་མེ༷ད་ཅེས་བྱ་བ་དང་བས༷མ་པ་ལས་འད༷ས་པ་དང་སྟོང༷་པ་ཉི༷ད་དང་ཆོས༷་ཀྱི་དབྱིང༷ས་བརྗོ༷ད་པ་ད༷ང་ཐ༷་སྙད༷་དང་བྲལ༷་བ་ལ༷་སོ༷གས་སུ། བསྟན༷་པ༷་དེ༷་ཀུན༷་བཀྲི་བའི་ཐ༷་སྙད༷་ཡི༷ན་ཏེ༷་ཡང་དག་ངེས་པའི་དོན་ལ་ནི་
དོ༷ན་དམ༷་མེ༷ད་ཅིང༷་ཀུན༷་སྒྲིབ༷་བམ་ཀུན་རྫོབ་ཅེས་བྱ་བའང་མེ༷ད་དོ། །ཐ་སྙད་ཙམ་མིན་པར་དོ༷ན་ད༷མ་ཚུལ༷་གྱིས༷་ལ༷མ་ཉི༷ད་འདི༷་འདྲ༷འོ་ཞེས༷་པ༷་དམིགས་སུ་ཡོད་ན་དེ༷་ཉི༷ད་ཀུན༷་སྒྲིབ༷་ཡི༷ན་གྱི་དོན་དམ་མིན་ཡང་དག་པར་ན་ཀུན་རྫོབ་དང་དོན་དམ་ཞེས་བདེན་པ་
གཉིས་སུ་དབྱེར་ག་ལ་ཡོད་དེ་མེད་དོ། །གཉིས་པ་ནི། བདེན་དོན་མ་མཐོང་བའི་ཐེ༷་ཚོ༷མ་ཡོ༷ད་པ་དང་མཐོང་སྟེ་ཐེ་ཚོམ་མེ༷ད་པའི་ཆོས༷་ནི༷་ག༷ང་ལ༷འང༷་ཡང་དག་པར་ན་བདེན་རྫུན་གཉིས་མེད་པས་རྫུན་པ་སྤང༷ས་ཤིང༷་བདེན་པ་ལ་གན༷ས་པ༷ར་མི༷་བྱེ༷ད་དོ། །དེ་ཅིའི་
ཕྱིར་ན་ཡང་དག་པར་ན་སྒོ༷མ་པ༷་པོ་ད༷ང་ནི༷་རྟོགས་བྱ་ཆོས༷་ཀྱི་དབྱིང༷ས་རང་བཞིན་མ་གྲུབ་པས་མེ༷ད་པའི་ཕྱིར༷་སུ་ཞིག་གང་ལ་སོམ་ཉི་ཡོད་དེ་དེ་ཕྱིར་སོ༷མ་ཉི༷་མེ༷ད་པའི་ཆོས་ལ་ད༷མ་པ༷ར་བལྟ༷་བ༷འ༷ང་མེ༷ད་དེ་ལུང་ལས་མཐུན་པའི་ཆོས་ལ་སྲེད་པ་དང་མི་མཐུན་པའི་
ཆོས་ལ་ཞེ་སྡང་སྤང་དགོས་པར་གསུངས་པའི་ཕྱིར་རོ། །གསུམ་པ་ནི། གོང་དུ་བསྟན་པ་དེ༷་ལྟར༷་དངོ༷ས་པོ༷འི་མཐ༷འ་རྣམ༷ས་བརྟག༷ས་པ༷ས་ར༷ང་བཞི༷ན་སྒྱུ་མ༷་ཙམ་དུའང་གྲུབ་པ་མེད་པར་འགྱུར༷་ཕྱིར༷་ཡོད་པ་མིན་ཡང་མེད་པ་ཞིག་ཡིན་ནམ་སྙམ་ན། དེ་ལྟར་
13-3-9b


ཡོད་པ་མ་གྲུབ་ན་མེད་པ་དེ་ནི་སུའི་མེད་པ་ཡིན་ཏེ་དེ་དག་ཡོ༷ད་པ་ལ༷་ལྟོས༷་པ༷འི་མེ༷ད་པ༷འ༷ང་མེ༷ད་དེ༷་དེ་ལྟར་ཡོད་པ་དགག་པའི་མེད་པ་མིན་ཡང་ཡོང་གིས་མེད་པ་ཡིན་ནོ་སྙམ་ན། རང་བཞིན་གྱིས་མ་སྐྱེས་པའམ་ཡང་གིས་མེ༷ད་པ༷་ལ༷་ཡ༷ང་མེ༷ད་པ༷་གཅིག་ཐ་སྙད་གདགས་
པ་མེ༷ད་དེ་མཐོང་ཐོས་མེད་ཅིང་གང་གིས་ངོ་བོར་མི་གནས་པ་དེ་ལ་སུ་ཡང་མེད་ཅེས་མི་སེམས་མི་བརྗོད་པའི་ཕྱིར་རོ། །གོང་དུ་བཤད་པ་ལྟར་མཐ༷འ་རྣམ༷ས་མེ༷ད་ཕྱིར༷་སུའི་དབུས་ཏེ་དབུས༷་ཀྱང་མེ༷ད་ལ་དབུས་མེད་པས་དབུས༷་ལ༷འ༷ང་གན༷ས་པ༷ར་མི༷་བྱེ༷ད་དོ༷། །
གཉིས་པ་སྤྱོད་པ་མཉམ་པ་ནི། ཆོས་ག༷ང་ལ༷འ༷ང་འཇིག༷་རྟེན༷་གྱི་འདོད་ཡོན་ཐམས་ཅད་ལ་དབང་བསྒྱུར་ཞིང་ཕུན་སུམ་ཚོགས་པའི་དབ༷ང་ཕྱུག༷་ཏུ་བྱས་ཀྱང་སྐྱོན་གྱིས་མ་གོས་པ་པ༷དྨོ༷་ལྟ་བུས་འདོད་ཡོན་ཀུན༷་ཀྱང༷་མི༷་སྤོང༷་བར་སྤྱོད་དེ་རྒྱུ་མཚན་སྐྱོན་ཡོན་
ཐམས་ཅད་ཡང་དག་པར་ཁྱད་མེད་པས་འདྲ༷་ཞིང་མི་འབྱེད་དེ་མཉམ༷་པར་གན༷ས་པས་སོ། །སེམས་ཅན་ཉིད་ཀྱང་མེད་ན་སུ་ཞིག་འཁྲུལ། དེས་ན་འཁྲུལ་བ་མེད་པའི་ཆོས༷་ལ༷་འཁྲུལ༷་བ༷ར་མཐོ༷ང་བ༷་དེ༷་ཉི༷ད་འཁྲུལ༷་བ༷་ཡི༷ན་པ༷ར་ར༷བ་ཏུ་རྟོག༷ས་ཏེ༷། དེས་ན་
མུ་སྟེགས་སྟོན་པ་དྲུག༷་གི༷ས་བསྟན༷་པ༷་དང་སྲོག་གཅོད་སོགས་ཉོན་མོངས་དང་བདུ༷ད་ཀྱིས༷་ལ༷ས་རྣམས་ཀྱང༷་མི་དམིགས་ཤིང་འདོར་དུ་མེད་པར་ཤེས་ནས་མི༷་འདོ༷ར་ཞིང་ང༷ན་དུ་མི༷་རྟོག་གོ༷། ཤེས༷་ར༷བ་ཐ༷བས་ཀྱི༷་སྤྱོ༷ད་པའ༷ང་ཅི་ལྟ་བུ་མཚན་ཉིད་དུ་མ་གྲུབ་ཅིང་
མི༷་གན༷ས་པའི་ཕྱིར༷་ན༷་བདུད་ཀྱི་སྤྱོད་པ་དང་གཉིས་མ་སྐྱེས་པར་མཉམ་པར་འདྲ༷་བ༷ར་སྤྱོ༷ད་དོ། །ལྟ་བ་ཐམས་ཅད་བྲལ་བ་ནི་ཡང་དག་པའི་དོན་ལ་ལྟ་བའོ་ཞེས་འབྱུང་བ་ལྟ་བུའི་འཛིན་པ་ཞུགས་ཏེ་རང༷་གི༷་ཤེ༷ས་པ༷་ནི་བདེན་པ་རྟོགས་པ་ཡིན་ནོ། །ཞེས་དམ་
13-3-10a


པ༷ར་བྱས༷་ཏེ༷་ཀུན༷་ལ༷ས་རྒྱལ༷་ཏེ༷་ལྟ་བ་དེ༷ས་བསྙེམ༷ས་པ་སྐྱེ་ན༷། རང་ལྟ་ལ་འདོ༷ད་ཆག༷ས་གཞན་ལྟ་ལ་ཞེ༷་སྡང༷་སྐྱེས༷་ནས༷་ཕན་ཚུན་རྩོད༷་པ་འབྱུང༷་བའི་གཏི༷་མུག༷་ཡི༷ན་ཏེ༷་བདེན་པ་ཞེས་བྱ་བ་མེད་པས་རང་ལྟ་བདེན་པར་བཟུང་བ་དང་རྫུན་པ་མེད་པས་གཞན་ལྟ་རྫུན་
པར་བཟུང་བ་གཉིས་གནས་ཚུལ་དང་མི་མཐུན་པའི་བློ་ཡིན་པའི་ཕྱིར་བདེན་རྫུན་གཉིས་ཀ་མི་དམིགས་པའི་དོ༷ན་རྣལ་མ་མི༷་མཐོ༷ང་ངོ་། །གསུམ་པ་དོན་བསྡུས་ཏེ་བྱང་ཆུབ་ཀྱི་སེམས་བསྟན་པ་ནི། ཇི༷་སྲི༷ད་འཇིག་རྟེན་ཡོད་མེད་
བདེན་རྫུན་སྣང་མི་སྣང་ལ་སོགས་པའི་ཡི༷ད་ཀྱི༷་གཡོ༷་བ༷་དེ༷་སྲི༷ད་བདུ༷ད་ཀྱི༷་སྤྱོད་ཡུལ༷་ཏེ༷་དེ་ནི་རྟོགས་དཀའ་བའི་ཕྲ༷་བ༷འི་ལ༷མ་ཡིན་ཅིང་། འོ་ན་མི་གཡོ་བར་གནས་སོ་ཞེ་ན། རྟོག་པ་དང་མཚན་མ་གཡོ༷འོ་ཞེས་ད༷ང་མི༷་གཡོ༷འོ་ཞེས་པའི་ཐ༷་སྙད༷་ཙམ་ཡང་
མི༷་གན༷ས་པའི་གན༷ས་དེ་ལ༷འ༷ང་གན༷ས་པ༷ར་མི༷་བྱེ༷ད་དེ༷་དེས་ན་མི་གཡོ་ཞེས་པ་དེ་ལ་མི་གནས་པ་ལྟ་ཅི་སྨོས། དེ་ལྟར་ན་ཉམས་སུ་མྱོང་བའི་ཚོར་བ་དང་ཚོར་བ་འགགས་པ་དང་། ཡིན་མིན་གྱི་འདུ་ཤེས་ཀྱིས་བཟུང་བའི་སྣང༷་བ་མེ༷ད་པ་ནི་མི་གནས་
དབུ༷་མ༷འི་ལ༷མ་སྟེ་དོན་དེ༷་ལ་དེ་བཞིན་སེམས་པས་བླ་མེད་བྱང་ཆུབ་འགྲུབ་པས་ན་བྱང༷་ཆུབ༷་སེ༷མས་ཞེ༷ས་བདེ༷་བ༷ར་གཤེ༷གས་པ༷ས་གསུང༷ས་སོ། །སྤྱི་དོན་བདུན་པ་དེ་ལྟར་གཏན་ལ་ཕབ་ནས་ངེས་པའི་དོན་བསྒོམ་པ་ལ་གཉིས། བསྒོམ་པའི་མི་
མཐུན་ཕྱོགས་བསྟན་པ་དང་། དེའི་གཉེན་པོ་བསྒོམ་པའི་དོན་མ་ནོར་བར་བསྟན་པའོ། །དང་པོ་ནི། རྣམ་པར་མི་རྟོག་པ་བསྒོམ་པ་ནི་བླང་དོར་མེད་པ་ཡིན་ལ། དེའི་མི་མཐུན་ཕྱོགས་གཟུག༷ས་སོགས་ད༷ང་མཚ༷ན་མ༷་དང་སྨོན༷་པ༷ར་འཛི༷ན་པ༷་
13-3-10b


གསུམ་པོ་ར༷བ་ཏུ༷་སྤང༷་ན༷ས་སུ༷། དེའི་གཉེན་པོར་སྟོང་ཉིད་སོགས་རྣམ༷་ཐ༷ར་གསུམ༷་པོ༷་བསྒོམ༷་པ༷འ༷ང་བླང་དོར་གྱི་མཐར་ལྷུང་བས་ན་བདུ༷ད་ཀྱི༷་ལ༷ས་ཡིན་ཏེ༷་གཟུག༷ས་ཉི༷ད་སྟོང༷་པའོ་དང་མཚན་མ་ཉིད་མཚན་མེད་སྨོན་པ་ཉིད་སྨོན་མེད་ཡིན་གྱི་ཐ་དད་དུ་མེད་
དོ། །འཁོ༷ར་བ་འགྲུབ་པར་བྱེད་པ༷འི་ལ༷མ་ཆགས་སྡང་རྨོངས་གསུམ༷་སྤང༷ས་ཤིང༷་མྱ༷་ང༷ན་ལས་འད༷ས་པའི་ལ༷མ་བསྒོམ༷་པར་བྱེ༷ད་པ༷འ༷ང་བདུ༷ད་ཀྱི་ལས་ཉི༷ད་དེ༷། དེ་ལྟར་སྤྱོད་པ་དེ༷་ཉི༷ད་ར༷ང་བཞི༷ན་མ༷་ཞི༷་བའམ་རང་བཞིན་ཞི་བ་མ་རྟོགས་པ་ཡིན་ཏེ་
ཆོས་ཀུན་གྱི་གནས་ཚུལ་ལམ་ར༷ང་བཞི༷ན་གྱི་དབང་དུ་ན་མྱང་འདས་བཙ༷ལ་བ་དང་འཁོར་བའི་ལམ་སྤང༷་བར་བྱེད་པ་གར༷་ཡང་མི༷་འགྲུབ་པའམ་མི་གན༷ས་པ་ཡིན་པའི་ཕྱིར་རོ། །འཕ༷གས་པ༷་ཀུན༷་གྱི༷་གཟིགས་པའི་སྤྱོད་ཡུལ༷་ད༷ང་གྲུབ་པའི་གན༷ས་
ཀྱང༷་འཁོར་བ་སྤང་བའི་ཕ་རོལ་ཞིག་ན་གུད་དུ་མ་འདྲེས་པར་མེད་ལ་མྱང་འད༷ས་སོག༷ས་ཡོན་ཏན་གྱི་ཁྱད་པར་ཐོབ་པའི་ལ༷མ་ཡང་འདི༷་ལས་གཞ༷ན་དུ་ན༷་གྲུབ་པ་མེ༷ད་དེ་ཐམས་ཅད་རང་བཞིན་མེད་པས་སོ། །གཉིས་པ་ལ་དངོས་དང་། འཐད་པ་
བསྟན་པ། ཇི་ལྟར་བསྒོམ་པའི་ཡོན་ཏན་གསུམ་ལས། དང་པོ་ནི། ལྡང༷་ད༷ང་མི༷་ལྡང༷་ཆེད༷་དུ༷་མི༷་སྤོང༷་སེ༷མས་རྟེན༷་མི༷་འཆ༷འ་ཞེས་མཚན་མ་དང་རྟོག་པ་ལྡང་བ་ཆེད་དུ་མི་སྤང་ཞིང་མི་ལྡང་བ་ལ་སེམས་ཀྱི་རྟེན་མི་འཆའ་བར་འབྲས་བུའམ་བདེན་
དོན་ལ་དམིགས་པའི་སྒོ་ནས་མངོ༷ན་དུ༷་བྱེད་པ་མི༷ན་ཏེ། དེ་ཅིས་མི་སྤོང་ཞེ་ན། ཆོས་ཉིད་ལ་ཟུག་རྔུ་མེད་པས་འཇ༷མ་ཞིང་དེ་རྟོགས་ན་དཔལ་དུ་གྱུར་པས་དཔ༷ལ་ཞེས་བྱ་སྟེ་ཆོས་ཉིད་དེ་མ༷་ཡི༷ན་པའི་མཚན་རྟོག་གི་སྐྱོན་ཕྲ་མོ་རྡུལ༷་ཆ་ཙམ༷་ཞིག་གཡོ༷་
13-3-11a


བ༷འམ་ཡོད་པར་མཐོང་ནའང་དེ༷་ཉི༷ད་ཆོས་ཉིད་དོན་གྱི་ཡེ་ཤེས་སམ་འཇམ་དཔལ་དེ༷་ཡི༷ན་པས་སྤང་དུ་མེད་པས་སོ། །འོ་ན་ཆོས་ཉིད་དམ་འཇམ་དཔལ་དེར་གནས་སམ་ཞེ་ན། དེའི་རང་བཞིན་ཅིར་ཡང་མ་གྲུབ་པས་གནས་
པར་བྱ་བའི་གཞི་མེད་པས་ན་དེར༷་ཡང་མི༷་གན༷ས་སོ། །འོ་ན་དེ་མངོན་དུ་བྱ་བ་མ་ཡིན་པའི་ཕྱིར་མིན་སྙམ་ན་བསྒོམ་བྱའི་ཆོས་ཉིད་དང་བསྒོམ་པའི་ཡེ་ཤེས་གཉིས་ཀ་མ་གྲུབ་པའི་ཕྱིར་ན། སྒོ༷མ་པ༷ར་བྱ༷་བ༷འི་ས༷འམ་གཞི་མི༷་རྙེད༷་པའི་ཕྱིར༷་སུ་ཞིག་གིས་གང་
ཞིག་ལ་བསྒོམ༷་པ༷ས་འབྲས་བུ་ཅི་ཞིག་རྙེད་དེ་རྙེད༷་པ༷ར་མི༷་འགྱུར༷་ཏེ༷། སེ༷མས་ཀྱི༷་སྤྱོ༷ད་ཡུལ༷་ཤེས༷་པ་དེ་ལ༷་ཡུལ་གྱི་རྣམ་པ་གང་སྣང་སེམས་ཀྱི་རྟོག་པ་ཅི་སྐྱེས་པ་དེ༷་ད༷ག་ཆོ༷ས་རྣམ༷ས་ཀྱི༷་ནི༷་ཆོས༷་ཉི༷ད་ཡི༷ན་པས་གང་སྤྱོད་ཡུལ་ཐམས་ཅད་ཆོས་ཉིད་ལས་མི་
གཞན་པས་གང་སྣང་ཡང་སྐྱོན་མེད་དོ། །སྐྱོན་མེད་ན་སེམས་ཅན་རྣམས་ཅིའི་ཕྱིར་འོང་ཞེ་ན། མཚན་མ་སྣ་ཚོགས་ལ་བདེན་པར་འཛིན་པའི་ཕྱིར་ཏེ། མཚན་མའི་བདེན་ཞེན་གྱི་རྣམ་པ་དང་བྲལ་ན་མི་འཁོར་བར་བསྟན་པའི་ཕྱིར། ཆོས་ཀུན་
ལ་མཚན་མའི་རྣམ༷་པ་ཐམས་ཅད་དང་བྲལ༷་བས་ན་ཆོས་གང༷་ལ༷འ༷ང་མི་འཛིན་པས་འདི་ནི་མཆོག༷་ད༷ང་འདི་ནི་ཐ༷་མ༷་ཞེས་བླང་དོར་གྱི་རྣམ་པ་མེ༷ད་པ༷ར་བསྒོམ་པ་ནི་ལ༷མ་གྱི་མཆོ༷ག་སྟེ་ལམ་འདི༷་ལྟ་བུ་རྒྱུན་དུ་བསྒོམ༷་མོ༷། །གཉིས་པ་ནི། རྟོག་པ་ཅི་སྐྱེ་
ཡང་ཅིས་མི་སྐྱོན་ན། འདུ༷་བྱེ༷ད་ཐམས་ཅད་ནི་རང་གི་ངོ་བོས་ཀྱང་མ༷་སྐྱེས༷་ལ་ཆོས༷་ཀུན༷་རྒྱུ་རྐྱེན་གཞན་གྱིས་ཀྱང་འབྱུང༷་བ་མེ༷ད་པས་ན་ཤིན༷་ཏུ༷་ཆོ༷ས་རྣམ༷ས་རང་བཞིན་གྱིས་མྱ༷་ང༷ན་ལས་འད༷ས་པས། བདེན་པའི་དངོ༷ས་པོ་ཅུང་ཟད་མེ༷ད་པར་རྟོགས་
13-3-11b


པ༷་དེ་ཚེ༷་རྟོག་སྣང་ཇི་སྙེད་སྐྱེ་བ་ཀུན༷་ཀྱང༷་ཆོས༷་ཀྱི༷་དབྱིང༷ས་ཀྱི་རང་བཞིན་དུ་རྟོགས་པའི་ཤེས༷་པ་དེ་ནི་མི་ཤེས་པའི་དགྲ༷་བཅོ༷མ་པ་ཡོན་ཏན་ར༷བ་ཏུ་འབྱོར༷་བ་ཡི༷ན་ནོ། །ཇི་སྐད་བསྟན་པའི་དོན་ནི་ན༷མ་མཁ༷འ་བཞིན་ཏེ་དཔེར་ན་ནམ་མཁའ་དོན་ཅི་ལྟ་
བུའི་མཚན་ཉིད་དུ་ཡང་མི༷་དམི༷གས་པས་མི༷ང་ཙམ༷་ཞིག་སྟེ་དེ་ནི་དགེ༷་བ་ད༷ང་ནི་མི༷་ད༷གེ་སོགས་གཉིས་ཆོས་ཀྱི་རང་བཞིན་ཅན་དུ་འབྱེ༷ད་པ་མེ༷ད་དེ་སྐྱེ༷་བ༷་མེ༷ད་པའི་ཕྱིར་རོ། །སྤོང་བའམ་མ་གྲུབ་པར་བྱ་བའི་རྩོལ༷་བ༷་ཡི༷ད་ལ༷་མི༷་བྱེ༷ད་ཅིང་དམིགས་
པའི་ཡུལ་གང༷་ལ༷འ༷ང་སེ༷མས་པ་མེ༷ད་དེ་སེམས་ཉིད་ཀྱང་མ་གྲུབ་པས་ཤེས་མི་ཤེས་སུ་མི་རྟོགས་པས་ཤེ༷ས་ད༷ང་མི༷་ཤེ༷ས་བྲལ༷་བའོ། །སྤང་གཉེན་ཁྱད་མེད་པས་གཉེན་པོ་དྲ༷ན་པ་ད༷ང་འབྱེ༷ད་མེ༷ད་ཆོས་གང༷་ལ༷འ༷ང་སྤང༷་བ་དགག་པ་དང་ལེ༷ན་པ་ལ་
དག༷འ་བ་ད༷ང་སྤང་གཉེན་འདྲ་བའམ་མཚུ༷ངས་པར་བློ་བཞག་པའང་མེ༷ད་དེ་ཅིར་ཡང་མི༷་དམི༷གས་ཤི༷ང་། འདོད་མི་འདོད་མེད་པས་མཉམ༷་པར་གན༷ས་ལ་ཐ་དད་དུ་མི་འབྱེད་པས་གཉི༷ས་སུ༷་བརྟག༷་པའང་མེ༷ད་དེ་འདི་ལྟ་བུ་ཡིན་ནོ་ཞེས་ཅིར་ཡང་
འཛིན་པ་མེད་པས་བརྗོ༷ད་པ་དང་བྲལ༷་ཞིང་དོན་དུ་གཉེར་བ་མེད་པས་བྱ༷་བ་མེད་པ་ད༷ང་སྒོ་གསུམ་གྱི་ལས་ལ་སྐྱོན་དུ་མི་ལྟ་བས་མི༷་བྱ་བ་ཡང་མེ༷ད་དེ༷་ཚོགས་དང་ཡོན་ཏན་གསར་དུ་སོ༷གས་པ་དང་སྐྱོན་བྲི༷་བ་མེ༷ད་དེ་ཆོས་ཉིད་བྲི་འཕེལ་མེད་པས་
སོ། །གསུམ་པ་ནི། ཚུལ་བཞིན་བསྒོམས་པའི་རྟགས་ཅི་ལྟ་བུ་འབྱུང་ཞེ་ན་ཆེད་དུ༷་རྩོལ༷་བ༷ར་བསྒོམ་པ་ཡི༷ད་ལ༷་མི༷་བྱེ༷ད་པ་དང་ཅི༷ས་ཀྱང༷་མི༷་འཁྲུག༷ས་པ་དང་ཐམས་ཅད་མཉམ༷་ཉིད་དུ་ཤེས༷་པ་ད༷ང་། ག༷ང་ལ༷འ༷ང་ཆག༷ས་ཤིང་འདོད་པ་
13-3-12a


ད༷ང་ཡུལ༷་གྱིས༷་མྱོས༷་པ་སྟེ་ཡུལ་གྱི་ཉེས་པས་རྨོངས་པ་དང་ཡུལ་གྱིས་སྐྲག༷་པ་དང་མི་འདོད་པའང་མེ༷ད་དེ༷་དེས་ན་ཆོས་གང་ཡང་སྤང་སྟེ་བྲལ་བར་མི་བྱེད་པས་མི༷་འབྲལ༷་ཞིང་གང་ཡང་སྒྲུབ་སྟེ་གནས་པར་མི་བྱེད་པས་གང་
ལའང་མི༷་གན༷ས་ཤི༷ང་། མི་མཐུན་ཕྱོགས་ཀྱིས་མི༷་འཕྲོག༷་ཅིང་ཆོས་ཉིད་མཉམ༷་པའི་དོན་ཤེ༷ས་པའི་ཡེ་ཤེས་བཞི༷་པོ༷་དང་བྱང་ཕྱོག༷ས་སོ་བདུན་ད༷ང་ཕ༷་རོ༷ལ་ཕྱིན་བཅུ་ལ་སོགས་ཏེ་རྣམ་དཀར་གྱི་ཕྱོགས་དང་འབྲས་བུའི་ཡོན་ཏན་ཇི་སྙེད་པ་རྣ༷མས་
བསྒོམ་དོན་ཇི་སྐད་བསྟན་པ་དེ༷ར་འདུས་ཤིང་ཆུབ་པར་རང་གི་རིག་པས་ཤེས༷་ཏེ༷། ཆོས་ཐམས་ཅད་སེམས་སུ་འདུས་པས་སེ༷མས་ཀྱི༷་དབྱི༷ངས་སུ༷་མ་ནོར་བར་བཞག་སྟེ་བསྒོམ༷་པ༷ས་ལ༷མ་གྱི༷་ཕུག༷་གམ་མཐར་ཐུག་ན༷་འདུག༷་པ༷་དེ༷་ཁོ་ན་ཡི༷ན་གྱི༷ས། དེ་
ལས་གཞ༷ན་དུ༷་ཇི་ལྟར་བསྒོ༷མ་པ༷ས་ཡང་དག་པའི་ཆོས་དབྱིངས་འོ༷ད་གས༷ལ་དོ༷ན་ཉི༷ད་གས༷ལ་ཞིང༷་རི༷ག་པ༷ར་མི༷་འགྱུར༷་རོ༷། །སྤྱི་དོན་བརྒྱད་པ་བརྒྱུད་པའི་ཐབས་ཀྱིས་ངེས་པའི་དོན་རྟོགས་པར་བྱ་བའི་ཐབས་བསྟན་པ་ནི། བརྒྱུད་པའི་ཐབས་
ཀྱིས་ངེས་དོན་རྟོགས་པར་བྱ་བའི་ཐབས་ཅི་ཞེ་ན་མཛུབ་མོས་ཟླ་བ་བཞིན་དུ་བཅོས་ཤིང་རྩོལ་བའི་བྱ་བས་བྱར་མེད་མཚོན་པས་ན། ཐབས་དང་བརྡ༷འ་ཅ༷ན་གྱི་སྒོ་ནས་བྱང་ཆུབ་སེམས་ལ་ཡ༷ང་ད༷ག་ལེ༷ན་པ༷འ༷ང་བྱང་ཆུབ་སྒྲུབ་པར་བྱེད་པ་ཡིན་པས་
ན་བྱང༷་ཆུབ༷་ཆེན་པོ་ཡི༷ན་ཞེ༷ས་སངས་རྒྱས་བཅོམ་ལྡན་འདས་ལྷ་མིའི་སྟོན༷་པ༷ས་ར༷བ་ཏུ་གསུང༷ས་པའི་ཕྱིར༷། གང་དངོས་སུ་རྟོགས་པའི་སྐལ་མེད་རྣམས་ཀྱིས་ཀྱང་བརྒྱུད་ནས་རྟོགས་པའི་ཐབས་ལ་འབད་དེ། དེ༷་ལ༷་འཆད་པར་འགྱུར་བ་འདི༷་
13-3-12b


ནི༷་དོན་དམ་པ་བྱང༷་ཆུབ༷་ཀྱི་སེ༷མས་ཉི༷ད་བསྐྱེ༷ད་ཅིང་བསྒོ༷མ་པ༷འི་གན༷ས་སམ་རྒྱུར་གྱུར་པ་ཡི༷ན་ཏེ༷། གང་ཞེ་ན་ཏིང་ངེ་འཛིན་དང་ཕྱག་རྒྱའོ། །དེ་ལ་དེ་བཞིན་ཉིད་དང་ཀུན་སྣང་དང་རྒྱུ་ཡི་ཏིང༷་འཛི༷ན་གསུམ༷་པོ་གོམས་པའི་དབང་གིས་མི་མཐུན་ཕྱོགས་
ཀྱིས་མི་འཕྲོག་པའི་བརྟན༷་པ༷ར་བྱས༷་ཤི༷ང་རྒྱལ་པོའི་བཀའ་རྟགས་དང་འདྲ་བར་སྐུ་ཕྱག་ཆེན། ཐུགས་དམ་རྒྱ། ཕྲིན་ལས་ལས་རྒྱ་སྟེ་སངས་རྒྱས་ཀྱི་རྟག༷ས་ཀྱི༷་ཕྱག༷་རྒྱ༷་གསུ༷མ་བཅིང༷ས་ཤིང་བསྒོམ་ན༷ས། གསུང་གི་རྟགས་ཀྱི་ཕྱག་རྒྱ་ཆོ༷ས་ཀྱི༷་ཕྱག༷་རྒྱ་
ཆེ༷ན་པོ༷ར་སེ༷མས་ཉི༷ད་བསྐྱེ༷ད་དེ༷་དེའི་སྙིང༷་པོ༷་བརྗོ༷ད་ཅི༷ང་བསྒོ༷མ་པར་བྱའོ། །ཏིང་ངེ་འཛིན་དང་ཕྱག་རྒྱ་རྣམས་ཆོས་ཉིད་ཡིན་ལ་ཡིན་པ་ལྟར་ཐ་མི་དད་དུ་སེམས་བསྐྱེད་ཅིང་བསྒོམ་ན་དེ་ལས་དོན་དམ་བྱང་ཆུབ་ཀྱི་སེམས་སྐྱེ་སྟེ། 
བསྒོམ་པ་མངོན་དུ་གྱུར་པ་ན་ཆོས་ཀུན་རང་སེམས་ལས་གཞན་དུ་མེད་པར་རང་གིས་རྟོགས་པར་འགྱུར་ཞིང་དེ་བསྒོམ་པས་ཚོགས་སོགས་ཅིང་སྒྲིབ་པ་དག་སྟེ་ཡེ་ཤེས་ལྷས་རྒྱུད་བྱིན་གྱིས་བརླབས་པའི་སྒོ་ནས་ཀྱང་རྟོགས་པར་འགྱུར་རོ། །སྤྱི་དོན་
དགུ་པ་བྱང་ཆུབ་སེམས་ཀྱིས་མ་ཟིན་ན་རྣམ་གྲོལ་མི་ཐོབ་ཅིང་དགེ་བ་ཆུད་ཟ་བར་བསྟན་པ་ནི། སེམ༷ས་ཀྱི་རང་བཞིན་ནམ་ཆོས་ཉིད་རྡོ༷་རྗེ༷་དེ་མ་ནོར་བར་བསྒོམ་པའི་སེ༷མས་དཔ༷འ་བྱང་ཆུབ་ཀྱི་སེམས་བསྒོ༷མ་པ༷ས་ནི་ཡང་དག་པའི་རྣམ༷་གྲོལ༷་གྱི་
ལ༷མ་ཀུན༷་མ༷་ནོ༷ར་བར་ནི་བསྒོམ་པ༷་ཡི༷ན། གོང་ལྟར་རྟོགས་ན་སྤྱོད་ཡུལ་ཐམས་ཅད་ཀུན་ཏུ་བཟང་པོའི་ཡོན་ཏན་ཐམས་ཅད་འབྱུང་བའི་མའམ་ཤེས་རབ་སྟོང་པའི་ལྷ་མོ་སྟེ་ཀུན༷་ཏུ་བཟ༷ང་མོ༷འི་སྟེ་དོན་དམ་བྱང་ཆུབ་སེམས་སྟོང་ཉིད་རྟོགས་པའི་
13-3-13a


སྤྱོ༷ད་པ༷ས་མ༷་ཟི༷ན་པའི་དགེ༷་བ༷འི་ཆོས༷་ནི༷་ག༷ང་ཡ༷ང་རུང༷་སྟེ༷། ཐེག་ཆེན་ཐབས་ཀྱི་སྤྱོད་པ་བྱམས་སོགས་ཀྱིས་ཟིན་པ་ཀུན༷་ཏུ༷་བཟ༷ང་པོའི་སྤྱོ༷ད་པ༷འ༷ང་ཆོས་ཉིད་དང་མི་འགལ་བར་མ་ཞུགས་པས་བདུ༷ད་ཀྱི༷་ལ༷ས་ཏེ༷་ཟ༷ད་ཅི༷ང་མཐ༷ར་
ཐུག༷་པར་འགྱུར༷་རོ། །དོན་དམ་བྱང་ཆུབ་སེམས་དེ༷་ད༷ང་ལྡན༷་པ༷འི་ལ༷ས་ནི༷་ལྟར་སྣང་བདུ༷ད་ཀྱི༷་ལ༷ས་ཀྱང༷་བྱང༷་ཆུབ༷་སྤྱོ༷ད་པ༷ར་གསུང༷ས་ཏེ་ཕྱི་ནང་གི་དངོས་པོ་དང་སྒོ་གསུམ་གྱི་སྤྱོད་པ་གཅིག་ཏུ་ཆད་པའི་ངེས་པ་མེད་དེ་ཤེས་པ་དང་མི་ཤེས་པའི་དབང་
ལས་ཀུན་བྱང་དུ་འགྱུར་བའི་ཕྱིར་རོ། །སྤྱི་དོན་བཅུ་པ་དོན་འདིར་མོས་པ་ཙམ་སྐྱེས་པས་ཀྱང་ཡོན་ཏན་མང་པོ་ཐོབ་པར་བསྟན་པ་ནི། ཇི་སྐད་བསྟན་པའི་དོན༷་འདི༷ར་མོ༷ས་ཤིང་ཡིད་ཆེས་པ༷་དེ༷་ཡ༷ང་བྱང༷་ཆུབ༷་ཆེན༷་པོ༷་ཡི༷ན་ཞེ༷ས་རྒྱལ༷་བ༷ས་ར༷བ་ཏུ༷་བསྔག༷ས་
སོ། །ཡོན་ཏན་ཐམས་ཅད་ཀྱི་གན༷ས་བྱང་ཆུབ་སེམས་འདི༷་བསྐྱེ༷ད་པ༷་ཙམ༷་གྱིས༷་འཇི༷ག་རྟེན༷་གསུམ༷་པོ༷་དང་དེ་དག་གི་གཙོ་བོའི་བླ༷་མ༷ར་གྱུར་པ་ཚངས་དབང་དང་བཅ༷ས་པ༷་ཡི༷། མཆོ༷ད་གན༷ས་སུ་གྱུར་པ་ཉན༷་ཐོ༷ས་རྣམས་དང་སྟོབས་ཆེན་པོ་བདུ༷ད་ཀྱི༷་སྡེ༷་
རྣམ༷ས་མ་ལུས་པ་ཟི༷ལ་གྱིས༷་གནོ༷ན་པར་འགྱུར་རོ་ཞེ༷ས་རྒྱལ༷་བ༷ས་གསུང༷ས་སོ། །བླ་མེད་བྱང་ཆུབ་འགྲུབ་པའི་ཐབ༷ས་ཆེན༷་པོ་གང་ཞིག་བྱང༷་ཆུབ༷་སེ༷མས་དཔའ་རྣམ༷ས་ཀྱི༷་སྤྱོད་ཡུལ་ཡིན་གྱི་ཉན་ཐོས་ལ་སོགས་པས་མི་རྟོགས་པའི་རང་བཞིན་གས༷ང་
བ༷འི་སྤྱོ༷ད་པ༷འ༷ང་འདི༷་ཉི༷ད་དེ༷། བྱང་ཆུབ་སེམས་འདི༷་མེ༷ད་ན་རྒྱལ༷་བ༷ས་ཇི་སྙེད་པའི་ཤེས་བྱའི་དོན་ཀུན་དང་རིགས་ཅན་གསུམ་པོས་དོན་དུ་གཉེར་བའི་ལམ་རྣམ༷་པ༷ར་སྣང༷་བར་མཛ༷ད་པའི་ཐེག༷་པ༷་གསུ༷མ་སྟོན༷་པ་མི༷་སྲི༷ད་དེ་བྱང་ཆུབ་སེམས་མ་རྟོགས་ན་
13-3-13b


སངས་རྒྱས་མི་སྲིད་པ་ཉིད་དོ༷། །གནས་འདི་ལ་སྐ༷ད་ཅི༷ག་ཙམ༷་དུ༷་ད༷ད་པ༷འི་ཤུག༷ས་ཀྱིས༷་གང་ཟག་དེ༷་ཡ༷ང་མི་ཐོགས་པར་མྱུར༷་དུ༷་འཇ༷མ་དཔ༷ལ་གཞོན་ནུ༷ར་གྱུར༷་ཏེ་ངེས་དོན་གྱི་འཇམ་དཔལ་དང་རོ་མཉམ་པར་འགྱུར་བའོ། །ལེགས་པའི་ཡོན་ཏན་ཐམས་
ཅད་བྱང་ཆུབ་སེམས་སུ་མ་འདུས་པ་མེད་པས་ན་རང་བཞིན་ཆོས་ཀྱི་དབྱིངས་ཀྱི་དཀྱིལ༷་འཁོ༷ར་ཉན་རང་ལ་སོགས་པས་མི་རྟོགས་པའི་གས༷ང་བ༷ར་ཞུག༷ས་ཤི༷ང་ཐེག༷་ཆེ༷ན་ཐུན་མོང་མིན་པའི་ད༷མ་ཚིག༷་མཆོ༷ག་རྣམས་ཀྱང༷་བཟུང༷་བ༷་ཡི༷ན་ལ། རིག་འཛིན་
བྱང་ཆུབ་སེམས་དཔའི་ཚུལ༷་ཁྲི༷མས་དང་སྡོམ༷་པ༷་ཀུན༷་ཀྱང༷་བསྲུང༷ས་ཤི༷ང་ཁམས་གསུམ་ན་མཚུངས་པ་མེད་པའི་སྦྱིན༷་གན༷ས་ད༷མ་པ༷ར་ར༷བ་ཏུ༷་བསྔག༷ས་པ་ཡིན་ནོ། །རྒྱུ་མཚན་དེ༷་ཡི་ཕྱིར༷་དོན་དམ་པ་བྱང་ཆུབ༷་སེ༷མས་ཀྱི༷་བསོ༷ད་ནམ༷ས་དེ༷་ལ༷་ག༷ལ་ཏེ༷་
གཟུག༷ས་ཡོ༷ད་སྲིད་ན༷། ན༷མ་མཁ༷འ་བ༷ར་སྣང༷་མུ་ཐུག་པ་མེད་པ་འདི༷་ཡང༷་སྣོ༷ད་དུ་བྱས་ན་ཆུང༷་པ་ལྟ་བུའོ་ཞེས༷་ཕྱོགས་དུས་ཀྱི་རྒྱལ༷་བ༷ས་མཚུང༷ས་པ༷ར་གསུང༷ས་སོ༷། །སྤྱི་དོན་བཅུ་གཅིག་པ་ལོག་པར་ཞུགས་པ་རྣམས་སྙིང་རྗེའི་གནས་སུ་བསྟན་པ་
ནི། ལས་དབང་གིས་སོ་སོར་སྐྱེ་བའི་སོ་སོའི་སྐྱེ༷་བོ༷་རྣམས་རྒྱུད་དྲུག་གི་སྐྱེ་བ༷་སྣ༷་ཚོག༷ས་པ༷་གཅིག་ནས་གཅིག་ཏུ་བརྒྱུད་པ་ད༷ག་ཏུ་སྔར་ཡང་སྐྱེས༷་ཤིང༷་ད་ལྟ་སྐྱེ༷་དང༷་ཕྱིན་ཆད་སྐྱེ༷་བར་འགྱུར༷་ཞིང་དེ་ལྟར་སྐྱེ་བ་རྒྱུན་མི་འཆད་པས་རྟག་ཏུ་སྐྱེ༷་བ༷འི་རྒྱུན༷་གྱི༷་
དབ༷ང་དུ༷་སོ༷ང་བ༷། རང་གི་རྟོག༷་པའི་མཐ༷འ་ཡི་གནས་ཚུལ་ཇི་ལྟ་བུ་ཡིན་པ་མི༷་ཤེས༷་པའི་དབང་གིས་རང་གི་ལོག་པའི་རྟོག༷་པ༷ས་རང་བསླུས༷་ཤིང༷་རྟོག་པ་རྒྱུན་མི་འཆད་པའི་ལུ་གུ་རྒྱུད་ཀྱི་རྟོག༷་པ༷འི་རྒྱུན༷་རྗེས་སུ་འབྲང༷ས་ཤིང་ཡང་དག་པའི་ལམ་
13-3-14a


བསྒོམ་པ་མེད་པ་འཁྲུལ༷་བའི་རྟོག༷་པ་ལ༷ས་རང་བཞིན་ངང་གིས་ཕྱིར༷་ལྡོག༷་པ་ནི་ནམ་ཡང་མེ༷ད་པར་འགྱུར༷་བ༷་དེ་དག་གིས། ཇི་ལྟར་ན་སྒྱུ༷་མ༷འི་སྒྱུ༷་ཐབས་སྔགས་ལ་སོགས་པ་ཤེས༷་པ་དག༷་གིས༷་སྒྱུ༷་མའི༷་གླང༷་པོ༷་སྤྲུལ་པ་དང་འདྲ་བ༷ར་
མི་བདེན་པ་སྒྱུ༷་མས༷་རྨོ༷ངས་པ༷འི་སེམས་ཅན་སྒྱུ༷་མ༷་ལྟ་བུ་རྣམ༷ས། ཇི་ལྟར་ན་རྨི༷་ལ༷མ་གྱིས༷་ཡིད་རབ་ཏུ་བསླུས༷་པ་བཞི༷ན་དུ༷་རྨི༷་བ༷འི་སྟེ་རྨི་ལམ་རྨི་བ་ལྟ་བུའི་སྲིད་པའི་བདེ༷་བ༷འ༷ང་ཉམ༷ས་ཤིང༷་སྡུག་བསྔལ་བའི་རྨི༷་ལ༷མ་ལྟ་བུ་འཁྲུལ་པའི་སྣང་བའི་དབ༷ང་དུ༷་སོ༷ང་
བ༷འི་རྨི༷་ལ༷མ་པ༷་སོ་སོའི་སྐྱེ་བོ་རྣམས་ནི་སྙིང་རྗེ་ཞེས་སོ། །མཐའ་བྲལ་བླ་མེད་ཀྱི་ལ༷མ་འདི༷་བློས་མ་ལྕོགས་ནས་སྤང༷ས་ཤིང༷་མཐ༷འ་ལ་གནས་པའི་མུ་སྟེགས་སོགས་ཀྱི་ལམ་ད༷ང་ལ༷མ་གཞ༷ན་ལ་ཡང་དག་པའི་ལ༷མ་དུ༷་བལྟས༷་ན༷ས་འདི་ནི་མ༷་ནོར༷་བའི་ལ༷མ་
ཡིན་ནོ་ཞེས༷་སྟོན༷་པ༷་ཡོད་དེ༷། དེ་ལྟར་སྨྲ་བ་དེ༷་ད༷ག་ནི་དཔེར་ན་རྡོ༷་ལ༷་གསེ༷ར་ཡིན་ནོ་ཟེར་བ་བཞིན་ཐུག༷ས་རྗེར༷་རུང༷་ཞི༷ང༷་ཞེས་སྙིང་རྗེ་སྐྱེ་བའི་གནས་ཡིན་ལ་ཐུག༷ས་རྗེ༷འི་བདག་ཉིད་རྣམས་ཀྱི་ཐུགས་ནི་ཐུག༷ས་རྗེ༷ས་ཀྱེ༷་མ༷འོ་སྙམ་དུ་རང་དབང་མེད་པར་འཕྲོ༷གས་
པ༷་ཡི༷ན་ཏེ། དཔེར་ན་ཡིད་འོང་གི་ཡུལ་ལ་སེམས་རང་དབང་མེད་པར་འཇུག་པ་ལ་ཡུལ་གྱིས་ཡིད་འཕྲོག་ཞེས་བརྗོད་པ་ལྟར་ཐུགས་རྗེ་མངའ་བ་རྣམས་ཐུགས་རྗེས་སེམས་འཕྲོག་པའོ། །ཤེས་རབ་ཀྱིས་བློ་ཤིན༷་ཏུ༷་མ༷་སྦྱང༷ས་པ་གང་ཞིག་དུ༷ས་
ཀྱིས༷་མན༷ར་བ༷འི་སྐྱེ༷་བོ༷་ལྔ༷་བརྒྱ༷་ཐ༷་མ༷་པ་ལ༷་སྐྱེས་པ་དག །དེ་བཞིན་གཤེགས་པའི་གསུང༷་ར༷བ་མ་ནོར་མ་བསླད་པས་དྲི༷་མ་མེ༷ད་ཅིང་རྟོག༷ས་དཀ༷འ་བ་དག༷་ལ༷་དཔྱོད་པ་ན། ཇི་སྐད་བསྟན་པའི་སྒྲ་ཇི་བཞི༷ན་དུ་སྤྱོད་པ༷ར་འགྱུར་བ་ད༷ང་དོན་གྱི་ཚུལ་ཇི་ལྟ་
13-3-14b


བ་བཞི༷ན་དུ་དཔྱོད་པར་བྱེད་པ་མི༷ན་ཏེ་ཇི་ལྟར་མུན་ཁང་གི་གསེར་དང་སྒྲོན་མ་བཞིན་དུ་དོན་དང་ཚིག་གི་རིམ་པ་མ་ཤེས་ནས་ཚིག་ཙམ་ལ་ཞེན་ནས། ཟབ་མོའི་དབྱིངས་མི་དཔོགས་ཀྱང་རང་ར༷ང་གི༷་བློ༷་གྲོ༷ས་ཀྱིས་ཇི་ཙམ་དཔོགས་པའི་སྟོབ༷ས་བཞི༷ན་དུ་འཇུ༷ག་
པ་ལ༷་སོག༷ས་པ༷་སོ་སོའི་ཞེ་འདོད་ཀྱི་ལྟ༷་བ་སྣ༷་ཚོག༷ས་པ་དག༷་གིས་བསླད་ནས། མི༷་ཤེ༷ས་ཆུ༷་བོ༷ས་གཡེ༷ངས་ཤིང༷་སྟེ་ཁྱེར་ནས་དེ་བཞིན་གཤེགས་པའི་གསུ༷ང་གི༷་ཉིང༷་ཁུ༷་ངེས་པའི་དོན་གྱི་གཞུང་བདུད་རྩི༷་ལྟ་བུ་ལ་ཚུལ་བཞིན་དུ་ཡིད་ལ་བྱེད་པའི་རྣལ༷་
འབྱོར༷་དང་བྲལ༷་བ་ཡིན་ནོ། །སྤྱི་དོན་བཅུ་གཉིས་པ་བརྩམས་པའི་དགེ་བ་བྱང་ཆུབ་ཏུ་བསྔོ་བ་ནི། རྒྱུ་མཚན་དེ༷་ཡི་ཕྱིར༷་རྒྱལ༷་བས༷་གསུ༷ངས་པ༷འི་ལ༷མ་མཆོ༷ག་རྒྱལ་བ་རྣམས་ཀྱི་ཐུག༷ས་ཀྱི༷་གས༷ང་བ༷་ད༷མ་པ༷་འདི༷། ཀུན་ནས་ཀུན༷་ཏུ༷་ཇི་ལྟ་བ་བཞིན་
དུ་རྟོགས་པ་ནི་རྒྱལ༷་བ༷་རྣམ༷ས་ཀྱི༷་ཐུག༷ས་ཀྱིས༷་སྤྱོ༷ད་ཡུལ༷་ཐུན༷་མོ༷ང་མ༷་ཡི༷ན་པ་ཡིན་པས་འཇམ་དཔལ་བཤེས་གཉེན་བདག་གིས་ཀྱང་ཤེས་པ་མིན་ན་ཡ༷ང་། གསང་བ་ཡང་དག་པའི་དོན་འདི་སློབ་དཔོན་རང་ཉིད་ཀྱི་ཡུན་རིང་དུ་གོམ༷ས་པར་
བྱས་པ༷འི་མཐུ༷་ཡི༷ས་ལུང་དང་མན་ངག་དང་མི༷་འག༷ལ་བའི་ཚུལ༷་དུ༷་རིགས་པའི་ཚད༷་མ༷་ད༷ག་ལ༷ས་ར༷བ་ཏུ་བསྒྲུབ༷ས་ཏེ༷། འགྲོ༷་བ༷འི་དོ༷ན་དུ༷་མི༷་གཉི༷ས་པ་སྟེ་གཉིས་མེད་བྱང་ཆུབ་ཀྱི་སེམས་སྟོན་པའི་ལ༷མ་མཆོ༷ག་དུས་གསུམ་སངས་རྒྱས་རྣམས་
ཀྱི་གཤེགས་ཤུལ་ཉིད་གསལ་བ་འདི༷་ནི༷་མདོར་བསྡུས་ཏེ་ར༷བ་ཏུ་བགྱིས༷་པ༷་འདིས་ནི། སྐྱེ༷་བོ༷་ཐམས་ཅད་སྲིད་པར་སྐྱེ་ཞིང་སྐྱེ༷་བ༷འི་གན༷ས་སྐ༷བས་ཐ༷མས་ཅ༷ད་དུ༷་ཡ༷ང་སྐ༷ད་ཅི༷ག་མ་ཙམ༷་དུ༷་ཡ༷ང་། ཡང་དག་པའི་བསམ་པ་མི༷་མཐུན༷་ཕྱོག༷ས་ཀྱིས༷་
13-3-15a


མི༷་ཉམ༷ས་ཤིང་རྒྱལ༷་བ༷་ཀུན༷་གྱི༷་ཐུག༷ས་སུ་ཆུད་པའི་དོན་གྱི་སྙིང་པོ་འདི༷་སེམས་ཅན་ཐམས་ཅད་ཀྱིས་རྟོགས་ཤིང་དེ་དག་གི་རྒྱུད་ལ་ར༷བ་ཏུ་རྒྱས༷་པར་ཤོ༷ག་ཅིག་ཅེས་སྨོན་ལམ་དུ་མཛད་པའོ། །གསུམ་པ་མཇུག་གི་མཛད་
བྱང་བསྟན་པ་ནི། བྱང༷་ཆུབ༷་སེ༷མས་བསྒོམ༷་པ༷་རྡོ༷་ལ༷་གསེ༷ར་ཞུན༷་འཇ༷མ་དཔ༷ལ་བཤེ༷ས་གཉེན༷་གྱིས༷་རྫོ༷གས་པ༷་ཆེ༷ན་པོ༷འི་རྒྱུ༷ད་ལ༷ས་བཏུས༷་པ༷་རྫོག༷ས་སོ༷། །ཞེས་པ་ནི་གོ་སླའོ། །ཟབ་ཅིང་རྒྱ་ཆེ་རྒྱལ་བའི་ཆོས་མཛོད་ཀྱི། །སྙིང་པོའི་ཡང་བཅུད་
རྩོལ་མེད་ཐེག་པའི་ལམ། །དབང་རྣོན་ཚེ་གཅིག་གྲོལ་བྱེད་རྫོགས་པ་ཆེ། །རིག་འཛིན་བྱེ་བའི་གཤེགས་ཤུལ་འདི་རྨད་བྱུང་། །ཆོས་ཀུན་མཉམ་པ་ཉིད་དུ་སངས་རྒྱས་པའི། །ཀུན་བྱེད་བྱང་ཆུབ་སེམས་ཀྱི་རང་བཞིན་མཆོག །མ་
ནོར་གསལ་བྱེད་ངེས་པ་དོན་གྱི་ལུང་། །རྒྱལ་ཀུན་ཐུགས་ཀྱི་གསང་མཛོད་འདི་ཁོ་ན། །དེ་ཕྱིར་རིག་འཛིན་བརྒྱུད་པའི་མན་ངག་བཅུད། །གང་འབྲེལ་གདོད་མའི་རྒྱལ་སར་ངལ་འཚོའི་གསོས། །དུས་ཀྱི་མཐར་ཡང་ཉམས་མེད་ཕྲིན་ལས་
རྒྱུན། །སྤེལ་སླད་ལྷག་བསམ་སྟོན་ཟླའི་དཔལ་ལ་འགྲན། །དེ་ལྟ་ན་ཡང་བདག་བློ་རྨོངས་པའི་དྲིས། །འཕགས་དང་མཁས་པའི་གཞུང་བཟང་རྙོགས་པའི་ཆ། །གང་མཆིས་ཚེ་རབས་སྡིག་དང་ལྷན་གཅིག་ཏུ། །བཤགས་ན་དག་
ཚངས་ཁྲུས་ཀྱི་དངོས་གྲུབ་སྩོལ། །འདིར་འབད་དགེ་བས་ཐེག་མཆོག་རྫོགས་པ་ཆེའི། །རིང་ལུགས་དྲི་མེད་སྲིད་མཐར་ཆེར་རྒྱས་ཤིང་། །བདག་གཞན་སྐྱེ་ཀུན་ལམ་མཆོག་འདིར་ཞུགས་ཏེ། །འཕགས་ལམ་ཆོས་ཉིད་བདེན་པས་
13-3-15b


སྲུང་གྱུར་ཅིག །ཅེས་བྱང་ཆུབ་སེམས་བསྒོམ་པ་རྡོ་ལ་གསེར་ཞུན་གྱི་མཆན་འགྲེལ་དེ་ཁོ་ན་ཉིད་གསལ་བའི་སྒྲོན་མེ་ཞེས་བྱ་བ་འདི་ནི། ཀུན་མཁྱེན་བླ་མ་རིན་པོ་ཆེ་མི་ཕམ་འཇམ་དཔལ་དགྱེས་པའི་ཕྱག་མཆན་ལས། རྗེ་དེ་ཉིད་ཀྱི་ཞབས་
ལ་སྤྱི་བོས་རེག་པའི་བཙུན་པ་འཇམ་དབྱངས་བློ་གྲོས་རྒྱ་མཚོས་དོན་འགྲུབ་ས་ལུག་ལོར་ཞེ་ཆེན་སྒྲུབ་སྡེ་བདེ་ཆེན་པདྨ་འོད་གླིང་དུ་ཞལ་བཤུས་ཤིང་ལུང་རིགས་སྨྲ་བའི་དབང་ཕྱུག་མཁན་ཆེན་ཀུན་བཟང་དཔལ་ལྡན་གྱིས་ཞུས་དག་མཛད་དེ་ལེགས་
པར་གཏན་ལ་ཕབ་པའི་ཡི་གེ་པ་ནི་བློ་གསལ་ལུང་རྟོགས་མཐར་ཕྱིན་གྱིས་བགྱིས་པ་སྟེ། འདིས་ཀྱང་ཐེག་མཆོག་རྫོགས་པ་ཆེན་པོའི་བསྟན་པ་ཡུན་རིང་དུ་གནས་པའི་རྒྱུར་གྱུར་ཅིག །མངྒ་ལཾ།།  །།
13-4-1a


༄༅། །ལུས་ལ་ཉེར་མཁོ་སྐབས་བརྒྱད་པ་བཞུགས་སོ། །
13-4-1b


ན་མོ་གུ་རུ་མཉྫུ་ཤྲཱི་ཀུ་མཱ་ར་ཏཱ་ཡ། ལུས་ལ་ཕན་བྱེད་ཉེར་མཁོ་སྐོར་འདི་ལ་ལུས་བརྟན་པ། པགས་མདངས་བཟང་བ། རྔུལ་ནག་སྲུང་བ། དྲི་ང་བ་བསལ་བ། སྤུ་བཅོས་པ། ནད་ཕྲན་ཚེགས་ཞི་བ། 
སྐད་བཅོས་པ། སོ་སོགས་ལ་ཕན་པ་བསྒྲུབ་པ་སྟེ་བརྒྱད་དོ། །དང་པོ་རྡོ་རྗེ་ཆུའི་གདམས་ངག་ནི། ཕོ་ཅོང་བཟང་པོ་མགར་བའི་སོལ་མལ་དུ་བསྲེགས་ལ་ཅུ་གང་བཟང་པོའི་ཆུ་ལ་བསྐྱུར། ཆུ་དེས་ལུས་ལ་བསྐུ་བྱུག་བྱས་པས་སོ་དམ་
པ་དང་། ལུས་རྡོ་རྗེ་བཞིན་དུ་འགྱུར། ཚེ་ཉི་ཟླ་དང་མཉམ། མདངས་རྨ་བྱ་དང་འདྲ། སྟོབས་ཆེ་མིག་གིས་ཚངས་གནས་མཐོང་། སྐྲ་དཀར་གཉེར་མ་མེད། གཞན་ཡང་རོ་ཙ་བ་སོགས་ཡོན་ཏན་བསམ་གྱིས་མི་ཁྱབ་ཅེས་དུས་འཁོར་
མན་ངག་གོ། ཡང་བདུད་རྩི་རིན་པོ་ཆེ་འཁྲུངས་པའི་རྒྱུད་ལས། རུ་དྲའི་རྡུལ་ལས་འཁྲུངས་པ་དངུལ་རྡོ་དཀར་སྔོ་མདངས་ལྡན་དེ། ཨ་རུ་ར་སྦྱར་བ་ཁོང་དུ་ཟ་ཞིང་། ཕྱི་ནས་ལུས་བཀྲུས་ཏེ་བྱུགས་ན་ལུས་མི་འཇིག་པའི་བདུད་རྩི་ཡིན་
13-4-2a


པས། རྡོ་རྗེ་ལྟར་འགྱུར་རོ། །གལ་ཏེ་ཤི་བའི་རོ་ལ་ཡང་འདི་བྱུགས་ན་སེམས་མེད་ཀྱང་ལུས་གཟི་བྱིན་མི་འཆོར་བར་བསྐལ་བར་བརྟན་ནོ། །ཞེས་གསུངས་པས་འདི་གོང་གི་རྡོ་རྗེའི་ཆུ་དང་སྦྱར་ནས་ལུས་ལ་བྱུགས་
པས་སྲ་ཞིང་བརྟན་པ་དང་།  མདངས་མི་ཉམས་པར་བྱེད་དོ། །ཡང་འབྲུག་རུས་ཞིབ་བཏགས་སྣུམ་སྦྱར་ན་ཚ་ཡོད་སར་བྱུགས་ན་ལུས་ཟུང་མི་འཆོར། ཁོང་བཏང་རུས་པ་སྲ་བའི་སྨན་ཡིན་ཞེས་གསུང་། སངས་རྒྱས་ཀྱི་གདུང་ལས་
བྱུང་བ་ཐལ་ཀ་རྡོ་རྗེ་ནི་ཤ་རུས་རྡོ་ལྟར་མཁྲེགས་པའི་སྨན་ཡིན་པས། ཅོང་ཞི་བྲག་ཞུན་ཐལ་རྡོར་འབྲུག་རུས་བཞི་ཁོང་དུ་བཏང་ན་ཤ་རུས་རྡོ་རྗེ་ལྟར་མཁྲེགས་ནས་བརྟན་པའི་མཆོག་ཏུ་འགྱུར་རོ། །གཉིས་པ་ལུས་ཀྱི་པགས་པ་ལ་ཕན་
བྱེད་ཀྱི་སྐོར་ལ་གཉིས་ཀྱི་དང་པོ་སྐྱོན་སེལ་བ་ནི། པགས་ཁྲ་སེལ་བ་ལ། མུ་ཟི་ནག་པོ།  བཙན་དུག །རྡོ་ཞོ་བཏུལ་མ། སྒ། དངུལ་རྡོ་རྣམས་ཆ་མཉམ་ཞིབ་བཏགས་བྱས་ལ། རབ་བུ་མོ་སྟག་ལོ་མ་ལོ་བརྒྱད་པའམ། 
13-4-2b


དེ་མ་བྱུང་ན་བུ་མོ་ལོ་བརྒྱད་མ་གང་རུང་གི་ཆུ་དང་སྦྱར། དང་པོ་པགས་ཁྲ་གྲི་རྩེས་སྐྱི་ལོང་ཙམ་བྲང་དེ། སྨན་བསྐུས་ནས་ཉི་མ་ལ་བསྲེགས་པས་ཐོན་ངེས་སོ། །རུ་རྟ་དང་།  སེང་པོ་རྣམ་ཡུངས་སྐྱེས། གཉིས། ཡུངས་ཀར་ཁྱིམ་གྱི་དུད་པ། དུག་ཉུང་ས་བོན་རྣམས་དལ་བར་
བཏགས་ཏེ་ལུས་ལ་དྲིལ་ཞིང་བྱུག་ན། ཤ་བཀྲ་ཤུ་བ་འབྲུམ་ཕྲན་གཡན་པ་སོགས་པགས་ནད་ཐམས་ཅད་སེལ་བར་བྱེད། རྟག་ཏུ་བརྟེན་ན་བུད་མེད་དམ་བྱིས་པའི་མཛེ་དང་ཤ་བཀྲ་ལ་འདི་ལས་ལྷག་པ་མེད་ཅེས་གསུངས་སོ། །ལ་ཕུག་གི་ས་བོན།
པྲི་ཡངྐུ། ཙན་དན་དམར་པོ།  རུ་རྟ་རྣམས་བཏགས་པའི་ཕྱེ་མས་དྲིལ་ཕྱིས་བྱས་པས་ཁྱི་རྔོ་སོགས་འཇོམས་ཞེས་རྒྱུད་ལས་སོ། །དུར་བཱ་དང་ཡུངས་བ་བཏགས་བྱུགས་རྔོ་ཤུ་སེལ་ཞིང་མེ་དབལ་དང་ཕོལ་མིག་ཁྱི་རྨ་ལ་ཡང་ཕན་ཞེས་རྒྱུད་ལས་གསུངས། གདོང་ལ་གྲོ་
ཐིག་ཡོད་སར་ཁང་བྱིལ་གྱི་བྲུན་ཆུ་སྦྱར་ཉིན་བདུན་བར་བྱུག་ན་མེད་པར་འགྱུར་རོ། །ཟངས་རྩི་དང་འཛེར་ལྡུམ་ཡང་ཡང་ཇི་སྲིད་བྱུག་པས་འཛེར་བ་རྣམས་མེད་པར་བྱེད་དོ། །རྒྱ་ཚྭ་དང་གླུམ་ཁུ་བྱུག་ཀྱང་དེ་བཞིན་ནོ། །ཟླ་བ་ཉ་དུས་ལམ་རྒྱ་གྲམ་གྱི་ས་བླང་བས་
འཛེར་བ་ཕྱིས་ནས་རང་གི་དྲི་ཆུས་བཀྲུས་པས་སེལ་ལོ། །གཉིས་པ་པགས་མདངས་བཟང་བར་བྱེད་པ་ལ། རུ་རྟ་སྤྲ་ཚིལ་ཁ་རུ་ཚ་སྤོས་དཀར་ཏིལ་མར་རྣམས་བ་ཆུ་སྦྱར་བ་བྱུགས་ན་གདོང་གི་སྐྱོན་དག་ནས་པདྨ་གཞོན་ནུའི་མདངས་དང་ལྡན་པར་འགྱུར་རོ། །ཡང་ན་རྒྱ་མཚོའི་སྦུ་བ་
དང་མུ་ཟི་སེར་པོ་ཞིབ་བཏགས་སྦྲང་རྩི་སྦྱར་བ་བྱུགས་ཀྱང་དེ་དང་འདྲའོ། །ཡང་ན་ཡུངས་ཀར་ཐང་ཕྲོམ་ཤུ་དག་རྒྱམ་ཚྭ་དང་བཏགས་པའི་ལྡེ་གུས་ཀྱང་གོང་བཞིན་ནོ། །བཅོད་དང་སྐྱེར་པའི་བར་ཤུན་བཙག་ཡུགས་ལྡོང་རོས་རྣམས་ཀྱི་ཕྱེ་མ་འོ་མ་དང་མར་དུ་བསྐོལ་བའི་ལྡེ་གུས་གདོང་
13-4-3a


ལ་བྱུགས་ན་ཉི་མ་འཆར་ཁ་བཞིན་དུ་མཛེས་པར་འགྱུར་རོ། །ཡུངས་ཀར་བཙག་ཡུགས་ལྡོང་རོས་རྣམས་ར་འོར་སྦྱར་བའི་ལྡེ་གུས་བྱུགས་ན་གདོང་ཟླ་བ་ལྟ་བུར་འགྱུར་རོ། །ནས་ཕྱེ། ཡུང་བའི་ཕྱེ་མ། བ་ཆུ། མར་དང་སྤོས་དཀར་ཤང་
མངར་རྣམས་ཆ་མཉམ་གྱིས་གདོང་ལ་དྲིལ་ཕྱིས་བྱས་ན་པདྨ་གསར་པའི་མདངས་དང་ལྡན་པར་འགྱུར་ལ། རྐང་པ་ལ་དྲིལ་ཕྱིས་ཀྱིས་པདྨའི་འདབ་མ་ལྟ་བུར་འགྱུར། ཚུལ་དེས་བུད་མེད་ཐམས་ཅད་རྒྱལ་པོའི་ཕོ་བྲང་དུ་མཛེས་ཤིང་ལྟ་ན་སྡུག་པར་འགྱུར་རོ། །སྟོད་ཇ་
དང་བ་ཆུའི་འདག་ཆལ་གདོང་ལ་བྱུགས་ཏེ་རེ་ཞིག་བཞག་ནས། སླར་བཀྲུས་ན་དྲི་མ་དག་སྟེ་ཁ་དོག་གསལ་ལོ། །ཉི་མ་དང་གྲང་ལྷགས་སོགས་ཀྱིས་གདོང་ནག་པོར་སོང་བ་ལ་བུ་རམ་གྱི་ལྡེ་གུས་བྱུགས་པ་ཞག་གཅིག་སོགས་སུ་བཞག་ལ་བཀྲུས་པས་སེལ་ལོ། །ཤིང་
ཚ་གླ་སྒང་རྒྱ་སྤོས་པ་ཏྲ་གེ་སར་ཏི་ཚ་རུ་རྟ་ན་གི་རྣམས་དང་། སྐྱུ་རུ་ར་ཆ་གསུམ་བྱས་པ་འདི་བཀྲུ་བའི་འདག་ཆལ་གྱི་མཆོག་གོ་ཞེས་རྒྱུད་ལས་སོ། །ཡང་ཙན་དན་གྱི་ཆུས་ཁྲུས་བྱས་ན་ལུས་ཀྱི་གཟི་བརྗིད་འཕེལ་ཞེས་གསུངས། ལུས་ལ་གཉེར་མ་མེད་པར་འདོད་
ན། མུ་ཟི་ནག་པོ་རྟ་ཡི་འོ་མར་བཙོས་ལ། དེར་ཁམ་བུའི་མར། རྩི་མར། བ་དམར་འོ་མ་བསྲེས་ཏེ། དང་པོ་རང་ལུས་རང་གི་དྲི་ཆུས་བཀྲུས་ནས། རྫས་དེ་ཁོང་དུ་འང་བཏང་། ལུས་ཐམས་ཅད་ལ་ཁྱབ་པར་བྱུགས་པས་གཞོན་ཤ་ཆགས་ཤིང་གཉེར་མ་མེད་པར་
འགྱུར་ཞེས་རིག་འཛིན་དགའ་རབ་རྡོ་རྗེའི་གསུང་ལས་སོ། །ཡང་། ཡུངས་ཀར་ཤུ་དག་སེ་འབྲུ་རྒྱ་ཚྭ་བཞི་ཞིབ་བཏགས་སྐྱོ་མ་བྱད་ལ་བྱུགས་ན་གཉེར་མ་མི་ཆགས་ཤིང་ཤ་མདངས་ལེགས་པོ་འོང་ངོ་། །གསུམ་པ་ལུས་ཀྱི་རྔུལ་ཆུ་བསྲུང་བ་ལ། བཅའ་སྒ་པི་ལིང་ཕོ་རིས་
13-4-3b


གསུམ་མར་དང་སྦྱར་བ་ལུས་ལ་བྱུག །རྫ་གསར་གྱི་ཕྱེ་མ་སྲན་ཕྱེ་ཞོ་སྦྱར་བས་ལུས་ལ་དྲིལ་ཕྱིས་བྱས་ན་ལུས་སྐམ་སང་གིས་འགྲོ་རྔུལ་ནག་མེད་ངེས་སོ། །ཞེས་གཏེར་མ་ལས་སོ། །ཡང་ཞུ་མཁན་འབྲས་བུ། རྩ་དྭ་བའི་རྩ་བ། ཁ་རུ་ཚྭ། ཡུངས་ཀར། སྐེ་ཚེ་
རྣམས་ལུས་ལ་བྱུགས་ན་དྲི་མ་མི་ཆགས་སོ། །བཞི་པ་ལུས་ཀྱི་དྲི་ང་བ་བསལ་བའི་སྐོར་ལས། བསེ་དྲི་འདོན་པའི་ཐབས་ནི། ཞ་ཉེ་བརྡ་རབ། བྱང་བུལ། གཡེར་མ། སྒོག་པ། དུད་པ་རལ་པ། ཙན་དན་ལྔ་ལྗིད་མཉམ་འབྲི་མར་ལ་སྦྱར་ནས་མཆན་འོག་བསྐུ་
མཉེ་བྱས་པས་ཕན་ངེས་སོ། །ཡང་གཅིག་ཟངས་གཡའ་དང་ཚྭ་དང་མར་རྙིང་གསུམ་གྱི་ལྡེ་གུས་ཚད་པའི་དུས་སུ་སྐེ་དང་མཆན་འོག་ཏུ་ཡང་ཡང་བྱུགས་ནས་ཉི་མ་ལ་བསྲེག །དེ་འདྲ་ལན་འགའ་བྱས་ན་བསེ་དྲི་ཇི་ལྟར་ཆེ་ཡང་ཐོན་པར་འགྱུར་རོ། །ཡང་གླ་རྩི་མཚུར་
ནག་མུ་ཟི་ཟངས་གཡའ་རྭ་གཞོབ་ཚ་བ་གསུམ་ཞིབ་བཏགས་མར་རྙིང་སྦྱར་བ་མཆན་ཁུང་སོགས་ལ་བྱུག །ཉི་མས་ཡང་ཡང་བསྲེགས་ན་འཐོན་པར་ངེས། སྔགས་ནི། ཨོཾ་བཛྲ་བི་ཡཀྵ་ཧཱུྃ་ཕཊཿ  ཞེས་བཟླ་སྟེ་ཟབ་བོ། །ཡང་མཆན་འོགས་སུ་རྔུལ་འབྱུང་ཚེ་དྲི་ལྷག་
པར་ང་བ་ལ་ཤུག་ཐལ་གྱིས་འཕུར་བས་ཀྱང་སྐབས་སུ་ཕན། ཡང་བུལ་ཏོག་གི་ཆུས་བཀྲུས་ལ་དེའི་ཤུལ་དུ་དུད་པ་བྱ་བལ་མ་དང་སྲན་མའི་མེ་ཏོག་ཞིབ་བཏགས་བུལ་ཏོག་གི་ཆུར་སྦྱར་བ་བྱུགས་པས་ངེས་པར་ཕན་ནོ། །བསེ་དྲི་འདི་ནི་མི་རིགས་སོགས་ཀྱིས་ལྷན་སྐྱེས་དག་
གོས་ཀྱི་རྒྱུད་ནས་འགོས་པ་ཡང་ཡོད་ལ། གང་ལྟར་ཀྱང་དབྱར་དུས་ཚ་བ་སོགས་ཀྱི་དུས་སུ་གོང་གི་སྨན་སྔགས་རྣམས་ཡང་ཡང་ཡུན་རིང་པོར་ཇི་སྲིད་མ་ཞི་བར་འབད་པས་བསྟེན་ན་བསེ་དྲི་རྩད་ནས་འཐོན་པར་མཐོང་ངོ་། །ནྱ་གྲོ་དྷ་ཡི་ཤིང་བུ་མཐེའུ་ཆུང་ཙམ་པ་བ་གཅིན་
13-4-4a


ནང་དུ་ཞག་གཅིག་སྦང་བ་དེས་སོ་བྲུད་ནས། དེ་རྗེས་ཨ་རུ་ར་དང་རུ་རྟ་མཉམ་པས་སོ་ལ་བགོས་ན་ཁ་ཡི་དྲི་སེལ་བའི་མཆོག་གོ། ཞེས་རྒྱུད་ལས་སོ། །གླ་སྒང་ཀ་ཀོ་ལ་སུག་སྨེལ། རུ་རྟ། འུ་སུ་ཤིང་མངར་རྣམས་སྦྱར་བ་ཁར་ཟོས་ན་
རྣག་དང་སྒོག་པའི་དྲི་དང་ཆང་གི་དྲི་འཕྲོག་པའི་མཆོག་གོ་ཞེས་རྒྱུད་ལས་སོ། །ཡང་སུག་སྨེལ་དང་འུ་སུ་ཁོ་ནས་ཀྱང་འགྲུབ་བོ་ཞེས་གསུང་།  ཡང་ཏང་ཀུན་ཁ་རུ་འཆོས་པས་ཀྱང་སྐབས་ཀྱི་ཁ་དྲི་སེལ་ལོ། །སྲོ་ལོ་དམར་པོའི་ཆུས་མ ཁུར་བཀང་བྱས་ན། ཁ་ཡི་དྲི་སྦྱོང་
ཞིང་ཁ་ནད་ལ་ཕན། མཚུར་ནག་གི་ཆུས་སོ་ཡི་དྲི་སྦྱོང་བར་བྱེད། སུག་པའམ་བུལ་ཏོག་གམ་འདག་ཆལ་གྱི་རྫས་ཀྱིས་ལུས་བཀྲུས་པའམ། ཆུ་ཚན་སོགས་སུ་ཞུགས་ནས་དག་པར་བྱས་ལ་དྲི་བཟང་པོའི་སྨན་རྣམས་མར་གསར་སྦྱར་ཏེ་ལུས་ལ་ཡང་ཡང་བྱུགས་
པས་དྲི་བཟང་ཞིང་ལྷ་དང་མི་རྣམས་དགའ་བར་འགྱུར་རོ། །ལྔ་པ་སྤུ་བཅོས་ཀྱི་སྐོར་ལ། རྟ་རྨིག་བསྲེགས་པའི་གཞོབ་དང་། དབྱི་མོང་བཙོས་པའི་ཁུ་བ། གླུམ་གྱི་ཁུ་བ། མར་ནག་རྣམས་སྦྱར་ནས་བྱུགས་པས་ལུས་ཀྱི་སྤུ་རྣམས་སྐྱེ་ཞིང་། སྐྲ་དཀར་ལ་བསྐུས་ན་ནག་
པོར་འགྱུར། སྐྲ་མེད་པ་དང་མེས་ཚིག་པའི་ཤུལ་དུ་བསྐུས་ན་སྔར་བས་ལྷག་པར་སྐྱེ་བར་འགྱུར་རོ། །མ་ཧེའི་རྭ་སྐྱུ་རུ་ར་ཆ་མཉམ་གྱི་ཆུ་ལ་ཚོས་པར་བཙོས་ནས་བཏོན་ལ་མེར་ནུས་བསྲེག་ཐལ་བ་དེ་གོང་གི་ཆུ་ལ་བཏབ་སྟེ་མགོ་ལ་བྱུགས་ན་སྐྲ་ཤིན་ཏུ་བཟང་པར་སྐྱེའོ། །
དེ་རྗེས་པགས་མཚམས་ཆུ་སེར་འཕེལ་བའི་རྟགས་བྱུང་ན་རྭ་དེ་ཉིད་སྣུམ་གྱིས་བཙོས་ལ་བྱུགས་པས་ཞི་བར་འགྱུར་རོ། །ཡང་རི་བོང་གི་ཁྲག་དང་གཙོད་ཁྲག་སྣག་ཚ་གསུམ་སྦྱར་ཏེ་བྱུགས་ན་སྐྲ་དང་སྨིན་མ་ལེགས་པར་སྐྱེའོ། །ཡང་སྐྱུ་རུ་ར་དང་རུ་རྟ་ཨུཏྤལ་སྤང་སྤོས་པཱ་ལ་
13-4-4b


རྣམས་ཀྱི་ཁུ་བས་བྱུགས་ན་སྐྲ་སྲབ་པ་ཡང་ཚན་འཐུག་པོར་སྐྱེ་ཞེས་རྒྱུད་ལས་སོ། །ཡང་སྐྱུ་རུ་ར་ཨ་རག་(ཨར་ནག་གམ་)གི་ནང་དུ་སྦང་བའི་ཁུ་བ་བྱུགས་ན་སྐྲ་ཚན་ཆེར་སྐྱེའོ་ཞེས་བཤད། ཡང་ཕག་ཚིལ་རྙིང་པ་དང་ཁམ་བུའི་ཚི་གུ་ལྡོང་རོས་བ་བླ་རྐང་མར་སྦྲང་རྩི་སྦྱར་ནས་སྨིན་མ་ལ་བྱུག་ན༷ད།
སྐྱེ་བར་འགྱུར་རོ། །ཡང་ཕག་ཚིལ་དང་ཁམ་བུའི་སྙིང་པོ་གཉིས་(སྲེག་འདྲ་དཔྱད་)བསྲེས་པའི་ཆུས་བསྐུས་ན་སྐྲ་ཡག་པོ་སྐྱེ། ཡང་ཟར་མ་བསྲེག་ཐལ་མར་སྦྱར་བྱུགས་ན་སྐྲ་ཟན་མི་འོང་སྐྲ་འཐུག་པོར་སྐྱེ། བྱ་ཕོའི་སྒོ་ང་དང་ཚྭ་གཉིས་མཉམ་བསྲེས་བྱུགས་ན་སྐྲ་སོགས་
འཐུག་པོར་སྐྱེའོ། །སྤུ་མེད་པ་ལ་གསར་དུ་སྐྱེ་བར་འདོད་ན། སྤྱི་ཐེར་སྐྲ་མེད་སར་རྟའི་ཀླད་པ་ཉིན་བདུན་བྱུགས་ན་སྐྲ་སྐྱེ་བར་འགྱུར་རོ། །ཡང་ན་ཁྱིའི་མཆེ་བ་ནུས་བསྲེགས་བྱས་ནས་འོ་མ་མར་དང་བཅས་པས་མཉེ་བར་བྱས་ན་སྐྲ་མ་སྐྱེས་པ་ཡང་སྐྱེའོ་ཞེས་རྒྱུད་
ལས་སོ། །རྒྱ་དང་སྨ་ར་འདོད་ན་སྲེ་མོང་གི་ཁྲག་གིས་སྐྱི་ཤུན་གར་འདོད་དབྱིབས་སུ་ཀླན་ལ་སྐམ་ཚེ་དྲག་འཐེན་བྱས་ན་དེ་ཡི་ཤུལ་དུ་སྤུ་སྐྱེའོ། །གང་འདོད་དུ་སྤུ་སྐྱེ་བར་འདོད་ན། དུད་པ་ཉེ་ཤིང་གི་རྩ་བ། སླང་དྲེག་ལྷམ་འབོག་བསྲེགས་པའི་གཞོབ་དང་བཞི་
པོ་མར་ནག་དང་སྦྱར་ཏེ་གང་འདོད་པར་བྱུགས་ན་དེར་སྤུ་སྐྱེ་བར་འགྱུར་རོ། །སྤུ་མི་སྐྱེ་བར་འདོད་ན། སྲེ་མོང་གི་ཁྲག །མུ་ཟི་འབྲི་ཚིལ་མ། ར་དུག་གསུམ་བསྲེས་ནས་བྱུགས་ན་སྤུ་མི་སྐྱེའོ། །ཡང་བ་བླ་ཆ་ལྔ། རྒྱ་སྐྱེས་ཤིང་གི་ཐལ་བ། ནས་ཐལ། ཆུ་ཤིང་གི་
ཐལ་བ་འདི་གསུམ་རེ་རེ་ནས་ཆ་རེ་རེ་སྟེ་འདི་རྣམས་ཆུ་ནང་འདམ་འཐག་བྱས་པ་བྱུགས་པ་ཙམ་གྱིས་མཚན་མའི་སྤུ་ཀུན་བྱི་བར་འགྱུར་རོ་ཞེས་རྒྱུད་ལས་སོ། །ཡང་སྨན་དེ་དང་སྦྲུལ་མཇུག་གི་ཕྱེ་བསྲེས་ནས་ཚ་བའི་ཏིལ་མར་དུ་ཞག་བདུན་བཞག་ལ་དེ་ཡིས་ལིང་ག་སོགས་
13-4-5a


མཉེས་ན་སྤུ་མི་འབྱུང་ངོ་། །ཞེས་གསུངས། ཡང་སྐྲ་དང་ཁ་སྤུ་མེད་པར་འདོད་ན་བཞར་ཏེ་སྒོམ་ཕ་ཝང་གི་ཀླད་པས་བསྐུ་མཉེ་ཐང་གསུམ་བྱས་ན་སླར་མི་སྐྱེའོ། །ལ་ལར་ཕ་ཝང་གི་ཁྲག་ཀྱང་དེ་འདྲར་བཤད་དོ། །ཡང་སྦྲུལ་གྱི་ཚིལ་
སྦལ་ཁྲག་སྐྱ་ཀའི་ཁྲག་གསུམ་བྱུགས་པས་སྤུ་མི་སྐྱེ་བར་བྱེད་དོ། །ཡང་སྤུ་མི་སྐྱེ་བའི་རྫས་ཁྱད་པར་ཅན་ནི། ལྡོང་རོས། ཡ་བཀྵ་ར། གོ་ཆེའི་ཤ   རྒྱ་ཚྭ། བ་བླ་དྲུག་སྤུ་བྲེགས་པའི་ཤུལ་དུ་བྱུགས་ན་སླར་མི་སྐྱེའོ། །སྐབས་འདིར་གོ་ཆེའི་ཤ་ཞེས་པ་ནི།  བསེ་
ཞོ་བསེ་འབྲས་གཉིས་ཀྱི་ཕྱི་ཤུན། ཡ་བཀྵ་ར་དང་བུལ་ཏོག་ཏིལ་མར་རམ་མར་ལོ་ལོན་བཀོལ་ནང་བླུགས་ནས་ཡུན་རིང་མི་བསྐོལ་བ་མན་ངག་གོ། སྨན་ནད་བྱུང་ན། དངུལ་ཆུ་རིལ་བུ། གླ་རྩི་ཤུ་དག །རྒྱ་སྣག་བཞི་སྦྱར་བའི་ཆུས་བྱུགས་ལ་སླར་བཀྲུས་པས་
སེལ་ལོ། །མྱོང་གྲུབ་མའོ། །སྐྲ་དཀར་པོ་ནག་པོར་བསྒྱུར་བའི་ཐབས་ལ། སྐྲ་བཞར་ནས་དག་པར་བཀྲུས་ཏེ་ཨ་རུ་རའི་ཁུ་བས་ལན་བདུན་བྱུགས། དེ་སྐམ་ནས་ནག་མཚུར་གྱིས་བྱུག །དེ་ལྟར་ལན་བདུན་བསྐྱར་ན་བརྒྱད་ཅུ་པ་ཡང་སྐྲ་དཀར་པོ་རྣམས་
ནག་པོར་འགྱུར་ཞེས་གཏེར་མ་ལས་སོ། །འདིས་སྐྲ་ལ་བྱུགས་ན་དུས་རྒྱུན་སྐྲ་མདོག་གནག་པ་ལ་ཕན་པར་སྣང་ངོ་། །འབྲས་བུ་གསུམ། ཚོན་རམས། མཚུར་ནག །བྷྲྀང་གི་ར་ཛའི་ཁུ་བ་ཨ་མྲའི་ས་བོན། ལྕགས་ཀྱི་ཕྱེ་མ་རྣམས་རང་ཆང་སྐྱུར་ནང་
བསྙལ་ནས་བཅང་། དེ་ནས་གུ་གུལ་གྱིས་སྐྲ་ལ་བདུག་ནས་གོང་གི་རྫས་དེས་མཉེ་ཞིང་ཞག་བདུན་བཅངས་ནས་བཞག་ན་སྐྲ་ནག་པོར་ཁ་བསྒྱུར་བར་འགྱུར་རོ་ཞེས་རྒྱུད་ལས་གསུངས། ཡང་རྨ་བྱའི་མཁྲིས་པ། བྷྲིང་གི་ར་ཛའི་ཁུ་བ་གཉིས་
13-4-5b


དག་པའི་མར་ལ་བཙོས་ཏེ་སྣར་བླུགས་པས་ཞག་བདུན་ནས་སྐྲ་ནག་པོར་འགྱུར་རོ་ཞེས་རྒྱུད་ལས་སོ། །ཡང་མི་བི་དཱ་རཱི་དང་། ཚ་བ་གསུམ། མུ་ཟི་དང་ཆ་མཉམ་བྱེ་མར་བྱས་ནས་སྡོང་བུའི་ནང་དུ་བཅུག །སྡོང་བུ་ཁ་ཐུར་དུ་བལྟས་ལ་མེ་སྦར། རིམ་པར་ཚ་
བའི་འབྲུ་མར་ཞུ་བ་སྣོད་དུ་བླངས་ནས་དེའི་ཐིགས་པ་གཉིས་རེ་སྣ་ལ་འཐུང་ན་སྐྲ་དཀར་དང་གཉེར་མ་འབྲལ་བར་བྱེད་ལ། དེའི་ཁུ་བ་འཛེར་པར་བྱུགས་ན་སེལ་བར་བྱེད་ཅེས་རྒྱུད་ལས་སོ། །བྷྲྀང་གི་ར་ཛ་(བལ་པོའི་ཡུལ་སྐད་བྷང་གར་ཟེར། རྩ་བ་དཀར་ནག་གཉིས་ལས་ནག་པོ་བཅུད་ལེན་ལ་བཟང་ཞེས་བཤད་པ་མཐོང་། བྷྲྀང་གི་ར་ཛ་ཞེས་བུང་བའི་རྒྱལ་པོར་ཡང་བསྒྱུར་བ་འདུག་ཀྱང་སྐྲའི་ཚོས་ཞེས་ར་ཛ་རིང་ཆ་མེད་པ་འཆི་མེད་མཛོད་འགྲེལ་དུ་གསུང་པ་འཐད་སྙམ་མོ། །མཆན།) ཁོ་ནས་ཀྱང་སྐྲ་ནག་པོར་བསྒྱུར་ནུས་པས་སྐྲ་ཡི་ཚོས་ཞེས་
ཟེར་རོ། །ཡང་འབྲས་གསུམ་ལྕགས་ཕྱེ་ཙི་ཏྲ་ཀ་སེ་འབྲུའི་རྩ་བ་རྣམས་ལྕགས་སྣོད་ནང་ཟླ་གཅིག་བཞག་སྟེ་དེས་བསྐུས་ན་རུས་
གོང་འདྲ་བའི་སྤུ་དཀར་པོ་རྣམས་ནག་པོར་འགྱུར་རོ་ཞེས་རྒྱུད་ལས་གསུངས། ཡང་ལྕགས་ཕྱེ་རྒྱ་ཚྭ་འབྲས་གསུམ་རྣམས་རྩབ་བམ་ཞོ་དཀྲུགས་ལ་སྦྱར་ཏེ་བསྐོལ་བ་ནུབ་མོ་མགོ་ལ་བྱུགས་ནས། ནང་བར་འབྲས་གསུམ་ཁུ་
བས་བཀྲུས་ན་སྐྲ་ནག་པོར་འགྱུར་རོ། །ཡང་དུད་སོལ་མེར་བསྲེགས་ནས་དམར་ལྷང་ངེར་སོང་བ་དེ་ཆུ་གྲང་ནང་འཕང་། དེའི་ཕྱེ་མ་མར་དང་སྦྱར་ཏེ་བྱུགས་ན་སྐྲ་ནག་པོར་འགྱུར། ཡང་ར་ཕོའི་རྭ་དང་སོ། །བྱ་རོག་ཕོའི་སྒྲོ། འགྲོན་ཐལ། ལྕགས་དྲེགས། ཐར་ནུ་ནག་
མཚུར་རྔམ་གསུམ་བསྲེགས་པའི་ཐལ་བ། ཕྱེ་མ་གསུམ་གོང་གི་འདྲ་རང་བཙོས་པའི་ཁུ་བར་བཏབ་ལ། དེར་འོ་མ་དང་མར་ནག་བླུགས་ནས་དྲོན་མོར་བྱས་པ་དེ་སྐྲ་ལ་བྱུགས་ན་ནག་པོར་འགྲོའོ། །ཡང་བ་ལུའི་རྩ་བ་གྲིབ་བསྐམ་མེར་བསྲེགས་པའི་སོལ་ཕྱེ་མར་དཀར་དང་
13-4-6a


བསྲེས་ནས་བྱུགས་པས་ཟླ་བ་རེ་ལ་སྐྲ་ནག་པོར་འགྲོའོ། །ཕ་དམ་པའི་གདམས་པ་ལས་སོ། །དེ་སོགས་སྐྲ་དཀར་ནག་པོར་བསྒྱུར་བའི་སྨན་སྣ་ཚོགས་ཡོད་ཀྱང་འདིར་དེ་ཙམ་མོ། །དྲུག་པ་ནད་སྣ་ཚོགས་ཞི་བ་ནི། རྒྱས་པར་གསོ་དཔྱད་
ཀྱི་གཞུང་སོགས་ལས་ཤེས་པར་བྱ་ལ། འདིར་ལུས་ལ་འཚེ་བ་ཕྲན་ཚེགས་རྣམས་ཞི་བ་དང་། ཕན་པ་སྒྲུབ་པ་བཤད་པ་ལ། རྒྱུན་དུ་ཚ་བའི་ནད་གཞི་ཡོད་ན་ཕྱོགས་བཅུའི་ཁམས་ཀྱི་བདུད་རྩི་བསིལ་བ་ཟླ་ཞུན་ལྟ་བུ་ཁ་ནས་རྔུབ་སྟེ་ལུས་གང་བར་བསམ་ལ། 
ཁ་ནས་སིབ་ཀྱིས་རྔུབ་པ་བཅས་བུམ་ཅན་ཅི་རིགས་རེ་རྒྱུན་དུ་བཟུང་། གུར་གུམ་དང་སྤང་སྤོས་ཀྱི་ཁུ་བ་ཅུང་ཟད་རེ་བཏུང་བར་བྱ། ཟས་སྤྱོད་ཐམས་ཅད་བསིལ་བ་དང་བསྟུན་པར་བྱའོ། །གྲང་ནད་ཆེ་ན་ཟས་སྤྱོད་དྲོ་བར་བྱ། ཕྱོགས་བཅུའི་དྲོད་
བཅུད་བསྡུས་ཏེ་གཏུམ་མོ་བསྒོམ་ལ་བུམ་ཅན་བཟུང་། སྨན་དྲོད་ཅན་འཇམ་པོ་ཅུང་ཟད་རེ་བསྟེན་པར་བྱའོ། །མ་ཞུ་བ་ལ་ཆུ་བསྐོལ་ཚ་མོ་བཏུང་། ལག་མཐིལ་གྱི་ལྟོ་བ་མཉེ། ཨོཾ་ཀྵུ་སུ་ཀྵུ་ཧ། ཞེས་བརྗོད་པས་ཕན་ནོ། །རླུང་ལ་སྣུམ་ཅན་གྱི་ཟས་
དང་བསྐུ་མཉེ་བསྟེན། ལུས་སྨྱུག་དོང་མར་ཁུས་གང་བ་ལྟར་དམིགས་ལ། ཨོཾ་ཨཱཿ་ཧཱུྃ་ཏྲཾ་པ་ར་ཎ་ཧཱུྃ་ཕཊ་སྭཱ་ཧཱ། ཞེས་བཟླ་ཤིན་ཏུ་ཟབ། མཁྲིས་པ་ལ་ཏིག་ཏ་དང་ཨ་རུ་རའི་ཐང་བཏང་། ན་མོ་ཧི་ཏུ་ཧེ་ཀེ་སྭཱ་ཧཱ༑ ཞེས་བཟླས་པས་ཅི་ལྟར་ཡང་སེལ་བར་
འགྱུར་རོ། །བད་ཀན་ལ་རྩོལ་བ་སྤྱད་ཅོང་ཞི་སྐྱུ་རུ་པྲི་ཡངྐུ་རྣམས་བསྟེན། བད་ཀན་སྐྱེ་བོ་གྲང་ཤས་ཆེ་བ་ལ་དྲོད་སྨན་དང་ཐལ་སྨན་རྣམས་བསྟེན། བཀའ་ལས་གསུངས་པའི་སྔགས། ཨོཾ་ཤཱནྟཱི་ཤཱནྟཱི། བྷི་ཏི་ཤཱནྟཱི། སརྦ་བི་ཏི་མུ་ལ་མྱགས་སྭཱ་ཧཱ། འདིས་
13-4-6b


བད་ཀན་གྱི་ནད་སེལ་ཏེ། ཟས་མ་ཞུ་བ། སྦོས་པ། སྐྲན་ནད། ཁྲག་དང་ཆུ་སྐྱུགས་པ་བད་ཀན་གྱི་ཟུག་གཟེར་སེལ་བར་འགྱུར་རོ། །ཁྲག་ལ་ཙནྡ་སྨུག་པོ་དང་བ་ཤ་ཀ་ཧོང་ལེན་སྐྱུ་རུ་རྣམས་ཀྱི་ཐང་བཏང་ལ་མ་འཁྲུགས་པར་བསྡད། སྲིན་ལ་བྱི་ཏང་མ་རུ་རྩྭེ་
དང་རུ་རྟ་གུར་གུམ་གྱི་ཐང་བཏང་། བདུད་རྩི་འབེབས་སྦྱང་གིས་ནད་ཐམས་ཅད་བུ་ག་རྣམས་ནས་སོང་བར་བསམ་ལ་སྒྲིབ་སྦྱང་གི་སྔགས་བཟླ། ནད་ཀུན་ལ་ཡང་དེ་ལྟར་བྱ་ཞིང་ནད་ཐམས་ཅད་མེད་པར་བྱེད་པའི་སྔགས་ནོར་བུ་བཟང་པོའི་རྟོགས་པ་ལས་
གསུངས་པ་འདི་བཟླའོ། །ཨོཾ་ཀྵ་པ་ཡ་ཀྵ་པ་ཡ་ཀྵི་སྭཱ་ཧཱ། ཐང་ཕྲོམ་འབྲས་བུ་གཡེར་མ་ལྡུམ་བུ་རེ་རལ་གསུམ་གྲིབ་སྐམ་བྱས་པའི་ཕྱེ་མ་མར་ཁུ་ཚ་བ་དང་སྦྱར་ནས་ལུས་ལ་བྱུགས་ན་ལྗི་བས་མི་ཟ་སྟེ་འཆིང་བར་འགྱུར་རོ་གསུང་། ཡང་གཙོད་ཁྲག་མར་
རྙིང་སྦྱར་བ་ལན་གསུམ་བྱུགས་པའམ། གཡེར་མ་པི་ལིང་ཤིང་མངར་སྦྱར་བའམ།  དབྱི་མོང་ནུས་བསྲེག་མར་སྦྱར་རམ། ཁམ་བུའི་ལོ་མ་རློན་པས་ལུས་ལ་བྱུགས་ཀྱང་ལྗི་བ་སྲུང་། ཡང་ཛཱ་ཏི་བྱ་རྒོད་སྤོས་གླ་རྩི་གསུམ་བཏགས་ཏེ་འབྲི་མར་རམ་ཟོ་མར་
སྦྱར་བ་ལུས་ལ་ཁྱབ་པར་བྱུགས་ན་ཐུབ་སྟེ། ལྗི་སྲུང་ཟབ་མོ་འདི་ཨ་ཙ་ར་དམར་པོའི་ལུགས་སོ། །ཡང་གླ་བའི་ཁྲག །སྟག་མའི་ལོ་མ།  འོམ་བུ་དམར་པོའི་རྩ་བ་གསུམ་ཞིབ་བཏགས་མར་དཀར་ལ་བསྣོས་ནས་ལུས་ལ་བྱུགས་ན་ལྗི་བ་མི་འབྱུང་ཞེས་གསུངས། 
ལུས་ཀྱི་ཤིག་སྲུང་བ་ལ། ཐོག་མར་ཟན་གཏོར། ཤ་ཆེན་ཤིག་དང་བཅས་པ་ཁ་འབར་མའི་སྔགས་ཀྱིས་བསྔོས་ཤིང་ལན་ཆགས་བཏང་ལ་བདེན་བདར་བྱ། སྔོ་རྟག་ངུ་བྲག་ཞུན་བྲག་དྲེག་གླ་རྩི་མུ་ཟི་དངུལ་ཆུ་བྱ་རྒོད་སྤོས་རེ་ལྕག་དུད་པ་བྱ་བལ་
13-4-7a


མ་རྣམས་ཞིབ་བཏགས་མིའི་ཞུན་མར་རམ། མར་ནག་གང་རུང་དང་སྦྱར་ལ་སྔགས་འདི་བརྒྱ་རྩ་བརྒྱད་བཟླས་ཏེ་བཏབ་ནས་ལུས་ལ་བྱུག །ཨོཾ་ཨཱཿཧཱུྃ་ཁོ་ལ་ཙཀྲཿསརྦ་མ་དུམ་ཏ་ཡེ་སྭཱ་ཧཱཿ ཟ་བ་རེ་ལ་ལན་རེ་བྱུག །དེ་ཡིས་ཐེ་
ཚོམ་མེད་པར་ཐུབ༔ སྡིག་པ་ཆེ་བས་གསང་བར་བྱ་ཞེས་འོད་ལྡན་རྒྱུད་ལས་སོ། །ཡང་བྱ་རྒོད་སྤོས་དང་། བ་དམར་གྱི་ལྕི་བ་ཞིབ་བཏགས་ལུས་ལ་བྱུགས་ན་ཤིག་མི་འོང་། ཡང་བ་ཚ་བུལ་ཏོག་ཤིང་ཀུན་སྒོག་སྐྱ་གུར་གུམ་རྣམས་ཆ་མཉམ་ཞིབ་བཏགས་
ལུས་ལ་ཁྱབ་པར་བྱུགས་ན་གོས་མི་འཛད་ཅིང་ལུས་ལ་ཤིག་སོགས་མི་འོང་བ་རྒྱ་གར་པའི་མན་ངག་གོ། སྲོ་ལོ་དཀར་པོ་དང་ལོ་བཙན་ཐེང་པོ་གཉིས་ཞིབ་བཏག་ཕྱེ་མ་ལུས་ལ་བྱུག་ན་ཁྱི་ཤིག་གིས་མི་ཟའོ། །གླང་པོ་ཆེའི་ལྕི་བ་བླང་སྟེ་རུས་སྦལ་གྱི་ཁོག་
པའི་ནང་དུ་བཞག་ལ། དེས་ཁྱིམ་དུ་བདུག་པར་བྱས་ན་འདྲེ་ཤིག་སོགས་རབ་ཏུ་ཞིའོ་ཞེས་རྒྱུད་ལས་སོ། །ཡང་པུ་ཤུད་ཀྱི་སྒྲོ་མལ་གྱི་སྔས་སུ་བཙུགས་པས་ཀྱང་སྲུང་བར་བཤད། ཡང་འདྲེ་ཤིག་སྲུང་ན་རོལ་མོ་གང་རུང་ལ་སྔགས་འདི་བྲིས། ཨོཾ་
པྲཾ་ཁ་ཐཾ་ཁ། སྲོག་ཐུཾ་ཐུཾ་ཧི་སྭཱ་ཧཱ། ཨོཾ་ཤིང་འཕེལ་སྭཱ་ཧཱ། དེ་ཉལ་ཁར་དཀྲོལ་ན་ཇེ་ཉུང་ཇེ་ཉུང་ལ་འགྲོ། མར་ལ་བཏབ་སྟེ་ལུས་ལ་བྱུགས་ཀྱང་མི་ཟའོ། །སྤང་རྒྱན་སྔོན་པོའི་མེ་ཏོག་རང་གི་མགོ་ལ་བཙུགས་ན་སྦྲང་བུས་སོ་མི་འདེབས་སོ། །སོ་གློ་
བུར་བཙན་བརྡུང་ལ་སྤང་རྩི་དང་རྡོ་དྲེག་དམར་པོ་བྱུག །མིག་ལ་གཞན་ཕོག་པས་འགྲམ་ན་གླ་རྩི་རྡོ་དྲེག་མིའི་ནུ་ཞོ་བྱུག །རྐང་ལག་གི་སེན་མོ་གོག་པའི་ནད་ལ། ཙི་ཊི་ཞེས་པ་ཁང་བྱིལ་གྱི་ཀླད་པ་བྱུགས་ན་ཕྲལ་དུ་ཕན། བསེར་བུས་ཕོག་པས་མཆུ་
13-4-7b


གས་ན་རང་གི་སྤྱི་བོར་མར་བྱུགས་པས་ཕན། སེན་སྐྱི་གས་ན་ལྟེ་བར་མར་བྱུགས་པས་ཞི། མིག་ཁ་བས་མི་ཕྱིད་པ་ལ། རུ་རྟའི་དུ་བས་བདུག་པའམ། གླ་རྩི་གོ་སྙོད་སྦྱར་བས་ལྟག་ཁུང་དུ་བྱུག་ན་ཕན། དུ་བ་སོགས་ཀྱིས་མིག་ཕྱིད་པ་ལ།  སྤང་རྒྱན་
ཁུ་བ་རས་ལ་བཙགས་པའི་དྭངས་མ་བྱུགས་པས་ཕན། འབྲས་བུ་སྐྲངས་པ་ལ་མིའི་ཐོད་རུས་ཞིབ་བཏགས་ཆུར་སྦྱར་བྱུགས་པས་ཕན། མི་ཐོད་མེར་བསྲེག་ཐལ་བ་ཐུར་མགོ་དོ་ཙམ་ཁོང་དུ་ཞག་བདུན་གྱི་བར་དུ་བཏང་ན་འབྲས་བུ་སྐྲངས་པ་ཤིན་ཏུ་ཆེ་བ་ལ་ཕན་
ནོ། །བྱ་ཐི་བའི་སྒོ་ང་རྐང་ལག་ལ་(མཐིང་རིལ་ཀྱང་)བྱུགས་ན་སེར་ཀ་མི་འོང་། ཕུག་རོན་གྱི་སྒོ་ངའི་ཆུ་བརླ་གཉིས་དང་རྐང་ཞབས་སུ་བསྐུས་ན་དེ་བཞིན་ནོ། །ཡང་མ་ནུ་ཁྲག་ཅན་གྱི་ཕྱེ་མའམ།  སྤོས་དཀར་གྱི་ཕྱེ་མས་རྐང་ལག་གི་སེར་ཁ་ལ་བྱུགས་ན་ཕན། ཀར་ལྷང་ཚེར་
འབྲི་མར་དང་། གླ་རྩི་བཙན་དུག །བྱ་རྒོད་ཀྱི་ཚིལ་རྣམས་ཀྱི་རིལ་བུ་ར་རིལ་ཙམ། ཕུག་རོན་སྒོ་ངའི་སེར་ཐིག་བཅས། རྐང་མཐིལ་ལ་བྱུགས་ན་ལྷག་པས་སེར་ཀ་མི་འོང་ཞེས་གཏེར་མའོ། །མིག་ཏུ་གྲ་མ་དང་རྡུལ་ཤོར་ན། ཨོཾ་དར་མ་དི་
སྭཱ་ཧཱ། ཞེས་བཟླས་ལ་མིག་གཡས་སུ་ཚུད་ན་གཡོན་པའི་སྲིན་ལག་དང་། གཡོན་དུ་ཚུད་ན་གཡས་པར་བསྔགས་ཏེ་མིག་འཕུར་ན་སྐད་ཅིག་ཉིད་ལ་འཐོན་པར་འགྱུར་རོ། །གཉིད་ཆུང་བར་འདོད་ན། སྤང་རྒྱན་དཀར་པོ།  ལྕེ་ཚ་དཀར་པོ། །ར་
དཀར་འོ་མར་སྦྱར་བའི་དུད་པ་སྣ་བུག་ཏུ་བཏང་བས་ཕན། སྤྱོད་ལམ་གྱི་སྒོ་ནས་གཉིད་བཀག་ན། སྐྱིལ་ཀྲུང་བྱས་ལ་ལག་གཉིས་པུས་མོ་ནས་འཇུས་ཏེ་རླུང་བཟུང་ཞིང་མགོ་ལྟག་པར་ལན་གསུམ་དྲག་ཏུ་སྤྲུགས་ན་གཉིད་མི་འོང་། འོང་འདོད་ན་
13-4-8a


མདུན་དུ་དགུག་པར་བྱའོ། །སྒོམ་སྒྲུབ་སོགས་ཀྱི་དུས་སུ་མཁོ་ཕྱིར་གཉིད་སྲུང་འགུག་གི་གདམ་པ་ལོགས་སུ་བཤད་ཀྱི་འདིར་མདོ་ཙམ་མོ། །རྒུན་འབྲུམ་དཀར་པོས་མཁྲིས་པ་དང་ལྕེ་སྐམ་པ་ལ་ཕན་ཞེས་གསུངས། སྣ་ཆམ་ལ། 
གུ་གུལ་དཀར་ནག་གླ་རྩི་ཨ་རུ་ར་བཅས་པའི་ཕྱེ་མ་དུ་བ་མེད་པའི་མེ་ལ་བསྲེགས་པའི་དུ་བ་སྣར་སོང་བས་ཕན། ཡོས་ཀྱི་ངས་པས་ཀྱང་ཕན་ནོ། །ཡང་ནས་ཕྱེ་ཏིལ་མར་གྱིས་སྤྲུས་པའི་དུ་བ་སྣར་བདུག་པས་ཕན་ནོ། །ཆང་ནད་ལ་སྒ་སྐྱ་དང་ཚྭ་བསྲེས་པ་ཆང་སྦྱར་
བཏང་བས་ཞི། ཆང་གིས་མི་བཟི་བའི་སྔགས། ཨོཾ་ནན་གྱི་སོད། བརྒྱ་རྩ་བརྒྱད་བཟླས་ན་ཆང་གིས་མི་བཟི། རྒྱུན་དུ་བཟླས་ན། ཆང་མི་འོང་བས་མང་པོ་མི་བཟླ་གསུང་། མར་མ་ཞུ་བས་དང་ག་འགག་ཅིང་མགོ་བོ་ན་ན། ཞོ་གྲང་བཏང་བས་ཕན། 
ཞོ་དང་དར་བས་བཟི་ན་རྐང་བ་ཆུར་བཅུག་པས་ཕན། སྐྱུ་རུ་རའི་འདབ་མ་དང་། འུ་སུ། བ་ལུ་གསུམ་ཆ་མཉམ་ཉི་ཟླའི་འོད་ཕོག་པའི་ཆུ་གཙང་རྫས་ཀྱི་བརྒྱད་འགྱུར་ནང་དུ་བླུགས་ནས་བཞི་ཆ་ལུས་པའི་བར་དུ་བསྐོལ་བའི་རྩིག་མ་དོར། སྨན་དེ་ཡི་བཞི་ཆ་
གཅིག་ཙམ་གྱི་ཀ་ར་བསྲེས་པ།  ཉི་མས་གདུང་བའི་ནད་བྱུང་བའི་ཕྱི་ཉིན་ནས་ཞག་གསུམ་བར་དུ་ཐོ་རེངས་འཐུང་ན་སོས་ཀ་རོང་ཆེན་གྱི་ལམ་དུ་བགྲོད་པ་ཉི་འོད་ཀྱིས་བསྲེགས་པས་འཆི་བ་སྟེར་བ་འཕྲོག་སྟེ། སྤུ་དང་པགས་པ་སོགས་ཁམས་བདུན་ལ་ཚད་ནད་ཞུགས་ནས་
སྟོབས་ཤོར་བ་དག་ཀྱང་ཞི་བར་བྱེད་ཅིང་ཚད་ནད་གཞན་ལའང་ཕན་ནོ་ཞེས་དུས་འཁོར་བསྡུས་རྒྱུད་ལས་གསུངས་སོ། །འདི་རྣམས་སྨན་མིང་ལེགས་སྦྱར་དུ་འདུག་པ་བླ་མ་སྔ་མ་དག་གིས་གོང་ལྟར་བཞེད། ས་ཆུ་མ་འཕྲོད་པའི་ནད་ལ། ཚྭ་སླ་ངར་བརྔོས་པ་དང་། ར་
13-4-8b


གསེབ་ཀྱི་རྭ་ཅོ་དང་ནིས་རྩེ་བཅས་ནུས་བསྲེག་ཆུ་སྐོལ་ལམ་ཇ་ནང་བཏབ་སྟེ་འཐུང་བས་ཕན། ཅོང་ཞིའི་ཆུས་ཀྱང་ཕན་ནོ། །འབྲས་གསུམ་སྟར་བུ་ལི་ག་དུར་ཆ་མཉམ་ཆུ་བྲེ་གང་དུ་གདུས་ཏེ་འཐུང་ན་ཆུ་ཁ་སྲ་བར་བྱེད། རྣལ་འབྱོར་བ་རང་ཁོང་དུ་སྒྲུབ་པ་བྱེད་དུས་དྲི་
ཆེན་མི་འབྱུང་བར་འདོད་ན། བྱ་གོ་བོའི་ཤ། ཚ་བ་གསུམ།  ཅོང་ཞི་རྡོ་ཕ་བང་། བུ་རམ་དཀར་པོ་རྣམས་ཆུ་བྲེ་བཞིར་བཏབ་སྟེ་གདུས་པ་ཕུལ་གང་ནས་ཁྱོར་གང་དུ་བསྡུས་པའི་རིལ་བུ་སྲན་མ་ཙམ་བྱས་ལ། ནང་མ་བདུན་དུ་ལྟོར་བཏང་། མར་གྱི་རིལ་བུ་
བདུན་རེའང་བཏང་། དེས་གོ་བོ་དང་འདྲ་བར་ཅི་ཟོས་ཚད་འཇུ་ཞིང་ཞག་བདུན་ནས་ཆུ་སྐྱ་ཐ་ལེ་བ་རེད་འོང་།  ཡང་ནང་རེ་ལུ་གུའི་ཚན་འདྲ་བ་རེ་ལས། རྣམ་སྣང་མི་འབྱུང་བ་གསང་སྤྱོད་སྙན་རྒྱུད་ཀྱི་ཁྱད་ཆོས་ཞལ་ཤེས་ཟབ་མོའོ། །ཡང་བྱང་བུལ་ཟེ་ཚྭ་
རུ་རྟ་གསུམ་སྦྱར་བ་དང་། བྱང་བུལ་སྒོག་པ་སོགས་སྦྱར་བའི་བཅུད་ཁོང་དུ་བསྡུ་བའི་སྨན་ཞེས་བཤང་བ་མི་འབྱུང་བ་གྲོ་ལུང་གཏེར་མ་སོགས་འདི་དང་ནུས་མཐུན་ཡོད་དོ། །ཡང་དྲི་མ་བཏང་དཀའ་ན། ལི་ཤི་དང་། རྒྱ་སྐག །ཆུ་དྲོན་སྦྱར་འཐུང་བྲུན་
འགག་པ་སོས་སོ། །ཨུག་ཆོས་རྩ་བ་འབྲས་བུ་བཅས་དང་། བུལ་ཏོག་ཨ་རུ་ལྕུམ་རྩ་རྣམས་བཏུང་བས་དྲི་མ་སྲི་བ་སེལ། རུ་རྟ་དང་ཤུ་དག་ཞིབ་བཏགས་མར་རྙིང་སྦྱར་ཏེ་ལུས་ལ་བྱུགས་ན་ལུས་དྲོད་ཆེ། ཨ་ག་རུ་ནག་པོ་འབའ་ཞིག་དང་། གཡག་རོག་
འོག་ཅན་ཤ་ཡོད་ཀྱི་མཁྲིས་པ། ཚ་བ་གསུམ་རྣམས་ཁོང་དུ་བཏང་ལུས་ལ་བྱུགས་ན་རྫས་ཀྱི་གཏུམ་མོ་སྟེ་དྲོད་འབར་ནས་གངས་རྩེར་ཉལ་ཀྱང་གྲང་བ་མི་འབྱུང་། ཡང་ཀ་ར། བ་བླ། ཕུག་རོན་སྒོ་ངའི་སེར་ཐིག །བཙན་དུག །བྱ་རྒོད་ཀྱི་ཚིལ་རྣམས་ཆ་
13-4-9a


མཉམ་ཞིབ་བཏགས་མར་རྙིང་སྦྱར་ཏེ་རྐང་མཐིལ་བྱུགས་ནས་ཉི་མ་ལ་ཡང་ཡང་བསྲོ། དེས་གངས་རྩེར་རྐང་རྗེན་དུ་ཚུགས་པར་ནུས་སོ། །སྒོག་སྐྱ་ཤིང་ཀུན་གླ་རྩི་ཞིབ་བཏགས་མར་ཁུ་དྲོན་མོས་རྣ་བར་བླུགས་པས་མགོ་སྲིན་ཡ་མ་དྲུངས་
ནས་འབྱིན། ཁ་ནད་རིགས་ལ་སྐྱེར་ཤུན། ཡུང་བ། ཧོང་ལེན་སེང་ཕྲོམ་རུ་རྟ་རྣམས་ཀྱིས་མཁུར་བཀང་ངམ། དེ་རྣམས་ཀྱི་ཕྱེ་མ་མར་དཀར་ལ་སྦྱར་ཏེ་བྱུགས་པས་ཕན། ཡང་རང་གི་དྲི་ཆུ་དྲོན་མོས་ཁ་བཤལ་ན་ཁ་ནད་ཐམས་ཅད་སེལ་ལོ། །ཡང་ན་རང་གི་
དྲི་ཆུས་ཁ་བཀྲུས་ལ། གླ་རྩི་དང་ནག་མཚུར་གྱིས་བྱུགས་པས་ཕན། མཆུ་ནད་བད་མཆུ་ལ། ཆུ་རྩ་དང་བུལ་ཏོག་བསྐུ་བའམ། གསེར་མདོག་རུ་རྟ་བྲག་ཞུན་ལྕགས་གཡའ་བཞི་ཆུ་གཙང་སྦྱར་བའི་ལྡེ་གུ་རྨ་བཀྲུས་རྗེས་བསྐུས་ནས་ཉི་མར་འདེ་བའམ།  །
ཁྲག་ཅན་ལ་ཞུ་མཁན་དང་ཙན་དན་སྨུག་པོས་བྱུགས་པའམ། ཡང་ན་ཕུག་རོན་བྲུན་ཚྭ་ལ་གླ་རྩི་མར་དཀར་སྦྱར་ཏེ་རྙིལ་དང་ཁ་ལ་བསྐུས་པས་ཕན། གསེར་མདོག་དང་ལྕགས་གཡས་ཀྱང་ཕན་ནོ། །ཁ་ཆེ་ར་འོར་སྦྱར་བ་མིག་ཏུ་བླུགས་ན་ནད་མེད་བདེ་ཞིང་ཡིད་
འོང་འགྱུར། ཕོ་རོག་གི་མིག་གཉིས་གསུམ་ཁོང་དུ་བཏང་ན་མིག་ཁ་བས་མི་ཕྱིད་པ་སོགས་ཡོན་ཏན་ཆེན་པོ་འབྱུང་། ཉ་མཁྲིས་གླ་རྩི་གོ་སྙོད་ཤུ་དག་དཀར་པོ་རྣམས་མར་རམ་ཆུ་ལ་སྦྱར་ཏེ་ལྟེ་ཁུང་དུ་བྱུགས་ན་མིག་ཁ་བས་མི་ཕྱིད་དོ། །ཛཱ་ཏི་དང་གླ་རྩིས་
བྱུགས་པས་མིག་ཁ་བས་ཕྱིད་པ་ལ་ཕན། དུད་པས་ཕྱིད་ན་སྲིད་པ་ཆགས་པའི་ཆུ་རྡོ་ནས་ཙམ། གླ་རྩི། ག་བུར། ཛཱ་ཏི། ཙན་དན་དཀར་པོ་བཞི་ཞིབ་བཏགས་ཆུ་དང་སྦྱར་ཏེ། ཕྱིད་དོགས་ན་མིག་གི་མཐའ་སྐོར་དུ་བྱུག །ཕྱིད་ན་མིག་ནང་བླུགས་པས་ཕན། 
13-4-9b


ལིང་ཐོག་ལ། གླ་རྩི། ཀ་ར། ཅུ་གང་། ཞིམ་ཐིག་བཞི་ཞིབ་བཏགས་སོགས་སྦུག་ནས་མིག་གི་ལིང་ཐོག་སྟེང་དུ་བཏབ་བམ་བསྐུས་པས་སེལ། ཡང་རྒྱ་ཤོག་གམ། རྒྱ་ཚྭའམ། པི་ལིང་གང་རུང་གི་དུ་བས་བདུག་ཀྱང་ཕན། ཕོ་རོག་གི་ཁྲག་བྱུགས་
ན་ཐེང་ཆོག་ཏུ་བཤད། ཕ་བང་ལོང་བུའི་ཞིབ་ཕྱེ་སྦྲང་སྦྱར་བསྐུས་ན་ཕན། རྒྱ་མཚུར་དཀར་པོ་མེར་བསྲེག་ཕྱེ་མའམ། ར་གན་དུད་པ་མིག་ཏུ་བླུགས་ན་མིག་ནད་ཀུན་ལ་ཕན། ལིང་རོ་ལ་དུང་རུ་རྟ་ཚྭ་ལ་གསུམ་ཆ་མཉམ་བསྲེག་ཐལ་ཕྱེ་མ་རྒྱུས་མདས་སྐམ་
འདེབས་བྱས་པས་སེལ། མིག་ལ་གྲ་ལྕག་ཕོག་པ་དང་རྡུལ་ཤོར་བ་སོགས་ཕྲལ་གྱི་མིག་ནད་རིགས་ལ་ལ་ཆའི་དུ་བས་བདུག་ན་ཕན།  མིག་ཏུ་གྲ་མ་ཤོར་ན་ནས་བཙོས་པའི་ཁུ་བ་བླུགས་པས་ཕན། ཞིམ་བུའི་ཁྲག་མ་རུལ་བ་གྲིབ་བསྐམ་ཕྱེ་མ་བྱུགས་པས་ལིང་
ཐོག་སོགས་མིག་ནད་རིགས་ལ་ཕན། ཤ་འཛེར་ལ་རང་གི་སྲིན་ལག་རྩེར་ཁྲག་གཏར་བ་བྱུགས་པས་ཕན། ལྟོ་སྟོངས་རང་གི་སོ་དྲེག་སྲིན་ལག་གིས་བླང་སྟེ་མིག་གཉིས་ལ་རྒྱུན་དུ་བྱུགས་ན་མིག་ནད་ཐམས་ཅད་སེལ་ཞིང་མིག་གསལ་བར་འགྱུར། རྣ་བ་ནས་
ཡུན་རིང་རྣག་འོང་ན། ཤིང་ཀུན་ཚྭ་ལ་གཉིས་མར་དུ་བཙོས་པ་ལན་གསུམ་བླུགས་པས་སེལ། ཨ་རུ་དང་རུ་རྟའི་ཁུ་བས་རྣ་བའི་རྣག་ཁྲག་དང་ཟུག་གཟེར་སེལ། ལྕེ་ནད་སོགས་ལྕེ་མི་བདེ་ལྡིབ་པའི་རིགས་ལ་ཚྭ་ལ་ནག་མཚུར་གསེར་མདོག་ཞུ་མཁན་ལི་ག་དུར་རྣམས་
ཆུར་སྦྲང་མཁུར་བཀང་ཡང་ཡང་བྱ། དེ་ནས་ལྕེ་རྩ་གཏར་བས་སྐྱོན་ཀུན་ཞི་གསུངས་སོ། །སྣ་དང་མཚུལ་བ་མི་བདེ་བ་ལ། གུར་གུམ་སྐྱུ་རུ་ཤིང་མངར་གྱི་ཁུ་བ་སྣར་བླུག །ཡུང་པ་ལྡོང་རོས་བ་བླ་རྒྱ་སྐག་འབྲས་གསུམ་ཙན་དན་དཀར་པོ་རྣམས་ཀྱི་དུ་བ་རྣོན་
13-4-10a


པོས་བདུག་པར་བྱའོ། །རང་གི་སྐྲ་ནམ་བཞར་ཐེབ་རེ་ལ་སྐྲ་ཆུས་ཁ་བཤལ་ན་སོ་སྲིན་གཏན་ནས་མི་འབྱུང་། ལ་ལ་ཕུད་བསྲེགས་པའི་དུ་བ་ཁར་བཏང་ན་སོ་སྲིན་ལ་ཕན།  ནག་མཚུར་མར་ནག་ནང་བསྐོལ་བ་སོ་ལ་བསྐུས་ན་སོ་ཡི་གཟུག་
གཟེར་ཐམས་ཅད་ཞི། ཨ་རུའི་ཕྱེ་མ་སྦྲང་རྩི་སྦྱར་བ་བསྐུས་ན་དེ་བཞིན་ལ་མ་ཞུ་ཁ་ནད་ཐམས་ཅད་སེལ། གདོན་གྱིས་སོ་ན་བར་ཁྱི་ལུད་གུ་གུལ་ཡུངས་ཀར་ར་ཡི་དུད་(རྨོངས་སྤུའམ་བརྟགས་)པས་བདུག་ན་ཕན། རླུང་གིས་སོ་ན་བར་སྒོག་སྐྱ་མར་དུ་བཙོས་པ་རྣ་བའི་ནང་ཐིགས་པ་འགའ་
བླུགས། ཟ་འགྲམ་ངོས་སུ་བྱུག་སྒོག་སྐྱའི་རོ་མ་སོ་བར་བཅུག་པས་ཕན་ནོ། །ཞིམ་བུའི་ལྤགས་པ་མགོར་གྱོན་ན་མགོ་ནད་ལ་ཕན། གོ་བྱི་ལ་ཆུར་བརྡར་ཕྱེ་མ་བྱུགས་པས་གླང་ཤུ་ཤ་བཀྲ་སེལ།  ཤུ་བ་ཟ་ཀོང་སོགས་ལ་ཚྭ་དང་གཡེར་
མ་ཆ་མཉམ་ཞིབ་བཏགས། མར་ཁུ་བཙགས་བཅད་སྦྱར་ཏེ་བྱུགས་པས་ཕན། ངོ་ཤིག་ལ་ཞུ་མཁན། ཡུང་བ།  སྒ་སྐྱའི་ཕྱེ་ཞིབ་ཆུར་སྦྱར་བྱུགས་པས་ཕན། སྡོམ་སྦྲུལ་སྡིག་པ་སོགས་ཁ་དུག་ཅན་གྱི་སོ་བཏབ་པར་རམ་པའི་ཁུ་བར་གླ་རྩི་བཏབ་པ་བྱུགས་
པས་ཕན། དུང་ཐལ་སྤང་སྤོས་མུ་ཟི་དཀར་པོ་གསུམ་ཞིབ་བཏགས་མར་སྦྱར་བྱུགས་པས་ཟ་འཕྲུག་ལ་ཕན། ཡང་ན་ཤུག་པའི་མར་ཁུའམ། རྩ བ་ཁུ་བྱུགས་པས་ཕན། ཤུ་ཐོར་རིགས་ལ་ཐར་ནུ། ཆུ་རྩ། ཚྭ་རྙིང་། ཟངས་གཞོང་ནང་སྲིན་ནག་བསྲེག་
པ། ཐབ་ཁའི་འོག་ས་བཅས་ཀྱི་ཕྱེ་མ་མར་རྙིང་སྦྱར་ཏེ་བྱུགས་ནས་མེ་ཉི་གང་རུང་ལ་ལན་གསུམ་བསྟན་པས་ཤུ་ཐོར་ཡུལ་འབུད་དོ། །ཡང་ན་མུ་ཟི་ཚྭ་ཕབ་དུད་པ་ཤ་རུ་བསྲེག་ཐལ་རྣམས་མར་སྦྱར་ཤུ་བར་བསྐུ་ཞིང་ཉི་མར་བསྲེག་པས་སེལ། བ་བླ་
13-4-10b


ལྡོང་རོས་འབྲུག་རུས་རྣམས་ཀྱི་ཕྱེ་མས་རྨ་ཡི་རྨེན་ངན་འཁྲིགས་པ་སེལ་ལོ། །མེ་རྨ་ལ་ཁྱི་ཁྲག་སླེབ་ཆོག་ཏུ་བཤད། ཆུ་བལ་དང་གསོར་ལྡེམ་གྱི་བསིལ་བའི་དུག་གིས་ཚ་དབལ་སེལ། སིནྡྷུ་ར་བཏབ་ཀྱང་ཕན་ནོ། །རྩ་ཆུ་འགགས་པར་བུལ་ཏོག་ཐུར་མགོ་
གསུམ་ཆུ་བཀོལ་གྱིས་འཐུང་ན་ཕན། གོ་བྱི་ལ་རྡོག་བཞི་འོ་མ་བྲེ་གང་དུ་བཙོས་ནས་དུམ་བཞི་བྱས་པ་ཞིབ་བཏགས། ཚ་སྲིན་ལ་ཆུ་གྲང་དང་། གྲང་སྲིན་ལ་ཆང་གིས་ཕུལ་ན་སྲིན་གྱི་ནད་རིགས་ལ་ཕན། མཚོན་རྨ་ཆེ་ཕྲའི་རིགས་ལ། ན་མ་ཏ་པ་ཤ  །ཞེས་
སྔགས་བཏབ་པས་རྨ་སྐྲངས་ཁྲག་སོགས་རྨ་ནད་རིགས་ལ་ཕན། ཤའུ་མྱུར་དུ་གསོ་བར་ཁ་གུར་དོམ་མཁྲིས་ཡུག་ཤིང་ཁནྜ་བཏབ་པས་ཕན་ངེས་སོ། །གུ་གུལ་ནག་པོའི་ཁུ་བས་མཚོན་རྨའི་དུག་སེལ། རྨ་ལ་ཐབ་ཤོར་ན། ཏང་ཀུན་སྡོང་རོས་མུ་ཟི་བཅས་ཞིབ་
བཏགས་པ་དང་བསྲེས་ཏེ་བྱུགས་པས་ཕན། གང་གི་སྔགས་ཀྱང་བཏབ་བོ། །ཐབ་རྒོད་ལ་སྲོ་མ་ར་ཙ་བ་ལང་གི་ཆུ་ལ་སྦྱར་ཏེ་བྱུགས་པས་ཕན། མགོ་དང་ཡན་ལག་གི་རྣག་མ་ཆོད་པ་ལ། ཁྱིམ་བྱའི་ཤ་སོལ་བ་གཅིག་མཛོ་ཞོའི་ནང་དུ་བཙོས་ལ་བཏང་། མཛོ་
ཞོ་མ་རྙེད་ན་གང་རྙེད་ལ་བྱ། དེས་ཕན་ཏེ་མཐའ་བཞིའི་མཁས་པའི་ལུགས་སོ། །ཁྱི་སེ་རྨུགས་ན་དེ་མ་ཐག་ཆུ་ངན་གྱིས་བཀྲུས། ཁྱི་སྐུད་ར་སྐུད་ཀྱིས་བཅིང་། སྤྱོད་ལམ་སྲུང་མི་དགོས་སོ། །དུག་གི་རིགས་མཐའ་དག་ལ། གསེར་མདོག །འོམ་བུ།
གུར་གུམ། གླ་རྩི། ཆང་ཉུང་བཏང་བས་སེལ། སོ་མ་ར་ཙ་བ་ལང་གི་ལྕི་བའི་ཁུ་བ་དང་སྦྱར་ཏེ་འཐུང་ན་རྒྱུ་བ་དང་མི་རྒྱུ་བའི་དུག་ཐམས་ཅད་འཇོམས་པའི་མཆོག་ཡིན་ནོ། །ཤང་ཤང་དམར་པོ་བསྐོལ་ཐང་གིས་དམར་བཤལ་ལ་ཕན།  ལན་གཉིས་གསུམ་སོང་
13-4-11a


ནས་རླུང་འདོན་དགོས་སོ། །སྐྱུང་ཁའི་ཁྲག་འབྲུམ་ནག་ལ་སླེབ་ཆོག་ཏུ་བཤད། ཙན་དན་དཀར་མར། གུར་གུམ། བ་ཤ་ཀ  །ཧོང་ལེན་གཡའ་ཀྱི་རྣམས་ཀྱིས་ཚད་པའི་རིགས་མཐའ་དག་སེལ། ཛཱ་ཏི་ཨ་གར་གོ་སྙོད་རུ་རྟ་རྣམས་ཀྱིས་
རླུང་སེལ། ཏིག་ཏ་དོམ་མཁྲིས་གསེར་མེ་སྐྱུ་རུས་མཁྲིས་པ་སེལ། སེ་འབྲུ་དང་ཚ་བ་གསུམ་གྱིས་བད་ཀན་གྲང་ནད་སེལ། ཅོང་ཞི་བྲག་ཞུན་ཨ་རུ་པྲི་ཡངྐུ་མ་ནུ་འུ་སུ་སྟར་བུ་རྣམས་ཀྱིས་བད་སྐན་སྨུག་པོ་འདུས་པའི་ནད་སེལ། གུ་གུལ་ནག་པོ་ཤུ་དག་
གླ་རྩི་ཆོས་སྨན་དྲི་ཆུ་རྣམས་ཀྱིས་གདོན་སེལ། གླ་རྩི་ཕུར་ནག་མིང་ཅན་ནག་པོ་སྟག་ཤ་གུ་གུལ་རྣམས་ཀྱིས་གཉན་སེལ། བྱི་ཏང་མ་རུ་རུ་རྟ་སོགས་ཀྱིས་སྲིན་སེལ། བ་ཤ་ཀ་ཧོང་ལེན་སྐྱུ་རུ་ཨ་རུ་ཙན་དན་དམར་པོ་མཛོ་མོ་ཤིང་སྲོ་ལོ་རྣམས་ཀྱིས་ཁྲག་དང་
འཁྲུག་སེལ་བས་སོ་སོར་གང་འོས་དང་དོན་སྣོད་ཀྱི་ཁ་འཛིན་རྣམས་སྦྱར་བས་ནད་ཐམས་ཅད་སེལ་བར་འགྱུར་རོ། །ཞོ་དང་བུ་རམ་སྦྱར་ཏེ་དཀྲུགས་པའི་ནང་དྲི་བཞི་ཞེས། ཤིང་ཚ་སུག་སྨེལ་ནཱ་ག་གེ་སར། གནྡྷ་བྷ་དྲ་བཞི་སྦྱར་བ་བཏབ་པ་འཐུང་ནས། ཟས་
དང་སྤོད་སྣ་ཚོགས་སྦྱར་བ་ཟོས་ན་ཤ་སྐྱེ་ཞིང་རོ་ཙ་བར་བྱེད་ཅེས་གཅེས་གྲུབ་ལས་སོ། །འདི་ཚ་ལ་(ཟས་ཟོས་རྗེས་སྐོམ་ཅུང་ཟད་བཏུང་བ་ལུས་སྨད་དྲོ་བ་ཀྱང་ཟེར་བརྟག་གོ )།ནན་དུ་བཏང་ན་བཟང་ཞེས་བཤད། མན་རྒྱུད་དུ། དྲི་བཟང་བཞི་དང་ཞོ་སྦྱར་ཆམ་པ་སེལ་གསུང་བ་ཡང་འདི་ཡིན་ཏེ་ལུས་ལ་ཤིན་ཏུ་འཕྲོད་པ་ཡིན་ནོ། །ཨ་རུ་
བཟང་པོ་དང་། རྟག་ངུ་། དབང་ལག །ཅོང་ཞི། བྲག་ཞུན། སྦྲང་རྩི་ཞུན་མར་སྦྱར་བ་ཟོས་ན་བཅུད་ལེན་གྱི་མཆོག་སྟེ་ཚེ་དང་ལང་ཚོ་འཕེལ་ལོ། །གླང་བུའམ་ཁྱི་དཀར་འབྲས་བུ་འོ་མར་བཙོས་ཏེ་ཟོས་
13-4-11b


ན་ཐིག་ལེ་འཛག་པ་གཅོད། ལུས་ཟུངས་འཕེལ་ལོ། །ཡང་སྐྱེས་པའི་གྲི་རུས་བརྡར་ཕྱེ་ལྟེ་བར་བསྐུས་ན་ཐིག་ལེ་འཛག་པ་སྲུང་ངོ་། །ཅོང་ཞི་དབང་ལག་དབྱར་རྩ་དགུན་འབུར་མཉེ་ཐུག་འབྲས་ཤིང་མངར་རྣམས་འོ་མར་གདུས་འཐུང་རོ་ཙ་བར་བྱེད་དོ། །རིན་
པོ་ཆེའི་རིགས་ལུས་ལ་འཆང་བ་ལ་ནད་གདོན་སེལ་ཞིང་ཕན་པ་སྒྲུབ་པའི་ནུས་པ་སོ་སོ་ཡོད་ལ། མདོ་ཙམ་བརྗོད་ན་ཕ་ལམ་གྱིས་ཀླུའི་དུག་སེལ། མཚོན་སོགས་སྲུང་། སྤོས་ཤེལ་གྱིས་མིག་གསལ་དམར་ནད་ཐུབ། གཡུ་བཟང་པོས་མཆིན་ནད་དང་
དུག་སོགས་ཐུབ། མུ་ཏིག་གིས་ཚེ་རིང་ཀླད་ནད་སེལ། བྱེ་རུས་ཟས་ནོར་འཕེལ་རྩ་ནད་ལ་ཕན། མུ་མེན་གྱིས་ནད་མེད་དང་སྟོབས་བསྐྱེད་དཀར་ཕྲ་མེན་གྱིས་གཟའ་རྒྱུ་སྐར་སྟེང་གདོན་འོག་གདོན་རྟས་བརྡབ་མགོ་ཆག་སོགས་ཐུབ། གསེར་ལུས་ལ་
འཆང་ན་མདངས་བཟང་། དེ་རིང་གསར་དུ་བརྡུང་བའི་རྣ་རྒྱན་ལ་གསེར་ཀུ་མཱ་རི་ཞེས་བྱ་ཞིང་། དེས་དེ་ཉིད་ཀྱི་མཚོན་སྲུང་། ཉིན་རེ་བཞིན་ཡང་ཡང་གསར་བརྡུང་བྱས་པས་དེ་བཞིན་ནོ། །དེ་སོགས་རིན་པོ་ཆེའི་ནུས་པ་ཤིན་ཏུ་རྒྱ་ཆེའོ། །ཨ་རུ་ར་
ཟུར་བརྒྱད་ལུས་ལ་འཆང་བས་རིམས་མི་འོང་། ཤུ་དག་དང་གུ་གུལ་འཆང་བས་གདོན་ཐུབ། གུ་གུལ་ནག་པོ་ལུས་ལ་བཅངས་པ་ཙམ་གྱིས་མཚོན་གྱིས་མི་འཆི། དེ་ལ་སོགས་པ་སྨན་གྱི་ནུས་པ་ཡང་ཚད་མེད་དོ། །ཐོག་གིས་བསད་པའི་རུས་པ་
སྐེ་ལ་བཏགས་ན་རྒྱལ་པོ་ཐུབ། རུས་སྦལ་གྱི་སྐོགས་པས་ས་བདག་ཐུབ། ཕག་མཆེས་ས་གདོན་ཐུབ། སླང་དྲེག་གིས་ས་དགྲ་ཐུབ།  དེ་ལ་སོགས་པ་རྫས་ཀྱི་ནུས་པ་ཡང་བསླུ་བ་མེད་པས་གང་ལ་གང་ཕན་དུ་སྦྱར་བར་བྱ་སྟེ་ཕྲན་བུའི་ནད་བཅོས་ཉེར་མཁོའི་
13-4-12a


སྐོར་རེ། བདུན་པ་སྐད་བཅོས་ཀྱི་སྐོར་ཟབ་མོ་མདོ་ཙམ་བརྗོད་ན། གུ་རུ་པདྨས་རྗེས་འཇུག་རྣམས་ཀྱི་དོན་དུ་མཛད་པ་ཚངས་དབྱངས་གསུང་གི་གདམ་ངག་ནི།  དང་པོ་གཡེར་མ་འབྲུ་བཅུ་བཞི་ཆུ་གཙང་ཕུལ་ཕྱེད་དུ་སྦང་བ་
ལྟོ་སྟོང་ལན་གསུམ་བཞིར་བཏུང་བས་རྩ་སྒོ་འབྱེད། དེ་ནས་ནས་ཀྱི་སོག་མ་མ་རུལ་བ་དམར་པོའི་ཚིགས་པ་ཕུལ་གང་། སྤང་རྒྱན་དཀར་པོ་རྩ་བར་བཅས་པ་སྤར་གང་རྫ་སྣོད་དུ་གཡའ་ཆུ་ཕུལ་གསུམ་ནང་ཞག་གསུམ་བགྲུངས་ལ། དེ་ཞག་ལྔ་བར་ལྟོར་
བཏང་། དེ་རྗེས་ཞག་གཉིས་ལ་ཨ་རུ་རའི་ཆུ་བཏུང་། ཞག་བདུན་པོ་དེས་རྩ་ནད་སྦྱང་བར་བྱས་ལ། དེ་ནས་དངོས་གཞི་ཨ་རུ་ར་གསེར་མདོག་རྡོག་པོ་བདུན། བ་རུ་ར་གཉིས། སྐྱུ་རུ་ར་བཅུ། དེ་དང་སྤྱི་བཞུར་མཉམ་པ་དང་སྲོ་ལོ་དཀར་པོ་སྤང་རྒྱན་
རྣམས་ཆུར་གདུས་པའི་ཁུ་བར་ཁ་ཚར་གྱི་ཕྱེ་མ་འདི་རྣམས་གདབ་པར་བྱ་སྟེ། ཅུ་གང་སུག་སྨེལ་ཤིང་མངར་མོན་ལུག་གླ་སྒང་། སྤང་རྩི་དོ་བོ། པི་པི་ལིང་ཀར་རྣམས་ཆ་མཉམ་ཞིབ་བཏག་ཆུ་གྲང་མོར་སྦྱར་ལ། ཟླ་བ་གཅིག་གི་བར་དུ་ནང་མོ་ལྟོ་
སྟོང་ལ་བཏུང་ན་ཚངས་པའི་དབྱངས་འགྲུབ། དེ་ཡང་སྐད་ངར་འདོད་ན་ཨ་རུ་ར་མང་དགོས། སྦོམ་འདོད་སུག་སྨེལ། འཕྲ་འདོད་སྲོ་ལོ། རིང་བར་ཅུ་གང་། སྙན་པར་སྤང་རྒྱན། འཁིང་འདོད་ཤིང་མངར་བསྐྱེད་པར་བྱའོ་ཞེས་རཏྣ་གླིང་པའི་གཏེར་མ་
ཟབ་བོ། །ཡང་པདྨ་གར་དབང་གི་གཏེར་ཁ་ནས།  ཨྸྥྷ༔ གི་ཝཾ་དང་ནི་ཁ་ཆེའི་ཆུས༔  སྐར་མ་རྒྱལ་གྱི་དུས་སུ་བྲིས༔ ཨ་རུ་ར་ཡི་ན་བཟའ་བྱ༔ ཟླ་བའི་བར་དུ་ཟོས་གྱུར་ན༔ མྱུར་དུ་ཚངས་པའི་དབྱངས་ལྡན་འགྱུར༔ ཨྶྚྶ ཀླུ་བདུད་ཐལ་ཀ་རྡོ་རྗེ་
13-4-12b


དང་༔ མེ་ཏོག་གླང་པོ་སྣ་ཡིས་ནི༔ སྐར་མ་རྒྱལ་གྱི་དུས་སུ་བྲིས༔ བྱང་ཆུབ་འོམ་བུའི་ཁུ་བས་དབུལ༔ ཉིན་རེ་ལྔ་ལྔ་ཟས་སུ་ཟ༔ གྲེ་བདེ་སྟོད་རྒྱབ་ཞི་བ་དང་༔ སྟོབས་ལྡན་སེང་གེའི་ང་རོ་འབྱུང་༔ ད་ནི་སྔགས་ཀྱི་བྱེད་ལུགས་ལ༔ སྔགས་དང་
རྫས་དང་དམིགས་པ་གསུམ༔ རྫས་ནི་འོམ་བུ་གསར་པ་ལ༔ ཚད་ནི་མཐེའུ་ཆུང་རྩེ་ཚོན་གང་༔ སྔགས་ནི། ཨོཾ་རུ་ཙི་ར་མ་ཎི་པྲ་ཝརྟ་ཡ་ཧཱུྃ་ཕཊ༔ འབུམ་ཚོ་གཅིག་ནི་སྔགས་ཚད་ཡིན། དམིགས་པ་ནི༔ རང་ཉིད་ནམ་མཁའ་མཐའ་ཡས་ལ༔ 
སྔགས་ནི་ལྷོ་སྤྲིན་འཐིབས་པར་བསྐྱེད༔ གྲེ་བ་གཡུ་འབྲུག་སྔོན་མོར་བསམ༔ སྔགས་ཤིང་སྦྲང་ཆར་སིལ་མར་བསྐྱེད༔ གསོལ་དུས་བདག་དང་མཐའ་ཡས་པའི༔ སེམས་ཅན་ཐམས་ཅད་སྒྲིབ་པ་རྣམས༔ ཞེ་སྡང་མེ་ལ་བྱང་ཆུབ་ཆར་བབ་བསམ༔ 
སྒྲིབ་བྱང་རང་ཉིད་ཤེལ་བུམ་ཞོ་ཡིས་བཀང་འདྲར་བསྐྱེད༔ ཅེས་པ་འདི་ནི་སློབ་དཔོན་པདྨས་རྒྱལ་བ་མཆོག་དབྱངས་ལ་གདམས་པ་པདྨ་གར་གྱི་དབང་ཕྱུག་རྩལ་གྱིས་སྤུ་རི་དྭགས་རྫོང་གི་གཏེར་མའོ། །ཡང་སྤང་རྒྱན་དཀར་པོ་འབྲི་མོག་ཨ་རུ་ར་གསུམ་ཆུ་
གཙང་དུ་སྤང་ལ། ཨོཾ་ཨཱཿཧཱུྃ་ན་མོ་ཧི་རི་མི་རི་སྭཱ་ཧཱ།  ཞེས་བཏབ་སྟེ་འཐུང་ན་ཚངས་པའི་དབྱངས་ཐོབ་ཅེས་བཀའ་གཏེར་གྱི་མན་ངག་གོ། ཨོཾ་བྷ་ག་ཝ་ཏི་ཤྲུ་ཏི་སྨྲྀ་ཏི་བ་ལ་བ་ལ་བར་མ་སིདྡྷེ་སྭཱ་ཧཱ༔ སྤྱན་རས་གཟིགས་ཀྱི་མདུན་དུ་ཆུ་ཁྱོར་བ་གང་ལ་
བཟླས་ནས་ཞག་བདུན་དུ་འཐུང་ན་ཚིགས་བཅད་སུམ་བརྒྱ་ཟིན། ཟླ་གཅིག་འཐུང་ན་མིའམ་ཅི་ལྟར་དབྱངས་སྙན་པར་འགྱུར་ཞེས་སྟོན་པ་སངས་རྒྱས་ཀྱི་བཀའོ། །ཡང་བྱང་ལུགས་སྐད་སྨན། རྟ་ཡི་མགྲིན་པ། གོང་མོའི་སྒོ་ང་། ཤ་བའི་
13-4-13a


ཀླད་པ། ནེ་ཙོ་དང་། ཁུ་བྱུག་དང་། འཇོལ་མོ་དང་། ཅོ་ག་རྣམས་ཀྱི་གྲེ་བ་དང་ལྕེ། གསང་སྨན་བོང་བུའི་གྲེ་བ་བཅས། ར་འོར་སྦྱར་བ་མར་ངོར་བསྟེན་ན་སྐད་ཀྱི་དངོས་གྲུབ་ཐོབ་བོ། །ཡང་ན་ཅུ་གུར་ལི་སུག་ཤིང་མངར་སྲོ་ལོ་གསེར་
མདོག་ཅོང་ཞི་རུ་རྟ་སྟར་བུ་སྤང་རྒྱན་དཀར་པོ་ཀ་ར་སྦྱར་བ་སྐད་སྨན་འཛམ་གླིང་འབྲུག་གྲགས་ཞེས་ཟུར་མཁར་ཆོས་རྗེའི་ལུགས་སོ། །ཡང་འབྲུག་སྒྲ་ཟིལ་གནོན་ཞེས་དེ་དང་ཕྱོགས་འདྲ་དང་། ཡང་རྒུན་འབྲུམ་སྟར་བུ་ཀྱི་ལྕེ། ཨ་ཀྲོང་དཀར་པོ་ཙན་དན་
དཀར་པོ་བོང་དཀར་རྣམས་ལ། ངུར་ལ་སྤུར་ལེན། ངར་འདོགས་སེ་འབྲུ་སུག་སྨེལ་སྦྲང་དཀར་སྦྱར་བའི་རིལ་བུ་ལྟོ་སྟོང་ལ་མུར་ན་སྐད་སྨན་མཆོག་ཅེས་བཤད། གཞན་ཡང་སྐད་སྨན་གྱི་སྦྱོར་སྡེ་སྣ་ཚོགས་ཡོད་ཀྱང་གང་གི་ར་ཏ་གཏེར་ལ་གཙོར་བྱས། 
གར་དབང་གཏེར་མའི་ཟ་ཡིག་དང་སྔགས་དམིགས་ཀྱིས་ནུས་པ་བསྐྱེད། དེ་རྗེས་ཀྱི་སྔགས་གཉིས་པོས་དངོས་གྲུབ་བསྒྲུབ། བྱང་ཟུར་མཁས་པའི་སྨན་སྦྱོར་རྣམས་ཀྱིས་ཀྱང་ཟུར་བརྒྱན། མགྲིན་པར་ཟླ་བའི་གདན་ལ་སྒྲ་དབྱངས་ལྷ་མོའི་ངོ་བོ་ཧྲཱིཾཿདཀར་པོ་
ལ་འཁོར་འདས་ཀྱི་སྒྲ་དབྱངས་བསྡུ་བའི་དམིགས་པས་སྔགས་ཧྲཱིཾཿཅི་ནུས་སུ་བཟླས་ཤིང་མཆོད་པ་ཕུལ་ནས་འདོད་དོན་ལ་གསོལ་བ་བཏབ་ན། དབྱངས་སྙན་ལྕེ་བདེ་བློ་གསལ་སྤོབས་པ་ཆེ་བས་ཀུན་ཡིད་འཕྲོག་པའི་དངོས་གྲུབ་ཐོབ་པར་འགྱུར་རོ། །བརྒྱད་པ་སོ་
དང་མིག་སོགས་ཀྱི་སྟོབས་གསོ་བ་ནི། དང་པོ་སོ་སྲ་ཞིང་མི་ཉམས་པའི་ཐབས་སུ་སྨན་རྒྱས་བསྡུས་སྣ་ཚོགས་གསུངས་མོད། འདིར་ཀུན་འདུས་ཟབ་མོའི་སྦྱོར་སྡེ་ནི། ཅོང་ཞི་རྒོད་པོ་སོལ་མེར་དམར་ལམ་པར་བསྲེགས་པ་ཅུ་གང་བཟང་པོའི་ཆུ་ལ་
13-4-13b


བསྐྱུར་བ་རྡོ་རྗེ་ཆུ་ཞེས་བྱ་སྟེ་སོ་སོགས་སྲ་བའི་སྨན་མཆོག་གོ། དེ་ལ་སོ་ཚགས་དམ་བྱེད་དོམ་མཁྲིས། སྙིལ་མི་འཆད་ཅིང་བརྟན་བྱེད་རྒྱ་སྐྱེགས། སོ་སྲིན་འཇོམས་པ་གླ་རྩི། ལྷ་བ་དང་རྩི་འཛིན་པ་རྒྱལ་མོ་ཀ་ར། རླུང་སེལ་བ་ཤིང་ཀུན། བད་ཀན་སེལ་བ་
ཁ་རུ་ཚྭ། ཁྲག་མཁྲིས་སེལ་བ་ཨ་རུ་གསེར་མདོག །སྲིན་སེལ་བ་བྱི་ཏང་ཀ །སོ་དཀར་བྱེད་ལུག་གི་མིག་འབྲས་དཀར་པོ་རྙིལ་དམ་བྱེད་གོ་ཡུ། རུལ་བ་གཅོད་པ་ཡུ་གུ་ཤིང་། རུལ་དྲི་འཁྲུད་པ་མཚུར་ནག །ཚགས་དམ་བྱེད་གླང་ཆེན་ཤ །ཁ་དྲི་
བསྲུང་བ་ཕུག་རོན་བྲུན། དེ་སྟེང་ཁ་ཚར་དུ་པི་ལིང་ཧ་ཤིག་སྨན་སྒ་ཚྭ་ལ་ཆུ་བཅད་བཅས་དེ་རྣམས་ཆ་མཉམ་སྦྲང་སྦྱར་རིལ་བུར་ཕག་གམ། ཁྱད་པར་ལུག་ཚིལ་དང་སྦྱར་ཏེ་རྙིལ་དང་སོ་ལ་ཐོ་རེངས་ལྟོ་སྟོང་སོགས་སུ་བྱུགས་པ་བྱས་ན། སོ་ཡི་བཅུད་
ལེན་ཐོད་པ་སོ་ཁྱེར་ཞེས་བྱ་བ། རིལ་བུ་རེས་ལོ་རེ་ཕྱིར་བརྟན་པར་བྱེད་དེ། ལན་བདུན་བསྐྱར་བས་ཀྱང་སོ་བརྟན་པ་འགྲུ་བན། ཡུན་དུ་བརྟེན་པས་ལྟ་ཅི་སྨོས། སྐབས་སུ་སོ་ལ་ཏིལ་ཆུ་ནང་དུ་གདུས་པ་སྐ་མོ་བྱུགས་པར་བྱ་སྟེ་ལག་ཏུ་བླང་བས་ཡིད་ཆེས་
པར་འགྱུར་རོ། །འདི་ནི་རང་གིས་བཏུས་ཏེ་སྦྱར་བའོ། །ཡང་མུ་ཟི་ཞིབ་བཏགས་རང་གི་དྲི་ཆུར་བསྣུར་ཏེ་སོ་ཡི་ཕྱི་ནང་རྙིལ་བཅས་ལ་བྱུགས་ཤིང་མཉེས་ན་སོ་སྲ་བར་ངེས་སོ། །གལ་ཏེ་སོ་བུད་ཟིན་པ་ལ་སླར་སྐྱེ་བའི་ཐབས་ནི། མ་ཧེའི་དཔྲལ་བའི་རུས་པ་
དང་འབྲུག་རུས་ཅོང་ཞི་བྱ་རྒོད་བྲུན་དཀར་པོ་རྣམས་ཆ་མཉམ་ཞིབ་བཏགས་བ་ཡི་ཞོ་དང་སྦྲང་རྒོད་ཀྱིས་སྤེལ་ནས་རུས་སྦལ་གྱི་ཁོག་པའི་ནང་དུ་བཅུག  །གོས་ཀྱིས་བྱིབས་ལ་ཞག་བཅུའམ་དགུར་ཆུ་ཡི་རྒྱུད་དུ་བསྙལ། དེ་ལ་རི་མོ་དཀར་ནག་གམ་ཡང་ན་དམར་
13-4-14a


བ་འོང་། དེ་ནས་ཞག་གསུམ་ཟས་གཞན་མི་ཟ་བར་ལྟོ་དགུག་སྟེ་འོ་མ་བསྐོལ་བ་འབའ་ཞིག་འཐུང་། དེ་ནས་སོ་ཡི་ཤུལ་དུ་རྫས་དེ་བྱུག །སྟེང་དུ་སྦྲང་རྩིས་མནན་ལ་བཞག །དེ་ལྟར་ལན་བདུན་བསྐྱར་ན་ཟླ་བ་གཅིག་ནས་སོའུ་
སྐྱེའོ། །ལོ་དུས་མཚམས་ནས་རྫས་བྱུགས་ལ་སྟེང་དུ་སྦྲང་རྩི་བྱུག །དེ་སྟེང་ཟར་མའི་མར་ཁུ་བྱུག །དེས་སོ་ཚགས་དམ་ལ་འགྲིགས། ངེས་པར་བདེན་ནོ་ཡིད་ལ་ཟུང་། ཞེས་རིག་འཛིན་ཆེན་པོ་དགའ་རབ་རྡོ་རྗེའི་བསྟན་པ་བུ་གཅིག་པའི་འགྲེལ་པ་དང་གཏེར་ཁ་
དུ་མར་འབྱུང་ངོ་། །བདུད་རྩིའི་རྒྱུད་ལས། དུང་ནི་སོ་སྐྱེ་བའི་བདུད་རྩི་སྟེ། སེང་གེའི་འོ་མ་དང་སྦྱར་ནས་བྱུགས་ན་ངེས་པར་སྐྱེའོ། །སེང་གེའི་འོ་མ་མ་རྙེད་ན། རི་དྭགས་རིགས་སུམ་ཅུའི་འོ་མ་དགོས་པར་གསུངས་སོ། །མིག་གསལ་བའི་སྨན་ནི། སྔོ་རྟག་ངུ་
རྩ་ཨ་བ། གོ་སྙོད། གུར་གུམ། དོམ་མཁྲིས། ལྕགས་སྦྲུལ་གྱི་ཤ །ཨ་རུ་ར། ལྕགས་ཁུ། རྡོ་མདུང་རྩེ་རྣམས་ཞིབ་བཏགས་སྦྲང་སྦྱར་རིལ་བུ་ཤ་རིལ་ཙམ་ལྟོ་སྟོང་ལ་ཟོས་པས་མིག་ཤིན་ཏུ་གསལ། ཡང་ན་ཅོང་ཞི། བྲག་ཞུན། འབྲས་བུ་གསུམ། རྩ་
ཨ་བ། རྟག་ངུ་། སྦྲུལ་སྔོན་གྱི་ཤ །དོམ་གྱི་མཁྲིས་པ།  གཞན་ཡང་རྙེད་ན་ཁྱི་ནག་བྱ་རོག་དྲེད་མོང་། དྲེའུ་རྟ་ནག་འུག་པ་རྣམས་ཀྱི་མཁྲིས་པ་བཅས། སྨན་དེ་རྣམས་སྦྲང་རྩིར་སྦྱར་བའི་ལྡེ་གུ་ཟླ་གསུམ་ཐོ་རེངས་བར་མ་ཆད་དུ་བསྟེན་ན་ཤ་ཡི་སྤྱན་དང་མཚུངས་
པར་འགྱུར་རོ། །ཞེས་གསུངས། ཡང་ན། ཨ་བ་ལུག་རུ་ཤིང་མངར་གུར་གུམ་ཨ་རུ་ར་ལྕགས་ཁུ་རྣམས་ཀྱི་སྨན་བ་འམ་ར་ཡི་འོ་མར་བསྐོལ་བ་བསྟེན་ཀྱང་མིག་ཤེད་རྒྱས་ལ་གསལ་ལོ། །གུར་གུམ་གི་ཝཾ་གླ་རྩི་ཙན་དན་དཀར་པོ་དོམ་མཁྲིས་ཉ་མཁྲིས་ཅུ་
13-4-14b


གང་ཞིམ་ཐིག་ག་བུར་མཚལ་དཀར་སྦྲུལ་མིག །ཉ་གསེར་མིག་མའི་མིག །སྤང་། སག་རམ་རྩི། རག་དུད་རྣམས་སྐྱེར་ཤུན་ཁུ་བས་དྲིལ་ལ་ར་འོར་སྦྱར་ཏེ་མིག་ཏུ་བླུགས་པས་མིག་ནད་དང་འགྲིབ་ཐམས་ཅད་སེལ། མིག་གསལ་ཞིང་མིག་གི་མངོན་ཤེས་ཐོབ་བོ། །
འདི་སྟེང་གཟི་རྙིང་ནག་ཁྲའི་ཕྱེ་མ་དང་། སྐྱུང་ཀ་དང་བྱ་མོ་ནག་མོའི་སྒོ་ངའི་སེར་ཐིག་བསྣན་ཀྱང་ལེགས་སོ། །རྣ་བ་འོན་པ་གསང་བའི་ཐབས་ཨུཏྟ་སྒྲ་སྒྲོགས་ཀྱི་མན་ངག་ནི། རྨ་བྱའི་མདངས་གཞོབ།  ཤིང་ཀུན། རུ་རྟ། ཨུག་ཆོས་འབྲས་བུ་ཐང་དུ་བསྡུ་ལ་དེའི་ཁུ་བ་གྲང་མོ་རྣ་
བར་ཡང་ཡང་བླུགས། དེ་ནས་སྨྱུག་སྦུབས་སམ་སྒྲོ་རྩས་འཇིབ་པས་ཁྲག་རྣག་སོགས་ཕྱིར་འབྱུང་ངོ་། །ཡང་ན་སྨན་དེ་རྣམས་ལ་ཕུག་ཁུ་བར་སྦྱར་ལ་བླུགས་པར་བྱའོ། །ཡང་རུ་རྟ་ཤིང་ཀུན་རྨ་བྱའི་མདོངས་སྒོག་གཅིག་སྐོམ་པོ་ཞིབ་པར་བཏགས་ལ་ལ་ཕུག་གཞོན་ནུའི་ཁོག་པར་
བཅུག །ཁ་ལ་ཕུག་གིས་བཅད་ཕྱི་ནས་འདག་པས་གཡོགས་ཏེ་མེ་མུར་དུ་ཚོས་པར་བསྲེག །གྲང་ནས་འདག་པའི་ནང་ནས་ལ་ཕུག་བླང་ལ། ཁ་ཚར་རླུང་ལ་སྒོག་སྐྱ། བད་ཀན་ལ་སྒ་སྐྱ། མཁྲིས་པར་པི་ལིང་། ཁྲག་ལ་རྒྱ་ཚོས། འདུས་པར་ཐམས་ཅད་བསྣན་ནས་
ཞིབ་བཏགས་ཕྱེ་མ་མར་ཁུའི་ནང་དུ་ཁོལ་བ་གྲང་དྲོ་རྩེ་འཇམ་ཙམ་གྱི་དུས་རྣ་བར་བླུགས་ལ་ཟན་དྲོན་གྱིས་བུ་ག་དགག །ནང་པར་སྨྱུག་སྦུབས་ཀྱིས་འཇིབ། དེ་སྟེང་ལུག་མགོ་རྙིང་པ་ཆང་དུ་བཙོས་པའི་རླངས་པས་བདུག །འོན་པ་མ་ཕྱེད་བར་དུ་དེ་ལྟར་བྱ། ཞག་བདུན་
ནས་ཕྱེ་འོང་། ཕྱེད་ནས་རྣ་བའི་ཕྱི་རྒྱབ་རུས་པ་མཐོ་མཐོ་བོའི་ཁར་སྤྲ་རྡོག་གི་མེ་བཙའ་གསུམ་བཞག་གོ། དེས་རྣ་བ་བརྟན་རྒས་གཞོན་མེད་པར་བྱེད་ཅེས། པདྨ་གླིང་པའི་གཏེར་ཁ་ལས་སོ། །དབང་པོ་གང་གསལ་བར་འདོད་པ་དེའི་རྩ་སྦུགས་སྟོང་སིང་ངེ་བའི་དབུས་
13-4-15a


སུ་རང་གི་ཡི་དམ་ལྷའི་ས་བོན་ནམ། ཨོཾ་ཨཱཿཧཱུྃ་གསུམ་ཀའམ་གང་རུང་རེ་ལྷའི་ངོ་བོར་ཡིན་པར་གསལ་ལ། དེ་ལས་འོད་འཕྲོས་དབང་པོའི་སྐྱོན་ཐམས་ཅད་དུད་ཁུང་ནས་དུ་བ་ལྟར་ཕྱིར་སོང་། ཕྱོགས་བཅུ་ནས་སྲིད་ཞིའི་དབང་པོ་དེ་དེའི་ནུས་
བཅུད་རྣམས་དང་བརྟན་གཡོའི་དྭངས་མ་བསྡུས་ཏེ་ས་བོན་ལ་ཐིམ་པ་དེ་འདྲའི་སྤྲོ་བསྡུ་ཡང་ཡང་བྱས་ལ་སྔགས་གང་བསྒོམས་པ་དེ་བརྒྱ་རྩ་སོགས་བཟླ། མཐར་འདོད་དོན་ལ་གསོལ་བ་བཏབ་ནས་གནས་དེ་ཉིད་དུ་ཐིམ་པས་རྡོ་རྗེའི་དབང་པོར་བྱིན་གྱིས་བརླབས་པར་བསམ་པས་
དབང་པོའི་སྐྱོན་སེལ་ཞིང་དངོས་གྲུབ་ཐོབ་བོ། །ཡིད་ཀྱི་དབང་པོ་ལ་ནི་སྙིང་ནང་དུ་བསྒོམ་པར་བྱའོ། །རྟག་ཏུ་ཡིད་བདེ་ཞིང་སྐྱིད་པར་འདོད་པས། ཛཱ་ཏི་སྙིང་ཞོ་ཤ ཨ་གར། ལི་ཤི། ཨ་རུ། གུར་གུམ། རྟག་ངུ་། ཅོང་ཞི་རྣམས་སྨན་དུ་བསྟེན། གོང་དུ་བཤད་
པའི་དམིགས་པ་དང་། རང་སེམས་ནམ་མཁའ་དང་མཉམ་པར་ཅི་ལའང་མི་འཛིན་པར་རང་བབས་སུ་ལྷོད་ལ།  ཏདྱ་ཐཱ། ཨོཾ་ཚོམ་མེའུ་ལི་ནི་དུ་ཀ་ཐཾ་སྭཱ་ཧཱ། ཞེས་པའི་སྔགས་འདི་ཉིན་རེ་བཞིན་བར་སྐབས་གང་བདེར་ཅུང་ཟད་རེ་བཟླས་ན་སེམས་རྣལ་དུ་ཕེབས་ནས་བག་དྲོ་ལ་ཤིན་ཏུ་སྐྱིད་
པར་འོང་ཞིང་། འཁོར་རྣམས་ཀྱང་བཀྲ་ཤིས་པ་སོགས་ཡོན་ཏན་ཚད་མེད་པ་ཐོབ་པ་གཏེར་མའི་མན་ངག་གོ། རྡོ་རྗེའི་ལུས་ནི་སྔགས་ཀྱི་རྟེན་མཆོག་དང་། །ལྷ་ཡི་གདན་དེ་སྡེ་བཞིའི་རྩ་བ་ཉིད། །དེ་ཕྱིར་དེ་ལ་སྲི་ཞུར་བགྱི་བའི་ཐབས། །འདིས་ཀྱང་གཞན་
ལ་ཕན་པ་ཆེར་བྱེད་ཤོག །ཅེས་པ་འདི་ནི་མི་ཕམ་འཇམ་དཔལ་དགྱེས་པས་ཕན་པའི་བསམ་པས་དགེ་བྱེད་ལོའི་དབོ་ཟླའི་ཚེས་རྒྱལ་སྲིད་གྲངས་ཀྱི་དུས་སུ་ཡོངས་སུ་འགྲུབ་པར་བགྱིས་པ་དགེ་ལེགས་འཕེལ།།    །། དགེའོ།།    །།    
13-4-15b


empty page
13-5-1a


༄༅། །འདོད་པའི་བསྟན་བཅོས་འཇིག་རྟེན་ཀུན་ཏུ་དགའ་བའི་གཏེར་ཞེས་བྱ་བ་བཞུགས་སོ། །
13-5-1b


རྒྱ་གར་སྐད་དུ། ཀཱ་མ་ཤཱ་སཏྲ་ལོ་ཀཱ་ནནྡ་སྱ་ནི་དྷི་ནཱ་མ། བོད་སྐད་དུ། འདོད་པའི་བསྟན་བཅོས་འཇིག་རྟེན་ཀུན་ཏུ་དགའ་བའི་གཏེར་ཞེས་བྱ་བ། གར་གྱི་དབང་ཕྱུག་ལ་ཕྱག་འཚལ་ལོ། །སྟོང་ཆེན་ཕྱག་
རྒྱའི་བཞིན་ལ་རྗེས་ཆགས་པ། །བདེ་མཆོག་ཨུཏྤལ་གཞོན་ནུའི་ཟུར་མིག་ཅན། །རྡོ་རྗེ་རྣོན་པོར་རབ་གྲགས་སྲིད་ཞིའི་དཔལ། །འགུགས་པ་གང་དེས་ཁྱོད་ལ་སྲུང་གྱུར་ཅིག །འདོད་ན་འདོད་བདེ་དགའ་བའི་མཐར་ཐུག་ལོ། །གང་
དང་བྲལ་ན་ཀུན་དགའ་ཉིད་མིན་ཀྱེ། །སྒྱུ་རྩལ་རྒྱ་མཚོས་མཛེས་སོ་མིག་ཡངས་མ། །བདེ་བའི་མེ་ཆེན་སྦར་ལ་མཐུ་ལྡན་མཛོད། །རྟེན་དང་ཉེར་བསྡོགས་བྱེད་པའི་འཁྲུལ་འཁོར་ནི། །དགའ་བ་རྣམ་པར་འཕེལ་བའི་འབྱུང་
གནས་ཏེ། །འཇིག་རྟེན་གྲངས་སུ་གནས་པ་དེའི་དང་པོ། །གྲོགས་མཆོག་ལྷ་ཡི་དགའ་ཚལ་ཡངས་པ་ཡིན། །འདི་ལ་སོ་དྲུག་རིགས་དང་བཀྲ་ཤིས་གྲངས། །ཆུ་གཏེར་དང་ལྡན་དབང་པོའི་རིམ་པ་ལས། །བདེ་ཆེན་དགའ་
13-5-2a


བ་འཕེལ་སླད་རྣལ་འབྱོར་མ། །ཡུལ་ན་གནས་པའི་མཚན་ཉིད་ཤེས་པར་བྱ། །རྡོ་རྗེ་ལ་སོགས་རེ་ཁཱས་རྣམ་བཀྲ་ཞིང་། །ཁྱིམ་དུ་རི་མོ་འབྲི་ཞིང་བརྡ་ལ་མཁས། །ཞི་སོགས་རིགས་མཚུངས་མཐོང་བས་བདེ་
འཕེལ་མ། །དམ་ལ་གནས་པ་དཔའ་བོས་བརྟགས་ཏེ་བླང་། །པད་འདྲ་པདྨའི་དྲི་ལྡན་གདོང་པ་སྣུམ། །སྣ་རྩེ་ཏིལ་འདྲ་སེན་མོ་རབ་ཏུ་དམར། །རྒྱབ་སྒུར་རྐང་མཐིལ་ཀུན་ནས་ས་ལ་རེག །བ་སྤུ་འཁྱིལ་ལྡན་ནུ་མ་ཏིལ་འབྲས་འདྲ། །
གསུས་གཉེར་གསུམ་ལྡན་བྲང་མཛེས་གླང་ཆེན་འགྲོས། །འོ་མདངས་སྐྱུར་བའི་རོ་ལྡན་རྡུལ་འབབས་མ། །དམར་བའི་མདངས་མངའ་ཡིད་འོང་གཟུགས་མཆོག་ཅན། །ཀུན་ཏུ་གྲགས་ལྡན་པདྨ་ཅན་གྱི་རིགས། །བ་ཚྭའི་དྲི་ལྡན་སྐྲ་དང་
སྣ་རིང་ཞིང་། །འོ་ཞོ་ལ་དགའ་དཀར་འཛིན་ཀུན་ནས་རྒྱས། །དཀར་སེར་མདོག་ལྡན་ཡིད་འོང་ངང་པའི་འགྲོས། །བློ་གྲོས་རབ་གསལ་རཀྟ་མངར་བག་ཅན། །རྡེབ་བཞིན་སྦྱོར་བ་འདོད་པའི་བུ་མོ་ནི། །དུང་དང་མཚུངས་པར་གྱུར་གང་
13-5-2b


དུང་ཅན་མ། །ཤ་རློན་དྲི་ལྡན་ལུས་ཆུང་བརླ་མཛེས་ཤིང་། །ངོ་ཚ་ཆུང་ཞིང་ཁྲོ་སྐྱེན་འཐབ་ལ་དགའ། །བྱ་རོག་རྐང་པ་འདྲ་བའི་རྗེ་ངར་ཅན། །མཆུ་འཕྱང་གན་རྐྱལ་ཉལ་ཞིང་ཕུག་རོན་སྐད། །སྔོ་བསང་མདོག་ལྡན་རཀྟ་ཚ་བའི་རོ། །གནག་པའི་སྐྲ་ལྡན་རི་མོ་ཅན་ཞེས་བྱ། །ཆང་
གི་དྲི་འབྱུང་ལུས་དང་བྱིན་པ་སྦོམ། །ཅུང་ཟད་ཡོ་བའི་སྣ་ལྡན་མདོག་སྨུག་ཅིང་། །སྤྱོད་པ་རྩིངས་ལ་དྲི་ང་རྡུལ་སྐྱེན་མ། །ནུ་མ་གཡས་དང་གཡོན་དུ་དགྱེ་བའི་ཉམས། །ཚོ་བརྗིད་གཟི་ལྡན་ཅུང་ཟད་མཆེ་བ་ཅན། །བསྐའམ་བསྔལ་བའི་རོ་ལྡན་རྡུལ་འབབས་མ། །གླང་ཆེན་
དང་འདྲ་གླང་པོ་ཅན་ཞེས་བྱ། །དེ་དག་རྣམས་ཀྱང་རབ་འབྲིང་ཐ་མ་སྟེ། །འདྲེས་པར་གྱུར་གང་སྣ་ཚོགས་གཟུགས་ཅན་མ། །གང་ཡང་ལུས་དང་སྤྱོད་ལམ་ཡིད་དུ་འོང་། །མཐོང་བས་དགའ་སྐྱེད་འགྲོགས་ན་བདེ་སྟེར་ཞིང་། །ལྟ་བས་སུན་པ་མེད་ལ་སྦྱར་བར་བྱ། །རེག་
པས་མངོན་དགའ་ལུས་ཀྱི་བདེ་བའི་གནས། །གྱོ་མོའི་སྦུབས་འདྲ་རྩུབ་རིང་མི་སྡུག་གཟུགས། །རྟག་ཏུ་སྐམ་མམ་ཧ་ཅང་གཤེར་བག་འཇག །བདེ་བའི་འོས་མིན་ཆེའམ་ཆུང་བ་དང་། །དྲོད་བྲལ་ལྷོད་པོར་གྱུར་པ་སྤང་བར་བྱ། །ཟེའུ་འབྲུ་དང་བཅས་སྟེང་དུ་འབུར་བའི་
དབྱིབས། །རུ་སྦལ་རྒྱབ་འདྲ་མཐུག་མཁྲང་ཡིད་དུ་འོང་། །འཇམ་ལ་སྤུ་ཉུང་ཕྱི་ན་ཁྱོན་ཡངས་ཀྱང་། །ནང་གི་བུ་ག་བད་སྙིང་བཞིན་དུ་ཟླུམ། །དུས་སུ་ཆགས་པའི་ཟིལ་འབྱུང་མྱུར་དུ་སྐམ། །དྲོད་བཅས་བུ་ག་རན་རྣམས་བདེ་བ་སྟེར། །ནོར་བུ་གཞིབས་པར་ནུས་པ་
མཆོག་ཏུ་བསྔགས། །གང་ཡང་གཟུགས་དང་ན་ཚོད་མཆོག་གྱུར་ཅིང་། །ཕན་ཚུན་དགའ་ཞིང་ཆགས་པའི་ཡིད་ལྡན་ན། །འདོད་པའི་སྒྱུ་རྩལ་འཕེལ་བའི་གཞིར་འགྱུར་ཏེ། །དགའ་བའི་དུས་སྟོན་ཆར་གྱིས་རྒྱ་མཚོ་བཞིན། །བདེ་བའི་རྟེན་དུ་གྱུར་པ་དེ་དག་ཀྱང་། །མཐོང་
13-5-3a


ན་དགའ་འཛུམ་ངག་སྙན་དྲུང་དུ་འདུ། །ཕག་ནས་ལྟ་འཁྲི་དབྱངས་ལེན་གོ་བར་བྱེད། །དྲུང་དུ་གླལ་ཞིང་མི་བཟོད་སོར་མོ་དང་། །ལུས་ཉེང་སྐྲ་འགྲོལ་གོས་བཅོས་ནུ་མ་སྟོན། །བུས་པར་འོ་བྱེད་རྐང་པས་ས་རིས་འདྲི། །དགོད་ཅིང་ལུ་ལ་སྐ་རགས་འགྲོལ་
བ་དང་། །རྨྱང་བྱེད་ཟུར་མིག་དང་བཅས་སྒེག་ཆོས་སོགས། །བུད་མེད་སྒྱུ་ཡི་དངོས་པོ་གང་ཡིན་པ། །གང་གིས་སྟོན་པ་ཐབས་ཀྱིས་དྲང་བར་ནུས། །མདོར་ན་མཐོང་བས་རང་ཉམས་བདེ་སྟེར་ཞིང་། །འགྲོགས་པས་རྩ་རླུང་སེམས་ལ་བག་ཕེབས་པ། །ཨུཏྤལ་དྲི་ལྡན་པདྨ་གཞོན་
ནུའི་བཞིན། །ངང་པའི་གདངས་ལྡན་དམ་ཚིག་ཆེད་འཛིན་མ། །སྔགས་ཀྱི་བདག་པོས་དངོས་གྲུབ་ཡན་ལག་ཏུ། །རྫས་སྔགས་དམིགས་པའི་ལྕགས་ཀྱུས་དགུག་པར་འོས། །བཙས་ནས་ལྔ་ལམ་གྱུར་བ་བྱིས་པའི་ལྕེ། །གི་ཝཾ་ཀ་ར་རྨ་བྱའི་མདོངས་དང་ནི། །རང་ཁྲག་དང་བཅས་
དཔྲལ་བར་བྱུགས་པས་འགུགས། །ཡང་ན་མི་ཁྱིའི་ལག་ངར་མཆོག་གཡས་གཡོན། །མེར་བསྲེགས་ཐལ་བ་གོ་བོའི་བྲུན་དང་ནི། །བྱང་བལྟའི་ཕུག་སྐྱེས་རྩ་རྩེ་ལྷོར་བསྟན་རྣམས། །ཞིབ་བཏགས་རང་གི་མི་བསྐྱོད་དང་བཅས་པ། །དཔྲལ་བར་ཐིག་ལེ་གསུམ་བྱས་གང་ལ་བལྟས། །
འདིར་ཤོག་སྨྲས་གང་དེ་མ་ཐག་ཏུ་འདུན། །སྔགས་ཀྱིས་དགུག་པ་གསང་བའི་ཡི་གེ་ནི། །མན་ངག་བཞིན་དུ་བཟླས་པས་འདོད་བཞིན་བྱེད། །ཏིང་འཛིན་ལོངས་སྤྱོད་འཁོར་ལོར་ཨཱཿདམར་པོའི། །བདེ་ཆེན་ཆགས་པའི་རང་མདངས་འོད་དམར་གྱིས། །བཞུས་ནས་བདག་དང་རོ་
མཉམ་བདེ་བའི་ངང་། །གསུང་གི་ཡི་གེ་དབྱངས་སུ་བརྗོད་པས་འགྲུབ། །གཉིས་པ་ཡིད་དུ་འོང་བའི་ས་ཕྱོགས་སུ། །བཅུད་དང་ལྡན་པའི་ཟས་དང་སྐོམ་བསྟེན་ལ། །བག་ཕེབས་བདེ་བའི་གནས་སུ་ཡོ་བྱད་བཅས། །དགའ་བའི་དུས་ལྡན་སྒྱུ་རྩལ་དབང་ཕྱུག་དེས། །འདོད་པའི་
13-5-3b


ཉེར་བསྡོགས་རྒྱལ་སྲིད་གྲངས་ལྡན་བྱ། །པདྨོ་རྣམ་པར་རྒྱས་པའི་སྤྱན་བཟང་གིས། །ཆགས་ལ་ཉེར་བསྐུལ་ཡིད་འོང་ཟུར་གྱི་མིག །སྣ་ཚོགས་བླན་ཏེ་ལྟ་བའི་རོ་མྱོང་བས། །དགའ་བའི་འཁྲི་ཤིང་སྤེལ་བ་དང་པོ་ཡིན། །འདོད་པའི་འདུན་པ་རབ་ཏུ་གསལ་བྱེད་པ། །དབྱངས་དང་དོན་གྱི་རྣམ་
པ་མི་མཉམ་པས། །སྣ་ཚོགས་གྱུར་པ་(དགོད་པ་སོགས་)ཅ་ཅོའི་ངག་གི་སྒྲས། །བདེ་བའི་ཆུ་གཏེར་འཕེལ་དེ་གཉིས་པ་ཡིན། །བཅུད་ཀྱིས་རྒྱས་པར་བྱས་པའི་ཡིད་འོང་ལུས། །དག་པར་ཁྲུས་བྱས་གུ་རྒུམ་ཙནྡ་དང་། །ག་བུར་ལ་སོགས་དྲི་བསུང་ལྡན་པ་ཡིས། །བྱུགས་བས་དགའ་སྟོན་རྣམ་འཕེལ་
གསུམ་པའོ། །ཡོལ་བས་བར་དུ་བཅད་བྱས་གྲོགས་མཆོག་གི། རྒྱན་དང་གླུ་གར་སོགས་ཀྱི་སྒྲ་དེ་དག །བདག་གིར་བྱས་པས་སྙིང་ལ་འདོད་པའི་མེ། །དྲག་ཏུ་སྦར་བར་བྱས་གང་བཞི་བ་ཉིད། །ཡིད་དུ་འོང་བའི་གཟུགས་དང་བསུང་ཞིམ་དྲི། །སྙན་པའི་གླུ་སོགས་དེ་
ཡི་འདོད་ཡོན་ལྔ། །མདུན་ན་བསྟར་བྱས་དེ་ལ་ཡིད་ཞུགས་པས། །རྩེ་གཅིག་དགའ་བར་བྱེད་པ་ལྔ་པ་ཡིན། །རྩེད་འཇོ་དང་ནི་དགའ་མགུར་སྤྱོད་ལ་སོགས། །སྔོན་ཚེ་རང་ཉམས་བསྟར་པའི་རི་བོང་གཟུགས། །དྲན་པའི་ཟླ་ཤེལ་ངོས་ལ་གསལ་བཀོད་པས། །ཀུན་དགའི་རོ་དང་
ལྡན་པ་དྲུག་པ་ཡིན། །ཕན་ཚུན་འདོད་ལ་འདུན་པས་ཉེར་བསྐུལ་བས། །རེག་བྱའི་དགའ་སྟོན་ཉམས་སུ་བསྟར་བ་ལ། །ཉེ་བར་ཕྱོགས་པའི་འདུ་(ལག་བཅང་སོགས་)འགོད་སྣ་ཚོགས་པ། །ཉམས་སུ་མྱོང་བ་དེ་དག་བདུན་པའོ། །ཡིད་འོང་ཡུལ་གཅིག་གིས་ཀྱང་ཚིམ་བྱེད་ན། །ལྔ་ཆར་
ཚང་བའི་སྨིན་ལེགས་སྨོས་ཅི་འཚལ། །ལང་ཚོའི་དུས་ལྡན་རང་དབང་གྱུར་པའི་གྲོགས། །ཡུལ་གྱིས་ཡིད་ལ་གནོད་པ་ཆུང་ངུའང་མེད། །རོ་ཙའི་སྦྱོར་བ་ཉེ་བར་ལྡན་གྱུར་པས། །འདོད་པའི་དགའ་བ་ཡོངས་སུ་རྫོགས་པར་བྱེད། །མ་མྱོངས་སྦྲང་རྩི་
13-5-4a


མིད་པས་དགའ་སྐྱེད་མིན། །སྒྱུ་རྩལ་བྲལ་ལ་མཆོག་གི་བདེ་བ་མེད། །དེ་ཕྱིར་བརྒྱད་ལས་བརྒྱད་དུ་ཕྱེ་བ་ཡི། ། དྲུག་ཅུ་རྩ་བཞིར་དྲང་སྲོང་གིས་བཤད་པའི། །སྒྱུ་རྩལ་ཆོ་ག་མཁས་པར་མ་བྱས་པར། །འཁྲིག་པར་བྱེད་པ་ཕྱུགས་ཀྱི་ངང་ཚུལ་ཡིན། །གསུམ་
པ་སྦྱོར་བའི་སྒྱུ་རྩལ་དང་། །བདེ་བའི་ཡན་ལག་ཕུན་ཚོགས་ལྡན། །བྱེད་བཅིང་པ་ཡི་བདེ་མྱོང་བ། །ཡོན་ཏན་གྲངས་ཀྱིས་རྣམ་པར་བཤད། ། འཁྱུད་དང་འོ་བྱེད་སེན་མོས་རྩེན། །སོ་འདེབས་འཇུག་དང་སིད་སྒྲ་འབྱིན། །ཉེད་དང་སྐྱེས་པ་ལྟར་བྱེད་པ། །བརྒྱད་པོ་འདི་
དག་རྩ་བ་ཡིན། །དང་པོ་ལ་ཡང་རྣམ་པ་བརྒྱད། །གདོང་བལྟ་དགའ་བའི་སེམས་བཅས་སུ། །འགྲོ་ན་དོག་པོའི་ཟོལ་གྱིས་ནི། །ལུས་ཀྱི་ཆ་ཙམ་འཕྲད་བྱེད་པ། །རེག་པ་ཅན་ཞེས་བྱ་བར་བརྗོད། །གང་དུ་འདུག་ལ་ནུ་མས་རེག །དེས་ཀྱང་དེ་བཟུང་འབིགས་པ་ཅན། །མཐུན་
བའི་གཏམ་བཅས་ཡུད་ཙམ་དུ། །ལུས་དྲུད་ཉེ་བར་འདར་བ་ཅན། །རྩིག་སོགས་ལ་བརྟེན་འཁྱུད་ཅིང་འཚིར། །སོས་འདེབས་གཟིར་བ་ཅན་ཞེས་བྱ། །ལག་པས་མགོ་བོ་བཀུག་ནས་འཁྱུད། །སིད་བཅས་འོ་བྱེད་འཁྲི་ཤིང་ཞོན། །ལངས་ལ་རྐང་པས་རྐང་བོལ་བརྫིས། །
རྐང་པ་ཡ་གཅིག་འཁྱུད་ནས་སུ། །ལག་པས་མགོ་བཀུག་འོ་བྱེད་པ། །ཤིང་ཐོག་ལེན་ཞེས་འདྲ་བའི་མིང་། །ཐང་པ་ཉལ་ནས་ཕན་ཚུན་གྱི། །ལྟོ་དང་བརླ་སོགས་ལེགས་སྦྱར་ཏེ། །ལག་པ་རྒྱབ་འཁྱུད་འོ་བྱ་བ། །ཏིལ་འབྲས་ལྟ་བུའི་འཁྱུད་པར་བཤད། །གཅིག་གི་འདོམས་
སུ་གཅིག་ཞུགས་ཏེ། །ཀུན་འཁྱུད་ཆགས་མྱོས་ཁྲི་འོ་ཆུ་ལྟར་འདྲེས་པའང་ཟེར་ར་ཛ། །དེ་དག་འཁྱུད་པའམ་རོལ་བ་ཡིན། །གཉིས་པ་འོ་བྱེད་བརྒྱད་པོ་ནི། །གནས་ཀྱི་དབང་གིས་བྱེ་བ་སྟེ། །ཁ་དང་མགྲིན་པ་ནུ་མ་དང་། །མཆན་ཁུང་རྐེད་པ་རྒྱབ་ཁུང་དང་། །སྣ་དང་མཁུར་ཚོས་
13-5-4b


པདྨར་བཅས། །ཁ་ཡིས་འོ་བྱ་ཆགས་པའི་སྒྲ། །འབྱིན་པ་ཝརྟི་ཀ་ཡིས་བཞིན། །ཀུན་ཏུ་ཆགས་པ་སྤེལ་བའོ། །སེན་མོ་འདེབས་པའི་ཚུལ་བརྒྱད་ནི། །བ་སྤུ་ལྡང་ཕྱིར་གཞོན་ནུ་མར། །རྣ་དྲུང་ནུ་མ་མཆུ་སོགས་སུ། །ཟོར་ཡང་སོར་མོས་འབྲས་ཀྱི་ནི། །གཟེགས་མའི་རྗེས་ཙམ་
མངོན་བྱེད་པ། །དྲལ་བ་ཞེས་སུ་བྱ་བར་བརྗོད། །མགྲིན་པ་ནུ་མ་རྒྱབ་སོགས་སུ། །རི་མོ་ཡོན་པོར་བྲི་བ་ནི། ། ཟླ་ཕྱེད་ཅེས་བྱ་གཡའ་ལྡངས་ཞིང་། །དྲེགས་བྲལ་སེམས་ནི་གཡོ་བར་བྱེད། །དེ་འདྲ་ཐ་དཀར་དྲང་པོར་བྲིས། །དཀྱིལ་འཁོར་ཞེས་སུ་མངོན་པར་བརྗོད། །ལྟེ་བའི་རྩ་བ་
དཔྱི་ཡི་སྟེང་། །ཚང་ར་ལ་སོགས་གནས་དག་ཏུ། །ཀུན་ཏུ་རིང་བའི་རེ་ཁཱ་བཀོད། །རི་མོ་རིང་པོ་ཞེས་བྱའོ། །དེ་ཉིད་ཡོན་པོར་བྲིས་པ་ན། །སྟག་གི་སེན་རྗེས་ཅེས་སུ་འདོད། །ནུ་མ་རྒྱབ་དང་ཀོས་ཀོའི་འོག། རྒྱ་གྲམ་ལྟ་བུའི་རྗེས་མངོན་པར། །གང་བྲིས་རྨ་བྱའི་རྐང་རྗེས་
ཞེས། །བརྡ་ཤེས་དྲང་སྲོང་རྣམས་ཀྱིས་བརྗོད། །ཚུལ་དེས་ནུ་མ་ལ་སོགས་སུ། །སེན་མོ་ལྔ་ཡི་རི་མོ་ནི། །ཤ་ཡིག་གཉིས་པའི་རྗེས་ལྟ་བུར། །མངོན་བྱས་རི་བོང་འཕྱོང་བར་བརྗོད། །དགའ་བའི་རོ་ནི་བསྐུལ་བའི་ཕྱིར། །ནུ་མ་རྒྱབ་དང་རྐེད་པར་ཡང་། །ཨུཏྤལ་
འདབ་འདྲའི་གཟུགས་བྲིས་པ། །ཨུཏྤལ་འདབ་མ་ཞེས་སུ་བཤད། །གང་ཕྱིར་སོ་དང་སེན་མོས་རྣམ་བཏབ་པ། །མྱོས་བྱེད་ལྕགས་ཀྱུའི་རྣམ་པ་མི་ལྡན་ཡང་། །གང་ལ་བཏབ་པའི་ཡིད་དབང་མྱོས་བྱེད་ཅིང་། །མཐོང་བ་ཙམ་གྱིས་ཆགས་ལྡན་མིག་ནས་འགུགས། །དགའ་
བའི་ཆུ་གཏེར་དག་ཀྱང་རྒྱས་བྱེད་ལ། །ལུས་ཀྱི་བ་སྤུའི་འཁྲི་ཤིང་གཡོ་བར་བྱེད། །དེ་ཕྱིར་ཐོག་མར་ཕྲད་དང་མགྲོན་ཕྱིན་དང་། །དགའ་བ་གཡོ་བའི་དུས་སུ་སྦྱར་བར་བྱ། །བཞི་པ་སོ་ཡིས་གདབ་ལ་བརྒྱད། །ཆགས་པས་ཤིན་ཏུ་དམར་བར་ནི། །འདེབས་པར་མུ་ཁ་ཅན་
13-5-5a


ཞེས་ཀྱང་བྱ། ལ་ཀཾ་ཞེས་བྱ། །དེ་ལས་མཆུ་དབུས་སོ་ཡི་རྗེས། །དོད་ཙམ་ཅུང་ཟད་བཙིར་བར་ནི། །འདེབས་པ་ཀྱི་ཤུས་སྐྲངས་པ་ཞེས། །བྱ་བར་ཡོངས་སུ་བརྗོད་པ་ཡིན། ། མཆུ་དང་སོ་གཉིས་ཁ་སྦྱར་ནས། །འགྲམ་ངོས་འདེབས་པ་མཆུ་སོ་
ཞེས། །བྱ་སྟེ་བྱེ་རུའི་ནོར་བུར་ཡང་། །འབོད་པ་སྒྲ་སྒྱུར་འགའ་ལ་གྲགས། །ཕྱོགས་དེར་སོ་ཕྲེང་གཉིས་ཀྱིས་ནི། །མངོན་ཙམ་འདེབས་པ་སོ་ཕྲེང་ཡིན། །ཁ་ཅིག་མ་ཎི་མཱ་ལ་ཞེས། །ནོར་བུའི་ཕྲེང་བ་ཉིད་དུ་འབོད། ། མཆེ་བ་གཉིས་ཀྱི་རྗེས་ཙམ་ནི། །གསལ་བར་
འདེབས་པ་ཐིག་ལེ་ཅན། །རྐེད་པ་ན་མཚོང་མགྲིན་སོགས་དང་། །དཔྲལ་བར་སོ་རྣམས་ཀུན་གྱི་རྗེས། །མངོན་ཙམ་འདེབས་པར་བྱེད་པ་ནི། །ཐིག་ལེའི་ཕྲེང་བ་ཞེས་བྱའོ། །ནུ་མ་དང་ནི་རྒྱབ་དག་ཏུ། །སྤྲིན་གྱི་དཀྱིལ་འཁོར་དབྱིབས་ལྟ་བུར། །མ་ངེས་འཆོལ་བར་སོས་བཏབ་པ། །
སྤྲིན་གྱི་དུམ་བུ་ཞེས་སུ་བརྗོད། །མཆན་ཁུང་སེན་མོས་བཏབ་རྗེས་སུ། །སོ་ཡིས་ཡུན་རིང་འདེབས་བྱེད་དོ། །ཕག་གིས་རྨུགས་པ་ཞེས་བྱ་སྟེ། །མཆིལ་པ་བོང་བུ་བཞིན་ཆགས་པའོ། །སོ་སེན་གདབ་པའི་གནས་དག་ཀྱང་། །རྣ་དྲུང་མགུལ་པ་མཆན་ཁུང་དང་། །ནུ་མ་
རྒྱབ་དང་གསང་བ་དང་། །སྐེད་པ་བརླ་དང་བཅས་པ་སྟེ། །གཡའ་ཟའི་གནས་སུ་ངེས་པར་སྦྱར། །མདོར་ན་མིག་གཉིས་ཡ་མཆུ་དག །མ་གཏོགས་གར་འདོད་གནས་སུ་གདབ། །འདོད་པའི་འཁོར་ལོར་ཞུགས་པ་ལ། །གནས་ལ་ངེས་པ་ཡོད་མ་ཡིན། །ཡང་དག་
འཇུག་པ་བརྒྱད་པོ་ནི། །མཁའ་གསང་རབ་ཏུ་སྦྱར་བ་སྟེ། །ཆགས་པ་སྲ་བ་བསྐུལ་ཕྱིར་དང་། །མི་བཟོད་བདེ་བ་འཕེལ་ཕྱིར་བྱ། །ལྟོ་སྦྱར་རྡོ་རྗེ་ཡོན་པོར་བཅུག །གསེག་སྟེ་དྲུད་པ་ཉེ་རོག་ཅན། །ལག་པས་རྟགས་ཀྱི་རྩ་བར་བཟུང་། །ཕྱོགས་ཀུན་བསྐོར་བ་སྲུབ་
13-5-5b


པར་འདོད། །བུ་མོ་རྐང་བརྐྱང་གན་རྐྱལ་ལ། །སྐྱེས་པས་ཕུར་ཐབས་གཟུགས་པ་ནི། །ཧུ་ལ་ཞེས་སུ་བྱ་བ་སྟེ། །འཇུག་པ་དག་ཏུ་ཉེ་བར་བརྗོད། །དེ་ནས་དགའ་བཅས་བསྐྱོད་བྱས་བ། །ཆེར་སྲུབ་བ་ཞེས་བྱ་བར་འདོད། །ལིངྒ་བཅུག་ནས་ཡུན་རིང་དུ། །
བསྡམས་ཏེ་གནས་པ་གཟིར་ལྡེམ་ཡིན། །ལིངྒ་རིང་དུ་ཕྱིར་ཕྱུང་ནས། །སླར་ཡང་དྲག་ཏུ་འཇུག་ཅིང་རྡེབ། །རབ་ཏུ་སྣུན་པར་བྱེད་པས་ན། །ནིར་ཁ་རབ་བསྣུན་ཏ་ཞེས་བྱ་བར་བརྗོད། །ལན་གཅིག་བཅུག་ནས་དེ་མ་ཐག །གསུམ་མམ་བཞིར་བརྡབ་སླར་ཡང་ནི། །གསུམ་མམ་ལན་བཞིར་འབྱིན་
འཇུག་བྱེད། །མཆིལ་པ་ལྟར་བྱེད་དེའི་ཡན་ལག །ཕན་ཚུན་གཉིས་ཀས་རྡེབ་པ་ནི། །རྡེབ་ཅིང་བསྣུན་པ་ཞེས་བྱའོ། །གྱེན་དུ་འགྲེང་ཞིང་དལ་བུས་གཞུག །རྡེབ་པར་བྱེད་པ་ཕག་ལྟར་བསྣུན། །སིད་ཀྱི་སྒྲ་འབྱིན་རྣམ་པ་བརྒྱད། །ངུ་དང་འཁུན་བྱེད་གདུང་
བྱེད་དང་། །དབྱངས་ཅན་དང་ནི་ཨ་ཝརྟ། །ཝརྞ་ཨ་རྡ་གྲོལ་བ་ཆུང་། །ཨ་ལམ་ཨརྦ་ཞེས་བྱ་བ། །རིམ་བཞིན་ཕུག་རོན་ཁུ་བྱུག་དང་། །ཧ་རི་ཏ་དང་སོ་བྱ་དང་། །བུང་བ་ངང་སྐྱ་ཐི་བ་དང་། །ལ་བ་ཀ་ཡི་སྐད་དང་སྦྱར། །དེ་ཡང་ཁོང་ན་གནས་པ་དང་། །ངག་ཏུ་གསལ་
པོར་དབྱུང་བ་ཡི། །ཆགས་པ་ཅན་གྱི་དབྱངས་ལ་ནི། །ངེས་མེད་ཅི་དགར་བརྗོད་པར་བྱ། །རྩ་གནས་བདེ་བའི་རང་མདངས་སྒྲ། །ཧ་སིད་ཨ་ཧཾ་ཧྲིཾ་ཧ་སོགས། །མ་བཅོས་ངག་གི་རོལ་མོ་ནི། །ཇི་ལྟར་འབྱུང་བ་འགོག་མེད་བརྗོད། །རྣམ་འགྱུར་སྣ་ཚོགས་ཀྱང་དེ་འདྲ། །
སྐྱེས་བུས་བསྣུན་དང་སིད་སྒྲ་སོགས། །གང་བྱས་ལན་དུ་བུ་མོ་ནི། །ཆགས་ལྡན་བསྟན་བཅོས་བྱང་བ་ཡིས། །སླར་ཡང་བསྣུན་སོགས་སྒྱུ་རྩལ་ལན།  །མིག་འཕྲུལ་ལྟ་བུར་སྦྱར་བར་བྱ། །འོ་བྱ་བ་ཡི་གནས་བརྒྱད་ཀྱི། །དབྱེ་བས་ཉེད་པའང་རྣམ་པ་བརྒྱད། །ཁུ་ཚུལ་
13-5-6a


ཐལ་མོ་གྲུ་མོ་དང་། །སྟ་ཟུར་མཁུར་བ་ལ་སོགས་པས། །ཉེད་ཅིང་སིད་ཀྱི་སྒྲ་བཅས་པར། །ཆགས་པའི་བདེ་བ་བསྐུལ་བར་བྱ། །གྲང་བའི་དབུགས་དང་བཅས་ནས་སུ། །ཤིན་ཏུ་འཚིར་ཞིང་ཉེད་པ་ནི། །ཡུན་རིང་བདེ་བའི་གནས་སུ་བྱ། །བདེ་བ་མཆོག་ཏུ་སྤེལ་བྱེད་
པའོ། །གལ་ཏེ་སྐྱེས་བུ་ངལ་བའམ། །ཡང་ན་ཆགས་འཕེལ་ཕྱིར་ཡང་ནི། །ཆགས་ལྡན་བུད་མེད་རྣམས་ཀྱིས་ནི། །སྐྱེས་བུའི་བྱ་བ་བྱེད་པ་ལ། །སྐྱེས་པ་ལྟར་བྱེད་ཅེས་བྱ་སྟེ། །དེ་ཡང་རྣམ་པ་བརྒྱད་དུ་བརྗོད། །སྐྱེས་པ་འདུག་ནས་བུད་མེད་ཀྱིས། །བསྐྱོད་པ་ལ་ནི་དྲུད་པར་
བརྗོད། །ཡུན་རིང་སྡུད་ཅིང་འཚིར་བ་ནི། །འཚིར་བ་ཞེས་སུ་མངོན་པར་བརྗོད། །འཁྲུལ་འཁོར་དང་བཅས་འཁོར་ལོ ལྟར། །བསྐོར་བ་ལ་ནི་བསྐོར་བར་འདོད། །བརླ་དང་བྱིན་པ་ཕན་ཚུན་བསྣོལ།  །ཀུན་ཏུ་བསྐོར་བ་བརླ་དང་ནི། །བྱིན་པས་བསྐོར་བ་ཞེས་བྱའོ། །དེ་ཚེ་
སྐྱེས་བུ་ངལ་གྱུར་ན། །ངལ་གསོའི་ཆེད་དུ་དལ་འདུག་ནས། །སླར་ཡང་འཇུག་པར་བྱེད་པ་ནི། །ངལ་གསོ་ཅན་ཞེས་བྱ་བར་བཤད། །སྐྱེས་བུའི་སྟེང་ནས་མར་སྤྱོད་པ། །ཁྱུང་ལྡིང་དག་ཏུ་མངོན་པར་བརྗོད། །རྐང་ལག་བརྐྱངས་ནས་བྱེད་པ་ནི། །ཤིན་ཏུ་བརྐྱང་བ་ཞེས་
པར་འདོད། །པང་དུ་རྒྱབ་ནས་སྤྱོད་བྱེད་པ། །གྲོང་གི་བྱ་བ་ཞེས་བྱའོ། །དེ་ལྟར་སྒྱུ་རྩལ་དྲུག་ཅུ་བཞིས། །མཚོན་ནས་འདོད་པའི་རྣམ་འགྱུར་མཐའ། །སྣ་ཚོགས་ཇི་ལྟར་འདོད་པ་ཡིས། །འདོད་པའི་དགའ་བ་སྤེལ་བར་བྱ། །གཞན་ཡང་འདི་ལྟར་ལུང་ལས་བཤད་
པ་ཡི། །བསམ་པས་འགྱུར་བའི་ལྟ་སྟངས་སོ་དྲུག་དང་། །བྱེད་པའི་རྣམ་པ་བརྒྱ་དང་བརྒྱད་ཉིད་དེ། །ལུས་བསྒྱུར་སོ་གཉིས་དབྱུང་བ་བཞི་ལ་སོགས། །རྣམ་པའི་དབྱེ་བ་གྲངས་མེད་གནས་པ་ལ། །ཇི་ལྟར་རིགས་པར་མཁས་ཤིང་གོམས་པར་བྱ། །གཉིས་པ་ཕུན་ཚོགས་
13-5-6b


བདེ་བའི་ཐབས་བསྒྲུབ་པ། །དང་པོར་དོགས་མེད་ཤིན་ཏུ་བག་ཕེབས་གནས། །མེ་ཏོག་འཁྲི་ཤིང་རྒྱས་པའི་སྐྱེད་མོས་ཚལ། །ནེའུ་གསེང་འབབ་ཆུ་དྲི་ཞིམ་པ་ཡི་གཞིར། །གློག་བཅས་འབྲུག་སྒྲ་གཡོ་བའི་སྤྲིན་ཕྲེང་གིས། །བླ་རེ་མངོན་མཛེས་དགའ་བའི་ས་ཕྱོགས་སུ། །རྣམ་
མང་བཀོད་པས་མཛེས་ལྡན་ཁང་པར་ནི། །ཁྲུས་བྱས་བདེ་བའི་སྟན་ལ་འདུག་ནས་སུ། །གླ་རྩི་ག་བུར་ཙནྡ་ན་གུར་གུམ་སོགས། །དྲི་ཞིམ་སྨན་གྱིས་ལུས་བྱུགས་མཁུར་བཀང་ལ། །གོས་བཟང་རྒྱན་གྱིས་སྤྲས་བཅས་གླུ་དབྱངས་སོགས། །བདེ་བ་སྤེལ་བའི་ཐབས་ལ་བརྟེན་པར་བྱ། །
རྒྱུ་སྐར་སྨིན་དྲུག་མགོ་དང་ཝ་དང་ནི། །རྟ་ཆུང་བྲེ་དང་ཕུལ་གྱི་དུས་དག་དང་། །ཁྱད་པར་ཉི་ཟླ་འཕོ་བའི་དུས་མཚམས་སུ། །འཁྲིག་པ་སྤངས་ལ་དགའ་བའི་དུས་སུ་སྦྱར། །སྲིད་བཅུད་རྩ་བ་དྲུག་དང་ཤིང་མངར་བཅས། །འོ་མར་གདུས་འཐུང་བདེ་བའི་རོ་ཉམས་དང་། །
ལང་ཚོར་བཅས་པ་དཀར་ཕྱོགས་ཟླ་བཞིན་འཕེལ། །ད་བྱིད་རྩངས་པ་བྱེའུའི་ཤ་དང་ནི། །ཐུག་འབྲས་སྣ་ཚོགས་འོ་མས་རོ་ཚར་བྱེད། །ཤིང་མངར་སྦྲང་རྩི་འོ་མར་བཅས་པའམ། །པི་ལིང་སྐྱུ་རུ་ཤ་ཁ་ར་དང་བཅས། །ཡང་ན་ཅོང་ཞི་ཤིང་མངར་དབང་པོ་ལག །འབྲས་
དཀར་འོ་མར་བཏབ་བསྐོལ་སྔགས་འདི་ཉིད། །ཨོཾ་ཙ་ལ་ཙ་ལ་སྭཱ་ཧཱ། །སྟོང་བཟླས་བཏབ་འཐུང་བདེ་འཕེལ་དངོས་གྲུབ་འཐོབ། །ལྷ་མོ་དུང་ཅན་སྔགས་འདིས་འཁྲིད་ཞུགས་ལ། །དངོས་གྲུབ་སྟེར་ཕྱིར་དུང་ཅན་མ་སོགས་ལ་བསྲུབ་སོགས་དུས་སུ་བཟླ་སྟོང་ཕྲག་གཉིས་འདོད་ཆགས་ལྷ་མོའི་རཀྟ་འཛག་པ་དང་། །
ལྷ་ཆེན་མཚན་མ་ས་ལས་སྐྱེས་པ་ཡི། །མི་ཡི་ལྕེ་དང་དབང་པོའི་ལག་པ་དང་། །སྲིད་པའི་ཁུ་བ་མཉམ་སྦྱར་རིལ་བུ་ལ། །ཡི་དམ་སྔགས་ལ་འདི་གདགས་བཟླས་ཏེ་བཟའ། །ཨོཾ་རཱ་ག་རཱ་ག་མ་ཧཱ་རཱ་ག་ཛྭ་ལ་ཛྭ་ལ་ཡེ་སྭཱ་ཧཱ། །འདོད་པའི་མེ་
13-5-7a


ཆེན་ཆེས་ཆེར་ངེས་པར་འབར། །ཡང་ན་སྟར་བུ་དབང་ལག་ཅོང་ཞི་རྣམས། །འོ་མར་བཏབ་འཐུང་ཧ་རི་ནི་ས་བཟླ། །དེས་ཀྱང་ཆགས་པ་ཆེ་བར་འགྱུར་བ་ཡིན། །ཧ་ཅང་ཆགས་པས་གཡོ་བར་གྱུར་པ་ན། །སྙིང་གར་བླ་མའི་ངོ་བོ་བྃ་ཡིག་ལས། །
ཆགས་བྲལ་བདུད་རྩི་དཀར་པོས་ལུས་གང་ནས། །བསིལ་ལྟེམ་སོང་བས་ཆགས་དཔལ་དམར་མདངས་རྣམས། །མཁའ་ལ་འཇའ་ཚོན་བཞིན་དུ་ཡལ་བར་བསམ། །ཡང་ན་ཡུང་བ་བྱང་བུལ་མ་ནུ་རྣམས། །ལྟོ་སྟོངས་ཆུ་བསྐོལ་གྱིས་དབུལ་འབྲུ་བཞི་བཟླ། །བདེ་
བ་མཆོག་ཏུ་སྤེལ་བའི་མན་ངག་ནི། །དཀར་པོའི་ཚེས་གཅིག་ནས་བརྩམས་བཅོ་ལྔའི་བར། །ཐབས་ཀྱི་གཡས་དང་ཤེས་རབ་གཡོན་གཙོ་བར། །བདེ་ཆེན་ཐིག་ལེ་སྔགས་ཀྱི་གཟུགས་གནས་ཕ། །མཐེ་བོང་ཨ་དང་རྗེ་ངར་ཨཱ་ཡི་གཟུགས། །བརླ་ལ་ཨི་དང་གསང་
བར་ཨཱི་ཡིག་དང་། །ལྟེ་སྙིང་ཨུ་ཨཱུ་ནུ་ལག་རྀ་དང་རཱྀ། །མགྲིན་མཆུ་ལྀ་ལཱྀ་མཁུར་ཚོས་མིག་ཨེ་ཨཻ། །རྣ་བར་ཨོ་དང་སྤྱི་བོར་ཨཽ་ཉིད་དེ། །བཅོ་ལྔ་སྤྱི་གཙུག་ཨཾ་གི་གཟུགས་ཀྱིས་གནས། །མཚམས་སུ་ཨཿཡིས་ལུས་ཀུན་ཁྱབ་པའོ། །མར་ངོར་ལྡོག་སྟེ་བརྒྱད་
གཉིས་སྤྱི་བོར་ཨ། །སྟོང་ལ་རྐང་མཐིལ་ཨཾ་དང་མཚམས་སུ་ཨཿ །གང་ཡིན་གནས་དེར་དྭངས་མའི་སྔགས་ཀྱི་གཟུགས། །དཀར་དམར་ཐིག་ལེའི་དབུས་སུ་རྣམ་གནས་པ། །མཚུངས་མེད་བདེ་བ་ཆེན་པོའི་གཟི་བྱིན་ཅན། །དེར་ནི་ཡུན་རིང་རྩེ་གཅིག་སེམས་བཟུང་
ནས། །རབ་འབར་ཕྲེང་བ་འཁྲུགས་པའི་འོད་ཟེར་གྱིས། །བརྟན་གཡོའི་དྭངས་བཅུད་བསྡུས་ནས་དེར་བསྟིམས་ཞིང་། །མཆོག་ཏུ་དགའ་བས་ཉེད་ཅིང་འོ་བྱ་སོགས། །གནས་དེར་ལྷག་པར་བྱས་པས་བདེ་འཕེལ་ཞིང་། །ཚེ་མདངས་སྟོབས་ལྡན་དངོས་གྲུབ་མཆོག་
13-5-7b


ཀྱང་ཐོབ། །ཞུན་མར་བདུད་རྩིའི་རྫས་ཀྱང་གནས་དེར་བྱུག །ཁྱད་པར་སྤྱི་བོར་གནས་ཙམ་ཞུན་མར་དང་། །གླ་རྩི་ཙནྡན་དཀར་པོས་ལེགས་པར་བྱུག །བསིལ་ཟེར་བྱེད་པའི་འོད་ལ་འདེ་བར་བྱ། །སྟོང་ལ་འབྲུ་མར་སྣ་ཚོགས་སྦྲང་རྩི་དང་། །ཛཱ་ཏི་སྦྱར་བའི་ལྡེ་གུས་
རྐང་མཐིལ་བྱུག །ཉི་མར་བསྲོ་ཞིང་འཕུར་ན་ཁམས་སྙོམས་ཤིང་། །བཅུད་དང་དྭངས་མ་ཚེ་དང་བདེ་བ་འཕེལ། །བདེ་བའི་རྟེན་མཆོག་ཀུནྡ་ལྟ་བུ་ནི། །སྲུང་དང་འཕེལ་བའི་ཐབས་ལ་ཅི་ནས་འབད། །དེ་བྲལ་རླན་གྱིས་བཏང་བའི་ལྗོན་པ་བཞིན། །བདེ་བའི་མེ་
ཏོག་འབྲས་བུ་གསལ་མི་འགྱུར། །རྣལ་འབྱོར་པ་ནི་དྲུག་ཅུར་དྲོད་བྲལ་ཞིང་། །བདུན་ཅུ་ལ་ནི་བདེ་བ་དང་ཡང་འབྲལ། །བུད་མེད་ལྔ་བཅུར་དྲོད་དང་དྲུག་ཅུ་ལ། །བདེ་བ་འབྲལ་ཕྱིར་ལང་ཚོའི་དུས་ཉིད་དུ། །མཆོག་ཏུ་རྙེད་པར་དཀའ་བའི་བདེ་ཆེན་བཙལ། །གལ་ཏེ་
འདུ་བྱེད་རྙིང་པར་གྱུར་ན་ཡང་། །རྫས་སྔགས་དམིགས་པའི་ཐབས་ཀྱིས་གསོས་བྱས་ནས། །མཆོག་དགའི་རྟེན་ལས་བདེ་བ་བསྒྲུབ་པར་བྱ། །ནོར་བུ་ལེགས་བཀྲུས་ཞུན་མར་བཀུ་མཉེར་བཅས། །མེ་ལ་བསྲོས་བྱས་བདེ་བའི་མྱུ་གུ་རྒྱས། །ད་བྱིད་སྡིག་སྲིན་
མཆིལ་པའི་ཤ་མཉམ་པ། །སྦྲང་སྦྱར་རིལ་བུ་ལྕམ་པའི་ཐང་གིས་དབུལ། །སྦྲང་སྨྱོན་ཁ་ཤོག་པ་དང་ཐང་ཕྲོམ་འབྲུ། །དངུལ་ཆུ་དུལ་མ་མར་རྙིང་སྦྱར་ནས་སུ། །ཉིན་མོར་རྟགས་བྱུགས་བསྲོ་ཞིང་མཉེ་བྱས་ལ། །མཚན་མོར་རོལ་ན་ནོར་བུ་ཆེར་རྒྱས་ཤིང་། །
མི་བཟོད་བདེ་བ་མཆོག་ཀྱང་འབར་བར་བྱེད། །དབྱུང་བར་དཀའ་ན་རྒྱ་སྐྱེགས་བྱང་བུལ་དང་། །ཚྭ་ལ་ཆ་མཉམ་ཞུ་མཁན་ཆུ་ཡིས་དབུལ། །བུ་རམ་རིལ་བུ་སྲན་ཙམ་བཏང་བས་འཐོན། །འོད་ལྡན་ག་བུར་གླ་རྩི་ཤིང་ཚ་དང་། །ནུ་ཞོ་སྦྱར་བྱུགས་སྦོམ་ཞིང་བདེ་བ་འཕེལ། །
13-5-8a


མོན་སྲན་གྲེའུ་གཟེ་མ་སྡིག་སྲིན་གསུམ། །ཆ་མཉམ་བསྐོལ་འཐུང་རྡོ་རྗེ་རྟག་ཏུ་འགྲེང་། །གལ་ཏེ་རྡོ་རྗེ་ཆུང་བར་འདོད་པ་ན། །སྲན་མའི་མེ་ཏོག་ལུག་གི་བུ་སྣོད་དང་། །རྟ་ཤ་ཆ་མཉམ་ལོ་བརྒྱད་དྲི་ཆུས་དབུལ། །ཨུག་ཆོས་སྤང་རྒྱན་ཤང་ཤང་མེ་ཏོག་གསུམ། །
ཟུམ་པར་བཏུས་ལ་རྟག་ཏུ་ངུ་དང་ནི། །བྱ་ཕོ་མཚལ་བུའི་ཨོག་ཞོལ་སྦྱར་བ་དེ། །བུ་མོར་བྱིན་པས་པདྨ་ཟུམ་པར་བྱེད། །གལ་ཏེ་རྡོ་རྗེས་ཕིགས་པར་མ་གྱུར་ན། །སྔ་མའི་མེ་ཏོག་གསུམ་པོ་ཁ་བྱེ་བ། །བྱ་ཕོའི་ཟེ་བ་གཡེར་མ་ཆང་སྦྱར་བཏང་། །ཚུལ་འདིས་མེ་ཏོག་ཁ་འབྱེད་
ཡངས་པར་བྱེད། །གཞན་ཡང་ཁྱིམ་བྱའི་ཚིལ་བུ་ཏིལ་མར་དང་། །བྱེའུའི་ཤ་སྦྱར་པདྨར་བསྐུས་ན་དམ། །དེ་སྟེང་བྱི་ལའི་གཞང་ཚིལ་བསྣན་ན་མཆོག །ལྕུམ་རྩའི་ཕྱེ་མ་བཏབ་པས་ཆུང་བར་བྱེད། །ཆ་ག་པ་ཡི་ཕྱེ་མས་མཆོག་ཏུ་སྡོམ། །གལ་ཏེ་དྲོད་དང་བྲལ་ན་ཚ་བ་
གསུམ། །རྩ་བ་ལྔ་སྦྱར་སྨན་མང་བཅུད་ཀྱིས་གསོ། །གླ་རྩི་ཤིང་ཚ་པི་ལིང་ནུ་ཞོ་བྱུག །དོག་པོར་གྱུར་ན་བཅོས་མའི་རྡོ་རྗེ་ནི། །རྒྱུ་རློན་བཀླུབས་པ་སོགས་ཀྱིས་དལ་བུར་དབྱེ། །རྩ་ཁ་འབྱེད་པའི་སྨན་གྱིས་ཡངས་པར་བྱ། །སེང་དཀར་ལིངྒ་ག་བུར་ཤིང་མངར་དང་། །
ཙནྡན་དཀར་པོ་བྱ་བྲ་རྩི་བཞིན་བཏགས། །སྦྲང་སྨྱོན་སྦྱར་བས་རྟགས་བསྐུས་སྦོམ་རིང་མཁྲང་། །མི་ཟད་བདེ་བ་ཆེས་ཆེར་རྒྱས་པར་བྱེད། །མཚེ་དང་བུ་རམ་བྱ་བྲུན་སྡོང་རོས་དང་། །རྒྱ་ཚྭ་ཞིབ་བཏགས་ཆུར་སྦྱར་བྱུགས་ཀྱང་མཆོག །ཡང་ན་ཟེ་ཚྭ་སྦྲང་རྩི་ཕུག་རོན་
བྲུན། །ཡང་ན་སྒོག་གཅིག་རྒྱ་སྐྱེགས་ཕག་ཚིལ་སྦྱར། །ཡང་ན་གཡེར་མ་རྒྱ་ཚྭ་དྭ་བའི་འབྲས། །དེ་དག་རྣམས་ཀྱིས་ནི་གུ་རྟ་སྐད་འབྱིན། །ཐམས་ཅད་བདེ་བ་སྐྱེད་པའི་སྨན་དུ་བཤད། །ག་བུར་ཚྭ་ལ་ཤིང་མངར་ཕུག་རོན་བྲུན། །ཁྱི་དཀར་ལིངྒ་འབྲས་བུ་
13-5-8b


རོ་འཛིན་བཅས། །ད་བྱིད་བྱེའུའི་ཤ་རྣམས་ཞིབ་བཏགས་ལ། །སྦྲང་སྨྱོན་སྦྱར་བས་རྟགས་བསྐུ་ཏིལ་མར་བྱུགས། །མི་བཟོད་བདེ་བ་མཆོག་ཏུ་འཕེལ་བར་བྱེད། །དེ་ལྟར་བདེ་འཕེལ་རྫས་རྣམས་གང་ལ་ཡང་། །རྩི་ཡི་ལྷ་མོ་བློ་གྲོས་མ་ཡི་ནི། །རིག་པ་འདིས་གདབ་
བདེ་ཆེན་འཕེལ་བང་འགྱུར། །ཨོཾ་གི་རི་ཧི་རི་ཙི་རི། །ཨ་ཨ་ཤུ་མ་ཤམ་སྭཱ་ཧཱ། །ཁྱད་པར་བདེ་བའི་རྟེན་མཆོག་དབྱིངས་ཕྱུག་རྩ། །ལྷ་མོ་གང་གི་ཆུ་སྐྱེས་སྦུབས་སུ་ནི། །སོར་མོ་གཉིས་ནས་བརྒྱད་ཀྱི་བར་གནས་པ། །སྦོམ་དང་ཕྲ་བ་མ་ངེས་དབྱིབས་ཚུལ་ཅན། །སོར་
མོ་གསུམ་པོ་སྦྲུལ་གྱི་གདེངས་ཀ་ལྟར། །གནས་པས་བསྐུལ་བྱ་དེ་ཡིས་མ་རྙེད་ན། །གཏེམ་བའི་འཁྲུལ་འཁོར་སྨན་གྱི་ནུས་པ་ཡིས། །མཐོང་དང་རེག་པའི་ཡུལ་དུ་མངོན་བྱས་ལ། །དེ་ཡི་སྣ་རྩེའི་པདྨའི་སྐུད་པ་དག །ནོར་བུའི་མིག་ཏུ་བརྒྱུས་པའི་ཐབས་མཁས་
ཀྱིས། །ནམ་མཁའི་སྒོ་འབྱེད་བདེ་བའི་ཁྱིམ་མཐོང་བྱ། །དེ་ལྟར་ཐབས་རྣམས་ཀུན་ཏུ་ཤེས་བྱས་ནས། །དང་པོར་ཆགས་པའི་ཉེར་བསྡོགས་རྣམ་མང་བྱ། །ཅུང་ཟད་དགོད་བཅས་ངོ་མཚར་བཅས་ལྟ་བུ། །སྨིན་མ་བསྐྱོད་བཅས་ཟུར་མིག་དང་ལྡན་པས། །
མཛའ་བ་གསལ་བྱེད་རབ་དགའ་མཐར་ཐུག་པ། །སྒེག་པ་ལས་སྐྱེས་ལྟ་སྟངས་ཉིད་དུ་བཤད། །ཅུང་ཟད་གྱེན་བཟློག་མིག་གིས་གང་། །སྟེང་གི་མིག་པགས་མཛེས་བརྫེས་ནས། །མིག་ཟུར་མཉམ་པར་རྒྱས་བྱས་པ། །ངོ་མཚར་བ་ཡི་ལྟ་སྟངས་འདོད། །གང་
ཞིག་དབུས་ནི་ཅུང་ཕྱེ་ཞིང་། །སྦུབས་ནི་རྟག་ཏུ་ཚེར་མ་ཕྱེ། །མིག་རྒྱན་ཀུ་མུ་ད་དེ་འགྱུར། །རེག་པ་འཛིན་ལ་རྟག་ཏུའོ། །རྫི་མའི་རྩེ་མོ་གཡོ་བཞིན་པར། །སྟེང་གི་མིག་པགས་སྣུམ་མཛེས་པ། །དྲི་དང་རེག་པའི་དགའ་བ་ལ། །ལྟ་སྟངས་ཀུ་མུ་ལ་རུ་
13-5-9a


འདོད། །འཇམ་ལ་ཅུང་ཞིག་བསྐུམས་པ་གང་། །ཅུང་ཟད་འཛུམ་ཞིང་དེ་བཞིན་མཛེས། །ལྟ་སྟངས་རོལ་བ་ཞེས་བྱ་སྟ། །བུད་མེད་རྣམས་ཀྱིས་ཕྱེད་ལྟ་བའོ། །དེ་ལྟར་ཕན་ཚུན་དགའ་བས་བལྟ་བ་ན། །སྟེང་དུ་གདོང་དང་འོག་ཏུ་བདེ་བའི་གནས། །
གཙོར་བྱ་ཆགས་པའི་གཏམ་དང་ཉེད་པ་སོགས། །དྲུག་ཅུ་རྩ་བཞིའི་གར་གྱིས་རྩེན་བྱ་ཞིང་། །ཁྱད་པར་མཆུ་དང་ལྕེ་འཇིབས་མཐིལ་བཞི་ཉེད། །ལག་པས་བདེ་གནས་མཉེ་ཞིང་ལྕེས་བསྐྱོད་སོགས། །ཆགས་ཚུལ་འཆོལ་བར་སྤྱད་པའི་དགའ་སྟོན་གྱིས། །བདེ་བའི་རྩ་མཆོག་
སད་པར་གྱུར་པའི་རྟགས། །མདོག་དམར་ཁ་སྐོམ་ལུས་རྡུལ་དྲོད་གཡོ་ཞིང་། །མིག་ཟུམ་ནན་གྱིས་འཁྱུད་དང་ཆགས་ཚིག་འབྱིན། །ངོ་ཚ་རྣམ་བྲལ་མ་ངེས་མྱོས་པ་བཞིན། །བ་སྤུ་ལངས་ཤིང་སྙིང་འདར་ལུས་འཕར་ཞིང་། །རང་ལ་ཆགས་པས་བལྟ་ཞིང་གུས་པ་སོགས། །
བཟོད་མེད་བདེ་བ་འབར་བའི་རྟགས་རྫོགས་ནས། །བྱེད་པའི་འཁྲུལ་འཁོར་རྣམ་པར་བཅིང་བར་བྱ། །དེ་ཡང་བཞི་དང་བརྒྱད་དང་བཅུ་དྲུག་དང་། །སུམ་ཅུ་རྩ་གཉིས་དྲུག་ཅུ་རྩ་བཞི་སོགས། །མིང་དང་གྲངས་ཀྱི་དབྱེ་བ་དུ་མར་གསུངས།  །ཉལ་ནས་སྦྱོར་བ་མི་ཡི་ཚུལ། །
དེ་ལ་སྟེ་འོག་གཉིས་སུ་དབྱེ། །ཟུར་དུ་སྦྱོར་བ་པྲེ་ཏ་ཀ །གཡས་དང་གཡོན་པས་རྣམ་པ་གཉིས། །ཙོག་པུར་སྦྱོར་བ་ལྷ་ཡི་སྟེ། །རྒྱབ་ནས་དུད་འགྲོའི་སྦྱོར་བ་ཡིན། །ལངས་ཏེ་སྦྱོར་བ་ཁྲོ་བོའི་ཚུལ། །དེ་ལ་འདེགས་དང་མཉམ་པ་གཉིས། །སྦྱར་བའི་རྩ་བ་འདི་བརྒྱད་
ཡིན། །དེ་ལས་རྣམ་པར་ཕྱེ་བ་ན། །བདག་ཉིད་སྐྱིལ་ཀྲུང་དག་གིས་གནས། །དབུས་སུ་ལྷ་མོ་ཙོག་བུར་འདུག །དེའི་དཔུང་པས་ཕྲག་པར་བསྡམ། །རང་གི་ལག་པས་རྐེ་ནས་འཁྱུད། །པདྨར་ནོར་བུ་གནས་བྱས་པ། །བདེ་བ་འབྱུང་བ་ཞེས་བྱའོ། །ལག་པས་རབ་
13-5-9b


འཁྱུད་ཕན་ཚུན་སྦྱོར། །གཉིས་ཀས་བསྐྱོད་པ་དོ་ལི་བསྐྱོད། །གཡས་བརྐྱང་སེམས་དཔའི་སྐྱིལ་ཀྲུང་ལ། །གཡོན་བརྐྱང་སེམས་མའི་སྐྱིལ་ཀྲུང་ཡིན། །གཉིས་ཀ་བསྣོལ་བསྐུམ་རྡོ་རྗེའི་གདན། །ཙོག་པུར་རྐང་པ་ཟླུམ་པོར་གདངས། །ཟླ་བ་ཕྱེད་པ་ཞེས་པ་ཡིན། །པུས་
མོ་འཕྲེད་དུ་ས་ལ་རེག །ལོང་བུ་འཕོངས་ཚོས་སུ་རེག་པ། །གཞུ་ཡི་གདན་ཞེས་བྱ་བ་སྟེ། །འདུག་སྟངས་རྣམ་པ་འདི་སོགས་ཀྱིས། །མདུན་དུ་དགའ་བ་བསྐྱེད་པར་བྱ། །བདེ་འབྱུང་དག་ལས་རིག་མ་ཡི། །རྐང་མཐིལ་རང་གི་བརླ་ལ་བཞག །ཙོག་པུས་བསྐྱོད་པ་བརླ་ཉིད་དོ། །
ཡུམ་གྱི་འཕོངས་ཚོས་ས་ལ་བཞག །ཕར་འཁྱུད་ས་ལ་མནན་ཞེས་བྱ། །ཙོག་པུར་གཉིས་ཀའི་རྐང་པ་བརྐྱང་། །མཉམ་སྦྱར་འཕོངས་ལ་ལག་པས་མཉེ། །རི་མོ་ཅན་དུ་བརྗོད་པ་ཡིན། །རིག་མའི་རྐང་པའི་སྒྱིད་ཁུང་གཉིས། །རང་གི་ཕྲག་པར་བཀལ་ཏེ་སྤྱོད། །འཁྲུལ་
འཁོར་ཞོན་པ་ཞེས་བྱར་གྲགས། །དེ་ལས་རྐང་པ་ཡ་གཅིག་ནི། །སྐྱེས་བུའི་བརླ་བར་མར་བརྐྱངས་ཞིང་། །གསེག་སྤྱོད་བུང་པའི་དྲ་བ་ཅན། །རྐང་པ་གཡས་གཡོན་གང་རུང་ལ། །འཁྱུད་པའི་རྐང་པ་ཅན་ཡང་ཟེར། །རིག་མའི་རྐང་མཐིལ་གཉིས་ཀ་ནི། །རང་གི་བྲང་
དབུས་སྦྱར་བྱས་ལ། །འཕོངས་ཚོས་ནས་འཁྱུད་ལག་པས་འཚིར། །པུས་མོ་རུ་སྦལ་བཅིང་བར་བཤད། །རིག་མའི་བྱིན་པ་སྐྱེས་བུ་ཡི། །མཚོགས་མར་གཏུགས་ལ་སྟེང་ནས་འཕུལ། །འདི་ནི་མཆོག་ཏུ་བྱེད་པའོ། །བུ་མོའི་བྱིན་པ་གྱེན་དུ་བལྟེབ། །སྐྱེས་བུས་སྟེང་མནན་
རྣམ་པར་འདར། །རིག་མའི་པུས་མོ་བསྐུམས་ནས་སུ། །རང་གི་བརླ་དང་དཀུར་སྦྱར་བའི། །སྟེང་ནས་སྐྱེས་བུས་ཡུན་རིང་མནན། །དབང་པོ་ཞེས་བྱའི་བྱེད་བཅིང་ཡིན། །ཡུམ་གྱི་རྐང་པའི་མཐིལ་དག་ལ། །མིག་དང་རྣ་བ་མགོ་བོ་སྦྱར། །ལག་པས་འཁྱུད་དེ་
13-5-10a


འཚིར་བ་ནི། །ཀུན་ཏུ་བཟང་པོ་ཞེས་བྱའོ། །ལྷ་མོ་གན་རྐྱལ་རྐང་བ་དག །བགྲད་པའི་དབུས་སུ་སྐྱེས་བུས་སྦྱོར། །ལག་པས་རིག་མའི་འགུལ་ནས་འཁྱུད། །བུད་མེད་ལག་པས་སྐྱེས་པ་ཡི། །སྐེད་པར་རྒྱབ་ཀྱི་ཕྱོགས་སུ་ཉེད། །འདི་ནི་དཔུང་པ་
ཅན་ཞེས་བྱ། །དེ་ལས་རིག་མའི་རྐང་པ་ནི། །བཀུག་སྟེ་ཐབས་ཀྱི་འཕོངས་ཚོས་རེག །སྐྱེས་བུའི་ལུས་ནི་ཙོག་བུ་ལྟར། །ལག་པས་རྩིབས་ལོགས་ལ་རེག་པ། །མི་མཉམ་པར་ནི་སྦྱོར་བའོ། །བུད་མེད་གན་རྐྱལ་བྱིན་པ་དག །སྐྱེས་པའི་བརླ་ལ་གཤིབས་ཏེ་སྦྱར། །
བུད་མེད་ལག་པ་སྐྱེས་བུ་ཡི། །མགྲིན་འཁྱུད་སྐྱེས་པའི་ལག་པ་ནི། །བུ་མོའི་གཞོག་ཏུ་རེག་པ་ནི། །གྲོང་པ་ཞེས་ནི་བྱ་བའོ། །བུད་མེད་པུས་མོ་བགྲད་བྱས་ལ། །རྐང་པས་སྐྱེས་བུའི་རྩིབས་ལོགས་བརྟེན། །ལག་པས་སྐྱེས་བུའི་མགྲིན་པར་འཁྱུད། །བུད་མེད་པུས་
མོའི་ཕྱི་རོལ་ནས། །སྐྱེས་བུའི་ལག་པ་ས་ལ་བརྟེན། །འདི་ནི་གྲོང་ཁྱེར་གར་ཞེས་བྱ། །བུད་མེད་གན་རྐྱལ་ཉལ་བ་ཡི། །པུས་མོ་བྲང་གི་ཕྱོགས་སུ་བསྐྱུངས། །ལག་པས་གཞོན་ནུའི་ཚང་རར་འཁྱུད། །སྐྱེས་བུའི་ལག་པ་བུད་མེད་ཀྱི། །མགུལ་འཁྱུད་བྲང་གིས་
འབུགས་པའོ། །རྐང་པ་གཅིག་དེ་སྙིང་གར་བཀུག །གཉིས་པ་བརྐྱངས་ནས་ལག་པ་ཡིས། །སྐྱེས་བུའི་རྒྱབ་ནས་འཇུས་བྱས་ལ། །སྐྱེས་བུའི་ལག་པ་བུད་མེད་ཀྱི། །མགྲིན་པད་འཁྱུད་པ་རབ་བརྐྱང་ཡིན། །བུ་མོ་གན་རྐྱལ་ཉལ་བ་དག །ཁྲི་ལས་ཕྱི་རོལ་རྐང་
བརྐྱངས་ནས། །དེར་ཞུགས་སྐྱེས་བུའི་རྐང་པ་དག །ཁྲི་ལས་ཕྱིར་བརྐྱང་ལག་པས་ནི། །སྐྱེས་པའི་རྒྱབ་འཁྱུད་ཁབ་ཅན་ནོ། །བུད་མེད་རྐང་པ་ཤད་ཀྱིས་བརྐྱང་། །ཡབ་ཀྱིས་ཀྱང་ནི་དེ་ལྟར་བརྐྱང་། །རྡོ་རྗེ་ཕྱེད་ལས་མི་ཚུད་ཀྱང་། །དུང་ཅན་མ་ཡི་རྩ་རྙེད་ཕྱིར། །
13-5-10b


ཤིན་ཏུ་བརྐྱང་བའམ་ཁ་སྦྱོར་རོ། །སྐྱེས་པ་འོག་ཏུ་བྱས་པ་ལ། །རིག་མ་སྟེང་སྦྱོར་གཉིས་ཀས་ནི། །སྟོད་སྨད་དགྱེ་ལྡེམ་ཤུགས་ཆེན་བསྐྱོད། །དོ་ལིའམ་ཁྱོགས་ཞེས་བྱ་བར་བརྗོད། །སྐྱེས་པ་སྟེང་ངམ་འོག་བྱས་ཀྱང་། །རེས་མོས་བརྡེབ་ཅིང་དམ་དུ་འཚིར། །བརླ་ཞེས་བྱ་
བའི་སྦྱོར་བར་བཤད། །བུ་མོའི་རྐེ་ནས་འཁྱུད་བྱས་ཏེ། །ལྟག་པར་གྲུ་མོ་གཉིས་སྦྱར་ལ། །རྣ་བའམ་སྐྲ་གཉིས་འཇུས་ནས་སུ། །བུད་མེད་རྐང་པ་སྟེང་དུ་འདུད། །ཕན་ཚུན་ལྷོད་བསྐྱོད་གྲུ་མོར་འདོད། །ལྷ་མོ་སྟེང་དུ་བྱས་ནས་སུ། །རྫ་མཁན་འཁོར་ལོ་བཞིན་དུ་བསྐོར། །
རྐང་ཟུང་གྱེན་དུ་བསྐྱོད་ཅིང་བསྐྱོད། །ལག་གཡོན་གྲུ་མོ་གཡས་སྟེང་ཕྱིན། །གཡས་པའི་གྲུ་མོ་གཡོན་སྟེང་འཛིན། །འདི་ནི་བུང་བ་ཅན་ཡང་ཟེར། །སྐྱེས་བུ་གན་རྐྱལ་འཕོངས་མཐོ་བྱས། །རྐང་གཉིས་རྩེ་མོ་མཁའ་ལ་གཏད། །དེར་ཞུགས་མྱོས་བྱེད་མ་དེས་ནི། །སྐྱེས་
པར་མདུན་བསྟན་བྱས་ནས་རོལ། །ལག་པས་མགྲིན་འཁྱུད་སྐྱེས་བུ་ཡི། །ལག་པ་བུད་མེད་རྒྱབ་ཏུ་སྦྱར། །འདི་ནི་མྱོས་བྱེད་རྟ་བབས་སོ། །སྐྱེས་པ་ཉེར་འདུག་བརྐྱང་བཞིན་དུ། །ཅུང་ཟད་བཀུག་པའི་རྐང་གཉིས་ལ། །གནས་པའི་བུ་མོ་འདོད་ལྡན་མ། །རྐང་གཉིས་
བསྐུམ་ཞིང་རོལ་པས་བསྲུབ། །འདི་ནི་སྲུབ་བྱེད་ཅེས་བྱའོ། །རིག་མ་གཡས་སམ་གཡོན་དུ་བཞག །བརླ་ནི་ཅུང་ཟད་ཁ་ཕྱེ་སྦྱོར། །བཙིར་བ་ཞེས་བྱའི་བྱེད་བཅིང་ངོ་། །ཡན་ལག་ཀུན་གྱིས་ཅི་བདེར་འཁྱུད། །ཕན་ཚུན་ཀུ་ཅོ་ག་ཞིའི་ཚིག །སྣ་ཚོགས་སྨྲ་ལྡན་རྒོད་པ་
ཅན། །བུད་མེད་ཁ་སྦུབ་རྒྱབ་ནས་ནི། །བྱེད་ལའང་བསྐུམ་དང་འཕོང་བསྟོད་དང་། །ཟུམ་དང་འགྲོད་དང་ལྟེ་བ་འདུག་ལ། །སྐྱེས་བུས་དེ་དང་འཚམས་པར་ནི། །དགུ་དང་དགྱེ་དང་ཤིན་ཏུ་དགྱེས། །རོལ་པའི་རྣམ་པ་དུ་མར་འགྱུར། །ཟུར་དང་ལངས་ཏེ་འདུག་ལ་ཡང་། །
13-5-11a


བརྐྱང་བསྐུམ་རྐང་ལག་འཁྱུད་སྟབས་ཀྱིས། །ཅུང་ཟད་མི་འདྲ་དུ་མར་གནས། །དེ་དག་ངེས་པ་མེད་པར་ནི། །བདེ་བའི་སྒྱུ་རྩལ་ཅི་རིགས་བྱ། །ལྷ་མོའི་མཁའ་དང་རྩ་ཁྱད་ཀྱིས། །གང་ལ་གང་འཚམས་སྦྱར་བར་བྱ། །དེ་ལས་གྲོང་གི་བྱ་བ་ཕལ། །གཉུག་མ་
ཉིད་དེ་གཞན་ཕལ་ཆེར། །དཀའ་ཕྱིར་གོམས་པས་བསྒྲུབ་བྱ་ཉིད། །རྒན་ཆེས་གཞོན་ཆེས་སྦྲུམ་མ་དང་། །ངལ་ཞིང་དུབ་པ་མ་གཏོགས་པ། །ལྷ་མོ་བདེ་བའི་སྐྱེད་ཚལ་དུ། །སྒྱུ་རྩལ་གར་གྱི་སྦྱོར་བ་བྱ། །དེ་ལྟར་བྱེད་པ་དེ་དག་གི། གཙོ་བོའི་རྣམ་པ་བསྡུས་ནས་ནི། །མཆོད་
པའི་ལྷ་མོ་བཅུ་དྲུག་གི། སྟོབས་ལྡན་སྦྱོར་བ་བཅུ་དྲུག་གསུངས། །བདེ་གསལ་མི་རྟོག་སྐྱེད་པ་ཡི། །ལྷ་ཡི་འདུག་སྟངས་རྣམ་བཞི་ནི། །སྒེག་མཛེས་འཇོལ་བག་འགྱིང་ལྡེམ་དང་། །རྣམ་གཟིགས་བཞི་ཡིན་དང་པོ་ནི། །རིག་མའི་རྐང་གཉིས་རང་ཉིད་ཀྱི། །ལྟག་པར་བཀལ་བྱས་
ལག་གཉིས་ཀྱིས། །སྒྱིད་པའི་ཐད་ནས་ཕར་ལ་གདངས། །གན་རྐྱལ་དུ་ནི་འདུག་པ་ལ། །དཔའ་བོས་ཅི་བདེར་རྩེན་པར་བྱ། །འཇོལ་བག་ཕྱག་རྒྱ་རང་ཉིད་ཀྱི། །དཔུང་པར་སྒྱིད་པ་གཉིས་བཀལ་ལ། །ལག་གཉིས་སྒྱིད་པའི་ནང་ངོས་ནས། །རྟིང་པ་གཉིས་པོ་འདེགས་བྱས་
ཏེ། །ཕྱིར་ལ་བགྲད་པའི་ཚུལ་གྱིས་འདུག །དེ་ལ་དཔའ་བོས་ཅི་བདེར་རོལ། །འགྱིང་ལྡེམ་རིག་མའི་ལག་པ་གཉིས། །སྒྱིད་པའི་ནང་ནས་ཕྱིར་བཏོན་ནས། །རྐང་པར་འཇུས་ལ་འདེགས་ཤིང་བགྲད། །དེ་ལ་ཅི་བདེར་རོལ་པའོ། །རྣམ་གཟིགས་རྣ་བ་གཡས་གཡོན་གྱི། །
ཐད་དུ་རྐང་གཉིས་གནམ་ལ་བཏེགས། །ལག་གཉིས་སྒྱིད་ཁུང་གཉིས་ནས་ནི། །ཚུར་ལ་འཁྱུད་བྱས་དེ་ལ་རོལ། །ལྷ་ཡི་འདུག་སྟངས་འདི་བཞི་ལ། །ཐབས་ནི་བརྐྱང་བསྐུམ་ཙོག་པུ་གསུམ། །གང་བདེའི་ཚུལ་གྱིས་རོལ་པར་བྱ། །གསལ་ཉམས་སྐྱེད་པར་བྱེད་
13-5-11b


པ་ཡི། །ལྷ་མིན་འདུག་སྟངས་རྣམ་བཞི་ནི། །བསྡིགས་པ་ཁྲོས་པ་རྔམས་པ་དང་། །འཇིགས་པ་བཞི་ཡིན་དང་པོ་ནི། །རིག་མ་གན་རྐྱལ་འདུག་བ་ཡི། །རྐང་གཉིས་གནམ་ལ་ཤད་བརྐྱང་བའོ། །ཁྲོས་པ་རིག་མ་དེ་ཉིད་ནི། །འཕྲེད་དམ་གན་རྐྱལ་དུ་འདུག་ལ། །རྐང་པ་ཡ་གཅིག་
ཐབས་ཀྱི་ནི། །དཔུང་པའི་སྟེང་དུ་བཀལ་ནས་རོལ། །པདྨོ་ཡངས་ན་དེ་ལྟར་བྱ། །རྔམས་པ་རིག་མ་ཙོག་པུར་འདུག །ལག་གཉིས་རྐང་པའི་བྱིན་པ་ནས། །མཉམ་བྱས་ཕྱིར་ལ་བགྲད་དེར་རོལ། །འཇིགས་པ་རིག་མ་ཙོག་པུར་འདུག །རྐང་པའི་ཕྱི་ནས་ལག་གཉིས་ཀྱི། །གྲུ་
ཁུག་གཉིས་ལ་སྒྱིད་པ་བཀལ། །ཕྱིར་བགྲད་ཚུལ་གྱིས་འདུག་པར་བྱ། །ལྷ་མིན་འདུག་སྟངས་འདི་བཞི་ལ། །ཐབས་ནི་ཁ་སྦུབ་དང་ཙོག་པུ། །གཉིས་པོ་ཇི་ལྟར་རིགས་པས་འཁྱུད། །བདེ་ཉམས་སྐྱེད་པར་བྱེད་པ་ཡི། །མི་ཡི་འདུག་སྟངས་རྣམ་བཞི་ནི། །གྱད་དང་རོལ་
པ་འཁྲིལ་སྦྱོར་དང་། །རབ་འཁྱུད་ཅེས་པ་རྣམ་པ་བཞི། །དང་པོ་ཡུམ་ནི་གན་རྐྱལ་ལ། །རྐང་པ་གཉིས་ཀྱི་སྒྱིད་པ་ནི། །ཐབས་ཀྱི་ཕྲག་པ་ལ་བཀལ་སྤྱོད། །ཚུལ་དེས་རིག་མ་སྟེང་དུའང་འདུག །རོལ་པ་རིག་མ་གན་རྐྱལ་འདུག །སྐེད་པར་ཐབས་ཀྱིས་སྐྱིལ་ཀྲུང་སྤྱོད། །
བཟློག་སྟེ་རིག་མ་སྟེང་དུའང་བྱ། །འཁྲིལ་སྦྱོར་རིག་མ་འཕྲེད་ལ་ཉལ། །གཞོགས་གཉིས་གང་རུང་སར་ཕབས་ལ། །རྐང་པ་ཐབས་ཀྱི་སྟེང་དང་ནི། །འོག་ཏུ་བཏང་ནས་བསྒུལ་བར་བྱ། །རབ་འཁྱུད་རིག་མ་གན་རྐྱལ་ལ། །བརྐྱང་བསྐུམ་ཐབས་ཀྱི་མཁལ་ཁུང་གཏད། །བཟློག་
སྟེ་རིག་མ་སྟེང་དུ་བྱ། །ཚུལ་དེས་འཕྲེད་ལའང་སྦྱོར་བ་ཡིན། །འདི་སྐབས་ཡུམ་གྱི་འདུག་སྟངས་རྣམས། །གོ་བཟློག་བྱ་ཚེ་ཡབ་ཀྱིའང་ཡིན། །མི་རྟོག་ཉམས་བསྐྱེད་ཀླུའམ་ནི། །དུད་འགྲོའི་འདུག་སྟངས་རྣམ་བཞི་ནི། །མཁའ་ལྡིང་སེང་གེ་གླང་ཆེན་དང་། །རུ་སྦལ་
13-5-12a


བཞི་ལས་དང་པོ་ནི། །རིག་མ་ལངས་ཏེ་ལྡེམ་འགྱིང་གིས། །ཚང་ར་ཕྱིར་བསྟན་ལག་གཉིས་ཀྱིས། །འཕོངས་ཀྱི་ཤ་བོ་ཆེ་བགྲད་ནས། །ཐབས་ཀྱིས་རྒྱབ་ནས་ལངས་ཏེ་སྦྱར། །གཉིས་པ་རིག་མ་འཕྲེད་ལ་ཉལ། །རྒྱབ་ནས་ཐབས་འདུག་རིག་མ་ཡི། །
རོ་སྟོད་ཐབས་ཀྱི་བྲང་སྤྲད་ལ། །བར་དུ་ཆེར་བརྒྱང་ཐབས་དགྱེ་ཞིང་། །རིག་མ་དགུ་པའི་རྣམ་པས་སྦྱར། །གསུམ་པ་རིག་མ་ཆེར་དགུས་ལ། །རྐང་ལག་བཞི་པོ་ས་ལ་བཙུགས། །ཐབས་ཀྱི་ལག་པ་རིག་མ་ལ། །གཏད་དེ་རྒུར་པར་བྱས་པའམ། །ཡང་ན་ཐབས་ནི་འགྲེང་སྟེ་
འདུག །རིག་མའི་སྐེད་པར་ལག་པས་བསྡམ། །བཞི་པ་རུ་སྦལ་ལྟ་བུ་ནི། །རིག་མ་ཁ་སྦུབ་ཏུ་འདུག་ལ། །དེ་སྟེང་ཐབས་འདུག་ཡང་ན་ཐབས། །ཙོག་པུར་བྱས་ནས་སྦྱོར་བའོ། །དེ་ལྟར་ལེགས་པར་བསྟན་པ་ཡི། །འདོད་པའི་བྱེད་པ་རྣམ་མང་པོས། །ལུས་ནི་ཤིན་ཏུ་མཉེན་
བྱེད་ཅིང་། །དགའ་བ་མཆོག་ཏུ་མྱོང་བར་བྱེད། །རྩ་དུལ་རླུང་ནི་ཆམ་ལ་ཕབ། །བདེ་བའི་ཡེ་ཤེས་རྙེད་པ་དང་། །ཐབས་ཀྱི་མན་ངག་དང་ལྡན་པས། །སོ་སོའི་རྩ་མདུད་གྲོལ་བར་འགྱུར། །བྱེད་པ་མི་ཤེས་སྦྱོར་བྱས་ན། །རླུང་མཁྲིས་བད་ཀན་ནད་གཞི་འཁྲུགས། །དེ་ཕྱིར་
འཇིག་རྟེན་སྦྱོར་ཐབས་ལ། །མཁས་བྱས་ཡེ་ཤེས་སྦྱོར་ཐབས་བརྟེན། །གང་ཚེ་སྦྱོར་བའི་རིམ་པ་ལས། །བདུད་རྩི་ཞུ་བ་རླུང་དང་ནི། །དམིགས་པས་བཟུང་བར་མ་ནུས་པས། །རྫས་ལ་བརྟེན་ཏེ་བཟུང་བ་ནི། །ག་བུར་ཐུན་གཅིག་ཚ་ལ་ནི། །བསྲེགས་པ་ཐུན་གཉིས་སྲད་དཀར་
དང་། །མེ་ཏོག་ལུག་མིག་ཐུན་རེ་རེ། །ཞིབ་བཏགས་སྦྲང་གིས་རིལ་བུར་དྲིལ། །ནངས་མ་བཅུ་རུ་ལྟོ་སྟོངས་བཏང་། །ལོ་གཅིག་བར་དུ་ཐིག་ལེ་འཛིན། །ཡང་ན་ཟངས་རྩི་དཀར་པོ་ཡི། །ཁཎྚ་ཟླ་གཅིག་ཟོས་ཀྱང་འཛིན། །མགྲོན་བུ་བུ་མར་དངུལ་ཆུ་བླུགས། །རང་གི་རྐང་
13-5-12b


མཐིལ་དྲེག་པ་ཡིས། །ཁ་བཅད་སྦྲ་ཚིལ་གྱིས་ཀྱང་བསྡོམ། །སྦྱོར་བའི་དུས་སུ་ལྕེ་འོག་བཅུག །འོག་རླུང་ཅུང་བསྡོམས་ཐིག་ལེ་འཛིན། །དེ་སྟེང་ས་བོན་བླུགས་ཀྱང་མཆོག །བྱ་བྲུན་མི་ཁྱིའི་རུས་པ་རྣམས། །བཏགས་པའི་ལྡེ་གུ་རྡོ་རྗེར་བསྐུས། །ས་བོན་འབྱུང་བ་འགོག་
ཅེས་བཤད། །རང་གི་ཏི་ལ་རྟག་ཏུ་ངུ་། །མེ་ཏོག་གཡུ་ལོ་དང་བཅས་པ། །ར་འོར་བསྐོལ་ནས་མར་གསར་སྦྱར། །ལྟོ་སྟོངས་བཏུང་ཞིང་གནམ་སྟོང་ལ། །རྐང་མཐིལ་བྱུགས་པས་ཐིག་ལེ་འཛིན། །གཞན་ཡང་ཌཱ་ཀི་སྦ་འདོད་ན། །བྱ་རྒོད་ལྕེ་དང་འུག་པའི་མིག །སྐམ་
ལ་ཞིབ་བཏགས་བྱ་རོག་གི། ཁྲག་གིས་སྦྲུས་པའི་རིལ་བུ་ནི། །གསེར་དངུལ་ཟངས་ཀྱིས་བཏུམས་ནས་སུ། །སྔགས་འདི་ཉིས་འབུམ་བཟླས་ནས་གདབ། །ཨོཾ་ཤ་མོག་ཤ་རི་དྷ་རི་སྭཱ་ཧཱ། །དགོས་དུས་རྫས་དེ་ཁར་བཅུག་ན། །མཁའ་ལ་འགྲོ་ཞིང་མི་སྣང་འགྲུབ། །དངུལ་ཕོར་
སྨུག་པའི་བུ་མོ་བསྐམས། །ཕྱེ་མ་ཁྭ་ཏའི་ཚིལ་དང་སྦྱར། །གོང་གི་སྔགས་བཏབ་ལུས་ལ་བྱུགས། །གོང་རྫས་ཁར་བཅུག་མི་སྣང་མཆོག །ཁྭ་ཏའི་སྒྲིབ་ཤིང་ཆུ་ལས་བརྟག །ཁྱི་ནག་རུས་པ་མེ་ལོང་ལས། །བྱི་ལ་ནག་མོའི་ཤ་མར་བཅས། །རིལ་བུ་ལུས་འཆང་མི་མཐོང་ངོ་། །
སྲིད་འབྱུང་བ་ཡིས་དོགས་པ་ལ། །རྒྱ་སྐྱེགས་གླ་རྩི་ཤུགས་འགྲོའི་མཚལ། །ལྟོ་སྟོངས་བཏང་བས་བགྲང་བྱ་ནི། །རྩེ་མོའི་སྲིད་པ་སྲུང་བར་གསུངས། །སྲེ་མོའི་རྒྱུས་པ་སུམ་སྒྲིལ་གྱིས། །སྲིན་ལག་གཡོན་པར་བསྡམས་ཀྱང་འགོག །རྒྱ་ཚྭ་མཛེ་ཚྭ་ཚ་ལ་དང་། །སྟར་བུ་
ལན་ཚྭ་བུལ་ཏོག་དང་། །མཚུར་ནག་ཞིབ་བཏགས་སྦང་རྒོད་ཀྱིས། །མགོ་བསྡུས་རིལ་བུ་སྲན་ཆུང་ཙམ། །བཅུད་དང་མཉམ་པར་སུས་བཏང་བ། །མེ་ཏོག་ལམ་དུ་དྲི་ཟ་མིན། །གལ་ཏེ་སྲིད་འབྱུང་འདོད་པ་ན། །སྲིད་སྤེལ་མན་ངག་བཞིན་དུ་བྱ། །རྫས་དང་དམིགས་པ་སྔགས་
13-5-13a


ཀྱིས་ནི། །སྙོམས་འཇུག་དུས་སུ་རབ་བསྐུལ་བས། །ཡེ་ཤེས་ཆགས་པའི་ཌཱ་ཀི་ནཱི། །དབབ་པའང་མན་ངག་དག་ལས་ཤེས།  །ལྷ་མོ་རང་ལ་འདུན་པའི་ཕྱིར། །ཨོཾ་ཙག་ཤུ་ཙེར་ལྡན་གུམ། །སྔགས་འདི་བཟླས་ལ་ཁམས་འབབས་ཚེ། །མཆིལ་མ་མོ་ཡི་ཁར་
བླུགས་ན། །རྟག་ཏུ་རང་དབང་ཁོ་ནར་འགྱུར། །ཆགས་དང་བྲལ་ལ་རྣམ་གྲོལ་མེད། །ཆགས་པ་བདེ་ཆེན་རྒྱུ་ཉིད་ཕྱིར། །སྣང་སྲིད་ཆགས་པ་བསྡུས་ནས་ཀྱང་། །འོད་དམར་རྣམ་པས་རང་སེམས་བསྲེ། །རང་སེམས་གདོད་ནས་མ་སྐྱེས་པས། །ཆགས་པ་དམིགས་སུ་མེད་པ་ལ། །
དམིགས་མེད་རྗེས་སུ་ཆགས་པའི་གཟུགས། །རྡོ་རྗེ་ཆོས་སུ་བདག་བསྒོམ་ཞིང་། །བདེ་ཆེན་ཆགས་པའི་འོད་དམར་པོས། །སྣང་སྲིད་ཀུན་ཏུ་ཁྱབ་བྱས་པས། །ཆགས་ཅན་མ་ལུས་རྣམ་གྲོལ་ཏེ། །ཀུན་ཀྱང་བདེ་ཆེན་ངང་དུ་བསམ། །ཨཾ་སོགས་ཕྱེད་དང་བཞི་པ་ཡི། །གསང་སྔགས་
མཆོག་ནི་ལེགས་བཟླས་ན། །རྡོ་རྗེ་ཆགས་པའི་རྒྱལ་པོ་ནི། །པདྨ་གཟི་ལྡན་འགྲུབ་ཅེས་གསུངས། །དེ་རྣམས་ཞར་བྱུང་ཉེར་མཁོར་བསྡུས། །གཞན་ཡང་ཟབ་མོའི་སྔགས་དམིགས་རྫས། །རྫོགས་པའི་རིམ་པའི་མན་ངག་ནི། །བརྒྱུད་ལྡན་བླ་མའི་ཞལ་ལས་བླང་། །འདོད་པས་
འཆིང་བར་གྱུར་པ་ནི། །འཆིང་བ་ཀུན་གྱི་ནང་ན་དམ། །འདོད་པས་གྲོལ་བར་གྱུར་པ་ནི། །གྲོལ་བ་ཀུན་གྱི་ནང་ན་མྱུར། །དེ་ཕྱིར་འདོད་པ་ལ་བརྟེན་ནས། །བདེ་ནས་བདེ་བར་གྲོལ་བའི་ཐབས། །རྣལ་འབྱོར་ཆེན་པོ་སྔགས་ཀྱི་ནི། །ཡེ་ཤེས་སྦྱོར་ཐབས་བདུད་རྩིའི་བཅུད། །འཆིང་
བའི་ནད་ཀྱིས་ཟིན་པ་ཡི། །རྣམ་ཤེས་ལྡན་པས་བཙལ་བར་བྱ། །དེ་ལས་བདེ་ཆེན་མཆོག་ཐོབ་ཅེས། །རྡོ་རྗེ་འཆང་གིས་མངོན་པར་བསྔགས། །དྲང་སྲོང་སྭ་ར་ཡཱ་ན་ཡི། །འདོད་པའི་བསྟན་བཅོས་འབུམ་པ་ལས། །ཀླུ་སྒྲུབ་ཀྱིས་བཏུས་སྟོང་ཕྲག་གཅིག །དེ་དོན་གཟུགས་བཟང་
13-5-13b


གིས་བསྡུས་སོགས། །གཞུང་དང་རྒྱུད་དང་དགོངས་འགྲེལ་རིགས། །སྣ་ཚོགས་ཆུ་གཏེར་ལྟ་བུ་ལས། །དོན་བསྡུས་སྙིང་པོའི་ཟླ་བ་འདི། །འདོད་ལྡན་སྐྱེ་བོའི་ཚོགས་རྣམས་ཀྱི། །དགའ་བའི་རྒྱ་མཚོ་འཕེལ་ཕྱིར་དང་། །རྣལ་འབྱོར་ལྡན་པ་རྣམས་ཀྱི་ནི། །ཡེ་ཤེས་སྣང་བ་གསལ་བའི་
ཕྱིར། །སྔགས་ཀྱི་དགོངས་འགྲེལ་ཡན་ལག་ཏུ། །ཉུང་ངུའི་ངག་གིས་གསལ་བར་སྤེལ། །སྔོན་ཆད་ཡོངས་སུ་མ་གྲགས་ཕྱིར། །འདི་ཚུལ་འཆད་ལ་གངས་ཅན་པ། །སོམ་ཉིའི་གཟེབ་ཏུ་ཆུད་མཐོང་ནས། །བློ་གྲོས་སྟོབས་ཀྱིས་གསལ་བར་བྱས། །ཟབ་མོའི་མན་ངག་གིས་བརྒྱན་
པས། །འདོད་པའི་བསྟན་བཅོས་གཞན་ལས་འཕགས། །ས་སྟེང་ཀུན་དགའི་རོ་ལྡན་ཞིང་། །དངོས་གྲུབ་མཛོད་དང་ལྡན་པའོ། །ཟླ་རྒྱས་མུན་པའི་རུམ་དུ་ཉལ་མི་བྱེད། །རྣམ་དཀར་བསམ་པ་ཉེས་པའི་ལམ་མི་འགྲོ། །མཁས་པའི་བཞེད་ལ་འཕྱ་བའི་དམན་པ་སུ། །ཁྲ་འདྲ་ངོ་ཚ་མེད་ལ་
འདིས་ཅི་བགྱི། །ཟབ་མོ་སྔགས་ཀྱི་ཚུལ་ལས་ལེགས་གསུངས་ཤིང་། །བློ་ཆེན་རྣམས་ཀྱིས་གསལ་བར་བྱས་པའི་དོན། །ཕན་པའི་བསམ་པས་བརྗོད་ལ་ལེགས་བྱས་ཆ། །གང་མཆིས་ཟླ་བ་ནོར་བུ་ཆུ་ཤེལ་བཞིན། །མཐའ་བྲལ་དག་པའི་མཁའ་ལ་ཉེར་མཛེས་པས། །འགྲོ་ཀུན་དགའ་བའི་
ཀུ་མུད་རྒྱས་པ་དང་། །བཅུ་དྲུག་བདེ་བ་མཆོག་གི་ཆ་རྫོགས་ནས། །གཞོམ་མེད་ལྷན་ཅིག་སྐྱེས་པ་གྲུབ་པར་ཤོག །ཅེས་པ་འདི་ནི་སྔགས་རྒྱུད་ནས་བསྟན་པའི་སྦྱོར་ཐབས་རྣམས་ཀྱི་དགོངས་པ་གསལ་བའི་ཕྱིར་དུ། མཁས་པ་སུ་མ་ཏི་སོགས་ཀྱིས་བསྐུལ་ནས། བཀའ་གཏེར་བསྟན་
བཅོས་ཀྱི་རིམ་པ་རྣམས་ལས་བཏུས་ཏེ་བརྩམ་ཐོ་ཙམ་གྲུབ་པ་ལ། སླར་རབ་ཚེས་མི་ཟད་པའི་ལོའི་ཆོ་འཕྲུལ་ཟླ་བའི་དམར་ཕྱོགས་ཀྱི་བཟང་པོ་དང་རྒྱལ་བ་དང་པོའི་ཞག་གཉིས་ལ་གྲུབ་པར་བགྱིད་པ་པོ་ནི་མི་ཕམ་འཇམ་དབྱངས་རྣམ་རྒྱལ་ཏེ། འདིས་ཀྱང་འགྲོ་བ་ཀུན་ལ་དགེ་ལེགས་ཀྱི་དཔལ་ཕུན་སུམ་
13-5-14a


ཚོགས་པ་སྦྱིན་པར་གྱུར་ཅིག །མངྒ་ལཾ།    །༄༅། །ཆགས་ལམ་ཉེར་མཁོ་སྐབས་བརྒྱད་པ་ཅན་བཞུགས་སོ། །ན་མོ་མཉྫུ་ཤྲཱི་པདྨ་ནི་རྟེ་ཤྭ་རཱ་ཡ། བདེ་འཕེལ་ཁམས་བརྟན་རྟགས་དང་དམར་ཆ་དྲངས། །སྲིད་གཅོད་བྱི་སྲུང་ཤིས་བསྒྱུར་སྲིད་འཕེལ་བཀྲ་ཤིས་
གྲངས། དང་པོ་ཁམས་དང་བདེ་བ་འཕེལ་བྱེད་ཀྱི་རྫས་ལ་བཏུང་བ་དང་བྱུག་པ་གཉིས་ལས། དང་པོ་དབྱར་རྩ་དགུན་འབུ་འོ་མར་རང་ཐིམ་བཙོས་ལ། དབང་ལག་མཆིལ་ཤ་བཅས་བཏགས་ཏེ་འཐུང་ན་རོ་ཙ་བར་བྱེད་དོ། །ཡང་རྩ་བ་ལྔ་དབང་ལག །ཁྱིམ་བྱ་ཕུག་རོན་མཆིལ་
བ་རྩངས་པ་ད་བྱིད་གོང་མོ་རྨིགས་བུ་རྣམས་ཀྱི་ཤ་གང་རྙེད། ཐལ་རྡོར་ཤིང་མངར་སུག་སྨེལ་ཐུག་འབྲས་སྣ་ཚོགས། ཏིལ་དཀར་ནག་སྨན་སྦྲུལ་ཤ  །སྡིག་སྲིན། མཁལ་ཞོ་བྲེག །ཚ་སྣ་གསུམ། ཚ་བ་གསུམ། ཁྱིམ་བྱའི་སྒོ་ང༌། ཛ་ཏི་གོ་སྙོད། མ་ནུ་ཁྲག་ཅན། ཐང་
ཁྲོམ་དཀར་ནག་གི་འབྲུ་རྣམས་སྦྱར་བ་རོ་ཙའི་སྨན་ཁྱད་པར་ཅན་ཏེ་སྨད་ཀྱི་གྲང་བ་སེལ་ཞིང་དྲོད་འབེབ་པ་དང་དབང་པོ་ལས་སུ་རུང་བར་བྱེད་དོ། །མོན་སྲན་གྲེའུ་གཟེ་མ་སྡིག་སྲིན་གསུམ་ཆ་མཉམ་པར་བསྐོལ་ཏེ་འཐུང་ན་རྡོ་རྗེ་རྟག་ཏུ་འགྲེང་ཞེས་གཏེར་མའོ། །སྟར་བུ་
དབང་ལག་ཅོང་ཞི་རྣམས་འོ་མར་གདུས་ཏེ་བཏང་ཧ་རི་ནི་ས་བཟླས་ན་ཆགས་པ་ཆེ་ཞེས་གཏེར་མའོ། །ད་བྱིད་ཟོལ་མེད་ཐུན་རེ་ཞིབ་བཏགས་འོ་མར་གདུས་ཏེ་འཐུང་ན་ཐུག་ཕྲད་དུ་སྦྱོར་བ་ཇི་ལྟར་འདོད་པ་ནུས་སོ། །ཡང་རོ་ཙའི་སྨན་ཤིན་ཏུ་ཟབ་པ་ནི། ཅོང་ཞི་དང་སྦལ་རྒྱབ་དཀར་པོ་
ཞིབ་བརྡུང་འོ་མར་གདུས་ལ་རྒྱ་ཚ་ཞད་ཙམ་བཏབ་ནས་ཁུ་བ་རང་ཐིམ་བྱས་པ་ཚན་དང་པོའོ། །ཡང་མཆིལ་ཀླད་དེ་ཕོ་དང་ཕུག་རོན་ཕོའི་ཤ་ད་བྱིད་པ་གཡེར་མ་ཐུག་འབྲས་སྣ་ཚོགས་བཅས་འོ་མ་སྣ་ཚོགས་བསྲེས་པར་མ་ཚིག་པར་གདུས་ཐིམ་གཉིས་པའོ། །ལུང་
13-5-14b


ཐང་གོ་ཡུ་འབྲས་སྣ་གསུམ་ཤིང་མངར་ཐལ་ཀ་རྡོ་རྗེ་རྣམས་ཞིབ་འདུལ་ཁ་ཚར་གྱི་སྨན་ནོ། །ཡང་ཐང་ཕྲོམ་དཀར་པོ། སྲོ་མ་སེངྒེ།  །དབྱར་རྩ་དགུན་འབུ། དབང་པོ་ལག་པ། མོན་སྲེན་གྲེའུ། སྡིག་སྲིན་གཟེ་མ་རྣམས་འོ་མར་གདུས་པ་རྩ་བའི་སྨན་ཚན་གསུམ་པ་སྟེ་དེ་ལྟར་
ཚན་གསུམ་པོ་གཅིག་ཏུ་བསྲེས་ལ་ཁ་ཚར་གྱི་སྨན་བཏབ་ནས་གྲོག་སྦྲང་རྙེད་ན་རབ། མ་རྙེད་ན་བུར་སྦྲང་གང་རུང་བཏབ། བུར་སྦྲང་མེད་ཀྱང་རུང་སྟེ། སྨན་རྣམས་ཤིན་ཏུ་འདྲེས་པར་འདམ་བཏགས་བྱས་པའི་རིལ་བུ་སེ་ར་རུས་ཙམ་དྲིལ་ནས་ནངས་པར་ལྟོ་སྟོང་སོགས་ནམ་འདོད་
ལ་ཟ་ན་འདི་རོ་ཙའི་སྨན་ཐམས་ཅད་ཀྱི་རྒྱལ་པོ་སྟེ་འཚོ་བྱེད་ཨ་ཛི་ཏས་རྒྱུད་ལུང་མན་ངག་གི་དགོངས་བཅུད་བསྡེབས་པ་འདིའི་ཕན་ཡོན་ལག་ཏུ་བླང་བས་གསལ་ལོ། །ཡང་ད་བྱིད་སྨུག་པོ་བུ་རམ་དབང་ལག་གསུམ་ཟོས་ན་བཅུད་རྒྱས། ཡང་མཆིལ་ཀླད་རྩང་ཤ ཨ་ཤུ་ལ། ད་
བྱིད་ཐལ་རྡོར་ཞིབ་བཏགས་བུ་རམ་སྦྱར་བ་ལྟོ་སྟོང་ལ་ཟོས་ན་དེ་མ་ཐག་སྦྱོར་ནུས་སོ། །ཞེས་གཏེར་མའོ། །ཡང་ལུག་རུ་དཀར་སེར་གྱི་མེ་ཏོག་གྲིབ་སྐམ་ལ་ཨ་རུ་རྒྱ་གར་མ་སྦྱར་བ་ཞིབ་བཏགས་འོ་མར་སྦྱར་ཏེ་ནངས་རེ་བཞིན་འཐུང་ན་དགུ་བཅུ་ལོན་པས་ཀྱང་ཕྱག་རྒྱ་བརྒྱ་ཕྲག་རེ་བརྟེན་
ནུས་ཞེས་གསུངས་སོ། །ཡང་བ་འོ་ཤིང་མངར་བུ་རམ་ལྟོ་སྟོང་ལ་འཐུང་ན་ནམ་དགོས་འགྲུབ་ཅེས་གསུངས། ཡང་ཅོང་ཞི་འོ་མར་གདུས་པའི་ཁུ་བར་ཤིང་མངར་དང་དབང་ལག་བཏབ་ཏེ་འཐུང་ན་འདོད་པ་བརྟེན་པའི་ནུས་པ་འཕེལ་ལོ། །ཡང་ཅོང་ཞི་ལེགས་པ་འོ་མར་གདུས་པའི་
དབུ་དཀར་ཕྱུར་བ་འོ་མ་བཅས་ཡུན་དུ་ཟོས་ན་ལུས་མདོག་དཀར་གཞོན་ཅིང་རོ་ཙ་བར་འགྱུར་རོ། །ཞེས་གཏེར་མའི་མན་ངག་གོ། ཡང་ཕ་དམ་པའི་གདམས་པ་ལས། ཐང་ཕྲོམ་དཀར་པོའི་མེ་ཏོག་གམ་འབྲས་བུ་སླ་ངར་སེར་ཙམ་བརྔོས་པ་ཐུན་གཅིག །ཤ་སྦྲང་མིག་པོ་ཆེ་བུབ་
13-5-15a


གཅིག །རྒྱ་རྩང་གི་ཤ་དང་ཀླད་པ། །བོད་རྩང་རླུང་འགམ་གྱི་དེ་གཉིས། །ཕུག་རོན་དང་རྒྱ་མཆིལ་བོད་མཆིལ་གྱི་ཀླད་པ་ཇི་མང༌། བྱ་ཕོའི་ངར་སྒོང༌། ཨ་རུ་གསེར་མདོག་གི་རྩེ་མོ་སྲན་མ་ཙམ་པ། གོ་བོའི་གྲེ་བ་དེ་ཙམ། བྱི་བ་སྟག་རིས་ཅན་ཕོའི་མཇུག་ཏོ། །ཞིམ་
བུའི་བྱི་ལ་འབྲས་བུ་ཐུན་ཚད་རེ། སུག་སྨེལ་ཐུན་བཟང་གཅིག །རྒྱ་ཚ་ཐུན་གཉིས། ཛ་ཏི་མཁལ་ཞོ་ཤིང་མངར་རྣམས་སྲན་མ་ཙམ་རེ། ལྕམ་པའི་འབྲུ་ཐུན་ལོག །སྡིག་པ་ཐུན་ལོག །སྨན་ལྒ་ཅུང་ཟད། སྐྱེས་དར་ག་བུར་ཙམ་ཇི་རྙེད་བྱུང༌། གཙང་གཡེར་རྡོག་པོ་ལྔ། ཐལ་རྡོར་རྡོག་
བདུན། ཀ་ར་མཐེབ་ཚིགས་ཙམ་རྣམས་ཞིབ་བཏགས་མར་དཀར་སྦྱར་བའི་རིལ་བུ་ལུག་རིལ་ཙམ་དྲིལ། ཨ་རག་གམ་འོ་དྲོན་ནམ། ཐ་མ་ཆང་བཟང་གིས་ཕུལ་ལ་བཏང་དེས་ལུས་ཟུང་འཕེལ་ལ་སྲིད་རྒྱས་པར་འགྱུར་རོ། །ཡང་ལུག་གི་ཀླད་པ་མར་གསར་དང་གཡེར་མས་བྲན་
པ་བཙོས་ཏེ་ཟོས་ནས་འོ་དྲོན་ལྟོ་རུ་བསྟེན་ན་བཅུད་འཕེལ་བཅུད་ལེན་ནོ། །ཡང་ར་ལུག་གི་འབྲས་བུ་མང་པོ་འོ་མར་བཙོས་ནས་ཁུ་བ་རང་ཐིམ་བྱས་པ་ལ་སུག་སྨེལ་དང་སྦྲང་སྦྱར་ནས་བསྲེ་བའང་ཡོད། འདིས་ཁུ་བཅུད་འཕེལ་ལོ། །ཡང་ལུག་ཐོང་ཚེར་གྱི་ཁོག་སྨད་བཟང་རུས་པའང་བ་གཅིག །ཁྱིམ་
བྱ་མཚལ་བུ་བུབ་གཅིག །སྲམ་དང་བྱི་བའི་མཇུག་ཏོ་རྣམས་ཞིབ་བཏགས་འོ་མར་བཏབ་ལ་བཙོ། བོད་རྩངས་རྨིགས་བུ་མཆིལ་བ་རྣམས་ཀྱི་ཤ་ཤིང་མངར་རྒྱ་ཚ་གོ་སྙོད་ཚ་བ་སྒ་ཡི་ཕོ་གསུམ་རྣམས་ཐུན་ཆེ་བ་རེ་བཏབ། ཁྱད་པར་རྒྱ་རྩང་གི་ཤ་གང་འབྱོར་གྱི་ཕྱེ་བཏབ་སྟེ་ཟོས་ན་ཁུ་བཅུད་རྒྱས་པར་
འགྱུར་རོ། །ཞེས་གསུངས་སོ། །གཞན་ཡང་དབང་ལག་སོགས་རོ་ཙའི་སྦྱོར་སྡེ་མང་ཉུང་སྣ་ཚོགས་གཞན་དུ་འབྱུང་ངོ༌། །བྱེ་རིང་ལས་ད་བྱིད་སྦྱོར་བ་ལ་འཕེལ་བྱེད་ལུས་ལ་སྦྱར་བ་ནི། རྡོ་ད་བྱིད་ཅོང་ཞི། ཚྭ་ད་བྱིད་རྒྱམ་ཚྭ། སྔོ་ད་བྱིད་ཁ་ཤོག་པ། བྱ་ད་བྱིད་མཆིལ་བ།
13-5-15b


་རྩངས་རླུང་ད་བྱིད་པ། རྒྱ་རྣམ་དབྱིད་པ་དམར་པོ། མཆིལ་མགོ་དམར། འོ་མ་ཆུ་ད་བྱིད་དེ་རྣམས་ཆ་མཉམ་པ། གྲང་བར་ཚ་བ་གསུམ་མམ། ཚ་བར་འབྲས་གསུམ་སྨན་མར་གྱིས་ལྟོ་སྟོང་འཕུལ་བཏང༌། ལུས་བྲག་བཞིན་སྲ།  ཚེ་ཉི་ཟླ་མཉམ་སོགས་ཕན་ཡོན་ཚད་མེད་འཐོབ། བདེ་བསྐྱེད་སེམས་ལ་སྦྱར་བ། ཤ་ད་བྱིད་ད་བྱིད། རྩངས་བྲག་ 
བྱ་མཆིལ་བ། ཤིང་ཨ་རུ་  ཏོག་ད་བྱིད་རྡོ་མ་ཅོང་ཞིང། སྦྲང་མངར་ད་བྱི་རྩི་དྲུག་ཞིབ་བཏགས་རིལ་བུ་རིལ་མ་ཙམ་མང་དུ་ཟོས་ན། ལུས་སེམས་བདེ་བའི་ཤུགས་ཆེ། རྡོ་རྗེ་བསླངས་ན་ལྡང་བཞག་ན་སྡོད། གདོང་པདྨ་འདྲ་སོགས་ཡོན་ཏན་ཀུན་རྒྱ་ཆེའོ། །
རེངས་བྱེད་ཆུར་སྦྱར་བ། ད་བྱིད་དང་བྲག་རྩངས་དམར་པོ་མ་རུལ་བ། རྒྱ་མཆིལ་མགོ་དམར་མཆུ་སྡེར་བྲེག །སྤུ་བཞུར། རྒྱུ་ལྟོ་ཕྱུངས། འབྲི་མར་བྱེའུ་ཙམ་དང་ལྷན་ཅིག་ལྕགས་སྣོད་བཙོ། མར་ཤ་ལ་ཐིམ་པ་དང་ཞིབ་བཏགས་ཁ་ཐུར་རེ་ཆང་ཞིམ་དང་
སྦྱར་བཏང༌། རྡོ་རྗེ་ལྕགས་བཞིན་འགྱུར་ཏེ་དེ་སོགས་ཕན་ཡོན་ཆེ། རྩ་བ་ལྔའམ་འབྲས་གསུམ་མར་ལ་གཞི་བྱས། དེ་ཕོའི་ཤ་མ་རུལ་བ་སྐམ་ལེགས་བུབ་གཅིག །མཆིལ་ཤ་བུབ་གཅིག་ནས་བཞི་སོགས་གང་རྙེད་སྐམ་ལེགས། ད་བྱིད་གང་རྙེད་ཞིབ་བཏགས་སྨན་མར་
དང་སྦྱར་ཁྱེམ་བུ་རེ་བཟའ། སྨན་ཟོས་ནས་ཟླ་བ་བཞི་ཙམ་ཚུན་བུད་མེད་ལ་མི་སྤྱད། སྨན་ཟླ་གཅིག་ཟོས་ན་དེའི་རིང་དང་དེ་རྗེས་ཟླ་གསུམ་བར་དུ་མི་སྤྱད་པའི་དམ་སྲུང་དགོས་ཏེ་ཐིག་ལེ་མ་ཉམས་པར་བྱ། སྤྱད་ན་སྨན་ནུས་ཉམས་འགྲོ། ལུས་ལ་སྨན་ནུས་ཞེན་ནས་བརྟན་པར་གྱུར་པ་ན་
མཚན་གཅིག་ལ་བུད་མེད་བརྒྱར་སྤྱོད་ཀྱང་རྩལ་སྟོབས་མི་འཆོར། ཤ་བཀྲག་རྒྱས་ཚེ་རིང༌། དེའི་ཚེ་རྡོ་རྗེ་རེངས་ནས་ཞིར་མ་འདོད་པའམ་ཁུགས་སུ་མ་ཚུད་ན། རེའུ་ལུག་གུ་མིག་མ་བྱེ་བའི་ཤ་སྐམ་ལེགས་ལྟོར་བཏང༌། དེ་ནི་ལོག་གནོན་ནོ། །ཏིལ་མོན་སྲན་ཁྲེའུ་གཉིས་
13-5-16a


ཞིབ་བཏགས་འོ་མར་སྦྱར་བླུད་ཉལ་ཕོད་པར་འགྱུར། གོ་བྱིའི་ཤ་དང་ཤིང་མངར་འོ་མར་སྦྱོར་བླུད་ལན་བརྒྱར་སྤྱད་ཀྱང་ཐིག་ལེ་མི་འཛད། ཨ་ཤོག་གནྡྷ་ཏིལ་གཉིས་འོ་མར་སྦྱར་འཐུང་སོགས་ཀྱིས་བུ་སྐྱེ། དབང་ལག་འོ་མར་གདུས་འཐུང་ཁམས་འཕེལ་འདོད་
སྤྱོད་ནུས། འབབ་བྱེད་ཀུན་དར་སྦྱར་བ་ནི། མཆིལ་བ་གྲོ་བོའི་ཀླད་པ་རྙེད་ཚད། བྱ་ཕོའི་ཀླད་པ། ཕུག་རོན་ཀླད་པ་གསུམ་སྦྱར་བུ་རམ་གྱིས་བཏུམ་སྟེ་རིལ་བུ་ནས་ཙམ་བྱས་ལ་མིད་པས་རིལ་བུ་རེ་ལ་བདེ་བ་རེ་རེ་འབྱུང༌། ཡང་མཆིལ་བ་གྲོ་བོའི་ཀླད་པ་རྙེད་ཚད་བུ་རམ་རིལ་བུ་
བསྟེན་ན་དེ་བཞིན་ནོ། །ཡང་མཆིལ་ཤ་ཤིང་མངར་ཞིབ་བཏགས་པ་འོ་བསྐོལ་གྲང་ཕུལ་བཏང་ན་གོང་འདྲ་རིལ་བུ་རེ་ལ་ནུས་པ་རེ་འབྱུང་ངོ༌། །ཡང་བྱ་ཕོའི་ཤ་དང་ཤིང་མངར་རྣམས་སྦྱར་ཟོས་དེ་དང་འདྲ། ཡང་དེ་གཉིས་བ་མར་སྦྱར་ཟོས་ནུབ་རེར་ལན་བཅོ་ལྔའོ། །བུད་མེད་སྤྱད་
དྲག་ཀྱང་ལུས་བཟང་བར་འགྱུར། ར་ཐུག་འབྲས་བུ་འོ་མར་བཙོས་ཀ་ར་ཏིལ་ཤིང་མངར་སྦྲང་སྦྱར་ཟོས་རྗེས་འོ་མ་ཕོན་རེ་འཐུང་ན་བདུན་ཅུ་ལོན་པས་ཀྱང་གཞོན་ནུ་བཞིན་དུ་འཁྲིག་པ་བསྟེན་ནུས་པར་འགྱུར་རོ། །ཞེས་སོ། །བླ་མ་དགོངས་འདུས་ལས་གསུང་བ། ཐིག་ལེ་འཕེལ་
བའི་དམིགས་པ་ནི་རང་ལུས་སྦྱངས་ཏེ་དག་པའི་སྒོ་གསུམ་ལྷར་གསལ། འབར་འཛག་བསྒོམ། སྤྱི་བོར་ཨོ་རྒྱན་ཡབ་ཡུམ་མཉམ་སྦྱོར་བདུད་རྩིས་རྩ་ཀུན་གང་ནས་བྱིན་གྱིས་བརླབ་པར་བསམ། ལུས་ཀྱི་རྩ་གནས་ཐམས་ཅད་དུའང་དཔའ་བོ་མཁའ་འགྲོ་ཡབ་ཡུམ་བདེ་སྟོང་
སྦྱོར་བའི་བདུད་རྩིས་གང་བར་བསམ་མོ། །ཐིག་ལེ་སྨིན་བྱེད་ཀྱི་སྨན་ལ། ཨ་རུ་ར་ཤ་རུས་སྙིང་པོ་བཅས་བདུན་ལྔ་གསུམ་གང་རྙེད། དེའི་ཉིས་འགྱུར་ཨ་རུ་ཤ་ཆེན་རུས་པ་བཅས། ཙན་དན་དཀར་པོ། མང་ག་བུར། གི་ཝཾ། གུར་གུམ། ཛ་ཏི། ཅུ་གང༌། སུག་
13-5-16b


སྨེལ་ཏེ་དེ་བདུན་ཐུན་ཚད་རེ། བྱ་ཕོ་མཚལ་བུའི་ཟེ་ཁྲག་ཐུན་གཉིས། མཆིལ་བ་མགོ་དམར་གྱི་ཀླད་པ་མ་ཉམས་པ་གཅིག །ཉ་མང་པོའི་ལྟོ་ཚིལ། བྱེའུ་ནས་ཟན་རུས་པ། དུང་སྲིན་མེད་རྡོག་གཅིག །མགྲོན་བུ་རྒྱ་མ་ཉམས་པ་མིག་མ་ཕུག་པ་གསུམ། བུ་མོ་དབང་པོ་མ་
ཉམས་པའི་ལུས་བྱུང་ཁྲག་ཁྱེའུ་གྲོང་ཆོས་མ་གོས་པའི་དྲི་ཆུ། ཅོང་ཞི་བཏུལ་མ། རྩ་དུར་བའི་རྩ་བ་སྟེ། དེ་རྣམས་ཆ་མཉམ་ཕྱེ་ཞིབ། དེ་ཀུན་དང་བུང་མཉམ་དབང་ལག་སྟོན་དཔྱོད་བཏུས་པ། བྱ་མ་གསར་གྱི་སྒོ་ངའི་སེར་པོ་དང་བུད་མེད་མོ་གསར་གྱི་ནུ་ཞོས་མགོ་བསྡུས་ལྡེ་གུ་
འདམ་འཐག་ཡུན་རིང་བྱས་པའི་རིལ་བུ་སྲན་འཕོས་ཙམ་མེ་ཉིའི་དྲོད་མེད་པར་བསྐམ། དར་དམར་པོའི་ཁུག་མར་བཅུག །ཉ་ཡོལ་ནས་གནམ་གང་བར་མི་བསྟེན། ཚེས་གཅིག་ནས་བཅོ་ལྔའི་བར་ནང་བར་ཁྱེའུ་སུས་སུ། །རིལ་བུ་གཅིག་ནས་ནང་རེ་རེ་རེ་བསྣན་ཏེ་ཚེས་བཅོ་
ལྔར་བཅོ་ལྔ་བར་དུ་བཏང༌། རིལ་བུ་བསྟེན་པའི་ཟླ་ཕྱེད་བར་ལ་ཐིག་ལེ་མ་ཟག་པར་བྱ། ཆགས་སྐྱེའི་གླེང་མོ་བརྗོད། མར་ངོར་སྨན་མི་བསྟེན་དུས་སུ་གོང་གི་དེ་རྣམས་གང་ཡང་མི་བྱ་བཟུང༌། དེས་ཐིག་ལེ་སྨིན་ཅིང་རབ་ཏུ་རྒྱས། སྐྱོབ་ཏུ་བཟའ་བཏུང་བཅུད་ཅན་བསྟེན་ན་
བཟང༌། ཡང་གཞུང་སྦྱོར་དེ་སྟེང་མཛོ་དྲེའུ་རྟོལ་གསུམ་མ་གཏོགས་གཞན་གང་རྙེད་ཀྱི་རུས་རིགས་གང་རུང་མཐེབ་ཚིགས་ཙམ་བརྡུང་བ་དང༌། ཅོང་ཞི་ནས་ཙམ་བཏུལ་མ་ཁྲོལ་བུ། དེ་ཕུལ་རེར་ཆང་ནར་སོན་ཕུལ་དོ་གདུས་པའི་ཁུ་བ་རང་ཐིམ་སྐམ་ཕྱེ་བྲེ་གང༌། རྙེད་ན་
གངས་སྦལ་གྱི་ཤ་གཟུགས་གཅིག །མ་རྙེད་ན་རྩངས་ཕག་གི་ཤ་གང་འབྱོར། འབྲས་བུ་གསུམ་ཆ་མཉམ་ཕྱེ་མ་ཕུལ་ཕྱེད། མ་རྙེད་ན་གང་འབྱོར་འོ་མ་བྲེ་གང་ལ་གདུས་ཞུན་བྱ་མཚལ་ལུའི་ཤ་གང་རྙེད། པ་ཤུད་ཀླད་པ། ཉ་ཤ་སྐམ་པོ། བྱ་ཀ་ལན་གྱི་སྒོ་ང་བཅས་
13-5-17a


སྦྲང་བུར་ཆུ་བཅད་འབྲི་མར་ཞུན་ཁུ་བཅས་ཐོ་རེངས་བསྟེན་ན་ཁམས་རྒྱས་སོ། །ཡང་བླ་མ་དགོངས་འདུས་ལས་ཁམས་ཉམས་པ་གསོ་བ་མན་ངག་གི་ལུང་ཧཱུཾ་རྒྱ་ཅན་ལས་གསུངས་པ་ནི། ཨ་རུ་ར་ཤ་རྒྱས་པ་བརྒྱ་རྩ་བརྒྱད་རུས་པ་རྐང་བཅས། དབང་ལག་སྡེར་
ལྔ་པ་ཡན་ཆད་བརྒྱ་རྩ་བརྒྱད། བལ་དཀར་མེ་ཏོག །ལྕ་བ། གཟེ་མ། ར་ཤག །བ་སྤུ། ཤུག་འབྲུ་འབུ་མེད། མཁན་དཀར་རྩ་བ། མཚེ། འོམ་བུ། སྲོ་ལོ་དཀར་པོ་དེ་རྣམས་ཀྱི་ཕྱེ་དང༌། ཅོང་ཞི་བྲེ་གང་ནང་ཟེ་ཚྭ་སྲང་གསུམ་བཏབ་པ་ཆུ་གཙང་དུ་བསྐོལ་ཞུན། 
རུས་རིགས་ཐམས་ཅད་ནས་ཙམ་བརྡུང་བའི་ཞག་ཁུས་བཀྲུས། ཁུ་ཐོག་གཅིག་ཕོས་ཏེ་ཞུན་བྱས་པར། བ་ར་འབྲི་གསུམ་འོ་མ་ཆ་མཉམ་ཕུལ་དགུ་བསྐོལ་བའི་ཞུན་དེ་རྣམས་དང༌། བཟང་དྲུག་ཐུན་གསུམ་གསུམ། ཙན་དན་དཀར་དམར་ཐུན་གསུམ། ག་བུར་ཐུན་གཅིག་
རྒྱ་སྦལ་ཤ་སྲང་གང༌། མཆིལ་བ་མགོ་དམར་ཤ་བུབ་གཅིག །བྱ་མཚལ་བུའི་ཟེ་ཁྲག །བྱ་ནག་མོའི་སྒོང་ངའི་སེར་རྩི་སྐམ་པ། འབྲོང་གི་རྐང་མར། རྒྱ་བྱའི་ཁྲག །བ་རུ་ར་གསུམ། སྐྱུ་རུ་ར་དགུ་རྣམས་རུས་པ་བཅས། འབྲས་སྣ་གསུམ། གོ་ཡུ། མཁལ་
ཞོ། སྡིག་སྲིན། སེ་འབྲུ། རྒྱ་ཚྭ། ར་ལུག་རླིག་འབྲས། ཏིལ་དཀར་ནག །སྤོས་དཀར། གུ་གུལ། ཆང་བཟང་བྲེ་གང་གི་ཞུན། རྡོ་རྒྱུས་བྱ་བལ་མ། པ་ཤེལ་ཙེ། ན་བུན་བུ་མོའི་ཤ་ཚིལ། ཉ་རུས་ཆེན་གྱི་ཀླད་པ། བུད་མེད་དར་མ་རྒྱུད་བཟང་
ཁྱེའུ་སྐྱེས་པའི་འོ་མའི་མར་དང་འབྲི་མར་བསྲེས་ལ་ཞུན་བྱས། སྦྲང་དཀར་དང་བུར་སྨུག་སོ་སོར་བསྐོལ་བའི་ཞུན་ཕྱེ།  དེ་རྣམས་གཡའ་མེད་སྣོད་དུ་ལྡེ་གུ་བྱས་ལ། ཁྱེའུ་སུས་སུ། ཐུན་རེ་རབ་ལོ་གཅིག །འབྲིང་ཟླ་དྲུག །ཐ་མ་ཟླ་གསུམ་བསྟེན་པས་ཡབ་ཡུམ་གྱི་ཁམས་
13-5-17b


དཀར་དམར་ཤ་རུས་རྐང་ཚིལ་ཁྲག་སོགས་ཀྱི་ཁམས་ཀུན་ཉམས་པ་སོས། སྟོབས་བསྐྱེད། དར་ལ་བབ། བདེ་སྟོང་འཕེལ། འདིའི་རིང་གྲིབ་ལ་འཛེམ། བཅུད་ཅན་བསྟེན་ཁམས་དང་ཤ་རྒྱས་ཆེ་བས་གེགས་བྱེད་ན་བསྟེན་འཕྲོ་བཅད་དོ། །ཞེས་གསུངས། ཁམས་དང་བདེ་བ་
འཕེལ་བའི་དམིགས་པ་ནི། བླ་གནས་གང་དུ་གནས་པའི་རྩ་མདུད་ནང་དུ་དཔའ་བོ་མཁའ་འགྲོ་ཡབ་ཡུམ་སྦྱོར་བའི་བྱང་སེམས་དཀར་དམར་གྱིས་རྩ་ཀུན་གང༌། འཁོར་དཔའ་བོ་མཁའ་འགྲོ་ཏིལ་གང་ལྟ་བུ་ཐམས་ཅད་ཀྱང་སྦྱོར་བས་བདེ་དྲོད་སྐྱེས་ནས་གར་འཁྲབ་པར་བསམ་མོ། །ཞེས་
གསུངས་སོ། །ཡང་ནད་དང་གདོན་སོགས་ཀྱིས་ཐིག་ལེ་སྐམ་པས་འདོད་པ་སྤྱོད་མི་ནུས་པ་ལ། བདུད་རྩི་ལྔ་དང་སྤང་སྤོས་སྲོ་ལོ་ཆང་སྦྱར་སྒྱེ་ལུམ་མམ་རླང་ལུམ་ཞག་གཅིག་གམ་གསུམ་དུ་བྱ། རྡུལ་རྣམ་རས་ཀྱིས་ཕྱི། དེའི་རིང་ཟས་བཅུད་ཅན་བསྟེན། ཁྱད་པར་བ་འབྲི་
ལུག་གསུམ་འོ་མ་ཞོ་ཙམ་གདུས་པར། ལྕ་བ་བ་སྦྲུ་ར་མཉེ། རུས་པ་ལྷ་བ་ཅན། སྒོག་སྐྱ། གཟེ་མ། རྒྱ་ཤུག་དམར་པོའི་འབྲུ་གུ་རྣམས་ཆ་མཉམ་ཆང་བཟང་དུ་བཙོས་པའི་ཁནྜ་དང༌། དབང་ལག་ཞིབ་བཏུལ་ཕྱེ་མ་ཕུལ་གང་འོ་མ་ཕུལ་དགུར་ཁུ་བ་རང་ཐིམ་བཙོས་པ་བཅས། 
སྦྲང་བུར་ཆུ་བཅད་ཁ་ཚར་བཏབ་པ་ཐོ་རངས་ཆང་སྐྲད་རེ་བསྟེན། དེའི་རིང་ལུས་ལ་མར་དཀར་བྱུག །དེས་སོས་པར་འགྱུར་རོ། །ཡང་ཐེའུ་རང་གི་གནོད་པ་སོགས་གདོན་རྐྱེན་ལས་ཐིག་ལེ་སྐམ་ནས་དབང་པོ་ལྡང་མི་ནུས་ལ། རྨི་ལམ་བྲག་གཡངས་ཐང་སྟོང་ཁང་ཧྲུལ་བྱིས་པ་སོགས་
ཉམས་མི་དགའ་བར་རྨི་ཞིང༌། བུད་མེད་དང་ཕྲད་ཀྱང་རྡོ་རྗེ་འགྱེལ་བའི་རིགས་ལ། ཨ་རུ་གསེར་མདོག །དཀར་པོ་ཆིག་ཐུབ། རྒྱ་མཚོའི་གསེར་ཕྱེ། མ་གི་ཏ་རྣམས་སྦྱར་ལ་སྔགས་འདི་བརྒྱ་རྩ་བརྒྱད་བཏབ་སྟེ་ཟོས་ན་ཁམས་གསོ་ཞིང་རྡོ་རྗེ་མི་འགྱེལ་ལ་བུ་ཡོད་པར་ངེས་སོ། །
13-5-18a


སྔགས་ནི། ཨོཾ་ཁྲོ་ཏ་བྷུ་ཏི་བྷུ་ཏིས་པ་ཡ་ཀུ་རུ་ཀུ་རུ་ཡེ་སྭཱ་ཧཱཾཿ ཞེས་གཏེར་མའོ། །ཡང་རྒྱལ་པོས་གནོད་ན་རམ་བུ་མུ་ཟི་ནག་པོ་གུ་གུལ་གསུམ་ལ་སྔགས་འདི། རཱ་ཛ་ཁ་བ་ཤིག །བརྒྱ་རྩ་བརྒྱད་བཏབ་ལུས་ལ་འཆང་ཁོང་དུའང་བཏང་པས་ཐུབ། མོ་གདོན་གནོད་
ན་སྦྲུལ་པགས་དང་སྲེ་མོང་པགས་པ་གཉིས་ལ། ཁྲོཾ་ཀྵ་ཧཱུཾཿ འདི་བྲིས་ནས་བཏགས་ན་ངེས་པར་ཐུབ་ཅིང་འདྲེ་གཞན་གྱིས་ཀྱང་མི་མཐོང་ངོ༌། །གཞན་ཡང་རེ་ལྕགས་འཕང་དྲེག་བསེན་མོ་གནས་པའི་རྡོ་དྲེག་གསུམ་ལུས་ལ་བཏགས་པས་བསེན་མོ་ཐུབ་བོ། །ཐེའུ་རང་ལ་དྭ་བའི་
འབྲས་བུ་དང༌། ཐང་ཁྲོམ་རིགས་བསྡུས་པའི་ཐུམ་པོ་ལུས་ལ་བཏགས། ཏྲི་ཧཱུཾ་སུ་ཏྲི་དུམ་བུ་ཐེའུ་བྲང་མཱ་ར་ཡ་ཛ་ཛཿ ཞེས་བཟླ་འདི་རྣམས་གཏེར་མའོ། །འགོང་པོའི་རིགས་སྤྱི་ཡི་ཁ་ཆིངས་ནི། འགོང་པོ་ཧབ་ཤ་ཏྲིག་ནན་ཐ་ཏྲི་མྱག་ཐུཾ་རིལ་རྦདཿ ཅེས་བཟླས་པས་འཇོམས་
པར་རྫོགས་པ་རང་བྱུང་གི་རྒྱུད་ལས་གསུངས་སོ། །དེ་དག་ཀྱང་ཡི་དམ་ཁྲོ་བོ་གང་ཡིན་གྱི་བསྐྱེད་རིམ་དང་སྔགས་བཅས་དམིགས་པ་གཟིར་ལ་སྲུང་སྐུད་སོགས་གདགས་པའམ་བཟླས་པས་ཐུབ་པར་འགྱུར་རོ། །སྤྱིར་ཁམས་འཕེལ་ཞིང་རོ་ཙ་བར་འདོད་པས་ཟས་ཤ་སྣུམ་
ཅན་དང༌། འབྲས། འོ་མ། འོ་ཞོའི་སྦྲིས་མ། ཤ་མང་གི་ཚོད་མ་སོགས་བརྟེན། ཤ་རུལ་ཆང་སྐྱུར་སྔོ་ངད་ཟ་ཚོད་དཀོར་ཟས་གྲིབ་ཟས་རྗེན་ཐུག་སོགས་སྤང་བར་བྱའོ། །རྟ་མགྲིན་ལས་ཚོགས་ནས། ཨོཾ་དུ་ཏི་མ་ལ་དུ་ཎི་ཧྲཱི་བྷ་ཏི་མཱུ་ལ་པཥྟིཾ་ཀུ་རུ་ཡེ་སྭཱ་ཧཱ། 
བུ་རམ་ལ་བསྔགས་ནས་ཟོས་ན་རྡོ་རྗེའི་དབང་པོས་ལན་རེར་ལན་བརྒྱར་སྤྱོད་ནུས། ཞེས་སོ། །འཇིག་རྟེན་གསུམ་རྒྱལ་རྒྱུད་ལས། རང་གི་རྡོ་རྗེ་རྡོ་རྗེ་བཅང་བས་བཟུང་ལ་སྙིང་པོ་ཧཱུཾ་ཞེས་པ་ཉིན་བདུན་དུ་དུས་གསུམ་དུ་ལང་བའི་བར་དུ་བཟླས་ལ། དེའི་མཇུག་ཏུ་ནམ་ཕྱེད་
13-5-18b


ཀྱི་བར་དུ་བཟླས་ན། རྟག་ཏུ་འགྲེང་ལ་བཅུད་མང་ཞིང་ཤུགས་དྲག་པས་བུད་མེད་ཐམས་ཅད་དགའ་བར་ནུས་སོ། །བུ་མོ་སྤྱད་པ་ན་རྡོ་རྗེ་བཟུང་ལ་ཧཱུཾ་ཞེས་བརྗོད་པར་བྱའོ་གསུངས། གངས་སྦལ་ཕུག་རོན་ཕོ་ཡི་ཤ །མཆིལ་བའི་ཤ་དང་ར་ཐུག་འབྲས། །བག་ཕྱེ་ཚ་སྣ་རིལ་བུ་
དྲིལ། །ཟངས་སྣོད་བཞག་ལ་ཞག་གསུམ་བསྔགས། །ཨོཾ་ཧྲིང་ཧྲིང་དབང་ལ་ཧྲིང་ཧྲིང་ཧ་རི་ནི་ས་ཧྲིང་སྭཱ་ཧཱཿ འགྲུབ་ན་རིལ་བུ་དམར་པོ་འོང༌། །ཆང་ཕུལ་ཉིན་མཚན་མེད་པར་རྡོ་རྗེ་འགྲེང༌། ཞེས་སོ། །གསང་བའི་རྡོ་རྗེ་ལ་བྱུག་པ་གང་གིས་བདེ་བ་ཆེ་ཞིང་བུད་མེད་
འབྲལ་མི་ཕོད་པར་བྱེད་པའི་ཐབས་ལ། ཁྱི་དཀར་པོའི་ལྕེ་ཕོ་མཚན་འབྲས་བུར་བཅས་པ་དང༌། གུར་གུམ་ག་བུར་ཚྭ་ལ་ཤིང་མངར་ཕུག་རོན་བྲུན་ད་བྱིད་རྣམས་སྦྲང་སྨྱོན་སྦྱར། ཏིལ་མར་བསྐོལ་གྲང་བཅས་རྡོ་རྗེར་བྱུག་ན་གང་ལ་སྤྱད་ཀྱང་བདེ་བ་མི་བཟོད་པར་འཕེལ།
བུ་མོ་དེས་ཁྲོམ་གྱི་ནང་དུའང་བདེ་བ་དྲན་ནས་སྦྱོར་བར་འདོད་ཅིང་འབྲལ་མི་ཕོད་པར་འགྱུར་རོ། །ཡང་མཚེ་བུ་རམ་ཕུག་རོན་བྲུན་སྡོང་རོས་རྒྱ་ཚྭ་ཞིབ་བཏགས་གར་སླ་ཞོ་ཙམ་བྱུག་པས་དེ་བཞིན་ནོ། །ཟེ་ཚ་ཕུག་རོན་བྲུན་སྦྲང་རྩིས་ཀྱང་དེ་འདྲའོ། །ཡང་དེ་འདྲ་བའི་སྨན་སྣ་
ཚོགས་རྒྱུད་དང་མན་ངག་ལས་བྱུང་བ་སྣ་ཚོགས་ཕྱོགས་བཀོད་ལ། དྭ་འབྲས་གཡེར་མ་རྒྱ་ཚྭ་སྦྲང་སྨྱོན་སྦྱར་བས་ཀྱང་གཡའ་སློང་ནི་གུ་རྟ་སྐད་འབྱིན་མ་བསྒུལ་ཀྱང་བདེ་བ་སྐྱེ། ཡང་མོའི་སྙིང་ལ་ཟིན་ནས་འབྲལ་མི་ཕོད་པའི་རྫས་མཆིལ་བའི་སྒོང་ཆུ་སེར་པོ། བ་རུ་བི་
ལིང༌། མཚུར་ནག་བཞི་ཆ་མཉམ་ཞིབ་བཏགས་སྦྲང་རྒོད་སྦྱར་བྱུག་བདེ་བ་འཕེལ་བ་གོང་བཞིན་ནོ། །ཡང་རྟག་ཏུ་ག་བུར་བུ་རམ་གུར་གུམ་མཚལ་ཤིང་མངར་ཕུག་རོན་བྲུན་ཁྱི་དཀར་རྡོ་རྗེ། ལྕམ་པ། གཡེར་མ་རྒྱ་ཚྭ་རྣམས་ཞིབ་བཏགས་སྦྲང་རྒོད་སྦྱར་བས་བྱུག་ན་
13-5-19a


གོང་འདྲ། ཡང་རྟག་ཏུ་སྒོག་གཅིག་སྐམ་པོ་སྒ་སྐྱ་ཕག་ཚིལ་མཉམ་སྦྱར་བྱུག་སྤྱད་གོང་བཞིན་བུད་མེད་དེས་བརྩེ་ཞིང་དུང་བར་བྱེད། ཡང་ཕ་ཝང་ཚེས་བཞིའི་དགོང་ཀ་བཏགས་ལ་དེའི་རིལ་མ་ཞིབ་བཏགས་རང་གི་གསང་རྡོར་རྩེར་བསྐུས་ཏེ་སྦྱོར་ན་
བུད་མེད་དེ་གཞན་གྱིས་སེམས་བསྒྱུར་བར་མི་ནུས་ཞེས་རྒྱུད་ལས་སོ། །བདེ་བ་འཕེལ་བའི་རྫས་ཐམས་ཅད་ལ་སྔགས་འདི་གདབ། ཨོཾ་གི་རི་ཧི་རི་ཙི་རི་ཨ་ཨ་ཤུ་མ་ཤམ་སྭཱ་ཧཱ། ཞེས་རྩི་ཡི་ལྷ་མོ་བློ་གྲོས་མའི་རིག་པ་བདེ་བ་འཕེལ་བར་བྱེད་པའོ། །ཡང་མིའི་ཤ་ལེགས་
པོ་མ་རུལ་བ་རྡོ་ཚན་བར་དུ་བཙིར་ཏེ་ཆུ་སེར་ཕྱིར་ཕོ། གྲིབ་སྐམ་ཞིབ་བཏགས་ཕྱེ་མ་ཆང་སྦྱར་ཚ་བ་གསུམ་དང་སྤོད་བྲན་ལྟོ་སྟོང་བཏང་ན་ཁམས་རྒྱས་སོ། །ཡང་བུ་རམ་ཕུལ་གང་ནང༌། ཅོང་ཞི་པི་ལིང་ཁྱོར་ཕྱེད། ད་བྱིད་མཛུབ་ཚིགས་ཙམ་མཆིལ་བ་བུབ་གཅིག་
རྣམས་ཞིབ་བཏགས་པ་འོར་སྦྱར་བ་ལྟོ་སྟོངས་ལ་ཟོས་ན་འདོད་པའི་སྦྱོར་བ་ནམ་དགོས་འགྲུབ་བོ། །རོ་ཙ་བའི་སྐབས་ཏེ་དང་པོའོ། །ད་ནི་ཁུ་བ་མི་ཉམས་པར་རེངས་པའི་ཐབས་བསྟན་པ་ནི། དགོངས་འདུས་ལས། མི་རིགས་སམ་རྒས་སམ་ཆགས་པ་སྤྱད་
དྲག་པས་ཏིལ་མྱུར་དུ་འཆོར་ན། ཅོང་ཞི་ལྷད་མེད་མེ་ངར་དུ་བསྲེགས་པ་འོ་མ་རང་ཏུལ་བ་དང༌། དབང་ལག་འོ་མར་བཙོས་པ་ཆ་མཉམ་འདེ་གུར། དོམ། ༼ནང་ཀྱི་མཁྲིས་པ།༽ སྤྲེའུ། འཕྱི་བ་ས། ཉ་༼ཆུ༽། མི་༼མེ༽། བྱ་རྒོད་༼རླུང༌།༽ ལུག་༼བལ།༽ རྟ་༼མགྱོགས་བྱེད་ཀྱི་མཁྲིས་པ་རྣམས་༽རྣམས་ཀྱི་མཁྲིས་པ་དང༌། གི་༼སྟོབས་ཀྱི་༽ཝང་
ཐུན་རེ། ཨ་རུ་གསེར་མདོག་རྣམས་ལྷན་དུ་བཏུལ་བ་ལ། ཁ་ཚར་བཟང་དྲུག །ཙན་དན་དཀར་དམར། ག་པར་སྦུར་ལེན། སྦྲང་དཀར་དང་བུ་རམ་གྱི་དབུ་བ། གླ་རྩི་སྨྱག་ཉུག་གུ་ཆུང༌།
13-5-19b


རྣམས་བསྲེས་ལ། ར་ལུག་གཉིས་ཀྱི་ཐུག་འབྲས་བྱུང་ན་རབ། མིན་ན་གང་རུང་རེ་བཅས་ཕྱུག་ཆེན་རྒྱུངས་པས་སྦྲུས་པའི་རིལ་བུ་སྲན་འཕོས་ཙམ་གྲིབ་སྐམ་ཐོ་རངས་གསུམ་གསུམ་ཟླ་གཅིག་བསྟེན་ན་ལོ་གཅིག་བར་དུ་ཐུབ། ལོ་གཅིག་བསྟེན་ན་ཐིག་ལེ་མི་བརྟན་པའི་
གེགས་གྲོལ་ལོ། །འདི་ཟ་ཚེ་གཡེར་ལྕམ་ཟྭ་སོགས་རྩ་ཁ་འབྱེད་པས་སྤངས། སྤྱོད་ལམ་ཐིག་ལེ་མི་ཉམས་པར་བྱའོ། །ཡང་འབྲས་བུ་གསུམ། བྲེ་གའི་འབྲས་བུ། སྐྱེར་ཤུན་ཁཎྜ། བྲག་ཞུན་བཅས། འབྲོང་ངམ་གཡག་རྒོད་ཀྱི་རྐང་མར་དང་
སྦྱར་བའི་རིལ་བུའམ་སྦྲང་བུར་ཆ་མཉམ་སྦྱར་བའི་སྨན་མར་གྱིས་ཀྱང་ཁམས་བརྟན་པར་བྱེད། དམིགས་པ་ནི་རང་ལུས་བདུད་རྩིས་སྨྱུག་དོང་ཞུན་མར་གྱིས་བཀང་བ་ལྟར་ཐེམ་མེར་གང་བ་ལ། དབང་པོའི་སྒོ་རྣམས་ཕཊ་སེར་པོ་མགོ་ཕྱིར་བསྟན་པས་བཀག་
པར་བསམ། བུམ་ཅན་བཟུང་དེས་རྒས་ལྷོད་ལའང་ཕན་ནོ་ཞེས་དགོངས་འདུས་ལས་སོ། །ཁུ་བ་རེངས་པར་བྱེད་པའི་སྔགས་ནི། ཨོཾ་ཛཾ་མཾ་རཾ། ཞེས་པ་སྟེ་ནག་པོ་ཆེན་པོའི་རྒྱུད་རྒྱལ་ལས་སོ། །ཡང་ག་པར་ཐུན་གཅིག །ལུག་མིག་མེ་ཏོག་ཐུན་
གཅིག །༼མཚལ་འང་༽སྲད་དཀར་ཐུན་གཅིག །ཚྭ་ལ་དུལ་མ་ཞོ་དོ་རྣམས་སྦྲང་རྒོད་དམ་བུར་དཀར་སྦྱར་བའི་རིལ་བུ་ནང་མ་བཅུར་ཟོས་ན་ལོ་གཅིག་ཐིག་ལེ་བསྟེན། ཡང་དང་པོ་དེ་གསུམ་སྟེང་པད་རག་གམ་མ་རྙེད་ན་སིནྡྷུ་ར་བསྣན་པའི་རིལ་བུ་གསུམ་རེ་ཞག་བཅོ་ལྔར་བསྟེན་
པས་ལོ་གཅིག་བར་ཐིག་ལེ་ཕབ་ཀྱང་མི་ཕེབ་པར་བཤད། ཡང་མེ་ཏོག་ལུག་མིག །གུར་གུམ། སུག་སྨེལ། མཚལ་དཀར་དོམ་མཁྲིས་རྣམས་ཞིབ་བཏགས་ར་དཀར་འོ་མས་འདམ་འཐག་རིལ་བུ་ལུག་རིལ་ཙམ་ཞོག་པ་ལྟོ་སྟོང་གསུམ་རེ་ཟོས་ན་རྩ་ཁ་འཐེམ་ནས་
13-5-20a


ཐིག་ལེ་ཕྱིར་འདོན་མི་སྲིད། ལུས་བཟང་འོད་ལྡན་འབྱུང་སྟེ་རྫས་ཀྱི་ཆགས་ལམ་བདེ་བ་ཆེན་པོ་འོ་ཞེས་གཏེར་མ་ལས་སོ། །ཡང་ཟངས་རྩི་དཀར་པོའི་འབྲུ་འོ་མར་བཏབ་སྟེ་ཞོར་ཆགས་པའམ། ཟངས་རྩིའི་ཁནྜ་དུམ་རེ་ནང་མོ་ལྟོ་སྟོང་ཟླ་གཅིག་ཟོས་ན་
ཐིག་ལེ་འཛིན། ཡང་དེ་བཞིན་དུ་ལུག་རུ་སེར་པོ་གྲིབ་སྐམ་ཕྱེ་མ་ཕུལ་གང་ལ་གཡེར་མའི་ཕྱེ་ཕུལ་ཕྱེད་བཏབ་སྟེ་ཞིབ་བཏགས་ཁྱེམ་བུ་རེ་རང་གི་དྲི་ཆུས་ཕུལ་ཏེ་ཟླ་ཕྱེད་བསྟེན་ན་གོང་འདྲ། ཡང་སྔོ་འོད་ལྡན་རང་གི་ཐིག་ལེ་བཅས་ར་འོར་གདུས་པ་བ་མར་སྦྱར་ནས་ཟོས་ལ་གནམ་སྟོང་
དུས་རང་གི་རྐང་མཐིལ་དུ་བྱུག་ན་བུད་མེད་དང་སྦྱོར་ཡང་ཐིག་ལེ་མི་འཆོར་འཛིན། འདི་ཐམས་ཅད་གཏེར་མ་ལས་སོ། །ཡང་ག་པར་གུར་གུམ། རྒྱ་ཚིལ། ༼ར་རྒོད་འདྲ།༽ རྨ་བྱའི་སྙིང་རྣམས་ཞིབ་བཏགས་ནོར་བུའི་རྩེ་ལ་བསྐུས་ན་ཐིག་ལེ་རྡོ་རྗེའི་བུམ་པར་ཕྱག་རྒྱ་དང་མ་བྲལ་བར་དུ་གནས་
སོ་ཞེས་དགའ་རབ་རྡོ་རྗེས་མཛད་པའི་སྲས་གཅིག་རྒྱུད་ཀྱི་འབྲེལ་བ་ལས་སོ། །ཡང་རྟག་ངུ༌། རྡོ་ཁབ་ལེན། མེ་ཏོག་གཡུ་ལོ། རང་གི་ཐིག་ལེ་བཞིར་འོར་བསྐོལ་ནས་ལྟོ་སྟོང་ལ་འཐུང་ཞིང་རྐང་མཐིལ་དུ་བྱུག་པས་ཐིག་ལེ་མི་འཛག་མི་ཉམས་ཞེས་འོད་ལྡན་
རྒྱུད་ལས་སོ། །ཡང་རའི་ལིངྒ་འམ་རྩངས་པའི་མཇུག་མ་བླང་ནས་དུར་ཁྲོད་ཀྱི་སྲད་བུས་སྐེད་པར་བཅིང་ན་ཁམས་འཛིན་ནོ། །དེ་བཞིན་དུ་དྷ་དུ་ར་གོས་ཕྲལ་འདོམ་དཀྲིས་ཀྱང་བྲལ་བས་བཏོན་ནས་ལུས་ལ་བཅིངས་བའམ། ཨ་རྐའི་བལ་དཀར་ལས་སྡོང་བུ་བྱས་པའི་ཕག་
ཚིལ་གྱི་མར་མེའི་མིག་སྨན་བྱས་པའམ། བྱི་ལ་ནག་པོའི་རྐང་རྒྱུས་ཀྱིས་བཅིང་བའམ། འཇམ་འབྲས་ནང་དངུལ་ཆུས་བཀང་སྟེ་སྐེད་པར་བཅིང་ན་དེ་གང་རུང་གིས་ཀྱང་ཁམས་འཛིན་པར་བྱེད་ཅེས་མི་གཡོ་བའི་རྒྱུད་ལས་སོ། །བ་བླའི་ཁུ་བའི་མིག་སྨན་དང༌། དངུལ་ཆུ་དང༌།
13-5-20b


པི་ལིང༌། རྒྱམ་ཚྭ། རུ་རྟ། ཕུག་རོན་བྲུན་རྣམས་ཀྱིས་ལིང་ག་དྲིལ་ཕྱིས་བྱས་པས་ཁུ་བ་རེངས་ཞེས་གཤེད་དམར་རྒྱུད་ལས་སོ། །ཡང་བྱ་བྲུན་དང་མི་ཁྱིའི་རུས་པ་བཏགས་པའི་ལྡེ་གུ་རྡོ་རྗེར་བསྐུས་ན་ས་བོན་མི་འབྱུང༌། ཡང་བྱི་ལའི་འབྲས་བུར་སྦྲང་རྩི་བྱུག་སྟེ་ག་པར་ཆུ་
ནང་བཙོས་ལ་བསྐམ་པ་ཞིབ་བཏགས་ཅོང་ཞི་བསྲེས་ནས་རྡོ་རྗེ་ལ་བྱུག་སྟེ་བུད་མེད་བརྒྱ་ལ་སྤྱད་ཀྱང་ཐིག་ལེ་མི་འཆོར་མི་ཉམས་མཁའ་འགྲོ་འདུ་ཞེས་དང༌། ཡང༌། ལ་ཕུག་ཁུ་བར་ཅོང་ཞི་དང་བ་འོ་སྦྱར་བ་སྐྱུ་རུ་ར་དང་བསྲེས་སྟེ་རྡོ་རྗེ་ལ་བྱུག་ནས་མེ་ལ་བསྲོས་ན་ཐིག་ལེ་མི་འཆོར་བར་
ཐུབ། ཡང་སྦྱིན་བསྲེག་ཐལ་བ་དང༌། ལུང་ཐང་སྙིང་པོ། ཨ་རུ་ར། ཅོང་ཞི་རྣམས་བ་འོར་སྦྱར་བའི་རིལ་བུ་རས་ཀྱི་བཏུམ་ལ་རྡོ་རྗེའི་བུ་གར་བཅུག་ཏེ་སྤྱད་ན་ཐིག་ལེ་མི་ལྷུང་བདེ་བ་ཆེ། ཡང་སྲེ་མོང་གི་རྒྱུས་པས་སྲིན་ལག་དཀྲིས་པའམ། ཡང་སྲེ་མོང་ཕོའི་རྒྱུས་
པར་མདུད་པ་དགུ་བརྒྱབ། བོ་དྷི་ཙིཏྟ་ནན་ཆོདཿ ཞེས་པའི་སྔགས་འདི་ཁྲི་བཟླས་བཏབ་རང་གི་སྲིན་ལག་གཡོན་པར་བཅིངས་ན་ཁམས་མི་འཆོར་རོ། །ཡང་མགྲོན་བུའི་ནང་དངུལ་ཆུས་བཀང་སྟེ་སྤྲ་ཚིལ་གྱིས་བཏུམ་ལ་གན་རྒྱལ་དུ་ལྕེ་འོག་བཅུག་སྟེ་སྤྱོད་པ་བྱས་ན་
ཐིག་ལེ་མི་འཆོར་ཞེས་འདི་རྣམས་རྒྱུད་རྣམས་དང་གཏེར་ཁ་རྣམས་སུ་ཡང་ཡང་བྱུང་བའོ། །ཡང་མགྲོན་བུ་སྦྲུམ་མ་ཆུར་བསྐྱུར་ན་ཁར་ལྡིང་བའི་ནང་གི་རྒྱ་སུབ་ཏུ་གསེར་དངུལ་ཟངས་དང་དངུལ་ཆུ་ཐིགས་པ་གཅིག་བླུག །ཁ་དམ་དུ་བཅད། ཕྱི་ནས་ལ་ཆའམ་སྤྲ་ཚིལ་
གྱིས་གཡོགས་ལ་སྙོམས་འཇུག་དུས་རང་གི་ལྕེ་འོག་ཏུ་གན་རྐྱལ་བཅུག་ན། མགྲོན་བུ་མ་ཕྱུང་བར་དུ་ཐིག་ལེ་མི་འཆོར་ཞེས་གཏེར་མའོ། །ར་དཀར་རམ་བ་དཀར་འོ་མ་བསྐོལ་ཏེ་འཐུང༌། རྐང་མཐིལ་ལ་ཡང་བྱུག །ཚིལ་ཆེན་གྱིས་ཀྱང་རྐང་མཐིལ་བྱུག་ན་ཕན་ཞེས་སོ། །
13-5-21a


ཡང་མགྲོན་བུ་སྦྲུམ་མ་མིག་མེད་ནང་དངུལ་ཆུ་ཐིག་པ་ཞིག་བླུག །རང་གི་རྐང་མཐིལ་གྱི་དྲེག་པས་ཁ་བཅད། དེ་སྤྲ་ཚིལ་གྱིས་བསྡམ། དེ་རང་གི་ལྕེ་འོག་བཅུག་ལ་སྦྱོར་བའི་དུས་སུ་འོག་རླུང་ཅུང་ཟད་བསྡམས་པས་ཐིག་ལེ་འཛིན་དེས་ཀྱང་ཟིན་དཀའ་ན། ཚེས་
བཅུ་བཞིའི་ནུབ་མོ་སྦྱོར་བ་བྱས་པའི་བྱང་སེམས་དཀར་དམར་ཐིག་གཅིག་ཀྱང་སྔར་གྱི་དངུལ་ཆུའི་སྟེང་དུ་བླུག་ལ་རྐང་དྲེག་གིས་ཁ་བཅད། དེའི་སྟེང་དུ་ཡང་བྱང་སེམས་བླུག །དེ་ནས་སྤྲ་ཚིལ་གྱིས་གཡོགས་ལ་སྔར་བཞིན་བྱ། དེས་ཉིན་མཚན་དུ་སྦྱོར་ཀྱང་ཐིག་ལེ་མི་འཆོར་
ངག་ཏུ་ཧཱུཾ་ཞེས་བརྗོད། རིག་པ་སྤྱི་བོའི་ཐིག་ལེ་དཀར་པོ་ལ་གཏད། རླུང་རྒྱུ་ཞབས་ནས་གྱེན་དུ་འུབ་འུབ་བྱས་པས་ཐིག་ལེ་འཛིན་ནོ་ཞེས་ཟབ། གཏེར་མའོ། །ཡང་གདོན་སོགས་ཀྱིས་ཐིག་ལེ་འཛག་པ་སྲུང་བ་ལ། ལུག་དཀར་པོའི་སོག་བལ་གཡས་པ་དང་ནག་པོའི་
སོག་བལ་གཡོན་པ་གཉིས་ལ་སྐུད་པ་ཁྲ་བོར་བྱས་ལ་མདུད་པ་ཉེར་གཅིག་གདབ། ཨོཾ་ཏྲི་ཧྲན་རྩོག་རྩོག༔ ཞེས་པ་ཁྲིའམ་མདུད་པ་རེ་ལ་སྟོང་ཕྲག་རེ་བཟླས་ལ་བཏབ་ནས་རྐེད་པར་བཅིངས་ན་ཐིག་ལེ་སྲུང་བའི་མཆོག་སྟེ་གཏེར་མ་སོགས་ལས་སོ། །འཇམ་དཔལ་རྩ་རྒྱུད་ལས། 
ཨོཾ་ཧ་ར་ཧ་ར་བནྡྷ་ནི་ཤུ་ཏྲ་དྷ་ར་ཎཱི་སིད་དྷར་ཐེ་སྭཱ་ཧཱ། མཱ་མ་ཀིའི་ཕྱག་རྒྱ་དང་བཟླས་པ་བྱ་ཞིང་བྲམ་ཟེའི་བུ་མོ་གཙང་མས་བཀལ་བའི་སྐུད་པ་གུར་གུམ་གྱི་ཆུས་བཙོས་ལ་མདུད་པ་བདུན་བོར་བར་ལན་བརྒྱ་རྩ་བརྒྱད་སྔགས་ཏེ་སྐེད་པར་ལན་གསུམ་དཀྲིས་ནས་བཅིངས་ན། ས་བོན་
འཆིངས་ཏེ་འདོད་པའི་དབང་ཕྱུག་དང༌། དགའ་ལྡན་གྱི་བུ་མོ་རྣམས་ཀྱིས་ཀྱང་ཡིད་ལའང་གནོད་མི་ནུས་ན། གཞན་བགེགས་དང་ལོག་འདྲེན་གྱིས་ལྟ་ཅི་སྨོས། ཞེས་གསུངས། མཱ་མ་ཀིའི་སྔགས་ནི། ཨོཾ་ཀུ་ལན་དྷཱ་རི་བན་དྷ་བན་དྷ་ཧཱུཾ་ཕཊ། ཞེས་བགེགས་
13-5-21b


ཐམས་ཅད་འཆིང་ཞིང་བརླག་པར་བྱེད་པ་སྟེ་རྡོ་རྗེ་རྩེ་གསུམ་པའི་ཕྱག་རྒྱ་དང་སྦྱར་བར་བྱའོ། །ཡང་རྒྱུད་དེ་ལས། ཚོན་སྣ་ལྔའི་སྐུད་པ་ལ་མུ་ཞེས་པའི་ཡི་གེ་འབྲུ་གཅིག་པོ་འདི་ལན་བཞི་བཟླས་ནས་སྐེད་པར་བཅིང་ན་ས་བོན་བསྡུམ་པར་འགྱུར་ཏེ་རྨི་ལམ་དུ་ཡང་འབྱུང་བར་མི་
འགྱུར་ལ། རང་འདོད་པ་ནི་མ་གཏོགས་སོ། །གལ་ཏེ་འདོད་ན་ཉིན་མཚན་རེ་རེ་བཞིན་བྱའོ། །ཅི་སྟེ་མི་འདོད་ན་ཐལ་བ་ལ་ལན་བདུན་སྔགས་ནས་ལྟེ་བའི་ཕྱོགས་སུ་བསྐུས་ན་ཞག་བདུན་ཕྲག་གསུམ་དུ་ས་བོན་བསྡོམ་པར་འགྱུར་རོ། །ཞེས་གསུངས། ཁུ་བ་བསྡམ་
པ་འདི་ཐབས་ལམ་སྐབས་མིན་ཀྱང་སྔགས་སྒྲུབ་པ་སོགས་ཀྱི་དུས་དང་རྒྱུན་དུ་ཡང་གལ་ཆེ་བ་ཡིན་ནོ། །ཁམས་བརྟན་པར་བྱེད་ཅིང་ཐིག་ལེ་འཛིན་པའི་སྐབས་ཏེ་གཉིས་པའོ། །ད་ནི་བདེ་གསང་རྟགས་ཀྱི་གནས་བདེ་བའི་ལས་སུ་རུང་བར་བྱེད་པའི་ཐབས་བཤད་དེ། 
དང་པོར་ཡབ་ཀྱི་རྡོ་རྗེ་འགྲེང་བ་དང་སྦོམ་པ་སོགས་ཀྱི་ཐབས་ལ། སྦྲང་རྒོད་ཐང་ཕྲོམ་ཁ་ཤོག་པའི་འབྲས་བུ་གཉིས་ཞོ་རེ་ཞིབ་བརྡུང༌། ར་ཚིལ་དང་དངུལ་ཆུ་བཏུལ་མ་བཅས་བསྡུས་པའི་རིལ་བུ་སྲན་ཙམ། འབྲི་མར་རྙིང་བ་དང་སྦྱར་ནས། ཉིན་མོ་རྡོ་རྗེ་ལ་ཡང་ཡང་
བྱུག་སྟེ་མཉེ་ཞིང་ཉི་མའམ་མེ་ལ་བསྲོ། ཁོང་དུ་བདེ་བ་འཕེལ་བའི་རྫས། ད་བྱིད་མཆིལ་ཤ་སྡིག་སྲིན་གསུམ་ཞོ་རེ་ཆ་མཉམ་ཞིབ་བཏགས་སྦྲང་རྩིར་སྦྱར་བ། རྒྱ་ཚྭ་དང་ལྕམ་པའི་ཆུ་ལ་སྦྱར་ནས་ནང་མོ་ལྟོ་སྟོངས་བཏང་ནས་དེའི་ནུབ་མོ་སྦྱོར་བ་བྱས་ན་རྡོ་རྗེ་གློ་བ་
ལྟར་བརྒྱངས་ནས་པདྨ་ཁེངས། བདེ་ཆགས་མི་བཟོད་པ་སྐྱེ་བར་འགྱུར་རོ། །ཕྱིར་མི་དབྱུང་བར་འཐོག་ན་བྱང་བུ་ལ་རྒྱ་སྐེག་ཚ་ལ་གསུམ་ཞོ་རེ་ཞིབ་བཏགས་ཞུ་མཁན་ཆུར་སྦྱར་རིལ་བུ་སྲན་མ་ཙམ་ཁོང་དུ་བཏང་བས་འཐོན་པར་འགྱུར་རོ། །ཞེས་གཏེར་མའོ། །
13-5-22a


ཡང་འོད་ལྡན་ག་པར་གླ་རྩི་ཤིང་ཚ་རྣམས་བུད་མེད་ནུ་ཞོར་སྦྱར་ཏེ་རྡོ་རྗེ་ལ་བྱུག་ན་ཆེ་ཞིང་བདེ་བ་སྐྱེད། ཡང་མོན་སྲན་དཀར་ནག་སྲན་ཆུང་གསུམ་ཞིབ་བཏགས་ཕྱེ་མ་མི་ཡི་རྐང་མར་སྦྱར། གསང་རྡོར་བྱུག་ན་ནམ་དགོས་ལས་སུ་རུང༌།
དེ་ལ་གི་རི་ཧི་རི་སོགས་སྔགས་བརྒྱ་རྩ་བརྒྱད་ཀྱིས་གདབ་པར་བྱའོ། །སྔགས་དེ་ནི་རྫས་ཐམས་ཅད་ལ་བཏང་ཡང་ལེགས་པ་སྐབས་ཐམས་ཅད་དུ་མ་སྨོས་ཀྱང་ཤེས་པར་བྱའོ། །ཡང་མོན་སྲན་གྲེའུ་གཟེ་མ་ད་བྱིད་གསུམ་ཕུག་རོན་བྲུན་དང་སྦྱར་ཏེ་གསང་རྡོར་ལ་
བྱུག་པས་མི་ཉམས་པར་འགྲེང་བར་བྱེད་དོ། །ཡང་སྨན་དེ་གསུམ་པ་མར་དང་སྦྱར་ཏེ་ལྟོ་སྟོང་ལ་བཏུང་བར་ཡང་བྱའོ། །ཡང་ཐལ་རྡོར་མི་ཀླད་བུ་རམ་གུར་གུམ་གསང་རྡོར་ལ་བྱུག་པའམ། ག་བུར་ཏིལ་ཙམ་ལོང་ཐང་རྩ་བ་རིལ་མ་ཙམ་སྦྱར་བསྐུས་སམ། སྦྲང་
རྒོད་ཁྱི་དཀར་རྡོ་རྗེ་ཤིང་ཀུན་རྣམས་མར་དཀར་དང་སྦྱར་ཏེ་སྔགས་བཏབ་གསང་རྡོར་ལ་བྱུག་ན་ལོ་དགུ་བཅུ་ལོན་པས་ཀྱང་མཚན་ལྡན་མ་བརྒྱ་ལ་སྤྱོད་ནུས་པར་འགྱུར་རོ། །ཞེས་དང༌། ཡང་ལྕམ་པའི་རྩ་བ། མོན་སྲན། ཁྱི་དཀར་རྡོ་རྗེ་སྐམ་པའི་ཕྱེ་བཅས་ཟླ་དྲུག་བར་
དུ་རྡོ་རྗེ་ལ་བྱུག་ན་ཤིན་ཏུ་ལས་སུ་རུང་ངོ༌། །ཡང་ས་བོན་ཁྱི་དཀར་འབྲས་བུ། སྦྲང་སྨྱོན་ལ་གི་རི་སོགས་སྔགས་བཏབ་རྡོ་རྗེར་བྱུག་པས་བདེ་བ་ཆེ། ཡང་དྷ་ཏུ་ར། མར་གསར། ཕག་ཚིལ། པི་ལིང༌། བ་སྤུ་རྣམས་ཀྱིས་ལིང་ག་ལ་བྱུག་སྟེ་མཉེས་ན་ཞག་
གསུམ་སོགས་ནས་འཕེལ། པདྨ་ལ་ཡང་དེ་དང་འདྲ་ཞེས་རྒྱུད་ལས་སོ། །ཡང་གླང་གི་རྭ་གྱེན་དུ་སྐྱེས་པ་བླང་ནས་བརྡར་ཏེ་ལིང་གར་བྱུག་ན་གྱེན་དུ་ལྡང་བར་བྱེད་ཅེས་རྒྱུད་ལས་སོ། །ཡང་མ་ནུ་པུ་ཤེལ་རྩེ། ཏིལ་དཀར། ནཱ་ག་གེ་སར་སྦྲང་རྩི་མ་ཧེའི་མར་
13-5-22b


གསར་རྣམས་ཀྱིས་ལྟེ་བར་བསྐུ་བའམ་ཕོ་མཚན་དྲིལ་ཕྱིས་བྱས་ན་ངེས་པར་འཕེལ། སླར་ཞི་འདོད་ན་ཆུ་དྲོན་གྱིས་རྫས་བཀྲུ་བ་ཀུན་ལ་ཤེས་པར་བྱའོ། །ཡང་དེ་བཞིན་ལིང་ག་ལ་རྔ་མོང་གི་ཆུས་བཀྲུས་པས་ཀྱང་འཕེལ་ལོ། །ཡང་དགོངས་འདུས་ཨོཾ་རྒྱ་ཅན་ན་
མི་རྟ་ཁྱི་གསུམ་ས་བོན། སྨྱུག་མའི་སྦུ་གུ་མཐོ་གང་བ་གཅིག །དབང་ལག །ག་བུར། གཡག་ལུག་ར་གསུམ་རླིག་འབྲས། བཟང་དྲུག་ཐུན་རེ་བུར་སྦྲང་བསྐོལ་བའི་དབུ་བ་སྦྱར་བའི་རིལ་བུ་སྲན་འཕོས་ཙམ་ཁྱེའུ་སུས། གསུམ་རེ་བསྟེན་པས་དབང་རྡོར་
ལྕགས་ཕུར་ལྟར་ལས་སུ་རུང་ཡང་འབྲས་བུ་གསུམ་ཆ་མཉམ་གདུས་ཁུ་དྲོ་འཇམ་ནང་དབང་རྡོར་ཅུང་སྦང༌། ཁྱི་ར་མི་འོ་གསུམ་བསྐོལ་བར་འབྲི་མར་ཁ་ཚ་བའི་ཞུན་སྦྱར་བས་རྡོ་རྗེར་བྱུག་ལ་ཉི་མར་བསྲོ་འཕུར་བྱ། དེ་ནས་ཁྱི་དང་བོང་བུའི་ཕོ་མཚན་སྐམ་པའི་ཕྱེ་
མ་ཐུན་རེ། གཡེར་མ་ཐུན་གཅིག །སྤོས་དཀར་ཐུན་གཅིག །སྐྱོན་གྱིས་མ་གོས་པའི་བྱང་སེམས་དཀར་དམར་ཅུང་ཟད། འབྲས་བུ་གསུམ་གྱི་སྙིང་པོ་བདུན་རེ། བྱ་ངང་སེར་གྱི་ཁྲག་ཅུང་ཟད། མགྲོན་བུ་བསྲེག་ཐལ་ཐུན་གཅིག །ཚྭ་ལ་ཐུན་གཅིག་
རྣམས་ཞིབ་བཏགས། ཆང་ནར་སོན་གྱི་སྙིང་ཁུར་སྦྱར། མོ་གསར་འོ་མ་ཆང་གི་ཕྱེད་ཙམ་སྦྱར་བའི་ལྡེ་གུ་ཞོ་ཙམ་བྱས་པར། ལུག་རུ་སེར་པོ་ཐུན་གཅིག །ཕབ་རྩི་ཐུན་ཕྱེད་ཙམ་བཏབ། རླང་ཐོན་ཙམ་བསྲོས་པ་དབྱར་ཡིན་ལ་ཞག་གསུམ། དགུན་
ཞག་ལྔ་དྲོ་སར་བྱིབས་ལ་བསྙལ། དེ་ནས་དབང་ལག་གི་ཕྱེ་བསྲེས་པའི་རིལ་བུ་ཁམ་ཚིལ་ཙམ་དྲིལ་ལ། བུད་མེད་ཀྱིས་མ་མཐོང་བར་བྱ། ལས་སྦྱོར་དུས་རིལ་བུ་གཅིག་རང་གི་ཁར་སྦང་བའི་སྐྱོ་མ་རྡོ་རྗེ་ལ་བྱུག་ལ་སྐམ་ནས་སྤྱད་པས་རྡོ་རྗེ་སྦོམ་རིང་མཁྲང་ཞིང་
13-5-23a


བདེ་བ་འཕེལ་བར་འགྱུར་རོ། །ཞེས་གསུངས་སོ། །ཞར་བྱུང་དུ་མ་ནུ་སྒ་སྐྱ་བྱང་བུལ་གསུམ་ཡུང་བའམ་ཡུངས་ཀར་སྦྱར་བ་དར་བས་འཕུལ་ཏེ་བཏང་ན་ཆགས་པས་ཧ་ཅང་གཡོ་བ་ཞི་བར་བྱེད། རྫས་འདི་ཆུ་བསྐོལ་བཏབ་བཏང་ཕོ་ལ་བྱིན་ན་རང་གི་
བུད་མེད་ལའང་མི་ཆགས་པར་འགྱུར་རོ། །ཞེས་གསུངས། ཡང་རྡོ་རྗེ་ཧ་ཅང་ཆེ་བ་ཆུང་བར་འདོད་ན། སྲན་མའི་མེ་ཏོག །ལུག་གི་བུ་སྣོད། རྟ་ཡི་སྲེ་ལོང་ངམ་ཤ་མ་སྐམ་བརྡུང་བུ་མོ་ལོ་བརྒྱད་པའི་ཆུ་དང་སྦྱར་ཏེ་ཁོང་དུ་བཏང་ན་རྡོ་རྗེ་ཤིན་ཏུ་ཆུང་བ་དང་མི་ལྡང་བར་ཡང་
འགྱུར། ཡང་རྡོ་རྗེ་འགྲེང་ནས་ཞིར་མ་བཏུབ་ན་བུད་མེད་ཀྱི་དྲི་ཆུས་བཀྲུས་པས་མི་ལྡང་ངོ༌། །བུད་མེད་ཀྱི་པད་རཀ་ཁོང་དུ་བཏང་ན་དེས་མི་ལྡང་བ་སོགས་བཤད་དོ། །ཡང་ནས་ཕྱེ་བ་ཆུ་སྤོས་དཀར་ཤིང་མངར་མར་གྱིས་ཕོ་མོ་སུའི་ལུས་དྲིལ་ཕྱིས་བྱས་ན་བཟང་པོར་འགྱུར་ཞིང་
དེ་སྟེང་སྦྲང་དང་ཞོ་ཟོས་ན་ཁམས་འཕེལ་ཞེས་རྒྱུད་ལས་སོ། །ཡང་ད་བྱིད་མཆིལ་ཤ་མི་ཤ་ཐང་ཕྲོམ་འབྲས་བུ་རྡོ་རྗེ་ལ་བྱུག་ན་འགྲེང་ཞིང་བདེ་བ་ཆེ་ཞེས་གཏེར་མ་ལས་སོ། །ཡང་བྱ་ཕོའི་ཀླད་པ་གླ་རྩི་ཤིང་ཚ་རྣམས་ཞིབ་བཏགས་བུད་མེད་ཀྱི་ནུ་ཞོར་སྦྱར་ཏེ་རྡོ་རྗེ་ལ་བྱུག་ན་ཆེ་
ཞིང་སྦོམ་པར་འགྱུར་རོ། །ཡང་ཐང་ཁྲོམ་རྩ་བ་གླ་རྩི་ཤུ་དག་ཤིང་ནག་པགས་པ་སྔོན་པོ་བོང་བུའི་ཀླད་པ་ཆ་མཉམ་མཛོ་མོའི་འོ་མར་སྦྱར་ནས་བྱུག་ཀྱང་དེ་བཞིན་ནོ། །ཡང་འོད་ལྡན་ནས་ཟན་ཀླད་པ་བུ་རམ་བ་མར་སྦྱར་བ་སུས་ཟོས་ཕོ་མོ་གང་ལའང་བདེ་བ་སྐྱེ་ཞིང་
ཕན་པ་ཆེ་ཞེས་འོད་ལྡན་རྒྱུད་ལས་སོ། །ཡང་པདྨ་དཀར་པོའི་གེ་སར། སྦྲང་བཅས་བཏགས་པ་ལྟེ་བར་བསྐུས་པས་ཕོ་ཡི་ལིང་ག་བརྟན། བུད་མེད་ཡིན་ན་ཆགས་པ་སྲ་བ་རྣམས་ཀྱང་ཆགས་པས་ཁུ་བ་འཛག་པར་བྱེད་དོ། །ཞེས་རྒྱུད་ལས་སོ། །ཡང་ག་པར་ཚ་ལ་དངུལ་ཆུ་གླང་པོ་པི་
13-5-23b


ལིང་སྦྲང་རྩིས་རྟགས་བྱུག་ན་བུད་མེད་རྣམས་ཆགས་ཟིལ་འཛག་པར་བྱེད་དོ་ཞེས་རྒྱུད་ལས་སོ། །ཡང་དཔའ་བོ་ཆིག་ཐུབ་ཏིལ་མར་སྦྱར་བ་ལྟེ་ཁུང་དུ་བྱུག་པས་འདོད་པ་སྤྱོད་ནུས་ཞེས་རྒྱུད་ལས་སོ། །ཡང་དཔའ་བྱེད་ཤིང་ཞེས་པའི་ཤིང་བུ་ཅུང་ཟད་མུར་བས་འདོད་པ་སྤྱོད་པའི་
སྤོབས་པ་ཆེན་པོ་སྒྲུབ་པར་བྱེད་དོ། །ད་ནི་ཕྱག་རྒྱའི་པདྨ་ལ་ཕན་པ་སྒྲུབ་པའི་ཐབས་བཤད་དེ། ཆག་པ་དང་བྱེ་ལེབ་ཀྱི་ཕྱེ་མ་བཏབ་ན་སྐྱེ་གནས་དམ་ཞིང་མཁྲང་པར་བྱེད་དོ་ཞེས་རྒྱུད་ལས་སོ། །དེ་བཞིན་ལྕུམ་རྩ་བརྡུང་བ་པདྨར་བསྐུས་ན་དམ་པར་འགྱུར། ཡང་བྱི་ལའི་གཞང་
ཚིལ་ཁོ་ནའམ། དེ་སྟེང་བྱེའུ་དང་ཕུག་རོན་གྱི་ཤ་ཁུ་བཅས་པདྨར་བསྐུས་ན་ཆུང་ནས་ཟུམ་པར་འགྱུར་ཏེ། གི་རི་ཧི་རི་སོགས་སྔགས་ཀྱང་ལན་བདུན་གདབ་པར་བྱའོ་གསུངས་སོ། །ཡང་ཁྱིམ་བྱའི་ཚིལ་བུ། བྱེའུའི་ཤ ཏིལ་མར་སྦྱར་བ་པདྨར་བསྐུས་ན་ཆེ་བའང་
ཟུམ་ནས་དམ་པས་ཐིག་ལེ་བཀག་པར་འགྱུར་རོ། །ཡང་སྤང་རྒྱན་ལུག་མིག་ཐང་ཕྲོམ་འབྲས་བུ། ཁྱི་ནག་རུས་པ་དོམ་མཁྲིས་བྱ་སྒོང་གི་སེར་ཐིག་རྣམས་པདྨར་བྱུག་པས་ཁ་བསྡམ་པར་འགྱུར་རོ། །འགྲོལ་ན་སྔགས། སུ་ཁ་ཕྱེ་སྭཱ་ཧཱ། ཞེས་བཟླས་ལ་བྱུག་གོ། ཡང་
རྟག་ངུ༌། བྱི་ལའི་གཞང་ཚིལ། བྱེའུས་༼རྩར་བྱེའུ༽ཏ་ཐོད་དཀར་གྱི་ཤ་རྣམས་མར་དང་སྦྱར་ཏེ་རྡོ་རྗེར་བྱུག་ནས་སྤྱད་ན་བྷ་ག་ཤིན་ཏུ་དམ་པར་འགྱུར་རོ། །ཡང་པདྨ་ཁ་སྡོམ་གྱི་མན་ངག་ཁྱད་པར་ཅན་གཏེར་མ་ནི། ཨུག་ཆོས་ཤང་དྲིལ་སྤང་རྒྱན་གླང་སྣའི་མེ་ཏོག་བཞི་ཁམ་ཕྱེ་ཙམ་
ན་བཏུས་ལ། དེ་རྣམས་དང་ཁྱིམ་བྱ་ཕོའི་ཨོག་ཞོལ་དང་རྒྱ་ཚྭ་ཐུན་གཅིག་རྣམས་ཆང་གར་མར་བཏབ་སྟེ་ལྟོ་སྟོང་ཁོང་དུ་བཏང་བའི་བུད་མེད་དེའི་བྷ་ག་ཤིན་ཏུ་ཡངས་པ་དག་ཀྱང་ཟུམ་ནས་རྡོ་རྗེས་མི་འབྱེད་པ་ཙམ་དུ་འགྱུར་རོ། །དེ་ལ་སྔགས་འདི་བཏབ་ན་ནུས་པ་
13-5-24a


ཁྱད་པར་དུ་འཕེལ་ཏེ་སྔགས་ནི། ར་ཏི་ཐཾཿ ས་ཏི་ཐཾཿ ཀ་ཏ་ཐཾཿ མ་ཧཱ་མུ་དྲ་ཁ་ཐཾཿ ཞེས་རྫས་ལ་བཏབས་སོ། །གལ་ལྟེ་རྡོ་རྗེས་ངེས་པར་མ་ཕིག་ན། པདྨ་ཁ་འབྱེད་ཀྱི་མན་ངག་གོང་གི་མེ་ཏོག་རྣམས་ཁ་ཕྱེ་བའི་དུས་སུ་བཏུས་པ་དང༌། བྱ་ཕོའི་ཟེ་བ་རྒྱ་
ཚྭ་རྣམས་ཆང་སྦྱར་བཏང་བས་ཁ་འབྱེད་པར་འགྱུར་རོ། །ཡང་རྟག་ཏུ་ག་པར་གླ་རྩི་ཤིང་ཚ་པི་ལིང་བརྡུང་བ་བུད་མེད་ནུ་ཞོར་སྦྱར་ཏེ་རྡོ་རྗེར་བྱུག་ན་གང་སྤྱད་བྱའི་བྷ་ག་ཡངས་ལ་དྲོད་ཆེ་བར་འགྱུར་རོ་ཞེས་འོད་ལྡན་རྒྱུད་ལས་སོ། །ཡང་བདེ་བའི་རྩ་ཁ་འབྱེད་པར། སྦྲང་
སྨྱོན། ཟོ་ཤེ། ཁྱི་དཀར་ཕོ་མཚན། ཏི་གུ་ལམ་སྐྱེས་མ། ལྡུམ་བུ་རེ་རལ། རྒྱ་གཡེར། རྒྱ་ཚ་ཞིབ་བཏགས་རྡོར་པད་ལ་བྱུག་པས་འགྲུབ་བོ་ཞེས་གཏེར་མའོ། །ཡང་སྣ་མའི་མེ་ཏོག་དང་ཏིལ་བཏགས་པས་ཁྲུས་བྱས་ན་བྷ་ག་སོགས་སྟེང་དུ་མཐོ་བར་བྱེད་ཅེས་
རྒྱུད་ལས་སོ། །ཡང་མ་ཧེ་ཕག་དང་གླང་ཆེན་དང་ཀ་རྐ་ཊ་ཡི་ཞག་ཚིལ་གྱིས་ནུ་མ་སོགས་མཉེས་ན་འཕེལ་ཞེས་རྒྱུད་ལས་སོ། །ཡང་པདྨའི་གེ་སར། ཨུཏྤལ་ཟེ་འབྲུ། པད་རྩ།༼པ་ཤེས་རྩེ༽ཨུ་ཤི་ར། མོན་ལུག །ཏིལ་རྣམས་མར་དུ་བཙོས་པས་བྷ་ག་དང་ལིང་གར་
བྱུག་ན་དག་ཅིང་དྲི་ང་བ་དང་ལྷོད་པ་དང་ནད་སོགས་འཇོམས་ཞེས་རྒྱུད་ལས་སོ། །ཡང་ནིམ་པའི་ཤུན་པའི་ཁུ་བས་བྷ་གར་ཁྲུས་བྱས་ནས་ནིམ་ཤུན་བདུག་ན་གཞོན་པ་དང་དྲི་བཟང་བ་དང་སྐལ་པ་བཟང་པོའི་ཡོན་ཏན་དང་ལྡན་པར་འགྱུར་རོ་ཞེས་རྒྱུད་ལས་སོ། །
ཡང་བ་བླ་ཆ་ལྔ། ཀིཾ་ཤུ་ཀ༼རྒྱ་སྐག་ཤིང་ཐལ་༽ཀྵ་ར་ཆ་གཅིག །ཡ་བ་ཀྵ་༼ནས་ཚིགས་༽ར་ཆ་གཅིག །ཆུ་ཤིང་ཀྵ་༼ཐལ་བ་༽ར་ཆ་གཅིག་རྣམས་ཆུ་ནང་མཉེས་ནས་བྱུག་པས་བྷ་ག་དང་མཚན་མ་སྐྱེ་གནས་ཀྱི་སྤུ་ཉུང་བར་བྱེད། དེ་དང་སྦྲུལ་མཇུག་གི་ཕྱེ་བསྲེས་ཏེ་ཚ་བའི་ཏིལ་མར་དུ་
13-5-24b


ཞག་བདུན་བཞག་ལ་དེ་ཡིས་ལིང་ག་སོགས་མཉེས་ན་སྤུ་མི་འབྱུང་ངོ༌། །ཡང་བ་བླའི་རྩ་བ་ཆུར་བཏགས་འཐུང་ན་ཁྲག་འཛག་པ་ཆད། ཡང་འོད་ལྡན་བུ་རམ་ཟླ་མཚན་སྦྱོར་བ་ཟོས་ན་བུད་མེད་ཀྱི་ཁྲག་འགོག་པར་བྱེད། ཡང་དངུལ་རྡོ་འམ་ལྕགས་རྡོའམ་བྲག་ཞུན་གང་
རུང་མར་དང་སྦྱར་ཏེ་ཟོས་ན་བུད་མེད་ཀྱི་ཟླ་མཚན་དུས་མིན་འབྱུང་བ་ཐུབ་བོ། །དེ་དག་ནི་རྡོ་རྗེ་དང་པདྨའི་བྱ་བའི་སྐབས་ཏེ་གསུམ་པའོ། །ད་ནི་མཚན་ལྡན་མའི་དམར་ཆ་འདྲོང་ན་མཆོག་ཐུན་གྱི་དངོས་གྲུབ་འགྲུབ་པས་དེའི་ཐབས་བཤད་པར་བྱ་སྟེ། དེ་ལ་གཙོ་བོ་ནི་རླུང་སྦྱོར་གྱིས་
ཁམས་འཛིན་འདྲེན་འདྲོང་ནུས་པ་དགོས་ལ། དེའི་གྲོགས་སུ་ཐབས་ཀྱི་ཡན་ལག་ཀྱང་འདི་ལྟ་སྟེ། དང་པོ་ཕྱག་རྒྱ་མའི་དབུ་མའི་མར་སྣེ་བྷ་གའི་ནང་ན་རྩ་ཀ་ཀ་མུ་ཁ་སྟེ་བྱ་རོག་གདོང་ཞེས་བྱ་བ་དེ་རྙེད་ན་ཡབ་ཡུམ་ལ་བདེ་བ་ཆེས་ཁྱད་པར་དུ་སྐྱེ་ཞིང་དེའི་རྩ་སྣེ་རང་གི་རྡོ་རྗེའི་
བུ་གར་ཚུད་པ་ཙམ་གྱིས་དངོས་པོའི་སྟོབས་ཀྱིས་རང་གི་དབུ་མའི་སྒོ་རང་བྱེ་བས་ཡོན་ཏན་ཚད་མེད་འཐོབ་པ་དང༌། དེ་ལས་དམར་ཆ་དྲོང་ན་རང་ལུས་བྱེ་རུ་སྣུམ་གྱིས་བསྐུས་པ་ལྟར་བཀྲག་མདངས་ལྡན་ཞིང་ཚེ་དང་ལུས་ཀྱི་བཅུད་ལེན་དང༌། དངོས་གྲུབ་གཉིས་ཚེགས་མེད་པར་
འགྲུབ་པས་དང་པོར་རྩ་དེ་ངོས་ཟིན་པ་གཅེས་ཏེ་དེ་ནི་པདྨའི་ཁ་ནས་གཏིང་དུ་སོར་གཉིས་ནས་བརྒྱད་ཀྱི་བར་གང་རུང་ན་ཡོད། ཕྱག་རྒྱ་ལང་ཚོ་དང་ལྡན་པ་རིགས་བཟང་བ་ལ་མངོན་ཆེ། ཁ་ཅིག་གི་བྷ་གའི་དབུས་དང༌། ཁ་ཅིག་ལ་གཡས་གཡོན་རྒྱབ་མདུན་སོགས་སུ་
དབྱིབས་དང་རིང་ཐུང་སྦོམ་ཕྲ་མ་ངེས་པ་ཡོད་པས། དེ་ལ་རྡོ་རྗེས་ནམ་རེག་ན་ཕྱག་རྒྱ་མས་མི་བཟོད་པར་བདེ་འཁུན་བྱེད་པ་འོང༌། རང་གི་རྡོ་རྗེའི་རྩེར་ཡང་ཧྲུད་ཧྲུད་བྱེད་སྙམས་པ་ལྟ་བུ་འོང༌། དེ་མཐོང་བའམ་རེག་པའི་སྒོ་ནས་ལག་རྡེའུ་འཕྲོད་པར་བྱ། དེ་ཡང་ཡུན་
13-5-25a


རིང་ཆགས་པ་བསླང་བ་དང་སྦྱོར་ཐབས་སྣ་ཚོགས་སོགས་ཀྱིས་རྩ་བསླང་ནས་མངོན་པར་འོང་བ་ལས་དུས་རྒྱུན་ཕལ་ལ་མངོན་དུ་མི་སྣང༌། རྩ་དེ་གཏེམ་པའི་འཁྲུལ་འཁོར་གྱི་ཐབས་ཀྱིས་བཙལ་བ་ནི། ཤོ་མང་འཆང་བ་སོར་དྲུག་ནང་སྟོང་གསང་
རྡོར་ཚད་ཙམ། རྩེ་ཆུང་ཕྲ་བ། རས་སམ་བལ་གྱིས་ནང་བརྫངས། ལུག་གི་ལྟོ་ཚིལ་ལམ་མར་གྱིས་ཕྱི་ནས་བྱུག་ལ་དེ་གཤང་ལམ་དུ་བརྫང༌། མ་རྙེད་ན་རས་བལ་སོགས་འཇམ་པོས་བྱ་མཁལ་ཁུང་གཉིས་སུ་དར་རྡོ་ཁུ་ཚུར་ཙམ་རེ་བཅུག་ལ་དར་ཐག་གིས་བསྡམ།
རྒྱབ་ནས་རྟ་སྒ་བརྟད་ལ་གན་རྐྱལ་བཞག་པས་མཁའ་གསང་ནང་དུ་ནུབ་ནས་གསང་གནས་གཡས་གཡོན་ནུ་མ་ལྟར་འབུར་འོང་བས་དེའི་ཚེ་རྩ་དེ་མིག་གིས་མཐོང་བར་ཕྱིར་དོན་འོང་བས་བྷ་ག་ནང་བལྟ་བར་བྱའོ། །མིག་གིས་མ་མཐོང་ཡང་སོར་མོས་རེག་དུ་རུང་བའམ་རྡོ་
རྗེས་རྙེད་པར་འགྱུར་རོ། །དེའི་རྩ་སྣེ་ནི་དབྱིབས་པད་སྣལ་ལྟར་ཕྲ་བ། མདུང་རྩེའམ་རལ་གྲི་ལྟར་རྣོ་བ། མེ་ལོང་ངོས་ལྟར་འཇམ་པ་རིང་ཐུང་སྦོམ་ཕྲ་མ་ངེས་པ་འོང༌། རྩ་དེ་རྙེད་ཚེ་དེའི་རྩ་སྣ་ཁབ་ལྟ་བུ་རང་གི་རྡོ་རྗེའི་བུ་གར་ཚུད་པར་བྱས་ལ་མི་འབྲལ་བར་དལ་བུས་
གཏེམ་པས་བདེ་བ་ཆེན་པོའི་རང་བཞིན་གྱིས་དབུ་མའི་སྒོ་འབྱེད་པར་འགྱུར་ཏེ། འདི་དུས་དལ་བུས་བག་དང་ལྡན་པར་མ་བྱས་ན་ཕྱག་རྒྱ་རྩ་བཟང་ཞིང་བདེ་ཆགས་ཆེ་བའི་རིགས་ལ་བདེ་བ་ཆེས་འབར་བས་སྲོག་གི་རྟེན་ཨ་ཧཾ་ཞུ་ནས་སྐད་ཅིག་དེར་ཚེའི་དུས་བྱེད་
པར་གསུངས་པས་ཚོད་དང་བསྟུན་པར་བྱའོ། །རྩ་དེ་ཁ་འབྱེད་པའི་སྨན། རེ་རལ། རྟག་ངུ༌། བྲག་ཞུན། སྦྲ་རྩི། མགྲོན་བུ་མ་བསྲེག་པ། རྒྱ་ཚ་རྣམས་ཞིབ་བཏགས་རིལ་བུ་ར་རིལ་ཙམ་ལྟོ་སྟོང་ལ་ཕྱག་རྒྱ་མའི་ལྟོ་བར་བཏང་བས་རྩ་ཁ་འབྱེད་དོ། །
13-5-25b


ཡང་བྱ་སྒོག་ཁྱི་སྒོག་རེ་རལ་ཐ་རམ་སྔོ་རྩི་༼གཡེར་མ༽གླང་བུ་ལང་ལང་རྣམས་ཞིབ་བཏགས། ཏིལ་མར་གུར་གུམ་རིལ་བུ་ར་རིལ་ཙམ་པདྨར་བཅུག །མར་གསར་སྦྱར་ཏེ་མོས་བཏུང་བས་རྩ་ཁ་འབྱེད་པར་འགྱུར་རོ། །ཡང་ན་མོ་རང་ལ་ལྟོ་སྟོང་ལྕམ་གཡེར་རིལ་བུ་བཏང་ཡང་
འགྲུབ། དེའི་རྩ་སྣེ་རིང་བར་བྱེད་པའི་ཐབས་ལ། ཨུག་ཆོས་རྩ་བ། ར་དཀར་འོ་མ། སྦྲང་རྩི། རྩི་མར། ཀ་ར། དུར་བྱིད་སྦལ་བའི་ཤ་ཚིལ་རྣམས་སྦྱར་ལ་མཚན་མའི་ཕུགས་སུ་བཅུག་པས་རྩ་རིང་བར་བྱེད། གོང་གི་རིལ་བུ་རྣམས་
པདྨར་བཅུག་པས་རྩ་མི་འཆོར་རོ། །ཡང་ན་ཨུག་ཆོས་དཀར་པོའི་རྩ་བ་ར་འོ་འམ་སྦྲང་སྦྱར་རྩ་སྣེར་བྱུག་པས་སྣ་རིང་བར་བྱེད་དོ། །ཕྱག་རྒྱའི་ཁམས་དམར་ཆ་དྲངས་ཐབས། དགོངས་འདུས་ཨཱཿརྒྱ་ཅན་ལས། རྡོ་ཁབ་ལེན་ཞོ་གསུམ་ནང༌། ཨ་རུ་
གསེར་མདོག་རྡོག་གཅིག །ཀ་ར་ཐུན་གཅིག །ཙན་དན་དཀར་པོ་ཧ་ཤིག །སྲན་མའི་མེ་ཏོག་རྣམས་རེ་རེ་ནས་ཐུན་རེ་ཞིབ་བཏགས། སྐྱེས་དར་མའི་ས་བོན་དང་སྦྱར་བའི་༼བུ་རམ་༽རིལ་བུ་བྲ་རིལ་ཙམ་མོ་རིགས་ཀྱིས་མ་མཐོང་མ་རེག་པར་བྱས་ལ། ཉམས་ལེན་དུས་
ནང་སྔ་ཐོ་རངས་རིལ་བུ་གསུམ་༼ཆང་གིས་ཕུལ་༽རེ་ཡབ་ཀྱིས་བསྟེན། ལྕགས་ཕྱེ་ཞོ་གསུམ། སྦལ་རྒྱབ། ག་པར། ཙན་དན་དམར་པོ། གཙང་གཡེར། ལྕམ་པའི་མེ་ཏོག་རེ་རེ་ནས་ཐུན་གཅིག་ཞིབ་བཏགས་སྦྲང་སྨྱོན་སྣུམ་མེད་སྦྱར་ཏེ་སྐྱེས་པ་གཞན་སུས་མ་
མཐོང་མ་རེག་པར་བྱས་ལ་༼ལྕམ་གཡེར་ཐང་གིས་༽ཕྱག་རྒྱ་མོ་ལ་བླུད། ཡབ་ལ་རྩ་སྡོམ། ཡུམ་ལ་རྩ་འབྱེད་ཀྱི་སྨན་བརྟེན་ཏེ་དྲངས་པས་དམར་ཆ་འདྲོང་ངོ༌། །འདི་དག་རྫས་ཀྱི་ནུས་པས་ཀྱང་ཅུང་ཟད་འདྲོང་བར་འགྱུར་ཏེ། དཔེར་ན་ཉམས་མཚར་དུ། འོ་མ་ལ་ལྕགས་ཕྱེ་བཏབ།
13-5-26a


ནོར་བུའི་བུ་གར་རྡོ་ཁབ་ལེན་གྱི་རིལ་བུ་བཅུག་ནས་འོ་མར་ཁར་གཏུག་ན་འཐུང་བར་བྱེད་པས་ཤེས་སོ། །ཡང་དེ་ལྟར་ཆེད་དུ་དྲངས་པའི་སྐབས་མིན་ཡང༌། འོད་ལྡན་དབང་ལག་ར་མཉེ་ཉེ་ཤིང་རྡོ་ཁབ་ལེན་རྣམས་ཕོ་མོ་གང་རུང་ལ་བཏང༌། ཅིག་ཤོས་དེས་ལྕགས་
ཁུ་འཐུང་བས་ལྕགས་ཅན་དེའི་བདེ་བ་ཁབ་ལེན་ཅན་ལ་འདུ་ཞིང་ཤ་བཀྲག་རྒྱས། ཏིང་འཛིན་གསལ་བ་འབྱུང་སྟེ་ཕོ་མོ་ཕན་ཚུན་སུ་འདོད་བཞིན་བྱ་སྟེ་རྟེན་འབྲེལ་གྱི་གནད་ལ་ཡིད་ཆེས་པའོ། །དམར་ཆ་དངོས་སུ་འདྲེན་པའམ་ཆ་མཐུན་ཙམ་བྱ་བ་ཡང༌། ཕྱག་རྒྱ་མ་ནད་མེད་པ། 
ཤིན་ཏུ་གཞོན་དར་བདོ་བ། མཛེས་པ། རིགས་བཟང་བ། སྐྱིད་པ་རྣམས་ལ་བྱའི། དེ་ལས་ལྡོག་པ་གཞན་ལ་མི་བྱ། འདྲེན་པའི་ཚེ་པདྨའི་རྩ་ནས་དམར་ཆ་རྡོ་རྗེའི་བུ་ག་ནས་ཆི་ལི་ལི་དྲངས་ཏེ་རང་ལུས་ཀྱི་རྩ་སྦུགས་ཁྱབ་པར་དམིགས་ལ། རླུང་གྱེན་དུ་དྲངས། ཧཱུཾ་བརྗོད་
འཁྲུལ་འཁོར་བྱས་པས་དྲོངས་རྟགས་རང་ལུས་བདེ་དྲོད་ཆིལ་ཆིལ་བ་སོགས་རྟགས་རྣམས་འབྱུང༌། དེས་རང་གི་ལུས་མདངས་དང་ཚེ་སོགས་འཕེལ་ཏེ་རྒྱས་པར་གཞན་དུ་ཤེས་པར་བྱའོ། །དམར་ཆ་དངོས་སུ་དྲོངས་ན་ཕྱག་རྒྱ་མོ་ལུས་མདངས་ངན་སྙིང་སྟོབས་ཤོར་བ་སོགས་འབྱུང་བས། 
དེའི་ལུས་སྟོབས་གསོ་བ་དགོངས་འདུས་ལས་གསུངས་པ། ཉ་ཀླད་སྦྲུལ་གྱི་གཞུང་པའམ་ཀླད་པ། རྒྱ་བྱེའུ་དམར་པོའི་ཤ   ར་ཐུག་འབྲས་བུ། བྱ་མཚལ་བུའི་ངར་སྒོང་རྣམས་ལ་ཨ་རུ་ཤ་ཆེན་པོ་མཉམ་སྦྱར་བའི་རིལ་བུ་ཀ་རས་དྲིལ། ཁྱེའུ་སུས་ལྔ་ལྔ་བཏང་ན་དམར་ཆ་དྲོངས་
རྗེས་ཀྱང་མོ་སྟོབས་དང་ལྡན་པར་འགྱུར། དམར་ཆ་མ་དྲོངས་པའི་བུད་མེད་ཕལ་ལ་བཏང་ན་སྐྱེས་པ་ཉེར་གཅིག་གིས་སྤྱད་ཀྱང་མི་ངོམས་པས་སྡུག་བསྔལ་བར་བྱེད་པས་སྐབས་མིན་དུ་མི་གཏོང་ངོ་ཞེས་གསུངས། ཞར་བྱུང་རང་གི་ཁམས་ཡུམ་མཁར་ཤོར་ན་གཡའ་མེད་སྣོད་དུ་བླང་ལ། 
13-5-26b


ག་བུར། གུར་གུམ། ཛ་ཏི། ཙན་དན་དཀར་དམར་ཅུ་གང༌། རུ་རྟ། དབང་ལག །བལ་དཀར་མེ་ཏོག །ཀ་ར། སྦྲང་རྩི། སེ་བ་བྱ་རྐང་ཅན་གྱི་མེ་ཏོག །གླང་སྣ། ལུག་རུ་སེར་པོ། ༼སྤེ་རུས་པའམ་༽སྤྱད་འབྲི་མིག་པ། བྱང་སེམས་དཀར་དམར། གསེར་མདོག་རྣམས་ཞིབ་བཏུལ་
ཕྱེ་མ་ཅོང་ཞི་འོ་མར་བསྐོལ་བའི་ཁ་ཞག་དཀར་པོས་སྦྲུས་པ་ཁྱེའུ་སུས་བསྟེན་ན། སྟོབས་གླང་ཆེན། རྩལ་སེངྒེ་འདྲ་ཞིང༌། མཁའ་ལ་བྱ་ལྟར་ལྡིང༌། རླུང་ལྟར་འཕྱོ། མེ་ཆུ་སོགས་འབྱུང་བར་དབང་ཐོབ། སྐྲ་དཀར་གཉེར་མ་མེད། ཚེ་རིང༌། རྒས་སྲ། 
ནད་ཀྱིས་མི་ཚུགས། དབང་ལྔའི་མངོན་ཤེས་འཆར། སྣང་བ་ཐམས་ཅད་དབང་དུ་འདུ། བཀྲག་མདངས་གཟི་བརྗིད་ཆེ། བྱིན་རླབས་ནུས་པ་ཆེ་བ་སོགས་ཐུན་མོང་གི་ཡོན་ཏན་དང༌། དེ་ལ་བརྟེན་ནས་ཁྱད་པར་གྱི་ཡོན་ཏན་རྒྱུད་ལ་སྐྱེ། ཐབས་ལམ་སྐབས་སུ་ཁམས་དབང་མེད་
ཤོར་ན་དེ་ལྟར་བྱ་ཡི། ཕན་ཡོན་ལ་བལྟས་ནས་ཆེད་དུ་ཐིག་ལེ་ཉམས་པར་མི་བྱ་སྟེ། སྔགས་ཀྱི་དམ་ཚིག་དང་འགལ་བའི་ཕྱིར་སྤང་ངོ་ཞེས་དགོངས་འདུས་ལས་གསུངས་སོ། །དངོས་གྲུབ་ཆེན་པོ་པདྨ་རཀྟ་དྲངས་པའི་སྐབས་སྟེ་བཞི་པའོ། །ད་ནི་རྣལ་འབྱོར་པ་ལས་དང་པོ་བ་
རླུང་ལ་རང་དབང་མ་ཐོབ་པས་ཕྱག་རྒྱ་བརྟེན་པ་དག་གིས་སྲིད་མེད་པར་འདོད་པ་རྣམས་ལ་དེའི་ཐབས་བཤད་པར་བྱ་སྟེ། རྒྱ་སྐག་རྒྱ་སྣག་ནག་མཚུར་གསུམ་ལྟོ་སྟོང་མོ་ལ་ཐུན་རེ་བཏང་ན་ཟླ་གཅིག་བར་དུ་སྲིད་བསྲུང་ངོ༌། །སྲེ་མོང་གིས་རྒྱུས་པ་སུམ་བསྒྲིལ་གྱིས་རང་གི་སྲིན་ལག་གཡོན་
པའི་རྩ་བསྡོམ་ནས་སྤྱད་ན་སྲིད་འགོག་པ་ལ་ཕན། ཡང་གཡུ་ཐོག་པའི་ཞལ་ནས་རྒྱ་ཚྭ་མཛེ་ཚྭ་ཚྭ་ལ་སྟར་བུ་ལན་ཚྭ་བུལ་ཏོག་མཚུར་ནག་རྣམས་ཆ་མཉམ་ཞིབ་བཏགས་སྦྲང་རྒོད་ཆུ་བཅད་ཅུང་ཟད་ཙམ་གྱིས་མགོ་བསྡུས་རིལ་བུ་སྲན་ཆུང་ཙམ་བྱས་སྐམ་ཐག་ཆོད་པ་དང་སྣོད་བཟང་པོར་
13-5-27a


བཅངས། བྱང་སེམས་འབབ་ཁར་རང་དུ་ནོར་བུ་པདྨ་ནས་ཕྱུང་ལ་དེའི་བུ་གར་རིལ་བུ་རེ་བཅུག་ནས་པདྨར་ཕབ་ཀྱང་སྲིད་མི་ཆགས་ངེས་སོ་གསུངས། ཤིན་ཏུ་ཟབ། ཅིས་ཀྱང་ཐབས་གཞན་མ་གྲུ་ན་སྦྱོར་བའི་དུས་སུ་ཚ་རྡོག་པོ་གཅིག་བྷ་གའི་ཕུག་རིང་
པོར་བསྐྱལ་ན་སྲིད་འགོག་པར་གསུངས། སྲིད་ཆགས་པ་སྔགས་ཀྱིས་སྲུང་ན་རང་ལུས་དྲིལ་བུར་བསྒོམ་ལ། ཨོཾ་ཏྲི་ཏྲི་ལམ་ཕྱེ། འབྱུང་བ་ལམ་ཕྱེཿ གྲུ་མོ་ལམ་ཕྱེཿ ཟང་ཟང་ལམ་ཕྱེ༔ ཐལ་ཐལ་ལམ་ཕྱེ༔ དྲི་ཟ་མོ་ཡི་མངལ་སྒོར་འཇུག་པ་སྲུངས༔ ཞེས་
པ་མང་དུ་བཟླས་ལ་མོའི་བྷ་གར་མཆིལ་མ་ཡང་ཡང་བྱུག་པས་མངལ་དུ་བུ་མི་ཆགས་ཞེས་གཏེར་མ་ཟབ་བོ། །ཡང་རྒྱ་སྐེག་སྒོ་ང་གང༌། རྒྱ་སྣག་རྒྱ་རུ་མཐེ་བོང་ཙམ་རེ། རྒྱ་ཚྭ་རིལ་མ་ཙམ། བི་ཥ་སྲན་མ་ཙམ། ཨ་རུ་དུག་གི་དྲུག་འགྱུར་བཅས་ཞིབ་བཏགས་རིལ་བུ་
བཅུ་གཉིས་ཙམ་བྱས་ལ། ཆང་ངམ་འོ་མར་སྦྱར་ཏེ་ཚེས་གཅིག་ན་མ་བྱུང་ལྟོ་སྟོང་ལ་རིལ་བུ་རེ་རེ་བཏང་བས་ཟླ་གཅིག་བར་དུ་ཐུབ། ཡང་གླ་རྩི། རྒྱ་སྐེག །རྟ་ཁྲག་གསུམ་སྦྱར་བའམ། ཡང་རྒྱ་སྣག་བྱེའུ་སྒོང་གང༌། རྒྱ་རུ་སྒོང་ཕྱེད། རྒྱ་སྣེ་སྒོང་གང༌།
རྒྱ་ཚྭ་ནས་ཙམ། གྱི་ལྕེ་ནས་གཅིག །གླ་རྩི་སྲན་ཙམ། ཡུང་བ་སྲན་མ་གསུམ་རྣམས་ཞིབ་བཏགས་ཕྱེ་མ་ཐུན་ཆེན་རེ་ལྟོ་སྟོང་ཆུ་གཙང་གིས་ཕུལ་ཏེ་བཏང་ན་ལོ་གསུམ་བར་དུ་སྲིད་མི་འཇུག་གོ། སྲིད་གཏན་ཆོད་འདོད་ན་སྦྱོར་སྡེ་སྣ་ཚོགས་ཡོད་ཀྱང༌། ཤིན་ཏུ་
ཟབ་ངེས་བཀའ་བརྒྱད་གསང་རྫོགས་ཀྱི་འོག་སྒོའི་ཁྲིད་ཡིག་ལས་བྱུང་བ་འདི་ལྟ་སྟེ། སྲིད་རྩ་བསྡམ་པ་ནི་རྒྱ་སྐག་ཕུལ་གང༌། རྒོད་མ་མཚལ་ཁ་མའི་ཁྲག་སྐམ་མཐེབ་རྡོག་ཙམ། གླ་རྩི་རིལ་མ་ཙམ། མཚུར་ནག་སྲན་མ་ཙམ་གསེར་བཞིན་མ་བསྣུར་བ་གཅིག་
13-5-27b


རྒྱ་རུ། རྒྱ་སྣག །མཛོ་ཕོའི་རྒྱུངས་པ་མཐེབ་ཚིག་ཙམ་ཞིབ་བཏགས་ཆང་ཕུལ་གང་དང་སྦྱར། རྫ་སྣོད་ཚ་ཏིང་ངེ་བའི་ནང་དུ་བླུག་ལ་ཞག་གསུམ་མནན། སྐྱ་ཤིག་གེར་བྱུང་བ་དང་བུད་མེད་སུ་ལ་བཏང་ཡང་སྲིད་པ་གཏན་ཐུབ་ངེས་སོ། །ཕྱིས་སྲིད་ཚོལ་དགོས་བྱུང་ན། 
རྩ་བཤལ་བཏང༌། ཤ་བའི་ཚིལ་བུ་བཟའོ་གསུངས། ཡང་རྒྱ་ཚྭ་རྒྱ་སྣག་རྒྱ་སྐེག་རྒྱ་རུ་སྟེ་རྒྱ་བཞི། ཟབ་ཆེན་གཞོབ། གསེར་གཡུ་མཚལ། ཅུ་གང་སྐྲད་སྐྱོང་གཞོབ། རྟ་ཁྲག །གླ་རྩི་བཅས་པའི་རིལ་བུ་དགོང་མོ་ལྟོ་བཀུག་ཞག་བདུན་བར་ལྟོ་སྟོང་བཏང་
བས་གཏན་ཆོད་དོ། །ཡང་ན་ཙན་དན་དཀར་པོ། ཏི་ཚ། གསེར་སྲན་མ་ཙམ་ཞིབ་བཏགས་ལྟོ་སྟོང་ལ་སྐྱེས་པས་འཐུང་ན་སྐྱེ་བ་གཏན་ནས་ཁེགས་ཡང་ན་ཀ་ར་ཞོ་གང༌། སྟག་གི་ཤ་དེ་མཉམ། བྱང་ཁྲ་དུག་ཕྱུང་བདུན། ཞིབ་བཏགས་ཞུ་མཁན་གདུས་ཁུ་ཕུལ་གང་
ལ་བཏབ་མོ་ལ་བཏང་ན་སྐྱེ་བ་གཏན་ཆོད་དོ་ཞེས་བསྟན་བུའི་འགྲེལ་པ་ལས་སོ། །ཡང་རྒྱ་སྐག་གླ་རྩི་སྐྱུང་ཁའི་ཁྲག་བྱང་ནག་ཟི་ར་ཁ་རུ་ཚ་རྣམས་ཞིབ་བཏགས་མོ་ལ་བཏང་ན་སྐྱེ་བ་གཏན་ཆོད་དོ། །ཡང་འབྲུག་རུས་གཙོད་ཁྲག་སྦྱར་བཏང་སྐྱེ་སྒབ་གཅོད་ཅེས་བདུད་རྩིའི་
རྒྱུད་ལས་སོ། །ཡང་བྱང་གཏེར་བཀའ་བརྒྱད་ལས། སྐྱེས་པའི་ས་བོན། ཙན་དན་དཀར་པོ། དངུལ་ཐལ་ལམ་དངུལ་ཆུ། གསེར་སྲན་མ་ཕྱེད་ཙམ་བརྡར་བ་རྣམས་ཟས་སྐོམ་ལ་བསྲེས་ཏེ་བུད་མེད་ལ་བྱིན་ན་སྐྱེ་རྒྱུན་གཅོད། དེ་ལུས་ལ་བྱུག་ན་ཤིག་རྒྱུན་ཆོད།
ལྟོ་སྟོང་ལ་བཏང་ན་ལུས་ཀྱི་སྲིན་བུ་རྒྱུན་གཅོད། དེ་རྣམས་སྟེང་བྱང་བ་ཆ་ཚང་བ་བཏང་ན་གཏན་དུ་ཆོད་ངེས་སོ། །ཕོ་རབས་གཅོད་ན། མཁན་པ་དཀར་པོ། ལྷང་མ་ལྷང་ཚེར། སྟག་གི་ཤ ཝ་ཤ་རྣམས་སྦྱར་བཏང་ཕོ་རབས་འཆད། ཕྱུགས་ཀྱི་རྒྱུད་གཅོད་ན།
13-5-28a


ཨུཏྤལ་སྔོན་པོ། བིག་པཎ། བུ་རམ། ཤུ་དག་གི་ཐང་ཆུ་རྣམས་སྦྱར་བཏང་ཕྱུགས་རབས་འཆད་ཅེས་བྱང་གཏེར་བསྟན་སྲུང་ཡོངས་རྫོགས་ཀྱི་མ་གུས་ཆམ་དབབ་ཀྱི་ལས་བརྒྱ་རྩ་བརྒྱད་པ་ལས་གསུངས་སོ། །ཡང་གསེར་ཞོ་ཕྱེད་གཏུན་བསྣུར་རི་མོ་
ཁྱུག་ཁྱུག་བྱུང་བ་ན་ཆང་སྦྱར་ཞག་གསུམ་མནན། དེ་ལྟོ་སྟོང་བཏང་ན་གཏན་ཆོད། ཡང་རྒྱ་སྐག་ཁུ་བ་རྒྱ་སྣག་བཟང་པོ་གླ་རྩི་མཛོ་དྲེའི་རྒྱུངས་པ་བཅས་བཏང་ན་ཆོད། རྒྱུ་ཞབས་གཉེར་མ་གསུམ་གྱི་བར་མའམ། ཆུ་སོའི་སྲིད་རྩ་མེས་བསྲེག་ནའང་གཏན་ཆོད་དོ། །ཡང་བླ་
མ་དགོངས་འདུས་ལས། སྲིད་གཅོད་ན། ཙན་དན་དཀར་པོ་ཐུན་གསུམ། ཏི་ཚ་ཐུན་གཅིག །གསེར་སྲན་མ་ཙམ། དངུལ་སྐམ་བཞི་ནམ་གཅིག །ཟངས་གསུམ་ནམ་གཅིག །སྲེ་མོང་རྒྱུས་པ་ཐུན་གཅིག་རྣམས་ལེགས་བཏུལ། གསེར་དངུལ་གྱི་གཡའ་ཆང་
དུ་སྦྱར་བས་རིལ་བུ་སྐྱེས་པ་རང་ཉིད་ལྟོ་བཀུག་ལ་ཐོ་རངས་ཁྱེའུ་སུས་ཁོང་དུ་བཏང༌། ཀ་ར་དཀར་པོ་ཞོ་གཅིག །སྟག་གི་ཉྭ་སུལ་གྱི་ཤ་དེ་མཉམ། རྒྱ་སྐག་ཐུན་གཅིག །བྱང་བ་བར་གཤོག་བསལ་བ་ལྔ། ཚ་ལ་ཐུན་ཕྱེད་རྣམས་རྩི་བཞིན་བཏུལ་བ། བུད་མེད་རང་གི་
དྲི་ཆུ་དུལ་གང་ནང༌། ཞུ་མཁན་ཁྱོར་གང་བླུག་ནས་བསྐོལ་བ། ཕུལ་ཕྱེད་ཙམ་དུ་གྱུར་ཚེ་རྩིག་མ་ཕྱུང་ལ། གོང་གི་རྫས་ཕྱེ་རྣམས་བཏབ། མོ་ལྟོ་བཀུག་ལ་ཐོ་རངས་བཏང༌། དེ་ཉིན་ཕོ་མོ་གཉིས་ཆང་བཟང་ནར་སོན་ངོམ་པ་རེ་འཐུང་བ་ལས་བཟའ་བཏུང་གཞན་སྤང་
གོས་དྲོ་མ་འཁྱགས་དལ་བར་བྱ། དེས་སྨན་ནུས་ལུས་ཐམས་ཅད་དུ་ཁྱབ་པས་དུག་མི་འཇུག །སྲིད་འཕེལ་མི་སྲིད་དེ་གཏན་ཆོད་དོ། །འདི་སྟེང་རབས་ཆད་ཕོ་མོའི་སྐྲ་གཞོབ་བསྲེས་ན་སླར་གསོ་མི་རུང་ངོ༌། །དེ་མིན་སླར་དཀྲོལ་ཏེ་སྲིད་འབྱུང་བར་འདོད་ན། ཨ་རུ་གསེར་
13-5-28b


མདོག་མ་ཉམས་པ་གཅིག །ལྕམ་འབྲུ་མ་ཉམས་པ་བདུན། གཡེར་མ་རྡོག་པོ་ལྔ། གཟེ་མའི་འབྲུ་ཉེར་གཅིག་རྣམས་བཏུལ་ཕྱེ། ཁྱི་དཀར་པོའི་ས་བོན་ཆང་སྦྱར་རིལ་བུ་མོ་ལ་སྔར་ལྟར་བཏང༌། བུད་མེད་འཕྱོན་མའི་ཆུར་སྦྱར་འདེ་གུ་ཕོ་ལ་བཏང༌། རྗེས་སྔར་ལྟར་བྱས་
པས་སྲིད་ཆགས་པར་འགྱུར་རོ། །མངལ་དུ་སྲིད་པ་ཆགས་པ་བཤིག་ན། ཟླ་བ་བཞི་ཚུན་བཤིག་སླ། གསེར་དངུལ་གྱི་གཡའ། རྒྱ་སྣག །རྒྱ་ཚོས། རྒྱ་ཚཱ་དོ་འབྲས་ཞུ་མཁན། ཆུ་རྩ། ཐར་ནུའི་རྩ་བ། ཨ་རུའི་རྩེ་སྨྱུང་རྣམས་ཐུན་ཕྲན་རེ་རེ་ཞིབ་བཏུལ་
སྐྱེས་པའི་ས་བོན་གྱིས་རིལ་བུ་དྲིལ་བ་སྲན་ཕོས་ཙམ་བཟའ་བཏུང་མ་སྤྱད་པའི་ལྟོ་སྟོང་ངམ། སྲོད་ལ་རིལ་བུ་བཅུ་གཅིག་ཆང་གིས་འཕུལ་ཏེ་བཏང༌། གོས་དྲོ་ལུས་མ་འཁྱགས་རྡུལ་ཐོན་པར་བྱས་པས། རིལ་བུ་ཞུ་ནས་བཤལ་ཅུང་ཟད་དང་བསྡོངས་ཏེ་སྲིད་ཞིག་ནས་
ཕྱིར་འབྱུང་བར་འགྱུར་རོ། །བུད་མེད་ལུས་བཟང་ལ་སྨན་ལྟོ་ཆེ་བར་ལན་གསུམ་བསྟུད་ན་ཅིས་ཀྱང་ཕྱིར་འབྱུང་ངོ༌། །ཟླ་བ་ལྔ་ཕར་འདས་ལུས་དབྱིབས་དོད་ཅིང་ཇེ་སྲར་གྱུར་པས་བཤིག་དཀའ་ལ་བཤིག་ན་སྡིག་པ་ཡང་ཆེ་བས་མི་བཤིག་ལ། ཅིས་ཀྱང་
བཤིག་དགོས་ན། འོལ་མོ་སེ་འབྲུ་བདུན། རྒྱ་རུའི་རྩེ་མོ་སོར་གཅིག །ཏི་ཙ་སྲན་མ་ཙམ་གཅིག །དངུལ་ཆུ་ཞོ་ཕྱེད་མཁར་གཞོང་དུ་ཅུང་བསྲོས་ལ། རྡོ་གཏུན་དུ་བླུག་སྟེ་ཚྭ་བཟང་པོ་ཞོ་གཅིག །བྱ་རྒོད་རྐང་མར་ལུག་རིལ་ཙམ་གཅིག །མུ་ཟི་སེར་པོ་ནས་ཙམ་གཅིག །
གླ་རྩི་ཐུན་གཅིག །ཁྱི་རུས་ཟན་གྱི་བྲུན་བྱ་བ་ལ་མ་ཐུན་གཅིག །ཟེ་ཚ་ཞོ་ཕྱེད་རྣམ་ལྷན་དུ་ལེགས་པར་བཏུལ། སྐམ་ནས་བཤུལ་ཤ༼མི་རྟ་ཁྱི་གསུམ་གང་རུང་གིས་ཆོག༽གང་རྙེད་བཅས་གཞུག་ཅིང་བཏུལ་བས་གོང་བུར་འདྲིལ་བ་དང༌། འཕྱི་པའི་ཐོད་རུས། སྲམ་གྱི་ཀླད་པ། ཉ་སེ་བའི་
13-5-29a


ཐོད་རུས། གོ་བོའི་ཕོ་བ་རྣམས་ཐུན་རེ། ལྕགས་ཕྱེ་ཞོ་གང་རྣམས། རྡོ་ཁབ་ལེན་བཞིན་ནམ་གཅིག །མགྲོན་ལྐོག་གི་བསྲེག་ཐལ་གཅིག །དུར་ཐོད། འབྲུག་རུས། ཐོད་རེ་རེ། འབུ་སྐྱོག་གཅིག །ཐལ་ཚིག་དམར་པོ་༼རྒྱུན་དུ་མེ་བུས་པའི་ཐབ་ཞབས་ཀྱིས་ཞུན།༽ ཐུན་གཅིག་རྣམས་རྩི་
བཞིན་བཏགས་ནས་གོང་བཞིན་བཏང་བས་ཟླ་བདུན་ཚུན་ཆད་ཤིག་པར་འགྱུར། ཟླ་བ་བདུན་འདས་ནས་བརྩམ་པར་མི་བྱའོ། །ཞེས་དགོངས་འདུས་ལས་གསུངས་པ་འདི་ཟབ་པས་འདིར་བཀོད་ལ། གཞན་གསོ་དཔྱད་རྒྱུད་སོགས་ནས་ཀྱང་མངལ་རྒྱུན་
བཤིག་པའི་སྨན་སྣ་ཚོགས་འབྱུང་ངོ༌། །བྱ་མ་བྱིའི་མཇུག་ཤ་བཏང་བ་ཁོ་ནས་མངལ་འཕྱིལ་ལོ་མན་ངག །དེ་དག་ནི་སྲིད་གཅོད་ཀྱི་སྐབས་ཏེ་ལྔ་པའོ། །ད་ནི་ཕྱག་རྒྱ་མ་ལ་གཡེམ་པའི་བྱི་ཕོ་སྲུང་བའི་ཐབས་མདོ་ཙམ་བཤད་པ། ཨོཾ་ཨཱཿཧཱུཾ་བྷེ་ར་བྷེ་ར་བྷྲཱུཾ་བྷྲཱུཾ་ན་མ་སྭཱ་ཧཱཿ སྔགས་
འདིས་ལན་ཚྭ་ལ་ལན་བརྒྱ་རྩ་བརྒྱད་སྔགས་ལ་མོའི་ལྟོར་བཏང༌། སྔགས་བྲིས་པ་སྐེ་ལ་བཏགས་ན་བྱི་ཕོ་རྣམས་ཁྲོས་ནས་ཉེ་བར་མི་འགྱུར་ཞེས་སྐུ་གསུང་ཐུགས་ལས་ཐམས་ཅད་པའི་རྒྱུད་ལས་གསུངས་པ་ཟབ་མོའོ། །ཡང༌། ཨོཾ་ཙག་ཤུ་ཙེར་ལྡན་གུམཿ ཞེས་པའི་སྔགས་
འདི་སྦྱོར་བ་བྱེད་དུས་ཡིད་ཀྱིས་བཟླས་ལ་ཁམས་འབབ་པ་དང་མཉམ་དུ་མཆིལ་མ་མོའི་ཁར་བླུག་པས་ཡིད་རང་དབང་དུ་གྱུར་ཏེ་བསད་ཀྱང་གཞན་དུ་ཕྱོགས་པར་མི་འགྱུར་རོ། །ཡང་ཕྱག་རྒྱ་མ་གཡེམ་པ་ལས་སྲུང་བའི་ཐབས། ས་དམར་བོར་གནས་པའི་རྨིག་བུ་དམར་པོའི་རོ་སྔོ་སྐམ་མ་
སོང་བ་རྫ་ཁ་སྦྱར་དུ་བསྲེག་པའི་སོལ་བ་ལ། རང་གི་ཤེས་རབ་མ་དེའི་རང་བྱུང་གི་མེ་ཏོག་སྦྱར་ཏེ་ཞིབ་བཏགས་བྱས་པས། རིག་མ་དེའི་མཐིལ་བཞི་མ་གཏོགས་ཤ་རྗེན་ལ་རྟགས་གདབ་ན་ཇི་སྲིད་སྐྱེས་པ་གཞན་གྱིས་མ་སྤྱད་པ་དེ་སྲིད་མི་འཇིག །སྤྱད་ན་འཇིག །གནད་ཞལ་ལས་
13-5-29b


དྲིས་ཞེས་བྱང་གཏེར་ལས་སོ། །ཡང་རྨིག་བུའི་རོའམ་ཁྲག །བྱང་སེམས་དཀར་དམར། རྒྱ་མཚལ། རྣལ་འབྱོར་རང་གི་དྲི་ཆུ། བ་དམར་འོ་མ་བཅས་པས་རྟགས་གདབ་ན་གོང་བཞིན་ནོ། །བླ་མ་དགོངས་འདུས་ལས། རང་གི་ས་བོན། ཕྱག་རྒྱ་མ་རང་གི་མཚལ་ལམ། 
སྐྱོན་གྱིས་མ་གོས་པའི་པད་རཀ བྱེའུ་མཆིལ་བའི་སྒོང་ཆུ་སེར་པོ། སྨྲིག་བུའི་ཁྲག །པ་ཤུད་ཀྱི་ཟེ་ཁྲག །༼ད་ཆུ་ཡིན༽མཚལ། སྐག་ཁུ། ཕྱག་རྒྱ་མོ་དེའི་སྐྲ་བསྲེག་པའི་གཞོ་བ་བཅས་ཞིབ་བཏགས་ལ། ཨོཾ་པདྨོ་བྷ་ཤ་གུ་ཧྱ་རཀྟ་ཀི་རི་ལི་སཱ་མཱ་ཡཱ་རཀྵྱཾཿ དྲུཾ་བྲུཾ་ཀཱ་ཡ་བྷ་ཤ་ར་ལི་ཀྵ་
སྭཱ་ཧཱ། ངག་བཅད་དེ་བརྒྱ་རྩ་བརྒྱད་བཟླས་ལ་གདབ། རྫས་ཆུར་བསྣུར་ལ། ལུག་ཐུག་གི་རྭ་རྒྱ་ཤུག་ལ་ཤེད་ཆེར་བརྡར་ནས། དྲོད་ཚ་ཆིལ་ཤས་མི་བཟོད་པར་ཕེབ་པ་དང༌། རྫས་དེས་མོའི་བཅུ་དྲུག་མདོ་དང་གྲོད་ཆུང་སྟེང་དུ་ཐིག་ལེ་བྱ། དེ་སྟེང་གོང་གི་སྔགས་
བཟླས་པའི་མཆིལ་མ་ཡང་བྱུག །དེས་རང་མ་གཏོགས་སུས་སྤྱད་ཀྱང་ཐིག་ལེ་ཕྱི་ནས་སྨེ་ཤ་ལྷག་པར་འགྱུར་ཞིང༌། རང་གིས་སྤྱད་པས་རྫས་ཀྱི་ཐིག་ལེ་བརྟན་པར་འགྱུར་ཏེ་ཕྱག་རྒྱ་མ་གཡེམ་པ་ལས་སྲུང་བའི་ཐབས་སུ་གསུངས་པ་སྟེ། རྒྱས་གདབ་དུས་རང་གི་མཁའ་
འགྲོ་ཆོས་སྐྱོང་ལ་སྲུངས་ཤིག་ཅེས་པའི་གཉེར་གཏད་བྱ་གསུངས་སོ། །ཕྱག་རྒྱ་བྱི་སྲུང་བའི་སྐབས་ཏེ་དྲུག་པའོ། །ད་ནི་ཕྱག་རྒྱ་མཚན་ངན་དག་ཀྱང་བཟང་པོར་བསྒྱུར་བའི་ཐབས་བཤད་དེ། དེ་ཡང་མོ་རང་ལ་ཆོས་བཤད་དེ་བློ་ལེགས་ལམ་དུ་བསྒྱུར། ཡི་དམ་གང་
རུང་ཕོག་ལ་བསྒོམ་བཟླས་བྱེད་དུ་གཞུག །སྦྱོར་བའི་དུས་རང་ཡབ་དང་ཕྱག་རྒྱ་མ་ཡུམ་གང་ཡང་རུང་བར་གསལ་བའི་རྩ་ཁམས་ཐམས་ཅད་དུ་དཔའ་བོ་མཁའ་འགྲོ་ཡབ་ཡུམ་ཏིལ་གང་ལྟར་གསལ་ཞིང་བདེ་བའི་འོད་ཀྱིས་རྩ་གསུམ་རྒྱལ་བ་རབ་འབྱམས་སྤྱན་དྲངས་ལ་མོའི་
13-5-30a


ལུས་ལ་བསྟིམ། བདུད་རྩི་བྱང་ཆུབ་སེམས་ཀྱིས་མཆོད་ཅིང་དབང་བསྐུར་བའི་དམིགས་པ་ལན་གཅིག་བྱས་ཏེ་སྦྱོར་བ་ཐང་གཅིག་བྱས་པས་ཀྱང་ཅི་ལྟ་བུའི་རིགས་ངན་པ་ཡང་བཟང་པོར་འགྱུར་བ་ལ་ཐེ་ཚོམ་མེད་ཅིང༌། དུས་རྒྱུན་དུ་ཡང་དེའི་ཚུལ་གྱིས་
བྱིན་རླབས་དབང་བསྐུར་བྱ་ཞིང་སྲུང་བའི་འཁོར་ལོ་སོགས་བརྟགས། དམ་རྫས་རྣམས་བཟའ་བྱུག་བྱ། བཀྲ་ཤིས་པའི་བྱིན་དབབ་བྱའོ། །ཡང་དགོངས་འདུས་ལས་ཕྱག་རྒྱ་མཚན་ངན་བཟང་པོར་བསྒྱུར་ཐབས་གསུངས་པ། དུད་འགྲོ་རྒྱུད་བཟང་གི་འོ་མས་རྣལ་
འབྱོར་པ་རང་གི་ལུས་ཀུན་བཀྲུས་པའི་ཁུ་བར། དྲི་ཆེན་དྲི་ཆུ་གསེར་མདོག་ག་བུར། གུར་གུམ། ཙན་དན་དཀར་དམར། དབང་ལག །བ་ཡི་རྣམ་ལྔ། སིནྡྷུ་ར་རྣམས་ཆ་མཉམ་ལ་ཆོས་སྨན་ཁ་ཚར་བཏབ་པའི་རིལ་བུ་སྲན་འཕོས་ཙམ་མཚལ་གྱིས་གོས་
བསྐོན། མེ་ཉིས་མ་ཕོག་པར་བསྐོམ། དར་དམར་དྲིལ། ཉ་སྟོང་བརྒྱད་སོགས་དུས་བཟང་ལ། བུད་མེད་དེའི་ལུས་ཀུན། དྲི་བཟང་གི་ཆུ་ལ་གཟུངས་སྔགས་དང་རྩ་གསུམ་སྙིང་པོ་བཟླས་ཏེ་བཏབ་ལ་བཀྲུ། ཁོང་དུ་འང་འཐུང་བཅུག །གུ་གུལ་དང་སྤོས་
དཀར་བདུག །དྲག་སྔགས་བཟླས་པའི་ཏིལ་དང་ཡུངས་ཐུན་བྲབ། དེ་ནས་དེ་རྡོ་རྗེ་ཕག་མོར་བསྒོམ་ལ། ནངས་པར་ཐོ་རངས་རིལ་བུ་གསུམ་རེ་མི་བཤིག་པར་གྱུར་མིད་ཁོང་དུ་བཏང༌། དེ་ལྟར་རིལ་བུ་བརྒྱ་རྩ་བརྒྱད་ཐིམ་ནས། འབྱུང་པོས་དབང་དུ་བྱས་པ་
སོགས་ཇི་ལྟར་རིགས་ངན་ཡང་བརྟེན་རུང་བའི་བཟང་པོར་འགྱུར་རོ། །རིལ་བུ་རྣམས་བར་མཚམས་མེད་པར་བསྟེན་པ་མན་ངག་སྟེ། གཞན་གང་གིས་ཀྱང་མ་མཐོང་བར་བྱ་ཞེས་གསུངས་ཤིང་གཞན་ཡང་ཙ་ཀྲས་བཟང་པོར་བསྒྱུར་ཐབས་ཀྱང་གསུངས་སོ། 
13-5-30b


འདི་ལ་རིལ་བུ་རྣམས་ལྷ་གང་མོས་སུ་གསལ་ལ་བཀྲ་ཤིས་བྱིན་རླབས་བསྡུ་བའི་འདུན་པས་སྔགས་ཀྱིས་བྱིན་རླབས་བྱས་ཀྱང་ལེགས་པའི་ཡན་ལག་ཏུ་འགྱུར་བ་ལས་མེད་པས་དེ་ལྟར་བྱས་ཀྱང་རུང༌། མིན་ཀྱང་གཞུང་བཞིན་བྱས་པས་འགྲུབ། རྣལ་འབྱོར་པ་ཕལ་ཕྱག་རྒྱ་རིགས་
ངན་དང་ལས་ཀྱིས་འབྲེལ་བ་རྣམས་ལ་ཕན་པའི་ཕྱིར་འདིར་བཀོད་ལ། ཕྱག་རྒྱ་རིགས་ངན་མིན་ཡང་རིགས་བཟང་བ་ལའང་འདི་ལྟར་བྱས་ན་གསེར་ལ་མདངས་གཏོན་པ་ལྟར་ཡོན་ཏན་ཡར་ལྡན་དུ་འགྱུར་བར་ངེས་སོ། །ཕྱག་རྒྱ་མོ་བཀྲ་ཤིས་པར་བྱེད་པའི་སྐབས་ཏེ་བདུན་པའོ། །
ད་ནི་རྣལ་འབྱོར་བ་རིགས་བརྒྱུད་འདོད་པ་ལ་ཕན་པའི་ཕྱིར་དེའི་ཐབས་མདོ་ཙམ་བཤད་པ་ལ། བདུད་རྩི་ཆེན་པོ་འཁོར་ལོ་འབར་བའི་རྒྱུད་ལས་བཛྲ་གིརྟཱིའི་སྤྲུལ་པ་རྩི་ཡི་ལྷ་མོ་བློ་གྲོས་མ་ཞེས་པ་རིགས་རྒྱུད་སྲིད་ཀྱི་མངའ་བདག་དེའི་རིག་པ་ནི། ཨོཾ་བཛྲ་གི་རྟཱིན་མོ་ཨ་དྷྱིད་ཤུ་
ཀ་ར་ཏ་རི་དྷི་པ་ཀི་བི་ཏི་སྭཱ་ཧཱ། ན་པ་ཤ་ཚ་ཆེ་གེ་མོ་ལ་བུ་སྐྱེ་བར་གྱུར་ཅིག་སྭཱ་ཧཱ། ཞེས་པ་འབུམ་བཟླས་ལ། དེ་ནས་བ་བླ་བ་ཡི་ཆུ་ནང་དུ་ཞག་གསུམ་སྦང་ལ་སྔགས་དེ་ཞག་གསུམ་བཏབ། དེ་ནས་བ་ཆུ་དེ་འཐུང་ན་མངལ་ཆགས། ཡང་བ་ཏོ་ལ་ཡི་རྩ་བ་ཞོ་གཉིས། ཀ་ར་
ཞོ་གཉིས་ཞིབ་བཏགས་ཆུ་གྲང་སྦྱར་བ་ལ་སྔགས་བཏབ་བླུད་ན་མོ་གཤམ་ལའང་བུ་སྐྱེ། ཡང་ན་ཡུངས་དཀར་ལྡོང་རོས་པི་ལིང་གི་རྩ་བ་དང་པི་ལིང༌། ཤིང་མངར། གི་ཝཾ་རྣམས་ཞིབ་བཏགས་སྔགས་བཏབ་བྱིན་ན་སྲིད་འཕེལ།  ཡང་ན་བ་སྤུའི་རྩ་བ་མ་རུལ་བ་འོ་མ་སྲང་
ཉེར་བརྒྱད་ནང་བསྐོལ་ཏེ་མར་དང་ལྷན་གཅིག་བླུད་ན་མངལ་འཛིན་པར་འགྱུར་རོ། །འདི་རྣམས་ཟླ་མཚན་རྒྱུ་བའི་དུས་སུ་བསྟེན་ཅིང༌། གདོན་དག་སྲིད་འགོང་སྲུང་ཕྱིར། གུ་གུལ། མུ་ཟི་ནག་པོ། བོང་ནག །རྟ་བོན་རྣམས་ལ་གོང་གི་མཱ་མ་ཀིའི་སྔགས་བཏབ་
13-5-31a


པའི་དུ་བ་སྐབས་སྐབས་སུ་བུད་མེད་ཀྱི་གསང་གནས་སུ་བདུག་པར་བྱའོ། །   པཔཔ    པཔཔ     ཨཨཨ  མམམ    སསས  བབབ   སསས་  ཟ་ཡིག་འདི་རྒྱ་ཤོག་ལ་རྒྱ་སྣག་གིས་བྲིས་བདུད་རྩི་ཆོས་སྨན་དང་གི་ཝཾ་དང༌། ཁ་གུར། རྡོ་ཁབ་ལེན། གཡུ་དང་བྱེ་རུའི་ཕྱེ་མས་བྱུག་ལ་ཐོག་མར་རྒྱལ་ཕུར་འཕྲོད་དུས་ཟ་
ཞིང་ཡུན་དུ་བསྟེན་པས་སྲིད་འབེབ་ཡིད་བཞིན་ནོར་བུའོ། །ཞེས་གཏེར་མའོ། །པདྨ་གཅེས་ཕྲེང་གི་གནད་ཀྱི་ཤོག་དྲིལ་རྡོ་རྗེ་ཅན་ལས། བྲག་སྐམ་ལ་ཆུ་འབྱུང་བའི་མན་ངག་ནི། བྱ་དཀར་མོའི་སྒོ་ངའི་ནང་དུ་དཀར་གསུམ་མངར་གསུམ། སྐྱེས་པ་དང་
བུད་མེད་ཀྱི་ས་བོན་མ་རྙེད་ནའོ་མ་དང་ཁྲག་བསྲེལ་བྱ་འབྲུ་སྣ་ལྔ་དང་རིན་ཆེན་ལྔ་བརྡར་ཕྱེ་བཏབ་ལ་ཁ་བལ་ཚོན་སྣ་ལྔས་བཅད། བལ་གྱིས་བཏུམ་ལ་ཟ་མ་ཏོག་ནང་དུ་བཅུག་ནས་ལྷ་རྟེན་ཀ་བ་ལ་བཅིང་དེས་ལོ་དུས་བུ་འཁོར་ཡོང༌། བརྒྱ་ལ་མ་བྱུང་ན་མ་ཡི་མལ་འོག་ཏུ་སྦ། དེས་བུ་ཚ་མི་འཁོར་མི་སྲིད་དོ། །ཞེས་
རྟེན་འབྲེལ་ཟབ་མོའོ། །སྲིད་ཀྱི་ལྟེ་བ་བུ་རུ་བསྒྱུར་ན། ལྕགས་ཀྱི་སྟ་རེ་ཚོན་གང་བ་གཅིག་གི་ཡུ་བ་ཤིང་སྟག་པ་ལ་བྱ། ཡུ་བ་དེ་ལ་སྔགས་འདི་བྲིས། ཨོཾ་མི་ལི་མི་ལི་མ་མ་བསྐྱེད་ཧཱུཾ་དེ་ཧི་ཧཱུཾཿ དེ་གང་ལ་བྱ་བའི་བུད་མེད་དེའི་སྐྲ་ཤད་ཀྱིས་དཀྲིས་ལ་བུད་
མེད་དེ་རང་གིས་མ་མཐོང་བར་མོའི་མལ་འོག་ཏུ་སྦ། འདིའི་རྣོ་ཚད་སྟོན་ཕྱིར་བྱ་ཚང་གི་འོག་ཏུ་སྟ་རེ་སྦས་ན་བྱ་ཕྲུག་ཐམས་ཅད་ཕོར་འགྱུར་རོ། །སྔགས་འདི་གི་ཝཾ་གིས་བྲིས་ནས་བུད་མེད་ཀྱི་མགོ་དང་སྐེད་པར་བཏགས་ན་མོ་གཤམ་ལའང་བུ་འབྱུང་ཞིང་ལྟེ་བ་བསྒྱུར་བར་བྱེད་པ་
ཐེ་ཚོམ་མེད་དོ་ཅེས་གཏེར་མའོ་ཟབ། གཞན་ཡང་ལྟེ་བསྒྱུར་ཀྱི་ཟ་ཡིག་དང༌། སོ་སོར་འབྲང་མའི་གཟུངས་སྔགས་བཟླ་ཞིང་དེའི་སྲུང་བ་གདགས་པ་དང༌། བྱང་ཆུབ་རྒྱན་འབུམ་གྱི་གཟུངས་སོགས་བཟླ་ཞིང་མཆོད་རྟེན་ལ་བསྐོར་བ་བྱས་པས་ལས་ཀྱིས་བུ་མེད་པ་ལའང་
13-5-31b


བུའི་སྐལ་བ་བཟང་པོར་སྐྱེད་པར་འགྱུར་རོ། །རྟ་མགྲིན་གྱི་རྒྱུད་ལས། དུར་ཁྲོད་ལྷ་མོས་བགེགས་གཞོམ་ཞིང་སྲུང་བའི་སྔགས། ཨ་མ་བ་སུ་པཱ་ཀཾ་བ་སུ་ཛོ་མོ་ཕེ་ཌཱི་དུ་བ་སུ། སྔགས་རྒྱལ་འདི་གོང་དུ་བསྙེན་པ་མ་བྱས་ཀྱང་རྟག་ཏུ་མ་ཡིས་བཟླས་ན་འཇིགས་པ་ཐམས་ཅད་
བཀག །དྲི་ཆུས་ཐིག་ལེས་ཕྱིར་རྒོལ་བ་ཀུན་རྨོངས་པར་བྱེད། སྔངས་བར་བྱེད། རང་བཅིངས་པ་གྲོལ། སྨྲ་ན་མི་འཇིགས་པ་ཐོབ་པ་དང་སྲིའུ་གསོ་བའི་སྔགས་སོ། །དེ་ནས་རིགས་རྒྱུད་སྤྲུལ་པའི་སྐུ་འཇོག་ཕྱིར་བུད་མེད་ཀྱི་ཟླ་མཚན་ཆད་ནས་ཞག་བཞི་པ་ལ། 
རང་གི་སྔར་ནས་ཁམས་ཡུན་རིང་མ་ཉམས་པར་བྱས་ལ། དེ་ནུབ་སྲོད་ལ་ཁམས་མི་བཏང་བར་ཡུན་རྒྱུན་རིང་སྦྱོར་བ་བྱས་པས་ཆུ་སེར་སོགས་ཁམས་ཀྱི་སྙིགས་མ་ཕྱིར་བཏོན། ཐོ་རངས་སེམས་བསྐྱེད་དང་སྲུང་འཁོར་མི་རྟོག་པ་བསྒོམ། ཡབ་ཡུམ་ལྷར་གསལ། ཡུམ་
གྱི་མཁའ་གསང་གཞལ་ཡས་ཁང་གི་དབུས་སུ་པད་ཉི་ཟླ་སྟེང་རང་གང་མོས་ཡི་དམ་གྱི་ས་བོན་གསལ་ལ་རང་གི་སྐུ་ལས་འོད་ཟེར་སྤྲོས་པས་ཕྱོགས་བཅུའི་རྒྱལ་བ་སྲས་བཅས་སྤྱན་དྲངས། རང་གི་ཞལ་ནས་ཞུགས། ཐུགས་ཀར་བདུད་རྩིར་ཞུ། སྐུ་ཡི་དབྱིབས་བརྒྱུད། 
རྡོ་རྗེའི་ལམ་ནས་ཡུམ་མཁའ་གཞལ་ཡས་ཁང་གི་དབུས་ཀྱི་ཡིག་འབྲུ་ལ་ཐིམ་པར་བསམ་ལ་ཁམས་ཡུམ་མཁར་ཕབ། དེ་ལས་གང་མོས་པའི་ལྷ་ཡི་སྐུ་བསྐྱེད། གནས་གསུམ་བྱིན་བརླབས་དང་ཡེ་ཤེས་ལྔས་དབང་བསྐུར་ལ། རྗེས་སུ་གཞལ་ཡས་ཁང་གི་སྒོ་
བཅད་ནས་སྒོ་བ་བཞི་དང་ཁྲོ་བཅུས་བསྲུང་བར་བསམ། འགྲོ་དོན་རྒྱ་ཆེན་པོ་འབྱུང་བའི་སྨོན་ལམ་བཏབ་ཡུམ་གྱིས་ཟས་སྐོམ་བཅུད་ཅན་བརྟེན། སྤྱོད་ལམ་གཟབ། ཟླ་བ་རྟིང་མར་ཟླ་མཚན་མ་བྱུང་ན་མངལ་ཆགས་པ་ཡིན་ནོ། །ཆོ་ག་འདིས་འགྲོ་དོན་འབྱུང་
13-5-32a


བའི་རིགས་བརྒྱུད་སྤྲུལ་པའི་སྐུ་འབྱུང་བར་འགྱུར་རོ། །དེ་ནས་མངལ་གྱི་ཟུག་རྔུ་ཞི་ཕྱིར་མ་མོ་མཆོད་པ་དང༌། སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོའི་མཚན་ནས་བརྗོད་
པ་སོགས་དང༌། མངལ་ལ་འབྱུང་པོའི་འཚེ་བ་མི་འབྱུང་བ་དང༌། བདེ་བར་བཙའ་བའི་ཐབས་ཀྱི་ཆོ་ག་རྣམས་གཞན་ལས་འབྱུང་བ་ལྟར་བྱའོ། །པདྨ་གཅེས་ཕྲེང་ལས། བུ་ཆུང་རྐན་མར་ལ། བུ་རམ་རྙིང་བ་མཐེབ་རྡོག་ཙམ། གླ་རྩི། སྦྲང་
རྩི། གུ་གུལ། རུ་རྟ། ཨ་རུ་ར་རྣམས་ཞིབ་བཏགས་སྦྱར་བ་ཆང་གསར་འཇམ་ཁྱོར་གང་བཅས་རྟེན་འབྲེལ་སྙིང་པོ་བརྒྱས་སྔགས་ལ་བཏང་པས་གདོན་གྱིས་མི་ཚུགས། རླུང་དང་མཆིལ་ནད་མི་འབྱུང༌། ཤ་བཀྲག་དང་ལྡན། ཡིད་གཞུང་བློ་རྣོའོ།
ཞེས་གསུངས། བལ་པོ་ཧཱུཾ་ཀ་རའི་མན་ངག་སྲིད་མཚོ་ཀ་དམ་པའི་ཕྱག་ཏུ་བརྒྱུད་པའི་གཞུང་ལས། བྱིས་པ་བཙས་ནས་ནུ་ཞོ་མ་བླུད་གོང་དུ། གསེར་ཅུང་ཟད། མ་ནུ། གླ་རྩི། བཟང་དྲུག་གི་ཝཾ་རྣམས་རིལ་བུ་བྱས་པ་རྩ་བའི་སྨན་འཚོ་སླ་ཞིང་བཀྲ་ཤིས་
པར་བྱེད་པ་དང༌། དེ་སྟེང་ཚེ་རིང་བར་འདོད་ན་རྒན་རྒོན་ཚེ་རིང་བའི་ཐོད་པ་དང༌། ཕོ་རོག་གི་ཤ་བསྣན་ལ་ཚེ་དཔག་མེད་པའི་གཟུངས་བཟླས་ཏེ་བཏང་ན་ཚེ་རིང༌། གཅན་གཟན་སྣ་ཚོགས་མཆུ་སྡེར་དང༌། དཔའ་བོ་ལ་ཁྲག་གཏར་བ་ཅུང་ཟད་བསྲེས་ན་དཔའ་བོ་འབྱུང༌། 
ཤུ་དག་ནག་པོ། ཡུང་བ་སེར་པོ། མི་བློ་རྣོ་བའི་རྨད་རར་འདྲུབ་པའི་ཆུ་དང༌། གཟུངས་སྣ་ཚོགས་ཀྱིས་མེ་ལོང་ལ་ཁྲུས་བྱས་པའི་ཆུ་རྣམས་གོང་གི་རྩ་བའི་སྨན་ལ་བསྣན་ཏེ་བློ་འཕེལ་གཟུངས་བཟླས་པས་བླུད་ན་དགེ་བཤེས་མཁས་པ་འོང༌། ཡང་སྨན་པ་
13-5-32b


མཁས་པའི་སྲིན་ལག་གི་ཁྲག་དང༌། གཙག་བུ་རྙིང་བ་བརྡར་བའི་ཕྱེ་མ་སྦྱང་བྲུན་སྦྱར་ནས་བཏང་ན་སྨན་པ་འོང་ངོ་ཞེས་པཎྜི་ཏའི་མན་ངག་གོ། བླ་མ་དགོངས་འདུས་ལས་གསུང་པའི་བྱིས་པ་འཕེལ་བྱེད་ཀྱི་རྫས་ཟབ་མོ་ནི། བྱིས་པ་དེ་བཙས་མ་ཐག་ཏུ་དྲི་
བཟང་པོའི་སྤོས་ཀྱིས་བདུག །སྨན་ཆབ་དང་བརྒྱུད་བཟང་གི་འོ་མ་དྲོན་མོས་ལུས་ལ་ཁྲུས་བྱ་ཙན་དན་དཀར་དམར། ག་བུར། གླ་རྩི། གི་ཝཾ། གུར་གུམ། ཨ་རུ་གསེར་མདོག །གུ་གུལ། ཨ་མྲྀ་ཏ། ཨུཏྤལ་སྔོན་པོ། པདྨ་དཀར་པོ། 
ཡབ་ཡུམ་གཉིས་ཀྱི་བདུད་རྩི། གཞན་ཡང་བྱིན་རླབས་ཀྱི་རྫས་གང་འཛོམས། ཤེས་རབ་འཕེལ་བ་དང༌། ཚེ་རིང་བ་དང༌། སྟོབས་རྒྱས་པ། ལོངས་སྤྱོད་འཕེལ་བའི་རྫས་རྣམས་སྦྱར་བའི་འདེ་གུས་ལུས་ཀྱི་ཕྱི་གནས་ལྔ་སྒོ་དགུར་བྱུག །ནང་དུ་
རྐན་མར་མ་བྱིན་གོང་ལྕེ་སྟེང་བྱུག །སླར་རྐན་མར་ལ་བསྲེ་ཞིང་ཁོང་དུ་བཏང༌། ཞག་བདུན་བར་དུ་ཁོང་དུ་གཏོང་བ་དང་བྱུག །དགེ་ཕྱོགས་རིམ་གྲོ་ཡང་བྱ། རྫས་དེས་ཁྱེའུའི་ལུས་ལ་ས་བོན་དང་ཕྱག་མཚན་སོགས་བྲིས་ན་སྲུང་བའི་མཆོག་ཏུ་འགྱུར།
དང་པོར་ཁྱེའུའི་ལུས་ལ་རེག་སྤྱོད་མ་བྱས་གོང་རྫས་འདི་བརྟེན་པས་ཡོན་ཏན་ཤིན་ཏུ་ཆེ་སྟེ་ཁྱེའུ་འཕེལ་བྱེད་ཀྱི་རྫས་སོ་ཞེས་གསུངས། དེ་ལྟར་འདིའི་རྫས་ཚང་སྟེང་གཅིས་ཕྲེང་དང་ཧཱུཾ་ཀ་རའི་རྩ་བའི་སྨན་ཡང་འདིར་ཚང་བ་རྣམས་དེར་ཟད། མ་
ཚང་བ་རྣམས་བསྣན་པར་བྱ་ལ། རིགས་གསུམ་མགོན་པོ་དང་ཛཾ་བྷ་ལ་སོགས་ཀྱི་སྔགས་ཟབ་མོས་བྱིན་གྱིས་བརླབས་ཏེ། བྱིས་པའི་ལྕེ་ལ་དབྱངས་ཅན་གྱི་ས་བོན་ཧྲཱིཿབྲིས་པས་བློ་གསལ། ངག་སྙན་ལྕེ་བདེ་བ་སོགས་དེས་མཚོན་པའི་རྟེན་འབྲེལ་བྱ་ཞིང་
13-5-33a


གོང་སྨོས་ལྟར་བཟའ་བྱུག་བྱས་ན་ཤིན་ཏུ་ཟབ་པས་གང་འདོད་རྟེན་འབྲེལ་བསྒྲིགས་པར་བྱའོ། །གཞན་ཡང་བྱིས་པའི་སྲོག་གཏའ་བསྡམ་པ་དང༌། ལྷ་མོ་བུ་རྫི་མ་དང་ནམ་གྲུ་མ་ལ་བཅོལ་བས་བར་ཆད་སྲུང་བ་སོགས་གཞན་ལས་ཤེས་པར་བྱའོ། །
སྲིད་འབེབས་ཀྱི་ཐབས་ཞར་བྱུང་དང་བཅས་པ་སྟེ་སྐབས་བརྒྱད་པའོ། །ཆགས་ལམ་ཕྱག་རྒྱ་མོ་བསྟེན་པའི་སྐབས་སུ་ཕལ་ལ་མཁོ་བ། ཕྱག་རྒྱ་མ་བརྟག་པ་དང༌། དགུག་པ་སོགས་དང༌། གཞན་ཡང་ཕྱག་རྒྱ་མ་གཞན་གྱིས་མི་མཐོང་བར་བྱ་བ་ལ་
སོགས་པ་གཞན་ལས་ཤེས་པར་བྱའོ། །འདིར་ཉེ་བར་མཁོ་བའི་སྐབས་བརྒྱད་པོ་བཤད་པ་འདི་ལས། གཞན་དུ་ཁམས་འཕེལ་བ་དང༌། སྲིད་འབེབ་སོགས་ཀྱི་སྐབས་དོན་རེ་རེ་ལ་ཡང་མན་ངག་གི་ཐབས་མཐའ་ཐུག་པ་མེད་པ་ཡོད་མོད་ཀྱི། ཐམས་ཅད་ལག་
ཏུ་ལེན་ཚོད་ཀྱང་མེད་ལ། ལག་ཏུ་བླང་ན་འདི་ཙམ་གྱིས་ཀྱང་དོན་ཡོངས་སུ་འགྲུབ་པའི་ཕྱིར་ཆགས་ལམ་གྱི་ཡན་ལག་ཉེར་མཁོ་སྐབས་བརྒྱད་པ་ཅན་འདི་ནི་རྒྱུད་དང་བཀའ་གཏེར་གྱི་མན་ངག་རྣམས་ནས་བཏུས་ཏེ་མི་ཕམ་འཇམ་དཔལ་དགྱེས་པས་གཞན་ལ་ཕན་པའི་
བློས་ས་ཁྱི་ཧོར་ཟླ་བརྒྱད་པའི་ཚེས་ཉེར་ལྔ་ལ་གྲུབ་པར་བགྱིས་པ་འདིས་སེམས་ཅན་ཐམས་ཅད་ལ་ཕན་པ་མཆོག་གི་དཔལ་སྦྱིན་པར་གྱུར་ཅིག  །མངྒ་ལཾ།།    །།      
13-5-33b


empty page
13-6-1a


༄༅། །གླུ་བྲོ་སྒྱུ་མའི་རོལ་མོ་ཡོད་དོ། །
13-6-1b


སྣ་ཚོགས་སྒྱུ་མར་འཆར་བའི་ཐབས་མཁས་འཕྲུལ། །བརྩེ་བའི་ཤུགས་ཀྱིས་བསྐྱོད་ཅིང་བསྐྱོད་པ་ལས། །སྲིད་པ་ཀུན་ན་ཀུན་དགའི་རོ་སྟེར་བ། །གར་གྱི་དབང་ཕྱུག་འཇམ་དཔལ་
གཞོན་ནུས་སྐྱོངས། །མཆོག་ཏུ་བྱི་དོར་བྱས་པའི་ལུས་ལ་ནི། །རྒྱན་མང་སྤྲས་པ་འགྱིང་ཞིང་འགྱིང་ཚུལ་དུ། །སྟངས་སྟབས་སྣ་ཚོགས་འཁྲུགས་བཞིན་འགྱུར་ཁུགས་གླུ། གསེར་གྱི་དྲིལ་ཆུང་འཁྲོལ་བའི་
སྒྲ་འདྲ་ཞིང་། །ལྡེམ་ལྡེམ་གཡོ་བའི་སྐེད་སྐབས་འཁྲི་ཤིང་ལ། །ནོར་བུའི་དྲ་ཕྱེད་འཕྱང་བའི་རྩེ་མོ་ནས། །ངང་རྒྱལ་སྒྲ་འདྲ་གསེར་གྱི་དྲིལ་གཡེར་འཁྲོལ། །ཡིད་འོང་སྲེད་པ་འཕེལ་བའི་རྨི་ལམ་མཐོང་། །
ཐུན་མཚམས་དབུས་ན་མཛེས་པའི་ཟླ་བ་ལྟར། །དཀར་དམར་རབ་ཏུ་སྡུག་པའི་བཞིན་རས་ཅན། །སྐྲ་ཡི་ལེན་བུ་ཤིག་ཤིག་པོར་གཡོ་ཞིང་། །ཙནྡ་ག་བུར་ལི་ཤིའི་དྲི་བསུང་འཕྲོ། །སྔ་མཐོང་ཕྱི་མར་ལྷག་
13-6-2a


པའི་ངང་ཚུལ་གྱིས། །བཞི་ཕྲག་བརྒྱད་ཀྱི་ཁྱེའུ་བུ་མོ་རྣམས། །སྤེལ་མའི་ཚུལ་དུ་ལག་པ་སྦྲེལ་ནས་འཁྲབ། །གོས་རྒྱན་ཉམས་འགྱུར་མི་གཅིག་དུ་མས་རྩེ། །དེར་ནི་རྟོག་ཆེན་བློ་གྲོས་
གསལ་བའི་མིག །པདྨའི་འདབ་མ་ལྟ་བུར་རྣམ་ཡངས་པ། །དེ་ཡིས་དེ་དག་རྣམས་ཀྱི་གནས་ཚུལ་རྣམས། །ཕན་ཚུན་ལན་གྱི་ཚུལ་དུ་སྨྲ་བར་བྱེད། དང་པོ་བྲོ་པ་ཁྱེའུ་རྣམས་ཀྱི་ངག་ལྷའི་རྔ་དབྱངས་ལྟ་བུ་
ལ་དྲངས་ནས་བལྟ་བའི་དགའ་བ་བརྗོད་པ་འདི་སྐད་དུ། འཇིག་རྟེན་རྩེ་དགའི་རོལ་མོ་དགའ་བའི་མཆོག །མྱ་ངན་ཡིད་ལ་འཐད་པ་སྦྲང་རྩི་འདྲ། །འཐུང་མ་ཐག་ཏུ་སྙིང་གི་དབུས་སུ་འཇུ། །ཅི་ཙམ་སྤྱད་
ཀྱང་འདི་ལ་སུན་པ་མེད། །ཁྱད་པར་ན་ཆུང་མཛེས་པའི་ལང་ཚོ་ཡི། །རོ་མཆོག་ཕན་ཚུན་མྱོང་པ་གསལ་སྟོན་པ། །ཟུར་གྱིས་འཛུམ་བཞིན་སྟངས་སྟབས་བསྐྱོད་པའི་གླུས། །གཟུགས་མེད་ཡིད་ཀྱང་བཞུ་བ་
13-6-2b


བཞིན་དུ་བྱེད། །ཉི་མའི་སྣང་བ་བྲལ་བའི་པདྨ་བཞིན། །བློ་ངན་རྣམས་ནི་རྟག་ཏུ་ངོ་ཟུམ་གནག །ཟླ་བའི་འོད་ཀྱིས་ཕོག་པའི་ཀུ་མུད་བཞིན། །བསོད་ནམས་ལྡན་པ་རྟག་ཏུ་དགའ་བས་འཛུམ། །འོ་མའི་མཚོ་ལ་ཨུཏྤལ་སྔོན་པོ་བཞིན། །
མཛེས་པའི་གདོང་ལ་འཁོར་བའི་འདྲེན་བྱེད་ཟུང་། །ཅུང་ཟད་ཟུམ་པའི་ལྟ་སྟངས་གློག་གི་ཟེར། །ཕན་ཚུན་སྙིང་ལ་ཞགས་པ་བཞིན་དུ་བསྐྱངས། །བརླན་ཏེ་ལྟ་བའི་མིག་དཀྱུས་པདྨའི་འདབ། །ཆགས་པའི་དམར་འོད་སྦྲང་རྩིའི་རྡུལ་
དམར་ཅན།  །འཐུང་འདོད་བུང་བ་གཞོན་ནུའི་མདུན་བལྟས་པ། །འདི་ན་ཕན་ཚུན་འགྲན་པ་ལྟ་བུར་གནས། །ཞེས་ཟེར། །དེའི་ཚེ་ན་རྟོག་ཆེན་པ་དེ་འཛུམ་མུལ་གྱིས་ཕྱུངས་ནས་བུང་བ་རྣམ་པར་རོལ་པའི་དབྱངས་ལ་དྲངས་ནས།
རང་གི་གོང་བའི་ཐད་ནས་ཐོས་ཙམ་དུ་མི་རྟག་པའི་གཏམ་འདི་སྐད་དུ། ཀྱེ་མ་ཕན་ཚུན་ལྟ་བས་བྲེལ་བ་ཡི། །སྤྲིན་མཐོང་རྨ་བྱ་བཞིན་དུ་འདི་ན་དགའ། །འཆི་བདག་འཇིགས་པའི་ཁར་ནི་གནས་བཞིན་དུ། །དོགས་པ་མེད་པར་རྩེ་འཇོའི་
གླུ་གར་འཁྲབས། །སྐད་ཅིག་མི་སྡོད་གར་གྱི་རྣམ་འགྱུར་འདིས། །དཔེ་ཞིག་སྐྱེས་བུའི་སྙིང་ལ་བསྟན་མོད་ཀྱི། །མི་ཤེས་བཞིན་དུ་ད་རུང་གར་ལ་བལྟ། །ཚེ་སྲོག་གར་དང་མཚུངས་པ་མི་སེམས་སམ། །ཡང་ཡང་གཡོ་ཞིང་བསྐྱོད་
པའི་ལྷུ་ཚིགས་རྣམས། །རྡོ་བཞིན་གཡོ་མེད་ཐང་ལ་ཉལ་བའི་མཐར། །ཤ་དང་བྲལ་བ་རུས་པའི་དུམ་བུ་ནི། །ཕྱོགས་དང་ཕྱོགས་སུ་བཀྲམ་པ་བཞིན་དུ་འཐོར། །འདི་ན་ཕན་ཚུན་གཅིག་ལ་གཅིག་བརྩེ་བས། །ལུ་གུ་རྒྱུད་དུ་འབྲེལ་བ་འདི་
13-6-3a


དག་ཀྱང་།  །ལས་ཀྱི་དབང་གིས་འཇིག་རྟེན་ཕ་རོལ་དུ། །གནས་རིས་མི་གཅིག་ཉིད་དུ་སོ་སོར་འགྲོ། །ནམ་ཞིག་སོ་དཀར་ཟེའུ་འབྲུ་འཐོར་བའི་བཞིན། །འཛུམ་ན་འདམ་རྫིད་རླུང་གིས་འཁྲུགས་འདྲ་བ། །འཁར་བ་ལ་
བརྟེན་དལ་བུས་བསྐྱོད་ན་ཡང་། །འཆི་བདག་འཇིགས་པ་དྲན་པ་བཞིན་དུ་འདར། །ཉི་འོད་ཀྱིས་རྒྱས་ཨུཏྤལ་གཞོན་ནུ་བཞིན། །རྟག་ཏུ་དགའ་བས་འཛུམ་པར་འདོད་ན་ཡང་། །བུ་ཡུག་རླུང་གིས་པདྨ་རྙིང་པ་ལྟར། །དུས་ཀྱིས་དབང་
མེད་རྒ་བ་ཤེས་པར་གྱིས། །ཞེས་ཟེར། དེ་ནས་གཞོན་ནུ་མ་རྣམས་ཀྱིས་མགྲིན་གཅིག་ཏུ་ལྷ་ཡི་སིལ་སྙན་གྱི་སྒྲ་ལྟ་བུའི་དབྱངས་ཀྱིས་དགོད་པའི་རྩེ་དགའ་རྗེས་སུ་མཚོན་པའི་གླུ་འདི་འདྲ་བ་ལེན་ཏོ། །གདོང་བཟང་ཟླ་བའི་གདོང་ཅན་
མཐོང་མ་ཐག །ཟླ་འོད་ཀྱིས་ཕྱེ་ཟླ་དགའི་གེ་སར་ལྟར། །རབ་དཀར་སོ་ཡི་ཟེའུ་འབྲུ་ཉེར་མཛེས་པ། །མཆུ་སྒྲོས་པདྨ་དམར་པོའི་དབུས་ནས་ངོམས། །སྙིང་དབུས་དགའ་བའི་འོ་མཚོ་ཕྱུར་བའི་རླབས། །མགུལ་གྱི་བུམ་པ་བཟང་པོར་
ལེགས་འཁྱིལ་བ། །ཉེ་བར་མཚོན་པ་གླུ་བྲོ་སྒྱུ་མའི་རོལ་མོ། ཚ་ཡིད་དུ་འོང་བའི་སྒྲ། དགོད་པ་ཞེས་སུ་འཇིག་རྟེན་དག་ན་གྲགས། །གང་ན་ལྷ་ཡི་སིལ་སྙན་ལྟ་བུར་ནི། །ཐོས་ན་དགའ་བས་དགོང་པ་ཞེས་བྱའི་སྒྲ། གནས་པ་དེ་ན་འཇིགས་པ་ཆེན་པོ་
དང་། །མྱ་ངན་ཟུག་རྔུས་མནར་བ་ངེས་པར་མེད། །གཞོན་ནུ་ཚོགས་པའི་དགའ་བ་འདི་ཡི་རོ། །མ་མྱོང་གྱི་ནར་བཞག་པའི་སྐྱེ་བོ་དེས། །མཐོ་རིས་དགའ་བ་གཞན་དང་གཞན་མྱོང་ཡང་། །རོ་མེད་དེ་ཡིས་བདེ་བ་མི་ཤེས་སོ། །
13-6-3b


ཞེས་ཟེར། དེ་ནས་དཔྱོད་རབ་པས་གཞོན་ནུ་མ་རྣམས་ཀྱིས་ཚིག་བདེན་ཁ་བདེ་ཐོས་ནས་མིག་བགྲད་དེ་བལྟས་ནས། ཁུ་བྱུག་རྩེ་བའི་རྟ་ལ་དྲངས་ནས་ཕྱེད་ཐོས་ཕྱེད་མི་ཐོས་སུ་སྡུག་བསྔལ་བའི་ཚུལ་མཚོན་པའི་གླུ་འདི་བླངས་སོ། །ཤ་
ལ་ཁྲག་གིས་བརླན་པའི་མཆུ་སྒྲོས་དབུས། །ཤ་མེད་རུས་པ་དཀར་པོའི་རང་མདོག་གང་། །ཤིན་ཏུ་གཙང་བའི་མེ་ཏོག་རྣམས་དང་བསྒྲུན། །ཀྱེ་མ་འདོད་ལྡན་རྣམས་ཀྱི་ཚུལ་ལ་ལྟོས། །འདོད་པས་དྲངས་ཏེ་རྣམ་པར་གཡེང་བའི་རླུང་། །
སྙིང་གི་ནགས་ཚལ་མཐུག་པོར་ཞུགས་གྱུར་པས། །དྲན་པའི་ཤིང་བལ་དབང་མེད་བསྐྱོད་པ་དག །མགྲིན་པའི་གཅོང་རོང་དོགས་པོར་འཁྲི་ཤིང་དགོད། །གང་ན་ན་ཆུང་ཕན་ཚུན་དགོད་པའི་སྒྲ། །གནས་པ་དེ་ན་འདོད་པའི་མེ་ཆེན་
འབར། །དེས་ནི་ལྕེ་བདུན་དྲག་ཏུ་དགོད་པ་ལྟར། །འཁྲུགས་པའི་དབུས་ན་གར་མཁན་བཞིན་དུ་འཕྱོ། །རྨི་ལམ་རྨིས་པའི་ཆུ་འཐུང་ཇི་བཞིན་དུ། །ངོམ་པ་མེད་པར་འདོད་པའི་རོ་མྱོང་བ། །དེས་ནི་སྲིད་པའི་མྱོང་བྱ་ཇི་མི་ཤེས། །འབར་
བའི་ཁྲོ་ཆུ་འཐུང་བའི་རོ་ཡང་ཤེས། །ཕན་ཚུན་གཅིག་ཏུ་འདུ་ལ་ཇི་དགའ་བ། །དེ་ལྟ་དེ་ལྟར་འབྲལ་བའི་སྡུག་བསྔལ་ཆེ། །མི་འདོད་པར་ཡང་རྒ་དང་འཆི་བ་ཡིས། །ལག་ནས་དྲངས་པ་བཞིན་དུ་ཉེ་བར་འཁྲིད། །བདག་ཉིད་རྒ་
བའི་ཟིལ་གྱིས་ནོན་པའི་ཚེ། །ན་ཆུང་ཚོགས་པའི་རྩེ་དགའ་སྙིང་ལ་གཟེན། །ཀྱེ་མ་གཞོན་རྣམས་བགྲེས་པོར་མི་འགྱུར་དང་། །གཞོན་མ་མྱོང་བའི་རྒན་པ་སུ་ཞིག་གོ། ཞེས་ཟེར་བས་ཀུན་གྱིས་རྟོག་ཆེན་པ་དེ་ལ་ཅུང་ཟད་བལྟས་ནས་
13-6-4a


ཡང་གཞོན་ནུ་དེ་དག་གིས་ནི་གུ་མ་རྣམས་དང་ལག་པ་སྦྲེལ་བཞིན་དུ་གླིང་བུ་རྣམ་པར་འགྱུར་བའི་གླུ་རྟ་ལ་དྲངས་ནས་ལག་བཅང་གི་དགའ་བ་རྗེས་སུ་མྱོང་བའི་དབྱངས་བརྗོད་པ། ལང་ཚོ་དར་ལ་བབས་པའི་ལག་པ་ཡི། །
པདྨའི་འདབ་མ་ཕན་ཚུན་འཐབ་བྱས་པའི། །རེག་པ་ལས་སྐྱེས་གུར་གུམ་གསར་བའི་ཆབ། །སྐོམ་པའི་རིམས་ནད་སེལ་བའི་སྨན་མཆོག་ཡིན། །འཆར་ཁའི་དམར་འོད་ཆགས་པའི་ཟླ་བ་ལྟར། །དཀར་དམར་ཡིད་དུ་འོང་བའི་ཞལ་གྱི་
ཁྱིམ། །མཐོང་བས་སྙིང་གི་རྙོགས་པ་དྭངས་ནུས་ན། །གཙང་མའི་ལུས་ལ་རེག་པས་སྨྲོས་ཅི་འཚལ། །མཐོང་མ་ཐག་ཏུ་སྐྱེ་བོ་བྱེ་བ་བརྒྱ། །མི་མཐོང་ལྕགས་ཀྱུ་རྣོན་པོའི་འཕྲུལ་ཐབས་ཀྱིས། །བརྟན་པའི་ངང་ཚུལ་འཕྲོགས་ནས་བཀུག་
པ་རྣམས། །ཁ་ལས་བབས་པ་བདུད་རྩི་བཞིན་དུ་འཐུང་། །ཆགས་དང་བྲལ་བ་རྣམས་ཀྱིས་མཐོང་གྱུར་ནའང་། །ཆགས་པའི་ས་བོན་མྱུར་དུ་བསྐྱེད་ནུས་པ། །ཆགས་དང་བཅས་པ་དེ་ཡིས་གང་གི་ལུས། །མ་མཐོང་གྱི་ནར་བཞག་པ་སྙིང་
རྗེའི་ཡུལ། །སྙིང་ལ་ཆགས་པ་མི་བཟད་མེ་འབར་ཡང་། །ལུས་ཀྱི་ཆུ་གླུ་བྲོ་སྒྱུ་མའི་རོལ་མོ། ཚ་རྙོགས་འཁྲུགས་པས་ནོན་གྱུར་པས། །འདོད་པའི་སྤྱོད་ཡུལ་མི་ཤེས་དེ་དག་རྣམས། །འདོད་ལ་གཡེང་བ་སྤངས་པའི་ཟོལ་གྱིས་རྒྱུ། །བདེ་བའི་མེ་ཆེན་སྙིང་ལ་སྦར་བ་ཡི། །
འདོད་པའི་སྒྱུ་རྩལ་ཆོ་ག་མི་མཁས་ན། །མཐོ་རིས་སྐྱེ་བས་ཐོབ་པའི་བློ་གྲོས་ནི། །རི་མོར་བྲིས་པའི་མར་མེ་ཉིད་དང་མཚུངས། །ཞེས་ཟེར་བ་ལ་དཔྱོད་ར་གཏོང་བས་ཕན་ཚུན་བལྟས་ནས་ཉེ་བ་ན་གནས་པ་རྣམས་ཀྱིས་ཐོས་ཙམ་དུ་རྨ་བྱ་མྱོས་པའི་
13-6-4b


གླུ་ལ་དྲངས་ནས་མི་གཙང་བ་སྟོན་པའི་གླུས་བསྐུལ་བ། ཀྱེ་མ་ལུས་ནི་བསྐྱོད་ཅིང་ཆེར་བསྐྱོད་པ། །དེ་ལྟ་དེ་ལྟར་ཁོངས་པའི་ནང་དུ་ཡང་། །མི་གཙང་དྲི་མའི་ཚོགས་རྣམས་འཁྲུག་ཅིང་འཁྱོམ། །གཤང་གཅིའི་བུམ་པ་མཁའ་ལ་
བསྐྱོད་པ་བཞིན། །གལ་ཏེ་འདི་གཅིག་གི་ནི་ཁོངས་གནས་པའི། །དྲི་མའི་ཚོགས་ཀུན་ས་ལ་ལྷུང་གྱུར་ན། །འདི་དག་ཀུན་ཀྱང་མྱོས་མྱོས་པོ་རུ་འགྱུར། །དེ་འདྲ་ཁོངས་པར་བཟུང་བཞིན་གར་ཡང་བྱེད། །གཅི་ལ་སོགས་པ་མི་གཙང་གཅིག་
འདོར་བའི། །སྣོད་དེ་ཡང་ནི་ཉེ་བར་སྨད་འོས་ན། །མི་གཙང་སུམ་ཅུ་དྲུག་གི་འབྱུང་གནས་གང་། །རྟག་ཏུ་ཁྲུས་ཀྱིས་མི་འདག་སུ་ཞིག་འདོད། །གཤང་གཅི་ཁྲག་ཞགས་སྣབ་ལུད་རྫིང་བུ་ན། །ཁྲི་ཕྲག་བརྒྱད་ཀྱི་སྲིན་བུའི་གྲོང་ཁྱེར་ཀུན། །ཀུན་ནས་
ཤིག་ཤིག་པོར་ནི་གཡོ་གྱུར་པ། །འདི་གཙང་ན་ནི་མི་གཙང་གཞན་སུ་ཞིག །ཀར་བུར་སྦྲང་གི་ཟས་གཙང་ཟོས་ན་ཡང་། །དེ་མ་ཐག་ཏུ་མི་གཙང་མཆོག་གྱུར་ན། །ཁ་དགུའི་རྨ་ནས་དྲི་ང་རྒྱུད་མར་འཛག །འདི་ལ་རེག་པས་སུ་ཞིག་
བདེ་བར་སེམས། །སྟེང་དུ་རྒྱུ་བའི་རླུང་གིས་མགྲིན་པ་ཡི། །ཡི་གེ་བསྐྱོད་པའི་དབྱངས་འདི་སྙན་ན་ཡང་། །ཐུར་སེལ་རླུང་གིས་བུས་པ་གཤོང་བའི་དྲི། །མི་བཟད་དུས་སུ་འབྱུང་བས་སྨ་ཡང་ཕབས། །བཤང་བ་སྲིན་བུས་འཐོར་
བའི་ཐུན་མཚམས་མདོག །པགས་པ་ཁྲག་གིས་གང་ཚེ་བྱེ་རུའི་མདངས། །ཚིལ་གྱིས་བརྒྱངས་པ་ཟླ་བ་འདྲའོ་ཞེས། །འཇིག་རྟེན་རྨོངས་པ་དག་གིས་ཉེ་བར་བརྟགས། །མི་གཙང་མི་གཙང་ཞེས་སུ་གང་གྲགས་པ། །ལུས་ལས་མ་བྱུང་
13-6-5a


འགའ་ཡང་མ་དམིགས་ཀྱང་། །འདི་ན་ལུས་ལ་ཞེན་པའི་བློ་གྲོས་ཀྱིས། །མི་གཙང་མངོན་སུམ་གྱུར་པ་མ་རྟོགས་སོ། །རྨོངས་པས་བསླད་པའི་སྐྱེ་བོ་འདི་དག་ནི། །ཕག་བཞིན་མི་གཙང་བ་ལ་ཤིན་ཏུ་བསྐམས། །
ཆགས་བྲལ་རྣམས་ཀྱི་ཡིད་ལ་གནས་པ་ཡི། །རྨད་བྱུང་བདུད་རྩིའི་རོ་མཆོག་མི་ཤེས་སོ། །མཛེ་ཅན་སྲིན་བུས་ཉེན་པ་དག་གིས་ནི། །མེ་ལ་བརྟེན་འདྲ་འདོད་པའི་བདེ་བ་ལས། །མཛེ་ནད་ཞི་འདྲ་ཆགས་དང་བྲལ་བ་ཡི། །བདེ་བ་ནམ་
ཡང་བླུན་པོས་མ་མྱོང་ངོ་། །ཞེས་ཟེར་བས་ཁྱེའུ་དང་བུ་མོ་ཕལ་ཆེར་དེ་ལ་ཅུང་ཟད་ཅུང་ཟད་ཉན་ནས་ཡང་ཡིད་བག་མེད་པའི་དབང་དུ་གྱུར་པས། སླར་གཞོན་ནུ་མ་རྣམས་ཀྱིས་འཁྱུད་པའི་རྩེ་དགའ་གསལ་བར་བྱེད་པའི་གླུ་འདི་གསེར་གྱི་
དྲིལ་གཡེལ་འཁྲོལ་བའི་རྟ་རུ་དྲངས་ནས་འདི་སྐད་དུ། །ཕན་ཚུན་ལག་ནས་དྲངས་ཏེ་ཡངས་པའི་བྲང་། །གཞོན་ནུའི་ཤ་ཚུགས་རེག་པའི་བདེ་མྱོང་ནས། །རྩེ་དགས་སླར་ཡང་དམ་པོར་བཅིང་གྱུར་པ། །འོ་མའི་མཚོ་ལ་ཟླ་ཟེར་བབས་པ་
བཞིན། །སྦྲང་རྩི་འཐུང་བ་རྣམས་ཀྱིས་སྦྲང་རྩི་ལྟར། །འདར་བ་དང་ལྡན་ཧ་གླུ་བྲོ་སྒྱུ་མའི་རོལ་མོ། ཚ་སིང་མྱོས་པའི་དབྱངས། །བརྒྱུད་མར་སྒྲོགས་པ་མཆུ་ཡི་བུང་པ་ཡིས། །གཅིག་ཤོས་མཆུ་སྒྲོས་པདྨའི་བཅུད་ལ་འཇིབས། །རེག་པ་ལས་སྐྱེས་འོད་ཀྱི་
ཤིང་རྟ་ཡིས། །བདེ་མཆོག་སྦྲང་རྩིའི་རི་བོ་བཞུ་བ་དང་། །ལྷན་ཅིག་གཟུགས་མེད་ཡིད་ཀྱང་ཞུ་བའི་མཚོར། །དེ་དང་དེར་ནི་རོ་གཅིག་ཉིད་དུ་འདྲེས། །སོས་ཀའི་དུས་ཀྱི་དཔལ་འདྲ་སྨད་མེད་པའི། །ན་ཆུང་དགའ་བ་བཅུད་ཀྱིས་ལེན་
13-6-5b


པའི་སྨན། །ཁ་མེད་ཡིད་ཀྱིས་འཐུང་བའི་དེ་མ་ཐག །སྙིང་ནང་བདུད་རྩིས་གང་བ་བཞིན་དུ་གྱུར། །ཞེས་ཟེར་བས་རྟོག་ཆེན་བློ་གྲོས་གསལ་བ་དེའི་གདོང་ཡེ་རེ་བཏེགས་ནས་སྟོང་པར་རྗེས་སུ་བསྟན་པའི་གླུ་འདི་ངང་པའི་རྒྱལ་པོ་རབ་ཏུ་
དྲེགས་པའི་དབྱངས་སུ་བསྒྱུར་ནས་ཀུན་གྱིས་ཐོས་པར་འདི་སྐད་དུ། ཨེ་མ།  སྤྱད་པས་མི་ངོམ་འདོད་པའི་གློག་ཞགས་འདི། །ཀུན་རྨོངས་སྤྲིན་གྱི་ནང་ན་གྱ་གྱུར་རོལ། །བརྟག་ན་དབེན་པ་སྨིག་རྒྱུའི་ཆུ་འདྲ་ཡང་། །སྲིད་པ་གསུམ་
པོ་བཅིང་བར་ནུས་པ་མཚར། །ཚེ་རབས་བརྒྱུད་མར་ཡང་ནས་ཡང་སྤྱད་པའི།  །སྐྱེ་བོ་གཅིག་གི་འདོད་འདི་གཟུགས་ཡོད་ན། །རི་རབ་ལྷུན་པོ་སྟོང་ཡང་ཆུང་ངུར་བགྱིད། །ད་རུང་ཕྱིར་ཞིང་སྲེད་པ་འཕེལ་ལ་ལྟོས། །གསུམ་ལས་
སྐྱེས་པ་རེག་པའི་བདེ་བ་དེ། །གསུམ་པོ་དག་ཏུ་ཡོད་པ་མ་ཡིན་ཀྱང་། །གསུམ་ན་གནས་པའི་སྐྱེ་བོ་འདི་དག་ཀུན། །འདི་ལ་རྨོངས་ནས་དུག་གསུམ་གྱིས་ཡང་ཡང་སྐྱེ། །ཚོར་བ་སེམས་ཀྱི་ངོ་བོ་ཉིད་ཡིན་ན། །རྐྱེན་ལ་མི་ལྟོས་རྟག་ཏུ་བདེ
འམ་སྡུག །སེམས་ལས་གཞན་པར་གྱུར་པའི་མྱོང་བྱ་ནི། །སེམས་དང་ཇི་ལྟར་འཕྲད་པ་བརྟགས་པར་གྱིས། །ནམ་མཁའ་ལྟ་བུའི་སེམས་ཀྱི་ཆོས་ཉིད་ནི། །འདི་ཞེས་ཐུབ་རྣམས་ཀྱིས་ཀྱང་མ་གཟིགས་ན། །འདི་ལ་བདེ་དང་
སྡུག་པའི་མཚན་མ་ཡིས། །ཇི་ལྟར་ཕན་དང་གནོད་པ་གསལ་པོར་སོམས། །བློ་གྲོས་གསལ་བ་ངས་ནི་དེར་བལྟས་ན། །སྲིད་པ་སྣ་ཚོགས་སྒྱུ་མའི་རོལ་མོར་མཐོང་། །སྒྱུ་མས་བསླུས་པར་གྱུར་པ་ཁྱེད་ལ་ཡང་། །སྒྱུ་མའི་སྙིང་
13-6-6a


རྗེ་མེ་བཞིན་བདག་ལ་འབར། །ཞེས་ཚིག་འབྲུ་གསལ་ཞིང་སྒྲ་གདངས་ཤིན་ཏུ་སྙན་པས་དྲི་ཟའི་དབྱངས་ཀྱིས་མི་རྣམས་ཀྱི་སྐད་བཞིན་དུ་དེ་དག་ཟིལ་གྱིས་མནན་པས་བྲོ་བ་དེ་དག་རྟོག་ཆེན་པ་དེ་ལ་ཤིན་ཏུ་དགའ་
ནས་ཀུན་གྱིས་དེ་ལ་བལྟའ་ཞིང་མགྲིན་གཅིག་ཏུ་དྲི་ཟའི་པི་ཝང་གི་ངག་ལ་དྲང་ནས་གླུ་འདི་འདྲ་བསྒྲགས་སོ། །རྒྱུ་སྐར་ནངས་ན་རྒྱུ་སྐར་བདག་པོ་དང་། །པདྨའི་ནངས་ན་པདྨ་དཀར་པོ་བཞིན། །ཁྱོད་ཀྱི་གླུ་ཡིས་བདག་ཅག་རྣམས་ཀྱི་གླུ། །
གདངས་དང་སྡེབ་སྦྱོར་མཛེས་པའི་སྒོ་ནས་མནན། །དེ་དོན་བདག་ཅག་རྣམས་ཀྱིས་དཔྱད་ན་ཡང་། །དེ་ལྟར་དོན་དུ་གྲུབ་པར་རིགས་ནས་ནི། །ཁྱོད་ནི་བདག་ཅག་ཉམས་ངའི་གཡང་ས་ལས། །རབ་ཏུ་བསྲུངས་པའི་ར་བ་ཉིད་དུ་མཐོང་། །
དམ་པ་རྣམས་ནི་རྨིས་ནའང་དགེར་འགྱུར་ན། །དངོས་སུ་མཐོང་བ་ལྟ་ཞིག་སྨྲོས་ཅི་འཚལ། །མཐོང་ནས་དེ་ཡི་གདམས་ངག་ཉན་པ་ལ། །སྲིད་དང་ཞི་བའི་དཔལ་ཡོན་པང་ན་གནས། །དེ་ཕྱིར་ཁྱུ་ཡི་སྔོན་ན་ཁྱུ་མཆོག་བཞིན། །བདག་
ཅག་རྣམས་ཀྱི་མདུན་དུ་ཁྱོད་བསྟར་ནས། །སྡུག་བསྔལ་རྒྱ་མཚོ་ཆེན་པོའི་ཕ་རོལ་དུ། །ངང་པས་བསྐོར་བའི་ངང་རྒྱལ་བཞིན་དུ་འཕུར། །བརྩེ་བའི་སྲད་བུ་གཅིག་གིས་བདག་ཅག་རྣམས།  །ཕྲེང་བ་བཞིན་དུ་བརྒྱུས་པ་འདི་དག་
ཀྱང་། །ཕྱིར་ཞིང་བདེ་བ་མི་ཤིགས་རྡོ་རྗེ་ཡིས། །གཅིག་ཏུ་བཟླུམས་པའི་ཐབས་མཆོག་ཁྱོད་ལ་ཞུ། །འཇའ་ཚོན་པ་ཏྲ་འཛིངས་པའི་དར་ལམ་ལ། །རྩེ་བཞིན་དུ་ཡང་མང་པོ་གཤེགས་ཞེས་ཐོས། །ངེད་ཅག་མི་འབྲལ་བཞིན་དུ་
13-6-6b


དེར་འགྲོ་བ། །ཤིན་ཏུ་འདོད་ན་དཔའ་བོས་ཐབས་སྟོན་ཅིག །ཅེས་ཟེར་བས་དེ་རྣམས་རིག་པ་མཆོག་དང་ལྡན་པར་ཤེས་ནས་རྟོག་ཆེན་པ་དེ་བྲོ་ར་ཟླུམ་པོའི་དབུས་སུ་སོང་ནས་རྡོ་རྗེའི་ཌཱ་དྲིལ་གསང་བའི་དབྱངས་ལ་བརྟེན་ནས་ཁྱེའུ་
དང་བུ་མོ་དེ་དག་ལ་སྙིང་བརྩེ་བའི་ཟབ་མོའི་གདམས་པ་བསྟན་པའི་གླུ་ལེན་བཞིན་རྐང་བྲོ་ཅུང་ཟད་འཁྲབ་ནས། ཨེ་མ་ངོ་མཚར་ཆེ་བའི་གྲོགས་པོ་རྣམས། །བདེ་སྟོང་གསང་བའི་ལམ་བཟང་འཇུག་ངོགས་བདེ། །ཁྱེད་
ཀྱང་དེ་ལ་དགྱེས་ཤིང་ང་ཡང་དགྱེས། །ང་དང་ཁྱེད་ཅག་ལྷན་དུ་བྲོ་གཅིག་བརྡུང་། །བུ་མོ་མ་སྐྱེས་ཆོས་ཀྱི་དབྱིངས་ལས་འོང་། །ཁྱེའུ་བཅུ་དྲུག་བདེ་བའི་ལང་ཚོ་རྫོགས། །རྟོག་ཆེན་གསལ་བ་རིག་པའི་ཡེ་ཤེས་ཏེ། །ང་དང་
ཁྱེད་ཅག་འཛོམ་པས་དགོས་པ་འགྲུབ། །རྐང་མཛེས་གསེར་གྱི་དྲིལ་ཆུང་འཁྲོལ་བ་ཡི། །སིལ་སིལ་རྐང་བྲོ་བརྡུང་བའི་ཉམས་འདི་ལ། །སྲིད་པ་ཧྲུལ་པོར་བཤིག་པའི་གནད་ཡོད་དེ། །སྐལ་བཟང་ཁྱེད་ཅག་རྣམས་ཀྱིས་
ཤེས་པར་མཛོད། །གཉིས་མཉམ་སྣང་བ་བདེ་བ་ཆེན་པོའི་མེས། །དངོས་ཀུན་སྟོང་པར་བཞུས་པའི་འོད་གསལ་ངང་། །འདོད་ཆགས་བདེ་སྟོང་སྒྱུ་མའི་ཡོ་ལངས་བསྐྱངས། །ཟག་མེད་འཇའ་སྐུ་འགྲུབ་པའི་རྟེན་འབྲེལ་
འགྲིགས། །ཁྱེད་ཅག་ཕྱི་ཡི་བྲོ་ར་གྲུ་གསུམ་ནང་། །ང་ནི་ཉི་མའི་ཐིག་ལེའི་གཟུགས་སུ་གནས། །གཞུ་ཡི་རྣམ་པ་ལྟ་བུའི་བྲོ་བརྡུངས་པས། །གློག་གི་ཟེར་མ་རྩེ་གསུམ་དབྱིབས་སུ་འབྱུང་། །ཁྱེད་ཅག་ཕྱི་ཡི་བྲོ་ར་ཟླུམ་པོ་
13-6-7a


ལ། །ང་ནི་ཟླ་བའི་ཐིག་ལེའི་གཟུགས་སུ་གནས། །མེ་ལྕེ་འབར་བ་ལྟ་བུའི་བྲོ་བརྡུང་བས། །འོ་མའི་ཐིགས་པ་སྐར་ཕྲེང་བཞིན་དུ་འབབས། །ཁྱེའུ་དང་པོ་བཞི་དང་བུ་མོ་བཞི། །མེ་ཏོག་དཀར་པོ་རྒྱས་
པའི་ཚལ་དུ་སོང་། །དགའ་དང་སྟོང་པ་ཟུང་དུ་སྦྱར་བའི་བྲོ། །བྲོ་ཆེན་དེ་ནི་འགྲན་ཟླ་མེད་པར་བརྡུང་། །ཁྱེའུ་གཉིས་པ་བཞི་དང་བུ་མོ་བཞི།  །མེ་ཏོག་དམར་པོ་རྒྱས་པའི་ཚལ་དུ་སོང་། །མཆོག་དགའ་སྟོང་ཆེན་ཟུང་དུ་སྦྱར་བའི་བྲོ། །
བྲོ་ཆེན་དེ་ནི་འགྲན་ཟླ་མེད་པར་བརྡུང་། །དེ་འོག་ཁྱེའུ་བཞི་དང་བུ་མོ་བཞི། །མེ་ཏོག་སྔོན་པོ་རྒྱས་པའི་ཚལ་དུ་སོང་། །ཁྱད་པར་དགའ་དང་ཤིན་ཏུ་སྟོང་སྦྱར་བྲོ། །བྲོ་ཆེན་དེ་ནི་འགྲན་ཟླ་མེད་པར་བརྡུང་། །ཁྱེའུ་ཐ་མ་བཞི་དང་བུ་མོ་བཞི། །
མེ་ཏོག་སེར་པོ་རྒྱས་པའི་ཚལ་དུ་སོང་། །ལྷན་སྐྱེས་དགའ་བ་ཐམས་ཅད་སྟོང་པའི་བྲོ། །བྲོ་ཆེན་དེ་ནི་འགྲན་ཟླ་མེད་པར་བརྡུང་། །དེ་མཐར་དེ་དག་ཀུན་ཀྱང་འབྲེལ་གྱུར་ནས། །སེར་མཐིང་དམར་པོའི་ཚལ་དུ་བྲོ་བརྡུང་ནས། །
སླར་ཡང་ཀུ་མུད་དཀར་པོའི་དགའ་ཚལ་ན། །ཁྱེད་དང་ང་ཡང་རོ་གཅིག་འདྲེས་པར་འགྱུར། །དེ་ཚེ་ཀུན་རྟོག་འཁོར་བའི་མུན་པ་ཀུན།  །རང་སར་ཡལ་བ་རྡོ་རྗེ་ནམ་མཁའི་དཀྱིལ། །རིག་སྟོང་བརྗོད་དུ་མེད་པའི་ཐིག་གླུ་བྲོ་སྒྱུ་མའི་རོལ་མོ། ཚ་ལེ་རུ། །དོན་
དམ་འཇམ་དཔལ་གཞོན་དུ་ངེས་པར་མཇལ། །ཞེས་ཟེར་བས་དེ་དག་ཀུན་གྱིས་བརྡ་དོན་གློ་བར་ཆུད་དེ་མཆོག་ཏུ་དགའ་ནས་རྟོག་ཆེན་པོ་དང་བཅས་པ་ཐམས་ཅད་སྟབས་གཅིག་ཏུ་ལྷ་དབང་གཡུལ་ལས་རྒྱལ་བའི་རྔ་སྒྲ་ལ་དྲངས་ནས། 
13-6-7b


བཀྲ་ཤིས་འགྱུར་བ་མེད་པའི་གླུ་འདི་དང་བསྒྲགས་ཏེ་ནོར་བུའི་ཆར་འབེབས་ཞེས་བྱ་བའི་རྐང་བྲོ་བརྡུང་ནས། ཨེ་མ་ཧོ། སྲིད་པ་སྣ་ཚོགས་སྒྱུ་མའི་གྲོང་ཁྱེར་གྱི་དབུས་ན། །སྒྱུ་མ་རྡོ་རྗེ་བཙན་པོའི་བྲོ་གར་ལ་བརྟེན་ནས། །སྒྱུ་མའི་
རང་མཚངས་མཐོང་བའི་ཤེས་རབ་དེ་འབར་བྱུང་། །སྒྱུ་མའི་ཟློས་གར་རྩེ་བའི་གང་ཟག་དེ་སྐྱིད་དོ། །སྣང་སྟོང་སྒྱུ་མར་ཤར་བའི་རྣལ་འབྱོར་གྱི་ཉམས་ལ། །གང་བྱས་ཇི་ལྟར་བྱས་ཀྱང་བདེ་ཆེན་གྱི་རོལ་མོ། །འདིར་སྐྱིད་ཕྱི་མར་སྐྱིད་
པའི་སྣང་ཚུལ་ལ་བསམས་ན། །ཉམས་དགའི་རྐང་བྲོ་མི་འཁྲབ་དབང་མེད་དུ་འདུག་གོ། རྟེན་མེད་མཁའ་ལ་ལྡིང་བའི་ཁྱུང་ཆེན་གྱི་ངང་ཚུལ། །དོགས་མེད་སྲིད་པའི་ཁམས་ན་བག་བསྐྱངས་སུ་འཕྱོ་བ། །བཟོད་མེད་སྙིང་རྗེ་འབར་
བའི་ཡོ་ལང་གི་ངང་ནས། །འགག་མེད་རིག་པའི་རྩལ་བྲོ་དུ་མ་ཞིག་འཁྲབ་བོ། །སྣང་བ་སྒྱུ་མར་ཤར་བའི་ངང་ཚུལ་གྱིས་བོས་པ། །གདམས་ངག་དོན་ཟབ་མགྲིན་པའི་རླུང་ཆེན་དེ་གཡོས་པས། །སྙིང་ལ་ཡེ་ཤེས་སྒྱུ་མའི་མེ་ཆེན་
རང་འབར་ནས། །སྲིད་པའི་ནགས་ཚལ་མཐུག་པོ་ཡམ་ཡམ་དུ་བསྲེགས་སོང་། །དཀར་དམར་མེ་ཏོག་འབྲེལ་བ་བདེ་སྐྱིད་ཀྱི་ཚོམ་བུ། །མི་འབྲལ་ལུག་རྒྱུད་རྡོ་རྗེའི་ཕྲེང་བ་རུ་སྦྲེལ་ནས། །གཅིག་ལ་གཅིག་བརྟེན་ཨཱ་ལི་ཀཱ་ལི་ཡི་འདུ་
འཕྲོས། །གཤོག་ཟུང་རྒྱས་པའི་བྱ་བཞིན་མཁའ་སྤྱོད་ལ་འཕུར་འགྲོ། པདྨའི་འོད་ཟེར་འཁྲུགས་པའི་ལྡིང་གུར་གྱི་དབུས་ན། །པདྨའི་རྒྱལ་པོ་རྟག་ཏུ་རྒུད་མེད་དེ་ཡོད་པས། །མི་ཟད་སྦྲང་རྩིས་མྱོས་པའི་བུང་ཚོགས་ཀྱི་
13-6-8a


འདུ་ས། །གཅིག་ཏུ་དགའ་བའི་གནས་དེར་བདག་ཅག་ཀུན་འགྲོའོ། །གཡུལ་རྒྱལ་ལྷ་ཡི་རྔ་འདྲའི་གླུ་དབྱངས་འདིས་བོས་བས། ཚེ་དཔལ་སྟོབས་ཐུ་གསེར་གྱི་སྙིང་པོ་ཡི་སྤྲིན་ཆེན། འཛམ་གླིང་
ཡངས་པའི་རྒྱལ་ཁམས་འདི་དག་ཏུ་དཀྲིགས་ནས། །དགའ་སྐྱིད་རྩེད་འཇོའི་འབྲུག་སྒྲ་སྒྲོགས་པར་ནི་གྱུར་ཅིག །ཅེས་ཟེར་ནས་རྨི་ལམ་ལྟ་བུའི་སྣང་བ་དེ་རེ་ཞིག་ཡལ་ལོ། །ཁ་མཚར་ཇི་བབ་གང་བབ་ཞིག །བྲིས་ཞེས་སྙན་ངག་ལེགས་
སྨྲ་བ། །པདྨ་ཡེ་ཤེས་ཞེས་བྱ་བས།  །ཡང་ཡང་བསྐུལ་བ་ལ་བརྟེན་ནས། །རྟག་ཏུ་རྣམ་གཡེང་ལ་གོམས་པའི། །རྣམ་དཔྱོད་དོན་མེད་གྱི་ན་པ། །མི་ཕམ་རྣམ་རྒྱལ་ཞེས་པ་ཡིས། །འཆལ་ངག་འདི་ག་འཕྲལ་དུ་བྲིས། །མངྒ་ལཾ། །
    གླིང་བྲོ་བདེ་ཆེན་རོལ་མོ་བཞུགས།  །དང་པོ་བྲོ་ཡི་བྱིན་འབེབས་ནི། །མོས་གུས་གདུང་བའི་ཡིད་མཆོག་གིས། །རབ་བསྐུལ་ཞི་ཞིང་དགའ་བའི་ཉམས། །སྙན་འགྱུར་ཚངས་པའི་དབྱངས་ལྟ་བུ། །གླུ་ནི་འདི་ལྟར་བླང་བར་
བྱ། །ཨོཾ། ལོ་འུ་ལ་ཨ་ཧོ་ཡ་སོགས། མི་རྗེ་སེང་ཆེན་ལྷ་ཡི་ནོར་བུ། །དགྲ་བླ་ཝེར་མའི་དཔུང་དང་བཅས་ཏེ། །བག་དྲོ་གཟི་བྱིན་ཐིབས་སེ་བྱོན་ནས། །གཡས་གྲལ་ལྷ་ཡི་བྲོ་ལ་བཞུགས་ཤོག །ཕོ་རྒྱུད་དཔའ་བའི་བྱིན་ཆེན་ཕོབ་ཤོག །  
  ཨ་ཧོ་ཡ་སོགས། བུ་ཡིས་ཕ་ཆེན་བརྗེད་པ་མི་སྲིད། །ངས་ནི་མི་བརྗེད་གསོལ་བ་འདེབས་སོ། །ཡིད་ལ་སེང་ཆེན་རྒྱལ་པོ་དྲན་ནས། །རྐང་པའི་བྲོ་དང་ལག་པའི་གར་སྟབས། །ངག་གི་གདུང་དབྱངས་ལྷང་ལྷང་སྒྲོགས་ན། །མཁྱེན་པའི་
13-6-8b


ཉི་མ་གསལ་བའི་ལྷ་སྲས། །བརྩེ་བའི་ཟླ་བ་རྒྱས་པའི་མི་རྗེ། །བྱིན་བས་གློག་ལྟར་མྱུར་བའི་སེང་ཆེན། །སྐུ་རྗེ་དོན་གྲུབ་ཝེར་མ་དཀར་པོ། །འཛུམ་པའི་ཞལ་རས་སྟོན་ལ་བྱོན་ཤོག །སྙན་པའི་གསུང་དབྱངས་སྒྲོགས་ལ་བྱོན་ཤོག །དགྱེས་
པའི་ཐུགས་ཀྱིས་དགོངས་ལ་བྱོན་ཤོག །བྱིན་རླབས་བརྡ་རྟགས་སྟོན་ལ་བྱོན་ཤོག །ཕྲིན་ལས་བྱིན་ཆེན་ཕོབ་ལ་བྱོན་ཤོག །ཨ་ཧོ་ཡ་སོགས། ལུས་ངག་ཡིད་གསུམ་མཆོད་པ་འབུལ་ན། །མ་གཡེལ་ཐུགས་རྗེས་དགོངས་ཤིག་ནོར་བུ། །ཕ་ཡིས་བུ་
དེ་བརྗེད་པ་མི་སྲིད། །མ་བརྗེད་ཡོད་ན་ད་ལྟ་ཕེབས་ཤོག །ཕེབས་ནས་བཀྲ་ཤིས་བྱིན་རླབས་མཛོད་ཅིག །ཨ་ཧོ་ཡ། ཨ་ཧོ་ཡ། ལེའུ་ཚན་དང་པོའོ། །དེ་ནས་བུད་མེད་རྣམས་ཀྱིས་ནི། གླུ་ནི་འདི་བཞིན་བླང་བར་བྱ། ཨོཾ། སྟོང་ཉིད་ལྷ་མོ་
ཆོས་ཀྱི་མཚོ་མོ། །མ་ཚོགས་མཁའ་འགྲོའི་འཁོར་དང་བཅས་ཏེ། །བག་དྲོ་གཟི་བྱིན་ཐིབས་སེ་བྱོན་ཤོག །གཡོན་གྲལ་ལྷ་ཡི་བྲོ་ལ་བཞུགས་ཤོག །མོ་རྒྱུད་མཛེས་པའི་བྱིན་ཆེན་ཕོབ་ཤོག །བུ་མོས་ཨ་མ་བརྗེད་པ་མི་སྲིད། །ངས་ནི་མི་
བརྗེད་གསོལ་འདེབས་སོ། །ཡིད་ལ་དྭང་སྨན་ཌཱ་ཀཱི་དྲན་ནས། །རྐང་པའི་བྲོ་དང་ལག་པའི་གར་ཐབས། །ངག་གི་གདུང་དབྱངས་ལྷང་ལྷང་སྒྲོགས་ན། །མཁྱེན་པའི་ཉི་མ་གསལ་བའི་མཁའ་འགྲོ། བརྩེ་བའི་ཟླ་བ་རྒྱས་པའི་ཡུམ་
ཆེན། །བྱིན་རླབས་གློག་ལྟར་མྱུར་བའི་དྭངས་སྨན། །དགྱེས་ཡུམ་བཀྲ་ཤིས་གསང་བའི་ལྷ་མོ། །འཛུམ་པའི་ཞལ་རས་སྟོན་ལ་བྱོན་ཤོག །སྙན་པའི་གསུང་དབྱངས་སྒྲོགས་ལ་བྱོན་ཤོག །དགྱེས་པའི་ཐུགས་ཀྱིས་དགོངས་ལ་
13-6-9a


བྱོན་ཤོག །བྱིན་རླབས་བརྡ་རྟགས་སྟོན་ལ་བྱོན་ཤོག །ཕྲིན་ལས་བྱིན་ཆེན་ཕོབ་ལ་བྱོན་ཤོག །ལུས་ངག་ཡིད་གསུམ་མཆོད་པ་འབུལ་ན། །མ་གཡེལ་ཐུགས་རྗེས་དགོངས་ཤིག་སྒྲོལ་མ། །མ་ཡིས་བུ་མོ་
བརྗེད་པ་མི་སྲིད། །མ་བརྗེད་ཡོད་ན་ད་ལྟ་ཕེབས་ཤོག །ཕེབས་ནས་བཀྲ་ཤིས་བྱིན་རླབས་མཛོད་ཅིག །ཨ་ཧོ་ཡ། ཨ་ཧོ་ཡ། ཞེས་སོ། །དེ་ནས་མཆོད་ཅིང་བསྟོད་པའི་གླུ། །ཕོ་མོ་ཁྱད་མེད་ཅི་བདེར་བླངས། །བཀྲ་ཤིས་དར་གྱི་འཕྱངས་
འཕྲུལ་ཐོགས། །སྒེག་ཅིང་འཛུམ་པའི་ཚུལ་གྱིས་ནི། །ཡིད་འཕྲོག་ངག་གིས་བླང་བར་བྱ། ཨཱ༔ སྐུ་རྗེ་སེང་ཆེན་ཡིད་བཞིན་ནོར་བུ། །རྩ་གསུམ་དགྲ་བླའི་སྤྲིན་དཔུང་འཁྲིགས་པ། །བདེ་ཆེན་དངས་སྨན་ཌཱ་ཀིའི་ཚོགས་དང་། །དགྱེས་
བཞད་ཆགས་པའི་ཉམས་འགྱུར་གཡོ་ཞིང་། །ཨ་ལ་ལ་ཧོ། ཨ་ལ་ལ་ཧོ། བྱིན་རླབས་གཟི་བྱིན་འབར་བར་བཞུགས་ལ། །འདིར་འཚོགས་དད་ལྡན་བདག་ཅག་རྣམས་ཀྱིས། །གནས་ལུས་ལོངས་སྤྱོད་མཆོད་པར་འབུལ་ན། །བརྩེ་བའི་
ཐུགས་ཀྱིས་བཞེས་པར་མཛོད་ཅིག །ཨ་ལ་ལ་སོགས། །མཛེས་མཛེས་ལུས་ཀྱི་བྲོ་གར་སྟངས་སྟབས། །སྙན་སྙན་ངག་གི་གླུ་དབྱངས་འགྱུར་ཁུག །དུང་དུང་སེམས་ཀྱི་དད་གུས་གདུང་ཤུགས། །ཡང་ཡང་སེང་ཆེན་རྗེ་ལ་མཆོད་དོ། །ཨ་ལ་ལ་
སོགས། སྔོན་ཚེ་སེར་པོ་ཧོར་གྱི་ས་ནས། །སྟོང་ཉིད་མགར་བཟའ་ཆོས་ཀྱི་སྒྲོན་མས། །དགྲ་བླའི་སྐུ་ཆས་ཁྱེད་ལ་གསོལ་བས། །བསྟན་དགྲ་ཐུལ་པའི་རྟེན་འབྲེལ་འགྲིགས་སོང་། །ཨ་ལ=    སྔོན་ཚེ་དྭང་སྨན་མཁའ་འགྲོའི་ཚོགས་
13-6-9b


དང་།  །ལྷ་ཀླུ་མི་ཡི་དྲེགས་ལྡན་རྣམས་ཀྱིས། །སྣ་ཚོགས་རྫས་མཆོག་ཁྱེད་ལ་ཕུལ་བས།  །ཕྲིན་ལས་ཀུན་འགྲུབ་རྟེན་འབྲེལ་འགྲིགས་སོང་། །ཨ་ལ་ལ་ཧོ་ཨ་ལ་ལ་ཧོ། །དེ་བཞིན་ད་ལྟ་མོས་ལྡན་ངེད་ཀྱིས། །དགྲ་བླའི་སྐུ་ཆས་རྟེན་འབྲེལ་རྫས་
མཆོག །སྣ་ཚོགས་སྤྲིན་ལྟར་གཏིབས་པའི་མཆོད་པས། །དགྲ་བླ་ཝེར་མའི་དབུ་འཕང་བསྟོད་ན། །ཨ་ལ་ལ=    འཛུམ་འཛུམ་སྤྱན་གྱིས་གཟིགས་ལ་བཞེས་ཤིག །དགྱེས་དགྱེས་ཐུགས་ཀྱིས་དགོངས་ལ་བཞེས་ཤིག །བྱམས་བྱམས་
ཕ་མ་ལྟ་བུའི་ཚུལ་གྱིས། །ཡང་ཡང་མགོན་སྐྱབས་སྡོང་གྲོགས་མཛོད་ཅིག །ཨ་ལ་ལ་ཧོ། །ཨ་ལ་ལ་ཧོ། །བྲོ་ལེའུ་ཚན་གཉིས་པའོ། །དེ་ནས་སྣ་ཚོགས་ཕྲིན་ལས་བྲོ། །དཔའ་བརྗིད་རྔམ་པའི་ཚུལ་གྱིས་བརྡུང་། །དགྲ་བླའི་ཆས་
སམ་གང་མཛེས་སུ། །འཇིགས་ལ་ཟིལ་ཆེ་སྙན་པའི་དབྱངས། །རིག་པའི་བརྟུལ་ཞུགས་བཅས་ཏེ་བླང་། །ཧཱུྃཿ སྔོན་ཚེ་འཛམ་གླིང་ནོར་བུ་དགྲ་འདུལ། །དགྲ་བླའི་སྐུ་ཆས་སྐུ་ལ་མནབ་ནས། །བདུད་དང་སྲིན་པོ་འདུལ་དུ་གཤེགས་ཤིང་། །
ནག་ཕྱོགས་ཧོར་བདུད་གདན་ལ་བཞུགས་ཚེ། །དགྲ་བླ་ཝེར་མའི་དམག་དཔུང་འདུས་སོང་། །དགྲ་བླ་ཝེར་མའི་དམག་དཔུང་འདུས་སོང་། །འཇམ་དཔལ་རྣོན་པོ་ཤེས་རབ་རལ་གྲིས། །ལྔ་ཕུང་སྒྱུ་མའི་དྲྭ་བ་བཤིག་ནས། །ཤ་ཁྲག་
དགྲ་བླའི་མཆོད་སྟོན་འགྱེད་སོང་། །དགྲ་བླ་དཔའ་བའི་གད་རྒྱང་བསྒྲགས་སོང་། །དགྲ་བླ་དཔའ་བའི =   ས་སྟེང་བདུད་སྲིན་བསྟན་པ་ནུབ་སོང་། །ས་སྟེང་སོགས་ཉིས་བསྐྱར།  དཀར་ཕྱོགས་དགའ་བའི་རྒྱལ་མཚན་བསྒྲེངས་སོང་། །དཀར་ཕྱོགས་
13-6-10a


དགའ༴   ལྷ་ཀླུས་སྐྱིད་པའི་བྲོ་གར་བརྡུང་སོང་། ལྷ་ཀླུས་སྐྱིད= ཡང་ཅིག་འཛམ་གླིང་ལྷ་ཡི་ནོར་བུ། །དགྲ་བླའི་སྐུ་ཆས་སྐུ་ལ་མནབ་ནས། །རྫུ་འཕྲུལ་རྟ་རྒྱུག་མཛད་པ་བསྟན་ཞིང་། །རིན་ཆེན་གསེར་གྱི་ཁྲི་ལ་བཞུགས་ཚེ། །
དགྲ་བླ་ཝེར་མའི་དམག་དཔུང་འདུས་སོང་། །འདི་ཉིས་བསྐྱར་སོགས་གོང་གི་རིགས་འོག་མ་ཀུན་ལ་འགྲེས་ཤེས་པར་བྱ། རྟ་མཆོག་རོལ་པ་དབང་གི་ང་རོ། །བཞད་པ་བརྒྱད་ཀྱི་དབྱངས་སུ་འཚེར་བས། །སྣང་སྲིད་འདོད་དགུ་དབང་དུ་བསྡུས་ནས། །དགྲ་བླ་
དགྱེས་པའི་མཆོད་སྟོན་མཛད་སོང་། །ས་སྟེང་བདུད་སྲིན་བསྟན་པ་ནུབ་སོང་། །དཀར་ཕྱོགས་དགའ་བའི་རྒྱལ་མཚན་བསྒྲེངས་སོང་། །ལྷ་ཀླུས་སྐྱིད་པའི་བྲོ་གར་བརྡུང་སོང་། །ཡང་ཅིག་སེང་ཆེན་སྐྱེས་བུ་དོན་གྲུབ། །དགྲ་བླའི་སྐུ་ཆས་
སྐུ་ལ་མནབ་ནས། །སྣ་ཚོགས་མཛད་པའི་རོལ་རྩེད་ངོམས་པས། །མཐའ་བཞིའི་ཆེ་དགུ་ཆབ་འོག་འཛུད་ཚེ། །དགྲ་བླ་ཝེར་མའི་དམག་དཔུང་འདུས་སོང་། །དགྲ་བླ་སོགས། མཐུ་སྟོབས་མཚུངས་པ་མེད་པའི་ལྷ་མཆོག །ཐོགས་མེད་
རྡོ་རྗེའི་ནུས་རྩལ་ལྡན་པས། །གང་འདོད་ཕྲིན་ལས་རང་དབང་བསྒྱུར་ནས། །དགྲ་བླ་དགྱེས་པའི་མཆོད་སྟོན་མཛད་སོང་། །ས་སྟེང་བདུད་སྲིན་བསྟན་པ་ནུབ་སོང་། །ས་སྟེང་སོགས་ཉིས་བསྐྱར་སྔ་མ་ལྟར་རོ། །དཀར་ཕྱོགས་དགའ་བའི་རྒྱལ་
མཚན་བསྒྲེངས་སོང་། །ལྷ་ཀླུས་སྐྱིད་པའི་བྲོ་གར་བརྡུང་སོང་། །ཡང་ཅིག་སྐྱེས་མཆོག་གེ་སར་རྒྱལ་པོ། །བསམ་གྲུབ་བདེ་མཆོག་ནོར་བུའི་ཕོ་བྲང་། །བཀྲ་ཤིས་གསེར་གྱི་ཁྲི་ལ་བཞུགས་ཏེ། །དད་དམ་དག་པ་འདུས་པའི་
13-6-10b


འཁོར་ལ། །རང་སྣང་ཆོས་སྐུའི་དགོངས་པ་གཏད་ཚེ། །མཐོང་བ་ཀུན་སྨོན་གླིང་དཀར་ཡུལ་གྱི། །དཔའ་ཐུལ་དང་སྨན་འདུས་པའི་ཚོགས་ཀྱིས། །རང་རིག་ཀུན་བཟང་དགོངས་པ་མཐོང་ནས། །འཆི་མེད་འོད་ལུས་དྭངས་མ་འགྲུབ་སོང་། །
དེ་ཚེ་རྩ་གསུམ་སྲུང་མའི་ཚོགས་རྣམས། །ཡེ་ཤེས་དགྲ་བླ་ཝེར་མའི་རྣམ་པས། །ངོ་མཚར་ཤིས་པའི་གད་རྒྱང་བསྒྲགས་སོང་། །ངོ་མཚར་ཤིས་སོགས་ཉིས་ཟེ། ས་སྟེང་བདུད་སྲིན་བསྟན་པ་ནུབ་སོང་། །དཀར་ཕྱོགས་དགའ་བའི་རྒྱལ་
མཚན་བསྒྲེང་སོང་། །ལྷ་ཀླུས་སྐྱིད་པའི་བྲོ་གར་བརྡུང་སོང་། །འདི་ནས་དབྱངས་དལ་བུས་ལུས་ཀྱི་སྟབས་རྣམས་བྱ་སྟེ། ལག་གཡས་ཐབས་ཆེན་དཔའ་བོའི་ཕྱག་རྒྱ། །གཡས་གྱེན་དུ་གདངས། རྔམ་རྔམ་ནམ་མཁའི་ཁམས་ལ་གདེངས་སོང་། །ལག་
གཡོན་ཤེས་རབ་དཔའ་མོའི་ཕྱག་རྒྱ། །མཛེས་མཛེས་ས་གཞིའི་ངོས་ལ་གཏད་སོང་། །ལག་གཡོན་མཛེས་པ་བསྒྱུར་ཞིང་ཐུར་དུ་ཕབ། རྐང་པ་གཡས་གཡོན་སྟོང་ཉིད་སྙིང་རྗེ། །ལྡེམ་ལྡེམ་གཡོ་བའི་བྲོ་ར་འགྲིགས་སོང་། །རྡོག་བྲོ་རས་འཐབ་དང་མཉམ་སྡེབ། རོ་
སྟོད་དགྱི་དགུ་གཡུ་འབྲུག་འཁྱུག་འགྲོས། །སྟོད་འཁྱུག་ལྡེམ། རྐང་པ་དམར་ཡག་སྟག་གི་མཆོངས་སྟངས། །རྐང་འདེགས་མཆོང་ཆེན། ལག་པ་ཁྱུང་ཆེན་གཤོག་པའི་ལྡིང་སྟབས། །བརྐྱང་འདེགས། མགོ་བོ་སེང་གེ་རྔམ་པའི་ལྟ་སྟངས། །ཕྱོགས་སུ་བརྗིད་
བར་བལྟ། ཝེར་མ་ལུས་ལ་ཆགས་པའི་སྒྱུ་རྩལ། །ཁམས་གསུམ་ཟིལ་གནོན་བྲོ་ཡི་སྟབས་ཀྱིས། །མི་འདོད་དགྲ་བདུད་ཆམ་ལ་ཕབ་སོང་། །འཁྲབ་ཆུང་།  མི་འདོད་དགྲ་བདུད་ཆམ་ལ་ཕབ་སོང་། །འཁྲབ་ཆེན། དེ་ནས་དལ་བུས་བྲོ་གྲལ་གཡས་སུ་བསྐོར་ལ།
13-6-11a


གཡས་བསྐོར་ཕོ་རྒྱུད་དཔའ་བོའི་དཔའ་དར། །གཡོན་དུ་བསྐོར་ལ།  གཡོན་སྐོར་མོ་རྒྱུད་དཔའ་མོའི་དཔའ་སྐྱེམས། །བྲོ་ཡི་རོལ་རྩེད་དེ་རིང་ངོམས་ན། །དགྲ་བླ་དགྱེས་པའི་དབུ་འཕང་བསྟོད་ཅིང་། །ཝེར་མ་དགའ་བའི་ངོ་
སོ་མཐོ་བའི། །དགའ་སྟོན་བྲོ་གར་རྟེན་འགྲེལ་འདི་ཡིས། །རྒྱལ་ཁམས་ཡོངས་ལ་བཀྲ་ཤིས་རྒྱས་ཤིང་། །འདིར་ཚོགས་ཡོངས་ལ་དགེ་ལེགས་འཕེལ་ཤོག །ཕྱོགས་ལས་རྣམ་པར་རྒྱལ་བའི་རྟེན་འབྲེལ། །དེ་རིང་ལྷུན་གྱིས་འགྲིགས་
པར་ཤོག་ཅིག །ཨ་ཏེ་ཧོ། ཨ་ཏེ་ཧོ། ཞེས་འཁྲབ་ལ་རྒྱ་རོལ་བསྒྲགས། དེ་ནས་དཔའ་སྐྱེམས་དྲངས་བར་བྱའོ། །བྲོ་ལེའུ་ཚན་གསུམ་པའོ། ། ༈ དེ་ནས་བཀྲ་ཤིས་རྫས་སྣ་ཚོགས། ཐོགས་ལ་དལ་བུར་བག་ཕེབས་ཤིང་། ཡིད་འོང་ཚིམ་པའི་ཚུལ་གྱིས་སུ། བཀྲ་ཤིས་དབྱངས་སྙན་བླང་བར་བྱ།
ཧོཿ རྩ་གསུམ་ཀུན་འདུས་སེང་ཆེན་རྒྱལ་པོ། །མཆོག་གསུམ་བཀྲ་ཤིས་སྙན་པའི་ནོར་བུ། །སྐུ་རྗེ་དོན་གྲུབ་ཝེར་མ་དཀར་པོ། །བཀྲ་ཤིས་དགེ་ལེགས་ཕུན་སུམ་ཚོགས་མཛོད། །ཨེ་མ་ཧོ། ཨེ་མ་ཧོ། ཀུན་ལ་འགྲེ། སྐུ་ཡི་བཀྲ་ཤིས་ཡིད་འོང་བྱིན་
ཆགས། །ནད་མེད་བདེ་སྐྱིད་འཕེལ་བའི་རང་བཞིན། །མི་ནུབ་རྒྱལ་མཚན་ལྟ་བུའི་བཀྲ་ཤིས། །འདིར་འཚོགས་ཡོངས་ལ་འཛོམས་པར་ཤོག་ཅིག །ཨེ་མ་སོགས། གསུང་གི་བཀྲ་ཤིས་དགའ་སྐྱིད་གླུ་དབྱངས། །སྙན་གྲགས་ས་སྟེང་ཁྱབ་པར་
སྒྲོགས་པ། །འགག་མེད་དུང་སྒྲ་ལྟ་བུའི་བཀྲ་ཤིས། །འདིར་ཚོགས་ཡོངས་ལ་འཛོམ་པར་ཤོག་ཅིག །ཨེ་མ་སོགས། ཐུགས་ཀྱི་བཀྲ་ཤིས་ཆོས་ཀྱི་ཞིང་ས། །བདེ་སྟོང་གསལ་འབར་བག་དྲོ་ལྷུན་ཆགས། །མི་འགྱུར་ནམ་མཁའ་ལྟ་བུའི་བཀྲ་ཤིས། །འདིར་
13-6-11b


འཚོགས་ཡོངས༴  །ཨེ་མ༴  །ཡོན་ཏན་བཀྲ་ཤིས་དགོས་འདོད་ཀུན་འབྱུང་། །ཆོས་སྲིད་ཕུན་ཚོགས་བསྟན་པ་དར་རྒྱས། །བསམ་འཕེལ་ནོར་བུ་ལྟ་བུའི་བཀྲ་ཤིས། །འདིར་ཚོགས༴   ཨེ་མ༴  ཕྲིན་ལས་བཀྲ་ཤིས་མཐུ་སྟོབས་དཔལ་འབར།།
ཕྱོགས་ལས་རྣམ་རྒྱལ་དབུ་འཕང་མཐོ་བའི། །དགུང་ལ་ཉི་ཟླ་ལྟ་བུའི་བཀྲ་ཤིས། །འདིར་ཚོགས་ཡོངས་ལ་འཛོམས་པར་ཤོག་ཅིག །ཨེ་མ་སོགས། གནས་འདི་མཁའ་སྤྱོད་མཐོང་བ་ཀུན་སྨོན། །འདིར་ཚོགས་དཔའ་ཐུལ་དང་སྨན་རིག་འཛིན། །མི་
འབྲལ་ཚོམ་བུ་གཅིག་ཏུ་ཚོགས་ནས། །བདེ་ཆེན་འགྲུབ་པའི་བཀྲ་ཤིས་ཤོག་ཅིག །ཨེ་མ་ཧོ། ཨེ་མ་ཧོ། བྲོ་ལེའུ་ཚན་བཞི་པའོ། །བྲོ་ཡི་དགའ་སྟོན་འདིར་འབྲེལ་བར། །ལྟད་མོ་རྣམ་པ་སྣ་ཚོགས་བྱ། །འདུས་པ་རྣམས་ཀྱིས་སེང་ཆེན་རྗེ། །དྲན་པས་གསོལ་འདེབས་དབྱངས་སྙན་
བསྒྲགས། །དེས་ནི་གནས་སྐབས་དགའ་བ་དང་། །ཡུན་དུ་ཆོས་སྲིད་ལེགས་ཚོགས་འཕེལ། །རྟེན་འབྲེལ་བཟང་པོའི་སྒོ་འཕར་དབྱེ། །བཀྲ་ཤིས་དོན་གྲུབ་ཕྱོགས་ལས་རྒྱལ། ས་མ་ཡ། ཞེས་པའང་བསེ་རུ་འོད་ལྡན་དཀར་པོས་དགོས་པ་ཁྱད་པར་ཅན་གྱི་ཕྱིར་བྲིས་པ་མངྒ་ལཾ།། ༈ །།
༄༅།  །རྟེན་འབྲེལ་ལམ་ཡག་འཆམས་ལུགས་བཞུགས།  མི་གོས་དཀར་པོ་ཅན། ཞྭ་པདྨ་ཁ་འབུས་ལྟ་བུ། མེ་ལོང་དར་སྣ་རྨ་བྱའི་སྒྲོས་བརྒྱན། །ལག་གཡས་སྦ་དབྱུག་རྩེ་ལ་དར་སྣ་དྲིལ་བུ་བཏགས་པ་ཐོགས་ཏེ་འཆམས་ནས་འདི་སྐད་
ཟེར་རོ། །ཨ་ལ་ལ། ཨ་ལ་ལ། བཀྲ་ཤིས་སོ། །ཡག་གོ། །ང་ད་ནང་ཟངས་མདོག་དཔལ་རིའི་ཕོ་བྲང་ནས་འོང་ངོ་། །ལྷ་ཨོ་རྒྱན་པདྨས་མངགས་པ་རང་ཡིན་ནོ། །ཁྱོད་གར་སོང་བཀྲ་ཤིས་བརྗོད་ཅིག་གསུངས་སོ། །ཨ་ལ་ལ་སྔར་ལྟར་
13-6-12a


མ་འཆི་མེད་ཡེ་ཤེས་མཚོ་རྒྱལ་ཕེབས་བྱུང་། ཞྭ་པདྨ་ཁ་འབུས་མགོ་ལ་བསྐོན་བྱུང་། འདི་སུས་མཐོང་བཀྲ་ཤིས་ལ་ཉེ་ཡག་གོ་གསུངས་སོ། །ལག་བཀྲ་ཤིས་ཚངས་པའི་སྦ་དབྱུག་ལྡེམ་མོ། །འདི་སུས་
མཐོང་བཀྲ་ཤིས་ལ་ཉེ་ཡག་གོ་གསུངས་སོ། །འཆམས་བཀྲ་ཤིས་གཡས་བྲོ་གཡོན་བྲོ་གྱིལ་གྱིལ། །འདི་སུས་མཐོང་བཀྲ་ཤིས༴   ངག་བཀྲ་ཤིས་གླུ་རྟ་རིང་ཐུང་སྤེལ་མ། །འདི་སུས་ཐོས༴ ཨ་ལ་ལ་སོགས། ཕྱོགས་བཅུ་ན་སངས་
རྒྱས་བཞུགས་སོ། །བཀྲ་ཤིས་སོ། །བཀྲ་ཤིས་སོ། །ཞིང་ཀུན་ན་དམ་ཆོས་སྒྲོགས་སོ། །བཀྲ་ཤིས༴   ས་ཐམས་ཅད་དགེ་འདུན་ཁྱབ་བོ། །བཀྲ་ཤིས༴ བཀྲ་ཤིས་པས་ནམ་མཁའ་ཁྱབ་བོ། །དགེ་ལེགས་པས་བར་སྣང་༴ བདེ་
སྐྱིད་པས་ས་སྟེང་ཁྱབ་བོ། །ཨ་ལ༴ པདྨ་ཁ་འབུས་ཞྭ་མོ། །པདྨ་འབྱུང་གནས་དབུ་ཞྭ། །མི་ལ་འཆི་བ་མེད་པའི། །འཆི་མེད་རྟེན་འབྲེལ་འགྲིགས་སོ།  ཨ་ལ༴  རྩེ་ལ་རྨ་བྱའི་སྒྲོ་གུར། །འཇའ་ཚོན་འོད་ལྔའི་ཚོམ་བུ། །རིགས་
འཛིན་བླ་མའི་བཀྲ་ཤིས། །རྟེན་འབྲེལ་དེ་རིང་འགྲིགས་སོ། །ཨ་ལ༴   བར་ན་མེ་ལོང་འོད་གསལ། །མེ་ལོང་གསལ་གྲིབ་མེད་པ། །ཡི་དམ་འཇམ་དབྱངས་བཀྲ་ཤིས། །རྟེན་འབྲེལ་དེ་རིང་༴ དེ་ལ་དར་སྣ་ལྔ་ལྡན། །རིགས་
ལྔའི་མཁའ་འགྲོའི་སྤྲིན་ཕུང་། །མ་རྒྱུད་མཁའ་འགྲོའི༴ རྟེན་འབྲེལ༴ །ལུས་ལ་གོས་དཀར་གྱོན་པ། །འགོ་བའི་ལྷ་སྲུང་བཟང་ངོ་། མི་འབྲལ་ཁ་འཛིན་མཛད་བའི།  རྟེན་འབྲེལ༴  ལག་ན་སྦ་དབྱུག་ཐོགས་པ། །སྦ་ལྡེམ་ལྷ་ཡི་ནོར་བུ། །
13-6-12b


ལྷ་སྲུང་ངོ་སོ་མཐོ་བའི། །རྟེན་འབྲེལ༴ །དེ་ལ་དར་སྣ་བཏགས་པ། །སྲིད་པའི་ཕྱ་གཡང་ཕྱུག་མོ། །འབོད་ཅིང་འབོད་ཅིང་འདུ་བའི༴ །རྟེན་འབྲེལ༴ །དེ་ལ་དྲིལ་ཆུང་བཏགས་པ། །ལྷ་སྲུང་དགྱེས་པའི་བཞད་སྒྲ། །རྒྱལ་ཁ་
ཐོ་ལེས་ཐོབ་པའི། །རྟེན་འབྲེལ༴ ང་བཀྲ་ཤིས་ལ་ཉེ་བཟང་པོ། །རྟེན་འབྲེལ་ལམ་ཡག་འཆམས་ན། །སུ་དང་འཕྲད་ཀྱང་ཁ་དགེ། །གང་དང་འཕྲད་ཀྱང་བཀྲ་ཤིས། །བླ་མའི་ཆོས་ར་གསུང་དུས། །ང་དང་ཐུག་ན་བསྟན་པ་དར། །
མི་དཔོན་ཁྲིམ་སར་འཛིན་དུས། །ང་དང་ཐུག་ན་ཆུས་སྲིད་རྒྱས། །སྐྱེ་བོ་དོན་གཉེར་འགྲོ་དུས། །ང་དང་ཐུག་ན་ཇི་བསམ་འགྲུབ། །དགའ་སྐྱིད་སྟོན་མོ་བྱེད་དུས། །ང་དང་ཐུག་ན་ཡར་དར་འོང་། །ཨ་ལ༴ །ང་རྟེན་འབྲེལ་ལམ་ཡག་
ཟེར་བ། །ནད་པར་ཐུག་ན་སོས་ལྟས་ཡིན། །ནད་པ་ཡར་སོས་ཧ་བགད་བྱེད། །གཤིན་པོ་བསྡུར་དུས་ཤི་སྒབ་ཆོད། །གསོན་པོ་མི་འཆི་ཚེ་རིང་ཡིན། །སྡུག་བསྔལ་ཅན་གྱི་སྡུག་མཐའ་སང་། །སྐྱིད་པའི་ཉི་མ་ཤར་ལྟས་ཡིན། །ཨ་
ལ་ལ། །དམག་ཇག་འགྲོ་ན་གཡུལ་རྒྱལ་ཡིན། །སོ་ནམ་འདེབས་ན་འབྲུ་འཕེལ་ཡིན། །བག་མར་འགྲོ་ན་སྐྱིད་མཐུན་ཡིན། །ཚོང་པ་འགྲོ་ན་ཚོང་ཡག་ཡིན། །ལམ་འགྲིམ་འགྲོ་ན་བྱེས་ཡག་ཡིན། །ཨ་ལ་ལ༴ ། ཁྱེད་འདི་ན་ཚོགས་
པའི་ལྷ་ཕྲུག་རྣམས། །ང་རྟེན་འབྲེལ་ལམ་ཡག་འཆམ་དུས་འདིར། །ཁ་དགེ་བའི་དགེ་ཚིག་བརྗོད་དང་རྟེན་འབྲེལ་ཡག །ལས་དགེ་བའི་ཟས་ནོར་བྱིན་དང་རྟེན་འབྲེལ་ཡག །སེམས་དགེ་བའི་དགའ་སྤྲོ་གྱིས་དང་རྟེན་འབྲེལ་ཡག །
13-6-13a


དགེ་གསུམ་འབྲས་བུ་ཁྱེད་ལ་ཡག་པོ་འོང་། །ཨ་ལ་ལ༴ །བྱ་ཤང་ཤང་ཏེའུ་གྲགས་པ་དང་། །ནོར་བསམ་འཕེལ་རྒྱལ་མཚན་ཕྱར་བ་དང་། །ང་རྟེན་འབྲེལ་ལམ་ཡག་འཆམ་པ་གསུམ། །སུ་དང་ཐུག་ཀྱང་བཀྲ་ཤིས་
དོན་གྲུབ་ཡིན། །རྟེན་འབྲེལ་ལ་ཉེ་དེ་རིང་བཟང་། །ཡག་གསུམ་ཡག་གི་གོང་བ་ལ། །ཁྱེད་ཅི་བསམ་འགྲུབ་པའི་བཀྲ་ཤིས་ཤོག །བླ་མ་ཨོ་རྒྱན་པདྨའི་བཀྲ་ཤིས་ཤོག །ཡི་དམ་འཇམ་པའི་དབྱངས་ཀྱིས་བཀྲ་ཤིས་ཤོག །མཁའ་
འགྲོ་ཡེ་ཤེས་མཚོ་རྒྱལ་བཀྲ་ཤིས་ཤོག །ཆོས་སྐྱོང་གེ་སར་རྒྱལ་པོའི་བཀྲ་ཤིས་ཤོག །ཚེ་རིང་བའི་བཀྲ་ཤིས་ཤོག །ནད་མེད་པའི་བཀྲ་ཤིས་ཤོག །ནོར་འཕེལ་བའི་བཀྲ་ཤིས༴  །དོན་གྲུབ་པའི༴  ཨ་ལ་ལ༴  །ཕྱོགས་གང་དུ་
བལྟས་ཀྱང་བཀྲ་ཤིས་རེད། །དུས་གང་དུ་བསམས་ཀྱང་བཀྲ་ཤིས་རེད། །དེ་སྣང་སྲིད་དག་པ་རབ་འབྱམས་རེད། །དུས་དེ་རིང་དགའ་པོ་སྐྱིད་དོ་ཨཱ། །ལྷ་ཨོ་རྒྱན་པདྨས་མངགས་དོན་གྲུབ། །མགོན་འཇམ་དཔལ་དཔའ་བོའི་བཞེད་
དོན་གྲུབ། །མ་ཡེ་ཤེས་མཚོ་རྒྱལ་ལས་དོན་གྲུབ། །སྐུ་སེང་ཆེན་རྒྱལ་པོའི་བཀའ་དོན་གྲུབ། །ང་གར་སོང་ས་ན་ལ་ཉེ་ཡག །གར་སྡད་ས་ན་ཕྲིན་ལས་འཕེལ། །ཁྱེད་འདིར་ཚོགས་རྣམས་ལ་བཀྲ་ཤིས་ཤོག །བཀྲ་ཤིས་སོ་མི་
འགྱུར་བཀྲ་ཤིས་འཕེལ། །བཀྲ་ཤིས་སོ་ལམ་ཡག་གོ་ལྷ་རྒྱལ་ལོ། །ཞེས་པའང་བསེ་རུ་འོད་ལྡན་དཀར་པོས་མེ་སྤྲེལ་ཟླ་བ་དྲུག་པའི་ཚེས་གསུམ་ལ་འབྲས་དཀར་ཞིག་གི་རྐྱེན་ལས་ཡིད་ལ་ཤར་བ་མངྒ་ལཾ།།    །།
13-6-13b


empty page
13-7-1a


༄༅། །རང་སྲུང་རྫས་རྒོད་ཟབ་མོ་གནམ་ལྕགས་མེ་འབར་མ་ཞེས་བྱ་བ་བཞུགས་སོ། །
13-7-1b


ན་མོ་གུ་རུ་ཡ་མཱནྟ་ཀཱ་ཡ། འདིར་རྡོ་རྗེ་གཙུག་ལག་གི་རྒྱུད་སོགས་དང་། ཨོ་རྒྱན་རིག་འཛིན་ཆེན་པོས་གཏེར་ཁ་སྔ་ཕྱིར་བསྟན་པའི་མན་ངག་གི་གནད་ལ་བརྟེན་ནས་རྫས་སྲུང་ཟབ་མོ་བཀོད་པ་ལ། 
རྫས་ནི་མཚོ་གསུམ་དུ་གྲགས་པ་ཁྲག་མཚོ་དུག་མཚོ་སྨན་མཚོ་གསུམ་སྟེ། དེ་ཡང་ཁྲག་གི་ནུས་པ་དུག་གིས་འདོན། དུག་གིས་ནུས་པ་སྨན་གྱིས་བསྐྱེད་པ་ཡིན་པས། ཐོག་མར་ཁྲག་སྣ་རྣམས་ཅི་རྙེད་པ་བསྲེ་ཞིང་སྦྱར།
ཁྲག་དེར་གཏོགས་པའི་ཁྲག་གསར་པའི་ནང་དུ་བླུགས་ལ་གྲོད་པའམ་སྒང་བུག་ཏུ་འདྲེས་ངེས་དཀྲུག་ཆང་རྒོད་ཉིང་ཁུ་ཉུང་ཙམ་སྦྱར་ཏེ་རྫའམ་སྤར་བུ་དམ་པོར་བཅུག་དབྱར་ཤིན་ཏུ་དྲོ་སར་ལུད་སོགས་ནང་དུ་བསྙལ་ཏེ་རུལ་
བཅུག་པས་ཁྲག་གི་ནུས་པ་རུལ་ན་ཆེ་གསུང་བ་ལྟར་ཡིན་ལ། ཁྲག་རུལ་ནས་ཡར་བླང་སྟེ་དེ་ནང་དུག་སྣ་ཞིབ་འདུལ་བྱས་ཏེ་བཏབ།  དུག་དང་སྨན་གྱི་ནུས་པ་སོ་མ་དྲི་མ་ཡལ་ན་ཆེ་བ་ཡིན་པ་ངེས་པར་བྱས་ལ། དུག་གི་
13-7-2a


སྨན་གྱི་ཕྱེད་ཙམ་གྱི་རྩི་སྨན་དྲི་ལྡན་རྣམས་བསྲེས་ལ་ཁྲག་གི་ནང་དུ་བཏབ་སྟེ་ཐོད་པར་ཕུར་བུས་དཀྲུག་ཅིང་སྔགས་བཟླའོ། །དེ་ལ་ཁྲག་མཚོ་ནི། མོན་པ་སོགས་མི་ནག །རྟ་ནག །ཁྱི་ནག་གི་ཁྲག །འབྲོང་དང་གཡག་
ནག །ར་ནག་གི་ཁྲག  །གླང་ནག །བོང་བུ་ནག་པ། དྲེའུ་ནག་གི་ཁྲག །སྲེ་མོང་མཛོ་དང་ཕག་ཁྲག །སྤྱང་ཀི་སྟག་གཟིག །དོམ་དྲེད་འཕར་བ་སོགས་གཅན་གཟན་གྱི་ཁྲག་སྣ་གང་རྙེད།  གཙོད་
ཁྲག་རྒྱ་ཁྲག་སོགས་རི་དྭགས་ཕལ་གྱི་ཁྲག་གང་རྙེད། བྱ་རྒོད་སོགས་བྱ་ཤ་ཟན་གྱི་ཁྲག་གང་རྙེད་རྣམས་བསགས། འདིར་མེད་དུ་མི་རུང་བའི་ཁྲག་གསུམ་ནི། མི་རྒོད་གྲིར་ཤི་བའི་ཁྲག །སྐྱེས་པས་མ་བསླད་
པའི་པདྨ་རཀྟ། བྱ་ཡི་གཅན་གཟན་ཏེ་ཁྲ་ཡི་ཁྲག་དང་གསུམ་ངེས་པར་དགོས་སོ། །ཡང་གྲི་ཁྲག་དང་ཤ་བའི་ཁྲག་གཉིས་སྐྱོབ་དུ་གལ་ཆེ་བར་བཤད། དམེ་ཕོ་དང་གདུག་པ་ཅན་གྱི་སྲོག་ཆགས་ཀྱི་ཁྲག་ལོན་
13-7-2b


ན་བསྲེ། ཕུག་ལྐུག་པས་ཁྲག་ངར་འཆི་རོན། འཕྱི་བ། ཉལ་བས་ཁྲག་རླང་ཆུང་། མཛེ་ཕོ། ཡེ་ནས་དུལ་བས་ཁྲག་ནུས་ལ་གནོད། ལུག་རུས་སྦལ་དམ་ཚིགས་མི་རུང་། གྱི་ཁྲག་ལྔ་མི་བསྲེ། བཤུལ་ཆགས་ཀྱི་ཁྲག་དྲི་གཞན་འགོག་བུང་ཆེར་མི་བྱ། སྔགས་བཟླ་བའི་སྔགས་པ་ཕྲེང་ཐོག་གི་ཁྲག་ཀྱང་དམ་ཚིག་གིས་མི་རུང་གསུང་མི་བསྲེ་བར་གསུང་། དེ་མིན་ཁྲག་སྣ་གཞན་གང་རྙེད་བསགས་ནས་བསྲེ་བར་བྱའོ། །
དུག་མཚོ་ནི་བཙན་དུག །མེ་ཏོག་ནག་པོ། བོང་དུག །མེ་ཏོག་སྔོ་སྨུག །ར་དུག་གསུམ་དང་མེ་ཏོག་དམར་པོ། ཀྱི་ལྕེ་ནག་པོ་བཞི་མེད་དུ་མི་རུང་། འདྲི་ཚིལ་གཞན་བོང་ང་། སྔོ་འཛིན་པ། རེ་ལྕག །འདིར་མེད་པ་ཡོད་ཐར་ནུ། ཐང་ཕྲོམ། 
ཁྱི་དུག་པ་ཀ་ཤོགནྡྷ། སྔོ་བརྟན་ནའང་ཟེར་སྤྲུ་ནག །རྩ་འབྲས་པ། ཁྲག་སྐྲོག་པ་དང་སྔོ་རྟ་རྣའང་ཟེར་སྐེ་ཚེ་ནག་པོ་བསེ་ཞོ་སེར་པོ། དུད་པ། དབྱི་མོང་ནག་པོ། བ་བླ། སྡོང་རོས། བྲག་དྲེག་ནག་པོ། ཤང་ཚེ། ཁྱད་པར་རྒྱ་ཚི་དུག་ལོ་སོགས་དུག་རིགས་
གང་རྙེད་བསགས། མདོར་ན་སྤྱང་དུག་ནི་དུག་གི་སྤྱང་ཀི་ཡིན་པ་དང་། རིན་ཆེན་དབྱིག་དུག་གིས་ཁྲག་གི་དྲི་གསོད་པའི་ཕྱིར་མི་བཏང་། དེ་མིན་དུག་སྣ་གང་ཚོགས་འདེབས་ཆོག །གཞན་ཡང་ཚྭ་དང་བུལ་ཏོག་མུ་
ཟི་སེར་པོ་སོགས་ལན་ཚྭའི་རིགས་མང་ན་དུག་ཁྲག་གི་ནུས་པ་གསོད་པས་མི་བཏང་གསུངས། བདུད་རྩི་སྨན་མཚོ་ནི། གདུག་པའི་དྲི་དང་ལྡན་པའི་སྨན་ཐམས་ཅད་སྟེ། གླ་རྩི། གུ་གུལ་ནག་པོ། ཤིང་ཀུན། ཤུ་དག་ནག་པོ་རྣམས་མེད་དུ་མི་
རུང་ལ། གཞན།  སྒོག་སྐྱའི་རྩ་བ།  སྒོག་གཅིག་བྱུང་ན་རབ་ཕུར་མང་ནག་པོ། མུ་ཟི་ནག་པོ། རྟ་ནག་པོའི་རྟ་བོན། གྲིའམ་མི་ཚིལ། ར་ཐུག་དང་ལུག་ཐུག་གི་སྦྲེ། ཡུངས་ཀར། ཡུངས་ནག །ཟི་ར་ནག་པོ། ཏིལ་ནག །སེང་ལྡེང་། མཚལ། 
13-7-3a


མཁན་དམར་རྩ་བ། བྱ་རྒོད་སྤོས། མ་ནུ། གཡེར་མ། ལ་ཆ། ཤུག་པའི་ཚི་བ། བྱི་རུག་ནག་པོ་སོགས་དྲི་ངད་ལྡན་པའི་སྨན་སྣ་གང་རྙེད་དང་། བདུད་རྩི་ལྔ་སྟེ། ཁྱེའུ་གཙང་མའི་བྱང་སེམས། བུ་མོ་སྐྱེས་པས་མ་སྤྱད་པའི་པད་རཀ །
དགེ་སློང་དང་སྔགས་པ་ཁྱེའུ་ལོ་བརྒྱད་གསུམ་གྱི། དྲི་ཆེན་དང་དྲི་ཆུ། གྲི་ཤའམ་མི་ཤའམ་མིའི་ཀླད་པ་གང་རུང་བཅས་སོ། །གཞན་ཡང་། ཁྲག་གི་སྐྱོབ་དུ། མི་རྟ་ཁྱི་གསུམ། སྦལ་སྦྲུལ་ཉ་གསུམ། སྟག་སྤྱང་ཝ་གསུམ། སྡོམ་སྡིག་ན་བུན་བུ་
མོ་གསུམ། རྟ་བོང་དང་བྱ་ཤ་ཟན་དང་། ལྕོང་མོ་དང་། པུ་ཤུད་དང་། ཏེ་ལོ་སྲིན་བྱ་སྲེ་མོང་རྨ་བྱ་དང་ཕག་པ་ལ་སོགས་པའི་ཤ་སྣ་ཅི་རིགས་པ་རྫས་ཚང་ཉུང་ཙམ་བཏབ། གཞན་ར་ཚིལ། ཉ་མཁྲིས། ཕག་ཚིལ་ཡང་ཅུང་ཟད་བཏབ། དུག་གི་
སྐྱོབ་དུ། བྱི་ནག་སྤྱང་ཀུ་ཕག་ནག་སྲམ་དང་བཞིའི་བྲུན་ངེས་པར་དགོས་ལ། གཞན་རི་བོང་བྱི་ལ་སྤྲེའུ་སོགས་ཀྱི་བྲུན་ཀྱང་བསྲེ་རུང་ངོ་། །སྨན་གྱི་སྐྱོབ་ཏུ་ནུས་པ་ངར་འདོན། རྨ་བྱའི་མདོངས། ཕག་མཆེ། རུས་སྦལ་ལྐོག་པ། ཐལ་ཆེན། 
སྟག་སོགས་གཅན་གཟན་གྱི་མཆེ་སྡེར། ཕོ་རོག་མགོ བ་དམར་པོའི་ཆུ། ཐོག་ལྕགས། གཟུགས་མོ་བྱི་ཐུར་གི་ཝཾ། དགེ་བཤེས་ལག་ནས་བྱུང་བའི་གསེར། སྤོས་དཀར་བདུད་རྩི་ཆོས་སྨན་བཅས་ཅུང་ཟད་རེ་བཏབ། སྤྱིར་རྫས་རྒོད་ཀྱི་ནང་དུ།
གཞོབ་ཀྱི་རིགས་ལ། ཤི་སྐྲའི་གཞོབ། རྟ་དྲེལ་སྤུ་གཞོབ། གླང་དམར་རྭ་གཞོབ། ཁྱི་བལ་ར་བལ་གྱི་གཞོབ། །ར་ལུག་གཡག་ཐུག་སོགས་ཀྱི་རྭ་གཞོབ། མིའི་སྐྲ་སེན་གྱི་གཞོབ་སོགས་བཟང་ཡང་། སྐབས་འདིར་ཁྲག་ནུས་ལ་མི་འཕྲོད་པ་
13-7-3b


སོགས་ཀྱིས་ལག་ལེན་དུ་མེད་པས་གཞོབ་རིགས་བཏང་སྲོལ་མེད། རྫས་རྒོད་གཞན་གྱི་སྐབས་སུ་འགྲོ་བ་ཡང་ཡོད་པ་སྐབས་ཕྱེད་པར་བྱའོ། །དེ་བཞིན་ག་བུར་གུར་གུམ་ཛ་ཏི་སོགས་སྨན་དྲི་བཟང་ཡིན་ཀྱང་འདིར་དམིགས་བསལ་ཏེ་མ་གསུངས་པས་མི་
དགོས་སོ། །དེ་ཡང་རང་སྲུང་གི་རྫས་འདི་ལ་མན་ངག་གི་ཡིག་ཆ་སོ་སོའི་ལུགས་ཀྱི་མང་ཉུང་རྒྱས་བསྡུས་སྣ་ཚོགས་ཡོད་ཀྱང་། འདིར་ནི་རྒྱ་ཕུར་བུའི་གཏེར་བྱོན་བུམ་ཐང་མ་དུག་ཁྲག་སྦྱར་བ་དང་ལྕགས་སྡོང་མ་བརྒྱད་ཚན་བཞིའི་རྫས་ཨུར་མོ་བཞི་སྦྱོར་ཅན་
ཏེ་བུམ་ལྕགས་གཉིས་ཀྱི་གཞུང་ལ་གཞི་བྱས་ནས་བཀོད་པ་ཡིན་ལ། དེར་ཡང་བླ་མའི་མན་ངག་ལ་ལྟོས་དགོས་པར་གབ་སྦས་སོགས་ཀྱི་དབང་གིས། རྫས་ཀྱི་འབྱིན་འཇུག་སྣ་ཚོགས་སུ་ཡོད་ཀྱང་། འདིར་མཛེ་ཁྲག་དང་ཡུག་ཁྲག་དམ་ཉམས་ཀྱི་ཁྲག་
སོགས་རྫས་འགའ་ཞིག་ལས་ཀྱུས་ཀྱི་རྫས་ལ་མི་བཏང་བར་བྱ་བ་དང་། སེར་འབེབ་སོགས་དང་སྐབས་འགའ་ཞིག་ལ་དམིགས་བསལ་དང་། སྔགས་ཀྱིས་བརླབ་ནུས་ན་སྦྱར་ཀྱང་འགལ་བ་མེད་པ་སོགས་སྐབས་ཕྱེ་སྟེ་གོ་དགོས་ལ། འདིར་ཇི་ལྟར་བཤད་པ་འདི་
ཁོ་ན་སྙིང་གི་ནོར་དུ་འཆང་ན་ལེགས་སོ། །འདིར་བསྟན་པའི་རྫས་སྲུང་འདིའི་ནང་དུ། ལོག་ཏྲིའི་རྫས་ཉེར་བཞི་མ་དང་། རྟ་ནག་གི་ཁྲོ་ཆུ་ལྟ་བུའི་རྫས་ཀྱི་སྐོར་དང་། རཏྣའི་གཏེར་བྱོན་གནམ་ལྕགས་ལྟ་བུའི་རྫས་རྒོད་བཅུ་དྲུག་པ། ལས་རབ་རྩལ་གྱི་
གཏེར་བྱོན་ཁྲོ་ཆུ་ཁོལ་མ་ལྟ་བུའི་རང་སྲུང་སོགས་མན་ངག་གི་སྐོར་མང་པོའི་དོན་ཐམས་ཅད་འདུས་པ་ཡིན་པས་ཁྱད་པར་དུ་འཕགས་པ་སྟེ་རྫས་སྲུང་ཐམས་ཅད་ཀྱི་རྒྱལ་པོ་བླ་ན་མེད་པ་ཡིན་ལ་མན་ངག་པྲ་ཁྲིད་ཀྱི་དོན་མང་པོ་འང་གབ་སྦས་མེད་པར་འདུས་
13-7-4a


པས་ཤིན་ཏུ་ཟབ་ཅིང་གསང་བར་བྱ་བ་ཉིད་དོ། །དེ་ཡང་རྫས་དེ་རྣམས་སྦྱར་ནས་ནུས་པ་སྔགས་ཀྱིས་བསྐྱེད་པ་ལ། ཐོག་མར་སྨན་ཆེན་ལ་ཡི་གེ་བརྒྱ་པ་བརྒྱ་རྩ་བརྒྱད་བཟླས་ཏེ་རང་གི་རྐང་གཡོན་འོག་ཏུ་ལེན་དགུ་བཏོན་པས་དུག་གི་སེལ་འདོན་
ནོ། །དེ་བཞིན་གྲི་ཁྲག་ལ་སྔགས་ལན་བརྒྱ་རྩ་བརྒྱད་བཟླས་ཏེ་རྐང་གཡས་འོག་ཏུ་ལན་གསུམ་བཏོན་པས་ཁྲག་གི་སེལ་འདོན་པ་སྟེ་དེས་རྫས་ཀྱི་གདུག་པ་རང་ལ་མི་འབྱུང་ངོ་། །དེ་བཞིན་དུ་རྫས་བླུགས་པའི་སྣོད་རྭ་ལ་སེལ་འདོན་ཞིང་བྱིན་གྱིས་བརླབ་པའི་
ཆེད་དུ་གཡག་གསར་གྱི་ཁྲག་ལ་ཡི་གེ་བརྒྱ་པ་བརྒྱ་རྩ་བརྒྱད་བཟླས་ནས་རྭ་ལ་བྱུགས་པས་བསྒྲུབ་བོ། །དེ་ནས་ཁྲག་སྣ་བསྲེས་པ་ལ་ཁྲག་གི་ནུས་པ་བསྐྱེད་པའི་སྔགས། ཨོཾ་བྷར་ལཾ་བྷེར་ལཾ་ཧཱུྃ་ཕཊ་སྭཱ་ཧཱ། ཞེས་བཏབ། དུག་སྣ་རྣམས་བསྲེས་ལ་དུག་གི་
ནུས་པ་བསྐྱེད་པའི་སྔགས། ཨོཾ་ར་ག་དུ་ས་མ་ཡ་ཧཱུྃ་ཕཊ། ཞེས་བཏབ། ༈ རྭ་ཡི་ངར་འདོན། ཕག་ཚིལ་མར་ནག །མི་ཚིལ། ཟེར་མོའི་བྲུན། སྲམ་བྲུན་རྣམས་ཞིབ་འདུལ་ནང་། བྱ་མཚལ་ལུའི་ཁྲག་ཐིགས་བླུགས་ལ་དེ་རྣམས་མར་
ཁུའི་ནང་དུ་བཏབ་སྟེ་སླ་ངར་བཙོ་ཙམ་བྱས་ནས། དེ་རྭ་ཡི་ཕྱི་ནས་ལན་དུ་མར་ཡང་ཡང་བྱུགས་པས་སྲ་ཞིང་ངར་ཆགས་སོ། །དེ་ལྟར་མ་བྱུང་ན་རྭའི་ཕྱི་ནང་ཀུན་དུ་རབ་པྲ་རྩིའམ། ཐ་མ་སྒོ་ངའི་ཆུས་བྱུགས་པས་སྲ་བར་འགྱུར་རོ། །རྫས་ཀྱི་ངར་འདོགས་
རྨ་བྱའི་མདོངས། བཙན་དུག །ཤིང་ཀུན། ཕག་བྲུན། རྒྱ་ཚིལ༷། སྐབས་འདིར་སྦྱང་བྲུན། སྤྲུ་ནག་དེ་རྣམས་ཐུན་གཅིག་ཆང་གར་མར་སྦྱར་ནས་རྭ་ནང་བླུག་གོ། །དེ་ལྟར་སོང་ནས་མཚོ་གསུམ་སྐྱོབས་དང་བཅས་པའི་རྫས་བསྲེས་ནས། གར་སླ་ཞོ་ཙམ་
13-7-4b


བྱས་པ་དེ་ཉིད་ཐོད་པ་སོགས་ཀྱི་སྣོད་དུ་བཞག་སྟེ། ལོ་གསར་རམ་ར་བ་བཞིའི་ཚེས་གཅིག་སོགས་ཚེས་གྲངས་གཟའ་སྐར་སོགས་དུས་སྦྱོར་དགེ་བ་ལ་མདུན་དུ་དལ་ལ་བཀོད། ཡི་དམ་གྱི་གཞུང་བསྲངས། རྫས་ལ་གཟུངས་ཐག་བཏགས་ལ་
སྔགས་ཀྱིས་བསྒྲུབ་པར་བྱ་སྟེ། དེ་ཡང་རང་ཡི་དམ་གང་རུང་གསལ་ལ་བདག་བསྐྱེད་བཟླས་པ་བྱ། དེ་ནས་མདུན་གྱི་རྫས་རྣམས་མི་དམིགས་པར་བསམ་ལ། སྟོང་པའི་ངང་ལས་ཡི་དམ་གྱི་ལྷར་གསལ་བའི་སྐུ་ལས་བསྐལ་པའི་མེ་དཔུང་ཆེན་པོ་མགར་གྱི་ཚ་ཚ་ལྟར་འཕྲོ་
བ་ལ་རང་གིས་སྔགས་བཟླས་པས་མེ་ལ་སྦུད་པ་བུས་པ་བཞིན། མེ་ཆེས་ཆེར་འབར་བས་གནོད་བྱེད་མ་ལུས་པ་ཐལ་བ་བུན་བུན་བསྲེགས་པར་བསམ། རང་ཉིད་ལྷའི་འཁོར་དུ་སྡེ་བརྒྱད་ཀུན་བཀོལ་ནས་ཅི་བཅོལ་བའི་བཀའ་ལ་ཉན་པར་ཡང་བསྒོམ་ལ། ཨོཾ་ན་མོ་བུདྡྷཱ་ལ། 
བཛྲ་ཀཱི་ལི་ཀཱི་ལཱ་ཡ་ནཱ་ག་དུ་ཙནྡྷེ་ཙནྡྷེ། མི་ལི་མི་ལི།    བྷནྡྷ་བྷ།   ནྡྷ་ནཱ་ག་ནི་སྭཱ་ཧཱ། གྲོང་ཁྱེར་དྲུག་པ་ཡིག་འབྲུ་སོ་གསུམ་པ་བཀླག་པས་གྲུབ་པ་ཤིན་ཏུ་ཟབ་མོའི་སྔགས་འདི་བཟླས་པས་བསྒྲུབ་པ་ཡིན་ནོ། །འདི་ཁོ་ན་བཟླས་ཀྱང་ཆོག་མོད་ཀྱི། རང་གི་ཡི་དམ་གྱི་རྩ་སྔགས་དང་
ཁྱད་པར་དྲག་སྔགས་སོ་ལྔ་པའི་ཤམ་བུར་ཀླུ་འདུལ་སྔགས་རྒོད་འདི་སྦྱར་ཏེ་བཟླས་ན་ལེགས་ཏེ། རབ་ཁྲི་འབྲིང་སྟོང་། ཐ་མ་ལྔ་བརྒྱ་བཟླས་པས་ཆོག་པར་གསུངས་ཀྱང་། སྔགས་ཀྱི་ནུས་པ་མང་དུ་བཟླས་ན་ཆེ་བ་ཡིན་པས། འབུམ་ལ་སོགས་པ་གྲུབ་ན་ཤིན་ཏུ་ནུས་
པ་ཆེ་ཞིང་། ནུས་པ་རྫོགས་པའི་རྟགས་སུ། རྫས་ལ་མེ་འབར་བ། དྲོད་འབར་བ། རླང་པ་འཕྱུར་བ། ཐོད་པ་འཕར་བ། སྒྲ་གྲགས་པ། འོད་འཁྱིལ་བ་སོགས་འབྱུང་ལ། གཞན་ཡང་རྫས་དེ་དབྱར་མི་རུལ་ལ། དགུན་མི་འཁྱགས་པ། གནས་རྩུབ་
13-7-5a


པོར་ཕྱིན་པ་དང་གནམ་ཐོག་རྒོད་པ་སོགས་དུས་རྩུབ་མོའི་ཚེ་ན། རྫས་སག་སྒྲ་བཅས་ཁོལ་ཞིང་འཕྱུར་བ་སོགས་འབྱུང་ངོ་། །ཐུན་མཐར་ལྷ་རྣམས་འོད་ཞུ་སྒྲུབ་པའི་རྫས་ཀྱི་རྣམ་པ་ཐོགས་པ་མེད་པའི་མཐུ་དང་ལྡན་པར་བསམ། དེ་ལྟར་བསྒྲུབས་ཟིན་པའི་
རྫས་དེ་སྣོད་ཨཾ་བྷི་ཞེས་པ་སྦུ་གུའམ་སྤར་བུའི་དོན་དེ། སྐབས་འདིར་རྫ་ཡི་སྤར་བུ་ཁ་ཆོད་ཅན་དུ་དྲི་མི་འཆོར་བར་བླུགས་པའམ། བྱེས་སུ་ཁུར་རྒྱུ་ཤེའུ་ཞེས་པ་གྲི་རྐང་གི་སྤུ་གུ་ཆག་གང་བ་སོགས་ཞབས་བསྡོམ་དང་ཁ་ཆོད་ལྡན་པ་རོ་སྐྲས་ཡུག་དཀྲིས་བྱས་པ་ཞིང་ལྤགས་
ཀྱིས་གཡོགས་པ་དང་། མ་རྙེད་ན་རི་བོང་གི་རྐང་སྦུགས་དང་སྨྱུག་དོང་ལྕགས་སྦུག་སོགས་ཀྱིས་བྱ་རུང་ཙམ་མོ། །ཡང་ན་གཡག་ཁྱུ་བའམ། གླང་བུ་འོག་ཅན་གྱི་རྭ་གཡས་གཡོན་གང་བདེར་རྩེ་ལ་ཆུ་སྲིན་གྱི་གཟུགས། ཞབས་སུ་རུས་སྦལ། རྒྱབ་སྟེང་དུ་མཆོད་རྟེན།
སྡིག་པའང་བཀོད་པ་ཡོད་རྩ་བའི་ཁར་སྦྲུལ་དཀྲིས་བཟོས་པ། ཞབས་པད་འདབ་བྲི་ཤིང་ལྡན་པ། ཁ་ཆོད་རྡོ་རྗེ་ཅན་བྱས་ལ་དེར་རྫས་བླུག་སྟེ་རང་གི་ལུས་ལ་རྒྱུན་དུ་འཆང་ཉལ་ཁར་སྔས་སུ་འབྲལ་མེད་བཞག །དུས་སུ་སྔགས་ཀྱིས་ཁ་གསོ་བ་དང་། རྫས་གསར་བས་གསོ། རྒྱུན་
དུ་རང་གི་དྲི་ཆུའམ་ཆང་བཟང་པོས་རླན་བག་དང་མ་བྲལ་བར་ཁ་གསོ། དྲི་དང་རླན་དང་མ་བྲལ་ན་ནུས་པ་ཁྱད་པར་དུ་ཆེ། འཆང་བ་ཙམ་གྱིས་སྲུང་བའི་རྒྱལ་པོར་འགྱུར། གལ་ཆེ་དུས་རང་གི་གནས་གསུམ་བུ་ག་དགུ་སོགས་སུ་བྱུགས། འཁོར་སྲུང་
ན་དེ་ལ་བྱུགས་པ་དང་། བདུག་པ་དང་། རྫས་ཀྱི་ཐུམ་པོ་སྲུང་མདུད་བཅས་གདགས།  སེར་བ་སྲུང་ན་སེང་ལྡེང་ཕུར་བུར་རྫས་བྱུགས་པ་རྫས་ཐུམ་དང་བཅས་ཕྱོགས་གང་སྲུང་བའི་མཚམས་སུ་བཀོད། དེ་འདྲའི་ཕུར་བུ་གཅིག་དང་རྫས་ཐལ་ཆེན་དང་བསྲེས་
13-7-5b


པས་སེར་བ་གདོང་བཟློག་བྱ། གདོན་འདུལ་བར་ནད་པའི་ཁོང་དུ་བཏང་། དུ་བས་བདུག་པས་གདོན་འབྲོས་པར་འགྱུར། མཐར་སྲུང་བའི་ཆེད་དུ་ལུས་ལ་གདགས་པ་སོགས་བྱ། རིམས་སྲུང་ན་སྲུང་སྐུད་སྣ་ལྔ་རྫས་ཐུམ་བཅས་ལུས་ལ་བཏགས། དེ་ལྟར་བྱས་
པས་རྫས་འདི་འཆང་བ་དེའི་རང་ལུས་རྡོ་རྗེར་འགྱུར་ཏེ། བསྐལ་པའི་མེ་འབར་བ་ལྟར། གདོན་བགེགས་བར་ཆད་གང་ཡང་ཕྱོགས་སུ་ཉེ་མི་ནུས། ནད་རིགས་བཞི་བརྒྱ་རྩ་བཞི་ཐུབ། རྡོ་གཉན་ས་གཉན་ཤིང་གཉན་མཚོ་གཉན་སོགས་གཉན་ས་བཅོམ་ཞིང་
ཀླུའི་གྲོང་ཁྱེར་མེ་ལ་བསྲེག་ཀྱང་རང་ལ་གནོད་མི་ནུས་པས། གཏད་ཁྲམ་སོགས་བྱེད་དུས་འདི་གལ་ཆེའོ། །ཕྱོགས་ངན་སོགས་དང་འཇིགས་པ་དང་གནོད་པ་ཐམས་ཅད་ཐུབ། མནའ་ཡི་ཉེས་པས་ལྷ་ཀླུའི་བཀའ་ཆད་ཀྱིས་མི་སྡིག་པ་སོགས་མདོར་
ན་ཐུབ་ཆོད་ཀྱི་ལས་ཅི་བྱས་ཀྱང་རང་ལ་གནོད་པ་མི་འབྱུང་བས། རང་ལ་ཅི་རི་འདི་ལ་རི་རྒྱ་དང་བལ་སོགས་ཡུལ་ཀུན་ལ་འདི་བས་ལྷག་པའི་སྲུང་བ་མེད། སྟེར་ཐེབས་གཅིག་ལས་མང་བར་མི་སྤེལ་བའི་བཀའ་རྒྱ་ཡོད་དོ། །རྫས་འདིའི་ཟེགས་མ་ཙམ་གྱིས་
མཛེ་ཤུ་གག་ལྷོག་གཉན་ཐོར་སོགས་ནད་གདོན་གདུག་པ་ཐམས་ཅད་ལ་བཟའ་བྱུགས་བདུག་པ་བྱས་ན་ཐུབ། རྟེན་འབྲེལ་རྫས་ཀྱི་ནུས་པ་འདི་ཡང་བསམ་གྱིས་མི་ཁྱབ་ལ། དེ་བས་སྔགས་ཀྱི་ནུས་པ་ཆེ། དེ་གཉིས་འཛོམ་ན་འཇིག་རྟེན་ཕུང་གསོ་ནུས། ལར་འདི་ཡི་
ནུས་པས་ལྷ་འདྲེའི་དལ་ཁ་ཆེན་པོ་བབ་པ། བན་བོན་གྱི་མཐུ་ལ་ཟུག་པ། ཡུལ་དུ་ནད་ཡམས་དྲག་པོ་བབ་པ། རང་གིས་ཕར་ལ་གཏད་རྒྱགས་པ་དང་། གདོན་ཆེན་པོ་འདུལ་བ། རོ་ཁུར་བ་སོགས་ཐུབ་ཆོད་ཅི་བྱས་ཀྱང་རང་ལུས་རྡོ་རྗེ་དང་འདྲ་བར་འགྱུར་ཏེ། 
13-7-6a


འདི་ནི་མེ་ཡི་ངར། འཁོར་ལོའི་དབལ་ལྟ་བུ་སྟེ། རྫས་སྲུང་ཀུན་གྱི་གབ་སྦས་མན་ངག་གསལ་པོར་བསྟན་པའི་པྲ་ཁྲིད་ཅན་འདི་འདྲ་གཞན་ན་མེད་དོ། །ས་མ་ཡཱ༔ འདིའི་དམ་ཚིག་ཏུ། རྫས་འདི་བུད་མེད་ཀྱིས་མི་མཐོང་མི་རེག་པར་བྱ། 
མི་ལག་མི་འགྲིམ། ཁྱད་པར་དམ་ཉམས་ལ་རེག་ཏུ་མི་འཇུག  །གཞན་ལ་འགོམ་དུ་མི་གཞུག །སེར་བ་འབབ་དུས་ཐོ་ཅོས་ས་ལ་བརྡབ་པར་མི་བྱ་ཞེས་གསུངས་སོ། །འདི་ལ་ཟུར་བརྒྱན་གྱི་མན་ངག་ནི། རྫས་གདུག་པ་ཅན་ཕལ་ཆེར་བྱིན་བ་མེད་པར་
བཅད་ན་མི་སྐྱ་སོགས་ཐ་མལ་པ་ཕལ་ལ་འདྲེ་སྲུང་བར་བྱེད་ཀྱང་། རང་གི་ལྷ་ཕྲན་སོགས་ཀྱང་སྐྲགས་པར་བྱེད་པས་སྔགས་ཀྱི་བྱིན་གྱིས་བརླབ་པ་གལ་ཆེ་ལ། དྲག་རྫས་འཆང་བའི་སྐབས་སུ་དེས་རང་གི་ལྷ་ལྔ་དགྱེས་པའི་ཐབས་སུ། བྱ་རྒོད་དང་གཡག་གི་ཚིལ་
བུ་གླ་རྩི་རིན་ཆེན་སྣ་ལྔ་བཅས། སྤྲ་ཚིལ་གྱིས་དྲིལ་རྭ་དོང་དུ་བཅུག །རྭ་ཡི་ཕྱི་ལ་ཡེ་དྷར་བྲི་བ་དང་། བཟང་དྲུག་སྤོས་དཀར་ཙན་དན་དཀར་པོ་རྣམས་ཀྱི་ཐུམ་པོ། རང་ལུས་སམ་རྭ་དང་མཉམ་དུ་འཆང་བས་དོན་གྲུབ་བོ། །རྫས་སྲུང་འདི་དང་མཉམ་དུ་
རང་གི་ལུས་ངག་ཡིད་གསུམ་སྲུང་བའི་ཕྱིར་ཤེར་ཤིང་སེང་ལྡེང་སྐྱེར་པའི་ཕུར་བ་གསུམ་བཏགས། རྨ་བྱ་ཟེར་མོ་སྲིན་བྱ་འུག་པ། པུ་ཤུད་ལྔའི་སྒྲོས་མཁའ་ལ་རྒྱུ་བ་ཐམས་ཅད་བསྒྲིབ། ཙན་དན་གུ་གུལ་དཀར་པོ་རིན་ཆེན་སྣ་ལྔ་བརྡར་བའི་ཕྱེ་མ་རང་ལ་བཏགས་ན་
ལྷ་ཀླུ་གཙང་རིགས་མི་རྣམས་དགྱེས་གུ་གུལ་ཤིང་ཀུན་བ་བླའི་དྲི་གསུམ་གྱིས་དབང་པོ་སྒོ་གསུམ་བསྲུང་། མི་ཕག་རྟ་ཡི་ཚིལ་གསུམ། མི་རྟ་ཁྱི་ཁྲག་གསུམ། དམ་རྫས་བདུད་རྩི་ལྔ་བཅས་འཆང་ན་འོག་གདོན་ལ་སོགས་ཐམས་ཅད་སྲུང་གསུངས་པ་ཕལ་ཆེར་
13-7-6b


རྫས་ནང་ཚང་ཡང་། ལོགས་སུ་ཁྲོལ་བུ་སོགས་ཀྱི་ཐུམ་པོ་འཆང་ཡང་ལེགས། ཙ་ཀྲས་བསྲུང་བ་ལ། འཁོར་ལོ་མུ་ཁྱུད་རིམ་ལྔ་ལ། །དབུས་སུ་ཡི་དམ་སྙིང་པོ་བྲི། །ཕྱི་རིམ་འཁོར་ལོ་རྩིབ་དྲུག་ལ། །གོང་སྔགས་གྲོང་ཁྱེར་དྲུག་པ་བཀོད། །དེ་ཡི་ཕྱི་ཡི་མུ་ཁྱུད་
ལ། །གང་བྱེད་ལས་སྔགས་བཀོད་པར་གསུང་། །འོན་ཀྱང་སྲུང་བ་ཁོ་ན་ཡིན་ན་རྫས་ཀྱི་ཉེས་པ་སོགས་ཀུན་ཐུབ་སྔགས་སྲུང་འདི་བཀོད་ན་ལེགས་སྙམ་ཨོཾ་སུ་དྷ་ར་ནི་མ་ཧི་བུདྡྷཿ ར་ག་ཧ་ནཿ དུ་མ་མ་རཀྵཿ ཧེ་ཏུ་མ་མ་ཏ་ཙ་རྱཿ  བཛྲ་བཛྲ་སུ་བཛྲཿ མ་མ་རཀྵ་རཀྵ་ནི་
སྭཱ་ཧཱཿ ཞེས་དང་། ཨོཾ་བཛྲ་བིནྡྷ་མ་ཧཱ་སུ་ཁ་བཛྲ་ཡཿ ཨཱོཾ་བི་མ་ལ་ཨ་ཀ་ཛ་ན་ཡ་ཧཱུྃཿ མ་ལེ་བན་ཙ་ཧ་ན་ཨ་པ་ར་ཤ་ན་ཀྲུཾ་ཡཱ། ཨོཾ་ཨཱཿབདག་ལ་མ་མ་རཀྵ་རཀྵ་ཧཱུྃཿ དེའི་ཕྱི་རོལ་མུ་ཁྱུད་ལ། རྡོ་རྗེའི་ར་བ། དེའི་ཕྱིར་མེ་རི་བྲིའོ། །འདི་ལ་ཡབ་འཁོར་ཡིག་མགོ་ཕྱིར་
བསྟན་གཡས་བསྐོར་ཅན། གི་ཝཾ་དང་ལྡོང་རོས་ཀྱིས་སེར་པོ་བྱ། མོ་འཁོར་ཡིག་མགོ་ནང་བསྟན་མཚལ་ལམ་རྒྱ་སྐེག་གིས་དམར་པོར་བྱ་བར་དུ་དགྲ་བགེགས་ལིངྒ་བཞག །འཁོར་ལོ་འཁོར་བའི་བར་དུ་གནོད་བྱེད་འཐག་པར་བསམ། ལས་ཚར་ནས་འཁོར་
ལོ་ལ་སྲུང་བའི་མིང་དང་སྤེལ་ཚིག་བཅུག །རང་གི་དཔུང་པ་གཡས་གཡོན་དུ་བཏགས། ལིངྒ་གནོད་བྱེད་སོ་སོའི་མནན་ཐབས་གཞུང་ལྟར་བྱའོ་གསུང་། དེ་ལྟར་བྱེད་ན་འཁོར་ལོའི་ལྟེ་བ་དང་མུ་ཁྱུད་ལ་རྩ་སྔགས་དང་ལས་སྔགས་བཀོད་པ་ཙམ་ལས་སྲུང་ཤམ་དང་། 
གང་གི་སྲུང་སྔགས་དེ་རེ་ཞིག་མི་བྲི་བར་བསྒྲུབས་ནས་སླར་སྲུང་བར་བསྒྱུར་དགོས་སོ། །འདིར་སྔགས་ཀྱི་ཁ་བསྒྱུར་ལ། རང་སྲུང་རྟག་ཏུ་བཅང་ན་ནང་པར་ཉི་ཤར་ཙམ་ལ་ངར་འདོགས་ཀྱི་སྔགས་འདི་དབུགས་ཐེང་གཅིག་ལ་བཟླས་ཏེ་རྫས་ནང་ཕུས་བཏབ་པས་ནུས་པ་
13-7-7a


བསྐྱེད་དོ། །ཨོཾ་རཀྵ་རུ་སི་ཨུ་ནི་ཀཱ་ཡ་ཝཀྩི་ཏྟ་རཀྵ་ཨུ་མ་བྷ་རི་ཏ་ཁྱེའུ་ནི་རཀྵ་རཀྵ་སྭཱ་ཧཱཿ རྫས་སྲུང་འདི་མཛེ་ཡུག་དམེ་བཤན་སོགས་ཀྱི་ལག་ཏུ་སོང་ན་ཞུད་འགྲོ་བས་འཛེམ། ཞུད་ན་ར་སྐད་འདོན། མ་ཚོར་ལུད་པ་འབྱུང་། དེ་ལ་སྔགས་ཀྱིས་ཁ་
གསོ་སོགས་ཤེས་པར་བྱའོ། །སྐམ་ན་གསོ་བ་རིགས་གཙང་མའི་ཁྱེའུ་འཐུང་ནུ་ཞོ་དང་དགེ་བཤེས་དང་སྔགས་པའི་འམ་རང་གི་དྲི་ཆུ་ཆང་བཟང་གི་ཁུ་བས་གསོས་ལ་སྔགས་བཏབ་རྫས་གསར་པ་བླུག་གོ། །ལྷ་སྲིན་སྤྱི་དང་ཁྱད་པར་ས་བདག་ཀླུ་གཉན་ལ་གྲོང་
ཁྱེར་དྲུག་པའི་རྒྱུན་སྔགས་ཁོ་ན་བཟླས་པས་འགྲུབ་ཕོ་གདོན་རྒྱལ་པོ་འདུལ་ན། བུདྡྷཱ་ཡ་སོགས་གྲོང་ཁྱེར་དྲུག་པའི་སྔགས་གཞུག་ལ། རཱ་ཙ་ཏྲི་མཱ་ར་ཡ་རྦདཿ རཱ་ཙ་སིདྷི་འང་ཙིཏྟ་མཱ་ར་ཡ་གཏུབ། རཱ་ཙ་སི་དྷིའང་ཙིཏྟ་མཱ་ར་ཡ་ཐིབ་ཛཿ ཨ་ཏི་ཐུམ་ཙིཏྟ་རྦད་ཏྲིའུ་མ་ལེ་ཛ་
ཡ་རྦད་སོདཿ ཞེས་བཏགས་པ་བཟླས། སྒོག་གཅིག་མུ་ཟི་ནག་པོ་ཐལ་ཆེན་ཐོག་ལྕག་རྨ་བྱའི་མདངས། ཡུངས་དཀར་ནག །སྐེ་ཚེ། གཅན་གཟན་མཆེ་སྡེར། འཕར་སྤྱང་ཁྲ་གླག་རླག་གི་ཤ གཡག་རྒོད་རྭ། གཙོད་རུ་ཕག་རྒོད་མཆེ་བ་རྣམས་
བཅངས། མོ་གདོན་འདུལ་ན། གོང་བཞིན་རྒྱུན་སྔགས་མཇུག་ཏུ། མ་མ་ཞུར་ཏྲི་མཱ་ར་ཡ་ཛཿ མ་མ་ཏྲི་མཱ་ར་ཡ་ཛཿ མ་རུ་ཏྲི་ཛ་མཱ་ར་ཡཿ ཛ་གཏུབས་ཙ་མུནྟྲི་མཱ་ར་ཡ་རྦདཿ ཞེས་གདགས། འགོང་པོ་ཕོ་མོས་གནོད་ན། སྔགས་ཤམ་ལ། ཏྲིའུ་ཏྲིའུ་མཱ་ར་ཡ་ཛཿ ཏྲི་ཤོ་
མཱ་ར་ཡ་ཛཿ ཏྲིད་དུ་མཱ་ར་ཡ་ཧཱུར་ཐུམ་ཛ་རྦདཿ ཅེས་བཏགས་ལ་བཟླ། ཞོ་ཆང་སྲུང་ན། རྒྱུན་སྔགས་ཤམ་དུ་འདི་བཏགས། ཨོཾ་ས་ར་ས་ར་བྱི་ས་ར་ས་ར་ཧཱུཾ་ཕཊཿ དུར་ཏི་ནག་པོ་ནན། དུར་ཏི་ནག་པོ་སོད༔ ནས་ནག་ལ་བཏབ་ནས། སྤར་བུའི་ནང་དུ་བླུག་པ་དང་།
13-7-7b


རྡེའུ་དཀར་ནག་བཅས་ཞོ་ཆང་སྟེང་དུ་བཞག་པས་ཐུབ། རྫས་རྒོད་ཀྱང་བཞག་ན་ལེགས། རྦོད་གཏོང་བཟློག་ན་སྔགས་ཤམ་དུ། ཨོཾ་བྷ་ཏ་ཡ་བྷ་ཏ་ཡཿ ལོ་ཀ་བྷ་ཏ་ཡ་ཧ་ཧཱུཾ་ཟློག་ཟློག༔ ཞེས་བཏགས་ལ་བཟླས་ཏེ་དུག་ཁྲག་བྱུགས་པའི་གཏོར་མ་ལ་བཏབ་སྟེ་ཟོར་
དུ་འཕང་། རང་སྲུང་རྫས་ཀྱི་ཟེག་མ་དང་། གུ་གུལ་ཚིལ་ཆེན་ཡུགས་སའི་ཞབས་མ། ཕག་བྲུན་མཛེ་བོའི་བྲུན་རྣམས་ཉ་སྟོང་ཚེས་བརྒྱད་རྣམས་སུ་རྦོད་གཏོང་འོང་བའི་ལམ་དུ་བསྲེགས་ན་སྡེ་བརྒྱད་ཀྱིས་གནོད་པའི་ལམ་ཆད་དེ་སྲུང་བའི་མཆོག་ཏུ་འགྱུར་རོ། །
སེར་བ་སྲུང་ན་སྔགས་ཤམ་དུ། ཨོཾ་ཏདྱ་ཐཱ། ཏིག་གུ་ལི་ཏིག་གུ་ལི༔ ཨུ་ལི་ཤ༔ ཤུ་གི་གུ༔ ཏི་ཏི་བི་རེ༔ ཧུ་ཡ་ཧུ་ཡ༔ ཧི་རི་ཧི་རི། ཧི་རཾ་སྭཱ་ཧཱ༔ ཐལ་ཆེན་ཡུངས་ཀར་ལ་བསྔགས་ནས་གཏོར། དུག་ཁྲག་ལ་ཡང་བསྔགས་ནས་རྫས་རྒོད་བཅས་བསྲུང་བའི་ས་
མཚམས་སུ་བཏང་བས་ཆོག་གོ། ཡང་རྫས་ཀྱི་སྒོ་ནས་སེར་བ་བཅད་ན། གུ་གུལ། མུ་ཟི་ནག་པོ། ཤུ་དག་ནག་པོ། ཨ་ག་རུ་ནག་པོ། བཙན་དུག །ལུག་ནག་སྤྲེ་དུག །ཐང་ཕྲོམ་པའི་རྩ་འབྲས། ར་དུག་པའི་རྩ་བ། རེ་ལྕག་རྩ་བ། ཐར་ནུའི་
རྩ་བ། སླེ་ཏྲེས་དང་རྫས་སྣ་བཅུ་གཉིས་པོ། ཕག་ནག་གི་ཚིལ་དང་སྦྱར། རིལ་བུ་གླ་རིལ་ཙམ་བྱས་ཏེ་སེར་བ་བྱུང་དུས་མེར་བསྲེགས་ལ། དུ་བ་འདི་རང་ལ་འགོ་བའི་ལྷ་སྐྱོབ་པའི་སྲུང་མ་རྣམས་ལ་མི་བཏང་ངོ་ཞེས་བདེན་པ་བདར། དུ་བ་དེ་ནམ་མཁའ་ལ་སོང་
བས་སེར་བ་འཆད་ངེས་སོ། །འོན་ཀྱང་གལ་མ་ཆེ་ན་མི་བྱའོ། །རྫས་ཀྱིས་སེར་བ་བཙན་ཐབས་འབེབ་ན། བ་བླ་ཚིལ་ཆེན་རྟ་བོན། མཛེ་ཁྲག །ཕག་ཁྲག་བཅས། རྫས་རྒོད་དང་ལྷན་དུ་ཡུལ་ལྷའི་རྟེན་ནམ་ཀླུ་གཉན་གནས་སར་བསྲེགས་པ་ཙམ་གྱིས་
13-7-8a


འབབས་སོ། །གལ་ཆེ་ན་ཆུ་ནང་དུའང་བླུགས། གལ་ཐོང་བྱ་མི་རུང་ངོ་། །གལ་ཏེ་སྔགས་ཀྱང་བཟླ་ན་སྔགས་ཤམ་དུ། ཕྲོམ་ཕྲོམ་ཧྲིལ་ཧྲིལ་ཤར་ཤར་ཕོབ་ཕོབ། ཅེས་བཟླའོ། །ཆར་དྲག་པོ་འབེབ་པར་བྱེད་ན། རྫས་རྒོད་དང་སྦལ་སྦྲུལ་རྩངས་
བའི་ཤ་གསུམ་བཅས་ཀླུ་གནས་སར་ཞག་གསུམ་བཞག །ཆར་ཕོབ་ཅེས་བསྡིགས་པ་བྱ། སྐབས་སུ་བསྲེགས་པས་འབེབ། སྔགས་ཀྱང་བཟླ་ན་སྔགས་ཤམ་དུ། ཆར་ཡ་ཆུར་ཡ་ཆར་ཕོབ། ཤར་ཤར་ཕོབ། སལ་སལ་ཕོབ། ཕྲོམ་ཕྲོམ་ཕོབ། 
ཅེས་བཟླ།  དེ་སོགས་ལས་སྣ་ཚོགས་བྱེད་དོ། །ནད་རིམས་སྣ་ཚོགས་སྲུང་ན། རྒྱུན་སྔགས་ཤམ་བུར། ཨོཾ་ཐིམ་ཐ་ར་ཏི་ས་དུནྡེ་ཛྭ་ལ་རཾ་པ་ཡེ་སྭཱ་ཧཱ། ཨོཾ་ཀ་ཤག་བྲག་ཚལ་རྦད་ཤག །ནད་ཀྱི་སྙིང་གོང་དཀར་པོ་ཆོད་སྭཱ་ཧཱ། ཞེས་བཏགས་པས་ཆོད་
དོ། །དམ་སྲི་གནོད་ན་སྔགས་ཤམ་དུ། འགོང་པོ་ཧབ་ཤ་ཏྲིག་ནན། ཐ་ཏྲི་མྱག་ཐུཾ་རིལ་རྦད༔ མ་མ་ཞུང་ཏྲི་མ་ར་ཡ་ཛཿ ཞེས་བཏགས་པས་ཐུལ་ལོ། །ཀླུ་སྲིན་གནོད་ན། སྔགས་ཤམ་དུ། ཨོཾ་ར་སུ་ལི་ནཱ་ག་རཱ་ཛ་མཱ་ར་ཡ་ཛཿ ཏམ་ནད་ཤད་རྦུད༔ 
ཅེས་བཏགས་པས་ཐུབ་བོ། །ལས་ཀྱི་རྗེས་སུ་གདོན་འདི་དག་མནན་པར་འདོད་ན། ཕོ་གདོན་ཁྱི་དཀར་ཐོད་པར་ལིངྒ་བཅུག །ཁྲིམས་ཉམས་པའི་གོས་ཀྱིས་དཀྲིས་ལ་བྲུབ་ཁུང་བཅུག་གོང་སྔགས་བཟླས་ཡུངས་ཀར་ནག་གུ་གུལ་གྱི་ཐུན་བྲབས། ལམ་རྒྱ་གྲམ་
དུ་མནན་ནོ། །དེ་བཞིན་སྦྱར་ལ་མོ་གདོན་ཁྱི་མོ་ནག་མོའི་ཐོད་པར་ཡུག་ས་མོའི་གོས་ཀྱིས་དྲིལ། ཡུངས་ཀར་ནག་ཏིལ་ནག་ཟི་ར་ནག་པོའི་ཐུན་བྲབས། ཐེམ་པར་མནན། འགོང་པོ་རི་བོང་ཐོད་པར་མི་ལྤགས་ཀྱིས་དྲིལ། ཡུང་ཀར་ནག་སྐེ་ཚེའི་ཐུན་བྲབས་
13-7-8b


མལ་འོག་མནན། ཐམས་ཅད་རྡོ་རྗེ་རྒྱ་གྲམ་དང་རི་རབ་ཀྱིས་མནན་པར་བྱའོ། །རང་སྲུང་རྫས་གནད་ཀུན་འདུས་གཞན་ལ་མེད་པའི་ཁྱད་ཆོས་གཅེས་པའི་བུ་ལའང་གསང་ཏེ་བཀའ་རྒྱས་བཏབ་པའི་མན་ངག་ཟབ་མོ་འདི་འཇམ་དཔལ་དགྱེས་པའི་རྡོ་རྗེའི་གཅེས་
པ་ལགས་སོ། །༈ གཞན་ཡང་རྫས་སྲུང་འགའ་ཞིག་འཕྲོས་སུ་བྲིས་པ་ལ། བདུ༷ད་རྩི༷་སྙིང༷་པོ༷འི་རྒྱུད་ལས། ཚེ་གཅིག་ལྕོང་མོ་ལུས་གཉིས་བླང་བའི་ཤས་གཙོ་བྱས་གདུག་པ་ཅན་གྱི་ཤ་སྣ་ཚོགས་དང་། ག་བུར་བཟང་དྲུག་སོགས་རྩི་སྨན་ཐམས་ཅད་
དང་། གླ་རྩི་ཤུ་དག་ཤིང་ཀུན་གུ་གུལ་སོགས་དྲི་ངད་ལྡན་པའི་སྨན་ཐམས་ཅད་དང་། བ་བླ་ལྡོང་རོས་མུ་ཟི་བྱ་རྒོད་སྤོས་སོགས་ས་རྡོ་སྔོ་སྨན་གྱི་དྲི་ལྡན་ཐམས་ཅད་དང་། བསེ་དྲི་ཅན་བཤུལ་ཆགས་ཀྱི་ཤ་རྣམས་དང་། བྱ་གཅན་ར་ལུག་སོགས་
སེམས་ཅན་སྣ་ཚོགས་ཀྱི་སྤུ་བྲུན་ཆུ་སེན་མོ་མཁྲིས་པ། སྦལ་སྦྲུལ་ཉ་ལྕོང་སོགས་ཆུ་གནས་ཀྱི་ཤ །འབྲུ་སྣ་དུག་སྣ་ཁྲག་སྣ་ཀུན་བསགས་ལ་ཞིབ་བཏགས་རིལ་བུ་བྱས་པ་རྫས་རྒོད་མང་སྦྱོར་ཏེ། དེའི་དུ་བས་བདུག་པ་དང་ཁུ་བ་བྱུག་པ་བྱས་པ་དང་
ཁོང་དུ་བཏང་བ་ཙམ་གྱིས་སྟེང་འོག་བར་གསུམ་གྱི་འབྱུང་གདོན་འདུལ་ཞིང་ནད་རིམས་སོགས་སྲུང་བར་གསུང་།  ༈ ཡ༷ང་མ༷ན་ང༷ག་གི་དཔེ་གཞན་ན། བཙན་དུག་ར་དུག་ཐང་ཕྲོམ་གསུམ། མི་དང་རྟ་དང་ཁྱི་ཁྲག་གསུམ། གླང་
གཡག་ར་ཐུག་རྭ་གཞོབ་གསུམ། །རྒྱ་ཚིལ་ཕག་ཚིལ་ཚིལ་ཆེན་གསུམ། །དྲི་ཆེན་ཕག་བྲུན་སྤྱང་བྲུན་གསུམ། །མི་རྟ་པུ་ཤུད་ཤ་གསུམ་དང་། །དྲི་ཆུ་བ་ཆུ་གར་ཆང་གསུམ། །གླ་རྩི་བ་བླ་ལྡོང་རོས་གསུམ། །ཤུ་དག་སྤོས་དཀར་སྤྲུ་བ་གསུམ། །
13-7-9a


ཤིང་ཀུན་མུ་ཟི་རྟ་བོན་གསུམ། །སྒོག་གཅིག་མ་ནུ་ཐང་ཕྲོམ་གསུམ། །གུ་གུལ་ཡུངས་ཀར་ཡུང་ནག་སོགས། །གཞན་ཡང་ཤ་སྣ་ཁྲག་སྣ་དང་། །དྲི་དང་ལྡན་པའི་སྨན་ཐམས་ཅད། །ཇི་ལྟར་རྙེད་པ་བསགས་བྱས་ལ། །གླང་
ཐུག་རྭ་ཅོའི་ནང་དུ་བླུག །སྔགས་པའི་དྲི་ཆེན་དག་དང་ནི། །དགེ་སློང་ལོ་བརྒྱད་གཉིས་དྲི་ཆུ། །བ་དམར་ཆུ་ཡི་དྲིལ་བར་བྱ། །རྟ་གསེབ་ནག་པོའི་རྟ་བོན་དང་། །བྱ་རྒོད་ལ་སོགས་བྱ་གཅན་ནི། །སྣ་ཚོགས་པ་ཡི་ཤ་ཁྲག་དང་། །གྲི་ཁྲག་རྣམས་
ནི་བུང་ཆེར་བྱ། །མཛེ་དམེ་མནོལ་ཁྲག་མ་གཏོགས་པའི། །ཁྲག་སྣ་བསགས་ལ་རུལ་བར་བྱ། །ཁྲག་གི་ནུས་པ་རུལ་ན་འབྱུང་། །སྨན་རྫས་གསར་པ་ནུས་ངར་ཆེ། །སྔགས་ནུས་བཟླས་པས་འབྱིན་པ་ཡིན། །རྫས་སྔགས་འདི་དང་ལྡན་པ་དེ། །
ཕྱག་ན་རྡོ་རྗེ་ཇི་བཞིན་དུ། །ཀུན་ཐུབ་རང་ཉིད་ཕྱོགས་ལས་རྒྱལ། །ཞེས་གསུངས།  ༈ ཡང༷་དྲག༷་སྔག༷ས་དང་ངན་སྔགས་ཐམས་ཅད་ལ་རང་སྲུང་ནི། གླ་རྩི། གུ་གུལ། དྲི་ཆེན། རང་གི༷་དྲི་ཆུ་སྦྱར་བས་རང་གི་གནས་དྲུག་ཏུ་ཐིག་ལེ་བྱ། དེས་
རང་ལ་མི་གནོད་ཅིང་བར་ཆད་རྐྱེན་ངན་བཟློག་པར་འགྱུར་རོ། །འདི་མེད་ལས་སྦྱོར་བརྩམས་ན་རང་སྲོག་རང་གིས་གཅོད། ཞལ་གདམས་གནད་འདི་ཤིན་ཏུ་གཅེས་ཞེས་གཤིན་རྗེ་གཤེད་ཁྲོ་ཆུ་དུག་གདོང་གི་ཡིག་ཆ་ལས་གསུངས་སོ། །༈ ཁྲོས༷་ནག༷་
གི༷་ལས་ཚོགས་ན། གུ་གུལ། རྒྱ་ཚིལ། བ་བླ། སྤྲུ་ནག་རྩ་བ། སྤྱང་བྲུན་ལྔ་རྩ་བ། དེའི་སྐྱོབས་བདུན་ནི་ཚིལ་ཆེན། གྲིར་ཤིའི་ཤ་ཆེན། གླ་རྩི། བ་གླང་གི་རྭ་གཞོབ། ཤུ་དག་ནག་པོ། ལྡོང་རོས། རྨ་བྱའི་ཤའམ་སྒྲོ་གང་རྙེད་དེ་སྐྱོབས་རྣམས་བུང་
13-7-9b


ཆེར་བྱ། ཞིབ་བཏགས་བ་ཆུ་དང་ནུས་ལྡན་དྲི་ཆུ་སྦྱར་བས་རིལ་བུ་སྲན་མ་ཙམ་ཚིལ་ཆེན་དང་སྦྱར་ཏེ་བདུག །ལྟོ་སྟོངས་ཁོང་དུ་བཏང་། ལུས་ལ་བྱུག་པ་བྱས་པས་མཛེ་ལྷོག་རིམས་སོགས་ནད་ཐམས་ཅད་དང་། གདོན་ཀུན་ཐུབ། གཏད་ཁྲོམ་བཟློག་
བམ་ལེན་ལྷོག་རོ་བཤའ་བ་སོགས་ལ་ཉམས་མི་ང་། གཏད་བྱེད་དུས་རང་ལ་བྱུགས་ན་མཛེ་ཐོད་རློན་པ་བརྒྱ་ཆུ་མིག་ཏུ་བྲུབས་ཀྱང་རང་ལ་ལོག་པའི་དོགས་པ་མེད། ཁྱི་ཐོད་དམ་མཛེ་ཐོད་དུ་བཅུག་ནས་ཀླུ་ཡོད་སར་སྦས་ན་དེར་ཐོག་སེར་རྒྱུན་དུ་འོང་ཞེས་གསུངས་སོ། །
༈ གཟའི༷་ཆོ༷ས་སྐོར༷་ཞིག་ན། རྫས་སྲུང་ལ། ཀླུ་ལ་གླ་རྩི་ཤིང་ཀུན་མུ་ཟི།  རྒྱལ་པོར་ཟབ་རྙིང་། བེ་གར་སྤྱང་བྲུན། བཙན་ལ་སྟག་སྡེར། བདུད་ལ་ཕོ་རོག་མགོ་བོ། མ་མོར་མུ་ཟི་ནག་པོ། ཐེའུ་རང་སྐེ་ཚེ་ཤངས་ཚེ། འགོང་པོ་ལ་ཕ་ཝང་
དྲེག་པ་དང་ཁྱི་གཞོབ། རིམས་ལ་སྐེ་ཚེ་ཐལ་ཆེན་ཤི་སྐྲ་སྒོག་སྐྱ་གླ་རྩི་སླེ་ཏྲེས་དེ་རྣམས་བཏགས་བྱུགས་བདུག་པས་སྲུང་ཞེས་གསུངས། ཡང༷་ཀླུ༷་དང་ས༷་བད༷ག་སྡེ༷་བརྒྱ༷ད་སྒྲིབ་ཤིང་ལ། ཕག་མཆེ། རུས་སྦལ་ལྐོག་པ། གདུང་ཤ་རི་རཾ། 
རྨ་བྱའི་སྒྲོ། གཟུགས་མོ་བྱི་ཐུར། ཐོག་རུས། བཙན་དུག །གུ་གུལ། མུ་ཟི་ནག་པོ། རྟ་བོན། གླ་རྩི། ར་ཐུག་སྦྲེ། སྤྱང་བྲུན། སྤྲུ་རྩ། ཟི་ར་ནག་པོ། བ་གླང་རྭ། མི་ཤ ཚིལ་ཆེན། སྐེ་ཚེ་ཤང་ཚེ་བཅས་ལུས་ལ་འཆང་བས་
ཐུབ་བོ་ཞེས་དང་།  ༈ ཡང་རྫས་སྲུང་ལ། རྨ་བྱའི་མདོངས། བྱ་རོག་ཁྲག །བཙན་དུག །གླ་རྩི། ཤིང་ཀུན། དགེ་བཤེས་ཀྱི་ལག་ནས་བྱུང་བའི་གསེར། ཐལ་ཆེན། མུ་ཟི་སེར་ནག །ཡུངས་དཀར་ནག་གུ་གུལ་
13-7-10a


དཀར་ནག་བཅས་རྫས་སྣ་བཅུ་གཅིག་དེ་དག་སྨྱུག་དོང་སོར་བརྒྱད་པར་བླུགས། འགོམ་ཡུག་མ་སོང་བར་མཆན་གཡོན་བཅངས། མི་ལག་མི་འགྲིམ་དེས་སྡེ་བརྒྱད་ཐམས་ཅད་བསྒྲིབ། རང་ལུས་གནམ་ལྕགས་རྡོ་རྗེ་འདྲ་ཞེས་གསུངས།
༈ ཡ༷ང་དྲག༷་ལ༷ས་བྱེད་དུས་རང་སྲུང་རྫས། ཅུ་གང་མུ་ཟི་བཙན་དུག་གླ་རྩི་ཤུ་དག་ལྔས་རང་ལུས་བྱུགས། རྫས་དེ་ལྔའི་སྟེང་དུ། པུ་ཤུད་སྒྲོ་དང་། གླ་བའི་མཆེ་བ་བཅས་རྫས་སྣ་བདུན་པོ་ལུས་ལ་བཅང་དགོས་ཞེས་བཤད། ཡང་གཅིག་ཕག་རྒོད་ཀྱི་མཆེ་བས་ཀླུའི་
ཁ་རླངས་ཀྱི་དུག་སྲུང་། དེ་བཞིན་གཟུགས་མོ་བྱི་ཐུར་གྱིས་རེག་དུག །རྟེན་འབྲེལ་སྙིང་པོ་གསེར་གྱིས་བྲིས་པས་བསམ་པའི་དུག་གླ་བའི་མཆེ་བས་ཚོར་དུག །རྨ་བྱའི་མདོངས་ཀྱིས་མཐོང་དུག་སྲུང་བས་དེ་ལྔ་བསྡེབ་སྟེ་ལུས་ཀྱི་རྡུལ་དྲོད་དང་མ་བྲལ་བར་ཀླུའི་དུག་དང་གནོད་པ་ཐམས་
ཅད་སྲུང་ཞེས་གཏེར་མའི་མན་ངག་གོ། དེ་ལྟར་རྫས་རྒྱས་བསྡུས་སྣ་ཚོགས་སུ་བསྟན་པ་ཅི་འོས་ཅི་འབྱོར་དུ་བཅངས་པར་བྱའོ། ༈ །ཡང་རྡོ་རྗེ་གཙུག་ལག་གི་རྒྱུད་ལས་གསུངས་པ། ཀླུ་གཏད་སོགས་བྱེད་པའི་དུས་སུ། རང་ནཱ་ག་རཀྴ་བསྒོམ་ཀླུ་ཟིལ་ཀྱིས་མནན། ཨོཾ་
ཨཱཿཧཱུྃ་དང་ཁྲོཾ། ཨོཾ་ཨཱཿཧཱུྃ་ཏྲཾ་ཧྲཱི། རྟེན་སྙིང་རྣམས་བྲིས་པ་བཏགས། རྨ་བྱའི་མདོངས་ཀྱིས་ཀླུ་སྒྲིབ། བྲག་དམར་ཤར་བལྟས་ནས་ཚེས་བཞིར་འུག་པའི་སྒྲོ་བླང་བས་ཀླུ་བཙན་སྒྲིབ། ཚེས་བཞིར་ནུབ་ནས་འུག་པའི་དོང་རུ་གཡས་པ་དང་སྲིན་བྱའི་དོང་རུ་གཡོན་པ་དང་
སྒྲོ་བླང་བས་ཐེའུ་རང་སྒྲིབ་མེ་ལོང་གི་ངོས་ལ་ཡུག་སའི་མངལ་ཁྲག་གིས་ཁཾ་བཾ་བྲིས་པ་འཆང་བས་ལྷ་འདྲེས་ཁྲག་གི་རྒྱ་མཚོར་མཐོང་། གདུང་ཤ་རཱི་རཾ་གྱིས་སངས་རྒྱས་སུ་མཐོང་། བ་སོ་སོགས་ཀྱི་མཆོད་རྟེན་གྱིས་ཀྱང་དེ་དང་འདྲ། རུས་སྦལ་ཁོག་པས་ཀླུ་རུ་མཐོང་། །
13-7-10b


ཆུ་ཤིང་ཕུར་པ་སོར་བཞི་ལ།  ཨོཾ་ཕེ་ལཾ་ཧཱུྃ་བྲིས། བཅང་ན་ནཱ་ག་རཀྴར་མཐོང་། ཛ་དཔྲལ་ཏི་གུར་གུམ་མགྲིན་གླ་རྩི་སྙིང་གར་གསུམ་དཔྲལ་བ་ལྐོག་མ་སྙིང་གར་བྱུག །གསེར་གྱིས་བྷྲཱུྃ་ཀྲྃ་ཁྲྃ་མུྃ་བྲིས་པ་བཏགས། བཙན་དུག་ཁ་སེང་ལྡེང་རྡི་ར་དང་ར་དུག་དང་རེ་ལྕག་བཞི། རྟ་ཁྱི་ཕག་ནག་ཁྲག་དམེ་
ཁྲག །ཤ་དུག་ཤི་ཤ་ནལ་ཤར་སྦྱར་བ་དང་།  སྦལ་སྦྲུལ་སྡིག་པ་སྡོམ་གྱི་ཤ་ཉ་དང་མིའི་ཀླད་པ་གླ་རྩི་དང་སྦྱར་བ་ཕྱེ་མར་བྱ། ཚིལ་ཆེན་ཤིང་ཀུན་སྒོག་སྐྱ་མུ་ཟི་ཤུ་དག་ཨ་མྲྀ་ཏ་དེ་རྣམས་ཁྲམ་བརྡུང་དྲི་ཆུར་སྦྱར་ཏེ་བྱུགས་བདུག་བྱས་པས་
བདག་སྲུང་ཕྱི་རྗེས་བཅད། །དེས་སྟོང་གསུམ་འཇིག་རྟེན་ཀླུ་ཡི་གྲོང་། །དུས་གཅིག་བཅོམ་ཡང་ཉེས་པ་མེད། །ཡ་བག་ཤ་ཡི་ལས་ཡིན་གསང་། ཞེས་གསུངས། ཐུག་ཕྲད་སྲུང་རྫས་རང་གི་དྲི་ཆེན་དྲི་ཆུ་གཉིས་ཨོཾ་ཨཱཿཧཱུྃ་གིས་བདུད་རྩིར་བརླབ་ལ་རོལ། སྤྱི་
གཙུག་ལྟེ་བ་སྣ་སྒོ་སྲུང་བས་ཐུབ་བོ། ༈ གཞན་ཡང་མཚོ་གསུམ་སྦྱོར་བ་ནི། དུག་མཚོར་དུག་རེ་ལྕག་ཤོག་ཤིང་བཙན་དུག་གུ་གུལ་ནག་པོ་ཏིལ་ནག །ཀྱི་ལྕེ་ནག་པོ་མུ་ཟི་ཤུ་དག་ཙན་དན་མར་ཁུའོ། །ཁྲག་མཚོ་དམེ་ཁྲག་གཙོད་ཁྲག་ཕག་པ་ར་རོག་ཁྲག་
སྨན་མཚོ། །ཨ་མྲྀ་ཏ་བཟང་དྲུག་དྲི་ཆེན་དྲི་ཆུ་གླ་རྩི་ཤིང་ཀུན་ནོ། །མེད་དུ་མི་རུང་རྫས་ནི། ཡུགས་ས་མི་དང་མ་འཕྲད་པའི་མངལ་ཁྲག །བུད་མེད་ལ་མ་ཤོར་བའི་ཁྱོ་ཕོའི་ཐིག་ལེའོ། །རྫས་རྣམས་ཁྲམ་ཁྲུམ་བརྡུང་བ་ཁྲག་སྣ་དང་རང་དང་བླ་མ་བཟང་པོའི་དྲི་ཆུར་སྦྱར་བ། 
མཛོ་རུར་ཞག་འགའ་མནན། ཡི་དམ་སྔགས་ཀྱིས་བཏབ་ལ་སྒྲུབ། དེས་རང་གི་གནས་ལྔར་ཐིག་ལེ་བྱ། མེར་བསྲེག་དུ་བ་བདུག །གལ་ཆེ་ན་རིལ་བུ་ཤིག་ཙམ་ལྟོར་སྟོང་ཁོང་དུ་བཏང་། གཉན་སར་འགྲོ་དུས། དུག་ཆུ་དྲི་ཆུ་ཆང་གིས་སྦང་བ་རང་ལ་བསྐུས་པས་ཀླུ་
13-7-11a


ལ་རྒྱས་འདེབ་པ་དང་ཕྱི་ལམ་བཅད་པ་སྟེ། རྫས་དེ་མི་འགོད་མི་ལག་མི་འགྲིམ་པར་བྱའོ། ༈ ཡང་སྲུང་རྫས། རྒྱ་མཚོའི་དབུ་བ་ཟི་ར་དཀར་ནག་རྒྱ་ཚ་སྒེ་གཤེར་ཀནྜ་ཀ་རི་རྣམས་ཀྱིས་ཀླུ་རྒྱལ་རིགས་ཐུབ། བཙན་དུག་རྒྱ་རུ་རྟ་ཚིལ་ཤ་རྭ་ཐོག་གིས་བསད་པ་རུས་
ཟངས་ལྕགས་རྣམས་ཀྱིས་རྗེ་རིགས་ཐུབ། སྤྲུ་འབྲུ་དོམ་གྱི་ཚིལ་དང་མཆེ་བ། བྱི་བ་དང་སྤྲེའུའི་མཆེ་བ་དང་སྡེར་མོ་གཙོད་རུ་ཁྱི་སྨྱོན་མཆེ་བ་གླ་རྩིས་དམངས་རིགས་ཐུབ། ཙན་དན་དཀར་དམར་ཤིང་ཀུན་མུ་ཟི་སེར་ནག་གླ་རྩི་ལྡོང་རོས་སེང་ལྡེང་རྟ་ཚིལ་རྣམས་ཀྱིས་
གདོལ་བ་ཐུབ། སྟག་གི་མཆེ་སྡེར། རྟོལ་གྱི་རྭ་རྩེ། གཡག་རྒོད་རྭ་རྩེ། མཛོ་མོའི་རྭ་རྩེ། རྒྱ་ཡི་རྭ་ཡིས་ཀླུ་བཙན་སྲུང་ངོ་། །སྤྱང་བྲུན་གུ་གུལ་ཤ་ཆེན་གླ་བ་ཕོའི་མཆེ་བ་ཕག་རྒོད་མཆེ་བ་དང་སྣ་དེས་ས་བདག་དང་རྒྱལ་པོ་ཐུབ་བོ། །ཁྱི་བྲུན་བྱ་རོག་གི་མཆུ། 
རེ་ལྕག་དང་། ར་ཐུག་ལུག་ཐུག་གི་རྭ་གཞོབ་ཚིལ་ཆེན་རྣམས་ཀྱིས་བདུད་ཐུབ།  དྲི་ཆེན་འཕྱི་བའི་མཆེ་བ། གུ་གུལ་ནག་པོས་ཐེའུ་རང་ཐུབ། གསེར་ཐལ་ཆེན།  ཨ་མྲྀ་ཏས་བྲམ་ཟེའི་རིགས་ཐུབ། གཡུ། དུང་། དངུལ། བ་སོ། བྱེ་རུ། མུ་ཏིག་
རྣམས་ཀྱིས་གཉན་ཐུབ། དེ་རྣམས་སོ་སོར་ཚན་པ་ཚན་པ་ཐུམ་བུར་བྱས་ཏེ། ཐུམ་བུ་རྣམས་རུས་སྦལ་གྱི་ཁོག་པར་བཅུག་ལ་བཅང་བར་བྱ། དེས་རང་ལུས་རྡོ་རྗེའི་མཁར་དུ་འགྱུར་ཞིང་གདོན་བགེགས་ཐམས་ཅད་སྒྲིབ་པ་དང་སྲུང་བ་དང་བསྐྲད་པར་འགྱུར་ཏེ། འདི་ལ་ཐེ་
ཚོམ་བྱ་མི་དགོས་སོ་ཞེས་གསུངས་སོ། ༈ ཡང་ཀིང་ནག་ལས་ཚོགས་ན། རྫས་སྲུང་བསྡུས་པ། གདོན་སྤྱི་སྲུང་གུ་གུལ། གནམ་ལྷར་ཁྱི་ལུད། ཀླུ་རྒྱལ་རིགས་ལ་གླ་རྩི། རྗེ་རིགས་ལ་མུ་ཟི་སེར་པོ། གདོལ་པ་ལ་ཤུ་དག་ནག་པོ། བྲམ་ཟེ་ལ་རྭ་གཞོབ། 
13-7-11b


དམངས་རིགས་ལ་ཚིལ་ཆེན། ཐེའུ་རང་ལ་དྲི་ཆེན། ཡམ་ཤུད་ལ་དྲི་ཆུ། བསྙབ་པ་ལག་རིང་ལ་རྨ་བྱའི་མདོངས་རྣམས་ཏེ་རྫས་སྣ་བཅུའམ། རྒྱས་པར་བྱེད་ན་དེ་སྟེང་། བདུད་ལ་ཡུངས་ཀར། ཐེའུ་རང་ར་ཚིལ། བཙན་ལ་གཡེར་མ། མ་མོ་ལ་ཆ། ལྷ་ལ་མཁན་
རྩ། དམ་ཅན་ཐང་ཕྲོམ། གཤིན་རྗེར་རེ་ལྕག །ཡུལ་ལྷར་ཐར་ནུ། དམ་སྲིར་ར་དུག །དམེ་གྲིར་ཤི་སྐྲ། སྲིན་པོར་དབྱི་མོང་། རྒྱལ་པོར་སྤྱང་བྲུན། ས་སྲིན་ལ་སྦྲུ་བ། ཐེའུ་རང་ལ་དུད་པ། འགོང་པོ་ལ་ལན་ཚྭ། གཟའ་ལ་སྒོག་གཅིག །ས་བདག་
ལ་ཙོང་རྩའང་ཝོད་རྩ། བགེགས་ལ་སྐེ་ཚེ། རིམས་བདག་ལ་བྱ་རྒོད་སྤོས། འབྱུང་པོ་ལ་ཤང་ཚེ། ཕོ་འདྲེ་ཉ་མཁྲིས། སྲིན་མོ་ལ་ཛ་ཏི། ལྷོག་པ་ལ་ཤིང་ཀུན། སྨྱོ་བྱེད་ལ་གྱི་ལྕེ་རི་རྩེ་རི་ཝེ་ཟེར་དཔྱད། ཀླུ་རྒོད་ལ་ཕག་ཚིལ། བྲག་སྲིན་ལ་ཁྱི་ཚིལ། ཆང་འདྲེ་ལ་
སྲིན་བྱའི་ཤ ཞོ་འདྲེ་ལ་སྲེ་མོང་གི་ཤ  །མི་ཕུངས་སྤྲེའུའི་བྲུན། སྟེང་སྲིན་པོ་གཉའ་རིང་ལའང་ལྷ་རིགས་ལ་སྡོང་རོས་དང་སྲིན་བུ་ཀ་རི་ཀ །གཟའ་ལ་སྦུབ་ཁ་ཏེ་ལོའི་ཤ །ཤ་ཟར་བུ་རམ། མཁའ་འགྲོ་མ་ལ་སེང་ལྡེང་། དྲི་ཟ་ལ་སྦྲུལ་ཤ སྨྱོ་བྱེད་ལ་སྦལ་ཤ བྱིས་གདོན་ལ་རི་བོང་བྲུན། 
གྲིབ་གདོན་ལ་བྱི་ལའི་བྲུན། པར་པ་ཏ་འབྲོག་སྲིན་ཀྱང་ལ་ཕག་གི་བྲུན། ལྟོ་འཕྱེ་ལ་ཁྱི་བལ། ནམ་མཁའ་ལྡིང་ལ་ར་བལ་ཏེ་འདི་རྣམས་རྒྱས་བསྡུས་གང་རུང་ཤུ་དག་ནག་པོ་དང་རང་གི་དྲི་ཆེན་ལ་གཞི་བླང་ལ། སྐར་མ་རྒྱལ་གྱི་དུས་སུ་ཞིབ་བཏགས། 
དགེ་སློང་ཁྲིམས་གཙང་ངམ་སྔགས་པ་ནུས་ལྡན་གྱི་དྲི་ཆུས་རིལ་བུ་བྲ་རིལ་ཙམ་དུ་དྲིལ། སྣོད་གཙང་མར་བླུག །རང་གཤིན་རྗེ་གཤེད་ཡབ་ཡུམ་སྦྱོར་མཚམས་ནས་བདུད་རྩི་དང་འོད་ཀྱི་བྱིན་བསྡུ་བྱ། སྲུང་སྔགས་གང་འགྲུབ་དབྱངས་གསལ་རྟེན་
13-7-12a


སྙིང་གིས་རབ་གནས་བྱས་ལ། ལུས་ལ་འཆང་བའམ།  ཞོག་སྔར་ལྟོར་བཏང་བའམ། དུས་གཉན་དུས་སུ་བདུག་པའམ་སྒོ་དགུར་བྱུགས་པ་སོགས་ཀྱིས་ནད་གདོན་བར་ཆད་ཐམས་ཅད་སྲུང་བ་དམ་པར་འགྱུར་རོ། །ཞེས་པ་འདི་ལས་ཐམས་ཅད་
པའི་རྒྱུད་ལས་གསུངས་པའི་རྫས་དང་ཆ་འདྲ་བས་དེར་བལྟ་བར་བྱའོ། ། ༈ ཡ༷ང་རང་སྲུང་གི་རྫས་ཚེ་བདག་གི་སྐོར་ལས་གསུང་བ། རིང་སྲེལ་གདུང་རུས་བྱིན་རླབས་བཀའ་བབ་རྣམས་དང་། སྟག་མཆེ། དུག་སྣ། ནག་པོའི་རིགས་ཀྱི་ཁྲ༷ག །
གཅིག་ཐུབ། སྤྲུ་ནག་རིན་ཆེན་ལྔ། འབྲུ་སྣ་ལྔ། བཟང་དྲུག་གླ་ནག་རྩི། གནམ་ས་འདུས་པའི་མཁྲིས་པ། ཤ་ཟན་རྣམས་ཀྱི་ཤ ཁྲག་འཐུང་ཆུ་གནས་ཀྱི་ཁྲག །མེ་ཏོག །ཞོ་ཤ །རྟ་བོང་། འགོང་པོའི་བླ་རྡོ་སྣ་ཚོགས་བཏུལ་བ། །
གྲི་རྐང་ངམ་གཡག་གླང་རྭ་ནང་བླུག །ལོ་བརྒྱད་ཆུའམ་ཆང་བསྲེས་ཟླ་གཅིག་དྲག་སྔགས་ཀྱིས་བསྔགས་ན་ནད་གདོན་སོགས་གནོད་པ་ཀུན་ཐུབ་ཀྱི་རྫས་གཅིག་ཆོག་ཏུ་བཤད། གཞན་ཡང་དེ་འདྲ་སྡེ་བརྒྱད་སོ་སོའི་སྲུང་རྫས་དང་གནད་དབབ་ཀྱི་རྫས་དང་།
ཐུན་མོང་སྤྱིར་རང་སྲུང་གི་རྫས་སོགས་རྒྱས་བསྡུས་སྣ་ཚོགས་ཡོད་པ་ཤེས་པར་བྱའོ། ། ༈ སྨན་གྱི་བསྡུས་དོན་སྙིང་པོ་ལས། རྫས་ནག་པོ་དགུ་སྦྱོར་སྒྲུབ་པ་ལ། གི་ཝམ། འཇམ་དབྱངས། དེ་ལ་སྔགས ཨོཾ་བི་ཤནྟི་སྭཱ་ཧཱ། ཞེས་པ་
སྟོང་བཏབ།  དེ་བཞིན་ཨ་རུ་ར་སྨན་བླ། ཨོཾ་རུ་ཏྲི་སྭཱ་ཧཱ། བོང་ང་ནག་པོ་ཕྱག་རྡོར། ཨོཾ་ཏི་ཏ་གྷ་རུ་སྭཱ་ཧཱ། གླ་རྩི་རྟ་མགྲིན། ཨོཾ་གྷ་གྷྲི་རྣའང་རུ་སྭཱ་ཧཱ། གུ་གུལ་ནག་པོ་བདུད་རྩི་འཁྱིལ་བ། ཨོཾ་ཨ་རཾ་སྭཱ་ཧཱ། མུ་ཟི་ནག་པོ། དབང་ཕྱུག་ཆེན་པོ། 
13-7-12b


ཨོཾ་རཀྴ་སྭཱ་ཧཱ། ཤིང་ཀུན་གང་བ་ཡང་ན་མི་གཡོ་བ་བཟང་པོ། ཨ་པ་ཤཾ་སྭཱ་ཧཱ། ཤུ་དག་ནག་པོ་སྤྱན་རས་གཟིགས། ཨོཾ་གུ་རུ་སྭཱ་ཧཱ། རྒྱ་སྣག །ཡང་ན་ཚོགས་བདག་གླང་གདོང་ཚེ་བདག་ནག་པོ། ཨོཾ་ཏིང་ཏིང་སྭཱ་ཧཱ། སྨན་དགུ་སྣོད་དགུར་བཞག །སོ་སོའི་སྔགས་སྟོང་རེ་བཏབ། ཡང་
གྲུབ་ན་ལྷ་སོ་སོར་གསལ་ལ་སོ་སོའི་སྔགས་ཀྱང་བཏབ་པར་བྱ་སྟེ། འཇམ་དཔལ་དམར་སེར་རལ་གྲི་པོ་ཏི་ཅན། ཨོཾ་ཝཱ་གཱི་ཤྭཱ་རཱི་མཱུཾ། སྨན་ལྷ་སྔོན་པོ་ཨ་རུ་ལྷུང་བཟེད་འཛིན། ཏདྱ་ཐཱ། བྷེ་ཥ་ཛྱེ་སོགས། ཕྱག་རྡོར་
ལྗང་སྔོན་རྡོ་རྗེ་དྲིལ་བུ་འཛིན། ཨོཾ་བཛྲ་པཱ་ཎི་ཧཱུྃ། རྟ་མགྲིན་དམར་པོ་རྡོ་རྗེ་བེ་ཅོན་འཛིན།  ཨོཾ་བཛྲ་ཀྲོ་དྷ་ཧ་ཡ་གྲི་བ་ཧུ་ལུ་ཧུ་ལུ་ཧཱུྃ་ཕཊ། བདུད་རྩི་འཁྱིལ་བ་ལྗང་སྔོན་བུམ་པ་འཛིན། ཨོཾ་བཛྲ་ཨ་མྲྀ་ཏ་ཀུནྜ་ལི་ཧ་ན་ཧ་ན་ཧཱུྃ་ཕཊ། དབང་ཕྱུག་སྔོ་སྐྱ་རལ་གྲི་བུམ་པ་བསྣམས་
ཨོཾ་མ་ཧཱ་དེ་བ་ཧཱུྃ་ཕཊ། མི་གཡོ་སྔོན་པོ་དབྱུག་པ་ཞགས་པ་འཛིན། ཨོཾ་ཙནྡ་མ་ཧཱ་རོ་ཥ་ཎ་ཧཱུྃ་ཕཊ། ཡང་ན། གང་བཟང་དཀར་པོ་རལ་གྲི་རིན་ཆེན་བསྣམས། ཨོཾ་པུརྑ་བྷ་དྲྭ་སྭཱ་ཧཱ། སྤྱན་གཟིགས་དཀར་པོ་པདྨའི་ཕྲེང་བ་བསྣམས། ཨོཾ་མ་ཎི་པདྨེ་ཧཱུྃ། ཚེ་བདག་
ནག་པོ་འཁོར་ལོ་ཞགས་པ་བསྣམས། ཨོཾ་ཨཱ་ཀྲོ་ཏེ་ཀ་ཡ་མཱནྟ་ཀ་ཧཱུྃ་ཕཊ། ཡང་ན། ཚོགས་བདག་གླང་གདོང་དགྲ་སཏྭ་ལ་ཕུག་བསྣམས། ཨོཾ་ག་ག་ག་ཎ་པ་ཏི་ཡེ་སྭཱ་ཧཱ། ཞེས་སོ། །དེ་ནས་སྨན་ཐམས་ཅད་བསྲེ་འདུལ་བྱས་ལ་དྲག་སྔགས་རིང་པོ་བཏབ་ནག་པོའི་རྫས་
དགུ་རིལ་བུར་དྲིལ་ལ། ཨོཾ་ཏྲི་ཏྲི་འདུལ་སྭཱ་ཧཱ། སྤྱི་སྔགས་ཡིན་རིལ་བུ་ལ་སུམ་བརྒྱ་བཏབ། མུ་ཟི་དངུལ་ཆུ་ཕག་ཚིལ་ཞལ་ཤེས་སོ། །རྟེན་འབྲེལ་སྙིང་པོས་རབ་གནས་བྱ། །རིལ་བུའི་རྒྱབ་ལ་ཕག་ཚིལ་བྱུག །དངུལ་ཆུའི་གོས་བཀོན། རིལ་བུ་སྲན་མ་ཙམ་དྲིལ། 
13-7-13a


རྒྱ་ནད་བསྲེ་མོག་རིགས་ལ་རིལ་བུ་བདུན་རེ་བཏང་། ནད་ངན་རིགས་ལ་རིལ་བུ་རེ་རེ་བཏང་། རིལ་བུའི་ཁུ་བ་བྱིས་པ་ལོ་བརྒྱད་དྲི་ཆུས་བྱ། རིམས་ནད་འགོ་སྲུང་ལོ་ཐུབ་མ་ཞེས་བྱ། གཡོགས་དམར་པོའམ་སྔོན་པོ་བྱ། མཛེ་དང་ཤུ་བ་གཡན་པ་དང་།
གག་པ་ལྷོག་པ་རྨ་རེ་བ། རིམས་ནད་རྒྱུ་གཟེར་ཐམས་ཅད་འཇོམས་པར་ཐེ་ཚོམ་མེད། དགུ་ཡི་སྦྱོར་བ་རྫོགས་གྱུར་ན། གཅིག་ཏུ་ཀླུ་ཡི་གཉན་པོར་འགྱུར། གཉིས་ནི་ས་བདག་གཉན་པོར་འགྱུར། །གསུམ་ནི་གཉན་ནད་མ་ལུས་འཇོམས། །བཞི་རུ་ལྷོག་པ་དཀར་ནག་སེལ། །ལྔ་རུ་
འགོ་བའི་ནད་རྣམས་དང་། །བྱིས་པའི་གདོན་ཆེན་བཅོ་ལྔ་བཟློག །དྲུག་ཏུ་མཁྲིས་པ་རྩར་རྒྱུག་ཐུབ། །བདུན་དུ་བལ་ནད་མིག་སེར་ཐུབ། །བརྒྱད་དུ་རྒྱུ་གཟེར་གཉན་པོར་འགྱུར། །དགུ་རུ་འབྲུམ་པ་དཀར་ནག་འཇོམས། །འདི་འདྲའི་མན་ངག་གཞན་ན་མེད། །བཻ་རོ་ཙ་ན་བདག་
འདྲ་ཡིས། །དཀའ་བ་སྤྱད་ནས་ཀུན་ཏུ་བཙལ། །འཇམ་དཔལ་དབྱངས་ཀྱི་སྤྲུལ་པ་ཁྱོད། །ནམ་ཞིག་དགོངས་པར་གཤེགས་དུས་སུ། །སྙིང་དང་འདྲ་བ་གཅིག་ལ་སྤྲོད། །གཉིས་ལ་བསྟན་ན་བསྟན་པ་འཇིག །ཨི་ཐིཿ ཞེས་གསུང་། ༈ སྲིའུ་གསོ་བ་ཨོ་རྒྱན་
པདྨས་མཛད་པའི་རྫས་སྦྱོར་ནི། གཉན་པོ་བརྒྱད་སྦྱོར་ཞེས། རྒྱལ་པོའི་གཉན་པོ་གུ་གུལ་ནག་པོ། །དེ་བཞིན་དམ་སྲིའི་མ་ནུ་པ་ཏྲ། ཀླུའི་གླ་རྩི། ས་བདག་གི་མུ་ཟི། བཙན་གྱི་ཤུ་དག །དར་སྲི་དང་ཆུང་སྲིའི་ཤིང་ཀུན། འགོང་པོའི་རྩ་ཀླུ་བདུད་རྡོ་རྗེའམ་
དམ་མཁྲིས། གདོན་བགེགས་ཀུན་གྱི་གཉེན་པོ་ནུས་ལྡན་དྲི་ཆུ། དེ་རྣམས་སྦྱར་བའི་རིལ་བུ་ལ་ཡི་དམ་ཆོས་སྐྱོང་གི་སྔགས་བཏབ། བུ་མ་སྐྱེས་གོང་དུ་མལ་བྱིན། སྐྱེས་འཕྲལ་རྐན་མར་དང་། ནུ་ཞོའི་གོང་དུ་བུ་ལ་བྱིན། དེ་ནས་ཟླ་བའི་ཡར་ངོར་ལན་རེ་བྱ།  དེ་
13-7-13b


ནས་ཇེ་མང་རྒྱུན་བསྟེན་བྱ། དེས་འཚོ་བར་འགྱུར་ཞེས་པདྨ་གླིང་པའི་ལུགས་སོ། ། ༈ གནུབ༷ས་ཀྱི༷་གོང༷་ཁུག་སྲོ་མ་ཅན་ལས། མི་དང་ཁྱིའི་བྲུན་སྐམ། ཤ་ཆེན་སྒོག་སྐྱ། མུ་ཟི་སེར་ནག་གཉིས། སྤྲུ་ནག་མཁན་ནག་རྩ་བ་དང་། སྨན་ཆེན་རྭ་གཞོབ་
བརྒྱད། ཆ་མཉམ་ཞིབ་བཏགས་རིལ་བུ་ཤུག་འབྲུ་ཙམ། མིག་ཕུག་གྲིབ་བསྐམ་བྱ། ལུག་ནག་གི་བལ་སྐུད་ལ་བརྒྱུས། སྐེ་ཕུག་ཏུ་བཅང་ན་ནད་རིགས་སྡེ་བརྒྱད། བྱད་ཕུར་མཛེ་ཤུ་གཡན་པ་བལ་ལྡག །ཕོལ་མིག་གག་ལྷོག་ཤ་འགུལ་འཁྲིག་འཁྱུག་ཚ་གཡའ་
མི་མཐུན་འགོ་ནད་ཀུན་ཐུབ་བོ། །གང་སྐྲངས་སར་བྱུགས། ཕྱུགས་འོ་མ་མི་སྟེར་བ་དང་ཞོ་ཆང་ཉེས་པར་བྱུགས་བདུག་གིས་སྲུང་། གཏད་སོགས་བྱེད་དུས་འདི་གལ་ཆེ། རྭ་གཞོབ་བརྒྱད་ནི། རྟ་བོན། རའི་རྭ། གླང་རྭ། མཛོ་ཕོའི་རྭ། འབྲི་རྭ། རྒྱ་རུ། གཙོད་
རུ། ཤ་བའི་རྭ་རྣམས་ཆ་མཉམ་མེ་ལ་ནུས་ལྡན་བསྲེགས་པའོ། །གུ་གུལ་མུ་ཟི་ཤིང་ཀུན་གླ་རྩི་རྟ་བོན་ཁྱི་བྲུན་བཙན་དུག་ཤུ་དག་སྦྱར། ཨོཾ་ཨཱ་ཀྲོ་ཏ་བཛྲ་ཧཱུྃ་ཧཱུྃ་ཕཊཿ དེས་བཏབ་ནས་བྱུགས་བདུག་བྱས་པས་གདོན་བགེགས་གཉན་རིམས་བར་ཆད་ཀུན་བཟློག་ཅིང་རྨི་
ལམ་ངན་པ་སོགས་མི་མཐུན་ཕྱོགས་ཀུན་ཐུབ་ཅེས་གསུངས་འདི་ཐམས་ཅད་གཅིག་བྱས། གནུབས་ཀྱི་རྫས་རྒོད་ཟབ་མོ་འདི་ཁོ་ནའོ། །དེ་ལྟར་རང་སྲུང་རྫས་ཀྱི་ཚོགས། ཤིན་ཏུ་ཟབ་པའི་མན་ངག་སྟེ། འདི་ན་གསལ་བོར་བཀོད་པ་ཡིས། འགྲོ་ལ་ཕན་པ་འབྱུང་
གྱུར་ཅིག །གྲོང་སྔགས་པ་སོགས་མངོན་སྤྱོད་བྱེད་པ་རྣམས་ལ་རིན་ཆེན་གསེར་གྱི་བང་མཛོད་ལས་ཀྱང་དགའ་བའི་རྫས་སྲུང་གི་རིམ་པ་ཅི་རིགས་པ་མི་ཕམ་པས་ཕྱོགས་གཅིག་གསལ་པོར་སྤེལ་བ་དགེ་ལེགས་འཕེལ། སྣོད་མིན་ལ་གསང་རྒྱཿ ཨི་ཐིཿ མངྒ་ལཾ། ཤུབྷཾ་
13-7-14a


རྫས་རྒོད་བཞུགས་སོ། །ན་མོ་གུ་རུ་བཛྲ་གྲོ་བོ་ལོད་ཡེ། །རྒྱལ་བ་ཀུན་གྱི་མཐུ་སྟོབས་རང་གཟུགས་ནི། །དཔལ་ཆེན་གསང་བདག་གཏུམ་པོར་ཤར་བའི་མཚན། །གང་གིས་ཐོས་པ་ན་ཡང་ས་གསུམ་གྱི། །གདུག་ཅན་དབང་དུ་གྱུར་པ་ངོ་མཚར་གནས། །
རྟེན་འབྲེལ་བསླུ་བ་མེད་པའི་ཆོས་ཉིད་འདི། །སྲིད་པ་གསུམ་ན་སུས་ཀྱང་མི་འགོག་པས། །ཐབས་ཆེན་བདུག་པའི་རྡོ་རྗེའི་མེ་རླུང་འདིས། །འབྱུང་པོའི་ཚོགས་ཀུན་སྤུར་མ་བཞིན་ཏུ་འབྱེར། །འཁོན་མེད་གྱུར་ཀྱང་རང་བཞིན་གཙེ་བ་ཡི། །ངང་ཚུལ་སྦྲུལ་གདུག་ཁྲོ་
བའི་རྗེས་འགྲོ་བ། །སྣང་སེམས་ལོག་པར་རྟོག་པའི་གདོན་གྱི་རིགས། །སྦྱོར་འདི་རྩོམ་པས་ད་ནི་བག་ཡོད་མཛོད། དེའང་རྫས་ཀྱི་རིམ་པ་ནི། །ཨ་རུ་ནག་པོ་ཞོ་བཞི་ལ།  །རུ་རྟ་ཞོ་གང་སྨན་ཆེན་བཞི། །ཤུ་དག་ནག་པོ་སྐར་མ་བདུན། །གླ་རྩི་སྐར་མ་བཞི་རུ་སྦྱར། །ག་
བུར་བཟང་དྲུག་སྐར་དོ་རེ། །བྱ་ཀྲི་སྤང་སྤོས་ཤིང་ཀུན་དང་། །སྐེ་ཚེ་ཤང་ཚེ་ཡུངས་དཀར་དང་། །སྤྲུ་ནག་ཐང་ཕྲོམ་བྱ་རྒོད་སྤོས། །བ་བླ་ལྡོང་རོས་བྲག་ཞུན་དང་། །མུ་ཟི་སེར་ནག་བཅས་པ་རྣམས། །སྔ་མ་བཅུ་གཉིས་སྐར་མ་གསུམ། །ཕྱི་མ་གཉིས་ཀྱི་དང་པོ་ནི། །ཞོ་
གང་ཕྱི་མ་སྐར་བཞིའོ། །གཞན་ཡང་ས་རྡོ་སྔོ་སྨན་གྱི། །དྲི་ངད་ཆེ་བ་དྲི་ཐོན་རེ། །གུ་གུལ་ནག་པོ་སྲང་ཕྱེད་དོ། །བསེ་སྦུར་པུ་ཤུད་ཏེ་ལོ་དང་། །སྦལ་སྦྲུལ་རྨིགས་པ་ལྕོང་མོ་དང་། །སྟག་གཟིག་ཁྲ་དང་རྐྱང་དང་ནི། །འཕྱི་བ་ཟེར་མོའི་ཤ་ཐུན་རེ། །གླང་ནག་རྭ་དང་གསེབ་སྔོ་ནག་གི་རྟ་
བོན་དང་། །རྟ་རྨིག་ཟེ་ཚ་ཐུན་གཉིས་རེ། །རྨ་བྱའི་སྒྲོ་དང་སྦྲུལ་ལྤགས་དང་། །ལྕགས་ཟངས་ཕྱེ་ནི་ཐུན་དོ་རེ། །བྱི་ལ་བྱ་རོག་ཝ་སྦྲེ་སྤྱང་། །ཁྱི་དང་ར་ཐུག་བྱ་རྒོད་དང་། །རྟ་ལུག་བཅས་ཀྱི་བྲུན་ཐུན་རེ། །འུག་པའི་ཤ་དང་གཞན་ཡང་ནི། །ཤ་ཁྲག་སྤུ་སེན་པགས་
13-7-14b


མཁྲིས་ལུད། སེན༤་སྒྲོ་༢ དང་བཅས་རྫས་ཚང་ཙམ། །གཞན་ཡང་ནས་འདྲ་ཐར་ནུར་ལྕགས། དེ་མི་རི་དྭགས་སོགས། འབྲུ་སྣ་དུག་སྣ་དང། །ཁྲག་སྣ་བཅས་པ་རྩེ་ཚང་ཏེ། །གྲུབ་པའི་དྲི་ཆེན་ཞོ་གང་དང་། །མི་བསྐྱོད་པ་ལ་རིལ་བུ་བྱ། །ཆེ་ཆུང་རམ་བུའི་འབྲས་བུ་ཙམ། །ཤིན་ཏུ་ཞིབ་ཅིང་འཐེམ་པར་བྱ། །དེ་ལ་
སྔགས་ཀྱིས་དབང་བསྐུར་ན། །ལྕགས་ལ་ངར་གྱིས་བརྒྱན་པ་འདྲ། །དེ་ཡང་རིལ་བུ་མདུན་དུ་བཤམས། ༈ སྐད་ཅིག་རིག་པ་མ་བཅོས་གཞི་ཀ་དག །རྩལ་སྣང་མ་འགགས་དྭངས་ཤེལ་འཇའ་ཚོན་བཞིན། །ཡེ་ཤེས་རང་སྣང་
རོལ་བ་དངོས་མེད་ལྷ། །རྡོ་རྗེ་གྲོ་ལོད་དམར་སྨུག་རྔམས་སྟབས་ཁྲོས། །དབང་དྲག་གཉིས་འཛོམས་སྟོབས་ལྡན་དཔའ་བོའི་ཆས། །མདོ་སྔགས་ཟུང་འཇུག་བརྡའ་སྟོན་ན་བཟའ་གསོལ། །ཕྱག་གཡས་གསེར་གྱི་རྡོ་རྗེ་རྩེ་ལྔ་བསྣམས། །བདུད་བགེགས་ཡུལ་རྣམས་ཤིག་ཤིག་
ཡམ་ཡམ་འདར། །གཡུལ་ངོའི་མཚོན་ཆ་ཆག་འཐོར་དཔའ་སྟོབས་ཞུམ། །ཞབས་གཉིས་རྒྱ་ལྷྭམ་སྟག་ཆེན་ངར་མའི་སྟེང་། །མགོ་དང་འཕོངས་སྟེང་མནན་ཚུལ་རེག་ཐུག་མེད། །སྡེ་བརྒྱད་ཕོ་ཉ་བྲན་དུ་ཁོལ་བའི་རྟགས། །གོམ་སྟབས་གསུམ་གྱིས་ས་གསུམ་གནོན་པར་
མཛད། །ཕྱག་གཡོན་གནམ་ལྕགས་སྡིག་པ་ཁྲུ་གང་བ། །མགོ་དགུ་མིག་རྣམས་ཁྲག་ཆེམ་རྭ་རྣམས་གཟེངས། །རྒྱལ་འགོང་བགེགས་ཀྱི་བླ་རྟེན་དེར་འདུས་ཐིམ། །འདྲེ་འཇིགས་གུ་གུལ་དུད་པའི་དྲི་འཐུལ་ཞིང་། །དེ་ལས་སྤྲུལ་པ་སྐར་མདའ་ཆད་པ་ལྟར། །དུང་
སྡིག་དཀར་པོ་གསེར་སྡིག་སེར་པོ་དང་། །ཟངས་སྡིག་དམར་པོ་གཡུ་སྡིག་ལྗང་གུ་རྣམས། །ཐོལ་ཐོལ་བྱ་འཕུར་བཞིན་དུ་ཐོགས་པ་མེད། །རྒྱལ་འགོང་བགེགས་ཀྱི་སྙིང་ལ་ཐུལ་གྱིས་ཟུགས། །སྙིང་ཁྲག་འཐུང་ཞིང་རྣམ་ཤེས་བདེ་ཆེན་སྤོར། །གང་དེ་སྲིན་པོའི་རྒྱལ་པོའི་སྐུ་རུ་
13-7-15a


གྱུར། །སྟོབས་དང་ནུས་པ་གཟི་བརྗིད་མེ་ལྟར་འབར། །འགལ་རྐྱེན་འཇིགས་བརྒྱད་ཤིང་ཚེར་བསྲེག་པ་འདྲ། །ཡེ་ནས་དམ་ཚིག་ཡེ་ཤེས་དབྱེར་མེད་པའི། །ཐུགས་ཀར་ཉི་མའི་གདན་ལ་ཡི་གེ་ཧཱུྃ། །འབར་བའི་སྔགས་ཀྱིས་བསྐོར་བའི་འོད་ཟེར་ནི། །
བསྐལ་པའི་མེ་ལྟར་གཟི་བྱིན་བདེ་དྲོད་ཀྱིས། །སྣོད་བཅུད་རབ་འབྱམས་ཤིག་ཤིག་ཡམ་ཡམ་འུར། །ཐམས་ཅད་རྡོ་རྗེ་ཁྲོ་བོའི་སྐུ་རུ་གྱུར། །ཨོཾ་ཨཱཿ་ཧཱུྃ་བཛྲ་གུ་རུ་རྡོ་རྗེ་གྲོ་བོ་ལོད། །ལོ་ཀ་སརྦ་སིདྡྷི་ཧཱུྃ། ཞེས་བརྒྱ་ཚར་བཟླས། མདུན་བསྐྱེད་ནི། །སྐད་ཅིག་རིག་པ༴ །རྩལ་སྣང་༴
རིལ་བུའི་སྣོད་མཆོག་དྲག་པོའི་གཞལ་ཡས་ཁང་། །དེ་དབུས་རིལ་བུ་རྣམས་ནི་སྐད་ཅིག་གི། ཡེ་ཤེས་རང་སྣང་རོལ་བ་སོགས་ནས་བསྲེག་པ་འདྲ། ཞེས་པའི་བར། མདུན་གྱི་གནས་གསུམ་ཡི་གེ་གསུམ་གྱིས་མཚན། །བདག་གི་ཐུགས་ཀའི་འོད་ཀྱིས་མདུན་བསྐྱེད་བསྐུལ། །དེ་
ལས་སྤྲོས་འོད་ནམ་མཁའི་མཐར་ཁྱབ་འཕྲོས། །ཕྱོགས་བཅུའི་རྒྱལ་བ་རབ་འབྱམས་རྒྱུད་བསྐུལ་ཏེ། །ཐམས་ཅད་ཤོག་སྐྱ་རླུང་གིས་བདས་པ་ལྟར། །རང་རང་གནས་ནས་སྤྱན་འདྲེན་དབྱེར་མེད་ཐིམ། །དད་པ་དྲག་པོས་ཐུགས་དམ་འདི་ལྟར་བསྐུལ། །ཧཱུཾ་ཧཱུཾ་ཧཱུཾ། ཆོས་
དབྱིངས་རྣམ་པར་དག་པའི་དཀྱིལ་འཁོར་ནས། །ཞི་དང་ཁྲོ་གར་སྒྱུ་འཕྲུལ་དྲྭ་བའི་ལྷ། །བླ་མ་ཡི་དམ་མཁའ་འགྲོ་ཆོས་སྐྱོང་སོགས། །དབང་བསྐུར་བྱིན་གྱིས་བརླབ་ཕྱིར་གཤེགས་སུ་གསོལ། །ལྷོ་ནུབ་པདྨ་འོད་ཀྱི་གཞལ་ཡས་ནས། །སྐུ་གསུམ་དབྱེར་མེད་དཀྱིལ་
འཁོར་ཀུན་གྱི་གཙོ། །རིག་འཛིན་རྡོ་རྗེ་གྲོ་ལོད་ལྷ་ཚོགས་རྣམས། །དབང་བསྐུར༴ །སྣང་སྟོང་༴ །གྲགས་སྟོང་༴ །རིག་སྟོང་༴ །དཔའ་བོ༴ །དཔའ་མོ༴ །མེ་ཏོག༴ །རོལ་མོ༴ །མངོན་སུམ༴ །བཀྲ་ཤིས༴ །དམ་རྫས༴ །འདིར༴ །བདེ་སྟོང༴ །བསྟན་འགྲོའི༴
13-7-15b


འདྲེ་བགེགས་མི༴ །ཞི་དུལ་འཕགས༴ །སྐུ་གསུམ་རྒྱལ་བའི༴ །འཇིགས་བརྒྱད་སྡུག་བསྔལ་ཞི༴ །དུས་ངན་སྙིགས་མ་ལྔ་བདོའི་དུས་འདི་རུ། །རྣམ་རྟོག་རང་མདངས་འབྱུང་གདོན་རླུང་ལྟར་འཚུབས། །རང་བཞིན་གདུག་པའི་ངང་ཚུལ་སྦྲུལ་ལྟར་གཡོ། །རྣམ་ཤེས་རྒྱུ་
བའི་རྩ་གནས་ཀུན་དུ་ཞུགས། །བརྒྱལ་སྨྱོ་ཡིད་དཀྲུགས་སྡུལ་བསྔལ་སྣ་ཚོགས་གཏོང་། །མི་བཟོད་མྱ་ངན་འཚུབ་པའི་དུས་འདི་རུ། །ཐུགས་རྗེ་ལྷག་པར་མྱུར་བའི་ཨོ་རྒྱན་རྗེ། །སངས་རྒྱས་ཀུན་འདུས་བླ་མ་ཁྱེད་དྲན་ནས། །དད་མོས་དྲག་པོས་ཐུགས་དམ་
གནད་བསྐུལ་ན། །ཐུགས་བསྐྱེད་དམ་བཅའ་དགོངས་ལ་སྐད་ཅིག་གིས། །གནས་འདིར་བྱོན་ལ་བྱིན་རླབས་དབང་མཆོག་བསྐུར། །ཆོས་ཀུན་རང་བཞིན་མ་གྲུབ་སྟོང་པའི་གདངས། །ཇི་སྙེད་རོལ་པ་ཡེ་ཤེས་རྒྱན་གྱུར་ཀྱང་། །མ་རྟོགས་ལོག་པར་འཕྱན་པའི་འགྲོ་
བ་ལ། །འཚེ་བའི་གདོན་རིགས་བརླག་པའི་རྫས་མཆོག་འདི། །རྟེན་འབྲེལ་བསླུ་བ་མེད་པའི་ཆོས་ཉིད་ཏེ། །ཕན་པའི་སེམས་ཀྱིས་འདི་ཉིད་བསྒྲུབས་པ་ལ། །རང་བཞིན་གདོད་ནས་དག་པའི་མགོན་ཁྱོད་ཀྱིས། །ཐུགས་གསུང་སྐུ་ཡི་བྱིན་ཆེན་ད་ལྟར་ཕོབ། །མཐོང་
ཐོས་དྲན་རེག་ཚོར་བའི་འགྲོ་བ་ཀུན། །མྱོང་བ་རྩུབ་པའི་གཉིད་ལས་སད་པ་བཞིན། །འཁྲུལ་སྣང་འབྱུང་པོའི་གདོན་ལས་གྲོལ་བར་མཛོད། །ཆོས་ཀུན་ཡེ་རྫོགས་སྙིང་པོ་བྱང་ཆུབ་སེམས། །འགྱུར་མེད་ཐིག་ལེ་ཆེན་པོ་ཁྱོད་ཀྱི་ཐུགས། །རང་བཞིན་རྣམ་
པར་གྲོལ་བ་རྟེན་འབྲེལ་འདིས། །ཡེ་ཤེས་དྲི་མེད་མིག་གཅིག་གིས་མཐོང་ཤོག །རྡོ་རྗེ་གྲོ་ལོད་དང་། ཐོད་ཕྲེང་རྩལ་སོགས་ཡི་དམ་གང་ཤེས་དང་གདོན་རང་རང་གི་གཉེན་པོའི་ལྷའི་སྔགས་བཟླས་པས་བྱིན་ཕེབས་རྟགས་མ་བྱུང་བར་བཟླའོ། །མཐར་ལྷ་འོད་ཞུ་རིལ་བུ་
13-7-16a


ལ་ཐིམ་པས། གང་གི་དྲི་ཚོར་བས་ཀྱང་། འཁྲུལ་སྣང་འབྱུང་གདོན་ཐམས་ཅད། རང་བཞིན་གྱི་གྲོལ་བའི་བྱིན་རླབས་ཕུན་སུམ་ཚོགས་པ་རིལ་བུའི་རྣམ་པར་བསམ། རྟགས་ནི་ལུས་དང་རིལ་བུ་ལས་མེ་འབར་བ་ལ་སོགས་དང་། དངོས་པོ་བཤིག་པ། 
བསྐལ་པའི་མེ་རླུང་འབར་བ། སོགས། འགྲུབ་པའི་རྟག་ཇི་རིགས་རྫོགས་ནས། ཡེ་དྷར་བཟླས་མེ་ཏོག་འཐོར། བཀྲ་ཤིས་བརྗོད་དེ་ལས་ལ་སྦྱར་བ་ནི། གང་དག་གདོན་གྱིས་ཟིན་པའི་ལུས་ལ་བདུག་ན། རྒྱལ་ཀླུ་གཟའ་བསེན་མོ་ལ་སོགས་གདོན་གྱི་རིགས་སུ་གྱུར་པ་ཐམས་ཅད་
སྦུར་མ་རླུང་གིས་བདས་པ་ལྟར་དེ་མ་ཐག་ཏུ་འབྱེར་ཞིང་། བཟའ་བྱུག་ཁྲུས་སུ་བྱས་པས་ཀྱང་། རིམས་ཡམས་འཚེ་བ་ཐམས་ཅད་ལས་རྒྱལ་བ་དང་འཆང་བས་ཀྱང་དེ་འདྲའོ། །འདི་གལ་ཆེ་བ་མ་གཏོགས་སུ་ཐོད་ཐོན་ལ་སྦྱིན་པར་མི་བྱ་སྟེ། ཡན་ལག་བརྒྱད་པ་ལས། 
ཤ་ཟ་མ་གཏོགས་ཐམས་ཅད་ལ། །མི་མཐུན་སྦྱིན་པར་མི་བྱ་སྟེ། །མཐུ་སྟོབས་ཆེ་བ་དེ་འཁྲོས་ནས། །ནད་པ་སྨན་པ་བཅས་གནོད་བྱེད། །ཅེས་གསུངས་པ་ལྟར་ཡིན་པས་རང་ཉིད་ཀྱིས་ཀྱང་ཟོན་འཚལ། །ཇི་ལྟར་བསྐལ་རླུང་དྲག་པོས་སྦུར་མ་ལྟར། །གདོན་དེ་བསྐྲོད་
པས་སོ། །འདིའི་དཔེའང་བཀའ་རྒྱ་དམ་པར་བྱའོ། །འདིའི་ཡོན་ཏན་ནི་ལག་ཏུ་བླངས་པས་ཤེས་སོ། །འདི་ཇི་ལྟར་བྱུང་ན་ངོ་བོ་ནི་རྒྱུད་ལ་ཡོད་ཀྱང་། རྣམ་པའི་ལག་ལེན་གསལ་བ་ནི་རང་གི་རིག་པ་དྲི་མེད་ལ། སྨན་བླ་དྲང་སྲོང་བརྒྱུད་པར་བཅས་པའི་བྱིན་རླབས་འཕོས་
པར་ངེས་པའོ། །དེ་ཡང་འདི་ལྟ་བུ་བྱིན་རླབས་ཁུངས་ནི་རྫོགས་སྤྲུལ་རིན་པོ་ཆེའི་དག་སྣང་། གཏེར་སྟོན་མཆོག་གྱུར་གླིང་པ་བཅས་ཀྱི་གཞུང་ལས་བསྒྲིགས་ཏེ། འདི་ལྟར་གོ་རིམ་རྫས་སྔགས་བཅས་འབྲེལ་དུ་བསྒྲིགས་པ་ནི། ངེས་པར་གཏེར་སར་ཞིག་དང་བྱིན་རླབས་
13-7-16b


མཉམ་པའོ། །འདི་ལྟར་གློ་བུར་ཤར་བསྒྲིགས་པའི་རིང་ལ་ཉམས་རྩུབ་པར་གྱུར་པ་སོགས་དང་། ཇི་ལྟར་ཤར་བའི་ཚུལ་གྱི་ཉམས་ནི་བརྗོད་པར་མ་བྱས་སོ། །ས་སྦྲུལ་ཟླ་༡ཚེས་༢༦ལ་མ་ཏིས་བྲིས་པ་མངྒ་ལཾ།   དྲེགས་པ་རྒྱུ་ཐེབས་ཀྱི་གནད་བྱང་ཟབ་མོ་དུས་ཀྱི་མེ་ལོང་རབ་གསལ་
བཞུགས་སོ། །ན་མོ་གུ་རུ་པདྨ་མཉྫུ་ཤྲཱི་ཡེ། འདིར་ཆོས་སྐྱོང་དང་དྲེགས་པ་སོ་སོའི་རྒྱུ་དུས་དང་ཐེབས་བཟློག་གི་གནད་ཤེས་ན། མཆོད་སྒྲུབ་རྦད་པ་སོགས་ཀྱི་ལས་ལ་རྣོ་མྱུར་ཁྱད་དུ་ཐོན་པས་ན་དེ་ཅི་རིགས་སུ་འབྲི་བ་ལ། འཇའ་ཚོན་མ་ནིང་ལས། དཔ༷ལ་
མགོ༷ན་རྒྱུ་དུས་གསུངས་པ་ནི། ལོ་གང་ཡིན་གྱི་དཔྱིད་ཟླ་ར་བའི་ཚེས་བཅུ་ལ་རྒྱུ། ཟླ་བ་གང་ཡང་རུང་བའི། ཡར་ངོའི་བརྒྱད་དང་བཅུ་བཞི། མར་ངོའི་ཉེར་གཉིས་ཉེར་དགུ་ལ་རྒྱུའོ། །ཞིབ༷་ཏུ༷་ན༷། བརྒྱད་ཀྱི་སྲོད་འཁོར་ཉེར་གཉིས་ཉི་རྒས་ལ་དཔལ་མགོན་འཁོར་
བཅས་ཤར་ནས་ནུབ་ཏུ་རྒྱུ། ཉེར་བཞི་ཉེར་ལྔའི་ཐོ་རངས་དང་། །བཅུ་ཡི་སྲོད་འཁོར་ལྷོ་ནས་བྱང་དུ་རྒྱུ། །དགུ་ཡི་ཐོ་རངས་བཅུ་གསུམ་ནམ་གུང་ལ། །ནུབ་ནས་ཤར་དུ་རྒྱུ་བར་བྱེད། །བཅུ་བཞིའི་སྐྱ་རེང་ལྔ་ཡི་ཐོ་རངས་ལ། །བྱང་ནས་ལྷོ་རུ་རྒྱུ་བ་སྟེ། །གནམ་
སྟོང་ཉིན་མོ་ལན་གསུམ་ཕྱོགས་བཅུར་གར་ཡང་ཐེབས། །རྒྱབ་བརྟེན་བྱས་ན་བསམ་པ་འགྲུབ། །དེ་བཞིན་ཞག་གི་དུས་ཀྱང་འདུག་གོ། འདི་དག་མགོན་པོ་སྤྱི་ལ་ཡང་སྦྱར་ཆོག་པར་མངོན་ནོ། །༈ སྤོ༷ས་དུད༷་ལ༷་བརྟེན་ནས་མགོན་པོ་སྒྲུབ་པ་ནི། ཤ་ཆེན་
ཚིལ་ཆེན། རྒྱ་ཤུག་ཙན་དན་དཀར་དམར། ཨ་ག་རུ། ཛ་ཏི་ཕལ། རྒྱ་སྤོས། སྤང་སྤོས། ཤིང་ཀུན། གླ་རྩི། ཨུཏྤལ་སྔོན་པོ་རྣམས་ཞིབ་སྦྱར་སྤོས་རེང་ངམ། སྤོས་རྒྱར་ཕྱེ་མ་བསྲེགས་ཏེ། དུས་བཞིར་མཆོད་ན། དཔལ་མགོན་
13-7-17a


འཁོར་བཅས་ཤ་ལ་ཤ་ཁྱི་འཁོར་བ་ལྟར་འགྱུར་རོ་གསུངས། ས་སྐྱའི་ཞལ་པོད་དུ་མེ་ཏོག་སྔོན་པོ་ཞེས་པ་བྱ་རྐང་གི་མེ་ཏོག་འདི་མཆོད་པར་ཕུལ་ན་མགོན་པོ་ཐུགས་ཁྲོས་པ་ཡང་ཞི་ཞིང་མཉེས་པར་གསུངས་གཞན་བླ་རྡོ་སོགས་སྒྲུབ་རྫས་དང་། རང་མཐུན་
གྱི་གཏོར་མ་མཆོད་རྫས་རྣམས་སོ་སོའི་གཞུང་ལས་ཤེས་པར་བྱའོ། ༈ མ་མོ་ཨེ་ཀ་ཛཱ་ཊི་རྒྱུ་བའི་དུས་ནི་ལོ་གཅིག་ལ་ཞག་ཉེར་བཞི་སྟེ། དེ་ཡང་བསད་པའི་དུས་བཞི་ནི། དགུན་རའི་ཚེས་བཅོ་ལྔའི་སྲོད་ལ་ཤར་ནས་ནུབ་ཏུ་རྒྱུ། དཔྱིད་རའི་ཚེས་
བཞིར་ནམ་ཕྱེད་ནུབ་ནས་བྱང་། དབྱར་རའི་བཅུ་བདུན་ས་རུབ་མཚམས་ལྷོ་ནས་བྱང་། སྟོན་རའི་ཚེས་དྲུག་གནམ་མཐའ་བཏེགས་དུས་བྱང་ནས་ལྷོར་རྒྱུ་དེ་རྣམས་ཀྱི་དུས་སུ་རྒྱུ་ཕྱོགས་དང་བསྟུན་ཏེ་བསད་ལས་བྱ་དུས་ལྷག་མ་ཉི་ཤུ་ནི། དགུན་རའི་སྟོང་གི་
ནམ་འཇིངས། འབྲིང་པོའི་བརྒྱད་ཀྱི་ཉི་ནུབ། ཉེར་གཉིས་རྡེའུ་ནག །ཐ་ཆུང་གི་བཅུ་ཡི་ཕྱེད་གུང་། ཉེར་ལྔའི་ཕྱེད་ཚད་རྣམས་དང་། དཔྱིད་ར་བའི་དགུ། འབྲིང་པོའི་བཅུ་དང་ཉེར་དགུ། ཐ་མའི་གསུམ་དང་ཉེར་བརྒྱད། དབྱར་ར་བའི་ཉེར་བདུན། འབྲིང་
པོའི་བཅུ་དང་ཉེར་གཅིག །ཐ་མའི་བཅུ་དྲུག་ཉེར་བདུན། སྟོན་ར་བའི་ཉེར་གསུམ། འབྲིང་པོའི་བཅུ་དགུ་ཉེར་གཅིག །ཐ་མའི་གཉིས་དང་ཉེར་བརྒྱད་རྣམས་ལ་རྒྱུ། འདི་རྣམས་ལས་སྟོན་གསུམ་གྱི་ཚེས་རྣམས་ལས། དྲུག་གི་ནམ་བཏེགས་པ། བཅུ་དགུའི་ཉི་མ་རྩེ་
ཤར། ཚེས་གཉིས་ཉིན་ཕྱེད་ནས་ཉི་མ་མ་ནུབ་བར་དུ་རྒྱུ་ལ། ལྷག་མ་བཅུ་བདུན་པོར་མཚན་མོར་རྒྱུའོ། །འདི་དུས་གཏོར་མ་སྦྱིན་པར་བྱའོ། །འདི་ནི་མ་མོ་ཡོངས་ཀྱི་གཙོ་མོ་ཡིན་པས། འདི་ཡི་རྒྱུ་དུས་ཀྱིས་མ་མོ་སྤྱི་ལ་ཡང་ཁྱབ། ལྷ་མོ་རེ་མ་ཏི་ནི། ནག་མོའི་སྔགས་
13-7-17b


རྒྱུད་ལས། རེ་མ་ཏི་སྟེ་དཔོན་གཡོག་གསུམ། །ཚེས་གཅིག་ལོ་གསར་གཉན་པ་ལ། །རྒྱུ་སྟེ་གཏོར་མ་སྦྱིན་པར་བྱ། །ཟླ་བ་གཅིག་ལ་རྒྱུ་བ་ནི། །ཉི་ཤུ་དགུ་སྟེ་གཏོར་མ་གཏོང་། །ཞག་གཅིག་དག་ལ་རྒྱུ་བ་ནི། །ནང་ནུབ་ཉིན་གུང་མཚན་གུང་གཉིས། །
གནད་ནས་བོར་ཞིང་ཕྲིན་ལས་བཅོལ། །ཞེས་དང་། མ་མོ་ཡང་ཏིག་བཀོལ་བའི་རྒྱུད་ལས། ཟླ་ཤི་ཉ་དང་ཚེས་བརྒྱད་དང་། །ཉི་ཤུ་གཉིས་དགུ་གནམ་སྟོང་བསྐང་། །ཞེས་དང་།  ལྷ་མོ་རེ་ཏིའི་བསྟོད་པ་རྒྱུད་ལས་གསུངས་པར། །ཟླ་བ་མར་ངོའི་ཚེས་དགུ་བཅུ་གཅིག་
ལ། །གང་གིས་མཆོད་པར་བྱེད་ལ་མཆོག་རྩོལ་ཞིང་། །ཞེས་གསུངས། ཞིབ་པར་སོ་སོའི་རྒྱུ་དུས་སོགས་མང་བས་འདི་ཙམ་ལག་ལེན་ཁེལ་ན་ལེགས། མ་མོ་མཁའ་འགྲོའི་སྤོས་ནི། ཨ་གར། དུ་རུ་ཀ ཙན་དན་དཀར་དམར། ཛ་ཏི། ཤ་ཁ་ར་རྣམས་
སྦྱར་བས་མཆོད། ཀློང་སྡེ་རྡོ་རྗེ་ཟམ་པ་ལས། མཁའ་འགྲོ་མ་དབབ་པའི་སྤོས་གསུངས་པ་ནི། ནལ་ཤ མི་ཀླད། བྱ་ཤ་ཟན་ཀླད་པ། བའམ་མཛོ་མོའི་སྤྲི། སྦྲང་རྩི། བུ་རམ། ཛ་ཏི། རྒྱ་ཤུག །རྟ་ཏང་ཀུན་ནམ་དཔྱད་མཁུན། མཛོའམ་དྲེའུའི་ཁྲག །ཤུག་ཚིལ་ལམ་
སྤོས་དཀར་སྦྱར། ཆང་ངམ་མར་ནག་ཏུ་སྤེལ་ལ་མོ་ཐོད་མཚན་ལྡན་དུ་བླུགས། སོལ་བའི་མེ་ལ་ཡེ་ཤེས་པ་དབབ་དུས་བསྲེགས། །ཞེས་པ་གསང་བའི་སྤོས་སྦྱོར་ཁྱད་པར་ཅན་ནོ། །དམ་ཅན་སྐྱེས་བུ་ཆེན་པོ་བསྙེན་སྒྲུབ་མ་བྱས་ཀྱང་འཁོར་བའི་
ཐབས་རྒྱུ་དུས་གང་ཡིན་ལ་མཆོད་གསོལ་བྱས་པས་འགྲུབ་པས་ན་རྒྱུ་དུས་བསྟན་པ། དེ་ཡང་རྒྱུ་དུས་བཅུ་བཞི་སྟེ། ཟླ་བ་གང་ཡང་རུང་བའི་ཚེས་གཅིག་གཟའ་དང་འགྲོགས་ཏེ་བར་སྣང་ལ་རྒྱུ་བས་རིན་པོ་ཆེས་མཆོད། ཚེས་བཞིར་བདུད་དང་འགྲོགས་ཏེ་ཤར་ནས་
13-7-18a


ནུབ་ཏུ་རྒྱུ་བས་ཤ་ཁྲག་གིས་མཆོད། ཚེས་བརྒྱད་ལ་ནུབ་བྱང་ནས་སྨན་མོ་དང་འགྲོགས་ཏེ་ཤར་ལྷོར་རྒྱུ་བས་འབྲང་རྒྱས་ཞལ་དཀར་དང་དཀར་གསུམ་མངར་གསུམ་གྱིས་མཆོད། བཅུ་གཉིས་ནམ་ཕྱེད་ལ་བདུད་དང་འགྲོགས་ཏེ་ལྷོ་ནས་བྱང་དུ་རྒྱུ་བས་
གསེར་སྐྱེམས་དང་རཀྟས་མཆོད། བཅོ་ལྔ་ཉི་མ་ཕྱེད་ནས་བྲག་སྲིན་དང་འགྲོགས་ཏེ་བྱང་ཤར་ནས་ལྷོ་ནུབ་ཏུ་རྒྱུ་བས་ཕུད་གཙང་མས་མཆོད། བཅོ་བརྒྱད་ནམ་ཕྱེད་ཡོལ་ནས་དམུ་བདུད་དང་འགྲོགས་ཏེ་ནུབ་ནས་ཤར་དུ་རྒྱུ་བས་གསེར་སྐྱེམས་དང་ཤ་ཁྲག་གིས་མཆོད།
ཉེར་གཉིས་ལ་གཤིན་རྗེ་དང་འགྲོགས་ཏེ་ཤར་ལྷོ་ནས་ནུབ་བྱང་དུ་རྒྱུ་བས། དགོངས་པ་ངར་བསྐྱེད་ཏིང་འཛིན་གསལ་ལ་ཤ་ཁྲག་གིས་མཆོད། ཉེར་ལྔའི་ཐོ་རེངས་ཀླུ་དང་འགྲོགས་ཏེ་བྱང་ནས་ལྷོ་རུ་རྒྱུ་བས་མངར་གསུམ་དང་སྨན་གྱིས་མཆོད། ཉེར་དགུའི་
ཉི་མ་མདུང་གང་ཙམ་ནས་བཙན་དང་འགྲོགས་ཏེ་ལྷོ་ནུབ་མཚམས་ནས་བྱང་ཤར་དུ་རྒྱུ་བས་ཕུད་དང་བརྔན་ཆས་མཆོད། བཤོས་བུ་སྨྱུག་རྒོད་ར་སྐྱེས་དར་ཟབ་པགས་བུས་མཆོད། གནམ་སྟོང་ལ་སྟེང་ནས་འོག་ཏུ་ཡེ་ཤེས་ཚངས་པའི་བུ་དང་འགྲོགས་ཏེ་རྒྱུ་
བས་སྤོས་དང་མེ་ཏོག་གསུར་གྱིས་མཆོད། ལྷ་ཕྱག་བྱ། སྡིག་པ་བཤགས། འདོད་པ་རྣམས་བསྐང་། བཅོལ་གཏམ་བྱ། ཁོའི་རྒྱུ་དུས་དེར་དྲག་ལས་བྱ། བྱེས་སུ་འགྲོ་བ་སོགས་ལ། ཁོ་གང་དུ་རྒྱུ་སར་བདག་ཀྱང་ཁ་གྱུ་སྟེ་རྒྱབ་བརྟེན་བྱ་ཞིང་གདོང་གཏུག་མི་
བྱ་ཞེས་གུ་རུ་རིན་པོ་ཆེས་གསུངས་སོ། །དམ་ཅན་ལ་ནི་ར་གསུར་གྱིས་མཆོད་པ་སྤོས་ཀྱི་མཆོག་གོ ༈ དྲང་སྲོང་ཁྱབ་འཇུག་ཆེན་པོ་ནི་གཙོ་བོར་རྒྱུ་དུས་བརྒྱད་དེ། ཚེས་བཞི་ཡི་སྲོད་ཟླ་བ་བརྒལ་ཙམ་ན་དཔུང་གཡོན་མ་མོའི་སྡེ་དཔོན་ལྗང་སྔོན་ཆེན་པོར་སྤྲུལ་བ་
13-7-18b


འཁོར་མ་མོ་རྣམས་དང་འགྲོགས་ཏེ་ནུབ་ནས་ཤར་དུ་རྒྱུ། ཕྱི་སྤྱིར་ཚེས་ལྔའི་ཉིན་གྱི་ནང་པར་ཉི་རྩེ་ཤར་དུས་ཚུར་ལྡོག་ཀྱང་གསུངས། ཀི་ཀང་རོག་ཏི་སྙིང་གཟེར་དྲག་པོའི་རྒྱུད་ལས། ཚེས་བཞི་སོགས་རྒྱུ་དུས་བརྒྱད་པོ་ལ་ཀོང་ཙེར་འཇུག་པའི་དུས་ཞེས་བྱ་སྟེ། དེ་དུས་ནུབ་ལ་སོགས་པའི་
ཕྱོགས་དེར་གནས་པས་མཆོད་ཅིང་སྒྲུབ་ལ། དེའི་ཕྱི་ཉིན་ཚེས་ཡི་སྲོད་ཟླ་བ་བགལ་ཙ་ན་ནུབ་ནས་ཤར་དུའོ། །ལྔ་ལ་སོགས་པའི་དུས་ཚོད་རྒྱུ་དུས་བརྒྱད་དུ་བསྟན་པ་དེ་ལ་ཕྱོགས་དེ་ནས་ཀི་ཀང་རྒྱུ་བས་དེ་དུས་ཐུན་བརྡེག་ཅིང་རྦད་བསྐུལ་བྱ་བར་གསུངས་པ་འོག་མ་ཀུན་ལ་མན་ངག་གི་ཚུལ་དུ་ཤེས་པར་བྱ། །དེ་ལྟ་ན་ཕྱི་ཉིན་ཚུར་ལྡོག་དུས་བཤད་པ་དྲུག་དང་དགུ་སོགས་ལ་གོ་དགོས་ཏེ་འཁོར་རྣམས་ལྡོག་དུས་གཅོད་པའི་གནད་དོ། །
དེར་རྦད་ཐུན་གྱི་ལས་བྱས་པ་ཐེབས་རྟགས་སམ། ཕར་རམ་ཚུར་ལ་རྒྱུ་ཕྱོགས་སུ་སྤྲིན་པ་སོགས་ཀྱི་རྟགས་ཀྱང་ཤེས་པར་བྱ་སྟེ། མ་མོའི་སྡེ་དཔོན་རྒྱུ་བའི་རྟགས་སུ་སྤྲིན་ཁམ་ནག་དང་སེར་བ་དུམ་བུ་འཚུབ་ནག་སོགས་འོང་ངོ་། །
ཚེས་བརྒྱད་ལ་ལག་གཡས་དྲང་སྲོང་དཀར་སེར་རམ། རཱ་ཧུ་ལར་སྤྲུལ་པ་འཁོར་དགྲ་བླའི་རྒྱལ་མོ་དང་འགྲོགས་ཏེ་སྔ་རྡེའུ་མགོ་དྲེས་དང་དོན་འདྲ་དྲོ་དང་པོ་ཙམ་ན་ཤར་ལྷོ་ནས་ནུབ་བྱང་དུ་རྒྱུ། ཕྱི་ཉིན་གྱི་སྲོད་ལ་ནུབ་བྱང་ནས་
ཚུར་ལྡོག་ཀྱང་གསུང་། འདི་རྒྱུ་བའི་རྟགས་སུ་ནམ་མཁའ་སྐྱ་ཐིབ་ལ་སྤྲིན་ལུག་གི་ལྟོ་ཚིལ་འདྲ་བ་དང་ཐོག་སེར་བུ་ཡུག་འོང་། ཚེས་བཅུ་ཅིག་ལ་ཆུ་སོ་བདུད་པོ་རོག་ཏིའི་མ་ཙར་ཀ་ཞེས་སུ་སྤྲུལ་པ་འཁོར་བདུད་ཀྱི་དམག་ཚོགས་དང་བཅས་པ་ནམ་
ཕྱེད་ནམ་འཇིངས་ཟེར་བ་འདི་དང་དོན་གཅིག་མཚན་མོའི་སྨག་ལ་བྱང་ནས་ལྷོར་རྒྱུ། སང་གི་ཉིན་ཕྱེད་ཚུར་ལྡོག་དེ་རྟགས་སྤྲིན་པ་ཤིང་ལོ་གཤིབ་འདྲ་དང་། མཐིང་ནག་སེམས་ཅན་གྱི་གཟུགས་འདྲ་བ་དང་སེར་བ་གྲུ་གསུམ་དབྱིབས་ཅན་རླུང་ཚུབ་དང་ཐོག་རྒྱུ་ཕྱོགས་སུ་འོང་། 
13-7-19a


ཚེས་བཅོ་ལྔ་ལ་མགོ་བོ་སྲིན་པོ་བིཥྚི་པ་ཏྲར་སྤྲུལ་ནས་འཁོར་སྲིན་པོའི་དམག་དཔུང་དང་འགྲོགས་ཏེ་ཉི་ཕྱེད་ལ་ལྷོ་ནུབ་ནས་བྱང་ཤར་དུ་རྒྱུ། ཕྱི་ཉིན་གྱི་ནམ་ཕྱེད་ན་ཚུར་ལྡོག །རྒྱུ་ཐེབས་ཀྱི་རྟགས་སུ་དེ་ཕྱོགས་ནས་སྤྲིན་པ་ཁམ་ནག་གཡག་གི་གཟུགས་དང་
མདུང་ཤིང་འདྲ་བ་དང་རླུང་དམར་དང་ཐོག་སོགས་འོང་ངོ་། །ཚེས་བཅོ་བརྒྱད་ལ་མཇུག་མ་དམུ་བདུད་ཧ་ལི་ཀའམ་བིཥྞུ་རཱ་ཛར་སྤྲུལ་པ་འཁོར་དམུ་ཡི་ཚོགས་དང་འགྲོགས་ཏེ། ནམ་ཕྱེད་ཡོལ་ན་ཤར་ནས་ནུབ་དུ་རྒྱུའོ། །སང་གི་ཉི་མ་ཕྱེད་ཡོལ་ན་ཚུར་ལྡོག །
སྤྲིན་པ་མཐིང་ནག་ཕྱིང་པ་བརྒྱང་བ་འདྲ་བ་ས་གཡོ་དང་ཐོག་སེར་སོགས་རྟགས་སོ། །ཚེས་ཉེར་གཉིས་ལ་ལག་གཡས་གཤིན་རྗེ་དུ་བ་མཇུག་རིང་དུ་སྤྲུལ་པ་འཁོར་གཤིན་རྗེའི་ཚོགས་དང་འགྲོགས་ཏེ། ཉི་མ་སྨྱུར་ཆེན་ཏེ་ཕྱེད་གུང་ཆུང་འང་ཟེར་ཡོལ་ཙམ་ན་ནུབ་བྱང་ནས་ཤར་ལྷོར་རྒྱུ། 
ཕྱི་དེ་ཉིན་གྱི་ནམ་ཕྱེད་ཡོལ་ལ་ཚུར་ལྡོག །རྒྱུ་རྟགས་སྤྲིན་དམར་ནག་ཧྲལ་པོ་སེམས་ཅན་སྣ་ཚོགས་པའི་གཟུགས་ཅན་དང་།  འཚུབ་ནག་དྲག་པོ་དང་སེར་བ་སོགས་རྒྱུ་ཕྱོགས་སུ་འབྱུང་ཚེས་ཉེར་ལྔ་ལ་ལག་གཡོན་ཀླུ་བཙན་ཁྱབ་འཇུག་ཆེན་པོར་
སྤྲུལ་བ། འཁོར་ཀླུ་བཙན་གྱི་སྡེ་ཚོགས་དང་འགྲོགས་ཏེ། སྐྱ་རེངས་འཆར་བར་རྩོམ་པ་དང་། ལྷོ་ནས་བྱང་དུ་རྒྱུ། ཕྱི་ཉིན་མུན་རུབས་ཚུབ་ཟེར་བ་འདི་དང་དོན་གཅིག་ཡིན་སྲོད་འཁོར་ལ་ཚུར་ལྡོག །རྒྱུ་རྟགས་སྤྲིན་ཕྱར་སྒྱེ་དྲིལ་བ་ལྟ་བུ་དམར་པོ། །རླུང་དང་འདྲེས་པའི་སེར་བ་དང་ཐོག་དེ་ཕྱོགས་ནས་འོང་
ངོ་། །ཚེས་ཉེར་དགུར་སྙིང་མིག་མཆེ་བ་གསུམ་དུམ་བརྒྱད་གཅིག་ཏུ་དྲིལ་ནས་གཟའ་བདུད་ཉིད་དམ་རུ་ཏྲར་སྤྲུལ་ཀྱང་གསུང་བི་ན་ཡ་ཀའམ་སྒྲ་གཅན་འཛིན་དུ་སྤྲུལ་བ། བགེགས་ཀྱི་འཁོར་དང་བཅས་ཏེ། ཉི་མ་ནུབ་ལ་ཉི་མ་མདུང་གང་ཟེར་བ་དང་སྨྱུར་ཆུང་འདི་
13-7-19b


དང་དོན་གཅིག་ཁད་པ་ཙམ་ལ་བྱང་ཤར་ནས་ལྷོ་ནུབ་དུ་རྒྱུ། དེའི་ཕྱི་ཉིན་གྱི་ནང་པར་ནམ་ལངས་ཙམ་ལ་ཚུར་ལྡོག །རྒྱུ་ཐེབས་ཀྱི་རྟགས་སྤྲིན་དུད་ཁ་མགོ་ཆེས་ནམ་མཁའ་གང་ནས་འབྲུག་གློག་ཐོག་སེར་སོགས་འབྱུང་ངོ་། །དེ་ལ་སྔོན་གཟའ་བདུད་ཆེན་པོ་འདི་ཉིད་འཇམ་
དཔལ་གཤིན་རྗེ་གཤེད་ཀྱིས་བསྟན་པ་སྲུང་བའི་ཕྱིར་དུག་ལྔའི་གདུག་པ་བསྡུས་པའི་ཆོ་འཕྲུལ་ལས་མངོན་དུ་འབྱུང་བར་མཛད་དེ། སླར་དམ་ལ་བཏགས་པའི་ཕྱིར་ཕྱག་མཚན་འཁོར་ལོས་ལུས་ཚལ་བ་བརྒྱད་དུ་བཏང་བ། སླར་ཡང་སྤྲུལ་པ་བརྒྱད་དུ་བྱས་ཤིང་ཕྱོགས་
མཚམས་བརྒྱད་ནས་སྡོང་ཟླ་སྡེ་བརྒྱད་དང་བཅས་ཏེ་ཕྱོགས་བཞིར་མཚན་མོ་དང་། མཚམས་བཞིར་ཉིན་མོར་རྒྱུ་བའི་ཚུལ་གསུངས་ཏེ། འདི་ལ་སྔ་འགྱུར་གྱི་གཟའི་རྒྱུད་ཀི་ཀང་དྲག་པོ་རོག་ཏི་སྙིང་གཟེར་དྲག་པོའི་རྒྱུད་དང་། རྡོ་རྗེ་གཙུག་ལག་ལ་སོགས་པའི་རྒྱུད་རྣམས་དང་།
གཤེད་དམར་སོགས་བཀའ་མའི་གཞུང་རྣམས་དང་། གུ་རུ་རིན་པོ་ཆེའི་མན་ངག་གཏེར་མའི་ལུགས་ཐམས་ཅད་ཞལ་མཐུན་པར་འདི་ལྟར་བྱུང་བ་གདམ་ངག་གི་གནད་བསླུ་མེད་ཡིན་ནོ། །གཞན་དུས་འཁོར་དང་དབྱངས་འཆར་གཞུང་དང་དབྱངས་འཆར་གྱི་བལ་པོའི་མན་
ངག་སོགས་ཀྱི་བིཥྚི་རྒྱུ་དུས་རྣམས་སོ་སོའི་རྒྱུ་བའི་ཕྱོགས་ཀྱང་མི་འདྲ་ལ། རྒྱུ་བའི་དུས་ཀྱང་ཚེས་ཞག་གི་དབང་དུ་མཛད་པ་སོགས་ལུགས་མི་འདྲ་བ་མང་ཡང་འདིར་ནི་མན་ངག་གི་ལུགས་གཙོ་བོར་བཟུང་སྟེ་ཚེས་ཚེས་ཞག་དང་བསྟུན་ཏེ་གང་གི་ཐ་སྙད་ཐོབ་པ་དེའི་ཉིན་ཞག་ལ་རྒྱུ་ཚུལ་འདི་བཞིན་
ལ། འདི་དང་བསྟུན་པའི་གཟའི་གདོང་གཏད་དང་རྒྱུ་དུས་བརྟག་པའི་མན་ངག་ཟབ་མོ་སྣ་ཚོགས་གཏེར་མར་བྱུང་། ཕར་འཁོར་དང་བཅས་ཏེ་རྒྱུ། ཚུར་ལྡོག་དུས་སྡོང་ཟླ་རྣམས་སྐྱེལ་མའི་ཚུལ་དུ་ཚུར་ལྡོག །དེ་ཡང་དྲག་ལས་སོགས་ལ་ཁོའི་
13-7-20a


རྒྱུ་བ་དང་བསྟུན་ཏེ་རྒྱབ་བརྟེན་བྱ། གདོང་གཏུག་མི་རུང་།  དཔེར་ན་ཚེས་བཞི་ཡི་མཚན་མོར་རང་གཟའ་རྒྱུ་ཕྱོགས་ནུབ་ཏུ་ཁ་བལྟས་ཏེ་མངར་གསུམ་དང་ཀླུ་སྨན་སྣ་ཚོགས་དང་བཅས་པའི་དཀར་གཏོར་མཆོད་ཅིང་གཟའ་ཉིད་ཞི་བའི་རྣམ་པར་བསམས་ལ་སྲུང་ཞིང་ཞི་བའི་
ཕྲིན་ལས་བཅོལ། ཡང་ཤ་རུལ་ཁྲག་རུལ་ཉ་རུལ་སོགས་དང་དམར་གཏོར་གྱིས་མཆོད་ལ། ཀིང་ཀང་གཏུམ་ཁྲོའི་ཚུལ་དུ་དགྲ་ལ་བསྐུལ་བ་དེ་བཞིན་ཀུན་ལ་འགྲེ། འདི་ཉིད་ཕ་སྲིན་པོ་ཡིན་པས་ཤ་རུལ་ཁྲག་རུལ་ཉ་རུལ་བཙོས་དང་རྗེན་ཤ་སྣ་ཚོགས་ར་མཆིན་སོགས་དམར་ཆེན་རྣམས་ཟས་སྐལ་
དང་། མ་ཀླུ་ཡིན་པས་དཀར་གསུམ་མངར་གསུམ་ཀླུ་སྨན་ལ་རྩི་སྨན་སྣ་ཚོགས་དང་ག་པུར་རྣམས་ཟས་སྐལ་དུ་གསུངས་སོ། །དགྲ་ལིང་རྒྱུ་བའི་ཕྱོགས་དང་གདོང་སྤྲད། རང་རྒྱུ་ཕྱོགས་ལ་རྒྱབ་བརྟེན་ཏེ་ལིང་ག་ལ་ཟོར་སོགས་བརྡེག་པར་བྱ་ཞིང་། དཔེར་ན་ཚེས་བཞིར་ཁྱབ་འཇུག་མཆོད་
ཚེས་ལྔའི་སྲོད་ལ་ལིང་ག་ཤར་ནས་ཁ་ནུབ་ཏུ་བསྟན་ལ་བཞག །ནུབ་ནས་ཕར་མ་མོའི་དྲག་སྔགས་བརྡེག་པས་མཚོན་ཏེ་ཀུན་ལ་འགྲེའོ། །ཐེབས་པའི་རྟགས་གོང་དུ་རྒྱུ་དུས་སུ་བསྟེན་པ་བཞིན་དང་། ཁྱད་པར་གྱི་རྒྱུ་དུས་རྟགས་ཀྱི་མན་ངག་ཟུར་དུའང་ཤེས་པར་བྱའོ། །བརྒྱད་ལ་འཇུག་ལ་
དགུ་ལ་རྒྱུ་བ་ལྟར་ཀུན་ལ་གསུང་། འཇུག་དུས་ཀྱི་རྒྱུ་ཕྱོགས་དང་དུས་ཚོད་ཇི་ལྟ་བར་ཕྱི་ཉིན་ལ་ཀི་ཀང་རྒྱུ་བར་བྱས་ནས། འཇུག་དུས་མཆོད་ཅིང་བསྒྲུབ། རྒྱུ་དུས་ཐུན་བརྡེག་པ་གནད་དོ། །ཞིབ་པར་གདོང་གཏད་ཀྱི་མན་ངག་ཟབ་མོ་རྣམས་བཞིན། འདི་རྒྱུ་བའི་ཞག་རྣམས་ལ་མཆོད་སྒྲུབ་བྱས་
ལ་རྒྱུ་བའི་གདོང་ཁོ་ནར་ཐུན་འཕེན་པ་སོགས་གདབ་ཁའི་ལས་བྱའོ། །ཉིན་ཞག་དེའི་རྒྱུ་དུས་རགས་པ་རྣམས་དང་བསྟུན་ལ་མཆོད་རྦད་བྱ། འགྱུ་གདོང་དངོས་ནི་དཔག་ཆེན་གྱི་མདའ་ལྟར་རྒྱུ་སྟེ་མན་ངག་ལས་ཤེས་པར་བྱའོ། །དྲང་སྲོང་མཉེས་ཐབས། ཕྱུགས་ཀྱི་རྭ་ཅོ་བྱ་ཤ བྱ་མོའི་
13-7-20b


སེར་ཐིག །ཆུ་སྲིན་སྡེར་མོ། མཛོ་མོ་ཤིང་། ཁང་རུལ་ཤིང་། ཕ་འོང་དྲེག་པ་རྣམས་ཤུག་ཚིལ་ཤུག་ཤུན་སྦྱར་ལ་བདུག །དེས་གཟའ་ཡི་ཐུགས་དང་འགལ་ཀྱང་སོར་ཆུད་ཅིང་མི་གནོད་ཅེས་གཏེར་མ་འགའ་ལས་བྱུང་ངོ་། ༈ དྲང་སྲོང་ཆེན་པོ་
འདིའི་སྤྲུལ་པའི་ལས་མཁན་དྲག་པོ་ས་བདག་པི་ལིང་ངམ། བྱི་ལིང་འཕར་མ་དང་། གཅེར་བུ་ལག་རྡུམ་སོགས་སུ་གྲགས་པ། བྱ་མ་གུང་རྒྱལ་སོགས། བྱ་མ་གུང་རྒྱལ། ཁ་ཚ་རོག་མོ། ཧ་ལ་གདོང་ནག་པོ། ཁྱི་ནག་ཁམས་འགྱེད།  སྤྱང་ཀི་འཁོར་བ། ནང་བདུད་མགོ་གཅོད། 
སྨེ་བ་བླ་མཁྱེན། རྒྱལ་བོ་མཚོན་ཐོགས། ཤན་པ་བདུད་སླེབ་གཤིན་རྗེ་ཟས་འཕྲོག་གོ། འཁོར་བཅུ་དང་བཅས་པ་ལ་ས་རྒྱལ་རྗེ་བློན་བཅུ་ཅིག་ཀྱང་ཟེར་ཏེ། གནམ་ས་གཉིས་ན་དབང་ཆེ་བ། མི་ཆུང་ནག་པོ་མཐེ་བོང་ཙམ་པ་མཇུག་མ་ཅན། རྟ་ཆུང་བྱི་བ་ཙམ་ཞོན་པ། ལག་ན་རུ་མཚོན་
ནག་པོ་ཐོགས་པ། གཞན་ཡང་རྣམ་འགྱུར་ཆ་ལུགས་སྣ་ཚོགས་སྟོན་པའོ། །ཤིན་ཏུ་གདུག་པ་ཆེ་བས་སུ་ཕྲད་ཧུར་ཐུམ་དུ་གསོད་པ། ཡང་འཁོར་སྨེ་བ་དགུ་དང་། སྡེ་བརྒྱད་ཁྲོམ་སྣ་བརྒྱད་ཀྱིས་བསྐོར་ནས་གཤིན་གསོན་གཉིས་ཀྱི་བྱ་ར་བ། སེམས་ཅན་སྲོག་གི་གཤེད་མ་
བྱེད་པའི་དྲེགས་པ་ཆེན་པོ་དེ་ཉིད་ལོ་ཟླ་ཞག་དུས་ཚེས་གྲངས་ལ་རྒྱུ་ཚེ། ཁྲོམ་ཤིད་དམག་སོགས་ཁོ་ལ་གདོང་གཏུག་མི་རུང་ངོ་། །ཁྲོམ་བྱས་བྱེད་མཁན་དག་ལ་ངན།  །ཤིད་བྱས་སྦང་མ་སྐམ་ལོང་མེད། །དེས་ན་ས་བདག་སྤང་སྐམ་ཟེར། །སྟོན་མོ་བྱས་ན་ཟིན་ཕྲལ་ཕུང་། །དེས་ན་ས་བདག་ཟིན་ཕུང་ཟེར། །
འཁྲུགས་པར་རུ་བཤད་ཆུས་ཉེས་འོང་། །ལག་ཆད་གོ་ཆ་བྲལ་བས་ན། །ས་བདག་གཅེར་བུ་ལག་རྡུམ་ཟེར། །བག་བྱས་ཡུག་སའམ་ལྡིང་སྐམ་འགྲོ། བག་འདུན་བྱས་ན་ནལ་དུ་འགྲོ། སྤྱིར་ན་འདུན་གྲོས་ལ་སོགས་པ། །འདུན་པ་ཀུན་འཆོལ་འབྲས་མེད་པས། །ས་བདག་ནལ་ཕྲུག་འཆོལ་བ་ཟེར། ཞེས་སོ། །འདིར་པི་ལིང་
13-7-21a


ཚེས་ལ་རྒྱུ་ཚུལ་གཏེར་མ་ལྟར་བརྗོད་ན། །དཔྱིད་རའི་བརྒྱད་དང་ཉེར་བརྒྱད་ཕག་གི་དུས། །འབྲིང་པོའི་བཅོ་བརྒྱད་སྤྲེལ་ཟླ་བ་དང་པོའི་གྱི་དུས། །ཐ་ཆུང་ཚེས་བརྒྱད་ཉེར་བརྒྱད་སྦྲུལ་ཉེར་བརྒྱད་གྱི་དུས། །དབྱར་རའི་ལྔ་དང་ཉེར་ལྔ་ཕག་གི་དུས། །འབྲིང་པོའི་བཅོ་ལྔ་སྤྲེལ་
གྱི་དུས། །ཐ་ཆུང་ཚེས་ལྔ་ཉེར་ལྔ་སྦྲུལ་གྱི་དུས། །སྟོན་རའི་གཅིག་དང་ཉེར་གཅིག་ཁྱི་ཡི་དུས། །སྟོན་འབྲིང་བཅུ་གཅིག་ལུག་གི་དུས། །སྟོན་ཐའི་ཚེས་གཅིག་ཉེར་གཅིག་འབྲུག་གི་དུས། །དགུན་རའི་དགུ་དང་ཉེར་དགུ་བྱ་ཡི་དུས། །དགུན་འབྲིང་བཅུ་དགུ་
རྟ་ཡི་དུས། །ཐ་ཆུང་ཚེས་དགུ་ཉེར་དགུ་ཡོས་ཀྱི་དུས། །འདི་དུས་མནན་གཏད་སེལ་རླུང་འཁོར། །མདོས་གཏོར་ཟོར་འཕེན་ཁོ་རང་མཆོད། །ཕར་རྒོལ་དྲག་པོའི་ལས་ལ་བཟང་། །རབ་གནས་འཕོ་སྐྱས་མཁར་མཆོད་རྟེན། །ཆེ་འདོན་དུར་ཤིད་ཁྲོམ་
ལྟད་སྟོན། །བུ་བཙས་བག་མ་ལ་སོགས་ངན། །ས་བརྐོས་ཆག་པ་དུ་བརྐོས་པའི། །གྲངས་ཀྱི་མི་འཆི་སོགས་ཏེ་གཉན། །དེ་ཕྱིར་དེ་དང་བསྟུན་ཤེས་བྱ། །འདི་ནི་ཤིན་ཏུ་གདུག་པ་ཆེ་བས་ལས་ཐབས་ཅི་ལའང་མི་བརྩིར་མི་རུང་བས་བརྩིས་ན་ལེགས་སོ། །
རྒྱུ་ཕྱོགས་ནི་དགོངས་འདུས་སྐར་མཛོད་ལས་དཔྱིད་གསུམ་ཤར་ནས་ནུབ་སོགས་ཁྲ་ཚ་བྱ་རོག་ལྟར་མཛད་པ་དེ་ལྟར་བརྩིའོ། ༈ ཡང་དྲང་སྲོང་ཁྱབ་འཇུག་ཆེན་པོའི་བསྡོང་ཟླར་གྱུར་པ། ས་བདག་ཟིན་ཕུང་ནག་པོ་ནི། །མི་ལུས་སྡིག་མགོ་རལ་
གྲི་ཅན། །གླང་ཞོན་སྡེ་བརྒྱད་ཐམས་ཅད་དང་། །ཁྱད་པར་གཟའ་དང་བསྡོངས་ནས་སུ། །ལོ་ཟླ་ཞག་དུས་ཚེས་ལ་རྒྱུ། །ཤིན་ཏུ་མ་རུངས་གདུག་པ་ཆེ། །འདི་དང་བསྟུན་ཏེ་དྲག་ལས་བྱ། །དེ་ལ་འདིར་ཚེས་ལ་རྒྱུ་བ་གཏེར་མ་ལྟར་བརྗོད་ན། ཕ་ནི་སྲིན་
13-7-21b


པོ་བདུད་ཉིར་རྒྱུ། །མ་ནི་སྲིན་མོ་འཇིག་ཉིར་རྒྱུ། །བུ་ནི་བློན་པོ་ཙང་ཀུན་ཡིན། །ཁོ་རང་ཟིན་ཕུང་ཨག་ཆེན་པོ། །འདི་ཉིད་རྒྱུ་དུས་བསྟན་པ་ནི། །དཔྱིད་གསུམ་སྟག་སྤྲེའི་ཉི་མ་ལ། །ལྷོ་ནས་དགོངས་འདུས་ཤར་ནས་ནུབ་བྱང་གི་ཕྱོགས་སུ་རྒྱུ། །དུས་ཚོད་མར་གྱི་བཞི་གཤེད་
ལྡོག །ལྡོག་དུས་མཁར་ལས་བུག་པ་དགག །རྫིང་འདྲུ་ལ་སོགས་ས་ཆུའི་ལས། །རྔམ་ཆེན་བྱ་བ་གཞན་ཀུན་སྤང་། །དབྱར་གསུམ་གླང་ལུག་ཉི་མ་ལ། །ནུབ་ནས་ཤར་གྱི་ཕྱོགས་སུ་རྒྱུ། །སྟོན་གསུམ་ཁྱི་འབྲུག་བྱང་
ནས་ལྷོར། །དགུན་གསུམ་ཕག་སྦྲུལ་ཤར་ནས་ནུབ། །རྒྱུ་བའི་དུས་གནད་བསྟན་པ་ནི། །དཔྱིད་ཟླ་ར་བ་ནས་རིམ་བཞིན། །བྱ་ཉལ་༡ནམ་ཕྱེད་༢ཐོ་རེངས་༣དང་། །མྱུར་སྨད་༤ཉི་མ་རྩེ་ཤར་༥དང་། །རྡེ་འུ་༦མགོ་དྲོས་ས་སྲོས་༧དང་། །རྩེ་ཤར་༨སྔ་དྲོ་༩ཉིན་ཕྱེད་༡༠
དང་། །མཚན་ཕྱེད་༡༡སྲོད་ལ་༡༢ངེས་པར་རྒྱུ། །རྒྱུ་དུས་བུ་བཙས་འདུན་བག་དང་། །ལྟད་སྟོན་རོ་ཤིད་མཁར་ལས་དང་། །དམག་ཇག་ལ་སོགས་ལས་བྱས་ན། །བྱ་བ་ཆུང་ཡང་ཉེས་ཆེན་འབྱུང་། །རོ་བཏང་ལོ་དྲུག་སྒབ་མི་ཆོད། །བདུན་བརྒྱུད་དག་
ཀྱང་ཕུང་བར་བྱེད། །ངན་ཐབས་ལས་རྣམས་འདི་དང་བསྟུན། །གདོང་ཐུག་མི་བྱ་ཐེབས་དང་བསྟུན། །དེ་ཡིས་དྲག་པོའི་ལས་འགྲུབ་བོ། །ཞེས་གསུངས་པ་ལག་ལེན་དུ་གོ་བདེར་བརྗོད་ན། དཔྱིད་ཟླ་གསུམ་པོའི་ཚེས་གཅིག་དང་བདུན་བཅུ་གསུམ་བཅུ་དགུ་ཉེར་
ལྔ་རྣམས་ལ་རྒྱུ། དབྱར་གསུམ་པོའི་དྲུག་བཅུ་གཉིས་བཅོ་བརྒྱད་ཉེར་བཞི་གནམ་སྟོང་ལ་རྒྱུ། སྟོན་གསུམ་གྱི་གསུམ་དགུ་བཅོ་ལྔ་ཉེར་གཅིག་ཉེར་བདུན་ལ་རྒྱུ། དགུན་གསུམ་ལ་བཞི་བཅུ་བཅུ་དྲུག་ཉེར་གཉིས་ཉེར་བརྒྱད་ལ་རྒྱུའོ། །རི་མོས་འདྲེན་ན། དུས་བཞི་
13-7-22a


རིམ་པར་དབང་༥ཐིག་༠མེ་༣ཟུང་༢བསྲེ། དྲུག་བགོས་ལྷག་མ་ནམ་སྟོང་ཟིན་ཕུང་ཡོད། ཅེས། རྡོར་གཙུག་ལས་ཀྱང་། སྟོན་གསུམ་ཁྱི་འབྲུག་ཉི་མར་བྱང་ནས་ལྷོར་སོགས་གོང་གི་རྩ་ཚིག་ལྟར་གསུང་། དུས་ནི་ཞག་དེའི་བཞི་གཤེད་ཀྱི་དུས་ལ་རྒྱུ་བར་གསུང་བས།
དཔེར་ན་ཁྱི་ཡི་ཉི་མར་ཡར་མར་གྱི་བཞི་གཤེད་གླང་དང་ལུག་གི་དུས་དང་། འབྲུག་ཉིར་ཡང་གླང་ལུག་གི་དུས་ལྟ་བུ་དཔེར་བརྗོད་དེ་མཆན་དུ་བྲིས་འདུག་གོ། རྒྱུ་ཕྱོགས་ནི་གོང་གི་རྩ་ཚིག་ལྟར། དཔྱིད་གསུམ་ལྷོ་ནས་བྱང་དུ་རྒྱུ། དབྱར་གསུམ་ནུབ་ནས་
ཤར། སྟོན་གསུམ་བྱང་ནས་ལྷོར། དགུན་གསུམ་ཤར་ནས་ནུབ་ཏུ་རྒྱུ་བར་བལྟའོ། །དཔྱིད་ཟླ་གསུམ་གྱི་བྱི་རྟ་བྱ་ཡོས་བཞིའི་ཉི་མར་ཟིན་ཕུང་དབུས་ན་གནས། དེར་དམག་དང་ས་ཡི་བྱ་བ་མི་བྱའོ་ཞེས་གསུངས།  ༈ གཟའ་རྒོད་ར་ཧུ་ལ་དང་སྲིང་མོ་གདོང་
མོ་བཞི་རི་རབ་ལ་གཡས་གཡོན་དུ་བསྐོར་ཏེ་ཕྲད་ནས་མནོལ་ཤོར་བ་ངན་པ་དགུ་འཛོམ་ཞེས་ཉི་མ་ནག་པོར་གྲགས་པ་ནི། དཔྱིད་ར་བའི་ཚེས་བདུན་ནམ་ཕྱེད། འབྲིང་པོའི་བཅུ་བཞི་ནམ་ལང་།  ཐ་ཆུང་གི་ཉེར་གཅིག །ནམ་ལང་མུན་རུབ་བར་། དབྱར་ར་བའི་ཚེས་ནམ་ལང་བརྒྱད། འབྲིང་པོའི་བཅུ་དྲུག་ཉིན་ཕྱེད། ཐ་མའི་ཉེར་ཕྱེད་ཡོལ་བཞི།
སྟོན་ར་བའི་ཚེས་ས་རུབ་དགུ། འབྲིང་པོའི་ཕྱེད་ཡོལ་བཅོ་བརྒྱད། ཐ་ཆུང་གི་ཉེར་ས་རུབ་བདུན། དགུན་ར་བའི་ཚེས་སྲོད་བཅུ། འབྲིང་པོའི་ཉི་ཤུ། ཐ་ཆུང་གི་གནམ་སྲོད་གང་སྟེ་ལོ་གཅིག་གི་ནང་ན་ཞག་བཅུ་གཉིས་པོ་འདི་ལ་སྟེང་འོག་
བར་གྱི་རླུང་དང་འབྱུང་ལྔ་འཁྲུག་སྟེ་བཙན་དུག །ལྟ་བུའི་ཉི་མ་འཆར་བ་ཞེས་པ་འདི་དུས་ནམ་ཕྱེད་དགེ་ལས་ནོར་གཏོང་བ། བར་བག་སོགས་ཐམས་ཅད་འཛེམ་དགོས་ལ། ཁྱད་པར་ཟླ་བཤད་ནང་བཞིན་སྤང་བླང་བྱ། འདི་
13-7-22b


དུས་གཟའ་ལས་ལ་རྦད་པ་དང་དྲག་ལས་ངན་ཐབས་ཕུང་བྱེད་ཀྱི་ལས་བརྩམ་ན་འགྲུབ་བོ། །འདི་ལ་རྒྱུ་ཕྱོགས་མེད། འདི་རི་མོས་བརྟག་ན། དུས་བཞི་རིམ་པར་༧རི་དབྱིག་༨སྲིན་པོ་༩ཕྱོགས་༡༠། བསྒྱུར་བྱར་བྱས་ལ་ནང་གསེས་གསུམ་ལས་གྲངས། གང་ཡིན་དེས་བསྒྱུར་ཆོས་ལ་ཉི་ནག་ཡོད། ཅེས་སོ། །༈
ཉི་མ་ནག་ཆུང་ནི་བྱ་མ་གུང་རྒྱལ་རྒྱུ་བ་སྟེ། འདི་ལ་དགོངས་འདུས་སྐར་མཛོད་ནས་ཁྲ་ཚ་བྱ་རོག་ཟེར། རྡོ་རྗེ་གཙུག་ལག་ལས། ཐེབས་བཟློག་བསམ་གྱིས་མི་ཁྱབ་ཀྱང་། །གནམ་གྱི་བྱ་མ་གུང་རྒྱལ་ཤིན་ཏུ་གནད། །ཅེས་དང་། ཡང་ས་ཡི་ཟིན་ཕུང་ནག་པོ་འདི་ཡང་གལ་ཆེ་
ཞེས་འདི་གཉིས་ནན་ཏན་གསུང་། དེ་ལ་བྱ་མ་གུང་རྒྱལ་རྒྱུ་བ་ནི། དཔྱིད་གསུམ་ལ་བརྒྱད་གསུམ་དུ་རིམ་པས་རྒྱུ་སྟེ། དཔྱིད་རའི་ཚེས་བརྒྱད། འབྲིང་པོའི་བཅོ་བརྒྱད། ཐ་ཆུང་གི་ཉེར་བརྒྱད་ལ་རྒྱུ། དེ་བཞིན་དབྱར་གསུམ་གྱི་ལྔ་གསུམ་ལ་རིམ་བཞིན། སྟོན་
གསུམ་གྱི་གཅིག་གསུམ། དགུན་གསུམ་གྱི་དགུ་གསུམ་ལ་རིམ་པས་རྒྱུ་སྟེ་དགུ་དང་བཅུ་དགུ་ཉེར་དགུའོ། །དགུན་གསུམ་བཞི་བཅོ་བརྒྱད་བཅུ་དྲུག་གསུམ་ལ་རྒྱུ་བའི་ལུགས་ཀྱང་སྣང་མོད་འདིར་མི་བརྩི། ཚུལ་དེ་རི་མོར་འདྲེན་ན། དུས་བཞི་རིམ་པར་ཀླུ་དབང་གཟུགས་དང་
བུག །དེ་སྟེང་དབང་ཐིག་དང་འབྲིང་ལ་བཅུ། ཐ་ཆུང་ཉི་ཤུ་བསྣན་པའི་ཚེས་དེ་ལ། ཉི་མ་ནག་ཆུང་བྱ་མ་གུང་རྒྱལ་རྒྱུ། ཞེས་སོ། །འདིའི་རྒྱུ་ཕྱོགས་ནི། སྐར་མཛོད་ལས། དཔྱིད་གསུམ་ཤར་ནས་ནུབ། དབྱར་གསུམ་ལྷོ་ནས་བྱང་། སྟོན་གསུམ་ནུབ་ནས་ཤར། དགུན་གསུམ་བྱང་ནས་
ལྷོར་རྒྱུ་ཞེས་གསུངས་པ་ལྟར་བརྩི། བྱ་མ་གུང་རྒྱལ་རྒྱུ་དུས་དེར་ཚེས་གཉན་རོ་དགུ་ཞེས་པ་གཟའ་ནད་ལྐུག་འཐིབ་གཏོང་བའི་བདག་པོ་གདུག་པ་ཅན་དང་། གཟའ་བདུད་ཟས་འཚོལ་ཕོ་ཉ་འགྱེད་པ་དང་།  བར་ཁྱི་རྒྱུ་བ་དང་བཅས་གསུམ་པོ་དེ་ཡང་འདི་ཁོ་ན་ལྟར་རྒྱུ་བས།
13-7-23a


དེ་རྣམས་འདོམས་པའི་དུས་ཤིན་ཏུ་གཉན་པ་ཡིན་པར་ཤེས་པར་བྱའོ། །རྩིས་རྙིང་ན་བྱ་མ་གུང་རྒྱལ་བརྒྱད་དང་བཅོ་བརྒྱད་སོགས་རིམ་རྒྱུ་ལ། པི་ལིང་ཉེར་བརྒྱད་བཅོ་བརྒྱད་བརྒྱད་པ་རྒྱུ་བ་ལྟ་བུ་གོ་རིམ་བཟློག་སྟེ་ཟླ་རེར་ལན་རེ་རྒྱུ་བར་བཤད་ཀྱང་གོང་གི་རྒྱུ་ལུགས་
དེ་ནི་དགོངས་འདུས་སྐར་མཛོད་ལུགས་ཟབ་པའོ། ། ༈ ཡང་གཟའ་རཱ་ཧུ་ལའི་ལྕམ་མོ་ས་ཡི་ཕུང་བྱེད་ནག་མོ་ཞེས་བྱ་བ། བུད་མེད་ནག་མོ་མི་སྡུག་པ་གཅེར་བུ་རལ་བ་ཅན་ཟོར་བ་དང་སེར་རྐྱལ་ཐོགས་པ་གང་ཕྲད་ཕུང་བར་བྱེད་པ་ནི། ཟླ་བ་བྱུང་ངོ་ཅོག་གི་ཚེས་གཅིག་གི་
ཉིན་ཕྱེད། གཉིས་ཀྱི་ནམ་ནམ་ཕྱེད་ཕྱེད། གསུམ་གྱི་ཉི་དྲོས་ནམ་ཕྱེད། བཞིའི་ཐོ་རེངས་སྲོད། ལྔའི་སྔ་དྲོ་ཉི་དྲོས། དྲུག་གི་ཐོ་རངས། བདུན་གྱི་ཉི་ཟེར་ཉི་སྒས། བརྒྱད་ཀྱི་སྐྱ་རེངས་ཐོ་རངས་ཤར་དུས། དགུའི་སྲོད་ཆེན་ཐོ་རངས། བཅུ། ནམ་ཕྱེད་བཅུ་གཅིག །བཅུ་གཉིས་གསུམ་གྱི་ནམ་གུང་། 
བཅུ་གསུམ་ཉི་ཤར་ནམ་ལངས། བཅུ་བཞིའི་ཉིན་ཉི་ཤར་ཕྱེད། བཅོ་ལྔའི་ཉི་ཕྱེད་སྔ་དྲོ། བཅུ་དྲུག་མྱུར་ཉི་སྨད་ཉིན་གུང་། བཅུ་བདུན་ནམ་ཕྱེད་ནམ་གུང་། བཅོ་བརྒྱད་སྔ་དྲོ་ནམ་ཕྱེད། བཅུ་དགུའི་ནམ་ས་སྲོས་སྲོལ་ཕྱེད། ཉི་ཤུའི་ཉིན་ནམ་ཕྱེད་ཕྱེད། ཉེར་གཅིག་ཐོ་རེངས། ཉེར་
གཉིས་ནམ་ཕྱེད་ཡོལ་ནམ་ཕྱེད། ཉེར་གསུམ་ཐོ་རངས་ནམ་ཕྱེད། ཉེར་བཞིའི་ཉི་ནུབ་ཐོ་རངས། ཉེར་ལྔའི་ནམ་ཕྱེད་ཉི་ཟེར། ཉེར་དྲུག་ཉིན་ནམ་ལང་གུང་། ཉེར་བདུན་ནམ་ཕྱེད་ཉི་ཕྱེད། ཉེར་བརྒྱད་ཉི་ཕྱེད་ཐོ་རངས། ཉེར་དགུའི་ཐོ་རེངས་མྱུར་ཉི་སྨད། གནམ་གང་གི་སྲོད་ལ་རྒྱུ། འདི་
རྒྱུ་དུས་དགེ་ལས་གང་ཡང་དུས་དམར་མཆན་རྣམས་རི་དཀར་ལུགས་སོ། །འཛེམ། མནན་གཏད་ངན་ཐེབས་འདི་ལ་གཏུག་ན་ཤིན་ཏུ་མྱུར་རོ་ཞེས་ཞང་ཁྲོམ་གཏེར་མའོ། །དེའི་ཕྱིར་ལིངྒ་བྲི་བ་སོགས། ས་ཡི་
13-7-23b


ཟིན་ཕུང་ནག་མོ་འདི་ལ་བྱའོ། ༈ ཀི་ཀང་འབྱུང་བའི་སྤྱི་བདུད་ཆེན་པོ་གཟའ་རྒོད་དྲག་པོ་སྒྲ་གཅན་ཚེས་ལ་རྒྱུ་བ་ནི། སྟག་རྟ་ཁྱི་གསུམ་ཟླ་བར་བཅུ་གཅིག་དཔེ་ལ་ལར་བཅོ་ལྔ་ཉེར་བརྒྱད་ཟེར་བཅུ་བདུན་ཟེར་བའང་འདུག །ཉེར་བདུན་ནམ་བྱུང་ལ་རྒྱུ། ཕག་ལུག་ཡོས་གསུམ་གཉིས་ཉེར་བཞི། བྱི་འབྲུག་སྤྲེལ་གསུམ་
བཅོ་བརྒྱད་ཉེར་བརྒྱད ། བྱ་གླང་སྦྲུལ་གསུམ་གྱི་བཅུ་དྲུག་ཉེར་དྲུག་ལ་རྒྱུ་སྟེ། འདི་དུས་དཀར་ཕྱོགས་དགེ་ལས་བྱས་ན་རྒྱལ་པོ་དམངས་སུ་བབ། དེ་བཞིན་བག་མ་མཁར་ལས་གཤིན་ལས། སྟོན་མོ་བྱིས་པ་བཙའ་
བ། ནད་བཏབ་རྣམས་ལ་མཐའ་ངན། འདི་རྒྱུ་དུས་ཐ་ན་རྡེའུ་ཤིང་བུ་ཕོག་ཀྱང་ཉེན་ཆེ་བས་དགེ་ལས་གཞན་སྤང་ལ་གདུག་ཅིང་རྩུབ་པའི་ལས་རྣམས་བྱའོ། །༈ གཟའ་རྒོད་འབྱུང་བ་ཟས་འཚོལ་ཞེས་བྱ་བ་འདི་ལ་འདྲ་མིན་གྱི་ལུགས་སྣ་ཚོགས་
འདུག་ཀྱང་། འདིར་རཱ་ཧུ་དང་གཟའ་རྒོད་དང་གཟའ་བདུན་བཅས་ཀྱིས་གཟན་ཚོལ་ལུགས་གསུམ་ཕྱོགས་གཅིག་གཏེར་མ་ལྟར་བརྗོད་ན། དེ་ཡང་དཔྱིད་ར་བའི་བཅུ་གཅིག་བཅུ་དྲུག །ཉེར་གཉིས་ཉེར་བདུན་ཉེར་བརྒྱད།  འབྲིང་པོའི་གཉིས་དང་གསུམ་
བཅོ་བརྒྱད་ཉེར་གསུམ། ཐ་ཆུང་གི་བཅོ་བརྒྱད་ཉེར་བརྒྱད། དབྱར་རའི་ལྔ་བཅུ་དྲུག་ཉེར་གཉིས། འབྲིང་པོའི་གཅིག་བཅུ་གསུམ་བཅོ་ལྔ་ཉེར་གཉིས་ཉེར་བརྒྱད། ཐ་ཆུང་གི་གཅིག་གཉིས་ལྔའང་གསུམ་བཅུ་གསུམ་བཅོ་བརྒྱད་ཉེར་གསུམ་ཉེར་ལྔ། སྟོན་རའི་
གཅིག་བཅོ་བརྒྱད་ཉེར་གཅིག་ཀྱང་ཉེར་གཉིས་ཉེར་བརྒྱད། འབྲིང་པོའི་གཉིས་བཅུ་གཅིག་བཅུ་དྲུག་ཉེར་གཉིས་ཉེར་དྲུག། ཐ་ཆུང་གི་གཅིག་བཅོ་ལྔ་བཅུ་དྲུག་ཉེར་གཅིག་ཉེར་གཉིས། ཉེར་བཞི་ཉེར་བརྒྱད། དགུན་ར་བའི་གཅིག་གཉིས་གསུམ། དགུ་
13-7-24a


ཉེར་དགུ། འབྲིང་པོའི་བརྒྱད་བཅོ་ལྔ། བཅོ་བརྒྱད། བཅུ་དགུ། ཉེར་གཉིས། ཉེར་བརྒྱད། ཐ་ཆུང་གི་བཅུ་དྲུག་ཉེར་གཉིས་ཉེར་དྲུག་ཉེར་དགུ་ལ་གཟན་ཚོལ་དགོངས་འདུས་སྐར་མཛོད་ལུགས་སོ། །འདི་དུས་བག་མ་གཏོང་ལེན་
བུ་བཙས་ནད་ཐེབས་རོ་གཏོང་རྣམས་ཤིན་ཏུ་ཉེན་ཆེ། མདོས་ཟོར་དགྲ་ལིང་འབྲི་བ་སོགས། དྲག་ལས་རྣམས་འདི་དང་བསྟུན་ན་ཐེབས་ཏེ་ཕ་རོལ་ལ་དམོད་བོར་ནས་རྡེའུ་ཤིང་བུ་བོར་ཀྱང་གནོད་དེ་ཉེན་ཆེ་བ་ཡིན་པའི་ཕྱིར་རོ། །དེས་ན་དྲེགས་པ་རྒྱུ་དུས་ལ་རྣམ་གྲངས་ཤིན་ཏུ་མང་པོ་
ཡོད་ཀྱང་། ཀུན་གྱི་གཙོ་བོ་གདུག་རྩུབ་ཆེ་ཞིང་མྱུར་བ། ཁྲ་ཉི་ཟིན་གསུམ། ཀིང་ཕུང་གཟན་གསུམ། པི་ལིང་དང་། སྡེ་བརྒྱད། པིཥྚི་སྟེ་དགུ་པོ་འདི་ཙམ་བརྩིས་ལ། དེ་དག་གང་ཡང་རུང་བའམ། ཅི་རིགས་འཛོམས་པ་དང་བསྟུན་ཏེ། དགྲ་ལིང་འབྲི་བ་དང་།
མདོས་ཟོར་སོགས་དྲག་ལས་བྱས་ན་ནུས་པ་ཁྱད་དུ་ཐོན་པར་འགྱུར་རོ། །རྒྱས་པར་སྤྲོ་ན་ཕུང་ཟོར་དང་། དབུལ་ལག །གནམ་ཁྱི་ལ་སོགས་པ་གདུག་པའི་རྒྱུ་བ་རྣམས་ཀྱང་དྲག་ལས་ལ་བཟང་བས། དེ་རྣམས་དང་ཡང་བསྟུན་པར་བྱས་ན་ལེགས་སོ། །༈ 
སྡེ་བརྒྱད་རྒྱུ་ཐེབས་ནི། རྡོ་རྗེ་གཙུག་ལག་དང་ཕུར་པའི་རྒྱུད་འཇིག་རྟེན་སྣང་བྱེད་ལས་གསུངས་པ་གཞིར་བྱས་ལ་མན་ངག་གཞན་གྱིས་བརྒྱན་ཏེ་བཤད་ན། ལྷ་ཆེན་མ་ཧཱ་དེ་བ་ཡབ་ཡུམ་འཁོར་སྡེ་བརྒྱད་དང་བཅས་པ་འདི་ལྟར་རྒྱུ་སྟེ། དཔྱིད་ཟླ་ར་བའི་ཚེས་བཞིར་
འཁོར་མ་མོ་བརྟན་མ་དང་བཅས་ཏེ་ཐེབ་པས་དེ་དུས་དྲག་ལས་བྱའོ་གསུང་། ཡང་གཞན་ནས་ཟླ་བ་དེ་ཡི་བཅུ་གཉིས་དང་བཅུ་བཞི་ལའང་དེ་བཞིན་ཐེབས་པར་བཤད་དོ། །ཆོས་དེ་དག་གི་དུས་སྤྱི་དང་ཁྱད་པར་ཡོས་བུའི་དུས་སུ་ཐེབས་ཆེ། དེ་ཡང་ནུབ་ནས་ཤར་དུ་
13-7-24b


ཐེབས་པར་བཤད་དོ། །ཁ་ཅིག་ཏུ་བཅོ་ལྔ་ལ་ཡང་ཐེབས་པར་བཤད། དེ་བཞིན་དུ་དཔྱིད་འབྲིང་པོའི་བཅུ་དྲུག་ལ་བདུད་དང་བསྡོངས་ཏེ་ཐེབས། དེ་ཡང་ཕག་གི་དུས་སུ་ཁྱད་པར་ཐེབས་ཤིང་ཤར་ནས་ནུབ་ཏུའོ། །དཔྱིད་ཐ་ཆུང་གི་ཉེར་གཉིས་ལ་མ་བདུད་དང་བཅས་ཏེ་
ཐེབས། ཕག་དུས་དང་ལྷོ་ནས་བྱང་དུ་ཐེབས་པ་ཁྱད་པར་གྱི་དམིགས་བསལ་ལོ། །དབྱར་ར་བའི་ཚེས་བརྒྱད་ལ་གཟའ་དང་བསྡོངས་ཏེ་ཐེབས། དེ་ཡང་ཁྱད་པར་ཡོས་དུས་ཐེབས་ལ་ཕྱོགས་དམིགས་བསལ་མ་མཐོང་། དབྱར་འབྲིང་པོའི་ཉ་ལ་འཁོར་ཀླུ་བརྒྱད་དང་བཅས་ཏེ་ཐེབས།
དེ་ཡང་འབྲུག་དུས་དང་ལྷོ་ནུབ་ནས་བྱང་ཤར་དུ་ཐེབས་པར་བལྟའོ། །དབྱར་ཐ་ཆུང་རིལ་བོར་མ་མོ་དང་བཅས་པ་ལྟད་མོ་ལ་གཡེང་བས་མི་ཐེབས་པས་དུས་དེར་དྲག་ལས་མི་བྱ། ཁྱད་པར་ཚེས་བཅུ་གཅིག་རྟ་ཡི་དུས་སུ་ལྷག་པར་ལྡོག་པས་དྲག་ལས་མི་བྱ། འདི་ཟླ་བ་ལྔ་པར་རྩི་དགོས་
སྔགས་པ་ཁ་རུལ་གྱི་ཟླ་བ་ཟེར་བ་འདི་ཡིན། འགའ་ཞིག་གིས་བཞི་པ་ལ་འདོད་པ་ལྟར་མི་བྱའོ། །འོན་ཀྱང་འདི་ནང་དྲག་ལས་ཅིས་ཀྱང་བྱ་དགོས་ན།  ཚེས་བརྒྱད་ལ་འཚོགས་པ་དང་། དགུ་ལ་ཐེང་གཅིག་ཐེབས་ཙམ་བརྩི་ཞེས་མན་ངག་གི་ཡིག་ཆ་འགའ་ལས་བཤད། 
སྟོན་ཟླ་ར་བའི་ཉི་ཤུ་གསུམ་ལ་འཁོར་མ་མོ་ཡོངས་དང་བཅས་ཏེ་ཉུལ་བས་ཐེབས། དེ་ཡང་ཁྱད་པར་འབྲུག་གི་དུས་ལ་ཐེབས་ཅིང་ཤར་ལྷོ་ནས་ནུབ་བྱང་དུ་ཐེབས། ཡིག་ཆ་འགར་ཉ་གསུམ་ལ་ཐེབས་ཞེས། བཅུ་གསུམ། བཅུ་བཞི། བཅོ་ལྔ་གསུམ་ལ་ཐེབས་པ་དང་། བཅོ་ལྔ་
འབྲུག་གི་དུས་བྱང་ཤར་དུ་ཐེབས་པར་ཡང་བཤད་དེ་དཔྱད་པར་བྱའོ། །སྟོན་འབྲིང་པོའི་ཚེས་བཅུ་བདུན་ནས་གནམ་སྟོང་གི་བར་དུ་ཉེར་གསུམ་མ་གཏོགས་པ་ལྷག་མའི་ཞག་བཅུ་གསུམ་པོ་དེ་ལ་འཁོར་རྒྱུ་སྐར་དང་བཅས་པ་ཉུལ་བས་ཐེབས། དེ་ཡང་ཁྱད་པར་ཡོས་བུ་དང་
13-7-25a


བྱི་བའི་དུས་སུ་ཐེབས་ཆེ་ལ། ཕྱོགས་ནུབ་ནས་ཤར་དུ་རྒྱུ་བར་བཤད། ཟླ་བ་འདིའི་ཚེས་བཅུ་ལའང་ཐེབས་པར་བཤད་པ་ཡོད། སྟོན་ཐ་ཆུང་གི་ཚེས་བརྒྱད་ནས་སྟོང་གི་བར་དུ་འཁོར་ལྷ་ཆེན་བརྒྱད་ཀྱིས་བྱས་ནས་ཉུལ་བས་ཐེབས། ཁྱད་པར་དུ་བརྒྱད་ཉེར་བརྒྱད་གནམ་
སྟོང་གསུམ་ལ་ཐེབས་ཆེ་བ་དང་། རྟ་དང་བྱ་ཡི་དུས་དང་ཕྱོགས་ཤར་ལྷོ་ནས་ནུབ་བྱང་དུ་ཐེབས་པ་དམིགས་བསལ་ལོ། །དགུན་ར་བའི་བཅུ་གསུམ་ནས་བཅུ་དྲུག་གི་བར་དུ་འཁོར་གནོད་སྦྱིན་དང་བཅས་ཏེ་ཉུལ་བས་ཐེབས། དེ་ཡང་སྤྲེལ་དང་གླང་གི་དུས་དང་ལྷོ་ནས་བྱང་དུ་ཐེབས་ཆེ་བར་
བལྟའོ། །དགུན་འབྲིང་པོའི་ཉེར་གཉིས་ནས་སྟོང་གི་བར་དུ་འཁོར་གཤིན་རྗེ་བཅས་པ་ཉུལ་བས་ཐེབས། ཁྱད་པར་བྱི་བ་དང་རྟའི་དུས་ལ་ཐེབས་ཤིང་། ཕྱོགས་ནུབ་བྱང་ནས་ཤར་ལྷོར་རྒྱུའོ། །འདི་ལ་ལུགས་གཞན་བཅོ་བརྒྱད་ནས་ཉེར་གཉིས་བར་དུ་ཐེབས་པར་བཤད་པ་དང་།
ཡང་བཅུ་བདུན་ལ་ཐེབས་པར་བཤད་པའང་ཡོད། དགུན་ཐ་ཆུང་འདི་ཡི་ཉ་ལ་སྤྱིར་བཏང་མགོ་ཕུར་འཛོམ་པ་མགོ་ཡི་ཟླ་བ་དང་བདུད་ཀྱི་ཟླ་བ་ཡིན། ཟླ་བ་འདི་རིལ་པོར་ལྷ་སྲིན་སྡེ་བརྒྱད་ཁ་ལོ་བསྒྱུར་ནས་ཐེབས་པས་སྔགས་པས་ཟོར་མདའ་འཕང་ན་ཤིན་ཏུ་ཐེབས་པས་སྔགས་
པ་ཟོར་འཕེན་གྱི་ཟླ་བ་ཟེར། དམིགས་བསལ་དུ་ཉེར་བདུན་ལ་མི་ཐེབས་པ་དང་། དེ་ཡང་དེའི་ཁྱི་ཡི་དུས་ལ་བཟློག་པར་བཤད། འདིའི་ཉེར་གཉིས་དང་། ཁྱད་པར་ཉེར་དགུ་ལ་སྐྱེ་འགྲོ་སྲང་ལ་འདེབ། གནམ་སྟོང་ནུབ་མོ་ལོ་གཅིག་གི་ནང་ཚུན་སུ་འཆི་བ་རྣམས་ཀྱི་སྲོག་ཁྲམ་ལ་
འདེབ་པའི་དུས་ཡིན་པས། འདིའི་ཉེར་དགུ་ལ་ལས་སྦྱོར་དང་། གནམ་སྟོང་ལ་མནན་པ་བྱ། འདི་ལ་ཐེ་ཚོམ་མེད། སྔགས་དང་ལག་ལེན་གཞན་མ་ཤེས་ཀྱང་རྡེའུ་ཤིང་བུ་ལ་དམོད་བོར་ཏེ་གཉན་པར་འཕངས་ཀྱང་དགྲ་ཐུབ་ཅེས་བཤད། ཕྱོགས་དམིགས་བསལ་
13-7-25b


བཤད་པ་མ་མཐོང་། དེ་རྣམས་ཚུར་ལ་བཟློག་དུས་ནི། དཔྱིད་ར་བའི་བཅུ་བདུན་དང་བཅུ་དགུ་ལ་ཟློག །ཁྱད་པར་སྤྲེལ་དང་གླང་གི་དུས་དང་ཉིན་ཕྱེད་ལ་ལྡོག་པར་བཤད་བདུན་ལའང་ལྡོག་པར་བཤད་དེ་དཔྱད་པར་བྱ། དཔྱིད་འབྲིང་གི་གཅིག་དང་བཅོ་བརྒྱད་ལ་ལྡོག །
ཡང་བརྒྱད་དང་བཅུ་གཅིག་ཉེར་གཅིག་ཉེར་བརྒྱད་ལའང་ལྡོག་པར་བཤད། དཔྱིད་ཐ་ཆུང་གི་གནམ་སྟོང་ལ་ལྡོག །དགུ་ལའང་ལྡོག་པར་བཤད་པ་ཡོད།  དབྱར་ར་བའི་ཚེས་གཉིས་དང་ལྔ། ཁྱད་པར་བྱ་དང་བྱི་བའི་དུས་ལ་ལྡོག །འབྲིང་པོའི་ཆོས་བདུན་ལ་
ལྡོག །ཡང་དྲུག་དང་བཅུ་དྲུག་བཅོ་བརྒྱད་ཉེར་བརྒྱད་རྣམས་ལའང་ལྡོག་པར་བཤད། ཁྱད་པར་སྦྲུལ་དུས་ལྡོག །དབྱར་ཐ་མའི་བཅུ་གཅིག་ལ་ལྷག་པར་ལྡོག་པ་གོང་བཤད་ལྟར་དང་། བཅུ་བདུན་ལའང་དེ་དང་འདྲ་བར་བཤད་པ་ཡོད། སྟོན་
རའི་ཉེར་ལྔ་ལ་ལྡོག་གླང་དུས་ཁྱད་པར་ཉེན། སྟོན་འབྲིང་གི་ཚེས་གསུམ་ལ་ལྡོག །ཁྱད་པར་གླང་གི་དུས་སུའོ། །ཉེར་གསུམ་དང་བཅུ་བཅུ་གསུམ་ལའང་ལྡོག་པར་བཤད་པ་ཡོད། སྟོན་ཐ་ཆུང་གི་ཚེས་གཉིས་ལ་ལྡོག །ཁྱད་པར་ཡོས་བུའི་དུས་
སུའོ། །ཚེས་གཅིག་དང་ཉེར་གཉིས་ལའང་ལྡོག་ཅེས་ཀྱང་བཤད། དགུན་ར་བའི་ཚེས་བརྒྱད་ལ་ལྡོག །ཁྱད་པར་བྱི་བའི་དུས་སུའོ། །ཡང་དགུ་དང་བཅོ་བརྒྱད་ཉེར་དྲུག་རྣམས་ལ་ལྡོག་ཅེས་ཀྱང་བཤད། དགུན་འབྲིང་པོའི་ཉི་ཤུ་ལ་ལྡོག  །ཁྱད་
པར་བྱ་ཡི་དུས་སུའོ། །ལ་ལར་ཉེར་དགུ་ལ་ལྡོག་པར་བཤད་ཀྱང་ཡིག་སྐྱོན་ནམ་བརྟག་པར་བྱའོ། །དགུན་ཐ་ཆུང་གི་ཉི་ཤུ་བདུན་ལ་ལྡོག །ཁྱད་པར་ཁྱི་ཡི་དུས་སུའོ། །ལྡོག་ཅིང་རང་ལ་ཚུལ་བཟློག་པའི་དུས་འདི་རྣམས་སུ་ཐུན་དང་ཕུར་ཟོར་མནན་གཏད་
13-7-26a


སེལ་སོགས་དྲག་ལས་བྱས་ན་རང་ལ་ལྡོག་པས་སྤང་བར་བྱ། ཐེབས་ཀྱི་དུས་སུ་སྡེ་བརྒྱད་མཆོད་པ་དང་དྲག་ལས་དེ་རྣམས་བྱས་ན་མཆོག་ཏུ་འགྱུར་ཏེ། ཐེབས་མེད་པར་ལས་བྱས་ན་ནམ་མཁའ་སྟོང་པར་མདའ་འཕེན་པ་དང་འདྲ་བས་ཐེབས་དང་བསྟུན་དགོས་སོ་
ཞེས་གསུངས། རྒྱུ་ཚུལ་འདི་ས་སྐྱའི་ཞལ་པོད་དུ་གཉན་ལོ་ཙ་བའི་མན་ངག་ཟབ་མོ་ཡིན་ཞེས་གསུངས། ཚེས་གྲངས་རེ་ཟུང་ཡིག་ནོར་འདུག་སྙམ་མོ། །སྡེ་བརྒྱད་སོ་སོའི་རྒྱུ་ཐེབས་རྡོ་རྗེ་གཙུག་ལག་དང་བཀའ་བརྒྱད་ལས་གསུངས་པ་ནི། ར་བ་བཞིའི་བདུན་གསུམ་
ཉི་ཤར་ཟེར་སྡུད་༡༢༧༧༧ ཀླུ། ཐ་ཆུང་བཞིའི་ཉེར་དགུའི་སྲོད་དང་ནམ་མཇིངས་བདུད་འབྲིང་བཞིའི་དྲུག་གསུམ་ཉི་ཤར་བཙན་དམར་ཐག་ཆད་དུས། ར་བ་བཞིའི་བརྒྱད་གསུམ་སྐྱ་རེངས་རྒྱལ་པོ་སྲོད་འཇིངས། འབྲིང་བཞིའི་དགུ་གསུམ་ནམ་ཕྱེད་ཉིན་ཕྱེད་ཀྱང་གནོད་སྦྱིན། ར་བ་བཞིའི་ཉེར་གཉིས་ནམ་འཇིངས་སྲོད་མ་མོ། །འདིར་མ་ཡིག་མི་གསལ་ཐ་ཆུང་
བཞིའི་བཅུ་གསུམ་གུང་ཉི་མྱུར་གྲིབ་འོང་དུས་གཤིན་རྗེ་རྒྱུ། སྲིན་པོ་དང་གཟའ་ནི་དུས་བརྒྱད་ལ་རྒྱུ་བ་ཁྱབ་འཇུག །དང་འདྲ། དམ་སྲི་འགོང་པོ་ཐེའུ་རང་ཟླ་བ་གང་ཡང་རུང་སྟེ་ས་སྲོས་ལ་
རྒྱུའོ། །རང་རང་རྒྱུ་དུས་རང་རང་མཆོད་པ་དང་། དེ་དག་གི་ལས་བྱའོ། །༢༥༨༡༡པའི་ཐ་ཆུང་བཞིའི་ཡར་མར་རྣམས་ལ་ལས་གཤིན་རྒྱུ་བས་གཏོར་མ་ཕུལ་ཞི་དྲག་གི་ལས་ཡ་མ་ལ་བརྟེན་པ་རྣམས་དེར་བསྟན་ཞེས་འབྲི་གུང་དྷརྨ་ཀི་རྟིས་གསུངས་གཞན་ཡང་དམག་རྩིས་སོགས་ལས་
གསུངས་པ་ལྟར། རེས་གཟའ་ཉི་མ་ལ་རྒྱལ་པོ་དང་ལྷ་མཆོད། ཟླ་བ་ལ་ཀླུ་དང་གནམ་སྨན་མཆོད། མིག་དམར་ལ་བཙན་དང་དགྲ་བླ་གཤིན་རྗེ་མཆོད། ལྷག་པ་ལ་གནོད་སྦྱིན་མཆོད་སྒྲུབ། ཕུར་བུ་ལ་བདུད་དང་གཟའ། པ་སངས་ལ་ལྷ་དང་ལྷ་མོ་ཞི་བ། སྤེན་པ་ལ་ཀླུ་དང་ས་
13-7-26b


བདག་གཤིན་རྗེ་མཆོད་སྒྲུབ་བཟང་། དུས་ཚོད་ཀྱི་དབང་དུ་བྱས་ན། ཕུར་པའི་ཁྲོ་བཅུའི་ཁམས་གསུམ་རྣམ་རྒྱལ་གྱི་རྒྱུད་ལས། ཐོ་རངས་ལྷ་འདྲེ་རྒྱལ་པོ་རྒྱུ། དགྲ་བླ་ཉི་མ་རྩེ་ཤར། ཉིན་ཕྱེད་དྲོས་དམག་དཔོན་རྒྱུ། ས་ཚུབ་བཙན། སྲོད་ལ་བདུད། ནམ་གུང་གཤིན་རྗེ། ནམ་
ཕྱེད་མ་མོ་རྒྱུ་བས་དེ་དུས་རང་གི་དྲག་སྔགས་ལས་སྦྱོར་བཟང་གསུང་། རྡོ་རྗེ་གཙུག་ལག་གི་རྒྱུད་ལས། ཉིན་ཞག་གཅིག་གི་ཐོ་རངས་རྒྱལ་པོ། །སྔ་དྲོ་ཤི་འདྲེ། ཉི་དྲོས་བདུད། ཐོ་རངས་ཀླུ། སྲོད་བསེན་མོ། །ཕྱི་དྲོ་བཙན། ནམ་གུང་མ་མོ། །གུང་ཡོལ་འགོང་པོ་རྒྱུ་དུས་ཡིན་
པར་གསུངས། ལྷ་འདྲེ་སྟོང་དྲའི་རྒྱུད་ལས། སྲོད་ལ་བདུད། སྲོད་ཆུང་བཙན། གུང་སྲོད་བདུད། གུང་སྨད་རྒྱལ་པོའང་གནོད་སྦྱིན། ཐོ་རངས་ཐེའུ་རང་རྒྱལ་པོའམ། སྐྱ་རེངས་དུས་ཐེའུ་རང་།  ནམ་ལང་སྨན། ཉི་རྩེ་ཤར་ཀླུ། ཉི་དྲོས་ས་བདག་རྒྱུ་གསུངས། སྲིད་པའི་གཏེར་ཁྱིམ་ལས། ཕོ་རྒྱུད་གྲིབ་
སོ་ཞོན་ནས་འོང་། མོ་རྒྱུད་ནུབ་མོ་རྒྱུ། གཤིན་རྗེ་ཉིན་མོ། སྐྱ་རེངས་ཤར་ནས་ཉི་ཤར་ཚུན་རྒྱལ་པོ། ཉིན་ཕྱེད་ཀླུ། ཕྱེད་ཡོལ་ནས་ཉི་རྒས་བར་གནོད་སྦྱིན། སྲོད་ལ་བདུད་བཙན། ནམ་ཕྱེད་མ་མོ། ནམ་ཕྱེད་ཡོལ་བགེགས་རིགས་ཕོ་མོ་རྒྱུ། དེ་དུས་
སོ་སོར་གཏོར་མ་སྦྱིན་པ་དང་ལས་སྦྱོར་བྱ་གསུངས་སོ། །གཞན་ཆོས་སྐྱོང་དྲེགས་པ་ཕལ་མོ་ཆེ་སོ་སོའི་རྒྱུ་དུས་ནི་རང་རང་གི་ཡིག་ཆ་ལས་ཤེས་པར་བྱ་སྟེ་འདིར་མ་སྨྲོས་སོ། ༈ རྣམ་སྲས་དང་ཛམ་བྷ་ལ་སོགས་ནོར་ལྷ་མཆོད་པའི་དུས་ནི། ཚེས་བརྒྱད་དང་བཅོ་ལྔ།
རྒྱུ་སྐར་བྲེ་དང་ཕུལ། སྤེན་སྣར་གྱི་འགྲུབ་སྦྱོར་སོགས་ལ་མཆོད་དེ། རྣམ་སྲས་ཛམ་ལྷའི་བདུག་རྫས། གུ་གུལ་ཙན་དན་དུ་རུ་སྐ། ཀ་ཏ་རའང་ག་བུར་ཨ་ག་རུ་རྣམས་སྦྱར་ཞེས་རྒྱུད་ལས་གསུངས་སོ། ༈ ཞར་བྱུང་དུ་ས་བདག་ཀླུ་གཉན་གྱི་ཐེབ་བཟློག་དམིགས་བསལ་ནི། ས་
13-7-27a


ཀླུག་སྟོན་ལུགས་ཏེ་བེ་དཀར་ལས་སོ། །ས་བདག་དཔྱིད་རའི་ཚེས་ལྔ་དང་སྟོང་ལ་གྲུབ། བརྒྱད་ལ་ཡལ་འགྲོ གཅིག་དང་དྲུག་ལ་ནོར་རྫས་ཕྱིར་མི་བཏང་། ཡས་ལམ་ལྷོ་ནུབ་ཏུ་ཡོད། དཔྱིད་འབྲིང་གི་ཚེས་བརྒྱད་ལ་གྲུབ། དྲུག་ལ་ཡལ། བཅུ་གཉིས་ནོར་མི་དབྱུང་།
ཡས་ལམ་ནུབ་བྱང་ཡོད། དཔྱིད་ཐ་ཆུང་གི་བཅོ་བརྒྱད་ལ་གྲུབ། དྲུག་ལ་ཡལ། བརྒྱད་ལ་ནོར་མི་བཏང་། ཡས་ལམ་བྱང་ཤར་དུ་ཡོད། དབྱར་རའི་གཅིག་གྲུབ་དྲུག་ཡལ་བརྒྱད་ལ་ནོར་མི་བཏང་། ཡས་ལམ་ཤར་ལྷོར་ཡོད། འབྲིང་པོའི་བཅུ་དགུར་གྲུབ། ཉེར་དྲུག་
ལ་ཡལ། བཅུ་དྲུག་ལ་ནོར་མི་དབྱུང་། ཡས་ལམ་ནུབ་བྱང་དུ་ཡོད། དབྱར་ཐ་མའི་གསུམ་ལ་གྲུབ། ཉ་ལ་ཡལ། ཉེར་བརྒྱད་ནོར་མི་དབྱུང་། ཡས་ལམ་ནུབ། སྟོན་རའི་བཅུ་དགུར་གྲུབ། ཉེར་དགུར་ཡལ། ཚེས་དགུར་ནོར་མེ་བཏང་། ཡས་ལམ་བྱང་ཤར་
དུ་ཡོད། སྟོན་འབྲིང་པོའི་དགུ་ལ་གྲུབ། བཅུ་གཉིས་ལ་ཡལ། བཅུ་ལ་ནོར་མི་བཏང་། ཡས་ལམ་ཤར་ལྷོར་ཡོད། སྟོན་ཐའི་བདུན་གྲུབ། བཞིར་ཡལ། ཉེར་བདུན་ནོར་མི་གཏོང་། ནུབ་བྱང་དུ་ཡས་ལམ་ཡོད། དགུན་རའི་ཉེར་བདུན་གྲུབ། དགུར་ཡལ། 
ཉི་ཤུར་ནོར་མི་བཏང་། ཡས་ལམ་ལྷོར་ཡོད ། དགུན་འབྲིང་པོའི་སྟོང་ལ་གྲུབ། གཉིས་ལ་ཡལ། བཅུ་གཉིས་ནོར་མི་བཏང་། ཡས་ལམ་ཤར། དགུན་ཐ་མའི་བཅུ་དགུ་ལ་གྲུབ། དྲུག་ལ་ཡལ། གནམ་སྟོང་ལ་ནོར་རྫས་ཕྱིར་མི་བཏང་། ཡས་ལམ་བྱང་
ཤར་དུ་ཡོད་པའོ། །འདི་དག་གི་གྲུབ་པའི་དུས་སུ་ས་བདག་མཆོད་པ་དང་བཅོས་པ་བཟང་། ཡལ་བའི་དུས་སུ་མི་ཕན་རང་ལ་བཟློག །ནོར་རྫས་ཕྱིར་མི་བཏང་ཞེས་པའི་དུས་དེར་ནོར་བཏང་ན་ར་བ་སྟོང་། ཟླ་བ་དེར་ས་བདག་སོགས་ཀྱི་ཡས་ལམ་ཕྱོགས་གང་
13-7-27b


བཤད་དེར་གཏོང་བ་བཟང་ཞེས་གསུངས།  ༈ ཡང་ས་བདག་བཟློག་དུས་དཔྱིད་རའི་བཅུ་བདུན་བཅུ་དགུ། དཔྱིད་འབྲིང་གི་གཅིག་དང་བརྒྱད། དཔྱིད་ཐ་མའི་གནམ་སྟོང་དབྱར་རའི་གཉིས་དང་ལྔ། དབྱར་འབྲིང་གི་གསུམ། དབྱར་ཐ་མའི་བཅུ་གཅིག །སྟོན་
ར་བའི་ཉེར་ལྔ། འབྲིང་པོའི་གསུམ། ཐ་མའི་གཉིས། དགུན་ར་བའི་བཅོ་བརྒྱད།  འབྲིང་པོའི་ཉེར་བདུན། ཐ་ཆུང་གི་ཚེས་བཅུ་བཞི་ལ་ལྡོག །ས་བདག་ལྡོག་དུས་འདིར།  དམག་དང་རོ་ལས་གཏད་སེར་ཆར་གྱི་ལས། ས་ཁ་དབྱེ་བ། ཀླུ་ཆོག །ཀླུ་
གཏད་རྣམས་བརྩམ་ན་རང་ལ་ལྡོག །ཚེ་ཐུང་དབུལ་ཞིང་ཉམས་པས་ངན་ཞེས་བཤད་དོ། །གཉན་སྤུག་གཞེད་རྒྱུ་བ་ནི། དཔྱིད་ར་བར་བདུན་༨ཐེབ་བཅུ་དགུར་བཟློག །འབྲིང་པོའི་༦བཅུ་གསུམ་ཐེབས། བཅོ་ལྔར་བཟློག ཐ་ཆུང་གི་ཉེར་གཅིག་༤ཐེབ་བཅོ་བརྒྱད་བཟློག །དབྱར་
ར་བའི་གསུམ་དང་ཉེར་གསུམ་༧ལ་ཐེབས། བཅུ་དྲུག་ལ་བཟློག །འབྲིང་པོའི་ཟླ་བ་༡༠རིལ་པོར་ཐེབས། ཐ་ཆུང་ལ་ཡང་༢༧རིལ་པོར་ཐེབས། སྟོན་རའི་༩དགུར་ཐེབས་བཅོ་བརྒྱད་བཟློག །འབྲིང་གི་ཉེར་གསུམ་༣༠ཐེབས། སྟོང་ལ་བཟློག །ཐ་ཆུང་གི་བདུན་༢༠ཐེབས། གཅིག་
ལ་བཟློག །དགུན་རའི་གཅིག་༡༩ལ་ཐེབས། བདུན་ལ་བཟློག །འབྲིང་པོའི་ཉེར་༡༠ལྔར་ཐེབས། སྟོང་ལ་བཟློག །ཐ་ཆུང་༣ལ་ནི་གཉན་གྱི་རིགས་རྣམས་ཚེས་བཅོ་ལྔ་མ་གཏོགས་ཟླ་བ་རིལ་པོར་བཟློག །ཐེབས་དུས་བཅོས། བཟློག་དུས་སྤང་ངོ་། །འདིར་དམར་ཆེན་ཐེབ་ལུགས་
གཅིག །རྒྱུ་དུས་ལས་ཅི་བརྩམས་ཀྱང་ཟློས་སྐྱོན་ཡོད་པས་ངན་ཡང་གཉན་བཅོས་པ་དང་མཆོད་པར་བཟང་གསུངས་སོ། ༈ ནཱ་ག་ཀླུ་ཡི་ཐེབས་བཟློག །རྡོ་རྗེ་གཙུག་ལག་ལས་གསུངས་པ་ནི། དཔྱིད་ཟླ་ར་བའི་ཚེས་བཅོ་ལྔ་ལ་ཀླུ་རྣམས་ཚུལ་ཁྲིམས་སྲུང་བས་འདི་དུས་གཏད་སོགས་མི་
13-7-28a


ལེན་བཟློག །ལྔ་ལའང་བཟློག་པའི་ལུགས་ཡོད། སྐར་མཛོད་ལས།  ཚེས་བཞི། བཅུ་གཅིག་བཅུ་གཉིས་བཅུ་བཞི་བཅུ་བདུན་བཅུ་དགུ་ཉེར་བཞི་ཉེར་ལྔ་ཉེར་དྲུག་ཉེར་བདུན་ཉེར་དགུ་གནམ་སྟོང་རྣམས་ལ་བཟློག །དེ་མིན་ཚེས་
ཐམས་ཅད་ལ་ཐེབས་པར་བཤད། ལུགས་གཞན་ལས་བཅུ་བཞི་ལའང་ཐེབས་པར་བཤད། དཔྱིད་འབྲིང་པོའི་བརྒྱད་དང་ཉི་ཤུར་ཆོས་བྱེད་པས་གཏད་སོགས་མི་ལེན་བཟློག །བཅོ་བརྒྱད་ཉེར་གཉིས་ཉེར་བརྒྱད་ལའང་བཟློག་པར་བཤད་པ་ཡོད། སྐར་མཛོད་ལས་
གཅིག་གསུམ་བཞི་ལྔ་བཅུ་གཉིས། བཅུ་དྲུག་བཅུ་བདུན་བཅོ་བརྒྱད་ཉེར་གཉིས་ཉེར་ལྔ་རྣམས་ལ་ཐེབས་པར་གསུང་། དེ་ཡང་བཅུ་གཉིས་དང་བཅོ་བརྒྱད་ལ་དྲག་ཐེབས། ཉེར་གཉིས་འབངས་ཐེབས། ཉེར་ལྔ་འཇམ་ཐེབས་སུ་བཤད། ལུགས་གཞན་
ན་བཅུ་ལའང་ཐེབས་སུ་བཤད།  དཔྱིད་ཐ་མའི་ཚེས་ཉེར་ལྔར་ཐེབས། དེ་མིན་ཚེས་ཐམས་ཅད་ལ་ཀླུ་རྣམས་དྲན་པ་སྙིགས་ནས་མི་ཐེབས་ཏེ་བཟློག་ཅེས་རྡོར་གཙུག་དང་དགོངས་འདུས་ཞལ་མཐུན། དབྱར་ར་བའི་ཚེས་བརྒྱད་ཟས་འཚོལ་ཞིང་ལངས་པས་ཐེབས།
ཉལ་གཉན་རྣམས་འགྲོས་ལའང་དྲོ་ལ་འདེབས་པས་ཐེབས། སྐར་མཛོད་ལས་བཅོ་བརྒྱད་ལའང་ཐེབས་པར་བཤད། དེ་མིན་ཚེས་གཞན་ལ་མི་ཐེབས། ཉི་ཤུ་དང་ཉེར་ལྔར་ངལ་བསོ་བཟློག །དབྱར་འབྲིང་ཉེར་གཉིས་མི་ལ་ཟས་འཆོལ་བས་ཐེབས། སྐར་མཛོད་ལས་
ཉི་ཤུ་དང་ཉེར་ལྔར་ཐེབས་པ་དང་། ལྔ་ལ་འཇོམ་ཐེབས་སུ་གསུངས། བརྒྱད་དང་ཉ་ལ་བཟློག །དབྱར་ཐ་ཆུང་གི་ཉ་ལ་ཉི་ཤུ་དགུ་ལའང་སྲིད་པ་རྒྱལ་པོའི་ལས་བྱེད་པས་ཐེབས་བདུན་དྲག་ཐེབས། བརྒྱད་ཞི་ཐེབས་སྐར་མཛོད་ལུགས། དེ་མིན་མི་
13-7-28b


ཐེབས་བཟློག་ཅེས་གསུངས། བཅུ་གཅིག་ཚེས་གཅིག་ལ་ཟེར་འདུག་ལ་ཁྲུས་བྱེད་པས་བཟློག །བཅུ་གསུམ་དང་ཉ་ལ་ལྡོག་པར་བཤད་པའི་ལུགས་ཀྱང་ཡོད། སྟོན་རའི་བཅུ་དགུར་ཟས་འཚོལ་བས་ཐེབས་ཆེ། དགུ་དང་བཅུ་ལའང་ཐེབས་པ་སྐར་མཛོད་ལུགས། བཅུ་དྲུག་དྲན་པ་
མེད་དེ་བཟློག །ལྔ་དྲུག་བཅུ་༡༦༣༨ལའང་བཟློག་པའི་ལུགས་ཡོད། སྟོན་འབྲིང་གི་ལྔ་དང་བཅོ་ལྔར་འབྲུ་བཅུད་སྡུད་དེ་ཐེབས་དེ་མིན་མི་ཐེབས། གསུམ་དྲུག་དགུ་དང་བཅུ་གསུམ་བཅུ་དྲུག་ལ་བཟློག་པར་བཤད། སྟོན་ཐ་མའི་ཚེས་གཅིག་དང་
བཅུ་གཅིག་ཉེར་གཅིག་ལ་གནས་ཚོལ་དང་གོས་གྱོན་པས་ཐེབས་ཞེས་དང་། གཉིས་ཀླུ་འཁོར་བརྒྱད་བཙུན་མོ་བཅོ་ལྔ་གདོལ་བ་ཐེབས་ཞེས་སྐར་མཛོད་ལུགས། དགུ་དང་བཅུ་དགུ་ཉེར་དགུར་བཟློག་ཡང་གསུམ་དང་བཅུ་ལ་བཟློག་པའི་ལུགས་སྣང་།
དགུན་ར་ཉེར་གཅིག་༢༡དང་ཉེར་གསུམ་ཡི་གེ་མ་དག་གམ་སྙམ་པའི་བཅོ་བརྒྱད་བཅོ་ལྔར་རྩི་ཤིང་གི་བཅུད་སྡུད་པས་ཐེབས་ལྔ་དང་བཅུ་བདུན་ལའང་ཐེབས་པ་སྐར་མཛོད་ལུགས། བརྒྱད་ལ་ཐེབས་པར་བཤད་པའང་ཡོད། བཅུ་ལ་བཟློག །དགུ་བཅུ་དགུ་ཉེར་དྲུག་ལའང་བཟློག་
པར་བཤད། དགུན་འབྲིང་པོའི་བཅོ་ལྔ་དང་ཉེར་གཅིག་ལ་འབྲུ་བཅུད་སྡུད་པས་ཐེབས། བདུན་བརྒྱད་ཉི་ཤུ་ལའང་ཐེབས་པ་སྐར་མཛོད་ལུགས། བཅུ་བདུན་ལ་ཐེབས་སུ་བཤད་པ་ཡོད། དྲུག་དང་བཅུ་དྲུག་ཉེར་དྲུག་ལ་བཟློག་གཉིས་དྲུག་
གསུམ་དང་ཉི་ཤུ་ལའང་བཟློག་པའི་ལུགས་ཡོད། དགུན་ཐ་ཆུང་ལ་ཀླུ་ཉལ་ཏེ་ཕན་གནོད་མེད་པས་མི་ཐེབས་ཞེས་རྡོར་གཙུག་དང་སྐར་མཛོད་སོགས་དགོངས་པ་མཐུན་ནོ། །དེ་ཡང་སྤྱིར་དགུན་ཐ་ཆུང་ཉལ་ནས། དཔྱིད་གསུམ་ལ་ཡང་ཉལ། དབྱར་
13-7-29a


གསུམ་ལྡང་། སྟོན་གསུམ་དར། དགུན་ར་འབྲིང་ལ་ཤི་ཞེས་བཤད་ལ་དབྱར་རའི་ཚེས་བརྒྱད་ནས་རྗེ་རིགས་ལྡང་། བཅོ་ལྔར་ནས་རྒྱལ་རིགས་དམངས་རིགས་ལྡང་། ཀླུ་ཉལ་ཁར་གཏད་པས་ཟས་སུ་ཟ།  ལྡང་དུས་གཅོད་སྦྲུལ་གྱི་ལོ་དང་ཟླ་བ། ཟླ་བ་གསུམ་པ་སྦྲུལ་ཟླ་ཡིན ། དེ་
ཡི་ཉ་ལ་ཀླུ་གཏད་བྱས་ན་ཤིས། ཀླུ་ཐེབས་དུས་ཀླུ་གཏོར་ཀླུ་ཆོག་ཆར་འབེབ་ཀླུ་རྒྱུ་སྐར་སྣར་མ་ལ་ཀླུ་རྣམས་ལ་བདུག་པ་སྦྱིན་པར་བྱའོ། །ཞེས་རྒྱུད་ལས་སོ། །གཏད་སོགས་ཀླུ་ལ་བརྟེན་པའི་ལས་ཀུན་བྱས་ན་ཤིས་པར་འགྱུར་ལ། འོལ་ཀའི་ཀླུ་རྒྱུད་འབུམ་ཏིག་གསུངས་པའི་ཐེབས་བཟློག་དང་སྡུར་ཁོ་རྩིས་ངེས་འདུ་བཟློག་དུས་དེ་དག་བྱ་མི་རུང་ངོ་། །གཞན་ཡང་ཀླུ་མཆོད་སོགས་
ཀྱི་སྐབས་སུ་མཁོ་བ་ཀླུའི་ཐེབས་བཟློག་མི་འདྲ་བའི་ཡིག་ཆ་སྣ་ཚོགས་འདུག་ཀྱང་འདི་ནི་ཚད་ལྡན་ཁུངས་ཐུབ་ཀྱི་གཞུང་ལས་བཤད་པས་ཡིད་ཆེས་པ་ཀླུ་མཆོད་
དང་ཀླུ་གཏད་ལ་གཅེས་སོ། །དགོངས་འདུས་སྐར་མཛོད་ལས། ས་བདག་ཀླུ་གཉན་རྒྱུ་བ་དང་གདོང་ཐུག་མི་བྱ་སྟེ། གང་ཞེ་ན། དཔྱིད་ར་འབྲིང་གི་ཚེས་བརྒྱད་ཟེར་འདུག་བཅོ་བརྒྱད་ནམ་ལངས་ཤར་ནས་ནུབ་ཏུ་རྒྱུ། ཐ་ཆུང་ཉེར་ལྔའི་ཉི་མ་ཕྱེད་ཡོལ། ཤར་ལྷོ་ནས་ནུབ་བྱང་
དུ་རྒྱུ། དབྱར་ར་འབྲིང་གི་བཅོ་ཚེས་བཅོ་ལྔའི་འང་ལྔའི་ཉིན་ཕྱེད་ལྷོ་ནས་བྱང་ནས་ལྷོའམ་བྱང་དུ་རྒྱུ། ཐ་ཆུང་གི་ཉེར་ལྔའི་༢༢ཀྱང་ཉིན་ཕྱེད་ལྷོ་ནུབ་ནས་བྱང་ཤར་དུ་རྒྱུ། སྟོན་ར་འབྲིང་གི་ཉེར་གཉིས་ཀྱི་ཉི་མྱུར་ནུབ་ནས་ཤར་དང་ནུབ་ཤར་དུ་རྒྱུ་ཐ་ཆུང་གི་ཚེས་༡༡ཀྱང་གཉིས་ཉི་མ་ནུབ་ཁའི་དུས་ནུབ་བྱང་ནས་
ཤར་ལྷོར་རྒྱུ། དགུན་ར་འབྲིང་གི་ཉི་ཤུ་ཐམ་པའི་༢༩༣༠འདི་ནམ་འཇིང་བྱང་ནས་ལྷོ་ནས་བྱང་ལྷོར་རྒྱུ། ཐ་ཆུང་གི་བཅུ་གཅིག་ནམ་ཚེས་གཅིག་ཀྱང་སྲོད་ཕྱེད་ཡོལ་ལ། བྱང་ཤར་ནས་ལྷོ་ནུབ་ཏུ་རྒྱུ། དཔྱིད་ར་སྟག་ཟླར་ངོས་སུ་བྱང་ལའི་ལས་སོགས་
13-7-29b


དངོས་སུ་དེ་དང་གདོང་མ་ཐུག་པར་དྲག་ཟོར་སོགས་ཁོའི་འགྲོས་དང་བསྟུན་ན་ཐེབས། ཁྱད་པར་དགྲ་བོ་ཀླུ་ལ་གཏོད་པར་ཤིས་སོ་ཞེས་གསུངས་སོ། །རྡོ་རྗེ་གཙུག་ལག་གི་རྒྱུད་ལས་ཀླུ་རྒྱལ་རིགས་དཀར་པོ་ཤིང་དང་ཤར་གྱི་ཆུ་ཁ་ཤར་བལྟས་ལ་གནས། དཔྱིད་རའི་ཉེར་
བདུན་ཉི་ཤར་ཤར་ནས་ནུབ་ཏུ་རྒྱུ། རྗེ་རིགས་སེར་པོ་ལྷོར་ཁ་བལྟས་ཀྱི་ཆུར་གནས།  སྟོན་རའི་ཉེར་གཉིས་ཉི་མ་ཕྱེད་ཡོལ་ལྷོ་ནས་བྱང་དུ་རྒྱུ། བྲམ་ཟེ་རིགས་དམར་པོ་ནུབ་ཕྱོགས་ཀྱི་ཆུ་ནུབ་བལྟས་ལ་གནས། དགུན་རའི་ཚེས་བཅོ་ལྔའི་དགོང་ག་ནུབ་ནས་ཤར་དུ་རྒྱུ། དམང་
རིགས་ལྗང་ཀུ་བྱང་བལྟས་བྱང་ཆུར་གནས། དབྱར་རའི་བཅོ་བརྒྱད་ཉི་ནུབ་བྱང་ནས་ལྷོར་རྒྱུ། གདོལ་པ་ནག་པོ་མཚམས་བཞིའི་ཆུ་དང་ཤིང་གཅིག་ལ་གནས། དབྱར་རའི་ཚེས་བརྒྱད་དགོང་གར་མཚམས་སུ་རྒྱུ་གསུང་། དེ་ལྟར་ཤེས་ནས་མཆོད་པ་དང་།
ལས་སྦྱོར་ཀླུ་གཏད་སོགས་ཤེས་པར་བྱའོ། །གཉན་ལ་གཏོད་ན་བྱ་མ་གུང་རྒྱལ་ལ་གཏོད། ས་བདག་ལ་ལྟོ་འཕྱེ་ལ་གཏོད་པ་ཡིན་ནོ་ཞེས་གསུང་སོ། །འདི་དག་གི་སྐབས་ཐམས་ཅད་དུ་དཔྱིད་མཁའ་འགྲོ་རྒྱ་མཚོའི་རྒྱུད་ལས། དཔྱིད་ཟླར་སོགས་རིམ་བཞིན་དུ། །ཉི་མ་བྱང་དུ་འགྲོ་བའི་ཚེ། ཞེས་གསུང་། མཆན། ཟླ་ར་བ་ནི་ཧོར་ཟླ་བཅུ་གཉིས་པ་རྒྱལ་གྱི་ཟླ་བ་ཁོ་ན་ལ་ངོས་འཛིན་དགོས་ཀྱི། 
མགོ་ཟླ་དང་མཆུ་ཟླ་ལ་བྱེད་པར་མི་བྱ་སྟེ། རྙིང་གཞུང་རྣམས་དང་སློབ་དཔོན་པདྨའི་གཏེར་ཆོས་རྣམས་ལས་རྒྱལ་ཟླར་བཞེད་པ་དེ་དག་ཤིན་ཏུ་ཚད་ལྡན་ཡིན་ལ། དེའི་དགོངས་པ་ལྟར་བྱས་
པས་ཐེབས་སོགས་འཆུག་མེད་གནད་དུ་སྨིན་པར་ཡིད་ཆེས་མྱོང་བས་གྲུབ་ལ། གཞན་ལུགས་ལྟར་བྱས་པས་གོ་མ་ཆོད་པ་མཐོང་བ་འདུག་ཅེས་སྔོན་གྱི་བླ་མ་རྣམས་དང་འབྲི་གུང་ཆོས་གྲགས་སོགས་ཀྱིས་ཡང་ཡང་ནན་ཏན་དུ་གསུངས་པ་དེ་ལྟར་ཅི་ནས་ཀྱང་ངེས་པར་
13-7-30a


བྱའོ། ། ༈ མཁར་ལས་དང་གཏེར་སྦ་བ་སྦྱིན་སྲེག་མནན་གཏད་སོགས་ཀྱིས་བརྐོ་བའི་ཐོག་མར་ལྟོ་འཕྱེ་ཆེན་པོ་ངེས་པར་བརྟག་དགོས་པར་རྒྱུད་སྡེ་རྣམས་ལས་གསུངས་པ་ལྟར་ལག་ལེན་བྱ་བ་ལ། ས་བདག་ལྟོ་འཕྱེ་ནི་ཇི་ལྟར་འོས་པའི་ས་
གཞི་སྙོམས་པར་ལྷོ་བྱང་སོགས་ཕྱོགས་མ་ནོར་བར་ཚངས་ཟུར་གྱི་ཐིག་བཏབ་པའི། ཐིག་གི་ལྟེ་བ་ཡན་ཆད་སྐུ་སྟོད། དེ་མན་ཆད་སྐུ་སྨད། སྟོད་རྒྱས་པ་མི་གཟུགས་སྨད་ཕྲ་བ་སྦྲུལ་མཇུག་དྲང་པོར་གནས་པ། གསེར་མདོག་གཡས་པས་བུམ་པ་ལྟེ་བར་
འཛིན་ཞིང་གཡོན་གྲུ་མོ་བཀུག་སྟེ་སྣར་སྦྱར་བ།  སྦྲུལ་གྱི་གདེངས་ཀ་ཅན་གཞོག་གཡོན་འོག་བཅུག་གིས་རྟག་ཏུ་ས་གཞིར་གཡས་སུ་འཁོར་བའོ། །དེའི་སྤྱི་བོར་ཀླུ་མཐའ་ཡས་སྔོན་པོ། རྣ་བར་པདྨ་དཀར་པོ། མགྲིན་པར་འཇོག་པོ་དམར་པོ།
སྙིང་གར་ནོར་རྒྱས་ལྗང་ཀུ། དཔུང་པར་པད་ཆེན་གསེར་མདོག །ལྟེ་བར་དུང་སྐྱོང་དཀར་པོ། གསང་གནས་སྟོབས་རྒྱུ་ལྗང་ཀུ། མཇུག་རྩེར་རིགས་ལྡན་སྔོན་པོ་གནས་པའོ། །དེ་ཡང་རྒྱས་པར་ཁྱིམ་ཟླ་བཅུ་གཉིས་ཀྱི་ཞག་སུམ་བརྒྱ་དྲུག་ཅུའི་
ཐིག་བསྣོལ་མར་བཏབ་པའི་ཕྱེད་དུ་ལྟོ་འཕྱེའི་ལུས་ཀྱི་ཚད་ཐིག་གི་ཁོང་ནས་བཏོན་པའི་ལག་ལེན་གཞན་དུ་ཤེས་ལ། དེ་ལྟར་སྐུ་གཟུགས་ཚོན་རྩིས་བྲིས་པའི་མཐར། འོ་མར་རྩི་སྨན་སྣ་ཚོགས་བཏབ་པ་དང་། དཀར་མངར་ཀླུ་གཏོར་སོགས་མཆོད་
པ་བཤམས་ལ། སྤྱན་དྲངས་མཆོད་ཅིང་བསྟོད། བསྡུ་ན་འོག་བཤད་ལྟོ་འཕྱེའི་གནས་ཕྱོགས་ཙམ་བརྟག་ལ། དེར་སྐུ་གཟུགས་རས་བྲིས་སམ། ཚོམ་བུ་ལ་ཡིད་ཀྱིས་གསལ་བཏབ་སྟེ་ཀླུ་མཆོད་བྱས་པས་ཆོག །དེ་ནས་ལྟོ་འཕྱེའི་མིག་ཏུ་བགེགས་
13-7-30b


མཐར་བྱེད་བསྒོམས། སྔགས་པ་རང་ཉིད་ཀྱང་བགེགས་མཐར་བྱེད་དུ་བསྒོམ་ལ།  ཏོག་རྩེར་གསེར་རྡོར་རྩེ་ལྔ་བྲིས་པ་ལག་གཡས་སྟེང་དང་གཡོན་པ་འོག་ཏུ་བྱས་པས་བཟུང་ནས། ཐོག་མར་ལྟོ་འཕྱེ་ལ་རྒྱབ་བརྟེན་བྱས་ནས་བརྐོ་བའི་ས་ཡི་ཐིག་མཚམས་
ལས་མ་འདས་པར། དབུས་ནས་གཡོན་སྐོར་ས་ཁམ་ལྔ་བསྐོས་པ་དེ་ཉིད་དངོས་གྲུབ་ཀྱི་ས་ཡིན་པས་དེས་སྡེ་བཞིའི་དོན་འཕེལ་བ་སོགས་བཟང་འབྲས་མང་དུ་བྱེད་པས་སྣོད་དུ་བརྩལ་ལ་བཀྲ་ཤིས་པའི་ས་སྣ་གཞན་པ་སྲེས། རྣམ་འཇོམས་གཟུངས་ཆུ་དང་བསིལ་གཏོར་ཆུ་དང་བཅས་
ཏེ་གང་བྱེད་ཀྱི་ས་གཞི་ཁྱབ་པར། དགེ་འདུན་བཞི་སྡེས་གཏོར་བཀྲ་ཤིས་བརྗོད་པས་བར་བྱས་ན་དེས་བཀྲ་ཤིས་ཤིང་དོན་ཀུན་འགྲུབ་པར་འགྱུར་རོ། །དང་པོར་བརྐོས་ཐིག་ནང་དུ་ཁམ་ལྔ་བརྐོས་པའི་རྗེས་སུ་ཅི་བདེ་བར་བརྐོས་པས་ཆོག་གོ། ཆེ་བ་འཛམ་གླིང་ཙམ་ནས་
ཆུང་བ་བྲེ་ཞབས་ཙམ་གྱི་ཐིག་གང་བཏབ་དེའི་ནང་དུ་དེ་བཞིན་འདུ་བ་རྟེན་འབྲེལ་གྱི་ཆོས་ཉིད་དོ། །དེ་ཡང་ཐིག་གིས་མ་བརྟག་པར་ལྟོ་འཕྱེའི་རྒྱབ་ཏུ་བརྐོས་ན་རང་འཆི་གནས་འཕོ་ནོར་བརླག་སོགས་མི་དགེ་བ་འབྱུང་། ལུས་ཀྱི་ཆ་དགུའི་ཆར་
བརྐོས་ན་ཕ་མ་དང་བུ་དང་ཆུང་མཉེ་འབྲེལ་འཆི། མཇུག་མར་སོང་ན་གླང་ཆེན་རྟ་ཕྱུགས་འཆི་ཞིང་སྟོབས་ཉམས་པས་ལྟོ་འཕྱེའི་ལུས་ཀྱི་ཆ་ཀུན་སྤང་ཏེ་གྲུ་འོག་མདུན་གྱི་ཐིག་མིག་གར་ཕོག་པ་དེ་དངོས་གྲུབ་ཀྱི་གཏེར་ཁ་དབྱེ་བའི་ས་ཡིན་པས་དེར་བརྐོ་བར་
བྱ་ལ། དང་པོར་ས་ཁམ་ལྔ་བརྐོས་ནས་དེ་རྗེས་ལུས་ཀྱི་ཆ་སོགས་ཡིན་མིན་དཔྱད་མི་དགོས་པར་ས་ཁྲུ་གང་བརྐོས་ལ་ས་པྲ་བརྟག་པས་ས་མདོག་སྣུམ་པ་གནག་པ་རིན་ཆེན་སྣ་ཚོགས་བྱུང་ན་ཤིན་ཏུ་བཟང་སླར་བླུགས་པས་གང་ཞིང་ལུད་ན་བཟང་།  གང་ཙམ་
13-7-31a


འབྲིང་། མ་གང་ན་ངན། རྡོ་བྱུང་ན་རླུང་ཆེན་པོ། རུས་པ་ཟུག་ཟེར། གྱོ་དུམ་ལྐུག་པ། ཕུབ་མ་དང་སོལ་བ་རིམ་པ། སྐྲ་དང་སོལ་བ་ཤིང་སོགས་ཡོད་ན་ཉེར་འཚེ་ཕྲ་མོ། སེམས་ཅན་རོ་རྙིང་སོགས་བྱུང་ན་ངན། བརྐོས་ཤུལ་
ཆུས་གང་བ་དང་། ཉ་ལྕི་བ་ཉ་གསོན་བྱུང་ན་བཟང་། དོང་དེར་ཆུ་བླུགས་ལ་རང་གོམ་པ་བརྒྱའི་བར་ཕྱིར་ཕྱིན་ཏེ་སླར་འོང་བས་དངུང་ཆུས་གང་ན་བཟང་། དམའ་ན་ངན། ཆུ་སྒྲ་དང་བཅས་པ་བྱུང་ན་ཀླུ་རྣམས་ཀྱི་འཇིགས་པ་སྟོན་པས་སྤངས་ཤིང་དོང་ཁ་
བསུབ་པར་བྱ། ས་མདོག་དཀར་པོ་རྒྱལ་རིགས་ཀྱི་དངོས་གྲུབ་ཡོད་པ་སོགས་སོ། །ཤུལ་དེ་ལ་རིན་ཆེན་བུམ་གཏེར་གཞུག །གཏོར་མ་བསྔོ། གཤེགས་གསོལ་བྱས་ལ་ཀླུ་གཟུགས་བསུབ། སྨོན་ལམ་བཀྲ་ཤིས་བྱ་གཞི་དེར་ཁང་པ་སོགས་བྱས་
ན་བཀྲ་ཤིས་སོ། །ཆོ་ག་དང་བརྟག་པ་འདི་ནི་གཙོ་བོར་ཁང་པ་དང་དཀྱིལ་འཁོར་གྱི་གཞིར་བརྟག་པའི་དབང་དུ་བྱས་ལ།  དཀྱིལ་འཁོར་གྱི་གཞི་ཡི་ས་ནི་འཐས་པ་དང་། རྡོ་ཤིང་སོགས་མེད་པ་བཟང་སྟེ། རྡོ་ཤིང་སོགས་ས་ཡི་ཟུག་རྡུ་ཡིན་པས་བསལ་
ལ་འཐས་པར་བཅག་པར་བྱ། མནན་གཏད་སོགས་ཀྱི་དུས་ཡིན་ན་ལྟོ་འཕྱེ་བརྟག་པས་བརྐོ་བའི་བར་གོང་ལྟར་ལས་དང་པོར་བརྐོ་དུས་སྙི་འབོལ་བྱུང་ན་ལེགས། སེམས་ཅན་གྱི་རོ་རུས་སོགས་ཀྱང་དྲག་ལས་ལ་མི་སྐྱོན། དོང་བུག་པ་དང་ཆུས་གང་བ་
སོགས་བཟང་བར་བཤད། དེར་ཁྲུ་གང་ཕན་ཆད་ས་རོ་སྟེ་ཕན་མེད་གནོད་མེད་ཡིན་ལ། དེ་ནས་སོར་དགུ་ཚུན་ཆད་མ་མོའི་གནས་ཏེ་འགོང་ཆོག་མནན་པར་བཟང་།  དེ་ནས་སོར་བཅུ་ཚུན་ལྷ་མོ་བརྟན་མའི་གནས་ཏེ་མནན་པ་ཀུན་ལ་བཟང་། དེ་ནས་
13-7-31b


སོར་ཉེར་བཞིའི་བར་དུ་ཀླུ་ཡི་གནས་ཏེ་སྐམ་གཏད་ལ་བཟང་། དེ་བས་རིང་ན་རྩུབ་ཆེ་བས་རང་ལ་ལྡོག་ཉེན་ཆེ། དོང་གཏིང་ཐག་ཐུང་ན་ནུས་པ་ཆུང་དགྲ་མི་འཆི་བས་ཚད་ངེས་པར་བྱ། རློན་གཏོད་ལ་དོང་ཚད་ངེས་པ་མེད་པར་གསུངས་པ་ལྟར་ཤེས་དགོས་སོ། །བྲེལ་
བའི་ཚེ་ཀླུ་མཆོད་སོགས་མ་གྲུབ་ཀྱང་ས་བརྐོ་བའི་ཐིག་བརྟག་ལ་བརྐོས་པས་འཐུས་སོ། །ལྟོ་འཕྱེའི་བརྐོས་ཐིག་ལག་ལེན་ནི། །ཉིན་གུང་ཐུར་ཤིང་བཙུགས་པ་ཡིས། །ཕྱོགས་བཙལ་ཚང་ཟུར་ཐིག་བཏབ་སྟེ། །ཕྱོགས་བཞི་རེ་རེ་གསུམ་གསུམ་བཅད། །
བུ་མོ་སྲང་སྡིག་ཤར་གྱི་ཕྱོགས། །གཞུ་དང་ཆུ་སྲིན་བུམ་པ་ལྷོ། །ཉ་དང་ལུག་གླང་གསུམ་ནུབ་ཕྱོགས། །འཁྲིག་པ་ཀརྚ་སེང་གེ་བྱང་། །དེ་ལྟར་གནས་ཕྱོགས་ཤེས་བྱས་ནས། །ད་ལྟའི་ཉི་ཁྱིམ་རྟོགས་སླད་དུ། །གང་བརྩིའི་ཉི་སྐར་མཁའ་
རོས་བསྒྱུར། །དབྱུག་བཅུག་འབྱུང་མེ་ཟླས་ཐོབ་པ། །ལུག་ནས་བརྩམ་པའི་འདས་ཁྱིམ་གྲངས། །ལྷག་མ་མཁའ་མེས་བསྒྱུར་བྱས་ལ། །ཆུ་སྲང་མིག་གིས་བགོས་ཐོབ་གཞུག །མདའ་ཡོན་ཟླ་བས་ཐོབ་པ་ནི། །ཞག་འདི་དང་བཅས་འདས་པའི་གྲངས། །
ཁྱིམ་དང་དེ་ཡི་སུམ་ཅུའི་ཆ། །གང་ན་མགོ་བོ་གནས་པ་རྟོགས། །དེ་ཕྱིར་ཁྱིམ་པའི་ས་ཁྱོན་ཆ། །གསུམ་བགོས་དེ་ཡི་ཆ་རེ་རེར། །བཅུ་རེ་བརྩིས་པས་སུམ་ཅུ་ཡི། །ད་ལྟ་མགོ་བོ་གང་གནས་པའི། །ཆ་དེའི་མདུན་ཁྱིམ་བདུན་པ་ཡི། །སུམ་ཅུའི་ཆ་ལས་
གཡས་སྐོར་དུ། །འདས་ཞག་གྲངས་མཚུངས་བགྲང་བ་དེར། །ལྷོ་འཕྱེའི་མཇུག་མ་གནས་པའི་ཕྱིར། །མགོ་མཇུག་དེ་ཡི་ཚངས་ཐིག་བཏབ། །དེ་ཡི་ཕྱེད་ལ་ལྟོ་འཕྱེ་སྟེ། །རྟག་ཏུ་གཡས་སུ་འཁོར་བ་ཡིས། །གྲུ་མོའི་འོག་གི་མདུན་ཕྱོགས་སུ། །བརྐོ་
13-7-32a


བའི་ཐིག་ནི་བཙལ་བར་བྱ། །དེ་ཡང་ལུས་ཕྱེད་དབུས་ཐིག་ནས། །ཕྱི་ཐིག་གདེང་ཀའི་བར་གྱི་ཚད། །ཆ་མཉམ་ལྔ་རུ་བགོས་པའི་ཆ། །གཅིག་ནི་ཚད་ཡིན་དེས་ཚད་པས། །གདེངས་ཀའི་རྩེ་ནས་མར་གསུམ་གཞལ་བར་འཕྲེད་ཐིག་དང་། །
ཚངས་མདུན་ནས་རང་གི་གཡོན་ཕྱོགས་ལྟོ་འཕྱེ་ཡོད་པར་བརྩིས་པས་གཡས་ཕྱོགས་སུ་ཕར་ཕྱེད་དང་གཉིས་དོར་བར། །མཐུར་དུ་ཐིག་བཏབ། དེ་ལྟར་གྱེན་དང་འཕྲེད་ཐིག་བཏབ་པ་ལ། །གཞི་བྱས་ཡས་ཏེ་གོང་གི་འཕྲེད་ཐིག་ནས་མར་ཆ་གཅིག་གཞལ་བར་འཕྲེད་ཐིག་བཏབ་པ་དང་། །འཕྲེད་ལ་གོང་གི་གྱེན་ཐིག་
ནས་ཕར་ཆ་ཕྱེད་ཀྱི་སར་གྱེན་ཐིག་བཏབ་པས། བར་དུ་གྲུ་བཞི་ནར་མོར་འབྱུང་བ་གནས་པ་དེ། །ལྟོ་འཕྱེའི་གྲུ་གཡོན་འོག་ལྟོ་བའི་ཐད་ཡིན་གྲུ་བཞི་དེའི་ཐིག་མཚམས་ལས་ཕྱིར་མ་འདས་པར་ཐིག་གི་ནང་དུ་བརྐོ་བའི་ས་དངོས་དེ་ཡིན་ཏེ། དེར་བརྐོས་ན་གང་འདོད་པའི་དངོས་གྲུབ་གཏེར་ཁ་དབྱེ་བའི་གནས། །ཡིན་པར་ཤེས་པར་བྱའོ། །
ཤུ་བྷཾ། ། ༈ ད་ནི་དྲག་ལས་གཡུལ་འགྱེད་ཟོར་འཕེན་སོགས་ལ་གནད་ཆེ་བ་ཕྱོགས་ཐེབས་ཀྱི་གཙོ་བོ་བརྗོད་པ་ལ། རྩ་བའི་སྒྲ་གཅན་ནི་དུས་འཁོར་དང་དབྱངས་འཆར་སོགས་ལས་གསུངས་པ་ཐེབས་ཀྱི་རྒྱལ་པོ་སྟེ། དེ་ཡང་སྒྲ་གཅན་འཁོར་ལོ་རིམ་
པ་གསུམ་པ་དཔེ་རིས་བཞིན་བྲིས་ལ། སྒྲ་གཅན་གདོང་དང་གདོང་སྐར་སྤྲད། །ཉི་སྐར་དུས་ཚོད་སྟེང་དུ་བཞག །མདེའུའི་རྩེ་ཐད་ཐེབས་ཕྱོགས་ཡིན། །འདི་ནི་ཤིན་ཏུ་གལ་ཆེ་ལ། །རང་སྒྲ་གཅན་ལུས་ཀྱི་ལྟོ་བའི་དབུས་སུ་རྒྱབ་བཏད། གཡོན་དུ་གདོང་། གཡས་
སུ་མཇུག་བཞག་པར་བྱས་ནས་ཐད་ཀར་ཁ་བལྟས་པས་ཐེབས་གཞན་མ་འགྲིགས་ཀྱང་འདི་གཅིག་པུས་ཀུན་ཟིལ་གྱིས་གནོན། དེའི་ཚེ་རྒྱབ་ཏུ་ཉི་མ་ཡོད་ཅིང་། ཟླ་བ་མདུན་དུ་ཡོད་ན་ལྷག་པར་བཟང་སྟེ། དེ་ལ་སྲིད་གསུམ་རྣམ་པར་རྒྱལ་བའི་དུས་
13-7-32b


སྦྱོར་ཞེས་བྱ་ཞིང་གཞན་ཡང་། དམར་སྤེན་ཕུར་གསུམ་རྒྱབ་དང་གཡས་ཀྱི་ཆ་ལ་ཡོད་ཅིང་། ལྷག་སངས་དག་མདུན་དང་གཡོན་གྱི་ཆར་ཡོད་དུས་འགྲིགས་ན་འདི་གཅིག་པུས་ས་གསུམ་ལས་རྣམ་པར་རྒྱལ་བར་བྱེད་དོ། །འདི་ཞིབ་ཏུ་བརྩི་འདོད་ན་སྔ་ནས་ལོ་གཅིག་གི་ཉ་གང་
ཡིན་ལ་ཆེས་ཆས་བསྒྲིགས་ཏེ་གཟའ་ལྔ་དང་ཡང་སྦྲག་ཅིང་ཕྱོགས་ཐེབས་རྣམས་དང་བསྟུན་ཏེ་རྩི་དགོས་ལ། དེ་ལྟར་མ་བྱུང་ཡང་གོང་ལྟར་བརྩིས་པས་ཀྱང་དོན་གྲུབ་བོ།། གཞན་ཡང་ལོ་ཟླ་ཞག་དུས་ཚེས་ཀྱི་ས་བདག་ལྷ་སྲིན་གདུག་པ་ཅན་རྣམས་རྒྱབ་དང་གཡས་སུ་གནས་ཏེ་རྒྱབ་བརྟེན་བྱས་ན་རང་ཉིད་རྒྱལ་མོད་ཀྱི། 
ཐམས་ཅད་འགྲིགས་དཀའ་བས་ཅི་རིགས་བརྩིལ། དེ་ཙམ་མ་ནུས་ན་ལོ་སོགས་ཀྱི་དབང་དུ་བྱས་ཏེ་ཕྱོགས་བརྩི་ན། པི་ལིང་ངམ་ས་ཕུག་པའམ་རྩིས་ལུགས་རྒྱལ་ནི་ལོ་ལ་གནས་ལུགས། བྱི་བའི་ལོ་ཡར་གྱི་ལྔ་མཐུན་སྦྲེལ་ལ་གནས་ཉི་ལྡོག་མཉམ་དུ་སྐྱས་བྱེད་པས་ནུབ་སྟོད་དུ་ཡོད། དེ་བཞིན་གླང་ལོ་བྱི་བ། སྟག་ལོ་ཡོས།
ཡོས་ལོ་ལུག །འབྲུག་ལོ་བྱ། སྦྲུལ་ལོ་བདུན་ཟུར་ཕག །རྟ་ལ་ཁྱི། ལུག་ལོ་སྟག སྤྲེལ་ལོ་ཡར་བཞི་སྦྲུལ། བྱ་ལོ་གླང་། ཁྱི་ལོ་རྟ། ཕག་ལོ་འབྲུག་གི་སྟེང་ན་གནས་སོ། ། ༈ ཡ༷ང་ས༷་  གཡོན་སྐོར་  ཡར་གཅིག །མར་གཅིག་སོང་།
རྒྱལ༷་ཀོ༷ང་ཙེ༷་འཕྲུལ་རྒྱལ་ལུགས་ནི། བྱི་ལོ་བྱི་བ། གླང་ལོ་ཡོས། སྟག་ལོ་ལུག །ཡོས་ལོ་བྱ། འབྲུག་ལོ་ཕག་སྦྲུལ་ལོ་ཁྱི། རྟ་ལོ་སྟག །ལུག་ལོ་སྤྲེལ། སྤྲེལ་ལོ་གླང་། བྱ་ལོ་རྟ། ཁྱི་ལོ་འབྲུག ཕག་ལོ་བྱི་བར་
གནས་པར་བཞེད། ༈ ཟླ་བའི་གཅེར་བུ་ལག་རྡུམ་ནི། །མི་ལུས་སྦྲུལ་མགོ་འབྲུག་ཞོན་པ། །མཐིང་ནག་འཇིགས་ཚུལ་སྦྲུལ་ཞགས་ཐོགས། །དཔྱིད་གསུམ་ཤར་ནས་ནུབ་ཏུ་རྒྱུ། དབྱར་གསུམ་ལྷོ་ནས་བྱང་། སྟོན་གསུམ་ནུབ་ནས་
13-7-33a


ཤར། དགུན་གསུམ་བྱང་ནས་ལྷོར་རྒྱུ། གཞན་ཁང་ནང་གནས་ཚུལ་ཀྱང་མདོ་བྱང་མ་བུ་ལས་གསུང་། ཁང་པའི་ནང་དུ་བུ་ཆུང་གི་རོ་འཚོལ་ཞིང་། དཔྱིད་ར་ནས་ཞག་དྲུག་ཅུར་ཁང་པའི་དབུས་སུ་གནས། ཐབ་ཀ་དང་ཚང་མང་དུ་རོ་བཞག་ན་བུ་ཆུང་འཆི་སྲིས་མི་རྨེ།
དཔྱིད་ཐའི་གཅིག་ནས་ཞག་དྲུག་ཅུའི་བར་ཁང་པའི་ལྷོ་ནུབ་དུ་གནས་དེར་རོ་བཞག་ན་བུད་མེད་ལ་ངན། དབྱར་ཐའི་གཅིག་ནས་དྲུག་ཅུའི་བར། །བྱང་ཤར་རོ་བཞག་ནོར་གོད་འོང་། །སྟོན་འབྲིང་གཅིག་ནས་དྲུག་ཅུའི་བར། །ཤར་ལྷོར་རོ་བཞག་དོ་
བདག་བནྡེར་ངན། །ཞེས་སོ་ཚེས་ལ་རྒྱུ་བ་གོང་དུ་སོང་། །དུས་ཚོད་ས་རྒྱལ་མདུན་གྱི་ནི། །བཞི་གཤེད་སྟེང་དུ་གནས་པར་འདོད། །ནམ་ལངས་ཡོས་དུས་ལྷོ་སྨད་གནས་པ་ལྟ་བུའོ། །ཡང་པི་ལིང་ལུགས་གཅིག་དཔྱིད་ར་སྦྲུལ་དུས་ལྷོ་སྟོད་དུ། །འབྲིང་པོ་རྟ་དུས་སྤྲེའུ་
ཐོག །ཐ་ཆུང་ལུག་དུས་ཕག་གི་སྟེང་། །དབྱར་ར་སྤྲེལ་དུས་སྦྲུལ་ཐོག་ཏུ། །འབྲིང་པོ་བྱ་དུས་ཕག་གི་སྟེང་། །ཐ་ཆུང་ཁྱི་དུས་བྱང་གི་སྟོད། །སྟོན་རར་ཕག་དུས་འབྲུག་ཐོག་ཏུ། །འབྲིང་པོ་བྱི་དུས་ལྷོ་ནུབ་ཕྱོགས། །ཐ་ཆུང་གྲང་དུས་ཁྱི་ཡི་སྟེང་།
དགུན་ར་སྟག་དུས་ཤར་སྨད་དུ། །འབྲིང་པོ་ཡོས་དུས་ལྷོ་སྨད་ཕྱོགས། །ཐ་ཆུང་འབྲུག་དུས་བྱ་ཐོག་ཏུ། །རང་རང་རྒྱུ་ཚེས་ཉིན་མོ་འཚོགས། །རྒྱུ་ཚེས་པི་ལིང་འཕར་མ་ཡིན། །ཞེས་གསུངས་པ་ལྟར་རོ། །ས་བདག་ཟིན་ཕུང་ལོ་ལ་འཁོར་བ་ནི། གནམ་
ལོ་གང་ཤར་དེའི་མར་གྱི་དྲུག་པའི་སྟེང་ན་ཡོད་པས་དེ་ཕྱོགས་རྒྱབ་བརྟེན་མདུན་ཕྱོགས་ཐེབས། ཟླ་བའི་ཟིན་ཕུང་བཤད་པ་མ་མཐོང་། ཚེས་གྲངས་རྒྱུ་ཕྱོགས་བཅས་གོང་དུ་སོང་། ད་ནི་དྲེགས་པ་ཀུན་གྱི་ཁ་ལོ་སྒྱུར་བ་དུས་ཐམས་ཅད་ཀྱི་ཆ་འཛིན་པ་ནི་གཟའ་
13-7-33b


རྭ་ཧུ་ལ་ཡིན་པས་དེ་ལ་ཕྱི་ནང་གསང་བ་ཡང་གསང་ཐོད་རྒལ་སོགས་རྒྱུ་ཚུལ་མང་དུ་མཆིས་པའི་གཙོ་བོ་བརྗོད་ན་ལོ་ནི་བྱ་གླང་སྦྲུལ་གསུམ་ལོ་ལ་ཟས་འཚོལ། ཟླ་བ་སྟོན་ཟླ་གསུམ་དང་། ཁྱད་པར་ཕག་ལུག་ཡོས་གསུམ་གྱི་གནམ་སྟོང་ལ་ཟས་འཚོལ་ལོ། །
༈ ཟླ་བའི་རཱ་ཧུ་འཁོར་ལུགས་ནི། གནམ་གྱི་གཟའ་ཆེན་ལྷ་རྒོད་ཅེས་སྒྲ་གཅན་འཛིན་དེ་དཔྱིད་གསུམ་མགོ་ནུབ་ཁ་བྱང་། དབྱར་གསུམ་མགོ་བྱང་ཁ་ཤར། སྟོན་གསུམ་མགོ་ཤར་ཁ་ལྷོ། དགུན་གསུམ་མགོ་ལྷོ་ཁ་ནུབ་ཏུ་བསྟན་པས་ཁ་བསྟན་ཕྱོགས་
ཐེབས། ཞག་གི་ཚེས་གྲངས་ལ་ནུ་རུ་ལུགས་སུ་རྒྱུ་བ་ནི་རྒྱལ་དབང་པདྨའི་མན་ངག་ལྟར་བཤད་ན་ཟླ་བ་གང་ཡང་རུང་བའི་ཚེས་གཅིག་གི་ཉིན་ཕྱེད་ལྷོ་ནུབ་ནས་བྱང་ཤར་དུ་རྒྱུ། གཉིས་ཀྱི་ནམ་ཕྱེད་ནུབ་ནས་ཤར། གསུམ་གྱི་ཉི་ནམ་མཇིང་ཀྱང་དྲོས་ལྷོ་ནུབ་ནས་བྱང་ཤར། འདིར་ཚེས་
བཞི་སོགས་དུས་བརྒྱད་གོང་དུ་བསྟན་པ་ཁོ་ན་ལྟར་ཡིན་ལ། ལྔ་ཡི་ཉི་དྲོས་ཤར་ནས་ནུབ། དྲུག་གི་ཐོ་རངས་བྱང་ཤར་ནས་ལྷོ་ནུབ། བདུན་གྱི་སྲོད་དུས་ཤར་ལྷོ་ནས་ནུབ་བྱང་། དགུའི་སྲོད་ལ་ནུབ་བྱར་ནས་ཤར་ལྷོ། བཅུའི་ནམ་ཕྱེད་བྱང་ནས་ལྷོར།
བཅུ་གཉིས་སྐྱ་རེངས་ལྷོ་ནུབ་ནས་བྱང་ཤར་ཀྱང་། ལྷོ་ནས་བྱང་། བཅུ་གསུམ་ནམ་ལངས་བྱང་ཤར་ནས་བྱང་ནས་ལྷོའང་ལྷོ་ནུབ། བཅུ་བཞིའི་སྔ་དྲོ་ནམ་མཁའ་ནས་མཚོར་རྒྱུ་ཡང་ལྷོ་ནས་བྱང་དུ་རྒྱུ་བར་བརྩིས་ཀྱང་རུང་། བཅུ་དྲུག་ནམ་ཕྱེད་ཉི་ནུབ་ཀྱང་ན་བྱང་ཤར་ནས་ལྷོ་ནུབ། བཅུ་བདུན་ནམ་ཕྱེད་ནུབ་བྱང་ནས་ཤར་ལྷོའང་ནུབ་ནས་ཤར། བཅུ་དགུའི་
སྔ་དྲོ་ནུབ་ནས་ལྷོ་ནུབ་ནས་བྱང་ཤར་ཀྱང་ཤར་ཉི་ཤུའི་ཉིན་ཕྱེད་ཤར་ལྷོ་ནས་ནུབ་བྱང་། ཉེར་གཅིག་སྐྱ་རེང་ནུབ་བྱང་ནས་ཤར་ལྷོ། ཉེར་གསུམ་ཉིན་ཕྱེད་ཤར་ནས་ནུབ། ཉེར་བཞིའི་ཉི་དྲོས་རྒྱ་མཚོའི་གཏིང་ནས་ནམ་མཁར་རྒྱུ་
13-7-34a


ཡང་། བྱང་ནས་ལྷོར་རྒྱུ་བར་བརྩིས་ཀྱང་རུང་། ཉེར་དྲུག་ནམ་ཕྱེད་ཡོལ་ནུབ་བྱང་ནས་ཤར་ལྷོ། ཉེར་བདུན་ནམ་ཕྱེད་ལྷོ་ནུབ་ནས་བྱང་ཤར། ཉེར་བརྒྱད་ཐོ་རངས་བྱང་ཤར་ནས་ལྷོ་ནུབ། གནམ་སྟོང་ཐོ་རངས་ཤར་ནས་ནུབ་ཏུ་རྒྱུ། ལུང་གཞན་ལས་ལྷ་ཡི་འདུས་ནས་
སྟེང་འོག་ཕྱོགས་མཚམས་ཁྱབ་པར་རྒྱུ་གསུངས། དེ་ལས་དུས་བརྒྱད་དམིགས་བསལ་ནི། ཚེས་བཞིའི་ཉི་ནུབ་ལྷོ་ནུབ་ནས་ནུབ་ཏུ་འཇུག །སྲོད་ལ་ཤར་དུ་རྒྱུ་བའི་ཚེ། །དོན་གཉེར་བག་མ་ལེན་ཚོང་བྱེད། །ཤིང་གཅོད་དཀར་ཆོས་ཆང་བཙོ་བཟང་། །མི་ཤི་ཆོས་སྟོན་འཐབ་བཟླུམ་སྤང་། །
དེ་ནས་ཁྱབ་འཇུག་ཉིད་ཞག་གསུམ་རང་སར་ཤར་དུ་གནས། །ཚེས་དྲུག་བདུན་ཀྱང་ནང་བར་ནུབ་ཏུ་འཁོར་རྣམས་ལྡོག །འཁོར་ཚུར་ལ་ལྡོག་དུས་ཧོམ་སྤར་ཟོར་འགྱེད་བཟང་། །ཚེས་བརྒྱད་ནམ་ལངས་ཤར་ནས་ཤར་ལྷོར་འཇུག །བརྒྱད་ཀྱི་སྔ་དྲོ་ཤར་ལྷོ་ནས། །ནུབ་བྱང་མཚམས་སུ་རྒྱུ་
བའི་ཚེ། །ཞལ་ལྕེ་དགྲར་རྒོལ་རྐུན་མ་མནའ་སྐྱེལ་བཟང་། །གོས་བཙེམ་བག་མ་ཁྲུས་བྱེད་ངན། །ཞག་གཉིས་ནུབ་བྱང་ཕྱོགས་སུ་གནས། །བཅུ་བཅུ་གཅིག་ཟེར་ཀྱང་ཡི་སྲོད་ལ་འཁོར་རྣམས་བཟློག །བསད་པ་སྙིང་ཐུན་ལས་
བྱའོ། །བཅུ་གཅིག་སྲོད་འཁོར་རླུང་ནས་བྱང་དུ་འཇུག །བཅུ་གཅིག་དེ་ཡི་ནམ་བྱིང་ནམ་ཕྱེད་དང་དོན་གཅིག་ལ། །བྱང་ནས་ལྷོ་རུ་རྒྱུ་བའི་ཚེ། །ཁྲུས་བྱེད་སྟོན་མོ་བུ་ལོན་འཇལ། །སྐྲ་འཁྲུ་བཟང་ལ་ས་བོན་གདབ། །བྲན་ཉེ་རྐང་འགྲོས་འདུལ་བ་ངན། །ཞག་གསུམ་ལྷོ་ཡི་ཕྱོགས་དེར་
གནས། །བཅུ་བཞིའི་ཉི་ཕྱེད་འཁོར་རྣམས་བཟློག །སེར་བ་དང་ནི་བྲུབས་ལས་བཟང་། །བཅོ་ལྔའི་སྔ་དྲོ་ལྷོ་ནུབ་འཇུག །བཅོ་ལྔའི་ཉིན་ཕྱེད་ལྷོ་ནུབ་ནས། །བྱང་ཤར་རྒྱུ་བ་དེ་ཡི་ཚེ། །ལྷ་གསོལ་གཡང་སྐྱབས་ཚུར་ལེན་དང་། །སྒྲུབ་པ་
13-7-34b


དབང་བསྐུར་ཆོས་སྤྱོད་བཟང་། །ཕར་འཇལ་མནའ་སྐྱེལ་བག་མ་བུ་འབོགས་ངན། །ཞག་གཉིས་བྱང་ཤར་དེར་གནས་ཏེ། །བཅུ་བདུན་ནམ་ཕྱེད་ལྷོ་ནུབ་འཁོར་རྣམས་ལྡོག །ཐོག་སེར་དབབ་པའི་ལས་ལ་ཤིས། །བཅོ་བརྒྱད་ནམ་ཕྱེད་ཁྱབ་འཇུག་ཤར་དུ་འཇུག་
བཅོ་བརྒྱད་དེ་ཡི་ནམ་ཕྱེད་ཡོལ། །ཤར་ནས་ནུབ་ཏུ་རྒྱུ་བའི་ཚེ། །རབ་བྱུང་བ་དང་ལྷ་ཁང་བཞེངས།  །མཆོད་རྟེན་ལམ་ཞུགས་དམག་དྲང་བཟང་། །མནའ་སྐྱེལ་ཕྱག་འཚལ་མཁར་ལས་དང་། །སྒོ་འཛུགས་ཐོག་འབུབ་སྒོ་ཡོལ་ངན། །ཞག་གསུམ་ནུབ་གནས་
ཉེར་གཅིག་གི། ཉིན་གུང་འཁོར་རྣམས་ཤར་དུ་ལྡོག །དེ་ཚེ་དྲག་ལས་བྱ་བར་བཟང་། །ཉེར་གཉིས་ཉི་ཕྱེད་ནུབ་བྱང་འཇུག །ཉེར་གཉིས་མྱུར་ཆུང་ནུབ་བྱང་ནས། །ཤར་ལྷོར་རྒྱུ་ཚེ་བཟོ་དང་ཡིག་རྩིས་དང་། །ཆུ་འདྲུ་པ་དང་གཏད་རྒྱགས་བཟང་། །
འདུན་མ་བྱ་དང་རྐང་འགྲོས་འདུལ། །ཁང་ས་དུར་ས་བཙལ་བ་ངན། །ཞག་གཉིས་ཤར་ལྷོའི་ཕྱོགས་དེར་གནས། །ཉེར་བཞིའི་ཉི་མ་ཕྱེད་ཡོལ་ལ། །འཁོར་ལྡོག་ཐོག་སེར་དབབ་ལ་ཤིས། །ཉེར་ལྔའི་ནམ་ཕྱེད་ལྷོ་རུ་འཇུག །སྐྱ་རེངས་ཤར་དུས་ལྷོ་ནས་བྱང་
དུ་རྒྱུ། །ཞིང་ཉོ་མཁར་ལས་བྱེད་པ་བཟང་། །ནོར་འཇལ་དམག་འདྲེན་སྤང་བར་བྱ། །ཞག་གསུམ་བྱང་གནས་ཉེར་བདུན་བརྒྱད་ཀྱང་གྱི། །ས་སྲོད་འཁོར་ལྡོག་ཁྱབ་འཇུག་བསྒྲུབ། །ཉེར་དགུའི་ཉི་མ་ཕྱེད་ཡོལ་དུས། །བྱང་ཤར་དུ་འཇུག་ཉི་མ་མདུང་གང་ལ། །
བྱང་ཤར་ནས་ནི་ལྷོ་ནུབ་རྒྱུ། །དགྲ་བྲུབ་ཧོམ་སྤོར་ཐོག་སེར་བཟང་། །ཚོང་བྱེད་ས་བོན་ཆང་བཙོང་ན། །ཞག་གསུམ་བཞི་འདྲ་སྙམ་ལྷོ་ནུབ་དེར་གནས་ཏེ། །ཚེས་གཅིག་ནམ་ལངས་འཁོར་རྣམས་ལྡོག །སེར་འབེབ་ཟོར་གྱི་ལས་ལ་བཟང་། །བསྡོང་
13-7-35a


ཟླ་ནང་འཁོར་ཐད་དྲང་དུ། །ལྡོག་པར་རྡོར་གཙུག་རྒྱུད་ལས་བཤད། །དྲག་པོ་བསད་པའི་ལས་དག་ལ། །རྒྱུ་བའི་དུས་ལ་བདུད་གཅོད་ཅིང་། །ལྡོག་པའི་དུས་སུ་གསོད་པར་གསུངས། །གདོང་ཐུག་མི་བྱ་རྒྱུ་དང་བསྟུན། །འགྱུ་གདོང་ལས་སྦྱར་དར་བ་ཡིན། །དར་
བས་བརྩམས་པའི་ལས་ཀུན་འགྲུབ། །འགྱུ་གོང་ལས་སྦྱར་ཞུད་པ་ཡིན། །ཞུད་པས་རྣལ་འབྱོར་སྲོག་ལ་རྒོལ། །འགྱུས་ཟིན་ལས་སྦྱར་གྱོད་པ་ཡིན། །གྱོད་པས་ཕན་གནོད་གང་ཡང་མེད། །ཐེབས་བཟློག་ཀུན་གྱི་གནད་ཆེ་བ། །འཇམ་དཔལ་བཤེས་གཉེན་མན་ངག་གོ། གཤིན་
རྗེ་ཟླ་གསང་ནག་པོའི་རྒྱུད་ལས། སྒྲ་གཅན་རྟག་ཏུ་རྒྱུ་བའི་རིམ་པ་གསུངས་པ། བྱང་གི་ཕྱོགས་ནས་ཚེས་གཅིག་སོགས་རིམ་བཀོད་ནུབ་བྱང་དང་ནུབ་སོགས་གཡོན་སྐོར་བྱས་པ་ཡིན་འདུག་ལ། འདི་ལ་བྱང་ཤར་ནས་མགོ་བཟུང་ལ་བདུན་བཅུ་བཞི་ཉེར་གཅིག་ཉེར་
བརྒྱད་མ་རྩིས་ན་དུས་བརྒྱད་གོང་དང་འགྲིགས་ཏེ་ལར་རྒྱུད་རྣམས་ཀྱི་དགོངས་པ་མན་ངག་གིས་ཤེས་དགོས་སོ། །དེ་ལྟར་དུས་བརྒྱད་པིཥྚི་འམ་ཁྱབ་འཇུག་རྒྱུ་བ་འདི་ཤིན་ཏུ་གནད་ཆེ་ཡང་རྒྱུད་དང་མན་ངག་སོ་སོའི་རྒྱུ་ཕྱོགས་མི་འདྲ་བས། ལ་ལའི་ཐེབས་ཡིན་པར་
ལ་ལའི་བཟློག་ཏུ་འགྲོ་བས་ཐེ་ཚོམ་ཆོད་དཀའ་ཡང་། འདིར་ནི་རྒྱལ་དབང་པདྨའི་མན་ངག་ཟབ་མོའི་རྗེས་སུ་འབྲང་ནས་བཀོད་པས་འདི་ཁོ་ན་ལྟར་ཐེ་ཚོམ་མེད་པར་བཟུང་བར་བྱ་སྟེ་མི་བསླུའོ། །ནུ་རུ་ལུགས་འདི་ལའང་ཡིག་ཆ་འདྲ་མིན་མང་ཞིང་ལ་ལ་ན་ཡི་གེ་
མ་དག་པ་ཡང་མང་ལ་འདི་ནི་ཤིན་ཏུ་དག་སྟེ་ཡིད་ཆེས་རུང་བའོ། ༈ གཞན་ཡང་མན་ངག་ནི། ཤར་དུ་ཉི་མ། ཤར་ལྷོར་མིག་དམར། ལྷོར་ཕུར་བུ། ལྷོ་ནུབ་ལྷག་པ། ནུབ་ཏུ་པ་སངས། ནུབ་བྱང་སྤེན་པ། བྱང་དུ་ཟླ་བ། བྱང་ཤར་རཱ་ཧུ་ལ་
13-7-35b


དངོས་ཏེ། ཕྱོགས་གང་ནས་སྒྲ་གཅན་རྒྱུ་བ་ལ་དེ་དང་དེའི་རཱ་ཧུ་ཞེས་བཏགས་ཏེ། ཤར་ནས་ནུབ་ཏུ་རྒྱུ་ཚེ་ཉི་མའི་རཱ་ཧུ་ཞེས་པ་ལ་སོགས་པ་བཞིན་ནོ། །བྱང་ཤར་རཱ་ཧུའི་རཱ་ཧུ་ནི་ཁྱད་པར་དུ་དྲག་ལས་ལ་སྟོབས་ཆེའོ།  །ཁྱབ་འཇུག་ནི་ལས་གང་བྱེད་ཀུན་གྱི་ལས་མཁན་ཁྱད་པར་ཅན་
ཡིན་པས་འདི་དང་བསྟུན་ན་སྔགས་ཀྱི་ལས་བསྒྲུབ་པ་ཤིན་ཏུ་རྣོ་སྟེ་དེའི་ཕྱིར། ཉི་མའི་རཱ་ཧུ་རྒྱུ་བ་དང་བསྟུན་ལ། མཚོན་དང་རེངས་ལས། ཟླ་བའི་རཱ་ཧུར་དགྲ་དང་འཐབ་པ་དགྲ་ཡུལ་བགྲོད་པ་དང་ཞི་ལས། མིག་དམར་རཱ་ཧུར་བརྡེག་བརྡུང་མེ་སྦར།  ལྷག་
པའི་རཱ་ཧུ་ལ་འཁྲུལ་འཁོར་དང་སྒྱོགས་ཀྱི་ལས། ཕུར་བུའི་རཱ་ཧུར་གཞན་སྡུད་པ་དང་བསད་ལས། པ་སངས་རཱ་ཧུར། སྔགས་བཟླ་དབང་དུ་བྱེད་པ་སོགས་ཁ་ཤར་དུ་བལྟས་ལ་བྱ། སྤེན་པའི་རཱ་ཧུར་དུག་སྦྱོར་དང་སྣ་ཚོགས་མཐུ་སྒྲུབ། རཱ་ཧུའི་རཱ་ཧུར་རྨོངས་
བྱེད་དང་། བསད་གཟིར་སོགས་གནོད་པའི་ལས་བྱ་སྟེ། གཟའ་སོ་སོའི་ལས་དང་མཐུན་པའི་ལས་རྩོམ་པ་ནི་ཡོངས་སུ་མ་གྲགས་པའི་མན་ངག་ཁྱད་པར་ཅན། སྤྱིར་བཏང་ལ་དམིགས་ཀྱིས་བསལ་བའི་ལས་ཏེ་ཁྱད་པར་ཐུན་ཕྱེད་རཱ་ཧུ་དང་དུས་བརྒྱད་རྒྱུ་ཚུལ་ལ་སྦྱར་རོ། །
༈ ཡང་སྒྲ་གཅན་ནང་ལྟར་རྒྱུ་བའི་ཚེས་ནི། ཚེས་ལྔ་དང་དགུ་དང་བཅུ་གཉིས། བཅུ་དྲུག་བཅུ་དགུ་ཉེར་གསུམ་ཉེར་དྲུག་འདི་དུས་བརྒྱད་ཀྱི་ཕྱི་ཉིན་ཡིན། འདི་ལ་དཔེ་གཞན་ན་མ་དག་པ་མང་དུ་སྣང་ངོ་། དཔེ་ལ་ལ་ན། བམ་སྲིན་ནམ་གྲུ། ཀོང་སྲིན་བྱ་རོག །མགོ་ལ་རཱ་ཧུའི་སྲིད་བཅིག་དབྱུག་གུར་ཁྱབ་འཇུག་རྟ་ཆུར་ལྷ་ཆེན་ཁྱབ་འཇུག་རྒྱུ་ཟེར་བ་དང་། ཡང་ཀོང་སྲིན་དང་རྟ་ཆུང་ཟེར་བ་དང་། ཡང་ཀོང་སྲིན་དང་རྟ་ཆུང་འགྲོག་སྲིན་བེའུ་རྫིལ་རྒྱུ་ཟེར་བའང་སྣང་། གནམ་སྟོང་ལ་རྒྱུ་བ་ནི་གོང་གི་རྒྱུ་རུར་འདུ་སྐར་མ་ལ་ནི་ཡབ་སྲིན་པོ་སྐང་མ་ཁྲ་༡༡སྟེ་དབོ། ཡུམ་ཀླུ་མོ་ལག་སོར་སྟེ་ལྷ་༡༦མཚམས། སྲས་ཁྱབ་འཇུག་
མགོ་༤ལ་རྒྱུ། དེ་བཞིན་སྟག་སྲིན་རྟ། ༩ བམ་སྲིན་ཝ། ༨ ཀོང་སྲིན་བྱ་སྦོ། ༢༡ འབྲོག་སྲིན་བྲེ། ༡༩ འཁོར་གཞན་རྣམས་དབྱུག་༡པར་རྒྱུ། 
13-7-36a


ཡང་བཅོ་ལྔར་ཡབ། ཉེར་གསུམ་༢༢ལའམ་དཔྱད་ཡུམ། ཉེར་དགུར་སྲས། བཞི་ལ་སྲིང་བཞི་རྒྱུ་བར་གསུངས་ཏེ་དེ་ཡང་ནུ་རུར་གཏོགས། དཔེ་ལ་ལར་ཟླ་བ་གང་རུང་གི་བྱི་རྟ་སྟག་སྤྲེལ་བཞིའི་ཉི་མ་ནམ་ཡོད་དང་དུས་ཚད་ལ་རྒྱུ་བ་འདི་གསང་བའི་རྒྱུ་དུས་སུ་གསུང་། དུས་ནི་སྟག་སྤྲེལ་རྟ་དང་བྱི་བའི་དུས་ལ་རྒྱུ་བར་
གསུངས། ཡང་ཐོད་བརྒལ་དུ་རྒྱུ་ལུགས། བཅུ་ལ་གཤིན་རྗེར་སྤྲུལ་ནུབ་བྱང་ནས་ཤར་ལྷོར་རྒྱུ། བཅུ་དྲུག་བི་ན་ཡ་ཀར་སྤྲུལ། བྱང་ཤར་ནས་ནི༷་ལྷོ་ནུབ་རྒྱུ།  ཉི་ཤུ་དམུ་བདུད་ཧ་ལི་ཀར་སྤྲུལ་ཏེ། བྱང་ནས་ལྷོར་རྒྱུ་ཞེས་བཤད། ཡང་ལུགས་གཅིག །བཅུ་གསུམ་བཅུ་དགུ་ཉི་ཤུ་གསུམ་ལ་ཉེར་དགུའང་རྒྱུ་བར་བཤད། ཡང་གསང་གཏེར་སྦས་ལྟར་རྒྱུ་བ། ཡར་གྱི་ཚེས་བརྒྱད་མར་གྱི་བཅུ་དྲུག །ཐ་མར་ཉི་ཤུ་བརྒྱད་ལ་རྒྱུ། དེ་དག་རྣམས་ལ་གསོད་ལས་འགྲུབ། 
ཡང་བཞི་བརྒྱད་བཅོ་ལྔ་བཅུ་དྲུག་ཉེར་གཉིས་ཉེར་བཞི་ལ་རྒྱུ་ཞེས་འདུག །ཡང་བཅུ་བཞིའང་འདུག །ཅེས་དང་། སྤྲུལ་པ་ལྟར་རྒྱུ་བ་ནི། ཡབ་ལྟར་རྒྱུ་བ་གནམ་སྟོང་ལ་རི་རབ་རྩེ་ནས་ཉིན་མོའི་དུས་སུ། ཡབ་ཅན་ནས་མཚོའི་གཏིང་དུ་རྒྱུ། ཡུམ་ལྟར་རྒྱུ་བ་ཚེས་གཅིག་ནུབ་མོ་ཡུམ་ཅན་སྟེ་རྒྱ་མཚོ་
ནས་སྟེང་དུ་རྒྱུ། འདི་དུས་ཐོག་སེར་དབབ་དང་ཧོམ་བྱེད་དམག་ལས་གནོད་ལས་བཟང་། ཡང་དཔྱིད་ཟླ་གསུམ་ལ་ཁྱད་པར་རྒྱུ་ཚུལ། དཔྱིད་ར་བར་གཤིན་རྗེར་སྤྲུལ་ཏེ་གཉའ་ཤིང་འཛིན་རིའི་ཁ་ནས་འཕེལ་བ་རྣམ་བཞི་རླུང་འཚུབ་གཏོང་། དཔྱིད་འབྲིང་ཀླུར་
བརྫུས་མ་དྲོས་མཚོར་གཞུང་འབྲལ་ཀླུ་འཇོག་པོའི་དབུ་འདེགས། ཀླུ་རྣམས་དྲོད་གཡོ་མཁའ་ལས་དྲོད་འབེབ་མཚོ་ལས་ཀླུ་རིགས་བཞིའི་འཕེལ་བས་ས་གཡོ་ཞིང་ཚེས་གཉིས་ལ་རྒྱུ། དཔྱིད་ཐ་ཆུང་མ་མོར་བརྫུས་ཏེ་དུར་ཁྲོད་དུ་མ་མོའི་འདུན་མ་བྱེད། འཕེལ་
13-7-36b


བ་བཞི་གཏོང་། ཕྱོགས་བཞི་ནས་འཚུབ་མ་དང་བཅས་ཚེས་གཉིས་ལ་རྒྱུ་ཞེས་གསུངས། ཕོ་ཉ་ལྟར་རྒྱུ་ལུགས་ནི་མགོ་སོགས་འགྱུ་བ་སྟེ་དཔྱིད་རའི་ཚེས་གཉིས་མགོ་ཚེས་དྲུག་མིག །ཚེས་དགུ་དཔུང་གཡས། བཅུ་གཅིག་དཔུང་གཡོན། བཅུ་གསུམ་སྙིང་། དཔྱིད་
འབྲིང་ཚེས་དྲུག་མིག །དགུར་མགོ བཅུ་གཅིག་ལ་སྙིང་། བཅུ་གསུམ་དཔུང་གཡོན་བཅུ་དགུ་གཡས་རྒྱུ་སྟེ། འདི་རྣམས་དུས་སུ་དྲག་པོའི་ལས་སྦྱོར་གང་ཡང་ཤིས། །ཕྱག་བརྙན་ལྟ་བུར་རྒྱུ་བ་ནི། །གསེར་གྱི་རི་བདུན་ཐ་མ་ལ། །སྐར་མ་ཕོད་དང་གདོང་མོ་
བཞི། །རླན་ལྷག་བད་ཀྱི་ཚུལ་དུ་གནོད། །སྟོན་གསུམ་བཅོ་ལྔའི་ཉི་ཕྱེད་ན། །བི་ཏྲི་པ་ཏྲ་མ་མོར་སྤྲུལ། །བྱང་ཤར་ནས་ནི་ལྷོ་ནུབ་རྒྱུ། །བཅུ་གཅིག་ནམ་ཕྱེད་སྨན་དུ་བརྫུས། །ལྷོ་ནས་བྱང་དུ་རྒྱུ་བའོ། །༡༨འང་ཚེས་བརྒྱད་སྐྱ་རེངས་ཤར་ཙ་ན། །བདུད་སྤྲུལ་ལྷོ་ནུབ་ནས་
བྱང་ཤར་དུ་རྒྱུ། །ཚེས་བཞི་ནམ་བྱིང་གཉན་དུ་བརྫུས། །ནུབ་བྱང་ནས་ནི་ཤར་ལྷོར་རྒྱུ། ༡༡ལྷོ་བཅོ་བརྒྱད་ཉི་དྲོས་བཙན་དུ་སྤྲུལ་ནས། །ནུབ་བྱང་ནས་ནི་ཤར་ལྷོར་རྒྱུ། །ཉེར་གཉིས་ཉི་མྱུར་དམུར་བརྫུས་ནས། །ཤར་ནས་ནུབ་ཏུ་རྒྱུ་བར་བྱེད་དོ། །ཉེར་ལྔའི་སྲོད་ལ་
སྲིན་པོ་རབ་རྫུས་ནས་བྱང་ནས་ལྷོར་རྒྱུ། ཉེར་དགུའི་ཉི་མྱུར་གཤིན་རྗེར་བརྫུས་ནས་བྱང་ཤར་ནས་ལྷོ་ནུབ་རྒྱུ་མ་དྲོས་མཚོ་ཡི་ནང་ན་རྒྱུ། དེ་དག་རྣམས་ལ་དྲག་ལས་བཟང་ཞེས་འདི་ཡང་སྟོན་གསུམ་ན་དུས་བརྒྱད་ཀྱི་རྒྱུ་ཚུལ་མི་འདྲ་བ་གཅིག་བྱེད་པའི་ཚུལ་ལོ། །གཞན་
ཡང་དྲག་པོའི་རྒྱུ་ཕྱོགས་བསམ་གྱིས་མི་ཁྱབ་པ་ཡོད་ཀྱང་འཇིག་རྟེན་ན་དབང་ཆེ་བ་ཚངས་དབང་ཁྱབ་འཇུག་སོགས་ཀྱི་དབང་མོ་ཆེ་འདི་དབང་ཕྱུག་ཉེར་བརྒྱད་དང་ངོ་བོ་གཅིག་པས་དེའི་རྒྱུ་ཚུལ་དུས་འཁོར་དང་དབྱངས་འཆར་ལས་ཀྱང་རྒྱུ་ཕྱོགས་མི་འདྲ་བའི་
13-7-37a


བཞེད་པ་སོ་སོར་གསུངས། འདིར་དུས་འཁོར་ལྟར་བརྗོད་ན། །ཟླ་བ་གང་ཡང་རུང་བ་ཡི། །ཚེས་གཅིག་དགུ་དང་བཅུ་དྲུག་དང་། །ཉེར་བཞི་ཤར་དུ་ཚངས་མ་གནས། །གཉིས་བཅུ་བཅུ་བདུན་ཉེར་ལྔ་ལ། །དྲག་མོ་བྱང་ནས་ལྷོ་རུ་རྒྱུ། །གསུམ་
དང་བཅུ་གཅིག་བཅོ་བརྒྱད་དང་། །ཉེར་དྲུག་ཤར་ལྷོར་གཞོན་ནུ་མ། །བཞི་དང་བཅུ་གཉིས་བཅུ་དགུ་དང་། །ཉེར་བདུན་ལྷོ་ནུབ་ཁྱབ་འཇུག་མ། །ལྔ་དང་བཅུ་གསུམ་ཉི་ཤུ་དང་། །ཉེར་བརྒྱད་ལྷོ་ལ་ཕག་མོ་གནས། །དྲུག་དང་བཅུ་བཞི་ཉེར་གཅིག་དང་། །ཉེར་
དགུ་ནུབ་ཏུ་དབང་མོ་གནས། །བདུན་དང་ཉེར་གཉིས་ཉ་སྟོང་གི། སྔ་ཆར་ནུབ་བྱང་ཙཱ་མུནྟྲི། །བརྒྱད་དང་ཉེར་གསུམ་ཉ་སྟོང་གི། ཕྱི་ཆར་བྱང་ཤར་དཔལ་མོའོ། །པད་འབྱུང་མཚོ་རྒྱལ་ཡབ་ཡུམ་ལ། །མཁའ་འགྲོའི་འདུ་ཚོགས་གདམ་པ་ནི། །ཊཱ་ཀིས་
ཕུལ་ལས་ཚེས་ཐེབས་ཕྱོགས། །དུས་འཁོར་ལས་གསུང་དེ་བཞིན་ལ། །ཤར་དུ་བྲམ་ཟེ་ཚངས་མ་དང་། །ཤར་ལྷོ་ལ་ནི་གཞོན་ནུ་མ། །ལྷོ་རུ་གཤིན་རྗེ་ཕག་ཞོན་མ། །ལྷོ་ནུབ་དག་ཏུ་ཁྱུང་ཞོན་མ། །ནུབ་ཀྱི་ཕྱོགས་སུ་དབང་མོ་སྟེ། །ནུབ་བྱང་ཕྱོགས་སུ་ཁྱུང་
གཤོག་མ། །བྱང་གི་ཕྱོགས་སུ་དྲག་མོ་དང་། །བྱང་ཤར་ཕག་མོ་ཞེས་སུ་གསུངས། །ཉ་སྟོང་ནུབ་བྱང་བཀོད་དེ་ལས། །སྔ་ཆ་ཕྱི་ཆའི་ཁྱད་པར་མེད། །ཚེས་དགུ་ཤར་དུ་མ་འགོད་པར། །བྱང་ཤར་བཀོད་ཙམ་ཁྱད་པར་རོ། །ཚེས་གྲངས་གང་ལ་
དྲག་ལས་སོགས། །རྩོམ་ཚེ་དེ་ཕྱོགས་རྒྱབ་གཏད་པས། །མདོས་ཟོར་ལ་སོགས་གང་བྱེད་ཀྱང་། །མཁའ་འགྲོ་མདུན་ཕྱོགས་ཕར་རྒྱུ་ཐེབས། །གཡས་བཞག་དགྲ་ཕམ་གཡོན་ནོར་རྙེད། །མཁའ་འགྲོའི་མདུན་དུ་ཁ་ཕར་བལྟས། །མདོས་ཟོར་གཡུལ་
13-7-37b


སོགས་བརྩམ་པ་ན། །དེ་དག་ཁྲོ་ཞིང་གདོང་ཐུག་པས། །རང་ཉིད་འཆི་སོགས་ཉེས་པ་འབྱུང་། །ཁྱད་པར་ཤར་གྱི་ཚངས་མའི་མདུན། །མདོས་ཟོར་སོང་ན་སློབ་དཔོན་ལ། །ངན་ཞིང་དགྲ་ལ་མི་ཐེབས་སོ། །དྲག་མོའི་ཕྱོགས་སུ་སྦྱིན་སྲེག་གི། ཐལ་བ་ཕོ་ན་བུད་མེད་
ངན།  །གཞོན་ནུ་མ་ལ་ཟོར་ལ་སོགས། །དྲག་ལས་སོང་ན་ཡོན་བདག་ངན། །ཁྱུང་ཞོན་མ་ཁྱབ་འཇུག་ལ་མདོས་དང་ཟོར། །སོང་ན་རབ་ཆད་བྱེད་དེ་ངན། །ཕག་ཞོན་མདོས་ཟོར་སོང་བ་ན། །གཞོན་རིམ་དག་ལ་ངན་པར་བཤད། །དབང་མོ་ལ་ནི་ཁྲག་ཟོར་སོང་། །བུ་
ཚ་འཆི་བར་བྱེད་དེ་ངན། །ཁྱུང་གཤོག་མ་ལ་མདོས་ཟོར་དང་། །གཏོར་ཟོར་སོང་ན་རང་ཉིད་འཆི། །ཕག་མོར་དམག་ཟོར་དྲག་ལས་སོགས། །བླ་མཆོད་ཡོན་བདག་གཉིས་ལ་ངན། །འདི་རྣམས་གང་ལའང་དེ་ཕྱོགས་སུ། །སྦྱིན་སྲེག་སྐྱས་དང་
བག་མ་དང་། །ཟོར་ལས་མཁར་ལས་མགྲོན་འགྲོ་སོགས། །གདོང་གཏུག་མི་བྱ་རྒྱབ་བརྟེན་བྱ། །དེ་ཡིས་བཀྲ་ཤིས་དོན་འགྲུབ་བོ། ༈ ད་ནི་སྒྲ་གཅན་དུས་ལ་རྒྱུ་ཐེབས་བཤད་དེ། འདི་ལ་ཐུན་ཕྱེད་དང་ཡུད་ཙམ་གྱི་རྒྱུ་ཚུལ་མང་དུ་བཤད་ཀྱང་། གཙོ་བོར་
ཟབ་གཏེར་ལས་བྱུང་བ་འདི་ཙམ་གྱིས་ཀྱང་དོན་འགྲུབ། ཉིན་ཞག་གཅིག་གི་དུས་ལ་དུས་ཐམས་ཅད་དུ་འདི་ལྟར་རྒྱུ་སྟེ། ཉི་མ་རྩེ་ཤར་ལ་ཤར་ནས་ནུབ་བྱང་དུ་རྒྱུ། ཉི་དྲོས་ལ་ནུབ་བྱང་ནས་ལྷོར། ཉིན་ཕྱེད་ལྷོ་ནས་བྱང་ཤར། ཉི་མྱུར་བྱང་ཤར་ནས་ནུབ། ཉི་ནུབ་
ནུབ་ནས་ཤར་ལྷོར། སྲོད་འཁོར་ཤར་ལྷོ་ནས་བྱང་། ནམ་ཕྱེད་བྱང་ནས་ལྷོ་ནུབ། ཐོ་རེངས་ནས་ནམ་ལངས་བར་ལྷོ་ནུབ་ནས་ཤར་དུ་རྒྱུ་སྟེ། དྲག་པོའི་ལས་སྦྱོར་རྣམས་ཁ་ལྟ་ཕྱོགས་འདི་དང་བསྟུན་ན་མཆོག་ཏུ་འཕགས་སོ། །འདི་སྐབས་རྒྱུ་ཕྱོགས་སོགས་རེ་
13-7-38a


ཟུང་བཻ་དཀར་སོགས་དང་མི་འདྲ་བ་ཡོད་ཀྱང་། མན་ངག་ཁུངས་ཐུབ་དང་བསྟུན་ནས་དག་པར་བགྱིས་པའི་ཕྱིར་འདི་ཁོ་ན་ལྟར་བཟུང་དགོས་སོ། །དྲེགས་པའི་རྒྱུ་ཕྱོགས་གང་ཡང་། རང་གི་རྒྱབ་ནས་མདུན་ཕྱོགས་རྒྱུ་ན་ཕར་ཐེབས་པར་རབ་
ཡིན། གཡས་ཕྱོགས་ནས་གཡོན་དུ་རྒྱུ་ཡང་གོང་དང་ཆ་འདྲ། མདུན་ནས་ཚུར་རྒྱབ་ཕྱོགས་རྒྱུན་གདོང་ཐུག་སྟེ་ལྡོག་པས་ངན། གཡོན་ནས་གཡས་སུ་རྒྱུ་ཡང་དེ་དང་ཆ་འདྲ་བར་ཤེས་པར་བྱས་ལ་དྲེགས་པ་རྣམས་རྒྱབ་དང་གཡས་སུ་བཞག་པར་བྱ་
དགོས་སོ། །དྲེགས་པའི་རྒྱུ་ཐེབས་རྣམས་མང་པོ་འཛོམ་ན་ནུས་པ་ཆེ་མོད་ཀྱི། གང་རུང་རེ་བརྩིས་ཀྱང་དོན་ཡོད་པས་ཅི་རིགས་པར་བརྩི་ལ། དེ་ཡང་གཞུང་ཚད་ལྡན་སོ་སོའི་ལུགས་ཐ་དད་པ་མང་བས་མཐའ་གཅིག་འདི་ཞེས་དམིགས་བསལ་དཀའ་ཡང་།
ཨོ་རྒྱན་སློབ་དཔོན་ཆེན་པོའི་ཡེ་ཤེས་ཀྱི་གཟིགས་པས་རྒྱུད་དང་ལུང་གི་གབ་པ་རྣམས་མངོན་དུ་ཕྱུངས་ཏེ་མན་ངག་གི་དགོངས་དོན་ཇི་ལྟར་ཕྱེས་པ་ལ་བསླུ་བ་མེད་པས་དེ་ཁོ་ནའི་རྗེས་སུ་འབྲངས་ཏེ་འདི་ལྟར་བཞག་པ་ལྟར་བྱ་དགོས་ལ། ཕྱོགས་ནས་རྒྱུ་བ་ཡང་སྤྱིར་
རྒྱབ་བརྟེན་བྱས་པ་རྣམས་དེ་ལྟར་ལ། མདུན་ནས་ཚུར་རྒྱུ་བ་རྣམས་ལའང་སྒྲིབ་བཅོས་གྲུབ་ན་དེ་ལྟར་དང་། མིན་ཀྱང་གསེར་སྐྱེམས་སོགས་ཕུལ་ལ། རང་ལྷའི་ང་རྒྱལ་གྱིས་རང་གི་འཁོར་དུ་བསྐོར་ཏེ་ཕར་རྦད་པའི་དམིགས་པ་བྱའོ། །སྤྱིར་ཐེབས་བཟློག་འདི་
ལ་རྒྱུད་དང་མན་ངག་གི་བཞེད་པས་ལུགས་སྣ་ཚོགས་ཡོད་དེ། དཔེར་ན་དུས་འཁོར་ལས། རྩ་བའི་སྒྲ་གཅན་དང་། དྲག་པོ་དུས་མཚན་རྣལ་འབྱོར་མ་རྣམས་དང་། དབྱངས་འཆར་ལས་རཱ་ཧུ་རྣམ་པ་བརྒྱད་སོགས་གསུང་པས་མཚོན་ཏེ་མང་དུ་སྣང་
13-7-38b


ཡང་། གཞུང་འདིར་བཤད་པ་ལྟར་སྤང་བླང་བྱས་པས་དོན་འགྲུབ་ལ། །རྒྱས་པར་སྤྲོས་ན་ཕྱོགས་ཐེབས་ཀྱི་སྐབས་སུ་རྩ་བའི་སྒྲ་གཅན་གཞིར་བྱས། དེ་སྟེང་གཟའ་བདུན་གྱི་གནས་ཕྱོགས་ཁྱིམ་རྩིས་དང་བསྟུན་ཏེ་བརྟག་པ་དང་། གཞུང་འདིར་
བཤད་པའི་སྒྲ་གཅན་སོགས་རྒྱུ་བས་རྣོ་བཏོན་དེ་སྟེང་ཐུན་ཕྱེད་དང་ཡུད་ཙམ་གྱི་རཱ་ཧུའི་མདེའུ་ཁ་སྒྱུར་ལུགས་ཀྱི་མན་ངག་ཁྱད་པར་ཅན་ཤེས་ན་དྲག་པོའི་ལས་ལ་ཐོགས་པ་མེད་པར་ཡིད་ཆེས་སུ་རུང་བ་ཡིན་ཏེ་བླ་མའི་ཞལ་ལས་ཤེས་པར་
བྱའོ། །དེ་ཡང་དཔེར་ན་ལྟོ་འཕྱེ་ཆེན་པོ་འཛམ་གླིང་ཙམ་ནས་བྲེ་ཞབས་ཙམ་གྱི་བར་གྱི་ཐིག་ནང་ལྟར་ཡོད་པར་གསུངས་པ་བཞིན། དྲེགས་པ་གདོས་བཅས་ཐོག་རེག་ཅན་ལྟ་བུ་མིན་ཞིང་དུས་ཀྱི་ཆ་འཛིན་པའི་རྫུ་འཕྲུལ་ཐོགས་མེད་ཙམ་ཡིན་
པས་དུས་དེ་ནམ་ཤར་ལ་དེ་ལྟར་རྒྱུ་བས་ཁྱབ་ཀྱི་རིགས་པའི་འགྲོ་འོང་ཕལ་པ་ལྟར་བསམ་གྱིས་མི་ཁྱབ་པས་ན། རྩིས་ཀྱི་དགོངས་ལམ་བཞིན་བརྩིས་ན་དེ་ལྟར་གྲུབ་པར་འགྱུར་བའི་ཕྱིར། ཐེབས་བཟློག་དུས་ཀྱི་གནད་ཡིག་ཁྱད་པར་ཅན་
འདི་ནི་གཞན་ལ་མེད་པའི་མན་ངག་ཁྱད་པར་ཅན། སྔ་འགྱུར་བའི་ལུགས་འཛིན་དྲག་སྔགས་མཁན་པོ་མཁས་བླུན་སུ་ལའང་ཕན་ཅིང་ལག་ལེན་དུ་ཁེལ་ལ་གསར་རྙིང་རྒྱུད་ལུང་མན་ངག་གི་དཔེ་མང་མང་རྒྱ་མཚོ་ལྟ་བུའི་སྙིང་པོའི་
བཅུད་འདི་ཁོ་ན་ཡིན་པས་གཞན་ལ་གསང་སྟེ་བཀའ་རྒྱས་བཏབ་ལ་སྔགས་འཛིན་སྐལ་བ་བཟང་པོ་ཅན་དག་གིས་རང་གཞན་དོན་གཉིས་སྒྲུབ་པའི་ཆ་རྐྱེན་དུ་ལོངས་སྤྱོད་ཅིག་ཅེས་དེ་ལྟར་གདམས་སོ། །ཅེས་པ་འདི་ཡང་རིག་
13-7-39a


སྔགས་འཛིན་པ་མི་ཕམ་རྣམ་རྒྱལ་ལམ། ཟིལ་གནོན་དགྱེས་པ་རྩལ་གྱིས་རབ་ཚེས་ས་ཁྱི་ནག་པ་ཟླ་བའི་ཚེས་བཅུ་ལ་རྫ་ཀླུང་གི་འགྲམ་བཤད་སྒྲུབ་ཆོས་གླིང་དུ་བྲིས་པ་འདིས་དམ་ལྡན་རྣམས་ཀྱི་རེ་བ་ཡོངས་སུ་སྐོང་བར་གྱུར་ཅིག །མངྒ་ལམ།།    །།
13-7-39b


empty page
13-8-1a


༄༅། །བརྟག་པ་སྣ་ཚོགས་པའི་སྐོར་ནོར་བུའི་མེ་ལོང་བཞུགས། 
13-8-1b


སྒྲུབ་པ་ལ་འཇུག་པའི་ཐོག་མཐའ་བར་གསུམ་གྱི་མཚན་མ་ནི། དང་པོར་དཀྱིལ་འཁོར་གྱི་ཡོ་བྱད་བསྒྲུབ་པ་དང་། རས་བྲིས་སོགས་དང་དངོས་གྲུབ་ཀྱི་རྫས་རྩམ་རྩོམ་པ་སོགས་ལས་ལ་དང་
པོར་འཇུག་པའི་ཚེ་ཕྱི་རོལ་དུ། ཁྲུང་ཁྲུང་ངང་པ་ངུར་པ་བཞད་སོགས་དགེ་བའི་བྱ་རྣམས་ནམ་མཁའ་ལ་འགྲོ་བ་མཐོང་བ་དང་། དེ་དག་གི་དགའ་བའི་སྐད་འདོན་པ། བྱ་ཤང་ཤང་ཏེའུ་དང་ནེ་ཙོ་སོགས་དགའ་བའི་སྐད་
འབྱིན་པ། རྔ་པ་ཊ་ཧ་དང་། རྔ་ཕྲན་དང་། རྔ་ཆེན།  རྫ་རྔ་ཆེ་ཆུང་། པི་ཝཾ་གླིང་བུ། འཁར་རྔ་དྲིལ་བུ་དང་། སིལ་ཁྲོལ་སོགས་རོལ་མོའི་སྒྲ་ཡིད་འོང་ཐོས་པ། སྐྱེས་པ་བུད་མེད་དམ་ཁྱེའུ་དང་བུ་མོ་རྣམས་ཀྱིས་བཅོས་མའམ་
བཅོས་མིན་གྱི་ཚིག་འདི་ལྟར། རྒྱལ་བ། གྲུབ་པ། ལེགས་པ། དགེ་བ། སྐྱིད་པ། དོན་གྲུབ་པ། འདི་སྦྱིན་ཅེས་དང་། བྱིས་པ་དང་། ལོངས་ཤིག་དང་། འབྲས་བུ་ཡོད་པ་ཞེས་སོགས་དང་། བཀྲ་ཤིས་ཀྱི་ཚིགས་
13-8-2a


བཅད་དང་། བརྒྱ་བྱིན་སོགས་ལྷ་དང་། ཆོ་གའི་གཏམ་དང་། རྒྱ་ཆེ་བ། མང་བ།  དཔལ་དང་། བཀྲ་ཤིས་སོགས་མདོར་ན་ཚིག་འབྲུ་ལེགས་པ་གང་དག་ཐོས་ན། སངས་རྒྱས་བྱང་སེམས་རྣམས་
ཀྱི་བྱིན་གྱིས་བརླབས་ནས་བདག་གིས་དངོས་གྲུབ་བསྒྲུབ་པ་དོན་ཡོད་དུ་སྙམ་དུ་ཤེས་པར་བྱ་སྟེ་དེ་རྣམས་དགེ་བའི་མཚན་མའོ། །དེ་ལས་བཟློག་ཏེ་སྤྲེའུ་བྱི་ལ་ཅེ་སྤྱང་བོང་བུ་མ་ཧེ་དང་། གཞན་ཡང་དུད་འགྲོ་སྨད་པའི་རིགས་
རྐང་གཉིས་དང་། རྐང་བཞི་པའི་སྒྲ་འདོན་པ་དང་། དེ་དག་རྣམས་ཀྱིས་ལམ་བཀག་པའམ་ལམ་དུ་འཕྲད་པ་དང་། སྦྲུལ་དང་སྡིག་པ་སོགས་སྲོག་ཆགས་མི་སྡུག་པ་མཐོང་བའམ་ལམ་བཀག་པ་དང་། མི་རྣམས་མྱ་ངན་
གྱི་ཆ་བྱད་དང་མི་སྡུག་པ་དབང་པོ་དང་ཡན་ལག་ཉམས་པ་འཇིགས་པ་མྱ་ངན་ཅན་མཐོང་བ་དང་། མི་རྣམས་གང་ཡང་རུང་བས་ཚིག་འབྲུ་མི་ལེགས་པ། ཕམ་པ། ཉམས་པ། ཤི་བ། ན་བ། རྒུད་པ། ཆོམས་ཤིག །ཟོ་ཤིག  །
13-8-2b


 ཀྱེ་ཧུད། རིང་བ། དཀའ་བ། མི་འགྲུབ་པ། དོན་མེད་པ་ལ་སོགས་དང་། སྨྲེ་སྔགས་ཀྱི་སྒྲ་དང་མདོར་ན་ཡིད་དུ་མི་འོང་ཞིང་ཚིག་འབྲུ་མི་ལེགས་པ་གང་ཐོས་ཀྱང་ལས་རྩོམ་པ་དེ་མི་འགྲུབ་ཅིང་མི་ལེགས་པར་ལྟའོ། །དེ་འདྲའི་མཚན་མ་ངན་པ་མཐོང་
ན་སྐབས་དེར་ལས་བརྩམ་པ་བསྐྱུར་ནས་གཞན་དུ་བརྩམ་པར་བྱའོ། །སླར་ཡང་བསྒྲུབ་པ་བསྐྱར་ཞིང་བརྩམ་ན་ལན་བདུན་པ་ལ་མཚམས་མེད་བྱས་པས་ཀྱང་འགྲུབ་ཅེས་གསུངས། གཞན་ཡང་སྐྱེས་པའམ་ཁྱེའུ་བུ་མོ་རྒྱན་བཟང་བ་དགའ་ཞིང་རྩེ་བ་
དགོད་པ། སྦྲུམ་མ་བུ་ཐོགས་པ། བ་སོགས་ཕྲུག་གུར་བཅས་པ། དགེ་སྦྱོང་མཛེས་པ། སྐྱེས་བུ་གྲགས་ལྡན། བྲམ་ཟེ་གོས་དཀར་པོ་གྱོན་པ། བུད་མེད་གཟུགས་བཟང་མོ་རྒྱན་གྱིས་མཛེས་པ། ན་ཆུང་གི་ཚོགས་འདུ་ཞིང་རྩེ་བ། ཤིང་རྟ་དང་རྟ་
དང་གླང་པོ་ཆེའི་རིགས་དང་། རྒྱལ་མཚན་དང་བ་དན་སོགས་བསྒྲེང་བ། ལག་ན་བཀྲ་ཤིས་པའི་རྫས་ཐོགས་པ་མཐོང་བ། འཇིག་རྟེན་ན་མཆོད་ཅིང་བསྔགས་པའི་རིགས་ཐམས་ཅད་དང་། གཞན་ཡང་བཀྲ་ཤིས་པའི་རྫས། རྡོ་རྗེ། དཔལ་
བེའུ། དུང་རྒྱལ་མཚན། འཁོར་ལོ། གདུགས། བུམ་པ། ཉ་དང་། པདྨ། མེ་ཏོག་གི་ཕྲེང་བའམ་ཕོན་པོ་དང་སིལ་མ་སོགས་དང་། མེ་ལོང་ལ་སོགས་རྫས་བརྒྱད། རྒྱལ་སྲིད་བདུན། སྒྲུབ་པའི་རྫས་ཀྱི་རྣམ་པ་སྣ་ཚོགས་ཕྲེང་བ་ཅོད་པཎ།
ནོར་བུ། ལྕགས་ཀྱུ། གཡུང་དྲུང་། རྩྭ་ཀུ་ཤ སྨན་དང་། འབྲུ་སྣ་ཚོགས་སོགས་མདོར་ན་བཀྲ་ཤིས་ཤིང་ཡིད་དུ་འོང་བའི་གཟུགས་མཐོང་བ་དང་། རང་ལ་གཞན་གྱིས་སྟེར་བ། ཁྱེའུ་སོགས་བཀྲ་ཤིས་པའི་སྲོག་ཆགས་ཀྱི་རིགས་རང་ལ་དགའ་
13-8-3a


ཞིང་འདུ་བ། དྲི་ཞིམ་པ་ཚོར་བ། འོད་དང་འཇའ་དང་གློག་དང་ཆར་དང་སེར་བུ་དང་། འབྲུག་གི་སྒྲ་སོགས་ཡིད་དུ་འོང་བ་ཐོས་པ། རིག་བྱེད་ཀྱི་དབྱངས། རྒྱལ་ཞིང་བདེ་ལེགས་ཀྱི་སྒྲ། འབྲས་ཡོས་དང་དཀར་གསུམ་མངར་གསུམ་
དང་། རོ་ལྡན་གྱི་ཟས་ཤིང་ཐོག་སོགས་སྣ་ཚོགས། མཆོད་ཡོན་དང་བུམ་པ་གང་བ་སོགས་དང་། སྣོད་གང་བ། མཚུན་གཏོར་སོགས་མིན་པའི་མཆོད་པའི་རྫས་ཡིད་དུ་འོང་བ་ཐོགས་པ། དགའ་སྟོན་བྱེད་པ། མེ་ལེགས་པར་
འབར་བ། ཟས་ལེགས་པའི་གཡོས་བྱེད་པ་སོགས། མདོར་ན་གཟུགས་སྒྲ་དྲི་རོ་རེག་བྱ་ཡིད་དུ་འོང་བའི་རིགས་གང་བྱུང་བ་དགེ་བའི་མཚན་མ་སྟེ། དེ་དག་ནམ་མཁའ་ནས་བྱུང་ན་ལྷ་རྣམས་ཀྱིས་ལྟས་ཏེ་དངོས་གྲུབ་རབ་དང་། བར་སྣང་ལས་
བྱུང་བ་ཐམས་ཅད་འབྲིང་། ས་གཞི་ལས་བྱུང་བ་ཐ་མ་སྟེ་ཐམས་ཅད་ཀྱང་དགེ་བའི་ལྟས་ཡིན་ལ། དེ་ལས་བཟློག་པའི་གཟུགས་སོགས་ཡིད་དུ་མི་འོང་བ་ཐམས་ཅད་མི་དགེ་བའི་མཚན་མའོ། །ནང་དུ་རང་གི་ཡིད་དགའ་ཞིང་སྤྲོ་ལ་དྭངས་པ་དང་།
དཔའ་ཞིང་མི་ཞུམ་པ། གསལ་ཞིང་མཆོག་ཏུ་བདེ་བ་ནི་རབ་ཏུ་དགེ་བའི་མཚན་མའོ། །གཞན་ཡང་ཤིན་ཏུ་ངོ་མཚར་ཆེ་བའི་རིགས་དང་། འཇའ་འོད་དང་མེ་ཏོག་གི་ཆར་འབེབས་པ། ནམ་མཁའ་ལས་ལྷ་རྣམས་ཀྱི་རོལ་མོ་དང་མཆོད་པ་
དང་བཅས་ཏེ་ལེགས་སོའི་སྒྲ་འབྱིན་པ། གཏེར་དང་རིན་པོ་ཆེའི་རིགས་རྙེད་པ། དམ་པ་རྣམས་ཀྱིས་བསྔགས་ཤིང་སྐྱེས་སྟེར་བ་སོགས་དངོས་གྲུབ་ཆེན་པོའི་མཚན་མ་སྣ་ཚོགས་ནི་དམ་པ་མཆོག་རྣམས་ལས་གཞན་དག་ལ་འབྱུང་བ་མེད་དོ། །
13-8-3b


གོང་བཤད་མཚན་མ་བཟང་པོ་འདི་རྣམས་ནི་སྒྲུབ་པའི་དུས་མིན་ཡང་། ཐ་མལ་གྱི་བྱ་བ་ཅི་རྩོམ་ཡང་དགེ་བའི་ལྟས་སུ་ཤེས་པར་བྱའོ།  །ལམ་དུ་འཇུག་པ་སོགས་ཀྱི་ཐོག་མར་ཡང་། རང་གི་ཡོ་བྱད་ཆག་ཉམས་དང་སྲོག་ཆགས་ཀྱིས་ཟོས་
པ། སྣོད་སྟོང་པ་དང་བཀྲ་མི་ཤིས་པའི་རྒྱན་མེ་ཏོག་དམར་པོ་དང་ཏིལ་མར་བྱུག་པ་སོགས་གཤིན་གྱི་ལས་དང་ཆ་འདྲ་བ་ཐམས་ཅད་དང་། གང་ཟག་མི་ཤིས་པ་དང་འཕྲད་པ། འཇིགས་སྐྲག་མྱ་ངན་ཅན་དང་།  རྟབ་ཅིང་མི་བདེ་བ་དང་
འཕྲད་པ། གཏམ་ངན་སྨྲ་བ། རང་ལ་ཁྲོ་ཞིང་འཐབ་པ། ལམ་འགོག་པ། ཁང་པ་རྡིབ་པ། མེས་ཚིག་པ། རོ་ཁུར་བ། དངོས་པོ་ཆག་ཉམས་བཅོམ་པ་སོགས་ཐམས་ཅད་བློས་དཔྱད་ལ་མི་དགེ་བའི་མཚན་མར་ཤེས་པར་བྱའོ། །
ཡང་དབང་སོགས་ཀྱི་སྟ་གོན་གྱི་དུས་སམ། སྒྲུབ་པའི་དུས་སོགས་སུ་རྨི་ལམ་གྱི་མཚན་མ་བཟང་ངན་ནི་དེ་བཞིན་གཤེགས་པའི་སྐུ་མཚན་དཔེས་བརྒྱན་པ་མཐོང་ན་ཡོན་ཏན་རྒྱ་མཚོ་མངོན་དུ་འགྲུབ་བོ། །སངས་རྒྱས་དེས་ཆོས་སྟོན་
པ་དང་། རྫུ་འཕྲུལ་འགྱེད་པ་སོགས་དང་ལུང་སྟོན་པ་ནི་རབ་བོ། །གཞན་ཡང་བྱང་ཆུབ་སེམས་དཔའ་ཆེན་པོ་རྣམས་དང་འཕགས་པའི་གང་ཟག་དམ་པ་རྣམས་མཐོང་བ་ནི་དགེའོ། །དགེ་སྦྱོང་དང་། གླེགས་བམ། ཆོས་ཀྱི་གཏམ་སྨྲ་བ་
ཆོ་ག་དང་རྒྱུད་འཆད་པ་སོགས་མདོར་ན་དཀོན་མཆོག་གསུམ་ལས་གང་རུང་རྨིས་ཀྱང་ལེགས་པའི་མཚན་མ་རབ་བོ། །གཞན་ཡང་གཙུག་ལག་ཁང་དང་། སྐུ་རྟེན་ཡིད་འོང་ཚིག་བཅད་ཀྱི་སྒྲ། དཀོན་མཆོག་ལ་མཆོད་པ་རང་ངམ་གཞན་གྱིས་བྱེད་པ། 
13-8-4a


ཆོ་ག་དང་སྒྲུབ་པ་ལ་འཇུག་པ། ཆོས་སྤྱོད་བཅུའི་བྱ་བ་ལ་འཇུག་པ། མཆོད་རྟེན་ལེགས་པ། གླེགས་བམ་ཀློགས་པ། ཆོས་འཆད་པ་སོགས་ཀྱང་དགེའོ། །དངོས་གྲུབ་རབ་ཀྱི་མཚན་མ་ནི།  སངས་རྒྱས་བྱང་སེམས་
སམ་ཡི་དམ་གྱི་ལྷ་དང་དྲང་སྲོང་སོགས་ཀྱིས་ལུང་སྟོན་པ། ཆོས་ཟབ་མོ་འཆད་པ། སེང་གེའི་ཁྲི་ལ་དབང་བསྒྱུར་བ། ཅོད་པཎ་བཏགས་པ། ཁྲུས་བྱེད་པ། རྡོ་རྗེ་སོགས་ཕྱག་མཚན་དང་། བཀྲ་ཤིས་པའི་རྫས་སྦྱིན་པ། རང་རྒྱལ་པོར་གྱུར་པ་སོགས་
ཤིན་ཏུ་ལེགས་ཏེ། དབང་བསྐུར་ཐོབ་པ་དང་། དངོས་གྲུབ་རྒྱ་ཆེན་པོ་འབྱུང་བའི་རྨི་ལམ་གང་ཟག་སྐལ་བ་ཆེན་པོ་དང་ལྡན་པ་ལས་འབྱུང་ངོ་། །དེ་སོགས་ཆོས་ཀྱི་ཕྱོགས་དང་འབྲེལ་བའི་རྨི་ལམ་ཐམས་ཅད་བཟང་ངོ་། །གཞན་ཡང་། རང་གི་ཕ་མ་དང་
སློབ་དཔོན། བརྒྱ་བྱིན་སོགས་ལྷ་དང་། མིའི་གང་ཟག་གྲགས་པ་དང་སྐལ་བ་ལྡན་པ། བུད་མེད་བཟང་མོ་རྒྱན་བཟང་། མཛའ་བཤེས་དང་གྲོགས་སོགས་དང་གཞན་ཡང་ཡིད་དུ་འོང་བའི་སྐྱེ་བོའི་ཚོགས་ཀྱིས་རང་ཉིད་བཀུར་བ་དང་། དགའ་བའི་
གཏམ་བྱེད་པ་དང་། ཟས་དང་ནོར་སྦྱིན་པ་སོགས་ཡིད་དགའ་བའི་ཕྱོགས་རྣམས་གང་ཡང་བཟང་། གླང་པོ་རྟ་དང་བ་ལང་དང་སེང་གེ་སོགས་རི་དྭགས་ཀྱི་ཚོགས་དང་། རི་དང་། ལྗོན་ཤིང་བཟང་པོ་དང་འབབ་ཆུ་དང་། རྒྱ་མཚོ་དང་སྐྱེད་མོས་ཚལ་དང་།
མེ་ཏོག་གི་ཚལ་དང་ཆར་འབེབ་པ། འབྲས་བུ་སྨིན་པ། རྒྱལ་པོ་དང་། དཀའ་ཐུབ་ཅན། བྲམ་ཟེ། ཕྱུག་པོ། དགེ་བའི་བཤེས་དང་། ངང་པ་སོགས་བཀྲ་ཤིས་པའི་བྱ་རྣམས་དང་། གསེར་དང་། གཏེར་དང་། རིན་པོ་ཆེ་སྣ་ཚོགས། འབྱུང་ཁུངས་སྣ་
13-8-4b


ཚོགས། མཚོན་ཆ་བཟང་པོ། འབྲུ་སྣ་ཚོགས། རྒྱན་དང་། གོས་དང་། ཟས་དང་ཁང་བཟང་དང་ཡོ་བྱད་སྣ་ཚོགས་དང་། བྱིས་པ་གཞོན་ནུ་རྒྱན་བཟང་རྣམས་རྨི་ལམ་དུ་མཐོང་བའང་དགེའོ། །བྱིས་པ་བཟང་པོ་སོགས་ཕ་རོལ་པོ་དག་གིས་བདག་ལ་ཟས་
ནོར་དང་ཕྲེང་བ་སོགས་སྦྱིན་པ་རང་རྒྱན་བཟང་། མཚོན་ཐོགས། གོ་གྱོན་ནས། དགྲ་བསད་པ། གཡུལ་ལས་རྒྱལ་བ། སྟོབས་འགྲན་པས་རང་རྒྱལ་བ། ནམ་མཁར་འཕུར་བ། ཡམ་ཤིང་གི་སྦྱིན་སྲེག་བྱེད་པ། ལྷ་དང་གཉེན་དང་འཕྲད་ཅིང་འགྲོགས་
པ། རྟ་དང་ཤིང་རྟ་དང་ཁྱོགས་ཀྱི་བཞོན་པ་བཟང་པོ་ལ་ཞོན་ནས་བདེ་བར་འགྲོ་བ། རང་ཉིད་རི་དང་ཁང་པ་དང་སྐས་ལ་གྱེན་དུ་བདེ་བླག་འགྲོ་བ་བཟང་། ཁྱད་པར་ཁྱུ་མཆོག་དང་གླང་པོ་ཆེ་དང་སྟག་དང་འབྲུག་དང་སེང་གེ་དང་ཁྱུང་དང་གྱི་ལིང་ཅང་ཤེས་
སོགས་ཡ་མཚན་པའི་བཞོན་པ་དང་ཉི་ཟླ་ལ་ཞོན་ནས་གྱེན་དུ་ནམ་མཁའ་ལ་འགྲོ་བའམ། གླིང་བཞི་བསྐོར་བ་སོགས་ཁྱད་པར་དུ་བཟང་། གཏེར་དང་གྲུབ་པའི་རྫས་དང་ནོར་བུ་བུམ་བཟང་སོགས་རྙེད་པའང་དགེ་བའི་མཚན་མ་ཆེན་པོའོ། །མཚོ་དང་
རྒྱ་མཚོ་ལ་བདེ་བར་རྐྱལ་བ་དང་། ཕ་རོལ་དུ་ཕྱིན་པ་འདམ་རྫབ་དང་དམག་དང་གཅན་གཟན་དང་འཕྲང་སོགས་ཉམ་ང་བའི་ཡུལ་ནས་བདེ་བར་ཐར་བ། ཉི་ཟླ་ཤར་བ། ཞིང་རྨོ་བ། འབྲུ་དང་ལོ་ཏོག་རྒྱས་པ་ཤིང་འབྲས་བུ་དང་ལྡན་པ། ཞོ་འོ་མར་དང་འབྲས་
ཡོས་ཤིང་ཐོག་སོགས་རོ་ལྡན་ཡིད་འོང་གི་ཟས་ཟ་བ། རྒྱལ་མཚན་དང་བ་དན་བསྒྲེང་བ། དར་ཕྱར་བ། རྔ་དང་དུང་སོགས་རོལ་མོ་སྙན་པར་བསྒྲགས་པ། ལྷ་དང་མིའི་ཁྲོམ་ཆེན་པོའི་ཚོགས་དཔོན་བྱེད་ཅིང་དབང་བསྒྱུར་བ། ཕྱི་རོལ་གྱི་འབྱུང་བ་
13-8-5a


ཆེན་པོ་དང་། ནང་གི་སྐྱེ་འགྲོའི་ཚོགས་ལ་ཇི་འདོད་པར་དབང་བསྒྱུར་བ། རང་གི་ལུས་ངག་ཡིད་གསུམ་སྔར་ལས་ཡོན་ཏན་འཕགས་ཤིང་སྟོབས་དང་གཟི་བརྗིད་ཆེ་བ།  ཇི་ལྟར་བསམ་པ་ལྟར་ཐོགས་མེད་དུ་གྲུབ་པ། 
གཞན་ལས་རང་ཉིད་ཁྱད་དུ་འཕགས་ཤིང་དཔའ་གདིང་ལྡན་ལ་ཡིད་ཚིམ་པ། བཀྲ་ཤིས་དང་ཀུན་དགའ་ངོ་མཚར་བའི་རྣམ་པ་སྣ་ཚོགས་དང་། དགའ་བའི་རྩེད་མོ་སྣ་ཚོགས་བྱེད་པ། བྱ་བ་བཟང་པོ་ལ་འཇུག་པ་ཐམས་ཅད་བཟང་། ཡང་
པདྨ་ལ་འདུག་པ་ནི་རྨི་ལམ་མཆོག་གོ། པདྨ་དང་ལྷ་མཐོང་བ། མེ་ཡི་ཕུང་པོ་འབར་བ་མཐོང་བ། ཁྱུ་མཆོག་དང་བ་ལང་དང་རྟ་དཀར་པོའི་ཁྱུ་མཐོང་བ་བཟང་། ཡང་ངན་པ་ལྟར་སྣང་ཡང་མཆོག་ཏུ་བཟང་བའི་རྨི་ལམ་ནི། རང་གི་མགོ་བོ་གཅོད་
པ་བདག་འཛིན་གཅོད་པའི་ལྟས། ཤ་ཆེན་ཟ་བ། ལུས་ཁྲག་གིས་འཁྲུ་བ་དང་བྱུག་པ། ཆང་འཐུང་བ། སྐྲ་བྲེག་པ། ལུས་ཚིག་པ་སྒྲིབ་པ་དག་པ། ཤིང་ནྱ་གྲོ་རྡར་འཛེགས་པ། མི་གཙང་བར་ནུབ་པ། རང་གི་རྒྱུ་མས་རྙེད་པ་དང་རྒྱལ་པོར་འགྱུར་གྲོང་གྲོང་མཐའ་བསྐོར་བ། ཡིད་འོང་བུད་མེད་དང་ཉིན་མོ་
ཉལ་བ་རྣམས་བཟང་ངོ་། །བྱ་རྒོད་ཀྱིས་རྒྱུ་མ་ཟ་བ་དང་། ཐང་ཆེན་པོ་མཐོང་བའང་རྒྱལ་པོར་འགྱུར་བའི་མཚན་མར་ནག་པོ་ཆེན་པོའི་རྒྱུད་ལས་གསུངས་སོ། །ཡང་དངོས་གྲུབ་ཉེ་བའི་མཚན་མ་ནི། ཚངས་པ་སོགས་ལྷའམ་
མིས་རྨི་ལམ་དུ་གཏམ་སྣ་ཚོགས་སྨྲ་བ། བུ་ལེགས་སོ་ཟེར་བ་དང་། བློ་ལྡན་སོགས་བསྔགས་པའི་སྒྲ་ཐོས་པ་རྨི་བ་དང་། སངས་རྒྱས་བྱང་སེམས་རྣམས་ཀྱི་སྐུ་འོད་དང་བཅས་པ་མཐོང་བ། དེ་དག་དང་ལྷ་རྣམས་ཀྱིས་ལས་འདི་ལྟར་གྱིས་
13-8-5b


ཞེས་ལུང་སྟོན་པ། རང་གི་ལྷའི་སྐུ་གཟུགས་དང་ཡི་གེ་གསལ་བར་མཐོང་བ། ཕྱོགས་བཅུའི་སངས་རྒྱས་མཆོད་ཅིང་ཐུགས་དགྱེས་ཏེ་རང་ལ་ཆོས་སྟོན་པ། རྒྱལ་བ་དང་རྒྱལ་བའི་སྲས་བྱང་སེམས་རྣམས་དང་ལྷ་ཆེན་པོ་རྣམས་དང་། རྒྱན་རྫོགས་
པའི་ལྷ་ཡི་བུ་དང་། བུ་མོའི་ཚོགས་ཀྱིས་རང་ལ་མཆོད་པར་བྱེད་པ། ཀུན་དགའ་ར་བ་དང་སྐྱེད་མོས་ཚལ་ན་ལྷའི་བུ་མོའི་ཚོགས་བསྐོར་བའི་རིག་པ་འཛིན་པའི་རྒྱལ་པོ་རྣམས་ཀྱིས་རང་ལ་མཆོད་པ་བྱེད་པ། ཁང་བཟང་དང་ལྗོན་ཤིང་རི་བོ་དང་
རྒྱ་མཚོ་འབབ་ཆུ་ཆུ་ཀླུང་རྫིང་བུ་སོགས་གནས་ཉམས་དགའ་བར། ཁྲི་དང་མལ་སྟན་དཀར་པོ་བཏིང་བར་རང་འདུག་ཅིང་། རིན་པོ་ཆེའི་རྒྱན་སྣ་ཚོགས་དང་། གདུགས་དང་རྒྱལ་མཚན་བ་དན་དང་ནོར་བུའི་རྒྱན་ཕྲེང་དང་གོས་བཟང་པོས་བརྒྱན་ཅིང་། ནོར་བུ་
མུ་ཏིག་ཉ་ཕྱིས་དུང་དང་དངུལ་སོགས་རིན་པོ་ཆེ་ལ་ལོངས་སྤྱོད་པ་དང་། མཆོད་རྟེན་དང་གླེགས་བམ་དང་། ལྷ་ཡི་གཟུགས་དང་ཨུཏྤལ་དམར་པོ་དང་། དྲི་སྣ་ཚོགས་དང་། ཤ་ཆང་ཉ་དང་ཤིང་ཏོག་འབྲས་བུ་སོགས་རོ་ལྡན་གྱི་ཟས་བཟའ་བ་དང་།
ཉན་རང་དང་དགེ་སློང་སོགས་འཁོར་བཞི་དང་། རྒྱལ་པོ་དང་བྲམ་ཟེ་དང་མཆོད་གནས་དང་ཕ་མ་སོགས་རང་གི་གཉེན་རྣམས་དང་མི་གྲགས་ལྡན་ཕྱུག་ཅིང་སྐལ་པ་བཟང་པོ་རྣམས་དང་། ཀླུ་དང་གནོད་སྦྱིན་དང་གྲུབ་པའི་ལྷ་སོགས་མི་མ་ཡིན་
པའི་ཚོགས་དང་། གཞོན་ནུ་དང་གཞོན་ནུ་མ་རྣམས་ཀྱིས་རང་ལ་མཆོད་ཅིང་རྗེད་པ་དང་། གདུགས་དཀར་རྔ་ཡབ་ལྷྭམ་དང་རལ་གྲི་བསིལ་ཡབ་གསེར་གྱི་ཡུ་བ་ཅན་ཏེ། དབང་ཕྱུག་དང་ལྡན་པ་རྣམས་ཀྱི་རྟགས་དང་མཚན་མ་རང་གིས་འཆང་
13-8-6a


བ་དང་། གོང་བཤད་ལྟར་ཅང་ཤེས་ཁྱུ་མཆོག་སེང་གེ་འབྲུག་སོགས་ཞོན་ནས་བདེ་བར་འགྲོ་བ་དང་། སྒྲ་དང་ལྡན་པའི་སྤྲིན་ལས་རིན་པོ་ཆེ་དང་མེ་ཏོག་གི་ཆར་འབེབས་པ་དང་། ཤིང་རྟ་གང་བ་དང་། བ་གཞོན་ནུ་བེའུ་ཕྲུག་
ཅན་སོགས་ཀྱི་ཁྱུ་ལ་ལོངས་སྤྱོད་པ་དང་། ཉི་མ་དང་ཟླ་བ་ཁོང་དུ་མིད་པ་དང་། ས་ཡི་ནང་དུ་ཞུགས་ཏེ་ས་བོན་འཐུང་བ་དང་། རྒྱ་མཚོ་ཆེན་པོ་ཧུབ་ཀྱིས་འཐུང་བ་དང་། མེ་ལ་ཅི་འདོད་དུ་བརྗི་ཞིང་མེ་རང་གི་ལུས་ཀྱི་ནང་དུ་ཞུགས་པ་སོགས་རྨིས་ན། 
གསང་སྔགས་ཉེ་ཞིང་རིང་པོར་མི་ཐོགས་པར་འགྲུབ་པའི་མཚན་མ་སྟེ། དེ་ནས་བཟླས་པས་ཟླ་བ་དང་ཟླ་ཕྱེད་ཉིན་ཞག་དང་སྐད་ཅིག་གིས་རིམ་པས་ཕྱི་ཕྱིར་སྔགས་ཇེ་ཉེར་འགྱུར་ཞིང་མྱུར་དུ་འགྲུབ་པར་འགྱུར་རོ། །ཡང་བར་ཆད་འབྱུང་བའི་རྨི་ལམ་
ནི། ནང་དུ་སྒོ་གསུམ་བག་མི་ཕེབ་ལ། རྨི་ལམ་དུ་སྟག་གཟིག་སེང་གེ་ཁྱི་ཕག་བོང་བུ་མ་ཧེ་རྔ་མོང་ཅེ་སྤྱང་བྱི་བ་སྡིག་པ་སྲེ་མོང་སྦྲུལ་བྱི་ལ་བྱ་རྒོད་འུག་པ་བཞད་བྱ་རོག་སྐྱར་མོ་རྣམས་དང་མི་ཐུང་ཧྲུལ་པོ། མི་ནག་པོ་གཅེར་བུ་ཐལ་རིས་ཅན་དང་
བཞིན་བསྒྱུར་ཞིང་རལ་གྲི་ཐོགས་པ། བྲམ་ཟེ་མདོག་ནག་པོ། བཤན་པ་དང་། བྱིས་པ་ཐལ་སྐྱ། མི་རིང་གཅེར་བུ་སོགས་མི་སྡུག་པའི་གཟུགས་སྣ་ཚོགས་དང་ལྡན་པ་དང་འཕྲད་པ་རེག་པ་གཏམ་སྨྲ་བའམ། དེ་དག་གིས་རྒོལ་བ་དང་། 
ཁྲོན་པ་སྐམ་པོ། ཐོད་པ་དང་རུས་གོང་གི་ཕུང་པོ། ལྕགས་མང་པོ་དང་། ཁང་རུལ་སོགས་གདོན་གྱི་རྟགས་ཡིན་པས་སྲུང་བ་དང་ཞི་བའི་ཐབས་བྱའོ། །གསང་བ་སྤྱི་རྒྱུད་སོགས་ལས། དཀྱིལ་འཁོར་སོགས་ཀྱི་ལས་བྱེད་དུས། གློ་
13-8-6b


བུར་ཅེ་སྤྱང་གི་སྒྲ་གྲགས་ན། གཏོར་མ་ཡང་ཡང་བྱིན། གཞན་ཡང་ཅེ་སྤྱང་སོགས་སྲོག་ཆགས་མི་ཤིས་པའི་སྒྲ་དང་། སྒྲ་ཆེན་པོ་དང་། འབྱུང་པོའི་གཟུགས་སྣ་ཚོགས་སྣང་བ་དང་། ལྗོན་ཤིང་གི་ཡལ་ག་ཆག་པ་དང་། འབྲུག་གི་སྒྲ་དྲག་པོ་གྲགས་པ་དང་། 
གཞན་ཡང་ལྟས་མི་བཟང་བ་སྣ་ཚོགས་གང་ཅི་བྱུང་ན་དེ་ཕྱོགས་སུ་གཏོར་མ་ཅི་རིགས་བྱིན་ནས། སྲུང་བ་ནན་ཏན་བྱ་བར་གསུངས། རྨི་ལམ་ངན་པ་གང་དག་གདོན་རྟགས་དང་གོང་གི་བཟང་པོ་རྣམས་ལས་བཟློག་ཏེ་གཟུགས་མི་སྡུག་པ། སྒྲ་མི་སྙན་པ། 
དྲི་མི་ཞིམ་པ། རོ་མི་ཞིམ་པ། རེག་བྱ་ཡིད་དུ་མི་འོང་བ། སེམས་ཅན་དམན་པ་མི་སྡུག་པ་དང་དགྲས་འཚེ་བ། གཅན་གཟན་དང་། དམག་སོགས་ཀྱིས་དེད་པ། ས་ལ་རྒྱུག་མཆོང་དང་གར་བྱེད་པ། གླུ་ལེན་པ། དགོད་པ། འབྲུ་མར་གྱིས་
ལུས་བསྐུས་པ། གཅེར་བུ་དང་། ཞར་འཐེང་རྒུར་པོ་མི་སྡུག་པ་དང་འཕྲད་དེ་གཏམ་སྨྲ་བ། རྩེ་གསུམ་སོགས་གདེང་པའི་མི་སྡུག་པའི་གཟུགས་ཅན་སོགས་ཀྱིས་བསྡིགས་ཤིང་། གནོད་པ་བྱེད་པ་ལ། མུན་པ་འཐིབ་པ། ཉི་ཟླ་ནུབ་པ། 
རླུང་སོགས་འབྱུང་བཞིས་གནོད་པ། རྒྱ་སྐག་དང་། བྱེ་མའི་རི་ལ་འཛེག་པ། བོང་བུ་རྔ་མོང་སོགས་ཞོན་ནས་ལྷོ་ཕྱོགས་སུ་འགྲོ་བ། ལམ་འཕྲང་བགྲོད་དཀའ་བ། འདམ་རྫབ་དང་མི་གཙང་བའི་ཁྲོད་དུ་ཉུལ་བ། ཐུར་དུ་རྒྱུག་པ། ལུས་དང་
ཡན་ལག་དང་ཡོ་བྱད་ཆག་པ་ཉམས་པ། གཞན་ལས་ཕམ་པ། མི་དགེ་བའི་ལས་བྱེད་པ་སོགས་ཡིད་དུ་མི་འོང་ཞིང་ཡིད་ལོག་པའི་རིགས་ཐམས་ཅད། ཚེ་དང་བསོད་ནམས་ལ་གནོད་པ་དང་ལས་ཀྱི་སྒྲིབ་པའི་རྟགས་ཡིན་ཏེ་དངོས་གྲུབ་
13-8-7a


འགྲུབ་དཀའ་བས།  བཤགས་པའི་རིགས་བྱ་ཞིང་། བསོད་ནམས་བསགས། སྟོང་ཉིད་བསྒོམ། ཞི་བའི་སྦྱིན་སྲེག་སོགས་ཀྱིས་ཞི་བར་བྱས་ནས་སླར་བརྩམ་པར་བྱའོ། །དེ་ལྟར་བསྙེན་སྒྲུབ་སྤྱིའི་དུས་
སུ་དགེ་མི་དགེའི་ལྟས་དང་རྨི་ལམ་གྱི་མཚན་མ་བསྟན་པ་འདིས་མཚོན་ནས། དངོས་སུ་མ་བཤད་པ་རྣམས་ཀྱང་དགེ་མི་དགེའི་མཚན་མ་གང་དང་གང་གི་ཆ་དང་འདྲ་བར་རང་བློས་ཤེས་པར་བྱ་ཞིང་། ཞི་སོགས་ལས་སོ་སོ་དང་མཐུན་པའི་ལྟས་
དང་རྨི་ལམ་རྣམས་ཀྱང་ཤེས་པར་བྱའོ། །དེ་ནས་དངོས་གྲུབ་ཤིན་ཏུ་ཉེ་བའི་ཚེ་ན། སྔོན་གྱི་ལས་ངན་ཇི་ལྟ་བུ་ཡོད་ཀྱང་རུང་། འཕྲལ་རྐྱེན་ཇི་ལྟ་བུས་ཀྱང་བཟློག་ཏུ་མེད་པར་སྔགས་ཀྱི་བྱིན་རླབས་ཞུགས་ནས་དངོས་གྲུབ་ཐོབ་པར་འགྱུར་ཏེ།
དེའི་རྟགས་སུ་རང་ཉིད་སེམས་དགེ་ཞིང་ཉོན་མོངས་ཆུང་ལ། ཕྱི་དང་ནང་གི་རྐྱེན་ཉེར་འཚེ་གང་གིས་ཀྱང་གཡོ་མི་ནུས་པར། སྒྲུབ་པ་ལ་གཅིག་ཏུ་སྤྲོ་བའི་སེམས་ཀྱིས་ཤིན་ཏུ་སྦྱང་བ་དང་ལྡན་པའི་ཞི་གནས་འགྲུབ་ཅིང་། དེས་ལུས་སེམས་བདེ་བས་
ཁྱབ་པའི་ངང་ནས་བཟླས་པས་ངེས་པར་འགྲུབ་སྟེ། རྨི་ལམ་དང་དངོས་སུ་ཡང་ལྷའི་གཟུགས་མཐོང་ཞིང་གསུང་ཐོས། ལུས་ལ་ནད་མེད་ཅིང་ཡོངས་སུ་དག་ལ་ཀུན་གྱི་ཡིད་དུ་འོང་བས།  བུད་མེད་གཞོན་ནུ་སོགས་འདུ་ཞིང་འདུད་པ་དང་། མར་
མེ་གསེར་ལྟར་ཡིད་དུ་འོང་བ་རང་འབར་རམ། སྦར་པའང་རྒྱུན་རིང་པོ་དང་སྣུམ་ཟད་ཀྱང་འབར་བ་དང་། རས་བྲིས་སོགས་སྐུ་གཟུགས་འགུལ་བའམ། ཕྲེང་བ་སྨིན་མ་མིག་དང་རྔ་ཡབ་དང་རྒྱན་གཡོ་བ། ཞལ་ནས་ཧཱུྃ་གི་སྒྲ་སོགས་འབྱིན་པ། 
13-8-7b


ནམ་མཁའ་ལས་མེ་ཏོག་གམ། རྫིང་ཆར་ཡིད་འོང་འབབ་པ། མཁའ་ལས་ལུས་མི་སྣང་བར་བུ་གཅིག་ཇི་འདོད་པ་སློངས་ཞེས་སྒྲ་ཐོས་པ། ས་གཡོ་བ། ལྷ་ཡི་རྔ་སོགས་རོལ་མོའི་སྒྲས་ལུས་ཀྱི་བ་སྤུ་ལྡང་བ། རྒྱན་གྱི་ཆར་འབེབ་པ། ནམ་མཁའ་
ལས་ལྷ་དང་ལྷ་མ་ཡིན་དང་། རང་གི་སྔགས་ཀྱི་ལྷའི་གཟུགས་དངོས་སུ་མཐོང་བ་ནི་གྲུབ་པའི་མཚན་མའོ། །དེའི་ཚེ་ན་སྒྲུབ་པའི་རྫས་ལས་དྲོ་བ་དང་དུ་བ་འཐུལ་བ་དང་མེ་འབར་བའི་མཚན་མ་གསུམ་ཀྱང་འབྱུང་བ་དེའི་དུས་སུ།  མ་ཉམས་
པའི་མེ་ཏོག་དཀར་པོ། དབྱིག་དང་ཙན་དན་དང་གུར་གུམ་ག་བུར་སོགས་དྲི་ཞིམ་པའི་ཆུ་དང་ཆུ་གཙང་གི་མཆོད་ཡོན་བསྒྲེང་ལ། བསྟོད་པ་དང་བཅས་ཏེ་རྩེ་གཅིག་གུས་པའི་ཡིད་ཀྱིས་ཕྱག་བྱས་ནས་རང་གང་འདོད་པའི་མཆོག་བསླང་ངོ་། །
མཆོག་ཐོབ་ནས་དགའ་བས་ཕྱག་བྱས་ཏེ། དད་པས་བསྟོད་པ་བྱ་ཞིང་མཆོད་ཡོན་ཕུལ་ལ་གཤེགས་སུ་གསོལ་བར་བྱའོ། །དངོས་སུ་གྲུབ་པ་ན། རས་བྲིས་དང་རལ་གྲི་སོགས་ལག་ཏུ་བཟུང་བས་མཁའ་སྤྱོད་སོགས་ཀྱི་རིག་པ་འཛིན་པར་
འགྱུར་ཏེ། རྫས་སོ་སོའི་ལས་ཀྱི་ཆོ་ག་བཞིན་དུ་སྤྱད་དེ། རྗེས་མཐུན་པ་ཙམ་ལ་དངོས་གྲུབ་ཉེ་བའི་མཚན་མ་ཅི་རིགས་མཐོང་ནས། ཕྱི་དྲོ་ཕྱོགས་བཅིངས་ལ། མཚན་མོ་དངོས་གྲུབ་བསྒྲུབ། གལ་ཏེ་དངོས་གྲུབ་ཆེ་བ་ལ་བགེགས་ཀྱང་
འབྱུང་སྲིད་པས་མཚན་ཕྱེད་སོགས་སུ་བགེགས་ཀྱི་གཟུགས་སྣ་ཚོགས་པས་བསྡིགས་པ་དང་། རྫས་འཕྲོག་པར་རྩོམ་པ་དང་། བར་ཆད་ཀྱི་རྣམ་པ་སྣ་ཚོགས་གང་ཅི་སྟོན་ཀྱང་འཇིགས་པ་མེད་པར་ཁྲོ་བོའི་སྔགས་ཀྱིས་བཅོམ་ནས་ཞི་བར་བྱའོ། །
13-8-8a


ཐོ་རེངས་མེ་ཏོག་གི་ཆར་སོགས་ལྟས་ཡ་མཚན་པ་དང་བཅས་ཏེ་དངོས་གྲུབ་ཐོབ་བོ། །གལ་ཏེ་སྲོད་ཀྱི་དུས་ནས་དངོས་གྲུབ་ཀྱི་མཚན་མ་བྱུང་ན། དངོས་གྲུབ་མནན་ཏེ་ཐོ་རེངས་བླངས་བར་བྱ། འབར་བ་སོགས་རིམ་དང་
རིམ་མིན་དུ་འབྱུང་ཚུལ་སྣ་ཚོགས་ཡོད་པ་དང་། ལྟས་རྣམས་ཀྱང་དང་པོར་འཇུག་པའི་དུས་སུ་དགེ་བ་དང་མི་དགེ་བའི་མཚན་མ་ཙམ་དང་། བསྙེན་པའི་དུས་སུ་ཉེ་བའི་མཚན་མ་དང་། ཚུལ་བཞིན་བསྒྲུབ་པའི་དུས་ན་དངོས་ཀྱི་ཚད་མཚན་མ་དང་།
རློམ་པ་པ་ཅན་ལ་བདུད་ཀྱི་བསླུ་བའི་རྟགས་སུའང་སྲིད་པ་ཡོད་ལ། ནང་གི་མཚན་མ་ཁྱད་པར་ཅན་དང་འབྲེལ་བ་ནི་ནམ་ཡང་མི་བསླུ་བ་ཡིན་ནོ། །འདི་ནི་འཇམ་དཔལ་རྩ་རྒྱུད། རྨི་ལམ་གྱི་རྒྱུད། དཔུང་བཟང་། ལེགས་གྲུབ། གསང་
བ་སྤྱི་རྒྱུད། ཕྱག་རྡོར་དབང་བསྐུར། གསང་བ་འདུས་པ། ནག་པོ་ཆེན་པོའི་རྒྱུད་སོགས། རྒྱུད་ཀུན་ལས་གསུངས་པའི་དངོས་གྲུབ་ཀྱི་མཚན་མ་སོགས་ཕྱོགས་གཅིག་ཏུ་མི་ཕམ་རྣམ་པར་རྒྱལ་བས་བཏུས་པའོ། །མངྒ་ལཾ། །
འཕགས་པ་འཇམ་དཔལ་གྱི་རྩ་བའི་རྟོག་པ་ལས།  རྒྱུ་མཚན་ཤེས་དང་རིག་པ་དང་། །སྐར་མའི་དཔྱད་ཤེས་སྐད་ཤེས་པ། །འདི་དག་དོན་མེད་མི་བྱ་སྟེ། །བཀྲ་ཤིས་དོན་དུ་བསྟན་པ་ཡིན། །ཞེས་གསུངས་སོ། ། ༈ སྦྱིན་
སྲེག་གི་མེ་པྲ་ནི་སྤྱི་དང་ཁྱད་པར། དང་པོ་མེ་ལྷ་སྤྱན་དྲངས་ནས་བྱོན་སྐྱེམས་འབུལ་སྐབས་བརྟག །སྦྱིན་སྲེག་གི་མེ་ནི་སྔགས་ཀྱི་བྱིན་གྱིས་བརླབས་པའི་མེ་ཡིན་པས་འགྲུབ་མི་འགྲུབ་སོགས་སྟོན་པར་བྱེད་དེ། དཔུང་བཟང་གིས་ཞུས་པ་
13-8-8b


ལས། མེ་ཡི་མཚན་མ་ཉེ་བར་བརྟག་པ་ནི། །མེ་སྟག་དུ་བ་མེ་ལྕེ་སྒྲ་རྣམས་ལས། །གྲུབ་པ་དང་ནི་མི་འགྲུབ་ཐམས་ཅད་ཀྱང་། །སྔགས་ཀྱིས་བྱིན་རླབས་མེ་ནི་སྟོན་པར་བྱེད། །ཅེས་གསུངས། དེ་ཡང་མེ་སྤྱིར། དམར་སེར་དང་གསེར་གྱི་
མདོག་འདྲ་དྭངས་པ་སྣུམ་པ་མཛེས་པ། ཉི་མའི་འོད་ལྟར་གཟི་ཆེ་བ། དུ་བ་མེད་ཅིང་། སྒྲ་མེད་པ། འབར་ཆེ་ཞིང་གཡས་སུ་འཁྱིལ་བ། དལ་ཞིང་བར་མི་འཆད་པ། ཡིད་དུ་འོང་བ། གྱེན་དུ་འབར་བ་བཟང་། གཞན་ཡང་ཆུ་ཤེལ་དང་ཁ་
བ་དུང་གི་མདོག་ལྟར་དཀར་བ། དལ་ཞིང་འཇམ་པ་དུ་བ་མེད་ཅིང་ཡིད་དུ་འོང་བས་ནི་སྡིག་པ་འཇོམས་ཞིང་ཞི་བའི་ལས་འགྲུབ། ཁ་དོག་སེར་པོ་སྣུམ་ཞིང་ཉི་འོད་ལྟ་བུ་བརྗིད་ཆེ་ལ་ལྷུན་སྟུག་ཅིང་ལྷོད་ལ་རྒྱ་ཆེ་བར་དལ་བུས་འབར་ན་རྒྱས་པའི་ལས་
འགྲུབ། རྒྱལ་སྲིད་དང་ལོངས་སྤྱོད་འཐོབ། ལྷམ་བུ་ཆུ་ཤེལ་དང་གློག་དང་བྱེ་རུ་ཛ་བའི་མེ་ཏོག་དམར་པོ་ཡིད་དུ་འོང་བ་དག་གི་མདོག་ལྟར་དམར་ཞིང་ཡིད་འཕྲོག་པ་དང་། དྲི་ཞིམ་པོས་དབང་གི་ལས་འགྲུབ། གཞན་ཡང་བཻཌཱུཪྻ་དང་ཨིནྡྲ་ནཱི་ལའི་
མདོག་ལྟར་སྔོ་ཞིར་དྭངས་ལ་སྣུམ་ཞིང་དྲི་མ་མེད་པ་དང་དུ་བ་མེད་པར་ཡིད་དུ་སྡུག་པའི་ཚུལ་དུ་འབར་ན་ནད་མེད་ཅིང་རིགས་བརྒྱུད་འཕེལ། འཇའ་ལྟར་ཡིད་དུ་འོང་བའི་ཁ་དོག་སྣ་ཚོགས་པ་འཇམ་ཞིང་དྲི་མ་མེད་པའང་བཟང་སྟེ་ལས་སྣ་
ཚོགས་འགྲུབ། དེ་ལས་ལྡོག་པ་ནག་པོ་རྩུབ་ཅིང་སྤྲིན་ནག་པོ་དང་པ་ལ་ཤ་ཡི་མདོག་ལྟ་བུ་དང་།  མདོག་ལྗང་གུ་བཀྲག་མེད་དང་། འབྲུ་མར་མདོག་འདྲ་དང་དུད་ཁ་རྣམས་ཀྱིས་དོན་ཉམས་སྤྲིན་སྣ་ཚོགས་ཀྱི་མདོག་ལྟར་མདོག་ངན་པ་སྣ་ཚོགས་
13-8-9a


འདྲེས་པ། དམར་ཙིག་ཙིག་པ་འོད་མེད་པ། དེ་བཞིན་དཀར་སེར་སོགས་དང་སེར་སྐྱ་དུ་བའི་མདོག་དང་མདོག་ཉམས་པ་ཡིད་དུ་མི་འོང་བ་ཀུན་ངན། དབྱིབས་ནི་གཡས་ཕྱོགས་སུ་འཁྱིལ་བ། རྒྱལ་མཚན་གདུགས་
དང་རྡོ་རྗེ་བུམ་པ་པདྨ་ལྕགས་ཀྱུ་དཔལ་བེའུ་བླུགས་གཟར་དུང་གཡས་འཁྱིལ་ཏྲི་ཤུལ་རལ་གྲི་ཤིང་རྟ་རྔ་ཡབ་གཡུང་དྲུང་གླང་པོ་སོགས་བཀྲ་ཤིས་པའི་རྫས་ཀྱི་རྣམ་པ་བཟང་།  མེ་ཡི་རྩེ་མོ་གཅིག་པུར་འབར་བ་མཆོག་ཏུ་བཟང་སྟེ་ཕུན་སུམ་ཚོགས་པ་
ཀུན་བྱེད། གཉིས་སུ་འབར་བ་འབྲིང་། གསུམ་དུ་འབར་བ་ཐ་མ་སྟེ་ཅུང་དམན་ནོ། །བཞིར་འབར་བ་རྒྱས་ཤིང་དངོས་གྲུབ་བརྟན། འདི་ལས་ལྡོག་པ་རྩེ་གསུམ་པ་དང་། བ་ལང་གི་མགོ་འདྲ་བ་སྐྲ་ཡང་རྩུབ་པ་དེ་བཞིན་དུ་གསལ་ཤིང་
དང་མདའ་མདུང་རལ་གྲི་སོགས་ཚུར་ལ་གཟས་པ་དང་ཞིབ་མ་དང་སྦྲུལ་གྱི་མགོ་དང་བོང་བུ་དང་ཁྱི་དང་རྔ་མོང་གི་མགོ་ལྟ་བུ་སོགས་མི་ཤིས་པའི་གཟུགས་རྣམ་པ་སྣ་ཚོགས་བྱུང་ན་ལས་གཞན་ལ་མི་དགེ་ཞིང་བགེགས་ཡོད་པའི་མཚན་མའང་ཡིན་
པས་སྟོབས་པོ་ཆེ་སོགས་ཀྱི་སྲེག་བླུག་བྱ། (ཧ་ཅང་བགེགས་མཚན་ཆེན་བཟོད་པར་མཛོད་ཅེས་ལན་གསུམ་བརྗོད་ཅིང་སྐབས་དེར་བྱ་བ་བཞག་ནས་སླར་ཞི་སྦྱིན་བྱའོ་གསུངས་མཆན།) སླར་ཞི་སྦྱིན་བྱ། དྲག་པོ་ལ་སྐྱོན་དུ་མི་འགྱུར། འོན་ཀྱང་དྲག་པོའི་མེ་ལྕེ་སྔོ་ནག་གམ། དམར་ནག །དྲག་ཏུ་འབར་ཞིང་སྒྲ་དང་མེ་སྟག་འཕྲོ་བ་སོགས་འཇིགས་སུ་རུང་བ་བཟང་། མེ་འབར་བའི་
སྒྲ་ནི་ཞི་སོགས་ལ་ངང་པ་དང་དུང་དང་རྔ་སྒྲ་རྫ་རྔ་གླིང་བུ་སིལ་སྙན་སོགས་རོལ་མོ་ཡིད་དུ་འོང་བའི་སྒྲ་གྲགས་ན་བཀྲ་ཤིས་ཤིང་ཕུན་ཚོགས་
13-8-9b


ཐོབ་བདེ་བ་འབྱུང་། ཙེག་ཙེག་གི་སྒྲ་དང་། ཧུར་ཧུར། འུར་འུར།  སིང་སིང་། ཙི་ཏ་ཙི་ཏ་སོགས་དང་། གནམ་ལྕགས་ཀྱི་སྒྲ་འདྲ་བ་ཏོག་སྒྲ་དང་མེ་སྟག་རྒོད་ཅིང་འཕྲོ་བ། སྨྲེ་སྔགས་དང་བོང་བུའི་སྒྲ་དང་ཁྱི་ཟུག་པ་སོགས་མདོར་ན་སྒྲ་ཡིད་
དུ་མི་འོང་བ་ཐམས་ཅད་ངན་ཅིང་མི་དགེ་བའི་མཚན་མ་ཡིན་ལ། དྲག་པོ་ལ་ཕལ་ཆེར་བཟང་བར་འགྱུར། དྲི་ནི། ག་བུར་ཙམ་པ་ཀ ཙན་དན་འདམ་སྐྱེས་ཨུཏྤལ་ཨ་གར་སོགས་མདོར་ན་དྲི་ཡིད་དུ་འོང་བ་ཐམས་ཅད་རིགས་དང་གནས་ཐོབ་པ་
སོགས་དགེ་ལེགས་ཀྱི་མཚན་མའོ། །དྲི་དང་སྒྲ་གང་ཡང་མེད་པར་འབར་བའང་ལེགས། གླང་ཆེན་དང་རྟ་སོགས་ཀྱིས་དྲིས་རྣམ་པར་རྒྱལ། མདོར་ན་དྲི་བཟང་པོ་ཐམས་ཅད་ཞི་སོགས་ལ་དགེ། ངན་བར་མི་རོའི་དྲི་དང་། རུལ་བ་དང་། མི་
གཙང་བ་དང་། ཅེ་སྤྱང་དང་བྱི་ལ་སོགས་ཀྱི་དྲི་དང་། ཉ་དྲི། སྦེ་དྲི་སོགས་མདོར་ན་དྲི་ངན་པ་ཐམས་ཅད་ཞི་སོགས་ལས་ལ་མི་དགེ་དངོས་གྲུབ་མེད་པར་སྟོན། དྲག་པོ་ལ་བཟང་བའི་སྐབས་ཀྱང་ཡོད། སྤྱིར་མི་དགེ་བའི་མཚན་མ་ནི་མེ་འབར་
དཀའ་བ། དུ་བ་འཚུབས་ཤིང་མང་བ། མེ་འདར་བ་ལྷབ་ལྷབ་འབར་ཞིང་བར་ཆད་པ། ཅུང་ཟད་ཅུང་ཟད་འབར་བ།  གཟི་མདངས་མེད་པ། མེ་དང་དུ་བས་སྒྲུབ་པ་པོ་ལ་ལྷག་པར་གདུང་བ་ཞི་དྲག་གང་ལའང་མི་ལེགས། ནད་སོགས་
མི་དགེ་བའི་མཚན་མའོ། །གཞན་ཡང་མེ་སྟག་མི་སྡུག་པ་རྒོད་ཅིང་མང་དུ་འཕྲོ་བ། ཡང་ཡང་ས་ལ་ཐུར་དུ་མེ་ལྕེ་འཁྱིལ་བ། ཕྱོགས་ཀུན་ཏུ་རྣམ་པར་འཕྲོ་བ། ཡང་ཡང་འཚབས་ཤིང་རྒོད་པ་བྲེལ་ལྷབ་ལྷབ་བྱེད་པ། ཐེག་ལེ་ནག་པོ་
13-8-10a


སོལ་མདོག་ཅན་རྣམས་རིགས་འཛད་ཅིང་སྡེ་དཔུང་འཇོམས་པས་མི་ལེགས། དྲག་པོ་ལ་མི་སྐྱོན་པའི་སྐབས་ཀྱང་ཡོད། དེ་ལས་བཟློག་སྟེ། མེ་ལྟོ་ཆེ་ཞིང་གཟི་བརྗིད་དང་མདོག་བཟང་བ་དང་། གཡས་
སུ་འཁྱིལ་ལ། སྒ་པ་ནས་གྱེན་དུ་ལྷམ་ལྷམ་བར་མེད་དུ་འབར་བ། དུ་བ་ཆུང་བ། དྲི་ཞིམ་ཞིང་མེ་སྟག་བཟང་པོར་འཕྲོ་བ། དུ་བ་དང་མེ་སྟག་སླ་མེད་པ་མེ་ལྕེ་ལེགས་འབར་འཇམ་པའང་ལེགས། དངོས་གྲུབ་ཆེན་པོའི་མཚན་མ་
ནི་མེ་མ་སྦར་བར་འབར་བ། མེ་ཡི་ནང་དུ་ལྷ་ཡིས་ལེགས་སོ་འབྱིན་པ་སོགས་མཆོག་ཏུ་ངོ་མཚར་བ་མཐོང་ན་དངོས་གྲུབ་མངོན་དུ་གྱུར་པའོ། །འདི་ནི་དཔུང་བཟང་གིས་ཞུས་པ་དང་། སྡོམ་འབྱུང་སོགས་རྒྱུད་སྣ་ཚོགས་དང་དམ་པ་རྣམས་ཀྱི་
བསྟན་བཅོས་ལས་བྱུང་བ་རྣམས་ཕྱོགས་གཅིག་ཏུ་མི་ཕམ་འཇམ་དཔལ་དགྱེས་པས་བཀོད་པ་དགེའོ།  ། ༈ མར་མེ་བརྟག་པ་ལ། རིན་པོ་ཆེ་དང་ལི་དང་འཁར་རག་སོགས་སྣོད་གས་ཆག་མེད་པར། སྡོང་བུ་ཤིང་སྐམ་
པོ་དྲི་མེད་རིང་ཐུང་སྣོད་ཀྱི་ཁ་དང་མཉམ་པ། སྦོམ་ཕྲ་མིག་ལ་མཛེས་པ། ཧ་ཅང་ཕྲ་སྦོམ་དུ་མར་མ་གྱུར་པ་ལ། སྲིན་བལ་དྲི་མེད་གཙང་མས་སྙོམས་པར་དྲིལ་ནས་མ་ཡོ་ཞིང་བརྟན་པར་བཙུགས། མར་ཁུ་ཚག་ཆོད་མ་ཚིག་པ་བླུག །རླུང་དང་ས་
རླན་ཁ་ཆར་འབབ་པ་དབྱར་འབུ་སྦྲང་ཤི་བ་སོགས་དང་། སྣུམ་དང་སྡོང་རས་ལ་ཆུ་སོང་བ་སོགས་ལག་སྟབས་ཀྱིས་སྐྱོན་མེད་པར་བྱས་ལ། ནས་ཚོམ་ཁར་མར་མེ་བཞག །མདུན་དུ་རྩ་གསུམ་ལྷ་ཚོགས་བསྐྱེད་ལ། ཨོཾ་ཨཱཿཧཱུྃ། བཛྲ་གུ་རུ་
13-8-10b


དྷེ་ཝ་ཌཱཀྐི་ནི་ཧཱུྃ། འོད་ལི་འོད་ལི་སརྦ་ཨཱ་ལོ་ཀེ་པྲ་བྷ་དྷ་ན་ཡེ་སྭཱ་ཧཱ། བརྒྱ་བཟླས་འཇག་མ་ཉག་རེ་ལ་བཏབ་སྟེ།  སྐོང་བུའི་ཁ་གདོང་སྟེང་དུ་བཞག  །བདེན་པ་བརྡར་བ། རིག་འཛིན་པདྨ་འབྱུང་གནས་ལ་སོགས་པ་རྩ་བརྒྱུད་བླ་མ་རྣམས་ཀྱིས་མར་མེའི་པྲ་
ཕོབ་ཅིག །མཁའ་འགྲོ་དུང་མིག་མ། རིགས་བཞིའི་མཁའ་འགྲོ། གནས་ཉི་ཤུ་རྩ་བཞིའི་མཁའ་འགྲོ་མ་རྣམས་ཀྱིས་མར་མེའི་པྲ་ཕོབ་ཅིག །རྒྱལ་པོ་ཆེན་པོ་སྡེ་བཞི་སོགས་ཆོས་སྐྱོང་དམ་ཅན་རྒྱ་མཚོས་མར་མེའི་པྲ་ཕོབ་ཅིག །བདག་གིས་
ཇི་ལྟར་གསོལ་བ་བཏབ་པ་བཞིན་དུ་མར་མེ་འདི་ལ་བླང་དོར་མངོན་སུམ་གསལ་བའི་པྲ་བསླུ་བ་མེད་པར་སྟོན་ཅིག །ཅེས་བརྗོད་ལ་མར་མེ་སྦར། བརྟག་པ་དམིགས་བསལ་ལ་སྐོང་བུའི་ཤར་ལྷོ་ནུབ་བྱང་མ་འཆོལ་བར་ནས་འབྲུ་རེ་གར་བབ་དུ་
བཞག་མར་མེ་བསང་སྦྱངས་བྱིན་གྱིས་བརླབས་ནས། མ་རིག་མུན་སེལ་སྒྲོན་མེ་མཆོག །དཀྱིལ་འཁོར་ལྷ་ཚོགས་རྣམས་ལ་འབུལ། །མངོན་ཤེས་རྟགས་དང་མཚན་མ་རྣམས། །སྣང་གསལ་མར་མེས་བསྟན་དུ་གསོལ། །ཞེས་ཕུལ། བརྟག་
པ་དངོས་ཀྱི་དང་པོ་མེ་ལྕེ་ལ་བརྟག་སྟེ། དབྱིབས་དང་མདོག་ནི། ཕྲ་ལ་དཀར་ལྡེམ་འབར་བ་མི་ནུབ་རྒྱལ་མཚན་སྟེ་བསྟན་པ་དར་རྒྱས་ཀྱི་ངོའོ། །མདོག་དཀར་ལ་རྩེ་ཟླུམ་འཁྱིལ་ཞིང་འོད་གསལ་བ་མི་ནུབ་ཚེའི་གཡུང་དྲུང་།  དབྱིབས་རྒྱལ་མཚན་
ལྟ་བུ་གསལ་འཚེར་འཁོད་སྙོམས་འབར་བ་བཀྲ་ཤིས།  སྣ་འཁོར་དུང་ལྟར་འཁྱིལ་ན་སྙན་གྲགས་ཀྱི་ངོ་། མདོག་དཀར་གདུགས་ཕུབ་འདྲ་བ་ཆོས་སྲིད་རྒྱས། གུར་གུམ་མམ་གསེར་སྦྱང་ལྟར་སེར་པོ་ཡིད་འོང་བར་ཆད་མེད། དབྱིབས་པདྨ་ཁ་ཕྱེ་
13-8-11a


བ་དང་། ཨུཏྤལ་ཁ་འབུས་པ། ནོར་བུ་ལྟ་བུས་ཟལ་ནོར་འཕེལ། གྲུ་བཞི་དང་བུམ་པ་དཔལ་བེའུ་རྣམས་ཀྱིས་རྒྱས་པའི་ལས་འགྲུབ། ལྕགས་ཀྱུ་ཞགས་པ་འདྲ་བ་དབང་། མདུང་རྩེ་འདྲ་བ་མངོན་སྤྱོད་
ཟུར་མེད་པའི་ཟླུམ་འཁྱིལ་དཀར་པོ་ཞི་བ། སྔོ་དམར་འོད་བཟང་དབྱིབས་སྣ་ཚོགས་ཁོད་སྙོམས་པ་ལས་སྣ་ཚོགས་འགྲུབ་དེ་ལ་སོགས་པ་བཀྲ་ཤིས་པའི་དབྱིབས་དང་འོད་བཟང་བ་དགེ་བའི་ལྟས་སུ་བལྟའོ། །མདོག་ནི་དཀར་པོ་ཞི་བ། 
སེར་པོ་རྒྱས་པ་དམར་པོ་དབང་། སྔོའམ་ལྗང་བ་དྲག་པོ་སྟེ་འོད་དང་དབྱིབས་ཀྱང་ལེགས་ལ་ཡིད་དུ་འོང་ན་ཞི་སོགས་ལས་དེ་དག་འགྲུབ། འོད་ཁ་དོག་ལྔ་པ་གསལ་ལ་ཡིད་དུ་འོང་བ་བྱུང་ན་ཕུན་སུམ་ཚོགས་ཏེ་བཟང་། མར་
མེ་གཅིག་གི་ནང་དུ་གཅིག་འབར་ན་ཤིན་ཏུ་བཟང་། མདོག་དང་དབྱིབས་ངན་པ་ནི། ནག་པོ་ལྟ་བུ་མི་གསལ་ཞིང་དབྱིབས་མི་ལེགས་པ་ཉོན་མོངས་པའི་སྒྲིབ་པ་དང་མི་གཙང་བའི་ངོ་། །མདོག་ངན་ཞིང་ལྷབ་ལྷབ་བྲེལ་བ་ཅན་དགྲའམ་
ཡང་ན་ཐག་རིང་མགྲོན་འོང་ལ། རྩི་ཟླུམ་ལ་བཅད་པ་འདྲ་ན་མ་ཉེས་པའི་ཁ་ཡོག །རྩེ་རལ་གྲིས་བཅད་པ་འདྲ་ན་རྐུན་གསོད་བྱེད་དོགས་ཡོད། རྩེ་གཉིས་ཡོད་ན་ཡུལ་གཞན་དུ་འགྲོ། མེ་ལྕེ་ཁ་གཉིས་སུ་སོ་སོར་གྱེས་ན་བྱེ་གྲལ་གྱི་ངོ་།
རྒྱབ་ནས་རྩེ་མོ་ཁ་གསུམ་བྱུང་ན་བཟང་། འཁྱིལ་བ་བཟང་། རྒྱབ་ནས་འོད་སྔོན་པོ་འཁྱིལ་ལེ་བ་བྱུང་ན་བཟང་། དཀར་ཟླུམ་སྤྲ་བ་དྲིལ་འདྲ་བཟང་། འབྲི་མིག་བྱུང་ན་བཟང་། རྩེ་གསུམ་བཞི་མི་གསལ་བར་འབར་ན་སློབ་
13-8-11b


དཔོན་ཕ་སྤུན་བཟའ་ཚང་སོགས་འོང་། རྩེ་མོ་ལྔ་ཕན་ཆད་བཟང་། དམར་ཤས་ཆེ་བ་སུམ་འཁྱོགས་འབར་ན་བུད་མེད་ལ་ནང་དམེ་སོགས་འོང་། མེ་སྙིང་སྔོན་པོ་མེད་པར་དམར་པོ་ཤིན་ཏུ་གཡུག་ན་བགེགས་ངོ་ཡིན་པས་བགེགས་གཏོར་
བཏང་། དམར་ནག་འཚུབ་པ་བུ་ཆེ་བ་འཆི། མེ་ལྕེ་ཆེ་ལ་རྒོད་ཅིང་ནག་ན་ངན། དམར་ལ་ཐུང་རྩུབ་ཡུལ་ས་ཀླུ་གཉན་གནོད།  དུ་བ་ཆེ་ལ་དྲེག་པ་བྱུང་ན་ཕོ་གདོན། ཁ་དམར་རྟིང་ནག་མོ་གདོན། ཁ་སེར་གཏིང་སྔོ་ས་བདག་གནོད། སོར་རེ་ཙམ་
ལས་མི་འབར་བར་འོད་ཞན་ན་ཕོ་ལྷ་གནོད་པས་ལྷ་གསོལ་བྱ། འོད་ཀྱི་ནང་དུ་དུད་འགྲོའི་གཟུགས་འདྲ་ན་རི་འདྲེ་གནོད། ལྷབ་ལྷབ་རྒོད་ཅིང་རྩེ་མོ་དུམ་ཆད་བྱུང་ན་དགྲ་ངོ་། ལྷབ་ལྷབ་ཆེ་ཞིང་མེ་ལྕེ་ཆེ་བ་རོ་རྦད་རྦད་དུ་མཆོད་རྩ་བ་ཆུང་བ་ལྟ་
བུ་བྱུང་ན་གློ་བུར་རྐྱེན་ཆེ་བའི་ངོ་། ནད་པ་ཡོད་ན་འཆི། མི་གསལ་ཞིང་རྩེ་མོ་ཐུར་དུ་གུག་ན་བོན་བྱད་སོགས་ཀྱི་ངོ་། འོད་མི་གསལ་ལ་ཚག་སྒྲ་དང་བཅས་པ། མེ་སྟག་དང་བཅས་པའི། དཀར་པོ་མདངས་མེད་ཡིད་དུ་མི་འོང་བ་ལྷ་གདོན། 
སེར་པོ་ས་བདག་གམ་རྒྱལ་པོ། །དམར་པོ་བཙན་དང་སྲིན་མོ་གྲེ་བོ། སྔོན་པོ་ཀླུ་དང་མ་མོ། ནག་པོ་བདུད་སོགས་ཀྱི་ངོ་བོ། མར་མེའི་དཀྱིལ་གྱི་མེ་མདངས་ནག་པོ་དེ་སྙིང་ཡིན་པས་ནག་ངམ་མེ་བ་བྱུང་ན་བཟང་། དེ་མེད་ན་སྙིང་སྟོང་གི་ངོའོ། །
དཀྱིལ་དམར་པོ་སྡོང་བུ་ལས་དུད་པ་ཕྱུར་བ་ནོར་མི་ལག་ཤོར་ངོ་ཡིན། བཙན་བཀར་གཡང་ལེན་དགོས། འབར་བཞིན་དུ་སྡོང་བུ་རྩ་རྩེ་ནག་ཏིང་ངེ་འདུག་པ་ལ་མེ་འོད་གསལ་ཞིང་དཀྱིལ་དུ་ནག་མདངས་ཤུགས་ཀྱིས་འོང་བས་དེ་འདྲ་སྙིང་སྟོང་མེད་པས་
13-8-12a


བཟང་། སྡོང་བུའི་རྩེ་དམར་བའམ་ཐལ་བར་སོང་ན་གོང་ལས་ལྡོག་སྟེ་མི་ལེགས། ཁྱད་པར་ནོར་ལ་ངན། མེ་ལྕེའི་སྟེང་དུ་སྡོང་བུ་ནག་ཧྲིང་ངེ་བྱུང་ན་རྩོག་ནལ་གྱི་ངོ་། བསང་ཁྲུས་བྱ། མོ་འདྲེ་བཀར། སྡོང་བུ་ཁ་
དབྲག་རེད་ན་གནམ་སྒོ་བཅད། སྡོང་བུ་རྐྱེན་མེད་པར་རྐེད་པར་ཆད་ནས་མར་ཁུའི་ནང་དུ་བྲུལ་ན་སྐྱིད་ལ་རྐེད་ཆད་ཀྱི་ངོ་། རྐྱེན་མེད་པར་སྡོང་བུ་འགྱེལ་ན་ངན། སྡོང་བུ་ཕྲ་ཉག་ཡོད་ན་བར་ཆད་འོང་།  སྡོང་རྩ་དཀར་ནས་སྔོན་པོའི་མདངས་གཏན་
ནས་མེད་ན་གཟའ་དཔོན་འཆི་སོགས་ངན། སྡོང་བུའི་རྩེ་མོ་གུག་ན་བྱད་དང་ནད་སོགས་ངོ་། བཟློག་པ་བྱ། སྡོང་བུའི་མགོ་ལ་དོམ་ཞྭ་ལྟ་བུའི་མེ་ཏོག་ནག་པོ་ཆགས་ནས་མེ་ལྕེ་ཐུར་དུ་མནན་ཏེ་མི་གསལ་ན་ངན། ལས་སྒྲིབ་ཆེ་བ་དང་གྲིབ་
རྩོག་སོགས་ཀྱི་ངོ་ཡིན། སྡོང་བུ་རྩ་སྦོམ་རྩེ་ཕྲ་ཟླུམ་མཛེས་བྱུང་ན་སྔགས་པ་གདན་ལས་མི་འཆུག །སྡོང་བུ་དྲང་ཞིང་ནག་ལ་རྩེ་རྣོ་ན་ཡོན་ཏན་ཆེན་པོ་འབྱུང་།  མར་ཁུ་ཟད་པ་དང་སྡོང་བུ་ཡང་བསྟུང་ནས་ནག་ཏིང་ངེ་བར་འབར་ཞིང་
མཐའ་སྡོང་རོ་ཆེན་པོ་མ་ལྷག་པར་སྡོང་སྙིང་དཀར་ཏིང་ངེར་སོང་ན་བསམ་པ་མཐར་ཕྱིན། སྡོང་རོ་ཆེན་པོ་ལུས་ན་ཕྱི་དལ་གྱི་ངོ་། །སྡོང་རོ་མེད་ན་གདོན་དང་སྒྲིབ་པ་ཆུང་། སྤྱིར་མར་མེ་འབར་ཚུལ་ལ་མེ་ལྕེ་དལ་བྲེལ་སྙོམས་པ་
བཟང་། གྱེན་དུ་འབར་ཞིང་སྒྲ་མེད་གསལ་ལ་མི་གཡོ་བ་བརྟན་པས་བཟང་། འོད་གསལ་ཞིང་རོས་མེ་ལྕེ་འཕེལ་ཏེ་རྩེ་མོ་ཁབ་འདྲ་བའི་རྣོན་པོ་རིང་དུ་སྐྱོང་བ་བློ་གྲོས་དང་ཡོན་ཏན་སྙན་གྲགས་སོགས་འཕེལ། གསལ་ཀྱང་བྲེལ་
13-8-12b


ལྷབ་ཆེས་པ་བྲེལ་བ་དང་འཚུབ་ངོ་། འབར་མི་ཐུབ་པར་གཉིད་སོང་བ་ལྟ་བུ་ཉམས་གྲིབ་ཀྱི་ངོ་།  །འབར་རྟག་ན་བསོད་ནམས་ཆེ། འབར་ཤེད་ཞན་ཅིང་མི་གསལ་བ་བསོད་ནམས་མངའ་ཐང་ཉམས། འོད་མི་གསལ་བར་སུ་ལུ་ལུ་བྱེད་ན་
གང་བྱས་མི་འགྲུབ། འོད་ཇི་ཙམ་གསལ་བ་བཟང་ཞིང་དོན་གྲུབ། མི་གསལ་ན་ངན་རྩོག་གྲིབ་དང་ཉམས་གྲིབ་ཀྱི་ངོ་ཡང་ཡིན། འཕར་བའི་འཕྲོ་ལ་འཕྲལ་དུ་ཇེ་ཞན་དུ་སོང་ནས་དམར་ཚུབ་ཚུབ་བྱེད་ན་ནད་པ་ཡོད་ན་འཆི་བས་དུར་བཟློག་
དང་དབང་རྒྱུན་གཏོར་བྱ། རྐྱེན་མེད་པར་མར་མེ་རང་ཤི་བྱུང་ན་ནད་པ་འཆི་བ་དང་། ནད་མེད་ཀྱང་འཆི་ལྟས་ཀྱི་ངོ་ཡིན་པས་ཤིན་ཏུ་ངན། མར་མེ་ལ་དྲི་བཟང་བྲོ་ན་བཟང་། གསུར་དྲི་སོགས་ངན། དྲི་མེད་པ་བཏང་སྙོམ་མོ། །སྒྲ་སྙན་པ་
ལྡབ་ལྡབ་ཟེར་ཞིང་དལ་བུར་ལེགས་འབར་འོད་གསལ་ན་ཀུན་གྱི་བྱམས། ལྷབ་ལྷབ་ཀྱི་སྒྲ་ཆེན་པོ་བྲེལ་ཅིང་། འཚེག་སྒྲ་བགེགས་ངོ་སྟེ་མཆོད་གནས་པ་ལ་ངན། མེ་སྟག་མང་པོ་འཕྲོ་བ་རྒྱ་འདྲེའི་ངོ་། །ཚག་སྒྲ་དང་བཅས་མེ་སྟག་འཕྲོ་
བ་ཁྱིམ་དུ་གདོན་ཞུགས་ངོ་། །དཀྱིལ་ནས་མེ་སྟག་ཐོ་རེ་བ་བྱད་ཕུར། མེ་ལྕེ་དམར་ཚུག་གེ་བ་ལས་མེ་སྟག་དམར་ཚུབ་ཚུབ་བྱེད་པ་ཤིན་ཏུ་ངན། ཚག་སྒྲ་བཅས་པའི་མེ་སྟག་རྒྱང་རིང་དུ་ཡལ་ན་རང་ཉིད་ཐག་རིང་དུ་འགྲོའོ། །ཡང་ན་རྒྱང་རིང་གི་
གཏམ་ཐོས་པ་སོགས་ཀྱི་ངོ་། །མར་མེ་ལས་དུད་པ་ཆེ་ན་སྒྲིབ་པ་དང་ནད་པ་ལ་ནད་ཡུན་རིང་། དངོས་གྲུབ་གཡེལ་བས་ཚོགས་འཁོར་དང་གཟུངས་ཁྲུས་བྱ། དུད་པ་ནག་ཤར་རེ་བ་གོད་ངོ་སོགས་ཡིན། མི་ཁ་བཀར་དགོས། དུད་པ་ནག་
13-8-13a


ནོག་མེད་ན་ནད་པ་སོས། ནད་མེད་ལ་ནད་མི་འབྱུང་། སྡོང་བུའི་སྟེང་དུ་དུ་བའི་མེ་ཏོག་ཆགས་པ་ནི། དབྱིབས་མེ་ཏོག་གི་འདབ་མ་དང་། དེའི་དབུས་ན་ཟེའུ་འབྲུའི་རྣམ་པ་ལྗང་སེར་དང་མདོག་ནག་པོ་འོད་ལ་མི་གནོད་
པ་ཆགས་ན་ཤིན་ཏུ་བཟང་། གོ་ས་འཕར། བསམ་པ་འགྲུབ། མེ་ཏོག་དེ་ཡང་མར་མེ་ཟད་པ་དང་མཉམ་དུ་རང་ཡལ་ལ་འགྲོ་བ་བཟང་། ཕལ་ཆེར་རེ་ངོས་ལྟ་བུ་སོགས་ཆགས་ནས་སྡོང་བུ་ཐུར་དུ་གུག་སྟེ་མར་ཁུའི་ནང་དུ་ལྷུང་བའམ། སྣུམ་
ཟད་རྗེས་ཀོང་བུའི་ནང་དུ་ལྷག་པའམ་འོད་ལ་གནོད་པ་རྣམས་མེ་ཏོག་ལེགས་པོ་མ་ཡིན་ཀྱང་། རྒྱ་ནག་པས་མེ་ཏོག་ཆགས་པ་རྣམས་བཟང་པོར་རྩི། སྣུམ་བླུགས་པའི་མར་ཁུ་བོ་ན་ལས་སྒྲུབ་པ་འགྱང་ནས་འགྲུབ་དཀའ། མར་ཁུ་ལ་པདྨ་
རིས་ཆགས་ན་བཟང་། མྱུར་དུ་སྐམ་ཞིང་ཉུང་སོང་ན་ཟ་ཐང་ཆུང་། འཁྱགས་རྗེས་དང་པོར་བླུགས་དུས་ལྟར་ཁ་མ་བྲི་ན་བཟང་། སྡོང་རྩ་བུག་ན་ངན། མར་ཁུ་མ་ཚིག་ཀྱང་དམར་རྙོགས་ཅན་དང་ཁྲག་ཐིག་འདྲ་བ་དང་། རྙོགས་ནག་ལང་
ན་ནད་དང་སྡུག་བསྔལ་གྱི་ངོ་ཡིན། སྣུམ་ཡུན་རིང་རྨེ་ཞིང་མར་མེ་ཡུན་རིང་འབར་ན་བཟང་། དེ་ལྡོག་མྱུར་དུ་སྐམ་ན་ཟ་ཐང་ཆུང་། མར་མེའི་སྟོད་ཕྲལ་གྱི་དང་། སྨད་ཕུག་གི་སའོ། །དམིགས་བསལ་ནས་འཕང་ཡོད་ན། ནས་ཤར་
མ་སློབ་དཔོན་དང་ཕ་མཚུན་ཁྱིམ་ཕྱྭ། ལྷོ་བུ་རྒྱུད་དང་སྲོག་ཕྱྭ། ནུབ་དགྲ་གདོན། བྱང་བུ་སྲིད་ནོར་ས་སྟེ་དང་པོ་འབྲུ་འདེབ་དུས་རང་སའི་འབྲུ་གསུམ་པོ་ཐང་ལ་ཤོར་ན་མི་ནོར་གྱི་བླ་གཞན་དུ་འཁྱམས་ངོ་དང་། འབྲུ་ནག་ན་ན་ངོ་། འགུལ་བ་དང་
13-8-13b


འཐོར་ན་ཕ་མྱེས་རུས་པ་འཐོར་རོ། །འབྲུ་ཕྱིར་བཏེགས་འདྲ་ན་གཡང་ཉམས། ཆག་པོ་བུག་ཅན་ལྷ་མི་དགའ་བས་བསྐང་བཤགས་བྱ། གཤིན་པོ་ཡིན་ན་རེ་ཆགས་ངོ་། །ནས་འབྲུའི་རྩ་བར་སྦུར་བ་སྣང་ན་ཀླུ་གཉན་གནོད། རྩ་བ་ནག་ན་
རྫས་ནག་མོ་འདྲེ་འཁྲི་བས་གདོན། ཐིག་ལེ་ནག་པོ་རིས་བབ་ན་གྱོད་ངོ་དང་བུ་ཆུང་ལ་ངན། ནང་དམེ་དང་རྩོག་ངོ་། ནས་ལ་སྐྱོན་ཅི་ཡང་མ་རེག་ན་ལོ་གཅིག་བར་ཅི་བསམ་འགྲུབ་སྟེ་བཟང་། ཡོས་རེད་ན་བཏང་སྙོམས། སོལ་བ་ལྟར་
ན་ཤིན་ཏུ་ངན། རྒྱབ་ཚིག་ན་ན་ངོ་། མདུན་ཚིག་ན་གོད་ཁ། སྟོད་ཚིག་ན་དོན་མི་འགྲུབ། སྨད་ཚིག་ན་ཁ་སྨྲས། ཟུར་ཚིག་ན་རྒྱབ་བསྣོལ། ནུབ་ཕྱོགས་དགྲ་སའི་ནས་ཚིག་ན་བཟང་། ནས་བཏབ་ནས་མི་སྒུལ་བར་མར་མེ་སྦར་
ནས་བརྟག །ནང་པར་ལྷ་ལ་གཏང་རག་ཕུལ་ལ་བཀྲ་ཤིས་བརྗོད་པར་བྱའོ། །མར་ཁུ་ཚིག་ན་མདངས་མེད་དམར་ཙུག་གེ་བ་དང་། སྡོང་བུ་རློན་ན་གུག་པ། ཙག་ཐག་མ་ཆོད་པའམ། གསར་དུ་ཆུ་སོང་ན་ཚག་སྒྲ་དང་མེ་འཆི་བ། 
སྡོང་བུ་སྦོམ་ཆེས་ན་ལྷབ་ལྷབ་པ། ཕྲ་ཆེས་ན་མེ་ལྕེ་ཆུང་བ་སོགས་ལག་སྟབས་ཀྱིས་བྱུང་བ་རྣམས་ཉེས་པ་ཆུང་ཡང་། པྲ་བརྟག་སྐབས་ཡིན་ན་དེ་དག་ཀྱང་རྒྱུ་རྐྱེན་རྟེན་འབྲེལ་དབང་གིས་བརྟག་པའི་སྒོར་འགྱུར་རོ། །འདི་ནི་
གོང་ལྟར་སྔགས་དང་བདེན་བདར་བཅས་དོན་གང་ལའང་ཆེད་བརྟག་བྱེད་པར་མ་ཟད་ཀྱི། རང་བཞིན་ལྷ་རྟེན་མདུན་དུ་ཕུལ་བའི་མར་མེ་སོགས་ལའང་ལེགས་ཉེས་ཀྱི་པྲ་འདི་ལྟར་བརྟག་པ་བྱེད་པ་ཡིན་ནོ། །ཞེས་པའང་སྤྲུལ་པའི་
13-8-14a


གཏེར་སྟོན་སངས་རྒྱས་གླིང་པའི་གཏེར་བྱོན་མར་མེའི་པྲ་བརྟག་གཙོར་བཟུང་། རྒྱུད་དང་མན་ངག་གི་བརྟག་པ་རེ་ཟུང་། པ་རི་ལོ་ཙཱས་བསྒྱུར་བའི་མར་མེའི་བརྟག་པ་ཉུང་ངུ་སོགས་ཀྱིས་བརྒྱན་ཏེ་མི་ཕམ་པས་བཀོད་
པ་དགེའོ།  ། ༈ ཐོད་བརྟག་ནོར་བུ་ལག་སྟེར་བཞུགས། བླ་མ་མཆོག་དང་ཧེ་རུ་ཀཿ  མཁའ་འགྲོའི་ཚོགས་ལ་གུས་བཏུད་ནས། །དངོས་གྲུབ་རྫས་མཆོག་ཀ་པཱ་ལའི།  །བཟང་ངན་མཚན་ཉིད་གསལ་བར་བཤད། །ལྷ་ལ་ནོར་བུ་ཀེ་ཀེ་རུ། །ཀླུ་ལ་ཡིད་བཞིན་
ནོར་བུ་སྟེ། །མི་ལ་མཚན་ལྡན་ཀ་པཱ་ལ། །ཁྱད་འཕགས་ཐོད་པ་ནོར་བུའི་མཆོག །འོན་ཀྱང་གནོད་སྦྱིན་ལ་སོགས་པས། །དབང་བྱས་མི་ལག་སོན་པར་དཀའ། །རང་སྐལ་བཞིན་དུ་ཕན་འདོགས་པའི། །མཚན་ལྡན་ཐོད་པ་བཅངས་བྱས་ལ། །བསྒྲུབ་ཅིང་དངོས་
གྲུབ་རྫས་སུ་བཟུང་། །དེ་ཡིས་ཕན་པ་མངོན་སུམ་འབྱུང་། །དེ་ཡང་རྒྱུད་ལས་མཚན་ལྡན་གྱི་ཐོད་པར་བསྔགས་པའི་རྣམ་གྲངས་དུ་མར་གསུངས་པ་དང་། གཏེར་ཁ་རྣམས་སུ་ཐོད་པ་བརྟག་པ་དང་། སྒྲུབ་པའི་གདམས་པ་སྣ་ཚོགས་བྱུང་བ་དང་། མཁས་ཤིང་གྲུབ་པའི་བླ་མ་
རྣམས་ཀྱིས་གསུང་ལས་ཀྱང་རྣམ་གྲངས་རྒྱ་ཆེར་བྱུང་བའི་སྙིང་པོ་མདོར་བསྡུས་ཏེ་བརྗོད་ན། དང་པོ་དབྱིབས་ཀྱི་དབང་དུ་བྱས་ན། ཟླུམ་པོ་ཞི་བ། གྲུ་བཞི་རྒྱས་པ། ཟླ་གམ་དབང་། ཟུར་གསུམ་དྲག་པོ། ཟུར་བརྒྱད་པ་མཆོག་གི་ལས་ཀྱི་ཐོད་པ་སྟེ། རིམ་བཞིན་སངས་
རྒྱས་སྤྱན་ལ་སོགས་པའི་ཕྱག་མཚན་ནོ། །མདོག་ནི་དཀར་པོ་དུང་མདོག་དམར་མདངས་ཅན་ཞི་བ་སྟེ་དུམ་བུ་གཅིག་པ་ལ་བྱུང་ན་ལྷག་པར་བཟང་། སེར་ལ་དམར་ཆགས་རྒྱས་པའི་རིགས་ཏེ་དུམ་བུ་གཉིས་པར་བཟང་། དམར་ལ་སྣུམ་པ་དབང་གི་རིགས་སྟེ་དུམ་གསུམ་པ་ལ་བྱུང་
13-8-14b


ན་བཟང་། སྔོ་ལ་དཀར་ཆགས་ལས་ཀྱི་རིགས་ཏེ་དུམ་བཞི་པ་ལ་བྱུང་ན་བཟང་། དཀར་ལ་རིགས་བཞིའི་ཐིག་ལེའམ་མདངས་འཚེར་བ། དུམ་བུ་ལྔ་པར་བྱུང་ན་བཟང་། དུམ་བུ་གཅིག་པ་དང་ལྔ་པ་བྲམ་ཟེ། གཉིས་པ་རྒྱལ་རིགས། གསུམ་པ་རྗེ་རིགས། བཞི་པ་དམངས་
རིགས་སུ་བཤད། ཡང་རྡོ་རྗེ་དུམ་གཅིག་ས་ལ་དབང་། །རིན་ཆེན་དུམ་གཉིས་རྒྱལ་པོར་འགྱུར། །པདྨ་དུམ་གསུམ་ནོར་ལ་དབང་། །རལ་གྲི་དུམ་བཞིས་ལས་རྣམས་འགྲུབ། །འཁོར་ལོ་དུམ་ལྔས་མཆོག་ཐོབ་བོ། །ཞེས་བཤད། ཡང་དུམ་གཅིག་ཆོས་ཐོད། 
གཉིས་པ་ནོར། གསུམ་པ་མི། བཞི་པ་འབྲུ། ལྔ་པ་ཕྱུགས་འཕེལ་བའི་ཐོད་པར་བཤད། དེ་ཡང་དུམ་བུ་གཅིག་པ་ལ། སྲུབ་གཏན་ནས་མེད་པ་བྱ་མོའི་སྒོ་ང་ལྟ་བུ་དེ་ནི་ཐོད་པ་ཇ་རིལ་ཞེས་ཤིན་ཏུ་བཟང་། སྲུབ་མངོན་ཀྱང་དུམ་བུ་རྣམས་གཅིག་ཏུ་འབྲེལ་བ་ལས་སོ་
སོར་མ་ཆད་པ་དེ་ཡང་བཟང་། དུམ་བུ་གཉིས་པ་ལ་བཟང་ངན་གཉིས་ཏེ། གླིང་ལ་ཆེ་ཆུང་བྱུང་ནས་མདུན་ངོས་ཆེ་བ་བྱུང་ན་བཟང་། མཉམ་པར་གཞུང་དུ་སྲུབ་བྱུང་ན་གོང་ལས་གཞན་པ་སྟེ་ངན་ནོ། །དུམ་གསུམ་ལ་རིགས་གསུམ་སྟེ། ལྟག་པ་དང་མཚོག་མ་གཡས་
གཡོན་དག་ཏུ་སྲུབ་བྱུང་ན་བཟང་། གླིང་དཀྱིལ་དང་མཚོག་མ་ལྟག་པ་དང་གསུམ་དུ་སྲུབ་བྱུང་བ་ཡང་བཟང་། རྣ་ལྷན་གཉིས་དང་དཀྱིལ་དུ་བྱུང་བ་ཡང་བཟང་ངོ་། །གླིང་བཞི་པ་ལ་རིགས་བཞི་སྟེ། །མཐའ་བཞི་བཞི་ཆོད་སྤྲ་ཆོད་བཟང་། །གླིང་ལྔ་པ་ལ་རིགས་ལྔ་སྟེ། །ལྔ་ཚོམ་
ལྔ་འདུས་ལྔ་གཤིབ་བཟང་། །སུམ་གཉིས་དང་ནི་ཕྱོགས་ཆོད་ངན། །དུམ་བུ་དུ་ཡིན་ནི། ལྟག་པ་དང་རྣ་ལྷན་གཉིས་པོའི་དུམ་བུ་མི་བརྩི་བར་ལྷག་མའི་རུས་པ་ལ་ཐོད་པའི་སྲུབ་ཀྱིས་བཅད་ནས་རུས་པ་ཕན་ཚུན་འབྲེལ་མེད་དུམ་གྲངས་དུ་རུ་མངོན་པ་བརྩི་དགོས་ཏེ། ཡུངས་
13-8-15a


འབྲུ་ཙམ་ཞིག་སོ་སོར་ཆད་ན་ཡང་དུམ་བུ་རེ་བརྩི། འཇག་མ་ཙམ་གྱིས་འབྲེལ་ཀྱང་གཅིག་ཏུ་བརྩི་ཞེས་བཤད། ཁ་ཅིག་གིས་ལེགས་པར་བརྟག་ན་ཅུང་ཟད་རེ་མ་འབྲེལ་བ་མི་སྲིད་པས་མཐེབ་སོར་རེ་ཙམ་འབྲེལ་བ་ལ་དུམ་བུ་གཅིག་ཏུ་བརྩི། 
དེ་ལྟར་མ་འབྲེལ་ན་སོ་སོར་རྩི་ཞེས་བཤད། ཐོད་སྲུབ་ཕན་ཚུན་བསྣོལ་མཚམས་རི་མོ་ཀྱ་ཀྱུར་སོང་བའི་དཀར་ཙེག་གེ་བ་དེ་ལ་མུ་ཏིག་ཚེམ་ཟེར། མུ་ཏིག་ཚེམ་ཤིན་ཏུ་ཞིབ་པར་བཅད་ན་བཟང་། བར་ཆད་དེ་རུས་པ་དཀར་པོས་འབྲེལ་ན་དུམ་བུ་ཐ་དད་དུ་མི་འགྱུར། མུ་ཏིག་
ཚེམ་རྩིང་བ་དང་མཐའ་ནས་སོར་རེའི་བར་ཙམ་དུ་ཡོད་ཅིང་། དཀྱིལ་དུ་མུ་ཏིག་ཚེམ་མེད་པར་སྲུབ་རྐྱང་གིས་བཅད་ན་འབྲིང་། མུ་ཏིག་ཚེམ་མེད་པར་སྲུབ་རྐྱང་བས་བཅད་ན་གོང་ལ་ལྟོས་ནས་ཐ་མ་ཡིན་གྱི་སྐྱོན་ཅན་དུ་མི་བལྟའོ། །རང་སར་མུ་ཏིག་ཚེམ་ཡོད་ལ། དགྲ་སར་
སྲུབ་ཀྱིས་བཅད་ན་བཟང་། དེ་ལས་བཟློག་པ་ངན། དུམ་མཚམས་རི་མོ་འཇམ་ཐུང་བཟང་། རྩུབས་པ་དང་སྲིན་འགྲོས་ཟབ་མོ་མི་ལེགས་པས་ཞན། སྲུབ་མཚམས་དམ་ཤིང་རད་རོད་མེད་ལ་དུམ་བུ་དུ་ཡིན་གསལ་པོར་བརྟག་སླ་ན་དགེའོ། །ཐོད་པའི་རྒྱ་སྲུབ་བསྣོལ་ཆེན་ཕོ་
ཐོད། ཆུང་ན་མོ་ཐོད་དང་། རྣ་ལྷན་འཐུག་པ་ཕོ། སྲབ་ན་མོ་ཐོད་ཡིན། དབྱར་ཤི་བའི་རྒྱ་སྲུབ་དམ་པ་དང་། དགུན་ཤི་བའི་ཐོད་པ་ལ་རྒྱ་སྲུབ་ཕྱེ་ཞད་འོང་ཞེས་བཤད། མདོག་དང་དབྱིབས་དང་དུམ་བུ་སོགས། །ཐམས་ཅད་མ་འཆོལ་ཞི་སོགས་ཀྱི། །ལས་གཅིག་འགྲུབ་
ལ་བསྔགས་པ་ཀུན། །ཚང་བ་རྙེད་ན་ལས་དེ་འགྲུབ། །གཞན་ཡང་ཕན་པ་རྒྱ་ཆེན་འབྱུང་བའི་ཐོད་བཟང་གི་རིགས། འབྱོར་པ་འཕེལ་བྱེད་ནོར་བུའི་ཐོད་པ་ནི། དབྱིབས་ནོར་བུའམ་ནས་འབྲས་ལྟ་བུ་མདུན་དང་ལྟག་ངོས་འབུར་དབྱིབས་དང་། མཚོག་མ་མ་ཞུམ་ཞིང་གང་བ་ལྟར་
13-8-15b


རབ་དུ་རྒྱས་པ་རང་སར་ནོར་བུའི་མཚན་མ་དང་། ཟ་ལམ་སོགས་ནང་གི་གཤོང་བུ་བཟང་བའོ། །རིགས་བརྒྱུད་འཕེལ་བྱེད་ནི་རྡོ་རྗེའི་དབྱིབས་ཅན་མདུན་རྒྱབ་གཡས་གཡོན་གཉིས་རྒྱས་ཤིང་། དེའི་ངོས་གཉིས་སུ་རྡོ་རྗེའི་རྭ་ལྟར་ལྷག་པར་འབུར་བ། ནང་གི་ཤིང་ལོ་ལོ་འབྲས་
རྒྱས་པའོ། །འབུར་ཟུམ་མ་དོད་པ་ཟླུམ་ལེབ་དུ་གྱུར་ན་ཞན། འགྲོ་བ་འདུན་བྱེད་པདྨའི་དབྱིབས་ཅན། མདུན་ཕྲ་ལ་རྒྱབ་གདོང་ལེབ་པ། རྒྱབ་རྒྱས་ཤིང་ཟླུམ་ལ་ཡ་ཡོ་མེད་པར་སྙོམས་པ། རང་ས་མ་ཉམས་པ་མདངས་ཡིད་དུ་འོང་བ། ནང་འཇམ་ལ་རི་མོ་བཟང་བའོ། །ཚེ་
འཕེལ་བྱེད་ནི་འཐུག་ཅིང་ཟླུམ་པོའི་གྲུ་བཞིའི་དབྱིབས་ཅན། ནང་གཞུང་ན་རུས་པའི་སྒང་ཡོད་པའི་གཞུང་ཐུར་གཡས་དང་གཡོན་གྱི་ཕྱོགས་གཉིས་སུ་མ་ཆད་པར་བྲེང་ངེར་རིང་བ། ཁྱུང་མཆུ་རིང་ལ་ཚེ་ལམ་བཟང་ཞིང་ནང་དུ་བུག་པ་མེད་པ། རི་མོ་བཟང་པོས་མཚན་པའོ། །མཆོག་གྲུབ་
བྱེད་ཟུར་བརྒྱད་པའམ། ཟླུམ་ལ་མཛེས་པ། སྤྱི་གཙུག་དྲང་པོ་ཚངས་བུག་ཡངས་པོ་ཡོད་པ། མདོག་ལྔ་ལྡན་ནམ་མཐིང་འོད་ཅན། རང་ས་སོགས་སུ་རིགས་ལྔའི་ཕྱག་མཚན་དང་ལྷ་སྐུ་ས་བོན་སོགས་ཀྱིས་མཚན་མ་ཡོད་པའོ། །གཡུལ་ལས་རྒྱལ་བྱེད་ཀྱི་ཐོད་པ་གླང་
ཆེན་མཆེ་བ་འབུར་པོ་གསལ་བར་དོད་ཅིང་རྒྱབ་ཏུ་རིང་པོར་ཟུག་པ། རྒྱབ་དབྱིབས་གླང་པོའི་རྒྱབ་ལྟ་བུ། མདུན་རྒྱབ་གཡས་གཡོན་སྙོམས་པ་རང་ས་འཐུག་ཅིང་མཐོ་བ། དགྲ་ས་དམའ་ལ་སྲབ་པར། རང་སར་རི་མོ་བཟང་འཇམ། དགྲ་སར་ངན་རྩུབ་ཡོད་པ། དབུས་ཀྱི་
གོང་གདོང་རིང་ལ་མཐོ་བ། ཚང་ར་མ་ཞོམ་ཞིང་རྒྱས་པའོ། །མཐོན་པོའི་ས་ཐོབ་བྱེད་ཀྱི་ཐོད་པ། སྤྱི་བོ་མཐོ་བ། རྒྱང་ལྟས་ངོས་འཇམ་ལ་ཞིབ་དུ་བལྟས་ན་རི་མོ་མང་ཞིང་ལེགས་པའི་མཚན་མ་ཅན། དེས་རིག་པ་དང་ནོར་འཕེལ་ལ་གཞན་གྱིས་བཀུར་བསྟི་བྱེད། རང་སའི་ཁ་
13-8-16a


གཡེལ་ལ་དགྲ་སའི་ཁ་ཆེར་དོག་པ། རི་མོ་བཟང་པོ་ཅན་གྱིས་ཆེན་པོའི་གོ་ས་ཐོབ། དེ་སོགས་ནད་མེད་པ་དང་བློ་གྲོས་འཕེལ་བ་དང་འཁོར་མང་བ་སྙན་གྲགས་ཆེ་བ་སོགས་ཅི་ལྟར་རིགས་པར་དཔྱད་པར་བྱའོ། །ཡང་མདོག་འདི་ལ་མུག་ཐོད་སྐྱ་གསེང་
དང་དཀར་པོ་བཟང་པོ་མ་ནོར་བ་དང་། དེ་བཞིན་དུ་མཁྲིས་ནད་ཀྱི་མདོག་སེར་པོ་དང་གསེར་མདོག །དུག་སོགས་ཀྱིས་སྔོན་པོ་དང་གཡུ་མདོག །མཛེ་ཐོད་སྨུག་པོ་དང་མཆོང་མདོག་སོགས་མ་ནོར་བར་བྱ་སྟེ། ཟླ་བ་གསེར་དང་པདྨ་སོགས། །ཡིད་འོང་མདངས་ལྡན་སྣུམ་བག་
ཅན། །མཐོང་བས་དགའ་བ་སྐྱེད་པ་ཡི། །ཁ་དོག་བཟང་ལྡན་བཀྲ་ཤིས་སོ། །དབྱིབས་ངན་པ་ནི་ཡོན་པོ་དང་གྲོག་སྐེད་ཁྱུང་མཆུ་དང་ཟ་ལུང་མེད་པ་ཡིད་དུ་མི་འོང་བ་དང་། ཆ་མི་མཉམ་པ་ངན། དབྱིབས་ལེགས་ཁོད་སྙོམས་ཡིད་དུ་འོང་བ་དང་། གླང་མཆེ་བར་བཙིར་བའི་ཟེར་དཔྱད་ཡར་བརྩིས་པའི་
ཟར་ཚག་འདྲ་ན་བསོད་ནམས་རྐང་ཚུགས། རང་སའི་ཕྱོགས་སུ་ཁ་གྱེད་ན་བསོད་ནམས་རྒྱ་ཆེ། རང་གི་རིགས་རྒྱུད་ལ་བྱང་ཆུབ་སེམས་དཔའ་སྐྱེ། ནང་དུ་རུབ་ན་བསོད་ནམས་སྐྱེ་བུལ་གཞན་དོན་མི་འགྲུབ། ཐམས་ཅད་སོ་སོ་ན་གྱེད་ན་བསོད་
ནམས་འབྲིང་། དེས་ན་རང་གི་ཁ་ཁྱེར་རྣམས་ཕྱིར་གྱེད་ཅིང་འཐུག་པ། དགྲ་ས་སྲབ་ཅིང་ནང་དུ་རུབ་པ་བཟང་། དེ་ལས་བཟློག་ན་ངན། ཕྱི་སོའི་རྣ་ལྟག་ཏུ་རུས་ལྷན་བྱུང་ན་མི་གཞན་གྱིས་མགོ་འདོགས་པ་འབྱུང་། དེ་ཡང་རང་སར་རང་འདོགས། དགྲ་སར་དགྲ་འདོགས།
མཚམས་སུ་ཡོད་ན་གཉིས་ཀ་ལ་འདོགས། རང་སའི་ཁ་ཁྱེར་ལ་ལྷ་བ་ངན་སྟེ་བུག་པ་མང་ན་འཁོར་གྱི་ནང་ནས་དགྲ་ལྡང་ཞིང་བོར་སྟོར་འོང་། བུ་ཚ་བུད་མེད་འཁོར་འདབ་ཀྱི་སར་བྱུང་ནའང་དེ་དག་ལ་ངན། དགྲ་སར་དགྲ་ལ་འོང་། ཁ་ཁྱེར་སྟེང་དུ་རི་མོ་གཞུ་བརྡུང་བ་འདྲ་ན་
13-8-16b


ང་འདུ་བའོ། །སྲིན་ཁུང་བྱུང་ན་ནད་མང་། ཕྱི་སོ་རྒྱབ་ཀྱི་རང་སར་རྩ་རྗེས་ཤིང་རྗེས་མདུང་ཤིང་འདྲ་བ་བྱུང་ན་ཚེ་ཐུང་། དགྲ་སར་དགྲ་བོ་ཚེ་ཐུང་། ཕྱི་སོའི་རང་སར་རྩ་རྗེས་དར་སྐུད་ཀྱིས་དྲུབ་པ་འདྲ་ན་ཚེ་རིང་། དགྲ་སར་དགྲ་ཚེ་རིང་། ཕྱི་སོར་རང་ས་དགྲ་ས་ནི་སྲུབ་མཚམས་མུ་
ཏིག་ཙམ་གྱིས་བཅད་པས་ཤེས། ནང་དུ་རྣ་བའི་ཐད་སོར་གཞུགས་ཐིག་བཏབ་པ་སོགས་ས་དགུ་བཞིན་ནོ། །མདོག་ངན་པ་ནི་སྔོ་སྐྱ་ཐེ་བའི་མདོག་དང་། སྔོ་ནག་ཕུག་རོན་གྱི་སྐེ་འདྲ་བ། སེར་ནག་འུག་པའི་རྒྱབ་འདྲ་བ་དང་དུད་ཁ་སོགས་དང་། མི་སྡུག་པའི་ར་རི་ཡོད་ཅིང་མདོག་
མི་གསལ་བ་མོག་མོག་པོ་རྩུབ་ལ་མདངས་མེད་པ་ངན་པས་སྤང་ངོ་། །དུམ་བུ་ལྔ་ཕན་ཆད་ནས་སྤངས་པར་བྱ་སྟེ། པྲེ་ཏ་དུམ་དྲུག་སློང་བར་འགྱུར། །ཏིར་དུམ་བདུན་གཏི་མུག་འཕེལ། །ན་རག་དུམ་བརྒྱད་དམྱལ་བར་སྐྱེ། །དུམ་དགུ་ཕུང་ཐོད་མ་རུང་པ། །དྲུག་ནས་དགུ་ཡི་བར་གྱི་
དུམ་བུ་ཅན་གྱི་ཐོད་པར་དགྲ་བགེགས་མནན་པར་བཟང་། དེ་མིན་འཆང་མི་རུང་། ཡང་དུམ་དྲུག་མི་ཤིས་སྡུག་བསྔལ་འབྱུང་། །དུམ་བདུན་གྲིར་གསོད་ནོར་རྫས་འཚིག །བརྒྱད་པས་ཚེ་ཐུང་ལོངས་སྤྱོད་ཉམས། །ལྷ་མོ་གནས་མཁར་ལ་སོགས་ནས། །དེ་ལས་མང་བ་མ་
བཤད་ཀྱང་། །དགུ་པ་ཤིན་ཏུ་མི་རུང་ལ། །དེ་ལས་མང་བའི་དུམ་བུ་དག །བྱུང་ན་ཆོས་ལེགས་ཞེས་སུ་ནི། །ཁུང་ལྡན་གཞུང་འགས་བཤད་ཅེས་གྲགས། །དགོངས་འདུས་ཐོད་བརྟག་ལས་བཅུ་པ་ངན་ལ་བཅུ་གཅིག་ཕན་ཆོད་མཆོག་གི་ཐོད་པ་སྟེ་བཟང་གསུངས། མཚོག་མའི་
དཀྱིལ་དུ་གཞུང་སྲུབ་ཀྱིས་བཅད་པ་ནལ་ཐོད་ཅེས་མཚན་ངན་དུ་གཏོགས་ན་ཡང་། མ་མོའི་དམ་རྫས་ཁྱད་པར་ཅན་ཡིན་ནོ།། ༈ །།ད་ནི་ཐོད་པའི་ནང་གི་རི་མོ་བརྟག་པ་ལ། རྣ་ལྷན་གཡས་གཡོན་ཕྱོགས་ནས་རྩ་བ་བྱས་ཏེ། ཡལ་ག་རྒྱས་པའི་རྩེ་མོ་ཚངས་པའི་བུ་གར་
13-8-17a


བཀན་པ་འདྲ་བའི་རི་མོ་ནི་དཔག་བསམ་གྱི་ཤིང་ཞེས་བྱ་སྟེ། འདི་ལ་ཡལ་ག་མང་ཞིང་ཡན་ལག་གྱེས་པ། ལོ་འདབས་དང་མེ་ཏོག་འབྲས་བུས་བརྒྱན་པ། འབྲས་བུའི་དབྱིངས་ཀྱང་དུམ་གཅིག་པ་ཡིན་ན་རྡོ་རྗེའི་དབྱིབས་ནས་དུམ་ལྔ་འཁོར་ལོའི་བར་
གྱི་མཚན་མ་གསལ་བ་ཤིན་ཏུ་བཟང་། དེ་ལྟར་མིན་ཀྱང་ཡལ་ག་ལོ་མ་མང་ཞིང་རྒྱས་པ་ལོ་དབྱར་ཤིང་ཞེས་བཟང་། དེ་ལྡོག་ལ་དགུན་ཤིང་དུ་འདོགས་ཏེ་ཞན། ཡལ་ག་འབྲས་བུ་སོགས་ཤིང་གི་རྩེ་མོའི་རིགས་རྣམས་ཕྱི་སར་ཤད་ཀྱིས་མ་ཕྱོགས་པར་རང་སར་འདུད་ཅིང་སྤུངས་པའི་རི་
མོ་བྱུང་ན་དཔལ་འབྱོར་འཕེལ་ཞིང་དགེ རི་མོ་རྣམས་འཇམ་མཉེན་དབྱིབས་ལེགས་ཤིང་བར་མ་ཆད་པར་རིང་དུ་དོད་པ་མ་གུག་ཅིང་དྲང་ལ་གསལ་ཞིང་བསྟར་ལེགས་པའི་བཀྲ་ཤིས་ཀྱི་རི་མོ་དག་གི་མཚན་མ་ལྡན་པ་མཆོག་ཏུ་དགེའོ། །ཤིང་རྩེ་བལྟས་ཚངས་བུག་ནས་བྱུང་ཞིང་ཁ་ཐོད་
མདུན་རང་ཕྱོགས་བསྟན་པ་ནོར་ཐོད་ཡིན། རྣལ་འབྱོར་པའི་བཏུང་ཕོར་བྱས་ན་བཟའ་བཏུང་འཕེལ། བུ་ག་ལ་བརྟག་ན། ཚངས་བུག་གཏན་ནས་མེད་པ་ནི་ཐོད་ལྐུག་ཞེས་བྱ་སྟེ་བདུད་རིགས་ཀྱི་ཐོད་པ་ཡིན་པས་དཔྱད་གཞན་ལེགས་ཀྱང་བཟང་བརྒྱ་ངན་གཅིག་གིས་འཇོམས་པ་ཞེས་
བྱ་སྟེ་འཆང་མི་རུང་། དབང་སྡུད་ཀྱི་སྐབས་སོགས་སུ་མཁོ་བ་ཡོད། ཚངས་པའི་བུ་ག་ཞོ་འཛག་ནུས་པ་ཧ་རེ་བ་ཡོད་ན། སུས་བརྟེན་ཀྱང་མཁའ་སྤྱོད་འགྲུབ། ཚངས་བུག་གཉིས་སོགས་ཡོད་པའང་སྲིད་དེ་བཟང་བཤད་སྣང་། མདུན་དུ་གཉིས་བྱུང་ནས་འོག་གི་དངོས་
གྲུབ་ཐོབ། རྒྱབ་ཏུ་གསུམ་བྱུང་ན་དངོས་གྲུབ་ཕྲ་མོ་འབྱུང་ཞེས་དཔེ་འགར་བཤད། ཚངས་བུག་གཅིག་པ་སྤྱི་གཙུག་མ་ཡོ་བར་བྱུང་ན་ལེགས། ཚངས་བུག་མ་གཏོགས་པའི་རོ་ཁུང་དང་སྲིན་རྗེས་སོགས་བུ་ག་ཧྲད་ཧྲེད་གང་བྱུང་ཡང་མི་དགེའོ། །རུས་རྒྱུ་ནི་ཇི་ཙམ་སྲ་ཞིང་
13-8-17b


མཁྲེགས་པ་བཟང་། རུས་པའི་སྲབ་མཐུག་ནི། མཐུག་ཤིང་ལྗིད་ལྡན་མཁྲེགས་པ་བཟང་ལ་སྤྱིར་སྲབ་མཐུག་ཁོད་སྙོམས་ལས། ཁྱད་པར་མདུན་ངོས་རང་ས་ཕྱོགས་མཐུག་ཅིང་། ལྟག་པ་དགྲ་སའི་ཕྱོགས་སྲབ་ན་ཤིན་ཏུ་ལེགས། དེ་ལྡོག་ངན། རྣ་ལྟག་དང་མུར་
གོང་གཉིས་པོ་ཅུང་ཟད་སྲབ་པ་ཐོད་པ་ཀུན་ལ་འོང་། བར་གྱི་ལྷ་བ་ཆུང་ཞིང་རུས་པ་ཆེ་ན་བཟང་། དེ་ལྡོག་རུས་རྒྱུ་ཅུང་ཞན། ལྷ་བའི་ཟམ་པ་བརྒྱུད་མར་འཁོར་ན་མཆོག་ཏུ་ལེགས་ཞེས་གསུངས་ཀྱང་། རྣ་ལྟག་སོགས་སུ་ཅུང་ཟད་འཁོར་དཀའ་བར་མཐོང་། ད་ནི་
གནས་མལ་དཔྱད་དེ། སྤྱི་ཙམ་དུ་མདུན་དཔྲལ་བ་ངོས་རང་ས། གཡས་མི་ས། གཡོན་ནོར་ས། རྒྱབ་ལྟག་པའི་ཕྱོགས་ཕྱི་ས་དང་ཞིབ་ཏུ་རྣ་བའི་ལྗོན་ཤིང་གཉིས་ཀྱི་རྩ་བར་ཤིང་བུས་འཕྲེད་ཐིག་བཏབ་པ་དཀྱིལ་ཚད་དོ། །དེ་ཡི་ཕྱོགས་གཉིས་ཆ་མཉམ་ཕྱེད་མར་
བགོས་པས་ལིང་ཚེ་བཞི་པོ་དེའི་ཐོད་པའི་དཔྲལ་བའམ་མདུན་གྱི་ཕྱོགས་ངོས་ནས་ཕར་བརྩིས་པས་དང་པོ་རང་ས་ཡིན། གཉིས་པ་འཕྲེད་དུ་དུམ་གསུམ་བཅད་པས་རང་གི་གཡས་ཕྱོགས་ནས་ཚུར། བླ་མ་དང་ལྷ་དང་སློབ་མའི་ས་རུ་བརྩི། གསུམ་པ་ཆ་བཞིར་བཅད་པ་
གཡས་ནས་གཡོན་དུ་རིམ་བཞིན་ཚེ་འདས་དེ་དང་ཡོན་བདག་དང་གཟུངས་མ་དང་། དུར་སར་དཔྱད། བཞི་པ་ལྟག་པའི་ཕྱོགས་ནི་དགྲ་སའོ། །མཉམ་པའི་སར་བཞག་ཚེ་མདུན་མཐོ་ཞིང་རྒྱབ་དམའ་ན་གཞན་གྱིས་མི་བརྫི། གཞན་ལིང་ཚེ་དགུར་
བྱས་ཏེ་དཔྱད་མཁན་འདུག་ཀྱང་ཁུང་ལྡན་ཡིན་མིན་བརྟག་གོ། དེ་ལྟར་གནས་མལ་དགུ་པོ་དེར་བཟང་ངན་གྱི་མཚན་མ་གང་བྱུང་སོ་སོར་བརྟག་གོ། ཐོད་པའི་ཕྱི་འམ་ནང་དུ་རུས་འབུར་ཁྲ་བརྒྱབ་པ་ལྟ་བུ་ཆེ་ཆུང་གང་བྱུང་རུས་ཁྲ་ཞེས་བྱ་སྟེ། རང་སར་བྱུང་
13-8-18a


ན་མཆོག་ཏུ་བཟང་།  ཐོད་པའི་ནང་གི་དབུས་ན་མཛུབ་རྗེས་ལྟ་བུའི་གཤོང་བུ་བཞི་བྱུང་ན། འདོད་འཇོ་བ་ཡི་ནུ་རྗེས་ཞེས་བྱ་སྟེ་རབ་ཏུ་དགེ། གླང་པོ་ཆེའི་རྗེས་བཞི་དོད་པ་འཇམ་ཞིང་འབུ་ཚག་མེད་ན་རྐང་བཞི་འདུ་གསུངས། མདུན་ངོས་སུ་
གཤོང་བུ་གཉིས་བྱུང་ན་ཡིད་བཞིན་ནོར་བུ་ཡིན་ཏེ་བཟང་། ཐོད་པའི་དབུས་སུ་གཤོང་བུ་ནར་མོ་གཅིག་གམ་གཉིས་མདུན་ཕྱོགས་སུ་དོད་ན་རྣལ་འབྱོར་པའི་ཟ་ལམ་ཡིན་ཏེ་བཟང་། འདི་རྣམས་འཆང་བ་ཙམ་གྱིས་ཟས་ནོར་ལོངས་སྤྱོད་ངེས་པར་འཕེལ། གཤོང་བུ་འདི་རྣམས་
འཇམ་ལ་ལེགས་པར་དོད་པ་དགེ། ཐོད་པའི་མདུན་ཕྱོགས་དཔྲལ་བའི་ནང་གི་རུས་པ་འབུར་པོ་དེ་ལ་ཁྱུང་མཆུ་ཟེར་འདི་འབུར་ཆེ་ཞིང་རྣ་རིང་པོར་དོད་ན་རྣལ་འབྱོར་སྲོག་གི་ཀ་བ་ཡིན་ཏེ་ཤིན་ཏུ་བཟང་། དེ་མཛུབ་མོར་བཀལ་བཏུབ་པ་ཙམ་བྱུང་ན་ངན་པ་དགུ་ཐུབ་ཞེས་བྱ་
སྟེ། ས་གནས་མལ་དགུ་པོའི་ངན་པ་ཅི་ཡོད་ཚད་སོགས་སྣའམ་ཁྱུང་མཆུ་འདི་བཟང་ན་ཐུབ་པས། སྐྱོན་བརྒྱ་ཡོན་ཏན་གཅིག་གིས་ཆོམ་པ་ཞེས་ཤིན་ཏུ་བཟང་། ཁྱད་པར་ཐོད་པ་དབྱིབས་ཟླུམ་ཡིད་འོང་དུམ་གཅིག་ལ་བྱུང་ན་ལྷག་པར་བཟང་།  ཁྱུང་མཆུ་
མཐུག་ན་བསོད་ནམས་མཐུག །རྣོ་ན་ཤེས་རབ་རྣོ། རྒྱུན་རིང་ན་བསོད་ནམས་ཡུན་རིང་། ཁྱུང་མཆུའི་སྟེང་དུ་རི་མོ་དཀར་པོ་ཕྲའུ་བར་མ་ཆད་པ་དོད་པའམ། དེའི་འགྲམ་གཉིས་སུ་གཤོང་བུའམ་རི་མོ་དཀར་པོ་ཁབ་མགོ་ཙམ་འབུར་དོད་དམ། མིན་ཀྱང་རང་མདོག་
མངོན་པ་བསྟར་ལེགས་པ་བྱུང་ན་ཚེ་ཡི་ལམ་ཡིན་ཏེ་ཤིན་ཏུ་བཟང་། ཁ་ཅིག་ཏུ་ཁྱུང་མཆུ་སྤུ་གྲིའི་སོ་ལྟར་ཧ་ཅང་མི་རྣོ་ཞིང་འཇམ་ན་ལེགས་ཞེས་གསུངས། རང་སར་ཐིག་ལེ་ཟླུམ་པོ་ཉི་མའི་འོད་ཟེར་ལྟ་བུས་བསྐོར་བ་སྐྱིད་ཀྱི་ཉི་མ་ཞེས་བྱ་སྟེ་བཟང་། ཉི་མ་འཁྱིམ་པ་ལྟ་བུའི་རི་
13-8-18b


མོ་སྨུག་པོ་སྣུམ་ཁྱིལ་ལེ་བ་བྱུང་ན་ཞག་གི་ཆུ་མིག་ཡིན་ཏེ་རང་སར་བྱུང་ན་ཆེས་དགེ། གཞན་ཡང་དུང་སོགས་བཀྲ་ཤིས་པའི་རྫས་ཀྱི་རིགས་དང་། ནས་འབྲུ་དང་ཁབ་མགོ་ལྟ་བུ་དང་། ཞི་སོགས་ཀྱི་ལས་མཚུངས་རི་མོ་ཟླུམ་པོ་སོགས་གཤང་ངམ་འབུར་དང་རི་མོ་གང་རིགས་
དབྱིབས་ལེགས་སུ་བྱུང་བ་བཟང་ཞིང་ཁྱད་པར་རང་སར་དགེ། བྱེ་བྲག་ཏུ་རྡོ་རྗེ་སློབ་དཔོན་གྱི་ས་རུ་རིགས་ལྔའི་ཕྱག་མཚན་གང་བྱུང་ཡང་ལེགས། སློབ་མའི་སར་མཆོད་པ་ལྔའི་གཟུགས་བརྙན་བཟང་། ཚེ་འདས་སར་གང་དུ་སྐྱེས་པའི་རིགས་དྲུག་གི་ས་བོན་འབྱུང་
བར་བཤད། ཡོན་བདག་ས་རུ་གླིང་བཞིའི་རི་མོ་བྱུང་ན་བཟང་། གཟུངས་མའི་སར་བཀྲ་ཤིས་རྟགས་བརྒྱད་གང་བྱུང་བཟང་། དུར་སར་ཚེ་ལམ་བྱུང་ན་བཟང་། རི་མོ་དཀར་པོ་ཁབ་མགོ་ཙམ་འབུར་རམ་རང་དོད་ལ་ཚེ་ལམ་ཟེར། དགྲ་སར་ཁུང་སོགས་ངན་པ་བྱུང་
ཡང་བཟང་། མདོར་ན་རང་སར་འཇམ་ལ་བཀྲ་ཤིས་དགེ་བའི་མཚན་མ་དང་ལྡན་པ་དང་། དགྲ་ས་རྩུབ་ལ་རད་རོད་མང་ཀྱང་ལེགས་པ་ཡིན་ནོ། །ཐོད་པ་འཇམ་ན་མི་ཁ་བྱམས། ལྗིད་ཆེན་བསོད་ནམས་འཕེལ། དབྱིབས་ལེགས་ན་ནོར་འདུ། གཏིང་ཟབ་ན་ཟས་
འདུ། འཐུག་ཅིང་ཁོད་སྙོམས་པ་ལོངས་སྤྱོད་བརྟན། དྭངས་ཤིང་མཁྲེགས་ན་ཆོས་འཕེལ། ནང་གི་རི་མོ་རྒྱས་ན་སྲིད་དང་ཆོས་འཕེལ། ཚངས་བུག་གསེང་དྲང་མི་བརྒྱུད་ཤེས་རབ་གསལ། འབར་འབུར་ཐམས་ཅད་ཕྱི་ན་ཡོད་ཅིང་། ཀང་ཀོང་ཐམས་ཅད་ནང་
ན་ཡོད་པ། རྒྱང་བཀྱེད་དེ་བལྟས་ན་རྩུབ་ཅིང་ངར་ཆེ་བ་འདྲ་བ། བཏུད་དེ་བལྟས་ན་འཇམ་ལ་མཁྲེགས་ཤིང་འོད་ཆེ་བ་བཟང་། དེ་ལྡོག་ངན། མར་ལ་ཡུངས་ཀར་བཏབ་འདྲ་ཁྲ་མེ་རེར་འདུག་པ་ཡང་བཟང་རྟགས་ཡིན། འབར་འབུར་གཤང་གཤོང་ལེགས་པ་རྣམས་
13-8-19a


རང་སར་བཟང་། ཕྱི་སར་ཡོད་ན་ངན། རྩ་ཡི་རྗེས་དར་སྐུད་ཀྱིས་བཙེམ་པ་འདྲ་བ་ཚེ་རིང་། མདུང་ཤིང་འདྲ་བ་ཚེ་ཐུང་། ཚེ་རིང་ཐུང་གི་མཚན་མ་རང་སར་རང་དང་། དགྲ་སར་དགྲ་ལ་དཔྱད། རྩ་རྗེས་གཡུང་དྲུང་དང་། གདུགས་དང་ཁྲི་
སོགས་ཀྱི་དབྱིབས་བྱུང་ན་ལེགས། ཞགས་པ་མདུང་སོ་སོགས་ངན། མདོར་ན་ཕྱི་ནང་གང་དུའང་ངན་སྐྱོན་མེད་ལ་དགེ་མཚན་བཀྲ་བ་མཚན་ཉིད་དང་ལྡན་པའི་ཐོད་པ་དེ་ནི། ཡིད་སྡུག་པའི་ཆུང་མ་བཞིན་དུ་མཐོང་བ་ཙམ་གྱིས་ཡིད་དུ་འོང་བ། རིན་པོ་ཆེའི་རྒྱན་བཟང་པོ་ལྟར་
ལག་ཏུ་བླང་ན་ལྗིད་དང་ལྡན་པ། སྙན་པའི་གཏམ་ཐོས་པ་ལྟར་བྲང་ལ་བཀབ་ན། ཡིད་དགའ་སངས་ཀྱིས་འོང་བ་ཡིན་ཏེ། དེ་འདྲའི་ཐོད་པ་བཟང་པོ་མཐོང་བ་ཙམ་དང་རེག་པ་ཙམ་གྱིས་ཀྱང་དེའི་ཉིན་པར་འདོད་པའི་དོན་དང་འཕྲད་པར་ནུས་ན། རྒྱུན་དུ་འཆང་བས་ལྟ་ཅི་སྨྲོས་
ཏེ། དངོས་གྲུབ་མཆོག་འགུག་པའི་རྫས་ཁྱད་པར་ཅན་ཡིན་ནོ། །མཚན་ལྡན་ཐོད་པ་ཁྱད་པར་ཅན་རྣམས་ནི། རང་གི་བསོད་ནམས་ཀྱི་སྐྱེ་འབྲི་དང་བསྟན་ནས་འབྲི་དང་བསྟུན་ནས་དུས་གཉན་ཐམས་ཅད་ལ་མདོག་དང་རི་མོ་འགྱུར་བར་བཤད་དོ། །ཡང་ཐོད་པའི་ཕྱི་རྒྱབ་ཀྱི་དཔྲལ་བའི་རྭ་གཉིས་
པོའི་རུས་པ་འབུར་དུ་དོད་པ་ཆེར་མངོན་ཤིང་། མཆེ་བའི་རྩེ་མོ་རྒྱབ་དགྲ་སར་ཕྱོགས་པ་བྱུང་ན་གླང་ཆེན་མཆེ་བ་ཞེས་བྱ་སྟེ། འདི་འཆང་བས་དགྲ་ལས་རྣམ་པར་རྒྱལ་བར་བྱེད་དོ། །རྣལ་འབྱོར་པའི་ཚེ་འཕྲང་བརྟག་ན། རང་གི་འཆང་བའི་ཐོད་པ་དེའི་སོག་སྣའི་མཚམས་ནས་
གཡས་སྐོར་དུ་ལྟག་པའི་དབུས་བར་མཐེབ་སོར་གྱིས་རིམ་པར་གཞལ་བས་སོར་རེ་མི་ལོ་ལྔ་རེར་བརྩིས་ཏེ་ཁྱོན་མི་ལོ་བརྒྱའི་བར་དུ་དཔྱད། གང་དུ་སྲིན་བུག་ཕོག་པ་དེར་ནད་འབྱུང་བ་སོགས་དཔྱད་དོ། །ད་ནི་བཟུང་དུ་མི་རུང་བའི་མཚན་མ་ངན་པ་བཤད་པ་ལ་བཅུ་དྲུག་ཡོད་དེ། བཟུང་
13-8-19b


དུ་མི་རུང་དོར་བྱ་ནི། །དེ་ཡང་འདི་ལྟར་གོ་རིམ་བཞིན། །དུམ་ངན་གསུམ་གྱིས་ངན་སོང་གསུམ། ༡ །མདོག་ངན་གསུམ་གྱིས་ས་ཡང་ཉམས། ༢ །རི་མོ་ངན་པས་རྒྱུད་ངན་འབྱུང་། ༣ །ཉིས་རིས་གྱིས་ནི་རང་ཉིད་གསོད། ༤ །གླང་པོའི་རྒྱབ་ནི་ནད་དུ་འགྱུར། ༥ །བྱ་རོག་རྗེས་ངན་འཐབ་
རྩོད་མང་། ༦ །སྡོང་གཅིག་གིས་ནི་རབ་ཆད་འགྱུར། ༧ །སྲུབ་ཁུང་གིས་ནི་ན་ཚ་འོང་། ༨ །དུར་སོས་རྟ་ཕྱུགས་མེད་པར་བྱེད། ༩ །དུར་ཁུང་ཚེ་ཐུང་ནོར་འཕྲོག་འགྱུར། ༡༠ །སྲིན་ཁུང་འཁོར་ངན་མི་ཁ་སྡང་། ༡༡ །རྩ་རོས་ཆོམ་རྐུན་ཕན་ཚུན་འབྱེད། ༡༢ །སྲིན་རྗེས་འདྲེ་ངན་ཟ་སྣ་འཇུག༡༣ །སྲིབ་ཁུང་
གཟུངས་མ་དགྲ་རུ་ལྡང་། ༡༤ །རྣལ་འབྱོར་གྲོང་ཆོག་བྱེད་པར་འགྱུར། །ཕུང་ཤུལ་ཁ་ངན་འབབ་པ་ཡིན། ༡༥ །བུ་ག་ངན་པའི་མཚན་ཉིད་ནི། ༡༦ །བུ་ག་མེད་ན་རང་བློ་རྟུལ། །འཁོར་ངན་བུ་ཚ་གླེན་ལྐུག་འབྱུང་། །སློབ་དཔོན་བློ་ལྡན་འགྱུར་མི་སྲིད། །བུ་ག་མང་ན་དངོས་གྲུབ་ཡལ། །
བུད་མེད་མ་ནིང་ཚངས་བུག་མེད། །བུ་ག་མང་རྣམས་དོར་བར་བྱ། །དེ་ཡང་འདི་ལྟར་དུམ་བུ་དྲུག་པ་དང་བདུན་པ་དང་བརྒྱད་པ་གསུམ་ནི་དུམ་ངན་གསུམ་མོ། །མདོག་ངན་གསུམ་ནི་སྔོ་སྐྱ་སྔོ་ནག་གསེར་ནག་གསུམ་མོ། །རི་མོ་ངན་པ་ཞེས་པ་ཕྱི་ནས་ཁ་དོག་དང་དབྱིབས་གླིང་རྣམས་
ངན་ལ། ནང་ན་ལྕགས་ཀྱུ་ཞགས་པ་ལྕགས་སྒྲོག་དབྱུག་ཐོ་རལ་གྲི་དགྲ་སཏྭ་སྟེ་སྐྱོན་ཅན་གྱི་རི་མོ་དྲུག་དང་། གཞན་ཡང་རྩེ་གསུམ་དང་ཁྲོ་བོའི་དབྱིབས་འདྲ་བའམ། ཡ་མ་རཱ་ཛའི་ཡི་གེ་དོད་པ་སོགས་དེ་འདྲའི་ཐོད་ངན་སུས་འཆང་བ་དེ་འཆི་བདག་གི་དྲུང་དུ་ཉེ་བར་གནས་སོ། །
གཤིན་རྗེ་གཤེད་ཀྱི་འཁྲུལ་འཁོར་བཞག་པའམ། འཆི་བདག་ཞལ་དབྱེ་སོགས་ཀྱི་དྲག་རྫས་ལ་མཁོའོ། །གཞན་ཡང་། སྦྲུལ་རིས་བྱ་རྗེས་ཁྱི་རྗེས་འབུ་རྗེས་སོགས་ཚེ་འདས་དང་དགྲ་ས་མིན་པ་གོང་དུ་བྱུང་ཡང་མི་དགེ་བའི་མཚན་མའོ། །སྡོམ་སྡིག་སྦྲུལ་དང་སྦལ་ལྕོང་
13-8-20a


དང་ཝ་དང་ཅེ་སྤྱང་སོགས་སྲོག་ཆགས་མི་ཤིས་པའི་གཟུགས་དང་མ་ཏྲཾ་གྱི་གཟུགས་ཀྱི་རི་མོ་དོད་པའི་ཐོད་པ་དེ་ནི་ལྷ་འདྲེས་བདག་ཏུ་བཟུང་བར་ངེས་ཏེ།  དེ་འཆང་བའི་མི་ལ་འདྲེ་གདོན་གྱིས་གནོད་པར་འགྱུར་རོ། །གཞན་ཡང་ལྗོན་ཤིང་གི་རི་མོའི་རྩེ་
མོ་གུག་ཅིང་ཆད་པ་ཐུང་བས་ཚངས་བུག་ཏུ་མ་སླེབ་པ། སྡོང་པོ་མདོག་ནག་ཡལ་ག་མེད་ཅིང་། རི་མོ་འཛིང་པ་དང་ཀྱོག་པོ་འཕྲེད་ཉལ་མེ་ཏོག་ལོ་འབྲས་བྲལ་བ་དང་། རྩུབ་ཅིང་མི་སྡུག་པ་དུར་ཁྲོད་ཀྱི་གཟུགས་སྣང་འདྲ་བ་རྣམས་གང་གིས་འཆང་བའི་གང་ཟག་དེ་གླིང་བཞི་
ལ་དབང་བ་ཡིན་ཀྱང་ཐ་མ་ལྟོག་གྲིར་འཆི་བས་དེས་མཚོན་རི་མོ་ངན་པ་ཀུན་སྤང་བར་བྱའོ། །ཉིས་རིམ་ཞེས་པ་རང་སའི་དགུ་ཐུབ་ཀྱི་སྟེང་གི་ཁ་ཁྱེར་དེར་ལྷ་བ་སྟོང་པའི་བུ་ག་བྱུང་ན་ཚེ་ལ་གནོད་པ་སོགས་མི་ཤིས་པ་སྣ་ཚོགས་འབྱུང་། ཐོད་པ་དཀྱིལ་མཐུག་མཐའ་སྲབ་ལ་རྒྱབ་ཕྱོགས་
སུ་གཉེར་མ་ཐག་ཐུག་བྱུང་ན་གླང་རྒྱབ་ཟེར། གཞན་གྱིས་ཐུབ་ཆོད་བྱེད་ནད་འབྱུང་། རྩ་བ་གཅིག་ལ་ཡལ་ག་གསུམ་མམ། །རྩ་བ་གཉིས་ཁ་དབྲག་ཅན་གྱི་རི་མོ་ལ་བྱ་རོག་གི་རྗེས་ཞེས་བྱའོ། །རང་ལ་མགོ་གསུམ་སྟོང་ཅིག་ཡིན་ཟེར། སླར་བརྟག ། བྷ་གའི་དབྱིབས་
འདྲ་བའི་ཁུང་བུ་ཐག་ཐུག་ཅན་རྩུབ་མོ་ནི་སྲུབ་ཁུང་ཞེས་བྱ་བ་ཡིན། རི་མོ་སྦྲུལ་འཁྱིལ་བ་ཐག་ཐུག་ཅན་ནི་དུར་ལམ་མམ་དུར་ས་ཞེས་བྱ། ཁ་ཆུང་གཏིང་ཟབ་ཀྱི་བུག་པ་དུར་ཁུང་ཡིན་རོ་དོང་ཡང་ཟེར། རྩ་རྣམས་འཁོར་ཞིང་ཁུང་བུ་ཆུང་དུ་ཁབ་ཤུབ་འདྲ་བ་མང་པོ་ཁ་
ཁུང་འབྲེལ་བ་ཅན་སྲིན་ཁུང་ཡིན། གཏིང་ཟབ་ཐག་ཐུག་མང་བའི་ཁུང་བུ་རིང་ཐུང་ནས་ཙམ་བྱུང་ན་རྩ་རོག་ཡིན། རིང་ཐུང་མ་ངེས་ལ་གཏིང་མི་ཟབ་པའི་རྩ་རེས་གྱེན་ཐུར་འཕྲེད་སོགས་གར་ཡང་སོང་ན། སྲིན་ཐབ་སྲིན་རྗེས་སྲིན་བུས་ཟོས་རྗེས་ཡིན། ཞེས་བྱར་
13-8-20b


འདོད། ཐག་ཐུག་མང་ལ་ཁ་དོག་ནག་པོ། དབྱིབས་ཟླ་གམ་འདྲ་བ་སྲིབ་ཁུང་ཡིན།  གླང་ཆེན་མཆེ་བའི་རྩེ་གཉིས་ཀྱི་ཐད་ཀ་སོགས་སུ་བུ་ག་ཟུར་གསུམ་བྱུང་ན་ཕུང་ཤུལ་ཡིན། ཚངས་བུག་མེད་དམ་བུ་ག་མང་བ་ནི་བུ་ག་ངན་པ་སྟེ། འདི་རྣམས་ཐོད་ངན་ཡིན་པས། དགྲ་
བོ་ཆམ་ལ་ཕབ་པར་ཤིས། །གླིང་དྲུག་མཚན་ཉིད་ངན་པ་ནི། །སྲིན་པོའི་ཟ་ལམ་ཡིན་ཞེས་གྲགས། །དེ་རུ་དགྲ་བཅུག་མྱུར་དུ་འཆི། །གླིང་བདུན་རྒྱལ་པོའི་ཧོམ་ཁུང་ཡིན། །དེར་བཅུག་དགྲ་ལ་སྨྱོ་འབོག་འོང་། །གླིང་བརྒྱད་མཚན་ཉིད་ངན་པ་ནི། །བདུན་ཀྱི་རང་འཐག་
ཞེས་བྱ་སྟེ། །དེར་བཅུག་མ་བསྒྲུབ་ཀྱང་དགྲ་འཆི། །དེ་སོགས་ཐོད་ངན་འཆང་མི་རུང་། །གལ་ཏེ་ཅིས་ཀྱང་འཆང་འདོད་ན། །ཐོད་མཁར་འཆང་སྲུང་རུས་སྦལ་གྱི། །ཐོད་པ་བཅང་ན་འཆང་དུ་རུང་། །རུས་མི་གཅིག་པའི་ཐོད་པ་དགུ་ལྷན་ཅིག་ཡོད་ན་གནས་དེ་དུར་ཁྲོད་ཀྱི་ར་བར་འགྱུར་བས་ངན་པ་
རེ་རེ་ཡོད་ཀྱང་སྐྱོན་དུ་མི་འགྱུར་ཞེས་དགོངས་འདུས་ཐོད་བརྟག་ལས་གསུངས་སོ། །མཆན། ཐོད་ངན་མཐོང་རེག་མི་དགེ་འབྱུང་། །ཤིན་ཏུ་ངན་པའི་ཐོད་པ་རུ། །དགྲ་བོའི་མིང་བཅུག་ཙམ་གྱིས་གནོད། །ཐོད་དཔྱད་ངན་པའི་འབྲས་བུ་རྣམས། །མནན་ཐོད་བྱས་ན་དགྲ་ལ་འབྱུང་། །གཞན་
ཡང་ངན་པའི་མཚན་མ་ནི། །རྒང་ལུང་མཆི་རྗེས་ཁྲག་རིས་ཅན། །སྐྱོང་འབུར་ཅན་ལས་བདེ་མི་སྲིད།  །ཁྱད་པར་ངུ་མཆི་མའི་རྗེས་རྗེས་མྱ་ངན་མང་། །ཡོ་བའི་དབྱིབས་ཅན་ཡིད་མི་བདེ། །ཤིང་སྡོང་ལོག་ན་ཟས་ནོར་འཛད། །ལྟག་པའི་ནང་ངོས་ཟུག་སྣ་རྣོ་ནའོ་དགྲ་མཆུ་རྣོ་ན་དགྲ་ངོ་ཆེ། །ཤིན་ཏུ་མཁྲེགས་ཀྱང་སྲབ་
ཆེས་ན། །འཚེ་བ་མང་ཞིང་ཚེ་ཐུང་འགྱུར། །མཐུག་ཀྱང་བུ་ག་མང་པོ་ཅན། །ནོར་གོད་ཆེ་ཞིང་གང་སྟོང་འགྱུར། །རུས་ལྷག་མཐེ་བོང་ཙམ་བྱུང་ཞིང་། །བུག་རྡོལ་ཅན་བྱུང་གྲི་རུ་འཆི། །ནང་གི་གཞོང་བུ་མེད་པ་དང་། །
13-8-21a


ཡོད་ཀྱང་རྩུབ་ཅིང་སྒྲོས་ངན་ལ། །ཟ་ལམ་མེད་དང་སྲུབ་ཀྱིས་ཆོད། །འཚོ་བའི་ཟས་ཀྱིས་ཐོང་བར་འགྱུར། །དེ་སོགས་ངན་རིགས་ཅེས་ཀྱང་སྤང་། །སྤྱིར་ན་དུར་ཁྲོད་ཐོད་པ་ལ། །བཟང་ངན་འདྲེས་མ་འབྱུང་བ་མང་། །བཟང་ངན་འདྲེས་
མ་བཅད་དུ་རུང་། །ངན་པ་ཤས་ཆེ་དོར་བར་བྱ། །མཚན་ལྡན་རྙེད་ན་དངོས་གྲུབ་འབྱུང་། །དུམ་གཅིག་པ་བྱུང་ན་དཔྱད་གཞན་ཅུང་ཟད་ངན་ཀྱང་མི་སྐྱོན། ཤིན་ཏུ་མཁྲིགས་པ་དང་ལྗིད་ཆེ་བ་སེམས་ལ་བབ་པ་གསུམ་འཛོམ་ན་འཆང་བས་དངོས་གྲུབ་སྟེར། དེ་ཡང་
གསོན་དུས་གཟུགས་མཛེས་སྐད་སྙན་སྤྱོད་ལམ་དལ་སྐྲ་མཚམས་ཕྱེད་ལ་གནག་ཅིང་འཚེར་བ་ཡ་རབས་ཀྱི་བརྒྱུད་པ་རྣམས་ལ་རུས་རྒྱུ་ལེགས་ཤིང་ཐོད་པ་བཟང་པོ་འོང་། ཡང་མགོ་ཆེ་ཞིང་མིག་ཤེལ་མིག །སོ་འཛིང་པ། སྣ་གོང་ཉག་པ། སྐྲ་སེར་བ། སྤུ་འདྲིལ་བ། 
རྐང་ལག་མ་ཁྱོགས་འགྲོས་བྱེད་པ་ཤིན་ཏུ་དབུལ་བའི་ཐོད་པ་ནོར་བུར་འགྱུར། ཡང་ཕོ་མོ་གང་ཡིན་ཀྱང་མདོག་ལྔ་ཚང་ངམ། ཡང་ན་སྔོའམ་ནག་པ། མིག་ཕུག་ཟབ་ལ་སེར་བ། སོ་སྐྱ་བ། སྐྲ་ཚན་ཆེ་ལ་རྩུབ་པ། སྣ་ཆེ་ཞིང་རྣོ་བ། མཚོག་མ་འཕུར་བ། སྐེ་ཕྲ་
བ། སྨིན་མ་ནག་ལ་རིང་བ། སྨིན་མཚམས་འབྲེལ་བ་རྣམས་ལ་ཐོད་པ་ལེགས་པ་འོང་། ཡང་ན་མིག་དཀར་ལ་ཤེལ་བ།  མཁུར་ཚོས་མཐོ་བ། སོ་བཟུར་བ། མཆེ་བ་རིང་བ། མཆུ་ཡོར་ལ་ཆེ་བ། བསོད་ནམས་ཟ་ཐང་དཔལ་ཁ་ཆུང་བ། ལྐུག་པ་མིན་པ་སྟེ་དེ་རྣམས་
ཚང་བ་ལ་ཐོད་པ་བཟང་པོ་འོང་། ཡང་གསོན་དུས་གྲུབ་ཐོབ་དང་སྤྲུལ་པ་རིགས་བཟང་དགེ་བཤེས་སོགས་དང་གསོན་དུས་མིག་བཀྲ་གཞན་པ། མིག་ནག་པོ། གདོང་ཆེ་བ། མཆེ་བ་རྣོ་ཞིང་། རྣ་བ་ཆེ་བ་ལ་ཐོད་པ་མཁྲེགས་པོ་འོང་། མདུན་སོ་གཉིས་ཀྱི་བར་དུ་སོ་
13-8-21b


ལྷག་ཡོད་པ། ཚེ་གང་དབུལ་བ་ལ་ནོར་ཐོད་འབྱུང་། སྣ་ཉག་ལ་སྣ་རྡོག་ཆེ་བ་ལ་ཁྱུང་མཆུ་བཟང་པོ་འོང་། དཔྲལ་ཟུག༷་རྒྱས་འབུར་ཅན་ལ་གླང་ཆེན་མཆེ་བ་ཡོད། དབང་པོ་རྣོ་ཞིང་སྐད་བདེ་བའི་རིགས་ལ་ཚངས་བུག་བཟང་པོ་ཡོང་། སྤྱི་བོ་འབུར་བ་ལ་འདོད་འཇོའི་བའི་ནུ་
རྗེས་ཡོད། སྐྲ་རྩུབ་པ་ལ་མར་དཀར་མཐེབ་རྗེས་ལྟ་བུའི་གཤོང་བུ་ཡོད། ཕོ་མོ་གང་ཡིན་ཡང་ཡ་རྐན་དབུས་སུ་སོ་སྐྱེས་པ་ལ་ཐོད་པ་མཆོག་འབྱུང་ངོ་། །དེ་ལྟར་ཤེས་ནས་ཐོད་པ་བཟང་པོ་ལེན་པའི་ཉེར་བསྡོག་ལ་འབད་པར་བྱའོ། །ཐོད་པ་ཆེ་ཆུང་གི་ཚད་ནི། མཐོ་གང་ལས་
ཆེ་བའི་ཐོད་པ་བྱུང་ན་ཚད་འདས་ཏེ་དཀོན། མཐོ་གང་རབ། མཛུབ་གང་འབྲིང་། མཁྱིད་གང་ཐ་མ་སྟེ། དེ་གསུམ་གང་ཡང་མཚན་ཉིད་དང་ལྡན་ན་དངོས་གྲུབ་འབྱུང་། མཚན་ལྡན་ཐོད་པར་ཆུར་སོར་བཅུ་བཞི། ཞེང་སོར་བདུན་ཡོད། དེ་ལས་གཞུང་དང་འཕྲེད་དུ་སོར་
གང་ཕ་མའི་ས་སོགས་ཆ་ཕྱེ་ལུགས་མང་པོར་ཡང་བཤད་ཀྱང་གཙོ་བོ་གཞུང་འདིར་བསྟན་པ་བཞིན་དུ་དཔྱད་དོ། །ཐོད་པ་བཟང་ཡང་བྲེག་མ་ཤེས་པས་ཉམས་ཤིང་ཡ་ཡོར་གྱུར་པ་དང་ཁོང་བུ་དབུག་པ་དང་། ནང་བརྡར་ཏེ་ར་རི་མེད་པར་བྱས་པ་དང་། གས་ཆག་ཚིག་སོགས་སྐྱོན་བྱུང་།
བ་སོགས་ཕྲལ་རྐྱེན་ལས་གྱུར་པ་དག་ཀྱང་སྤང་ངོ་། །ཐོད་པ་དང་ཐོག་མར་འཕྲད་དུས་ཀྱི་ལ་ཉེ་ནི་རོ་ལ་བརྟགས་ན། རང་ལ་སྤྱི་བོ་བསྟན་ན་དུམ་གཅིག་སོགས་ཆོས་ཐོད་ཡོད། མདུན་དང་གཡས་གཡོན་བསྟན་པ་རིམ་བཞིན་དུམ་གྲངས་སོགས་བཟང་པོ་འོང་། ལྟག་པ་བསྟན་པ་
དུམ་ངན་ཡོད་པའམ་ལེན་མི་རུང་ངོ་། །ཐོད་པ་བཀོལ་ཟིན་ཡིན་ན་རང་དང་དང་པོར་འཕྲད་དུས་ཁ་གྱེན་བསྟན་ཆུས་བཀང་ནས་རང་ལ་མདུན་བསྟན་པ་དེ་བླངས་ན་རང་ལ་ཕན་ལེགས་དཔྱད་མི་ལེགས་ཀྱང་དངོས་གྲུབ་འབྱུང་། ཡང་ན་སའམ་སྲོག་ཆགས་ཀྱིས་གང་བའང་བཟང་། རྙེད་དུས་ལྟས་དགེ་
13-8-22a


བ་དང་བཅས་ཏེ་རྙེད་ན་ཕན་ཐོག །ཁ་སྦུབ་ནས་ལྟག་པ་བསྟན་པ་བླང་ཀྱང་ཕན་པ་མི་འབྱུང་། གཡས་གཡོན་བསྟན་པ་འབྲིང་དུ་ཤེས། ཐོད་པ་བྲེག་ནས་གསོལ་བཏབ་བདེན་པ་བརྡར་ཏེ་ལན་གསུམ་གཡས་སུ་བསྐོར་བས་མདུན་རང་ལ་བསྟན་ན་ཅིས་ཀྱང་
བཟང་། ལྟག་པ་བསྟན་ན་ངན། གཞན་འབྲིང་པོ་ཙམ་མོ། །ཐོད་པ་མཆོག་རྣམས་ལ་ས་སྤར་ཏེ་འགྲོ་བ་དང་། ཏོག་ཏོག་གི་སྒྲ་གྲགས་པ། མཚན་མོ་མེ་འོད་འཕྲོ་བ་སོགས་འབྱུང་། ཐོད་པ་ལེགས་པོ་རྙེད་ན་མིག་འབོར་གྱི་སྟེང་དང་།  ལྟག་རུས་འབུར་པོའི་རྩེ། རྣ་ལྟག་སྟེང་དུ་
ཐིག་བཏབ་ལ་མ་ཆེ་མ་ཆུང་བར་ཚད་ལྡན་དུ་དྲས་སྣུམ་དབྱུང་སོགས་བྱི་དོར་ལེགས་པར་བྱས། ཕྱི་ནང་དག་པར་བཀྲུས་ལ། སྲང་ལ་གཞལ་བའི་ཚད་ངེས་པར་བྱས་ནས། སླར་དྲི་བཟང་བྱུག །ཟས་སྣ་འབྲུ་སྣ་རིན་ཆེན་ལྔ་དྲི་བཟང་སོགས་ཀྱིས་ནང་བཀང་། ན་བཟའ་གསོལ་ནས་རིན་
པོ་ཆེའི་བུམ་པ་མགུལ་ཆིངས་དཀར་པོ་ཅན་བཅུད་ལྡན་ལ་གཟུངས་གང་རུང་བཟླས་པ་དེའི་སྟེང་དུ་བཞག་མཆོད་པས་བསྐོར་ལ་མཚམས་བཅད། བུམ་པའི་གཟུངས་ཐག་བཟུང་ལ། ཐོད་པ་རིན་པོ་ཆེའི་གཞལ་ཡས་ཁང་དུ་ཡི་དམ་གང་རུང་དང་རྩ་གསུམ་ནོར་ལྷ་གསལ། ཐུགས་ཀའི་
འོད་ཀྱིས་འཁོར་འདས་ཀྱི་དཔལ་དང་དྭངས་བཅུད་བསྡུས་ཏེ་ཐོད་པར་ཐིམ་པར་བསམས་ལ། སྔགས་འདི་འབུམ་ཕྲག་དགུ་བཟླ་བར་བྱ། ཨོཾ་ཀ་པཱ་ལ་བོ་དྷི་ཙིཏྟ་ཨོཾ་ཨཱཿཧཱུྃ། ཞེས་བཟླ་ཞིང་ཉིན་རེ་ལན་གསུམ་མམ་དགུ་རེར་ཐོད་པ་ནམ་མཁར་ལན་དགུ་རེ་སྦར་ཏེ། སངས་རྒྱས་ཐོད་ལ་
ཕྱག་འཚལ་ལོ། །རིན་ཆེན་ཐོད་ལ་ཕྱག་འཚལ་ལོ། །གཞལ་ཡས་ཐོད་ལ་ཕྱག་འཚལ་ལོ། །ནོར་བུ་ཐོད་ལ་ཕྱག་འཚལ་ལོ། །ཞེས་བསྟོད་པ་དུས་གསུམ་བྱས་ནས་དངོས་གྲུབ་ཞུ་བར་བསམ། དེ་ལྟར་བསྙེན་གྲངས་རྫོགས་པ་དང་། ཐོད་པ་སྲང་ལ་གཞལ་བས་སྔར་ལས་ལྗི་
13-8-22b


བར་སོང་འདུག་ན་རིན་པོ་ཆེའི་གཞལ་ཡས་ཁང་ངམ། ནོར་བུ་རིན་པོ་ཆེ་ཞེས་བྱ་སྟེ། དངོས་གྲུབ་འབྱུང་བར་ངེས་པའི་རྫས་ཡིན་པས་གཞན་ལ་མི་བསྟན་པར་མཛོད་ཕུག་སོགས་སུ་སྦ། དུས་ཚེས་བཟང་པོ་ལ་དྲི་བཟང་གིས་བྱུག་ཅིང་ན་བཟའ་གསོལ་ལ། གོང་བཞིན་སྔགས་
བཟླས་ཏེ་ནམ་མཁའ་ལ་སྦར་ཞིང་བསྟོད་པ་བྱ། ཡི་དམ་སྔགས་དང་། ཨོཾ་ཧཱུྃ་ཏྲཱྃ་ཧྲཱིཿཨཱཿབྷྲཱུྃ་རཏྣ་ཀ་པཱ་ལ་སརྦ་སིདྡྷི་བ་ར་དེ་སྭཱ་ཧཱ། ཞེས་བརྗོད་ཅིང་དངོས་གྲུབ་ཞུས་པས་འདོད་དགུ་ཆར་དུ་འབེབ་པར་འགྱུར་རོ། །གཞན་ཡང་ཐོད་སྒྲུབ་ཟབ་མོ། བླ་མ་དགོངས་འདུས་སོགས་གཏེར་
ཁ་དུ་མས་འབྱུང་བ་བཞིན་ཉམས་སུ་བླང་། བསྡུ་ན་ཐོད་པའི་ནང་དུ་རྩ་གསུམ་དམ་ཅན་གང་འདོད་ཀྱི་སྲོག་འཁོར་ནོར་སྒྲུབ་ཀྱི་ཁ་བསྒྱུར་ལྡན་པའི་ཙཀྲ་སོགས་བཅུག་ལ་རིན་ཆེན་འབྲུ་སྣ་སྨན་སྣ་སོགས་གཡང་ཅན་གྱི་རྫས་སྣ་ཚོགས་པས་བཀང་སྟེ་གོང་བཞིན་སྒྲུབ་པར་བྱའོ། །ཐོད་པ་
བཟང་པོ་རྙེད་པས་དཔལ་འཕེལ་བའི་གཏམ་རྒྱུད་ཁུངས་དག་གླེང་བ་ཡང་མང་དུ་སྣང་ངོ་། །དངོས་གྲུབ་འབྱུང་བའི་རྫས་མཆོག་ཀ་པཱ་ལ། །བརྟག་པའི་ཚུལ་གྱི་གདམས་ངག་དུ་མ་ལས། །སྙིང་པོའི་མན་ངག་གསལ་ཞིང་དོན་འདུས་པ། །མི་ཕམ་པས་བཀོད་གཞན་ལ་ཕན་གྱུར་
ཅིག །ཤིང་འབྲུག་ཟླ་བ་གཅིག་པའི་ཚེས་བཅུ་བཞི་ལའོ། །མངྒ་ལཾ།། ༈ །། ཐོད་བརྟག་ཁུངས་ཆེ་བ་ལྷ་མོ་གནས་མཁར་དང་། བམ་རིལ་ཐོད་མཁར་ཞེས་པ་ཡོད། འདི་སྔོན་ཧཱུྃ་ཀ་ར་སོགས་ཀྱི་ལུགས་དེ་ཡིན་ནམ་སྙམ། ས་སྐྱའི་རྗེ་བཙུན་པས་བམ་རིལ་ཐོད་མཁར་དང་
འཇིགས་བྱེད་རྐང་གཅིག་སོགས་ཁུངས་མེད་བློ་བརྟག་ཡིན་གསུངས། ཡང་མཁས་པ་ས་པཎ་དག་བམ་རི་ཐོད་མཁར་སོགས་མུ་སྟེགས་ཀྱི་རྒྱུད་ཡིན་གསུངས་ཀྱང་ངེས་པ་མི་སྣང་། ཐོད་བརྟག་རཏྣའི་དཔེ་ཁྲིད་གསལ་སྒྲོན་ཞེས་པ་ཐོད་བརྟག་མང་པོའི་དོན་བསྡུས་པ་དེ་ལེགས། གཞན་
13-8-23a


བླ་མ་ཚོས་མཛད་པ་རྒྱས་བསྡུས་སྣ་ཚོགས་སྣང་། གཏེར་མ་ལས་ཐོད་པ་བརྟག་བསྒྲུབ་དུ་མ་ཡོད། རྗེ་བཙུན་གྲགས་རྒྱལ་༢དཔེ་ཁྲིད་གསལ་སྒྲོན། ༡ སྨན་རྒྱས་ཀུན་གྲགས། ཧཱུྃ་ཆེན་པ་རྣམས་ཀྱིས་མཛད་པ་དང་དགོངས་འདུས་ཐོད་བརྟག་སོགས་བརྟག་པ་
མང་པོའི་དོན་གནད་ཐམས་ཅད་གཞུང་འདིར་བསྡུས་པས་འདི་འདྲ་རྙེད་དཀའ་ཤིན་ཏུ་ལེགས་སོ།།
13-8-23b


empty page
13-9-1a


༄༅། །རྡོ་རྗེ་གཡུ་སྒྲོན་མའི་པྲ་སྒྲུབ་སྣང་གསལ་མེ་ལོང་ཞེས་བྱ་བ་བཞུགས་སོ། །
13-9-1b


རྡོ་རྗེ་གཡུ་སྒྲོན་མའི་པྲ་སྒྲུབ་སྣང་གསལ་མེ་ལོང་ཅེས་བྱ་བ། དངོས་ཀུན་སྟོང་ཆེན་ཐིག་ལེར་མཉམ་བརྡལ་བ། །སྣང་སྲིད་མ་མོའི་དཀྱིལ་འཁོར་ཡངས་པའི་གཙོ། །གང་འདུལ་ཕྲིན་ལས་དཔལ་མོའི་སྐུར་སྣང་བ། །རྡོ་རྗེ་གཡུ་ཡི་སྒྲོན་མས་
དགེ་ལེགས་མཛོད། །དེ་ལ་འདིར་སྨན་བཙུན་ཆེན་མོའི་ཐུགས་ཀྱི་སྒོ་ནས་རྣོ་མཐོང་པྲ་དབབ་པའི་ཆོ་ག་ལ་བསྙེན་བསྒྲུབ་ལས་གསུམ་གྱི་དང་པོ། ས་གཙང་བཀྲ་ཤིས་དབེན་གནས་སུ་ལེབ་ཕྱིང་དཀར་པོ་གཙང་མའི་སྟེང་དུ་དབུས་སུ་རིན་པོ་ཆེའི་སྣོད་འབྲུ་དཀར་གྱིས་བཀང་བའི་སྟེང་
དུ་མེ་ལོང་དྲི་བྲལ་ལ་ལི་ཁྲི་སིནྡྷུ་ར་ཆང་སྦྱར་བས་རྩ་སྔགས་བཟླ་ཞིང་མཁའ་འགྲོ་ལྔར་མོས་པའི་ཐིག་ལེ་ལྔ་ཚོམ་བཀོད། དེའི་མདུན་དུ་ཤེལ་གྱི་མཆོད་རྟེན་ནམ་རང་བྱུང་གི་ཤེལ་རྡོ་བཞག །རྒྱབ་དུ་མདའ་ལ་དར་ཚོན་སྣ་ལྔ་བཏགས་པ་བཤམས། མདུན་དུ་མར་གྱི་ལྷ་གཡག །གཡས་
སུ་དཀར་གསུམ་ལས་སྤྲུལ་པའི་གཏོར་ཟླུམ། གཡོན་དུ་བཀའ་སྲུང་གི་དམར་གཏོར། མཐར་ཉེར་སྤྱོད། ཕྱེ་མར། སྐྱེམས་ཕུད། བསང་མཆོད། འབུལ་གཏོར། ཤིང་སྣ་སྤོས་དཀར་བཅས་ཇི་འབྱོར་བའི་མཆོད་པ་བཤམས། རང་གི་མདུན་དུ་རྡོར་དྲིལ་ཌཱ་རུ་འཐོར་ནས།
13-9-2a


བསྔགས་པའི་འབྲུ། ཆང་ལ་སྦྱར་རྒྱུའི་སིནྡྷུར་སོགས་དགོས་པའི་ཡོ་བྱད་དང་མདའ་ལ་དར་དཀར་བཏགས་པ་བཞག །རང་ཡི་དམ་གང་རུང་ངམ། རྗེ་བཙུན་སྒྲོལ་མའི་ལས་གཞུང་བསྲངས། བཀའ་བགེགས་མཚམས་གཅོད་སོགས་ཐམས་ཅད་
གྲུབ་རྗེས་བཟླས་པ་དང་། རྗེས་སུ་མཆོད་བསྟོད་བྱས་ལ། མཆོད་པ་བྱིན་གྱིས་བརླབ་ནས། རང་གི་མདུན་མཁར་སྣང་སྲིད་ཐམས་ཅད་སྲིད་པ་མ་མོའི་དཀྱིལ་འཁོར་ཡངས་པ་ཆེན་པོའི་དབུས་སུ་མེ་ལོང་ལ་གཟུགས་བརྙན་ཤར་བའི་ཚུལ་
དུ། མདུན་གྱི་ནམ་མཁར་འཆི་མེད་དགའ་བའི་ཚལ། །གངས་རི་མཐོ་བརྗིད་རིན་ཆེན་བྲག་རིས་གཏམས། །འཇའ་འོད་ཆུ་འཛིན་སྤྲིན་འཁྲིགས་འབྲུག་སྒྲ་སྒྲོགས། །གདུང་སེལ་ལྷ་ཡི་བདུད་རྩིའི་ཆར་ཟིམ་འབབ། །
དཔག་བསམ་ཤིང་དང་བདུད་རྩིའི་ཆུ་ཀླུང་དང་། །ཨུཏྤལ་མནྡ་ར་སོགས་མེ་ཏོག་བཀྲ། །ཡིད་འོང་ལྷ་ཀླུ་དྲི་ཟ་གནོད་སྦྱིན་དང་། །གྲུབ་དང་རིག་འཛིན་དུ་མ་ཀུན་ནས་རྩེ། །མཛེས་པའི་རི་དྭགས་སྙན་པའི་སྒྲ་འབྱིན་
13-9-2b


པའི། །བྱ་ཚོགས་འཕུར་ལྡིང་བག་ཕེབ་དལ་བུར་རྒྱུ། །བཟའ་བཏུང་གོས་རྒྱན་ལྷ་ཡི་རོལ་མོ་སོགས། །འདོད་རྒུའི་འབྱོར་བ་བསམ་མི་ཁྱབ་པའི་དབུས། །རིན་ཆེན་བདུན་གྱིས་སྤྲས་པའི་ཁང་བཟང་མཆོག །ནོར་བུའི་བ་གམ་བཀྲ་བའི་ལྟེ་བའི་ཆར། །
ལྷ་མིའི་གོས་ཀྱིས་ཀླུབ་པའི་རཏྣའི་ཁྲིར། །བོད་སྐྱོང་བརྟན་མའི་གཙོ་མོ་གཡུ་ཡི་སྒྲོན། །དཀར་གསལ་མདངས་མཚར་ལྷ་ཡི་བུ་མོའི་ཚུལ། །མཛེས་སྡུག་མཚན་དཔེའི་རི་མོ་ཅིར་ཡང་འགྱེད། །ཕྱག་གཡས་ལྔ་ལྡན་མདའ་དར་ཕྱོགས་བཅུར་གཡབ། །
མཁའ་འགྲོ་དམ་ཅན་བྲན་འགྱེད་སྲིད་བཅུད་སྡུད། །གཡོན་པ་དངུལ་དཀར་ལྷ་ཡི་མེ་ལོང་འཛིན། །སྲིད་གསུམ་ཀུན་སྣང་འཕྲུལ་གྱི་རིག་པ་སྟོན། །དར་ཟབ་རིན་ཆེན་སྣ་ཚོགས་རྒྱན་ཆས་སྒེག། འོད་ཕྲེང་ཀློང་ན་ཕྱེད་སྐྱིལ་རོལ་བས་བཞུགས། །
འཁོར་དུ་ཡེ་ཤེས་ཌཱ་ཀི་སྡེ་ལྔ་དང་། །བརྟན་སྐྱོང་མ་མོ་སྨན་བཙུན་འབུམ་གྱིས་བསྐོར། །གནས་གསུམ་འབྲུ་གསུམ་མཚན་དང་བདག་ཉིད་ལྷའི། །ཐུགས་ཀའི་ས་བོན་འོད་ཀྱིས་དག་པའི་ཞིང་། །རྔ་ཡབ་གླིང་དང་ཨོ་རྒྱན་སྤྲུལ་པའི་གནས། །
ཡོངས་འདུའི་དྲུང་དང་ཚངས་པའི་འཇིག་རྟེན་སོགས། །ངོ་མཚར་གནས་ཡུལ་མ་ངེས་ཞིང་ཁམས་ནས། །སྐད་ཅིག་མདུན་གྱི་ནམ་མཁར་བྱོན་པར་གྱུར། །ཨོཾ་བཛྲ་པྲ་མོ་ཧ་ཧྲིང་ཧྲིང་སྭཱ་ཧཱ། པཉྩ་ཌཱ་ཀི་ནཱི་བཛྲ་ས་མ་ཡ་ཛ་ཛཿསྤོས་དཀར་དང་ཤིང་སྣའི་བསང་
དུད་བྱ། ཌཱ་དྲིལ་དང་རྔ་རོལ་རྦ་གླིང་གི་འགྱུར་བ་དང་བཅས་སྙན་པའི་དབྱངས་ཀྱིས་འབོད་ཅིང་མདའ་དར་གཡབས་ཏེ། ཀྱེཿ གླིང་མཆོག་ལྷོ་ཡི་སོགས་ནས། བཞེས་སུ་གསོལ༔ ཅེས་པས་སྤྱན་དྲངས་ནས་བཞུགས་སུ་གསོལ་ཞིང་མཆོད་བསྟོད་མངའ་གསོལ་རྣམས་གང་འོས་རྒྱས་པར་བྱ།  བསྡུ་ན། 
13-9-3a


ཀྱེཿ ཀུན་ཁྱབ་ཆོས་སྐུ་སྤྲོས་དང་བྲལ་བའི་ཀློང་། །ཀུན་སྣང་མ་འགགས་རིགས་ལྔ་དབྱིངས་ཀྱི་ཡུམ། །རྣམ་སྤྲུལ་ཌཱ་ཀིའི་གཙོ་བོ་ཝཱ་ར་ཧི། །ཞིང་སྐྱོང་སྨན་བཙུན་རྒྱལ་མོའི་སྐུར་བཞེངས་པ། །རིག་འཛིན་དཔའ་བོ་རྣམས་
ཀྱི་གྲོགས་གཅིག་མ། །དགོངས་ཤིག་རྡོ་རྗེ་གསང་བའི་དམ་ལ་འདུས། །འཆི་མེད་རིག་འཛིན་པདྨ་རྒྱལ་པོ་ཡིས། །དཀྱིལ་འཁོར་ཆེན་པོར་གསང་བའི་དབང་བསྐུར་ནས། །སྤྱི་བོར་རྡོ་རྗེ་གཞག་ནས་རྡོ་རྗེའི་ཆུ། །ལྗགས་ཀྱི་དབང་པོར་བསྟིམས་ཤིང་
མ་འོང་དུས། །རིག་འཛིན་རྣལ་འབྱོར་སྒྲུབ་པ་པོ་རྣམས་ལ། །སྣང་གསལ་པྲ་ཡི་དངོས་གྲུབ་སྩོལ་བ་དང་། །འཆི་མེད་ཚེ་གཡང་འདོད་རྒུའི་དཔལ་དང་ནི། །ས་ལམ་ཉམས་རྟོགས་སྤེལ་བའི་ཐབས་མཁས་དང་། །གསང་སྔགས་བསྟན་པ་སྐྱོང་བའི་
རྡོ་རྗེའི་དམ། །མ་ཅིག་ཁྱོད་ཀྱི་སྙིང་ལ་བྲིས་པ་དགོངས། །དེང་འདིར་སྒྲུབ་མཆོག་རྣལ་འབྱོར་བདག་ཅག་གིས། །བསྟེན་མཆོད་བསྐང་བའི་དམ་རྫས་ཚོགས་བྱས་ཤིང་། །ཏིང་འཛིན་སྙིང་པོ་སྔགས་ཀྱིས་གནད་ནས་དྲངས། །གསང་བའི་མཚན་
ནས་འབོད་ཅིང་སྤྱན་དྲང་ན། །བརྟན་གཡོའི་དྭངས་བཅུད་བསྡུས་པའི་ཡིད་འོང་སྐུ། །སྣ་ཚོགས་རྫུ་འཕྲུལ་འདོད་རྒུའི་རོལ་པ་ཡིས། །གནམ་ས་བར་སྣང་ཁྱབ་པའི་གར་བྱེད་ཅིང་། །མ་ཐོགས་མྱུར་དུ་གནས་འདིར་གཤེགས་ནས་སུ། །གསང་
བའི་དམ་རྫས་འདི་ལ་རྟེན་མཛོད་ལ། །བདག་ཅག་རྣམས་ཀྱི་སྙིང་ལ་ཞུགས་ནས་ནི། །སྣང་གསལ་བསླུ་མེད་པྲ་ཡི་དངོས་གྲུབ་སྩོལ། །ཕྱི་མཆོད་འདོད་ཡོན་རྒྱ་མཚོ་སྤྲིན་དུ་འཁྲིག །ནང་མཆོད་སྨན་གཏོར་རཀྟ་དྭངས་རེ་སྤྲོ། །གསང་མཆོད་བདེ་སྟོང་
13-9-3b


རོལ་མོ་འབྱམས་སུ་ཀླས། །མ་ཅིག་ལྷ་མོ་འཁོར་བཅས་ཐུགས་དམ་བསྐང་། །ཀུན་གསལ་གསང་བའི་རྫས་མཆོག་ཨཱ་དརྴ། །དྲི་མེད་ཤེལ་གྱི་མཆོད་སྡོང་འོད་དུ་འབར། །རྣམ་བཀྲ་ལྔ་ལྡན་དར་གྱི་འཇའ་རིས་འཁྱིལ། །མ་ཅིག་ལྷ་མོ་འཁོར་བཅས་
ཐུགས་དམ་བསྐང་། །སྐྱེ་མཆེད་དྲུག་ལྡན་གཙང་མའི་པྲ་རྟེན་མཛེས། །བཟླས་བརྗོད་སྙིང་པོ་སྔགས་ཀྱི་སྒྲ་གདངས་སྒྲོགས། །རོ་མཉམ་བདེ་སྟོང་རྡོ་རྗེའི་ཏིང་འཛིན་བརྟན། །མ་ཅིག་ལྷ་མོ་འཁོར༴ །ཕྱི་དང་ནང་དང་གསང་བའི་མཆོད་པའི་སྤྲིན། །
ལྷ་དང་སྔགས་དང་རྣལ་འབྱོར་སྒྲུབ་པ་པོ། །དུ་མ་རོ་མཉམ་ཡེ་ཤེས་ཆེན་པོའི་ངང་། །མ་ཅིག་ལྷ་མོ་འཁོར༴ །དོན་དམ་འདུ་འབྲལ་མེད་པའི་དམ་ཚིག་དང་། །ཀུན་རྫོབ་རྟེན་འབྲེལ་བསླུ་བ་མེད་པ་ཡིས། །མ་ཅིག་ལྷ་མོ་ཁྱོད་ཉིད་རྟག་བསྟེན་ན། །
རྡོ་རྗེའི་དམ་དགོངས་བདག་གི་ཕྲིན་ལས་མཛོད། །འཆི་མེད་ཚེ་གཡང་འདོད་རྒུའི་དཔལ་འབར་ཞིང་། །འཁོར་འདས་ལམ་གྱི་དྭངས་བཅུད་དབང་དུ་བསྡུས། །ས་ལམ་ཉམས་རྟོགས་ཡར་ངོའི་ཟླ་བཞིན་སྤེལ། །མཆོག་ཐུན་དངོས་གྲུབ་རེ་བ་ལྷུན་གྲུབ་
མཛོད། །དེ་ནས་བཟླས་པ་བྱ་བ་ནི། རང་གི་ཐུགས་ཀ་ནས་སྤྲོས་པའི་འོད་ཀྱིས་སྨན་བཙུན་མའི་ཐུགས་རྒྱུད་བསྐུལ་ཞིང་དགྱེས་པ་བསྐྱེད། ཅི་འདོད་པའི་ཕྲིན་ལས་རྣམ་པ་བཞི་དང་ཁྱད་པར་སྣང་སྲིད་ཀྱི་ལེགས་ཉེས་ཐམས་ཅད་གསལ་པོར་སྟོན་པའི་སྣང་
གསལ་བསླུ་མེད་པྲ་ཡི་དངོས་གྲུབ་སྩོལ་བར་བསམ་ལ། ཨོཾ་བཛྲ་པྲ་མོ་ཧ་བྃ་ཧ་རི་ནི་ས་ཧྲིང་ཧྲིང་སརྦ་སིདྡྷི་ཙཀྵུ་པྲ་བེ་ཤ་ཡ་ཕཊ་སྭཱ་ཧཱཿ ཞེས་རྩ་སྔགས་འབྲུ་བཅུ་དགུ་པའི་སྭཱ་ཧཱའི་གོང་དུ་མདེའུ་སྔགས་འབྲུ་བདུན་པ་བཏགས་ཏེ་འབུམ་ཕྲག་གཅིག་བཟླ། འདིའི་དུས་ཀྱང་མཐོང་ཐོས་
13-9-4a


ཤེས་པའི་རྟགས་ཇི་རིགས་འབྱུང་ངོ་། །སྐབས་སུ་མཆོད་བསྟོད་བསྐང་བ་ལ་འབད། ཐུན་མཐར་ལྷ་རྟེན་ལ་བསྟིམ། ཡི་དམ་གྱི་ལས་གཞུང་བསྡུའོ། །གཉིས་པ་བསྒྲུབ་པ་ནི། རང་ཉིད་ལྷ་ཡི་ཐུགས་ཀ་ནས་འོད་ཟེར་འཕྲོས་པས་སྨན་བཙུན་འཁོར་བཅས་ཀྱི་
ཐུགས་རྒྱུད་བསྐུལ། ཡེ་ཤེས་ཀྱི་རྣོ་མཐོང་མཁྱེན་པའི་འོད་ཟེར་བྱུང་བརྟེན་དང་བདག་གི་སྙིང་གར་ཐིམ་པས་སྣང་སྲིད་ས་ལེར་གསལ་བའི་མཐུ་དང་ལྡན་པར་བསམ་ལ། རྩ་སྔགས་ལ་གོང་གི་མདེའུ་སྔགས ཀྱི་ཚབས་སུ། ཀ་ར་ཀ་ར་དྭངས་ར་དྭངས་ར་ཐེ་སེ་ཐེ་སེ། སྒྲུབ་
སྔགས་འབྲུ་བཅུ་གཉིས་པ་བཏགས་པ་ཁྲི་ཕྲག་གཅིག་བཟླས་ལ་མེ་ལོང་ལ་བཏབས། སྐབས་སུ་བཟང་ཤིང་སྤོས་མེར་བསྲེག །ཀྱེཿ འབོད་དོ་རྡོ་རྗེ་གཡུ་སྒྲོན་མ༔ བསྐུལ་ལོ་རྣོ་མཐོང་པྲ་ཡི་བདག༔ མིང་བོས་འབོད་པའི་དུས་བྱུང་ན༔ སྲིང་གཅིག་འོང་བར་མ་ཆད་དམ༔
རྟེན་ལ་འབེབས་པར་མ་ཆད་དམ༔ རྣོ་མཐོང་སྟོན་པར་མ་ཆད་དམ༔ དྲི་མེད་དཀར་གསལ་མཛེས་འཛུམ་སྐུ༔ མངོན་སུམ་ཉིད་དུ་འདིར་གཤེགས་ཤིག༔ ཕྱག་གཡས་མདའ་དར་གཡབ་པ་ཡིས༔ སྣང་གསལ་པྲ་ཡི་དངོས་གྲུབ་བསྡུས༔  གཡོན་
པ་དངུལ་དཀར་མེ་ལོང་གིས༔ སྲིད་པ་གསུམ་གྱི་ལེགས་ཉེས་སྟོན༔ སྒེག་མཛེས་ཆགས་པའི་ཉམས་འགྱུར་གྱིས༔ པྲ་རྟེན་འདི་ཡི་སྙིང་ལ་ཞུགས༔  རང་གིས་སྒྲུབ་ན་རྣལ་འབྱོར་བདག་གི་ཞེས་བསྒྱུར། གསལ་གསལ་སྟོན་ལ་ཐོལ་ཐོལ་སྨྲོས༔
ལྷང་ལྷང་མངོན་ཤེས་ཚུལ་བཞིན་སྒྲུབས༔ རྒྱུད་གསུམ་བླ་མའི་སྤྱན་སྔ་རུ༔ དམ་བཅའ་དགོངས་ལ་ཕྲིན་ལས་མཛོད༔ ཞེས་བསྐུལ་ཞིང་རྦ་གླིང་གི་འགྱུར་བ་སོགས་ཀྱིས་དབབ།  དེ་ལྟར་བསྒྲུབས་པས་རྟགས་དངོས་ཉམས་རྨི་ལམ་ལ་ཇི་རིགས་འབྱུང་བར་འགྱུར། དེ་ནས་མེ་
13-9-4b


ལོང་གི་ངོས་ཀྱི་སིནྡྷུ་ར་རང་གི་སྨིན་མཚམས་བྱུགས་ལ་དངོས་གྲུབ་བླང་ངོ་། །སྐབས་སུ་གཏོར་མཆོད་བསང་ཁྲུས་ལ་བརྩོན་པར་བྱའོ། །ཤིན་ཏུ་གསང་ཞིང་གྲིབ་རིགས་ལ་འཛེམ་པ་གལ་ཆེའོ། །སྤྱིར་གསང་སྔགས་བསྒྲུབ་པ་ལ་དངོས་གྲུབ་ཀྱི་མདེ་ཁ་མཁའ་འགྲོ་ཡིན་ལ། འདི་ནི་གནས་གསུམ་གྱི་མཁའ་འགྲོ་མའི་སྙིང་པོ་རྡོ་རྗེ་ཕག་མོ་
ཉིད་འཇིག་རྟེན་གྱི་ཚུལ་བཟུང་བས་ཕྲལ་འགྲུབ་ཐག་ཉེ། ཕུག་བྱིན་རླབས་ཆེ། འདི་ལ་བརྟེན་ནས་དངོས་གྲུབ་གཉིས་ཀྱི་སྣ་མྱུར་དུ་དྲངས་པའི་གནད་ཁྱད་པར་ཅན་ཡོད། བཀྲ་ཤིས་ཤིང་ཚེ་གཡང་སྙན་པ་འཕེལ་བའི་ལྷ་མོ་འདི་བདེ་ཆེན་ཡེ་ཤེས་མཚོ་རྒྱལ་དང་ངོ་བོ་གཅིག་པར་གསུངས་པས་གུ་རུའི་རྒྱུད་འཛིན་དང་ཟབ་གཏེར་ལ་སྤྱོད་པ་
རྣམས་ཀྱི་རང་བཞིན་གྱི་ལྷ་ཁྱད་པར་ཅན་ཡིན་ཅིང་། བོད་ཡུལ་གྱི་ལྷན་ཅིག་སྐྱེས་མ་དངོས་འདི་ཡིན་པས་བོད་དུ་སྔགས་ཀྱི་དངོས་གྲུབ་ཆེ་ཕྲ་ཅི་ཐོབ་པ་འདི་ཡི་བྱིན་རླབས་ཡིན་པས་ཡིད་ཆེས་པར་བྱའོ། ༈ གསུམ་པ་ལས་སྦྱོར་ལ་གནས་གཙང་མར་གཞི་གཙང་སྟེང་ཆོད་པ་བཤམས། མེ་ལོང་བཞག་ལ་ལས་གཞུང་རྒྱས་བསྡུས་གང་
འཚམ་བསྲང་། འོག་གི་སྔགས་རྣམས་སོ་སོར་ཅི་རིགས་བཟླས་ཟིན་ནས། པྲ་རྟེན་ཁྱེའུའམ་བུ་མོ་གཙང་མ་གྲོང་ཆོས་ཀྱི་མ་གོས་པ་ལོ་བཅུ་གཉིས་སམ་བཅོ་ལྔ་ཡན་ཆོད་རིགས་རྒྱུད་བཟང་བ།  སྐྱེ་མཆེད་གཙང་བ། ཕ་མ་ཚང་བ། མིང་བཀྲ་ལེགས་པ་སོགས་བཀྲ་ཤིས་པ་ཞིག་ཁྲུས་བྱས་གོས་གཙང་གྱོན།  ལུས་དྲི་བཟང་ཆི་ལེ་བ་བྱས། 
ཁོ་རང་གི་ཡིད་ལ་འཐད་པའི་རྡོ་ཞིག་ལེན་བཅུག་སྟེ་དར་དམར་གྱིས་དྲིལ་ལ་པྲ་མཁན་གྱི་པུས་མོའི་འོག་ཏུ་བཅུག །ལི་ཁྲི་འམ་སིནྡྷུ་རའི་ཞུར་འཐེན། མཁུར་ཚོས་སུ་ཐིག་ལེ་བྱ། སྟན་དཀར་པོ་གཙང་མ་ལ་ནས་ཀྱི་གཡུང་དྲུང་རིས་བཀྲམ་པ་ལ་འདུག་བཅུག །ཆང་ཕུད་གཙང་མ་རྒྱུ་ལེགས་ལ་སྔགས་ཀྱིས་བསྒྲུབས་པའི་སིནྡྷུ་ར་
བཏབ་ལ་སྤྱིན། ཁྱད་པར་སྔགས་ཀྱིས་བསྒྲུབས་པའི་འབྲུ་ཚོམ་སྤྱི་བོར་བཞག་དར་དཀར་པོའི་ཐོད་གཡོག །མེ་ལོང་གསལ་པོར་ཕྱིས་ལ། དེའི་མདུན་དུ་མར་མེ་གཙང་མ་གསལ་བོར་སྦར། དེར་ཕྱོགས་པའི་མར་གྱི་བསང་གཡག་དཀར་པོ་མིག་འབུར་ཚུགས་སུ་བལྟ་བ་བཀོད། བདག་ལྷའི་རྣལ་འབྱོར་གྱིས་བསང་ཁྲུས་
13-9-5a


གསེར་སྐྱེམས་བགེགས་བསྐྲད་མཚམས་གཅོད་མཆོད་རྫས་རླབས་པ་དང་།  རྟེན་བསྐྱེད་ནས་སྤྱན་འདྲེན་པར་བྱ། རྟེན་དང་བྱིས་པ་སོགས་སྨན་བཙུན་མའི་རོལ་བར་གསལ་ལ་གཙང་མའི་གནས་ནས་ཡེ་ཤེས་པ་ཆར་ལྟར་དབབ་ལ་བསྟིམ། བསྔགས་པའི་ཆང་སིནྡྷུ་ར་བཏབ་པ་བླུད། རྩ་
སྔགས་འབྲུ་བདུན་བཏགས་པ་དང་། ཀམ་ཁོ་ལེ་འབྲུ་དྲུག་བཏགས་པ་བཟླས་པའི་སྔགས་ནས་བྱིས་པ་ལ་གཏོར།  བྷི་ལུག་བཟླས་ལ་མེ་ལོང་ལ་གཏོར། རྩ་སྔགས་དང་ཀ་ར་སྦྲེལ་བ་མིག་ལ་གདབ། ལས་སྦྱོར་བཅོ་ལྔ་པ་བཟླས་ལ་ལྟག་པར་བཏབ། བཅིང་སྔགས་བཟླས་པའི་མེ་ཏོག་གཏོར་བས་འོད་ཟེར་གྱི་དྲྭ་བས་
སྦྲེལ་ཏེ་བཞན་དུ་གཡེལ་བའི་དབང་མེད་པར་བསམ། སྔགས་རྣམས་པྲ་རྟེན་སོགས་ཀྱིས་མ་ཚོར་བར་བཟླའོ། །པྲ་རྟེན་གཡག་དཀར་པོ་མིག་འབུར་ཚུགས་སུ་བལྟ་བ། མེ་ལོང་རྒྱ་མཚོར་དམིགས་ལ་མ་ཡེངས་བར་བལྟ། གལ་ཏེ་རྣལ་འབྱོར་བ་ནུས་ལྡན་ཏིང་འཛིན་བརྟན་ཅིང་བཟླས་གྲངས་ཚད་དུ་སོན་ན་རང་ལ་ཕབ་
ཀྱང་རུང་ལ། རིགས་བཟང་དང་ཁམས་ཀྱི་ཁྱད་པར་ལས་པྲ་རྟེན་ལོ་རྒན་ཡང་མཐོང་བར་འདུག་གོ། དེ་ལྟར་བྱས་པས་པྲ་རྟེན་ཤེས་པ་འགྱུར། ཉམས་སྤྲོ་མཆོད་རྫས་རྣམས་བཀྲག་ཆེར་གྱུར་ནས་ཕེབ་ན་གཏོར་མ་སོགས་མཆོད་པ་ཕུལ་ལ། ཁྱེད་ལ་དེ་རིང་སོགས་འདོན་ཆ་ལྟར་རམ་གང་འདོད་སྟོན་པའི་ཕྲིན་ལས་བཅོལ་
ལ། ཅི་དང་ཇི་འདོད་པ་གསལ་ངེས་པར་དུ་དྲི། ཁ་མང་བློ་མང་དང་ཙབ་ཙུབ་མི་བྱ་ཕྱོགས་རེ་རེ་ནས་དྲི་རེ་རེ་ལེགས་པར་ཚར་བ་དང་གཞན་དྲི་བར་བྱའོ། །དེ་ལ་སྔགས་བྱང་ནི། ཆང་དང་སིནྡྷུ་ར་ལ་འདེབས་པའི་སྔགས། ཨོཾ་འཕང་གྭ་པ་ཡེ་སྭཱ་ཧཱ། ཚེགས་བར་བདུན་པའོ། །ཨྃ་ཀཾ་ཁོ་ལེ་ཀཾ་ཁོ་ལེ། ཤོ་
ན་ཁོ་ལེ་ཤོ་ན་ཁོ་ལེ། ཁེ་ས་དྷ་རེ་ཁེ་ས་དྷ་རེ་ཤ་ས་ཧཾ་ཨཿ ཆུ་བུར་མིག་གི་སྒོ་སོལཿ རྩ་སྔགས་ཉེར་བདུན་པ་དང་མདེའུ་འབྲུ་དྲུག་བཏགས་ལ་བཟླས། ཨོཾ་བྷི་ལུག་ཀྵ་ནི་ཨ་ལོ་ཀྵ་ཀ་ཡ་སྭཱ་ཧཱཿ བསྙེན་སྔགས་བཅུ་གཉིས་པ་མེ་ལོང་ལ་བཏབ། ཨོཾ་བྷི་ལི་བྷི་ལི། ཀྵི་ལི་ཀྵི་ལི། 
13-9-5b


ཨ་ལོ་ཀྵ་ཡེ་སྭཱ་ཧཱ༔  ལས་སྦྱོར་བཅོ་ལྔ་བ་ལྟག་ཁུང་ལ་གདབ། གོང་གི་རྩ་སྔགས་དང་སྒྲུབ་སྔགས་ཀ་ར་སོགས་བཅུ་གཉིས་པ་སྦྲེལ་བ་མིག་ལ་བཏབ། ཨོཾ་བྲུཾ་བྲུཾ་བཅིང་བཅིང་ན་ག་ཕོབ། སྤྱན་རས་གཟིགས་ཀྱིས་མོ་སྟོན། སིན་འདུ་ར་ཕང་སྭཱ་ཧཱ། པྲ་མོ་ཆུ་བུར་མིག་གི་སྒོ་སོལ། 
རྣོ་བའི་ཕྱོག་སྟོན་ཅིག །ཕྲ་ཕེབ་ནས་བཅིང་སྔགས་སོ་གསུམ་པའོ། །སྔགས་བྱང་འདི་རྣམས་ལ་མང་ཉུང་ཅི་རིགས་འདུག་ཀྱང་འདི་དཔེ་དག་པ་དང་བརྒྱུད་པ་འདིའི་ལུགས་ལྟར་ཡིན་ཐེམས་སུ་མནན་ཕྱིན་ཆད་སྔགས་བྱང་ཡང་འདི་ལྟར་ཡི་གེ་དབུ་ཅན་ཁོ་ནར་དཔེ་བཅད་དགོས་སོ། །ཀཾ་ཁོ་ལེ་མན་གྱི་སྔགས་
བྱང་འདི་རྣམས་ཚན་པ་རེ་རེས་ཀྱང་པྲ་ཕེབས་ནུས་ཏེ་འདིར་ཐམས་ཅད་ཇི་འགྲུབ་རེ་བཟླ་བ། རྒྱལ་སྲས་གཏེར་ཁའི་ལུགས་ཡིན་ལ། གཙོ་བོར་རྩ་སྔགས་དང་ཀ་ར་བཏགས་པ་བཟླའོ། །དེས་ལེགས་པར་ཕེབ་པར་འགྱུར་རོ། །གལ་ཏེ་གྲིབ་དང་མི་གཙང་བ་སོགས་ཀྱིས་མ་ཕེབས་ན་རང་དབང་ཕྱུག་ཆེན་པོ་མཐིང་ནག་དབུ་
སྐྲ་ཁམ་ནག་འཁྱིལ་བ་གཡས་ཞགས་དམར་གཡོན་ལྕགས་ཀྱུ་རལ་གྲི་འཛིན་པས་ལྷ་འདྲེ་ཆོམ་རྐུན་སོགས་གང་ཡིན་པྲ་མོའི་མེ་ལོང་འདིར་བཀུག་པར་བསམ་ལ། ཨོཾ་པྲ་མ་ཚག་ཚག་ཡེར་ཡེར་འདུས་འདུས་སྭཱ་ཧཱཿ སྔགས་འབྲུ་བཅུ་གཅིག་པ་བཟླས་ཕྱོགས་བཞིར་མདའ་དར་གཡབ་པས་གསལ་ལོ། །
མཐོང་དཀའ་བ་ལ་དམིགས་པ་ནི་ཐང་ཆེ་བ་ཞིག་གི་དཀྱིལ་དུ་མཆོད་རྟེན་དཀར་པོ་ཆོས་འཁོར་བཅུ་གསུམ་ལྡན་པར་བསམ། དེ་ལ་ཨ་ཙ་ར་འབོག་ཁྲེས་དཀར་པོ་ཁུར་བ་བཅུ་གསུམ་དང་། གཞོན་ནུ་མ་བཅུ་གསུམ་འཚབ་སྟེ་བསྐོར་བ་བྱེད་པར་མོས། རང་ཡང་ཨ་ཙ་རའི་ཆ་བྱད་ཀྱིས་དེའི་ཁྲོད་དུ་བསྒོམས་ཏེ་ཇེ་མཐོ་
ཇེ་མཐོར་བསྐོར་བ་བྱས་པས་ཆོས་འཁོར་བཅུ་གསུམ་དུ་སླེབ་པ་དང་། ལྷུང་ལ་ཁད་བྱུང་བར་བསམ་ཞིང་སྔགས་བཟླས་ཁྱེའུའི་ལྟག་པར་བཏབ་དེས་མཐོང་ངོ་། །གལ་ཏེ་མ་མཐོང་ན་ཐང་དེའི་དཀྱིལ་དུ་ཙན་དན་གྱི་ཤིང་ཡལ་ག་གསུམ་དུ་གྱེས་པའི་དབུས་མར་རང་ཉིད་ལྷ་མོའི་ཆ་བྱད་ཀྱིས་བསྡད་གཡས་གཡོན་གྱི་ཡལ་ག་
13-9-6a


གཉིས་སུ་ཡང་ལྷ་མོ་རེ་རེ་བསྒོམས་ཞིང་གསུམ་གས་རྦ་གླིང་འབུད་པར་བསྒོམས་ནས་སྔགས་བཟླའོ། །དེས་ཀྱང་མ་ཕེབ་ན་ཐང་ཆེན་དབུས་སུ་མཚོ་ཤིན་ཏུ་དྭངས་པ་ཞིག་བསམ་མཚོ་དེའི་དཀྱིལ་དུ་གཞུའི་མཆོག་མའི་སྟེང་དུ་རང་ཉིད་བསྡད་གཞུ་རྒྱུད་ལ་འཆང་། མཆོག་གཞོན་རླུང་གིས་
བསྐྱོད་པས་རང་ཉིད་མཚོར་ལྷུང་ལ་ཁད་དུ་བསམ་ཞིང་སྔགས་བཟླའོ། །ཡང་པྲ་ཕེབ་པ་འགོར་ན་ཕྱེ་ཕུད་གཏོར་སྤོས་དཀར་གྱི་དུད་པ་གཏོང་ཞིང་། ཀྱེ། ཕྱོགས་ཕྱོགས་སོགས་སམ་བསྐུལ་བ་གང་ཤེས་འདོན། ཅེས་ཀྱང་མ་ཕེབ་ན་ཁྲོ་བོའི་ལྟ་སྟངས་ལྡན་པས་ནས་ལྕགས་ཀྱིས་བྲབས་ཏེ། ཀྱེ། བྱང་ཤར་
བུ་མོ་སོགས་དང་། ཡི་དམ་ཁྲོ་བོའི་སྔགས་ཤམ་བུ་རྩ་སྔགས་དང་སྒྲུབ་སྔགས་སྦྲེལ་མ་བཟླས་པས་ཕེབ་པར་ངེས་སོ། །པྲ་ཕེབས་མྱུར་བ་དང་གསལ་ན་ལོག་ནོན་འདི་རྣམས་མི་དགོས་སོ། ། ༈ མཐོང་བའི་ལེགས་ཉེས་ལ་དཔྱད་པ་ནི། ཁྱིམ་ཕྱ་ལ་མཆོད་རྟེན་པད་སྤུངས་དཀར། མཚོ་རྫིང་བུ་ཆུ་
མིག་དང་། ར་བ་མ་ཞིག་པ་སྒོ་གསར་དུ་མ་དོད་པ་དཀར་ཞིང་གསལ་ན་ལེགས། ཁྱིམ་ལྡིབ་ཀ་བ་འཆུས་འཁྱོགས་ཁ་དོག་ནག་མུན་པར་མཐོང་ན་ངན། སྲོག་ཕྱྭ་ལ་ལྗོན་ཤིང་རྒྱས་པ། སྐྱེས་པ་ཆས་བཟང་། དབང་པོ་ཚང་བ་ལོ་བདག་གསལ་ལ་ནག་པོས་མ་གོས་པ་བཟང་། དེ་ལྡོག་མགོ་སོགས་མི་ཚང་བ་ཤིང་ཆག་
པ་སོགས་ངན། སྟག་ཤར་ལ་མདའ་སྒྲོ་མ་ཉམས་པ ། དྲི་བཟང་། གོ་མཚོན། དཔལ་བཤོས་མདའ་དར་དཀར་པོ། མདུང་དང་མདུང་དར་བཟུང་བ་སོགས་བཟང་། བུད་མེད་ལ། འཕང་རིན་ཆེན་རྒྱན་སོགས་བཟང་། དགེ་བཤེས་ལ། རྡོར་དྲིལ། མཆོད་རྟེན་དཀར་པོ་ལྔ། པོ་ཏི། དུང་། ཆོས་གོས་
སོགས་བཟང་། སྔགས་པ་ལ་ཕུར་བྷན་ཞྭ་ནག་བགྲང་འཕྲེང་སོགས་དང་། བོན་པོ་ལ་རྔ་གཤང་རྨ་བྱ་ནེ་ཙོ་སིལ་སྙན་སོགས་བཟང་། ཀུན་ལ་བླ་རེ་ཕན་བཀྲ་ཤིས་རྫས་བརྒྱད་རིན་པོ་ཆེའི་རིགས། ཡི་གེ་སྐུ་གཟུགས་མཆོད་ཆའི་རིགས། རྒྱལ་སྲིད་བདུན་སོགས་དངོས་པོ་དང་མིང་གི་པྲ་ལེགས་པ་ཡིད་དུ་འོང་བའི་རིགས་བཟང་ཞིང་
13-9-6b


ཁྱད་པར་དགེ་བཤེས་རིགས་ལ་བཟང་འགྲོ་དོན་འབྱུང་། བྲག་རི་ལྷུན་ཆགས་ལྗོན་ཤིང་འབྲས་ལྡན། ཆུ་བོ་རྒྱུན་བཟང་། གངས་རི་གསལ་འཚེར། ལོ་འབྲས་རྒྱས་པ་སྤུང་བ། ཐང་རྒྱ་ཆེར་སོང་བ་སོགས་ཕྱིས་བཟང་། མདོར་ན་སོ་སོའི་ཡོ་བྱད་སོགས་བརྡའ་རྟགས་དེ་མགོ་མཇུག་མ་ལོག་པ། ཕུག་རལ་འཁྱོགས་པ་སོགས་
ཀྱི་སྐྱོན་མེད་པ་གསལ་བ་ནག་པོས་མ་གོས་པ་བཟང་། དེ་ལས་ལྡོག་ན་ངན། རྒྱ་ཇེ་ཆེར་ཇེ་གསལ་ལ་སོང་ན་བཟང་། དེ་ལས་ལྡོག་ན་ངན། གཟུགས་གང་ཡང་དབྱིབས་ཉམས་པ། ལྷུང་བ་ཆུས་ཁྱེར་བ། བྱི་བ་སོགས་སེམས་ཅན་ཁར་འཛིན་པའི་རིགས། རི་དང་མཆོད་རྟེན་ནག་པོ་ལ་ཐིམ་པ་མགོ་མཇུག་ལྡོག་སོགས་
བྱུང་ན་ངན་པས་རིམ་གྲོ་བཅོས་ཐབས་དྲིའོ། །མི་ཁའི་རྫས། ཤིང་སྐམ་ལ་བྱ་ཚང་བཅས་པ་ཐང་ལ་བྲ་བོ་སྒོག་བཙོང་སྦལ་སྦྲུལ་དང་སྲོག་ཆགས་དམན་པའི་རྫས་ངན། དར་ཡུག་སྔོ་ནར་བྱུང་ན་མི་ཁ་དང་ཁ་མཆུའི་ངོ་། གྲི་མདུང་སྔོ་ཟིང་བྱུང་ན་ཁ་མཆུའི་ངོ་། ཟངས་གོག་པོ་བྱུང་ན་གོད་ཁ་དང་དགྲ་ངོ་། སྨན་
གཞོང་སྨན་བཅས་ལྷ་རྗེ་བོས་ཤིག་ནད་འོང་གི་ཞེས་པའི་བརྡའ། བྱའི་རིགས་ལོ་བདག་མིན་པའི་ཁང་ཐོག་བྱུང་ན་བྱད་ཡིན་པས་འབུམ་འུར་ཁྲོ་རོལ་གཏོར་བཟློག་བྱ། ལྷག་པར་མི་རུང་བའི་ལྟས་ཐང་ཆེན་ལ་བྲ་བོ་སྐྱེས་ཤིང་དཀྱིལ་དུ་ཤིང་སྡོང་མི་རོ་རེང་འདྲའི་ཁར་དུར་བྱ་བབ་པ་དང་། ཤེལ་ཐམས་ཅད་སྡིག་ནག་གིས་གང་བ་དང་། ལྷག་
པར་སྡིག་ནག་ཤིན་ཏུ་ཆེ་བས་མི་རོ་ཟ་བ་བྱུང་ན་པྲ་མཁན་རང་ལ་མི་རུང་བས་པྲ་ཆས་ཡོན་བདག་ལ་གཏད་དེ་པྲ་མཁན་རང་གི་ནང་དུ་འོང་ནས་རིམ་གྲོ་ཆེར་བྱའོ། །ནད་པ་ཉ་བྱུང་ན་འཆིའོ། སྡིག་སྦྲུལ་སྦལ་ལྕོང་ཀླུ་རྟགས་ཡིན་པས་ཀླུ་བཅོས་བྱ། མཆོད་རྟེན་ནག་པོ་ལ་ཐིམ་པ། བྱ་གཅན་གྱིས་ཟོས་པ། བཅིང་བ། རྒྱབ་པ།
བཤིག་པ་བསད་པ་ངན། མི་མགོ་བོ་དང་སྐྲ་མེད་ན་འཚོ་དཀའ། སྲིན་ལག་མ་ཚང་ན་འཚོ་ཐུབ་ཙམ་འོང་། འབྲང་རྒྱས་མཆོད་རྟེན་མདའ་དར་སོགས་བཟང་།  ༈ སྲིད་ཆ་ལ། མདའ་དང་ཆུ་མཚོ་ལུག་དཀར་བུའི་ངོ་། འཕང་ལུག་ནག་ཕག་བུ་མོ་ཡིན། ཆུ་མིག་དང་མཚོ་བྱུང་ན་ཆུང་མ་དང་སྲིད་ཀྱི་ངོ་། །སྦང་མ་
13-9-7a


དང་སྦང་མའི་ཐང་དཀྱིལ་ལ་འདུག་ན་མཐར་རབ་ཆད།  ༈ གདོན་ཕྱྭ་ལ། བུ་ཆུང་རི་བོང་བྱི་བ་སྤྲ་རྣམས་འགོང་པོ། རྟ་གཡག་མི་ཁྱི་ལུག་སྦྲུལ་བྱ་རྣམས་ནག་པོར་བྱུང་ན་བདུད། ཆུ་མིག་ཞིང་ནེའུ་གསིང་སྦལ་སྦྲུལ་མཚོ་ས་བདག་ཀླུ་གཉན། བྱ་གཅན་གཟན། བྲག་རི་སྐྱ་བོ་
མི་རེང་རིང་དམར་པོ་སོགས་བཙན། ཁྲག་མཚོ་དུག་མཚོ་ཐོད་ཕོར། བུད་མེད་མི་སྡུག་པ་སྣ་ཚོགས་མ་མོ། མགོན་པོ་ལ་བ་དན། ཤུག་པ་ཡུ ལ་ལྷ། རྩིག་ཁུང་ཉི་ཤར་བཙན། མདའ་འཕང་གྲི་ཕོ་མོ། བནྡྷེ་མི་སྡུག་པའི་གཟུགས་སྣ་ཚོགས། ལྷ་ཁང་མཆོད་ཆ་དཀོར་བདག་སོགས་སོ། །གཞན་ཡང་བྱིས་པས་ལྷ་
འདྲེ་མི་གསུམ་ཐམས་ཅད་མཐོང་། ལྷ་ཡིན་ན་གཟི་བརྗིད་ཆེ། རྒྱན་ཚང་བ་མཐོང་། འདྲེ་ཡིན་ན་རང་འདོད་པའི་མདོས་གཏོར་སོགས་ལ་སྟོན་མོ་བྱས་པ་འོང་། དེ་རྣམས་ཀྱིས་གཏམས་ལབ་པ་བྱིས་པས་ཚོར། གལ་ཏེ་མ་ཚོར་ན་གསལ་པོར་སྟོན་བྱས་ནས་ནས་གཏོར་བས་ཐོས་པར་འགྱུར་རོ། ། ༈ ཆོས་ཆ་ལ་ལྷ་རྟེན་མཁར་
ཁང་སོ་མ་བྲག་དཀར་པོ། རོལ་མོ་སྒྲ་སྙན་ཅན་སོགས་བཟང་།  ༈ དགྲ་ཆ་ལ་མི་རིང་གོ་མཚོན་ཐོགས་པ། གཡག་དང་ཁྱིས་དེད་པ། ཟངས་གོག་བཅོམ་པ། མདའ་ཆག་གཞུ་ཆག་གོ་མཚོན་དམག་ཆས་དགྲ་ངོ་། ༈ ལམ་ཕྱ་ལ་ཆུར་བྱིང་འདམ་ཟུག །ཐང་ཆེན་དང་རི་དང་མཆོད་རྟེན་ཆེན་པོ་ལ་གནས་
བཅས་སྙལ་སྙེལ་བྱས་པ་རི་དང་མཆོད་རྟེན་ནག་པོའི་གྲིབ་ཀྱིས་གནོན་པ། འཐིབ་གྱིས་བསྒྲིབ་པ་མི་གསལ་བ་ཡུན་རིང་པོར་མ་ཤར་བ་ཕྱི་དལ་ཡིན། ལམ་ཞུགས་ངོ་མདོག་དཀར་འགྲོ་འོང་བྱེད་པ་ལམ་ངོ་མྱུར་དུ་འོང་། གྲོགས་ཕྱྭ་དང་དོན་ཕྱྭ་ལ་སྣོད་སྟོང་གའུ་ཐང་སོགས་ངན། འབྲུའི་ཕུང་པོ་ལོངས་སྤྱད་པ། རྩི་ཐོག་རྒྱས། 
སྣོད་བཟང་རིན་པོ་ཆེས་གང་བ། རིན་ཆེན་སྣ་ལྔ། ཤིང་འབྲས་ལྡན། ཤིང་འདབ་རྒྱས། ལོ་འབྲས་རྒྱས་སོགས་ལེགས། གྲངས་དུས་སོགས་ཚད་ལ་མཛུབ་མོ་དང་ཕྲེང་བ་སོགས་ཀྱི་བརྡའ་སྟོན། དེ་རྣམས་ནི་མཚོན་བྱེད་ཙམ་སྟེ་རྒྱས་པར་ཤེས་བྱའི་རྣམ་པ་བཞིན་དུ་བརྡའ་ཡང་ཚད་མེད་པས་རང་གི་རིག་པས་ལེགས་པར་
13-9-7b


དཔྱད་ཤེས་པར་བྱའོ། །མེ་ལོང་གི་ཁ་ཚུར་བསྟན་པའི་གཡོན་དང་བལྟ་མཁན་གྱི་གཡས་རང་ས་ཡིན། ཅིག་ཤོས་ཕྱི་སའོ། །འཆར་མྱུར་བ་གསལ་བ་ཇེ་ཆེར་སོང་བ་ལེགས། དེ་ལས་ལྡོག་པ་ངན། དཀར་པོའི་རིགས་བཟང་། ཁྲ་བོ་འབྲིང་།  ནག་པོ་ངན། ཞིབ་པར་ཞལ་ལས་དང་མྱོང་བས་དཔྱོད་པ་བསྡེབས་ཏེ་ཤེས་
པར་བྱ་ཡི་བརྗོད་ལས་འདས་སོ། །ལ་ལར་གསལ་ཞིང་ཤན་ཕྱེད་པ་འོང་། །ལ་ལར་དེ་ལས་ལྡོག་སྟེ་བརྡར་དཀའ་བ་འོང་། བར་སྐབས་སུ་ཐམས་ཅད་ཉུང་དུ་སོང་བ་དང་ཐིབ་ཀྱིས་ནོན་ནས་མི་གསལ་ན་གཞན་གྱི་གྲིབ་ལ་བརྟེན་པས་པྲའི་ལྷ་མོ་བྲོས་པ་ཡིན་པས་བསང་ཁྲུས་བྱ། བཟང་འདྲ་ལ་ངན་པ། ངན་འདྲ་ལ་བཟང་པོ་སོགས་
ངེས་དཀའ་བའང་འོང་། གདོན་དང་རྐུན་མ་རྫས་སྟོར་བ་སོགས་ཀྱིས་མཚོན་དངོས་སུ་ཇི་བཞིན་ཤར་བའམ། མིང་ཐོག་ཡི་གེའམ། ཡོ་བྱད་དམ་བླ་རྟགས་ལོ་རྟ་སོགས་ཅི་རིགས་འཆར་ཕ ལ་ཆེར་དཔྱད་དཀའ། ལར་པྲ་རབ་ཞིག་ཕབ་ན་དུས་གསུམ་གྱི་བརྟག་བྱ་ཡིད་ལ་ས་ལེར་འཆར། འབྲིང་ལྷ་མོས་དངོས་སུ་སྨྲ་བ་
འབྱུང་བའམ། ལུང་བསྟན་གྱི་ཡིག་གཟུགས་གསལ་པོར་འཆར། ཐ་མ་བརྡའ་ཡི་རྣམ་པ་འཆར། དེ་ལའང་གསལ་མི་གསལ་ཤན་ཕྱེད་མི་ཕྱེད་ཅི་རིགས་ཡོད་པས་གསལ་པོར་སྟོན་ཅེས་ནན་ཏན་དམོད་པར་བྱའོ། །པྲ་རྟེན་ལ་མེ་ལོང་ནང་དུ་བལྟས་ཚེ་རེས་གཟུགས་མཐོང་བ་དང་། རེས་ཐོས་མཐོང་གཉིས་ཀ །རེས་
ཐོས་མཐོང་ཤེས་པ་གསུམ་ཀའི་མངོན་ཤེས་ཡང་འོང་ངོ་། །དོན་གང་ཡིན་པ་དེ་ལ་ལྟོས་ཤིག་བྱས་ལ་བལྟར་བཅུག །གལ་ཏེ་ཤིན་ཏུ་གསང་རྒྱུའི་རིགས་ལ་ཡིད་ཀྱིས་གསོལ་བ་བཏབ་ནས་དྲིས་ཏེ་ད་ཇི་འདུག་ལྟོས་ཤིག་ཅེས་བྱའོ། །དེ་ལྟར་བྱས་པས་དོན་གྲུབ་པ་དང་མཆོད་ཅིང་བསྟོད་ལ་ཡིག་བརྒྱ་བཟླ་ཞིང་ཡེ་ཤེས་པ་གཤེགས།
དམ་ཚིག་པ་རྟེན་ལ་ཐིམ་པར་བསམ། པྲ་རྟེན་གྱི་མགོར་སེ་གོལ་བརྡབ་གཏང་རག་དང་བཀྲ་ཤིས་བྱ། པྲ་རྟེན་དང་པྲ་མཁན་ལ་བཀྲ་ཤིས་པའི་ཟས་ཀྱི་སྟོན་མོ་དང་ཡིད་དུ་འོང་བའི་དངོས་འབུལ་གྱིས་མགུ་བར་བྱ། འདིར་སྨྲས་པ། ཟག་བཅས་བསམ་གཏན་ལྡན་པའང་དཀའ་བས་ན། །ཟག་མེད་མངོན་པར་ཤེས་པ་ལྟ་ཅི་
13-9-8a


སྨྲོས། །དེས་ན་བླང་དོར་དཔྱོད་པའི་བློ་གྲོས་ནི། །འོལ་ཚོད་མུན་པའི་ལམ་དུ་འཕྱན་གྱུར་པས། །ཕལ་ཆེར་མི་ཤེས་བཞིན་དུ་གྱི་ནར་གནས། །ལ་ལས་སྤྱི་བརྟོལ་ལོག་པའི་ལུང་སྟོན་པ། །དེ་དག་རྣམས་ལ་རིན་ཆེན་སྒྲོན་འདྲ་བར། །ཤིན་ཏུ་ཕན་པ་འདི་ལས་གཞན་གང་ཞིག །བདག་གིས་
མི་ཤེས་ལྐོག་ཏུ་གྱུར་པའི་ཆོས། །ལྷ་དང་སྔགས་ཀྱི་མཐུ་ལ་བརྟེན་ནས་ནི། །ཕན་པའི་སེམས་ཀྱིས་གཞན་ལ་ལུང་སྟོན་པ། །འདི་ཡང་རྒྱལ་བའི་སྲས་ཀྱི་ཚུལ་མིན་ནམ། །ཀུན་མཁྱེན་རྡོ་རྗེ་འཆང་དབང་སྟོན་པ་དེས། །རབ་འབྱམས་རྒྱུད་སྡེར་སྔགས་ཀྱི་ཕྲིན་ལས་སུ། །རྣོ་གསལ་པྲ་ཡི་གདམས་པ་གང་གསུངས་པའི། །
ཚུལ་འདི་རྗེས་འཇུག་རྣམས་ཀྱི་མིག་བཟང་ཡིན། །དེ་ཕྱིར་འདི་ལ་འབད་པའི་དགེ་ཚོགས་ནི། །སྟོན་ཀའི་ཟླ་བ་ལྟ་བུར་རབ་དཀར་བས། །འགྲོ་བ་ཀུན་ལ་བླང་དོར་གསལ་བ་ཡི། །སྣང་བ་བླ་ན་མེད་པ་སྦྱིན་པར་ཤོག །དེ་ཡང་བསྒྲུབ་འབྲས་ལ་བསླུ་བ་མེད་པར་རྣོ་ཞིང་མྱུར་བ་གཞན་ལས་ཁྱད་པར་དུ་འཕགས་པར་མངོན་
སུམ་ཚད་མས་མཐོང་བ་ནི་ཟབ་མོ་གཏེར་གྱི་ཕྱོགས་ཡིན་ལ། གཏེར་ཁ་དེ་ལའང་མཆོག་དང་ཐུན་མོང་བསྒྲུབས་པའི་ཐབས་ཚུལ་ནམ་མཁའི་ཁམས་ལྟར་མཐའ་ཡས་པ་ཞིག་བཞུགས་པ་ལས་སྐབས་འདིར་སྣང་གསལ་པྲ་ཡི་སྒྲུབ་པ་ཐམས་ཅད་ཀྱི་རྒྱལ་པོ་རྡོ་རྗེ་གཡུ་ཡི་སྒྲོན་མ་ལ་བརྟེན་པ་འདི་ནི། ཤོ་རྒྱལ་སྲས་ལེགས་པའི་གཏེར་
ཁ་དང་། མཆོག་གྱུར་གླིང་པའི་གཏེར་བྱོན་སོགས་གཏེར་ཁ་གོང་འོག་གི་བཅུད་དྲིལ་ལ་ཡིག་ཆ་གྱིས་ཤིག་ཅེས། དཔལ་ཨོ་རྒྱན་ཆོས་ཀྱི་རྒྱལ་པོའི་རྒྱལ་ཚབ་ཆེན་པོ་པདྨ་འོད་གསལ་མདོ་སྔགས་གླིང་པའི་གསུང་གིས་རྗེས་སུ་གནང་བ་དང་བཀའ་ལུང་ཞལ་ཁྲིད་བཅས་བསྩལ་པ་ལ་བརྟེན་ནས། རྒྱལ་སྲས་གྱི་གཏེར་གཞུང་རྩ་བ། དེའི་
གསལ་བྱེད་དགེ་སྦྱོང་བློ་གསལ་རྒྱ་མཚོ་དང་། ཞྭ་དམར་པས་མཛད་པ་སོགས་དང་། ཕྱིས་གྱི་གཏེར་ཁ་དུ་མའི་གནད་དྲིལ་ཏེ་བརྩམ་ཐོ་ཙམ་གྲུབ་པ་ལ། སླར་ཡང་སྒྲུབ་པ་ལག་ལེན་དང་འབྲེལ་བར་མྱོང་ཁྲིད་དང་ཞལ་ཤེས་ཟབ་གནད་ཀྱིས་བརྒྱན་ཏེ་རབ་ཚེས་མེ་གླང་ཁྲུམ་ཟླའི་དཀར་ཕྱོགས་ཀྱི་ཚེས་བཅུ་ལ་མི་ཕམ་རྒྱ་མཚོ་ཞེས་བྱ་བས་བཀྲ་
13-9-8b


ཤིས་ལྷ་རྩེར་རང་གནས་གྲགས་པའི་ཁང་བུར་གྲུབ་པར་བགྱིས་པ་འདིས་ཀྱང་དད་དམ་ལྡན་པའི་རྣལ་འབྱོར་པ་རྣམས་ལ་དགེ་ལེགས་གྱི་སྣང་བ་མི་ཟད་པའི་དཔལ་ཀུན་ནས་སྩོལ་བར་གྱུར་ཅིག །དགེའོ་དགེའོ་མངྒ་ལཾ། ། ༈ ཀྱེ། གླིང་མཆོག་ལྷོ་ཡི་འཛམ་བུའི་གླིང་༔ འཛམ་
གླིང་ཉི་མ་བྱང་ཤར་ན༔  གཡའ་དང་སྤང་གི་མཚམས་ཤེད་ན༔ སྤྲིན་དང་ན་བུན་ཐིབས་སེ་ཐིབ༔ འོད་དང་གློག་དམར་ཁྱུགས་སེ་ཁྱུག༔ འབྲུག་སྒྲ་རི་སྒྲ་དི་རི་རི༔ བདུད་རྩིའི་སྦྲང་ཆར་སི་ལི་ལི༔ ཤེལ་གྱི་མཁར་པོ་ལྡེམས་སེ་ལྡེམ༔ 
གཡུ་ཡི་ཁ་བད་ཐིབས་སེ་ཐིབ༔ དུང་གི་སྒོ་མོ་ཁྲིགས་སེ་ཁྲིག༔ མུ་མེན་སྒོ་ལྕགས་ཁྲོ་ལོ་ལོ༔ སྐུ་མཁར་དེ་ཡི་ནང་ཤེད་ན༔ དར་དཀར་གུར་ཆེན་ལིངས་སེ་ལིང༔ དུང་གི་ཚུགས་ཤིང་ལྡེམ་སེ་ལྡེམ༔ མུ་ཏིག་ཆོན་ཐག་རྒྱངས་སེ་རྒྱང་༔ བྱུ་
རུས་ཆོན་ཕུར་ཐམས་སེ་ཐམ༔ གསེར་གྱི་གཉྫིན་ལྷགས་སེ་ལྷག༔ མཁའ་འགྲོའི་གསུང་སྙན་ཀྱུ་རུ་རུ༔  སྨན་མོའི་བྲོ་བརྡུང་ཁྲབས་སེ་ཁྲབ༔ གནས་མཆོག་དེ་ནི་ངོ་མཚར་ཆེ༔ གཞལ་ཡས་དེ་ནི་ཉམས་རེ་དགའ༔ གུར་དཀར་དེ་ནི་བག་རེ་བྲོ༔ 
གུར་ཆེན་དེ་ཡི་ནང་ཤེད་ན༔ རིན་ཆེན་ཤེལ་གྱི་ཁྲི་སྟེང་ན༔ པདྨ་ཉི་ཟླའི་གདན་སྟེང་དུ༔ མ་ཅིག་རྡོ་རྗེ་གཡུ་སྒྲོན་མ༔ སྔོ་ལྗང་མདངས་མཚེར་འགྱིང་བག་ཆགས༔ ཞལ་གཅིག་ཕྱག་གཉིས་འཛུམ་མདངས་ཅན༔ ཕྱག་གཡས་མདའ་དར་སྣ་ལྔ་
བསྣམས༔  ཕྱག་གཡོན་དངུལ་དཀར་མེ་ལོང་འཛིན༔ རིན་ཆེན་སྣ་ཚོགས་རྒྱན་གྱིས་བརྒྱན༔  དར་ཚོན་སྣ་ལྔའི་ན་བཟའ་གསོལ༔ ཞབས་གཉིས་བརྐྱང་བསྐུམ་ཚུལ་དུ་བཞུགས༔ གཡུ་ཡི་ཐོར་ཚུགས་ལྡེམས་སེ་ལྡེམ༔ དར་གྱི་ཅོད་པན་
13-9-9a


པུ་རུ་རུ༔  རིན་ཆེན་རྒྱན་ཆ་ཁྲོ་ལོ་ལོ༔ སྤྱན་རས་གཟིགས་ཀྱི་སྲིང་གཅིག་མ༔ ཆོས་མཛད་ཡོངས་ཀྱི་མ་ཅིག་མ༔ ཨོ་རྒྱན་པདྨའི་བཀའ་ཉན་མ༔ སེམས་ཅན་ཀུན་གྱི་དོན་མཛད་མ༔ འཁོར་དུ་མཁའ་འགྲོ་སྡེ་ལྔ་དང་༔ 
སྨན་བཙུན་འབུམ་ཕྲག་གཅིག་གིས་བསྐོར༔ དམ་རྫས་གཏོར་མ་འདི་བཞེས་ལ༔ བོས་པའི་དུས་སུ་སྙན་མ་སྲ༔ གཡབ་པའི་ཚེ་ན་སྤྱན་མ་བརྟུལ༔ སྒྲུབ་པའི་ཚེ་ན་རྒྱང་མ་རིང་༔ བརྟེན་པའི་ཚེ་ན་གཞན་མ་གཡལ༔ འགྲོགས་པའི་ཚེ་ན་ཕྲག་མ་
དོག༔ འདྲི་བའི་ཚེ་ན་རྫུན་མ་རྒྱག༔ བརྩེ་དང་དུང་བའི་སེམས་ཀྱི་སུ༔ མིང་བོས་འབོད་དོ་གནས་འདིར་བྱོན༔ གང་བུ་དེ་ནི་མཐོ་མཐོ་ནས༔ མདའ་དར་སྣ་ལྔ་གཡབ་ཅིང་བྱོན༔  གཤོང་བུ་དེ་ནི་དམའ་དམའ་ནས༔ སྤོས་དཀར་དུད་པ་འཐུལ་ཞིང་
བྱོན༔  གནས་མཆོག་དམ་པ་འདི་ན་ནི༔ ཁྱོད་ཀྱི་དམ་རྫས་ཚོགས་ལེགས་ཀྱི༔ པྲ་གདན་དྲི་མེད་དཀར་པོའི་སྟེང་༔ ནས་བཟང་དཀར་མོ་བྲེ་གང་འདི༔ སྨན་བཙུན་ཁྱོད་ཉིད་བཞུགས་པའི་གདན༔ དྲི་མེད་ཤེལ་གྱི་མཆོད་རྟེན་འདི༔ སྨན་བཙུན་
ཁྱོད་ཉིད་དགྱེས་པའི་རྟེན༔ དངུལ་དཀར་མེ་ལོང་གཡའ་དག་འདི༔ ཁམས་གསུམ་གསལ་པའི་རྟེན་དུ་འཛུགས༔ མདའ་བཟང་དེ་ནི་བྱ་རྒོད་མ༔ མདེའུ་གཞུང་དང་བཅས་པ་འདི༔ སྨན་བཙུན་ཁྱོད་ཀྱི་སྲོག་གི་རྟེན༔ དཀར་གཏོར་མངར་གསུམ་
བརྒྱན་པ་འདི༔ དཀོན་མཆོག་བླ་མ་ཡི་དམ་དང་༔ སྨན་བཙུན་མཉེས་པའི་རྫས་སུ་འབུལ༔ དམར་གཏོར་ཤ་ཁྲག་བརྒྱན་པ་འདི༔ མཁའ་འགྲོ་ཆོས་སྐྱོང་གཞི་བདག་དང་༔ སྨན་བཙུན་མཉེས་པའི་རྫས་སུ་འབུལ༔  འབྲང་རྒྱས་ཞལ་དཀར་
13-9-9b


བརྒྱན་ལྡན་དང་༔ ཕྱེ་མར་གྲོ་ཡོས་སྡེར་གང་བཅས༔  སྨན་བཙུན་ཁྱོད་ལ་གསོས་སུ་འབུལ༔ བསེ་ལྡེར་ཤ་གཟུགས་རྒྱན་པ་འདི༔  སྨན་བཙུན་ཁྱོད་ལ་ཚོགས་སུ་འབུལ༔ མགྲོན་བུ་མོན་ལུག་གླ་སྒང་འདི༔ སྨན་བཙུན་དགྱེས་པའི་རྟེན་དུ་འབུལ༔ 
སྨན་ལེབ་རྒྱན་གྱི་བརྒྱན་པ་འདི༔ སྨན་འཁོར་རྣམས་ལ་ཚོགས་སུ་འབུལ༔ དམ་རྫས་གཏོར་མ་འདི་རྣམས་ནི༔ འདིར་བྱོན་དགྱེས་པར་བཞེས་སུ་གསོལ༔ ཞེས་པས་སྤྱན་དྲངས།  ༈ པྲ་དབབ་ཁར་ཞུ་བ་ནི། ཁྱེད་ལ་དེ་རིང་ཞུ་བ་ནི༔ པྲ་གདན་
དཀར་པོ་དྲི་མེད་ལ༔ འབྲུ་མཆོག་གཙང་མ་གཡུང་དྲུང་རིས༔ བཀྲ་ཤིས་ཁྱེའུའམ་བུ་མོ་གཙང་མ་འདི༔ རྣལ་འབྱོར་བདག་ཆགས་ཡོན་མཆོད་ཀྱིས༔ ཡིད་ལ་བསམ་པའི་དོན་འདི་དང་༔ འདས་དང་མ་འོང་ད་ལྟ་དང ༔ ཁམས་གསུམ་མ་ལུས་
གསལ་བར་སྟོན༔ ལྷ་དང་མི་དང་འདྲེ་ལ་སོགས༔ ཕན་བྱེད་གནོད་བྱེད་གསལ་བར་སྟོན༔ གཞན་གྱིས་མ་ཤེས་ངེད་ལ་འདྲི༔ ང་ཡི་མི་ཤེས་ཁྱོད་ལ་དྲི༔ མ་ཅིག་རྡོ་རྗེ་གཡུ་སྒྲོན་མ༔ དམ་རྫས་གཏོར་མ་འདི་བཞེས་ལ༔ གནས་མཆོག་འདི་
རུ་པྲ་ཕོབ་ཅིག༔ གདན་ཁ་འདི་རུ་ཕྱྭ་ཅིག་སྟོན༔ རྫུ་འཕྲུལ་སྲིད་པའི་ཕྱྭ་རུ་མ༔  སྨྲོས་ཅིག་སྟོན་ཅིག་གསལ་བར་སྟོན༔ ཨོཾ་མ་ཎི་བཛྲ་ཙནྡྲ་མ་ཧཱ་ཊ་ཐ་ག་ཡ་སྭཱ་ཧཱ༔ ཞེས་འདོད་དོན་རྩེ་གཅིག་ཏུ་གསོལ། ༢ ཡང་བར་བར་དུ་ཕྱེ་གསུར་སྤོས་དཀར་དུད་པ་གཏོང་།
ཀྱེ། ཕྱོགས་ཕྱོགས་དེ་ནི་ཕ་གི་ན༔ ཉི་མ་ཤར་ཕྱོགས་ཕ་གི་ན༔ དུང་རི་དཀར་པོའི་རྩེ་མོ་ན༔ དུང་གི་མཚོ་མོ་འཁྱིལ་ལི་ལི༔ ཤེལ་གུར་དཀར་པོ་ཟངས་སེ་ཟང་༔ ཤེལ་གུར་དེ་ཡི་ནང་ཤེད་ན༔ རྫུ་འཕྲུལ་སྲིད་པའི་ཆ་རུ་ནི༔ སྐུ་མདོག་དཀར་པོ་
13-9-10a


འོད་དུ་འབར༔ སྐུ་ལ་རས་སྐུ་དཀར་པོ་གསོལ༔ ཕྱག་ན་རྦ་མཁར་གླིང་བུ་བསྣམས༔ སྲིད་གསུམ་སྟོན་ཆེད་ད་ཚུར་བྱོན༔ གོང་བུ་མདའ་དོང་ཙམ་ཞིག་ལ༔ ངལ་བསོ་མི་དགོས་ད་ཚུར་བྱོན༔ ལུང་བ་ཕུ་ཐུང་ཙམ་ཞིག་
ལ༔ སྙེལ་བསོ་མི་དགོས་ད་ཚུར་བྱོན༔ ཤིང་བདུད་རྩི་ཅན་གྱི་དུད་པས་བསང་༔ སྲིད་པ་གསུམ་གྱི་གནས་ཀྱང་སྟོན༔ གདོན་དང་རྐུན་མའི་མིང་ཀྱང་ཤོད༔ མ་ཐོགས་མྱུར་དུ་ད་ཚུར་བྱོན༔ མ་འདའ་དྲག་དུ་ད་ཚུར་བྱོན༔ ཞེས་བྱ་ཞིང་དེས་ཀྱང་
མ་ཕེབས་ན།  ཁྲོ་བོའི་ལྟ་སྟངས་དང་ལྡན་པས་ནས་ལྕག་གིས་བྲབ་ཅིང་།  ཀྱེ༔ བྱང་ཤར་བུ་མོ་དམ་མེད་མ༔ མཁའ་འགྲོ་གཡུ་ཡི་རལ་པ་ཅན༔ ཡབ་ཡུམ་གཉིས་པོ་གྲོས་བྱས་ནས༔ གཡམ་པའི་སྒྲོམ་བུར་བཅུག་ནས་ནི༔ ཤེལ་སྤང་མཚམས་སུ་
བོར་བའི་ཚེ༔ ཕ་བས་བྱམས་པ་ང་ཡིས་བྱས༔ མ་བས་བྱམས་པ་ང་ཡིས་བྱས༔ སྔོན་ཚེ་དེ་ཡི་དུས་ཙམ་ན༔ འོ་སྐོལ་ལྕམ་སྲིང་གཉིས་པོ་ཡིས༔  དམ་བཅས་ཁས་བླངས་མི་དྲན་ནམ༔ བོས་པའི་དུས་སུ་འོང་བ་དང་༔ ཤེལ་དཀར་མཆོད་
རྟེན་འདིའི་ནང་དུ༔ འདས་དང་མ་འོང་ད་ལྟ་དང་༔ ཁམས་གསུམ་སྟོན་པར་མ་ཆད་དམ༔ ལྷ་དང་མི་དང་འདྲེ་ལ་སོགས༔ ཕན་གནོད་སྟོན་པར་མ་ཆད་དམ༔ མིང་བོས་དྲིས་པའི་ལན་འདི་རྣམས༔ ཁྱོད་ཀྱིས་སྨྲ་བར་མ་ཆད་དམ༔ དམ་ཚིག་མི་
བསམ་དམ་ཉམས་ཡིན༔ དམ་ཚིག་གཉན་པོ་བསྲུང་ན་ནི༔ མིང་པོས་བོས་ནས་དྲིས་དུས་འདིར༔ འོང་ནས་དགོས་པའི་དོན་རྣམས་སྨྲོས༔ བལྟ་བའི་མིག་ཡང་ང་ལ་ཡོད༔ ཉན་པའི་རྣ་བ་ང་ལ་ཡོད༔ སྣོམ་པའི་སྣ་ཡང་ང་ལ་ཡོད༔ སྨྲ་བའི་ལྕེ་
13-9-10b


ཡང་ང་ལ་ཡོད༔ བསམ་པའི་སེམས་ཀྱང་ང་ལ་ཡོད༔ དམ་རྫས་གཏོར་མ་འདི་ལོངས་ལ༔ བསྒྱུར་རོ་ཆེ་གེ་མོ་འདི་ལ༔ སྟེང་གི་ལྷ་དང་འོག་གི་ཀླུ༔ བར་གྱི་བཙན་དང་འདྲེ་ལ་སོགས༔ ཕན་གནོད་མ་ལུས་གསལ་བར་སྟོན༔ ཅེས་བརྗོད་པས་སྟོན་པར་ངེས་སོ། །
མངྒ་ལཾ། །སྙིང་ཐིག་ལས། ཏིང་ཏིང་ཤག་གིས་མ་བོས་ན། །ལྷ་མོ་འོངས་སུ་མི་འདོད་པས། །འབོད་དུས་འདི་ལྟར་བྱ་སྟེ། བཾ་ཧ་རི་ནི་ས་བཛྲ་པྲ་མོ་ཧ༔ ཏིང་ཏིང་ཤག༔ ཙིཏྟ་ཧྲིཾ་ཧྲིཾ་ཛཿཛཿ འདི་བཟླས་པས་ལྕགས་ཀྱུས་དྲངས་པ་འདྲ་གསུངས། མངྒ་ལཾ།  ། ༈ རྡོ་རྗེ་གཡུ་
སྒྲོན་མའི་གསོལ་བྱང་ཕྲིན་ལས་མྱུར་འགྲུབ་ཞེས་བྱ་བ་བཞུགས་སོ། །ཇི་འབྱོར་བའི་མཆོད་ཚོགས་གཙང་མར་བཤམས་ནས་བྱིན་གྱིས་བརླབས་ལ་འདི་སྐད་དོ།། ཧཱུྃ། སྣང་སྲིད་མ་མོའི་དཀྱིལ་འཁོར་ཡངས་པའི་གཙོ། །བདེ་སྟོང་དགུང་སྨན་དབྱིངས་ཀྱི་དབང་ཕྱུག་མ། །གེ་སར་
སྐྱེས་བུའི་གསང་འཛིན་ཌཱ་ཀི་ནི། །འབུམ་ཕྲག་མཁའ་འགྲོའི་ཚོགས་བཅས་གཤེགས་སུ་གསོལ། །ལྷན་སྐྱེས་བདེ་བ་ཆེན་པོའི་རང་མདངས་ལས། །རྗེས་ཆགས་རྨད་བྱུང་རྡོ་རྗེའི་ལང་ཚོ་གང་། །སྨན་བཙུན་གཡུ་ཡི་སྒྲོན་མར་ཤར་བའི་དཔྱིད། །མི་འབྲལ་
སྙིང་གི་ཐིག་ལེར་མངའ་གསོལ་ཏེ། །མཆོད་བསྟོད་རོ་མཉམ་རྡོ་རྗེའི་དམ་བསྲེ་ན། །འདུ་འབྲལ་མེད་པར་བརྩེ་དགས་རྟག་ཏུ་སྐྱོངས། །འཆི་མེད་ཚེ་དང་འཛད་མེད་ནོར་གྱི་མཛོད། །འགྲན་མེད་སྟོབས་དཔལ་སྙན་གྲགས་གཟི་འབར་ཞིང་། །སྣང་སྲིད་སྒྲིབ་
མེད་གསལ་བའི་པྲ་དང་ནི། །ཕུན་ཚོགས་བདེ་སྐྱིད་དགའ་བའི་མཆོག་རྣམས་སྩོལ། །བདེ་སྟོང་དབྱེར་མེད་རྡོ་རྗེའི་ལམ་མཆོག་ནས། །ཟུང་འཇུག་ཡེ་ཤེས་མྱུར་དུ་འགྲུབ་པར་མཛོད། །ཅེས་པའང་ལྷ་མོ་དགྱེས་པའི་དགེ་ལེགས་ཀྱི་སྣང་བ་དཀར་པོས་ཁྱབ་པའི། དུས་ཀྱི་
13-9-11a


ཁོངས་སུ་ཟིལ་གནོན་དགྱེས་པ་རྩལ་གྱིས་བྲིས་པ་བཀྲ་ཤིས་མཆོག་ཏུ་གྲུབ་བོ།། ༈ གཏེར་སྲུང་ཀླུ་བཙན་གྱི་གསོལ་མཆོད་ནོར་བུའི་ཕྲེང་བ་བཞུགས་སོ།།     །རྡོ་རྗེ་གཡུ་སྒྲོན་མའི་པྲ་སྒྲུབ་ཀྱི་གཏེར་སྲུང་ཀླུ་བཙན་རྡོ་རྗེ་འབར་བ་ལ་མཆོད་གསོལ་སྤྲོ་ན། གཏོར་མ་
ཟུར་གསུམ་སྦྲུལ་དཀྲིས་ཅན་ཐེབ་རིལ་ཇི་མང་གིས་བསྐོར་བ་དང་། གསེར་སྐྱེམས་སོགས་མཆོད་ཚོགས་ཇི་འབྱོར་བཤམས་ནས་འདི་སྐད་དོ།།     ཀྱེ། ཀ་དག་ལྷུན་གྲུབ་པདྨ་རྒྱལ་པོ་ཡིས། །ཁ་བའི་ལྗོངས་འདིར་ཟབ་མོ་གཏེར་གྱི་མཛོད། །ག་ལ་བ་དེར་གཏད་པའི་མཐུ་བོ་ཆེ། །ང་ཡིས་
འབོད་དོ་རྡོ་རྗེ་ཁྱུང་དྲག་སྩལ། །ཅ་ཅོ་སྣ་ཚོགས་སྙན་པའི་སྒྲ་དབྱངས་སྒྲོགས། །ཆ་བྱད་ཡིད་འོང་གཟུགས་སོགས་བཀོད་པ་མཛེས། །ཇ་ཆང་ལ་སོགས་བཟའ་བཏུང་གཅལ་བཀྲམ་ནས། །ཉ་རྒྱས་ཟླ་འདྲའི་ཐུགས་མངའ་ཀླུ་བཙན་ཆེ། །ཏ་ཐཱ་ག་ཏའི་
བསྟན་སྲུང་དེང་འབོད་ན། །ཐ་ཚིག་གཉན་པོ་ཡལ་བར་མ་དོར་བར། །ད་ལྟ་སྐད་ཅིག་ཉིད་དུ་འདིར་བྱོན་ནས། །ན་ཚོད་གཞོན་ནུའི་ཞལ་རས་པདྨའི་སྦུབས། །པ་སངས་ལྟར་དཀར་འཛུམ་པའི་ཚེམ་ཕྲེང་གིས། །ཕ་རོལ་ཕུན་ཚོགས་རང་གིར་བགྱིད་པ་ཡིས། །
པ་མཆོག་དཔག་བསམ་གཏེར་བུམ་ནོར་བུ་བཞིན། །མ་ལུས་འདོད་དགུ་འཇོ་བའི་གྲོགས་སུ་བཞུགས། །ཙ་མ་ར་ལྟར་ཁེངས་ཤིང་སྡང་བའི་དགྲ། །ཚ་ཟེར་བརྒྱ་པས་མུན་པ་བཞིན་འཇོམས་པ། །ཛ་ཡའི་བསྟན་སྲུང་རྡོ་རྗེ་འབར་བ་རྩལ། །ཝ་ལེར་
དྲན་ཅིང་མཆོད་བསྟོད་མངའ་གསོལ་ན། །ཞྭ་བཞིན་གཙུག་ཏུ་བཀུར་འོས་གསང་སྔགས་ཚུལ། །ཟྭ་ལྟར་དམན་པར་སེམས་བགྱིད་སྡིག་ལྡན་དགྲ། །འ་འོལ་བཏང་སྙོམས་ངང་དུ་མ་བཞག་པར། །ཡ་ང་ཆོ་འཕྲུལ་གདུག་པས་དཔའ་བཀོང་
13-9-11b


ཤིག །ར་རི་དང་བྲལ་ལྐོག་གྱུར་མཁྱེན་པའི་སྤྱན། །ལ་འུར་འབྱེད་པའི་ཐབས་མཆོག་པྲ་སེ་ནའི། །ཤ་ས་ན་འདི་ཉི་ཟླའི་དཀྱིལ་འཁོར་བཞིན། །ས་སྟེང་ཀུན་ཏུ་གསལ་ཞིང་རྒྱས་པར་མཛོད། །ཧ་ཅང་དགྱེས་འཛུམ་བཞད་པའི་རྣམ་འགྱུར་གྱིས། །
རྟག་ཏུ་ཡིད་བཞིན་འདོད་དགུར་སྐྱོང་བ་དང་། །ཨ་ལ་ལ་ཞེས་ངོ་མཚར་དབྱངས་དང་བཅས། །གང་བཅོལ་ཕྲིན་ལས་ཐོགས་མེད་གྲུབ་པར་མཛོད། །ཅེས་པའང་རྡོ་རྗེ་གཡུ་སྒྲོན་མའི་པྲ་སྒྲུབ་ཀྱི་ཡིག་ཆ་བྲི་སྤེལ་མང་དུ་བགྱིས་པའི་ཚེ་ཉེ་གནས་ལ་གཏེར་བདག་ཀླུ་བཙན་གྱི་འཚུབས་རྨི་ལམ་དུ་
བྱུང་བའི་རྐྱེན་ལ་བརྟེན་མི་ཕམ་པས་ལྕགས་འབྲུག་ཟླ་བ་༡༡བཅུ་གཅིག་པའི་ཚེས་བཅོ་ལྔ་ལ་བྲིས་པ་དགེ་ལེགས་འཕེལ།།  ༈   །།པྲ་ལ་སྨོད་པ་འགོག་པའི་གཏམ་དྲང་སྲོང་རྣ་རྒྱན་བཞུགས་སོ།     །ན་མོ་གུ་རུ་མཉྫུ་ཤྲཱི་བཛྲ་ཏཱཀྵྞི་ཡ། ཤུགས་དྲག་བརྩེ་བས་དྲངས་པའི་ཐབས་མཁས་
ཀྱིས། །མ་ལུས་འགྲོ་བའི་ཕན་བདེ་བསྒྲུབ་མཛད་པ། །བྱང་ཆུབ་སེམས་ཀྱི་བདག་ཉིད་རྒྱལ་བའི་སྲས། །སྣ་ཚོགས་མཛད་པའི་ཁུར་ཆེན་བསྣམས་ལ་འདུད། །གང་ཞིག་རྒྱལ་བའི་བཀའ་དང་མཐུན་པའམ། །དེ་ལས་ཕྱི་རོལ་གྱུར་པ་གང་ཡིན་ཞེས། །
ལེགས་པར་དཔྱོད་པའི་བློ་གྲོས་མིག་བགྲད་པ། །སྐལ་བཟང་སྐྱེ་བོ་རྣམས་ཀྱི་ཚུལ་ཡིན་ཀྱང་། །དེང་སང་བཀའ་དང་དགོངས་པ་འགྲེལ་བའི་གཞུང་། །མ་རྟོགས་བཞིན་དུ་རྟོགས་པར་རློམ་པ་ཡི། །རང་འདོད་རྟོག་གེ་ངན་པའི་གཏམ་གྱིས་ནི། །རྒྱལ་དང་
འཕགས་པའི་དགོངས་པ་རྙོགས་མར་བྱེད། །དེ་ཕྱིར་ཀུན་སློང་དག་པའི་སེམས་ཀྱིས་ནི། །རྒྱལ་བའི་བཀའ་བཞིན་དྲི་མེད་རིགས་པས་ཀྱང་། །ལེགས་པར་གྲུབ་པའི་གཏམ་གྱི་ཚུལ་ཅུང་ཟད། །འདི་རུ་སྤྲོས་པས་མཁས་རྣམས་དགྱེས་པར་མཛོད། །
13-9-12a


དེ་ལ་འདིར་རང་དང་གཞན་གྱི་དོན་གཉིས་ཕུན་སུམ་ཚོགས་པའི་འབྱོར་པ་ལ་དབང་བསྒྱུར་བར་འདོད་པའི་རྒྱལ་སྲས་བྱང་ཆུབ་སེམས་དཔའ་རྣམས་ནི་མཐུ་ཕུན་སུམ་ཚོགས་པ་མངོན་པར་ཤེས་པ་དྲུག་གི་སྒོ་ནས་གཞན་དོན་མཛད་པ་
ཡིན་ལ། དེ་ལྟར་འཕགས་ལམ་མ་ཐོབ་པའི་གང་ཟག་རྣམས་ཀྱིས་ཀྱང་རང་དང་གཞན་གྱི་དོན་སྒྲུབ་པ་ལ་རྒྱུའི་གཙོ་བོ་ནི་བླང་དོར་ཤེས་པ་ཡིན་པར་གྲུབ་ལ། དེ་ལའང་མཐར་ཐུག་ཐར་པ་མཆོག་གི་ལམ་གྱི་སྤང་བླང་ཤེས་པ་བསྒྲུབ་བྱའི་གཙོ་བོ་ཡིན་མོད་ཀྱི། 
དེའི་ཡན་ལག་ཏུ་གནས་སྐབས་ཀྱི་དོན་བསྒྲུབ་ཕྱིར་ཐུན་མོང་དངོས་གྲུབ་སྒྲུབ་ཚུལ་དུ་མ་ཞིག །མདོ་དང་རྒྱུད་སྡེ་དུ་མ་ནས་ཡང་ནས་ཡང་དུ་གསལ་པོར་གསུངས་པ་དེ་ཀུན་ཀྱང་དགོས་པ་ཁྱད་པར་ཅན་ཡིན་པ་གཞིར་བཅས་མོད། ཁྱད་པར་དུ་མངོན་ཤེས་མ་ཐོབ་
པའི་གང་ཟག་གིས། རང་དང་ལྷག་པར་གཞན་དོན་སྒྲུབ་པ་ལ་མེད་དུ་མི་རུང་བ་ནི་ལྐོག་གྱུར་གསལ་བའི་ཚུལ་ཡིན་པར་གྲུབ་སྟེ། གང་བགྱིས་ན་དོན་དུ་འགྱུར་བ་དང་། གང་བྱས་ན་དོན་དུ་མི་འགྱུར་བ་སོགས་ཤེས་པ་དེ་ལ་རག་ལས་པའི་ཕྱིར་རོ། །དེས་
ན་དམུས་ལོང་ལག་ནོམ་ལྟ་བུའི་གང་ཟག་རྣམས་ཀྱིས། རང་ལ་ལྐོག་གྱུར་ཤེས་པའི་མཐུ་ནི་མེད། ན་ཚ་དང་རྐྱེན་ངན་ཕྲ་མོ་བྱུང་ཚེ་ལམ་དུ་ནི་སློང་མི་ནུས་པར་གྲོང་མཐའི་སྤྲང་པོ་ཡན་ཆོད་ལ་ཅི་དྲག་ཇི་འདྲ་རེད་འགྲོ་ཟེར། མོ་ལྟ་ཞིང་བྲེལ་ཚུབ་ཚུབ་མི་བྱེད་
མཁན་ནི་སུ་ཡང་ཡོད་དཀའ་འདྲ་ལ། རང་གར་སོས་དལ་གྱི་ཁ་གཏམ་ལ་པྲ་སྒྲུབ་ལ་སོགས་པ་འདི་དག་དོན་ཆུང་བར་མ་ཟད་བྱེད་ཀྱང་མི་རུང་བ་ལྟ་བུར་སྨྲ་བ་དུ་མ་འདུག་པ་ཁྱེད་ཅག་ལུང་ལ་ཐོས་པ་ཆུང་བ་དང་། རིགས་པ་ལ་འདྲིས་གོམས་མེད་པར་ཟད་
13-9-12b


དེ། དེས་ན་ཁོ་བོས་ཁྱེད་ཅག་ལ་ཅུང་ཟད་ཕྱེ་སྟེ་བཤད་ན། སྤྱིར་རྣམ་པ་ཐམས་ཅད་མཁྱེན་པའི་ལམ་ནི་དོན་དུ་གཉེར་བྱའི་གཙོ་བོ་ཡིན་མོད། པྲ་ལ་སོགས་པ་སྒྲུབ་པའང་དེ་དང་འགལ་བ་ནི་མིན་ཏེ། ཐམས་ཅད་མཁྱེན་པའི་ཡེ་ཤེས་ཚེ་འདི་ཉིད་ལ་སྟེར་བའི་སྔགས་
ཀྱི་རྒྱུད་སྡེ་དུ་མ་ནས་ལས་ཕྲ་མོ་སྒྲུབ་པའི་གཙོ་བོར་པྲ་ཕབ་པའི་ཐབས་མང་དུ་གསུངས་པ་དང་། རིགས་པས་དཔྱད་ནའང་འགལ་བ་མེད་པར་མ་ཟད་ཕན་པའི་ཡན་ལག་ཏུ་མཐོང་བའི་ཕྱིར་རོ། །དེ་ལ་མདོ་དང་རྒྱུད་སྡེ་དགོངས་འགྲེལ་དང་བཅས་པ་ལས་ཇི་ལྟར་
གསུངས་ཚུལ། སྤྱིར་རྒྱལ་སྲས་བྱང་ཆུབ་སེམས་དཔས་ཤེས་བྱ་ཀུན་ལ་སློབ་པ་ཡིན་ཏེ། དེ་ཡང་ཐམས་ཅད་མཁྱེན་པའི་ཡེ་ཤེས་ཤེས་བྱ་མཐའ་དག་གི་ཡུལ་ཅན་ཡིན་པས་ལམ་དུས་སུ་ཡང་ཤེས་བྱ་ཉི་ཙེ་བ་ཙམ་མིན་པར་ཀུན་ལ་སློབ་པ་དང་། ཁྱད་པར་
གཞན་ཕན་གྱི་ཆ་ལག་ཏུ་འགྱུར་རུང་ཀུན་ལ་མཁས་པར་བྱ་བ་ཡིན་ཏེ། དཀོན་མཆོག་ཏ་ལ་ལས། དེ་དག་ཐབས་ཚུལ་རྣམ་པ་སྣ་ཚོགས་ཀྱིས། །འཇིག་རྟེན་རྒྱུ་ཞིང་འགྲོ་བའི་དོན་རྣམས་བྱེད། །འཇིག་རྟེན་མི་ཆགས་ཆུ་ལ་པདྨ་བཞིན། །དགའ་ཞིང་
དད་པར་བྱེད་པ་རྣམས་ལ་རྒྱུ། །དེ་དག་སྙན་ངག་མཁན་རྒྱལ་སྙན་ངག་སྦྱོར། །གར་མཁན་རྔ་མཁན་གྱད་དང་རོལ་མོ་མཁན། །བཞག་མཛེས་རྒྱན་ཕྲེང་ཐོགས་ཤིང་གར་བྱེད་དང་། །སྒྱུ་མ་མཁན་པོ་གཟུགས་མང་ཀུན་ཏུ་སྟོན། །གྲོང་པ་གྲོང་དཔོན་
ཁ་ལོས་སྒྱུར་བར་འགྱུར། །དེ་བཞིན་དེད་དཔོན་ཚོང་དཔོན་ཁྱིམ་བདག་འགྱུར། །རྒྱལ་པོ་བློན་པོ་མདུན་འདོན་ཕོ་ཉ་དང་། ། སྨན་པ་འཇིག་རྟེན་བསྟན་བཅོས་ཆོ་ག་མཁན། །དེ་དག་དགོན་པར་ལྗོན་ཤིང་ཆེན་པོར་འགྱུར། །སྨན་དང་རིན་ཆེན་མི་ཟད་གཏེར་
13-9-13a


རྣམས་དང་། །ཡིད་བཞིན་ནོར་བུ་འདོད་འབྱིན་སྡོང་པོ་དང་། །ལམ་གོལ་དོགས་པ་རྣམས་ལ་ལམ་སྟོན་འགྱུར། །འཇིག་རྟེན་བྱུང་ནས་མི་རིང་ཤེས་གྱུར་ཅིང་། །སེམས་ཅན་ལས་ཀྱི་ཚུལ་རྣམས་མི་ཤེས་པ། །དེ་དག་ཀུན་
ལ་རྨོས་ཆོས་ཚོང་ཐབས་དང་། །སྣ་ཚོགས་བཟོ་རྣམས་འཇིག་རྟེན་བརྗོད་པར་བྱེད། །འཚེ་མེད་གནོད་པ་མེད་པའི་སྦྱོར་བ་གང་། །སེམས་ཅན་བདེ་བྱེད་མཁས་པས་རབ་བསྔགས་པ། །རིག་སྟོབས་སྨན་དང་བསྟན་བཅོས་སྣ་ཚོགས་ཀུན། །དྲང་སྲོང་དེ་
དག་རྣམས་ཀྱིས་རབ་ཏུ་བརྗོད། །ཅེས་སོགས་གསུངས་པས་མཚོན་ཏེ་མདོ་དུ་མ་ནས་གསུངས་པ་དང་། སྤྱོད་འཇུག་ལས་ཀྱང་། རྒྱལ་སྲས་རྣམས་ཀྱིས་མི་བསླབ་པ། །དེ་ནི་གང་ཡང་ཡོད་མ་ཡིན། །ཞེས་སོགས་བཀའ་དགོངས་འགྲེལ་དུ་མ་ལས་
ཤེས་བྱ་ཀུན་ལ་བསླབ་པར་གསུངས་པ་དང་། ཁྱད་པར་དུ་པྲ་དབབ་པ་ནི་རྒྱུད་སྡེ་དུ་མ་ནས་གསུངས་པ་ཡིན་ཏེ། ཀྱེ་རྡོ་རྗེའི་རྒྱུད་ཀྱི་སྔགས་ཀྱི་ལེའུ་ལས། ཨོཾ་ན་གྲྭ་ན་གྲྭ་ཞེས་པའི་སྔགས་ཀྱི་མཐེ་བོང་ལ་པྲ་ཕབ་ནས་རྫས་སོགས་སུས་ཁྱེར་ཤེས་པ་དང་།
དཔལ་སངས་རྒྱས་ཐམས་ཅད་མཉམ་པར་སྦྱོར་བ་མཁའ་འགྲོ་སྒྱུ་མ་བདེ་བའི་མཆོག་ཅེས་བྱ་བའི་རྒྱུད་ལས་ཀྱང་། རལ་གྲི་མེ་ལོང་མདའ་གཞུ་དང་། །ཤིང་དང་ཆུ་དང་འབབ་ཆུ་བྲག །གཟུགས་བརྙན་འབྱུང་བའི་ཁྱིམ་དག་ལས། །བྱ་དང་དེ་བཞིན་
མི་བྱ་དང་། །སྟོར་བ་དང་ནི་མ་སྟོར་དང་། །འཕྲོག་པ་དང་ནི་མ་འཕྲོག་དང་། །དེ་བཞིན་རྙེད་དང་མི་རྙེད་དང་།  །གསོན་པ་དང་ནི་ཤི་བ་དང་། །དེ་བཞིན་རྒྱལ་དང་ཕམ་པ་དང་། །དོན་ཡོད་དང་ནི་དོན་མེད་དང་། །དེ་བཞིན་གྲུབ་དང་མི་གྲུབ་དང་། །
13-9-13b


བདེ་དང་མི་བདེ་ཆོ་ག་བཞིན། །ལྷ་ཡུལ་དག་གི་དོན་རྣམས་དང་། །སངས་རྒྱས་ཞིང་གི་དོན་རྣམས་ཀྱང་། །ཀུན་ནས་ཀུན་དུ་ཐམས་ཅད་ནི། །བསམ་པ་མཐོང་ཞིང་ཐོས་པར་བྱེད། །ཅེས་པ་ལ་སོགས་པ་དང་། བདེ་མཆོག་ཉུང་ངུའི་རྒྱུད་ལས། །
དེ་བཞིན་སྔགས་བཟླས་རལ་གྲི་ཆུ། །མཐེ་བོང་མར་མེ་མེ་ལོང་ལ། །སྔགས་པ་བདག་ཉིད་རྟག་རྣལ་འབྱོར། །པྲ་སེ་ན་ནི་འབེབ་པར་བྱེད། །ཅེས་དང་། འཇམ་དཔལ་དཔའ་བོ་གཅིག་གྲུབ་ཀྱི་རྒྱུད་ལས་ཀྱང་། ལྷའི་བུ་དྲི་མ་མེད་པ་དང་། ལྷ་མོ་
ཙུནྡ་ཤྲ་བ་ཎ། ཤ་ཟ་རྣ་སྒྲོགས་སོགས་ཀྱི་སྒོ་ནས་མངོན་ཤེས་དང་པྲ་དང་རྨི་ལམ་སྒྲུབ་པའི་ཆོ་ག་སྣ་ཚོགས་གསུངས་པས་མཚོན། བྱ་སྤྱོད་རྣལ་འབྱོར་བླ་མེད་ཀྱི་རྒྱུད་སྡེ་ཕལ་མོ་ཆེ་ན་ལས་ཕྲན་ཚེག་གི་གཙོ་བོར་པྲ་སྒྲུབ་པ་ཡང་ནས་ཡང་དུ་གསུངས་པ་
ཡིན་ལ། དེ་དག་ཀྱང་རྫས་སྔགས་ཏིང་འཛིན་ཅི་རིགས་ལ་བརྟེན་པ་ཡིན་ལ།  དེ་ཡང་ལྷ་ཡེ་ཤེས་པ་ལ་བརྟེན་པ་ནི། ཡེ་ཤེས་དབབ་པ་དང་ཕྱོགས་མཐུན་ཏེ། དུས་འཁོར་ལས་ཡེ་ཤེས་ཕེབས་པའི་སྐབས་སུ། ཐུགས་ཕེབས་པས་ནི་གཞན་གྱི་སྙིང་
ལ་གནས་པ་དག་དང་བྱུང་དང་འབྱུང་བ་ཐམས་ཅད་ཤེས་པར་འགྱུར། ཞེས་སོགས་གསུངས་པ་དང་འདྲ་ཞིང་། །གསང་བ་འདུས་པ་ལས་ཀྱང་། །བུ་མོ་ལོ་གྲངས་བཅུ་གཉིས་མའམ། །ཁྱེའུ་ལོ་གྲངས་བཅུ་གཉིས་པ། །མཚན་ཉིད་ཐམས་ཅད་
ཡོངས་རྫོགས་པ། །བཟུང་ནས་དབབ་པ་རབ་ཏུ་བརྟགས། །ཆོ་ག་ཐམས་ཅད་བྱས་ནས་ནི། །ལས་རྣམས་རབ་ཏུ་བསྒྲུབ་པར་བྱ། །ཞེས་གསུངས་པ་རྣམས་དང་དོན་འདྲ་ཞིང་། དཔུང་བཟང་གི་ཞུས་པའི་རྒྱུད་ལས། མཐེ་བོང་མེ་ལོང་རལ་གྲི་ཆུ་
13-9-14a


དང་ཤེལ། །མར་མེ་ས་གཞི་ལྕགས་དང་ནམ་མཁའ་དང་། །ལྷུང་བཟེད་ནོར་བུ་དག་དང་མེ་འབར་བ། །འདི་ལ་གསལ་པོར་སྟོན་པ་དྲག་ཏུ་འབྱུང་། །ཞེས་པ་ནས། སྔགས་པ་ཡུན་རིང་ཉོན་མོངས་མི་འགྱུར་རོ། །ཞེས་པའི་
བར་གྱིས་གསལ་བར་བསྟན་ཅིང་། གཞན་ཡང་དུས་ཀྱི་འཁོར་ལོ་སོགས་ལས་ས་འོག་གི་གཏེར་མཐོང་པ་དང་། གསང་འདུས་ལས་རྡོ་རྗེ་ཨཉྫ་ན་དབབ་པའི་ཆོ་ག་སོགས་ཀྱིས་མཚོན།  མི་སྣང་བ་དང་། མིག་སྨན་དང་། ཞི་བ་དང་། རྒྱས་པ་དང་།
དྲག་པོའི་ལས་དང་། དབུགས་པ་དང་། མིག་མཐོང་དང་། རྣ་བ་མིག་ཡིད་ཀྱི་མངོན་པར་ཤེས་པ་སྒྲུབ་པ་དང་། རྨི་ལམ་དང་། མེ་ཆུ་མེ་ལོང་སེན་མོ་མཐེ་བོང་རལ་གྲི་མར་མེ་ལ་སོགས་པའི་དངོས་པོ་ལ་པྲ་སེན་དབབ་པའི་ཆོ་ག་སོགས་ལས་ཕྲན་ཚེགས་ཤིན་
ཏུ་མང་པོ་ཞིག །མདོ་དང་ཁྱད་པར་རྒྱུད་སྡེ་རིན་པོ་ཆེ་རྣམས་ལས།  ལྷ་དང་སྔགས་དང་། རྫས་དང་། ཏིང་འཛིན་གྱི་འཁྲུལ་འཁོར་མི་འདྲ་བ་ལ་བརྟེན་པ་ཅི་རིགས་གསུངས་པ་དེ་ཀུན་ཀྱང་སྨད་པར་བྱ་བ་མ་ཡིན་ཏེ། སངས་རྒྱས་ཀྱི་གསུང་དགོས་པ་ཁྱད་པར་
ཅན་ནོ། །དེའི་མན་ངག་ཀྱང་སློབ་དཔོན་ཀླུ་སྒྲུབ་ཀྱི་ཙུནྡའི་པྲ་ཕབ་ཀྱི་གཞུང་ལ་སོགས་པ་རྒྱ་བོད་ཀྱི་མཁས་པས་བརྩམས་པའི་ཡིག་ཆ་མང་དུ་བཞུགས་བཞིན་པ་རྣམས་ནི་ལུང་ལས་ཇི་ལྟར་གསུངས་ཚུལ་མདོ་ཙམ་ཡིན་ལ། རིགས་པས་བརྟག་ནའང་པྲ་ནི་ཐམས་
ཅད་མཁྱེན་པའི་ལམ་དང་འགལ་བ་མིན་ཏེ། ལྷག་པའི་ལྷ་ཞིག་ལ་བརྟེན་ནས་རྫས་སྔགས་ཏིང་ངེ་འཛིན་གྱི་སྟོབས་ལས་བརྟག་བྱའི་བླང་དོར་དངོས་སམ་བརྡའི་ཚུལ་དུ་མཐོང་བ་ཙམ་པྲའི་ངོ་བོ་ཡིན་ན། བླང་དོར་མཐོང་བ་ཙམ་ནི་རྣམ་མཁྱེན་གྱི་ལམ་དང་འགལ་
13-9-14b


བའི་ལུང་རིགས་གང་ཡང་མེད་པས་སོ། །གལ་ཏེ་བླང་དོར་མཐོང་བ་ཙམ་ལམ་གྱི་གེགས་ཡིན་ན། ཟག་མེད་ཀྱི་མངོན་ཤེས་ནས་ཕྲེང་མོ་ཐིག་པོ་ཡན་ཆོད་དང་། ལམ་གང་དུ་འཇུག་ལྡོག་གི་སྐྱོན་ཡོན་མིག་གིས་མཐོང་བ་དང་།  རྣ་བས་ཐོས་པ་ཚུན་ཆད་ཀྱང་།
ཁྱོད་ལ་རྣམ་མཁྱེན་གྱི་གེགས་སུ་འགྱུར་བར་ཐལ་བའི་ཕྱིར། ཁྱོད་ཀྱི་རྣམ་མཁྱེན་དེ་ནམ་ཡང་ཐོབ་པར་མི་འགྱུར་རོ། །ཁོ་ན་རེ། དེ་ཙམ་གྱིས་མིན་ཀྱང་། པྲ་འདི་ལ་ཀུན་སློང་ངན་པ་སོགས་འབྱུང་སྲིད་པས་གེགས་གོལ་ས་ཆེ་བས་ཡང་དག་པའི་ལམ་དང་
མི་མཐུན་ཟེར་ན། འོ་ན་པྲ་ཡིན་ན་ཀུན་སློང་ངན་པས་ཁྱབ་པ་ཁྱོད་ཀྱིས་ཁས་ལེན་པ་ཡིན་ནམ་མིན།  དེ་མིན་ན་དེ་ལྟར་སྨྲས་པ་ལ་དགོས་པ་ཅུང་ཟད་ཀྱང་མེད་དེ། སྤྱིར་ཀུན་སློང་ངན་ན་པྲ་ཙམ་དུ་མ་ཟད་ཁྲོ་བོའི་བསྒོམ་བཟླས་སོགས་ཀྱང་ཡང་དག་པའི་ལམ་
དུ་མི་རུང་སྟེ། སྦྲུལ་ལ་བཟུང་ཉེས་དང་། རིག་སྔགས་ལོག་པར་བསྒྲུབ་པ་ཞེས་གྲགས་པ་ལྟར། གཤིན་རྗེའི་སྔགས་ལོག་པར་བཟླས་པའི་ལོ་རྒྱུས་བཞིན་ནོ། །དེས་ན་ཁྱོད་ཀྱིས་དགག་བྱ་ཀུན་སློང་ངན་པ་ཡིན་ན་རུང་གི་པྲ་ལ་སྨོད་པ་དོན་མེད་དོ། །
གེགས་གོལ་སའང་ཆེ་བ་མིན་ཏེ། ཇི་ལྟར་ན་སྔགས་ལམ་གྱི་ཕྲིན་ལས་ཀྱི་གཙོ་བོ་སྒྲོལ་བ་དང་སྦྱོར་བ་ལྟ་བུ་ཐབས་ཀྱིས་ཟིན་ན་ཆེས་མཆོག་གི། མ་ཟིན་ན་གོལ་ས་ཆེ་ཡང་། འདི་ནི་བྱང་ཆུབ་ཀྱི་སེམས་ཀྱིས་ཟིན་ན་ཡང་དག་པའི་ལམ་དུ་འགྱུར་བ་ལྟ་ཅི་སྨྲོས་
ཀྱི་མ་ཟིན་ཀྱང་། རང་གཞན་གྱི་བླང་དོར་མཐོང་ནས་དོན་ལ་འཇུག་པ་ཙམ་ཡིན་པས། ཕན་འདོགས་ཀྱི་བྱ་བ་ཡིན་གྱི་མི་དགེ་བ་ཅུང་ཟད་ཀྱང་མ་ཡིན་ནོ། །གལ་ཏེ་གང་ཟག་དམན་པ་ཁ་ཅིག་གི་བླང་དོར་ཅུང་ཟད་ཤེས་ན་དེ་ལ་བརྟེན་ནས་མངོན་རློམ་དང་གྲུབ་
13-9-15a


བརྫུ་འབྱུང་སྲིད་ཀྱང་། དེ་འདྲ་བ་ནི་ལམ་གྱི་ཡོན་ཏན་ཕྲ་མོ་ཐམས་ཅད་ལ་གེགས་སུ་འབྱུང་སྲིད་པ་ཡིན་པས་པྲ་ཁོ་ནའི་སྒེར་སྐྱོན་མ་ཡིན་ཅིང་། ཡེ་ཤེས་ཀྱི་ལྷ་ལ་བརྟེན་པའི་པྲ་ལེགས་པོ་ཞིག་ཡིན་ན། གཞན་སྐྱོན་བརྗོད་པ་
དང་། རྫུན་བཏགས་པས་མི་གསལ་བར་འགྱུར་བ་ཉིད་ཀྱིས་སྐྱོན་དེ་ཁེགས་པ་ཡིན་ཅིང་། གཞན་ཕན་དང་བདེན་པའི་ལམ་ལ་གནས་པ། ཁྲིམས་གཙང་ཞིང་རིམ་གཉིས་ལ་བརྟན་པ་ཇི་ཙམ་ཐོབ་པ་དེ་ཙམ་པྲ་ཡང་ཆེས་གསལ་བས་རང་གི་སྐྱོན་ཡོན་རྟོགས་
པའི་མེ་ལོང་དང་འདྲ་བས་གོལ་ས་འགོག་པའི་ཐབས་ཡིན་བྱས་ན་རུང་གི་བཟློག་ནས་སྨྲ་བ་ཁྱོད་ནི་རིགས་ལམ་མི་ཤེས་པའི་རང་རྟགས་ངོམ་པ་ཞིག་གོ། །ཡང་ཁོ་ན་རེ། དེ་ལྟ་ནའང་། རྣམ་མཁྱེན་གྱི་ལམ་གྱི་གཙོ་བོ་མིན་པས་དོན་དུ་གཉེར་བྱ་མིན་ནོ་ཞེ་
ན། རྣམ་མཁྱེན་དང་ཐར་ལམ་གྱི་གཙོ་བོ་པྲ་མིན་ཅིང་། པྲ་བསྒྲུབ་ཁོ་ནས་ཐར་བ་ཐོབ་པ་ངེད་ཀྱིས་ཀྱང་མི་འདོད་མོད་ཀྱི། འོན་ཀྱང་ཐར་ལམ་གྱི་གཙོ་བོ་མིན་ཚད་སྤང་བྱ་ཡིན་ན་ཧ་ཅང་ཐལ་ཏེ། རིག་བྱེད་བཟོ་གནས་སོགས་ཤེས་བྱ་གཞན་དང་། ཐ་ན་
ཟས་གོས་གནས་མལ་ཚུན་ཆོད་ཀྱང་ཁྱོད་ཀྱིས་སྤང་དགོས་པར་ཐལ་ཏེ། དེ་རྣམས་ལམ་གྱི་གཙོ་བོ་མིན་པའི་ཕྱིར།  དེ་རྣམས་བརྒྱུད་ནས་ཐར་ལམ་ལ་ཕན་པའི་ཡན་ལག་ཡིན་ཟེར་ན། འདི་ཡང་དེ་ལྟར་ཅིས་མིན་ཏེ། གནས་སྐབས་ལུས་བསྲུང་བ་སོགས་
ཀྱི་སྒོ་ནས་ཐར་པ་ལ་ཆེས་ཕན་པ་ཡིན་པས་སོ། །ཡང་ཁོ་ན་རེ། དེ་ལྟར་ཡིན་སྲིད་ཀྱི། འོན་ཀྱང་པྲ་སོགས་སྒྲུབ་པ་འདི་ནི་འདུལ་བའི་རྣམ་ཐར་གཙང་མ་སྐྱོང་བ་དང་མི་མཐུན་པས་སྤང་དགོས་སྙམ་ན། བླུན་པོ་ཁྱོད་ནི་རྣམ་ཐར་གཙང་མ་དང་མི་གཙང་
13-9-15b


བའི་ཁྱད་མི་ཤེས་པ་ཞིག་སྟེ། དེ་གང་གི་ཕྱིར་ན། དེང་སང་སྙིགས་མའི་དུས་འདིར་ཟག་མེད་ཀྱི་བསམ་གཏན་ཐོབ་པ་གཞུང་ལས་བཤད་པ་བཞིན་འབྱུང་བས་ལུང་སྟོན་པའི་གང་ཟག་ནི་དཀའ་སྟེ། སངས་རྒྱས་བྱང་སེམས་ཀྱི་སྤྲུལ་པ་འགྲོ་བའི་ཁམས་ན་
བཞུགས་པ་ལྟ་ཅི་སྨྲོས་ཀྱང་། རང་ཅག་རྣམས་ཀྱི་ངོར་ཇི་བཞིན་སྣང་དཀའ་སྟེ། གལ་སྟེ་སྣང་ན་ཟག་མེད་ཕར་ཞོག་ཟག་བཅས་ཀྱི་བསམ་གཏན་མཚན་ཉིད་པ་ཞིག་གྲུབ་ནས། ལྷའི་རྣ་བ་དང་མིག་གི་མངོན་ཤེས་གྲུབ་པའང་། །རྟག་ཏུ་རྟེན་བཅས་མ་ཚང་མེད། །
ཐག་རིང་སྒྲ་སོགས་སྤྱོད་ཡུལ་ཅན། །ཞེས་བཤད་པ་ལྟར་གྱི་ཤིན་ཏུ་རྒྱང་རིང་པོ་དང་། བར་ཆོད་པའི་སྒྲ་དང་གཟུགས་ཀྱང་ཤེས་དགོས་ན། རང་གི་སྤྱད་ཆ་ཕྲ་མོ་ཙམ་ཞིག་མཚན་མོ་སོགས་སུ་སྟོར་ན། གར་བབ་ལག་པས་ཉུག་ཅིང་མི་ཚོལ་བར་ཐད་ཀ་ནས་ལེན་
པ་མཐོང་དཀའ་བར་སྣང་། དེ་ཡི་ཕྱིར་ན་རང་རེ་ལྟ་བུ་ཕལ་པ་རྣམས་ལ་བླང་དོར་ལྐོག་ཏུ་གྱུར་པའི་དབང་གིས་བྱ་སྤྱོད་ཕལ་ཆེ་བ་ཕྱིན་ཅི་ལོག་ཏུ་གྱུར་པ་ཡིན་ལ། དེ་ལྟ་བུའི་སྐབས་སུ་རང་གིས་མ་ཤེས་པ་གཞན་ལ་དྲིས་ནའང་། ལ་ལས་ནི་མིག་བར་སྣང་ལ་གཏད་
ནས་ཅི་དྲན་ཁ་ནས་འདོན། ལ་ལས་ནི་ལུང་ལས་གྲགས་པའི་མོ་ཕྱྭ་ཅི་ཡང་མིན་པར་གལ་ཐོད་དུ་བརྟག་པ་བྱེད། དེ་དག་ཀྱང་བླང་དོར་མངོན་སུམ་གསལ་བའི་དགོངས་པའི་རྩལ་དང་། སྣང་བ་རྟེན་འབྲེལ་དུ་ཤར་བ་ཡིན་ན་ཆོག་སྟེ། དེ་མིན་པའི་རང་རྟགས་
སུ་བྱིས་པས་ཕྲེང་བརྐུང་གི་གྲངས་བཟུང་བ་ལྟར་ཕྱེད་ཐིག་ཕྱེད་མ་ཐིག་སུ་སོང་། ལ་ལས་ནི་སྤྱི་བརྟོལ་བསྐྱེད་དེ་ང་རོ་དང་ཚམ་རྔམས་ཆེ་ཆེ་སྐད་ཀྱིས་ལྷ་ཆེ་གེ་མོ་ཡིན་ཟེར། འདྲ་འདྲ་མང་པོ་ལབ། ལ་ལ་ནི་དངོས་སུ་ཤི་འདྲེས་རྒྱུད་བརླམས་ཏེ་འཕྲལ་གྱི་རྫུ་
13-9-16a


འཕྲུལ་དང་རྣོ་ཐིག་ཕྲ་མོས་ཡིད་བསླུས་ནས་མཐར་རང་གཞན་ཕུང་ལ་སྦྱར། ལ་ལས་ནི་ཤི་གསོན་གྱི་དད་རྫས་རི་ཙམ་ཟ་བ་ལ་སྤོབས་པ་ཆེ་བཞིན་དུ། ཕྲེང་མོ་ཙམ་ཡང་མི་ཤེས་མདོག་དང་མི་བལྟ་མདོག་བྱས་ཏེ། ལུང་སྟོན་པ་ལ་
སྤོབ་པ་ཞུམ་པའི་ཟོལ་གྱིས་ཐོབ་བྱ་གཉིས་ཡིད་ལ་གཅགས་པ་སྟེ། གཉིས་པོ་གང་ཞེ་ན། ཀུན་མཁྱེན་པར་གྲགས་པའི་མཚང་བརྡོལ་རྒྱུ་མེད་པ་དང་། ཤེས་ཀྱང་སྦས་པའི་རྣམ་ཐར་གྱི་ཆེ་བ་ཞིག་ཐོབ་འདོད་གཉིས་པོ་ཡིད་ལ་གཅགས་པ་ནི། གཡོ་
སྒྱུའི་ནང་ན་གཡོ་སྒྱུ་ཆེ་སྟེ། གཞན་དད་གནས་བྱེད་པའི་སྤོབས་པ་བྱུང་བཞིན་ཕྲེང་མོ་ཙམ་ཞིག་མི་ཤེས་པ་དང་མི་སྤོབས་པ་ནི་འགལ་བའི་རང་མཚང་ཡིན་ནོ། །དེས་ན་དེ་དང་དེ་འདྲ་བ་དུ་མས་གཞན་མགོ་བསྐོར་ན་མི་ཆོས་བླ་མའི་རྫུན་འབྱུང་ཉེ་བས་འདུལ་བ་དང་འགལ་བ་ཡིན་གྱི།
དེ་འདྲ་བའི་བླང་དོར་བ་ལ་ཛ་བཞིན་འཛིངས་པའི་དུས་ན། རྡོ་རྗེ་འཆང་གི་བཀའ་བཞིན་དུ་ལྷག་པའི་ལྷ་ལ་བརྟེན་ནས་རྫས་སྔགས་ཏིང་འཛིན་གྱི་ནུས་པའི་བླང་དོར་གསལ་བའི་པྲ་ཕབ་སྟེ། དེ་ལ་ཇི་ལྟར་ཤར་བ་ལྟར་བསྟན་པ་ནི།  སངས་རྒྱས་ཀྱི་མངོན་ཤེས་
མེད་པའི་གང་ཟག་རྣམས་ལ་ཆེད་དུ་གནང་བ་ཡིན་པས། རྒྱལ་བའི་བཀའ་བཞིན་རྣམ་ཐར་གཙང་མ་བསྐྱང་བ་ཡིན་གྱི་བཀའ་དང་འགལ་བ་ནི་མ་ཡིན་ནོ། །གལ་ཏེ་རང་གིས་དཔྱད་མ་ཤེས་པ་སོགས་ཀྱིས་བླང་དོར་ཇི་བཞིན་མ་ཐིག་ཀྱང་། རྫུན་གྱི་ཉེས་པ་
ཅུང་ཟད་ཀྱང་མིན་ལ། སྤྱིར་རྒྱལ་བ་དང་མངོན་ཤེས་མངའ་བའི་དྲང་སྲོང་གིས་བརྩེ་བས་བཤད་པའི་བཀའ་བསྟན་རྣམས་ན་བླང་དོར་གསལ་བ་དུ་མ་ཡོད་ཀྱང་། གཙོ་ཆེ་བ་དཔལ་ལྡན་དུས་ཀྱི་འཁོར་ལོའི་གཟའ་སྐར་དང་རླུང་རྩིས། འཇམ་པའི་དབྱངས་
13-9-16b


ཀྱི་སྤྲུལ་པས་བསྟན་པ་སྤོར་ཐང་། སྤྱན་རས་གཟིགས་དང་སྒྲོལ་མ་དབང་ཕྱུག་ཡབ་ཡུམ་གྱི་རྣམ་པར་བཞེངས་ནས་གསུངས་པའི་དབྱངས་འཆར་དང་གཞན་ཡང་བདེན་ཚིག་གྲུབ་པའི་གང་ཟག་གིས་བྱས་པའི་མོ་ལ་སོགས་པ་རྣམས་ནི་མངོན་ཤེས་མེད་པའི་
གང་ཟག་གིས་ཆེས་དོན་དུ་གཉེར་བྱ་ཡིན་ཀྱང་། དེ་རྣམས་ལས་བླང་དོར་སོ་སོར་ཆེས་གསལ་བ་ནི་པྲ་ཡིན་པས་རྒྱུད་སྡེ་རྒྱ་མཚོ་ལྟ་བུ་ལས་མི་འདྲ་བའི་ཁྱད་པར་དུ་མ་གསུངས་པ་རྣམས་ནི་སངས་རྒྱས་ཀྱི་བརྒྱུད་འཛིན་རྣམས་ཀྱི་མིག་ལྟ་བུ་ཡིན་ན། ཀྱེ་མ་བླུན་པོ་
དག་གིས་དེ་ལ་སྨོད་པ་ནི་ངོ་ཚའོ། །དེ་ལྟར་རྣམ་མཁྱེན་སྒྲུབ་པའི་ལམ་དང་འགལ་བ་མེད་པ་ཙམ་དུ་མ་ཟད། ལམ་གྱི་ཡན་ལག་མཆོག་ཅིག་ཡིན་པར་ཡང་གྲུབ་སྟེ། རྒྱུ་མཚན་གང་གིས་ན། ལམ་གྱི་ཡོན་ཏན་ཁྱད་པར་ཅན་ཐོབ་པ་ཡང་རང་གི་ལུས་རྣལ་
མར་འཚོ་ཞིང་ཡུལ་དུས་གྲོགས་ལ་སོགས་པ་མཐུན་པའི་རྐྱེན་ལ་ལྟོས་པ་ཅན་ཡིན་ཅིང་། དེ་དག་གི་བླང་དོར་ལྐོག་ཏུ་གྱུར་པ་རྣམས་རང་ལ་གསལ་བའི་མཐུ་མེད་པའི་དབང་གིས། ཕལ་ཆེར་ཕྱིན་ཅི་ལོག་ཏུ་འགྱུར་བ་ལ་ཐབས་གཞན་བྲལ་བའི་ཚེ་ན་བླང་དོར་
གསལ་བའི་ཐབས་སུ་འདི་ལྟ་བུའི་མན་ངག་རྒྱལ་བ་རྡོ་རྗེ་འཆང་གི་བརྩེ་བས་གནང་བ་དེ་ལས་ཕན་པའི་ཐབས་མཆོག་ཞིག་དཀའ་བར་སྣང་བའི་ཕྱིར་རོ། །དེས་ན་དཀྱིལ་འཁོར་དུ་དབང་ཞིག་བསྐུར་བའི་སྔ་རོལ་དུ་ཡང་། སོར་ཤིང་དང་རྨི་ལམ་བརྟགས་པ་སོགས་
ཀྱིས་དངོས་གྲུབ་འགྲུབ་པའི་ཚུལ་བརྟག་པ་ཡོད་བཞིན་དུ། འདི་ལྟ་བུའི་ཚུལ་འགོག་པ་ནི་རྡོ་རྗེ་འཆང་གི་ཕྲིན་ལས་ལ་བར་དུ་གཅོད་པའི་བདུད་ཀྱི་ཚིག་ཡིན་པར་ཤེས་པར་བྱའོ། ། དེས་ན་པྲ་རབ་ཞིག་ཕེབས་ན་བླང་དོར་མངོན་སུམ་དུ་ཡིད་ལ་གསལ་བ་དང་།
13-9-17a


འབྲིང་ཕེབས་ན་ལྷས་དངོས་སུ་ལུང་སྟོན་པ་དང་། ཐ་མའང་བརྡའ་དང་གཟུགས་བརྙན་གྱི་ཚུལ་དུ་འཆར་བས་རང་དོན་དུ་ཆོས་དང་སྲིད་ཀྱི་བྱ་བ་ལྐོག་གྱུར་གྱི་གནས་ལ་འཇུག་ལྡོག་གི་མིག་ཕྱེ་བ་དང་། ལྷག་པར་གཞན་དོན་དུ་མཁོ་
བ་ཡིན་ཏེ། བཀའ་གདམས་གོང་མ་རྣམས་ཀྱི་གསུང་ལས། གཞན་དོན་དུ་ཆོས་འཆད་པ་སོགས་ལ་མངོན་པར་ཤེས་པ་ཐོབ་དགོས། དེ་མེད་ཀྱང་བླང་དོར་ཤེས་པའི་པྲ་གསལ་པོ་ལྟ་བུ་ཞིག་ཤིན་ཏུ་དགོས་ཀྱང་། གལ་ཏེ་མེད་ན་ཐ་ན་ཡི་དམ་ལྷག་པའི་ལྷ་
ལ་གསོལ་བ་བཏབ་སྟེ་འཇུག་ལྡོག་གི་རྨི་ལམ་གསལ་པོ་ཙམ་ཅིས་ཀྱང་དགོས་པར་གསུངས་པའི་གསུང་རྒྱུན་དེང་སང་གི་བར་དུ་ཡོད་པ་ལྟ་བུ་ཡིན་པས། ལམ་གྱི་ཡན་ལག་ཡིན་གྱི་ལམ་གྱི་སྤང་བྱ་མིན་ནོ། །དེས་ན་སྤང་བླང་ཕྱིན་ཅི་ལོག་ཏུ་འགོག་པ་
ཁྱོད་ནི་ནང་པ་སངས་རྒྱས་པའི་གསུང་ལས་རིང་དུ་བརྒལ་བ་ཞིག་གོ། །དེ་ལ་ཁོང་ན་རེ། འོ་ན་པྲ་དེ་ཐར་པ་དང་ཐམས་ཅད་མཁྱེན་པའི་ལམ་ལ་མེད་ཐབས་མེད་པ་ལྟ་བུར་ཁྱོད་ཀྱིས་བཤད་པ་དེ་ཡིན་ན། སྡུད་པ་ལས་ཕྱིར་མི་ལྡོག་པའི་རྟགས་ཀྱི་སྐབས་
སུ། དྲག་ཤུལ་སྤྱོད་སྔགས་མི་བྱེད་བུ་མེད་སྦྱོར་སྔགས་མིན། །འདོད་པའི་ལས་ཅན་ཕོ་མོར་འགྱུར་ཞེས་སྟོན་མི་བྱེད། ཞེས་དང་། གཞན་ཡང་བཀའ་དགོངས་འགྲེལ་གྱི་གཞུང་ཚད་ཐུབ་དུ་མ་ནས། དེ་འདྲའི་རིགས་ཅན་མི་བྱེད་པར་གསུངས་
པ་ཅི་ཡིན་ཟེར་ན། དེ་འདྲ་བའི་ལུང་དེས་མཐའ་གཅིག་ཏུ་པྲ་སོགས་བཀག་པ་མིན་སྟེ། དེ་ལ་དགོངས་གཞི། དགོས་པ། དངོས་ལ་གནོད་བྱེད་གསུམ་ཡོད། དགོངས་གཞི་ནི་ཀུན་སློང་ངན་པས་རང་འདོད་ཁོ་ནས་ཕྱིན་ཅི་ལོག་ཏུ་སྤྱོད་པའི་སྔགས་དང་བྱ་
13-9-17b


བ་ཐམས་ཅད་ལ་དགོངས། དགོས་པ་ལ་ལྟོས་ས་ལྟོས་འཇོག་དང་།  ཡུལ་དུས་ལ་ལྟོས་པའི་དགོས་པ་གཉིས། དང་པོ་མཆོག་གི་དངོས་གྲུབ་སྒྲུབ་པའི་ཐབས་ཕར་བཞག་ནས། ཐུན་མོང་ཙམ་དོན་དུ་གཉེར་བ་ནི་ཡིད་བཞིན་གྱི་ནོར་བུ་དོར་ནས་མཆིང་
བུ་ལེན་པ་དང་འདྲ་བས་མཆོག་ལ་ལྟོས་ནས་ཕལ་པ་སྨད་པའི་སྐབས་དང་། ཡང་སྙིགས་མའི་དུས་སུ་ཡུལ་འགའ་ཞིག་ཏུ་འཕྲལ་གྱི་ལུང་སྟོན་ཐིག་པ་དང་། རྫུ་འཕྲུལ་ཙམ་ལ་ཡིད་བརྟན་ཆེས་བྱེད་པ།  དེ་ཡི་ཚེ་ན་རང་འདོད་མཁན་ཕལ་གྱིས་པྲ་སོགས་
ལ་བརྟེན་ནས་དོན་ཅུང་ཟད་ཤེས་པ་ལམ་རྟགས་ཡིན་ཟོལ་དང་། གཞན་ཡང་རྫས་སྔགས་དང་མི་མ་ཡིན་ཕལ་གྱི་མཐུ་བྱིན་པའི་གྲུབ་པའི་མཚན་མ་ཕྲ་མོ་ལམ་ཆེན་པོར་སོན་པའི་འབྲས་རྟགས་སུ་ངོམ་པས། གང་ཟག་སྐལ་པ་དམན་པ་རྣམས་དེ་ལ་དད་
ཅིང་བསླབ་གསུམ་དག་པའི་རྣམ་ཐར་གཙང་མ་སྐྱོང་བ་རྣམས་ལ་རྩིས་མེད་པར་གྱུར་ནས།  རང་འདོད་སྒྱུ་ཐབས་མཁན་དེ་ལོག་འཚོ་བསྒྲུབ་པ་ལ་ཤིན་ཏུ་སྟོབས་དང་ལྡན་པར་འགྱུར་བ་སོགས་ཡུལ་དུས་ལ་ལྟོས་ཏེ་བླ་མ་སྐྱེས་ཆེན་དམ་པ་འགས་མི་བཞེད་
པའི་ཚུལ་གནང་བའང་དགོས་པའི་དབང་གིས་ཡིན་གྱི། སྤྱིར་རྡོ་རྗེ་འཆང་གི་རྗེས་སུ་གནང་བ་པྲ་སོགས་འགོག་པ་ནི་མིན་ནོ། །དེ་ཡིན་ན་དངོས་ལ་གནོད་བྱེད་ལུང་དང་རིགས་པ་སྔར་ཇི་སྐད་སྨྲོས་པའི་ཚུལ་ལས་བརྩམས་ཏེ་གནོད་པ་དུ་མ་འབབ་པ་ཤེས་
པར་བྱའོ། །དེ་ལྟར་ཤན་ཕྱེ་མ་ཤེས་པར། མཐའ་ཅིག་དུ་པྲ་ལ་སོགས་པ་འདི་དག་མི་ལེགས་ཞེས་སྨྲ་ན་ཚིག་དེས་ཆོས་དང་གང་ཟག་གཉིས་ཆར་ལ་བསྐུར་བ་བཏབ་པར་འགྱུར་ཏེ། ཆོས་ལ་བསྐུར་པ་ཇི་ལྟར་བཏབ་ན། རྒྱལ་བའི་མདོ་རྒྱུད་དུ་མ་ནས་
13-9-18a


བླང་དོར་གསལ་པོར་རྟོགས་ཕྱིར་པྲ་ཕབ་པར་གསུངས་པའི་གསུངས་དེ་ཀུན་སྤངས་པ་ཡིན་ཏེ། ཆོས་སྤང་བ་ནི་ཤིན་ཏུ་ཕྲ་བར་གསུངས་པས་ན། དེ་ཙམ་གྱིས་ཀྱང་ཆོས་དེ་སྤང་བར་འགྱུར་བའི་ཕྱིར་རོ། །དེ་ཡང་མདོ་ལས། དེ་
བཞིན་གཤེགས་པའི་བཀའ་ལ་ལ་ནི་བཟང་པོར་འདུ་ཤེས། ལ་ལ་ནི་ངན་པར་འདུ་ཤེས་ན། དེ་ཡང་ཆོས་སྤང་བའོ། །ཞེས་གསུངས་ཏེ། རྒྱལ་བའི་བཀའ་ཐམས་ཅད་ཐམས་ཅད་མཁྱེན་པའི་ལམ་ལ་དངོས་སམ་བརྒྱུད་ནས་ཕན་པ་ཡིན་ན། དེའི་ནང་
ན་སྤང་བྱ་ཞིག་ཅུང་ཟད་ཀྱང་ཡོད་པ་མིན་ནོ། །དེ་ལྟར་ཤོ་ལོ་ཀ་གཅིག་སྙིང་ནས་སྤངས་ཀྱང་ཆོས་སྤང་བའི་ཉེས་པར་འགྱུར་བ་ཡིན་ལ། ཆོས་སྤང་བ་ནི་མཚམས་མེད་ལས་ཀྱང་ཆེས་ཤིན་ཏུ་ལྕི་བར་མདོ་རྒྱུད་དུ་མ་ནས་ཡང་ཡང་གསུངས་པས་ན། ཀྱེ་མ་རྟོག་
གེ་ངན་པ། ཆོས་ཀྱི་ནང་གི་འབྲས་བུའི་རོ་ལྟ་བུ་ནི་མྱོང་མ་ནུས། ཚིག་འཁྲི་དང་ཡི་གེའི་དོན་ཤུན་པ་ལྟ་བུའི་རོས་མྱོས་ཤིང་དྲེགས་པ་རྣམས་ལ་ས་མཚམས་འདི་ན་གཡང་ས་ཆེན་པོ་ཞིག་ཡོད་ངེས་པ་ཡིན་ནོ། །གཉིས་པ་གང་ཟག་ལ་ཇི་ལྟར་བསྐུར་ན། ངེས་
པ་དོན་གྱི་དབང་དུ་བྱས་ན་སྤངས་རྟོགས་མཐར་ཕྱིན་པའི་སངས་རྒྱས་ཡིན་པར་གདོད་མི་ཟ་ཡང་ཐུན་མོང་གི་སྣང་ངོར་ཡང་མཁྱེན་བརྩེ་མཚུངས་པ་མེད་པའི་མཁས་ཤིང་གྲུབ་པའི་གོ་འཕང་མཐོན་པོར་གཤེགས་པ་ལ་རྩོད་པ་མེད་པ། སློབ་དཔོན་པདྨ་དང་། དཔལ་
ལྡན་ཨ་ཏི་ཤ་ལྟ་བུས་ཀྱང་གདུལ་བྱ་གཞན་སྣང་གི་ངོར། དགོས་པའི་དབང་གིས་པྲ་ཕབས་མཛད་པ་ཡིན་ཏེ། སངས་རྒྱས་གཉིས་པ་པདྨ་སཾ་བྷ་ཝས། བོད་གངས་ཅན་གྱི་བསྟན་པའི་སྒྲོན་མེ་སྦར་བའི་དང་པོར། མ་རུངས་པའི་དྲེགས་པ་བརྟུལ་བའི་དུས་
13-9-18b


སུ། འོད་ཟེར་ཅན་གྱི་པྲ་ཕབས་ནས་ཁྱེའུ་རྣམས་ལ་བསྟན་པས། ལྷ་འདྲེ་རྣམས་ཀྱི་གྲོས་དང་འདུན་མ་ཇི་ལྟ་བར་ཤེས་ནས་གདུལ་བའི་ཐབས་དེ་ལྟར་མཛད་པས་བོད་གངས་ཅན་དུ་སངས་རྒྱས་ཀྱི་བསྟན་པ་ཚུགས་པའི་ཕྲིན་ལས་བྱུང་བའི་ཚུལ། དེབ་ཐེར་
རྙིང་པ་དག་ལས་གསལ་བ་དང་། ལྷ་ཅིག་ཇོ་བོ་ཆེན་པོ་ནས་ཀྱང་། ཙུནྡ་ལ་བརྟེན་པའི་པྲ་ཕབས་པའི་ལོ་རྒྱུས་བཀའ་གདམས་ཕ་ཆོས་སོགས་སུ་གསལ་བ་དང་། དེ་དག་གི་བརྒྱུད་པའང་བཞུགས་པ་ལྟ་བུས་མཚོན། བོད་འདིར་ཡང་དངོས་སུ་གསལ་མ་
གསལ་ཇི་རིགས་ལས། ཕྲིན་ལས་ཀྱི་འགྲོ་དོན་ཆེ་བ། གཞན་ཕན་བྱང་ཆུབ་ཀྱི་སེམས་འབྱོང་བའི་མཁས་གྲུབ་ཐམས་ཅད་ཀྱང་ཚུལ་འདི་ལ་ཕྱག་བཞེས་མཛད་པ་ཕལ་ཆེར་རང་གི་རྣམ་ཐར་བཀའ་འབུམ་ལོ་རྒྱུས་གཞན་ཇི་རིགས་ན་གསལ་བ་དེ་འདྲ་ཡིན་
པས། དེ་དག་ཕལ་ཆེ་བའང་རང་གི་ཇི་བཞིན་དགོངས་ཀྱང་།  རྒྱལ་བའི་བཀའ་བཞིན་དུ་པྲ་ཕབས་སོགས་ཀྱི་མཐུས། གཞན་ཡིད་ཆེས་པར་མཛད་ན། ཅི་ཡང་མི་ཤེས་པ་རང་རེ་ལྟ་བུས་སྨྲོས་ཅི་དགོས། དེས་ན་གང་ཟག་ཁྱད་པར་ཅན་དེ་དག་ལ་ཡང་
ཁྱོད་ཀྱི་ཚིག་དེས་སྐྱེས་བུ་དམ་པ་མིན་པར་དོན་གྱིས་བསྐུར་བར་འགྱུར་ཞིང་། གསུང་པ་པོ་རྡོ་རྗེ་འཆང་ཡང་སྐྱབས་གནས་ཡང་དག་ཏུ་མི་རུང་བར་དོན་གྱིས་ཁས་བླང་བ་ཡིན་པས། ཁྱོད་ཀྱི་གང་བྱུང་གི་ཚིག་འདི་ཅུང་ཟད་བསྐྱུང་ན་ལེགས་ཞེས། ལྷག་
བསམ་དག་པས་ཐལ་མོ་སྦྱར་ཏེ་ཞུ་བ་ཡིན་ལ། གལ་ཏེ་ད་རུང་སྨྲ་ན་ཡང་། ཚེར་མའི་རྩེ་མོ་བྲག་ལ་བསྣུན་པ་ལྟར། རང་གི་བློ་གྲོས་རྒུད་པའི་རྐྱེན་དུ་འབབ་པར་འགྱུར་གྱི། དོན་གྱི་ལུང་དང་རིགས་པ་འདི་ལས་བརྒལ་ཏེ་སྨྲ་བ་བཟང་པོ་ཞིག་ནི་སྲིད་པ་
13-9-19a


མ་ཡིན་པས་བག་ཡོད་པར་བྱོས་ཤིག །ཀ་ཡེ་གསོན་དང་པྲ་སོགས་འགོག་པ་ཁྱོད།  །ཁ་ནས་ཇི་ལྟར་བརྗོད་ཀྱང་ན་ཚ་སོགས། །ག་ལེར་རང་གི་སྟེང་དུ་བྱུང་ཙ་ན། །ངན་ནམ་བཟང་པོ་ཅི་ཡིན་དེ་ན་གསལ། །ཅ་ཅོ་སྣ་
ཚོགས་དོན་མེད་འཆལ་པོའི་ངག །ཆོས་སྤང་ལས་ལ་ཤིན་ཏུ་ཉེ་འགྱུར་བའི། །ཇི་ནུས་རང་གི་རྒྱུད་ལ་བརྟགས་བྱས་ཏེ། །ཉི་མ་རེ་བཞིན་དོན་མེད་གཏམ་སྤངས་ཤིག །ཏ་ཐཱ་ག་ཏས་ལེགས་པར་གསུངས་པའི་ཆོས། །ཐ་ན་ཡི་གེ་འབྲུ་གཅིག་
ཚུན་ཆད་ཀྱང་། །དུས་ཀུན་འགྲོ་ལ་ཕན་པ་ཁོ་ནའི་ཕྱིར། །ནམ་ཡང་སྤང་བར་བྱ་བ་ཅུང་ཟད་མེད། །པ་ཝ་སངས་ལྟར་དཀར་བའི་ལྷག་བསམ་གྱིས། །ཕ་རོལ་དོན་མིན་སྨྲ་བའི་ཕྲག་དོགས་ཚིག །བ་མོར་ཉི་ཟེར་ཇི་བཞིན་གཞོམ་སླད་དུ། །
མ་བཅོས་དྲང་པོའི་གཏམ་གྱི་རོལ་མོ་འཁྲོལ། །ཙབ་ཙུབ་བློ་སྣ་མང་པོའི་འཆལ་ངག་འདིས། །ཚེ་རབས་དུ་མའི་ཕུང་ཁྲོལ་ཁུར་ལེན་པས། །ཛ་ཡའི་གསུང་ལ་གཤེ་བ་སྤང་བའི་ཕྱིར། །ཝཱ་གི་ཤྭ་རིའི་བཙུན་པ་བདག་གིས་ཀྱང་། །ཞི་བའི་ཡིད་ཀྱིས་
འདི་ན་གང་སྨྲས་པ། །ཟས་མཆོག་བཞིན་དུ་ཁྱོད་ཀྱིས་དང་བླང་ནས། །འ་འུར་བྲེ་མོའི་གཏམ་ངན་རྒྱུན་བཅད་དེ། །ཡ་མཚན་ཚུལ་བཟང་གནས་ལ་བསྔགས་པར་གྱིས། །རང་གཞན་བླང་དོར་མ་འདྲེས་མཐོང་བའི་ཕྱིར། །ལས་ཀྱི་མེ་ལོང་དང་
འདྲ་རྣམ་གསལ་པྲ། །ཤིན་ཏུ་གཅེས་པར་བཟུང་ནས་ཟོལ་མེད་པར། །སེམས་ཅན་གཞན་ལ་ཕན་པ་ལྷུར་ལོངས་ཤིག །ཧ་ཅང་གཞན་དོན་ཁུར་ཆེན་ཁྱེར་མིན་ཡང་། །གནས་སྐབས་རང་དང་གཞན་གྱི་དགོས་དོན་ལ། །ཨེ་ཡིན་མི་ཡིན་
13-9-19b


སྙམ་པའི་ཐེ་ཚོམ་རྒྱ། །ཅུང་ཟད་གྲོལ་ཀྱང་བཟང་པོ་མ་ལགས་སམ། །འདི་ནི་ལེགས་གསུང་དབྱར་གྱི་རྔ་བོ་ཆེ། །གཙུག་རོལ་ཉི་ཟླའི་ལམ་ནས་སྒྲགས་པའི་མོད། །རྣམ་དཔྱོད་རིགས་པའི་སྒྲོ་ཐིག་མ་ཉམས་པ། །བློ་བཟང་གཙུག་ཕུད་མཛེས་
པའི་མགྲིན་དབྱངས་སོ། །ཞེས་པའང་ལབ་སྐྱབས་མགོན་ཐམས་ཅད་མཁྱེན་པའི་བཀས་བསྐུལ་བ་བཞིན་དུ་མི་ཕམ་རྣམ་པར་རྒྱལ་བས་བྲིས་པ་མངྒ་ལཾ།། ༈ །། གླིང་གེ་སར་སྐྱེས་བུས་མཛད་པའི་མདའ་མོའི་བདར་བ་ནི།  བསྭོ།   གཅིག་པ། གསེར་ས་གཞི་
 གཉིས་པ། ཉི་མ་ཟླ་བ། གསུམ་པ། སྲིད་པ་གསུམ། བཞི་པ། གླིང་བཞི། ལྔ་པ། མཁའ་འགྲོ་སྡེ་ལྔ། དྲུག་པ། འགྲོ་བ་རིགས་དྲུག །བདུན་པ། གཟའ་བདུན། བརྒྱད་པ། གླིང་ཕྲན་བརྒྱད། སྤར་ཁ་བརྒྱད། དགུ་པ། སྨེ་བ་དགུའམ་ཕྱོགས་སྐྱོང་དགུ། བཅུ་པ། ས་བཅུ། བླ་མ་ཡི་དམ་དཔའ་བོ་མཁའ་འགྲོ་ཆོས་སྐྱོང་སྲུང་མ་ཡུལ་ལྷ་གཞི་བདག་ཕོ་ལྷ་དགྲ་བླ་མ་ལྷ་ཞང་ལྷ། མཐོ་བ་གནམ་ལ་
ལ་གནས་པ། དམའ་བ་ས་ལ་གནས་པ། རླུང་དང་མཁའ་ལ་གནས་པ། དེ་རིང་གི་གཟའ་དང་ཚེས་ལ་སོགས་པར་
གནས་པ། བསྭོ། བཅུ་གཅིག་བཅུ་གཉིས་བཅུ་གསུམ་གོང་། །བཅུ་གསུམ་གོང་གི་ཡང་སྟེང་ན། །རྣམ་པར་རྒྱལ་བའི་ཁང་བཟང་ནས། །ལྷ་གནས་སྟོང་དང་རྩ་གཉིས་ནས། །མ་ནེ་ནེ་གནམ་སྨན་དཀར་མོ། ཕོ་བོ་དུང་ཁྱུང་དཀར་པོ། ནུ་བོ་
ཀླུ་སྦྲུལ་འོད་ཆུང་། སྲིང་མོ་ཐ་ལེ་འོད་འཕྲོ། དགྲ་བླ་གཉན་སྟག་དམར་པོ། མ་སང་སྐྱེས་བུ་དོན་གྲུབ་ལ་སོགས་པ། འཇིག་རྟེན་གསུམ་ན་གནས་པའི་མཐུ་སྟོབས་རྫུ་འཕྲུལ་ཕུན་སུམ་ཚོགས་པ་རྣམས་ཐུགས་རྗེའི་དབང་གིས་གནས་འདིར་གཤེགས་སུ་
13-9-20a


གསོལ། ཕྱག་འཚལ་མཆོད་ཅིང་སྐྱབས་སུ་མཆི། །མོ་རྟེན་རྫས་དང་མཆོད་པ་བཞེས། །བཞེས་ནས་ཕྱྭ་གཡང་མོ་ཕོབ་ཅིག །དཀར་གསུམ་མངར་གསུམ་མཆོད་པ་བཞེས། །འབྲུ་སྣ་ལྔ་ཡི་གདན་སྟེང་དུ། །ཕྱེ་
མར་ཕུད་ལྔ་བཤམས་པ་འདི། །མངོན་ཤེས་ལེགས་ཉེས་སྟོན་པའི་ཡོན། །ཡོན་བདག་འཁོར་དང་བཅས་ཀྱིས་འབུལ། །འབུལ་བ་གཙང་མ་འདི་བཞེས་ལ། །བདེན་རྫུན་ལེགས་ཉེས་མི་བསྲེ་བར། །བཟང་ངན་སོ་སོར་སྟོན་པར་ཞུ། །ཚིལ་ཆེན་
གསུར་གྱི་དུད་པ་འདི། །གསུར་འདྲེ་གསུར་ལ་དགྱེས་རྣམས་ལ། །མོ་དང་ཕྱྭ་ཡི་དོན་དུ་བསྔོ། །ཨོཾ་མ་ཎི་པདྨེ་ཧཱུྃ། ཕྲེང་སྐོར་རམ་བདུན་ཕྲག་གསུམ་གཉིས་གང་ཐོན་བྱ། བསྭོ། དང་པོ་གཅིག་པ་མི་འབོད་རྒྱུས། །སྨེ་བ་གཅིག་དཀར་ལྷ་ཡི་བུ། །ལྷ་ཡི་ལུང་
བསྟན་ཡེ་ཤེས་སྤྱན། །ཡེ་ཤེས་སྤྱན་གྱིས་མོ་འདི་སྟོན། །དེ་ནས་གཉིས་པ་སྨོད་པ་འདི། །སྨེ་བ་གཉིས་ནག་ལ་སོགས་པ། །ནག་པོ་འདྲེ་མདའ་བརྩམ་པ་ཡིན། །ལྷ་འདྲེས་བཟང་ངན་ཤན་ཕྱེད་མཛོད། །དམར་པོ་ལྷ་མདའ་གས་མེད་ལ། །ལྟོང་ཁ་མར་
གྱིས་བརྒྱན་པ་འདི། །ལྷ་ཡི་གསོལ་གདན་དཀར་པོ་ཡིན། །ལྷ་མདའ་རྐན་སྒྲ་མ་རྡེབ་པར། །ཞེས་པ་ལྟོང་ཁ་ཚག་སྒྲ་ཅན་ལ་བྱ། དེ་རིང་ཕྱྭ་གཡང་མོ་ཕོབ་ལ། །འདྲེ་མདའ་ནག་པོ་ཐུར་དུ་དེད། །སྲིད་པའི་དིང་དིང་བརྒལ་ཉེར་གྱིས། །གཞིའི་གཡུང་དྲུང་གི་ཟུར་བརྒལ་ཉེ་བ་ཙམ་དུ་
དེད་ཅེས་པའོ། །གཞི་ཡི་འབྲུ་ནས་མ་བསྡུ་བར། །འདྲེ་མདའ་ནག་པོ་སོ་སོར་བྱེར། །སྨེ་བ་དགུ་ཡི་སྐོར་མགོའི་སྟེང་། །ལྷ་འདྲེའི་དམོད་མདའ་ལྟོང་སྤྲད་ནས། །འཇིག་རྟེན་གསུམ་གནས་འབོད་པ་འདི། །ལྷ་འདྲེ་རྣམས་ཀྱི་གབ་ཙེ་ཡིན། །གབ་ཙེ་འདི་ཡིས་
13-9-20b


མི་ཐིག་མེད། །ལྷ་འདྲེ་རྣམས་ཀྱིས་མི་མཁྱེན་མེད། །མངོན་མཁྱེན་ཅན་གྱིས་བཟང་ངན་སྟོན། །དམག་ཇག་ཐེབས་སམ་མི་ཐེབས་ཀྱི། །ཕམ་རྒྱལ་ཤན་དབྲག་ད་ཕྱེས་ཤིག །ཐེབས་ན་ལྷ་མདའ་ཡ་ཡཱ་ཡཱ། །མི་ཐེབས་འདྲེ་མདའ་ཡ་ཡཱ་ཡཱ། །བཟང་པོ་
ཕུན་སུམ་ཚོགས་པ་དང་། །ལུས་ལ་ན་ཚ་མི་འོང་ཞིང་། །ཅི་བསམ་དོན་ཆེན་འགྲུབ་པ་ན། །ལྷ་མདའ་ལྷ་ཡི་ཕོ་ཉ་ཆེ། །ཁྱུང་ཆེན་མཁའ་ལ་ལྡིང་བ་བཞིན། །མཐོ་བའི་གནམ་འཕང་ད་ཆོད་ལ། །ཉམས་ང་མི་འཚལ་འདྲེ་མདའ་འདི། །ཐེང་གསུམ་ཧར་
གྱིས་ནོན་པར་གྱིས། །འདྲེ་མདའ་ནག་པོའི་ལྟོང་གཤོག་ལ། །ཆག་གྲུམ་གས་འདར་བྱེད་པ་དང་། །སྒྲོ་མོ་ཡུག་གསུམ་ཆོད་པར་གྱིས། །ཕོ་བྲང་ཐོག་གིས་མ་གཏོར་ཅིག །མདའ་བཞི་ཀ་གྱེན་དུ་འཕར་ནས་ལྟོང་ཆག་འཐོར་དུ་འོང་བ། དིང་དིང་གུར་ཁང་མ་
བརྒལ་ཞིག །གཡུང་དྲུང་གི་ཟུར་ལས་བརྒལ་ནས་སྟོང་ཁ་བྲལ་ན། བསྐལ་པ་ཆགས་འཇིག་གི་སྐབས་སུ་བབ་པ་ཡིན་པས་གཉན་ནོ། །འདྲེ་མདའ་ནག་པོར་མ་སྒྲག་ཅིག །དེད་མི་ནུས་པར་འདར་བ་དང་འབྲོས་པ། སྔངས་ནས་ཕྱི་ནུད་མ་བྱེད་ཡཱ། ། ཚུར་ནུར་བ་དང་ཆང་མཇུག་ཏུ་ཤུད་ལ། ཕྱེ་མར་
ཁ་ན་མ་འབོ་ཡ། ལྷ་མདའི་མར་འདྲེ་མདའ་ལ་འགོས་པ། རྐན་སྒྲ་ཏག་ཏག་མ་རྡེབ་ཡ། །ལྟོང་ཁ་འཚག་པ། ལྟོང་ལ་ཆག་གས་མ་རྒྱུག་ཡ། །རྒོད་པོ་སྒྲོག་རུས་མ་ཆག་ནས། །སྒྲོ་ཕྱི་བ།  སེང་དཀར་གཡུ་རལ་སྤྲུགས་པ་བཞིན། །ལྷ་མདའ་དམར་པོ་ངར་བསྐྱེད་
ལ། །བཟང་ངན་མ་བསྲེ་སོ་སོར་ཕྱེས། །བཟང་ན་ངན་ལ་མ་སློང་ཞིག །ངན་ན་བཟང་ལ་མ་སྟོན་ཡཱ། །འདྲེ་མདའ་ནག་པོ་བྱུར་ཆེན་འདི། །ཆུ་བོའི་གཞུང་ལ་ད་དེད་ཅིག །འདྲེ་མདའི་འོག་ལ་མ་འཛུལ་ཅིག །སྒྲོ་མོ་བསྣོལ་འཛོལ་མ་བྱེད་ཅིག །
13-9-21a


བཟང་ངན་ཤན་དབྲག་ད་ཕྱེས་ཤིག །ཅེས་འདོད་དོན་གང་ཡིན་ལེགས་པར་སྨོས། འདི་གལ་ཆེ་བས་ནམ་ཐོད་ཐོད་མི་གདབ། གལ་ཆེ་དུས་གདབ། སྔགས་ནི། ཨ་ཀ་ཡ་མ་ར་ཙ་པྲ་ཕོབ། ཅེས་སམ། ཡང་ན། ཡ་ས་ཀར་ཤ་ཡ་པྲ་ཕོབ། ཅེས་བཟླའོ། །
མཇུག་ཏུ། ཐེའུ་རང་བྲག་ཕུག་ནང་དུ་དེངས། །གདུག་རྩུབ་ཕྲག་དོག་ཞི་བར་ཤོག །འདྲེ་མོ་ལུང་གསུམ་མདོ་རུ་སོང་། །ཀོ་ལོང་ཕྲག་དོག་མ་བྱེད་ཅིག །ཕུག་གི་ལྷ་ལ་བཀྲ་ཤིས་ཤོག །བར་གྱི་མི་ལ་བཀྲ་ཤིས་ཤོག །སྒོ་ཡི་ནོར་ལ་བཀྲ་ཤིས་ཤོག །ཡུལ་ལྷ་གཞི་བདག་བཀྲ་ཤིས་ཤོག །
འབྲས་བུ་སྐུ་གསུམ་ལྷུན་གྲུབ་ཤོག །ཞེས་སོ། །ཞལ་དྲོ་བཀྲ་ཤིས་དགེ་ལེགས་འཕེལ།།                  །། ༈                   གེ་སར་མདའ་མོའི་དཔྱད་དོན་རིན་ཆེན་མེ་ལོང་བཞུགས་སོ།  །རིག་གསུམ་པདྨའི་སྒྱུ་འཕྲུལ་
གར། །གེ་སར་སྐྱེས་བུ་དོན་གྲུབ་ལ། །བཏུད་ནས་དེ་ཡི་མདའ་མོ་ཡི། །དཔྱད་དོན་རིན་ཆེན་མེ་ལོང་འགོད། །དེ་ཡང་གནས་གཙང་མར་ལྷ་གཞི་དཀར་པོའི་སྟེང་དུ་ནས་ཀྱི་གཡུང་དྲུང་གཡས་སྐོར་ལྟེ་བ་ནས་མགོའི་བར་མཐོ་གང་དང་སོར་དྲུག་ཡོད་པ་བཀོད། 
གཡུང་དྲུང་གི་ཁུག་བཞི་དང་ལྟེ་བར་འབྲུ་ཡི་ལྔ་ཚོམ་བཀོད་ལ། ལྷ་མདའ་མཚལ་མ་ལེགས་པ་སྐྱོན་མེད་གཉིས་དང་། འདྲེ་མདའ་མདའ་སྐྱ་སྐྱོན་མེད་གཉིས་སོ་སོར་ལྟོང་སྤྲད་ལ་གཡུང་དྲུང་གི་ལྟེ་བར་བཞག །ལྷ་མདའི་མགུལ་དུ་སྲུང་སྐུད་དཀར་པོ
འམ་དར་དཀར་བཏགས། འདྲེ་མདའི་མགུལ་དུ་ནག་པོ་བཏགས། མཆོད་སྟེགས་སུ་མདའ་དར་བཙུག་ཕྱེ་མར་སྐྱེམས་ཕུད་མར་མེ་སྤོས་སོགས་མཆོད་པ་ཅི་འབྱོར་དང་། རང་མདུན་བསང་དང་དམོད་ནས་འདུ་བྱས་ལ། གཙང་སྦྲ་དང་ལྡན་པར་བདེ་བའི་
13-9-21b


སྟན་ལ་འདུག་ནས་སྐྱབས་སེམས་བྱས་ལ། རང་སྤྱན་རས་གཟིགས་སུ་བསྒོམ་སྟེ་མ་ཎི་བརྒྱ་སྐོར་བཟླ། མདུན་དུ་གེ་སར་རྒྱལ་པོ་ལང་ཚོ་དར་ལ་བབ་པ་ཆ་བྱད་མཛེས་པ་སྤྱན་གསུམ་པ་ཕྱག་གཡས་པདྨ་དཀར་པོ། གཡོན་མེ་ལོང་བསྣམས་པ། དཔའ་
བོ་མཁའ་འགྲོ་དགྲ་བླ་ཝེར་མས་བསྐོར་བ་གསལ་ལ་སྤྱན་དྲངས་ནས་བསྟིམ། བསང་དང་གསེར་སྐྱེམས་སོགས་མཆོད་པ་གང་རིགས་བཏོན། གེ་སར་རྒྱལ་པོ་ཁྱེད་ཀྱིས་བདག་གི་བརྟག་བྱ་འདི་བསླུ་མེད་དུ་སྟོན་པར་མཛད་དུ་གསོལ་སྙམ་པའི་ཡིད་ཀྱིས། ཨ་
ཀརྵཱ་ཡ་རལ་གྲི་ནག་པོ་ཤིག་ཤིག་ཨ་ཀ་ཡ་མ་ར་ཙ་པྲ་ཕོབ། ཅེས་བརྒྱའམ་རྒྱས་པར་སྟོང་ཙམ་བཟླས་ནས་མདའ་ལྟོང་དུ་བཏབ། ཡང་། ས་མ་ཡ་ཌཱཀྐི་ནཱི་པྲ་མོ་ཤག །པྲ་མོ་ཕྱེ། རྣོ་མཐོང་གསལ་བའི་སྒྲོན་མེ་སྟོན། ཞེས་བརྒྱ་བཟླས་ལ་འབྲུ་ལ་
བསྔགས་ནས་མདའ་ལ་གཏོར། གསུར་བཏང་། དེ་ནས་བསམ་པ་རྩེ་གཅིག་པས་བདར་བ་གེ་སར་ཞལ་གསུང་དང་གཞན་ཡང་རྩ་གསུམ་དམ་ཅན་བསྐུལ་ཞིང་བདེན་མཐུ་བདར་བ་རྒྱས་བསྡུས་གང་རིགས་གཏོང་ཞིང་། མོ་མའི་གཡས་སུ་ལྷ་མདའ་གཡོན་དུ་འདྲེ་
མདའ། གཞན་ཁ་ཅིག་གིས་གཡས་སུ་འདྲེ་མདའ་གཡོན་དུ་ལྷ་མདའ་བཟུང་བ་ལྟོང་སྤྲད། ལྷ་མདའི་ལྟོང་ཁ་མར་གྱིས་བརྒྱན། མདའ་གཉིས་པོའི་མདེའུ་ཆ་མཇུག་ཏུ་གཏད་ལ་ཤེད་ཅུང་ཟད་བརྟེན་ཏེ་དམ་པར་བཟུང་། འདོད་དོན་གང་ཡིན་འདི་ལེགས་ན་ལྷ་མདའ་
རྒྱལ་བ་དང་འདྲེ་མདའ་ཕམ་པ།  མི་ལེགས་ན་འདྲེ་མདའ་རྒྱལ་ཞིང་ལྷ་མདའ་ཕམ་པའི་བརྡ་རྟགས་གསལ་བར་ཡང་ཡང་གསོལ་བ་བཏབ་པས་མདའ་འཕར་བར་འགྱུར་ཏེ། མདའ་གང་ལྟར་འཕར་ཀྱང་ཤད་བརྟེན་བཞིན་དེ་གར་མངག་ལ་བརྟག་གོ །
13-9-22a


ཡང་ན་མི་གཙང་མ་གཞན་གཉིས་ལ་མདའ་འཇུ་བཅུག་ནས་མོ་མས་སྔགས་བཏབ་འབྲུ་གཏོར་ཀྱང་རུང་། འཛིན་མཁན་གཙང་མ་གལ་ཆེའོ། །མདའ་ཤེད་ཆེར་འཕར་ན་དོན་དམོད། ཆུང་ན་སྔགས་བསྐྱར། བརྟག་པ་དངོས་ནི།
དང་པོར་མདའ་སྙུག་དང་སྒྲོ་མདེའུ་བཅས་ལ་སྐྱོན་མེད་ཅིང་མདངས་ལེགས་པ་ཅི་ལའང་བཟང་། མདའ་ཆག་པ་དང་ལྟོང་སོགས་གས་ན་ན་ཚ་ཤི་ཆད་འོང་། དེ་ཡང་མདའ་ལྟོང་ཕྱོགས་སྟོད་ཕོ་ས་བར་བུད་མེད་སྨད་ནོར་སར་དཔྱད། དེ་བཞིན་རྒན་རིམ་ནས་
རིམ་པར་དཔྱད། སྒྲོ་གོག་ཅིང་ཕྱི་ན་ཡང་ངན་ཏེ་ཁྱད་པར་རྟ་ནོར་ལ་ངན། ཡང་ན་གློ་བུར་ན་ཚ་བྲེད་སྔངས་ངོ་། །མདེའུ་བཙའ་བ་ནང་འཁྲུག་གམ་གྲིར་ཤི་སོགས་ཀྱི་ངོ་ཡིན་ངན། མདེའུ་བུད་པ་བྱེ་བྲལ་སོགས་མི་བདེ་བའི་ངོ་། །མདའ་ལ་ཁྲག་འགོས་ན་
དམར་ངོ་། །ནག་དྲི་སོགས་མི་གཙང་བའི་ངོ་སོགས་ཀྱི་ལ་ཉེ་སྣ་ཚོགས་དཔྱད་པར་བྱའོ། །ལྷ་མདའ་ལངས་ནས་གྱེན་དུ་བསྒྲེངས་ཞིང་འདྲེ་མདའ་གཏན་མ་འཕར་ན་ཅི་ལའང་བཟང་། འདྲེ་མདའ་གྱེན་ལངས་ལྷ་མདའ་མ་འཕར་ན་ཅི་ལའང་ངན། ལྷ་མདའ་འདྲེ་མདའ་
གཉིས་ཀ་འཕར་ཀྱང་ལྷ་མདའ་སྟེང་དུ་སོང་སྟེ་འདྲེ་མདའ་ཞབས་སུ་བཅུག་ན་རང་གི་དགྲ་བླ་དར། དེ་ལས་གོ་ལྡོག་དགྲ་བོའི་དགྲ་བླ་དར་བས་ངན། ལྟོང་ཁ་དང་སྒྲོ་རྩ་ནས་ཚག་སྒྲ་བྱུང་ན་ཁ་འགྱོད། ལྷ་མདའ་འདར་ན་བྲེད་སྔངས་ཁ་སྨྲས་འོང་། ལྷ་མདའ་སྐེད་
པ་ནས་ལྡེམ་ལྡེམ་བྱེད་ན་ནད་པ་ཡིན་ན་ནད་ཡུན་རིང་། གཞན་ལ་ཁ་མ ཆུ་ཤོར་གོད་ཀྱི་ངོ་ཡིན། གདོན་ཆེ། དགྲ་ཕྱར་འབྲིང་། ལྷ་མདའ་ཕྱིར་ནུད་བྱས་ན་སྡར་ངོ་སྟེ་བྱེ་བྲལ་དང་ལབ་བརྗོད་སོགས་བློ་མི་བདེ་བའི་ངོ་། ངན་པ་དེ་རྣམས་འདྲེ་མདའ་ལ་བྱུང་ན་
13-9-22b


མི་ལྟོ་ལེགས་པར་བཤད། མདའ་བཞིའི་ཁ་ནས་ཙག་ཙག་ཟེར་ན་ཕོ་གདོན་རྒྱལ་པོས་གནོད། །ཙིག་ཙིག་ཟེར་ན་མོ་གདོན་འདྲེ་མོ། ཀྲོག་ཀྲོག་ཟེར་ན་ཐེའུ་རང་། ཀྲིག་ཀྲིག་ཟེར་ན་འགོང་པོ། ཤོག་ཤོག་ཟེར་ན་གོད་ངོ་ཡིན། ལྷ་མདའ་ལངས་སྔ་ན་ལེགས་
ཏེ་ཁ་གསལ་ངོ་། །འདྲེ་མདའ་སྔོན་དུ་ལངས་བཅུད་མི་ལེགས་ཀྱང་། རྔོན་པ་ཁྱི་ཁྲིད་དང་རྐུན་བུ་ཐག་བཟུང་གི་མོ་ལ་ཤ་བ་སོད། ནོར་ཐོང་། མདའ་གཉིས་ལངས་ནས་ལྷ་མདས་འདྲེ་མདའ་དེད་ན་ལེགས། དེ་ལྡོག་ངན། ལྷ་མདའ་ཤེད་ཆེ་འདྲེ་མདའ་ཤེད་
ཆུང་བ་ལེགས། དེ་ལྡོག་ངན། མདའ་གཉིས་ལངས་ནས་འཐབ་ཅིང་རྒྱལ་ཕམ་རེས་མོས་བྱེད་ན། བདག་དང་དགྲ་བོ། རྒྱལ་ཕམ་རེས་མོས་བྱེད་པའི་ངོ་། ཁྱིམ་བདག་ཕོ་མོར་གྲི་བཙན་རྒྱལ་པོ་སོགས་ཀྱིས་གདོན། ནད་པ་ལ་ལྷ་འདྲེ་འཐབ་ཅིང་གྲིབ་
གདོན་གྱི་ངོ་ཆེ། ན་ཚ་དྲག་པོ་འོང་། མཐར་ཡང་རྒྱལ་ཕམ་བྱེད་པ་མ་བྱུང་ན་ན་ངོ་དང་འཚུབ་ཡོད་པས། ལྷ་མཆོད་འདྲེ་བཀར། གླུད་འབོར་བ་སོགས་དང་དཀར་ཆོས་རིམ་གྲོར་འབད་དགོས། རིམ་གྲོ་ཅི་དགོས་དམོད་པས་ལྷ་མདའ་རྒྱལ་བའི་བརྡ་རྟགས་
བྱུང་ན་དེ་གར་འབད་པ་གལ་ཆེ། དེ་ལྟར་སྐབས་ཀུན་ཏུ་ཤེས་པར་བྱའོ། །ལྷ་མདས་འདྲེ་མདའ་དེད་འཕྲོ་ལ་ཤུགས་ཞན་དུ་སོང་ན་བདག་དང་ལྷ་སྟོབས་མ་སྨིན་པས་དགྲ་བླ་དང་ཝེར་མ་དྲག་ཏུ་མཆོད་བསྟོད་བྱའོ། །ཤུགས་ཇེ་དྲག་སོང་ན་བཟང་། འདྲེ་མདའ་
མཐོ་ཞིང་ལྟོང་ཁ་བྲལ་ན་ཁ་འགྱོད་ངོ་། ནད་པར་གཞོག་སྐམ་ངོ་། གཟའ་ཀླུ་གནོད། འདྲེ་མདའ་མཐོ་ཞིང་ཁ་ནས་ཚག་ཚག་ཟེར་ན་འདྲེ་གདོན་གྱི་ངོ་ཆེ་བས། རྒྱལ་མདོས་དང་ཐེའུ་རང་སོགས་འདྲེ་བཀར་བྱ། མདའ་བཞི་ག་གྱེན་དུ་ལངས་ཡང་ལྷ་མདའ་
13-9-23a


མཐོ་ན་བཟང་། མདའ་བཞིའི་ལྷ་མདའ་སྟེང་དུ་བྱས་ཏེ་འདྲེ་མདས་ཡར་བཏེགས་ཚུལ་གྱིས་མདའ་བཞི་བསྣོལ་མར་གྱེན་བསྒྲེང་ལྟོང་ཁ་མ་བྲལ་བར་གུར་ཕུབ་འདྲ་ན་ཅི་ལའང་བཟང་རབ་ཡིན། འདྲེ་མདས་ཞབས་ནས་ཕུལ་ཏེ་ལྷ་མདའ་
ལྟོང་ཁ་ཕྲལ་ན་ཅུང་མི་ལེགས། ལྷ་མདའ་སྟེང་དང་འདྲེ་མདའ་ཞབས་སུ་བྱས་ཏེ་ཕན་ཚུན་འཕྲེད་དུ་བསྣོལ་བ་འུར་མཐིལ་འདྲ་ན་གྲོགས་ཕྱར་མཆོག་ཏུ་བཟང་།  ཁ་མཆུ་རྒྱལ་ནད་པར་མི་སྐྱོན། དེ་ལྡོག་འདྲེ་མདའ་སྟེང་སོང་འུར་མཐིལ་འདྲ་ན་གྲོགས་ཕྱར་ངན།
གཏམ་བསྣོལ་དང་བྱེ་བྲལ་འོང་། ཁ་མཆུ་ཕམ། ནད་པར་ནད་གཞི་ཆེ། གྲིབ་རྩོག་ངོ་ཆེ་བས་བསང་ཁྲུས་འདྲེ་བཀར་སོགས་བྱ། ལྷ་མདའ་དང་འདྲེ་མདའ་མ་འཕྲད་པར་རང་ཕྱོགས་སུ་སོ་སོར་གྱེས་ན་ནད་པ་ཡིན་ན་འདྲེ་དང་བྲལ། ལྷ་མཆོད་བྱ། ཁ་
མཆུ་རང་ཞི་སྟེ་མི་སྐྱོན། དགྲ་བོར་འཁྲུགས་པ་མི་འབྱུང་། མགྲོན་པོར་འགོར་གཞི་ཆེ། འདྲེ་མདའ་ཕྱིར་རང་སར་བྱེར་ཞིང་ལྷ་མདའ་གྱེན་དུ་ལངས་ན་ལྷ་ངོ་མཐོ། གདོན་མེད། དེ་ལྡོག་ལྷ་ཤུལ་གདོན་བཟུང་ངན། མདའ་བཞིའི་སྒྲོ་མོ་བསྣོལ་འཛོལ་སག་
སག་གི་སྒྲ་བཅས་བརྡར་རེས་བྱེད་ན། ཕྱི་ཡི་དགྲ་ལས་ནང་གི་ཐིགས་པ་ཐུ། ཕར་ལ་མ་གནོད་ས་ནས་ཚུར་གནོད་འབྱུང་། མི་ཁ་སྡང་བ་དང་ཡིད་འཁྲུགས་ཀྱི་ངོ་ཡིན། ལྷ་མདའ་གཞི་ལས་ཅུང་ཟད་སྟེང་དུ་སྤག་སྟེ་འདྲེ་མདའི་ཕྱོགས་སུ་རྒྱུག་པ་དང་འདྲེ་
མདའ་ཡང་དེ་མཚུངས་ཕར་ཕར་བྲོས་པ་ལྷ་རྒྱལ་ཏེ་བཟང་། དེ་ལྡོག་ངན། གཉིས་ཀ་གཞི་སྟེང་ནས་མ་སྤག་པར་ལྷ་མདས་འདྲེ་མདའ་དེད་ཀྱང་སྤྱིར་བཟང་མོད། སྒྲོ་འཚག་ཅིང་འཐབ་ལུགས་ཞན་པས་བློ་འགྱོད་ཁ་འཚག་གཞན་ཡང་འབྱུང་། ལྷ་མདའ་
13-9-23b


སྟེང་སོང་འདྲེ་མདའ་མ་འཕར་ན་ཡང་བཟང་། གཡུང་དྲུང་གི་སྟེང་ནས་ཕྱི་རོལ་དུ་བརྒལ་ནས་ཕྱི་སར་སོང་སྟེ་ལྟོང་ཁ་ཕྲལ་ན་ཐག་རིང་འགྲོ་དགོས་སོགས་འབྱུང་སྟེ་ཅུང་ཞན། ཧ་ཅང་ཕྱི་རོལ་དུ་བརྒལ་ཆེས་ན་བསྐལ་བ་ཆགས་འཇིག་གི་སྐབས་སུ་བབ་པས་ངན་
པར་བཤད། ལག་སྟབས་མིན་ཡང་ལྟོང་ཁ་ཕྲལ་བ་མང་ན་ཁ་འགྱོད་དང་ཕྱི་དལ་གྱི་ངོ་ཙམ་ཡིན། གཡུང་དྲུང་གི་རི་མོ་ལས་མ་བརྒལ་བར་ལྷ་མདའ་འགུལ་ཁ་ཡང་ཤེད་ཆེ་སྟེང་དུ་མཐོ་ཞིང་ལྟོང་ཁ་མི་ཕྲལ་བར་དན་ནེར་བརྟན་ན་མཆོག་ཏུ་བཟང་། དེ་ལྡོག་ངན།
ལྷ་མདའི་ཁ་ཡི་མར་འདྲེ་མདའ་ལ་འགོས་པ་དང་། གཞི་སྟེང་གི་ནས་འབྲུ་རྣམས་འདྲེ་མདའི་སྒྲོས་ཁྱེར་ན་རྒྱུ་ཤོར་དང་གཡང་ཉམས་ཀྱི་ངོ་ཡིན། འདྲེ་མདས་གཞི་ཡི་ནས་བསྡུས་ཏེ་ལྷ་མདའི་ཕྱོགས་སུ་ཕུལ་ན་དགྲ་ལས་ནོར་ཐོབ། དེ་ལྡོག་རང་ནོར་དགྲ་ལ་
འཆོར། མདའ་གཉིས་ཀས་འབྲུ་སོ་སོར་རང་ཕྱོགས་ཁྱེར་ན་ནོར་བགོ་ངོ་དང་འབྲུ་ཕྱོགས་སུ་གཏོར་ན་ནོར་ལ་ངན། གཞི་ནས་སྟེང་དུ་སྒྲོ་ཁ་འཐབ་ན་ནོར་ལ་འཐབ་ངོ་དང་ནད་པར་ལྷ་འདྲེ་རྩོད་ངོ་ཡིན། མདའ་གཡས་གཡོན་གཅུ་ཞིང་འཁོར་ན་ལྟོང་ཁ་འཚག་གས་
སོགས་བྱེད་དེ་འཚུབ་ཆེ་བའི་ངོ་ཡིན། རིམ་འགྲོ་འབད། ལྷ་མདས་འདྲེ་མདའ་མར་བརྡབ་ཚུལ་བྱེད་ན་ལེགས། དེ་ལྡོག་ངན། མདའ་གློ་བུར་ཆག་ན་ཤི་ཆད་ངོ་། བར་ཆད་ཤིན་ཏུ་ཆེ། སྒྲོ་ཕྱི་བ་སྟོང་ཁ་གས་པ་སོགས་དེ་དང་ཆ་འདྲའོ། །ལྷ་མདས་
འདྲེ་མདའ་ཕྱིར་དེད་ནས་འདྲེ་མདའ་མི་འཕར་བར་དེ་གར་འདུག་ལ་ལྷ་མདའ་རང་ཉིད་གྱེན་དུ་དྲང་པོར་ལངས་ཏེ་བརྟན་པར་འགྲེང་སྟེ་འདུག་ན་བར་ཆད་དང་བྲལ་ཏེ་ཅི་བསམ་འགྲུབ།  རེས་འགའ་སྔགས་དང་བདར་བ་མེད་པར་མདའ་ལངས་ན་མི་ལེགས་ཏེ་དམུ་གབ་
13-9-24a


ཡོད་པའམ། ཡང་ན་ཡུལ་ལྷའི་ཆོ་འཕྲུལ་ཡིན། ཡིག་བརྒྱ་བཏོན་ནས་རེ་ཤིག་མཚམས་བཞག་དགོས། ཡང་དམོད་ལོང་མེད་པར་འཕར་སྔ་བ་ཡང་དེ་དང་ཆ་འདྲ་ལ། མདའ་ལ་ཁོང་ཤེད་ཅི་ཡང་མེད་པར་འགུལ་ཁ་ཡང་བ་
ཡང་དེ་དང་ཆ་འདྲ་སྟེ་ཡིད་བརྟན་མེད། མདའ་བཞི་གཏན་ནས་མི་འཕར་ན་གདོན་ངོ་དང་ཕྱི་དལ་གྱི་ངོ་ཡིན། ནད་པར་གཞི་ཚེ། མདའ་བཞི་ཚོམ་དུ་ལངས་ན་མོ་རབ་ཡིན་ཅེས་འདུག །འདྲེ་མདའ་ལྷ་མདའ་བསྣོལ་ལུགས་ཧོམ་ཁུང་འདྲ་ན་ནད་མོར་ངན།
ཨེ་འོང་མོ་ལ་ལང་སྔ་བུལ་རྟགས་ཡིན། སྔོན་མ་མ་ཚར་པར་ཕྱི་མས་དོན་ན་འབྲིང་ཙམ་མོ་ཡིག་ནོར་འདྲ་དཔྱད་ཟེར་དཔྱད། ལྷ་མདའ་ལངས་ཀྱང་གྱེན་དུ་དྲང་པོར་མི་འགྲོ་བར་གཡས་གཡོན་དུ་ཡོ་འཁྱོགས་བྱེད་ན་ལྷ་མ་དགའ་བའི་ངོ་ཡིན། རྒྱལ་གཤེད་གདོན། ལྷ་མདའ་འགུལ་
ཙམ་ལས་ལྡངས་མི་ནུས་པར། འདྲེ་མདའ་ལངས་ན་ནོར་ཕྱིར་འབྲང་བའི་གདོན་དང་། ཐབས་ཁོ་ན་སོགས་ཀྱིས་ལྷ་ལ་ཉེས་པ་སོང་པས་ལན། དེ་ལྡོག་བཟང་། མདོར་ན་ལྷ་མདའ་འདྲེ་མདའ་གང་ལངས་སྔ། ཤེད་སུ་ཆེ། སྟེང་དུ་སུ་མཐོ། སུས་སུ་
དེད་ཀྱི་རྒྱལ་ཕམ་ཤེས་པར་བྱ། མདའ་བཞི་མ་འཛོམ་ན་ལྷ་མདའ་འདྲེ་མདའ་གཉིས་ཀྱིས་ཀྱང་ཆོག་པར་བཤད། གལ་ཆེན་མདའ་མོ་ཐེང་གསུམ་བཏབ་པས་གསུམ་གར་ལྷ་མདའ་རྒྱལ་ན་ལེགས། དང་པོ་རྒྱལ་ཡང་ཕྱི་མ་གཉིས་སུ་འདྲེ་
མདའ་རྒྱལ་ན་ལྷ་ངོ་དམའ། ཁྱིམ་ལྷ་སོགས་ཁྲོས་པས་ཅི་ལའང་ངན། དེ་ལྡོག་ཕུག་བཟང་། དེ་ལྟར་ཕྲལ་དང་བར་དང་ཕུག་གི་བཟང་ངན་དཔྱད། ཕར་ཆེར་ལ་ལན་དུ་བཏབ་ཀྱང་དམོད་དོན་གཅིག་པ་ལ་འཕར་ཚུལ་གཅིག་པར་འོང་ངོ་། །མདའ་
13-9-24b


མོ་འདི་ནི་སྔགས་དང་བདར་བ་མཆོད་པ་རྣམས་ནན་ཏན་བྱས་ཏེ། དུས་བཟང་དང་གནས་དགེ་བར་བརྟག་བྱ་གལ་ཆེན་ལ། ཐེ་ཚོམ་མེད་པར་སྐྱེས་བུ་སེང་ཆེན་རྒྱལ་པོར་ཡིད་ཆེས་པས། གསོལ་བ་བཏབ་སྟེ་བརྟག་ན་དོན་གང་ལའང་མི་བསླུ་ཞིང་ཁྱད་པར་
དགྲ་ཕྱྭ་དང་རྒྱལ་ཕམ་རྩོད་པ་ལ་བསྔགས་སོ། །ཁུངས་ཐུབ་མོ་དཔྱད་གསུམ་སོགས་ཀྱི། །གཞུང་དོན་ཕྱོགས་གཅིག་མི་ཕམ་པས། །བྲིས་འདིས་བླང་དོར་རབ་གསལ་ཞིང་། །འདོད་པའི་དོན་ཀུན་གྲུབ་གྱུར་ཅིག །མངྒ་ལཾ། །
༈ ཀྱེ། ཀུན་གསལ་ཝེར་མའི་གསས་མཁར་ཆེན་པོ་ན། །སྣང་གསལ་ཨ་དཀར་འོད་ཀྱི་ཝེར་མ་མཆོག །སེང་ཆེན་ཡིད་བཞིན་ནོར་བུ་བསམ་འཕེལ་ནི། །ཁྱེའུ་བཅུ་དྲུག་ལང་ཚོ་མཛེས་སྡུག་འབར། །དར་དང་རིན་ཆེན་མེ་ཏོག་རྒྱན་
གྱིས་མཛེས། །ཡིད་འཕྲོག་འཁོར་ལོས་བསྒྱུར་བའི་ཆས་སུ་བཞུགས། །ཕྱག་གཡས་པདྨ་དཀར་པོའི་ཟེ་འུ་འབྲུར། །ཡིད་བཞིན་ནོར་བུ་མཐོན་མཐིང་འོད་ལྔ་འབར། །གཡོན་ན་རྫུ་འཕྲུལ་རྣོ་གསལ་མདའ་གཞུ་བསྣམ། །དགྱེས་འཛུམ་
རྣམ་ལྔ་སྣ་ཚོགས་ཝེར་མའི་དཔུང་། །དགྱེས་པའི་བྲོ་གར་བརྡའ་རྟགས་ལུང་བསྟན་ངོམ། །ཕྱི་ནང་གསང་བ་བདེ་སྟོང་རྡོ་རྗེའི་སྤྲིན། །མཆོད་པར་འབུལ་ལོ་ཐུགས་རྗེས་བརྩེར་དགོངས་ལ། །རྫུ་འཕྲུལ་མདའ་མོ་འདི་ལ་བྱིན་ཆེན་ཕོབ། །ལེགས་
ཉེས་བླང་དོར་མ་ནོར་སྒྲིབ་མེད་སྟོན། །སྔོན་ཚེ་ཞལ་བཞེས་ཐུགས་དམ་དགོངས་མཛོད་ལ། །ཝེར་མའི་རྡོ་རྗེའི་གླུ་བྲོ་ད་བསྒྱུར་ཅིག །བསྭོ་ཨོཾ་ཨ་དཀར་ཝེར་མ་ཨ་ཨཱ་ཀརྴ་ཡ་པྲ་ཕོབ། འབྲུ་དཀར་སྟེང་དུ་ལྷ་ཡི་མདའ། །དར་དཀར་བཏགས་ལ་ནག་པོ་ཡང་། །
13-9-25a


དྲང་བཞག་བསང་སྐྱེམས་མཆོད་བདེན་བདར། །སྔགས་པའི་འབྲུ་འཐོར་ཤར་གསེར་སྐྱེམ། །རྒྱབ་ཏུ་བསང་ཕུད་སྔགས་ཉེར་གཅིག །ཡང་ན་བརྒྱ་རྩ་བརྒྱད་དུ་བཟླས། །མདའ་མོ་འཕར་འཁྲབ་ངོ་མཚར་ཆེ། །ཟླ་དྲུག་ཚེས་གསུམ་ལའོ།།  །།
༈ གེ་སར་སྐྱེས་བུ་དོན་འགྲུབ་ཀྱི་མདའ་མོ་ཟུར་རྒྱན་སྣང་གསལ་མེ་ལོང་ཁྱད་འཕགས་བཞུགས་སོ། །ན་མོ་པདྨ་ཀ་རཱ་ཡེ། སྐྱེས་བུ་ཆེན་པོའི་མདའ་མོ་ལ། །རྣོ་མཐོང་རྟིང་གཅོད་སྤྲོས་བྱ་ན། །གཞི་དཀར་སྟེང་ལ་མདའ་དར་དང་། །མར་མེ་ཕྱེ་མར་སྐྱེམས་ཕུད་བསངས། །རིམ་བཞིན་བཤམས་ལ་
བརྡར་ཡང་བྱ། །དང་པོ་མཆོད་རྫས་བྱིན་གྱིས་རླབས།   རཾ་ཡཾ་ཁཾ་གིས་བསང་། ཨོཾ་ཨཱཿཧཱུྃ་ཧོས་རླབས། མཆོད་པའི་སྤྲིན་ཕུང་མཐའ་ཡས་པས། །དགྲ་བླ་ཝེར་མ་དགྱེས་པའི་རྫས། །ཀུན་བཟང་མཆོད་སྤྲིན་རབ་འབྱམས་ཀྱིས། །དཔག་ཡས་ནམ་མཁའ་
གང་བར་གྱུར། །དེ་ནས་མངོན་རྟོགས་བསྒོམ་པ་ནི། མདུན་དུ་འཇའ་འོད་སྤྲིན་ཕུང་དབུས། །ཨ་དཀར་འོད་ཀྱི་ཝེར་མ་ནི། །གཞོན་མཛེས་ཡིད་འཕྲོག་ཉམས་དང་ལྡན། །དཀར་གསལ་དག་པའི་ཤེལ་ལྟ་བུ། །ཕྱག་གཡས་རིན་ཆེན་སྒྲོན་མེ་བསྣམས། །
སྲིད་པ་གསུམ་པོ་ས་ལེར་གསལ། །གཡོན་ན་རཏྣའི་མེ་ལོང་གིས། །དུས་གསུམ་མ་སྒྲིབ་ལྷང་ངེར་སྟོན། །དར་དཀར་རལ་ཀ་མེ་ཏོག་བརྒྱན། །འཇའ་སྤྲིན་སྤོས་བསུང་ཐིབས་སེ་ཐིབ། །དགྱེས་ཡུམ་རྣམ་ལྔ་མདའ་དར་དང་། །བུམ་པ་འཛིན་
ཅིང་འོད་ལྔ་འབར། །འཁོར་དུ་ཀུན་གསལ་ཝེར་མ་འབུམ། །རྣམ་འགྱུར་ཆ་ལུགས་མ་ངེས་གཟུགས། །རྡོ་རྗེའི་བྲོ་གར་བརྡའ་གླུ་བསྒྱུར། །བདེ་དྲོད་བྱིན་ཕུང་ཡ་ལ་ལ། །བསྒོམ་པ་ཙམ་གྱིས་རྣོ་མཐོང་འབེབས། །སྤྱན་འདྲེན་དང་བརྡར་བ་ནི། 
13-9-25b


ཀྱེ། རིག་གསུམ་པདྨའི་སྒྱུ་འཕྲུལ་གཅིག་བསྡུས་པ། །ནག་ཕྱོགས་བདུད་དགྲ་འདུལ་བའི་མཐུ་བོ་ཆེ། །རིག་འཛིན་ཆེན་པོ་འཛམ་གླིང་རྒྱན་མཆོག་རྩལ།  །ཤེས་རབ་རལ་གྲི་མདའ་གཞུ་ཐོགས་པ་ཡི། །སེང་ཆེན་དོན་འགྲུབ་ནོར་བུའི་ལྷ་ཚོགས་རྣམས། །
ཐུགས་དམ་བསྐུལ་ལོ་ཐུགས་རྗེས་མ་གཡེལ་དགོངས། །ཁྱད་པར་ཉིད་ཀྱི་ཡེ་ཤེས་རོལ་མོ་ལས། །ཨཱ་དཀར་འོད་ཀྱི་ཝེར་མ་རྣོ་མཐོང་བདག །དགྱེས་ཡུམ་བཀའ་འཁོར་དཔུང་གི་ཚོགས་དང་བཅས། །འཇའ་འོད་སྤྲིན་འཁྲིགས་མེ་ཏོག་ཆར་འབེབ་
ཅིང་། །རྡོ་རྗེའི་གླུ་དང་གར་གྱི་སྟངས་སྟབས་ཀྱིས། །ཐོགས་པ་མེད་པར་གནས་འདིར་གཤེགས་ནས་སུ། །མོས་ལྡན་བདག་གི་སྙིང་ལ་བྱིན་རློབ་ཅིང་། །རྣོ་མཐོང་འཕྲུལ་གྱི་དངོས་གྲུབ་སྩལ་དུ་གསོལ། །མདའ་དར་མེ་ལོང་དར་སྣའི་མཆོད་པ་བཞེས། །
འོད་གསལ་སྣང་བྱེད་སྒྲོན་མེའི་མཆོད་པ་བཞེས། །ཞལ་ཟས་བཟའ་བཏུང་སྣ་ཚོགས་མཆོད་པ་བཞེས། །བདུད་རྩི་དྲི་ཞིམ་བསང་གི་མཆོད་པ་བཞེས། །ཚེ་སྲོག་ནོར་བུའི་རྒྱལ་མཚན་བརྟན་མི་བརྟན། །ལུས་ཁམས་དཔག་བསམ་ལྗོན་པ་རྒྱས་མི་
རྒྱས། །དབང་ཐང་ནོར་བུའི་བང་མཛོད་གང་མི་གང་། །རླུང་རྟ་སྙན་པའི་བ་དན་བསྒྲེང་མི་བསྒྲེང་། །རྟེན་འབྲེལ་རྫས་མཆོག་རྣམས་ལ་བརྡ་རུ་སྟོན། །ལེགས་ཉེས་མ་འདྲེས་ཐིགས་སུ་འདེབས་པར་མཛོད། །ཀྱེ། ལྷ་དང་གཡང་དང་དཀར་ཕྱོགས་
བཟང་པོ་དང་། །འདྲེ་དང་བྱུར་དང་ནག་ཕྱོགས་ངན་པའི་སྡེ། །གཉིས་གཉིས་ཟུར་དུ་བསྒྲིགས་པའི་མདའ་མཆོག་བཞི། །རྒྱལ་ཕམ་དབང་པོས་མཐོང་བའི་བརྡའ་དག་ལས། །འགྱུར་མེད་སེང་ཆེན་ལྷ་ཡི་བདེན་ཚིག་མཐུ། །རྣལ་འབྱོར་ཡིད་ཀྱི་
13-9-26a


གསོས་སུ་དེང་ལེན་ན། །མཁྱེན་དང་བརྩེ་བ་བྱང་ཆུབ་ཆེན་པོ་ཡིས། །བཟང་ངན་ཤན་འབྱེད་མཛོད་ཅིག་ཝེར་མའི་རྗེ། །ཀྱེ། ཡེ་ནས་སྟོང་ཀྱང་འཆར་སྒོ་མ་འགགས་པ། །ཀུན་གསལ་ཤེས་པ་ནོར་བུའི་མེ་ལོང་ལ། །དུས་
གསུམ་ལྐོག་གྱུར་གསལ་བའི་རི་མོ་རྣམས། །མ་འདྲེས་ས་ལེར་བྲིས་ཤིག་ཆོས་སྐྱོང་གཙོ། །ཁྱེད་ནི་འཇིག་རྟེན་འདས་དང་མ་འདས་པའི།  །དགྲ་བླ་ཝེར་མ་ཡོངས་ཀྱི་རྒྱལ་པོ་ཡིན། །སྙིགས་མའི་སྐྱེ་བོ་སྐྱོབས་པའི་ཞལ་བཞེས་དང་། །ཕྲིན་ལས་གློག་
ལྟར་མྱུར་བའི་ཐུགས་བ སྐྱེད་དགོངས། །མཁའ་ལ་དཔང་མཛད་རྩ་གསུམ་རྒྱལ་བ་དང་། །བར་སྣང་རྟིང་གཅོད་སྣང་སྲིད་དྲེགས་པའི་དཔུང་། །ས་ལ་རྣལ་འབྱོར་མི་ཡི་ཚོགས་དབུས་འདིར། །ཡིད་ཆེས་དད་པས་ཁྱེད་ལ་རེ་བ་ཡི། །རྣལ་འབྱོར་
ཁྲེལ་ལ་བསྐུར་བ་མ་མཛད་པར། །བསླུ་མེད་བརྡ་རྟགས་ད་ལྟ་ཉིད་དུ་ཕོབ། །ཅེས་བྱས་ལ་མདའ་མོའི་སྔགས་ཐུན་མིན་ཕྲིན་ལས་རོལ་པ་རྩལ་གྱི་དག་སྣང་གི་ལུགས། སྔགས་སྒྲུབ་ལས་འབུམ་གཅིག་གསུངས།  མཆན། ཨ་ཀ་ཀྵ་ཡ་རལ་གྲི་ནག་པོ་ཤིག་ཤིག༔ ཨ་ཀ་ཡ་མ་ར་ཙ་ཕོབ༔ 
ཅེས་པ་འདི་ཉིད་བརྒྱ་རྩ་ཙམ་བཟླས་ནས་སྔགས་པའི་འབྲུ་མདའ་ལ་འཐོར་ཞིང་གཞུང་ལྟར་བརྟགས། དེའི་ཚེ་སྲོག་དང་མི་རྒྱུད་ཀྱི་ལེགས་ཉེས་མདའ་དར་ལ་བརྟགས།  མདའི་སྟོད་མི་ས། བར་ནོར་ས། མདིལ་
དགྲ་ས། སྒྲོ་ནག་ན་མི་རྒྱུད་བཟང་། མདངས་ངན་ན་ཅུང་ཞན། སྒྲོ་ཁ་མ་ཕྱེ་ན་བཟང་། སྟོད་དཀར་ན་ལྷ་ངོ་མཐོ། སྨད་དཀར་ན་ལྷ་བྱད་དུ་བབ། སྒྲོ་མེད་ན་བུ་ཚ་དཀོན། ལྟོང་གས་ན་མི་རྒྱུད་དར་ཤི་ཡོད། མདའ་ཆག་ཉམས་ཅན་ཤི་ཆད་ཀྱི་ངོ་ཡིན། མཚལ་
13-9-26b


མེད་ན་མི་ཁ་གནོད་སོགས་ངན། མདོག་ཁ་དོག་ལེགས་ན་མི་བཀྲག་རྒྱས། མདིལ་ཆེན་དགྲ་ཟོན་དགོས། ཆུང་ན་བཟང་། མདིལ་མེད་ན་ངན། རྣོ་ན་དགྲ་ཐུབ། རྟུལ་དང་ཉམས་པ་ངན། བཙའ་ན་ནོར་གོད་དམ་མི་ཁ་སོགས་གནོད། མདའ་མདང་དང་
ལྡན་པ་ལེགས། ཡོ་འཁྱོག་སོགས་མཁར་ལ་ངན་པས་ན་ངོ་ཡིན་ཞིབ་དུ་དཔྱད་ཅིང་རིགས་པར་ཁ་དམར་གདབ།   ༈   མར་མེ་ལུས་ཀྱི་ས་ལ་བརྟགས། འོད་གསལ་ན་ནད་མེད། མི་གསལ་ན་ནད་ངོ་དང་གྲིབ་ངོ་ཡིན། རླུང་དང་རྐྱེན་མེད་སར་མར་
མེ་ཤི་ན་ངེས་པར་ཤི་ཆད་འོང་། ཆུ་སོང་བ་ལྟར་ཚགས་སྒྲ་དང་བཅས་འབར་དཀའ་ན་བར་ཆད་ཆེ། ཕྱོགས་སུ་རླུང་དྲག་པོས་བཏབས་པ་ལྟར་མེ་ལྕེ་ཆད་ཅིང་བསྐྱོད་ན། འཚུབས་ཆེ་བས་རིམ་གྲོ་འབད། འུར་ཟིང་གི་ངོ་ཡང་ཡིན། རྩེ་མོ་བཅད་པ་ལྟ་བུ་མི་
གསལ་ཞིང་ཐུང་ན་ཕོ་ལྷ་མནོལ་བས་ངོ་སོ་དམའ། དབྱིབས་རྩེ་རྣོ་ཞིང་རིང་ལ་མཛེས་པ་དང་། རྒྱལ་མཚན་དང་བཀྲ་ཤིས་པའི་རྫས་འདྲ་ན་ཤིན་ཏུ་བཟང་།  དཀར་པོ་སོགས་ཀྱི་མདངས་ལྡན་གསལ་ན་ཞི་སོགས་ལས་འགྲུབ། འབར་ཡུན་རིང་ན་སྲིས་
སྨེ་ཞིང་བཟང་། དཀྱིལ་སྔོ་ནག་ལ་སྡོང་བུ་རྩེ་མོ་དམར་བར་ནག་ཐིང་ངེ་འདུག་ན་བློ་འགྱོད་ཆེ། མེ་རྟགས་དམར་ཚུག་གེ་བ་མི་གསལ་ན་ན་ངོ་དང་གྱོད་ངོ་ཡིན། རྩེ་མོ་ཐུར་དུ་འགུགས་པའི་ཉམས་ལྟར་མི་གསལ་ན་མནན་པ་སོགས་གཉའ་ནོན་ཡོད། སྟབ་
སྟབ་ཟེར་ཞིང་འོད་ཤིན་ཏུ་བཟང་ལ་ཡིད་དུ་འོང་བར་འབར་ན་བཀྲ་ཤིས་པ་འཕེལ།  དེ་ལ་མེ་ཏོག་ཆགས་ཤིང་འོད་གསལ་ན་དགེ་མཚན་གྱི་ངོ་ཡིན། དེ་ལ་སོགས་པ་ཞིབ་པར་ཞལ་ལས་ཤེས་པར་བྱའོ།  ། ༈   དེ་ནས་མཆོད་རྫས་ཕྱེ་མར་དང་འབྲུ་
13-9-27a


སྣོད་སྐྱེམས་ཕུད་རྣམས་དབང་ཐང་ལོངས་སྤྱོད་ཀྱི་བརྟགས་གཞི་ཡིན་པས་ན། སྣོད་ཆག་ཉམས་ནི་གཡང་ཉམས་ཤིང་བཅུད་མི་ཆགས་པས་གསེར་འོད་སོགས་འདོན། འབྲུ་དང་ཕྱེ་མར་ཁ་དོག་དྲི་རོ་ལྡན་ན་བཟང་པོར་འཕེལ། 
དེ་ལྡོག་ངན་ཞིང་བཅུད་མི་འཕེལ། ལྷད་འདྲེས་པ་གོད་སོགས་ཀྱི་ངོ་། །སྣོད་མ་གང་བ་ཟ་ཐང་ཆུང་། གང་ཆེ་ནས་ཕྱིར་ཟག་པ་དེ་ཕྱོགས་སུ་གཡང་ཉམས་པའི་ངོ་། གློ་བུར་འཐོར་ཞིག་བྱུང་ན་ནོར་ལ་བར་ཆད་ཆེ།  ༈   དཀར་མོ་ལག་གཡས་ཀྱང་མ་ཉམས་
ཆེ་ཚོ་ལྡན་པ་བཟང་བ་སོགས་མཆོད་རྫས་རིགས་ཀུན་ལ་རིགས་འགྲེས་དེ་སོགས་རིག་པས་དཔྱད།  ༈   བསང་རླུང་རྟའི་སྐྲ་ལ་དཔྱད། དེ་ཡང་བསང་ཕོར་གི་ནང་དུ་བདུད་རྩི་ཅན་གྱི་ཤིང་གསུམ་ཧ་ཅང་མི་མང་ཧ་ཅང་མི་ཉུང་བ་དང་འོ་སྐོལ་བསྲེགས་ལ་
ཆབ་བྲན་ནས་བཞག་པས། དུ་བ་ལེགས་པར་འཐུལ་ཞིང་འབར་སྐྱེན་ན་རླུང་རྟ་དར་དོན་འགྲུབ་པ་ལ་ཚེགས་མེད། ཤིན་ཏུ་འབར་དཀའ་ན་དོན་མི་འགྲུབ། དུ་བ་གྱེན་དུ་དྲང་ཐ་ལེ་འགྲོ་བ་རླུང་རྟ་དར་བའི་རྟགས་གཡས་སུ་འཁྱིལ་ཞིང་ཕྱུར་ཕྱུར་འགྲོ་ན་ཕོ་ལྷ་
དར། གཡོན་དུ་འཁྱིལ་ཞིང་དལ་བ་མཛེས་ན་ཕུག་ལྷ་ལྷ་མོ་དགྱེས། ཁ་དོག་དཀར་ན་ལྷ་ལ་མནོལ་བག་མེད་པས་ངོ་སོ་མཐོ། སྔོན་པོ་མཐིང་འོད་འཚེར་ན་བཟང་། སྡོ་དམར་བྱུང་ན་ལྷ་འཁྲུགས་ཀྱི་ངོ་། །ནག་པོ་བྱུང་ན་ལྷ་མནོལ་ཞིང་མི་བདེ་བའི་ངོ་། 
དབྱིབས་བཀྲ་ཤིས་པའི་རྫས་དང་དཔག་བསམ་ཤིང་སྤྲིན་རིས། འབྲུག་ལྟ་བུ་བཟང་། ཚུབ་ཚུབ་པོ་ཧོར་ཆོད་ཅན་བར་ཆད་ཆེ། གནམ་རྡོ་ལྷུང་པ་དང་། རྦབ་འདྲིལ་བ་དང་། ཕད་རྩེ་ནག་པོ་དང་། བ་ལང་གི་མགོ་དང་། སྲིན་པོའི་གདོང་ལྟ་བུ་སོགས་
13-9-27b


ཡིད་དུ་མི་འོང་བ་བཀྲ་མི་ཤིས་པའི་ངོ་། །དྲི་ཞིམ་ཞིང་གཙང་ལ་མདོག་དབྱིབས་ཡིད་དུ་འོང་ན་དོན་འགྲུབ། དེ་ལས་ལྡོག་ན་མི་དགེ་ཞིང་ངན། ཕྱིས་བཟང་དུ་བྱུང་ན། རིམ་འགྲོས་འགྱུར་ཏེ། དང་པོ་བཟང་ཕྱིས་ངན་དུ་སོང་ན་བར་ཆད་ཆེ་བས་གཟབ། དུ་བ་ལྷ་
གཞི་དང་རྣལ་འབྱོར་ལ་འཁྱིལ་ཞིང་གྱེན་དུ་འགྲོ་ན་ལྷས་མགོན་པས་བཟང་།  ༈   སྤོས་ཀྱི་དུད་པའང་འདི་དང་སྡེ་ཚན་གཅིག་ཏུ་བརྟགས། དེ་སོགས་ཞིབ་ཏུ་དཔྱད་ལ། གཞི་ལ་ཁང་གཞི་གནས་མལ་དཔྱད་དེ། བུག་རལ་ཟག་གསུམ་ངན། ཁ་
དོག་དཀར་ཞིང་སྲ་ལ་འཐུག་ན་བཟང་། དེ་ལ་སོགས་པ་ཞིབ་དུ་དཔྱད་དེ།  ༈   དེ་ཡང་དང་པོ་རྣལ་འབྱོར་པ་མོ་འདེབས་པའི་སླད་དུ་འབོད་པར་ཆས་པ་ན། གེ་སར་ཝེར་མའི་བསང་མཆོད་དང་ཐུགས་དམ་བསྐུལ་བ་བྱས་ནས་བརྡར་བ་ཡེ་དྷར་བཟླས་རྟེན་
འབྲེལ་བརྟགས་པའི་འདུན་པས་སྦྱིན་བདག་གི་གམ་དུ་འགྲོ་བར་བྱའོ།  ། ༈   མདའ་དར་མེད་ན་ཤུག་པ་སོགས་ཤིང་ལོ་རྒྱས་པ་ལ་བལ་གྱིས་དཀྲིས་ནས་ཁྱེར་ཤོག་བྱས་ལ། དེ་ཡང་མདའ་པྲ་དང་འདྲ་བར་དཔྱད་ཅིང་། ལོ་འདབ་རྒྱས་ཤིང་མ་ཉམས་མ་
ཆག་བཟང་། བལ་སྟེང་སྲེང་འོག་ཀུན་ཏུ་ཁྱབ་ཅིང་ལྷུན་སྡུག་ན་བཟང་། གལ་ཆེ་རིགས་ལ་མཆོད་པ་འདི་བཞི་མ་ཚང་བར་ཁ་ཙམ་གྱིས་མོ་འདེབས་པ་དེས་ཝེར་མ་མི་མཉེས་ལ་ཁ་དམར་ཀྱང་མི་ཐིག་གོ། མཆོད་རྫས་འདི་རྣམས་དངོས་བཟང་ཞིང་གཙང་བ་རྒྱ་ཇི་
ཙམ་ཆེ་བར་འབྱོར་ཚད་བྱ། དགོས་པ་མེད་ཀྱང་མོ་ཡི་ཟ་ཐང་གི་ཚུལ་དུ་བླངས་བར་བྱ་སྟེ། མོ་ལྷ་དགྱེས་ནས་ཕྱིན་ཆད་རྣོ་ཐིག་དང་སྦྱིན་བདག་ལ་ཕན་ཐོག་པའི་རྟེན་འབྲེལ་ཡིན་ནོ། །ཚུལ་བཞིན་དུ་བྱས་ནས་པྲ་རྟགས་ཐམས་ཅད་ལ་ཞིབ་ཏུ་བརྟགས་པས་ཐམས་
13-9-28a


ཅད་མཚུངས་ན་ཐེ་ཚོམ་མེད་ཅིང་པྲ་རྟགས་འདི་རྣམས་ཁྱད་པར་དུ་ཡང་བདེན་ངེས་པ་ཡིན་ཏེ་ལག་ཏུ་བླང་བས་ཤེས་སོ། །སྔར་ཞིག་སྐྱེས་བུའི་མདའ་མོ་ལ། །རྒྱས་སྤྲོས་འདི་འདྲ་ཞིག་བྲིས་ཀྱང་། །ཡི་གེ་གོས་དཀར་ཀློང་དུ་
གཟིམ། །སླར་ཡང་བཟོ་དཔོན་བསོད་མིང་གིས། །བསྐུལ་ཚེ་མདའ་མོའི་རྟགས་དཔྱད་དོན། །ཆ་ལག་པྲ་རྟགས་མདོར་བསྡུས་ཙམ། །ཕྲལ་དུ་བྲིས་སོ་འདི་རྣམས་ཀྱང་། །རང་བློ་ཁོ་ན་མ་ཡིན་ཏེ། །ནག་རྩིས་ལ་སོགས་གཞུང་ཆེན་དང་། །དམ་
པའི་མན་ངག་གིས་ཀྱང་བརྒྱན། །དེ་ཕྱིར་ལག་ཏུ་བླང་བའི་ཚེ། །རང་རྟགས་གསལ་ཕྱིར་བཤད་རྒྱ་སྐྱུང་།  །ཨྠིཿ། མི་ཕམ་པས་བྲིས་པ་དགེ་ལེགས་སུ་གྱུར་ཅིག་ཉིད་ཀྱི་ངོ་མི་ལྡོག་སླད་དུ་བྲིས། གཞན་ལ་འདི་འདྲ་ཅི་མཁོ་མ་སྟོན་ཅིག །
༈    གེ་སར་མདའ་མོའི་དཔྱད་དོན་གསེར་གྱི་ལྡེ་མིག་བཞུགས་སོ། །འདིར་མདའ་མོ་འཕྲུལ་གྱི་མངོན་ཤེས་འདི་ཡི་དཔྱད་དོན་ལ་བསྡུས་པ་ལྷ་མདའ་དང་འདྲེ་མདའ་གང་འཕར་བྱུང་ཞིང་ལྡངས་ཆེ་ལ་རྒྱལ་བ་དེས་ཁ་དམར་ཐམས་ཅད་རྟིར་གཅོད་བྱ། ༈
ཅུང་ཟད་རྒྱས་པའི་བརྟག་པ་བྱེད་པ་ན། དང་པོ་ལྷ་མདའ་འཕར་ན། ལྷ་ངོ་མཐོ། དང་པོ་འདྲེ་མདའ་འཕར་ན་ལྷ་ངོ་དམའ། འདྲེ་མདའ་འཕར་ཞིང་ཤུག་དྲག་ལ་ལྷ་མདའ་གཏན་མ་འཕར་ན་ཤིན་ཏུ་ངན། འདྲེ་མདའ་འཕར་སྡང་མེད་ལྷ་མདའ་འཕར་ན་ལེགས།
ལྷ་མདའ་འཕར་མགྱོགས་ན་ལེགས་འཕར་དཀའ་ན་ཕྱི་དལ་དང་ཐེ་ཚོམ་གྱི་ངོ་ཡིན། མདའ་གཉིས་ཀ་འཕར་རང་ཕྱོགས་སོ་སོར་སོང་ན་ལྷ་འདྲེ་ཕྱེས་པས་འཁྲུགས་རྩོད་མི་འབྱུང་། རང་ས་རང་གནས་ཟིན་པས་བཟང་། ལྷ་མདའ་འདྲེ་མདའི་སྟེང་ནས་མར་བརྡུང་ན་
13-9-28b


བཟང་། དེ་ལས་ལྡོག་ན་ངན། ལྷ་མདའ་གྱེན་དུ་སོང་ན་ལྷ་ངོ་མཐོ། འདྲེ་མདའ་གྱེན་དུ་ལྡང་ན་བར་ཆད་ཆེ། མདའ་འདར་བ་ན་ཁ་མཆུ་དང་འཇིགས་ངོ་ཆེ། ལྷ་མདའ་སྟེང་དུ་སོང་ན་ལྷ་ངོ་མཐོ། དེ་ལས་ལྡོག་ན་ངན། ལྷ་མདའ་སྟེང་དང་འདྲེ་མདའ་
འོག་ཏུ་བྱས་ནས་འུར་མཐིལ་ལྟ་བུ་བྱུང་ན་གྲོགས་ངོ་ཡིན། དོན་ཕྱྭ་ཕྱོགས་ཙམ་འགྲུབ་ངོ་ཡིན། ལྷ་མདས་འབྲུ་རང་ཕྱོགས་སུ་དེད་ན་རྙེད་པའི་ངོ་ཡིན། འདྲེ་མདའི་སྒྲོ་ཡིས་འབྲུ་བསྡུས་ནས་ལྷ་མདའི་ཕྱོགས་སུ་ཕུལ་ན་ཕ་རོལ་པོ་ལས་ནོར་ཐོབ་ངོ་ཡིན། 
མདའ་གཉིས་ཀྱིས་འབྲུ་ཕྱོགས་སུ་ཆེར་གཏོར་ན་ནོར་ལ་གཟབ། འདྲེ་མདས་རང་གི་ཕྱོགས་སུ་འབྲུ་ཁྱེར་ན་ནོར་ལ་དགྲ་ངོ་ཡོད། མདའ་ཁ་ཚག་སྒྲ་བྱེད་ན་ཁ་འགྱོད་ངོ་ཡིན། སྟོད་ནས་གས་ན་མི་ལ་ངན། སྒྲོ་གསར་དུ་བྱི་ན་རྟ་ལ་ངན། རྐེད་ནས་ཆག་
ན་བུད་མེད་ལ་ངན། སྨད་ནས་ཆག་ན་ནོར་ལ་ངན། མདའ་གཉིས་གཞི་ལས་རྒལ་གྲགས་ན་ཐག་རིང་འགྲོ་དགོས་སོགས་ཅུང་མི་ལེགས། ཕར་ཚུར་དེད་རེས་དང་མདའ་འཕར་སྡེབ་བྱས་ན་འཐབ་ངོ་ཡིན། མཐར་སུ་རྒྱལ་ལ་བལྟ་དགོས། ལྷ་མདའ་ལངས་
ཤིང་འདྲེ་མདའ་ཕུལ་མནན་བྱས་ཤིང་། མདའ་ཁ་བྲལ་ན་བཟང་། དེ་ལས་ལྡོག་ན་ངན། སྟེང་འོག་གཅུ་ཞིང་འཁོར་ན་བྱ་རར་སྒྲིམ་དགོས་ཏེ་རིམ་གྲོ་བྱ་བ་ལ་འབད། ནས་ཀྱི་གཡུང་དྲུང་གི་ལྟེ་བར་ལྷ་མདས་འབྲུ་སྒྲོ་ཡིས་བཟུང་གྱེན་དུ་ལང་ན་དོན་ཆེན་པོའི་ངོ་ཡིན།
འདྲེ་མདའ་ཕྱིར་རང་སར་བྱེར་ལྷ་མདའ་ལང་ན་ལྷ་ངོ་མཐོ། གདོན་ཕྱིར་བུད་ཀྱི་ངོ་ཡིན། དེ་ལས་གོ་ལྡོག་ན་ལྷ་ཤུལ་གདོན་གྱིས་བཟུང་ཞིང་གདོན་ངོ་དྲག་པོ་ཡོད། ལྷ་མདའ་འདྲེ་མདའི་འོག་ཏུ་སྐྱུག་གི་སོང་ན་ལྷ་ལ་གྲིབ་མནོལ་དང་གཞན་གྱིས་མགོ་སྐོར་གྱི་ངོ་ཡོད། འདྲེ་
13-9-29a


མདའ་དེ་ལྟར་སོང་ན་གཞན་རང་འོག་ཏུ་འདུས་པས་བཟང་། ལྷ་མདའ་འདྲེ་མདའི་སྟེང་ནས་མར་མནན་པ་དང་། ཟུར་ནས་ཕར་ཤུགས་ཀྱིས་དེད་ན་རང་ཕྱོགས་རྒྱལ། ཞབས་ནས་ཡར་འདེགས་ནས་སྟོང་ཁ་བྲལ་ན། ལྷ་བསང་དང་དགྲ་བླ་མནོལ་
བསང་དགོས་ཏེ་ལྷ་སར་གྲིབ་ངོ་ཡོད་པའི་བརྡའ། འདྲེ་མདའ་དེ་ལས་ལྡོག་ཏེ་དཔྱད། ལྷ་མདའ་གྱེན་དུ་སོང་ན་ཆེར་བཟང་། སྟེང་ནས་འོག་ཏུ་འཛུལ་ན་ཅུང་ཟད་ཞན། ཕྲེད་ལ་འདྲེ་མདའ་ཕྱོགས་སུ་རྒྱུ་ན་སྟེང་འོག་གང་དུ་འགྲོ་དཔྱད། ཚུར་རང་ཕྱོགས་སུ་ཤད་
ཀྱིས་འོང་ན་ཉེས་མེད་ཙམ་ཡིན། གྱེན་དུ་འཕར་འཕྲོ་དང་འདྲེ་མདའ་དེད་འཕྲོ་ཤུགས་ཆེར་མེད་ན། བདག་དང་ལྷ་སྟོབས་ཆེ་བ་མ་སྨིན་པས། དགྲ་བླ་མཆོད་ཅིང་གསོལ་བསྐང་དྲག་པོ་བྱ། རིམ་འགྲོ་སོགས་འདི་བྱས་ན་ལེགས་སམ་བྱས་ནས་ཕྲལ་དམོད་བོར་ལ་
ནས་གཏོར་བས་སྔ་མ་ལས་ལྡོག་གོ་བརྡའ་བསྟན་འོང་། ལྷ་མདའ་མྱུར་དུ་ལྡང་ཡང་ཁང་ཤེད་ཅི་ཡང་མེད་པར་བྱིན་བྱིན་ལ་ཆག་ན་འཕར་ལེགས་ཀྱང་མི་བཟང་སྟེ་ཞིབ་ཏུ་དཔྱད་དོ། །སྔགས་དང་བདེན་པ་དྲག་ཏུ་བརྡར་བར་བྱའོ། །དང་པོ་ལྷ་མདའ་ལྡང་ནས་རང་
གནས་གྱེས། དེ་ནས་འདྲེ་མདའ་ལྡངས་ནས་རང་གནས་གྱེས་པའི། ལྷ་མདའ་སྟེང་དུ་ཕྱིན་པའི་ར་འཐིབ་པ་ལྟར་གྱི་དེད་ནས་རང་སར་སོ་སོར་བབ་ན་མགྲོན་ཕྱར་སྐད་ཆ་གསར་དུ་ཐོས་པའི་ངོ་། ལྷ་མདའ་དལ་བུས་ལྡང་བས་མཐོ་བ་དང་། འདྲེ་མདའ་ལངས་
ཞིང་རང་མལ་བྱུང་བ་ན། མགྲོན་པོས་རང་སར་ནོན་པའི་ངོ་ཡིན། མདོར་ན་ལྷ་མདའ་དང་འདྲེ་མདའ་གཉིས་ལ་ཤེད་ཆེ་ཆུང་ཕན་ཚུན་འདེགས་ཚུལ་སྟེང་འོག་སུ་མཐོ། བྱིན་སུ་ཆགས་ལས་དཔྱད་དོན་ཐམས་ཅད་ཚུལ་བཞིན་བརྗོད་པའི་ཁ་
13-9-29b


དམར་ལྟ་བུར་ལེན་པར་བྱའོ། །བཟོ་གནས་པུཎྱེ་རཱ་ཛའི་གསུངས་བསྐུལ་ངོར་རྫོང་གསར་དུ་མི་ཕམ་པས་འཕྲལ་བྲིས་མངྒ་ལཾ།།    །།