25-1-1


ཇོ་ནང་ཆོས་མཛོད་ཆེན་མོ་ལས། 
རྗེ་བཙུན་ཏཱ་ར་ནཱ་ཐའི་གསུང་འབུམ། 
༼ཨ༽
25-1-2


25-1-3


25-1-4


25-1-5


༄༅། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་རྩ་བའི་རྒྱུད་ཅེས་བྱ་བ་བཞུགས། 
༄༅། །རྒྱ་གར་སྐད་དུ། ཨ་མྲྀ་ཏ་ཧྲི་ད་ཡ་ཨངྒ་ཨཥྚ་གུ་ཧྱ་ཨུ་པ་དེ་ཤ་ཏནྟྲ་ནཱ་མ། བོད་སྐད་
དུ། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ཅེས་བྱ་བ། བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་
བླ་བཻ་ཌཱུཪྻ་འོད་ཀྱི་རྒྱལ་པོ་ལ་ཕྱག་འཚལ་ལོ། །ཐུགས་རྗེས་འགྲོ་བའི་དོན་མཛད་བཅོམ་ལྡན་
འདས། །མཚན་ཙམ་ཐོས་པས་ངན་འགྲོའི་སྡུག་བསྔལ་སྐྱོབ། །དུག་གསུམ་ནད་སེལ་སངས་
རྒྱས་སྨན་གྱི་བླ། །བཻ་ཌཱུཪྻ་ཡི་འོད་ལ་ཕྱག་འཚལ་ལོ། །
འདི་སྐད་བདག་གིས་བཤད་པའི་དུས་གཅིག་ན། དྲང་སྲོང་གི་གནས་སྨན་གྱི་གྲོང་ཁྱེར་
ལྟ་ན་སྡུག་ཅེས་བྱ་བ་རིན་པོ་ཆེ་སྣ་ལྔ་ལས་གྲུབ་པའི་གཞལ་ཡས་ཁང་ཡོད་དེ། ཁང་པ་དེའི་
རྒྱན་ནི་སྨན་གྱི་ནོར་བུ་རིན་པོ་ཆེ་རྣམ་པ་སྣ་ཚོགས་པས་བརྒྱན་པ་སྟེ། ནོར་བུ་རིན་པོ་ཆེ་དེས་
ནི་རླུང་གི་ནད་དང་མཁྲིས་པའི་ནད་དང་བད་ཀན་གྱི་ནད་དང་ལྡན་པའི་ནད་དང་འདུས་པའི་
ནད་ལས་གྱུར་པའི་ནད་བཞི་བརྒྱ་རྩ་བཞི་སེལ་བར་བྱེད་པ། ཚ་བའི་ནད་ལ་བསིལ་དུ་གྱུར་
པ། གྲང་བའི་ནད་ལ་དྲོད་དུ་འགྱུར་བ། བགེགས་རིགས་སྟོང་ཕྲག་བརྒྱད་ཅུ་ཞི་བར་བྱེད་པ། 
དགོས་འདོད་ཐམས་ཅད་ཡིད་བཞིན་དུ་གྲུབ་པར་བྱེད་པ་ཡོད་དོ། །གྲོང་ཁྱེར་དེའི་ལྷོ་ཕྱོགས་
ན་རི་བོ་འབིགས་བྱེད་ཅེས་བྱ་བ་ཉི་མའི་སྟོབས་དང་ལྡན་པའི་རི་ལ་སེ་འབྲུ་དང་ན་ལེ་ཤམ་
དང་པི་པི་ལིང་དང་ཙི་ཏྲ་ཀ་ལ་སོགས་པ་གྲང་བ་སེལ་བར་བྱེད་པའི་སྨན་རོ་ཚ་བ་དང་སྐྱུར་
བ་དང་ལན་ཚྭ་བ་དང་ནུས་པ་ཚ་བ་དང་རྣོ་བའི་སྨན་གྱི་ནགས་ཚལ། རྩ་བ་དང་སྡོང་པོ་དང་
25-1-6


ཡལ་ག་དང་ལོ་མ་དང་མེ་ཏོག་དང་འབྲས་བུར་ལྡན་པའི་སྨན་དྲི་ཞིམ་པ་ལྟ་ན་སྡུག་པ་ཡིད་དུ་
འོང་བ་སྨན་གྱི་དྲིས་ཁྱབ་པ་རྣམས་སུ་གྲང་བའི་ནད་མི་འབྱུང་བ་ཡོད་དོ། །གྲོང་ཁྱེར་དེའི་བྱང་
ཕྱོགས་ན་རི་བོ་གངས་ཅན་ཞེས་བྱ་བ་ཟླ་བའི་སྟོབས་དང་ལྡན་པའི་རི་ལ་ཙན་དན་དང་ག་
བུར་དང་ཨ་ག་རུ་དང་ནིམ་པ་ལ་སོགས་པ་ཚ་བ་སེལ་བར་བྱེད་པའི་སྨན་རོ་ཁ་བ་དང་དངར་
བ་དང་བསྐ་བ་དང་ནུས་པ་བསིལ་བ་དང་རྟུལ་བའི་སྨན་གྱི་ནགས་ཚལ། རྩ་བ་དང་སྡོང་པོ་
དང་ཡལ་ག་དང་ལོ་མ་དང་མེ་ཏོག་དང་འབྲས་བུར་ལྡན་པའི་སྨན་དྲི་ཞིམ་པ་ལྟ་ན་སྡུག་པ་
ཡིད་དུ་འོང་བ་སྨན་གྱི་དྲིས་ཁྱབ་པ་རྣམས་སུ་ཚ་བའི་ནད་མི་འབྱུང་བ་ཡོད་དོ། །གྲོང་ཁྱེར་དེའི་
ཤར་ཕྱོགས་ན་རི་བོ་སྤོས་ངད་ལྡན་ཞེས་བྱ་བའི་རི་ལ་ཨ་རུ་རའི་ནགས་ཚལ། རྩ་བས་རུས་
པའི་ནད་སེལ་བ། སྡོང་པོས་ཤའི་ནད་སེལ་བ། ཡལ་གས་རྩ་རྒྱུས་ཀྱི་ནད་སེལ་བ། ཤུན་པས་
པགས་པའི་ནད་སེལ་བ། ལོ་མས་སྣོད་ཀྱི་ནད་སེལ་བ། མེ་ཏོག་གིས་དབང་པོའི་ནད་སེལ་བ། 
འབྲས་བུས་དོན་སྙིང་གི་ནད་སེལ་བ། རྩེ་མོ་ན་ཨ་རུ་ར་རྣམ་པ་ལྔ་སྨིན་པ། རོ་དྲུག་དང་ལྡན་
པ། ནུས་པ་བརྒྱད་དང་ལྡན་པ། ཞུ་རྗེས་གསུམ་དང་ལྡན་པ། ཡོན་ཏན་བཅུ་བདུན་རྫོགས་པ། 
ནད་ཀྱི་རིགས་སུ་གྱུར་པ་ཐམས་ཅད་སེལ་བ། དྲི་ཞིམ་པ་ལྟ་ན་སྡུག་པ་ཡིད་དུ་འོང་བ་སྨན་གྱི་
དྲིས་ཁྱབ་པ་རྣམས་སུ་ནད་བཞི་བརྒྱ་རྩ་བཞི་མི་འབྱུང་བ་ཡོད་དོ། །གྲོང་ཁྱེར་དེའི་ནུབ་ཕྱོགས་
ན་རི་བོ་མ་ལ་ཡ་ཞེས་བྱ་བ་ལ་བཟང་པོ་དྲུག་གི་སྨན་འཁྲུངས་པ་སྟེ། ནད་ཐམས་ཅད་ཞི་བར་
བྱེད་པའི་སྨན་ཅོང་ཞི་རིགས་ལྔ་དང་། བྲག་ཞུན་རིགས་ལྔ་དང་། སྨན་ཆུ་རིགས་ལྔ་དང་། ཆུ་
ཚན་རིགས་ལྔ་དང་ལྡན་པའི་རི་བོ་ཡོད་དོ། །ས་ཕྱོགས་ཐམས་ཅད་ཀྱང་གུར་གུམ་གྱི་སྤང་རི་
དང་སྤོས་ཀྱི་ངད་ལྡང་བ། བྲག་ཐམས་ཅད་ལ་རྡོའི་སྨན་དང་ཚྭ་སྣའི་རིགས་ཚང་བར་ཡོད་པ། 
སྨན་གྱི་ནགས་ཚལ་གྱི་རྩེ་ན་རྨ་བྱ་དང་ཤང་ཤང་དང་ནེ་ཙོ་ལ་སོགས་པ་བྱ་སྐད་སྙན་པར་སྒྲོག་
པ། རྩ་བ་ན་གླང་པོ་ཆེ་དང་དོམ་དང་གླ་བ་ལ་སོགས་པ་སྨན་བཟང་པོ་ཡོད་པའི་སེམས་ཅན་
25-1-7


ཚང་བར་གནས་པ། སྨན་གྱི་རིགས་སུ་གྱུར་པ་ལ་མ་འཁྲུངས་པའམ་མ་ཚང་བ་མེད་པའི་རྒྱན་
གྱིས་སྤྲས་པའོ། །གཞལ་ཡས་ཁང་དེའི་དབུས་ན་ནོར་བུ་བཻ་ཌཱུཪྻའི་གདན་ལ་སྟོན་པ་བཅོམ་
ལྡན་འདས་འཚོ་མཛད་སྨན་གྱི་བླ་བཻཌཱུཪྻ་འོད་ཀྱི་རྒྱལ་པོ་ཞེས་བྱ་བ་བཞུགས་སོ། །སྟོན་པ་དེ་
ལ་འཁོར་ནི་ལྷ་དང་། དྲང་སྲོང་དང་། ཕྱི་པ་དང་། ནང་པའི་འཁོར་བཞིས་ཡོངས་སུ་བསྐོར་བ་
སྟེ། གང་ཞེ་ན་ལྷའི་འཁོར་ནི་འདི་ལྟ་སྟེ། ལྷའི་སྨན་པ་སྐྱེ་དགུའི་བདག་པོ་མྱུར་བ་དང༌། ལྷའི་
སྨན་པ་ཐ་སྐར་དང༌། ལྷའི་དབང་པོ་བརྒྱ་བྱིན་དང༌། ལྷ་མོ་བདུད་རྩི་མ་ལ་སོགས་པ་ལྷའི་
འཁོར་མང་པོ་དང་ཐབས་གཅིག་ཏུ་བཞུགས་སོ། །དྲང་སྲོང་གི་འཁོར་ནི་འདི་ལྟ་སྟེ། དྲང་
སྲོང་ཆེན་པོ་རྒྱུན་ཤེས་ཀྱི་བུ་དང༌། མེ་བཞིན་འཇུག་དང༌། མུ་ཁྱུད་འཛིན་དང༌། འགྲོ་བ་སྐྱོང་
གི་བུ་དང༌། གཤོལ་འགྲོ་སྐྱེས་དང༌། དཀའ་གཉིས་སྤྱོད་དང༌། ཐང་ལ་འབར་དང༌། ནབས་
སོ་སྐྱེས་ལ་སོགས་པ་དྲང་སྲོང་གི་འཁོར་མང་པོ་དང་ཐབས་གཅིག་ཏུ་བཞུགས་སོ། །ཕྱི་པའི་
འཁོར་ནི་འདི་ལྟ་སྟེ། མུ་སྟེགས་ཀྱི་མེས་པོ་ཚངས་པ་དང༌། མཧཱ་དེ་བ་ཤྲཱི་རལ་པ་ཅན་དང༌། 
ཁྱབ་འཇུག་དང༌། གཞོན་ནུ་གདོང་དྲུག་ལ་སོགས་པ་མུ་སྟེགས་ཀྱི་འཁོར་མང་པོ་དང་ཐབས་
གཅིག་ཏུ་བཞུགས་སོ། །ནང་པའི་འཁོར་ནི་འདི་ལྟ་སྟེ། འཕགས་པ་འཇམ་དཔལ་དང༌། སྤྱན་
རས་གཟིགས་དབང་ཕྱུག་དང༌། ཕྱག་ན་རྡོ་རྗེ་དང༌། ཀུན་དགའ་བོ་དང༌། འཚོ་བྱེད་གཞོན་
ནུ་ལ་སོགས་པ་ནང་པའི་འཁོར་མང་པོ་དང་ཐབས་གཅིག་ཏུ་བཞུགས་སོ། །དེའི་ཚེ་དེའི་དུས་
ན་སྟོན་པས་གསུངས་པའི་ཚིག་གཅིག་ལ་འཁོར་རྣམ་པ་བཞི་སོ་སོ་རང་རང་གིས་སྟོན་པའི་
ལུགས་སུ་གོ་བར་ཟད་དོ། །འདི་ནི་རང་གི་ལུས་ངག་ཡིད་གསུམ་ཉེས་པ་མེད་པར་དྲང་པོར་
བསྲངས་ནས་གཞན་གྱི་ཉེས་པ་མ་སྙོམས་པ་སྙོམས་པར་བྱེད་པས་དྲང་སྲོང་གི་ལུགས་ཞེས་
བྱའོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གླེང་གཞིའི་ལེའུ་
སྟེ་དང་པོའོ།། །། 
25-1-8


དེའི་ཚེ་དེའི་དུས་ན་སྟོན་པ་བཅོམ་ལྡན་འདས་འཚོ་མཛད་སྨན་གྱི་བླ་བཻ་ཌཱུཪྻ་འོད་ཀྱི་
རྒྱལ་པོ་དེས་ནད་བཞི་བརྒྱ་རྩ་བཞི་ཞི་བར་བྱེད་པའི་སྨན་གྱི་རྒྱལ་པོ་ཞེས་བྱ་བའི་ཏིང་ངེ་
འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་ཐུགས་ཀ་ནས་འོད་ཟེར་ཁ་
དོག་བརྒྱ་སྟོང་དུ་མ་ཕྱོགས་བཅུར་འཕྲོས་པས་ཕྱོགས་བཅུའི་འགྲོ་བ་སེམས་ཅན་ཐམས་ཅད་
ཀྱི་སེམས་ཀྱི་ཉེས་པའི་སྐྱོན་བསལ། མ་རིག་པ་ལས་བྱུང་བའི་དུག་གསུམ་གྱི་ནད་ཐམས་
ཅད་ཞི་བར་བྱས་ནས་སླར་ཐུགས་ཀར་འདུས་པ་ལས། སྤྲུལ་པའི་སྟོན་པ་དྲང་སྲོང་རིག་པའི་
ཡེ་ཤེས་ཞེས་བྱ་བ་ཞིག་ཐུགས་ལས་སྤྲུལ་ཏེ་མདུན་གྱི་བར་སྣང་ལ་བཞུགས་ནས་དྲང་སྲོང་གི་
འཁོར་རྣམས་ལ་འདི་སྐད་ཅེས་མདུན་བསུའོ། །ཀྱེ་གྲོགས་པོ་དག་ཤེས་པར་གྱིས་ཤིག མི་ན་
བ་གནས་པར་འདོད་པ་དང་ན་བ་གསོ་བར་འདོད་པའི་གང་ཟག་གིས་གསོ་བ་རིག་པའི་མན་
ངག་ལ་བསླབ་པར་བྱའོ། །ཚེ་རིང་བར་འདོད་པའི་གང་ཟག་གིས་གསོ་བ་རིག་པའི་མན་ངག་
ལ་བསླབ་པར་བྱའོ། །ཆོས་དང་ནོར་དང་བདེ་བ་སྒྲུབ་པར་འདོད་པའི་གང་ཟག་གིས་གསོ་
བ་རིག་པའི་མན་ངག་ལ་བསླབ་པར་བྱའོ། །འགྲོ་བ་གང་ཞིག་ནད་ཀྱི་སྡུག་བསྔལ་ལས་ཐར་
བར་འདོད་པ་དང༌། གཞན་གྱི་སྤྱི་བོས་བསྐུར་བར་འདོད་པའི་གང་ཟག་གིས་གསོ་བ་རིག་
པའི་མན་ངག་ལ་བསླབ་པར་བྱའོ། །དེ་སྐད་ཅེས་བཀའ་སྩལ་པ་དང༌། དེའི་ཚེ་དེའི་དུས་ན་
སྟོན་པ་བཻཌཱུཪྻ་འོད་ཀྱི་རྒྱལ་པོའི་ལྗགས་ལས་འོད་ཟེར་ཁ་དོག་བརྒྱ་སྟོང་དུ་མ་ཕྱོགས་བཅུར་
འཕྲོས་པས་ཕྱོགས་བཅུའི་འགྲོ་བ་སེམས་ཅན་ཐམས་ཅད་ཀྱི་ངག་གི་ཉེས་པའི་སྐྱོན་བསལ། 
ནད་དང་གདོན་ཐམས་ཅད་ཞི་བར་བྱས་ནས་སླར་ལྗགས་ལ་འདུས་པ་ལས། གསུང་ལས་
སྤྲུལ་པའི་དྲང་སྲོང་ཡིད་ལས་སྐྱེས་ཞེས་བྱ་བ་ཞིག་བྱུང་སྟེ་སྟོན་པ་ལ་ཕྱག་དང་སྐོར་བ་བྱས་
ནས་སེང་གེའི་ལྟ་སྟངས་ཀྱིས་སྟོན་པའི་མདུན་དུ་འདུག་སྟེ་འཁོར་གྱི་དྲང་སྲོང་རྣམས་ཀྱི་དོན་
དུ་ཞུ་བའི་ཚིག་འདི་སྐད་ཅེས་གསོལ་ཏོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། དེ་
25-1-9


ལྟར་བདག་གཞན་གྱི་དོན་ཕུན་སུམ་ཚོགས་པ་སྒྲུབ་པར་འདོད་པས་གསོ་བ་རིག་པའི་མན་
ངག་ལ་ཇི་ལྟར་བསླབ་པར་བགྱི། དེ་སྐད་ཅེས་ཞུས་པ་དང༌། ཐུགས་ལས་སྤྲུལ་པའི་དྲང་
སྲོང་རིག་པའི་ཡེ་ཤེས་དེས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་རྣམས་གསོ་བ་
རིག་པའི་མན་ངག་གི་རྒྱུད་ལ་བསླབ་པར་བྱའོ། །ཡན་ལག་ལ་བསླབ་པར་བྱའོ། །གནས་ལ་
བསླབ་པར་བྱའོ། །སྐབས་ལ་བསླབ་པར་བྱའོ། །མདོ་ལ་བསླབ་པར་བྱའོ། །ལེའུ་ལ་བསླབ་
པར་བྱའོ། །ཞེས་གསུངས་པ་དང༌། ཡང་དྲང་སྲོང་ཡིད་ལས་སྐྱེས་ཀྱིས་གསོལ་པ། ཀྱེ་སྟོན་པ་
ལགས། གསོ་བ་རིག་པའི་མན་ངག་གི་རྒྱུད་ལ་ཇི་ལྟར་བསླབ་པར་བགྱི། ཞེས་ཞུས་པ་ལས། 
སྟོན་པས་བཀའ་སྩལ་པ། ཀྱེ་དྲང་སྲོང་ཆེན་པོ་ཉོན་ཅིག རྒྱུད་བཞི་ལ་བསླབ་པར་བྱ་སྟེ་གང་ཞེ་
ན་འདི་ལྟ་སྟེ། རྩ་བའི་རྒྱུད་དང་བཤད་པའི་རྒྱུད། །མན་ངག་རྒྱུད་དང་ཕྱི་མའི་རྒྱུད། །དེ་ལྟར་
རྒྱུད་བཞི་རུ་ཤེས་པར་བྱའོ། །
ཡན་ལག་བརྒྱད་ལ་བསླབ་པར་བྱ་སྟེ་གང་ཞེ་ན་འདི་ལྟ་སྟེ། ལུས་དང་བྱིས་པ་མོ་ནད་
གདོན། །མཚོན་དུག་རྒས་དང་རོ་རྩ་བ། །ཡན་ལག་བརྒྱད་དུ་ཤེས་པར་བྱའོ། །
གནས་བཅུ་གཅིག་ལ་བསླབ་པར་བྱ་སྟེ་གང་ཞེ་ན་འདི་ལྟ་སྟེ། རྩ་བ་མདོ་ཡི་གནས་དང་
གཅིག །གྲུབ་པ་ལུས་ཀྱི་གནས་དང་གཉིས། །འཕེལ་འགྲིབ་ནད་ཀྱི་གནས་དང་གསུམ༌། །
བྱ་བ་སྤྱོད་ལམ་གནས་དང་བཞི། །འཚོ་བ་ཟས་ཀྱི་གནས་དང་ལྔ། །སྦྱོར་བ་སྨན་གྱི་གནས་
དང་དྲུག །ཆ་བྱད་དཔྱད་ཀྱི་གནས་དང་བདུན། །ཐ་མལ་ནད་མེད་གནས་དང་བརྒྱད། །ངོས་
བཟུང་རྟགས་ཀྱི་གནས་དང་དགུ། །གསོ་བྱེད་ཐབས་ཀྱི་གནས་དང་བཅུ། །བྱ་བྱེད་སྨན་པའི་
གནས་དང་ནི། །བཅུ་གཅིག་གནས་སུ་ཤེས་པར་བྱའོ། །སྐབས་བཅོ་ལྔ་ལ་བསླབ་པར་བྱ་སྟེ་
གང་ཞེ་ན་འདི་ལྟ་སྟེ། དང་པོ་ཉེས་གསུམ་གསོ་བའི་སྐབས། །གཉིས་པ་ཁོང་ནད་གསོ་བའི་
སྐབས། །གསུམ་པ་ཚད་པ་གསོ་བའི་སྐབས། །བཞི་པ་ལུས་སྟོད་གསོ་བའི་སྐབས། །ལྔ་པ་
25-1-10


དོན་སྣོད་གསོ་བའི་སྐབས། །དྲུག་པ་གསང་ནད་གསོ་བའི་སྐབས། །བདུན་པ་ཐོར་ནད་གསོ་
བའི་སྐབས། །བརྒྱད་པ་ལྷན་སྐྱེས་རྨ་གསོའི་སྐབས། །དགུ་པ་བྱིས་པ་གསོ་བའི་སྐབས། །བཅུ་
པ་མོ་ནད་གསོ་བའི་སྐབས། །བཅུ་གཅིག་གདོན་ནད་གསོ་བའི་སྐབས། །བཅུ་གཉིས་མཚོན་
རྨ་གསོ་བའི་སྐབས། །བཅུ་གསུམ་དུག་ནད་གསོ་བའི་སྐབས། །བཅུ་བཞི་རྒས་པ་གསོ་བའི་
སྐབས། །བཅོ་ལྔ་རོ་ཙ་གསོ་བའི་སྐབས། །དེ་ལྟར་སྐབས་བཅོ་ལྔར་ཤེས་པར་བྱའོ། །
མདོ་བཞི་ལ་བསླབ་པར་བྱ་སྟེ་གང་ཞེ་ན་འདི་ལྟ་སྟེ། །བརྟག་པ་རྩ་ཆུའི་མདོ་དང་གཅིག །
ཞི་བྱེད་སྨན་གྱི་མདོ་དང་གཉིས། །སྦྱོང་བྱེད་ལས་ཀྱི་མདོ་དང་གསུམ། །འཇམ་རྩུབ་དཔྱད་
ཀྱི་མདོ་དང་བཞི། །དེ་ལྟར་མདོ་བཞི་རུ་ཤེས་པར་བྱའོ། །
ལེའུ་བརྒྱ་དང་ལྔ་བཅུ་དྲུག་ལ་བསླབ་པར་བྱ་སྟེ་གང་ཞེ་ན་འདི་ལྟ་སྟེ། གླེང་གཞི་གླེང་སློང་
གཞི་དང་ངོས་འཛིན་དང་། །གསོ་བའི་ཐབས་དང་རྩིས་ཀྱི་ལེའུ་དྲུག །མདོ་གནས་རྩ་བའི་རྒྱུད་
དུ་ཤེས་པར་བྱ། །བཤད་པའི་སྡོམ་དང་ཆགས་ཚུལ་འདྲ་དཔེ་དང་། །གནས་ལུགས་མཚན་
ཉིད་དབྱེ་བ་འཇིག་ལྟས་དང་། །ནད་ཀྱི་རྒྱུ་རྐྱེན་ཞུགས་ཚུལ་མཚན་ཉིད་དང་། །དབྱེ་བ་རྒྱུན་
དུས་གནས་སྐབས་སྤྱོད་པ་དང་། །ཟས་ཚུལ་ཟས་བསྡམ་ཟས་ཚོད་རན་པར་བཟའ། །སྨན་
གྱི་རོ་ནུས་སྦྱར་ཐབས་ཆ་དཔྱད་དང་། །མི་ན་གནས་དང་ཉེས་པ་དངོས་སྟོན་དང་། །ངན་གཡོ་
སྐྱོན་བརྟག་སྤང་བླང་མུ་བཞིར་བརྟག །གསོ་ཚུལ་སྤྱི་དང་ཁྱད་པར་གསོ་ཐབས་གཉིས། །གསོ་
ཐབས་དངོས་དང་སྨན་པའི་ལེའུ་སྟེ། །དེ་ལྟར་བཤད་པའི་རྒྱུད་ལ་གནས་བཅུ་གཅིག །གཅིག་
གསུམ་གསུམ་བཞི་བཞི་ལྔ་དྲུག་པ་གཅིག །སྡོམས་གཅིག་ལེའུ་སུམ་ཅུ་རྩ་གཅིག་གོ ། །ཞུས་
དང་ཉེས་པ་རླུང་མཁྲིས་བད་ཀན་འདུས། །གཅོང་ནད་མ་ཞུ་སྐྲན་དང་སྐྱ་རྦབ་དང་། །འོར་
དང་དམུ་ཆུ་གཅོང་ཆེན་ཟད་བྱེད་དྲུག །ཚ་བ་སྤྱི་དང་གལ་མདོ་རི་ཐང་མཚམས། །མ་སྨིན་
རྒྱས་སྟོངས་གབ་རྙིང་རྙོགས་པ་དང༌། །འགྲམས་འཁྲུགས་རིམས་དང་འབྲུམ་པ་རྒྱུ་གཟེར་
25-1-11


དང༌། །གག་ལྷོག་ཆམ་པ་ལེའུ་བཅུ་དྲུག་གོ །ལུས་སྟོད་མགོ་བོ་མིག་དང་རྣ་བ་དང༌། །ཁ་དང་
སྣ་དང་ལྦ་བ་ལེའུ་དྲུག །དོན་སྣོད་སྙིང་དང་གློ་མཆིན་མཆེར་མཁལ་དང༌། །ཕོ་བ་རྒྱུ་མ་ལོང་
དང་ལེའུ་བརྒྱད། །གསང་བའི་ནད་ལ་ཕོ་མོ་ཐ་དད་གཉིས། །ཐོར་ནད་སྐད་འགགས་ཡི་ག་
འཆུས་པ་དང༌། །སྐྱིགས་བུ་སྐོམ་དད་དབུགས་མི་བདེ་བ་དང༌། །གླང་ཐབས་སྲིན་ནད་འཁྲུ་
སྐྱུག་དྲི་མ་འགགས། །གཅིན་འགགས་གཅིན་སྙི་ཚད་འཁྲུ་དྲེག་ནད་དང༌། །གྲུམ་བུ་ཆུ་སེར་
རྩ་དཀར་པགས་པའི་ནད། །ཕྲན་བུའི་ནད་དང་ལེའུ་བཅུ་དགུའོ། །ལྷན་སྐྱེས་རྨ་ལ་འབྲས་
དང་གཞང་འབྲུམ་དང༌། །མེ་དབལ་སུར་ཡ་རྨེན་བུ་རླིག་བླུགས་དང༌། །རྐང་བམ་མཚན་བར་
རྡོལ་དང་ལེའུ་བརྒྱད། །བྱིས་པ་ཉེར་སྤྱོད་ནད་དང་དེའི་གདོན་གསུམ། །མོ་ནད་སྤྱི་དང་བྱེ་
བྲག་ཕལ་པ་གསུམ། །འབྱུང་པོ་སྨྱོ་བརྗེད་གཟའ་དང་ཀླུ་གདོན་ལྔ། །རྨ་ལ་རྨ་སྤྱི་མགོ་དང་སྐེ་
ཡི་རྨ། །བྱང་ཁོག་ཡན་ལག་ལེའུ་ལྔ་རུ་བཤད། །དུག་ལ་སྦྱར་དུག་གྱུར་པ་དངོས་དང་གསུམ། །
རྒས་པ་གསོ་བ་བཅུད་ཀྱི་ལེན་པ་དང༌། །རོ་ཙ་ཁུ་བ་གསོ་དང་བུད་མེད་བཙལ། །དེ་ལྟར་
མན་ངག་རྒྱུད་ལ་བཅོ་ལྔའི་སྐབས། །གཅིག་གཅིག་གཉིས་གཉིས་གསུམ་གསུམ་བཞི་གཅིག་
དང༌། །ལྔ་གཉིས་དྲུག་གཉིས་་བརྒྱད་གཉིས་བཅུ་དྲུག་གཅིག །བཅུ་དགུ་གཅིག་དང་ཞུས་
པས་དགུ་བཅུ་གཉིས། །རྩ་ཆུ་ཐང་ཕྱེ་རིལ་བུ་ལྡེ་གུ་དང༌། །སྨན་མར་ཐལ་སྨན་ཁཎྜ་སྨན་ཆང་
དང༌། །རིན་པོ་ཆེ་དང་སྔོ་སྦྱོར་སྣུམ་འཆོས་དང༌། །བཤལ་སྐྱུགས་སྣ་སྨན་འཇམ་རྩི་ནི་རུ་ཧ༌། 
རྩ་སྦྱོང་གཏར་བསྲེག་དུགས་ལུམས་བྱུག་པ་དང༌། །ཐུར་དཔྱད་ཕྱི་མའི་རྒྱུད་ལ་མདོ་བཞི་སྟེ། 
གཉིས་བཅུ་བདུན་དྲུག་ལེའུ་ཉི་ཤུ་ལྔ། །དེ་ལྟར་རྩ་བའི་རྒྱུད་ལ་ལེའུ་དྲུག །བཤད་པའི་རྒྱུད་
ལ་ལེའུ་སུམ་ཅུ་གཅིག །མན་ངག་རྒྱུད་ལ་ལེའུ་དགུ་བཅུ་གཉིས། །ཕྱི་མའི་རྒྱུད་ལ་ལེའུ་ཉི་ཤུ་
ལྔ། །རྒྱུད་བཞི་སྡོམས་པས་བརྒྱ་དང་ལྔ་བཅུ་བཞི། །མཇུག་དོན་ཡོངས་སུ་གཏད་དང་ལྔ་བཅུ་
དྲུག །དེ་དག་ཡན་ལག་བརྒྱད་དུ་འདུས་པ་སྟེ། །ལུས་ལ་བདུན་ཅུ་བྱིས་པ་མོ་ནད་དང༌། །དུག་
25-1-12


གསུམ་གདོན་ལྔ་རྨ་ལྔ་བཅུད་ལེན་གཅིག །རོ་ཙ་ལ་གཉིས་རྒྱུད་གསུམ་སྤྱི་ཁྱབ་ཡིན། །ཞེས་
གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གླེང་སློང་
རྣམ་གྲངས་རྣམ་པར་བཀོད་པའི་ལེའུ་སྟེ་གཉིས་པའོ།། །། 
དེ་ནས་དྲང་སྲོང་ཡིད་ལས་སྐྱེས་ཀྱིས་དྲང་སྲོང་རིག་པའི་ཡེ་ཤེས་ལ་འདི་སྐད་ཅེས་
གསོལ་ཏོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །གསོ་བ་རིག་པའི་རྒྱུད་སྡེ་རྣམ་
བཞི་ལས། །རྩ་བའི་རྒྱུད་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་
བཤད་དུ་གསོལ། །ཞེས་ཞུས་པ་ལས་ཐུགས་ཀྱི་སྤྲུལ་པ་དྲང་སྲོང་རིག་པའི་ཡེ་ཤེས་ཀྱིས་
འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། །དང་པོ་རྩ་རྒྱུད་མདོ་ཡི་
གནས་བསྟན་པ། །རྩ་བ་གསུམ་ལ་འདྲིལ་བའི་སྡོང་པོ་དགུ། །གྱེས་པའི་ཡལ་ག་བཞི་བཅུ་རྩ་
བདུན་ཏེ། །ལོ་འདབ་ཉིས་བརྒྱ་རྩ་བཞིར་རྒྱས་པ་ཡིན། །གསལ་བའི་མེ་ཏོག་འབྲས་བུ་ལྔ་རུ་
སྨིན། །འདི་དག་རྩ་བའི་རྒྱུད་ཀྱི་སྡོམས་སུ་བཤད། །དེ་ཉིད་རྒྱས་པར་བཀྲོལ་ན་འདི་ལྟ་སྟེ། །
ནད་དང་ལུས་ཟུངས་དྲི་མ་རྣམ་པ་གསུམ། །རྣམ་པར་མ་གྱུར་པ་དང་གྱུར་པ་ལས། །ལུས་ནི་
གནས་དང་འཇོམས་པར་བྱེད་པ་ཡིན། །ནད་ནི་རླུང་དང་མཁྲིས་པ་བད་ཀན་གསུམ། །སྲོག་
འཛིན་གྱེན་རྒྱུ་ཁྱབ་བྱེད་མེ་ཐུར་སེལ། །འཇུ་བྱེད་མདངས་སྒྱུར་སྒྲུབ་མཐོང་མདོག་གསལ་ལྔ། །
རྟེན་མྱག་མྱོང་ཚིམ་འབྱོར་བྱེད་བཅོ་ལྔའོ། །དྭངས་མ་ཁྲག་ཤ་ཚིལ་རུས་རྐང་ཁུ་བ། །ལུས་
ཟུངས་བདུན་ཡིན་དྲི་མ་བཤང་གཅི་རྔུལ། །དེ་ལྟར་རྣམ་གྲངས་ཉི་ཤུ་རྩ་ལྔ་པོ། །རོ་དང་ནུས་
པ་སྤྱོད་ལམ་རྣམ་གསུམ་གྱིས། །ཐམས་ཅད་མཉམ་པར་གནས་པས་འཕེལ་འགྱུར་ཞིང༌། །
དེ་ལས་ཟློག་པ་གནོད་པར་འགྱུར་བ་ཡིན། །ནད་ནི་སྐྱེད་པར་བྱེད་པའི་རྒྱུ་གསུམ་སྟེ། །དེ་
ལ་ལྷན་ཅིག་བསྐྱེད་པའི་རྐྱེན་བཞི་ཡིས། །འཇུག་སྒོ་རྣམ་པ་དྲུག་ཏུ་ཞུགས་ནས་ནི། །ལུས་
ཀྱི་སྟོད་སྨད་བར་དུ་གནས་བཅས་ཤིང༌། །རྒྱུ་བར་བྱེད་པའི་ལམ་ནི་བཅོ་ལྔ་རུ། །ན་སོ་ཡུལ་
25-1-13


དུས་དགུ་རུ་འཕེལ་བྱེད་དེ། །འབྲས་བུ་སྲོག་གཅོད་པ་ཡི་ནད་དགུར་སྨིན། །ལྡོག་པའི་རྒྱུ་ནི་
བཅུ་དང་གཉིས་སུ་འགྱུར། །མདོ་དོན་དྲིལ་བས་ཚ་གྲང་གཉིས་སུ་འདུས། །དེ་ལྟར་དྲུག་ཅུ་
རྩ་གསུམ་གསོ་བྱའི་ནད། །དེ་ལ་འདོད་ཆགས་ཞེ་སྡང་གཏི་མུག་གསུམ། །རླུང་མཁྲིས་བད་
ཀན་རིམ་པས་སྐྱེད་པའི་རྒྱུ། །དེ་ལ་དུས་གདོན་ཟས་དང་སྤྱོད་ལམ་བཞིས། །དེ་དག་འཕེལ་
དང་ཟད་པར་གྱུར་ནས་ནི། །པགས་ལ་གྲམ་ཞིང་ཤ་ལ་རྒྱས་པ་དང༌། །རྩ་རུ་རྒྱུ་ཞིང་རུས་ལ་
ཞེན་པ་དང༌། །དོན་ལ་འབབ་ཅིང་སྣོད་དུ་ལྷུང་བར་འགྱུར། །བད་ཀན་ཀླད་པ་ལ་བརྟེན་སྟོད་
ན་གནས། །མཁྲིས་པ་མཆིན་མཁྲིས་ལ་བརྟེན་བར་ན་གནས། །རླུང་ནི་དཔྱི་རྐེད་ལ་བརྟེན་
སྨད་ན་གནས། །རུས་པ་རྣ་བ་རེག་བྱ་སྙིང་སྲོག་ལོང༌། །ཁྲག་རྔུལ་མིག་དང་མཆིན་མཁྲིས་
རྒྱུ་མ་དང༌། །དྭངས་མ་ཤ་ཚིལ་རྐང་ཁུ་བཤང་གཅི་དང༌། །སྣ་ལྕེ་གློ་མཆེར་ཕོ་མཁལ་ལྒང་
པ་རྣམས། །ལུས་ཟུངས་དྲི་མ་དབང་པོ་དོན་སྣོད་ལྔ། །རླུང་མཁྲིས་བད་ཀན་རྒྱུ་བའི་ལམ་དུ་
བཤད། །རྒས་པ་རླུང་མི་དར་མ་མཁྲིས་པའི་མི། །བྱིས་པ་བད་ཀན་མི་ཡིན་ན་སོས་གཉན། །
ངད་ཅན་གྲང་བ་རླུང་གི་ཡུལ་ཡིན་ཏེ། །སྐམ་ས་ཚ་གདུང་ཆེ་བ་མཁྲིས་པའི་ཡུལ། །རླན་ཅན་
སྣུམ་པ་བད་ཀན་ཡུལ་དུ་བཤད། །རླུང་ནད་དབྱར་དུས་རྒོངས་དང་ཐོ་རངས་ལྡང༌། །མཁྲིས་
པ་སྟོན་དུས་ཉིན་གུང་མཚན་གུང་ལྡང༌། །བད་ཀན་དཔྱིད་དུས་སྲོད་དང་སྔ་དྲོ་ལྡང༌། །འཚོ་བ་
གསུམ་ཟད་འདུ་བ་གཤེད་དུ་བབས། །སྦྱོར་བ་མཚུངས་དང་གནད་དུ་བབས་པ་དང༌། །དུས་
འདས་རླུང་ནད་སྲོག་རྟེན་ཆད་པ་དང༌། །ཚ་བ་ལ་འདས་གྲང་བ་གཏིང་འཁར་བ། །ཟུངས་
ཀྱིས་མི་ཐུབ་རྣམ་པར་འཚེ་བ་རྣམས། །འབྲས་བུ་སྲོག་གཅོད་ནད་དགུ་ཞེས་སུ་བཤད། །རླུང་
མཁྲིས་བད་ཀན་ཞི་དང་མ་ཞི་བ། །གཉིས་གཉིས་བཞི་རུ་ལྡོག་པས་བཅུ་གཉིས་སོ། །རླུང་
དང་བད་ཀན་གྲང་བ་ཆུ་ཡིན་ཏེ། །ཁྲག་དང་མཁྲིས་པ་ཚ་བ་མེ་རུ་འདོད། །སྲིན་དང་ཆུ་སེར་ཚ་
གྲང་ཐུན་མོང་གནས། །དེ་ལྟར་རྣམ་གྲངས་བརྒྱད་ཅུ་རྩ་བརྒྱད་ཀྱིས། །ནད་གཞིའི་རྣམ་པ་མ་
25-1-14


ལུས་ཤེས་པར་འགྱུར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་
མན་ངག་གི་རྒྱུད་ལས་གནས་ལུགས་ནད་གཞིའི་ལེའུ་སྟེ་གསུམ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ནད་ལ་བལྟ་རེག་དྲི་བས་ཡོངས་ཤེས་བྱ། །མིག་གིས་བལྟ་བ་ལྕེ་དང་ཆུ་ལ་
བརྟག །བརྟག་པ་འདི་ནི་མཐོང་བ་ཡུལ་རིག་ཡིན། །སོར་མོས་རེག་པ་བརྡ་སྦྱོར་ཕྲིན་པ་རྩ༌། 
བརྟག་པ་འདི་ནི་དཔྱོད་པ་དོན་རིག་ཡིན། །ངག་གིས་དྲི་བ་སློང་རྐྱེན་ན་ལུགས་ཟས། །བརྟག་
པ་འདི་ནི་ཐོས་པ་སྒྲ་རིག་ཡིན། །རླུང་གི་ལྕེ་ནི་དམར་ཞིང་སྐམ་ལ་རྩུབ། །མཁྲིས་ལྕེ་བད་ཀན་
སྐྱ་སེར་མཐུག་པོས་གཡོགས། །བད་ཀན་སྐྱ་གླེག་མདངས་མེད་འཇམ་ལ་རློན། །རླུང་གི་ཆུ་
ནི་ཆུ་འདྲ་སྦུ་བ་ཆེ། །མཁྲིས་ཆུ་དམར་སེར་རླངས་ཆེ་དྲི་མ་དུགས། །བད་ཀན་ཆུ་ནི་དཀར་ལ་
དྲི་རླངས་ཆུང༌། །རླུང་གི་རྩ་ནི་རྐྱལ་སྟོང་སྐབས་སུ་སྡོད། །མཁྲིས་པའི་རྩ་ནི་མགྱོགས་རྒྱས་
གྲིམས་པར་འཕར། །བད་ཀན་རྩ་ནི་བྱིང་རྒུད་དལ་བའོ། །དྲི་བ་ཡང་ལ་རྩུབ་པའི་ཟས་སྤྱོད་
ཀྱི། །རྐྱེན་གྱིས་གཡལ་འདར་བྱ་རྨྱང་གྲང་ཤུམ་བྱེད། །དཔྱི་དང་རྐེད་པ་རུས་ཚིགས་མ་ལུས་
ན། །གཟེར་བ་ངེས་མེད་འཕོ་ཞིང་སྟོང་སྐྱུགས་བྱེད། །དབང་པོ་མི་གསལ་ཤེས་པ་འཚུབ་པ་
དང་། །བཀྲེས་དུས་ན་ཞིང་སྣུམ་བཅུད་ཕན་པར་ངེས། །རྣོ་ཞིང་ཚ་བའི་ཟས་དང་སྤྱོད་ལམ་
གྱིས། །ཁ་ཁ་མགོ་ན་ཤ་དྲོད་ཚ་བ་དང༌། །སྟོད་གཟེར་ཞུ་རྗེས་ན་ཞིང་བསིལ་བ་ཕན། །ལྕི་
ལ་སྣུམ་པའི་ཟས་དང་སྤྱོད་ལམ་གྱིས། །དང་ག་མི་བདེ་ཁ་ཟས་འཇུ་བ་དཀའ། །སྐྱུག་ཅིང་ཁ་
མངལ་ཕོ་བ་འཚིང་ལ་སྒྲེག །ལུས་སེམས་ལྕི་ལ་ཕྱི་ནང་གཉིས་ཀ་གྲང༌། །ཟོས་རྗེས་མི་བདེ་
ཟས་སྤྱོད་དྲོ་ན་འཕྲོད། །དེ་ལྟར་བརྟག་ཐབས་སུམ་ཅུ་རྩ་བརྒྱད་ཀྱིས། །ནད་ཀུན་འཁྲུལ་མེད་
ངེས་པར་གཏན་ལ་འབེབས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་
གསང་བ་མན་ངག་གི་རྒྱུད་ལས་ངོས་འཛིན་རྟགས་ཀྱི་ལེའུ་སྟེ་བཞི་པའོ།། །། 
25-1-15


དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ནད་ལ་གསོ་བར་བྱེད་པའི་གཉེན་པོ་ནི། །ཟས་དང་སྤྱོད་ལམ་སྨན་དཔྱད་
བཞི་ཡིན་ཏེ། །རྟ་བོང་འཕྱི་བ་ལོ་ཤ་ཤ་ཆེན་དང༌། །འབྲུ་མར་ལོ་མར་བུ་རམ་སྒོག་སྐྱ་ཙོང༌། འོ་
མ་ལྕ་བ་ར་མཉེ་ཟན་ཆང་དང༌། །བུར་ཆང་རུས་ཆང་རླུང་ནད་ཅན་གྱི་ཟས། །བ་རའི་ཞོ་དར་
མར་གསར་རི་དྭགས་ཤ །ར་ཤ་སྐོམ་ཤ་གསར་པ་ཆག་ཚེ་དང༌། །སྐྱབས་དང་ཁུར་ཚོད་ཆབ་
ཚ་ཆུ་བསིལ་དང༌། །བསྐོལ་གྲང་མཁྲིས་པའི་ནད་ཀྱི་ཟས་སུ་བཤད། །ལུག་དང་གཡག་རྒོད་
གཅན་གཟན་ཉ་ཡི་ཤ །སྦྲང་རྩི་སྐམ་སའི་འབྲུ་རྙིང་ཟན་དྲོན་དང༌། །འབྲི་ཡི་ཞོ་དར་གར་ཆང་
ཆུ་སྐོལ་ནི། །བད་ཀན་ནད་གཞི་ཅན་གྱིས་བསྟེན་པར་བྱ། །རླུང་ལ་དྲོ་སར་ཡིད་འོང་གྲོགས་
བསྟེན་ཞིང༌། །མཁྲིས་པའི་ནད་ལ་བསིལ་སར་དལ་བར་བསྡད། །བད་ཀན་ནད་ལ་རྩོལ་
བཅག་དྲོ་ས་བསྟེན། །རླུང་ལ་དངར་སྐྱུར་ལན་ཚྭ་སྣུམ་ལྕི་འཇམ། །དངར་ཁ་བསྐ་བསིལ་
སླ་རྟུལ་མཁྲིས་པའི་སྨན། །ཚ་སྐྱུར་བསྐ་རྣོ་རྩུབ་ཡང་བད་ཀན་ནོ། །རོ་ནུས་དེ་ལ་སྦྱོར་བ་ཞི་
སྦྱང་གཉིས། །ཞི་བྱེད་རླུང་ལ་ཁུ་བ་སྨན་མར་གཉིས། །མཁྲིས་པའི་ནད་ལ་ཐང་དང་ཅུར་
ནིས་བསྟེན། །བད་ཀན་ནད་ལ་རིལ་བུ་ཏྲེས་སམ་སྦྱར། །ཁུ་བ་རུས་ཁུ་བཅུད་བཞི་མགོ་ཁྲོལ་
ཏེ། །སྨན་མར་ཛཱ་ཏི་སྒོག་སྐྱ་འབྲས་བུ་གསུམ། །རྩ་བ་ལྔ་དང་སྨན་ཆེན་དག་ལ་སྦྱར། །མ་ནུ་
སླེ་ཏྲེས་ཏིག་ཏ་འབྲས་བུའི་ཐང༌། །ག་བུར་ཙན་དན་གུར་གུམ་ཅུ་གང་ཕྱེ། །བཙན་དུག་ཚྭ་
སྣ་རྣམས་ཀྱི་རིལ་བུ་དང༌། །ཏྲེས་སམ་སེ་འབྲུ་ད་ལིས་རྒོད་མ་ཁ། །ཚྭ་དང་ཅོང་ཞི་བསྲེགས་
པའི་ཐལ་སྨན་ནོ། །སྦྱོང་བྱེད་རླུང་གི་ནད་ལ་འཇམ་རྩི་སྟེ། །མཁྲིས་པ་བཤལ་ལ་བད་ཀན་
སྐྱུགས་ཀྱིས་སྦྱང་། །འཇམ་རྩི་སླེ་འཇམ་བཀྲུ་འཇམ་བཀྲུ་མ་སླེན། །བཤལ་ལ་སྤྱི་བཤལ་
སྒོས་བཤལ་དྲག་དང་འཇམ། །སྐྱུགས་ལ་དྲག་སྐྱུགས་འཇམ་སྐྱུགས་གཉིས་སུ་སྦྱར། །དཔྱད་
དུ་བསྐུ་མཉེ་ཧོར་གྱི་མེ་བཙའ་དང༌། །རྔུལ་དབྱུང་གཏར་ག་ཆུ་ཡི་འཕྲུལ་འཁོར་དང༌། །དུགས་
25-1-16


དང་མེ་བཙའ་རིམ་བཞིན་དཔྱད་ཀྱིས་བཅོས། །དེ་ལྟར་གསོ་ཐབས་དགུ་བཅུ་རྩ་བརྒྱད་པོ། །
ཡེངས་མེད་གུས་པར་བརྩོན་པས་བསྟེན་བྱས་ན། །ནད་ཀྱི་འདམ་ལས་མྱུར་དུ་གྲོལ་བར་
འགྱུར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་གསོ་ཐབས་ཀྱི་ལེའུ་སྟེ་ལྔ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །གནས་ལུགས་ངོས་འཛིན་གསོ་བའི་རྩ་བ་ལ། །རྣམ་གྱུར་མ་གྱུར་བལྟ་
རེག་དྲི་བ་དང༌། །ཟས་སྤྱོད་སྨན་དཔྱད་སྡོང་པོ་དགུ་རུ་འདྲིལ། །ཡལ་ག་ལུས་ལ་ནད་ཟུངས་
དྲི་མ་གསུམ། །ནད་ལ་རྒྱུ་རྐྱེན་འཇུག་སྒོ་གནས་དང་ལམ། །ལྡང་དུས་འབྲས་བུ་ལྡོག་རྒྱུ་མདོ་
དོན་དགུ། །བལྟ་བ་ལྕེ་ཆུ་རེག་པ་རྩ་ལ་གསུམ། །དྲི་བ་སློང་རྐྱེན་ན་ལུགས་གོམས་པ་གསུམ། །
ཟས་ལ་ཟས་སྐོམ་དྲུག་སྟེ་སྤྱོད་ལམ་གསུམ། །སྨན་ལ་རོ་དང་ནུས་པ་གཉིས་གཉིས་དྲུག །
སྦྱར་ཐབས་ཞི་བྱེད་དྲུག་དང་སྦྱོང་བྱེད་གསུམ། །དཔྱད་གསུམ་བཞི་བཅུ་རྩ་བདུན་གྱེས་པ་
ཡིན། །རྒྱས་པའི་ལོ་འདབ་དང་པོ་ཉི་ཤུ་ལྔ། །ནད་ཀྱི་ཟིན་ཏིག་དྲུག་ཅུ་རྩ་གསུམ་དང༌། །བལྟ་
བ་དྲུག་དང་རེག་པའི་རྩ་རྒྱུད་གསུམ། །དྲི་བ་ཉེར་དགུ་རླུང་ཟས་བཅུ་བཞི་དང༌། །མཁྲིས་
ཟས་བཅུ་གཉིས་བད་ཀན་ཟས་སྐོམ་དགུ། །སྤྱོད་ལམ་དྲུག་དང་སྨན་གྱི་རོ་ནུས་དགུ། །ཁུ་
བ་གསུམ་དང་སྨན་མར་རྣམ་པ་ལྔ། །ཐང་ཕྱེ་བཞི་བཞི་རིལ་བུ་རྣམ་པ་གཉིས། །ཏྲེས་སམ་
ལྔ་དང་མི་འདའི་བཅོས་ཐབས་དགུ། །དཔྱད་སྡེ་བདུན་ཏེ་ནད་གཞི་བརྒྱད་ཅུ་བརྒྱད། །སུམ་
ཅུ་རྩ་བརྒྱད་ངོས་བཟུང་བརྟག་པ་སྟེ། །བཅོས་པའི་ཐབས་ལ་དགུ་བཅུ་རྩ་བརྒྱད་དོ། །སྤྱིར་
སྡོམས་ཉིས་བརྒྱ་རྩ་བཞིར་རྒྱས་པ་ཡིན། །མེ་ཏོག་ནད་མེད་ཚེ་རིང་གསལ་བ་ལ། །འབྲས་བུ་
ཆོས་ནོར་བདེ་བ་གསུམ་དུ་སྨིན། །དཔེ་དང་སྦྱར་ཏེ་རྣམ་གྲངས་བཀོད་པ་ཡི། །སྙིང་པོ་ལྟ་བུར་
བསྡུས་པའི་རྩ་རྒྱུད་འདི། ཤེས་རབ་བློ་ལྡན་འགའ་ཡི་སྤྱོད་ཡུལ་ལས། །བློ་རྨོངས་སྐྱེ་བོ་རྣམས་
25-1-17


ཀྱིས་རྟོགས་མི་འགྱུར། །སྤྲོས་དགའ་རྒྱ་ཆེན་གཞུང་དུ་བལྟ་བར་གྱིས། །ཞེས་གསུངས་ནས་
དྲང་སྲོང་རིག་པའི་ཡེ་ཤེས་དེ་སྨན་པའི་རྒྱལ་པོའི་ཐུགས་ཀར་ཐིམ་པར་གྱུར་ཏོ། །བདུད་རྩི་
སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔེ་དོན་གྱི་རྣམ་གྲངས་རྣམ་པར་
བཀོད་པའི་ལེའུ་སྟེ་དྲུག་པའོ།། །།བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་
གི་རྒྱུད་ལས་རྩ་བའི་རྒྱུད་ཅེས་བྱ་བ་རྫོགས་སོ།། །།ཞུས་དག
༈ རྗེ་བཙུན་ཏཱ་ར་ནཱ་ཐའི་ཐུགས་རྗེའི་ཤུགས། །རབ་འབྱམས་བརྒྱད་ཁྲི་བཞི་སྟོང་ཆོས་ཀྱི་
སྒོ། །མ་ལུས་དགོས་འདོད་སྩོལ་བའི་འཁྲུལ་འཁོར་ལས། །རྒྱུད་འདི་འགྲོ་བ་ཡོངས་ཀྱི་དཔལ་
དུ་བཀོད། །
25-1-18


༄༅། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་བཤད་པའི་རྒྱུད་ཅེས་བྱ་བ་བཞུགས། 
༄༅། །དེ་ནས་སྟོན་པ་བཅོམ་ལྡན་འདས་འཚོ་མཛད་སྨན་གྱི་བླ་བཻཌཱུཪྻ་འོད་ཀྱི་རྒྱལ་པོ་
དེས་ཏིང་ངེ་འཛིན་དེ་ལས་བཞེངས་ཏེ། སྨྲ་བའི་སེང་གེ་ཞེས་བྱ་བའི་སྨན་གྱི་ཏིང་ངེ་འཛིན་ལ་
སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་དབུའི་གཙུག་ནས་འོད་ཟེར་ཁ་དོག་
བརྒྱ་སྟོང་དུ་མ་ཕྱོགས་བཅུར་འཕྲོས་པས་ཕྱོགས་བཅུའི་འགྲོ་བ་སེམས་ཅན་ཐམས་ཅད་ཀྱི་
ལུས་ཀྱི་ཉེས་པའི་སྐྱོན་བསལ། རླུང་མཁྲིས་བད་ཀན་གྱི་ནད་ཐམས་ཅད་ཞི་བར་བྱས་ནས་
སླར་དབུའི་གཙུག་ཏུ་འདུས་པ་ལས། སྤྲུལ་པའི་སྟོན་པ་དྲང་སྲོང་རིག་པའི་ཡེ་ཤེས་ཞེས་བྱ་
བ་ཞིག་སྐུ་ལས་སྤྲུལ་ཏེ་མདུན་གྱི་བར་སྣང་ལ་བཞུགས་པ་ལས། །གསུང་ལས་སྤྲུལ་པའི་དྲང་
སྲོང་ཡིད་ལས་སྐྱེས་ཞེས་བྱ་བ་དེས་སྟོན་པ་ལ་ཕྱག་དང་སྐོར་བ་བྱས་ནས་འདི་སྐད་ཅེས་ཞུས་
སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །བསྡུས་དོན་རྩ་རྒྱུད་དེ་ལྟར་གསུངས་
ལགས་ན། །བཤད་པའི་རྒྱུད་ལ་ཇི་ལྟར་བསླབ་པར་བགྱི། །འཚོ་མཛད་སྨན༌པའི་རྒྱལ་པོས་
བཀའ་སྩོལ་ཅིག །དེ་སྐད་ཅེས་ཞུས་པ་དང༌། སྐུ་ལས་སྤྲུལ་པའི་དྲང་སྲོང་རིག་པའི་ཡེ་ཤེས་
དེས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། །གཉིས་པ་བཤད་པའི་
རྒྱུད་ལ་བསླབ་པ་ནི། །འགྲོ་དྲུག་གཙོ་བོར་གྱུར་པ་མི་ལུས་ལ། །མི་ན་གནས་དང་ན་བ་གསོ་
བ་དང༌། །ཚེ་རིང་ཆོས་ནོར་བདེ་བ་སྒྲུབ་པའི་ཕྱིར། །གསོ་བ་རིག་པའི་དོན་རྣམས་མདོར་བསྡུ་
ན། །གསོ་བྱ་གསོ་བྱེད་ཇི་ལྟར་གསོ་བ་དང༌། །གསོ་བ་པོ་དང་རྣམ་པ་བཞི་རུ་བཤད། །དང་པོ་
25-1-19


གསོ་བར་བྱ་བའི་ཡུལ་བསྟན་པ། །གང་གི་དོན་དུ་གསོ་བ་ལུས་དང་ནི། །གང་གསོ་དེ་ལས་
བྱུང་བའི་ནད་དུ་བསྟན། །ནད་ལ་གསོ་བར་བྱེད་པའི་གཉེན་པོ་ནི། །སྤྱོད་ལམ་ཟས་དང་སྨན་
དང་དཔྱད་རྣམས་སོ། །ནད་དེ་གཉེན་པོས་ཇི་ལྟར་གསོ་བ་ལ། །ནད་མེད་གནས་ཤིང་རིང་དུ་
འཚོ་བ་དང༌། །རྣམ་གྱུར་ན་བ་གསོ་བར་བྱ་བའོ། །དེ་ལ་ངོས་བཟུང་བརྟག་པའི་ཐབས་དང་
ནི། །རྟོགས་ནས་ཇི་ལྟར་གསོ་བའི་གསོ་ཚུལ་དང༌། །གང་གིས་གསོ་བའི་གསོ་ཐབས་གསུམ་
དུ་བཤད། །དེ་ལྟར་གསོ་བར་བྱེད་པའི་གསོ་བ་པོ། །རྩ་བ་བཞི་ལ་ཡན་ལག་བཅུ་གཅིག་སྟེ། །
འདི་དག་བཤད་པའི་རྒྱུད་ཀྱི་སྡོམས་ཚིག་ཡིན། །ཞེས་གསུངས་སོ། །བདུད་རྩི་སྙིང་པོ་ཡན་
ལག་བརྒྱད་པ་གསང་བ་མན་ངག་གི་རྒྱུད་ལས་བཤད་པའི་རྒྱུད་ཀྱི་སྡོམས་ཚིག་བསྟན་པའི་
ལེའུ་སྟེ་དང་པོའོ།། །། 
དེ་ནས་དྲང་སྲོང་ཡིད་ལས་སྐྱེས་ཀྱིས་སྟོན་པ་དྲང་སྲོང་རིག་པའི་ཡེ་ཤེས་ལ་འདི་སྐད་
ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །གྲུབ་པ་ལུས་ཀྱི་གནས་ལ་
ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་
ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །དང་པོ་གང་གི་དོན་དུ་གསོ་བ་
ལུས། །གྲུབ་པ་ལུས་གནས་བསྟན་པ་འདི་ལྟ་སྟེ། །ཆགས་ཚུལ་འདྲ་དཔེ་གནས་ལུགས་མཚན་
ཉིད་དང༌། །དབྱེ་བ་ལས་དང་འཇིག་ལྟས་བདུན་དུ་བཤད། །དེ་ལ་དང་པོ་ཆགས་པའི་ཚུལ་
བསྟན་པ། །ཆགས་རྒྱུ་འཕེལ་རྐྱེན་བཙའ་རྟགས་རྣམ་པ་གསུམ། །དང་པོ་ཕ་མའི་ཁུ་ཁྲག་སྐྱོན་
མེད་པ། །རྣམ་ཤེས་ལས་དང་ཉོན་མོངས་ཀྱིས་བསྐུལ་ནས། །འབྱུང་ལྔ་ཚོགས་པ་མངལ་དུ་
ཆགས་པའི་རྒྱུ། །དཔེར་ན་གཙུབས་ཤིང་དག་ལས་མེ་འབྱུང་མཚུངས། །ཁུ་ཁྲག་རླུང་གིས་
རྩུབ་ནག་རོ་བསྐ་ལ། །མཁྲིས་པས་རོ་སྐྱུར་མདོག་སེར་དྲི་མ་མནམ། །བད་ཀན་སྐྱ་འབྱར་རོ་
དངར་བསིལ་བ་སྟེ། །ཁྲག་གིས་རུལ་ཞིང་བད་རླུང་དུམ་བུར་ཆད། །ཁྲག་མཁྲིས་རྣག་འདྲ་
25-1-20


བད་མཁྲིས་མདུད་པ་ཅན། །རླུང་མཁྲིས་སྐམ་ཞིང་འདུས་པ་བཤང་གཅི་འདྲ། །འདི་དག་སྐྱོན་
གྱིས་ས་བོན་བྱེད་མི་ནུས། །ལས་མ་འཛོམ་ན་རྣམ་ཤེས་མི་འཇུག་སྟེ། །ས་མེད་མི་འགྲུབ་ཆུ་
མེད་སྡུད་མི་ནུས། །མེ་མེད་མི་སྨིན་རླུང་མེད་འཕེལ་མི་འགྱུར། །ནམ་མཁའ་མེད་པར་འཕེལ་
བའི་གོ་མི་ཕྱེད། །ཁུ་བ་དཀར་ལྕི་དངར་ལ་མང་བ་དང༌། །ཟླ་མཚན་ཚོས་ཁུ་རི་བོང་ཁྲག་འདྲ་
བ། །བཀྲུས་ན་དག་འགྱུར་སྐྱོན་མེད་མངལ་ཆགས་བྱེད། །བུད་མེད་བཅུ་གཉིས་ལོན་ནས་ལྔ་
བཅུའི་བར། །དྭངས་མ་ལས་བྱུང་ཟླ་རེར་བསགས་པའི་ཁྲག །རྩ་ཆེན་གཉིས་ནས་ནག་ཅིང་དྲི་
བྲལ་བ། །རླུང་གིས་མངལ་གྱི་སྒོར་འབྱིན་ཞག་གསུམ་འཛག །དེ་རྟགས་ཉམ་ཆུང་བཞིན་རས་
ངན་པ་དང༌། །ནུ་མ་རྐེད་པ་མགུལ་བ་མིག་དཀུ་གཡོ། །ཟླ་མཚན་ལྡན་པ་སྐྱེས་པ་འདོད་པའི་
རྟགས། །མངལ་ཁ་བྱེ་ནས་ཞག་ནི་བཅུ་གཉིས་བར། །དང་པོའི་ཞག་གསུམ་བཅུ་གཅིག་བུ་མི་
ལེན། །གཅིག་གསུམ་ལྔ་བདུན་དགུ་ལ་བུར་འགྱུར་ཏེ། །གཉིས་དང་བཞི་པ་དྲུག་པ་བུ་མོར་
འགྱུར། །ཉི་མ་ནུབ་པས་པད་མའི་ཁ་ཟུམ་བཞིན། །བཅུ་གཉིས་འདས་ནས་ཁུ་བ་མངལ་མི་
སྡོད། །ཁུ་བ་མང་བ་བུ་རུ་སྐྱེ་འགྱུར་གྱི། །ཟླ་མཚན་མང་བ་བུ་མོར་སྐྱེ་བར་འགྱུར། །ཆ་མཉམ་
མ་ནིང་བྱེ་ལས་མཚེ་མར་སྐྱེ། །སྐྱེ་གནས་མི་མཐུན་པ་དང་གཟུགས་མི་སྡུག །འདི་དག་གནོད་
པའི་དྲི་མས་སྐྱེ་བར་འགྱུར། །མངལ་ཆགས་མཚན་མས་ས་བོན་འཛིན་པ་དང༌། །འདོད་པ་
ངོམས་ཤིང་ལུས་སྙོམ་ལྕི་བ་ཡིན། །ཕ་ཡི་ཁུ་བས་རུས་པ་ཀླད་གཞུང་སྐྱེད། །མ་ཡི་ཟླ་མཚན་
ཤ་ཁྲག་དོན་སྣོད་སྐྱེད། རང་གི་སེམས་ལས་དབང་པོའི་རྣམ་ཤེས་འབྱུང༌། །ས་ལས་ཤ་དང་
རུས་པ་སྣ་དྲི་སྐྱེད། །ཆུ་ལས་ཁྲག་དང་ལྕེ་རོ་རླན་པ་སྐྱེད། །མེ་ལས་དྲོད་དང་མདོག་གསལ་
མིག་གཟུགས་སྐྱེད། །རླུང་ལས་དབུགས་དང་པགས་པ་རེག་བྱ་སྐྱེད། །མཁའ་ལས་བུ་ག་རྣ་
བ་སྒྲ་སྐྱེད་འགྱུར། །གོམས་པས་བྱ་བ་ལ་འཇུག་སྣང་བ་མཆེད། །རྒྱུ་རྐྱེན་རྟེན་འབྲེལ་འཛོམས་
པས་ལུས་སུ་འགྲུབ། །དེ་ལྟར་ཆགས་ནས་འཕེལ་བའི་ཚུལ་བསྟན་པ། །མངལ་ཆགས་འཕེལ་
25-1-21


བའི་རྒྱུ་ནི་ལྟེ་བ་སྟེ། །བུ་སྣོད་གཡས་གཡོན་རྩ་དང་ལྟེ་བ་འབྲེལ། །རྩ་གཉིས་བསམ་སེ་བཅུད་
ཀྱི་རྟེན་དང་འབྲེལ། །དེ་ཕྱིར་མ་ཡི་ཁ་ཟས་དྭངས་མ་ཡིས། །རིམ་གྱིས་མངལ་དུ་རྣམ་པར་
འཕེལ་འགྱུར་ཏེ། །དཔེར་ན་རྫིང་ཡུར་ཆུ་ཡིས་ཞིང་སྐྱེད་འདྲ། །དེ་ཡང་བདུན་ཕྲག་སུམ་ཅུ་
རྩ་བརྒྱད་ཀྱི། །རླུང་གིས་བསྒྱུར་ནས་ཟླ་དགུར་འཕེལ་འགྱུར་ཏེ། །ཟླ་བ་དང་པོ་བདུན་ཕྲག་
དང་པོའི་དུས། །འོ་མར་རུ་མ་བླུག་འདྲ་ཁུ་ཁྲག་འདྲེས། །བདུན་ཕྲག་གཉིས་པ་ནུར་ནུར་པོ་
རུ་འགྱུར། །བདུན་ཕྲག་གསུམ་པ་ཞོ་ཆགས་ལྟ་བུར་སྣང༌། །སྐྱེས་བུ་འདོད་པས་དུས་འདིར་
ཐབས་བསྟེན་ཏེ། །མཚན་མ་གསལ་བར་མ་གྱུར་གོང་དུ་བྱ། །འདི་སྟོབས་ལྡན་པས་ལས་
ཀྱང་ཟིལ་གནོན་ནུས། །སྐར་མ་རྒྱལ་ལ་སྐྱེས་པ་བུ་ཡི་གཟུགས། །ལྕགས་སྣ་ཁ་ཡར་ལས་
བརྡུངས་སོལ་མེ་ལ། །མདོག་འགྱུར་བསྲེགས་པ་བ་ཡི་འོ་མའི་ནང༌། །གོང་གི་གྲངས་གསུར་
ཁུ་བ་སྙིམ་གང་བླུད། །ཉི་མ་ཟླ་བའི་དྭངས་མ་བཟའ་བ་དང༌། །བཅིངས་དང་གདགས་པའི་
རྟེན་འབྲེལ་བསྟེན་པར་བྱ། །ཉལ་པོ་རྩོལ་དྲག་མཚན་མོ་གཉིད་མ་ལོག །ཉིན་གཉིད་ཤུགས་
བཀག་ཚ་རྣོ་ལྕི་བ་དང༌། །བཤང་དགག་ཟས་དང་རློན་ཁྲུས་མས་བཏང་དང༌། །གཏར་ག་ལ་
སོགས་ཟླ་བརྒྱད་བར་དུ་སྤང༌། །ཅི་ཕྱིར་མངལ་འཇིག་འཆི་འམ་དཀུ་སྐམས་འགྱུར། །བཞི་
པ་གོར་གོར་མེར་མེར་ནར་ནར་པོ། །དེ་ལས་ཕོ་མོ་མ་ནིང་རིམ་པར་འགྱུར། །དེ་རྟགས་དཀུ་
ལྕི་ལུས་རིད་ཡི་ག་འགག །གཡལ་རྙོང་སྒྱིད་སྐྱུར་ནུ་མ་སྐྱེ་བ་དང༌། །སྐྱུར་ལ་དགའ་ཞིང་སྙིང་
ལ་སྣ་ཚོགས་འདོད། །དེ་བཀག་མངལ་འཇིག་གཟུགས་མི་སྡུག་པར་འགྱུར། །དེ་བས་གནོད་
པའང་ཕན་བསྲེས་ཅུང་ཟད་བྱིན། །ཟླ་བ་གཉིས་པ་བདུན་ཕྲག་ལྔ་པ་ལ། །མངལ་གནས་
ལུས་ཀྱི་དང་པོ་ལྟེ་བ་ཆགས། །དྲུག་པ་ལྟེ་བ་ལ་བརྟེན་སྲོག་རྩ་ཆགས། །བདུན་པར་མིག་གི་
དབང་པོ་གཟུགས་སུ་དོད། །བརྒྱད་པ་དེ་ལ་བརྟེན་ནས་མགོ་དབྱིབས་ཆགས། །དགུ་པར་
ལུས་དབྱིབས་ཁོག་པ་སྟོད་སྨད་ཆགས། །ཟླ་བ་གསུམ་པ་བདུན་ཕྲག་བཅུ་པ་ལ། །དཔུང་པ་
25-1-22


གཉིས་དང་དཔྱི་གཉིས་འབུར་དུ་དོད། །བཅུ་གཅིག་དབང་པོ་དགུ་ཡི་གཟུགས་དབྱིབས་དོད། །
བཅུ་གཉིས་པ་ལ་དོན་ལྔའི་གཟུགས་དབྱིབས་དོད། །བཅུ་གསུམ་པ་ལ་སྣོད་དྲུག་གཟུགས་
དབྱིབས་དོད། །ཟླ་བ་བཞི་པ་བདུན་ཕྲག་བཅུ་བཞི་ལ། །དཔུང་རྐང་བརླ་རྐང་བཞི་པོའི་
གཟུགས་དབྱིབས་དོད། །བཅོ་ལྔ་པ་ལ་རྐང་ལག་རྗེ་ངར་དོད། །བཅུ་དྲུག་པ་ལ་སོར་མོ་ཉི་ཤུ་
དོད། །བཅུ་བདུན་ཕྱི་ནང་འབྲེལ་བའི་རྩ་རྣམས་ཆགས། །ཟླ་ལྔ་བདུན་ཕྲག་བཅོ་བརྒྱད་ཤ་
ཚིལ་ཆགས། །བཅུ་དགུ་པ་ལ་ཆུ་བ་རྒྱུས་པ་ཆགས། །ཉི་ཤུ་པ་ལ་རུས་དང་རྐང་མར་ཆགས། །
རྩ་གཅིག་པ་ལ་ཕྱི་ཡི་པགས་པ་གཡོགས། །དེ་ནས་ཟླ་དྲུག་བདུན་ཕྲག་རྩ་གཉིས་ལ། །དབང་
པོ་སྒོ་དགུའི་བུ་ག་རྣམ་པར་བྱེ། །རྩ་གསུམ་སྐྲ་དང་བ་སྤུ་སེན་མོ་སྐྱེ། །རྩ་བཞི་པ་ལ་དོན་སྣོད་
གསལ་བར་སྨིན། །དེ་དུས་བདེ་དང་སྡུག་བསྔལ་ཤེས་པར་འགྱུར། །རྩ་ལྔ་པ་ལ་རླུང་གི་རྒྱུ་
བ་འབྱུང༌། །རྩ་དྲུག་པ་ལ་སེམས་ཀྱི་དྲན་པ་གསལ། །དེ་ནས་ཟླ་བདུན་བདུན་ཕྲག་རྩ་བདུན་
ནས། །སུམ་ཅུའི་བར་གྱིས་ཐམས་ཅད་གསལ་རྫོགས་འགྱུར། །ཟླ་བ་བརྒྱད་པ་བདུན་ཕྲག་
སོ་གཅིག་ནས། །སོ་ལྔའི་བར་དུ་ཐམས་ཅད་ཆེར་འཕེལ་བྱེད། །མ་དང་བུ་གཉིས་ཐང་རེ་གཟི་
མདངས་འཕོ། །ཟླ་བ་དགུ་པ་བདུན་ཕྲག་སོ་དྲུག་ནས། །མངོན་པར་མི་དགའ་སྐྱོ་བའི་འདུ་
ཤེས་འབྱུང༌། །སོ་བདུན་པ་ལ་ལོག་པའི་འདུ་ཤེས་སྐྱེ། །སོ་བརྒྱད་མགོ་མཇུག་ལོག་སྟེ་མངལ་
ནས་འབྱིན། །འོན་ཀྱང་ཁྲག་ཟགས་པ་ན་འཕེལ་མི་ནུས། །མངལ་རྒྱས་ཟླ་བ་ཚང་ཡང་བཙའ་
བ་དཀའ། །རླུང་གིས་དཀུ་བཀག་ཟླ་བ་ཚང་ཡང་འགོར། །དེ་ལྟར་མངལ་དུ་འཕེལ་ཞིང་སྨིན་
པའི་ཚེ། །ཟླ་དགུ་འདས་ནས་བཙའ་བའི་དུས་ཡིན་ཏེ། །དེ་ཡང་གཡས་ལོགས་ལ་བརྟེན་དཀུ་
གཡས་མཐོ། །ལུས་ཡང་རྨི་ལམ་དག་ན་སྐྱེས་པ་མཐོང༌། །ནུ་ཞོ་གཡས་པ་སྔར་འབྱུང་ཁྱེའུ་
སྐྱེ། །སྐྱེས་པ་ཕྲད་འདོད་གླུ་གར་རྒྱན་ལ་དགའ། །གོང་ལས་ཟློག་པ་བུ་མོ་སྐྱེ་བའི་རྟགས། །དེ་
དག་འདྲེས་ལས་མ་ནིང་འབྱུང་བ་སྟེ། །དབུས་དམའ་མཐའ་གཉིས་མཐོ་ན་མཚེ་མར་སྐྱེ། །དེ་
25-1-23


ནས་མྱུར་དུ་བཙའ་རྟགས་ལུས་རྙོང་ཞིང༌། །དཀུ་ལྷོད་སྨད་ལྕི་ཚང་ར་རྐེད་པ་ན། །ལྟོ་བ་ཆུ་སོ་
ན་ཞིང་ལྡང་དུབ་བྱེད། །མཚན་བྱེ་གཅིན་མང་དབང་མེད་ན་ཟུག་ལྡང༌། །བུད་མེད་བཙའ་མྱོང་
གིས་བསྐོར་བཙའ་བར་བྱ། །སྲོག་འབྲལ་འདྲ་བའི་ནད་སོས་ཚས་ཀྱིས་གསོ། །ཞེས་གསུངས་
སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་ཆགས་
ཚུལ་བསྟན་པའི་ལེའུ་སྟེ་གཉིས་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །འདྲ་དཔེ་ཕུང་པོའི་གནས་ལུགས་བསྟན་པ་ནི། །དཔྱི་རུས་གཉིས་ནི་རྩིག་
པའི་འགྲམ་གཞི་འདྲ། །སྒལ་ཚིགས་གསེར་གྱི་དོང་ཙེ་བརྩེགས་པ་འདྲ། །སྲོག་པ་རྩ་ནི་མཆོང་
གི་ཀ་བ་འདྲ། །བྲང་རུས་གྲུ་བཞི་གདུང་མ་བཀལ་བ་འདྲ། །རྩིབ་མ་ཉེར་བཞི་ཕྱམ་འགྲེམས་
ལེགས་པ་འདྲ། །ལྷ་རུ་རྩེ་ནི་ཕྱམ་གྱི་རྟེན་མ་འདྲ། །རྩ་དང་ཆུ་རྒྱུས་གྲལ་ཕྱམ་བཀོད་པ་འདྲ། །
ཤ་དང་པགས་པ་འདག་ཞལ་བྱས་པ་འདྲ། །སྒྲོག་རུས་གཉིས་ནི་མཁར་བད་བཏགས་
པ་འདྲ། །སོག་པ་གཉིས་ནི་གྲུ་ཕུབས་བྱས་པ་འདྲ། །མགོ་བོ་དབུ་རྩེ་བ་གམ་བྱས་པ་འདྲ། །
དབང་པོ་སྒོ་ལྔ་སྐར་ཁུང་གཏོད་པ་འདྲ། །ཐོད་པའི་རུས་པ་རྒྱ་ཕུབས་བཀལ་བ་འདྲ། །ཚངས་
པའི་བུ་ག་དུད་ཁུང་ཕྱེ་བ་འདྲ། །རྣ་བ་གཡས་གཡོན་ཁྱུང་མགོ་འགྱིང་བ་འདྲ། །སྣ་བུག་མཛེས་
པའི་རྒྱན་ཏེ་ཏོག་དང་འདྲ། །སྐྲ་ལོ་ཕོ་གྱོ་མོ་གྱོའི་རྫ་དང་འདྲ། །ལག་པ་གཉིས་ནི་དར་དཔྱངས་
བཏགས་པ་འདྲ། །བྱང་ཁོག་སྟོད་སྨད་ཁྱམས་སྟོད་ཁྱམས་སྨད་འདྲ། །མཆིན་དྲི་དར་གྱི་ཡོལ་
བ་བཀྲམ་པ་འདྲ། །སྙིང་ནི་རྒྱལ་པོ་གདན་ལ་བཞུགས་པ་འདྲ། །གློ་བ་མ་ལྔ་ནང་གི་བློན་པོ་
འདྲ། །གློ་བ་བུ་ལྔ་རྒྱལ་པོའི་སྲས་དང་འདྲ། །མཆིན་མཆེར་གཉིས་ནི་བཙུན་མོ་ཆེ་ཆུང་འདྲ། །
མཁལ་མ་ཕྱི་བློན་གྱད་པ་གདུང་འདེགས་འདྲ། །བསམ་སེ་འུ་ནི་ནོར་གྱི་བང་མཛོད་འདྲ། །ཕོ་
བ་གཡོས་བཅུ་བྱེད་པའི་ཁོག་མ་འདྲ། །རྒྱུ་མ་ལོང་ཁ་བཙུན་མོའི་གཡོག་དང་འདྲ། །མཁྲིས་པ་
25-1-24


སྡོར་གྱི་རྐྱལ་པ་བཀལ་བ་འདྲ། །ལྒང་ཕུག་ཆུ་ཡིས་རྫ་མ་བཀང་བ་འདྲ། །འོག་སྒོ་གཉིས་ནི་ཆུ་
ཁུང་བཞག་པ་འདྲ། །རྐང་པ་གཉིས་ནི་སྒོ་ཡི་རྟ་བབས་འདྲ། །གཉན་པའི་གནད་ནི་རྒྱལ་པོས་
མངའ་བསྐུར་འདྲ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་ལུས་ཀྱི་འདྲ་དཔེ་བསྟན་པའི་ལེའུ་སྟེ་གསུམ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ལུས་ཀྱི་གནས་ལུགས་བསྟན་པ་རྣམ་བཞི་སྟེ། །ལྡང་ཚད་ལུས་ཟུངས་
གནས་ལུགས་བསྟན་པ་དང༌། །འབྲེལ་པ་རྩ་ཡི་གནས་ལུགས་བསྟན་པ་དང༌། །གཉན་པ་
གནད་ཀྱི་གནས་ལུགས་བསྟན་པ་དང༌། །རྒྱུ་ལམ་བུ་གའི་གནས་ལུགས་བསྟན་པའོ། །དང་
པོ་རླུང་གི་ལྡང་ཚད་ལྒང་ཕུག་གང༌། །མཁྲིས་པའི་ལྡང་ཚད་རང་གི་གསང་སྒྲོ་གང༌། །བད་
ཀན་ལྡང་ཚད་རང་གི་སྙིམ་པ་གསུམ། །ཁྲག་དང་ཕྱི་སའི་ལྡང་ཚད་སྙིམ་པ་བདུན། །གཅིན་
དང་ཆུ་སེར་ལྡང་ཚད་སྙིམ་པ་བཞི། །ཞག་དང་ཚིལ་བུའི་ལྡང་ཚད་སྙིམ་པ་དོ། །མདངས་དང་
ཁུ་བའི་ལྡང་ཚད་ཁྱོར་བ་རེ། །ཀླད་པའི་ལྡང་ཚད་རང་གི་སྙིམ་པ་གང༌། །ཤ་ཡི་ལྡང་ཚད་སྤར་
ཚད་ལྔ་བརྒྱ་སྟེ། །བུད་མེད་བརླ་དང་ནུ་མ་ཉི་ཤུས་ལྷག །རུས་པའི་ལྡང་ཚད་རུས་རིགས་ཉི་
ཤུ་གསུམ། །དེ་ལས་སྒལ་ཚིགས་འཕང་ལོ་ཉི་ཤུ་བརྒྱད། །རྩིབ་མའི་གྲངས་ནི་ཉི་ཤུ་རྩ་བཞི་
སྟེ། །སོ་ཡི་གྲངས་ནི་སུམ་ཅུ་རྩ་གཉིས་མཆིས། །རུས་པའི་དུམ་བུ་སུམ་བརྒྱ་དྲུག་ཅུ་སྟེ། །ཡན་
ལག་ཚིགས་ཆེན་རྣམ་པ་བཅུ་གཉིས་ཡོད། །ཚིགས་ཕྲན་ཉིས་བརྒྱ་དང་ནི་ལྔ་བཅུའོ། །ཆུ་བ་
བཅུ་དྲུག་རྒྱུས་པ་དགུ་བརྒྱ་མཆིས། །སྐྲ་ཡི་ཉག་མ་ཉི་ཁྲི་ཆིག་སྟོང་སྟེ། །བ་སྤུའི་བུ་ག་བྱེ་བ་ས་
ཡ་མཆིས། །དོན་ལྔ་སྣོད་དྲུག་བུ་ག་སྒོ་དགུ་ཡོད། །འཛམ་གླིང་རང་ལུས་འདོམ་གང་གྲུ་བཞི་
སྟེ། །གཟུགས་ངན་རྣམས་ལ་རང་ཁྲུ་ཕྱེད་དང་བཞི། །འབྲེལ་པ་རྩ་ཡི་གནས་ལུགས་བསྟན་
པ་ནི། །ཆགས་སྲིད་འབྲེལ་པ་ཚེ་ཡི་རྩ་དང་བཞི། །ཆགས་པའི་རྩ་ནི་ལྟེ་བ་ལས་གསུམ་གྱེས།  །
25-1-25

 
རྩ་གཅིག་གྱེན་ལ་སོང་བས་ཀླད་པ་ཆགས། །གཏི་མུག་ཀླད་པར་བརྟེན་ནས་གནས་པ་སྟེ། །
དེ་ལས་བད་ཀན་སྐྱེད་པས་སྟོད་ན་གནས། །རྩ་གཅིག་བར་དུ་ཟུག་པས་སྲོག་རྩ་ཆགས། །ཞེ་
སྡང་སྲོག་རྩ་ཁྲག་ལ་བརྟེན་ནས་གནས། །དེ་ལས་མཁྲིས་པ་སྐྱེད་པས་བར་ན་གནས། །རྩ་
གཅིག་ཐུར་དུ་ཟུག་པས་གསང་བ་ཆགས། །འདོད་ཆགས་ཕོ་མོའི་གསང་བར་གནས་པ་སྟེ། །
དེ་ལས་རླུང་སྐྱེད་སྨད་ན་གནས་པ་ཡིན། །སྲིད་པའི་རྩ་བོ་ཆེ་ནི་རྣམ་བཞི་སྟེ། །དབང་པོ་ཡུལ་
ལ་འཆར་བར་བྱེད་པའི་རྩ། །ཀླད་པ་ལ་སྲིད་རྩ་ཕྲན་ལྔ་བརྒྱས་བསྐོར། །དྲན་པའི་དབང་
པོ་གསལ་བར་བྱེད་པའི་རྩ། །སྙིང་ལ་སྲིད་ཅིང་རྩ་ཕྲན་ལྔ་བརྒྱས་བསྐོར། །ལུས་ཀྱི་ཕུང་པོ་
ཆགས་པར་བྱེད་པའི་རྩ། །ལྟེ་བ་ལ་སྲིད་རྩ་ཕྲན་ལྔ་བརྒྱས་བསྐོར། །བུ་ཚ་རིགས་རྒྱུད་འཕེལ་
བར་བྱེད་པའི་རྩ། །མཚན་མ་ལ་སྲིད་རྩ་ཕྲན་ལྔ་བརྒྱས་བསྐོར། །སྟེང་འོག་ཐད་ཀར་ལུས་
ཀུན་རྗེས་སུ་འཛིན། །འབྲེལ་པའི་རྩ་ལ་དཀར་ནག་གཉིས་ཡོད་དེ། །སྲོག་པ་རྩ་ནི་རྩ་ཡི་སྡོང་
པོ་ལ། །ཡལ་གའི་ཚུལ་དུ་གྱེན་ལ་གྱེས་པ་ཡི། །ཤ་ཁྲག་འཕེལ་བྱེད་རྩ་ཆེན་ཉི་ཤུ་བཞི། །དོན་
སྣོད་ནང་འབྲེལ་སྦས་པའི་རྩ་ཆེན་བརྒྱད། །ཡན་ལག་ཕྱིར་འབྲེལ་མངོན་པའི་རྩ་བཅུ་དྲུག །
དེ་ལས་གྱེས་པའི་གཏར་རྩ་བདུན་ཅུ་བདུན། །གཉན་པའི་རྩ་གནད་བརྒྱ་དང་བཅུ་གཉིས་ཏེ། །
འདྲེས་པའི་རྩ་ཕྲན་བརྒྱ་དང་བརྒྱད་ཅུ་དགུ། །དེ་ལས་ཕྱི་ནང་བར་གསུམ་བརྒྱ་ཉི་ཤུ། །རྩ་
ཕྲན་སུམ་བརྒྱ་དྲུག་ཅུར་གྱེས་པ་ཡིན། །དེ་ལས་རྩ་ཕྲན་བདུན་བརྒྱ་དག་ཏུ་གྱེས། །དེ་ལས་
ཡང་ཕྲན་ལུས་ལ་དྲ་བར་འབྲེལ། །ཀླད་པ་རྩ་ཡི་རྒྱ་མཚོ་ཆེན་པོ་ལས། །རྩ་བ་ལྟ་བུར་ཐུར་
དུ་ཟུག་པ་ཡི། །བྱ་བ་བྱེད་པའི་ཆུ་རྩ་བཅུ་དགུ་ཡོད། །དེ་ཡང་དོན་སྣོད་ནང་དུ་འབྲེལ་པ་ཡི། །
དར་གྱི་དཔྱངས་ཐག་བཅུ་གསུམ་སྦས་པའི་རྩ། །ཡན་ལག་ཕྱིར་འབྲེལ་མངོན་པའི་རྩ་དྲུག་
སྟེ། །དེ་ལས་ཆུ་རྩ་ཕྲན་བུ་བཅུ་དྲུག་གྱེས། །མི་ལ་ཚེ་ཡི་རྩ་ནི་གསུམ་ཡོད་དེ། །གཅིག་ནི་མགོ་
ལུས་ཐམས་ཅད་ཁྱབ་པར་གནས། །གཅིག་ནི་དབུགས་དང་འགྲོགས་ནས་རྒྱུ་བ་སྟེ། །གཅིག་
25-1-26


ནི་བླ་དང་འདྲ་སྟེ་འཁྱམ་པ་ཡིན། །རླུང་ཁྲག་རྒྱུ་བའི་བུ་ག་ཕྱི་ནང་ཀུན། །འབྲེལ་བྱས་ལུས་ནི་
སྐྱེད་ཅིང་གནས་པ་དང༌། །སྲོག་གི་རྩ་བ་ཡིན་ཕྱིར་རྩ་ཞེས་བྱ། །གཉན་པའི་གནད་ལ་ཤ་ཚིལ་
རུས་པ་དང༌། །ཆུ་རྒྱུས་དོན་སྣོད་རྩ་ཡི་གནད་དང་བདུན། །ཤ་གནད་སྐྲངས་ཤིང་རུས་གནད་
ན་ཟུག་ཆེ། །ཆུ་རྒྱུས་གནད་ཀྱིས་འཇའ་བར་བྱེད་པ་སྟེ། །རྩ་ཚིལ་དོན་སྣོད་གནད་ཀྱིས་སྲོག་
འདོར་བྱེད། །འཆི་སྦྱོང་གསོ་བ་དཀའ་ཕྱིར་གནད་ཅེས་བྱ། །ཤ་གནད་བཞི་བཅུ་རྩ་ལྔ་ཚིལ་
གནད་བརྒྱད། །རུས་པའི་གནད་ནི་སུམ་ཅུ་རྩ་གཉིས་ཏེ། །རྒྱུས་གནད་བཅུ་བཞི་དོན་གནད་
བཅུ་གསུམ་དང༌། །རྩ་གནད་བརྒྱ་དང་དགུ་བཅུ་ཐམ་པ་ཡོད། །མགོ་ལ་རེ་གཉིས་སྐེ་ལ་སོ་
གསུམ་དང༌། །དགུ་བཅུ་གོ་ལྔ་བྱང་ཁོག་སྟོད་སྨད་གནས། །བརྒྱ་དང་བཅུ་གཉིས་ཡན་ལག་
བཞི་ལ་གནས། །གནད་ཀྱི་རྣམ་གྲངས་སུམ་བརྒྱ་རྩ་གཉིས་བཤད། །དེ་ལས་རབ་ཏུ་གཉན་
པ་དགུ་བཅུ་དྲུག །ཆོད་ཟིན་སྲོག་འདོར་མཁས་ཀྱང་བཅོས་སུ་མེད། །འབྲིང་དུ་གཉན་པ་བཞི་
བཅུ་རྩ་དགུར་བཤད། །མཁས་པ་རྣམས་ཀྱིས་བཅོས་སུ་བཏུབ་པ་ཡིན། །དེ་ལས་ལྷག་པ་
གནད་དུ་བསྟན་ན་ཡང༌། །གཉན་པར་མ་བཤད་ཀུན་གྱིས་གསོ་བར་ནུས། །རྒྱུ་ལམ་བུ་གའི་
གནས་ལུགས་ཕྱི་ནང་གཉིས། །ནང་གི་བུ་ག་སྲོག་ཟུངས་དྲི་མ་གསུམ། །ཆུ་དང་ཟས་རྒྱུ་བཅུ་
གསུམ་གནས་པ་ཡིན། །ཕྱི་ཡི་བུ་ག་མགོར་བདུན་གསང་བར་གཉིས། །བུད་མེད་མངལ་སྒོ་
ནུ་མ་གཉིས་ཀྱིས་ལྷག །དབྱིབས་ཟླུམ་སྦོམ་དང་ཕྲ་ལ་རིང་འབྲེལ་གྱེས། །ལོ་མའི་རྒྱབ་ཀྱི་རྩ་
ལྟར་གནས་པའོ། །དྭངས་མ་ཉེར་འཕེལ་སྒོ་ནི་བུ་ག་སྟེ། །ཟས་དང་སྤྱོད་ལམ་མི་མཐུན་བསྟེན་
པ་ཡིས། །བུ་གའི་རྒྱུ་ལམ་གནོད་པས་ནད་སྐྱེད་ལ། །མང་འབྱུང་འགགས་དང་གཞན་འགྲོ་
འཁྲུག་པར་བྱེད། །གནོད་མེད་བུ་ག་དག་པས་བདེ་བར་འགྱུར། །ཞེས་གསུངས་སོ། །བདུད་
རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་གནས་ལུགས་བསྟན་
པའི་ལེའུ་སྟེ་བཞི་པའོ།། །། 
25-1-27


དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ལུས་ཀྱི་མཚན་ཉིད་རྣམ་པ་གཉིས་ཡིན་ཏེ། །གནོད་བྱ་ཁམས་དང་གནོད་
བྱེད་ཉེས་པའོ། །ནད་དང་ལུས་ཟུངས་དྲི་མ་རྣམ་གསུམ་པོ། །ཕན་ཚུན་གཅིག་ལ་གཅིག་
བརྟེན་རག་ལུས་པས། །ཆགས་གནས་འཇིག་པའི་རྩ་བ་ཡིན་ཕྱིར་ལུས། །དང་པོ་གནོད་བྱ་
ཁམས་ལ་དབྱེ་བ་ལས། །མེ་དྲོད་འགྱུར་ཚུལ་འབྲས་བུ་རྫོགས་དུས་སོ། །གནོད་བྱའི་དབྱེ་བ་
ཟུངས་དང་དྲི་མ་གཉིས། །ལུས་ཟུངས་དྭངས་མ་ཁྲག་དང་ཤ་དང་ཚིལ། །རུས་པ་རྐང་མར་ཁུ་
བ་བདུན་དུ་བཤད། །དྲི་མ་བཤང་གཅི་རྔུལ་ལ་སོགས་པའང་ཡིན། །དེ་ལ་དྭངས་མས་གནོད་
བྱ་འཕེལ་བར་བྱེད། །ཁྲག་གིས་བརླན་ཞིང་སྲོག་འཚོ་ཤ་ཡིས་གཡོགས། །ཚིལ་གྱིས་སྣུམ་
དང་རུས་པས་བརྟེན་པ་དང༌། །རྐང་གིས་བཅུད་འགྱུར་ཁུ་བས་མངལ་འཛིན་བྱེད། །བཤང་
གཅིས་རྟེན་འདྲུལ་འབྱིན་པར་བྱེད་པ་སྟེ། །རྔུལ་གྱིས་པགས་པ་མཉེན་ཞིང་བ་སྤུ་བརྟན། །མེ་
དྲོད་ཅེས་བྱ་འཇུ་བའི་གཞི་ཡིན་ཏེ། །འཇུ་བར་བྱེད་པའི་མཁྲིས་པ་དེ་ལ་བཤད། །ནད་དང་
ལུས་ཟུངས་དྲི་མ་ཀུན་གྱི་དྲོད། །དེ་ཡིས་ནད་མེད་བརྩོན་དང་གཟི་མདངས་དང༌། །ཚེ་དང་
ལུས་ཟུངས་མེ་དྲོད་སྟོབས་འཕེལ་བྱེད། །ཞུ་གནས་སྒོར་འཇུག་ཟས་ལམ་སྒོ་གཏན་ཡིན། །དེ་
སྟོབས་ལྡན་ན་ཞུ་ནས་ཐུར་འགྲོ་སྟེ། །སྟོབས་ཞན་ཁ་ཟས་མ་སྨིན་ཉིད་ཕྱིར་འབྱུང༌། །མེ་དྲོད་
དེ་ནི་ཟས་གང་ལུས་ཟུངས་མདངས། །སྟོབས་རྒྱས་འཕེལ་བར་བྱེད་པའི་རྒྱུ་ཡིན་ཏེ། །མ་ཞུ་
དྭངས་སོགས་རྒྱས་པར་མི་འགྱུར་ཕྱིར། །ཟས་སྐོམ་སྤྱོད་ལམ་ཡང་ལ་དྲོ་བ་ཡིས། །འབད་དེ་
མེ་དྲོད་བསྲུང་བར་བརྩོན་གྱུར་ན། །ལུས་ཀྱི་སྟོབས་དང་ཚེ་ནི་གནས་པར་གྱུར། །མེ་དྲོད་དེ་
ཡིས་ཁ་ཟས་འཇུ་ཚུལ་ནི། །ཟས་སྐོམ་སྲོག་གི་རླུང་གིས་ལྟོ་བར་བཅུག །སྐོམ་གྱིས་བཤིག་
ཅིང་སྣུམ་གྱིས་མཉེན་པར་བྱས། །མེ་མཉམ་རླུང་གིས་མཁྲིས་པ་འཇུ་བྱེད་བུས། །ཕོ་བའི་
གནས་སུ་སྨན་ལྟར་སྐོལ་བར་བྱེད། །དང་པོར་རོ་དྲུག་ཟས་སྐོམ་གང་ཟོས་པ། །བད་ཀན་
25-1-28


མྱག་བྱེད་དག་གིས་མྱག་པར་བྱེད། །རོ་དངར་ལྦུ་བ་ཅན་གྱུར་བད་ཀན་སྐྱེད། །བར་དུ་མཁྲིས་
པ་འཇུ་བྱེད་ཀྱིས་བཞུས་པས། །རྣམ་པར་ཚ་བས་རོ་སྐྱུར་མཁྲིས་པ་སྐྱེད། །ཐ་མར་མེ་མཉམ་
རླུང་གིས་དྭངས་སྙིགས་ཕྱེ། །ཁ་བར་འགྱུར་ཏེ་དེ་ཡིས་རླུང་སྐྱེད་འགྱུར། །འབྱུང་བ་ལྔ་ལྡན་
ཟས་ཀྱི་ཡོན་ཏན་གྱིས། །ལུས་ཀྱི་འབྱུང་བ་ལྔ་པོ་རྒྱས་པར་བྱེད། །འགྱུར་ཚུལ་ཞུ་རྗེས་དྭངས་
སྙིགས་བྱེ་བ་ལས། །སྙིགས་མ་རྒྱུ་མར་སྐ་སླ་གཉིས་སུ་བྱེ། །སྐ་བ་བཤང་འགྱུར་སླ་བ་གཅིན་
དུ་འགྱུར། །དྭངས་མ་ལུས་ཟུངས་རང་རང་མེ་དྲོད་ཀྱིས། །སྨིན་པར་འགྱུར་ཏེ་དྭངས་མ་ཕོ་བ་
ནས། །དྭངས་མ་ལེན་པའི་རྩ་དགུར་མཆིན་ལམ་བརྒྱུད། །མཆིན་པའི་གནས་སུ་ཁྲག་འགྱུར་
ཁྲག་ལས་ཤ །ཤ་ལས་ཚིལ་འགྱུར་ཚིལ་ལས་རུས་པར་འགྱུར། །རུས་ལས་རྐང་འགྱུར་རྐང་
ལས་ཁུ་བར་འགྱུར། །དེ་རྣམས་རྩིགས་མ་ཕོ་བའི་བད་ཀན་དང༌། །སྣོད་མཁྲིས་བུ་གའི་དྲི་མ་
ཞག་དང་ནི། །སོ་སེན་བ་སྤུ་བཤང་སྣུམ་མངལ་འཛིན་ཡིན། །ལུས་ཟུངས་ཁུ་བའི་མཐར་ཕྱིན་
མདངས་མཆོག་སྟེ། །སྙིང་ལ་གནས་ཤིང་ལུས་ཀུན་ཁྱབ་པ་དང༌། །ཚེ་གནས་གཟི་མདངས་
བཀྲག་དང་ལྡན་པར་བྱེད། །དེ་དག་འབྲས་བུ་རྫོགས་དུས་ཟས་ཟོས་པའི། །དྭངས་མ་ཁུ་བར་
འགྱུར་དུས་ཞག་དྲུག་སྟེ། །རོ་ཙ་ལ་སོགས་འཕྲལ་དུ་ཁུ་བ་སྐྱེད། །སྨན་རྣམས་ཕལ་ཆེར་ཞག་
གཅིག་ལས་བྱེད་འགྱུར། །གནོད་བྱེད་ཉེས་པ་བརྒྱད་དེ་དབྱེ་བ་དང༌། །མངལ་དུ་གྲུབ་ཚུལ་
རང་བཞིན་མེ་དྲོད་དང༌། །ལྟོ་བ་གནས་དང་ལས་དང་མཚན་ཉིད་དོ། །དབྱེ་བ་རླུང་དང་མཁྲིས་
པ་བད་ཀན་གསུམ། །རྒྱུ་དང་ངོ་བོ་དཔེ་དང་འབྲས་བུ་དང༌། །གཉེན་པོའི་སྒོ་ནས་གྲངས་དང་
གོ་རིམ་གྲུབ། །རྣམ་པར་མ་གྱུར་ལུས་གནས་གྱུར་པས་འཇོམས། །རླུང་ལ་དབྱེ་ན་སྲོག་འཛིན་
གྱེན་རྒྱུ་དང༌། །ཁྱབ་བྱེད་མེ་མཉམ་ཐུར་སེལ་རྣམ་པ་ལྔ། །མཁྲིས་པའི་དབྱེ་བ་འཇུ་བྱེད་
མདངས་སྒྱུར་དང༌། །སྒྲུབ་བྱེད་མཐོང་བྱེད་མདོག་གསལ་རྣམ་པ་ལྔ། །བད་ཀན་དབྱེ་བ་རྟེན་
བྱེད་མྱག་བྱེད་དང༌། །མྱོང་བྱེད་ཚིམ་བྱེད་འབྱོར་བྱེད་རྣམ་པ་ལྔ། །དེ་ཉིད་མངལ་དུ་གྲུབ་པའི་
25-1-29


ཚུལ་བསྟན་པ། །སྐྱེ་བའི་དང་པོ་ཁུ་བ་ཁྲག་ལ་གནས། །དཔེར་ན་དུག་ཅན་སྲིན་པོའི་དུག་སྐྱེད་
མཚུངས། །ཁུ་ཁྲག་མངལ་གནས་ཟས་དང་སྤྱོད་ལམ་གྱིས། །ཉེས་པ་ལྷག་གྱུར་རང་བཞིན་
བདུན་དུ་འགྱུར། །རླུང་ཆུང་མཁྲིས་པ་འབྲིང་ལ་བད་ཀན་ཆེ། །འདུས་པ་མཆོག་ཡིན་ལྡན་
གསུམ་བར་མར་འགྱུར། །དེ་བཞིན་ཕོ་བའི་མེ་དྲོད་བཞིར་འགྱུར་ཏེ། །རླུང་གིས་མི་སྙོམས་
མཁྲིས་པས་རྣོ་བ་དང༌། །བད་ཀན་ཆུང་ལ་འདུས་པ་མཉམ་པར་འགྱུར། །ལྟོ་བ་རླུང་གིས་
སྲ་ལ་མཁྲིས་པས་སྙི། །བད་ཀན་གྱིས་ནི་ལྟོ་བ་བར་མར་འགྱུར། །གནས་ས་ལུས་ཁྱབ་གྱུར་
ཀྱང་སྙིང་ག་དང༌། །ལྟེ་བའི་འོག་བར་སྟེང་ན་མས་རིམ་གནས། །ཉེས་པའི་ལས་ནི་རླུང་གིས་
དབུགས་འབྱིན་རྔུབ། །བསྐྱོད་དང་ལས་སྤྱོད་ཤུགས་འབྱིན་གནོད་བྱ་རྒྱུ། །དབང་པོ་གསལ་
དང་ལུས་རྗེས་འཛིན་པར་བྱེད། མཁྲིས་ལས་བཀྲེས་སྐོམ་ཟས་ལེན་འཇུ་བ་དང༌། །ལུས་དྲོད་
མདངས་གསལ་སྙིང་དཔའ་བློ་ལྡན་བྱེད། །བད་ཀན་ལུས་དང་བློ་བརྟན་གཉིད་ལོག་དང༌། །
ཚིགས་འབྲེལ་བཟོད་ཅིང་ལུས་འཇམ་སྣུམ་པར་བྱེད། །ཁྱད་པར་སྲོག་འཛིན་རླུང་དེ་སྙིང་
གར་གནས། །གྲེ་བ་བྲང་གཞུང་རྒྱུ་ཞིང་ཟས་སྐོམ་མིད། །དབུགས་རྔུབ་མཆིལ་འདོར་སྦྲིད་
པ་སྒྲེག་པ་འབྱིན། །བློ་དང་དབང་པོ་གསལ་ཞིང་སེམས་འཛིན་བྱེད། །གྱེན་དུ་རྒྱུ་བའི་རླུང་
ནི་བྲང་ལ་གནས། །སྣ་ལྕེ་ལྐོག་མར་རྒྱུ་ཞིང་ཚིག་འབྱིན་ལ། །སྟོབས་མདངས་ཁ་དོག་འབད་
རྩོལ་དྲན་གསལ་བྱེད། །ཁྱབ་བྱེད་རླུང་ནི་སྙིང་ལ་གནས་པ་སྟེ། །ལུས་ཀུན་ཁྱབ་པར་རྒྱུ་ཞིང་
འདེགས་འཇོག་འགྲོ། །བརྐྱང་བསྐུམ་འབྱེད་འཛུམ་བྱ་བ་ཕལ་རག་ལུས། །མེ་དང་མཉམ་
པའི་རླུང་ནི་ཕོ་བར་གནས། །ནང་ཁྲོལ་ཀུན་ཏུ་རྒྱུ་ཞིང་ཁ་ཟས་འཇུ། །དྭངས་སྙིགས་འབྱེད་
ཅིང་གནོད་བྱ་སྨིན་པར་བྱེད། །ཐུར་དུ་སེལ་བའི་རླུང་ནི་གཞང་ལ་གནས། །ལོང་དང་ལྒང་པ་
གསང་བ་བརླ་ནང་རྒྱུ། །ཁུ་ཁྲག་བཤང་གཅི་མངལ་ནང་འབྱིན་སྡོམ་བྱེད། །འཇུ་བྱེད་ཞུ་དང་
མ་ཞུའི་བར་ན་གནས། །ཟས་འཇུ་དྭངས་སྙིགས་འབྱེད་ཅིང་ལུས་དྲོད་དང༌། །ལྷག་མ་བཞི་ཡི་
25-1-30


གྲོགས་དང་སྟོབས་སྐྱེད་བྱེད། །མཁྲིས་པ་མདངས་སྒྱུར་མཆིན་པར་གནས་པ་སྟེ། །དྭངས་མ་
ལ་སོགས་ཁ་དོག་མ་ལུས་སྒྱུར། །མཁྲིས་པ་སྒྲུབ་བྱེད་སྙིང་ལ་གནས་པ་སྟེ། །ཡིད་གཞུངས་ང་
རྒྱལ་བློ་དང་འདོད་པ་སྒྲུབ། །མཐོང་བྱེད་མིག་ལ་གནས་ནས་གཟུགས་མཐོང་བྱེད། །མདོག་
གསལ་པགས་གནས་པགས་མདོག་གསལ་བར་བྱེད། །བད་ཀན་རྟེན་བྱེད་བྲང་ལ་གནས་པ་
སྟེ། །ལྷག་མ་རྣམས་ཀྱི་རྟེན་དང་ཆུ་ལས་བྱེད། །བད་ཀན་མྱག་བྱེད་མ་ཞུ་བ་ལ་གནས། །ཟས་
སྐོམ་མྱག་ཅིང་འདྲུལ་བར་བྱེད་པ་ཡིན། །བད་ཀན་མྱོང་བྱེད་ལྕེར་གནས་རོ་ཚོར་བྱེད། །ཚིམ་
བྱེད་མགོར་གནས་དབང་པོ་ཚིམ་པར་བྱེད། །བད་ཀན་འབྱོར་བྱེད་ཚིགས་དམིགས་ཀུན་ལ་
གནས། །ཚིགས་རྣམས་འབྱོར་ཞིང་བརྐྱང་བསྐུམ་བྱེད་པ་ཡིན། །ཉེས་པའི་མཚན་ཉིད་རླུང་
མཁྲིས་བད་ཀན་གསུམ། །རླུང་གི་མཚན་ཉིད་རྩུབ་ཅིང་ཡང་བ་དང༌། །གྲང་ཞིང་ཕྲ་ལ་སྲ་
ཞིང་གཡོ་བ་ཡིན། །མཁྲིས་པའི་མཚན་ཉིད་སྣུམ་བཅས་རྣོ་ཞིང་ཚ། །ཡང་ཞིང་དྲི་མནམ་འཁྲུ་
ཞིང་གཤེར་བ་ཡིན། །བད་ཀན་མཚན་ཉིད་སྣུམ་ཞིང་བསིལ་བ་དང༌། །ལྕི་རྟུལ་འཇམ་བརྟན་
འབྱར་བག་ཅན་དུ་གནས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་
བ་མན་ངག་གི་རྒྱུད་ལས་ལུས་ཀྱི་མཚན་ཉིད་བསྟན་པའི་ལེའུ་སྟེ་ལྔ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ལུས་ཀྱི་ལས་ནི་ལུས་ངག་ཡིད་དང་གསུམ། །དགེ་དང་མི་དགེ་ལུང་མ་
བསྟན་ལ་སྤྱོད། །བྱེ་བྲག་དབང་པོ་ལྔ་ཡིས་རང་ཡུལ་འཛིན། །ལུས་ཀྱི་དབྱེ་བ་རྟེན་དང་ན་
ཚོད་དང༌། རང་བཞིན་ནད་ཀྱི་སྒོ་ནས་དབྱེ་བ་བཞི། །རྟེན་གྱིས་དབྱེ་ན་ཕོ་མོ་མ་ནིང་གསུམ། །
ན་ཚོད་དབྱེ་བ་བཅུ་དྲུག་བར་བྱིས་པ། །དེ་ལས་ལུས་ཟུངས་དབང་པོ་གཟི་མདངས་སྟོབས། །
འཕེལ་འགྱུར་བདུན་ཅུའི་བར་དུ་དར་མ་སྟེ། །དེ་ལས་ཟད་པ་ཕན་ཆད་རྒན་པོ་ཡིན། །རང་
བཞིན་རྐྱང་པ་ལྡན་དང་འདུས་པ་བདུན། །དེ་ལ་རླུང་གིས་བསྐྱེད་པའི་མི་རྣམས་ནི། །དབྱིབས་
25-1-31


སྒུར་ཤ་སྐེམ་མདོག་སྔོ་སྨྲ་བ་མང༌། །གྲང་ལྷགས་མི་བཟོད་འགྲོ་ཚེ་སྒྲ་དང་བཅས། །ནོར་ཆུང་
ཚེ་ཐུང་གཉིད་སྲབ་ལུས་བོངས་ཆུང༌། །གླུ་དང་དགོད་དང་འཐབ་མོ་མདའ་ལ་དགའ། །མངར་
སྐྱུར་ཁ་ཚའི་རོ་ལ་སྲེད་པ་སྟེ། །བྱ་རྒོད་ཁྭ་ཝའི་མཚན་ཉིད་ལྡན་པ་ཡིན། །མཁྲིས་པའི་རང་
བཞིན་སྐོམ་དད་བཀྲེས་ཤས་ཆེ། །སྐྲ་ལུས་མདོག་སེར་བློ་རྣོ་ང་རྒྱལ་ཆེ། །རྔུལ་ཆེ་དྲི་ང་ཚེ་ནོར་
ལུས་བོངས་འབྲིང༌། །མངར་ཁ་བསྐ་བསིལ་ཟས་ལ་སྲེད་པ་སྟེ། །སྟག་སྤྲེ་གནོད་སྦྱིན་མཚན་
ཉིད་ལྡན་པ་ཡིན། །བད་ཀན་རང་བཞིན་ཅན་ནི་ལུས་བསིལ་ཞིང༌། །རུས་ཚིགས་མི་མངོན་ཤ་
རྒྱས་ཁ་དོག་དཀར། །དབྱིབས་དགྱེ་བཀྲེས་སྐོམ་ཉོན་མོངས་ཐན་པ་བཟོད། །ལུས་ཚོ་ཚེ་རིང་
ནོར་མང་གཉིད་མཐུག་ཅིང༌། །ཞེ་སྡང་འདམ་རིང་རང་བཞིན་ངང་རྒྱུད་བཟང༌། །ཚ་སྐྱུར་བསྐ་
རྩུབ་ཟས་ལ་སྲེད་པ་སྟེ། །སེང་གེ་ཁྱུ་མཆོག་མཚན་ཉིད་ལྡན་པ་ཡིན། །ལྡན་དང་འདུས་པ་
འདྲེས་ལས་ཤེས་པར་བྱ། །ནད་ཀྱིས་དབྱེ་བ་རྣམ་པར་མ་གྱུར་གྱུར། །རྣམ་པར་མ་གྱུར་ལུས་
གནས་ཐ་མལ་ལ། །ནད་མེད་གནས་དང་རིང་དུ་འཚོ་བར་བྱ། །རྣམ་གྱུར་ནད་ཀྱིས་བཅོམ་
པའི་ལུས་དེ་གསོ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་ལུས་ཀྱི་ལས་དང་དབྱེ་བ་བསྟན་པའི་ལེའུ་སྟེ་དྲུག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག ལུས་ཀྱི་འཇིག་ལྟས་རྣམ་པ་བཞི་ཡིན་ཏེ། །རིང་དང་ཉེ་བ་མ་ངེས་ངེས་
པའོ། །རིང་ལྟས་ཕོ་ཉ་རྨི་ལམ་རྣམ་འགྱུར་གསུམ། །ཕོ་ཉ་ཡ་མཚན་ཅན་དང་དགེ་སྦྱོང་དང༌། །
རིགས་མཐུན་པ་ནི་ནད་པ་སོས་པའི་རྟགས། །དེ་ལས་བཟློག་པ་འགྲུབ་པར་མི་འགྱུར་ཏེ། །
འཇིགས་རིངས་དངངས་ཤིང་རྡོ་དང་བོང་བ་ཉེད། །རིང་ནས་འབོད་ཅིང་སྡིག་པའི་ལས་
ལ་སྤྱོད། །བཀྲ་མི་ཤིས་པའི་རྒྱན་དང་སྨྲ་བརྗོད་བྱེད། །དེ་ལྟ་བུ་ཡི་ཕོ་ཉས་ལས་མི་འགྲུབ། །
སྨན་པ་སེམས་རྩུབ་མི་ཤིས་སྨྲ་བ་དང༌། །གཅོད་བཤིག་མཚུན་གཏོར་སྦྱིན་སྲེག་བྱེད་པའི་
25-1-32


དུས། །ཕོ་ཉ་འོངས་པ་ནད་པ་འཆི་བའི་ལྟས། །ཚེས་དྲུག་བཞི་དགུ་ཉི་ཟླ་གཟའ་ཟིན་དང༌། །
གཟའ་སྐར་ངན་དང་མཚན་མོ་ལམ་འཇུག་ངན། །འགྲོ་ཚེ་ལམ་དུ་ཆད་ཚིག་ཆག་པ་དང༌། །
ངུ་བསད་སྨྲ་བ་ཐོས་དང་མཐོང་བ་དང༌། །བྱི་ལ་སྤྲེའུ་སྲམ་སྦྲུལ་ལམ་བཅད་ཅིང༌། །བཀྲ་མི་
ཤིས་པ་གང་མཐོང་ངན་པའི་ལྟས། །དགེ་བ་འབྲུ་དང་ཞོ་སོགས་སྣོད་གང་དང༌། །དྲིལ་བུ་མར་
མེ་མེ་ཏོག་འབྲས་ཡོས་ཟན། །ལྷ་ཡི་སྐུ་དང་ལུས་ཀྱི་རྒྱན་དཀར་པོ། །ཆོས་སྤྱོད་པ་དང་རྒྱལ་
མཚན་བསྒྲེང་བ་དང༌། །མེ་འབར་རྟ་ལུག་བ་སོགས་ཕྲུག་གུར་བཅས། །ཡིད་དུ་འོང་བའི་སྒྲ་
འམ་བཟའ་བཏུང་རྒྱན། །དེ་དག་ལམ་དུ་མཐོང་ངམ་ཁྱིམ་དུ་འཇུག །དགེ་ལྟས་ནད་པ་སོས་
པའི་མཚན་ཉིད་ཡིན། །ཞོ་ཕྲུམ་ལ་སོགས་ཁྱིམ་ནས་ཕྱིར་འབྱུང་དང༌། །རླུང་མེད་མེ་ཤི་སྣོད་
ཆག་ངན་པའི་ལྟས། །རྨི་ལམ་བྱི་ལ་སྤྲེའུ་སྟག་དང་ཝ། །རོ་ལ་ཞོན་རྨིས་འཆི་བདག་ཟིན་པའི་
རྟགས། །མ་ཧེ་རྟ་ཕག་བོང་བུ་རྔ་མོ་ལ། །གཅེར་བུར་ཞོན་ནས་ལྷོ་ཕྱོགས་འགྲོ་རྨིས་འཆི། །སྤྱི་
བོར་ལྕུག་མ་སྐྱེས་ཏེ་བྱ་ཚང་བཅས། །ཏཱ་ལ་ཚེར་མ་ཅན་ཤིང་སྙིང་གར་སྐྱེས། །པདྨ་ཕྱུང་དང་
གཡང་ལྷུང་དུར་ཁྲོད་ཉལ། །མགོ་ཆག་བྱ་རོག་ཡི་དྭགས་རྨེ་ཅན་བསྐོར། །རྐང་ལྤགས་ལྷུང་
དང་མ་ཡི་མངལ་དུ་འཇུག །ཆུས་ཁྱེར་འདམ་བྱིང་ཉ་ཡིས་མིད་པ་དང༌། །ལྕགས་གསེར་རྙེད་
དང་ཚོང་དང་འཐབ་མོ་ཕམ།།བྲོ་བའི་ཁྲལ་དེད་བག་མ་ལེན་པ་དང༌། །གཅེར་བུར་འདུག་དང་
སྐྲ་དང་ཁ་སྤུ་བྲེགས། །གཤིན་དང་ལྷན་ཅིག་ཆང་འཐུང་དེས་འདྲུད་དང༌། །གོས་དང་ཕྲེང་བ་
དམར་པོས་བརྒྱན་པ་ཡི། །གཤིན་པོ་དག་དང་ལྷན་ཅིག་གར་བྱེད་པ། །དེ་དག་འཆི་བདག་
དབང་དུ་སོང་བའི་ལྟས། །དེ་ལ་སོགས་ཏེ་རྨི་ལམ་མི་བཟང་བ། །ཡིད་འཇུག་བུ་ག་ནད་ཀྱིས་
བཀག་ཕྱིར་མཐོང༌། །རྒྱུན་དུ་རྨི་བའི་ནད་པ་འཆི་འགྱུར་ཏེ། །ནད་མེད་མ་ངེས་རིམ་གྲོས་ཐར་
བར་འགྱུར། །མཐོང་ཐོས་མྱོང་དང་གསོལ་བ་བཏབ་པ་དང༌། །གྲུབ་པ་ནད་ལས་བྱུང་དང་
རྣམ་པ་དྲུག །མཚན་སྟོད་རྨི་ལམ་བརྗེད་ངས་འབྲས་བུ་མེད། །ཐོ་རངས་མཐོང་དང་གསལ་
25-1-33


ན་འབྲས་བུ་འབྱིན། །ལྷ་དང་ཁྱུ་མཆོག་སྐྱེས་བུ་གྲགས་པ་ལྡན། །མེ་འབར་མཚོ་དང་ལུས་
ཁྲག་མི་གཙང་བྱུགས། །གོས་དཀར་གྱོན་དང་འཕན་གདུགས་ཤིང་འབྲས་རྙེད། །རི་བོ་ཁང་
བཟང་འབྲས་བཅས་ཤིང་ལ་འཛེག །སེང་གེ་གླང་ཆེན་རྟ་དང་བ་ལང་ཞོན། །ཆུ་བོ་མཚོ་རྒལ་
བྱང་ཤར་འགྲོ་བ་དང༌། །ཉམ་ང་ལས་ཐར་དགྲ་བོ་ཕམ་པ་དང༌། །ལྷ་དང་ཕ་མས་མཆོད་པ་
བྱེད་པ་རྣམས། །གང་རྨིས་ཚེ་རིང་ནད་མེད་ནོར་རྙེད་འགྱུར། །ཐ་མལ་རྣམ་འགྱུར་འཆི་བའི་
ལྟས་བསྟན་པ། །སྨན་པ་སྨན་དང་བླ་མ་མཛའ་བཤེས་སྡང༌། །རྒྱུ་མེད་ཡིད་གཞུངས་མཛེས་
རྒྱས་དཔལ་ཐོབ་བམ། །དེ་ལས་གོ་ལྡོག་འཆི་བར་འགྱུར་བའི་ལྟས། །རྟག་ཏུ་མདངས་ངན་
བློ་སེམས་མི་བདེ་ཞིང༌། །གཏོར་མ་བྱ་རོག་བྱིན་ན་མི་ཟ་དང༌། །ཁྲུས་བྱས་སྙིང་ག་མྱུར་སྐམ་
ཆུ་མི་ཆགས། །གང་གིས་སོར་མོ་དྲངས་པས་སྒྲ་མི་འབྱུང༌། །ཟས་ཟོས་སྟོབས་ཆུང་ལུས་ཀྱི་
དྲི་མ་འགྱུར། །ཤིག་སྲོ་འདུ་ཞིང་ཡང་ན་སྤོང་འགྱུར་འཆི། །འདོད་རྨོངས་ཁྲོ་བ་སྔར་ལས་གོ་
བཟློག་ཅིང༌། །སྔར་སྤྱོད་སྐྱོན་ཡོན་རྣམ་པ་གཞན་འགྱུར་ན། །མི་དེ་འཆི་བདག་དབང་དུ་སོང་
ཞེས་བྱ། །ཉི་མ་མེ་ལོང་ཆུ་དང་ནམ་མཁའ་ལ། །གཟུགས་བརྙན་མགོ་བཅད་ཡན་ལག་མེད་
ན་འཆི། །དེ་ནས་ཉེ་བའི་ལྟས་ལ་རྣམ་གཉིས་ཏེ། །ཉེ་བ་དང་ནི་ཤིན་ཏུ་ཉེ་བའོ། །ཉེ་བའི་ལྟས་
ལ་དུག་མཚོན་མ་ཕོག་པར། །བུ་ག་དགུ་ནས་ཁྲག་འཛག་སྨྲས་འཕྲལ་བརྗེད། །མཇེ་ནུབ་
རླིག་པ་འཕྱང་ངམ་གོ་ཟློག་དང༌། །ལུད་པ་སྦྲིད་པ་སྔོན་མེད་སྒྲ་འབྱུང་དང༌། །མར་མེ་ཤི་བའི་
དྲི་མ་མི་ཚོར་དང༌། །སྐྲ་ཕྱིས་ཚོར་མེད་སྤྱི་བོར་སྣུམ་བཅས་སྣང༌། །སྐྲ་སྨིན་གསར་དུ་མཚམས་
བྱེ་རྩུབ་འཁྱིལ་དང༌། །དཔྲལ་བ་ཆུ་སོར་ཟླ་ཚེས་རྩ་རིས་སྣང༌། །དབང་པོ་ཡུལ་ལྔ་ཐ་མལ་
རྒྱུ་མེད་པར། །རྣམ་པར་འགྱུར་ཏེ་ཡོད་མེད་གོ་བཟློག་སྣང༌། །ལག་ངར་སྨིན་དབྲག་གཏད་
པ་མི་མཐོང་དང༌། །མིག་བཙིར་འོད་མེད་རི་བོང་འབོས་ནོན་འདྲ། །ཁུང་དུ་བྲོས་སམ་རྒྱལ་
མོའི་མདངས་ཉམས་འཆི། །རྣ་བ་ཧྲིད་འབྱར་ཨུཏྟ་ཆད་པ་དང༌། །མགོ་བོའི་རླངས་པའི་གྲིབ་
25-1-34


མ་མེད་ན་འཆི། །སྣ་བུག་གདངས་ཤིང་བ་སྐྱ་ཆགས་པ་དང༌། །ལྕེ་གཞུང་ནག་ལ་སྐམ་ཐུང་སྨྲ་
མི་ཤེས། །མ་མཆུ་འཕྱངས་དང་ཡ་མཆུ་བརྫེས་པ་དང༌།།གདོང་ལ་རྡུལ་ཆགས་དབུགས་གྲང་
སོ་དྲེག་ཆགས། །གྱེན་དུ་དབུགས་བརྩེག་དྲོད་ཡལ་འཆི་བ་ཡིན། །ལུས་པོ་གྲང་ལ་ཚ་བ་སྐྱེ་
བ་དང༌། །གྲང་བས་གདུངས་ནས་ཚ་བ་སྤོང་བ་དང༌། །དེ་བཞིན་ཚ་བས་གདུངས་ནས་གྲང་
བ་སྤོང༌། །ཆོ་ག་བཞིན་བྱས་ནད་ལ་སྐྱེད་མེད་ཅིང༌། །ཆོ་ག་ལོག་པས་བདེ་བར་གནས་སྙམ་
བྱེད། །དེ་དག་འཆི་བའི་ལྟས་སུ་བཤད་པ་ཡིན། །ཤིན་ཏུ་ཉེ་བ་འབྱུང་བ་རྣམ་པ་ལྔ། །དབང་
པོ་ལྔ་པོ་རིམ་པས་ཐིམ་པ་སྟེ། །ས་ནུས་ཆུ་ལ་ཐིམ་པས་གཟུགས་མི་མཐོང༌། །ཆུ་ནུས་མེ་ལ་
ཐིམ་པས་བུ་ག་སྐམ། །མེ་ནུས་རླུང་ལ་ཐིམ་པས་དྲོད་རྣམས་སྡུད། །རླུང་ནུས་མཁའ་ལ་ཐིམ་
པས་ཕྱི་དབུགས་ཆད། །མིག་གི་དབང་པོ་ཉམས་པར་གྱུར་པ་ཡིས། །གཟུགས་མི་གསལ་
ཞིང་སྒྲ་ལ་ཐིམ་པར་འགྱུར། །རྣ་བའི་དབང་པོ་ཉམས་པར་གྱུར་པ་ཡིས། །སྒྲ་མི་གསལ་ཞིང་
དྲི་ལ་ཐིམ་པར་འགྱུར། །སྣ་ཡི་དབང་པོ་ཉམས་པར་གྱུར་པ་ཡིས། །དྲི་མི་གསལ་ཞིང་རོ་ལ་
ཐིམ་པར་འགྱུར། །ལྕེ་ཡི་དབང་པོ་ཉམས་པར་གྱུར་པ་ཡིས། །རོ་མི་གསལ་ཞིང་རེག་ལ་ཐིམ་
པར་འགྱུར། །ལུས་ཀྱི་དབང་པོ་ཉམས་པས་རེག་མི་ཚོར། །མ་ངེས་འཆི་ལྟས་ནད་ཚུལ་མང་
པོ་ལས། །འཆི་བའི་ལྟས་རྣམས་སྣང་བར་གྱུར་ན་ཡང༌། །ནད་ཞི་བས་ནི་འཆི་ལྟས་ཞི་འགྱུར་
རོ། །ཞི་ཡང་ལྟས་བརྟན་གནས་ན་ངེས་པར་འཆི། །ཕྱི་ནང་སྲོག་ཟུངས་ཤ་ཟས་རྩ་དང་གསུམ། །
ཤོར་བའི་ནད་པ་གང་ཡིན་འཆི་བར་ངེས། །ནད་ལ་ཆོ་ག་སྣ་ཚོགས་བསྒྲུབས་བྱས་ཀྱང༌། །
བཅོས་སྐྱེད་མེད་ན་འཆི་བར་ངེས་པ་ཡིན། །དེ་ལྟར་ཕུང་པོ་འཇིག་པའི་འཆི་ལྟས་རྣམས། །
ནད་དང་ལུས་ཟུངས་དྲི་མ་འཁྲུགས་གྱུར་ནས། །གཅིག་གཤེད་གཅིག་གིས་བྱས་ཏེ་སྲོག་
འདོར་ཕྱིར། །འབྱུང་འགྱུར་དུས་ཀྱི་རི་རབ་འཇིག་དང་མཚུངས། །འཆི་ལྟས་མི་ཤེས་གསོ་བ་
བླང་དོར་འགག །དེ་མ་ཤེས་པས་སྙན་གྲགས་ཐོབ་མ་ཡིན། །དེ་ཕྱིར་མཁས་འདོད་འཆི་ལྟས་
25-1-35


རྟོགས་པར་བྱ། །རྨི་ལམ་རྣམ་འགྱུར་རིང་དང་མ་ངེས་ལྟས། །ཚོགས་གསོག་ཀློག་སྒྲུབ་ཡི་དམ་
སུམ་འགྱུར་བཟློག །ཉེ་དང་ངེས་པའི་ལྟས་ལ་འཆི་བསླུ་བྱ། །ཤིན་ཏུ་ཉེ་བའི་ལྟས་ལ་ཟློག་
ཐབས་མེད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་ལུས་ཀྱི་འཇིག་ལྟས་བསྟན་པའི་ལེའུ་སྟེ་བདུན་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། །འཕེལ་འགྲིབ་ནད་ཀྱི་གནས་ལ་ཇི་ལྟར་བསླབ་པར་བགྱི། །འཚོ་
མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། 
ཀྱེ་དྲང་སྲོང་ཆེན་པོ་ཉོན་ཅིག །གང་གསོ་ཕུང་པོ་དེ་ལས་བྱུང་བ་ཡི། །འཕེལ་འགྲིབ་ནད་ཀྱི་
གནས་ལ་བསླབ་བྱ་ན། །རྒྱུ་རྐྱེན་ཞུགས་ཚུལ་གནས་དང་མཚན་ཉིད་དང༌། །དབྱེ་བ་སོ་སོའི་
དོན་དང་བདུན་དུ་བཤད། །དང་པོ་རྒྱུ་ལ་རིང་རྒྱུ་ཉེ་རྒྱུ་གཉིས། །རིང་བའི་རྒྱུ་ལ་སྤྱི་དང་ཁྱད་
པར་གཉིས། །དང་པོ་ནད་འཁྲུགས་སྣ་ཚོགས་ཚུལ་ཅན་གྱིས། །གྲངས་མེད་གྱུར་པས་ལུས་
ཉིད་གཟིར་གྱུར་པ། །དེ་རྒྱུ་རེ་རེར་བསྟན་པར་མི་ནུས་པས། །དེ་བས་ནད་ཀུན་སྤྱི་རྒྱུ་བརྗོད་
པ་ནི། །ནད་རྣམས་ཀུན་གྱི་རྒྱུ་ནི་གཅིག་པུ་སྟེ། །བདག་མེད་དོན་མ་རྟོགས་པས་མ་རིག་ཅེས། །
དཔེར་ན་བྱ་ནི་མཁའ་ལ་ལྡིང་གྱུར་ཀྱང༌། །རང་གི་གྲིབ་མ་དེ་དང་མི་འབྲལ་ཞིང༌། །འགྲོ་ཀུན་
བདེ་བར་གནས་ཤིང་སྤྱོད་ན་ཡང༌། །མ་རིག་ལྡན་པས་ནད་དང་འབྲལ་མི་སྲིད། །ཁྱད་པར་རྒྱུ་
ནི་མ་རིག་ལས་བྱུང་བའི། །འདོད་ཆགས་ཞེ་སྡང་གཏི་མུག་དུག་གསུམ་ལས། །འབྲས་བུ་རླུང་
མཁྲིས་བད་ཀན་ཉེས་པ་སྐྱེད། །ཉེ་རྒྱུ་རླུང་དང་མཁྲིས་པ་བད་ཀན་གསུམ། །རྣམ་པར་མ་གྱུར་
ནད་ཀྱི་རྒྱུར་འགྱུར་ལ། །རྣམ་འགྱུར་མ་སྙོམས་ནད་ཀྱི་ངོ་བོ་ཡིན། །ལུས་དང་སྲོག་ལ་གནོད་
ཅིང་གདུང་བས་སོ། །མཁྲིས་པ་འཁྲུགས་པས་ལུས་ཟུངས་སྲེག་པར་བྱེད། །འདི་ནི་མེ་ཡི་རང་
བཞིན་ཚ་བས་ན། །སྨད་ན་གནས་ཀྱང་སྟོད་དུ་འབར་བར་བྱེད། །ཚ་བའི་ནད་ཀུན་འདི་ལས་
25-1-36


མ་སྐྱེས་མེད། །བད་ཀན་འཁྲུགས་པས་ལུས་ཀྱི་མེ་དྲོད་འཇོམས། །འདི་ནི་ས་ཆུའི་རང་བཞིན་
ལྕི་ལ་བསིལ། །སྟོད་ན་གནས་ཀྱང་སྨད་དུ་ལྷུང་བར་བྱེད། །གྲང་བའི་ནད་ཀུན་འདི་ལས་མ་
སྐྱེས་མེད། །རླུང་ནི་ཚ་གྲང་གཉིས་ཀའི་ཁྱབ་བྱེད་དེ། །ཉི་མར་ལྡན་ན་བསྲེག་པའི་གྲོགས་བྱེད་
ཅིང༌། །ཟླ་བར་ལྡན་ན་བསིལ་བའི་གྲོགས་བྱེད་ལ། །སྟོད་སྨད་ཕྱི་ནང་མ་ལུས་ཁྱབ་པར་རྒྱུ། །
ཚ་གྲང་གཉིས་ཀ་འཁྲུག་ཅིང་སློང་བར་བྱེད། །དེ་བས་རླུང་ནི་ནད་ཀུན་མ་ལུས་རྒྱུ། །ཞེས་
གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ནད་ཀྱི་
རྒྱུ་བསྟན་པའི་ལེའུ་སྟེ་བརྒྱད་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །རྒྱུ་ལ་སྐྱེད་པར་བྱེད་པའི་རྐྱེན་གསུམ་སྟེ། །སྐྱེ་མཆེད་གསོག་ལྡང་སློང་རྐྱེན་
རྣམ་པ་གསུམ། །སྐྱེ་ཞིང་མཆེད་པར་བྱེད་པ་སྐྱེ་མཆེད་དང༌། །གསོག་ཅིང་ལྡང་བར་བྱེད་པས་
གསོག་ལྡང་ཞེས། །བསགས་པ་སློང་བར་བྱེད་པ་སློང་རྐྱེན་ནོ། །སྐྱེ་མཆེད་དུས་དང་དབང་པོ་
སྤྱོད་ལམ་རྣམས། །དམན་ལྷག་ལོག་པས་ནད་རྣམས་སྐྱེད་པར་བྱེད། །དུས་ནི་ཚ་དུས་གྲང་
དུས་ཆར་དུས་གསུམ། །དམན་པ་ཚ་གྲང་ཆར་པ་ཆུང་བ་སྟེ། །ལྷག་པ་ཆེ་དྲགས་ལོག་པ་མེད་
པའོ། །དབང་པོ་ལྔ་དང་དེ་ཡི་ཡུལ་ལྔ་པོ། །ཆུང་ངམ་དེ་ལ་མི་སྦྱོར་དམན་པ་སྟེ། །ཤས་ཆེར་
གཏད་པ་ལྷག་པའི་སྦྱོར་བ་ཡིན། །ཤིན་ཏུ་ཉེ་དང་རིང་བ་ཆེའམ་ཆུང༌། །འཇིགས་དང་མི་སྡུག་
ལོག་པའི་སྦྱོར་བར་བཤད། །སྤྱོད་ལམ་ལུས་ངག་ཡིད་དང་གསུམ་ཡིན་ཏེ། །ཆུང་ངམ་མི་
སྦྱོར་འཇུག་པ་དམན་པས་དམན། །རྟུན་ངས་འཇུག་པ་ལྷག་པའི་སྦྱོར་བ་སྟེ། །ཤུགས་བཀག་
བཙིར་གཅུས་མི་དགེ་ལོག་སྦྱོར་རོ། །གསོག་ལྡང་ཞི་གསུམ་རྒྱུ་དང་ངོ་བོ་དུས། །རྒྱུ་ནི་རྩུབ་
སོགས་དྲོ་ལྡན་རླུང་གསོག་ལ། །གྲང་བས་ལྡང་ཞིང་སྣུམ་དྲོས་ཞི་བར་འགྱུར། །དེ་བཞིན་རྣོ་
སོགས་བསིལ་ལྡན་མཁྲིས་པ་གསོག །ཚ་བས་ལྡང་ཞིང་རྟུལ་སོགས་བསིལ་ལྡན་ཞི། །ལྕི་
25-1-37


སྣུམ་བསིལ་ལྡན་བད་ཀན་གསོག་འགྱུར་གྱི། །དྲོ་བས་ལྡང་ཞིང་རྩུབ་སོགས་ཀྱིས་ཞི་འགྱུར། །
ངོ་བོ་རང་གནས་འཕེལ་བ་གསོག་པ་ཡིན། །རྒྱུ་ལས་འཁྲུག་བྱེད་མི་མཐུན་ཡོན་ཏན་འདོད། །
ལྡང་བ་ལོག་པའི་ལམ་ཞུགས་རང་རྟགས་སྟོན། །རང་གནས་མཉམ་གནས་ནད་མེད་ཞི་བ་
ཡིན། །དུས་ནི་སོ་ག་སོགས་གསུམ་རླུང་གི་སྟེ། །མཁྲིས་པ་དབྱར་དང་བད་ཀན་དགུན་སྨད་དོ། །
སོ་གའི་དུས་སུ་ཡང་ལ་རྩུབ་པ་ཡི། །ཡུལ་དང་ལུས་དང་ཟས་སྤྱོད་ཀུན་མཚུངས་པས། །རླུང་
གསོག་བྱེད་ཀྱི་དྲོ་བས་ལྡང་མི་འགྱུར། །དབྱར་དུས་ཆར་རླུང་གྲང་བ་སྐྱེས་པས་ལྡང༌། །སྟོན་
དུས་སྣུམ་ལ་དྲོ་བས་ཞི་བར་འགྱུར། །དབྱར་དུས་སྣུམ་བསིལ་མཁྲིས་གསོག་ལྡང་མི་འགྱུར། །
སྣུམ་དྲོས་སྟོན་ལྡང་དགུན་སྟོད་བསིལ་བས་ཞི། །དགུན་སྨད་བསིལ་སྣུམ་ལྕི་བས་བད་ཀན་
གསོག །བསྒོངས་པས་ལྡང་མིན་དཔྱིད་དུས་ཉི་མའི་འོད། །དྲོ་བས་ལྡང་ཞིང་སོ་ག་ཡང་རྩུབ་
ཞི། །འོན་ཀྱང་འབྱུང་བའི་དུས་ལ་མ་བབ་ཀྱང༌། །ཟས་སྤྱོད་དབང་གིས་འཕྲལ་ལ་འབྱུང་པ་
ཡོད། །ཁྱད་པར་སློང་རྐྱེན་ཐུན་མོང་ཁྱད་པར་གཉིས། །ནད་ཀུན་སློང་བར་བྱེད་པའི་ཐུན་མོང་
རྐྱེན། །འབྱུང་བའི་དུས་དང་གདོན་དུག་མི་འཕྲོད་ཟས། །གསོ་བ་ལོག་དང་ལས་ངན་སད་
ལས་འབྱུང༌། །ཁྱད་པར་ཁ་དང་ཡང་རྩུབ་བསྟེན་དྲགས་དང༌། །ཆགས་པས་དུབ་དང་ལྟོ་ཆག་
གཉིད་ཆག་དང༌། །ལྟོ་སྟོང་ལུས་ངག་བྱ་བ་དྲག་ཤུལ་དང༌། །ཁྲག་མང་ཟགས་དང་འཁྲུ་སྐྱུག་
དྲག་པོས་བཏབ། །བསེར་བུས་བུས་དང་ག་ཆད་ངུས་པ་དང༌། །མྱ་ངན་སེམས་ལས་ཁ་ལས་
ཆེས་པ་དང༌། །བཅུད་མེད་ཁ་ཟས་ཡན་ལ་གཏད་པ་དང༌། །ཤུགས་བཀག་པ་དང་ནན་གྱིས་
བཙིར་བ་ཡི། །རྐྱེན་དེ་རྣམས་ཀྱིས་རླུང་ནད་ལྡང་བར་བྱེད། །ཚ་བའི་རོ་དང་རྣོ་ཚ་སྣུམ་བསྟེན་
དྲགས། །རྒྱུད་ལ་ཞེ་སྡང་དྲག་པོ་སྐྱེས་པ་དང༌། །ཚད་དགུང་གཉིད་ལོག་འདུག་རྗེས་དྲག་ཤུལ་
བྱས། །མི་ཐེག་ཁུར་དང་ས་སྲན་བརྐོས་པ་དང༌། །གཞུ་སྲན་བཀང་དང་འཛིང་ག་བཀྱེ་བ་
དང༌། །བང་དང་འགྲོ་ལས་དག་གིས་ཉེན་པ་དང༌། །རྟ་ཡིས་བརྡབས་དང་གཡང་ལ་ལྷུང་བ་
25-1-38


དང༌། །འཐིབས་འོག་ཚུད་དང་རྡོ་དབྱུག་བརྡུངས་པ་དང༌། །ཤ་མར་བུ་རམ་ཆང་སོགས་བཟའ་
བཏུང་དྲགས། །རྐྱེན་དེ་རྣམས་ཀྱིས་མཁྲིས་ཚད་སློང་བར་བྱེད། །ཁ་མངར་ལྕི་བསིལ་སྣུམ་
བསྟེན་དྲགས་པ་དང༌། འགྲངས་རྗེས་དལ་བར་འདུག་དང་ཉིན་གཉིད་ལོག །རླན་སྟེང་ཉལ་
དང་ཆུར་ཞུགས་གོས་སྲབ་འཁྱགས། །གྲོ་སྲན་གསར་ཐོག་སེར་ཅན་སུམས་པ་དང༌། །ར་སྐོམ་
ཤ་རིད་ཚིལ་བུ་འབྲུ་མར་དང༌། །རྩི་མར་རུལ་པ་ལོ་བཤུར་ལ་ཕུག་རས། །རི་སྒོག་ལ་སོགས་
རྗེན་ཟས་མཐའ་དག་དང༌། མ་འཚོས་འཚིག་དང་ཁེངས་པོའི་ཟས་རྣམས་དང༌། །ར་ཡི་འོ་རློན་
ཞོ་དར་ཆུ་གྲང་ཇ། །བཟའ་བཏུང་ཆེས་ཏེ་ཚད་ལས་འདས་པ་འམ། །སྔ་མ་མ་ཞུ་ཕྱི་མ་ཟོས་པ་
ཡི། །རྐྱེན་དེ་རྣམས་ཀྱིས་བད་ཀན་གྲང་ནད་སློང༌། །དེ་དག་འདྲེས་ལས་ལྡན་འདུས་ནད་དུ་
འགྱུར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་ནད་ཀྱི་རྐྱེན་བསྟན་པའི་ལེའུ་སྟེ་དགུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །དེ་ལྟར་རྒྱུ་ལ་རྐྱེན་གྱིས་བསྐྱེད་བྱས་ནས། །འཇུག་པའི་ཚུལ་ནི་འཕང་
བྱའི་ཡུལ་དེ་ལ། །འཕེན་པར་བྱེད་པའི་རྐྱེན་ནི་རྣམ་བཞི་ཡིས། །འཕེན་བྱ་གཅིག་ལ་ཕོག་
དང་འབྲེལ་བས་དཔག །དེ་ཡང་རླུང་ནི་རུས་པ་ལ་གནས་ཏེ། །མཁྲིས་པ་ཁྲག་དང་རྔུལ་ལ་
གནས་པ་ཡིན། བད་ཀན་ལྷག་མ་རྣམས་ལ་གནས་པའོ། །དེ་ལྟར་ཕན་ཚུན་རྟེན་དང་བརྟེན་
པའི་ཚུལ། །ཉེས་པ་འཁྲུགས་པས་ལུས་ཟུངས་ཉེན་བྱས་ཏེ། །གཉིས་ཀས་དྲི་མ་ལ་ནི་གནོད་
པར་བྱེད། །དེ་ཡང་ནད་དང་རྒྱུ་མཐུན་ཟས་ཀྱི་བཅུད། །ཁྱབ་བྱེད་རླུང་གིས་བུ་ག་རྣམས་སུ་
གཏོར། །དེ་ཚེ་དྭངས་མ་གང་དུ་ཆགས་གྱུར་པ། །བུ་གའི་སྐྱོན་དང་དེ་དུས་སྤྱོད་ལམ་གྱིས། །
མཁའ་ལ་སྤྲིན་འདུས་ཆར་པ་འབབ་པ་བཞིན། །རང་རང་གནས་སུ་འཕེལ་ཞིང་གསོག་པར་
བྱེད། །བསགས་པ་རྐྱེན་ཕྲད་ངེས་པ་ཁོ་ནར་ལྡང༌། །ལམ་དྲུག་ཞུགས་ནས་བདེ་མེད་ནད་
25-1-39


འབྱུང་འགྱུར། །དེ་ལྟར་ཞུགས་ནས་གང་དུ་བརྟེན་པའི་གནས། །ཞུ་བའི་གནས་དང་དཔྱི་མིག་
རུས་ཚིགས་དང༌། །རེག་བྱ་རྣ་བ་རླུང་གི་གནས་ཡིན་ཏེ། །ཁྱད་པར་ཞུ་གནས་ལོང་ན་གནས་
པ་ཡིན། །མཁྲིས་གནས་ལྟེ་བ་ཕོ་བ་ཁྲག་དང་རྔུལ། །དྭངས་མ་ཆུ་སེར་མིག་དང་པགས་པ་སྟེ། །
ཁྱད་པར་ཞུ་དང་མ་ཞུའི་བར་ན་གནས། །བད་ཀན་བྲང་དང་མགུལ་པ་བློ་བ་མགོ ། །དྭངས་མ་
ཤ་ཚིལ་རྐང་ཁུ་བཤང་གཅི་དང༌། །སྣ་ལྕེ་ཁྱད་པར་མ་ཞུའི་གནས་ལ་གནས། །ཞེས་གསུངས་
སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ནད་འཇུག་ཚུལ་
གྱི་ལེའུ་སྟེ་བཅུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ཉེས་པའི་མཚན་ཉིད་འཕེལ་ཟད་འཁྲུགས་པ་གསུམ། །འཕེལ་ཟད་ནད་
ཟུངས་དྲི་མ་རྣམ་གསུམ་སྟེ། །དེ་ལ་རྒྱུ་དང་མཚན་མ་རྟགས་བསྟན་པའོ། །དང་པོ་ཉེས་པ་
འཕེལ་དང་ཟད་པའི་རྒྱུ། །ཟས་སྤྱོད་མི་འདོད་སློང་དང་མི་འཕྲོད་འཕྲོད། །གང་སྦྱིན་དེ་དང་
དེས་འཕེལ་ཟད་པར་འགྱུར། །གཉིས་པ་ལུས་ཀྱི་མེ་དྲོད་རང་གནས་འདུག །ཆ་ཤས་ལུས་
ཟུངས་ཀུན་ལ་གནས་པ་དེ། །འབར་དང་བྲི་བས་འཕེལ་དང་ཟད་པར་འགྱུར། །དང་པོས་
ཕྱི་མ་རྒྱས་དང་འགྲིབ་བྱེད་ཡིན། །དྲི་མ་ཐོགས་དང་ཤིན་ཏུ་འབྱུང་ལས་ཤེས། །དེ་རྟགས་
རླུང་འཕེལ་སྐེམ་ནག་དྲོད་ལ་དགའ། །ལུས་འདར་ལྟོ་བ་སྦོ་ཞིང་བཤང་བ་སྲི། །སྨྲ་མང་མགོ་
འཁོར་སྟོབས་གཉིད་དབང་པོ་ཉམས། །མཁྲིས་པ་འཕེལ་བས་བཤང་གཅི་ལྤགས་མིག་
སེར། །བཀྲེས་སྐོམ་ལུས་ཚ་གཉིད་ཆུང་འཁྲུ་བར་བྱེད། །བད་ཀན་འཕེལ་བས་དྲོད་ཉམས་
ཟས་མི་འཇུ། །ལུས་ལྕི་མདོག་དཀར་ཁོང་སྙོམ་ཡན་ལག་ལྷོད། །མཆིལ་མང་ལུད་པ་གཉིད་
ཆེ་དབུགས་མི་བདེ། །དྭངས་མ་འཕེལ་བས་བད་ཀན་དང་འདྲ་ལ། །ཁྲག་འཕེལ་མེ་དབལ་
ཁོང་འབྲས་མཆེར་པའི་ནད། །མཛེ་སྐྲན་ཁྲག་མཁྲིས་ནད་དང་མིག་སེར་དང༌། །རྙིལ་ནད་
25-1-40


སྐྱོད་དཀའ་མིག་དང་གཅིན་པགས་དམར། །ཤ་འཕེལ་ལྦ་བ་རྨེན་བུ་ཤ་རྒྱས་འགྱུར། །ཚིལ་
འཕེལ་ངལ་དང་ནུ་མ་གསུས་ཚིལ་སྐྱེ། །རུས་པ་འཕེལ་བས་རུས་ལྷག་སོ་ལྷག་འབྱུང༌། །
རྐང་འཕེལ་ལུས་ལྕི་མིག་གཡུང་ཚིགས་ཁ་སྦོམ། །ཁུ་འཕེལ་ཁུ་བའི་རྡེ་འགྱུར་བུད་མེད་
དད། །བཤང་འཕེལ་ལུས་ལྕི་ལྟོ་སྦོ་རྒྱུ་མ་འཁྲུག །གཅིན་འཕེལ་ཆུ་སོར་ཟུག་ཅིང་མ་གཅིས་
སེམས། །རྔུལ་འཕེལ་རྔུལ་ཆེ་དྲི་ལོག་པགས་ནད་འབྱུང༌། །ཕྲ་མོ་འཕེལ་བས་ལྕི་ཞིང་གཡའ་
འདྲུལ་བྱེད། །རླུང་ཟད་རྩོལ་ཆུང་སྨྲ་ཉམས་ལུས་མི་བདེ། །དྲན་པ་མི་གསལ་བད་ཀན་འཕེལ་
རྟགས་འབྱུང༌། །མཁྲིས་ཟད་དྲོད་མདོག་ཉམས་པས་གྲང་དང་ནག །བད་ཀན་ཟད་པས་རང་
གི་གནས་སྟོངས་ཤིང༌། །མགོ་འཁོར་སྙིང་འདར་ཚིགས་མཚམས་ལྷོད་པར་འགྱུར། །དྭངས་
མ་ཟད་པས་ཤ་སྐམ་ཟས་མིད་དཀའ། །པགས་རྩུབ་སྒྲ་ཆེར་མི་བཟོད་ན་བར་འགྱུར། །ཁྲག་
ཟད་རྩ་ལྷོད་པགས་རྩུབ་བསིལ་སྐྱུར་དད། །ཤ་ཟད་ལྷུ་ཚིགས་ན་ཞིང་རུས་པགས་འབྱར། །
ཚིལ་ཟད་གཉིད་ཆུང་ཤ་སྐམ་སྔོ་སྐྱར་འགྱུར། །རུས་པ་ཟད་པས་སྐྲ་འབྱི་སོ་སེན་ཕྱུང༌། །རྐང་
ཟད་སྦུབས་སྟོང་མགོ་འཁོར་མིག་འགྲིབ་འགྱུར། །ཁུ་བ་ཟད་པས་ཁྲག་འབྱུང་འཚིག་གམ་
སེམས། །བཤང་ཟད་རྒྱུ་མའི་ནང་དུ་སྒྲ་བཅས་འཁྱིལ། །གྱེན་དུ་འགྲོ་ཞིང་རྩིབ་ལོགས་སྙིང་
ག་ན། །གཅིན་ཟད་མདོག་འགྱུར་སྲི་དང་ཉུང་ངུར་འགྱུར། །རྔུལ་ཟད་པགས་འགས་བ་སྤུ་
འགྲེང་དང་འབྱི། །ཕྲན་བུ་རང་གནས་སྟོངས་དང་ཡང་ལས་ཤེས། །ལུས་ཟུངས་དྲི་མ་ལ་ནི་
བརྟེན་པའི་ཕྱིར། །འཕེལ་དང་ཟད་པས་སྟོབས་ལ་གནོད་པ་ཡིན། །མདངས་ནི་སེམས་ལ་
སྡུག་བསྔལ་གྱིས་ཟད་དེ། །སྔོ་རིད་ཉམ་ཆུང་མི་དགའ་གཟི་མདངས་ཉམས། འཚོ་བྱེད་འོ་མ་
ཤ་ཁུ་དེ་སྨན་ཡིན། །འཁྲུགས་རྟགས་རླུང་གི་རྩ་ནི་སྟོང་ལ་རྐྱལ། །ཆུ་ནི་ཆུ་འདྲ་དྭངས་ལ་ལོག་
རྗེས་སླ། །འགྲོ་འདོད་ཤུས་འདེབས་ཤེས་པ་ཡང་ལ་འཕྱོ། །མགོ་བོ་ཟི་འཁོར་རྣ་བ་འུར་ལ་
འཁྲོག །ལྕེ་སྐམ་དམར་རྩུབ་ཁ་རོ་བསྐ་བ་བྲོ། །གཟེར་འཕོ་གྲང་འདར་འགུལ་རྒྱབ་ཟུག་དང་
25-1-41


སྙོང་། །རེངས་འཁུམས་བྱེ་ཆག་འབྱིན་དང་དཀྲིས་སྙམ་བྱེད། །འགུལ་ན་ཟུག་ཆེ་སྤུ་བརྩེ་ཕྲུམ་
སེར་ཁྱེར། །གཉིད་མེད་གཡལ་འདར་རྐྱོང་འདོད་ཚིག་པ་ཟ། །དཔྱི་རྐེད་རུས་ཚིགས་མ་ལུས་
བརྡུངས་སྙམ་བྱེད། །ལྟག་པ་བྲང་དང་མུར་འགྲམ་ཟུག་ཅིང་གཟེར། །རླུང་གསང་རྣམས་ནི་ཁ་
བྱེ་མནན་ན་ན། །སྟོང་སྐྱུགས་བྱེད་ཅིང་ཐོ་རངས་སྦུ་སོག་ལུ། །སྦོ་འཁྲོག་རྒོངས་དང་ཐོ་རངས་
ཞུ་རྗེས་ན། །མཁྲིས་པ་འཁྲུགས་རྟགས་རྩ་རྒྱས་ཕྲ་གྲིམས་མགྱོགས། །ཆུ་མདོག་དམར་སེར་
དྲི་དུགས་རླངས་པ་ཆེ། །མགོ་ན་ཤ་ཚ་ཁ་རོ་སྐྱུར་ལ་ཁ། །ལྕེ་སྟེང་བད་ཀན་ཆེ་ལ་སྣ་སྒོ་སྐམ། །
མིག་སྤྲིན་དམར་སེར་གཟེར་བ་གཅིག་ཏུ་འདྲིལ། །ནུབ་གཉིད་ཆུང་ལ་ཉིན་པར་གཉིད་མི་
ཐུབ། །ལུད་པ་དམར་སེར་ཚ་བྲོ་སྐོམ་དད་ཆེ། །ཁྲག་མཁྲིས་འཁྲུ་སྐྱུག་རྔུལ་ཆེ་དྲི་མ་མནམ། །
ཁ་དོག་དམར་སེར་སྨིན་ཅིང་འདྲུལ་བར་བྱེད། །ཉིན་དགུང་མཚན་དགུང་ཞུ་བའི་དུས་ན་ན། །
བད་ཀན་འཁྲུགས་རྟགས་རྩ་ནི་བྱིང་རྒུད་དལ། །ཆུ་ནི་མདོག་དཀར་དྲི་དང་རླངས་པ་ཆུང༌། །
ཁ་མངལ་ལྕེ་རྙིལ་སྐྱ་ལ་མིག་དཀར་སྐྲང༌། །སྣབས་ལུད་མང་ཞིང་མགོ་འཐོམ་ལུས་སེམས་
ལྕི། །དང་ག་མི་བདེ་དྲོད་མེད་འཇུ་སྟོབས་ཆུང༌། །མཁལ་རྐེད་ན་ཞིང་ལུས་སྦོ་ལྦ་བ་སྐྱེ། །ཁ་
ཟས་བད་ཀན་སྐྱུག་ཅིང་འཁྲུ་བ་དང༌། །དྲན་པ་མི་གསལ་གཉིད་ཆེ་སྒྱིད་པ་སྐྱུར། །གཡའ་
མཁྲང་ཚིགས་དམ་ཤ་རྒྱས་ལས་མཐའ་རིང༌། །ནམ་ཞོད་སྲོད་དང་སྔ་དྲོ་ཟོས་ཐོག་ལྡང༌། །དེ་
ལྟར་མཚན་ཉིད་འཕེལ་ཟད་འཁྲུགས་གསུམ་གྱི། །ཇི་ལྟར་བཤད་པའི་རྟགས་ཀྱིས་ནད་ཀུན་
ཁྱབ། །ལྡན་འདུས་འདྲེས་པའི་རྟགས་ལས་ཤེས་པར་བྱ། །འདིར་མ་འདུས་པའི་ནད་རྟགས་
ཡོད་མི་སྲིད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་
གི་རྒྱུད་ལས་ནད་ཀྱི་མཚན་ཉིད་བསྟན་པའི་ལེའུ་སྟེ་བཅུ་གཅིག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ནད་ཀྱི་དབྱེ་བ་རྒྱུ་ཡི་དབྱེ་བ་དང༌། །རྟེན་དང་རྣམ་པའི་སྒོ་ནས་དབྱེ་བ་
25-1-42


གསུམ། །དང་པོ་རྒྱུ་ཡི་སྒོ་ནས་དབྱེ་བ་ནི། །ཚེ་འདིའི་ཉེས་དང་སྔོན་གྱི་ལས་ལས་བྱུང༌། །དེ་
གཉིས་འདྲེས་ལས་བྱུང་དང་རྣམ་པ་གསུམ། །དང་པོ་རྒྱུ་རྐྱེན་འཛོམ་ལས་འབྱུང་བ་སྟེ། །ལས་
སྐྱེས་རྒྱུ་མེད་པ་ལ་དཀྱེལ་ཆེ་བ། །རྒྱུ་ཆུང་དཀྱེལ་ཆེ་ཉེས་ལས་འདྲེས་པ་ཡིན། །དང་པོ་ཚེ་
འདིའི་ཉེས་པ་རྣམ་གཉིས་ཏེ། །རང་བཞིན་གནས་པ་ཁོང་གི་ཉེས་པ་དང༌། །ཕྱི་རྐྱེན་ལས་བྱུང་
གློ་བུར་ཉེས་པ་གཉིས། །དང་པོ་རླུང་མཁྲིས་བད་ཀན་གསུམ་ཡིན་ཏེ། །གཉིས་པ་དུག་མཚོན་
གདོན་དང་རྣམ་པ་གསུམ། །རྟེན་གྱི་སྒོ་ནས་དབྱེ་ན་སྐྱེས་པ་དང༌། །བུད་མེད་བྱིས་པ་རྒས་པའི་
ནད་རིགས་བཞི། །ཀུན་ཁྱབ་ཐུན་མོང་བ་དང་རྣམ་པ་ལྔ། །སྐྱེས་པའི་ནད་ལ་ཁུ་བ་ཟད་བླུགས་
གཉིས། །རླིག་བླུགས་ཕོ་མཚན་བདུན་དགུ་བཅོ་བརྒྱད་བཤད། །བུད་མེད་ནད་ལ་ཚབས་བཅུ་
མངལ་སྐྲན་དགུ། །མངལ་གྱི་སྲིན་བུ་ལངས་ཁྲོས་རྣམ་པ་གཉིས། །རྩ་ནད་བཅོ་ལྔ་སུམ་ཅུ་རྩ་
དྲུག་གོ །བྱིས་པའི་ནད་ལ་ཕྲ་རགས་ཞིབ་ཚེགས་བརྒྱད། །རྒས་ནད་འབྱུང་བའི་ལུས་སྟོབས་
འགྲིབས་པ་ཡིན། ཀུན་ཁྱབ་ཐུན་མོང་ནད་ལ་ཉེས་པ་དང༌། །གཙོ་བོ་གནས་དང་རིགས་ཀྱིས་
དབྱེ་བའོ། །ཉེས་པས་དབྱེ་བ་རླུང་མཁྲིས་བད་ཀན་གསུམ། །རླུང་གི་ནད་ལ་སྤྱི་དང་བྱེ་བྲག་
གཉིས། །སྤྱི་ལ་རིགས་དང་གནས་ཀྱིས་དབྱེ་བ་གཉིས། །རིགས་ཀྱིས་དབྱེ་ན་རླུང་ནད་ཉི་ཤུ་
སྟེ། །གནས་ཀྱིས་དབྱེ་ན་འཇུག་སྒོ་རྣམ་པ་དྲུག །དབང་པོ་ལྔ་ལ་མེ་ཏོག་ཤར་དང་བདུན། །བྱེ་
བྲག་སྲོག་འཛིན་ལ་སོགས་རྣམ་གྱུར་ལྔ། །བད་ཀན་མཁྲིས་པར་འདྲེས་པས་བཅུ་རུ་འདོད། །
དབྱེ་བ་བཞི་བཅུ་རྩ་གཉིས་རླུང་གི་ནད། །མཁྲིས་པའི་ནད་ལ་སྤྱི་དང་བྱེ་བྲག་གཉིས། །སྤྱི་
ལ་རིགས་དང་གནས་ཀྱི་དབྱེ་བ་གཉིས། །རིགས་ཀྱི་དབྱེ་བ་ཐང་ལ་ལྷགས་པ་དང༌། །གནས་
གྱུར་ཁ་ལུད་རྩ་རྒྱུག་རྣམ་པ་གསུམ། །གནས་ཀྱིས་དབྱེ་ན་སྒོ་དྲུག་དབང་པོ་བདུན། །བྱེ་བྲག་
འཇུ་བྱེད་ལ་སོགས་རྣམ་གྱུར་ལྔ། །རླུང་དང་བད་ཀན་འདྲེས་པས་བཅུ་རུ་འདོད། །དབྱེ་བ་
ཉི་ཤུ་རྩ་དྲུག་མཁྲིས་པའི་ནད། །བད་ཀན་ནད་ལ་རང་རྒྱུད་གཞན་རྒྱུད་གཉིས། །རང་རྒྱུད་
25-1-43


ཅན་ལ་སྤྱི་དང་བྱེ་བྲག་གཉིས། །སྤྱི་ལ་རིགས་དང་གནས་ཀྱིས་དབྱེ་བ་གཉིས། །རིགས་ཀྱི་
སྒོ་ནས་དབྱེ་ན་ལྷེན་སོགས་དྲུག །གནས་ཀྱིས་དབྱེ་ན་སྒོ་དྲུག་དབང་པོ་བདུན། །བྱེ་བྲག་
རྟེན་བྱེད་ལ་སོགས་རྣམ་གྱུར་ལྔ། རླུང་དང་མཁྲིས་པར་འདྲེས་པས་བཅུ་རུ་འདོད། །གཞན་
རྒྱུད་ཅན་ལ་སེར་པོ་སྨུག་པོ་གཉིས། སྨུག་པོ་བྱེར་རྒྱས་རྡོལ་དང་འགྱིངས་པ་བཞི། །དབྱེ་
བ་སུམ་ཅུ་རྩ་གསུམ་བད་ཀན་ནད། །བརྒྱ་དང་རྩ་གཅིག་ཉེས་པའི་དབྱེ་བར་འདོད། །གཙོ་
བོས་དབྱེ་ན་རང་རྒྱུད་གཞན་རྒྱུད་ཅན། །རང་རྒྱུད་ཅན་ནི་རྐྱང་པ་རང་རྟགས་སྟོན། །འཕེལ་
དང་རབ་འཕེལ་མཆོག་འཕེལ་ཟད་པར་སྦྱར། །གཞན་རྒྱུད་ཅན་ལ་ལྡན་འདུས་བླ་གཉན་
གསུམ། །ལྡན་པ་མཉམ་གསུམ་ཅིག་རབ་ལྷག་པ་དྲུག །འདུས་ལ་མཚུངས་ཅིག་རབ་འབྲིང་
གསུམ་སྦྱར་དྲུག །གཉིས་གཅིག་ལྷག་པ་ལ་དྲུག་གོ་ཟློག་ཟད། །འཕེལ་ཟད་འདྲེས་ལ་མཉམ་
འཕེལ་ཟད་སྦྱར་དྲུག །གཅིག་ཟད་གཉིས་འཕེལ་གོ་ཟློག་བཅས་པ་དྲུག །འཕེལ་ཟད་དབྱེ་བ་
བདུན་ཅུ་རྩ་བཞིའོ། །བླ་གཉན་ནད་ཀྱི་སྟེང་དུ་ནད་གང་ཞིག །བྱུང་བ་དེ་ཡང་དབྱེ་བ་གསུམ་
འགྱུར་ཏེ། །ཞུགས་དང་ལོག་དང་འདོམ་པ་ཞེས་སུ་བཤད། །གཅིག་གི་གནས་སུ་ནད་གཞན་
ཞུགས་པ་དང༌། །རང་མ་ཞི་བར་གཞན་དུ་ལོག་པ་དང༌། །ནད་སྣ་གཉིས་སུ་འཐབ་པས་དགུ་
ཚན་གསུམ། །བརྒྱ་དང་རྩ་གཅིག་གཙོ་བོའི་དབྱེ་བར་འདོད། །གནས་ཀྱི་སྒོ་ནས་དབྱེ་ན་ལུས་
དང་སེམས། །སེམས་ལ་གནས་པ་སྨྱོ་བྱེད་བརྗེད་བྱེད་གཉིས། །ལུས་ལ་གནས་པ་སྟོད་སྨད་
ཕྱི་ནང་བཞི། །ཕྱི་ནང་ཀུན་ཁྱབ་ནད་དང་རྣམ་པ་ལྔ། །ལུས་སྟོད་དབང་པོ་མགོ་ལ་གནས་པ་
ནི། །མགོ་མིག་རྣ་བ་སྣ་དང་མཆུ་སོ་ལྕེ། །རྐན་ནད་གྲེ་བ་ལྦ་བ་ནམ་ཚོང་ནད། །གྲེ་བར་གནས་
པ་ནད་དང་གག་པ་དང༌། །མགུལ་འགགས་ནད་དང་སྐད་འགགས་རྣམ་པ་བཞི། །ནམ་ཚོང་
སྤྱིར་གནས་སྐོམ་དད་སྐྱིགས་བུ་དང༌། །དབུགས་མི་བདེ་དང་ཡིད་འཆུས་ཆམ་པ་ལྔ། །སྤྱི་རུ་
སྡོམས་པས་དབྱེ་བ་བཅོ་བརྒྱད་བཤད། །དོན་སྣོད་ནང་ལ་གནས་པའི་ནད་བསྟན་པ། །སྙིང་
25-1-44


དང་གློ་བ་མཆིན་མཆེར་མཁལ་མ་དང༌། །ཕོ་བ་མཁྲིས་པ་རྒྱུ་ལོང་ལྒང་པ་དང༌། །བསམ་སེའི་
ནད་དང་རྣམ་པ་བཅུ་གཅིག་གོ །དོན་སྣོད་སྤྱིར་གནས་མ་ཞུ་གླང་ཐབས་སྐྲན། །སུར་ཡ་ཚད་
འཁྲུ་རྒྱུ་གཟེར་རྣམ་པ་དྲུག །སྣོད་སྤྱིར་གནས་པ་འཁྲུ་སྐྱུག་རྣམ་པ་གཉིས། །སྤྱི་རུ་སྡོམས་པས་
ནད་རིགས་བཅུ་དགུའོ། །སྨད་ནད་གཞང་འབྲུམ་མཚན་བར་རྡོལ་བ་དང༌། །རྟུག་འགགས་
གཅིན་འགགས་གཅིན་སྙི་རྣམ་པ་ལྔ། །ཕྱིར་གནས་པགས་པ་ཤ་དང་རྩ་རུས་ཏེ། །པགས་པའི་
ནད་ལ་ཤ་བཀྲ་བས་ལྡགས་དང༌། །གཡན་པ་གླང་ཤུ་ཟ་རྐོང་ཤུ་བ་དང༌། །རེག་པའི་དུག་དང་
མཛེར་པ་ངོ་ཁབ་དང༌། །ནད་གཞན་པགས་ལ་གྲམ་དང་བཅུ་རུ་བཤད། །ཤ་ཡི་ནད་ལ་ལྦ་བ་
རྨེན་བུ་གཉིས། །ནད་གཞན་ཤ་ལ་རྒྱས་དང་རྣམ་པ་གསུམ། །རྩ་ཡི་ནད་ལ་རྩ་དཀར་རྩ་ནག་
གཉིས། །ནད་གཞན་རྩ་རུ་རྒྱུག་དང་རྣམ་པ་གསུམ། །རུས་པའི་ནད་ལ་དྲེག་དང་རྐང་བམ་
གཉིས། །ནད་གཞན་རུས་ལ་ཞེན་དང་རྣམ་པ་གསུམ། །ཤ་རུས་ཀུན་ལ་གནས་པ་གྲུམ་བུའི་
ནད། །སྤྱི་རུ་སྡོམས་པས་ཉི་ཤུ་ཐམ་པའོ། །ཕྱི་ནང་ཀུན་ཏུ་ཁྱབ་པའི་ནད་རིགས་ལ། །མཁྲིས་པ་
སྨུག་པོ་དམུ་འོར་སྐྱ་རྦབ་གཅོང༌། །ཚ་བ་སྡེ་དྲུག་འགྲམས་འཁྲུགས་རིམས་ནད་དང༌། །འབྲུམ་
བུ་ལྷོག་པ་སྦྱར་དུག་རྫི་ཟེར་དུག །རླངས་དུག་ཤ་དུག་མི་འཕྲོད་པ་ཡི་དུག །བཙན་དུག་ཁྱི་
དུག་སྲིན་བུ་སྦྲུལ་གྱི་དུག །འབྱུང་པོ་གཟའ་དང་མཛེ་འབྲས་མེ་དབལ་སྲིན། །མགོ་དང་བྱང་
ཁོག་ཡན་ལག་སྐེ་ཡི་རྨ། །སྤྱི་རུ་སྡོམས་པས་སུམ་ཅུ་རྩ་བདུན་ཏེ། །བརྒྱ་དང་རྩ་གཅིག་གནས་
ཀྱི་དབྱེ་བར་འདོད། །རིགས་ཀྱི་སྒོ་ནས་དབྱེ་ན་ཁོང་ནད་དང༌། །རྨ་དང་ཚད་པ་ཐོར་བུའི་ནད་
རིགས་བཞི། །དང་པོ་ཁོང་ནད་སྒོ་ནས་དབྱེ་བ་ལ། །མ་ཞུ་རྒྱུ་དང་འབྲས་བུ་གཅོང་ནད་གཉིས། །
མ་ཞུ་ངོ་བོ་རིགས་གྲོགས་དུས་ཀྱིས་བཞི། །འབྲས་བུ་གཅོང་ནད་དབྱེ་བ་གསར་རྙིང་གཉིས། །
གསར་པ་བད་ཀན་སྐྱ་བོ་སྨུག་པོ་དང༌། །མཁྲིས་པའི་ནད་དང་དུག་གཅོང་རྣམ་པ་བཞི། །སྐྱ་
བོ་ལྷེན་དང་ལྕགས་དྲེག་མེ་ཉམས་དང༌། །མགུལ་འགགས་གྲུམ་བུ་དཀར་པོ་འཇུ་སྐེམས་དྲུག །
25-1-45

 
སྨུག་པོ་བྱེར་རྒྱས་རྡོལ་རལ་འགྱིངས་དང་འདྲིལ། །གབ་འཐབ་འོར་ལྷུང་གྲང་བ་ལྷིང་ཆད་
བཅུ། །མཁྲིས་པ་ཁ་ལུད་རྩ་རྒྱུག་གནས་གྱུར་གསུམ། །དུག་གི་གཅོང་ལ་ཚ་སྦྱོར་གྲང་སྦྱོར་
གཉིས། །རྙིང་པ་སྐྲན་དང་དམུ་འོར་སྐྱ་རྦབ་བཞི། །གཅོང་ཆེན་ཟད་བྱེད་ནད་དང་རྣམ་པ་ལྔ། །
སྐྲན་ལ་ཁྲག་མཁྲིས་ལྷེན་དང་རྡོ་ཡི་སྐྲན། །རླུང་སྲིན་རྩ་ཆུའི་སྐྲན་དང་བརྒྱད་དུ་བཤད། །དམུ་
ཆུ་བྱེར་ཟགས་འཁྱིམས་ཆུ་རྡོལ་ཆུ་བཞི། །འོར་ལ་ཚ་འོར་གྲང་འོར་རྣམ་པ་གཉིས། །སྐྱ་རྦབ་
གློ་སྙིང་མཆིན་མཆེར་ཆུ་སེར་ལྔ། །ཟད་བྱེད་རླུང་མཁྲིས་བད་ཀན་བླ་གཉན་བཞི། །ཁོང་ནད་
སྤྱིར་སྡོམས་བཞི་བཅུ་རྩ་བརྒྱད་དོ། །རྨ་ལ་ལྷན་ཅིག་སྐྱེས་དང་གློ་བུར་བ། །ལྷན་སྐྱེས་འབྲས་
དང་རྨེན་བུ་སུར་ཡ་དང༌། །མེ་དབལ་གཞང་འབྲུམ་རྐང་བམ་མཚན་བར་རྡོལ། །གློ་བུར་རྨ་ལ་
གནས་དང་རིགས་ཀྱིས་དབྱེ། །གནས་ནི་མགོ་སྐེ་བྱང་ཁོག་ཡན་ལག་ལ། །རྨ་རིགས་བཤུས་
བཅད་རྣམ་པར་བཅད་པ་དང༌། །འཕྱང་ལྷུང་ཕུག་གཤགས་གྲུགས་པ་རྣམ་པ་བརྒྱད།།སྤྱི་རུ་
སྡོམས་པས་དབྱེ་བ་བཅུ་དྲུག་གོ །ཚ་བ་མ་སྨིན་རྒྱས་སྟོངས་གབ་རྙིངས་རྙོགས། །འགྲམས་
འཁྲུགས་རིམས་ནད་དུག་ཚད་རྣམ་པ་བཞི། །འགྲམས་ལ་ཕྱི་འགྲམས་ནང་འགྲམས་རྣམ་
པ་གཉིས། །འཁྲུགས་ལ་རྒྱས་འཁྲུགས་སྟོང་འཁྲུགས་འཇམ་འཁྲུགས་གསུམ། །རིམས་
ལ་བལ་ནད་རྒྱུ་གཟེར་འབྲུམ་པ་དང༌། །གག་ལྷོག་ཆམ་པའི་ནད་དང་རྣམ་པ་ལྔ། །དུག་ལ་
སྦྱར་དུག་གྱུར་པ་དངོས་དང་གསུམ། །ཐོར་བུ་སྐད་འགགས་སྐྱིགས་བུ་ཡི་ག་འཆུས། །སྐོམ་
དད་དབུགས་མི་བདེ་དང་གླང་ཐབས་སྲིན། །འཁྲུ་སྐྱུག་དྲི་མ་གཅིན་འགགས་གཅིན་སྙི་
དང༌། །ཚད་འཁྲུ་དྲེག་གྲུམ་ཆུ་སེར་རྩ་དཀར་དང༌། །པགས་པའི་ནད་དང་ཐོར་བུ་བཅོ་བརྒྱད་
དོ། །བརྒྱ་དང་རྩ་གཅིག་རིགས་ཀྱི་དབྱེ་བར་འདོད། །དེ་ལྟར་ཉེས་པ་གཙོ་བོ་རིགས་གནས་
བཞིའི། །དབྱེ་བ་བཞི་བརྒྱ་རྩ་བཞིའི་ནད་ཡོད་དེ། །དེ་ལ་གཞན་དབང་བཅོས་ཀྱང་འཆི་བ་
དང༌། །ཀུན་བརྟགས་གདོན་ནད་རིམ་གྲོས་གྲོལ་བ་དང༌། །ཡོངས་གྲུབ་མ་བཅོས་འཆི་ལ་
25-1-46


བཅོས་ན་འཚོ། །ལྟར་སྣང་མ་བཅོས་རང་བཞིན་འཚོ་བ་བཞི། །གཅིག་ལའང་བཞི་སྦྱར་བཞི་
བརྒྱ་རྩ་བཞི་སྟེ། །སྡོམས་པས་སྟོང་དང་དྲུག་བརྒྱ་བཅུ་དྲུག་འགྱུར། །རྣམ་པའི་སྒོ་ནས་དཔག་
ཏུ་མེད་པར་དབྱེ། །ཉེས་པ་གནོད་བྱ་ཉི་ཤུ་རྩ་ལྔ་ལ། །རྐྱང་པ་ལྡན་འདུས་དུ་མའི་རིགས་འབྱུང་
བས། །གྲངས་དང་མིང་གི་ངེས་བསྟན་ཡོད་མ་ཡིན། །འོན་ཀྱང་ཉེས་པ་གསུམ་ལས་ནད་མི་
འདའ། །གནོད་བྱ་བཅུ་ལས་ནད་ཀྱི་གནས་མི་འདའ། །དཔེར་ན་འདབ་ཆགས་བྱ་ཡིས་གར་
འཕུར་ཡང༌། །ནམ་མཁའི་མཐོངས་ལས་འཕུར་ས་མེད་པ་བཞིན། །བད་རླུང་གྲང་ལ་ཁྲག་
མཁྲིས་ཚ་བས་ན། །དུ་མར་ཕྱེ་ཡང་ཚ་གྲང་གཉིས་སུ་འདུས། །སོ་སོའི་དོན་ལ་རྒྱུ་དང་སྔར་
ཚུལ་དང༌། །ཚུལ་ཕྱེད་པ་དང་དཀྱེལ་དུ་གྱུར་པ་བཞི། །རྒྱུ་ནི་རང་རང་སྐྱེད་པའི་རྐྱེན་ཡིན་ཏེ། །
སྔར་ཚུལ་ཞེས་བྱ་བྱེ་བྲག་གསལ་མིན་པ། །ནད་རྟགས་གསལ་བར་གྱུར་པ་ཚུལ་ཕྱེད་ཡིན། །
རང་གནས་མཐར་ཕྱིན་ཤུགས་རྫོགས་དཀྱེལ་གྱུར་ཏོ། །དེ་ལ་རྣམ་གྲངས་བརྟག་པ་གཙོ་བོ་
སྟོབས། །རྣམ་གྲངས་ནད་རིགས་ནང་ཚེགས་དབྱེ་བ་སྟེ། །བརྟག་པ་དེ་རྣམས་མ་འདྲེས་ཕྱེད་
པ་ཡིན། །གཙོ་བོ་རང་རྒྱུད་ཅན་དང་གཞན་རྒྱུད་ཅན། །དེ་ལ་སྔར་སྐྱེས་བླ་གཉན་བཅས་པའོ། །
ནད་སྟོབས་ཡུལ་དུས་རང་བཞིན་ན་ཚོད་དང༌། །ནད་ཁམས་ཟས་སྤྱོད་དབང་གིས་གཉིས་སུ་
འགྱུར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་ནད་ཀྱི་དབྱེ་བ་བསྟན་པའི་ལེའུ་སྟེ་བཅུ་གཉིས་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །བྱ་བ་སྤྱོད་ལམ་གནས་ལ་ཇི་ལྟར་བསླབ་པར་བགྱི། །འཚོ་མཛད་
སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་
སྲོང་ཆེན་པོ་ཉོན་ཅིག །ནད་ལ་གསོ་བར་བྱེད་པའི་གཉེན་པོ་ཡི། །བྱ་བ་སྤྱོད་ལམ་གནས་
ལ་བསླབ་བྱ་ན། །རྒྱུན་སྤྱོད་དུས་སྤྱོད་གནས་སྐབས་སྤྱོད་པ་གསུམ། །དེ་ལ་ཉིན་རེ་རྒྱུན་དུ་
25-1-47


སྤྱོད་པའི་ལས། །ཚེ་བརྐྱང་འཇིག་རྟེན་པ་དང་དམ་པའོ། །དང་པོ་ཚེ་བརྐྱང་པ་ཡི་སྤྱོད་ལམ་
ནི། །རྟག་ཏུ་བདེ་གནས་འདོད་ཅིང་ཚེ་བསྲིང་ཕྱིར། །སྨན་མཆོག་རིན་ཆེན་གྲུབ་པའི་གསང་
སྔགས་བཅང༌། །ནད་སློང་རྐྱེན་གཉིས་དྲན་པས་རྟག་ཏུ་སྤང༌། །ལུས་ངག་ཡིད་ལས་ཉེས་
སྤང་ཡང་དག་བསྟེན། །ལྕེ་སོགས་དབང་པོ་མནར་དང་ཉམས་བདེར་མིན། །ཐེ་ཚོམ་གྲུ་འམ་
མི་སྲུན་བཞོན་པ་དང༌། །གསོད་ས་ཆུ་ཆེན་མེ་ཡི་ཕུང་པོ་དང༌། །གད་སྟེང་ཤིང་རྩེར་དབྱར་
དགུན་འཛེག་འགྲོ་སྤང༌། །སྡོད་ན་ས་བརྟག་འགྲོ་ན་ལམ་བརྟག་ཅིང༌། །མཚན་མོ་དོན་ཆེན་
དབྱུག་ཐོགས་གྲོགས་ལྡན་བྱ། །མཚན་གཉིད་མ་ལོག་རྩུབ་པས་ཅི་བདེར་ལོག །མ་ལོག་ནང་
པར་སྨྱུང་བྱ་ཕྱེད་གཉིད་ལོག །ར་རོ་སྟོབས་ཟད་མྱ་ངན་རྩོལ་བས་དུབ། །སྨྲ་མང་རྒས་དང་
འཇིགས་པའི་མི་རྣམས་ལ། །སོ་ག་རྩུབ་ཅིང་མཚན་མོ་ཐུང་བས་ན། །ལུས་ཀྱི་སྟོབས་འཕྲོག་
རླུང་འཕེལ་འགྱུར་བའི་ཕྱིར། །ཉིན་པར་གཉིད་ལོག་སྣུམ་ལྕིར་འགྱུར་བས་ཕན། །གཞན་
དུ་ཉིན་གཉིད་བད་ཀན་སྐྱེད་ཅིང་སྐྲངས། །རྨོངས་བག་མགོ་ན་སྒྱིད་སྐྱུར་རིམས་འདེབས་
འགྱུར། །གཉིད་འཕེལ་སྐྱུགས་དང་སྨྱུང་བྱ་བུད་མེད་བསྟེན། །གཉིད་ཡེར་འོ་མ་ཞོ་ཆང་ཤ་
ཁུ་བཏུང༌། །མགོ་བོ་བསྐུ་ཞིང་རྣ་བ་སྣུམ་གྱིས་དགང༌། །ཉལ་པོ་སྐྱེ་གནས་མི་མཐུན་བདག་པོ་
ཅན། །མི་སྡུག་སྦྲུམ་མ་ཤུགས་ཞན་ཉེན་པ་དང༌། །ཟླ་མཚན་ལྡན་དུས་བཀན་བྱེད་འཁྲིག་པ་
སྤང༌། །དགུན་དུས་རོ་ཙས་དྲེགས་ཚེ་བཀག་པ་མེད། །སྟོན་དཔྱིད་ཞག་གཉིས་དབྱར་སོས་ཟླ་
ཕྱེད་སྤྱད། །གཞན་དུ་བུད་མེད་ལ་ཞུགས་དབང་པོ་ཉམས། །མགོ་འཁོར་དུས་མིན་འཆི་བར་
བྱེད་པ་ཡིན། །རྟག་ཏུ་བསྐུ་བྱུག་སྤྱོད་བྱེད་རྒས་ངལ་རླུང༌། །འཇོམས་བྱེད་མགོ་རྐང་རྣ་བ་ལ་
བསྟེན་བྱ། །ལུས་ཡང་ཚིལ་འབྲི་སྐབས་ཕྱེད་མེ་དྲོད་སྐྱེད། །མཁྲེགས་དང་ལས་ནུས་ཡང་དག་
རྩོལ་སྤྱད་འབྱུང༌། །ཐལ་དྲགས་ལོག་པས་དེ་ལས་མ་རུངས་འགྱུར། །རྒན་བྱིས་རླུང་མཁྲིས་
ནད་ཅན་དེ་སྤང་བྱ། །སྟོབས་ལྡན་སྣུམ་ཟ་དགུན་དང་དཔྱིད་དུས་དང༌། །བད་ཀན་ཅན་གྱིས་
25-1-48


རྩོལ་བཅག་བསྟེན་པར་བྱ། །དྲིལ་ཕྱིས་བད་ཀན་སེལ་ཞིང་ཚིལ་འཇུ་བྱེད། །པགས་གསལ་
ཡན་ལག་བརྟན་པར་བྱེད་པའི་མཆོག །ཁྲུས་ནི་རོ་ཙ་དྲོད་སྟོབས་ཚེ་མདངས་སྐྱེད། །གཡའ་
རྔུལ་དྲི་ང་སྙོམ་སྐོམ་ལུས་ཚ་སེལ། །ཆུ་དྲོན་མགོ་བཀྲུས་སྐྲ་མིག་སྟོབས་འཕྲོག་ཡིན། །ཚད་
འཁྲུ་ལྟོ་སྦོས་ཆམ་པ་མ་ཞུ་དང༌། །སྣ་མིག་ནད་ཅན་ཟོས་མ་ཐོག་ལ་སྤང༌། །མིག་ནི་མེ་ཡི་རང་
བཞིན་བད་ཀན་འཇིག །མཆི་མ་འཛག་ཕྱིར་མིག་སྨན་སྐྱེར་ཁཎྜ། །རྟག་ཏུ་ཞག་བདུན་ལོན་
ཚེ་ཉིན་རེ་བླུག །གློ་བུར་ནད་ལྔའི་དགྲ་ལ་སྐྱེལ་མ་བསྟེན། །རྟག་ཏུ་གཅིག་ལ་མ་ཡིན་ཀུན་
སྙོམས་སྤྱད། །དེ་ལྟར་བདག་ནི་ཉིན་མཚན་གནས་འགྲོ་ཞེས། །རྟག་ཏུ་དྲན་པ་ཉེར་འཇོག་
སྡུག་བསྔལ་བསྲིང༌། །འཇིག་རྟེན་མི་ཆོས་སྤྱོད་པ་ཡོན་ཏན་ཀུན་གྱི་གཞི། །འཆད་དོན་བཙན་
པར་བྱ་ཞིང་ཚིག་རྗེས་དོན་གྱིས་བསབ། །ངན་ལས་ཆད་ཀྱང་བཟློག་ཅིང་བཟང་ལས་བཤོལ་
ཡང་བརྩམ། །གཞིག་པ་སྔོན་ལ་བཏང་ཞིང་ཕྱིས་ཀྱི་ལེགས་འཕེན་བཅའ། །ཟེར་དགུ་བདེན་
པར་མི་བཟུང་ལེགས་པར་དཔྱད་ནས་བཟུང༌། །སྨྲ་དགུ་བསམ་ལ་སྨྲ་ཞིང་རང་གི་མདོ་དོན་
བསྡམ། །བུད་མེད་ངག་ལ་མི་ཉན་སྦད་ཁ་ལྕི་བར་བྱ། །བྱམས་ལྟོས་མི་ལ་ཚིག་དྲོན་མི་གཞུག་
ལྷུག་པར་སྨྲ། །ཅམ་ལ་བརླིང་ཞིང་འཕྲལ་ལ་འགྲོགས་པ་བདེ་བར་བྱ། །དགྲ་བོ་ཡན་པར་མི་
བཏང་འདམ་རིང་ཐབས་ཀྱིས་འདུལ། །ཉེ་འཁོར་ཤ་ཚས་བསྐྱང་ཞིང་སྔར་དྲིན་མིག་རིང་བལྟ། །
སློབ་དཔོན་ཕ་ཁུ་ལ་སོགས་རྒན་རིགས་ཕུད་དུ་ཁུར། །ཡུལ་མི་མཛའ་བཤེས་འགྲོགས་
དགོས་རྣམས་དང་བློ་སེམས་བསྟུན། །སོ་ནམ་ཞིབ་མོར་བྱ་ཞིང་དགོས་དུས་རྩིང་པོར་སྤྱད། །
མི་བདེན་འཕམ་ངོས་བླང་ཞིང་རྒྱལ་ན་ཚོད་ཟིན་བྱ། །མཁས་ན་དྲེགས་པ་སྐྱུང་ཞིང་ཕྱུག་ན་
ཆོག་ཤེས་བྱ། །མི་བྲན་ཁྱད་དུ་མི་བསད་མཐོ་ལ་ཕྲག་དོག་སྤང༌། །མི་ངན་བསྟེན་རྫི་མི་བྱ་
བན་བོན་དགྲར་མི་བསླང༌། །གཞན་གྱི་ནོར་ལ་མི་འབགས་ལ་ཡོགས་མནའ་ལ་འཛེམ། །མི་
འགྱོད་རྡོག་གཏད་བྱ་ཞིང་ངན་ལ་དབང་མི་བསྐུར། །སེམས་ཀྱི་སྟོབས་དྲང་ངང་རིང་ཡངས་
25-1-49


ཤིང་གཞི་བསྐྱེད་ལ། །ལས་རྣམས་ཕལ་ཆེར་ཟླ་ཚོད་དུས་སུ་བླང་བ་གཅེས། །དེ་འདྲ་གཅིག་
པུར་སྐྱེས་ཀྱང་གཞན་ལ་དབང་མི་འཆོར། །བྲན་གྱི་ལུས་ཀྱང་སྐྱེ་བོ་མང་པོའི་དཔོན་དུ་འགྱུར། །
དེ་ནས་དམ་པ་ལྷ་ཆོས་སྤྱད་པ་ནི། །སེམས་ཅན་ཐམས་ཅད་བདེ་བ་འདོད་པའི་ཕྱིར། །རྩོམ་
པ་ཀུན་ལ་འཇུག་ཀྱང་ཆོས་མེད་ན། །བདེ་ཉིད་སྡུག་བསྔལ་རྒྱུ་ཕྱིར་ཆོས་ལ་འབད། །མོས་
པས་བཤེས་བསྟེན་ཅིག་ཤོས་རིང་དུ་སྤང༌། །སྲོག་གཅོད་རྐུ་དང་ལོག་པར་གཡེམ་པ་དང༌། །
རྫུན་དང་ངག་འཁྱལ་ཚིག་རྩུབ་དབྱེན་སྦྱོར་དང༌། །བརྣབས་སེམས་གནོད་སེམས་ལྟ་བ་ཕྱིན་
ཅི་ལོག །སྡིག་པའི་ལས་བཅུ་ལུས་ངག་ཡིད་ཀྱིས་སྤང༌། །མྱ་ངན་ནད་ཕོངས་སྡུག་ལ་ནུས་
ཕན་གདགས། །འབུ་སྲིན་སོགས་ཀུན་རྟག་ཏུ་རང་འདྲར་བལྟ། །བསླུ་མེད་དེས་པས་འཛུམ་
ཞིང་དྲང་པོར་སྨྲ། །གནོད་བརྩོན་དགྲ་ལའང་ཕན་གདགས་གཙོར་བྱས་ཏེ། །བྱམས་པས་བྱང་
ཆུབ་མཆོག་གི་སེམས་གཉིས་བསྐྱེད། །ལུས་ངག་ཡིད་དུལ་ཕངས་མེད་གཏོང་སེམས་ལྡན། །
གཞན་གྱི་དོན་ལའང་རང་གི་འདྲར་སེམས་པ། །དེ་དག་དམ་པའི་སྤྱོད་པ་མཐར་ཐུག་གོ ། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་
ཉིན་རེ་བཞིན་རྒྱུན་དུ་སྤྱོད་པའི་ལེའུ་སྟེ་བཅུ་གསུམ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །གཉིས་པ་དུས་སུ་སྤྱོད་པའི་སྤྱོད་ལམ་ནི། །དགུན་སྟོད་དགུན་སྨད་དཔྱིད་
དང་སོ་ག་དང༌། །དབྱར་སྟོན་དགུན་ཟླ་ར་སོགས་གཉིས་རིམ་བཞིན། །སྐད་ཅིག་ལ་སོགས་
ཐངས་ཅིག་ཡུད་ཙམ་ལ། །ཉིན་ཞག་ཟླ་བ་དུས་དང་ལོར་འགྱུར་ཏེ། །ཉི་མ་བརྒྱད་གསུམ་
དབྱར་དགུན་དབུས་སུའང་བཟློག །གསུམ་ནི་ལྷོ་དང་བྱང་དུ་འགྲོ་ཞེས་བྱ། །ནམ་དང་ཉི་མ་
ཕྱེད་ན་མཉམ་པ་ཡིན། །བརྒྱད་དང་བཅུ་ན་སྒྲ་སྒྲོགས་ཆད་པར་འགྱུར། །དེ་ལ་དགུན་ཟླ་ཐ་
ཆུང་ལ་སོགས་པ། །ཉི་མ་བྱང་དུ་འགྲོ་བའི་དུས་ཀྱི་ཚེ། །ཤིན་ཏུ་རྣོ་ཚ་རྩུབ་པའི་ངོ་བོར་འགྱུར།  །
25-1-50

 
རླུང་དང་ཉི་མ་དག་གི་ནུས་སྟོབས་ཀྱིས། །ཟླ་བ་ས་ཡི་ཡོན་ཏན་ཟད་པར་བྱེད། །འདིར་ནི་ཚ་
བསྐ་ཁ་བའི་རོ་སྟོབས་ཆེ། །མི་རྣམས་ཀྱི་ནི་མཐུ་སྟོབས་ཉིན་རེ་འཕྲོག །ཆར་དུས་ལྷོ་ཕྱོགས་
འགྲོ་ཚེ་སླར་སྟོབས་སྐྱེད། །བསིལ་བ་ཟླ་བའི་སྟོབས་ལྡན་ཉི་མ་འབྲི། །ཆར་བབས་རླུང་གིས་
ས་སྟེང་ཚ་བ་ཞི། །སྐྱུར་དང་ལན་ཚྭ་མངར་བའི་རོ་སྟོབས་སྐྱེད། །དགུན་ཆེ་སོས་དང་དབྱར་
ཆུང་སྟོན་དཔྱིད་འབྲིང༌། །དེ་ལྟར་བགྲོད་དུས་རྣམ་པ་གཉིས་བསྟན་ནས། །ད་ནི་ནམ་ཟླ་དུས་
དྲུག་སྤྱོད་ལམ་ནི། །དགུན་སྟོད་གྲང་བས་བ་སྤུའི་སྒོ་བཀག་སྟེ། །མེ་ཡི་སྟོབས་ལྡན་རླུང་གིས་
སྦར་བ་ཡིས། །ཟས་ཉུང་གྱུར་ན་ལུས་ཟུངས་འགྲིབ་བར་འགྱུར། །དེ་ཕྱིར་དང་པོའི་རོ་གསུམ་
བསྟེན་པར་བྱ། །དེ་ཚེ་མཚན་མོ་རིང་བས་བཀྲེས་གྱུར་ཏེ། །དེ་ཡིས་ལུས་ཟུངས་འབྲི་བར་
འགྱུར་བའི་ཕྱིར། །ཏིལ་མར་གྱིས་བྱུག་ཤ་ཁུ་སྣུམ་པ་བཟའ། །པགས་པའི་གོས་དང་ལྷམ་
ནི་རྟག་ཏུ་བགོ །དུགས་དང་མེ་ཉིའི་འོད་ལ་རན་པར་བསྲོ། །ས་ཡི་ཁང་པ་ཉིས་རིམ་ནང་དུ་
བསྡད། །དགུན་སྨད་དུས་ན་ལྷག་པར་གྲང་བས་ན། །དེར་ཡང་སྤྱོད་ལམ་དེ་ཉིད་སྤྱད་པར་
བསྔགས། །དགུན་དུས་བད་ཀན་ཁོག་ཏུ་གསོག་པ་སྟེ། །དཔྱིད་དུས་ཉི་འོད་དྲོས་པས་མེ་དྲོད་
ཉམས། །བད་ཀན་ལྡང་ཞིང་ཐ་མའི་རོ་གསུམ་བསྟེན། །ནས་རྙིང་སྐམ་སའི་ཤ་དང་སྦྲང་རྩི་
དང༌། །ཆུ་བསྐོལ་སྒ་ཐང་བཏང་ཞིང་རྩུབ་པ་བསྟེན། །རྩོལ་བས་བཅག་དང་དྲིལ་ཕྱིས་བད་
ཀན་བསལ། །དྲི་ཞིམ་སྐྱེད་མོས་ཚལ་གྱི་ཉི་གྲིབ་འདུག །སོ་ག་ཉི་མའི་འོད་ཟེར་རབ་ཚ་བས། །
སྟོབས་འཕྲོག་ཕྱིར་ན་མངར་ཡང་སྣུམ་བསིལ་བཟའ། །ལན་ཚྭ་ཚ་སྐྱུར་རྩོལ་བ་ཉི་འོད་སྤང༌། །
བསིལ་ཆུས་ལུས་བཀྲུ་ཆང་ཆུ་བསྲེས་པ་བཏུང༌། །རབ་ཕྲའི་གོས་བགོ་བསིལ་ཁང་དྲི་བཟང་
བསྟེན། །ཤིང་གྲིབ་རྫི་ཆར་བསེར་བུ་ངད་ལྡན་བྱ། །དབྱར་དུས་མཁའ་ལ་སྤྲིན་འདུས་ཆུ་ཡིས་
བརླན། །རླུང་དང་གྲང་བ་ས་རླང་ཆུ་རྙོག་ཅན། །མེ་དྲོད་གནོད་པས་མེ་དྲོད་སྐྱེད་པ་བསྟེན། །
དང་པོའི་རོ་གསུམ་ཡང་དྲོ་སྣུམ་བཅས་བཟའ། །སྐམ་སའི་ཆང་བཏུང་ཁང་སྟེང་བསིལ་ཁང་
25-1-51


གནས། །དབྱར་བསིལ་འཕྲལ་དུ་ལུས་ལ་ཉི་ཟེར་གདུངས། །ཆར་དུས་བསགས་པའི་མཁྲིས་
པ་སྟོན་ན་ལྡང༌། །དེ་བསལ་ཕྱིར་ན་མངར་ཁ་བསྐ་བ་བསྟེན། །ག་བུར་ཙན་དན་ཨུ་ཤིར་དྲི་
ལྡན་པའི། །གོས་བགོ་ཁང་པ་ཆག་ཆག་བཏབ་བར་འདུག །མདོར་ན་ཟས་སྐོམ་དབྱར་དགུན་
དྲོ་བ་བསྟེན། །དཔྱིད་རྩུབ་སོས་དང་སྟོན་ག་བསིལ་བར་བྱ། །དབྱར་དང་དགུན་ནི་དང་པོའི་
རོ་གསུམ་བསྟེན། །དཔྱིད་ཀ་ཐ་མའི་རོ་གསུམ་སོ་ག་མངར། །སྟོན་ཀ་མངར་ཁ་བསྐ་བ་བསྟེན་
པར་བྱ། །སྟོན་དཔྱིད་བཤལ་སྐྱུགས་དབྱར་ག་འཇམ་རྩི་བསྔགས། །དམན་ལྷག་ལོག་ན་དེ་
དང་འཚམ་པར་དཔྱད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་
མན་ངག་གི་རྒྱུད་ལས་དུས་སུ་སྤྱོད་པའི་ལེའུ་སྟེ་བཅུ་བཞི་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །གསུམ་པ་གནས་སྐབས་སྤྱོད་ལམ་བསྟན་པ་ནི། །བཀྲེས་སྐོམ་སྐྱུག་པ་
གཡལ་དང་སྦྲིད་པ་དང༌། །དབུགས་གཉིད་ལུད་པ་མཆི་མ་བཤང་བ་འཕྱེན། །གཅིན་དང་ཁུ་
བའི་ཤུགས་ནི་དགག་མི་བྱ། །བཀྲེས་བཀག་ལུས་ཞིག་ཉམ་ཆུང་ཡི་ག་འཆུས། །མགོ་འཁོར་
དེ་ཟས་ཡང་སྣུམ་དྲོ་ཆུང་སྦྱར། །སྐོམ་བཀག་ཁ་སྐམ་མགོ་འཁོར་སྙིང་ནད་འབྱུང༌། །མྱོས་
འགྱུར་དེ་བསིལ་ཆང་ཆུ་ཐམས་ཅད་ཕན། །སྐྱུགས་བཀག་དང་ག་འགག་དང་དབུགས་མི་
བདེ། །སྐྱ་རྦབ་མེ་དབལ་གཡན་པ་འབྲས་དང་མཛེ། །མགོ་ནད་ལུད་པ་རིམས་ནད་འབྱུང་
བར་འགྱུར། སྨྱུང་གནས་དུད་རྣོན་ཁ་བཀང་དབོ་བར་བྱ། །སྦྲིད་བཀག་དབང་པོ་མི་རྣོ་མགོ་
བོ་ན། །གཉའ་བ་རེངས་དང་ཁ་ཡོ་འགྲམ་ཆག་འགྱུར། །དུད་རྣོན་སྣ་སྨན་ཉི་མ་བལྟ་བས་
བསལ། །གཡལ་བཀག་དེ་འདྲ་ཆོ་ག་རླུང་འཇོམས་ཕན། །ངལ་དུབ་དབུགས་བཀག་སྐྲན་
དང་སྙིང་ནད་འབྱུང༌། །མྱོས་འགྱུར་དེ་སིལ་ངལ་གསོ་རླུང་སེལ་ཕན། །གཉིད་བཀག་གཡལ་
མང་ལུས་རྙོང་མགོ་བོ་ལྕི། །མིག་འགྲིབ་ཁ་ཟས་མི་འཇུ་ཤ་ཁུ་དང༌། །ཆང་བཏུང་བསྐུ་མཉེ་བྱ་
25-1-52


ཞིང་གཉིད་ལོག་ཕན། །ལུད་པ་བཀག་པས་ལུད་འཕེལ་དབུགས་མི་བདེ། །ཤ་སྐེམ་སྐྱིགས་
བུ་སྙིང་ནད་ཡི་ག་འཆུ། །དེར་ནི་ལུད་པ་བསལ་བའི་ཆོ་ག་བྱ། །མཆི་མ་བཀག་པས་སྙིང་དང་
མགོ་བོ་ན། །སྣ་ཆུ་འཛག་ཅིང་མགོ་འཁོར་ཡི་ག་འཆུས། །དེ་ལ་ཆང་བཏུང་གཉིད་ལོག་གཏམ་
སྙན་ཕན། །འཕྱེན་བཀག་རྟུག་སྐམས་འཕྱེན་དང་བཤང་བ་འགག །སྐྲན་གཟེར་མིག་རྟུལ་
དྲོད་ཆུང་སྙིང་ནད་འགྱུར། །བཤང་བ་བཀག་པས་ཁ་རུ་མི་གཙང་འབྱུང༌། །ཀླད་པ་ན་ཞིང་ཉ་
འགྱུར་ཆམ་པས་འདེབས། །སྔར་བཤད་ནད་འགྱུར་གཅིན་བཀག་རྡེའུ་ནད་དང༌། །ཆུ་སོ་ཕོ་
མཚན་དཀུ་ནད་སྔར་ནད་འབྱུང༌། །འདི་སྨན་རེང་བུ་མས་བཏང་ལུས་བཅིང་དང༌། །བསྐུ་བྱུག་
དུགས་དང་སྨན་མར་བསྟེན་པར་བྱ། ཁུ་བ་བཀག་པས་དེ་འཛག་ཕོ་མཚན་ན། །ཆུ་འགག་རྡེ་
འུ་འཕེལ་དང་མ་ནིང་འགྱུར། །མས་བཏང་ལུས་བཅིང་བུད་མེད་སྤྱད་པར་བྱ། །ཏིལ་མར་འོ་
མ་ཁྱིམ་བྱ་ཤ་ཆང་བཏང༌། །དེ་ལྟར་ཤུགས་ནི་བཀག་དང་བཙིར་བ་ཡིས། །ནད་ཀུན་འབྱུང་
འགྱུར་ཕལ་ཆེར་རླུང་འཁྲུག་པས། །དེ་ཕྱིར་དེ་ཡི་ཟས་དང་སྨན་སྐོམ་སྦྱར། །ནད་གང་སྨྱུང་
དང་ཞི་བས་བཞུ་བྱས་ཀྱང༌། །རོ་མ་ལྡང་འགྱུར་ལེགས་སྦྱངས་སླར་མི་འབྱུང༌། །དེ་ཕྱིར་དགུན་
བསགས་གྲང་ནད་དཔྱིད་དུས་སྦྱང༌། །སོས་བསགས་དབྱར་སྦྱང་དབྱར་བསགས་སྟོན་དུས་
སྦྱང༌། །ལེགས་པར་སྦྱངས་པས་རོ་ཐོན་ནད་མེད་འགྱུར། །རྟག་ཏུ་ཕན་པའི་ཟས་དང་སྤྱོད་
ལམ་རྣམས། །ཉམས་ལྡན་བསྟེན་པར་བྱེད་ན་ནད་མི་འབྱུང༌། །ནད་ཀུན་མི་སྐྱེ་སྐྱེས་པའང་
ཞི་བྱའི་ཕྱིར། །གནས་སྐབས་སྤྱོད་པའི་ཆོ་ག་འདི་ཉིད་བསྔགས། །ཞེས་གསུངས་སོ། །བདུད་
རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གནས་སྐབས་ཀྱི་སྤྱོད་ལམ་
བསྟན་པའི་ལེའུ་སྟེ་བཅོ་ལྔ་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །འཚོ་བ་ཟས་ཀྱི་གནས་ལ་ཇི་ལྟར་བསླབ་པར་བགྱི། །འཚོ་མཛད་
25-1-53


སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་
སྲོང་ཆེན་པོ་ཉོན་ཅིག །ནད་ལས་གསོ་བར་བྱེད་པའི་གཉེན་པོ་ཡི། །འཚོ་བ་ཟས་ཀྱི་གནས་ལ་
བསླབ་པ་ནི། །ཟས་སྐོམ་ལེགས་སྤྱད་ལུས་དང་སྲོག་འཚོ་ཞིང༌། །དམན་ལྷག་ལོག་གྱུར་ནད་
བསྐྱེད་འཕྲལ་སྲོག་འཇོམས། །དེ་ཕྱིར་ཟས་སྐོམ་སྦྱོར་བ་མཁས་པ་གཅེས། །འདི་ལ་སྤྱི་
སྡོམས་ཟས་ཚུལ་ཤེས་པ་དང༌། །ཟས་བསྡམ་ཟས་ཚོད་རན་པར་བཟའ་བ་གསུམ། །ཟས་ཀྱི་
ཚུལ་ཤེས་བྱ་ལ་ཟས་སྐོམ་གཉིས། །ཟས་ལ་འབྲུ་ཤ་སྣུམ་ངད་གཡོས་སྦྱར་ལྔ། །འབྲུ་ལ་
གཉིས་ཏེ་གྲ་མ་གང་བུ་ཅན། །དེ་ལ་གྲ་མ་ཅན་གྱི་འབྲུ་ཡི་སྡེ། །འབྲས་ཁྲེ་ཁྲ་མ་གྲོ་ནས་སོ་བ་
དང༌། །སྲེད་དེ་ལ་སོགས་རོ་དང་ཞུ་རྗེས་མངར། །རོ་ཙ་རླུང་འཇོམས་ལུས་སྟོབས་བད་ཀན་
སྐྱེད། །དེ་ལ་འབྲས་ནི་སྣུམ་འཇམ་བསིལ་ལ་ཡང༌། །ཉེས་པ་གསུམ་སེལ་རོ་ཙ་འཁྲུ་སྐྱུག་
གཅོད། །ཁྲེ་ནི་ལྕི་བསིལ་བརྟས་བྱེད་ཆག་གྲུགས་སྦྱོར། །ཁྲ་མ་བསིལ་ཡང་རྩུབ་ཅིང་ཡི་གར་
འཕྲོད། །གྲོ་ནི་ལྕི་བསིལ་འཚོ་བྱེད་རླུང་མཁྲིས་སེལ། །ནས་ནི་ལྕི་བསིལ་བཤང་འཕེལ་
སྟོབས་སྐྱེད་མཆོག །སོ་བ་སྲེད་དེ་བསིལ་ཡང་བད་མཁྲིས་སེལ། །གང་བུ་ཅན་འབྲུ་སྲན་མ་
མོན་སྲན་གཉིས། །བསྐ་མངར་བསིལ་ཡང་སྐྱ་ལ་རྩ་སྒོ་འགག །བད་ཀན་ཚ་བ་སེལ་ཞིང་འཁྲུ་
བ་གཅོད། །སྣུམ་སེལ་ཁྲག་མཁྲིས་ཚིལ་ལ་བྱུགས་ན་ཕན། །རྒྱ་སྲན་བད་རླུང་ལུད་པ་དབུགས་
མི་བདེ། །གཞང་འབྲུམ་ཁུ་བའི་རྡེ་འཇོམས་ཁྲག་མཁྲིས་སྐྱེད། །མ་ཤ་རླུང་འཇོམས་བད་
མཁྲིས་ཁུ་སྟོབས་འཕེལ། །སྲན་ཆུང་བསྐ་མངར་ཉེས་པ་གསུམ་ག་སྐྱེད། །སྐྱོ་མས་མེ་དབལ་
དྲེག་ནད་ཁྲག་ནད་སེལ། །ཏིལ་འབྲུ་ལྕི་དྲོ་རོ་ཙ་རླུང་ནད་འཇོམས། །ཟར་མ་མངར་ཁ་སྣུམ་
འཇམ་རླུང་ལ་ཕན། །བྲ་བོ་བསིལ་ཡང་རྨ་འཇིག་ཉེས་གསུམ་སྐྱེད། །འབྲུ་ཀུན་གསར་ཐོག་
རློན་པ་ལྕི་བ་སྟེ། །སྨིན་གྱུར་སྐམས་དང་རྙིང་པ་ཡང་བ་ཡིན། །རྗེན་པ་བཙོས་དང་གཡོས་སུ་
བྱས་པ་ཀུན། །རིམ་བཞིན་ཡང་ཞིང་འཇུ་སླ་འཕྲོད་པར་འགྱུར། །ཤ་ནི་སྡེ་བརྒྱད་སྐམ་གཤེར་
25-1-54


ཐུན་མོང་གནས། །རྨ་བྱ་གོང་སྲེག་སྐྱུང་ག་བྱ་ནག་དང༌། །རི་བྱ་རྣམས་ནི་ཁྲོན་གྱིས་རྐོ་བའི་སྡེ། །
ནེ་ཙོ་ཁུ་བྱུག་ཐི་བ་སྐྱ་ག་དང༌། །འཇོལ་མོ་བྱེ་འུ་མཆུ་ཡིས་རྐོ་བའི་སྡེ། །ཤ་བ་གླ་དགོ་གཉན་
དང་རི་བོང་དང༌། །གཙོས་ཀྱི་ཤ་རྣམས་རི་དྭགས་སྡེ་ཚན་ཡིན། །རྒྱ་དང་ཁ་ཤ་ར་རྒོད་ཕག་
རྒོད་དང༌། །མ་ཧེ་བསེ་སྨྱུག་རྐྱང་དང་གཡག་རྒོད་དང༌། །མཛོ་རྒོད་ལ་སོགས་རི་དྭགས་ཆེ་
བའི་སྡེ། །སྟག་གཟིག་དོམ་དྲེད་གསའ་དང་སྤྱང་ཀི་དབྱི། །ཝ་དང་འཕར་བ་སྤྲེ་སོགས་གཅན་
གཟན་སྡེ། །བྱ་རྒོད་ཁྲ་རླག་ནེ་ལེ་བྱ་རོག་དང༌། །འུག་པ་བྱེའུ་ཁྲ་རྩལ་མཐུས་ཟ་བའི་སྡེ། །མཛོ་
གཡག་རྔ་མོ་རྟ་བོང་བ་ལང་དང༌། །སྐོམ་པོ་ར་ལུག་ཁྱི་དང་ཕག་པ་བྱ། །བྱི་ལ་ལ་སོགས་མི་
ཡིས་བདག་བྱེད་སྡེ། །འཕྱི་བ་བྱི་ཐུར་སྦལ་སྦྲུལ་གྲུམ་པ་དང༌། །རྨིགས་པ་རྩངས་པ་སྡིག་པ་
ཁུང་གནས་སྡེ། །ཁྲུང་ཁྲུང་ངང་ངུར་སོ་བྱ་སྐྱར་མོ་དང༌། །སྲམ་དང་ཉ་སོགས་རླན་ལ་གནས་
པའི་སྡེ། །སྡེ་བརྒྱད་ཤ་རྣམས་རོ་དང་ཞུ་རྗེས་མངར། །ཐོག་མཐའ་བར་མ་སྐམ་གཤེར་ཐུན་
མོང་གནས། །སྐམ་སའི་ཤ་རྣམས་བསིལ་ཞིང་ཡང་ལ་རྩུབ། །རླུང་དང་བད་ཀན་ལྡན་པའི་ཚ་
བ་སེལ། །རླན་གནས་ཤ་རྣམས་སྣུམ་ཞིང་ལྕི་ལ་དྲོ། །ཕོ་བ་མཁལ་རྐེད་གྲང་རླུང་ནད་ལ་ཕན། །
ཐུན་མོང་གནས་པ་ནུས་པ་གཉིས་དང་ལྡན། །བྱ་གཅན་རྩལ་མཐུས་ཤ་རློན་ཟ་བ་རྣམས། །
རྩུབ་ཡང་རྣོ་བས་ཕོ་བའི་མེ་དྲོད་སྐྱེད། །སྐྲན་བཤིག་ཤ་འཕེལ་གྲང་བའི་ནད་ཀུན་སེལ། །
ལུག་ཤ་སྣུམ་དྲོ་སྟོབས་འཕེལ་ལུས་ཟུངས་སྐྱེད། །རླུང་དང་བད་ཀན་སེལ་ཞིང་དང་ག་འབྱེད། །
ར་ཤ་ལྕི་བསིལ་ཉེས་པ་གསུམ་སློང་ཞིང༌། །བསེ་དུག་འབྲུམ་ནག་མེས་འཚིག་རྨ་ལ་ཕན། །
བ་ལང་བསིལ་སྣུམ་རླུང་ལྡན་ཚ་བ་སེལ། །རྟ་རྐྱང་བོང་བུ་ལ་སོགས་བཤུལ་ཤ་རྣམས། །རྣག་
གཅོད་མཁལ་རྐེད་གྲང་བ་ཆུ་སེར་སེལ། །ཕག་ཤ་བསིལ་ཡང་རྨ་འཇིག་སྨུག་པོ་སེལ། །མ་
ཧེའི་ཤ་ཡིས་གཉིད་དང་ཤ་འཕེལ་བྱེད། །གཡག་ཤ་སྣུམ་དྲོ་གྲང་སེལ་ཁྲག་མཁྲིས་སྐྱེད། །
ཁྱིམ་བྱ་བྱེའུ་ཁུ་འཕེལ་རྨ་ལ་ཕན། །རྨ་བྱ་མིག་ནད་སྐད་འགགས་རྒས་སྲ་ཕན། །གཡག་རྒོད་
25-1-55


ཕོ་མཆིན་གྲང་སེལ་མེ་དྲོད་སྐྱེད། །རི་དྭགས་བསིལ་ཡང་ལྡན་ཚད་སེལ་བར་བྱེད། །རི་བོང་
ཤ་རྩུབ་དྲོད་སྐྱེད་འཁྲུ་བ་གཅོད། །འཕྱི་བ་སྣུམ་ལྕི་དྲོ་ཞིང་འབྲས་ལ་ཕན། །གྲང་རླུང་ཕོ་བ་
མཁལ་རྐེད་མགོ་ནད་སེལ། །སྲམ་ཤ་རོ་ཙ་མཁལ་རྐེད་གྲང་བ་སེལ། །ཉ་ཤ་ཕོ་བའི་ནད་
སེལ་དང་ག་འབྱེད། །མིག་གསལ་རྨ་འབྲས་བད་ཀན་བཤིག་པར་བྱེད། །ཤ་ཀུན་ཕོ་མོའི་
སྟོད་སྨད་ཕྱེད་ལྕི་སྟེ། །སྦྲུམ་མ་ཀུན་ལྕི་རྐང་བཞི་མོ་ཡི་ཡང༌། །བྱ་རྣམས་ཀུན་ནི་ཕོ་ཡི་ཡང་བ་
ཡིན། །མགོ་དང་རོ་སྟོད་བྲང་རྒྱབ་དཔྱི་རྐེད་ལྕི། །ལུས་ཟུངས་བདུན་པོ་ཕྱི་མ་ཕྱི་མ་ལྕི། །ཤ་
གསར་བསིལ་ཞིང་ཤ་རྙིང་དྲོ་ལ་བཅུད། །ལོ་ཤ་ཁྱད་པར་རླུང་གནོན་མེ་དྲོད་སྐྱེད། །རློན་པ་
འཁྱགས་པོ་བསྲེགས་པ་འཇུ་དཀའ་བསིལ། །སྐམ་དང་བཙོས་པ་ཡང་ཞིང་འཇུ་བ་སླ། །སྣུམ་
ནི་མར་དང་ཏིལ་མར་རྐང་མར་ཚིལ། །རོ་མངར་ཕྱི་མ་ལྕི་བསིལ་ཁོང་འཁྲུ་སྣུམ། །རྟུལ་དང་
ཕྲ་ལ་མཉེན་ཞིང་རླན་པ་ཡིན། །རྒས་བྱིས་སྟོབས་ཆུང་སྦེག་རྩུབ་ཁུ་ཁྲག་ཟད། །སྦྱང་བྱས་
སེམས་ལས་རླུང་གིས་ཉེན་ལ་བསྔགས། །དེ་ལ་མར་གསར་བསིལ་ཞིང་རོ་ཙ་ལ། །མདོག་
སྟོབས་སྐྱེད་ཅིང་མཁྲིས་ཚད་སེལ་བར་བྱེད། །མར་རྙིང་སྨྱོ་དང་བརྗེད་བྱེད་བརྒྱལ་རྨ་འཚོ། །
ཞུན་མར་བློ་རྣོ་དྲན་གསལ་དྲོད་སྟོབས་སྐྱེད། །ཚེ་འཕེལ་སྣུམ་པའི་མཆོག་སྟེ་ལས་སྟོང་བྱེད། །
ཕྲུམ་གསར་སྤྲི་དང་ཕྱུར་བ་ལ་སོགས་པ། །དང་ག་ལེན་ཞིང་རྟུག་སྐམས་བད་ཀན་སེལ། །ཟོ་
མར་བད་རླུང་སེལ་ཞིང་མེ་དྲོད་སྐྱེད། །འབྲི་དང་ལུག་མར་དེ་བཞིན་གྲང་རླུང་སེལ། །མཛོ་
སྙོམས་བ་ར་བསིལ་བས་རླུང་ཚད་སེལ། །ཏིལ་མར་ཚ་རྣོ་སྐེམ་པོ་ཤ་སྐྱེད་ཅིང༌། །སྦོམ་པོ་འབྲི་
ལ་མཁྲེགས་ཏེ་བད་རླུང་སེལ། །ཡུངས་མར་རླུང་གནོན་བད་མཁྲིས་སྐྱེད་པ་ཡིན། །རྐང་མར་
རླུང་འཇོམས་ཁུ་སྟོབས་བད་ཀན་སྐྱེད། །ཚིལ་གྱིས་རུས་ཚིགས་ན་དང་མེས་འཚིག་དང༌། །
རླུང་དང་རྣ་ཀླད་མངལ་ནད་སེལ་བར་བྱེད། །སྐྱེས་བུ་སྣུམ་ལ་བརྟེན་པར་བྱེད་པ་རྣམས། །
ནང་གི་དྲོད་འབར་ཁོང་པ་དག་པ་དང༌། །ལུས་ཟུངས་འཕྲལ་བརྟས་སྟོབས་དང་མདོག་
25-1-56


བཟང་ལྡན། །དབང་བརྟན་རྒས་སྲ་ལོ་བརྒྱ་ཐུབ་པར་བཤད། །སྔོ་ངད་སྒོག་བཙོང་ལ་སོགས་
ཚ་བ་དང༌། །ཁུར་མངས་རྒྱ་ཁུར་ལ་སོགས་ཁ་བ་དང༌། །སྐམ་དང་གཤེར་བའི་གནས་སུ་སྐྱེས་
པ་དང༌། །སྐམ་དང་རློན་པ་གཡོས་བྱས་རྗེན་པ་རྣམས། །དྲོ་ཡང་བསིལ་ལྕི་གྲང་བ་ཚད་ནད་
སེལ། །བཙོང་སྒོག་གཉིད་འཕེལ་ཟས་ལེན་བད་རླུང་སེལ། །སྒོག་སྐྱ་ལྕི་བསིལ་སྲིན་ནད་ཚད་
རླུང་སེལ། །ལ་ཕུག་གཞོན་ནུ་ཡང་དྲོ་མེ་དྲོད་སྐྱེད། །ནར་སོན་ལྕི་བསིལ་བད་ཀན་སྐྱེད་པར་
བྱེད། །ཉུང་མ་དེ་བཞིན་དུག་ནད་མ་ལུས་བསྲུང༌། །རི་སྒོག་ཐམས་ཅད་འཇུ་དཀའ་ཟས་ལེན་
ལྕི། །ལྕུམ་དང་ཆུ་ལོས་བད་ཀན་དང་ག་འབྱེད། །སྔོ་ཀུན་རྩ་སྒོ་འགག་ཅིང་སྨན་ནུས་འཇོམས། །
དེ་ལ་གཡོས་སུ་བྱས་པའི་ཟས་སྡེ་ལ། །འབྲས་ཐུག་སླ་དང་སྐ་དང་གར་བ་དང༌། འབྲས་ཆན་
རྣམས་ནི་སྔ་མ་སྔ་མ་ཡང༌། །སླ་བ་སྐོམ་སྙ་ཉེས་པ་ལྷག་མ་འཇོམས། །འཇུ་ཞིང་ཟུངས་སྙོམས་
དྲོད་སྐྱེད་རྩ་སྦུབས་མཉེན། །སྐ་བ་དྲོད་སྐྱེད་བཀྲེས་སྐོམ་ཉམ་ཆུང་སྙ། །ནད་འཇུ་བྱེད་ཅིང་དྲི་
མ་འགགས་པ་སེལ། །ཐུག་གར་འཁྲུ་གཅོད་ཡིད་འོང་སྐོམ་པ་སེལ། །དེ་ཕྱིར་རིམ་པས་ཉམ་
ཆུང་ཁྲུས་རྗེས་བསྔགས། །འབྲས་ཆན་ལེགས་བཙོས་ཚ་བའི་སྨན་དང་བསྐོལ། །ཡང་ཞིང་
འཇུ་སླ་ཤ་ཁུ་འོ་བསྐོལ་ལྕི། །འབྲས་ཡོས་འཁྲུ་བ་གཅོད་དང་རུས་ཆག་སྦྱོར། །སྲུས་ཐུག་ནས་
ཐུག་རྒྱུན་འགག་མེ་དྲོད་འཇོམས། །ཡོས་དྲལ་ཡང་ཞིང་འཇམ་དྲོ་ཕོ་བར་འཕྲོད། །ཙམ་པ་
གྲང་མོ་སྟོབས་སྐྱེད་ལྕི་བ་ཡིན། །བཙོས་ཟན་ཡང་ལ་འཇམ་པས་འཇུ་བ་བླ། །ཁེངས་པོ་
ཐམས་ཅད་ཕོ་བའི་མེ་དྲོད་འཇོམས། །ཨ་སྦྱར་འཇུ་བླ་སྟོབས་འཕྲོག་ཉེས་ཀུན་སེལ། །ཟན་
ཆང་རླུང་སེལ་ཁོང་པའི་དྲོད་ལ་ཕན། །སྐྱུར་པོ་ཟས་ལེན་ཉེས་སེལ་རྙིངས་ཞབས་དམད། །ཤ་
ཁུ་ཉམས་བརྟས་ཚིམ་བྱེད་རླུང་ལ་ཕན། །ཟན་སྐམ་ཚོད་མ་རླུང་ལ་མཆོག་ཏུ་བསྔགས། །ཟྭ་
ཚོད་རླུང་འཇོམས་དྲོད་སྐྱེད་བད་མཁྲིས་སློང༌། །ལྕམ་པ་བེ་ཁུར་དྲོད་སྐྱེད་འཁྲུ་བ་གཅོད། །དོ་
ཚོད་རླུང་འཇོམས་རྨ་སྐེམ་བད་མཁྲིས་སྐྱེད། །སྣེ་ཚོད་མིག་ལ་གནོད་ཅིང་རྟུག་སྐམ་སེལ།  །
25-1-57

 
མོན་སྣེ་དམར་པོས་ཉེས་པ་གསུམ་ག་སེལ། །སྐྱས་དང་ཁུར་ཚོད་བསིལ་ཏེ་ཚ་བ་སེལ། །སྔོ་
སྒའི་ཚ་བ་མཁྲིས་ཚད་མགོ་ནད་སེལ། །སྲན་ཚོད་ཁ་ཟས་ལེན་ཞིང་བད་རླུང་སྐྱེད། །ལུས་ཀྱི་
སྣུམ་འདོན་འབྲུ་མར་མ་ཞུ་སེལ། །ལོ་གསར་སྙོམས་ཤིང་བཤུར་བས་བད་རླུང་སྐྱེད། །ཡུངས་
ཀར་ལོ་མ་བད་མཁྲིས་འཁྲུག་པར་བྱེད། །ལྕ་བ་ར་མཉེའི་ཚོད་མས་བད་རླུང་སེལ། །ལ་ཕུག་
ཚ་བ་དྲོད་སྐྱེད་འཁྲུ་བ་གཅོད། །སྒོག་སྐྱ་སྒོག་སྔོན་ཚ་བ་རླུང་ལ་ཕན། །ལན་ཚྭས་ཁ་ཟས་ཀུན་
གྱི་བྲོ་བ་སྐྱེད། །དྲོད་སྐྱེད་འཇུ་བ་བླ་ཞིང་བཤང་བ་འབྱིན། །གཡེར་མས་རྩ་སྒོ་འབྱེད་ཅིང་བད་
རླུང་སྐྱེད། །སྒ་ཡིས་དྲོད་སྐྱེད་ཤིང་ཀུན་རླུང་ནད་འཇོམས། །སྤོད་ཀུན་ཟས་ཀྱི་བྲོ་སྐྱེད་ཡི་གར་
འོང༌། །བཏུང་བ་འོ་མ་ཆུ་དང་ཆང་ལ་སོགས། །རིམ་བཞིན་ནད་སེལ་བཟློག་པས་དེ་རབ་
སྐྱེད། །འོ་མ་ཕལ་ཆེར་རོ་དང་ཞུ་རྗེས་མངར། །སྣུམ་ལྕི་ཟུངས་འཕེལ་མདངས་སྐྱེད་རླུང་
མཁྲིས་སེལ། །རོ་ཙ་བད་ཀན་སྐྱེད་བསིལ་ལྕི་བ་ཡིན། །བ་ཡི་འོ་མ་གློ་རྡོལ་གཅོང་ལ་ཕན། །
རིམས་རྙིང་གཅིན་སྙི་ཡིད་གཞུངས་འཚོ་བྱེད་ཡིན། །ར་ཡི་འོ་མས་དབུགས་མི་བདེ་བ་སེལ། །
ལུག་གི་འོ་མས་རླུང་འཇོམས་སྙིང་ལ་གནོད། །འབྲི་ཡི་འོ་མ་བད་མཁྲིས་ནད་ལ་གནོད། །རྟ་
བོང་འོ་མ་གློ་གསོ་རྨོངས་པར་བྱེད། །འོ་རློན་ལྕི་བསིལ་སྲིན་དང་བད་ཀན་སྐྱེད། །བསྐོལ་ན་
ཡང་དྲོ་བསྡུས་ན་འཇུ་དཀའ་ལྕི། །བཞོས་ཐོག་འོ་མ་དྲོན་མོ་བདུད་རྩིར་མཚུངས། །འོ་མ་སྙིང་
པོ་བཏོན་པའི་ཞོ་ས་ཡིས། །མ་སྙོམས་རིམས་ཆམ་འགྲམས་འཁྲུགས་འཁྲུ་བ་སེལ། །ཞོ་རྨུན་
རོ་དང་ཞུ་རྗེས་སྐྱུར་བསིལ་སྣུམ། །རྟུག་སྐེམ་རླུང་ཚད་སེལ་ཞིང་ཡི་ག་འབྱེད། །དར་གསར་
བསྐ་སྐྱུར་ཡང་ཞིང་མེ་དྲོད་སྐྱེད། །སྐྲན་མཆེར་གཞང་འབྲུམ་མར་མ་ཞུ་བ་སེལ། །ཞོ་ཁ་ཆུ་འཁྲུ་
བཤང་སླ་རྩ་སྦུབས་སྦྱོང༌། །ཆུར་ཁུས་རླུང་མཁྲིས་མི་སྐྱེད་བད་ཀན་སེལ། །ཞོ་བཙོས་རྟུག་
སྐེམ་ཚད་པས་འཁྲུ་བ་སེལ། །དཀར་རྣམས་ལུག་དང་འབྲི་ཡི་དྲོ་ལ་བཅུད། །བ་ར་བསིལ་
ཡང་མཛོ་ཡི་སྙོམས་པ་ཡིན། །ཆུ་ནི་ཆར་ཆུ་གངས་ཆུ་ཆུ་ཀླུང་ཆུ། །ཆུ་མིག་ཁྲོན་པ་བ་ཚ་ཤིང་གི་
25-1-58


ཆུ། །རིམ་པས་དང་པོ་མཆོག་ཡིན་ཕྱི་མ་དམན། །མཁའ་ལས་འབབ་པ་རོ་མི་གསལ་ལ་ཞིམ། །
འཚོ་ངོམས་བསིལ་ལ་ཡང་བས་བདུད་རྩིར་མཚུངས། །གངས་ཅན་ལས་བྱུང་ཤུགས་དྲག་
བརྡབས་པའི་ཆུ། །ཤིན་ཏུ་བཟང་བསིལ་མེ་ཡིས་ཐུབ་པར་དཀའ། །བརྟན་གཡུང་སྲིན་བུ་
རྐང་བམ་སྙིང་ནད་སྐྱེད། །ས་གཙང་ཉི་འོད་རླུང་གིས་ཕོག་པ་བཟང༌། །འདམ་རྫབ་ཉ་ལྕིབས་
རྩ་ལོ་ཤིང་གྲིབ་ཕོག །བ་ཚ་སྲོག་ཆགས་ཁུ་བས་ཉེས་ཀུན་སྐྱེད། །ཆུ་བསིལ་བརྒྱལ་ངལ་ཆང་
ནད་མགོ་འཁོར་སྐྱུག །སྐོམ་དད་ལུས་ཚ་ཁྲག་མཁྲིས་སེལ་བ་བྱེད། །ཆུ་བསྐོལ་དྲོད་སྐྱེད་ཟས་
འཇུ་སྐྱིགས་བུ་སེལ། །བད་ཀན་ལྟོ་སྦོས་དབུགས་མི་བདེ་བ་དང༌། །ཆམ་པ་རིམས་གསར་
འཕྲལ་དུ་ཟློག་པར་བྱེད། །བསྐོལ་གྲང་བད་ཀན་མི་སྐྱེད་མཁྲིས་པ་སེལ། །ཞག་གཅིག་ལོན་
ནས་དུག་འདྲ་ཉེས་ཀུན་སྐྱེད། །ཆང་ནི་མངར་སྐྱུར་ཁ་ལ་ཞུ་རྗེས་སྐྱུར། །རྣོ་དྲོ་རྩུབ་ཕྲ་ཅུང་ཟད་
ཐུར་དུ་འཁྲུ། དྲོད་འབར་སྤོབས་སྐྱེད་གཉིད་འཕེལ་བད་རླུང་སེལ། །ཐལ་དྲགས་སེམས་
བསྒྱུར་བག་མེད་ངོ་ཚ་འཇིག །ར་རོ་དང་པོ་བག་མེད་གནས་ལ་གནས། །རྣམ་རྟོག་ངན་བཅོམ་
བདེ་བ་ཡིན་སྙམ་སེམས། །ར་རོ་གཉིས་པ་གླང་ཆེན་སྨྱོན་པ་ལྟར། །ཁ་ན་མ་ཐོ་ཚུལ་ཁྲིམས་
འཆལ་བའི་གནས། །ར་རོ་ཐ་མ་སེམས་མེད་རོ་ལྟར་ཉལ། །གང་ཡང་མི་ཤེས་མུན་པའི་
གནས་སུ་འགྱུར། །གསར་པ་ལྕི་ཞིང་རྙིང་པ་ཡང་བ་ཡིན། །གསར་འཇམ་ཕོ་བའི་དྲོད་སྐྱེད་
འཇུ་བ་བླ། །གྲོ་ཆང་འབྲས་ཆང་ནས་ཆང་གོང་མ་ལྕི། །སོ་བ་སྲེད་དེ་ཡོས་ཆང་ཡང་བ་ཡིན། །
ཚ་ནི་ཁྲག་མཁྲིས་བད་ཀན་སེལ་བར་བྱེད། །ཅེས་གསུངས་སོ། །བདུད་རྩི་སྙིང་པོ་ཡན་ལག་
བརྒྱད་པ་གསང་བ་མན་ངག་གི་རྒྱུད་ལས་ཟས་ཀྱི་ཚུལ་ཤེས་པར་བྱ་བའི་ལེའུ་སྟེ་བཅུ་དྲུག་
པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ཟས་སྐོམ་བསྡམ་བྱ་དུག་ལྡན་མི་འཕྲོད་ཟས། །འཕྲལ་དུ་སྲོག་འདོར་
25-1-59


ཉེས་པ་འཁྲུག་ཕྱིར་བསྲུང༌། །རྒྱལ་པོའི་ཕོ་བྲང་སྲོག་འཚོའི་སློབ་དཔོན་བཞག །དེས་ནི་ཟས་
སྐོམ་དུག་ལས་ཐར་བར་འགྱུར། །དུག་ལྡན་ཟས་དེ་ཁ་དོག་དྲི་རོ་ལྡོག །མེས་ཚིག་དུ་བ་རྨ་
བྱའི་མགྲིན་འདྲ་འབྱུང༌། །མེ་ལྕེ་གཅིག་ཏུ་འཁྱིལ་ཞིང་མེ་སྟག་རྒལ། །མཐོང་ན་བྱ་རོག་སྐད་
འདོན་རྨ་བྱ་དགའ། །ཁྱི་ལ་བྱིན་ན་ལྟོ་བ་དྲོས་ནས་སྐྱུག །ཤ་ལ་དུག་ཡོད་དམར་ལ་ལྕགས་
མི་ལེན། སྦོས་ཤིང་ཆང་སྦྱར་མིག་བདུགས་ཚ་ཞིང་འཁྲུག །དུག་སྟེར་ཆས་ཚང་མི་དེ་ཁ་སྐམ་
ཞིང༌། །རྔུལ་ཞིང་འདར་ལ་སྐྲག་ཅིང་འདུག་མི་ཚུགས། །གནོང་བག་གིས་ནི་ཕྱོགས་སུ་བལྟ་
བར་བྱེད། །ཤེས་ནས་ཀུན་ལ་གནོད་པར་འགྱུར་ཕྱིར་དོར། །ཁ་ཟས་མི་འཕྲོད་ཟོས་པས་
སྦྱར་དུག་མཚུངས། ཞོ་མ་ལངས་དང་ཆང་གསར་མི་འཕྲོད་དེ། །ཉ་ཡི་ཤ་དང་འོ་མ་འཕྲོད་པ་
མིན། །དེ་བཞིན་འོ་མ་ཤིང་ཐོག་གཉིས་མི་འཕྲོད། །བྱ་ཡི་སྒོ་ང་ཉ་ཡི་ཤ་མི་འཕྲོད། །སྲན་མའི་
ཚོད་མ་བུ་རམ་ཞོ་མི་འཕྲོད། །ཤ་མོ་ཡུངས་ཀར་མར་ལ་བཙོས་པ་དང༌། །ཁྱིམ་བྱའི་ཤ་དང་ཞོ་
བསྲེས་ཟ་བ་དང༌། །སྦྲང་རྩི་མར་ནག་ཆ་མཉམ་འཕྲོད་མི་འགྱུར། །མར་གསར་འཁར་བའི་
སྣོད་དུ་ཞག་བཅུ་ལས། །སྐྱེར་པའི་མེ་ལ་ཧ་རི་ཏྲ་ཤ་བསྲེགས། །ཅོང་ཞི་ཟོས་རྗེས་ཤ་མོ་ཁུར་
བ་ཟ། །ཞུན་མར་ཟོས་རྗེས་ཆུ་གྲང་འཐུང་བ་དང༌། །ཤ་ལ་དཀར་སྐྱུར་ཙམ་དྲིས་ཕོག་པ་དང༌། །
བཙོས་པའི་རླངས་བསུབས་ཞག་བདུན་ལོན་པ་དང༌། །སྐྱུར་དང་འོ་མ་ལྷན་ཅིག་ཟ་བ་དང༌། །
སྔ་མ་མ་ཞུ་ཕྱི་མ་ཟོས་པ་ཡིས། །ཁ་ཟས་མི་འཕྲོད་ཟོས་པས་འཐབ་པ་དང༌། །མ་གོམས་དུས་
མིན་ཟོས་པས་དུག་ཏུ་འགྱུར། །རྩོལ་བཅས་སྣུམ་བསྟེན་དྲོད་ཆེ་དར་ལ་བབ། །སྟོབས་ལྡན་
གོམས་པར་ཟོས་ལ་གནོད་མི་འགྱུར། །མི་འཕྲོད་འཕྲོད་པ་བསྟེན་ནམ་སྤང་བྱེད་ན། །འདྲིས་
གོམས་སྒོ་ནས་ཆ་ཡིས་བསླབ་པར་བྱ། །འཕྲལ་དུ་སྤང་བསྟེན་ཉེས་པ་མྱུར་དུ་འཁྲུག །གནོད་
པ་གནོད་བྱའི་བདག་ཉིད་ཉེར་གྱུར་པས། །ཕན་མེད་གནོད་པར་བྱེད་པ་མཁས་པས་སྤང༌། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་
25-1-60


ཟས་བསྡམ་པའི་ལེའུ་སྟེ་བཅུ་བདུན་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །དུས་ཀུན་ཏུ་ནི་ཟས་ཚོད་རན་པར་བཟའ། །ཟས་རྣམས་ལྕི་ཡང་ཚད་ལས་
དཔགས་བྱ་སྟེ། །ཡང་ལ་འགྲངས་ཤིང་ལྕི་ལ་ཕྱེད་འགྲངས་ཙམ། །བདེ་བླག་འཇུ་བླ་ཚོད་ཟིན་
ཞེས་སུ་བཤད། །དེ་ནི་ལུས་འཚོ་མེ་དྲོད་སྐྱེད་བྱེད་ཡིན། །གལ་ཏེ་ཟས་ཚོད་མ་ཟིན་ཆུངས་
གྱུར་ན། །སྟོབས་མདངས་མི་འཕེལ་རླུང་ནད་མ་ལུས་འབྱུང༌། །ཚད་ལས་ཐལ་ན་མ་ཞུ་བེ་
སྣབས་སྐྱེད། །དེ་ཡིས་མེ་མཉམ་རླུང་རྒྱུའི་རྩ་སྦུབས་བཀག །ཕོ་བའི་དྲོད་ཉམས་ཉེས་པ་མ་
ལུས་སྐྱེད། །དེ་ཕྱིར་ཟས་དང་ཕོ་བའི་མེ་དྲོད་སྦྱར། །ལྟོ་བའི་ཆ་གཉིས་ཟས་ལ་ཆ་གཅིག་སྐོམ། །
ཆ་བཞི་པ་ནི་རླུང་གི་གནས་སུ་བཞག །ཟས་ཟོས་རྗེས་སུ་སྐོམ་འཐུངས་ངོམས་དང་ཁྱབ། །
ཟས་འདྲུལ་འཇུ་ཞིང་ལུས་བརྟས་སྟོབས་འཕེལ་བྱེད། །སྐད་འགགས་གློ་རྡོལ་ལུད་པ་ཆམ་
པ་དང་། །ནམ་ཚོང་ཡན་ཆད་ནད་ལ་གནོད་པ་ཡིན། །མེ་དྲོད་ཆུང་ལ་ཤ་ཟོས་ཆང་འཐུང་བྱ། །
མི་འཇུ་སྦོས་ན་ཟོས་རྗེས་ཆུ་བསྐོལ་བཏུང༌། །སྐེམ་པོ་རྒྱས་པར་བྱེད་ན་ཆང་བཏུང་བྱ། །སྦོམ་
པོ་དབྲི་ལ་སྦྲང་རྩིའི་ཆུ་བཏུང་ངོ༌། །ཞོ་ཆང་དུག་སྦགས་སྦྲང་རྩི་ཟོས་པ་ལ། །རྗེས་སུ་ཆུ་བསིལ་
འཐུངས་ན་ཕན་པ་ཡིན། །ཟས་ཟོས་བར་མཐའ་ཐོག་མར་སྐོམ་འཐུངས་ན། །ཉམས་འཚག་
རན་ཞིང་སྦོམ་དང་སྐེམ་པོར་འགྱུར། །ཉེས་པ་ལམ་མིན་མི་འགྲོ་མེ་དྲོད་འབར། །ལུས་ཡང་
དང་ག་བདེ་ལ་དབང་པོ་གསལ། །སྟོབས་ཆེ་བཤང་གཅི་འོག་རླུང་བདེ་བར་རྒྱུ། །ཟས་ཚོད་
ལེགས་པར་ཟིན་ལས་འབྱུང་བར་འགྱུར། །ཞེས་གསུངས་སོ། །བདུད་རྩི་སྙིང་པོ་ཡན་ལག་
བརྒྱད་པ་གསང་བ་མན་ངག་གི་རྒྱུད་ལས་ཁ་ཟས་བསྲུང་བ་དང་ཟས་ཚོད་རན་པར་བཟའ་
བའི་ལེའུ་སྟེ་བཅོ་བརྒྱད་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
25-1-61


རིག་པའི་ཡེ་ཤེས་ལགས། །སྦྱོར་བ་སྨན་གྱི་གནས་ལ་ཇི་ལྟར་བསླབ་པར་བགྱི། །འཚོ་མཛད་
སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་
སྲོང་ཆེན་པོ་ཉོན་ཅིག །ནད་ལ་གསོ་བར་བྱེད་པའི་གཉེན་པོ་ཡི། །སྦྱོར་བ་སྨན་གྱི་གནས་ལ་
བསླབ་བྱ་ན། །རོ་དང་ཞུ་རྗེས་ནུས་པ་སྦྱར་ཐབས་བཞི། །དང་པོ་རོ་ལ་རྟེན་དང་དབྱེ་བ་དང༌། །
ངོ་བོ་སྡེ་ཚན་ལས་དང་རྣམ་པ་ལྔ། །རྟེན་ནི་འབྱུང་བ་ལྔ་ལས་སྐྱེ་འགྱུར་ཏེ། །ས་ཡིས་གཞི་རྟེན་
ཆུས་རླན་མེ་ཡིས་དྲོད། །རླུང་གིས་བསྐྱོད་བྱེད་ནམ་མཁས་གོ་ཕྱེ་བས། །དེས་བསྐྱེད་གྱུར་ཀྱང་
ཤས་ཆེར་རོ་གཅིག་མིན། །ས་ཆུ་མེ་ས་ཆུ་མེ་ཆུ་དང་རླུང༌། །མེ་རླུང་ས་རླུང་གཉིས་ཀྱིས་རོ་དྲུག་
སྐྱེད། །ས་སྨན་ལྕི་བརྟན་རྟུལ་འཇམ་སྣུམ་ལ་སྐམ། །མཁྲང་ཞིང་བརྟེན་དང་སྡུད་བྱེད་རླུང་ནད་
སེལ། །ཆུ་སྨན་སླ་བསིལ་ལྕི་རྟུལ་སྣུམ་ལ་མཉེན། །བརླན་ཞིང་འཇམ་ལ་སྡུད་བྱེད་མཁྲིས་
ནད་སེལ། །མེ་སྨན་ཚ་རྣོ་སྐམ་རྩུབ་ཡང་སྣུམ་གཡོ། །དྲོད་སྐྱེད་སྨིན་ཅིང་མདོག་བྱེད་བད་ཀན་
སེལ། །རླུང་སྨན་ཡང་གཡོ་གྲང་རྩུབ་སྐྱ་ལ་སྐམ། །སྲ་ཞིང་བསྐྱོད་དང་ཁྱབ་བྱེད་བད་མཁྲིས་
སེལ། །ནམ་མཁའ་འབྱུང་བཞིའི་སྨན་ལ་སྤྱིར་ཁྱབ་སྟེ། །ཁོང་སྟོང་ཡངས་པའི་གོ་འབྱེད་འདུས་
ནད་སེལ། །དེ་བས་དངོས་དང་སྦྱར་བའི་དབང་གྱུར་ལས། །ས་སྟེང་སྨན་མིན་ཅི་ཡང་ཡོད་
མ་ཡིན། །གྱེན་འདྲེན་སྨན་ནི་མེ་དང་རླུང་ཡིན་ཏེ། །ཐུར་འགྲོ་ས་དང་ཆུ་ལས་བྱུང་བའི་ཕྱིར། 
བཀྲུ་སྨན་ཕལ་ཆེར་དང་པོའི་རོ་ལས་འབྱུང༌། །རོ་ནི་མངར་སྐྱུར་ལན་ཚྭ་ཁ་ཚ་བསྐ། །གོ་རིམ་
བཞིན་དུ་འཚོ་བྱེད་སྟོབས་ཆེན་ཡིན། །ངོ་བོ་ལྕེ་ལ་གསལ་བས་རོ་ཞེས་བྱ། །དེ་ཡང་མངར་
བའི་རོ་དེ་མྱངས་པའི་ཚེ། །ཁ་ལ་ཆགས་ཤིང་ཞིམ་པས་སྲེད་པ་སྐྱེ། །སྐྱུར་བ་སོ་བརྩེ་བཞིན་
སྡུད་ཁ་ཆུ་འཛག །ལན་ཚྭ་རེག་ན་ཚ་ཞིང་མཆིལ་མ་འདུ། །ཁ་བ་ཁ་ཡི་དྲི་སྦྱོང་ཡི་ག་ལྡོག །ཚ་
བ་ཁ་ལྕེ་བསྲེག་ཅིང་མིག་ཆུ་འཛག །བསྐ་བ་ལྕེ་རྐན་ལ་ཆགས་རྩུབ་སྙམ་བྱེད། །རོ་དྲུག་སོ་སོ་
སྨན་གྱི་སྡེ་བསྟན་པ། །ཤིང་མངར་རྒུན་འབྲུམ་གུར་ཀུམ་ཅུ་གང་དང༌། །དོང་ག་ར་མཉེ་ཉེ་
25-1-62


ཤིང་ལྕ་བ་དང༌། །ཀ་ར་བུ་རམ་སྦྲང་དང་ཤ་མར་སོགས། །དེ་དང་དེ་འདྲ་མངར་བའི་སྨན་སྡེ་
ཡིན། །སེ་འབྲུ་སྟར་བུ་བསེ་ཡབ་སྐྱུ་རུ་ར། །རྒྱ་ཤུག་ད་ཏྲིག་ཞོ་དར་ཆང་དང་རྩབས། །དེ་དང་
དེ་འདྲ་ལ་སོགས་སྐྱུར་བའི་སྡེ། །རྒྱམ་ཚྭ་རྒྱ་ཚྭ་ལྕེ་མྱང་ཚྭ་དང་ནི། །རྭ་ཚྭ་ཁ་རུ་ཚྭ་དང་ཙབས་རུ་
ཚྭ། །ཟེ་ཚྭ་ལྦ་ཚྭ་མཛེ་ཚྭ་ཐལ་ཚྭ་དང༌། །ཤིང་ཚ་ཡ་བཀྵ་ར་བུལ་ཏོག་རྣམས། །དེ་དང་དེ་འདྲ་
ལ་སོགས་ལན་ཚྭའི་སྡེ། །ནིམ་པ་ཏིག་ཏ་བོང་ང་དཀར་པོ་དང༌། །ཧོང་ལེན་གསེར་གྱི་མེ་ཏོག་
དུག་མོ་ཉུང༌། །གླ་རྩི་མཁྲིས་པ་སྐྱེར་པ་བ་ཤ་ཀ །བྲག་ཞུན་ཀྱི་ལྕེ་རེ་སོན་ལ་སོགས་པ། །དེ་
དང་དེ་འདྲ་ཁ་བའི་སྨན་སྡེ་ཡིན། །ན་ལེ་ཤམ་དང་བཅའ་སྒ་པི་པི་ལིང༌། །སྒ་གཤེར་ཤིང་ཀུན་
སྲུབ་ཀ་ལྕེ་ཚ་བ། །དྭ་བ་བཙོང་དང་སྒོག་སྐྱ་ལ་སོགས་པ། །དེ་དང་དེ་འདྲ་ཚ་བའི་སྨན་སྡེ་ཡིན། །
ཙན་དན་ཨ་རུ་ར་དང་བ་རུ་ར། །ཨུཏྤལ་ག་དུར་སྨག་དང་མོན་ཆ་ར། །འོམ་བུ་ལ་སོགས་དེ་
འདྲ་བསྐ་བའི་སྡེ། །ག་བུར་ཆུ་མ་ཙི་ལ་སོགས་པ་ཡི། །ལྡན་པའི་རོ་རྣམས་དེ་ལས་བསྒྲེས་ཏེ་
དཔྱད། །ནད་གང་སེལ་བ་རོ་ཡི་ལས་བསྟན་པ། །མངར་སྐྱུར་ལན་ཚྭ་ཚ་བས་རླུང་འཇོམས་
ཤིང༌། །ཁ་དང་མངར་དང་བསྐ་བས་མཁྲིས་པ་སེལ། །ཚ་སྐྱུར་ལན་ཚྭས་བད་ཀན་སེལ་བར་
བྱེད། །ཁྱད་པར་མངར་བས་འཕྲོད་ཅིང་གཟུགས་སྟོབས་སྐྱེད། །རྒས་བྱིས་སྐེམ་པོ་གྲེ་བ་གློ་
ལ་ཕན། །ལུས་བརྟས་རྨ་འབྱོར་མདངས་བཀྲ་དབང་པོ་གསལ། །ཚེ་རིང་འཚོ་བྱེད་དུག་དང་
རླུང་མཁྲིས་སེལ། །བསྟེན་དྲགས་བད་ཀན་ཚིལ་སྐྱེད་མེ་དྲོད་འབྲི། །ལུས་སྦོམ་གཅིན་ནད་
ལྦ་བ་རྨེན་བུ་སྐྱེད། །སྐྱུར་བས་དྲོད་སྐྱེད་ཡི་ག་འབྱེད་པ་དང༌། །ཚིལ་འདྲུལ་གཅོད་བྱེད་འཇུ་
ཞིང་རེག་པ་བསིལ། །རླུང་འགགས་རྒྱུ་ཞིང་བསྟེན་དྲགས་ཁྲག་མཁྲིས་སྐྱེད། །ལུས་ལྷོད་རབ་
རིབ་མགོ་འཁོར་སྐྱ་རྦབ་འོར། །མེ་དབལ་གཡན་པ་ཐོར་བུ་སྐོམ་རིམས་སྐྱེད། །ལན་ཚྭས་སྲ་
འཁྱིལ་འགགས་པ་འབྱིན་པ་དང༌། །དུགས་ཀྱིས་རྔུལ་དང་དྲོད་སྐྱེད་ཡི་ག་འབྱེད། །བསྟེན་
དྲགས་སྐྲ་འབྱི་སྐྲ་དཀར་གཉེར་མ་མང༌། །སྟོབས་འབྲི་སྐོམ་མཛེ་མེ་དབལ་ཁྲག་མཁྲིས་
25-1-63


སྐྱེད། །ཁ་བས་ཡི་ག་འཆུས་དང་སྲིན་སྐོམ་དུག །མཛེ་དང་བརྒྱལ་དང་རིམས་རློན་མཁྲིས་པ་
འཇོམས། །འདྲུལ་དང་ཚིལ་ཞག་རྐང་མར་བཤང་གཅི་སྐེམ། །ཡིད་གཞུངས་ནུ་མའི་ནད་དང་
སྐད་འགགས་སེལ། །བསྟེན་དྲགས་ཟུངས་འཛད་རླུང་དང་བད་ཀན་སྐྱེད། །ཚ་བས་ལྐོག་ནད་
གག་པ་མཛེ་འོར་སེལ། །རྨ་འཇིག་དྲོད་སྐྱེད་འཇུ་བྱེད་ཡི་ག་འབྱེད། །ཚིལ་དང་འདྲུལ་བག་
སྐེམ་སྦྱོང་རྩ་སྦུབས་འབྱེད། །བསྟེན་དྲགས་ཁུ་བ་སྟོབས་ཟད་ལུས་འཁུམས་འདར། །བརྒྱལ་
ཞིང་རྐེད་པ་རྒྱབ་སོགས་ན་བར་བྱེད། །བསྐ་བས་ཁྲག་མཁྲིས་ཚིལ་དང་འདྲུལ་བག་སྐེམ། །རྨ་
འཚོ་ཚིལ་དང་པགས་མདོག་དྭངས་པར་བྱེད། །བསྟེན་དྲགས་བེ་སྣབས་འཁྱིལ་དང་བཤང་བ་
སྲི། །ལྟོ་སྦོ་སྙིང་ནད་སྐེམ་དང་རྩ་སྒོ་འགག །མདོར་བསྡུས་མངར་བའི་རོ་ཡིས་རླུང་མཁྲིས་
སེལ། །ནས་རྙིང་སྐམ་སའི་ཤ་རྣམས་མ་གཏོགས་པ། །ཕལ་ཆེར་བད་ཀན་སྐྱེད་པར་བྱེད་ན་
ཡང༌། །གཡག་རྒོད་ཉ་ལུག་ཤ་དང་སྦྲང་རྩི་ཕན། །སྐྱུར་བས་བད་ཀན་སེལ་བྱེད་མཁྲིས་སྐྱེད་
ཀྱང༌། །སྐྱུ་ར་ར་ཡིས་ཁྲག་མཁྲིས་ཚ་བ་སེལ། །ལན་ཚྭས་རླུང་དང་བད་ཀན་སེལ་བྱེད་ཅིང༌། །
ལྕེ་མྱང་རྒྱམ་ཚ་མ་གཏོགས་མཁྲིས་པ་སྐྱེད། །ཧ་ཅང་ཐལ་དྲགས་ལྕི་བས་བད་ཀན་སྐྱེད། །ཁ་
བས་མཁྲིས་སེལ་བད་རླུང་སྐྱེད་ན་ཡང༌། །ཀ་ར་ཉྫ་དང་སླེ་ཏྲེས་བད་རླུང་སེལ། །ཚ་བས་རླུང་
དང་བད་ཀན་སེལ་བྱེད་ལ། །སྒོག་སྐྱ་པི་པི་ལིང་མིན་མཁྲིས་པ་སྐྱེད། །ཧ་ཅང་ཐལ་དྲགས་
ཡང་རྩུབ་རླུང་ཡང་སྐྱེད། །བསྐ་བས་མཁྲིས་སེལ་ཨ་རུ་བ་རུ་ར། །མ་གཏོགས་ཕལ་ཆེར་བད་
རླུང་གཉིས་ལ་གནོད། །ཞུ་རྗེས་ཕོ་བའི་མེ་དང་ཕྲད་པའི་ཚེ། །བད་མཁྲིས་རླུང་གིས་རིམ་པར་
ཞུ་བ་ལས། །མངར་དང་ལན་ཚྭའི་ཞུ་རྗེས་མངར་བར་ཞུ། །སྐྱུར་བ་རོ་མཚུངས་ཁ་ཚ་བསྐ་
གསུམ་ཁ། །ཉེས་པ་གསུམ་པོ་གཉིས་གཉིས་རེ་རེས་སེལ། །ཞེས་གསུངས་སོ། །བདུད་རྩི་
སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རོ་དང་ཞུ་རྗེས་བསྟན་པའི་ལེའུ་
སྟེ་བཅུ་དགུ་པའོ།། །། 
25-1-64


དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སྨན་གྱི་ནུས་པ་རོ་ནུས་ངོ་བོ་གཉིས། །སྤྱི་དང་བྱེ་བྲག་ཅེས་སུ་གསུངས་པ་
ཡིན། །དང་པོ་ནུས་སྟོབས་ཡོན་ཏན་གསུམ་དུ་བཤད། །ནུས་པ་ལྕི་སྣུམ་བསིལ་དང་རྟུལ་བ་
དང༌། །ཡང་རྩུབ་ཚ་དང་རྣོ་བ་རྣམ་པ་བརྒྱད། །དང་པོ་བཞི་པོས་རླུང་དང་མཁྲིས་པ་སེལ། །
འོག་མ་བཞི་ཡིས་བད་ཀན་སེལ་བར་བྱེད། །ཡང་རྩུབ་བསིལ་བ་གསུམ་གྱིས་རླུང་སྐྱེད་ཅིང༌། །
ཚ་རྣོ་སྣུམ་པ་གསུམ་གྱིས་མཁྲིས་པ་སྐྱེད། །ལྕི་སྣུམ་བསིལ་རྟུལ་བཞི་ཡིས་བད་ཀན་སྐྱེད། །
ཡོན་ཏན་མ་ལུས་སྙིང་པོར་གྱུར་པ་དང༌། །ནུས་པའི་ཁྱད་པར་ལྡན་པས་མཐུ་ཞེས་བརྗོད། །
གངས་ཅན་འབིགས་བྱེད་ཟླ་ཉིའི་སྟོབས་ཅན་ལས། །ཚ་བསིལ་ཕུལ་དུ་བྱུང་བས་སྟོབས་
ཞེས་བྱ། །དེ་ལ་ཚ་བས་གྲང་བའི་ནད་རྣམས་སེལ། །བསིལ་བས་ཚ་བའི་ནད་རྣམས་སེལ་
བར་བྱེད། །ཡོན་ཏན་འཇམ་དང་ལྕི་དྲོ་སྣུམ་དང་བརྟན། །གྲང་དང་རྟུལ་བ་བསིལ་མཉེན་སླ་
དང་སྐམ། །སྐྱ་དང་ཚ་བ་ཡང་དང་རྣོ་རྩུབ་གཡོ། །བཅུ་དང་བདུན་གྱིས་མཚན་ཉིད་ཉི་ཤུ་
འཇོམས། །དེ་ཕྱིར་ཡོན་ཏན་ཞེས་སུ་བཤད་པ་ཡིན། །དེ་དག་ཕལ་ཆེར་རོ་ལས་རྗེས་འབྱུང་
སྟེ། །རོ་ནི་ས་སོགས་རྣམས་ལ་བརྟེན་པའི་ཕྱིར། །ལྕི་སྣུམ་ལ་སོགས་དེ་ལས་འབྱུང་བ་ཡིན། །
ལན་ཚྭ་བསྐ་མངར་རྣམ་གསུམ་རིམ་བཞིན་ལྕི། །དེ་བཞིན་ལན་ཚྭ་སྐྱུར་མངར་སྣུམ་པ་ཡིན། །
བསྐ་ཁ་མངར་བསིལ་ཁ་བསྐ་མངར་བ་རྟུལ། །སྐྱུར་ཚ་ཁ་བ་རྣམ་གསུམ་ཡང་ལ་རྩུབ། །ཚ་
སྐྱུར་ལན་ཚྭ་རྣམ་གསུམ་ཚ་ལ་རྣོ། །རོ་སོགས་མ་བཅོས་གང་ཡང་སྟོབས་ཅན་ཡིན། །རོ་མཉམ་
ནུས་པ་སོ་སོ་རྟེན་སྟོབས་དང༌། །གྱུར་པ་སྦྱར་བའི་དབང་ལས་འབྱུང་འགྱུར་ཏེ། །མི་མཐུན་
འོག་མས་གོང་མ་ཟིལ་གྱིས་གནོན། །ཐམས་ཅད་མཐུན་ན་རོ་ཡིས་ལས་བྱེད་ལ། །རོ་བཞིན་
མི་གནོད་ཞུ་རྗེས་ལས་བྱེད་དེ། །རོ་ལས་གོ་བཟློག་ནུས་པས་ལས་བྱེད་པས། །རོ་སྡེབས་ནུས་
སྡེབས་ཞུ་རྗེས་སྡེབས་ཏེ་སྦྱར། །ངོ་བོ་རྫས་རེའི་ནུས་པ་བསྟན་པ་ནི། །རིན་པོ་ཆེ་ཡི་སྨན་དང་
25-1-65


ས་རྡོའི་སྨན། །ཤིང་སྨན་རྩི་སྨན་ཐང་སྨན་སྔོ་སྨན་དང༌། །སྲོག་ཆགས་སྨན་དང་དབྱེ་བ་བརྒྱད་
དུ་བཤད། །དང་པོ་རིན་པོ་ཆེ་ཡི་ནུས་པ་ནི། །གསེར་གྱིས་ཚེ་རིང་རྒས་སྲ་དབྱིག་དུག་སེལ། །
དངུལ་གྱིས་ཆུ་སེར་ནད་དང་རྣག་ཁྲག་སྐེམ། །ཟངས་ཀྱིས་རྣག་སྐེམ་གློ་མཆིན་ཚ་བ་སེལ། །
ལྕགས་ཀྱིས་མཆིན་དུག་མིག་ནད་སྐྱ་རྦབ་སེལ། །གཡུ་ཡིས་དུག་དང་མཆིན་པའི་ཚ་བ་སེལ། །
མུ་ཏིག་ཀླད་པ་འཛག་གཅོད་དུག་ནད་སེལ། །ཉ་ཕྱིས་ནུས་པ་མུ་ཏིག་ཁྱད་པར་མེད། །དུང་
གིས་རྣག་སྐེམ་འགྱིངས་འབིགས་རུས་ཚད་སེལ། །བྱུ་རུས་མཆིན་ཚད་རྩ་ཚད་དུག་ཚད་སེལ། །
མུ་མེན་དུག་དང་ཆུ་སེར་མཛེ་ནད་སེལ། །རྡོ་ཡི་སྨན་གྱི་ནུས་པ་བསྟན་པ་ནི། །སྨུག་པོ་སྦལ་
རྒྱབ་ཕོ་སྦལ་མོ་སྦལ་གཉིས། །ཆུ་སེར་འཕུལ་འདྲེན་སྐེམ་ཞིང་ལྷ་བ་འཛིན། །རུས་པ་ཆག་པ་
སྦྱོར་ཞིང་ཀླད་པ་སྡོམ། །དཀར་པོ་སྦལ་རྒྱབ་དཀར་པོ་ཆིག་ཐུབ་དང༌། །སྨུག་པོ་ཆིག་ཐུབ་ལ་
སོགས་དེ་དང་འདྲ། །གངས་ཐིགས་དེ་བཞིན་མཆིན་པའི་ཚ་བ་སེལ། །ཁབ་ལེན་མདེའུ་
འབྱིན་ཀླད་རུས་རྩ་ནད་སེལ། །བེ་སྣབས་རུས་སྦྱོར་རྨེན་གཅོད་ཤའུ་སྐྱེད། །མཉྫི་ར་ཡིས་རུས་
པའི་ཚད་པ་སེལ། །ཕག་མགོས་རུས་པ་གསོ་ཞིང་ཆུ་སེར་འདྲེན། །བྱེ་མགོ་དེ་བཞིན་ཤ་འུ་
སྐྱེད་པ་དང་། །གསེར་རྡོ་དངུལ་རྡོ་ཆུ་སེར་འདྲེན་པར་བྱེད། །སྟང་ཟིལ་གསེར་ཟིལ་དངུལ་
ཟིལ་རུས་མདོག་འབྱིན། །གྲུ་བཞི་ཀླད་པ་གསོ་ཞིང་ཆུ་སེར་འདྲེན། །ཅོག་ལ་མ་ཡིས་རྩ་དང་
ལྷ་བ་འཛིན། །རྡོ་གླད་གླད་པ་སྡོམ་ཞིང་ཤ་འུ་གསོ། །ལི་གྲིས་རུལ་གཅོད་རྡོ་ཆུས་རུས་པ་སྦྱོར། །
རྡོ་མཁྲིས་རྩ་སྡོམ་གཤའ་དཀར་ཤ་འུ་སྐྱེད། །ལྡོང་རོས་བ་བླ་རྨེན་ངན་རུལ་བ་གཅོད། །རྡོ་
སོལ་རྡོ་རྣམས་འཇུ་ཞིང་རྩ་ཁ་སྡོམ། །བ་ནུ་རྡོ་རྒྱུས་མཐིང་རྒྱུས་ཆུ་བ་གསོ། །ཏི་ཚ་སེར་པོ་རྨ་
འདྲུབ་མིག་ལ་ཕན། །མཚལ་གྱིས་རྨ་འདྲུབ་གློ་མཆིན་རྩ་ཚད་སེལ། །ལིག་བུ་མིག་དང་བཙག་
ཡུག་རྣམས་ལ་སོགས། །མིག་ནད་རུས་ཚད་སེལ་ཞིང་ཆུ་སེར་སྐེམ། །ཅོང་ཞིས་འཁྲུ་གཅོད་
བད་ཀན་ཚ་བ་སེལ། །རྡོ་ཐལ་ཕོ་བའི་བད་ཀན་འདྲིལ་བ་གཅོད། །ཧ་ཤིག་རྩ་སྦྱོང་མོ་རྡེ་རྡེ་
25-1-66


ནད་སེལ། །ས་ཡི་སྨན་གྱི་ནུས་པ་བསྟན་པ་ནི། །གསེར་གྱི་བྱེ་མས་མཁལ་ནད་ཆུ་འགགས་
སེལ། །སིནྡྷུ་ར་ཡིས་རྩ་ཚད་དོན་རྨ་གསོ། །རྣག་ཁྲག་སྐེམ་ཞིང་མེས་འཚིག་རྨ་ལ་ཕན། །ཟེ་
ཚྭས་རྡོ་འཇུ་རྡེའུ་རྡོ་སྐྲན་བཤིག །ཡ་བཀྵ་ར་དྲོད་སྐྱེད་སྐྲན་ནད་སྦྱོང་། །བུལ་ཏོག་རུལ་གཅོད་
ཙམ་པ་མྱགས་པར་བྱེད། །མུ་ཟི་སེར་པོ་གདོན་འཇོམས་རྣག་ཁྲག་སྐེམ། །ནག་མཚུར་སེར་
མཚུར་རུལ་གཅོད་སྐྲན་ལ་བརྐོ། །བིག་པན་འབྲས་གཅོད་སྐྲན་བཤིག་ལིང་ཐོག་ལེན། །རྡོ་
དྲེག་དུག་དང་ཚད་པ་རྙིང་པ་སེལ། །བྲག་ཞུན་ཚད་པའི་ནད་རྣམས་ཀུན་ལ་ཕན། །ཁྱད་པར་
ཕོ་མཆིན་མཁལ་ཚད་སེལ་བའི་མཆོག །ཤིང་སྨན་རྩ་བ་ལྡུམ་བུ་སྡོང་པོ་དང་། །ཡལ་ག་རྐང་
དང་ཤུན་པ་ཐང་ཆུ་དང་། །ལོ་མ་མེ་ཏོག་འབྲས་བུ་བཅུ་རུ་འགྱུར། །རྩི་སྨན་རྩ་ཤིང་སྲོག་
ཆགས་ལས་བྱུང་བ། །ཐང་སྨན་རྩ་བ་ངར་པ་ལོ་མ་དང་། །མེ་ཏོག་འབྲས་བུ་ལྔ་རུ་འགྱུར་བ་
ཡིན། །དེ་དག་གང་ལ་གང་ཕན་ནུས་པ་ནི། །ག་བུར་ཚ་བ་རྒྱས་པ་ཐོག་བབས་གསོད། །རྙིངས་
ཤིང་ཞེན་པའི་ཚ་བ་རྩད་ནས་འབྱིན། །ཙན་དན་དཀར་པོས་གློ་སྙིང་འཁྲུགས་ཚད་སེལ། །
ཙན་དན་དམར་པོས་ཁྲག་གི་ཚད་པ་སེལ། །ཨ་ག་རུ་ཡིས་སྙིང་སྲོག་ཚ་བ་སེལ། །གི་ཝཾ་
རིམས་དུག་མཆིན་ཚད་སྣོད་ཚད་སེལ། །ཅུ་གང་གློ་ནད་ཀུན་སེལ་རྨ་ཚད་གཅོག །གུར་གུམ་
མཆིན་ནད་ཀུན་སེལ་རྩ་ཁ་སྡོམ། །སུག་སྨེལ་མཁལ་ནད་གྲང་བ་མ་ལུས་སེལ། །ཛཱ་ཏིས་རླུང་
འཇོམས་སྙིང་གི་ནད་རྣམས་སེལ། །ལི་ཤིས་སྲོག་རྩའི་ནད་དང་གྲང་རླུང་སེལ། །ཀ་ཀོ་ལ་
ཡིས་ཕོ་མཆེར་གྲང་བ་སེལ། །གླ་རྩིས་དུག་སྲིན་མཁལ་མཆིན་གཉན་ནད་སེལ། །དོམ་
མཁྲིས་རྩ་སྡོམ་རུལ་གཅོད་ཤ་འུ་སྐྱེད། །ཨུཏྤལ་གློ་མཆིན་ཚད་པ་མ་ལུས་སེལ། །ནཱ་ག་པུཥྤ་ན་
ག་གེ་སར་དང་། །པདྨ་གེ་སར་གློ་མཆིན་སྙིང་ཚད་སེལ། །ཟི་ར་དཀར་པོས་གློ་ཡི་ཚད་པ་
སེལ། །ཟི་ར་ནག་པོས་མཆིན་པའི་གྲང་བ་སེལ། །ལ་ལ་ཕུད་ཀྱིས་ཕོ་ནད་གྲང་བ་སེལ། །སོ་
མ་ར་ཛས་ལྤགས་ནད་ཆུ་སེར་སེལ། །ཐལ་ཀ་རྡོ་རྗེ་དག་ཀྱང་དེ་བཞིན་ནོ། །གསེར་གྱི་མེ་ཏོག་
25-1-67


སྣོད་ཚད་མཁྲིས་ཚད་སེལ། །གསེར་གྱི་ཕུད་བུས་མཁྲིས་པ་གྱེན་དུ་འདྲེན། །དུག་མོ་ཉུང་གིས་
མཁྲིས་སེལ་ཚ་འཁྲུ་གཅོད། །རྒུན་འབྲུམ་གློ་ནད་སེལ་ཞིང་ཚད་པ་སྦྱོང་། །འུ་སུས་ཕོ་བའི་
བད་ཀན་ཚ་བ་སེལ། །སྟར་བུས་གློ་བརྐོ་ཁྲག་འཇུ་བད་ཀན་གཅོད། །བསེ་ཡབ་བད་ཀན་ཚ་
བ་སེལ་བར་བྱེད། །སེ་འབྲུས་ཕོ་བའི་ནད་རྣམས་མ་ལུས་སེལ། །མེ་དྲོད་སྐྱེད་ཅིང་བད་ཀན་
གྲང་ནད་འཇོམས། །ན་ལེ་ཤམ་གྱིས་བད་ཀན་གྲང་བ་སེལ། །པི་པི་ལིང་གིས་གྲང་ནད་མ་
ལུས་སེལ། །སྨན་སྒས་དྲོད་སྐྱེད་ཟས་ལེན་བད་རླུང་འཇོམས། །སྒ་སྐྱས་བད་རླུང་སེལ་ཞིང་
ཁྲག་འཁྱགས་འཇུ། །ཙི་ཏྲ་ཀ་སྟོབས་མེ་འདྲ་མེ་དྲོད་སྐྱེད། །འོར་ནད་གཞང་འབྲུམ་སྲིན་ནད་
མཛེ་ནད་སེལ། །ཤིང་ཚས་ཕོ་མཆིན་གྲང་རླུང་སེལ་བར་བྱེད། །ཀ་རཉྫ་ཡིས་ཕོ་བའི་མེ་དྲོད་
སྐྱེད། །ཤིང་ཀུན་སྲིན་འཇོམས་གྲང་ནད་སྙིང་རླུང་སེལ། །བྱི་ཏང་ག་ཡིས་སྲིན་སེལ་མེ་དྲོད་
སྐྱེད། །མ་རུ་ཙེ་ཡིས་སྲིན་ནད་སེལ་བར་བྱེད། །གོ་བྱེས་སྲིན་གསོད་རུལ་གཅོད་ཕོ་རིམས་
སེལ། །སྤོས་དཀར་ཆུ་སེར་སྦྱོང་ཞིང་སྐེམ་པར་བྱེད། །གུ་གུལ་ས་གདོན་ལྷོག་པ་གཉན་གཟེར་
འཇོམས། །ཤེལ་ཏས་ལྷ་རུས་ཆུ་སེར་བཙོན་དུ་འཛིན། །རྒྱ་ཚྭས་དུག་དང་སྲིན་གསོད་རྩ་ནད་
སྦྱོང་། །གག་པ་ཤ་རོ་གཅོད་ཅིང་ཆུ་འགགས་འབིགས། །རྒྱམ་ཚྭས་བད་རླུང་མ་ཞུ་གྲང་བ་
སེལ། །ལྕེ་མྱང་ཚྭ་ཡང་དེ་བཞིན་མིག་ལ་ཕན། །ཁ་རུ་ཚྭ་དང་ཙབས་རུ་ཚྭ་གཉིས་ཀྱིས། །དྲོད་
སྐྱེད་སྦོ་སྒྲེག་འགྱིངས་དང་བད་རླུང་འཇོམས། །རྭ་ཚ་ཐལ་ཚྭས་སྣོད་ཀྱི་གྲང་བ་སེལ། །མཛེ་
ཚྭས་ཁྲག་འཇུ་རྨ་ཡི་ཆུ་སེར་འདྲེན། །ཚ་ལས་རྨ་འདྲུབ་ཁྲག་འཇུ་སྦྱོང་བར་བྱེད། །ལྦ་ཚྭས་ལྦ་
བ་འཇོམས་པར་བྱེད་པའོ། །ཨ་རུ་ལན་ཚྭ་མ་གཏོགས་རོ་ལྔ་ལྡན། །འཚོ་བྱེད་དྲོད་སྐྱེད་ཟས་
འཇུ་འཕྲོད་པར་བྱེད། །རླུང་མཁྲིས་བད་ཀན་ལས་གྱུར་ནད་ཀུན་འཇོམས། །དེ་ལ་རིགས་ལྔ་
རྣམ་རྒྱལ་འཇིགས་མེད་དང་། །བདུད་རྩི་འཕེལ་བྱེད་སྐེམ་པོ་ལྔ་ཡིན་ཏེ། །རྣམ་པར་རྒྱལ་བ་
ཀུ་བའི་མཇུག་མ་འདྲ། །རླུང་མཁྲིས་བད་ཀན་འདུ་བའི་ནད་རྣམས་སེལ། །ཁྱད་པར་བཀྲ་
25-1-68


ཤིས་དོན་ཀུན་འགྲུབ་པས་བཟང་། །འཇིགས་མེད་ཟུར་ལྔ་མིག་ནད་གདོན་ལ་བསྔགས། །
བདུད་རྩི་ཤ་མཐུག་སྐེམ་པོ་ཤ་འཕེལ་བྱེད། །འཕེལ་བྱེད་ཟླུམ་པོ་བུམ་འདྲ་རྨ་ལ་བསྔགས། །
སྐེམ་པོ་སུལ་མང་བྱིས་པའི་མཁྲིས་ནད་སེལ། །བ་རུ་ར་ཡིས་བད་མཁྲིས་ཆུ་སེར་སེལ། །སྐྱུ་
རུ་ར་ཡིས་བད་མཁྲིས་ཁྲག་ནད་སེལ། །སྙིང་དང་མཁལ་མ་གླ་གོར་ཞོ་ཤ་གསུམ། །སྙིང་ཚད་
མཁལ་ཚད་མཆེར་ཚད་སེལ་བར་བྱེད། །ཨ་འབྲས་སྲ་འབྲས་འཇམ་འབྲས་མཁལ་ནད་སེལ། །
འབྲ་གོས་བད་ཀན་སྨུག་སེར་ཕོ་ནད་སེལ། །མ་ནུ་པ་ཏྲས་རླུང་ཁྲག་ཚ་བ་སེལ། །པུཥྐར་མཱུ་
ལས་བད་ཀན་ཚ་བ་སེལ། །རུ་རྟས་རླུང་ཁྲག་ཕོ་བ་སྦོས་པ་སེལ། །གློ་ནད་གག་པ་ཤ་རོ་
གཅོད་པར་བྱེད། །ཡུང་བས་དུག་སེལ་རུལ་གཅོད་གཉན་ནད་འཇོམས། །ཤུ་དག་མ་ཞུ་དྲོད་
སྐྱེད་གག་ལྷོག་སེལ། །པུ་ཤེལ་སྐྱུགས་གཅོད་བད་ཀན་ཚ་བ་སེལ། །ཁྱུང་སྡེར་དཀར་སྨུག་
དུག་ཚད་སེལ་བར་བྱེད། །དཔའ་བོ་དཀར་སེར་དཔའ་རྒོད་དེ་བཞིན་ནོ། །བོང་ང་དཀར་པོས་
རིམས་དུག་མཁྲིས་ཚད་སེལ། །བོང་ང་དམར་སེར་ཤ་དུག་བཙན་དུག་སེལ། །ཤིང་མངར་གློ་
ནད་རྩ་ནད་སེལ་བར་བྱེད། །སླེ་ཏྲེས་ཀཎྜ་ཀ་རིས་རླུང་ཚད་སེལ། །ག༌བྲ་དག་ཀྱང་དེ་བཞིན་
རིམས་ལ་ཕན། །ཏིག་ཏས་མཁྲིས་པའི་ཚད་པ་མ་ལུས་སེལ། །བ་ཤ་ཀ་ཡིས་ཁྲག་ཚད་མ་
ལུས་སེལ། །བ་ལེ་ཀ་ཡིས་གློ་མཆིན་སྣོད་ཚད་སེལ། །ག་དུར་རིམས་དང་གློ་ཚད་རྩ་ཚད་
སེལ། །སྟབ་སེང་རུས་ཆག་སྦྱོར་ཞིང་རུས་ཚད་སེལ། །སྒྲོན་ཤིང་བད་རླུང་ཆུ་སེར་གྲང་བ་
སེལ། །སྐྱེར་པ་སེ་རྒོད་དུག་སྡུད་ཆུ་སེར་སེལ། །སེང་ལྡེང་ཁྲག་དང་ཆུ་སེར་སྐེམ་པར་བྱེད། །
སོ་ཆས་ནད་ཀུན་གྱེན་འདྲེན་སྐྱུགས་སྨན་མཆོག །དན་རོག་ཤྲཱི་ཁཎྡ་དྲག་པོར་སྦྱོང་། །དོང་
གས་མཆིན་ནད་སེལ་ཞིང་འཇམ་པོར་འཁྲུ། །ཀ་པེད་ད་ཏྲིག་སྨག་དང་མོན་ཆ་རས། །འཁྲུ་
བའི་ནད་རྣམས་ཚ་གྲང་མེད་པར་གཅོད། །སྔོ་ཡི་སྨན་གྱི་ནུས་པ་བསྟན་པ་ནི། །ཧོང་ལེན་ཁྲག་
སྐེམ་འཁྲུགས་ཚད་དོན་ཚད་སེལ། །སྤང་རྩི་དོ་བོས་རིམས་དུག་རྙིངས་ཚད་སེལ། །རེ་སྐོན་
25-1-69


ཁྲག་སྐེམ་སྨུག་པོ་རྩ་ཚད་སེལ། །ཀྱི་ལྕེས་སྣོད་ཚད་མཁྲིས་ཚད་སེལ་བར་བྱེད། །སུམ་ཅུ་ཏིག་
གིས་མཆིན་མཁྲིས་ཚ་བ་སེལ། །པྲི་ཡངྐུ་ཡིས་ཕོ་མཆིན་ཚ་བ་སེལ། །ཟངས་ཏིག་ལྕགས་ཏིག་
མཁྲིས་པའི་ཚ་བ་སེལ། །སྲོ་ལོ་སུག་འདྲས་གློ་ཡི་ཚད་པ་སེལ། །གཡའ་ཀྱི་མ་ཡིས་མཁྲིས་པ་
ཞི་སྦྱོང་བྱེད། །གང་ག་ཆུང་གིས་དུག་དང་ཚད་འཁྲུ་གཅོད། །བྱ་རྒོད་སྤོས་ཀྱིས་གདོན་དུག་
རིམས་ཚད་སེལ། །སྲོལ་གོང་པ་ཡིས་མགོ་ཆག་དུག་ཚད་སེལ། །ཡུ་མོ་མདེ་འབྱིན་བུ་རོ་ཟུག་
རྔུ་འབྱིན། །དར་ཡ་ཀན་གྱིས་བྱང་ཁོག་ཆུ་སེར་སྐེམ། །མགོ་བོའི་རུས་ཆག་སྦྱོར་ཞིང་ལྷ་བ་
འཛིན། །རྟ་པགས་ལྷ་བ་འཛིན་ཞིང་ཆུ་སེར་འདྲེན། །ཨ་བི་ཥ་ཡིས་མགོ་ཆག་དུག་ཚད་སེལ། །
སྟག་ཤས་རྨ་འདྲུབ་གཉན་གསོད་དུག་ནད་སེལ། །སྤང་རྒྱན་དཀར་པོས་གྲེ་བའི་དུག་ཚད་
སེལ། །ཡུ་གུ་ཤིང་གིས་རྨ་སྦྱོར་དུག་ཚད་སེལ། །རྩད་དང་རྒུ་ཐུབ་ལྡུམ་སྟག་དུག་ནད་སེལ། །
ཨ་བྱག་མགོ་ཆག་གསོ་ཞིང་ཆུ་སེར་སྐེམ། །ཚེར་སྔོན་རུས་ཆག་གསོ་ཞིང་ལྷ་བ་འདེགས། །
སྨུག་ཆུང་མདན་ཡོན་དག་ཀྱང་དེ་བཞིན་ནོ། །གསེར་སྐུད་གློ་མཆིན་རྩ་ཚད་དུག་ཚད་སེལ། །
ལུག་རུ་སྨུག་པོས་དུག་སྡུད་ཤ་དུག་སེལ། །ལུག་རུ་སེར་པོ་ཆུ་རུག་ཆུ་འཐུང་བྱེད། །སེ་བའི་
མེ་ཏོག་མཁྲིས་སེལ་རླུང་ཁ་གནོན། །འབུ་སུ་ཧང་གིས་རྨ་འདྲུབ་གློ་ནད་སེལ། །སྒོང་ཐོག་པ་
ཡིས་ཤ་དུག་འཁྲུགས་ཚད་སེལ། །ཨ་ཀྲོང་གློ་ཡི་ཚད་པ་སེལ་བར་བྱེད། །ཚར་བོང་གྲེ་བའི་
ཚད་པ་གློ་ནད་སེལ། །ཏང་ཀུན་སྙིང་གི་ཚད་པ་དུག་ནད་སེལ། །སེ་རྒོད་འབྲས་བུས་དུག་
ཚད་མཆིན་ཚད་སེལ། །ཤུག་པ་ཚེར་ཅན་མཁལ་ཚད་ལྷོག་པ་སེལ། །སྐྱེར་པའི་མེ་ཏོག་འབྲས་
བུས་འཁྲུ་བ་གཅོད། །ཐང་ཕྲོམ་ལང་ཐང་ཙེ་ཡིས་སྲིན་ནད་སེལ། །སྲིན་ཤིང་སྣ་མའི་འབྲས་བུ་
དེ་བཞིན་ནོ། །དྲེས་མའི་གེ་སར་སྲིན་གསོད་གླང་ཐབས་འཇོམས། །དཀར་པོ་ཆིག་ཐུབ་དུག་
སྡུད་གཉན་སྲིན་འཇོམས། །ཨ་ཝ་བྱང་ཁོག་རྨ་དང་མིག་ལ་ཕན། །ཞིམ་ཐིག་ལེ་ཡིས་མིག་གི་
ལིང་ཐོག་ལེན། །པར་པ་ཏ་ཡིས་རིམས་དང་དུག་ཚད་སེལ། །དྭ་བའི་རྩ་བས་སྲིན་གསོད་
25-1-70


རུས་མཛེར་འགོགས། །འདམ་བུ་ཀ་རས་གློ་མཆིན་རྩ་ཚད་སེལ། །འབྲི་ཏ་ས་འཛིན་རྣག་ཁྲག་
ཆུ་སེར་འདྲེན། །བྱ་པོ་ཙི་ཙིས་བུད་མེད་ཟླ་མཚན་གཅོད། །ཤུ་མོ་ཟ་ཡིས་གློ་རྣག་འཁྲུ་བ་
གཅོད། །སྙི་བས་བློ་མུར༌བྲང་ཚ་ཆམ་པ་སེལ། །གཡེར་ཤིང་པ་ཡིས་འབྲུམ་པའི་ཚ་བ་སེལ། །
མེ་ཏོག་སེར་ཆེན་རྨ་འདྲུབ་རྩ་རུལ་གསོ། །བྲག་སྐྱ་ཧ་བོས་དུག་སེལ་ཚད་འཁྲུ་གཅོད། །བྲག་
སྤོས་རྨ་འདྲུབ་རྣག་སྐེམ་ལྷ་བ་འཛིན། །རྒྱ་སྤོས་སྤང་སྤོས་ཚད་རྙིང་དུག་ཚད་སེལ། །མྱང་རྩི་
པྲས་ཀྱིས་ཆུ་འཐུང་རིམས་ཚད་སེལ། །རྒུ་དྲུས་རྨ་འདྲུབ་རྩ་འཐུད་རྒྱུ་གཟེར་སེལ། །འབམ་
པོས་སྐྲངས་འཇོམས་ཁོང་འབྲས་བཤིག་པར་བྱེད། །མེ་ཏོག་ལུག་མིག་དུག་དང་རིམས་ནད་
སེལ། །མཁན་པས་ཁྲག་གཅོད་ཡན་ལག་སྐྲངས་པ་འཇོམས། །ཆུ་མ་རྩི་ཡིས་ཆུ་སེར་དམུ་ཆུ་
སྦྱོང་། །བྱི་ཚེར་རིམས་དུག་མཁལ་མའི་ཚ་བ་སེལ། །དེ་བས་རིམས་སེལ་རྩ་མཁྲིས་མཁྲིས་
ནད་སེལ། །རེ་རལ་འོམ་བུས་ཤ་དུག་སྦྱར་དུག་སེལ། །ཞུ་མཁན་ཚོས་བཙོད་གློ་མཁལ་
འགྲམས་ཚད་སེལ། །ལྕམ་པས་ཆུ་འགགས་སྐོམ་དད་འཁྲུ་བ་སེལ། །བྲག་ལྕམ་རྨ་འདྲུབ་རྟི་
རྨིག་རྩ་སྒོ་འགེག །གྲ་མའི་རྩ་བས་ཤ་ཚད་རྩ་ཚད་སེལ། །མཛོ་མོས་ཁྲག་འཁྱགས་འཇུ་ཞིང་
ཁྲག་ཚད་སེལ། །ཕང་མའི་འབྲས་བུས་སྙིང་ཚད་མོ་ནད་སེལ། །སྲད་དཀར་བ་ཡིས་དམུ་ཆུ་སྐྱ་
རྦབ་སྦྱོང་། །བྱི་རུག་རྨ་ཡི་འབུ་སྲུང་སྲིན་ཕོལ་སེལ། །མཚེ་ལྡུམ་རྩ་ཡི་ཁྲག་གཅོད་མཆིན་ཚད་
སེལ། །བྲེ་གས་གློ་དང་མཁལ་མའི་ཚ་བ་སེལ། །ལུག་ཆུང་རིམས་དུག་སྨུག་པོ་རྩ་ཚད་སེལ། །
ལུག་ངལ་དུག་སེལ་ཡན་ལག་སྐྲངས་པ་འཇོམས། །ཟངས་རྩི་བ་ཡིས་མཁྲིས་ནད་མིག་སེར་
སེལ། །རྙ་ལོས་རྒྱུ་ལོང་སྣོད་ཀྱི་ཚ་བ་སེལ། །ཤོ་མང་རྨ་ཡི་ཚ་བ་སེལ་བར་བྱེད། །པ་ཡག་རྩ་
བས་བློ་གསོ་བློ་ནག་འདྲེན། །བྱེའུ་ལ་ཕུག་ཤ་དུག་སེལ་བར་བྱེད། །ཨུག་ཆོས་རྣ་བའི་ནད་
སེལ་སྦོས་པ་སྦྱོང་། །སྐྱི་བའི་འབྲས་བུས་མཁྲིས་པ་གྱེན་ལ་འདྲེན། །ས་རྫི་ཀ་ཡིས་ཕོ་བའི་མེ་
དྲོད་སྐྱེད། །སྲུབ་ཀ་རུལ་གཅོད་དྲོད་སྐྱེད་ཆུ་སེར་འདྲེན། །ལྕེ་ཚ་དབྱི་མོང་གཉིས་ཀྱང་དེ་
25-1-71


བཞིན་ནོ། །བ་ལུས་བད་ཀན་ཚ་གྲང་འཐབ་པ་སེལ། །གོ་སྙོད་རླུང་ཚད་དུག་དང་མིག་ནད་
སེལ། །ཐ་རམས་ན་རམས་བྱ་རྐང་འཁྲུ་བ་གཅོད། །སོག་ཀ་པ་ཡིས་སྐྱུག་པ་མ་ལུས་གཅོད། །
དབང་པོ་ལག་པས་ལུས་སྟོབས་ཁུ་བ་སྐྱེད། །རི་ཤོས་མཁྲིས་པ་སྤྱང་ཚེར་བད་ཀན་འདྲེན། །
དུར་བྱིད་ཐར་ནུས་ཚ་གྲང་ནད་ཀུན་སྦྱོང་། །སྔོན་བུས་ཆུ་སེར་ཁྲོན་བུས་མཁྲིས་པ་སྦྱོང་། །
ལྕུམ་རྩས་དུག་ཚད་སྣོད་ཚད་བད་ཀན་སྦྱོང་། །ཆུ་རྩས་གཉན་སྦྱོང་རྨ་ཡི་སྐམ་རྩི་བྱེད། །རེ་
ཅག་པ་ཡིས་འབྲས་འདུལ་གཉན་ནད་སྦྱོང་། །ལྕ་བས་ཆུ་སེར་མཁལ་རྐེད་གྲང་བ་སེལ། །ཉེ་
ཤིང་ར་མཉེས་ཚེ་བསྲིང་ཆུ་སེར་སེལ། །ཨ་ཤོ་གནྡྷས་སྨད་གྲང་ཆུ་སེར་སེལ། །གཟེ་མས་
གཅིན་སྲི་གྲུམ་བུ་མཁལ་ནད་སེལ། །སྲོག་ཆགས་ལས་བྱུང་རྭ་དང་རུས་པ་དང་། །ཤ་ཁྲག་
མཁྲིས་ཚིལ་གླད་པ་པགས་སེན་སྤུ། །ཆུ༌བྲུན་བུབས་རིལ་ལུས་དང་བཅུ་གསུམ་འབྱུང་། །དེ་
དག་གང་ལ་གང་ཕན་ནུས་པ་བསྟན། །བསེ་རུས་བྱང་ཁོག་རྣག་ཁྲག་ཆུ་སེར་སྐེམ། །ཁ་ཤ་ཤ་
བའི་རྭ་ཡང་དེ་དང་འདྲ། །གཙོས་དང་དགོ་བའི་རྭ་ཡིས་འཁྲུ་བ་གཅོད། །རྒྱ་རུ་ལུག་ཐུག་རྭ་
ཡིས་བུ་འབྱིན་བྱེད། །རྒོད་གཡག་རྭ་ཡིས་དྲོད་སྐྱེད་སྐྲན་ནད་བཤིག །གཉན་གྱི་རྭ་ཡིས་
རིམས་ནད་སེལ་བར་བྱེད། །མི་ཡི་དུར་ཐོད་ཆུ་སེར་སྐེམ། །མི་རུས་བཙའ་མ་སོག་ཐལ་གྱིས། །
ཚད་རྙིང་ལུས་ལ་ཞེན་པ་འགོགས། །མི་ཡི་དཔྱི་རུས་ལྷོག་པ་གསོད། །འབྲུག་རུས་རུལ་
གཅོད་རྨེན་པ་འདྲུབ། །སྟག་གི་རུས་པས་ལྷ་བ་འགུགས། །འགྲོན་བུ་ཁྲག་གཅོད་རྣག་ཆུ་སྐེམ། །
ཐོག་གིས་བསད་པའི་རུས་པ་དང་། །རྒྱུ་གཟེར་ཐོད་པས་རྒྱུ་གཟེར་འཇོམས། །ཕག་པའི་
རུས་པས་སྨུག་པོ་སེལ། །ལུག་གི་རུས་པས་རླུང་ནད་སེལ། །སེར་བ་རུས་ཀྱིས་ཆུ་འགགས་
སེལ། །ཟེར་མོའི་རུས་པས་ཁྲག་ཤོར་གཅོད། །སྤྲེའུའི་རུས་པས་བུ་འབྱིན་བྱེད། །འབུ་སྐྱོགས་
སྲིན་སེལ་དམུ་ཆུ་སྦྱོང་། །བཤུལ་ཆགས་རུས་པས་ཆུ་སེར་སེལ། །མི་ཤས་འབྲས་འདུལ་རླུང་
དུག་གཉན་ནད་འཇོམས། །སྦྲུལ་ཤས་འདྲིལ་བཤིག་འགགས་འབྱིན་མིག་ལ་ཕན། །བྱ་རྒོད་
25-1-72


ཤ་ཡིས་དྲོད་སྐྱེད་ལྦ་བ་འཇིག །རྨ་བྱའི་ཤ་ཡིས་མཁྲིས་པ་དུག་ནད་འཇོམས། །ད་བྱིད་ཤ་
ཡིས་མཁལ་རྐེད་གྲང་བ་སེལ། །སྲམ་གྱི་མཆིན་པས་ཆུ་འགགས་སེལ་བར་བྱེད། །འཕྱི་བའི་
མཆིན་པས་རུས་པ་གས་པ་སྦྱོར། །ར་ཡི་མཆིན་པས་མིག་ལ་མཆོག་ཏུ་ཕན། །གློ་སྙིང་མཆིན་
མཆེར་མཁལ་ཤས་རང་ནད་སེལ། །སྤྱང་ཀིའི་ཕོ་བས་དྲོད་སྐྱེད་མ་ཞུ་འཇུ། །སྤྱང་ཀིའི་ལྕེ་
ཡིས་ལྕེ་སྐྲངས་འཇོམས། །ཕག་པའི་ལྕེ་ཡིས་རུས་མཛེར་འགོགས། །ཁྱི་ཡི་ལྕེ་ཡིས་རྨ་རྣམས་
འདྲུབ། །བོང་བུའི་ལྕེ་ཡིས་འཁྲུ་བ་གཅོད། །ཐུག་འབྲས་རོ་ཙ་ཁྱི་རླིག་བུ་རོགས་འབྱིན། །ཝ་
དང་ཁུག་རྟའི་གློ་བས་གློ་རྡོལ་གཅོད། །བྱ་ཝང་བོང་བུའི་ཤ་ཡིས་སྐྱུག་པ་གཅོད། །མཆིལ་པ་
ནས་ཟན་རྩངས་པས་ཁུ་བ་སྐྱེད། །ངུར་པའི་ཤ་ཡིས་ཉྭ་ལོག་སེལ་བར་བྱེད། །ཤ་བའི་ཁྲག་
གིས་སྲིན་སེལ་མངལ་ཁྲག་གཅོད། །ར་ཡི་ཁྲག་གིས་རེག་དུག་འབྲུམ་ནག་སེལ། །གཡག་
རྒོད་ཁྲག་དང་གཙོད་ཁྲག་འཁྲུ་བ་གཅོད། །ཕག་ཁྲག་དུག་དང་སྨུག་པོ་བྱེར་བ་སྡུད། །བོང་
ཁྲག་གྲུམ་བུ་ཚིགས་མིག་ཆུ་སེར་སེལ། །བྱ་ཡི་ཟེ་ཁྲག་ཤ་གསོ་ལྷ་བ་འཛིན། །མངལ་ཁྲག་རྩ་
སྡོམ་ཤ་འུ་སྐྱེད་པར་བྱེད། །མཁྲིས་པའི་རིགས་རྣམས་ཐམས་ཅད་རྩ་ཁ་སྡོམ། །རུལ་གཅོད་ཤ་
གསོ་དུག་སེལ་མིག་ལ་ཕན། །སྦྲུལ་གྱི་ཚིལ་བུས་མདེའུ་འབྱིན། །ཤ་ཚིལ་སྲིན་སྲེལ་དུག་ནད་
སྲུང་། །ཕག་ཚིལ་དུག་སྡུད་ཤུ་ཐོར་སེལ། །མི་ཚིལ་རླུང་འཇོམས་ཤུ་ཐོར་སེལ། །ར་གླད་ཆུ་
རྒྱུས་ཆད་པ་གསོ། །ལུག་གླད་མགོ་འཁོར་འཚོ་འཁྱོམས་གསོ། །རི་དྭགས་གླད་པས་འཁྲུ་བ་
གཅོད། །རི་བོང་གླད་པས་རྒྱུ་གཟེར་སེལ། །མི་གླད་སྐྲངས་འཇོམས་ཆུ་སེར་འཇིག །སྦྲུལ་
པགས་ཤ་བཀྲ་གླང་ཤུ་སེལ། །བསེ་ཀོ་གླང་ཀོ་འབྲུམ་ནག་སེལ། །བྱི་བའི་པགས་པས་རྣག་སྣ་
འདྲེན། །ཆུ་སྲིན་སྡེར་མོས་རུས་ཚད་སེལ། །བོང་བུའི་རྨིག་པས་ཆུ་འགགས་སེལ། །རྟ་ཡི་རྨིག་
པས་སྐྲན་ནད་སེལ། །རྟ་བོན་པ་ཡིས་ཉ་ལོག་འཇོམས། །རྨ་བྱའི་མདོངས་དུག་གློ་རྣག་སེལ། །
སོ་བྱའི་སྒྲོ་ཡིས་ཆུ་འགགས་འབིགས། །འུག་པའི་སྒྲོ་ཡིས་དམུ་ཆུ་སེལ། །བྱ་མ་བྱིའི་སྒྲོས་
25-1-73


མངལ་ནད་འབྱིན། །གནའ་བའི་སྤུ་ཡིས་དུག་ནད་སེལ། །ར་ཐུག་རྨོངས་སྤུས་ལྷོག་པ་
འཇོམས། །མི་ཆུས་གཉན་དང་སྲིན་སེལ་རིམས་ནད་བསྲུང་། །བ་ཆུས་ཆུ་སེར་ཚད་རྙིང་སྦྱོང་། །
རྒོད༌བྲུན་དྲོད་སྐྱེད་སྐྲན་བཤིག་སྐྲངས་པ་འགུགས། །ཕག༌བྲུན་མ་ཞུ་གཉན་རིམས་མཁྲིས་
སྐྲན་སེལ། །མི༌བྲུན་མཁྲིས་སྐྲན་དུག་སེལ་སྐྲངས་པ་འཇོམས། །རྟ་སྦངས་སྲིན་སེལ་མཁྲིས་
རླུང་སྐྱུག་པ་གཅོད། །རི་བོང༌བྲུན་གྱིས་དམུ་ཆུ་སྦྱོང་བར་བྱེད། །ཁྱི་སྤྱང་གོང་མོའི༌བྲུན་གྱིས་
སྐྲངས་པ་འཇོམས། །བྱ༌བྲུན་བྱི༌བྲུན་གཉིས་ཀྱིས་རྣག་སྣ་འདྲེན། །ཕུག་རོན༌བྲུན་གྱིས་སྐྲངས་
པ་རྣག་ཏུ་འགུགས། །བྱང་པས་རྩ་ཡི་ནད་རྣམས་སྦྱོང་བར་བྱེད། །སྡིག་སྲིན་ཆུ་སྦུར་གཉིས་
ཀྱིས་ཆུ་འགགས་སེལ། །བསེ་སྦུར་བྱིང་བྱིང་ཐུ་ལུས་གླང་ཐབས་འཇོམས། །སྤྲུ་མའི་འབུ་ཡིས་
རྩ་ཁྲག་ཤོར་བ་སྡོམ། །ན་བུན་བུ་མོས་གླད་པ་འཛག་པ་གཅོད། །ཆུ་བྱི་རྦ་བྱིའི་ཤ་ཡིས་ཤ་
དུག་སེལ། །རྨིགས་པས་སྲིན་ནད་དུག་ནད་སེལ་བར་བྱེད། །སྨན་རྟ་བུ་རམ་གྲང་རླུང་སེལ་
བའི་རྟ། །ཀ་ར་ཁྲག་མཁྲིས་ཚ་བ་སེལ་བའི་རྟ། །སྦྲང་རྩི་ཆུ་སེར་བད་ཀན་སེལ་བའི་རྟ། །དེ་
དག་སོ་སོའི་སྨན་གྱི་ནུས་པ་སྟེ། །དྲང་སྲོང་རྣམས་ཀྱིས་འདི་ལ་གཅེས་པར་ཟུངས། །ཞེས་
གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྨན་གྱི་
ནུས་པ་བསྟན་པའི་ལེའུ་སྟེ་ཉི་ཤུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སྦྱར་ཐབས་སྡེ་ཚན་རོ་སྦྱོར་ནུས་པར་སྦྱར། །ནད་གང་སེལ་བ་སྨན་གྱི་སྡེ་
བསྟན་པ། །ག་བུར་ཙན་དན་དཀར་པོ་གི་ཝཾ་དང༌། །ཅུ་གང་གུར་གུམ་ཨུཏྤལ་སྔོན་པོ་རྣམས། །
ཚ་བ་ཐུན་མོང་སྤྱིར་འཇོམས་སྨན་སྡེ་ཡིན། །ཏིག་ཏ་གསེར་གྱི་མེ་ཏོག་དུག་མོ་ཉུང༌། །བོང་
ང་དཀར་པོ་རྩ་མཁྲིས་གཡའ་ཀྱི་མོ། །ཀྱི་ལྕེ་སྐྱེར་པ་མཁྲིས་པ་སེལ་བའི་སྡེ། །ཙན་དན་དམར་
པོ་མཛོ་མོ་སེང་ལྡེང་དང༌། །ཧོང་ལེན་བ་ཤ་ཀ་དང་སྐྱུ་རུ་ར། །རེ་སྐོན་སྤང་རྩི་དོ་བོ་བཙོད་དང་
25-1-74


ཚོས། །ཁྲག་ནད་སེལ་བར་བྱེད་པའི་སྨན་སྡེ་ཡིན། །གི་ཝཾ་གསེར་གྱི་མེ་ཏོག་བོང་ང་དཀར། །
ག་དུར་བྱི་ཚེར་དེ་བ་པར་པ་ཏ། །ཁྲག་རྐང་རིམས་ནད་སེལ་བའི་སྨན་སྡེ་ཡིན། །གླ་རྩི་བོང་
ང་དཀར་སེར་དམར་པོ་གསུམ། །ཁྱུང་སྡེར་དཀར་སྨུག་དཔའ་བོ་དཀར་སེར་རྩད། །རྣམ་པར་
རྒུ་ཐུབ་སྟག་ཤ་ཧ་བོ་དང༌། །ཡུང་བ་གང་ག་ཆུང་དང་རེ་རལ་དང༌། །འོམ་བུ་སྤང་རྒྱན་སྤང་རྩི་
དོ་བོ་དང༌། །སེ་རྒོད་སྐྱེར་པའི་བར་ཤུན་དུག་སྨན་སྡེ། །ཅུ་གང་ཤིང་མངར་རྒུན་འབྲུམ་སྟར་
བུ་དང༌། །རུ་རྟ་ག་དུར་ཨ་ཀྲོང་སྲོ་ལོ་དཀར། །སུག་འདྲ་ལ་སོགས་གློ་སྨན་སྡེ་ཚན་ཡིན། །སླེ་
ཏྲེས་ཀཎྜ་ཀ་རི་ཨ་ག་རུ། །གོ་སྙོད་རུ་རྟ་གུ་གུལ་སྒོག་སྐྱ་རྣམས། །རླུང་དང་ཚད་པར་ལྡན་པའི་
སྨན་སྡེ་ཡིན། །བསེ་ཡབ་མ་ནུ་འུ་སུ་སྟར་བུ་དང༌། །ཨུཏྤལ་སེ་འབྲུ་སྒ་སྐྱ་སྐྱུ་རུ་ར། །བད་ཀན་
ཚ་བ་སེལ་བའི་སྨན་སྡེ་ཡིན། །སྨན་སྒ་སྒ་སྐྱ་ཤིང་ཀུན་ཁ་རུ་ཚྭ། །བཙོང་སྒོག་བད་རླུང་སེལ་
བའི་སྨན་སྡེ་ཡིན། །སེ་འབྲུ་ཕོ་བ་རིས་དང་པི་པི་ལིང༌། །སྨན་སྒ་ཙི་ཏྲ་ཀ་དང་ཀ་ཀོ་ལ། །སུག་
སྨེལ་ཤིང་ཚ་འཇམ་འབྲས་བྱི་ཏང་ག །ད་ལིས་ཟི་ར་ནག་པོ་ལ་ལ་ཕུད། །དབྱི་མོང་སྲུབ་ཀ་ལྕེ་
ཚ་ཙབས་རུ་ཚྭ། །རྒྱ་ཚྭ་རྒྱམ་ཚྭ་རྭ་ཚྭ་ཐལ་ཚྭ་རྣམས། །བད་ཀན་གྲང་བ་སེལ་བའི་སྨན་སྡེ་ཡིན། །
ཛཱ་ཏི་བུ་རམ་རུས་སྣ་རླུང་སྨན་ཡིན། །སྤོས་དཀར་ཐལ་ཀ་རྡོ་རྗེ་སོ་མ་ར། །སེང་ལྡེང་སྐྱེར་པ་
ཆུ་སེར་སྨན་གྱི་སྡེ། །གླ་རྩི་ཤིང་ཀུན་སྒོག་སྐྱ་མ་རུ་ཙེ། །ཐང་ཕྲོམ་ལང་ཏང་ཙེ་དང་བྱི་ཏང་ག །
དྲེས་འབྲུ་འབུ་སྐྱོགས་ཕུར་ཐལ་སྲིན་ཤིང་འབྲུ། །དྭ་བ་གཡེར་མ་སྤྲུ་མ་སྲིན་སྨན་སྡེ། །ཀ་པེད་
བིལ་བ་ད་ཏྲིག་མོན་ཆ་ར། །སྨག་དང་ཐ་རམས་ན་རམས་རྒྱ་སྐྱེགས་ཤིང༌། །བཙོད་དང་བྱ་རྐང་
འཁྲུ་གཅོད་སྨན་སྡེ་ཡིན། །རྒྱ་ཚྭ་རྒྱམ་ཚྭ་གསེར་གྱི་བྱེ་མ་དང༌། །སྡིག་སྲིན་སུག་སྨེལ་ཉི་དགའ་
ཆུ་སྨན་སྡེ། །སོན་ཆ་རི་ཤོ་སྤྱང་ཚེར་ཤུ་དག་དང༌། །གསེར་ཕུད་འབྲི་ཏ་ས་འཛིན་སྐྱི་འབྲུམ་
དང༌། །གཡའ་ཀྱི་ཡུངས་ཀར་ལ་སོགས་སྐྱུགས་སྨན་སྡེ། །ཨ་རུ་དནྡ་དོང་ག་ཤྲཱི་ཁཎ། །དུར་
བྱིད་ཐར་ནུ་ལྕུམ་རྩ་སྔོན་བུ་དང༌། །ཁྲོན་བུ་ཙི་སྟག་རེ་ཅག་ཆུ་རྩ་རྣམས། །འཁྲུ་བར་བྱེད་པའི་
25-1-75


སྨན་གྱི་སྡེ་ཚན་ཡིན། །སྦྱར་ཐབས་རོ་སྦྱོར་ནུས་པར་སྦྱོར་བ་གཉིས། །རོ་བསྡེབས་སྦྱོར་བ་ལྔ་
བཅུ་རྩ་བདུན་ཏེ། །གཉིས་པར་སྦྱར་ལ་མངར་ལྔ་སྐྱུར་བ་བཞི། །ལན་ཚྭ་གསུམ་ལ་ཁ་གཉིས་
ཚ་བ་གཅིག །གསུམ་དུ་སྦྱར་ལ་མངར་བཅུ་སྐྱུར་བ་དྲུག །ལན་ཚྭ་གསུམ་ལ་ཁ་བ་གཅིག་པུ་
ཉིད། །བཞི་སྦྱར་མངར་བཅུ་སྐྱུར་བཞི་ལན་ཚྭ་གཅིག །ལྔ་སྦྱོར་མངར་བ་ལྔ་ལ་སྐྱུར་བ་གཅིག །
བཞི་པ་གཉིས་པ་བཅོ་ལྔ་ལྔ་པ་དྲུག །གསུམ་པ་ཉི་ཤུ་དྲུག་ཏུ་སྦྱར་བ་གཅིག །རྐྱང་པ་དྲུག་སྟེ་
དྲུག་ཅུ་རྩ་གསུམ་མོ། །འཕེལ་ཟད་བདུན་ཅུ་རྩ་བཞིའི་གཉེན་པོར་སྦྱོར། །ནུས་པར་སྦྱར་ལ་
ཞི་དང་སྦྱང་བ་གཉིས། །ཞི་བྱེད་སྨན་སྦྱོར་སྡེ་ཚན་ལྔ་འམ་བདུན། །ཐང་ཕྱེ་རིལ་བུ་ལྡེ་གུ་སྨན་
མར་ལྔ། །སྨན་ཆང་འབྲི་ཏ་གཉིས་ཏེ་བདུན་དུ་བཤད། །སྦྱོང་བྱེད་འཇམ་རྩི་བཤལ་སྐྱུགས་ནི་
རུ་ཧ། །སྣ་སྦྱོངས་ཉེས་གསུམ་འདུས་པ་མགོ་ནད་འབྱིན། །བཞི་བརྒྱ་རྩ་བཞི་ནད་ཀྱི་གཉེན་
པོར་སྦྱོར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་སྡེ་ཚན་དང་སྦྱར་ཐབས་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། །ཆ་བྱད་དཔྱད་ཀྱི་གནས་ལ་ཇི་ལྟར་བསླབ་པར་བགྱི། །འཚོ་
མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་
དྲང་སྲོང་ཆེན་པོ་ཉོན་ཅིག །ནད་ལས་གསོ་བར་བྱེད་པའི་གཉེན་པོ་ཡི། །ཆ་བྱད་དཔྱད་ཀྱི་
གནས་ལ་བསླབ་པ་ནི། །དཔྱད་དང་དཔྱད་ཀྱི་ཆ་བྱད་རྣམ་པ་གཉིས། །ལུས་ཀྱི་ཕྱི་ནས་ནད་
རྣམས་འབྱིན་པ་དང༌། །ཞི་བར་བྱེད་པ་གང་ཡིན་དཔྱད་ཡིན་ཏེ། །དེ་ཡང་འཇམ་དང་རྩུབ་
དང་དྲག་པོ་གསུམ། །འཇམ་པོའི་དཔྱད་ལ་དུགས་ལུམས་བྱུག་པ་གསུམ། །རྩུབ་པའི་དཔྱད་
ལ་གཏར་བསྲེག་དབུག་པ་གསུམ། །དྲག་པོ་འདྲལ་གཅོད་འདྲུད་དང་འབྱིན་པ་བཞི། །དེ་ཡི་
ཆ་བྱད་ཟུག་རྔུ་བརྟག་པའི་དཔྱད། །སྐམ་པ་བཙགས་བུ་ཐུར་མ་ཕྲན་བུའོ། །དེ་ལ་དང་པོ་ཟུག་
25-1-76


རྔུ་བརྟག་པའི་དཔྱད། །རྩེ་ཞབས་མེད་པའི་ཟླུམ་པོ་སྲིད་སོར་དྲུག །ཁབ་མགོ་ཞེས་བྱ་མགོ་
བོའི་རུས་ཆག་བརྟག །མགོ་ཟླུམ་བྲ་བོ་རྩེ་ཀྱོག་རྩེ་གུག་པ། །སྦྲུལ་མིག་ཟངས་དུང་ཁ་འདྲ་
སོར་བཅུ་གཉིས། །ཕྲ་ལ་འཇམ་པས་ཡན་ལག་ཟུག་རྔུ་བརྟག །སོར་བརྒྱད་དབལ་ལྡན་རྩེ་
མོ་སྐར་ཁུང་ཅན། །སྐྲངས་པ་རྣག་ཏུ་སྨིན་ནམ་མ་སྨིན་བརྟག །སྦུབས་ཅན་བ་ནུ་འདྲ་བ་སོར་
གསུམ་པ། །སྦོམ་སོར་ཕོ་ལ་ལྔ་སྟེ་མོ་ལ་དྲུག །ནད་བལྟ་བ་ལ་བུ་ག་གཉིས་པར་བྱ། །ལས་
ལ་བུ་ག་གཅིག་པ་གློ་དཀར་ཅན། །དེ་འདྲ་གཞང་འབྲུམ་བལྟ་དང་བཅད་ལ་སྦྱར། །ཟུག་རྔུ་
འབྱིན་པ་སྐམ་པའི་སྡེ་ཚན་ནི། །སེང་གེ་ཁ་དང་ཀང་ཀ་བྱ་རོག་མཆུ། །སྲིད་སོར་བཅོ་བརྒྱད་
འབྲེལ་མཚམས་གཟེར་བཏབ་པ། །རྩ་བ་ལྕགས་ཀྱུའི་དབྱིབས་ལྡན་ཨ་ལོང་བཏགས། །རུས་
ལ་ཟུག་པའི་ཟུག་རྔུ་འབྱིན་ལ་སྦྱར། །དེ་འདྲ་སོར་བརྒྱད་མཐིང་རིལ་མཆུ་འདྲ་བ། །ཤིན་ཏུ་ཕྲ་
བས་ཤ་རྒྱུས་ཟུག་རྔུ་དབྱུང༌། སྦུབས་ལྡན་སྲིད་སོར་བཅུ་གཉིས་གསང་ལ་མཁྲང༌། །ནང་ནས་
སྡོམ་པ་འདམ་བུའི་མཆུ་ཞེས་བྱ། །རྨ་གཏིང་ལུས་པའི་ཟུག་རྔུ་དབྱུང་ལ་སྦྱར། །སོ་ཕྲ་རྩ་བ་
གདུ་བུས་བསྡམས་པ་ནི། །ཙུ་མོ་ཏི་སྟེ་རྩ་རོ་རྒྱུས་པ་དབྱུང༌། །ཤ་འདྲལ་ཁྲག་དབྱུང་བཙགས་
བུའི་སྡེ་བསྟན་པ། །བྱེའུ་སྦུ་གུའི་སྒྲོ་འདྲ་སོར་དྲུག་པ། །ཤ་གསེབ་ཁྲག་རྩ་རྐྱང་པ་འདེབས་
ལ་སྦྱར། །ལྟག་ཉལ་རྩེ་རྣོ་སྣོད་ཀ་རྩེ་ཆུང་གཏར། །སྟ་རེ་ཁ་འདྲ་རུས་སྟེང་རྩ་ལ་གཏར། །ཆུ་
གྲི་འདྲ་བས་སྐྲངས་ལ་ཞལ་ཞལ་བྱ། །སོར་བརྒྱད་ཟོར་བའི་དབྱིབས་ཀྱིས་ལྕེ་སྐྲངས་གཤག །
བཙགས་འདྲ་བྲང་བ་ཅན་གྱིས་མགོ་རྨ་འདྲ། །དབུག་པའི་ཐུར་དཔྱད་སྲིད་སོར་དྲུག་པ་ལ། །
མགོ་འོག་ལུས་ཤོང་ཐུར་ཞབས་ལྡིག་པར་བྱ། །སྦུབས་ཐུར་སྦལ་མགོ་གློ་དཀར་ཡོད་པ་
ཡིས། །རླངས་འཁྱིམས་གསེང་དང་སྙིང་ཆུ་མཆིན་ཆུ་བཙག །སྦུབས་ཐུར་སྨྱུ་གུ་ཁ་ཡིས་དམུ་
ཆུ་བཙག །བྱིད་པོའི་མཆུ་འདྲས་བྱང་ཁོག་རྣག་གསང་དབྱེ། །ནས་འདྲའི་ཐུར་མ་སྒལ་ཚིགས་
སྐྲན་ལ་སྦྱར། །གློ་སྙིང་རྒྱུ་ལོང་མཁལ་མར་སྦལ་མགོ་བསྔགས། །ཟངས་ཐུར་བྲ་བོ་འདྲ་བས་
25-1-77


མིག་སྤྲིན་དབུག །མཐོ་གང་འབྲི་ལྕེ་ཁ་ཡིས་ཅུར་ཕྱིན་བྱ། །མདུང་རྩེའི་སོ་ཡིས་ཡན་ལག་རྣག་
ཆུ་དབུག །གཞན་ཡང་ཆ་བྱད་ཕྲན་བུའི་སྡེ་བསྟན་པ། །སྟེ་ཁ་སོ་གཉིས་པ་དང་བེ་ལེ་ཁ། །རྐོ་
མའི་མཆུ་འདྲ་སོར་དྲུག་ཡུ་བ་ཅན། །ལྕགས་བཟང་ངར་ལྡན་མགོ་ཡི་རུས་པ་འབྲུད། །སོག་
ལེ་ཞེང་དུ་སོར་གཉིས་སོ་ཞིབ་པ། །སྲིད་སོར་བཅུ་པས་རུས་པ་ལྷག་པ་བྲེག །ཆན་པ་རྣོ་བས་
རྨ་ཡི་རྩ་རྒྱུས་བཅད། །སྦུབས་ཅན་སོར་ལྔ་སོག་ལེའི་ཁ་འདྲ་བ། །འཁོར་ལོ་ལྡན་པ་རུས་པ་
འབུགས་པའི་གསོར། །སོར་བཅུ་བེ་ལེ་ཁ་འདྲ་རྩེ་གུག་པ། །རྣ་བ་སྣ་དང་གྲེ་བའི་འབྲུམ་པ་
བཅད། །མངལ་ཐུར་མཐོ་གང་རྩེ་གུག་བུ་ཤི་དབྱུང༌། །ཆ་བྱད་སྦྲུལ་མགོས་རྡེའུ་དབྱུང་བར་
བྱ། །གྲོ་སོག་འབྲིང་ཚད་མཁྲང་གསང་འཇམ་པ་ལ། །སོར་བཅུ་གཉིས་པའི་འཕྲུལ་ཐུར་ཆུ་
འགགས་བཙག །རྩེ་ཀྱོག་སྲིད་སོར་བཅུ་པས་སོ་སྲིན་བསྲེག །སོར་བཅུ་རྩ་བའི་བུ་ག་སོར་
མོ་ལྔ། །རྩེ་མོ་ཁ་དབྲག་ཁ་སྣར་དུ་བ་རྔུབ། །སྦུབས་ཅན་སོར་བཅུ་ཐེམ་བུ་ལྟ་བུའི་ཁ། །གྲེ་
བར་སྨན་གདབ་ལྕེ་ཆུང་བསྲེག་ལ་སྦྱར། །རྩ་བའི་སྦུབས་ལ་མཐེ་བོང་ཤོང་བ་ལ། །རྩེ་བུག་
སྲན་མ་ཤོང་ཙམ་སོར་བརྒྱད་པ། །རྐེད་པ་རྩ་བར་འཁོར་ལོ་དཀྲིས་པ་ཡི། །གཅེ་འུ་ཞེས་བྱས་
འཇམ་རྩི་ནི་རུ་བཏང༌། །དེ་འདྲ་ཕྲ་མོ་རྨ་བཀྲུ་བ་ལ་སྦྱར། །རྔབས་རྭ་དཔངས་སུ་སོར་ལྔ་ཁ་
སོར་གསུམ། །རྩེ་བུག་ཡུངས་ཀར་ཤོང་བས་ཆུ་སེར་དྲང༌། །བུམ་པ་འཁྱུད་འཁོར་སོར་ནི་བཅོ་
བརྒྱད་ལ། །སྲིད་སོར་བཅུ་གཉིས་ཁ་ཟླུམ་སོར་བཞི་པ། །ཕྱི་སྐྲན་འཇུ་ཞིང་འདྲེན་ལ་སྦྱར་བར་
བྱ། །མེ་ལོང་སྤུ་གྲི་ཟླ་ཚེས་ལྟ་བུ་ཡིས། མགོ་བོའི་སྐྲ་བཞར་ཡོག་ཐོད་མགོ་ལྟ་བུ། །སྲིད་སོར་
བཅུ་པ་ཏེལ་པ་ཞེས་བྱ་སྟེ། །འབྲས་དང་ལྷོག་པ་སྐྲངས་པ་བསྲེག་པར་བྱ། །དབལ་ལྡན་ཕྲ་
འཇམ་གུག་པོ་ཤ་ཡི་ཁབ། །ཤ་དང་པགས་པ་རལ་བ་བཙེམ་ལ་སྦྱར། །དེ་ལྟར་ཆ་བྱད་ནད་
དང་གང་མཁོ་སྤྱད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་གཉེན་པོ་ཆ་བྱད་བསྟན་པའི་ལེའུ་སྟེ་ཉི་ཤུ་རྩ་གཉིས་པའོ།། །། 
25-1-78


དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །ནད་མེད་ཐ་མལ་གནས་ལ་ཇི་ལྟར་བསླབ་པར་བགྱི། འཚོ་མཛད་
སྨན་པའི་རྒྱལ་པོས་བཤད་དུ་གསོལ། ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་
ཆེན་པོ་ཉོན་ཅིག །རྣམ་པར་མ་གྱུར་ཐ་མལ་ལུས་པོ་ལ། །མི་ན་གནས་དང་རིང་དུ་འཚོ་བར་
བྱ། །དང་པོར་མི་ན་གནས་པར་བྱ་བ་ནི། །ནད་ཀུན་རྒྱུ་ལས་རྐྱེན་གྱིས་བསླང་ལས་འབྱུང༌། །
རྐྱེན་མེད་རྒྱུ་ལས་འབྲས་བུ་འབྱུང་མི་སྲིད། །དེ་ཕྱིར་ནད་རྣམས་ཀུན་གྱི་རྐྱེན་སྤང་བྱ། །དུས་
དང་དབང་པོ་སྤྱོད་ལམ་རོ་ནུས་རྣམས། །དམན་དང་ལོག་པ་ལྷག་པས་ནད་སྐྱེད་ལ། །ཡང་
དག་སྦྱོར་བ་ནད་མེད་གནས་པའི་རྒྱུ། །དེ་ཕྱིར་སྤྱོད་ལམ་ཟས་སྨན་རྣམ་གསུམ་པོ། །ཡང་དག་
བསྟེན་པས་ནད་མེད་བདེར་གནས་འགྱུར། །ལོ་ཟླ་འདས་ཏེ་ལུས་ཟུངས་སྟོབས་འགྲིབ་པ། །
ཚེ་ཟད་རྒས་པའི་ནད་ལས་བསྲིང་བ་ནི། །བཅུད་ལེན་ཕན་ཡོན་གནས་རྟེན་བྱ་ཐབས་བཞི། །
ཕན་ཡོན་ཚེ་རིང་ན་ཚོད་དར་ལ་འཇོག །ལུས་མདངས་སྟོབས་སྐྱེད་དབང་པོ་གསལ་བར་
བྱེད། །གནས་གཙང་དབེན་དགའ་བར་ཆད་མེད་པ་དེར། །རྟེན་ནི་ཧ་ཅང་རྒས་པ་མ་ཡིན་
པས། །ཆགས་སྤང་བརྩོན་པས་གཟའ་སྐར་བཟང་དུས་འཇུག །བྱ་ཐབས་གཙོར་བླང་ཞར་
སྤྱད་རྣམ་པ་གཉིས། གཙོ་བོར་སྤྱད་པ་སྔོན་འགྲོ་དངོས་གཞི་གཉིས། །སྔོན་འགྲོ་སྣུམ་འཆོས་
རྗེས་ལ་ཁྲུས་བྱས་ལ། འབྲས་བུ་གསུམ་དང་རྒྱམ་ཚྭ་པི་པི་ལིང༌། །བཅའ་སྒ་ཤུ་དག་ཡུང་བ་བྱི་
ཏང་ག །བུ་རམ་བ་ཆུ་སྦྱར་བས་ཁོང་པ་སྦྱང༌། །མ་སྦྱངས་དྲི་བཅས་ཚོས་ལྟར་དོན་མེད་འགྱུར། །
དངོས་གཞི་སྒོག་སྐྱ་ཞུན་མར་སྦྱར་བྱས་ལ། །ནས་སྣོད་བདུན་གསུམ་བཞག་ལ་ཞག་གྲངས་
བསྟེན། །རླུང་གི་ནད་སེལ་ཚེ་འཕེལ་བྱེད་པ་ཡིན། །བྲག་ཞུན་ལེགས་བཏུལ་གསེར་དངུལ་
ཟངས་ལྕགས་དང་། །ལྕགས་སྣོད་འཕྲོད་སྨན་སྦྱར་བ་རིམ་བསྐྱེད་བཟའ། །ནད་འཇོམས་ཚེ་
འཕེལ་མོན་སྣེ་རྒྱ་སྲན་སྤང༌། །ཙི་ཏྲ་ཀ་དང་མར་སྦྲང་སྦྱར་བ་བསྟེན། །ཚེ་རིང་ལུས་རྒྱས་མེ་
25-1-79


དྲོད་འབར་བར་བྱེད། །བ་གཅིན་སྦྱར་བསྟེན་ཤ་བཀྲ་མཛེ་ནད་སེལ། །ཨ་རུ་བར་སྐྱུར་འབྲས་
བུའི་སྨན་མར་གྱིས། །དབང་པོ་གསལ་ཞིང་སྟོབས་སྐྱེད་རྒས་ཀ་སྲ། །ཀུན་ལ་ནད་དང་གང་
འཕྲོད་ཟས་སྤྱོད་བསྟེན། །རུལ་སྐྱུར་སྔོ་ངད་མི་འཕྲོད་སྤང་བར་བྱ། །ཟླ་བ་གསུམ་དྲུག་ལོ་
གཅིག་འབྲས་བུ་འགྲུབ། །དེ་མ་ལྕོགས་ན་ཞར་ལ་སྤྱད་བྱས་པས། །གནས་སྐབས་འབྲས་བུ་
འབྱུང་བར་ནུས་པ་ཡིན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་
མན་ངག་གི་རྒྱུད་ལས་མི་ན་བ་གནས་པར་བྱ་བའི་ལེའུ་སྟེ་ཉི་ཤུ་རྩ་གསུམ་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། ངོས་བཟུང་རྟགས་ཀྱི་གནས་ལ་ཇི་ལྟར་བསླབ་པར་བགྱི། འཚོ་
མཛད་སྨན་པའི་རྒྱལ་པོས་བཤད་དུ་གསོལ། ཞེས་ཞུས་པ་ལས། སྟོན་པས་གསུངས་པ། ཀྱེ་
དྲང་སྲོང་ཆེན་པོ་ཉོན་ཅིག །ངོས་བཟུང་རྟགས་ཀྱི་གནས་ལ་བསླབ་པ་ནི། །མེ་དང་དུ་བ་ཇི་
བཞིན་དུ། །ནད་ཀྱི་ངོས་ནི་རྟགས་ལ་བཟུང༌། །བརྟག་ཐབས་མེད་པའི་སྨན་པ་ཡིས། །རྟགས་
ཉིད་རྟགས་སུ་མི་ཤེས་ཏེ། །དུ་བ་རླངས་པར་འཁྲུལ་དང་འདྲ། །སྤྲིན་འདུས་ཙམ་ལས་ཆར་
འབྱུང་ཟེར་བ་ལྟར། །མ་ངེས་པ་ལ་རྟགས་སུ་བྱེད་པ་ཡོད། །དེ་ཕྱིར་ངོས་འཛིན་བརྟག་ཐབས་
མན་ངག་གཅེས། །ཁ་དམར་བཅོས་ལ་དགོས་པའི་ཕྱིར། །ཉེས་པ་དངོས་སྟོན་བརྟག་པ་དང༌། །
སྐྱེ་བོ་མཁས་ཟེར་མགུ་བྱའི་ཕྱིར། །ངན་གཡོ་སྐྱོན་གྱིས་བརྟག་པ་དང༌། །གསོ་ཚེ་བླང་དོར་བྱ་
བའི་ཕྱིར། །སྤང་བླང་མུ་བཞིར་བརྟག་པའོ། །ཉེས་པ་དངོས་སུ་སྟོན་པའི་བརྟག་པ་ལ། །སློང་
བ་རྒྱུ་ཡི་སྒོ་ནས་བརྟག་པ་དང༌། །མཚན་ཉིད་རྟགས་ཀྱི་སྒོ་ནས་བརྟག་པ་དང༌། །ཕན་གནོད་
བསྟེན་པའི་སྒོ་ནས་བརྟག་པའོ། །སློང་བ་རྒྱུ་རྐྱེན་ཟས་དང་སྤྱོད་ལམ་རྣམས། །གང་ཟོས་གང་
བྱས་ནད་ཀུན་རྟོགས་པར་ནུས། །ཁྱད་པར་སློང་བའི་རྐྱེན་གྱིས་ཤེས་པར་བྱ། །ཅི་ཕྱིར་རྒྱུ་
ལས་འབྲས་བུ་འགལ་མི་སྲིད། །མཚན་ཉིད་རྟགས་ལ་བརྟག་གཞི་བརྟག་ཡུལ་དང༌། །བརྟག་
25-1-80


སྒོ་བརྟག་པའི་ཚུལ་དང་རྣམ་པ་བཞི། །གཞི་ནི་རླུང་དང་མཁྲིས་པ་བད་ཀན་གསུམ། །མཚན་
ཉིད་འཕེལ་ཟད་གསོག་ལྡང་འཁྲུགས་པའི་རྟགས། །ཚ་གྲང་གཉིས་སུ་དྲིལ་ལ་བརྟག་པར་
བྱ། །བརྟག་ཡུལ་དབང་པོ་ཡུལ་ལྔ་དྲི་མ་ལྔ། །དབང་པོ་མིག་དང་རྣ་བ་སྣ་ལྕེ་ལུས། །ཡུལ་ནི་
གཟུགས་སྒྲ་དྲི་རོ་རེག་བྱ་ལྔ། །དྲི་མ་ལུད་པ་འཁྲུ་སྐྱུགས་ཆུ་ཁྲག་བརྟག །བརྟག་སྒོ་ཡུལ་དུས་
རང་བཞིན་ན་ཚོད་དང༌། །ཉིན་ཞག་ཟས་ཟོས་གནས་ལམ་མ་འཁྲུལ་རྟོགས། །བརྟག་ཚུལ་
བལྟ་དང་རེག་པ་དྲི་བས་བརྟག །བལྟ་བ་མིག་ཡུལ་བོངས་དབྱིབས་ཁ་དོག་བརྟག །ཁྱད་པར་
ལྕེ་དང་ཆུ་ལ་བརྟག་པར་བྱ། །འདི་ནི་མཐོང་བ་ཡུལ་རིག་བརྟག་པ་ཡིན། །རེག་པ་ལུས་ཡུལ་
ཚ་གྲང་འབུར་འཇམ་བརྟག །ཁྱད་པར་བརྡ་སྦྱོར་འཕྲིན་པ་རྩ་ལ་བརྟག །འདི་ནི་དཔྱོད་པ་
དོན་རིག་བརྟག་པ་ཡིན། །དྲི་བས་བརྟག་པ་རྣ་བའི་ཡུལ་ཀུན་ཏེ། །གང་གིས་གང་ལྟར་གང་ན་
གང་དུ་གང༌། །ཁྱད་པར་རྒྱུ་གནས་མཚན་ཉིད་དྲིས་ལ་བརྟག །རྒྱུ་ལ་ཉེས་པ་གནས་ལ་འཇུག་
པའི་སྒོ། །མཚན་ཉིད་ནད་རིགས་བྱེ་བྲག་ཕྱེད་པར་འགྱུར། །དེ་ཕྱིར་བརྟག་པ་ཀུན་ལ་དྲི་བ་
གཅེས། །འདི་ནི་ཐོས་པ་སྒྲ་རིག་ཅེས་སུ་བཤད། །ཕན་གནོད་བསྟེན་པ་ཟས་སྤྱོད་སྨན་དཔྱད་
བཞི། །རྒྱུ་དང་ནད་ཀྱི་ངོ་བོ་མཐུན་མི་མཐུན། །འཕྲོད་མི་འཕྲོད་ལས་ནད་ཀུན་ཤེས་པར་
འགྱུར། །ལྟར་སྣང་མ་ཡིན་བསྲིངས་པས་རྟོགས་འགྱུར་ཏེ། །སྨན་པས་ཉམས་རྙེད་ནད་པའི་
གསོ་དོན་ཤེས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་
གི་རྒྱུད་ལས་ཉེས་པ་དངོས་སུ་སྟོན་པ་བརྟག་པའི་ལེའུ་སྟེ་ཉི་ཤུ་རྩ་བཞི་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ངན་གཡོ་སྐྱོན་གྱི་སྒོ་ནས་བརྟག་པ་ནི། །མཚན་ཉིད་ཤེས་བྱ་མཚང་འབྲུ་
དེ་དུས་བསྲིང༌། །སྔར་རྗེས་བཅད་དང་བཅུད་ལ་བོར་བ་དང༌། །ཁ་བཅིང་སྤོ་ལ་གདོན་དང་
ཐབས་འོག་གཞུག །དང་པོ་མཚན་ཉིད་ཤེས་པར་བྱ་བ་ནི། །ནད་ཀུན་སྤྱི་དང་ཁྱད་པར་རྟགས་
25-1-81


ཤེས་པས། །འདི་ན་ཙམ་ལས་འདི་འོང་རྟོགས་པར་འགྱུར། །དེ་ཕྱིར་དེ་ལ་གོམས་ཤིང་འདྲིས་
པ་གཅེས། །རིན་ཆེན་ལ་སོགས་བཟང་ངན་ཤེས་པ་ཡང༌། །བསྟན་བཅོས་མ་ཡིན་དེ་མེད་པར་
ཡང་མིན། །མཚང་འབྲུ་ཕོ་ཉ་འབྲེལ་བ་ཐབས་ཀྱི་ཕྱིར། །ཅི་ན་ཇི་ལྟར་གང་བཏང་སུ་ཡིན་དང༌། །
ཞག་གྲངས་དཔྱད་པས་མི་སྨྲ་མངོན་པར་ཤེས། །དུས་བསྲིང་རིངས་སྟབས་མ་ཡིན་ཐངས་
ཅིག་གནས། །དེ་བར་ལུས་ངག་ཡེངས་མ་གཏམ་ལ་དཔྱད། །རྗེས་བཅད་གཏར་བསྲེག་སྨན་
སྦྱོར་ཅི་བྱས་བཙལ། །བརྙེད་པ་ཙམ་གྱིས་ཚ་གྲང་ཕྱོགས་མཐུན་རྟོགས། །བཅུད་ལ་བོར་བ་མི་
སྨྲ་མ་རྟོགས་ན། །སྒྲོག་ཕྱིར་ངན་པ་མི་བྱ་གདོན་བཅོས་དགོས། །སྨན་ཅིག་སྦྱར་ན་ཕན་ཞེས་
བྱིང་པོར་སྨྲ། །ངང་གིས་མི་ཐུབ་འདི་ན་ཅི་བྱ་འབྱིན། །ཁ་བཅིང་ཞེས་པ་ཁ་ཅིག་ཕྲད་པ་དང་། །
སྨྲ་བར་བྱེད་པ་སྨོས་པས་ཚུད་བྱས་ཏེ། །ཅི་ན་སྨན་པས་ཤེས་ཀྱི་བཤད་མི་དགོས། །གསལ་
བར་བརྗོད་པས་སྐྱེ་བོ་ངོ་མཚར་ཟེར། །སྤོ་ལ་གདོན་པ་ཐབས་ཀྱིས་རྟོགས་གྱུར་ན། །གཞན་
དག་རྩ་ཆུ་ན་ལུགས་མང་བརྟག་དགོས། །ང་ལ་མ་ཡིན་གཅིག་ལ་ཁ་དམར་གདགས། །མིག་
བལྟས་ཙམ་གྱིས་ཆོག་ཅེས་གྲགས་པ་འབྱུང༌། །ཡང་ན་ཞིབ་ཏུ་དཔྱད་པས་བརྟག་མཁས་ཟེར། །
ཐབས་འོག་གཞུག་པ་ཀུན་གྱིས་སྐད་མི་སྟེར། །རྣམ་པའི་ཁ་དམར་བཏགས་ལ་རྫོང་ལ་བྲོས། །
དང་པོ་ཟས་སྤྱོད་མི་འཕྲོད་གདོན་གྱིས་རྐྱེན། །རུལ་སྐྱུར་དྲག་ཤུལ་རྗེན་ཟས་གནོད་ཅེས་བྱ། །
གཉེན་པོ་ཕན་གནོད་མེད་པའི་སྙོམས་པ་དབོག །རྫོང་ལ་འབྲོས་པ་ནད་དང་སྨན་གྱི་མིང༌། །
སྔ་ན་མ་གྲགས་མི་ཤེས་ངོ་མཚར་བརྗོད། །དེ་ཡིས་མ་རྟོགས་གྱུར་ཀྱང་མཁས་ཁྱད་འབྱིན། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་
ངན་གཡོ་སྐྱོན་གྱི་སྒོ་ནས་བརྟག་པའི་ལེའུ་སྟེ་ཉི་ཤུ་རྩ་ལྔ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སྤང་བླང་མུ་བཞིའི་སྒོ་ནས་བརྟག་པ་ནི། །གསོ་བླ་གསོ་དཀའ་གསོ་ཙམ་
25-1-82


སྤང་བ་བཞི། །གསོ་བླ་བ་ནི་ཡན་ལག་ལྡན་པ་དང༌། །གང་ཟག་ནད་ཀྱི་སྒོ་ནས་གསོ་བླ་བ། །
ཡན་ལག་སྒོ་ནས་གསོ་བར་བླ་བ་ནི། །སྨན་པ་སྨན་དང་ནད་གཡོག་རྣམ་པ་གསུམ། །སྨན་
པ་མཁས་པའི་བཏེགས་ལ་འཛེགས་པ་དང༌། །གཞུང་གི་དོན་ཤེས་ལས་རྣམས་མཐོང་ཞིང་
གཙང༌། །སྨན་ནི་ཆོ་ག་ཡོན་ཏན་མང་དུ་ལྡན། །ཕུན་སུམ་ཚོགས་ཤིང་འཕྲོད་པར་སྦྱར་བའོ། །
ནད་གཡོག་སྒྲིམ་བརྩེ་གཙང་སྦྲ་བློ་དང་ལྡན། །ཡན་ལག་བཅུ་གཉིས་ལྡན་ན་གསོ་བ་བླ། །
གང་ཟག་ནད་པ་སྐྱེས་བུ་གཞོན་ཞིང་དུལ། །སྙིང་སྟོབས་ལྡན་ཞིང་སྨན་ཀུན་བཟོད་པའི་
ལུས། །རྫས་ཕྱུག་བསྒོ་བ་ཉན་ལ་ཤེས་པར་ནུས། །དྲིས་པའི་ནད་རྟགས་ཟློས་མཁས་གསོ་
བླའི་ཡུལ། །ནད་ཀྱི་སྒོ་ནས་གསོ་བར་བླ་བ་ནི། །རྒྱུ་དང་སྔར་ཚུལ་མཚན་ཉིད་ཆུང་བ་དང༌། །
གནོད་བྱ་ཡུལ་དུས་རང་བཞིན་མི་མཚུངས་དང༌། །གནོད་མེད་ལམ་གཅིག་རྐྱང་པ་གསར་
གསོ་བླ། །འོན་ཀྱང་རིམས་ལ་ཡུལ་དུས་མཚུངས་པ་དང༌། །ཆུ་འགགས་ནད་ལ་གནོད་བྱ་
མཉམ་པ་དང༌། །ཁྲག་སྐྲན་རྙིང་པ་གསོ་བ་བླ་ཞེས་བྱ། །གསོ་དཀའ་བ་ནི་བླ་བ་དེ་དག་འདྲེས། །
ཐབས་མང་ཡུན་རིང་གསོ་བ་དགོས་པའོ། །དེ་ལས་གོ་ཟློག་གྱུར་ལ་གོམས་ཕན་ཉིད། །ཚེ་
ཡི་ལྷག་མ་ལུས་སྲིད་གསོ་བ་ཙམ། །སྤང་བར་བྱ་ལ་གསོ་ཐབས་ཡོད་མེད་གཉིས། །རྒྱལ་པོ་
དགེ་བའི་བཤེས་དང་འགྲོ་ལ་སྡང༌། །སྨན་པས་བྱས་པ་མི་གཟོ་བརྙས་པ་བྱེད། །བྲེལ་དང་
འབྱོར་པ་མི་ལྡན་ཉན་མི་བཏུབ། །ཚེ་ཟད་མྱ་ངན་ལ་གནན་བསྟན་པ་བཤིག །སྐྱེ་བོའི་ཡ་ག་
ངན་པ་འབྱུང་བའི་ཕྱིར། །གསོ་ཐབས་ཡོད་ཀྱང་སྤང་བར་བཤད་པ་ཡིན། །གསོ་ཐབས་མེད་
པས་སྤང་བར་བྱ་བ་ནི། །ཤིན་ཏུ་ཕྱིན་ཅི་ལོག་དང་འཆི་ལྟས་སྣང༌། །སྲོག་གཅོད་ནད་དགུས་
དེ་ལུས་བཟུང་བ་སྤང༌། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་
མན་ངག་གི་རྒྱུད་ལས་སྤང་བླང་མུ་བཞིར་བརྟག་པའི་ལེའུ་སྟེ་ཉི་ཤུ་རྩ་དྲུག་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
25-1-83


རིག་པའི་ཡེ་ཤེས་ལགས། གསོ་བྱེད་ཐབས་ཀྱི་གནས་ལ་ཇི་ལྟར་བསླབ་པར་བགྱི། འཚོ་
མཛད་སྨན་པའི་རྒྱལ་པོས་བཤད་དུ་གསོལ། ཞེས་ཞུས་པ་ལས། སྟོན་པས་གསུངས་པ། ཀྱེ་
དྲང་སྲོང་ཆེན་པོ་ཉོན་ཅིག །ནད་དེ་རྟོགས་ནས་ཇི་ལྟར་གསོ་བའི་ཕྱིར། །གསོ་བར་བྱེད་པའི་
ཐབས་ཀྱི་གནས་བསྟན་པ། །དེ་ལ་གསོ་བའི་ཚུལ་དང་གསོ་ཐབས་གཉིས། །དང་པོ་ནད་ཀྱི་
གསོ་ཚུལ་བསྟན་པ་ནི། །ནད་ལ་གསོ་ཐབས་དཔག་ཏུ་མེད་མོད་ཀྱང༌། །གསོ་ཚུལ་མེད་ན་
མུན་པར་མདའ་འཕེན་འདྲ། །དེ་ལ་གསུམ་སྟེ་སྤྱི་ཡི་གསོ་ཚུལ་དང༌། །བྱེ་བྲག་པ་དང་ཁྱད་པར་
གསོ་ཚུལ་ལོ། །དང་པོ་ཇི་ལྟར་གསོ་དང་གང་གིས་གསོ། །སོས་པའི་ཚད་དང་རྣམ་པ་གསུམ་
གྱིས་བསྟན། །དང་པོ་རླུང་ལ་སོགས་པ་ཇི་སྙེད་ནད། །རང་གནས་གསོག་པའི་དུས་སུ་བསལ་
བར་བྱ། །ལངས་ཤིང་རྒྱས་ནས་ནད་གཞན་འཁྲུག་བྱེད་ཕྱིར། །གཞན་ལ་གནོད་པ་མེད་པའི་
སྦྱོར་བས་གསོ། །ནད་གཞན་སྐྱེས་ན་ནད་སྟོབས་གང་ཆེ་བཅོས། །གསོ་བའི་གཉེན་པོ་ཞི་དང་
སྦྱང་བ་གཉིས། །གསོག་དུས་ཞི་ལ་ལངས་ནས་སྦྱང་བས་བཅོས། །ཞི་དུས་ཟས་སྤྱོད་གཟབ་
ཅིང་མི་འཁྲུགས་བྱ། །འོན་ཀྱང་འཕྲལ་རྐྱེན་དུས་མིན་གསོག་ལྡང་ནད། །དུས་འདས་གསོ་
དཀའ་འགྱུར་ཕྱིར་འཕྲལ་དུ་བསལ། །སྨན་ཡང་ཉིན་ཞག་ཟས་དུས་རིགས་པ་ཡིས། །ནད་
དང་སྦྱར་ཏེ་བཏང་ཚུལ་བཅུ་རུ་བཤད། །ཟས་མ་ཟོས་དང་ཟས་སྔོན་དབུས་དང་མཐའ། །ཟས་
ཁམ་ཟས་མཚམས་དུས་མེད་ཙེ་གུ་དང༌། །ཟས་བཅས་ཟས་མནན་མཚན་མོ་བཏང་བའོ། །
ནད་དང་མི་སྦྱོར་ཀུན་ལ་ཞུ་དུས་གཏོང༌། །རྨོངས་པའི་ལུགས་ཏེ་ནད་ཐོག་འབབ་པ་དཀའ། །
དུས་ལས་མ་འདས་རྡེའུ་ངོས་འཛིན་འདྲ། །ནད་གང་གསོ་དཔྱད་སྦྱར་ཡང་མཆིལ་སྣབས་
མང༌། །ལུས་ལྕི་དང་ག་མི་བདེ་ཟས་མི་འཇུ། །རྒྱུན་སྐམ་ཁོང་འདྲུལ་བཤང་གཅི་དུས་མིན་
འབྱུང༌། །ཤེད་ཆུང་སྐད་དམའ་ནད་རྩེ་མ་བཞིལ་རྟགས། །ནད་གང་ཞི་དུས་གོང་ལས་ལྡོག་
རྟགས་འབྱུང༌། །མ་ཞི་བཅོས་ཤིང་ཞི་ནས་ལྷག་མི་སྦྱར། །བྱེ་བྲག་གསོ་བའི་ཚུལ་ལ་རྣམ་པ་
25-1-84


གསུམ། །མ་ཞུར་བཅས་དང་རང་རྒྱུད་གཞན་དབང་ངོ༌། །དང་པོ་དྲོད་ཆུང་ཟས་སྐོམ་མ་ཞུ་བ། །
དེ་ཉིད་རླུང་སོགས་གནོད་བྱར་འདྲེས་པ་རྣམས། །སྨིན་དང་དྲོད་སྐྱེད་སྨན་གྱིས་རྩེ་བཅིལ་
ལ། །རྟགས་ཐོབ་གང་དང་ཉེ་བའི་གནས་ནས་སྦྱང༌། །སྟེང་འོག་རང་བྱུང་སྨན་གྱིས་དགག་མི་
བྱ། །མ་སྨིན་མི་སྦྱང་ཞེན་ཕྱིར་ལུས་ཟུངས་འཇོམས། །དཔེར་ན་མ་ལངས་ཆང་ལ་ཆུ་བསིངས་
བཞིན། །མ་ཞུ་མེད་པའི་རང་རྒྱུད་ནད་རྐྱང་དེ། །ནད་ཀུན་སྐྱེད་པར་བྱེད་པའི་རྒྱུ་བསྟེན་པས། །
ཐོག་མར་རླུང་འཇུག་དེ་ནས་གཞན་འཇུག་སྟེ། །དེ་དག་ཟས་སྤྱོད་སློང་བའི་དུས་མ་འཛོམས། །
རང་གནས་གསོག་ཅིང་རིང་སྡོད་ཤུགས་མི་ཕྱིན། །དཔེར་ན་འཁྲུག་པ་བྱེད་པའི་ཤི་བོ་བཞིན། །
བཙིར་ཡང་མི་ཟློག་བར་དུ་མི་ལྡང་ཞིང༌། །རྐྱེན་ཕྲད་ནུས་པ་རྙེད་དེ་གནས་ལས་ལྡང༌། །དེ་
དག་ཐོག་མར་རླུང་ཞུགས་ནད་འཁྲུགས་ཕྱིར། །འཇིག་ཅིང་འཇུ་བྱེད་ཟས་ཀྱིས་སྨིན་བྱས་
པས། །ནད་འཐོར་རླུང་དེ་ཚར་གཅོད་ཁོང་པར་བསྡུ། །དཔེར་ན་ཆར་པ་འབེབས་པའི་རླུང་
གནོན་འདྲ། །དེ་ནས་གང་དང་ཉེ་བའི་ལམ་ནས་སྦྱང༌། །ཡན་ལག་ཕྱིར་གནས་ཁོང་དུ་མ་
འདུས་ན། །རྩ་སྒོ་ཕྱི་དང་ནང་ནས་སྦྱངས་ལ་དབྱུང༌། །གཞན་དབང་བླ་གཉན་བཅས་པའི་ནད་
ཡིན་ཏེ། །རང་གི་གནས་ནས་ལངས་ནས་གནས་གཞན་ཕྱིན། །ཕྱིན་ནས་རང་གནས་སྔ་མ་ལ་
གནོད་འཁྲུག །དེ་སྟོབས་ཆུང་ན་རང་གནས་སྔ་མ་གསོ། །ཕྱི་མ་སྟོབས་ཆེ་བླ་གཉན་དེ་བཅོས་
པས། །རང་གནས་གནས་པ་བཅོས་མི་དགོས་པར་འཚོ། །དཔེར་ན་རྐུན་མོ་བསྟེན་པའི་རྗེ་བོ་
བཞིན། །ཁྱད་པར་གསོ་བའི་ཚུལ་ལ་རྣམ་པ་དགུ། །མ་རྟོགས་དོགས་བཅས་གདེངས་མ་ཐོབ་
བའི་ནད། །བྱི་ལ་འཇབ་པ་ལྟ་བུའི་སད་མདས་བཅོས། །ངོས་ཟིན་ངེས་པ་རྙེད་ཅིང་གདེངས་
ཐོབ་ན། །སྤོ་ལ་དར་འཕྱར་ལྟ་བུར་དངོས་སུ་བཅོས། །གཉེན་པོ་ཐོག་ཏུ་མི་འབབ་ནད་ལམ་
གཟུང༌། །རྟ་རྒོད་དཀྱུས་སུ་འཛུད་པ་ལྟ་བུར་བཅོས། །སྔར་བཅོས་ནད་ལ་དམན་ལྷག་ལོག་པ་
གསུམ། །བརྟགས་ལ་སྐྱར་མོ་ཉ་ལེན་བཞིན་དུ་བཅོས། །སྟོབས་ཆེན་ནད་ལ་སྨན་དཔྱད་ཟས་
25-1-85


སྤྱོད་བཞི། །ལག་གཏོད་མི་ཤ་འཕྲང་ཕྲད་ལྟ་བུར་བཅོས། །སྟོབས་ཆུང་ནད་ལ་སྤྱོད་ལམ་ཟས་
སྨན་དཔྱད། །སྐས་གདང་ལྟ་བུར་མས་འཛེག་རིམ་པས་བཅོས། །རྐྱང་པའི་ནད་ལ་དཔའ་
བོས་དགྲ་འདུལ་བཞིན། །དེ་གཞིལ་གཞན་ལ་གནོད་མེད་སྦྱོར་བས་བཅོས། །ལྡན་འདུས་
ནད་ལ་འདུ་བ་ཆ་སྙོམས་གཅེས། །གཙོ་བོས་དམེ་ཤོར་འཁྲུགས་ཟླུམས་ལྟ་བུར་བཅོས། །ཀུན་
ལ་གནོད་བྱ་ལ་སོགས་ཆོས་བཅུར་སྦྱར། །མཛོ་ཁལ་ལུག་ཁལ་ལྟ་བུར་འཚམ་པས་བཅོས། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་
གསོ་ཚུལ་སྤྱིར་བསྟན་པའི་ལེའུ་སྟེ་ཉི་ཤུ་རྩ་བདུན་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། །ཁྱད་པར་གསོ་ཚུལ་མདོར་བསྟན་རྣམ་དགུ་པོ། །དེ་དག་རྒྱས་པར་
བཀྲོལ་ན་ཇི་ལྟར་ལགས། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་
ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །ཁྱད་པར་གསོ་ཚུལ་རྒྱས་པར་
བཤད་པ་ནི། །དང་པོར་ནད་རྟགས་དཔྱད་ལ་ཐེ་ཚོམ་ན། །རླུང་གི་ནད་ལ་སད་མདའ་སྲེ་ལོང་
ཐང༌། །མཁྲིས་པའི་ནད་ལ་སད་མདའ་ཏིག་ཏའི་ཐང༌། །བད་ཀན་ནད་ལ་སད་མདའ་རྒྱམ་
ཚྭ་གསུམ། །ཕོ་ལོང་གཉན་སྲིན་སད་མདའ་བྱ་ཁྱུང་ལྔ། །ཁྲག་འཁྲུག་རླུང་གཟེར་སད་མདའ་
མ་ནུ་བཞི། །སྦྱར་བའི་དུག་ལ་སད་མདའ་སྡུད་སྨན་བཏང༌། །ཚ་གྲང་འདྲེས་པའི་སད་མདའ་
གོམས་པ་བསྟེན། །བཤལ་གྱི་སད་མདའ་སྣ་སེལ་འཁྲོག་ཐང་བཏང༌། །མེ་བཙའི་སད་མདའ་
སྣུམ་ལྡན་དྲོད་དུགས་དང༌། །གཏར་གའི་སད་མདའ་རྡོ་གྲང་ཆུ་ལྕག་བྱ། །རྣག་གི་སད་མདའ་
མེ་ཐུར་མིག་ཅན་བརྡེག །གཞན་ཡང་ནད་དེ་འདི་ཡིན་སྙམ་པ་ཡི། །གཉེན་པོའི་སྦྱོར་བ་ཆུང་
ངུའི་སད་མདའ་བསྟེན། །འཁྲིག་དང་ལྡན་པའི་འདྲར་སྣང་ཀུན་བསྡུར་ལ། །གཉེན་པོ་གང་
ལེན་དེ་ཉིད་བཅོས་པ་གཅེས། །ཁ་དམར་མི་སྨྲ་ཁ་ཅོལ་ཆུང་བར་འགྱུར། །འདི་དུས་གསལ་
25-1-86


བར་མི་སྒྲག་བྱིངས་པོར་སྨྲ། །ནད་ལ་ངེས་པ་བརྙེད་ཅིང་གདེངས་ཐོབ་ན། །ནད་དེ་འདི་ཡིན་
རྒྱུ་རྐྱེན་འདི་ཡིས་སྐྱེད། །ད་ལྟ་འདི་ན་མཐའ་གཞུག་འདི་རུ་འགྱུར། །བཅོས་ཀ་འདི་བྱེད་དུས་
ཚོད་འདི་ནས་སོས། །ཡང་ན་མི་ཐུབ་འཆི་བའི་དུས་ཚིགས་བོར། །སྤོ་དར་འཕྱར་བཞིན་ཀུན་
གྱིས་གོ་བར་སྨྲ། །གཉེན་པོ་ཐོག་ཏུ་མི་འབབ་ལམ་གཞུག་དཀའ། །མ་སྨིན་ཚ་བའི་གཉེན་པོ་
གྲོགས་ཐོག་འབབ། །གྲོགས་འཕེལ་བས་ནི་ཚ་བ་ཉིད་འཕེལ་བྱེད། །དེ་ཕྱིར་བད་རླུང་གྲོགས་
དེ་ཐང་གིས་དབྱེ། །ནད་ཁྲག་ཟུངས་ཁྲག་འོ་མ་ཆུ་འདྲེས་འདྲ། །འབྲས་བུ་གསུམ་གྱིས་ཁྲག་
ངན་ཕྱེ་ལ་གཏར། །དེ་ལྟར་མ་ཕྱེད་ནད་ལུས་ཟུངས་ལ་གནོད། །བད་ཀན་དུག་ཚད་བྱེར་བ་
བསྡུས་ལ་བསད། །མ་འདུས་གཉེན་པོས་མི་གསོད་སླར་འགྲམས་འགྱུར། །གབ་ཚད་གྲང་
བའི་མགོ་ཕུར་དྲོད་ཀྱིས་བཤུ། །ཅི་ཕྱིར་གྲང་བས་གཉེན་པོ་ལེན་མི་འགྱུར། །མ་ཞུའི་ནད་
ཀུན་སྨིན་དང་དྲོད་སྐྱེད་སྨན། །རྩེ་བཅིལ་རྟགས་ཐོབ་གང་ཉེའི་ལམ་ནས་སྦྱང༌། །བཤལ་གྱི་
སྔོན་འགྲོ་སྨན་གྱིས་ནད་ཀུན་སློང༌། །ནད་མ་ལྷོངས་ན་འཁྱག་ཐོག་ཆུ་འབེབས་འདྲ། །སྨན་
པ་གཞན་གྱིས་སྔར་བཅོས་ནད་དེ་ལ། །དམན་ནམ་ལོག་གམ་ལྷག་གམ་ལེགས་བརྟགས་ལ། །
དམན་པས་ནད་མ་ཞི་ན་གཉེན་པོ་བསྐྱེད། །ལོག་ནས་ནད་སྟོབས་སྐྱེས་ན་སྦྱོར་བ་བསྒྱུར། །
ལྷག་ནས་ནད་གཞན་ལངས་ན་གང་ལངས་མནན། །ཚ་བ་སྟོབས་ཅན་ནད་ལ་ཆུ་བཞི་ཕོབ། །
ག་བུར་རྩེ་ཆུང་སྨན་དང་དཔྱད་ཀྱི་ཆུ། །ཁ་ཟས་ཡེན་ལ་གཏད་པ་ཟས་ཀྱི་ཆུ། །བསིལ་སར་
སྡོད་པ་སྤྱོད་ལམ་ཆུ་ཡིས་བཅོས། །གྲང་བ་སྟོབས་ཅན་ནད་ལ་མེ་བཞི་སྤོར། །དྲོད་དགུ་སྦྱར་
བ་སྨན་གྱི་མེ་ཡིན་ཏེ། །མེ་བཙའ་དཔྱད་མེ་དྲོད་བཅུད་ཟས་ཀྱི་མེ། །གནས་གོས་དྲོ་བ་སྤྱོད་
ལམ་མེ་ཡིས་བཅོས། །དེ་ལྟར་མ་བཅོས་ནད་རྒྱས་སྲོག་ལ་གཏོད། །སྟོབས་ཆུང་ནད་ལ་དང་
པོ་སྤྱོད་ལམ་གཟབ། །དེས་མ་ཞི་ན་ཕན་གནོད་ཟས་ཀྱིས་བཅོས། །དེས་མ་ཞི་ན་བསིལ་དྲོད་
སྨན་གྱིས་བཅོས། །གསུམ་གས་མ་ནོན་དཔྱད་ཀྱིས་ནད་ཡུལ་དབྱུང༌། །རླུང་དང་མཁྲིས་པ་
25-1-87


བད་ཀན་ནད་རྐྱང་ལ། །དེ་ཉིད་ཞི་བྱ་གཞན་མ་ལངས་པར་བཅོས། །དེ་མ་ཤེས་ན་ལྡོག་རྒྱུ་
བཅུ་གཉིས་འགྱུར། །ལོག་པས་རང་མ་ཞི་བར་གཞན་སྐྱེད་དེ། །རླུང་གི་ནད་ལ་ཁ་ཚའི་རོ་
བསྟེན་ན། །རླུང་མ་ཞི་བར་བད་ཀན་མཁྲིས་པར་ལྡོག །མཁྲིས་པའི་ནད་ལ་ལན་ཚྭ་ཚ་བ་
བསྟེན། །མཁྲིས་པ་མ་ཞི་བད་རླུང་གཉིས་སུ་ལྡོག །བད་ཀན་ནད་ལ་ཁ་དང་ལན་ཚྭ་བསྟེན། །
བད་ཀན་མ་ཞི་རླུང་མཁྲིས་གཉིས་སུ་ལྡོག །མི་འཕྲོད་རྐྱེན་གྱིས་འདུས་པར་ལྡོག་པ་ཡོད། །
ལྷག་པས་ནད་དེ་ཞི་ནས་གཞན་སློང་སྟེ། །མངར་དང་ལན་ཚྭས་རླུང་ཞི་བད་མཁྲིས་སྐྱེད། །ཚ་
སྐྱུར་བད་ཀན་ཞི་ནས་རླུང་མཁྲིས་སྐྱེད། །མངར་ཁས་མཁྲིས་པ་ཞི་ནས་བད་རླུང་སྐྱེད། །ལྡན་
འདུས་ནད་ལ་འདུ་བ་ཆ་མཉམ་པ། །ཨ་རུ་བྲག་ཞུན་འདུ་བ་སྤྱི་རུ་སྙོམས། །གནས་དང་ནད་
གཞི་སོ་སོའི་ཁ་འཛིན་ནི། །སྙིང་ལ་ཛཱ་ཏི་གློ་ལ་ཅུ་གང་སྟེ། །མཆིན་པར་གུར་གུམ་སྲོག་རྩར་
ལི་ཤི་བཏང༌། །མཁལ་མར་སུག་སྨེལ་མཆེར་པར་ཀ་ཀོ་ལ། །ཕོ་བའི་ཁ་འཛིན་སེ་འབྲུ་པི་པི་
ལིང༌། །མཁྲིས་པའི་ཁ་འཛིན་ཏིག་ཏ་གསེར་མེ་ཏོག །རླུང་ལ་ཛཱ་ཏི་སླེ་ཏྲེས་རུས་བཅུད་གསུམ། །
བད་ཀན་མ་ནུ་འུ་སུ་བསེ་ཡབ་བཏང༌། །ཁྲག་ལ་བ་ཤ་ཀ་དང་ཧོང་ལེན་ཏེ། །ཆུ་སེར་སྤོས་
དཀར་ཐལ་རྡོར་སོ་མ་ར། །གཉན་དང་གདོན་ལ་གླ་རྩི་གུ་གུལ་ནག །དེ་དག་གང་དང་གང་
དགོས་རྟགས་དང་སྦྱར། །ཐམས་ཅད་འདུས་ན་ཀུན་ལ་ཁ་གནོན་བཏང༌། །ལྡན་འདུས་ཆ་
མཉམ་གང་ཤས་ཆེ་བ་ལ། །གཉེན་པོའང་དེ་དང་བསྟུན་ལ་གང་མཐོ་མནན། །ཡང་ན་སྔ་ཕྱི་
རེ་མོས་བཅོས་པའམ། །ཡང་ན་ལྟག་པ་སྤྲད་ལ་དུས་གཅིག་གཞོམ། །ཉིན་གུང་མཚན་གུང་
མཁྲིས་པའི་ཚ་བ་བསད། །བསིལ་སྨན་བསིལ་ཟས་ཚ་བའི་དུས་དེར་བསྟེན། །སྲོད་དང་སྔ་དྲོ་
ཕོ་བའི་མེ་དྲོད་གསོ། །དྲོད་སྨན་དྲོད་ཟས་བད་ཀན་གྲང་བ་གཞིལ། །དགོང་དང་ཐོ་རངས་རླུང་
ལ་བརྔན་པ་སྦྱིན། །དྲོད་བཅུད་ཟས་སྨན་ཐོར་བུའི་རླུང་སྣ་བསླན། །ལྷག་ན་གང་ལྷག་དགྲར་
ལྡང་ཕ་སྤུན་འདྲ། །ཆད་ན་གང་ཆད་སྐྱོང་དགོས་མོ་ངན་འདྲ། །དེས་ན་འདུ་བ་ལྷག་ཆད་མེད་
25-1-88


པར་མཉམ། །ལུས་ཟུངས་བཟོ་རྒྱུ་འདྲ་བས་ཆུད་མི་གསན། །ཕོ་བ་ཞིང་ས་འདྲ་བས་མེ་དྲོད་
གསོ། །དེ་ལྟར་ཤེས་ན་འཚོ་བྱེད་སྨན་པར་འགྱུར། །གནོད་བྱ་ཡུལ་དུས་རང་བཞིན་ན་ཚོད་
དང༌། །ནད་ཁམས་གནས་དང་མེ་དྲོད་ཉམས་སྟོབས་དང༌། །གོམས་པ་འདི་བཅུས་ཕྲ་མོ་ཡན་
ཆད་བརྟག །ཐམས་ཅད་མཚུངས་ན་གཉེན་པོས་ནོན་པར་བཏང༌། །དེ་མ་ཡིན་ན་འཚམ་ཚད་
བསྟེན་པར་བྱ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་
གི་རྒྱུད་ལས་ཁྱད་པར་གྱི་བཅོས་ཚུལ་རྒྱས་པར་བཤད་པའི་ལེའུ་སྟེ་ཉི་ཤུ་རྩ་བརྒྱད་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །གང་གིས་གསོ་བའི་གསོ་ཐབས་མང་ཡོད་ཀྱང༌། །ཐུན་མོང་བ་དང་ཁྱད་
པར་གཉིས་ཀྱིས་གསོ། །ཐུན་མོང་གསོ་ཡུལ་གཉིས་ཕྱིར་གསོ་ཐབས་གཉིས། །སྟོབས་སྐྱེད་
བརྟ་བྱ་ཉམས་དམད་སྨྱུང་བའོ། །བརྟ་བར་བྱ་བ་ཡུལ་དང་གང་གིས་བརྟ། །ཕན་ཡོན་དྲགས་
སྐྱོན་དེ་ཡི་བཅོས་ཐབས་ལྔ། །དེ་ཡུལ་རླུང་ཆེ་ཟུངས་ཟད་ཁྱིམ་གསར་དུབ། །སྦྲུམ་མ་བཙས་
རྗེས་ཁྲག་ཟགས་གློ་རྡོལ་རྒས། །གཉིད་མེད་མྱ་ངན་དཀའ་ཐུབ་རྩོལ་བས་དུབ། །སོ་གའི་
དུས་རྣམས་ཕལ་ཆེར་བརྟ་བས་གསོ། །དེ་ཟས་ལུག་ཤ་བུ་རམ་ཀ་ར་མར། །འོ་མ་ཞོ་ཆང་ལ་
སོགས་བཅུད་ཀྱིས་བརྟ། །སྨན་སྦྱོར་ནད་དང་གང་འཕྲོད་སྨན་མར་བསྟེན། །དཔྱད་དུ་འཇམ་
རྩི་ཁྲུས་དང་བསྐུ་མཉེ་བྱ། །སྤྱོད་ལམ་གཉིད་ལོག་དལ་དང་སེམས་དགའ་བརྟ། །དེ་ཡིས་
སྟོབས་འཕེལ་ནད་ཀུན་ཟིལ་གནོན་ནུས། །དཔེར་ན་ཁ་ཉེན་པོ་ཡིས་ནུས་རྙེད་བཞིན། །ཐལ་
དྲགས་འཚོ་ཆེས་འབྲས་དང་རྨེན་བུ་དང༌། །རྨོངས་བག་གཅིན་སྙི་ལུད་པ་བད་ཀན་འཕེལ། །
དེ་ལ་བད་ཚིལ་ཟད་བྱེད་ཟས་སྨན་ཕན། །གུ་གུལ་བྲག་ཞུན་སྐྱེར་པའི་ཁཎྜ་དང༌། །སྦྲང་སྦྱར་
འཚོ་ཆེས་ནད་ཀུན་སེལ་བར་བྱེད། །འབྲས་བུ་གསུམ་དང་སྦྲང་རྩི་སྦྱར་བའམ། །བཅའ་སྒ་
ཡ་བཀྵ་ར་བྱི་ཏང་ག །སྐྱུ་རུ་ནས་ཕྱེ་སྦྲང་སྦྱར་འཚོ་ནད་སེལ། །འཚོ་བས་སྐེམ་བཟང་བརྟ་བ་
25-1-89


ཚོད་ཟིན་བྱ། །སྨྱུང་བར་བྱ་ལ་ཡུལ་དང་གང་གིས་དམད། །ཕན་ཡོན་དྲགས་སྐྱོན་དེ་ཡི་བཅོས་
ཐབས་ལྔ། །དེ་ཡུལ་མ་ཞུ་སྣུམ་ཟོས་བརླ་རེངས་ནད། །རིམས་དང་གཅིན་སྙི་ཁོང་འབྲས་དྲེག་
གྲུམ་མཚེར། །ལྐོག་གླད་སྙིང་ནད་ཚད་འཁྲུ་སྐྱུག་པ་དང༌། །ལུས་ལྕི་དང་ག་མི་བདེ་བཤང་གཅི་
འགགས། །འཚོ་ཆེས་ཆུ་སེར་བད་མཁྲིས་རྒྱས་པའི་ནད། །སྟོབས་ལྡན་དར་བབ་དགུན་དུས་
སྨྱུང་བས་བཅོས། །དེ་ཡི་སྨན་དུ་ཞི་དང་སྦྱང་བ་གཉིས། །མ་སྙོམས་སྙོམས་པར་བྱེད་པ་ཞི་བ་
སྟེ། །སྦྱོར་བ་ཟས་སྨན་སྤྱོད་ལམ་དཔྱད་ཀྱིས་བཅོས། །ཉམ་སྟོབས་ཆུང་ལ་ཟས་ཀྱི་བཀྲེས་
སྐོམ་བྱ། །དེ་འོག་ཡང་ཞིང་འཇུ་བླ་ཅུང་ཟད་བསྟེན། །ཉམས་སྟོབས་འབྲིང་ལ་ཐང་དང་ཕྱེ་མ་
སོགས། །དྲོད་སྐྱེད་སྨིན་བྱེད་སྦྱོར་བ་གང་ཡིན་བསྟེན། །སྟོབས་ལྡན་ཉིན་མཚན་རྩོལ་བཅག་
རྔུལ་དབྱུང་ཞིང༌། །མེ་བཙའ་དུགས་ལུམས་གཏར་ག་དཔྱད་ཀྱིས་བཅོས། །སྦྱང་པ་ནད་བློང་
ཕྱིར་འབྱིན་བྱེད་པ་སྟེ། །སྦྱོར་བ་མ་ཞུའི་གནས་ལ་སྐྱུགས་ཀྱིས་སྦྱང༌། །ཞུ་བའི་གནས་ལ་ནི་
རུ་ཧ་ཡིས་དྲང༌། །ལུས་སྤྱིར་བཤལ་ལ་རྩ་ནད་རྩ་སྦྱོངས་བྱ། །ཞི་སྦྱང་ཉམས་དམད་ཕན་ཡོན་
དབང་པོ་གསལ། །ལུས་ཡང་ཡི་ག་བདེ་ལ་བྱ་བྱེད་བརྩོན། །བཀྲེས་སྐོམ་དུས་འབྱུང་བཤང་
རླུང་བདེ་བར་རྒྱུ། །དྲགས་ན་ཟུངས་འཛད་ཤ་སྐེམ་མགོ་བོ་འཁོར། །གཉིད་མེད་མདངས་
ཤོར་སྐད་གདངས་དབང་པོ་ཉམས། ཁ་སྐོམ་དང་ག་འགག་དང་བྱིན་པ་བརླ། །གཞུག་ཏོ་
རྩིབ་ལོགས་སྙིང་ག་གླད་པ་ན། །རིམས་འདེབས་སྐྱུག་འདོད་རླུང་ནད་སྐྱེད་པར་བྱེད། །དེ་
ལ་བརྟས་པར་བྱེད་པ་ཐམས་ཅད་ཕན། །ཁྱད་པར་ཤ་ཟའི་ཤ་དང་འཇམ་རྩི་དང༌། །ཟས་
འགྲངས་གཉིད་ལོག་ཕག་འདྲར་ལུས་རྒྱས་འགྱུར། །ལུས་རྒྱས་འཚོ་བྱེད་ཤ་འདྲ་གང་ཡང་
མེད། །མདོར་ན་བརྟ་བྱའི་ཡུལ་ལ་ཉམས་མི་དམད། །གལ་ཏེ་སྦྱང་བ་དགོས་ལ་འཇམ་པོས་
བྱ། །ཉམས་དམད་དགོས་ལ་བརྟས་པར་བྱེད་པ་སྤང༌། །རླུང་འཕེལ་ནད་གང་ཟད་པ་བརྟ་
བས་གསོ། །རླུང་ཟད་བད་མཁྲིས་འཕེལ་བ་སྨྱུང་བས་བཅོས། །རྟེན་དང་བརྟེན་པ་འཕེལ་
25-1-90


ཟད་བཅོས་ཐབས་གཅིག །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་
བ་མན་ངག་གི་རྒྱུད་ལས་གསོ་ཐབས་གཉིས་བསྟན་པའི་ལེའུ་སྟེ་ཉི་ཤུ་རྩ་དགུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ཁྱད་པར་ཉེས་གསུམ་སོ་སོར་བཅོས་པ་ནི། །ཟུང་འཇུག་རླུང་ལ་ཏིལ་མར་
མཆོག་ཡིན་ཏེ། །བུ་རམ་ཆང་དང་མར་རྙིང་ལུག་ཤ་ཡིབ། །འཕྱི་བ་རྟ་བོང་མི་ཤ་སྒོག་བཙོང་
སོགས། །ལྕི་སྣུམ་འཇམ་དྲོའི་ཟས་ཀྱིས་བཅོས་པར་བྱ། །སྤྱོད་ལམ་མུན་ཁུང་དྲོ་བའི་གནས་སུ་
བསྡད། །ཡིད་འོང་ཚིག་སྙན་གཉིད་ལོག་གོས་དྲོན་བགོ ། །སྨན་དུ་རུས་བཅུད་གསུམ་གྱི་ཁུ་བ་
དང༌། །ལུག་མགོ་རྙིང་པའི་མགོ་འཁྲོལ་སྦྱོར་བ་བྱ། །བཅུད་བཞིའི་ཐང་དང་ཤིང་ཀུན་གསུམ་
ཐང་བཏང༌། །ཕྱེ་མ་ཛཱ་ཏི་ཤིང་ཀུན་ཅུར་ནིས་བསྟེན། །དཀར་འདོན་ཤ་འདོན་སྒོག་འདོན་
སྐྱུར་འདོན་དང༌། །ཛཱ་ཏི་སྒོག་སྐྱ་བཙན་དུག་རུས་ཆེན་དང༌། །འབྲས་བུ་གསུམ་དང་རྩ་བའི་
སྨན་མར་སྦྱར། །མདོར་ན་མངར་སྐྱུར་ལན་ཚྭ་སྣུམ་དྲོས་བཅོས། །ཁྱད་པར་མར་རྙིང་དྲོད་ཀྱི་
འཇམ་རྩི་བསྔགས། །དཔྱད་དུ་ལོ་མར་རྙིང་པའི་བསྐུ་མཉེ་བྱ། །སྣུམ་ལྡན་དུགས་ཀྱིས་གཟེར་
བའི་གནས་སུ་བདུག །སྤྱི་གཙུག་ལ་སོགས་རླུང་གསང་མེ་ཡིས་མནན། །མཁྲིས་པའི་ནད་
ལ་མར་གསར་མཆོག་ཡིན་ཏེ། །བ་ལང་རི་དྭགས་ཤ་གསར་ཆུ་བསིལ་ཇ། །བ་རའི་ཞོ་དར་
སྐྱབས་དང་ཁུར་ཚོད་དང༌། །ཆག་ཚེ་ཕྱེ་ཐུག་བསིལ་བའི་ཟས་ཀྱིས་བཅོས། །སྤྱོད་ལམ་བསེར་
བུ་ཤིང་གྲིབ་ནིའུ་གསིང་བསྟེན། །ཆུ་འགྲམ་བསིལ་གནས་མ་འཁྲུགས་དལ་བར་བསྡད། །དྲི་
བཟང་བསིལ་ཞིང་ཡིད་དུ་འོང་བས་བྱུག །སྨན་དུ་སྔོ་ཐང་རྩི་སྨན་ཐུན་མོང་གསུམ། །ག་བུར་
ཙན་དན་གི་ཝཾ་ཚ་སྟོབས་སྦྱར། །མདོར་ན་མངར་ཁ་བསྐ་བསིལ་སྨན་གྱིས་བཅོས། །ཁྱད་པར་
མངར་བའི་བཤལ་གྱིས་སྦྱང་བ་བསྔགས། །དཔྱད་དུ་རྔུལ་དབྱུང་ཆུ་ཡི་འཕྲུལ་འཁོར་བསྐོར། །
གང་རྒྱས་རྩ་ལ་གཏར་ཞིང་བསིལ་གྱིས་བདུག །བད་ཀན་ནད་ལ་སྦྲང་རྩི་མཆོག་ཡིན་ཏེ།  །
25-1-91

 
ཉ་ལུག་གཡག་རྒོད་གཡི་དང་བྱ་རྒོད་ཤ །འབྲུ་རྙིང་ཟན་དྲོན་ཆང་ནར་ཕྱིན་པ་དང༌། །ཆུ་སྐོལ་
སྒ་ཆུ་ལ་སོགས་ཡང་ཞིང་རྩུབ། །དྲོ་ལ་ཆུང་བའི་ཟས་ཀྱིས་བཅོས་པར་བྱ། །སྤྱོད་ལམ་མེ་ཉིས་
སྲོ་ཞིང་གོས་དྲོར་གཡོག །སྐམ་སར་ལུས་སེམས་རྩོལ་སྤྱད་གཉིད་མི་ལོག །སྨན་དུ་ལན་ཚྭ་ཚ་
བའི་བསྡུས་ཐང་བཏང༌། །ཕྱེ་མ་སེ་འབྲུ་ད་ལིས་ཐལ་སྨན་སྦྱར། །མདོར་ན་ཚ་སྐྱུར་ཡང་རྩུབ་
རྣོ་བ་བསྟེན། །ཁྱད་པར་རྣོ་ལ་རྩུབ་པའི་སྐྱུགས་སྨན་བསྔགས། །དཔྱད་དུ་ཚྭ་དང་བོང་བ་སྤུ་
དུགས་བསྟེན། །ཤིན་ཏུ་རྒྱས་ལ་མེ་བཙའ་ཐུར་མ་བྱ། །མདོར་ན་རླུང་ནད་འཇམ་རྩི་བཅུད་
ཀྱིས་བཅོས། །མཁྲིས་པའི་ནད་ལ་བཤལ་དང་བསིལ་གྱིས་བཅོས། །བད་ཀན་ནད་ལ་སྐྱུགས་
དང་དྲོད་ཀྱིས་བཅོས། །རླུང་དང་མཁྲིས་པར་ལྡན་ལ་བསིལ་བཅུད་བསྟེན། །བད་མཁྲིས་ལྡན་
ལ་བསིལ་ལ་ཡང་བས་བཅོས། །བད་རླུང་ལྡན་ལ་དྲོ་ལ་བཅུད་པས་བཅོས། །འདུས་པའི་ནད་
ལ་བསིལ་བཅུད་ཡང་བས་བཅོས། །མདོར་བསྡུས་ཚ་བ་ཐམས་ཅད་བསིལ་གྱིས་བཅོས། །
གྲང་བའི་ནད་གཞི་ཐམས་ཅད་བད་ཀན་ལྟར། །རླུང་ནི་ཚ་གྲང་གང་འབྲེལ་སྣུམ་དྲོས་བཅོས། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་
གསོ་ཐབས་དངོས་བསྟན་པའི་ལེའུ་སྟེ་སུམ་ཅུ་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། །བྱ་བྱེད་སྨན་པའི་གནས་ལ་ཇི་ལྟར་བསླབ་པར་བགྱི། །འཚོ་
མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་
དྲང་སྲོང་ཆེན་པོ་ཡིད་ལས་སྐྱེས། །དེ་ལྟར་གསོ་བར་བྱེད་པའི་གསོ་བ་པོ། །བྱ་བ་བྱེད་པ་སྨན་
པའི་གནས་བསྟན་པ། །རྒྱུ་དང་ངོ་བོ་ངེས་ཚིག་དབྱེ་བ་དང༌། །ལས་དང་འབྲས་བུ་རྣམ་པ་དྲུག་
གིས་བསྟན། །རྒྱུ་ནི་བློ་ལྡན་བསམ་པ་དཀར་བ་དང༌། །དམ་ཚིག་ལྡན་ཞིང་རྣམ་པ་བཟོ་བ་
དང༌། །བྱ་བ་ལ་བརྩོན་མི་ཆོས་མཁས་དང་དྲུག །དེ་ལ་དང་པོ་བློ་དང་ལྡན་པ་ནི། །བློ་ཆེ་བློ་
25-1-92


བརྟན་བློ་གཟེག་གསུམ་ལྡན་པས། །གསོ་དཔྱད་མདོ་རྒྱས་མ་ལུས་ཁོང་དུ་ཆུད། །ལག་ལེན་
ཀུན་ལ་ཐོགས་བརྡུགས་ཉམས་ང་མེད། །རིག་པས་དཔྱོད་ཤེས་མངོན་ཤེས་ཕྲ་མོ་འཆར། །དེ་
ཉིད་རྒྱུ་ཡི་ནང་ནས་མཆོག་ཅེས་བྱ། །བསམ་པ་དཀར་བ་བྱང་ཆུབ་སེམས་ལྡན་པ། །སྦྱོར་བ་
དངོས་གཞི་འཇུག་ལས་དང་པོ་ནི། །སྡུག་བསྔལ་མཐོང་དང་ཕན་འདོགས་དད་པ་དང༌། །
བཟང་ངན་བྱམས་སྡང་ཞེ་ནས་སྙོམས་པ་ཡིས། །སྙིང་རྗེ་བྱམས་པ་དགའ་བ་བཏང་སྙོམས་
བཞི། །སྨོན་པ་བྱང་ཆུབ་མཆོག་ཏུ་སེམས་བསྐྱེད་དེ། །དངོས་གཞི་འཇུག་པ་ཚད་མེད་ཉམས་
སུ་བླང༌། །འཇུག་པ་བསྔགས་པར་བལྟ་ཞིང་ཁོན་འཛིན་མེད། །དེ་ལྡན་གསོ་བླ་འཚོ་མང་
གྲོགས་སུ་འགྱུར། །དམ་ཚིག་ལྡན་པ་བློ་བཞག་རྣམ་པ་དྲུག །བཟུང་བྱ་གཉིས་དང་ཤེས་བྱ་
གསུམ་དུ་བཤད། །དང་པོ་སློབ་དཔོན་གསུང་དང་གསོ་དཔྱད་དང༌། །མཆེད་དང་ནད་པ་རྣག་
ཁྲག་རྣམ་དྲུག་ལ། །སངས་རྒྱས་དྲང་སྲོང་གསུང་དང་བཀའ་རྒྱུད་དང༌། །དཔུན་གྲོགས་བུ་ཚ་
ཁྱི་ཕག་ལྟ་བུར་ནི། །བློ་བཞག་པ་ཡི་དམ་ཚིག་དྲུག་བསྲུང་བྱ། །གཉིས་པ་སྨན་གྱི་རིག་འཛིན་
ཆ་བྱད་རྣམས། །བཀའ་སྲུང་ཕྱག་ཆ་ལྟ་བུར་བཟུང་ཞིང་བསྲུང༌། །གསུམ་པ་སྨན་རྣམས་ནོར་
བུ་བདུད་རྩི་དང༌། །མཆོད་རྫས་ཤེས་པར་བྱ་བ་གསུམ་ཡིན་ཏེ། །དགོས་འདོད་འབྱུང་བའི་
ནོར་བུར་ཤེས་པར་བྱ། །ནད་རྣམས་སེལ་བའི་བདུད་རྩིར་ཤེས་པར་བྱ། །ཕུད་ཀྱིས་རིག་
འཛིན་མཆོད་པའི་རྫས་སུ་ཤེས། །དང་པོ་རིན་པོ་ཆེ་དེ་བཙལ་ལ་བཅང༌། །གཉིས་པ་ལེགས་
པར་སྦྱར་ལ་བྱིན་གྱིས་བརླབ། །རང་ཉིད་བཻཌཱུརྱ་འོད་རྒྱལ་པོ་དང༌། །སྨན་གྱི་སྣོད་ནི་བདུད་རྩི་
ལྷུང་བཟེད་བསམ། །སྨན་བླ་དྲང་སྲོང་རྣམས་ཀྱིས་ཤིས་པ་བརྗོད། །འཚོ་མཛད་སྨན་པའི་
རྒྱལ་པོ་བཅོམ་ལྡན་འདས། །དུག་གསུམ་ནད་སེལ་སངས་རྒྱས་སྨན་གྱི་བླ། །སྐུ་མདོག་མཐིང་
ག་བཻཌཱུརྱ་ཡི་འོད། །སྤྲུལ་པའི་སྐུ་ལ་མཚན་དང་དཔེ་བྱད་ལྡན། །རླུང་མཁྲིས་བད་ཀན་ནད་
ཀྱིས་གདུངས་པ་ལ། །ནད་ཀྱི་གཉེན་པོ་ཕྱག་གཡས་ཨ་རུ་ར། །ཕྱག་གཡོན་བདུད་རྩིའི་ལྷུང་
25-1-93


བཟེད་པར་པུ་བསྣམས། །བཻཌཱུརྱ་ཡི་འོད་ལ་ཕྱག་འཚལ་ལོ། །རིག་པའི་གནས་མཆོག་བཅོ་
བརྒྱད་ཐུགས་སུ་ཆུད། །ཚེ་ལ་དབང་བའི་བཅུད་ལེན་དངོས་གྲུབ་བརྙེས། །མངོན་ཤེས་སྙིང་
རྗེས་འགྲོ་མཆོག་འདུ་བ་སྙོམས། །དྲང་སྲོང་རིག་འཛིན་རྣམས་ལ་ཕྱག་འཚལ་ལོ། །ལྷ་རྣམས་
ཀྱི་ནི་བདུད་རྩི་ལྟ་བུ་དང༌། །ཀླུ་རྣམས་ཀྱི་ནི་གཙུག་ནོར་ལྟ་བུ་དང༌། །དྲང་སྲོང་རྣམས་ཀྱི་
བཅུད་ལེན་ལྟ་བུར་ནི། །ཁྱེད་ལ་སྨན་འདི་ཉེ་བར་གནས་གྱུར་ཅིག །རླུང་མཁྲིས་བད་ཀན་
བཞི་བརྒྱ་རྩ་བཞིའི་ནད། །ཚེ་ལ་བར་དུ་གཅོད་པ་ཞི་བ་དང༌། །གནོད་པའི་བགེགས་རིགས་
སྟོང་ཕྲག་བརྒྱད་ཅུ་དང༌། །ཡེ་འབྲོག་སུམ་བརྒྱ་དྲུག་ཅུ་ལ་སོགས་པ། །བསམས་པའི་བར་དུ་
གཅོད་པ་ཞི་བར་མཛོད། །ༀ་ན་མོ་བྷ་ག་ཝ་ཏེ་བྷཻ་ཥ་ཛྱེ་གུ་རུ་བཻ་ཌཱུརྱ་པྲ་བྷ་རཱ་ཛཱ་ཡ་ཏ་ཐཱ་ག་ཏཱ་
ཡ་ཨརྷ་ཏེ་སམྨྱཀྶཾབུདྡྷཱ་ཡ། ཏདྱ་ཐཱ། ༀ་བྷཻ་ཥ་ཛྱེ། བྷཻ་ཥ་ཛྱེ། མཧཱ་བྷཻ་ཥ་ཛྱེ། བྷེ་ཥ་ཛྱེ་རཱ་ཛཱ་ཡ། ས་
མུདྒ་ཏེ་སྭཱ་ཧཱ། །བདུན་བཟླས་བདུད་རྩིར་བསམས་ཏེ་རིག་འཛིན་མཆོད། །དངོས་གྲུབ་བླངས་
པས་རང་གི་ནད་གདོན་བསལ། །ནད་པས་བསྟེན་པས་འཆི་བ་སོས་པར་བསམ། །དམ་ལྡན་
བྱིན་འབེབས་བཀྲ་ཤིས་བསོད་ནམས་འབྱུང༌། །རྣམ་པ་བཟོ་བ་ལུས་ངག་ཡིད་དང་གསུམ། །
ལག་པ་བདེ་བས་སྨན་དཔྱད་བཟོ་ལ་མཁས། །ངག་ཚིག་སྙན་པས་ནད་པ་སྤྲོ་སྐྱེད་ནུས། །
རིག་པ་བཀྲ་བས་ཡིད་ལ་མ་རྨོངས་གསལ། །དེ་ཤེས་བཟོ་རྣམས་ཀུན་གྱི་དཔོན་དུ་འགྱུར། །
བྱ་བ་ལ་བརྩོན་བདག་དང་གཞན་གཉིས་ཏེ། །བདག་ཉིད་བྱ་བ་བརྩོན་པ་རྒྱུ་ལ་བསླབ། །
རྐྱེན་བསྟེན་གྲོགས་ལ་བརྩོན་བྱ་གོམས་མཐར་དབྱུང༌། །རྒྱུ་ནི་འབྲི་ཀློག་མཐའ་རུ་ཕྱིན་པར་
བསླབ། །ཆོད་དང་མི་ཆོད་དེ་ལ་བརྟེན་པར་སྣང༌། །དེ་རྐྱེན་སློབ་དཔོན་བསྟེན་ཏེ་མཚན་ཉིད་
དང༌། །བསྟེན་པའི་ཐབས་དང་བསྟེན་པའི་དགོས་པ་གསུམ། །མཚན་ཉིད་རྒྱ་ཆེ་མཁས་དང་
མན་ངག་ལྡན། །ངང་རིང་གསོག་ཆུང་བརྩེ་ལ་བཀུར་འོས་བསྟེན། །བསྟེན་ཐབས་དོགས་པ་
མེད་པར་བློ་གཏད་ལ། །ངོ་ལྐོག་མེད་པར་བྱ་བ་བསྒྲུབ་པར་བྱ། །སྤྱོད་པ་ཐམས་ཅད་དེ་ཡི་
25-1-94


ཡུལ་དང་བསྟུན། །དྲིན་དུ་ཚོར་བས་རྒྱུན་དུ་བསྲིང་བར་བྱ། །དགོས་པ་མྱུར་བར་ལོབས་དང་
མཁས་པར་འགྱུར། །གྲོགས་ལ་བརྩོན་བྱ་ཞུ་དང་དྲི་བ་དང༌། །བཟུང་དང་བསམ་པ་ལེ་ལོ་བྱ་
བ་མིན། །ཅི་ཡི་ཕྱིར་ན་དེ་ཉིད་བར་གཅོད་དགྲ། །གོམས་པ་མཐར་དབྱུང་མཐོང་ཐོས་ལག་
བླངས་ཏེ། །ཐམས་ཅད་ཞེན་འདྲིས་ཐེ་ཚོམ་སྤོང་བར་བྱེད། །གཞན་གྱི་བྱ་བ་ལ་བརྩོན་ནད་པ་
དེ། །དེ་དོན་ཕྱི་བཤོལ་བར་དུ་མ་ཆོད་པར། །གྱང་ཐོག་མར་ཕོར་བོ་ན་གསོད་བསྡིགས་བཞིན། །
སྨན་དཔྱད་དུས་ལས་མ་འགྱངས་བརྩོན་པས་སྒྲིམས། །མི་ཡི་ཆོས་ལུགས་མཁས་པར་བྱ་བ་
ནི། །མི་ཆོས་པ་དང་དམ་པ་ཐུན་མོང་གསུམ། །དང་པོ་མཁས་པར་བསླབ་ལ་གཉེན་གྱིས་
བཙའ། །གྱོང་གིས་འདུལ་གསུམ་ལྡན་ན་འདོད་པ་འགྲུབ། །དམ་པའི་ཆོས་ལུགས་སྣ་དུལ་
འགྲོགས་པ་བདེ། །ཆོག་ཤེས་གྱུར་ན་རང་གཞན་ཕན་ཐོགས་འགྱུར། །ཐུན་མོང་ཕོངས་པ་
རྣམས་ལ་སྙིང་རྗེས་བཟུང༌། །མཐོན་པོ་རྣམས་ཀྱིས་རང་གིས་མདོ་དོན་སྒྲུབ། །ཚོགས་པ་དྲུག་
ལྡན་འབྲས་བུ་ཐེ་ཚོམ་མེད། །ཉེས་པ་གནོད་བྱ་གཉེན་པོའི་མཚན་ཉིད་རྣམས། །ཅི་རིགས་
ཁོང་དུ་ཆུད་པ་ངོ་བོར་འདོད། །ངེས་ཚིག་ནད་གསོ་ལུས་ལ་ཕན་ཕྱིར་སྨན། །ནད་སྟེང་དཔྱད་
དཔའ་འགྲོ་ལ་ཕ་ལྟར་སྐྱོབ། །རྒྱལ་པོ་རྣམས་ཀྱིས་རྗེ་རུ་འཁུར་བར་བྱེད། །དབྱེ་བ་སྨན་པ་བླ་
ན་མེད་པ་དང༌། །ཁྱད་པར་ཅན་དང་ཕལ་པ་གསུམ་ཡིན་ཏེ། །དུག་གསུམ་རྒྱུ་འབྲས་ནད་སེལ་
གོང་ན་མེད། །གཞན་རིག་མངོན་ཤེས་བྱམས་ལྡན་དྲང་པོར་སྲོང༌། །གནད་རིགས་རྗེས་
སྦྱངས་ལས་གོམས་འགྲོ་བའི་གཉེན། །འདོད་པས་འཕྲལ་དུ་ཆ་བཟུང་སྲོག་གི་གཤེད། །འོན་
ཀྱང་མཆོག་དང་ཐ་མར་གྲགས་པ་སྟེ། །གདུང་བཙུན་བློ་དང་ལྡན་ཞིང་དམ་ལ་གནས། །
གཞུང་གི་དོན་མཁས་མན་ངག་གནད་དུ་རྡེག །གོམས་ཐོབ་གཙོ་བོར་ཆོས་གཉེར་འདོད་པ་
སྤངས། །དུལ་ཞིང་བཟོ་མཁས་འགྲོ་ལ་བྱམས་སེམས་ཆེ། །གཡེལ་མེད་གཞན་གྱི་དོན་ལ་
རང་དོན་སེམས། །གསོ་དཔྱད་ཀུན་ལ་རྨོངས་མེད་སྨན་པའི་མཆོག །འགྲོ་བ་ནད་པ་རྣམས་
25-1-95


ཀྱི་མགོན་གཅིག་པུ། །རིག་འཛིན་དྲང་སྲོང་རྣམས་ཀྱི་རྒྱུད་འཛིན་སྲས། །འཚོ་མཛད་སྨན་པའི་
རྒྱལ་པོའི་སྤྲུལ་པར་བཤད། །དེ་ལྟར་མི་ལྡན་ཐ་མའི་སྐྱོན། །རིགས་རྒྱུད་མེད་པའི་སྨན་པ་དེ། །
ཝ་ཡིས་རྒྱལ་ས་བཟུང་བ་ལྟར། །ཀུན་གྱིས་སྤྱི་བོར་བཀུར་མི་འགྱུར། །གཞུང་དོན་མི་ཤེས་
སྨན་པ་དེ། །དམུས་ལོང་དག་ལ་རྫས་བསྟན་བཞིན། །ནད་རིགས་བཅོས་ཐབས་ཤན་མི་ཕྱེད། །
མཐོང་གོམས་མེད་པའི་སྨན་པ་དེ། །རྒྱུས་མེད་ལམ་དུ་ཞུགས་པ་བཞིན། །ནད་རྟགས་དཔྱད་
ལ་ཐེ་ཚོམ་འགྱུར། །བརྟག་ཐབས་མི་ཤེས་སྨན་པ་དེ། །གཉེན་མེད་བྱེས་སུ་འཁྱམས་པ་འདྲ། །
ནད་ངོ་ཤེས་པ་གཅིག་མི་འབྱུང༌། །རྩ་ཆུ་མི་ཤེས་སྨན་པ་དེ། །བྱ་བས་བྱ་གཏོང་མི་ཤེས་འདྲ། །
ཚ་གྲང་ནད་ཀྱི་སྐད་མི་སྟེར། །ཁ་དམར་མི་ཤེས་སྨན་པ་དེ། །གཙོ་བོས་སྨྲ་བ་མི་ཤེས་འདྲ། །
རང་སྐྱེངས་གྲགས་པ་ངན་པ་འཕོག །བཅོས་ཚུལ་མི་ཤེས་སྨན་པ་དེ། །མུན་ཁུང་འབེམ་ལ་
བརྡེག་པ་འདྲ། །གཉེན་པོ་ནད་ཐོག་འབབ་མི་འགྱུར། །ཟས་སྤྱོད་མི་ཤེས་སྨན་པ་དེ། །རང་
སྲིད་དགྲ་ལ་ལོག་པ་འདྲ། །ནད་ཀྱི་སྟོབས་སྐྱེད་ལུས་ཟུངས་འཇོམས། །ཞི་སྦྱོར་མི་ཤེས་སྨན་
པ་དེ། །སོ་ནམ་མི་ཤེས་ཞིང་པ་འདྲ། །དམན་ལྷག་ལོག་པས་ནད་སྐྱེད་འགྱུར། །སྦྱོང་བྱེད་མི་
ཤེས་སྨན་པ་དེ། །བྱེ་མའི་རི་ལ་ཆུ་འབེབས་འདྲ། །ནད་དང་ལུས་ཟུངས་མ་རུངས་བྱེད། །ཆ་
བྱད་སྨན་མེད་སྨན་པ་དེ། །གོ་མཚོན་མེད་པའི་དཔའ་བོ་འདྲ། །ནད་ཀྱི་དགྲ་དཔུང་ཆོམས་མི་
འགྱུར། །གཏར་བསྲེག་མི་ཤེས་སྨན་པ་དེ། །ནང་ཡན་མེད་པའི་རྐུན་མོ་འདྲ། །ནད་དང་དཔྱད་
དུ་འཛོལ་བར་འགྱུར། དེ་ཕྱིར་སྨན་པ་ངན་པ་ནི། །ལྕི་ཡང་ལོག་པར་རྟོགས་པ་ཡིས། །གསོ་བ་
ལོག་པ་དག་ཏུ་འགྱུར། །བདུད་ཉིད་སྨན་པའི་ཆ་བྱད་ཅན། །གཤིན་རྗེའི་ཞགས་པ་ཐོགས་
པས་ན། །སྲོག་གི་གཟུ་བ་ཡིན་པའི་ཕྱིར། །འབྲེལ་བ་མི་བྱ་འཁོར་རྣམས་འཕུང༌། །སྨན་པའི་
ལས་ལ་ཐུན་མོང་ཁྱད་པར་གཉིས། །དང་པོ་ལུས་ངག་ཡིད་ཀྱི་བྱ་བའི་ལས། །ལུས་ཀྱིས་སྨན་
དང་ཆ་བྱད་ཚོགས་པར་བསག །ནད་པའི་བྱ་བ་གང་ཡིན་དོན་དུ་གཉེར། །ངག་གི་ལས་ནི་ཁ་
25-1-96


དམར་གདགས་པ་སྟེ། །རྟོགས་ན་ཁྲོམ་དུ་དུང་འབུད་ལྟ་བུར་གདགས། །འཚོ་བར་ཁས་
བླངས་འཆི་བར་དུས་བཏབ་གཅེས། །ཉམས་མ་ལོངས་ན་སྦྲུལ་ལྕེ་ལྟ་བུར་གདགས། །གཉིས་
ལ་ཞོན་ནས་གང་བཟང་སྟེང་དུ་བྲོས། །ཡང་ན་མཐུན་པར་སྣང་བ་གསལ་གདབ་ཅིང༌། །བློ་ཡི་
ཆོད་པ་ཡུལ་དང་བསྟུན་པ་དང༌། །སྲིད་པའི་སྒོ་མི་དགག་པར་རྫོང་ལ་བྲོས། །དང་པོ་ནད་པས་
དོགས་དང་སྨན་པས་རྟོགས། །གཅིག་པར་མཐུན་ན་དེ་ཉིད་གསལ་པོར་བརྗོད། །གཉིས་པ་
ནད་པས་དུག་ཏུ་དོགས་པ་ལ། །གཞན་བཟུང་ཐོག་ཏུ་མ་བྱུང་ཟེར་སྲིད་ཕྱིར། །བློ་བསྟུན་དེར་
བཏགས་ནད་གང་ཡིན་པ་བཅོས། །གསུམ་པ་འཚོ་འཆི་ཉེན་ཆེ་ཉེན་ཆུང་རྣམས། །ཀླུང་རྟ་
ལས་དབང་བསོད་ནམས་རྐྱེན་དབང་གིས། །ཇི་འདྲ་འཆི་ལ་ཇི་འདྲ་འཚོ་བའི་ཕྱིར། །ཁ་
དམར་ཧ་ཅང་གསལ་བ་སྨྲ་མི་བཏུབ། །ཉེན་ཆེར་ཡོད་ཀྱང་གསོ་རུ་ཡོད་པར་སྨྲ། །ཉེན་ཆུང་
ཚོར་ཡང་བྱ་ར་དགོས་པར་སྨྲ། །ལར་ཡང་མི་ཆོས་འཇིག་རྟེན་དག་དང་བསྟུན། །ཡིད་ལས་མ་
འཁྲུལ་བརྩོན་པས་བསམ་ཞིང་གཞིག །ཁྱད་པར་ལས་ནི་ལྟ་སྒོམ་སྤྱོད་པ་གསུམ། །ལྟ་བ་ཆོས་
རྣམས་ཀུན་ལ་དབུ་མར་རྟོགས། །དམན་མཐའ་ལྷག་མཐའ་ལོག་པའི་མཐའ་སྤངས་པའི། །
ཡང་དག་དབུ་མར་བལྟ་བ་ལྟ་བའི་མཆོག །སྒོམ་པ་ཚད་མེད་བཞི་ཡི་ངང་དུ་གནས། །ལོག་
པའི་གོལ་ས་བཞི་རུ་མ་ཤོར་གཅེས། །སྤྱོད་པ་སྤང་བླང་གཉིས་ལས་མི་དགེ་སྤང༌། །སྨྱོ་འཆལ་
ཐོ་ཅོ་སྡིག་པ་ངན་སྤྱོད་དོར། །སྦྱིན་དང་ཚུལ་ཁྲིམས་བཟོད་པ་བརྩོན་འགྲུས་སྤྱད། །སྨན་པའི་
འབྲས་བུ་གནས་སྐབས་མཐར་ཐུག་གཉིས། །གནས་སྐབས་འབྲས་བུ་ཚེ་འདིར་སྐྱིད་པ་དང༌། །
དབང་དང་ལོངས་སྤྱོད་དགའ་བདེ་ལྡན་པར་འགྱུར། །དེ་དག་སྒྲུབ་པར་བྱེད་པ་སྨན་ཡིན་
པས། །དེ་ཡང་རང་གི་ཡོན་ཏན་མི་ལ་འཕྱར། །འཚེ་བའི་མི་ལའང་སྤུན་བཞིན་བག་ཕབ་ལ། །
བརྟག་ཅིང་ཚོད་བླང་སྤྱོད་པ་བསྟུན་ལ་བཅོས། །དེ་ཡིས་བསོད་ནམས་གྲགས་པ་ཐོབ་པར་
འགྱུར། །འདོད་པའི་ཟས་དང་ལོངས་སྤྱོད་ཤུགས་ལས་འབྱུང༌། །འདི་དུས་བག་དང་ལྡན་པས་
25-1-97


བཙའ་བར་བྱ། །བྲིན་པའི་དུས་སུ་ཟས་ནོར་གཤེར་ཞིང་བླངས། །འགྱངས་ན་དྲིན་བྱས་བརྗེད་
ནས་ལན་མི་ཁྲེལ། །མཐར་ཐུག་འབྲས་བུ་གཡོ་སྒྱུ་འདོད་པ་རྣམས། །སྤངས་ནས་ནད་པ་གསོ་
བ་ལ་འཇུག་པ། །བླ་མེད་སངས་རྒྱས་ས་ལ་བགྲོད་འགྱུར་ཞེས། །འཚོ་མཛད་སྨན་པའི་རྒྱལ་
པོས་བཤད་པ་ཡིན། །ཞེས་གསུངས་ནས་རིག་པའི་ཡེ་ཤེས་དེ་སྨན་པའི་རྒྱལ་པོའི་དབུའི་
གཙུག་ཏུ་ཐིམ་པར་གྱུར་ཏོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་གསོ་བ་པོ་སྨན་པའི་ལེའུ་སྟེ་སུམ་ཅུ་རྩ་གཅིག་པའོ། །བདུད་རྩི་སྙིང་པོ་ཡན་ལག་བརྒྱད་
པ་གསང་བ་མན་ངག་གི་རྒྱུད་ལས་བཤད་པའི་རྒྱུད་ཅེས་བྱ་བ་རྫོགས་སོ།། །། 
༈ རྗེ་བཙུན་ཏཱ་ར་ནཱ་ཐའི་ཐུགས་རྗེའི་ཤུགས། །རབ་འབྱམས་བརྒྱད་ཁྲི་བཞི་སྟོང་ཆོས་ཀྱི་
སྒོ། །མ་ལུས་དགོས་འདོད་སྩོལ་བའི་འཁྲུལ་འཁོར་ལས། །རྒྱུད་འདི་འགྲོ་བ་ཡོངས་ཀྱི་དཔལ་
དུ་བཀོད། །ཞུས་དག མངྒ་ལཾ། 
25-1-98


༄༅། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་མན་ངག་གི་རྒྱུད་ཅེས་བྱ་བ་བཞུགས་སོ། །
༄༅། །དེ་ནས་སྟོན་པ་བཅོམ་ལྡན་འདས་འཚོ་མཛད་སྨན་གྱི་བླ་བཻཌཱུརྱ་འོད་ཀྱི་རྒྱལ་པོ་
དེས་ཏིང་ངེ་འཛིན་དེ་ལས་བཞེངས་ཏེ། དགོས་འདོད་འབྱུང་བ་ཞེས་བྱ་བའི་སྨན་གྱི་ཏིང་ངེ་
འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་སྐུའི་ལྟེ་བ་ལས་འོད་ཟེར་ཁ་
དོག་བརྒྱ་སྟོང་དུ་མ་ཕྱོགས་བཅུར་འཕྲོས་པས་ཕྱོགས་བཅུའི་འགྲོ་བ་སེམས་ཅན་ཐམས་ཅད་
ཀྱི་ཕོངས་པའི་སྡུག་བསྔལ་བསལ། ཕྱི་ནང་གི་ནད་ཐམས་ཅད་ཞི་བར་བྱས་ཏེ་སླར་སྐུའི་ལྟེ་
བར་འདུས་པ་ལས། སྤྲུལ་པའི་སྟོན་པ་དྲང་སྲོང་རིག་པའི་ཡེ་ཤེས་ཞེས་བྱ་བ་ཞིག་ཡོན་ཏན་
ལས་སྤྲུལ་ཏེ་མདུན་གྱི་བར་སྣང་ལ་བཞུགས་པ་ལས། གསུང་གི་སྤྲུལ་པ་དྲང་སྲོང་ཡིད་ལས་
སྐྱེས་ཞེས་བྱ་བ་དེས་སྟོན་པ་ལ་ཕྱག་དང་སྐོར་བ་བྱས་ནས་འདི་སྐད་ཅེས་ཞུས་སོ། །ཀྱེ་སྟོན་པ་
དྲང་སྲོང་རིག་པའི་ཡེ་ཤེས་ལགས། །རྒྱས་པར་བཤད་རྒྱུད་དེ་ལྟར་གསུངས་ལགས་ན། །མན་
ངག་རྒྱུད་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །
ཞེས་ཞུས་པ་དང༌། ཡོན་ཏན་ལས་སྤྲུལ་པའི་དྲང་སྲོང་རིག་པའི་ཡེ་ཤེས་དེས་འདི་སྐད་ཅེས་
གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། །གསུམ་པ་མན་ངག་རྒྱུད་ལ་བསླབ་པ་
ནི། །འགྲོ་མཆོག་གཙོ་བོར་གྱུར་པའི་མི་ལུས་ཀྱང༌། །མ་རིག་འཁྲུལ་པའི་དབང་གིས་འཁོར་
བར་འཁྱམ། །གཏི་མུག་དབང་གིས་སྐྱོན་ཡོན་རྒྱུ་མ་ཤེས། །འདོད་པའི་དབང་གིས་སྡིག་པའི་
ལས་མང་སྤྱད། །ཞེ་སྡང་དབང་གིས་གཞན་ལ་གནད་དུ་བཙུགས། །ཕྲག་དོག་དབང་གིས་
25-1-99


མཐོ་ལ་འགྲན་སེམས་བསྐྱེད། །ང་རྒྱལ་དབང་གིས་དམའ་ལ་ཁྱད་དུ་བསད། །རིག་པ་སྤྱང་
པས་རྩོམ་པ་ཀུན་ལ་འཇུག །མདོ་དོན་ཆུང་བས་ཡུན་གྱི་སྲིད་མ་རྙེད། །ལས་ངན་བག་ཆགས་
རྒྱུན་འཁྲིགས་བསགས་པ་ཡིས། །འཁོར་བའི་ཁ་བརྒྱུད་ལུས་ངན་སྣ་ཚོགས་བླངས། །དེ་ཕྱིར་
ལས་དང་ཉེས་པ་ལས་བྱུང་བའི། །བཞི་བརྒྱ་རྩ་བཞིའི་ནད་དུ་གྲགས་པ་ཡིས། །བདེ་བའི་
བར་སྐབས་མེད་པར་ལུས་སེམས་གདུངས། །དེ་ལ་ཉེས་པ་ཁོང་ནད་ཚད་པ་དང༌། །ལུས་སྟོད་
དོན་སྣོད་གསང་བ་ཐོར་བུའི་ནད། །ལྷན་སྐྱེས་རྨ་བརྒྱད་ལུས་སྤྱིར་གསོ་བ་སྟོན། །བྱིས་པ་མོ་
ནད་གདོན་མཚོན་དུག་ནད་དང༌། །རྒས་པ་རོ་ཙ་ཡན་ལག་བརྒྱད་པོ་ཡིས། །སྤྱི་བོའི་གཙུག་
ནས་རྐང་མཐིལ་ཡན་ཆད་ཀྱི། །ནད་ཀྱི་རིགས་སུ་གྱུར་པའི་བཅོས་ཐབས་ཀུན། །ལག་ལེན་
མན་ངག་རྒྱུད་ཆེན་འདི་ནང་དུ། །བརྩེ་བའི་སེམས་ཀྱིས་དྲང་སྲོང་ཁྱོད་ལ་བཤད། །གུས་པས་
ཉོན་ལ་ཡིད་ལ་ཟིན་པར་གྱིས། །དྲེགས་མེད་བྱམས་པའི་སེམས་ཀྱིས་ནད་པ་གསོས། །ཀྱེ་
དྲང་སྲོང་ཆེན་པོ་ཡིད་ལས་སྐྱེས། །བློ་རབ་དོན་དུ་རྩ་རྒྱུད་མདོར་བསྟན་བཤད། །བློ་འབྲིང་
དོན་དུ་བཤད་རྒྱུད་རྒྱས་པར་བཤད། །ཐ་མའི་དོན་དུ་ཤིན་ཏུ་རྒྱས་པ་ཡི། །དམར་ཁྲིད་ལག་
ལེན་གཅིག་ཏུ་ཁྲིགས་སྡེབས་པའི། །མན་ངག་རྒྱུད་འདི་བཅོ་ལྔའི་སྐབས་ཀྱིས་དབྱེ། །དེ་ལ་
རླུང་མཁྲིས་བད་ཀན་སྣ་དྲངས་ནས། །ནད་རིགས་གང་ལ་གསོ་ཐབས་གང་དགོས་པ། །ཁྱོད་
ཀྱིས་དྲིས་ཤིག་ང་ཡིས་བཤད་ལུང་སྦྱིན། །ཞེས་གསུངས་པ་དང༌། དྲང་སྲོང་ཡིད་ལས་སྐྱེས་
ཀྱིས་འདི་སྐད་ཅེས་ཞུས་སོ། །དྲང་སྲོང་ཆེན་པོ་རིག་པའི་ཡེ་ཤེས་ལགས། །ཁྱོད་ནི་འགྲོ་ཀུན་
དཔལ་དུ་ཤར་བས་ན། །དང་པོར་མདོ་གནས་རྩ་རྒྱུད་བསྡུས་པར་གསུངས། །དེས་མ་ཁྲོལ་ལ་
བཤད་རྒྱུད་རྒྱས་པར་གསུངས། །ད་ནི་དེ་ཡི་ལག་ལེན་མན་ངག་རྒྱུད། །སྐབས་ཀྱི་དབྱེ་བ་བཅོ་
ལྔར་གསུངས་པ་ལས། །ཉེས་གསུམ་གསོ་བའི་སྐབས་ལ་ཇི་ལྟར་བསླབ། །རླུང་དང་མཁྲིས་
པ་བད་ཀན་རྣམ་གསུམ་གྱི། །རྒྱུ་རྐྱེན་དབྱེ་བ་རྟགས་དང་བཅོས་ཐབས་རྣམས། །འཚོ་མཛད་
25-1-100


སྨན་པའི་རྒྱལ་པོས་བཤད་དུ་གསོལ། །ཀྱེ་ཧོ་འགྲོ་བའི་དོན་དུ་བཤད་དུ་གསོལ། །གྲོགས་ཀྱི་
དམ་པར་དགོངས་ལ་བཤད་དུ་གསོལ། ཞེས་ཞུས་སོ། །བདུད་རྩི་སྙིང་པོ་ཡན་ལག་བརྒྱད་པ་
གསང་བ་མན་ངག་གི་རྒྱུད་ལས་མན་ངག་རྒྱུད་ཞུས་པའི་ལེའུ་སྟེ་དང་པོའོ།། །། 
དེ་ནས་སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག དང་པོ་ཉེས་གསུམ་གསོ་བའི་སྐབས་བསྟན་པ། །རླུང་དང་མཁྲིས་པ་བད་
ཀན་གསུམ་དུ་བཤད། །དེ་ལ་རླུང་ནི་ནད་ཀུན་འཁྲུག་པའི་རྒྱུ། །སྣ་འདྲེན་མཇུག་སྡུད་འཐོར་
དང་ཁྱབ་པར་བྱེད། །རང་རྒྱུད་གདུག་ཅིང་ནད་མང་རྩུབ་པའི་ཕྱིར། །ཐོག་མར་རླུང་གི་བཅོས་
ཐབས་བཤད་པར་བྱ། །ཀྱེ་དྲང་སྲོང་ཆེན་པོ་མ་ཡེངས་གུས་པས་ཉོན། །རླུང་གི་ནད་ལ་རྒྱུ་རྐྱེན་
དབྱེ་བ་དང༌། །རྟགས་དང་བཅོས་ཐབས་རྣམ་པ་ལྔ་ཡིས་བཤད། །རྒྱུ་ནི་མ་རིག་ལས་བྱུང་
འདོད་ཆགས་ཀྱིས། །བསྐྱེད་རླུང་མཚན་ཉིད་དྲུག་ལྡན་ཐ་མལ་གནས། །དེ་རྐྱེན་ཁ་དང་ཡང་
རྩུབ་བསྟེན་དྲགས་དང༌། །ཆགས་པས་དུབ་དང་ལྟོ་དང་གཉིད་ཆག་དང་། །ལྟོ་སྟོང་ལུས་ངག་
བྱ་བ་དྲག་ཤུལ་དང༌། །ཁྲག་མང་ཟགས་དང་འཁྲུ་སྐྱུགས་དྲག་པོས་བཏབ། །བསེར་བུས་བུས་
དང་ག་ཆད་ངུས་པ་དང་། །མྱ་ངན་སེམས་ལས་ཁ་ཡི་ལས་ཆེས་དང༌། །བཅུད་མེད་ཁ་ཟས་
ཡེན་ལ་བརྟད་པ་དང༌། །ཤུགས་བཀག་པ་དང་ནན་གྱིས་བཙིར་བ་ཡི། །རྐྱེན་དེས་དང་པོར་
རང་གནས་འཕེལ་ཞིང་གསོག །རང་གི་ནུས་སྟོབས་རྒྱས་ནས་རྐྱེན་ཕྲད་སློང་། །རྐྱེན་དྲག་
གསོག་ལྡང་དུས་གཅིག་བྱེད་པའང་ཡོད། །ལངས་ནས་འཇུག་སྒོ་དྲུག་ཞུགས་རང་རྟགས་
སྟོན། །བདེ་མེད་རླུང་ནད་དྲུག་ཅུ་རྩ་གསུམ་འབྱུང༌། །དེ་ལ་དབྱེ་ན་སྤྱི་དང་བྱེ་བྲག་གཉིས། །སྤྱི་
ལ་དབྱེ་ན་རིགས་དང་གནས་སུ་སྦྱར། །རིགས་ནི་གཞན་རྒྱུད་ལོག་པའི་ལམ་ཞུགས་པ། །རླུང་
ནད་ཨ་ཝརྟ་དང་ད་རྒན་གཉིས། །འགྲམ་པ་ཉམས་དང་ལྕེ་ལྡིབ་ཕྱོགས་གཅིག་གུག །རྩ་
འཛིན་གཞོགས་ཕྱེད་སྐམས་དང་ལུས་ཀུན་སྐམས། །ཤིང་རེངས་དཔུང་འཇའ་བི་ཤ་ཙེ་དང་
25-1-101


ནི། །སྲ་འཐེང་དང་ནི་བརླ་རེངས་ཅེ་སྤྱང་མགོ །ཚེར་མ་གཟུགས་འཁུམས་ཁ་ལི་རྐང་བརྩེ་
དང༌། །རྐང་པ་ཚ་བ་ཞེས་བྱ་ཉི་ཤུར་བཤད། །མདོར་བསྡུས་རེངས་འཁུམས་སྐམས་དང་སྦོས་
པ་དང༌། །འཕྱེས་གཟེར་འཕྱོས་དང་བོག་པ་བརྒྱད་དུ་བསྡུ། །གནས་ནི་རང་རྒྱུད་གནོད་བྱ་ལ་
ཞུགས་པ། །པགས་གྲམ་ཤར་རྒྱས་རྩ་རུ་རྒྱུ་བ་དང༌། །རུས་ལ་ཞེན་དང་དོན་བབས་སྣོད་དུ་
ལྷུང༌། །དབང་པོ་ལྔ་ལ་མེ་ཏོག་ཤར་བའོ། །དེ་ལ་དང་པོ་པགས་ལ་གྲམ་པ་གཅིག །གཉིས་པ་
ཤ་དང་ཚིལ་ལ་ཞུགས་པ་གཉིས། །གསུམ་པ་རྩ་ཆུ་ཁྲག་ལ་ཞུགས་པ་གསུམ། །བཞི་པ་རུས་
ཚིགས་རྐང་དང་བཅུད་ཞུགས་བཞི། །ལྔ་པ་གློ་སྙིང་མཆིན་མཆེར་མཁལ་ཞུགས་ལྔ། །དྲུག་པ་
ཟས་དང་མ་ཞུ་ཞུ་བའི་གནས། །མཁྲིས་པ་བཤང་གཅི་མངལ་དུ་ཞུགས་པ་བདུན། །དབང་པོ་
མགོ་མིག་རྣ་བ་སྣ་སོ་དང༌། །ཀུན་ལ་ཞུགས་དང་ཉི་ཤུ་བརྒྱད་དུ་བཤད། །མདོར་བསྡུས་མགོ་
རླུང་སྙིང་རླུང་གློ་རླུང་དང་། །མཆིན་རླུང་ཕོ་རླུང་ལོང་རླུང་མཁལ་རླུང་བདུན། །བྱེ་བྲག་དབྱེ་བ་
སྲོག་འཛིན་གྱེན་རྒྱུ་དང་། །ཁྱབ་བྱེད་མེ་མཉམ་ཐུར་སེལ་རྣམ་པ་ལྔ། །བད་ཀན་མཁྲིས་པར་
འདྲེས་པས་བཅུ་རུ་བཤད། །བརྟག་པའི་ཐབས་ལ་རྣམ་པ་གསུམ་ཡིན་ཏེ། །སློང་བ་རྒྱུ་ཡི་སྒོ་
ནས་བརྟག་པ་དང༌། །མཚན་ཉིད་རྟགས་ཀྱི་སྒོ་ནས་བརྟག་པ་དང༌། །ཕན་གནོད་གོམས་པའི་
སྒོ་ནས་བརྟག་པའོ། །དང་པོ་སློང་བ་རྒྱུ་ལ་བརྟག་པ་ནི། །གོང་གི་ཟས་དང་སྤྱོད་ལམ་རྐྱེན་
རྣམས་ཀྱིས། །བསླང་ནས་ན་ན་རླུང་ལས་གཞན་མི་སྲིད། །དེ་ཕྱིར་དང་པོ་རྒྱུ་བརྟག་གཅེས་པ་
ཡིན། །མཚན་ཉིད་རྟགས་ལ་སྤྱི་དང་བྱེ་བྲག་གཉིས། །སྤྱི་རྟགས་རྩ་ནི་སྟོང་ལ་རྐྱལ་བ་དང༌། །
ཆུ་ནི་ཆུ་འདྲ་གདང་ལ་ལོག་རྗེས་སླ། །འགྲོ་འདོད་ཤུས་འདེབས་ཤེས་པ་ཡང་ལ་འཕྱོ། །མགོ་
བོ་ཟི་འཁོར་རྣ་བ་འུར་ལ་འཁྲོག །ལྕེ་སྐམ་དམར་རྩུབ་ཁ་རོ་བསྐ་བ་བྲོ། །གཟེར་འཕོ་གྲང་
འདར་འགུལ་ཁྱབ་ཟུག་དང་སྙོམ། །རེངས་འཁུམས་བྱེ་ཆག་འབྱིན་དང་དཀྲིས་སྙམ་བྱེད། །
འགུལ་ན་ཟུག་ཆེ་སྤུ་བརྩེ་ཕྲུམ་བསེར་ཁྱེར། །གཉིད་མེད་གཡལ་འདར་རྨྱང་འདོད་ཚིག་པ་
25-1-102


ཟ། །དཔྱི་རྐེད་རུས་ཚིགས་མ་ལུས་བརྡུངས་སྙམ་བྱེད། །ལྟག་པ་བྲང་དང་མུར་འགྲམ་ཟུག་
ཅིང་གཟེར། །རླུང་གསང་རྣམས་ནི་ཁ་བྱེ་མནན་ན་ན། །སྟོང་སྐྱུགས་བྱེད་ཅིང་ཐོ་རངས་སྦུ་
གསོག་ལུ། །སྦོ་འཁྲོག་རྒོངས་དང་ཐོ་རངས་ཞུ་རྗེས་ན། །བྱེ་བྲག་བརྟག་པ་རླུང་གིས་སྒུར་
པོར་བསྡུས། །འཁུན་ཞིང་དྲན་མེད་མིག་ཧར་དབུགས་འབྱིན་དཀའ། །དེ་མིང་རླུང་ནད་ཨ་
ཝརྟ་ནར་བཤད། །ད་རྒན་ཕྱིར་དགྱེ་བྲང་འབུར་གཉའ་བ་བརྟུངས། །ལྟག་པ་དགྱེ་ལ་སོ་
འཆའ་སྦུ་བར་སྐྱུག །མགོ་དང་འགྲམ་པ་རྒྱབ་ན་སྐད་མི་ཕྱིན། །མིག་ཧར་གཡལ་འབྱུང་རྩིབ་
ལོགས་གཉིས་སུ་ཟུག །ད་རྒན་ནང་གུག་ན་ཚུལ་དེ་འདྲ་ལ། །སྐེ་བརྟུངས་བྲང་དུ་བསྡུས་ཏེ་རོ་
སྟོད་འབུར། །འགྲམ་པ་ཉམས་པ་འཐམས་འཕྱང་འབྱེད་འཛུམས་ཉམས། །ལྕེ་ལྡིབ་བཟའ་
བཏུང་སྨྲ་དཀའ་ལྐུགས་ལྡིབ་ཐེན། །གཞོགས་གཅིག་གུག་པ་ཁ་ཡོ་མགོ་བོ་འདར། །ཚིག་
ཐོགས་མིག་རེངས་དྲན་ཉམས་གཉིད་ལོག་དངངས། །རྩ་འཛིན་རླུང་ཁྲག་སྤྱི་བོའི་རྩར་ཞུགས་
ཏེ། །ནད་ཚབས་དྲག་ལ་སྤྱི་གཙུག་ཤ་མདོག་ནག །གཞོགས་ཕྱེད་སྐམས་པ་ཚོར་མེད་བྱ་བ་
ཉམས། །ལུས་ཀུན་སྐམས་པ་ཐམས་ཅད་དེ་དང་འདྲ། །ཤིང་རེངས་དགྱེ་དགུ་མི་ཤེས་ཤིང་
ལྟར་རེངས། །དཔུང་འཇའ་ཕྲག་ཞུགས་འདེགས་སོགས་བྱ་ཉམས་ན། །བི་ཤ་ཙེ་ནི་ལག་སོར་
བྱ་བ་ཉམས། །སྲ་འཐེང་བརླ་ནང་ཆུ་བ་ལ་ཞུགས་པས། །འགྲོ་འདར་ཚིགས་ལྷོད་འཐེང་ཞིང་
རྐང་པ་འཕྱེས། །བརླ་རེངས་བད་ཀན་ཚིལ་འཕེལ་བརླ་རུས་ཞེན། །གྲང་ཞིང་ཚོར་མེད་
འདེགས་དཀའ་ལྕི་བའོ། །རླུང་ཁྲག་པུས་མོར་སྐྲངས་པ་ཅེ་སྤྱང་མགོ །གློང་མོར་ཞུགས་པ་
རླུང་ནད་ཚེར་མ་སྟེ། །རྟིང་ཆུར་ཞུགས་ན་བྱིན་རེངས་གཟུགས་འཁུམས་ཡིན།།གཟུགས་
འཁུམས་བི་ཤ་ཙེ་འདོམ་ཁ་ལིར་བཤད། །རྐང་པ་བརྩེ་བ་རྐང་བརྩེ་ཞེས་བྱ་སྟེ། །རྐང་པ་ཚ་བ་
དྲོད་བཅས་འགྲོ་ཚེ་ཚ། །མདོར་བསྡུས་རེངས་འཁུམས་དགྱེ་དགུ་བརྐྱང་བསྐུམ་ཉམས། །
སྐམས་པ་ཚོར་མེད་བྱ་ཉམས་ཤ་པགས་འབྱར། །སྦོས་པ་གཡོ་ཞིང་སྐྲངས་ལ་འཕེལ་འབྲི་
25-1-103


བྱེད། །འཕྱེས་པ་སྨད་བཤལ་རྐང་པ་ལྕི་ལ་བེམ། །གཟེར་བ་ཀར་ཟུག་ནད་དྲག་ངེས་མེད་
འཕོ། །འཕྱོས་པ་གཉིད་མེད་མང་སྨྲ་ངུ་འབྲོས་དགོད། །ལྐུགས་པ་སྟོབས་དང་དྲན་ཉམས་སྨྲ་
མི་ཤེས། །གནས་དང་སྦྱར་ན་པགས་ལ་རླུང་གྲམ་པ། །གས་སྙམ་རེག་པ་རྩུབ་ལ་བརྩེ་བ་
ཡིན། །ཤར་ཞུགས་སྐྲངས་རྩུབ་མདོག་འགྱུར་འབྲུམ་པ་འབྱུང་། །ཚིལ་ཞུགས་ཡི་འཆུས་ལུས་
སྐྲངས་རྨེན་བུ་སྐྱེད། །རྩར་ཞུགས་རྩ་དེ་སྟོང་ལ་སྦོམ་པོར་སྐྲངས། །ཁྲག་ཞུགས་གཉིད་ཆེ་རྩ་
དམར་མདོག་མི་སྡུག །ཆུ་བར་ཞུགས་པ་ཞ་རེངས་འཐེང་པར་བྱེད། །རུས་ཞུགས་ཟུག་ཆེ་ཤ་
སྐམས་ཉམ་སྟོབས་འཛད། །ཚིགས་ཞུགས་སྟོང་སྦོབ་སྐྲངས་ནས་ད་རྒན་འགྱུར། །རྐང་ཞུགས་
གཉིད་མེད་དཀྲིས་སེམ་བཙིར་ན་ཕན། །ཁུ་བར་ཞུགས་པ་སྐམ་མམ་མདོག་འགྱུར་ལུག །
སྙིང་ཞུགས་སྟོད་གང་ཤུས་འདེབས་ཤེས་པ་འཕྱོ། །གློར་ཞུགས་བྱད་སྐྲངས་མི་ཁོགས་སྦུ་
གསོག་ལུ། །མཆིན་ཞུགས་བཀྲེས་དུས་གཡལ་མང་འཕྱོངས་ནས་ན། །མཆེར་ཞུགས་ལུས་
སྐྲངས་སྦོ་འཁྲོག་སྟེང་དུ་གཟེར། །མཁལ་ཞུགས་མཁལ་རྐེད་ན་ཞིང་རྣ་བ་འོན། །ཟས་ལ་རླུང་
ཞུགས་ཁ་ཟས་ཟོས་རྗེས་ན། །མ་ཞུའི་གནས་ཞུགས་སྒྲེག་སྐྱུག་ཡི་ག་འགག །སྦོ་འཁྲོག་སྐོམ་
དད་ཆེ་ལ་དབུགས་མི་བདེ། །ཞུ་བའི་གནས་ཞུགས་གཟེར་ཞིང་སྦོ་འཁྲོག་བྱེད། །བཤང་
འགག་ཆུ་སྲི་རྐེད་པ་མཇུག་ཏོ་ན། །མཁྲིས་ཞུགས་སྦོ་གཟེར་འཇུ་དཀའ་མིག་སྤྲིན་སེར། །
བཤང་ཞུགས་རླུང་འཁྱིལ་རྟུག་སྐམ་སྒྲ་བཅས་འཁྲུ། །གཅིན་ཞུགས་ལྒང་པ་བསིལ་སྦོ་སྲི་
འམ་སྙི། །མངལ་ཞུགས་འབུར་འདྲིལ་མངལ་ཁྲག་སྡོམ་མམ་འཛག །མགོར་ཞུགས་མགོ་
འཁོར་ཟི་འཁྱོམ་བརྟད་མི་ཚུགས། །མིག་ཞུགས་རྩ་དམར་ལུག་སྙམ་བསེར་བུ་གནོད། །རྣ་
བར་ཞུགས་པ་འུར་འཁྲོག་སྟོང་སྙམ་གཟེར། །སྣར་ཞུགས་སྣ་འགག་ཆུ་འཛག་དྲི་མི་ཚོར། །
སོར་ཞུགས་བེར་བ་ལངས་ནས་ན་ཞིང་སྐྲངས། །ལུས་ཀུན་ཞུགས་པ་ཀུན་ཁྱབ་སྤྱི་རྟགས་
འདྲ། །མདོར་བསྡུས་མགོ་རླུང་མགོ་འཁོར་རྣ་བ་འུར། །སྐྱུག་ཅིང་ལངས་ན་འགྱེལ་བུབ་ཕྱི་
25-1-104


ཡུལ་འཁྱོམ། །སྙིང་རླུང་ལུས་འདར་སྟོད་རྒྱངས་ཤེས་པ་འཁྲུལ། །སྨྲ་འཆལ་མགོ་འཁོར་
གཉིད་ཆུང་ཤུ་ཡིས་འདེབས། །གློ་རླུང་གཉིད་ཆུང་ཁོགས་དཀའ་སྦུ་གསོག་ལུ། །ལུས་རྒྱངས་
སྐྱུག་དང་མིག་སྐྲངས་ནུབ་གློ་མང༌། །མཆིན་རླུང་སྒྲེག་ཅིང་སྟོད་གཟེར་བཤུལ་ཤ་ན། །ཁ་ཟས་
ཡི་གར་མི་འོང་མིག་མི་གསལ། །རྒོངས་དང་ཐོ་རངས་མཆིན་པ་འཕྱོང་ཐག་ཆད། །ཕོ་རླུང་
དབུགས་རྒོད་སྦོ་ལ་སྟོང་སྒྲེག་བྱེད། །ཕོ་བ་འབྲབ་སྙམ་ཟོས་རྗེས་བདེ་བར་མངོན། །ལོང་རླུང་
སྦོ་འཁྲོག་འཁྲུ་དང་འོག་རླུང་མང༌། །མཁལ་རླུང་མཁལ་རྐེད་ན་ཞིང་རྣ་བ་འུར། །ནང་ཚེགས་
རླུང་ནད་རྣམ་ལྔ་ནད་གྱུར་རྟགས། །སྲོག་རླུང་ཟས་རྩུབ་སྨྱུང་དང་དྲག་ཤུལ་ལམ། །ཤུགས་
བཀག་བཙིར་བས་འཁྲུགས་ཏེ་མགོ་བོ་འཁོར། །སྙིང་འཕྱོས་དབུགས་སྡུད་དཀའ་ཞིང་མིད་
མི་ཐུབ། །སྟོད་རྒྱུ་སྒྲེག་སྐྱུག་བཀག་དང་ངུ་དགོད་དྲགས། །ཁུར་ལྕི་བཏེག་པས་འཁྲུགས་ཏེ་
དིག་ཅིང་ལྐུགས། །སྨྲ་དཀའ་སྟོབས་ཆུང་ཁ་ཡོ་དྲན་པ་ཉམས། །ཁྱབ་བྱེད་འགྲོ་འདུག་རྩེད་མོ་
དྲགས་པ་དང༌། །འཇིགས་དང་ཡི་མུག་ཁ་ཟས་རྩུབ་པས་འཁྲུགས། །སྙིང་བཅུགས་བརྒྱལ་
འབོག་མང་དུ་སྨྲ་བ་དང་། །འགྲོ་འདོད་འཇིགས་སྐྲག་མི་སྙན་ཚིག་གིས་སློང༌། །མཉམ་གནས་
འཇུ་དཀའི་ཟས་དང་ཉིན་གཉིད་ཀྱིས། །འཁྲུགས་པས་ཕོ་བ་གྲང་ཞིང་ཟས་མི་ལེན། །སྐྱུག་
ཅིང་ཁ་ཟས་མི་འཇུ་བསུས་ཁྲག་འདྲེས། །ཐུར་སེལ་བཤང་གཅི་ཕྱེན་དང་ཁུ་བ་ཡི། །ཤུགས་
བཀག་བཙིར་བས་འཁྲུགས་ཏེ་རུས་མིག་འཁོལ། །ཡན་ལག་འཁྲུལ་འཕྱེས་དབུགས་ངན་དྲི་
ཆུ་སྡོམ། །དེ་དག་གང་ཡང་མཁྲིས་པར་འདྲེས་པ་ཡིས། །ཚ་བ་སྐྱེ་ཞིང་མིག་ཆུ་སེར་བར་བྱེད། 
བད་ཀན་འདྲེས་པས་ལྕི་བསིལ་རྨོངས་པར་འགྱུར། །ཕན་གནོད་བསྟེན་པའི་སྒོ་ནས་བརྟག་
པ་ནི། །ཤ་ཆང་བུར་མར་དྲོད་བཅུད་བསྟེན་པ་དང༌། །བསྐུ་མཉེ་མེ་ཉིས་དྲོས་ཤིང་འགྲངས་ན་
བདེ། །ཆུ་གྲང་བ་དར་ལོ་ཤུར་གཡེར་མ་ཇ། །བཀྲེས་སྐོམ་གྲངས་དང་སྨྲ་བརྗོད་ཉལ་པོ་དང༌། །
གཉིད་ཆག་སེམས་ལས་གནོད་པས་རླུང་དུ་ཤེས། །མདོར་བསྡུས་དང་པོ་ཟས་སྤྱོད་གནོད་
25-1-105


པས་བསླང༌། །བར་དུ་རྩ་སྟོང་ཆུ་དྭངས་གཡལ་འདར་རྙོང༌། །སྤུ་བརྩེ་རྒོངས་དང་ཐོ་རངས་ཞུ་
རྗེས་ན། །ཐ་མ་བསིལ་གནོད་དྲོད་བཅུད་ཕན་འགྱུར་བ། །ནད་གང་ཡིན་ཡང་རླུང་གི་མི་
འགྱུར་རྟགས། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་ལ་བཅོས་ཐབས་ཟས་སྤྱོད་
སྨན་དཔྱད་བཞི། །དང་པོ་ཟས་ཀྱི་སྒོ་ནས་བཅོས་པ་ནི། །ཟྭ་དང་བཙོང་སྒོག་ཟན་སྐམ་རུས་
ཚོད་དང༌། །ལུག་ཤ་རྟ་བོང་འཕྱི་བ་མི་ཡི་ཤ །ལོ་ཡིབ་བུ་རམ་མར་རྙིང་འབྲུ་མར་དང༌། །ཟན་
དྲོན་འོ་མ་ཆང་དང་བུར་ཆང་སོགས། །དྲོ་ཞིང་སྣུམ་བཅུད་ཟས་ཀྱིས་བཅོས་པར་བྱ། །གཡེང་
བ་མེད་པའི་མུན་ཁུང་དྲོ་བའི་གནས། །གོས་མཐུག་གཉིད་ལོག་སྙན་ཚིག་སྨྲ་བ་དང༌། །ཡིད་
དུ་འོང་བའི་གྲོགས་ཀྱིས་བཅོས་པར་བྱ། །གནོད་ཅིང་སྐྱེད་པའི་ཟས་སྤྱོད་དུས་ཀུན་སྤང༌། །
སྨན་ནི་ཁུ་བ་ཆང་དང་འདོན་སྦྱོར་དང༌། །ཕྱེ་མ་སྨན་མར་ལྔ་ལས་དང་པོ་ནི། །སྲེ་ལོང་སོགས་
ཡུ་གཞུག་ཆུང་བསྡུས་ཁུ་དང་། །རུས་པ་སྣ་ཚོགས་བསྡུས་ཁུར་སྤོད་བཏབ་བཏང༌། །རླུང་ནད་
མ་ལུས་ཀུན་ལ་ཕན་པ་ཡིན། །ཤ་མར་བུར་རྙིང་ཆང་དུ་བསྡུས་པའི་ཐང༌། །རླུང་ནད་ཀུན་
སེལ་མཆོག་ཏུ་སོ་ལ་ཕན། །ཛཱ་ཏི་ཁ་རུ་ཚྭ་དང་ཤིང་ཀུན་བཏབ། །སྙིང་དང་སྲོག་རྩར་ཞུགས་
པའི་རླུང་རྣམས་སེལ། །ལུག་མགོ་ལོ་གསུམ་ལོན་པའི་བསྡུས་ཁུ་ལ། །ཤིང་ཀུན་སྒ་དང་རྒྱམ་
ཚྭ་ཁ་ཚར་བཏབ། །རླུང་ནད་ཀུན་འཇོམས་ཁྱད་པར་མགོ་རླུང་སེལ། །སྒ་དང་ཤིང་ཀུན་
བསྡུས་པའི་ཁུ་བ་ལ། །ཁ་རུ་ཚྭ་བཏབ་རླུང་ནད་ཀུན་ལ་ཕན། །ཁྱད་པར་ཕོ་ལོང་རླུང་དང་སྙིང་
རླུང་སེལ། །སྒ་དང་གོ་སྙོད་ཛཱ་ཏི་བསྡུས་པའི་ཐང༌། །རླུང་ནད་མ་ལུས་འཇོམས་ཤིང་དྲན་པ་
གསལ། །ཆང་ནི་ལྕ་བ་ར་མཉེ་ཟན་ཆང་ལ། །གྲོ་ཡི་ཆང་བསིངས་རླུང་ནད་མ་ལུས་འཇོམས། །
མཆོག་ཏུ་མཁལ་རྐེད་སྨད་ཀྱི་རླུང་ལ་ཕན། །(འདི་ལ་སོགས་ཏེ་སྦྱོར་སྡེའི་སྨན་མིང་སོ་སོར་མཆན་བུས་མི་
གསལ་བ་རྣམས་ཕྱི་རྒྱུད་བཞིན་རྟོགས་པར་བྱའོ།།) །བུ་རམ་ཆང་གིས་རླུང་ནད་ཐམས་ཅད་འཇོམས། །དེ་
བཞིན་མར་ཆང་གྲང་རླུང་སེལ་བར་བྱེད། །གཟེ་མའི་ཆང་གིས་རུས་རླུང་མཁལ་རླུང་སེལ།  །
25-1-106

 
ཐོང་ཚེར་རུས་ཆང་རུས་པའི་རླུང་ལ་ཕན། །འདོན་ལ་དཀར་འདོན་དམར་འདོན་སྐྱུར་འདོན་
དང་། །སྒོག་འདོན་བཞི་ལས་དང་པོ་རྩེག་བཅད་མར། །ཚོམས་ཕྱེ་འོལ་སྐོམ་སྦྱར་བ་འོ་མར་
བཙོས། །སྒ་དང་རྒྱམ་ཚྭ་བཏབ་པ་དཀར་འདོན་ཡིན། །ལུག་ཤའི་ཁུ་བར་སྦྱར་བ་དམར་
འདོན་ནོ། །སྐྱུར་འདོན་ཁུགས་པའི་གླུམ་ལ་ཉེ་འུ་བྱས། །མར་རྙིང་བུ་རམ་སྒ་བཏབ་བཙོས་
པའོ། །སྒོག་འདོན་སྒོག་སྐྱ་ཚོས་པར་བཙོས་ལ་བསྣུར། །མར་དང་རུས་ཁུ་རྒྱམ་ཚྭའི་ཕྱེ་བཏབ་
བཙོ། །དེ་རྣམས་གང་ཡང་རླུང་ནད་མ་ལུས་འཇོམས། །ལུས་ཀྱི་སྟོབས་སྐྱེད་དབང་ཤེས་
གསལ་བར་བྱེད། །རི་ཐང་མཚམས་ཀྱི་རླུང་ལ་བདུད་རྩི་འདྲ། །ཕྱེ་མ་ཛཱ་ཏི་ཤིང་ཀུན་ཁ་རུ་ཚྭ། །
རྩ་རུ་ཚྭ་དང་རྒྱམ་ཚྭ་ཚ་བ་གསུམ། །ཤིང་ཚ་སེ་འབྲུ་སུག་སྨེལ་ཨ་རུ་ར། །སླེ་ཏྲེས་སྒོག་སྐྱ་བུར་
དཀར་བརྒྱད་འགྱུར་སྦྱར། །ཛཱ་ཏི་ཤིང་ཀུན་གང་རུང་གཙོ་བོར་བཏང༌། །རུས་བཅུད་(སྲེ་ལོང་
སོགས་ཡུ་གཞུག་ཆུང་)གསུམ་མམ་བཅུད་(ཤ་མར་བུར་ཆང་)བཞིའི་ཁུ་བས་དབུལ། །སྟོད་སྨད་ཕྱི་ནང་
རླུང་ཀུན་འདི་ཡིས་འཇོམས། །སྨན་མར་ཁ་རུ་ཚྭ་དང་པི་པི་ལིང༌། །ཨ་རུ་འབྲི་མར་རླུང་ནད་
སྟོང་ལ་ཕན། །སེ་འབྲུ་འུ་སུ་སྒ་དང་ཙི་ཏྲ་ཀ །པི་པི་ལིང་དང་འབྲི་མར་རླུང་རྣམས་འཇོམས། །
མེ་དྲོད་སྐྱེད་ཅིང་སྐེམ་པོ་རྒྱས་པར་བྱེད། །སྒོག་སྐྱ་བུར་མར་སྦྱར་བ་ནས་གསེབ་མནན། །
རླུང་ནད་མ་ལུས་འཇོམས་པའི་སྨན་མཆོག་ཡིན། །ཛཱ་ཏི་ཁ་རུ་ཚྭ་དང་ཤིང་ཀུན་དང༌། །ཨ་རུ་
ར་དང་འབྲི་མར་རླུང་རྣམས་འཇོམས། །དེ་བཞིན་བཙན་དུག་རུས་ཆེན་འབྲས་བུ་གསུམ། །རྩ་
བ་ལྔ་ཡི་སྨན་མར་སྦྱར་བར་བྱ། །དཔྱད་དུ་མར་རྙིང་དྲོད་ཀྱི་འཇམ་རྩི་བཏང༌། །ཨ་རུ་ར་དང་
སྒོག་སྐྱ་རྒྱམ་ཚྭ་དང༌། །ཞུན་མར་སྦྱར་བའི་རེང་བུས་སྨད་རླུང་སེལ། །ནད་གཞན་གེགས་བྱས་
སྣུམ་ལྡན་འཇམ་པོས་སྦྱང༌། །འབྲུ་མར་རྙིང་པས་ལུས་ཀུན་བྱུགས་ལ་མཉེ། །གཟེར་སར་
འབའ་ཆ་རུས་རྙིང་བཙོས་པས་བདུག །སྣ་ཚོགས་རུས་པ་བཙོས་པའི་རླངས་ལུམས་བྱ། །དེ་
ཡི་ཞག་གིས་ལུས་ཀུན་བྱུག་ཅིང་མཉེ། །སྣུམ་འཆོས་དུགས་ཀྱིས་གཟེར་དང་བརྩེ་བ་འཇོམས།  །
25-1-107

 
རེངས་འཁུམས་ལ་སོགས་ཇི་ལྟར་འདོད་པ་འགུགས།།སྟོབས་འཕེལ་དྲོད་འབར་སྐེམ་པོ་
རྒྱས་པར་བྱེད། །ནད་གཞན་འདྲེས་ན་དེ་ལྟར་མ་ཡིན་སྤང༌། །སྤྱི་གཙུག་ཨན་སྟོང་ཚིགས་པ་
དང་པོ་དང༌། །དྲུག་བདུན་བཅུ་དྲུག་དཀར་ནག་མཚམས་རྣམས་བསྲེག །དེ་ལྟར་ཆོ་ག་འདི་
རྣམས་བསྟེན་གྱུར་ན། །རླུང་ནད་དུ་མ་མ་ལུས་འཇོམས་པར་ངེས། །བྱེ་བྲག་གསོ་ཐབས་
རིགས་གནས་ནང་ཚེགས་གསུམ། །རླུང་ནད་རིགས་ཀྱི་སྒོ་ནས་བཅོས་པ་ནི། །ཨ་ཝ་རྟ་ལ་
སྣུམ་དུགས་བྱས་པའི་རྗེས། །སྣ་སྦྱོངས་རྣོ་བས་དབུགས་རྒྱུའི་བུ་ག་བསལ། །དེ་ཡི་རྗེས་ལ་རྒྱ་
ཤུག་འོ་མ་ཞོ། །ཤ་ཁུ་མར་ཁུ་བསྐོལ་བའི་དྭངས་མ་བསླུད། །རྒྱ་ཤུག་ཐང་ཤིང་སླེ་ཏྲེས་རྩ་བ་
ལྔ། །རུ་རྟ་རྒྱ་སྤོས་ཀཎྜ་ཀ་རི་དང༌། །ཤ་ཁུ་འོ་མ་བུར་རྩབས་སྣུམ་བཞི་བསྐོལ། །མར་དེ་བྱུག་
བདུག་སྣ་སྨན་འཇམ་རྩིར་བཏང༌། །རླུང་དེ་བད་ཀན་འདྲེས་ན་སྙིང་ག་དང༌། །རྩིབ་ལོགས་ན་
ལ་གཡེར་མ་ཨ་རུ་ར། །ཤིང་ཀུན་རྒྱམ་ཚྭ་ཤིང་ཚ་ཁ་རུ་ཚྭ། །མ་ནུ་ནས་བསྐོལ་ཁུ་བ་སྦྲང་སྦྱར་
བསླུད། །ཤིང་ཀུན་བཅའ་སྒ་སེ་འབྲུ་ཁ་རུ་ཚྭ། །རུ་རྟ་བསྐོལ་བའི་ཁུ་བ་བསླུད་པར་བྱ། །མཁྲིས་
པར་འདྲེས་ན་སྣ་སྨན་ཁྲུས་ཀྱིས་སྦྱང༌། །ད་རྒན་ཕྱིར་དགྱེ་ནང་གུག་འགྲམ་ཉམས་དང༌། །
ཕྱོགས་གཅིག་གུག་དང་དཔུང་པ་འཇའ་བ་ལ། །སྣ་སྨན་བརྟ་བ་བཏང་ཞིང་སྤྱི་བོ་དང༌། །
མིག་དང་རྣ་བར་ཏིལ་མར་བསྐུ་ཞིང་དགང༌། །སྐྲངས་ན་སྐྱུགས་བཏང་དམར་ཚ་གཏར་ག་
གདབ། །བརླ་རེངས་མ་ཞུ་བད་ཚིལ་སྐྱེས་པའི་ཕྱིར། །དེ་ལ་སྣུམ་འཆོས་སྤངས་ལ་རྩུབ་བཅོས་
བྱ། །ནས་དཀར་སོ་བ་སྲེ་ཟན་སྐམ་སའི་ཤ །སྦྲང་རྩི་སྐྱུར་རྩབས་ཚོད་མ་ཚྭ་མེད་བྱིན། །འབྲས་
བུ་གསུམ་དང་ཙ་བྱ་པི་པི་ལིང་། །ཧོང་ལེན་སྦྲང་དང་སྦྱར་བའི་ལྡེ་གུ་བཏང༌། །ཙ་བྱ་ཙི་ཏྲ་ཀ་
དང་ཨ་རུ་ར། །སྒྲོན་ཤིང་སྦྲང་རྩི་སྦྱར་བའི་ལྡེ་གུ་བཏང༌། །གུ་གུལ་བྲག་ཞུན་ཨ་རུ་བ་གཅིན་
བསླུད། །གླ་སྒང་ཙི་ཏྲ་ཀ་དང་ཚ་བ་གསུམ། །གུ་གུལ་འབྲས་བུ་གསུམ་དང་བྱི་དང་ག །ཆ་
མཉམ་ཕྱེ་མས་ཚིལ་དང་བད་ཀན་སེལ། །ཀ་རཉྫ་དང་ཡུངས་དཀར་བ་གཅིན་བྱུག །ཚིལ་དང་
25-1-108


བད་ཀན་ཟད་བྱའི་དྲག་ཤུལ་བརྩམ། །ཟད་ནས་ཁ་ཟས་གློད་དེ་སྣུམ་འཆོས་བྱ། །གཟུགས་
འཁུམས་སྲ་འཐེང་བི་ཤ་ཙེ་སོགས་ལ། །ར་སྣ་མཱུ་ལ་དོང་གྲ་ཙི་ཏྲ་ཀ །པི་པི་ལིང་དང་ཟུར་པ་མ་
ནུ་ཡི། །ཕྱེ་མ་མར་བསྐོལ་ཐོགས་མེད་འགྲོ་ནུས་འགྱུར། །བི་ཤ་ཙེ་དང་གཟུགས་འཁུམས་
གར་ཡོད་ངོས། །མཐེའུ་ཆུང་སྲིན་ལག་རྒྱབ་ཀྱི་རྒྱུས་པ་ལ། །སེར་པོ་སྣལ་མ་འདྲ་བ་ཡོད་དེ་
བཅད། །སྲ་འཐེང་ལ་སོགས་ཕྱི་མའི་རླུང་རྣམས་ཀུན། །རྒྱུ་ལས་བརྟགས་ལ་སྣུམ་དུགས་
གཏར་བ་དང༌། །སྦྱང་དང་བྱུག་སོགས་ཅི་རིགས་སྦྱར་བར་བྱ། །རྒྱ་སྤོས་རུ་རྟ་སུག་སྨེལ་ཤུ་
དག་གཉིས། །ཙན་དན་དམར་པོ་རྡོ་དྲེག་སྤང་སྤོས་དང༌། །ཤུ་ཏི་ཏིལ་མར་ཀ་ར་སྦྱར་བའི་
མར། །རྩ་འཛིན་ཤིང་རེངས་སྲ་འཐེང་ལ་སོགས་པའི། །རླུང་ནད་ལྷག་མ་མ་ལུས་འཇོམས་
པར་བྱེད། །སྨྱོ་རྗེད་སྐྲན་དང་རླིག་བླུགས་སེལ་བར་འགྱུར། །གནས་ཀྱི་སྒོ་ནས་བཅོས་པར་བྱ་
བ་ནི། །ཤ་པགས་ལ་ཞུགས་བསྐུ་མཉེ་བྱུགས་དུགས་བྱ། །ཚིལ་ཞུགས་བརླ་རེངས་ཕྱུག་པོའི་
རླུང་ལྟར་གསོ། །རུས་དང་རྐང་ཞུགས་སྣུམ་དུགས་བྱ་བ་དང༌། །སྣུམ་བཞི་བཟའ་དང་བྱུག་
དང་འཇམ་རྩི་བཏང༌། །བཅུད་ལ་རླུང་ཞུགས་ད་བྱིད་སྐྱིན་གོར་སྦྱར། །རྒྱུས་པ་ཚིགས་དང་
རྩར་ཞུགས་སྣུམ་དུགས་དཀྲི། །ཆུ་བ་འཁུམས་ལ་མོན་སྲན་དྲེའུ་དང༌། །རྒྱམ་ཚྭ་ཏིལ་མར་སྦྱར་
ཏེ་བསྐོལ་བ་བྱུག །ཁྲག་ལ་རླུང་ཞུགས་སྣུམ་འཆོས་བྱས་ལ་གཏར། །ཁྲག་ཟགས་རྗེས་སུ་
ཚོར་མེད་གྱུར་པ་ལ། །དུད་པ་རྒྱམ་ཚྭ་ཏིལ་མར་སྦྱར་བས་བྱུག །དོན་བབས་སྙིང་རླུང་ཤིང་
ཀུན་གསུམ་ཐང་བཏང༌། །འབྲས་བུའི་མར་དང་སྨན་ཆེན་སྨན་མར་སྦྱར། །གློར་ཞུགས་སྟར་
བུ་(ཅུ་གང་ཟི་ར་དཀར་པོ་སུག་སྨེལ་ཏེ་)བཞི་པའི་ཕྱེ་མ་དང༌། །ཨ་རུ་འབྲི་རྐང་སུར་ཕུག་སྨན་མར་སྦྱར། །
མཆིན་ཞུགས་ཏིང་ཁྲོལ་མཆིན་པ་སྤོད་བྲན་བཏང་། །མཆེར་ཞུགས་ཚ་བ་གསུམ་དང་ཞུན་
མར་སྦྱར། །མཁལ་ཞུགས་རྩ་བ་ལྔ་དང་གཟེ་ཆང་བྱིན། །ཀུན་ལ་རྒྱབ་ཀྱི་ཚིགས་པའི་རང་
གསང་བསྲེག །ཟས་དང་མ་ཞུའི་གནས་ཞུགས་སྐྱུགས་སྨན་བཏང༌། །འཇུ་བྱེད་མེ་དྲོད་སྐྱེད་
25-1-109


བྱེད་ཟས་སྨན་སྦྱར། །ཞུ་གནས་འཇམ་རྩི་ཟས་སྔོན་ཞུན་མར་བཏང༌། །མཁྲིས་ཞུགས་(ལ་རྒད་
མ་ཁ་གསེར་གྱི་མེ་ཏོག་ཏིག་ཏ་རྒྱམ་ཚྭའི་ཕྱེས་)དྲོད་བསྐྱེད་བཤལ་དང་མེ་བཙས་བཅོས། །མངལ་དུ་རླུང་
ཞུགས་མོ་ནད་ལྟ་བུར་གསོ། །བཤང་ཞུགས་དཎྜའི་མར་སྦྱར་འཇམ་རྩི་བཏང༌། །གཅིན་
ཞུགས་སྣུམ་ལྡན་དུགས་དང་ཆུ་སྨན་སྦྱར། །མགོར་ཞུགས་བྱུག་པ་མེ་བཙའ་མགོ་ཁྲོལ་བསྟེན། །
རྣ་བར་ཞུགས་ན་དུགས་བྱ་ཞུན་མར་དགང༌། །མིག་དང་སྣར་ཞུགས་ཞུན་མར་དྭངས་མ་བླུག །
སོར་ཞུགས་དུགས་དང་མེ་བཙའ་བཅུད་བཞིའི་ཐང༌། །དབང་པོ་ཀུན་ལ་འབྲས་བུའི་སྨན་
མར་མཆོག །ལུས་ཀུན་ལ་ཞུགས་སྤྱི་བཅོས་རང་གིས་འཐེམས། །དེ་ནས་ནང་ཚེགས་རླུང་
ལྔའི་སྒོས་བཅོས་ལ། །སྲོག་འཛིན་རླུང་ལ་ཏིལ་མར་བསྐུ་མཉེ་བྱ། །སྣ་སྨན་འཇམ་པོ་བཏང་
ལ་རླུང་གསང་བསྲོ། །སྟོད་རྒྱུ་བྲང་དང་སྡུད་སྒོར་སྣུམ་གྱིས་བདུག །སྨན་མར་རུས་ཐང་བཏང་
ཞིང་གསང་(བདུད་སྒོ བྲང་། ཏོང་རུས་) གསུམ་བསྲེག །ཁྱབ་བྱེད་ཛཱ་ཏི་ཞོ་ཤའི་སྨན་མར་བཏང་། །
བུར་ཆང་ལོ་ཤ་ཤ་ཆེན་ཚ་བ་བསྟེན། །མེ་མཉམ་དུགས་བྱ་ཤིང་ཀུན་(སྒ་ཁ་རུ་ཚྭ་སེ་འབྲུའི་)ཅུར་
ནིས་སྦྱར། །བཅུ་གསུམ་པ་དང་མེ་མཉམ་གསང་ལ་བསྲེག །ཐུར་སེལ་རླུང་ལ་འཇམ་རྩི་བསྐུ་
མཉེ་དུགས། །དྲོད་བཅུད་ཟས་བསྟེན་བཅུ་དྲུག་མདོ་རུ་བསྲེག །མཁྲིས་པར་འདྲེས་ལ་སྦྱོངས་
དང་བསིལ་བཅུད་བསྟེན། །བད་ཀན་འདྲེས་ལ་སྐྱུགས་དང་ཡང་དྲོ་སྦྱར། །ཀྱེ་དྲང་སྲོང་ཆེན་པོ་
མ་ཡེངས་གུས་པས་ཉོན། །རླུང་ནད་མདོར་བསྡུས་བཅོས་ཐབས་འདི་ལྟར་བྱ། །རེངས་
འཁུམས་སྣུམ་འཆོས་བྱ་ཞིང་ལུམས་ཀྱིས་གདུལ། །སྐམས་པ་སྣུམ་དུགས་རྩ་བཤལ་ཆུ་
ལུམས་བྱ། །སྦོས་པ་སྣུམ་འཆོས་རྗེས་ལ་བཤལ་གྱིས་སྦྱང་། །འཕྱེས་པ་སྣུམ་འཆོས་སྤངས་ལ་
རྩུབ་བཅོས་བྱ། །གཟེར་བ་སྣུམ་ལྡན་དུགས་དང་མེ་ཡིས་བཅག །འཕྱོས་པ་བཅུད་བཞིའི་
སྨན་མར་མེ་ཐུར་མནན། །ལྐུགས་པ་སྣུམ་འཆོས་འཇམ་རྩི་(དང་གཙུག་ཨན་སྟོང་སོར་མོ་ཉི་ཤུ་སྲོག་རྩ་
མྱོས་བྱེད་རྣམས་ལ་)མེ་བཙས་བསལ། །མགོ་རླུང་ཏིལ་མར་ཤིང་ཀུན་སྣ་སྨན་བཏང༌། །སོ་མ་ར་ཛ་
25-1-110


སྒོག་སྐྱ་ཁ་རུ་ཚྭ། །མར་སྦྱར་བྱུགས་ལ་གྲོད་གཏུམས་དཀྲིས་མས་བསྡམ། །སྒ་དང་ཤིང་ཀུན་
བསྡུས་པའི་རླངས་ལུམས་བྱ། །སྣ་ཚོགས་རུས་ཁུ་ལོ་མར་ལུག་ཚིལ་རྐང༌། །བུ་རམ་ཤ་ཁུར་
སྦྱར་བསླུད་རྔུལ་དབྱུང་བྱ། །ལྟག་ཁུང་ཁ་གསུམ་ཚིགས་པ་གསུམ་པ་བསྲེག །སྙིང་རླུང་ཞོ་ཤ་
གསུམ་དང་འབྲས་བུ་གསུམ། །འབྲི་མར་བུ་རམ་སྦྱར་བའི་སྨན་མར་ལ། །ཚ་བ་གསུམ་དང་
ཚྭ་སྣ་གསུམ་བཏབ་བཏང༌། །རུས་སྣའི་ཞག་དང་ལོ་མར་བུ་རམ་ལ། །དྲོད་སྨན་ཚྭ་སྣ་ཚོགས་
ཚད་སྦྱར་ལ་བཏང༌། །དྲུག་བདུན་དཀར་ནག་མཚམས་དང་བྱ་མིག་བསྲེག །གློ་རླུང་སྟར་བུ་ཅུ་
གང་ཟི་ར་དཀར། །སུག་སྨེལ་ཁ་རུ་ཚྭ་དང་ཀ་ར་སྦྱར། །བཟང་པོ་བཞི་དང་ཚྭ་གསུམ་སྦྲང་སྦྱར་
བཏང༌། །སེ་འབྲུ་བཞི་དང་ནཱ་ག་ཟི་ར་དང༌། །པ་ཏྲ་འུ་སུ་ལ་ལ་ཕུད་དང་སྒ། །ན་ལེ་ཤམ་དང་
ཀར་སྦྱར་གསར་འཇམ་དབུལ། །བཞི་ལྔ་བྱ་རོག་མིག་དང་སྐེ་སྟོང་བསྲེག །ཡིབ་མ་གར་ཆང་
མི་བཏང་གསར་ཤ་དང༌། །གྲོ་ཆང་སྲོ་ལོས་བསིངས་དང་གསར་འཇམ་བཏང་། །མཆིན་རླུང་
མཆིན་སྣ་སྐམས་ཕྱེའི་སྨན་མར་ལ། །ཁ་རུ་ཚྭ་དང་གུར་གུམ་བཏབ་ལ་བཏང༌། །བྲག་ཞུན་
སྨན་མར་འབྲི་རྐང་སྨན་མར་སྦྱར། །རུས་སྣའི་ལུམས་བྱ་དགུ་པ་རྩིབ་སྟེང་བསྲེག །ཕོ་བའི་
རླུང་ལ་བུ་རམ་ཏིང་ཁྲོལ་བཏང༌། །སེ་འབྲུ་ཤིང་ཚ་དྲོད་གསུམ་ཚྭ་སྣ་གསུམ། །ཟི་ར་དཀར་
ནག་གཉིས་དང་ཚ་བ་གསུམ། །ལ་ལ་ཕུད་དང་བུ་རམ་ཆང་གིས་དབུལ། །བུར་ཆང་སྦྱར་
བཏང་ཕོ་དཀྱིལ་བཅུ་གསུམ་བསྲེག །ལོང་གི་རླུང་ལ་སེ་འབྲུ་ཚ་བ་གསུམ། །ཁ་རུ་ཚྭ་དང་གྲོ་
མ་འབོས་ལོ་དང༌། །བུ་རམ་སྦྱར་བཏང་སྒོག་སྐྱའི་སྨན་མར་བྱིན། །སླེ་ཏྲེས་ཀཎྜ་ཀ་རི་ཤུ་དག་
དང༌། །བཙོད་དང་ཛཱ་ཏི་སུག་སྨེལ་པི་པི་ལིང༌། །ཡུང་བ་ཤུ་མོ་ཟ་དང་ར་མར་གྱི། །འཇམ་རྩི་
བཏང་ཞིང་ལོང་ཕུགས་གཡས་གཡོན་བསྲེག །མཁལ་རླུང་མགོ་ཚོད་ཤུ་མོ་ཟ་བཏབ་བཏང༌། །
རུས་སྣའི་ཁུ་བ་བུ་རམ་སྦྱར་བསྡུས་སམ། །བོང་ཤ་སྲམ་ཤ་བུར་ཆང་ཟན་ཆང་དང༌། །རྩ་བ་
ལྔ་ཡི་མར་སྦྱར་བཅུ་བཞི་བསྲེག །དེ་ལ་སོགས་ཏེ་རླུང་ནད་དུ་མ་ཡང༌། །ནད་གཞན་འདྲེས་ན་
25-1-111


དེ་ཡི་ཁ་འཛིན་གཅེས། །རྐྱང་པ་རྣམས་ལ་སྤྱི་བཅོས་ཁོག་ཕུབ་ལ། །རང་རང་ནད་ཀྱི་གསོ་
ཐབས་མདེ་ཁར་གདགས། །སྣུམ་བཅུད་དྲོད་ཀྱིས་མི་སེལ་རླུང་གཞན་མེད། །རླུང་ནི་ཚ་གྲང་
གཉིས་ཀའི་ཟུང་དུ་འཇུག །མཁྲིས་ཚད་འབུད་ཅིང་བད་ཀན་གྲང་བ་འཁྱག །དམུ་འོར་སྐྱ་
རྦབ་གཡོ་ཞིང་སྐྲན་རྣམས་སྒོང་། །བསགས་པའི་ནད་རྣམས་ཐམས་ཅད་རླུང་གིས་སློང༌། །
བྱེར་བའི་ནད་ཀུན་སྣ་འདྲེན་རླུང་གིས་བྱེད། །ཚད་གཞུག་ཕལ་ཆེར་ཐོར་བུའི་རླུང་གིས་
འབུད། །དེ་ཕྱིར་རླུང་གི་ནད་ལ་བྱ་ར་གྱིས། །ཞེས་གསུངས་སོ། །བདུད་རྩི་སྙིང་པོ་ཡན་ལག་
བརྒྱད་པ་གསང་བ་མན་ངག་གི་རྒྱུད་ལས་རླུང་གི་ནད་གསོ་བའི་ལེའུ་སྟེ་གཉིས་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག མཁྲིས་པའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྗེས་
བཅད་དྲུག་གིས་བསྟན། །རྒྱུ་ནི་ནད་གཞི་སྣོད་ཀྱི་མཁྲིས་པ་ལ། །སློང་རྐྱེན་གནད་དུ་མཚོན་
བསྣུན་འགྲམས་པ་དང༌། །ཟས་སྐོམ་ཚ་སྐྱུར་མི་འཕྲོད་མ་ཞུ་དང༌། །ཞེ་སྡང་མི་གཙང་ལྷ་
བསྣོལ་འདྲེ་གཡོས་པས། །གསོ་དཀའ་མཁྲིས་ནད་བཞི་བཅུ་བདུན་དུ་འགྱུར། །དེ་ལ་དབྱེ་བ་
སྤྱི་དང་བྱེ་བྲག་གཉིས། །སྤྱི་ལ་རིགས་དང་གནས་ཀྱིས་དབྱེ་བ་གཉིས། །རིགས་ཀྱི་སྒོ་ནས་
དབྱེ་ན་རྣམ་བཞི་སྟེ། །ནད་གཞིའི་མཁྲིས་པ་ཐང་ལ་ལྷགས་པ་དང༌། །མེ་དྲོད་མཁྲིས་པ་གཞན་
གྱི་གནས་གྱུར་དང༌། །སྣོད་ཀྱི་མཁྲིས་པ་ཁ་ལུད་ཁ་ཤོར་དང༌། །ཐུན་མོང་མཁྲིས་པ་རྩ་རུ་རྒྱུ་
བའོ། །དང་པོ་རྐྱེན་བཞིས་མཁྲིས་པ་འཕེལ་བ་སྟེ། །ཚད་པ་གསོ་བའི་སྐབས་སུ་རྒྱས་པར་
སྟོན། །གཉིས་པ་རླུང་དང་མ་ཞུ་བད་ཀན་ཁྲག །འཇུ་བྱེད་མཁྲིས་པའི་ཡུལ་དུ་ཞུགས་པ་ཡིས། །
མཁྲིས་པའི་གོ་ཕྲོགས་ཕྱི་རུ་བྱེར་བའོ། །གསུམ་པ་ཕོ་མཆིན་སྐྲན་གྱིས་མཁྲིས་པ་བཅར། །
ཡང་ན་མཁྲིས་པ་རང་ལ་སྐྲན་ཞུགས་པས། །མཁྲིས་པ་དབང་མེད་ཕྱི་རུ་ཁ་ལུད་དམ། །
འགྲམས་སམ་རླུང་གིས་མཁྲིས་ཁ་ཤོར་བའོ། །བཞི་པ་སྣོད་མཁྲིས་འཇུ་བྱེད་གང་ཡང་རུང༌།  །
25-1-112

 
འགྲམས་འཁྲུགས་རིམས་རྐྱེན་མཁྲིས་པ་འཕེལ་བའམ། །ཟས་སྤྱོད་རྐྱེན་གྱིས་འཕེལ་ཏེ་རྩར་
ལུད་པས། །ཤ་སེར་མིག་སེར་རྣམ་པ་གཉིས་སུ་འགྱུར། །མཁྲིས་ནད་བཅུ་གསུམ་རིགས་ཀྱི་
དབྱེ་བར་འདོད། །མདོར་བསྡུས་ཐོག་མཐའ་རང་རྒྱུད་ཚ་བའི་ནད། །བར་པ་གཉིས་པོ་གཞན་
དབང་ལྡན་པ་ཡིན། །གནས་ཀྱིས་དབྱེ་ན་པགས་ལ་གྲམ་པ་དང༌། །ཤ་ལ་རྒྱས་དང་རྩ་རུ་རྒྱུ་བ་
དང་། །རུས་ལ་ཞེན་དང་དོན་བབས་སྣོད་དུ་ལྷུང༌། །དབང་པོ་ལྔ་ལ་མེ་ཏོག་ཤར་བའོ། །དོན་
ནི་གློ་སྙིང་མཆིན་མཆེར་མཁལ་མ་ལྔ། །སྣོད་ནི་ཕོ་ལོང་རྒྱུ་མ་ལྒང་པ་མངལ། །དབང་པོ་མགོ་
མིག་རྣ་བ་སྣ་ལྕེའོ། །དེ་ལྟར་བཅུ་དགུ་གནས་ཀྱི་དབྱེ་བར་འདོད། །བྱེ་བྲག་འཇུ་བྱེད་སྒྲུབ་བྱེད་
མདངས་སྒྱུར་དང༌། །མཐོང་བྱེད་མདོག་གསལ་རྣམ་ལྔར་གྱུར་པའོ། །རླུང་དང་བད་ཀན་
འདྲེས་པས་བཅུ་རུ་འགྱུར། །ཀུན་ཀྱང་མདོར་བསྡུས་ཚ་གྲང་གཉིས་སུ་འདུས། །ཁྲག་དང་
མཁྲིས་པ་འཕེལ་བ་ཚ་བ་སྟེ། །མ་ཞུ་བད་རླུང་ཡུལ་ཕྲོགས་གྲང་བའོ། །དེ་ཡི་རྟགས་ལ་སྤྱི་དང་
བྱེ་བྲག་གཉིས། །སྤྱི་རྟགས་མིག་སྤྲིན་བཞིན་པགས་ཆུ་མདོག་སེར། །ལྟོ་ཆེ་མཁྲིས་པ་འཁྲུ་
སྐྱུག་ཟ་འཕྲུག་བྱེད། །དེ་ཡང་མཁྲིས་པ་ཚ་བ་སྐོམ་དད་ཆེ། །རྩ་གྲིམས་ཆུ་ཡི་རླངས་ཆེ་ཀུ་ཡ་
མཐུག །ཁ་ཁ་ལུས་ཚ་གཉིད་ཆུང་བཤང་བ་སེར། །ཤ་ཆང་མར་རྙིང་བུ་རམ་དྲོད་བག་གནོད། །
མཁྲིས་པ་གྲང་བ་དེ་ལས་གོ་ལོག་སྟེ། །མེ་དྲོད་འཇུ་སྟོབས་ཆུང་ལ་བཤང་བ་དཀར། །བྱེ་
བྲག་ཚ་བ་རྒྱུ་བརྟག་གོམས་པས་བརྟག །རླུང་གི་གནས་གྱུར་སྦོ་འཁྲོག་རྟུག་པ་སྐམ། །གཡལ་
མང་དྲོད་བཅུད་ཟོས་རྗེས་བདེ་བར་མངོན། །མ་ཞུ་བད་ཀན་གང་གི་གནས་གྱུར་ཀྱང༌། །ལུས་
ལྕི་གཉིད་ཆེ་སྒྱིད་སྐྱུར་འདུག་སྙིང་འདོད། །ཟས་སྐོམ་སྤྱོད་ལམ་བསིལ་གནོད་དྲོ་ན་བདེ། །
ཁྱད་པར་དྲི་མ་སྐྱ་ལ་གསོབ་པ་ཡིན། །ཁྲག་གི་གནས་གྱུར་སྨུག་པོའི་རྒྱུ་བྱས་ཏེ། །དྲི་མ་ནག་
སྨུག་སྐམ་ལ་ཤ་རིལ་འདྲ། །མཆིན་པའི་སྐྲན་ནམ་མཆིན་པ་རྒྱས་པ་ཡིས། །མཁྲིས་ཡུལ་
ཕྲོགས་ན་མྱངས་པས་དངོས་སུ་གསལ། །ཕོ་བའི་སྐྲན་གྱིས་ཡུལ་ཕྲོགས་ཟས་སྐོམ་འཁྲེན།  །
25-1-113

 
མཁྲིས་པའི་སྟེང་དུ་སྲ་ཞིང་མནན་མི་བཟོད། །མཁྲིས་པ་རང་ལ་སྐྲན་ཞུགས་ལུས་ཤེད་ཆུང༌། །
ལུས་ཀྱི་མདོག་སེར་ཟ་འཕྲུག་དང་ག་འགག །བཤལ་དང་གཏར་ལ་ནད་ཐོན་བཅོས་སྐྱེད་
མེད། །ནད་དེ་འཆི་བདག་ཁ་རུ་ཚུད་དང་འདྲ། །ཁ་ཤོར་ཤེད་མེད་མཁྲིས་པ་འཁྲུ་སྐྱུག་བྱེད། །
མཁྲིས་པ་འགྲམས་སམ་འཁྲུགས་ཚད་མཁྲིས་པར་བབས། །རིམས་ནད་མཁྲིས་པར་བབས་
པའི་རྩར་རྒྱུག་གསུམ། །དེ་རྟགས་བཅོས་ཐབས་རང་རང་ལེའུར་བལྟ། །རང་བཞིན་ཟས་སྤྱོད་
རྐྱེན་གྱིས་མཁྲིས་འཕེལ་བའི། །རྩར་རྒྱུག་དག་ལ་ཤ་སེར་མིག་སེར་གཉིས། །མཁྲིས་པ་ཤ་
སེར་ཤེད་ཆུང་གཉིད་མི་ཐུབ། །ལུས་ལྕི་ཞོ་དར་ཆུ་སོགས་གང་ཡང་ཁ། །ཤ་མདོག་གསེར་
འདྲ་རྫས་དཀར་སེར་པོར་མཐོང༌། །སྔ་དྲོ་བསིལ་ཕེབས་བདེ་ལ་ཉིན་གུང་ན། །མཁྲིས་པ་
མིག་སེར་མིག་སྤྲིན་སེན་མོ་སེར། །ལུས་རྔུལ་ཉམ་ཆུང་ཁོང་ཚ་མིག་རུས་ན། །ཁ་ཟས་ཡི་གར་
མི་འོང་སྐོམ་དད་ཆེ། །སྐྱུག་པ་སྙམ་བྱེད་མིག་སྔར་སྔོ་དམར་མཐོང༌། །ཀུན་ཀྱང་ཡུན་རིང་རྒྱས་
ནས་སྨིན་པའི་དུས། །ཀྵ་ཡ་ནག་པོར་གྱུར་ནས་ཟ་འཕྲུག་བྱེད། །པགས་མདོག་སྔོ་ནག་སྐྲ་དང་
སྨིན་མ་འབྱི། །ཤེད་མེད་ཤ་སྐམ་སེན་མོ་ནག་ཐིག་ཆགས། །འདི་དུས་མཁྲིས་པས་ཤ་རུས་
ཐམས་ཅད་ཁྱབ། །གཤིན་རྗེའི་ཞགས་པས་ཟིན་པས་འཚོ་མི་འགྱུར། །འདི་ལ་བཅོས་ཐབས་
མི་བརྩམ་ཚོགས་གསོག་བསྐུལ། །མཁྲིས་པ་པགས་ལ་གྲམ་པ་ཟ་འཕྲུག་བྱེད། །ཤ་ལ་རྒྱས་
པ་ཤུ་བ་ཐོར་པ་འབྱུང༌། །ཕྲུགས་ན་ཆུ་སེར་ཁྲག་དང་མཁྲིས་པ་འཛག །རྩ་རུ་རྒྱུ་བ་ཚིགས་
གཞི་ཉྭ་གཞི་དང༌། །དྲོ་སར་ཟ་ཞིང་རྒྱས་ནས་ལུས་ཀུན་ཟ། །རྩ་མིག་མཁྲིས་པས་གང་ཕྱིར་
པགས་མིག་སེར། །གཏར་ན་ཁྲག་མེད་མཁྲིས་པ་ཟང་མར་འོང༌། །རུས་ལ་ཞེན་པ་ཚིགས་པ་
ཐམས་ཅད་ན། །ཁོལ་བུར་ན་ཞིང་ཤ་སྐམ་ཚིགས་ཐོག་སྐྲངས། །སྙིང་ལ་ཞུགས་ན་གློ་སྙིང་
སྟོད་མི་བདེ། །ལྕེ་སེར་གཉིད་ཆུང་སྙིང་ལ་གྲང་མོ་འདོད། །གློ་ལ་ཞུགས་ན་སྣབས་ལུད་སེར་
པོར་འོང༌། །མཆིན་པར་ཞུགས་ན་ཤ་སྔོ་མཆིན་སྟེང་ན། །མགོ་ན་མིག་ཚ་མཆིལ་མ་སྐ་ལ་
25-1-114


འདྲིལ། །མཆེར་པར་ཞུགས་ན་ལྕེ་ཁྲ་ཁྲག་རླན་འཁྲུ། །སྦོ་རྫིང་རྐང་པ་གཡོན་སྐྲངས་ལྷུ་ཚིགས་
ན། །མཁལ་མར་ཞུགས་ན་རྐང་པ་ལྕི་ལ་སྦྲིད། །མཁལ་རྐེད་ན་ཞིང་རྣ་རྒྱབ་སེར་པོར་འགྲོ། །
ཕོ་བར་ཞུགས་ན་མཁྲིས་པ་འཁྲུ་སྐྱུག་བྱེད། །ལོང་དང་རྒྱུ་མར་ཞུགས་ན་མཁྲིས་པ་འཁྲུ། །
ལྒང་པར་ཞུགས་ན་ཆུ་ཁ་སྲིའམ་སྙི། །མངལ་དུ་ཞུགས་ན་མཁྲིས་པ་འཛག་གམ་འདྲིལ། །
མགོ་ལ་ཞུགས་ན་འཚོགས་མ་གླད་པ་ན། །ཉི་མ་ཕོག་དང་ཞོ་འཐུངས་སྟོན་དུས་ལྡང༌། །མིག་
ཞུགས་མདོག་སེར་ཚ་ཞིང་མཆི་མ་མང༌། །རྣར་ཞུགས་ཟུག་ཆེ་ཚ་ལ་ཆུ་སེར་འཛག །སྣར་
ཞུགས་སྣབས་ཀྱི་མདོག་སེར་མཚུལ་པ་འགག །ལྕེ་ལ་ཞུགས་ན་ལྕེ་སེར་རོ་ཀུན་ཁ། །ཀུན་ལ་
མིག་ཆུ་སེར་ན་མཁྲིས་པར་བརྟག །བྱེ་བྲག་མཁྲིས་པ་ལྔ་ལས་འཇུ་བྱེད་ནི། །ནད་དུ་གྱུར་ན་
ལྕེ་སེར་སྐོམ་དད་ཆེ། །ཁ་ཟས་མི་འཇུ་དང་ག་འགག་པར་འགྱུར། །མདངས་སྒྱུར་ནད་གྱུར་ཆུ་
སེར་ཕོ་བ་ལྟེམ། །ལུས་པོ་ལྕི་ལ་ཤེད་ཉམ་ཆུང་བ་ཡིན། །སྒྲུབ་བྱེད་སྙིང་བཅུགས་དབུགས་
རྒོད་སྐོམ་དད་ཆེ། །དང་ག་མི་བདེ་ལུས་འདར་གློ་སྙིང་ཚ། །མཐོང་བྱེད་ནད་གྱུར་མགོ་ན་ཆང་
འཐུངས་གཟེར། །མིག་སེར་མིག་གིས་ཉེ་མཐོང་རིང་མི་མཐོང་། །མདོག་གསལ་ནད་གྱུར་
ལུས་ཀྱི་ཤ་དྲོད་ཆེ། །ཤ་པགས་སྔོ་ནག་ཚ་ལ་རྩུབ་པའོ། །རླུང་དང་བད་ཀན་གང་འདྲེས་དེ་
རྟགས་སྟོན། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་མཁྲིས་ནད་ཚ་གྲང་
གཉིས་སུ་བསྡུ། །གཉེན་པོ་སྨན་དཔྱད་ཟས་དང་སྤྱོད་ལམ་བཞི། །མཁྲིས་ནད་ཚ་བའི་སྨན་ནི་
ཏིག་ཏ་དང༌། །གསེར་གྱི་མེ་ཏོག་ཀྱི་ལྕེ་བ་ཤ་ཀ །བོང་ང་དཀར་པོ་བསྐོལ་གྲངས་ཐང་དུ་
བཏང༌། །དྲོད་ཆུང་འཇུ་བ་དཀའ་ན་དྲོད་སྨན་བསྣན། །དེ་འོག་གསེར་གྱི་མེ་ཏོག་ཏིག་ཏ་
གསུམ། །བོང་ང་དཀར་པོ་རུ་རྟ་པར་པ་ཏ། །རྩ་མཁྲིས་ཧོང་ལེན་སྐྱེར་ཤུན་ཀ་ར་སྦྱར། །ཕྱེ་མ་
ཆུས་འཕུལ་མཁྲིས་ནད་མ་ལུས་འཇོམས། །རུ་ཐུང་གཤའ་རིང་སྣོད་ཀ་གང་བབས་གཏར། །
དེས་མ་ཞི་ན་བསྡུ་སྦྱང་ཞི་གསུམ་སྦྱར། །དང་པོ་བྲག་ཞུན་ནིམ་པ་བ་ཤ་ཀ །སྤ་འབྲུམ་ཏིག་ཏ་
25-1-115


ཨ་བ་རྒུན་འབྲུམ་དང༌། །ལྕུམ་རྩ་ཤིང་མངར་སྐྱེར་ཤུན་ཀ་ར་སྦྱར། །གསེར་གྱི་མེ་ཏོག་བ་ཆུར་
སྦངས་ཁུས་དབུལ། །འདུས་རྟགས་མིག་ཆུ་བཞིན་མདངས་སྔར་བས་དཀར། །སྐོམ་སྙེག་དང་
ག་འགགས་ན་སྦྱང་བར་བྱ། །ཁྲོན་བུ་ཚ་ལ་གསེར་གྱི་མེ་ཏོག་ཕྱེ། །དྲི་ཆུར་སྦྱར་བཏང་བ་ཆུའི་
ལྕག་གིས་བསྐུལ། །འབྲས་ཐུག་རྗེས་གཅོད་ཟས་སྐོམ་བསིལ་བ་གཅེས། །དེ་རྗེས་ནད་ལྷག་
རོལ་དུ་བསད་པའི་ཕྱིར། །གསེར་གྱི་མེ་ཏོག་སྤྱི་ཞུར་ཀ་ར་སྦྱར། །བ་འོས་འཕུལ་བསྟེན་དེ་
རྗེས་ཏིག་ཏ་གསུམ། །གསེར་གྱི་མེ་ཏོག་ལྕགས་ཕྱེ་བོང་ང་དཀར། །སྐྲ་བཟང་བྱི་ཏང་ག་དང་
ཀ་ར་སྦྱར། །ཕྱེ་མ་གངས་ཆུས་འཕུལ་ལ་སུམ་ཡར་བཏང༌། །དེ་རྗེས་ཚ་བའི་ལྷག་མ་ལུས་སྲིད་
ན། །ཁྲག་མཁྲིས་ཤས་ཆེ་ཉི་ཤུ་རྩ་ལྔ་སྦྱར། །རླུང་ཤས་ཆེ་ན་ཏིག་ཏའི་སྨན་མར་ཤིས། །ཁ་
ཟས་བ་ལང་རི་དྭགས་ཤ་གསར་དང༌། །མར་གསར་ཁུར་མངས་འབྲས་དང་ནས་སྔོན་ཟན། །
གངས་ཆུ་བ་རའི་ཞོ་དར་ཆབ་ཚ་སོགས། །བསིལ་ལ་ཡང་བའི་ཟས་སྐོམ་བཏང་བར་བྱ། །
སྤྱོད་ལམ་མེ་ཉི་ཞེ་སྡང་དྲག་ཤུལ་སྤང༌། །ཡིད་འོང་སྙན་ཚིག་བསིལ་གནས་དལ་བར་འདུག །
ཁྲུས་བྱ་མགོ་བཀྲུ་གོས་གསར་དྲི་མེད་བགོ ། །གྲང་མཁྲིས་སྨན་ལ་སེ་འབྲུ་ཤིང་ཚ་དང༌། །སྐྱུ་
རུ་ར་དང་ནིམ་པ་སྟར་བུ་དང༌། །ཕག་རིལ་ཐལ་བ་བུར་དཀར་ཆུ་སྐོལ་དབུལ། །དེས་མ་ཞི་ན་
ཆ་མཉམ་བཞི་པའི་སྟེང༌། །ཏིག་ཏ་བསྣན་ལ་ཀར་སྦྱར་ཆུ་སྐོལ་དབུལ། །དེ་ཡིས་མཁྲིས་པ་
བད་ཀན་སྡུད་དང་འདྲུལ། །དེ་ནས་གསེར་གྱི་ཕུད་བུ་རི་ཤོ་བ། །རྒྱམ་ཚྭ་པི་པི་ལིང་དང་དུར་
བྱིད་རྣམས། །ཞིབ་བཏགས་འོ་མ་སྦྱར་བཏང་ནད་ཀུན་འདྲེན། །ཡང་ན་རྒྱམ་ཚྭ་ཨ་རུ་མཆུ་
སྙུང་དང༌། །ལྕུམ་རྩ་ཟངས་རྩི་བ་དང་པི་པི་ལིང༌། །གསེར་གྱི་མེ་ཏོག་ཐང་གི་རྒྱུན་སྦྱོངས་
བཏང༌། །རྗེས་ལ་ཟས་སྐོམ་དྲོད་ཀྱིས་བཅད་པ་གཅེས། །དེ་འོག་སེ་འབྲུ་སྒ་སྐྱ་པི་པི་ལིང༌། །
ཏིག་ཏ་གསེར་གྱི་མེ་ཏོག་དུག་མོ་ཉུང༌། །མ་ནུ་ཀ་ར་སྦྱར་བ་ཆུ་སྐོལ་དབུལ། །རྗེས་གཅོད་
ནད་རྣམས་མལ་དུ་འཇུག་པར་བྱེད། །གསོ་དཀའ་བརྒྱད་དགུ་བཅུ་གཉིས་ལོང་ཐེར་བསྲེག །
25-1-116

 
ཁ་ཟས་བ་ར་མཛོ་མར་གསར་པ་དང༌། །ལུག་ཤ་གསར་པ་ཉ་ཤ་ཤ་རྙིང་སྐམ། །ཟན་དྲོན་
སྒོག་སྐྱའི་ཚ་མིག་གསར་འཇམ་བསྟེན། །སྤྱོད་ལམ་རླན་གྲང་བསེར་བུས་གྲང་པ་སྤངས། །
སྐམ་སར་མི་རྔུལ་ཙམ་དུ་བཅག་པར་བྱ། །དེ་ནས་བྱེ་བྲག་བཅོས་ཐབས་ཐང་ལ་ལྷགས། །ཚ་
བ་སྤྱི་བཅོས་ལེ་འུར་བསྟན་པར་བྱ། །རླུང་གི་གནས་གྱུར་ལུག་ཤ་མར་གསར་ཆང་། །དྲོད་
བཅུད་ཟས་བསྟེན་སེ་འབྲུ་པི་པི་ལིང༌། །ཏིག་ཏ་ཤིང་ཀུན་བཅའ་སྒ་ཁ་རུ་ཚྭ། །ཨ་རུ་བུ་རམ་
སྦྱར་བ་ཆུ་སྐོལ་དབུལ། །མར་གསར་འཇམ་རྩི་བདུད་རྩི་ལྟ་བུར་བསྔགས། །ཚིགས་པ་དང་པོ་
དགུ་པ་མེ་ཡིས་བསྲོ། །མ་ཞུ་བད་ཀན་གང་གི་གནས་གྱུར་ཀྱང༌། །སེ་འབྲུ་བཞི་འམ་རྒོད་མ་
ཁ་ཡི་ཕྱེས། །མ་ཞུ་འཇུ་ཞིང་ཕོ་བའི་མེ་དྲོད་སྐྱེད། །དེ་རྗེས་སྐྱུགས་བཤལ་གང་འཚམ་གོང་
བཞིན་བསྟེན། །དེ་འོག་ཏིག་ཏ་གསེར་གྱི་མེ་ཏོག་དང༌། །རྒྱམ་ཚྭ་གོང་ལ་བསྣན་པས་ནད་
ལྷག་གདོན། །གསུམ་པ་བཅུ་གསུམ་མེ་མཉམ་ལྷེན་གསང་བསྲེག །ཁྲག་གི་གནས་གྱུར་བད་
ཀན་སྨུག་པོར་བཅོས། །རྗེས་ལ་བརྒྱད་དགུ་མེ་ཡིས་མནན་པ་གཅེས། །མདོར་ན་ཞུགས་པའི་
ནད་དེ་བཅོས་པ་ཡིས། །རང་གནས་མཁྲིས་པ་རང་སོར་འགྱུར་བ་ཡིན། །རྒྱུ་མ་བསལ་བར་
འབྲས་བུ་ཁེགས་མི་སྲིད། །མཆིན་པ་རྒྱས་སམ་མཆིན་སྐྲན་ཁ་ལུད་ན། །ཅུ་གང་བརྒྱད་སྦྱར་དེ་
རྗེས་རུ་ཐུང་ངམ། །སྣོད་ཀ་གཤའ་རིངས་མང་གཏར་ཁྲག་སྟོབས་དབྲི། །དེ་འོག་སྦྱངས་ཏེ་མེ་
ཡིས་བཅད་པར་བྱ། །སྐྲན་གྱི་ཁ་ལུད་འགྲོན་བུའི་ཐལ་བ་དང༌། །མདའ་རྒྱུས་ཤུ་དག་སྤྱང་ཚེར་
རྒྱམ་ཚྭ་དང་། །ཐལ་སྨན་སྦྱར་བའི་རིལ་བུས་བཤིག་ལ་སྦྱང༌། །རུ་ཐུང་གཤའ་རིངས་ཅུང་ཟད་
གཏར་བར་བྱ། །རྗེས་ལ་ལྷེན་གསང་དགུ་པ་ཁ་གསུམ་བསྲེག །མཁྲིས་སྐྲན་མི་དང་ཕག་བྲུན་
བསྲེགས་ཐལ་ལ། །ཀ་ར་སེ་འབྲུ་ལྔ་སྦྱར་ཆུ་སྐོལ་དབུལ། །སྐབས་སུ་ཏིག་ཏ་བརྒྱད་སྦྱར་ཅུང་
ཟད་གཏར། །རྗེས་སྤྱད་བརྒྱད་དགུ་བཅུ་གཉིས་ཕོ་གསང་བསྲེག །མཁྲིས་པ་ཤ་སེར་ཏིག་ཏ་
དུག་མོ་ཉུང༌། །གསེར་གྱི་མེ་ཏོག་ཧོང་ལེན་བ་ཤ་ཀ །བོང་ང་དཀར་པོ་བ་ལེ་ཀ་ཐང་བཏང༌།  །
25-1-117

 
རྩེ་ཆུང་དྲུག་འགོ་གཤའ་རིངས་གསུམ་ག་གཏར། །ཏིག་ཏ(དུག་མོ་ཉུང་ཀྱི་ལྕེ་དུར་བྱིད་)འི་བཤལ་བྱ་
ཕྱི་རྗེས་བསིལ་ཤས་བཅད། །གུར་གུམ་བདུན་པ་སྦྱར་བཏང་ཞོ་དཀྲུགས་སྦྱིན། །མཁྲིས་པ་
མིག་སེར་ཏིག་ཏའི་གྲང་ཐང་བཏང༌། །འབྲས་བུ(གསུམ་དུར་བྱིད་དོང་ག་ལྕུམ་རྩ་ཀྱི་ལྕེ་རྒུན་འབྲུམ་ཧོང་ལེན་
བོང་ང་སླེ་ཏྲེས་)འི་ཐང་གིས་མཁྲིས་ཚད་འོར་དུ་སྐྱུར། །མཆིན་མཁྲིས་འདོམ་རྩ་རྩེ་ཆུང་གཤའ་
རིངས་གཏར། །སླེ་ཏྲེས་ཏིག་ཏ་སྒ་སྐྱ་ཨ་རུ་ར། །ཧོང་ལེན་དུག་མོ་ཉུང་དང་ཀ་ར་སྦྱར། །ག་
བུར་(ཅུ་གང་གུར་གུམ་ཙན་དན་བ་ཤ་ཀ་ཧོང་ལེན་པདྨ་གེ་སར་ཏེ་)བདུན་པ་ཀ་ར་སྦྱར་བ་བཏང༌། །མཁྲིས་པ་
ཤ་པགས་གཉིས་ལ་རྒྱས་པ་ལ། །ཁ་ལུད་ལ་སོགས་ནད་གང་ཡིན་ཡང་རུང༌། །རྒྱ་སྤོས་སྤང་
སྤོས་བྲག་སྤོས་ཨ་རུ་ར། །ཤུག་པ་ལྕ་བ་ཏང་ཀུན་བ་ལུ་དང༌། །ཤུ་དག་རུ་རྟ་བ་ཆུར་སྦྱར་
བའམ། །ཡང་ན་སྔོན་བུ་སྲུབ་ཀ་ཞོ་སྦྱར་བྱུག །དེས་མ་སོས་ན་ཟོ་མར་སྒོག་སྐྱ་ཚ། །ཆུ་དྲོན་
བཀྲུས་རྗེས་བྱུགས་ལ་ཉི་མར་བསྲེག །སེན་མོས་བྲད་པས་མཁྲིས་པ་ཟང་མར་ཐོན། །ཤུག་
ཚེར་སྤ་མ་སྲད་མའི་ལོ་མ་གསུམ། །ཚྭ་སྦྱར་བྱུགས་བསྲེགས་སེན་མོས་བྲད་ཅིང་བཞར། །ཡང་
ཡང་བསྐྱར་བས་ཆུ་སེར་རྩད་ནས་འདོན། །དེས་ཀྱང་མ་སེལ་དུར་བྱིད་སྔོན་བུ་དང༌། །ཨ་རུ་
ར་གསུམ་བསྡུས་པའི་དྭངས་མ་ལ། །ཆུ་སེར་སྨན་གསུམ་བཏབ་པའི་རྒྱུན་སྦྱོངས་བྱ། །མཆིན་
མཆེར་ཆུ་སེར་མཁྲིས་རྩ་མང་དུ་གཏར། །ཆུ་ལུམས་བྱས་རྗེས་སེང་ལྡེང་སྨན་མར་ཕན། །རྩར་
ཞུགས་ཏིག་ཏ་དུག་ཉུང་བ་ལེ་ཀ །བ་ཤ་ཀ་དང་ཀྱི་ལྕེ་གསེར་མེ་ཏོག །འོམ་བུ་ཏིག་ཏའི་ཐང་
བཏང་རྩ་མང་གཏར། །དེ་འོག་སྦྱངས་རྗེས་ཉི་ཤུ་རྩ་ལྔ་སྦྱར། །རུས་ལ་ཞེན་ན་ཏིག་ཏ(གསུམ་དང་
འབྲས་བུ་གསུམ་ཁྲོན་བུ་ལྕུམ་རྩ་སྟབ་སེང་བསྡུས་པ)འི་རྒྱུན་སྦྱོང་བཏང༌། །ཉི་ཤུ་རྩ་ལྔ་མཁྲིས་སྨན་ཁ་བསྒྱུར་
སྦྱར། །ཁ་ཟས་བསིལ་བསྟེན་ཆུ་ལུམས་མཆོག་ཏུ་བསྔགས། །ཤ་ཁྲག་རྒྱུས་པ་སྐམས་པ་གསོ་
བའི་ཕྱིར། །ག་བུར་ཙན་དན་དཀར་དམར་གེ་སར་གསུམ། །ཨུཏྤལ་བ་མར་ཀར་སྦྲང་ལྡེ་གུ་
བཏང༌། །མདོར་ན་མཁྲིས་པ་ཕྱིར་བྱེར་ཆུ་སེར་བཅོས། །དོན་ལྔར་མཁྲིས་པ་ཞུགས་པའི་སྤྱི་
25-1-118


སྨན་དུ། །ཏིག་ཏ་གསུམ་དང་གསེར་གྱི་མེ་ཏོག་དང་། །དུག་ཉུང་རྒུན་འབྲུམ་ཀྱི་ལྕེ་བོང་ང་
དཀར། །སྙིང་ལ་ཛཱ་ཏི་རུ་རྟ་ཨ་ག་རུ། །གློ་ལ་ཤིང་མངར་ཅུ་གང་ཨ་ཀྲོང་བསྣན། །མཆིན་པར་
བྲག་ཞུན་གུར་གུམ་བ་ཤ་ཀ །མཆེར་པར་རུ་རྟ་སེ་འབྲུ་པི་པི་ལིང༌། །མཁལ་མར་ཤུག་ཚེར་
སུག་སྨེལ་དམར་པོ་གསུམ། །ཀ་ར་སྦྱར་བཏང་རང་རང་རྩ་ལ་གཏར། །ཚ་བ་ཆོམས་ནས་
ཚིགས་གསང་མེ་ཡིས་བསྡམ། །སྣོད་ལྷུང་གང་ཡང་བཤལ་ལས་ལྷག་པ་མེད། །མགོ་ལ་ཁ་
ལུད་བཤལ་སྐྱུགས་གཏར་བ་དང་། །(ཏིག་ཏ་བརྒྱད་པའི་)ཕྱེ་མ་ཆུ་ལྕག་(སྡུད་སྒོ་གསུམ་ལ་)མེ་བཙའ་
(འབྲས་བུ་གསུམ་གྱི་)སྨན་མར་བཅོས། །མིག་ལ་དཔྲལ་རྩ་གཏར་ཞིང་སྐྱེར་ཁན་བྱུག །རྣ་བར་རུ་རྟ་
སྲན་མའི་མེ་ཏོག་དང༌། །གསེར་གྱི་མེ་ཏོག་ཨར་བར་ཁུ་བ་བླུག །སྣ་ལ་སྣ་སྦྱོང་བཏང་རྗེས་
གུར་གུམ་བླུག །ལྕེ་ལ་སྒབ་རྩ་གཏར་དང་མངར་བས་དགང༌། །ཁྱད་པར་མཁྲིས་པ་འཇུ་བྱེད་
རྣམ་གྱུར་ན། །རྒྱམ་ཚྭ(གསུམ་པ་)འི་ཐང་བཏང་གསེར་ཕུད་སྐྱུགས་ཀྱིས་དྲངས། །མདངས་སྒྱུར་
བཤལ་རྗེས་རྒོད་མ་ཁ་ཕྱེ་ལ། །ཏིག་ཏ་བསྣན་བཏང་མཁྲིས་རྩ་མང་དུ་གཏར། །སྒྲུབ་བྱེད་ཨ་
གར་(ཛཱ་ཏི་གུར་གུམ་ཏིག་ཏ་ཨ་རུ་ར་ནཱ་ག་གེ་སར་ཀ་ར་དང་)དྲུག་སྦྱར་རྩེ་ཆུང་བསྣོལ། །མཁྲིས་པའི་རྩ་
གཏར་སྙིང་གར་ཆུ་ལྕག་བརྡེག །མཐོང་བྱེད་ནད་ལ་ཏིག་ཏའི་ལྡེ་གུ་སྦྱར། །གསེར་མདུང་
གཏར་ལ་ཆུ་ལྕག་མང་དུ་བརྡེག །མདོག་གསལ་ནད་ལ་ཙན་དན་གུར་གུམ་བྱུག །གསེར་གྱི་
མེ་ཏོག་ཙན་དན་སོ་མ་ར། །རྭ་གསུམ་ཀར་སྦྱར་ཆུས་བྲན་རྩ་ཕྲན་གཏར། །བད་རླུང་གང་
འབྲེལ་དེ་ཡི་གཉེན་པོ་བསྟེན། །སྤྱིར་ན་ནད་འདི་གདོན་ཆེ་བཅོས་སྔོན་དུ། །སྐུ་མདོས་སྔོ་
མདོས་གསེར་མདོས་ལ་སོགས་བསྔགས། །ཐ་མ་མི་ལྡོག་ཕྱི་རྗེས་བཅད་པའི་ཐབས། །ནད་
ལྷག་ཅུང་ཟད་ལུས་ཀྱང་ལོག་འགྱུར་བས། །བཤལ་གྱིས་རྗེས་བཅད་མི་དོམ་ཉ་མཁྲིས་
གསུམ། །གུར་གུམ་ཀ་ར་སྦྱར་ལ་བ་འོས་འཕུལ། །དེ་རྗེས་ཀ་ར་སྤྱི་ཞུར་གསེར་མེ་ཏོག །བ་
དམར་འོ་མས་འཕུལ་བས་ཕྱིར་མི་ལྡོག །བཅུ་གསུམ་བཅུ་དགུ་ཁ་གསུམ་མེ་ཡིས་བསྲེག །
25-1-119

 
ཟུངས་ངན་རླུང་ཆེ་ཏིག་ཏའི་སྨན་མར་སྦྱར། །ལོ་གཅིག་ཟས་སྤྱོད་གཟབ་པས་བརྟན་པར་
འགྱུར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་མཁྲིས་པའི་ནད་བཅོས་པའི་ལེའུ་སྟེ་གསུམ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག བད་ཀན་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་ལྔ་
ཡིས་བསྟན། །རྒྱུ་ནི་མ་རིག་གཏི་མུག་ལས་བྱུང་བའི། །བད་ཀན་ཐ་མལ་མཚན་ཉིད་བདུན་
ལྡན་དེ། །སློང་རྐྱེན་ཁ་མངར་ལྕི་བསིལ་སྣུམ་བསྟེན་དྲགས། །འགྲངས་རྗེས་དལ་བར་བསྡད་
དང་ཉིན་གཉིད་ལོག །རླན་སྟེང་ཉལ་དང་ཆུར་ཞུགས་གོས་སྲབ་འཁྱགས། །གྲོ་སྲན་གསར་
ཐོག་བསེར་ཅན་སུངས་པ་དང༌། །ར་སྐོམ་ཤ་རིད་ཚིལ་བུ་འབྲུ་མར་དང༌། །རྩི་མར་རུལ་པ་ལོ་
ཤུར་ལ་ཕུག་རས། །རི་སྒོག་ལ་སོགས་རྗེན་ཟས་མཐའ་དག་དང༌། །མ་ཚོས་པ་དང་ཚིག་པོ་
ཁེངས་པོའི་ཟས། །བ་རའི་འོ་མ་ཞོ་དར་ཆུ་གྲང་ཇ། །བཟའ་བཏུང་ཆེས་ཏེ་ཚད་ལས་འདས་
པའམ། །སྔ་མ་མ་ཞུ་ཕྱི་མ་ཟོས་པ་ཡི། །རྐྱེན་དེ་རྣམས་ཀྱིས་བད་ཀན་གྲང་ནད་སློང༌། །དབྱེ་བ་
རང་རྒྱུད་ཅན་དང་གཞན་རྒྱུད་ཅན། །རང་རྒྱུད་ཅན་ལ་སྤྱི་དང་བྱེ་བྲག་གཉིས། །སྤྱི་ལ་རིགས་
དང་གནས་ཀྱི་དབྱེ་བ་གཉིས། །རིགས་ཀྱི་སྒོ་ནས་དབྱེ་ན་བད་ཀན་ལྷེན། །བད་ཀན་ལྕགས་
དྲེག་མེ་དྲོད་ཉམས་པ་དང༌། །བད་ཀན་མགུལ་འགགས་གྲུམ་བུ་དཀར་པོ་དང་། །བད་ཀན་
འཇུ་སྐེམ་ནད་དང་རྣམ་པ་དྲུག །གནས་ཀྱི་དབྱེ་ན་པགས་གྲམ་ཤ་ལ་རྒྱས། །རྩར་རྒྱུ་རུས་ཞེན་
དོན་བབས་སྣོད་དུ་ལྷུང༌། །དབང་པོ་ལྔ་ལ་མེ་ཏོག་ཤར་བའོ། །དོན་ནི་གློ་སྙིང་མཆིན་མཆེར་
མཁལ་མ་ལྔ། །སྣོད་ནི་ཕོ་ལོང་རྒྱུ་མ་མཁྲིས་པ་དང༌། །ལྒང་པ་མངལ་དུ་ཞུགས་དང་རྣམ་པ་
དྲུག །དབང་པོ་མགོ་མིག་རྣ་བ་སྣ་ལྕེའོ། །བྱེ་བྲག་ནང་ཚེགས་རྟེན་བྱེད་མྱག་བྱེད་དང༌། །མྱོང་
བྱེད་ཚིམ་བྱེད་འབྱོར་བྱེད་རྣམ་པ་ལྔ། །རླུང་དང་མཁྲིས་པར་འདྲེས་པས་བཅུ་རུ་འགྱུར། །བཞི་
25-1-120


བཅུ་རྩ་གཅིག་རང་རྒྱུད་དབྱེ་བར་འདོད། །གཞན་རྒྱུད་ཅན་ལ་སེར་པོ་སྨུག་པོ་གཉིས། །དེ་ཡི་
རྟགས་ལ་སྤྱི་དང་བྱེ་བྲག་གཉིས། །སྤྱི་རྟགས་སློང་བ་རྒྱུ་ལ་བརྟག་པ་དང༌། །མཚན་ཉིད་
རྟགས་ཀྱི་སྒོ་ནས་བརྟག་པ་དང༌། །ཕན་གནོད་གོམས་པའི་སྒོ་ནས་བརྟག་པ་གསུམ། །དང་པོ་
སློང་བྱེད་རྒྱུ་ལས་བརྟག་བྱ་ན། །གོང་གི་བད་ཀན་སྐྱེད་པའི་ཟས་སྤྱོད་རྣམས། །བསྟེན་རྗེས་ན་
ན་བད་ཀན་ཡིན་པར་བཤད། །ནད་རྟགས་རྩ་ནི་བྱིང་གུད་ཞར་བ་དང༌། །ཆུ་ཡི་མདོག་དཀར་
དྲི་དང་རླངས་པ་ཆུང༌། །ཁ་མངལ་ལྕེ་རྙིལ་སྐྱ་ལ་མིག་དཀར་སྐྲངས། །སྣབས་ལུད་མང་ཞིང་
མགོ་འཐོམ་ལུས་སེམས་ལྕི། །དང་ག་མི་བདེ་དྲོད་མེད་འཇུ་སྟོབས་ཆུང༌། །མཁལ་རྐེད་མི་
བདེ་ལུས་སྦོ་ལྦ་བ་སྐྱེ། །ཙམ་པ་བད་ཀན་སྐྱུག་ཅིང་འཁྲུ་བ་དང༌། །གཏར་ན་ཁྲག་མདོག་
དམར་སྐྱ་འབྱར་བག་དང༌། །དྲན་པ་མི་གསལ་གཉིད་ཆེ་སྒྱིད་པ་སྐྱུར། །གཡའ་མཁྲང་ཚིགས་
དམ་ཤ་རྒྱས་ལས་མཐའ་རིང༌། །ནམ་ཞོད་སྲོད་དང་སྔ་དྲོ་ཟོས་ཐོག་ལྡང༌། །ཕན་གནོད་ཟས་
སྤྱོད་རྩུབ་ཡང་དྲོ་བ་འཕྲོད། །ལྕི་བསིལ་བསྟེན་པས་ཁྱད་པར་ན་ལས་གསལ། །བྱེ་བྲག་
རིགས་ཀྱི་སྒོ་ནས་བརྟག་པ་ལ། །དང་པོ་བད་ཀན་ལྷེན་ཞེས་བྱ་བ་ནི། །རྟེན་དང་མ་གོམས་མི་
འཕྲོད་ངོ་བོ་བཞིའི། །རྐྱེན་གྱིས་མ་ཞུ་བད་ཀན་བེ་སྣབས་འཕེལ། །བེ་སྣབས་ལྷེན་སྣའི་འོག་
ཏུ་ཚོགས་པ་ལ། །ལྷེན་ཞེས་བྱ་སྟེ་ཉམས་ལ་འདྲིལ་སྙམ་བྱེད། །ལྟོང་ངེ་ན་ལ་མནན་ན་འདྲིལ་
བ་མེད། །དང་ག་མི་བདེ་ཁ་ཟས་འཇུ་བ་དཀའ། །ཟོས་དུས་ན་ཞིང་ལྟོགས་ན་བདེ་བར་མངོན། །
ལྕགས་དྲེག་ཅེས་བྱ་གོང་ལྟར་མ་ཞུ་བས། །བེ་སྣབས་འཕེལ་ཏེ་ཕོ་བའི་ནང་སུལ་ལ། །ལྕགས་
དྲེག་ཆགས་པས་ཕོ་བའི་མེ་དྲོད་ཉམས། །སྒྲེག་འཚིང་ཕོ་བ་ཐམས་ཅད་ཧྲེམ་མེ་ན། །དང་ག་མི་
བདེ་ཤ་སྐམ་སྡོད་སྙིང་འདོད། །བེ་སྣབས་བད་ཀན་ཁ་ཟས་ཟོས་ཚད་སྐྱུག །བད་ཀན་མེ་
ཉམས་གྲང་རླུང་ཤས་ཆེ་ལ། །ཁ་ཟས་འཇུ་དཀའ་བསིལ་ཕྱོགས་ཚད་ལས་ཐལ། །གོས་སྲབ་
ལུས་གྲང་ཆུ་ཡི་ལས་མང་བྱས། །ཚད་གཞུག་བསིལ་ཐལ་སྦྱོངས་གཏར་དྲགས་པ་ཡིས།  །
25-1-121

 
མཁྲིས་པ་འཇུ་བྱེད་མེ་མཉམ་རླུང་མཐུ་ཉམས། །ལུས་ཀྱི་དྲོད་ཆུང་ཁ་ཟས་འཇུར་མི་འདོད། །
སྦོ་འཁྲོག་འཚིང་སྒྲེག་ཁ་ཟས་མ་སྨིན་འཁྲུ། །སྟོབས་ཆུང་ཤ་སྐམ་མཇུག་ཏུ་དམུ་སྐྲན་འགྱུར། །
བད་ཀན་མགུལ་འགགས་ཞེས་པ་ཕོ་བ་དང༌། །བྲང་དང་གློ་བར་བད་ཀན་རྒྱས་པ་ཡིས། །
བད་ཀན་རླངས་པ་གློ་ཡུ་མིད་པར་ཆགས། །དཔེར་ན་དོང་བའི་ལོགས་ལ་ཟོ་ཆགས་འདྲ། །
དེས་རྐྱེན་མིད་པ་འཆུས་ནས་ཟས་མིད་དཀའ། །དབུགས་རྔུབ་མི་བདེ་ཤ་སྐམས་ལུས་སྟོབས་
འཆོར། །ཟས་སྐོམ་མེད་པས་ཕོ་བ་ཆ་ནས་རུབ། །མཇུག་ཏུ་མིད་པ་འགགས་ནས་འཆི་བ་
ཡིན། །བད་ཀན་གྲུམ་བུ་དཀར་པོ་ཞེས་བྱ་བ། །མ་ཞུ་རང་གནས་བད་ཀན་འཕེལ་བ་ཡིས། །
ཕོ་བ་མཆིན་པ་གང་ཡིན་ཆ་མེད་ན། །ཁ་ཟས་ཅི་ཟོས་མི་ཞིམ་འཁྲུ་སྐྱུག་བྱེད། །ཉྭ་གཞི་མིག་
རུས་ན་ཞིང་ཆུ་ཚན་འབྱུང༌། །མཇུག་ཏུ་ཡན་ལག་ལ་བྱེར་གྲུམ་བུར་འགྱུར། །བད་ཀན་འཇུ་
སྐེམས་ཞེས་བྱ་འགྲངས་པ་མེད། །སྟོབས་ཆུང་ཤ་སྐམ་བསུས་པ་ཤིན་ཏུ་ཆེ། །བྱིན་པ་འདར་
ལ་སྒྱིད་པ་སྐྱུར་བ་ཡིན། །བད་ཀན་ལྤགས་གྲམ་དྲོད་བྲལ་བས་ལྡགས་གཡའ། །ཤ་རྒྱས་དྲོད་
མེད་སྦོ་སོབ་དྲེག་པ་ཆགས། །གཉིད་ཆེ་ལུས་ལྕི་སྒྱིད་སྐྱུར་རྨེན་བུ་འོང༌། །རྩར་ཞུགས་རྩ་རྒྱུད་
གྲང་བསིལ་གྱོང་ལ་ལྕི། །རུས་ལ་ཞེན་ན་རུས་པ་གྲང་ཞིང་ན། །ཚིགས་ཁ་གཡོ་ཞིང་བརྐྱང་
བསྐུམ་འགྲོ་འདུག་གྱོང༌། །སྙིང་ལ་བབས་ན་དྲན་པ་རྨོངས་པར་བྱེད། །དང་ག་མི་བདེ་སྟོད་
རྒྱངས་ལུས་སེམས་ལྕི། །གློར་བབས་སྟོད་རྒྱངས་མགོ་འཁོར་ཟས་མི་འདོད། །བེ་སྣབས་སྔོ་
ལྗོབ་མང་དུ་ལུ་བར་བྱེད། །མཆིན་པར་བབས་ན་ཟོས་རྗེས་མཆིན་པ་ན། །སྲིན་བུ་ལྡོག་ཅིང་
ཁ་ནས་ཆུ་སྔོན་འཛག །མཆེར་བབས་གཉིད་ཆེ་དབུགས་རྒོད་ཁོང་པ་སྦོ། །རྨྱ་ཞིང་སྒྱིད་པ་
སྐྱུར་ལ་ཟས་མདོག་འཁྲུ། །མཁལ་བབས་མཁལ་རྐེད་ན་ཞིང་དྲི་ཆུ་སྲི། །རྣ་བ་འཐིབ་ཅིང་རླན་
གྲང་ཁྱད་པར་གནོད། །ཕོ་བར་ལྷུང་ན་ཕོ་བ་མི་བདེ་ལྕི། །བྲང་ཚ་ཆུ་ཚན་འབྱུང་ཞིང་ཟས་མི་
འཇུ། །ལོང་ལྷུང་སྦོ་འཁྲོག་བྱེད་ཅིང་ཟོས་ཚེ་ན། །རྒྱུ་མར་ལྷུང་ན་བེ་སྣབས་འཁྲུ་ཞིང་ལྕི།  །
25-1-122

 
མཁྲིས་པར་ལྷུང་ན་མིག་སེར་འཇུ་བ་དཀའ། །ལུས་ལྕི་སྒྱིད་པ་སྐྱུར་ལ་གཉིད་དུ་འབྱིང་། །
ལྒང་པར་ལྷུང་བས་བད་ཀན་ཟ་ཁུར་འགྱུར། །མངལ་ལྷུང་སྨད་གྲང་ཟླ་མཚན་གཅིན་བག་
འཛག །བད་ཀན་མགོ་ལ་ཞུགས་ན་མགོ་བོ་ལྕི། །གཉིད་ཆེ་དང་ག་མི་བདེ་ཡི་ག་འགག །མིག་
ལ་ཞུགས་ན་སྐྲངས་ཤིང་མཆི་མ་འཛག །རྣ་བར་ཞུགས་ན་གྲང་ཞིང་ལྕི་ལ་འཐིབ། །སྣ་ལ་
ཞུགས་ན་སྣ་འགག་མཚུལ་པ་ལྕི། །ལྕེ་ལ་ཞུགས་ན་ལྕེ་གྱོང་རོ་མི་ཚོར། །བྱེ་བྲག་བད་ཀན་
རྟེན་བྱེད་ནད་གྱུར་ན། །དང་ག་མི་བདེ་སྟོད་རྒྱངས་མདུན་རྒྱབ་གཟེར། །བྲང་ཚ་ཆུ་སྐྱུར་འབྱུང་
ཞིང་དང་ག་འགག །བད་ཀན་མྱག་བྱེད་འཇུ་དཀའ་བཅུད་མི་ལེན། །ཁ་ཟས་མི་འཇུ་སྒྲེག་ཅིང་
ཕོ་བ་གྱོང༌། །མྱོང་བྱེད་ཁ་ཟས་བྲོ་མེད་སྐོམ་དད་ཆུང༌། །ལྕེ་གྲང་མཆུ་ན་སྐད་འཛེར་ཟས་མི་
ལེན། །ཚིམ་བྱེད་མགོ་འཁྱོམ་མིག་ཟི་རྣ་བ་འགག །སྦྲིད་པ་སྣབས་མང་ཆམ་འདེབས་འཚོགས་
མ་ལྕི། །འབྱོར་བྱེད་བརྐྱང་བསྐུམ་དཀའ་ཞིང་ཚིགས་མགོ་སྦོམ། །རྐང་ལག་ལྷུ་ཚིགས་ན་ཞིང་
ཚིགས་ཁ་གཡོ། །རླུང་དང་མཁྲིས་པར་གང་འདྲེས་དེ་རྟགས་སྟོན། །བད་ཀན་སེར་པོ་མཁྲིས་
པའི་ཁ་ལུད་ཡིན། །རྩ་ནི་དལ་ལ་སྟོང་ཞིང་ཆུ་མདོག་སེར། །ཕོ་བ་ལྟེམ་ཞིང་ཟས་ལ་དང་ག་
ཞན། །ཆང་འཐུངས་དྲོས་ཚེ་འཚོགས་མ་མིག་རུས་ན། །བྲང་ཚ་ཆུ་སྐྱུར་འབྱུང་ཞིང་མཁྲིས་པ་
སྐྱུག །ས་རླན་རུལ་སྐྱུར་ཟོས་རྗེས་འཁྲུ་ཡང་སྲིད། །གྲོ་ཡོས་ར་ཤ་མར་རྙིང་ཆང་སྐྱུར་གནོད། །
མཇུག་ཏུ་སྨུག་པོའམ་མཁྲིས་པའི་ནད་དུ་འགྱུར། །བད་ཀན་སྨུག་པོ་ཁྲག་གི་སྙིགས་མ་ཡིན། །
ཕོ་མཆིན་རོ་སྟོད་ན་ཞིང་རྒྱ་བཤལ་སྐྱུག །ལུས་ལྕི་སྒྱིད་པ་སྐྱུར་ལ་སྙིང་མི་དགའ། །འགྲངས་
ལྟོགས་གྲང་དང་དྲོ་བ་གང་ཡང་གནོད། །དོན་མེད་ན་ཞིང་བྱས་མེད་བདེ་བར་མངོན། །བཅོས་
པའི་ཐབས་ལ་སྤྱི་དང་བྱེ་བྲག་གཉིས། །དང་པོ་བད་ཀན་ངོ་བོ་བསིལ་བའི་ཕྱིར། །སྨན་དཔྱད་
ཟས་སྤྱོད་རྣམ་བཞི་དྲོད་དུ་སྤྲུག །ས་འདྲ་གཉེན་པོའི་ཁ་ན་ལྕི་བའི་ཕྱིར། །ལན་རེས་མི་སེལ་
ཡུན་དུ་བསྟེན་པ་གཅེས། །དང་པོ་ཟས་ཀྱི་སྒོ་ནས་བཅོས་པ་ནི། །འབྲུ་རྙིང་ཟན་དྲོན་ཆང་ནར་
25-1-123


སྨིན་པ་དང༌། །ཆུ་སྐོལ་སྒ་ཆུ་ལུག་དང་ཉ་ཤ་དང༌། །གཡག་རྒོད་བྱ་རྒོད་དབྱི་དང་སྤྱང་ཀིའི་ཤ། 
དྲོ་ཞིང་ཡང་ལ་རྩུབ་པའི་ཟས་སྐོམ་རྣམས། །འགྲངས་ཆེས་མ་ཡིན་འཇུ་བླ་ཉུང་ཟད་བསྟེན། །
སྤྱོད་ལམ་མེ་ཉི་དྲོ་ཞིང་གོས་དྲོར་བགོ །སྐམ་སར་ལུས་ངག་རྩོལ་བཅག་གཉིད་མི་ལོག །སློང་
བར་བྱེད་རྐྱེན་ཟས་སྤྱོད་དུས་ཀུན་སྤང་། །སྨན་དུ་རྒྱམ་ཚྭ་གསུམ་དང་བཞི་ཐང་བཏང༌། །རྒྱམ་
ཚྭ་བྲེ་ག་པི་པི་ལིང་གི་ཐང༌། །ཚ་བ་གསུམ་དང་རྒྱམ་ཚྭའི་ཐང་ལ་སོགས། །བསྡུས་པའི་ཁུ་བ་
ཚན་མོ་བཏང་བར་བྱ། །ཕྱེ་མ་སེ་འབྲུ་བཞི་དང་བརྒྱད་པ་དང༌། །ད་ལིས་བདུན་དང་རྒོད་མ་ཁ་
རྣམས་སྦྱར། །ཚ་བ་ལྔ་དང་ཁ་རུ་ཚ་ཡི་ཕྱེ། །མ་ཞུ་ལྷེན་དང་ལྕགས་དྲེག་དང་ག་འགྲིབ། །མེ་
དྲོད་ཉམས་དང་གྲང་ནད་སྟོང་ལ་ཕན། །སེ་འབྲུ་བཞི་སྟེང་ཟི་ར་ཁ་རུ་ཚྭ། །བཅའ་སྒའི་ཕྱེ་མས་
དྲོད་སྐྱེད་ཡི་ག་འབྱེད། །ཟས་འཇུ་སྒྲེག་དང་ཕོ་བའི་ཟུག་གཟེར་འཇོམས། །ཚ་བ་ལྔ་དང་སེ་
འབྲུ་བཞི་པ་དང༌། །བྱི་ཏང་ག་དང་རྒྱམ་ཚྭ་ཁ་རུ་ཚྭ། །ཕྱེ་མས་བད་ཀན་གྲང་བ་མ་ལུས་
འཇོམས། །ཀུན་ལ་བུར་དཀར་རྟ་སྦྱར་ཆུ་སྐོལ་དབུལ། །སྨན་གྱིས་མགོ་ནོན་རྩ་བ་མ་ཐོན་ན། །
གྱེན་ཐུར་གང་ཉེའི་ལམ་ནས་སྦྱང་བར་བྱ། །དེ་རྗེས་ནད་ལྷག་གང་འཕྲོད་ཕྱེ་མས་གདོན། །
དཔྱད་དུ་ཚྭ་དང་བོང་བ་སྤུ་དུགས་བསྟེན། །གྲང་བ་ཤིན་ཏུ་རྒྱས་ན་མེ་ཐུར་བྱ། །བྱེ་བྲག་
བཅོས་ཐབས་རིགས་གནས་ནང་ཚེགས་དང༌། །གཞན་དབང་བཞི་ལས་རིགས་ཀྱིས་བཅོས་
པ་ནི། །དང་པོ་བད་ཀན་ལྷེན་ལ་ཚ་བ་གསུམ། །རྒྱམ་ཚྭ་ཁ་རུ་ཚྭ་ཡི་བསྐོལ་ཐང་བཏང་། །
ཚྭའམ་བོང་བ་བསྲེགས་པའི་དུགས་ཀྱིས་བདུག །དེས་མ་སེལ་ན་ཚྭ་བསྲེག་སྦྱོར་བ་བྱ། །སྨན་
རྗེས་སྐྱུགས་དྲང་ལྷེན་གསང་ཁ་གསུམ་བསྲེག །གལ་ཏེ་ལྷེན་དེ་རྒྱ་ཆགས་འདྲིལ་བ་ན། །
མནན་ན་སྲ་ཞིང་འཕར་ལ་བཟོད་པ་ཆུང༌། །ཁ་ཟས་ལེན་དུ་མི་སྟེར་ཟོས་ཚད་སྐྱུག །འདི་ཉིད་
བད་ཀན་ལྷེན་སྐྲན་ཞེས་བྱ་སྟེ། །ཅོང་ཞི་སོལ་བའི་མེ་ལ་འཚོས་པར་བསྲེག །དར་བར་ངད་
བསད་ཐལ་བ་བྱ་རྒོད་བྲུན། །ཨ་རུ་ར་དང་པི་པི་ལིང་དུ་སྦྱར། །ཀ་རས་རྟ་བྱས་ཆུ་སྐོལ་འཕུལ་
25-1-124


ལ་བཏང༌། །མ་ཞུ་ལྷེན་སྐྲན་ཐལ་བར་རློག་པར་བྱེད། །ཡང་ན་ཐུན་གསུམ་ཚ་བའི་རིལ་བུས་
བཤིག །ཞིག་ནས་ནད་རོ་བཤལ་ལམ་སྐྱུགས་ཀྱིས་སྦྱང༌། །ལྕགས་དྲེག་ཆགས་ན་ཅོང་ཞིའི་
ཐལ་སྨན་སྦྱར། །ཡང་ན་ཐལ་སྨན་རྣོན་པོ་བསྟེན་ལ་བརྐོ། །དེ་འོག་བཤལ་སྐྱུགས་སྦྱངས་
རྗེས་སེ་འབྲུ་སྦྱར། །ཞི་དཀའ་ཕོ་གསང་མདུན་རྒྱབ་མེ་ཡིས་བསྲེག །མེ་ཉམས་རྒོད་མ་ཁ་ཡི་
ཕྱེ་མ་སྦྱར། །སེ་འབྲུ་ཚ་བ་ལྔ་དང་བཟང་པོ་གསུམ༌། བྱི་ཏང་ག་དང་སྲུབ་ཀ་ཀ་རཉྫ། །རྒྱམ་ཚྭ་
ཁ་རུ་ཚྭ་དང་བུ་རམ་སྦྱར། །ཆུ་སྐོལ་འཕུལ་བས་ཕོ་བའི་མེ་དྲོད་སྐྱེད། །རྒྱམ་ཚྭ་ལ་ལ་ཕུད་དང་
ཨ་ཟ་མོ། །པི་པི་ལིང་དང་སྒ་རྣམས་རིམ་པས་བསྐྱེད། །ཀུན་དང་མཉམ་པའི་ཨ་རུའི་ཐལ་
སྨན་སྦྱར། །མེ་ནི་མངོན་སུམ་ཉིད་དེ་དྲོད་སྐྱེད་མཆོག །ཤིང་ཀུན་ཁ་རུ་ཚྭ་དང་ཚ་བ་གསུམ། །
སྒོག་སྐྱ་མར་རྙིང་རེང་བུས་མེ་དྲོད་སྐྱེད། །བཅུ་གཉིས་མེ་མཉམ་གསང་ལ་མེ་ཐུར་བྱ། །བད་
ཀན་མགུལ་འགགས་ནད་ལ་ཚ་བ་ལྔ། །བཟང་པོ་བཞི་དང་ཤིང་ཀུན་བྱི་ཏང་ག །རྒྱམ་ཚྭས་སྣ་
དྲངས་ཚྭ་སྣ་ཚོགས་ཚད་དང༌། །སྲུབ་ཀ་ལྕེ་ཚའི་ཕྱེ་མ་སྦྲང་རྒོད་སྦྱར། །ཅོང་ཞི་རྒོད་བཏུལ་
ཐལ་སྨན་རྣོན་པོ་དང༌། །ནང་ནུབ་ལྟག་པ་སྤྲད་ལ་ཆུ་སྐོལ་དབུལ། །ཉ་ཤ་ཨོལ་གོང་ཚ་བ་ཁོང་
དུ་བསྟེན། །སྨན་རྗེས་བཤལ་སྐྱུགས་སྦྲགས་ལ་སྦྱང་བར་བྱ། །ལྷེན་གསང་སྐེ་སྟོང་ཚིགས་པ་
བཞི་པ་བསྲེག །བད་ཀན་གྲུམ་བུ་དཀར་པོ་བཅོས་པ་ནི། །རྡོ་འམ་བྱ་བྲ་བསྲོས་པའི་དུགས་
ཀྱིས་བདུག །ཤིང་ཀུན་རྒྱ་ཚྭ་དབྱི་མོང་བསྐོལ་ཐང་བཏང༌། །སུག་སྨེལ་རུ་རྟ་རྒྱམ་ཚྭ་པི་པི་
ལིང༌། །གླ་རྩི་བྱི་ཏང་ག་ཡི་ཕྱེ་མ་བསྟེན། །སེ་འབྲུ་ཚ་བ་གསུམ་དང་ཨ་རུ་ར། །རྒྱམ་ཚྭ་མ་ནུ་འུ་
སུ་ད་ཏྲིག་དང༌། །མ་རུ་ཙེ་དང་བུ་རམ་སྦྲང་སྦྱར་བཏང༌། །ཁྱད་པར་རླན་མེད་དྲོ་སར་བཅག་པ་
བསྔགས། །བད་ཀན་འཇུ་སྐེམས་བཅའ་སྒ་ཁ་རུ་ཚྭ། །ཨ་རུ་སྐྱུ་རུ་བུར་དཀར་སྦྱར་ལ་བཏང༌། །
སྤྱང་ཚེར་སྐྱུགས་བྱ་ལྷེན་གསང་མེ་ཡིས་བསྲེག །ཀུན་ལ་ཟས་སྐོམ་ཡང་དྲོ་ཆུང་བས་བཅོས། །
པགས་གྲམ་ཚ་བ་གསུམ་དང་ཟོ་མར་སྦྱར། །ཉི་མས་བསྲེག་ཅིང་མཉེ་བྱུག་འཐེམ་པར་བྱ།  །
25-1-125

 
ཤར་རྒྱས་ཨོལ་གོང་པ་ཡི་ཚ་བ་བཏང༌། །སེ་འབྲུ་བརྒྱད་སྦྱར་ལྟོ་དགུག་རྩོལ་བ་སྤྱད། །རྩར་
རྒྱུ་ཚྭ་སྣའི་ཐང་བཏང་མེ་དུགས་བསྟེན། །རུས་ཞེན་བུར་ཆང་ཚ་བ་གསུམ་སྦྱར་བཏང༌། །བྱ་བྲ་
བསྲོས་པའི་དུགས་བྱ་བོང་ཤ་བཟའ། །ཟོ་མར་བྱུགས་མཉེ་ཚིགས་དམིགས་གྲང་སར་བསྲེག །
གློ་སྙིང་གང་ལ་བབས་ཀྱང་སྐྱུགས་ཀྱིས་དྲངས། །དེ་རྗེས་སེ་འབྲུ་བཞི་པ་གཙོ་བོ་ལ། །སྙིང་
ལ་ཛཱ་ཏི་ཤིང་ཀུན་ཁ་རུ་ཚྭ། །གློ་ལ་སྟར་བུ་རུ་རྟ་ཅུ་གང་སྟེ། །སྦྲང་དང་བུར་དཀར་རྟ་བྱས་ཆུ་
སྐོལ་དབུལ། །ཡང་ན་སྙིང་ལ་ཛཱ་ཏི་ཚ་བ་གསུམ། །སུག་སྨེལ་ཟི་ར་ནག་པོ་ཀ་ཀོ་ལ། །བུར་
དཀར་སྦྱར་བཏང་གློ་ལ་སེ་འབྲུ་དང༌། །ཚ་བ་གསུམ་དང་ཟི་ར་དཀར་ནག་གཉིས། །ཤིང་ཚ་
སུག་སྨེལ་བུ་རམ་སྦྱར་ལ་བཏང༌། །དེ་རྗེས་ཚིགས་པ་བཞི་ལྔ་དྲུག་བདུན་བསྲེག །མཆིན་
བབས་ཚ་བ་གསུམ་དང་སེ་འབྲུ་དང༌། །ཤིང་ཚ་ཁ་རུ་ཚྭ་དང་གུར་གུམ་དང༌། །ཀ་ར་སྦྱར་
བཏང་དགུ་པ་མེ་ཡིས་བསྲེག །མཆེར་བབས་སེ་འབྲུ་རྒྱམ་ཚྭ་ཚ་བ་གསུམ། །ཐལ་ཚྭ་ཁ་རུ་ཚྭ་
དང་ལྕེ་མྱང་ཚྭ། །བུར་དཀར་སྦྱར་བཏང་བཅུ་གཅིག་མེ་ཡིས་བསྲེག །མཁལ་བབས་ཚྭ་དང་བྱེ་
མ་སྤུ་དུགས་བསྟེན། །ཚ་བ་གསུམ་དང་སུག་སྨེལ་རྒྱ་ཚྭ་དང༌། །ལྕམ་པ་སྡིག་སྲིན་གསེར་གྱི་བྱེ་
མ་དང་། །འབྲས་སྣ་གསུམ་དང་བུ་རམ་ཆང་གིས་དབུལ། །གསའ་དང་སྤྱང་ཀི་སྲམ་དང་བོང་
ཤ་བསྟེན། །རྗེས་ལ་ཚིགས་པ་བཅུ་བཞི་སྤྲ་བས་མནན། །ཕོ་བར་ལྷུང་ན་སེ་འབྲུ་ལྔ་པའམ། །
ཁ་རུ་ཚྭ་དང་ད་ཏྲིག་ཤིང་ཀུན་སྦྱར། །རྗེས་ལ་མདུན་རྒྱབ་གང་བབས་གསང་དུ་བསྲེག །རྒྱུ་
ལོང་ལྷུང་ན་ཤིང་ཚ་ཚ་བ་ལྔ། །བྱི་ཏང་ག་དང་ཤིང་ཀུན་ཁ་རུ་ཚྭ། །བུ་རམ་སྦྱར་བཏང་མདུན་
རྒྱབ་གསང་ལ་བསྲེག །མཁྲིས་པར་ལྷུང་ན་སེ་འབྲུ་བཞི་པ་དང༌། །རྒྱམ་ཚྭ་གསེར་གྱི་མེ་ཏོག་
སྒ་སྐྱ་སྦྱར། །སྦྱོངས་བྱ་ཚིགས་པ་དགུ་དང་བཅུ་པ་བསྲེག །ལྒང་པར་ལྷུང་ན་རྒྱ་ཚྭ་ཚ་བ་གསུམ། །
སུག་སྨེལ་ལྕམ་པ་ཆང་དང་སྦྱར་ལ་བཏང༌། །མངལ་ལྷུང་ཐུན་གསུམ་ཚ་བའི་རིལ་བུ་སྦྱར། །
དྲོད་དུགས་མེ་བཙའ་ཆང་དང་བོང་ཤ་བསྟེན། །མགོར་ཞུགས་སྐྱུགས་བྱ་སེ་འབྲུ་བརྒྱད་པ་
25-1-126


སྦྱར། །མིག་ལ་ར་གན་དུད་བྱུགས་ཉ་ཤ་བཏང༌། །རྣ་བར་ཞུགས་ན་ཤིང་ཀུན་རྒྱ་ཚྭ་བླུག །སྣ་
ལ་སྣ་སྦྱོང་དུད་པ་རྣོན་པོས་བདུག །ལྕེ་ལ་ཞུགས་ན་ཚ་བའི་མཁུར་བཀང་བཅང༌། །བྱེ་བྲག་
ནང་ཚེགས་བད་ཀན་རྟེན་བྱེད་ལ། །སྤྱང་ཚེར་སྐྱུགས་བྱ་སེ་འབྲུ་ལྔ་པའམ། །ཅོང་ཞི་དྲུག་སྦྱར་
ཚིགས་པ་བརྒྱད་པ་བསྲེག །མྱག་བྱེད་སེ་འབྲུ་རྒྱམ་ཚྭའི་ཏྲེས་སམ་སྦྱར། །བཅུ་གསུམ་དགུ་པ་
ཕོ་གསང་གང་རིགས་བསྲེག །མྱོང་བྱེད་ནད་ལ་འབྲས་བུ་གསུམ་ཐང་བཏང་། །སྟར་བུ་སྒེ་
གཤེར་ཤིང་མངར་འབྲས་བུ་གསུམ། །སྦྲང་དང་སྦྱར་བཏང་སྐེ་སྟོང་དང་པོ་བསྲེག །ཚིམ་བྱེད་
སྐྱུགས་བྱ་སྣ་སྨན་(ཤིང་དངར་ཏིལ་མར་ལ་ཕུག་སུག་པ་)བཞི་པ་བཏང༌། །འཚོགས་མའི་གསང་དབྱེ་
འདུས་སོ་གསུམ་དུ་བསྲེག །འབྱོར་བྱེད་ཨ་རུ(གླ་རྩི་སྒ་བོ་ཆེ་བོང་ཁྲག་)འི་ཕྱེ་མ་བཏང་བར་བྱ། །
ཐལ་ཀ་རྡོ་རྗེ་ཟོ་མར་བསྐུ་མཉེ་དང༌། །ཆུ་སེར་མེར་སར་རྔབས་རུ་མེ་ཐུར་བྱ། །རླུང་མཁྲིས་
གང་འབྲེལ་དེ་ཡི་གཉེན་པོ་བསྟེན། །གཞན་དབང་ཅན་གྱི་བད་ཀན་སེར་པོ་ལ། །ཆ་མཉམ་
བཞི་ཐང་སེ་འབྲུ་བརྒྱད་པ་སྦྱར། །གསེར་ཕུད་སྐྱུགས་དང་མ་ནུ(ཨ་རུ་སླེ་ཏྲེས་ཀཎྜ་ཀ་རི་སྒ་དོང་ག་ལྕུམ་
རྩ)འི་དྲོད་བཤལ་བཏང༌། །གསེར་མདུང་གཏར་ཞིང་ཅོང་ཞི་དྲུག་པ་སྦྱར། །ཤ་གསར་མར་
གསར་བ་མཛོའི་འོ་མ་བསྟེན། །བད་ཀན་སྨུག་པོ་སེ་འབྲུ་བསེ་ཡབ་དང༌། །སྟར་བུ་སྐྱུ་རུ་ར་
དང་སྒ་སྐྱ་དང༌། །མ་ནུ་འུ་སུ་ཨུཏྤལ་པི་པི་ལིང༌། །ཀ་ར་སྦྱར་ལ་ཆུ་སྐོལ་འཕུལ་ལ་བཏང༌། །
སྤྱིར་ན་བད་ཀན་ལྕི་རྟུལ་བསིལ་བའི་ཕྱིར། །ཁོང་ནད་ཀུན་གྱི་རྩ་བ་བད་ཀན་བྱེད། །ཤ་
པགས་རྩ་ཚིགས་ཕྱི་རུ་བྱེར་བ་ཉུང༌། །རང་གི་གནས་ལས་གཞན་དུ་ཞུགས་པ་དཀོན། །ཕལ་
ཆེར་མ་ཞུ་ཕོ་བར་རྒྱས་པའི་ས། །དེ་ཕྱིར་ཕོ་བའི་ཁ་འཛིན་གཅེས་པ་ཡིན། །ཞེས་གསུངས་སོ། །
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བད་ཀན་གྱི་ནད་
བཅོས་པའི་ལེའུ་སྟེ་བཞི་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེད་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
25-1-127


རིག་པའི་ཡེ་ཤེས་ལགས། །རླུང་མཁྲིས་བད་ཀན་བཅོས་ཐབས་དེ་ལྟར་ན། །འདུས་པའི་ནད་
ལ་གསོ་ཐབས་ཇི་ལྟར་བགྱི། །མཚོན་བྱེད་མིང་དང་དབྱེ་བ་ཇི་ལྟར་ལགས། །འཚོ་མཛད་སྨན་
པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། །ཀྱེ་དྲང་སྲོང་
ཆེན་པོ་ཡིད་ལས་སྐྱེས། འདུས་པའི་ནད་ལ་གསུམ་གས་བཅོས་པ་སྟེ། །འོན་ཀྱང་རང་བཞིན་
རྒྱུ་ཡིས་འདུས་པ་དང༌། །བྱུང་ཚུལ་དུས་གྱི་སྒོ་ནས་འདུས་པ་དང༌། །འདུ་བ་འཁྲུགས་པའི་སྒོ་
ནས་འདུས་པ་གསུམ། །ཕྱི་མ་མ་སྨིན་ཚ་བ་དུག་ནད་དེ། །དང་པོ་མཚོན་བྱེད་བད་ཀན་སྨུག་
པོར་བཏགས། །དེ་ལ་རྒྱུ་རྐྱེན་གནས་དུས་རིགས་དང་རྟགས། །བཅོས་པའི་ཐབས་དང་རྗེས་
བཅད་བརྒྱད་དུ་བཤད། །རྒྱུ་ནི་བད་ཀན་ཁྲག་མཁྲིས་རླུང་དང་བཞི། །ནད་ཀུན་འདུས་ཕྱིར་
འདུས་ནད་རྟགས་བཅོས་དཀའ། །དེ་ལ་སྐྱེད་པའི་རྐྱེན་ནི་ཚ་གྲང་གཉིས། །ཚ་རྐྱེན་འགྲམས་
ཁྲག་ལྷག་དང་མཚོན་ཁྲག་ལུས། །དེ་ཉིད་མཆིན་པའི་སྟེང་དུ་ལྷུང་བའམ། །ཚ་སྐྱུར་ཟས་ཀྱིས་
ཁྲག་འཕེལ་མཆིན་པ་རྒྱས། །དེ་དག་ཟུངས་སུ་འགྱུར་དུ་མ་འདོད་པར། །མཆིན་གནས་ཕོ་
བར་བབས་པས་བད་ཀན་འདྲེས། །ཁྲག་དང་བད་ཀན་རུལ་ནས་རྒྱུ་མར་ལྷུང༌། །མཁྲིས་པར་
འདྲེས་པས་ཁ་དོག་དུད་ཁུར་འགྱུར། །དེ་ཉིད་ལོང་དུ་འཕྱུགས་པས་རླུང་དང་བསྡོངས། །དེ་ལ་
སྨུག་པོ་ཡས་བབས་ཞེས་སུ་འདོད། །གྲང་རྐྱེན་འཇུ་དཀའ་མི་འཕྲོད་ཟས་བསྟེན་པས། །ཕོ་
བར་མ་ཞུ་དེ་ཡིས་བེ་སྣབས་འཕེལ། །མེ་མཉམ་འཇུ་བྱེད་རླུང་གི་མཐུ་ཉམས་པས། །དྭངས་
སྙིགས་མ་ཕྱེད་མཆིན་པའི་གནས་སུ་ཤོར། །ཟུངས་སུ་མ་གྱུར་ཁྲག་ངན་མཆིན་པར་རྒྱས། །ཁ་
ལུད་གོང་བཞིན་ཕོ་བར་ལྷུང་བ་དེ། །མ་ཞུས་རྒྱུ་བྱས་བད་ཀན་གྲང་ཤས་ཆེ། །སྨུག་པོ་གབ་
པས་ཝ་ལྟར་གཞའ་བར་བྱེད། །དེ་ལ་སྨུག་པོ་མས་ཆགས་ཞེས་བྱར་འདོད། །སྨུག་པོའི་གནས་
ལ་རང་གནས་གཞན་གནས་གཉིས། །རང་གནས་ཕོ་མཆིན་རྒྱུ་ལོང་རྣམ་པ་བཞི། །ཕོ་བར་
གནས་པས་བད་ཀན་ནད་དང་འདྲ། །མཆིན་པར་གནས་པས་ཁྲག་གི་ནད་དང་འདྲ། །རྒྱུ་མར་
25-1-128


གནས་པས་མཁྲིས་པའི་ནད་དང་འདྲ། །ལོང་དུ་ལྷུང་བས་རླུང་གི་ནད་དང་འདྲ། །གནས་
གཞན་བྱེར་ལ་ཕྱི་ནང་རྣམ་པ་གཉིས། །ཕྱི་གནས་ཤར་རྒྱས་པགས་གྲམ་ས་བདག་འདྲ། །རྩར་
བྱེར་དུག་འདྲ་ཚིགས་ལ་གྲུམ་བུར་བྱེད། །ནང་གནས་སྲོག་རྩ་མཆིན་ལམ་ཁྲག་ལ་ཞོན། །སྲོག་
རྩ་རྫོང་ལ་ཚིགས་པ་མཁར་དུ་འདོད། །ཡར་ལ་མགོ་ལ་འཕྱུར་བས་མགོ་ནད་བྱེད། །གློ་ལ་གློ་
ནད་སྙིང་ལ་སྙིང་རླུང་བྱེད། །མཆེར་པར་མཆེར་ནད་མཁལ་མར་མཁལ་ནད་བྱེད། །སྨུག་
པོའི་དུས་གསུམ་དང་པོ་ཚ་བའི་དུས། །བར་དུ་ཚ་གྲང་འཐབ་པའི་དུས་ཡིན་ཏེ། །ཐ་མ་གྲང་བ་
ལྷིང་ཆད་པ་དང་གསུམ། །དང་པོ་སྨུག་པོ་ཚ་བ་སྐྱེས་པ་ལས། །ཁྲག་མཁྲིས་འཕེལ་བས་རྒྱས་
ཏེ་ཚ་བའི་དུས། །གྲང་བ་སྐྱེས་ན་དང་པོ་རང་གནས་གབ། །བར་དུ་ཁྲག་མཁྲིས་ཚ་ལ་བད་
རླུང་གྲང༌། །དེ་དག་ཤེད་སྙོམས་ཚ་གྲང་འཐབ་པར་བྱེད། །ཐ་མར་ཁྲག་མཁྲིས་ཚ་བའི་སྟོབས་
ཟད་ནས། །བད་རླུང་རྒྱས་པས་གྲང་བར་འགྱུར་བ་ཡིན། །སྨུག་པོའི་རིགས་ལ་བྱེར་རྒྱས་
འགྱིངས་འདྲིལ་བཞི། །བྱེར་ལ་ཕྱིར་བྱེར་བ་དང་ནང་བྱེར་གཉིས། །སྨུག་པོ་རྒྱས་ལ་རྡོལ་དང་
མ་རྡོལ་གཉིས། །སྨུག་པོ་འགྱིངས་ལ་གབ་དང་མ་གབ་གཉིས། །སྨུག་པོ་འདྲིལ་ལ་གསར་
དང་རྙིང་པ་གཉིས། །དེ་རྣམས་བརྟག་ཐབས་སྤྱི་དང་བྱེ་བྲག་གཉིས། །སྤྱི་ལ་རྩ་ཆུ་ནད་རྟགས་
ལོ་མ་དང༌། །ཕན་གནོད་བསྟེན་པའི་སྒོ་ནས་བརྟག་པ་བཞི། །རྩ་ལ་ངོས་བཟུང་སྦོམ་ཁེངས་
ཀན་རྩ་ཞར། །གྲང་བས་བསྐྱེད་ན་ཕལ་ཆེར་ཕྲ་ལ་གུད། །ཆུ་མདོག་སྨུག་དུགས་སྐ་ལ་རྙོག་མ་
ཅན། །ཡང་ན་དམར་སྨུག་ལྗང་ཡང་སྲིད་པ་ཡིན། །ན་ལུགས་ཕོ་མཆིན་ཁ་འཁོར་རོ་རྒྱབ་སྦྲག །
ལུས་ལྕི་བྱིན་པ་མི་ཐེག་སྒལ་ཚིགས་ན། །དང་ག་མི་བདེ་ཁ་མངལ་ཉ་དྲི་བྲོ། །བྲང་ཚ་སྐྱུག་
སྙམ་བྱེད་ཅིང་སྐྱུག་པ་དཀའ། །སྐབས་སུ་ཁོང་ཚ་མགོ་དང་མིག་རུས་ན། །རྔུལ་གྲང་རྗེས་ལ་
གླང་ཐབས་ལྡང་བ་དང༌། །དྲི་མ་སྨུག་ལ་སྐམ་ཞིང་ཤ་རིལ་འདྲ། །འགྲངས་ཀྱང་ན་ལ་ལྟོགས་
ཀྱང་ན་བ་དང༌། །གྲང་ཡང་ན་ལ་དྲོས་ཀྱང་ན་སྙམ་བྱེད། །དོན་མེད་ན་ལ་བྱས་པ་མེད་པར་
25-1-129


འདྲག །ཕལ་ཆེར་སྟོན་དཔྱིད་དུས་ན་ལྡང་བ་ཡིན། །འདི་ལ་དུས་ཀྱི་ལོ་མ་རྣམ་གསུམ་འབྱུང༌། །
དང་པོ་འཇུག་དུས་ཆུ་ཚན་ཆུ་སྐྱུར་སྐྱུག །བར་དུ་སྨིན་ནས་སེར་པོ་རྒྱ་བཤལ་སྐྱུག །ཐ་མར་
རྒྱས་ནས་ཁྲག་རུལ་དུད་ཁུར་སྐྱུག །གསར་ཐོག་འབྲུ་དང་གྲོ་ཡོས་ཕྱེ་སུངས་ཟན། །མར་རྙིང་
ཁྲག་ཚོད་འབྲུ་མར་ར་ཤ་དང༌། །གནག་ཤ་རུལ་སུངས་ཉ་ཕག་ཤ་བེམ་དང༌། །ཆང་སྐྱུར་སྒོག་
སྐྱ་ཞོ་མ་ལངས་ལ་སོགས། །སྣུམ་ལྕིའི་ཟས་དང་བསིལ་དྲོད་དྲགས་པ་གནོད། །གནའ་དགོ་
བ་ལང་ཤ་གསར་རྙིང་པའི་འབྲུ། །སྲན་མ་བ་ར་མཛོ་ཞོ་དར་བ་དང༌། །ཉ་ཤ་ཕག་ཤ་སོལ་བ་
ལ་སོགས་པ། །ཟས་སྐོམ་ཡང་རྩུབ་བསིལ་དྲོད་སྙོམས་པ་འཕྲོད། །བྱེ་བྲག་གནས་ས་ཡུལ་ལ་
བརྟག་པ་དང༌། །གནས་སྐབས་དུས་དང་ནད་རིགས་སྒོ་ནས་བརྟག །དང་པོ་གནས་ས་ཕོ་
མཆིན་རྒྱུ་ལོང་བཞི། །ཕོ་བར་གནས་ཚེ་སྒྲེག་སྐྱུག་ཟོས་རྗེས་ན། །འཇུ་དཀའ་ཆང་རྒན་ཆང་
གསར་ཤི་ཤ་གནོད། །ཧ་ཅང་དྲོད་དྲགས་རླན་གྲང་དུས་ན་ལྡང༌། །མཆིན་པར་གནས་ཚེ་
མཆིན་དྲི་རོ་རྒྱབ་ན། །ཚིགས་པ་བཀན་ཞིང་མཉེས་ན་ཕན་སྙམ་བྱེད། །མེ་ཉི་དྲོད་བཅུད་རུལ་
སྐྱུར་དག་ལས་ལྡང༌། །མཆིན་པར་རྒྱས་ན་སྲ་ཁེངས་སྐྲན་ལྟར་ན། །རྒྱུ་མར་གནས་ཚེ་ན་ཞིང་
འགྱུ་བ་དང༌། །འདྲིལ་ནས་ན་ཞིང་མིག་དང་ཆུ་མདོག་སེར། །ལོང་དུ་གནས་ཚེ་སྦོ་འཁྲོག་འུར་
བ་དང༌། །རྒོངས་དང་སྐྱུར་འཐུངས་དུས་ན་ཁྱད་པར་སྦོ། །ཐུར་རླུང་དྲི་ཆེ་དྲོད་འཕྲོད་གྲང་བ་
གནོད། །དུས་ཀྱི་བརྟག་པ་དང་པོ་ཚ་བའི་དུས། རྩ་གྲིམས་ཆུ་མདོག་སྨུག་ལ་དྲི་རླངས་ཆེ། །ལྕེ་
སྐམ་གྱོང་ལ་ཁ་ཁ་དང་ག་འགག །ལུས་ལྕི་གཉིད་ཆེ་གདོང་སྣུམ་མིག་སྤྲིན་དམར། །མཆིན་དྲི་
རོ་རྒྱབ་གཉིས་སུ་སྦྲག་ཅིང་གཟེར། །མགོ་དང་མིག་རུས་ན་ཞིང་འཚོགས་མ་ལྕི། །མེ་དང་ཉི་
མས་དྲོས་ཚེ་ཁྱད་པར་ན། །རུལ་སྐྱུར་དྲག་ཤུལ་རྗེས་ལ་ལྡང་བ་ཡིན། །དེ་ཉིད་སྨུག་པོའི་ཚ་བ་
རྒྱས་ཞེས་བྱ། །འཐབ་པ་སྨུག་པོས་མཉམ་གནས་ལམ་བསྒགས་པས། །མཉམ་གནས་སྣོད་
ཀྱི་རྩ་ནང་ཀུན་ཏུ་ཞུགས། །རླུང་ཁྲག་ཕར་འབོར་ཚུར་འབོར་འདེད་ཅིང་རྒྱུ། །དུས་མེད་རྒྱུན་
25-1-130


དུ་ཟུག་ཆེ་གླང་ཐབས་ལྡང༌། །ཉིན་མོ་ཅུང་བདེ་མཚན་མོ་རྒྱུན་དུ་ན། །ལྟོགས་ཤིང་དུགས་བྱས་
དུས་ན་བདེ་སྙམ་བྱེད། །ཤ་ཞུ་པགས་པ་སྐམས་ལ་རྩ་རྣམས་རྒྱས། །བསིལ་དྲོད་ཟས་སྨན་
ཅིས་ཀྱང་ཕན་གནོད་ཆུང་། །འདི་ནི་སྨུག་པོ་འཁྲུགས་པ་ཞེས་བྱ་སྟེ། །གསོ་དཀའ་ཕལ་ཆེར་
འཆི་བ་མང་བ་ཡིན། །ཐ་མར་ལུས་གྲང་ཉམ་ཆུང་ཟས་མི་འཇུ། །སྒྲེག་སྐྱུག་འགྲངས་རྗེས་ན་
ལ་འཁྲུ་ཡང་སྲིད། །སྦོ་འཁྲོག་འགྱིང་ཞིང་ཆུ་དང་སིང་གླེག་གནོད། །རིགས་ཀྱི་སྒོ་ནས་བརྟག་
ན་བྱེར་བ་ནི། །མགོ་དང་མིག་རུས་ན་ཞིང་ལུས་ཀུན་བརྩེ། །ལུས་ལྕི་སྒྱིད་པ་སྐྱུར་ལ་ཤེད་
ཉམས་འབྲི། །མཆིན་དྲི་རོ་རྒྱབ་རྩིབ་ལོགས་གཟེར་ཞིང་འཁྱུག །སྒལ་ཚིགས་བརྫིས་ན་ཕན་
སྙམ་ཤུལ་ཤ་ཁྲིད། །ལུད་པ་ཁྲག་བཅས་སྨུག་པོ་ལུ་བར་བྱེད། །མཁལ་རྐེད་བརླ་སུལ་ཚིགས་
གཞི་བྱིན་ཉྭ་ན། །ངེས་མེད་འཕོ་ཞིང་ན་ལ་སྐྱུག་སྙམ་བྱེད། །ཁྱད་པར་མགོ་ལ་བྱེར་ན་འཚོགས་
མ་ལྕི། །མིག་རུས་ན་ཞིང་སྣ་ཁྲག་མི་ཆོད་འཛག །སྙིང་ལ་བྱེར་ན་སྨྱོ་འདར་སྙིང་མི་དགའ། །
གཉིད་མེད་ཆང་འཐུངས་དུས་ན་སྲན་མི་བཟོད། །སྟོད་རྒྱངས་དྲོད་བཅུད་མེ་བཙས་ཕན་སྐྱེད་
མེད། །གློར་བྱེར་རོ་རྒྱབ་ཚ་ལྕི་དུམ་རེ་ན། །ལུད་པ་ཁྲག་བཅས་སྨུག་ཁམ་ཡུན་དུ་འབྱུང༌། །
གཏར་སྨན་གློ་བཅོས་སྐྱེད་མེད་དྲོད་བཅུད་གནོད། །མཆེར་པར་བྱེར་པ་གཡོན་གཟེར་དྲོས་
ཚེ་ན། །ཞེ་འཁུན་བྱེད་ཅིང་གདོང་པ་སྨུག་པོར་འགྲོ། །མཁལ་བྱེར་རྐེད་པ་འཁོར་ཞིང་རྐང་པ་
ལྕི། །བརླ་སུལ་མཁལ་རྩ་ཁྲིད་ཅིང་ཆུ་མདོག་དམར། །བསམ་སེར་བྱེར་ན་ཕོ་མོའི་མཚན་མ་
ནས། །ཁྲག་རྣག་མི་ཆོད་རྒྱུན་དུ་འབྱམས་པ་ཡོད། །ཤ་པགས་ལ་བྱེར་ཀོར་ལེར་ཚ་ཞིང་ན། །
རྩར་བྱེར་རྩ་རྒྱས་མདོག་ནག་སྦྲིད་ཅིང་སྐྲངས། །ཚིགས་བྱེར་བརྐྱང་བསྐུམ་དཀའ་ཞིང་
ཚིགས་མགོ་སྦོམ། །ལྕི་ཞིང་དྲོད་ཆེ་བཅུད་གནོད་གྲུམ་ཐབས་ན། །མཁར་བྱེར་ཚིགས་པའི་
རྒྱུད་ན་བཤུལ་ཤ་ཁྲིད། །ཁ་བྱེ་མནན་བཙིར་བཀན་ན་ཕན་སྙམ་བྱེད། །དེ་ལྟར་བྱེར་རྟགས་སྣ་
ཚོགས་ཅི་འདྲ་ཡང་། །མདོར་ན་ཕོ་མཆིན་ནད་དང་བསྡོངས་པས་ཤེས། །རེ་མོས་ན་འམ་སྔར་
25-1-131


དུས་ཕོ་མཆིན་ན། །ཕྱིས་གཞན་ནད་བྱུང་སྔར་ནད་མེད་ན་ངེས། །སྨུག་པོ་རྒྱས་ལ་རྡོལ་དང་མ་
རྡོལ་གཉིས། །མ་རྡོལ་སྨུག་པོའི་ཁྲག་ཚད་རྒྱས་པའི་རྟགས། །དང་པོ་ཚ་བའི་དུས་ཀྱི་སྐབས་
སུ་བསྟན། །ཤིན་ཏུ་རྒྱས་ན་ཁྲག་རུལ་རྡོལ་འགྱུར་ཏེ། །དེ་ཡང་མ་ཞུའི་གནས་རྒྱས་དུད་ཁུ་
སྐྱུག །ཞུ་བའི་གནས་སུ་རྒྱས་ན་ཁྲག་ནག་འཁྲུ། །བར་དུ་རྒྱས་ན་གཉིས་ཀར་རྡོལ་བར་འགྱུར། །
གྱེན་ཐུར་གཉིས་པོ་གང་དུ་རྡོལ་གྱུར་ཀྱང༌། །དེ་ལ་ཁྲག་ལམ་ཆོད་དང་མ་ཆོད་གཉིས། །ངོ་བོ་
ཟད་དང་རྣམ་པ་གསུམ་དུ་འགྱུར། །ལམ་ཆོད་ཟུངས་ཁྲག་མ་ཤོར་ནད་ཁྲག་ཐོན། །ཟུག་མེད་
ལུས་ཡང་དང་ག་བདེ་ན་འཚོ། །ཁྲག་ལམ་མ་ཆོད་མང་དུ་སྐྱུགས་ཁྲུས་རྗེས། །ཁྲག་ནག་དུད་
ཁུ་མ་ཟད་བདེ་སྟོབས་མེད། །དང་ག་འགགས་ན་ཕལ་ཆེར་གསོ་བ་དཀའ། །ངོ་བོ་ཟད་པ་
ཕལ་ཆེར་ཟུངས་ཁྲག་ཤོར། །ཆུ་དམར་སྦུ་བ་ཆེ་ལ་རྩ་སྟོང་རྒྱུག །གློ་སྙིང་མི་བདེ་དབུགས་
འདེག་སྐྲ་འདབ་འདར། །ལྕེ་མཆུ་སེན་མོའི་བཀྲག་ཤོར་གདོང་པ་སེར། །སྐེ་རྩ་སྤྲུག་ཅིང་བོལ་
གོང་ཅུང་ཟད་གཡོ། །སྐོམ་དད་ཆེ་ལ་སྙིང་ལ་གྲང་མོ་འདོད། །ཕལ་ཆེར་འཆི་ལ་འཚོ་བ་འགའ་
འབྱུང་སྲིད། །སྨུག་པོ་འགྱིངས་ལ་གབ་དང་མ་གབ་གཉིས། །མ་གབ་རྟགས་དང་བཅོས་
ཐབས་སྤྱི་དང་འདྲ། །གྲང་བས་མགོ་བྱིབས་སྣོད་ཚད་གབ་པ་ནི། །རྩ་རྒྱུད་ཕྲ་ལ་བྱིང་ཞིང་ཆུ་
མདོག་ལྗང༌། །ལུས་ལྕི་སྒྱིད་པ་སྐྱུར་ལ་དང་ག་འགྲིབ། །མཆིན་དྲི་རོ་རྒྱབ་ན་ཞིང་སྒྲེག་པ་
འབྱུང༌། །ཁ་དྲི་མངལ་ལ་སྐྱུགས་ན་ཕན་སྙམ་བྱེད། །རྔུལ་གྲང་ཞོ་དར་གྲང་རྗེས་གླང་ཐབས་
ལྡང༌། །ཟས་དང་སྤྱོད་ལམ་དྲོ་ན་བདེ་བར་མངོན། །འཇུ་དཀའ་ཕོ་བ་འཚིང་ལ་དྲི་མ་སྐམ། །
སྨུག་པོ་སྐྲན་དུ་འདྲིལ་ན་མཆིན་པ་དང༌། །མཆེར་པ་ཕོ་ལོང་རྒྱུ་མའི་གནས་སུ་འབྱུང༌། །སྲ་
འདྲིལ་གཟེར་ཞིང་ན་ལ་མནན་ན་འཕར། །གནས་དེ་ཚ་ཞིང་སྟོབས་འཛད་དང་ག་འགག །རྩ་
རྒྱུད་ཕྲ་མགྱོགས་ཆུ་མདོག་དམར་བར་འོང༌། །གསར་དུས་ཆགས་མོད་མཆིན་པ་ལྟ་བུར་
གཉན། །རྙིངས་ཤིང་རུལ་ནས་གསོ་བར་བླ་བ་ཡིན། །འདྲིལ་བ་ཟགས་ན་གདོང་དང་རྐང་
25-1-132


བོལ་གཡོ། །བསུས་པ་ལྕི་ལྡིར་གསུས་པའི་རྩ་རྣམས་བཀྲ། །སྨུག་པོ་ཟགས་པའི་ཚ་ཆུ་མི་འཚོ་
སྤང༌། །ཅི་ཕྱིར་སྐྲན་རོ་བཤིག་ཚད་ཆུ་རུ་གསོག །བསྐམས་པས་མི་སྐོམས་རྒྱུ་ལས་འཛག་པ་
ཡིན། །ཁོང་ནད་ཕལ་ཆེར་སྨུག་པོའི་རྒྱུ་ཡིས་སྐྱེད། །མི་མཁས་རྨོངས་པས་དུག་ཏུ་འཛིན་པ་
ཡོད། །ལ་ལས་ཚ་བ་ལ་ལས་གྲང་བར་འཛིན། །ལ་ལས་ས་བདག་གདོན་དུ་འཛིན་པའང་
ཡོད། །དེ་ཕྱིར་སྨུག་པོའི་ནད་ལ་བྱ་ར་སྒྲིམས། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །
སྤྱི་ལ་བཅོས་ཐབས་ཟས་སྤྱོད་སྨན་དཔྱད་བཞི། །དང་པོ་ཟས་སྤྱོད་སྒོ་ནས་བཅོས་པ་ནི། །ཉ་
དང་ཕག་པ་གྲ་མའི་ཤ་གསར་དང༌། །མཛོ་ཡི་ཞོ་དར་རྣ་དགོ་བ་ལང་ཤ །སྲན་མ་ཇ་དང་
བསྐོལ་གྲངས་ཆུ་ལ་སོགས། །སྨུག་པོ་ཚ་བ་རྒྱས་པའི་ཟས་སུ་བཤད། །དྲོད་བཅུད་དྲག་ཤུལ་
ཀུན་ཏུ་སྤང་བར་བྱ། །གཙང་ཉ་རྒོད་གཡག་ཤ་དང་ལུག་ཤ་གསར། །གསར་འཇམ་སྐམ་སའི་
ཟན་དྲོན་ལ་སོགས་པ། །སྨུག་པོ་གྲང་རྐྱེན་གབ་པའི་ཟས་སུ་བཤད། །འཇུ་དཀའ་ལྕི་བསིལ་
ཉིན་གཉིད་གྲང་བ་སྤང༌། །རླན་མེད་དྲོ་སར་རྔུལ་མ་ཐོན་ཙམ་བཅག །སྨན་གྱིས་བཅོས་པ་རྩི་
རྡོ་སྔོ་དང་གསུམ། །རྩི་སྦྱོར་ཨ་རུ་བྲག་ཞུན་འདུ་བ་སྙོམས། །ཅུ་གང་གུར་གུམ་གློ་མཆིན་ཁ་
གནོན་ཡིན། །སེ་འབྲུ་བསེ་ཡབ་སྟར་བུ་འུ་སུ་དང༌། །མ་ནུ་ཨུཏྤལ་པི་པི་ལིང་དང་བདུན། །
བད་ཀན་ཚ་བ་འཇོམས་པའི་གཉེན་པོ་ཡིན། །ཏིག་ཏ་བ་ཤ་ཀ་ཡིས་ཁྲག་མཁྲིས་གསོད། །ཚ་
སྟོབས་ཆེ་ན་གི་ཝཾ་ཙན་དན་བསྣན། །གྲང་བ་ཆེ་ན་ད་ལིས་སྒེ་གཤེར་བསྣན། །སྟོད་སྨད་བར་
གནས་བུར་དཀར་སྦྲང་རྩིས་བསྒྱུར། །སྨུག་པོ་མ་ལུས་འཇོམས་པའི་སྤྱི་སྨན་ཡིན། །ཁྱད་པར་
སྨུག་པོ་ཚ་བ་རྒྱས་ལ་བསྔགས། །རྡོ་སྦྱོར་ཨ་རུ་བྲག་ཞུན་རྒྱལ་པོ་ལ། །བཙུན་མོ་བ་ཤ་ཀ་དང་
རེ་སྐོན་པ། །ཅོང་ཞི་སྲས་ལ་བློན་པོ་གཉེན་པོ་(མ་ནུ་འུ་སུ་སྟར་བུ་)གསུམ། །སྨུག་པོ་མ་ལུས་གསོ་
བའི་སྤྱི་སྨན་ཡིན། །ཛཱ་ཏི་ཨ་ག་རུ་དང་ཙན་དན་བསྣན། །སྨུག་པོ་སྙིང་དང་སྲོག་རྩར་བྱེར་བ་
འཇོམས། །གི་ཝཾ་ཙན་དན་དཀར་པོ་བསིལ་གསུམ་བསྣན། །སྨུག་པོ་གསར་དུས་ཚ་བ་རྒྱས་
25-1-133


པ་སེལ། །ཅུ་གང་རྒུན་འབྲུམ་ཤིང་མངར་དོམ་མཁྲིས་བསྣན། །སྨུག་པོ་གློ་ལ་བྱེར་བ་འཇོམས་
པར་བྱེད། །བོང་ང་དོམ་མཁྲིས་གསེར་གྱི་མེ་ཏོག་བསྣན། །སྨུག་པོ་ཚ་བ་སྣོད་དུ་གབ་པ་
འཇོམས། །ལྡུམ་བུ་ཕག་ཁྲག་སྐྱེར་པའི་བར་ཤུན་བསྣན། །རྩ་ཚིགས་བྱེར་བ་དུག་དང་འདྲ་བ་
འཇོམས། །རྒྱ་སྐྱེགས་པུ་ཤེལ་འབྲས་ཡོས་གྱེན་རྡོལ་གཅོད། །ད་ཏྲིག་བྱ་རྐང་དུག་ཉུང་ཐུར་
རལ་སྡོམ། །སྟར་བུ་རྒྱམ་ཚྭ་སྦྲུལ་ཤས་འདྲིལ་བ་འཇིག །ད་ལིས་སེ་འབྲུ་དྲོད་སྨན་གབ་པ་
སེལ། །སྨན་རྟ་ཀ་ར་བུ་རམ་སྦྲང་རྩིས་བསྒྱུར། །འདུས་ནད་གསོ་དཀའ་སྨུག་པོ་འཇོམས་པའི་
མཆོག །སྔོ་སྦྱོར་པྲི་ཡང་ཀུ་དང་ཁུར་མང་དང༌། །སེ་རྒོད་བར་ཤུན་སྟར་བུ་ཡུང་བ་ལྔ། །གོང་མ་
ཆ་བསྐྱེད་གཙོ་ཡིན་དེ་ཡི་འཁོར། །ད་ལིས་ཤིང་ཚ་སུག་སྨེལ་ར་མཉེ་བ། །སླེ་ཏྲེས་ཞིབ་
བཏགས་ཀ་རས་རྟ་བྱས་ལ། །ཚ་གྲང་ཆུ་བསིལ་བསྐོལ་བས་འཕུལ་ལ་བཏང༌། །སྨུག་པོ་ཀུན་
འཇོམས་ཁྱད་པར་འཐབ་པ་སེལ། །ཙན་དན་ཅུ་གང་གུར་གུམ་མ་ནུ་དང༌། །འུ་སུ་ཀ་ར་སྦྱར་
བ་ལྟག་པ་སྤྲད། །སྨུག་པོ་ཁྲག་ཚད་རྒྱས་པ་སེལ་བར་བྱེད། །ཆ་མཉམ་བཞི་ཐང་ལྟག་སྤྲད་སྦོ་
སྒྲེག་འཇོམས། །གུར་གུམ་དོམ་མཁྲིས་རྒྱ་སྐྱེགས་པུ་ཤེལ་ཙེ། །འབྲས་ཡོས་ཀ་ར་སྦྲང་གིས་
སྐྱུག་པ་གཅོད། །ཅོང་ཞི་རེ་སྐོན་ད་ཏྲིག་དུག་མོ་ཉུང༌། །པྲི་ཡང་ཀུ་རྣམས་འབྲས་ཐུག་ལ་བཏབ་
སྟེ། །ལྟག་པ་སྤྲད་པས་ཐུར་དུ་འཁྲུ་བ་གཅོད། །འདུས་ནད་སྨུག་པོའི་གྲོང་ཁྱེར་འཇོམས་པར་
བྱེད། །མེ་ཏོག་དང་པོ་ཆུ་སྐྱུར་སྐྱུག་དུས་སུ། །སེ་འབྲུ་མ་ནུ་གུར་གུམ་པི་པི་ལིང༌། །སུག་སྨེལ་
ཅོང་ཞི་ཀ་རས་ཁ་སླངས་བཏང༌། །ཡང་ན་སེ་འབྲུ་སྟར་བུ་སྐྱུ་རུ་ར། །ད་ཏྲིག་སྐྱེར་འབྲུ་ཆུ་རྐང་
སྦྱར་བ་བཏང༌། །སེར་པོ་མཁྲིས་ཐབས་སྐྱུག་དུས་དུག་མོ་ཉུང༌། །ཏིག་ཏ་ཤིང་མངར་འུ་སུ་ཀ་
ཀོ་ལ། །དོམ་མཁྲིས་ཀ་ར་སྦྱར་བས་ཞི་བར་འགྱུར། །ཡང་ན་ཤིང་མངར་གསེར་གྱི་མེ་ཏོག་
དང༌། །ཏིག་ཏ་སེ་འབྲུ་དམར་པོ་གསུམ་ཐང་དང༌། །རྒྱ་བཤལ་ཙ་དམར་སྐྱུག་དུས་གུར་གུམ་
དང༌། །ཅུ་གང་ཏིག་ཏ་ཨུཏྤལ་བ་ལེ་ཀ །སྐྱུ་རུ་ར་དང་སྐྱེར་ཤུན་ཀ་ར་སྦྱར། །རྒྱ་སྐྱེགས་ཁུ་བས་
25-1-134


འཕུལ་བཏང་ཞི་བར་བྱེད། །ཁྲག་རུལ་དུད་ཁུ་སྐྱུག་དུས་སེ་འབྲུ་དང༌། །བཙོད་དང་འུ་སུ་སུག་
སྨེལ་པི་པི་ལིང༌། །བསེ་ཡབ་ཤིང་མངར་དོམ་མཁྲིས་སྦྲང་སྦྱར་བཏང༌། །དཔྱད་དུ་གཏར་ག་
བཤལ་དང་མེ་བཙའ་དུགས། །གང་དགོས་ནད་ཀྱི་སྐབས་དང་སྦྱར་ཏེ་བཅོས། །དེ་ནས་བྱེ་
བྲག་བཅོས་ཐབས་རྣམ་གསུམ་སྟེ། །གནས་དང་དུས་དང་རིགས་དང་སྦྱར་ཏེ་བཅོས། །དང་པོ་
གནས་དང་སྦྱར་ཏེ་བཅོས་པ་ནི། །ཕོ་བར་གནས་ཚེ་བད་ཀན་གཙོ་བོར་བཅོས། །དང་པོ་མ་ནུ་
བཞི་ཐང་གཏོང་བ་བསྔགས། །སྤྱི་སྨན་སེ་འབྲུ་བཞི་དང་ལྟག་པ་སྤྲད། །ཡང་ན་སེ་འབྲུ་བཞི་
དང་གུར་གུམ་དང༌། །མ་ནུ་འུ་སུ་སྟར་བུ་སྦྱར་ལ་བཏང༌། །མཆིན་པར་གནས་ཚེ་ཁྲག་ནད་
གཙོ་བོར་བཅོས། །དང་པོ་ཏིག་ཏ་རུ་རྟ་བ་ཤ་ཀ །མ་ནུ་པུ་ཤེལ་རྩེ་ཡི་བསྐོལ་གྲངས་བཏང༌། །
ཕྱེ་མ་གུར་གུམ་བདུན་དང་ཅུ་གང་བརྒྱད། །རུ་ཐུང་སྣོད་ཀ་ཁྲག་ཚོད་སྦྱར་ལ་གཏང༌། །ཕྱེ་མ་
གཏར་གྱིས་མ་ཞི་དུར་བྱིད་དང༌། །ཧོང་ལེན་ཚ་ལའི་རིལ་བུས་ཟུངས་སྦྱར་སྦྱང༌། །རྒྱུ་མར་
གནས་ཚེ་མཁྲིས་པ་གཙོ་བོར་བཅོས། །ཏིག་ཏ་མ་ནུ་དུག་ཉུང་བསྐོལ་གྲངས་བཏང༌། །ཡང་ན་
ཨིཎྜ་བཞི་ཐང་ཤིས་པ་ཡིན། །ཕྱེ་མ་བྲག་ཞུན་དུག་ཉུང་བོང་ང་དཀར། །དོམ་མཁྲིས་མ་ནུ་འུ་
སུ་ཨ་རུ་ར། །ག་དུར་ཀ་ར་སྦྱར་བའི་ཕྱེ་མ་བསྟེན། །ཞི་བར་མ་ནུས་གོང་ལྟར་བཤལ་གྱིས་
སྦྱང༌། །ལོང་དུ་གནས་ཚེ་རླུང་ཉིད་གཙོ་བོར་བཅོས། །དང་པོ་མ་ནུ་བཞི་ཡི་བསྡུས་ཐང་བཏང༌། །
སེ་འབྲུ་ཚ་བ་གསུམ་དང་བཟང་པོ་གསུམ། །གུར་གུམ་ཤིང་ཚ་ཟི་ར་ཨ་རུ་ར། །རྒྱམ་ཚྭ་ཁ་རུ་
ཚྭ་དང་བུ་རམ་སྦྱར། །ཆུ་ཚན་འཕུལ་བས་སྦོ་འཁྲོག་ལོང་རླུང་འཇོམས། །སྨད་དུ་ཟུག་ཆེ་
འགགས་ན་མས་འདྲེན་བྱ། །སྨུག་པོ་དུས་ཀྱིས་བཅོས་པ་ཚ་བའི་དུས། །རུ་རྟ་(ཏིག་ཏ་བ་ཤ་ཀ་པུ་
ཤེལ་ཙེ་མ་ནུ་)ལྔ་ཐང་སྨུག་པོའི་འཕྲལ་ཟུག་བཅོག །ཕྱེ་མ་ཙན་དན་གི་ཝཾ་གུར་གུམ་དང༌། །ཅུ་
གང་མ་ནུ་འུ་སུ་བ་ཤ་ཀ །ཨུཏྤལ་རེ་སྐོན་ཏིག་ཏ་བྲག་ཞུན་རྣམས། །ཀ་ར་སྦྱར་ལ་སུམ་ཡར་
བཏང་བར་བྱ། །ཡང་ན་ཨ་རུ་བྲག་ཞུན་རེ་སྐོན་པ། །ཀྱི་ལྕེ་བོང་ང་སྤང་རྩི་པྲི་ཡང་ཀུ། །ཀ་ར་
25-1-135


སྦྱར་བཏང་ཡང་ན་ཙན་དན་དཀར། །གི་ཝཾ་བསིལ་གསུམ་ཏིག་ཏ་བ་ཤ་ཀ །རུ་རྟ་བྲག་ཞུན་
ཨ་རུ་ཀ་ར་སྦྱར། །ཆུ་གྲང་འཕུལ་བས་སྨུག་པོ་རྒྱས་པ་འཇོམས། །སྣོད་ཀ་རུ་ཐུང་ལོང་རྩ་
གནས་སྦྱར་གཏར། །ཕྱེ་མ་གཏར་གྱིས་མ་ཞི་གོང་ལྟར་སྦྱང༌། །བར་དུ་འཁྲུགས་ཏེ་རླུང་ཁྲག་
འཐབ་པའི་དུས། །མ་གྲང་བཅག་ཅིང་བསིལ་དྲོད་ཁྲེའུར་བཏང་། །སེ་འབྲུ་མ་ནུ་སྟར་བུ་པི་པི་
ལིང༌། །བ་ཤ་ཀ་དང་ཀ་ར་སྦྱར་བ་བསྔགས། །ཡང་ན་ཅུ་གང་བདེ་བྱེད་ཆུང་ངུ་ལ། །མ་ནུ་འུ་སུ་
སྟར་བུ་བསྡེབས་ཏེ་བསྟེན། །ཆུ་བོ་ཨ་བོའི་དུགས་ཀྱིས་འཕྲལ་ཟུག་བཅག །དེ་ལ་བདེ་སྐྱེད་
ཆུང་ཡང་སྟོབས་བཟང་ན། །སྔོན་འགྲོ་ཡུན་བསྲིང་འཇམ་རྩིས་རླུང་བསལ་ལ། །དུར་བྱིད་
སྟར་བུ་དུང་ཐལ་སྦྲུལ་གྱི་ཤ །རྒྱ་ཚྭ་བུ་རམ་སྦྱར་བའི་བཤལ་གྱིས་སྦྱང༌། །སྦྱང་བའི་ཟུངས་
མེད་འཇམ་རྩི་ནི་རུ་སྤེལ། །ལན་གྲངས་བདུན་དགུ་ཅི་རིགས་བཏང་བྱས་ན། །རླུང་མལ་
གཞུག་ཅིང་ལོང་ཕུགས་ཁྲག་སྐམ་དབྱུང༌། །རུ་ཐུང་རྩེ་ཆུང་ལོང་རྩ་ཁ་ཕྱེ་ལ། །ཨན་སྟོང་བཅུ་
གསུམ་ལོང་གསང་མེ་ཡིས་མནན། །དེ་ཡིས་འཐབ་པ་གནས་སུ་ཞི་བར་འགྱུར། །ཐ་མ་གྲང་
བ་ལྷིང་ཆད་བཅོས་པ་ནི། །རྒྱམ་ཚྭ་གསུམ་དང་བཞི་པའི་ཐང་མང་བཏང༌། །ཕྱེ་མ་སེ་འབྲུ་བཞི་
སྟེང་ཕོ་བ་རིས། །མ་ནུ་འུ་སུ་སྒ་དང་ཀ་ར་སྦྱར། །ཡང་ན་མ་ནུ་འུ་སུ་རྒྱམ་ཚྭ་བསྣན། །བུ་རམ་
སྦྱར་བ་ཆུ་ཚན་འཕུལ་ལ་བཏང༌། །འཇམ་རྩི་ནི་རུ་ཧ་སྤེལ་སྐབས་སུ་བསྔགས། །ཕོ་བ་ལོང་
གསང་དྲུག་བདུན་བརྒྱད་པ་བསྲོ། །གཏར་བཤལ་བསིལ་ཕྱོགས་རླན་གྲང་བསེར་བུ་སྤང༌། །
དྲོ་ལ་བཅུད་པས་བད་རླུང་ཞི་བར་བྱ། །རིགས་ཀྱིས་བཅོས་པ་སྨུག་པོ་བྱེར་བ་ལ། །གུར་གུམ་
ཅུ་གང་ཨུཏྤལ་བ་ལེ་ཀ །ཏིག་ཏ་སྐྱུ་རུ་སྐྱེར་ཤུན་ཀ་ར་སྦྱར། །གང་བབས་རྩ་གཏར་བྱེར་ཆུང་དེ་
ཡིས་སེལ། །བྱེར་ཚབས་ཆེ་ན་བསྡུ་བསད་སྦྱང་བར་བྱ། །བསྡུ་བ་ཕག་ཁྲག་མ་ནུ་འུ་སུ་དང༌། །
སྟར་བུ་ཀ་ར་སྦྱར་བས་བྱེར་བ་སྡུད། །ཡང་ན་སེ་འབྲུ་སེ་རྒོད་བར་ཤུན་དང༌། །རེ་རལ་ཕག་
ཁྲག་ཀ་ར་བ་འོས་དབུལ། །ཡང་ན་ཚ་ལ་འོ་མ་སྦྱར་བས་བསྡུ། །དེ་དག་ཀུན་གྱིས་སྨུག་པོ་སྤྱི་
25-1-136


རུ་སྡུད། །སེར་པོ་གསུམ་ཐང་སྟོད་དུ་བྱེར་བ་སྡུད། །ཚ་ལ་ཚོས་གསུམ་ཐང་གིས་སྨད་བྱེར་
སྡུད། །འདུས་རྟགས་ལུས་ལྕི་ཁ་སྐམ་དང་ག་འགག །ཕོ་བ་ན་ལ་རྩ་ཆུའི་ཚ་བ་སྐྱེ། །དེ་དུས་སྤྱི་
སྨན་རྩི་སྦྱོར་བསྟེན་ཏེ་བསད། །དེ་རྗེས་དུར་བྱིད་ཧོང་ལེན་ཚ་ལས་སྦྱང༌། །ནད་སྟོབས་ཆེ་ན་
རིམ་པ་ཅི་རིགས་བསྐྱར། །ཆུང་ན་སྦྱངས་རྗེས་ཕྱེ་མས་བསད་པར་བྱ། །མ་འདུས་བྱེར་བ་རང་
སར་བསད་པ་ནི། །སྨུག་པོ་སྤྱི་སྨན་བར་པའི་མདེ་ཁ་སྦྱར། །ཡང་ན་རྒྱས་པའི་སྐབས་ཀྱི་ཕྱེ་མ་
ལ། །མགོར་བྱེར་དོམ་མཁྲིས་ཏིག་ཏ་མཚེ་ལྡུམ་བསྣན། །སྙིང་ལ་སྤོས་དཀར་ཛཱ་ཏི་ཨ་གར་
བསྣན། །གློ་ལ་ཅུ་གང་ཤིང་མངར་མཚལ་དཀར་བསྣན། །མཆིན་པར་བྲག་ཞུན་གུར་གུམ་བ་
ཤ་ཀ །རྒྱ་སྐྱེགས་སྦངས་པའི་ཁུ་བས་འཕུལ་ལ་བཏང་། །མཆེར་པར་ལི་ཤི་གསེར་མེ་པི་པི་
ལིང༌། །མཁལ་མར་གླ་རྩི་སུག་སྨེལ་ལྕམ་པ་བསྣན། །བསམ་སེར་ཚོས་གསུམ་བསྣན་ཏེ་བྱིན་
ལོང་གཏར། །དོན་ལྔ་རང་རང་རྩ་ལ་གཏར་བ་སྟེ། །མགོ་ལ་གསེར་མདུང་འཚོགས་གསང་རྩེ་
ཆུང་གཏར། །ནང་རྩར་བྱེར་ན་རྩ་ལྟོ་སྦྲགས་ལ་སྦྱང༌། །ཤ་པགས་རྩ་རུས་ཕྱི་རུ་བྱེར་བ་ལ། །
ཁོང་ནད་བསལ་ལ་དེ་རྗེས་ཆུ་ལུམས་བྱ། །སྨུག་པོ་རྒྱས་ལ་རྡོལ་དང་མ་རྡོལ་གཉིས། །མ་
རྡོལ་རྒྱས་པའི་བཅོས་ཐབས་གོང་དུ་བསྟན། །ཤིན་ཏུ་རྒྱས་ཏེ་མཚོ་རྡོལ་གྱེན་ཐུར་གཉིས། །
གྱེན་རྡོལ་སྟོབས་ལྡན་ཁ་ཟས་ཚུད་པ་ལ། །མི་བཅད་བྱུག་བདུག་རུས་ཁུ་བུར་ཆུ་སོགས། །
ལུས་ཟུངས་བསྲུངས་ལ་ནད་ཁྲག་སྐྱུག་ཏུ་གཞུག །ཁྲག་ལམ་མ་ཆོད་ཟུངས་མེད་བཅད་
དགོས་ན། །འབྲས་བཀྲུས་ཁུ་བར་སྐྱུ་རུ་པུ་ཤེལ་ཙེ། །སྦྲང་རྩི་སྦྱར་བཏང་ཙན་དན་པུ་ཤེལ་ཙེ། །
བ་ལེ་ཀ་དང་ག་དུར་པར་པ་ཏ། །བསྐོལ་གྲངས་ཐང་བཏང་པྲི་ཡང་ཀུ་བསྲེགས་པའི། །ཐལ་
བ་ཞུན་མར་སྦྱར་ཏེ་བཏང་བར་བྱ། །ཅུ་གང་གུར་གུམ་དོམ་མཁྲིས་བ་ཤ་ཀ །ཟབ་ཐལ་འགྲོན་
ཐལ་སྲན་མའི་མེ་ཏོག་སྦྱར། །ཙན་དན་དམར་པོ་ར་ཁྲག་པུ་ཤེལ་ཙེ། །སྟང་ཟིལ་འབྲས་ཡོས་
ཕྱེ་དང་ཀ་ར་སྦྱར། །མ་ཆོད་ལོག་ནོན་དུར་བྱིད་པྲི་ཡང་ཀུ། །ཁུ་བ་སྦྲང་དང་སྦྱར་བས་སྦྱང་
25-1-137


བར་བྱ། །ཡང་ན་དུར་བྱིད་འབྲས་གསུམ་པྲི་ཡང་ཀུ། །པི་པི་ལིང་དང་སྦྲང་སྦྱར་སྦྱང་བ་མཆོག །
རྗེས་ལ་སེ་འབྲུ་སྐྱུ་རུ་འབྲས་ཡོས་ཕྱེ། །མར་དང་སྦྱར་བའི་སྐྱོ་མ་བསླུད་པར་བྱ། །ཐུར་དུ་
རལ་བ་ཟུངས་ཡོད་གོང་མ་བཞིན། །བཅད་དགོས་ཐ་རམས་བྱ་རྐང་རྒྱ་སྐྱེགས་བསྡུས། །ཁུ་
བར་ད་ཏྲིག་དོམ་མཁྲིས་པྲི་ཡང་ཀུ། །རེ་སྐོན་ཀ་ར་བཏབ་ལ་བཏང་བའམ། །འབྲས་ཐུག་རེ་
སྐོན་ཅོང་ཞི་ཀར་སྦྱར་བཏང༌། །ཡང་ན་བ་ཤ་ཀ་དང་པྲི་ཡང་ཀུ། །ནག་མཚུར་སེང་ཕྲོམ་སྐྱེར་
པའི་ཁཎྜ་ཡི། །བསྡུས་ཐང་གྲང་མོ་སྦྲང་དང་སྦྱར་ལ་བཏང༌། །འབྲས་སྣ་གསུམ་དང་ཀ་པེད་
མོན་ཆ་ར། །འབྲས་ཡོས་ཕྱེ་དང་ཀ་ར་སྦྱར་ལ་བཏང༌། །བྱིན་ཉྭ་ཆུས་བསྒྲང་ལོང་གསང་མདུན་
རྒྱབ་བསྲོ། །མ་ཆོད་ལོག་ནོན་སོན་ཆ་འོ་མ་སྦྲང༌། །སྐྱུགས་བྱས་རྗེས་ལ་སེ་འབྲུ་པུ་ཤེལ་ཙེ། །
སེང་ཕྲོམ་ཙན་དན་དམར་པོ་འབྲས་ཐུག་བསླུད། །བ་འམ་ར་ཡི་འོ་མ་གསོན་ཁྲག་ལ། །པུ་
ཤེལ་བཏབ་པའི་འཇམ་རྩི་བཏང་བར་བྱ། །ངོ་བོ་ཟད་པའི་རྟགས་བྱུང་བ་ར་ཡི། །འོ་མ་ཀ་ར་
མར་སྐོལ་རླུང་དུས་བཏང༌། །གསར་བཅུད་གསུམ་དང་མངར་གསུམ་ཏིང་ཁྲོལ་བྱིན། །དཀར་
འདོན་སྦྱོར་བ་ཅུ་གང་བདེ་བྱེད་སྦྱོར། །སྨུག་པོ་གབ་ཅིང་འགྱིངས་ན་བཟང་དྲུག་དང༌། །ཅོང་
ཞི་ཚ་སྦྱོར་བཤིག་ལ་དེ་རྗེས་སྦྱང༌། །ཡང་ན་ཨ་རུ་བྲག་ཞུན་རེ་སྐོན་གསུམ། །རིམ་པས་ཕྱེད་
སྐྱུངས་སྐྱུ་རུ་བ་ཤ་ཀ །རུ་རྟ་བོང་ང་ཀར་བུར་སྦྲང་གིས་བསྒྱུར། །ཕྱེ་མ་བྲིད་དེ་ཆུ་སྐོལ་འཕུལ་
ལ་བཏང༌། །འཇུ་དཀའ་སེ་འབྲུ་བཞི་དང་ལྟག་པ་སྤྲད། །ཡང་ན་གངས་ཐིགས་ཨ་རུ་བྲག་
ཞུན་དང༌། །གི་ཝཾ་ཙན་དན་མི་རུས་བཙའ་མ་དང༌། །དོམ་མཁྲིས་ཡུང་བ་ཁུར་རྩ་དྲི་ཆེན་དང༌། །
བཟང་དྲུག་ཀར་སྦྱར་རིམ་པས་བསྐྱེད་དེ་བཏང༌། །འཁྲོག་འགྱུར་འཁྲུ་སྙམ་བྱེད་ན་ཁ་ཟས་
དབྲི། །སྨན་ཐུན་བསྐྱེད་ལ་ཆུ་སྐོལ་ཚན་མོས་དབུལ། །ནད་འགྱིངས་ཞོ་ལྟར་ཆགས་པ་ཐུར་དུ་
སྦྱོང༌། །འཁྲུར་མ་འདོད་ཀྱང་རང་གི་གནས་སུ་འཇོམས། །ཡང་ན་སྟར་བུ་ཞོ་གསུམ་རྒྱམ་ཚྭ་
གཉིས། །མ་ནུ་འུ་སུ་ཐུན་རེ་ཀ་ར་སྦྱར། །ཆུ་ཚན་འཕུལ་བས་སྨུག་པོ་འགྱིངས་པ་བཤིག །དུར་
25-1-138


བྱིད་སྟར་བུ་ཚ་ལ་བུ་རམ་གྱི། །རིལ་བུས་སྦྱངས་ཏེ་རྒྱམ་ཚྭ་སྟར་བུ་དང༌། །རུས་ཁུའི་ལྕག་
བསྟེན་བསིལ་དྲོད་སྤེལ་ཏེ་བཅད། །སྨུག་པོའི་ཁྲག་སྐྲན་འདྲིལ་ན་ཚྭ་བསྲེགས་སྦྱར། །ཡང་ན་
ཅོང་ཞི་ཚ་སྦྱོར་བསྟེན་ཏེ་བརྐོ། །ཡང་ན་ཟེ་ཚྭ་ཞོ་གསུམ་མཚལ་གྱིས་བསྒྱུར། །ལུག་གི་ཀླད་པ་
བཙོས་ཏེ་སྦྱར་ལ་བཏང༌། །ཁ་ཟས་ཕག་སྦྲུལ་ཉ་ཤས་བཤིག་པར་བྱ། །ཞིག་ན་ངོ་བོ་ཅུང་ཟད་
སྙི་རུ་མངོན། །དང་ག་འགག་ཅིང་རྩ་ཆུའི་ཚ་བ་སྐྱེ། །དུར་བྱིད་རྒྱམ་ཚྭ་སྟར་བུ་སྦྲུལ་ཤ་དང༌། །
བུ་རམ་སྦྱར་བའི་རིལ་བུས་སྐྲན་རོ་སྦྱང༌། །ཤིན་ཏུ་རྙིངས་ཤིང་བཤིག་དཀའ་སྨན་གཏར་
སྦྱོངས། །ཚ་བ་བསལ་ལ་དེར་རྗེས་བཤལ་གྱིས་སྦྱང༌། །ལར་ནི་སྨུག་པོ་འདུས་པའི་ནད་ཡིན་
པས། །ས་འདྲ་གསོ་དཀའ་ནད་སྣུར་ལྕི་བའི་ཕྱིར། །ལན་རེས་ཞི་བར་མི་འགྱུར་བཅོས་རྣམས་
བསྐྱར། །ཟུངས་མ་བསྲུངས་པར་སྨན་དཔྱད་བསྟུད་དྲགས་བཏུད། །གསེར་ཟད་གཡའ་ཟད་
ནད་ཟུངས་དུས་གཅིག་འཛད། །དེ་ཕྱིར་ནད་སྟོབས་ཅུང་ཟད་བྲི་བའི་སྐབས། །གསར་བཅུད་
ཟས་ཀྱིས་ལུས་ཟུངས་བསྲུང་ཞིང་བཅོས། །ཐ་མ་མི་བཟློག་ནད་རྗེས་གཅོད་པའི་ཐབས། །
བཤལ་དང་ཕྱེ་མས་ནད་ལྷག་མེད་པར་སྦྱང༌། །སྲོག་རྩ་ཕོ་ལོང་མཆིན་གསང་མེ་ཡིས་བསྡམ། །
མི་འཕྲོད་ཟས་སྤྱོད་ལོ་དུས་བར་དུ་བསྲུང༌། །དེ་ཡིས་མི་བཟློག་བརྟན་པར་འགྱུར་བ་ཡིན། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་
འདུས་ནད་བད་ཀན་སྨུག་པོ་བཅོས་པའི་ལེའུ་སྟེ་ལྔ་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། །དམར་ཁྲིད་ལག་ལེན་མན་ངག་རྒྱུད་འདི་ཡི། །ཁོང་ནད་གསོ་
བའི་སྐབས་ལ་ཇི་ལྟར་བསླབ། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་
ཞུས་པས། སྟོན་པས་གསུངས་པ། །ཀྱེ་དྲང་སྲོང་ཆེན་པོ་ཉོན་ཅིག །ཁོང་ནད་གཅོང་ལ་རྣམ་པ་
གཉིས་ཡིན་ཏེ། །སྡེ་བཞི་གཅོང་གི་རྩ་བ་མ་ཞུ་དང༌། །འབྲས་བུ་གཅོང་ནད་གསར་རྙིང་རྣམ་
25-1-139


གཉིས་སོ། །མ་ཞུ་གཅོང་གི་རྒྱུ་ལ་སྤྱི་དོན་དྲུག །རྒྱུ་དང་རྐྱེན་དང་གྱུར་ཚུལ་བསྟན་པ་དང༌། །
དབྱེ་བ་རྟགས་དང་དེ་ཡི་བཅོས་ཐབས་སོ། །རྒྱུ་ནི་བད་ཀན་ལྕི་ཞིང་བསིལ་བ་ལ། །དེ་རྐྱེན་
རྟེན་དང་མ་གོམས་མི་འཕྲོད་དང༌། །ངོ་བོ་མི་འཇུ་བ་ཡི་རྐྱེན་བཞི་ཡོད། །དང་པོ་རྟེན་ནི་གྲང་
རླུང་ཅན་གྱི་མི། །ཟུངས་ངན་སྦེག་དང་ཁ་ཟས་སྐྱ་བ་ཟ། །དལ་བར་འདུག་དང་མྱ་ངན་སེམས་
ལས་དུབ། །རྒས་དང་ཟས་ཀྱིས་མནར་ཤུལ་འཇུ་མི་ནུས། །མ་གོམས་ནམ་ཕྱེད་ཁ་ཟས་མ་
མྱོང་ཟ། །མི་འཕྲོད་དཀར་སྐྱུར་སྔོ་ངད་འོ་མ་ཉ། །སྔ་མ་མ་ཞུ་ཕྱི་མ་ཟོས་པ་དང༌། །འདྲེས་པར་
ཟོས་པས་མི་འཕྲོད་འཇུ་མི་འགྱུར། །ཟས་ཀྱི་ངོ་བོ་འབྲུ་གསར་བསེར་ཅན་རུལ། །ཤ་རིད་
ཚིལ་བུ་འོ་རློན་རྗེན་པ་དང༌། །མ་ཚོས་འཚིག་དང་ཁེངས་པོ་ཆུ་བསྲེས་རྣམས། །དུས་མེད་ཟས་
ཚོད་མ་ཟིན་འཇུ་བ་དཀའ། །གྱུར་ཚུལ་རྒྱུ་དང་རྐྱེན་དུ་ལྡན་པ་ཡིས། །བད་མཁྲིས་རླུང་གིས་
འཇུ་བའི་མཐུ་ཉམས་ཏེ། །མྱགས་བྱེད་བད་ཀན་དག་གིས་མྱག་མ་ནུས། །འཇུ་བར་བྱེད་པའི་
མཁྲིས་པས་འཇུ་མ་ནུས། །མེ་མཉམ་རླུང་གིས་དྭངས་སྙིགས་འབྱེད་མ་ནུས། །དེ་ལས་མ་ཞུ་
ཞེས་སུ་བརྗོད་པ་ཡིན། །མ་ཞུའི་དབང་གིས་ཕོ་བའི་བད་ཀན་འཕེལ། །བེ་སྣབས་དེ་ཡིས་
རླུང་རྒྱུའི་རྩ་སྦུབས་བཀག །ལྷེན་དང་ལྕགས་དྲེག་མེ་དྲོད་ཉམས་ལ་སོགས། །གཅོང་ནད་མ་
ལུས་སྐྱེད་པར་བྱེད་པ་ཡིན། །དར་ལ་བབ་ཅིང་སྟོབས་ལྡན་མེ་དྲོད་ཆེ། །ལུས་ངག་བྲེལ་ཞིང་
སྣུམ་བག་རྒྱུན་དུ་ཟ། །མི་འཕྲོད་ཟས་ལ་གོམས་སམ་བྲིད་ནས་སློབ། །དེ་ལ་དུས་ཀུན་མ་ཞུ་
འབྱུང་མི་འགྱུར། །དབྱེ་བ་རྫས་དང་ངོ་བོ་རིགས་གྲོགས་དུས། །རྫས་ཀྱིས་དབྱེ་ན་གྱོང་རླན་
སྣུམ་དང་གསུམ། །གྱོང་ནི་ཙམ་པ་སྔོ་ངད་ཤ་རིད་དོ། །རླན་ནི་ཆང་ཆུ་འོ་མ་ཞོ་དར་ཇ། །སྣུམ་
ནི་རྩི་མར་འབྲུ་མར་ཚིལ་ཞག་རྐང༌། །རླན་སྣུམ་མ་ཞུ་ཕལ་ཆེར་ཉེས་པ་ཆེ། །ངོ་བོས་དབྱེ་ན་
སྙིགས་མ་དྭངས་མ་གཉིས། །དེ་ལ་སྙིགས་མ་མ་ཞུ་ཞེས་བྱ་བ། །ཁ་ཟས་མ་ཞུ་རང་སར་ཕོ་
ལོང་ལས། །བད་ཀན་བེ་སྣབས་འཕེལ་བས་བཏུམས་ནས་གནས། །རྙིངས་ནས་སྙིགས་མ་
25-1-140


འདྲིལ་བའི་ཟས་སྐྲན་འགྱུར། །མཉམ་གནས་རླུང་གིས་དྭངས་སྙིགས་མ་ཕྱེད་པའི། །སྙིགས་
མ་དྭངས་མའི་རྩ་མིག་ཤོར་བ་ཡིས། །མདངས་སྒྱུར་མཁྲིས་པས་ཟུངས་ཁྲག་མ་སྨིན་ཏེ། །ཡུན་
རིང་མཆིན་གནས་དྭངས་མ་མ་ཞུ་ཡིན། །རྙིངས་ནས་དྭངས་མ་འདྲིལ་ཟགས་བྱེར་འགྱིངས་
བཞི། །འདྲིལ་བས་སྐྲན་རྣམས་སྐྱེད་པར་བྱེད་པ་སྟེ། །ཟགས་པས་སྐྱ་རྦབ་དམུ་ཆུ་སྐྱེད་པར་
བྱེད། །བྱེར་བས་དུག་མཛེ་མེ་དབལ་འོར་དུ་ལྷུང༌། །འབྲས་དང་སུར་ཡ་དྲེག་དང་གྲུམ་བུ་
དང༌། །མིག་སེར་རྩ་སྐྲན་རྐང་བམ་དུ་མར་འགྱུར། །འགྱིངས་པས་སྨུག་པོ་རྒྱས་གབ་མཆེར་
པའི་ནད། །ནད་རྣམས་ཕལ་ཆེར་དྭངས་མ་མ་ཞུས་སྐྱེད། །རིགས་ཀྱིས་དབྱེ་ན་བེ་སྣབས་
བསུད་ནད་དང༌། །མ་ཞུ་ཤིང་འདྲ་དུག་འདྲ་རྣམ་པ་བཞི། །གྲོགས་ཀྱིས་དབྱེ་ན་རླུང་མཁྲིས་
བད་ཀན་གསུམ། །དུས་ཀྱིས་དབྱེ་ན་གསར་རྙིང་གཉིས་སུ་འགྱུར། །ངོས་འཛིན་རྟགས་ལ་སྤྱི་
དང་བྱེ་བྲག་གཉིས། །སྤྱི་རྟགས་དྲི་མ་འགག་གམ་དུས་མིན་འབྱུང༌། །འོག་རླུང་འགྱུ་དཀའ་
འཁྱིལ་ཞིང་ཁོང་པ་སྦོ། །སྐབས་སུ་འགྱིངས་རྗེས་བུངས་ཆེར་འཁྲུ་བར་འགྱུར། །དྭངས་
སྙིགས་འདྲེས་པས་བཤང་གཅི་ཞག་ཅན་འཁྲུ། །ཁོང་སྙོམ་ལུས་ལྕི་ཡི་ག་ལྡོག་པར་བྱེད། །
ཟོས་དུས་ན་ཞིང་སྒྲེག་ལ་མགོ་བོ་ན། །བྱེ་བྲག་རྟགས་ལ་སྙིགས་མ་མ་ཞུ་ན། །ཁ་མངལ་ཕོ་བ་
འཚིང་ལ་སྒྲེག་ཅིང་སྐྱུག །གང་མ་ཞུ་བའི་ཟས་དེ་ཁྱད་པར་གནོད། །གོམས་པར་ཟོས་སམ་
རྙིངས་ནས་དེ་ལྟར་མིན། །མིག་དང་གདོང་པ་རྐང་བོལ་གཡོ་བར་བྱེད། །དྭངས་མ་མ་ཞུ་ཁོང་
སྙོམས་ཡི་ག་འགག །སྒྲེག་མང་ཤ་སྐམ་སྙིང་ག་རྩིབ་ལོགས་ན། །མ་ཞུ་བེ་སྣབས་བད་ཀན་
འཕེལ་བ་ཡིས། །སྟེང་འོག་མེ་མཉམ་རླུང་རྒྱུའི་ལམ་བཀག་པས། །ཁོང་སྦོ་ཐེར་ཟུག་ན་ལ་
འོག་རླུང་སྡོམ། །སྒྲེག་པ་མི་ཐོན་མ་ཞུ་ཀུན་གྱི་རྒྱུ། །མ་ཞུ་བསུད་ནད་ཅེས་བྱ་བེ་སྣབས་དེས། །
ཐུར་སེལ་ལམ་བཀག་གྱེན་དུ་ལོག་པ་ཡིས། །དབུགས་ངན་སྲི་ཞིང་དྲི་མ་སྐམ་པ་དང༌། །བྲང་
ཚ་ཆུ་ཚན་འོང་ཞིང་སྒྲེག་པ་བསུད། །མཆིན་དྲི་ན་ཞིང་མཇུག་ཏུ་སྨུག་པོར་འགྱུར། །མ་ཞུ་ཤིང་
25-1-141


འདྲ་ཞེས་བྱ་བེ་སྣབས་དེས། །སྟེང་འོག་རྒྱུ་བ་རླུང་གི་ལམ་བཀག་པས། །མེ་མཉམ་མཆིན་
མཆེར་རྩིབ་ལོགས་རྩ་ནང་ཞུགས། །དགྱེ་དགུ་མི་ཤེས་ནང་དུ་ཤིང་བཅུག་འདྲ། །གར་ཞུགས་
གཟེར་ཞིང་གླང་ཐབས་འབྱུང་བ་ཡིན། །དུག་འདྲ་དྭངས་མ་མ་ཞུ་རྩ་མིག་བྱེར། །རྩ་ནང་ཀུན་
ཏུ་དྭངས་མ་ཆགས་ཤིང་ཞེན། །དུག་ནད་ལྟ་བུར་ཤ་ལུས་སྔོ་ཞིང་སྐམ། །ཤེད་ཆུང་ཟོས་རྗེས་
མི་བདེ་དང་ག་ཞན། །ཚ་ཆེས་གྲང་ཆེས་གཉིས་ཀ་མི་བཟོད་ན། །མ་ཞུའི་རྣམ་པ་གང་ཡང་རླུང་
ལྡན་ཚེ། །ཁོང་སྦོ་འདར་དང་མགོ་འཁོར་ཡན་ལག་རེངས། །མཁྲིས་ལྡན་ཁོང་ཚ་དྲི་ཆེ་འཁྲུ་བ་
སེར། །སྒྲེག་སྐྱུག་སྐོམ་དད་ཆེ་ཞིང་རིམས་ཀྱིས་འདེབས། །བད་ཀན་ལྡན་པ་མཆིལ་མ་འབྱར་
བག་མང༌། །ལུས་ལྕི་སེམས་བྱིང་སྒྲེག་སྐྱུག་ཟས་མི་ཞིམ། །དུས་ཀྱིས་དབྱེ་ན་གསར་དང་རྙིང་
པ་གཉིས། །གསར་པའི་དུས་ན་མ་ཞུ་བ་ཞེས་བྱ། །རྙིངས་ནས་མ་ཞུའི་རྒྱུས་བསྐྱེད་གཅོང་ནད་
འགྱུར། །བཅོས་པའི་ཐབས་ལ་གསར་རྙིང་རྣམ་པ་གཉིས། །གསར་དུས་བཅོས་ཐབས་སྤྱི་
དང་བྱེ་བྲག་གཉིས། །སྤྱི་ལ་སྨན་དཔྱད་ཟས་དང་སྤྱོད་ལམ་བཞི། །མ་ཞུ་ཆུང་འབྲིང་ཆེན་པོ་
ནད་སྟོབས་སྦྱར། །མ་ཞུ་ཆུང་ངུ་ཟས་ཀྱིས་བཀྲེས་སྐོམ་བྱ། །ནང་ནུབ་དུས་ན་རྒྱམ་ཚྭའི་ཆུ་
སྐོལ་བཏུང༌། །སྙིངས་མ་རང་སར་ལས་པའི་མ་ཞུ་འཇུ། །བད་ཀན་བེ་སྣབས་རྩ་སྦུབས་
འགགས་པ་སྦྱོང༌། །ཁ་ཟས་འཇུ་དཀའ་གྲང་མོ་ཆེས་པ་སྤང༌། །ཕྱེ་ཐུག་སྒ་བཏབ་ལུག་ཤ་ཡིབ་
མ་དང༌། །ཉ་དང་རྒོད་ཤ་ཆང་དང་ཟན་དྲོན་སོགས། །ཡང་དྲོ་འཇུ་བླ་རྒྱུ་སྲུང་ཉུང་ཤས་བསྟེན། །
སྤྱོད་ལམ་རླན་གྲང་བསེར་བུ་ཉིན་གཉིད་སྤང༌། །སྐམ་སར་ལུས་དྲོ་རྔུལ་ཕྱིན་རྩོལ་བ་སྤྱད། །
འོན་ཀྱང་གསར་དུས་སྨྱུང་བྱ་ཉིན་གཉིད་ཕན། །ཁ་ཅིག་མ་ཞུ་གསར་རྙིང་ཐམས་ཅད་ལ། །
བཅགས་པ་ཕན་ཞེས་རྨོངས་པའི་མུན་ཚིག་སྨྲ། །སྙིགས་མ་མ་ཞུ་གསར་པ་ལྕགས་ཕན་ཏེ། །
དྭངས་མ་མ་ཞུ་རྙིང་པའི་དུག་ཏུ་འགྱུར། །ཅི་ཕྱིར་དྭངས་མ་མཆིན་གནས་མཁྲིས་ལྡན་ཚ། །
སྙིགས་མ་ཕོ་ལོང་བད་རླུང་བསྡོངས་པས་གྲང༌། །མ་ཞུ་འབྲིང་པོ་རྒྱམ་ཚྭ་བཞི་ཐང་བཏང༌།  །
25-1-142

 
རྒྱམ་ཚྭ་ཁ་རུ་ཚྭ་དང་ཚ་བ་གསུམ། །བསྡུས་ཐང་ཚན་མོས་དྲོད་སྐྱེད་མ་ཞུ་འཇུ། །ཞི་དཀའ་
རྒོད་མ་ཁ་ཡི་ཕྱེ་མ་འམ། །སེ་འབྲུ་ཚ་བ་ལྔ་དང་ཚྭ་སྣ་གསུམ། །བུར་དཀར་སྦྱར་ཕྱེ་ཐུན་སྐྱུངས་
ཆུ་ཚན་དབུལ། །ཐུན་ཆེས་འཇུ་དཀའ་བེ་སྣབས་གྲོགས་སུ་འགྱུར། །རྡོ་དང་བོང་བ་ཚྭ་ཡི་དྲོད་
དུགས་བདུག །ཁྱི་སྤྱང་དབྱི་སོགས་སྤུ་དུགས་རྐེད་པར་དཀྲི། །མ་ཞུ་ཆེན་པོ་སྨན་གྱིས་བཞུས་
རྗེས་སྦྱང༌། །སྟོད་གནས་སྐྱུགས་ལ་སྨད་གནས་ནི་རུ་ཧ། །བར་དུ་གནས་ན་བཤལ་གྱིས་སྦྱང་
བར་བྱ། །རྗེས་ལ་ཟས་སྤྱོད་བསྟེན་ཉེས་སླར་འཕེལ་བྱེད། །དེ་ཕྱིར་རྗེས་ཀྱི་སྤྱོད་ལམ་ཤིན་ཏུ་
གཟབ། །དེས་ཀྱང་ཞེན་ཆེ་རྩ་བ་མ་ཐོན་ན། །ཕོ་གསང་གང་བབས་མེ་འམ་ཐུར་མས་སྤྲུག །བྱེ་
བྲག་བཅོས་པ་སྙིགས་མ་མ་ཞུ་ལ། །ཕོ་བའི་དྲོད་སྐྱེད་སེ་འབྲུ་ཚ་བ་གསུམ། །མ་ཞུ་འཇུ་བྱེད་
རྒྱམ་ཚྭ་ཁ་རུ་ཚྭ། །རྒྱ་ཚྭ་བུར་དཀར་སྦྱར་བའི་ཕྱེ་མ་ལ། །ཙམ་པ་མ་ཞུ་ཕབས་དང་བུལ་ཏོག་
བསྣན། །ཤ་མ་ཞུ་ན་སྤྱང་ཀིའི་ཕོ་བའམ། །སོ་བྱ་རྒོད་ཀྱི་གྲེ་བ་བསྣན་ལ་བཏང༌། །ཤ་ཁུ་སོག་
ཡུའི་ཐང་དང་ལྟག་པ་སྤྲད། །སྔོ་ངད་མ་ཞུ་ཟྭ་དང་དབྱི་མོང་བསྣན། །ཆང་མ་ཞུ་ལ་ཕབས་དང་
ཆང་སྐོལ་བསྣན། །ཡང་ན་སོགས་ཚིགས་ཐང་གིས་འཇུ་བར་བྱེད། །ཇ་ཆུ་མ་ཞུ་ཚྭ་བསྣན་དྲི་ཆུ་
བཏུང༌། །ཞོ་དར་འོ་མ་མ་ཞུ་ཆུར་ཁུས་འཇུ། །མར་ཚིལ་མ་ཞུ་ཅོང་ཞི་མེ་བརྟུལ་བསྣན། །འབྲུ་
མར་མ་ཞུ་སྲན་ཕྱེ་ལྟག་སྤྲད་བསྣན། །རྡོ་མ་ཞུ་ལ་མཚུར་དང་ཟེ་ཚྭ་བསྣན། །སྨན་མ་ཞུ་ན་དུག་
རིལ་ལྟག་པ་སྤྲད། །སྨན་རྗེས་སོན་ཆ་ཤུ་དག་པི་པི་ལིང༌། །སྒ་སྐྱ་ར་ཡི་འོ་མས་གྱེན་དུ་དྲང༌། །
ནད་ཆེ་དང་པོར་སྐྱུགས་བྱས་རྗེས་ལ་སྨན། །ཁྱད་པར་ཚ་དུགས་རྩོལ་སྤྱད་ཆུ་སྐོལ་མཆོག །
དྭངས་མ་མ་ཞུ་ཆ་མཉམ་བཞི་ཐང་བཏང༌། །བྱེར་ན་འོ་མ་ལན་ཚྭ་བཏབ་པས་བསྡུ། །མ་བྱེར་
འདུས་ནས་དུར་བྱིད་ཤི་རི་ཁན། །རུ་རྟ་རྒྱམ་ཚྭ་ཤུ་དག་བུ་རམ་སྦྱར། །ཆུ་ཚན་སྐྱུར་རྩབས་
འབྲས་ཀྱིས་ཕྱི་རྗེས་བཅད། །སེ་འབྲུ་ལྔ་པ་ཆུ་སྐོལ་འཕུལ་ལ་བཏང༌། །མ་ཞུ་བེ་སྣབས་སོན་
ཆ་ཤུ་དག་སྒ། །རྒྱམ་ཚྭ་ཆུ་སྐོལ་སྦྱར་བའི་སྐྱུགས་ཀྱིས་དྲང༌། །སྐྱུགས་རྗེས་ལྟོ་བར་དུགས་བྱ་ཆུ་
25-1-143


སྐོལ་བཏུང་། །ལྕུམ་རྩ་སོན་ཆ་བུལ་ཏོག་པི་པི་ལིང༌། །ཚྭ་དང་མར་སྦྱར་རེང་བུས་སྨད་རླུང་
སྦྱོང༌། །དེ་སྟེང་དུར་བྱིད་ཕབས་སྦྱར་མས་འདྲེན་བཏང༌། །སྲོད་ཀྱི་དུས་སུ་རྐང་མཐིལ་རྡོ་ཡིས་
བདུག །བསུད་ནད་རྟིང་པའི་དྲེག་མཚམས་མེ་བཙའ་གདབ། །དེ་ཉིན་སྨྱུང་བྱས་སྟེང་རླུང་
དྲག་ཏུ་བསྣན། །འོག་རླུང་གློད་ལ་བར་རླུང་དྲག་ཏུ་སྤྲུག །དེ་འོག་བཤལ་རྗེས་ལྟ་བུར་ཟས་
སྤྱོད་གཟབ། །མ་ཞུ་ཤིང་འདྲ་ཐང་དུགས་རྩེ་བཅིལ་ལ། །སྦྱོངས་སྐྱུགས་སྦྲགས་བཏང་ལྟོ་བར་
ཆུ་ཚན་བདུག །ལོང་རྩ་རུ་ཐུང་གཏར་ལ་ཁ་ཟས་དབྲི། །དུག་འདྲ་རུས་རྙིང་རླངས་དུགས་ཆུ་
ཚན་བྱ། །དེ་འོག་དུག་གམ་སྨུག་པོ་ལྟ་བུར་བསྡུ། །འདུས་རྟགས་ཐོབ་ནས་ལྟོ་དང་རྩ་ནས་
སྦྱང༌། །རྗེས་ལ་ག་བུར་ཉི་ཤུ་རྩ་ལྔ་དང༌། །སེ་འབྲུ་ལྔ་པ་ལྟག་པ་སྤྲད་ལ་བཏང༌། །མཇུག་ཏུ་
འབའ་སམ་སྨན་མར་ཕྱི་རྗེས་བཅད། །མ་ཞུ་རླུང་ལྡན་དུགས་དང་འཇམ་རྩི་བཏང༌། །མཁྲིས་
ལྡན་སྦྱང་ཞིང་བད་ཀན་ལྡན་པ་སྐྱུགས། །རང་རང་ཁ་འཛིན་ཟས་སྨན་འཚམ་པས་བཅོས། །
མ་ཞུ་རྙིངས་ནས་ནད་གཞན་གྱུར་པ་ལ། །དང་པོ་མ་ཞུའི་རྒྱུ་ལས་སྐྱས་པའི་ཕྱིར། །སེ་འབྲུ་ལྔ་
པ་ཚ་གྲང་ཀར་བུར་བསྒྱུར། །ཆུ་སྐོལ་འཕུལ་བས་ཕོ་བའི་མེ་དྲོད་སྐྱེད། །མ་ཞུའི་ནད་འབྱང་
དྭངས་མ་རང་གནས་འཇོག །འབྲས་བུ་ནད་གཞན་གསོ་བླའི་གྲོགས་སུ་འགྱུར། །རྒྱུ་མ་
བཅོས་པར་འབྲས་བུ་གསོ་འདོད་པ། །དུག་རྩ་མ་ཕྱུངས་ལོ་མ་བཅད་སྐྱུར་འདྲ། །ཁོང་ནད་
ཐམས་ཅད་མ་ཞུས་སྐྱེད་པའི་ཕྱིར། །མ་ཞུའི་གསོ་དཔྱད་མཁས་པ་ཤིན་ཏུ་གཅེས། །རྒྱུ་ཉིད་
གྲོལ་ན་འབྲས་བུ་ག་ལ་འབྱུང༌། །ཞེས་གསུངས་སོ། །དེ་ནས་ཡང་དྲང་སྲོང་ཡིད་ལས་སྐྱེས་
ཀྱིས་ཞུས་པ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །མ་ཞུའི་རྒྱུས་བསྐྱེད་འབྲས་བུ་
གཅོང་ནད་དུ། །དེ་དག་རྒྱུ་རྐྱེན་གྱུར་ཚུལ་དབྱེ་བ་དང་། །རྟགས་དང་བཅོས་ཐབས་རྗེས་
གཅོད་ཇི་ལྟར་ལགས། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་
དང༌། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །མ་ཞུའི་རྒྱུས་བསྐྱེད་འབྲས་བུ་
25-1-144


གཅོང་ནད་ལ། །གསར་པ་ལྷེན་དང་ལྕགས་དྲེག་མེ་དྲོད་ཉམས། །དུག་གཅོང་བད་ཀན་སྨུག་
པོ་མཁྲིས་པའི་ནད། །རྙིང་པ་སྐྲན་དང་སྐྱ་རྦབ་དམུ་འོར་བཞི། །གཅོང་ཆེན་ཟད་བྱེད་རྣམ་པ་
ལྔ་རུ་བཤད། །དུག་ནད་ཕྱིས་འབྱུང་གསར་གཞན་སྔར་བརྗོད་པས། །སྐབས་འདིར་རྙིང་པའི་
གཅོང་ནད་སྡེ་ལྔར་བསྟན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་
བ་མན་ངག་གི་རྒྱུད་ལས་ཁོང་ནད་ཐམས་ཅད་ཀྱི་རྒྱུ་མ་ཞུ་བ་བཅོས་པའི་ལེའུ་སྟེ་དྲུག་པའོ།།    །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །གཅོང་ཆེན་སྐྲན་ལ་རྒྱུ་རྐྱེན་དབྱེ་བ་དང༌། །གནས་ས་གྱུར་ཚུལ་རྟགས་དང་
བཅོས་ཐབས་དྲུག །རྒྱུ་ནི་མ་ཞུ་བད་ཀན་ཁྲག་མཁྲིས་རླུང༌། །སྲིན་དང་ཆུ་སེར་སྤུ་ལས་འབྱུང་
བ་ཡིན། །རྐྱེན་ནི་སྔོན་ལས་གདོན་དང་མ་ཞུ་བ། །འགྲམས་འཁྲུགས་མཚོན་དང་བུ་བཙས་
རླན་གྲངས་བསྐྱེད། །དབྱེ་བ་བད་ཀན་ཟས་ལྷེན་རྡོ་ཡི་སྐྲན། །རླུང་གི་ལྷིང་སྐྲན་ཁྲག་མཁྲིས་རྩ་
སྐྲན་དང༌། །སྤུ་སྲིན་ཆུ་སྐྲན་རྣག་སྐྲན་བཅུ་གཅིག་གོ །གནས་ནི་གློ་སྙིང་མཆིན་དྲི་མཆིན་
མཆེར་མཁལ། །མཁྲིས་པ་ཕོ་ལོང་རྒྱུ་མ་ལྒང་པ་མངལ། །སྙིགས་མ་མ་ཞུའི་ཟས་སྐྲན་ཕོ་ལོང་
འབྱུང༌། །ལྷེན་སྐྲན་ཕོ་བ་རྡོ་སྐྲན་ཕོ་བ་ལྒང༌། །ལྷིང་སྐྲན་ཕོ་བ་ལོང་དང་མངལ་དུ་གནས། །
ཁྲག་སྐྲན་ཕོ་ལོང་མཆིན་མཆེར་མངལ་དུ་འབྱུང༌། །མཁྲིས་སྐྲན་སྣོད་མཁྲིས་རྒྱུ་མའི་ནང་དུ་
གནས། །རྩ་སྐྲན་ཕོ་མཁལ་མཆིན་དྲི་རྒྱུ་གྲོག་མང་། །སྤུ་སྐྲན་ཕོ་ལོང་རྒྱུ་མ་ལྒང་པར་གནས། །
སྲིན་སྐྲན་ཕོ་ལོང་གཉིས་ཀྱི་ནང་དུ་འབྱུང་། །ཆུ་སྐྲན་ངེས་མེད་གར་ཡང་འབྱུང་སྲིད་དེ། །གློ་
སྙིང་མཆིན་པ་རྒྱུ་ལོང་བར་དུ་མང་། །རྣག་གི་སྐྲན་ལ་གར་འོང་ངེས་པ་མེད། །མདོར་བསྡུས་
ཕྱི་སྐྲན་ནང་སྐྲན་བར་སྐྲན་གསུམ། །ཕྱི་སྐྲན་སྣོད་ཀྱི་ཕྱི་དང་ཤ་ལྤགས་བར། །བར་སྐྲན་སྣོད་
ཀྱི་ནང་འདེབས་དོན་གྱི་ལོགས། །ནང་སྐྲན་དོན་སྣོད་ཀུན་གྱི་གཏིང་ན་གནས། །གྱུར་ཚུལ་ཁ་
25-1-145


ཟས་གྱོང་ཚིལ་སྦང་མ་སོགས། །མ་ཞུ་རང་སོར་གནས་པས་བེ་སྣབས་འདྲིལ། །སྙིགས་མ་མ་
ཞུ་ཟས་ཀྱི་སྐྲན་དུ་འགྱུར། །མ་ཞུའི་རྐྱེན་གྱིས་བད་ཀན་བེ་སྣབས་འཕེལ། །རླུང་གིས་བསྒྲིལ་
བས་ལྷེན་སྐྲན་ཞེས་བྱར་འགྱུར། །དྭངས་མ་མ་ཞུ་ཕོ་བར་ཡུན་རིང་གནས། །བད་ཀན་གྲང་
བས་རྒྱུ་བྱས་རླུང་གིས་བསྒོངས། །ཡང་ཡང་གཡོགས་ཤིང་སྲ་བར་སྨིན་པ་ནི། །དྭངས་མ་མ་
ཞུ་རྡོ་སྐྲན་ཞེས་བྱར་འགྱུར། །དྭངས་མ་མ་ཞུ་མཆིན་པར་ཁྲག་ངན་རྒྱས། །མཆིན་པའི་གཤམ་
དུ་ཁྲག་གི་ཟིལ་པ་ཆགས། །འཕེལ་ཞིང་རྒྱས་པས་མཆིན་པའི་ཁྲག་སྐྲན་འགྱུར། །དེ་འདྲ་
མཆེར་པར་ཞུགས་པ་མཆེར་པའི་སྐྲན། །མཆིན་ཁྲག་ཕོ་བར་ལྷུང་བས་བད་ཀན་བསྲུལ། །
ཁྲག་བཙོས་འདྲིལ་བས་སྨུག་པོའི་སྐྲན་དུ་འགྱུར། །དེ་ཉིད་ལོང་ཕུགས་འདྲིལ་བས་ལོང་སྐྲན་
ཡིན། །དེ་བཞིན་རྒྱུ་མར་ལྷུང་བ་མཁྲིས་པར་འདྲེས། །སྲ་བར་འདྲིལ་བ་རྒྱུ་མའི་མཁྲིས་སྐྲན་
ཡིན། །དྭངས་མ་མ་ཞུ་མཆིན་གནས་མཁྲིས་པར་ལྷུང༌། །མཁྲིས་པའི་རྩི་ཆགས་འདྲིལ་བ་སྣོད་
མཁྲིས་སྐྲན། །དངས་མ་མ་ཞུ་ངན་ཁྲག་རྒྱས་པ་དེ། །མཆིན་དྲི་གློ་མཁལ་རྒྱུ་གྲོག་ཕོ་བའི་རྩར། །
འགྲིམས་པ་ས་གཅིག་འདྲིལ་བ་རྩ་ཡི་སྐྲན། །མཚོན་ལམ་མཚོན་ཁྲག་འཁྱིམས་པའང་དེ་
བཞིན་ནོ། །དྭངས་མ་མ་ཞུ་ལྒང་པའི་རྩ་མིག་འགྲིམས། །ཆུ་ཡི་དྲོད་ཀྱིས་བཙོས་བསྒྲིལ་རྡེ་འུར་
འགྱུར། །བུད་མེད་བུ་བཙས་ནད་ལྷག་མངལ་དུ་འདྲིལ། །དེ་ཉིད་བུ་བཙས་མངལ་གྱི་ཁྲག་
སྐྲན་ཡིན། །ཕོ་བ་ལོང་དུ་སྲིན་བུ་དྲུ་གུར་འདྲིལ། །སྲིན་སྐྲན་ཞེས་བྱ་ཕོ་བ་ལྒང་པའི་ནང༌། །སྤུ་
འཐུམས་འདྲིལ་བས་སྤུ་ཡི་སྐྲན་དུ་འགྱུར། །དྭངས་མ་མ་ཞུ་རྩ་མིག་བྱེར་བ་ཡིས། །དོན་སྣོད་
ལོགས་ལ་ཆུ་སེར་ཕུར་མར་ཆགས། །ཆུ་སྐྲན་ཞེས་བྱ་རྣག་སྐྲན་རྣག་ཐུམ་ཡིན། །ཕོ་ལོང་
མངལ་དུ་སྐྲན་གང་རླུང་གིས་བསྐྱོད། །འཕྱོ་ལྡིང་འཕེལ་འབྲི་བྱེད་པ་རླུང་གི་སྐྲན། །རྐྱང་པའི་
རླུང་ལས་སྐྲན་དུ་འགྱུར་བ་མེད། །མདོར་བསྡུས་སྐྲན་ཀུན་ཚ་གྲང་གཉིས་སུ་བསྡུ། །ཁྲག་དང་
མཁྲིས་པས་རྒྱུ་བྱས་ཚ་བའི་སྐྲན། །བད་རླུང་གྲང་བས་རྒྱུ་བྱས་གྲང་སྐྲན་ཡིན། །དེ་ཡི་རྟགས་
25-1-146


ལ་སྤྱི་དང་བྱེ་བྲག་གཉིས། །སྐྲན་ཀུན་སྤྱི་རྟགས་རྩ་རྒྱུད་ཞན་ཅིང་ཞར། །ཆུ་ལ་སྐྲན་ཐིགས་ཉ་
མིག་འབྱུང་བ་དང༌། །གང་ལ་སྐྲན་ཡོད་སྟེང་དུ་དྲེག་པ་ཆགས། །ཁ་ཟས་མི་འཇུ་འགྲངས་རྐྱེན་
སྒྲེག་ཅིང་སྐྱུག །ཁྱད་པར་ཤ་རིད་མར་རྗེན་སིང་གླེག་སྐྱུག །དྲི་མ་སྲི་སྐམ་འཁྲུ་ཡང་སྲིད་པ་
ཡིན། །ཤ་སྐམ་ཤེད་ཆུང་འགྲངས་དང་གྲང་རྗེས་ན། །དྲག་ཤུལ་ནད་ལྡང་འདི་རྟགས་ཕལ་
ཆེར་འབྱུང༌། །བྱེ་བྲག་སྙིགས་མ་མ་ཞུ་ཟས་ཀྱི་སྐྲན། །ཕོ་བ་འཚིང་སྒྲེག་ཟོས་ཐོག་གླང་ཐབས་
ལྡང༌། །གང་མ་ཞུ་བའི་ཟས་དེ་མཆོག་ཏུ་གནོད། །གདོང་པ་མིག་ལྕིབས་རྐང་བོལ་གཡོ་བ་
ཡིན། །ལྷེན་སྐྲན་རྫི་བའི་སྲན་ཆེ་ཅི་ཟོས་སྐྱུག །རླན་གྲང་ཟོས་རྗེས་ན་ཞིང་ལྟོགས་ན་བདེ། །
སྒྲེག་པ་མི་ཐོན་ཤེད་ཆུང་འཕེལ་འབྲི་མེད། །དྭངས་མའི་རྡོ་སྐྲན་དེ་འདྲ་ཤིན་ཏུ་སྲ། །མཆིན་
པའི་ཁྲག་སྐྲན་འཕེལ་སྐྱེན་གཡས་ནས་ཆགས། །མིག་སེར་ཆུ་དམར་རྩ་རྒྱུད་ཕྲ་ལ་མགྱོགས། །
གྲང་དྲོས་རོ་རྒྱབ་མཆིན་དྲི་སྦྲག་ཅིང་ན། །ཤ་མདོག་སྔོ་སྐམས་མཆིན་ཤ་སིང་གླེག་སྐྱུག །
སྐྲན་རྒྱས་མཁྲིས་ཡུལ་ཕྲོགས་ཏེ་མིག་ཆུ་སེར། །མཆེར་པའི་ཁྲག་སྐྲན་དེ་འདྲ་གཡོན་དུ་
འབྱུང༌། །སྦོ་སྒྲེག་ཟས་སྐོམ་ལེན་ཡང་ལྦུ་བ་སྐྱུག །ཚ་བ་ཤས་ཆུང་གདོང་པ་སྦོད་པོར་གཡོ། །
ཕོ་ལོང་སྨུག་པོའི་ཁྲག་སྐྲན་ཚ་ཞིང་གཟེར། །མནན་ན་འཕར་ཞིང་བསིལ་དྲོད་གཉིས་ཀ་
གནོད། །འགྲངས་ལྟོགས་གྲང་དང་དྲོས་པ་གང་ཡང་ན། །སྣོད་ཀྱི་མཁྲིས་སྐྲན་ཤ་མདོག་སྔོ་ལ་
སྐམ། །ཟས་ལེན་གྱུར་ཀྱང་ཤེད་བྲལ་མིག་ཆུ་སེར། །སྨིན་ནས་ལུས་ཀུན་ཟ་འཕྲུག་བྱེད་པ་
ཡིན། །རྒྱུ་མའི་མཁྲིས་སྐྲན་ལུས་ལྕི་མིག་ཆུ་སེར། །རྩ་གྲིམས་དང་ག་མི་བདེ་ནད་ཟུག་ཆེ། །
སྐོམ་དད་ཆེ་ལ་དྲི་ཆུ་སྲི་བར་མངོན། །ལོང་གི་རླུང་སྐྲན་སྦོ་འཁྲོག་སྦུ་བ་འཁྲུ། །མི་བརྟན་འཕོ་
འགྱུར་འཕེལ་འགྲིབ་བྱེད་པ་ཡིན། །མངལ་སྐྲན་ཚིགས་པ་རྒྱུ་ཞབས་ལྡང་དུབ་གཟེར། །
འགྲངས་ཚེ་ན་ཞིང་སྐབས་སུ་ཁྲག་ཅན་འཛག །ལྒང་པའི་རྡེ་སྐྲན་ཆུ་དགག་ཟུག་གཟེར་ཆེ། །
གློ་བའི་རྩ་སྐྲན་གློ་མང་འགོགས་པ་དཀའ། །སྐད་འཛེར་ཤ་ལུས་སྔོ་སྐམ་ཟོས་རྗེས་སྐྱུག །
25-1-147

 
མཁལ་མའི་རྩ་སྐྲན་ཐོག་མར་ན་ཟུག་ཆུང༌། །སྨིན་ནས་ལྟར་མངོན་ཤ་སྐམ་དགྱེ་དགུ་དཀའ། །
ཆུ་མདོག་དམར་ལ་ལུས་ལྕི་ཆུ་འཐུངས་སྐྱུག །མཆིན་དྲིའི་རྩ་སྐྲན་ཚིགས་པ་བརྒྱད་པ་ན། །
དགྱེ་དགུ་མི་བདེ་སྒྲེག་ཅིང་སྐྱུག་སྙམ་བྱེད། །མཆིན་པ་མཆིན་དྲིའི་ཤ་ཟོས་སྐྱུག་པར་འགྱུར། །
རྩ་སྐྲན་ཕལ་ཆེར་རིལ་ཙམ་རྩ་ཆུ་ཚ། །སྲིན་སྐྲན་འདྲིལ་དུས་ཟུག་ཆེ་ཞི་དུས་བདེ། །སྤུ་སྐྲན་
གང་དུ་བྱུང་སར་གནས་རྟགས་སྟོན། །སྙིང་གི་ཆུ་སྐྲན་བྲང་ལ་སྲིན་ཐོར་འོང༌། །ཤེས་པ་རྒོད་
ཅིང་སྨྱོ་ཚུལ་སྟོན་པ་འམ། །ཁྲོ་ཚིག་སེམས་རྩུབ་ཆུ་ཚན་འཚེད་སྙམ་བྱེད། །ཆུ་སྐྲན་ཕལ་ཆེར་
མིག་ལྕིབས་རྐང་བོལ་གཡོ། །ངོ་བོ་སྲ་མེར་ཟུག་ཆུང་རྫི་བ་བཟོད། །རྣག་སྐྲན་རེག་ན་བརྩེ་ལ་
མནན་མི་བཟོད། །རྩ་ཆུ་ཕྱི་ཡུལ་ཅུང་ཟད་ཚ་བ་སྐྱེ། །དེ་ལྟར་སྐྲན་རྣམས་ཕལ་ཆེར་ལྟོ་སྟོང་ལ། །
ལངས་བུབ་གན་རྐྱལ་ཟུར་ལ་གནས་ཏེ་མྱོང་། །བར་གནས་སྲ་འདྲིལ་ལག་འོག་བཟུང་བར་
ནུས། །ཕྱི་ན་གནས་པ་དངོས་སུ་གསལ་བར་སྟོན། །གཏིང་ན་གནས་ན་རྟགས་ལ་ནད་ངོས་
བཟུང༌། །གློ་མཆིན་མཆེར་སྐྲན་གསང་སར་གཟེར་བ་ཡིན། །མདོར་བསྡུས་ཚ་སྐྲན་རྩ་ཆུ་ཕྱི་
ཡུལ་ཚ། །གནས་དེར་འཕེལ་སྐྱེན་ཚ་ཞིང་མནན་ན་འཕར། །ཁ་ཟས་དྲོད་བཅུད་མི་འཕྲོད་
བསིལ་བ་འཕྲོད། །དེ་ལས་གོ་ལྡོག་གྲང་བའི་སྐྲན་དུ་བརྟག །ཟུག་ཆེ་སྐྱུག་ཅིང་ཟུངས་གསུམ་
ཤོར་ན་སྤང༌། །སྟོབས་ལྡན་ཟུག་མེད་ཟས་ཚུད་འཚོ་བས་བཅོས། །བཅོས་པའི་ཐབས་ལ་སྤྱི་
དང་བྱེ་བྲག་གཉིས། །སྤྱི་ལ་བཅོས་ཐབས་སྨན་དཔྱད་ཟས་སྤྱོད་བཞི། །ཚ་སྐྲན་གྲང་སྐྲན་ཕྱི་
ནང་བར་གསུམ་སྦྱར། །དང་པོ་ནང་ན་གནས་པའི་ཚ་སྐྲན་ལ། །ཏིག་ཏ་གསེར་གྱི་མེ་ཏོག་དུག་
མོ་ཉུང༌། །བསིལ་གསུམ་བྲག་ཞུན་རུ་རྟ་པི་པི་ལིང༌། །ཚ་ལ་འགྲོན་ཐལ་ཨ་རུ་ར་དང་ནི། །ཅོང་
ཞི་དྲག་པོར་བརྟུལ་བའི་ཐལ་བ་དང༌། །ལྡོང་རོས་ཧོང་ལེན་ད་ལིས་ཐལ་བ་རྣམས། །ཀ་ར་
སྦྱར་བཏང་གང་ཉེའི་རྩ་ལ་གཏར། །རྩ་ལྟོ་གང་རིགས་སྦྱངས་ལ་ཆུ་ལུམས་བྱ། །བར་གནས་
ཚ་སྐྲན་བཟང་དྲུག་ཨ་རུ་ར། །ཙན་དན་དཀར་དམར་ཨུཏྤལ་བོང་ང་དཀར། །ཏིག་ཏ་གསེར་
25-1-148


གྱི་མེ་ཏོག་དུག་མོ་ཉུང༌། །རུ་རྟ་ཚ་ལ་རྒྱམ་ཚྭ་པི་པི་ལིང༌། །སྤོས་དཀར་སེང་ལྡེང་མུ་ཟི་བསེ་རུ་
དང༌། །རྟ་རྨིག་བཙའ་མ་གཅན་གཟན་རུས་པ་དང༌། །གཡག་རྒོད་རྭ་དང་རུས་པ་སེར་ཙམ་
བསྲེག །ཅོང་ཞི་རྒོད་བརྟུལ་ཀ་ར་སྦྱར་ལ་བཏང༌། །གཏར་སྦྱོངས་ཆུ་ལུམས་གོང་བཞིན་ཤེས་
པར་བྱ། །ཕྱི་ཡི་ཚ་སྐྲན་མཁན་པ་སྤྱང་ཚེར་རྩ། །ལྕེ་ཚ་འོལ་མོ་གོ་སྙོད་བྱི་བའི་བྲུན། །སྦངས་
ལུམས་བྱས་པས་ཕལ་ཆེར་རྣག་ཏུ་འགྱུར། །མ་ཁུགས་གོང་ལྟར་སྨན་དཔྱད་ཚ་བས་སྦྱང༌། །ཚ་
ཐུར་རྒྱབ་ལ་འབྲས་ལྟར་རུལ་གཅོད་སྦྱར། །ཡང་ན་བྱི་ཤང་དཀར་མོ་གོ་བྱེ་མཚལ། །ཟེ་ཚྭ་གླ་
རྩི་སྦྲང་རྒོད་རེང་བུ་གཞུག །ཚ་བ་མི་ཚོར་ཆུ་བུར་བྱུང་ན་ཐེབས། །ཀླད་པ་བྱུགས་ལ་ཤོག་བུས་
ཁ་བཀབ་བཞག །ཕོ་བར་ཟན་དྲོན་དུགས་ཀྱིས་བག་རེ་བདུག །དེ་རྣམས་ཟས་སྤྱོད་རི་དྭགས་
ལུག་ཤ་གསར། །བ་མཛོའི་ཞོ་དར་མར་གསར་ལ་སོགས་པ། །བསིལ་ཡང་བསྟེན་ཞིང་རུལ་
སྐྱུར་འཇུ་དཀའ་སྔོ། །གྲང་དང་དྲག་ཤུལ་མེ་ཉིས་གདུངས་པ་སྤང་། །ཟབས་སུ་ཞུགས་པའི་
གྲང་སྐྲན་བཅོས་པ་ནི། །ཐང་ཤིང་དུར་བྱིད་དནྡ་ཡ་བཀྵ། །ཚ་བ་ལྔ་དང་ཚྭ་སྣ་རྣམ་པ་ལྔ། །ས་
རྫི་ཀ་དང་པ་ཏྲ་འབྲས་བུ་གསུམ། །རུ་རྟ་དང་ནི་ཟི་ར་དཀར་ནག་གཉིས། །ཧོང་ལེན་ཕྱེ་མ་
ཏིལ་མར་ཞག་དང་ཞོ། །མར་གྱིས་སྦྲུས་ལ་རྫ་མ་ཁ་སྦྱར་བསྲེག །དེ་ཉིད་རྒྱལ་པོ་རྒོད་མ་ཁ་
དང་སྦྱར། །སེ་འབྲུ་བརྒྱད་དང་ནང་ནུབ་ལྟག་པ་སྤྲད། །དེ་ཡིས་དྲོད་སྐྱེད་དང་ག་འབྱེད་པར་
བྱེད། །དེ་རྗེས་རྒྱམ་ཚྭ་ཚ་ལ་ལ་ལ་ཕུད། །ཚ་བ་ལྔ་དང་ཨ་རུའི་ཐལ་སྨན་སྦྱར། །བྱ་རྒོད་གོ་བོ་
སྤྱང་བྲུན་ཕོ་བ་དང༌། །ཟི་ར་ནག་པོ་ཁ་རུ་རྩ་རུ་ཚྭ། །ཚ་བ་གསུམ་དང་སྦྱར་ལ་ལྟག་པ་སྤྲད། །
ཡང་ན་ཟ་བྱེད་ཆེ་ཆུང་ཐལ་སྨན་སྦྱར། །སེ་འབྲུ་བཞི་དང་ནང་ནུབ་ལྟག་པ་སྤྲད། །དེ་ཡིས་
དྲོད་སྐྱེད་དང་ག་འབྱེད་པ་དང༌། །གྲང་སྐྲན་མ་ལུས་ཐལ་བར་རློག་པར་བྱེད། །ཞིག་ནས་སྙིར་
མངོན་ཟུག་ཆེ་རྩ་ཆུ་ཚ། །གཅོད་བྱེད་བཤལ་གྱིས་སྦྱངས་རྗེས་མེ་ཡིས་བསྲེག །བར་གནས་
གྲང་སྐྲན་སྒྲོན་ཤིང་འབྲས་བུ་གསུམ། །ཚྭ་སྣ་ཚོགས་ཚད་སེ་འབྲུ་པི་པི་ལིང༌། །བཟང་པོ་
25-1-149


གསུམ་དང་ཚ་ལ་སྤོས་དཀར་དང༌། །དུར་བྱིད་སྔོ་ཡི་ཚ་གསུམ་རྒོད་གཡག་རྭ། །ཕྱེ་མ་ཆང་
སྦྲུས་སླ་ངར་ནུས་ལྡན་བསྲེག །ཐལ་བ་བུ་རམ་སྦྱར་བ་ཆུ་སྐོལ་དབུལ། །ཞིག་ནས་སྦྱོངས་
བཏང་མ་ཞིག་ཐུར་མ་བརྡེག །ཐུར་རྗེས་སྐྲན་རོ་བཤལ་གྱིས་སྦྱང་བར་བྱ། །བྲང་དང་རྩིབ་
ལོགས་སྐྲན་ཐག་གང་གཟེར་དང༌། །སྦྲུལ་མིག་གང་ལ་བབ་པའི་ཚིགས་གསང་བསྲེག །ཕྱི་ཡི་
གྲང་སྐྲན་སྣུམ་འཆོས་དུགས་བྱས་ལ། །སྙིར་གྱུར་བུམ་པ་ཚད་ལྡན་མེ་བཙའ་བྱ། །ཐེབས་
འགའ་བསྟེན་པས་འཇུ་ཞིང་ཕྱི་རུ་འདྲེན། །འབུར་ན་འཇག་གིས་མཐའ་ནས་བསྡམས་ལ་
བཙིར། །གཙགས་བུས་དྲས་ལ་སྐྲན་དབྱུང་རྨ་ལྟར་གསོ། །དནྡ་ཡུངས་ཀར་ཟར་མ་ཏིལ་སྦྱར་
བྱུག །མ་འདྲོངས་ཚ་ཐུར་རྒྱབ་ལ་འབྲས་ལྟར་བཅོས། །དེ་རྣམས་ཟས་སྤྱོད་ལུག་དང་གཡག་
རྒོད་དང༌། །གཅན་གཟན་གོང་སྲེག་ཁྱིམ་བྱ་བྱེའུའི་ཤ །འབྲས་ཆན་སྤོད་བཅས་ཟན་དྲོན་ཞུན་
མར་བསྟེན། །ཆང་གི་དྭངས་མ་སྒ་ཆུ་བསྐོལ་བ་བཏུང༌། །བཅུད་མེད་འཇུ་དཀའ་བསིལ་
ཕྱོགས་ཐམས་ཅད་སྤང༌། །བཅག་དང་རྩོལ་བ་སྤུ་དུགས་རྡོ་ཡི་མཉེ། །བྱེ་བྲག་བཅོས་ཐབས་
སྙིང་གི་ཆུ་སྐྲན་ལ། །བསེ་རུ་དོམ་མཁྲིས་ཛཱ་ཏི་ཟངས་ཐལ་དང༌། །ཤ་རུ་དུར་ཐོད་འགྲོན་ཐལ་
སྦྲང་སྦྱར་བཏང༌། །དེས་མ་སྐེམས་ན་དེ་སྟེང་དངུལ་ཆུ་དང༌། །སྟར་བུ་དབྱི་མོང་ལ་འཁར་
བསྣན་པ་ཡི། །རིལ་བུ་བྱས་ལ་སྙིང་ཆུ་བསྐམ་པར་བྱ། །དེས་ཀྱང་མ་སྐེམས་སྙིང་ཆུ་ཐུར་མས་
གཙག །གློ་མིག་རྩ་སྐྲན་ཐོག་མར་ཆུ་ལུམས་བྱ། །དེ་ནས་སྟར་བུ་སྐྱུ་རུ་པི་པི་ལིང༌། །ཆུ་རྟ་ཤིང་
མངར་བུལ་ཏོག་སྦྲང་སྦྱར་བཏང༌། །སྟར་བུ་བུལ་ཏོག་སྐྱུ་རུ་ར་དང་སྦྲང༌། །རིལ་བུ་མུར་བས་
གློ་སྐྲན་འཇོམས་པ་ཡིན། །མཆིན་པའི་ཁྲག་སྐྲན་རྩ་སྐྲན་སྦྱོར་བས་གདུལ། །ཡང་ན་གུར་གུམ་
(ཅུ་གང་ཨུཏྤལ་ཏིག་ཏ་བྲག་ཞུན་རུ་རྟ་དོམ་མཁྲིས་བ་ཤ་ཀ་ཀྱི་ལྕེ་མཚལ་དཀར་གྱི་སྦྱོར་བ་དང་)སེ་འབྲུ་ལྟག་པ་སྤྲད། །
ཡང་ན་སེ་རྒོད་འབྲས་བུ་བྲག་ཞུན་དང༌། །ཙན་དན་གུར་གུམ་ཆང་སྦྱར་ཞག་གསུམ་མནན། །
ལངས་ནས་བུ་རམ་སྦྱར་བའི་ལྡེ་གུ་བཏང༌། །མཆིན་ཁྲག་རྒྱས་དང་མཆིན་སྐྲན་འཇུ་ཞིང་
25-1-150


སྐེམ། །རུ་ཐུང་སྣོད་ཀ་མང་གཏར་ཉུང་དུ་དབྱུང༌། །ཚ་བ་སྐྱེ་སྲིད་བྲག་ཞུན་(གུར་གུམ་ཅུ་གང་ཨ་རུ་
ཏིག་ཏ་དོམ་མཁྲིས་པི་ལིང་)བདུན་པ་དང༌། །ལྟག་པ་སྤྲད་དེ་ཕྱི་རྗེས་བཤལ་གྱིས་སྦྱང༌། །མཆེར་སྐྲན་
དེ་འདྲའི་རྗེས་ལ་མེ་ཡིས་བསྲེག །མཁལ་ཚིལ་རྩ་སྐྲན་དང་པོ་ཆུ་ལུམས་བྱ། །ཟུག་ཆུང་སྙི་དང་
བདེར་སོང་བྱིན་ལོང་གཏར། །སྐྱེད་མེད་བྱ་བྲ་ཁྲ་བོའི་ལུམས་བྱས་ཏེ། །རྣག་ཏུ་བཀུག་ལ་མེ་
ཡིས་ཕྱི་རྗེས་བཅད། །མ་ཁུགས་ཚད་པ་སྦྱངས་ལ་ཐུར་མས་བཅོས། །མ་ཞུའི་ཟས་སྐྲན་ལྷེན་
སྐྲན་རྡོ་སྐྲན་ལ། །གསར་པའི་དུས་ན་རྡོ་ཡིས་མཉེ་བར་བྱ། །རྒྱམ་ཚྭ་ལ་ལ་ཕུད་དང་ཨ་ཟ་མོ། །
པི་པི་ལིང་དང་དོང་གྲ་ཆ་རེ་བསྐྱེད། །ཨ་རུ་ཀུན་མཉམ་ཕྱེ་མ་མེ་དང་འདྲ། །མ་ཞུ་བད་རླུང་
གྲང་སྐྲན་འཇོམས་པར་བྱེད། །བི་ཥ་ཨ་རུ་བཅུ་འགྱུར་ཕོ་འགྲོན་བདུན། །ཅུ་གང་གུར་གུམ་ཚ་
བ་རྣམ་པ་ལྔ། །ཚྭ་སྣ་ལྔ་དང་རྒྱ་ཚྭ་པྲི་ཡང་ཀུ། །ཐལ་སྨན་ཞོ་གསུམ་དྲི་ཆུས་འདམ་བཏགས་བྱ། །
རིལ་བུ་བྱས་བསྟེན་རྒྱམ་ཚྭ་སུམ་ཐང་བཏང༌། །རྡོ་ཡང་ཐལ་བར་འགྱུར་སྲིད་སྐྲན་ཅི་སྨོས། །
ཚྭ་བསྲེགས་ཟེ་ཚྭ་གོ་ཐལ་སྦྱོར་བ་ཡང༌། །མན་ངག་ལྡན་ན་སྐྲན་བཤིག་སྨན་མཆོག་ཡིན། །
ཞིག་པའི་སྐྲན་རོ་གཅོད་བྱེད་བཤལ་བྱས་ལ། །མ་ཞིག་ཐུར་མའི་རྗེས་ལ་སླར་ཡང་སྦྱང༌། །
སྣོད་ཀྱི་མཁྲིས་སྐྲན་ཚེ་སྔོན་ལས་ནད་ཡིན། །འོན་ཀྱང་གསར་དུས་བྱམས་པས་འབད་དེ་
གསོ། །མི་དང་ཕག་བྲུན་ནུས་ལྡན་བསྲེགས་ཐལ་བ། །ཚ་ལ་དོམ་མཁྲིས་ཀ་ར་པི་པི་ལིང༌། །
སེ་འབྲུ་ལྔ་དང་ནང་ནུབ་ལྟག་པ་སྤྲད། །ཆུ་སྐོལ་འཕུལ་བས་སྐྲན་དེ་འཇུ་ཞིང་སྐེམ། །གཏར་
དྲངས་རྗེས་ལ་ཆུ་ལུམས་སྦྱོངས་ཀྱིས་བཅོས། །རྒྱུ་མའི་མཁྲིས་སྐྲན་ཚ་ལ་དོམ་མཁྲིས་དང༌། །
ཧོང་ལེན་ཀར་སྦྱར་ཞུ་མཁན་དུགས་ཀྱིས་བདུག །དེ་རྗེས་མན་ངག་བཤལ་(དུར་བྱིད་ཚ་ལ་དོམ་
མཁྲིས་ཧོང་ལེན་)གྱིས་ཁོང་ནས་དབྱུང་། །ཡང་ན་ཏིག་ཏ་བརྒྱད་ཀྱིས་བརྟུལ་རྗེས་སྦྱང༌། །ཕོ་བ་
ལོང་དུ་སྨུག་པོའི་ཁྲག་སྐྲན་ཆགས། །སྟར་བུ་མ་ནུ་འུ་སུ་རྒྱམ་ཚྭ་བཞི། །བུར་དཀར་སྦྱར་བ་ཆུ་
སྐོལ་འཕུལ་ལ་བཏང་། །ཆུ་བ་ཧ་བོ་ཚྭ་བཏབ་དུགས་ཀྱིས་བདུག །དོམ་མཁྲིས་ཧོང་ལེན་དུར་
25-1-151


བྱིད་ཚ་ལས་སྦྱང༌། །ཡང་ན་ཚྭ་བསྲེགས་སེ་འབྲུ་ལྔ་པ་གཉིས། །ལྟག་སྤྲད་ཞིག་ནས་དྲག་པོའི་
བཤལ་གྱིས་སྦྱངས། །ཟུངས་ངན་འཇམ་རྩི་ནི་རུ་ཧ་སྤེལ་དྲང༌། །རླུང་གི་ལྷིང་སྐྲན་སྒོག་སྐྱའི་
སྨན་མར་དང་། །བུ་རམ་སྦྱར་བ་བཟའ་ཞིང་འཇམ་རྩི་བཏང༌། །དེ་འོག་ཤིང་ཀུན་སེ་འབྲུ་ཚ་
བ་ལྔ། །མ་ནུ་རྒྱམ་ཚྭ་རྩ་རུ་ཁ་རུ་ཚྭ། །ཟི་ར་གོ་སྙོད་འུ་སུ་ལ་ལ་ཕུད། །སུག་སྨེལ་སྟར་བུ་ཤུ་
དག་ཟུར་པ་དཀར། །བུལ་ཏོག་བྱེ་རུག་ཞོ་དང་མར་ལ་བཙོ། །དྲོན་མོར་བསྟེན་རྗེས་མེ་ཡིས་
འཇོམས་པ་ཡིན། །སྒོག་སྐྱ་སྲང་བཞི་ཆུ་བོ་བརྒྱད་འགྱུར་བསྐོལ། །ཆུ་བསྡུས་འོ་མ་ལས་
འཐུངས་རླུང་སྐྲན་འཇོམས། །རླུང་རིམས་བི་ཤ་ཙེ་སོགས་རླུང་ཀུན་སེལ། །ཤིང་ཀུན་ཤུ་དག་
རུ་རྟ་ཁ་རུ་ཚྭ། །དོང་གྲ་ཨ་རུ་མ་ནུ་ལ་ལ་ཕུད། །དནྡ་དུར་བྱིད་ཕྱེ་མས་རླུང་སྐྲན་སྦྱོང༌། །སྲིན་
སྐྲན་རྒྱ་ཚྭ་དོང་གྲ་བྱི་ཏང་ག །ཕུར་ཐལ་བུ་རམ་རིལ་བུས་ནང་ནས་བཤིག །རྟ་སྦངས་ཕུར་མོ་
སྒོག་སྐྱ་སྤུ་དུགས་བདུག །ཞིག་དཀའ་སྒོག་སྐྱའི་སྨན་མར་སྲིན་སྨན་ལྡན། །བཟའ་ཞིང་འཇམ་
རྩི་བཏང་བྱ་ཞིག་ན་འཚོ། །མངལ་སྐྲན་བྱ་བྲ་བྱི་བྲུན་པ་ཡག་རྩ། །ནད་མ་སྦང་སྦྱར་བསྲོས་ལ་
མང་དུ་བདུག །ཟ་བྱེད་ཐུན་གསུམ་རིལ་བུས་སྐྲན་བཤིག་ལ། །ཕྱི་ནང་ཁྲུས་གཤེར་སྦྱོར་བས་
ཁྲག་རོ་གདོན། །ཁྲག་རྣག་ཤེ་རུལ་ཤ་སྐྱོ་ཐོན་ན་འཚོ། །ལྕ་བ་ཏིལ་བསྐོལ་ཁུ་བ་ཚ་བ་གསུམ། །
བུ་རམ་མར་བཏབ་མངལ་སྐྲན་གསར་པ་འཇིག །ཐང་ཤིང་རྩ་བ་པི་པི་ལིང་གི་རྩ། །ཀ་རཉྫ་
དང་པི་པི་ལིང་གི་ཕྱེ། །ཏིལ་བསྐོལ་ལྡེ་གུས་མངལ་སྐྲན་འཇོམས་པར་བྱེད། །ཞིག་ནས་ཁྲག་
འཛག་མི་བཅད་ལུས་ཟུངས་བསྲུང༌། །རྗེས་ལ་རྩ་བ་ལྔ་ཡི་སྨན་མར་སྦྱར། །ཟས་སྐོམ་སྤྱོད་
ལམ་ཤིན་ཏུ་དྲོ་བས་བཅོས། །ལྒང་པའི་སྐྲན་ལ་ཟེ་ཚྭ་ཞོ་བཞི་དང༌། །རྒྱ་ཚྭ་ཞོ་གཉིས་སྡིག་སྲིན་
ཚ་བ་གསུམ། །ལྕམ་པ་བུ་རམ་སྦྱར་ལ་ཆང་གིས་དབུལ། །རྡེའུ་ཞིག་ནས་ཆུ་ལམ་འབྱུང་བར་
ངེས། །མདོར་བསྡུས་རླུང་སྐྲན་སྣུམ་འཆོས་བཏང་བར་བྱ། །མཁྲིས་སྐྲན་སྦྱང་ཞིང་ཁྲག་སྐྲན་
གཏར་གྱིས་དྲང༌། །རྩ་སྐྲན་རྣག་ཏུ་འགུགས་ཤིང་ཆུ་ལུམས་ཤིས། །རྡོ་སྐྲན་ཐུར་མ་ལྷེན་སྐྲན་
25-1-152


སྨན་གྱིས་བཤིག །ཆུ་སྐྲན་རྣག་སྐྲན་གསང་དུ་དབྱུང་བར་བྱ། །ནང་སྐྲན་སྨན་ལ་བར་སྐྲན་ཐུར་
མས་བཤིག །ཕྱི་སྐྲན་བུམ་པར་དྲངས་ལ་དམར་འབྱིན་བྱ། །དེ་ལྟར་ཤེས་ན་འཚོ་བྱེད་མཁས་
པ་ཡིན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་གཅོང་ཆེན་སྐྲན་ནད་བཅོས་པའི་ལེའུ་སྟེ་བདུན་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སྐྱ་རྦབ་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་རྐྱེན་ཟས་དང་སྤྱོད་ལམ་མི་འཕྲོད་པས། །མ་ཞུའི་དྭངས་མ་མཆིན་
གནས་ཟུངས་མ་གྱུར། །ངན་ཁྲག་ཆུ་སེར་རྒྱས་པ་རླུང་གིས་གཏོར། །ལུས་ཀུན་ཁྱབ་པས་སྐྱ་
རྦབ་དག་ཏུ་གཡོ། །དེ་ཉིད་གློ་མཆིན་མཆེར་པར་ཞུགས་པ་དང༌། །ཆུ་སེར་རླུང་དང་ལྡན་ཕྱིར་
དབྱེ་བ་ལྔ། །གློ་བ་སྐྱ་རྦབ་ཁྲག་ཤས་ཆེ་བ་སྟེ། །མཆིན་པ་མཁྲིས་ལྡན་མཆེར་པ་བད་ཀན་ལྡན། །
ཆུ་སེར་སྐྱ་རྦབ་ཤ་ལྤགས་མཚམས་སུ་ཁྱབ། །རླུང་ནད་སྐྱ་རྦབ་སྙིང་དང་སྲོག་རྩར་གནས། །
དེ་རྟགས་སྤྱི་དང་བྱེ་བྲག་གཉིས་སུ་གསུངས། །སྤྱི་རྟགས་དང་པོ་ཁ་གདོང་མིག་ལྕིབས་དང༌། །
རྐང་བོལ་ངར་གདོང་སྦོད་པོར་གཡོ་ཞིང་སྐྲངས། །འགུལ་ན་རྔམ་འདེགས་སྙིང་སྤྲུག་དང་ག་
འགག །ཁ་ཟས་མི་འཇུ་ལྕེ་མཆུ་རྙིལ་སྐྲག་འཆོར། །སྟོབས་ཆུང་རྩ་བྱིང་ཆུ་སེར་ཤིན་ཏུ་ངལ། །
བྱེ་བྲག་གློ་བ་སྐྱ་རྦབ་གློ་མང་ཞིང༌། །ལུད་པ་ཁྲག་ཅན་སྦུ་གསོག་ལུ་བ་ཡིན། །མཆིན་པ་མིག་
སྤྲིན་ཤ་མདངས་དྲི་ཆུ་སེར། །མཆེར་པ་ཁོང་སྦོ་ཤིག་མང་ལྕེ་མཆུ་སྐྱ། །ཆུ་སེར་ཟ་འཕྲུག་བྱེད་
ཅིང་ཆུ་སོ་སྐྲངས། །རླུང་ནི་གཉིད་ཆུང་སྐྲངས་གསོབ་འཕེལ་འབྲི་ཆེ། །བཅོས་པའི་ཐབས་ལ་
སྤྱི་དང་བྱེ་བྲག་གཉིས། །སྤྱི་བཅོས་དང་པོ་རླུང་གིས་སྣ་ཁྲིད་ཕྱིར། །མངར་གསུམ་ཏིང་ཁྲོལ་
ལུག་ཤ་ལོ་ཡིབ་དང༌། །ཞུན་མར་ཆང་དང་བསྐུ་མཉེས་ཞི་བར་ནུས། །དེས་མ་ཞི་ན་སྨན་
དཔྱད་ཟས་སྤྱོད་བཞི། །དེ་སྨན་སྐྱ་རྦབ་རླུང་ཤས་ཆེ་བའི་ཕྱིར། །དང་པོ་ཏིག་ཏ་བ་ཡི་རྣམ་ལྔ་
25-1-153


ཡི། །སྨན་མར་གང་ཤིས་མས་བཏང་བཟའ་དང་བྱུག །དེ་ཡི་རྗེས་ལ་སྐྱུགས་སྨན་རྣོན་པོས་
སྦྱང༌། །སླར་ཡང་གོང་གི་སྣུམ་འཆོས་བྱས་རྟིང་ལ། །བཀྲུ་སྨན་(དུར་བྱིད་སྒྲོན་ཤིང་)ལྕགས་ཕྱེ་བ་
གཅིན་སྦྱར་བས་སྦྱང༌། །དེ་རྗེས་འབྲས་བུ་གསུམ་དང་ལི་ག་དུར། །བྱི་ཏང་ག་དང་ཙི་ཏྲ་ཚ་བ་
གསུམ། །ཆ་མཉམ་ཀུན་དང་ལྕགས་ཕྱེ་མཉམ་བྱས་ཏེ། །སྦྲང་སྦྱར་ལྡེ་གུས་སྐྱ་རྦབ་འཇོམས་
པར་བྱེད། །ཏ་བྱ་ཐང་ཤིང་སྐྱེར་ཤུན་ཚ་བ་ལྔ། །པི་པི་ལིང་གི་མཱུ་ལ་འབྲས་བུ་གསུམ། །ཀུན་
གྱི་ཉིས་འགྱུར་ལྕགས་ཕྱེ་བ་གཅིན་བརྒྱད། །སོ་སོར་བསྐོལ་བསྲེས་རིལ་བུ་ཟོས་པའི་རྟིང༌། །
དར་བ་འཐུངས་པས་སྐྱ་རྦབ་འཇིལ་བར་ནུས། །ཏ་བྱ་བྲག་ཞུན་དངུལ་ཆུ་ལྕགས་དྲེག་དང༌། །
རྭ་གསུམ་ཚ་བ་གསུམ་དང་ཙི་ཏྲ་ཀ །བྱི་ཏང་ག་དང་སྦྲང་རྩིའི་ལྡེ་གུ་ཡིས། །སྐྱ་རྦབ་དབྱིག་
དུག་རྗེད་བྱེད་འཇོམས་པར་བྱེད། །གླ་སྒང་གོ་སྙོད་པ་ཏྲ་ཚ་བ་ལྔ། །སྟག་ཚེར་སྐྱེར་ཤུན་ཆུ་
སྐོལ་འཕུལ་བྱས་ན། །འོར་དང་སྐྱ་རྦབ་འདུས་གྱུར་ཚབས་ཆེ་སེལ། །རྗེས་ལ་དང་པོ་བཅུ་
གསུམ་བཅོ་བརྒྱད་བསྲེག །དེ་ཡིས་རླུང་དང་ཆུ་སྒོ་འགེགས་པར་བྱེད། །འབྲས་ཐུག་ལུག་ཤ་
མར་གསར་དར་བ་བསྟེན། །ཉ་ཕག་རུལ་སྐྱུར་ཞོ་དང་བུར་རློན་ཚྭ། །ཡོས་དང་ཤ་སྐམ་རྗེན་
ཟས་འཇུ་དཀའ་དང༌། །ཉིན་གཉིད་ཉལ་པོ་བཞོན་པ་རླན་གྲང་སྤང༌། །བྱེ་བྲག་གློ་ནད་སྐྱ་རྦབ་
ཅུ་གང་དང༌། །གུར་གུམ་སུག་སྨེལ་ད་ལིས་སེ་འབྲུ་དང༌། །ལྕགས་ཕྱེ་ཀ་ར་སུམ་འགྱུར་སྦྱར་
ཏེ་བཏང༌། །ཚ་བ་ཆེ་ན་ག་བུར་(ཙན་དན་བསིལ་གསུམ་ག་དུར་ཏིག་ཏ་བ་ཤ་ཀ་ཚོས་ཨ་རུ་པི་ལིང་)བཅུ་གཅིག་
སྦྱར། །དེ་རྗེས་རྩེ་ཆུང་སྒང་རྩ་དྲུག་མགོ་གཏར། །དེས་མ་ཞི་ན་ཨ་རུའི་(དནྡ་དུར་བྱིད་ཤིང་མངར་བོང་
ང་བུལ་ཏོག་མར་དང་སྦྱར་ལ་)ཁྲུས་སྨན་བཏང༌། །རྗེས་ལ་གྲོ་ཡི་ཆང་བསྟེན་བཞི་ལྔ་བསྲེག །མཆིན་
པ་སྐྱ་རྦབ་གུར་གུམ་གཡུ་རྙིང་དང༌། །ལྕགས་ཕྱེ་ཏ་བྱ་མཁྲིས་ཆེན་ར་མར་སྦྱར། །ཡང་ན་ནིམ་
པ་རྩ་མཁྲིས་བ་ཤ་ཀ །ཏིག་ཏ་སླེ་ཏྲེས་ཧོང་ལེན་འབྲས་བུ་གསུམ། །བསྐོལ་བའི་ཁུ་བ་སྦྲང་
དང་སྦྱར་ལ་བཏང༌། །དེ་ཡི་རྗེས་ལ་རྩེ་ཆུང་རུ་ཐུང་གཏར། །མ་ཞི་གུར་གུམ་(དནྡ་དུར་བྱིད་པི་ལིང་གི་
25-1-154


)བཤལ་གྱིས་སྦྱངས་རྗེས་ལ། །བཅུ་གསུམ་དགུ་པ་མེས་མནན་དེ་འོག་ཏུ། །ལུག་རུ་ཧོང་ལེན་
སྲོལ་གོང་རྩ་མཁྲིས་དང༌། །ཤིང་ཚ་རྭ་ཚ་སྒ་དང་པི་པི་ལིང༌། །བུ་རམ་རིལ་བུ་བྱས་བསྟེན་
བབས་ཆེ་ལ། །ཆུ་སེར་འོར་སྒོ་རྣམས་སུ་ཐུར་མས་བསེང༌། །མཆེར་པ་སྐྱ་རྦབ་ལྕགས་ཕྱེ་བཅུ་
པ་དང༌། །ད་ལིས་བདུན་པ་ལྟག་པ་སྤྲད་པས་འཇོམས། །ཁ་ཟས་དྲོད་བསྟེན་བཅུ་གཅིག་བཅུ་
གཉིས་བསྲེག །ཆུ་སེར་སྐྱ་རྦབ་སྤོས་དཀར་འབྲས་བུ་གསུམ། །བྲག་ཞུན་སྦྲང་སྦྱར་ལྕགས་
ཕྱེ་བཅུ་པ་དང༌། །ལྟག་སྤྲད་སྦྲང་རྩི་བུ་རམ་ཏིང་ཁྲོལ་དང༌། །བཤུལ་ཤ་བཏང་ཞིང་མ་ཞི་(ཨ་རུ་
དུར་བྱིད་ཤྲཱི་ཁཎྜ་ཤུ་ཟུར་པ་ཏྲ་བ་ཆུའི་)བཤལ་གྱིས་སྦྱང༌། །རྗེས་ལ་ཆུ་གསང་རྣམ་(ཚིགས་པ་དང་པོ་བཅུ་གསུམ་
བཅོ་བརྒྱད་པ་)གསུམ་མེ་ཡིས་བསྡམ། །སྐྱ་རྦབ་རླུང་ལ་ཤིང་ཀུན་(སྒ་པི་ལིང་ཁ་རུ་ཚྭ་ཤིང་ཚ་ཙི་ཏྲ་ཀ་ཛཱ་ཏི་
སུག་སྨེལ་ཏེ་)བརྒྱད་པ་བསྟེན། །སྒོག་སྐྱ་རྩ་བའི་སྨན་མར་སྣུམ་འཆོས་བྱ། །རུས་པ་སྣ་ཚོགས་
ཁུ་བ་སྤོད་དྲན་བཏུང༌། །ལུག་ཤ་བཤུལ་ཤ་ཆང་བསྟེན་དྲུག་བདུན་བསྲེག །སྐྱ་རྦབ་རྙིངས་པ་
འོར་ནད་འཆི་ཆུར་འགྱུར། །འོར་ནད་རྙིངས་པ་དམུ་ཆུར་འགྱུར་བ་ཡིན། །དེ་ཕྱིར་འོར་ནད་
སྐྱ་རྦབ་གང་ཡང་རུང༌། །མ་ཐུབ་རྙིངས་ནས་དམུ་ཆུའི་བཅོས་ཐབས་སྦྱར། །ཞེས་གསུངས་སོ། །
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྐྱ་རྦབ་བཅོས་པའི་
ལེའུ་སྟེ་བརྒྱད་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །འོར་ནད་གསོ་བ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །རྒྱུ་རྐྱེན་ཟས་དུས་རྐྱེན་གྱིས་བསྐྱེད་པ་གསུམ། །དང་པོ་ཁ་ཟས་མ་ཞུ་
དྭངས་སྙིགས་འདྲེས། །མཆིན་གནས་ཟུངས་སུ་མ་གྱུར་ཁྲག་ངན་རྒྱས། །དེ་ཉིད་ཤ་པགས་
བྱེར་བས་ཆུ་སེར་སྐྱེད། །ཆུ་སེར་འོར་དུ་ལྷུང་སྟེ་གཡོ་བར་འགྱུར། །དུས་བསྐྱེད་སྐྱ་རྦབ་རྙིངས་
ལས་འབྱུང་བ་ཡིན། །རྐྱེན་བསྐྱེད་ནད་ཀུན་བཅོས་ཉེས་འཁྲུགས་ལས་འབྱུང༌། །དབྱེ་བ་རླུང་
25-1-155


མཁྲིས་ཁྲག་དང་བད་ཀན་དང༌། །བསྣད་དང་དུག་ལས་བྱུང་བ་དྲུག་ཏུ་བཤད། །རྟགས་ལ་སྤྱི་
དང་བྱེ་བྲག་རྣམ་པ་གཉིས། །སྤྱི་རྟགས་རྩ་རྣམས་ཐམས་ཅད་ཚ་ཞིང་འཁྱུག །ལུས་དང་ཡན་
ལག་སྙོམ་ལ་ངལ་བ་སྟེ། །དྲོད་ཆུང་ཁ་ཟས་མི་འཇུ་དང་ག་འགག །དེ་རྗེས་ལུས་ཀུན་གཡོ་
ཞིང་སྐྲངས་པ་སྟེ། །ཁྱད་པར་གདོང་བོལ་བྲང་བསུས་ཆུ་སོ་སྐྲངས། །ཤ་དང་པགས་པའི་བར་
རྣམས་ཆུ་སེར་ཁེངས། །འོག་ཏུ་གང་བཅུག་ཡོན་པོར་སྐྲངས་པ་ཡིན། །བྱེ་བྲག་རྟགས་ལ་རླུང་
འོར་ལུས་འདར་བརྩེ། །སྐྲངས་རྩུབ་གསོབ་ལ་ཉིན་ཆེ་མཚན་མོ་ཆུང༌། །མཁྲིས་འོར་མིག་ཆུ་
པགས་སེར་དྲོས་ན་སྐྱེ། །ཁྲག་འོར་རྩ་རྣམས་གཟེར་འཁྱུག་མིག་ཆུ་དམར། །བད་ཀན་ལུས་
གྲང་གྲངས་ན་མི་བདེ་ལ། །སྐྲངས་པ་ཉིན་ཆེ་མཚན་མོ་ཆུང་བ་ཡིན། །བསྣད་འོར་མཚོན་
ལམ་ལ་བརྟེན་ཚ་ལ་དམར། །དུག་རེག་ཁོང་སོང་དུག་རྟགས་ལྡན་པས་ཤེས། །བཅོས་པའི་
ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་གསར་དུས་སྨྱུང་བྱ་འཇུ་བླ་བསྟེན། །བོང་ང་
ཐང་ཤིང་དུག་ཉུང་བྱི་ཏང་ག །ཕོ་བ་རིས་བསྐོལ་ཁུ་བས་འོར་ནད་སེལ། །སེ་འབྲུ་ལྔ་པས་ཕོ་
བའི་མེ་དྲོད་བསྲུང༌། །འབྲས་བུ་གསུམ་ཐང་ཧོང་ལེན་ཚ་བ་གསུམ། །དུར་བྱིད་བ་ཆུ་ལྕགས་
སྣོད་བསྐོལ་ཁུ་ལ། །སྤོས་དཀར་སྦྲང་རྩི་སྦྱར་བའི་ཁྲུས་ཀྱིས་སྦྱང༌། །སྤོས་དཀར་བྲག་ཞུན་
འབྲས་གསུམ་ཐང་གིས་བསྡུས། །སླེ་ཏྲེས་ཐང་ཤིང་སྤོས་དཀར་ཨ་རུ་ར། །བ་སྤྲུ་བ་ཆུར་སྦྱར་
བསླུད་འོར་ཀུན་འཇོམས། །ཁྱད་པར་རླུང་ལ་བ་ཡི་རྣམ་ལྔའི་མར། །བཟའ་དང་བྱུག་དང་
འཇམ་རྩིར་བཏང་བ་དང༌། །ཁ་རུ་ཚྭ་དང་ཞུན་མར་སྒ་སྦྱར་བྱུག །མཁྲིས་འོར་སྦྱངས་རྗེས་
བཟང་དྲུག་འགྲོན་ཐོད་ཐལ། །ཚ་བ་གསུམ་ཐལ་བྲག་ཞུན་སོ་མ་ར། །ཀ་ར་སྦྱར་བས་མཁྲིས་
འོར་སྐེམ་པར་བྱེད། །ཁྲག་འོར་སྦྱངས་རྗེས་ཉི་ཤུ་རྩ་ལྔ་ལ། །ཆུ་སེར་སྨན་བསྒྱུར་སེང་ལྡེང་ཁུ་
བས་དབུལ། །རྩ་ཁ་ཕྱེ་ཙམ་མང་དུ་གཏར་བར་བྱ། །བད་ཀན་གྲང་འོར་སྦྱངས་རྗེས་ཐལ་སྨན་
བསྐམ། །གནད་པའི་འོར་ལ་ཁྲག་དབྱུང་བསིལ་བས་བྱུག །དུག་བསྐྱེད་པ་ལ་དུག་གི་གསོ་བ་
25-1-156


སྦྱར། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་འོར་ནད་གསོ་བའི་ལེའུ་སྟེ་དགུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །གཅོང་ཆེན་དམུ་ཆུའི་རྒྱུ་རྐྱེན་དབྱེ་བ་དང༌། །གྱུར་ཚུལ་གནས་དང་རྟགས་
དང་བཅོས་ཐབས་དང༌། །ཕྱི་རྗེས་བཅད་དང་སྤྱི་དོན་བརྒྱད་ཀྱིས་བསྟན། །རྒྱུ་ནི་རླུང་མཁྲིས་
བད་ཀན་ཆུ་སེར་ཁྲག །དེ་རྐྱེན་མ་ཞུ་བཤལ་རྗེས་ཟས་སྤྱོད་ལོག །ཚ་བའི་རྗེས་ལ་གཏར་དང་
བསིལ་སྦྱོར་ཐལ། །ངལ་དུབ་རྗེས་ལ་ཆུ་མང་འཐུངས་པ་དང༌། །རླན་སྟེང་ཉལ་བ་ལ་སོགས་
མེ་དྲོད་ཉམས། །སྔོན་ལས་གདོན་རྐྱེན་དབང་གིས་དམུ་ཆུར་འགྱུར། །དབྱེ་བ་ནད་གདོན་དུག་
ལས་གྱུར་པ་གསུམ། །ནད་ཆུ་བྱེར་ཟགས་འཁྱིམས་ཆུ་རྒྱུ་རྡོལ་བཞི། །བྱེར་ཆུ་ཁྲག་བྱེར་
མཁྲིས་བྱེར་ཆུ་བྱེར་གསུམ། །ཟགས་ཆུ་དོན་ཟགས་སྣོད་ཟགས་སྐྲན་ཟགས་གསུམ། །དོན་
ཟགས་མཆིན་མཆེར་གློ་བ་ཟགས་པ་གསུམ། །སྣོད་ཟགས་ཕོ་བ་ལོང་ག་ཟགས་པ་གཉིས། །
སྐྲན་ཟགས་ཁྲག་སྐྲན་རྩ་སྐྲན་ཆུ་སྐྲན་ཟགས། །དབྱེ་བ་ཆུ་རིགས་བཅོ་ལྔར་འགྱུར་བ་ཡིན། །
གྱུར་ཚུལ་མ་ཞུ་ཕོ་བའི་བད་ཀན་འཕེལ། །དེ་ཡིས་དྲི་ཆུ་ཐུར་སེལ་རྒྱུ་ལམ་བཀག །རླུང་ལོག་
དྲི་ཆུ་དྭངས་མའི་རྒྱུ་ལམ་ཤོར། །པགས་འོག་སྣོད་ཀྱི་ཕྱི་རོལ་ཆུ་ཡིས་ཁེངས། །དེ་ནི་རྩ་ཁ་ལོག་
པའི་འཁྱིམས་ཆུ་ཡིན། །བྱེར་ཆུ་དྭངས་མ་མ་ཞུ་མཆིན་ལམ་བརྒྱུད། །ཟུངས་སུ་མ་སོང་ངན་
ཁྲག་ཆུ་སེར་རྒྱས། །ཤ་པགས་རྩ་མིག་བྱེར་བ་ཁྲག་བྱེར་ཡིན། །མཆིན་རྒྱས་ངན་ཁྲག་མཁྲིས་
པར་ཟགས་པ་ཡིས། །མཁྲིས་འཕེལ་ཁ་ལུད་ཤ་པགས་ཆུ་སེར་རྒྱས། །དེ་ཉིད་དྭངས་མ་
མཁྲིས་བྱེར་ཆུ་ཞེས་བྱ། །རླན་གྲང་སྦྱོངས་གཏར་བསིལ་སྦྱོར་ཐལ་བ་ཡིས། །ཕོ་བའི་མེ་ཤི་ཆུ་
གྲང་སིངས་སླེག་དང༌། །ཞོ་དར་ཇ་སོགས་འཐུངས་པ་མ་ཞུ་བར། །དྭངས་མའི་ལམ་ཤོར་
ཟུངས་སུ་འགྲོར་མ་འདོད། །རྩ་ལ་བྱེར་བས་ཆུ་སེར་གྲང་བ་སྐྱེད། །དྭངས་མ་ཆུ་བྱེར་ཞེས་བྱ་
25-1-157


གྲང་ཆུར་འགྱུར། །གོང་ལྟར་ཕོ་བའི་མེ་དྲོད་ཤོར་བ་ཡིས། །མ་ཞུ་བད་ཀན་དྭངས་མའི་རྩ་མིག་
བཀག །དྭངས་མ་མ་ཞུ་ཕོ་བར་ཡུན་རིང་གནས། །ཕོ་བའི་དྲོད་ཤོར་རྫ་གསར་ཆུས་བཀང་
འདྲ། །རྔུལ་ཞིང་ཟགས་པ་ཕོ་བའི་ཟགས་ཆུ་ཡིན། །གོང་གི་དྭངས་མ་མ་ཞུ་ལོང་དུ་ལྷུང༌། །
ལོང་ཁེངས་ཟགས་པ་ལོང་གི་ཟགས་ཆུ་ཡིན། །དྭངས་མ་མ་ཞུ་འགྲམས་ཁྲག་མཆིན་ཐོག་
ལྷུང་། །མཆིན་པ་ཁྲག་གིས་ཁེངས་ཤིང་རྒྱས་པ་ཡིས། །མཆིན་པའི་དྲོད་ཤོར་རུལ་བ་མཆིན་
ཟགས་ཡིན། །དེ་འདྲ་མཆེར་ལས་བྱུང་བ་མཆེར་པའི་ཆུ། །དྭངས་མ་མ་ཞུ་ངན་ཁྲག་གློ་སྦུབས་
འགྲིམས། །གློ་སྦུབས་ཆུ་སེར་ཁེངས་ནས་འདུས་པ་དེ། །མཆིན་དྲིའི་སྟེང་དུ་ལྷུང་ནས་སྣོད་
སྟེང་ཟགས། །དེ་ཉིད་གློ་བ་ཟགས་པའི་ཆུ་རུ་བཤད། །དྭངས་མ་མ་ཞུ་ངན་ཁྲག་རྒྱས་པ་དེ། །
མཆིན་མཆེར་མཆིན་དྲི་ཕོ་ལོང་རྒྱུ་མ་ཡི། །རྩར་ཞུགས་རྩ་མིག་ཁྲག་རླངས་རྩ་སྐྲན་འདྲིལ། །
རྙིངས་ནས་ཁྲག་ཞུ་རྡོལ་ཏེ་རྩ་ཁ་བྱེ། །དེ་ཉིད་རྩ་སྐྲན་ཟགས་པའི་ཆུ་ཞེས་བྱ། །དྭངས་མ་མ་ཞུ་
འགྲམས་ཁྲག་མཚོན་ཁྲག་གིས། །མཆིན་མཆེར་རྒྱས་ཏེ་ཁྲག་ཟིལ་སྐྲན་དུ་ཆགས། །རྙིངས་
ནས་སྐྲན་ཞུ་ཁྲག་སྐྲན་ཟགས་ཆུ་ཡིན། །དྭངས་མ་མ་ཞུའི་ངན་ཁྲག་ཆུ་སེར་རྒྱས། །རྩར་
འགྲིམས་རྩ་མིག་ཆུ་སེར་སྐྱ་རྦབ་བྱེད། །དེ་ཉིད་རྡོལ་བ་ཆུ་སྐྲན་ཟགས་ཆུ་ཡིན། །རྒྱུ་མ་
འགྲམས་སམ་རྒྱུ་གཟེར་རུས་པ་ཟུག །རྒྱུ་མའི་རྩི་ཉམས་རྙིངས་ནས་རུལ་ཞིང་རྡོལ། །དྲི་ཆུ་
ཕྱིར་འཛག་རྒྱུ་རྡོལ་ཆུ་ཞེས་བྱ། །གཞན་ཡང་སྤྱོད་ལམ་སྐྱོན་གྱིས་གདོན་དང་འགྲས། །སྦྱར་
དུག་རྐྱེན་གྱིས་ཆུ་རུ་འགྱུར་བ་ཡོད། །འོན་ཀྱང་ནད་ཀུན་བཅོས་ཉེས་སྐྱ་རྦབ་དང༌། །འོར་དུ་
འགྱུར་ལ་འོར་རྙིང་དམུ་ཆུར་འགྱུར། །མདོར་བསྡུས་རླུང་དང་མཁྲིས་པ་བད་ཀན་ཆུ། །དེ་ཡང་
ཚ་ཆུ་གྲང་ཆུ་གཉིས་སུ་འདུས། །ཆུ་ཡི་གནས་ས་ཕྱི་ནང་བར་དང་གསུམ། །ཕྱི་ཆུ་ཤ་མདངས་
བར་ན་གནས་པ་སྟེ། །ནང་ཆུ་རྒྱུ་ལོང་སྣོད་ཀྱི་སྟེང་ན་འཕྱོ། །བར་ཆུ་པགས་འོག་ཤ་སྟེང་ཁྱབ་
པར་གནས། །དེ་རྟགས་སྤྱི་དང་བྱེ་བྲག་རྣམ་པ་གཉིས། །སྤྱི་རྟགས་དང་པོ་འཇུག་དང་བར་དུ་
25-1-158


སྨིན། །ཐ་མ་རྒྱས་དུས་འཚོ་འཆི་བརྟག་པའོ། །དང་པོ་འཇུག་དུས་ཤེད་ཆུང་ཕོ་བ་ལྟེམ། །
དབུགས་རྒོད་སྙིང་འདེགས་ཟས་ཀྱི་འཇུ་སྟོབས་ཆུང༌། །ལྕེ་མཆུ་རྙིལ་དཀར་འགྲོ་འདུག་
བསུས་པ་ལྡིག །བོལ་གོང་ངར་གདོང་ཆུ་སོ་བཅུ་དྲུག་མདོ། །ཕོ་བ་བྲང་ཞོལ་ཁ་གདོང་མིག་
ལྕིབས་དང༌། །ཆུ་ཡི་མཁར་བརྒྱད་གཡོ་ཞིང་སྐྲངས་པ་ཡིན། །བར་དུ་ཆུ་རུ་སྨིན་ནས་བསུས་
པ་ཁེངས། །བེམ་ཏོལ་རྒྱབ་ན་ཐོལ་ཐོལ་ཕྲིག་ཕྲིག་འོང༌། །ཐ་མ་རྒྱས་དུས་ཚ་ཆུ་གྲང་ཆུ་གཉིས། །
ཚ་ཆུ་རྩ་གྲིམས་ཆུ་མདོག་དམར་རམ་སེར། །གློ་སོར་མིག་སེར་ལྷེན་སྣ་སློག་པ་ཆགས། །
བསུས་པ་ཆེ་ལ་རྩ་ཡི་དྲ་བས་ཁྱབ། །ཡན་ལག་ཕྲ་ལ་སྐམ་པས་ཡི་དྭགས་འདྲ། །གྲང་ཆུ་རྩ་
དལ་ཆུ་སྔོ་སྐོམ་དད་ཆུང༌། །ཕོ་བ་སྦོ་འཁྲོག་བྱེད་ཅིང་སྐབས་སུ་འཁྲུ། །མགོ་ལུས་ཡན་ལག་
སྐྲངས་ཆེ་མནན་རྗེས་འོང༌། །སྦོམ་ལ་རགས་པས་མགོན་པོ་ལྟ་བུར་བཤད། །གྲང་ཆུ་ཡུན་
ལོན་ཆུ་རྒྱས་གློ་སྙིང་དང༌། །མཆིན་པ་ཆུས་ནུབ་ཚོས་ཏེ་མྱུར་དུ་འཆི། །ཚ་ཆུ་རྒྱས་ཐེབས་མི་སྐྱེ་
ཚེ་རིང་སྟེ། །ཕུག་ན་སྲོག་ཡིན་མྱུར་དུ་འཆི་བར་འགྱུར། །འཆི་རྟགས་དང་ག་མི་བདེ་སྐྱུག་པ་
དང༌། །གློ་མང་མིག་སེར་དབུགས་ཐུང་སྐོམ་དད་ཆེ། །དྲི་ཆུ་དམར་སེར་སྐ་ལ་ཉུང་བ་དང༌། །
ཟུངས་ཟད་ལུས་སྟོབས་ཤོར་ན་སྤང་བར་བྱ། །དབུགས་དལ་དང་ག་བདེ་ལ་སྐོམ་དད་ཆུང༌། །
ཟུག་མེད་ལུས་ཡང་མིག་དཀར་དྲི་ཆུ་སྔོ། །རྩ་རྒྱུད་སྙོམས་ལ་ཤེད་ཆེ་འཚོ་བར་འགྱུར། །བྱེ་
བྲག་བརྟག་པ་དྭངས་མ་ཁྲག་བྱེར་ཆུ། །རྩ་གྲིམས་ཆུ་དམར་ལུས་ལྕི་དང་ག་འགག །རོ་སྟོད་
རྩིབ་ལོགས་རྣམས་སུ་གཟེར་ཕྲན་ལྡང༌། །གཏར་ན་ཁྲག་ངན་སླ་ལ་ཆུ་ལྟར་སེར། །དྭངས་མ་
མཁྲིས་བྱེར་རྔམ་འདེགས་གློ་སྙིང་སྤྲུག །དང་ག་མི་བདེ་འགྲངས་ན་ཕོ་བ་རྫིང༌། །མིག་ཆུ་སེར་
ལ་འཁྲུས་ན་མཁྲིས་པ་འབྱུང༌། །དྭངས་མ་ཆུ་བྱེར་ལྡེར་ཚོ་ལྟ་བུར་སྐྲངས། །རྩ་བྱིང་ཆུ་སྔོ་སྙིང་
སྤྲུག་ཕོ་བ་རྫིང༌། །དེ་གསུམ་དང་པོ་ཕྱི་ཆུ་འོར་ཡིན་ཏེ། །རྙིངས་པར་གྱུར་ན་ནང་དུ་ཆུ་རུ་སྨིན། །
མཆིན་པ་དང་པོ་ཟགས་པ་གཡས་ནས་འཕེལ། །རྩ་གྲིམས་ཆུ་དམར་ཕུག་ན་རྒྱ་བཤལ་
25-1-159


འབྱུང༌། །བསུས་པ་ཆེ་ལ་རྩ་བཀྲ་ཡན་ལག་སྐམ། །མཆེར་པ་ཟགས་པ་གཡོན་ནས་འཕེལ་བ་
ལ། །ཆུ་ཡི་ནང་ན་མཆེར་པ་རྡོ་ལྟར་སྲ། །ཕོ་བ་སྦོ་འཁྲོག་འཇུ་སྟོབས་ཆུང་བ་ཡིན། །གློ་བ་
ཟགས་པ་གློ་མང་གློ་སྙིང་སྤྲུག །ཟོས་རྗེས་ཕོ་བ་མི་བདེ་སྐྲག་མདངས་འཆོར། །ཕོ་ལོང་ཟགས་
པ་སྦོ་འཁྲོག་ཕོ་བ་རྫིང༌། །དང་ག་མི་བདེ་ཤིན་ཏུ་འཇུ་སྟོབས་ཆུང༌། །འགྲངས་དང་གྲང་རྗེས་
གླང་ཐབས་ལྟ་བུར་ན། །ཁྱད་པར་ཕོ་བ་ལོང་ཡུལ་ཆེ་བ་ཡིན། །སྐྲན་ཟགས་གསོག་པ་བུལ་
ཞིང་ཡོད་ངོས་མང༌། །རྩ་ཁ་བྱེ་ནས་གསོག་རྐྱེན་ཟུག་གཟེར་ཆེ། །འཁྱིམས་ཆུ་འོག་རླུང་ལྡོག་
ལ་ཆུ་བབས་ཆུང༌། །སྦོ་འཁྲོག་བྱེད་ལ་མྱུར་དུ་སྐྱེ་བ་ཡིན། །རྒྱུ་རྡོལ་རྒྱུ་སྨད་མི་བདེ་སྨད་ནས་
སྐྱེ། །འདྲེ་ཆུ་ཤ་སྣ་འགུལ་ཞིང་སྙིང་མི་དགའ། །གདོང་ལ་ཆུ་བུར་འོང་ཞིང་སྣ་ཁྲག་འཛག །
འཕར་རྩ་མི་སྒྲུང་ལྡང་དུབ་འདྲེ་ཁ་རྒོད། །ཡང་ན་ཤེས་པ་བྱིང་ལ་ཚིག་པ་ཟ། །མེ་ལོང་ནང་དུ་
བྱིང་བྱིང་ཐུ་ལུ་འདྲ། །དུག་ལས་གྱུར་པ་དུག་གི་ནད་རྟགས་འབྱུང༌། །མདོར་བསྡུས་རླུང་
མཁྲིས་བད་ཀན་འདུས་པས་སྒྱུར། །རླུང་གྱུར་འཁྲོག་འུར་ཟུག་ཆེ་འཕེལ་འབྲི་བྱེད། །ཆུ་སྔོ་དྲི་
མ་སྲི་ལ་དབུགས་ངན་སྡོམ། །མཁྲིས་པ་མིག་སེར་ཤ་སྔོ་ཆུ་བབས་ཆུང༌། །རྩ་གྲིམས་ཆུ་མདོག་
མར་ཁུ་ཙོད་ཁུ་འདྲ། །བད་ཀན་དབུགས་འདེག་སྐྲངས་ཆེ་འཇུ་སྟོབས་ཆུང༌། །ལུས་ལྕི་གཉིད་
ཆེ་རྩ་བྱིང་ཆུ་མདོག་སྔོ། །དེ་ལ་འདྲེ་ཆུ་འཁྱིམས་ཆུ་ཕོ་ལོང་ཟགས། །བྱེར་ཆུ་གསོར་རུང་ཕྱི་མ་
ཁས་མི་བླང༌། །མཁྲིས་པ་ལས་གྱུར་ཚ་ཆུ་མི་འཚོ་སྤང༌། །བད་རླུང་ལས་གྱུར་གྲང་ཆུ་གསོ་བར་
ནུས། །གསོ་ཐབས་དང་པོ་མངོན་ཚུལ་ཞུགས་དུས་སུ། །སེ་འབྲུ་བརྒྱད་དང་རྒོད་མ་ཁ་ཡི་ཕྱེ། །
ལུག་ཤ་གསར་འཇམ་ཞུན་མར་དྲོད་བསྐྱེད་ལ། །འཇམ་བཤལ་ཆུ་སེར་སྦྱངས་པས་ཞི་བར་
ནུས། །བར་དུ་ཆུ་རུ་རྒྱས་ཏེ་སྨིན་པའི་དུས། །དེ་ལ་བཅོས་ཐབས་སྤྱི་དང་བྱེ་བྲག་གཉིས། །སྤྱི་
རུ་དམུ་ཆུ་བཅོས་ཐབས་རྣམ་ལྔར་བཤད། །དང་པོ་ཆུ་བོ་འོལ་ཁ་བསྒྱུར་བ་དང༌། །གཉིས་པ་
རྒྱ་མཚོ་གནས་སུ་བསྐམ་པ་དང༌། །གསུམ་པ་རྫིང་གི་འོར་ཁུང་བརྟོལ་བ་དང༌། །བཞི་པ་མཚོ་
25-1-160


མོ་ཡུར་དུ་དྲངས་བ་དང༌། །ལྔ་པ་རྩ་ལ་འགག་མིག་གཞུག་པའོ། །ཆུ་བོའི་འོལ་ཁ་མ་བསྒྱུར་
ན། །རྫིང་གི་སྐྱེ་ཆུ་གསོག་པ་འདྲ། །རྒྱ་མཚོ་གནས་སུ་མ་བསྐམས་ན། །ལུ་མ་ཅན་གྱི་ཆུ་མིག་
འདྲ། །རྫིང་གི་འོར་ཁུང་མ་བརྟོལ་ན། །ཆུ་ཡིས་ལྟོང་མོ་འགེངས་པ་འདྲ། །མཚོ་མོ་ཡུར་དུ་མ་
དྲངས་ན། །རྫིང་གི་འབོད་ཀ་མེད་པ་འདྲ། །རྩ་ལ་འགག་མིག་མ་བཅུག་ན། །ཞིང་པས་ཐན་
གར་བཞག་པ་འདྲ། །དེ་ཕྱིར་བཅོས་ཚུལ་ལྔ་ལྡན་གཅེས། །དང་པོ་ཆུ་བོའི་འོལ་ཁ་སྒྱུར་བ་ནི། །
མ་ཞུ་མེ་དྲོད་ཉམས་ལས་འབྱུང་བའི་ཕྱིར། །གྲང་བའི་ཆུ་ལ་སེ་འབྲུ་བཞི་པ་སྟེ། །ཚ་བའི་ཆུ་
ལ་དེ་སྟེང་གུར་གུམ་བསྣན། །བུར་དཀར་སྦྱར་བ་ཆུ་སྐོལ་འཕུལ་ལ་བཏང༌། །ཕོ་བའི་མེ་དྲོད་
སྐྱེད་ཅིང་མ་ཞུ་འཇུ། །བད་ཀན་བེ་སྣབས་རྩ་སྦུབས་འགགས་པ་སེལ། །དྭངས་མ་མ་ཞུ་ལུས་
ཟུངས་རང་སོར་འཇུག །དེ་རྗེས་ཤིང་མངར་འུ་སུ་ལྕམ་པ་དང༌། །སྲུབ་གའི་འབྲས་བུ་འུག་
སྒྲོའི་ཐལ་བ་རྣམས། །ཞུན་མར་སྦྱར་བཏང་སྐོམ་ལ་ཤིན་ཏུ་འཛེམ། །དྭངས་མ་དྲི་ཆུ་རང་ལམ་
འཇུག་པར་བྱེད། །དེ་ཡིས་དང་ག་བདེ་ལ་སྐོམ་དད་ཆུང༌། །དྲི་ཆུའི་བུངས་ཆེ་ཕོ་བ་བདེ་བར་
འགྱུར། །དེ་ནས་རྒྱ་མཚོ་གནས་སུ་སྐེམ་པ་ལ། །སྨན་དང་དཔྱད་དང་ཟས་དང་སྤྱོད་ལམ་བཞི། །
སྨན་གྱིས་སྐེམ་པ་ཐོད་སྦྱོར་ཐལ་སྦྱོར་དང༌། །བི་ཥ་རུས་སྦྱོར་དངུལ་ཟངས་སྦྱོར་བ་དྲུག །ཐོད་
པའི་སྦྱོར་བ་མི་དང་ཕག་པ་དང༌། །རྟ་དང་འཕྱི་བ་དུར་ཐོད་གཙོ་བྱས་ལ། །ཨ་རུ་བ་རུའི་རུས་
པ་ཝ་ཡི་སྙིང༌། །བྱང་སེམས་དཀར་དམར་བྱང་པ་ཤིང་ཀུན་དང༌། །རྒྱ་ཚྭ་དབྱི་མོང་སྲུབ་ཀའི་
འབྲས་བུ་རྣམས། །འོ་མ་མར་དང་ཞག་ལ་འདག་པ་བྱ། །ནུས་ལྡན་བསྲེགས་ཐལ་སུག་སྨེལ་
པི་པི་ལིང༌། །སེ་འབྲུ་སྡིག་སྲིན་ལྕམ་པ་སྲམ་གྱི་བྲུན། །ཁ་ཚར་བཏབ་ལ་འདུ་བའི་རྟ་དང་སྦྱར། །
དམུ་ཆུ་རྒྱ་མཚོ་ཙམ་ཡང་སྐེམ་པར་ནུས། །ཐལ་སྦྱོར་ཐལ་སྨན་འཇམ་པོ་སུམ་གཉིས་ལ། །
བཙན་དུག་ཨ་རུ་བཅུ་གཅིག་ཕོ་འགྲོན་བདུན། །ཅུ་གང་གུར་གུམ་ཚ་བ་རྣམ་པ་ལྔ། །ཚྭ་སྣ་
ཚོགས་ཚད་ཡ་བཀྵ་ར་དང༌། །ས་རྫིང་ཀ་དང་ཤ་རུ་དུར་ཐོད་ཐལ། །པྲི་ཡང་ཀང་རྣམས་དྲི་
25-1-161


ཆུས་འདམ་བཏགས་བྱ། །རིལ་བུ་སྲན་ཙམ་ཁྱེའུ་སུས་རིམ་པས་བསྐྱེད། །ཟླ་བ་གཅིག་གིས་
རྒྱ་མཚོ་སྐེམས་པར་ནུས། །བི་ཥའི་སྦྱོར་བ་བཙན་དུག་ཆ་གཅིག་ལ། །ཨ་རུ་སུམ་གཉིས་སོ་
སོར་ནུས་ལྡན་བསྲེག །འགྲོན་བུ་དུར་ཐོད་བུར་དཀར་རིལ་བུ་བྱ། །གྲང་ཆུའི་སྟེང་དུ་བསྐལ་
པའི་མེ་བདུན་འདྲ། །རུས་སྦྱོར་དུང་དང་འགྲོན་བུ་དུར་རུས་དང༌། །ཉ་སྲམ་ཆུ་བྱའི་རུས་པས་
གཙོ་བྱས་ལ། །མུ་ཟི་ཟངས་ཐལ་ཅོང་ཞི་ཨ་རུ་ར། །རུ་རྟ་ཚ་བ་གསུམ་དང་དབྱི་མོང་དང༌། །ཟེ་
ཚྭ་ཐལ་ཚྭ་རྒྱ་ཚྭ་ཁ་རུ་ཚྭ། །རྒྱམ་ཚྭ་བྱང་ཚྭ་ཞིབ་བཏགས་ནུས་ལྡན་བསྲེག །དམུ་ཆུ་མ་ལུས་
སྐེམས་པའི་གདམས་པ་སྟེ། །ཁྱད་པར་སྐྲན་ཟགས་ཆུ་ལ་བསྔགས་པ་ཡིན། །དངུལ་ཆུ་མུ་ཟི་
སྟར་བུ་ཚ་བ་གསུམ། །ཚྭ་སྣ་བུ་རམ་རིལ་བུ་སྐེམས་ཀྱི་མཆོག །ཁྱད་པར་ཚ་ཆུ་སྐེམས་པའི་ཕ་
ལམ་ཡིན། །ཟངས་ཐལ་སྦྱོར་བ་ཟངས་ཐལ་སུམ་གཉིས་ལ། །ལྕགས་ཐལ་སུམ་ཆ་ཤ་རུས་
ཐོད་འགྲོན་ཐལ། །ཨ་རུ་རྡོ་དྲེག་ཏ་བྱ་ཚ་གྲང་གི །རྟ་ཡིས་བསྒྱུར་བས་རྒྱ་མཚོ་སྐེམས་པར་
བྱེད། །ཁྱད་པར་དོན་ཟགས་ཆུ་ལ་བསྔགས་པ་ཡིན། །ཡང་ན་ཟངས་ལྕགས་དངུལ་ཐལ་ཡ་
བཀྵ། །མུ་ཟི་རྒྱ་ཚྭ་དབྱི་མོང་ཙི་ཏྲ་ཀ །ཨ་རུ་ཚ་བ་གསུམ་དང་ཀ་ར་སྦྱར། །ཚ་གྲང་ཐུན་མོང་
སྐེམས་པར་བྱེད་པ་ཡིན། །ཁ་ཟས་ལུག་ཤ་ཟན་དྲོན་གཡག་རྒོད་ཤ །ཚོ་ཁུ་སྤོད་བྲན་མར་
ཟན་ཆང་འཇམ་བསྟེན། །འཇུ་དཀའ་སྔོ་ངད་ཟས་ངན་བསིལ་ཟས་སྤང༌། །ཚ་ཆུ་དྲོད་བཅུད་ཧ་
ཅང་དྲགས་པ་དང༌། །སྤྱོད་ལམ་བསེར་བུ་རླན་གྲང་དྲག་ཤུལ་སྤང༌། །དྲོ་བའི་གནས་འདུག་མི་
རྔུལ་བག་ཙམ་བཅག །དཔྱད་དུ་དབྱི་སྤྱང་པགས་པའི་སྤུ་དུགས་བྱ། །ཁྱི་ཡི་པགས་པ་དྲོ་ཡང་
དང་ག་འགྲིབ། །ལྟེ་བ་བཞི་སྒྲོམ་ལྷེན་སྣའི་རྩེ་མོ་དང༌། །སྒྲོག་རུས་གཤོང་དང་དང་པོ་བཅུ་
གཉིས་བསྲེག །གང་ལ་བབས་པའི་གསང་སྒོ་མེ་ཡིས་བསྡམ། །ཚ་བའི་ཆུ་ལ་རུ་ཐུང་སྣོད་ཀ་
གཏར། །གསུམ་པ་རྫིང་གི་འོར་ཁུང་བསལ་བ་ནི། །ཆུ་བཤལ་ཆུ་སྦྱོངས་འཕྲུལ་འཛག་རྣམ་པ་
གསུམ། །དམུ་རྫིང་བུ་ག་འགགས་ལས་འབྱུང་བའི་ཕྱིར། །འདི་ལ་གཉེན་པོ་སྦྱོང་འདྲ་གཞན་
25-1-162


ན་མེད། །ཆུ་བཤལ་ཨ་རུ་མཆུ་སྙུང་ཟངས་དྲེག་དང༌། །དནྡ་དུར་བྱིད་དོང་ག་ཤྲཱི་ཁན། །ཐར་ནུ་
ཁྲོན་བུ་རེ་བཅག་ལྕུམ་རྩ་དང༌། །སྔོན་བུ་ཆུ་མ་རྩི་དང་པི་པི་ལིང༌། །རྒྱ་ཚྭ་བུ་རམ་རིལ་བུ་ཆང་
གིས་དབུལ། །སྔོན་འགྲོ་ཕྱི་རྗེས་ལས་ལྔ་སྤྱི་དང་མཐུན། །དེ་ཡིས་རྩ་ཁ་འབྱེད་ཅིང་ཆུ་རྣམས་
སྡུད། །དེ་རྗེས་སེ་འབྲུ་ཤིང་ཚ་པི་པི་ལིང༌། །སུག་སྨེལ་གུར་གུམ་གླ་རྩི་བོང་ང་དཀར། །བྲག་
ཞུན་སྤོས་དཀར་འུ་སུ་ལྕམ་པ་དང༌། །རྒྱ་ཚྭ་རྒྱམ་ཚྭ་སྡིག་སྲིན་གསེར་བྱེ་མ། །ཨ་རུ་བྱང་པ་བུ་
རམ་རིལ་བུ་བྱ། །ཆང་གིས་འཕུལ་བས་ཆུ་རྣམས་གསང་བར་འདྲེན། །ཆུ་འདྲོངས་ཆུང་ན་ཉི་
དགའ་པི་པི་ལིང༌། །ཤིང་ཚ་བསྡུས་པའི་ཁུ་བ་ལྕག་ཏུ་བཏང༌། །ཡང་ན་ཆུ་མ་རྩི་དང་ཨ་རུ་ར། །
སེ་འབྲུ་སུག་སྨེལ་ཤིང་ཚ་པྲི་ཡང་ཀུ། །གླ་རྩི་བྲག་ཞུན་གུར་གུམ་བོང་ང་དཀར། །མོན་ལྕམ་
རྒྱམ་ཚྭ་རྒྱ་ཚྭ་སྡིག་སྲིན་དང༌། །སྦུར་མགྱོགས་འུ་སུ་བྱང་པ་ཆང་གིས་དབུལ། །ཡང་ན་སྔོན་མོ་
ཆབ་འདྲེན་སྙིམ་པ་གང༌། །རག་ཤ་མིག་མེད་བཅུ་རྣམས་རྩི་བཞིན་བཏགས། །དྲོད་སྨན་རིལ་
མོ་ཆུ་བྲེ་གང་ལ་བསྡུ། །ཕྱེད་འདུས་རྒྱུན་དུ་སྐོམ་དུ་བཏང་བར་བྱ། །ཡང་ན་བོང་རྨིག་གཡས་
གཞུར་ཞོ་གསུམ་དང༌། །བུ་རམ་ཞོ་གཉིས་རྒྱ་ཚྭ་ཞོ་གཅིག་རྣམས། །རིལ་བུ་བྱས་བཏང་དེ་
དག་ཐམས་ཅད་ཀྱིས། །གསང་བའི་ལམ་དུ་རྒྱ་མཚོ་འདྲོངས་པར་ངེས། །ཀུན་གྱིས་འདྲོངས་
དཀའ་གཉེན་པོའི་ཆུ་སྦྱོངས་ནི། །རྒྱ་ཚྭ་སྡིག་སྲིན་སུག་སྨེལ་གུར་གུམ་མཚལ། །གླ་རྩི་ཚ་ལ་
སྤོས་དཀར་པི་པི་ལིང༌། །གཟེ་མ་ལྕམ་པ་འབུ་སྐྱོགས་བྱང་པ་རྣམས། །རྩི་བཞིན་བཏགས་ལ་
བུར་གར་ཕྱེད་དང་སྦྱར། །སྲད་དཀར་ཐང་གིས་སྔ་དྲོ་རྒོངས་མོ་དབུལ། །ཡང་ན་རྒྱ་ཚྭ་དུར་
བྱིད་ཨ་རུ་ར། །ཟངས་དྲེག་བྱང་པ་བུ་རམ་རིལ་བུར་དྲིལ། །ན་མ་ལྔ་བདུན་ཆུ་སྐོལ་འཕུལ་ལ་
བཏང༌། །རྒྱ་མཚོ་ཙམ་ཡང་འདྲོངས་པར་ཐེ་ཚོམ་མེད། །འཕྲུལ་འཛག་རྣོན་པོ་(དནྡ་དུར་བྱིད་དོང་ག་
)གསུམ་དང་སྦྱོང་བྱེད་(སྔོན་བུ་འབྲོན་བུ་ཐར་ནུ་)གསུམ། །སེར་པོ་(ཡུང་བ། སྐྱེར་པ། ལྕུམ་རྩ། ) གསུམ་དང་
སྔོ་ཡི་ཚ་བ་གསུམ། །འབྲས་བུ་(ཨར་བར་སྐྱུར་)གསུམ་དང་ཆུ་ལམ་འཛུད་པ་(རྒྱ་ཚྭ་སྡིག་སྲིན་གླ་རྩི་)
25-1-163


གསུམ། །སྣ་སེལ་(ཚ་བ་)གསུམ་དང་འདྲེན་པར་བྱེད་པ་(ཚ་ལ་ལི་ཤི་མོན་ཆ་ར་)གསུམ། །མི་གདུག་
པ་ཡི་སྨན་(བྱང་པ་ཤིང་མངར་ལྕམ་པ་)གསུམ་སྨན་རྟ་གསུམ། །ཞིབ་བཏགས་ཆང་འཕུལ་རྩ་ལྟོ་
གཉིས་ནས་སྦྱོང༌། །ལུས་ཟུངས་བཟང་ན་ཞག་རེ་སྨན་གྱིས་སྦྱང༌། །ཞག་རེ་ཟས་ཀྱིས་ལུས་
ཟུངས་གསོ་བར་བྱ། །ཟུངས་ངན་ཟས་ལ་ཞག་གཉིས་སྨན་ལ་གཅིག །དེ་ལྟར་སྤེལ་བའི་ཆུ་
སྦྱོངས་ལྕག་གིས་བསྐུལ། །ཟས་སྨན་མ་སྤེལ་ཆུ་ལམ་ཟས་ཀྱིས་འགག །དེ་ཕྱིར་ཟས་སྨན་
འཐེང་འགྲོས་ཤེས་པར་གྱིས། །བཞི་པ་མཚོ་མོ་ཡུར་དུ་དྲངས་བ་ནི། །རྩ་ནས་བཙག་དང་
གསང་ནས་བཙག་པ་གཉིས། །དང་པོ་ཤ་རུ་མགོ་རུས་ཡ་བཀྵ། །རྩ་བྱ་སྤེན་ཐལ་བ་ཆུས་རྩ་
ལམ་སྦྱང༌། །ཆུ་སེར་གདོང་རྩ་རྒྱུན་དུ་གཏར་བར་བྱ། །རྐང་པའི་སྐྲངས་ཆེ་སྦང་གར་བག་ཕྱེ་
སྦྱར། །པུས་མོ་མན་ཆད་བྱུགས་ལ་དེབ་བཏང་བཅིང༌། །མཐེ་བོ་བོར་བའི་སོར་མོ་གསུམ་གྱི་
བར། །མཚོན་གང་བཅལ་པར་ཕུག་ལ་ཆུ་སེར་དབྱུང༌། །ཆུ་ཐག་ཆོད་ནས་རྨ་དེ་སྤྲ་བས་བསྲེག །
ཐམས་ཅད་བརྡུགས་ན་གསང་གནས་བཙག་པར་བྱ། །གསང་ནི་རྒྱབ་ཀྱི་རྩིབ་ཐུང་གཉིས་ཀྱི་
མཆན། །མདུན་གྱི་ལྷེན་གསང་ལྟེ་བ་ཡན་ཆད་དུ། །ཆུ་མཚམས་པགས་པ་སྲབ་པའི་འབྲི་
དམིགས་ཡིན། །རྐེད་པར་ཆུ་ཆིངས་སྣམ་བུས་མས་ཡར་བསྡམ། །སྐྱིལ་ཀྲུང་ཁད་མཉམ་སྟན་
འདུག་ལུས་པོ་བསྲང༌། །རྫེམས་དང་རྫེམས་འཛིན་རྩ་སྟེང་མ་ཡིན་པར། །སྦུབས་ཐུར་སྨྱུ་གུ་
ཁ་ཡིས་སོར་གཉིས་དབུག །བྲེ་ཕྱེད་ཕུལ་དོ་ཆུ་བོངས་སྦྱར་ལ་དབྱུང༌། །འདོན་པ་མང་ན་ཆུ་
ཚབ་ཟུག་གཟེར་སྐྱེ། །ཕུག་ཤུལ་དུང་དང་འགྲོན་བུ་རྩིབ་བསྲེགས་གླན། །ཕྱིང་བ་བག་འདག་
སྦྱར་བ་སྣམ་བུས་བཅིང༌། །ཆུ་ཁ་བླུགས་ན་ཆུས་བོར་སྲོག་དང་འབྲལ། །དེས་ན་སྔ་མའི་རྨེན་
པ་མ་བརྟས་པར། །ཕྱི་མ་མི་དབུག་ཕུག་ན་གཤེད་མ་བྱེད། །དེ་ནས་ནས་རེ་རིམ་པས་ཇེ་
དམའ་དབུག །བཙག་དང་སྐེམ་པ་སྦྱོངས་སུ་སྤེལ་ལ་བཅོས། །བཙགས་པའི་ཆུ་པྲ་ཆུ་དང་འདྲ་
ན་འཚོ། །ལྗང་གུ་སེར་པོ་འཚོ་དཀའ་དམར་སྨུག་འཆི། །ལྔ་པ་རྩ་ལ་འགག་མིག་གཞུག་པ་ནི།  །
25-1-164

 
དོམ་མཁྲིས་གླས་དང་བྲག་སྤོས་གུར་གུམ་བཞི། །སྦྲང་དང་སྦྱར་བས་རྩ་ཁ་སྡོམ་པར་བྱེད། །
སྐེམས་ཀྱི་སྐབས་བཤད་མེ་དམིགས་བསྲེག་པ་བསྐྱར། །ཁྱད་པར་སྟེང་འོག་བར་(དང་པོ་བཅོ་
བརྒྱད་བཅུ་གསུམ་)གྱི་ཆུ་སྒོ་བསྡམ། །དེ་ནས་དམུ་ཆུ་བྱེ་བྲག་བཅོས་པ་ནི། །བྱེར་ཆུ་རྣམ་གསུམ་སེ་
འབྲུས་ཕོ་བ་བསྲུང༌། །དེ་རྗེས་ཁྲག་བྱེར་ཉི་ཤུ་རྩ་ལྔ་ཡིས། །དྭངས་སྙིགས་ཕྱེ་ལ་འཇམ་པའི་
བཤལ་གྱིས་སྦྱང༌། །རྩ་ཁ་མང་དུ་ཕྱེ་ལ་ཉུང་དུ་གདོན། །ཟས་སྐོམ་བསིལ་དྲོད་སྤེལ་ལ་སྙོམས་
པར་བཅོས། །མཁྲིས་བྱེར་(དནྡ་དུར་བྱིད་སྤོས་དཀར་)བ་ཆུའི་སྦྱོངས་བཏང་ཕོ་གསང་བསྲེག །རུས་
ཐལ་སིག་ནེའི་སྦྱོར་བས་(བཟང་དྲུག་ཚ་བ་གསུམ་འགྲོན་ཐོད་ཐལ་བ་བྲག་ཞུན་སོ་མ་ར་)རང་སར་སྐེམ། །ཟས་
སྐོམ་གོང་བཞིན་དྭངས་མ་ཆུ་བྱེར་ལ། །མེ་ཡིས་སྟོད་སྨད་བར་གྱི་ཆུ་གསང་བསྡམ། །ཟས་
སྐོམ་དྲོད་བསྟེན་རུས་ཐལ་སྦྱོར་བས་བསྐམ། །དེ་རྣམས་དང་པོ་ཕྱི་ཆུའི་དུས་སུ་བསྟེན། །མ་
ཐུབ་རྙིངས་ན་སྤྱི་བཅོས་རྣམ་ལྔ་གཅེས། །མཆིན་པའི་ཟགས་ཆུ་བྲག་ཞུན་(གུར་གུམ་སོ་མ་ར་ཛཱ་དོམ་
མཁྲིས་ཟངས་ཐལ་འགྲོན་ཐལ་བཟང་དྲུག་གི་)སྦྱོར་བས་བསྡམ། །རུ་ཐུང་རྩ་གཏར་དངུལ་ཆུའི་སྦྱོར་བས་
བསྐམ། །མཆེར་ཟགས་རུ་ཐུང་གཡོན་གཏར་བྱི་ཏང་ག །ཤུ་དག་རྒྱ་ཚྭ་འོ་མར་བསྐོལ་བ་
བསླུད། །ཤི་ཀྲུ་བསྐོལ་བར་རྒྱམ་ཚྭ་པི་པི་ལིང༌། །ཙི་ཏྲ་ཀ་བཏབ་མཆེར་ཟགས་དམུ་ཆུ་སྐེམ། །
གློ་ཟགས་སེ་འབྲུ་ལྔ་པས་ཕོ་བ་བཟུང༌། །ཟངས་ཐལ་སྐེམས་བསྟེན་རྗེས་ལ་དྲུག་བདུན་
བསྲེག །ཕོ་ལོང་ཟགས་དང་འཁྱིམས་ཆུ་ཟས་དྲོད་དང༌། །ཐལ་སྦྱོར་བི་ཥའི་སྐེམས་སྦྱོར་བསྟེན་
པར་བྱ། །ཤིང་ཀུན་ཙ་བྱ་སྒོག་སྐྱ་རྩ་བ་ལྔ། །སྨན་མར་འཇམ་རྩི་བཏང་བས་སྐེམས་གྲོགས་
འགྱུར། །སྐྲན་ཟགས་འབྲས་གསུམ་ཚ་བ་གསུམ་པོ་དང༌། །བྱི་ཏང་ག་དང་ལྕགས་ཕྱེ་ཙི་ཏྲ་ཀ། 
ཐལ་སྨན་སྦྲང་དང་སྦྱར་ཏེ་བཏང་བར་བྱ། །ཐལ་སྦྱོར་རུས་སྦྱོར་བཤིག་སྐེམས་དུས་གཅིག་
བྱེད། །རྒྱུ་རྡོལ་མི་འཚོ་གདོན་ཆུ་རིམ་གྲོས་བཅོས། །དུག་ལས་གྱུར་ན་སྐེམས་སྦྱོར་གཉེན་
པོར་བསྟུན། །རླུང་མཁྲིས་བད་ཀན་གང་ཤས་ཆེ་བའི་ཆུ། །སྨན་དཔྱད་ཟས་སྤྱོད་དེ་ཡི་གཉེན་
25-1-165


པོར་སྦྱོར། །མི་ལྡོག་རྗེས་གཅོད་སྔོ་ངད་འཇུ་དཀའི་ཟས། །འཇིག་ཟས་རྟ་ཞོན་ཉལ་པོ་འགྲོ་
འདུག་དང༌། །རླན་གྲང་ཟས་སྤྱོད་མི་འཕྲོད་ལོ་དུས་བསྲུང༌། །སྐེམས་ཀྱི་སྨན་རྣམས་ནང་རེ་
རྒྱུན་མི་བཅད། །བོང་ཤ་རྩ་བ་ལྔ་ཡི་སྨན་མར་དང༌། །ད་བྱིད་སྐྱིན་གོར་ལུས་ཟུངས་གསོ་བར་
བྱ། །དེ་ཡིས་འཆི་བདག་དམུ་ཆུ་ཟློག་པར་ངེས། །ཞེས་གསུངས་སོ། །བདུད་རྩི་སྙིང་པོ་ཡན་
ལག་བརྒྱད་པ་གསང་བ་མན་ངག་གི་རྒྱུད་ལས་གཅོང་ཆེན་དམུ་ཆུ་བཅོས་པའི་ལེའུ་སྟེ་བཅུ་
པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག གློ་གཅོང་ཆེན་པོ་ཟད་བྱེད་རྒྱུ་དང་ནི། །དབྱེ་བ་རྟགས་དང་དེ་ཡི་བཅོས་
ཐབས་བཞི། །རྒྱུ་ནི་བཤང་གཅི་ཕྱེན་དབུགས་བཀག་པ་དང༌། །དྭངས་མ་ལ་སོགས་ལུས་
ཟུངས་སྣུམ་ཟད་དང༌། །དྲག་ཤུལ་ཟས་སྐོམ་མི་མཐུན་བསྟེན་པ་ཡིས། །རླུང་མཁྲིས་བད་ཀན་
ཉེས་པ་འཁྲུགས་གྱུར་ཏེ། །ལུས་ཀུན་ཁྱབ་ཅིང་བུ་ག་འཁྲུག་པ་དང༌། །མེ་དྲོད་ཉམས་པས་
དྭངས་མ་མ་སྨིན་ཏེ། །དྲི་མར་གྱུར་པས་ལུས་ཟུངས་ཟད་པར་བྱེད། །དེ་ཕྱིར་གཅོང་ཆེན་ཟད་
བྱེད་ཅེས་བྱར་བཤད། །དབྱེ་བ་རླུང་མཁྲིས་བད་ཀན་རྣམ་གསུམ་སྟེ། །གཅོང་ཆེན་ནད་ཀྱི་བླ་
གཉན་དྲུག་ཏུ་བཤད། །དེ་ཡི་རྟགས་ལ་སྤྱི་དང་བྱེ་བྲག་གཉིས། །སྤྱི་རྟགས་དང་པོ་བར་དང་ཐ་
མ་གསུམ། །དང་པོ་སྔར་ཚུལ་ཆམ་འདེབས་སྦྲིད་པ་མང༌། །ཁ་མངལ་ཉམས་སྟོབས་ཞན་ལ་
མེ་དྲོད་ཆུང༌། །ཟོས་ཀྱང་སྟོབས་མེད་སྙིང་འཕར་དང་ག་ཞན། །སྐྱུག་འདོད་རྐང་བོལ་གདོང་
སྐྲངས་མིག་མདངས་དཀར། །བུད་མེད་ཆང་དང་ཤ་ལ་ཤིན་ཏུ་སྲེད། །མགོ་རྐང་ཉི་མ་མི་
བཟོད་འགེབས་པར་བྱེད། །ཟས་སྐོམ་རྔུལ་འདུ་སྐྲ་དང་སེན་མོ་རིང༌། །རྨི་ལམ་མི་བཟང་སྣ་
ཚོགས་མཐོང་བར་འགྱུར། །དེ་རྗེས་བར་དུ་གཅོང་ཆེན་སྟོད་ན་གནས། །ཆམ་འདེབས་ལུད་
པ་མང་ལ་དབུགས་མི་བདེ། །ཕྲག་པ་མགོ་ན་སྐད་འགག་ཡི་ག་འཆུ། །སྨད་དུ་གནས་ན་ཕོ་བ་
25-1-166


རྒྱུ་ལོང་འབབ། །སྐྱུག་ཅིང་འཁྲུ་འམ་རྟུག་སྐམ་ནད་དུ་འགྱུར། །བར་ན་གནས་ན་རྩིབ་ལོགས་
གཟེར་ཟུག་བྱེད། །ཚིགས་གཞིར་གནས་ན་རིམས་ཀྱིས་འདེབས་པ་སྟེ། །དེ་ལྟར་གཅོང་ཆེན་
ནད་ཚུལ་བཅུ་གཅིག་ལྡན། །བྱེ་བྲག་རླུང་གྱུར་གླད་པ་རྩིབ་ལོགས་ན། །ཡན་ལག་ན་འགྱུར་
སྐད་འགགས་མགུལ་པ་སུབ། །མཁྲིས་གྱུར་རྐང་ལག་ཕྲག་པ་ཚ་བ་དང༌། །འཁྲུ་སྐྱུག་ཁ་སྣ་
རིམས་ཀྱིས་ཐེབས་འདྲ་ན། །བད་ཀན་ལུས་ལྕི་སྐྱུགས་ཅིང་ཡི་ག་འཆུ། །མཆིལ་སྣབས་མང་
ལ་ཆམ་འདེབས་མེ་དྲོད་ཉམས། །གཅོང་ཆེན་གནོད་པ་མ་ཞུ་འཁྲུ་དང་སྐྱུག །ཆམ་པ་ལུད་པ་
སྐད་འགགས་ཡི་ག་འཆུ། །དེ་དག་གཅོང་ཆེན་ནད་ཀྱི་བླ་གཉན་ཡིན། །བཅོས་པའི་ཐབས་
ལ་སྤྱི་དང་བྱེ་བྲག་གཉིས། །སྤྱི་བཅོས་དང་པོ་སྣུམ་འཆོས་དུགས་བྱས་ལ། །སོན་ཆ་འོ་མ་
སྦྱར་བས་སློན་དུ་གཞུག །དུར་བྱིད་དོང་ག་ཀ་ར་མར་སྦྱར་སྦྱང༌། །དེ་རྗེས་དྲོད་སྐྱེད་སྨན་དང་
ཟས་སྐོམ་བཏང༌། །ཡིད་དུ་འོང་ཞིང་རླུང་འཇོམས་ཡང་བ་བསྟེན། །འབྲུ་རྙིང་ར་ཡི་འོ་མ་ཤ་
ཁུ་མར། །སྤྱང་ཀི་བྱ་རྒོད་སྦྲུལ་དང་བོང་བུའི་ཤ །ཤ་ཟའི་ཤ་ཉིད་གསང་བྱིན་ཟུངས་འཕེལ་
མཆོག །ཤེས་ན་སྐྱུག་ཅིང་སྤོང་བས་སྟོབས་མི་སྐྱེ། །འཇམ་རྩི་བཏང་ཞིང་ཤ་ཆང་བུར་མར་
བསྟེན། །བྱེ་བྲག་རླུང་གྱུར་གཅན་གཟན་ཆུར་གནས་ཤ །མར་བརྔོས་ཁུ་བ་སྤོད་བྲན་བཏང་
བར་བྱ། །ར་ཤ་མར་དུ་བཙོས་པའི་ཁུ་བ་དེ། །པི་པི་ལིང་ངམ་སྒ་འམ་སེ་འབྲུ་འམ། །ནས་
ཐུག་དང་སྦྱར་གནོད་པ་དྲུག་སེལ་བྱེད། །མཁྲིས་གྱུར་ཆང་བསླུད་འུ་སུ་སྒ་ཐང་བཏང༌། །ཤིང་
མངར་དུག་ཉུང་བྱ་ཀྲི་རྒུན་འབྲུམ་དང༌། །མ་ནུ་ཟུར་པ་ཨུཏྤལ་བྱི་ཚེར་བ། །གཟེ་མ་པ་ལ་གོ་
སྙོད་པི་པི་ལིང༌། །ཀྱི་ལྕེའི་སྨན་མར་གཅོང་ནད་སེལ་བར་བྱེད། །བད་ཀན་ཚ་བ་ལྔ་དང་ཡ་
བཀྵ། །ལྡེ་གུའི་སྨན་མར་གཅོང་ནད་དམུ་སྐྲན་འཇོམས། །ཁྱད་པར་ཆང་རྙིང་དྭངས་མ་མཆོག་
ཏུ་བསྔགས། །མདོར་ན་གཅོང་ཆེན་མེ་དྲོད་ཉམས་པ་ཡི། །འཁྲུ་བ་ལུས་ཟུངས་འཇོམས་ཕྱིར་
བསྲུང་བ་གཅེས། །འདི་དུས་བཤང་བ་དག་ལ་བརྟེན་པས་ན། །ཚ་འཁྲུའི་སྐབས་བཤད་སྨན་
25-1-167


བསྟེན་གསོ་བ་སྦྱར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་
མན་ངག་གི་རྒྱུད་ལས་གཅོང་ཆེན་ཟད་བྱེད་བཅོས་པའི་ལེའུ་སྟེ་བཅུ་གཅིག་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །ཚ་བ་གསོ་བའི་སྐབས་ལ་ཇི་ལྟར་བསླབ་པར་བགྱི། །ཚ་བའི་ནད་
རྣམས་རྒྱུ་རྐྱེན་གང་ལས་བྱུང༌། །ཚ་བའི་ངོ་བོ་ཇི་ལྟར་གནས་པ་ལགས། །ཚ་བ་ཞེས་བྱའི་མིང་
དུ་ཅི་ཕྱིར་བཏགས། །ཚ་བའི་ནད་ལ་དབྱེ་ན་དུ་ཞིག་མཆིས། །ཚ་བའི་རྟགས་དང་བཅོས་
ཐབས་ཇི་ལྟར་ལགས། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པས། 
དྲང་སྲོང་ཆེན་པོ་རིག་པའི་ཡེ་ཤེས་དེས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་
ལས་སྐྱེས། །ཚ་བ་གསོ་བའི་སྐབས་ལ་བསླབ་བྱ་ན། །ནད་གཞིའི་དབྱེ་བ་རྣམ་པ་དཔག་མེད་
ཀུན། །མདོ་རུ་བསྡུས་པས་ཚ་གྲང་གཉིས་སུ་འདུས། །ཚ་བའི་ནད་དར་སྣ་མང་འཁྲུལ་སོ་ཆེ། །
ངོས་བཟུང་བཅོས་དཀའ་རྒྱས་བླ་མྱུར་སྲོག་འཕྲོག །འདི་ཤེས་གྲང་ནད་ཞར་ལ་ཤེས་འགྱུར་
བས། །དེ་ཕྱིར་ཁྱོད་ཀྱིས་ཞུས་པ་ཤིན་ཏུ་ལེགས། །ཀྱེ་དྲང་སྲོང་ཆེན་པོ་མ་ཡེངས་གུས་པས་
ཉོན། །དང་པོ་ཚ་བའི་ནད་དེའི་རྒྱུ་བསྟན་པ། །རིང་བའི་རྒྱུ་དང་ཉེ་རྒྱུ་རྣམ་པ་གཉིས། །རིང་རྒྱུ་
མ་རིག་ལས་བྱུང་ཞེ་སྡང་སྟེ། །མ་རིག་དབང་གིས་ཉོན་མོངས་དུག་ལྔར་སྨིན། །དེ་ལས་ཞེ་
སྡང་མཁྲིས་པ་སྐྱེད་རྒྱུ་ཡིན། །ཅི་ཕྱིར་མ་རིག་མེད་ན་ཉོན་མོངས་མེད། །ཉོན་མོངས་མེད་པར་
ཞེ་སྡང་མི་འབྱུང་སྟེ། །ཞེ་སྡང་མེད་པར་ཚ་བ་འབྱུང་མི་སྲིད། །ཉེ་རྒྱུ་རྣམ་པར་མ་གྱུར་མཁྲིས་
པ་ཉིད། །ཅི་ཕྱིར་མཁྲིས་པ་ཚ་ལ་རྣོ་བ་དེ། །ཐང་ལ་ལྷག་པས་གནོད་བྱ་སྲེག་པའི་ཕྱིར། །ཚ་བ་
ཀུན་གྱི་རྒྱུ་ནི་མཁྲིས་པ་ཡིན། །མཁྲིས་པ་མེད་པར་ཚ་བ་འབྱུང་མི་སྲིད། །དེ་ལྟར་རྣམ་པར་མ་
གྱུར་མཁྲིས་པ་དེ། །འཕེལ་བྱེད་རྣམ་པར་འགྱུར་བའི་རྐྱེན་བཞི་སྟེ། །དུས་དང་གདོན་དང་
ཟས་དང་སྤྱོད་ལམ་མོ། །སྤྱི་རུ་དུས་བཞི་དམན་ལྷག་ལོག་པ་དང༌། །ཁྱད་པར་སྟོན་ཚད་དཔྱིད་
25-1-168


ཚད་ཚ་བའི་རྐྱེན། །གདོན་ནི་དྲག་པོ་ཁྲོས་པ་དཔྲལ་བའི་མིག །མ་མོ་མཁའ་འགྲོ་རྦད་
འཁྲུགས་རྒྱུ་ལས་བྱུང༌། །ཟས་ནི་ཚ་སྐྱུར་ལན་ཚྭ་བྲོ་བའི་རོ། །ཤ་ཆང་བུ་རམ་དྲོད་བཅུད་བསྟེན་
དྲགས་སློང༌། །སྤྱོད་ལམ་འདུག་རྗེས་དྲག་པོའི་ལས་བྱས་ཤིང༌། །ཚད་ཁུང་གཉིད་ལོག་བང་
འགྲོས་ཉེན་པ་དང༌། །མི་ཐེག་ཁུར་དང་ས་སྲན་བརྐོས་པ་དང༌། །གཞུ་སྲན་བཀང་དང་འཛིང་
ག་བཀྱེ་བ་དང༌། །རྟ་ཡིས་བརྡབས་དང་གཡང་དུ་ལྷུང་བ་དང༌། །ཐིབས་འོག་ཚུད་དང་རྡོ་
དབྱུག་བརྡུངས་པས་ལྷོང་། །དེ་རྣམས་ཚ་བ་སྤྱི་ཡི་རྐྱེན་གྱུར་ཀྱང༌། །དུས་གདོན་གཉིས་ཀྱིས་
མ་བསྐྱེད་རིམས་མི་འབྱུང༌། །ཟས་སྤྱོད་གཉིས་ཀྱིས་མ་བསྐྱེད་འཁྲུགས་མི་འབྱུང༌། །སྤྱོད་ལམ་
དག་གིས་མ་བསྐྱེད་འགྲམས་མི་འབྱུང༌། །ཁ་ཟས་ཁྱད་པར་དུག་ཚད་རྐྱེན་དུ་འགྱུར། །དེ་དཔེ་
མེ་ལ་ཤིང་བསྣན་རླུང་བསྐྱོད་འདྲ། །རྐྱེན་བཞིས་མཁྲིས་ཚད་བསྐྱོད་པས་ཚ་བར་འགྱུར། །དེ་
ལ་ཚ་བ་ཞེས་བྱའི་ངོ་བོ་ནི། མཁྲིས་པའི་མེ་དྲོད་ཐང་ལ་ལྷག་པ་ཡིན། །ཅི་ཕྱིར་མཁྲིས་པ་སྣུམ་
བཅས་རྣོ་ཞིང་ཚ། །ཡང་ཞིང་དྲི་མནམ་འཁྲུ་ཞིང་གཤེར་བ་དེ། །ཐང་ལ་ལྷག་པའི་ཚ་བའི་
རྟགས་སུ་འབྱུང༌། །གདོང་སྣུམ་མྱུར་སྨིན་དྲོད་ཆེ་ཟློག་དཀའ་ཡང༌། །དྲི་ཆེ་འཁྲུ་ཞིང་གཏར་
ཁྲག་ལུད་པ་སླ། །འདི་རྟགས་འབྱུང་ཕྱིར་ཚ་བར་ཤེས་པར་བྱ། །ཚ་བའི་རྒྱུ་མཚན་གནོད་བྱ་
སྲེག་པ་སྟེ། །གནོད་བྱ་ལུས་ཟུངས་བདུན་དང་དྲི་མ་གསུམ། །འདི་དག་ཐལ་བར་སྲེག་པ་མ་
ཡིན་ཀྱང༌། །ཚ་བའི་དྲོད་ཀྱིས་བསྲུལ་བས་སྲོག་འདོར་བྱེད། །དེ་ཕྱིར་སྲེག་ཅེས་བྱ་བར་བཤད་
པ་ཡིན། །ཚ་བའི་དབྱེ་བ་རྟེན་དུས་ཉེས་པ་དང༌། །གནས་ས་རྒྱུད་དང་གནས་སྐབས་རིགས་
ཀྱིས་དབྱེ། །རྟེན་གྱིས་དབྱེ་བ་བྱིས་པ་དར་མ་རྒན། །དུས་ཀྱིས་དབྱེ་ན་གསར་དང་རྙིང་པ་
གཉིས། །ཉེས་པས་དབྱེ་ན་རླུང་མཁྲིས་བད་ཀན་དང༌། །ཁྲག་དང་ཆུ་སེར་ཚ་བ་རྣམ་པ་ལྔ། །
གནས་ཀྱིས་དབྱེ་ན་ཕྱི་ནང་བར་དང་གསུམ། །ཤ་པགས་རྩ་རུས་དོན་སྣོད་ལ་གནས་པའོ། །
རྒྱུད་ཀྱིས་དབྱེ་ན་རང་རྒྱུད་གཞན་རྒྱུད་ཅན། །རང་རྒྱུད་ཅན་དེ་རྐྱང་པ་རང་རྟགས་གསལ།  །
25-1-169

 
གཞན་རྒྱུད་ཅན་ལ་ལྡན་ཚད་འདུས་ཚད་གཉིས། །གནས་སྐབས་དབྱེ་བ་རྣམ་པ་དྲུག་ཡིན་ཏེ། །
མ་སྨིན་རྒྱས་སྟོངས་གབ་རྙིངས་རྙོངས་པའོ། །རིགས་ཀྱིས་དབྱེ་ན་འགྲམས་འཁྲུགས་རིམས་
དུག་བཞི། །ཚ་བའི་རྟགས་ལ་འགྱུར་མེད་ངོས་བཟུང་དང༌། །སྤང་བླང་མུ་བཞི་ཁ་དམར་
གདགས་པའོ། །དང་པོ་ངོས་བཟུང་སྤྱི་དང་བྱེ་བྲག་གཉིས། །སྤྱི་ཡི་རྟགས་ལ་ཕྱི་ནང་གསང་བ་
གསུམ། །ཕྱི་རྟགས་སློང་བ་རྒྱུ་རྐྱེན་སྒོ་ནས་བརྟག །ནང་རྟགས་མཚན་ཉིད་རྟགས་ཀྱི་སྒོ་ནས་
བརྟག །གསང་རྟགས་ཕན་གནོད་སྒོ་ནས་བརྟག་པའོ། །སློང་བ་རྒྱུ་རྐྱེན་སྒོ་ནས་བརྟག་པ་ནི། །
གོང་རྐྱེན་ཟས་སྤྱོད་རྗེས་ལས་ཤེས་པར་བྱ། །མཚན་ཉིད་རྟགས་ཀྱི་སྒོ་ནས་བརྟག་པ་ནི། །ཚ་
བའི་རྩ་ནི་མགྱོགས་རྒྱས་གྲིམས་པ་ཡིན། །ཆུ་མདོག་དམར་སེར་དྲི་དུགས་རླངས་པ་ཆེ། །མགོ་
ན་ཤ་ཚ་ཁ་རོ་སྐྱུར་ལ་ཁ། །ལྕེ་སྟེང་བད་ཀན་ཆེ་ལ་སྣ་སྒོ་སྐམ། །མིག་སྤྲིན་དམར་སེར་གཟེར་
བ་གཅིག་ཏུ་འདྲིལ། །ལུད་པ་དམར་སེར་ཚ་བྲོ་སྐོམ་དད་ཆེ། །ཁྲག་མཁྲིས་འཁྲུ་སྐྱུག་རྔུལ་ཆེ་
དྲི་མ་མནམ། །ནུབ་གཉིད་ཆུང་ལ་ཉིན་པར་གཉིད་མི་ཐུབ། །ཉིན་དགུང་མཚན་དགུང་ཞུ་བའི་
དུས་ན་ལྡང༌། །དེ་དག་མཁྲིས་པའི་མེ་དྲོད་འཕེལ་རྟགས་ཡིན། །ཕན་གནོད་བསྟེན་པའི་སྒོ་
ནས་བརྟག་པ་ནི། །ཟས་སྤྱོད་སྨན་དཔྱད་ཆུ་བཞི་བསྟེན་པ་ཡིས། །འཕྲོད་དང་མི་འཕྲོད་
གོམས་པས་ངེས་པ་བསྐྱེད། །ཚ་བ་བྱེ་བྲག་སོ་སོའི་མི་འགྱུར་རྟགས། །སྤྱི་རྟགས་དེ་དག་ཀུན་
ལ་ཁྱབ་སྟེངས་སུ། །རྟེན་གྱི་ཚ་བ་ན་སོའི་རིམ་པས་ཤེས། །དུས་ཀྱི་ཚ་བ་ཡུན་གྱིས་ཤེས་པར་
འགྱུར། །ཉེས་པའི་ཚ་བ་སྡོངས་ཟླའི་རྟགས་ལས་དཔག །གཡལ་འདར་གཉིད་ཡེར་བརྩེ་ན་
རླུང་ཚད་དེ། །ཁ་ཁ་མིག་ཆུ་སེར་ན་མཁྲིས་ཚད་ཡིན། །ལྕི་རྨོངས་འཇུ་དཀའ་བད་ཀན་ཚ་བ་
ལ། །མིག་ཆུ་དམར་ལ་གཟེར་འདྲིལ་ཁྲག་ཚད་ཡིན། །གཡོ་སྐྲངས་ཟ་འཕྲུག་ཤུ་ཐོར་ཆུ་སེར་
ཚ། །གནས་ཀྱི་ཚ་བ་འཇུག་སྒོ་གར་གནས་གསལ། །རང་རྒྱུད་ཅན་དེ་རང་རྟགས་གསལ་བས་
ཤེས། །ལྡན་ཚད་རླུང་ལྡན་གཅིག་གྲོགས་གཅིག་གིས་བྱེད། །དཔེར་ན་གཉེན་བཤེས་མཐུན་
25-1-170


པ་ལས་བྱེད་འདྲ། །བད་ཀན་ཚ་བར་ལྡན་པས་འཐབ་པར་འགྱུར། །མི་མཐུན་མི་གཉིས་ས་
གཅིག་འཚོགས་དང་མཚུངས། །འདུས་པའི་ཚ་བ་དུས་ངན་ཤར་པོ་འདྲ། །ཁོ་བས་ང་དྲག་
གཅིག་འོག་གཅིག་མི་ཚུད། །དེ་དག་བསིལ་དྲོད་གཉེན་པོ་གང་འོས་བསྟེན། །ཕན་སྙམ་བྱེད་
ཀྱང་བཏུད་ན་གནོད་པས་ཤེས། །མ་སྨིན་ཕྲུམ་སེར་ཚིགས་གཞི་སྲོད་དུས་ན། །རྒྱས་པའི་ཚ་
བ་ཚད་རྟགས་རྫོགས་པར་འབྱུང༌། །སྟོང་ཚད་བསིལ་གྱི་གཉེན་པོ་བསྟེན་གྱིན་འཕེལ། །གབ་
ཚད་དྲོད་བཅུད་བསྲིངས་ཀྱིན་གནོད་པར་ཚོར། །རྙིངས་པའི་ཚ་བ་ཡུན་ལོན་གྱུར་པས་ཤེས། །
རྙོངས་ཚད་རྔུལ་བརྩེ་སྣ་ཁྲག་གཡོ་ལས་གསལ། །རིམས་ཚད་མགོ་ན་ཟ་ཟི་གྲང་ཤུམ་བྱེད། །
འཁྲུགས་ཚད་གཟེར་དང་ལུད་པ་དབུགས་ལ་གསལ། །འགྲམས་ཀྱི་ཚ་བ་སྤྱོད་ལམ་དྲག་
རྗེས་ན། །དུག་ཚད་མ་ངེས་ཁོལ་བུར་ནད་སྣ་མང༌། །འདི་དག་མི་འཁྲུལ་སོ་སོའི་ངོས་འཛིན་
ཡིན། །སྤང་བླང་མུ་བཞིར་ཁ་དམར་གདགས་པ་ནི། །རྩ་རྒྱུད་སྦོམ་ཞིང་མཁྲང་ལ་འགྱུར་ལྡོག་
ཆུང༌། །ཆུ་མདོག་གདོང་གསལ་ལྕེ་རློན་གཏར་ཁྲག་ཕྱེད། །ལུད་པ་འགོགས་བླ་གཟེར་ཆུང་
རྔམ་པ་བདེ། །ཟས་ལེན་ཤེད་ཆེ་སྨན་དཔྱད་ངོ་ལེན་ན། །ནད་གང་ཡིན་ཡང་གསོ་བ་བླ་བར་
བཤད། །འཆི་ལྟས་མེད་ཀྱང་ནད་ཀྱི་སྟོབས་ཆེ་ལ། །བླ་གཉན་འགྱུར་ལྡོག་མང་ན་གསོ་བ་
དཀའ། །འཆི་རྟགས་རྩ་ཆུ་ལུད་པ་ཁྲག་དང་དབུགས། །ནད་སྟོབས་གཟེར་ས་ལུས་སྟོབས་
དབང་པོར་བརྟག །རྩ་རྒྱུད་འདར་སྤུན་སྡོད་དང་འཚུབ་པ་འཆི། །ཆུ་ནི་ཁོང་ལོག་སྲི་འཆོར་
སངས་ན་འཆི། །ལུད་པ་དུད་ཁུ་ཤ་སྐྱོ་འདྲ་བ་ལ། །མང་དུ་འབྱུང་ཞིང་གྲེ་བར་གསོག་ན་འཆི། །
ཁྲག་མེད་མཚལ་འདྲ་ཆད་པོ་ནག་རྩིགས་འཆི། །དབུགས་ནི་མ་བསྐྱོད་གཉིད་དུ་སོང་གྱུར་
ཀྱང༌། །རྔམ་པ་མི་བདེ་ཐུང་ལ་རྩེག་ན་འཆི། །ནད་སྟོབས་ཁོང་འཐེམས་གཉེན་པོ་མི་ལེན་
ཅིང༌། །ལྡོག་འགྱུར་མང་ལ་འདྲེ་ཁ་རྒོད་ན་འཆི། །གཟེར་ས་ཐོག་མ་ཁོ་ནར་སྙིང་ག་གཟེར། །
གཞན་དུ་མི་འཕོ་ཕུར་པ་བཙུགས་འདྲ་འཆི། །ལུས་ཤེད་ཆད་ངལ་སྟན་ལ་འབྱར་ན་འཆི།  །
25-1-171

 
དབང་པོ་མིག་ལྡོག་ཁོང་དུ་བྲོས་པ་དང༌། །རྣ་བ་སྙེ་ལ་སྣ་སྐམ་བ་སྐྱ་ཆགས། །མཆུ་བརྫེས་སོ་
ནག་ལྕེ་སྐམས་ཕུགས་སུ་བྲོས། །གདོང་ལ་ས་ཆགས་སྨྲ་མང་གསལ་ཆ་ཆུང༌། །ཟས་དང་སྐོམ་
གྱིས་བོར་ན་ངེས་པར་འཆི། །དེ་ཡང་འདྲ་སྣང་ཕྱོགས་མཐུན་བཅོས་སྐྱེད་བལྟ། །འཆི་ལྟས་
སྣང་ཡང་གཉེན་པོ་ལེན་གྱུར་ན། །མ་ངེས་འདྲ་སྣང་ཡིན་སྲིད་གསོ་བར་བརྩམ། །འཆི་བའི་
རྟགས་གཅིག་ནད་ཀུན་ལ་མི་འབྱུང༌། །ནད་གཅིག་ལ་ནི་འཆི་རྟགས་ཀུན་མི་འབྱུང༌། །དེ་ཕྱིར་
ལྟས་མང་གཉེན་པོ་མི་ལེན་ན། །ལས་དབང་འཆི་བདག་ཞགས་པས་ཟིན་ཏེ་སྤང༌། །ཚ་བ་དེ་
དག་བཅོས་པའི་ཐབས་བསྟན་པ། །སྤྱི་དང་བྱེ་བྲག་རྣམ་པ་གཉིས་སུ་འདོད། །སྤྱི་ལ་བཅོས་
ཐབས་རྣམ་པ་གསུམ་ཡིན་ཏེ། །ནད་དང་གཉེན་པོ་སྤྲོད་པའི་བཅོས་ཚུལ་དང༌། །དུས་ལས་མི་
འདའ་གནད་ཀྱི་གདམས་པ་དང༌། །ཚ་བའི་དངོས་པོ་གཞོམ་པའི་གཉེན་པོའོ། །བཅོས་ཚུལ་
ནོར་ན་གཉེན་པོ་མི་ལེན་པས། །གང་ལ་གང་འཚམ་སྒོ་ནས་བཅོས་པར་བྱ། །ཚ་གྲང་འདྲེས་
ན་གཉེན་པོ་མི་ལེན་པས། །འདྲེས་པ་ཕྱེ་ལ་ནད་དང་གཉེན་པོ་སྤྲད། །བྱེར་ཞིང་འགྲམས་ན་
གཉེན་པོ་མི་ལེན་པས། །བྱེར་བ་བསྡུས་ལ་ནད་ཀྱི་ངོ་བོ་གཞོམ། །དང་པོ་ནད་དང་གང་འཚམ་
བཅོས་པ་ཡི། །ལུས་ཟུངས་ན་ཚོད་སྦྱར་ལ་བཅོས་པ་ནི། །ཟུངས་འབྲིང་བྱིས་པའི་ཚ་བ་གཉེན་
ལྟར་བསྟེན། །ཟུངས་བཟང་དར་མའི་ཚ་བ་དགྲ་ལྟར་བསད། །ཟུངས་ངན་རྒས་པའི་ཚ་བ་བུ་
ལྟར་གསོ། །ནད་སྟོབས་དུས་དང་སྦྱར་ལ་བཅོས་པ་ནི། །སྟོབས་ལྡན་གསར་པའི་ཚ་བ་ཐོག་
བབས་བསད། །སྟོབས་ཆུང་རྙིངས་པའི་ཚ་བ་ངང་གིས་གདོན། །ཉེས་པའི་སྒོ་ནས་བཅོས་
པར་བྱ་བ་ནི། །རླུང་གི་ཚ་བ་འབྲོས་འདེད་ཚུལ་དུ་བཅོས། །མཁྲིས་པའི་ཚ་བ་ཟགས་བཅད་
ཚུལ་དུ་བཅོས། །བད་ཀན་ཚ་བ་མགོ་སྤུར་ཚུལ་དུ་བཅོས། །ཁྲག་གི་ཚ་བ་ཤེད་དམད་ཚུལ་དུ་
བཅོས། །ཆུ་སེར་ཚ་བ་སྦྱང་སྐེམ་ཚུལ་དུ་བཅོས། །གནས་ཀྱི་སྒོ་ནས་བཅོས་པར་བྱ་བ་ནི། །ཤ་
པགས་ཚ་བ་རྔུལ་དང་ཆུ་ཡིས་བཅོས། །རྩ་ཡི་ཚ་བ་རྩ་ཁྲུས་གཏར་གྱིས་བཅོས། །རུས་པའི་ཚ་
25-1-172


བ་དུགས་དང་ལུམས་ཀྱིས་བཅོས། །དོན་ཀྱི་ཚ་བ་ཕྱེ་མ་གཏར་གྱིས་བཅོས། །སྣོད་ཀྱི་ཚ་བ་
སྦྱོངས་ཀྱིས་བཅོས་པར་བྱ། །གཙོ་བོའི་སྒོ་ནས་བཅོས་པར་བྱ་བ་ནི། །རང་རྒྱུད་ཅན་དེ་རྐྱང་
འདེད་ཚུལ་དུ་བཅོས། །གཞན་རྒྱུད་ཅན་དེ་གང་མཐོ་གཉའ་ནས་མནན། །གནས་སྐབས་སྒོ་
ནས་བཅོས་པར་བྱ་བ་ནི། །མ་སྨིན་ཚ་བ་སྨིན་བྱས་ལམ་དུ་གཞུག །རྒྱས་པའི་ཚ་བ་འབར་
བའི་མེ་དཔུང་བསད། །སྟོངས་པའི་ཚ་བ་རླུང་འབུད་བཅུད་ཀྱིས་གསོ། །གབ་ཚད་མགོ་སྤུར་
བཤུས་ལ་སྨན་ནད་སྤྲད། །རྙིངས་པའི་ཚ་བ་ཞེན་པའི་རྩི་དང་དབྲལ། །རྙོངས་པའི་ཚ་བ་ཆུ་
སེར་རང་སར་སྐམ། །རིགས་ཀྱི་སྒོ་ནས་བཅོས་པར་བྱ་བ་ནི། །འགྲམས་ཀྱི་ཚ་བ་ལུས་ཟུངས་
རང་སོར་གཞུག །འཁྲུགས་ཀྱི་ཚ་བ་དབྱེ་བསད་དབྱུང་བས་མཉམ། །རིམས་ཀྱི་ཚ་བ་བྱ་ལྟར་
སྤུར་ལ་གདོན། །དུག་ཚད་འདུ་བ་ཆ་མཉམ་གཉེན་པོས་བསད། །ཚ་གྲང་འདྲེས་པ་དབྱེ་བའི་
བཅོས་ཚུལ་ནི། །མ་སྨིན་འདྲེས་པ་ཕྱེ་ལ་ལམ་དུ་གཞུག །འདི་དུས་གཉེན་པོ་བསྟེན་ན་གྲོགས་
ཐོག་འབབ། །གྲོགས་འཕེལ་བས་ནི་ཚ་བ་ཉིད་འཕེལ་བྱེད། །མ་སྨིན་ཆང་བསླང་ཆང་དུ་མི་
རུང་ལྟར། །ལམ་དུ་མི་ཚུད་འཆི་འམ་གསོ་དཀར་འགྱུར། །དེ་ཕྱིར་བད་རླུང་གཉིས་ཀྱི་གྲོགས་
གཅིལ་ལ། །མཁྲིས་ཚད་མི་འཕེལ་ལམ་དུ་གཞུག་པ་གཅེས། །སྨིན་བྱས་རྙིངས་པའི་ཚ་བ་
འདྲེས་པ་རྣམས། །ཕྱོགས་གཅིག་ཆུ་བོ་གཞུང་དུ་བསྲངས་ལ་དབྱེ། །དེ་ལ་སྐྱོན་ཡོན་རྣམ་པ་
གཉིས་ཡོད་དེ། །ཚ་བཅོས་གྲང་བར་འཕུལ་ན་སྐྱོན་ཡོན་གཉིས། །ཡུན་དུ་སྦྱོང་སྟེ་སྲོག་ལ་
རྒོལ་མི་འགྱུར། །གྲང་བཅོས་ཚ་བར་འཕུལ་ན་སྐྱོན་ཡོན་གཉིས། །གསོ་བ་བླ་སྟེ་དུས་འདའ་
སྲོག་ལ་འབབ། །དེ་ཕྱིར་སྣ་ལ་ཚ་བཅོས་གྲང་བར་འཕུལ། །གབ་ཚད་གྲང་བའི་མགོ་སྤུར་མ་
བཤུས་ན། །གཉེན་པོ་ནད་ཀྱི་ཐོག་ཏུ་མི་འབབ་པས། །མགོ་སྤུར་བཤུས་ལ་ནད་དང་གཉེན་པོ་
སྤྲད། །སྟོངས་ཚད་རླུང་ལ་རྔན་པ་མ་བྱིན་ན། །རླུང་གིས་ཚ་བ་བུས་ནས་ལ་ཆེན་འདའ། །དེ་
ཕྱིར་ཟས་ཀྱིས་བྲིད་ལ་ཚད་གཞུག་གདོན། །གྲང་རྙོངས་དང་པོ་ཕོ་བའི་མེ་དྲོད་གསོ། །གཞི་
25-1-173


འཛིན་མ་ཤེས་མེ་ཤི་ཚ་རོ་ལས། །ཚ་རྙོངས་འདྲེས་པ་སྦྱང་བ་འཇམ་པོས་དབྱེ། །འདྲེས་པའི་
ནད་ཀུན་གཉེན་པོ་བསྟེན་པ་དཀའ། །བཅོས་ངོ་གང་ལེན་ནད་དེ་གདོང་ལ་བཅོས། །བསིལ་
དྲོད་གཉིས་ཀའི་གཉེན་པོ་མི་ལེན་ན། །ཕྱིང་དྲིལ་བཅོས་སམ་ཡང་ན་ལྟག་སྤྲོད་བྱ། །གང་ཡང་
མི་ལེན་སྔོན་གྱི་ལས་ནད་ཡིན། །ཚོགས་གསོག་འཆི་བསླུས་འཚོ་བ་འགའ་འབྱུང་སྲིད། །དེ་
ལྟར་འདྲེས་པའི་དབྱེ་ཐབས་མ་ཤེས་པར། །ཚ་བ་བད་རླུང་སྲ་བསྲེས་བཅོས་བྱས་པས། །གང་
དུ་ངོས་མི་ཟིན་ཅིང་སྐྱེད་མེད་འགྱུར། །དེ་ཕྱིར་འདྲེས་པའི་དབྱེ་ཐབས་ཤེས་པ་གཅེས། །བྱེར་
བའི་ཚ་བ་རྣམ་པ་གསུམ་ཡིན་ཏེ། །རང་བཞིན་བྱེར་དང་རྐྱེན་གྱིས་བྱེར་བ་དང༌། །དུས་ལས་
འདས་པའི་བྱེར་བ་རྣམ་པ་གསུམ། །དུག་དང་སྨུག་པོ་རང་བཞིན་བྱེར་བ་སྟེ། །མ་སྨིན་རི་ཐང་
མཚམས་སུ་བཅོས་ཉེས་རྐྱེན། །ཚ་བ་བྱེར་ཏེ་རྙོགས་པ་ཞེས་བྱར་འགྱུར། །གསུམ་པ་ནད་
འདུས་དུས་སུ་མ་སྦྱངས་པས། །དུས་ལས་འདས་ཏེ་རྩ་མིག་ཀུན་ཏུ་བྱེར། །དེ་ལྟར་བྱེར་ཀུན་
སྣ་ཁྲིད་རླུང་གིས་བྱེར། །རྩ་མིག་ཀུན་ཏུ་ཞུགས་ནས་ལུས་ཀུན་ཁྱབ། །བྱེར་བ་མ་བསྡུས་
གཉེན་པོ་བསྟེན་བྱས་ཀྱང༌། །རི་དྭགས་ཐང་འདེད་འདྲ་སྟེ་གསོད་མི་འགྱུར། །འདི་ལ་ཐང་
དང་ཕྱེ་མ་ཟས་སྤྱོད་ཀྱིས། །རླུང་གཞིལ་ནད་དེ་ཁོང་དུ་བསྡུས་བྱས་ནས། །གཉེན་པོ་བསྟེན་ན་
མེ་སྟེང་ཆུ་བླུག་འདྲ། །འདུས་དཀའ་རྩ་སྦྱོངས་རྒྱུན་སྦྱོངས་ཆུ་ལུམས་བསྔགས། །དེ་ཡིས་མ་
འདུས་བྱེར་བ་རང་སར་འདོན། །དུས་ལས་མི་འདའ་གནད་ཀྱི་གདམས་པ་ནི། །ཚ་བ་དུས་
ལས་འདའ་བའི་ནད་བཞི་སྟེ། །ངོ་བོ་ཉིད་ཀྱི་དུས་ལས་འདའ་བ་དང་། །སྦྱོར་བ་དམན་ལྷག་
ལོག་པས་དུས་འདའ་བ། །དང་པོ་གནད་དུ་བབས་པའི་ཚ་བ་སྟེ། །ཐོག་མའི་དུས་ནས་སྲོག་
ལ་ངེས་པར་རྒོལ། །དེ་ལ་ནད་ཀྱི་ཚོད་བླངས་དུས་ལས་འདའ། །དེ་ཕྱིར་ཆུ་བཞིས་སྲོག་ལ་
ཐོབ་ཤ་བྱ། །དམན་པ་བཅོས་ཀྱིས་ནད་མགོ་མནན་པ་ཡིས། །བདེ་བཞིན་བྱེད་ཀྱང་གཏིང་
ཚད་མ་ཐོན་པས། །ཚ་བས་ཟུངས་ཟད་དུས་ལས་འདའ་བའི་ཕྱིར། །གཉེན་པོ་མི་བཅད་
25-1-174


སྟོབས་བསྐྱེད་བསྲིངས་ལ་བཏང༌། །ལོག་པ་གབ་ཚད་གྲང་བར་འཁྲུལ་པ་ཡིས། །མེ་བཞི་
བསྟེན་པས་ཚ་བ་དུས་ལས་འདའ། །ལྷག་པ་ནད་ཆུང་གཉེན་པོ་དྲགས་པ་ཡིས། །བད་རླུང་
དགྲར་ལངས་གྲང་བས་སྲོག་ལ་རྒོལ། །འདི་གཉིས་ལྟར་སྣང་ངོས་འཛིན་ཤེས་པ་གཅེས། །བྱ་
རས་ནམ་ཚོར་དུས་ན་བརྩོན་པས་ཟློག །དེ་དག་ཤེས་ན་དུས་ལས་འདའ་མི་སྲིད། །ཚ་བའི་
དངོས་པོ་གཞོམ་པའི་གཉེན་པོ་ནི། །ཟས་དང་སྤྱོད་ལམ་སྨན་དཔྱད་རྣམ་བཞིས་བཅོས། །དང་
པོ་ཟས་ལ་ཕན་བསྟེན་གནོད་པ་སྤང༌། །ཕན་པའི་ཟས་སྐོམ་བསྟེན་ཐབས་བཅུ་གཅིག་སྟེ། །མ་
སྨིན་ཚ་བ་ལམ་དུ་གཞུག་པའི་ཟས། །རྒྱས་པའི་ཚ་བ་ཡེན་ལ་གཏད་པའི་ཟས། །ཐོར་བུའི་
རླུང་ལ་རྔན་པ་བྱིན་པའི་ཟས། །ཐེ་ཚོམ་ངེས་པ་སྐྱེད་པ་སད་མདའི་ཟས། །སྟོངས་པའི་ཚ་བ་
བཅུད་ཀྱིས་དགང་པའི་ཟས། །ཚད་རླུང་འདྲེས་པ་ཁ་ཡན་དགུག་པའི་ཟས། །གབ་པའི་ཚ་བ་
མགོ་སྤུར་བཤུ་བའི་ཟས། །རྙིངས་པའི་ཚ་བ་ཞེན་པ་དབྲལ་བའི་ཟས། །གྲང་བ་ཁ་ཐལ་མེ་
དྲོད་གསོ་བའི་ཟས། །རླུང་འཕྱོས་ཁ་ཐལ་བཅུད་ཀྱིས་གནོན་པའི་ཟས། །ཟུངས་ཟད་ཚད་པ་
ལུས་སྟོབས་བསྐྱེད་པའི་ཟས། །དེ་ལྟར་འཕྲོད་ཟས་སྐབས་དང་སྦྱར་ལ་བསྟེན། །གནོད་ཟས་
མ་སྨིན་སྨིན་དུ་མི་སྟེར་དང༌། །རྒྱས་པའི་ཚ་བ་མེ་དབལ་སྐྱེད་པ་དང༌། །རླུང་ཚད་འབུད་ཅིང་
ཚ་བ་འབྱེར་བ་དང༌། །གབ་རྙོངས་ཚ་བའི་མེ་དྲོད་འཇོམས་པ་དང༌། །རྙིངས་པའི་ཚ་བ་སྟོད་ལ་
གནོན་པ་དང༌། །ངོ་བོ་ཉིད་ཀྱིས་མི་འཕྲོད་ཟས་དང་དྲུག །མི་འཕྲོད་ཟས་རྣམས་དུག་འདྲ་སྤང་
བར་བྱ། །སྤྱོད་ལམ་བཅོས་པ་མཐུན་དང་མི་མཐུན་གཉིས། །ལྡན་ཚད་རྣམས་ལ་བསིལ་དྲོད་
སྙོམས་པ་མཐུན། །རྐྱང་པ་རྣམས་ལ་བསིལ་བ་ཁོ་ན་བསྔགས། །གནས་དང་གོས་དང་བྱ་བའི་
སྤྱོད་ལམ་གསུམ། །བསིལ་དྲོད་སྙོམས་པའི་གནས་ནི་ཉི་གྲིབ་མཚམས། །རླན་སྟེང་ཁ་ཡེང་མ་
ཡིན་དབེན་པར་འདུག །མ་འཁྱགས་མ་རྔུལ་དྲོ་ཞིང་ཡང་བ་བགོ །དྲག་ཤུལ་དལ་ཆེས་མ་
ཡིན་མི་རྔུལ་བཅག །བསིལ་གནས་ནེའུ་བསིང་སྟེང་དང་ཆུ་ཡི་འགྲམ། །ཤིང་གྲིབ་བསེར་བུ་
25-1-175


སྟེང་གི་བསིལ་ཁང་གནས། །རས་གོས་ལ་སོགས་ཡང་ཞིང་བསིལ་བ་བགོ །ལུས་ངག་བྱ་བ་
མ་ཡིན་ཉིན་གཉིད་བསྲུང༌། །ཡིད་འོང་གྲོགས་དང་སེམས་སྤྲོ་ཀུན་ལ་ཤིས། །དེ་ལས་བཟློག་
པ་མི་མཐུན་སྤང་བར་བྱ། །སྨན་གྱིས་བཅོས་པ་ཞི་དང་སྦྱང་བ་གཉིས། །ཞི་བྱེད་སྨན་ལ་ཐང་
ཕྱེ་མར་དང་གསུམ། །ཐང་ལ་སྨིན་ཐང་དབྱེ་ཐང་སྡུད་པའི་ཐང༌། །གསོད་ཐང་སད་ཐང་དགུག་
ཐང་སྐམ་ཐང་བདུན། །སྨིན་པར་བྱེད་པའི་ཐང་ལ་རྣམ་གསུམ་སྟེ། །མ་ནུ་བཞི་པས་བད་རླུང་
སྨིན་པར་བྱེད། །ཏིག་ཏ་གསུམ་པས་མཁྲིས་ཚད་སྨིན་པར་བྱེད། །འབྲས་བུ་གསུམ་གྱིས་ཁྲག་
ཚད་སྨིན་པར་བྱེད། །དབྱེ་བའི་ཐང་ལ་རྣམ་པ་གསུམ་ཡིན་ཏེ། །སླེ་ཏྲེས་ཆིག་ཐང་རླུང་ཚད་
འབྱེད་པར་བྱེད། །སྐྱུ་རུའི་ཆིག་ཐང་ཁྲག་ནད་འབྱེད་པར་བྱེད། །སེ་འབྲུ་(མ་ནུ་སྒ་སྐྱ་)གསུམ་ཐང་
བད་ཀན་ཚ་བ་འབྱེད། སྡུད་ཐང་མ་ནུ་བཞི་དང་འབྲས་བུ་གསུམ། །ག་བྲ་(བཙོད་བ་ཤ་ཀ)གསུམ་
པའི་ཐང་ལ་བུ་རམ་བཏབ། །ཚད་པ་རླུང་གིས་བྱེར་བ་སྡུད་པར་བྱེད། །གསོད་པའི་ཐང་ལ་ཚ་
བ་གསར་རྙིང་གཉིས། །ཚ་བ་གསར་པ་གསོད་པའི་ཐང་གསུམ་སྟེ། །དེ་བ་(པ་ཏོལ་པར་པ་ཏ་ག་དུར་
ཨ་རུ་)ལྔ་ཐང་རིམས་ནད་རྒྱས་པ་འཇོམས། །ཧོང་ལེན་(བ་ཤ་ཀ་རྩི་དམར་སྤང་རྩི་སྐྱུ་རུ་)ལྔ་ཐང་
འགྲམས་འཁྲུགས་རྒྱས་པ་འཇོམས། །འོམ་(རེ་རལ་རྣམ་པར་ཁྱུང་སྡེར་ཨ་བོ་གང་ཆུང་སྲོལ་གོང་སྤང་རྒྱན་བོང་ང་
སྤང་རྩི་བྱི་ཚེར་སེ་རྒོད་སྐྱེར་པ་སྐྲ་བཟང་སོ་མ་ར་)ཐང་བཅོ་ལྔས་དུག་ཚད་རྒྱས་པ་འཇོམས། །ཐང་ཆེན་
(འབྲས་གསུམ་སླེ་ཏྲེས་བ་ལེ་བ་ཤ་ཧོང་ལེན་ཏིག་ཏ་བོང་དཀར་ག་དུར་)བཅུ་པས་རྙིངས་ཚད་རོལ་དུ་གསོད། །
སད་ཐང་སྲེ་ལོང་པ་ཡི་ཆིག་ཐང་དང༌། །རུས་བཅུད་གསུམ་དང་གོ་སྙོད་གསུམ་པའི་ཐང༌། །
རི་ཐང་མཚམས་ཀྱི་ངེས་པ་སྟེར་བར་བྱེད། །དགུག་ཐང་བཅུད་བཞིའི་ཐང་གིས་རླུང་འཕྱོས་
འགུགས། །སྐམ་ཐང་སེང་ལྡེང་(འབྲས་གསུམ་སླེ་ཏྲེས་སྐྱེར་པ་ཆུ་སེར་སྨན་གསུམ་)དགུ་པས་རྙོངས་ཚད་
སྐེམ། །དེ་རྣམས་ཚ་བ་འཇོམས་པའི་ཐང་སྦྱོར་ཡིན། །ཕྱེ་མ་སྔོ་སྦྱོར་རྩི་སྦྱོར་འདྲེས་པ་གསུམ། །
སྔོ་སྦྱོར་རྒྱལ་པོ་(གཡའ་ཀྱི་)བཙུན་མོ་(རྩི་དམར་)སྲས་(སྲོ་ལོ་)དང་ནི། །བློན་(པྲི་ཡང་ཀུ་)འབངས་(པར་པ་
25-1-176


ཏ་)དམག་དཔོན་(རིམས་ལ་པར་པ་ཏ་འཁྲུགས་ལ་སྤང་རྩི་ཁྲག་ལ་ཧོང་ལེན་མཁྲིས་པར་ཏིག་ཏ་སོགས་ཤས་གང་ཆེ་ལ་ལོག་
པོར་བཏང་)དམག་མི་(སུམ་ཅུ་ཏིག་རྣམ་པར་གང་ཆུང་དར་ཡ་ཀན་ཚེར་སྔོན་ཁྲག་རྐང་སྤང་རྒྱན་སྒོང་ཏོག་བུར་རྩ་འོམ་བུ་སྤྱི་
ཞུར་བྱི་ཚེར་བྱ་རྒོད་སྤོས་དང་བཅུ་གསུམ་)ཆིབས་པར་(གངས་ཆུ་ལ་བསྡུས་གྲངས་སམ་ཁཎྜ་)བཅས། །ཚ་བ་ཀུན་
ལ་མེ་ཐོག་ཆུ་བླུག་འདྲ། །རྩི་སྦྱོར་ཚ་བ་རབ་འབྲིང་བྱེ་བྲག་གིས། །ག་བུར་ཙན་དན་གི་ཝཾ་གཙོ་
བོ་ལ། །འབར་བའི་ཚད་སྟོབས་བསད་པའི་ཕྱེ་མ་དང༌། །ལྡན་ཚད་དུས་གཅིག་འཇོམས་པའི་
ཕྱེ་མ་དང༌། །རྙིངས་ཚད་རྩད་ནས་འདོན་པའི་ཕྱེ་མ་དང༌། །འདུ་བ་ཁ་སྙོམས་བྱེད་པའི་ཕྱེ་མའོ། །
འབར་བའི་ཚད་སྟོབས་བསད་པའི་ཕྱེ་མ་ལ། །ཚ་བ་རབ་ལ་ག་བུར་རྒྱལ་བློན་གསུམ། (དེ་སྟེང་
ཙན་དན་གི་ཝཾ་ཧོང་ལེན་ཏིག་ཏ་སྟེ་)བདུན་པ་(དེ་སྟེངས་བ་ཤ་བོང་དཀར་)དགུ་པ་གསུམ་གྱིས་བསད་པ་
གཅེས། །ཚ་བ་འབྲིང་ལ་ཙན་དན་(དཀར་དམར་ཅུ་གང་གུར་གུམ་ཨུཏྤལ་ཧོང་ལེན་གི་ཝཾ་ག་དུར་ཏིག་ཏ་བ་ཤ་ཀ་)
བཅུ་པ་སྟེ། །ཐ་མ་གི་ཝཾ་(ཅུ་གང་གུར་གུམ་བ་ཤ་བ་ལེ་ཧོང་ལེན་ཏིག་ག་དུར་བོང་དཀར་ཏེ་)བཅུ་པས་འཇོམས་
པར་འགྱུར། །ལྡན་ཚད་དུས་གཅིག་འཇོམས་པའི་ཕྱེ་མ་ནི། །ཚ་བ་རླུང་ལྡན་ཨ་གར་(བཟང་དྲུག་
རུ་རྟ་སླེ་ཏྲེས་སྒོག་ཐལ་ཀ་ར་སྟེ་)བཅུ་པས་འཇོམས། །བད་ཀན་ལྡན་ལ་ཅུ་གང་བདེ་བྱེད་སྦྱར། །རྙིངས་
ཚད་རྩད་ནས་འདོན་པའི་ཕྱེ་མ་ལ། །རབ་ལ་ག་བུར་ཉི་ཤུ་རྩ་ལྔ་སྟེ། །འབྲིང་ལ་ཙན་དན་ཐ་མ་
གི་ཝཾ་ངོ་། །སྔོ་རྩི་འདྲེས་པའི་སྦྱོར་བ་གཙོ་བོ་བརྒྱད། །འཁྲུགས་(ལ་ཙན་དན་དམར་པོ་ཤིང་མངར་རུ་རྟ་སྐྱུ་
རུ་)རིམས་(ལ་གསེར་མེ་སྐྲ་བཟང་ག་དུར་དེ་བ་སྤང་རྩི་བོང་དཀར་)བབས་སྒོ་མདེ་ཁ་(གཉན་ལ་གླ་རྩི་གུ་གུལ་སྙིང་ལ་
ཛཱ་ཏི་ཨ་གར་གློ་ལ་ཨ་ཀྲོང་ཤིང་མངར་མཆིན་པར་ཨུཏྤལ་བྲག་ཞུན་མཆེར་པར་པི་ལིང་མཁལ་མར་སུག་སྨེལ་ཕོ་བར་བོང་དཀར་
མཁྲིས་པར་གསེར་མེ་ཆུ་སོ་ལ་གླ་རྩིས)བསྒྱུར་ལ་སྦྱར། །ཚ་བའི་ནད་རྣམས་མི་སེལ་གང་ཡང་མེད། །
སྨན་མར་ཚ་བའི་ནད་རྗེས་བཅད་པ་སྟེ། །འབྲས་བུ་གསུམ་གྱིས་སྟོངས་པའི་ཚད་རྗེས་
གཅོད། །ཏིག་ཏའི་མར་གྱིས་ཚད་རྙིང་རླུང་ལྡན་གདོན། །བ་ཡི་རྣམ་ལྔ་སེང་ལྡེང་སྨན་མར་
གྱིས། །ཚད་རྙོངས་ཕྱི་རྗེས་ཆུ་སེར་སྐེམ་པར་བྱེད། །ཞི་བྱེད་ཐང་ཕྱེས་ཚ་བ་མ་སེལ་ན། །སྦྱོང་
25-1-177


བྱེད་བཤལ་གྱིས་མཁྲིས་ཚད་འོར་དུ་སྐྱུར། །ཚ་བ་ཀུན་ལ་སྨིན་དུས་ཁྲུས་པ་མཆོག །སྣོད་
བབས་བཅོས་ཀྱི་གཙོ་བོ་སྦྱང་བ་ཡིན། །བཅོས་རྡུགས་ལོག་གནོན་སྦྱོངས་མིན་གཞན་ན་མེད། །
ཅི་ཕྱིར་རྒྱུ་ཉིད་རྩད་ནས་འབྱིན་པས་སོ། །དེ་ཡང་རུང་དང་མི་རུང་ནད་གཞི་བརྟག །རན་དང་
མི་རན་དུས་ཚོད་བརྟག་པ་དང༌། །ཐུབ་དང་མི་ཐུབ་ལུས་ཤེད་ལེགས་པར་བརྟག །མཁྲིས་
པའི་ནད་ལ་སྦྱོངས་ལས་མི་འདའ་ཡང་། །མ་སྨིན་ཚ་བ་མི་སྦྱང་བྱེར་ཏེ་འགྲོ། །རླུང་འབུད་ཆེ་
དང་འདྲེ་ཁ་རྒོད་ལ་མིན། །སྨིན་དང་སྣོད་བབས་བཅོས་རྡུགས་དུས་ཚོད་དུ། །རྩ་ཤེད་མ་ཤོར་
ཤེད་ཀྱིས་ཐུབ་དུས་སྦྱང་། །དེ་ལ་སྔོན་འགྲོ་དངོས་གཞི་ཕྱི་རྗེས་གསུམ། །སྔོན་འགྲོ་མ་སྨིན་
སྨིན་པར་བྱ་བ་དང༌། །བྱེར་ན་བསྡུ་ཞིང་རླུང་ཁ་གནོན་པ་དང༌། །གབ་པའི་མགོ་བསླང་མེ་དྲོད་
ཉམས་ན་གསོ། །ནད་ཀྱི་རྩེ་བཅིལ་རྒྱས་ཚད་མ་ཡིན་པའི། །རྙིང་པ་རྣམས་ལ་ཁྲུས་དང་བསྐུ་
མཉེ་བྱ། །དངོས་གཞི་རྒྱལ་པོ་(ཐར་ནུ་)བཙུན་མོ་(ཁྲོན་བུ་)སྲས་(ཧོང་ལེན་)དང་བློན(ལྕུམ་རྩ་གསེར་མེ།)། །
མཚོན་ཆ་(པ་ཏོ་ལ་)ཆིབས་སུ་(ཀ་ར་)བཅས་པས་ནད་ཡུལ་འདོན། །ཚ་བ་སྨིན་དུས་ག་བུར་གི་ཝཾ་
བསྣན། །སྣོད་དུ་བབས་ན་བྲག་ཞུན་དུག་མོ་ཉུང༌། །བཅོས་བརྡུགས་ཚ་ལ་གུར་གུམ་མདེ་ཁ་
བསྒྱུར། །དྲི་ཆེ་ཁ་དོག་དམར་སེར་ནད་ཐོན་རྟགས། །ཚ་གྲང་ཆུ་ལྕག་བྲབས་ལ་དག་པར་
སྦྱང༌། །སྦྱང་བ་མ་དག་བསྐྱར་ལ་སྦྱང་བ་གཅེས། །མ་འབྱོངས་ནད་བསླང་ཚ་བ་སླར་འཕེལ་
འགྱུར། །འབྱོངས་རྗེས་ཆུ་གྲོག་འབྲས་སམ་ཕྱེ་ཐུག་གམ། །ཞོ་ཕྲུལ་ལ་སོགས་བསིལ་གྱིས་
བཤལ་རྗེས་བཅད། །དེ་ལྟར་མ་ཡིན་རྗེས་ལ་དྲོད་བསྟེན་ན། །བཀྲུ་བཤལ་བྱས་རྗེས་སྣོད་དུ་
དུག་གཡོས་འདྲ། །རྙིངས་ཚད་རྣམས་ལ་རྒྱུན་སྦྱོངས་བསྔགས་པ་ཡིན། །དཔྱད་ཀྱིས་བཅོས་
ཐབས་རྣམ་པ་དྲུག་ཡིན་ཏེ། །གཏར་གྱིས་ཁྲག་ངན་རྩ་ལམ་སྦྱང་བ་དང༌། །རྔུལ་གྱིས་ཚད་
རླངས་བ་སྤུར་དབྱུང་བ་དང༌། །དུགས་ཀྱིས་འཕྲལ་གྱི་ཟུག་གཟེར་བཅག་པ་དང༌། །ལུམས་
ཀྱིས་ཚ་བ་བྱེར་བ་གདོན་པ་དང་། །ཆུ་ཡིས་ཕྱི་ཚད་མེ་དབལ་བཅག་པ་དང༌། །མེ་ཡིས་ཚ་བ་
25-1-178


འབྲོས་འཕྲང་བསྡམ་པའོ། །དང་པོ་གཏར་གྱིས་རྩ་ལམ་ཁྲག་སྦྱང་བ། །རུང་དང་མི་རུང་ནད་
གཞི་བརྟག་པ་གཅེས། །ཁྲག་མཁྲིས་ནད་ལ་གཏར་བར་གསུངས་ན་ཡང༌། །ཚ་བ་གཏར་དུ་
མི་རུང་རྣམ་པ་བདུན། །མ་སྨིན་ཚད་པ་གཏར་ན་རྙོགས་པར་འགྱུར། །ཁྱད་པར་རིམས་ལ་
གང་གཏར་དོན་ལ་འབབ། །འཁྲུགས་སོགས་ངན་ཁྲག་མ་ཕྱེ་གཏར་བ་ཡིས། །ཟུངས་ཁྲག་
ཤོར་བས་རླུང་སྐྱེ་ཚ་བ་བྱེར། །ནད་ཁྲག་ལུས་པས་ཚ་བའི་རོ་མི་ཐོན། །སྟོངས་ཚད་གཏར་ན་
རླུང་འཕྱོ་ཟུག་གཟེར་སྐྱེ། །གཉན་ཚད་གཏར་ན་ཁྲག་ཤུལ་སྲོག་རྩར་འཇུག །དུག་ཚད་གཏར་
ན་བྱེར་ཏེ་རོ་མི་ཐོན། །ཟུངས་ངན་ཚད་པ་གཏར་ན་སྲོག་རྟེན་ཆད། །གཏར་དུ་རུང་བའི་ཚད་
པ་སྨིན་རྒྱས་དུས། །ཁྱད་པར་འགྲམས་འཁྲུགས་ཁྲག་གཟེར་གཏར་བ་ཤིས། །སྨིན་ལོང་མེད་
པའི་ཚ་བ་ལག་གཏོད་ལྟར། །རྒྱས་པའི་ཚ་བ་ཁྲག་ལ་ཐོབ་ཤ་བྱ། །སྟོངས་པའི་ཚ་བ་བསིལ་
བཅུད་གསོ་ཞིང་གཏར། །གབ་ཚད་གང་བབས་རྩ་ལ་གཏར་ལ་བསླང༌། །རྙིངས་ཚད་ཕངས་
པ་བཞིན་དུ་ཉུང་དུ་དབྱུང༌། །རིམས་དུག་གཉན་གཟེར་རྩར་བབས་རླངས་ཐོན་གཏར། །
གཏར་བའི་དུས་ཚོད་རན་དང་མི་རན་དང་། །སྔོན་འགྲོ་སྙེལ་ཐབས་གདབ་ཐབས་རྩ་
དམིགས་དང༌། །ཁྲག་སྤྲ་དབྱུང་ཚད་ལོག་ནོན་ལ་སོགས་པ། །ཕྱི་རྒྱུད་གཏར་གའི་ལེའུར་ཤེས་
པར་གྱིས། །རྔུལ་གྱིས་ཚ་བ་བ་སྤུར་དབྱུང་བ་ནི། །མ་སྨིན་སྟོབས་ཆེན་ནད་ལ་རྔུལ་མི་དབྱུང༌། །
ཕྱུངས་ཀྱང་རྔུལ་མེད་ནད་འཁྲུགས་སླར་ཡང་འབྱེར། །ཟུངས་ཟད་རྔུལ་བཏོན་རླུང་སྐྱེས་ལུས་
སྟོབས་འཇོམས། །མ་སྨིན་སྟོབས་ཆུང་ལམ་ནས་ལྡོག་པ་དང༌། །རྒྱས་པའི་ཚ་བ་རླངས་པར་
འདོན་པ་དང༌། །སྟོངས་པའི་རླུང་ཚད་དུས་གཅིག་དབྱུང་བ་དང༌། །རྙིངས་པའི་ཚ་བ་རྩིབ་ཤ་
དགག་པ་དང༌། །ཁྱད་པར་རིམས་ཀྱི་ཚ་བ་བྱ་ལྟར་སྤུར། །ཤ་པགས་རུས་ཚད་རྔུལ་དུ་དབྱུང་
བས་བཅོས། །དབྱུང་དུས་ཕལ་ཆེར་རྔུལ་དྲི་ཐོན་དུས་ཡིན། །སྦྱོར་བ་འཕུལ་འདྲེན་གཉིས་སུ་
ཤེས་པར་བྱ། །དུགས་ཀྱིས་འཕྲལ་གྱི་ཟུག་གཅོག་བསིལ་དྲོད་གཉིས། །ཆུ་རྡོ་རྨོན་ལྕགས་
25-1-179


ཚན་ཞོ་བསིལ་བའི་སྔོ། །གྲང་མོས་གསོར་བདུགས་ཁྲག་གཟེར་ཟུག་གཅོག་མཆོག །ཆུ་
དུགས་གྲེ་བ་རྒྱུ་གཟེར་མིག་ཚད་འཇོམས། །བསིལ་དུགས་མ་སྨིན་རླུང་དང་ལྡན་ལ་སྤང༌། །
དྲོད་དུགས་རྒྱས་ཚད་རྐྱང་ལ་མི་རུང་སྟེ། །འཁར་གོང་ཆང་བྲན་བསྲོས་པས་རླུང་གཟེར་
གཅོག །ཧོར་གྱི་མེ་བཙས་ཀོ་ལེར་གཟེར་འཁྱུག་འཇོམས། །སོ་ཕག་བསྲོས་པས་ཕོ་བར་
དུགས་བྱས་ན། །མ་སྨིན་གབ་རྙོང་ཕོ་བའི་མེ་དྲོད་གསོ། །ལུམས་ནི་བདུད་རྩི་ལྔ་ཡི་ཆུ་ལུམས་
སམ། །བཅིང་ལུམས་རླངས་ལུམས་འབྱུང་བའི་ཆུ་ལུམས་ཀྱིས། །ཚ་བ་ཤ་པགས་རྩ་རུས་བྱེར་
བ་འཇོམས། །ཆུ་ཡི་འཁོར་ལོས་ཕྱི་ཚད་བཅག་པ་ནི། །མ་སྨིན་ལྡན་ཚད་རྣམས་ལ་བྱར་མི་
རུང༌། །སྟོབས་ཆུང་ཚ་བ་ལམ་ནས་བཟློག་པ་དང༌། །བྱེར་བའི་ཚ་བ་ཁོང་དུ་བསྡུ་བ་དང་། །
རྒྱས་པའི་ཚ་བ་མེ་དབལ་བསད་པ་དང་། །རྙིངས་པའི་ཚ་བ་ཞེན་པ་གདོན་པར་བྱ། །མེ་ཡིས་
ཚ་བ་འབྲོས་འཕྲང་བསྡམ་པ་ནི། །ཚ་བའི་ནད་ཀུན་བསྲེག་པར་མ་བཤད་ཀྱང༌། །ཚ་བ་བསྲེག་
པའི་ནད་རིགས་རྣམ་པ་དྲུག །མཁྲིས་པ་རྩར་རྒྱུག་ནད་ལ་འབྲོས་འཕྲང་བསྡམ། །རྩ་སྟོངས་
ཚ་བ་འཕྲང་ཁ་སོ་པས་བཅད། །ཚ་གཞུག་རླུང་གིས་འབུད་པ་མེ་ཡིས་མནན། །རླུང་རིམས་
འདར་བུ་ཡེར་བུ་མལ་དུ་གཞུག །ལྷོག་པའི་ཚ་བ་གཉན་ཐོག་གཉན་དབབ་ཅིང༌། །ཚ་རྗེས་
གྲང་བར་ལོག་ན་མེ་དྲོད་གསོ། །དེ་དག་ཚ་བས་ཚ་བ་བཅོས་ཞེས་བྱ། །དེ་ནས་ཚ་བ་བྱེ་བྲག་
བཅོས་པའི་ཐབས། །བླ་གཉན་ཐོར་བུའི་ནད་སྣ་བསལ་བ་ནི། །སྨྱོ་ལྐུགས་ཡེར་འཐིབས་མགོ་
གཟེར་འཁྱོམས་པ་དང༌། །མིག་ཚག་རྣ་བ་འོན་དང་སྣ་ཁྲག་འཛག །ལྕེ་སྐམ་སྐོམ་དད་ཆེ་དང་
དང་ག་འགག །སྐྱིགས་འབྱམས་གཟེར་ཆེ་གློ་མང་མི་ཁོགས་དང༌། །འཁྲུ་སྐྱུག་དྲི་ཆུ་འགག་
དང་ཁྲག་ཏུ་འཛག །རྔུལ་འབྱམས་ལུས་དྲོད་ཕྱི་རུ་ཤོར་བ་དང༌། །རྐང་ལག་ན་འཁུམས་ཕོལ་
འབྲས་ལ་སོགས་པ། །ངོ་མཚར་ཚེགས་མེད་ནད་ཀྱི་སྒོས་བཅོས་བསྟན། །སྨྱོ་བ་ཆལ་ཆོལ་སྨྲ་
ཞིང་ཁྲོ་ཚུལ་སྟོན། །ལྐུགས་པ་དྲན་པ་ཉམས་ནས་སྨྲར་མི་འདོད། །ཡེར་བ་ཉིན་མཚན་གཉིས་
25-1-180


ཀ་གཉིད་མི་འབྱུང༌། །སྨྱོ་བ་ཚ་སྨྱོ་གྲང་སྨྱོ་གཉིས་སུ་ཡོད། །ལྐུགས་པ་ཚ་ལྐུགས་གྲང་ལྐུགས་
གཉིས་སུ་དབྱེ། །ཡེར་པ་ཚ་ཡེར་རླུང་ཡེར་རྣམ་པ་གཉིས། །ངོས་བཟུང་རྩ་ཆུ་ལྕེ་དང་སྔར་རྗེས་
བཅད། །གོམས་པས་བསྟེན་ལ་ཚད་རླུང་ལ་ཤན་དབྱེ། །ཚད་སྨྱོ་གཞུག་ཆུང་ལྔ་བདུན་ཆང་
བསྡུས་ཁུར། །ག་བུར་རྒྱལ་བློན་སྦྱར་བཏང་རྔུལ་མང་དབྱུང༌། །ཡང་ན་ག་བུར་ཆང་དང་སྦྱར་
ལ་བཏང༌། །ཚིགས་པ་དྲུག་པ་ཨན་སྟོང་མེ་ཡིས་བསྲེག །དེ་རྗེས་ཐོང་ཚེར་དང་གའི་བལ་
འདབ་ཅིག །རུས་བཅུད་གསུམ་གྱི་ཁུ་བས་བལ་ཚི་བཙིར། །(ཚ་ལ་གླ་རྩིས་)དུག་འདོན་(རྡོ་དྲེག་གིས་
)ངར་བཏགས་རླུང་དུས་བཏང་བར་བྱ། །ཡང་ན་བལ་ཚིར་ཛཱ་ཏི་ཀ་ཀོ་ལ། །རུས་ཁུ་སྦྱར་བཏང་
མ་མཆུའི་དཀྱིལ་དུ་བསྲེག །གྲང་བས་སྨྱོ་ན་བུར་དཀར་ཆང་སྦྱར་བཏང༌། །མ་ནོན་བཅུད་
བཞིའི་ཐང་ལ་ཛཱ་ཏི་དང༌། །ཤིང་ཀུན་བིག་པན་ཁ་རུ་ཚྭ་བཏབ་བཏང༌། །ཨན་སྟོང་དྲུག་བདུན་
དཀར་ནག་མཚམས་སུ་བསྲེག །ཤ་རྙིང་མར་རྙིང་རུས་ཆེན་ཁུ་བ་བཏང༌། །ཚ་བས་ལྐུགས་ན་
ག་བུར་རྒྱལ་བློན་གསུམ། །བཏང་ལ་རྔུལ་དབྱུང་དེ་རྗེས་ཆུ་ལྕག་བྱ། །སྒབ་རྩ་ཐོང་རྩ་རུ་ཐུང་
རྩ་ལ་གཏར། །དེ་ལ་སྐྱེད་མེད་སྤྱི་གཙུག་འཚོགས་ཁ་བསྲེག །གྲང་བས་ལྐུགས་ན་སྲོག་རྩ་
མྱོས་བྱེད་དང༌། །སྤྱི་གཙུག་ཨན་སྟོང་སོར་མོ་ཉི་ཤུ་བསྲེག །ཤ་འདོན་ལ་སོགས་བཅུད་ཀྱིས་
བཅོས་པར་བྱ། །ཚ་བས་གཉིད་ཡེར་གླ་རྩི་མར་དཀར་བྱུག །གླ་རྩི་འོ་མར་བསྡུས་དང་སྒོག་
ཐལ་བཏང༌། །རླུང་ཡེར་ཤ་ཆང་བུ་རམ་སྒོག་ཚོད་བྱིན། །དྲོད་སྨན་འོ་མ་བུ་རམ་འཇམ་རྩི་བྱ། །
གཉིད་ཀྱིས་མྱོས་ན་བ་ལུ་རྡོ་དྲེག་དང༌། །ཤུག་འབྲུམ་ཐང་བཏང་སྦྱང་སྙིང་(སྡིག་པའི་མགོ་གི་ཝཾ་བུ་
མོ་སྟག་ལོ་མའི་སྲིན་ལག་སེན་མོ་ཆུར་སྦྱངས་ཀྱི་)སྦྱོར་བ་བྱ། །བྱི་བ་ཉ་མིག་གང་རྙེད་མིག་ལ་བྱུག །མགོ་
གཟེར་གསེར་ཕུད་གཡའ་ཀྱི་རི་ཤོའི་རྩ། །ཀྱི་འབྲས་བོང་ང་དཀར་པོའི་སྐྱུགས་ཀྱིས་དྲངས། །
ཟུག་མ་ཆོགས་ན་དེ་རྗེས་བཤལ་གྱིས་སྦྱང༌། །དཔྲལ་རྩ་འཚོགས་གསང་གཏར་ལ་ཆུ་བཅག་
བྱ། །མུར་གོང་འཕར་རྩ་ལྟག་པའི་སྡུད་སྒོ་བསྲེག །དོམ་མཁྲིས་ཏིག་ཏ་གུར་གུམ་བོང་ང་
25-1-181


དཀར། །ཨ་བྱག་གངས་ཐིགས་གསེར་གྱི་མེ་ཏོག་དང༌། །ཀ་ར་སྦྱར་བཏང་མགོ་བོ་འཁྱོམས་
པ་ལ། །མགོ་ཁྲོལ་སྦྱོར་བ་ཤིང་ཀུན་སྒ་བཏབ་བྱིན། །མར་གསར་རྒྱམ་ཚྭ་སྦྱར་བའི་སྣ་སྨན་
བཏང༌། །མིག་ཚག་ག་བུར་དོམ་མཁྲིས་སྐྱེར་ཁན་བྱུག །གླ་རྩི་སྐྱེར་པའི་བར་ཤུན་ཐང་དུ་
བཏང༌། །རྣ་བ་འོན་ན་ཚིགས་པ་བཅུ་བཞི་བསྲེག །རྗེས་ལ་འབྲས་གསུམ་རྩ་བའི་སྨན་མར་
སྦྱར། །སྣ་ཁྲག་འོང་ན་མཁན་སྐྱེར་ཁུ་བ་ལ། །རྡོ་དྲེག་གུར་གུམ་དོམ་མཁྲིས་སྦྱར་ལ་བཏང༌། །
ཡང་ན་གུར་གུམ་དོམ་མཁྲིས་མཚེ་ཡི་ཐལ། །རྡོ་དྲེག་སྙ་ལོ་སྲད་དཀར་ཀྱི་ལྕེ་བ། །ཀ་ར་སྦྱར་
བཏང་མགོ་སྟོད་ཆུ་ཡིས་བསྒྲང༌། །ཁ་ལྕེ་སྐམ་ལ་སྟར་བུ་ཉི་དགའ་དང༌། །ཆུ་རུག་པ་དང་ཀ་ར་
སྦྲང་སྦྱར་མུར། །སྐོམ་དད་ཆེ་ན་ཉི་དགའ་ཀ་ར་སྦྱར། །འུ་སུ་བསྐོལ་ཁུར་ཀ་ར་སྦྲང་བཏབ་
བྱིན། །ཡང་ན་སོ་ཕག་བསྡུས་པའི་ཁུ་བས་དབུལ། །དང་ག་འགག་ལ་ཀ་ར་རྒུན་འབྲུམ་བཏང་། །
སྐྱུ་རུ་ཀ་ར་སྦྲང་སྦྱར་མཁུར་བཀང་བཏང༌། །ཏིག་ཏ་སྐྱུ་རུ་རྒྱམ་ཚྭའི་གྲང་ཐང་བཏང༌། །དེ་
རྗེས་སྣོད་ཀ་ཐོང་རྩ་མཁྲིས་རྩ་གཏར། །སེ་འབྲུ་བཞི་ཐང་ཅུ་གང་བདེ་བྱེད་སྦྱར། །སྙིང་ལ་གང་
འདོད་ཟས་དང་སྦྱར་ལ་བཏང༌། །སྐྱིགས་བུ་འབྱམས་ལ་ཚ་དང་གྲང་བ་གཉིས། །ཚ་བས་
སྐྱིགས་ན་མགོ་ལུས་ཆུ་བཅག་བྱ། །དེ་རྗེས་ཚིགས་པ་དྲུག་བདུན་འཚོགས་ཁ་བསྲེག །ཙན་
དན་དཀར་པོ་ནུ་ཞོ་སྣ་རུ་བླུག །ཡང་ན་ག་བུར་རྒྱལ་བློན་བཏང་རྗེས་ལ། །མཐེབ་ཆེན་སྲིན་
ལག་སེན་མོ་སྤྲ་བས་བསྲེག །གྲང་བས་སྐྱིགས་ན་ཚྭ་སྣ་ཆང་སྦྱར་བཏང༌། །ཟན་དྲོན་ཞྭ་མོ་
བྱས་ལ་མགོ་ལ་བསྐོན། །འཚོགས་སྲུབས་སྐེ་སྟོང་ཕོ་བའི་དཀྱིལ་དུ་བསྲེག །གཟེར་ལ་ཁྲག་
གཟེར་གཉན་གཟེར་རླུང་གཟེར་གསུམ། །ཁྲག་གཟེར་མ་ནུ་རུ་རྟ་ཞིབ་བཏགས་ལ། །ཀ་ར་
སྦྱར་བ་ཆུ་སྐོལ་འཕུལ་ལ་བཏང༌། །གཉན་གཟེར་གུ་གུལ་ནག་པོའི་དྲུངས་ཐང་བླུད། །རླུང་
གཟེར་སྦྲུ་རྩ་གླ་རྩི་ཆོས་སྨན་དང༌། །གུར་གུམ་སྦྱར་བ་སྲེ་ལོང་ཐང་གིས་དབུལ། །ཡང་ན་ཛཱ་ཏི་
སུག་སྨེལ་པི་པི་ལིང༌། །པུ་ཤེལ་རྩེ་དང་སླེ་ཏྲེས་ཤིང་ཚ་དང༌། །ཀ་ར་སྦྱར་བ་སྲེ་ལོང་ཐང་གིས་
25-1-182


དབུལ། །གློ་མང་ཅུ་གང་ཤིང་མངར་ཀ་ར་སྦྱར། །རའམ་བ་འོ་དྲོད་མོས་འཕུལ་ལ་བཏང༌། །
ཡང་ན་ཕོ་རོག་མིག་གི་རྩ་བ་དང༌། །ཅུ་གང་ཀ་ར་སྦྱར་ལ་བ་འོས་འཕུལ། །ཡང་ན་ཅུ་གང་
ཤིང་ཚ་པི་པི་ལིང༌། །ཀ་ར་སྦྲང་དང་མར་སྦྱར་ལྡེ་གུ་བཏང༌། །ཡང་ན་ཅུ་གང་ཨ་ཀྲོང་རུ་རྟ་
དང༌། །པི་པི་ལིང་དང་ཀ་ར་སྦྱར་ལ་བཏང་། །འགོགས་དཀའ་སྟར་བུ་རུ་རྟ་པི་པི་ལིང༌། །ཤིང་
ཚ་སྐྱུ་རུ་ར་དང་སྦྲང་སྦྱར་བཏང༌། །འཁྲུ་ལ་ཚ་འཁྲུ་གྲང་འཁྲུ་རྣམ་པ་གཉིས། །དུད་ཁུ་དམར་
སེར་དྲི་ཆེ་ཆུ་གཏིང་འབྱིང༌། །ཚ་འཁྲུ་ཡིན་པས་མཁྲིས་ཕྱེ་བདུན་པ་སྦྱར། །ཨིཎྜ་བཞི་ཐང་བིལ་
བ་བཏབ་པས་གཅོད། །ཙམ་པ་སྦུ་ཆུར་འཁྲུ་བ་གྲང་བ་སྟེ། །སེ་འབྲུ་བཞི་དང་འཁྲུ་གཅོད་(དན་
རོག སྨག མོན་ཆར། བིལ་བ།)བཞི་སྦྱར་བཏང༌། །ལྟེ་འོག་མཚོན་གང་མཚོན་དོ་བཅལ་བར་བསྲེག །
སྐྱུག་པའི་ནད་ལ་ཚ་དང་གྲང་བ་གཉིས། །ཁྲག་དང་མཁྲིས་པ་སྐྱུག་པ་ཚ་བ་སྟེ། །ཁྲག་ཏུ་སྐྱུག་
ན་རྒྱ་སྐྱེགས་ཁུ་བ་ལ། །དོམ་མཁྲིས་གུར་གུམ་ཀ་ར་སྦྱར་ལ་བཏང༌། །མཁྲིས་པར་སྐྱུག་ན་རྟ་
སྦངས་ཆང་སྦྱར་བཏང༌། །ཡང་ན་འབྲས་བཀྲུས་ཁུ་བར་པུ་ཤེལ་རྩེ། །སྦྲང་རྩི་བཏབ་སྟེ་ལྡེ་
གུར་བཏང་བས་གཅོད། །ཆུ་དང་ཙམ་པ་སྐྱུག་པ་གྲང་བ་སྟེ། །འབྲས་ཡོས་ཁྱོར་གང་སེ་འབྲུ་
པི་པི་ལིང༌། །བཅའ་སྒ་སྦྲང་རྩི་སྦྱར་བཏང་ལྷེན་གསང་བསྲེག །སྟོང་སྐྱུགས་སྲེ་ལོང་ཐང་
བཏང་དྲུག་པ་བསྲེག །ཚ་བས་ཆུ་འགགས་སོ་བྱའི་སྒྲོ་ཐལ་དང་། །བོང་ཐོར་ལག་རྨིག་གཡས་
ཀྱི་རྩི་བཞུར་ལ། །ཆུ་སྦུར་ཉི་དགའ་ཀ་ར་སྦྱར་ལ་བཏང༌། །ཡང་ན་ཞོ་ཤ་སྐྱེར་ཤུན་རྒྱ་ཚྭའི་
ཐང༌། །དེས་མ་སེལ་ན་ལོང་རྩ་གཉིས་ལ་གཏར། །ཟེ་ཚྭ་སྡིག་སྲིན་གཟེ་མ་ཆང་སྦྱར་བཏང༌། །
ཁྱད་པར་རིམས་ཚད་ཆུ་འགགས་སེལ་བར་བྱེད། །དྲི་ཆུ་ཁྲག་ཏུ་འཛག་ན་བྲག་ཞུན་དང༌། །
གུར་གུམ་དོམ་མཁྲིས་སྦྱར་བཏང་བྱིན་ལོང་གཏར། །དྲི་མ་འགགས་ན་ལ་ཕུག་ཐལ་བ་དང༌། །
ཨུག་ཆོས་འབྲས་བུ་ཨ་རུ་མཆུ་སྙུང་དང༌། །འོ་མ་སྦྱར་ལ་ལྟོར་བཏང་ནི་རུས་བསུ། །ཀྱི་ལྕེའི་
བསྡུས་ཐང་མར་དཀར་བཏབ་ལ་བྱིན། །ཡང་ན་སྣེ་རྒོད་བུལ་ཏོག་ཐང་དུ་བཏང༌། །རྔུལ་
25-1-183


འབྱམས་ད་ལིས་ལུག་མིག་ཐང་བཏང་ལ། །རྗེས་ལ་སྒ་སྐྱ་ཆང་དང་སྦྱར་ལ་བཏང་། །ཧོང་
ལེན་ཙན་དན་བོང་ང་མར་གསར་བྱུག །ལུས་དྲོད་ཕྱིར་ཤོར་ཆུ་བཅག་བྱས་རྗེས་ལ། །སྐྱུ་རུ་
ཨུཏྤལ་མར་དཀར་སྦྱར་བ་དང༌། །སེ་རྒོད་སྐྱེར་ཤུན་སོ་མ་ར་ཛ་བྱུག །ཚ་རྗེས་རྐང་ལག་ཞ་
རེངས་ན་བ་དང༌། །ཁ་མིག་ཡོ་ན་རྩ་སྦྱོངས་ཆུ་ལུམས་བྱ། །འབྲས་ཡོས་ཐང་གིས་ཕྱེ་ལ་གང་ཉེ་
གཏར། །དེ་ལྟར་བླ་གཉན་ཐོར་བུའི་ནད་སྣ་ཚོགས། །ཚ་བ་ཀུན་ལ་ཕལ་ཆེར་འབྱུང་འགྱུར་ཏེ། །
ཁྱད་པར་བལ་ནད་རིམས་ལ་མང་བ་ཡིན། །དེ་ཕྱིར་ཁ་ཐོར་གཉེན་པོས་ནད་སྣ་བསལ། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཚ་
བ་སྤྱི་བཅོས་པའི་ལེའུ་སྟེ་བཅུ་གཉིས་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས། །
ཚ་གྲང་གཉིས་སུ་མ་འདུས་ནད་མེད་ཀྱང༌། །ཚ་གྲང་ནོར་བར་བཅོས་ན་གཞན་སྲོག་འདོར། །
དེ་ཡི་ངོས་བཟུང་འཁྲུལ་སོ་ཅི་ལྟར་བསལ། །འཚོ་མཛད་སྨན་པའི་རྒྱལ་པོས་བཤད་དུ་
གསོལ། །དེ་སྐད་ཞུས་པའི་དོན་ལ་ལན་གསུངས་པ། །ཚ་གྲང་འཁྲུལ་གཞི་གལ་འགག་རྣམ་
བཞི་སྟེ། །རྟགས་དང་ངོ་བོ་གཉིས་ཀ་ཚ་བ་དང༌། །རྟགས་དང་ངོ་བོ་གཉིས་ཀ་གྲང་བ་དང༌། །
ཕྱི་རྟགས་ཚ་ཡང་ངོ་བོ་གྲང་བ་དང༌། །ངོ་བོ་ཚ་ཡང་ཕྱི་རྟགས་གྲང་བ་ཡིན། །རྒྱུ་རྐྱེན་ཡུལ་
དུས་རང་བཞིན་ན་ཚོད་དང༌། །གནས་ས་ཉིན་ཞག་ཟས་ཟོས་གོམས་པ་ཆུ། །འདི་བཅུའི་སྒོ་
ནས་འཁྲུལ་མེད་ངོ་ཡིས་བཟུང༌། །མཁྲིས་པ་སྐྱེད་པའི་སློང་རྒྱུ་དེས་བསྐྱེད་ནས། །སྐམ་ས་
ཚ་གདུང་ཡུལ་དུས་སོས་ཀ་སྟོན། །དར་མ་མཁྲིས་ཤས་ཆེ་དང་བར་ན་གནས། །ཉིན་དགུང་
མཚན་དགུང་ཞུ་དུས་ན་བ་དང༌། །ཁ་ཟས་དྲོད་བཅུད་ཡུན་དུ་བསྲིངས་བསྟེན་པས། །ཆུ་དམར་
སྐ་ལ་དྲི་དུགས་ཀུ་ཡ་མཐུག །དེ་ལ་མཁྲིས་པ་འཕེལ་བའི་རྟགས་བྱུང་ན། །རྟགས་དང་ངོ་བོ་
གཉིས་ཀ་ཚ་བ་ཡིན། །དེ་ལ་བད་རླུང་འཕེལ་བའི་རྟགས་ཡོད་ན། །ཕྱི་རྟགས་གྲང་ཡང་ངོ་བོ་
25-1-184


ཚ་བར་གནས། །བད་རླུང་སྐྱེད་པའི་སློང་རྒྱུ་བསྟེན་པ་དང༌། །ངད་ཅན་བསེར་བུ་རླན་ཅན་
དབྱར་དགུན་དུས། །རྒས་དང་བྱིས་པ་བད་རླུང་ཆེ་བ་དང༌། །སྟོད་སྨད་གནས་ཤིང་ཉིན་ཞག་
ཐོག་མཐར་ན། །ཟོས་ཐོག་ཞུ་རྗེས་དུས་ན་ལྡང་བ་དང༌། །བཅུད་མེད་བསིལ་ཟས་རྒྱུན་དུ་
བསྟེན་པ་ཡིས། །ཆུ་སྔོ་དྲི་རླངས་ཆུང་ལ་ཀུ་ཡ་སྲབ། །དེ་ལ་བད་རླུང་འཕེལ་བའི་རྟགས་བྱུང་
ན། །རྟགས་དང་ངོ་བོ་གཉིས་ཀ་གྲང་བ་ཡིན། །དེ་ལ་མཁྲིས་པ་འཕེལ་བའི་རྟགས་ཡོད་ན། །
ཕྱི་རྟགས་ཚ་ཡང་ངོ་བོ་གྲང་བར་གནས། །གལ་ཏེ་དེ་དག་ཕན་ཚུན་འདྲེས་གྱུར་ན། །ཚ་གྲང་
འདྲེས་པས་ལྟར་སྣང་ནད་འབྱུང་སྟེ། །ཚ་བ་གྲང་བ་ལྟ་བུར་སྣང་བ་དང༌། །གྲང་བ་ཚ་བ་ལྟར་
སྣང་གང་ཡང་རུང༌། །ནད་གཞི་རྟགས་དང་བཅོས་ཐབས་གོམས་པ་དང༌། །བཅོས་སྐྱེད་ལྟར་
སྣང་ལྔ་ཡིས་འཁྲུལ་སོ་བསལ། །དང་པོ་ནད་གཞི་མིང་གི་ལྟར་སྣང་ནི། །དྭངས་མ་མ་ཞུ་ཚ་བ་
བད་སྨུག་དང༌། །ཚ་སྐྲན་ཚ་ཆུ་ཚ་བའི་ཆུ་འགགས་དང༌། །མ་ཞུ་གླང་ཐབས་བད་ཀན་དམུ་སྐྲན་
དང༌། །ཆུ་འགགས་ཞེས་པའི་མིང་ལ་བརྟེན་བྱས་ནས། །དྲོད་ཀྱིས་བཅོས་པས་ཚ་བས་དེ་སྲོག་
འདོར། །དབྱིག་དུག་རྡོ་དུག་དུག་མིང་ལ་བརྟེན་ནས། །བསིལ་གྱིས་བཅོས་པས་གྲང་བས་
སྲོག་འདོར་བྱེད། །དེ་ཕྱིར་ལྟར་སྣང་མིང་ལ་མི་བརྟེན་པར། །ཚ་གྲང་འཁྲུལ་སོ་རྟགས་ཀྱིས་
བསལ་བར་བྱ། །དེ་ཡང་རྟགས་ལ་ལྟར་སྣང་འབྱུང་སྲིད་དེ། །རླུང་གིས་ཁ་དང་ལྕེ་སྐམ་གཟེར་
བ་དང་། །མི་འགྱུར་བད་ཀན་སྟོད་གཟེར་ཆེན་པོ་དང༌། །མཁྲིས་པ་རླུང་གིས་བུས་པའི་མགོ་
ནད་དང༌། །མ་ཞུས་མཁྲིས་ཡུལ་ཕྲོགས་པའི་མིག་སེར་དང༌། །ཚད་གཞུག་རླུང་གིས་བུས་
པའི་སྟོངས་ཚད་རྣམས། །ངོ་བོ་གྲང་ཡང་ཕྱི་རྟགས་ཚ་བར་འཁྲུལ། །རྟགས་ཀྱི་རྗེས་འབྲངས་
གསོ་བ་ལོག་པར་འགྲོ། །བསིལ་གྱིས་བཅོས་པས་གྲང་བས་སྲོག་འདོར་བྱེད། །ཕོ་མཁལ་
སྙིང་ལ་ཚ་བ་གབ་པ་ནི། །ཕོ་བ་ཟས་འཇུ་བྱེད་པའི་གཞི་ཡིན་པས། །དེ་ཕྱིར་གནས་དེར་ཚ་
བའི་ནད་ཞུགས་ན། །འཇུ་བྱེད་མེ་དེས་ལོག་པའི་ལས་བྱེད་པས། །གཟེར་རྫིང་མི་འཇུ་སྒྲེག་
25-1-185


སོགས་གྲང་རྟགས་འབྱུང་། །མཁལ་མ་བད་ཀན་གྲང་བའི་གཞི་ཡིན་པས། །ཚད་ནད་ཞུགས་
ཀྱང་དྲོས་ན་ཕན་པ་དང་། །ཆུ་སྲི་གྲང་ན་ནར་མངོན་གྲང་རྟགས་སྟོན། །སྙིང་ནི་རླུང་དང་བད་
ཀན་གཞི་ཡིན་པས། །དེ་ཕྱིར་སེམས་འཕྱོ་བརྗེད་ངས་གཉིད་མེད་ཅིང༌། །སྨྱོ་འབོག་འདར་
བ་ལ་སོགས་འབྱུང་བས་ན། །ཕོ་མཁལ་སྙིང་གི་ཚ་བ་གྲང་རླུང་འདྲ། །ངོ་བོ་ཚ་ཡང་ཕྱི་རྟགས་
གྲང་བར་འཁྲུལ། །གཞན་ཡང་གཉིད་ཡེར་སྐྱུག་དང་རུས་ཚིགས་ན། །གཡལ་འདར་སྨྱོ་ལབ་
སྐྱིགས་བུས་བཏབ་པ་རྣམས། །ཚ་བ་ཡིན་ཡང་གྲང་བའི་རྟགས་ལྟར་སྣང༌། །རྟགས་ལ་བརྟེན་
ན་གསོ་བ་ལོག་པར་འགྲོ། །དྲོད་ཀྱིས་བཅོས་ན་ཚ་བས་སྲོག་འདོར་བྱེད། །དེ་ཕྱིར་ལྟར་སྣང་
རྟགས་ལ་མི་བརྟེན་པར། །བཅོས་ཐབས་འཕྲོད་མི་འཕྲོད་ཀྱིས་འཁྲུལ་སོ་བསལ། །དེ་ཡང་
འཕྲོད་འཕྲོད་འདྲ་ལ་མི་འཕྲོད་དང༌། །མི་འཕྲོད་འདྲ་ལ་འཕྲོད་པར་བསལ་བ་ཡི། །བཅོས་
སྐྱེད་ལྟར་སྣང་ཞེས་བྱ་འབྱུང་སྲིད་དེ། །ཚ་བ་གྲང་བའི་རྟགས་ལྟར་སྣང་བ་ལ། །བསིལ་སྦྱོར་
འཕྲོད་ཀྱང་འཕྲལ་དུ་མི་འཕྲོད་འདྲ། །དྲོད་སྦྱོར་གནོད་ཀྱང་འཕྲལ་དུ་འཕྲོད་ལྟར་སྣང༌། །གྲང་
བ་ཚ་བའི་རྟགས་ཅན་དེ་ལས་ལྡོག །དེ་ཡང་སྨན་ནད་འཐབ་པས་མི་འཕྲོད་འདྲ། །ལྟར་སྣང་
རྟགས་ཀྱིས་མགོ་མནན་འཕྲོད་པ་འདྲ། །ལྟར་སྣང་རྗེས་སུ་འབྲངས་ན་སྲོག་ལ་རྒོལ། །དེ་ཕྱིར་
ལྟར་སྣང་བཅོས་ལ་མི་བརྟེན་པར། །གོམས་པ་ཡུན་དུ་བསྲིངས་པས་རྟོགས་པར་འགྱུར། །དེ་
ཡང་ནད་པའི་རྟོག་པ་ཞེན་ཕྱོགས་ཀྱིས། །གནོད་ཀྱང་ཕན་ནམ་སྙམ་དུ་རྟོག་པ་དང་། །ཕན་
ཀྱང་གནོད་སྙམ་ལྟར་སྣང་འབྱུང་སྲིད་པས། །ནད་པའི་ཡིད་རྟོག་མ་ཡིན་འཕྲོད་མི་འཕྲོད། །
རྩ་ཆུ་བཅོས་སྐྱེད་དག་གིས་འཁྲུལ་སོ་བསལ། །དེ་ལའང་བཅོས་སྐྱེད་ལྟར་སྣང་བཞི་ཡོད་
དེ། །ཕྱི་རྟགས་ལོག་ལ་ངོ་བོ་མ་ལོག་དང༌། །ངོ་བོ་ལོག་ལ་ཕྱི་རྟགས་མ་ལོག་པ། །རྟགས་དང་
ངོ་བོ་གཉིས་ཀ་མ་ལོག་དང༌། །རྟགས་དང་ངོ་བོ་གཉིས་ཀ་ལོག་པའོ། །དང་པོ་བད་ཀན་ཅན་
གྱི་ཚ་བ་ལ། །བསིལ་སྦྱོར་གཏུགས་པས་གཏིང་ཚད་མ་ཐོན་ཀྱང༌། །ཕོ་བའི་མེ་ཤི་གྲང་རྟགས་
25-1-186


སྟོན་པར་བྱེད། །གྲང་བ་རྒན་པོ་གཏིང་ནས་འཁར་བ་ལ། །མེ་བཞི་ལུས་ལ་ཡུན་དུ་བསྟེན་
བྱས་པས། །དྲོད་ཀྱི་རླངས་པས་རྩ་སྦུབས་ཀུན་ཁྱབ་སྟེ། །མགོ་ན་རྩ་རྒྱུག་ཆུ་མདོག་དམར་ལ་
སོགས། །ངོ་བོ་གྲང་ཡང་རྟགས་ཀུན་ཚ་བར་སྟོན། །དེ་ཡང་གྲང་བ་རྒན་པོ་ཚ་བ་འདྲ། །ཚ་བ་
རྒན་པོ་གྲང་བ་འདྲ་བས་ན། །འདྲ་འདྲ་ནོར་ནས་ཚ་གྲང་ནོར་ཉེན་ཡོད། །དེ་ཕྱིར་རྟགས་ཀྱིས་
ངོ་གླན་གཏིང་ནད་གདོན། །གཉིས་པ་འོག་འགྲིམས་རྐུན་བུའི་ནད་གསུམ་སྟེ། །གྲང་བའི་ནད་
ལ་དྲོད་སྦྱོར་བསྟེན་དྲགས་ན། །གནས་དུས་རང་བཞིན་ཚ་བའི་རྐྱེན་ཕྲད་པས། །ཁྲག་མཁྲིས་
ཚ་བ་འཕེལ་བའི་རྐྱེན་བྱས་ཏེ། །ཚ་བ་གྲང་བའི་འོག་འགྲིམས་རྐུན་བུར་སྐྱེ། །འོག་འགྲིམས་
མ་ཚོར་དྲོད་སྦྱོར་བསྟེན་པ་ཡིས། །མེ་འབར་ཤིང་བསྣན་བཞིན་དུ་ལུས་ཟུངས་བསྲེག །དེ་ལ་
ཆུ་བཞི་བརྩོན་བྱས་མྱུར་དུ་ཟློག །ཚ་བའི་ནད་ལ་བསིལ་སྦྱོར་བསྟེན་དྲགས་ན། །གནས་དུས་
རང་བཞིན་གྲང་བའི་རྐྱེན་ཕྲད་པས། །བད་རླུང་གྲང་བ་འཕེལ་བའི་རྐྱེན་བྱས་ཏེ། །གྲང་བ་
ཚ་བའི་འོག་འགྲིམས་རྐུན་བུར་སྐྱེ། །འོག་འགྲིམས་མ་ཚོར་བསིལ་སྦྱོར་བསྟེན་པ་ཡིས། །ཕོ་
བའི་མེ་ཤི་སྐྲན་དང་དམུ་ཆུར་འགྱུར། །དེ་ལ་མེ་བཞི་བརྩོན་བྱས་མྱུར་དུ་ཟློག །གཞན་ཡང་ཚ་
བའི་ནད་ལ་བསིལ་གཏུགས་པས། །གནས་དུས་རང་བཞིན་རླུང་གི་རྐྱེན་ཕྲད་དེ། །ཐོར་བུའི་
རླུང་སྐྱེས་ཚ་བའི་ལྷག་མ་བུས། །ལུས་ལ་མེ་བཏང་འདྲ་ཞིང་ཁ་ལྕེ་སྐམ། །དབུགས་ཐུང་རྩ་
རྒོད་གཟེར་འབྱུང་སྐོམ་དད་ཆེ། །དེ་ནི་རླུང་གིས་ཚ་བའི་འོག་འགྲིམས་ཡིན། །འོག་འགྲིམས་
མ་ཚོར་བསིལ་སྦྱོར་བསྟེན་པ་ཡིས། །མེ་ལ་རླུང་བསྐྱོད་བཞིན་དེ་བུད་ཤིང་བསྲེག །དེ་ཕྱིར་
ཟས་ཀྱིས་ངོ་གླན་ཚད་ལྷག་གདོན། །རྟགས་དང་ངོ་བོ་གཉིས་ཀ་མ་ལོག་ན། །སྦྱོར་བ་དམན་
ཅིང་ལོག་པས་བསྐྱེད་ཅིང་བསྒྱུར། །གཉིས་ཀ་ལོག་ན་དེ་ལ་འཁྲུལ་སོ་མེད། །ནད་གཞིའི་
ལྟར་སྣང་འཁྲུལ་སོ་རྟགས་ཀྱིས་བསལ། །རྟགས་ཀྱི་ལྟར་སྣང་འཁྲུལ་སོ་བཅོས་ཀྱིས་བསལ། །
བཅོས་ཀྱི་ལྟར་སྣང་འཁྲུལ་སོ་གོམས་པས་བསལ། །གོམས་པའི་ལྟར་སྣང་འཁྲུལ་སོ་སྐྱེད་
25-1-187


ཀྱིས་བསལ། །བཅོས་སྐྱེད་ལྟར་སྣང་འཁྲུལ་སོ་ཆུ་ཡིས་བསལ། །ཆུ་མདོག་ལྟར་སྣང་འཁྲུལ་
སོ་ཀུ་ཡས་བསལ། །དེ་ལ་ནོར་བ་ནམ་ཡང་འབྱུང་མི་སྲིད། །དེ་དག་ལྟར་སྣང་ལྔ་ཕྲུགས་ཞེས་
བྱ་སྟེ། །འཁྲུལ་མེད་ཚ་གྲང་གནད་ཀྱི་གལ་མདོ་ཡིན། །དེ་ལྟར་མན་ངག་ལྡན་པས་རྟོགས་
འགྱུར་གྱི། །དཀྱུས་ཙམ་འཛིན་པ་རྣམས་ཀྱིས་ཤེས་མི་འགྱུར། །ཞེས་གསུངས་སོ། །བདུད་
རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་འཁྲུལ་གཞི་བསལ་བ་ཚ་གྲང་
གལ་མདོའི་ལེའུ་སྟེ་བཅུ་གསུམ་པའོ།། །། 
དྲང་སྲོང་ཡིད་ལས་སྐྱེས་ཀྱིས་ཡང་གསོལ་པ། །སྨན་པའི་རྒྱལ་པོ་རིག་པའི་ཡེ་ཤེས་
ལགས། །ཚ་བའི་ནད་རྣམས་གཉེན་པོས་ཟློག་སླ་ཡང༌། །ཚ་བ་བཅོས་རྗེས་གྲང་བ་སྐྱེས་པ་
ཡིས། །ཚ་གྲང་འཁྲུལ་ནས་གཞན་གྱི་སྲོག་འདོར་བས། །རི་ཐང་མཚམས་ཀྱི་ངོས་འཛིན་
བཅོས་པའི་ཐབས། །འཁྲུལ་མེད་གནད་ཀྱི་མན་ངག་བསྟན་དུ་གསོལ། །རིག་པའི་ཡེ་ཤེས་
དེ་ཡིས་ལན་གསུངས་པ། །རི་ཐང་མཚམས་ཀྱི་འཕྲང་ལ་རྣམ་པ་གསུམ། །རླུང་གི་ཞུ་འཁྱགས་
སྔུན་ནས་བསུ་བ་དང༌། །མཁྲིས་པའི་ཞུ་འཁྱགས་འཕྲང་ལ་བསྒུག་པ་དང༌། །བད་ཀན་ཞུ་
འཁྱགས་ཕྱི་རྗེས་བཅད་པའོ། །དེ་ལྟར་མི་ཤེས་སོ་མཚམས་གཅིག་ཏུ་འདོད། །རྨོངས་པའི་
ལུགས་ཡིན་གཞན་སྲོག་འདོར་བས་ན། །དེ་ཕྱིར་འཕྲང་གསུམ་འདི་ལྟར་ཤེས་པར་གྱིས། །
རྒས་དང་རླུང་ཆེའི་ཚ་བ་རླུང་གནས་འབབ། །མྱ་ངན་སེམས་ལས་འཕྲལ་གྱི་རླུང་རྐྱེན་འདོམ། །
ག་བུར་གཏར་བཤལ་ཚ་བ་བདའ་དྲགས་སོགས། །དེ་རྣམས་རིགས་ལ་ཚད་གཉའ་ཆག་
དུས་སུ། །རླུང་གིས་སྣ་བསླང་ཐོར་བུའི་རླུང་རྟགས་འོང༌། །ཐོར་བུའི་རླུང་གིས་ཚད་གཞུག་
བུས་པ་ཡིས། །རྩ་རྒྱུག་ཆུ་དམར་དྲོད་དང་སྐོམ་དད་ཆེ། །ལྕེ་སྐམ་རྔམ་པ་རྒོད་ལ་སོགས་པ་
ཡི། །ཚ་བའི་རྟགས་སྟོན་འཁྲུལ་བའི་ས་ཅིག་ཡིན། །ལྟར་སྣང་ཚ་བའི་རྗེས་འབྲངས་དེད་པ་
ན། །ཁ་ཐལ་རླུང་གིས་ཚ་བ་སྲོག་རྩར་འཕུལ། །རྩ་སྟོངས་ཞེས་བྱ་འདི་ལ་གསོ་ཐབས་དཀའ།  །
25-1-188

 
དེ་ཕྱིར་ཟས་ཀྱིས་སྔུན་བསུ་རླུང་སྣ་གླན། །ཧ་ཅང་བསུ་བ་སྔས་ན་ཚ་བའི་གཞུག །ཟས་ཀྱིས་
བཟུང་ནས་རྙིངས་ཚད་སྐྱེད་པ་ཡོད། །རླུང་གི་ཞུ་འཁྱགས་མི་གསལ་འཁྲུལ་སོ་ཆེ། །དེ་ཕྱིར་
ངོས་བཟུང་ཕྱི་ནང་གསང་གསུམ་སྟེ། །ཚད་གཞུག་རླུང་གིས་བུས་པའི་ཕྱི་རྟགས་སུ། །རྩ་རྒྱུག་
གྱུར་ཀྱང་སྟོང་ལ་མནན་མི་བཟོད། །ཆུ་མདོག་དམར་ཡང་དྭངས་ལ་ལྦུ་བ་ཆེ། །གཟེར་བ་ཡོད་
ཀྱང་མ་ངེས་གར་ཡང་འཕོ། །ལྕེ་སྟེང་སྐམ་ཡང་དམར་ལ་ཤིན་ཏུ་རྩུབ། །སྐོམ་དད་ཆེ་ཡང་མ་
འཐུངས་སྲན་པར་ཚུགས། །རྔམ་འདེགས་དབུགས་རྒོད་གྱུར་ཀྱང་སྣ་བུག་ཧར། །རླུང་གསང་
བརྫིས་ན་ན་སྟེ་སྲན་མི་བཟོད། །བསིལ་གཏར་བསྟེན་གྱིན་ཚད་པ་སླར་ཡང་སྐྱེ། །བུར་ཞོ་རུས་
ཐང་བསྟེན་གྱིན་ཚད་རྟགས་ནུབ། །ནང་གི་བརྟག་པ་རྩ་ནི་སྟོང་ལ་མྱུར། །ཆུ་མདོག་དམར་ལ་
དྭངས་ཤིང་ལྦུ་བ་ཆེ། །ལྕེ་སྟེང་དམར་ལ་སྐམ་ཞིང་རྩུབ་པ་སྟེ། །དེ་གསུམ་མཐུན་ན་ཁ་ཟས་
གློད་པས་ཆོག །ལྕེ་སྐམ་ཕན་ཆད་རླུང་འབུད་ཡོད་པ་ཡིན། །སྐམ་ལ་རིད་ན་རླུང་ལས་ཚད་ཁ་
མཐོ། །སྐམ་ལ་ནག་ན་རླུང་ཚད་ཕྱེད་མར་ཡོད། །དམར་ལ་སྐམ་རྩུབ་རླུང་ཉིད་ཟང་མ་ཡིན། །
སེར་ལ་སྐམ་ཁོག་རླུང་དང་མཁྲིས་པར་ལྡན། །སྐྱ་ལ་སྐམ་ཁོག་བད་རླུང་ཚ་བ་ཡིན། །སྐྱ་གླེག་
མདོག་མེད་ཚ་བ་བྱེར་ཞིང་རྙོགས། །དམར་འཇམ་རློན་ཞིང་མཉེན་ན་ནད་དང་བྲལ། །མན་
ངག་ལྡན་པས་ཞུ་འཁྱགས་མཐོང་བས་གསལ། །གསང་བ་ཕུགས་འཚོལ་སྨན་གྱིས་བརྟག་
པ་སྟེ། །བུ་རམ་གོ་སྙོད་སྒ་སྐྱ་བསྡུས་ཐང་ངམ། །རུས་བཅུད་གསུམ་མམ་བུར་ཞོ་གང་རུང་བ། །
ཁྱོར་གང་སྲོད་ལ་བཏང་པའི་དེ་ནུབ་ཏུ། །གཉིད་ཆེ་ཟུག་ཆུང་བླ་འཆོལ་ཉུང་བ་དང༌། །ནང་
པར་ལྕེ་རློན་ཤེས་པ་གསལ་ན་ངེས། །རྔམ་རྒོད་འདར་འབོག་སྨྲ་འཆལ་འབྲོས་པ་ན། །འཕྲལ་
དུ་མཐིལ་བཞི་ཚིགས་པ་བསྐུ་མཉེ་བྱ། །ཚིལ་བུ་བུ་རམ་ཕྱེ་གསུར་དུ་བས་བདུག །གོང་བཞིན་
སྣ་ལོན་མཚམས་སུ་ཕེབས་པར་ངེས། །ངེས་པ་རྙེད་ན་བསིལ་ཤ་གསར་པ་ཡི། །ཚོ་ཁུ་མེ་མ་
ཕྲད་དང་གསར་འཇམ་ཆང༌། །བ་ཤ་བཙོས་ཁེངས་སྒོག་སྐྱའི་ཆབ་མིག་དང༌། །བ་རའི་མར་
25-1-189


གསར་ཀ་ར་སྦྲང་སྦྱར་རྣམས། །དགོང་དང་ཐོ་རངས་རླུང་དུས་བསྟེན་པར་བྱ། །དེ་ལས་རྒྱས་
པ་ཚད་སྟོངས་བཅོས་དང་མཐུན། །ཁ་ཟས་སྔར་གློད་བསིལ་སྨན་གཞུག་བསྲིངས་ལ། །ཟས་
ཀྱིས་རླུང་མནན་བསིལ་གྱིས་ཚད་ལྷག་གདོན། །དར་མ་ནད་ཁམས་ཁྲག་མཁྲིས་ཆེ་བ་དང༌། །
མཁྲིས་པའི་གནས་སུ་ཚ་བ་བབས་པ་དང༌། །ཤ་ཆང་གཉིད་དང་དྲག་ཤུལ་ཚད་རྐྱེན་འདོམ། །
ཚ་བ་བཅོས་ཕྱིས་ཚ་བ་ཁ་ཐལ་དང༌། །ཚད་པ་བད་རླུང་གྲོགས་མེད་རྐྱང་པ་རྣམས། །ཚད་
པ་ཟད་ཀྱང་བད་རླུང་རྟགས་མི་འབྱུང༌། །དེ་ལ་ཟས་གློད་ཡེན་ལ་གཏད་རྗེས་ཀྱི། །རྩ་སྦུབས་
སྟོངས་པས་ཟས་ཚད་སྐྱེད་འགྱུར་བས། །རྩ་འདེགས་དྲོད་ཆེ་ཁ་སྐམ་ཤེས་པ་འཐིབ། །ཚད་
ལྷག་ཡོད་ཟེར་འཁྲུལ་པའི་ས་ཡིན་ཏེ། །རྨོངས་པས་དེ་ལ་བསིལ་གྱིས་དེད་པ་ཡིས། །ཟུངས་
ཟད་རླུང་ལས་གྱུར་པའི་ཚ་བར་ལྡོག །དེ་སྲོག་གཤིན་རྗེའི་ལག་ཏུ་གཏད་དང་མཚུངས། །
ཟས་གློད་སྔས་ན་རྒྱས་པའི་ཚ་བར་ལྡོག །གང་ཡང་མི་ཤེས་རྨོངས་པ་མགོ་བོ་འཁོར། །མ་
སྔས་མ་ཕྱིས་འཕྲང་ལ་བསྒུག་པ་གཅེས། །ངོས་བཟུང་རྟགས་ལ་དོན་མེད་རྔུལ་འབྱུང་ཞིང༌། །
དང་ག་མི་འགག་སྐོམ་དད་ཆུང་བ་དང༌། །གཉིད་དུས་ཟ་ཟི་མི་འོང་རྔམ་པ་བདེ། །སྣ་རྡོག་
མཉེན་ཞིང་ཆུ་མདོག་དམར་སེར་དང༌། །རྩ་རྒྱུད་ཕྱི་གྲིམས་ཁོང་ལྷོད་ཐ་མལ་གྲངས། །ལྕེ་སྟེང་
སེར་ལ་སྐམ་ཁོག་མཐའ་མ་དམར། །ཤ་རྙིང་མར་རྙིང་བུ་རམ་ཆང་ལ་སོགས། །བསྟུད་དྲགས་
པ་དང་ཧ་ཅང་ཚད་ལས་ཐལ། །ཟོས་འགྲོག་ཚ་བ་སྐྱེ་ཡང་ཟས་མི་བཅད། །དེ་ལས་ཐལ་ནས་
ཟུངས་ཟད་རླུང་གྱུར་ན། །ཤ་འཆོར་མདོག་སེར་ལྕེ་ཡིས་རོ་མི་ཚོར། །རྔམ་རྒོད་བ་སྤུ་ལྡང་ཞིང་
སྐོམ་དད་ཆེ། །སྐྲ་རྩ་སེང་ལ་སྐྲ་འདབ་བག་ཙམ་འདར། །མཁྲིས་པའི་ཞུ་འཁྱགས་མི་འགྱུར་
ངོས་འཛིན་ཡིན། །དེ་ལ་བཅོས་ཐབས་ཚད་རྟགས་ནུབ་པ་དང་། །གྲང་རྟགས་མི་སྒུག་བུར་
ཞོ་ཚོ་ཁུ་དང༌། །ཆང་འཇམ་ཆུ་བསྲེས་ཆ་ཡིས་བྲིད་ལ་བཏང་། །དེ་ཡིས་ཚ་བ་མི་སྐྱེ་འཁྲུལ་
མི་སྲིད། །ནད་ཟད་ཟས་ཀྱིས་ཚ་བ་སྐྱེར་མངོན་ན། །བསྲེག་པའི་ནུས་མེད་ཐལ་ཚན་དྲོད་
25-1-190


དང་འདྲ། །གལ་ཏེ་ཚ་བ་བདའ་དྲགས་ཁ་ཐལ་ན། །ཟུངས་ཟད་རླུང་གྱུར་ཚ་བར་ལྡོག་པའི་
ཕྱིར། །རུས་རྙིང་བསྡུས་ཁུར་ཤིང་ཀུན་སྤོད་སྣ་དང་། །བིག་པན་ཐལ་བ་དྲོ་འཇམ་ཁྱེའུ་སུས་
བཏང༌། །ཡང་ན་ཁ་རུ་ཚྭ་དང་ཛཱ་ཏི་དང༌། །མར་རྙིང་སྦྱར་བ་སུམ་ཡར་བཏང་བར་བྱ། །དེས་
མ་ཐུབ་ན་ཛཱ་ཏི་གསུམ་མམ་ལྔ། །ཁ་རུ་ཚ་ལ་ཞོ་བཞི་བུར་སྲང་གཅིག །མར་རྙིང་སྲང་བདུན་
ལྡེ་གུར་བྱས་ཏེ་བཏང༌། །མི་རུས་བསྡུས་ཁུར་སྒོག་སྐྱ་ཤིང་ཀུན་བྲན། །མཐིལ་བཞི་ཚིགས་
པ་རླུང་གསང་སྐུ་མཉེ་དང༌། །རླུང་གསང་བཞི་བསྲོ་མར་རྙིང་འཇམ་རྩི་བྱ། །ཤ་ཆང་མར་རྙིང་
བུ་རམ་དྲོད་བཅུད་བསྟེན། །བྱིས་པ་བད་ཀན་གྲང་ཤས་ཆེ་བ་དང་། །བད་ཀན་ཡུལ་དུ་ཚ་བ་
བབས་པ་དང༌། །མ་སྨིན་གཏར་བསིལ་ཚ་བ་བྱེར་རྐྱེན་འདོམ། །ཚད་གཞུག་མི་མངོན་གྲང་
རྟགས་ཁ་ཡར་འོང༌། །རྩ་དལ་ཆུ་མདོག་སྔོ་ལ་དང་ག་འགག །ལྕེ་རློན་གདོང་སྐྱ་ཁ་ཟས་འཇུ་
བ་དཀའ། །བག་ལ་ཉལ་བས་གྲང་བར་འཁྲུལ་བ་ཡོད། །དེ་ལ་བརྟེན་ནས་ཟས་གློད་ཚ་བར་
ལྡོག །ཧ་ཅང་ཐལ་དྲགས་དམུ་ཆུར་འགྱུར་བ་ཡོད། །དེ་མ་ཡིན་པ་འདི་ལ་ཐལ་སྐྱོན་ཆུང༌། །དེ་
ཕྱིར་ཚ་བ་ཟད་ངེས་ཕྱི་རྗེས་བཅད། །ངོས་བཟུང་རྩ་རྒྱུད་བྱིང་དལ་ལྷོད་པར་འཕར། །ཆུ་ཁ་སྙི་
ལ་མདོག་སྔོ་ཤིན་ཏུ་དྭངས། །སྔར་གྱི་གོས་ཀྱིས་མི་དྲོས་སྐྲ་རྩ་སེང༌། །ཁ་ཟས་འཇུ་བའི་སྟོབས་
དང་སྐོམ་དད་ཆུང༌། །མིག་ཕུག་བྲང་དང་བསུས་པ་རྐང་བོལ་སྐྲངས། །དེ་དུས་ཚ་བ་མེད་ངེས་
རྟགས་ཡིན་པས། །གོང་དང་མི་འདྲ་ཁ་ཟས་བྲིད་མི་དགོས། །ཤ་ཆང་དྲོད་བཅུད་ལྷུག་པར་
བཏང་བས་ཆོག །འཇུ་དཀའ་སྦོ་སྒྲེག་ཁ་མངལ་མཆིལ་མ་མང༌། །རྒྱམ་ཚྭ་གསུམ་ཐང་སེ་འབྲུ་
བཞི་པའམ། །རྒོད་མ་ཁ་ཡི་ཕྱེ་མས་མེ་དྲོད་བསྐྱེད། །ཅེས་གསུངས་སོ། །བདུད་རྩི་སྙིང་པོ་
ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཚ་བའི་རི་ཐང་མཚམས་བསྟན་པའི་ལེའུ་
སྟེ་བཅུ་བཞི་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།  །
25-1-191

 
མ་སྨིན་ཚ་བའི་རྒྱུ་རྐྱེན་ངོ་བོ་གང༌། །མ་སྨིན་ཚ་བའི་མིང་དུ་ཅི་ཕྱིར་བཏགས། །དབྱེ་བ་རྟགས་
དང་བཅོས་ཐབས་བཤད་དུ་གསོལ། །དེ་སྐད་ཞུས་པའི་དོན་ལ་ལན་གསུངས་པ། །མ་སྨིན་ཚ་
བའི་རྒྱུ་ནི་བད་རླུང་ཡིན། །དེ་ལ་རྐྱེན་གསུམ་རང་བཞིན་མ་སྨིན་དང་། །ནད་ཁམས་རྐྱེན་གྱི་
སྒོ་ནས་མ་སྨིན་པའོ། །རང་བཞིན་རྒྱུ་ཡིས་མ་སྨིན་ཞེས་བྱ་བ། །དེ་རྒྱུ་བད་རླུང་བསྡོངས་པ་ཅི་
ཞེ་ན། །དཔེར་ན་རླུང་མཁྲིས་བད་ཀན་ཕ་སྤུན་འདྲ། །གཅིག་ལ་རྐྱེན་བྱུང་གཉིས་ཀྱང་མི་བདེ་
ལྟར། །རྐྱེན་བཞི་མཁྲིས་པ་ལ་ཕོག་དེས་བསླང་བས། །ཞར་ལ་བད་རླུང་གཉིས་ཀྱང་མི་བདེ་
འཁྲུག །དེ་ཕྱིར་མ་སྨིན་ཚ་བ་འབྱུང་བ་ཡིན། །དེ་ཡང་ཁྱད་པར་རིམས་ལ་མི་འབྱུང་མེད། །
ནད་ཁམས་ཡུལ་དུས་རང་བཞིན་ན་སོ་དང༌། །གནས་དང་ནད་ཁམས་ཟས་སྤྱོད་རྐྱེན་དབང་
གིས། །བད་རླུང་ལྡན་པས་སྨིན་པ་དཀའ་བར་འགྱུར། །རྐྱེན་ནི་མ་སྨིན་ཚ་བ་བྱུང་དུས་སུ། །
ཟས་སྤྱོད་གཉེན་པོ་སྔས་པས་བྱེར་བ་ཡིན། །དེས་བསྐྱེད་མ་སྨིན་ཚ་བ་ཞེས་བྱ་བ། །ཚ་བ་
བད་རླུང་བསྡོངས་ཟླར་བཅས་པ་ཡིས། །རླུང་གིས་ཚ་བ་ཟུངས་ལ་ཁྱབ་པར་གཏོར། །བད་
ཀན་ཚ་བའི་མགོ་མནན་སྐྱེར་མི་སྟེར། །ཤིང་རློན་མེ་སྔོན་དུ་བ་འབྱུང་བ་ལྟར། །བསྡོངས་ཟླ་
མ་ཕྱེད་ནད་ཤུགས་མ་རྫོགས་པས། །སྐྱེ་འཕྲོ་མ་ཆད་མ་སྨིན་ཞེས་སུ་བརྗོད། །འདི་དུས་ཚ་བ་
ཟུངས་དང་དབྱེར་མེད་འདྲེས། །ནད་ཁྲག་ཟུངས་ཁྲག་འོ་མ་ཆུ་འདྲེས་འདྲ། །ཡུངས་དཀར་
མར་བཞིན་དེ་ལུས་ཁྱབ་པར་གནས། །དབྱེ་བ་རང་ཉིད་སྨིན་དང་སྨིན་ལོང་མེད། །སྨིན་དུ་མི་
འདོད་ཚ་བ་རྣམ་པ་གསུམ། །རང་ཉིད་སྨིན་ལ་སྟོབས་ཆེན་སྟོབས་ཆུང་གཉིས། །སྨིན་ལོང་
མེད་ལ་གནད་དུ་བབས་པ་དང་། །སྦྱོར་བ་ལོག་པས་སྨིན་ལོང་མེད་པ་གཉིས། །ཚ་བ་སྨིན་དུ་
མི་འདོད་རྐྱེན་གསུམ་སྟེ། །རླུང་དང་བད་ཀན་རྐྱེན་གྱིས་བྱེར་བ་འོ། །དེ་ལ་མ་སྨིན་གཉེན་པོ་
བསྟེན་སྔས་པས། །བྱ་ཤོར་བྱེར་སྡིགས་རྙོགས་པ་བཞི་རུ་འགྱུར། །མ་སྨིན་རྟགས་ལ་སྤྱི་དང་
བྱེ་བྲག་གཉིས། །ཕྱིས་འབྱུང་ཁ་དམར་སྨིན་པའི་རྟགས་དང་བཞི། །སྤྱི་རྟགས་རྩ་རྒྱུད་ཕྲ་ཞིང་
25-1-192


གཡོ་ལ་མགྱོགས། །ཆུ་མདོག་དམར་སེར་སྐ་ལ་རྙོག་མ་ཅན། །ལྕེ་སྐྱ་སྟེང་དུ་རླུང་འབྲུམ་
དམར་རྩིམ་འབྱུང་། །ལུས་དྲོད་མི་སྙོམས་སྲོད་ལ་ཤ་དྲོད་ཆེ། །གཡལ་མང་སྒྱིད་པ་སྐྱུར་ལ་བྱ་
རྙང་བྱེད། །ཁ་ཁ་མགོ་དང་བྱིན་ཉྭ་ཚིགས་གཞི་ན། །གྲང་ཤུམ་བྱེད་ཅིང་མེ་དང་ཉི་མ་སྙེག །རྨི་
ལམ་ཟ་ཟི་མང་ལ་སེམས་ལས་ཆེ། །མ་སྨིན་ཚ་བ་ཀུན་ལ་རྟགས་དེ་འབྱུང༌། །བྱེ་བྲག་རང་ཉིད་
སྨིན་པའི་ཚ་བ་དེ། །ནད་ཁམས་ཁྲག་མཁྲིས་ཤས་ཆེའི་མི་རྣམས་ལ། །ཚ་བ་ཁྲག་མཁྲིས་རྔུལ་
གནས་བབས་པ་ཡི། །ཟས་དང་སྤྱོད་ལམ་ཚ་གྲང་མ་ལོག་པས། །ལུགས་སུ་འབྱུང་བ་རྐྱང་
པའི་ཚ་བ་ཡིན། །ཞག་གསུམ་ལྔ་བདུན་དུས་ན་རང་ཉིད་སྨིན། །རྩ་ཆུ་དང་ག་མགོ་དང་ཚིགས་
གཞི་ན། །གྲང་ཤུམ་དག་ལས་ནད་སྟོབས་ཆེ་ཆུང་དཔག །གནད་དུ་བབས་པས་སྨིན་ལོང་
མེད་པ་ནི། །འགྲམས་འཁྲུགས་རིམས་དུག་མོད་དུ་དོན་སྣོད་བབས། །དོན་སྣོད་འདྲུལ་ཕྱིར་
སྨིན་དུས་སྡོད་ལོང་མེད། །སྦྱོར་བ་ལོག་པས་སྨིན་ལོང་མེད་པ་ནི། །ཚ་བ་བད་རླུང་གཉིས་ལ་
བབས་པ་ལས། །ཟས་སྤྱོད་ཤ་ཆང་ཤུགས་དྲག་འདོམ་པ་ཡིས། །སྨིན་པའི་ལོང་མེད་སྲོག་ལ་
མྱུར་དུ་རྒོལ། །དེ་རྟགས་ལུས་སྟོབས་དབང་པོའི་གཟི་མདངས་འཆོར། །ན་མ་ཐོག་ནས་ཟུག་
ཆེ་ཅར་ལ་ཐེབས། །ཉལ་དང་སྙེས་དང་ཙོག་པུར་འདུག་ལ་སོགས། །གང་ཡང་བདེ་མེད་སྨིན་
ལོང་མེད་པ་ཡིན། །རླུང་གིས་ཚ་བ་སྨིན་དུ་མི་འདོད་རྟགས། །རྩ་འཁྲུག་ལུས་ཀུན་བརྡུངས་
སྙམ་སྟོང་སྐྱུགས་བྱེད། །གཡལ་འདར་མིག་དཔངས་མཐོ་ལ་མཆི་མ་འཛག །ཚ་བ་བད་ཀན་
དག་གིས་མ་སྨིན་ན། །ཁ་མངལ་མཆིལ་སྣབས་མང་ལ་ཕོ་བ་རྫིང༌། །དང་ག་མི་བདེ་སྐྱུག་ཅིང་
ལུས་དྲོད་ཆུང༌། །ཆུ་གྲང་ཞོ་དར་གཏར་བཤལ་རྔུལ་ཐང་སོགས། །རྐྱེན་གྱིས་བྱེར་བས་ལུས་
རྔུལ་ཤེད་ཉམ་ཆུང༌། །གྲང་ཤུམ་རེས་ཡོད་རེས་མེད་མེ་ཉི་འདོད། །དེ་ཡང་རླུང་ཤས་ཆེ་ན་བྱ་
ཤོར་ཏེ། །བཅོས་སུ་མི་འདོད་ཚ་བ་ལམ་ནས་འཁྱོག །ཆུ་དམར་རྩ་རྒྱུད་ཕྲ་གྲིམས་སྟོང་ལ་
མགྱོགས། །གློ་གསོར་གཉིད་ཆུང་གཡལ་མང་རུས་ཚིགས་ན། །བྱ་ཤོར་མ་གླན་སྟོངས་ཏེ་རླུང་
25-1-193


ལྟར་འཚུབ། །ཁྲག་མཁྲིས་ཤས་ཆེའི་ཚ་བ་བྱེར་འགྱུར་ཏེ། །རྩ་རྒྱུད་ཕྲ་མགྱོགས་ཆུ་དམར་
ཚིགས་གཞི་ན། །གློ་འབུད་རྔུལ་ཁ་སྙི་ལ་པགས་པ་བརྩེ། །བྱེར་ཏེ་མ་བསྡུས་རྙིངས་ནས་རྩི་
ལྟར་ཞེན། །བད་ཀན་ཤས་ཆེ་ཚ་བའི་མགོ་སྡིགས་ཏེ། །ཕོ་མཆིན་མཁལ་འཁོར་མགོ་དང་
ཚིགས་གཞི་ན། །དང་ག་མི་བདེ་འཇུ་དཀའ་སྟོང་སྐྱུགས་བྱེད། །སྡིགས་པ་མ་བསེངས་གབ་
ནས་མུན་ལྟར་འཐིབ། །ཆུ་སེར་ཤས་ཆེ་ཚ་བ་རྙོགས་པར་འགྱུར། །རྩ་རྒྱུད་ཕྲ་མགྱོགས་ཆུ་
མདོག་དམར་ལ་སྨུག །སྙིང་སྤྲུག་མིག་ལྕིབས་རྐང་བོལ་ཅུང་ཟད་གཡོ། །གློ་ཆུང་འདེགས་
ཤིང་རོ་སྟོད་གཟེར་ཕྲན་འོང༌། །རྙོགས་པ་མ་བསལ་འོར་ལྷུང་ཆུ་ལྟར་འཕྱོ། །མ་སྨིན་ཚ་བ་
ཕྱིས་ཀྱི་འབྱུང་ཚུལ་ནི། །ནད་སྟོབས་ཆེ་ལ་སྨིན་དཀའ་ཕལ་ཆེར་འཆི། །སྨིན་དཀའ་ནད་
སྟོབས་ཆུང་ཡང་ཡུན་དུ་སྦྱོང༌། །སྟོབས་ཆེ་སྨིན་བླ་འཆི་སྐྱེན་འཚོ་སྐྱེན་ནད། །སྟོབས་ཆུང་སྨིན་
པ་བླ་ན་མྱུར་དུ་འཚོ། །དེ་བཞིན་ཡུལ་དུས་རང་བཞིན་ན་སོ་དང༌། །ནད་ཁམས་ཁྲག་མཁྲིས་
ཅན་ལ་ཟས་སྤྱོད་ལོག །ཚད་སྟོབས་ཆུང་ན་རང་ཤུགས་སྨིན་འགྱུར་ཏེ། །སྟོབས་ལྡན་ཚ་བ་
རྒྱས་པ་ཕལ་ཆེར་འཆི། །དེ་བཞིན་བད་རླུང་གྲང་བའི་ནད་གཞི་ལ། །ཟས་དང་སྨན་དཔྱད་
སྤྱོད་ལམ་བསིལ་བསྟེན་པས། །ཚ་བ་མ་སྨིན་ཡུན་དུ་སྦྱོང་བར་འགྱུར། །དེ་ལ་ཤ་ཆང་དྲག་
ཤུལ་ཉིན་གཉིད་ཤོར། །ནད་སྟོབས་ཆུང་ན་སྨིན་པ་བླ་བ་སྟེ། །སྟོབས་ཆེ་སྨིན་ལོང་མེད་པའི་
ཚ་བར་འགྱུར། །སྨིན་རྟགས་ལྕེ་སྟེང་དཀར་སེར་རླུང་འབྲུམ་མེད། །རྩ་སྟོད་རྒྱུག་ཅིང་རྩ་སྨད་
དམའ་ལ་གྲིམས། །ཆུ་མདོག་དམར་སེར་ཀུ་ཡ་ལིང་གིས་འདྲིལ། །བསིལ་འདོད་ལུས་ལ་དྲི་
འབྱུང་དབང་པོ་གཡུང༌། །ཁྱད་པར་གྲང་ཤུམ་ཆད་ན་སྨིན་པ་སྟེ། །འབུད་བྱེད་མེ་ཤིང་ཟད་
པའི་མེ་དང་འདྲ། །གསོ་བའི་དུས་ཡིན་དེ་ལས་ཐལ་མི་བྱ། །བཅོས་པའི་ཐབས་ལ་སྤྱི་དང་བྱེ་
བྲག་གཉིས། །སྤྱི་ལ་བཅོས་པའི་ཚུལ་དང་གཉེན་པོ་གཉིས། །བཅོས་པའི་ཚུལ་ལ་རྣམ་པ་
གཉིས་ཡིན་ཏེ། །རིམས་ཀྱི་ཚ་བ་ཆང་ལྟར་སྨིན་པར་བྱ། །འགྲམས་འཁྲུགས་ཚ་བ་དགྲ་ཟིན་
25-1-194


ལྟ་བུར་དབྱེ། །བཅོས་པའི་གཉེན་པོ་སྨན་དཔྱད་ཟས་སྤྱོད་བཞི། །སྨན་དུ་མ་ནུ་བཞི་ཐང་དྲོ་
འཇམ་བསྟེན། །ཚ་བ་མི་འཕེལ་བད་རླུང་ཞི་བར་བྱེད། །ཁྲག་མཁྲིས་ཤས་ཆེ་སླེ་ཏྲེས་འབྲས་
བུ་གསུམ། །བསྡུས་འཇམ་བསྟེན་པས་ཚ་བ་དྭངས་སྙིགས་འབྱེད། །ཡུན་དུ་སྨིན་དཀའ་བིག་
པན་ཐལ་བ་དང༌། །བཟང་པོ་གསུམ་དང་སླེ་ཏྲེས་པུ་ཤེལ་རྩེ། །ད་ལིས་བྱི་ཚེར་ཕྱེ་མ་རུས་ཁུས་
དབུལ། །དཔྱད་དུ་ཕོ་བར་དུགས་བྱ་མཐིལ་བཞིར་བྱུག །ཟས་སྤྱོད་ཕྱེ་ཚོད་དྲལ་ཐུག་བསྐོལ་
གྲང་ཆུ། །དེ་སོགས་བཅུད་མེད་འཇུ་བླ་དྲོ་འཇམ་བསྟེན། །ནང་ནུབ་དུས་སུ་ཆུ་སྐོལ་ཚན་མོ་
བཏུང༌། །སྤྱོད་ལམ་གོས་དྲོ་ཉི་གྲིབ་མཚམས་སུ་བསྡད། །དྲག་ཤུལ་མེ་ཉིས་གདུངས་དང་ཉིན་
གཉིད་ལོག །ཤ་ཆང་དྲོད་བཅུད་མཁྲིས་ཚད་སྐྱེད་ཕྱིར་སྤང༌། །གྲིབ་འཁྱགས་ས་རླན་བསེར་
བུ་གྲང་བ་དང༌། །ཞོ་དར་ཆུ་གྲང་རྗེན་ཟས་འཇུ་དཀའ་རྣམས། །བད་རླུང་གྲོགས་ལ་ཕོག་པས་
སྤང་བར་བྱ། །བཤལ་གཏར་རྔུལ་དབྱུང་བསིལ་ཐང་ཕྱེ་མ་རྣམས༌། འདི་དུས་མི་བསྟེན་ཚ་བ་
ལམ་ནས་འཁྱོག །དེ་ལྟར་སྨིན་བྱེད་སྦྱོར་བ་མི་ཤེས་པར། །ཁ་ཅིག་སྨིན་པ་བླ་ཞེས་དྲོད་སྦྱོར་
བསྟེན། །ནད་ཀྱི་སྟོབས་བསྐྱེད་སྲོག་ལ་ངེས་པར་རྒོལ། །ཁ་ཅིག་མ་སྨིན་ཚ་བ་བསིལ་གྱིས་
བཅོས། །ཁ་དྲག་སྐྱེལ་མའི་འགྲོན་པོ་བཅོམ་པ་འདྲ། །གཉེན་པོ་གྲོགས་ཀྱི་ཐོག་ཏུ་བབས་པ་
ན། །མཁྲིས་ཚད་མི་གསོད་བད་རླུང་སྐྱེད་བྱེད་པས། །གྲོགས་འཕེལ་བས་ནི་ཚ་བ་ཉིད་འཕེལ་
བྱེད། །དེ་ཕྱིར་སྨིན་བྱེད་བསིལ་དྲོད་སྙོམས་བསྟེན་ན། །ཕྱི་ནས་མི་སྐྱེ་སྔར་སྐྱེས་འབྱེད་ཅིང་
སེལ། །བྱེ་བྲག་རང་ཉིད་སྨིན་པའི་ཚ་བ་ལ། །སྟོབས་ཆེ་སྨིན་བྱེད་གཉེན་པོ་ཚུལ་བཞིན་
བསྟེན། །སྟོབས་ཆུང་ནད་ལ་ཚ་བ་བྱ་ལྟར་སྤུར། །འབྲས་བུ་གསུམ་དང་ཏིག་ཏ་ལི་ག་དུར། །
བ་ལེ་ཀ་དང་ཨུཏྤལ་སླེ་ཏྲེས་བསྐོལ། །ཕུལ་ཕྱེད་རྩེ་འཇམ་བཏང་ལ་དྲོ་སར་བསྙལ། །སྨན་ཞུ་
ལུས་རྔུལ་གྱུར་ནས་གདོང་པ་བྱིབས། །རྔུལ་ཐོན་བལ་དང་ཕྱེས་ཕྱི་རླུང་གནོན་བཏང༌། །གལ་
ཏེ་ཐོན་དཀའ་སྣེའུའི་རླངས་དུགས་བྱ། །ཁ་ཅིག་སྨན་མ་ཞུ་བར་གདོང་པ་བྱིབས། །སྨན་ནུས་
25-1-195


མ་ཐོན་ནད་པའི་སྡུག་སྲན་ཟད། །རྔུལ་མེད་ནད་འཁྲུགས་ཉེས་པ་ཕྱིར་ལ་ཆེ། །དེ་ལྟར་རྔུལ་
འདོན་ཀུན་ལ་ཤེས་པར་གྱིས། །དེ་བཞིན་ཉི་མ་གསུམ་དུ་རྔུལ་བཏོན་ལ། །དེ་རྗེས་སྐར་ཆུ་རྫེ་
འུ་གང་དོ་གསུམ། །རིམ་པས་ཉི་མ་གསུམ་དུ་ལུས་ལ་བྲན། །དེ་ནས་གི་ཝཾ་བསིལ་གསུམ་ཕྱེ་
མ་བསྟེན། །དེ་ཡིས་ཚ་བ་ལམ་ནས་ཟློག་པར་ངེས། །སྨིན་ལོང་མེད་པའི་ཚ་བ་བཅོས་པ་ནི། །
བད་རླུང་དུས་སུ་སྨིན་བྱེད་ཐང་བསྟེན་ཞིང༌། །མཁྲིས་པའི་དུས་སུ་བསིལ་གྱི་གཉེན་པོས་
བསད། །སྨིན་དུས་བསྒུགས་ན་ལ་འདའ་སྲོག་འཕྲོག་འགྱུར། །དེ་བས་བྱེར་ཞིང་རྙོགས་ལ་མི་
ལྟ་བར། །ནད་དང་སྨན་དཔྱད་སྲོག་ལ་ཐོབ་ཤ་བྱ། །བད་ཀན་མ་སྨིན་སེ་འབྲུ་སྐྱུ་རུ་ར། །སྒ་སྐྱ་
པུ་ཤེལ་རྩེ་ཡི་བསྡུས་ཐང་བཏང༌། །ཡང་ན་སེ་འབྲུ་སྐྱུ་རུ་བྱི་ཚེར་བ། །ཡང་ན་རྒྱམ་ཚྭ་གསུམ་
པའི་བསྡུས་ཐང་བཏང༌། །རླུང་གིས་མ་སྨིན་སླེ་ཏྲེས་བུར་རྙིང་ཐང༌། །ཡང་ན་རུས་བཅུད་
གསུམ་གྱི་བསྡུས་ཐང་བཏང༌། །རྐྱེན་གྱིས་བྱེར་ན་བིག་པན་ཆང་སྦྱར་བྱིན། །གྲུ་མོ་པུས་མོ་
མན་ཆད་ཆུ་ཡིས་བྲན། །ཕྱི་དེ་ནང་པར་དཔྱི་དཔུང་མན་ཆད་ལ། །དེ་ཡི་ཕྱི་དེ་ནང་པར་ལུས་
ཀུན་བྲན། །དེ་ནས་འབྲས་བུ་ཏིག་ཏའི་བསྡུས་གྲངས་བསྟེན། །བཅོས་སྔས་མ་སྨིན་ཚ་བ་བྱ་
ཤོར་ན། །སྲེ་ལོང་ཐང་བཏང་མཐིལ་བཞི་རླུང་གསང་བྱུག །ཁོལ་བུར་ན་འམ་གཟེར་སར་
དུགས་ཀྱིས་བདུག །མ་ནུ་བཞི་ཡི་བསྡུས་ཐང་ཚན་མོ་བསྟེན། །ཤ་གསར་མར་གསར་ཡོས་
ཆང་བྱ་ཤོར་གླན། །མ་སྨིན་བྱེར་ལ་སྲེ་ལོང་རུས་ཐང་བཏང་། །དེ་ནས་འབྲས་བུ་གསུམ་གྱི་
བསྡུས་གྲང་བླུད། །དེ་རྗེས་བཟང་པོ་དྲུག་གི་ཕྱེ་མ་སྦྱར། །བརྩེ་འཕྲོ་ཆད་ནས་(ཨ་རུ་ལྕུམ་རྩའི་)
འཇམ་བཤལ་བཏང་བས་འཚོ། །ཁ་ཟས་བསིལ་བཅུད་བསྟེན་པས་བྱེར་བ་སྡུད། །མ་སྨིན་
མགོ་སྡིགས་སེ་འབྲུ་བཞི་པ་སྦྱར། །སྲེ་ལོང་སྒ་བསྲེགས་ཐང་བཏང་འཇམ་བཤལ་བྱ། །བཅུད་
མེད་དྲོ་འཇམ་ཟས་བསྟེན་མགོ་སྡིགས་སེང༌། །མ་སྨིན་རྙོགས་ལ་སླེ་ཏྲེས་པི་པི་ལིང༌། །འབྲས་
གསུམ་ཐང་བཏང་རུ་ཐུང་སྣོད་ཀ་གཏར། །དེ་ནས་ཙན་དན་གི་ཝཾ་གུར་གུམ་གསུམ། །ཚད་
25-1-196


སྟོབས་སྦྱར་ཏེ་རྭ་གསུམ་བ་ཤ་ཀ །སྤོས་དཀར་སོ་མ་ར་ཛ་བྲག་ཞུན་ཕྱེ། །ཐུན་སྐྱུངས་ཡུན་
བསྲིངས་སེང་ལྡེང་ཐང་གིས་དབུལ། །(འབྲས་གསུམ་ལྕུམ་རྩ་སྔོན་བུ་སྤོས་དཀར་བ་ཆུའི་)བཤལ་བཏང་
རྗེས་ལ་(ཚིགས་པ་དང་པོ་བཅུ་གསུམ་བཅོ་བརྒྱད་མེ་མཉམ་གསང་རྣམས་ལ་)མེས་བཅད་རྙོགས་པ་བསལ། །དེ་
ལྟར་མ་སྨིན་པ་ཡི་ཚ་བ་དེ། །ཚ་བ་ཀུན་གྱི་སྔོན་དུ་འབྱུང་བ་སྟེ། །ཁྱད་པར་རིམས་ལ་མ་སྨིན་
ཤས་ཆེར་འབྱུང་། །མ་སྨིན་རྟགས་དང་གང་ལྡན་སྨིན་བྱ་གཅེས། །དུས་ཚོད་སྨིན་རྟགས་མ་
ཤར་བར་དུ་བཅོས། །སྨིན་ལེགས་ཚ་བ་ཆོམས་སླ་འཚོ་བ་སྐྱེན། །བཅོས་ཉེས་གབ་རྙིངས་
རྒྱས་སྟོངས་རྙོགས་འགྱུར་བ། །དེས་ན་འདི་དུས་བཅོས་ཀ་གཟབ་པར་བྱ། །ཞེས་གསུངས་སོ། །
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཚ་བ་མ་སྨིན་པ་བཅོས་
པའི་ལེའུ་སྟེ་བཅོ་ལྔ་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས། །
ཚ་བ་རྒྱས་པའི་རྒྱུ་རྐྱེན་ངོ་བོ་གང༌། །ཚ་བ་རྒྱས་པའི་མིང་དུ་ཅི་ལྟར་བཏགས། །དབྱེ་བ་རྟགས་
དང་བཅོས་ཐབས་བཤད་དུ་གསོལ། །དེ་ལྟར་ཞུས་པའི་དོན་ལ་ལན་གསུངས་པ། །རྒྱས་
ཚད་རྒྱུ་ནི་གནོད་བྱེད་མཁྲིས་པ་སྟེ། །ངོ་བོ་ཚ་ཞིང་རྣོ་ལ་དྲི་མནམ་པའོ། །དེ་ལ་རྒྱས་རྐྱེན་རང་
བཞིན་རྒྱས་པ་དང༌། །དུས་ཀྱིས་རྒྱས་དང་རྐྱེན་གྱིས་རྒྱས་པའོ། །རང་བཞིན་མ་མོ་མཁའ་འགྲོ་
འཁྲུགས་པ་དང༌། །སྟོན་དཔྱིད་ཚ་སྒོའི་ཡུལ་དུས་འཛོམ་པ་དང༌། །ཤ་ཆང་ལ་སོགས་ཟས་
སྐོམ་དྲོད་བཅུད་དྲགས། །སྤྱོད་ལམ་དྲག་ཤུལ་རྐྱེན་གྱིས་འཁྲུགས་པ་ལས། །ཚ་བ་རྣོ་དྲོའི་མེ་
དྲོད་ཐང་ལ་ལྷགས། །ལུས་ཟུངས་ཁྲག་དང་དྲི་མ་རྔུལ་ལ་རྒྱས། །དུས་ནི་སྨིན་དང་ཚ་བའི་སྒང་
ལ་བབས། །རྐྱེན་ནི་མ་སྨིན་ཚ་བ་ཡུལ་དུས་དང༌། །རང་བཞིན་ན་སོ་གནས་དང་ནད་ཁམས་
རྣམས། །མཁྲིས་པར་འདོམ་ལ་ཟས་སྤྱོད་ལོག་པ་ཡིན། །ནད་སྨིན་ཤུགས་རྫོགས་རྐྱང་པའི་
ཚ་བ་དེས། །ལུས་ཟུངས་སྲེག་པར་བྱེད་ཕྱིར་རྒྱས་ཞེས་བྱ། །དཔེར་ན་ཤིང་སྐམ་མེ་ཡི་ཕུང་པོ་
25-1-197


འདྲ། །དབྱེ་བ་རིགས་དང་སྟོབས་དང་བབས་སྒོས་དབྱེ། །རིགས་ཀྱིས་དབྱེ་ན་རིམས་རྒྱས་
འཁྲུགས་རྒྱས་གཉིས། །སྟོབས་ཀྱིས་དབྱེ་ན་སྟོབས་ཆེན་སྟོབས་ཆུང་གཉིས། །བབས་སྒོས་
དབྱེ་ན་སྤྱི་དང་བྱེ་བྲག་གཉིས། །བྱེ་བྲག་སྙིང་སྲོག་གློ་མཆིན་མཆེར་མཁལ་དྲུག །ཕོ་བ་མཁྲིས་
པ་བརྒྱད་ལ་རྒྱས་པའོ། །རྒྱས་པའི་རྟགས་ལ་སྤྱི་དང་བྱེ་བྲག་གཉིས། །སྤྱི་རྟགས་རྩ་ནི་སྦོམ་ལ་
དྲག་པ་དང༌། །འབུར་འདྲིལ་མཁྲང་གྲིམས་མྱུར་ལ་མགྱོགས་པར་འཕར། །ཆུ་མདོག་དམར་
སེར་དྲི་མནམ་རླངས་པ་ཆེ། །ལུད་པ་དམར་སེར་དུད་ཁ་མང་དུ་ལུ། །དབུགས་ཐུང་གཟེར་
དྲག་ཁ་སྐམ་སོ་དྲེག་ཆགས། །ལུས་ལྕི་དང་ག་མི་བདེ་སྐོམ་དད་ཆེ། །སྙིང་ལ་བསིལ་འདོད་
ལུས་ལ་རྔུལ་དྲི་མནམ། །ཁྱད་པར་རིམས་རྒྱས་མགོ་ན་ཟ་ཟི་མང༌། །སྟོབས་ཆེན་སྟོབས་ཆུང་
ནད་ཀྱི་སྟོབས་ལས་དཔག །བྱེ་བྲག་སྙིང་ལ་ཚ་བ་རྒྱས་པ་ནི། །མྱོས་ལྡན་དྲན་པ་མི་གསལ་
གོས་ལ་སྡང༌། །ལྕེ་སྐམ་གཞུང་ནག་གཉིད་དང་སྐོམ་དད་ཆེ། །དང་ག་འགག་ལ་ནུ་མའི་སྟེང་
དུ་གཟེར། །སྲོག་རྩར་བབས་པས་ཁུས་འདེབས་ཤེས་པ་འཁྲུལ། །གོས་ཀྱི་རྔུལ་སེལ་མིག་
དམར་གནམ་ལ་བལྟ། །གློ་ལ་རྒྱས་ན་དབུགས་ཐུང་བྲང་རྒྱབ་གཟེར། །མགོ་འཁོར་དབུགས་
རྔམ་སྐད་འགག་གློ་སྙིང་རྡུང༌། མཚན་མོ་ཉལ་ཁར་གློ་མང་ཁ་གདོང་སྐྲངས། །མཆིན་པར་
རྒྱས་ན་མིག་དམར་ལུད་པ་སེར། །རྩིབ་ལོགས་གཡས་ཀྱི་སྟེང་དང་མཆིན་དྲི་གཟེར། །མཆེར་
རྒྱས་ཁོང་སྦོ་གཡོན་གྱི་རྩིབ་ལོགས་གཟེར། །དབུགས་རྒོད་ལྕེ་སྐྱ་མཆུ་ནག་པུས་མོ་སྐྲངས། །
རྐང་ལག་སྦྲིད་ཅིང་རྐེད་པ་ཆག་སྙམ་བྱེད། །མཁལ་རྒྱས་ཆུ་སྲི་རྐང་བཤལ་མཁལ་རྐེད་
གཟེར། །ཆུ་དམར་ཚ་རླངས་མགོ་འཐོམ་རྣ་བ་འོན། །ཕོ་བར་རྒྱས་ན་གླང་ཐབས་ན་ཞིང་སྐྱུག །
གྲང་དྲོ་གཉིས་ཀ་ན་ལ་ལྟག་མིག་བལྟ། །མཁྲིས་པར་རྒྱས་ན་ཁ་ཁ་མིག་ཆུ་སེར། །དང་ག་
འགག་ལ་མཁྲིས་པ་སྐྱུག་པར་འགྱུར། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་
ལ་བཅོས་པའི་ཚུལ་དང་གཉེན་པོའོ། །བཅོས་ཚུལ་སྟོབས་ཆེན་དར་དྲག་ཐོག་བབས་བསད།  །
25-1-198

 
སྟོབས་ཆུང་ཚ་བ་འཇམ་ལ་ཞི་བས་བཅོས། །དང་པོར་རླངས་བསད་བར་དུ་ལོ་མ་བྲབ། །ཐ་
མ་རྩ་བ་བཅད་པའི་ཚུལ་དུ་བཅོས། །གཉེན་པོ་སྨན་དཔྱད་ཟས་དང་སྤྱོད་ལམ་བཞི། །སྨན་
གྱིས་བཅོས་པ་ཞི་དང་སྦྱོང་བ་གཉིས། །ཞི་བྱེད་སྨན་ལ་ཐང་དང་ཕྱེ་མ་སྟེ། །ཐང་ལ་དབྱེ་བའི་
ཐང་དང་བསད་ཐང་གཉིས། །དབྱེ་ཐང་ཏིག་ཏ་སླེ་ཏྲེས་སྐྱུ་རུ་ར། །བ་ཤ་ཀ་ཡི་བསྐོལ་གྲང་ནད་
ཁྲག་འབྱེད། །དེ་ལྟར་དབྱེ་ཐང་མེད་པར་ཁྲག་གཏར་བས། །ཟུངས་ཁྲག་ནད་ལ་ཤོར་ཏེ་ཉེས་
པ་ཆེ། །བསད་ཐང་སླེ་ཏྲེས་སྐྱུ་རུ་བ་ལེ་ཀ །དེ་གསུམ་གཞིར་བཞག་ཚ་བ་རབ་འབྲིང་གིས། །
ཧོང་ལེན་ཏིག་ཏ་བ་ཤ་ཀ་སྦྱར་བ། །བསྐོལ་གྲང་ཁུ་བ་རྒྱས་ཚད་འཇོམས་པའི་མཆོག །ཡང་
ན་སླེ་ཏྲེས་བྱི་ཚེར་འབྲས་བུ་གསུམ། །ཏིག་ཏ་ཧོང་ལེན་བོང་ང་དཀར་པོ་དང༌། །རྒྱ་སྐྱེགས་བ་
ཤ་ཀ་དང་འབྲས་བུ་གསུམ། །མ་ནུ་པུཥྐར་ར་གསུམ་ཨུཏྤལ་ལ། །ག་དུར་ཀུན་ལ་བསྲེས་པའི་
བསྐོལ་གྲངས་ཐང༌། །རླུང་མཁྲིས་ཁྲག་དང་བད་ཀན་ཚ་བ་འཇོམས། །ཕྱེ་མས་བསད་པ་ཚ་བ་
སྟོབས་རྒྱས་ལ། །ག་བུར་རྒྱལ་བློན་གསུམ་(གུར་གུམ་ཧོང་ལེན་བ་ཤ་ཀ་ཏིག་ཏ་བསྣན་པའི་)བདུན་(ག་བུར་
གཙོ་བརྒྱད་ལ་བསྣན་པའི་)དགུ་པ་སྦྱར། །ཚ་བ་འབྲིང་ལ་གི་ཝཾ་(བསིལ་གསུམ་ཙན་དན་གླ་རྩི་བོང་དཀར་ཨ་རུ་ཀ་
ར་)ཙན་དན་(བསིལ་གསུམ་ག་དུར་ཨུཏྤལ་ཏིག་ཏ་ཤིང་མངར་ཀ་ར་)བརྒྱད། །ཚ་བ་ཐ་མ་ཅུ་གང་(གུར་གུམ་སུག་
སྨེལ་བྲག་ཞུན་ཏིག་ཏ་ཨ་རུ་མཚལ་པི་ལིང་ཀ་ར་)བརྒྱད་པ་དང༌། །གུར་གུམ་(ཅུ་གང་བ་ལེ་ཀ་ཨུཏྤལ་བ་རུ་ར་མཚལ་
ཏིག་ཏ་)བདུན་དང་ཐང་ཆེན་(ཏིག་ཏ་དུག་ཉུང་གསེར་མེ་ག་དུར་སྐྱུ་རུ་ཧོང་ལེན་བ་ཤ་ཀ་ཀ་ར་)བདུན་པ་སྦྱར། །
སྦྱང་བ་ཚ་བ་སྨིན་དང་སྣོད་དུ་ལྷུང༌། །མཆིན་མཁྲིས་ལ་བབས་བཅོས་སྐྱེད་ཆུང་བ་དང༌། །རྩ་
ཤེད་མ་ཤོར་ལུས་ཟུངས་བཟང་བ་ལ། །ཨ་རུ་མཆུ་སྙུང་ལྕུམ་རྩ་གསེར་མེ་ཏོག །ཧོང་ལེན་བ་
ཆུར་བསྐོལ་ཏེ་གྲང་པ་བཏང་། །སྐྱུག་ན་བསྲུང་ཞིང་ཕིགས་ནས་ལྕག་གིས་བསྐུལ། །རྗེས་ལ་
ཆུ་གྲོག་འབྲས་དང་ཞོ་ཡིས་བཅད། །ནད་དངོས་འདོན་བྱེད་གསོ་དཔྱད་གཙོ་བོ་ཡིན། །དཔྱད་
ཀྱིས་བཅོས་པ་གཏར་རྔུལ་ཆུ་དུགས་བཞི། །སྨན་གྱིས་མ་ཆོམས་གཏར་གྱིས་དབྱུང་བ་སྟེ།  །
25-1-199

 
གང་རྒྱས་རྩ་དང་གང་བབས་རྩ་ལ་གཏར། །སྔོན་འགྲོ་དངོས་གཞི་ཕྱི་རྗེས་སྤྱི་དང་མཐུན། །
འགྲམས་འཁྲུགས་ཁྲག་ངན་རྩ་དང་དོན་ལ་བརྟག །དེ་ཕྱིར་གསོ་དཔྱད་གཙོ་བོ་གཏར་བ་
ཡིན། །ཚ་བ་བ་སྤུར་འདྲེན་བྱེད་རྔུལ་དུ་དབྱུང༌། །ར་དཀར་རྭ་རྩེ་གཡས་གཞོབ་བལ་ཚི་སྦྱར། །
འཇམ་བསྲོས་ལུས་པོ་ཀུན་ལ་ཁྱབ་པར་བྱུག །དེ་སྐམས་རྗེས་ལ་ག་བུར་རྒྱལ་བློན་གསུམ། །
ཤ་བལ་ཁུ་བས་འཕུལ་བཏང་བ་སྤུར་འདོན། །ཡང་ན་ཨ་རུ་ཛཱ་ཏི་བྱི་ཚེར་ཐང༌། །དྲོ་འཇམ་
བཏང་ལ་རྔུལ་དབྱུང་བལ་ཕྱེས་ཕྱི། །དྲལ་ཐུག་དྲོ་འཇམ་བཏང་ཞིང་རླུང་ཁ་མནན། །རིམས་
ནི་མཁྲིས་ཚད་རྔུལ་གནས་བ་སྤུར་ལྷག །གཏར་བ་མི་བཟང་དཔྱད་མཆོག་རྔུལ་དུ་དབྱུང་། །
ཆུ་ལྕག་སྐར་ཆུས་ཉི་མ་ཁ་དྲོས་ལ། །པང་ལེབ་ཐོག་ཏུ་གཅེར་བུ་ཙོག་པུར་འདུག །ཕུལ་
ཕྱེད་ཁོང་བཏང་ལུས་ཀུན་ཁ་ཆུས་བྲན། །མི་དངངས་པ་ཡི་ཆུ་རྒྱུན་ཚུགས་ཚད་བླུག །དེ་ཡིས་
ཚ་བའི་རླངས་འདོན་ཚད་མགོ་གཅོག །དུགས་ཀྱིས་བཅོས་པ་གཟེར་སྟེང་ཆུ་རྡོ་དང་། །རྨོན་
ལྕགས་བྱང་མ་བསིལ་བའི་སྔོ་སྣ་འམ། །མཚན་དང་ཀྱི་ལྕེ་ཞོ་སྦྱར་གྲང་མོ་ཡིས། །ཡང་ཡང་
གསོར་ཏེ་བདུགས་པས་འཕྲལ་ཟུག་གཅོག །ཟས་ཀྱིས་བཅོས་པ་འབྲས་དང་ཆག་ཚེ་དང༌། །
རྒྱ་ཁུར་ཁུར་ཚོད་བ་ཡི་ཞོ་དར་གསར། །གངས་ཆུ་བ་ཚྭ་མེད་པའི་ཆུ་བསིལ་བཏང༌། །ཕོ་བ་
ཞན་ན་དེ་ཡང་བསྐོལ་གྲང་ཤིས། །ལན་ཚྭ་ཤ་ཆང་སྒོག་པ་ཚ་བའི་སྔོ། །སྣག་ལུག་ཞོ་དར་དྲོད་
བཅུད་དུག་འདྲ་སྤང༌། །སྤྱོད་ལམ་བསེར་བུ་གྲིབ་མ་ཆུ་ཡི་འགྲམ། །ནེའུ་བསིང་ས་གཙང་ཟླ་
འོད་བསིལ་གནས་འདུག །ལུས་ངག་ཡིད་གསུམ་ཞི་དལ་ངེས་པར་བྱ། །མེ་ཚན་ཉི་ཚན་ལུད་
སྟེང་ཉིན་གཉིད་དང༌། །འགྲོ་འདུག་ལྡང་ཉལ་ལུས་ངག་རྩོལ་བ་སྤང༌། །དེ་ནས་རྒྱས་ཚད་བྱེ་
བྲག་བཅོས་པ་ལ། །ཐང་གཏར་འགམ་ཕྱེ་གསུམ་དུ་ཤེས་པར་བྱ། །རྙིངས་ཚད་སྐྱུ་རུ(་བ་ཤ་ཀ་
ཙན་དན་གུར་གུམ་སྦྱར་བ)འི་ཐང་བཏང་སྙིང་རྩ་གཏར། །ག་བུར་(ཅུ་གང་གུར་གུམ་ཨུཏྤལ་ཏིག་ཏ་ཧོང་ལེན་ཨ་
ག་རུ་ཀ་ར་)བདུན་དགུ་(ཙན་དན་གཉིས་ཨ་ག་རུ་ཅུ་གང་ཏིག་ཏ་ཨུཏྤལ་གླ་རྩི་པུ་ཤེལ་རྩེ་ཀ་ར་)ཙན་དན་(ཏིག་ཏ་བ་ལེ་ཀ་
25-1-200


བོང་དཀར་ཀ་ཀོ་ལ་ཨ་རུ་ནཱ་ག་གེ་སར་རུ་རྟ་ཀ་ར་སྟེ་) བརྒྱད་པ་སྦྱར། །སྲོག་རྩར་ཤོར་ན་ཐང་གཏར་སྙིང་
བཞིན་བཅོས། །ཕྱེ་མ་ཨ་གར་ནག་པོ་(ཙན་དན་དཀར་དམར་ཛཱ་ཏི་ལི་ཤི་སྙིང་ཞོ་ཤ་གུར་གུམ་ནཱ་ག་གེ་སར་རུ་རྟ་ཀ་
ར་)དགུ་སྦྱོར་བྱ། །སྤྱི་བོའི་གཙུག་དང་རྐང་མཐིལ་གཏར་ལ་བསྲེག །གཞུག་ཆུང་ལྔ་བདུན་ག་
བུར་སྦྱོར་བ་བྱ། །ཟུག་བྲི་དྲན་པ་གསལ་ན་ཐུབ་པའི་རྟགས། །གློ་འཁྲུགས་བ་ལེ་(སྲོ་ལོ་བ་ཤ་ཙན་
དན་ཏིག་ཏ)འི་ཐང་བཏང་གློ་རྩ་གཏར། །ཤིང་མངར་(ཅུ་གང་གུར་གུམ་ཛཱ་ཏི་ཀ་ཀོ་ལ་རྒུན་འབྲུམ་ཏིག་ཏ་ཨུཏྤལ་
)བརྒྱད་དང་ཅུ་གང་(གུར་གུམ་ཛཱ་ཏི་ལི་ཤི་སུག་སྨེལ་བོང་དཀར་ཏིག་ཏ་ཀ་ར་)བདུན་(ཨ་རུ་གེ་སར་)དགུར་སྦྱར། །
མཆིན་ཚད་བ་ཤ(བ་ལེ་ཀ་གུར་གུམ་ཏིག་ཏ)འི་ཐང་བཏང་རུ་ཐུང་གཏར། །ཕྱེ་མ་གུར་གུམ་(ཅུ་གང་སུག་
སྨེལ་ཀ་ཀོ་ལ་བ་ལེ་ཀ་གསེར་མེ་ཏིག་ཏ་ཀ་ར་)བདུན་དང་(ཧོང་ལེན་དུག་ཉུང་དང་)དགུ་པ་སྦྱར། །མཆེར་པའི་ཚ་
བ་གསེར་གྱི་མེ་ཏོག་(ཙན་དན་ལི་ཤིའི་)ཐང༌། །མཆེར་རྩ་གཏར་ཞིང་སུག་སྨེལ་(ཀ་ཀོ་ལ་ལི་ཤི་གུར་གུམ་
ཏིག་ཏ་སླེ་ཏྲེས་གསེར་མེ་ཀ་ར་)བདུན་པ་སྦྱར། །མཁལ་ཚད་གུར་གུམ་(བྲག་ཞུན་སུག་སྨེལ་གྱི་)ཐང་བཏང་
བྱིན་ལོང་གཏར། །ཤུག་ཚེར་(སྡིག་སྲིན་སུག་སྨེལ་ཉི་དགའ་ཨ་རུ་ཏིག་ཏ་གུར་གུམ་ཀ་ར་)བདུན་པ་ཙན་དན་
(གླ་རྩི་གུར་གུམ་ཏིག་ཏ་བྲག་ཞུན་བོང་དཀར་སུག་སྨེལ་ཨ་རུ་མཁལ་མ་ཞོ་ཤ་ཀ་ར་)དགུ་པ་སྦྱར། །ཕོ་བའི་ཚ་བ་བྱི་
ཚེར་(ཏིག་ཏ་སྐྱུ་རུ་མ་ནུའི་)ཐང་བཏང་ལ། །སྣོད་ཀ་གཏར་ཞིང་བྲག་ཞུན་(ཨ་རུ་སུག་སྨེལ་གུར་གུམ་གླ་སྒང་
དུག་ཉུང་དོམ་མཁྲིས་ཀ་ར་)བདུན་པ་སྦྱར། །མཁྲིས་ཚད་ཏིག་ཏ(གསེར་མེ་བ་ཤ་ཀ)འི་ཐང་བཏང་མཁྲིས་
རྩ་གཏར། །ཕྱེ་མ་གསེར་གྱི་མེ་ཏོག་(ཏིག་ཏ་དུག་ཉུང་གུར་གུམ་སྐྱེར་པ་དོམ་མཁྲིས་བ་ཤ་ཀ་ཀ་ར་)བདུན་པ་
སྦྱར། །སྤྱི་བཅོས་གོང་ལ་བློས་བརྟགས་མདེ་ཁར་གདགས། །དེ་ལྟར་བཅོས་པས་སོས་པའི་
མཚན་མ་ནི། །རྩ་བྱིང་ཁར་ཐོན་ཕྲ་བ་སྦོམ་དུ་སོང༌། །དྲག་པ་དལ་ལ་གྲིམས་པ་ལྷོད་པ་དང༌། །
སྟོངས་པ་མཁྲང་ལ་སྤུན་པ་རིང་དུ་སོང་། །ཆུ་མདོག་དྭངས་ལ་དྲི་ཆུང་ཀུ་ཡ་སྲབ། །ཟུག་
ཆོགས་སྙིང་རྩ་སེང་ལ་ཟས་རོ་རྙེད། །དབུགས་བདེ་ཉིན་གཉིད་ཆུང་ལ་ནུབ་གཉིད་ཆེ། །བྱ་
བའི་ལས་ལ་ལུས་སེམས་འཇུག་པར་འདོད། །དེ་ལྟར་བཅོས་རྗེས་ཞུ་འཁྱགས་ས་མཚམས་
25-1-201


ནི། །དབྱར་མཐའ་དགུན་བཞིན་རྒྱས་རྗེས་སྟོངས་པར་འགྱུར། །དེ་ཕྱིར་རི་ཐང་མཚམས་ཀྱི་
གསོ་ཐབས་བསྟན། །མི་རིགས་གནས་དང་ནད་ཁམས་རྐྱེན་དབང་གིས། །རླུང་མཁྲིས་བད་
ཀན་ཞུ་འཁྱགས་རྣམ་པ་གསུམ། །རླུང་གི་ཞུ་འཁྱགས་སྔུན་ནས་བསུ་བ་དང༌། །མཁྲིས་པའི་
ཞུ་འཁྱགས་འཕྲང་ལ་བསྒུག་པ་དང༌། །བད་ཀན་ཞུ་འཁྱགས་ཕྱི་རྗེས་བཅད་པ་གསུམ། །རི་
ཐང་མཚམས་ཀྱི་ལེའུར་ཤེས་པར་བྱ། །ཚ་རྗེས་མ་ལོག་ཟས་སྤྱོད་མཐའ་རུ་གདོན། །ཞེས་
གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྒྱས་
པའི་ཚ་བ་བཅོས་པའི་ལེའུ་སྟེ་བཅུ་དྲུག་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས། །
ཚ་བ་སྟོངས་པའི་རྒྱུ་རྐྱེན་ངོ་བོ་གང༌། །སྟོངས་པའི་མིང་དུ་ཅི་ཕྱིར་བཏགས་པ་ལགས། །དབྱེ་
བ་རྟགས་དང་བཅོས་ཐབས་བཤད་དུ་གསོལ། །དེ་སྐད་ཞུས་པའི་དོན་ལ་ལན་གསུངས་
པ། །སྟོངས་པའི་ཚ་བའི་རྒྱུ་ནི་རླུང་ཡིན་ཏེ། །སྐྱེད་བྱེད་རྐྱེན་གསུམ་རང་བཞིན་སྟོངས་པ་
དང༌། །རྐྱེན་གྱིས་སྟོངས་དང་གནས་ཀྱིས་སྟོངས་པའོ། །རང་བཞིན་སྟོངས་པ་རླུང་རིམས་
སྟོངས་འཁྲུགས་གཉིས། །ཡུལ་དུས་རང་བཞིན་ན་སོ་ནད་ཁམས་གནས། །རླུང་རྐྱེན་འདེམ་
པས་རིམས་སམ་འཁྲུགས་འབྱུང་བས། །དང་པོ་རང་གནས་ཚ་བ་རླུང་འབུད་བཅས། །རྐྱེན་
གྱིས་སྟོངས་པ་རླུང་ཤས་ཆེ་བ་ཡི། །ཚ་བ་བསིལ་ཐང་ཕྱེ་མ་རྩུབ་མོ་དང༌། །གཏར་བཤལ་
རྔུལ་དང་ཟས་སྐོམ་ཡེན་ལ་གཏད། །ཚད་གཉའ་ཆོགས་ནས་རླུང་སྐྱེས་ཚད་གཞུག་འབུད། །
གནས་ཀྱིས་སྟོངས་པ་སྲོག་རྩ་རླུང་གནས་བབས། །གནས་ཀྱི་དབང་གིས་ཚ་བ་རླུང་གིས་
འབུད། །རྐྱེན་དེས་རླུང་ཚད་འཐབ་པའི་ནད་དུ་འགྱུར། །རླུང་གིས་ཚ་བ་བུས་ཀྱིན་ཚད་
རྟགས་འཕེལ། །རླུང་ཉིད་གྲང་བས་ཚད་རྟགས་འགལ་ཞེ་ན། །སྟོངས་པའི་ཚ་བ་མགར་གྱི་སོ་
མལ་འདྲ། །སྦུད་པ་གྲང་ཡང་མེ་ཡི་གྲོགས་སུ་འགྱུར། །འབུད་བྱེད་མ་བཅད་ཚ་བ་ཆེས་ཆེར་
25-1-202


འཕེལ། །དེ་ཕྱིར་སྟོངས་པའི་ཚ་བ་ཞེས་སུ་བརྗོད། །དབྱེ་བ་སྤྱི་དང་བྱེ་བྲག་རྣམ་པ་གཉིས། །
སྤྱི་ལ་ཚ་བ་སྟོངས་དང་རྩ་སྟོངས་དང༌། །རླུང་སྟོངས་ཞེས་བྱ་རྣམ་པ་གསུམ་དུ་བཤད། །བྱེ་
བྲག་རིམས་སྟོངས་ཁྲག་སྟོངས་མཁྲིས་པ་སྟོངས། །བད་ཀན་ཆུ་སེར་གློ་སྙིང་སྟོངས་པ་དྲུག །
དེ་རྟགས་དང་པོ་ཚ་བ་སྟོངས་པ་ནི། །གཉའ་ཆོགས་ཚད་གཞུག་རླུང་གིས་འབུད་པ་སྟེ། །ཆུ་
མདོག་དམར་ཞིང་དྭངས་ལ་སྦུ་བ་ཆེ། །རྩ་རྒྱུད་སྟོང་ལ་རྩ་སྟོད་རྒྱུག་པ་དང༌། །དབུགས་ཐུང་
རྔམ་པ་རྒོད་ལ་ཕྱི་ཚད་ཆེ། །མིག་སྤྲིན་དམར་ཞིང་ལྕེ་ནི་དམར་ལ་རྩུབ། །གཟེར་འཕོ་སྐོམ་
དད་ཆེ་ལ་མིག་རྩ་གྲུང༌། །སྣ་བུག་ཧར་ལ་གཉིད་ཆུང་སྐབས་སུ་དངང་། །བ་སྤུ་ལངས་ལ་རླུང་
གསང་མནན་ན་ན། །སྐབས་སུ་གཏམ་ལ་ཅོ་འཕྲུལ་བག་རེ་འོང༌། །འདི་ནི་ལྟར་སྣང་རླུང་གི་
ཚ་བ་སྟེ། །བསིལ་གཏར་དེད་ན་གཤིན་རྗེའི་ལག་ཏུ་གཏོད། །རྟགས་ལ་ཐེ་ཚོམ་གསུར་བྱུག་
རུས་ཐང་སད། །ལྕེ་རློན་རྔམ་པ་བདེ་ལ་སྐོམ་དད་ཆུང་། །གཉིད་ཆེ་དབང་པོ་གསལ་སོགས་
ཚད་རྟགས་ནུབ། །མཁས་པས་དེ་ལ་སོམ་ཉི་མི་བྱའོ། །སྲོག་རྩར་ཚ་བ་བབས་པའི་རྩ་སྟོངས་
རྟགས། །རྩ་ཆུ་གོང་འདྲ་མིག་དམར་གནམ་དུ་བལྟ། །ཁུས་འདེབས་ཤེས་པ་འཁྲུལ་ལ་གོས་
རྔུལ་སེལ། །གཉིད་མེད་ཤེས་པ་ཡང་ཞིང་འབྲོས་ཚུལ་སྟོན། །སྐབས་སུ་འདར་ལ་དྲུང་གི་མི་
ལ་འཛིན། །སོ་འཐམ་སོ་འཆའ་སྣང་བ་ལོག་པར་མཐོང༌། །སྙིང་སྲོག་གནས་སུ་རླུང་ཁྲག་
འཐབ་པ་སྟེ། །རྟགས་རྣམས་ཚང་ན་མི་འཚོ་སྤང་བར་བཤད། །ཚད་གཞུག་རླུང་དུ་ལོག་པའི་
རླུང་སྟོངས་རྟགས། །གཡལ་མང་རླུང་གསང་ན་ཞིང་སྟོང་སྐྱུགས་བྱེད། །གཉིད་མེད་ཤེས་པ་
འཕྱོ་ལ་ཞེ་ས་མཁས། །རྙོང་འདོད་མིག་དཔངས་མཐོ་ལ་སྐྲ་འདབ་འདར། །གཏིང་གི་དབང་
པོ་མ་འཁྲུལ་ཆལ་ཆོལ་སྨྲ། །ལྕེ་སྟེངས་དམར་རྩུབ་རྩ་ཆུའི་ཚ་བ་མེད། །ཧ་ཅང་ཐལ་ན་སྨྱོ་བར་
འགྱུར་བ་ཡོད། །བྱེ་བྲག་རིམས་སྟོངས་རྐང་ལག་རེངས་ཤིང་ན། །ཁ་བླ་གཉིད་མེད་སྐྲ་འདར་
གདོང་དབལ་སྐྱ། །ཁྲག་སྟོངས་ཁ་སླ་གཉིད་ཆེ་དང་ག་འགག །མཁྲིས་སྟོངས་གཉིད་མེད་ཁ་
25-1-203


བླ་མིག་ལྕེ་སེར། །བད་སྟོངས་རྔུལ་ཆེ་གཉིད་དུས་ཟ་ཟི་མང༌། །ཆུ་སེར་སྟོངས་པ་མིག་གིས་
ཟ་ཟི་མཐོང༌། །གཉིད་མེད་དབང་པོ་འཁྲུལ་ཞིང་སྨྱོ་ཚུལ་སྟོན། །གློ་སྙིང་སྟོངས་པ་གཉིད་དང་
ཟུག་གཟེར་ཆུང༌། །ལུས་རེངས་སོ་འཐམ་བླབ་འཆོལ་བྱེད་པའོ། །སྟོངས་ཚད་བཅོས་པ་སྤྱི་
དང་བྱེ་བྲག་གཉིས། །སྤྱི་ལ་བཅོས་པའི་ཚུལ་དང་གཉེན་པོ་གཉིས། །བཅོས་པའི་ཚུལ་ལ་
རྣམ་པ་གསུམ་ཡིན་ཏེ། །ཚ་སྟོངས་ཁ་དྲག་དཔུང་པ་གཉའ་ཚུལ་བཅོས། །རྩ་སྟོངས་འཕྲང་ཁ་
སོ་པས་བཅད་པའི་ཚུལ། །རླུང་སྟོངས་སྨྱོན་པ་མལ་འཇུག་ཚུལ་དུའོ། །གཉེན་པོ་སྨན་དཔྱད་
ཟས་སྤྱོད་རྣམ་པ་བཞི། །ཚ་བ་སྟོངས་ལ་གཞུག་ཆུང་རུས་པ་ལྔ། །ཆང་བྲེ་ཕྱེད་དུ་སུམ་གཉིས་
བསྡུས་ཁུ་རུ། །ག་བུར་ཅུ་གང་ཀ་ར་བཏབ་ལ་བཏང༌། །སྨན་ཞུ་རྔུལ་འདོན་རྔུལ་རྗེས་རླུང་སྣ་
བསླན། །དེ་ནས་ཐོང་ཚེར་བལ་ཚི་རུས་ཁུར་བཙིར། །བིག་པན་ཤིང་ཀུན་བུར་སྦྱར་རླུང་དུས་
བཏང༌། །ཡང་ན་བིག་པན་ཐལ་བ་ཨ་ག་རུ། །ཛཱ་ཏི་རུ་རྟ་སྤོས་དཀར་བུ་རམ་སྦྱར། །རྒོངས་
དང་ཐོ་རངས་རུས་ཁུས་འཕུལ་ལ་བཏང༌། །རླུང་དང་ཚད་པ་དུས་གཅིག་འཇོམས་པར་བྱེད། །
ཙན་དན་བསིལ་གསུམ་ཨུཏྤལ་སླེ་ཏྲེས་དང་། །སེ་འབྲུ་པི་པི་ལིང་དང་བིག་པན་ཐལ། །བུར་
དཀར་སྦྱར་བ་གུང་གཉིས་རུས་ཁུས་དབུལ། །དཔྱད་དུ་རྒོངས་ཀ་ཉི་མ་ནུབ་པ་དང༌། །ཚིགས་
པ་དྲུག་བདུན་ཨན་སྟོང་མེ་ཡིས་བསྲེག །གཟེར་སར་འབའ་ཆ་རུས་རྙིང་འོལ་སྐོམ་མམ། །
འཁར་གོང་སྲིན་ཅན་ཆང་བྲན་བསྲོས་པས་བདུག །ཁ་ཟས་ལུག་ཤ་ཉེ་འུ་ནང་ནུབ་དང༌། །བ་
ལང་རི་དྭགས་ཤ་གསར་ཉིན་གུང་བཏང༌། །སྐོམ་དུ་སླེ་ཏྲེས་བུར་རྙིང་བསྡུས་པའམ། །གསར་
འཇམ་འོ་མ་བསྐོལ་གྲངས་བུར་དཀར་བཏབ། །མཁས་པའི་རིག་པས་དཔྱད་ཅིང་ཉམས་སྦྱར་
བསྟེན། །སྤྱོད་ལམ་བསེར་བུ་ཁ་ཡེད་མི་སྙན་གཏམ། །དྲག་ཤུལ་ཅ་ཅོ་འདུ་འཛི་སྤངས་བྱས་
ལ། །ཡིད་འོང་གྲོགས་བསྟེན་དྲོ་བའི་གནས་སུ་བསྡད། །བཅོས་ཀ་མི་ལེན་ཚ་བ་ཆེར་འཕེལ་
ན། །ཟས་ཀྱིས་སྣ་བླང་བསིལ་གྱིས་ཚ་བ་བསད། །རྩ་སྟོངས་ཚ་བ་བསིལ་གཏར་མི་གསོད་
25-1-204


པས། །དང་པོར་སྤྱི་གཙུག་དྲུག་པ་མཐེབ་སྙིང་བསྲོ། །ཨ་གར་(ཛཱ་ཏི་རུ་རྟ་ཨུཏྤལ་)བཞི་སྦྱོར་བུར་
དཀར་རུས་ཁུས་དབུལ། །མ་ཐུབ་སྡུད་སྒོ་བདུན་པ་དཀར་ནག་མཚམས། །སྤྲ་བ་ལྔས་བསྲེག་
འཕྲང་སྡོམ་འབྲོས་སྒོ་འགེགས། །ག་བུར་ཙན་དན་ཛཱ་ཏི་སྙིང་ཞོ་ཤ །ཅུ་གང་ནཱ་ག་གེ་སར་ཀ་
ར་སྦྱར། །དགུང་གཉིས་བཏང་རྗེས་སྦང་སྐམ་རུས་རྙིང་བདུག །ཆང་བཙོས་ལུས་ཀུན་དྲིལ་
ལ་རྔུལ་མང་གདོན། །དེ་རྗེས་གོང་བཞིན་རྩ་འཕྲང་བསྡམ་པ་གཅེས། །ཟས་དང་སྤྱོད་ལམ་
གོང་མ་ཇི་བཞིན་ནོ། །རླུང་སྟོངས་ཚ་བ་རླུང་དུ་ལྡོག་འགྱུར་བས། །ཟས་སྐོམ་ཆང་འཇམ་བུར་
དཀར་ལུག་ཤ་དང༌། །འདོན་གྱི་སྦྱོར་བ་བྱས་ཏེ་ནང་ནུབ་བཏང༌། །མ་ནོན་ལོ་ཤ་མར་རྙིང་
ཤ་ཆེན་སྤྲུག །རླུང་གསང་བསྐུ་མཉེ་ཡོས་སམ་སྤ་འུས་བདུག །ཤིང་ཀུན་སྒ་དང་ཛཱ་ཏི་ཁ་རུ་
ཚྭ། །བིག་པན་སླེ་ཏྲེས་བུ་རམ་རུས་ཁུས་དབུལ། །དྲུག་བདུན་དང་པོ་སྡུད་སྒོ་མེ་ཡིས་མནན། །
མི་དང་མི་ལབ་མུན་ཁུང་བསྙལ་ལ་བཞག །བྱེ་བྲག་བཅོས་པ་རིམས་སྟོངས་གཏར་ག་སྤང༌། །
ལུག་ཤ་ཆང་འཇམ་བསྐུ་མཉེ་གཉིད་ཀྱིས་བཅོས། །བིག་པན་སླེ་ཏྲེས་ཀ་ར་རུས་ཁུས་དབུལ། །
ཁྲག་སྟོངས་ཆང་དང་ཉིན་གཉིད་མེ་བཙའ་སྤང༌། །བྱུག་པ་ཤ་གསར་འཇམ་ཐང་བཏང་བར་
བྱ། །མཁྲིས་པ་སྟོངས་ན་ཤ་ཆང་མཆོག་ཏུ་གནོད། །བསྐུ་མཉེ་འཇམ་ཐང་བཏང་ཞིང་གཉིད་
མི་བསྲུང༌། །བད་ཀན་སྟོངས་ན་མར་དང་གཏར་ག་སྤང༌། །ཆུ་སྐོལ་ཤ་གསར་བཏང་ཞིང་
བསྐུ་མཉེ་བྱ། །འབྲས་བུ་གསུམ་གྱི་ཐང་བཏང་རྔུལ་མི་ཕྱི། །ཆུ་སེར་སྟོངས་ན་མར་ནག་སྤང་
བར་བྱ། །ཤ་ཆང་རྙིང་པ་བཏང་ཞིང་གཉིད་མི་བསྲུང༌། །འབྲས་གསུམ་མར་སྦྱར་ལྔ་བདུན་མེ་
ཡིས་བསྲོ། གློ་སྙིང་སྟོངས་ན་བསིལ་ཐང་གཏར་ག་སྤང༌། །རུས་ཐང་ཤ་གསར་བསྐུ་མཉེ་ཆང་
འཇམ་བཏང༌། །སྤྱི་ལ་བྱེ་བྲག་བཅོས་པའི་མདེ་ཁར་གདགས། །ཞེས་གསུངས་སོ། །བདུད་
རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྟོངས་པའི་ཚ་བ་བཅོས་པའི་
ལེའུ་སྟེ་བཅུ་བདུན་པའོ།། །། 
25-1-205


དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས༌། 
ཚ་བ་གབ་པའི་རྒྱུ་རྐྱེན་ངོ་བོ་གང༌། །གབ་པའི་ཚ་བའི་མིང་དུ་ཅི་ཕྱིར་བཏགས། །དབྱེ་བ་
རྟགས་དང་བཅོས་ཐབས་བཤད་དུ་གསོལ། །དེ་སྐད་ཞུས་པའི་དོན་ལ་ལན་གསུངས་པ། །
གབ་པའི་ཚ་བའི་རྒྱུ་ནི་གྲང་རླུང་ཡིན། །དེ་ལ་རྐྱེན་གསུམ་རང་བཞིན་གབ་པ་དང་། །གནས་
ཀྱིས་གབ་དང་རྐྱེན་གྱིས་གབ་པའོ། །ཡུལ་དུས་རང་བཞིན་ན་ཚོད་ནད་ཁམས་རྣམས། །གྲང་
རླུང་ཅན་ལ་ཚ་བ་ཕྲན་བུ་བྱུང༌། །དང་པོ་རང་གནས་བད་རླུང་འོག་ཏུ་གབ། །དེ་ཕྱིར་རང་
བཞིན་ཡེ་ནས་གབ་ཅེས་བྱ། །གནས་ཀྱིས་གབ་པ་ཕོ་མཁལ་སྙིང་དང་གསུམ། །ཚ་བ་ཞུགས་
ཀྱང་གྲང་རླུང་གནས་ཡིན་པས། །ཚ་བ་གཏིང་གབ་སྤྱི་རྟགས་གྲང་རླུང་སྟོན། །རྐྱེན་གྱིས་གབ་
པ་མ་སྨིན་བཅོས་སྔས་དང༌། །བད་ཀན་རི་ཐང་མཚམས་སུ་བཅུད་སྔས་པས། །གྲང་བའི་འོག་
ཏུ་ཚ་བ་གབ་པ་ཡིན། །གབ་པའི་ཚ་བ་སྦས་པའི་མེ་དང་འདྲ། །གྲང་རླུང་གཉིས་ཀྱིས་ཚ་བའི་
མགོ་བྱིབས་པས། །བད་རླུང་འོག་ཏུ་ཚད་རྟགས་བག་ལ་ཉལ། །ཕྱི་གྲང་ནང་ན་ཚ་བས་གབ་
ཅེས་བྱ། །དབྱེ་བ་སྤྱི་དང་བྱེ་བྲག་རྣམ་པ་གཉིས། །སྤྱི་ལ་ཚ་སྟོབས་ཅན་དང་གྲང་སྟོབས་ཅན། །
བྱེ་བྲག་སྙིང་ལ་ཚ་བ་གབ་པ་དང༌། །ཕོ་བར་གབ་དང་མཁལ་མར་གབ་པའོ། །བརྟག་ཐབས་
བཞི་སྟེ་རྟགས་ལ་ནད་ངོས་བཟུང༌། །རྩ་ཆུས་མཚང་འབྲུ་གཏར་གྱིས་ཕུགས་བཙལ་ཏེ། །ཟས་
དང་སྨན་གྱིས་མགོ་ཕུར་བཤུ་བར་བྱ། །རྟགས་ཀྱིས་ངོས་བཟུང་སྤྱི་དང་བྱེ་བྲག་གཉིས། །སྤྱི་
ལ་ཚ་སྟོབས་ཅན་དང་གྲང་སྟོབས་ཅན། །ཚ་སྟོབས་ཅན་དེ་རྩ་དཔངས་དམའ་ལ་གྲིམས། །ཆུ་
མདོག་དམར་ལ་ལྡོག་དཀའ་ཤེས་པ་ལྕི། །ངོ་སྣུམ་གཉིད་ལོག་རྗེས་ལ་ཁ་ལྕེ་སྐམ། །ཁ་ཁ་
དང་ག་མི་བདེ་སྐབས་སུ་རྔུལ། །ལུས་ལྕི་མིག་དམར་མགོ་ལྕི་སྣ་ཁྲག་འཛག །ནུབ་གཉིད་
ཆུང་ལ་ཉིན་གཉིད་ཆེ་བ་དང༌། །མེ་ཉིས་ཕོག་ན་ཁམས་ལྕི་གྱེན་ལ་ངལ། །བསིལ་དྲགས་དྲོས་
དྲགས་གཉིས་ཀ་གནོད་པར་ཚོར། །གྲང་སྟོབས་ཅན་དེ་རྩ་རྒྱུད་བྱིང་ལ་བུལ། །ཆུ་སྔོ་ལྡོག་ཏུ་
25-1-206


མི་འདོད་གདོང་པ་སྐྱ། །ལུས་གྱོང་དང་ག་མི་བདེ་སྣ་ཆུ་འཛག །ཤེས་པ་བྱིང་ལ་ཟས་སྤྱོད་དྲོ་
ན་འཕྲོད། །བྱེ་བྲག་སྙིང་ལ་གབ་ན་སེན་མོ་དཀར། །སྲོད་ལ་གཉིད་ཡེར་ཉིན་མོ་གྲིབ་མ་སྙེག །
བྲང་རྒྱབ་གདོང་པ་སྲིན་ཐོར་རྒྱུན་མི་ཆད། །ཆང་འཐུངས་རྗེས་ལ་དྲན་པ་མི་གསལ་འཕྱོ། །
ཕོ་བར་གབ་ན་ཚ་གྲང་གཉིས་ཀ་གནོད། །ཁྱད་པར་དྲོད་དྲགས་ཕུར་པ་བཙུགས་ལྟར་ན། །
གསར་ཤ་མི་འཕྲོད་ཟས་སྐོམ་དྲོ་འཇམ་ཕན། །མཁལ་མར་གབ་ན་ཟགས་ཆུ་ཁྲག་ཏུ་འབྱུང༌། །
ཆང་འཐུངས་འགྲོ་འདུག་རྗེས་ལ་རྐང་པ་ལྕི། །མཁལ་རྩ་གར་ཁྲིད་ས་ནས་གཟེར་རམ་ན། །
དེ་ལྟར་ནད་ཀྱི་རྟགས་ལ་ཐེ་ཚོམ་ན། །རྩ་དང་ཆུ་ཡི་སྒོ་ནས་མཚང་འབྲུ་སྟེ། །རྩ་རྒྱུད་མ་ངེས་ཇི་
ལྟར་འདུག་ཀྱང་རུང༌། །གཏིང་ན་ཅུང་ཟད་གྲིམས་ལ་མཁྲང་བར་འོང༌། །ཆུ་མདོག་མ་ངེས་ཇི་
ལྟར་འདུག་གྱུར་ཀྱང༌། །རླངས་པ་སངས་བུལ་ཀུ་ཡ་ལིང་གི་འོང༌། །དེས་མ་རྟོགས་ན་གཏར་
གྱིས་ཕུགས་འཚོལ་ཏེ། །སྙིང་ལ་གབ་ན་སྣོད་ག་གཏར་བས་གསལ། །ཕོ་བར་གབ་ན་རུ་ཐུང་
གཏར་བས་ཤེས། །མཁལ་མར་གབ་ན་བྱིན་གཞུག་གཏར་བས་གསལ། །ལུས་སྤྱིར་གབ་ན་
གསུམ་ག་གཏར་བར་བྱའོ། །རྣག་མཁྲིས་ལྕགས་གཡའ་ཆགས་ན་གབ་པར་ངེས། །ངེས་ཤེས་
མ་སྐྱེས་ཟས་སྨན་མགོ་ཕུར་བཤུ། །དང་པོ་ཁ་ཟས་དྲོད་བཅུད་ཕྱོགས་གཅིག་བསྟེན། །ཐོག་
མར་གྲང་བ་ཞི་བས་བདེར་མངོན་ཞིང༌། །བར་དུ་ཕན་དང་གནོད་པ་གང་ཡང་མེད། །མཇུག་
ཏུ་གཏིང་ཚད་སླེབ་ནས་གནོད་པར་ཚོར། །དེ་རྗེས་སྨན་གྱིས་མགོ་ཕུར་བཤུ་བ་ནི། །སྤྱི་རུ་
གབ་ན་ཅུ་གང་བདེ་བྱེད་སྦྱར། །སེ་འབྲུ་བཞི་པས་བད་རླུང་མགོ་ཕུར་བཤུ། །གུར་གུམ་ཅུ་གང་
ཨུཏྤལ་ཚ་བ་འཇོམས། །ཁྱད་པར་སྣ་ཁྲིད་ནང་ཡན་ཕུགས་འཚོལ་གསུམ། །རང་གནས་སྣ་
ཁྲིད་བཟང་པོ་གསུམ་པོ་ལ། །ནང་ཡན་ཀུན་ལ་པི་པི་ལིང་གིས་བྱེད། །ཕུགས་འཚོལ་གཙོ་བོ་
ཙན་དན་གི་ཝཾ་དང༌། །གུར་གུམ་གསུམ་ལ་འཁོར་གྱིས་ཁ་སྒྱུར་བ། །སྙིང་ལ་རུ་རྟ་སྤོས་དཀར་
ཨ་ག་རུ། །མཁལ་མར་བྲག་ཞུན་གླ་རྩི་ཨ་རུ་ར། །ཕོ་བར་བོང་ང་དཀར་པོ་ལི་ག་དུར། །བྲག་
25-1-207


ཞུན་གསེར་གྱི་མེ་ཏོག་ཀ་ར་སྦྱར། །ཐུན་སྐྱུངས་ཆུ་ཚན་འཕུལ་ཏེ་བྲིད་ལ་བཏང༌། །དང་པོར་
བད་རླུང་ལ་ཕོག་མི་འཕྲོད་འདྲ། །བར་དུ་གྲང་བ་ཐལ་ནས་གནོད་པ་མེད། །ཐ་མ་ཚ་བར་
སླེབ་ནས་ཕན་པར་ཚོར། །དེ་དག་གསུམ་འགྱུར་སྨན་གྱི་མན་ངག་ཡིན། །བཅོས་པའི་ཐབས་
ལ་སྤྱི་དང་བྱེ་བྲག་གཉིས། །སྤྱི་ལ་བཅོས་པའི་ཚུལ་དང་གཉེན་པོ་གཉིས། །བཅོས་ཚུལ་དང་
པོ་རྐུན་ཆེན་ཕུགས་སུ་གཞུག །བར་དུ་དུད་ཁུང་རྒྱ་སྐར་དབྱེ་བ་དང༌། །ཐ་མ་མེ་ལྷག་ཆུ་ཡིས་
བསད་ཚུལ་གསུམ། །གཉེན་པོ་སྨན་དཔྱད་ཟས་དང་སྤྱོད་ལམ་བཞི། །སྨན་གྱིས་བཅོས་པ་
ཐང་དང་ཕྱེ་མ་གཉིས། །ཐང་སྦྱོར་འབྲས་བུ་གསུམ་དང་བ་ལེ་ཀ །ཨུཏྤལ་སླེ་ཏྲེས་ཏིག་ཏ་བོང་
ང་དཀར། །ག་དུར་བ་ཤ་ཀ་ཡི་བསྡུས་གྲང་བཏང༌། །ཚ་བ་ཁོང་གསོད་ཕྱིར་འཕུལ་ཁྲག་ངན་
འབྱེད། །དེ་རྗེས་ཕྱེ་མ་ག་བུར་ཨ་ག་རུ། །བསིལ་གསུམ་ཏིག་ཏ་བོང་ང་ལི་ག་དུར། །ཀ་ར་
དཀར་པོའི་རྟ་ལ་བསྐྱོན་ལ་བཏང༌། །གི་ཝཾ་ཙན་དན་བསིལ་གསུམ་ཨ་རུ་ར། །གླ་རྩི་བོང་ང་
དཀར་པོ་ཀ་ར་སྦྱར། །གུར་གུམ་ཅུ་གང་ཏིག་ཏ་ཨ་རུ་ར། །བྲག་ཞུན་ཨུཏྤལ་མཚེ་ཚིགས་བ་ལེ་
ཀ །ཀ་ར་སྦྱར་བ་ཚ་བ་རབ་འབྲིང་ཐ། །སྙིང་མཁལ་ཕོ་བ་གནས་དང་སྦྱར་ཏེ་བསྟེན། །ཡང་ན་
གོང་གི་ནང་ཡན་བཞག་པ་ཡི། །སྣ་ཁྲིད་ཕུགས་འཚོལ་སྦྱར་བས་ཚ་བ་འཕུལ། ཁ་ཟས་འབྲས་
དང་བ་ལང་ཤ་གསར་དང༌། །ཆག་ཚེ་མར་གསར་ཞོ་དཀྲུགས་མཁས་པས་སྦྱར། །སྤྱོད་ལམ་
བསིལ་གནས་དལ་འདུག་གཉིད་མི་ལོག །དེ་ཡིས་ཚ་བ་ཁོང་ནས་ཕྱིར་འཕུལ་ཏེ། །གྲོག་ཚང་
བཤིག་འདྲ་ཕྱི་ཚད་སྐྱེས་པ་ན། །དཔྱད་དུ་གང་རྒྱས་རྩ་གཏར་བཤལ་གྱིས་སྦྱང༌། །རུས་བབས་
བདུད་རྩི་ལྔ་ཡི་རླངས་ལུམས་བྱ། །ཤ་དང་ལྤགས་ལ་བབ་པ་རྔུལ་དུ་དབྱུང༌། །མཁལ་མ་ནང་
རྩར་བབས་ན་རྩ་ནས་སྦྱང༌། །དེ་དག་ཚ་བ་རང་སར་དབྱུང་བ་སྟེ། །དུ་བ་འཁྱིམས་ལ་རྒྱ་སྐར་
འབྱེད་བཞིན་ནོ། །ཐ་མར་ཚད་གཞུག་མ་ཐོན་རོ་མ་ལས། །རྐྱེན་དང་ཕྲད་ན་མེ་སྟག་སྤྲ་བ་
འདྲ། །དེ་ཕྱིར་གི་ཝཾ་ཙན་དན་བསིལ་གསུམ་དང༌། །ཤིང་མངར་རྒུན་འབྲུམ་ཛཱ་ཏི་པི་པི་ལིང༌།  །
25-1-208

 
སེ་འབྲུ་ཤིང་ཚ་ཀ་ར་སྦྱར་བ་ཡིས། །ཕོ་བའི་མེ་གསོ་ཚ་བའི་ལྷག་མ་འདོན། །བལ་ཚིའི་ཆུ་
ལུམས་ཏིག་ཏའི་སྨན་མར་སྦྱར། །ཚད་ལྷག་མེད་པའི་རྟགས་ཐོབ་ཁ་ཟས་གློད། །དེ་རྗེས་
བྱེ་བྲག་གང་བབས་གསང་ཁ་བསྡམ། །བྱེ་བྲག་སྙིང་ལ་ཚ་བ་གབ་པ་ལ། །ག་བུར་ཙན་དན་
དཀར་དམར་ཨ་ག་རུ། །བསིལ་གསུམ་ཛཱ་ཏི་ཞོ་ཤ་གེ་སར་དང༌། །ཨ་རུ་ར་དང་ཀ་ར་སྦྱར་ལ་
བཏང་། །ཚད་སྟོབས་ཆུང་ན་ཙན་དན་དཀར་པོ་དང༌། །ཨུཏྤལ་ནཱ་ག་གེ་སར་ཨ་རུ་ར། །ཛཱ་ཏི་
སྐྱུ་རུ་ཀ་ར་སྦྱར་ལ་བཏང༌། །རྩེ་ཆུང་སྣོད་ཀ་ལྕེ་རྩ་ཐོང་རྩ་གཏར། །ཚ་བ་ཆོམས་ནས་ནུ་དབྲག་
དྲུག་བདུན་བསྲེག །ཁ་ཟས་ཕྱིས་ན་སྙིང་རླུང་འཇུག་པས་ན། །སྔ་རུ་ཟས་གློད་འབྲས་གསུམ་
སྨན་མར་སྦྱར། །ཕོ་བར་གབ་ན་སེ་འབྲུ་ལྔ་པའམ། །ད་ལིས་བདུན་པས་ཕོ་བའི་གཞི་བཟུང་
ལ། །གུར་གུམ་གསེར་གྱི་མེ་ཏོག་དུག་མོ་ཉུང༌། །བྲག་ཞུན་དོམ་མཁྲིས་ག་དུར་བ་ལེ་ཀ །ཀ་
ར་སྦྱར་བ་གུང་གཉིས་བསྐོལ་གྲངས་དབུལ། །ཡང་ན་བདེ་བྱེད་ཆེན་པོ་དུས་བཞིར་བསྟེན། །
རུ་ཐུང་སྣོད་ཀ་གཏར་ལ་(སྙ་ལོ་ཆུ་རྩ་བསྡུས་ལ་དུར་བྱིད་པི་ལིང་ཁ་ཚར་བཏབ་པའི་)ཐང་ཁྲུས་བྱ། །ཁ་ཟས་
ཁྲེའུ་རྗེས་ལ་ཕོ་གསང་བསྲེག །མཁལ་མར་གབ་ན་དམར་པོ་བཞི་ཐང་བཏང༌། །ཕྱེ་མ་ཙན་
དན་གུར་གུམ་སུག་སྨེལ་དང༌། །ཏིག་ཏ་བྲག་ཞུན་ཤུག་ཚེར་ཨ་རུ་ར། །ཡང་ན་ཙན་དན་གླ་
རྩི་ཨ་རུ་ར། །སུག་སྨེལ་ལི་ཤི་གུར་གུམ་ཏིག་ཏ་དང༌། །འཇམ་འབྲས་ཀ་ར་སྦྱར་བཏང་བྱིན་
ལོང་གཏར། །གཟེར་སར་གླ་རིལ་དྲི་ཆུར་བཙོས་པས་བདུག །རྗེས་ལ་སྦྲང་ཆང་བོང་ཤས་
མཁལ་ཟུངས་གསོ། །རྩ་བ་ལྔ་སྦྱར་ཚིགས་པ་བཅུ་བཞི་བསྲེག །དེ་ལྟར་གབ་པའི་ཚ་བ་རྣམ་
པ་གསུམ། །ཚ་རྗེས་དྲོད་ཀྱིས་མ་བཅོས་གྲང་བར་ལྡོག །ཅེས་གསུངས་སོ། །བདུད་རྩི་སྙིང་པོ་
ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གབ་པའི་ཚ་བ་བཅོས་པའི་ལེའུ་སྟེ་བཅོ་
བརྒྱད་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།  །
25-1-209

 
རྙིངས་པའི་ཚ་བའི་རྒྱུ་རྐྱེན་ངོ་བོ་གང༌། །ཚ་བ་རྙིངས་པའི་མིང་དུ་ཅི་ཕྱིར་བཏགས། །དབྱེ་
བ་རྟགས་དང་བཅོས་ཐབས་བཤད་དུ་གསོལ། །དེ་སྐད་ཞུས་པའི་དོན་ལ་ལན་གསུངས་པ། །
རྙིངས་ཚད་རྒྱུ་ནི་ལོ་ཟླ་ལོན་པ་སྟེ། །དེ་རྐྱེན་རང་བཞིན་རྙིངས་དང་རྐྱེན་གྱིས་རྙིངས། །སྦྱོར་བ་
དམན་པས་རྙིངས་པ་རྣམ་པ་གསུམ། །རང་བཞིན་རྙིངས་པ་བད་ཀན་སྨུག་པོ་དུག །ལོ་དང་ཟླ་
བར་ཟུངས་དང་ཡེ་ནས་འདྲེས། །རྐྱེན་གྱིས་རྙིངས་པ་ཚ་བ་ཕྲན་བུ་ལ། །ཟས་སྤྱོད་མ་བསྡམས་
ཕྱོགས་མེད་བཏང་བ་ཡིས། །རྒྱུ་ཆུང་བ་ཡིས་རྒྱས་པར་མ་ནུས་ཀྱང༌། །ཟས་སྤྱོད་རྐྱེན་གྱིས་ཚ་
བ་ཞིར་མ་སྟེར། །མ་སྨིན་མཁྲིས་ཤས་ཆེ་ལ་བཅོས་སྔས་པ་འམ། །སྦྱོར་བ་དམན་པ་རིམས་
ཆུང་འཇམ་འཁྲུགས་སམ། །འགྲམས་ཆུང་གཉེན་པོས་མ་ནོན་ཡུན་དུ་ལས། །དེ་ལྟར་རྐྱེན་
དེས་ལོ་དང་ཟླ་བ་རུ། །ནད་དེ་ཟུངས་སུ་འདྲེས་ཤིང་ཞེན་པ་ཡིས། །ལྕགས་ལ་བཙའ་འམ་རས་
ལ་སྣུམ་ཞེན་ནམ། །ཤིང་ལ་སྲ་རྩི་བཏང་འདྲ་གཏིང་འདོན་དཀའ། །ཡུན་རིང་ལོན་ཕྱིར་ཚ་བ་
རྙིངས་ཞེས་བྱ། །རྙིངས་ཚད་དབྱེ་བ་སྤྱི་དང་བྱེ་བྲག་གཉིས། །སྤྱི་ལ་རྙིངས་ཚད་རླུང་ལྡན་རླུང་
མེད་གཉིས། །རླུང་མེད་སྦྱོར་དམན་རྐྱེན་གྱིས་རྙིངས་ལས་བྱུང༌། །རླུང་ལྡན་མ་སྨིན་རླུང་ཤས་
ཆེ་བ་ལ། །བཅོས་པ་སྔས་པས་ནད་ལ་བྱ་ཤོར་ཏེ། །གཅིག་བཅོས་གཅིག་སྐྱེས་ཚ་བ་མ་གསོད་
པས། །རླུང་ཚད་འཐབ་ཅིང་ཡུན་དུ་ལས་པའམ། །རླུང་གི་རི་ཐང་མཚམས་སུ་བཅུད་སྔས་
པས། །ཚད་གཞུག་ལས་པ་རླུང་དང་བསྡོངས་ལས་བྱུང༌། །བྱེ་བྲག་དབྱེ་བ་ཤ་ལ་རྒྱས་པ་དང་། །
རྩ་རུ་རྒྱུ་ཞིང་རུས་ལ་ཞེན་པའོ། །རྟགས་ལ་སྤྱི་དང་བྱེ་བྲག་རྣམ་པ་གཉིས། །སྤྱི་ཡི་རྟགས་ལ་
རྙིངས་ཚད་རླུང་མེད་དེ། །རྩ་རྒྱུད་ཕྲ་གྲིམས་ཆུ་དམར་རླངས་ཡུན་རིང༌། །གདོང་སྣུམ་ཁ་འབྱར་
རྐན་ཕུགས་སྐམ་ལ་གྱོང༌། །མིག་རྩ་དམར་ལ་ཚག་ཅིང་མཆི་མ་འཛག །ཤ་མདོག་སྔོ་ལ་སྐམ་
ཞིང་དྲེག་ཆུང་ཆགས། །འགུལ་ན་གློ་སྙིང་འཕར་ལ་རོ་སྟོད་ཚ། །ཡན་ལག་བཞི་དང་རོ་སྨད་
ལྕི་ལ་སྦྲིད། །སྙིང་ལ་གྲང་མོ་འདོད་ཅིང་བསིལ་གྲིབ་སྙེག །ཉིན་དགུང་སྲོད་ལ་ན་ཞིང་རྔུལ་ཁ་
25-1-210


སྙི། །གཉིད་ཆེ་དྲོད་བག་རྗེས་ལ་ལྡང་ཞིང་ན། །ཚ་བ་གཞན་པས་དང་ག་བག་ཙམ་བདེ། །རླུང་
ལྡན་དེ་འདྲ་ཁྱད་པར་ལུས་ཤེད་ཆུང༌། །སྐབས་སུ་ཕྲུམ་སེར་ཁྱེར་ཞིང་བ་སྤུ་བརྩེ། །དོན་མེད་
རྔུལ་འོང་གཟེར་འགྲམ་རུས་ཚིགས་ན། །བྱེ་བྲག་ཤ་ལ་རྒྱས་ན་ཁོལ་བུར་སྐྲངས། །དམར་སྲ་
བཙིར་ན་ན་ལ་རྣག་ཆུ་འཛག །ལྤགས་ལ་གྲམ་ན་བརྩེ་ཞིང་ཚ་བར་བྱེད། །རྩར་རྒྱུ་ནག་པོར་གསལ་ལ་རྩ་
ཐོག་སྐྲངས། །རུས་ཞེན་ཁོལ་བུར་ན་ཞིང་སོ་མདངས་ཉམས། །སྔོ་སྐམས་ཚིགས་པ་གཡོ་ཞིང་
སྒྱིད་པ་འཁུམས། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་ལ་བཅོས་པའི་ཚུལ་
དང་གཉེན་པོའོ། །བཅོས་ཚུལ་དང་པོ་གྱོང་པོ་བརླན་གྱིས་སྦང༌། །བར་དུ་ཐལ་ཚན་ཆུ་ཡིས་
བྲན་པར་བྱ། །ཐ་མར་དུག་གི་སྡོང་པོ་རྩད་ནས་གདོན། །གཉེན་པོ་སྨན་དཔྱད་ཟས་དང་སྤྱོད་
ལམ་བཞི། །ཚ་རྒན་ལུས་སྤྱིར་གྲམ་ཞིང་ཞེན་པ་དེ། །བསྡུ་ཞིང་ནད་ཁྲག་ལུས་ཟུངས་དབྱེ་
བའི་ཕྱིར། །འབྲས་བུ་གསུམ་དང་ཏིག་ཏ་སླེ་ཏྲེས་གཉིས། །བསྐོལ་གྲངས་ཡུན་དུ་བསྲིངས་
པའི་བརླན་གྱིས་སྦང༌། །རྔུལ་ཆད་ལུས་ཡང་ཁམས་དྭངས་དང་ག་བདེ། །གཟེར་བ་ཞིའམ་
འདུས་ན་གང་བབས་རྩ། །མང་དུ་རླངས་ཐོན་ཁ་དབྱེ་ཉུང་དུ་འདོན། །དེ་རྗེས་ཏིག་ཏ་ཧོང་
ལེན་འབྲས་བུ་གསུམ། །སྤང་རྩི་བསྐོལ་གྲངས་ཚ་བ་རོལ་དུ་གསོད། །ཕྱེ་མ་ག་བུར་ཉི་ཤུ་རྩ་
ལྔ་པ། །འབྲས་བུ་གསུམ་མམ་སེང་ལྡེང་ཐང་གིས་དབུལ། །དེ་རྗེས་ཨ་རུ་བར་སྐྱུར་ལྕུམ་རྩ་
དང༌། །དུར་བྱིད་བ་ཆུར་སྦངས་ལ་སྦྲང་གིས་བསྒྱུར། །ལྟོ་སྟོང་བཏང་བས་ངེས་མེད་རྒྱུན་དུ་
འཁྲུ། །ནད་དང་ལུས་ཤེད་སྦྱར་ལ་དུས་བབས་བཅད། །ཚད་ཞེན་རྩད་ནས་འབྱིན་པའི་དཔྱད་
མཆོག་ཡིན། །དེ་ནས་གི་ཝཾ་ཙན་དན་བསིལ་གསུམ་དང་། །ཨུཏྤལ་སླེ་ཏྲེས་བྲག་ཞུན་ཀ་ར་
སྦྱར། །རླུང་དང་ལྡན་ལ་ཏིག་ཏའི་སྨན་མར་ཤིས། །དེ་ལྟར་བཅོས་ཀྱང་ཚ་བ་སླར་འཕེལ་ན། །
སྟོངས་ཚད་འབྱུང་བས་ཟས་ཀྱིས་རླུང་སྣ་བསླན། །དེས་ཀྱང་མ་ཞི་ལུས་ཟུངས་ཚ་བར་ལོག །
ཅིས་ཀྱང་མ་ཆོགས་ལ་ཆེན་འདའ་བར་འགྱུར། །དེས་ན་ཚ་བ་རྣམ་གསུམ་བརྟག་པ་གཅེས།  །
25-1-211

 
ཁ་ཟས་རི་དྭགས་བ་ལང་ཤ་གསར་དང་། །བ་རའི་ཞོ་དར་མར་གསར་ཆག་ཚེ་བཏང༌། །ཡོས་
ཆང་སྲོ་ལོས་བསིངས་པ་རིག་པས་སྦྱར། །སྤྱོད་ལམ་མེ་ཉི་ལུས་ངག་རྩོལ་བ་སྤང༌། །བསིལ་
སར་ཉིན་གཉིད་མི་ལོག་དལ་བར་བསྡད། །དེ་ལྟར་བཅོས་རྗེས་ཚད་ལྷག་མེད་པར་བདེའ། །
ཅུང་ཟད་ལུས་ཀྱང་ཉུང་མའི་རྨ་དང་འདྲ། །དེ་ཕྱིར་ཟས་སྤྱོད་ཟླ་བའི་བར་དུ་བསྡམ། །ཉི་ཤུ་
རྩ་ལྔ་སྦྱར་ཞིང་ཆུ་ལྕག་བྲན། །སྣེ་དམར་(སྲད་དཀར་སྟབ་སེང་འབྲས་གསུམ་གྱི་)སྦྱོར་བ་ནང་མ་འགའ་
བཏང་ལ། །རྔུལ་དབྱུང་ཚ་བ་ཅུང་ཟད་ལུས་མི་སྲིད། །དེ་ནས་ཟས་དང་སྤྱོད་ལམ་ཆ་ཡིས་གློད། །
བྱེ་བྲག་ཤར་རྒྱས་ཉི་ཤུ་རྩ་ལྔ་སྦྱར། །མཆིན་རྩས་གཙོ་བྱས་རྩ་ཁ་མང་དུ་དབྱེ། །རྔུལ་དབྱུང་ཆུ་
ལྕག་རྒྱུན་སྦྱོངས་བསྔགས་པ་ཡིན། །རྩ་རུ་རྒྱུ་ན་ཙན་དན་(དཀར་དམར་གཉིས་བསིལ་གསུམ་ག་དུར་དོམ་
མཁྲིས་ཨུཏྤལ་སོ་མ་ར་ཛ་མཚལ་ཧོང་ལེན་)བཅུ་གཅིག་སྦྱར། །གང་རྒྱས་རྩ་གཏར་སྐྱེད་ཆུང་རྩ་སྦྱོངས་བྱ། །
རུས་ལ་ཞེན་ན་ཤིང་སྣ་(ཙན་དན་གཉིས་སེང་ལྡེང་སྐྱེར་པ་དེ་བ་དཱ་རུ་སྨྱུག་ཤུན་སྤྱི་ཞུར་རུ་རྟ་ཀ་ར་)བརྒྱད་པ་སྦྱོར། །
རུས་རྙིང་བདུད་རྩི་ལྔ་ཡི་རླངས་ལུམས་བྱ། །མཁལ་རྩ་གཏར་ཞིང་རྒྱུན་སྦྱོངས་ཤིས་པ་ཡིན། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཚ་
བ་རྙིངས་པ་བཅོས་པའི་ལེའུ་སྟེ་བཅུ་དགུ་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས། །
ཚ་བ་རྙོགས་པའི་རྒྱུ་རྐྱེན་ངོ་བོ་གང༌། །རྙོགས་པའི་ཚ་བ་མིང་དུ་ཅི་ཕྱིར་བཏགས། །དབྱེ་བ་
རྟགས་དང་བཅོས་ཐབས་བཤད་དུ་གསོལ། །དེ་སྐད་ཞུས་པའི་དོན་ལ་ལན་གསུངས་པ། །ཚ་
བ་རྙོགས་པའི་རྒྱུ་ནི་ཆུ་སེར་ཡིན། །རྐྱེན་ནི་རང་བཞིན་རྙོགས་དང་རྐྱེན་གྱིས་རྙོགས། །རང་
བཞིན་ཆུ་སེར་ཤས་ཆེའི་ཚ་བ་རྣམས། །བཅོས་རྗེས་ནད་གཞིའི་ཐོག་ཏུ་ལྷུང་བ་ཡིན། །རྐྱེན་
གྱིས་རྙོགས་པ་བཅོས་སྔས་ཁ་ཐལ་གཉིས། །བཅོས་སྔས་མ་སྨིན་ཚ་བའི་རིགས་གང་ཡང༌། །
སྨན་དཔྱད་ཟས་སྤྱོད་གཉེན་པོ་བསྟེན་སྔས་པས། །བད་ཀན་སྐྱེས་ཏེ་ཕོ་བའི་མེ་དྲོད་ཤོར།  །
25-1-212

 
རླུང་ནད་སྐྱེས་པས་ཚ་བ་རྩ་མིག་བྱེར། །རླུང་གིས་ཁྲག་གཡོས་ཆུ་སེར་སྐྱེད་པ་ཡིན། །ཁ་ཐལ་
བ་ནི་བད་ཀན་རི་ཐང་མཚམས། །བསིལ་དྲགས་ཕོ་བའི་མེ་ཤི་གྲང་ཆུར་འགྱུར། །ངོ་བོ་རླུང་
ཁྲག་ཆུ་སེར་འདུས་པའི་ནད། །ཆུ་མིག་རྙོགས་སམ་བྱེ་ཆབ་གཡོས་པ་བཞིན། །བཅོས་ཉེས་
རྙོགས་ཕྱིར་རྙོགས་ཚད་མིང་དུ་བཏགས། །འཇུག་སྒོ་དྲུག་ཞུགས་ལུས་ཀུན་ཁྱབ་པར་བྱེད། །
དེ་ལ་དབྱེ་བ་སྤྱི་དང་བྱེ་བྲག་གཉིས། །སྤྱི་ལ་ཚ་བས་རྙོགས་དང་གྲང་རྙོགས་གཉིས། །རྒྱུ་རྐྱེན་
དག་གིས་ནད་སྟོབས་ཆེ་ཆུང་ཡིན། །བྱེ་བྲག་པགས་ལ་གྲམ་དང་ཤ་ལ་རྒྱས། །རྩ་རུ་འགྲིམས་
དང་རུས་ལ་ཞེན་པ་དང༌། །དོན་ལ་བབས་དང་སྣོད་དུ་ལྷུང་བ་དྲུག །རྟགས་ལ་སྤྱི་དང་བྱེ་བྲག་
རྣམ་པ་གཉིས། །སྤྱི་རྟགས་ཚ་རྙོགས་ཆུ་དམར་རྒྱ་བཤལ་འདྲ། །རྩ་རྒྱུད་ཕྲ་ལ་མགྱོགས་ཤིང་
གཏིང་ན་རྒྱུག །གདོང་པ་སེར་སྦོས་ལྕེ་རྙིལ་སེན་བཀྲག་འཆོར། །འགུལ་ན་རྔམ་པ་རྒོད་ལ་
གློ་སྙིང་འཕར། །ཤེད་ཆུང་རྔུལ་ཁ་སྙི་ལ་ཁ་ལྕེ་སྐམ། །གཉིད་ཆེ་གློ་མང་མིག་ལྕིབས་རྐང་བོལ་
གཡོ། །ལུས་པོ་བརྩེ་ཞིང་རོ་སྟོད་གཟེར་ཕྲན་འོང༌། །ནད་སྟོབས་ཆེ་ན་དོན་ལ་རྣག་ཆུ་གསོག །
ཁྱད་པར་རྔུལ་བརྩེ་སྣ་ཁྲག་གཡོ་བ་ཡིན། །གྲང་རྙོགས་རྩ་རྒྱུད་ཕྲ་ཞིང་སྟོང་ལ་མགྱོགས། །ཆུ་མདོག་
དམར་སེར་རྙོག་ཅིང་གདོང་པ་སྦོ། །བྲང་དང་གསུས་པ་ངར་གདོང་རྐང་བོལ་གཡོ། །ལྕེ་དང་
རྙིལ་སྐྱ་ལུས་རྔུལ་རྔམ་པ་རྒོད། །ཕོ་བ་རྫིང་ལ་ཁ་ཟས་འཇུ་སྟོབས་ཆུང༌། །ནད་སྟོབས་ཆེ་ན་
ཚ་ཆུར་འགྱུར་བ་ཡིན། །བྱེ་བྲག་པགས་གྲམ་སྐྲ་དང་བ་སྤུ་འབྱི། །ཟ་འཕྲུག་ཆུ་རྐང་མེ་དབལ་
ཤུ་ཐོར་ཡོང༌། །ཤ་རྒྱས་ཁོལ་བུར་ན་ཞིང་འབར་འབུར་སྐྲངས། །དམར་སྲབ་བརྟོལ་ན་རྣག་
ཁྲག་ཆུ་སེར་འཛག །རྩར་འགྲིམས་རྩ་རྒྱས་ནག་པོར་གསལ་བ་དང༌། །རྩ་འཁྱུག་རྩ་སྟེང་
སྐྲངས་ཤིང་ཡན་ལག་སྦྲིད། །རུས་ཞེན་ཤ་སྐམ་སྔོ་ལ་ཁོལ་བུར་ན། །གདོང་སྐྲངས་ཚིགས་
ཁ་གཡོ་ཞིང་སྒྱིད་པ་འཁུམས། །སོ་དང་སེན་མོའི་སྐྲག་འཆོར་སྐྱ་གླེག་འགྲོ། །གློར་བབས་
དབུགས་ཐུང་སྐད་འཛེར་བྲང་རྒྱབ་གཟེར། །མིག་མཆུ་བོལ་སྐྲངས་དབུགས་རྒོད་རྣག་ཁྲག་
25-1-213


ལུ། །སྙིང་བབས་འཐིབས་མྱོས་དྲན་ཉམས་གྲང་མོ་འདོད། །མཆིན་བབས་མིག་སེར་ལུས་ལྕི་
དང་ག་འགག །ལྕེ་བཀྲ་རྙིལ་དཀར་ལུས་སྤྱི་སེར་པོར་འགྲོ། །མཆེར་བབས་གཡོན་གཟེར་
མཆུ་སྐྲངས་སྦྲིད་པ་མང༌། །མཁལ་བབས་རྐེད་པ་ན་ཞིང་རོ་སྨད་ལྕི། །སྣོད་དུ་ལྷུང་ན་དང་
ག་འགགས་པ་དང༌། །འཁྲུ་སྐྱུག་དྲི་མ་འགག་གམ་འཚིང་ཞིང་འགྱུང་། །གསོ་བའི་ཐབས་ལ་
སྤྱི་དང་བྱེ་བྲག་གཉིས། །སྤྱི་ལ་བཅོས་པའི་ཚུལ་དང་གཉེན་པོ་གཉིས། །བཅོས་ཚུལ་དང་པོ་
རླན་ཆེན་བྱེ་མ་སྐམ། །བར་དུ་ཆུ་བོ་རྐ་རུ་དྲང་བ་དང༌། །ཐ་མ་དགྲ་བོ་གཉེན་དུ་བཟླུམས་པས་
བཅོས། །གཉེན་པོ་སྨན་དཔྱད་ཟས་དང་སྤྱོད་ལམ་བཞི། །དང་པོ་ཚ་རྙོགས་ཆུ་སེར་སྐེམ་པའི་
སྨན། །སྡུད་ཐང་གསུམ་གྱིས་བྱེར་བ་བསྡུས་བྱས་ནས། །ཉི་ཤུ་རྩ་ལྔ་རུས་ཐང་འཕུལ་བཏང་
བས། །ཚ་བ་འདུས་ཤིང་རླུང་ཁ་སྙོམས་པར་བྱེད། །དེ་ནས་ཙན་དན་དཀར་དམར་འབྲས་བུ་
གསུམ། །བྲག་ཞུན་སྤོས་དཀར་སོ་མ་ར་ཛ་དང༌། །བསིལ་གསུམ་པི་པི་ལིང་དང་ཀ་ར་སྦྱར། །
སེང་ལྡེང་ཁུ་བས་འཕུལ་བས་ཆུ་སེར་སྐེམ། །དེ་རྗེས་གང་རྒྱས་རྩ་ཁ་མང་དུ་དབྱེ། །འབྲས་
བུ་གསུམ་གྱི་རྒྱུན་སྦྱོངས་དག་པར་སྦྱང༌། །གྲང་རྙོགས་དང་པོ་སེ་འབྲུ་ལྔ་པའམ། །ཅུ་གང་
བདེ་བྱེད་ཆུང་ངུས་ཕོ་བ་བཟུང༌། །དེ་རྗེས་ཐང་གིས་བསྡུས་ལ་རྒྱུན་སྦྱོངས་བྱ། །བཟང་དྲུག་
ཆུ་སེར་སྨན་གསུམ་འབྲས་བུ་གསུམ། །ཤ་རུ་དུར་ཐོད་འགྲོན་བུ་ཚྭ་གསུམ་ཐལ། །སེ་འབྲུ་ལྔ་
དང་ལྟག་སྤྲོད་ཆུ་སེར་སྐེམ། །ནད་སྟོབས་ཆེ་ན་དམུ་ཆུའི་སྦྱོངས་སྐེམས་བྱ། །ཐ་མར་ཆུ་སེར་
ཚད་ལྷག་ཟུངས་སུ་སྒྱུར། །དེ་ཡི་སྦྱོར་བ་སྦྲང་ཆང་རྐྱང་ཁུག་གམ། །གཟེ་མ་སྲོ་ལོ་འབྲས་བུ་
གསུམ་གྱི་ཆང༌། །ཆུ་སེར་རླུང་མཁྲིས་བད་ཀན་གཞི་དང་བསྟུན། །འབའ་སམ་སྨན་མར་སྦྲང་
དང་སྦྱར་ལ་བསྟེན། །དེ་ཡིས་ཆུ་སེར་ཁྲག་ངན་ཟུངས་ཁྲག་ཏུ། །དངུལ་ལ་གསེར་འགྱུར་རྩི་
བཞིན་སྒྱུར་བར་བྱེད། །ཟས་དང་སྤྱོད་ལམ་རྙིངས་ཚད་ཇི་བཞིན་ནོ། །བྱེ་བྲག་ཤ་ལྤགས་
གཉིས་ལ་བབས་པ་ལ། །མཆིན་མཆེར་རྩ་གཏར་འབྲས་བུའི་རྒྱུན་སྦྱོངས་བྱ། །ཆུ་ལྕག་བརྡེག་
25-1-214


ཅིང་ཉི་ཤུ་རྩ་ལྔ་སྦྱར། །བ་སྤུའི་སྐྱི་ཁྲུས་རྔུལ་འདོན་མཆོག་ཏུ་བསྔགས། །ཙན་དན་ཆུ་སེར་
སྨན་གཉིས་བ་ཆུ་བྱུག །རྩར་བབས་ཕྱི་རྩ་གཏར་ལ་ནང་རྩ་སྦྱང༌། །ཙན་དན་(དཀར་དམར་ག་
དུར་དོམ་མཁྲིས་སོ་མ་ར་ཛ་ཅུ་གང་ལི་ཤི་ཨུཏྤལ་མཚལ་ཧོང་ལེན་ཀ་ར་)བཅུ་པས་རྩ་ཡི་ཚ་བ་
སྐེམ། །རུས་ཞེན་མི་རུས་བདུད་རྩིའི་རླངས་ལུམས་བྱ། །རྒྱུན་སྦྱོངས་སྐྱི་ཁྲུས་མཁལ་རྩ་གཏར་
བ་དང༌། །ཤིང་སྣ་བརྒྱད་པས་རུས་པའི་ཚད་པ་སྐེམ། །གློར་བབས་ཙན་དན་གི་ཝཾ་ཨ་ག་རུ། །
ཅུ་གང་གུར་ཀུམ་ཤིང་མངར་རྒུན་འབྲུམ་དང༌། །སྲོ་ལོ་སྤང་རྒྱན་འབུ་སུ་ཀ་ར་སྦྱར། །རྣག་
མང་སྟར་བུ་པཉྫས་གྱེན་དུ་དྲངས། །རྗེས་ལ་ཉི་ཤུ་རྩ་ལྔས་རྣག་ཚད་སྐེམ། །ཚ་བ་ཆོམས་ནས་
དམར་གསུམ་(བསིལ་གསུམ་འདམ་བུ་ཤིང་མངར་ཀ་ར་སྦྲང་མར་གསར་གྱི་)ལྡེ་གུ་སྦྱར། །སྙིང་བབས་ཨ་ག་
རུ་དང་ཙན་དན་དཀར། །ཛཱ་ཏི་ཅུ་གང་གུར་ཀུམ་ལི་ཤི་དང༌། །ཞོ་ཤ་སྐྱུ་རུ་ར་དང་ཀ་ར་སྦྱར། །
དེ་རྗེས་གཏར་ལ་ཞོ་ཤ་(ཙན་དན་གཉིས་ཨ་རུ་ར་གུར་ཀུམ་སྤོས་དཀར་ཀ་རའི་)སྨན་མར་སྦྱར། །དཀར་
ནག་མཚམས་དང་དྲུག་པས་ནད་རྗེས་བཅད། །མཆིན་བབས་བྲག་ཞུན་གུར་གུམ་བདུན་པ་
སྦྱར། །རུ་ཐུང་སྣོད་ཀ་གཏར་ཞིང་འཇམ་ཁྲུས་བྱ། །མཆེར་བབས་གུར་ཀུམ་སེ་འབྲུ་ལྟག་པ་
སྤྲད། །རྗེས་ལ་ཕོ་གསང་ཚིགས་པ་བཅུ་གཅིག་བསྲེག །མཁལ་བབས་གུར་ཀུམ་(ཏིག་ཏ་སྐྱུ་རུ་
འཇམ་འབྲས་གླ་རྩི་ཤུག་ཚེར་ཙན་དན་ཀ་ར་)བདུན་དང་བྲག་ཞུན་(ཏིག་ཏ་གླ་རྩི་སྤོས་དཀར་སོ་མ་ར་གུར་ཀུམ་ཤུག་ཚེར་
སྤང་རྩི་ཀ་ར་)བརྒྱད། །རྗེས་ལ་གཏར་ལ་རྩ་ནག་བཅུ་བཞི་བསྲེག །སྦྲང་ཆང་རྐྱང་ཁུག་བཤུལ་
ཤས་མཁལ་ཟུངས་གསོ། །སྣོད་ལྷུང་བཤལ་བྱ་ཅུ་གང་བདེ་བྱེད་སྦྱར། །ཚ་བ་ཆེ་ན་གུར་ཀུམ་
གསེར་མེ་ཏོག །དོམ་མཁྲིས་ཏིག་ཏ་བྲག་ཞུན་ཨ་རུ་ར། །གླ་སྒང་ཀ་ར་སྦྱར་བས་སྣོད་ཚད་
སེལ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་ཚ་བ་རྙོགས་པ་བཅོས་པའི་ལེའུ་སྟེ་ཉི་ཤུ་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས།  །
25-1-215

 
འགྲམས་ཀྱི་ཚ་བའི་རྒྱུ་རྐྱེན་ངོ་བོ་གང༌། །འགྲམས་ཀྱི་ཚ་བའི་མིང་དུ་ཅིའི་ཕྱིར་བཏགས། །
དབྱེ་བ་རྟགས་དང་བཅོས་ཐབས་བཤད་དུ་གསོལ། །དེ་སྐད་ཞུས་པའི་དོན་ལ་ལན་གསུངས་
པ། །འགྲམས་ཚད་རྒྱུ་ནི་ནད་དང་ལུས་ཟུངས་ལ། །དེ་རྐྱེན་ལུས་ཀྱི་བྱ་བ་དྲག་ཤུལ་གྱིས། །
བང་མཆོངས་རྩལ་དང་ཕ་བོང་འདེགས་པ་དང༌། །མི་ཐེག་ཁུར་དང་གཞུ་སྲན་བཀང་བ་
དང༌། །ས་སྲན་བརྐོས་དང་གཡང་ལྷུང་རྟ་ཡིས་བརྡབས། །ཐིབས་འོག་ཚུད་དང་རྡོ་དབྱུག་
བརྡུངས་པ་ཡིས། །ལུས་ཟུངས་འགྲམས་པས་ཁྲག་འཁྲུགས་མཁྲིས་ཚད་བསླང་། །དེ་ཕྱིར་
འགྲམས་ཀྱི་ཚ་བ་ཞེས་སུ་བརྗོད། །དབྱེ་བ་ནང་གི་དོན་སྣོད་འགྲམས་པ་དང་། །ཕྱི་ཡི་ཡུལ་
བཞི་འགྲམས་པ་རྣམ་པ་གཉིས། །དང་པོ་དོན་ལྔ་སྣོད་དྲུག་འགྲམས་པ་དང༌། །ཡུལ་ནི་ཤ་
རུས་རྩ་དང་ཆུ་རྒྱུས་བཞི། །འགྲམས་པའི་རྟགས་ལ་སྤྱི་དང་བྱེ་བྲག་གཉིས། །སྤྱིར་རྟགས་གང་
འགྲམས་ན་ཞིང་གཟེར་ཟུག་ལྡང༌། །རྩ་ནི་ཕྲ་ལ་གྲིམས་ཏེ་ཆུ་དམར་དུགས། །གདོང་སྣུམ་
རྔམ་འདེགས་ལུས་ཀྱི་བྱ་བ་དཀའ། །བྱེ་བྲག་སྙིང་འགྲམས་ཁ་ལྐུགས་འགུལ་ན་འབོག །དྲན་
པ་མི་གསལ་གཉིད་ལོག་སད་ཚེ་དངངས། །ནུ་འཇིང་སོག་དབྲག་གཟེར་ལ་མིག་རྩ་ཧར། །
སྲོག་རྩར་འགྲམས་ན་མིག་ཧར་ཁུ་ཡིས་འདེབས། །དྲན་པ་མི་གསལ་ཟུག་ཆེ་ས་ལ་འབྲད། །
གློ་འགྲམས་རོ་རྒྱབ་ལྕི་ཞིང་ཉལ་མི་ཤེས། །སྣ་འབུད་དབུགས་མི་བདེ་ལ་གྲེ་བ་ཤུ། །གློ་ལུ་
མི་ཤེས་ཐལ་གོང་མནན་སྙམ་བྱེད། །བྲང་དང་རྒྱབ་ཏུ་གཟེར་ལ་དགྱེ་དགུ་དཀའ། །ལུད་པ་
འགོགས་དཀའ་ཁྲག་དང་རྣག་ཏུ་ལུ། །མཆིན་འགྲམས་རྩིབ་སྒང་མཆིན་སྣར་གཟེར་ཞིང་ན། །
ལུད་པ་ཁྲག་ཏུ་ལུ་ཞིང་སྣ་ཁྲག་འཛག །གློ་སྙིང་མི་བདེ་སྟོད་རྒྱངས་དབུགས་ཀྱིས་འདེགས། །
མིག་སྤྲིན་དམར་ལ་མི་གསལ་ཕོ་བ་སྒང༌། །མཆིན་དྲིར་འགྲམས་ན་ཤ་སྔོ་རོ་སྟོད་རྒྱངས། །
གློ་སོར་འགུལ་ན་སྙིང་རྡུང་འགྲོ་མི་ནུས། །ལུས་པོ་གྱོང་ལ་ཉུང་བསྲེགས་གཅུས་པ་འདྲ། །
མིག་དམར་མཆིན་དྲི་འཁོར་ལ་རྩེ་ཆུང་རྒྱངས། །མཆེར་འགྲམས་ཕོ་སྟོད་སྦོ་ཞིང་གཡོན་ངོས་
25-1-216


གཟེར། །གདོང་པ་གྲོ་བོ་སྦོ་འཁྲོག་སྐབས་སུ་འཁྲུ། །གཡོན་ངོས་རྩིབ་སྒང་རྩིབ་སྣར་གཟེར་
ཞིང་འཕྲིག །མཁལ་འགྲམས་ཚང་ར་མི་ཐེག་དགྱེ་དགུ་དཀའ། །མཁལ་ཁུང་སྣེ་ས་དཔྱི་མིག་
བརླ་སྒང་ཟུག །འབྲས་བུ་སྐྲངས་ཤིང་དྲི་ཆུ་ཁྲག་ཏུ་འཛག །ཕོ་བར་འགྲམས་ན་སྒྲེག་པ་དྲག་
པོ་འོང༌། །ཕོ་སྟོད་སྦོ་འཁྲུག་ཟས་སྐོམ་ཅི་ཟོས་སྐྱུག །གླང་ཐབས་ཕོ་བ་བསྒངས་ནས་ཉལ་མི་
ཤེས། །ལོང་འགྲམས་ལོང་ཕུགས་གཟེར་སྒང་སྦོ་འཁྲོག་མང༌། །གློ་འདེག་རོ་སྟོད་གང་ཞིང་
གྲང་སྙམ་བྱེད། །དབུགས་ངན་རྗེས་ལ་ཕྱི་ས་མི་ཐུབ་འཆོར། །རྒྱུ་མར་འགྲམས་ན་ཚ་འབྲབ་
འཁྲིལ་སྙམ་བྱེད། །སྣེ་སར་ལྷུང་སྙམ་ཆུ་སྡོམ་རྒྱུ་གླང་ལྡང་། །མཁྲིས་འགྲམས་མིག་སེར་ཤ་སྔོ་
མགོ་བོ་ལྕི། །མཆིན་པ་སྐྲངས་སྙམ་མཁལ་མ་མཆིན་དྲི་ན། །རོ་སྟོད་གང་སྙམ་ཆུ་དམར་གླང་
ཐབས་འོང༌། །ལྒང་པར་འགྲམས་ན་རྒྱུ་ཞབས་མཁལ་ཁུང་ན། །ཆུ་ཁ་སྙི་ཞིང་སྣེ་ས་ཚ་འབྲབ་
བྱེད། །བསམ་སེར་འགྲམས་ན་དཔྱི་མིག་བརླ་སུལ་ན། །སྟ་ཤ་ཆད་སྙམ་བྱེད་ཅིང་ལང་མི་
ཤེས། །རྐང་པ་བཤལ་སྦྲིད་ཚང་ར་འབྲེལ་མཚམས་ན། །སྐབས་སུ་དྲི་ཆུ་སྡོམ་པ་སྙམ་དུ་བྱེད། །
ཕྱི་ཡི་ཤ་འགྲམས་ཉྭ་དང་ཤ་གཞན་གཉིས། །ཉྭ་འགྲམས་ཉྭ་སྣ་སྐྲངས་ཤིང་བྱ་བ་ཉམས། །ཤ་
གཞན་རྡུངས་སྙམ་བྱེད་ཅིང་ན་དམར་སྐྲངས། །རུས་ལ་ཚིགས་རྐང་མགོ་སྲུབས་རྩིབ་མ་བཞི། །
ཚིགས་འགྲམས་འགུལ་དཀའ་ཟུག་ཆེ་གོང་འོག་སྐྲངས། །རྐང་འགྲམས་འགུལ་དཀའ་
གཏིང་ནས་ལྷང་ལྷང་བྱེད། །སྲུབས་འགྲམས་དྲན་པ་མི་གསལ་སྐྱུག་ཅིང་འཁྱོམ། །རྩིབ་མར་
འགྲམས་ན་ཟུག་ཆེ་མནན་མི་བཟོད། །རྩ་ལ་མགོ་དང་བྱང་ཁོག་ཡན་ལག་གསུམ། །མགོ་ཡི་
རྩ་འགྲམས་རྩ་རྒྱུད་ཁྲིད་ཅིང་ན། །རྩ་སྟེང་སྐྲངས་ཤིང་རྩ་འབྲུམ་འབྱུང་བ་ཡིན། །བྱང་ཁོག་
རྩ་འགྲམས་གློ་ལུ་གང་འགྲམས་གཟེར། །ཚ་བ་སྐྱེ་ཞིང་སྐྲངས་རྗེས་རྣག་ཏུ་འགྱུར། །ཡན་
ལག་རྩ་འགྲམས་རྩ་ཡི་རྒྱུད་ཀུན་སྐྲངས། །དམར་ཞིང་ཚ་འཁྱུག་བརྐྱང་བསྐུམ་བྱ་བ་དཀའ། །
ཆུ་རྒྱུས་འགྲམས་པ་དགྱེ་དགུ་མི་ཤེས་སྐྲངས། །ཆུ་བ་རྒྱབ་ཡིན་རྒྱུས་པ་མདུན་ན་གནས།  །
25-1-217

 
བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་ལ་བཅོས་ཐབས་སྨན་དཔྱད་ཟས་སྤྱོད་
བཞི། །དང་པོ་ཐང་སྦྱོར་ཧོང་ལེན་བ་ཤ་ཀ །སྤང་རྩི་ཀྱི་ལྕེ་རྣམ་པར་བཙོད་དང་དྲུག །ཚ་བའི་
སྟོབས་སྦྱར་གཉིས་བཞི་དྲུག་བསྡེབས་ལ། །བསྡུས་གྲང་ཁུ་བས་འགྲམས་ཚད་འཇོམས་པར་
བྱེད། །ཡང་ན་སྐྱེར་པ་མཚེ་ཟླུམ་སེང་ལྡེང་བཙོད། །བསྡུས་གྲང་འགྲམས་ཚད་ཀུན་ལ་བདུད་
རྩི་འདྲ། །ཕྱེ་མ་ཚ་བ་རབ་འབྲིང་བྱེ་བྲག་གིས། །ག་བུར་ཙན་དན་གུར་གུམ་གཙོ་བོ་ལ། །དོམ་
མཁྲིས་ག་དུར་རྣམ་པར་ཨ་རུ་ར། །ཨ་བྱག་སྟབ་སེང་ཀ་ར་དྲུག་འགྱུར་སྦྱར། །རྗེས་ལ་འབྲས་
བུ་གསུམ་དང་དམར་པོ་གསུམ། །སེང་ལྡེང་རྩ་བ་ལྔ་ལ་སོགས་པ་ཡི། །གང་འཕྲོད་སྨན་མར་
སྦྱར་བས་ཕྱི་རྗེས་བཅད། །དཔྱད་དུ་གཏར་བཤལ་དུགས་ལུམས་མས་བཏང་དང༌། །ཆུ་ལྕག་
ཕྱི་ནང་འགྲམས་ལ་མཁས་པས་སྦྱར། །ཁ་ཟས་སྤྱོད་ལམ་བསིལ་ཞིང་དལ་བར་བྱ། །རྟས་
བརྡབས་གཡང་དུ་ལྷུང་དང་ཐིབས་འོག་ཚུད། །བྱང་ཁོག་འགྲམས་ནས་ཚ་བ་རྒྱས་པ་ལ། །ག་
བུར་བདུན་དང་དགུ་པ་སྦྱར་བར་བྱ། །རྔུལ་དབྱུང་གང་རྒྱས་རྩ་གཏར་བཤལ་གྱིས་སྦྱང་། །བྱེ་
བྲག་བཅོས་པ་སྙིང་འགྲམས་གཙོ་བོ་(ག་བུར་ཅུ་གང་ཙན་དན་གི་ཝཾ་ཀ་ར་)བཞི། །ཨ་ཀར་(ཙན་དན་དཀར་
དམར་ཛཱ་ཏི་ལི་ཤི་བསེ་རུ་གླ་རྩི་སྙིང་ཞོ་ཤ་ཨ་རུ་ར་ཀ་ར་) དགུ་དང་ཛཱ་ཏི་(གུར་གུམ་ཅུ་གང་ན་ག་གེ་སེར་སྙིང་ཞོ་ཤ་ཀ་
རའོ་)ཅུར་ནི་སྦྱར། །སྙིང་རྩ་ཀུན་གཏར་དབེན་གནས་མི་བསྒུལ་བསྙལ། །བསིལ་བསྟེན་ཆང་
སྤང་རྗེས་ལ་དྲུག་བདུན་བསྲེག །སྲོག་རྩ་འགྲམས་པའི་བཅོས་ཐབས་སྙིང་དང་འདྲ། །ཁྱད་
པར་སྤྱི་གཙུག་རྐང་མཐིལ་གཏར་ལ་བསྲེག །གློ་འགྲམས་ག་དུར་གསུམ་པའི་ཐང་བཏང་ལ། །
ག་བུར་གསུམ་དགུ་ཅུ་གང་ལྔ་པ་སྦྱར། །ཚ་བའི་ཤུགས་སྦྱར་གཏར་གྱིས་ཟུག་གཟེར་བཅག །
རྣག་ཏུ་ལུ་ན་སྲིན་བྱའི་ཀླད་པ་བཏང༌། །བ་རའི་འོ་མ་དྲོན་མོ་ལྟོ་སྟོང་བླུད། །ཚ་བ་བྲི་ནས་སྲོ་
ལོའི་བསིངས་ཆང་དང༌། །ཅུ་གང་ལྡེ་གུ་སྦྱར་ལ་ཚད་རོ་བཅག །རྗེས་ལ་བཞི་ལྔ་བྲང་སྐས་ཆེ་
ཆུང་བསྲེག །མཆིན་འགྲམས་ཐོག་མར་ག་བུར་(བསིལ་གསུམ་གཡུ་རྙིང་འབྲས་གསུམ་ལུག་རུ་སྨུག་པོ་ཀ་ར་)
25-1-218


དགུ་པ་སྦྱར། །རྗེས་ལ་གུར་གུམ་གཡུ་རྙིང་ཏིང་སག་ཀྱུད། །ར་མར་སྦྱར་བསྐོལ་རླངས་ཡལ་
ཁོང་དུ་བཏང༌། །རྩེ་ཆུང་རུ་ཐུང་མཁྲིས་རྩ་རིམ་པས་གཏར། །དེ་རྗེས་དགུ་པ་མཆིན་པའི་ཟུར་
གསང་བསྲེག །མཆིན་དྲི་དེ་བཞིན་རྗེས་ལ་རྩ་ལྟོས་སྦྱངས། །བཞི་བཞིའི་སྟེང་དང་བརྒྱད་པ་
ཁ་གསུམ་བསྲེག །འབྲས་བུའི་སྨན་མར་སྦྲང་རྩི་བུར་ལྡན་བསྟེན། །མཆེར་འགྲམས་བཟང་
དྲུག་ཤིང་ཚ་མོན་ཆ་ར། །ག་དུར་དོང་ག་པི་པི་ལིང་དང་ནི། །ཀ་ར་སུམ་འགྱུར་ཆུ་སྐོལ་འཕུལ་
ལ་བཏང༌། །སྲིན་ལག་རྒྱབ་རྩ་རྟ་མཐུར་གཉིས་ལ་གཏར། །དེ་ནས་རྒྱམ་ཚྭ་ཚ་ལ་ལྕེ་མྱང་
ཚྭ། །ཀ་ར་མར་སྦྱར་ཕོ་མཆེར་གསང་ལ་བསྲེག །མཁལ་འགྲམས་དང་པོ་ཙན་དན་(གུར་གུམ་
སུག་སྨེལ་གླ་རྩི་འཇམ་འབྲས་རུ་རྟ་ཨ་རུ་)བདུན་པ་སྦྱར། །བར་དུ་ཞོ་ཤའི་ཕྱེ་མ་བྱིན་ལོང་གཏར། །ཐ་
མ་ཤུག་(སྐྱེར་པ་སྤ་འབྲུ་གཟེ་མ་ལྕམ་པ་བ་སྤྲུ་བ་རའི་མར་ལ་སྡིག་སྲིན་གུར་གུམ་བུ་རམ་)པའི་མར་སྦྱར་དུགས་
ལུམས་བྱ། །རྗེས་ལ་ཟས་སྐོམ་དྲོད་བསྟེན་མཁལ་གསང་བསྲེག །ཕོ་བར་འགྲམས་ན་སྤྱང་
ཚེར་ཆིག་སྐྱུགས་བྱ། །མཆེར་འགྲམས་འོལ་སེ་སོ་ཆ་འོ་སྦྱར་བཏང༌། །རྒྱམ་ཚྭ་ཚ་ལ་ལ་ཕུག་
ས་བོན་དང༌། །ཅོང་ཞི་ཚ་གསུམ་སྦྲང་ལ་རིལ་བུ་སྦྱར། །རུ་ཐུང་སྣོད་ཀ་གུང་སྲིན་བར་རྩ་
གཏར། །རྗེས་ལ་ཕོ་གསང་མདུན་རྒྱབ་རིམ་པས་བསྲོ། །ལོང་འགྲམས་ཤིང་ཀུན་ཁ་རུ་ཚྭ་དང་
ནི། །པི་པི་ལིང་གི་བསྐོལ་གྲངས་ཐང་དུ་བཏང༌། །ཡང་ན་ལ་ཕུག་ས་བོན་ཁ་རུ་ཚྭ། །ཤིང་ཚ་
བུ་རམ་ཆང་ངམ་ཕྱེ་མ་(ཤིང་ཀུན་ཅུར་ནི་)སྦྱར། །ལོང་རྩ་གཏར་ཞིང་གུར་གུམ་(ཨ་རུ་དབྱི་མོང་བསྡུས་ཁུར་
དུར་བྱིད་བཏབ་པའི་)བཤལ་གྱིས་སྦྱང་། །སྐབས་སུ་འདྲེན་བྱ་རྗེས་ལ་ལོང་གསང་བསྲེག །རྒྱུ་མར་
འགྲམས་ན་གུར་གུམ་(པི་ལིང་དུར་བྱིད་མར་བུ་རམ་སྦྱར་བའི་)བཤལ་གྱིས་སྦྱང༌། །ལོང་རྩ་རྒྱུ་མའི་རྩ་
གཏར་(ལྕུམ་རྩ་ལྕེ་མྱང་ཚྭ་མར་གྱི་)རེང་བུ་བྱ། །ཚ་དུགས་བྱ་ཞིང་རྗེས་ལ་བཅུ་བདུན་བསྲོ། །མཁྲིས་
འགྲམས་ཏིག་ཏའི་ཐང་བཏང་(ག་དུར་བཟང་དྲུག་གསེར་མེ་མི་དོམ་སྦྲུལ་གྱི་)མཁྲིས་ཕྱེ་སྦྱར། །མཁྲིས་
རྩ་ཀུན་གཏར་པ་ཏོ་ལ་ཡིས་སྦྱང༌། །རྗེས་ལ་ཚིགས་པ་བཅུ་པ་བསྲེག་པར་བྱ། །ལྒང་པར་
25-1-219


འགྲམས་ན་མཁལ་མའི་བཅོས་དང་འདྲ། །སྐབས་སུ་ཆུ་སྨན་བསྟེན་ཞིང་བཅོ་བརྒྱད་བསྲེག །
དཀུར་འགྲམས་མཁལ་མའི་བཅོས་འདྲ་བྱིན་ཀྱོག་གཏར། །བཀྲུ་འཇམ་བཏང་ཞིང་བཅུ་
གསུམ་དཔྱི་སྟེང་བསྲེག །དེ་ནས་ཕྱི་ཡུལ་འགྲམས་པ་བཅོས་པ་ནི། །ཉྭ་འགྲམས་ཉྭ་སྣ་ཨ་ས་
འབའ་ཆས་བདུག །གང་ཉེའི་རྩ་གཏར་རྣག་ཤོར་སྤྱི་དང་འདྲ། །ཤ་འགྲམས་ལུམས་གཏར་དེ་
བཞིན་དེབ་ཏུ་བཙལ། །ཚིགས་འགྲམས་དྲོད་བཅས་སྐྲངས་དམར་ཆུ་ལྕག་བརྡེག །མཚན་མོ་
བྱེ་རློན་བ་ལྕིའི་ལུམས་སུ་གཞུག །སྐབས་སུ་ཕྱིང་པ་ཆུར་བཅུག་ཚིགས་ཁ་བསྡམ། །གང་རྒྱས་
རྩ་གཏར་རྗེས་ལ་ཕྱིང་དེབ་བཏང༌། །དྲོད་མེད་ན་ཚ་ཆུང་ཞིང་སྐྲངས་པ་གསོབ། །ཕྱིང་པ་སྣུམ་
ལྡན་གླན་ལ་ཆུ་རྡོས་བདུག །ཨ་ས་འབའ་དུགས་རྗེས་ལ་དེབ་ཏུ་བཙལ། །དང་པོ་དལ་ལ་ཕྱི་
དུས་བཅགས་པ་ཕན། །རྐང་འགྲམས་སྐྱ་སྦྱོར་བྱས་ལ་ཕྱིང་དེབ་བཅིང་། །སྲུབས་འགྲམས་རྒྱ་
ཆིངས་ཚན་རྡོ་མེ་བཙའ་དང༌། །རྩིབ་མ་སྒྲོག་རུས་ཆག་འགྲམས་སྣུམ་ནན་བྱ། །ཆག་ཚབས་ཆེ་
ན་བསྲེགས་རྗེས་ཆས་སུ་གཞུག །མགོ་བོའི་རྩ་འགྲམས་སྤང་རྩི་བ་ཤ་ཀ །སྟབ་སེང་སྐྱུ་རུའི་
ཐང་རྗེས་གར་འགྲམས་གཏར། །འབྲུ་སྣ་བདུད་རྩི་ལྔ་ཡིས་རྒྱ་ཆེར་བདུག །སྡུད་སྒོ་རྩ་སྒོ་གར་
འཁྱུག་མེ་ཡིས་མནན། །བྱང་ཁོག་རྩ་འགྲམས་ག་དུར་བ་ཤ་ཀ །ཏིག་ཏ་སྐྱུ་རུའི་ཐང་རྗེས་གོང་
བཞིན་གཏར། །གང་གཟེར་དུགས་དང་བདུད་རྩིའི་རླངས་ལུམས་བྱ། །ཡན་ལག་རྩ་འགྲམས་
དུགས་དང་མེ་ཡིས་མནན། །སྟབ་སེང་སྐྱུ་རུ་ཧོང་ལེན་བ་ཤ་ཀ །ཀྱི་ལྕེ་དཀར་པོའི་ཐང་བཏང་
གང་ཉེ་གཏར། །མདོར་བསྡུས་ཁྲག་རྩ་གཏར་ལ་འཕར་རྩ་བསྲེག །ཧོང་ལེན་ཏིག་ཏ་ཀྱི་ལྕེ་
ཞོ་སྦྱར་མནན། །ཆུ་རྒྱུས་འགྲམས་ན་སུག་པ་ཉེ་ཤིང་པ། །མཁན་པ་བུལ་ཏོག་ཕབས་སྦྱར་
ཆུ་འཇམ་བསྲོ། །བཟོད་ཚད་ཆུར་སྦང་བདུད་རྩིའི་རླངས་ལུམས་བྱ། །ཆང་དང་ལོ་མར་བསྐུ་
མཉེ་མེ་ཉིས་བསྲོ། །གླ་སྒང་ཐལ་བ་དོམ་མཁྲིས་རྡོ་རྒྱུས་དང༌། །མཐིང་ཤུན་བག་ཕྱེ་སྦང་གར་
རྒྱུས་པའི་ཤ །ཚྭ་ཁུ་སྦྱར་བྱུགས་ཕྱིང་དེབ་བཏང་ལ་བཅོས། །མདོག་དམར་སྐྲངས་དང་དྲོད་ཆེ་
25-1-220


གང་ཉེ་གཏར། །སྦོས་ན་ཆུ་སྒོ་དབྱེ་ཞིང་རྔབས་རྭས་དྲང་། །ཅོག་གེ་མི་བཞག་དལ་བུས་བརྐྱང་
བསྐུམ་བསླབ། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་
གི་རྒྱུད་ལས་འགྲམས་ཀྱི་ཚ་བ་བཅོས་པའི་ལེའུ་སྟེ་ཉི་ཤུ་གཅིག་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས། །
འཁྲུགས་ཞེས་བྱ་བའི་རྒྱུ་རྐྱེན་ངོ་བོ་དང༌། །ཚ་བ་འཁྲུགས་པའི་མིང་དུ་ཅི་ཕྱིར་བཏགས། །
དབྱེ་བ་རྟགས་དང་བཅོས་ཐབས་བཤད་དུ་གསོལ། །དེ་སྐད་ཞུས་པའི་དོན་ལ་ལན་གསུངས་
པ། །རྒྱུ་ནི་མཁྲིས་པ་ཚ་བའི་རང་བཞིན་ལ། །དེ་རྐྱེན་དུས་གདོན་ཟས་སྤྱོད་རྣམ་བཞི་ཡིས། །
ཉེས་པ་འཁྲུགས་པས་ཁྲག་ཚད་བསྐྱེད་བྱས་ནས། །ལུས་ཟུངས་ཚ་བས་བསྲེག་ཕྱིར་འཁྲུགས་
ཞེས་བྱ། །དབྱེ་བ་རྒྱས་འཁྲུགས་སྟོངས་འཁྲུགས་འཇམ་འཁྲུགས་གསུམ། །རྒྱས་འཁྲུགས་
ཡུལ་དུས་རང་བཞིན་ན་སོ་དང༌། །ནད་ཁམས་ཁྲག་མཁྲིས་ཅན་གྱི་མི་རྣམས་ལ། །ཟས་སྐོམ་
ཤ་མར་ཆང་སོགས་བཅུད་དྲགས་དང༌། །སྤྱོད་ལམ་ལུས་ངག་དྲག་ཤུལ་ཞེ་སྡང་གིས། །མཁྲིས་
འཁྲུགས་ཚ་བ་ཁྲག་ལ་རྒྱས་པ་ཡིན། །སྟོངས་འཁྲུགས་ཡུལ་དུས་རང་བཞིན་ན་སོ་དང༌། །ནད་
ཁམས་ལ་སོགས་རླུང་ཤས་ཆེ་བ་ལ། །སྤྱོད་ལམ་མྱ་ངན་སེམས་ལས་གཉིད་ཆག་དང༌། །ཉལ་
པོ་དཀའ་ཐུབ་ཤེད་མེད་ལྟོ་སྟོང་དུས། །ལུས་ངག་དྲག་ཤུལ་རྐྱེན་གྱིས་རླུང་ཁྲག་འཁྲུགས། །
མཁྲིས་ཚད་སྐྱེས་པ་རླུང་གིས་བུས་པའོ། །འཇམ་འཁྲུགས་ཡུལ་དུས་རང་བཞིན་ན་སོ་དང༌། །
ནད་ཁམས་བད་ཀན་ཅན་ལ་འཁྲུགས་བྱུང་བ། །ཁྲག་མཁྲིས་ཚ་བ་བད་ཀན་མགོ་མནན་
པའོ། །དེ་ལ་དང་པོ་རྒྱས་འཁྲུགས་དབྱེ་བ་ནི། །ནད་རིགས་བབས་སྒོ་ལུད་པས་དབྱེ་བ་
གསུམ། །ནད་རིགས་ཚ་འཁྲུགས་ཚ་འགྲམས་ཚ་རིམས་གསུམ། །ཁྲག་མཁྲིས་འཁྲུགས་ཚད་
རྐྱང་པ་ཚ་འཁྲུགས་ཡིན། །དབྱེ་བ་ཚ་རྒྱས་ཚ་ལྐུགས་དུག་ཐབས་གསུམ། །འཁྲུགས་ཚད་
འགྲམས་ལ་བརྟེན་པ་ཚ་འགྲམས་ཡིན། །དེ་ལ་དབྱེ་བ་ཚ་རྡོལ་ཚ་རྨུགས་གཉིས། །འཁྲུགས་
25-1-221


ཚད་རིམས་དང་བསྡོངས་པ་ཚ་རིམས་ཡིན། །དེ་ལ་གཉན་དང་འདུ་བའི་ཚ་རིམས་གཉིས། །
དེ་ལྟར་འཁྲུགས་རིམས་རྣམ་པ་བདུན་དུ་འགྱུར། །བབས་སྒོ་གློ་སྙིང་མཆིན་མཆེར་མཁལ་མ་
དང༌། །མཁྲིས་པ་རྩ་དང་རླུང་ལ་བབས་པ་བརྒྱད། །ལུད་པའི་ཁ་དོག་དེ་བཞིན་ཤེས་པར་བྱ། །
དེ་རྟགས་སྤྱི་དང་བྱེ་བྲག་ཀག་དུས་གསུམ། །སྤྱི་རྟགས་རྩ་རྒྱུད་སྦོམ་དྲག་མཁྲང་ལ་མགྱོགས། །
ཆུ་མདོག་དམར་སེར་དྲི་དུགས་རླངས་པ་ཆེ། །ཕྲུམ་སེར་ཡུན་ཐུང་གཟེར་དྲག་དགྱེ་དགུ་
དཀའ། །དབུགས་རྒོད་ལུད་པ་དམར་སེར་དུད་ཁུར་འོང༌། །བྱེ་བྲག་ཚ་རྒྱས་ནད་སྟོབས་རྒྱས་
པ་ལ། །དོན་ལ་བབས་ན་ཤིན་ཏུ་གཟེར་བ་དྲག །སྣོད་དུ་བབས་ན་མིག་ཆུ་ལུད་པ་སེར། །
སྨན་གཏར་མི་ལེན་ཕོ་མཆིན་རྫི་མི་བཟོད། །ཚ་ལྐུགས་ལུད་པ་མི་ཐོན་ཐེངས་པོར་ལུ། །
ཁོགས་ན་དམར་སེར་དུད་ཁུ་སྲན་ཙམ་འབྱུང༌། །དུག་ཐབས་ན་མ་ཐོག་ནས་བཅར་ལ་
ཐེབས། །ལུད་པ་དུད་ཁུ་ཉུང་བསྲེགས་ཁུ་བ་འདྲ། །གློ་མཆིན་ཚ་བས་རྨུག་ཅིང་འདྲུལ་བར་
བྱེད། །ཚ་རྡོལ་ལུད་པ་དམར་སེར་ཁྲག་ཏུ་འབྱུང༌། །རྩ་ཁ་རྡོལ་ནས་མང་དུ་སྐྱུག་ན་འཆི། །ཚ་
རྨུགས་དང་པོ་གློ་བ་ཁྲག་གིས་རྒྱས། །ལུད་པ་གྱེན་དུ་མ་རྡོལ་དོན་ལ་རྨུགས། །མཇུག་ཏུ་ཕལ་
ཆེར་རྣག་ཏུ་འགྱུར་བ་མང༌། །དེ་རྟགས་མགོ་ན་ལུས་ལྕི་དང་ག་འགག །རྣག་ཁྲག་ལུ་ཞིང་སྟོད་
རྒྱངས་གསང་ས་གཟེར། །འདུ་བའི་ཚ་རིམས་ཕྲུམ་སེར་ཁྱེར་བ་དང༌། །ཚིགས་གཞི་མགོ་ན་
ཟ་ཟི་རིམས་དང་འདྲ། །གཟེར་དང་ལུད་པ་གློ་ཚར་འབྱུང་བ་ཡིན། །གཉན་ཚད་རིམས་ནི་
གཟེར་ཐུང་ཞེས་བྱ་སྟེ། །གཟེར་འཕོ་ལུད་པ་འགྱུར་ལྡོག་མང་བ་ལ། །ལྕེ་མཆུ་སྐྱ་སེར་ལུས་
དང་ཤེས་པ་ཡང༌། །གཉིད་ཆུང་བ་སྤུ་ལྡོག་ཅིང་ཡམས་ཐབས་འབྱུང༌། །སྙིང་ལ་བབས་ན་
མིག་དམར་ནུ་འཇིང་གཟེར། །ལྕེ་སྐམ་དྲན་པ་མི་གསལ་བླ་འཆོལ་སྨྲ། །གློ་ལ་བབས་ན་ལུད་
པ་རྣག་ཁྲག་ལུ། །དཔུང་མིག་སྒྲོག་རུས་སོག་དབྲག་བྲང་མདོ་ན། །མཆིན་བབས་གཡས་ཀྱི་
རྩིབ་ལོགས་མཆིན་སྟེང་ན། །ཤེད་ཆུང་ལངས་འདོད་བཤུལ་ཤ་ལྕི་བ་ཡིན། །མཆེར་བབས་
25-1-222


འབུར་ཚུགས་བལྟ་ཞིང་སྦྲིད་པ་མང༌། །རྩིབ་ཐུང་གཡོན་གཟེར་ལུས་ལ་འབྲུམ་ཆུང་འོང༌། །
མཁལ་བབས་མཁལ་སྐེད་ན་ཞིང་དགྱེ་དགུ་དཀའ། །རྩ་འཁྲུགས་ལུས་སྦྲིད་མིག་དམར་སྨྲ་
བ་འཚེར། །ཁ་སྐམ་ཆུ་འདོད་ལྕེ་ཐུང་གྲེ་བ་ཚ། །མཁྲིས་བབས་ཁ་ཁ་ལུས་སེར་སྐྲ་འདབ་རྔུལ། །
རླུང་འཁྲུགས་ཁ་སྐམ་འཕྱོ་འདར་གཡལ་སྐྱིགས་འབྱུང༌། །ལུད་རིགས་སྐྱ་གསོབ་དམར་པོ་
སེར་སྨུག་དང༌། །སྨུག་ནག་སྲེ་འོ་དམར་ཐང་སེར་ལ་གདང་། །སྔོན་པོ་སྦུ་བ་ཅན་དང་བརྒྱད་དུ་
བརྟག །ཞག་ཀག་གློ་ཚ་དུག་ཐབས་བདུན་ཡིན་ཏེ། །གཞན་རྣམས་དགུ་ཡིན་བཅུ་གཅིག་
འདས་འཚོ་མང༌། །གློ་བུ་སྙིང་མཆིན་བབས་པ་སྲོག་ལ་རྒོལ། །མཆེར་མཁལ་ཉེན་ཆེ་གློ་མ་
མཁྲིས་བབས་འཚོ། །མོད་ནས་ལུས་ཀྱི་སྟོབས་ཤོར་གཟི་མདངས་ཉམས། །ལུད་པ་དུད་ཁུ་
གཟེར་ལ་བཅོས་སྐྱེད་མེད། །དབུགས་ཐུང་ལུད་པ་གསོག་ཅིང་འདྲེ་ཁ་རྒོད། །ནད་ལྡོག་མང་
ན་གནད་དུ་བབས་པ་ཡིན། །ཞག་ཀག་འདས་ཀྱང་འཚོ་བ་ག་ལ་སྲིད། །ནད་ལ་ལྡོག་ཆུང་
དབུགས་དལ་ལུད་པ་ཁོགས། །སྨན་གཏར་གཟེར་ལུད་ཚ་བ་བཅོས་སྐྱེད་ཆེ། །འཚོ་བར་ངེས་
ཀྱི་ལེ་ལོ་སྤོངས་ལ་འཆོས། །དེ་ནས་སྟོང་འཁྲུགས་ཚ་སྟོངས་གྲང་སྟོངས་གཉིས། །སྤྱི་རྟགས་
གཡལ་དང་འདར་དང་གཟེར་བ་འཕོ། །སྙིང་ག་ཤེས་པ་མི་བདེ་བྲང་རྒྱབ་ན། །དང་ག་མི་བདེ་
བརྩེ་ཞིང་ཕྲུམ་སེར་ཁྱེར། །ཁམས་ངན་མགོ་འཁྱོམ་རུས་ཚིགས་ན་བ་དང༌། །ལུད་པ་སྐྱ་
གསོབ་ཐེང་པོ་ཁོགས་པ་དཀའ། །ཁྱད་པར་ཚ་སྟོངས་རྩ་ནི་སྟོང་ལ་མགྱོགས། །ཆུ་དམར་སྦུ་
བ་ཆེ་ལ་རླངས་པ་འཚུབ། །མིག་དམར་ལྕེ་སྐམ་ལུས་ཀྱི་ཕྱི་དྲོད་ཆེ། །སྐོམ་དད་ཆེ་ལ་ཟ་ཟི་ཆལ་
ཆོལ་འོང༌། །གྲང་སྟོངས་ཆུ་མདོག་སྔོ་ལ་སྦུ་བ་གསོག །རྩ་ནི་སྟོང་ལ་དལ་ཞིང་ལུས་ཤེད་ཆུང༌། །
གཉིད་མེད་སྙིང་འདར་ཤུས་འདེབས་སྟོང་སྐྱུགས་བྱེད། །འཇམ་འཁྲུགས་ལུད་པ་མི་གཙང་
གཟེར་ཕྲན་འབྱུང༌། །རྩ་དང་ཆུ་ཡི་ཚ་བ་བགས་ཀྱིས་སྐྱེ། །མདོར་ན་འཁྲུགས་ཕྲན་ནད་སྟོབས་
ཆུང་བར་བརྗོད། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་ལ་བཅོས་པའི་ཚུལ་དང་
25-1-223


གཉེན་པོ་གཉིས། །བཅོས་ཚུལ་ཚ་འཁྲུགས་མཁྲིས་ཐོག་བབས་པའི་ཕྱིར། །ཞི་སྦྱང་མཁྲིས་
པའི་གཉེན་པོས་བཅོས་པ་གཅེས། །ཚ་འགྲམས་དོན་ལ་ཁྲག་ཚད་རྒྱས་པའི་ཕྱིར། །ཚ་རླངས་
བསད་ཅིང་རྩ་ནས་དྲང་བ་གཅེས། །ཚ་རིམས་མཁྲིས་ཚད་རྔུལ་ལ་བབས་པའི་ཕྱིར། །ཚ་བ་
རོལ་བསད་བ་སྤུར་དབྱུང་བ་གཅེས། །གཉན་གཟེར་ཆུ་སེར་དྲི་མར་བཅས་པའི་ཕྱིར། །གཉེན་
པོས་བསད་ཅིང་རྗེས་ལ་སྦྱང་པ་གཅེས། །སྟོང་འཁྲུགས་ཁྲག་མཁྲིས་རླུང་གིས་འབུད་པའི་
ཕྱིར། །རླུང་བཏུལ་མཁྲིས་ཚད་བསད་ལ་ཚད་རོ་གདོན། །འཇམ་འཁྲུགས་ཚད་འགོ་བད་ཀན་
མནན་པའི་ཕྱིར། །འཇམ་ལ་ཞི་བས་བཅོས་ལ་རྔུལ་དུ་དབྱུང་། །གཉེན་པོ་སྨན་དཔྱད་ཟས་
དང་སྤྱོད་ལམ་བཞི། །རྒྱས་འཁྲུགས་ཚ་བ་རྒྱས་ཕྱིར་སྨིན་མི་དགོས། །ཏིག་ཏ་སླེ་ཏྲེས་སྐྱུ་རུ་བ་
ཤ་ཀ །བསྐོལ་གྲངས་ཐང་གིས་ཁྲག་དབྱེ་མཁྲིས་ཚད་བསད། །རྩེ་ཆུང་དྲུག་འགོ་སྣོད་ཀ་གང་
རྒྱས་རྩ། །མོད་ནས་ཉིན་ཞག་བསྟུད་གཏར་བུངས་ཆེར་དབྱུང༌། །ཕྱེ་མ་ག་བུར་རྒྱལ་བློན་ལྔ་
བདུན་དགུ། །ཚ་བའི་སྟོབས་སྦྱར་བུངས་བསྐྱེད་བསྟུད་ལ་བཏང་། །སྐབས་སུ་རྔུལ་དབྱུང་
གཟེར་སྟེང་བསིལ་བས་བདུག །ཚ་བའི་སྟོབས་རྒྱས་སྐྱེད་ཆུང་མཆིན་མཁྲིས་བབས། །སྦྱོང་
བྱེད་རྒྱལ་བློན་(ཐར་ནུ་ལྕུམ་རྩ་ཁྲོན་བུ་ཧོང་ལེན་གསེར་མེ་) དྲི་ཆུར་སྦྱར་བས་སྦྱང༌། །ཁ་སྒྱུར་ཚ་བ་སྟོབས་
རྒྱས་(ལ་ག་བུར་གི་ཝཾ་)བཅོས་རྡུགས་(ཚ་ལ་གུར་གམ་)དང༌། །ཚ་འཁྲུགས་མཆིན་མཁྲིས་གཉིས་ལ་
བབས་པ་(ན་བྲག་ཞུན་དུག་ཉུང་)དང་། །དུད་ཁུ་མ་འགྱུར་(ག་བུར་སེ་རུལ་)ཚ་ལྐུགས་ཕྱིར་མ་
འདྲོངས(སྟར་བུ་རུ་རྟ་ཚ་ལ༌)། །ཚ་རྡོལ་མ་ཆོད་(ན་ཚ་ལ་རྒྱ་སྐེགས་བ་ཤ་ཀ) ཚ་རིམས་མ་འཆུན་པ(ལ་ཏིག་ཏ་
བོང་ང་ག་དུར་)འི། །གར་དགོས་སྟེང་དུ་རྒྱལ་བློན་ཆིབས་ཁ་བསྒྱུར། །དྲི་ཆེ་ཁ་དོག་སེར་ན་ནད་
ཐོན་རྟགས། །ལྕག་གིས་བྲབས་ལ་ཚ་བ་དག་པར་སྦྱང༌། །འཁྲུས་རྗེས་མི་བདེ་ཤེས་པ་ཟི་
བའམ། །དག་པར་འབྱོངས་ན་བཤལ་རྗེས་བསིལ་གྱིས་བཅད། །ཟུངས་བཟང་ནད་སྟོབས་
ཆེ་ན་སྦྱང་བ་བསྐྱར། །སྨན་གཏར་སྦྱོངས་ཀྱིས་གཟེར་བྱེར་བཅོས་རྡུགས་ན། །བུར་ཆང་བྱེར་
25-1-224


བསྡུ་འདྲེགས་པ་བསྐོག་ལ་བསད། །ཁ་ཟས་ཆག་ཚེ་བ་རའི་ཞོ་དར་དང༌། །ཁུར་མང་སྐྱབས་
ཚོད་ཆུ་གྲོག་བསྟེན་པར་བྱ། །ལན་ཚྭ་ཤ་ཆང་ལ་སོགས་དྲོད་བཅུད་བསྡམ། །སྤྱོད་ལམ་མེ་དང་
ཉི་མ་དྲག་ཤུལ་སྤང༌། །བསེར་བུ་གྲིབ་མ་བསིལ་སར་དལ་བར་བསྡད། །དེ་ལྟར་བཅོས་རྗེས་
ཚད་སྟོབས་ཅུང་ཟད་ཆག །རྩ་དལ་ལུད་པ་འགྱུར་ལ་གཟེར་བ་ཆོགས། །དེ་ནས་ཙན་དན་གི་
ཝཾ་བསིལ་གསུམ་དང་། །ཏིག་ཏ་བ་ཤ་ཀ་དང་ཀ་ར་སྦྱར། །གློ་མང་ཤིང་མངར་འགོགས་
དཀའ་སྟར་བུ་བསྣན། །གཟེར་མེད་ལུད་པ་གཙང་ལ་དང་ག་བདེ། །ལུས་དང་ཤེས་པ་ཡང་ལ་
སྙིང་རྩ་སེང༌། །རི་ཐང་མཚམས་སུ་སླེབ་པས་གསར་བཅུད་གློད། །བྱེ་བྲག་རིགས་དང་བབས་
སྒོ་ལུད་པ་སྦྱར། །ཚ་རྒྱས་དོན་བབས་སྨན་གཏར་བསྟུད་ལ་བཅོས། །སྣོད་དུ་བབས་ན་བཤལ་
ལས་ལྷག་པ་མེད། །ཚ་ལྐུགས་སྟར་བུ་ནཱ་ག་གེ་སར་དང༌། །རུ་རྟ་ཚ་ལ་དུད་པ་བྱ་བལ་མ། །ཀ་
ར་སྦྱར་ལ་ཐུན་སྐྱུངས་གྲངས་མང་གཏར། །གཟེར་སྟེང་མཚན་དཀར་ཚར་བོང་དྲོ་འཇམ་
བདུག །དེས་མ་ཐོན་ན་མན་ངག་(སྟར་བུ་རུ་རྟ་ཚ་ལ་རྒྱལ་བློན་)བཤལ་གྱིས་སྦྱང༌། །དུག་ཐབས་རྒྱལ་
བློན་གསུམ་སྦྱར་རྩེ་ཆུང་བསྣོལ། །ནད་དང་སྨན་དཔྱད་སྲོག་ལ་ཐོབ་ཤ་བྱ། །སྐྱེད་མེད་(ག་བུར་
སེ་རུལ་ཁུ་བས་)ཁོང་སྦྱངས་ག་བུར་(གི་ཝཾ་ཙན་དན་བསེ་རུ་གུར་གུམ་མི་མཁྲིས་མཚལ་ཧོང་ལེན་ཀ་ར་ག་དུར་ཐང་གིས་
དབུལ་)བརྒྱད་པ་སྦྱར། །ག་དུར་སེ་རུལ་ཁུ་བ་སྐོམ་དུ་བསྟེན། །དུད་ཁུ་རྣག་ཏུ་འགྱུར་ན་ཐུབ་པ་
ཡིན། །ཚ་རྡོལ་གུར་གུམ་དོམ་མཁྲིས་སྲན་མའི་པུས། །ཀར་སྦྱར་ཚོས་ཁུས་འཕུལ་ལ་ཆུ་ལྕག་
བྲན། །ཁྲག་མ་ཆོད་ན་མན་ངག་(ཚ་ལ་ཚོས་བ་ཤ་ཀའི་)བཤལ་གྱིས་སྦྱང༌། །ཁྲག་སྨུག་སྐྱུ་རུ་བ་ཤ་
ཀ་ཐང་དང༌། །ག་བུར་(ཙན་དན་གཉིས་ཅུ་གང་གུར་གུམ་དོམ་མཁྲིས་ཏིག་ཏ་བ་ཤ་མཚལ་ཀ་ར་)དགུ་སྦྱར་ཡང་
ཡང་བསྟུད་ལ་བཏང༌། །ཚ་འགྲམས་འདི་གཉིས་གཙོ་བོ་གཏར་ཡིན་པས། །ནད་དང་དཔྱད་
གཉིས་ཁྲག་ལ་ཐོབ་ཤ་བྱ། །རྣག་རྨུགས་བསེ་རུ་(ཙན་དན་གཉིས་བསིལ་གཉིས་ག་དུར་ཤིང་མངར་དོམ་
མཁྲིས་ཀ་ར་)བརྒྱད་པས་ཁྲག་ཚད་བསད། །སྟར་བུ་པཉྩས་(རི་རྟ་སྟར་བུ་སྐྱུ་རུ་ར་པུ་ལིང་ཤིང་ཚ་)གློ་རྣག་
25-1-225


གྱེན་དུ་དྲང༌། །རྗེས་ལ་དམར་པོ་གསུམ་གྱིས་གློ་བ་གསོ། །འདུ་བའི་ཚ་རིམས་དང་པོ་ཐང་
གིས་དབྱེ། །རིན་ཆེན་ཞགས་པའི་ཕྱེ་མས་རོལ་དུ་བསད། །ཡང་ན་གཙོ་བོ་བརྒྱད་པ་ཤིས་པ་
ཡིན། །སྐབས་སུ་རྔུལ་དབྱུང་གཟེར་སྦྱར་ཅི་རིགས་གཏར། །ཚ་བ་ཆོམས་དཀའ་མན་ངག་
(ཏིག་ཏ་བོང་ང་ག་དུར་)བཤལ་གྱིས་སྦྱང༌། །གཟེར་ཐུང་ཐོག་མར་སླེ་ཏྲེས་ཨ་རུ་ར། །བཙོད་ཀྱི་ཐང་
གིས་སྨིན་སྡུད་འབྱེད་པར་བྱེད། །དེ་ནས་གཟེར་སྨན་གཉེན་པོ་(ཐར་ནུ་ཆུ་རྩ་ར་དུག་མེ་ཏོག་ཨ་བྱག་ཤ་
ཆེན་)ལྔ་སྦྱོར་གྱི། །དྲི་ཆུ་སྦྱར་ཏེ་ཐུན་སྐྱུངས་ཡང་ཡང་བཏང༌། །ཡང་ན་གཟེར་སྨན་ཆེན་མོ་(བཟང་
དྲུག་གླ་རྩི་གུ་གུལ་མིང་ཅན་ཤ་ཆེན་དུག་པ་ཤུ་དག་དཀར་པོ་ཐར་ནུ་ཆུ་རྩ་རེ་ཅག་དྲི་ཆུར་སྦྱར་བ་)ཤིས་པ་ཡིན། །སྦྱངས་
རྗེས་གི་ཝཾ་ཙན་དན་ཅུ་གང་དང༌། །གུར་གུམ་དོམ་མཁྲིས་གླ་རྩི་བོང་ང་དཀར། །བཙོད་ཁུས་
འཕུལ་བཏང་གཟེར་སྟེང་སྤྲུ་ཚན་བདུག །གཉན་མ་སོད་པར་ག་བུར་གཏར་ག་སྤང༌། །དཀར་
དང་མངར་བག་མི་བཏང་དུག་དང་མཚུངས། །སོད་རྟགས་གཟེར་དང་ལུད་པ་སོ་ཟིན་ནས། །
གཏར་དང་ག་བུར་གཟེར་དང་ཚད་སྟོབས་སྦྱར། །བབས་ས་གནས་དང་སྦྱར་ཏེ་བཅོས་པ་ནི། །
བསིལ་གསུམ་ཙན་དན་དཀར་པོ་ཀུན་ལ་གཅེས། །ཛཱ་ཏི་(གེ་སར་གསུམ་ཨ་ག་རུ་མི་མཁྲིས་ལྕགས་ཕྱེ་ཀ་
ར་)བདུན་པ་བསྡེབས་པས་སྙིང་འཁྲུགས་སེལ། །ཤིང་མངར་(ཨ་རུ་རྒུན་འབྲུམ་བ་ལེ་ཀ་)བཞི་པས་
གློ་ཡི་འཁྲུགས་ཚད་སེལ། །ཨུཏྤལ་(ཏིག་ཏ་བ་ཤ་དུག་ཉུང་པ་ཏོ་ལ་)ལྔ་པ་སྡེབས་པས་མཆིན་འཁྲུགས་
སེལ། །ཨ་རུ་(ཏིག་ཏ་བ་ཤ་པར་པ་ཏ་)བཞི་སྡེབས་ཕོ་མཆེར་འཁྲུགས་ཚད་སེལ། །བྲག་ཞུན་(བ་ཤ་
སྡིག་སྲིན་ཨ་རུ་སྐྱེར་ཤུན་)ལྔ་པ་སྡེབས་པས་མཁལ་ཚད་སེལ། །དོམ་མཁྲིས་(ག་དུར་ཨ་བ་)གསུམ་པ་
སྡེབས་པས་རྩ་འཁྲུགས་སེལ། །ཏིག་ཏ་(གསེར་མེ་དུག་ཉུང་སུམ་ཅུ་ཏིག་)བཞི་པས་མཁྲིས་པའི་
འཁྲུགས་ཚད་སེལ། །ཛཱ་ཏི་(སུག་སྨེལ་སླེ་ཏྲེས་པུ་ཤེལ་ཤིང་ཚ་པི་ལིང་)དྲུག་པས་རླུང་འཁྲུགས་ཚ་བ་སེལ། །
ཀུན་ལ་ཀ་ར་དཀར་པོའི་རྟ་ལ་བསྐྱོན། །གང་ལ་བབས་པའི་རང་རང་སྒོས་རྩ་གཏར། །རླུང་
འཁྲུགས་གཏར་སྤང་རྩ་འཁྲུགས་གང་རྒྱས་གཏར། །ལུད་པའི་མདོག་དང་སྦྱར་ཏེ་བཅོས་པ་
25-1-226


ནི། །ལུད་པ་སྐྱ་གསོབ་སྙིང་གི་གབ་འཁྲུགས་ཡིན། །ཛཱ་ཏི་(ཙན་དན་སྙིང་ཞོ་ཅུ་གང་)བཞི་པ་སྐྱུ་རུའི་
ཐང་གིས་དབུལ། །སྣོད་ཀ་ཐོང་རྩ་གཉིས་ལ་གཏར་བར་བྱ། །ལུད་པ་དམར་ན་གློ་ཡི་གབ་
འཁྲུགས་ཡིན། །ཅུ་གང་(གུར་གུམ་ཙན་དན་ཤིང་མངར་དོམ་མཁྲིས་)ལྔ་པ་ཚོས་ཁུས་འཕུལ་ལ་བཏང༌། །
སྒང་རྩ་དྲུག་འགོ་གཉིས་ལ་གཏར་བར་བྱ། །ལུད་པ་དམར་སེར་མཆིན་པའི་གབ་འཁྲུགས་
ཡིན། །གུར་གུམ་(ལི་ཤི་དུག་ཉུང་དོམ་མཁྲིས་སྐྱེར་པ་བྲག་ཞུན་པ་ཏོ་ལ་)བདུན་པ་བ་ཤ་ཀས་འཕུལ་བཏང༌། །
ལུད་པ་སྨུག་ནག་མཆེར་པའི་གབ་འཁྲུགས་ཡིན། །གི་ཝཾ་(གུར་གུམ་བ་ལེ་མཚལ་ཨ་རུ་)ལྔ་པ་སེ་
རུལ་ཐང་གིས་དབུལ། །མཆིན་མཆེར་གཉིས་ལ་རུ་ཐུང་གཡས་གཡོན་གཏར། །ལུད་པ་སྲེའོ་
མཁལ་མའི་གབ་འཁྲུགས་ཡིན། །བཙོད་ཁུས་བྲག་ཞུན་(གུར་གུམ་སུག་སྨེལ་ཨ་རུ་གླ་རྩི་ཨུཏྤལ་བོང་དཀར་
ཏིག་ཏ་)བརྒྱད་འཕུལ་བྱིན་གཞུག་གཏར། །རྩ་འཁྲུགས་ལུད་པ་དམར་ལ་ཐེང་པོར་ལུ། །དོམ་
མཁྲིས་(ལི་ཤི་གུར་གུམ་ག་དུར་ཧོང་ལེན་མཚལ་)དྲུག་པ་ག་དུར་ཐང་གིས་དབུལ། །གཟེར་བ་གང་ཉེ་
གང་རྒྱས་རྩ་ལ་གཏར། །སེར་ལ་དྭངས་ན་མཁྲིས་པའི་གབ་འཁྲུགས་ཡིན། །ཏིག་ཏ་(གསེར་མེ་
དུག་ཉུང་དོམ་མཁྲིས་བ་ཤ་ཀ་སྐྱེར་པ་)དྲུག་པ་གི་ཝཾ་ཐང་གིས་དབུལ། །མཁྲིས་རྩ་བཤའ་རིངས་གསེར་
མདུང་གཏར་བར་བྱ། །ལུད་པ་སྔོན་པོ་སྦུ་གསོག་རླུང་འཁྲུགས་ཡིན། །རུས་ཁུས་ཨ་གར་(ཛཱ་ཏི་
སུག་སྨེལ་སླེ་ཏྲེས་པུ་ཤེལ་གུ་གུལ་དཀར་པོ་རུ་རྟ་)བདུན་འཕུལ་གཏར་མི་བྱ། །དང་པོ་ཚ་བ་སྟོབས་རྒྱས་སྤྱི་
བཅོས་ཏེ། །ཚ་སྟོབས་བྲི་ནས་སྒོས་བཅོས་མདེ་ཁར་གདགས། །དེ་ནས་སྟོངས་འཁྲུགས་
བཅོས་ཐབས་བསྟན་པ་ནི། །ཚ་སྟོངས་རླུང་དང་ཚ་བ་ཕྱིང་དྲིལ་བཅོས། །ར་གསུམ་མ་ནུ་བཞི་
ཐང་བསྲེས་པ་བཏང༌། །གཟེར་སྟེང་སྤྲུ་མ་འཁར་གོང་བསྲོས་པས་བདུག །བ་ཞོ་བ་དར་ཤ་
གསར་རླུང་ཁ་མནན། །གཟེར་འདུས་ངན་ཁྲག་རྩ་ཁ་ཕྱེ་ཙམ་གཏར། །ཚིགས་ཁ་བྱེ་ན་ན་སར་
མེ་ཡིས་མནན། །ག་བུར་ཉི་ཤུ་རྩ་ལྔ་རུས་ཁུས་དབུལ། །ཚ་བ་ཆོམས་དཀའ་སྣུམ་ལྡན་འཇམ་
པོས་སྦྱང༌། །རྗེས་ལ་ཏིག་ཏའི་སྨན་མར་བསྟེན་པར་བྱ། །གྲང་སྟོངས་རུས་བཅུད་གསུམ་གྱི་
25-1-227


ཁུ་བ་བསྟེན། །མ་ནུ་བཞི་ཐང་དྲོ་འཇམ་རྒྱུན་དུ་བསྔགས། །རུས་རྙིང་དུགས་དང་ཞུན་མར་
བསྐུ་བྱུག་བྱ། །ཤ་གསར་ཆང་གསར་མར་གསར་བུར་དཀར་བཏང༌། །འབྲས་བུ་གསུམ་གྱི་
མར་སྦྱར་རླུང་གསང་སྲེག །མདོར་ན་རླུང་ཞི་ཚ་བ་མི་འཕེལ་བཅོས། །ཆགས་པ་སྨྲ་བརྗོད་
སེམས་ལས་བསེར་བུ་དང༌། །ཞེ་སྡང་དྲག་ཤུལ་རུལ་སྐྱུར་བཅུད་དྲགས་སྤང་། །འཇམ་
འཁྲུགས་བཅོས་པ་ར་གསུམ་བསྡུས་པའི་ཐང༌། །ཡུན་བསྟེན་ཁྲག་དབྱེ་གཟེར་དམིགས་སྦྱར་
ལ་གཏར། །གཙོ་བོ་བརྒྱད་ཀྱི་ཕྱེ་མས་ཚ་བ་བསད། །སྐབས་སུ་བད་ཀན་ཚ་བ་རྔུལ་དུ་དབྱུང༌། །
ཕྱེ་ཐུག་བ་ཞོ་བ་ཤ་ཆུ་གྲོག་བཏང་། །སྐྱེད་ཆུང་སྦྱངས་རྗེས་ཉི་ཤུ་རྩ་ལྔ་སྦྱར། །མ་ལྷག་མ་ཆད་
རྩ་བ་ཐོན་པར་བཅོས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་
མན་ངག་གི་རྒྱུད་ལས་འཁྲུགས་ཀྱི་ཚ་བ་བཅོས་པའི་ལེའུ་སྟེ་ཉི་ཤུ་གཉིས་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །རིམས་ཞེས་བྱ་བའི་རྒྱུ་རྐྱེན་གང་ལས་བྱུང༌། །ངོ་བོ་རྒྱུ་མཚན་ཅི་
ལས་མིང་དུ་བཏགས། །རིམས་ལ་དབྱེ་བའི་ནད་རིགས་དུ་ཞིག་མཆིས། །མངོན་ཚུལ་མི་
འགྱུར་རྟགས་ནི་ཇི་ལྟར་འོང༌། །དེ་ལ་བཅོས་ཐབས་རྣམ་པ་དུ་ཡིས་བཅོས། །འཚོ་མཛད་སྨན་
པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། དྲང་སྲོང་རིག་པའི་ཡེ་ཤེས་དེས་འདི་
སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། །རིམས་ཞེས་བྱ་བའི་ནད་འབྱུང་
རྒྱུ་རྐྱེན་ནི། །ལྔ་བརྒྱ་དུས་ཀྱི་ཐ་མར་གྱུར་ཙ་ན། །མི་རྣམས་འདོད་པའི་དབང་གིས་ལོག་པར་
སྤྱོད། །སྔགས་པ་རྣམས་ནི་རྡོ་རྗེའི་ནང་དམེ་དར། །དགེ་འདུན་བཙུན་པ་རྣམས་ནི་སྡེ་འཁྲུག་
བྱེད། །མུ་སྟེགས་བན་བོན་རྣམས་ནི་ཟོར་ཁ་འཕེན། །སྐྱེ་བོ་རྣམས་ནི་མནའ་འཐབ་ཤན་
དམར་བྱེད། །དེ་དུས་མ་མོ་མཁའ་འགྲོ་ཀུན་འཁྲུགས་ཏེ། །ནད་ཀྱི་ཁ་རླངས་སྤྲིན་དུ་ཆགས་པ་
ལས། །བལ་ནད་རྒྱུ་གཟེར་གག་ལྷོག་འབྲུམ་ནག་འབྱུང༌། །གཞན་ཡང་དུས་བཞིའི་འབྱུང་བ་
25-1-228


དམན་ལྷག་ལོག །དྲག་ཤུལ་དྲི་དུགས་ཁྲོ་འཇིགས་མྱ་ངན་འདོད། །ཁ་ཟས་མ་སྙོམས་པ་ཡིས་
རིམས་སུ་འགྱུར། །རྒྱུ་རྐྱེན་དེ་ཡིས་མཁྲིས་པའི་མེ་དྲོད་བསླང༌། །རྔུལ་ལ་བབས་ནས་བད་
ཀན་མཁྲིས་པ་རླུང༌། །འཇུག་སྒོ་དྲུག་ཏུ་རིམ་པས་འཇུག་པའམ། །དྲིས་ཕོག་ཡམས་སུ་རིམས་
ཀྱིས་འགོས་པའི་ཕྱིར། །རིམས་ཞེས་བྱ་བའི་རྒྱུ་མཚན་མིང་དུ་བཏགས༌། དབྱེ་བ་བལ་ནད་
འབྲུམ་བུ་རྒྱུ་གཟེར་དང༌། །གག་ལྷོག་ཆམ་པའི་རིམས་དང་རྣམ་པ་ལྔ། །དེ་ལ་ཕྱི་མ་བཞི་པོ་
འོག་ཏུ་སྟོན། །བལ་ནད་དབྱེ་བ་རྣམ་པ་གསུམ་ཡིན་ཏེ། །བབས་ས་གནས་དང་སྦྱར་ཏེ་དབྱེ་བ་
དང༌། །རིམ་པ་དུས་དང་སྦྱར་ཏེ་དབྱེ་བ་དང༌། །ནད་གཞི་རིགས་དང་སྦྱར་ཏེ་དབྱེ་བ་གསུམ། །
དེ་ལ་རླུང་མཁྲིས་བད་ཀན་འདུས་པ་དང༌། །གཉན་རིམས་ཞེས་བྱ་རྣམ་པ་ལྔ་རུ་བཤད། །
འདར་བུ་ཡེར་བུ་རླུང་གི་རིམས་ཡིན་ཏེ། །ལེབ་རྒན་ཀླད་གཟེར་ཞེས་བྱ་མཁྲིས་པའི་རིམས། །
རྨོངས་བུ་ལྐུགས་པ་བད་ཀན་རིམས་སུ་བཤད། །འདུས་རིམས་དབྱེ་བ་རྒྱུན་རིམས་རྟག་པའི་
རིམས། །ཉིན་གཅིག་ཉིན་གསུམ་ཉིན་བཞི་རྣམ་པ་ལྔ། །མཁྲིས་པ་རྩར་རྒྱུག་རིམས་དང་ཀླད་
གཟེར་དང༌། །རིམས་སྨྱོན་ཏྲེ་ཏྲེ་ཧོས་སུ་བཏགས་པ་གསུམ། །དོན་མཐུན་གཉན་རིམས་མིང་
གི་རྣམ་གྲངས་ཡིན། །རྟགས་ལ་སྤྱི་དང་བྱེ་བྲག་རྣམ་པ་གཉིས། །སྤྱི་ལ་མ་སྨིན་རྒྱས་དང་
སྟོངས་པ་གསུམ། །དང་པོ་མ་སྨིན་རིམས་ཀྱི་མངོན་ཚུལ་ནི། །ཕྲུམ་སེར་ཡུན་རིང་མགོ་རྐང་
ཚིགས་གཞི་ན། །ལུས་ལྕི་སྒྱིད་སྐྱུར་རྨི་ལམ་ཟ་ཟི་མང༌། །གཡལ་མང་རྣ་བ་འཐིབས་ལ་ཤེས་
པ་མྱོས། །ཉི་མ་སྙེག་ཅིང་ཁྱད་པར་སྲོད་ལ་ན། །ཁ་ཁ་མགོ་བོ་ན་ཞིང་དང་ག་འགག །རྩ་རྒྱུད་
ཕྲ་མགྱོགས་གཡོ་ཞིང་ཆུ་མདོག་རྙོག །བར་དུ་རིམས་རྒྱས་ལུས་ལྕི་རྔུལ་དྲི་མནམ། །མིག་
མདངས་དམར་སེར་ལྕེ་མཆུ་སོ་དྲེག་ཆགས། །མགོ་ན་སྐོམ་དད་ཆེ་ལ་ཤེས་པ་གཡུང༌། །ཆུ་
དམར་དྲི་མ་དུགས་ལ་ཀུ་ཡ་མཐུག །རྩ་རྒྱུད་ཕྲ་ལ་གྲིམས་ཤིང་མྱུར་དུ་འཕར། །ཐ་མར་ཞུ་
འཁྱགས་མཚམས་སླེབ་སྟོངས་པའི་རྟགས། །དཔྱི་དང་རྐེད་པ་རུས་རྐང་ཁྱད་པར་ན། །ལུས་
25-1-229


རྔུལ་གཉིད་ཆུང་མགོ་འཐོམ་རྣ་བ་འུར། །ལྕེ་ནི་དམར་རྩུབ་སྐམ་ལ་སྟོང་སྐྱུགས་བྱེད། །སྨྲ་
འཆལ་སྐབས་སུ་འདར་ཞིང་ཕྱི་དྲོད་ཆེ། །བྱེ་བྲག་རྟགས་ལ་རྣམ་པ་གསུམ་ཡོད་དེ། །དང་པོ་
བབས་ས་གནས་ཀྱིས་བརྟག་པ་ནི། །ཐོག་མར་སྐྱི་དང་བ་སྤུར་འབབ་པ་སྟེ། །ཤེད་ཆུང་སྒྱིད་
སྐྱུར་ལུས་བརྩེ་བ་སྤུ་ལྡང༌། །དེ་ནས་པགས་ལ་བབས་ཏེ་ཕྲུམ་སེར་ཁྱེར། །མགོ་རྐང་ཚིགས་
གཞི་ན་ཞིང་ཉི་མ་སྙེག །དེ་ནས་རྩ་ལ་བབས་ཏེ་རྩ་ཚད་སྐྱེ། །རྩ་འཁྱུག་ཤེས་པ་བྱིང་ལ་སྐོམ་
དད་ཆེ། །ཁ་ཁ་ཆུ་མདོག་དམར་ལ་རྙོག་པའོ། །དེ་ནས་ཤ་ལ་བབས་ཏེ་མགོ་བོ་འཐོམ། །ལུས་
ལྕི་ཤ་ཚ་བསིལ་འདོད་ཤེས་པ་ཉོབ། །དེ་ནས་སྣོད་དུ་བབས་ཏེ་དང་ག་འགག །དྲི་མ་འཁྲུ་
སྐམ་ལྕེ་ལ་བད་ཀན་ཆགས། །དེ་ནས་དོན་ལ་བབས་ཏེ་རྩ་ཆུ་ཚ། །ལྕེ་སྐམ་ཟ་ཟི་སྨྲ་ལ་སྐོམ་
དད་ཆེ། །དེ་ནས་གཞུག་ཏུ་རུས་ལ་བབས་པའི་རྟགས། །སྣ་བུག་ཁ་ལྕེ་སྐམ་ལ་སོ་དྲེག་ཆགས། །
རྩ་སྟོངས་རྣ་བ་འོན་ལ་ཤེས་པ་ཉོག །རིམ་པ་དུས་ཀྱི་སྒོ་ནས་བརྟག་པ་ནི། །དང་པོ་ཞག་
གསུམ་བད་ཀན་དུས་ཡིན་ཏེ། །ཚ་བ་མགོ་ལ་བབས་པས་མགོ་བོ་ན། །ཉྭ་དང་ཚིགས་གཞི་ན་
ཞིང་ཕྲུམ་སེར་ཁྱེར། །གཡལ་མང་སྒྱིད་སྐྱུར་སྐྱུག་ཅིང་ཉི་མ་སྙེག །ཚ་བ་མ་སྨིན་དྭངས་སྙིགས་
དབྱེ་བའི་དུས། །དེ་ནས་ཞག་གསུམ་མཁྲིས་པའི་དུས་ཡིན་ཏེ། །ཚ་བ་དབང་པོའི་སྒོར་བབས་
ཁ་ཁ་ལ། །ལྕེ་ལ་བད་ཆེ་སོ་མཆུ་དྲེག་པ་ཆགས། །སྣ་སྐམ་རྣ་བ་མི་གསང་མིག་ནག་ཆེ། །ཆུ་
དམར་རྩ་གྲིམས་ཆུ་ལྟར་སྐེམ་པའི་དུས། །དེ་ནས་ཞག་གསུམ་ཁྲག་དུས་ཁྲག་ལ་བབས། །རྩ་
དང་ཆུ་ཡི་ཚ་བ་གོང་བས་ཆེ། །ལྕེ་སྐམ་སྐོམ་དད་ཆེ་ལ་རྔུལ་དྲི་མནམ། །ལུས་ལྕི་ཚ་བ་དགྲ་
ལྟར་བསད་པའི་དུས། །དེ་ནས་ཞག་གསུམ་རླུང་ཁྲག་འཐབ་པའི་དུས། །ཚད་པ་དོན་ལ་
བབས་པས་བླབ་འཆོལ་སྨྲ། །དྲན་པ་མི་གསལ་ཚབས་ཆེ་སྲོག་རྩར་འཆོར། །ཤེད་ཆུང་རྩ་བྱིང་
ངོ་ནག་ལྕེ་སྐམ་རྩུབ། །ཡང་ན་སྨྱོ་འབྲོས་གཉེན་ལྟར་བསྟེན་དུས་ཡིན། །དེ་ནས་ཞག་གསུམ་
རི་ཐང་མཚམས་ཀྱི་དུས། །རུས་ལ་བབས་པས་དཔྱི་སྐེད་རུས་རྐང་ན། །ཤེད་ཆུང་གདོང་སྐྱ་
25-1-230


མགོ་འཐོམ་རྣ་བ་འུར། །གཉིད་ཆུང་ལུས་རྔུལ་བུ་ལྟར་གསོ་དུས་ཡིན། །ནད་གཞི་རིགས་ཀྱི་
སྒོ་ནས་བརྟག་པ་ནི། །དང་པོ་རླུང་རིམས་བརླ་དང་རྐེད་པ་ན། །མགོ་ལུས་ཡན་ལག་ལུས་
ཀུན་བརྡུངས་སྙམ་བྱེད། །གཡལ་མང་མགོ་འཁོར་རྣ་བ་སྒྲ་དང་བཅས། །གཉིད་ཡེར་མུ་
འགྲམ་མགོ་བོ་ཟུག་ཅིང་གཟེར། །སྤུ་ལྡང་པགས་པ་བརྩེ་ལ་རྔུལ་མི་འབྱུང༌། །རྐང་ལག་མགོ་
བོ་འདར་ཞིང་བླབ་འཆོལ་སྨྲ། །ཁ་ཟས་མི་འཇུ་བཤང་གཅི་སྲི་བ་ཡིན། །ཁྱད་པར་འདར་བུ་
ཕྲུམ་སེར་ཡུན་རིང་འདར། །ཡེར་བུ་གཉིད་མེད་གཡོ་ཞིང་འབྲོས་ཚུལ་སྟོན། །རླུང་རིམས་
བབས་ས་རུས་ཡིན་རུས་ཀུན་ན། །རྒྱས་ས་དོན་ཡིན་ལྕེ་སྐམ་ཟ་ཟི་མང༌། །ཐ་མར་སྲོག་རྩར་
ལམ་དོན་སྨྱོ་འབྲོས་བྱེད། །མཁྲིས་རིམས་བསིལ་འདོད་མགོ་ན་ཁ་ཁ་ཞིང༌། །ལུས་ཚ་འཁྲུ་
ཞིང་བཤང་གཅི་ལྤགས་མིག་སེར། །རྔུལ་དབྱུང་དྲི་མནམ་མྱོས་ཤིང་སྐོམ་དད་ཆེ། །ལུད་པ་
ཁྲག་བཅས་ཁ་ལ་ཐོར་པ་འོང༌། །ཁྱད་པར་ལེབ་རྒན་སྟོད་གཟེར་ལུད་པ་དམར། །སྣ་ཁྲག་
འཛག་ཅིང་ཚད་རྟགས་ཆེ་བ་ཡིན། །ཀླད་གཟེར་ཚ་བ་རྒྱས་ལ་མགོ་ཟུག་ཆེ། །མུར་འགྲམ་
ལྟག་རྩ་འཁྱུག་ཅིང་འཚོགས་མ་ལྕི། །མཁྲིས་རིམས་དང་པོ་བབས་ས་རྩ་ཡིན་པས། །རྩ་ཆུ་ཚ་
ལ་རྩ་རྒྱས་རྩ་རྣམས་འཁྱུག །བར་དུ་རྒྱས་པའི་ས་ནི་ཁྲག་ཡིན་པས། །ཆུ་དམར་རོ་སྟོད་ཚ་
ཞིང་སྣ་ཁྲག་འོང༌། །ཐ་མ་ཕལ་ཆེར་ཕོ་བར་ལམ་དོད་པས། །མཁྲིས་པས་ཕོ་བའི་མེ་དྲོད་ཕྱིར་
བཏོན་ཏེ། །ལྕེ་སྐམ་མཆུ་ཐུང་ཁ་སྐམ་སོ་དྲེག་ཆགས། །དང་ག་མི་བདེ་སྟོང་སྐྱུགས་བྱེད་པའོ། །
བད་རིམས་མྱོས་ཤིང་ཚ་བ་དལ་བུས་སྐྱེ། །སྐྱུག་ཅིང་མཆིལ་མ་ལུད་པ་མང་བ་དང༌། །ལུས་
སྙོམ་ལྕི་ཞིང་གཉིད་ཆེ་དང་ག་འགག །བཤང་གཅི་ལྕེ་དང་སེན་མོ་པགས་མདོག་དཀར། །
ཁྱད་པར་རྨོངས་བུ་ཟ་ཟི་ཉག་ཉོག་མང༌། །དྲན་པ་མི་གསལ་ཤེས་པ་འཐིབ་པ་ཡིན། །ལྐུགས་
པ་མི་ངོ་མི་ཤེས་སྨྲ་བ་ལྐུགས། །དྲི་ཆེན་དྲི་ཆུ་མི་འཁྱོལ་མལ་དུ་འཆོར། །བད་རིམས་དང་པོ་
བབས་ས་དང་ག་སྟེ། །ཁ་མངལ་ཟས་མི་འཇུ་ལ་དང་ག་འགག །བར་དུ་རྒྱས་པ་ཤ་དང་ཀླད་
25-1-231


པ་སྟེ། །ལུས་ལྕི་མྱོས་དང་ལྐུགས་པར་འགྱུར་བ་ཡིན། །ཐ་མར་འཆོར་ས་མཁལ་མར་ལམ་
དོན་པས། །ཆུ་སྲི་མཁལ་རྐེད་ན་ལ་རྣ་བ་འོན། །འདུས་རིམས་རྟགས་ལ་སྤྱི་དང་བྱེ་བྲག་
གཉིས། །སྤྱི་རྟགས་དང་པོ་བར་དང་ཐ་མ་གསུམ། །འདུས་རིམས་ཐོག་མ་དྭངས་མར་བབས་
པའི་ཕྱིར། །དྭངས་མ་བད་མཁྲིས་གཉིས་ཀྱི་གནས་ཡིན་པས། །བད་ཀན་ཤས་ཆེ་མ་སྨིན་
རྟགས་མི་གསལ། །དེ་འོག་མ་ཞུ་སྨུག་པོ་ལྟ་བུར་སྣང༌། །མཁྲིས་ཤས་ཆེ་ན་མ་སྨིན་རྟགས་
འགའ་གསལ། །དེ་འོག་མཁྲིས་ནད་ལྟ་བུར་མིག་ཆུ་སེར། །བར་དུ་རྒྱས་དུས་སེམས་རྨུགས་
རྣ་བ་འོན། །གཉིད་ལོག་དུས་ན་ཟ་ཟི་བླབ་འཆོལ་འབྱུང༌། །ལུད་པ་དམར་སེར་དཀར་པོ་
འབྱར་བག་ལུ། །རྐང་དང་རྐེད་པ་རུས་ཚིགས་མ་ལུས་ན། །གྲེ་བ་ཚ་འཛེར་སྦྲིད་པ་སྣ་ཆུ་མང༌། །
མིག་དམར་རྩིབ་ལོགས་ན་ཞིང་སྐོམ་དད་ཆེ། །ཚ་བ་བཤང་གཅི་རྔུལ་དང་གཉིད་མི་སྙོམས། །
ཐོར་པ་འབྲུམ་ཕྲན་དམར་ནག་འབྱུང་ཡང་སྲིད། །དྭངས་མ་ཁྲག་སོགས་ཟུངས་ཀུན་ལ་
གནས་ཕྱིར། །ནད་རྟགས་མི་འདྲ་སྣ་ཚོགས་ཅིར་ཡང་སྲིད། །ངོས་བཟུང་སྨིན་བསད་འབྱང་
དཀའ་ས་འདྲ་ལྕི། །ངེས་ཤེས་རྣ་བ་མི་གསང་ཟ་ཟིས་ཤེས། །ཐ་མར་ལུས་ཟུངས་ཞུ་བས་རྔུལ་
མང་འབྱུང༌། །སྨྲ་མང་ཕྱི་རྩ་འདར་སྲིད་སྟོང་སྐྱུགས་འོང༌། །ལུས་གྲང་ཧམ་པ་སྐྱ་འམ་མགོ་རྐང་
ན། །དེ་དག་རི་ཐང་མཚམས་སུ་ཕེབས་རྟགས་ཡིན། །བཅོ་བརྒྱད་ཉི་ཤུ་གཉིས་ན་འཚོ་འཆི་
ཕྱེད། །བྱེ་བྲག་རྟགས་ལ་རྒྱུན་རིམས་དྭངས་མར་བབས། །བད་མཁྲིས་ལྡན་པའི་ནད་རྟགས་
འབྱུང་བ་སྲིད། །ཁྲག་ལ་བབས་པ་རྟག་པའི་རིམས་ཡིན་ཏེ། །རོ་སྟོད་ཕོ་མཆིན་མི་བདེ་སྣ་
ཁྲག་འཛག །གློ་མང་ལུད་པ་མི་གཙང་མིག་ཆུ་དམར། །ཞག་གཅིག་ཚ་བའི་ཟུག་གཟེར་ལན་
གཉིས་ལྡང༌། །ཤ་ལ་བབས་པ་ཉིན་གཅིག་པ་ཞེས་བྱ། །རྔུལ་མང་དྲོད་ཆེ་ལུས་དང་ཤེས་པ་
ལྕི། །ཚ་བ་ནད་ཟུག་ཉིན་རེ་ལན་རེ་ལྡང༌། །ཚིལ་ལ་བབས་པ་ཉིན་གསུམ་པ་ཡི་རིམས། །ཁྱད་
པར་གཉིད་ཆེ་ལུས་པོ་ཤིན་ཏུ་ལྕི། །རླུང་མཁྲིས་ཤས་ཆེ་དང་པོ་མགོ་ལ་འབབ། །བད་མཁྲིས་
25-1-232


ཤས་ཆེ་སྐེ་དང་ཕྲག་པར་འབབ། །རླུང་དང་བད་ཀན་ཤས་ཆེ་རྐེད་པར་འབབ། །ཉིན་རེ་བདེ་
ལ་ཉིན་གཉིས་གཏུད་ནས་ན། །རུས་ལ་བབས་པ་ཉིན་བཞི་པ་ཡི་རིམས། །ཁྱད་པར་རྐེད་པ་
རྐང་རུས་ཚིགས་གཞི་ན། །ཀླད་པར་བབས་ཚེ་མགོ་འཁོར་ཆམ་པས་འདེབས། །སྟོབས་ཆེ་ཁ་
ཡོ་མིག་སླེ་གཟའ་ཕོག་མཚུངས། །བད་ཀན་ཆེ་ན་བྱིན་པ་ན་བར་བྱེད། །རླུང་ཤས་ཆེ་ན་ཁྱད་
པར་ཀླད་པ་ན། །ཞག་གཉིས་བདེ་ལ་ཞག་རེ་ན་རེས་བྱེད། །གཉན་རིམས་མཁྲིས་པ་རྩར་
རྒྱུག་ཅེས་བྱ་བ། །ནད་འདི་ཀླུ་བདུད་བྱང་སྨན་རྐྱེན་བྱས་ནས། །མཁྲིས་ཚད་ཕྱི་རོལ་རྔུལ་གྱི་
སྒོར་ཞུགས་ཏེ། །ནང་དུ་མཆིན་མཁྲིས་དོན་སྣོད་གཉིས་ལ་བབས། །རང་སར་མི་གནས་རྩ་
མིག་ཀུན་ཏུ་རྒྱུག །ཡར་ལ་མགོ་དང་ཀླད་པར་བད་ཡུལ་འཕྲོག །མར་ལ་མཁལ་མ་རྒྱུངས་
པར་ཆུ་ཡུལ་འཕྲོག །དོན་ལ་གློ་དང་སྙིང་ལ་རླུང་ཡུལ་འཕྲོག །ཕོ་ལོང་རྒྱུ་མ་སྣོད་དུ་མཁྲིས་
ཡུལ་འཕྲོག །ཤ་པགས་ཕྱིར་ཤོར་སྟོབས་དང་ཁ་དོག་འཕྲོག །མཇུག་ཏུ་མཁྲིས་གནས་རླུང་
གིས་སྤྱད་བྱས་ནས། །རང་གནས་སྲོག་རྩར་འཆོར་བས་འཚོ་བ་ཉུང་། །དེ་རྟགས་གྲང་ཤུམ་
བྱེད་ཅིང་རྒྱུ་བ་ཞན། །རྩ་ནི་སྟོང་ལ་མྱུར་ཞིང་ཆུ་སེར་ཉོག །མགོ་དང་ཚིགས་གཞི་ན་ཞིང་ཟ་ཟི་
འོང༌། །བར་དུ་ནད་རྒྱས་ཆུ་ནི་མར་ནག་འདྲ། །མིག་སྤྲིན་ལྕེ་འོག་མུར་གོང་ཤ་མདངས་སེར། །
ཁ་ཁ་ལུས་ཚ་གཉིད་ཆུང་དང་ག་འགག །སེན་མོ་རྙིལ་དང་ལྕེ་མཆུ་དཀར་སེར་འོང༌། །མགོ་
གཟེར་ལྕེ་མཆུ་འགས་ཤིང་སོ་དྲེག་ཆགས། །མཆིན་མཁྲིས་སྟེང་དུ་འདྲིལ་བ་མནན་མི་བཟོད། །
ནད་ཀྱི་དྲི་དུགས་སྟོབས་དང་གཟི་མདངས་འཆོར། །སྨིན་པའི་ལོང་མེད་བདུན་དགུའི་དུས་
ན་འཆི། །བླུན་པོ་འགའ་ཞིག་སྨིན་བྱེད་དུས་ལ་སྡོད། །རྩ་སྤུན་ཤེས་པ་ཡང་ལ་ལུས་སྟོབས་
ཤོར། །ཕྱི་ཡི་དྲོད་ཆུང་པགས་མདོག་གསེར་ལྟར་སེར། །དུས་འདས་རང་གནས་སླེབ་པས་
ཟློག་ཐབས་མེད། །དེ་ཕྱིར་མ་སྨིན་དུས་ན་བྱ་ར་སྒྲིམས། །ཁྱད་པར་མགོར་བྲོས་ཀླད་གཟེར་
སྣ་ཁྲག་འཛག །གློར་བབས་རོ་སྟོད་གཟེར་ལ་ལུད་པ་སེར། །མཁལ་བབས་མཁལ་རྐེད་ན་
25-1-233


ཞིང་དྲི་ཆུ་སྡོམ། །ཕོ་བར་བབས་ན་ཁ་ཁ་མཁྲིས་པ་སྐྱུག །རྒྱུ་མར་བབས་ན་ཟུག་ཆེ་ཚན་ཅན་
འཁྲུ། །དེ་དག་མི་འགྱུར་འཁྲུལ་མེད་ནད་རྟགས་ཡིན། །བཅོས་པའི་ཐབས་ལ་སྤྱི་དང་བྱེ་བྲག་
གཉིས། །སྤྱི་བཅོས་མ་སྨིན་དུས་སུ་མ་ནུ་བཞི། །ཡང་ན་སླེ་ཏྲེས་ལྔ་ཐང་སྨིན་པར་བྱ། །ཟས་
དང་སྤྱོད་ལམ་བསིལ་དྲོད་སྙོམས་པར་བཅོས། །རྒྱས་པར་མ་སྨིན་སྤྱི་བཅོས་ལེའུར་བལྟ། །
བར་དུ་སྨིན་རྒྱས་ཏིག་ཏ་གསེར་མེ་ཏོག །དེ་བ་པར་པ་ཏ་དང་ལི་ག་དུར། །ཨ་རུ་ར་ཡི་ཐང་
བཏང་རྔུལ་མང་དབྱུང༌། །ཚ་སྟོབས་ཆེ་ན་དེ་སྟེང་ག་བུར་དང༌། །གི་ཝཾ་ཅུ་གང་གུར་གུམ་བོང་ང་
དཀར། །ཏིག་ཏ་ཀ་ར་སྦྱར་ལ་ཐང་གིས་དབུལ། །སྨན་ཞུ་རྔུལ་དབྱུང་རིམས་ཚད་ཀུན་ལ་
ཤེས། །སྐྱེད་ཆུང་མིག་ཆུ་སེར་ན་བཤལ་གྱིས་སྦྱང༌། །འབྲས་བུ་གསུམ་དང་དུར་བྱིད་པི་པི་
ལིང་། །ནཱ་ག་གེ་སར་སྦྲང་རྩི་ཀ་ར་སྦྱར། །རིམས་ཀུན་གསར་རྙིང་མེད་པ་སེལ་བར་བྱེད། །ཆུ་
ལྕག་བྲབས་ལ་ནད་དག་བསིལ་གྱིས་བཅད། །ཟས་དང་སྤྱོད་ལམ་རྒྱས་ཚད་སྤྱི་དང་འདྲ། །
ཁྱད་པར་རིམས་སོ་ཅོག་ལ་ཞོ་གནོད་དེ། །བཅུ་གསུམ་འདས་ནས་འོ་མ་བདུད་རྩིར་མཚུངས། །
ཐ་མ་རི་ཐང་མཚམས་སུ་སད་མདའ་བཏང༌། །ཁ་ཟས་གློད་ཅིང་ཚད་གཞུག་གདོན་པའི་
ཐབས། །རི་ཐང་མཚམས་ཀྱི་ལེའུར་ཤེས་པར་བྱ། །བིག་པན་སྲད་དཀར་སྙ་ལོ་ཀྱི་ལྕེ་བཞི། །
ཚ་བའི་སྟོབས་སྦྱར་དུ་བ་མ་ཤོར་བསྲེགས། །ཐལ་བར་མགོ་ན་ཨ་རུ་ཟུར་ལྔ་སྡེབ། །སྣ་ཁྲག་
འཛག་ན་མཚེ་ཡི་ཐལ་བ་སྡེབ། །གློ་ལུ་བ་ལ་རྒྱ་སྐེགས་ཐལ་བ་སྡེབ། །རྩིབ་ལོགས་གཟེར་ན་
མ་ནུའི་ཐལ་བ་སྡེབ། །མིག་ཆུ་སེར་ན་ཤོ་རྩའི་ཐལ་བ་སྡེབ། །ཚིགས་གཞི་ལ་བབས་རྟ་ལྤགས་
ཐལ་བ་སྡེབ། །དྲི་མ་འགགས་ན་སུག་པའི་ཐལ་བ་སྡེབ། །ཆུ་སྲི་བ་ལ་གཟེ་མའི་ཐལ་བ་སྡེབ། །
རླུང་གི་རིམས་ལ་རུས་ཁུས་འཕུལ་ལ་བཏང༌། །རི་ཐང་མཚམས་སུ་ཆང་ཁྱོར་རེ་ཡིས་དབུལ། །
ཆང་འཐུངས་གཉིད་ལོག་ག་བུར་ནག་པོ་ཡིན། །རླུང་ལྡན་རིམས་རིགས་ཀུན་ལ་བསྔགས་པ་
སྟེ། །ཁྱད་པར་རི་ཐང་མཚམས་ཀྱི་བདུད་རྩི་ཡིན། །མ་སྨིན་རི་ཐང་མཚམས་གཉིས་རིམས་ལ་
25-1-234


གཅེས། །དེ་ཕྱིར་མཁས་པས་འདི་དུས་གཟབ་པར་བྱ། །བྱེ་བྲག་བཅོས་པའི་ཐབས་ལ་རྣམ་
གསུམ་ལས། །བབས་ས་གནས་དང་སྦྱར་ལ་བཅོས་པ་ནི། །བ་སྤུར་བབས་དུས་ལྟོ་སྒུག་ཆུ་
སྐོལ་བཏང༌། །ཁ་ཟས་བསིལ་ཕྱོགས་མི་བཏང་སྨིན་པར་དཀའ། །བསིལ་ཐང་ཕྱེ་མ་མི་བསྟེན་
ཚ་བ་རྙོགས། །སྣུམ་བཅུད་མི་བཏང་ཚ་བ་རུས་ལ་ཞེན། །དེ་ནས་པགས་བབས་མ་ནུ་བཞི་
ཐང་བཏང་། །ཚ་བ་ཆེ་ན་འབྲས་གསུམ་སླེ་ཏྲེས་ཐང༌། །འདི་དུས་མི་བསྲེག་ཚ་བ་ཁོང་དུ་
འཆོར། །དྲོད་བཅུད་མི་བསྟེན་རྩི་ལྟར་ཞེན་པར་འགྱུར། །བསིལ་ཕྱེ་མི་བསྟེན་ཚ་བ་སྐྱེ་ལམ་
འགག །ཁྱད་པར་གཏར་ག་བཤལ་དང་བསིལ་བཅུད་སྤང༌། །ཚ་བའི་ནད་ལ་བྱ་འཆོར་རྔུལ་
མི་དབྱུང་། །དེ་ནས་རྩར་བབས་བཟང་དྲུག་བ་ཤ་ཀ །ག་དུར་ཀར་སྦྱར་ཟས་སྐོམ་བསིལ་དུ་
བསྟེན། །འདི་དུས་ཐང་བཏང་དང་ག་འགག་པས་སྤང༌། །སྣུམ་བཅུད་གབ་འགྱུར་བསྲེགས་ན་
ཚ་བ་འདྲེགས། །སྐྱུར་ཤོར་ངན་ཁྲག་རྩར་ཞེན་གསོ་བ་དཀའ། །ཤར་བབས་གི་ཝཾ་བསིལ་
གསུམ་ཨ་རུ་ར། །ཀ་ར་སྦྱར་བའི་བསིལ་འཇམ་ཕྱེ་མ་བསྟེན། །བསྲེགས་ན་གཟེར་འདེབས་
གཏར་ན་རྗེས་མི་ཆོད། །འདི་དུས་རྔུལ་དུ་གདོན་པ་ཤིས་པ་ཡིན། །ཐང་བཏང་རྩར་ཞེན་
བཅུད་ཤོར་མེ་རུ་འབར། །ག་བུར་མི་བཏང་རླུང་འཁྲུགས་ཚ་བ་འཐོར། །སྣོད་བབས་བྱི་ཚེར་
ཏིག་ཏ་གསེར་མེ་ཏོག །བོང་ང་ག་དུར་དུག་ཉུང་ཀ་ར་སྦྱར། །རྔུལ་ཐང་བསྲེག་དང་དྲོད་བཅུད་
ཤིན་ཏུ་གནོད། །སྣོད་དུ་བབས་ཚེ་ཐང་བཤལ་བསྔགས་པ་ཡིན། །དོན་བབས་ཚ་བ་རབ་
འབྲིང་བྱེ་བྲག་གིས། །ག་བུར་ཙན་དན་གི་ཝཾ་གཙོ་བྱས་ལ། །བསིལ་གསུམ་ག་དུར་ཏིག་ཏ་
བོང་ང་དཀར། །ཧོང་ལེན་ཀ་ར་སྦྱར་བའི་ཕྱེ་མ་བསྟུད། །རླུང་མཁྲིས་བད་ཀན་ཁྲག་ཤས་ཆེ་བ་
ལ། །མེ་སྦྱོངས་རྔུལ་གཏར་ཅུང་ཟད་བསྟེན་པར་བྱ། །རྔུལ་གྲང་རླུང་འཁྲུགས་བཅུད་སྔས་ཚ་
བར་ལྡོག །རུས་བབས་སྲེ་ལོང་བུར་ཞོ་ཚོ་ཁུས་སང་། །ཟས་ཀྱིས་ངོ་བསླང་བསིལ་གྱིས་ཚད་
གཞུག་གདོན། །བསིལ་དྲགས་ཟས་ཡེན་ཟུངས་འཛད་ལ་རྒལ་འགྱུར། །རླུང་འཕེལ་གསར་
25-1-235


འཇམ་བྲིད་ལ་དྲུག་བདུན་བསྲེག །རིམ་པ་དུས་དང་སྦྱར་ཏེ་བཅོས་པ་ནི། །བད་ཀན་དུས་སུ་
འབྲས་གསུམ་མ་ནུ་བཞི། །སླེ་ཏྲེས་བྱི་ཚེར་ཏིག་ཏ་དྲོ་འཇམ་བསྟེན། །རྔུལ་དབྱུང་ཚ་བའི་ཁ་
བྲིད་གཉེན་ལྟར་བསྟེན། །མཁྲིས་དུས་ཏིག་ཏ་གསེར་གྱི་མེ་ཏོག་དང༌། །ཨ་རུ་ར་ཡི་བསྡུས་
གྲང་བཏང་བར་བྱ། །བཟང་དྲུག་གསེར་གྱི་མེ་ཏོག་བ་ཤ་ཀ །ག་དུར་ཀ་ར་སྦྱར་བའི་ཕྱེ་མ་
བསྟེན། །མགོ་བོ་ན་ན་དཔྲལ་རྩ་ཁ་ཕྱེ་གཏར། །ཆུ་ལྕག་བྱས་པས་ཚ་སེལ་སྐྲ་མི་འབྱི། །ཁྲག་
དུས་ག་བུར་ཙན་དན་གི་ཝཾ་དང༌། །བསིལ་གསུམ་ག་དུར་ཀ་རའི་ཕྱེ་མ་གཏུད། །ཁྲག་མཁྲིས་
སྟོབས་ཆེ་ཅུང་ཟད་གཏར་ཞིང་སྦྱང༌། །བྱིང་འཐིབས་རྔུལ་གདོན་ཟས་སྤྱོད་བསིལ་དུ་བསྟེན། །
རླུང་ཁྲག་འཐབས་དུས་ཛཱ་ཏི་སྙིང་ཞོ་ཤ། །བིག་པན་ཐལ་བ་བུར་དཀར་སྦྱར་ལ་བཏང༌། །ག་
བུར་རྒྱལ་བློན་གསུམ་དང་ལྟག་པ་སྤྲད། །དྲན་མེད་སྨྲ་འཆལ་མི་ལ་འཛིན་ནམ་སྣོམ། །ཟས་
བྱིན་ཁྱེམ་བུ་སོས་འཛིན་མིག་རྩ་གྲུང༌། །ག་བུར་ཆང་སྦྱར་བཏང་ལ་དྲུག་པ་བསྲེག ཁ་ཟས་
བསིལ་དྲོད་སྤེལ་བཏང་སྒོག་ཆབ་བསྔགས། །སྐྱེད་ཆུང་ཨ་སོ་གཏར་ལ་རྒྱལ་བློན་གསུམ། །
ཛཱ་ཏི་ཀ་ར་སྦྱར་ལ་བཏང་བར་བྱ། །བཅུ་གསུམ་ཕན་ཆད་ཚ་བའི་རི་ཐང་མཚམས། །ཆང་
གསར་ཚོ་ཁུ་བུར་ཞོ་སྲེ་ལོང་ཐང༌། །སད་མདས་ངོ་བསླང་ཆ་ཡིས་བྲིད་ལ་གློད། །སྐྱུ་རུ་ཙན་
དན་ག་བུར་བིག་པན་ཐལ། །ཀར་སྦྱར་ཚད་ལྷག་སྐམ་ཕྱིར་བསྲིངས་ལ་བཏང༌། །ཚ་བ་ཐོན་
ནས་གང་འཕྲོད་ཟས་ཀྱིས་གསོ། །ནད་གཞིའི་རིགས་དང་སྦྱར་ཏེ་བཅོས་པ་ནི། །རླུང་རིམས་
དང་པོ་བུ་རམ་གོ་སྙོད་ཐང༌། །རུས་བཅུད་གསུམ་དང་སླེ་ཏྲེས་ཆིག་ཐང་དང༌། །བྱི་ཚེར་ག་དུར་
སླེ་ཏྲེས་སྒ་ཐང་བཏང༌། །སྨིན་ནས་བཟང་དྲུག་སླེ་ཏྲེས་བིག་པན་ཐལ། །ཀ་རའི་ཕྱེ་མ་རུས་
ཁུས་འཕུལ་ལ་བཏང་། །གཏར་བཤལ་ག་བུར་འདི་ལ་ཉེ་མི་རུང༌། །བསིལ་ཤ་གསར་པ་མར་
གསར་ཡོས་ཐུག་བསྟེན། །ཚ་བ་ཆུང་ན་ཞག་དགུ་ལོན་པ་དང༌། །འདར་བུའི་ལྟག་ཁུང་ཡེར་
བུའི་ཨན་སྟོང་བསྲེག །མ་ཐུབ་སྲོག་རྩར་ལམ་དོན་སྨྱོ་བ་ན། །ཛཱ་ཏི་གུ་གུལ་རུ་རྟ་ཨ་ག་རུ།  །
25-1-236

 
སྒོག་ཐལ་བུར་དཀར་སྦྱར་ལ་རུས་ཁུས་དབུལ། །རུས་བཅུད་ཁུ་བར་ཛཱ་ཏི་བཏབ་ལ་བཏང༌། །
མ་ཐུབ་གཞུག་ཆུང་ལྔ་བདུན་སྦྱོར་བ་བྱ། །དྲུག་བདུན་ཨན་སྟོང་ལྟག་པའི་སྡུད་སྒོ་བསྲེག །དེ་
ལྟར་བཅོས་པས་མ་ཐུབ་སྲོག་རླུང་ལོག །རྩ་སྤུན་རྔམ་པ་རྩེག་ན་འཆི་བ་ཡིན། །སྣ་ལོན་དྲན་
པ་གསལ་ལ་རྩ་ཤེད་རྒྱས། །ཆུ་དྭངས་ལྕེ་རློན་རྐང་པའི་དྲོད་རྙེད་ཅིང༌། །སྣབས་སྐམས་འགོག་
བླ་རྣ་བ་གསང་ན་འཚོ། །མཁྲིས་རིམས་དང་པོ་ཏིག་ཏ་བྱི་ཚེར་ཐང༌། །བྱི་ཚེར་ག་དུར་རྩ་
མཁྲིས་སྐྲ་བཟང་དང༌། །ཨ་རུ་ག་དུར་ཏིག་ཏ་སྐྲ་བཟང་བཏང༌། །སྨིན་ནས་ག་དུར་གི་ཝཾ་ཙན་
དན་གསུམ། །ཚད་སྟོབས་སྦྱར་ལ་བསིལ་གསུམ་ལི་ག་དུར། །ཏིག་ཏ་དུག་ཉུང་གསེར་མེ་
བོང་ང་དཀར། །ཧོང་ལེན་བ་ཤ་ཀ་དང་ཀ་ར་སྦྱར། །ཚ་བ་ཆེ་ལ་ཁྱད་པར་མིག་ཆུ་སེར། །
འབྲས་གསུམ་ལྕུམ་རྩ་དུར་བྱིད་ཐང་བཤལ་བྱ། །ཁྱད་པར་ལེབ་རྒན་སྣ་ཁྲག་འཛག་པ་ལ། །
ཙན་དན་མཚེ་ཐལ་དོམ་མཁྲིས་སྦྱར་ལ་བཏང༌། །སྨིན་མའི་བར་དུ་སྤྲ་བ་ལྔ་ཡིས་བསྡམ། །གློ་
ལུ་སྟོད་གཟེར་ལུད་པ་དམར་བ་ན། །ཙན་དན་དཀར་པོ་གུར་གུམ་ཅུ་གང་དང༌། །རྒྱ་སྐྱེགས་
ཤིང་ཐལ་ཀ་ར་སྦྱར་བྱས་ལ། །ཚོས་ཁུས་འཕུལ་བཏང་གློ་རྩ་ཅུང་ཟད་གཏར། །ཀླད་པ་གཟེར་
ན་མུ་འགྲམ་འཁྱུག་རྩ་བསྲེགས། །དཔྲལ་བའི་རྩ་ལ་ཁྲག་རླངས་ཐོན་ཙམ་གཏར། །གླ་རྩི་སྤང་
སྤོས་ཕུར་ཐལ་ཨ་རུ་ར། །ཤུག་པ་སྤང་རྒྱན་དཀར་སྦྱར་འཚོགས་སྟེང་བསྲེག །ཐ་མ་ཕོ་བར་
ལམ་དོན་ཐང་བཤལ་བྱ(འབྲས་གསུམ་ལྕུམ་རྩ་དུར་བྱིད་ཀྱིས་)། །དེ་རྗེས་ཛཱ་ཏི་ཤིང་ཀུན་ཀ་ཀོ་ལ། །
བུར་ཆང་བཏང་ལ་ཚོ་ཁུ་ཆང་འཇམ་བསྟེན། །དེ་ལྟར་མ་བཅོས་ཕོ་བའི་མེ་ཤི་ནས། །ཁ་ཟས་
མི་འཇུ་སྟོང་སྐྱུགས་བྱེད་ན་འཆི། །གོང་བཞིན་སྣ་ལོན་རྟགས་ཚང་འཚོ་བར་ངེས། །བད་ཀན་
རིམས་ལ་དང་པོ་མ་ནུ་བཞི། །བྱི་ཚེར་ག་དུར་བ་ཤ་ཀ་དང་སྒ། །གླ་སྒང་པར་པ་ཏ་ཡི་སྨིན་ཐང་
བཏང༌། །སྨྱུང་བར་བྱ་ཞིང་ནང་ནུབ་ཆུ་སྐོལ་བཏུང༌། །སྨིན་ནས་བཟང་དྲུག་ཏིག་ཏ་འབྲས་བུ་
གསུམ། །ཨུཏྤལ་ག་དུར་ཀ་ར་སྦྱར་ལ་བཏང༌། །འབྲས་བུ་གསུམ་དང་ཏིག་ཏ་ལི་ག་དུར།  །
25-1-237

 
བསྡུས་ཐང་དྲོན་མོ་བཏང་ལ་རྔུལ་མང་དབྱུང༌། །འབྱང་དཀའ་ཚ་བ་མི་ཆག་བཤལ་(ལྕུམ་རྩ་
དུར་བྱིད་ཨ་རུ་ར་སྐྱེར་ཤུན་ཐང་) གྱིས་སྦྱང༌། །ཁྱད་པར་རྨོངས་བུའི་རིགས་ལ་ར་དཀར་པོའི། །རྭ་རུ་
བསྲེགས་པའི་གཞོབ་དང་བལ་ཚི་སྦྱར། །ལུས་ཀུན་བྱུགས་ལ་ག་བུར་རྒྱལ་བློན་གསུམ། །
ཁོང་དུ་བཏང་ལ་ཞུ་ནས་བ་སྤུར་དབྱུང་། །བླབ་འཆོལ་མང་ན་ལྟག་པའི་སྐྲ་མཚམས་བསྲེག །
སྐྱུགས་སུ་བྱུང་ན་ཚིགས་པ་དང་པོ་བསྲེག །ཁ་ལྐུགས་ག་བུར་རྒྱལ་བློན་གསུམ་པ་དང༌། །ཛཱ་
ཏི་སྦྱར་བཏང་རྐང་མཐིལ་མཐེབ་སྙིང་བསྲོ། །དེ་རྗེས་ལྕེ་འོག་རྩ་ལ་གཏར་བར་བྱ། །མཁལ་
མར་ལམ་དོན་གཟེ་མ་པི་པི་ལིང་། །བུ་རམ་བསྡུས་ཐང་དྲོན་མོས་མཁལ་སྣ་བསླན། །དེ་ལྟར་
མ་བཅོས་མཁལ་མའི་ཟུངས་ཉམས་ཏེ། །རྐང་པའི་དྲོད་ཉམས་དབུགས་ཐུང་སྣ་ཆུ་འོང༌། །བླ་
རྩ་བྲོས་ན་མི་ཐུབ་འཆི་བར་ངེས། །སྣ་ལོན་གོང་གི་རྟགས་ཚང་འཚོ་བ་ཡིན། །འདུས་རིམས་
བཅོས་ཐབས་སྤྱི་དང་བྱེ་བྲག་གཉིས། །སྤྱི་བཅོས་སྨིན་དང་ཞི་བྱ་གསོ་བ་གསུམ། །དང་པོ་
སྨིན་བྱེད་དྭངས་མར་བབས་པ་ཡིས། །ཕོ་བ་དྲོད་ཉམས་རྩ་ལམ་འགགས་པའི་ཕྱིར། །ཅི་
རིགས་སྨྱུང་བྱ་ནང་ནུབ་ཆུ་སྐོལ་བཏུང༌། །འབྲས་སམ་ཡོས་ཐུག་སྤོད་བཅས་ཚ་བ་བཏང༌། །
བཅའ་སྒ་བྱི་ཚེར་པར་པ་ཏ་གསུམ་ལ། །གླ་སྒང་བསྡེབས་ཏེ་བསྐོལ་ཐང་རྩེ་འཇམ་དང༌། །སླེ་
ཏྲེས་གླ་སྒང་རྩ་མཁྲིས་སྒ་ཐང་བཏང༌། །བད་རླུང་ཆེ་ན་མ་ནུ་བཞི་ཐང་སྟེ། །ཁྲག་མཁྲིས་ཆེ་ན་
འབྲས་བུ་གསུམ་ཐང་བཏང༌། །ཟས་སྤྱོད་ཚ་གྲང་གཉིས་སྤང་དྲོ་འཇམ་བསྟེན། །དེ་ཡི་སྨིན་
རྟགས་རྔུལ་གཡོས་ཕྲུམ་སེར་སངས། །དེ་འོག་བར་དུ་ཞི་བས་བཅོས་བྱ་སྟེ། །དེ་ཡང་བཅོས་
པའི་དུས་ལ་གསར་རྙིང་གཉིས། །གསར་དུས་ཉེས་པའི་སྟོབས་ཀྱིས་བཅོས་པ་དང་། །ཚ་བའི་
སྟོབས་དང་སྦྱར་ནས་བཅོས་པ་གཉིས། །ཉེས་པའི་སྟོབས་སྦྱར་རླུང་མཁྲིས་བད་ཀན་གསུམ། །
གང་ཤས་ཆེ་བ་སྔོན་ལ་ཞི་བར་བྱ། །ཆ་མཉམ་བད་མཁྲིས་རླུང་གསུམ་རིམ་པས་བཅོས། །
རླུང་ལ་སླེ་ཏྲེས་མཁྲིས་ལ་ཨ་རུ་ར། །བད་ཀན་པི་པི་ལིང་གི་ཆིག་ཐང་བཏང༌། །ཆ་མཉམ་པ་
25-1-238


ལ་འབྲས་བུ་གསུམ་ཐང་བསྟེན། །ཟས་སྤྱོད་སྨན་དཔྱད་དེ་ཡི་གཉེན་པོར་སྦྱར། །ཚ་བའི་
སྟོབས་དང་སྦྱར་ཏེ་བཅོས་པ་ནི། །ཡུལ་དུས་ན་ཚོད་ནད་ཁམས་ཟས་སྤྱོད་ཀྱིས། །ཚ་སྟོབས་ཆེ་
ཆུང་གཉིས་སུ་འགྱུར་བའི་ཕྱིར། །སྟོབས་ཆེ་སྨིན་དུས་བསྡད་པའི་ལོང་མེད་པས། །ཞག་
གཅིག་སྨྱུང་བྱས་ནང་པར་གསར་ཤ་སྦྱིན། །དེ་ཡི་ནང་པར་གསེར་ཕུད་སྐྱུགས་ཀྱིས་དྲང་། །
སྐྱུགས་བྱས་ནང་པར་ཧོང་ལེན་བཤལ་གྱིས་སྦྱང༌། །དེ་ཡིས་ཕོ་བའི་བད་མཁྲིས་བསལ་བྱས་
ལ། །ག་བུར་རྒྱལ་བློན་གསུམ་ལྔ་བདུན་པ་འམ། །རིན་ཆེན་ཞགས་པ་ལུས་ཟུངས་ཚ་སྟོབས་
སྦྱར། །སྐབས་སུ་སྨན་བཏང་རྗེས་ལ་ཚད་ལམ་བསལ། །སྣོད་ཚད་ཆེ་ན་མངར་བའི་སྨན་གྱིས་
སྦྱང་། །སྟོད་གཟེར་ལུད་པ་དམར་སེར་གནས་སྦྱར་གཏར། །ཚ་བའི་རླངས་གདོན་ཁྲག་བོངས་
ཆེར་མི་རུང་། །སྟོབས་ཆུང་བྱ་ཀྲ་སྐྱེར་པ་པ་ཏོ་ལ། །ཧོང་ལེན་སྒྲོན་ཤིང་གླ་སྒང་འབྲས་བུ་
གསུམ། །བསྐོལ་གྲངས་བཏང་རྗེས་གཙོ་བོ་བརྒྱད་པ་ལ། །གླ་སྒང་པར་པ་ཏ་དང་དུག་མོ་ཉུང་། །
པ་ཏོ་ལ་དང་རྩ་མཁྲིས་བསྣན་ལ་བཏང་། །ཟླ་གཅིག་ཕར་འདས་རིམས་རྙིང་ཚ་བ་རྣམས། །
སླེ་ཏྲེས་པི་པི་ལིང་དང་འབྲས་བུ་གསུམ། །ཐང་མང་བཏང་རྗེས་ཉི་ཤུ་རྩ་ལྔ་སྦྱར། །སྐབས་སུ་
རྔུལ་དབྱུང་མིག་ཆུ་སེར་ན་སྦྱང་། །བཤང་གཅི་ཕྱེན་འགགས་པ་ལ་བྱ་ཀྲ་དང་། །གཟེ་མ་འོ་མ་
བུར་རྙིང་བསྐོལ་བ་ཕན། །མདོག་སྔོ་ཤ་སྐམ་དང་ག་བདེ་བ་ན། །ཚ་བ་ཕྱི་རུ་བྱེར་བས་ཆུ་ལྕག་
ཕན། །རྩ་ཁྲིད་ན་འཕྲེང་ལྕི་ན་ཅུང་ཟད་གཏར། །ཚིགས་གཞི་རུས་པ་ན་སྐྲངས་ཆུ་ལུམས་བྱ། །
རིམས་རྗེས་སྣ་རྩ་སྐྲངས་ན་གང་ཉེ་གཏར། །གུར་གུམ་ཀ་ར་མར་གསར་སྣ་སྨན་བཏང་། །
བྲག་ཞུན་སྟག་ཤ་ཧོང་ལེན་དྲི་ཆུ་བྱུག །ཀོ་ལེར་ན་ཞིང་གཟེར་ན་ཚན་དུགས་བྱ། །གཤེད་
མེད་སྨད་ཚད་སྐྱེས་ན་སྨད་འདྲེན་བཏང་། །ཟུངས་ཟད་རོ་སྨད་དྲོད་བྲལ་འཇམ་རྩི་བྱ། །སྟོབས་
མེད་གཏིང་ཚད་མ་ཐོན་རླུང་སྐྱེས་ན། །ཏིག་ཏའི་སྨན་མར་སྦྲང་རྩི་སྦྱར་ལ་བསྟེན། །མདོར་ན་
ཚ་བ་ནད་ཟུངས་ཀུན་འབྲེལ་ཕྱིར། །ཐོར་བུ་སྣ་ཚོགས་མ་ངེས་འབྱུང་བས་ན། །ཚ་བ་སྤྱི་དང་
25-1-239


འཕྲུལ་ཏེ་ནད་སྣ་བསལ། །ཐ་མ་རི་ཐང་མཚམས་སུ་ཟུངས་གསོ་སྟེ། །འདུས་རིམས་ཡིན་ཕྱིར་
ངེས་མེད་འཕྲུལ་སོ་ཆེ། །ལེགས་པར་བརྟགས་ནས་ཁ་ཟས་རིམ་གྱིས་གློད། །འདྲར་སྣང་སླུ་
བྲིད་འཕྲང་ལ་མ་ཤོར་གཅེས། །དེ་ནས་འདུས་རིམས་བྱེ་བྲག་གསོ་བ་ནི། །རྒྱུན་རིམས་པ་
ཏོལ་(དུག་ཉུང་ཧོང་ལེན་)གསུམ་པའི་ཐང་བཏང་ཞིང་། །ཁྱད་པར་བད་ཀན་ཤས་ཆེ་སྒྲེག་ཅིང་སྐྱུག །
མི་འཇུ་ཡི་ག་འགགས་ན་(སོན་ཆ་རྒྱམ་ཚྭའི་)སྐྱུགས་ཀྱིས་དྲང་། །མཁྲིས་བབས་མིག་ཆུ་སེར་ན་
(དུར་བྱིད་རྒུན་འབྲུམ་ཨིཎྜ་བཞི་ཐང་)བཤལ་གྱིས་སྦྱང་། །སྲིན་ཁྲོས་ཕོ་བར་ཟུག་ལ་གོ་བྱེ(་བུ་རམ་རིལ་བུ་
སྦྱར་བ)ས་བསད། །རྟག་པའི་རིམས་ལ་ཧོང་ལེན་(པ་ཏོ་ལ་གླ་སྒང་བ་སྤུ་པ་ཏྲ་)ལྔ་པ་སྦྱར། །གར་བབས་
རྩ་ལ་ཅི་རན་རིགས་པས་གཏར། །ཉིན་གཅིག་པ་ལ་གླ་སྒང་(པ་ཏོ་ལ་འབྲས་གསུམ་ནིམ་པ་དུག་ཉུང་རྒུན་
འབྲུམ་)བརྒྱད་པ་བཏང་། །གཙོ་བོ་རྔུལ་མང་དབྱུང་ཞིང་ཆུ་ལྕག་བྱ། །ཉིན་གསུམ་པ་ལ་བཅའ་
སྒ་(ཙན་དན་ཏིག་ཏ་སླེ་ཏྲེས་)བཞི་ཐང་བཏང༌། །བྱེ་རུག་(སྤོས་དཀར་ཡུང་སྐྱེར་བྲག་ཞུན་དུག་ཉུང་བོང་ང་འབྲས་
གསུམ་)བཅུ་པ་སྦྲང་དང་སྦྱར་ལ་བྱིན། །ཉིན་བཞི་པ་ལ་སླེ་ཏྲེས་(གླ་སྒང་སྐྱུ་རུ་)གསུམ་ཐང་བཏང་། །
སླེ་ཏྲེས་བྲག་ཞུན་སྦྱར་བྱུགས་མཁན་ཆུས་བྲན། །རུ་རྟ་ཨ་རུ་འོ་མའི་འཇམ་རྩི་བྱ། །ཚིགས་པ་
ཁ་བྱེ་ཟུག་གཟེར་གང་ཆེ་བསྲེག །ཀླད་པར་བབས་ན་སྣ་བཤལ་བཏང་བ་འམ། །ཆུ་ཚན་གླ་
རིལ་དུགས་བྱ་ནང་རྩ་སྦྱང་། །རྗེས་ལ་རྩ་བ་འབྲས་བུའི་སྨན་མར་སྦྱར། །ཀུན་ལ་པ་ཏོ་ལ་དང་
པུ་ཙེ་ཤེལ། །གླ་སྒང་ཤིང་མངར་ཨ་རུ་ར་དང་ལྔ། །པ་ཏོལ་ལྔ་འདིའི་ཐང་ཕྱེ་གང་རིགས་ཕན། །
རིམས་གང་ཅིས་ཀྱང་ཚ་བ་མི་ཆག་ན། །འཚོ་དཀའ་ལག་པའི་རྩ་ལ་ལན་འགའ་གཏར། །
ཉིན་གཅིག་མི་གཏར་བཞི་པོ་རང་རང་(རྒྱུན་རིམས་རྩ་གང་བབ་པར་གཏང་། རྟག་པའི་རིམས་ལ་དྲུམ་མགོ་
གནོད་ཀ་གཏར། རིམས་གཉིན་གསུམ་པ་ལ་རྩེ་ཆུང་དཔུང་རྩ་གཏར། ཉིན་བཞི་པ་ལ་ལྟག་རྩ་གཏར།) རྩ། །གཏར་བས་
རིམས་ཀྱི་ཚ་བ་རྩད་ནས་འདོན། །ཀུན་ལ་རི་ཐང་མཚམས་སུ་གཟབ་པ་གཅེས། །གཉན་
རིམས་བཅོས་ཐབས་སྤྱི་དང་བྱེ་བྲག་གཉིས། །སྤྱི་བཅོས་དང་པོ་རྩ་ཡི་འབྲོས་འཕྲང་བསྡམ།  །
25-1-240

 
གཉིས་པ་གཉེན་པོ་སྦྱར་བས་བསད་པ་དང་། །གསུམ་པས་རོ་དབྱུང་བཞི་པས་ནད་ལྷག་
བསལ། །དང་པོ་རྩ་ཡི་འབྲོས་འཕྲང་བསྡམ་པ་ནི། །མི་དོམ་མཁྲིས་པ་གླ་རྩི་བོང་ང་དཀར། །
རྒུ་དྲུས་ཆོས་སྨན་བྲག་ཞུན་ཡུང་བ་རྣམས། །ལོ་བརྒྱད་ཆུ་ལ་སྦྱངས་ལ་ཁོང་དུ་བཏང་། །སྨིན་
བྱེད་ཐང་དང་ལྟག་པ་སྤྲད་པར་ཤིས། །སྡུད་སྒོ་འཚོགས་མ་དྲུག་པ་བཅུ་གསུམ་པ། །ནང་ལོང་
འཕར་རྩ་སྤྲ་བ་བཞི་ལྔས་མནན། །དེས་ནི་རྩ་ཡི་འབྲོས་འཕྲང་འགེགས་པར་བྱེད། །གཉེན་པོ་
འཛིན་པ་བོང་ངའི་མེ་ཏོག་དང༌། །ལྷོག་དུག་ཨ་རུ་ཤ་ཆེན་ཆ་ཡིས་བསྐྱེད། །དྲི་ཆུའི་རིལ་བུ་
སྲན་ཙམ་ཐེབས་འགའ་བཏང༌། །ལྕི་རྔུལ་ཕྱི་ཚད་ཆེ་ན་གསོད་པའི་རྟགས། །གཟེར་བཤལ་རོ་
དབྱུང་མ་ཐེབས་བསྐྱར་ལ་སྦྱང༌། །བསྐྱར་ཡང་མི་འཇུག་སྲོག་རླུང་ཉམས་ཏེ་འཆི། །ལེགས་
འཁྲུ་མདོག་སེར་དྲི་ཆེ་རོ་ཐོན་རྟགས། །མཁྲིས་པ་ཐོན་ཆུང་མིག་སེར་བསྐྱར་ལ་བཏང༌། །
འབྱོངས་ན་མིག་སྤྲིན་འཕྲལ་ལ་དཀར་པོར་འགྲོ། །ཕྱེ་མ་གི་ཝཾ་གུར་གུམ་དུག་མོ་ཉུང༌། །ཧོང་
ལེན་ཏིག་ཏ་སྐྱེར་ཤུན་བོང་ང་དཀར། །ཀྱི་ལྕེ་གུ་གུལ་ལྕུམ་རྩ་སྒྲོ་པུཥྤ། །ཞིབ་བཏགས་དུས་
བཞིར་ཆུས་འཕུལ་ཚད་ལྷག་འཇོམས། །ཚ་ཡང་ག་བུར་སྲོག་རླུང་ལྡོག་ཕྱིར་སྤང༌། །གཉན་མ་
སོད་པར་གཏར་དང་དཀར་མངར་སྤང༌། །འབྲས་ཐུག་ཡོས་ཐུག་བསྐོལ་གྲངས་ཆུ་གྲོག་
བཏང༌། །བྱེ་བྲག་གར་བབས་ནད་ཀྱི་དམིགས་བརྟགས་ལ། །མགོར་བབས་དོམ་མཁྲིས་
གངས་ཐིགས་གི་ཝཾ་དང༌། །ཨ་བྱག་བོང་ང་ཀ་ར་སྦྱར་ལ་བཏང༌། །འཚོགས་མ་སྡུད་སྒོ་མུར་
འགྲམ་མེ་ཡིས་མནན། །སྣ་ཁྲག་འཛག་ན་གུར་གུམ་དོམ་མཁྲིས་དང༌། །མཚེ་ཐལ་སྙ་ལོ་སྲད་
དཀར་ཀྱི་ལྕེ་བ། །རྡོ་དྲེག་སེར་པོ་ཀ་ར་སྦྱར་ལ་བཏང་། །གློར་བབས་ཙན་དན་གུར་གུམ་ཅུ་
གང་དང༌། །སྐྱེར་ཤུན་ཤིང་མངར་བོང་ང་དཀར་པོ་དང་། །ཀ་ར་སྦྱར་བཏང་དྲུག་འགོ་སྣོད་ཀ་
གཏར། །མཁལ་བབས་གླ་རྩི་གུར་གུམ་སུག་སྨེལ་དང༌། །སྐྱེར་ཤུན་བྲག་ཞུན་ཉི་དགའ་ཨ་རུ་
ར། །ཤུག་ཚེར་སྦྱར་བཏང་བཅུ་བཞི་རྩ་ནག་བསྲེག །ཕོ་བར་བབས་ལ་སྤྱི་དང་ཁྱད་པར་
25-1-241


གཉིས། །སྤྱི་རུ་ཕོ་བར་བབས་པའི་རིམས་རྣམས་ལ། །ཕག་རིལ་ཐལ་བ་དོམ་མཁྲིས་སྦྱར་བ་
བསྔགས། །གླ་རྩི་དུག་ཉུང་བཙོད་དང་ལི་ག་དུར། །དོམ་མཁྲིས་བོང་དཀར་སྐྱེར་པའི་བར་
ཤུན་སྦྱར། །ཁྱད་པར་གཉན་ཤས་ཆེ་ན་བསད་རྗེས་སྦྱང༌། །ཕག་རིལ་སྲད་དཀར་ཧོང་ལེན་དེ་
བ་བཞི། །ཁྱོར་བ་རེ་རེ་སོ་སོར་བསྲེགས་ཐལ་བ། །དམར་ཟལ་བ་ཆུས་འདམ་བཏགས་བྱས་
པའི་ཕྱེ། །ཀ་རས་ཁ་བསླང་རིམས་ཚད་ཀུན་ལ་བསྔགས། །ཁྱད་པར་འདུས་རིམས་རིམས་
སྨྱོན་ཏྲེ་ཏྲེ་ཧོ། །གཉན་རིམས་ཕོ་བར་བབས་པའི་བདུད་རྩི་ཡིན། །མཁྲིས་ཡུལ་རླུང་གིས་
ཕྲོགས་ལ་ཁ་རུ་ཚྭ། །ཛཱ་ཏི་ཐང་དང་བུར་ཆུང་བསྡེབས་ལ་བཏང༌། །ག་བུར་ནག་པོ་ཆང་དུ་
སྦྱར་བ་བསྔགས། །མ་ཞུས་རྒྱུ་བྱས་སྒྲེག་སྐྱུག་ཟས་མི་འཇུ། །རྒྱམ་ཚྭ་བཞི་ཐང་བཏང་ཞིང་(ཨ་
རུ་ལྕུམ་རྩ་པི་ལིང་གསེར་མེའི་)ཐང་བཤལ་བྱ། །རྒྱུ་མར་བབས་ན་དང་པོ་བཤལ་བཏང་ལ། །དེ་རྗེས་
གཉེན་པོ་ཐོག་རུས་རྒུ་དྲུས་དང༌། །གླ་རྩི་ཆོས་སྨན་བོང་ང་དཀར་པོ་དང་། །ཆུ་རྩ་དྲི་ཆུར་སྦྱར་
ལ་བཏང་བར་བྱ། །རིམས་ཚད་དང་པོ་མ་སྨིན་སྙན་གསན་འབེབས། །བར་དུ་ཚ་བ་སྨིན་རྒྱས་
གཞི་ལ་གནོན། །ཐ་མར་གཞུག་རྒྱན་ཐོར་བུའི་ཞབས་ཏོག་བྱེད། །དེ་ཕྱིར་ཐོར་བུ་ནད་ཀྱི་
བསལ་ཐབས་གཅེས། །རིགས་པས་ཚ་བ་སྤྱི་དང་འཕྲུལ་ཏེ་བཅོས། །ཞེས་གསུངས་སོ། །
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རིམས་ཀྱི་ཚ་བ་བལ་
ནད་བཅོས་པའི་ལེའུ་སྟེ་ཉི་ཤུ་གསུམ་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས། །
འབྲུམ་བུའི་རིམས་ལ་རྒྱུ་རྐྱེན་མཚན་ཉིད་དང༌། །དབྱེ་བ་རྟགས་དང་བཅོས་ཐབས་ཇི་ལྟར་
བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་ལ་ལན་
གསུངས་པ། །འབྲུམ་བུའི་རིམས་ནི་སྤྱི་དང་འདྲ་བ་ལ། །ངོ་བོ་ཚ་བ་ཆུ་སེར་ལ་བབས་ནས། །
རུས་རྐང་ལྷ་བའི་གཏིང་ནས་སྐྱེ་བར་བྱེད། །ཐོར་པའམ་འབྲུམ་བུ་འོང་ཕྱིར་མིང་དུ་བརྗོད།  །
25-1-242

 
དབྱེ་བ་ནག་པོ་དཀར་པོ་རིགས་གཉིས་ཏེ། །ནག་པོའི་རིགས་གསུམ་སྐྲངས་པ་གླང་གཉའ་
དང༌། །ཁྲག་སྐམ་རྩེལ་ཏེ་ཟངས་གཟེར་སྦུ་གུ་ཅན། །དཀར་པོའི་རིགས་གསུམ་ཤ་ར་སྐྱ་ཤར་
དང༌། །རྨོག་མགོ་སྤྱི་ཟླུམ་སིབ་བུ་ཀོབ་ཙེ་འོ། །དེ་ཡི་རྟགས་ལ་སྤྱི་དང་བྱེ་བྲག་གཉིས། །སྤྱི་
རྟགས་ཚིགས་གཞི་ན་ལ་གྲང་ཤུམ་བྱེད། །ལུས་སྤྱིར་སྙོམ་ལ་དང་ག་མི་བདེ་ཞིང༌། །ཁ་ཁ་ཟ་
ཟི་འོང་ལ་སྒྱིད་པ་སྐྱུར། །ཁྱད་པར་མགོ་བོ་ན་ཞིང་གློ་སྙིང་བརྡུང༌། །ཤ་མདངས་དམར་ལ་
མཐུག་ཅིང་ལུས་ཀུན་བརྩེ། །མཁྲིས་པ་སྐྱུག་ཅིང་རུས་རྐང་འཆག་སྙམ་སེམས། །དང་པོ་མ་
སྨིན་མངོན་ཚུལ་དེ་ལྟར་འབྱུང༌། །བར་དུ་འབྲུམ་པ་ཕྱིར་ཐོན་བདེ་སྙམ་བྱེད། །ཐ་མ་བྱེ་བྲག་
རྟགས་ལ་དཀར་ནག་གཉིས། །ནག་པོའི་རིགས་ལ་སྐྲངས་པ་གླང་གཉའ་ནི། །ཕྱི་རུ་མི་ཐོན་
ཟུག་ཆེ་ལུས་ཀུན་སྐྲངས། །ཆུ་སེར་ནག་པོ་ཉེས་ཀུན་འདུས་ལས་བསྐྱེད། །ཁྲག་སྐམ་རྩེལ་
ཏེ་ཤིག་ནི་དམར་ནག་མཐུག །ཟངས་གཟེར་སྦུ་གུ་ཅན་ནི་དཀྱིལ་དུ་སྐྱོང༌། །དེ་གཉིས་ཁྲག་
དང་མཁྲིས་པ་ལས་གྱུར་ཡིན། །ཁྱད་པར་མགོ་ན་རྩ་ཆུ་ཕྱི་ཡུལ་ཚ། །དཀར་པོ་རྨོག་མགོ་སྤྱི་
ཟླུམ་ཆེ་ལ་འཆོལ། །ཤ་ར་སྐྱ་ཤར་དཀར་ལ་མཐུག་པ་སྟེ། །སིབ་བུ་ཀོབ་ཙེ་ཙམ་ཙེམ་མཐུག་
ཀོབ་འབྱུང༌། །བད་རླུང་ལས་གྱུར་ནད་ཟུག་ཆམ་པ་འདྲ། །ཚད་པའི་རྟགས་ཆུང་མ་ལོག་
བཅོས་མི་དགོས། །དེ་དག་བཅོས་ཐབས་སྤྱི་དང་བྱེ་བྲག་གཉིས། །སྤྱི་བཅོས་དང་པོ་མ་སྨིན་
སྤུ་སྒོ་དབྱེ། །ནད་རྒྱས་ཚ་བ་ཁོང་ནས་ཕྱིར་ལ་དབུལ། །ཁོང་ཤོར་ཕྱིར་དྲང་ཐ་མ་འབྲུམ་རྗེས་
གསུབ། །དང་པོ་སྒོ་དབྱེ་སླེ་ཏྲེས་འབྲས་བུ་གསུམ། །ཏིག་ཏ་བ་ཤ་ཀ་དང་ལི་ག་དུར། །བསྡུས་
ཐང་དྲོན་མོ་ཕུལ་གང་ཉི་ཕྱེད་བཏང༌། །སྨན་ཞུ་རྔུལ་གདོན་བལ་དང་ཕྱེ་ཡིས་ཕྱི། །སྤུ་སྒོ་ཕྱེད་
པས་འབྲུམ་པ་ཕྱིར་མྱུར་སྐྱེ། །ནད་སྟོབས་ཆེ་བ་རྣམས་ལ་ཐེབས་འགའ་བསྔགས། །འདི་དུས་
དཔྱད་མཆོག་རྔུལ་ལས་ལྷག་པ་མེད། །ཆག་ཅེ་ཕྱེ་ཐུག་འོ་མ་བཏབ་པ་དང༌། །འོ་ཟན་དར་
གསར་ཆུ་སྐོལ་ཆབ་ཚ་བསྟེན། །ཉིན་ནུབ་མ་ལུས་མི་བསེང་དྲོད་ལ་སྒོར། །གྲང་དང་བསེར་
25-1-243


བུས་ཕོག་ན་འབྲུམ་པ་ལྡོག །བཅུད་ཤོར་འབྲུམ་པ་མི་སྐྱེ་དོན་ལ་འབབ། །གལ་ཏེ་ཤོར་ན་
སྲན་ཁུ་སྲན་ཚོད་སྦྱིན། །དེ་རྗེས་ཚ་བ་འཕུལ་ལ་ཐང་ཕྱེ་གཉིས། །དང་པོ་ལུག་ཆུང་སྒོག་ཐོག་
ལུག་ཤོའི་ཐང༌། །གཡེར་ཤིང་ཐང་གིས་འབྲུམ་པ་ཕྱིར་ལ་འཕུལ། །ཕྱེ་མས་ཚ་བ་འཕུལ་ལ་
རྡོ་རྩི་གཉིས། །རྩི་སྦྱོར་ཙན་དན་གི་ཝཾ་ཨ་རུ་ར། །ཛཱ་ཏི་ཅུ་གང་གུར་གུམ་གླ་རྩི་དང༌། །བསེ་
རུ་ཀ་ར་སྦྱར་ལ་གང་ཆུས་དབུལ། །རྡོ་སྦྱོར་རྒྱལ་པོ་སྡེ་བཞི་མཚལ་དཀར་དང༌། །གླ་རྩི་ཚ་ལ་
ཀར་སྦྱར་ཆང་གིས་དབུལ། །ཐུན་གྲངས་ཐུན་ཚད་ཚ་བ་ནད་སྟོབས་དཔག །རྩི་ཡིས་དོན་
སྣོད་ཚ་བ་སེལ་བར་བྱེད། །རྡོ་ཡིས་ཆུ་སེར་སྐེམ་ཞིང་ཕྱིར་ལ་འཕུལ། །ནད་སྟོབས་ཆེ་ན་རྡོ་རྩི་
ལྟག་སྤྲོད་མཆོག །འབྲུམ་བུ་མ་ཐོན་ལུས་སྐྲངས་གྲང་ཤུམ་བྱེད། །ནད་འབྲས་ཤིང་མངར་འོ་
མར་བསྐོལ་བ་བྱུག །འབྲུམ་པ་སྐྱེ་འཕྲོ་ནང་དུ་ལོག་པའམ། །འབྲུམ་རྫོགས་སླར་ལོག་ཁོང་
ནས་ཕྱིར་དྲང་བ། །འཛིམ་པ་ནས་ཙམ་ཀར་སྦྱར་ཁོང་དུ་བཏང༌། །རྔུལ་དབྱུང་དེ་རྗེས་རྡོ་རྩི་
གང་རུང་ལ། །དངུལ་ཆུ་བཞི་ནམ་བསྣན་ལ་ལྟག་པ་སྤྲད། །ཐུན་བསྐྱེད་དྲུག་ཡར་བཏང་བས་
ཕྱིར་འཕུལ་བྱེད། །འབྲུམ་པ་རྫོགས་ནས་ཤི་བ་ཕལ་དུ་མེད། །ཐ་མར་ནད་འགོ་ཆོགས་ནས་
རྗེས་བསུབ་པ། །འབྲུམ་པའི་ཤུ་བ་རྣག་ཅིང་རླན་ཆེ་ན། །ཤ་རུ་ཕུར་ཡོག་དྲེས་མའི་ཐལ་བ་
དང༌། །ལྕི་བ་སེར་ཀའི་ཐལ་བ་བཏབ་པས་སྐེམ། །མཐིལ་བཞིར་ཐོན་དང་སྔོན་མ་ཕལ་ཆེར་
སྐམས། །གཉིད་ཆུང་གཡལ་མང་སུས་འདར་ཤེས་པ་ཡང༌། །རྩ་ཆུའི་ཚ་བ་བྲི་ནས་ཁ་ཟས་
གློད། །ཞུན་མར་གསར་འཇམ་ཤ་གསར་མར་གསར་སྦྲང༌། །དང་པོ་བྲིད་ལ་ཐ་མར་ལྷུག་
པར་བཏང༌། །ཆང་མང་རྣགས་ཏེ་འབྲུམ་ཤུལ་ཟ་བས་ན། །ཁ་ངོམས་ཙམ་ལས་ཡོག་འཐུང་
སྤང་བར་བྱ། །འདི་མན་ཁ་ཟས་བཟང་ན་བསྲོངས་པ་སྐྱེན། །གདོང་པའི་ཤུ་བ་གོགས་ནས་དྲི་
ཆུས་བཀྲུ། །ར་ཕག་ཚིལ་བུ་ཚེར་སྔོན་སྦྱར་བ་བྱུག །བྱེ་བྲག་བཅོས་པ་རིགས་དང་བབས་སྒོ་
སྦྱར། །རིགས་བཅོས་སྐྲངས་པ་གླང་གཉའི་འབྲུམ་པ་ལ། །བསེ་ཀོ་གླང་གཉའི་ཀོ་བ་སེར་ཙམ་
25-1-244


བསྲེགས། །སྲན་ཕྱེ་བསྲེས་པ་སྤྱི་སྨན་ལྟག་སྤྲད་སྐེམ། །སྐྲངས་པ་ཆེ་ན་གང་ཉེའི་རྩ་ལ་གཏར། །
དུར་བྱིད་ཧོང་ལེན་སྤོས་དཀར་དུག་པུས་པའི། །རིལ་བུ་བ་ཆུས་འཕུལ་བའི་བཤལ་གྱིས་
སྦྱང་། །རྩེལ་ཏེ་ཤིག་དང་ཟངས་གཟེར་འདྲ་བ་ལ། །བཟང་དྲུག་གླ་རྩི་ཕག་རིལ་ཁུ་བ་དང༌། །
ར་ཁྲག་སྦྱར་བའི་ལྕག་མདའ་བཏང་བའམ། །ཏིག་ཏ་དུག་ཉུང་ཧོང་ལེན་བ་ཤ་ཀ །གོང་གི་
རྩི་སྦྱོར་སྤྱི་ལ་བསྣན་པ་བཏང༌། །ཤིན་ཏུ་ཚ་བ་ཆེ་ན་ག་བུར་བསྣན། །དཀར་པོ་སེ་འབྲུ་སྐྱུ་རུ་
རྡོ་སྦྱོར་བསྣན། །ལུས་སྐྲངས་སྨན་གྱིས་མ་ཐོན་བདུན་ན་འཆི། །དམར་ཐིག་འབྲུམ་པར་མ་
སོང་ལྔ་ན་འཆི། །ནག་ལེབ་རྣག་ཏུ་མ་སོང་དགུ་ན་འཆི། །སྐྱ་ཤར་ཟས་བསྡམས་དྲགས་ན་
འཆི་བ་ཡིན། །འབྲུམ་རྫོགས་སླར་ལོག་ལས་ཀྱིས་འཆི་ཞེས་བྱ། །བབས་ས་གནས་དང་སྦྱར་
ཏེ་བཅོས་པ་ནི། །སྙིང་ལ་བབས་ན་སྨྱོ་འདར་དངངས་ཆུང་འབྱུང༌། །རྩི་སྦྱོར་སྤྱི་སྟེང་ག་བུར་
བསྣན་ལ་བཏང༌། །མ་ཐུབ་སྨྱོ་ཞིང་འཚིག་ན་འཆི་བ་ཡིན། །གློར་བབས་གློ་མང་གཟེར་ཞིང་
རྣག་ཏུ་འབྱུང༌། །སྲོ་ལོ་ཤིང་མངར་རྩི་སྦྱོར་ལ་བསྣན་བཏང་། །མ་ཐུབ་མིད་པ་འགགས་ན་འཆི་
བ་ཡིན། །མཆིན་པར་བབས་ན་མིག་དམར་མཆིན་སྟེང་གཟེར། །དོམ་མཁྲིས་བྲག་ཞུན་ཁ་ཆེ་
གུར་གུམ་བསྣན། །འཐིབས་ཀྱིན་ཁྲག་ཏུ་འཁྲུ་སྐྱུག་འཆི་བ་ཡིན། །རྒྱུ་མར་བབས་ན་མཁྲིས་པ་
འཁྲུ་སྐྱུག་བྱེད། །བཙོད་དང་སྙ་ལོ་དུག་ཉུང་བསྣན་ལ་བཏང༌། །ཁྲག་ཏུ་འཁྲུ་ན་སྣོད་རྡོལ་འཆི་
བ་ཡིན། །དེ་དག་ཀུན་གྱི་འདྲེད་དུ་དངུལ་ཆུ་ཤིས། །མིག་ཏུ་བྱུང་ན་ག་བུར་གླ་རྩི་བྱུག །ཡང་ན་
འོལ་མོ་སེ་དང་ནུ་ཞོ་བྱུག །དོམ་མཁྲིས་ཏི་ཚ་སྐྱེར་ཁན་ར་གན་དུང༌། །ནུ་ཞོ་སྦྱར་བྱུགས་འཇབ་
འཇིབ་སྒྲོ་ཡིས་བྱབ། །ག་བུར་གུར་གུམ་ཆུས་བཀྲུ་གྲོད་ཆས་བདུག །གྲེ་བར་བབས་ན་ཕྱེ་ཚོད་
ཚན་མོས་བདུག །ཤུ་དག་རུ་རྟ་རྒྱ་ཚྭའི་ཕྱེ་མ་གདབ། །མཚར་བོང་ཐང་བཏང་རྟ་སྦངས་ཁུ་བ་
བཏུང༌། །མ་ཐུབ་སྐྱུང་བུས་བཞར་རྗེས་སྨན་ཕྱེ་བཏབ། །ལྒང་པར་བབས་ན་རྒྱ་ཚྭ་རུ་རྟ་དང༌། །
ཉི་དགའ་གླ་རྩི་བསྡུས་ཐང་བཏང་བར་བྱ། །རྒྱ་ཚྭ་གླ་རྩི་ཤུ་དག་རུ་རྟ་བཞི། །ཆུས་སྦྱར་གསང་
25-1-245


བའི་གཅེ་འུས་ལྒང་པར་བསྐྱལ། །དེ་ཡིས་གདུག་པ་འབྲུམ་པའི་ནད་འཇོམས་བྱེད། །ཅེས་
གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་འབྲུམ་
པའི་རིམས་བཅོས་པའི་ལེའུ་སྟེ་ཉི་ཤུ་བཞི་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས། །
རྒྱུ་གཟེར་རིམས་ལ་རྒྱུ་རྐྱེན་མཚན་ཉིད་དང༌། །དབྱེ་བ་རྟགས་དང་བཅོས་ཐབས་བཤད་དུ་
གསོལ། །དེ་སྐད་ཞུས་པའི་དོན་ལ་ལན་གསུངས་པ། །རྒྱུ་གཟེར་རྒྱུ་ནི་རིམས་ཚད་སྤྱི་དང་
འདྲ། །ངོ་བོ་མཆིན་ཚད་ཐུར་དུ་བབས་པ་ལ། །གཉན་ནད་ཆུ་སེར་མཁྲིས་ཚད་བསླང་བ་ཡིས། །
རྒྱུ་མ་གཟེར་ཞིང་འཁྲུ་བས་རྒྱུ་གཟེར་ཡིན། །དབྱེ་བ་སྤྱི་དང་བྱེ་བྲག་རྣམ་པ་གཉིས། །སྤྱི་ལ་
དོན་འཁྲུ་བ་དང་སྣོད་འཁྲུ་བ། །སྟོབས་ཆེན་སྟོབས་ཆུང་རྣམ་པ་བཞི་རུ་འགྱུར། །བྱེ་བྲག་དབྱེ་
བ་རྒྱུ་གཟེར་རྒྱུ་འཁོར་དང༌། །རྒྱུ་འཁྲོལ་རྒྱུ་ལུགས་ཞེས་བྱ་བཞི་རུ་བཤད། །དེ་རྟགས་དང་པོ་
མགོ་དང་ཚིགས་གཞི་ན། །ཕྲུམ་སེར་ཁྱེར་ཞིང་རྒྱུ་མ་ན་ལ་འཁྲུ། །འཁྲུ་བའི་བོངས་ཆུང་འཁྲུ་
དུས་ཟུག་གཟེར་ཆེ། །དམར་སེར་ཟ་ཁུ་སྨུག་པོ་བེ་སྣབས་འཁྲུ། །ཁྱད་པར་དོན་འཁྲུ་ཟུག་ཆེ་
འཁྲུ་བོངས་ཆུང༌། །སོ་ཁྲག་གཞིབས་ན་ཤ་ཁོག་བཤལ་བ་འདྲ། །སྣོད་འཁྲུ་དམར་སེར་ཟ་
ཁུ་བེ་སྣབས་འཁྲུ། །ཟུག་ཆུང་གྲངས་ཉུང་སྟོབས་ལྡན་ཚ་བ་ཆེ། །གྲངས་མང་ཟུག་ཆེ་སྟོབས་
ཆུང་དེ་ལས་ལྡོག །བྱེ་བྲག་རྒྱུ་གཟེར་བོངས་ཆུང་ཡང་ཡང་འཁྲུ། །འཁྲུ་བའི་དུས་ན་ཁྱད་པར་
ཟུག་གཟེར་ཆེ། །རྒྱུ་འཁོར་ཐུན་དུ་བཅད་ནས་བོངས་ཆེར་འཁྲུ། །རྒྱུ་མ་གཏུབས་སྙམ་ཟུག་ཆེ་
འཁྲུས་རྗེས་བདེ། །རྒྱུ་འཁྲོལ་ཟུག་ཆུང་ལྡང་དུབ་མེད་པ་ལ། །འཁྲུ་བའི་བོངས་དང་རྩ་ཆུའི་
ཚ་བ་ཆུང༌། །རྒྱུ་ལྐུགས་མི་འཁྲུ་སྦོ་འགག་གཏུབས་སྙམ་བྱེད། །བཅོས་པའི་ཐབས་ལ་གསར་
རྙིང་དུས་དང་སྦྱར། །གསར་པའི་བཅོས་ལ་སྤྱི་དང་བྱེ་བྲག་གཉིས། །སྤྱི་ལ་བཅོས་ཐབས་ནད་
སྟོབས་ཆེ་ཆུང་གིས། །སྟོབས་ཆེན་ནད་ལ་བཅོས་ཚུལ་རྣམ་པ་བདུན། །སྣོད་ཀྱི་རྩི་སྲུང་མཁྲིས་
25-1-246


པའི་མེ་བསད་ཅིང༌། །རྒྱུ་ལོང་རུལ་སྦྱང་ནད་དངོས་གཉེན་པོས་བསད། །མཆིན་པའི་ཟགས་
བསྡམ་འཁྲུ་བའི་ཁ་དོག་སྒྱུར། །ཐ་མར་ཆུ་བོའི་རྒྱུན་ལམ་བཅད་པའོ། །དང་པོ་སྣོད་ཀྱི་རྩི་
སྲུང་ཆིག་ཐུབ་(རི་བོང་ཀླད་པ་དོམ་མཁྲིས་ཏིལ་ནག་)གསུམ། །མཁྲིས་པའི་མེ་བསད་གུར་གུམ་(ཅུ་གང་
ཨུཏྤལ་ཏིག་ཏ་བ་ལེ་ཀ་བྲག་ཞུན་དྲུག་ལ་ཚད་སྟོབས་སྦྱར་ནས་ག་བུར་ཙན་དན་གི་ཝཾ་གིས་ཁ་བསྒྱུར་)བདུན་པ་གཉིས། །
དུས་བཞི་ལྟག་པ་སྤྲད་ལ་བཏང་བར་བྱ། །དེ་འོག་སྦྱོང་བྱེད་ཆིག་ཐུབ་(ཐར་ནུ་ཆུ་རྩ་རེ་ཅག་དྲི་ཆུར་
)རྣམ་པ་གསུམ། །འཁྲུ་མདོག་བློན་(དམར་ན་བྱ་རྐང་སེར་ན་དུག་ཉུང་སྨུག་ན་རེ་རལ་ཟ་ཁུ་སྐྱི་འབྲུམ་བེ་སྣབས་
སུག་སྨེལ་)གྱིས་ཁ་བསྒྱུར་རུལ་དྲི་སྦྱང་། །ལན་གཅིག་ལན་གཉིས་གང་དགོས་ནད་སྟོབས་སྦྱར། །
སྦྱངས་རྗེས་གཉེན་པོ་ཆིག་ཐུབ་(རང་ཤིའི་ཐོད་པ་ཐོག་རུས་ཆོས་སྨན་དུག་པུས་རྒུ་དྲུས་ཆུ་རྩ་གླ་རྩི་བྲག་ཞུན་)
རྣམ་པ་གསུམ། །ཐུན་ཆུང་གྲངས་མང་བཏང་ལ་དངོས་པོ་བསད། །ཤིན་ཏུ་ཟུག་ཆེ་རྒྱུ་ཞབས་
ཆུ་རྡོས་བདུག །བོང་ང་(དཀར་པོ་ཀྱི་ལྕེ་དཀར་པོ་ཧོང་ལེན་གྱི་ཕྱེ་མ་)ཆུ་འཁྱགས་སྦྱངས་པའི་སྨད་འདྲེད་
བཏང༌། །གཞང་ཁ་ལུག་ན་ཤིང་ལེབ་ཁ་སྡོམ་བྱ། །དེ་ནས་ཚད་སྟོབས་ཅུང་ཟད་ཆག་མངོན་
ནས། །མཆིན་པའི་ཟགས་སྡོམ་གུར་གུམ་(ཅུ་གང་བ་ལེ་ཏིག་ཏ་མཚེ་ཚིགས་ཨ་རུ་མཚལ་དོམ་མཁྲིས་བྲག་ཞུན་
)དགུ་པ་དང་།།འཁྲུ་ལྡོག་སྒྱུར་བྱེད་(དམར་ན་བྱ་རྐང་ཚོས་སེར་ན་དུག་ཉུང་དོམ་མཁྲིས་བེ་སྣབས་སུག་སྨེལ་ཐོག་
རུས་སྨུག་ན་རེ་རལ་ཁྲག་རྐང་ཟ་ཁུ་ཀྱི་འབྲུམ་མི་མཁྲིས་ཀུན་ལ་ཀ་ར་སྦྱར་བ་)ལྟག་པ་སྤྲད་ལ་བཏང་། །ཟས་སྐོམ་
ནས་སྔོན་ཅར་བརྡུངས་ཚོས་པ་ལ། །བ་རའི་འོ་མ་བག་ཙམ་བཏབ་པ་དང་། །བ་ཚྭ་མེད་པའི་
ཆུ་གྲོག་བསྟེན་པར་བྱ། །དཀར་མངར་རུལ་སྐྱུར་དྲོད་བཅུད་མཐའ་དག་སྤང་། །དེ་ནས་ཚ་བ་
ཆོགས་ན་ནད་སྟོབས་བྲི། །རྩ་དལ་ཆུ་སྔོ་དྲོད་ཆུང་ཕོ་ལོང་འཁྲོག །འཁྲུ་བའི་དྲི་དང་ཟུག་ཆུང་
འཁྲུ་ཚིགས་རིང་། །འཁྲུ་བ་སྒྲ་བཅས་ཆུར་སྐྱུར་སྟེང་དུ་ལྡིང་། །དེ་དུས་གཅོད་བྱེད་སྨན་དང་
གསར་བཅུད་ཟས། །རིམ་པས་སྤེལ་ཏེ་ཆུ་བོའི་རྒྱུན་ལམ་བཅད། །བཙན་ཐབས་མི་བཅད་
ཆ་ཡིས་བྲིད་པ་ཡིན། །སྟོབས་ཆུང་ནད་ལ་བཅོས་ཐབས་རྣམ་པ་གསུམ། །རྒྱུ་རིམས་དང་པོ་
25-1-247


རྩ་ཁ་བསྡམ་པ་དང༌། །བར་དུ་ཚ་བ་རོལ་དུ་བསད་པ་དང༌། །ཐ་མ་ཆུ་བོའི་རྒྱུན་ལམ་བཅད་
པའོ། །ཀུན་གྱི་གཙོ་བོ་ཆིག་ཐུབ་དཀར་(འདི་སྐབས་སྤང་རྩི་དོ་པོ་) པོ་ཡིན། །དང་པོ་པར་པ་ཏ་དང་
ཁྲག་རྐང་གཉིས། །གཙོ་བོ་ཆ་མཉམ་གངས་ཆུ་བསྐོལ་གྲངས་བཏང་། །བར་དུ་ཏིག་ཏ་བོང་
ང་སྲོ་ལོ་དཀར། །ཧོང་ལེན་བཞི་པོ་གཙོ་བོའི་སུམ་ཆ་སྦྱར། །བསྐོལ་གྲངས་ཐང་ངམ་ཕྱེ་མ་
ཆུས་སྦྱངས་བཏང༌། །ཐ་མ་ཚ་བའི་སྟོབས་ཆག་བཅད་རན་དུས། །སྐྱེར་པའི་མེ་ཏོག་གཙོ་བོའི་
སུམ་ཆ་སྦྱར། །བ་ཡར་འོ་མར་བཏབ་བཏང་རྒྱུན་ལམ་གཅོད། །ཡང་ན་རྒུ་དྲུས་ཆོས་སྨན་ཐོད་
པ་དང༌། །ཐོག་རུས་རྒྱལ་པོ་ཡིན་པས་སུམ་གཉིས་བཏང་། །གླ་རྩི་དོམ་མཁྲིས་ཨ་བྱག་བོང་
ང་དཀར། །རྩི་དམར་ཆུ་རྩ་བྲག་ཞུན་སུམ་ཆ་བཏང་། །འཁྲུ་མདོག་དམར་ན་མེ་ཏོག་བྱ་རྐང་
སྡེབ། །སེར་པོ་དུག་ཉུང་ཟ་ཁུ་ཀྱི་འབྲུམ་སྡེབ། །རྒྱ་ཤལ་རེ་རལ་བེ་སྣབས་སུག་སྨེལ་སྡེབ། །
གངས་ཆུ་སྦྱར་བས་རུལ་བསྲུང་ཚ་བ་བཅོག །འཁྲུ་བའི་ཚིགས་རིང་ཚད་ལྷག་བྲི་བ་དང༌། །ཀ་
ར་སྦྱར་ལ་བ་འོ་བསྐོལ་གྲངས་དབུལ། །རོ་འདོན་འཁྲུ་བ་གཅོད་ཅིང་ལུས་བརྟས་བྱེད། །བྱེ་
བྲག་བཅོས་ཐབས་རྒྱུ་གཟེར་རྒྱུ་འཁོར་གཉིས། །སྤང་རྩི་ཧོང་ལེན་བོང་ང་སུམ་ཅུ་ཏིག །ཁྲག་
རྐང་སྲོ་ལོ་པར་པ་ཏ་བསྡུས་ཐང་། །རྩ་ཁ་སྡོམ་དང་མི་འདྲུལ་སྲ་བར་བྱེད། །དམར་ཟལ་བ་
ཡི་འོ་མ་མར་དཀར་བསྡུས། །རྒྱུ་མའི་ནང་རྩི་མི་འཛད་འདྲེད་པར་བྱེད། །ཁྱད་པར་རྒྱུ་གཟེར་
རྒྱ་བཤལ་བཙོད་ཁུ་ལ། །གུར་གུམ་ཨུཏྤལ་ཀ་ར་སྲ་བྱེད་སྦྱར། །སེར་པོ་གི་ཝཾ་སྒྲོ་པུས་སྲ་བྱེད་
སྦྱར། །ཁྲག་ཏུ་འཁྲུ་ན་དོམ་མཁྲིས་སྲ་བྱེད་སྦྱར། །རྒྱུ་འཁོར་ཆུ་རྩ་དུད་ཁུ་ཐལ་ཁུ་འདྲ། །ཨ་རུ་
མཆུ་སྙུང་སྐྱེར་ཤུན་བ་ལེ་ཀ །གསེར་གྱི་མེ་ཏོག་སྲ་བྱེད་སྦྱར་ལ་བཏང༌། །ཁྲག་ནག་ཤེ་རུལ་
འཁྲུ་ན་བ་ཤ་ཀ །སླེ་ཏྲེས་སྲ་བྱེད་སྦྱར་བའི་བསྡུས་ཐང་བཏང་། །རྒྱུ་འཁྲོག་དམར་པོར་འཁྲུ་
ན་གུར་གུམ་དང༌། །དོམ་མཁྲིས་ཀར་སྦྱར་བོང་ངའི་ཆིག་ཐང་བཏང་། །ཆུ་སྐྱ་བེ་སྣབས་སུག་
སྨེལ་ཀ་ར་སྦྱར། །རྒྱུ་ལྐུགས་ཨ་རུ་མཆུ་སྙུང་བ་ལེ་ཀ །བསྡུས་ཁུར་གསེར་གྱི་མེ་ཏོག་སུམ་ཅུ་
25-1-248


ཏིག །ཏིག་ཏ་བོང་ང་དཀར་པོ་བཏབ་ལ་བཏང༌། །ལོང་རྩ་གཉིས་གཏར་གྲོད་པའི་ཆུ་དུགས་
བྱ། །དེ་ཡིས་འཁྲུར་མ་འདོད་ན་(འཁྲུ་བའི་ཆིག་ཐུབ་གསུམ་གྱི་སྟེང་དུ་ཨ་བྱག་ཧོང་ལེན་དུག་པུས་དྲི་ཆུར་སྦྱར་བའི་)
གཉན་བཤལ་བཏང༌། །ཟླ་ཕྱེད་ཕར་འདས་རྒྱུ་རིམས་རྙིང་པ་རྣམས། །མཁྲིས་ཕྱེ་བདུན་ནམ་
ཨིཎྜ་བཞི་ཐང་བསྟེན། །འཁྲུ་བ་དྲི་བཅས་དུགས་ཡོད་བཤལ་གྱིས་སྦྱང་། །ཕྱེ་ཐུག་འབྲས་དང་
ཆུ་གྲོག་བསྐོལ་གྲངས་རྣམས། །བོངས་ཆུང་གྲངས་མང་བཏང་ཞིང་གནོད་ཟས་བསྲུང༌། །ཚ་བ་
ཆོགས་ནས་བཅད་དུས་སླེབ་པའི་ཚེ། །ཅོང་ཞི་རྩི་མར་གངྒ་ཆུང་དང་གསུམ། །ཡང་ན་མེ་ཏོག་
བྱ་རྐང་ཤ་ནུས་བསྡུས། །བ་ཞོ་ཀླད་པ་སྤྱིན་དང་འབྲས་ཡོས་ཕྱེ། །ཚོས་པར་བཙོས་ལ་ཙེ་གུར་
བཏང་བར་བྱ། །ཡང་ན་ད་ཏྲིག་ཀ་པེད་མོན་ཆ་ར། །སྨག་དང་ཐ་རམས་འབྲས་ཐུག་བཏབ་པ་
འམ། །ཡང་ན་བཙོད་ཁྲག་རྒོད་ཁྲག་སྦྱར་ལ་བཏང༌། །ཡང་ན་ཐ་རམ་བྱ་རྐང་བསྡུས་ཁུ་ལ། །
སྨག་དང་ད་ཏྲིག་ཀ་པེད་མོན་ཆ་ར། །ཞིབ་བཏགས་བཏབ་ལ་ཙེ་གུར་ཡང་ཡང་བཏང༌། །འཁྲུ་
དྲགས་སྣོད་ཀྱི་དྲོད་ཤོར་གྲང་འབྱམས་ན། །སེ་འབྲུ་ལྔ་སྦྱར་རྒྱུ་ལོང་གསང་ལ་བསྲེག །ཁ་ཟས་
ལུག་དང་བ་ལང་རི་དྭགས་ཤ །མ་རུལ་གསར་པའི་ཚོ་ཁུ་བོངས་ཆུང་བཏང༌། །གསར་འཇམ་
གླ་བ་རྒྱ་སྐྱེགས་ཤིང་ཐལ་སྦྱར། །ཅོང་ཞིའི་ཕྱེས་བྲན་ཁ་སྐོམ་བག་རེ་བསྟེན། །འཁྲུ་བ་མ་ཆོད་
བར་དུ་ཟས་སྤྱོད་གཟབ། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་
མན་ངག་གི་རྒྱུད་ལས་རྒྱུ་གཟེར་གྱི་རིམས་བཅོས་པའི་ལེའུ་སྟེ་ཉི་ཤུ་ལྔ་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས། 
གག་ལྷོག་རིམས་ལ་རྒྱུ་རྐྱེན་དབྱེ་བ་དང༌། །དེ་ཡི་རྟགས་དང་བཅོས་ཐབས་བཤད་དུ་གསོལ། །
དེ་སྐད་ཞུས་པའི་དོན་ལ་ལན་གསུངས་པ། །རྒྱུ་ནི་ཁྲག་གནས་དུག་ཅན་སྲིན་བུ་བདུན། །
ཟངས་ལྟར་དམར་ཞིང་ཕྲ་ལ་བལྟར་མི་མངོན། །སྐད་ཅིག་ཙམ་ལ་མགོ་རྐང་ཁྱབ་རྒྱུ་ནུས། །
དེ་ལ་རྐྱེན་ནི་རླུང་མཁྲིས་བད་ཀན་འདུས། །སྐྱེད་བྱེད་ཡུལ་དུས་ཟས་སྤྱོད་གདོན་རྐྱེན་གྱིས།  །
25-1-249

 
སྲིན་འཁྲུགས་ལུས་ལ་ཟོས་པས་གཉན་ནད་འབྱུང་། །དེ་ཕྱིར་དཀར་མངར་གནོད་ཅིང་དུག་
གིས་འཇོམས། །དབྱེ་བ་བབས་ས་མིང་གིས་ཐ་དད་དེ། །མགོ་ལ་བབས་ན་ཀླད་གཟེར་ཞེས་
བྱ་ཞིང༌། །གྲེ་བར་གག་པ་རོ་སྟོད་གཟེར་ཐུང་སྟེ། །ཕོ་བར་གཉན་གླང་རྒྱུ་མར་རྒྱུ་གཟེར་ལ། །
པགས་ལ་མེ་དབལ་ཚིགས་ལ་རྨེན་བུ་སྐྱེད། །ཉྭ་ལ་ཉྭ་ལོག་ཤར་བབས་ལྷོག་པར་བཤད། །
ཤ་རུས་རྩར་བེམ་འདྲུལ་ཕྱིར་འབྲས་ཞེས་བྱ། །འོན་ཀྱང་འདི་རུ་གག་ལྷོག་གཉིས་སུ་བསྡུ། །
ལྷོག་པའི་དབྱེ་བ་འབྱུང་བ་ནད་གཞི་རིགས། །འབྱུང་བས་དབྱེ་ན་ས་མེ་ཆུ་རླུང་བཞི། །ནད་
གཞིས་དབྱེ་ན་དཀར་ནག་ཁྲ་བོ་གསུམ། །རིགས་ཀྱིས་དབྱེ་ན་རྒོད་དང་ཡང་རྒོད་དང༌། །ཡམ་
བུ་ཡུ་མོ་ཞེས་བྱ་བཞི་རུ་བཤད། །གག་པ་ཕོ་མོ་བུ་དང་གཉན་གག་གོ །བརྟག་པའི་ཐབས་
ལ་སྤྱི་དང་བྱེ་བྲག་གཉིས། །སྤྱི་རུ་ངོས་བཟུང་ཕྱི་ནང་གསང་བ་གསུམ། །ཕྱི་རྟགས་སྐྲངས་
དབྱིབས་འབྲུམ་པ་ཆུ་བུར་འདྲ། །ཉ་སྦྲུལ་སྡོམ་སྡིག་རྟ་བླ་སྦལ་ལྕོང་དང༌། །ན་ཆུང་ནུ་མ་ལྟར་
སྐྲངས་ཉམ་ང་འཇིགས། །ཁ་དོག་དམར་རམ་ནག་སྨུག་ཁྲ་བོར་སྐྲངས། །ན་ལུགས་ཕྲུམ་
སེར་ཁྱེར་དང་ཚིགས་གཞི་ན། །མགོ་ན་ཁ་ཁ་འཕྱོ་འདར་སྙིང་མི་དགའ། །ནང་རྟགས་རྩ་ཆུ་
རེག་བྱ་རྒྱུན་སྲང་བཞི། །རྩ་ནི་ཁ་རྒྱུག་གཏིང་གྲིམས་ཁོང་ན་འདར། །ཆུ་ནག་རླངས་འཐིབས་
ཀུ་ཡ་འཁྲུགས་ནས་འོང༌། །རེག་བྱ་ཚོར་མེད་ཡང་ན་བཟོད་པ་ཆུང༌། །ཤིན་ཏུ་ཚའམ་ཤིན་
ཏུ་གྲང་བར་འགྱུར། །རྒྱུན་སྲང་སོག་སྤྲིན་འབྱིལ་དང་བ་སྤུ་ལོག །ཨན་སྟོང་འགྲམ་འཕར་
སྒལ་མཆན་དམར་ཐིག་འབྱུང༌། །གསང་རྟགས་ནག་པོ་(མུ་ཟི་ཤུ་དག་གླ་རྩི་)གསུམ་བཏང་དངངས་
འདར་ཡིན། །བྱེ་བྲག་རྟགས་ལ་ལྷོག་པ་གག་པ་གཉིས། །ལྷོག་པའི་རྟགས་ལ་ས་ལྷོག་སྐྲངས་
བརྟན་སྲ། །སྐྲངས་མདོག་ཐོར་པའི་མགོ་བོ་ནག་པོར་འོང༌། །མེ་ལྷོག་དམར་ཚ་མཆེད་སྐྱེན་
མེས་ཚིག་འདྲ། །ཆུ་ལྷོག་འཇམ་བསིལ་ཆུ་བུར་ཆུ་སེར་འཛག །རླུང་ལྷོག་སྐྱ་གསོབ་མི་བརྟན་
འཕར་ཞིབ་བྱེད། །དཀར་པོ་ཟུག་ཆུང་རྩ་ཆུ་ཕྱི་ཡུལ་གྲང༌། །ནག་པོ་ཟུག་ཆེ་རྩ་ཆུ་ཕྱི་ཡུལ་
25-1-250


ཚ། །ཁྲ་བོ་རྟགས་འདྲེས་ཟུག་གཟེར་ལྡང་དུབ་བྱེད། །རྒོད་ནི་འབྲོས་སྐྱེན་ནད་དྲག་སྐྲངས་པ་
སྐྱེན། །ཡང་རྒོད་ཁོང་དུ་འཆོར་སྐྱེན་འཁོར་ལ་འཕྲོ། །ཡམ་བུ་སྐྲངས་པ་འབར་འབུར་ཡམས་
ཐབས་འོང༌། །ཡུ་མོ་སྲ་བརྟན་ནད་ཟུག་ཆུང་བའམ། །ཡང་ན་སྙི་ལ་འདོལ་ཞིང་འགུལ་བ་
འོ། །ལ་ལ་ལྷོག་པ་གཉིད་པོ་ཞེས་སུ་འདོགས། །གག་པ་ངོས་བཟུང་ལྕེ་སྟེང་བད་ཀན་མཐུག །
ལྕེ་མཆུ་འགྲམ་དང་རྐན་ཕུགས་ཐོར་པ་ཆགས། །གྲེ་བ་སྐད་འགགས་ཟས་དང་སྐོམ་མི་ཐར། །
ཁྱད་པར་ཕོ་གག་སྐར་ཆེན་ཤར་བ་འདྲ། །མོ་གག་རྒྱ་ཕོར་ཁ་སྦུབ་ལྟ་བུ་སྟེ། །བུ་གག་ཞོ་ཆལ་
གཏོར་བ་འདྲ་བར་འོང༌། །གཉན་གག་རལ་གྲི་སྣ་མའི་གཞུང་འདྲ་འམ། །རུས་སྦལ་རྒྱབ་དང་
ཁྲོ་བོའི་མིག་དང་འདྲ། །མིག་ལ་མ་ཐོགས་ཕྱི་ཡི་རྟགས་ལ་བཟུང༌། །བཅོས་པའི་ཐབས་ལ་
ལྷོག་པ་གག་པ་གཉིས། །ཟས་སྤྱོད་བསང་སྦྱང་བཞི་ནི་སྤྱི་རུ་རྒྱུག །ཁྱད་པར་ལྷོག་པ་བྱུག་པ་
བསྲེག་པས་བཅོས། །བྱེར་ཞུད་འཁྱམས་དང་ཆུ་སེར་ལོག་པ་མནན། །གག་པ་ཞི་བཞུ་བཅད་
པ་གསུམ་གྱིས་བཅོས། །ཡར་རྫོང་མར་རྫོང་ཤོར་བབས་ལོག་གནོན་གཅེས། །དང་པོ་ཁ་ཟས་
དཀར་མངར་རུལ་སྐྱུར་སྤང༌། །ཕྱེ་ཚོད་དྲལ་ཐུག་ཆུ་གྲོག་བསྟེན་པར་བྱ། །སྤྱོད་ལམ་ཆགས་པ་
ཉིན་གཉིད་དྲག་ཤུལ་དང༌། །རྟ་ཞོན་འཁྲོ་འཚིག་ཆུ་རྒལ་མི་སྡུག་སྤང༌། །བསད་ཐབས་མཐུན་
པ་སྨན་གྱིས་བསད་པ་དང༌། །མི་མཐུན་གཉེན་པོས་བསད་པར་བྱ་བ་དང༌། །ནུས་པ་སྔགས་
ཀྱིས་བསད་པ་རྣམ་པ་གསུམ། །མཐུན་པ་གླ་རྩི་བཟང་དྲུག་གུ་གུལ་ནག །ཚ་ན་ག་བུར་གི་
ཝཾ་བསྣན་ལ་བཏང་། །གྲང་ན་ཤུ་དག་ཤིང་ཀུན་བསྣན་པར་བྱ། །ཡང་ན་ཨ་བྱག་སྟག་ཤ་གུ་
གུལ་ནག །གླ་རྩི་ཤུ་དག་ཨ་རུ་སྦྱར་ལ་བཏང༌། །མི་མཐུན་གཉེན་པོས་བསད་ཐབས་རྐྱང་
སྦྱོར་དང༌། །གཙོ་འཁོར་སྦྲག་དང་མང་སྦྱོར་ཆེན་མོ་གསུམ། །དང་པོ་སྔོན་འགྲོ་བསྡུ་བསད་
ལོག་གནོན་བཞི། །སྔོན་འགྲོ་རྫས་(རྨིགས་པའི་ཤ་ནས་རྩམ་ཆུ་མཐུང་སྲིན་གསོར་ནས་དཀར་མོ་གསུམ་གྲུབ་
གནོན། ཙམ་པ་མི་འགག སྐྱི་འབྲུ་གཅིག མཁྲིས་པ་སེལ་ཆང་མིག་ནོན། རྒྱ་གཡེར་གཅིག་རྩ་ཁ་འབྱེད་ལོག་མི་ཡོང་)བཞི་ཆུ་
25-1-251


དང་སྦྱར་ལ་བཏང༌། །ཉེས་པའི་ཁ་གནོན་ཡོན་ཏན་བརྒྱ་དང་ལྡན། །བསྡུ་བ་བུར་དཀར་ཆང་
སྦྱར་ཕུལ་གང་བཏང༌། །རླུང་གནོན་བྱེར་སྡུད་གཉེན་པོས་གསོད་པ་བླ། །བསད་ལ་སྨན་དང་
སྦྱར་ཚད་བཏང་ཐབས་གསུམ། །སྨན་ནི་ཕྱི་འཛིམ་ནང་འཛིམ་གསང་འཛིམ་གསུམ། །ཕྱི་
འཛིམ་ར་དུག་རྩ་བ་དུས་བརྐོས་པ། །ནང་འཛིམ་མགོ་དགུ་མགོ་བདུན་ལྔ་གསུམ་ལ། །གསང་
འཛིམ་འབྲས་བུ་ལོ་གཅིག་སྐྱེས་པའོ། །རྨ་མེད་ཞག་བདུན་མེ་ཡི་སྤྲིན་ལ་བདུག །སྦྱར་ཐབས་
ནས་ཙམ་ཀ་ར་བརྡར་ཕྱེ་དང༌། །ལོ་བརྒྱད་ཁྱེའུ་དགེ་སློང་དྲི་ཆུར་སྦྱར། །བཏང་ཐབས་མ་སོད་
བར་དུ་བསྐྱར་ཞིང་བཏང༌། །རྔུལ་དབྱུང་སོད་རྟགས་ལུས་པོ་སོར་མོ་རེངས། །ཟུག་ཆོགས་
སྐྲངས་ཆོམས་རྔུལ་ཆུར་འབྱུང་བ་ཡིན། །ལོག་གནོན་མིང་པོ་བདུན་གྱི་སྲིང་(བྲག་སྐྱ་ཨ་ཨོལ་ཟེར་)
གཅིག་མ། །རྩ་བ་མེ་ཏོག་དབྱར་དགུན་དུས་དང་བསྟུན། །ཐུན་རེ་བོད་ཚྭ་སྦྱར་བས་སྨན་ལོག་
འཇོམས། །སོད་རྟགས་མེད་ཀྱང་གསུམ་གྱི་རེ་རེ་གཅེས། །སྦྱོར་བ་འདི་ལ་དམན་ལྷག་ལོག་
གསུམ་འགྱུར། །དམན་པ་མ་སོད་གཡག་ཤོར་རྟ་ཆད་འདྲ། །སྦྱོར་བ་ལོག་པ་གཡག་མེད་རྟ་
རྒྱུག་འདྲ། །དེ་བཞིན་ལྷག་པ་གཡག་སོད་བང་ལྷག་འདྲ། །དེ་ཕྱིར་འདི་ལ་མཁས་པས་གཟབ་
པར་རིགས། །གཙོ་འཁོར་བཅས་ལ་གཉེན་པོ་ཡོད་མེད་གཉིས། །མེད་པ་འཛིམ་པ་ཤུ་དག་ར་
ཐུག་སྦྲེ། །མི་ཡི་དཔྱི་རུས་ཐལ་བ་བཞི་སྦྱར་ཏེ། །ཐུན་ཚད་ནད་སྦྱར་དྲི་ཆུས་སྦྱངས་ལ་བཏང༌། །
རྔུལ་དབྱུང་སྨན་ནད་བྱུང་ན་སོད་པ་ཡིན། །མ་སོད་བསྐྱར་ཞིང་སོད་ན་ལོག་གནོན་གཅེས། །
གཙོ་འཁོར་གཉེན་པོར་བཅས་ལ་བཙན་དུག་དང༌། །ཨ་རུ་གླ་རྩི་མུ་ཟི་གུ་གུལ་ནག །བཟང་
དྲུག་རུ་རྟ་ཤིང་ཀུན་ཤུ་དག་དང་། །དྲི་ཆུར་སྦྱར་བའི་རིལ་བུ་སྲན་ཙམ་བྱ། །དངུལ་ཆུ་བསྣན་
ཡང་མཆོག་ཏུ་ཤིས་པ་ཡིན། །མ་སོད་བར་དུ་བཏང་ཞིང་རྔུལ་དུ་དབྱུང༌། །མང་སྦྱོར་ཚེ་གཅིག་
ལུས་གཉིས་བླངས་པའི་ཤས། །གཙོ་བྱས་གདུག་པ་ཅན་གྱི་ཤ་རྣམས་དང༌། །གླ་རྩི་གུ་གུལ་མུ་
ཟི་ལ་སོགས་པ། །རྡོ་རྩི་སྔོ་ཡི་དྲི་སྨན་སྣ་ཚོགས་དང༌། །སེང་ལྡེང་ལ་སོགས་ཚེར་མ་ཅན་རྣམས་
25-1-252


དང༌། །བཙན་དུག་ལ་སོགས་དུག་སྣ་ཚོགས་ཚད་དང༌། །ཚད་དུ་(དུག་སྨན་ཆ་གཅིག་ཚེར་སྨན་ཆ་གཉིས་
ཤ་སྨན་ཆ་གསུམ་དྲི་སྨན་ཆ་བཞི་)སྦྱར་ཏེ་རྩི་བཞིན་བཏགས་བྱས་ལ། །དྲི་ཆུས་སྦྲུས་པའི་རིལ་བུར་
སྔགས་དབང་བསྐུར། །གཉན་ནད་མ་ལུས་ནད་རིགས་ཀུན་ལ་འགྲོ། །ཁྱད་པར་གག་ལྷོག་
འཇོམས་པའི་གཉེན་པོ་ཡིན། །སྔགས་ཀྱིས་བསད་པ་ལྕགས་ཀྱི་བྱ་ཁྱུང་བསྒོམ། །སྔགས་ཆུ་
བླུད་ཅིང་སྐྲངས་ཀྱི་མཐའ་ནས་བརྡེག །ༀ་ནག་པོ་ཀཱ་ལ་རཀྵ་རྦད་རྦད། །སོད་སོད། ཕྱུངས་
ཕྱུངས། །སྤུ་གྲི་ཟངས་ཟངས། །ལྕགས་ཀྱི་ལྡེར་མོས་གནོད་བྱེད་འབྱུང་པོའི་སྙིང་ལ་ཟོ། །ནཱ་ག་
བྱི་ར་ཡ་སོད། ནཱ་ག་བྱི་མ་ལིང་སོད། །སྨྲ་བ་བཅད་དེ་བཟླས་པས་གཉན་རྣམས་གསོད། །ཐ་
མ་རོ་དབྱུང་རྒྱལ་བློན་(ཐར་ནུ་ཆུ་རྩ་ཧོང་ལེན་)དྲི་ཆུས་སྦྱང༌། །བཤལ་ཐེབས་ལྕག་གིས་བྲབས་ལ་
དག་པར་སྦྱང༌། །ཡང་ན་བཟང་དྲུག་གླ་རྩི་གུ་གུལ་ནག །ཤུ་དག་མུ་ཟི་སྟག་ཤ་ཤ་ཆེན་དང་། །
ལྷོག་དུག་ཐར་ནུ་ཆུ་རྩ་དུག་པུས་པ། །གསེར་གྱི་མེ་ཏོག་ཧོང་ལེན་གི་ཝཾ་རྣམས། །དྲི་ཆུ་སྦྱར་
བས་གསོད་སྦྱོང་ཆིག་ཆོད་བྱེད། །དེ་ནས་ཁྱད་པར་ལྷོག་པ་བཅོས་པ་ལ། །བྱུག་པ་འཛིམ་པ་
མུ་ཟི་སྟག་ཤ་བ། །གླ་རྩི་གུ་གུལ་གཉན་དུག་ལྷོག་པ་གསོད། །སོ་ཐོག་ཀྱི་ལྕེ་བྲག་སྤོས་ཆུ་རྩ་
དང༌། །སྤྲུ་རྩ་ཁྱི་སྤྱང་མི་བྲུན་སྐྲངས་པ་འཇོམས། །རྭ་གཞོབ་དུད་པ་བྱ་བལ་བྱ་བྲུན་ཏེ། །བྲག་
ཞུན་ཤུ་དག་དྲི་ཆུ་ཀུན་གྱི་གྲོགས། །ཞིབ་ལ་སླ་བ་མ་སྐམས་ཡང་ཡང་བྱུག །སྐྲངས་ཚད་མི་
བཤིག་འབྲོས་སྣ་ནོན་པ་གཅེས། །མ་ནོན་ཤོག་བུ་སྤུ་ནན་ཕྱིང་ནན་བྱ། །བྱུག་པ་ཁོང་སྨན་
གཉིས་ཀྱིས་མ་སོད་ན། །མེ་ཡིས་བསྲེགས་ལ་ལུང་པའི་མདོ་སྒོ་དགག །རི་བོའི་རྩེ་ལ་མེ་རྒྱ་
གདབ་པ་དང༌། །སྐྲངས་ཀྱི་ཐ་མ་དམག་གིས་བསྐོར་བ་དང༌། །སྟེང་དུ་གནམ་ལྕགས་དབབ་
པ་བཞི་ཡིས་བཅོས། །བསྲེགས་རྗེས་ཁོང་སྨན་བྱུག་པ་བསྟུན་ལ་བསད། །ཐུབ་པའི་རྟགས་
སུ་སྐྲངས་བྲི་ཟུག་གཟེར་ཆོགས། །ཡང་ན་རྣག་ཏུ་ཁུགས་ན་འཚོ་བ་ཡིན། །རྣག་ཏུ་ཁུགས་ནས་
ཡན་ལག་བཞིན་དུ་བཅོས། །ནད་ལོག་བྱེར་ཞུད་འཁྱམས་དང་ཆུ་སེར་ལོག །བྱེར་ལ་རྩ་ཤ་སྐྱི་
25-1-253


རྣག་བྱེར་བ་བཞི། །རྩ་བྱེར་མེ་བཙའ་གཏར་ག་སྦྱོངས་ཀྱིས་དགུག །ཤ་བྱེར་ཁྲ་བོ་ནག་པོའི་
ཆས་ཀྱིས་དགུག །སྐྱི་བྱེར་པགས་ལ་བྱེར་བ་སྐམ་རྩིས་དགུག །རྣག་བྱེར་ཁྲུས་ནན་དེབ་དང་
ཆིངས་ཀྱིས་དགུག །ཞུད་པ་གདོན་བཅོས་ཞོ་སྦང་སྦྱར་བས་བསླང༌། །ཡང་ན་སྦང་མ་བྱུག་
པས་བྲན་ལ་བདུག །འཁྱམས་པ་དོན་འཁྱམས་རྩ་དྲག་རྔམ་པ་རྒོད། །འཕྲང་བཅད་ཁོང་དུ་
བསྡུས་ལ་གཉེན་པོས་བསད། །སྣོད་འཁྱམས་དང་ག་མི་བདེ་འཁྲུ་སྐྱུག་བྱེད། །བཤལ་གྱིས་
སྦྱང་བ་ལོག་གནོན་དམ་པ་ཡིན། །ཆུ་སེར་ནག་པོར་ལོག་ན་སྨྱོ་འབོག་བྱེད། །མིག་ལྡོག་སྣ་
ནས་ཆུ་སེར་ཁྲག་འཛག་ན། །སྣ་བཤལ་བཏང་ཞིང་ག་བུར་རྒྱལ་བློན་སྦྱར། །དྲུག་པ་བདུན་
པ་དཀར་ནག་མཚམས་སུ་བསྲེག །དེ་ལ་སྐྱེད་མེད་ལས་ཀྱིས་འཆི་བ་ཡིན། །གག་པའི་བཅོས་
ཐབས་ཞི་བཞུ་བཅད་པ་ནི། །ཞི་བ་ཚྭ་བཙོད་འཛིམ་པ་ཕོ་ཚོས་གདབ། །བཞུ་བ་ཚྭ་ལ་རྒྱ་ཚྭ་
མཚུར་གཉིས་གདབ། །བཅད་པ་རྒྱ་ཚྭ་རུ་རྟ་ཤུ་དག་གདབ། །དེས་མ་ཆོད་ན་ཀྱོང་བུས་བཞར་
རྗེས་བསྲེག །གག་པ་གཉན་ཚད་གྲེ་བར་འགགས་པའི་ཕྱིར། །འདི་ལ་དཔྱད་མཆོག་སྦྱོངས་
འདྲ་གཞན་ན་མེད། །ནད་ལོག་ཡར་རྫོང་ཀླད་ལ་ཤོར་བ་ན། །སྣ་ནས་ཆུ་སེར་འཛག་ཅིང་
བླབ་འཆོལ་སྨྲ། །དེ་ལ་སྣ་བཤལ་བཏང་ལ་ཆུ་སེར་སྦྱང༌། །མར་རྫོང་སྙིང་ལ་ཤོར་ན་ཤེས་པ་
སྨྱོ། །ལྕེ་གཞུང་ནག་ལ་ག་བུར་རྒྱལ་བློན་སྦྱར། །དེ་ལ་སྐྱེད་མེད་ཚེ་ཟད་སྤང་བར་བྱ། །ཞེས་
གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གག་
ལྷོག་བཅོས་པའི་ལེའུ་སྟེ་ཉི་ཤུ་དྲུག་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ལ། །དྲང་སྲོང་ཡིད་ལས་སྐྱེས་ཀྱིས་འདི་སྐད་ཞུས། །
ཆམ་པའི་རིམས་ལ་རྒྱུ་རྐྱེན་དབྱེ་བ་དང༌། །དེ་ཡི་རྟགས་དང་བཅོས་ཐབས་བཤད་དུ་གསོལ། །
དེ་སྐད་ཞུས་པའི་དོན་ལ་ལན་གསུངས་པ། །ཆམ་པའི་རྒྱུ་ནི་རིམས་སྤྱི་འདྲ་བ་ལ། །ཁྱད་པར་
མི་གཙང་ཟས་སྤྱོད་ཁ་ཟས་འདྲེས། །རྡུལ་འཚུབ་གྲིབ་ཕོག་རྐྱེན་ལས་འབྱུང་བ་ཡིན། །དབྱེ་
25-1-254


བ་གྲེ་ཆམ་གློ་ཆམ་རིམས་ཆམ་དང༌། །སྣ་ཆམ་དག་དང་རྣམ་པ་བཞི་ཡིན་ནོ། །དེ་རྟགས་དང་
པོ་གྲེ་བ་རྐན་མཚུལ་ཚ། །བར་དུ་སྣ་ཆུ་འཛག་ཅིང་མཚུལ་པ་འགགས། །ཐ་མ་སྦྲིད་པ་མང་དུ་
བསྟུད་ཅིང་འོང༌། །གློ་ཆམ་དང་པོ་གྲེ་བ་ཚ་ཞིང་འཛེར། །བར་དུ་གློ་མང་མགོ་དང་བྲང་རྒྱབ་
ན། །ཐ་མ་རྣག་ཏུ་ལུ་ཞིང་གློ་གཅོང་འགྱུར། །རིམས་ཆམ་མགོ་དང་ཚིགས་གཞི་བྱིན་ཉྭ་ན། །
རོ་སྟོད་མི་བདེ་བརླ་རྐེད་བརྡུངས་སྙམ་བྱེད། །ཁ་ཁ་དང་ག་མི་བདེ་གྲང་ཤུམ་བྱེད། །སྲོད་ལ་
ཤ་ཚ་རྨི་ལམ་ཟ་ཟི་མང༌། །དེ་ལ་དྲག་ཤུལ་བཅུད་ཤོར་རྒྱས་གྱུར་ན། །ཆམ་པ་སྐྱུར་ཤོར་ཞེས་
བྱ་ཤི་བ་མང༌། །སྣ་ཆམ་སྣ་ཚ་གཡའ་ལ་སྣ་ཆུ་མང༌། །བཅོས་ཐབས་གྲེ་ཆམ་ཟས་སྤྱོད་གཟབ་
པས་འཚོ། །གློ་ཆམ་ཨ་རུ་ར་ཡི་ཁམ་མུར་བྱ། །སྲོ་ལོ་ཤིང་མངར་སྤང་རྒྱན་གྲང་ཐང་བཏང༌། །
གྲེ་བ་ཚ་འཛེར་ལི་ཤི་དྲུག་པ་སྦྱར། །མཇུག་ཏུ་ཆམ་རྒན་ལུད་པ་མ་ཆོད་ན། །ཉི་ཤུ་རྩ་ལྔས་ཚ་
བའི་གཏིང་བཏོན་ལ། །བུར་དཀར་གསར་འཇམ་བསིལ་བཅུད་གློ་རླུང་གསོ། །ཆམ་རིམས་
སྨྱུང་བར་འདུག་ལ་ཆུ་སྐོལ་བཏུང་། །འབྲས་བུ་གསུམ་དང་སླེ་ཏྲེས་ཏིག་ཏ་དང་། །མ་ནུ་ཧོང་
ལེན་ཐང་བཏང་རྔུལ་དུ་དབྱུང་། །ཚ་བ་སྨིན་གསོད་དུས་གཅིག་བྱེད་པ་ཡིན། །དྲི་བཟང་
བཞི་དང་ཞོ་སྦྱར་ཆམ་པ་སེལ། །སེ་འབྲུ་སྐྱུ་རུ་ཞོ་སྦྱར་དེ་བཞིན་ནོ། །བ་ལུ་ད་ཏྲིག་སྟར་བུ་ཚ་
བ་གསུམ། །ཟི་ར་དབྱི་མོང་ཙི་ཏྲ་ཀ་ཆ་གཉིས། །དྲི་བཟང་བཞི་ལ་ཆ་ཕྱེད་ཀ་ར་སྦྱར། །ལུད་
པ་ཆམ་པ་རྒྱས་དང་དབུགས་མི་བདེ། །འཇོམས་པར་བྱེད་ཅིང་སྐད་སྙན་ཡི་ག་འབྱེད། །སྣ་
ཆམ་ཡོས་ཀྱི་རླངས་པས་བདུགས་ན་ཕན། །ཆུ་འཕྲུལ་ཆབ་ཚ་ཕྱེ་ཚོད་ཞོ་དར་བསྟེན། །དྲག་
ཤུལ་ཉིན་གཉིད་དྲོད་བཅུད་སྤང་བར་བྱ། །སྐྱམས་ནས་རིམས་སམ་འཁྲུགས་སུ་ཤོར་བ་ན། །
བརྩོན་པས་རང་རང་གཞུང་བཞིན་བཅོས་པར་བྱ། །ཞེས་གསུངས་སོ། །བདུད་རྩི་སྙིང་པོ་
ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཆམ་རིམས་བཅོས་པའི་ལེའུ་སྟེ་ཉི་ཤུ་
བདུན་པའོ།། །། 
25-1-255


དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། །ལུས་སྟོད་གསོ་བའི་སྐབས་ལ་ཇི་ལྟར་བསླབ་པར་བགྱི། །འཚོ་
མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང་། །སྟོན་པ་དྲང་སྲོང་རིག་པའི་
ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ལུས་སྟོད་དབང་
པོའི་གསོ་ཐབས་མགོ་དང་མིག །རྣ་བ་སྣ་དང་ཁ་དང་ལྦ་བ་དྲུག །དང་པོ་མགོ་ཡི་ནད་ལ་རྒྱུ་
རྐྱེན་དང༌། །དབྱེ་བ་རྟགས་དང་བཅོས་ཐབས་རྣམ་བཞིར་བསྟན། །རྒྱུ་རྐྱེན་དུད་པ་ཉིན་མཚན་
གཉིད་ཆག་དང༌། །ཆང་མངས་མང་སྨྲས་ངུ་བ་དྲགས་པ་དང་། །རླུང་འཚུབ་མ་གོམས་དྲིས་
ཕོག་རྒྱུ་ལས་འབྱུང༌། །དབྱེ་བ་གཙོ་བོའི་ནད་བརྒྱད་ཕལ་པ་དྲུག །དང་པོ་རླུང་མཁྲིས་ཁྲག་དང་
བད་ཀན་དང༌། །ལྡན་པའི་ནད་གསུམ་མགོ་ཡི་སྲིན་དང་བརྒྱད། །ཕལ་པ་མ་རླུང་རྨེན་འབྲས་
གློག་པ་ཅན། །སྐྲ་བྱི་སྤྱི་ཐེར་སྐྲ་དཀར་རྣམ་པ་དྲུག །དེ་རྟགས་རླུང་གྱུར་མུར་འགྲམ་ཟུག་ཅིང་
གཟེར། །དཔྲལ་བ་སྨིན་མཚམས་ལུག་པ་སྙམ་དུ་སེམས། །རྣ་བ་འུར་ཞིང་སོ་དང་འགྲམ་པ་
ན། །རྩ་འཁྱུག་ལྟ་བ་མི་བཟོད་སྣ་ཆུ་མང༌། །ལྡང་དུབ་ན་ཞིང་སྣུམ་དུགས་བསྡམས་ན་བདེ། །
མཁྲིས་གྱུར་རིམས་འདྲ་མགོ་ལུས་མིག་རྣམས་ཚ། །དུ་བས་བདུགས་སམ་མཚན་དུས་གྲང་
ན་བདེ། །ཁྲག་གྱུར་རྩེ་ཆུང་རྒྱངས་ལ་མུར་འགྲམ་གཟེར། །ཆང་དང་དྲག་ཤུལ་གཉིད་དང་ཉི་
ཚན་གནོད། །བད་ཀན་ལས་གྱུར་མགོ་ལྕི་ཟས་མི་ཞིམ། །སྐྱུག་ཅིང་མིག་སྐྲངས་མཚན་མོའི་
དུས་ན་བདེ། །བད་མཁྲིས་མགོ་ནད་མེ་ཉིས་དྲོས་ཚེ་ན། །མགོ་ལྕི་དང་ག་མི་བདེ་ཆང་ནད་ཆེ། །
བད་རླུང་ལྕི་འཁྱོམ་ཟི་ལ་ཟས་མི་ཞིམ། །རླུང་མཁྲིས་གཉིས་ལྡན་དཔྲལ་མིག་མུར་འགྲམ་ན། །
གྲང་དྲོ་ངེས་མེད་ཕྱེད་གོང་བཀྲེས་དུས་ལྡང༌། །རྩ་རྣམས་འཕར་ཞིང་བསིལ་ཕེབས་རྒོངས་
དུས་བདེ། །མགོ་སྲིན་སེམས་འཁྲུལ་སྟོབས་ཆུང་མི་བཟོད་ན། །སྣབས་ཀྱི་མདོག་དམར་རྒྱ་
སྲུབས་སྟེང་དུ་སྐྲངས། །ངེས་མེད་ནད་ལྡང་ཟས་སྤྱོད་ཕན་གནོད་ཆུང༌། །གང་ལངས་རྩ་འཕར་
25-1-256


སྒྲ་སྐད་དྲག་ཤུལ་ལྡང༌། །དཀར་ནག་འཁར་གོང་བསྲེགས་ལ་མཆིལ་མས་བརྟག །མ་རླུང་བུ་
ལ་ཤོར་བ་མགོ་བོ་སྐྲངས། །དེ་བཞིན་རྨེན་འབྲས་སྲ་བར་སྐྲངས་པ་དང་། །སྲིན་ནད་འབྲུམ་
ཕྲན་གློག་པས་ཁྱབ་པ་དང༌། །བད་ཀན་ཁྲག་མཁྲིས་ཆུ་སེར་སྐྲ་རྩ་སྲུལ། །ཀོ་ལེར་སྐྲ་བྱི་སྤྱི་བོ་
ཐེར་པོ་དང༌། །ལུས་དྲོད་མགོར་ཞུགས་སྐྲ་ཚོས་སྐྲ་དཀར་འབྱུང༌། །བཅོས་ཐབས་རླུང་ལས་
གྱུར་པའི་མགོ་ནད་ལ། །ཞུན་མར་རྗེས་ལ་འོ་མ་དྲོན་མོ་བླུད། །ཤ་སྣ་མང་བརྡུངས་འུ་སུས་
བྲན་བཙོས་བདུག །མར་སྣ་ཚོགས་དང་ཀ་ར་སྦྱར་ལ་བྱིན། །རླུང་འཇོམས་སྨན་དང་ཞུན་མར་
སྦྱར་བའམ། །རས་བལ་ས་བོན་ཤིང་ཚ་ཛཱ་ཏི་དང༌། །གླ་སྒང་ཆུ་དྲོན་ལ་བཏབ་སྣ་སྨན་བཏང༌། །
རྒྱ་སྲུབས་རྣམས་སུ་ཧོར་གྱི་མེ་བཙའ་བྱ། །སྡུད་སྒོ་གསུམ་དང་འཕར་རྩ་གང་ལངས་བསྲེག །
མཁྲིས་གྱུར་མར་གསར་སྣུམ་འཆོས་རྗེས་ལ་གཏར། །བསིལ་བའི་སྐྱུག་འཁྲུས་སྦྱང་ཞིང་ཆུ་
ཡིས་བྲན། །ཙན་དན་ཨུཏྤལ་རྒྱ་སྤོས་རུ་རྟ་བྱུག །ཀ་ར་གུར་གུམ་མར་གསར་སྣ་སྨན་བཏང༌། །
ཁྲག་གྱུར་འབྲས་བུ་གསུམ་གྱི་ཐང་བཏང་ལ། །གཏར་དང་ཞལ་ཞལ་བྱ་ཞིང་ཆུ་ལྕག་བརྡེག །
བད་གྱུར་མར་རྙིང་སྣུམ་རྗེས་སྐྱུག་ཏུ་གཞུག །ཚ་བ་ལྔ་དང་སྤྱང་ཚེར་བ་ཡིས་བདུག །ཙི་ཏྲ་ཀ་
དང་སྒ་སྐྱ་སྲན་ཕྱེ་བྱུག །སྨྱུང་བྱས་ལ་ཕུག་སྦྲང་རྩིའི་སྣ་སྨན་བཏང༌། །བད་མཁྲིས་མགོ་ནད་ཆུ་
ལྕག་འཚོགས་གསང་དབྱེ། །ལོ་གྲངས་ཆུས་བྲན་བུལ་ཏོག་བཏབ་ལ་མཉེ། །སྐམས་ནས་ཞུན་
མར་བྱུག་ཅིང་སེ་འབྲུ་སྦྱར། །བད་རླུང་མགོ་ནད་གཉིས་ཀ་ལྡན་པར་བཅོས། །རླུང་མཁྲིས་
མགོ་ནད་རླུང་གྱུར་ལྟ་བུར་གསོ། །དེ་རྗེས་ཁྱད་པར་གཏར་ག་མང་དུ་གདབ། །སྲིན་ལ་གཏར་
ཁྲག་དྲོན་མོ་སྣར་བླུག་ལ། །ཉ་རུལ་ཤིང་ཀུན་བྱི་ཏང་ག་དང་གསུམ། །བ་ཆུ་སྦྱར་བའི་སྣ་སྨན་
བཏང་འབྱུང་འགྱུར། །མར་དང་སྦྱར་བའི་དུ་བ་སྣ་རུ་བདུག །གླ་རྩི་བཙན་དུག་ཤིང་ཀུན་མ་
རུ་རྩེ། །ལང་ཐང་ཙེ་དང་རྩད་བཙོད་ཕུར་མོ་རྣམས། །ཤ་ཚིལ་སྦྱར་ལ་བསྲེགས་པའི་དུ་བས་
བདུག །མ་རླུང་རླུང་བཅོས་བྱས་རྗེས་འབྲས་ལྟར་གསོ། །རྨེན་འབྲས་ནད་ལ་དེ་ཡི་གསོ་བ་
25-1-257


སྦྱར། །གློག་པ་ཅན་ལ་ལྕགས་ཀྱི་ཞལ་ཞལ་གདབ། །བ་གཅིན་ཁྱིམ་བྱའི་བྲུན་དང་འབའ་ཆ་
བསྐུ། །ཡང་ན་རྟ་སྦངས་ཁུ་བ་ཚ་བཏབ་བྱུག །སྤྱི་ཐེར་ཀོ་ལེར་སྐྲ་འབྱི་སྦྱོངས་བྱས་ལ། །ཐུར་
མས་བཙགས་ཏེ་ཕག་པའི་རྐང་མར་ཚིལ། །སོ་མ་ར་ཛ་སྐྱུ་རུ་ར་སྦྱར་བྱུག །སྤང་མ་ལྡོང་རོས་
ནལ་ཤམ་ནག་མཚུར་བྱུག །ཡང་ན་སྤང་མ་རུ་རྟ་ཐལ་ཏྲེས་ཏིལ། །ཨུཏྤལ་འོ་མ་སྦྲང་སྦྱར་ལྡེ་
གུ་བྱུག །ཡང་ན་པད་མ་གེ་སར་སྐྱུ་རུ་ར། །ཤིང་མངར་ཏིལ་ནག་སྦྲང་དང་སྦྱར་ལ་བྱུག །རྩ་
བ་ལྔ་དང་ཏིལ་མར་སྣ་སྨན་བླུག །སྐྲ་དཀར་ལུག་རུའི་ཐལ་བ་ཡུངས་ཀར་བྱུག །ཤིང་མངར་
སྟག་ཚེར་ཙན་དན་པི་པི་ལིང༌། །ཨུཏྤལ་སྐྱུ་རུའི་ཁུ་བ་མར་བསྐོལ་བའི། །སྣ་སྨན་མགོ་བསྐུས་
སྐྲ་དཀར་ཀླད་ནད་སེལ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་
མན་ངག་གི་རྒྱུད་ལས་མགོ་ནད་གསོ་བའི་ལེའུ་སྟེ་ཉི་ཤུ་བརྒྱད་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག མིག་གི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་
ཡིས་བསྟན། །རྒྱུ་རྐྱེན་ནད་ཀུན་འཁྲུག་པར་བྱེད་པ་དང༌། །ཁྱད་པར་ཤ་རུལ་བཙོང་སྒོག་ཆང་
སྐྱུར་སོགས། །མིག་ལ་གནོད་ཅིང་ཁྲག་མཁྲིས་སྐྱེད་པའི་ཟས། །བསྟེན་པ་རྩ་ནང་འགྲིམས་
པས་མིག་ནད་སྐྱེད། །སྤྱོད་ལམ་དྲག་ཤུལ་མི་ཐེག་ཁུར་བ་དང༌། །དུ་བ་བསེར་བུ་ཁ་བ་མཚོན་
ལ་སོགས། །རྐྱེན་གྱིས་ཕོག་པས་མིག་ནད་སྐྱེད་པར་བྱེད། །དབྱེ་བ་མིག་ཆུའི་ནད་དང་མིག་
ཚག་དང༌། །ལིང་ཐོག་རབ་རིབ་འགྲིབས་དང་རྣམ་པ་ལྔ། །མིག་ཆུ་རླུང་མཁྲིས་ཁྲག་དང་བད་
ཀན་དང༌། །འདུས་པ་སྲིན་བུ་མིག་ནད་སྒྲ་ངན་བདུན། །ཚག་པོ་སྐམ་ཚག་གཤེར་ཚག་གདུང་
གྱུར་གསུམ། །དེ་ལ་རླུང་མཁྲིས་བད་ཀན་ཁྲག་དང་བཞི། །ལིང་ཐོག་རབ་རིབ་དབྱེ་བའང་
དེ་བཞིན་ནོ། །འགྲིབས་ལ་སྲོད་ལོང་ཕྱི་ནང་བར་འགྲིབས་གསུམ། །ཕྱི་འགྲིབས་ཤ་ལྷག་
ཤ་མཛེར་རྩ་དྲ་དང༌། །སྔོ་རིབ་ལིང་རོས་ཁེབ་དང་རྣམ་པ་ལྔ། །ནང་འགྲིབས་ཆུ་འཁྲུགས་རྩ་
25-1-258


མདངས་ཉམས་པ་གཉིས། །བར་འགྲིབས་རླུང་མཁྲིས་བད་ཀན་འདུས་པ་བཞི། །སུམ་ཅུ་རྩ་
གསུམ་མིག་ནད་དབྱེ་བར་འདོད། །དེ་རྟགས་མིག་ཆུའི་ནད་ལ་རླུང་གྱུར་པ། །མཆི་མ་འཛག་
ཅིང་རྡུལ་གྱིས་གང་སྙམ་སེམས། །འཛུམ་པར་དཀའ་དང་དུས་མེད་འབྱེད་འཛུམ་བྱེད། །ཆུ་
དང་བད་ཀན་ཁྲག་རྣག་གྲ་མཚམས་འཛག །མཁྲིས་གྱུར་ཚ་དམར་འདྲུལ་ཞིང་འབྲུམ་ཕྲན་
ཁྱབ། །གཡའ་ཞིང་སྐྲངས་ལ་ཆུ་སེར་རྣག་བཅས་འཛག །ཁྲག་གྱུར་ཟུག་ཆེ་འབྲུམ་ཕྲན་དམར་
པོས་ཁྱབ། །བད་ཀན་ལས་གྱུར་འབྲུམ་ཕྲན་དཀར་པོས་གང༌། །མིག་ནང་འབྱར་ཞིང་གཡའ་
ལ་ཟུག་ཆུང་བ། །འདུས་གྱུར་མིག་ཞུ་རྫི་མ་ནང་དུ་ཟུག །ཚ་སྐྲངས་མཆི་མ་འཛག་ཅིང་མིག་
མཆུ་འབྱར། །སྲིན་གྱུར་རྨིན་བུ་སུབ་འདོད་གཡའ་བ་འབྱུང་། །བྱིས་པའི་མིག་ནད་སྒྲ་ངན་
སོ་སྐྱེ་ཚེ། །མ་ནད་ལས་བྱུང་དམར་ཚ་འབྱར་ཞིང་སྐྲངས། །ལག་པས་མིག་དང་སྣ་ཉེད་གསོ་
དཀའ་ཡིན། །མིག་ནད་སྐམ་ཚག་བད་རླུང་ལས་གྱུར་པ། །མིག་སྐམ་རྩུབ་ཅིང་ཚ་ལ་བསེར་
བུ་གནོད། །གཤེར་ཚག་ཁྲག་དང་མཁྲིས་པ་ལས་གྱུར་པས། །དམར་ཚ་ཉི་མ་མི་བཟོད་མཆི་
མས་ཁེངས། །གདུང་བའི་མིག་ནད་རླུང་གྱུར་ལྡང་དུབ་བྱེད། །རྡུལ་གྱིས་གང་ངམ་བུས་སྙམ་
བྱེད་པ་དང༌། །མགོ་འཁོར་རྣ་བ་འུར་ཞིང་མིག་དམར་སྐྲངས། །མཁྲིས་གྱུར་ཚ་སྐྲངས་དམར་
འདྲུལ་སེར་པོར་མཐོང་། །མེ་མདག་གཏོར་སྙམ་མཛེར་ཐབས་ཁྱབ་པ་ཡིན། །ཁྲག་གྱུར་ཤིན་
ཏུ་ན་ཞིང་རེག་མི་བཟོད། །མེ་ཉི་མི་བཟོད་མིག་དམར་དམར་པོར་མཐོང༌། །བད་ཀན་གཡའ་
སྐྲངས་མིག་གི་འབྲས་བུ་ཞུ། །གདུང་བ་ཕལ་ཆེར་སོ་དང་མུར་འགྲམ་དང༌། །མཁུར་ཚོས་མགོ་
བོ་ན་ཞིང་རིབ་ཚབས་ཆེ། །ལིང་ཐོག་མིག་འབྲས་དཀར་ནག་སྟེང་དག་ཏུ། །རླུང་གྱུར་སྔོ་སྲབ་
མཁྲིས་པ་ཐིག་ལེ་སེར། །ཁྲག་གྱུར་མཚོན་གྱིས་གཙེས་འབྱུང་དམར་པོར་འོང༌། །བད་ཀན་
ལས་བྱུང་མཐུག་ཅིང་སྐྱ་བས་གཡོགས། །ཀུན་ལ་ཟུག་ཆེ་རྩུབ་ཅིང་མཆི་མ་འབྱུང༌། །མཐོང་
བྱེད་སྟེང་བྱུང་ཟངས་གཟེར་འདྲ་གསོ་དཀའ། །རབ་རིབ་ནད་དེ་མིག་ཆུའི་ནང་དུ་འཇུག །དེ་
25-1-259


ཡང་རིམ་པ་བཞིན་དུ་འཇུག་འགྱུར་ཏེ། །དང་པོར་ཞུགས་ཚེ་རེས་གསལ་རེས་མི་གསལ། །
གཉིས་པར་ཞུགས་ཚེ་ཐག་རིང་ཆུང་མི་མཐོང༌། །ཉེ་ཞིང་གཟིར་བལྟས་ལེགས་མཐོང་གོ་
ལོག་སྣང༌། །སྟེང་འོག་གཡས་གཡོན་ཉེ་རིང་ལོགས་མི་གསལ། །འདི་དུས་རབ་རིབ་ཅེས་བྱ་
གསོ་བ་སྒྲིམས། །རླུང་གྱུར་དུ་བ་རབ་རིབ་སྐྲ་ཤད་དང༌། །སྦྲང་བུ་འོད་མཐོང་གཟུགས་ཀུན་
གཡོ་བར་སྣང༌། །མཁྲིས་གྱུར་གློག་དང་མེ་སྒྲོན་རྨ་བྱའི་སྒྲོ། །ཁྲག་གྱུར་དམར་ལ་བད་ཀན་མུན་
འཐིབས་འགྱུར། །གསུམ་པར་ཞུགས་ཚེ་སྟེང་མཐོང་འོག་མི་མཐོང༌། །རས་ཀྱིས་མིག་བཀབ་
ལྟར་མཐོང་ནད་མདོག་སྣང༌། །སྔོན་པོ་ཞེས་བྱའི་རིམ་པ་བཞིར་ཕྱིན་ནས། །རྒྱལ་མོ་ཁེབས་
ཏེ་ལོང་བར་འགྱུར་བ་ཡིན། །འགྲིབས་པ་སྲོད་ལོང་ནག་པོ་ལང་ལིང་ཁེབས། །ཤ་ལྷག་སྐྱ་
བོ་ཟུག་ཆུང་དལ་བུས་སྐྱེ། །ཤ་འཛེར་ར་རིལ་ལྟ་བུར་དམར་ལ་འབུར། །དེ་རྒྱས་མདོག་ནག་
རྒྱ་ཆེ་མཐུག་པ་ཡིན། །རྩ་ཡི་དྲ་བས་མཐུག་ཁྱབ་དེ་ཉིད་དོ། །སྔོ་རིབ་སྒོང་སྤྲིས་ལྟ་བུས་ཁྱབ་
པ་སྟེ། །ལིང་རོ་སྲབ་དང་མཐུག་པས་སྒྲིབ་པ་གཉིས། །མཐུག་པོ་སྦོ་མ་ཚ་རྡོག་མིག་གཉིས་
སྤང་། །ཆུ་འཁྲུགས་མཚོ་གཉིས་འདྲེས་ཏེ་སྣག་ཚ་འདྲ། །རྒྱལ་མོའི་རྩ་མདངས་ཉམས་པས་
ནག་སང་འོང༌། །རླུང་འགྲིབས་ཉི་མ་མཁྲིས་འགྲིབས་འུག་མིག་དང༌། །བད་ཀན་ཟླ་བ་འདུས་
པ་འཇའ་ཚོན་འདྲ། །རྟགས་ལས་ནད་ངོས་མ་འདྲེས་སོ་སོར་བཟུང༌། །གསོ་བའི་ཐབས་ལ་
སྤྱི་དང་བྱེ་བྲག་གཉིས། །སྤྱི་རུ་སྨན་དཔྱད་ཟས་སྤྱོད་བཞི་ཡིས་བཅོས། །སྨན་དུ་གསལ་བྱེད་
ལྡེ་གུ་འབྲས་གསུམ་མར། །ཨ་བ་བཅོ་ལྔ་ལ་སོགས་ཁོང་དུ་བཏང༌། །དཔྱད་དུ་སྣུམ་འཆོས་
འཁྲུས་སྐྱུགས་གཏར་ག་བྱ། །ལྡོང་རོས་རྒྱ་མཚོའི་ལྦུ་བ་སྤང་སྤོས་དུང༌། །གླ་རྩི་ཨུཏྤལ་སུག་
སྨེལ་སྐྱེར་ཁཎྜ། །ཙན་དན་གུར་ཀུམ་རྒྱམ་ཚྭ་ཚ་བ་གསུམ། །ཀ་ར་སྦྲང་སྦྱར་བྱུགས་ན་མིག་
གི་ནད། །རབ་རིབ་ཤ་མཛེར་ཚག་འགྲིབས་ནད་ཀུན་སེལ། །ཟས་སྤྱོད་ཚ་སྐྱུར་རུལ་སུངས་
བཙོང་སྒོག་ཟྭ། །སྣེ་ཚོད་ལོ་བཤུར་མར་ནག་བུར་སྨུག་དང༌། །དུ་བ་བསེར་བུ་ཁ་བ་ཆགས་
25-1-260


པ་སྤྱོད། །དྲག་ཤུལ་སྐད་ཆེས་འདོན་པ་ལ་སོགས་སྤང༌། །ཁྱད་པར་མིག་ཆུ་རླུང་གྱུར་གུར་
གུམ་དང༌། །མར་རྙིང་ཆུར་བསྐོལ་སྣ་སྨན་མིག་བརྟ་བྱ། །སྐྱེར་པའི་ཁཎྜ་ནུ་ཞོ་སྦྲང་སྦྱར་བྱུག །
མཁྲིས་གྱུར་འབྲུམ་པ་བཞར་རྗེས་ཆུ་དྲོན་བཀྲུ། །ག་བུར་དོམ་མཁྲིས་ཡུང་བ་ཨ་རུ་ར། །ནུ་
ཞོ་སྦྲང་རྩི་སྦྱར་ལ་བྱུག་པར་བྱ། །ཁྲག་གྱུར་འབྲུམ་པ་བཞར་ཞིང་གང་ཉེ་གཏར། །བཙོད་དང་
སྐྱེར་པ་རྒྱ་སྐྱེགས་རྒུན་འབྲུམ་དང༌། །ཨུཏྤལ་བསྐོལ་གྲང་ཀ་ར་མིག་ཏུ་བླུག །བད་གྱུར་འབྲུམ་
པ་བཞར་ལ་ནག་མཚུར་དང་། །པི་པི་ལིང་དང་རྒྱ་ཚྭ་ལྡོང་རོས་དང༌། །སྟང་ཟིལ་སྦྲང་དང་སྦྱར་
ལ་མིག་ཏུ་བླུག །མདུང་རྩེ་ཙན་དན་དཀར་པོ་ཤིང་མངར་བཙོད། །ཞུ་མཁན་ཆུ་ལ་བཏང་པའི་
མིག་ལ་བྱུག །མིག་ནད་ཅི་ལས་གྱུར་ཀྱང་འཕྲལ་ཟུག་བཅོག །འདུས་པའི་མིག་ཆུ་རྫི་མ་ཕྱིས་
བྱས་ལ། །སྐྱེར་པའི་ཁཎྜ་ལྡོང་རོས་ཟངས་ཕྱེ་དང་། །ནག་མཚུར་བྱི་རུག་ཟངས་ནང་སྦངས་ཁུ་
བླུག །བྱི་རུག་ནག་མཚུར་ཟངས་ནང་བཞག་པ་བྱུག །སྲིན་གྱུར་བ་ལྕིའམ་རྟ་སྦངས་དུགས་
བྱས་ནས། །ཐོར་པ་བརྟོལ་ལ་ནག་མཚུར་རྒྱ་ཚྭ་དང༌། །འབྲས་བུ་གསུམ་དང་སྦྲང་རྩི་སྦྱར་
བ་བྱུག །མིག་ནད་སྒྲ་ངན་མ་ནུའི་སྐྱུག་ཁྲུས་བྱ། །སེང་ཕྲོམ་ནིམ་པ་ཧོང་ལེན་སེར་པོ་གཉིས། །
ཟངས་ཕྱེ་ནུ་ཞོ་སྦྱར་བ་མིག་ལ་བྱུག །ཆུ་སེར་རྣག་ཁྲག་གྲ་མཚམས་ལས་འཛག་ན། །ཨ་རུ་
བུལ་ཏོག་སྦྲང་རྩི་དྲི་ཆུས་བཀྲུ། །དེ་རྗེས་ག་བུར་དོམ་མཁྲིས་སྐྱེར་ཁན་བྱུག །སྐམ་ཚག་ཏི་ཚ་
སེར་པོ་ཅུ་གང་དང༌། །མར་གསར་ཀ་ར་མེ་ལོང་གཡའ་བླངས་བྱུག །ཡང་ན་མི་སྐྲ་མར་སྦྱར་
ནུས་ལྡན་བསྲེགས། །ཐལ་བ་མར་གསར་མེ་ལོང་གཡའ་སྦྱར་རམ། །རག་དུད་མར་གསར་མེ་
ལོང་གཡའ་སྦྱར་བྱུག །གཤེར་ཚག་དཔྲལ་རྩ་མིག་རྩ་སྣ་རྩེ་གཏར། །སྐྱེར་པའི་ཁཎྜ་ར་འོ་སྦྱར་
བ་བྱུག །མིག་ཚག་ཀུན་ལ་སག་རྩི་ཚ་བ་གསུམ། །ཡུང་བ་དུང་དང་ཏི་ཚ་སེར་པོ་དང༌། །མར་
གསར་མེ་ལོང་གཡའ་དང་སྦྱར་ལ་བྱུག ། 
མཆིན་པ་ཚོན་པོ་ཆུར་སྦངས་ཆུ་སེར་བཏོན། །ཞིབ་བརྡུངས་མར་བཙོས་ཚ་གསུམ་སྦྲང་རྩི་བཏབ། །མཆིན་པའི་རླངས་པས་
25-1-261


མིག་ཚག་སེལ་བར་བྱེད། །གདུང་བའི་མིག་ནད་རླུང་གྱུར་འབྲས་གསུམ་མར། །སྨིན་མའི་སྟེང་དང་
ལྟག་པའི་སྤུ་འཁྱིལ་དང༌། །རྐང་པའི་རྟིང་པའི་དྲེག་མཚམས་མེ་བཙའ་གདབ། །ཁྲག་མཁྲིས་
ལས་གྱུར་ཁོང་སྦྱང་གཏར་ག་བྱ། །ཤིང་མངར་སྐྱེར་པ་ཀཎྜ་ཀ་རི་ཡི། །ཁཎྜ་ར་གན་དུད་པ་ན་
ལེ་ཤམ། །སྦྱར་བསྐུས་དམར་ཚག་གཟེར་ཞིང་འདྲུལ་བ་སེལ། །གསལ་བྱེད་དགུ་པའི་ལྡེ་གུ་
བཏང་བར་བྱ། །བད་ཀན་སྐྱུགས་བྱས་ནིམ་པ་འབྲས་བུ་གསུམ། །སེང་ཕྲོམ་བ་ཤ་ཀ་ཁུ་དྲོ་
འཇམ་བླུག །མར་རྙིང་ཚ་བ་གསུམ་དང་སྦྱར་བ་བཟའ། །ལིང་ཐོག་ཁྲག་མཁྲིས་མཚོན་གྱིས་
གཙེས་པ་ལ། །འཁྲུས་སྨན་གཏར་ག་སྐྱེར་ཁན་དོམ་མཁྲིས་བྱུག །རླུང་གྱུར་ཞུན་མར་བཟའ་
བདུག་སྒོག་ཆབ་བཏང༌། །བད་ཀན་ལས་གྱུར་ཉ་ཕག་ཤ་ཡིས་བཤིག །ཀུན་ལ་ཨ་རུ་བུལ་
ཏོག་དྲི་ཆུས་བཀྲུ། །ཡང་ན་རྡོ་མཁྲིས་དོམ་མཁྲིས་ཀ་ར་བཏབ། །མཚེ་སྤྱིན་བཙན་དུག་ཞིམ་
ཐིག་རྒྱ་ཚྭས་བླང༌། །ལིང་ཐོག་རྙིངས་ནས་ཤུ་དག་འབྲས་བུ་གསུམ། །རུ་རྟ་ཀ་རའི་ཕྱེ་མ་བཏབ་
པས་སེལ། །སྤང་མ་འགྲོན་བུ་ལྡོང་རོས་བཙག་ཡུག་རྣམས། །རྒྱ་མཚོའི་ལྦུ་བ་མགོ་རུས་སྟང་
ཟིལ་དུང༌། །ཁྱིམ་བྱའི་སྒོ་ང་སྦྱར་བསྐུས་ལིང་ཐོག་གཅོད། །ཅུ་གང་གུར་གུམ་ག་བུར་གླ་རྩི་
དང༌། །ལིག་བུ་མིག་བཏགས་ཀ་ར་སྦྱར་བ་བྱུག །སྦང་ལུམས་བྱས་རྗེས་སྦོས་སུ་ཚོར་བ་དང༌། །
ལ་ཆའི་དུད་པས་བདུགས་རྗེས་ལྕགས་ཀྱུས་བཤུ། །རབ་རིབ་ཀུན་ལ་ཤིང་མངར་ར་མཉེ་
གཉིས། །ཀཎྜ་ཀ་རི་ཨུཏྤལ་ཨ་རུ་ར། །པི་པི་ལིང་དང་ཀ་ར་རྒུན་འབྲུམ་དང༌། །ར་འོ་བ་མར་
འབྲས་གསུམ་བ་ཤ་ཀ །བསྡུས་ཁུས་རབ་རིབ་སེལ་བར་བྱེད་པ་ཡིན། །འབྲས་གསུམ་ཤིང་
མངར་སྦྲང་རྩིའི་ལྡེ་གུ་སྦྱར། །ཉལ་ཁར་བཟའ་ཞིང་ཟླ་གཅིག་ཕན་ཟས་བསྟེན། །སྐྱུ་རུའི་ཁུ་བ་
འཐུངས་ན་རབ་རིབ་སེལ། །ཏ་བྱ་ཤིང་མངར་ལྕགས་ཕྱེ་ཀ་ར་སྦྲང༌། །མར་རྙིང་འབྲས་བུ་སྦྱར་
བས་རབ་རིབ་སེལ། །ཨ་རུ་སྦྲང་རྩི་རྒྱུན་དུ་ཟས་གོང་བསྟེན། །ཅོང་ཞི་བསིལ་གསུམ་ཨུཏྤལ་
འབྲས་བུ་གསུམ། །གོ་སྙོད་ཤིང་མངར་བྲག་ཞུན་སྦྲུལ་གྱི་ཤ །ལྕགས་ཕྱེ་ཨ་བ་རྣམ་གཉིས་ཀ་
25-1-262


ར་སྦྱར། །ཡུན་དུ་བསྟེན་ན་མིག་གི་བཅུད་ལེན་འགྱུར། །སྤང་མ་གསེར་རྡོ་ཤིང་མངར་ན་ལེ་
ཤམ། །འོ་མར་སྦངས་ལ་དུ་བ་མ་ཤོར་བསྲེག །ལྡེ་གུ་བྱུགས་པས་རབ་རིབ་སེལ་བར་བྱེད། །
སྤང་མ་ཤིང་མངར་བར་སྐྱུར་ན་ལེ་ཤམ། །ཆུར་བཏགས་རིལ་བུ་བདར་བསྐུས་རབ་རིབ་
སེལ། །ཨུཏྤལ་སྐྱེར་པའི་ཁཎྜ་ཚ་བ་གསུམ། །རུ་རྟ་ཨ་རུ་ར་ཡིས་རབ་རིབ་འཕྱག །སྦྲུལ་གྱི་རོ་
གཅིག་སྡིག་པའི་རོ་བཞི་རྣམས། །ཉི་ཤུ་རྩ་གཅིག་འོ་མར་བསྲུལ་པའི་མར། །ཁྱིམ་བྱ་གསོས་
པའི་བྲུན་གྱི་ལྡེ་གུ་བྱུག །མཁའ་ལྡིང་བྱ་རྒོད་ལྟ་བུའི་མིག་འཐོབ་འགྱུར། །ཨ་རུ་ར་དང་དོམ་
མཁྲིས་རྒྱ་སྐྱེགས་དང༌། །གླ་རྩི་བུལ་ཏོག་ཆུ་གཙང་འཁར་སྣོད་སྦྱངས། །མིག་ཏུ་བཏིགས་པས་
སྤྲིས་གཡོགས་རབ་རིབ་སེལ། །ལིང་རོ་རྩ་དྲ་ལ་སོགས་འགྲིབས་ཀུན་གཅོད། །ག་བུར་གླ་
རྩི་རྒྱ་ཚྭ་སྒོ་ང་ལ། །ༀ་ན་ག་ཤ་རི་རྦད། །ག་ཏོ་ཤ་རི་རྦད། །ཐུག་ནན་ཤ་རི་རྦད་སྭཧཱ། །སྨྲ་བ་
བཅད་དེ་སྒོང་སྤྲིས་ཞུ་བར་བཟླས། །འདེབས་དུས་ཉི་ཤུ་རྩ་རེ་ཁོང་དུ་བཏང༌། །སྨན་བྱུགས་
སྔགས་གདབ་འགྲིབ་བྱེད་མ་ལུས་སེལ། །ཉ་ཕག་སྒོ་ང་གོ་སྙོད་རྒྱུན་དུ་བསྟེན། །རྐང་བཀྲུ་
འབྲི་མར་ཕག་ཚིལ་གོ་སྙོད་བྱུག །རྐང་རྗེན་མི་བྱ་གནོད་པའི་ཟས་སྤྱོད་བསྲུང་། །སྲོད་ལོང་ན་
ལེ་ཤམ་དང་ཞོ་སྦྱར་བྱུག །བ་ལྕི་མཆེར་པའི་ནང་དུ་པི་པི་ལིང༌། །བཅུག་བསྲེགས་གྲིབ་སྐམས་
སྦྲང་སྦྱར་ལྡེ་གུ་བྱུག །ར་མཆིན་དམར་པོ་ཟོས་ན་སྲོད་ལོང་སེལ། །ཤ་མཛེར་གསར་དུས་ཁྲག་
མཁྲིས་ལྟ་བུར་བཅོས། །རྙིངས་ནས་ཁབ་རྩེས་ཕུག་ལ་མཐེབ་མོས་མཉེ། །ཤ་ལྷག་རྩ་དྲ་ཤ་
མཛེར་རྒྱས་པ་ན། །དང་པོ་ཁྲུས་གཏར་སྨན་གྱིས་བཅོས་བྱས་ལ། །དུགས་བྱས་མཐེབ་མོས་
མཉེས་ལ་གཙགས་བུས་བཤུ། །ཆུ་ལྕག་བྱས་ཏེ་སྦྲང་མར་བྱུགས་ལ་བཅིང༌། །དེ་རྗེས་ཨ་རུའི་
ལྡེ་གུ་ནུས་ལྡན་བསྲེགས། །བར་སྐྱུར་ཁུ་བར་སྦྱར་ལ་གྲིབ་སྐམས་བྱ། །རྒྱ་ཚྭ་ཉིས་འགྱུར་སྦྱར་
བའི་ཕྱེ་མ་བཏབ། །དཔྱད་བྱས་བཤུལ་གྱི་ནད་ལྷག་མ་ལུས་གཅོད། །རབ་རིབ་ལིང་རོ་ལྡེ་
གུ་ནུས་ལྡན་བསྲེག །སྔོ་རིབ་ལིང་རོ་སྲབ་མོ་ཆུ་འབྱེད་བྱ། །པ་ཡག་འབྲས་བུ་ལུག་རུ་ཞིམ་
25-1-263


ཐིག་ལེ། །འགྲོན་ཐལ་ཉ་མཁྲིས་སེན་རྩི་འཛིབ་བུ་ཀ །ཁྱི་གླད་སྦྲང་སྨྱོན་སྦྱར་བ་བླུག་རྗེས་
འཕྱག །ཕྱི་འགྲིབས་མ་ལུས་སེལ་བར་བྱེད་པ་ཡིན། །ནང་འགྲིབས་ཟས་སྤྱོད་ཁོང་སྨན་དག་
ལ་འབད། །བར་འགྲིབས་དཔྱད་མཆོག་ཐུར་མས་དབྱེ་བར་བྱ། །དེ་ལ་སྔོན་འགྲོ་དངོས་གཞི་
ཕྱི་རྗེས་གསུམ། །སྔོན་འགྲོ་ནད་དུས་རིམ་གྲོ་དཔྱད་དང་བཞི། །ནད་གཞིའི་སྔོན་འགྲོ་དབྱེར་
རུང་མི་རུང་བརྟག །དབྱེར་མི་རུང་བ་ལུད་པ་ཆམ་པས་བཏབ། །མ་ཞུ་འཁྲུ་སྐྱུག་མགོ་གཟེར་
ཡོད་པ་དང༌། །ལུས་ལ་དགྲ་དར་སྤར་ཁ་ལི་ལ་བབས། །འདུས་པའི་མིག་ཚིལ་ཞུ་བ་དབྱེར་
མི་རུང༌། །ཕྱི་འགྲིབས་ནང་འགྲིབས་ཐུར་མས་དབྱེར་མི་ཕྱེད། །མ་སྨིན་དུས་སུ་བསལ་ཡང་
སླར་འགེབས་སྤང༌། །མེ་ཟླ་ཉི་མ་ཤར་ནུབ་མི་མཐོང་ན། །དུས་འདས་རྒྱལ་མོའི་མཐུ་ཉམས་
དབྱེར་མི་རུང༌། །དབྱེར་རུང་དེ་ཟློག་ཆུ་ནང་ཞག་ཐིགས་འདྲ། །ཟླ་བ་ཉ་ལྟར་གང་བ་དབྱེ་བར་
བྱ། །དུས་ཀྱི་སྔོན་འགྲོ་རླུང་འགྲིབས་ལོ་གསུམ་སྨིན། །བད་ཀན་ལོ་གཅིག་འདུས་པ་ཕྱེད་
དང་གཉིས། །མཁྲིས་པ་ཟླ་བ་དྲུག་གིས་སྨིན་པའི་དུས། །མ་སྨིན་གནོད་པའི་ཟས་ཀྱིས་སྨིན་
པར་བྱ། །རིམ་གྲོ་སྔོན་འགྲོ་ཆབ་གཏོར་བརྒྱ་རྩ་དང༌། །གྲྭ་ལྔ་འདོན་ཞིང་ལྷ་མཆོད་གནོད་པ་
བསལ། །དཔྱད་ཀྱི་སྔོན་འགྲོ་ནད་བཤིག་བསལ་བླའི་ཕྱིར། །ལོ་ངར་ཞུ་མཁན་ཆང་བཙོས་
རླངས་དུགས་བྱ། །དངོས་གཞི་ཆོ་ག་གསང་ས་བརྡེག་ཐབས་དང༌། །བསལ་ཐབས་སོལ་ཚད་
བརྟན་བྱ་ལེགས་ཉེས་རྟགས། །སྤྱི་དོན་རྣམ་པ་བདུན་དུ་ཤེས་པར་བྱ། །དང་པོ་ཐུར་མའི་ཚད་
དང་བཅའ་གཞི་གཉིས། །ཐུར་མའི་རྒྱུ་ནི་གསེར་ཟངས་ར་གན་གསུམ། །བྲ་བོ་འབྲི་ལྕེ་ཁ་དང་
གཟོང་ཁ་འདྲ། །སྲིད་སོར་དྲུག་པ་རྩེ་མོ་རྒྱལ་མོ་གང༌། །ཞེང་དུ་དེའི་ཕྱེད་མགྲིན་པ་གྲོ་མགྲིན་
ཙམ། །སྲིད་དུ་བར་མཚོན་དོ་དབུས་རི་མོ་དོད། །ཐུར་རྐེད་གྲུ་བཞི་སྦོམ་ལ་ཐུར་ཞབས་ཕྲ། །
ཆག་ཚད་ལྡན་པས་སྐྱོན་སྤོང་ཡོན་ཏན་འབྱུང༌། །ལུས་ཀྱི་བཅའ་གཞི་གཟའ་སྐར་ཚེས་བཟང་
ལ། །སྤྲིན་མེད་ཉི་མ་འདེ་སར་འདུ་ལོང་བསྡམས། །སྔ་དྲོ་ཤར་བལྟས་ལོ་མཐུན་གཡོག་
25-1-264


གིས་བརྟེན། །སྣམ་བུ་གཙང་མས་ལག་པ་རྐེད་པ་དྲིལ། །སྨན་པ་མདུན་ངོས་ནས་ཀྱི་ཁྲི་སྟེང་
འདུག །གཡོག་གིས་རྡོ་གཉིས་མི་འབྱེད་ངོས་སུ་བརྡུང༌། །དེ་ཡི་སྒྲ་ལ་ནད་པ་མིག་བལྟར་
གཞུག །གསང་ས་ལྷ་མི་བདུད་ཀྱི་བུ་ག་གསུམ། །ཚད་དང་ལྡན་པའི་དར་ཡེས་གསང་མཚོན་
ཏེ། །གྱེས་ན་ནད་མི་སུམས་ལ་བསྡུས་ན་འབྱར། །མཐོས་ན་མི་ནོན་དམས་ན་མི་སུམས་པས། །
བདུད་ལས་ཕྱིར་བསྐྱེད་བཙན་ལས་གདོང་བྱོལ་བའི། །ཐུར་རྩེ་གང་གི་དབུས་སུ་བརྡེག་པར་
བྱ། །བརྡེག་ཐབས་གཡོན་པས་མིག་མི་འགུལ་བར་བཟུང༌། །གཡས་ཀྱིས་ཐུར་ཞབས་གསང་
དེ་བསྟན་བྱས་ལ། །ཐུར་མ་བཟློག་སྟེ་མཐེབ་མཛུབ་གུང་མོས་བཟུང༌། །མ་ཞུམ་བརྟན་པས་
གསང་དུ་ལེགས་བཙུགས་ལ། །ཐུར་མ་བྱ་མི་འདའ་བའི་མན་ངག་གིས། །མིག་གི་དཀྱིལ་དུ་
བསྡིགས་ལ་ནེམས་ཀྱིས་དབུལ། །ལེགས་ཕུགས་པུས་ཞེས་བྱ་བའི་སྒྲ་བྱུང་ནས། །འཆི་མེད་
བལ་གྱིས་མིག་ལ་ཆུ་ལྕག་བྱ། །བསལ་ཐབས་རང་ལ་གདུང་ཚུགས་བལྟར་བཅུག་ལ། །ཐུར་
མ་བསྙལ་ཏེ་རྒྱལ་མོའི་སྟེང་དུ་བཏང༌། །རྒྱལ་མོ་སྐྱ་རིབ་ཐུར་རྩེ་མཉམ་པར་འདོད། །ཕན་
ལྟར་དྲིལ་དང་ཅོང་ལྟར་བཤུ་བ་དང༌། །འོ་ལྟར་དབོ་དང་སྤུ་ལྟར་གཟིངས་པ་ཡིས། །སྒྲིབ་
བྱེད་བསལ་ལ་ཐུར་མའི་འོག་ཏུ་སྦ། །མཐོར་ན་བསྡུ་ཞིང་བྲོས་ན་དགུག་པ་དང༌། །ཤོར་ན་
བསླན་ཞིང་སྨས་ན་ཁུ་ཡིས་གདབ། །སོལ་ཚད་ཉི་མ་གཟའ་ལས་ཐར་བ་བཞིན། །ཕྲ་རགས་
གཟུགས་རྣམས་འཕྲལ་དུ་གསལ་བ་ཡིན། །འོ་ལྟར་བོ་ན་དེ་དུས་མི་གསལ་ཡང༌། །ནད་ཆུ་
དྭངས་ནས་ག་ལེ་ཕྱི་ནས་གསལ། །དེ་འོག་མི་ལྡོག་བརྟན་པར་བྱ་བའི་ཕྱིར། །སྐད་འདོན་གློ་
ལུ་དབུགས་བསྡམ་གོམ་འགའ་བཅག །ལོག་ན་བསལ་ཞིང་མ་ལོག་བརྟན་པ་དང༌། །ཆུ་བལ་
གླན་ལ་དེ་སྟེང་རས་མས་བཅིང༌། །མལ་དུ་བསྙལ་ལ་ཐུར་མ་དྲིལ་ཏེ་གདོན། །སྔས་མཐོང་
བྱས་ལ་མིག་དེ་འོག་ངོས་བསྟན། །ལེགས་པའི་རྟགས་ལ་འདོད་པ་རྣམ་གསུམ་ཡོད། །ནགས་
ལ་ཁ་བ་བབས་འདྲ་འདོད་པ་ཡིན། །གངས་ལ་ཉི་མ་ཤར་འདྲ་འདོད་པ་ཡིན། །དཔྱད་རྗེས་
25-1-265


ཟུག་མེད་བདེ་ན་འདོད་པ་ཡིན། །ཉེས་པའི་རྟགས་ལ་མི་འདོད་རྣམ་པ་གསུམ། །ཕུག་དུས་
ཁྲག་གིས་གང་ན་དེ་མི་འདོད། །སེལ་དུས་རྙོག་ནག་ལངས་ན་དེ་མི་འདོད། །དཔྱད་རྗེས་ཟུག་
གཟེར་ལངས་ན་དེ་མི་འདོད། །ཕྱི་རྗེས་ཟས་སྤྱོད་བསླབ་དང་ལོག་པ་མནན། །ཁ་ཟས་མར་
དཀར་འོ་ཟན་འཚོས་པར་བཙོས། །སྐྱོ་འདུར་བལྡད་མི་དགོས་པ་ལྟོ་སྲུང་བསྟེན། །སྐོམ་ན་
ཆུ་གྲོག་བག་ཙམ་བཏུང་བར་བྱ། །སྦྲིད་པ་གློ་ལུ་སྣབས་ཕྱི་མཆིལ་མ་འདོར། །ལྡང་ཉལ་ལ་
སོགས་དྲག་ཤུལ་ཀུན་ལ་གཟབ། །མིག་གི་མན་ངག་ཆུ་ཡིན་ནན་ཏན་བསྐྱེད། །ཞག་གསུམ་
ལོན་ནས་བཅིངས་པ་བཀྲོལ་ལ་བལྟ། །ཞག་བདུན་ལོན་ནས་ཁ་ཟས་ཆ་ཡིས་གློད། །རླུང་
ཤས་ཆེ་ན་དེ་བས་བག་སྔར་གློད། །གནོད་པའི་ཟས་སྤྱོད་དུག་འདྲ་རྒྱུན་དུ་གཟབ། །ལོག་
གནོན་འགྲམས་དང་འགྲིབས་པ་ཞར་བ་གསུམ། །དང་པོ་ཤ་རུས་རྩ་དང་གདོན་འགྲམས་
བཞི། །ཤ་འགྲམས་ལྟག་པར་ཟུག་དང་མིག་མི་ཐེག །ལུས་རྔུལ་མགོ་ལྕི་རབ་རིབ་མཆི་མ་
མང༌། །ལྟག་པར་གྱོ་དུགས་སྐྲ་མཚམས་མུར་གོང་བསྲེག །རུས་འགྲམས་མིག་འབྲས་ཡན་
ལག་ཚིགས་གཞི་དང་། །དཔྲལ་བ་མིག་རུས་ན་ན་འཚོགས་མའི་སྟེང༌། །ཚ་བ་གསུམ་མམ་
འབྲུ་མར་དུགས་ཀྱིས་བདུག །རྩ་འགྲམས་མིག་དམར་མི་ཐེག་མགོ་ཕྱེད་ན། །སྐེ་མཇིང་མི་
བདེ་ལུས་སྦྲིད་ཆུ་ནན་བསྐྱེད། །དཔྲལ་རྩ་མིག་རྩ་སྣ་རྩེ་ལ་སོགས་གཏར། །གདོན་འགྲམས་
ཚིག་པ་ཟ་ལ་ལུས་པོ་འདར། །རྔུལ་འབྱུང་གྲང་ཤུམ་བྱེད་ན་བསྐྲད་ལས་བྱ། །གཞན་ཡང་
ཉེས་པ་གང་འབྲེལ་སྦྱོར་བས་གསོ། །སྤྱོད་ལམ་རྐྱེན་གྱིས་ནད་ལོག་འགྲིབས་པ་ལ། །སྦྲུལ་
ཤ་ཨ་བ་གུར་གུམ་གོ་སྙོད་དང༌། །ཀ་ར་མར་གསར་ལུག་མཆིན་བརྒྱངས་པ་བཏང༌། །བསིལ་
གསུམ་ག་དུར་སྐྱེར་པའི་ཁཎྜ་དང༌། །ནུ་ཞོ་ར་འོ་སྦྱར་བ་མིག་ཏུ་བླུག །གསལ་བྱེད་བདུན་
དགུའི་ལྡེ་གུ་སྦྱར་ལ་བཏང༌། །སྐྱེད་མེད་ཟླ་བ་ཕྱེད་ནས་ཐུར་ལོག་བསྐྱར། །ཞར་བའི་ལོག་
གནོན་ཟུག་གཟེར་བཅག་པ་གཅེས། །ག་བུར་དོམ་མཁྲིས་སྐྱེར་པ་མིག་ཏུ་བླུག །གང་ཉེའི་རྩ་
25-1-266


གཏར་ཆུ་ལྕག་དྲག་ཏུ་བྱ། །དོམ་མཁྲིས་ལ་སོགས་མཁྲིས་པའི་ལྕག་མདའ་བཏང༌། །བསིལ་
གསུམ་འབྲས་གསུམ་ལྕགས་ཕྱེ་སྦྲང་སྦྱར་བཟའ། །ཟས་སྤྱོད་བསིལ་བསྟེན་དྲོད་བཅུད་སྤང་
བར་བྱ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་མིག་ནད་བཅོས་པའི་ལེའུ་སྟེ་ཉི་ཤུ་དགུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །རྣ་བའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་རྐྱེན་ཟས་དང་སྤྱོད་ལམ་གདོན་སོགས་ཀྱིས། །འདུ་བ་འཁྲུགས་ཏེ་རྣ་
བའི་ནད་སྐྱེད་འགྱུར། །དབྱེ་བ་རྣ་བ་ནད་དང་འོན་པ་གཉིས། །ནད་ནི་རླུང་མཁྲིས་བད་ཀན་
ཁྲག་དང་བཞི། །འདུས་གྱུར་རྣག་འཛག་འབྲུམ་ཐོར་འབྱུང་བ་དྲུག །འོན་པ་སྒྲ་བཅས་འོན་
དང་རྣ་པགས་འགགས། །སྐམ་འོན་མ་རླུང་བུ་ལ་ཤོར་བ་བཞི། །དེ་རྟགས་རྣ་ནད་རླུང་གྱུར་
སྟོང་སྙམ་སེམས། །ཟུག་ཆེ་གྲང་ན་མི་བདེ་གཞོགས་ཕྱེད་ན། །མཁྲིས་གྱུར་ཚ་བཅས་ཟུག་ཆེ་
མགོ་བོ་ན། །ཆུ་སེར་མྱུར་འཛག་གང་རེག་འབྲུམ་ཐོར་རྣག །རྣ་བ་ནང་འགྲམས་ཁྲག་གྱུར་ལྕི་
ཟུག་ཆེ། །བད་ཀན་ལས་གྱུར་མགོ་དང་འགྲམ་པ་ལྕི། །ཟུག་ཆུང་གཡའ་སྐྲངས་རྙིངས་ནས་
རྣག་སྐམ་འཛག །འདུས་གྱུར་ཀུན་གྱི་རྟགས་ལྡན་སྒྲ་མི་ཐོས། །རྣག་མདོག་སྐ་སླ་མ་ངེས་
རྒྱུན་དུ་འཛག །འོན་པ་སྒྲ་བཅས་ཆུ་བཤང་རྔ་སྒྲ་ཐོས། །རྣ་པགས་འགགས་ན་རྣ་བ་ཁེངས་
འཐིབས་ལྕི། །སྐམ་འོན་སྟོང་སང་ནག་གམ་དམར་བའོ། །མ་རླུང་བྱིས་པ་སོ་སྐྱེ་ལས་བྱུང་
ཚེ། །མ་རླུང་བུ་ལ་ཤོར་བས་རྣག་འཛག་འོན། །གསོ་ཐབས་རླུང་གྱུར་སྣུམ་ལྡན་དྲོད་དུགས་
བྱ། །སྒོག་སྐྱ་བཅའ་སྒ་ཤིང་ཀུན་མར་སྦྱར་བཏང༌། །ལ་ཕུག་སྐམ་པོ་ཆང་དུ་བཙོས་བྱས་ལ། །
བརྡུངས་བཙིར་ཁུ་བ་རྒྱམ་ཚྭ་དྲོ་འཇམ་བླུག །ཡང་ན་སྒྲོན་ཤིང་སྡོང་བསྲེགས་སྣུམ་སྦྱར་རམ། །
རྒྱམ་ཚྭ་རུ་རྟ་ར་ཐུག་ཆུ་སྦྱར་བླུག །དེ་ལ་སྐྱེད་ཆུང་འབའ་སམ་སྨན་མར་སྦྱར། །མཁྲིས་གྱུར་
25-1-267


ཀ་ར་མར་དང་བཅས་པ་བཟའ། །དེ་འོག་བསིལ་བའི་འཁྲུས་བཏང་མངར་བས་དགང་། །རུ་
རྟ་ཨ་རུའི་ཐང་བཏང་རྣ་བར་བླུག །ཁྲག་གྱུར་དེ་བཞིན་ཁྱད་པར་གང་ཉེ་གཏར། །བད་གྱུར་
པི་པི་ལིང་དང་མར་བསྐོལ་བསླུད། །དེ་རྗེས་སྐྱུགས་བྱ་སྒོག་སྐྱ་ལ་ཕུག་དང༌། །སྒེ་གཤེར་
ཁུ་བ་གང་རུང་རྣ་བར་བླུག །རྣག་འཛག་རེད་སྦྱང་སྨན་བསྐུས་བལ་ཡེས་ཕྱི། །ཡང་ན་སྣུམ་
འཆོས་རྗེས་ལ་རྣ་བ་སྦྱང༌། །རུ་རྟ་ལ་ཕུག་བྱང་པ་རྒྱ་ཚྭ་དང༌། །སྒེ་གཤེར་ཞིབ་བཏགས་དར་
ཚགས་ལ་བཏོན་ལ། །འབྲུ་མར་སྦྱར་ཏེ་འཇམ་ཙམ་སྲོས་ལ་མནན། །ལངས་ནས་ཁྱི་བལ་ཡེ་
འུས་རྣ་བར་བཏིགས། །ཁྱི་བལ་བག་ཟན་རས་གསར་ལེགས་པར་དགག །རྣ་བ་རྔབས་ཀྱིས་
དྲངས་པས་ནད་ཀུན་སྦྱོང༌། །རྣག་འཛག་པ་དང་རྣ་པགས་འགགས་པ་སེལ། །ཡང་ན་རྒྱ་ཚྭ་ཤུ་
དག་གསེར་ཕུད་བུ། །སྒོག་སྐྱ་རུ་རྟ་ཆ་མཉམ་ཞིབ་བཏགས་ལ། །བལ་དྲིལ་སྒོག་ཆུར་བཅུག་
བཙིར་ཁུ་བ་བླུག །ཞག་གསུམ་ལོན་ནས་སྦུབས་མས་དྲང་བར་བྱ། །འབྲུམ་ཐོར་ཀྱོང་བུས་
བཞར་རྗེས་པི་པི་ལིང༌། །རྒྱམ་ཚྭ་ལྡོང་རོས་ཉེ་ཤིང་ཙི་ཏྲ་ཀ །དནྡ་སྦྲང་མར་སྦྱར་བའི་རེང་བུ་
གཞུག སྒྲ་བཅས་འོན་ལ་འབྲུ་མར་བསྲོས་ལ་བླུག །དེ་འོག་ཤིང་ཀུན་ཤུ་ཏི་སྐྱེར་བར་ཤུན། །
ཀྱི་ལྕེ་བོང་ང་དཀར་པོ་ཚ་བ་གསུམ། །ཡུངས་མར་བཞི་འགྱུར་ཚ་བསྐོལ་བླུག་པས་ཕན། །རྣ་
པགས་འགགས་ན་སྒོག་སྐྱ་ལ་ཕུག་ཁུ། །འབྲུ་མར་སྦྱར་བ་རུ་རྟ་རྨ་བྱའི་མདོངས། །རྒྱམ་ཚྭ་
བཏབ་ལ་འཇམ་བསྲོས་རྣ་བར་བླུག །ཐུར་ལ་སྦུབ་ཉལ་ནང་པར་རྔབས་གྱིས་དྲང༌། །ཡང་ན་
གླ་རྩི་ཤིང་ཀུན་ཁ་རུ་ཚྭ། །རུ་རྟ་ལ་ཕུག་ཨུག་ཆོས་རྨ་བྱའི་མདོངས། །འབྲུ་མར་སྦྱར་ལ་རྣར་
བླུག་རྗེས་ལ་བྲུ། །སྐམ་འོན་ཤིང་ཀུན་རུ་རྟ་གླ་རྩི་དང༌། །ཨུག་ཆོས་ཏིལ་མར་སྦྱར་བླུག་བལ་
ཡེས་ཕྱི། །དམར་སང་ལ་ནི་གདོན་བཅོས་བྱ་བར་ཤིས། །འོན་པ་ཀུན་ལ་སྒོག་སྐྱ་ལ་ཕུག་ཆུ། །
ར་ཐུག་ཆུ་དང་རྒྱམ་ཚྭ་རྒྱ་ཚྭ་དང་། །རུ་རྟ་གླ་རྩི་ཤིང་ཀུན་ཨུག་ཆོས་འབྲས། །རྣར་བླུག་ཡེ་འུས་
བྲུ་ཞིང་རྔབས་ཀྱིས་དྲངས། །ལ་ཕུག་བཅའ་སྒའི་ཐལ་བ་སྐྱེར་བར་ཤུན། །ཤིང་ཀུན་ཤུ་དག་ཤུ་
25-1-268


ཏི་ཁ་རུ་ཚྭ། །རྒྱ་ཚྭ་རུ་རྟ་ཀྱི་ལྕེ་ཡ་བཀྵ། །གྲོ་གའི་ཐལ་བ་གླ་སྒང་འབྲུ་མར་དང༌། །ཚྭ་སིངས་
བཞི་འགྱུར་ལྕུམ་ཁུར་བསྐོལ་ཏེ་བླུག །གཡའ་སྐྲངས་སྒྲ་བཅས་རྣག་འཛག་འོན་པ་སེལ། །མ་
རླུང་གསར་ཞུགས་རྣག་འཛག་བཅོས་དང་མཚུངས། །འབའ་སམ་མར་སྦྱར་རྙིངས་ནས་སྤང་
བར་བྱ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་རྣ་བའི་ནད་གསོ་བའི་ལེའུ་སྟེ་སུམ་ཅུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སྣ་ནད་རྒྱུ་རྐྱེན་དབྱེ་བ་བཅོས་ཐབས་གསུམ། །རྒྱུ་རྐྱེན་ཟས་དང་སྤྱོད་ལམ་
གདོན་རྐྱེན་གྱིས། །འདུ་བ་འཁྲུགས་པས་སྣ་ནད་སྐྱེད་པར་བྱེད། །དབྱེ་བ་སྣ་སུབས་འབྲུམ་
ཐོར་ཤ་ལུ་དང༌། །རྣག་ཁྲག་འཛག་དང་རྣམ་པ་ལྔར་བཤད་དོ། །བཅོས་ཐབས་རྣག་དང་ཆུ་
སེར་སྣ་འགགས་ན། །དབུགས་འཚུབ་མཚུལ་པ་ཤུ་ལ་སྣ་བཤལ་བཏང༌། །དྲོད་སྨན་སྟར་བུ་
ཤིང་མངར་སྦྲང་རྩི་སྦྱར། །གདོང་སྐྲངས་སྟོད་བརྒྱངས་མཚུལ་པ་འགགས་པ་སེལ། །འབྲུམ་
ཐོར་བྱུང་ན་ཏི་ཚ་མར་དཀར་བྱུག །དནྡ་དུར་བྱིད་ལྡོང་རོས་ལྕེ་མྱང་ཚྭ། །ཙི་ཏྲ་ཀ་དང་པི་ལིང་
མར་དང་སྦྲང༌། །རེང་བུ་སྦྱར་ལ་སྣ་ནང་གཞུག་པར་བྱ། །དེས་མ་སེལ་ན་རྣ་བ་ལྟ་བུར་བཅོས། །
སྐམ་ཞིང་ཚ་ན་གུར་གུམ་ཞུན་མར་བླུག །སྣ་ལ་འབྲས་བྱུང་སྣ་ནད་ཤ་ལུ་ཡིན། །བྲུད་དང་
གཅོད་སྨན་གཏར་ལུམས་སྐེམས་ཀྱིས་བཅོས། །ཕལ་ཆེར་འཚོ་དཀའ་སྔོན་གྱི་ལས་ནད་ཡིན། །
ཚད་རོ་རྫོང་ལ་བྲོས་ཏེ་རྣག་འཛག་ན། །སྐྱུགས་རྗེས་རྒྱ་སྐྱེགས་ཤིང་ཀུན་བྱི་ཏང་ག །བུ་རམ་
པི་པི་ལིང་དང་ན་ལེ་ཤམ། །ལུག་ཐུག་གཅིན་དང་སྦྱར་བའི་སྣ་སྨན་བཏང༌། །ཡང་ན་ཚ་བ་
གསུམ་དང་དུག་མོ་ཉུང༌། །ཟི་ར་བྱི་ཏང་ག་ཡི་ཁུ་བ་བླུག །ཐོང་ཚེར་མགོ་ཤ་རུས་པ་ཀླད་པར་
བཅས། །ཟི་ར་དཀར་པོ་ཤིང་ཀུན་བཏབ་ལ་བསྡུ། །སྒ་དང་པི་པི་ལིང་གཉིས་འཚོས་ཀར་
གདབ། །ལྟོ་སྟོང་བསྐོལ་བཏང་འབྲས་བུའི་སྨན་མར་བྱ། །སྣ་ནས་ཁྲག་འཛག་དེ་རིགས་རྣམ་
25-1-269


པ་གསུམ། །སེར་ལ་སླ་བ་གླད་པ་ལས་འབྱུང་སྟེ། །སྨིན་དབྲག་མེས་བསྡམ་རྟ་པགས་སྣ་སྨན་
བཏང༌། །སྨུག་ནག་སྣེ་བཞི་ལས་བབས་སྣེ་ས་བཅིང༌། །ནུ་མ་རླིག་པ་ཟ་འོག་སྐུད་པས་སྐྱིག །
དམར་ལ་གདང་བ་རྩ་ཁ་བྱེ་བ་ཡིན། །སྣ་ཡི་དབུགས་ཀྱིས་གར་སླེབ་དཔུང་འཛུམ་བསྲེག །
སྣ་རུ་བསུར་བདུག་ཐང་དང་ལྡེ་གུ་བཏང༌། །ཀུན་ལ་མཁན་སྐྱའམ་སྤྲུ་མའི་རེང་བུ་ཡི། །མགོ་
ལ་གུར་གུམ་དོམ་མཁྲིས་ཟབ་འགྲོན་ཐལ། །ལྡེ་གུ་བྱུགས་ལ་ཕུགས་སུ་སླེབ་པར་བརྫང༌། །
སྣ་ཁྲག་ཕལ་ཆེར་ཁྲག་འཕེལ་ལས་འབྱུང་བས། །རྩེ་ཆུང་གཏར་ཏེ་འོལ་ཁ་བསྒྱུར་བར་བྱ། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྣ་
ནད་གསོ་བའི་ལེའུ་སྟེ་སོ་གཅིག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ཁ་ཡི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་བཞི་
རུ་བཤད། །རྒྱུ་རྐྱེན་ཟས་དང་སྤྱོད་ལམ་གདོན་ལ་སོགས། །འདུ་བ་འཁྲུགས་པས་ཁ་ནད་
སྐྱེད་པར་བྱེད། །དབྱེ་བ་མཆུ་རྙིལ་སོ་ལྕེ་གྲེ་བ་རྐན། །མཆུ་ནད་གྲེ་མཆུ་ཤོ་རེ་བད་ཀན་དང༌། །
གཅེན་དང་ཁྲག་རྒྱས་ཁ་ཤུ་དྲུག་ཏུ་བཤད། །སོ་ནད་བད་རླུང་ཁྲག་མཁྲིས་སོ་འབྲས་སྲིན། །
ལྕེ་ནད་རླུང་མཁྲིས་བད་ཀན་ལྕེ་ལྷག་སྐྲངས། །རྐན་ནད་ལྕེ་ཆུང་བབས་དང་ལྕེ་འདྲ་དང༌། །
རྐན་འབྲུམ་ཆུ་བུར་རུས་སྦལ་རྐན་སྨིན་ནོ། །གྲེ་བའི་ནད་ལ་རླུང་དང་མཁྲིས་པ་ཁྲག །བད་
ཀན་འདུས་པ་འབྲས་དང་རྨེན་བུའོ། །སུམ་ཅུ་ཐམ་པ་ཁ་ནད་དབྱེ་བར་བཤད། །དེ་རྟགས་
གྲེ་མཆུ་མཆུ་ནད་ཤ་རྨེན་སྐྱེས། །ཤོ་རེ་མཆུ་གས་བད་ཀན་སྐྱ་ཚོས་ཚ། །གཅེན་ནི་འབྲུམ་ཐོར་
ན་ལ་ཚ་བ་འབྱུང༌། །ཁྲག་རྒྱས་སྨུག་ལ་སྦོམ་པར་སྐྲངས་པ་ཡིན། །ཁ་ཤུ་མཆུ་ལ་ཤུ་བ་ཆགས་
པའོ། །རྙིལ་ནད་གཡའ་ཞིང་འདྲུལ་ལ་ཁྲག་རྣག་འཛག །རླུང་གིས་སོ་ནད་བེར་བ་ལངས་
ནས་ན། །འཕར་རྩ་འཁྱུག་ཅིང་གྲང་མོ་བཟོད་ཐབས་མེད། །ཁྲག་མཁྲིས་དྲོད་ཆེ་རྩ་རྒྱངས་
25-1-270


བཅུད་ཟས་གནོད། །བད་ཀན་སོ་ནད་རྙིལ་འདྲུལ་དྲི་མི་ཞིམ། །སོ་འབྲས་སོ་རྩར་སྐྲངས་ཤིང་
རྣག་ཏུ་འགྱུར། །སྲིན་ནད་ཚ་གྲང་གང་ཡང་རེག་ཐབས་མེད། །ལྡང་དུབ་བྱེད་ཅིང་ཟུག་ལངས་
ལྷང་ལྷང་གཟེར། །རླུང་གི་ལྕེ་ནད་རྩུབ་འགགས་རོ་མི་ཚོར། །མཁྲིས་གྱུར་འབྲུམ་པ་དམར་
པོ་ཚ་བས་ཁྱབ། །བད་ཀན་ལྕེ་ནད་སྐྱ་འཇམ་ཆེར་མི་བདེ། །ལྕེ་ལྷག་ལྕེ་འོག་ལྕེ་འདྲ་སྐྲངས་
ཏེ་ན། །ལྕེ་སྐྲངས་ཁ་ཁེངས་ཆུ་འཛག་ཟས་མི་ཐར། །ལྕེ་ཆུང་བབས་པ་བ་ཡི་ནུ་ལྟར་རྒྱས། །
ལྐོག་འགགས་ཟས་སྐོམ་མི་ཐར་སྣར་འོང་སྐྱུག །དེ་འདྲ་ལྕེ་ཆུང་འགྲམས་སྐྲངས་ལྕེ་འདྲ་
ཡིན། །རྐན་འབྲུམ་རྐན་ཕུགས་འབྲུམ་བུ་ཆུ་སེར་འཛག །ཆུ་བུར་རྐན་དཀྱིལ་འབྲུམ་པ་སྙི་ལ་
རྡོལ། །རུས་སྦལ་ན་ཚ་མེད་པར་སྐྲེད་པོར་སྐྲངས། །རྐན་སྨིན་རྐན་ལས་རྣག་འཛག་གྱུར་པའོ། །
གྲེ་བ་རླུང་གྱུར་རྣ་བ་འགྲམ་པ་གཟེར། །གྲེ་བ་ནང་སྐྲངས་ཚ་ལ་སྐམ་པ་ཡིན། །ཁྲག་མཁྲིས་
སྐྲངས་དམར་ཚ་སྐྱེ་རྣག་ཏུ་འགྱུར། །བད་ཀན་སྐྲངས་མདོག་སྐྱ་ལ་ལྗན་ལྗིན་མང༌། །འདུས་པ་
གྲ་མས་གང་སེམས་འབྲུམ་བུ་འབྱུང༌། །འབྲས་ནད་ཕྱི་ནང་མྱུར་སྐྲངས་རྣག་ཏུ་འགྱུར། །རྨེན་
བུ་སྲ་ལ་ཟུག་ཆུང་སྨིན་མི་བྱེད། །བཅོས་ཐབས་གྲེ་མཆུ་བྲུད་ལ་ལྕགས་ཀྱིས་བསྲེག །སེང་
ཕྲོམ་འཇིབ་རྩི་འབྲས་གསུམ་སྦྲང་སྦྱར་བྱུག །ཤོ་རེ་གཡས་གཡོན་མཐའ་དྲས་མཁྲིས་པ་
བྱུག དར་གྱིས་བཙེམས་ལ་ཧེལ་སྲབ་སྦྱིན་ཆུས་བསྡམ། །གད་མོ་མི་དགོད་བལྡད་མི་དགོས་
པ་བཟའ། །རྨེན་པ་འཁྲིགས་ནས་སྐུད་པ་བཏོན་ལ་གསོ། །བད་ཀན་ཨ་རུ་སྒེ་གཤེར་ཐལ་
བ་བྱུག །ཡང་ན་ཨ་རུ་ར་དང་བུ་རམ་བྱུག །ཡང་ན་སྦྲང་རྩི་པ་ཋ་ཚ་གསུམ་བྱུག །སྲིན་ལག་
གཡོན་གྱི་ཚིགས་བར་འོག་ངོས་བསྲེག །གཅེན་ལ་ཁྲག་དབྱུང་སེང་ཕྲོམ་ལྡེ་གུ་བྱུག །ཁྲག་
རྒྱས་སྐྱུ་རུའི་ཐང་བཏང་མཆུ་རྩ་གཏར། །ཁ་ཤུ་བརྟོལ་ལ་ཁྱི་དབྲེ་ལྷམ་མཐིལ་གླན། །རྙིལ་ནད་
དོམ་མཁྲིས་རྒྱ་སྐྱེགས་བ་ཤ་ཀ །ཀྱི་ལྕེ་ཧོང་ལེན་ཞུ་མཁན་ཀ་ར་མར། །སྦྱར་བ་མཁུར་བཀང་
སྣ་ཡི་སྨན་དུ་བཏང༌། །གླ་སྒང་སྐྱེར་པ་བཅའ་སྒ་འབྲས་བུ་གསུམ། །འཇིབ་རྩི་སྦྲང་དང་སྦྱར་
25-1-271


བའི་མཁུར་བཀང་བཅང་། །སྐྱེར་པ་རུ་རྟ་གླ་སྒང་ཤུ་དག་བཙོད། །པ་ཋ་ཧོང་ལེན་ཡུང་བ་སྦྲང་
མཁུར་བཀང༌། །སོ་ནད་རླུང་གྱུར་སྣུམ་ལྡན་དུགས་ཀྱིས་བདུག །རླུང་འཇོམས་སྨན་དང་ཞུན་
མར་བསྐོལ་བས་བསྲེག །ཤིང་མངར་ཏིལ་སྦྲང་འོ་མ་མཁུར་བར་བཅང་། །འཕར་རྩ་མེས་
མནན་འབྲས་བུའི་སྨན་མར་སྦྱར། །ཁྲག་མཁྲིས་སོ་ནད་སྐྱུ་རུའི་ཐང་བཏང་གཏར། །འབྲས་
བུ་གསུམ་དང་རུ་རྟ་བ་ཤ་ཀ །རྒྱ་སྐྱེགས་སྐྱེར་པ་ཀ་ར་མཁུར་བཀང་བཅང༌། །ཙན་དན་དཀར་
དམར་ལྡེ་གུ་ཕྱི་ནས་བྱུག །བད་ཀན་སོ་བྲུད་བུལ་ཏོག་སྦྲང་རྩི་བྱུག །ཡང་ན་ཅོང་ཞི་སྦྲང་སྦྱར་
སྟར་བུ་བྱུག །སོ་འབྲས་སྲུབ་ཀ་རྒྱ་ཚྭ་ནལ་ཤམ་བྱུག །རྙིལ་ནད་ལྟར་བཅོས་མ་ཕན་བྲུད་ལ་
བསྲེག སོ་སྲིན་རྟ་སྦངས་ཕུར་མོ་སྤུ་དུགས་བྱ། །ཤིང་ཀུན་ནག་མཚུར་རུ་རྟ་བྱི་ཏང་ག །ས་རྫི་
ཀ་དང་མར་སྦྱར་མཁུར་བར་དགང་། །ཏིག་ཏ་ཐང་ཕྲོམ་སག་རྩི་ཤ་ཚིལ་ལམ། །ར་ཚིལ་སྦྱར་
བ་འཁར་གོང་མེས་བསྲེག་བདུག །ཡང་ན་ཐང་ཕྲོམ་སྒོག་སྐྱ་མུ་ཟི་དང༌། །གུ་གུལ་ནག་པོ་
གཤུལ་ཚིལ་དེ་བཞིན་བདུག །ཤ་ཚིལ་ཤིང་ཀུན་བྱི་ཏང་ག་གླན་བསྲེག །བྱེ་སྟག་བུ་རམ་རིལ་
བུ་སོ་སྟེང་བཞག །རྣ་དྲུང་སྲིན་ལག་ཕྱི་ཁྲིག་རུས་མགོ་བསྲེག །རླུང་འབྲེལ་བཙན་དུག་དྲོད་
སྨན་མར་བཙོས་བདུག །ཁྲག་མཁྲིས་འབྲེལ་ན་གང་ཉེའི་རྩ་ལ་གཏར། །ལྕེ་ནད་རླུང་གྱུར་
མཁུར་བཀང་སྣ་སྨན་བཏང༌། །མཁྲིས་གྱུར་མངར་བས་མཁུར་བཀང་ལྕེ་རྩ་གཏར། །བད་
གྱུར་སྐེ་ཚེ་ཚ་གསུམ་སྦྲང་སྦྱར་བྱུག །ལྕེ་ལྷག་ཕྱེད་བཅད་ལྕགས་བསྲེགས་ཐལ་སྨན་གདབ། །
ལྕེ་སྐྲངས་སྤྱང་ལྕེ་སྦལ་པའི་ཤ་ཁུས་བདུག །མ་ཕན་ལྐོག་མར་དུགས་བྱ་སྨིན་ནས་དབྲལ། །
དེ་ཤུལ་རྒྱ་ཚྭ་རུ་རྟ་ཤུ་དག་གདབ། །དེ་འོག་དྲོད་བཅུད་བསྟེན་པས་རྨེན་མི་ལྡང་། །རྒྱ་ཚྭ་ཐར་
ནུ་སྔོ་ཡི་ཚ་བ་གསུམ། །སྲུབ་ཀ་གཟེ་མ་ཕུར་ཐལ་སྔོན་བུ་དང༌། །རྩ་མཁྲིས་ཐལ་ཀ་རྡོ་རྗེ་སོ་
མ་ར། །སྲེ་མོང་ཤ་དང་དུར་བྱིད་དར་བཙགས་ཕྱེ། །དྲི་ཆུ་སྦྱར་བ་འཇམ་ཙམ་སྲོས་ལ་མནན། །
ལྕེ་ལ་བྱུག་ཅིང་རས་ལ་བསྐུས་ལ་གླན། །ཟུག་སྐྱེས་གྱུར་ནས་ལྕེ་ཡི་རྩ་ལ་གཏར། །ལྕེ་ལྷག་
25-1-272


ལྡིབ་འཐེན་སྐྲངས་སོགས་ལྕེ་ནད་སེལ། །ལྕེ་ཆུང་བབས་ན་སྤྱི་བོའི་སྐྲ་འཐེན་བསྲེག །རུ་རྟ་
རྒྱ་ཚྭ་ཤུ་དག་ན་ལེ་ཤམ། །གཡེར་མའི་ཕྱེ་གདབ་ཉ་ཁུའི་ཚ་བས་བདུག །ཁྲག་དབྱུང་མ་ཕན་
ཕྱེད་བཅད་ལྕགས་ཀྱིས་བསྲེག །ལྕེ་འདྲ་ཁྲག་དབྱུང་ཡ་བཀྵ་ར་གདབ། །རྐན་འབྲུམ་བཞར་
ལ་བུལ་ཏོག་ཕྱེ་མ་གདབ། །ཆུ་བུར་རུས་སྦལ་གཉིས་ལ་ཁྲག་ཕྱུངས་ལ། །ནག་མཚུར་སྐྱེར་
པའི་ཁཎྜ་སྦྲང་སྦྱར་བྱུག །རྐན་རྨེན་དྲལ་ལ་གཅོད་སྨན་ཕྱེ་མ་གདབ། །རྐན་དང་རྙིལ་ནད་བད་
ཀན་ཁྲག་འཕེལ་ཕྱིར། །མཁུར་བཀང་རྣོན་པོས་སྦྱང་ཞིང་གཏར་མང་གདབ། །གླ་སྒང་ཡ་
བཀྵ་ར་ལྕེ་མྱང་ཚྭ། །སྐྱེར་ཤུན་ལྡོང་རོས་སྦྲང་རྩིའི་མཁུར་བཀང་བཅང༌། །པ་ཏོལ་བཅའ་སྒ་སླེ་
ཏྲེས་འབྲས་བུ་གསུམ། །ཏིག་ཏ་ཀྱི་ལྕེ་སྦྲང་རྩིའི་མཁུར་བཀང་བཅང་། །རུ་རྟ་ཤུ་དག་སྟར་བུ་
འབྲས་བུ་གསུམ། །ཚ་བ་གསུམ་དང་རྒྱ་ཚྭ་བུལ་ཏོག་མཚུར། །སྦྲང་རྩིའི་མཁུར་བཀང་གཡའ་
འདྲུལ་རྣག་འཛག་སེལ། །གྲེ་བ་རླུང་གྱུར་རླུང་འཇོམས་སྨན་མཁུར་དགང༌། །ཁོང་དུ་བསྟེན་
ཞིང་རིལ་བུ་མུར་བར་བྱ། །ཁྲག་མཁྲིས་མངར་བསིལ་མཁུར་བཀང་མང་དུ་གཏར། །བད་
ཀན་འདུས་པ་རྩུབ་པའི་སྨན་གྱིས་བཅོས། །གྲེ་འབྲས་རྨེན་བུའི་དུགས་ལུམས་གཏར་རྗེས་
བསྲེག །རྣ་ཤལ་འོག་གཤོང་མེ་བཏབ་རོ་མི་ལྡང༌། །གྲེ་བའི་ནད་ཀུན་ཨ་རུ་བཙོ་བསྲེག་ཐང༌། །
མངར་བའི་ཐང་དང་རིལ་བུ་ཁ་མུར་བསྟེན། །ཉ་ཁུས་བདུག་ཅིང་སྒང་རྩ་སྐྱོར་གོང་གཏར། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་
ནད་གསོ་བའི་ལེའུ་སྟེ་སོ་གཉིས་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །མགུལ་ནད་ལྦ་བ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་རུ་བསྟན། །རྒྱུ་རྐྱེན་ཟས་དང་སྤྱོད་ལམ་གདོན་ལ་སོགས། །འདུ་བ་འཁྲུགས་པས་ལྦ་
བ་སྐྱེད་པར་བྱེད། །དབྱེ་བ་རླུང་མཁྲིས་ཁྲག་དང་བད་ཀན་ཚིལ། །འདུས་པའི་ལྦ་བ་གཡང་
25-1-273


ལྦ་བྱུར་ལྦ་བརྒྱད། །དེ་རྟགས་རླུང་གྱུར་མགོ་མང་ཁོང་སྟོང་ཞིང༌། །མཁྲིས་པའི་ལྦ་བ་ཕུར་ཚེ་
ཆུང་ལ་སྙི། །ཁྲག་ལྦ་དྲོད་བཅུད་དྲག་ཤུལ་རྐྱེན་གྱིས་སྐྱེ། །བད་ཀན་སྲ་མཁྲེགས་དལ་དུས་སྐྱེ་
བར་བྱེད། །ཚིལ་ལྦ་སྐྱེ་འགག་སྐྱེ་འབྲི་ཆེ་བ་སྟེ། །འདུས་པའི་ལྦ་བ་དབུགས་བསུབ་ངར་ངར་
འབྱུང༌། །གཡང་ལྦ་བདེ་ལ་དབྱིབས་ལེགས་བཀྲ་ཤིས་ལྡན། །བྱུར་ལྦ་མི་བདེ་མི་སྡུག་བཀྲ་མི་
ཤིས། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་ཚ་བ་སྨན་ཆང་ཕྱེ་མ་དང༌། །
དཔྱད་དང་སྔགས་དང་ལོག་གནོན་དྲུག་གིས་བཅོས། །དང་པོ་གཡག་རྒོད་ཨོལ་མདུད་ལ་
སོགས་པའི། །ཨོལ་པ་སྣ་ཚོགས་མ་རུལ་མ་བམ་པ། །ཚྭ་སྣ་སུག་སྨེལ་ཟི་ར་སླེ་ཏྲེས་རྣམས། །
ཞིབ་བརྡུངས་བཙོས་ཏེ་ལྟོ་རུ་བསྟེན་པས་འཇོམས། །སྨན་ཆང་ཨོལ་མདུད་རྣམ་པ་སྣ་ཚོགས་
དང༌། །སྨན་སྒ་ཉ་ཤ་བཟང་དྲུག་ཤིང་ཚ་དང༌། །ལྦ་ཚྭ་རུ་རྟ་ཨུཏྤལ་ཆུ་ལ་བསྡུས། །ཆང་སྦྱར་
མནན་ཏེ་ལངས་ནས་སྐོམ་དུ་བསྟེན། །ཕྱེ་མ་ཨོལ་མདུད་སྣ་ཚོགས་བཟང་པོ་དྲུག །ཝ་ཚྭ་ཤིང་
ཚ་རྒྱམ་ཚྭ་ཚ་བ་གསུམ། །ཨ་རུ་ཀར་བུར་རྟས་བསྒྱུར་ཆུ་སྐོལ་དབུལ། །ཡང་ན་ཨོལ་མདུད་
རྙིང་པ་རྒྱ་ཚྭ་དང༌། །ལྦ་ཚྭ་ཏིག་ཏ་སྤང་རྒྱན་བ་ཤ་ཀ །ཀ་ར་སྦྱར་བ་ལྟོ་སྟོང་བསྟེན་པར་བྱ། །གོ་
བོའི་སྟོད་ཁོག་གཡག་རྒོད་རྟ་དང་རྐྱང༌། །སྤྱང་ཀི་སོ་བྱ་ལ་སོགས་གྲེ་སྣ་ཚོགས། །ཚ་བ་གསུམ་
དང་བྲག་ཞུན་ལྦ་ཚྭ་དང༌། །བུར་དཀར་སྦྱར་བ་ལྟོ་སྟོང་ཆུ་སྐོལ་དབུལ། །ཟླ་ཕྱེད་བསྟེན་པས་
ལྦ་བ་རྩད་ནས་འབྱིན། །དཔྱད་དུ་དཔུང་སྐེ་རྣ་རྒྱབ་ལྦ་རྩ་གཏར། །རྣ་ཤལ་འོག་དང་ལྦ་མགོ་
ཨན་སྟོང་བསྲེག །སྔགས་བཅོས་སྨྲ་བཅད་བཟླས་ཏེ་ཕྱི་ནས་གདབ། །ༀ་ནག་ཏ་རག་ཏ་པུས་
པ་ཏ་སྭཱཧཱ། །ཆུ་ལ་བཟླས་ཏེ་ཁོང་དུ་བཏང་བར་བྱ། ༀ་མི་ཏི་མི་ཏི་ཤག་ཀྲུག་སྭཱཧཱ། །ༀ་ཁ་ཁུ་
ག་མ་ལ་རཀྟ་ནན། །ༀ་དམར་མོ་ཛིན་དུ་ཛིན་དུ་ཧཱུཾ་ཧཱུཾ་ཕཊ་ཕཊ་སྭཱཧཱ། །ཐོག་མར་དགུ་པ་ལྔ་
བརྒྱད་དེ་རྗེས་སྦྲེལ། །བཟླས་ཤིང་བཏབ་པས་ལྦ་བ་ཐམས་ཅད་འཇོམས། །ལོག་གནོན་ལྦ་
བ་ཤིན་ཏུ་བཅོས་དཀའ་སྲ། །ཚ་ཐུར་རྒྱབ་ལ་རུལ་བཅད་འབྲས་ལྟར་གསོ། །བྱེ་བྲག་རླུང་
25-1-274


ལྦ་མེ་བཙའ་སྣུམ་དུགས་བྱ། །མཁྲིས་པའི་ལྦ་བ་ཕུག་པས་འཚོ་བར་འགྱུར། །ཁྲག་གི་ལྦ་བ་
གཏར་དང་བསིལ་ཕྱེ་བསྟེན། །བད་ཚིལ་ལྦ་བ་སྐྱུགས་དང་རྩུབ་འཆོས་བྱ། །འདུས་པའི་ལྦ་བ་
ཀུན་གྱིས་གསོ་བ་སྟེ། །གཡང་ལྦ་མི་བཅོས་གཡང་ལོན་བྱ་བར་ཤིས། །བྱུར་ལྦ་གདོན་བཅོས་
རིམ་གྲོ་རྒྱ་ཆེར་གྱིས། །ཚོགས་བསག་དེ་འོག་གང་ལ་འཚམ་པས་བཅོས། །ཞེས་གསུངས་སོ། །
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལྦ་བ་བཅོས་པའི་ལེའུ་
སྟེ་སོ་གསུམ་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །དོན་སྣོད་གསོ་བའི་སྐབས་ལ་ཇི་ལྟར་བསླབ་པར་བགྱི། །འཚོ་
མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། །དྲང་སྲོང་རིག་པའི་ཡེ་
ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །དོན་སྣོད་ནད་ཀྱི་གསོ་
ཐབས་བསྟན་པ་ནི། །སྙིང་དང་གློ་བ་མཆིན་མཆེར་མཁལ་མ་ལྔ། །ཕོ་བ་རྒྱུ་མ་ལོང་གི་ནད་
བརྒྱད་ལས། །ཐོག་མར་དོན་གྱི་རྒྱལ་པོ་སྙིང་གསོ་བ། །རྒྱུ་དང་དབྱེ་བ་རྟགས་དང་བཅོས་
ཐབས་བཞི། །རྒྱུ་ནི་མྱ་ངན་སེམས་འཁྲུགས་ཡིད་མི་བདེ། །ལྟོ་ཆག་གཉིད་ཆག་ཞེ་སྡང་དྲག་
པོས་སྐྱེད། །དབྱེ་བ་སྙིང་འཕྱོས་སྙིང་གཟེར་སྙིང་ཚད་དང་། །སྙིང་ཆུ་སྙིང་འཐིབས་སྙིང་གི་
སྲིན་བུ་དང༌། །སྙིང་ནད་ཁ་ལེ་ནག་པོ་ཞེས་བྱ་བདུན། །དེ་རྟགས་སྙིང་འཕྱོས་མགོ་ན་བརྗེད་
ངས་ཆེ། །ཤེས་པ་འཕྱོ་ཞིང་དོན་མེད་སྙིང་མི་དགའ། །རེས་འགའ་མ་དྲིས་པར་ཡང་མུ་ཅོར་སྨྲ། །
རེས་འགའ་དྲིས་ཀྱང་དེ་ཡི་ལན་མི་ལྡོན། །མི་སྙན་ཚིག་གིས་དངངས་ཤིང་ཤུ་ཡིས་འདེབས། །
དབུགས་ཐུང་གཉིད་ཆུང་སྙིང་ཉིད་སྟོང་ངམ་སེམས། །སྙིང་གཟེར་ནད་ལ་རླུང་གཟེར་ཁྲག་
གཟེར་གཉིས། །མགོ་འཁོར་སྟོད་གཟེར་རྔམ་པ་ཐུང་ལ་ཆེ། །མིག་རྩ་རྒོད་ཅིང་ཁ་ལྕེ་སྐམ་
ལ་རྩུབ། །ཁྲག་གཟེར་ལྕེ་སྐམ་ཕུར་པ་བཙུགས་ལྟར་གཟེར། །འབུར་ཚུགས་བལྟ་ཞིང་རྔམ་
25-1-275


རྒོད་ཞེ་འཁུན་བྱེད། །སྙིང་ཚད་ཚ་བ་རྒྱས་དང་འཁྱིལ་བ་གཉིས། །རྒྱས་པ་མྱོས་འཐིབས་མིག་
དམར་རོ་སྟོད་གཟེར། །སྙིང་འཆུ་སྣ་སྐམ་བྲང་རྒྱབ་མེ་བཏང་འདྲ། །ཚ་བ་སྙིང་ལ་འཁྱིལ་བ་
ཚ་མྱག་བྱེད། །སྙིང་འཕར་གྲི་ཡིས་བཏུབས་སྙམ་ལྕེ་སྐམ་ཐུང༌། །སྙིང་ལ་ཆུ་སེར་བབས་ན་
སྨྲ་བ་མང༌། །ཁོང་འདར་གཉིད་ཆུང་སྙིང་རྡུང་གཡལ་སྟོང་གཡོ། །གླུ་དང་དགོད་ལ་དགའ་
ཞིང་ཚིག་པ་ཟ། །སྙིང་འཐིབས་བརྗེད་ངས་ཆེ་ཞིང་སེམས་ལས་ཆེ། །དང་ག་མི་བདེ་གཉིད་
ཆེ་རྡོ་བརྫངས་སེམས། །སྲིན་གྱུར་མིག་མདོག་ནག་ཅིང་ལྗན་ལྗིན་འཛག །སྙིང་འཕར་མུན་
འཐིབས་སོག་མེས་འབྲད་སྙམ་སེམས། །ཁ་ལེ་ནག་པོ་རྩ་སྟོང་ཚད་པ་ཆེ། །སྨྲ་ཉུང་སྤྲོ་ཐུང་
རྡེག་འདོད་འབུར་ཚུགས་བལྟ། །མགོ་བོ་ཕྱེད་ན་ན་ངོས་ཁ་ཡོར་འགྱུར། །བཅོས་ཐབས་དང་
པོ་སྙིང་ལ་རླུང་ཞུགས་པས། །འབྲས་བུའི་མར་ནི་བཟའ་བྱུག་འཇམ་རྩིར་བཏང་། །ཛཱ་ཏི་ཁ་
རུ་ཚྭ་ཡི་སྨན་མར་རམ། །རུས་(སྐྱེས་པ་དང་དར་མའི་རུས་ཆེན་གྱི་ལྷ་)ཆེན་ལོ་མར་འབྲས་བུའི་སྨན་མར་
ལ། །ཤིང་ཀུན་ཛཱ་ཏི་ཁ་རུ་ཚྭ་དང་སྒ། །སླེ་ཏྲེས་གོ་སྙོད་བུར་རྙིང་བཏབ་ལ་བཏང༌། །བཙན་
དུག་ཨ་རུ་གླ་རྩི་རུ་རྟ་དང༌། །ཤིང་ཀུན་ཤུ་དག་ཛཱ་ཏི་གུ་གུལ་དང༌། །བུ་རམ་སྦྱར་བའི་རིལ་
བུ་ཐབས་ལྡན་བསྟེན། །དྲུག་བདུན་སྙིང་སྟོད་སྙིང་ལོགས་མེ་ཐུར་བྱ། །བུད་མེད་སྨྲ་བརྗོད་
མི་ཉན་ཁ་ཡེད་སྤང༌། །རླུང་གཟེར་ཛཱ་ཏི་གོ་སྙོད་ཞོ་ཤའི་ཐང༌། །ཕྱེ་མ་དེ་སྟེང་རུ་རྟ་ལི་ཤི་དང༌། །
ཀ་ཀོ་ལ་དང་ཤིང་ཀུན་བུ་རམ་སྦྱར། །སྙིང་གསང་མདུན་རྒྱབ་གང་དུ་བབས་པ་བསྲེག །ཁྲག་
གཟེར་ཞོ་ཤ་སླེ་ཏྲེས་ཨ་རུའི་ཐང༌། །ཕྱེ་མ་ཙན་དན་ཨ་གར་སྙིང་ཞོ་ཤ །གེ་སར་གཉིས་དང་ཛཱ་
ཏི་ཀ་ར་སྦྱར། །ཨ་སོ་རྩེ་ཆུང་གཏར་ལ་དྲུག་བདུན་བསྲེག །བཅོས་འཕྱིས་སྙིང་ནང་ཁྲག་གིས་
གང་སྟེ་འཆི། །སྙིང་ལ་ཚ་བ་རྒྱས་ན་སྙིང་རྩ་གཏར། །ག་བུར་བདུན་དགུ་ཉི་ཤུ་རྩ་ལྔ་སྦྱར། །ཚ་
བ་འཁྱིལ་ན་ག་བུར་སྙིང་ཞོ་ཤ། །ཛཱ་ཏི་ཅུ་གང་དོམ་མཁྲིས་ཀ་ར་སྦྱར། །ཐོང་རྩ་ཨ་སོ་ལྕེ་འོག་
རྩ་ལ་གཏར། །སྙིང་གི་ཆུ་སེར་སེ་འབྲུའི་(རྒྱམ་ཚྭ། ཁ་རུ་ཚ། ལྕེ་མྱང་ཚ། པི་ལིང་། ཨ་རུ་ར། ཀ་ར་)ཕྱེ་མ་སྦྱར།  །
25-1-276

 
དཀར་ནག་མཚམས་དང་སྡུད་སྒོ་བདུན་པ་བསྲེག །འབྲས་གསུམ་སེང་ལྡེང་མར་གྱི་ཆུ་སེར་
སྐེམ། །སྙིང་འཐིབས་སྐྱུགས་བྱ་ཆུ་སྐོལ་མང་དུ་བཏང་། །སེ་འབྲུ་དབྱི་མོང་ཚ་བ་གསུམ་གྱི་
ཐང༌། །རྒྱམ་ཚྭ་དྲོད་སྨན་ཁ་རུ་ཚྭ་ཐང་བཏང༌། །ཤུ་དག་ཤིང་ཀུན་རྒྱམ་ཚྭ་ཁ་རུ་ཚྭ། །དོང་གྲ་
སུག་སྨེལ་ཡ་བཀྵ་ར་དང༌། །ལ་ལ་ཕུད་དང་དྲོད་སྨན་སྦྲང་སྦྱར་བཏང༌། །སྙིང་སྲིན་བྱི་ཏང་ག་
དང་ཤིང་ཀུན་དང༌། །མ་རུ་ཙེ་དང་སྒོག་སྐྱ་ལང་ཐང་རྩེ། །ཛཱ་ཏི་ཞོ་ཤ་སྤྲུ་མའི་ཁུ་བས་དབུལ། །
བྱི་ཏང་ཀ་དང་རུ་རྟ་བ་ཆུར་སྦྱར། །སྙིང་གི་སྲིན་ནད་ཚ་གཡའ་གཟེར་འཁྱུག་སེལ། །ཁ་ལེ་
ནག་པོ་སྐྱུ་རུ་ར་ཡི་ཐང་། །རྒོད་ཀྱི་ལྟོ་སྟོང་པ་ཡི་ཚ་བ་བཏང༌། །ཞོ་ཤ་གསུམ་གྱི་མར་སྦྱར་སྙིང་
རྩ་བསྲེག །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་སྙིང་ནད་གསོ་བའི་ལེའུ་སྟེ་སོ་བཞི་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །དོན་ལྔའི་བློན་པོ་གློ་ནད་གསོ་བ་ལ། །རྒྱུ་དང་དབྱེ་བ་རྟགས་དང་བཅོས་
ཐབས་བཞི། །རྒྱུ་ནི་རླུང་མཁྲིས་བད་ཀན་ཁྲག་དང་ཆུ། །རུལ་སྐྱུར་ཟོ་མར་ཚྭ་དང་དུ་བ་དང༌། 
ཆམ་པ་འགྲམས་དང་དྲག་ཤུལ་རྣམས་ཀྱིས་བསྐྱེད། །དབྱེ་བ་ཐང་པོ་སྐྱ་རྦབ་ཚ་བ་དང༌། །ཆུ་
ཤོར་ཐེས་པོ་གློ་གཅོང་གློ་རྒྱས་དང༌། །བུང་ཚང་ཅན་དང་རྣམ་པ་བརྒྱད་དུ་བཤད། །དེ་རྟགས་
རླུང་གློ་ཐང་པོ་རྒྱུན་དུ་ལུ། །འགོགས་དཀའ་སྦུ་གསོག་རྒོངས་དང་ཐོ་རངས་མང༌། །སྐྱ་རྦབ་
གློ་མང་མིག་ལྕིབས་རྐང་བོལ་གཡོ། །ཚ་བ་ཚ་སུབས་ཚ་གཟེར་གཉིས་སུ་དབྱེ། །ཚ་སུབས་
རྩ་ཆུ་ཚ་ལ་རོ་སྟོད་རྒྱངས། །ལུད་པ་ཚ་བྲོ་ལྦུ་ཆུང་མཁྲིས་པ་འོང༌། །སྟོན་དུས་དྲག་ཤུལ་དྲོད་
བཅུད་ཤིན་ཏུ་གནོད། །ཚ་གཟེར་ཉལ་བ་མི་བདེ་དབུགས་ཀྱིས་ཐེག །ལུད་པ་དམར་སེར་ལུ་
ཞིང་སྐབས་སུ་གཟེར། །ཆུ་ཤོར་ངལ་ཆུ་གློ་ལ་ཤོར་བ་སྟེ། །སྟོད་རྒྱངས་མགོ་ན་མིག་སྤྲིན་སེར་
པོར་འོང༌། །དང་ག་མི་བདེ་གློ་མང་རྔམ་པས་ཐེག །ཤ་སྐམ་རྔུལ་མེད་གཏམ་བར་བཅད་ཅིང་
25-1-277


སྨྲ། །གཞུག་ཏུ་ལུད་པ་ཤ་སྐྱོ་གློ་ལས་འཛག །ཐེས་པོ་ལུད་པ་སྔོ་ལྗོབ་མང་དུ་ལུ། །གྱེན་ལ་
དབུགས་ཐེག་རོ་སྟོད་ལྕི་ལ་ཁེངས། །ལུད་པ་ཐོན་རྗེས་ཅུང་ཟད་བདེ་སྙམ་བྱེད། །གློ་གཅོང་
ཤ་སྐེམ་ཤེད་ཆུང་འགུལ་མི་ནུས། །བྱི་ལའི་མགུལ་འདྲ་ཟས་སྨན་ཕན་སྐྱེད་ཆུང༌། །གློ་རྒྱས་
མིག་དམར་ལྕེ་མཆུ་མཁུར་ཚོས་སྨུག །སྐད་འཛེར་སྟོད་རྒྱངས་རྔམ་རྒོད་ལུད་པ་དམར། །བུང་
ཚང་ལུད་པ་ཤེ་རུལ་རྣག་ཏུ་འབྱུང༌། །ཡང་ན་སྔོན་པོ་ལྦུ་བ་ཅན་གསེབ་ཏུ། །ཉ་མིག་ལྟ་བུའི་
རྣག་དང་འདྲེས་པར་ལུ། །སྤྱིར་ན་གློ་བ་བད་ཀན་ཡུལ་ཡིན་པས། །དབྱར་དུས་བདེ་ལ་དགུན་
དུས་ན་བ་དང༌། །ཉིན་པར་བདེ་ལ་མཚན་མོ་ན་བ་ཡིན། །དེ་རྣམས་བཅོས་ཐབས་རླུང་གློ་
བསིལ་བཅུད་བསྟེན། །མངར་གསུམ་(ཛཱ་ཏི་ཤིང་ཚ་སུག་སྨེལ་པི་པི་ལིང་པྲི་ཡང་ཀུ་བ་མར་གྱི་)ལྡེ་གུ་འབྲས་
བུའི་སྨན་མར་སྦྱར། །གསོ་བ་དཀའ་ལ་བཞི་ལྔ་མེ་ཡིས་བསྲེག །གློ་ནད་སྐྱ་རྦབ་སྟར་བུའི་(ཛཱ་
ཏི་སུག་སྨེལ་ཀ་ཀོ་ལ་ཨ་རུ་ལྕགས་ཕྱེ་སྦྲང་གི་)ལྡེ་གུ་དང༌། །ཅུ་གང་(གུར་གུམ་ལི་ཤི་སུག་སྨེལ་ཤིང་མངར་ཨ་རུ་ལྕགས་
ཕྱེ་སྦྲང་གི་)ལྡེ་གུ་བྱ་མིག་ལྔ་པ་བསྲེག །ཚ་སུབས་ཙན་དན་(བསིལ་གསུམ་ཨུཏྤལ་གླ་སྒང་རྒུན་འབྲུམ་ཤིང་
མངར་དང་།)བརྒྱད་དང་(ཨ་རུ་གི་ཝཾ་གུར་གུམ་ཅུ་གང་ཤིང་མངར་རྒུན་འབྲུམ་སྲོ་ལོ་སྤང་རྒྱན་འབུ་སུ་ཧང་དང་)བཅུ་པ་
དང༌། །ཨ་ཀྲོང་(སྟར་བུ་ཅུ་གང་རུ་རྟ་ཤིང་མངར་ཙན་དན་བྱི་ཚེར་ཀ་ར་)བརྒྱད་དང་མར་གསར་ཤ་གསར་
བསྟེན། །ཚ་གཟེར་དེ་བཞིན་བཅོས་ཤིང་གཏར་བར་བཟང་། །བཤལ་དང་ཆུ་ལྕག་ཉི་ཤུ་རྩ་
ལྔ་སྦྱར། །ཆུ་ཤོར་ནད་ལ་ཤིང་མངར་ཡུང་བ་གསུམ། །སྔོན་དུ་བཏང་ལ་དེ་རྗེས་གློ་སྐྱུགས་བྱ། །
ཤིང་མངར་འདམ་བུ་ཀ་ར་ལི་ག་དུར། །ཅུ་གང་གུར་གུམ་དོམ་མཁྲིས་ཙན་དན་རྣམས། །ཀ་
ར་སྦྱར་བ་བཙོད་ཀྱི་ཁུ་བས་དབུལ། །རྗེས་ལ་སྲོ་ལོ་ག་དུར་འདམ་བུ་མཚལ། །བཅད་འབྱོར་
གུར་གུམ་ཀ་ར་འོ་མས་དབུལ། །ཝ་ལ་སོགས་པའི་གློ་བ་སྣ་ཚོགས་བཏང༌། །བད་ཀན་གློ་
སྦུབས་ཞུགས་པའི་ཐེས་པོ་ལ། །(སྤྱང་ཚེར་རི་ཤོ་དུར་བྱིད་ཁུ་བར་རྒྱམ་ཚྭ་པི་ལིང་བཏབ་པའི་)སྐྱུགས་ཀྱིས་ཕོ་
བ་གློ་སྦུབས་བད་ཀན་སྦྱང༌། །སྟར་བུ་པཉྩས་ལུད་པ་གྱེན་དུ་དྲང་།༌། རྗེས་ལ་མཱུ་ལ་ལྔ་(མ་ནུ་གླ་
25-1-278


སྒང་སྒེ་གཤེར་བ་རུ་ག་དུར་)འམ་ཅུ་གང་(ཤིང་ཚ་སུག་སྨེལ་པི་ལིང་སྦྲང་)ངམ། །པི་པི་ལིང་གི་ལྡེ་གུ་བསྔགས་
པ་ཡིན། །ཤ་གསར་མར་གསར་སྦྲང་རྩི་ལྡན་པ་བཏང༌། །ཐེས་པོ་ལ་སོགས་གློ་ནད་རླུང་ལྡན་
གང༌། །བ་འོ་བཞོས་ཐོག་རླུང་དུས་བཏང་བར་བསྔགས། །གློ་གཅོང་གློ་མིག་ལུད་པའི་གཅོང་
འདྲིལ་བས། །ཨ་ཀྲོང་ལུམས་སམ་སྨན་ཆུ་ཆུ་ལུམས་བསྟེན། །དེ་ནས་སྟར་བུ་པཉྩས་གྱེན་དུ་
དྲང༌། །ལུད་པ་སྐྱ་སྔོ་སྐམ་པོ་མང་ཐོན་འཚོ། །མ་ཐོན་ལུམས་དང་འདྲེན་སྦྱོར་བསྐྱར་ལ་སྦྱང༌། །
སྐབས་སུ་ཅུ་གང་ལྡེ་གུ་སྦྱར་བའམ། །ཕྱེ་མ་བ་འོ་སྦྱར་བ་རེ་ལུག་གི །གློ་བ་མ་སུངས་རྒྱངས་
ཏེ་བཏང་བར་བྱ། །གླ་དགོ་བ་ཤ་གྲོ་ཆང་ཡོས་ཆང་བསྟེན། །གློ་རྒྱས་རྩེ་ཆུང་དྲུག་འགོ་མང་དུ་
གཏར། །ལུད་པ་དམར་ན་རྒྱ་སྐྱེགས་འབྲི་མོག་བཙོད། །སྲོ་ལོ་དཀར་པོའི་བསྡུས་ཐང་ཡང་
ཡང་བཏང༌། །ཙན་དན་(དཀར་དམར་ཅུ་གང་གུར་གུམ་བ་ཤ་སྤང་རྩི་སྲོ་ལོ་བོང་ང་ཀྱི་ལྕེ་ཨུཏྤལ་སྐྱུ་རུ་)བཅུ་གཅིག་
ཕྱེ་མ་ཐང་དེས་དབུལ། །རྗེས་ལ་གཏར་ཞིང་ཉི་ཤུ་རྩ་ལྔ་(དམར་གསུམ་དང་མཚལ་བསྣན་ལ་)སྦྱར། །
ཅིས་ཀྱང་སྐྱེད་ཆུང་སྨུག་པོར་བྱེར་སྲིད་པས། །སྨུག་པོའི་ཁྲག་བཤལ་བཅོས་ཐབས་བསྔགས་
པ་ཡིན། །ཁྲག་ཏུ་བརྡོལ་ན་པུཥྤ་(སྲན་མའི་མེ་ཏོག་སྐྱེར་པའི་མེ་ཏོག་གུར་གུམ་དོམ་མཁྲིས་ཚོས་ཁུ་)ལྔ་སྦྱོར་རམ། །
ཀར་ཤ་པ་ནི་(ལྔའི་ཐལ་བ་དོམ་མཁྲིས་གུར་གུམ་མཚལ་ཟབ་ཐལ་)མདོངས་ཐལ་ལྔ་(རྨ་བྱ་རྦབ་ཟེར་བྱ་མཚལ་ཕུག་
རོན་སྒྲོ་འགྲོན་བུ་ཕུར་མོའི་ཐལ་བའི་)སྦྱོར་བསྔགས། །མང་དུ་གཏར་ཞིང་རོ་སྟོད་ཆུ་ཡིས་བྲན། །ཟས་
སྐོམ་བསིལ་བསྟེན་སྤྱོད་ལམ་དྲག་ཤུལ་སྤང༌། །བུང་ཚང་རྣག་ཉུང་བསྐམས་པས་སྐོམས་སམ་
བལྟ། །ཨ་ཀྲོང་(ཙན་དན་སྐྱུ་རུ་རུ་རྟ་སྟར་བུ་བསིལ་གསུམ་ཤིང་མངར་བྱི་ཚེར་)བཅུ་པ་ཟངས་ཐལ་(མུ་ཟི་ཤ་རུ་སྤེན་
མ་སྲོ་ལོ་ཨ་ཀྲོང་)སྦྱར་བ་དང༌། །ཀླད་པ(ཝ་དང་སྲིན་བྱའི་མུ་ཟི་ཟབ་ཐལ་སྲོ་ལོ་ཅུ་གང་སྤང་རྒྱན་སྟར་བུ་)འི་སྦྱོར་བ་
རྣག་སྐེམས་གློ་གསོའི་མཆོག །ཉི་ཤུ་རྩ་ལྔ་(ལ་གོ་དོར་གསུམ་དང་དོམ་མཁྲིས་)མན་ངག་ལྡན་པས་སྦྱར། །
རྣག་བུངས་ཆེ་འམ་བསྐམས་པས་མ་སྐོམས་ན། །སྟར་བུ་པཉྩ་(པ་ཡག་རྩ་བ་བུལ་ཏོག་ལ་ཆ་)མན་
ངག་ལྡན་པས་དྲང༌། །རྣག་ཁྲག་འདྲེས་ན་ཤུ་མོ་ཟ་སྨན་(བ་མར་གྱིས་འབྲི་མོག་གི་རྩི་སླངས་ལ་རྒྱ་སྐྱེགས་
25-1-279


དང་བོང་ཡར་འོ་མ་ཕུལ་དོ་དོ་ཤུ་མོ་ཟ་ཚོམས་གཅིག་ལི་ཤི་ཀ་ར་སྦྱར་བ་)མཆོག །ཅུ་གང་ཨ་ཀྲོང་ཀ་ར་ཨ་རུ་ར། །
བོང་ཡར་འོ་སྦྱར་རེ་འུའི་གློ་བ་རྒྱངས། །གློ་གསོ་ཁྲག་ཏུ་ལུ་ལ་བསྔགས་པ་ཡིན། །ཝ་གློ་འོ་
མར་(ཨ་རུ་ཅུ་གང་མུ་ཟི་དོམ་མཁྲིས་ཤིང་མངར་སྦྲང་བོང་ཡར་འོ་མ་)སྦྱར་ཞོ་དེ་བཞིན་ཤིས། །ཁྲག་མེད་རྣག་ཏུ་
བྱུང་ན་(རྣག་སྐྱུགས་ཀྱིས་)སྦྱང་བ་མཆོག །སྒོང་སྤྲིས་སྦལ་སྒོང་ལྟ་བུའི་རྣག་ཡུལ་འཐོན། །དེ་རྗེས་
གློ་གསོ་ཁྲག་ཏུ་བྱུང་ན་བཅད། །རྣག་གཞུག་མ་ཐོན་ཟངས་ཐལ་(ཝ་དང་སྲིན་བྱའི་ཀླད་པ་མུ་ཟི་སག་རམ་
རྩི་སྲོ་ལོ་པི་ལིང་སླ་ངར་སྲེགས་པ་དང་སྤེན་མ་ཤ་རུའི་ཐལ་བ་སྤང་རྒྱན་ཀ་ར་སྦྲང་)སྦྱོར་བ་དང༌། །ཉི་ཤུ་རྩ་ལྔ་ལྟག་
པ་སྤྲད་ལ་སྐམ། །རླུང་དང་ལྡན་ན་སྲོ་ལོའི་(བྲེ་ཕྱེད་ལ་ཨ་རུ་ཉི་ཤུའི་སྨན་མར་ལ་བཟང་དྲུག་པི་ལིང་སྦྲང་)སྨན་
མར་སྦྱར། །གློ་མང་མི་འགོག་ཅུ་གང་བཞི་པ(་ཤིང་མངར་སྟར་བུ་རུ་རྟ)ས་བཅད། །ཅེས་གསུངས་སོ། །
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གློ་ནད་བཅོས་པའི་
ལེའུ་སྟེ་སོ་ལྔ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག བཙུན་མོ་ལྟ་བུ་མཆིན་པའི་གསོ་ཐབས་ལ། །རྒྱུ་དང་དབྱེ་བ་རྟགས་དང་
བཅོས་ཐབས་བཞི། །རྒྱུ་ནི་ཚ་སྐྱུར་ཟས་དང་དྲག་ཤུལ་སྐྱེད། །དབྱེ་བ་ལེབ་རྒན་རྒྱས་དང་ལྡེམ་
བུ་དང༌། །དུག་ཐབས་ཆུ་ཤོར་རྐུན་བུ་འོར་ལྷུང་དང༌། །ཁ་ལུད་གཞུང་རེངས་མཆིན་གྲུམ་ནག་
པོ་དང༌། །མཆིན་ནད་ཧལ་སྐེམ་མཆིན་དྲི་དཀར་ནག་དང༌། །གནད་མཆིན་རྩ་བྱེར་མཆིན་
རླུང་མཆིན་རྒུད་དང༌། །རླན་གྲང་གླང་དགུར་གྲང་སྦོས་བཅོ་བརྒྱད་དོ། །དེ་རྟགས་མཆིན་ནད་
ལེབ་རྒན་རྒྱས་པ་དེ། །མཆིན་སྟེང་རྩིབ་ཐུང་གཡས་གཡོན་སྦོ་ཞིང་ན། །ལུས་དང་འཚོགས་
མ་ལྕི་ཞིང་རོ་སྟོད་གཟེར། །སྟེང་བཏོན་རྡིབ་སྙམ་འོག་བཅུག་འབུགས་སྙམ་བྱེད། །ཙོག་པུར་
འདུག་ན་ཐུར་ལ་འཐེན་པ་འདྲ། །ཤ་སེར་མཁལ་རྐེད་མི་བདེ་སྒྱིད་པ་འཁུམས། །མཆིན་ནད་
ལྡེམ་བུ་ན་བ་མི་ཚོར་བར། །གཉིད་མེད་ཁོང་སྙོམ་ལུས་ལྕི་ཟས་མི་འདོད། །ཁྲག་འབྲོས་ཤ་
25-1-280


དང་རུས་པ་ཁད་ཀྱིས་སྐམ། །དུག་ཐབས་མིག་དམར་གདོང་སྔོ་རྩིབ་སྟེང་ཟུག །ཕོ་མཆིན་
གང་སྙམ་འཇུ་དཀའ་ཟོས་ཚེ་ན། །བྲུན་སྐམ་བོལ་གཡོ་མུར་གོང་མཐིལ་བཞི་སེར། །གཞུག་ཏུ་
མཆིན་པ་རུལ་ནས་དུད་ཁུར་ལུ། །ཆུ་ཤོར་ཁོང་སྦོ་རོ་སྟོད་བརྫིས་ན་ཕན། །སྒལ་རེངས་མཆིན་
པ་འཕྱོངས་ཤིང་གཡལ་མི་ཐོན། །ཕོ་མཆིན་སྟོང་སྙམ་དྲོས་དྲགས་མགོ་བོ་ན། །རྐུན་བུ་རྐང་
པ་གྲང་ལ་རོ་སྟོད་གཟེར། །མིག་གིས་ཡས་ལྕིབས་མི་ཐེག་ཉམ་ཆུང་སྙ། །སྟོད་གང་དཔུང་
མགོ་གཟེར་ལ་སྐེ་རྩ་རེངས། །ཁ་ཟས་ཟོས་ན་བག་རེ་ཕན་སྙམ་བྱེད། །འོར་ལྷུང་གཉིས་ལས་
མཆིན་ཁྲག་རྐེད་པར་ལྷུང༌། །རྐེད་པ་འཁོར་ཞིང་འགུལ་ན་ཟུག་ཆེ་གཟེར། །རྐང་པར་ལྷུང་ན་
དཔྱི་སྦྲིད་སྐམ་ཁོལ་བྱེད། །རྐེད་པ་ཚ་ལ་ཆུ་རྒྱུས་ན་བར་འོང༌། །ཁ་ལུད་གློ་དང་ཕོ་བར་ལུད་པ་
གཉིས། །གློར་ལུད་སྟོད་རྫིངས་མིག་དམར་མཆན་འོག་གཟེར། །ཁྲག་ཏུ་ལུ་ཞིང་སྐབས་སུ་
རྣག་ཁྲག་འཛག །ཕོ་བར་ལུད་ན་བསྡམས་ཤིང་གཟེར་ནས་ན། །དགྱེ་དགུ་མི་ཤེས་ཚ་ཙེག་
སྒྲེག་པ་འོང༌། །ལྡང་དུབ་ཆེ་ལ་བསུས་པ་ལྟར་མི་མངོན། །གཞུང་རེངས་རྐང་ལག་རེངས་ལ་
ལྷུ་ཚིགས་ན། །དགྱེ་དགུ་མི་ཤེས་སྟོད་གཟེར་ལྟག་པར་དགྱེ། །མཆིན་གྲུམ་ནག་པོ་ལུས་ཀུན་
བརྡུངས་སྙམ་བྱེད། །རྐང་བཤལ་འགུལ་ན་མི་བཟོད་སྒུར་པོར་འགྲོ། །ཧལ་སྐེམས་ལུས་པོ་ཟ་
འདར་གཞོགས་གཡས་ལྕི། །མིག་མདངས་ཆུང་ཞིང་འཛུར་ལ་སྐོམ་དད་ཆེ། །མཆིན་དྲི་དཀར་
པོ་ལྷེན་སྣ་གཡས་གཡོན་ན། །གཉིད་ཆེ་ཁ་སྐམ་རྩིབ་ལོགས་གཟེར་ནས་ན། །མཆིན་དྲི་ནག་
པོ་སྲོག་རྩ་སྙིང་མི་བདེ། །ཁོང་པ་སྟོང་སྦོས་ལྷེན་སྣར་འདྲིལ་ནས་ན། །གནད་མཆིན་རྩ་བྱེར་
སྟོད་གཟེར་ཐལ་གོང་ན། །སྟོད་གང་ཕོ་མཆིན་མི་བདེ་རྩེ་ཆུང་རེངས། །གློ་བྱུང་མཆིན་པ་
འཕྱོངས་ལ་བཟོད་ཐབས་མེད། །བྱད་སྨུག་སྣ་ཁྲག་འཛག་ཅིང་ཅི་ཟོས་གནོད། །མཆིན་རླུང་
གཡལ་བྱུང་རྗེས་ལ་མཆི་མ་འཛག །ཕོ་མཆིན་འདྲེས་སྙམ་བྱེད་ཅིང་ན་ལ་འཕྱོངས། །རྒོངས་
དང་ཐོ་རངས་ན་ཞིང་གྲང་ན་སྐྱིག །མཆིན་རྒུད་ཟས་ཟོས་རྗེས་ལ་མཆིན་པ་ན། །ཉམ་ཆུང་ཆུ་
25-1-281


དྲོན་སྐྱུག་ལ་གཡལ་མི་ཕྱིན། །མཆིན་པ་རླན་གྲང་པུས་མོ་གྲང་ཞིང་ཟ། །སྟོད་གང་གློ་སྐམ་ལུ་
ཞིང་དགྱེ་དགུ་དཀའ། །གླང་དགུར་ལུས་སྐྲངས་བྱད་སྦོས་ལྕེ་མཆུ་སྐྱ། །མགོ་འཁོར་སྐྲ་སྨིན་
ཟ་ལ་སྣ་ཤུ་འབྱུང༌། །གྲང་སྦོས་ཁོང་པ་གྲང་ལ་བྱད་ཤ་སྦོས། །བཅོས་ཐབས་མཆིན་ནད་ལེབ་
རྒན་རྒྱས་པ་ལ། །གི་ཝཾ་སྐྱུ་རུ་ར་ཡི་ཐང་བཏང་ལ། །ར་ས་ཡ་ན(་དོང་ག་དུར་བྱིད་ཧོང་ལེན་ཁྲོན་བུ་ལྕུམ་
རྩ་ཐར་ནུ་རེ་ལྕག་སྐྱེར་པ་ཨ་རུ)འི་བཤལ་བཏང་རུ་ཐུང་གཏར། །མཁྲིས་ཆེན་(དོམ་མཁྲིས་བྲག་ཞུན་ཨ་རུ་མར་
གསར་)སྦྱོར་བ་རྒུན་འབྲུམ་ཐང་གིས་དབུལ། །ཚ་བ་ཞེན་ཆེ་ག་བུར་བདུན་པ་སྦྱར། །ཉལ་བའི་
སྔས་སྨད་ཁ་ཟས་བསིལ་དུ་བསྟེན། །མཆིན་ནད་ལྡེམ་བུ་ཨ་རུ(་བར་སྐྱུར་སླེ་ཏྲེས་ཏིག་ཏ་བོང་ང་ཧོང་ལེན་
ལྕུམ་རྩ་དོང་ག་དུར་བྱིད་སྦྱར་བ)འི་ཐང་ཁྲུས་བྱ། །གཡུ་རྙིང་ཅུར་ནི་(ག་བུར་ལི་ཤི་ཙན་དན་དོམ་མཁྲིས་གླ་རྩི་རྒུན་
འབྲུམ་གསེར་མེ་)བྲག་ཞུན་(གུར་གུམ་བ་ལེ་ཨ་རུ་པྲི་ཡང་ཀུ་)ལྔ་པ་སྦྱར། །དུག་ཐབས་སྨྱུང་བྱས་གསེར་
ཕུད་(བསྡུས་ཁུར་བུལ་ཏོག་བཏབ་པའི་)སྐྱུགས་ཀྱིས་དྲང༌། །གཡུ་རྙིང་(གུར་གུམ་ལི་ཤི་ཨུཏྤལ་གེ་སར་གསུམ་
)བདུན་པ་སྙི་བའི་(མེ་ཏོག་སུམ་ཅུ་ཏིག་སེང་ལྡེང་ཤིང་ཚའི་)ཐང་གིས་དབུལ། །རྗེས་གཅོད་གི་ཝཾ་(ཙན་
དན་དཀར་དམར་རེ་རལ་སྔོན་བུ་མཚལ་བཅད་འབྱོར་གཉིས་དང་)བརྒྱད་པ་བ་འོས་དེད། །མཆིན་པ་ཆུ་ཤོར་
ར་གསུམ་བ་ལེའི་(དུག་ཉུང་ཏིག་ཏ་རུ་རྟ་ཧོང་ལེན་ཨ་རུ་ར་སླེ་ཏྲེས་)ཐང༌། །རུ་ཐུང་རྩེ་ཆུང་མཆིན་མཁྲིས་
འདོམ་རྩ་གཏར། །གློ་དང་སྡོངས་ན་ཅུ་གང་ལྡེ་གུ་སྦྱར། །རྗེས་ལ་ཚིགས་པ་ལྔ་དང་དགུ་པ་
བསྲེག །མཆིན་ནད་རྐུན་བུ་ཨ་སོ་གཉིས་ལ་གཏར། །བ་ལེ་ཀ་(སླེ་ཏྲེས་ཨ་རུ་རྒུན་འབྲུམ་བོང་ང་ཧོང་ལེན་
ཏིག་ཏ་གླ་སྒང་དུག་ཉུང་ཀྱི་ལྕེ་དུར་བྱིད་ཁྲོན་བུ་)ཡི་བཤལ་བཏང་ཕྲན་བུ་གཏར། །མཆིན་པ་འོར་དུ་ལྷུང་
བ་གཉིས་ཀ་ལ། །འབྲས་བུ་གསུམ་གྱི་(དུར་བྱིད་ཧོང་ལེན་ཁྲོན་བུ་)བཤལ་བཏང་བྱིན་ལོང་གཏར། །
དམར་གསུམ་ཕྱེ་མ་དར་ཡ་ཀན་(མི་དོམ་མཁྲིས་བྲག་ཞུན་གྱི་)ཐང་བཏང་། །མཆིན་ཁྲག་གློ་ལ་ལུད་
ན་(བ་ལེ་ཀ་ཨ་རུ་སྐྱུ་རུ་ལྕུམ་རྩ་དུར་བྱིད་དོང་ག་)ཐང་ཁྲུས་བྱ། །གློ་རྩ་རུ་ཐུང་གཏར་ཞིང་བསིལ་སྨན་
བཏང༌། །ཕོ་བར་ལུད་ན་རུ་ཐུང་འདོམ་རྩ་གཏར། །ར་གསུམ་(དུར་བྱིད་ཧོང་ལེན་གྱི་)བཤལ་དང་
25-1-282


བ་ལེ་ཀ་(གླ་སྒང་རྒུན་འབྲུམ་ཧོང་ལེན་ཨ་བི་ཥ་)ཐང་བཏང༌། །མཆིན་པ་གཞུང་རེངས་དུར་ལྕགས་ཐང་
དུ་བཏང༌། །རུ་ཐུང་དྲུག་འགོ་ཕོ་གདུང་གཏར་བར་བྱ། །བྱ་བྲུན་སྦང་སྐམ་དུགས་ཀྱིས་གཞུང་
ཤུལ་བདུག །བ་ལེ་ཀ་ཐང་བྲག་ཞུན་ཅུར་ནི་བཏང༌། །མཆིན་གྲུམ་ནག་པོ་འབྲས་བུ་གསུམ་
ཐང་བཏང༌། །རྔུལ་དབྱུང་རྩེ་ཆུང་གཏར་ཞིང་སྔོན་བུ(་ཨ་རུ་ཟངས་རྩི་རྒུན་འབྲུམ་གྱི)ས་སྦྱང༌། །མར་
གསར་སོ་མ་ར་ཛ(་བསིལ་གསུམ་ཨ་རུ་འདམ་བུ་ཤིང་མངར་ལྕགས་ཕྱེ་སྦྲང་དང་སྦྱར་བ)འི་ལྡེ་གུ་བཏང༌། །རྗེས་
ལ་ཤ་སྲུབས་ཚིགས་དམིགས་གར་བབས་བསྲེག །མཆིན་ནད་ཧལ་སྐེམ་ཨ་བི་ཥ་(པར་པ་ཏ་ཀྱི་ལྕེ་
)ཡི་ཐང༌། །སྔོན་བུའི་བཤལ་བཏང་རུ་ཐུང་ཕྲན་བུ་གཏར། །ལུམས་རྗེས་སྨན་མར་སྦྱར་ལ་དགུ་
པ་བསྲེག །མཆིན་དྲི་དཀར་པོ་མཆིན་མཁྲིས་འདོམ་རྩ་གཏར། །བ་ལེ་ཀ་དང་ཀྱི་ལྕེའི་གྲང་
ཐང་བཏང༌། །གུར་གུམ་(ལི་ཤི་སུག་སྨེལ་ཀ་ཀོ་ལ་ད་བྱིད་པར་པ་ཏ་སྤང་སྤོས་ཤུ་མོ་ཟ་སྦྲང་སྟེ་)བརྒྱད་པའི་ལྡེ་གུ་
སྦྱར་བར་བྱ། །མཆིན་དྲི་ནག་པོ་བྲག་ཞུན་ཐང་བཏང་ལ། །རུ་ཐུང་གཏར་ཞིང་རྗེས་ལ་བརྒྱད་
པ་བསྲེག །གནད་མཆིན་རྩ་བྱེར་རུ་ཐུང་རྩེ་ཆུང་གཏར། །འདོམ་རྩ་ཨ་སོ་བྱིན་གཞུག་ལོང་རྩ་
གཏར། །བ་ལེའི་ཐང་བཏང་འབྲས་བུ་གསུམ་གྱིས་སྦྱང༌། །དེ་ལྟར་མཆིན་ནད་ཚ་བ་དེ་རྣམས་
ལ། །ཁ་ཟས་བསིལ་བསྟེན་རུལ་སྐྱུར་དྲོད་བག་སྤང༌། །ཚ་བ་ཆོམས་ན་གསར་བཅུད་དྲོད་ལ་
དབབ། །རྗེས་ལ་ཚིགས་པ་བརྒྱད་དགུ་གར་བབས་བསྲེག །མཆིན་རླུང་ཐོང་ཚེར་མཆིན་པ་
སྤོད་བྲན་བཏང༌། །བུར་དཀར་མར་གསར་ཏིང་ཁྲོལ་སྤོད་ལྡན་མུར། །ར་གསུམ་མར་སྦྱར་
དགུ་པ་ཁ་གསུམ་བསྲེག །ཀུར་གུམ་ཆང་སྦྱར་མཆིན་པའི་གྲང་རླུང་བསེལ། །མཆིན་རྒུད་དེ་
འདྲ་སེ་འབྲུ་ད་ལིས་བཏང༌། །ཨ་རུ་འབྲི་རྐང་གཟེ་མའི་སྨན་མར་སྦྱར། །མཆིན་ནད་རླན་གྲང་
དེ་བཞིན་མཆིན་གསང་བསྲེག །མཆིན་པ་གླང་དགུར་འབྲས་བུའི་རྒྱུན་བཤལ་བཏང༌། །སེ་
འབྲུ་ལྔ་པ་སྐེམས་སྨན་སྦྱར་བ་བསྟེན། །ཁ་ཟས་ཁྲེའུ་རྗེས་ལ་མེ་ཡིས་བཅད། །མཆིན་པ་གྲང་
སྦོས་ད་ལིས་སེ་འབྲུ་སྦྱར། །ལྔ་དང་དྲུག་པ་ལྷེན་སྣ་ཁ་གསུམ་བསྲེག །དེ་ལྟར་མཆིན་ནད་
25-1-283


གྲང་བ་དྲོད་ཀྱིས་བཅོས། །གསར་འཇམ་ལུག་ཤ་ལ་སོགས་དྲོད་ལ་བསྒོར། །ཞེས་གསུངས་
སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མཆིན་ནད་གསོ་
བའི་ལེའུ་སྟེ་སོ་དྲུག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །མཆེར་པའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་རུ་བཤད། །རྒྱུ་ནི་མ་ཞུ་རླན་གྲང་དྲག་ཤུལ་སྐྱེད། །དབྱེ་བ་མཆེར་ནད་ཚ་བ་ཁྲག་སྦོས་
དང༌། །མཆེར་རླུང་མཆེར་པའི་བད་ཀན་བླུགས་པ་ལྔ། །མཆེར་ནད་ཚ་བ་ཆང་འཐུངས་དྲོས་
ཚེ་སྦོ། །ལྕེ་ཁྲ་དབུགས་རྒོད་མཆུ་དང་གདོང་པ་སྨུག །རྐང་ལག་སྦྲིད་ཅིང་གཡོན་གྱི་རྩིབ་ཐུང་
གཟེར། །ཁྲག་སྦོས་དེ་འདྲ་བཞིན་མདོག་སྔོའམ་སེར། །ཁོང་ལྕི་སྦོ་འཁྲོག་བྱེད་ཅིང་མ་མཆུ་
འཕྱང༌། །མཆེར་རླུང་ལུས་སྐྲངས་སྦོ་འཁྲོག་འཇུ་སྟོབས་ཆུང༌། །སྒྲེག་པའམ་འོག་རླུང་ཐོན་ན་
བདེ་སྙམ་བྱེད། །མཆེར་པའི་བད་ཀན་མཆུ་ལ་བད་ཀན་འཆགས། །གྲང་དང་རྒོངས་དུས་སྦོ་
ལ་གཡོན་ངོས་གཟེར། །བླུགས་པ་སྦོ་འཁྲོག་ཕྱི་ས་མི་ཐུབ་འཆོར། །བཅོས་ཐབས་མཆེར་ཚད་
ལི་ཤི་ཀ་ཀོ་ལ། །སུག་སྨེལ་གུར་གུམ་ཏིག་ཏ་གསེར་མེ་ཏོག །སླེ་ཏྲེས་ཀ་ར་སྦྱར་བའི་ཕྱེ་མ་
བཏང༌། །ཀ་ཀོ་ལ་དང་གུར་གུམ་ཨ་རུ་ར། །ཀ་ར་སྦྱར་བཏང་མཆེར་པའི་རྩ་ལ་གཏར། །ཁྲག་
སྦོས་ནད་ལ་མ་ནུ་པི་པི་ལིང༌། །སུག་སྨེལ་ཤུ་དག་དོང་གྲ་ན་ལེ་ཤམ། །ཁ་རུ་ཚྭ་དང་ཤིང་ཚ་
རྒྱམ་ཚྭ་དང༌། །བུ་རམ་སྦྱར་བཏང་ངར་གདོང་མཆེར་རྩ་གཏར། །མཆེར་པའི་རླུང་དང་བད་
ཀན་གཉིས་ཀ་ལ། །ཤིང་ཀུན་ཁ་རུ་ཚྭ་ཡི་བསྡུས་ཁུ་བཏང༌། །ད་ལིས་སུག་སྨེལ་ཤིང་ཚ་ཁ་རུ་
ཚྭ། །ཟི་ར་ཚ་བ་གསུམ་དང་བུ་རམ་སྦྱར། །མཆེར་པའི་སྟེང་དང་བཅུ་གཅིག་ཁ་གསུམ་བསྲེག །
བླུགས་པའི་ནད་ལ་ཀ་ཤོ་ཀན་ད་དང༌། །རྒྱམ་ཚྭ་ཁ་རུ་ཚྭ་ཡི་ཕྱེ་མ་བཏང༌། །བསྲེག་པ་གོང་
བཞིན་མཛོ་དང་ཏོལ་ཤ་བྱིན། །དབང་པོ་ལག་པ་གེ་སར་རྣམ་པ་གསུམ། །བུ་རམ་སྦྱར་བས་
25-1-284


མཆེར་པའི་ནད་ཀུན་བསེལ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་
གསང་བ་མན་ངག་གི་རྒྱུད་ལས་མཆེར་ནད་གསོ་བའི་ལེའུ་སྟེ་སོ་བདུན་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །མཁལ་མའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་ནི་བརྡབས་དང་མི་ཐེག་ཁུར་དང་བཏེག །རླན་ལ་འདུག་དང་ཆུ་ཡི་ལས་
བྱས་འབྱུང༌། །དབྱེ་བ་མཁལ་རླུང་མཁལ་གཅོང་འོར་ལྷུང་དང༌། །མཁལ་ཚད་ཆུ་ཤོར་མཁལ་
གྲུམ་ད་རྒན་བདུན། །དེ་རྟགས་མཁལ་རླུང་རྐེད་པ་འཕྱོངས་ནས་ན། །ནད་དམིགས་མི་རྙེད་
རྣ་བ་འོན་པར་འགྱུར། །མཁལ་གཅོང་སྨད་གྲང་རྐེད་པ་འཁོར་བར་ན། །རྐང་པ་བཤལ་ལ་
དཔྱི་དང་རྐེད་པར་ཟུག །ཆུ་སྲི་བཅུད་བླུགས་བཤུལ་ཤ་ཁྲིད་ནས་ན། །འོར་ལྷུང་མཁལ་རྐེད་
ན་ཞིང་ཟ་འཕྲུག་བྱེད། །འགྲོ་འདུག་བྱས་ཚེ་པུས་མོའམ་བོལ་གོང་སྐྲངས། །མཁལ་ཚད་ཆང་
འཐུངས་འགྲོ་འདུག་བྱས་ཚེ་ན། །ཆུ་ཁ་ཚ་ཞིང་ཤ་རུས་བར་ན་འཁྱུག །྅྅྅྅྅྅མཁལ་མ་ཆུ་
ཤོར་མཁལ་རྩ་འགྲམས་པའམ། །མཆིན་ཁྲག་བཅས་པས་ཟགས་ཆུ་ཁྲག་ཏུ་འབྱུང༌།྅྅྅྅྅྅྅྅྅ །མཁལ་འགྲམས་
བྱེར་རྒྱས་ལྷུང་བ་རྣམ་པ་གསུམ། །སྟོད་དུ་བྱེར་ན་ལྟག་ཆུའི་འགྲམ་གཉིས་ན། །སྐེ་སྒྱུར་མི་
ཤེས་སྒུར་པོར་འགྲོ་བ་ཡིན། །བར་དུ་རྒྱས་ན་མཁལ་རྐེད་འཁོར་ཞིང་ན། །དཔྱི་སྟེང་འབྲེལ་
མཚམས་རྩ་ནག་སྦོ་ཞིང་གཟེར། །གློ་དང་སྦྲིད་པ་བྱུང་ཚེ་བཟོད་ཐབས་མེད། །ཚིགས་པ་ཁ་
བྱེ་རྐེད་པ་ཀྱོག་པོར་འགྲོ། །སྨད་དུ་ལྷུང་ན་རྐང་པ་བཤལ་ཞིང་སྦྲིད། །བརླ་སུལ་བྱིན་སུལ་
པུས་མོའི་ཚིགས་མཚམས་ན། །མཁལ་གྲུམ་རྐེད་པ་མན་ཆད་ཐམས་ཅད་ན། །གློ་དང་སྦྲིད་
པ་བྱུང་ཚེ་དཔྱི་མིག་ཟུག །སྒལ་པ་རེངས་ཤིང་མཇིང་པ་སྒྱུར་མི་ཤེས། །ནམ་སྟོད་ན་ཞིང་ནམ་
སྨད་བདེ་བར་ཚོར། །ཆང་དང་དྲོད་བཅུད་ཟོས་རྗེས་ཚ་བ་སྐྱེ། །ད་རྒན་ཚིགས་པ་ཕྱིར་དོན་
སྒུར་པོར་འགྲོ། །བཅོས་ཐབས་དང་པོ་མཁལ་རླུང་གཟེ་མའི་ཆང༌། །རྩ་བ་ལྔ་ཡི་སྨན་མར་
25-1-285


འཇམ་རྩི་བཏང༌། །རེང་བུ་བྱ་ཞིང་བཅུ་བཞི་རྩ་ནག་བསྲེག །མཁལ་གཅོང་ཐོང་ཚེར་མཁལ་
མ་མར་བཙོས་བཏང༌། །གཟེ་མ་ལྕ་བ་ར་མཉེ་ཟན་ཆང་ལ། །ཆང་བསིངས་བསྣུར་ཏེ་བུ་རམ་
སྒ་དང་མར། །བཏབ་སྟེ་ཚོས་པར་བཙོས་ལ་དྲོ་འཇམ་བཏང༌། །རྩ་བ་ལྔ་འམ་ར་གསུམ་ཤ་སྣ་
(ཐུག་འབྲས། ད་བྱིད། བརྡུང་རྩོས།)གཉིས། །སྒ་དང་བྲེ་གའི་མར་ལ་པི་པི་ལིང༌། །ཅོང་ཞི་སུག་སྨེལ་
སླེ་ཏྲེས་ཁ་ཚར་གདབ། །ར་རམ་སྦྲང་དང་སྦྱར་ལ་བཏང་བར་བྱ། །འབའ་སམ་མར་ལ་ད་བྱིད་
སྨུག་པོ་དང༌། །རྩངས་པ་མཆིལ་པ་ཕུག་རོན་ལང་ཐང་ཙེ། །ཅོང་ཞི་ཚ་བ་གསུམ་དང་འབྲས་
སྣ་གསུམ། །ཞོ་ཤ་གསུམ་དང་ཛཱ་ཏི་སྡིག་སྲིན་དང༌། །སུག་སྨེལ་བྲེ་ག་བུ་རམ་སྦྱར་ལ་བཏང་། །
ཁྱད་པར་གཅིན་སྙི་ས་བོན་འཛག་པ་གཅོད། །སུག་སྨེལ་ཚ་བ་ལྔ་དང་ཚྭ་སྣ་ལྔ། །སྡིག་སྲིན་
ལྕམ་པ་འབྲས་གསུམ་བུར་སྦྱར་བཏང༌། །དུགས་དང་མེ་བཙའ་དྲོད་དང་བཅུད་ཀྱིས་བཅོས། །
འོར་ལྷུང་འབམ་པོ་སེང་ལྡེང་སྨན་མར་ལ། །ཚྭ་སྣ་ཚོགས་ཚད་སྦྲང་དང་སྦྱར་ལ་བཏང༌། །
བོང་བུ་འཕྱི་བ་རྟ་རྐྱང་ཤ་སྣ་བསྟེན། །ཟ་འཕྲུག་གཡེར་མ་ཤུ་དག་ཡུང་བ་དང༌། །མར་རྙིང་
ཕག་ཚིལ་བྱུགས་ལ་ཉི་མས་བསྲེག །པུས་མོ་བོལ་གོང་སྐྲངས་ཚེ་ཆུ་ཚན་བྱ། །མཁལ་ཚད་
ནད་ལ་མཁལ་མ་ཞོ་ཤ་དང༌། །གུར་གུམ་སྐྱེར་ཤུན་སྡིག་པ་ཀ་ར་སྦྱར། །བྱིན་གཞུག་ལོང་རྩ་
གཉིས་ལ་གཏར་བར་བྱ། །མཁལ་མའི་ཟགས་ཆུ་ཁྲག་ཏུ་བྱུང་སྲིད་ན། །མཁལ་རྩ་འགྲམས་
སམ་མཆིན་ཁྲག་བབས་པ་ཡིན། །བསིལ་གསུམ་བྲག་ཞུན་དོམ་མཁྲིས་བ་ཤ་ཀ །ཤིང་ཚ་
བ་ལུ་ཀ་ར་སྦྱར་ལ་བཏང༌། །རུ་ཐུང་ལོང་རྩ་གཏར་ཞིང་ཆུ་ལྕག་བྱ། །ཆུ་ཤོར་སྐྱུ་རུ་ར་ཡིས་
ཁྲག་ཕྱེ་གཏར། །དམར་པོ་བཞི་ཐང་ཚན་དན་(གུར་གུམ་གླ་རྩི་བྲག་ཞུན་ཏིག་ཏ་མཁལ་མ་ཞོ་ཤ་བཙོད་ཚོས་ཞུ་
མཁན་ཨ་རུ་ཤུག་ཚེར་)བཅུ་གཅིག་སྦྱར། །གི་ཝཾ་གླ་རྩི་གསེར་གྱི་བྱེ་མ་དང༌། །བསིལ་གསུམ་སྡིག་
སྲིན་ལྕམ་པ་འབྲས་སྣ་གསུམ། །བྲེ་ག་ཀ་ར་སྦྱར་བའི་ཕྱེ་མ་བཏང༌། །སྟོད་དུ་བྱེར་ན་ལུམས་
(བདུད་རྩི་ལྔ་འམ་གླ་རིལ་སོགས་ཀྱི་)བྱ་ལྟག་རྩ་གཏར། །བར་དུ་རྒྱས་ན་མཆོག་ཏུ་རྩ་སྦྱོང་ཤིས། །སྨད་
25-1-286


དུ་ལྷུང་ན་གཏར་དང་ཆུ་ལུམས་བྱ། །ཀུན་ལ་ཚ་བ་ཆོགས་ན་སྨན་མར་སྦྱར། །གང་དུ་ཟུག་
པའི་སྟེང་དུ་མེ་བཙའ་གདབ། །མཁལ་གྲུམ་སྔོན་བུ(་ཨ་རུ་རྒུན་འབྲུམ་ཟངས་རྩི)འི་བཤལ་བཏང་ཆུ་
ལུམས་བྱ། །རྩ་ནས་སྦྱངས་ནས་སེང་ལྡེང་(ཁཎྜ་དམར་པོ་བཞི་ཆུ་སེར་སྨན་གསུམ་བོང་ཁྲག་སྦྲང་བསྒར་བའི་)ཕྱེ་
མ་སྦྱར། །བསིལ་གསུམ་ཞོ་ཤ་གསུམ་དང་འབྲས་སྣ་གསུམ། །ཆུ་སེར་སྨན་གསུམ་གསེར་གྱི་
བྱེ་མ་དང༌། །སྡིག་སྲིན་བྲེ་ག་སྦྲང་གི་ལྡེ་གུ་དང༌། །བདུད་རྩི་མེ་ཏོག་འབྲུ་སྣའི་རླངས་ལུམས་
བྱ། །བྱིན་གཞུག་ལོང་རྩ་ཁྲག་དང་སྦྱར་ལ་གཏར། །ཚ་བ་ཆོགས་ནས་སྦྲང་ཆང་ཡོངས་རྫོགས་
སྦྱར། །སེང་ལྡེང་སྨན་མར་སྦྲང་དང་སྦྱར་ལ་བཏང༌། །ཆུ་སེར་འོར་སྒོ་ཀུན་ཏུ་མེ་བཙའ་བསྲེག །
ད་རྒན་ནད་ལ་བདུད་རྩི་ལྔ་ཡིས་བདུག །རྩ་སྦྱོངས་བྱས་ལ་འབའ་སམ་སྨན་མར་སྦྱར། །
སུག་སྨེལ་ཤིང་ཚ་ཟི་ར་པི་པི་ལིང༌། །རུ་རྟ་བྲེ་ག་བུ་རམ་རིལ་བུ་བཏང༌། །ཚིགས་པའི་སྟེང་
འོག་མེ་ཐུར་གོར་དབུས་བརྡེག །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་
གསང་བ་མན་ངག་གི་རྒྱུད་ལས་མཁལ་ནད་གསོ་བའི་ལེའུ་སྟེ་སོ་བརྒྱད་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ཕོ་བའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་ནི་ངལ་དུབ་རླན་གྲང་བཟའ་ཆེས་དང༌། །ཁ་ཟས་མི་འཕྲོད་པ་ལས་གྱུར་
པའོ། །དབྱེ་བ་ཕོ་ནད་ཚ་བ་གྲང་བ་གཉིས། །ཚ་བ་ཕོ་བར་འགྲམས་བབས་འཁྲུགས་བབས་
དང༌། །དུག་ཐབས་གཉན་རླུང་ཕོ་བ་སུར་ཡ་དང༌། །མཁྲིས་པ་ལུད་དང་མཆིན་ཁྲག་ལུད་པའོ། །
མཆིན་ཁྲག་ལུད་པ་འདྲིལ་དང་མ་འདྲིལ་གཉིས། །གྲང་བ་རླུང་དང་མ་ཞུ་ལྕགས་དྲེག་ལྷེན། །
མེ་ཉམས་རྡོ་སྐྲན་དམུ་རྫིང་སྲིན་དང་འབྲས། །ཚ་གྲང་བདུན་དགུ་ཕོ་ནད་བཅུ་དྲུག་གོ །འོན་
ཀྱང་རླུང་དང་བད་ཀན་མཁྲིས་པ་ཁྲག །དུག་ཐབས་ཕོ་ལོག་རྒུད་པ་སྙོང་བུ་བརྒྱད། །མདོར་
བསྡུས་ཕྱི་མ་ལེའུ་གཞན་དུ་གསལ། །དེ་རྟགས་ཕོ་རླུང་སྦོ་ཞིང་སྟོང་སྒྲེག་དང༌། །འབྲབ་པ་
25-1-287


བཞིན་དུ་ན་ཞིང་སྟོང་སྐྱུགས་བྱེད། །ཡང་ན་སྒྲ་བཅས་འཁྲོག་ཅིང་འཁྲུ་བ་ཡིན། །ཕོ་བའི་བད་
ཀན་འཚིང་སྒྲེག་ཟས་མི་འཇུ། །བསིལ་ཟས་འཇུ་དཀའ་ཟོས་རྗེས་རྔུལ་གྲང་ན། །ཟས་ལ་
འཁྲེན་ཅིང་འབྱར་བག་སྐྱུག་པ་དང༌། །ཡང་ན་ཁ་ཟས་མ་སྨིན་ཙམ་པ་འཁྲུ། །ཕོ་བར་མཁྲིས་
པ་ལྷུང་ན་འཁྲུ་འམ་སྐྱུག །ཁྲག་ལྷུང་ཚ་ཆེས་གྲང་ཆེས་གཉིས་ཀ་ན། །ཕོ་བ་དུག་ཐབས་མི་
འཇུ་དང་ག་འགག །མིད་པ་ན་ལ་བྲང་ཚ་ཆུ་ཚན་སྐྱུག །ཤ་འབྲོས་བསུས་རྩ་བཀྲ་ལ་ཟོས་ཐོག་
སྐྱུག །ཕོ་ལོག་སྦོ་ལྡེང་ཟུག་ཆེ་ལྡང་དུབ་བྱེད། །ཕོ་བ་རྒུད་པ་སྒྲེག་མང་བཅུད་མི་འཇུ། །སྦུ་
བར་སྐྱུག་ཅིང་ཉམ་ཆུང་ཆང་འཐུངས་བདེ། །སྙོང་བུ་དེང་ངེ་བརྗེད་ངས་མེད་པར་ན། །བཅོས་
ཐབས་ཕོ་རླུང་ཤིང་ཀུན་ཁ་རུ་ཚྭ། །ཕོ་བ་རིས་དང་སེ་འབྲུ་བུ་རམ་སྦྱར། །སྣ་ཚོགས་རུས་ཁུར་
ཤིང་ཀུན་ཁ་རུ་ཚྭ། །ཐལ་ཚྭ་བཏབ་བཏང་དུགས་བྱ་ཕོ་གསང་བསྲེག །མར་རྙིང་ཚ་བ་གསུམ་
དང་ཚྭ་སྣ་གསུམ། །སྦྱར་བས་རླུང་གིས་སྐྱུག་པ་གཅོད་པར་བྱེད། །འཁྲུ་ན་ལ་ཕུད་དོང་གྲ་
ཁྱོར་བ་རེ། །ཀ་ར་འོ་མ་མར་དུ་བསྡུས་ལ་བཏང༌། །ཕོ་བའི་བད་ཀན་ཤིང་ཀུན་ཁ་རུ་ཚྭ། །སྨན་
སྒ་སྦྱར་ལ་དོང་གྲའི་ཐང་གིས་དབུལ། །ཕོ་བ་དྲོད་ཆུང་ཁ་ཟས་མི་འཇུ་སེལ། །སེ་འབྲུ་སུག་
སྨེལ་རྒྱམ་ཚྭ་ལ་ལ་ཕུད། །ཤིང་ཚ་ཟི་ར་བཅའ་སྒ་པི་པི་ལིང༌། །ལྕེ་མྱང་ཁ་རུ་ཚྭ་དང་བུ་རམ་
སྦྱར། །དྲོད་སྐྱེད་ཟས་འཇུ་ཕོ་བའི་གཟེར་ཟུག་སེལ། །གོ་སྙོད་ན་ལེ་ཤམ་དང་ཁ་རུ་ཚྭ། །ཀ་
ར་སྦྲང་སྦྱར་བད་ཀན་སྐྱུག་པ་གཅོད། །བྱི་ཏང་ག་དང་སྒྲོན་ཤིང་ཚ་བ་གསུམ། །འུ་སུ་བསྐོལ་
ཁུས་བད་ཀན་འཁྲུ་བ་གཅོད། །ཕོ་གསང་མདུན་རྒྱབ་མེ་ཡིས་བསྲོ་བར་བྱ། །ཕོ་བའི་མཁྲིས་
པ་གཡའ་ཀྱིའི་སྐྱུགས་ཀྱིས་དྲང༌། །དེ་རྗེས་ལྕུམ་རྩ་ཨ་རུའི་བཤལ་གྱིས་སྦྱང༌། །ཕོ་བའི་ཁྲག་
ནད་ཅུ་གང་བདེ་བྱེད་སྦྱར། །སྟར་བུའི་(དུང་ཐལ་སྦྲུལ་ཤ་རྒྱ་ཚྭ་དུར་བྱིད་ཀྱི་)སྦྱོང་བཏང་རུ་ཐུང་གཉིས་
ལ་གཏར། །ཕོ་བ་དུག་ཐབས་ཐར་ནུ་སྲུབ་ཀ་བ། །རི་ཤོ་རྒྱམ་ཚྭའི་སྐྱུགས་བྱ་དེ་འོག་ཏུ། །མ་ནུ་
ཀཎྜ་ཀ་རི་སུག་སྨེལ་དང༌། །གུར་གུམ་ལི་ཤི་ཀ་ར་སྦྱར་ལ་བཏང༌། །སེ་འབྲུ་བཞི་སྦྱར་ཕོ་ལོག་
25-1-288


ཀ་ཀོ་ལ། །སུག་སྨེལ་ཤིང་ཚ་ད་ལིས་པི་པི་ལིང༌། །ཟི་ར་ན་ལེ་ཤམ་དང་ཀ་ར་སྦྱར། །ཁ་རུ་ཚྭ་
དང་རྭ་གཞོབ་བསྡུས་ཐང་བཏང༌། །ཕོ་བ་རྒུད་ན་ཨ་རུ(་སྐྱུ་རུ་གོ་སྙོད་ཟི་ར་ནག་པོ་ལ་ལ་ཕུད་ཤིང་ཚ་ཕོ་བ་
རིས་ཐལ་ཚྭ་རྭ་ཚ་རྒྱ་ཚྭ་ལྕེ་མྱང་ཚྭ་པི་པི་ལིང་བུ་རམ་)འི་ཅུར་ནི་སྦྱར། །ཕོ་བ་སྙོང་བུ་ད་ལིས་(ཚ་བ་གསུམ་ཤིང་ཚ་བུ་
རམ་)ཅུར་ནིས་སྦྱར། །ཕོ་བ་ཟས་འཇུ་བྱེད་པའི་གཞི་ཡིན་པས། །ཟས་སྤྱོད་དྲོད་བསྟེན་སེ་འབྲུ་
ད་ལིས་ཤིས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་
གི་རྒྱུད་ལས་ཕོ་བའི་ནད་གསོ་བའི་ལེའུ་སྟེ་སོ་དགུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག རྒྱུ་མའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་ནི་ཟས་དང་སྤྱོད་ལམ་མི་འཕྲོད་པས། །འདུ་བ་འཁྲུགས་ཏེ་རྒྱུ་མར་
བབས་པའོ། །དབྱེ་བ་རྒྱུ་ཁྲོལ་རྒྱུ་འཁྲིལ་རྒྱུ་འགྱིངས་དང༌། །རྒྱུ་འགགས་རྒྱུ་གཟེར་རྣམ་པ་ལྔ་
རུ་བསྟན། །རྒྱུ་ཁྲོལ་རྒྱུ་མར་རླུང་ཞུགས་བླུག་བླུག་ཟེར། །སྐབས་སུ་ཁྲོལ་ཞིང་ཆུ་རུ་འཁྲུ་བ་སྟེ། །
རྒྱུ་འཁྲིལ་རྒྱུ་མ་རླུང་གིས་གཅུས་པ་ཡིན། །འོག་རླུང་མི་ཐོན་འཁྲིལ་ཞིང་ལྡང་དུབ་བྱེད། །རྒྱུ་
འགྱིངས་རྒྱུ་མར་བད་ཀན་བེ་སྣབས་རྒྱས། །རྒྱུ་མ་ལྕི་ལ་ན་འགྱུང་དྲི་མ་འགྱིང༌། སྐབས་སུ་ན་
ཞིང་བད་ཀན་བེ་སྣབས་འཁྲུ། །རྒྱུ་འགགས་ཁྲག་དང་མཁྲིས་པས་དྲི་མ་འགགས༌། ཚ་འདྲིལ་
གཟེར་ཞིང་དྲི་མ་ཤ་རིལ་འདྲ། །རྒྱུ་གཟེར་གཟེར་ཞིང་ཐུར་དུ་བཤལ་བ་ཡིན། །བཅོས་ཐབས་
རྒྱུ་འཁྲོལ་ཞུན་མར་དྭངས་མ་བཏང༌། །ཚ་བ་གསུམ་དང་རྒྱམ་ཚྭ་ལྕེ་མྱང་ཚྭ། །ཁ་རུ་ཚྭ་དང་བུར་
དཀར་ཆུ་སྐོལ་དབུལ། །ཚྭ་འམ་གྱོ་མོ་བསྲོས་པས་རྒྱུ་མ་བདུག །རྒྱུ་འཁྲིལ་ལ་ནི་ཤིང་ཀུན་ཁ་
རུ་ཚྭ། །རྒྱམ་ཚྭ་ཚ་བ་གསུམ་དང་བུ་རམ་སྦྱར། །ཆང་བསྐོལ་འཕུལ་བཏང་ཚ་བསྲོས་དུགས་
ཀྱིས་བདུག །འཇམ་རྩི་བཏང་ཞིང་མདུན་རྒྱབ་གསང་དུ་བསྲེག །རྒྱུ་འགྱིངས་ཚ་བ་ལྔ་དང་ཚྭ་
སྣ་སྦྱར། །ལྕུམ་རྩའི་བཤལ་བཏང་རྒྱུ་འགགས་ནི་རུས་དྲང༌། །རྒྱུ་གཟེར་མཁྲིས་ཕྱེ་བདུན་པས་
25-1-289


བཅད་པར་བྱ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་
གི་རྒྱུད་ལས་རྒྱུ་མའི་ནད་བཅོས་པའི་ལེའུ་སྟེ་བཞི་བཅུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག ལོང་གི་ནད་ལ་རྟགས་དང་བཅོས་ཐབས་གཉིས། །དང་པོ་ལོང་ནད་གྲང་
སྦོས་གྲང་འགྱིངས་དང༌། །ཚ་རྙོངས་འཇུ་སྐེམས་རླངས་པ་ཅན་དང་ལྔ། །གྲང་སྦོས་འུར་འཁྲོག་
གྲངས་རྗེས་ལྟེ་ཟུར་ན། །རྐང་པ་ཆུར་བཅུག་སྦུ་བ་སྐྱ་བོར་འཁྲུ། །རེས་འགའ་ཕྱི་ས་སྐམ་
ཞིང་སྡོམ་པར་བྱེད། །ལོང་ནད་གྲང་འགྱིངས་སྦོ་ཞིང་དྲི་མ་འགྱིང༌། །ལོང་ལྕི་སྐབས་སུ་སྐྱ་བོ་
ཟས་མདོག་འཁྲུ། །ལོང་ནད་ཚ་རྙོངས་ཁ་སྐམ་སྐོམ་དད་ཆེ། །སྦོ་ཞིང་སྨུག་རྔུལ་བྱེད་ལ་ཕྱི་ས་
འགག །ལོང་ནད་འཇུ་སྐེམས་སྦོ་འཁྲོག་ཅི་ཟོས་ན། །ཉམ་ཆུང་ཁ་སྐམ་མཁལ་རྐེད་ཆད་སྙམ་
བྱེད། །རླངས་པ་ཅན་ནི་གཞུང་པ་རེངས་ཤིང་ན། །རྐེད་པ་སྒུར་པོར་སོང་ནས་འགྱུར་མི་ཤེས། །
བཅོས་ཐབས་གྲང་སྦོས་ཡ་བཀྵ་ར་དང༌། །ཁ་རུ་ཚྭ་དང་རྒྱམ་ཚྭ་སྟར་བུ་ཡི། །ཕྱེ་མ་ཞོ་ཁ་ཆུ་
ཡིས་འཕུལ་བཏང་བས། །གཟེར་སྦོ་རླུང་གིས་ཕྱི་ས་འགགས་པ་སེལ། །འུ་སུ་སྟར་བུ་ཤིང་
མངར་ཡ་བཀྵ། །ཀྱི་ལྕེ་དྲོད་སྨན་ཕྱེ་མ་ཆུ་སྐོལ་དབུལ། །སྦོ་འཁྲོག་གཟེར་དང་འཁྲུ་བ་སེལ་
བར་བྱེད། །འཇམ་རྩི་(སྒོག་སྐྱ་ཤིང་ཀུན་ཚ་བ་གསུམ་མར་རྙིང་གི་)རེང་བུ་ཞུན་མར་བཏང་བ་བསྔགས། །
གྲང་འགྱིངས་ཤིང་ཀུན་ཤུ་དག་རུ་རྟ་དང༌། །ཚ་ལ་ཁ་རུ་ཚྭ་རྣམས་གོང་མས་བསྐྱེད། །བསྡུས་
ཁུས་སྦོ་འགྱིང་ལོང་གི་གྲང་བ་སེལ། །སེ་འབྲུ་ཚ་བ་གསུམ་དང་ཚྭ་སྣ་བཞི། །བུར་དཀར་སྦྱར་
བས་སྦོས་པ་འཇོམས་པའི་མཆོག །ཨ་རུ་གླ་སྒང་ཤུ་དག་ཙི་ཏྲ་ཀ། པུ་ཤེལ་བ་ཆུ་བསླུད་པས་
རྟུག་འགགས་སེལ། །ལོང་ནད་ཚ་རྙོངས་འབྲས་བུ་གསུམ་གྱི་ཐང༌། །བ་ལེ་ཀ་ཡི་ཐང་བཏང་
ལོང་རྩ་གཏར། །འཇུ་སྐེམས་ད་ལིས་བདུན་སྦྱར་བཤལ་གྱིས་སྦྱང༌། །རླངས་པ་ཅན་ལ་སེ་
འབྲུའི་ཕྱེ་མ་སྦྱར། །བཅུ་དྲུག་པ་དང་ལོང་ཐེར་ལྟེ་འོག་བསྲེག །ཅེས་གསུངས་སོ། །བདུད་རྩི་
25-1-290


སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལོང་ནད་གསོ་བའི་ལེའུ་སྟེ་བཞི་
བཅུ་རྩ་གཅིག་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། །གསང་ནད་གསོ་བའི་སྐབས་ལ་ཇི་ལྟར་བསླབ་པར་བགྱི། །འཚོ་
མཛད་སྨན་པའི་རྒྱལ་པོས་བཤད་དུ་གསོལ། ཞེས་ཞུས་པ་དང༌། དྲང་སྲོང་རིག་པའི་ཡེ་ཤེས་
ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །གསང་བའི་ནད་ལ་ཕོ་མཚན་
མོ་མཚན་གཉིས། །ཕོ་མཚན་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །རྒྱུ་ནི་ཆགས་པ་སྤྱད་དྲགས་གྲ་མས་རེག །བཤང་གཅི་ཁུ་བའི་ཤུགས་
བཀག་བཙིར་ལས་འབྱུང༌། །དབྱེ་བ་སོས་ཟིན་འབྲུམ་པ་མདུད་འདྲ་དང༌། །སྦུབས་འབྱར་
གྲ་མ་ཅན་དང་རྣམ་པ་ལྔ། །སོས་ཟིན་རླུང་མཁྲིས་ཁྲག་དང་བད་ཀན་འདུས། །ཕོ་མཚན་ནད་
རིགས་རྣམ་པ་དགུ་རུ་བཤད། །དེ་རྟགས་སོས་ཟིན་རླུང་ལས་གྱུར་པ་ནི། །རྟག་ཏུ་འགྲེང་དང་
པགས་པ་འགས་པར་བྱེད། །མཁྲིས་གྱུར་དམར་པོར་སྐྲངས་ལ་ཚ་བ་སྐྱེ། །ཁྲག་གྱུར་འབྲུམ་
པ་ནག་པོ་ཁྲག་བཅས་འཛག །བད་ཀན་གཡའ་ཞིང་སྐྲངས་ལ་ལྕི་བ་ཡིན། །འདུས་གྱུར་རླིག་
སྐྲངས་རྣག་དཀའ་ཀུན་རྟགས་ལྡན། །འབྲུམ་པ་ཅན་ནི་འབྲུམ་པ་མང་པོས་ཁྱབ། །མདུད་འདྲ་
པགས་པ་ཕྱིར་ལོག་སྐྲངས་ཤུ་འབྱུང༌། །སྦུབས་འབྱར་ཁ་ཟུམ་གཅིན་འབྱུང་འཆུ་ཞིང་འགག །
གྲ་མ་ཅན་ནི་གྲ་མས་གང་སེམས་ན། །གསོ་ཐབས་སོས་ཟིན་གསར་དུས་གཏར་ག་གདབ། །
ནི་རུ་ཧས་དྲངས་བསིལ་བའི་བྱུག་པ་བྱ། །སྨིན་ནས་བརྟོལ་ལ་མར་སྦྲང་ཏིལ་བསྐོལ་བྱུག །
སྤང་མ་སེང་ཕྲོམ་ལྡོང་རོས་བཙག་ཡུག་རྣམ། །བ་བླ་ནག་མཚུར་སུག་སྨེལ་སྐྱེར་ཁཎྜ། །རྒྱ་
ཚྭ་རྒྱམ་ཚྭ་ཧ་རེ་ཎུ་ཀའི་ཕྱེ། །སྦྲང་སྦྱར་བྱུག་པས་སོས་ཟིན་རྨ་འཚོ་བྱེད། །རྫ་གསར་འབྲས་
གསུམ་བསྲེགས་ཐལ་མར་སྦྱར་བྱུག །རླུང་གྱུར་སེང་ཕྲོམ་མར་དང་སྦྱར་ལ་བྱུག །མཁྲིས་གྱུར་
25-1-291


ག་བུར་ཙན་དན་ལྡེ་གུ་བྱུག །ཁྲག་གྱུར་རུ་རྟ་བ་ཤ་ཀ་ཡིས་བྱུག །བད་ཀན་ལས་གྱུར་སྐྱུ་རུ་
སྦྲང་རྩི་བྱུག །འདུས་པ་ཡིན་ན་རྨ་སྤྱིའི་གསོ་བ་སྦྱར། །འབྲུམ་པ་བཞར་ལ་སོས་ཟིན་ལྟ་བུར་
བཅོས། །མདུད་འདྲ་སྣུམ་བྱུག་མཉེ་ཞིང་སྣུམ་པས་བདུག །སྦུབ་འབྱར་སྦུ་གུས་བརྒྱང་ཞིང་
དྲལ་ལ་གསོ། །གྲ་མ་ནས་ཕྱེ་གོ་སྙོད་མར་བཙོས་དཀྲི། །ཞེས་གསུངས་སོ། །བདུད་རྩི་སྙིང་པོ་
ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཕོ་མཚན་གྱི་ནད་གསོ་བའི་ལེའུ་སྟེ་བཞི་
བཅུ་རྩ་གཉིས་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །མོ་མཚན་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་རྐྱེན་ཉལ་པོ་མང་དུ་སྤྱད་པ་དང༌། །ཁྲག་འཛག་བུ་བཙས་རྗེས་ལ་ཟས་
སྤྱོད་ལོག །དེ་ཡིས་མངལ་ནད་མ་ལུས་སྐྱེད་པར་བྱེད། །དབྱེ་བ་རླུང་མཁྲིས་ཁྲག་དང་བད་
ཀན་འདུས། །དེ་རྟགས་རླུང་གྱུར་མངལ་ནང་ཚོར་མེད་བེམ། །ཟླ་མཚན་སླ་ཞིང་སྦུ་བཅས་
ཉུང་དུ་འཛག །ཆུ་ཁ་སྙི་ཞིང་སེམས་ཅན་ཡོད་སྙམ་སེམས། །ཟླ་མཚན་བླུགས་སམ་འཁྱིལ་
དང་སྐྲན་དུ་འདྲིལ། །ཁ་འཆུས་ཁུ་བ་རློན་ཟུམ་ཧར་པོ་སོགས། །མངལ་ནད་མི་བཟད་དུ་མ་
འབྱུང་བར་བྱེད། །མཁྲིས་གྱུར་ཟླ་མཚན་སེར་ནག་དྲི་མ་ཆེ། །ཚ་འབྲབ་ཚ་བ་སྐྱེ་ཞིང་རྣག་ཏུ་
འཛག །ཁྲག་གྱུར་ཟླ་མཚན་མི་ཆད་རྟག་ཏུ་འཛག །བད་ཀན་གཡའ་གྲང་ཟུག་ཆུང་སྤྱིན་བག་
འཛག །འདུས་པ་ལས་གྱུར་ནད་ཀུན་བྱེད་པར་བཤད། །དེ་ལྟར་མངལ་ནད་ཀུན་གྱིས་བུ་མི་
འཛིན། །བཅོས་ཐབས་མངལ་ནད་ཕལ་ཆེར་རླུང་ཡིན་པས། །སྣུམ་འཆོས་འཇམ་རྩི་དུགས་
ཀྱིས་གསོ་བར་བསྔགས། །དེ་འོག་འཆུས་པ་བསྲང་ཞིང་ཁ་ཟུམ་སྦྱང༌། །རྩ་སྦུབས་འཇམ་པོས་
མངལ་ནད་ཀུན་སྦྱངས་ཏེ། །གོ་སྙོད་ཤུ་དག་རྒྱམ་ཚྭ་པི་པི་ལིང༌། །ཟི་ར་ནས་ཚིག་ཐལ་བ་བ་ཤ་
ཀ །ལ་ལ་ཕུད་དང་ཙི་ཏྲ་ཀ་རྣམས་ནི། །ཆང་དང་མར་བཙོས་མངལ་ནད་གཞང་འབྲུམ་སེལ།  །
25-1-292

 
ར་སྣ་གཟེ་མ་བ་ཤ་ཀ་བསྐོལ་བསླུད། །རྒྱ་སྤོས་ཀཎྜ་ཀ་རི་རུ་རྟ་དང༌། །རྒྱམ་ཚྭ་ཐང་ཤིང་ཁུ་
བ་མར་དུ་བསྐོལ། །ཡེ་འུ་ལ་བྱུགས་མངལ་ནང་གཞུག་པར་བྱ། །མཁྲིས་གྱུར་སེང་ཕྲོམ་རུ་རྟ་
བ་ཤ་ཀ །ཁུ་བ་ཡེ་འུ་ལ་བྱུགས་མངལ་དུ་བཏང༌། །ཉེ་ཤིང་ཁུ་བ་འོ་མ་མར་བསྐོལ་ཁུར། །ར་
མཉེ་ཉེ་ཤིང་ཤིང་མངར་རྒུན་འབྲུམ་དང༌། །བ་ལེ་པི་པི་ལིང་དང་ཀ་ར་སྦྲང༌། །མངལ་ཁྲག་ཁུ་
བའི་ནད་སེལ་བུ་སྐྱེད་མཆོག །གཟེ་མ་ཉེ་ཤིང་འོ་མ་སྦྱར་བའམ། །ཤིང་མངར་སྦྲང་རྩི་སྐྱེར་
པ་པྲི་ཡང་ཀུ། །འབྲས་བཀྲུས་ཆུར་སྦྱར་མངལ་ཁྲག་འཛག་པ་གཅོད། །བད་གྱུར་བུ་རམ་ཆང་
དང་ཨ་རུའི་ཆང༌། །པི་པི་ལིང་དང་ཨ་རུ་ལྕགས་ཕྱེ་སྦྲང༌། །ནག་ཚུར་རྒྱམ་ཚྭ་ཨ་བྱག་འབྲས་བུ་
གསུམ། །སྦྲང་དང་སྦྱར་བས་བད་ཀན་མངལ་ནད་སེལ། །ཚ་བ་ལྔ་དང་བ་གཅིན་མས་བཏང་
བྱ། །མཁྲིས་ལ་ཤིང་མངར་འོ་མར་བཅས་པ་དང༌། །རླུང་ལ་སེ་འབྲུ་ཞུན་མར་སྦྱར་བ་བཏང༌། །
ལྡན་པ་གཉིས་འབྲེལ་འདུས་པ་ཀུན་གྱིས་གསོ། །ཀུན་ལ་རུ་རྟ་རྒྱ་སྤོས་འབྲས་བུ་གསུམ། །
ཤུ་དག་ཤིང་ཀུན་ར་མཉེ་ཧོང་ལེན་བཙོད། །ཤིང་མངར་ཉེ་ཤིང་ཡུང་སྐྱེར་ལ་ལ་ཕུད། །སྨན་
མར་མངལ་ནད་ཁུ་བའི་ནད་ཀུན་སེལ། །གདོན་འཇོམས་མངལ་ཆགས་དུས་ཟོས་བུ་འཆི་
གསོས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་མོ་མཚན་གྱི་ནད་གསོ་བའི་ལེའུ་སྟེ་བཞི་བཅུ་རྩ་གསུམ་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །ཐོར་ནད་གསོ་བའི་སྐབས་ལ་ཇི་ལྟར་བསླབ་པར་བགྱི། །འཚོ་
མཛད་སྨན་པའི་རྒྱལ་པོས་བཤད་དུ་གསོལ། ཞེས་ཞུས་པ་དང༌། དྲང་སྲོང་རིག་པའི་ཡེ་
ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག ཐོར་བུའི་ནད་ལ་སྐད་
འགགས་ཡི་ག་འཆུས། །སྐོམ་དད་སྐྱིགས་བུ་དབུགས་མི་བདེ་བ་དང༌། །གླང་ཐབས་སྲིན་ནད་
འཁྲུ་སྐྱུག་དྲི་མ་འགགས། །གཅིན་འགགས་གཅིན་སྙི་ཚད་འཁྲུ་དྲེག་ནད་དང༌། །གྲུམ་བུ་ཆུ་
25-1-293


སེར་རྩ་དཀར་པགས་པའི་ནད། །ཕྲན་བུའི་ནད་དང་རྣམ་གྲངས་བཅུ་དགུར་བཤད། །དང་པོ་
སྐད་འགགས་ནད་ལ་རྒྱུ་དང་རྐྱེན། །དབྱེ་བ་རྟགས་དང་བཅོས་ཐབས་རྣམ་པ་བཞི། །རྒྱུ་རྐྱེན་
ཟས་དང་སྤྱོད་ལམ་གདོན་ལ་སོགས། །འདུ་བ་འཁྲུགས་པས་སྐད་འགགས་ནད་སྐྱེད་འགྱུར། །
དབྱེ་བ་རླུང་མཁྲིས་ཁྲག་དང་བད་ཀན་དང༌། །ཟད་བྱེད་ཚིལ་གྱུར་དས་ཆད་བདུན་དུ་བཤད། །
དེ་རྟགས་རླུང་གྱུར་སྐད་ལ་འཕེལ་འགྲིབ་ཆེ། །གྲེ་བ་གྲ་མས་གང་སྙམ་རྩུབ་ལ་ཚ། །མཁྲིས་
གྱུར་གྲེ་བ་ཚ་སྐམ་ཚིག་མི་ཐར། །ཁྲག་གྱུར་དྲག་ཤུལ་བཅུད་གནོད་གྲེ་བ་དམ། །བད་ཀན་
མགུལ་པ་འགག་ལ་སྐད་དམའ་འཛེར། །ཟད་བྱེད་དུ་བས་བདུགས་དང་བྲུད་སྙམ་སེམས། །
ཚིལ་གྱུར་སྐད་འགགས་ཚོ་ཆེས་ལས་ཤེས་བྱ། །དས་ཆད་གྲེ་བ་ན་ལ་སྐད་མི་ཕྱིན། །བཅོས་
པའི་ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་ཅུ་གང་ཤིང་མངར་སྤང་རྒྱན་དཀར། །རུ་
རྟ་རྒུན་འབྲུམ་ཀ་ར་སྦྱར་ལ་བཏང༌། །ཨ་རུ་ཅུ་གང་ཤིང་མངར་སྤང་རྒྱན་དཀར། །སྲོ་ལོ་སུག་
སྨེལ་མི་ཤ་ཀ་ར་སྦྱར། །བསིལ་གསུམ་ཤིང་མངར་རྒུན་འབྲུམ་ཤིང་ཚ་དང༌། །སྤང་རྒྱན་ཀ་ར་
སྐད་འགགས་ཀུན་ལ་ཕན། །བྱེ་བྲག་རླུང་གྱུར་འབྲས་ཆན་བུ་རམ་མར། །སྦྱར་ཟོས་རྗེས་ལ་
ཆུ་ཚན་བཏུང་བར་བྱ། །སྣུམ་ལྡན་དུགས་བྱ་འོ་ཐུག་མར་བཏབ་བསླུད། །མཁྲིས་གྱུར་པ་ལ་
རྒྱ་ཤུག་དྲི་བཟང་བཞི། །རྒྱམ་ཚྭར་བཅས་བསྐོལ་སྣ་ཡི་སྨན་དུ་བཏང༌། །ཤིང་མངར་ཞུན་མར་
འབྲས་ཐུག་བཅས་པ་བསླུད། །སྤང་རྒྱན་(ཤིང་མངར་བོང་དཀར་)གསུམ་ཐང་ཅུ་གང་ཀར་བཏབ་
བཏང་། །ཁྲག་གྱུར་སྐྱུ་རུའི་ཐང་བཏང་སྐྱོར་གོང་གཏར། །བད་གྱུར་ཚ་བ་ལྔ་དང་ཡ་བཀྵ། །
ཨ་རུ་ར་དང་སྦྲང་རྩི་སྦྱར་བ་སྦྱིན། །ནས་ཐུག་པི་པི་ལིང་དང་བཅས་པ་བཟའ། །སེལ་དཀའ་
སྐྱུག་སྨན་རྣོན་པོས་སྦྱངས་རྗེས་བསྲེག །ཟས་བྱེད་ལས་བྱུང་དུ་བ་སྣ་སྨན་བཏང༌། །ཤིང་ཚ་
སུག་སྨེལ་དྲོད་སྨན་ཅུ་གང་དང༌། །ཀ་ར་རིམ་བསྐྱེད་སྦྲང་སྦྱར་ལྡེ་གུ་བཏང༌། །ཚིལ་གྱུར་ཉམ་
སྨད་ཟས་སྨན་རྩུབ་བཅོས་བསྟེན། །དས་ཆད་ཤ་དང་ཀ་ར་སྦྲང་རྩི་སྦྱར། །མངར་བའི་སྨན་
25-1-294


དང་ལྷན་ཅིག་བསྐོལ་ལ་བཏུང༌། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་
གསང་བ་མན་ངག་གི་རྒྱུད་ལས་སྐད་འགགས་གསོ་བའི་ལེའུ་སྟེ་བཞི་བཅུ་རྩ་བཞི་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག ཡི་ག་འཆུས་པའི་ནད་ལ་རྒྱུ་རྐྱེན་དང༌། །དབྱེ་བ་རྟགས་དང་བཅོས་ཐབས་
རྣམ་པ་བཞི། །རྒྱུ་རྐྱེན་ཟས་སྤྱོད་གདོན་གྱིས་འདུ་བ་འཁྲུགས། །ལྕེ་སྙིང་ལ་ཞེན་ཡི་ག་འཆུས་
པར་འགྱུར། །དབྱེ་བ་རླུང་མཁྲིས་བད་ཀན་འདུས་པ་བཞི། །དེ་རྟགས་རླུང་གྱུར་རོ་བསྐ་
མཁྲིས་པ་ཁ། །བད་ཀན་རོ་མངར་འདུས་པ་རོ་དང་བྲལ། །གསོ་ཐབས་ཡིད་ལ་འཐད་པའི་
ཟས་གང་ཡང༌། །གང་ལ་ཕན་པའི་སྨན་དང་སྦྱར་ལ་བྱིན། །ཕྱི་ནང་ཁྲུས་སྦྱང་འབྲས་བུ་འོ་
མར་སྦྱར། །དཀར་བའི་ཟས་བསྟེན་བསྐ་བའི་ཆུས་ཁ་བཀྲུ། །ཡིད་ལ་འཐད་པའི་དུ་བ་སྣ་རུ་
རྔུབ། །བ་ལུ་ཕོ་བ་རིས་སྒ་པི་པི་ལིང༌། །རིམ་བསྐྱེད་ཤིང་ཚ་སུག་སྨེལ་ཀ་ར་སྦྱར། །ཕོ་བའི་
དྲོད་སྐྱེད་ཡི་ག་འབྱེད་པར་བྱེད། །ལ་ལ་ཕུད་དང་ད་ཏྲིག་སྟར་བུ་སྒ། །སེ་འབྲུ་རྒྱ་ཤུག་ཀ་ར་འུ་
སུ་དང༌། །ཤིང་ཚ་ཁ་རུ་ཚྭ་དང་པི་པི་ལིང༌། །གོ་སྙོད་ན་ལེ་ཤམ་སྦྱར་ཡི་ག་འབྱེད། སུག་སྨེལ་
ཤིང་ཚ་ནཱ་ག་པུཥྤ་དང༌། །ཚ་བ་གསུམ་གྱི་ཕྱེ་མས་ཡིག་འཆུས་སེལ། །ཚ་བ་ཤས་ཆེ་ཅུ་གང་བདེ་
བྱེད་ཤིས། །བྱེ་བྲག་ཤུ་དག་ཀ་ར་ནིམ་པའི་ཆུས། །སྐྱུགས་རྗེས་ཆང་དྭངས་སྐར་ཆུ་སྦྲང་ཆང་
བསླུད། །འདུས་པའི་ནད་ལ་ཀུན་གྱིས་རློན་བྱས་ལ། །ཤུ་དག་ནིམ་པ་བུ་རམ་ཆུ་སྦྱར་བསླུད། །
ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཡི་
ག་འཆུས་པ་གསོ་བའི་ལེའུ་སྟེ་བཞི་བཅུ་རྩ་ལྔ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སྐོམ་པའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་རྐྱེན་གྱེན་རྒྱུའི་རླུང་དང་མཁྲིས་པ་འཁྲུགས། །བད་ཀན་སྐེམས་པས་
25-1-295


སྐོམ་དད་སྐྱེ་བར་བྱེད། །ཆང་དང་ལན་ཚྭས་བད་མཁྲིས་སྐྱེས་པའམ། །ཚད་གུང་ངལ་དུབ་
སྤྱད་རྗེས་སྐོམ་མང་འཐུངས། །ཁོང་ཚད་བསྡུས་པས་མཁྲིས་སྐྱེད་སྐོམ་དད་ཆེ། །དབྱེ་བ་རླུང་
མཁྲིས་བད་འདུས་བཅུད་ཟད་ལྔ། །དེ་རྟགས་ཁ་ལྕེ་སྐམ་ཞིང་ཟས་མི་འདོད། །ལྕེ་ཉུལ་སྐད་
འགགས་ངོམས་པ་མེད་པར་སྐོམ། །རླུང་གྱུར་མགོ་འཁོར་གཉིད་མེད་མུ་འགྲམ་གཟེར། །སྣ་
དང་ལྕེ་ཡིས་དྲི་དང་རོ་མི་ཚོར། །མཁྲིས་གྱུར་ཁོང་ཚ་ཁ་ཁ་ཁ་དྲི་མནམ། །བད་ཀན་ཁ་མངལ་
རློན་བྲོ་ཟས་མི་འཇུ། །འདུས་རྟགས་ཀུན་སྟོན་བཅུད་ཟད་ཟས་མིད་དཀའ། །བཅོས་ཐབས་
རླུང་མཁྲིས་སེལ་བྱེད་ཕལ་ཆེར་བསྔགས། །ཕྱི་ནང་གཉིས་ནས་བཀྲུ་ཞིང་བསིལ་བར་བྱ། །
ཆར་ཆུ་སྦྲང་རྩི་སྦྱར་བ་སྐོམ་དུ་བཏུང༌། །ཆག་ཚེ་ཀ་ར་སྦྲང་དང་སྦྱར་ལ་བཟའ། །འོ་མ་སྐྱུར་
རྩབས་སྦྲང་གི་མཁུར་བཀང་བཅང༌། །ཁྱད་པར་རླུང་གྱུར་བུ་རམ་ཞོ་སྦྱར་བཏང་། །མཁྲིས་པ་
ལས་གྱུར་མངར་བའི་སྨན་གྱིས་སྦྱང༌། །བད་ཀན་ལས་གྱུར་ནིམ་པའི་ཆུ་ཡིས་རློན། །སྐྱེར་པ་
ཀ་ར་སྦྲང་ཆུ་སྐོམ་དུ་བཏུང༌། །འདུས་པའི་ནད་ལ་སྐྱུགས་རྗེས་ཆུ་ཚན་བསླུད། །བཅུད་ཟད་ཤ་
ཁུ་འོ་མས་གསོ་བར་བྱ། །འུ་སུ་བསྐོལ་ཁུར་ཀ་ར་སྦྲང་བཏབ་པས། །ནད་གཞི་ཅི་ལས་གྱུར་
ཀྱང་སྐོམ་པ་སེལ། །ཤིན་ཏུ་སྐོམ་ན་བཏུང་འོས་མ་ཡིན་ཡང༌། །ཐོག་མར་སྐོམ་བསལ་དེ་རྗེས་
ནད་གཞི་བཅོས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་སྐོམ་ནད་གསོ་བའི་ལེའུ་སྟེ་བཞི་བཅུ་རྩ་དྲུག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སྐྱིགས་བུའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །རྒྱུ་རྐྱེན་ཟས་སྤྱོད་གདོན་གྱིས་རླུང་འཁྲུགས་པས། །གྱེན་རྒྱུའི་བུ་ག་
འགགས་ཏེ་སྐྱིགས་བུ་འབྱུང༌། །དབྱེ་བ་ཟས་བྱུང་ཕྲན་ཚེགས་ཟུང་འབྱུང་དང༌། །ཆེན་པོ་ཟབ་
མོ་ཞེས་བྱ་རྣམ་ལྔར་བཤད། །དེ་རྟགས་ཟས་བྱུང་རིངས་ཐབས་ཟོས་རྗེས་འབྱུང༌། །ཕྲན་
25-1-296


ཚེགས་ཟས་ཟོས་རྗེས་འབྱུང་མོད་ལ་ཆད། །ཟུང་འབྱུང་ཚིགས་རིང་ཞུ་དུས་གཉིས་གཏུད་
འབྱུང་། །ཆེན་པོ་ཤུགས་དྲག་མིག་ཧར་ཚིག་མི་ཐོན། །ཟབ་མོ་ལྟེ་བའི་འོག་ནས་གཏུད་འབྱུང་
བསང་། །ཉམ་ཆུང་ཟུངས་ཟད་གློ་རྡོལ་རྒས་པ་ལ། །སྐྱིགས་བུ་ཆེན་པོ་ཤུགས་དྲག་བྱུང་བ་
སྤང༌། །བཅོས་ཐབས་དང་པོ་འབྲུ་མར་བསྐུ་མཉེ་བྱ། །ཚབས་ཆེ་བ་ལ་སྐྱུགས་ཁྲུས་འཇམ་
པོས་སྦྱང༌། །དབུགས་མི་བདེར་བཤད་དུ་བ་རྔུབ་པར་བྱ། །ནུ་ཞོ་ཙན་དན་སྦྲང་རྩི་སྦྱར་བའམ། །
སྦྲང་རྩི་ནས་ཟན་བྲུན་སྦྱར་སྣ་སྨན་བཏང༌། །བྲ་བོ་བྱི་བྲུན་བརྔོས་པའི་སྟེང་དུ་ཉལ། །གྲང་
རྗེས་མར་བྱུགས་ལག་པའི་སྙིང་རྩ་མནན། །གཅིག་བགྲང་དབུགས་ཐུབ་བསྡམས་པས་རླུང་
ཁྱིམས་སེལ། །མ་ཚོར་འཇིགས་སྐྲག་དངངས་པའི་ཆོ་ག་བྱ། །ཆད་དཀའ་སྤྱི་གཙུག་འཚོགས་
སྒོ་སྐེ་སྟོང་དང༌། །ཚིགས་པ་བརྒྱད་པ་ནང་ལོང་འཕར་རྩ་བསྲེག །ཅེས་གསུངས་སོ། །བདུད་
རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྐྱིགས་བུའི་ནད་གསོ་བའི་
ལེའུ་སྟེ་བཞི་བཅུ་རྩ་བདུན་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག དབུགས་མི་བདེ་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །རྒྱུ་རྐྱེན་མ་ཞུ་བད་ཀན་འཕེལ་བ་དང༌། །ལུད་པ་འཕེལ་བས་དབུགས་
ལམ་བཀག་ལས་འབྱུང༌། །དབྱེ་བ་ཕྲན་ཚེགས་མུན་ཅན་དབུགས་ཆད་དང༌། །ཆེན་པོ་གྱེན་
འབྱུང་ཞེས་བྱ་རྣམ་པ་ལྔ། །དེ་རྟགས་སྙིང་ག་རྩིབ་ལོགས་རྒྱངས་སམ་གཟེར། །ལྟོ་སྦོ་དབུགས་
རྒོད་ཡང་ན་བཞའ་བར་འགྱུར། །ཕྲན་ཚེགས་འགྲངས་ངོམས་འདུག་རྗེས་དྲག་ཤུལ་འབྱུང༌། །
མུན་ཅན་གློ་མིག་བད་ཀན་དགགས་པ་ཡིས། །ལུད་པ་མང་ལ་གྲེ་བ་ངར་ཞིང་འཛེར། །ཉལ་
ན་མི་བདེ་རོ་སྟོད་གཟེར་སྙམ་བྱེད། །དབུགས་ཆད་བད་ཀན་གློ་མིག་འགགས་པ་ཡིས། །གྱེན་
རྒྱུའི་མཐུ་ཉམས་དབུགས་འབྱིན་མི་བདེ་ཞིང༌། །སྐད་དམའ་གཞུག་ཆད་གསང་གཏམ་སྨྲ་
25-1-297


བ་ཡིན། །ཆེན་པོ་སྐད་འཛེར་མགུལ་སྐམ་ང་རོ་ཆེ། །བསྐྱོད་ཚེ་དབུགས་རྒོད་ལུད་པ་མང་དུ་
འབྱུང༌། །གྱེན་འབྱུང་བད་ཀན་དབུགས་རྒྱུའི་ལམ་བཀག་པས། །ཕྱིར་འབྱིན་བདེ་ཞིང་ནང་དུ་
དབུགས་རྔུབ་དཀའ། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་རྒྱམ་ཚྭ་ཏིལ་
མར་ལུས་ཀུན་བྱུག །ཚ་བ་ཤས་ཆེ་དེ་སྤང་ཆུ་དྲོན་བསླུད། །བཀྲུ་སྨན་སྐྱུགས་སྨན་འཇམ་པོས་
བུ་ག་སྦྱང་། །སྦྱངས་པས་མ་དག་ནད་ལྷག་(ཨ་ག་རུ་གུ་གུལ་དཀར་ནག་གླ་སྒང་རྡོ་དྲེག་སྤང་སྤོས་ཤིང་ཚ་ཧ་རེ་ཎུ་
ཀ་བྱི་ཏང་ག་གླ་རྩི་སྤྲ་ཚིལ་དུ་བ་མེད་པའི་མེར་བསྲེགས་པའམ། ཡང་ན་སྤོས་དཀར་དང་ལྡོང་རོས། ཡང་ན་ཨ་གར་མར་སྦྱར་གྱི་
)དུད་པས་བསལ། །རྟ་འམ་བ་གསར་ལྕི་ཁུ་སྦྲང་སྦྱར་བསླུད། །ཤིང་མངར་པི་པི་ལིང་གི་རྩ་བ་
དང་། །བ་ལྕི་སྦངས་ཁུར་བུ་རམ་སྦྲང་སྦྱར་བྱིན། །མར་གསར་ཞོ་སྤྲིས་རླན་གནས་ཤ་རྣམས་
བཟའ། །ཉེས་པ་གང་ཆེའི་ཤས་དང་སྦྱར་(རླུང་ཤས་ཆེ་ན་སྣུམ་འཆོས་བྱས། རི་བོང་གི་ཤ་ཁུ་མར་པི་ལིང་སྦྱར་བ་
བསླུད། སྐེ་སྟོང་དང་པོ་བསྲེག །མཁྲིས་གྱུར་དུར་བྱིད་གསེར་མེ་ཧོང་ལེན་གྱིས་སྦྱང༌། འབྲས་ཆན་པི་ལིང་ཅུ་གང་སྒ་མར་སྦྱར་བ་
བསླུད། བད་གྱུར་སྐྱུགས་བྱ་མ་ནུ་ཟུར་པ་སྐྱུ་རུ་སྦྲང་སྦྱར་བསླུད། ཁྲག་གྱུར་རྩེ་ཆུང་ཐོང་རྩ་གཏར་)ལ་བཅོས། །བྱེ་བྲག་
ཕྲན་ཚེགས་ནད་ལ་བཅོས་མི་དགོས། །ཕྱི་མ་བཞི་ལ་སྟར་བུ་སྐྱུ་རུ་ར། །རུ་རྟ་ཤིང་མངར་ཞོ་
སྦྱར་བད་ཀན་དྲང༌། །དེ་འོག་མུན་ཅན་ཙན་དན་ཅུ་གང་དང༌། །ཤིང་མངར་ཀ་ར་དྲི་ཆུ་བར་
པས་དབུལ། །དབུགས་ཆད་ཅུ་གང་ཤིང་ཚ་སུག་སྨེལ་དང༌། །པི་པི་ལིང་དང་ཀ་ར་སྦྲང་སྦྱར་
བཏང༌། །ཡང་ན་ཨ་ཀྲོང་སྦྲང་རྩི་སྦྱར་བ་བྱིན། །ཆེན་པོ་སྒོང་ཐོག་སྲོ་ལོ་དཀར་པོའི་ཐང༌། །ལོ་
བརྒྱད་དྲི་ཆུ་ཀ་རས་རོ་བསྒྱུར་བཏང༌། །གྱེན་འབྱུང་མ་ནུ་སྦྲང་གི་ལྡེ་གུ་བྱིན། །ཀུན་ལ་སྐྱོར་
གོང་རྩ་དང་ཐོང་རྩ་གཏར། །གོ་ཆེན་གོ་ཆུང་སྐེ་སྟོང་ཐུར་མས་གསེང༌། །ཞེས་གསུངས་སོ། །
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དབུགས་མི་བདེ་བ་
གསོ་བའི་ལེའུ་སྟེ་བཞི་བཅུ་རྩ་བརྒྱད་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
25-1-298


ཆེན་པོ་ཉོན་ཅིག གླང་ཐབས་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །རྒྱུ་རྐྱེན་མ་ཞུ་བ་དང་མི་འཕྲོད་ཟས། །རྔུལ་གྲང་སྲིན་འཁྲུགས་གདོན་
ལས་འབྱུང་བར་བྱེད། །དབྱེ་བ་གནས་དང་ནད་རིགས་རྣམ་པ་གཉིས། །གནས་ནི་དོན་གླང་
སྣོད་གླང་རྩ་གླང་གསུམ། །དོན་གླང་མཆིན་གླང་མཆེར་གླང་རྣམ་པ་གཉིས། །སྣོད་གླང་ཕོ་
བ་རྒྱུ་མ་ལོང་དང་གསུམ། །རྩ་གླང་ཕྱི་རྩ་ནང་རྩའི་གླང་ཐབས་གཉིས། །རིགས་ནི་ཚ་གྲང་
སྲིན་དང་གཉན་གླང་བཞི། །ཚ་གླང་མཆིན་མཆེར་གཉིས་ཀྱི་ཁྲག་འཁྱགས་དང༌། །ཁྲག་དང་
མཁྲིས་པ་ཕོ་ལོང་ལྷུང་ལས་འབྱུང༌། །གྲང་གླང་ཕོ་བར་མ་ཞུ་ལྷུང་བ་དང༌། །རྒྱུ་ལོང་ནང་དུ་
ཐུར་སེལ་འཁྱིལ་ལས་འབྱུང༌། །སྲིན་གླང་ཕོ་ལོང་གཉིས་སུ་སྲིན་འདྲིལ་ལ། །གཉན་གླང་ཕོ་
བ་རྒྱུ་མར་གཉན་བབས་པའོ། །དེ་རྟགས་མཆིན་གླང་གཡས་ངོས་མཆིན་སྟེང་གཟེར། །རྔུལ་
གྲང་རྗེས་ལ་ནད་ལྡང་རྩ་ཆུ་ཚ། །མཆེར་གླང་མཆེར་སྟེང་རྩིབ་ཐུང་གཟེར་བ་དང༌། །སྦོ་འཁྲོག་
བྱེད་ཅིང་ཆུ་གྲང་འཐུངས་ན་ན། །ཕོ་བ་གླང་ཐབས་ལྷེན་སྣའི་འོག་ཏུ་ན། །རྒྱུ་མའི་གླང་ཐབས་
ལྟེ་བའི་འོག་ཏུ་ན། །ལོང་གླང་ལྟེ་བའི་གཡས་གཡོན་ཐད་ཀར་ན། །ཚ་གླང་རྒྱུ་རྐྱེན་ཚ་བས་
བསླང་བ་དང༌། །ལུས་རྔུལ་བསུས་པ་ཆུང་ལ་ལྡང་དུབ་བྱེད། །ཁྲག་གམ་མཁྲིས་པ་འཁྲུ་སྐྱུག་
རྩ་ཆུ་ཚ། །ཁྱད་པར་ཕོ་བ་ལོང་དུ་ཁྲག་ལྷུང་ན། །གྲང་རྗེས་ན་ཞིང་སྒྲེག་ལ་སྐྱུག་ཚུལ་སྟོན། །
རོ་རྒྱབ་མཆིན་དྲི་སྦྲག་ཅིང་ཚ་རུམ་བྱེད། །མཁྲིས་པར་ལྷུང་ན་ཁ་སྐམ་སྐོམ་དད་ཆེ། །ཁ་ཁ་
མཁྲིས་པར་སྐྱུག་ཅིང་གཟེར་འབྱུང་སྒྲེག །གྲང་གླང་རྒྱུ་རྐྱེན་གྲང་བས་ལྡང་བ་ལ། །སྦོ་ལྡེང་
ལྡང་དུབ་མེད་པར་ཐེར་ཟུག་ན། །མ་ཞུ་བད་ཀན་སྐྱུག་ཅིང་གྲང་རྔུལ་བྱེད། །ཁྱད་པར་མ་ཞུ་
མི་འཕྲོད་ཟོས་རྗེས་ལྡང༌། །རུལ་སྒྲེག་མང་ཞིང་སྐྱུག་ལ་ཟོས་ཐོག་ན། །ལོང་དུ་སྨུག་པོ་འཐབ་
པའི་གླང་ཐབས་ནི། །ཐུར་རླུང་མི་ཐོན་ཕར་འབོར་ཚུར་འབོར་རྒྱུ། །འགྲངས་དང་མཚན་མོའི་
དུས་སུ་ཁྱད་པར་ན། །ལྟོགས་ཤིང་ཉིན་མོའི་དུས་ན་ཅུང་ཟད་བདེ། །རྒྱུ་མར་ཐུར་སེལ་འཁྱིལ་
25-1-299


བས་ཕྱེན་མི་ཐོན། །གྱེན་དུ་འཁྱིལ་ཞིང་སྦོ་འཁྲོག་ཧྲིལ་ཧྲིལ་ན། །ཚབས་ཆེ་རླུང་གིས་གཅུས་
ཤིང་འཁྲིལ་ན་སྤང༌། །ཕོ་ལོང་སྲིན་གླང་དཀར་མངར་གྲང་རྗེས་ན། །དྲུ་གུར་འདྲིལ་ལམ་ཚ་
ལ་འབུགས་སྙམ་བྱེད། །ལྡང་དུབ་ཆེ་ལ་ལངས་དུས་སྲན་གླགས་མེད། །ཕོ་བ་རྒྱུ་མར་གཉན་
བབས་གྲིས་དཀྲུགས་འདྲ། །ཕོ་བ་སྒྲིམས་ལ་ཉྭ་འབྲོས་བ་སྤུ་ལྡོག །རྩ་འཇུར་རྣ་བ་སླེབ་ཅིང་
རྫི་མ་ཆག །ཕྱི་རྩ་གླང་ཐབས་ལྟེ་བའི་ཟུར་གཉིས་འཕར། །ནང་རྩ་གླང་ཐབས་སྲོག་རྩ་གཟེར་
འཁྲུག་འཕར། །བཅོས་ཐབས་མཆིན་གླང་གྲོག་ཞིང་བསྲོས་པས་བདུག །དྲི་ཆུར་བྲག་ཞུན་
བ་ཤ་ཀ་སྦངས་བཏང༌། །གུར་གུམ་(ཅུ་གང་བ་ལེ་ཏིག་ཏ་ཨུཏྤལ་ཨ་རུ་མཚེ་ཀ་ར་)བདུན་དང་ཅུ་གང་(གུར་
གུམ་སེ་འབྲུ་སུག་སྨེལ་བྲག་ཞུན་ཏིག་ཏ་པི་ལིང་ཚ་ལ་ཀ་ར)བརྒྱད་པ་སྦྱར། །རུ་ཐུང་རྩ་ལ་གཏར་ལ་ཁྲག་
ཤེད་བཅག །མཆེར་གླང་སེ་འབྲུ་རྒྱམ་ཚྭ་བཞི་ཐང་བཏང༌། །མ་ནུ་(སེ་འབྲུ་སུག་སྨེལ་ཀ་ཀོ་ལ་རྒྱམ་ཚྭ་
པི་ལིང་ཀ་ར་)དྲུག་པ་ཆུ་སྐོལ་འཕུལ་ལ་བྱིན། །ཡོས་སམ་སྲན་ཕུབ་དུགས་བྱ་མཆེར་རྩ་གཏར། །
དེ་གཉིས་ཞི་དཀའ་ལྕུམ་རྩ(ཨ་རུ་དུར་བྱིད་རྒྱམ་ཚྭ་)འི་ཐང་གིས་སྦྱང༌། །སྣོད་གླང་གང་ཡང་དཔྱད་
མཆོག་སྦྱོངས་ཡིན་པས། །སྟར་བུ་དུང་ཐལ་སྦྲུལ་ཤ་རྒྱམ་ཚྭ་དང༌། །དུར་བྱིད་བུ་རམ་དྲི་ཆུའི་
རིལ་བུས་སྦྱང༌། །སྣོད་དུ་ཁྲག་མཁྲིས་མ་ཞུ་ལྷུང་བ་འདོན། །ཁྱད་པར་ཕོ་གླང་སྐྱུགས་ལ་རྒྱུ་
མ་བཤལ། །ལོང་གླང་ནི་རུ་ཧ་ཡིས་དྲང་བར་བྱ། །ཚ་གླང་དུགས་གཏར་(བྲག་ཞུན་བ་ཤ་བ་ལེའི་
ཐང་ལ་དོམ་མཁྲིས་གུར་གུམ་བཏབ་)ཐང་(ཨ་རུ་བྲག་ཞུན་གླ་རྩི་བོང་ང་དོམ་མཁྲིས་གུར་གུམ་སུག་སྨེལ་པྲི་ཡང་ཀུ་ལི་ཤིའི་)
ཕྱེ་(ཨ་རུ་དུར་བྱིད་ལྕུམ་རྩ་རྒྱམ་ཚྭའི་)སྦྱོངས་ཀྱིས་བཅོས། །མཆིན་ཁྲག་ཕོ་བར་ལྷུང་ན་(སྟར་བུ་དུང་ཐལ་
སོགས་ཀྱིས་)སྦྱང་བ་གཅེས། །རུ་ཐུང་གཏར་ཞིང་ཡོས་སམ་ཆུ་རྡོས་བདུག །བྲག་ཞུན་(དོམ་མཁྲིས་
གུར་གུམ་ཨུཏྤལ་)བཞི་པ་ཀ་ར་སྦྱར་ལ་བཏང༌། །མཁྲིས་པར་ལྷུང་ན་གཡའ་ཀྱི(དུར་བྱིད་རྒྱམ་ཚྭ་)འི་
སྦྱོངས་སྐྱུགས་སྦྲག །རྗེས་ལ་སེ་འབྲུ་(བཞི་པའི་སྟེང་དུ་གུར་གུམ་དུག་ཉུང་གསེར་མེ་)བདུན་པ་སྦྱར་བར་
བྱ། །གྲང་གླང་དུགས་(ཚ་བ་གསུམ་)ཐང་(ཤིང་ཀུན་ཚྭ་གསུམ་)ཕྱེ་མ་བསྲེག་པས་བཅོས། །མ་ཞུར་ལྷུང་
25-1-300


ན་(སྤྱང་ཚེར་དུར་བྱིད་རྒྱམ་ཚྭ་པི་ལིང་གི་)སྐྱུགས་རྗེས་དྲོད་སྨན་(སེ་འབྲུ་ཚ་བ་གསུམ་རྒྱམ་ཚྭ་ཁ་རུ་ཚྭ་)སྦྱར། །སྨུག་
པོ་འཐབ་ལ་རུ་རྟ་དྲུག་པ་དང༌། །ཆུ་ལོ་ཨ་བོའི་དུགས་བསྟེན་རུ་ཐུང་གཏར། །ལྟེ་ཟུར་གཉིས་
བསྲེག་ནི་རུ་འཇམ་རྩི་སྤེལ། །རྒྱུ་མར་རླུང་འཁྱིལ་མེས་བསྲོ་བཀྲུ་འཇམ་བཏང༌། །ཤིང་ཀུན་
(ཁ་རུ་ཚྭ་ཕོ་རིས་སྒ་བུ་རམ་)བཞི་པའི་ཕྱེ་མ་ཆང་གིས་དབུལ། །སྲིན་ལ་རྒྱ་ཚྭ་དོ་བའི་རྩ་བའམ། །ཤུ་ཏི་
བུ་རམ་སྦྱར་བའི་རིལ་བུའམ། །ལང་ཐང་ཙེའམ་ཐང་ཕྲོམ་སྒོག་སྐྱའམ། །དཀར་པོ་ཆིག་ཐུབ་
དྲི་ཆུར་སྦྱར་བས་འཇོམས། །རྟ་སྦངས་ཕུར་མོ་སྤྲུ་རྩའི་དུགས་ཀྱིས་བདུག །གཉན་གླང་ལྷོག་
དུག་གསུམ་(མིང་ཅན། སྟག་ཤ ཨབ་བྱག གང་རུང་དང་པི་པི་ལིང་རྒྱམ་ཚྭ་དྲི་ཆུར་སྦྱར་བ་)གྱི་སྦྱོར་བའམ། །བྱ་
ཁྱུང་རིལ་བུས་བསད་རྗེས་རྒྱལ་བློན་(ཐར་ནུ་ཆུ་རྩ་སྔོན་བུ་)སྦྱར། །རྩ་གླང་རྐེད་པ་བཅག་ཅིང་རྩ་
བཞི་བཅིང༌། །བཤལ་གཏར་ཚད་སྦྱང་མེ་ཡིས་རླུང་ལམ་དགག །མང་དུ་ཕྱེ་ལ་ནད་ངོས་མ་
འདྲེས་བཟུང་། །ཉུང་དུ་བསྡུས་ལ་ལག་ལེན་གཉིས་སུ་དྲིལ། །ཞེས་གསུངས་སོ། །བདུད་རྩི་
སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གླང་ཐབས་བཅོས་པའི་ལེའུ་སྟེ་
བཞི་བཅུ་རྩ་དགུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག སྲིན་བུའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་རྐྱེན་ཟས་དང་སྤྱོད་ལམ་གདོན་ལ་སོགས། །འདུ་བ་འཁྲུགས་པས་
སྲིན་ནད་སློང་བར་བྱེད། །དབྱེ་བ་ཕྱིར་གནས་ཤིག་དང་སྲོ་མ་སྟེ། །ནང་གནས་བད་ཀན་རླུང་
མཁྲིས་ཁྲག་དང་བཞི། །བད་ཀན་ཕོ་བ་རླུང་སྲིན་ལོང་ན་གནས། །མཁྲིས་སྲིན་སོ་མིག་པགས་
གཞང་མཚན་མར་གནས། །ཁྲག་སྲིན་རྐང་མེད་ཟླུམ་ལ་དམར་བ་སྟེ། །ཁྲག་ལ་གནས་ཤིང་
རྩ་ནང་ཀུན་ཏུ་རྒྱུག །གཉན་ནད་ཀུན་གྱི་རྒྱུ་དང་མཛེ་ནད་བྱེད། །གླད་སྲིན་ཡ་མ་དཀར་ནག་
དེ་ལས་བྱུང༌། །དེ་རྟགས་དཀར་དང་མངར་བག་གྲང་རྐྱེན་ལྡང༌། །ལྟོ་ཆེ་ལྡང་དུབ་བྱེད་ལ་ཚིག་
25-1-301


པ་ཟ། །འཁྲུགས་པའི་གནས་ཀྱིས་སྲིན་བུའི་ནད་རིགས་དབྱེ། །ཡ་མ་དཀར་ནག་ཚ་གྲང་ནད་
སྟོབས་དཔག །གློག་ལྟར་འཁྱུག་ཅིང་ཀོར་ལེར་གཟེར་བ་ཡིན། །བཅོས་ཐབས་ཤིག་སྲོ་ལོ་
བཙན་བྱ་རྒོད་སྤོས། །ར་དུག་མར་ནག་སྦྱར་བ་མགོ་ལ་བྱུག །ཤ་བའི་ཚིལ་དང་སྦྱར་བ་ལུས་
ལ་བྱུག །ཡང་ན་དངུལ་ཆུ་མར་སྦྱར་གོས་ལ་བྱུག །བྱི་ཏང་ལྡོང་རོས་རྒོད་སྤོས་མར་ནག་ལ། །
དྷུ་རུ་ད་དྷ་ཛྷེ་ལ་པ་སྭཱཧཱ། །བརྒྱ་རྩ་བརྒྱད་བཟླས་སྲོག་ཆགས་སྐྱེ་རྒྱུན་གཅོད། །བད་ཀན་སྲིན་
བུ་འོ་མ་ལ་བསྡུས་ལ། །བྱི་ཏང་ག་དང་མ་རུ་ཙེ་དང་བཙོད། །འབྲུམ་དང་སེ་འབྲུ་མ་ནུ་སྐྱུ་རུ་
ར། །སྒེ་གཤེར་སྦྲང་དང་སྦྱར་བའི་ཕྱེ་མ་བཏང་། །རླུང་སྲིན་བུ་རམ་ལ་བསྡུས་ཤིང་ཀུན་བཙོང་། །
སོ་མ་ར་ཛ་རུ་རྟ་བ་རུ་ར། །ཤུ་དག་བྱི་ཏང་ག་དང་བུ་རམ་སྦྱར། །ཚ་བ་གསུམ་དང་ཤིང་ཀུན་
སྒོག་སྐྱ་དང་། །འོ་མ་སྦྱར་བའི་འཇམ་རྩི་བཏང་བར་བྱ། །མིག་སྲིན་སོ་སྲིན་རང་རང་གསོ་བར་
བྱ། །པགས་སྲིན་བྱི་ཏང་ག་དང་ཙི་ཏྲ་ཀ །སྒོག་སྐྱ་གཡེར་མ་དོ་བ་བྱི་རུག་པ། །སྤྲུ་མ་ཕུར་མོ་ཟོ་
མར་བྱུགས་ལ་མཉེ། །གཞང་སྲིན་གླ་རྩི་སྒོག་སྐྱ་ལང་ཐང་ཙེ། །ཚ་བ་གསུམ་དང་ཟོ་མར་རེང་
བུ་གཞུག །སྒོག་པ་རྒྱམ་ཚྭ་གླ་རྩི་བྱི་ཏང་ག །མུ་ཟི་མར་སྦྱར་བཅུག་ལ་ཕྱིང་པས་བསྲོ། །མཚན་
མའི་སྲིན་ལ་ཆགས་པ་སྤྱད་པས་སེལ། །ཡ་མ་དཀར་པོ་སྐྲ་བྲེགས་འཁྱུག་སར་དབུག །ར་ཡི་
གློ་ཁྲག་ཚིལ་པགས་དྲོན་མོས་གཡོགས། །ར་ཡི་སྙིང་དང་མཆིན་མཆེར་ཟས་སུ་བཟའ། །ཞག་
གསུམ་རུ་རྟ་ར་ཚིལ་འོ་མ་བྱུག །རྩ་སྒོ་མེས་མནན་སྲིན་སྨན་དུ་བས་བདུག །འཁྱུག་ཚབས་
ཆེ་ན་རྩ་དེ་གཏར་ལ་བསྲེག །ཡ་མ་ནག་པོ་སྦྱོངས་བཏང་གཏར་ག་བྱ། །ར་ཡི་གློ་ཁྲག་སྣག་
རམས་ཁྱི་ལུད་སྦྱིན། །སྦྱར་བས་བྱུགས་ལ་གཙུག་དང་འཚོགས་མའི་སྟེང༌། །ཐོངས་བཞག་
མངར་གསུམ་བྱུགས་ཏེ་གྲོད་པས་བཏུམ། །དགུ་ནས་གཤགས་ལ་རྔབས་དྲང་སྦང་འཇིབ་བྱ། །
དུགས་བདུག་ཤ་བའི་གློ་ཁྲག་ཚིལ་ལུམས་བྱ། །གློག་ལྟར་འཁྱུག་ལ་ལོང་གསང་མདུན་རྒྱབ་
བསྲེག །གཟེར་སྟེང་དྲས་ལ་མེ་བཙས་འཚོས་པར་མནན། །ཀུན་ལ་བྱི་ཏང་ག་དང་མ་རུ་ཙེ།  །
25-1-302

 
གླ་རྩི་ཤིང་ཀུན་སྒོག་སྐྱ་གཡེར་མ་དང༌། །ཐང་ཕྲོམ་ཕུར་ཐལ་ལང་ཐང་ཙེ་དང་འབྲུམ། །གྲེས་
འབྲུ་སྤྲུ་མ་དཀར་པོ་ཆིག་ཐུབ་རྣམས། །མངར་གསུམ་འོ་མར་སྦྱར་བ་ཁོང་དུ་བཏང༌། །ཤ་བའི་
ཚིལ་དང་སྦྱར་བ་སྣ་རུ་བདུག །ཟོ་མར་རེང་བུ་བྱས་ལ་མས་ཡར་བཏང༌། །དོ་བའི་ཁཎྜ་སྦྱར་
ལ་པགས་ལ་བྱུག །བྱ་ཁྱུང་རིལ་བུ་ཡུན་བསྟེན་སྲིན་ཀུན་འཇོམས། །བྱི་རུག་བྱི་ཏང་ག་དང་
ཞིམ་ཐིག་ལེ། །སྐེ་ཚེ་ལྕ་བ་སྣེའུ་འབམ་པོ་དང་། །ཤས་སྣ་བསྐོལ་ཁུར་སོ་ཆ་པི་པི་ལིང༌། །ས་རྫི་
ཀ་བཏབ་ཏིལ་མར་མས་ཡར་བཏང༌། །ཁུ་བར་དུར་བྱིད་སྦྱར་བའི་སྲིན་བཤལ་བྱ། །དཀར་
མངར་རྒྱ་སྣེ་སྣུམ་པའི་ཟས་རྣམས་སྤང༌། །ཞེས་གསུངས་སོ། །བདུད་རྩི་སྙིང་པོ་ཡན་ལག་
བརྒྱད་པ་གསང་བ་མན་ངག་གི་རྒྱུད་ལས་སྲིན་ནད་བཅོས་པའི་ལེའུ་སྟེ་ལྔ་བཅུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སྐྱུགས་ཀྱི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་རྐྱེན་མ་ཞུ་ལྷེན་དང་ལྕགས་དྲེག་དང༌། །ཁོང་འབྲས་བད་སྨུག་སྲིན་བུ་
སྟེང་རླུང་འཁྲུགས། །མི་སྡུག་ཡུལ་མཐོང་རྣམས་ཀྱིས་གྱེན་དུ་སྐྱུག །དབྱེ་བ་རླུང་མཁྲིས་བད་
ཀན་འདུས་པ་བཞི། །དེ་རྟགས་མ་ཞུ་གང་ཟོས་དེ་ཉིད་སྐྱུག །ལྷེན་དང་ལྕགས་དྲེག་ཆུ་སྐྱུར་
བད་ཀན་སྐྱུག །ཁོང་འབྲས་ཁ་ཟས་ཀུན་ལ་འཁྲེན་པ་སྟེ། །བད་ཀན་སྨུག་པོ་རྒྱ་བཤལ་དུད་
ཁུ་སྐྱུག །སྲིན་གྱིས་སྲིན་སྐྱུག་རླུང་འཁྲུག་སྟོང་སྐྱུགས་བྱེད། །མི་སྡུག་ཡུལ་མཐོང་དྲི་ཚོར་རེག་
པས་སྐྱུག །རླུང་གྱུར་སྦུ་ཅན་ཆུ་ཐབས་སྐྱུག་པ་ལ། །བྲང་རྒྱབ་རྩིབ་ལོགས་གཟེར་ཞིང་མགོ་
བོ་འཁོར། །མཁྲིས་གྱུར་ཁ་ཁ་སེར་པོ་ཁྲག་ཅན་སྐྱུག །ལུས་ཚ་སྐོམ་དད་ཆེ་ལ་མགོ་བོ་གཟེར། །
བད་ཀན་ལས་གྱུར་བེ་སྣབས་བསྐ་མངར་སྐྱུག །དང་ག་འགག་ཅིང་གདོང་སྐྲངས་བྲང་ཁ་
ན། །འདུས་པ་ལས་ནི་ཀུན་རྟགས་སྟོན་པར་བྱེད། །བཅོས་ཐབས་ཀུན་ལ་སྨྱུང་བྱ་ཆུ་ཚན་
བཏུང༌། །ཟས་སྐོམ་ཡང་ལ་འཇུ་བླ་ཅུང་ཟད་བསྟེན། །ཟས་ཟོས་རྗེས་ལ་ཆུ་གྲང་གདོང་བཀྲུ་
25-1-303


གཏོར། །ཁྱད་པར་མ་ཞུ་རྒྱམ་ཚྭ་གསུམ་པས་བཞུ། །ལྷེན་དང་ལྕགས་དྲེག་ཐལ་སྨན་རྗེས་ལ་
རློན། །ཁོང་འབྲས་ཚེར་སྔོན་སྔོ་ཡི་ཚ་བ་གསུམ། །ཐར་ནུ་བསྲེགས་ཐལ་རྒྱ་ཚྭ་སེར་མཚུར་
སྦྱར། །རྒྱ་བཤལ་དུད་ཁུ་སྐྱུག་ལ་སྨུག་པོ་བཞིན། །སྟེང་རླུང་འཁྲུགས་ལ་མེ་བཙའ་རུས་ཐང་
བཏང༌། །སྲིན་ལ་དེ་སྨན་མི་སྡུག་ཡིད་འོང་བཟློག །རླུང་གྱུར་ཚ་བ་གསུམ་དང་ཚྭ་སྣ་གསུམ། །
ཞུན་མར་སྦྱར་བཏང་བྱུག་བྱས་མེ་བཙའ་བྱ། །མཁྲིས་གྱུར་སྦྱངས་རྗེས་འབྲས་ཀྱི་སྦྱོར་བས་
བཅད། །བད་ཀན་སྐྱུགས་རྗེས་བྱི་ཚེར་སྦྲང་སྦྱར་རམ། །སེ་འབྲུ་འབྲས་ཡོས་ནས་ཕྱེ་སྦྱར་བ་
བྱིན། །འདུས་པའི་ནད་ལ་གསུམ་གིས་བཅོས་པར་བྱ། །ཞེས་གསུངས་སོ། །བདུད་རྩི་སྙིང་པོ་
ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྐྱུགས་པའི་ནད་བཅོས་པའི་ལེའུ་སྟེ་ལྔ་
བཅུ་རྩ་གཅིག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །འཁྲུ་བའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་ནི་མ་ཞུ་གནས་སྐབས་འཁྲུ་བ་དང༌། །ཕོ་བའི་མེ་ཉམས་རྒྱུ་ལོང་གྲང་བ་
སྐྱེས། །མཁྲིས་པ་སྣོད་ལྷུང་མཆིན་ཚད་ཐུར་དུ་བབས། །དབྱེ་བ་རླུང་མཁྲིས་བད་ཀན་འདུས་
པའོ། །དེ་རྟགས་མ་ཞུ་དོན་མེད་འགྱིངས་རྗེས་འཁྲུ། །མེ་ཉམས་ཁ་ཟས་མ་སྨིན་རྒྱུན་པར་
འབྱང༌། །རྒྱུ་ལོང་གྲང་བ་འཁྲོག་འུར་གྲང་ན་ལྡང༌། །མཁྲིས་པ་སྣོད་ལྷུང་སེར་པོ་ཚ་བཅས་
འཁྲུ། །མཆིན་ཚད་བབས་པ་དམར་སྨུག་དུད་ཁུར་འཁྲུ། །རླུང་གྱུར་སྦོ་འཁྲོག་སྦུ་བ་སྒྲ་བཅས་
འཁྲུ། །མཁྲིས་པ་དམར་སེར་དྲི་མནམ་ཚོར་མེད་འཁྲུ། །བད་ཀན་བེ་སྣབས་འཁྲུ་ལ་ལྟོ་ལྕི་
སྒྲེག །འདུས་པ་ལས་གྱུར་རྟགས་ཀུན་ལྡན་པར་འཁྲུ། །བཅོས་ཐབས་མ་ཞུ་མེ་དྲོད་ཉམས་པ་
ལ། །སྨྱུང་བྱ་ཡོས་ཐུག་ཤ་གསར་སྒ་སྤོད་བྲན། །བུངས་ཆུང་བསྟེན་ཞིང་ཆུ་སྐོལ་ཆང་འཇམ་
བསྟེན། །ད་ལིས་བདུན་དང་རྒོད་མ་ཁ་ཕྱེ་སྦྱར། །ཚྭ་སྣ་ཚ་བ་ལྔ་དང་ལ་ལ་ཕུད། །སེ་འབྲུ་ཤིང་
25-1-304


ཀུན་བུ་རམ་རིལ་བུ་བཏང༌། །སེ་འབྲུ་ཤིང་ཚ་དྲོད་གསུམ་ཚ་བ་གསུམ། །ལ་ལ་ཕུད་རྣམས་
དྲོད་སྐྱེད་འཁྲུ་བ་གཅོད། །ཟས་སྤྱོད་བསིལ་སྤང་གཅན་གཟན་སྤུ་དུགས་བསྟེན། །རྒྱུ་ལོང་
གྲང་བ་ལོང་གསང་མདུན་རྒྱབ་བསྲོ། །ཙི་ཏྲ་ཀ་དང་སུག་སྨེལ་ཚ་བ་གསུམ། །བུ་རམ་སྦྱར་
བཏང་ལྕམ་པའི་ཚ་བ་བཏང༌། །མཁྲིས་པ་སྣོད་ལྷུང་མཁྲིས་ཕྱེ་བདུན་པ་སྦྱར། །མཆིན་ཚད་
ཐུར་བབས་བད་ཀན་སྨུག་པོར་བཅོས། །རླུང་གིས་འཁྲུ་ལ་སྣུམ་དུགས་འཇམ་རྩི་བྱ། །སེ་འབྲུ་
ཚ་བ་ལྔ་དང་ཁ་རུ་ཚྭ། །ཤིང་ཀུན་བུ་རམ་སྦྱར་བཏང་ཞུན་མར་བསླུད། །མཁྲིས་གྱུར་སེ་འབྲུ་
བོང་ང་བཅའ་སྒའི་ཐང་། །རྩ་མཁྲིས་གླ་སྒང་ཧོང་ལེན་དུག་མོ་ཉུང༌། །ཙི་ཏྲ་ཀ་དང་ཚྭ་གསུམ་
བུ་རམ་སྦྱར། །མཁྲིས་སྐྲན་མིག་སེར་འཁྲུ་བ་གཅོད་པར་བྱེད། །གླ་སྒང་བོང་ང་བིལ་བ་དུག་
མོ་ཉུང༌། །ཏིག་ཏ་པ་ཏྲ་འུ་སུ་སྐྱེར་ཁཎྜ། །སྒ་དང་འབྲས་བཀྲུས་ཁུ་བ་སྦྱར་བསླུད་ན། །ཁྲག་
དང་མཁྲིས་པར་འཁྲུ་ཞིང་འཁྲོག་པ་སེལ། །བད་ཀན་ཚ་བ་ལྔ་དང་ཨ་རུ་ར། །འུ་སུ་གནྔྷ་ཤ་ཁུ་
འབྲས་ཐུག་བསླུད། །ཤིང་ཀུན་ཤུ་དག་ཧོང་ལེན་བོང་ང་དཀར། །དུག་ཉུང་པ་ཏྲ་གཟེ་མ་ཚ་བ་
ལྔ། །ཚྭ་སྣ་ལྔ་དང་ཏིལ་དང་ཞོ་བཙོས་ཐལ། །མར་སྦྱར་བད་རླུང་མ་ཞུ་སྐྲན་འཁྲུ་སེལ། །ཞེས་
གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་འཁྲུ་བའི་
ནད་བཅོས་པའི་ལེའུ་སྟེ་ལྔ་བཅུ་རྩ་གཉིས་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །དྲི་མ་འགགས་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །རྒྱུ་རྐྱེན་ཟས་སྤྱོད་གདོན་གྱིས་འདུ་བ་འཁྲུགས། །རྒྱུ་ལོང་བཤང་ལམ་
སྐམས་ནས་དྲི་མ་སྡོམ། །དབྱེ་བ་རླུང་མཁྲིས་བད་ཀན་སྲིན་ནད་དང༌། །ཐུར་སེལ་ལོག་དང་
རྣམ་པ་ལྔར་བཤད་དོ། །དེ་རྟགས་རླུང་གྱུར་འཁྲོག་སྐམ་ཤ་རིལ་འདྲ། །མཁྲིས་པ་རྒྱུ་ཞབས་
ན་འདྲིལ་དམ་ལ་མཁྲེགས། །བད་ཀན་ལྟོ་ལྕི་སྒྲེག་ཅིང་བསུས་པ་སྐྲངས། །སྲིན་གྱུར་ཨ་ལོང་
25-1-305


ཁ་ཟ་ལྡང་དུབ་བྱེད། །ཐུར་སེལ་ལོག་པ་འཁྲོག་སྒང་ཕྱེན་མི་ཐོན། །བཅོས་ཐབས་ཀུན་ལ་ནི་
རུ་ཧ་ཡིས་དྲང༌། །རླུང་ལ་ཤུ་ཏི་མཁྲིས་ལ་ལྕུམ་རྩ་སྟེ། །བད་ཀན་དྲོད་སྨན་སྲིན་ལ་བྱི་ཏང་ག །
ཐུར་སེལ་ལོག་ན་རླུང་སྣ་རླུང་གིས་དྲངས། །ཨ་རུ་ལྕུམ་རྩ་བུལ་ཏོག་བསྡུས་པའི་ཐང༌། །དྲི་མ་
སྐམས་པ་གང་ཡང་རླན་པར་བྱེད། །ཟས་སྤྱོད་ཁོང་སྨན་འདུ་བ་སྤྱི་དང་འདྲ། །ཞེས་གསུངས་
སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དྲི་མ་འགགས་པ་
གསོ་བའི་ལེའུ་སྟེ་ལྔ་བཅུ་རྩ་གསུམ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །གཅིན་འགགས་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་
རྣམ་པ་བཞི་ཡིས་བསྟན། །རྒྱུ་རྐྱེན་ལྒང་པའི་ཁ་ཉིད་ཐུར་བལྟས་པའི། །ངོས་གཉིས་ཆུ་རྒྱུའི་རྩ་
ཡོད་རྒྱུ་མར་འབྲེལ། །དེ་ལ་ཟས་སྤྱོད་གདོན་གྱིས་འདུ་བ་འཁྲུགས། །ལྒང་པའི་རྩར་ཞུགས་
གཅིན་ནད་སྐྱེད་པར་བྱེད། །དབྱེ་བ་གཅིན་སྲི་བ་དང་གཅིན་འགགས་གཉིས། །སྲི་བ་རླུང་
མཁྲིས་བད་ཀན་འདུས་པ་བཞི། །འགགས་ལ་ཁ་འཆུས་རླུང་འཁྱིལ་ཁྲག་དང་སྤུ། །སྐྲངས་
དང་ཁུ་བ་བཤང་བ་རྡེ་འགགས་བརྒྱད། །དེ་རྟགས་རླུང་གྱུར་ཡང་རྩུབ་ཟས་སྤྱོད་ཀྱིས། །ཆུ་
སྔོ་ལྒང་པ་ཕོ་མཚན་ན་ལ་གཟེར། །མཁྲིས་གྱུར་དམར་སེར་ཚ་བ་ཆེ་ལ་ན། །བད་ཀན་བསིལ་
ཞིང་སྐ་འབྱར་ཡུན་དུ་ཐོགས། །འདུས་པ་ཀུན་གྱི་རྟགས་དང་ལྡན་པ་ཡིན། །གཅིན་བསྡམས་
ལྒང་པ་རྒྱས་ཏེ་ཁ་འཆུས་པས། །རྒྱུ་ཞབས་སྒང་ཞིང་གཅུས་སྙམ་བཙིར་ན་འབྱུང༌། །ཐུར་སེལ་
གྱེན་དུ་འཁྱིལ་བས་ཆུ་སོར་ཟུག །ཉུང་ཤས་བཤང་གཅི་གཏོང་བའི་དུས་སུ་འབྱུང༌། །མཁལ་
མ་བསམ་སེའི་རྩ་འགྲམས་ཁྲག་འཁྲུགས་པས། །ཆུ་དམར་ཁྲག་རོ་བཅས་འབྱུང་རྒྱུ་ཞབས་ན། །
ཁ་ཟས་སྤུར་འདྲེས་ལྒང་པའི་རྩར་འགྲིམས་པས། །ཟུག་ཆུང་སྙི་ལ་ཆུ་འཛིམ་སྤུ་ཉག་འབྱུང༌། །
ལྒང་པའི་ཁ་འམ་བཤང་ལམ་བར་དུ་སྐྲངས། །སྲ་ཞིང་ན་ལ་བཤང་གཅི་ཕྱེན་དབུགས་སྡོམ།  །
25-1-306

 
ཚངས་སྤྱོད་པ་འམ་གཅིན་བྲོ་ཉལ་པོ་བྱས། །ཁུ་བ་གཅིན་འདྲེས་ཐལ་ཁུ་འདྲ་བ་འབྱུང༌། །
བཤང་བ་འགགས་པ་རྟུག་པ་གཅིན་བསྡམས་སམ། །བཤང་གཅི་འདྲེས་ན་གཅིན་ལ་བཤང་
དྲི་མནམ། །རྡེ་འགགས་བད་མཁྲིས་ཁུ་ཆུ་ཁྲག་ཅན་སྤུ། །བད་ཀན་ལ་བསྟེན་ཆུ་བཙོས་རླུང་
གིས་སྒྲིལ། །མངོན་ཚུལ་ཕོ་མཚན་གཞང་ཁ་བར་རྣམས་ན། །གཅིན་འགགས་སྦྲེ་མནམ་ལྒང་
པར་སྦོ་བར་བྱེད། །ནད་རྒྱས་གཅིན་འབྱུང་དུས་ན་སོ་འཆའ་འདར། །འཁུན་ཞིང་ཁུ་ཚུར་
བཅང་དང་མཚན་མ་ཉེད། །དེ་ཡང་འཆོལ་རྡེ་ཟུག་རྡེ་གཉིས་སུ་སྲིད། །འཆོལ་རྡེ་གཅིན་ཡང་
བར་མཚམས་བཅད་ཅིང་འོང༌། །རྟ་ཞོན་དྲག་ཤུལ་རྗེས་ལ་ཁྲག་ཅན་འཛག །ཟུག་རྡེ་ཁ་ལ་
ཟུག་ནས་རྒྱུན་དུ་སྡོམ། །གཏིང་དུ་ཟུག་ན་ན་གཟེར་ཆུ་མི་འགག །དེ་རྣམས་བཅོས་ཐབས་རླུང་
གྱུར་ཆུ་སྲི་ལ། །རྒྱ་ཚྭ་སྡིག་སྲིན་སུག་སྨེལ་ཁ་རུ་ཚྭ། །ཉི་དགའ་བུ་རམ་ཆང་དང་སྦྱར་ལ་བསླུད། །
བསྐུ་བྱུག་སྣུམ་དུགས་དྲོད་བཅུད་ཟས་ཀྱིས་བཅོས། །མཁྲིས་གྱུར་ཉེ་ཤིང་གཟེ་མ་པུ་ཤེལ་ཙེ། །
རྒུན་འབྲུམ་དུར་བ་འབྲས་དང་བ་ད་ར། །བསྐོལ་ཁུར་ཀ་ར་སྦྲང་རྩི་བཏབ་པ་བསླུད། །གླ་རྩི་
སྐྱུ་རུ་བྲག་ཞུན་ཆིག་ཐང་བཏང༌། །བད་གྱུར་རྒྱ་ཚྭ་སུག་སྨེལ་ཚ་བ་གསུམ། །སྡིག་སྲིན་ལྕམ་པ་
ཆང་དང་སྦྱར་ལ་བཏང༌། །བྱ་རྒོད་རུས་པ་སུག་སྨེལ་ཚ་བ་གསུམ། །གཟེ་མ་སྦྲང་བསླུད་འདུས་
པ་ཀུན་གྱིས་གསོ། །ཁ་འཆུས་རྐང་པ་ནས་སྤྲུག་ལག་པས་བསྲང་། །རླུང་འཁྱིལ་དུགས་དང་
བྱུག་པ་འཇམ་རྩི་བྱ། །ཁྲག་འགགས་ཆུ་ཚན་ནང་བཅིང་ལོང་རྩ་གཏར། །དམར་པོ་བཞི་དང་
མཁྲིས་སྣ་སྦྱར་ལ་བཏང༌། །སྤུ་འགགས་ལྒང་པའི་ཁ་ནས་མཉེ་ཞིང་བཞོ། །སྐྲངས་འགགས་
ཆུ་ལུམས་དུགས་དང་གཏར་བ་དང༌། །མས་བཏང་གོང་མས་སྐྲངས་པ་བཞུ་བར་བྱ། །ཁུ་བ་
ཆགས་པ་སྤྱད་ཅིང་མཉེས་ལ་བཞོ། །བཤང་བ་འགགས་པ་ནི་རུ་ཧ་ཡིས་དྲང༌། །གང་ཡང་
ཐོན་དཀའ་ཆུ་ཐུར་གསང་བ་ལ། །ཕོ་ལ་མཐོ་གང་སྦོམ་ཕྲ་གྲོ་སོག་ཙམ། །མོ་ལ་སོར་བརྒྱད་
སྦོམ་ཕྲ་ནས་སོག་ཙམ། །རྒྱུས་མདེས་ཁ་དྲིལ་གསང་དུ་བཏང་བ་དབྱུང༌། །རྡེའུས་འགགས་ལ་
25-1-307


སྨན་བཤིག་དཔྱད་ཀྱིས་དབྱུང༌། །རྡེ་སྨན་ཀྲུང་ཀྲུང་རྔ་མོ་བོང་རུས་དང༌། །དབྱི་མོང་གཟེ་མ་
སྨན་སྒ་ཆང་སྦྱར་བཏང༌། །རྣོན་པོ་གསུམ་དང་ཉི་དགའ་གླ་རྩི་དང༌། །སོ་བྱའི་སྒྲོ་གཞོབ་ཆུ་ངན་
སྦྱར་ལ་བཏང༌། །ཟེ་ཚྭ་རྒྱ་ཚྭས་སྣ་དྲངས་ཚྭ་སྣ་ཚོགས། །གསེར་གྱི་བྱེ་མ་སྡིག་སྲིན་འབྲས་སྣ་
གསུམ། །ཉི་དགའ་སུག་སྨེལ་གླ་རྩི་ཚ་བ་གསུམ། །སྤོས་དཀར་འབུ་སྐྱོགས་བུར་དཀར་ཆང་
སྦྱར་བཏང༌། །ཡང་ན་བ་ཚྭ་ནག་མཚུར་སྨན་མར་ལ། །ཁ་ཚར་བཏབ་བཏང་ཟས་སྤྱོད་དྲོད་དུ་
བསྟེན། །ཆུ་འགགས་ཀུན་སེལ་ཁྱད་པར་རྡེའུ་བཤིག །རྒྱ་ཚྭ་སུག་སྨེལ་གླ་རྩི་སྡིག་སྲིན་དང༌། །
བོང་རྨིག་བྱིང་བྱིང་ཐུ་ལུ་ཆང་སྦྱར་ལ། །ༀ་རཾ་རཾ་ཤག་ཤག་རྩིར་རྩིར་ཚེག་ཚེག་རྦད་སྙིལ་
སྭཱཧཱ། །སྨྲ་བ་བཅད་དེ་རྒྱུན་དུ་བཟླས་ལ་བྱིན། །དཔྱད་ཀྱིས་དབྱུང་བ་རྡེ་ཕྲན་ལམ་ནས་དྲལ། །
སྨན་གྱིས་མ་བཤིགས་རྙིངས་ཤིང་རྒྱས་པ་ལ། །སྣུམ་བསྐུས་དུགས་བྱ་རྟ་ཤིང་ལ་བསྐྱོན་ནས། །
ནད་པ་ཁ་ཟས་མ་ཟོས་ཉམ་སྨད་དེ། །པུས་མཉམ་ནས་ཀྱི་ཁྲི་ལ་པང་པས་བརྟེན། །སྒྱིད་ཁུང་
བཀུག་ལ་གཡོག་བཅས་རས་ཀྱིས་བཅིང༌། །ལག་གཡས་སོར་མོ་ལྟེ་འོག་གཡོན་ནས་བཙིར། །
གཡོན་པའི་གུང་མོས་གཞང་ཁར་རྡེའུ་བསྒུག །ཆུ་རྩ་སྲོག་རྩ་སྲིད་རྩ་ལས་བྱོལ་བའི། །མདུན་
གསང་ཟུར་གསང་རྒྱབ་གསང་གར་ཁུགས་སར། །རྡེའུ་བཙལ་ལ་གཙགས་ཀྱིས་ལེགས་དྲལ་
ཏེ། །ཆ་བྱད་སྦྲུལ་མགོ་ལྟ་བུས་དབྱུང་(བུད་མེད་ལ་བུ་སྣོད་ལེགས་པར་བརྟག་པ་གཅེས་སོ། །སྒང་པ་དང་ནོར་ཉེན་
ཆེ།)བར་བྱ། །ཆུ་དྲོན་ནང་བཅིང་རྨ་ལ་སྦྲང་རྩི་བྱུག །བུ་རམ་སྦྲང་བྱིན་ནས་ཐུག་མར་བཅས་
བསླུད། །ཞག་བདུན་འདས་ནས་གཅིན་ལམ་མ་འགྱུར་ན། །རྨ་དེ་སྤྲ་བས་བསྲེག་ཅིང་ཕྱིང་
པས་བདུག །རྟ་ཞོན་ཉལ་པོ་རི་ཤིང་འཛེག་པ་དང༌། །ཆུ་ཡི་ལས་དང་རླན་སྟེང་ལོ་དུས་སྤང༌། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཆུ་
འགགས་གསོ་བའི་ལེའུ་སྟེ་ལྔ་བཅུ་རྩ་བཞི་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
25-1-308


ཆེན་པོ་ཉོན་ཅིག །གཅིན་སྙིའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །རྒྱུ་རྐྱེན་ལན་ཚྭ་མངར་བསིལ་ལྕི་བའི་ཟས། །རླན་ཅན་མལ་འདུག་
བད་ཀན་ཚིལ་འཕེལ་བ། །ལྒང་པར་ཟགས་པས་ཟ་ཁུ་སྐྱེད་པར་བྱེད། །དབྱེ་བ་བད་མཁྲིས་
རླུང་དང་རྣམ་པ་གསུམ། །བད་ཀན་ཟ་ཁུ་ཆུ་ཆང་བུར་ཤིང་དང༌། །གར་པོ་འབྲས་ཕྱེ་ཁུ་ཆུ་བྱེ་
མ་དང༌། །བསིལ་དང་བགས་འབྱུང་ཁ་ཆུ་བཅུ་རུ་བཤད། །མཁྲིས་པའི་ཟ་ཁུ་ནས་ཚིག་སྣག་
ཚ་དང༌། །སྔོན་པོ་སྐྱེར་ཁུ་བཙོད་ཁུ་ཁྲག་འདྲ་དྲུག །རླུང་གྱུར་རྐང་ཞག་གླང་ཆེན་སྦྲང་འདྲ་
བཞི། །ཟ་ཁུ་ཉི་ཤུ་གཅིན་སྙིའི་ནད་རིགས་ཡིན། །དེ་རྟགས་མངོན་ཚུལ་མལ་སྟན་གཉིད་ལ་
རྩི། །རྔུལ་མང་དྲི་མནམ་སྐྲ་དང་སེན་མོ་རིང༌། །ཁ་མངར་གྲེ་བ་རྐན་སྐམས་བསིལ་ལ་རྩི༌། །
མཐིལ་བཞི་ཚ་ཞིང་གཅིན་མདོག་རྙོག་ཅན་འབྱུང༌། །གཅིན་གྱི་ཤུལ་ལ་སྦྲང་མའི་ཚོགས་
ཀུན་འདུ། །མངོན་ཚུལ་མི་གསལ་མདོག་ལ་ངེས་མ་ཡིན། །བད་གྱུར་ཁ་ཟས་མི་འཇུ་དང་ག་
འགགས༌། གཉིད་ཆེ་ལུད་པ་མང་ཞིང་སྐྱུག་པར་བྱེད། །མཁྲིས་གྱུར་ཕོ་མཚན་ལྒང་པར་ཟུག་
ཅིང་ན། །ཁ་སྐམ་ལུས་ཚ་འཁྲུ་ཞིང་རིམས་ཀྱིས་འདེབས། །རླུང་གྱུར་གཉིད་འཕར་གཉིད་
ཆུང་དབུགས་མི་བདེ། །འདར་གཟེར་ཟས་ལ་རྔམ་ཞིང་ལུད་པ་མང༌། །ཀུན་ཀྱང་ཡལ་བར་
བོར་ན་ཐོར་པ་བཅུ། །ཁམ་ཕོར་རུས་སྦལ་སྒུར་པོ་དྲ་བ་ཅན། །མེ་དབལ་སྲན་ཆུང་ཡུངས་
དཀར་བ་ད་ར། །སྦུ་བཅས་ཁོང་འབྲས་ཞེས་བྱ་གནད་སྟེང་འབྱུང༌། །བཅོས་ཐབས་ཟ་ཁུ་བད་
ཚིལ་གཙོ་བོར་བཅོས། །འབྲུ་རྙིང་སྐམས་སའི་ཤ་ལ་སོགས་པ་ཡི། །ཡང་ཞིང་རྩུབ་པའི་ཟས་
སྐོམ་སྤྱོད་ལམ་བསྟེན། །བ་གཅིན་ལྕི་བ་ལས་བྱུང་ཁ་ཟས་བཟའ། །ངལ་དུབ་མང་དུ་སྤྱད་ཅིང་
གཉིད་མི་ལོག །ཡང་ཞིང་རྩུབ་པའི་སྨན་གྱིས་དྲིལ་ཕྱིས་བྱ། །ཡུང་སྐྱེར་སྐྱུ་རུ་གཟེ་མའི་བསྡུས་
ཐང་བཏང་། །འབྲས་གསུམ་ཆང་སྦངས་སྐམས་ཕྱེ་སྦྲང་སྦྱར་བཟའ། །བད་ཀན་ལས་གྱུར་ཟ་
ཁུ་སྐྱུགས་བྱས་ལ། །སེང་ཕྲོམ་གླ་སྒང་ཨ་རུ་ར་ཐང་དང༌། །པ་ཏྲ་བྱི་ཚེར་བྱི་ཏང་ག་ཡི་ཐང༌།  །
25-1-309

 
སེང་ལྡེང་སྐྱེར་པ་བྱི་ཏང་ག་ཡི་ཐང༌། །གང་རུང་སྦྲང་རྩི་སྦྱར་ལ་བཏང་བར་བྱ། །མཁྲིས་པའི་
ཟ་ཁུ་སྦྱོངས་རྗེས་ཤ་ཁུས་བདའ། །སྐྱེར་པ་སྐྱུ་རུ་སྦྲང་དང་སྦྱར་བའམ། །སླེ་ཏྲེས་སྐྱུ་རུ་སྦྲང་དང་
སྦྱར་ལ་བཏང་། །དུག་མོ་ཉུང་དང་སྐྱེར་པ་ཙི་ཏྲ་ཀ །འབྲས་བུ་གསུམ་གྱི་བསྐོལ་ཁུ་བསླུད་པར་
བྱ། །རླུང་གྱུར་འབྲས་བུ་གསུམ་དང་སྒྲོན་ཤིང་དང༌། །སྐྱེར་པ་གླ་སྒང་མར་དང་སྦྱར་ལ་བཏང་། །
ཟུངས་དང་འདྲེས་ཕྱིར་ཤིན་ཏུ་གསོ་དཀའ་ཡིན། །བླ་གཉན་ཐོར་པ་གཅིན་བསླུད་རྨ་ལྟར་
གསོ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་གཅིན་སྙི་བའི་ནད་གསོ་བའི་ལེའུ་སྟེ་ལྔ་བཅུ་རྩ་ལྔ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །རྒྱ་ནད་ཚད་འཁྲུ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་རྐྱེན་མེ་དྲོད་མི་སྙོམས་ཆུང་བ་ལ། །དྲོད་རླངས་ཆེ་བའི་ཡུལ་སར་ཆུ་
མང་འཐུངས། །ཟས་ཚོད་མ་ཟིན་ཤ་རིད་ཤིང་ཐོག་འབྲུ། །བཅུད་མེད་ཟས་ཀྱིས་མེ་དྲོད་ཕྱིར་
ལ་བཏོན། །ཕྱི་ཡུལ་དྲོད་རླངས་ཚ་བས་མཆིན་ཚད་སྐྱེད། །ལུས་ཀྱི་ཆུ་ཁམས་ཐུར་བསྐྱོད་
འཁྲུ་བར་འགྱུར། །དབྱེ་བ་རླུང་མཁྲིས་ཁྲག་དང་བད་ཀན་བཞི། །དེ་རྟགས་སྙིང་ག་རྩིབ་
ལོགས་བཤང་ལམ་ཟུག །ལུས་སྙོམ་ཁོང་པ་སྦོ་ཞིང་ཟས་མི་འཇུ། །མ་སྨིན་ཆུར་འབྱམ་སྨིན་
པ་དེ་ལས་ལྡོག །རླུང་གྱུར་སྦུ་བ་སྒྲ་བཅས་བུར་ཁུ་འདྲ། །ཆུར་འཁྲུ་སྐབས་སུ་འགག་ཅིང་
གོང་བུར་འབྱུང༌། །གཟེར་ཞིང་ཁ་སྐམ་བ་སྤུ་ལྡང་བ་ཡིན། །མཁྲིས་གྱུར་སེར་ནག་སྔོ་ལ་དྲི་མ་
ཆེ། །བཤང་ཁ་ཚ་ཞིང་ལུས་རྔུལ་སྐོམ་དད་ཆེ། །ཁྲག་གྱུར་ཁྲག་ཏུ་འཁྲུ་ཞིང་གཞང་ཁ་འདྲུལ། །
བད་གྱུར་སྐམ་འབྱར་གཉིད་ཆེ་ཡི་ག་འཆུ། །བཅོས་ཐབས་མ་སྨིན་དང་པོའི་དུས་ཉིད་དུ། །
ནང་ནུབ་ཆུ་ཚན་བཏུང་ཞིང་སྨྱུང་བར་བྱ། །སེ་འབྲུ་བིལ་བ་ད་ཏྲིག་ཟུར་པ་སྒ། །འུ་སུའི་ཐང་
གིས་སྨིན་བྱེད་འཁྲུ་བ་གཅོད། །བཤང་འགྱིངས་བྱི་ཏང་ག་དང་འབྲས་བུ་གསུམ། །པི་པི་ལིང་
25-1-310


བསྐོལ་ཁྲུས་བཏང་ནི་རུས་དྲང༌། །འབྲས་སམ་ཕྱེ་ཐུག་སྒ་སྤོད་བྲན་པ་དང༌། །ལུག་དང་བ་ལང་
སྐམ་སའི་ཤ་གསར་དང༌། །དར་གསར་ཆང་གསར་བསྐོལ་གྲངས་མེ་དྲོད་སྦྱར། །ཟས་སྤྱོད་
བསིལ་དྲོད་མཉམ་ཞིང་ཟས་ཚོད་བཟུང༌། །གླ་སྒང་བོང་ང་དཀར་པོ་བིལ་བ་སྒ། །ཤིང་ཀུན་
དུག་མོ་ཉུང་ཁུ་བསྡུས་འཇམ་བཏང༌། །བིལ་བ་འུ་སུ་གླ་སྒང་བ་ལེ་ཀ །དོང་ག་བསྐོལ་གྲངས་
ཁུ་བ་བསླུད་པར་བྱ། །འཁྲུ་བ་མ་སྨིན་མི་བཅད་ཉེས་པ་ཆེ། །སྟོབས་ཆུང་ཟས་སྤྱོད་གཟབ་ཅིང་
བཏང་སྙོམས་བཞག །རླུང་གྱུར་བིལ་བ་སྒ་དང་པི་པི་ལིང༌། །བུ་རམ་ཏིལ་མར་སྦྱར་བཏང་འོ་
དྲོན་བསླུད། །མཁྲིས་གྱུར་དུག་མོ་ཉུང་དང་བོང་ང་དཀར། །འབྲས་ཁུ་སྦྲང་དང་སྦྱར་ལ་བསླུད་
པར་བྱ། །བོང་ང་དུག་མོ་ཉུང་དང་བ་ལེ་ཀ །བིལ་བ་གླ་སྒང་འབྲས་ཁུ་སྦྲང་སྦྱར་བསླུད། །ཁྲག་
གྱུར་ཏིལ་ནག་ཀ་ར་རའི་འོ་མ། །ཡང་ན་ཙན་དན་འབྲས་ཁུ་སྦྲང་སྦྱར་བཏང༌། །ཧོང་ལེན་སྐྱེར་
ཤུན་རྒྱ་སྐྱེགས་པི་པི་ལིང༌། །སྨན་མར་འབྲས་ཀྱི་ཐུག་པ་སྦྱར་ལ་བཏང༌། །བད་ཀན་ལས་
གྱུར་བིལ་བ་ཨ་རུ་ར། །སྒ་དང་གླ་སྒང་བསྐོལ་བའི་ཁུ་བ་བསླུད། །པ་ཏྲ་གླ་སྒང་བིལ་བ་མོན་
ཆ་ར། །སྒ་དང་འུ་སུ་བུ་རམ་དར་བཅས་བྱིན། །བཅོས་རྗེས་གཅིན་མང་བཤང་བ་ཉུང་ལ་སྐ། །
ཕྱེན་གྱི་སྒྲ་ཐོན་ཟས་འཇུ་ནད་བྱང་རྟགས། །ཟས་དང་སྤྱོད་ལམ་གཟབ་པས་འཚོ་བར་འགྱུར། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་
ཚད་པའི་འཁྲུ་བ་གསོ་བའི་ལེའུ་སྟེ་ལྔ་བཅུ་རྩ་དྲུག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །དྲེག་གི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་རྐྱེན་ཁྲག་འཁྲུག་བྱེད་པའི་ཟས་སྤྱོད་བསྟེན། །ཉིན་པར་གཉིད་ལོག་
སྐྱིད་པར་འདུག་པ་དང༌། །དྲག་ཤུལ་རྐྱེན་གྱིས་རླུང་ཁྲག་འཁྲུགས་པ་ཡིས། །རྐང་པའི་མཐེབ་
མོ་ལག་པའི་གྲུ་མོར་གནས། །དང་པོ་ཁོལ་བུ་རྙིང་ནས་མཆེད་པར་འགྱུར། །དབྱེ་བ་རླུང་
25-1-311


མཁྲིས་ཁྲག་དང་བད་ཀན་བཞི། །དེ་རྟགས་མངོན་ཚུལ་བརླ་རྐེད་ཚིགས་རྣམས་ན། །གཡའ་
འགུལ་ཆག་སྙམ་ཚོར་མེད་ལྕི་བ་སྟེ། །ཡང་ཡང་ལྡང་ཞིང་སླར་ལྕི་འགྱུར་བ་ཡིན། །ནད་རྒྱས་
གསར་དུས་པགས་པ་ཁྲག་ལ་གནས། །སྐྲངས་དམར་དྲོད་ཆེ་སྲ་ལ་སྔོ་ཐིག་བཅས། །ཤིན་ཏུ་
ན་ཞིང་བྱ་རྨྱང་མང་བ་སྟེ། །རྟོགས་བླའི་དུས་ཡིན་དུས་འདིར་བཅོས་པ་གཅེས། །ཐ་མ་རྙིངས་
ནས་རྩ་ཆུ་རུས་ཚིགས་ཁྱབ། །ལྷག་པར་སྐྲངས་ཤིང་མི་བཟོད་སྲ་ལ་ཧྲེམ། །གཞང་ཁ་རུས་
ཚིགས་ཆད་པ་སྙམ་དུ་སེམས། །ཤུགས་རྒྱས་ཞ་འཐེང་འདི་དུས་གསོ་དཀར་འགྱུར། །ཁྱད་
པར་རླུང་གྱུར་གཟེར་འཕྲིག་འཕེལ་འགྲིབ་བྱེད། །སྐྲངས་ལ་ནག་པོ་སྔོན་པོའི་ཐིག་ལེ་འོང༌། །
མཁྲིས་གྱུར་དྲོད་ཆེ་དམར་ལ་རེག་མི་བཟོད། །ཁྲག་གྱུར་ཚ་འབྲབ་མདོག་དམར་འདྲུལ་བར་
བྱེད། །བད་ཀན་ལས་གྱུར་གཡའ་ལྕི་ཚོར་བ་མེད། །བཅོས་ཐབས་རླུང་བཅོས་ཅི་རིགས་རླུང་
བསལ་ལ། །དེ་རྗེས་མང་དུ་གཏར་ལ་ཉུང་དུ་དབྱུང༌། །ཙག་ཙག་ལྷང་ལྷང་ན་སར་རྔབས་རུ་
གཟུགས། །སྐྲངས་ཆེ་དམར་ལ་ཐུར་མས་བཙག་པར་བྱ། །རླུང་གྱུར་བ་གཅིན་སྤོས་དཀར་འོ་
མས་སྦྱང༌། །དེ་འོག་སླེ་ཏྲེས་བསྐོལ་བའི་ཁུ་བ་དང༌། །འོ་མ་བསྐོལ་བ་ཀ་ར་བཏབ་ལ་བཏང་། །
རྒུན་འབྲུམ་ཤིང་མངར་ཀ་ར་མར་བསྐོལ་བསླུད། །མཁྲིས་གྱུར་ཉེ་ཤིང་ཧོང་ལེན་འབྲས་བུ་
གསུམ། །སླེ་ཏྲེས་པ་ཏོལ་འོ་མ་མར་བསྐོལ་བསླུད། །གུར་གུམ་སྐྱེར་པ་བསྐོལ་ལ་སྦྲང་སྦྱར་
བྱིན། །དེ་འོག་དུར་བྱིད་རྒུན་འབྲུམ་འོ་མར་སྦྱར། །བད་གྱུར་འབྲས་བུ་གསུམ་དང་སྦྲང་རྩི་
བཏང༌། །གླ་སྒང་གུར་གུམ་སྐྱེར་བསྐོལ་སྦྲང་སྦྱར་བསླུད། །ནད་སྟོབས་ལྡན་ན་སྐྱུགས་རྗེས་
རྩུབ་བཅོས་བྱ། །ཀུན་ལ་འབྲས་བུ་གསུམ་དང་ཚ་བ་ལྔ། །གནྡྷ་པ་ཏྲ་ཤིང་ཚ་བ་ཤ་ཀ །པི་
ལིང་མཱུ་ལ་ཅུ་གང་བྱི་ཏང་ག །ཤུ་དག་སྤང་སྤོས་ལྕགས་གཡའི་ལྡེ་གུ་ཡིས། །དྲེག་ནད་གཟེར་
བཅས་མ་ལུས་སེལ་བར་བྱེད། །དུར་བྱིད་ཨ་རུ་རྒྱམ་ཚྭ་པི་པི་ལིང༌། །བཀྲུ་འཇམ་སྦྱོར་བ་དྲེག་
འཇོམས་སྨན་མཆོག་ཡིན། །ནད་སྐྱོན་སེལ་ན་ཕྱི་ནས་བྱུག་པས་བཅོས། །ཏིལ་མར་སྦྲང་རྩི་
25-1-312


གུ་གུལ་ཐལ་ཏྲེས་བཙོད། །བསྐོལ་བའི་ལྡེ་གུ་བྱུགས་པས་དྲེག་ནད་སེལ། །ཁྲག་མཁྲིས་ལས་
གྱུར་སྟག་ཚེར་ཤིང་མངར་བཙོད། །སྐྱེར་པ་ཙན་དན་རྒྱ་ཤུག་པུ་ཤེལ་རྩེ། །སྲན་ཆུང་ཀ་རའི་
ལྡེ་གུ་གྲང་མོ་བྱུག །ཤུ་དག་རུ་རྟ་དུད་པ་སེར་པོ་གཉིས། །ཤུ་ཏིའི་ལྡེ་གུས་བད་རླུང་དྲེག་ནད་
སེལ། །རྙིངས་ནས་མས་བཏང་བཀྲུ་སྨན་སྣུམ་འཆོས་བྱ། །ཀུན་ལ་བད་ཚིལ་རླུང་ཁྲག་གཙོ་
བོར་བཅོས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་དྲེག་ནད་གསོ་བའི་ལེའུ་སྟེ་ལྔ་བཅུ་རྩ་བདུན་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །གྲུམ་བུའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །རྒྱུ་རྐྱེན་རླན་སྣུམ་ཡུལ་དང་སྣུམ་བཅུད་ཟས། །དྭངས་མ་གནས་སུ་མ་
སྨིན་ཆུ་སེར་རྒྱས། །ཤ་རུས་རྩ་རྒྱུས་ལ་གནས་གྲུམ་བུ་སྐྱེད། །དབྱེ་བ་ཤ་ཏྲེམ་རུས་ཏྲེམ་རྩ་ཏྲེམ་
དང༌། །ཆུ་ཏྲེམ་ཏྲེམ་དཀར་ཏྲེམ་ནག་རྣམ་པ་དྲུག །དེ་ཡི་རྟགས་ལ་སྤྱི་དང་བྱེ་བྲག་གཉིས། །སྤྱི་
རྟགས་གྲང་ཤུམ་ཡུན་རིང་ཤ་པགས་བརྩེ། །གདོང་སྣུམ་མགོ་བོ་རྐེད་པ་དཔྱི་མིག་ཟུག །ཤེད་
ཆུང་སྒྱིད་སྐྱུར་ཤ་འབྲོས་རྔུལ་ཁ་སྙི། །རུས་ཚིགས་ཤ་རུས་འཁོལ་ཞིང་ཆུ་རྒྱུས་གྱོང༌། །འགུལ་
ཚེ་ལྷག་པར་ན་ཞིང་སྐད་ངན་འཆོར། །ཆུ་དམར་རྩ་འཁྱུག་ཕྲ་མགྱོགས་གཏིང་ན་རྒྱུག །བྱེ་
བྲག་ཤ་ཏྲེམ་བད་མཁྲིས་ཤས་ཆེ་སྟེ། །ཤ་སྦོ་མདོག་ནག་ཡན་ལག་སྦྲིད་པ་དང༌། །གློ་སྙིང་མི་
བདེ་སྣ་ཁྲག་མང་དུ་འཛག །ཤ་རུས་འབྱེད་སྙམ་བེམ་པོར་བྱེད་པ་ཡིན། །རུས་ཏྲེམ་རླུང་གི་
ཤས་ཆེ་སྐོམ་དད་ཆེ། །རུས་པ་ཚ་བ་སྐྱེ་ཞིང་འཇུ་ལ་སྐམ། །ཚིགས་རྣམས་གྲམ་ཞིང་ཟུག་ཆེ་
འགུལ་མི་ནུས། །བསྒུལ་དང་སྒྲ་ཆེར་མི་བཟོད་གཡང་སྐྱུར་སེམས། །རྩ་ཏྲེམ་ཁྲག་གི་ཤས་ཆེ་
སྐྲག་མདངས་ཉམས། །གློ་སྙིང་མི་བདེ་ལྟག་ཤ་ཆད་སྙམ་བྱེད། །རྩ་རྣམས་སྦོས་ཤིང་སྲ་ལ་ན་
བ་ཡིན། །ཆུ་ཏྲེམ་ཆུ་རྒྱུས་གྱོང་འདར་རེངས་འཁུམས་སྐམས། །ཏྲེམ་དཀར་ཆུ་སེར་དཀར་པོ་
25-1-313


གྲང་ཤས་ཆེ། །ཏྲེམ་ནག་ཆུ་སེར་ནག་པོ་ཚ་ཤས་ཆེ། །བཅོས་པའི་ཐབས་ལ་སྤྱི་དང་བྱེ་བྲག་
གཉིས། །སྤྱི་བཅོས་དང་པོ་ཞག་ལྔའི་བར་དག་ཏུ། །བད་ཀན་ཆུ་སེར་སྦྱང་ཕྱིར་འབྲས་བུ་
གསུམ། །སླེ་ཏྲེས་ཐང་བསྟེན་ཆུ་བསྐོལ་ཡང་ཡང་བཏུང༌། །དེ་རྗེས་ཙན་དན་དཀར་དམར་གི་
ཝཾ་དང༌། །བཟང་དྲུག་ཆུ་སེར་སྨན་གསུམ་གེ་སར་གཉིས། །ཏིག་ཏ་སླེ་ཏྲེས་སྤྱི་ཞུར་འབྲས་བུ་
གསུམ། །གླ་རྩི་སྤང་རྒྱན་བེ་(སྤང་རྩི་དོ་བོ་)དོ་བ་ཤ་ཀ །བོང་ཁྲག་ཀ་ར་སྦྱར་བ་ཉི་ཤུ་ལྔ། །གུང་
(ཉིན་གུང་མཚན་གུང)གཉིས་སེང་ལྡེང་ཁུ་བས་འཕུལ་ལ་བཏང༌། །སེ་འབྲུ་ལྔ་པ་ནང་ནུབ་ཆུ་སྐོལ་
བཏུང༌། །དྭངས་མ་གནས་འཇོག་ཆུ་སེར་ཚ་བ་སྐེམ། །གླ་རྩི་གུར་གུམ་སྒ་རྒོད་གཉེན་པོའི་
སྨན། །ཞོའམ་བོང་ཁྲག་ལ་སྦྱར་ལྡེ་གུར་བཏང་། །སྨན་རྗེས་འབྲས་བུ་གསུམ་གྱི་རྒྱུན་སྦྱོངས་
བྱ། །ཤ་སྦོས་ཆུ་བ་འཁུམས་སམ་རུས་ཚིགས་ཟུག །ར་མཉེ་བ་སྤྲུ་ཉེ་ཤིང་ཆུ་ལུམས་བྱ། །རྗེས་
ལ་སྤང་སྤོས་མར་དཀར་སྦྱར་བ་བྱུག །ཚིགས་མིག་ཆུ་སེར་གྲང་ཐུར་སྦྱོར་བས་གདོན། །ཁ་
ཟས་འབྲས་དང་ཆག་ཚེ་སྲན་ཆན་དང༌། །ཁུར་མང་བ་ཡི་ཞོ་དར་བསྐོལ་གྲངས་ཆུ། །ཇ་
སོགས་བསིལ་ལ་ཡང་བའི་ཟས་སྐོམ་བསྟེན། །རུལ་སྐྱུར་སྣུམ་ལྕི་ཚྭ་སོགས་དུག་འདྲ་སྤང༌། །
མེ་ཉི་ཉིན་གཉིད་རླན་གྲངས་ཀུན་ལ་གཟབ། །ཚ་བ་བྱང་བའི་རྟགས་བྱུང་སྦྲང་ཆང་དང༌། །
བ་ཡི་རྣམ་ལྔས་ཆུ་སེར་ཚད་ལྷག་སྐམ། །སྐམ་སར་མི་རྔུལ་ཙམ་དུ་དལ་བར་བཅག བྱེ་བྲག་
ཤ་ཏྲེམ་གཟེ་མ་བ་སྤྲུ་བ། །ཤིང་ཚ་དོང་གྲ་མར་སྦྱར་ལྡེ་གུ་བཏང་། །ལྕ་བའི་ཁཎྜ་གཡེར་ཆུ་སྒ་
ཆུ་བསྟེན། །རུས་ཏྲེམ་ག་བུར་བཟང་དྲུག་ཙན་དན་དཀར། །ཤིང་ཚ་བ་ལེ་ཀ་དང་པུ་ཤེལ་རྩེ། །
བཅའ་སྒ་ནག་མཚུར་ཀ་ར་སྦྱར་ལ་བཏང༌། །བོང་ཁྲག་དྲོན་མོ་གླ་རྩི་སྒ་སྦྱར་རམ༌། །བུ་རམ་
སྦྲང་རྩི་མར་སྦྱར་ཏིང་ཁྲོལ་བཏང༌། །གཏར་བསྲེག་མི་བྱ་རྗེས་ལ་བཤུལ་ཤ་བསྟེན། །རྩ་ཏྲེམ་
དང་པོ་བ་ལེ་ཀ་ཡི་ཐང༌། །དེ་འོག་གཡེར་ཆུ་བསྡུས་ཐང་བཏང་བར་བྱ། །རུ་རྟ་སེ་འབྲུ་ཤིང་
ཚ་པི་པི་ལིང༌། །སྒ་སྐྱ་ཨ་རུ་ར་དང་ཁ་རུ་ཚྭ། །སྦྲང་དང་སྦྱར་བའི་ལྡེ་གུ་བཏང་བར་བྱ། །གླ་
25-1-314


རྩི་གུར་གུམ་ཨ་རུ་ལི་དོང་གྲ། །སྦྲང་རྩི་མར་དང་སྦྱར་བའི་ལྡེ་གུ་བཏང༌། །རྩ་ཡི་དྲོད་འཆོར་
གཏར་ག་མི་བྱ་སྤང༌། །ཆུ་ཏྲེམ་འབྲས་བུ་གསུམ་དང་མཱུ་ལ་གསུམ། །འུ་སུ་ཚ་བ་གསུམ་དང་ཚྭ་
སྣ་གསུམ། །སྦྲང་རྩི་མར་དང་སྦྱར་བའི་ལྡེ་གུ་བཏང༌། །ཨ་རུ་རྒུན་འབྲུམ་འུ་སུ་ཤོ་མོ་ཟ། །ཚ་
བ་ལྔ་དང་སྦྲང་རྩི་མར་སྦྱར་བཏང༌། །བྱིན་གཞུག་རྩ་གཏར་ཚ་བ་བྱང་བ་དང༌། །བཅོ་ལྔ་བཅུ་
དྲུག་དཔྱི་མིག་གར་བབས་བསྲེག །ཆུ་རྒྱུས་འཁུམས་ན་བསྐུ་མཉེ་དྲག་ཏུ་བྱ། །ཏྲེམ་དཀར་
ཆང་ནང་ཤིང་ཚ་ལི་དོང་གྲ། །སྦྲང་སྦྱར་རྩ་བའི་ཟན་ཆང་ཆུ་ལུམས་བྱ། །ར་མཉེ་བ་སྤྲུ་ཉེ་ཤིང་
སྦྲང་མར་བསྟེན། །ཏྲེམ་ནག་ཨ་རུ་ཆུར་བསྡུས་ཞག་འགར་བཏང༌། །གུར་གུམ་བཤལ་བྱ་གཟེ་
མའི་སྨན་མར་སྦྱར། །ཀུན་ལ་སྐྱེད་ཆུང་རུས་རྩ་(དཔུས་མོའི་གཉན་གོང་ནས་གྱིན་དུ་འཁྱིད་གང་སོར་གཉིས་གྱི་
སར་གཤགས་དེ་ན་རྩ་ནག་པོ་གྲོ་སོག་ཙམ་ཅིག་ཡོད། དེ་ལ་ཁྲག་ཕུལ་གང་འདོན་)གཏར་བ་དང༌། །རྩིབ་ཏུ་བཅུག་
ལ་ཁ་བཅིང་ལན་མང་སྒྲིལ། །རྟ་ལ་བསྐྱོན་ཏེ་གསང་ལ་ཆུ་ནང་སྐྱུར། །ཞེས་གསུངས་སོ། །
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གྲུམ་བུའི་ནད་བཅོས་
པའི་ལེའུ་སྟེ་ལྔ་བཅུ་རྩ་བརྒྱད་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ཆུ་སེར་ནད་ལ་གྱུར་ཚུལ་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །དང་པོ་གྱུར་ཚུལ་ཁ་ཟས་དྭངས་མ་དེ། །མཁྲིས་པ་དམར་སྒྱུར་ལས་
ཀྱིས་ཁྲག་ཏུ་འགྱུར། །ཁྲག་གི་སྙིགས་མ་མཁྲིས་པའི་ནང་དུ་གསོག །མཁྲིས་པའི་དྭངས་མ་
ཆུ་སེར་ཉིད་དུ་འགྱུར། །གནས་ནི་ཤ་རུས་དོན་སྣོད་ཕྱི་ནང་ཁྱབ། །ཁྱད་པར་ཤ་མདངས་བར་
དང་ཚིགས་པར་གནས། །ཚད་ནི་རང་གི་སྙིམ་པ་བཞི་རུ་བཤད། །དབྱེ་བ་ཆུ་སེར་རིགས་དང་
འཇུག་པའི་སྒོ། །རིགས་ནི་ཆུ་སེར་དཀར་པོ་ནག་པོ་གཉིས། །ཆུ་སེར་དཀར་པོ་བད་རླུང་གྲང་
བར་བསྡོངས། །ཆུ་སེར་ནག་པོ་ཁྲག་མཁྲིས་ཚ་བར་བསྡོངས། །འཇུག་སྒོ་ལྤགས་གྲམ་ཤར་
25-1-315


རྒྱས་རྩ་རུ་རྒྱུག །རུས་ཞེན་དོན་བབས་སྣོད་དུ་ལྷུང་བའོ། །དེ་ཡི་རྟགས་ལ་སྤྱི་དང་བྱེ་བྲག་
གཉིས། །སྤྱི་རྟགས་ཟ་འཕྲུག་ཐོར་བ་ལེབ་མོར་འོང༌། །སྐབས་སུ་ལུས་ཀུན་སྦོ་ཞིང་སྐྲངས་པ་
དང༌། །ཤ་མདོག་སྔོ་ལ་རྩུབ་ཅིང་འབྲུམ་པ་འོང༌། །གྲ་མ་ཕུབ་མས་རེག་ན་ཟ་འཕྲུག་བྱེད། སྐྲ་
དང་སྨིན་མ་བྱི་ཞིང་འདྲུགས་པའོ། །ཁྱད་པར་ཆུ་སེར་དཀར་པོ་རྩ་ཆུ་གྲང༌། །ནམ་ཞོད་རླན་
དུགས་ཆུར་ཞུགས་གྲང་ཚེ་ལྡང༌། །ལུས་དྲོས་དྲོད་བཅུད་ཟོས་རྗེས་བདེ་བར་མངོན། །ཆུ་སེར་
ནག་པོ་རྩ་ཆུའི་ཚ་བ་སྐྱེ། །མེ་ཉིས་དྲོས་ཤིང་ཆང་འཐུངས་སྟོན་དུས་ལྡང༌། །ཆུ་སེར་ལྤགས་
གྲམ་ཁྱད་པར་ཟ་འཕྲུག་བྱེད། །ཐོར་ཆུང་མང་ལ་ཕྲུགས་ན་ཆུ་སེར་འཛག །ལྤགས་མདོག་
སྔོ་རྩུབ་གྱོང་ལ་སྲིན་ཐོར་མང༌། །ཤ་ལ་རྒྱས་ན་ཉྭ་སྒང་ཤུ་བ་འབྱུང་། །ཤ་ཀུན་འགུལ་འཕྲིག་
སྐྲངས་ཤིང་སྦོ་བ་ཡིན། །རྩར་རྒྱུག་རྩ་ཀུན་སྦྲིད་དང་འཁྱུག་པ་དང༌། །ཚ་མྱག་ཚ་བར་གྲང་
བསིལ་ཟ་བེར་འོང༌། །རྩ་མིག་ནང་དུ་སྲོག་ཆགས་རྒྱུ་བ་འདྲ། །རུས་ཞེན་རུས་པ་ལྷང་ལྷང་ན་
བ་དང་། །ཚིགས་དམིགས་ན་ཞིང་བརྐྱང་བསྐུམ་འགྲོ་འདུག་དཀའ། །ཚིགས་ཁ་སྐྲངས་ཤིང་
ཟ་ལ་ཤུ་ཐོར་འབྱུང༌། །དོན་བབས་སྙིང་ལ་ཆུ་སེར་ཞུགས་པ་ཡིས། །ཤེས་པ་འཕྱོ་འདར་སྟོད་
རྒྱངས་སྙིང་མི་དགའ། །དངང་ཞིང་ཚིག་པ་ཟ་ལ་ཁྲོ་ཚིག་བྱེད། །བྲང་ལ་སྲིན་ཐོར་ཤ་བཀྲ་འོང་
བ་དང༌། །ལྕེ་ལ་ཐོར་པ་རྒྱུན་དུ་འོང་བ་ཡིན། །གློར་ཞུགས་གློ་མང་མིག་དང་རྐང་བོལ་སྐྲངས། །
བྲང་རྒྱབ་གཟེར་ལ་སྐད་འགག་མཚུལ་པ་སྐམ། །མཆིན་ཞུགས་མིག་ནས་མཆི་མ་རྒྱུན་དུ་
འཛག །ལུས་ལྕི་སྣ་ཁྲག་འོང་ཞིང་ཕོ་མཆིན་ན། །མཆེར་ཞུགས་སྦོ་འཁྲོག་མཆུ་ནད་རྒྱུན་དུ་
འབྱུང༌། །མཁལ་ཞུགས་རྐེད་པ་དཔྱི་དང་བརླ་སུལ་ན། །སྨད་ལྕི་རྐང་པ་སྦྲིད་ཅིང་རྩ་ཀུན་
འཁྱུག །སྣོད་བབས་མིག་སེར་ཚ་འགྱུར་སྣ་གླང་ལྡང༌། །སྐབས་སུ་ཆུ་སྡོམ་སྐབས་སུ་སེར་
སྨུག་འཁྲུ། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་ལ་བཅོས་ཐབས་སྨན་དཔྱད་
ཟས་སྤྱོད་བཞི། །ཆུ་སེར་དཀར་ནག་གཉེན་པོ་སོ་སོར་བསྟེན། །ཆུ་སེར་དཀར་པོ་ཆང་དང་
25-1-316


ལུག་ཤ་དང༌། །མར་རྙིང་འཕྱི་བ་རྟ་བོང་ཤ་རྣམས་དང༌། །བུ་རམ་ཆང་སྦྱར་གཟེ་མའི་ཟན་ཆང་
དང༌། །ར་མཉེ་རྩ་བའི་ཟན་ཆང་བུར་སྦྱར་བཏང༌། །སྤྱོད་ལམ་རླན་གྲངས་བསེར་བུ་ཕུབ་ལས་
སྤང༌། །སྨན་དུ་ར་མཉེ་ལྕ་བ་གཟེ་མ་དང༌། །ཉེ་ཤིང་བ་སྤྲུ་གོང་མས་ཆ་བསྐྱེད་པའི། །བསྡུས་
ཁུའི་ཁཎྜ་སྦྲང་དང་བུ་རམ་སྦྱར། །བཅའ་སྒ་པི་པི་ལིང་དང་ཙི་ཏྲ་ཀ །སུག་སྨེལ་ཛཱ་ཏི་སྦྱར་ཏེ་
བཏང་བར་བྱ། །རྩ་བ་ལྔ་དང་སེང་ལྡེང་འབྲས་བུ་གསུམ། །ཟོ་མར་བཅས་པའི་མར་ཁུ་བུ་
རམ་སྦྱར། །བཅའ་སྒ་ལ་སོགས་ཕྱེ་མ་ཁ་ཚར་གདབ། །གྲང་བའི་ཆུ་སེར་མ་ལུས་འཇོམས་
པར་བྱེད། །སྦྲང་སྨྱོན་ཆ་ཡིས་གོམས་པས་བྲིད་ལ་བསྟེན། །བཙན་དུག་ཨ་རུ་གུར་གུམ་ཤུ་
དག་དང༌། །རུ་རྟ་ཤིང་ཀུན་ཛཱ་ཏི་བྱི་ཏང་ག །ཙི་ཏྲ་ཀ་དང་དྲོད་སྨན་བུ་རམ་སྦྱར། །རིལ་བུ་སྲན་
ཙམ་བསྟེན་ན་ཆུ་སེར་སྐེམ། །མུ་ཟི་འབྲི་མར་ནང་དུ་བསྡུས་པ་ཡིས། །མར་ནག་མདོག་འགྱུར་
སྦྲང་དང་སྦྱར་ལ་བཟའ། །དཔྱད་དུ་གང་བབས་གསང་ལ་མེ་བཙའ་བྱ། །ཆུ་སེར་ནག་པོ་ཟས་
སྤྱོད་བསིལ་བས་བཅོས། །བ་ར་མཛོ་ཡི་ཞོ་དར་མར་གསར་དང་། །ཆབ་ཚ་བ་ལང་རི་དྭགས་
ཤ་གསར་བསྟེན། །ཆང་དང་མར་རྙིང་རུལ་སུངས་བུ་རམ་སྤང་། །སྤྱོད་ལམ་བསིལ་སར་དལ་
བར་གནས་པར་བྱ། །སྨན་དུ་སྔོན་བུ་ལྕུམ་རྩ་ཨ་རུ་ར། །ཐར་ནུ་རེ་ལྕག་ཆུ་རྩ་བྱི་ཏང་ག །ཆུ་
སེར་སྨན་གསུམ་བ་ཆུར་སྦངས་པས་བཀྲུ། །དེ་རྗེས་རྩ་བཤལ་བཏང་ལ་ཆུ་སེར་སྦྱངས། །སྐྱེར་
པ་སེ་རྒོད་སེང་ལྡེང་བ་རུ་ཡི། །ཕྱེ་མ་གུ་གུལ་བཅུ་དང་སྦྱར་ལ་བཏང་། །བ་ཡི་རྣམ་ལྔ་སེང་
ལྡེང་སྨན་མར་སྦྱར། །དངུལ་ཆུའི་རིལ་བུ་བསྟེན་པས་ཆུ་སེར་སྐེམ། །དཔྱད་དུ་གང་ལ་བབས་
པའི་རྩ་ལ་གཏར། །བྱེ་བྲག་ཆུ་སེར་ཤ་པགས་རྒྱས་པ་ལ། །སྔོན་བུ་སྲུབ་ཀ་ཞོ་དང་སྦྱར་བས་
བྱུག །སོ་མ་ར་ཛ་ཤུ་དག་ལི་ཤི་དང༌། །ཙི་ཏྲ་ཀ་དང་མར་སྦྱར་བྱུག་པར་བྱ། །སྲད་དཀར་ཐལ་
བ་རྟ་བོང་འོ་མས་བྱུག །ཐལ་ཀ་རྡོ་རྗེ་གཡེར་མ་མར་སྦྱར་བྱུག །སྦུར་བ་དོང་གྲ་འོ་མ་སྦྱར་
བའམ། །བ་རུ་ར་དང་སྦྲུལ་ཐལ་མར་སྦྱར་བྱུག །སོ་མ་ར་ཛ་བ་བླ་བ་གཅིན་བྱུག །མ་ཕན་རྩ་
25-1-317


སྦྱོངས་སེང་ལྡེང་སྨན་མར་སྦྱར། །རྩར་རྒྱུག་གཏར་དང་རྩ་སྦྱོངས་རྗེས་ལ་སྐམ། །རུས་ཞེན་ལྟོ་
དང་རྩ་ནས་སྦྱངས་བྱས་ལ། །རྩ་བ་ལྔ་དང་མུ་ཟིའི་སྨན་མར་སྦྱར། །ཚིགས་དམིགས་ཆུ་སེར་
ལྟ་བུར་མེ་ཐུར་བྱ། །ཤ་པགས་རྩ་རུས་ཀུན་ལ་ཆུ་ལུམས་བསྔགས། །དེ་རྗེས་སེང་ལྡེང་སྨན་
མར་ནད་རྗེས་བཅད། །སྙིང་ལ་ཞུགས་ན་སྦལ་རྒྱབ་ཆིག་ཐུབ་དང༌། །གསེར་རྡོ་མཚལ་དཀར་
ཕ་ཝཾ་ལོང་བུ་དང༌། །ཚ་ལ་བཟང་དྲུག་ཆུ་སེར་སྨན་གསུམ་དང༌། །གུ་གུལ་ཤིང་ཀུན་གླ་རྩི་སྙིང་
ཞོ་ཤ །རུ་རྟ་སྐྱུ་རུ་ར་དང་ཨ་ག་རུ། །ཨ་རུ་ར་དང་ཀ་ར་སྦྱར་ལ་བཏང༌། །སྙིང་རྩ་གཏར་ཞིང་
ཚིགས་པ་དྲུག་པ་བསྲེག །བཙན་དུག་རིལ་བུ་སེང་ལྡེང་སྨན་མར་སྦྱར། །གློར་ཞུགས་ཅུ་གང་
རུ་རྟ་ཤིང་མངར་དང༌། །ཙན་དན་རྒུན་འབྲུམ་ཆུ་སེར་སྨན་གསུམ་དང༌། །ག་དུར་དམར་པོ་
གསུམ་དང་སྦྲང་སྦྱར་ལ། །གློ་ཡི་རྩ་གཏར་ཚིགས་པ་བཞི་ལྔ་བསྲེག །མཆིན་མཆེར་ལ་ཞུགས་
རྩ་ལྟོས་སྦྱང་བ་གཅེས། །གུར་གུམ་བྲག་ཞུན་གླ་རྩི་པི་པི་ལིང༌། །ཀ་ར་སྦྱར་བཏང་མཆིན་པའི་
རྩ་ལ་གཏར། །མཁལ་བབས་དམར་པོ་བཞི་ཡི་ཐང་བཏང་ཞིང༌། །རྩ་སྦྱོངས་རྗེས་ལ་རྩ་བའི་
སྨན་མར་སྦྱར། །གང་དུ་བབས་པའི་གསང་དུ་མེ་བཙའ་བྱ། །སྣོད་དུ་ཆུ་སེར་བབས་པ་སྦྱོངས་
ཀྱིས་དབྱུང༌། །མདོར་བསྡུས་ཆུ་སེར་འཕེལ་བས་ནད་འགྱུར་ཏེ། །ཤ་བཀྲ་གླང་ཤུ་སྲིན་ཐོར་ཁེ་
མ་དང༌། །ཤུ་བ་ཟ་རྐོང་ཟ་འཕྲུག་ཆུ་སེར་བྱེད། །འོར་དང་སྐྱ་རྦབ་དམུ་ཆུ་ཆུ་སེར་བྱེད། །སུར་
ཡ་མེ་དབལ་དྲེག་གྲུམ་གག་ལྷོག་དང༌། །རྙོགས་པའི་ཚ་བ་ཐམས་ཅད་ཆུ་སེར་བྱེད། །མགོ་
དང་ཡན་ལག་བྱང་ཁོག་ལ་སོགས་པ། །རྨ་ཡི་ཉེས་པ་ཐམས་ཅད་ཆུ་སེར་བྱེད། །འབྲས་དང་
མཛེ་ནད་ཆུ་སེར་ལས་འབྱུང་བས། །དེ་ཕྱིར་ཆུ་སེར་ནད་ལ་བྱ་ར་གཅེས། །དངུལ་ཆུ་མུ་ཟི་
སེང་ལྡེང་སོ་མ་ར། །ཐལ་ཀ་རྡོ་རྗེ་གུ་གུལ་དཀར་ནག་གཉིས། །སྐྱེར་པ་བྲག་ཞུན་སྔོ་ཡི་ཚ་
བ་གསུམ། །བྱང་པ་རྩ་བ་ལྔ་དང་བོང་བུའི་ཤ། །སྦྲང་རྣམས་ཆུ་སེར་འཇོམས་པའི་གཉེན་པོ་
ཡིན། །ནད་གང་བསྡོངས་པའི་གཉེན་པོ་བསྡེབས་ཏེ་བསྟེན། །ཆུ་སེར་ཟད་ན་ཤ་དང་པགས་
25-1-318


པ་སྐམས། །ཉམ་སྟོབས་མི་སྐྱེ་ཤ་དང་ཆང་གིས་གསོ། །ཞེས་གསུངས་སོ། །བདུད་རྩི་སྙིང་པོ་
ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཆུ་སེར་གྱི་ནད་གསོ་བའི་ལེའུ་སྟེ་ལྔ་བཅུ་
རྩ་དགུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །རྩ་དཀར་ནད་ལ་གྱེས་ཚུལ་རྒྱུ་རྐྱེན་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །གྱེས་ཚུལ་ལུས་ཀུན་རྩ་བ་རྩས་སྐྱེད་དེ། །སྲོག་གི་རྩ་བར་གྱུར་པའི་རྩ་
རིགས་གཉིས། །སྲོག་རྩ་ལས་བྱུང་རྩ་ནག་གྱེན་དུ་གྱེས། །གླད་པ་ལས་བྱུང་རྩ་དཀར་ཐུར་དུ་
ཟུག །ནང་རྩ་དོན་འབྲེལ་ཕྱི་རྩ་ཡན་ལག་འབྲེལ། །ནང་རྩ་དར་གྱི་དཔྱངས་ཐག་བཅུ་གསུམ་
སྟེ། །རླུང་གི་རྩ་བཞི་སྙིང་དང་རྒྱུ་མར་འབྲེལ། །མཁྲིས་པའི་རྩ་བཞི་གློ་ལོང་མཆིན་མཁྲིས་
འབྲེལ། །བད་ཀན་རྩ་བཞི་ཕོ་མཆེར་མཁལ་ལྒང་འབྲེལ། །འདུས་པའི་རྩ་གཅིག་བསམ་
སེར་འབྲེལ་བ་ཡིན། །ནང་རྩ་མི་མངོན་དོན་སྣོད་འབྲེལ་བའི་ཕྱིར། །མགོ་སྐྱོན་འབབ་ཅིང་ན་
ལུགས་དུ་མ་སྟོན། །ཕྱི་རྩ་སྦུ་གུ་ཅན་གཉིས་འཇའ་བྱེད་གཉིས། །རཏྣ་གཉིས་ཏེ་རྩ་རྒྱུད་དྲུག་
ཏུ་བཤད། །སྦུ་གུ་ཅན་དེ་ལྟག་པའི་སྡུད་སྒོར་དོན། །ཨན་སྟོང་གཡས་གཡོན་མཚོན་རེ་ཐད་
ཀར་འགྲིམས༌། ཚིགས་པ་ལྔ་ནས་གཞུང་པའི་རྩ་དང་འབྲེལ། །བཅུ་བཞི་པ་ནས་བསམ་སེ་
མཁལ་མར་འབྲེལ། །གཞུག་ཆུང་དཔྱི་ལེབ་མཚམས་བརྒྱུད་དཔྱི་མིག་དོན། །བྱིན་བརླའི་ཕྱི་
སུལ་ཕྱི་ལོང་གུང་མཐེབ་བརྒྱུད། །གཉིས་ནི་བཅུ་བཞི་ནས་གྱེས་དཔྱི་སྟེང་དོན། །བརླ་སྒང་
པུས་ཚིགས་ངར་གདོང་ཐུར་བར་འགྲིམས། །པིར་མགོར་འབྲེལ་ནས་གོང་དང་རྐང་མཐིལ་
འདུས། །འཇའ་བྱེད་ལྟག་ཟུར་སྤུ་འཁྱིལ་གཉིས་སུ་དོན། །ཨན་སྟོང་འགྲམ་ནས་ཕྲག་བརྒྱུད་
དཔུང་སོག་མཚམས། །དཔུང་འཛུམ་ཚིགས་དམིགས་ལུག་གཞུག་ཕྱི་མཆན་འགྲིམས། །གྲུ་
མོའི་ཚིགས་བསྐོར་ལག་པའི་མཐེབ་མོར་འབྲེལ། །རཏྣ་རྩེ་མགོ་རྣ་བཤལ་འོག་ཏུ་ཐོན།  །
25-1-319

 
སྒྲོག་རུས་ནང་ནུབ་གྲུ་མོ་གཞུ་མཆོག་བར། །ཐུར་བར་འགྲིམས་ནས་ལག་པའི་སྲིན་མཐེབ་
འབྲེལ། །ཕྱི་རྩ་ཤ་ཆུ་རུས་ཚིགས་འབྲེལ་བའི་ཕྱིར། །སྐྲངས་སྦོས་སྐམས་དང་ཞ་རེངས་བྱེད་
པར་འགྱུར། །དེ་ལ་རྒྱུ་རྐྱེན་དྲག་ཤུལ་འགྲམས་པའམ། །རིམས་དུག་ཚ་བ་རྩ་ལ་བབས་པ་
འམ། །མཚོན་གྱིས་བཅད་བརྡུངས་རླུང་འཁྲུགས་རྩར་ཞུགས་པས། །དེ་ལ་རྩ་དཀར་ནད་
དུ་འགྱུར་བ་ཡིན། །དབྱེ་བ་སྤྱི་དང་བྱེ་བྲག་རྣམ་པ་གཉིས། །སྤྱི་ལ་རྩ་དཀར་ཚ་དང་གྲང་བ་
གཉིས། །དེ་ཡང་དུས་ཀྱིས་གསར་དང་རྙིངས་པར་འགྱུར། །བྱེ་བྲག་གནས་དང་འདུ་བའི་ནད་
གཞིས་དབྱེ། །གནས་ནི་མགོ་དང་བྱང་ཁོག་ཡན་ལག་གསུམ། །འདུ་བ་རླུང་མཁྲིས་བད་ཀན་
འདུས་པ་བཞི། །དེ་རྟགས་མགོ་སྟོད་ཁ་མིག་ཡོན་པོར་འགྱུར། །མགོ་འཁོར་མྱོས་དང་དྲན་
ཉམས་ཙོག་མི་ཟུག །གཉིད་ཆུང་སྐྱུག་དང་ཁ་ལྐུགས་དབང་པོ་འཁྲུལ། །གཡའ་ཟ་སྒྲ་ཆེར་
མི་བཟོད་ཡན་ལག་ཤལ། །བྱང་ཁོག་སྨྲ་མང་འདར་རྗེས་ངོམས་པ་མེད། །གཞོགས་གཅིག་
བེམ་མམ་ཚོར་བྲལ་སྐྲངས་སམ་སྙམ། །དྲི་ཆུ་བླུགས་སམ་ཡང་ན་རྒྱུན་གཉིས་སྡོམ། །མེ་ལྟར་
ཚ་འམ་ཡང་ན་རྡོ་ལྟར་གྲང༌། །གཞུ་ལྟར་གུག་གམ་ཡང་ན་རྭ་ལྟར་དགྱེ། །ཤིང་ལྟར་རེངས་
སམ་ཡང་ན་གྱོང་ལྟར་བསྡུས། །ངོ་མཚར་ནད་རྟགས་དུ་མ་སྟོན་པར་བྱེད། །ཡན་ལག་ཤལ་
སྦྲིད་བེམ་མམ་ཚོར་བ་བྲལ། །གཡོ་སྐམས་ཞ་རེངས་འཁུམས་སམ་རོ་ལྟར་བོག །མཚོན་
ཕོག་གཡས་གཡོན་སྟོད་སྨད་སྣེ་བསྣོལ་སྐྲངས། །འགྲམས་མཚོན་ཚད་བབས་མཁྲིས་ལྡན་
ཚ་བར་འགྱུར། །རླུང་དང་བད་ཀན་རྐྱེན་བྱས་གྲང་བར་འགྱུར། །རླུང་ལྡན་འདར་གཡལ་ཁ་
སྐོམ་ཤེས་པ་འཁྲུལ། །མཁྲིས་ལྡན་དྲོད་དང་ཚ་བ་ཟུག་གཟེར་ཆེ། །བད་ཀན་ལྡན་པ་དྲོད་ཆུང་
གཡོ་ཞིང་སྐྲངས། །འདུས་པའི་མཚན་ཉིད་ཀུན་རྟགས་སྟོན་པར་བྱེད། །སྟོབས་ལྡན་འཆི་ལ་
འབྲིང་པོ་བཅོས་པས་འཚོ། །ཚབས་ཆུང་ཡུན་ལོན་རང་བཞིན་འཚོ་བར་འགྱུར། །བཅོས་པའི་
ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་གསར་དང་རྙིངས་པ་དུས་དང་སྦྱར། །གསར་
25-1-320


དུས་ཚབས་ཆེན་མཐིལ་བཞི་བཅུ་གསུམ་པ། །སྤུ་འཁྱིལ་པིར་མགོ་སོར་མོ་ཉི་ཤུ་བསྲེག །ཚ་
བ་ཤས་ཆེ་རིན་ཆེན་རྡོ་རྩི་སྔོ། །(གསེར་ཟངས་གཡུ་རྙིང་ཐོག་ལྕགས་བྱུ་རུ་ཉ་སྐྱོགས། །རྡོ་རྒྱལ་བཞི་བཟང་དྲུག་གླ་རྩི། 
འབྲི་ཏ་ས་འཛིན་ལྕམ་པ་)ཀ་ར་དཀར་སྦྱར་ཆུ་གྲང་འཕུལ་ལ་བཏང༌། །ཡང་ན་(ཉ་ཕྱིས་བཟང་དྲུག་གི་ཝཾ་ཙན་
དན་དཀར་དམར་ཨ་ག་རུ་བསེ་རུ་གླ་རྩི་རུ་རྟ་པི་ལིང་ཤིང་ཚ་འབྲས་བུ་གསུམ་སྡིག་སྲིན་གསེར་བྱེ་ལྕམ་པ་ཟི་ར་གཉིས་འབྲི་ཏ་ས་
འཛིན་)ཉི་ཤུ་རྩ་ལྔའི་ཕྱེ་མ་སྦྱར། །ཟས་སྐོམ་གསར་བཅུད་ཡོས་ཐུག་ཞོ་དར་བསྟེན། །སྟོད་སྨད་
གར་བབས་གནས་སྦྱར་རླངས་ཐོན་གཏར། །ཚ་བ་བྲི་ནས་བུར་ཆང་བདུད་རྩི་ཡིན། །གྲང་
བ་ཤས་ཆེ་གླ་རྩི་བཟང་པོ་དྲུག །བ་མཁལ་རུ་རྟ་ཨ་རུ་བུ་རམ་སྦྱར། །ཨ་རུ་གྲང་བསིངས་ཁུ་
བས་འཕུལ་ལ་བཏང་། །ཡང་ན་ཨ་རུ་སྨན་ཆེན་དཀར་ནག་སེར། །གླ་རྩི་རུ་རྟ་ཤུ་དག་དྲི་ཆུས་
སྦྲུ། །རིལ་བུ་དྲོད་དུས་བསྟེན་ན་བདུད་རྩིར་འགྱུར། །དྲུག་བདུན་དཀར་ནག་མཚམས་བསྲེག་
གཏར་མི་བྱ། །ཁ་ཟས་དྲོད་བཅུད་བུར་ཆང་སྨན་མར་སྦྱར། །རྩ་ནད་རྙིངས་པ་བསྡུས་སྦྱངས་
བརྟ་བར་བྱ། །ད་ལིས་ཀྱི་ལྕེ་ཤིང་མངར་ཁཎྜ་ལ། །གུར་གུམ་སུག་སྨེལ་འབྲི་ཏ་ས་འཛིན་དང༌། །
གསེར་བྱེ་ཉི་དགའ་སྦྲང་སྦྱར་ནང་ནུབ་བཏང་། །གླ་རིལ་ཆང་བཙོས་དྲིལ་བས་རྩ་ནད་སྡུད། །
དེ་ནས་བྱང་ཁོག་ནང་རྩར་བབས་ཆེ་ན། །ལྟོ་སྦྱོངས་རྗེས་ལ་རྩ་བཤལ་བསྔགས་པ་ཡིན། །
མགོ་དང་ཡན་ལག་ཕྱིར་བབས་རྩ་ནས་སྦྱངས། །ཐ་མར་འབྲི་ཏ་ས་འཛིན་ཨ་རུ་ར། །ད་ལིས་
ཀྱི་ལྕེ་ཤིང་མངར་ཉི་དགའ་ཡི། །སྨན་མར་སྦྲང་རྩི་བུ་རམ་ལྡན་པ་བཏང༌། །ཡང་ན་འབའ་སམ་
སྨན་མར་དྲོད་བཅུད་བསྟེན། །བྱེ་བྲག་མགོར་བབས་ཕྱི་རྩ་གླ་རིལ་ལུམས། །ཨན་སྟོང་འགྲམ་
དང་སྡུད་སྒོ་སྤུ་འཁྱིལ་བསྲོ། །ནང་རྩར་བབས་ན་རྡོ(འི་རྒྱལ་པོ་བཞི་དོམ་མཁྲིས་གུར་གུམ་གླ་རྩི་རུ་རྟ་ཨ་རུ་ཨ་
བྱག་ཆུ་རྩ་བོང་ང་གསེར་ཐིག་ཚ་ན་ཀ་ར་གྲང་ན་བུ་རམ་གྱི་)སྦྱོར་བསྟེན་པར་བྱ། །རི་བོའི་རྩེ་ལ་གསེར་གྱི་མེ་
རྒྱས་གདབ། །ལུས་ཀྱི་ཆ་ཉམས་དྲོད་ཤོར་མདུད་གསུམ་གདུར། །གཞོགས་རེངས་ཁ་ལྐུགས་
རྩེ་མགོ་སོར་མོ་བསྲེག །ཁ་མིག་ཡོ་ན་ལྟག་ཟུར་སྤུ་འཁྱིལ་བསྲེག །དར་རྩ་བསྣད་འགྲམས་
25-1-321


མགོ་ལྕི་སྣ་སྦྱོངས་བྱ། །ཚ་བ་རྩ་རྒྱས་རྩེ་ཆུང་རྩ་ལྟོ་སྦྲག །རླུང་འཁྲུགས་གུར་གུམ་ཤིང་མངར་
སྣ་སྨན་བཏང༌། །བྱང་ཁོག་རྩ་ནད་སྤྱི་གཙུག་སྡུད་སྒོ་དང༌། །དྲུག་པ་དཀར་ནག་མཚམས་
དང་སྒྲོག་རུས་གཤོང་།། །ཨན་སྟོང་འགྲམ་དང་སྐེ་སྟོང་སོག་མཐིལ་བསྲེག །གསེར་ཟངས་
ཐོག་ལྕགས་བྱུ་རུ་ཉ་སྐྱོགས་དང༌། །བཟང་དྲུག་ཙན་དན་དཀར་དམར་ཨ་ག་རུ། །གླ་རྩི་བསེ་
རུ་འགྲོན་ཐལ་དོམ་མཁྲིས་དང༌། །རྡོ་དྲེག་ཀ་ར་ཨ་རུའི་ཁུ་བས་འཕུལ། །གླ་རིལ་ལུམས་བྱ་
རྙིངས་ནས་རྩ་ལྟོ་སྦྲག །སྙིང་ལ་ཛཱ་ཏི་རུ་རྟ་ཨ་གར་བསྣན། །གློ་ལ་ཤིང་མངར་རྒུན་འབྲུམ་གླ་
སྒང་བསྣན། །མཆིན་པར་ཨུཏྤལ་བྲག་ཞུན་བ་ཤ་ཀ །མཆེར་པར་མ་ནུ་པ་ཏོལ་པི་པི་ལིང་།༌། 
མཁལ་མར་བཙོད་དང་ཞུ་མཁན་རྒྱ་སྐྱེགས་བསྣན། །ཕོ་བར་མ་ནུ་རྒྱམ་ཚྭ་པ་ཏོ་ལ། །རྒྱུ་ལོང་
བོང་ང་དུག་ཉུང་གླ་སྒང་བསྣན། །མཁྲིས་པར་ཏིག་ཏ་དུག་ཉུང་གསེར་མེ་ཏོག །ལྒང་པར་ལྕམ་
པ་རྒྱ་ཚྭ་སྡིག་པ་བསྣན། །རང་(དོན་ནོད་)རང་རྩ་གཏར་རང་(གི་)སོར་(མོ་དང་)རང་(གི་ཚིགས་)གསང་
བསྲེག །ཡན་ལག་རྩ་དཀར་བྱེར་བསྡུའི་ཁཎྜ་ལ། །ཚ་ན་ག་བུར་གྲང་ན་པི་པི་ལིང༌། །རིལ་བུ་
མཐེབ་ཙམ་ར་འོ་སྦྱར་ལ་བཏང༌། །གླ་རིལ་བདུད་རྩི་ལྔ་ཡི་ལུམས་སུ་གཞུག །གང་བབས་རྩ་
གཏར་རྙིངས་ནས་རྩ་ནས་སྦྱང༌། །ཤ་སྐམས་པ་ལ་དེ་རྗེས་ཆུ་ལུམས་བྱ། །འབྲས་བུའི་མར་ལ་
བཟང་དྲུག་སྨན་ལྡན་བསྟེན། །ཆུ་རྒྱུས་བབས་ཚེ་སློ་ལུམས་ཆང་རྒན་བཏུང༌། །རྐང་བཤལ་
བཅུ་བཞི་རྩ་ནག་ཁ་གཟར་དང༌། །དཔྱི་མིག་དཔུང་ཚིགས་ཕྱི་ནང་རྐང་མཐིལ་བསྲེག །ལག་
ཤལ་སྒྲོག་རུས་གཤོང་དང་འཇའ་བྱེད་གཉིས། །དཔུང་ཚིགས་ཕྱི་ནང་རཏྣ་ལག་མཐིལ་བསྲོ། །
རླུང་ལྡན་རླུང་གསང་བསྲོ་ཞིང་བཅུད་ཟས་བསྟེན། །མཁྲིས་པར་ལྡན་ན་ལྟོ་སྦྱོངས་རྩ་སྦྱོངས་
བཏང༌། །བད་ཀན་ལྡན་ལ་ཆུ་ཚན་ལུམས་དུགས་བྱ། །འདུས་པའི་ནད་ལ་ཀུན་དང་འབྲེལ་
བར་བཅོས། །གང་ཞིག་རྩ་དཀར་ནད་ཚུལ་མི་ཤེས་པར། །གཟའ་ཕོག་ཟེར་བའི་སྨན་པ་བླུན་
པོ་སྟེ། །ཐབས་འདི་རྨ་རྣམས་ཀུན་གྱི་ལོག་གནོན་དང༌། །རིམས་དུག་བླ་གཉན་ནད་ཀྱི་མདེ་
25-1-322


ཁ་ཡིན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་རྩ་དཀར་གྱི་ནད་བཅོས་པའི་ལེའུ་སྟེ་དྲུག་ཅུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །པགས་ནད་རྒྱུ་རྐྱེན་དབྱེ་བ་བཅོས་ཐབས་གསུམ། །རྒྱུ་ནི་སྲིན་དང་ཆུ་སེར་
འཕེལ་བ་ལ། །གདོན་དང་འདུ་བ་འཁྲུགས་པས་པགས་ནད་སྐྱེད། །དབྱེ་བ་ཤ་བཀྲ་གླང་ཤུ་
མཛེར་པ་དང༌། །ཟ་རྐོང་ཤུ་བ་སྲིན་ཐོར་ངོ་ཤིག་དང༌། །ཁབས་དང་ཁྱེ་མ་ལ་སོགས་སྒྲ་ཡིས་
བརྟག །བཅོས་ཐབས་སྦྲུལ་ནག་པགས་པ་ནུས་ལྡན་བསྲེགས། །བ་རུའི་མར་སྦྱར་གླང་ཤུ་ཤ་
བཀྲ་སེལ། །སོ་མ་ར་ཛ་ལྡོང་རོས་བ་ཆུ་བྱུག །ཕག་ཚིལ་མུ་ཟི་བླང་ཤུ་ཤ་བཀྲ་སེལ། །མཛེར་
པ་པགས་ལ་དྲངས་ཏེ་བཙོད་ཤེལ་བསྲེག །ཟ་ཀོང་གང་ཉེ་གཏར་ལ་ཆུ་ལུམས་བྱ། །ཟ་འཕྲུག་
རྩབས་བཀྲུས་ནིམ་པ་ནག་མཚུར་ཏིལ། །གི་ཝཾ་རྩབས་དང་སྦྱར་བའི་ལྡེ་གུ་བྱུག །སོ་མ་ར་ཛ་
ཤུ་དག་ཙི་ཏྲ་ཀ །ལི་ཤི་ཟོ་མར་ཤུ་བ་ཟ་ཀོང་སེལ། །ཤུ་བ་ཐང་ཤིང་རུ་རྟ་ལྡོང་རོས་མར། །ཡང་
ན་མུ་ཟི་ཚ་ཕབས་དུ་བ་བྱུག །སྔོ་ཡི་ཚ་བ་གསུམ་དང་ར་དུག་པ། །ཐར་ནུ་ཆུ་རྩ་མར་དཀར་
ཤུ་བ་སེལ། །སྲིན་ཐོར་དོ་བའི་རྩ་བ་ཙི་ཏྲ་ཀ །བྱི་ཏང་ག་དང་བཙན་དུག་སྦྱར་བ་བྱུག ངོ་
ཁབས་ཁྱེ་མ་སྦྲང་བཙོད་ལྡེ་གུ་བྱུག །རྟ་དཀར་རྨིག་པ་བསྲེགས་ཐལ་མར་གསར་རམ། །ཟི་
ར་དཀར་ནག་ཡུངས་དཀར་འོ་མ་ཏིལ། །ཡང་ན་སྐྱེར་པ་སེང་ཕྲོམ་བྲི་ཧ་ཏི། །སེང་ཕྲོམ་སྤྲ་
ཚིལ་སྤོས་དཀར་པུ་ཤེས་རྩེ། །བུ་རམ་སྦྲང་མར་བ་གཅིན་བསྐོལ་བ་བྱུག །རྨེ་བ་ངོ་ཁབས་ཁྱེ་
མ་སེལ་བར་བྱེད། །གདོང་པ་པད་མ་ཟླ་བ་ལྟ་བུར་འགྱུར། །སེར་པོ་གཉིས་དང་རུ་རྟ་དུག་མོ་
ཉུང༌། །དུད་པའི་ལྡེ་གུས་ཤུ་བ་ཤ་བཀྲ་དང༌། །གཡན་པ་པགས་ནད་མ་ལུས་སེལ་བར་འགྱུར། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་
པགས་པའི་ནད་གསོ་བའི་ལེའུ་སྟེ་དྲུག་ཅུ་རྩ་གཅིག་པའོ།། །། 
25-1-323


དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ཕྲན་བུའི་ནད་ཀྱི་གསོ་ཐབས་བསྟན་པ་ནི། །ཉྭ་ལོག་འཁྲུ་སྐྱུག་བྱུང་ན་
མཐེབ་སྲིན་བསྲེག །འདོད་ཆགས་(བྱ་ཕོའི་ཟེ་བ་)རྩེ་མོ་ཞེ་སྡང་ཚིལ་(སྦྲུལ་ཚིལ་)བུ་དང༌། །གཏི་
མུག་འཁོར་(ཕག་པ་ནག་པོའི་སྣ་)ལོ་བནྡེའི་མཁྲིས་(དུད་པ་)པ་དང༌། །བོན་པོའི་ཐལ་(རྟ་བོན་པོ་)བ་འདྲེ་
འཇིགས་ཐང་(གུ་གུལ་)ཆུ་དང༌། །བརྟན་པོའི་དྲེག་(ཕོ་བོང་དྲེག་པ་)པ་དྲི་ཅན་ལྟེ་བ་(གླ་རྩི་)རྣམས། །དྲི་
ཆུར་སྦྱར་བ་ཕྱིར་བྱུག་ཁོང་དུ་བཏང༌། །ཡང་ན་བྱ་ཟེ་ཕག་སྣ་ངུར་པའི་ཤ །རྡོ་དྲེག་གླ་རྩི་བུལ་
ཏོག་ཤུ་དག་དང༌། །སུག་སྨེལ་ཆུ་གྲང་འཕུལ་བཏང་གོས་ཀྱིས་བྱིབ། །ཡང་ན་སྦལ་པ་སྡིག་པ་
སྟག་ཁྲ་བོ། །གླ་རྩི་དོམ་མཁྲིས་གི་ཝཾ་དྲི་ཆུར་སྦྱར། །གུར་གུམ་ཐང་བཏང་ཉ་སུལ་ལྕགས་ཀྱིས་
བསྲེག །སྐྱུག་ན་སྐེ་སྟོང་དྲུག་པ་ལྷེན་སྣ་བསྲེག །སྲེ་ལོང་ཐང་བཏང་འཁྲུ་ན་ལྟེ་འོག་བསྲེག །ཁ་
ཟས་བསིལ་དྲོད་ནད་ཀྱི་ཟོ་དང་སྦྱར། །མེས་འཚིག་རྨ་ལ་ཉ་ཡི་མཁྲིས་པ་དང༌། །དོམ་མཁྲིས་
སྦལ་པའི་ཁྲག་དང་སྦྱར་ལ་གདབ། །ཡང་ན་བུལ་ཏོག་བྲག་སྤོས་ཕྱེ་མ་གདབ། །ཚབས་ཆེ་
བ་ལ་ཁོང་དུ་ག་བུར་དང༌། །ཙན་དན་གུར་གུམ་གི་ཝཾ་མཁྲིས་སྣ་བཏང༌། །ཆུ་རུག་ཤོད་དང་
ཞོ་བཙགས་སྦང་འཇིབ་བྱ། །ཆུ་ལ་གནས་པའི་མཁྲིས་པ་མཐའ་དག་དང༌། །ག་བུར་ཅུ་གང་
གུར་གུམ་ཧོང་ལེན་དང༌། །བུལ་ཏོག་བྲག་སྤོས་ཆུ་རྩ་རྨ་བཙིར་གདབ། །ཁབ་བམ་མདེ་འུ་
ཁོང་དུ་ཤོར་བ་ལ། །ཨ་བར་སྐྱུར་གསུམ་གོང་མས་ཆ་བསྐྱེད་ལ། །ཁབ་ལེན་ཕྱེ་མ་སྲིན་བལ་
ཆུ་སྦྱར་བཏང༌། །འགུལ་དུ་མི་གཞུག་གན་རྐྱལ་ཉལ་ལ་བསྡད། །སྲིན་གྱིས་དྲིལ་ནས་བཤང་
སྒོར་འབྱིན་པར་འགྱུར། །ཤ་འམ་ཟན་ལ་སོགས་པས་གནངས་གྱུར་ན། །རྐང་པའི་མཁྲིག་
མ་གཉིས་ནས་ལག་པས་བཟུང༌། །རྒྱབ་ཏུ་ཁ་བུབ་ཁུར་ལ་ཅུང་ཟད་སྒུར། །སྐེ་རགས་རྡོ་ཡིས་
རྐང་མཐིལ་གཉིས་སུ་བརྡེག །དེ་ནས་རོ་སྟོད་རྒྱབ་པས་ཅུར་གྱིས་འབྱིན། །གྲེ་བར་གྲ་མ་ཟུག་
ན་སྦྲུལ་ཚིལ་བྱུག །ནས་ཕུབ་ཐང་བཏང་བ་ཤ་ཁམ་ཆེར་བཟའ། །གྲེ་བར་རུས་པ་ཟུག་ན་གོ་
25-1-324


བོ་ཡི། །གྲེ་བ་གྲོ་ཆང་ནང་སྦངས་ཁུ་བ་བྱིན། །ཉ་རུས་ཟུག་ན་སོ་བྱའི་ཤ་ཁུའམ། །སྲམ་གྱི་སྣ་
དང་མཆེ་བའི་ཁུ་བ་བཏང༌། །རྣ་བའི་རྭ་རུའི་དུམ་བུ་མུར་བར་བྱ། །སྡོམ་དང་སྡིག་པ་ཁོང་དུ་
སོང་བ་ལ། །སྲད་དཀར་རམ་པ་ཆང་སྦྱར་ཁོང་དུ་བཏང༌། །ཆང་ནད་སྒ་གཡེར་ཚྭ་བཏགས་
ཆང་སྦྱར་བཏང༌། །འཕྱི་མཁྲིས་དྲོན་མོ་མིད་ན་ཆང་ནད་འབྱང༌། །ཤ་བ་རྣ་བའི་ཁྲག་གཉིས་
དྲོན་མོ་ལ། །ཚྭ་བཏབ་བཏང་ན་ཆང་ནད་གཏན་དུ་འབྱང༌། །སྔོ་སྒའི་ཚ་བ་སྨན་ཆུ་བསྟེན་པར་
བྱ། །སྣེའུ་ལྷགས་ན་རང་གི་དྲི་ཆུ་བྱུག །ཕྱིང་པ་ཚ་ཆུར་བཙོས་པས་སྐྲངས་པ་མནན། །མཐེ་
བོའི་སེན་མོ་སེར་ཙམ་བསྲེག་པར་བྱ། །གཉའ་རེངས་ལྟག་དགྱེ་ཚྭ་མར་བྱུགས་ལ་མཉེ། །བསེ་
དྲི་ཏི་ཚ་ཤུག་ཐལ་རྔུལ་སར་བྱུག །རྐང་ལག་ཁ་བས་ཕྱིད་ན་ཆུ་ཡིས་བགྲང༌། །རྣ་བར་སྲོག་
ཆགས་ཤོར་ན་རྒྱ་ཚྭ་དང༌། །ཤིང་ཀུན་མར་ནག་དུགས་བསྲོས་ཚུགས་ཚད་བླུག །ནུ་མ་སྐྲངས་
ན་ལྟོ་བཀུག་ཐང་གིས་སྦྱང༌། །སྤེན་ཐལ་གནའ་བའི་གཞུག་སྤུ་རྒྱ་ཚྭ་རྣམས། །བྱིས་པའི་ཆུ་
ལ་སྦྱར་ལ་ཐོ་རེངས་བཏང༌། །ཕིགས་ནས་དཔྱི་རུས་བསྲེགས་ཐང་ལྕག་ཏུ་བཏང༌། །ཟུག་ཆེ་
སྤང་རྒྱན་དྲོད་སྨན་ཤིང་མངར་ལྕག །ནུ་མའི་ཚབས་དང་སྤུ་འགགས་སྐྲངས་པ་སྦྱོང༌། །ཞེས་
གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཕྲན་བུའི་
ནད་གསོ་བའི་ལེའུ་སྟེ་དྲུག་ཅུ་རྩ་གཉིས་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་དྲང་སྲོང་རིག་པའི་ཡེ་ཤེས་ལ་འདི་སྐད་ཅེས་
ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། །ལྷན་སྐྱེས་རྨ་གསོའི་སྐབས་ལ་ཇི་
ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང་། 
 དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །
ལྷན་སྐྱེས་རྨ་ལ་འབྲས་དང་གཞང་འབྲུམ་དང༌། །མེ་དབལ་སུར་ཡ་རྨེན་བུ་རླིག་བླུགས་དང་། །
རྐང་བམ་མཚན་བར་རྡོལ་དང་བརྒྱད་དུ་བཤད། །དང་པོ་འབྲས་ལ་རྒྱུ་རྐྱེན་དབྱེ་བ་དང༌།  །
25-1-325

 
རྟགས་དང་བཅོས་ཐབས་རྣམ་པ་བཞི་ཡིས་བསྟན། །རྒྱུ་ནི་འགྲམ་འཁྲུགས་ཁ་ཟས་མ་སྨིན་
པས། །ངན་ཁྲག་རྒྱས་ཏེ་རླུང་གིས་བསྒྲིལ་ནས་འབྱུང༌། །དབྱེ་བ་གནས་དང་ཉེས་པའི་རིགས་
ཀྱིས་དབྱེ། །གནས་ཀྱིས་དབྱེ་ན་ཕྱི་འབྲས་ནང་འབྲས་གཉིས། །ཕྱི་ལ་ཤ་རུས་རྩ་ཡི་འབྲས་
དང་གསུམ། །ནང་འབྲས་གློ་སྙིང་མཆིན་མཆེར་མཁལ་མ་དང༌། །ཕོ་བ་རྒྱུ་ལོང་གཞང་དང་
ལྒང་པ་དགུ། །དེ་རིགས་རླུང་མཁྲིས་ཁྲག་དང་བད་ཀན་དང༌། །མཚོན་དང་བྱེ་འབྲས་དབྱེ་བ་
བཅོ་བརྒྱད་བཤད། །དེ་རྟགས་ཕྱི་ནང་རིགས་ཀྱིས་བརྟག་པ་གསུམ། །ཕྱི་འབྲས་སྤྱི་རྟགས་
རྩ་རྒྱུད་ཕྲ་ལ་འདར། །སྐྲངས་པ་སྲ་བརྟན་ན་ཟུག་ཆུང་བ་ལ། །ལུམས་འདུལ་ཀུན་གྱིས་ཞི་
བར་མི་འགྱུར་བའོ། །ཁྱད་པར་ཤ་འབྲས་ཉུང་གཤེར་འཕྱགས་པ་འདྲ། །རུས་འབྲས་རུས་
པ་མདོག་འགྱུར་རྩི་ཉམས་ཟོས། །རྣག་ཆུ་སྲོ་མ་ཁུ་ཚིགས་འབྱུང་བ་ཡིན། །རྩ་འབྲས་རྩ་ཐོག་
སྐྲངས་ཤིང་འཁྱུག་ལ་འཕྲོ། །དེ་དག་གནད་སྟེང་བྱུང་བ་གསོ་བ་དཀའ། །ཁོང་འབྲས་སྐྲན་
ལྟར་རེག་པ་སྲ་བའམ། །མི་མངོན་གཏིང་ནུབ་ཟས་ལ་མཁྲེན་པ་སྟེ། །སྨིན་ནས་གྱེན་ཐུར་
གཉིས་ཀར་རྣག་རྡོལ་འགྱུར། །གློ་འབྲས་མིད་པ་ན་ཞིང་ཟས་མིད་དཀའ། །སྙིང་འབྲས་དྲན་
པ་མི་གསལ་མུན་སྲོས་སེམས། །མཆིན་འབྲས་དབུགས་འགག་མགོ་འཁོར་སྐོམ་དད་ཆེ། །
མཆེར་འབྲས་སྦོ་འཁྲོག་བྱེད་ཅིང་དབུགས་མི་བདེ། །མཁལ་འབྲས་ཆུ་སྲི་བཙིར་སྙམ་རྐེད་པ་
ན། །ཕོ་བ་ལྟོ་སྦོ་ཟས་འཁྲེན་མིད་པ་ན། །རྒྱུ་ལོང་ཞུ་རྗེས་ན་ལ་སྐྱིགས་བུ་འོང༌། །གདོང་པ་རྐང་
བོལ་གཡོ་ཞིང་འཁྲུ་བར་འགྱུར། །གཞང་འབྲས་གཞང་ཁ་ན་ཞིང་ཕྱེན་དབུགས་འགག །ལྒང་
པ་ཆུ་འགགས་ཟུག་ཆེ་ཆུ་སོ་ན། །ཕལ་ཆེར་ཕོ་ལོང་མིད་པའི་འབྲེལ་མཚམས་མང༌། །དེ་ཕྱིར་
ཕོ་བའི་ཁ་འཛིན་གཅེས་པ་ཡིན། །རླུང་གྱུར་སྦོ་འཁྲོག་མི་བརྟན་མགོ་བོ་འཁོར། །མཁྲིས་གྱུར་
དམར་ཚ་མྱུར་རྣག་ཚ་བ་སྐྱེ། །བད་ཀན་མདོག་སྐྱ་སྒྲེག་ཅིང་ཟས་མི་འཇུ། །ཁྲག་ལས་གྱུར་པ་
ནུ་མ་མངལ་དུ་འབྱུང༌། །རབ་ཏུ་ཚ་ལ་འབྲུམ་པ་ནག་པོས་ཁྱབ། །མཚོན་ལམ་ལ་བརྟེན་རྡོ་ལ་
25-1-326


ཐུག་ལ་སོགས། །ཞི་ཞིང་སླར་ལྡང་རྒྱུན་དུ་གནས་པར་བྱེད། །བྱེ་འབྲས་བྱེ་སྒོང་ཙམ་སྲ་ཟུག་
མེད་བརྟན། །བཅོས་པའི་ཐབས་ཀྱང་དེ་བཞིན་རྣམ་གསུམ་སྟེ། །ཕྱི་འབྲས་དང་པོ་གདུལ་
དང་བར་སྐྱོན་བསལ། །ཤ་འུ་གསོ་ཞིང་ཐ་མ་རྨེན་བརྟས་བྱ། །འབྲས་འདུལ་ཤ་ལ་མི་རུས་ཉ་
ཡི་ཤ །སྤྲུ་རྩ་རེ་ལྕག་ཅོང་ཞི་དྲི་ཆུའི་ལུམས། །རུས་ལ་པི་པི་ལིང་དང་ར་མཉེ་མནན། །རྩ་ལ་
མཚལ་དང་ཚ་ལས་བྲན་ལ་བདུག །ཡང་ན་ཤ་ལ་བདུད་རྩི་ལྔ་ཡིས་བདུག །རུས་ལ་འབའ་
ཆའམ་རུས་སྣ་སྣ་ཚོགས་ལུམས༌། རྩ་ལ་བསིལ་བའི་སྔོ་སྣས་གདུལ་བར་བྱ། །ཁ་ཟས་ཕྱོགས་
མེད་འཇིག་ཟས་བཏང་ལ་བཤིག །ཐུལ་རྟགས་སྐྲངས་ཤིང་ཧྲེམ་མེད་མཉེན་ལ་བདེ། །དེ་ཡི་
སྟེང་དུ་མེ་བཙའ་འཚོས་པར་བསྲེག །ཡང་ན་སྐྲངས་འདུས་ཚ་འཁྱུག་རྣག་སྨིན་འགྱུར། །རྣག་
ཕུག་འཇིབས་ཁྲུས་རུལ་བཅད་འབྱར་གྱིས་བཅོས། །སྐྱེད་མེད་བར་དུ་ཤ་རོ་སྐྱོན་བསལ་བ། །
དངུལ་ཐལ་རྒྱ་ཚྭ་རུ་རྟ་བྱང་པ་བཞི། །ཡང་ན་བསེ་ཞོ་བཙན་དུག་དངུལ་ཐལ་དང༌། །སྨུག་པོ་
སྦལ་རྒྱབ་དོམ་མཁྲིས་སྦྱར་བའམ། །བྱང་པ་རྒྱ་ཚྭ་རུ་རྟ་ཤུ་དག་དང༌། །ཐར་ནུ་འབྲུག་རུས་སྦྲང་
སྨྱོན་ཚ་བ་གསུམ། །རྨ་མེད་ཐུར་མས་སྨན་ལམ་གཏོད་ལ་གཞུག །རྨ་ཅན་རེངས་བུའམ་ཤོག་
བུ་ལ་བྱུགས་དགབ། །དམ་གྱིས་སྦྱར་ལ་ཞག་གསུམ་ཟ་རུ་གཞུག །སེར་ག་བྱུང་ནས་གསོན་
གཤིན་མཚམས་སུ་བརྫངས། །འབམ་པོ་ཕུག་རོན་བྲུན་དང་སྦང་འཇིབས་བྱ། །ཡང་ན་སོ་
ཐོག་ཟེ་ཚྭ་སྦྲང་སྦྱར་བཅད། །ཆོད་པ་དཀའ་ན་ལྕགས་ཀྱིས་ནོན་པར་བསྲེག །རུས་ལ་སྟག་ཤ་
ལྕེ་ཚ་ཁབ་ལེན་གསུམ། །སྦྲང་སྨྱོན་སྦྱར་བྱུགས་ཆོད་དཀའ་བྲུད་དམ་བསྲེག །གསོན་གཤིན་
སྤྲད་ཅིང་བྱེར་ན་མགོ་ལྟར་བཅོས། །རྩ་ལ་འབྲས་བུའི་ཐང་རྗེས་མང་དུ་གཏར། །རྩ་འབྲུམ་
ཚན་དོ་འཕར་རྩ་མེ་ཡིས་མནན། །རྩ་ནས་སྦྱང་ཞིང་ཁོང་ནས་རྩ་ཁ་བསྡམ། །འཕྲོ་ཆད་ཤ་རོ་
གོང་བཞིན་བསལ་བར་བྱ། །རྩ་ཁ་ཤོར་ན་དོམ་མཁྲིས་ཐལ་བ་གཉིས། །སྤྲུ་འབུ་བུ་རམ་རིལ་
བུས་རྩ་ཁ་དགག །སྤྲུ་རྩ་ཞོ་དང་སྦྱར་བས་རྨ་ཁ་གཡོག །སྐྱོན་སོལ་དག་ནས་བཀྲུས་ལ་འཚོ་
25-1-327


སྨན་གདབ། །སྐམས་ན་ཞོས་སྦང་རློན་ན་ཕྲུམ་སར་བཏང༌། །སྦོས་ན་ཕྱིང་མར་བརྩེ་ན་ལྷིང་
རྩ་བྱ། །ཐ་མ་རྨེན་ཆགས་བརྟས་པར་བྱ་བ་ནི། །དུར་བླུག་ཀླད་པ་ཚ་དང་སྦང་གར་བྱུག །ཁྲུ་
གང་འོག་ས་ཁུར་རྩ་རུས་སྣ་རྣམས། །དྲི་ཆུར་བཙོས་བདུགས་རྨེན་མི་ལྡང་བར་བྱེད། །ཁོང་
འབྲས་སྨིན་ནས་གསོ་བ་དཀའ་བའི་ཕྱིར། །སྨིན་དུ་མི་གཞུག་གསར་དུས་གསོ་བ་སྒྲིམས། །
དང་པོ་སྨྱུང་བྱས་བོང་ང་བྱི་ཏང་ག །དུག་ཉུང་སྒྲོན་ཤིང་ཕོ་བ་རིས་བསྐོལ་བསླུད། །སྟོབས་ཆེ་
སྤོས་དཀར་དུར་བྱིད་ཨ་རུ་ར། །ཧོང་ལེན་དྲོད་སྨན་བ་ཆུ་སྦྱར་བས་བཀྲུ། །ཡང་ན་ནིམ་པ་ཧོང་
ལེན་འབྲས་བུ་གསུམ། །ཤིང་མངར་པ་ཏོལ་དུར་བྱིད་ཀྱི་ལྕེ་བ། །སྲན་ཆུང་ཁུ་བ་མར་བསྐོལ་
སྦྱང་བར་བྱ། །སྐབས་སུ་འཇམ་རྩི་ནི་རུ་ཧ་སྤེལ་བཏང༌། །ཀྱི་ལྕེ་བསྡུས་ཁུར་ཏིག་ཏ་བྱི་ཚེར་
བ། །ཙན་དན་གླ་སྒང་ཨུཏྤལ་སྐྱུ་རུ་ར། །ལྕ་བ་ར་མཉེ་འོ་མ་མར་བསྐོལ་བསླུད། །བྲག་ཞུན་གུ་
གུལ་བ་གཅིན་མིག་ལ་བྱུག །སྟོན་གའི་འབམ་པོ་སོས་ཀའི་དབྱི་མོང་གཉིས། །ཁཎྜར་བྱས་ཏེ་
སྣ་མ་ཚིག་པ་ལ། །བུ་རམ་བཏབ་བསྲེས་རྒྱ་ཚྭ་ཁ་རུ་ཚྭ། །ཚ་བ་གསུམ་སྦྱར་རིལ་བུ་ཁྱེའུ་སུས་
བསྟེན། །འཇམ་རྩིར་བཏང་ཞིང་ཕྱི་ནས་དམིགས་ལ་བྱུགས། །དྲོད་ལ་བསྒོར་ཞིང་ཡང་ན་
འཇུ་བླ་བསྟེན། །ཞིག་རྟགས་མཐོང་ནས་གང་ཉེའི་རྩ་ནས་དྲངས། །འཁྲུ་ན་སྨན་ཐུན་བསྐྱེད་
པས་ཁོང་འབྲས་འཇོམས། །དེས་མ་སེལ་ན་ཨ་རུ་བ་ཆུར་བསྡུས། །གོང་བཞིན་ཁཎྜས་ཚ་
གྲང་གང་ཡང་འཇོམས། །ཐ་མར་སེ་འབྲུའི་སྦྱོར་བས་ནད་རྗེས་བཅད། །ཁྱད་པར་བྲག་ཞུན་
ཨ་རུ་སྤོས་དཀར་གསུམ། །གཞིར་བཞག་གློ་ལ་ཅུ་གང་ཤིང་མངར་བསྣན། །ཙན་དན་ཛཱ་ཏི་
སྐྱུ་རུ་ཞོ་ཤ་སྙིང༌། །མཆིན་པར་བ་ཤ་ཀ་དང་གུར་གུམ་བསྣན། །མཆེར་པར་པི་པི་ལིང་དང་ལི་
ཤི་བསྣན། །མཁལ་མར་བཙོད་དང་སུག་སྨེལ་སྡིག་སྲིན་བསྣན། །ཕོ་བར་ཁ་རུ་ཚྭ་དང་བཅའ་
སྒ་བསྣན། །རྒྱུ་ལོང་རྒྱམ་ཚྭ་གསེར་གྱི་མེ་ཏོག་བསྣན། །ལྒང་པར་སྡིག་སྲིན་གཞང་ལ་ནི་རུས་
བསུ། །དོན་སྣོད་གར་བབས་རང་རང་རྩ་ལ་གཏར། །སྨིན་ནས་རང་དོན་ནད་དེ་བཏང་སྙོམས་
25-1-328


བཞག །ནང་ནས་སྨིན་ཚེ་ཕྱིར་འབྱུང་རྨ་ལྟར་གསོ། །རླུང་འབྲས་ཁྲུས་བཏང་རྩ་བ་ལྔ་བསྐོལ་
བསླུད། །ཁྲག་མཁྲིས་པུ་ཤེལ་རྩེ་བཙོད་འབྲས་བུ་གསུམ། །ཤེལ་ཏ་ཤིང་མངར་ཡུང་སྐྱེར་སྤ་
ཤུག་འབྲུ། །སྨན་མར་བཟའ་བྱུག་གང་ཉེའི་རྩ་ལ་གཏར། །བད་ཀན་སྦྱངས་རྗེས་དུར་བྱིད་
ཡུང་བ་ནས། །སྐྱེར་པ་ཏིལ་བྱུག་བྱེ་འབྲས་མེ་ཡིས་བསྲེག །མཚོན་འབྲས་མང་གཏར་ལུམས་
དང་རུལ་གཅོད་སྦྱར། །ཆུ་ལུམས་མེ་བཙའ་ཤིན་ཏུ་བསྔགས་པར་འདོད། །ཅེས་གསུངས་སོ། །
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་འབྲས་བཅོས་པའི་
ལེའུ་སྟེ་དྲུག་ཅུ་རྩ་གསུམ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །དགྲ་ལྟར་སྲོག་འཕྲོག་གཞང་འབྲུམ་གསོ་བ་ལ། །རྒྱུ་རྐྱེན་དབྱེ་བ་རྟགས་
དང་བཅོས་ཐབས་བཞི། །རྒྱུ་རྐྱེན་ཁྲུས་དྲགས་བཤང་ལམ་གཅེ་འུས་བཙན། །སྟན་སྲབ་ཙོག་
འདུག་བཤང་གཅི་ཕྱེན་འགག་བཙིར། །བཞོན་སྟེན་ཐུར་སེལ་རླུང་འཁྲུགས་གཞང་འབྲུམ་
སྐྱེད། །དབྱེ་བ་བད་རླུང་ཁྲག་མཁྲིས་སྐམ་གཤེར་རོ། །དེ་རྟགས་འབྲུམ་པས་གཞང་བཀག་
ཐུར་སེལ་ལོག །ཉེས་པ་འཁྲུགས་ཏེ་དྲོད་ཆུང་ཡན་ལག་ན། །རླུང་འཁྱིམ་ཁོང་སྦོ་མགོ་འཁོར་
ཡི་ག་འཆུ། །སྟོབས་ཆུང་ཤ་སྐམ་མཆིལ་མང་རུས་ཚིགས་ན། །གཅིན་མང་བཤང་བ་ཉུང་
ཞིང་འཁྲུ་འམ་སྐམ། །ཆུ་སྲི་མཚན་མ་ན་འབྲབ་གཞང་ཁ་གཟེར། །དྲི་མ་ཁྲག་བཅས་སྲུལ་
ལས་གྲངས་ཕྱོགས་དཔག །ཁྱད་པར་བད་གྱུར་སྦོ་ཞིང་མེ་དྲོད་ཆུང༌། །ཡི་ག་འཆུ་ཞིང་ཆམས་
འདེབས་མཆིལ་མ་མང༌། །གཅིན་སྲི་ཆུ་སོར་ཟུག་ཅིང་ན་ལ་གཟེར། །འཁྲུ་མདོག་སྐྱ་ལ་བད་
ཀན་བེ་སྣབས་མང༌། །ཁྲག་དང་ཆུ་སེར་མི་འཛག་འབྲུམ་པ་དཀར། །གཡའ་ཞིང་འཕྲུག་
འདོད་ཚོར་བ་ཆུང་བ་ལ། །པགས་པ་སེན་མོ་མིག་སྤྲིན་གདོང་པ་སྐྱ། །རླུང་གྱུར་དྲི་མ་བཤང་
སྐམ་ཚ་ལ་འཚག །སྒྲ་དང་བཅས་ཤིང་སྐ་སླ་འདྲེས་མར་འཁྲུ། །མགོ་དང་ཕྲག་པ་བརླ་དང་
25-1-329


རྩིབ་ལོགས་དང༌། །ཆུ་སོ་ན་ཞིང་དབུགས་རྒོད་ལུས་དྲོད་ཆུང༌། །པགས་པ་སེན་མོ་གདོང་
མིག་འབྲུམ་པ་ནག །ཁྲག་གྱུར་འབྲུམ་པ་བྱུ་རུ་འོལ་སེ་འདྲ། །ཤིན་ཏུ་ཚ་ཞིང་ན་ལ་ཁྲག་མང་
འཛག །མཁྲིས་གྱུར་ཚ་བ་སྐྱེ་ཞིང་སྐོམ་དད་ཆེ། །ལུས་རྔུལ་གཞང་ནག་དམར་སེར་དྲི་བཅས་
འཁྲུ། །འབྲུམ་པ་དམར་སེར་སྔོ་ལ་ཁྲག་སླ་འཛག །པགས་པ་སེན་མོ་མིག་ཆུ་སྔོ་སེར་ལྗང༌། །
གཞང་སོར་ཕྱེད་དང་ལྔ་ལས་གཉེར་མ་གསུམ། །ཕྱིར་བྱུང་གསར་པ་གསོ་བ་བླ་བ་སྟེ། །བར་
མར་བྱུང་དང་ལོ་གཅིག་འདས་གསོ་དཀའ། །ནང་གནས་འདུས་པ་ལོ་འདས་གསོ་བ་ཙམ། །
ལུས་སྐྲངས་གཞང་རྣག་རིམས་བཏབ་སྐྱུག་པ་དང༌། །སྙིང་ག་རྩིབ་ལོགས་ན་དང་ལྷན་སྐྱེས་
སྤང༌། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །དང་པོ་ཨ་རུ་ར་དང་བྱི་ཏང་ག །དུག་
ཉུང་ཙི་ཏྲ་ཀ་དང་དར་བ་བསླུད། །ཨ་རུ་ཀཎྜ་ཀ་རི་ཙི་ཏྲ་ཀ །གང་རུང་རྫར་བྱུགས་དར་བ་བླུག་
ལ་བསླུད། །ཛཱ་ཏི་རུ་རྟ་ཐལ་ཏྲེས་ཨ་ག་རུ། །ཤུ་ཏི་བསེ་ཡབ་ཐང་ཤིང་རོ་སྨད་བྱུག །བཤང་
གཅི་འགགས་ན་འོ་མ་མར་གསར་བྱུག །གཟེ་མ་བ་སྤྲུ་ཐང་ཤིང་ཁུ་བ་བསླུད། །ཆུ་ཚན་ལུས་
བཅིང་སྤ་འབྲུམ་ཞུན་མར་བྱུག །བྱ་བྲུན་པི་པི་ལིང་དང་འོལ་མ་སེ། །ཡུང་བ་བ་གཅིན་བྱུག་
དང་རེང་བུ་གཞུག །མི་སྐྲ་བྱི་ལ་སྦྲུལ་པགས་མོན་ཆ་ར། །མར་སྦྱར་དུད་བདུག་དེ་དག་གཞང་
འབྲུམ་འཇིག །ཐོར་པ་བྲུད་དང་གཏར་བས་ཁྲག་ངན་དབྱུང༌། །མ་ཞིག་ལྟོས་སྦྱངས་ཉི་མ་ལྟེ་
བའི་སར། །རྡེའུ་འདོན་པ་ལྟ་བུར་ལུས་(གན་རྒྱལ་དུ་བཟུང་བླ་དང་གཉའ་བ་རས་ཀྱིས་དཀྲིས། འཕོངས་ཉི་མ་
ལ་བསྟན་བཤར་རོ་སྣུམ་བྱུགས་ལ་)བཅོས་ལ། །བལྟ་དང་བཅད་པའི་ཆ་བྱད་ཚད་ལྡན་པས། །ཐོར་པ་
བཞར་ཞིང་ལྕགས་དང་མར་གྱིས་བསྲེག །དེ་རྗེས་རོ་སྨད་སྨན་མར་བྱུག་པར་བྱ། །གཡས་
གཡོན་མདུན་རྒྱབ་ཐོར་པ་རིམ་པ་ཡིས། །ཞག་བདུན་བར་བཅད་འབྲུམ་པ་རེ་རེ་བསལ། །ཙི་
ཏྲ་ཀ་བཏབ་ཞོ་བསྣན་དར་བ་བཏུང༌། །ཤ་ཁུའམ་སྲན་ཁུ་དར་བར་བཅས་པ་བཟའ། །དར་
བ་འཇམ་རྩུབ་བར་མ་མེ་དྲོད་དཔག །དར་བས་གཞང་འབྲུམ་ནད་བཅོམ་སླར་མི་ལྡོག །བྱེ་
25-1-330


བྲག་བད་གྱུར་རྒོད་མ་ཁ་ཕྱེ་སྦྱར། །སོ་ཆ་དུད་པ་པི་པི་ལིང་དང་མར། །རེང་བུའམ་འབྲུ་མར་
སྦྱར་བ་མས་བཏང་བྱ། །རླུང་གྱུར་སེ་འབྲུའི་ཁུ་བ་ཟི་ར་གཉིས། །ལ་ལ་ཕུད་དང་པ་ཏྲ་སྒ་སྦྱར་
བཏང༌། །ཨ་རུ་བ་ཆུར་བཙོས་ཕྱེ་བུར་སྦྱར་སྦྱིན། །ཁྲག་གྱུར་དྲི་མནམ་ཟུངས་སྲུང་མི་བཅད་
བཞག །མཚལ་འདྲ་བཅད་དེ་ཤ་མ་ལི་ཡི་ཤུན། །སེང་ཕྲོམ་བཙོད་དང་ཧོང་ལེན་དུག་མོ་
ཉུང༌། །ཙན་དན་ཤིང་མངར་པུ་ཤེལ་ནཱ་གེ་སར། །ཞིབ་བཏགས་འབྲས་བཀྲུས་ཆུ་དང་སྦྱར་
ལ་བསླུད། །དུག་མོ་ཉུང་ཤུན་འབྲས་བུ་ཨ་བྱག་དང༌། །གེ་སར་ཨུཏྤལ་སེང་ཕྲོམ་སྨན་མར་
བཏང༌། །སྟང་ཟིལ་ཙན་དན་པུ་ཤེལ་ར་ཁྲག་དང༌། །ཀ་ར་འབྲས་ཀྱི་ཆུ་བསླུད་ཏིལ་ནག་གི ། །
ལྔ་འགྱུར་ཤ་ཁ་ར་དང་འོ་སྦྱར་བྱིན། །མཁྲིས་པ་ལས་གྱུར་ཨིཎྜ་བཞི་ཐང་བཏང༌། །དུག་ཉུང་
བོང་ང་སྐྱེར་ཁན་སྦྲང་སྦྱར་བཟའ། །སྤོས་དཀར་དོང་གྲ་ཨ་རུ་ཁྲོན་བུས་སྦྱང༌། །གཞང་འབྲུམ་
རློན་ལ་དུག་མོ་ཉུང་ཤུན་མཆོག །སྐམ་ལ་བསེ་འབྲས་ཀུན་ལ་དར་བ་མཆོག །བླ་གཉན་གང་
བྱུང་ནད་གཞི་བརྟགས་ལ་བསལ། །ཤུགས་བཙིར་སྟན་སྲབ་ཉལ་པོ་བཞོན་པ་དང༌། །རླན་
གྲངས་མེ་ཉིས་གདུང་བ་རྟག་ཏུ་སྤང༌། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་
པ་གསང་བ་མན་ངག་གི་རྒྱུད་ལས་གཞང་འབྲུམ་གསོ་བའི་ལེའུ་སྟེ་དྲུག་ཅུ་རྩ་བཞི་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །མེ་དབལ་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །རྒྱུ་རྐྱེན་ཟས་སྤྱོད་གདོན་གྱིས་ཁྲག་མཁྲིས་འཕེལ། །ཆུ་སེར་ཚ་བ་རླུང་
གིས་བུས་པའོ། །དབྱེ་བ་རླུང་མཁྲིས་བད་ཀན་མཚོན་ལས་བྱུང༌། །གནས་ནི་པགས་པ་དོན་
སྙིང་རྣམས་ལ་གནས། །དེ་རྟགས་རླུང་གྱུར་འདར་བརྩེ་སྐྲངས་གཟེར་སྐྱུག །མཁྲིས་གྱུར་ཚ་
དམར་མྱུར་མཆེད་ཁ་ཁ་སྐོམ། །བད་གྱུར་གཡའ་འཇམ་མགོ་རྐང་ཚིགས་གཞི་ན། །མཚོན་
བྱུང་རིམས་འདྲ་འབྲུམ་དམར་ཚ་བས་ཁྱབ། །ཕྱིར་བྱུང་མེས་ཚིག་རྨ་དང་འདྲ་ཞིང་མཆེད།  །
25-1-331

 
ནང་གནས་གློ་སྙིང་ཚ་གདུང་མྱོས་པར་འགྱུར། །སྟོབས་ཉམས་གནས་དེར་ཚ་གཟེར་སྐོམ་
དད་ཆེ། །བཅོས་ཐབས་ཐོག་མར་གཏར་སྦྱང་ནང་སྐྱོན་བསལ། །དེ་འོག་བྱུག་པས་མེ་དབལ་
ཞི་བར་བྱེད། །ཤིང་མངར་དུག་ཉུང་སོ་ཆ་སྟོད་བྱུང་རློན། །ར་གསུམ་ཀྱི་ལྕེ་དུར་བྱིད་སྨད་
བྱུང་སྦྱོང༌། །སྲན་ཆུང་ནིམ་པ་ཧོང་ལེན་ཀྱི་ལྕེ་དཀར། །ཤིང་མངར་སྐྱེར་པའི་ཁུ་བ་ཁོང་དུ་
བསླུད། །སྣུམ་བཅུད་མི་བཏང་གང་ཉེ་ཡང་ཡང་གཏར། །ནང་སྐྱོན་དག་ནས་མུ་ཟི་ནག་པོ་
དང༌། །ར་དུག་ཐར་ནུ་ལྡོང་རོས་ལྡེ་གུ་བྱུག །སྣག་ཚ་རུ་རྟ་གླ་རྩི་ཆུ་ངན་བྱུག །རླུང་གྱུར་ཤུ་ཏི་
གླ་སྒང་པི་པི་ལིང༌། །ཤི་ཀྲུ་འུ་སུ་སྒྲོན་ཤིང་རུ་རྟ་དང༌། །འོ་མ་མར་དང་སྦྱར་ལ་བྱུག་པར་བྱ། །
མཁྲིས་གྱུར་པད་(བུན་ད་རི་ཀའི་རྩ་བ་) རྩ་ཨུཏྤལ་བ་ལེ་ཀ །རྒུན་འབྲུམ་ཙན་དན་ཤུག་པ་ཤེལ་ཏ་
དང༌། །ཤིང་མངར་གསེར་བཙག་འོ་མར་ཀ་ར་བྱུག །བད་ཀན་འབྲས་བུ་གསུམ་དང་པུ་ཤེལ་
རྩེ། །འདམ་བུ་ཀ་ར་ཤུག་པ་བཙོད་ཁུ་བྱུག །མཚོན་བྱུང་བསིལ་བས་བྱུག་ཅིང་གཏར་ག་བྱ། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མེ་
དབལ་བཅོས་པའི་ལེའུ་སྟེ་དྲུག་ཅུ་རྩ་ལྔ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སུར་ཡའི་ནད་ལ་གྱུར་ཚུལ་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །གྱུར་ཚུལ་ཟས་སྤྱོད་རྐྱེན་གྱིས་ཁྲག་འཕེལ་དང༌། །མཚོན་ཁྲག་ལུས་དང་
འགྲམས་ཁྲག་གཏར་མ་འཆུན། །རིམས་དུག་ཚ་བ་རྩར་བབས་མ་གཏར་བས། །ཁྲག་ངན་ཆུ་
སེར་དོན་སྣོད་རྩ་མིག་འདུས། །སྐྲངས་ཤིང་བརྣགས་ན་འབྲས་ལྟར་འགྱུར་བ་ཡིན། །དབྱེ་བ་
གློ་མཆིན་མཁལ་མ་ཕོ་ལོང་ལྔ། །དེ་རྟགས་གློ་བའི་སུར་ཡ་མཆན་འོག་སྐྲངས། །སྟོད་གཟེར་
གློ་མང་མཆིན་པ་མཆིན་སྟེང་སྐྲངས། །སྟོད་གང་ཉལ་བ་མི་ཤེས་མཁལ་མ་ན། །མཁལ་སྟེང་
སྐྲངས་ཤིང་དྲི་ཆུ་སྲི་བ་ཡིན། །ཕོ་ལོང་སྦོ་འཁྲོག་བྱེད་ཅིང་སྟེང་དུ་སྐྲངས། །ཀུན་ཀྱང་སྨིན་
25-1-332


ནས་རྣག་ཁྲག་ཤེ་རུལ་འཛག །སྐབས་སུ་གསོག་ཅིང་བློ་བློང་ལྡང་བར་བྱེད། །བཅོས་ཐབས་
འབྱེད་ཐང་བཏང་རྗེས་མང་དུ་གཏར། །དེ་འོག་ལྟོ་དང་རྩ་ནས་དག་པར་སྦྱང༌། །བྲག་ཞུན་
འོམ་བུའི་ཁཎྜ་མིག་ལ་བྱུག །བདུད་རྩི་ལྔ་ཡི་ལུམས་ཀྱིས་སྐྲངས་པ་འདུལ། །ཡང་ན་མེ་ཏོག་
སྣ་ཚོགས་ལུམས་སུ་གཞུག །མ་ཞི་འབམ་པོ་བྱ་བྲ་སྤྲུ་མ་ཡི། །ལུམས་ཀྱིས་རྣག་ཏུ་བཀུག་ལ་
སྨིན་ནས་བརྟོལ། །སྦང་མའི་འཇིབས་བྱ་ཧྲེམ་ན་ལུམས་དང་སྤེལ། །རྣག་འབྱམས་དངུལ་ཆུའི་
རིལ་བུས་སྐེམ་པ་དང༌། །གར་བབས་གནས་དང་སྦྱར་བའི་ཕྱེ་མ་སྦྱར། །འབའ་སམ་མར་ལ་
རྭ་སྣ་མཁྲིས་སྣ་དང༌། །བཟང་དྲུག་སྦྲང་དང་སྦྱར་བས་སྐེམ་པར་བྱེད། །རྩ་སྒོ་རྨ་ཡི་སྟེང་དུ་མེ་
བཙས་མནན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་
གི་རྒྱུད་ལས་སུར་ཡའི་ནད་བཅོས་པའི་ལེའུ་སྟེ་དྲུག་ཅུ་རྩ་དྲུག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག རྨེན་བུའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་རྐྱེན་དྲག་ཤུལ་རྐྱེན་གྱིས་འགྲམས་པའམ། །རླུང་ཁྲག་འཁྲུགས་པ་རྨེན་
བུ་ལ་བརྟེན་སྐྲངས། །ཕལ་ཆེར་སྐེ་མཇིང་མིག་ཟུར་སྣེ་ས་མང༌། །དབྱེ་བ་རླུང་མཁྲིས་ཁྲག་
དང་བད་ཀན་དང༌། །ཤ་ཚིལ་རྩ་དང་འབྲས་དང་བརྒྱད་དུ་བཤད། །དེ་རྟགས་རླུང་གྱུར་རྒྱ་
ཆེ་བུས་འདྲར་གཡོ། །མཁྲིས་གྱུར་དམར་སེར་དྲོད་ཆེ་ཚ་ལ་རྣག །ཁྲག་གྱུར་དྲོད་ཆེ་ཚ་དམར་
རྩ་ཐོག་འབྱུང༌། །བད་ཀན་ཟུག་ཆུང་སྲ་བསིལ་སྐྱ་བ་ཡིན། །ཤ་རྨེན་སྲ་ལ་རྒྱ་ཆེ་འཇམ་ཞིང་
སྣུམ། །ཚིལ་རྨེན་མདོག་དཀར་བསིལ་ཞིང་འཕེལ་འབྲི་ཆེ། །རྩ་རྨེན་རྩ་སྟེང་སྙི་ལ་འགུལ་
བའོ། །འབྲས་མཁྲང་སྲ་འདྲིལ་གཏིང་ཟུག་འཕེལ་འབྲི་ཆུང༌། །ཁ་ཅིག་རང་བཞིན་ཞི་འམ་
འཕེལ་རྒྱས་བྱེད། །ཁ་ཅིག་ཟུག་མེད་ཁ་ཅིག་ཟུག་གཟེར་ཆེ། །ལ་ལ་སྨིན་དཀའ་ལ་ལ་མྱུར་དུ་
རྣག །སྲ་ལ་སྨིན་དཀའ་ཉུང་གཤེར་འཁྱགས་འདྲ་དང༌། །འབྲོས་ཤིང་འཕེལ་སྐྱེན་འགས་པ་
25-1-333


སྤང་བར་བྱ། །བཅོས་ཐབས་གསར་དུས་ནད་སྟོབས་ཆུང་བ་ལ། །སྤྲ་ཚིལ་ཤོག་བུ་ལ་བསྐུས་
བསྲོས་པ་གླན། །རྒྱམ་ཚྭ་བཅའ་སྒ་ཚན་དོས་བདུག་ཅིང་མཉེ། །མ་ཞི་སྟེང་དུ་མེ་ཡིས་འཚོས་
པར་བསྲེག །ནད་སྟོབས་འབྲིང་ལ་བྲག་ཞུན་དྲི་ཆུ་བྱུག །ཡང་ན་གླད་རུལ་ཚྭ་དང་སྦྱར་བ་བྱུག །
ཨ་རུ་གུ་གུལ་སྐྱེར་པ་བ་ཆུ་བཏུང༌། །མ་ཞི་འབམ་པོ་བྱ་བྲས་རྣག་ཏུ་དགུག །རྙིངས་ཤིང་རྒྱས་
ནས་སྣུམ་འཆོས་དུགས་བྱས་ལ། །ལྟོ་དང་རྩས་སྦྱང་གང་ཉེའི་རྩ་ལ་གཏར། །ཆུ་མ་ཙི་དང་སྒོང་
ཐོག་བྲག་ཞུན་དང་། །བུལ་ཏོག་དྲི་ཆུ་སྦྱར་བས་བྱུག་པར་བྱ། །མ་ཐུབ་བསྲེགས་སྟེང་ཁྲ་བོའི་
ལུམས་ཀྱིས་གདུལ། །རྣག་ཏུ་ཁུགས་ནས་འབྲས་ལྟར་བཅོས་པར་བྱ། །ཟུག་ཆུང་རབ་འཕྱང་
རྩ་བར་བཅད་ལ་བསྲེག །བད་རླུང་སྟག་(ཀན་ད་རི་དཀར་པོ་)ཚེར་སེང་(ཀན་ད་དཀར་རི་སྨུག་པོ་)ཚེར་ཙི་
ཏྲ་ཀ །པི་པི་ལིང་གི་སྨན་མར་སྣུམ་རྗེས་(དན་ད་དུར་བྱིད་ཁྱི་ལྕེ་བུ་རམ་)སྦྱང༌། །རྒྱམ་ཚྭ་སྒ་མར་བྱུགས་
སྟེང་ཨ་སས་བདུག །ཁྲག་མཁྲིས་ཨ་རུ་རྒྱ་སྐྱེགས་ཙན་དན་དང༌། །ཧོང་ལེན་ཤུ་དག་སྦྲང་དང་
སྦྱར་ལ་བཏང༌། །ཀྱི་ལྕེ་བྲག་ཞུན་ཧོང་ལེན་དྲི་ཆུ་བྱུག །ཤ་རྨེན་གཅན་གཟན་ཤ་སྣ་བཙོས་ལ་
བདུག །ཚིལ་གྱུར་གུ་གུལ་བཟའ་ཞིང་བྱེ་རུག་བདུག །རྩ་རྨེན་གོང་འོག་བསྲེག་ཅིང་གང་ཉེ་
གཏར། །འབྲས་མཁྲང་ལུམས་ཀྱིས་བཏུལ་ལ་དེ་རྗེས་བསྲེག །ཅེས་གསུངས་སོ། །བདུད་རྩི་
སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྨེན་བུ་བཅོས་པའི་ལེའུ་སྟེ་དྲུག་
ཅུ་རྩ་བདུན་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །རླིག་བླུགས་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །རྒྱུ་རྐྱེན་ཟས་སྤྱོད་གདོན་དང་ཐུར་སེལ་འཁྲུགས། །ལམ་ལོག་རླིག་པར་
ཞུགས་ཏེ་སྐྲངས་པར་བྱེད། །དབྱེ་བ་རླུང་མཁྲིས་བད་ཀན་ཚིལ་གྱུར་དང༌། །གཅིན་ལས་གྱུར་
དང་རྒྱུ་བླུགས་དྲུག་ཏུ་བཤད། །དེ་རྟགས་རླུང་གྱུར་གློ་བུར་གང་རྒྱས་ན། །མཁྲིས་གྱུར་དམར་
25-1-334


ཞིང་ཚ་ལ་དྲོད་ཆེ་རྣག །བད་ཀན་ཟུག་ཆུང་གྲང་ཞིང་ལྕི་ལ་སྲ། །ཚིལ་གྱུར་གྲང་ཞིང་འཇམ་ལ་
རྣག་པ་དཀའ། །གཅིན་གྱུར་རླིག་འོག་འཁོར་སྐྲངས་རྐྱལ་ཆུ་འདྲ། །རྒྱུ་བླུགས་རླུང་གིས་རྒྱུ་མ་
དཀྲུགས་གྱུར་ཏེ། །སྣེ་ས་རླིག་པར་འཕུལ་ལ་སྦོ་ཞིང་གཟེར། །སྒྲ་དང་བཅས་ཤིང་བཅུག་ཀྱང་
སླར་འབྱུང་འགྱུར། །བཅོས་ཐབས་རླུང་གྱུར་ཤིང་མངར་འཇམ་རྩི་བཏང༌། །སྣུམ་དུགས་བསྐུ་
མཉེ་སྨན་མར་རྗེས་ལ་སྦྱར། །མཁྲིས་གྱུར་ལུམས་གཏར་སྨིན་གྱུར་རྨ་ལྟར་གསོ། །བད་ཀན་
སྐྱེར་པ་སྦྲང་བསླུད་བཅོ་བརྒྱད་བསྲེག །ལུམས་དུགས་སྨིན་བྱ་རྣག་ནས་རྨ་ཁྲུས་བྱ། །ཚིལ་
གྱུར་བྱེ་རུག་བརྒྱད་པའི་ལུམས་ཀྱིས་བདུག །སྲུབས་མེད་པགས་དྲལ་ཚིལ་ཕྱུང་རྨ་བཀྲུས་
བཙེམ། །ལྡོང་རོས་སུག་སྨེལ་སྤོས་དཀར་པི་པི་ལིང༌། །གོ་བྱེ་ཏིལ་མར་བྱུག་ཅིང་སྣུམ་དུགས་
བྱ། །གཅིན་གྱུར་ལྷུང་སར་ཕུག་ལ་རྨ་ལྟར་གསོ། །སྒོ་ང་སྐྲངས་ནས་རྩ་ཡི་ཐག་པ་བསྲེག །རྒྱུ་
བླུགས་རྩ་བ་ལྔ་ཡིས་སྨན་མར་སྦྱར། །འཇམ་རྩི་དུགས་བསྟེན་ནང་བཅུག་རྒྱུ་ལམ་བསྲེག །མ་
ཞི་སྲིན་ལག་རྒྱུས་པ་བཅད་ལ་བསྲེག །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་
པ་གསང་བ་མན་ངག་གི་རྒྱུད་ལས་རླིག་བླུགས་གསོ་བའི་ལེའུ་སྟེ་དྲུག་ཅུ་རྩ་བརྒྱད་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །རྐང་བམ་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །རྒྱུ་རྐྱེན་ཟས་སྤྱོད་གདོན་གྱིས་བད་ཀན་ཁྲག །འཕེལ་བས་ཤ་རུས་ཁད་
ཀྱིས་ཏྲེབ་ཅན་སྐྲངས། །ན་བའི་ཟུག་གཟེར་ཆུང་བས་རྐང་བམ་ཡིན། །རྐང་ལག་རྣ་བ་མཆུ་
དང་སྣ་ལ་མང༌། །དེ་ཡང་རླན་ཅན་ཡུན་དུ་འབྱུང་བ་ཡིན། །དབྱེ་བ་རླུང་དང་མཁྲིས་པ་བད་
ཀན་གསུམ། །དེ་ལྟར་རླུང་གྱུར་རྩུབ་ཅིང་སྐྲངས་མདོག་ནག །མཁྲིས་གྱུར་མདོག་སེར་ཚ་ལ་
རིམས་ཀྱིས་འདེབས། །བད་ཀན་ལྕི་ལ་ཟུག་ཆུང་ཤ་མཛེར་ཁྱབ། །བཅོས་ཐབས་རླུང་གྱུར་
དུགས་གཏར་རྒྱུན་སྦྱོངས་བྱ། །མཁྲིས་པ་ལས་གྱུར་གཏར་དང་བསིལ་བས་བྱུག །བད་གྱུར་
25-1-335


པི་པི་ལིང་དང་ཨ་རུའི་ཐང༌། །འུ་སུ་བྲི་ཧ་ཏི་དང་ཡུངས་དཀར་བྱུག །ཀུན་ལ་འབྲུ་རྙིང་ཟན་
དང་སྦྲང་རྩི་བཟའ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་རྐང་བམ་གྱི་ནད་བཅོས་པའི་ལེའུ་སྟེ་དྲུག་ཅུ་རྩ་དགུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །མཚན་བར་རྡོལ་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་
པ་བཞི་ཡིས་བསྟན། །རྒྱུ་ནི་སྟན་སྲབ་ཙོག་པུར་འདུག་པ་དང༌། །བཞོན་སྟེན་རླན་སྟེང་ཡུན་
རིང་འདུག་ལས་འབྱུང༌། །དབྱེ་བ་རྐྱང་པ་ལྡན་འདུས་གསུམ་དུ་བཤད། །དེ་རྟགས་མཚན་
དབྲག་འབྲུམ་ཐོར་ཆུ་སེར་འཛག །སྨིན་ནས་རྣག་ཁྲག་སྲིན་འཛག་འཚོར་མི་འདོད། །ཞི་
ཡང་སླར་ལྡང་བཤང་གཅི་ཁུ་ཁྲག་འཛག །རླུང་གྱུར་ཁ་མང་སྤུ་ཅན་སླ་བ་འཛག །མཁྲིས་པ་
དམར་ཚ་བད་ཀན་ལས་གྱུར་གཡའ། །རླུང་མཁྲིས་དམར་མཆེད་བད་རླུང་སྨིན་དཀའ་ནག །
བད་མཁྲིས་ཚ་སྐྲངས་འདུས་པ་ནད་ཚབས་ཆེ། །གསོ་ཐབས་གསར་དུས་གཏར་ཞིང་ཐོར་
པ་བརྟོལ། །རྟ་སྦངས་དུགས་བྱ་ནི་རུ་ཧ་ཡིས་དྲང༌། །རྙིངས་ནས་ལྟོས་སྦྱངས་ཆུ་ཚན་ནང་དུ་
སྤྱིང༌། །འབྲས་གསུམ་བྱི་ལའི་རུས་པ་རྨ་ལ་བྱུག །བྱི་ཏང་ག་དང་ར་གསུམ་པི་པི་ལིང༌། །ཙི་
ཏྲ་ཀ་དང་སྦྲང་རྩི་མར་སྦྱར་བཟའ། །སླེ་ཏྲེས་སུག་སྨེལ་བྱི་ཏང་དུག་མོ་ཉུང༌། །བ་རུ་ཨ་རུ་སྐྱུ་
རུ་སྤོས་དཀར་རྣམས། །རིམ་པས་བསྐྱེད་ལ་སྦྲང་སྦྱར་བཟའ་བར་བྱ། །དུག་ཉུང་པི་པི་ལིང་
དང་ཙི་ཏྲ་ཀ །བྱི་ཏང་ག་རྣམས་འབྲས་བུ་གསུམ་གྱི་ཕྱེ། །ཀུན་དང་སྤོས་དཀར་མཉམ་ཏེ་སྦྲང་
སྦྱར་བཟའ། །གུ་གུལ་པི་པི་ལིང་དང་འབྲས་བུ་གསུམ། །ཤིང་ཚ་སུག་སྨེལ་སྦྲང་རྩི་སྦྱར་བ་
བཏང༌། །སྨན་གྱིས་ཞི་དཀའ་བཅད་དེ་བསྲེག་པར་བྱ། །ཟས་དང་སྤྱོད་ལམ་འདུ་བའི་རིགས་
དང་བསྟུན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་མཚན་བར་རྡོལ་བ་གསོ་བའི་ལེའུ་སྟེ་བདུན་ཅུ་པའོ།། །། 
25-1-336


དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །བྱིས་པ་གསོ་བའི་སྐབས་ལ་ཇི་ལྟར་བསླབ་པར་བགྱི། །འཚོ་
མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང༌། སྟོན་པ་དྲང་སྲོང་རིག་པའི་
ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག བྱིས་པ་གསོ་བ་ཉེར་
སྤྱོད་དེའི་ནད་དང༌། །གདོན་གསོ་བ་དང་གསུམ་དུ་ཤེས་པར་བྱ། །ཉེར་སྤྱོད་དང་པོ་བར་དང་
ཐ་མ་གསུམ། །དང་པོ་བཙས་དུས་ཤིས་དང་མི་ཤིས་བརྟག །བཀྲ་ཤིས་བརྗོད་ཅིང་ལྟེ་བ་
བཅད་པ་དང༌། །རྟེན་འབྲེལ་བྱ་ཞིང་ནུ་མ་བསྣུན་ཐབས་བསྟན། །ཤིས་རྟགས་ལུགས་འབྱུང་
སྐྱེས་དང་གན་རྐྱལ་བྱུང༌། །ལྟེ་བ་སྟོད་དཀྲིས་ངུ་སྐད་དྲག་པོར་སྒྲོག །སྤྱི་བོ་རིང་ལ་མགོ་སྲ་
འཚོགས་མ་ཆུང༌། །སྐྲ་མཚམས་མཐོ་ལ་ཤ་གཙང་རྣ་བ་ཤོག །ཁ་ལྕེས་ནུ་མ་དྲག་འཇིབ་འདར་
ཞིང་དངང་། །དེ་འདྲ་གསོ་བླ་མི་ནོར་བཀྲ་ཤིས་འགྱུར། །གོ་ལྡོག་སོ་བཅས་སྐྱེས་པ་ངན་པར་
བཤད། །སྐྱེས་མ་ཐག་ཏུ་བཀྲ་ཤིས་ཚིག་འདི་བརྗོད། །བདག་གི་བུ་ཁྱོད་སྙིང་ལས་སྐྱེས་པ་
ཡིན། །ལོ་བརྒྱ་འཚོ་ཞིང་སྟོན་བརྒྱ་མཐོང་གྱུར་ཅིག །ཚེ་རིང་དཔལ་ཐོབ་ངན་དགུ་ཐུབ་པ་
དང༌། །མི་ནོར་བཀྲ་ཤིས་བདེ་སྐྱིད་ཕུན་ཚོགས་ཤོག །དེ་སྐད་བརྗོད་དེ་ལྟེ་བ་སོར་བཞིར་
བཅིང༌། །ཁྲག་མ་ཐིགས་པར་(བལ་སྐུད་ཤིག་གེབས་ཡས་མས་གཉིས་སུ་དཀྲེས་ལ་པར་དུ་བཅད་)བཅད་ལ་
པང་དུ་བླང༌། །སྤོས་ཆུ་དྲོ་འཇམ་ལུས་ཀུན་དག་པར་བཀྲུ། །ལྕེ་ཡི་ཐོག་ཏུ་གུར་གུམ་ཧྲཱིཿཡིག་
བྲི། །གླ་རྩིའི་ཆུ་བསླུད་སྦྲང་མར་སྦྱར་བ་བྱིན། །དེ་ནས་མ་ཡི་ནུ་ཞོ་བསྣུན་པར་བྱ། །ནུ་ཞོ་
སྐམས་ན་རིགས་བཟང་ནད་མེད་ཅིང༌། །སྲོག་སྐྱོབ་བུ་མ་ཤི་བའི་ནུ་མ་བསླུད། །སྐབས་སུ་རུ་
རྟ་མར་སྦྱར་ལྟེ་བར་བསྐུ། །དེ་ནས་བར་གྱི་བྱ་བ་ཞག་གསུམ་ནས། །ལྷ་གསོལ་རྟ་གཟུགས་
སྲུང་བའི་ཆོ་ག་བྱ། །ཟླ་ཕུད་བཏང་ཞིང་མིང་གདགས་རྣ་བ་དབུག །ཟས་དང་སྤྱོད་ལམ་བཅའ་
རྫིས་ལེགས་བསྐྱང་བྱ། །དང་པོ་འགོ་ཞིང་བསྟེན་ནམ་བསྒྲུབས་པ་ཡི། །ལྷ་ལ་གསོལ་མཆོད་
25-1-337


བྱ་ཞིང་ལྷ་རྟེན་གཟུགས། །སློབ་དཔོན་སྤྱན་དྲང་སྲོག་མདའ་སྲོག་འཕང་བཅའ། །གནམ་རྟ་
བར་རྟ་ས་རྟ་སྒོ་གཏའ་གཟུག །གཙང་མའི་གོས་ལ་ཤུ་དག་གུ་གུལ་དང༌། །ཡུངས་དཀར་དུ་
བས་བདུགས་ལ་བུ་ལ་བསྐོན། །ལག་པ་གཉིས་དང་མགུལ་དུ་ཤུ་དག་གདགས། །ཟླ་དུས་
གཏོར་མ་བཤོས་བུ་ཆུང་གླུད་བཏང༌། །བཙས་སྐར་ལྷའམ་ཉེ་དུ་ལས་དྲས་པའི། །སྙན་ཞིང་
ཤིས་པའི་མིང་ནི་ཁ་འཆམ་གདགས། །སྲིའུ་ཡིན་ན་ཐར་ཐར་ཟླ་མིང་སྤོ། །ཟླ་བ་བརྒྱད་ན་རྣ་
བ་དབུག་པར་བྱ། །རྣ་ཤལ་མཐེ་བོས་ལེགས་མཉེ་དཀྱིལ་སྲབ་པར། །རྒྱ་ཁབ་ཟབ་སྐུད་ཕུག་
ལ་སྣུམ་གྱིས་བྱུག །ཁྱེའུ་གཡས་ལ་བུ་མོ་གཡོན་པ་དབུག །ཟས་སུ་བུར་སྦྲང་ཞུན་མར་རྒྱུན་
དུ་བསྟེན། །སྐབས་སུ་ཤ་ཚོད་མར་སྦྱར་ཤ་ནད་སེལ། །ཨ་རུ་ར་དང་ཤི་ཀྲུ་(ན་ལེ་ཤམ་དཀར་པོ་
ཡིན་)ཚ་བ་གསུམ། །ཤུ་དག་པ་ཏྲ་ལྕེ་མྱང་ཚྭ་རྣམས་དང༌། །ར་དཀར་འོ་མ་མར་བསྐོལ་དབྱངས་
ཅན་མར། །བློ་འཕེལ་དྲན་གསལ་ངག་ཚིག་སྙན་ཕྱིར་བསྟེན། །ཡུངས་དཀར་ཤུ་དག་རྒྱམ་ཚྭ་
པི་པི་ལིང༌། །རུ་རྟ་བ་སྤྲུ་མར་བསྐོལ་སྨན་མར་གྱིས། །ཚེ་འཕེལ་སྟོབས་བསྐྱེད་གདོན་རྣམས་
འཇོམས་ཕྱིར་བསྟེན། །སྤྱོད་ལམ་མིག་ལ་ཉི་མའི་ཟེར་མི་བཏང༌། །རྐང་མཐིལ་འཚོགས་མ་
མི་བསྲེག་གྲང་མི་གཞུག །ཡོན་པོར་མི་ཟུང་བསླང་བ་སྔས་པ་མིན། །མེ་དང་བྱ་གཅན་འགོ་
ནད་འཇིགས་སྐྲག་བསྲུང༌། །སྐབས་སུ་བསྐུ་མཉེ་ཉི་མས་རན་པར་བསྲོ། །ཐ་མའི་བྱ་བ་སོ་
སྐྱེའི་ནད་བསལ་ཞིང༌། །རྟ་བཀྲོལ་བྱ་ཞིང་གཏང་རག་བཏང་བའོ། །རྨ་བྱའི་སྤྱི་བོར་མདོངས་
སྒྲོ་སྐྱེ་བ་དང༌། །བྱིས་པ་རྣམས་ལ་སེའུ་སྐྱེ་བའི་ཚེ། །ལུས་ཀུན་མི་ན་བ་ནི་གཅིག་ཀྱང་མེད། །
དེ་དུས་སྦྲང་རྩི་ཨ་བྱག་སྐྱུ་རུ་རའི། །ལྡེ་གུས་རྙིལ་བྱུག་མྱུར་དུ་སོ་སྐྱེ་འགྱུར། །ཨ་བྱག་སེང་
ཕྲོམ་བ་ལེ་ཨ་བ་སེ། །རྒྱ་སྲན་བཙོད་ཁུ་མར་དང་ཞོ་ཁ་ཆུ། །བསྡུས་པའི་མར་ནང་ཡ་བཀྵ་ར་
བཏབ། །སོ་སྐྱེ་ལས་བྱུང་ནད་ཀུན་འཇོམས་པར་བྱེད། །སྣ་ལ་ཡ་སོ་སྐྱེས་སམ་སོ་བཅས་སྐྱེས། །
སྦྱིན་སྲེག་བྱ་ཞིང་སྐེམ་བྱེད་བཅོས་པར་བྱ། །བྱིས་པ་ཟླ་ངོ་བཅུ་གཉིས་ལོན་པ་དང༌། །ལྷ་ལ་
25-1-338


གཏང་རག་བཏང་ཞིང་རྟ་རྣམས་དགྲོལ། །ཞེས་གསུངས་སོ། །བདུད་རྩི་སྙིང་པོ་ཡན་ལག་
བརྒྱད་པ་གསང་བ་མན་ངག་གི་རྒྱུད་ལས་བྱིས་པ་ཉེར་སྤྱོད་གསོ་བའི་ལེའུ་སྟེ་བདུན་ཅུ་རྩ་
གཅིག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །བྱིས་པའི་ནད་ལ་རྒྱུ་རྐྱེན་དབྱེ་བ་དང༌། །རྟགས་དང་བཅོས་ཐབས་རྣམ་པ་
བཞི་ཡིས་བསྟན། །དང་པོ་རྒྱུ་ནི་རླུང་མཁྲིས་བད་ཀན་ལ། །རྐྱེན་ནི་མ་ཡི་རྐྱེན་དང་བུ་རྐྱེན་
གཉིས། །མ་རྐྱེན་མ་ཡིས་ཟས་སྤྱོད་གང་འཕེལ་བའི། །མ་ཡི་རླུང་མཁྲིས་ཁྲག་དང་བད་ཀན་
ནད། །བུ་ལ་ལྷུང་དང་མི་གཙང་གདོན་རྐྱེན་གྱིས། །འོན་ལོང་དིག་པ་ཞ་དགུར་ཤོར་སོགས་
འབྱུང༌། །འདི་རྣམས་ལྷན་སྐྱེས་ནད་ཡིན་གསོར་མི་ནུས། །བུ་རྐྱེན་གདོན་དང་སྤྱོད་ལམ་ཁ་
ཟས་གསུམ། །གདོན་རྐྱེན་མང་ཡང་བྱིས་གདོན་བཅུ་གཉིས་ཡོད། །ལས་མཁན་ཕོ་ཉ་རྒྱལ་
བསེན་གཉིས་ཀྱིས་བྱེད། །སྤྱོད་ལམ་མ་དང་བུ་རྫི་མ་བཟོ་བས། །ལྷུང་ངམ་བརྡབས་སམ་
སྤྲུགས་དང་བསླང་སྔས་དང༌། །ལྟེ་བ་འཐེན་དང་ངུས་དྲགས་རླན་དྲགས་དང༌། །ཟས་སྐོམ་ཚ་
ཆེས་བསིལ་ཆེས་བསྟེན་དྲགས་པས། །བྱིས་པའི་ནད་རིགས་ཉི་ཤུ་རྩ་བཞི་སྐྱེད། །དབྱེ་བ་ལྷན་
སྐྱེས་ནད་དང་གློ་བུར་གཉིས། །མ་ནད་བུ་ལ་ལྷུང་བ་ལྷན་སྐྱེས་ཡིན། །གློ་བུར་ནད་ལ་ཕྲ་
རགས་ཞིབ་ཚགས་གསུམ། །རགས་པ་བྲང་དང་གློ་མཆིན་འཁྲུ་སྐྱུག་དང༌། །རིམས་དང་ལྟེ་བ་
རྡེའུའི་ནད་དང་བརྒྱད། །ཕྲ་བ་མགོ་སྐྲངས་གྲེ་བ་འགགས་པ་དང༌། །མཆེར་མཁྲིས་ཕོ་ལོང་ས་
ཟོས་ཞོ་རས་བརྒྱད། །ཞིབ་ཚགས་མིག་དང་རྣ་བ་ཁ་ནད་དང༌། །རྨེན་བུ་སྲོག་རྩ་ཤ་ནད་སྲིན་
ཕོལ་བརྒྱད། །བརྟག་པའི་ཐབས་ལ་སྤྱི་དང་བྱེ་བྲག་གཉིས། །འཚོ་འཆི་ལྟང་གཅོད་ཁ་མར་
གདགས་དང་གསུམ། །སྤྱི་རྟགས་རྟག་ཏུ་ངུ་ལས་ནར་ཤེས་བྱ། །གང་ནར་འཇུ་དང་དེར་
མནན་ན་བ་དང༌། །མིག་འབྱེད་དཀའ་ཞིང་ངོ་ནག་དང་ག་འགག །རྩེད་མོ་མི་རྩེ་དབུགས་མི་
25-1-339


བདེ་བ་དང༌། །སྐད་གཉའ་འཁུན་ཞིང་སེན་མོ་རྣོ་བའོ། །ཁྱད་པར་བྲང་ནད་རྒོད་གཡུང་ཚ་
གྲང་གཉིས། །བྲང་རྒོད་ཚ་བ་བྲང་དང་རོ་སྟོད་སྐྲངས། །ལུས་ཚ་ནུ་མ་མི་འདོད་ངུ་བ་དྲག །
མགོ་དང་རོ་སྟོད་ཕྱིར་འདོན་ལྟག་པ་དགྱེ། །རྩ་དང་འཕར་སྒོ་དྲག་ལ་ཨ་འབྲས་བཟློག །ཁ་
ལྕེ་སྐམ་ལ་དྲེག་པ་ཆགས་པ་དང༌། །རྟིང་པ་འཛུགས་པ་མི་ཤེས་ཧྲེང་ཧྲེང་རྨྱང༌། །བྲང་དེ་གློ་
དང་བསྡོངས་ན་ལུད་པ་ལུ། །ཕོ་བར་བསྡོངས་ན་མིག་སེར་སྟོང་སྐྱུགས་བྱེད། །བྲང་གཡུང་
གྲང་བ་དབུགས་བདེ་ཉད་ཉོད་མང༌། །ཁ་འཛུམ་མི་ཤེས་མཇིང་རེངས་རོ་སྟོད་གྱོང༌། །གློ་ནད་
ཚ་གཟེར་ཚ་སུབས་ཐང་པོ་གསུམ། །ཚ་གཟེར་རྩ་གྲིམས་འཐིབས་ཆེ་གཏིང་ནས་འཁུན། །
དབུགས་ཐུང་གློ་ལུ་ཁ་མིག་བཙུམས་ནས་ལུ། །ལུད་པ་འགོག་ལ་སྙིང་བརྡུངས་སྐྱུག་མི་ཤེས། །
ཚ་སུབས་འགོག་ཏུ་མི་འདོད་དྲག་ཏུ་ལུ། །ལུས་པོ་ཚ་ལ་རྩ་དང་འཕར་སྒོ་དྲག །གློ་བསྟུད་
འོང་ཞིང་བྲང་དང་མ་ལ་འབྲད། །རྗེས་ལ་ལུས་རྔུལ་འཁུན་ཞིང་སྐྱུག་ཚུལ་སྟོན། །ཐང་པོ་གློ་
ནད་རྙིངས་པ་རླུང་ལྡན་ཏེ། །དྲག་ཏུ་ལུ་ཞིང་ལུད་པ་འགོག་རྒྱུ་མེད། །མིག་དང་མཆུ་སྐྲངས་ལྕེ་
རྙིལ་དཀར་བའོ། །མཆིན་པའི་ནད་ལ་ཚ་བབས་གྲང་བབས་གཉིས། །རྒོད་བབས་ཚ་བ་
མཆིན་སྣ་ཕྲ་ལ་འཕར། །རྩ་རྒྱུག་ཆུ་ཚ་དབུགས་རྒོད་ཕོ་སྟོད་གྲང༌། །ལུས་ཚ་གཡལ་བར་
འདོད་ལ་གཡལ་མི་ཐོན། །མཆུ་དང་རྙིལ་ལ་དྲེག་པ་ནག་པོ་ཆགས། །མིག་དམར་སྣ་སྒོ་སྐམ་
ལ་ལྕེ་གཞུང་སེར། །རེའུ་སྐད་འབྱིན་ཞིང་རྣ་རྩ་ནག་ལ་སྦོམ། །གཡུང་བབས་གྲང་བ་རྩ་དལ་
ཆུ་ཡང་གྲང༌། །ལག་པ་འཇིབ་ཅིང་ལྕེ་མུར་སྟོང་ལྡད་བྱེད། །དྲོད་ཆུང་མཆིན་སྣ་མི་འཕར་
མདན་ཤིག་འཕྲུག །ནུབ་མོ་ངུ་ཞིང་ངུ་སྐད་ཕྲ་ལ་འཛེར། །ཤ་མདོག་སྔོ་སེར་མཆིན་སྣ་སྲབ་ལ་
རིང༌། །སྤྱི་རྟགས་ཚ་གྲང་གཉིས་པོ་གང་བབས་ཀྱང༌། །མིག་སྔོ་གྱེན་ལྡོག་བྱད་དང་མཐིལ་
བཞི་སེར། །ལུས་ལྕི་རྔམ་པ་རིང་ཐུང་ལྡང་དུབ་ན། །འཁུན་ཞིང་སྔ་དྲོ་བདེ་ལ་རྒོངས་དུས་ན། །
མཆིན་པས་ཕོ་བ་མནན་པས་འཁྲུ་སྐྱུག་བྱེད། །འཁྲུ་བའི་ནད་ལ་ཚ་འཁྲུ་གྲང་འཁྲུ་གཉིས༌། 
25-1-340


ཚ་འཁྲུ་དབུགས་ཐུང་རྩ་དང་འཕར་སྒོ་དྲག །བཞིན་སྣུམ་ཕྱི་ཚད་ཆེ་ལ་ཤེས་པ་འཐིབ། །འཁྲུ་
མདོག་དམར་སེར་ལྗང་གུ་དུད་ཁུར་འཁྲུ། །གྲང་འཁྲུ་དབང་པོ་གསལ་ལ་འཕར་སྒོ་དལ། །
འཁྲུ་མདོག་ནུ་ཞོ་ཙམ་མདོག་སྐྱ་བོར་འཁྲུ། །རྒྱུ་ལོང་འཁྲོག་ཅིང་སྦུ་བ་སྒྲ་བཅས་འཁྲུ། །སྐྱུག་
པའི་ནད་ལ་ཚ་དང་གྲང་བ་གཉིས། །ཚ་བས་སྐྱུག་པའི་ནད་རྟགས་ཚ་བར་འབྱུང༌། །ཁྲག་གམ་
མཁྲིས་པར་སྐྱུག་པ་ཚ་བ་ཡིན། །གྲང་བས་སྐྱུག་པ་ཞོ་འཐུངས་སྐྱུག་པ་དང༌། །ཙམ་པ་མ་ཞུ་
གང་ཟོས་སྐྱུག་པ་དང༌། །སྦུ་བ་བད་ཀན་སྐྱུག་ཅིང་ཕྱི་རྟགས་གྲང༌། །རིམས་ནད་མེ་ལྟར་ཚ་
ཞིང་འཕར་རྩ་རྒྱུག །ངུ་འཚིག་རྔུལ་འཐིབས་བ་སྤུ་ལོག་པ་དང༌། །སྐོམ་འདོད་རྨྱོང་ཞིང་ཁ་སྣ་
ལག་པས་སུབ། །ལྟེ་ནད་ལྟེ་མཁྲང་ལྟེ་འཁོར་ལྟེ་མཁྲེགས་དང༌། །ལྟེ་རྣག་བཞི་སྟེ་དང་པོ་ལྟེ་
མཁྲང་ནི། །ལྟེ་འབུར་རྐང་པ་སྡུད་ལ་རྐྱོང་མི་ཤེས། །གྲང་ནད་རྟགས་ལྡན་ངུ་སྐད་གཅོད་སྡོམ་
བྱེད། །ལྟེ་འཁོར་སྨུག་པོར་སྐྲངས་འབུར་རེག་མི་བཟོད། །ལྟེ་མཁྲེགས་སྨུག་ཅིང་སྲ་ལ་ཏྲེབ་བེ་
ན། །ལྟེ་རྣག་ལྟེ་བ་ཆད་ཤུལ་རྣག་ཞུགས་ནས། །ཁུང་བུར་ཟོས་ནས་རྒྱུ་ལོང་ལུག་པར་བྱེད། །
རྡེའུའི་ནད་ལ་ཕུགས་རྡེ་ལམ་རྡེ་གཉིས། །ཕུགས་རྡེ་ལ་ཡང་འཕྱོ་རྡེ་ཟུག་རྡེ་གཉིས། །ལམ་རྡེ་
ཆུ་ལམ་རྡེའུས་འགགས་པ་ཡིན། །དྲི་ཆུ་མི་ཐོན་མཚན་མ་ཆུ་རྐྱལ་འདྲ། །འཕྱོ་རྡེ་འོང་བའི་འཕྲོ་
ལ་འཕྲལ་དུ་འགག །ཆུ་ཡི་གསེབ་ཏུ་ཤ་ཡི་ནལ་ནོལ་འོང༌། །ཟུག་རྡེ་ཁ་ལ་ཟུག་ན་ན་ལ་སྲི། །
ཕུགས་སུ་ཟུག་ན་མི་སྲི་ན་ལ་གཟེར། །གང་ཡང་སྤྱི་རྟགས་ཆུ་སྲི་ཡང་ཡང་འཛག །ཟུག་ཆེ་ཁུ་
ཚུར་འཆང་ངམ་འབད་ཅིང་ངུ༌། །མགོ་འདར་སོ་སྡོམ་ལྒང་པ་རྒྱས་པར་འགྱུར། །བུ་ཆུང་མགོ་
བརྡབས་རྒྱ་ཞིག་སྐྲངས་པ་ན། །རྣག་ཡོད་བཞིན་དུ་མར་མེར་སྐྲངས་པར་བྱེད། །གྲེ་བ་
འགགས་ན་སྐད་འཛེར་ཁ་ཆུ་མང༌། །མཆེར་པའི་ནད་ནི་ཁོང་ལྕི་ལྡང་དུབ་བྱེད། །ནུ་མ་སོས་
འདེབས་བག་རེ་རྔུལ་དུ་འོང༌། །མཁྲིས་ནད་རྣ་རྒྱབ་ཤ་མདངས་སེར་ལ་དྭངས། །རྩ་གསལ་
ལྕེ་སྐྱ་སེན་མོ་ནག་ལ་རིང༌། །ཁ་ཟས་བྱིན་ན་མི་ཟ་འདོད་ཚུལ་བྱེད། །ཕོ་བའི་ནད་ནི་ཤ་ཆུང་
25-1-341


དྲེག་པ་ཆགས། །ཁ་ཟས་འཇུ་དཀའ་ཕོ་བ་སྐྱེ་འབྲི་བྱེད། །ལོང་ནད་འཁྲོག་འུར་སྒངས་འཁུན་
འཕེལ་འབྲི་བྱེད། །ས་ཟོས་ཕོ་བ་སྒངས་ཤིང་དྲི་མ་འགག །ཞོ་རས་ནད་ལ་རླུང་མཁྲིས་བད་
ཀན་གདོན། །རླུང་གྱུར་ནུ་ཞོ་སྦུ་བཅས་ཆུ་སྟེང་འཕྱོ། །དེ་ཡིས་ཕོ་བ་སྦོ་སྐྱུག་བཤང་གཅི་སྲི། །
མཁྲིས་གྱུར་སེར་སྣང་རོ་སྐྱུར་ཚད་པ་སྐྱེ། །བད་ཀན་སྔོ་ནལ་ཆུར་འབྱིང་མ་ཞུས་སྐྱེད། །ཚོམ་
བུར་ཆད་ན་གདོན་ངོ་ཡོད་པ་ཡིན། །མིག་གི་ནད་ལ་སྒྲ་ངན་འཕྲལ་ཚག་གཉིས། །སྒྲ་ངན་
མིག་དམར་ཚ་ཞིང་མཆི་མ་འཛག །རྣ་བའི་ནད་ལ་མ་རླུང་འགྲམས་པ་གཉིས། །མ་རླུང་རྣག་
འཛག་འགྲམས་པ་རྣ་རྩ་སྐྲངས། །ཁ་ཡི་ནད་ལ་བཙའ་ཐོར་བསེན་ཐོར་གཉིས། །བཙའ་ཐོར་ནད་
ཟུག་མེད་ལ་ཐོར་པ་འོང༌། །བསེན་ཐོར་ཐོར་པ་དཀར་ལ་ཚ་བ་སྐྱེ། །རྨེན་བུ་རྐང་ལག་འཁུམས་ནས་
རྐྱོང་མི་ཤེས། །སྲོག་རྩའི་ཆུ་སེར་མིག་སྐྱ་ཤ་སེར་སྐམ། །སྲིན་ནད་ལྡང་དུབ་ཆེ་ལ་སྐུམ་སྐུམ་
བྱེད། །མི་སྐད་ཁྱི་སྐད་ལ་ངུ་ནད་ཟུག་ལྡང༌། །ཤ་ནད་ལྕེ་མུར་ལག་པའི་མགོ་བོ་འཇིབ། །སེར་
ཤའི་ཚོད་མ་འདྲ་བ་རྒྱུན་དུ་འཁྲུ། །ཕོལ་ནད་འཕོངས་ཀྱི་རྩར་སྐྲངས་རྣག་ཏུ་འགྱུར། །འཚོ་
འཆི་ལྟང་གཅོད་ཁ་དམར་གདགས་པ་ནི། །རྐང་ལག་མཐིལ་བཞི་དཀར་ལ་ཧྲིད་པ་དང༌། །རྣ་
བ་སྐམས་ཤིང་མགོ་ལ་འབྱར་བ་དང༌། །སྣ་བུག་སྐམས་ལ་བ་རྒྱ་ཆགས་པ་དང༌། །མིག་གི་
མདངས་ཤོར་ཁུང་དུ་བྲོས་པ་དང༌། །ལྟག་མིག་བལྟ་ཞིང་འཛུམ་མི་ཤེས་པ་དང༌། །ལྕེ་ནི་སྐམ་
ཞིང་ཐུང་ལ་སོ་དྲེག་ཆགས། །ཕོ་བ་རྡོ་ལྟར་སྲ་དང་ཟོས་ཚད་སྐྱུག །དབུགས་ཐུང་གྲེ་བ་གསོག་
ཅིང་ངར་བ་དང༌། །འཁྲུ་བ་ཆུ་ལྟར་འབྲུབ་དང་ནུ་མ་ཤོར། །མགོ་སྲུབས་བྱེ་དང་པགས་མདོག་
གསེར་ལྟར་སེར། །ཤ་པགས་སྦོས་དང་ཕོ་བ་ཆུ་ཡིས་ཁེངས། །མཆིན་པས་ལྟེ་བར་སླེབ་ན་མི་
འཚོ་སྤང༌། །མིག་ལྕེ་ལ་སོགས་དབང་པོའི་བཀྲག་མ་ཤོར། །དབུགས་བདེ་རྩ་དལ་མཐིལ་
བཞི་དམར་བ་དང༌། །ནུ་མ་ཟས་ལ་སྲེད་ལ་སེན་མོ་འདྲུག །སྨན་ལེན་གསོས་སྐྱེད་ཆེ་ན་བླང་
བར་བྱའོ། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་དུས་གསུམ་ཟས་སྤྱོད་
25-1-342


སྨན་དཔྱད་བཞི། །ཞོ་འཐུང་དུས་ན་སྨན་དཔྱད་མ་ལ་བྱ། །ཟས་འདྲེས་དུས་ན་མ་བུ་གཉིས་ཀ་
ལ། །ཞོ་སྤངས་ཟས་ཟའི་དུས་ན་བུ་ལ་བྱ། །ཟས་ནི་ཡང་ཞིང་འཇུ་སླ་སྦྱིན་པ་དང༌། །སྤྱོད་ལམ་
ངུ་རུ་མི་གཞུག་གྲང་མི་བྱ། །སྨན་གྱིས་བཅོས་པ་ཞི་དང་སྦྱང་བ་གཉིས། །ཞི་བྱེད་བཟང་ཞིང་
འཇམ་ལ་འཇུ་བླ་བ། །ཀར་བུར་ཁ་བླངས་མངར་ཤས་ཆེ་བ་སྦྱིན། །སྔོ་ཐང་བཤལ་སྨན་ལ་
སོགས་རྩུབ་མོ་རྣམས། །ལེགས་པར་བསྡུས་ཁུ་འཇམ་ཞིང་འཇུ་སླ་བསྟེན། །བཤལ་རྗེས་
འབྲས་ཀྱི་ཚོད་མ་ཤིས་པ་ཡིན། །དཔྱད་ཀྱི་བཅོས་པ་གཏར་བསྲེག་ཆུ་ལྕག་འདྲེན། །གཏར་ག་
གང་ཐེབས་རྩ་ཁ་ཕྱེ་ཙམ་སྟེ། །ལོ་མ་ལོན་ན་ལག་མགོ་ཁྲག་ཐོན་གཏར། །མེ་བཙའི་སྤྲ་བ་
སྲན་མ་སྦོས་པ་ཙམ། །གསུམ་ལས་མི་མང་སྐྱི་ཚོས་ཙམ་གྱིས་ཆོག །ཆུ་ལྕག་སྐར་ཆུ་བུམ་པར་
བླུག་པས་བསྒྲེང༌། །མས་འདྲེན་ལོ་མ་ལོན་ལ་རེང་བུ་བྱ། །ལོ་ལོན་པ་ལ་ནི་རུ་ཆུ་སྲང་གཅིག །
དེ་ནས་ལོ་རེ་ལོན་གྱིན་སྲང་རེ་བསྐྱེད། །སྨན་དཔྱད་དྲག་པོ་མི་བྱ་འཇམ་པོས་བཅོས། །བྱེ་
བྲག་བཅོས་ཐབས་བྲང་ནད་ཚ་བ་ལ། །ཟས་སྨན་ཆུ་མདའ་གཏར་དང་མེ་བཙས་བཅོས། །
ཟས་སུ་ཤ་མར་གསར་པ་ཞོ་དར་བཏང༌། །དྲོད་བཅུད་མི་བཏང་སྨན་དུ་ག་བུར་དང༌། །ཅུ་
གང་གུར་གུམ་ཙན་དན་ཀར་སྦྱར་བཏང༌། །གློ་ལ་ག་དུར་ཕོ་བར་སུག་སྨེལ་བསྣན། །སྐྲངས་
ན་ཆུ་མདའ་བྲན་ཞིང་དྲུག་འགོ་གཏར། །སྟོད་དུ་སྐྲངས་ན་སྤྱི་གཙུག་བྱ་རོག་མིག །ཙ་ར་ཁུང་
ནས་ཐུར་ཚོན་དོ་རུ་བསྲེག །སྨད་དུ་སྐྲངས་ན་སྙིང་རྩེ་དཀར་ནག་མཚམས། །གློ་ལ་ལྔ་པ་ཕོ་བ་
ལྷེན་གསང་བསྲེག །བྲང་ནད་ཤིན་ཏུ་རྙིངས་ཏེ་ཤ་མདོག་སེར། །ཁོང་སྙོམ་འགུལ་ན་ངུ་ཞིང་
མ་ལ་འཕྱང༌། །འཁུན་ཞིང་ནུ་མ་ཙེ་གུར་བཅད་ཅིང་འཐུང༌། །དེ་ལ་ཙན་དན་གི་ཝཾ་བསིལ་
གསུམ་སྦྱར། །རྗེས་ལ་ཚིགས་པ་བདུན་དང་ལྷེན་སྣ་བསྲེག །བྲང་ནད་གྲང་བ་ཛཱ་ཏི་སུག་སྨེལ་
དང༌། །ལ་ལ་ཕུད་ཀྱི་ཐང་བཏང་ཤིང་ཀུན་དང་། །དོང་གྲ་ཁ་རུ་ཚྭ་དང་བུར་དཀར་སྦྱར། །ཟས་
ནི་བསིལ་དྲོད་ཁྲེའུར་བཏང་བར་བྱ། །ཆུ་མདའ་མི་བྱ་སྣུམ་ནན་ཚན་དོ་བྱ། །མེ་ནི་གོང་གི་སྟེང་
25-1-343


དུ་བཞི་པ་བསྲེག །མཇིང་པ་རེངས་ན་ལྟག་པ་བསྲེག་པར་བྱ། །མདོར་ན་སྨན་གཏར་ཆུ་ཡིས་
ཚ་བ་གདོན། །དེ་རྗེས་མེ་ཡིས་བསྲེག་པ་མཆོག་ཏུ་ཤིས། །ཚ་གཟེར་གློ་ལ་གསོ་ཐབས་ཞི་སྦྱང་
གཉིས། །ཧོང་ལེན་བོང་ང་དཀར་པོའི་བསྡུས་ཁུ་ལ། །གི་ཝཾ་གུར་གུམ་གླ་རྩི་ཤུ་དག་དཀར། །
སྦྲུལ་ཤ་རུ་རྟའི་ཕྱེ་མ་སྦྱར་ལ་བཏང༌། །ཨ་རུ་ཧོང་ལེན་དུར་བྱིད་བསྡུས་ཁུ་ལ། །ཤ་ཆེན་གླ་རྩི་
བཏབ་ལ་འཁྲུ་རུ་གཞུག །དེས་མ་ཐུབ་ན་ག་བུར་རྒྱལ་བློན་གསུམ། །ཚ་སུབས་ནད་ལ་སྨན་
དང་གཏར་གྱིས་བཅོས། །གུར་གུམ་ཤུ་དག་ཅུ་གང་ཀར་སྦྱར་བཏང༌། །ཤིང་མངར་སྲོ་ལོའི་
ཐང་བཏང་ག་བུར་དང༌། །ལི་ཤི་སུག་སྨེལ་འབྲས་གསུམ་ད་ཏྲིག་དང༌། །ཅུ་གང་གུར་གུམ་གི་
ཝཾ་རྒུན་འབྲུམ་དང༌། །ཤིང་མངར་ཀ་ར་སྦྱར་བཏང་རྔུལ་མང་དབྱུང༌། །གཏིང་ཐོན་དཀའ་ན་ཅུ་
གང་གུར་གུམ་དང༌། །ཙན་དན་དཀར་དམར་བསེ་རུ་ཤིང་མངར་མཚལ། །ལི་ཤི་སུག་སྨེལ་
སྲ་འབྲས་ད་ཏྲིག་དང༌། །སྟར་བུ་རུ་རྟ་སྒ་སྐྱ་པི་པི་ལིང༌། །འདམ་བུ་ཀ་ར་ནས་སྔོན་འབྲུ་བདུན་
རྣམས། །ཞོ་ལ་བཏབ་ཀྱིན་རྒྱུན་དུ་བསྟེན་པར་བྱ། །སྣོད་ཀ་རུ་ཐུང་ཁྲག་དང་སྦྱར་ལ་གཏར། །
ཚ་སུབས་རྒས་ནས་ལུད་པ་རྣག་ཅན་ལ། །བྱ་བོ་ཙེ་(མ་མ་རྒྱས་རྒྱས་)ཙེ་སྟར་བུ་ཤིང་མངར་དང༌། །
སུག་སྨེལ་ཀ་ར་སྦྱར་བས་རྣག་རྣམས་དྲང༌། །ཙན་དན་བསིལ་གསུམ་བསེ་རུས་རྣག་ཚད་
སྐེམ། །རོ་སྟོད་ཆུས་བྲན་གསར་འཇམ་ཟས་ཀྱིས་བཅོས། །རླུང་གློ་ཐང་པོ་སྨན་ཟས་མེ་ཡིས་
བཅོས། །སྨན་ནི་ད་ཏྲིག་ཀ་ར་པི་པི་ལིང་། །མར་གསར་སྦྱར་བའི་ལྡེ་གུ་བཏང་བ་དང༌། །ཅུ་
གང་ཤིང་ཚ་སུག་སྨེལ་པི་པི་ལིང་། །མར་གསར་སྦྲང་དང་སྦྱར་བའི་ལྡེ་གུ་བཏང༌། །ག་དུར་ཛཱ་
ཏི་ཤིང་ཀུན་བུར་དཀར་བྱིན། །མར་དཀར་བུར་དཀར་ལུག་ཤ་གསར་འཇམ་བཏང༌། །སྐྱེད་
ཆུང་ལུས་སྐྲངས་སྤོས་དཀར་བཤལ་གྱིས་སྦྱང༌། །དེ་རྗེས་གོང་བཞིན་ཚིགས་པ་བཞི་ལྔ་བསྲེག །
མཆིན་ནད་ཚ་བ་ཟས་སྨན་གཏར་བ་དང༌། །བཤལ་དང་མེ་བཙའ་ཆུ་ཡིས་བཅོས་པར་བྱ། །
ཁ་ཟས་མ་བུ་གཉིས་ཀ་དྲོད་བཅུད་སྤང༌། །ཤ་གསར་མར་གསར་ཞོ་དར་བསྟེན་པར་བྱ།  །
25-1-344

 
སྨན་དུ་ཏིག་ཏ་བ་ཤ་ཀ་བསྡུས་ཁུར། །བྲག་ཞུན་དུལ་མ་སྦངས་ལ་མང་དུ་བསླུད། །ཨ་རུ་སྐྱུ་
རུ་བསྡུས་པའི་ཁུ་བ་ལ། །གུར་གུམ་གསུམ་བཏབ་ཀར་སྦྱར་བུ་ལ་བསླུད། །ག་བུར་ཅུ་གང་
གུར་གུམ་རུ་རྟ་དང༌། །མ་ནུ་འཇིབ་རྩི་ཀ་ར་དཀར་སྦྱར་བཏང༌། །ཡང་ན་གུར་གུམ་ཅུ་གང་
བྲག་ཞུན་དང་། །ཛཱ་ཏི་དོམ་མཁྲིས་ཏིག་ཏ་ཨ་རུ་ར། །ཀ་ར་དཀར་པོ་སུམ་འགྱུར་སྦྱར་ལ་
བཏང༌། །ཡང་ན་གུར་གུམ་གི་ཝཾ་ཨ་རུ་ར། །ཀ་ར་སྦྱར་བཏང་སྐྱེད་ཆུང་ཨ་རུ་ར། །ཧོང་ལེན་
དུར་བྱིད་བསྡུས་ཁུར་ཀར་སྦྱར་བཏང་། །སྐྱུག་ན་ཕུས་གདབ་འགྱིངས་ན་རེང་བུས་བསུ། །
དམར་སེར་དྲི་ཆེ་ནི་རུ་ལུགས་སུ་སྦྱང༌། །དཀར་སྔོ་ཙམ་པ་ཞོ་འཁྲུ་མྱུར་དུ་བཅད། །རུ་ཐུང་
སྣོད་ཀ་ལོང་རྩ་ཁྲག་སྦྱར་(རྣག་མཁྲིས་ཆགས་ན་བྱ་སྒོང་རེ་གཏོན། ཟུངས་ཁྲག་མི་འདོན་)གཏར། །ཆུ་མདའ་ཕོ་
སྟོད་ཚིགས་པ་དགུ་ལ་བརྡེག །ཡང་ན་ལྒང་ཕུག་ཆུ་ཡིས་བཀང་ལ་བདུག །དེ་ཡིས་མཆིན་སྣ་
མི་འཕར་ཚ་སྟོབས་ཞི། །མཆིན་སྣ་སྦྲུལ་མིག་དགུ་དང་བཅུ་གཉིས་བསྲེག །ཚ་བ་མ་ཆོམས་
བསྲེགས་ན་མེ་དྲོད་སྐྱེད། །རྗེས་ལ་མ་བསྲེགས་མཆིན་པ་སར་མི་ཁྱོལ། །དེས་ན་བསྲེག་པའི་
དུས་ཚོད་ཤེས་པ་གཅེས། །གྲང་བབས་སྨན་ཟས་ལུམས་སྦྱང་མེ་ཡིས་བཅོས། །སྨན་དུ་འབྲས་
བུ་གསུམ་གྱི་བསྡུས་ཁུ་ལ། །གུར་གུམ་ཅུ་གང་བསིངས་ལ་བཏང་བར་བྱ། །སྒ་སྐྱ་ཛཱ་ཏི་སུག་
སྨེལ་བསྡུས་ཐང་བཏང༌། །གླ་སྒང་གུར་གུམ་གི་ཝཾ་ཀ་ར་སྦྱར། །རྒྱམ་ཚྭ་གསུམ་དང་ལྟག་པ་
སྤྲད་ལ་བཏང༌། །ཡང་ན་ཛཱ་ཏི་སུག་སྨེལ་ཤིང་ཚ་སྒ། །བུར་དཀར་སྦྱར་བཏང་མ་བུ་གཉིས་
ཀའི་ཟས། །མར་གསར་ཕྱེ་ཐུག་ཤ་གསར་ཚ་ཁུ་བསྟེན། །ཤ་མར་རྙིང་པ་ཆང་སོགས་བཅུད་
མི་བཏང༌། །གློ་དྲོན་སྤོད་བྲན་རུས་ཕྱེ་སྣུམ་ལྡན་ནམ། །མེ་ཏོག་སྣ་ཚོགས་ལུམས་ཀྱིས་བདུག་
པར་བྱ། །དུར་བྱིད་ལྕུམ་རྩ་ཨ་རུ་སྔོན་བུ་བསྡུས། །ཐལ་ག་སོ་མ་ར་ཛ་བཏབ་ལ་བཏང༌། །གློར་
བསྡོངས་སྤོས་དཀར་ཕོ་བར་མ་ནུ་བཏང༌། །མཁྲིས་བསྡོངས་སྒ་སྐྱ་སྨན་དང་བུ་རམ་སྤེལ། །
ནད་སྟོབས་བྲི་ནས་དགུ་དང་བཅུ་གཉིས་དང་། །ལྟེ་ཟུར་མཆིན་སྣ་རྩིབ་ཐུང་གཉིས་པོ་བསྲེག །
25-1-345

 
ཚ་འཁྲུ་ཟས་སྨན་གཏར་དང་ཆུ་ཡིས་བཅོས། །ཟས་སུ་ཕྱེ་ཐུག་འབྲས་ཐུག་ཙེ་གུར་བཏང༌། །
རྗེས་ལ་ཤ་གསར་ཚོ་ཁུ་འོ་ཟན་བསྟེན། །སྨན་དུ་རྒྱུ་མ་བསྲུང་དང་ཚད་པ་གཞོམ། །འཁྲུ་བ་
བསྐུལ་དང་བཅད་པ་བཞི་ཡིས་བཅོས། །རྒྱུ་སྲུང་ས་སྨྱག་གླ་རྩི་བཏབ་པ་བཏང༌། །ནས་རྙིང་
ཕྱེ་ཐུག་མར་གསར་རྒྱམ་ཚྭ་བཏབ། །རྒྱུ་མ་མི་འདྲུལ་སྲ་འཇམ་འདྲེད་པར་བྱེད། །ཚད་གཅོག་
ག་བུར་རྒྱལ་བློན་གསུམ་པ་བཏང༌། །ཡང་ན་ཙན་དན་དཀར་པོ་ཆུ་ལ་བརྡར། །དེ་ལ་གུར་
གུམ་གླ་རྩི་བཏབ་ལ་བཏང༌། །ཡང་ན་ཨིནྡྲ་བཞི་ཐང་རྒྱུན་དུ་བསྟེན། །དམར་ན་བྲག་ཞུན་སེར་
ན་གི་ཝཾ་བཏང༌། །སྨུག་ན་རེ་རལ་ལྗང་གུ་སྐྱེར་ཤུན་བཏང༌། །དུད་ཁུ་གླ་རྩི་ཟུངས་ཁྲག་དོམ་
མཁྲིས་བཅད། །འགྱིང་ཞིང་འཁྲུའམ་ཟུག་ཅན་ཙེ་གུར་འཁྲུ། །བུ་གསུམ་(དོང་ག སྔོན་བུ། ཁྲོན་བུ་)
ཨ་རུ་བསྡུས་ཁུས་འཁྲུ་བ་བསྐུལ། །ཐ་མར་ཚ་བ་ཆོགས་ནས་བཅད་པ་ནི། །འཁྲུ་གཅོད་སྨན་
རྣམས་འབྲས་ཐུག་བཏབ་ལ་བཏང༌། །ཡང་ན་ཞོ་བཙོས་བཏབ་བཏང་གྲོ་ཕྱེ་སྦྱིན། །རུ་ཐུང་
སྣོད་ཀ་ལོང་རྩ་གཏར་བ་དང༌། །ཆུ་ཡི་ལྕག་གིས་ཉྭ་བཞི་བསྒྲང་བར་བྱ། །གྲང་བས་འཁྲུ་ལ་
བཟང་པོ་བཞི་པོ་(ཛཱ་ཏི། སུག་སྨེལ། ལི་ཤི་ཀ་ཀོ་ལ་)སྦྱར། །ཛཱ་ཏི་སུག་སྨེལ་ད་ཏྲིག་སྲ་འབྲས་བཏང༌། །
ཡང་ན་རྒོད་ཁྲག་གཙོད་ཁྲག་བཙོས་ལ་བཏང༌། །སྤྱིན་ཆུ་ད་ཏྲིག་བཏབ་ནས་བཏང་བས་ཆད། །
ཆད་དཀའ་བཅུ་གཉིས་པ་དང་ལྟེ་བ་བསྲེག །ཚ་བས་སྐྱུག་པ་ཁྲག་ཏུ་འབྱུང་བ་ལ། །འདམ་བུ་
ཀ་ར་ཛཱ་ཏི་ཙན་དན་དམར། །པུཥྐར་གླ་སྒང་མཚལ་དང་སྦྲང་སྦྱར་བཏང༌། །མཁྲིས་པར་སྐྱུག་
ན་ལྕགས་ཀྱི་ཁུ་བ་བཏང༌། །གྲང་བས་སྐྱུག་ན་ཛཱ་ཏི་སུག་སྨེལ་དང༌། །ད་ཏྲིག་སྲ་འབྲས་བུ་
རམ་སྦྱར་བས་ཆད། །ཤ་གསར་ཚོ་ཁུར་ལ་ལ་ཕུད་བཏབ་བཏང་། །ཆད་པ་དཀའ་ན་ལྷེན་སྣ་
སྤྱི་གཙུག་བསྲེག །ཟས་སུ་ཆང་འཇམ་ཤ་གསར་བྲིད་ལ་བཏང༌། །ཞོ་སྐྱུག་ཀཎྜ་ཀ་རི་ཚ་བ་ལྔ། །
སྦྲང་དང་ཞུན་མར་སྦྱར་བ་བྱིན་པར་བྱ། །ཁ་ཟས་མི་འཇུ་མིག་སེར་བསུས་པ་ཆེ། །སེ་འབྲུ་ལྔ་
དང་རྒྱམ་ཚྭ་བུར་དཀར་སྦྱར། །ཆུར་སྐྱུག་འབྲས་ཐུག་ལ་ལ་ཕུད་བཏབ་བཏང༌། །ཙམ་པར་
25-1-346


སྐྱུག་ན་སྨྱུང་བ་བྱས་པས་འཚོ། །རིམས་ལ་འབྲས་གསུམ་སླེ་ཏྲེས་བསྡུས་འཇམ་བཏང་། །ཏིག་
ཏ་ག་དུར་བསྡུས་གྲང་མ་ལ་སྦྱིན། །རྔུལ་དབྱུང་སྤྱི་ཞུར་ཀ་ར་ཆུར་སྦངས་བཏང༌། །གུར་གུམ་ཅུ་
གང་གི་ཝཾ་གླ་རྩི་བཞི། །ཀ་ར་སྦྱར་བཏང་སྟོབས་ཆེ་ག་བུར་བསྣན། །གློ་མང་རྒུན་འབྲུམ་ཅུ་
གང་ཆུ་བསིངས་བཏང༌། །ཚ་རྙིངས་བུ་གསུམ་ཁུ་བ་ཀ་རས་སྦྱང༌། །དེ་རྗེས་ཅུ་གང་བདེ་བྱེད་
ཆེན་མོ་སྦྱར། །ཁ་ཟས་བསིལ་བསྟེན་དྲོད་བཅུད་དུག་འདྲ་སྤང༌། །རི་ཐང་མཚམས་སུ་ཁྲེའུར་
སད་ཅིང་བཏང༌། །ལྟེ་མཁྲང་ནད་ལ་གླ་རྩི་བྱི་ཏང་ག །མ་རུ་རྩེ་དང་སྨྱུག་རྩི་པི་པི་ལིང༌། །ཕུར་
ཐལ་སྡིག་སྲིན་དྲི་ཆུས་སྦྱངས་ལ་བཏང༌། །ཟི་ལྡི་སྦུར་ཐལ་ཕ་མའི་སྐྲ་གཞོབ་བཞི། །བྱིས་པའི་
ཆུར་སྦྱངས་བཏང་བས་སེལ་བར་འགྱུར། །ལྟེ་འཁོར་མཁན་སྦང་སྤྲུ་མ་ལྕ་འབྲས་དང༌། །གོ་
སྙོད་གཡེར་མ་དྲོན་མོར་བསྲོས་པས་བདུག །གླད་རུལ་མཁན་ཕབས་ཆང་སྦྱར་སྐྱོ་མ་བྱུག །
རྣག་ཏུ་ཁུགས་ན་ཕུག་པས་འཚོ་བར་ངེས། །ལྟེ་མཁྲེགས་མ་ཡི་རྒྱབ་རྩ་དྲུག་འདུས་གཏར། །
ཁྲག་ལ་ཕག་རིལ་སྤྱང་བྲུན་གླ་རྩི་དང༌། །ཤིང་ཀུན་སྒོག་སྐྱ་སྦྱར་བྱུགས་བྱ་སྤུས་མནན། །ལྟེ་
རྣག་དང་པོ་ལྟེ་སྐམ་ཕྱེ་མ་གདབ། །མ་ཐུབ་བྲག་སྤོས་ཆུ་རྩ་མཁྲིས་སྣ་དང༌། །གུར་གུམ་སྦྱར་བ་
རྨ་ལ་གདབ་པར་བྱ། །རྡེ་ནད་གསར་དུས་རྒྱ་ཚྭ་སུག་སྨེལ་དང་། །སྡིག་སྲིན་ལྕམ་པ་ཆང་དང་
སྦྱར་ཏེ་བཏང༌། །རྡེའུ་རྒྱས་ན་ཚྭ་སྦྱོར་ཆེན་མོས་བཤིག །ལམ་རྡེ་འགགས་ན་སྲུབས་མིན་དྲལ་
ལ་དབྱུང༌། །མགོ་བོ་སྐྲངས་ན་རྩ་འཕྲང་མེ་ཡིས་བསྡམ། །རྒྱ་ཆིངས་བྱས་ལ་ཁོང་དུ་བསིལ་
སྨན་བཏང༌། །དབུག་ཏུ་མི་རུང་འཇམ་པོས་བཅོས་པས་ཐུབ། །གྲེ་བའི་ནད་ལ་གླ་རྩི་རུ་རྟ་
དང༌། །གི་ཝཾ་ཀ་ར་སྦྱར་བ་ཁོང་དུ་བཏང༌། །ཨ་རུ་དུར་བྱིད་གླ་རྩིའི་བཤལ་གྱིས་སྦྱང༌། །མཆེར་
ནད་གཡོན་གྱི་རྩིབ་མའི་སྟེང་དུ་བསྲེག །ཀ་ཀོ་ལ་དང་ཨ་རུ་ར་ཡི་ཐང༌། །མཁྲིས་ནད་རྒྱམ་ཚྭ་
གསུམ་པ་ཀ་ར་སྦྱར། །ཚ་བ་ཆེ་ན་ཏིག་ཏ་ཀར་བཏབ་བཏང༌། །ཨན་སྟོང་བཅུ་གཅིག་བསྲེག་
ཅིང་མཁྲིས་རྩ་གཏར། །ཕོ་བའི་ནད་ལ་སེ་འབྲུ་བཞི་པ་སྦྱར། །གྱོང་དང་བསིལ་སྤང་མདུན་
25-1-347


རྒྱབ་ཕོ་གསང་བསྲེག །ལོང་ནད་སེ་འབྲུ་དྲུག་སྦྱར་ལོང་གསང་བསྲེག །ས་ཟོས་པ་ལ་གླ་སྒང་
སེར་པོ་གཉིས། །པ་ཏྲ་ལྕ་བ་བ་སྤྲུ་བྱི་ཏང་ག །བིལ་བ་ཚ་བ་གསུམ་གྱི་སྨན་མར་བཏང༌། །ཞོ་
རས་རླུང་གྱུར་འབྲས་བུའི་སྨན་མར་བྱིན། །ཙི་ཏྲ་ཀ་དང་རུ་རྟའི་བསྡུས་ཐང་བཏང༌། །མཁྲིས་
གྱུར་འབྲས་བུ་གསུམ་དང་གླ་སྒང་དང༌། །རྩ་མཁྲིས་ཧོང་ལེན་བསྐོལ་བའི་ཁུ་བ་བསླུད། །བད་
ཀན་རྒྱམ་ཚྭ་ཤིང་མངར་པི་པི་ལིང༌། །མར་དང་སྦྱར་སྦྱིན་བོང་ང་དཀར་པོ་དང༌། །གླ་སྒང་ཤུ་
དག་རྩ་བ་ལྔ་བསྐོལ་བསླུད། །ཞོ་རས་གདོན་ཞུགས་དེ་ཡི་གསོ་བ་སྦྱར། །མིག་གི་ནད་ལ་
གསལ་བྱེད་སྨན་མར་བཏང་། །སྐྱེར་ཁན་ནུ་ཞོ་སྦྱར་བ་མིག་ཏུ་བླུག །རྣ་བ་རྣག་འཛག་མ་བུ་
བཅུད་ཀྱིས་གསོ། །འབྲས་བུའི་སྨན་མར་བཅུ་གསུམ་མེ་ཡིས་བསྲེག །རྣ་བ་འགྲམས་ན་ནག་
མཚུར་རུ་རྟ་དང་། །གླ་རྩི་ཆུ་ལ་སྦྱངས་ལ་རྣ་བར་བླུག །རྒྱ་སྐྱེགས་རུ་རྟའི་ཁུ་བ་ཁོང་དུ་བཏང༌། །
བཙའ་ཐོར་ཤ་ཚིལ་བསུར་བདུག་གླ་རྩི་བཏང༌། །སྤྱི་བོའི་གཙུག་ཏུ་བཙོད་ཀྱི་མེ་བཙའ་
གདབ། །བསེན་ཐོར་ལ་ཡང་གླ་རྩི་ཁོང་དུ་བཏང་། །ཤུ་དག་རུ་རྟ་ཨ་རུ་སྦྲང་སྦྱར་སྦྱིན། །ས་
མཚུར་ཆུ་ཡི་ཁ་བྲུ་བསེན་མོ་བཅོས། །རྨེན་བུ་ལྷེན་སྣའི་གཡས་བསྲེག་དོམ་མཁྲིས་བཏང༌། །
སྲོག་རྩའི་ཆུ་སེར་ཨན་སྟོང་དགུ་བདུན་བསྲེག །སྲིན་ལ་གླ་རྩི་ཤིང་ཀུན་བྱི་ཏང་ག །སྒོག་
སྐྱའི་ཕྱེ་མ་འོ་མར་བཏབ་ལ་བཏང་། དུར་བྱིད་སྒ་སྐྱ་བྱི་ཏང་ག་ཡིས་སྦྱང༌། །མ་ཕན་སྲིན་རྟ་
ཁྲག་ཡིན་གཏར་ག་བྱ། །ཤ་ནད་ཤ་དང་ཁྲག་གི་ཚོད་མ་བྱིན། །ཕོལ་ལ་ཙན་དན་སྐྱེར་ཁན་
སྦྲང་སྦྱར་བྱུག །ཙན་དན་ཀ་ར་ཆུར་སྦྱར་ཁོང་དུ་བཏང༌། །མ་ཞི་བྱུག་པས་རྣག་ཏུ་བཀུག་ལ་
དབུག །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་བྱིས་པའི་ནད་གསོ་བའི་ལེའུ་སྟེ་བདུན་ཅུ་རྩ་གཉིས་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །བྱིས་པའི་གདོན་ལ་ངོས་བཟུང་བཅོས་ཐབས་གཉིས། །དང་པོ་རིགས་
25-1-348


རྟགས་གསོ་བ་དཀའ་བླ་བཞི། །དེ་རིགས་སྐེམ་བྱེད་གཞོན་ནུ་གདོང་དྲུག་གི ། །སྤྲུལ་པ་སྐྱེས་
བུའི་གཟུགས་ཅན་རྣམ་པ་ལྔ། །བུད་མེད་གཟུགས་ཅན་བདུན་ཏེ་བཅུ་གཉིས་བཤད། །དེས་
ཟིན་རྟགས་ལ་སྤྱི་དང་བྱེ་བྲག་གཉིས། །སྤྱི་རྟགས་རྟག་ཏུ་ངུ་ཞིང་དངང་ལ་འཁུན། །གཉིད་
ཆུང་གཡལ་མང་མ་མཆུ་སོ་ཡིས་འདེབས། །མ་ལ་འབྲད་ཅིང་ནུ་མ་ཁ་ནས་འདོན། །གཉའ་
ཞིང་མིག་ལྡོག་སྦུ་བར་སྐྱུག་པ་ཡིན། །བྱེ་བྲག་རྟགས་ལ་སྐྱེས་བུའི་གཟུགས་ལྔ་ལ། །སྐེམ་
བྱེད་མགོ་རྡེབ་མིག་གཅིག་མཆི་མ་འཛག །རྔུལ་མང་སྐྱིག་ཅིང་སོ་འཆའ་མཇིང་པ་རེངས། །
བཤང་ཁ་སྦར་པོས་འཆང་ཞིང་ཞོ་མི་འཐུང་། །ས་ག་གཉིད་མེད་དྲན་ཉམས་སྦུ་བར་སྐྱུག །ནུ་
མ་ལྕེ་ལ་སོ་འདེབས་གནམ་དུ་བལྟ། །ལུག་གདོང་འཁུན་སྦོ་འཁྲུ་སྐྱུག་རྐང་ལག་འདར། །གློ་
མང་མིག་དམར་སྐྱིག་ཅིང་ཁུ་ཚུར་འཆང༌། །ཁྱི་གདོང་ལུས་འདར་རྔུལ་འོང་མིག་འཛུམ་ཞིང༌། །
རྐན་རྡེབ་འཁྲུ་སྐྱུག་དྲི་མ་ཆེ་བར་འོང༌། །ཡི་དྭགས་དངངས་ཤིང་འཁྲུ་སྐྱུག་བྱེད་པ་དང༌། །གློ་
ལུ་གཡལ་མང་ཁ་ཁ་ཤ་ལུས་སྐམ། །བུད་མེད་གཟུགས་ཅན་བྱ་གདོང་ཚ་བ་སྐྱེ། །འཁྲུ་ཞིང་ལྕེ་
ཀྱོག་རྐན་ལ་འབྲུམ་ཐོར་འོང༌། །སྲུལ་མོ་འཁྲུ་སྐྱུག་སྐྱིགས་བུ་སྐོམ་དད་ཆེ། །གྲང་བའི་སྲུལ་མོ་
ལུས་འདར་མིག་ཟུར་བལྟ། །རྒྱུ་འཁྲོག་ངོས་གཅིག་ཚ་ལ་ངོས་གཅིག་གྲང༌། །སྲུལ་མོ་ལོང་བ་
མིག་མི་གསལ་ལ་སྐྲངས། །འཁྲུ་སྐྱུག་ཚ་སྐྱེ་གློ་ལུ་ཞོ་མི་འདོད། །བཞིན་རྒྱས་བཞིན་མཛེས་
ཚ་སྐྱེ་ཟས་མི་འདོད། །ལྟོ་ལ་རྩ་ཡི་དྲ་བ་ནག་པོས་ཁྱབ། །ནམ་གྲུ་སྔོན་པོར་འཁྲུ་ལ་སྐྱིགས་བུ་
འོང༌། །ཁ་ཡོ་ཚ་བ་སྐྱེས་ལ་ལྤགས་མདོག་སྔོ། །ནམ་གྲུ་སྐེམ་པོ་ཚ་བ་སྐྱེ་བ་དང་། །སྐྲ་འབྱིད་
སྐད་ཆུང་ཁ་དོག་སྣ་ཚོགས་འཁྲུ། །ལས་མཁན་ཕོ་ཉ་རྒྱལ་པོ་བསེན་མོ་གཉིས། །རྒྱལ་པོ་
དངངས་འདར་མིག་མདོག་ཐོ་རངས་ངུ་། །བསེན་མོ་བྱིང་འཐིབས་ཚ་སྐྱེ་སྲོད་དུས་ངུ་། །གསོ་
བ་དཀའ་ལ་སྲོག་འདོད་ཡས་འདོད་གཉིས། །བཙས་སྐར་ངན་དང་ཁ་བུབ་ནམ་ཕྱེད་བཙས། །
ཡ་རྐན་ནག་ལ་ཁ་དོག་སྣ་ཚོགས་འཁྲུ། །ཟས་དང་ནུ་མ་མི་འདོད་མཚན་མོ་ངུ་། །སྲོག་འདོད་
25-1-349


གདོན་དེ་གསོ་བ་དཀའ་བ་ཡིན། །ཁ་སྐམ་ལྕེ་ཡིས་མཆུ་ལ་མྱུལ་བ་དང༌། །ཟས་སྐོམ་འདོད་
ལ་བྱིན་ན་ཟ་རྒྱུ་མེད། །ཡས་འདོད་གདོན་དེ་གསོ་བ་སླ་བ་ཡིན། །གསོ་བའི་ཐབས་ལ་ཞི་
དང་དྲག་པོ་གཉིས། །དང་པོ་ཡས་གླུད་གཏོར་མ་ཞི་བས་བཅོས། །གནས་མལ་འཁྲུས་བྱུག་
གདགས་བདུག་སྨན་ཟས་བདུན། །གནས་མལ་གདོན་མེད་དབེན་པར་བགེགས་བསྐྲད་ལ། །
དོང་ག་སྒྲོན་ཤིང་ཨ་བ་ཀ་རཉྫ། །ནིམ་པ་ལྕམ་པ་ཆུ་དྲོན་ཁྲུས་ཀྱིས་བཀྲུ། །ཤུ་དག་རིན་ཆེན་
བསེ་རུ་གནས་གསུམ་གདགས། །བ་ལང་རུས་སྤུ་ར་ཕག་བྱི་ལའི་བྲུན། །ར་སྤུ་ཡུངས་དཀར་
མི་སྐྲ་རྨ་བྱའི་སྒྲོ། །སྲན་ཕུབ་སོ་བ་མར་རྙིང་ཕ་ཝང་བྲུན། །ཧོང་ལེན་སོ་ཆ་ཐང་ཤིང་ཨ་བ་སེ། །
ནིམ་པ་གུ་གུལ་ཀཎྜ་ཀ་རི་གཉིས། །ར་ཐུག་གཅིན་སྦྱར་རེང་བུའི་དུད་པས་བདུག །རྩ་བ་ལྔ་
དང་ར་སྣ་མཱུ་ལ་དང་། །གླ་སྒང་ཙི་ཏྲ་ཀ་དང་ཚ་བ་གསུམ། །བ་སྤྲུ་ཤིང་མངར་ཤིང་ཀུན་མོན་
ཆ་ར། །སྒྲོན་ཤིང་དུག་མོ་ཉུང་དང་བྱི་ཏང་ག །པི་པི་ལིང་གི་རྩ་བའི་སྨན་མར་སྦྱར། །ཁོང་དུ་
བཟའ་ཞིང་ལུས་ལ་བྱུག་པ་བྱ། །གདོན་འཇོམས་སྟོབས་དང་ཁ་དོག་མེ་དྲོད་སྐྱེད། །ཁ་ཟས་ཤ་
ཆང་ཁྲག་ཚོད་སྤང་བར་བྱ། །དཀར་གསུམ་བཟའ་ཞིང་ཆ་གསུམ་གཏོར་མས་མཆོད། །ཆབ་
གཏོར་བཏང་ཞིང་གཟུངས་ཆེན་གྲ་ལྔ་འདོན། །གཏོར་མ་འདོད་པའི་གདོན་རྣམས་དེ་ཡིས་
འཚོ། །དེས་ཀྱང་མ་སོས་ལས་ལ་སྦྱར་བར་བྱ། །དྲག་སྔགས་བྲབ་ཅིང་མནན་བསྲེག་འཁོར་
ལོ་བསྐོར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་བྱིས་པའི་གདོན་གསོ་བའི་ལེའུ་སྟེ་བདུན་ཅུ་རྩ་གསུམ་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། །མོ་ནད་གསོ་བའི་སྐབས་ལ་ཇི་ལྟར་བསླབ་པར་བགྱི། །འཚོ་
མཛད་སྨན་པའི་རྒྱལ་པོས་བཤད་དུ་གསོལ། ཞེས་ཞུས་པ་དང༌། །དྲང་སྲོང་རིག་པའི་ཡེ་ཤེས་
ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །མོ་ནད་གསོ་བའི་སྐབས་
25-1-350


ལ་བསླབ་པ་ནི། །དུག་གསུམ་འབྱུང་བ་བཞི་ལས་གྲུབ་པའི་ལུས། །སྔོན་ལས་འདོད་ཆགས་
དབང་གིས་ཕོ་མོར་སྣང༌། །བསོད་ནམས་དམན་པས་ཟ་མ་མོ་ལུས་ཐོབ། །ནུ་མ་མངལ་དང་
ཟླ་མཚན་ཁྱད་པར་ལྷག །ལུས་ཟུངས་ཕྱི་མ་ཁུ་བ་དཀར་དམར་གཉིས། །ཟླ་མཚན་དམར་པོ་
བཅུ་གསུམ་ལོན་ནས་འཛག །མངལ་ནང་ཁུ་བ་འཛིན་ཞིང་ཤ་ལུས་སྐྱེད། །དཀར་པོ་ནུ་མ་ལ་
རྒྱས་གསོས་སུ་འགྱུར། །དེ་ལ་སྔོན་ལས་ཟས་སྤྱོད་གདོན་རྐྱེན་གྱིས། །མངལ་ནད་ལྔ་དང་རྩ་
ནད་བཅུ་དྲུག་དང༌། །སྐྲན་ནད་དགུ་དང་སྲིན་བུའི་ནད་རིགས་གཉིས། །མོ་ནད་གཙོ་བོ་སུམ་
ཅུ་རྩ་བཞི་དང༌། །ཕལ་པའི་ནད་བརྒྱད་བཞི་བཅུ་ཐམ་པར་འགྱུར། །སྐྱེ་བ་དམན་ཕྱིར་བུད་
མེད་ལུས་ལ་ལྷག །དེ་ཡང་སྤྱི་དང་བྱེ་བྲག་ཕལ་པ་གསུམ། །མོ་ནད་སྤྱི་ལ་དབྱེ་བ་དེ་ཡི་རྒྱུ། །
རྟགས་དང་བཅོས་ཐབས་རྣམ་པ་བཞི་ཡིས་བསྟན། །དབྱེ་བ་ཁྲག་ཚབས་རླུང་ཚབས་རྣམ་
པ་གཉིས། །དེ་རྒྱུ་དང་པོ་ཟླ་མཚན་ལས་བྱུང་ཕྱིར། །གསར་པའི་དུས་ན་ཁྲག་ཚབས་ཞེས་བྱ་
སྟེ། །རྙིངས་ནས་རླུང་དང་བསྡོངས་པས་རླུང་ཚབས་སོ། །དེ་རྟགས་ཁྲག་ཚབས་སྤྱི་ཡི་མཚན་
ཉིད་ནི། །རྐེད་སོ་མན་ཆད་རུས་པ་འཁོལ་ཞིང་ན། །རྒྱུ་ཞབས་ཚ་འབྲབ་རོ་རྒྱབ་མཆིན་དྲི་
གཟེར། །རྩ་རྣམས་ཚ་འཁྱུག་ཤུ་བ་འབྲུམ་ཕྲན་འོང༌། །མངལ་ཁྲག་འཛག་གམ་འཁྱིལ་དང་
རྣག་ཏུ་འགྱུར། །རླུང་ཚབས་རུས་པ་འཁོལ་ཞིང་སྙིང་མི་བདེ། །མགོ་འཁོར་མགོ་ཡི་རུས་པ་
གྲང་བསིལ་བྱེད། །ལུས་ཀུན་གྲང་ཞིང་ཤ་མཐོང་བར་དུ་ན། །ཤ་རྣམས་གཡོ་ཞིང་སྦོ་ལ་སྦྲིད་
པ་དང༌། །མིག་འགྲིབ་སྨྱོ་འམ་འབོག་གམ་བརྗེད་པ་ངས། །ཆུ་སོ་རྒྱུ་ཞབས་བསྡམ་ཞིང་ཟ་
ཁུར་འབབ། །ཟླ་མཚན་མི་ཆོད་རྒྱུན་དུ་འབྱང་བར་བྱེད། །བཅོས་པའི་ཐབས་ལ་ཁྲུས་གཤེར་
བཅུད་གཤེར་གཉིས། །དེ་ལ་ཁྲག་ཚབས་ཁྲུས་གཤེར་དག་གིས་བཅོས། །ཁྲུས་གཤེར་ལ་
ཡང་ལྟོ་གཤེར་རྩ་གཤེར་གཉིས། །ལྟོ་གཤེར་ལ་ཡང་ཆེན་པོ་ཆུང་ངུ་གཉིས། །རྩ་གཤེར་ནང་
དང་ཕྱི་རུ་ཤེས་པར་བྱ། །དང་པོ་ཁྲུས་གཤེར་ཁྲུས་དང་སྣུམ་འཆོས་བྱ། །དངོས་གཞི་ཧ་རི་
25-1-351


ཏ་ཀ་ཞིམ་ཤིང་དང༌། །དྭ་ཚ་སོ་སོར་བསྐོལ་ཏེ་གྲང་ནས་བསྲེ། །སྒེ་གཤེར་ཤིང་ཚ་འོལ་མོ་
ཁྲོན་བུ་དང་། །རྒྱམ་ཚྭ་ཏྲི་བྱི་ཏ་རྣམས་ཁ་ཚར་གདབ། །སློང་དང་སྦྱོང་བྱེད་གཉིས་སུ་བཅད་
ལ་བཏང༌། །ལྟོ་གཤེར་ཆུང་ངུ་གརྦྷ་ཙཎྜ་ལི། །ཏྲི་བྱི་ཏ་དང་ཧ་རི་ཏ་ཀ་དང༌། །ཤིང་ཚ་རྒྱམ་ཚྭ་
སྒེ་གཤེར་ཆ་མཉམ་སྟེ། །ཞིབ་བཏགས་ཞིམ་ཤིང་བསྡུས་ཁུར་བཏབ་ལ་བཏང་། །ལྕག་དང་
ལོག་གནོན་རྗེས་གཅོད་སྤྱི་དང་མཐུན། །ཟླ་མཚན་འཁྱིལ་དང་མངལ་སྐྲན་བུ་རོ་རྣག །ཁྲག་
ཚབས་མ་ལུས་མངལ་སྐྱོན་སྦྱོང་བར་བྱེད། །རྩ་གཤེར་སྔོན་འགྲོ་སྒེ་གཤེར་ཐང་བཏང་ཞིང་། །
མེ་ཏོག་གྲོག་ཤིང་འབའ་ཆ་བྱ་བྲ་རྣམས། །གང་རུང་ཆང་བཙོས་ན་ས་རྒྱུ་ཞབས་བདུག །ཁྲུས་
དང་བསྐུ་མཉེ་བྱས་རྗེས་བྱང་པ་དང༌། །གསེར་གྱི་བྱེ་མ་ཤིང་ཚ་སུག་སྨེལ་དང༌། །དཀར་རྩི་
མཐིང་ཤུན་ལོ་བརྒྱད་ཆུ་ལ་བསྐྱོན། །བྱ་ཐབས་ལག་ལེན་རྩ་སྦྱོང་སྤྱི་དང་མཐུན། །ཕྱི་ཡི་རྩ་
གཤེར་ཆེ་འབྲིང་ཆུང་གསུམ་ལས། །ཆེན་པོ་རྒྱ་ཚྭ་ཤིང་ཚ་ཁ་རུ་ཚྭ། །བསེ་རུ་རྒྱ་རུ་གཙོད་རུ་ཤ་
བའི་རུ། །དནྡ་དུར་བྱིད་དེ་བ་དཱ་རུ་དང༌། །ད་བྱིད་བྱ་མ་བྱི་ཡི་མཇུག་སྒྲོ་ཕབས། །སུག་སྨེལ་
རྡོ་དྲེག་དུད་པ་བུལ་ཏོག་རྣམས། །བུར་སྨུག་སྦྱར་བའི་རིལ་བུ་མངལ་དུ་བསྐྱལ། །འབྲིང་པོ་
སུག་སྨེལ་རྒྱ་ཚྭ་ཚ་བ་གསུམ། །དནྡ་དུར་བྱིད་ཡ་བཀྵ་ར་ཕབས། །བ་སྤྲུ་ཤུག་ཚེར་སྦྲང་དང་བུ་
རམ་སྦྱར། །ཆུང་བ་གུར་གུམ་རྒྱ་ཚྭ་སུག་སྨེལ་དང་། །བྱང་པ་དུར་བྱིད་བུལ་ཏོག་བུ་རམ་སྦྱར། །
རིལ་བུའམ་ཁུ་བ་མངལ་དུ་གཅེ་འུས་བསྐྱལ། །རྒྱུ་ཞབས་དུགས་ཀྱིས་བསྲོ་ཞིང་ལག་པས་
མཉེ། །ཟུག་ལངས་མི་དངང་འགོར་ན་གཅེ་འུས་དྲང༌། །མངལ་ཁྲག་འཁྱིམས་དང་མངལ་
སྐྲན་བུ་རོ་ལུས། །མངལ་ནད་ཁྲག་བབས་མ་ལུས་སྦྱོང་བར་བྱེད། །གཉིས་པ་རླུང་ཚབས་
བཅུད་གཤེར་དག་གིས་བཅོས། །དེ་ལ་ཤ་བཅུད་ཆང་བཅུད་སྨན་བཅུད་གསུམ། །ཤ་བཅུད་
སྦྱར་ཐབས་ལུག་ཐུག་ཚོན་པོ་ཡི། །གློ་སྙིང་མཆིན་མཆེར་མཁལ་མ་ལྟོ་ཚིལ་གཞང༌། །ལྕེ་དང་
ཨོལ་བ་རྨེན་བུ་ནམ་ཚོང་བྲང༌། །ལྟག་པ་གུང་རྩིབ་མཇུག་ཐུང་རླིག་པ་མིག །འབྲག་དང་རྐང་
25-1-352


བཞག་ཉྭ་གཞི་ཞིབ་བརྡུངས་ལ། །འབྲི་མར་རྙིང་པ་ཕུལ་དོ་ལུང་རྡོར་བསྐོལ། །ཁོལ་དུས་ཤ་
རྣམས་བཏབ་ལ་སྣར་ཙམ་བཙོ། །དེ་ནས་གར་ཆང་ཕུལ་དོ་ཚ་བ་གསུམ། །ཤིང་ཀུན་ཆུ་དང་
ཆུ་མ་འདྲེས་པའི་ཁྲག །རིམ་པས་གཅིག་ཁོལ་གཅིག་བླུག་དཀྲུག་ཅིང་བཙོ། །དེ་ཉིད་ཤ་སྤྱི་
བསྲེས་ཏེ་ཚ་བར་བྱས། །སུམ་ཡར་བསྟེན་ཞིང་སྐོམ་དུ་གར་ཆང་བསླུད། །ལུས་གྲང་བསེར་བུ་
མི་བཏང་རླུང་ཚབས་འདོན། །ཆང་བཅུད་སྦྲང་དང་བུ་རམ་གཟེ་མའི་ཆང༌(བྱང་པ་ལངས་པ་ལ་ཚ་བ་
གསུམ། སུག་སྨེལ། མ་ནུ་བཏབ་ལ་རླུང་དུས་བཏང་)། །མར་ཆང་རུས་ཆང་ལྔ་ཡིས་རླུང་ཚབས་སེལ། །སྨན་
བཅུད་ལ་ནི་ཁྲག་བཅུད་མར་བཅུད་གཉིས། །ཁྲག་བཅུད་སྦྱོར་བ་གནག་ལུག་ཤ་བ་ཡི། །ཤ་
ཚིལ་ཁྲག་དང་རུས་ཁུ་བསྲེས་པ་ལ། །ཤིང་ཚ་བཏབ་བསྐོལ་ཕོག་སྟེ་གྲང་པ་དང༌། །སྨྱུག་ཤུན་
ལྕུམ་རྩ་རྒྱམ་ཚྭ་ཚ་བ་གསུམ། །བཏབ་སྟེ་འཇམ་བསྲོས་ཁྱེ་སུས་བསྟེན་པར་བྱ། །ཡང་ན་བོང་
ཁྲག་ཆུ་མ་ཕོག་པའི་ནང༌། །ཤིང་ཚ་སུག་སྨེལ་སླེ་ཏྲེས་སྲ་འབྲས་སྲིན། །རྒྱམ་ཚྭ་ལྕུམ་རྩ་བཏབ་
དཀྲུགས་ཁོལ་བ་དང༌། །རུས་ཁུ་བླུག་བཙོས་ཁྱེ་སུས་ཁྱོར་རེ་བསྟེན། །མར་བཅུད་རྩ་བ་ལྔ་
ཡི་སྨན་མར་ལ། །སྦྲང་དང་བུ་རམ་ཁ་ཚའི་སྨན་དང་སྦྱར། །ཐོ་རངས་ཕྱི་དྲོ་བསྟེན་པས་རླུང་
ཚབས་འདོན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་
གི་རྒྱུད་ལས་མོ་ནད་གཙོ་བོ་སྤྱི་བཅོས་ཀྱི་ལེའུ་སྟེ་བདུན་ཅུ་རྩ་བཞི་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །མོ་ནད་བྱེ་བྲག་དབྱེ་བ་དེ་ཡི་རྒྱུ། །རྟགས་དང་བཅོས་ཐབས་རྣམ་པ་བཞི་
ཡིས་བསྟན། །དབྱེ་བ་མངལ་ནད་རླུང་མཁྲིས་བད་ཀན་ཁྲག །འདུས་པ་རྣམ་ལྔ་གསང་བའི་
སྐབས་སུ་བཤད། །ཁྲག་ཚབས་གློ་སྙིང་མཆིན་མཆེར་མཁྲིས་པ་མཁལ། །རྒྱུ་མ་འོ་མ་ནུ་མ་
གོར་པ་བཅུ། །རླུང་ཚབས་མགོ་དང་རུས་པ་སྙིང་མཁལ་མ། །ཕོ་བ་རྒྱུ་མའི་ཚབས་དང་དྲུག་
ཏུ་བཤད། །ཟླ་མཚན་ཆུ་སེར་རླུང་གིས་བྱེར་བ་ལས། །རྩ་ནད་ཅེས་བྱ་ཚབས་ནད་བཅུ་དྲུག་
25-1-353


འགྱུར། །ཚབས་སྐྲན་ཆུ་བུར་ཅན་དང་ཧྲེམ་པོ་དང༌། །བེམ་པོ་རྨེན་སྐྲན་ཕོ་སྐྲན་ནག་པོ་དང༌། །
རྩ་སྐྲན་ས་བོན་སྐྲན་དང་ཟ་ཁུ་དགུ། །ཟླ་མཚན་ཆུ་སེར་རླུང་གིས་བསྒྲིལ་བ་ལ། །ཚབས་སྐྲན་
ཞེས་བྱ་དབྱེ་བ་དགུ་རུ་འགྱུར། །མ་ར་རྩེ་དང་ཨ་སོ་རྣམ་པ་གཉིས། །མངལ་གྱི་སྲིན་བུ་ལངས་
ཁྲོས་ནད་གཉིས་སྐྱེད། །དེ་རྟགས་སྙིང་གི་ཁྲག་ཚབས་རོ་སྟོད་གཟེར། །རྒྱུ་ཞབས་ཚ་ཞིང་
གཏུབས་པ་སྙམ་དུ་བྱེད། །གློ་ཡི་ཁྲག་ཚབས་གློ་མང་རོ་སྟོད་གཟེར། །རྩེའུ་འགྲེང་ཡན་ལག་
སྦྲིད་ཅིང་ཁ་གདོང་སྐྲངས། །མཆིན་པའི་ཁྲག་ཚབས་མིག་སྤྲིན་དམར་རམ་སེར། །མཆིན་
པའི་སྟེང་དང་མགོ་བོ་ན་བའོ། །མཆེར་པའི་ཁྲག་ཚབས་རྒྱུ་ཞབས་ན་ཞིང་གཟེར། །ཕོ་བ་
འཁྲོག་ཅིང་མཆེར་པའི་སྟེང་དུ་ན། །མཁྲིས་པའི་ཁྲག་ཚབས་ཉམ་ཆུང་སྐོམ་དད་ཆེ། །གློ་ལུ་
ཤ་པགས་སེར་པོར་འགྲོ་བ་ཡིན། །མཁལ་མའི་ཁྲག་ཚབས་འདོམས་གཡའ་མོ་མཚན་ཚ། །
རྐེད་སོ་མན་ཆད་རུས་པ་ཁོལ་ཞིང་ཚ། །རྒྱུ་མའི་ཁྲག་ཚབས་ཚ་ཞིང་གཏུབས་སྙམ་བྱེད། །འོ་
ཚབས་ཟླ་མཚན་འོ་ཁ་ཆུ་འདྲ་འཛག །སྙིང་འཕྱོ་ཆུ་སོ་ན་ཞིང་སྐྱུག་སྙམ་བྱེད། །ནུ་ཚབས་ནུ་མ་
སྐྲངས་ཤིང་ཟུག་གཟེར་ཆེ། །ཁྲག་ཚབས་གོར་པ་ལུས་ལྕི་འགྲོ་མི་ཤེས། །རྒྱུ་སྨད་ཁེངས་ཤིང་
ལྡང་དུབ་ན་བར་བྱེད། །མགོ་ཡི་རླུང་ཚབས་མགོ་འཁོར་ལིང་ཐོག་མོད། །རྣ་བ་འོན་ཞིང་རྣག་
འཛག་སོ་འགྲམ་ན། །རུས་པའི་རླུང་ཚབས་རུས་པ་འཁོལ་ཞིང་གྲང༌། །ཚིགས་རྐང་མཚང་
ར་བེམ་པོ་བཟོད་པ་ཆེ། །སྙིང་གི་རླུང་ཚབས་དྲན་པ་མི་གསལ་ཞིང༌། །མགོ་འཁོར་རྣ་བ་འུར་
ཞིང་སྨྱོ་འབོག་བྱེད། །མཁལ་མའི་རླུང་ཚབས་རྐེད་ཚིགས་འཁོལ་ཞིང་ན། །གྲང་ན་ན་ཞིང་
རྐེད་པ་མན་ཆད་བཤལ། །ཕོ་བའི་རླུང་ཚབས་སྦོ་འདྲིལ་ལྡང་དུབ་བྱེད། །ཁ་ཟས་འཇུ་དཀའ་
བསིལ་ཟས་ཤིན་ཏུ་གནོད། །རྒྱུ་མའི་རླུང་ཚབས་བསྡམས་ཤིང་ཟླ་མཚན་འབྱང་། །མངལ་
སྐྲན་ཆུ་བུར་ཅན་ནི་རྒྱུ་སྨད་སྦོ། །ཟླ་མཚན་ཆུ་སེར་དག་ཏུ་འབྱང་བར་བྱེད། །ཁྲག་སྐྲན་ཧྲེམ་
པོ་རྒྱུ་ཞབས་ལྡང་དུབ་ན། །ཤ་སྐྲན་(མངལ་ཁ་མཆུས་ཏེ། དྭངས་མ་ཆུ་སེར་དུ་འཛག་ཅིང་རྩིགས་མ་འདྲིལ། མདོར་
25-1-354


ན་བུ་མོ་གཞོན་པ་ལ་སྐྱེས་པ་མང་པོས་བྱས་པས་ནད་འབྱུང་གསུངས་སོ)བེམ་པོ་མཁལ་རྐེད་ཆད་སྙམ་བྱེད། །ཕོ་
བ་རྫིངས་ཤིང་ཟས་སྐོམ་འཇུར་མི་འདོད། །མཚང་ར་མི་ཐེག་རྒྱུ་ཆུ་སྡོམ་པར་བྱེད། །རྨེན་(བུ་
མོ་ཆུང་ལ་སྐྱེས་པ་ཆེས་པ་དང་འཕྲད་དེ་མངལ་འདྲམ་སྟེ་)སྐྲན་ཁྲག་ནག་འཛག་ཅིང་ཤ་མི་སྐྱེ། །ཆུ་སྲི་ལྡང་
དུབ་ན་ཞིང་སྨད་མི་ཐེག །ཕོ་སྐྲན་རེམས་པ་ལུས་ཤ་སྐྱེར་མི་འདོད། །སྨད་བཤལ་གཞོགས་
ལྕི་དབུགས་རྒོད་སྙིང་མི་བདེ། །སྐྲན་རོ་ནག་པོ་མདོག་འགྱུར་ཚིགས་གཞི་སྐྲངས། །ལུས་ཤ་
བེམ་པོར་བྱེད་ཅིང་མཛེ་རུ་འགྲོ། །རྩ་སྐྲན་ལིང་པ་ཤ་རུས་ཁོལ་ཞིང་ན། །ས་བོན་སྐྲན་ནི་ཤ་
རུས་འཇིག་སྙམ་བྱེད། །ཁྲག་སྐྲན་ཟ་ཁུ་ཁོང་པ་སྦོ་ཞིང་འཁྲོག །ཀུན་ཀྱང་བྱིས་པ་ཆགས་ལྟར་
སྲ་ཞིང་འདྲིལ། །སྐབས་སུ་སྦོ་ཞིང་ན་གཟེར་ཆུ་སེར་འཛག །མངལ་གྱི་སྲིན་བུ་ལངས་པས་
ཚ་བའི་ནད། །མཚང་ར་མཚན་མ་གཡའ་འཁོལ་ནུ་མ་རྒྱས། །སེམས་འཕྱོ་གཉིད་མེད་འགྲོ་
འདོད་སྐྱེས་པ་འདོད། །ཤ་སྐམ་མོ་མཚན་དྲི་མ་ཤིན་ཏུ་མནམ། །ཁྲོས་པ་དེ་དུས་སྐྱེས་པ་མ་
འཕྲད་པས། །མཛུབ་མོ་ཤིང་བུས་ཕྲུགས་པས་སྲིན་ཁྲོས་ཏེ། །མངལ་ཁ་སྐྲངས་ཤིང་ཆུ་སེར་
འཛག་པ་དང༌། །ཤིན་ཏུ་སྲ་ཞིང་ན་ལ་མཚན་མ་སྦོ། །བཅོས་ཐབས་རྩ་ནད་སྐྲན་དང་སྲིན་བུ་
གསུམ། །དང་པོ་རྩ་ནད་བཅུ་དྲུག་བཅོས་པ་ནི། །རླུང་ཚབས་དྲུག་པོ་དྲོད་དང་བཅུད་ཀྱིས་
བཅོས། །ཁྲག་ཚབས་བཅུ་པོ་བསིལ་དྲོད་ཁྲེའུར་བཅོས། །སྙིང་གི་ཁྲག་ཚབས་ཨ་རུ་རྒྱམ་ཚྭ་
དང༌། །ཤིང་ཚའི་ཐང་གཤེར་སྦྱངས་རྗེས་སྙིང་རྩ་གཏར། །དེ་འོག་འབྲས་བུའི་སྨན་སྦྱར་དྲུག་
པ་བསྲེག །གློ་ཚབས་ལྟོ་གཤེར་ཆུང་བས་སྦྱང་བྱ་སྟེ། །དྲུག་འགོ་གཏར་ལ་བདེ་བྱེད་འབྲིང་པོ་
སྦྱར། །རྗེས་ལ་དམར་གསུམ་མར་སྦྱར་བཞི་ལྔ་བསྲེག །མཆིན་ཚབས་གུར་གུམ་ཤིང་ཚ་པི་
པི་ལིང༌། །ཨ་རུ་ཆང་སྦྱར་སྦྱངས་ལ་རུ་ཐུང་གཏར། །གུར་གུམ་བདུན་སྦྱར་རྗེས་ལ་བརྒྱད་པ་
བསྲེག །མཆེར་ཚབས་རྒྱ་ཚྭ་ཤིང་ཚ་དུར་བྱིད་སྦྱང་། །སེ་འབྲུ་བརྒྱད་སྦྱར་བཅུ་གཅིག་མཆེར་
སྟེང་བསྲེག །མཁྲིས་ཚབས་ཨ་རུ་ཁྲོན་བུ་གསེར་མེ་ཏོག །ཐང་ཁྲུས་རྗེས་ལ་ཏིག་ཏ་བརྒྱད་པ་
25-1-355


སྦྱར། །མཁྲིས་རྩ་གཏར་ཞིང་ཚིགས་པ་བཅུ་པ་བསྲེག །མཁལ་མའི་ཚབས་ལ་ཤིང་ཚ་ཆང་ལ་
བསྐོལ། །རྒྱ་ཚྭ་རྒྱ་རུ་བ་སྤྲུ་ཙཎྜ་ལི། །ཁ་ཚར་བཏབ་བཏང་བྱིན་གཞུག་རྩ་ལ་གཏར། །རྗེས་ལ་
རྩ་བ་ལྔ་སྦྱར་བཅུ་བཞི་བསྲེག །རྒྱུ་ཚབས་ལྕུམ་རྩ་ཨ་རུའི་ཐང་གཤེར་སྦྱང༌། །འོམ་བུ་བདུད་
རྩིའི་དུགས་བདུག་བཅུ་བདུན་བསྲེག །རྙན་མོའི་གློ་བ་སྒ་དང་མར་རྙིང་བཏང༌། །འོ་ཚབས་
འབྲུ་སྣའི་དུགས་བྱ་ཚ་མར་བྱུག །ཤིང་ཚ་གཟེ་མ་ར་སྣ་མཱུ་ལ་སྒ། །སྤང་རྒྱན་དཀར་པོ་བུ་རམ་
སྦྱར་ལ་བཏང༌། །ནུ་མའི་ཁྲག་ཚབས་མཚལ་གྱི་ཉ་དགུས་མནན། །བ་ཤ་ཀ་དང་ཀྱི་ལྕེ་དཀར་
པོ་དང༌། །ཨ་རུའི་ཐང་བཏང་འབྲུ་སྣའི་(འབྲས་སོ་བ་གྲོ་ནས་དཀར་ཕུལ་དོ་དོ་བ་རྩོས་པའི་ཁུ་བ་མར་བྲེ་ཕྱེད་ཚ་
བ་བཞི་ཤིང་ཚ་ཁ་རུ་ཚ་ར་ཚ་རྒྱམ་ཚ་ཆུ་བཅད་དེ་སྦྲང་དང་བུ་རམ་སྦྱར་ལ་བཏང་ངོ་)སྨན་མར་སྦྱར། །རྒྱབ་རྩ་གཏར་
ཞིང་གསུམ་པ་བདུན་པ་བསྲེག །ཁྲག་ཚབས་གོར་པ་འབྲུ་འམ་ཚ་དུགས་བྱ། །ཤ་རུ་འོལ་མོ་
རྒྱ་ཚྭ་ཆང་སྦྱར་བཏང༌། །ལོང་རྩ་ཡོབ་གོང་རྩ་གཏར་ཟས་དྲོད་བསྟེན། །མགོ་ཡི་རླུང་ཚབས་
མགོ་ཡི་རུས་ཁུ་དང༌། །མགོ་ཤ་གླད་པ་གྲོད་པར་བྲུབས་བཙོས་བདུག །འཚོགས་གསང་ཕྱེ་
ལ་སྡུད་སྒོ་གསུམ་སྟེང་བསྲེག །མགོ་བཅུད་མར་ཆང་འབྲས་བུའི་སྨན་མར་བསྟེན། །རུས་
ཚབས་ཐོང་ཚེར་མཚང་ར་རུས་ཁུ་བསྡུས། །ཁུ་བར་མཚང་རའི་ཤ་བཏབ་ཚ་བ་གསུམ། །ཤིང་
ཚ་སྨྱུག་ཤུན་བཙོང་བཏབ་འཚོས་པར་བཙོ། །ནང་པར་ཁྱེ་སུས་ཚོན་རེ་བསྲོས་ཀྱིན་བཏང༌། །
རུས་ཆང་སྦྲང་ཆང་བུར་ཆང་བསྔགས་པ་ཡིན། །སྙིང་ཚབས་སྤྲེ་དོམ་འཕྱི་བའི་སྙིང་གཙོ་བྱས། །
སྙིང་སྣ་ཚོགས་ཚད་བརྡུངས་ཏེ་གྲོད་པར་བླུག །ཛཱ་ཏི་སུག་སྨེལ་ཤིང་ཚ་སྙིང་ཞོ་ཤ །རྭ་ཚ་དྭ་ཚ་
ཨ་རུ་ཁ་རུ་ཚྭ། །ཁ་ཚར་བཏབ་སྟེ་ཆུ་ལ་འཚོས་པར་བཙོ། །དེ་དང་ལུག་ཤ་བསྲེས་ཏེ་ཁྱེ་སུས་
བསྟེན། །འབྲས་བུའི་མར་སྦྱར་ཚིགས་པ་དྲུག་པ་བསྲེག །མཁལ་ཚབས་ར་ལུག་ཐུག་པོའི་
མཁལ་མ་དང༌། །རྟ་དང་གླང་གི་མཁལ་མས་གཙོ་བྱས་ལ། །མཁལ་སྣ་ཚིལ་བཅས་གཏུབས་
ཏེ་གྲོད་པར་བླུག །ཤིང་ཚ་དྭ་ཚ་སུག་སྨེལ་ཨ་རུ་ར། །རྭ་ཚ་སྤོད་སྣ་བ་སྤྲུ་མཁལ་ཞོ་ཤ །གཟེ་
25-1-356


མ་འབྲས་སྣ་གསུམ་བཏབ་བཙོས་བྱས་ལ། །ལུག་ཤ་བསྲེས་ཏེ་ཚ་བ་ཁྱེ་སུས་བསྟེན། །ཡང་
ན་ལུག་ཐོང་མཁལ་མ་ཚིལ་དང་བཅས། །ཤིང་ཚ་སྨྱུག་ཤུན་བཏབ་བཙོས་གྲངས་པ་དང་། །
བཙོང་དང་ཤིང་ཚ་ཚ་བ་གསུམ་བཏབ་བཏང་། །ཕོ་བའི་རླུང་ཚབས་བྱ་བྲའམ་བོང་བསྲེགས་
བདུག །སེ་འབྲུའི་ཅུར་ནིས་འཕྱི་བ་གོང་མོ་བཏང༌། །མདུན་རྒྱབ་མེས་མནན་སྒོག་སྐྱའི་སྨན་
མར་སྦྱར། །རྒྱུ་མའི་རླུང་ཚབས་ཐོང་ཚེར་ཁྲག་ནང་དུ། །རྭ་ཚ་དྭ་ཚ་ཤིང་ཚ་སུག་སྨེལ་དང༌། །
ཨ་རུ་སླེ་ཏྲེས་སྤོད་སྣ་འབྲས་ཕྱེ་སྦྱར། །རྒྱུ་མ་རྒྱངས་བཙོས་ཁྱེ་སུས་བསྟེན་པར་བྱ། །ཡང་ན་
བཞག་ཤ་ཚིལ་གཏུབས་ཁྲག་དང་བསྲེས། །སྨྱུག་ཤུན་བཙོང་དང་ཤིང་ཚ་རྒྱམ་ཚྭ་བཏབ། །རྒྱུ་
མ་རྒྱངས་བཙོས་ཁྱེ་སུས་བསྟེན་པར་བྱ། །གཉིས་པ་སྐྲན་ནད་དགུ་ཡི་བཅོས་ཐབས་ནི། །མེ་
ཏོག་སྣ་ཚོགས་ཆང་དུ་མནན་པའམ། །བྱ་བྲ་སྣུམ་དང་བསྲེས་ནས་འབྲུ་སྣའི་ལུམས། །ལུས་
ཀུན་དྲིལ་ཞིང་མཚང་ར་རྒྱུ་ཞབས་བདུག །སྒ་དང་ཚ་མར་སྦྱར་བའི་བསྐུ་མཉེ་བྱ། །བྱི་ས་བྱ་བྲ་
གྲོག་ཞིང་དྲོད་དུགས་བྱ། །སེ་འབྲུའི་ཅུར་ནིས་ཚ་བའི་རིལ་བུས་བཤིག །ལོང་རྩ་གཏར་ཞིང་
ཁྲུས་གཤེར་སྐྲན་རོ་སྦྱང༌། །རྗེས་ལ་པཉྩ་(བཟང་པོ་ལྔ་)པ་ལའི་སྨན་མར་རམ། །རྩ་བ་ལྔ་སྦྱར་
ཚིགས་པ་བཅོ་ལྔ་བསྲེག །བོང་བུ་འཕྱི་བ་ལ་སོགས་བཤུལ་ཤ་བསྟེན། །གསུམ་པ་སྲིན་བུའི་
ནད་གཉིས་བཅོས་པ་ནི། །སྲིན་ལངས་ཚ་བའི་ནད་ལ་སྐྱེས་པ་བསྟེན། །དྲིལ་ཕྱིས་ས་བོན་
དྭངས་མ་ཐང་དུ་བཏང༌། །སྲིན་ཁྲོས་འབྲུའམ་མེ་ཏོག་བྱི་རུག་བདུག །བྱི་རུག་བརྒྱད་པའི་ཁུ་
བ་མངལ་དུ་བཏང༌། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་མོ་ནད་བྱེ་བྲག་བཅོས་པའི་ལེའུ་སྟེ་བདུན་ཅུ་རྩ་ལྔ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །མོ་ནད་ཕལ་པ་མཚན་མའི་ནད་དང་ནི། །བུ་མ་ཕྱིན་དང་མགོ་མཇུག་ལོག་
པ་དང༌། །རོག་མ་ཕྱིན་དང་སྣོད་ལུག་ཁྲག་མ་ཆོད། །ནད་གཞུག་ལས་དང་དུག་ཐབས་གྱུར་པ་
25-1-357


བརྒྱད། །དང་པོ་མངལ་ཆགས་ཟླ་བ་ལོན་པ་དང༌། །ཕོ་མོ་གཉིས་ཀྱི་མཚན་མ་དོད་པའི་དུས། །
ཕ་དང་མ་ལ་ཆགས་དང་ཞེ་སྡང་སྐྱེ། །དེ་དུས་མཚན་མའི་ནང་དུ་ཉིང་ལོ་འབྱུང་། །སྒྱིད་སྐྱུར་
ཚིག་པ་ཟ་ལ་མཆི་མ་མང༌། །དང་ག་མི་བདེ་ཟས་སྐོམ་སྣ་ཚོགས་འདོད། །སྟོང་སྐྱུགས་བྱེད་
ཅིང་ནད་གཞི་གར་ཡོད་ལྡང༌། །འདི་ལ་ཉིན་གཉིད་མི་ལོག་གྲངས་མི་བྱ། །གང་འདོད་ཟས་
བྱིན་རྟ་བོང་བྱ་ཤ་སྤང༌། །དྲག་དལ་མི་བྱ་སྐམ་སར་རན་ཙམ་བཅག །ནད་གཞི་གང་ལངས་
དེ་ཡི་གཉེན་པོ་བསྟེན། །བུ་མ་ཕྱིན་ལ་གསོན་པོ་གཤིན་པོ་གཉིས། །གསོན་པོ་ནལ་བུ་དབྱུང་
དང་བཙར་མ་འདོད། །ནལ་བུ་གདོན་ཐབས་སྨན་གཉིས་གསུམ་དང་ལྔ། །ལྟོ་དགུག་རྩ་ཁ་
ཕྱེ་ལ་ཆང་སྦྱར་བཏང༌། །ཐུན་དང་ཡུན་དང་སྦྱར་ལ་བུ་རྩ་གཏར། །ཟླ་བདུན་མན་ཆད་ཐོན་
པར་ངེས་པ་ཡིན། །བཙར་མ་འདོད་ལ་ཕྱི་ནང་བར་དང་གསུམ། །དང་པོ་ནང་གི་སྣོད་ནས་
མ་འགྱུར་ན། །ཕོ་ཡི་རྨོངས་དང་མོ་ཡི་སྤྱི་སྐྲ་གཉིས། །བསྲེགས་ཐལ་རྒྱ་རུ་གཙོད་རུ་བསེ་རུ་
གསུམ། །ཞིབ་བཏགས་ཆང་སྦྱར་བཏང་ལ་དུགས་ཀྱིས་བདུག །ཡང་ན་མདེ་འབྱིན་རྒྱ་རུ་
མདའ་རྒྱུད་གསུམ། །ཆང་སྦྱར་བཏང་ལ་བྱི་སའི་དུགས་ཀྱིས་བདུག །ཡང་ན་སྦྲང་མར་རྒྱ་རུ་
སྦྱར་ལ་བཏང༌། །ཡང་ན་ལྷ་དང་ཡི་དྭགས་གཏོར་མས་མཆོད། །སྨྲ་བཅད་སྔགས་སྟོང་ཞུན་
མར་བཏབ་བཏང་སྦྱིན། །ༀ་གྲེང་གྲེང་མཧཱ་གྲེང་བཛྲ་རྗེ་སེ་སརྦ་བྱི་དེ་སྭཱཧཱ། །བར་གྱི་རུས་པའི་
མིག་ནས་མ་ཐོན་ན། །འཚོགས་མ་བརྟོལ་ལ་མཛུབ་མོས་དྲག་ཏུ་འཐེན། །ཐོན་དཀའ་སེན་མོ་
བྲེགས་ལ་ཆང་གིས་བཀྲུ། །ཆ་བྱད་ཟླ་གམ་རྒྱབ་འདྲས་གསིལ་དེ་དབྱུང༌། །ཕྱི་ཡི་ཤ་པགས་
མིག་ནས་མ་ཐོན་ན། །རྐེད་བཅིངས་སྒ་སྟེང་བཞག་ལ་ཕྲག་པ་མནན། །ཤི་རོ་མ་ཐོན་མདའ་
རྒྱུད་རྒྱ་ཚྭ་དང༌། །རྒྱ་རུ་གཙོད་རུ་ཆང་སྦྱར་དུགས་ཀྱིས་བདུག །ཡང་ན་དུར་བྱིད་མདེ་འབྱིན་
བྱ་མ་བྱི། །རྒྱ་རུ་བུར་ཆང་སྦྱར་ལ་བཏང་བར་བྱ། །ཡང་ན་རྒྱ་ཚྭ་དུར་བྱིད་ཤ་རུའི་ཐལ། །བ་སྤྲུ་
ཆང་སྦྱར་སྦང་སྐམ་དུགས་ཀྱིས་བདུག །ཡང་ན་རྒྱ་ཚྭ་ཁྱི་རླིག་ཚ་བ་བཏང༌། །དུར་བྱིད་རྒྱ་རུ་རྒྱ་
25-1-358


ཚྭ་མར་དང་སྦྱར། །མངལ་དུ་བཏང་སྟེ་ཕྱིང་པའི་སྣུམ་དུགས་བྱ། །མགོ་མཇུག་ལོག་གམ་རྐེད་
པ་མཇིང་པ་ལྟེབས། །འཕོངས་ནས་འོང་ན་རྐང་པ་བཏེག་ལ་སྤྲུག །མཛུབ་མོས་འཕུལ་ཏེ་ཕོ་
(ཁྱོའི་ཕུ་རུང་གཡས་)མདུང་ཕོངས་སུ་བརྡེག །སྔགས་ལ་འབྲུ་ལོག་བྱས་ཏེ་ཁོང་དུ་བཏང༌། །རོག་མ་
ཕྱིན་ན་རི་བོང་རིལ་མ་དང༌། །རྒྱ་ཚྭ་རྒྱ་རུ་རྨོང་གཞོབ་ཆང་སྦྱར་བཏང་།༌། སྔགས་སམ་ཁྱི་རླིག་
སྦྱོར་བས་ངེས་པར་ཐོན། །བུ་སྣོད་ལུག་ན་ཆུ་འཇམ་འོ་མས་བཀྲུ། །ཕྱི་ནང་སློག་ལ་མཛུབ་
མོས་སླེབ་ཚད་བསྡིགས། །གཡེར་མས་ཨིག་ཏུ་བཅུག་པས་ཚུད་པར་ངེས། །མ་ཚུད་ཕྱིང་པའི་
ཡོག་ཐོད་ཕྲུ་མས་དྲིལ། །དེ་ལ་རྒྱ་ཚྭ་གླན་ཏེ་ཕུགས་སུ་བསྐྱལ། །རྐང་པ་བཏེག་ལ་བསིག་
ཅིང་མཚན་ཁར་བདུག །འཕོངས་སྟོད་ཉལ་ཏེ་འགྲོ་འདུག་ལངས་པ་སྤང་། །ཁྲག་ཤོར་བུར་
ཆང་ཀ་ར་ཆང་སྦྱར་བསླུད། །མ་ཆོད་རྩ་ཁུ་བྱུག་དང་ཆང་སྦྱར་བཏང༌། །ཡང་ན་ནས་ཚིག་ཁུ་
བར་སྦྲང་རྩི་དང༌། །དོམ་མཁྲིས་སྐྲ་གཞོབ་བཏབ་ནས་བཏང་བས་ཆོད། །ཡང་ན་དོམ་མཁྲིས་
ཤིང་ཚ་བཏབ་ལ་བཏང༌། །ཡང་ན་གོང་མོའི་སྒྲོ་གཞོབ་སྦྲང་རྩི་དང༌། །ཀ་ར་སྐོགས་པའི་ཐལ་
བ་སྦྱངས་ལ་བཏང༌། །ཉྭ་གཞི་རོ་སྨད་ཆུས་བསྒྲང་བཅུ་དྲུག་བསྲེག །བསྐུ་མཉེ་གསུར་བདུག་
བུར་ཆང་རུས་ཁུ་བསྟེན། །བཙས་རྗེས་ནད་ལྷག་འདྲིལ་ནས་ཟུག་སྐྱེས་ན། བྱི་སའི་དུགས་བྱ་
གཡེར་མ་ཆང་སྦྱར་བཏང༌། །སྦྲང་དང་ཆང་སྦྱར་བུར་ཆང་མང་དུ་བཏང༌། །དེས་མ་ཞི་ན་སྦང་
མ་ཚྭ་བསྲོས་བདུག །དེ་རྗེས་ལོང་རྩ་གཏར་ལ་མངལ་བཤལ་བྱ། །འགྱིངས་རྗེས་ཤེ་རུལ་
ཁྲག་རྣག་བྱུང་བ་ན། །འཇིགས་པ་མི་དགོས་མངལ་བཤལ་བྱས་པས་ཐོན། །མོ་ནད་དུག་
ཐབས་བཙས་རྗེས་ཤ་མར་རྙིང༌། །ཉིན་གཉིད་དྲག་ཤུལ་རྐྱེན་གྱིས་མཁྲིས་ཚད་སྐྱེད། །རྩ་རྒྱུད་
ཕྲ་མགྱོགས་ཤེད་མེད་སྐོམ་དད་ཆེ། །རོ་སྟོད་གཟེར་ཕྲན་འཕོ་ཞིང་ལུད་པ་དམར། །དེ་ལ་ཁ་
ཟས་བསིལ་དྲོད་སྤེལ་ལ་བཏང༌། །རུ་ཐུང་སྣོད་ཀ་མཁྲིས་རྩ་ལོང་རྩ་གཏར། །ཨ་རུ་ལྕུམ་རྩ་
དུར་བྱིད་ཐང་གིས་སྦྱང༌། །བཏབ་སེང་ཏིག་ཏའི་ཐང་བཏང་ག་བུར་རམ། །གུར་གུམ་བདུན་
25-1-359


སྟེང་དོམ་མཁྲིས་བསྣན་ལ་བཏང༌། །སྨན་དང་ཟས་གཉིས་བསིལ་དྲོད་བསྣོལ་བྱས་ཏེ། །ཚ་
གྲང་སྤེལ་བཅོས་བཅུད་ལ་སྔ་བར་དབབ། །ཅེས་གསུངས་སོ། །བདུད་རྩི་སྙིང་པོ་ཡན་ལག་
བརྒྱད་པ་གསང་བ་མན་ངག་གི་རྒྱུད་ལས་མོ་ནད་ཕལ་པ་གསོ་བའི་ལེའུ་སྟེ་བདུན་ཅུ་རྩ་དྲུག་
པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། །གདོན་གསོའི་སྐབས་ལ་ཇི་ལྟར་བསླབ་པར་བགྱི། །འཚོ་མཛད་
སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང་། །སྟོན་པ་དྲང་སྲོང་རིག་པའི་ཡེ་
ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག གདོན་ལ་འབྱུང་པོའི་
གདོན་དང་སྨྱོ་བྱེད་དང༌། །བརྗེད་བྱེད་གཟའ་དང་ཀླུ་གདོན་རྣམ་ལྔར་བཤད། །འབྱུང་པོའི་
གདོན་ལ་རྒྱུ་རྐྱེན་མཚན་ཉིད་དང༌། །དབྱེ་བ་རྟགས་དང་བཅོས་ཐབས་ལྔ་ཡིས་བསྟན། །རྒྱུ་
རྐྱེན་སྡིག་པ་མི་དགེའི་ལས་མང་སྤྱད། །གྲོགས་མེད་ཡ་ང་གཅིག་བུར་བསྡད་པ་དང༌། །ཡ་ག་
ཅན་ལ་འབགས་གཙེས་བརྙས་པ་དང༌། །མཆོད་འོས་ཆག་དང་མྱ་ངན་གདུངས་ལ་སོགས། །
མི་འཚམས་ལུས་ངག་འགལ་ལས་འཇུག་པར་འགྱུར། །མཚན་ཉིད་འབྱུང་པོ་མི་མ་ཡིན་
ལ་སོགས། །ལུས་ངག་ཡིད་ལ་ཞུགས་ནས་སྤྱོད་པ་སྒྱུར། །དབྱེ་བ་ལྷ་དང་ལྷ་མིན་དྲི་ཟ་ཀླུ། །
གནོད་སྦྱིན་ཚངས་པ་སྲིན་པོ་ཤ་ཟ་དང༌། །ཡི་དྭགས་གྲུལ་བུམ་བྱད་སྟེམས་གཡེང་བྱེད་དང༌། །
རོ་ལངས་མཚུན་ལྷ་བླ་མ་དྲང་སྲོང་རྒན། །གྲུབ་པ་ཞེས་བྱའི་གདོན་ཆེན་བཅོ་བརྒྱད་དོ། །དེ་
རྟགས་སྔར་བས་དད་དང་ཤེས་པ་དང༌། །ལུས་ངག་ཡིད་སྤྱོད་འགྱུར་ཞིང་དེ་སྤྱོད་བྱེད། །བློ་
སེམས་མི་བདེ་སྤྲོ་ཐུང་ཤེས་པ་འཕྱོ། །ཁྱད་པར་ལྷ་གདོན་སཾ་ཀྲྀ་ཏ་སྐད་སྨྲ། །ཚིག་སྙན་གཉིད་
ཆུང་བཞིན་ལེགས་གཙང་སྦྲ་ཆེ། །ལྷ་མིན་ཤ་ཆང་ལ་དད་མིག་ཟུར་བལྟ། །ཁྲོ་གཏུམ་ང་རྒྱལ་
ཆེ་ཞིང་བབ་ཆོལ་མང༌། །དྲི་ཟ་སྒེག་ཅིང་དྲི་ཞིམ་རང་ལ་མགུ། །གླུ་གར་རྩེད་འཇོ་ལ་དགའ་
25-1-360


རྒྱན་དམར་འདོད། །ཀླུ་གདོན་མདངས་ལྡན་མིག་དམར་འབུར་ཚུགས་བལྟ། །དཀར་དང་
དམར་འདོད་ལྕེ་མྱུལ་ཁ་བུབ་ཉལ། །གནོད་སྦྱིན་སྟེར་ལ་དགའ་ཞིང་གསང་གཏམ་སྨྲ། །སྨན་
པ་བྲམ་ཟེ་ལ་སྡང་ཉ་ལ་སྲེད། །ཚངས་པ་ཀྱེ་ཞེས་འབོད་ཅིང་བསྟན་བཅོས་འདོན། །རང་
བརྡེག་གཞན་ལ་གཤེ་ཞིང་དགོད་ལ་དགའ། །སྲིན་པོ་སྟོབས་ལྡན་ཚིགས་རྩུབ་དམར་ལ་རྩི། །
ཤ་ཟ་ངོ་གནོང་སྐད་དམའ་སྐབས་སུ་འབོག །དོན་མེད་ངུ་ཞིང་ས་འབྲད་འབྲེལ་མེད་སྨྲ། །ཡི་
དྭགས་ཡི་དྭགས་སྤྱོད་ཚུལ་བྱེད་པ་སྟེ། །མི་འམ་ཅི་འདར་འཇིགས་ཤིང་ཟས་མི་འདོད། །གྲུལ་
བུམ་ངོ་ནག་དལ་འགྲོ་རླིག་པ་སྐྲངས། །བྱད་སྟེམས་ཤིང་འཛིན་གཅེར་རྒྱུག་གནས་སྟོང་འདུག །
གཡེང་བྱེད་ཆུ་འདོད་དངང་ཚིག་ཟས་མི་འདོད། །རོ་ལངས་བདེན་སྨྲ་གཉིད་ཆེ་རྒྱན་དགའ་
འདར། །མཚུན་ལྷ་ཁ་སྐམ་མིག་འཛུམ་གཡོན་གོས་གོན། །བླ་མ་དྲང་སྲོང་རྒན་པོ་གྲུབ་པ་
བཞི། །རང་རང་སྤྱོད་ལམ་ཁ་ཟས་དེ་དང་མཐུན། །གང་ཡང་བྱིས་པ་དང་འགྲོགས་གཅེར་
བུར་འབུད། །སྐྲ་བརྫེས་བློ་སེམས་མི་བདེ་ཡུན་རིང་སྤང༌། །བཅོས་ཐབས་སྔགས་བཟླས་
གཏོར་མ་སྦྱིན་སྲེག་དང༌། །ཀློག་འདོན་མཉམ་འཇོག་བསྙེན་བསྒྲུབ་ཚོགས་བསགས་པས། །
འབྱུང་པོའི་གདོན་ཉིད་ཞི་བར་བྱེད་པ་ཡིན། །བྱ་ཀྲ་སྤང་སྤོས་ཤུ་དག་རྨ་བྱའི་སྒྲོ། །ཤིང་ཀུན་
སྦྲུལ་པགས་སྲན་ཕབ་བྱི་ལའི་བྲུན། །ཆ་མཉམ་དུ་བས་བདུགས་པས་འབྱུང་པོ་འབྱེར། །ཙན་
དན་གུར་གུམ་སུག་སྨེལ་འབྲས་བུ་གསུམ། །བྱ་ཀྲ་སྐྱེར་པ་སྒྲོན་ཤིང་ཚ་བ་གསུམ། །གནྡྷ་པ་
ཏྲ་དུག་ཉུང་པུ་ཤེལ་རྩེ། །ཡུངས་དཀར་རྒྱ་སྤོས་ཤུག་པ་པྲི་ཡང་གུ། །དབྱི་མོང་རུ་རྟ་ཧོང་ལེན་
བོང་ང་དཀར། །སྤང་མ་ལྡོང་རོས་གཅིན་དྲུག་(བ་གླང་རྟ་བོང་ར་ལུག་)མར་རྙིང་ལ། །སྦྱར་བ་ཁུས་
འདེབས་སྨན་མར་ཞེས་བྱ་སྟེ། །བཟའ་བྱུག་སྣར་བླུགས་གདོན་ལས་མྱུར་དུ་གྲོལ། །རིག་
སྔགས་གྲ་ལྔ་མཆོད་ཕུལ་བསྒྲགས་ན་ཕན། །གཏོར་མ་རིན་ཆེན་དྲི་སྣ་འབྲུ་སྣ་དང་། །མེ་ཏོག་
འབྲས་ཆན་ཁུ་བ་དཀར་མངར་རྣམས། །ལྷ་དང་བླ་མ་དྲང་སྲོང་གྲུབ་པ་དང༌། །རྒན་པོ་ལྔ་ལ་
25-1-361


ལྷ་ཡི་ཁང་པར་བཏང༌། །ལྷ་ལ་བྱང་ཕྱོགས་ལྷ་མིན་ནུབ་ཏུ་སྦྱིན། །དྲི་ཟའི་གདོན་ལ་བ་ལང་
ལམ་མདོ་དང༌། །ཀླུ་དང་མཚུན་ལྷ་འབབ་ཆུའི་འགྲམ་དུ་སྦྱིན། །གནོད་སྦྱིན་ཆུ་གཉིས་འདུས་
པའི་གནས་སུ་བཏང༌། །སྲིན་པོ་ལམ་མདོ་ཚངས་པ་ཤར་དུ་མཆོད། །ཤ་ཟ་ལ་ནི་ནུབ་ཀྱི་ཁང་
སྟོང་བཏང༌། །གཏོར་མ་སྦྱིན་སྲེག་སྨན་དུད་ལ་སོགས་པ། །ཁྱད་པར་རང་རང་འཛིན་པའི་
དུས་སུ་བསྟེན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་
གི་རྒྱུད་ལས་འབྱུང་པོའི་གདོན་གསོ་བའི་ལེའུ་སྟེ་བདུན་ཅུ་རྩ་བདུན་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག རྣམ་ཤེས་སྨྱོ་བྱེད་ནད་ལ་རྒྱུ་རྐྱེན་དང༌། །དབྱེ་བ་རྟགས་དང་བཅོས་ཐབས་
བཞི་ཡིས་བསྟན། །རྒྱུ་རྐྱེན་སྙིང་སྟོབས་ཞན་ལ་མྱ་ངན་དང༌། །ཡིད་མི་བདེ་དང་སེམས་ལས་
ཆེས་པ་དང༌། །ཟས་སྤྱོད་མི་འཕྲོད་གདོན་གྱིས་རྐྱེན་བྱས་ཏེ། །ཉེས་པ་འཁྲུགས་པས་རྣམ་
ཤེས་རྒྱུ་(སྙིང་པདྨ་འདབ་བརྒྱད་ཀྱི་དབུས་ན་རྩའི་རྒྱལ་པོ་ཨ་ཝ་དྷཱུ་ཏི་རྟ་རྔ་ཙམ་ཞིག་གནས། དེའི་ཕྱོགས་བཞི་སྟེང་འོག་དྲུག་ཏུ། 
རྩ་སྟོང་བ་ཁ་དོག་དྲུག་ཏུ་གནས་ཏེ། དེ་རྣམ་ཤེས་ཚོགས་དྲུག་ཏུ་གནས། དེ་བདུན་དུ་ནད་དང་གདོན་ཞུགས་བག་དྲན་པ་ཉམས་
ཏེ། ཤིང་རྟའི་ཁ་ལོ་བསྒྱུར་བ་བཞིན་དུ་བྱ་བ་ཅི་དགའ་དགའ་བྱེད་དོ།།)གནས་ཞུགས། །ཡིད་དེ་ལམ་ལོག་དྲན་
ཉམས་སྨྱོ་བར་འགྱུར། །དབྱེ་བ་རླུང་མཁྲིས་བད་ཀན་འདུས་པ་དང༌། །ཡིད་གདུང་དུག་གདོན་
ལས་གྱུར་བདུན་དུ་བཤད། །དེ་རྟགས་རླུང་གྱུར་ཤ་སྐམས་སྦུ་བར་སྐྱུག །མང་དུ་སྨྲ་ཞིང་
ངུ་འབྲོས་བྱེད་པ་དང༌། །མིག་སྤྲིན་དམར་ལ་ཁ་ཟས་ཞུ་ནས་ལྡང༌། །མཁྲིས་གྱུར་ཁྲོ་བརྡེག་
བསིལ་འདོད་མིག་ཆུ་སེར། །མེ་དང་སྐར་མ་མིག་སྔར་མཐོང་བར་བྱེད། །བད་ཀན་རློན་ཞིང་
སྨྲ་ཉུང་ཡི་ག་འཆུ། །གཉིད་ཆེ་སྣབས་དང་ཁ་ཆུ་མང་དུ་འཛག །འདུས་པ་ལས་ནི་ཀུན་རྟགས་
སྟོན་པར་བྱེད། །ཡིད་གདུང་དྲན་སྐྱེན་དུས་ལྡང་སེམས་མི་བདེ། །དུག་གིས་མདངས་ཉམས་
སྟོབས་ཆུང་སེམས་འཁྲུལ་བྱེད། །གདོན་གྱུར་གང་གནོད་སྤྱོད་པར་འགྱུར་བའོ། །བཅོས་པའི་
25-1-362


ཐབས་ལ་སྤྱི་དང་བྱེ་བྲག་གཉིས། །དང་པོ་ཡིད་འཇུག་བུ་གའི་ལམ་བསལ་ཕྱིར། །བསྐུ་མཉེ་
ལུམས་བྱ་སྐྱུགས་ཁྲུས་གཏར་བས་སྦྱང་། །འབྲས་བུ་གསུམ་དང་ཧ་རེ་ཎུ་ག་དང༌། །སྒྲོན་ཤིང་
ཐལ་ཏྲེས་ཡུང་སྐྱེར་པརྞི་གཉིས། །རྒྱ་སྤོས་རུ་རྟ་སྟག་ཚེར་པྲི་ཡང་ཀུ། །ནཱ་ག་གེ་སར་ད་ལིས་
དོང་ག་བཙོད། །སེ་འབྲུ་བྱི་ཏང་ག་དང་ཀ་ཀོ་ལ། །དབྱི་མོང་ཨུཏྤལ་ཙན་དན་ཤུག་པ་རྣམས། །
མར་རྙིང་དགེ་བའི་སྨན་མར་ཞེས་བྱ་སྟེ། །རོ་ཙ་བུ་བསྐྱེད་ལུས་རྒྱས་སྨྱོ་བྱེད་འཇོམས། །ཁྱད་
པར་རླུང་ལས་གྱུར་ལ་འཇམ་རྩི་བྱ། །བོང་ང་ཞོ་གཅིག་ཆང་དུ་སྦངས་ལ་བཏགས། །ཨ་རུ་
དྲུག་འགྱུར་ཕྱེ་མ་ཆུ་ལ་བསྡུས། །མར་བསྐོལ་བཟང་དྲུག་བུ་རམ་བཏབ་སྟེ་བསྟེན། (ལྟོ་སྟོང་ལ་ཁ་
ཡིས་བྲིད་ལ་བཏང་)།ཐབས་དང་མི་ལྡན་(དུས་ཅིག་ཏུ་བཏང་ན་)ཚེ་ཡི་བར་ཆོད་འགྱུར། །ཡང་ན་བྱ་ཁྱུང་
ལྔ་པ་ཛཱ་ཏི་མཉམ། །རིལ་བུ་བྱས་ཏེ་གཅིག་གཉིས་གསུམ་བསྐྱེད་བསྟེན། །ཛཱ་ཏིའི་མར་དང་
རུས་ཆེན་སྨན་མར་དང༌། །ལོ་ཤ་ལོ་མར་ཤ་ཆེན་གར་ཆང་བསྟེན། །ཨ་རུ་ཚ་བ་གསུམ་དང་
ཙི་ཏྲ་ཀ །འུ་སུ་ལ་ལ་ཕུད་དང་ཁ་རུ་ཚྭ། །རྒྱམ་ཚྭ་བུ་རམ་སྦྱར་བའི་ཕྱེ་མ་བསྟེན། །རླུང་གསང་
རྣམས་སུ་མེ་དང་ཐུར་མ་བྱ། །མཁྲིས་གྱུར་དནྡ་དུར་བྱིད་གསེར་མེ་ཏོག །ཨ་རུ་ར་དང་པི་པི་
ལིང་གིས་སྦྱང༌། །ཏིག་ཏ་མ་ནུ་རུ་རྟ་བ་ཤ་ཀ །ཧོང་ལེན་གུར་གུམ་སྐྱུ་རུའི་ཕྱེ་མ་བཏང༌། །སྙིང་
རྩ་གཏར་ཞིང་ཏིག་ཏའི་སྨན་མར་སྦྱར། །ཟས་སུ་ལུག་ཤ་རྔ་བྲན་ཤ་གསར་བསྟེན། །བད་གྱུར་
སྤྱང་ཚེར་སྒེ་གཤེར་པོ་སོ་ཆ། །བ་ཡི་འོ་མར་སྦྱར་ལ་སྐྱུག་ཏུ་གཞུག །རྩུབ་པའི་ཟས་(ཆང་ཟན་ཉ་
ཕག་གོང་སྲེག་ཤ་དང་སྦྱར་)སྨན་(ཚ་བ་ལྔ་སེ་འབྲུ་ཤིང་ཀུན་རྩ་ལ་རི་ཚ་ཕྱེ་མ་སྦྱར་)མེ་ཐུར་བསྟེན་པ་དང་། །འདུས་
པ་ལ་ནི་ཀུན་གྱི་གསོ་བ་སྦྱར། །ཡིད་དུངས་ཆོས་ནོར་གཏམ་སྙན་གྲོགས་ཀྱིས་གསོ། །དུག་ལ་
དཔའ་སེར་བོང་ང་དཀར་དམར་རྩད། །རེ་རལ་ཡུང་བ་དྲི་ཆུའི་རིལ་བུ་བསྟེན། །གདོན་གྱུར་
བྱི་ལ་ར་ཐུག་འུག་པ་ཝ། །གཅིན་རྟུག་མཁྲིས་སེན་སྤུ་པགས་སྤོས་སྦྱར་བདུག །ཅེས་གསུངས་
སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྨྱོ་བྱེད་ཀྱི་གདོན་
25-1-363


གསོ་བའི་ལེའུ་སྟེ་བདུན་ཅུ་རྩ་བརྒྱད་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །བརྗེད་བྱེད་དབྱེ་བ་རྟགས་དང་བཅོས་ཐབས་གསུམ། །དབྱེ་བ་རླུང་མཁྲིས་
བད་ཀན་དུག་གདོན་ལྔ། །དེ་རྟགས་བྱུང་ཚུལ་སྙིང་འདར་མགོ་བོ་འཐོམ། །རྔུལ་འབྱུང་སྦོ་
ཞིང་སྟོབས་ཆུང་རུས་ཤིང་ན། །ཁ་ཆུ་སྣ་ཆུ་མང་ཞིང་ནད་ལངས་དུས། །འགྱེལ་ཞིང་སོ་འཆའ་
རྐང་ལག་གཡོབ་པ་དང༌། །སྦུ་བར་སྐྱུག་ཅིང་མུན་པར་ཞུགས་སྙམ་སེམས། །རླུང་གྱུར་རྐང་
ལག་འདར་རེངས་ཡང་ཡང་ལྡང༌། །མཁྲིས་པ་བཞིན་སེར་ཁ་སྐམ་ཞུ་དུས་ལྡང་། །བད་ཀན་
ཚིགས་རིང་ཁྱད་པར་ཁ་ཆུ་མང༌། །དུག་གྱུར་ནད་རྟགས་མི་གསལ་ཤེས་པ་འཁྲུལ། །གདོན་
གྱུར་སྔར་བས་སྤྱོད་པ་གཞན་དུ་འགྱུར། །བཅོས་ཐབས་ནི་རུ་ཧ་དང་སྣ་བཤལ་དང་། །སྐྱུགས་
ཁྲུས་རྣོ་བས་བུ་ག་དག་པར་སྦྱང༌། །འུག་པ་བྱ་རོག་བྱ་རྒོད་ཟེར་མོ་སྦྲུལ། །ཁྱི་སྤྲེ་རྟ་ཡི་ཆུ་སྒྲོ་
བྲུན་དུད་བདུག །བ་སེར་མཁྲིས་པའི་ཁུ་བ་སྣ་སྨན་བཏང༌། །ཤུ་དག་རུ་རྟ་མར་རྙིང་སྦྲང་སྦྱར་
བྱིན། །བོག་ཡུན་རིང་ན་སོར་མོ་ཉི་ཤུ་བསྲེག །འཇམ་རྩི་བུར་ཆང་བཏང་ཞིང་རླུང་གསང་
བསྲོ། །སྲོག་རྩ་མྱོས་བྱེད་གསང་ལ་མེ་ཐུར་བྱ། །བྱེ་བྲག་གསོ་བ་སྨྱོ་བྱེད་དག་དང་འདྲ། །སྤྱིར་
ན་སྨྱོ་བྱེད་བརྗེད་བྱེད་གང་ལ་ཡང༌། །ཁྲག་མཁྲིས་ཚ་བའི་ཕུགས་བཅས་བཅོས་མི་ལེན། །དེ་
ཕྱིར་ཚ་བ་དག་པར་སྦྱང་བྱ་སྟེ། །དེ་འོག་ཟས་སྨན་དྲོད་བཅུད་མེ་ཐུར་གསོ། །སྨྱོ་དང་བརྗེད་
བྱེད་ཕལ་ཆེར་གདོན་གྱུར་པས། །བསྐང་བཤགས་ཁྲུས་གཏོར་བདེན་བདར་ཞི་བས་བསྟེན། །
ཆུ་གཏོར་ཀླུ་ཆོག་གཏོར་མས་བྲིད་ལ་བཅོས། །ཐ་མ་དྲག་པོའི་ལས་ཀྱིས་མཐའ་རུ་བསྐྱལ། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་
བརྗེད་བྱེད་ཀྱི་ནད་གསོ་བའི་ལེའུ་སྟེ་བདུན་ཅུ་རྩ་དགུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
25-1-364


ཆེན་པོ་ཉོན་ཅིག །གཟའ་ཡི་གདོན་ལ་འཛིན་དུས་བརྟག་ཐབས་དང༌། །བསྲུང་བ་བཅོས་
ཐབས་ཕྱིར་མི་ལྡོག་པའོ། །འཛིན་དུས་ཚེས་བཞི་བརྒྱད་དམ་བཅུ་གཅིག་དང༌། །བཅོ་ལྔ་བཅོ་
བརྒྱད་ཉི་ཤུ་གཉིས་དང་ལྔ། །ཉི་ཤུ་དགུ་དང་རྒྱུ་དུས་བརྒྱད་ལ་འཛིན། །བརྟག་ཐབས་སྤྱི་
དང་ཁྱད་པར་སྤང་བླང་བརྟག །སྤྱི་རྟགས་བཞོགས་བཤལ་མིག་རྩ་གྲུང་བ་དང༌། །ཁ་ལྐུགས་
ཁ་སླེ་ངུ་དང་དགོད་པར་བྱེད། །ཁྱད་པར་བརྟག་པ་མེ་གཟའ་ཆུ་གཟའ་གཉིས། །མེ་གཟའ་
གཞོགས་གཡས་ལ་ཕོག་ལྕེ་གཡས་ཐུང༌། །ཚ་བ་ཆེ་ཞིང་སེན་མོ་གཞོབ་རོག་འོང༌། །ཆུ་གཟའ་
གཡོན་ལ་ཕོག་ཅིང་ལྕེ་གཡོན་ཐུང༌། །ལུས་ཀུན་དྲོད་དང་བྲལ་ཞིང་ཆུ་རྒྱུས་གྱོང་། །སྤང་བླང་
བརྟག་པ་ཉི་ཤུ་དགུ་ལ་ཟིན། །ཕོག་མ་ཐག་ཏུ་སྐྱུག་ཅིང་ལྐུགས་པ་དང༌། །སྙིང་གར་ཆུ་ལྕག་
རྒྱབ་པས་མི་དངངས་དང༌། །མིག་འཛུམ་མི་ཤེས་དྲུག་ཅུ་ཡར་འདས་པ། །གསོས་ཀྱང་སོས་
པར་མི་འགྱུར་སྤང་བར་བྱ། །བསྲུང་བ་རང་དང་ནད་པ་སྲུང་བ་གཉིས། །རང་གི་སྲུང་བ་ཀེ་ཚེ་
ཀར་ཕྲ་མེན། །རྨིགས་པའི་ཤ་ལ་སྔགས་བཟླས་ལུས་ལ་བཅང༌། །ༀ་བ་ར་ཙ་ཀྲ་རཱ་ཧུ་ལ་སྭཱཧཱ། 
ༀ་ཧཱུཾ་སུ་ལི་ཧཱུཾ་སུ་ལི་ཏིང་བྲི་དུ་སུ་སུ་མེ་མེ་ཤིག་ཤིག་སྭཱཧཱ། །ༀ་སྟུམ་པོ་ལི་སྟུམ་པོ་ལི་ཏིང་བྷི་མ་
ཏུམ་བྷེ་སུ་སུ་མེ་མེ་ཤིག་ཤིག་སྭཱཧཱ། །གློ་ལ་མ་བརྗེད་གནས་པས་གཟའ་གདོན་ཐུབ། །ནད་
པའི་སྲུང་བ་རིང་བསྲེལ་ཀར་ཕྲ་མེན། །རྨ་བྱ་བྱ་རོག་སྙིང་ཁྲག་ལུས་ལ་བཅང༌། །གུ་གུལ་
དཀར་ནག་ཡུགས་སའི་དོར་རྟ་ལ། །ཐུམ་པོ་བྱས་ལ་གཡོན་གྱི་ངོས་སུ་གདགས། །བཟང་
དྲུག་གླ་རྩི་སྒོག་ཐལ་མར་གསར་བྱུག །རྒྱུ་དུས་ནད་པའི་མལ་དུ་ཕུག་རོན་གཞུག །ༀ་ཏྲི་ཁྱེ་
ད་བཾ་ཧཱུཾ། །སྡོད་པའི་གྱང་ངམ་ཐོག་ལ་བྲིས་པས་ཐུབ། །བཅོས་ཐབས་བཙོན་དུ་བཟུང་དང་
དངངས་སུ་གཞུག །ཟས་དང་སྤྱོད་ལམ་ཁྲུས་ཆུ་གཟའ་ཆོག་བྱ། །ཟིན་པའི་མོད་ལ་བཙོན་དུ་
བཟུང་བྱ་སྟེ། །ཡུགས་སའི་ཞབས་མས་ནད་པའི་མགོ་ཕུར་ལ། །ཀེ་ཏ་བཟླས་ཤིང་གུ་གུལ་དུ་
བས་བདུག །གུ་གུལ་ཆུར་སྦྱངས་སྔགས་བཏབ་ཁོང་དུ་བཏང༌། །སྒོག་ཐལ་གངས་ཐིགས་རྡོ་
25-1-365


མཁྲིས་དྲི་ཆུ་སྦྱར། །ལུས་ལ་བྱུགས་པས་འཁོར་ལ་འཕྲོ་མི་འགྱུར། །དེ་ནས་དངངས་སུ་གཞུག་
པ་མེ་གཟའ་ལ། །ཉི་གྲིབ་མཚམས་སུ་ནད་པ་ཙོག་པུར་བཞག །སྟེང་ནས་ཆུ་རྫ་བདུན་གྱིས་
བསྟུད་ལ་བྲན། །རྒྱབ་ནས་དུང་འབུད་བྲོས་ན་སྔར་ཤུལ་དབུལ། །ཆུ་གཟས་ཟིན་ན་མཐའ་མ་
མེ་ཡིས་བསྐོར། །བྲོས་ན་མདའ་བཀང་གྲི་ཐོགས་རྒྱོབ་སོད་བསྡིགས། །དེས་ཀྱང་མ་སོས་ནད་
པ་མཐོང་ཀར་བཞག །འོག་ཏུ་སོག་འབོལ་སྟེང་དུ་གོས་བཏིང་ལ། །དུང་འབུད་པ་དང་བསྐྱུར་
བ་དུས་གཅིག་བྱ། །ཁ་ཟས་ཆང་དང་མར་རྙིང་ཤ་ཁྲག་སྤང༌། །སྦྲང་དང་མར་གསར་ཞོ་དར་
དཀར་ཆོས་བསྟེན། །སྤོས་དཀར་སྦྲང་དང་སྦྱར་བ་ཁོང་དུ་བཏང༌། །སྤྱོད་ལམ་མི་གཙང་གྲིབ་
འཛེམ་མེ་ཉི་སྤང༌། །མི་ཡིས་མི་ལབ་མི་ཅོལ་སྙན་ཚིག་སྨྲ། །ཁྲུས་ཆུ་ག་བུར་གི་ཝཾ་བཟང་པོ་
དྲུག །ཙན་དན་གླ་རྩི་སྤོས་དཀར་དྲི་ཆུས་བཀྲུ། །ཡང་ན་དེ་རྣམས་སྒོག་སྐྱ་ནུས་ལྡན་བསྲེགས། །
ཆང་དང་སྦྱར་ལ་ལུས་ཀུན་ཡང་ཡང་བཀྲུ། །རྣམ་འཇོམས་ལ་སོགས་ཁྲུས་ཆུས་བཀྲུ་བ་
བསྔགས། །གཟའ་ཆོག་གཏོར་མ་བྱིན་དང་བྱད་དགྲོལ་གཉིས། །གང་ཡང་དང་པོ་ཀླུ་ཆོག་
རྒྱབ་བཅོས་ལ། །དེ་རྗེས་དཀར་གཏོར་གཅིག་དང་དམར་གཏོར་གཅིག །སྔགས་དང་ཕྱག་
རྒྱས་བྱིན་བརླབས་གུ་གུལ་གྱིས། །ནད་པར་བདུག་ཅིང་ཀེ་ཏ་མང་དུ་བཟླས། །ༀ་ཀེ་ཏ་ཀེ་ཏ་
སྭཱཧཱ། །དེ་རྗེས་སྔགས་ཀྱིས་གཟའ་ལ་གཏོར་མ་སྦྱིན། །སྨྲང་གིས་བཀྲོལ་ལ་གཏོར་མ་སྐྱེལ་
དུ་བཏང༌། །དེ་ཤུལ་ནད་པ་དེ་དང་རྒྱབ་སྤྲད་ལ། །སྟེའུ་ཤུག་པ་ལ་བརྡེག་གཏམ་ཁ་དྲི། །དེ་
ཡི་ནུབ་མོ་གཟའ་ཡི་བྱད་དགྲོལ་ཏེ། །སླ་ང་ཆུ་ཡིས་བཀང་པའི་ཁ་གདང་དུ། །གཟའ་བརྒྱད་
གཟུགས་ལ་ཁ་དོག་སོ་སོར་བསྒྱུར(ཤར་དུ་གཟའ་ཉི་མ་སྐུ་མདོག་དམར་པོ་ཕྱག་ན་པདྨ་བསྣམས་པ། །ལྷོར་ཕུར་བུ་
སེར་པོ་པུ་ཏི། ནུབ་ཏུ་ཟླ་བ་དཀར་པོ་ཀུ་མུ་ད། བྱང་དུ་ལྷག་པ་སེར་པོ་ཨུཏྤལ། ཤར་ལྷོར་མིག་དམར་དམར་པོ་མེ་དཔུང༌། ལྷོ་ནུབ་
ཏུ་རཱ་ཧུ་ལ་ནག་པོ་བུམ་པ། ནུབ་བྱང་དུ་པ་སངས་དཀར་པོ་པདྨ། །བྱང་ཤར་དུ་སྤེན་པ་སྔོན་པོ་དབྱུག་པ་བསྣམས་པའོ།)། །ཁ་
གདངས་ཆུ་ཡི་ནང་དུ་བསྟན་ལ་བཞག །རང་རང་མིང་དང་སྙིང་པོ་བྲིས་ལ་གླན། །ནད་པ་བྱད་
25-1-366


ཐག་བཏགས་ལ་གཟུགས་དང་སྦྲེལ། །སླ་ངའི་ཕྱོགས་བཞིར་མར་མེ་བཞི་བཏང་ལ། །ༀ་ཀེ་
ཏ་ཀེ་ཏ་རཱ་ཧུ་ལ་སྭཱཧཱ། །བརྒྱ་རྩ་བཟླས་ལ་བྱད་བཀྲོལ་བྱད་ཐག་བཅད། ཡག་ཤཾ་ཕཊ། དུར་ཤཾ་
ཕཊ། །སེ་ཤཾ་ཕཊ། ཕག་ཤཾ་ཕཊ། ཕེ་ཤཾ་ཕཊ། ཕེར་ཤཾ་ཕཊ། ཤར་ཤཾ་ཕཊ། ཏྲག་ཤཾ་ཕཊ། ཙ་ཤཾ་
ཕཊ། བརྒྱ་རྩ་བཟླས་ཤིང་ཉི་མ་ཟླ་བ་དང༌། །མིག་དམར་ལྷག་པ་ཕུར་བུ་པ་ཝ་སངས། །སྤེན་
པ་རཱ་ཧུ་ལ་བརྒྱད་སྨྲང་གིས་བཀྲོལ། །བྱད་ཐག་བཅད་དེ་ཆུ་ཡི་ནང་དུ་བསྐྱུར། །རྫ་སྣོད་བྱོ་ལ་
ཐོ་རངས་ཆུ་གཞུང་བསྐྱལ། །རྒྱུ་དུས་བརྒྱད་ལ་གཟའ་ཆོག་ཐེབས་རེ་བྱ། །མི་ལྡོག་ཐབས་ལ་
ཟིན་ནས་ཞག་བདུན་ནས། །ཀླུ་བརྒྱད་བྱས་ཏེ་ཟིན་དུས་རྒྱུ་ཕྱོགས་སུ། །བོང་བུ་ཕུག་རོན་གླུད་
དུ་བྱས་ཏེ་བཏང༌། །ནད་པ་སོས་རྗེས་ཕ་ཝཾ་ཆོ་ལོང་དང་། །ཀར་ཕྲ་མེན་དང་བཟླས་ཡུངས་སྐེ་
རུ་གདགས། །དེ་ཡིས་ཕྱིར་མི་ལྡོག་པར་ངེས་པ་ཡིན། །ཞེས་གསུངས་སོ། །བདུད་རྩི་སྙིང་པོ་
ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གཟའི་གདོན་ནད་བཅོས་པའི་ལེའུ་སྟེ་
བརྒྱད་ཅུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ལན་ཅིག་ལྔ་བརྒྱ་ཐ་མའི་དུས་ཚོད་དུ། །བསྐལ་པའི་ཆ་ཉམས་འབྱུང་བའི་
བཅུད་ཤོར་བས། །མི་རྣམས་ཟ་ཐང་བྲི་ནས་དབུལ་པོར་འགྱུར། །ས་གཉན་རློག་ནས་སྤང་
མཐའ་ཞིང་དུ་འཕྲུ། །ཆུ་གཉན་དཀྲུགས་ནས་ནེའུ་གསིང་རྫིང་དུ་བསྐྱིལ། །ཤིང་གཉན་གཅོད་
ཅིང་རྡོ་གཉན་རྩ་བ་འདེགས། །མི་གཙང་འཐབ་གཞོབ་བཤན་དམར་འཇོལ་ཉོག་སྤྱོད། །བན་
བོན་ནུས་པ་སྒྲུབ་པའི་ལོང་མེད་ནས། །གཉན་ས་དཀྲུགས་པས་དགྲ་རྣམས་ཐུལ་ལ་རེ། །དེ་
ཚེ་ཀླུ་གཉན་ས་བདག་ལྷ་སྲིན་འཁྲུགས། །རེག་མཐོང་ཁ་རླངས་བསམ་པའི་དུག་འཕྲོས་པས། །
ཙི་ཙི་ཛྭ་ལ་འབར་བའི་བསྐལ་པ་དར། །མཐོང་བས་སྐྱུག་བྲོ་བསམས་པས་སྐྱི་འཇིགས་ཤིང་། །
ཐོས་ན་ཡ་ང་རང་རོ་རང་གིས་མཐོང༌། །ཚེ་འདིའི་གཉེན་འདུན་ཀུན་དང་གསོན་འབྲལ་བྱེད།  །
25-1-367

 
དེ་འདྲའི་ནད་ཀྱི་གསོ་ཐབས་ངས་བསྟན་གྱིས། །དྲང་སྲོང་ཆེན་པོ་མ་ཡེངས་གུས་པས་ཉོན། །
འདི་ལ་རྒྱུ་རྐྱེན་མཚན་ཉིད་དབྱེ་བ་དང༌། །རྟགས་དང་བཅོས་ཐབས་ལྔ་རུ་ཤེས་པར་བྱ། །རྒྱུ་
ནི་ལུས་ལ་གནས་པའི་ཆུ་སེར་ལ། །དེ་རྐྱེན་སྔོན་གྱི་ལས་ཀྱི་རྣམ་སྨིན་པ། །འཕྲལ་དུ་གདོན་
དང་ཕོག་ཐུག་བྱུང་བ་འམ། །ཟས་སྤྱོད་དབང་གིས་འདུ་བ་འཁྲུགས་གྱུར་པས། །ཆུ་སེར་ནག་
པོ་ལུས་ལ་རྒྱས་པ་ཡིན། །མཚན་ཉིད་ཤ་པགས་རུས་ཚིགས་རྩ་ཁྲག་དོན། །ཆུ་སེར་བསྲུལ་
བས་ལུས་ཀུན་མ་རུངས་བྱེད། །མི་བཟོད་གསོ་དཀའ་མཛེ་ཡི་ནད་དུ་བཤད། །དབྱེ་བ་གནས་
དང་རིགས་ཀྱིས་བཅོ་བརྒྱད་འགྱུར། །ཞུགས་ཚུལ་གནས་ཀྱིས་དབྱེ་ན་སྐྱི་པགས་རྩི། །མདོག་
སྟོབས་ཤ་ཚིལ་ཆུ་བ་རྩ་དང་ཁྲག །ཆུ་སེར་རུས་ཚིགས་ལྷ་བ་གླད་རྐང་ཁུ། །དོན་ལ་ཞུགས་
པས་དབྱེ་བ་བཅུ་དང་བརྒྱད། །རིགས་ཀྱིས་དབྱེ་བ་རྐྱང་པ་ལྡན་འདུས་བདུན། །ཐོད་འདྲ་
ཟླུམ་པོ་གླང་ཤུ་ཨུ་དུམ་ཝར། །རི་ཤའི་ལྕེ་དང་པགས་མཛེ་གཅིག་པུ་དང༌། །འབྲུམ་ཕྲན་ཤ་
བཀྲ་འབྲས་བྱེར་སེར་ག་དང༌། །ཤུ་བ་ཁ་བརྒྱ་པདྨ་དཀར་པོ་དང༌། །འབྲུམ་བུ་གཡན་པ་
པགས་པ་མྱགས་པ་དང༌། །འོལ་སེ་འདྲ་དང་སུམ་ཅུ་རྩ་དྲུག་གོ །བརྟག་ཐབས་དང་པོ་ནད་
ངོས་བཟུང་བ་དང༌། །གསོ་ཚེ་སྤང་བླང་མུ་བཞིར་བརྟག་པའོ། །ངོས་བཟུང་རྟགས་ལ་སྤྱི་དང་
བྱེ་བྲག་གཉིས། །སྤྱི་ལ་ཕྱི་ནང་གསང་བ་གསུམ་གྱིས་བརྟག །ཕྱི་ལ་མངོན་ཚུལ་རྨི་ལམ་
བརྟག་པ་དང༌། །མཚན་ཉིད་ལུས་ངག་ཡིད་ལ་བརྟག་པའོ། །རྨི་ལམ་ཆུ་དང་ཤིང་དང་ནིའུ་
གསིང་དང་། །སྦལ་ལྕོང་ཉ་སྦྲུལ་འབུ་སྦྲང་སྡིག་སྡོམ་སོགས། །ལུས་ལ་འབྱར་དང་གསེབ་ན་
འདུག་པ་དང༌། །གཡག་མཛོ་གཅན་གཟན་རྣམས་ཀྱིས་དེད་པ་དང༌། །མི་ཤོང་སྒོ་འཕྲང་
འཛུལ་དང་གཡང་ལ་ལྷུང༌། །ཉི་ནུབ་ས་སྲོས་སེར་བ་བབས་པ་དང༌། །མདའ་དང་སྒོ་ང་ལྷ་
ཁང་ལྡེར་སོ་འགུལ། །བུད་མེད་དག་གིས་ལུས་ཟུངས་འབྱིན་པ་རྨི། །ལྷས་ཚོར་དུས་ཏེ་གདོན་
གྱིས་འདེབས་པའི་རྟགས། །ལུས་ལ་བརྟག་པ་བཞིན་ལ་འགྱུར་ལྡོག་བྱེད། །བཀྲག་ཕྲོགས་པ་
25-1-368


འམ་ཡང་ན་སྐྱེས་པ་དང༌། །དོན་མེད་ཁྲག་སྐྱེ་སྣ་ཁྲག་འཛག་པ་དང༌། །པགས་པ་རེས་འགས་
རེས་རྩུབ་ཚ་འམ་གྲང༌། །གཡའ་ཞིང་ཕྲུག་འདོད་ཤུ་ཐོར་ཆུ་བུར་འོང༌། །འགུལ་འཕྲིག་ཕོ་
མཆིན་མི་བདེ་རུས་རྐང་ན། །གསང་ཚིགས་གནད་པའི་རྨ་རྣམས་ཡུན་རིང་གནས། །ངག་ལ་
བརྟག་པ་འགྱུར་ལྡོག་མང་བ་སྟེ། །ཡིད་ལ་བརྟག་པ་སྙིང་འཆུ་མི་དགའ་འཕྱོ། །ཁྲོ་ཚིག་འགྲོ་
འདོད་གོང་རྟགས་གསང་བར་ཐུབ། །རང་ཚོར་དུས་ཡིན་གདོན་གྱིས་ཐེབས་པར་ངེས། །ནང་
གི་བརྟག་པ་རྣམ་རྟོག་ཅི་འདྲ་ཡང༌། །བཞིན་ཉིད་མེ་ལོང་འདྲ་སྟེ་བཀྲུས་ལ་བརྟག །མེ་ཏོག་
ཡོད་སར་ཆུ་མི་འཆགས་པར་སྐམ། །སྐྱ་སྨུག་དམར་སོགས་ཤ་མདོག་འགྱུར་བ་ལ། །ཤ་
པགས་བཏེག་ནས་མཐེ་བོས་མནན་རྗེས་འོང༌། །སྣ་གོང་མཁུར་ཚོས་སྨིན་དབྲག་རྣམས་སུ་
མང༌། །མེ་ཏོག་སྐམས་ན་དུས་ལས་འདས་ཞེས་བྱ། །གསལ་བར་སྟོན་པ་དབང་པོ་མིག་ཡིན་
ཏེ། །མི་གནོད་པ་ཡི་(མིག་རྩ་དྭངས་མ་ནས་དམར་སིང་ངེ་བ། སྟེང་དུ་སྟོན་པ་དང་། མིག་མདངས་ལོག་པ། ཁྲག་འཁྲུག་ཏུ་
འོང་བའོ། །)རྩ་དང་གནོད་པའི་(དམར་ནག་གམ། སྨུག་ནག་གམ། གཏིང་དུ་བྱིང་བ་འམ། རྩེ་མོ་ལ་ཐིག་ལེ་ནག་པོ་སྐལ་
བ། རྩེ་མོ་རྒྱལ་མོ་ལ་ཁ་བལྟས་པ། མིག་མདངས་ཉམས་པར་འོང་)རྩ། །གདོན་(མདའ་འདྲ་ན་རྗེ་རིགས་ཡིན། བརླ་གཡོན་
ལ་འཛིན། གྲེ་མོ་གཡོན་ལ་ཤོར་རོ་འོང་། མདུང་འདྲ་ན་བྲམ་ཟེ་ཡིན། བྱིན་པ་པུས་མོ་གཡས་ལ་ཤ་རོ་འོང་། མགོ་བྱི་བ་འདྲ་ན་
དམངས་རིགས་ཡིན། པུས་མོ་གཡོན་ལ་ཤ་རོ་འོང་)རིགས་འཇུག་(གང་ལ་ཡང་རྟ་མགོ་འདྲ་ན་རེ་འདོད་ཡིན། ཐང་ཤིང་
འགྱེལ་བ་འདྲ་ན་དོ་རྡོ་བ་ཡིན་)ཚུལ་ལུས་ཀྱི་ཞུགས་(རྩ་སྟོད་ལ་ཞུགས་པ་དང་། སྨད་ལ་ཞུགས་པ། མདུན་རྒྱབ་ལ་འོང་། 
ཕྱི་ཤ་པགས་དང་རྒྱབ་ལ་འོང་། གཡས་གཡོན་དེས་ཤེས་)ས་དང༌། །ཐུབ་(རྩའི་རྩེ་མོ་བར་མཚོ་ལས་སླེབ་ཅིང་གྲང་ཉུང་བ་
བླ། ཐ་མ་རྩ་བ་ཆད་པ། རྩེ་མོ་གུག་པ། ནད་གཞི་བྱང་བ་ཐུབ་པ་ཡིན་ནོ།།)དང་མི་(རྩའི་རྩེ་མོ་རྒྱལ་མོ་ལ་སླེབ་པ། རྒྱལ་མོའི་
མདངས་ཉམས་པ་མི་ཐུབ་བོ།།)ཐུབ་ལོ་(དཀར་ནག་འཚམས་ན་ཆུ་རིས་ཡོད་གདོན་རྩས་བུག་པ་ཁྲམ་དུ་ཡོད་པ་ལོ་གྲངས་
བརྩི་ཕྱི་མཚོའི་ཚིགས་ལ་ལོ་གྲངས་བརྩི་)གྲངས་བརྟག་པར་བྱ། །གསང་བ་སྨན་གྱི་སྒོ་ནས་བརྟག་པ་སྟེ། །
མུ་ཟི་གུ་གུལ་ཤུ་དག་གླ་རྩི་བཞི། །(སོས་ཀའི་)སྲུབ་ཀ་ལོ་མར་མཉམ་ལ་རས་སུ་ཕུར། །(ནད་པ་
25-1-369


རང་གི་)དྲི་ཆུར་སྦངས་ལ་ཞག་གསུམ་སྐོམ་དུ་བཏང༌(ཡང་ན་ཁྱི་ལྕེའི་ཕྱེ་མ་ཐུར་མགོ་གསུམ་བཏབ་ལ་སྐོམ་ཡོག་
ཚད་བཏུང་། དེའི་དྲི་ཆུ་བསགས་ལ་ཞག་གསུམ་ཁོར་མར་བཏུང་ཞིང་སྐོམ་གཞན་སྤངས་པར་བྱའོ)། །དྲི་ཆུ་ཁྲག་དང་ཆུ་
སེར་སྣ་ཚོགས་དང༌། །རང་གི་མདོག་ལས་གནོད་དང་མི་གནོད་བརྟག །བྱེ་བྲག་བརྟག་པ་
དུག་དང་གདོན་རིགས་དང༌། །ཞུགས་ཚུལ་བབས་ས་ཉེས་པའི་རིགས་ཀྱིས་བརྟག །དང་པོ་
དུག་གི་སྒོ་ནས་བརྟག་པ་ནི། །ལྕི་(རང་གི་ལུས་དང་ཤེས་པ་ལྕི། གཉིད་ཆེ། བེམ་པོ་དང་ཤ་རོ་ཡོང་)འཐིབས་ས་
དུག་ཡང་(སྦྲིད་པ་བེར་བ། འདར་བ་དང་འཁྲིག་པ་འོང་)ཞིང་གཡོ་བ་རླུང༌། །ཚ་(ཚ་སྐྲངས། ཚ་བེར། ཚ་ཙག ཚ་མྱག་
འོང་བའོ།།)སྲེག་མེ་དུག་གྲང་(གྲང་ཞུམ་དང་། ཆུ་ཐིགས་ལ་ཆར་པ་ཕོག་པ་འདྲ་བ་འོང་)ཞིང་བསིལ་བ་ཆུ། །
གདོན་རིགས་དབྱེ་བ་རྩ་བ་ཡན་ལག་གཉིས། །ཡན་ལག་ཐེ་བྲང་འགོང་པོ་སྐྱི་(མགོ་ལ་ཀློག་པ་
འོང་། གདོང་ལ་འཁྱེ་མ་འོང་། བ་སྤུ་རྩེ། གཡའ་ལ་གྲང་སིལ་བྱེད། སྐྱི་རོ་དང་ཐོར་ཕྲན་འོང་། )ལ་འབབ། །དམ་(ཀོར་ལེར་
ན། འགུལ། འཁྲིག བེམ་པོར་བྱེད་ན་ཤ་རོ་འོང་)སྲི་པགས་པ་ས་བདག་ཤ་ལ་འཛིན། །གཉན་རྩ་བ་(རྩ་ཀུན་
འཁྱུག ཁྲག་སྐྱེ། མིག་སླེ། ཟ་འཕྲུག་བྱེད་)སྤུ་རིགས་དྲུག་ཆུ་(རུས་ཚིགས་ཁོལ། སེན་མོའི་བཀྲག་ཉམས། རྐང་ལག་
འཁུམས་)རྒྱུས་འཛིན། །རྩ་གདོན་རྒྱལ་(སྤྱི་བོའི་གཙུག་ཏུ་ཤ་རོ་འོང་། སྙིང་ལ་བབས་དཀར་ལ་སེར། རྒྱལ་པོ་འམ་
སྲོག་ཆགས་དཀར་པོ་རྨི་བའོ།།)རིགས་ཡིད་དུག་གཙུག་ནས་འཇུག །རྗེ་རིགས་(མེ་ཡི་དུག་མཆིན་པར་བབས། 
རྒྱན་དང་སྲོག་ཆགས་དམར་པོ་རྨི་བའོ།།)མཐོང་བའི་དུག་སྟེ་རྩ་ནས་འཇུག །བྲམ་(ཆུའི་དུག་མཁལ་མར་བབས། 
རྒྱན་དང་སྲོག་ཆགས་སེར་པོ་རྨི་བའོ།།)ཟེ་ཁ་རླངས་དུག་སྟེ་ལག་པ་གཡོན། །དམངས་(རླུང་གི་དུག་ལུས་ལ་
གཉེར་ཆུང་འོང་། ཡན་ལག་བྱི་གཞུག་ན་སྐད་འཛེར། རྒྱན་དང་སྲོག་ཆགས་སྔོན་པོ་རྨི་བའོ།།)རིགས་རེག་དུག་རྐང་པ་
གཡས་ནས་འཇུག །གདོལ་(འདུས་པའི་དུག་མཆེར་པ་ལ་འབབ། གློ་སྙིང་མི་བདེ། རྒྱན་དང་སྲོག་ཆགས་ནག་པོ་
རྨིའོ།།)པ་མཆེ་བའི་དུག་ཅན་རྐང་པ་གཡོན། །མཇུག་ཏུ་ཀླུ་ཡི་རྒྱལ་པོ་དོན་ལ་(ཤེད་འཆོར། སྙིང་མི་
དགའ། སྣ་ཞིག མིག་ཞུ།)འབབ། །འཇུག་ཚུལ་རྣམ་པ་ལྔ་ཡི་སྒོ་ནས་འཇུག །ཀུ་རེ་(ཤེས་བྱ་ཟིན་པའི་
རྟགས་ཀུན་ཡོང་། བྱམས་པ་སྒོམ་)ཀྱལ་ཀའི་ཚུལ་དུ་ཞུགས་པ་དང༌། །ལོངས་(གློ་བུར་དུ་ཁ་ལོ་མིག་སླེ། འགུལ་
25-1-370


བ་འཁྲིག་པ་མང་། དེ་ལ་ལས་བྱིན་)སྤྱོད་རེ་འདོད་ཚུལ་གྱིས་ཞུགས་པ་དང༌། །མི་གཙང་(གློ་བུར་དུ་འོང་། 
ཁྲུས་དང་བྱད་འགྲོལ་བྱ་)མནོལ་གྱི་སྒོ་ནས་ཞུགས་པ་དང༌། །དོ་(བསྣད་ཆེ་ས་རྣམས་སུ་འོང་སྔགས་དང་སྨན་
བྱའོ།།)སྡོ་བསད་པའི་སེམས་ཀྱིས་ཞུགས་པ་དང༌། །ལས་(ཡང་བའི་རྟགས་རྣམས་འོང་ངོ་།།)ཀྱི་རྣམ་སྨིན་
ཚུལ་དུ་ཞུགས་པར་བརྟག །བབས་ས་གནས་ཀྱི་སྒོ་ནས་བརྟག་པ་ནི། །སྐྱི་(འཁྱེམ་གླང་ཤུ་ཀྱི་བྱེར་ཀྱི་
རོ་འོང་། བ་སྤུ་)དང་པགས་(པགས་པ་ལ་གླང་ཤུ་འོང་)པ་རྩ་(ལ་གླང་ཤུ་འོང་)དང་མདོག་(པགས་པ་བྱད་མདངས་
ཉམས་སོ།།)ལ་ཞུགས། །སྟོབས་(ཤེད་མེད་སྒྱིད་པ་སྐྱུར་)དང་ཤ་(འགུལ་འཁྲིག །བེམ། ཤ་རོ་འོང་)ཚིལ་(ལུས་རིད། 
ཡན་ལག་འཁྲུལ་)ཆུ་(གྱོང་ཞིང་ན་)བ་རྩ་(སྦྲིད་ལུམས་བྱེད་འཕར་དང་འཁྱུག)དང་ཁྲག (གདོང་པ་དམར་སྣ་ཁྲག་འཛག་
ལུས་ལྗི)། །ཆུ་སེར་(ཟ་འཕྲུག་བྱེད། ཆུ་སྒང་དང་ཉ་སྒང་འོང་)རུས་(གྲུམ་ཐབས་སུ་ན། འཕྲུལ་ཤ་སྐམ་ཐིག་ལེར་ན། སྣ་ཞོམ་
)ཚིགས་ལྷ་(གདོང་པ་ཚ་ལུས་གྲང་སིལ་བྱེད།)བ་གླད་(མགོ་འཐོམ་སྐྲ་བྱི་)པར་ཞུགས། །རྐང་(སྐད་འགགས། ཡན་
ལག་ཞིག་མིག་དམར།)དང་ཁུ་(སྐམ་སམ་ལུག དབང་པོ་མི་ལྡང་)བ་དོན་ལ་ཞུགས་པར་བརྟག །དོན་ནི་སྙིང་
(ཡམ་ཡམ་འོང་། ལྕེ་ལ་ཐོར་བ་འོང་། ལྕེ་བཙོད་མདོག་ཏུ་འགྲོ་)དང་གློ་(རོ་སྟོད་ལྕི། སྣ་འགགས། སྐད་འཛེར་སྣ་ཆུ་སྐྱ་བོ་འོང་)
བ་མཆིན་(གཉིད་ཆེ། ཤེས་པ་འཐིབས། འཆལ་མ་སྣ་ཁྲག་མང་མིག་འགུལ་དམར་ལ་སླ་)པ་དང༌། །མཆེར་(ཚུལ་བད་
ཀན་ཆགས། ལྕེ་སྔོ་ཁྲ་འོང་། གདོང་པ་གྲེ་བར་འོང་)པ་མཁལ་(རྣ་བ་འོན། མཁལ་སྐྱེད་དང་སྒང་བ་འབྲས་བུར་སྐྲངས་)མར་
ཞུགས་པ་བརྟག་པར་བྱ། །མདོར་བསྡུས་བཅུ་(ལུས་གནད་སྤྱི་བོ། ངག་གནད་མགྲིན་པ། སེམས་གནད་སྙིང་ག
སྙིང་གནད་ལྕེ། གློ་གནད་སྣ། མཆིན་གནད་མིག མཆེ་གནད་མཆུ། མཁལ་གནད་རྣ་བ་ཡན་ལག་གི་གནད་ཚིགས། ཚིལ་གནད་
དྲེག་བཞི། རུས་གནད་སོ། ཤ་གནད་མཐེ་བོང་། ཆུ་རྒྱུས་གནད་མཚན་མ་)གསུམ་གནད་ལ་ངོ་ཡིས་བཟུང༌། །ཉེས་
པའི་སྒོ་ནས་མཛེ་རིགས་བཅོ་བརྒྱད་བརྟག །རླུང་(མདོག་སྐྱ། པགས་པ་རྩུབ། ཤ་སྐམ། ཁ་ཡོ། མིག་སླེ། མིག་
ཆུ་འཛག ཡན་ལག་འཆད་དོ་)མཛེ་ཐོད་འདྲ་མཁྲིས་(མདོག་སྣུམ་ལ་རྣག་ཁྲག་འཛག་སྨིན་མ་བྱི་)མཛེ་ཨུ་དུམ་ཝར། །
བད་(ལུས་ལྕི་ཀོར་ཀོར་པོར་འདབས་འབྲེལ་འཇམ་ལ་དཀར་)ཀན་ལས་གྱུར་ཟླུམ་པོ་གླང་(ཟ་གཡའ་པགས་པ་ལ་
འབྲུམ་ཕྲན་བྱུང་། ཆུ་སེར་འཛག)ཤུ་གཉིས། །རླུང་དང་མཁྲིས་པར་(མཐའ་ལས་དབུས་མཐོ་ཚ་ལ་ནག་)ལྡན་པ་
25-1-371


རི་ཤའི་ལྕེ། །བད་རླུང་(པགས་པ་འཐུག རྒྱ་ཆེ། རྟ་པགས་འདྲའོ།།)ལས་གྱུར་པགས་མཛེ་གཅིག་པུ་དང༌། །
འབྲུམ་(རྩུབ་ལ་གཡའ་བ་འབྱུང་)ཕྲན་ཤ་(སྐྱིལ་རྩུབ་མཐའ་འཇམ་ལ་རློན་)བཀྲ་འབྲས་(སྨེན་བུ་དཀར་པོ་གཡའ་
བས་ཁྱབ་)བྱེར་སེར་(རྐང་མཐིལ་འགས་)ག་དྲུག །བད་མཁྲིས་ལས་གྱུར་ཤུ་བ་(ཤུ་བ་མང་པོ་འོང་། དམར་ལ་
སྨུག་པ་མང་པོ་འགས་)རྨ་ཁ་བརྒྱད། །པད་(དབུས་དཀར་མཐའ་རྩ་རིས་མང་ངོ་)དཀར་འབྲུམ་(པགས་པ་སྲབ། 
འབྲུམ་པ་དཀར་དམར་ཁྱབ་)བུ་གཡན་(གྲེ་མོ་སོར་མོ་ཚང་ར་ལ་འབྲུམ་པ་མང་དུ་འབྱུང་)པ་པགས་(ཐོར་པ་དམར་པོ་ཚ་
འདྲུལ་)མྱགས་དྲུག །འདུས་(འབྲུམ་པ་སྟོད་དམར་སྨད་ནག་ལ་འབུར་)པ་ལས་གྱུར་འོལ་མ་སེ་འདྲའོ། །
ནད་འདི་འོག་ནས་རྐུན་བུར་འཇུག་པའི་ཕྱིར། །མི་གསལ་འཁྲུལ་སོ་མང་བས་བརྟག་པ་
གཅེས། །ཕྱི་ནང་གསང་རྟགས་གསུམ་གྱིས་གཏན་ལ་ཕོབ། །ཉྭ་རྩ་(ཡོད་པ་སྙིང་རྩ་ཡོད་སར་)རླུང་
(ལུས་ཁྱབ་པར་རྟགས་གཞན་འོང་)གདོན་འཕྲིག་པར་ནོ་ར་རེ། །ཤ་(ཤུ་བར་འགྲོ། སྤྲུལ་པ་ཡིན་)འབུར་སྲིན་
(གནག་ཏུ་འགྲོ་སྔགས་དང་སྨན་གྱི་ནུས་པ་ཡིན་)འབུར་གཏིང་(རུས་པ་ལ་འབྱར་བསྐྱེད་ན་གསལ། ནད་རྒྱས་པ་ཡིན་)
འབུར་ནོ་ར་རེ། །ཤ་(ཉོལ་ཉོལ་འོང་ཁ་རླངས་ཡིན་)སྒང་ཉྭ་(ཁ་དོག་དམར་ལ་ན་ཚ་མེད་པ་སྤྲུལ་པ་ཡིན་)སྒང་ཆུ་(ཆུ་
བུར་མེ་ཏོག་ཡིན་)སྒང་ནོ་ར་རེ། །ཤ་(རོ་ལོ་ཅིག་)པགས་སྐྱི་(པགས་ལོ་གཉིས་)དང་རུས་(རོ་གཏིང་ནས་སྐྱེ་བ་ལོ་
བཞི་)རོ་ནོ་ར་རེ། །ཁ་(གློ་བུར་དུ་འབྱུང་བ་བླ་ཁད་ཀྱི་འབྱུང་བ་དཀའ་)ཡོ་མིག་(བསོ་བ་དཀའ་)སླེ་སྐ་སླ་ནོ་ར་རེ། །
ནད་(ཡེང་མེད་དུ་ན་)དང་ཁམས་(ཡེང་ན་མི་ན་)འདུས་གདོན་(སྙིང་མི་དགའ་)གསུམ་ནོ་ར་རེ། །ཀྱལ་
(རེས་འོང་རེས་མི་འོང་ཟིན་མེད་ཚོར་བ་ལྟར་བྱས་ན་ཐུ་རུ་འགྲོ་)ག་རེ་འདོད་(གློ་བུར་དུ་འོང་ཡས་བྱིན་)རྣམ་སྨིན་དོ་སྡོ་
(འབྲས་བུ་སྨིན་པའི་རྟགས་འོང་། སེམས་བསྐྱེད་བསྒོམས། སྔགས་དང་བསྲུང་བ་ལ་འབད་གནད་དུ་ཟིན་ལ་འབྲས་བུ་མ་སྨིན་
པའོ།།)བ། །འདི་དག་འཕྲང་ལ་མ་ཤོར་ངོས་བཟུང་གཅེས། །ཟས་སྐོམ་སྤྱོད་ལམ་གནས་མལ་
གོས་ལ་སོགས། །དྲི་དང་རེག་པས་འགོས་ཕྱིར་བསྲུང་བ་གཅེས། །གཉིས་པ་སྤང་བླང་མུ་
བཞིར་བརྟག་པ་ནི། །མཁར་(སྤྱི་གཙུག སྨིན་སྲག སྣ་རྩེ། ཡ་སྐན། མགྲིན་པ། སྙིང་ག ལྟེ་བ། མཚན་མར་ཤ་རོ་འོང་)
བརྒྱད་རྩེ་ནས་བཅོམ་པ་དང༌། །སྙིང་པོ་(མཐེ་བོང་བཞི་ལ་ཤ་རོ་འོང་)བཞི་ལ་ཞུགས་པ་དང༌། །རྩེ་མོ་
25-1-372


(སྣ་རྩེ། ལྕེ་རྩེ། མཚན་མར་ཤ་རོ་འོང་)གསུམ་ལ་ཟིན་པ་དང༌། །ཚིགས་(དཔུང་བ་གྲེ་མོ་སྙན་གོང་ཤ་རོ་འོང་)ཆེན་
མཁར་ནས་ཕབ་པ་དང༌། །དུག་(ས་ཆུ་མེ་རླུང་བཞི། ས་མེ་གཉིས་བསོ་བ་ཙམ། མེ་རླུང་དཀའ། ཆུ་རླུང་སླའོ།།)བཞི་
ལུས་ལ་རྒྱས་པ་དང༌། །མདངས་(མིག་མདངས་ཉམས་ཏེ་གཟི་འདྲ། བྱད་མདངས་ཉམས་ཏེ་གློ་བ་འདྲ། སོ་མདངས་
ཉམས་ཏེ་དུང་འདྲ་)གསུམ་ཡལ་དང་སྤུ་(སྐྲ་དང་། སྨིན་མ། སྨ་ར་)གསུམ་བྱི། །ཆུ་(ཁ་ཆུ། སྣ་ཆུ། མིག་ཆུ་)གསུམ་
བོ་དང་རྒྱ་མཚོ་(མིག་གི་མ་སྦེབས་རྟག་ཏུ་སློན་)རླབས། །གློ་(སྣ་འཕྲང་ཞིག་ནས་སྙི་འདེ་ལ་སོང་བ་)སྙིང་(ལྕེ་བཙོད་
འདྲ་བ་དང་ནག་པོར་སོང་བ་དང་འབྲུམ་པ་གཟེར་འདྲ་བ་འབྱུང་པ་)མཆིན་(མིག་ཞུ་ནས་སྔོ་གླེང་སོང་བ་དང་དམར་ལོག་སོང་
བ་)མཆེར་(ཆུས་མེ་མི་ཕེར་རོ་)མཁལ་(ཁུ་བ་སྐྱོ་མར་ལུག་པའོ།།)མར་རྒྱས། །མཐིལ་(ཁ་སྤྲད་ནས་སྡད་པའི་བར་དུ་
རྔུལ་མེད་ན་ཤ་རོ་ཡོད་པ་ཡིན་)བཞིའི་རླངས་པ་ཡལ་བ་དང༌། །ས་བདག་(ཤ་རོ་རུས་པར་སླེབ་པ། རྨ་ཁྲོན་པ་ལྟ་
བུ་གཏིང་རིང་བ་རུས་ཐོག་ནས་ཐོར་སྨྱོན་གཟེར་བཏབ་པ་འདྲ་བ་དང་། ཤ་རོ་ཁྲག་རོ་མེད། ཆུ་སྦུར་ཤ་རོ་ཅན་ནོ།།)རྨེ་བ་
ཆགས་པ་རྣམས། །གསོ་རུ་མི་རུང་སྤང་བར་བྱ། །དེ་འདྲེས་(དཀའ་སླ་)པ་ནི་གསོ་བ་ཙམ། །རྒྱལ་
པོའི་ཕོ་བྲང་(མི་བདེ་ས་གཟུང་ནས་སྡོད་པ་)བཏབ་པ་ལ༌། འབྲས་བུ་སྨིན་པའི་རྟགས་(ས་བདག་རྨེ་བ་ཆགས་
པའི་)མེད་ན། །དེ་ནི་གསོ་བ་དཀའ་བ་ཡིན། །དམངས་ནི་གྲོང་ཁ་ཡན་པ་ལ། །རྟོག་པ་སྣ་
ཚོགས་གྲངས་མང་ཡང༌། །(མི་གསོས་པ་རྣམས་ལས་)གོང་ལས་བཟློག་པ་གསོ་བ་བླ། །ལྔ་པ་བཅོས་
པའི་ཐབས་ལ་རྣམ་པ་གསུམ། །གནོད་པ་བསྲུང་ཞིང་ཞུགས་པ་དབྱུང་བ་དང༌། །ཐ་མ་ལུམས་
པའི་དུས་སུ་ཚེ་བསྲིང་བའོ། །དང་པོ་གནོད་པའི་དུས་སུ་བསྲུང་བ་ནི། །མ་རུངས་གདུག་པ་
འདུལ་མཛད་འགྲོ་བའི་མགོན། །མཐུ་སྟོབས་བདག་པོ་ཕྱག་ན་རྡོ་རྗེ་ཡི། །སྙིང་པོ་བཟླས་པས་
ཀླུ་ཡི་དུག་རྣམས་སེལ། །ས་རྡོ་མཱུ་ལ་བདུད་རྩིའི་བཅུད་ལེན་གྱིས། །ཆུ་སེར་མི་སྐྱེ་གདོན་
རྣམས་ཐུབ་པར་འགྱུར། །བར་དུ་ཞུགས་པའི་དུས་སུ་དབྱུང་བ་ནི། །སྔོན་འགྲོ་རྒྱུ་རྐྱེན་ཆུ་སེར་
སྦྱང་བ་དང༌། །དངོས་གཞི་གདུག་པའི་དུག་ནད་གཞོམ་པ་དང༌། །རྗེས་གཅོད་ཀོ་ལེ་ནད་ཀྱི་
གདོན་ཐབས་དང༌། །གང་དགོས་རྟེན་འབྲེལ་མདངས་སྟོབས་གདབ་པ་དང༌། །ནད་ཐོན་མ་
25-1-373


ཐོན་བཏང་རན་བཟུང་ཚད་བསྟན། །དང་པོ་ནད་ཀྱི་རྒྱུ་དང་གདོན་གྱི་རྐྱེན། །ཆུ་སེར་ལྟོ་དང་
རྩ་ནས་སྦྱང་པ་ནི། །ཁྲུས་དང་སྐུ་མཉེ་སྔོན་འགྲོ་སྤྱི་དང་འདྲ། །བ་ཆུར་དུར་བྱིད་ལྕུམ་རྩ་འབྲས་
བུ་གསུམ། །སྔོན་བུ་བསྡུས་ཁུར་ཆུ་སེར་སྨན་གསུམ་དང༌། །གུ་གུལ་བྱི་ཏང་ག་བཏབ་རྒྱུན་
སྦྱོངས་བྱ། །ཡང་ན་འབྲས་བུ་གསུམ་དང་ཚ་བ་ལྔ། །དུར་བྱིད་དནྡ་དོང་ག་བྱ་ཀྲ་དང༌། །ཧོང་
ལེན་ཤུ་དག་བོང་ང་ཙི་ཏྲ་ཀ །པ་ཏྲ་ཤྲཱི་ཁཎྜ་བཏགས་ལྡེ་གུ། །མར་དུ་བསྐོལ་ལ་ལྟོ་སྲའི་བཀྲུ་
སྨན་སྦྱར། །དེ་རྗེས་རྩ་ནས་སྦྱང་བ་སྤྱི་སྨན་ལ། །ཆུ་སེར་སྨན་གསུམ་གུ་གུལ་གླ་རྩི་ལྔ། །གདོན་
དང་ཆུ་སེར་སྦྱང་ཕྱིར་མདེ་ཁ་བསྒྱུར། །གློ་(སྦལ་རྒྱབ་ཅུ་གང་)སྙིང་(གངས་ཐིགས་ཛཱ་ཏི་)མཆིན་(མོན་ཅ་ར་
གུར་གུམ་)མཆེར་(ཀ་ཀོ་ལ་པ་ཏོལ་)མཁལ་(གསེར་གྱི་བྱེ་མ་སུག་སྨེལ་)མ་ཤ་(མོན་ལྕམ་སེང་ལྡེང་རུ་ཏ་)རུས་(སེང་
ལྡེང་རུ་ཏ་)རྩ(འབྲི་ཏ་ས་འཛིན)། །གང་བབས་ནད་སྟེང་ཁྲིད་པའི་ནང་ཡན་(གང་དགོས་)སྦྱར། །བཏང་
ཐབས་ལྕག་དང་ལོག་གནོན་རྗེས་གཅོད་རྣམས། །སྦྱོང་བྱེད་ལས་ལྔའི་མདོ་རུ་ཤེས་པར་བྱ། །
ར་བ་བཞི་ལ་(རྩ་ལྟོ་སྐྱེད་)ལན་རེ་སྦྱང་བ་གཅེས། །རྒྱུ་རྐྱེན་མེད་ན་འབྲས་བུ་ག་ལ་འབྱིན། །
གཉིས་པ་གདུག་པའི་དུག་ནད་གཞོམ་པ་ལ། །ཟས་དང་སྤྱོད་ལམ་སྨན་དཔྱད་རྣམ་པ་བཞི། 
ཁ་ཟས་དཀར་དང་མངར་གྱི་རྣམ་པ་དང༌། །རུལ་སྐྱུར་ཚྭ་དང་སྔོ་ཚོད་འཇིག་ཟས་སྤང༌། །འབྲུ་
རྙིང་གསར་ཤ་སྐམ་ཡིབ་ཕྱེ་ཐུག་དང༌། །ཚབ་ཚ་སིངས་པོ་བརྡ་བྲོ་ཆུ་གྲང་བསྟེན། །སྤྱོད་ལམ་
ཆགས་པ་དྲག་ཤུལ་ཉིན་མོའི་གཉིད། །མི་གཙང་གཉན་པའི་ཐུབ་ཆོད་ཀུན་ལ་འཛེམ། །སྨན་
སྦྱོར་ཐང་ཕྱེ་རིལ་བུ་ལྡེ་གུ་དང༌། །སྨན་མར་ལྔ་ལས་དང་པོ་ཐང་སྦྱོར་ནི། །སེང་ལྡེང་ནིམ་པ་སླེ་
ཏྲེས་པ་ཏོ་ལ། །བྱི་ཚེར་ལྔ་ཡིས་ཆུ་སེར་རང་སར་སྐེམ། །སེང་ལྡེང་ཆིག་ཐང་མཛེ་ནད་འཇོམས་
པའི་མཆོག །ཕྱེ་མ་ཅོང་ཞི་སྦལ་རྒྱབ་ཆིག་ཐུབ་གཉིས། །བེ་སྣབས་གྲུ་བཞི་རྡོ་རྒྱུས་མཉྫི་ར། །
གསེར་དངུལ་ཟངས་ལྕགས་རྡོ་དང་ཚ་ལ་མཚལ། །བཟང་དྲུག་ཆུ་སེར་སྨན་གསུམ་འབྲས་བུ་
གསུམ། །གུ་གུལ་གླ་རྩི་མུ་ཟི་ཙི་ཏྲ་ཀ །གསེར་གྱི་མེ་ཏོག་མ་ནུ་རུ་རྟ་དང༌། །སེང་ལྡེང་ཀ་ར་
25-1-374


སྦྱར་བས་ཆུ་སེར་སྐེམ། །ཀྱི་ལྕེ་མིང་ཅན་སེར་ནག་བྲག་སྤོས་པ། །གླ་རྩི་གུ་གུལ་རུ་རྟ་སེང་
ལྡེང་དང༌། །སྤོས་དཀར་ཀ་ར་སྦྱར་བ་དྲི་ཆུས་དབུལ། །གྲང་ཤས་ཆེ་ན་ཨ་རུ་བཙན་དུག་
བསྣན། །ཀླུ་གཉན་ས་བདག་དུག་ནད་འཇོམས་པའི་མཆོག །རིལ་བུའི་སྦྱོར་སྡེ་བྱ་ཁྱུང་རིན་
པོ་ཆེ། །དང་པོ་བྱ་ཁྱུང་རྣམ་ལྔ་སྦྱར་བ་ནི། །ཤ་རུས་རྒྱུས་པ་སྙིང་ཁྲག་བྱ་ཁྱུང་ལྔ། །བཞི་གཅིག་
སུམ་གཉིས་ཕྱེད་དང་སུམ་ཆ་སྦྱར། །ཨ་རུ་བཙན་དུག་རིམ་པས་ཞིབ་པར་བཏགས། །དེ་ནས་
བསྲེས་ལ་སྐམ་འཐགས་འཐེམས་པར་བྱ། །ལོ་བརྒྱད་བདུད་རྩིས་ཆུ་ཐགས་ཉིན་གསུམ་བྱ། །
བྱང་བའི་ཚད་ནི་གནག་ལ་འཚེར་བར་འོང་། །གླ་རྩི་རིལ་བུ་བྱེད་ཀར་ཆུར་སྦྱངས་བཏང༌། །
གི་ཝཾ་ནག་པོ་ཚན་དེ་ཚ་གྲང་བསྒྱུར། །གུ་གུལ་ནག་པོ་གདོན་གྱི་གཉེན་པོར་གཅེས། །འབྲུ་
ལྔས་དབང་(བདག་ཉིད་ཡི་དམ་དུ་བསྒོམ་པའི་སྟེང་། པདྨ་དམར་པོ་འབད་མ་བཞི་པ་ཁ་ཐུར་དུ་ཕུབ་པའི་སྟེང་དུ་ༀ་ཨཿཧྲིཿཁ་
ཧཱུཾ་ལྔ་དབུས་ནས་གཡོན་སྐོར་དུ། ཁ་དོག་དཀར་པོ་ཁ་འཐུར་དུ་བསྟན་ནས་འཁྲིལ་ལེ་གནས་པར་བསམ། འབྲུ་ལྔ་བརྒྱ་རྩ་བརྒྱད་
བཟླས་པས་ཡི་གེ་བདུད་རྩིར་ཞུ་ནས། སྐན་ནས་ལྕེ་སྟེངས་སུ་བབས་ནས་སྨན་ལ་བཏབས་པས་བདུད་རྩིར་གྱུར་པར་བསམ། ཟ་
ཙ་ན་གོང་བཞིན་བསམ་ནས་གྲེ་བར་མིད་པས། བདུད་རྩིར་སོང་ནས་ནད་གདོན་བསོས་ཤིང་དག་པར་བསམ་མོ།།)བསྐུར་
ཏིང་འཛིན་ལྡན་པས་བཟའ། །ཚེས་བཅུའི་བར་དུ་རེ་རེ་ཉི་ཤུ་གཉིས། །སུམ་ཅུ་གསུམ་གསུམ་
ནུབ་མོ་སུམ་ཡར་བཏང་། །ཞུགས་པའི་དུས་ནས་ལོ་རུ་བསྟེན་པར་བྱ། །དེ་ལ་བདེ་སྐྱེད་མེད་
ན་ཤ་གཉིས་ཕྲི། །ལོ་དུས་བསྟེན་པས་མཛེ་རིགས་བཅོ་བརྒྱད་སེལ། །ཀླུ་ཡི་དུག་ནད་མ་ལུས་
གཏན་ནས་འཇོམས། །རིན་ཆེན་སྦྱོར་བ་དངུལ་ཆུ་དུག་ཕྲལ་དང༌། །མུ་ཟི་སེང་ལྡེང་ཁཎྜ་
བཟང་པོ་དྲུག །ཆུ་སེར་སྨན་གསུམ་གུ་གུལ་བྱ་ཁྱུང་སྦྱར། །ཀླུ་ཡི་གདོན་འཇོམས་ཆུ་སེར་རྩད་
ནས་སྐེམ། །ཁྱད་པར་དངུལ་ཆུ་སྟར་བུ་མུ་མེན་གསེར། །སྒྲོན་ཤིང་དེ་བ་དཱ་རུ་ཨ་རུ་ར། །གུ་
གུལ་དཀར་ནག་གླ་རྩི་སོ་མ་ར། །ཐལ་ཀ་རྡོ་རྗེ་དག་དང་བཟང་པོ་དྲུག །ཙན་དན་དཀར་པོ་
གི་ཝཾ་དྲི་ཆེན་རྣམས། །རིལ་བུ་གཅིག་གཉིས་གསུམ་དུ་བསྐྱེད་ལ་བཏང༌། །འདི་ཡིས་ལས་ཀྱི་
25-1-375


རྣམ་སྨིན་ཡིན་སྲིད་ཀྱང༌། །ཚེ་འདིའི་མཛེ་ནད་ངེས་པར་ཤོལ་ཐེབས་འགྱུར། །བཏང་ཐབས་
ལོག་གནོན་རིན་ཆེན་སྦྱར་སྡེ་ལྟོས། །ལྡེ་གུའི་སྦྱོར་བ་ལྕགས་ཕྱེ་ཙི་ཏྲ་ཀ །སྐྱུ་རུ་བྱི་ཏང་ག་དང་
པི་པི་ལིང༌། །སྦྲང་སྦྱར་ལྡེ་གུས་མཛེ་ནད་རྒྱས་པ་འཇོམས། །སེང་ལྡེང་ལྕ་བ་ར་མཉེ་ཆ་མཉམ་
པའི། །ཁཎྜ་སྦྲང་སྦྱར་བཟང་དྲུག་བྱི་ཏང་ག །ཆུ་སེར་སྨན་གསུམ་དྲོད་སྨན་ཙི་ཏྲ་ཀ །ཁ་ཚར་
བཏབ་པའི་ལྡེ་གུས་མཛེ་ནད་འཇོམས། །མུ་ཟི་ཨ་རུ་སྦྲང་སྦྱར་ཆ་མཉམ་སྟེ། །ལྕགས་གཡའ་
བསྒོས་པའི་ལྡེ་གུས་མཛེ་ནད་འཇོམས། །སྨན་མར་སེང་ལྡེང་ཏིག་ཏ་ཆེ་འབྲིང་སྦྲང༌། །བཟང་
དྲུག་ཆུ་སེར་སྨན་གསུམ་ཁ་ཚར་བཏབ། །ཆུ་སེར་སྐེམ་ཞིང་ལུས་སྟོབས་རྒྱས་པར་བྱེད། །
དཔྱད་དུ་གང་ཞུགས་རྩ་གཏར་རླངས་པ་དབྱུང༌། །ཁྱད་པར་དཔྲལ་རྩ་ཆུ་སེར་གདོང་རྩ་
གཏར། །གསུམ་པ་ཀོ་ལེ་ནད་ཀྱི་གདོན་ཐབས་ནི། །གདོང་ལ་ལུད་ན་བྱང་པ་རྒྱ་ཚྭ་དང་། །
དུར་བྱིད་སྲུབ་ཀ་སྤྲུ་མ་གཟེ་མ་དང༌། །ཅུ་གང་ཆང་དང་སྦྱར་བ་དྲོད་ཕབ་མནན། །ལངས་
ནས་བྱུགས་པས་གདོང་བཤལ་ཆུ་སེར་འདོན། །ཐག་ཆོད་ལུག་སུག་ཐལ་བ་མར་དཀར་བྱུག །
ཀོ་ལེར་སྦྲིད་བེམ་བཙགས་ལ་རྔབས་རྭས་དྲང༌། །ཡང་ན་དྲི་ཆུས་བཀྲུས་ལ་བྱང་པ་དང་། །
དུར་བྱིད་རྒྱ་ཚྭ་སྔོ་ཡི་ཚ་བ་གསུམ། །གོང་ལྟར་མནན་ལ་བྱུགས་ཏེ་ཉི་མས་བསྲེག །ཡང་ན་
སྔགས་ཀྱིས་(རང་བྱ་ཁྱུང་ལྕགས་ཀྱི་མཆེ་སྡེར་ཅན་དུ་སྒོམས་ལ་སྨྲ་བ་བཅད་ནས་ཁྲི་ཚོ་བཟླས་ལ་འཇིབ་པོ། ༀ་ཁྲིག་ཤེལ། 
ཏྲལ་ཏྲལ། མན་ཐི་ཐིས། ལོ་ལོ་ནི་ལོ། ཧབ་ཧུབ་ལོང་། མོ་གཱ། རིམ་དགུ་སྲོ་ལི་ཁྲག་སྡལ་མོ་དྲོངས་ཅིག)ཆུ་སེར་དྲང་བར་
བྱ། །ཤ་རོ་གཙགས་ཀྱིས་དྲལ་ལ་ཟ་སྨན་(རུས་ཐལ། བྱང་ཚེར། ཚེར་མ་ཅན་སྣ་ཚོགས། སྙུག་རྩིའི་ཐལ་བ་བྱ་བལ་
མ་དང་། དུར་བྱིད་)གཞུག །སྐྱོན་དང་བྲལ་ནས་རྨ་ལ་འཚོ་སྨན་གདབ། །སྨིན་མ་བྱི་ན་ཕག་ཚིལ་
ཟེར་མོའི་ཁྲག །ཚྭ་དང་ལྡོང་རོས་བ་ལ་རྐང་མར་དང༌། །ཁམ་བུའི་རྩི་དང་སྦྲང་སྦྱར་བྱུགས་
པས་འཚོ། །མཚུལ་པ་འགགས་ན་སྣ་སྦྱོངས་ཡང་ཡང་བཏང༌། །གྲེ་བ་འགགས་ན་གཏར་དང་
དེ་སྨན་སྦྱར། །བཞི་པ་རྟེན་འབྲེལ་མདངས་སྟོབས་གདབ་པ་ནི། །(མི་ཁྱི་ར་རྟ་མངལ་)ཁྲག་ལྔ་(སྦལ་
25-1-376


སྦྲུལ་གྱི་)ཤ་གཉིས་(མི་དང་རྒྱའི་)ཚིལ་གཉིས་(གླ་རྩི་ཤུ་དག་ཤིང་ཀུན་མུ་ཟི་སྒོག་སྐྱ་སྤྲུ་རྩ་སྟེ་)དྲི་ཅན་དྲུག །བཙན་
དུག་ཙན་དན་མར་ཁུ་སྦྱར་ལ་བྱུག །ཤ་(ཤ་བཀྲ་ལ་སྦལ་སྦྲུལ་གྱི།)གཉིས་ནག་པོ་(གླ་རྩི་ཤུ་དག་གུ་གུལ་ནག་
)གསུམ་དང་རྟ་བོན་པོ། །དྲི་(མུ་ཟི་ལྡོང་རོས་སྤྲུ་རྩ་)གསུམ་གཞོབ་(རྨ་བྱ་གླང་རུ་རྟ་རྨིག་)གསུམ་དུ་བས་
བདུག་པར་བྱ། །བདུད་(གྲུབ་པ་ཐོབ་པའི་བདུད་རྩི་གཡམ་པ་ལ་སྲེག་ལ་ཉི་མ་ཅིག་གི་སྐམ་པར་བྱ། གུ་གུལ་དང་དྲི་ཆུས་་་་་་་་་་་་་་་་་་བཱི་རིལ་བུ་སྲན་མ་ཙམ་གྱི་ལྷག་པར་གདོན་འཇོམས། བྱ་ཁྱུང་གི་ནུས་པ་སྐྱེད་དོ།།)རྩི་རིལ་བུ་ཉིན་མོ་གསུམ་
ཡར་བཏང་། །དྲི་ཆུའི་(ཕུལ་དགུ་ཤོང་བའི་རྫ་མར་ཐེམ་བུ་ཅུག་ལ་དྲི་ཆུ་བསགས་ལ་ཐེམ་བུ་དང་པོ་ཕྱིར་ཕོ། བར་པ་ལ་ཨ་
རུ་ར་ཐུན་རེ་བཏབ་ལ་བཏུང་། ལྷག་མ་སྣར་དྲངས། སྙིགས་མ་ཕོ་ལ་བཏད་)རྟེན་འབྲེལ་སྨན་འཇུ་གདོན་ནད་སེལ། །
དང་ག་འགགས་ན་སེ་འབྲུ་བཞི་བདུན་སྦྱར། །དེ་ཡང་ཁྱད་པར་བྱ་ཁྱུང་ཟ་དུས་བསྟེན། །ཐ་
མ་བཏང་རན་བཟུང་ཚད་བསྟན་པ་ནི། །དང་པོ་སྨན་གྱི་སྦྱོར་བ་བསྟེན་པ་ཡིས། །ཇེ་བདེ་སོང་
ན་ནད་ཞེན་ཆུང་བ་ཡིན། །ནད་ཀུན་སློངས་ན་གདོན་ཞེན་འབྲིང་པོ་ཡིན། །ཕན་གནོད་མེད་ན་
གཏིང་ཞེན་ཆེ་བ་ཡིན། །ལོ་གཅིག་ལོ་གཉིས་གསུམ་གྱི་བར་དུ་སྒྲིམ། །བར་དུ་མང་བསྟེན་
བདེ་དང་ཉུང་བསྟེན་བདེ། །གང་མ་བདེ་བ་དེ་ལས་བཟློག་ལ་བསྟེན། །ནད་འགོ་ཆོགས་
རྟགས་སྙིང་རྩ་སེང་བ་དང༌། །ལུས་ཡང་ཁམས་དྭངས་དང་ག་བདེ་བ་དང༌། །སྣ་ཁྲག་འཛག་
དང་དྲི་ཆུ་ཁྲག་ཏུ་དོན། །ཞུགས་སར་ཆུ་སེར་འདུས་ཤིང་རྣག་ཁྲག་འཛག །གློག་ཤུ་བུད་དང་
རྟགས་རྣམས་ཁད་ཀྱིས་ནུབ། །རྨི་ལམ་ལུས་ལས་སྲོག་ཆགས་འཐོན་པ་དང༌། །ཁྲུས་བྱས་
བཤལ་བྱུང་སྣ་ཁྲག་ཟགས་པ་རྨི། །གནོད་པའི་རྨི་ལྟས་ནུབ་དང་སྐམ་བསྲེགས་འཕྱིར། །ལུས་
ལ་མེ་འབར་ཉི་མ་ཤར་བ་འབྱུང༌། །མིག་རྩ་སངས་ཁུགས་ཆད་བཏུལ་གང་བྱུང་རྣམས། །
གདུག་པ་ཀླུ་ཡི་གདོན་དང་བྲལ་བའི་རྟགས། །དེ་རྟགས་མཐོང་ན་རིལ་བུ་རེ་རེ་དབྲི། །ཕྲི་
བས་མི་བདེ་སྣོན་འབྲིད་ཤེས་པར་བྱ། །བསྣན་པས་བདེ་ན་མ་ཐོན་ད་དུང་བསྲིང༌། །ཕྲི་བས་
བདེ་ན་ནད་ཀྱི་རྩད་ཐོན་པས། །ལོ་དུས་བར་དུ་མ་བརྗེད་རྒྱུན་པར་བསྟེན། །དེ་ཡིས་མི་ལྡོག་
25-1-377


ཕྱི་རྗེས་ཆོད་པ་ཡིན། །ལུས་ཟུངས་ནད་དུ་གྱུར་ཕྱིར་ཐོན་དཀའ་བས། །བརྩོན་པས་དར་དྲག་
ངང་གིས་སྙུགས་བསྲིང་གཅེས། །སྤྱིར་ན་ནད་འདི་སྔོན་གྱི་ལས་ངན་ཏེ། །རྒྱ་དང་ལམ་འཕྲང་
བསལ་དང་ཉེའུ་འདོན་དང༌། །ཆབ་གཏོར་ཚོགས་འཁོར་དགེ་སློང་བཞི་གྲྭ་དང༌། །བཀའ་
བཀླག་སྡིག་སྒྲིབ་སྦྱང་ཞིང་སེམས་བསྐྱེད་བསྒོམ། །ཁམས་གསུམ་སེམས་ཅན་ཐམས་ཅད་ཕ་
མ་ཡིན། །ཕ་མའི་ལན་ཆགས་བུ་ཡིས་སྦྱང་དོན་དུ། །སྤྱི་དང་སྒོས་དང་ཡང་སྒོས་སེམས་བསྐྱེད་
ལ། །ལུས་ངག་ཡིད་དང་ལོངས་སྤྱོད་སྦྱིན་བློས་བཏང༌། །ལུས་སེམས་ནད་གདོན་རང་བཞིན་
མ་གྲུབ་ཕྱིར། །བདག་མེད་སྟོང་པའི་དོན་ལ་རྒྱུན་དུ་བལྟ། །ཐ་མ་ལུམས་དུས་སྦྱོངས་དང་
གཏར་བ་གཙོ། །གནོད་པ་སྤང་ཞིང་རིལ་བུ་སྨན་མར་བསྟེན། །དེ་ཡིས་ནད་ཁ་བྲི་ནས་ཚེ་རིང་
འགྱུར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་གདུག་པ་ཀླུའི་གདོན་ནད་གསོ་བའི་ལེའུ་སྟེ་བརྒྱད་ཅུ་རྩ་གཅིག་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། །རྨ་གསོའི་སྐབས་ལ་ཇི་ལྟར་བསླབ་པར་བགྱི། །རྨ་ཞེས་བྱ་བའི་རྒྱུ་
རྐྱེན་གང་ལས་བྱུང༌། །ངོ་བོ་རྒྱུ་མཚན་ཅི་ལས་མིང་དུ་བཏགས། །དེ་ལ་གནས་པའི་ས་དང་
དབྱེ་བ་དུ། །རྟགས་དང་བཅོས་ཐབས་ལོག་གནོན་རྗེས་གཅོད་རྣམས། །འཚོ་མཛད་སྨན་པའི་
རྒྱལ་པོས་བཤད་དུ་གསོལ། །ཞེས་ཞུས་པ་དང༌། དྲང་སྲོང་རིག་པའི་ཡེ་ཤེས་ཀྱིས་འདི་སྐད་
ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །རྒྱུ་རྐྱེན་རླུང་དང་མཁྲིས་པ་བད་ཀན་ལ། །
ཟས་སྤྱོད་མི་འཕྲོད་གདོན་གྱིས་རྐྱེན་པ་ཡིས། །ལྷན་ཅིག་སྐྱེས་པའི་རྨ་རུ་འགྱུར་བ་ཡིན། །
མདའ་རྡོ་གྲི་མདུང་རྭ་ཤིང་མཆེ་བ་མེ། །ལུས་ལ་བསྣད་པས་གློ་བུར་རྐྱེན་རྨར་འགྱུར། །
འཛག་པ་དྲི་ང་ཚོར་བ་སྡུག་བསྔལ་བཅས། །ལུས་ལས་འཕྲལ་དུ་ཉམས་ཤིང་རྨ་བ་ལ། །
པགས་པ་ཤ་གདན་རལ་ཕྱིར་རྨ་ཞེས་བྱ། །གནས་ས་པགས་པ་ཤ་དང་ཆུ་རྒྱུས་རྩ། །ཚིགས་
25-1-378


དང་རུས་པ་དོན་སྣོད་བརྒྱད་ལ་གནས། །དབྱེ་བ་ལྷན་ཅིག་སྐྱེས་དང་གློ་བུར་གཉིས། །ལྷན་
སྐྱེས་རྨ་ལ་སྤྱི་དང་བྱེ་བྲག་གཉིས། །ཕྱི་མ་རྡོལ་དང་ནང་རྨ་ཟ་ཁུ་དང༌། །བར་མ་ཟུག་པ་ཞེས་བྱ་
གསུམ་དུ་འགྱུར། །བྱེ་བྲག་ཕྱི་ནང་འབྲས་དང་གཞང་འབྲུམ་དང༌། །མེ་དབལ་སུར་ཡ་རྨེན་བུ་
རླིག་བླུགས་དང༌། །རྐང་བམ་མཚན་བར་རྡོལ་དང་བརྒྱད་དུ་བཤད། །གློ་བུར་རྐྱེན་གྱི་རྨ་ལ་
རིགས་དང་གནས། །རིགས་ཀྱིས་དབྱེ་ན་བཤུས་གཤགས་བཅད་པ་དང༌། །རྣམ་པར་བཅད་
དང་རབ་ཏུ་འཕྱང་བ་དང༌། །ལྷུང་དང་གྲུམས་དང་ཕུག་པ་བརྒྱད་ཡིན་ནོ། །གནས་ཀྱིས་དབྱེ་
ན་མགོ་དང་བྱང་ཁོག་དང༌། །ཡན་ལག་རྨ་དང་གསུམ་འདུས་རྐེ་རྨ་བཞི། །དེ་རྟགས་གསོ་བ་
དཀའ་བླ་བརྟག་པ་དང༌། །གནད་ལ་སོང་དང་མ་སོང་བརྟག་པ་དང༌། །རེད་དང་མ་རེད་
བརྟག་པ་རྣམ་པ་གསུམ། །གསོ་དཀའ་བ་ལ་གནས་དང་རང་བཞིན་རྐྱེན། །རྨ་གནས་མིག་
དང་རྣ་བ་སོ་དང་སྣ། །མུར་གོང་རྩིབ་ལོགས་བྲང་དང་ལྟེ་བ་དང༌། །ནུ་མ་མཆན་ཁུང་རླིག་པ་
རུས་མགོ་དང༌། །སྒལ་ཚིགས་ཆུ་རྒྱུས་ལས་བྱེད་ཚིགས་མཚམས་དཀའ། །རྨ་ཡི་རང་བཞིན་
ཐུར་དུ་ཕུགས་འཆས་དང༌། །ཟུག་རྔུ་ལས་དང་ཉྭ་ཁྲོས་ཆུ་རྒྱུས་རུལ། །རྩ་ཆད་ཚིགས་འཁོར་
འབུ་ཞུགས་རུས་མཛེར་ཡོད། །ནང་སྐྱོན་མ་སྦྱངས་རེད་བཅས་གསོ་དཀའ་ཡིན། །རྐྱེན་ནི་
སྣུམ་དྲགས་ཟས་དམན་སྨྱུང་བར་འདུག །ཉིན་པར་གཉིད་ལོག་ཉལ་པོ་སྤྱད་པ་དང༌། །བསྒུལ་
བསྐྱོད་སྔས་པ་འཚོ་བ་དཀའ་བར་བཤད། །དེ་ལས་གོ་ལྡོག་རྨ་ནི་གསོ་བ་བླ། །གནད་དུ་
བབས་པ་གསོས་ཀྱང་འཚོ་མི་འགྱུར། །གནད་ལ་སོང་བ་ཤ་ཚིལ་རུས་པ་དང༌། །ཆུ་རྒྱུས་དོན་
སྣོད་རྩ་གནད་རྣམ་བདུན་ཏེ། །ཤ་གནད་སྐྲངས་ཤིང་བྱེར་ལ་ཁྲོ་བ་ཡིན། །ཚིལ་བུའི་གནད་ལ་
སོང་ན་ལྷོག་ཐབས་སྐྲངས། །རུས་གནད་ན་ཞིང་རུས་ཚད་རྐུན་བུར་སྐྱེ། །དོན་གནད་ཟུག་
གཟེར་ཆེ་ཞིང་གཟི་མདངས་འཆོར། །སྣོད་གནད་དྲག་པོར་སྦོ་འཁྲུག་དྲི་ཆུ་སྡོམ། །རྩ་གནད་
རྩ་ཚད་སྐྱེ་ཞིང་འདུ་བ་འཁྲུག །མདོར་ན་སྒོ་གསུམ་གནད་ལ་ཕེབས་པར་འགྱུར། །གནད་ལ་
25-1-379


མ་སོང་ཟུག་མེད་དང་ག་བདེ། །ལུས་ཡང་བྱ་བའི་ལས་ལ་བློ་མི་ལྡོག །རྨ་རེད་རྟགས་ལ་སྤྱི་
དང་ཁྱད་པར་གཉིས། །སྤྱི་རྟགས་རྨ་ཁ་རྒྱས་དང་ཞུམ་པ་དང༌། །ཤིན་ཏུ་སྲ་སྙི་མཐོ་འམ་དམའ་
བ་འམ། །ཚ་འམ་དྲོད་མེད་དམར་ནག་སྔོ་འམ་སྐྱ། །དྲི་མནམ་འདྲུལ་ཞིང་འཚོར་མི་འདོད་
པའོ། །བྱེ་བྲག་རེད་དང་འགྲམས་དང་བྱེར་བ་དང༌། །གཞའ་སྨྱོ་རུས་ཟན་ཅན་དང་རྣམ་པ་དྲུག །
རེད་ལ་འདུ་བས་རེད་དང་ཟས་སྤྱོད་རེད། །འདུ་བ་རླུང་མཁྲིས་ཁྲག་དང་བད་ཀན་བཞི། །
རླུང་གྱུར་སྔོ་ནག་དམར་སྨུག་སྐྱ་བ་ལ། །པགས་པ་རྩུབ་ཙེག་གས་སྙམ་རྣག་ཆུ་སླ། །མཁྲིས་
གྱུར་དམར་ལ་ཚ་འབྲབ་ཟུག་གཟེར་ཆེ། །མྱུར་དུ་འདྲུལ་ཞིང་རྣག་ཆུ་མང་དུ་འཛག །ཁྲག་གྱུར་
མདོག་དམར་ཚ་འཁྱུག་ཁྲག་ཏུ་འཛག །བད་གྱུར་ཟུག་ཆུང་འདྲད་འདྲོད་མང་ལ་སྐྱ། །ཟས་
ཀྱིས་རེད་པ་ཟས་རེད་སྐོམ་རེད་གཉིས། །ཟས་རེད་རྨ་སྐམས་སྦོས་སམ་འཇིག་པར་བྱེད། །
སྐོམ་རེད་ལུས་རྔུལ་རྨ་གཤེར་རྣག་ཆུ་མང༌། །སྤྱོད་རེད་ཉི་ལྷགས་གཉིད་ཆགས་འཇིགས་པ་
ལྔ། །ཉི་རེད་རྣག་སྔོ་རྨ་ཧྲིད་གཉེར་མ་འབྱུང༌། །ལྷགས་རེད་སྔོ་སྐྱ་གྲང་འབྲུམ་འོང་བ་ཡིན། །
གཉིད་རེད་དབང་པོ་མི་གསལ་ཟས་མི་འདོད། །ཆགས་རེད་རྨ་ཁ་འབྱེ་ཞིང་ཁུ་ཚིགས་འོང༌། །
འཇིགས་པས་སྐྲངས་ཤིང་གྲོགས་འདོད་རྨ་ཁ་སྐམ། །འགྲམས་པ་ཞེ་སྡང་དྲག་ཤུལ་ཉི་མ་རྟ། །
ཟས་དང་གདོན་གྱིས་འགྲམས་པ་རྣམ་པ་དྲུག །ཞེ་སྡང་ཁྲོ་ཚིག་ཆུ་སེར་ཚ་བ་སྐྱེ། །དྲག་ཤུལ་
དྲག་པོར་སྐྲངས་ཤིང་ཁྲག་ཚད་སྐྱེ། །ཉི་མས་འགྲམས་ན་རྨ་སྐམས་ཆུ་བུར་འོང༌། །སྨུག་པོར་
སྐྲངས་ཤིང་རྣག་མདོག་དམར་རྩ་འབྱུང༌། །རྟ་འགྲམས་འགྲོ་འདོད་མདོག་སྐྱ་རྔུལ་ཞིང་ཚ། །
ཟས་འགྲམས་རྨ་མདོག་ལོག་ལ་ཚ་བ་སྐྱེ། །གདོན་འགྲམས་ཚིག་པ་ཟ་ལ་ཐོར་པ་ཡོང༌། །
བྱེར་པ་པགས་པ་ཤ་ཚིལ་རྩ་རུས་ཚིགས། །པགས་བྱེར་པགས་མགོ་རྣག་ཆུས་ཟོས་པ་སྟེ། །
ཤ་བྱེར་ཉྭ་སུལ་བྱེ་ནས་རྣག་བྱེར་ལ། །ཚིལ་བྱེར་དྲེག་དང་པགས་པ་བྱེར་བ་ཡིན། །རུས་བྱེར་
ཤ་རུས་བར་དུ་རྣག་ཞུགས་པ། །ཚིགས་བྱེར་ཕྱི་ཚིགས་ནང་ཚིགས་འཁོར་བའོ། །རྩ་བྱེར་རྩ་
25-1-380


ལ་ཆུ་སེར་གྲམ་པ་ཡིས། །འཁྱུག་ཅིང་སྐྲངས་ལ་རྩ་འབྲུམ་འབྱུང་བ་ཡིན། །བཞའ་ལ་ཤ་རུས་
ཚ་གྲང་རྣམ་པ་བཞི། །ཤ་བཞའ་བ་ནི་ཤའུ་སྐྱེར་མི་འདོད། །རུས་བཞའ་རུས་པའི་སྟེང་ནས་ཤ་
མི་སྐྱེ། །ཚ་བཞའ་རྨ་ཁ་ཤི་ལ་རླངས་པ་ཆེ། །གྲང་བཞའ་དྲོད་བྲལ་རྨ་ཁ་ཤི་བའོ། །སྨྱོ་ལ་ཤ་
ཁྲག་རུས་པ་རྣག་སྨྱོ་བཞི། །ཤ་སྨྱོ་ཤ་འུ་མཐུག་སྦོབ་རྨ་ཁར་ལུད། །ཁྲག་སྨྱོ་སྨུག་ནག་རེག་ན་
ཁྲག་ནག་འཛག །རུས་སྨྱོ་རུས་སྟེང་ཤ་འུ་མཛེར་ཐབས་སྐྱེ། །རྣག་སྨྱོ་རྣག་ཆུ་མང་ལ་རྨ་ཁ་
མཐོ། །རུས་ཟན་རུས་པ་ལས་དང་ཟུག་རྔུ་ལས། །རྣག་ཤ་མ་ཐོན་རྨ་ཡི་རུས་ཟན་བཞི། །རུས་
པའི་རུས་ཟན་རྨ་ཁ་མཐོ་ལ་སྦོ། །རྣག་ཆུ་ཆད་དུ་མི་འདོད་སྲོ་མ་ཅན། །ཟུག་རྔུའི་རུས་ཟན་ཁ་
བྱེ་འཕོངས་སུ་ཆགས། །རྣག་མདོག་ཙན་དམར་མི་ཆད་ཁྲག་ཅན་འཛག །རྣག་གི་རུས་ཟན་
སྐྲངས་པ་སྐྱ་ལ་བེམ། །རྣག་ལ་སྐྱེ་འབྲི་ཆེ་ལ་དྲི་མ་མནམ། །རྨ་ཡི་རུས་ཟན་རྨ་ཡིས་སྨན་མི་
འཇུ། །ཡང་ན་རྨ་ཁ་ཕྱིད་ནས་རློན་པར་འགྲོ། །རེད་འབྱོངས་སྐྱོན་མེད་དམར་ཞིང་རེག་མི་
བཟོད། །རྣག་མདོག་སྐྱ་འཇམ་ཤ་འུ་འབྲུམ་ཕྲན་བཅས། །རྨ་ཁ་ལྕགས་གཡས་བསྐོར་ཞིང་བླ་
གཉན་མེད། །གསོ་ཐབས་སྐྲངས་གཞོམ་རེད་སྦྱང་ཤ་འུ་གསོ། །ཟས་དང་སྤྱོད་ལམ་འཕྲོད་
དང་མི་འཕྲོད་བསྟེན། །དང་པོ་བར་ཐ་ཀུན་ཏུ་ཤེས་པར་བྱ། །དང་པོ་རྨ་གསར་ཞག་གསུམ་
སྦང་མས་གདུལ། །ཆང་འགག་སྦང་མས་རླུང་འདུལ་ཆུ་སེར་འཇིབ། །སིངས་པོའི་སྦང་མས་
རྨ་ཡི་བད་ཀན་སེལ། །ཆུ་ནས་བཏོན་པས་ཁྲག་མཁྲིས་ཚ་བ་འཇོམས། །དྲགས་ན་རྨ་འབྱེར་
ཤའུ་རླིག་པ་འཕྱིད། །བྱད་དང་མཐིལ་བཞི་ཆུ་རྒྱུས་འདྲུལ་བར་བྱེད། །ནང་བརྟོལ་ཚ་བ་སྡུད་
ཅིང་རུལ་མྱགས་མཆེད། །དེ་ཕྱིར་སྦང་མ་གནས་དུས་ཤེས་པ་གཅེས། །དེ་འོག་སྐྲངས་པ་ཤོར་
ན་འཇིབ་འདུལ་བྱ། །བསིལ་འཇིབས་དྲོད་འཇིབ་རྨ་ཡི་ཚ་གྲང་དྲིས། །འོན་ཀྱང་རྨ་རྣམས་
ཕལ་ཆེར་ཚ་བ་སྟེ། །འདི་ལ་གྲང་བ་འབྱུང་བ་ཉིན་སྐར་བཞིན། །བསིལ་བས་བླུག་ཅིང་བྱུག་
དང་བདུགས་བྱས་ན། །མེ་ལ་ཆུ་ལྟར་སྐྲངས་པ་ཞི་བར་འགྱུར། །ཚ་རྒྱུ་མཁྲིས་པ་ཁྲག་ལ་
25-1-381


གནས་པའི་ཕྱིར། །གང་ཉེ་གང་རྒྱས་རྩ་ལ་ཁྲག་ཤེད་སྨད། །མི་ངན་རྟེན་བྲལ་གནོད་མི་ནུས་
དང་མཚུངས། །གནད་ལ་ཟེམ་ལ་ཇུ་ཙེས་ཞལ་ཞལ་བྱ། །རུས་སྟེང་རྣམས་ལ་རུས་ལ་ཐུག་
པར་བརྡེག །གནད་ཀྱི་སྟེང་དུ་པགས་པ་འཐེན་ལ་བཙག །མེར་དང་སྟོང་སོགས་ཆུ་སེར་
འདུས་སར་ཤིས། །དེ་སྟེང་ཆུ་ཡིས་ཚུགས་ཚད་བསྒྲེང་བར་བྱ། །རྗེས་ལ་བསིལ་བའི་ཞུན་ནན་
ཤིས་པ་ཡིན། །ཡང་ན་རྔབས་རྭ་བཙུགས་ཏེ་འབུར་བ་དང༌། །གཙགས་བུས་དྲལ་ཏེ་ཆུ་སེར་
ཡང་ཡང་གཞིབ། །ཇུ་ཚེ་རྔབས་རྭས་ཤ་པགས་ཆུ་སེར་འདྲེན། །འཕྲལ་དུ་ཟུག་གཅོག་སྐྲངས་
པ་རྣག་མི་འཆོར། །སྔས་ན་འཕར་ཞིང་གདོན་སྐྲངས་འབྱེར་བས་སྤང༌། །ཀུན་གྱིས་ཞི་དཀའ་
རྩ་འམ་ལྟོ་ནས་སྦྱང༌། །རྒྱུ་ཉིད་རྩད་ནས་འདོན་ཕྱིར་དཔྱད་མཆོག་ཡིན། །ཟུག་མེད་སྐྲངས་པ་
སྲ་ལ་རླུང་ཆེ་ན། །ཆུར་གནས་ཤ་ཡི་ལུམས་ཀྱང་བསྔགས་པ་ཡིན། །སྲ་བརྟན་ཟུག་ཆུང་བད་
རླུང་འཇོམས་པ་ཡི(ཐང་ཤིང་། རྒྱ་སྤོས། བྱེ་རུག ཏིག་ཉུང་)། །སྨན་གྱིས་བྱུགས་སྟེང་དྲོ་བའི་དུགས་ཀྱིས་
བདུག །དེ་འོག་འབྲུ་བཙོས་བཏགས་པའི་ལྡེ་གུས་འཇོམས། །ན་ཚ་ཟུག་གཟེར་ཆེ་ན་ཟར་མ་
ཏིལ། །ཆ་མཉམ་བརྔོས་ཕྱེ་འོ་མ་སྦྱར་བ་བྱུག །ཤུག་པ་རུ་རྟ་རྒྱམ་ཚྭ་ཟར་མ་ཏིལ། །ཕབས་དང་
རྗེན་ཕྱེ་ཞོ་བཙོས་ཞུན་བྱས་ན། །ཞི་དཀའི་སྐྲངས་པ་གང་ཡང་རྣག་ཏུ་འགུགས། །བར་དུ་རེད་
སྦྱང་སྤྱི་དང་བྱེ་བྲག་གཉིས། །སྤྱི་བཅོས་འབའ་ཆའི་ལུམས་དང་རུས་པའི་ཞུན། །ཡང་ན་དུག་
སྣ(རེ་ཅག་རི་ཤོ་ཀྱི་ལྕེ་སྦང་གར་རྗེན་ཕྱེ་མར་ནག་སྦྱར་བ་)འི་ལུམས་ཞུན་ནན་འཕྲོད་སྦྱར། །ཡང་ན་ས་(བྱི་ཁུང་
ས་མྱགས། སེ་རུལ་ས། ཡུང་བ། ཆུ་རྩ། སྙུག་རྩི། རི་བོང་དང་གོང་མོའི་བྲུན་སྤང་དཀར་སྦྱར་བའི་ནན་བྱ་)ཡི་ནན་གྱིས་རྨ་
རྒན་གདུལ། །རྨ་ཡི་རེད་སྦྱང་དུར་བྱིད་དནྡ་དང༌། །ཡུང་སྐྱེར་ནིམ་པ་ཤིང་མངར་པ་ཏོ་ལ། །
རྒྱམ་ཚྭ་ཏིལ་གྱི་ལྡེ་གུས་རེད་པ་སྦྱོང༌། །ཡང་ན་རུ་རྟ་(དུར་བྱིད་ཡུང་བ་རྒྱ་ཚྭ་)བཞི་འམ་དངུལ་ཐལ་
(རྒྱ་ཚྭ་དུར་བྱིད་ཐར་ནུ་དོམ་མཁྲིས་མཚལ་)དྲུག །ཞ་ཉེའི་(དང་དུར་བྱིད་)གཅོད་སྨན་སྦང་འཇིབས་ཤ་རོ་
གཅོད། །ཡུན་རིང་འཚོ་དཀའ་ཤ་རོ་ལྕགས་ཀྱིས་བསྲེག །བྱེ་བྲག་རླུང་གིས་རེད་པ་སྦྱང་བ་
25-1-382


(གླུམ་སྦང་ཚ་བ་གསུམ་སྣུམ་བཞི་ར་མཉེ་ཉེ་ཤིང་ལྕ་བའི་ཆས་བྱ། བསིལ་མི་བཏང༌། ཐལ་བའི་སྐམ་རྩི་བྱུག་པ་)དང༌། །
མཁྲིས་པ་(ག་བུར་མཁྲིས་པ་ཅུ་གང་ཀ་ར་གདབ། ཤོ་མང་ངམ་ཞོ་གླན། གསེལ་ཆས་བྱ། སྣུམ་མི་བཏང་)ཁྲག་(མཁྲིས་སྣ་
གདབ་དམར་ཆས་བྱ། གཏར་ག་བྱི་བྲུན་དུགས་མི་བྱ་)དང་བད་ཀན་རེད་པ་(སྔོའི་ཚ་བ་གསུམ་མཁྲིས་སྣ་བཅད་འབྱོར་
གདབ། སྦང་གར་ཚ་བ་གསུམ་ཕབས་གླད་པ་གཡེར་མ་ཞོའི་ཆས་བྱ། སྣུམ་དང་སྒོ་ང་མི་བཏང་བ་)དང༌། །ཟས་(ཉ་ལྕིབས་
གཡུ་ལོ་ཞོ་བཙགས་ཤ་ཆང་བཏང༌། འཇིག་ཟས་བསྡམ་)སྐོམ་(དོམ་མཁྲིས་རྒྱ་ཚྭ་ཕག་མགོ་ལིག་བུ་མིག་བྱུག འོམ་བུ་བ་ལུ་ཤུག་
པ་ཞོ་སྦྱར་གླན་)ཉི་མ་(ཀ་ར་ཤིང་མངར་རའི་འོ་མ་བྱུག་ཉ་ལྕིབས་གླན་)ལྷགས་པས་རང་པ་(མཁན་སྦང་ཚ་བ་གསུམ་
ལྕམ་འབྲུམ་ཞུན་བྱ། འོལ་སྐོམ་གླན།)དང་། །གཉིད་(ག་བུར་ཆུ་བྱུག་ཆུ་རྩ་བག་ཕྱེ་ཞོ་གླན་)དང་ཆགས་པ་(མར་ནག་
སྤོད་བྲན་བྱུག་ཤ་ཆང་བཏང་)འཇིགས་པས་རེད་པ་(གླ་རྩི་གུ་གུལ་བྱུག་ཞོ་སྦང་གླན་གྲོགས་བསྟེན་པས་)སྦྱང༌། །ཞེ་
སྡང་(བསིལ་སྨན་དང་བསིལ་ཆས་བཏང་ཡིད་འོང་གཏམ་དང་གྲོགས་བསྟེན་)དྲག་ཤུལ་(ཤོ་མང་གླན་གཏར་ག་བྱ་དལ་
བར་སྡོད་)ཉི་མས་འགྲམས་པ་(ཧོང་ལེན་ཉ་ལྕིབས་བྲ་བོ་ཞོ་སྦྱར་བཏང་བ་)དང༌། །རྟ་(ཀ་རའི་ཐང་བཏང་འབྲི་ཏ་ས་
འཛིན་རྟ་སྦངས་བྱུག)དང་ཟས་(བསིལ་བཏང་བཅུད་བསྡམ་)དང་གདོན་གྱིས་འགྲམས་པ་(གུ་གུལ་གླ་རྩི་མུ་ཟི་
སྤང་སྤོས་ཤ་ཆེན་ཡུངས་ཀར་བྱུགས་པས་)གསོ། །པགས་པ་བྱེར་(རྨ་མཁྲིས་སྣས་བཀྲུ་)དང་ཤ་བྱེར་(ཆུ་བཙགས་ལ་
སྐྱ་སྦྱོར་ཕྱིང་དེབ་བྱ་)ཚིལ་བྱེར་(ཕྱིང་དུགས་བྱ་ཐལ་བའི་སྐམ་རྩི་བྱུག་པ་)དང༌། །རྩ་བྱེར་(འཕར་རྩ་བསྲེག་ཁྲག་གཏར་
དོམ་མཁྲིས་སྟབ་སེང་ཐང་བཏང་མཁྲིས་ནན་བྱ་)རུས་བྱེར་(ལྷ་བ་བྲུད་དོམ་མཁྲིས་སྟབ་སེང་རུ་རྟ་ཚེར་སྔོན་གདབ་)ཚིགས་
བྱེར་(ཕུག་ལ་ཁྲུས་ནན་གྱིས་)བསྡུ་བར་བྱ། །ཤ་བཞའ་(ཆང་དང་ལུག་ཤ་བཏང་)རུས་བཞའ་(ཁོང་དུ་ཤ་ཆང་
བཏང་ཚ་བ་གསུམ་གྱིས་བཀྲུ་དོམ་མཁྲིས་ཡུང་མཚལ་གདབ་)ཚ་བཞའ་(བསིལ་གྱིས་བཀྲུ་ག་བུར་གདབ་)གྲང་བཞའ་
(གསར་བཅུད་བཏང་དྲོད་ལུམས་བྱ་བ་)དང༌། །ཤ་མྱོས་(རུལ་གཅོད་གདབ་མེས་བསྲེག་)ཁྲག་མྱོས་(རྨ་ལ་ཁྲག་འདོན་
གཅོད་སྨན་གདབ་)རུས་མྱོས་(བསྲེག་གམ་བྲུད་ལ་སྨན་གདབ་)རྣག་མྱོས་(མེ་བཙའ་གདབ་རྣག་དབྱུང་)བཅད། །
རུས་པའི་རུལ་ཟན་(ཁོང་དུ་བྱ་དང་རི་བོང་གི་ཤ་བཏང་མི་རུས་འབྲུག་རུས་འགྲོན་ཐལ་རུ་རྟ་གདབ་དེས་མ་ཐོན་ན་ཤ་
དྲས་ལ་རུས་མཛེར་གདོན་)ཟུག་རྔུའི་རུལ་ཟན་(ཁོང་དུ་ཉ་ཤ་བཏང་རྨ་ལ་ཟུག་རྔུ་འབྱིན་པའི་ཞུན་བྱ་རུལ་གཅོད་གདབ་
25-1-383


རྣག་འཁྱིམས་པ་འདོན་)དང༌། །རྣག་(ལ་རྣག་བཤལ་བྱ་)དང་རྨ་ཡི་རུལ་ཟན་དབྱུང་(རྨ་ལ་ཞོ་བཙགས་གླན་སྨན་མི་
གདབ་བ་རུ་རའི་ཚི་གུ་གདབ་རྨ་ཕྱིད་ན་ཕྲུམ་གླན་ཆུ་རྩ་གདབ་སྦང་མ་སྤང་)བར་བྱ། །དེ་སོགས་རྨ་རེད་བླ་གཉན་
གང་བྱུང་བསལ། །ཐ་མ་སྐྱོན་སོལ་དག་ནས་རྨ་རྩིས་གསོ། །དང་པོ་གསོ་གཅོད་སྦྲགས་མར་
སྦྱར་བ་དང༌། །དེ་རྗེས་འཚོ་སྨན་ཆིག་ཚུགས་སྦྱར་བའོ། །དང་པོ་ལི་གྲི་(མཚལ་སེར་མཚུར་ཨ་རུ་སོ་ཆ་
སྤོས་དཀར་སྦང་མ་མར་གསར་)བརྒྱད་དང་བཅད་འབྱོར(་ཚ་བ་གསུམ་མི་དོམ་ཕག་མཁྲིས་གསུམ་)བདུན། །རྒུ་
དྲུས་(ཆུ་རྩ་དོམ་མཁྲིས་བྲག་སྤོས་ཀ་ར་)ལྔ་པ་གང་འཛོམ་གསོ་གཅོད་བྱེད། ཐ་མ་མཁྲིས་སྦྱོར་(ལུག་
མཁྲིས་བདུན་ཆུ་ཕུལ་ལྔ་ལ་བསྡུས་ལ་བྱའི་ཟེ་ཁྲག་བྲག་སྤོས་མི་དོམ་ཉ་མཁྲིས་སྟག་ཤ་དར་ཡ་ཀན་སྦྱར་བ་རྨ་རྩིར་བཟང་)སྔོ་
སྦྱོར་(དར་ཡ་ཀན་སེར་འདབ་ལྔ་པ་སྐྱེར་ཤུན་སྙི་བ་ཁུར་རྩ་ཤེལ་ཏ་པ་ཡག་འབྲུ་ཀ་ར་སྦྱར་བ་རྨ་ཀུན་ལ་བཟང་)ཤ་སྦྱོར་(ཀྱི་
ལྕེ་བྲག་ལྕམ་སྟག་ཤ་ཕག་ལང་པ་དཀར་པོ་བཅད་འབྱོར་ཆུ་རྩ་བྲག་སྤོས་མཁྲིས་སྣ་མཚལ་དཀར་ཅུ་གང་གུར་གུམ་ཀ་ར་གསར་
རྙིང་ཀུན་གྱི་རྨ་རྩི་)དང༌། །ཤ་(སྟག་ཤ་དོམ་མཁྲིས་བྲག་སྤོས་གདབ་)རུས་(སྟབ་སེང་ཨ་བྱག་དོམ་མཁྲིས་ཚེར་སྔོན་ཨ་བ་
ཚེར་སྔོན་)པགས་པ་(སླང་དྲེག་རྙི་ནག་ཕ་བ་གོལ་གོལ་དུད་པ་བྱ་བལ་མར་གསར་བྱུག་)དྲེག་གི་(ཁུར་མང་ཁུར་ཆུང་སུམ་
ཅུ་ཏིག་)རྨ་རྩིར་བསྟུན། །དེ་རྗེས་རྨེན་པ་བརྟས་པར་བྱ་བ་(རྨེན་པ་ཆགས་ནས་ཕྱེ་མར་གླན་ཡང་ན་ཤུ་དག་རྒྱམ་
ཚྭ་ཚ་བ་གསུམ་ཞུན་མར་རྐང་མར་རེ་བལ་བཙོས་ལ་གླན་པ་)དང༌། །གདོང་པའི་པགས་མདོག་པད་མ་ལྟར་
མཛེས་(ལྡོང་རོས་ཚོས་བཙོད་བ་བླ་ཡུང་སྐྱེར་སྦྲང་སྦྱར་བྱུགས་)ཤིང༌། །མགོ་ཡི་རྨེན་པ་སྐྲ་ལོ་སྐྱེད་པར་བྱེད་(བ་
ལང་གི་རྭ་རུས་པ་རྨིག་པ་སྤུ་པགས་ཐལ་ཏིལ་མར་སྦྱར་བ་བྱུག་གོ)། །རྨ་སྤྱིར་ཟས་སྤྱོད་འཕྲོད་དང་མི་འཕྲོད་པ། །
རྨ་གསར་དུས་ན་ཁྲག་འཆོར་སྐྲངས་པའི་ཕྱིར། །ཆུ་དང་ཙམ་པ་བཀུག་སྟེ་སྨྱུང་བར་བྱ། །
གནད་མེད་རྨ་དྲོན་ཆང་དང་མར་གྱིས་དབབ། །དེ་ཡིས་ཟུག་ཆུང་རང་འབྱོར་བྱེད་པ་ཡིན། །
རྨ་རྣམས་ཚ་བ་སྐྱེ་ཞིང་ཟུངས་དམའ་ན། །གསར་བཅུད་ཟས་ཀྱིས་ལུས་ཟུངས་གསོ་བ་
བསྔགས། །ཞོ་ཡིས་ཚད་པ་གཅོག་ཅིང་ཁ་ཟས་ལེན། །འོན་ཀྱང་ནན་ལྟར་རྣག་བུངས་ཆེ་ན་
གནོད། །རྔ་བྲན་ཤ་གསར་ཤ་འུ་སྐྱེ་ན་ཡང༌། །ཕོ་བ་ངན་ཞིང་འབྱང་ན་དེ་ཡང་གནོད། །མར་
25-1-384


གྱིས་རྨ་རེད་རྩ་ཁ་སྡོམ་ན་ཤིས། །ཆང་ནི་ཁྲག་དང་ཆུ་སེར་རྣག་སྐྱེད་དེ། །རྨ་བཞའ་ཆུ་རྒྱུས་
རེངས་འཁུམས་འདུལ་ན་བསྔགས། །ཆུ་ཉིད་ཚ་བ་གཅོག་ཅིང་དང་ག་འབྱེད། །སྐྲངས་ཤོར་
གདོན་དང་ཕོ་བ་ངན་ལ་དུག །ཉ་ཕག་ཤ་ཡིས་རྨ་ཀུན་བཤིག་པར་བྱེད། །མདེའུ་དམ་དང་རྨ་
འབྲས་འདུལ་ལ་བཏང་། །རི་བོང་བྱ་ཤ་རྨ་འབྱེར་རུས་མཛེར་འགོགས། །ཤ་རྙིང་མར་རྙིང་
ནང་ཁྲོལ་སྒོ་ང་རྗེན། །རྨ་རྣམས་ཀུན་ལ་གནོད་དེ་སྤང་བར་བཤད། །རྨ་ཡི་སྐྲངས་དང་ཚ་བ་
ཆོགས་པ་དང༌། །རྣག་ཤ་ཐོན་སོགས་རེད་འབྱོངས་ཟས་བཅུད་སྤྲུག །བྱེ་བྲག་བཤུས་པ་(མགོ་
ཡན་ལག་བྱང་ཁོག་གང་ཡིན་ཡང་པགས་པ་བཤུས་པ་ལ་ཨ་སས་བདུག་ཚ་ལ་དོམ་མཁྲིས་གུར་གུམ་གདབ་པགས་པ་སྦྱར་ཏེ་
ཧེལ་སྲབ་དང་སྤྱིན་ཆུས་སྦྱར། །དེ་སྟེང་སྐྱ་སྦྱོར་ཕྱིང་དེབ་བཏང་ལ་བཅིང༌། །ཡང་ན་པགས་པ་སྦྱར་ཏེ་ཧེལ་སྲབ་དང་སྤྱིན་ཆུས་སྦྱར། །
དེ་སྟེང་སྐྱ་སྦྱོར་ཕྱིང་དེབ་བཏང་ལ་བཅིང༌། ཡང་ན་པགས་པའི་སྟེང་དུ་མར་དཀར་སྦྲང་རྩི་བསིལ་བའི་སྨན་བྱུགས་ལ་ཕྱིང་པ་
བཏང་རས་ཀྱིས་བཅིང་པས་)སྦྱར་ཞིང་བཤགས་པ་(ཤ་གང་ཡང་གྱེན་ཐུར་དུ་བཤགས་ན་ཕར་ཚུར་གཉིས་སུ་སྐྱ་སྦྱོར་
ཕྱིང་པ་སྦྱར་ཏེ་སྟོད་སྨད་དུ་སྒྲུ་ལུ་བྱས་ལ་བསྡམ་ཁ་ཕྱེ་ལ་རྨ་རྩི་གདབ་རྨ་ཁར་སྦང་རོ་གླན། རླིག་པ་རལ་ན་བཙེམས་ལ་རྐེད་པ་ལ་
བཅིང་དུགས་ལུམས་སྤང༌། ཤ་ཉིལ་ན་དར་སྐུད་ཀྱིས་བཙེམས་ཕྱིང་དེབ་བཏང༌། ཤིང་བྱང་)བསྡམ། །བཅད་པའི་རྨ་(ཤ་
གང་ཡང་འཕྲེད་དུ་བཅད་ན་རྨ་སྟོད་སྨད་དུ་ཕྱིང་པ་སྦྱར་གཞན་བཅོས་ལུགས་བཤགས་པ་བཞིན་)དང་རྣམ་པར་བཅད་པ་
(རུས་པ་ལ་ཐུག་པར་ཆད་ན་ཧེལ་གེ་སྤྱིན་སྦྱར་གྱིས་ཟམ་བུ་བཏང་དེའི་སྟེང་དུ་སྐྱ་སྦྱོར་ཕྱིང་དེབ་བཏང་ལ་བཅིངས་ཏེ་)འཐུད། །
འཕྱང་བ་བཅད་(རུས་པ་ཆོད་ནས་ཤ་ཁམ་ཙམ་ལས་པ་དེ་བཅད་ནས་ཁད་པུ་གཞུག་)ཅིང་ལྷུང་ན་ཁད་པུ་
གཞུག(ཤ་ལ་སྐྱ་སྦྱོར་དང་ཕྱིང་དེབ་བཏང་དེའི་སྟེང་དུ་ཤིང་བྱང་ལྔ་དྲུག་བཏང་འབྲེང་པས་བསྡམ་བསྣོལ་མཚམས་སུ་ཀྱི་གུ་
བསྣོལ་བས་གཅུས་ལ་མར་དུ་བཙོ་དེ་ནས་ཁ་ཞུན་དང་མ་རྩི་ཚུལ་བཞིན་བྱ་རྩ་རྒྱུད་རྣམས་མེས་མནན་ནོ)། །དྲུགས་པ་
བཅིང་(འོ་མ་བསྐོལ་བ་འབྲས་ཐུག་སྐམ་སའི་ཤ་ཁུ་སྦྱིན་གཞན་ཆག་པ་འཆིང་བ་དང་འདྲ་)ཞིང་ཕུག་པའི་ཆུ་སེར་དྲང་
(ཀླད་པ་ཕུག་པ་དང་བྱང་ཁོག་ཕུག་པ་གཉིས་རང་རང་གི་ལེའུར་གསལ། ཡན་ལག་ཤ་འདམ་ཆེ་སར་ཐུར་དུ་ཕུག་ཆེས་ན། རྨར་
ཤེལ་ཏའི་རེང་བུ་གཞུག རྒྱབ་ནས་ཆུ་ལྕག་བྱ་རྨ་ཕུག་ན་ཚུར་ལ་ཕྱིང་པས་བཅུས་ལ་རྨ་བཅར་ལ་གདབ། མདོར་ན་རྨ་གཏིང་དུ་ཆུ་
25-1-385


སེར་མི་འཁྱིམ་པར་བྱའོ། །རྣག་ཕུགས་ཆེས་ན་ཛཱ་ཏི་པུཥྤའི་མར་སྦྱར། ཛཱ་ཏི་པུཥྤ་ནིམ་པ་པ་ཏོ་ལ་ཡུང་སྐྱེར་བ་སྤྲུ་ཧོང་ལེན་སྤྲ་ཚིལ་
སྦང་མ་བཙོད་ཤིང་མངར་ཀ་རཉྫ་ཨ་རུའི་སྨན་མར་བཟའ་བྱུག་རྨ་ནང་བླུག །ཁ་ཆུང་གཏིང་རིང་ཕུག་བཅས་རྣག་འཛག་སེལ་ལོ)། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྨ་
སྤྱིའི་གསོ་ཐབས་བསྟན་པའི་ལེའུ་སྟེ་བརྒྱད་ཅུ་རྩ་གཉིས་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །ཡན་ལག་དང་པོ་མགོ་ལ་མཚོན་ཕོག་ན། །དེ་ལ་རྟགས་དང་
བཅོས་ཐབས་ཇི་ལྟར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་
དང༌། དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་
ཅིག །ཡན་ལག་ལྔ་ལ་གཅེས་པ་མགོ་བོ་ཡིན། །དེ་ལ་གནས་ལུགས་ཕོག་ས་བརྟག་པའི་
ཐབས། །བཅོས་པའི་ཐབས་དང་ལོག་གནོན་ལྔ་ཡིས་བསྟན། །དང་པོ་མི་རིགས་མགོ་
དབྱིབས་བསྟན་པ་དང༌། །ཤ་རུས་གླད་པ་རྩ་ཡི་གནས་ལུགས་བསྟན། །མི་རིགས་རླུང་མཁྲིས་
བད་ཀན་ལྡན་འདུས་བདུན། །མགོ་དབྱིབས་སྤྱི་རིང་ལྟག་འབུར་སོག་ཀ་དང༌། །གྲུ་བཞི་ཟླུམ་
པོ་འཕྲེད་ཉལ་སྤྱི་ལེབ་བོ། །དེ་དག་གླད་པ་རུས་པ་རིམ་བཞིན་ངན། །དེ་བཞིན་རྣམ་པ་གཟེར་
རྩ་མང་བར་བཤད། །གླད་པ་རྒྱ་མཚོའི་གནས་ལུགས་བསྟན་པ་ནི། །ཤ་གླད་མར་གླད་བུང་
ཚང་གླད་པ་དང༌། །ཕྲུམ་གླད་ཞོ་གླད་འོ་གླད་ཆུ་གླད་བདུན། །མི་རིགས་མགོ་ཡི་དབྱིབས་དང་
གླད་པ་སྦྱར། །དེ་དག་རིམ་པས་གོང་མ་བཟང་བར་འདོད། །རྒྱ་དར་སྨུག་ལ་དྭངས་པ་གླ་ཧེལ་
ཙམ། །རྩ་ཡི་དྲ་བར་གཏུམས་ནས་གནས་པ་ཡིན། །འོན་ཀྱང་མགོ་རིལ་མིག་ནག་མཚུལ་པ་
ཉེག །སྣབས་ལུད་ཉུང་ཞིང་གཡང་ཆུ་རྨ་ལ་བཟང༌། །མཚོན་ཕོག་དུས་ན་འགྱེལ་བུབ་ཟ་ཟི་
མེད། །མི་སྐྱུག་མི་ལྐུག་འཆལ་མེད་བཟང་རྟགས་ཡིན། །དེ་བཟློག་ཞོ་དང་འོ་མ་ཆུ་གླད་
འབྱུང༌། །གླད་ཁྱིམ་རུས་པའི་གནས་ལུགས་བསྟན་པ་ནི། །ཕོ་རུས་མོ་རུས་མ་ནིང་རུས་པ་
གསུམ། །དེ་ལ་སྒང་དང་རྩིབས་དང་མཐའ་རུ་འགྱུར། །ཕོ་རུས་གདུང་མཐུག་ལྷ་བ་ཆུང་ལ་
25-1-386


མཁྲེགས། །མོ་རུས་ལྷ་གདུང་སྙོམས་ཤིང་སྲབ་ལ་མཉེན། །མ་ནིང་རུས་པ་ལྷ་བ་ཆེ་ལ་གསོབ། །
ལྟག་པ་སྨིན་དཀྱིལ་སོར་བཞི་ཞུར་པོ་སྒང༌། །རུས་པ་མཐུག་མཁྲེགས་སྐྲོན་ལ་ལྷ་བ་ཆེ། །དེ་
ཡི་གཡས་གཡོན་སོར་བཞི་རུས་པའི་རྩིབས། །གོང་བས་སྲབ་ལ་ལྷ་གདུང་སྙོམས་པ་ཡིན། །
དེ་ཡི་མཐའ་མ་རྣ་ལྟག་ལྷག་མ་རྣམས། །ལྷ་བ་ཆུང་ཞིང་སྲབ་ལ་སྐྲོན་པར་བཤད། །གཡོགས་
པ་ཤ་ཡི་གནས་ལུགས་བསྟན་པ་ནི། །སྤྱི་གཙུག་ཤ་ནི་བཞག་སྒོར་འཁྱིལ་འདྲ་གཉན། །ལྟག་
པའི་ཤ་ནི་ཉ་ལྡང་གཞིབས་འདྲ་གཉན། །འཚོགས་མའི་ཤ་ནི་གཞུ་ཤུལ་བཏང་འདྲ་གཉན༌། 
མུར་གོང་ཤ་ནི་ལུག་མཁལ་བརྩེགས་འདྲ་གཉན། །དེ་ལས་གཞན་པ་མི་གཉན་འདག་
གཡོགས་འདྲ། །འབྲེལ་པ་རྩ་ཡི་གནས་ལུགས་བསྟན་པ་ནི། །གླད་པའི་རྩ་དང་རུས་རྩ་ཤ་རྩ་
གསུམ། །གླད་པའི་རྩ་ལ་འཚོ་བྱེད་དར་རྩ་དང༌། །ཕྱི་ནང་གཞན་འབྲེལ་ཆུ་རྩ་གཉིས་སུ་
བཤད། །དང་པོ་གཉན་གྱི་རེ་ཐག་རྣམ་པ་བཞི། །ཕྱི་ནང་རྒྱུག་པ་ཚངས་པའི་སྐུད་པའོ། །རེ་
ཐག་བཞི་ནི་རྣ་བའི་ཕྱི་ནང་ན། །རྩེ་ནག་གཉིད་ལོག་གཉིས་ལས་གྱེས་པ་ཡི། །དར་སྟེང་ཤིང་
ལོའི་འདབ་ལྟར་འབྲེལ་བར་གནས། །ཕྱི་ནང་རྒྱུག་པ་ལྟག་རུས་འབུར་པོ་ནས། །མཁུར་ཚོས་
བྱུང་སྟེ་སླར་ལོག་གླད་པ་བླངས། །འདུས་སོ་གསུམ་འབྲེལ་སྲུབས་ལ་ཕྱི་ནང་བརྩེམས། །
ཚངས་པའི་སྐུད་པ་ཤ་རུས་གླད་པ་ཡི། །རྩ་གསུམ་འདུས་ཏེ་སྤྱི་བོའི་གཙུག་ན་གནས། །
གཞན་དང་འབྲེལ་བའི་ཆུ་རྩ་ཕྱི་ནང་གཉིས། །ནང་རྩ་དར་གྱི་དཔྱང་ཐག་བཅུ་གསུམ་སྟེ། །རྗེ་
ཞབས་ལས་བྱུང་རྐེ་ཡི་ནང་ནས་རྒྱུ། །དོན་ལྔ་སྣོད་དྲུག་བསམ་སེར་འབྲེལ་བ་ཡིན། །ཕྱི་རྩ་
ལྟག་པའི་ཆུ་རྩ་སྦུ་གུ་ཅན། །ལྟག་ཟུར་སྤུ་འཁྱིལ་ཆུ་རྩ་འཇའ་བྱེད་གཉིས། །རྣ་ཤལ་འོག་
གཤོང་རཏྣ་གཉིས་ཏེ་དྲུག །རྐང་ལག་རུས་ཚིགས་ཆུ་རྒྱུས་འབྲེལ་བ་ཡིན། །ཟ་འགྲམ་སྟེང་ན་
སོ་རྩ་ལྡད་བྱེད་གཉིས། །རྐན་གྱི་དཀྱིལ་ན་འདོམ་རྩ་སུམ་མདོ་རིས། །ཉི་ཤུ་རྩ་གཉིས་ཆུ་རྩའི་
གནད་དུ་བསྟན། །རུས་རྩ་མདུང་ཚུགས་འཕྲེད་ཉལ་འཁྱམ་པོ་གསུམ། །མདུང་ཚུགས་གཟེར་
25-1-387


རྩ་གཙུག་དང་འཚོགས་མའི་སྒོ། །ལྟག་པའི་སྡུད་སྒོ་གཡས་གཡོན་གཉིས་ཏེ་གསུམ། །སྨིན་
དཀྱིལ་གཉིས་དང་མཁུར་ཚོས་སྒོ་ལྔར་འབྱུང༌། །དེ་ལས་གཞན་པ་མ་ངེས་གར་ཡང་སྲིད། །
རུས་པ་ངན་ཞིང་གླིང་དང་རྩ་ཕུར་མང༌། །འཕྲེད་ཉལ་རྣ་ལྟག་སྟེང་ནས་སོར་བཞི་ན། །བོན་
པོའི་ཐོད་ཅེས་བྱ་བའི་ལྷ་རྩ་ཡོད། །འཁྱམ་པོ་བཞའ་ཁུག་ཁྱི་ཉལ་བྱི་སྡེར་གསུམ། །འདིར་
གནས་ངེས་མེད་ལྷ་བའི་གསེབ་ན་གནས། །རུས་པ་བརྡར་ཚེ་བྱ་རས་སོད་པ་གཅེས། །ཤ་ཡི་
རྩ་ལ་ངེས་དང་མ་ངེས་གཉིས། །ངེས་པ་ལྟག་ཟུར་ལྟག་རྩ་ནག་པོ་གཉིས། །རྣ་བའི་ཕྱི་རྒྱབ་
ཚོན་གང་ཕྱི་ལྗོན་གཉིས། །རྣ་བའི་ནང་ངོས་ནང་ལྗོན་རྣམ་པ་གཉིས། །མུར་གོང་ཟུར་ན་ལྟག་
རལ་འཁྱུག་རྩ་གཉིས། །དཔྲལ་བའི་དཀྱིལ་ན་གསེར་མདུང་དངུལ་མདུང་གཉིས། །མཚུལ་
པའི་འགྲམ་ན་མཚུལ་རྩ་ནག་པོ་གཉིས། །མུར་གོང་ཤོང་ན་མཐོང་བྱེད་མིག་རྩ་གཉིས། །མུར་
འགྲམ་སྟེང་ན་སོ་རྩ་འཕར་བ་གཉིས། །གཙུག་གི་ཕྱོགས་བཞིར་རེ་(མཚོན་རེ་རེ་ན་)ཐག་རྣམ་པ་
བཞི། །དེ་ལྟར་ཉི་ཤུ་ངེས་པར་བཤད་པ་ཡིན། །དོན་ལྔ་སྣོད་དྲུག་དབང་པོ་སྒོ་བཞིའི་རྩ། །
གནས་ལ་ངེས་མེད་བརྟགས་ལ་ངོས་བཟུང་གཅེས། །གཉིས་པ་ཕོག་ས་བཟང་ངན་འབྲིང་པོ་
གསུམ། །ངན་པ་སྡུད་སྒོ་བཞིར་ཕོག་འཆི་བའི་གནས། །ཆག་ཚབས་ཆེ་རུང་ཆུང་རུང་ངན་པ་
ཡིན། །འཕྲེད་ཉལ་སྲུབས་སྟེང་མིག་ཕོག་མཁུར་ཚོས་དང༌། །ཟ་འགྲམ་སྟེང་རྣམས་ཕོག་ས་
འབྲིང་དུ་བཤད། །ཤ་རྩའི་སྟེང་དུ་ཆག་ཚབས་ཆུང་ན་ངན། །ཤ་དང་རུས་པ་གླད་པ་རྩ་ཡི་
རིགས། །ཕྱི་བས་ནང་མ་ནང་མ་གཉན་པ་ཡིན། །ཕོག་ས་བཟང་བ་དཔྲལ་བ་རྭ་ལྡེབས་
གཉིས། །ཆག་ཚབས་ཆེ་ཆུང་མེད་པར་བཟང་བ་ཡིན། །འདིར་མ་སྨོས་རྣམས་ཕོག་ས་འབྲིང་
དུ་བཤད། །བརྟག་པའི་ཐབས་ལ་མཚོན་རྨ་ཕྱི་ཡུལ་གསུམ། །ཟུག་རྔུའི་མཚོན་ལ་མདའ་རྡོ་གྲི་
དང་གསུམ། །མདའ་ལ་ཝ་ལུང་བཤོལ་བརྐོས་གཏམ་ཟུག་གསུམ། །གྲི་ལ་བཞོགས་དང་
རྫོགས་དང་བཅད་པའོ། །རྡོ་ལ་གས་པ་ཆག་པ་འཐམས་པ་གསུམ། །གས་ལ་སྦོམ་ཕྲ་རིང་
25-1-388


ཐུང་རྣམ་པ་བཞི། །ཆག་པ་སྟེང་ཆག་འོག་ཆག་བཅས་ནས་ཆག །བཅས་པར་ཆག་ལ་ཞོམ་
གྲུམ་རྡིབ་རྡོལ་བཞི། །འཐེམས་ལ་ཆེན་པོ་ཆུང་ངུ་འབྲིང་པོ་གསུམ། །དེ་དག་ལ་ཡང་རྣོ་ཕོག་
རྟུལ་ཕོག་དང༌། །ཉེ་ཕོག་རིང་ཕོག་ཤུགས་ཅན་ཤུགས་མེད་དང༌། །ཕར་ཕོག་ཚུར་ཕོག་ལྗིད་
ཅན་ལྗིད་མེད་བརྟག །ཚུར་ཕོག་ཉེ་དང་ཤུགས་ཆེ་ལྗིད་ཅན་དང༌། །རྟུལ་ཕོག་རུས་དང་ཕྲད་
པར་མ་གྱུར་ཀྱང༌། །དེ་ལ་ཕལ་ཆེར་ཉེས་སྐྱོན་འབྱུང་བ་མང༌། །རེག་མྱང་རྨ་ལ་བརྟག་པ་ཡོད་
མེད་གཉིས། །རྨ་མེད་པ་ལ་འགྲམས་དང་ཆག་པ་གཉིས། །འགྲམས་ལ་སྟེང་སྲུབས་ཞིག་ན་
གོམ་པ་འཁྱོལ། །མིག་འཛུམ་མི་ཤེས་སྐྱུག་ཅིང་མགོ་འཁོར་ཟི། །བར་གྱི་རྒྱ་བེར་དེ་སྟེང་རྩ་ཆུ་
ཚ། །མིག་དམར་སྣ་ཁྲག་འཛག་ཅིང་དང་ག་འགག །འོག་གི་མཚོ་འཁྱོམས་དྲན་མེད་ལྐུགས་
སམ་འཆལ། །རྨ་མེད་རུས་པ་ཆག་ན་རེག་པས་མྱང༌། །སྒང་ཤོང་མི་སྙོམས་མནན་ན་བཟོད་
པ་ཆུང༌། །གསུམ་བཞི་འདས་ནས་ཤ་རུས་བྱེ་ཞིང་མེར། །རྨ་ཅན་བརྟག་པ་ཤ་གདན་ཆོད་མ་
ཆོད། །ཤ་གདན་མ་ཆོད་རས་ཚངས་བཅུག་ལ་བརྟག །གསུམ་དང་ལྔ་ཡི་བར་དུ་མདོག་མི་
འགྱུར། །དམར་མཁྲང་རེག་ན་བརྩེ་བ་སྐྱོན་མེད་དེ། །སྐྱ་སྨུག་སྔོ་ནག་རུལ་ན་ཆག་རྟགས་
ཡིན། །ཤ་གདན་ཆོད་ནས་མིག་ལམ་མ་ཐོགས་ན། །ཁབ་མགོ་བཏང་བས་གས་དྲུགས་འཐེན་
དུ་འོང༌། །རུས་པ་རྩི་དང་བྲལ་ནས་རྩུབ་ན་སྐྱོན། །སྲུབས་ཀྱི་སྟེང་དུ་ཁྲེད་ཁྲེད་ཁྲལ་ཁྲལ་འོང༌། །
ལྷ་བ་འཐེམས་སམ་མགོ་ཆག་ཚབས་ཆེ་ན། །ཐུག་ཐུག་བྱས་པས་གོག་སྐད་འོང་བ་ཡིན། །
མིག་ལམ་ཐོགས་ན་གས་ཆག་དངོས་སུ་གསལ། །ལྷ་བ་འཐེམས་ན་ལྷ་ཁྲག་ཙིམ་ཙིམ་འབྱུང་། །
གསུམ་དང་ལྔ་ནས་ཐིག་ལེ་ཁྱེ་མ་ཅན། །དམར་སྔོ་ནག་གྲོ་སེར་སྐྱ་སྨུག་པོ་དང༌། །སྔོ་ནག་
སྐམས་ན་ལྷ་བ་འཐེམས་པ་ཡིན། །འོག་ཆག་སོ་ཞོའམ་བེ་སྣབས་ལྟ་བུར་དཀར། །ཐ་མ་དུང་
གི་མདོག་ཏུ་འགྱུར་བར་བཤད། །སེན་མོའི་མདོག་ལྟར་སྨུག་དང་རུས་སྐྱོན་མེད། །གལ་ཏེ་ཐེ་
ཚོམ་ཟ་ན་སྨན་གྱིས་བརྟག(ཁབ་ལེན་བུལ་ཏོག་ར་ཐུག་ཆུ་ཁྱེ་འཐུང་ནུ་ཞོ་བྱུགས་པས་སྐྱོན་ཡོད་ན་ནག་པོར་འགྲོ་སྐྱོན་
25-1-389


མེད་ན་མདོག་མི་འགྱུར་བའོ)། །ཁ་ཤ་བཞའ་དང་སྦོས་དང་ཉྭ་སྒང་དང༌། །ཕྱིར་ལྷོགས་གསོབ་དང་
སྐམ་རུལ་ཆག་པའི་རྟགས། །ནང་རེ་བཞིན་དུ་རྨ་ཁ་མཐེབ་ཀོར་བྱ། །ཤ་རུས་བྱེ་ཞིང་མནན་
ཤུལ་འོང་བ་དང༌། །གས་སྣ་ཆག་སྣ་བཟོད་པ་ཆུང་བ་ཡིན། །ཤ་རྩ་མ་ཐུལ་བ་ལ་ངེས་མེད་
པས། །ཨ་ས་ལྷིང་ནན་སྤོད་ལུམས་གླད་ཞུན་བྱ། །བྱེ་སྦོས་ན་ཟུག་བྲི་ན་སྐྱོན་མི་འབྱུང༌། །རྩ་ཆུ་
ཕྱི་ཡུལ་སྒོ་ནས་བརྟག་པ་ནི། །རྩ་རྒྱུད་གྲིམས་མགྱོགས་དྲག་དང་ཡང་ན་བཞའ། །ཆུ་དམར་
ཀུ་ཡ་རླངས་ཆེ་སྙི་འམ་སྡོམ། །སྐྲ་ནི་འགྲེང་དང་མཚམས་བྱེ་ཉལ་བ་དང་། །ཀོ་ལེར་ཚོར་མེད་
སྨིན་མ་འཛིངས་པ་དང༌། །མིག་མི་ཐེག་ཅིང་ཆེ་ཆུང་ཡོད་པ་དང༌། །མིག་སྤྲིན་ཁྲག་ཤིག་འོང་
ཞིང་འཛུམ་མི་ཤེས། །སྣ་ཁྲག་འཛག་དང་སྣ་སྐམས་སྣ་གོང་རྔུལ། །ལྕེ་སྐམས་སེར་ལ་ཐོས་
ཀྱིས་དོགས་ལྟར་སྨྲ། །ཟས་ལ་འཇབ་ཞིང་ཡང་ན་ཧབ་ཧབ་རྔམ། །འགྲངས་དང་བཀྲེས་དུས་
ན་ཞིང་ཟོས་རྗེས་སྐྱུག །གཉིད་འཐིབ་ངུར་འཁུན་གཉིད་སད་ཚེ་ན་ན། །འགྲོ་ན་འདར་ཞིང་
འགྱེལ་བུབ་འཁྱོམ་དང་འཇབ། །སྲན་མ་མི་ཆོམས་ཕྲུམ་སེར་ཁྱེར་བ་དང༌། །གཡལ་འདར་བྱ་
རྨྱང་བྱེད་ཅིང་སྦྲིད་པ་མང༌། །མགོ་ལྕི་དང་ག་མི་བདེ་གློ་རྡོལ་བྱེད། །དེ་རྣམས་མགོ་སྐྱོན་ཡོད་
པར་ཤེས་པར་བྱ། །བཅོས་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་བཅོས་བརྔན་པ་བྱིན་
ལ་བྲིད་པ་དང༌། །མཁར་ལ་འོབས་ཀྱིས་བསྐོར་བའི་བཅོས་ཚུལ་དང༌། །གྲོང་ཁྱེར་མེ་ཡིས་
གཞོམ་པའི་ཚུལ་བཅོས་གསུམ། །དང་པོ་བརྔན་པ་བྱིན་ལ་བྲིད་པ་ནི། །མཚོན་ཕོག་སྐྲ་བཞར་
གར་པོ་རྗེན་ཕྱེ་ཞོ། །སྤོད་སྣ་མར་ནག་བཙོས་པའི་ཨ་སས་བདུག །ལྕ་འབྲུམ་གཡེར་མ་གོ་
སྙོད་ཚྭ་དང་ཕབས། །ཆང་འགག་སྦང་མ་དྲོད་ཕབ་འཇིབས་སུ་བཏང༌། །ཁྲག་ངན་ཆུ་སེར་
འཇིབ་ཅིང་རླུང་བྱེར་འདུལ། །ཞུ་མཁན་གླ་སྒང་སྤང་སྤོས་མར་ནག་བསྐོལ། །མཚན་རྡོས་
སྦོས་འཁྱུག་རྩ་འབྲུམ་བྱུང་སྟེང་བདུག །བྱེར་ཆེ་གླད་པ་མར་ཆང་ཚྭ་བཏབ་བཙོས། །ཞུན་གྱིས་
བདུགས་པས་ཤ་རྩ་རེམས་པ་འདུལ། །དང་པོའི་རྨ་རྒོད་ཞུན་མར་ཆང་གིས་དབབ། །ཞག་
25-1-390


གསུམ་ལོན་ནས་རྨ་ལ་འཕུལ་འདྲེན་བྱ། །ཁོང་ནས་འཕུལ་བ་སྨན་དང་ཁ་ཟས་གཉིས། །རླུང་
ཅན་མ་ཡིན་ཞག་གསུམ་བསིལ་དུ་བསྟེན། །དེ་ནས་གསར་བཅུད་རྣམ་གསུམ་རིམ་པས་
བཏང་། །ཐ་མ་མི་ལྡོག་གདེངས་ཐོབ་ཤ་ཆང་སྤྲུག །དེ་ཡིས་ཤ་འཕེལ་ཟུངས་གསོ་སྨན་བཅུད་
སྐྱེད། །ཁོང་སྨན་སྦལ་རྒྱབ་གངས་ཐིགས་གསེར་རྡོ་དང༌། །གུར་གུམ་མི་དོམ་མཁྲིས་པ་ཨ་བི་
ཥ། །ཨ་བྱག་ཆུ་རྩ་བུ་རམ་སྦྱར་བ་བཏང༌། །ཤིན་ཏུ་སྐྱོན་ཆེ་རྡོ་ཡི་རྒྱལ་པོ་བཞི། །ཁབ་ལེན་
འབྲུག་རུས་གསེར་གྱི་བྱེ་མ་དང༌། །འབྲི་ཏ་ས་འཛིན་རེ་རལ་མི་དོམ་མཁྲིས། །གུར་གུམ་ཨ་
བྱག་བྱང་སེམས་དཀར་དམར་རྣམས། །བུ་རམ་སྦྱར་བ་ཆང་གིས་འཕུལ་ལ་བཏང༌། །རྨ་ཡི་
འདྲེན་ལ་རྡོ་རྩི་སྔོ་དང་གསུམ། །རྡོ་སྦྱོར་རྒྱལ་པོ་སྡེ་བཞི་ཟེ་ཚྭ་དང༌། །གུར་གུམ་དོམ་མཁྲིས་ཀ་
རའི་ཕྱེ་མ་གདབ། །ཡང་ན་རྡོ་ཡི་མང་སྦྱོར་ཆེན་མོ་སྦྱར། །ཡང་ན་སྦལ་རྒྱབ་གངས་ཐིགས་ཅུ་
གང་དང༌། །གུར་གུམ་དོམ་མཁྲིས་ཀ་ར་སྦྱར་ལ་གདབ། །རྡོ་སྨན་ཀུན་ལ་འཇུ་རྩི་དར་སྨན་
གཅེས། །རྩི་སྦྱོར་ཚི་བ་ཕྱེ་མ་ཁཎྜ་གསུམ། །ནགས་མའི་ཐང་ཆུས་ལྷ་རུས་བཙོན་དུ་འཛིན། །
ཕྱེ་མ་ག་བུར་ཅུ་གང་གུར་གུམ་དང་། །དོམ་མཁྲིས་ཧོང་ལེན་མཚལ་དཀར་ཀ་ར་སྦྱར། །སྐྱོན་
ཆེ་ཨ་བྱག་ཚེར་སྔོན་དར་ཡ་ཀན། །གོང་ལ་བསྣན་ཏེ་དགུ་སྦྱོར་རྨ་ལ་གདབ། །ཁཎྜ་རི་དང་
ཀླུང་གི་རྟ་པགས་པ། །རེ་སྐོན་དར་ཡ་ཀན་རྣམས་དུས་བཏུས་ལ། །ས་མེད་ཆུ་ཆོད་སྣ་མ་
འཚིག་པར་བཅད། །དེ་གསུམ་སྤྲུགས་ལ་རྨ་ལ་གདབ་པར་བྱ། །ཡང་ན་རྒྱ་ཚྭ་པདྨེ་ལྡོང་རོས་
མཚལ། །ཚ་ལ་སེར་མཚུར་བུལ་ཏོག་སྦྲང་སྦྱར་བཏང༌། །ཡང་ན་ག་བུར་ཅུ་གང་རྒྱ་ཚ་དང༌། །
དོམ་མཁྲིས་ཀ་ར་སྦྱར་བ་གདབ་པར་བྱ། །སྔོ་སྦྱོར་ཚེར་སྔོན་རྟ་པགས་ཨ་བི་ཥ། །རེ་སྐོན་ཆུ་
རྩ་དོམ་མཁྲིས་ཀ་ར་སྦྱར། །གསུམ་འདུས་སྦྱོར་བ་སྦལ་རྒྱབ་མཚལ་དཀར་དང༌། །ག་བུར་
གུར་གུམ་དོམ་མཁྲིས་ཤེལ་ཏ་དང་། །རྟ་པགས་སྟབ་སེང་ཀ་ར་སྦྱར་ལ་བཏང༌། །ཆུ་སེར་
འགྲོངས་ཆུང་མན་ངག་སྨན་(རྒྱ་ཚྭ་བྱང་པ་སྦྲང་རྒོད་)གསུམ་བསྣན། །ཀུན་ལ་སྦང་མ་འཇམ་པོའི་
25-1-391


འཇིབ་ཆས་གཅེས། །ཡང་ན་དངུལ་ཆུ་ཟངས་ཐལ་མུ་ཏིག་དང༌། །སྦལ་རྒྱབ་དོམ་མཁྲིས་ཚ་ལ་
ཨ་བི་ཥ། །རྒྱ་ཚྭ་བྱང་པ་བྲག་སྤོས་རྨ་ཁོང་བསྟེན། །རྩ་འཐུད་ཁྲག་གཅོད་གས་སྦྱོར་ཞོམ་པ་
སྲོང༌། །ཁ་ཞུན་སྦང་སྐོགས་མར་དཀར་ཞོ་བཙགས་ཤིས། །དེ་ལྟར་འཕུལ་འདྲེན་རིམ་པར་
བསྟེན་པ་ཡིས། །དང་ག་བདེ་ཞིང་ཟུག་མེད་ཁམས་སྙིང་སེང༌། །རྨ་ཡི་མདོག་ལེགས་རྣག་
དཀར་འཇམ་པར་བཞེད། །ཁ་ཤ་ཤི་སྨྱོས་སྐམས་སམ་ཤ་རུས་བྱེ། །རྣག་སླ་ཚ་བ་སྐྱེ་ཞིང་དང་
ག་འགག །ཤེས་པ་ལྕི་ཞིང་མགོ་ལུས་ཚུགས་མི་ཐུབ། །གཏིང་སྐྱོན་གཡོས་པ་དྲས་ཀྱིས་རྩད་
ནས་དབྱུང༌། །སྐྱོན་ཐག་ཆོད་ནས་རྨ་ལ་འཚོ་སྨན་(ཅུ་གང་གུར་གུམ་མཚལ་དཀར་དོམ་མཁྲིས་ཤིང་མངར་ཆུ་རྩ་
བྲག་སྤོས་ཚ་ལ་)གདབ། །རྨ་སྐམས་ཤ་འུ་མི་ཆགས་གཤེར་རྩི་(བ་རུ་རའི་རྐང་མར་དང་སྦང་མ་)གདབ། །
རྨ་རློན་ཤ་འུ་མི་ཆགས་སྐམ་རྩི་(ཆུ་རྩ་དང་རེ་བལ་སྣུམ་ལྡན་)གདབ། །ཤ་སྨྱོས་པགས་པ་མི་རྒྱུ་གཅོད་
སྨན་(དོམ་མཁྲིས་ཀ་ར་)གདབ། །རྨ་བཞའ་ཤ་མི་སྐྱེ་ལ་རྨ་སོབས་(ཤ་ཆང་)བཏང༌། །དེ་དག་ཟླུམ་
བཅོས་རྒྱལ་པོའི་བཅོས་ཚུལ་ཡིན། །གཉིས་པ་གྲོང་ཁྱེར་མེ་ཡིས་གཞོམ་པ་ནི། །ཕོག་དུས་
གཉིས་པར་ཆུ་སེར་མི་འདུ་ཞིང༌། །བདུན་འདས་ཁ་ཡན་མེ་ཡིས་ཐུབ་པར་དཀའ། །དེ་ཕྱིར་
གསུམ་དང་ལྔ་པར་བསྲེག་པ་བསྔགས། །གདབ་ཐབས་གས་པ་སྡོམ་པ་གས་སྟེང་དུ། །
འཐེམས་པ་གསེང་དང་བྲོས་པ་འགུགས་པ་གཉིས། །ལྷ་ཁྲག་སྤྲད་ལ་དེ་སྟེང་གདབ་པར་བྱ། །
ཆག་པ་སྦྱོར་བ་རྨ་ཁར་གསུམ་ཚོམས་གདབ། །གདབ་ཚད་ཆུ་སེར་རིམ་པ་(དམར་སེར། དཀར་)
གསུམ་ཐོན་བྱ། །རྨ་མེད་ཆག་ན་དེ་ཡི་སྟེང་དུ་གདབ། །ཀུན་ལ་ཞག་བདུན་བར་དུ་མེ་ལན་རེ། །
དེ་ཡིས་ཆུ་སེར་སྡོམ་འདྲེན་སྐེམས་པར་བྱེད། །གླད་པ་འཛག་དང་དར་རྩ་ཆོད་པ་ལ། །གསེར་
གྱི་ཏེལ་པས་སྣར་ཙམ་བསྲེག་པར་གསུངས། །ཤ་རྩ་པགས་ལ་རུས་རྩ་མར་གྱིས་བསྲེག །ཤ་
བྱེར་འདུས་སོ་གསུམ་དང་རེ་ཐག་བཞི། །ལྟག་རལ་ལྟག་རྩ་ཕྱི་ནང་ལྗོན་ཤིང་མནན། །རྩ་
བྱེར་རྩ་འབྲུམ་གང་བྱུང་སྟེང་དུ་བསྲེག །བྱེར་ཚ་འདུས་སོ་(སྤྱིགཙུག །འཚོགས་མ། ལྟག་མདུད།)གསུམ་
25-1-392


དང་ཆུ་མགོ་གཉིས། །ཨན་སྟོང་རྣ་བའི་མདུན་རྒྱབ་རྣ་ཤལ་འོག །སྤུ་འཁྱིལ་གཉིས་ཏེ་བསྲེག་
དམིགས་བཅུ་གསུམ་མནན། །ནང་རྩ་བྱེར་ན་དྲུག་པ་འཁོར་ལོ་གསུམ། །སྔོན་བུ་དཀར་ནག་
མཚམས་སུ་གསེར་གྱིས་བསྲེག །གཞན་ཡང་སྣ་ཁྲག་མ་ཆོད་སྨིན་དབྲག་བསྲེག །སྐྱིག་བུ་
འབྱམས་ན་ཀོས་ཀོ་སྤྱི་གཙུག་བསྲེག །མིག་ལུག་དེ་ངོས་རྟིང་པའི་འཛུམ་དུ་བསྲེག །གཞུང་
རེངས་ལྟག་དགྱེ་རྩ་ནག་ལྟག་ཆུ་བསྲེག །ལུས་སྦྲིད་ཟ་ཟི་མང་ན་ལྟེ་བ་བསྲེག །སྒྲེག་ཅིང་དང་
ག་འགག་ན་བཅུ་གཉིས་བསྲེག །དྲན་ཉམས་རྐང་བཤལ་རྩ་དཀར་ནང་ལྟར་བསྲེག །ཤ་རོ་
རུས་རོ་དཀར་པོར་སོང་བར་བསྲེག །དེ་དག་མེ་བཅོས་བློན་པོས་བཅོས་ཚུལ་ཡིན། །དྲ་
བཅོས་མཁར་ལ་འོབས་ཀྱིས་བསྐོར་བ་ནི། །དྲ་དུས་གསར་སྐྱོན་གསུམ་དང་ལྔ་ལ་དྲ། །རྙིངས་
སྐྱོན་ནམ་ལོག་སྐྱོན་གྱི་དུས་དང་སྦྱར། །དྲ་ཐབས་རྨ་དེ་སྟེང་བཏོན་སྔས་མཐོར་བཅུག །སྐྱོན་
དང་འཚམ་པའི་དྲེས་ཁོར་བལ་གྱིས་དྲིལ། །བར་མེད་སོར་མོས་ཇེ་དྲག་མནན་པར་བྱ། །
མདོག་ལོག་མཁྲང་དང་སྦྲིད་པར་གྱུར་པ་ཡིས། །དྲ་བ་སླ་ཞིང་ཟུག་ཆུང་ཁྲག་མི་འཆོར། །དེ་
དུས་དྲས་བཙགས་སྲབ་མཁྲང་རྣོ་བ་ཡིས། །ཆག་སྐྱོན་ཆུང་ཞིང་གནད་ལ་ཉེ་བ་ལ། །ཉྭ་རལ་
བོང་མཆུ་བཞི་ཤོར་གར་འོས་དྲ། །ཚབས་ཆེ་མགོ་སྐྱོན་ཉིད་ཀྱིས་སྲོག་འདོར་ཕྱིར། །ཤ་ཆེར་
དྲས་ཀྱང་དེ་ལ་ཉེས་མེད་པས། །སྟ་སྒབ་བསྐོར་ཏེ་ཤ་གདན་བཅས་པར་དྲ། །ཁྲག་ཤོར་སྤྲ་
བའམ་སྤུ་རྩའི་བྲལ་བྲུལ་བརྫང༌། །དར་ཐོག་རྣག་ཤོར་འགྱངས་པའི་ལོང་མེད་པས། །དེ་ཡི་
ཉིན་པར་གསེང་བུག་ཅི་ཐོན་བྱ། །གསར་སྐྱོན་ཤ་གསར་གླད་པ་རྨར་བཅུག་ཅིང༌། །ནང་པར་
བསལ་ལ་རུས་སྐྱོན་གང་འདུག་བརྟག །རྩ་དང་རུས་སྐྱོན་མ་བསལ་ཐེ་ཚོམ་ན། །སྨན་(རྒྱ་ཚྭ་བུལ་
ཏོག་ཚྭ་ཚག་པོའི་ཤ་སྦྱར་ནས་དར་ཅིག་བཞག་པས་རྩ་མདོག་མི་འགྱུར་རུས་མདོག་འགྱུར། ཁྲག་ཡིན་ན་རླངས་པ་འོང་)དང་ཟོ་
ཡིས་རུས་སྐྱོན་རྩ་ཁྲག་(དེ་ལྟེ་བར་བཞག་ནས་བྲུས་པས་མ་འགྱུར་ན་རྩ་ཡིན་འགྱུར་ན་སྐྱོན་ཡིན་པས་སོ་སོར་)དབྱེ། །
བཤང་ཁར་མི་བརྡར་སྐྱིབས་སུ་བཅད་ལ་བྲུད། །ལྷ་བར་སླེབ་ནས་ལྷ་ཁྲག་ཆིར་གྱིས་འབྱུང༌།  །
25-1-393

 
རྣག་སླ་སེར་སྔོ་རླངས་ཆེ་གཅོད་སྡོམ་བྱེད། །གང་བྱུང་སྐྱོན་ཡིན་བྲུད་ཅིང་རྩ་བ་བཅད། །
བརྡར་ན་མེད་ལ་བཞག་ན་ཡོད་པ་དང༌། །ཕྱོགས་རེ་ལྷ་ཁྲག་མེད་ལ་ཕྱོགས་རེ་ཡོད། །ལྷ་
མིག་མ་ཚང་རུས་པ་ཁྱེ་མ་ཅན། །མ་བརྡར་བཞག་ན་ལྷ་བ་སྐམ་བྱེར་འགྲོ། །གསོབ་ཅིང་མང་
སླ་ནག་དང་རླངས་པ་ཆེ། །བཞག་ན་བྱ་ཝང་རྒྱབ་འདྲ་གཤེར་བྱེར་འགྲོ། །དེ་ཕྱིར་བལ་ཡེས་
ཕྱིས་ཤིང་བལྟས་ལ་བྲུད། །རུས་པ་ཉུང་རློན་བཞིན་དུ་རླན་མི་འབྲལ། །ལྷ་ཁྲག་དམར་དྭངས་
ཞག་བཅས་སྙོམས་པར་འབབ། །སྐྱོན་མེད་གསོན་དང་ཕྲད་པས་བྲུད་འཕྲོ་བཅད། །ཆུ་སེར་
དར་ཐོག་ལྷུང་དང་ཆག་སྐྱོན་ཆེ། །དེ་དག་འོག་གདུང་སྦྲང་གཤོག་ཙམ་དུ་བརྡར། །སྲུབས་
ཞིག་ཆིངས་དང་ནན་གྱིས་བསྡམ་པ་གཅེས། །གླད་ཆས་རུས་བཟང་སྦྲང་འདབ་ཁྱབ་པར་
བཞག །རུས་ཚས་ཤ་བཟང་ཁ་ཤའི་འོག་ཏུ་སྦ། །ཤ་ཚས་རྣག་བཟང་མི་ཕྱི་ཆི་རེ་བཞག །རྣག་
ཚས་རླན་བཟང་རྨ་ཆས་རླན་ལྡན་གཡོག །གས་སྣ་རི་ཐང་མཚམས་དང་རྣག་ཆུའི་སྟེང༌། །
གསེང་བུག་བྱེའུ་ནས་ཟན་མིག་ཙམ་དབུག །གླད་མྱུལ་བཏང་ཞིང་རྣག་ཁྲག་ཆུ་སེར་དབྱུང༌། །
དེ་ནས་གསེང་བུག་གྲོ་གའི་འཇིབས་ཚངས་གཞུག །ལྷ་རོ་ཞོ་དང་སྦྱར་བས་ལྷ་མིག་དགང༌། །
ཡང་ན་རྐང་མགོ་མར་སྦྱར་ལྷ་མིག་དགང་། །སྦང་མ་ཞོ་དང་སྦྱར་བས་རྨ་ནང་དགང༌། །སྦང་
མ་ཕབས་དང་ལྡན་པས་ཁ་ཤ་གཡོགས། །ཕྱི་དེ་ནང་པར་ལྷ་སྐྱོན་ཐུན་བུར་བཏུ། །དེ་དུས་ལྷ་
བས་མནའ་བསྐྱལ་ཕྱིར་མི་ལྡོག །སྐྱོན་ཐག་མ་ཆོད་བར་དུ་ཚི་བ་གདབ། །རྨ་ཆས་སྦང་མ་ཞོ་
བཙགས་ཁོ་ན་བཏང༌། །བཟོ་རྫོགས་རུས་པའི་སྐྱོན་ཐག་ཆོད་པ་དང༌། །ཚི་བ་ཕྱེ་མ་ཁཎྜ་
གསུམ་ཕྲུགས་གདབ། །ཡང་ན་ག་བུར་ཅུ་གང་གུར་གུམ་མཚལ། །མི་དོམ་མཁྲིས་པ་འདམ་
བུ་ཀ་ར་གདབ། །ཡང་ན་རེ་སྐོན་རུ་རྟ་བསིལ་གསུམ་དང༌། །དོམ་མཁྲིས་མཚལ་དཀར་ཀ་ར་
སྦྱར་ལ་གདབ། །ཟླུམ་འཆོས་སྐབས་ཀྱི་རྨ་སྨན་གང་ཡང་བཟང༌། །རྨ་ཆས་ཚིལ་བུ་མར་དཀར་
སྦྱར་བའམ། །ཆུ་རྩ་རྗེན་ཕྱེ་ཞོ་མར་ཀར་སྦྱར་བཏང༌། །སྦང་གར་གླད་པ་ཕབས་སུ་སྦྱར་བ་ལ།  །
25-1-394

 
སྤང་སྤོས་ག་དུར་གླས་བྲན་རྨ་ཆས་སྦྱར། །དྲོ་དུས་གྲང་མོ་གྲང་དུས་བསྲོས་ལ་བཏང༌། །བཟོ་
བྱས་ཞག་གསུམ་བཞི་ནས་གླད་པ་ཡི། །ལྡེབས་བཟང་མཐིལ་གྱི་རུས་པ་སྐྱ་ལ་སྨུག །ལྷ་བའི་
མདངས་སྣུམ་ཁ་རྣག་དཀར་ལ་འཇམ། །ཁ་ཤ་མཐོ་མཁྲང་དམར་ལ་སྙོམས་པ་དང༌། །ལུས་
ཡང་ཟས་ཞིམ་ཟུག་མེད་ལེགས་རྟགས་ཡིན། །ཤའུ་རྣམ་(གླད་པའི་ཤའུ་བྱི་ཚི་མིག་ནས་ནུ་མ་འདྲ་རུས་པའི་
ཤའུ་ལྷ་མིག་ནས་ཡུང་ཀར་གཏོར་བ་འདྲ་ཤའི་ཤའུ་དང་ལྷ་བའི་ཤའུ་དམར་ཚེམ་ཐོར་པ་འདྲ་བ་འོང་དེ་ནས་ཤ་ཆང་སྦྲུག་ལ་བཏང་
)གསུམ་ཟམ་ཐོགས་ལྡོག་མི་སྲིད། །སྦང་གར་མར་ནག་བག་ཕྱེ་སྦྱར་བས་གཡོག །རྨ་ཁ་ཟུམ་
ན་རེ་བལ་མར་བཙོས་བརྫང༌། །ཤ་མཛེར་བྱེ་འཁྱིམས་བྱུང་ན་ཐུར་མས་བསྲེག །སྐབས་སུ་
དོམ་མཁྲིས་ཀ་རའི་ཆུ་ཡིས་བཀྲུ། །ཤ་འདྲོགས་ལྷིང་ཚ་གླད་ཞུན་བག་རེ་བཏང༌། །དེ་རྣམས་
དྲ་བཅོས་དམངས་ཀྱི་བཅོས་ཚུལ་ཡིན། །བྱེ་བྲག་བཅོས་ཐབས་ཤ་རུས་གླད་རྩ་བཞི། །ཤ་ལ་
བཤུས་བཤགས་བཅད་བརྡུངས་རྫོགས་པ་ལྔ། །པགས་པ་བཤུས་ན་ཚ་ལ་དུལ་མ་དང༌། །དོམ་
མཁྲིས་བཏབ་པ་སྦྱར་ཏེ་ཧེལ་སྲབ་བཅིང༌། །སྐྱ་སྦྱོར་ཕྱིང་དེབ་སྟེང་དུ་ཆིངས་མས་བསྡམས། །
བཤགས་པ་ཕན་ཚུན་བཅད་པའི་ཡན་མན་དུ། །ཕྱིང་པ་སྦྱར་ཞིང་སྨན་གདབ་སྲད་བུས་
བསྒྲོག །ཞོ་བཙགས་སྦང་གར་སྦྱར་བའི་ཁ་ཞུན་བྱ། །བརྡུངས་ཚབས་ཆུང་བ་ཚན་དོས་ཐུབ་པ་
ཡིན། །ཆེ་ན་ཐུར་མས་བཙགས་ལ་ཨ་སས་བདུག །དེ་རྗེས་ཕྱིང་པ་སྣུམ་ལྡན་གླན་ལ་བསྲོ། །
སྐབས་སུ་མཁྲིས་པ་འོ་མ་སྦྱར་ལ་བྱུགས། །རྫོགས་ལ་སྦང་འཇིབས་བྱ་ཞིང་རུལ་(ཡོང་བ་དུར་
བྱིད་རྨ་ཅན་ཤ་གདན་ལ་བཏབ་)གཅོད་གདབ། །ཆུ་སེར་ཚན་ལངས་མེ་གདབ་རྩ་ཕྲང་བསྡམ། །རྨ་ཡི་
རུལ་གཅོད་ཤ་འུ་གསོ་སྨན་གདབ། །རྨ་ཁ་ཁེངས་ན་རེ་བལ་སྣུམ་བཙོས་བཏང༌། །རུས་པའི་
བཅོས་ཐབས་རྨ་ཅན་རྨ་མེད་གཉིས། །རྨ་མེད་རུས་ཆག་སྐྲ་བཞར་མར་ཚིལ་བྱུག །ཚན་དོས་
བདུག་ཅིང་རེ་བལ་སྣུམ་ལྡན་དཀྲི། །ཡང་ན་སྐྱ་སྦྱོར་དེབ་བཏང་རྒྱ་ཆིངས་བྱ། །ཁོང་དུ་སྟབ་
སེང་ཐང་དང་རྡོ་སྦྱོར་བསྟེན། །ཆུ་སེར་འདུས་ན་མེས་བསྐམ་བརྟོལ་མི་རུང༌། །གོ་ལོག་ཆག་ན་
25-1-395


ཤ་དྲ་རུས་བཟོ་བྱ། །རྒྱ་སྲུབས་ཞིག་ན་རྒྱ་ཆིངས་བསྡམ་པ་གཅེས། །སྲུབས་སྟེང་མེ་གདབ་
ཁོང་དུ་རྡོ་སྨན་བསྟེན། །རྨ་ཅན་གས་རིང་དབུས་སུ་ལྷ་ངོ་སྤྲད། །གས་སྣའི་སྟེང་དུ་མེ་བཙས་
བསྡམ་པར་བྱ། །གས་ཆུང་རྣམས་ལ་སྟེང་གདུང་བླངས་པས་ཐུབ། །སྦོས་ན་འོག་གདུང་
གཏུགས་ལ་གསང་བུག་གཏོད། །གསུམ་གས་བཞི་གས་གས་ཀྱི་ཚོམས་སུ་བརྡར། །སྟེང་ཆག་
སྟེང་གདུང་བླངས་ལ་ལྷ་ཁྲག་སྤྲད། །འོག་ཆག་གྲུམ་པ་རྒྱ་བསྐྱེད་མཐའ་ནས་སྦྱང༌། །མཐའ་
ཡི་ཆག་སྲུབས་རྣམས་སུ་གསེང་བུག་གཏོད། །མཐིལ་རུས་དར་འབྲེལ་བཙན་ཐོན་མི་བྱ་
འགྲམས། །སྨན་གྱིས་རུས་རོ་རང་གོགས་བྱས་ལ་གདོན། །རྡིབ་པ་གོང་མ་སྣ་བཏུད་འོག་མ་
བརྡར། །གཞོམ་པ་མཐའ་དབུས་ཆ་མཉམ་སྲབ་ཏུ་བརྡར། །སྒོང་རྡོལ་མཐའ་ཡི་ཁད་མཉམ་
རུས་ཚབ་གཞུག །ཤའུ་ཆགས་ནས་འཕར་གནོན་འབྲོས་འདེད་གཅེས། །ཟམ་ཐོགས་འཕར་
གནོན་ཕྱུངས་ལ་རྨ་གསེབ་བཏང༌། །འཐེམས་པ་ལྷ་བ་སྟེང་བླང་གསོན་དང་སྤྲད། །ལྷ་བ་
འཐེམས་ཚབས་ཆེ་ན་འོག་ལ་གཏུག །ཤ་མེད་རུས་པ་ཐེར་པོ་ལྷ་ཁྲག་སྤྲད། །གཞོགས་དང་ཝ་
ལུང་ལྷ་ཁྲག་སྤྲད་པས་ཐུབ། །བཤོལ་བརྐོས་འགྲམས་སྦྱར་བཅད་པ་གས་དང་འདྲ། །དེ་
བཞིན་རྫོགས་པ་གྲུམ་པ་ལྟ་བུར་བཅོས། །གཏམ་ཟུག་ཐ་མའི་རུས་པ་ནས་གང་བཞག །དེ་ཕྱི་
འོབས་སུ་བྲུས་ལ་གསེང་བུག་གཏོད། །རུས་མཛེར་མདེའུར་བཅས་པ་ག་ལེ་དབྱུང༌། །གླད་
པའི་འཚོ་ཐབས་མཚོ་འཁྱོམས་སྤྲི་བཙན་དང༌། །དར་རལ་ཕུག་དང་རྫོགས་ནས་ལུག་པ་ལྔ། །
མཚོ་འཁྱོམས་རྒྱ་ཆིངས་བསྡམས་ལ་རྡོ་སྦྱོར་བསྟེན། །གླད་པ་སྨན་སྒ་བུ་རམ་སྦྱར་ལ་བཏང༌། །
སྒོ་གསུམ་མེས་མནན་རྗེས་ལ་སྨན་མར་སྦྱར། །རུས་མཛེར་སྤྲི་བཙན་གུར་གུམ་ཆིག་ཚུགས་
གདབ། །ཁྲག་དབལ་ཆགས་ན་རྒྱ་ཚྭའི་ཕྱེ་མས་བཞུ། །སྔོའམ་རྣག་ཤ་རུལ་ན་(ཤུ་དག་གླ་སྒང་རུ་རྟ་
དོམ་མཁྲིས་རྒུ་དྲུས་མཚལ་ཟངས་གཡའ་ཛཱ་ཏི་སུག་སྨེལ་ཕབས་ཨ་རུ་རའི་)གཅོད་སྨན་གདབ། །རུལ་གཅོད་དར་
ཡ་ཀན་ནམ་གུར་གུམ་མམ། །ག་བུར་ཅུ་གང་གུར་གུམ་དོམ་མཁྲིས་གདབ། །གླད་སྤྲི་མེར་
25-1-396


མེར་སྦོས་ན་ཆུ་སེར་བཙག །དར་འོག་གླད་པའི་སྟེང་དུ་རྣག་ཞུགས་ན། །གསེར་གྱི་བཙགས་
བུས་ཕྱུངས་ལ་སྡོམ་སྨན་(མུ་ཏིག་དོམ་མཁྲིས་གི་ཝཾ་གུར་གུམ་འོ་མ་འཛིན་འོམ་བུའི་བར་ཞུན་བུ་རམ་ནུ་ཞོ་དར་ལ་
བྱུགས་ལ་གླན་)གདབ། །དར་རལ་དེ་བཞིན་ཡང་ན་ག་བུར་དང༌། །དོམ་མཁྲིས་བཅད་འབྱོར་ནུ་
ཞོ་བྱུགས་ལ་བརྫང་(དར་ལ་སྨན་བྱུགས་ནས་དགབ། སྟེང་དུ་ཞ་ཉེས་མནན། དེའི་སྟེང་དུ་ཆུ་རྡོས་མཐོ་བར་མནན། ཐ་མར་
ཞོ་བཙགས་བཏང༌། དེ་སྟེང་ཕྱིང་པ་མར་བཙོས་བཏང་ལ་དམ་དུ་དཀྲི)། །ཡང་ན་སྦལ་རྒྱབ་བདུད་རྩི་(རི་བོང་གི་ཆུ་
དང་ཆ་ག་རའི་ཁ་ཆུ་)དཀར་སྨུག་གཉིས། །རེ་རལ་འབྲི་(བ་རུ་རའི་སྙིང་པོ་)རྐང་མེ་ལོང་ཐལ་བ་དྲུག །
གླད་པ་འཛག་པ་གཅོད་ཅིང་རྒྱ་ཡིས་འདེབས། །ཡང་ན་བྱ་ཡི་ཟེ་ཁྲག་མུ་ཏིག་དང༌། །བྱང་
སེམས་དཀར་དམར་བོང་བུ་ག་མ་ཡི། །འོ་མ་མེ་ལོང་གཡའ་དང་སྦྱར་ལ་བྱུག །ཕུག་ནས་
མདེའུ་མེད་ན་གླད་ངན་ལྡུགས། །གླད་བཟང་རང་སར་འཁྲིགས་ནས་ཆུ་མི་འབྱུང༌། །འབྲིང་
ལ་དྭངས་སྙིངས་བྱེ་ནས་གླད་ཆུ་འབྱུང༌། །དེ་ལ་མཚོན་ལམ་རིང་ཐུང་རྒྱུས་མདེས་བརྟག །ཚད་
དང་ལྡན་པ་ཞ་ཉེའི་ཐེམ་བུ་(རྩེ་མོ་དང་ཕྱོགས་བཞིར་བུག་པ་རྒྱ་ཁབ་མིག་ཙམ་ཕུག་ལ་སོར་གཅིག་ཕྱི་ལ་ཉུག་གེ་ཡོང་བ་
བྱས་ལ་)བཙུགས། །དྭངས་སྙིངས་འབྱེད་ཅིང་རྒྱ་ཡིས་འདེབས་པའི་སྨན་(སྦལ་རྒྱབ་གངས་ཐིགས་བེ་
སྣབས་གྲུ་བཞི་འབྲི་རྐང་དོམ་མཁྲིས་གི་ཝཾ་གུར་གུམ་ཁུར་ཞོ་བྲག་སྤོས་མེ་ཏོག་ཕྲེང་བ་ཉེ་ཤིང་བུ་རམ་སྦྱར་བ་ཁོང་དུ་བཏང༌། རྨ་
ལ་སྒོ་ང་བཙུགས་ལ་མཐའ་ཟན་དྲོན་གྱིས་བསྐོར། འབྲི་མར་སྦུ་སྙིགས་ཕྱུངས་པ་དང་སྨན་སྦྱར་བ་བླུག་ལ་ཏེལ་པས་བསྐོལ། ནང་
དུ་དྲོ་བ་སྙམ་བྱེད་ན་འཕྲོ་བཅད། ནང་ནུབ་གཉིས་བསྟུད་ཀྱིན་བྱ)། །རྨ་རུ་བསྐོལ་ཞིང་ཁོང་དུ་བསྟེན་པར་བྱ། །
དེ་འོག་འཛག་གཅོད་སྨན་གྱིས་(ཁྱི་གུ་མིག་མ་ཕྱེ་བ་རེའུ་མས་མ་ལྡགས་པ་ཅོ་ག་ཟེར་མོ་རྣམས་ཀྱི་གླད་པ་ཆུ་ལ་
འབྱོངས་པར་དཀྲུགས་ལ་དྭངས་མ་གྲིབ་སྐམས་བྱས་པ་དང་སྦལ་རྒྱབ་ཁབ་ལེན་རྡོ་མཁྲིས་ག་བུར་ཅུ་གང་འབྲི་རྐང་ཛཱ་ཏི་མེ་ཏོག་
ཕྲེང་བ་བྲག་སྤོས་དོམ་མཁྲིས་མཁྲིས་ཆེན་མར་ལ་བསྐོལ་བ་དེས་)རྨ་རུ་བསྐོལ། །ཚེག་སྒྲ་མེད་ན་རྒྱ་ཡིས་ཐེབས་
པ་ཡིན། །མདེ་ཡོད་གཉི་བ་རིང་ན་སྐམ་པས་བསྲོ། །ལྕགས་གཡའི་དྲོད་ཀྱིས་གླད་པ་སྡོམ་
པར་བྱེད། །ཐ་མར་གསང་གཏོད་ནང་དུ་འདྲེན་སྨན་གདབ། །དུས་ལ་བབ་ནས་མདེའུ་ཕྱུངས་
25-1-397


ཤུལ་དུ། །མཚོན་དང་མཐུན་པ་ཞ་ཉེའི་ཐེམ་བུ་ལ། །གློ་སྐར་ཁ་སྒྱེར་ལྡན་བྱས་དུག་ཕྱུངས་ཏེ། །
རྩི་སྨན་གསོན་གཤིན་མཚམས་སུ་སླེབ་པར་བསྐྱལ། །ཐེམ་བུ་རུས་པའི་བར་དུ་གྲོ་གས་
བསྡམ། །ཐེམ་སྔས་ཐེམ་ཐག་ཐེམ་ཚངས་ལྡན་པར་བྱ། །ག་བུར་མུ་ཏིག་དོམ་མཁྲིས་བཅད་
འབྱོར་དང༌། །ཀ་ར་ནུ་ཞོ་སྦྱར་བ་ཐེམ་བུར་བླུག །ཐེམ་སྟེང་དར་དགབ་རྨ་ཆས་རྫི་ཁབ་གཡོག །
རྣག་ཉུང་ཤ་འུ་སྐྱེ་དྲག་ནང་དུ་གཟེར། །ནང་མ་རེ་བཞིན་ཐེམ་བུ་ཉམས་སྦྱར་བསྟུད། །ལྕི་ལ་
ཚ་བ་སྐྱེ་ཞིང་དང་ག་འགག །ཆུ་སེར་ཕུགས་སུ་ལས་པས་ཐེམ་བུ་བསྲིང༌། །གླད་མཛེར་སྐྱེས་
ན་གཅོད་སྨན་ཐེམ་བུར་འབུད། །ཡང་ན་འཁར་བའི་ཐུར་མས་བསྲེག་པར་བྱ། །ཐེམ་བུ་མི་
འདོད་རྣག་ཆུ་སླ་དུས་དབྱུང༌། གླད་པ་ཤ་འུས་ཁེངས་ནས་མ་བདེ་ན། །གཏིང་རྣག་ལུས་པས་
བསྲེགས་ལ་རྣག་ཆུ་གདོན། །རྫོགས་ནས་ལུག་པ་དར་རལ་བཅོས་དང་གཅིག །ཀུན་ལ་ཁོང་
སྨན་སྟང་ཟིལ་འབྲུག་རུས་དང༌། །སྦལ་རྒྱབ་ལིག་བུ་མིག་དང་ཕག་མགོ་རྣམས། །ཆུ་འཐགས་
བྱས་ཏེ་བུ་རམ་སྦྱར་ལ་བཏང༌། །ཨ་བྱག་ཤེལ་ཏ་སྤྱི་ཞུར་རེ་སྐོན་དང༌། །ཧ་འུ་པ་(རྩི་མར་རྐང་ཅིག་)
པ་སྨུག་ཆུང་(ལྡན་ཡོན་)རྩི་བཞིན་བཏགས། །སྦྲང་སྦྱར་བཏང་ཞིང་ཆགས་སྤྱོད་དྲག་ཤུལ་དང༌། །
རུལ་སྐྱུར་སྔོ་ངད་འཇིག་ཟས་སྤང་བར་བྱ། །ཁ་ཞུན་མཁྲིས་སྣ་སྒོང་མར་སྦྱར་ལ་བཏང་། །
ཤའུ་མི་ཆགས་གཡུ་མཆོང་བྱུ་རུའི་མདོག །སྤྲི་མེར་ཆེ་ཆུང་འབྲིང་པོ་བསིལ་དུ་བཅོས། །སྔོ་
དམར་གྲུ་གསུམ་འདྲ་ན་རྩ་རྒྱས་གཏར། །ཁྲག་དང་ཆུ་སེར་གླད་དུམ་ཇེ་མང་འཛག །བླབ་
འཆོལ་སྨྲ་ཞིང་དབང་པོ་ལོག་པར་འཛིན། །ཚ་བ་སྐྱེ་ཞིང་སྐོམ་སྙེག་དང་ག་འགག །རྩ་ཤེད་
ཤོར་ན་མི་ཐུབ་འཆི་བ་ཡིན། །འཛག་པ་ཆོད་ནས་དམར་ནི་སྦུ་གེ་བྱས། །ཆུ་རྩ་ཁུ་བ་འདྲ་བའི་
གླད་ཆུ་འོང༌། །ཁམས་བདེ་ཟུག་ཆུང་དང་ག་བདེ་ན་འཚོ། །སོས་ནས་རྨེན་ཆགས་མི་ལྡོག་
བརྟན་པར་བྱ( དར་ཡ་ཀན་དང་ཚིལ་བུ་བྱུགས་འབྲུ་སྣའི་ལུམས་བྱ་འབྲས་བུའི་སྨན་མར་སྦྱར)། །རྩ་བཅོས་པ་ལ་ཤ་
རུས་གླད་པ་གསུམ། །ཤ་རྩ་ཆོད་ན་རྩ་རྒྱུད་གོང་འོག་བསྲེག །ཐར་ནུ་སྒོང་ཐོག་སྤྲུ་རྩ་ཞོ་སྦྱར་
25-1-398


བརྫང༌། །སྤྲུ་རྩ་ཞོ་དང་སྦྱར་བས་རྨ་ཆས་བྱ། །འཁྱུག་འཕྲེང་རྩ་འབྲུམ་སྟེང་དུ་ཚན་དོས་བདུག །
གཏར་དང་མེ་བཙའ་གང་དགོས་རིག་པས་དཔྱད། །རུས་རྩ་མདུང་ཚུགས་ཆོད་ན་ཏིལ་
དཀར་པོ། །གླ་རྩི་དོམ་མཁྲིས་ཞོ་སྤྲིས་རྩ་མགོར་བསྐུ། །རྒྱུ་རིང་བཀབ་ལ་ཟངས་ཏེལ་འོད་
བསྲེགས་བདུག །ཡང་ན་ད་ཏྲིག་རྒུན་འབྲུམ་སྤང་བསྐུས་བསྲེག །འཕྲེད་ཉལ་འཁྱམས་པོ་
འབྲི་རྐང་བདུན་གསུམ་དང༌། །མོན་ཆ་ར་དང་དོམ་མཁྲིས་སྒོག་སྐྱ་སྦྱར། །ཀུན་ལ་དོམ་མཁྲིས་
ལི་ཤི་དར་ཡ་ཀན། །ཁྲག་(བྱེའི་ཟེ་ཁྲག་མངལ་ཁྲག་)གཉིས་མཚལ་དཀར་རིལ་བུ་རྨ་ལ་གླན། །ལེབ་
རྒལ་མར་དུ་བཙོས་པས་སྟེང་ནས་མནན། །ཡང་ན་ག་བུར་ཅུ་གང་གུར་གུམ་དང༌། །གི་ཝཾ་
འབྲི་རྐང་དོམ་མཁྲིས་འགྲོན་ཐལ་དང༌། །སྤྲུ་རྩ་རམ་པའི་སེའུ་དུ་(སྙི་མ་ནག་མོ་བ་གོལ་)བ་གཉིས། །
སྔོ་ཁྲག་ཆོད་དང་ནུ་ཞོ་སྦྲང་སྦྱར་གླན། །མེ་ཏོག་ཆགས་ན་རྩ་ཁ་ཟིན་པ་ཡིན། །དབུགས་སྡོམ་
སྐད་དྲག་དྲི་མ་འཚིར་བ་སྤང༌། །ནད་ཤོར་བཟུང་བ་སྦལ་རྒྱབ་རེ་རལ་དང༌། །བྲག་སྤོས་སྦྲང་
རྩི་སྦྱར་བ་ཏེལ་པས་བསྲོ། །ཡང་ན་རྒྱ་ཚྭ་བྱང་པ་དོམ་མཁྲིས་གླན། །རྩ་མཉེན་བྱ་ལ་དཀར་
(ཏིལ་དཀར། སྤང་རྒྱན་དཀར། ཁྱི་ལྕེ་དཀར་)གསུམ་ཞོ་སྤྲིས་སྦྱར། །རྩ་མགོར་བསྐུས་ལ་རྒྱུ་རིང་སྟེང་དུ་
བསྲོ། །གླད་རྩ་ཆེན་པོ་ཆོད་ན་བཅོས་སུ་མེད། །རྩ་ཕྲན་ག་བུར་གུར་གུམ་མི་དོམ་མཁྲིས། །བུ་
རམ་སྦྱར་བ་གླན་སྟེང་ཏེལ་པས་བསྲེག །རྒྱ་རྩ་འགྲམས་ན་གཏར་ལ་བསྲེག་པ་དང༌། །སྣ་
ནས་(རྒྱ་ཚྭ་བྱང་པ་ལྡུམ་བུ་རེ་རལ་སྡིག་སྲིན་མཚལ་ཨ་རུ་ར་ཉི་དགའ་པི་པི་ལིང་དྲི་ཆུ་སྦྱར་བས་)སྦྱང་ཞིང་སྣ་ཁྲག་
དབྱུང་བར་བྱ། །ཕྱི་ནང་ཆུ་རྩ་བཅད་བརྡུངས་རྩ་དཀར་ལྟོས། །རྡོ་བཞི་མཁྲིས་བཞི་རྩི་བཞི་སྔོ་
སྣ་བཞི(རྡོའི་རྒྱལ་པོ་སྡེ་བཞི་མི་དོམ་བྱ་རྒོད་ཉ། ག་བུར་ཅུ་གང་གུར་གུམ་ཙན་དན་དམར་པོ། དར་ཡ་ཀན་སྟག་ཤ་འདམ་བུ་ཀ་
ར་སྤང་རྩི་དོ་བོ་)། །རིལ་བུ་ལྡེ་གུ་ཞོ་སྦྱར་ཁོང་དུ་བཏང༌། །རྩ་ནད་ཀུན་ལ་བདུད་རྩི་ལྟ་བུ་ཡིན། །
རྩི་གསུམ་སྔོ་གསུམ་(གུར་ཀུམ་དོམ་མཁྲིས་སྤྲུ་འབྲུ། གཉན་ཐུབ་རྟ་མིག་སྤྱི་ཞུར་)ཁོང་ནས་སྡོམ་པའི་མཆོག །
ཟུག་ཆེ་བླབ་འཆོལ་སྨྲ་ལ་ཁྲག་མི་ཆོད། །ཡང་ན་སྣ་བུག་ཧར་གྱིས་སྐམས་ན་འཆི། །ཁྲག་
25-1-399


ཆོད་རྩ་ཟིན་མེ་ཏོག་ཆགས་ན་འཚོ། །བཞི་པ་བཅོས་རྗེས་ལོག་གནོན་བསྟན་པ་ནི། །གདོན་
དང་དཔྱད་ལྷག་ཟས་སྤྱོད་ལོག་པ་ཡིས། །ཤ་ལ་བཞའ་ཁྲོས་བྱེར་བ་གསུམ་དུ་འགྱུར། །རུས་
ལ་སྐམ་བྱེར་གཤེར་བྱེར་གཉིས་སུ་འགྱུར། །རྩ་ལ་བྱེར་དང་ཁྲིད་པ་གཉིས་སུ་འགྱུར། །གླད་
སྐྱོན་བཞའ་སྦོས་སྨྱོ་ལྐུགས་བཞི་རུ་འགྱུར། །ལྡོག་རྟགས་དང་པོ་རླུང་གིས་སྣ་འདྲེན་པས། །
གཡལ་འདར་རྨྱང་སྦྲིད་གྲང་ཤུམ་བྱེད་པ་དང༌། །མགོ་ལུས་ལྕི་ཞིང་རྔུལ་མང་དང་ག་འགག །
སྐོམ་སྙེག་ཚིག་པ་ཟ་ན་ལྡོག་པའི་རྟགས། །ཤ་བཞའ་རྨ་སྐམ་མདོག་སྐྱ་ཁ་ཤ་ཤི། །ཨ་སས་
བདུག་ཅིང་ཁོང་ནས་ཟས་སྐོམ་བརྡེག །སྦང་མ་ཤུལ་ཚིལ་སྤོད་སྣ་ཆང་བཙོས་གླན། །ཤ་སྨྱོ་
སེར་སྨུག་རྨ་ཁ་མཐོ་བར་འོང༌། །ཁྲག་དབྱུང་ག་བུར་ཆུས་བཀྲུ་ཀ་ར་གདབ། །རྨ་ཁོང་གཉིས་
ཀ་བསིལ་གྱིས་བཅོས་པར་བྱ། །བྱེར་ལ་སྐྱི་བྱེར་བ་དང་ཤ་བྱེར་གཉིས། །སྐྱི་བྱེར་ཤ་པགས་བྱེ་
ཞིང་ཆུ་སེར་འཛག །བུལ་ཏོག་ཆུས་བཀྲུས་མེ་མེད་དུ་(སྙི་ནག བ་གོལ། དུད་པ་བྱ་བལ་མ་)བ་གསུམ། །
ཆུ་རྩ་མར་དཀར་ཞོ་སྤྲིས་སྦྱར་བས་བྱུག །ཤ་བྱེར་དང་པོ་རྨ་ཡི་ཐོ་སྐོར་སྐྲངས། །དེ་རྗེས་
སྲུབས་སྣ་རྩ་མཁྲང་སྐྲངས་འགྱུར་ཏེ། །ཐ་མར་མགོ་ཀུན་སྐྲངས་འགྱུར་ཤ་རུས་འབྱེ། །མ་
བཅོས་ནང་དུ་ཐིམ་ནས་བྱེར་ཁྲིད་འབྱུང༌། །དེ་ལ་ཐུར་མས་བཙགས་ལ་ཨ་སས་བདུག །གླད་
སྣ་ཚྭ་སྦྱར་སྤོད་བསྲོས་ཞུན་དུ་གཞུག །ཡང་ན་རྩ་བ་བཞི་ཡི་(ལྕ་བ་འབམ་པོ་སྤྲུ་རྩ་ཏང་ཀུན་རྩ་བ་ཕབས་དྲི་
ཆུ་སྦྱར་ལ་བསྲོས་པའི་)ལུམས་ཀྱིས་བདུག །རྩ་འཕྲེང་མེས་བསྡམ་སྐྱ་སྦྱོར་སྤུ་དེབ་བཏང་། །སྲུབས་
སྟེང་ཕྱིང་པས་མནན་ལ་ཆིངས་ཀྱིས་བསྡམ། །རུས་པ་སྐམ་བྱེར་སྤ་བཅད་ལྟ་བུ་དང༌། །མེས་
འཚིག་བྲག་ལྟར་བྱེར་བ་རྣམ་པ་གཉིས། །བད་རླུང་གྲང་བས་བྱེར་ན་སྤ་བཅད་འདྲ། །ལྷ་ཁྲག་
སྤྲད་ལ་སྨན་གྱིས་(ཅུ་གང་གུར་གུམ་ལི་ཤི་བྱའི་ཟེ་ཁྲག་མི་དོམ་མཁྲིས་པ་ཛཱ་ཏི་འོ་མ་འཛིན་པ་སྦྱར་ལ་བཏབ་པས་)ལྷ་བ་
བཟུང༌། །ཁོང་དུ་རྟ་པགས་(རི་རླུང་གི་ཆང་དང་སྦྱར་ལ)གཉིས་བཏང་(ལུག་གི་རྐང་མགོ་རྒུན་འབྲུམ་བུ་རམ་མར་
བརྫང༌། །ཡང་ན་རུས་པ་ཆང་བཙོས་གླན་ལྷ་ཞོ་བེ་སྣབས་རྡོ་མཁྲིས་དོམ་མཁྲིས་རེ་རལ་ཁུར་ཞོ་ཅུ་གང་སྦྲང་གི་ལྡེ་གུ་བྱུགས་པས་)
25-1-400


རུས་ཁུགས་བྱ། །ཤ་གསར་ཆང་གསར་ལྷ་བའི་མེ་དྲོད་སྐྱེད། །མེས་འཚིག་བྲག་ལྟར་བྱེད་ན་
ཚ་བ་ཡིན། །ག་བུར་རྒྱལ་བློན་བཞི་(ག་བུར་ཅུ་གང་གུར་གུམ་ཧོང་ལེན་ཀ་ར། ཡང་ན་ཙན་དན་སྨུག་པོ་ཧོང་ལེན་
སྣུར་བ་ར་ཞོ་སྦྱར་ལ་བྱུག)དང་ཙན་དན་(སྨུག་པོ་རྡོ་རྒྱུས་ཅུ་གང་ཛཱ་ཏི་གུར་གུམ་རུ་རྟ་མཁྲིས་ཆེན་ནུ་ཞོ་སྦྱར་བ་བྱུག་གོ)
བདུན། །རྨ་ལ་བཏབ་ལ་བསིལ་བའི་ཆས་སུ་གཞུག །ག་བུར་རྒྱལ་བློན་གསུམ་པ་ཁོང་དུ་
བཏང༌། །རྩེ་ཆུང་གཏར་ཞིང་ཟས་སྐོམ་བསིལ་དུ་བྱ། །མ་ཁུགས་ཁྲག་བཀུག་རུས་པ་བཅད་
ཕུགས་བྲུད། །སྐམ་བྲོས་འགུགས་པའི་སྨན་བརྒྱད་(ཅུ་གང་གུར་གུམ་ལི་ཤི་དོམ་མཁྲིས་ག་དུར་འོ་མ་འཛིན་ཀྱི་
ལྕེ་བྱའི་ཟེ་ཁྲག་བུ་རམ་ལ་གཞི་བླངས་ལ་)ལྷ་སྟེང་གདབ། །(རྐང་མགོ་དཔྱི་སེར་བ་)རུས་གསུམ་མར་ཚིལ་
བསྲེས་ལ་ཁ་ཤ་གཡོག །(བུ་མོ་ལོ་ཉི་ཤུ་ལོན་པ་ལུག་གཡག་གི་གསོན་)ཁྲག་གསུམ་བུར་རྙིང་སྦྱར་བ་ལྷ་
སོབས་བཏང༌། །གཤེར་བྲོས་བ་རྒན་ཁ་ཆུ་ལྟ་བུ་དང༌། །ཞིང་ཐག་ལངས་པ་ལྟ་བུར་བྱེར་བ་
གཉིས། །ཤའུ་སྐྱེ་དྲག་གཙེས་ན་ཁྲག་ནག་འོང༌། །ཅུང་ཞིག་བཞག་ན་བྱ་ཝང་རྒྱབ་ལྟར་འགྱུར། །
བ་ཡི་ཁ་ཆུ་འདྲ་ལ་རུས་སྦལ་སྙིང༌། །དོམ་པ་ལ་དང་རྩངས་པའི་གླད་པ་གདབ། །ཕྱི་ནས་(གོ་
སྙོད་ལྕམ་འབྲུམ་སྦང་ཉེ་མར་ནག་གི་)དུགས་བྱ་ཁོང་དུ་སྡུད་སྨན་(གསེར་མདོག་ན་ལེ་ཤམ་བུ་རམ་ཆང་སྦྱར་)
བཏང༌། །དེས་མ་ཐུབ་ན་རྨ་ལ་འདྲེན་རྩི་(རྒྱ་ཚྭ་གཙོད་ཁྲག)གདབ། །སྦྲང་ཆང་བཏང་ཞིང་མགོ་ལ་
སྨན་(རུ་རྟ་བྲག་སྤོས་པི་པི་ལིང་མར་ནག་)གྱིས་བྱུག །དེས་མ་ཁུགས་ན་བྲུད་ལ་སྦལ་ཁྲག་(ཡང་ན་རྒྱ་ཚྭ་རུ་རྟ་
ཤུ་དག་དབྱི་མོང་གདབ། ཚིལ་ནན་སྤོད་ནན་བྱ་)གདབ། །ཐག་ལངས་ཁོང་དུ་ཚས་བཏང་ཨ་སས་བདུག །
གསོན་དང་སྤྲད་ལ་དགུ་སྦྱོར་ཁཎྜས་བཟུང་། །ཡང་ན་གཉིས་ཀར་ལྷ་བ་གསོན་དང་སྤྲད། །
གཤེར་བྲོས་འགུགས་པའི་སྨན་(རྒྱ་ཚྭ་ཁ་རུ་ཚྭ་གུར་གུམ་དོམ་མཁྲིས་འོ་མ་འཛིན་སྦྲང་བུ་རམ་)བདུན་ལྷ་སྟེང་
གདབ། །ཚལ་ནན་སྤོད་ནན་བྱ་ཞིང་བྱེ་སྟེང་བསྲེག །འབྲེང་བུ་འདོམ་རྩ་གཏར་ཞིང་ཡེན་ལ་
གཏད། །ཁྲ་བོར་བྱེར་ན་རྨ་ནང་སྡུད་སྨན་(རུས་པ་རྔུལ་ཙིག་ཙིག་བྱེད། ཕྱིས་ན་ཆུ་སེར་མི་རྙེད། །དེ་ལ་རེ་རལ་ཅུ་
གང་འོམ་བུའི་མེ་ཏོག་མངར་གསུམ་འབྲི་མར་སྦུ་སྙིགས་ཕྱུངས་པ་དང་སྦྱར་ལ་)བསྐོལ། །རྡོ་དགུ་རྩི་གསུམ་སྔོ་ལྔ་
25-1-401


(ཆིག་ཐུབ་གཉིས་སྦལ་རྒྱབ་གཉིས་གྲུ་བཞི་ཅོག་ལ་མ་རྡོ་གླད་བེ་སྣབས་བྱེ་མགོཅུ་གང་གུར་གུམ་གི་ཝཾ། རེ་རལ་བྲག་སྤོས་འབྲི་
ཏ་ས་འཛིན་ཀྱི་ལྕེ་ལུག་མིག་)བུ་རམ་སྦྱར། །ཁོང་དུ་བཏང་བས་ལྷ་བའི་བྱེར་ཀུན་འགུགས། །ལྷ་བྲོས་
ལྷས་མི་སླེབ་ན་དེ་རྒྱུ་གསུམ། །ལེགས་པར་བརྟགས་ལ་སོ་སོའི་སྐྱོན་དང་དབྲལ(ཡང་ན་དར་ཐོག་
ཏུ་རྣག་ཞུགས་པས་འདོན། ཡང་ན་ལྷ་རྩ་ཤོར་བས་མར་གྱིས་བསྲེག །ཡང་ན་ཤ་རུས་སྐྱོན་རྒྱ་ཆེར་ཡོད་པས་ཤ་ཤུན་དབྱེ)། །ལྷ་
མིག་རྣག་གིས་གང་ན་སྔོ་ལ་སོབ། །ཇི་ཙམ་བྲུད་ཀྱང་ལྷ་ཁྲག་སྐམས་ནས་མེད། །ཤེད་ཆུང་
གྲང་འདར་དང་ག་འགགས་ན་འཆི། །བྲོས་ཁུགས་རླན་རྙེད་ཤའུ་སྐྱེས་པ་དང༌། །ཁ་ཤ་དམར་
འདྲུབ་ནད་ཟོ་བདེ་ན་འཚོ། །གལ་ཏེ་རུས་པ་འཁྲུན་མ་ཆོད་གྱུར་ན། །ཤ་རུས་བར་ནས་ཤའུ་
ལྕེ་ཐབས་སྐྱེ། །ཁ་ཤ་དྲེའུ་ཉྭ་སྒང་འབྱུང་བ་ཡིན། །ཤ་དྲལ་རུས་མཛེར་ཕྱུངས་ལ་ཆགས་སྨན་
(མངལ་ཁྲག་རྒུ་དྲུས་དོམ་མཁྲིས་གསུམ་)གདབ། །བཟོ་ལྷག་ལུས་ན་ཀྱོང་བུས་ཆོད་པར་བྲུད། །རྩ་སྐྱོན་
བྱེར་ལ་ཤ་རུས་གླད་རྩ་གསུམ། །ཤ་རྩ་བྱེར་ན་སྐེ་མཇིང་འགྱུར་བ་དཀའ། །འཁྱུག་ཅིང་སྐྲངས་
ལ་ཟུག་ཆེ་གཟེར་བ་ཡིན། །རྩ་སྟེང་མེས་མནན་ལུམས་སྣ་གསུམ་(མེ་ཏོག་སྣ་ཚོགས་བདུད་རྩི་ལྔ་འབྲུ་སྣ་
ལྔ་)གྱིས་བདུག །རུས་རྩ་བྱེར་ན་ལྷ་བ་བྲོས་པ་ཡིན། །དེ་ལ་སྨན་དང་མར་སྦྱར་ཏེལ་པས་
བསྐོལ། །གླད་རྩ་བྱེར་ན་ཆུ་སེར་དར་ཐོག་ལྷུངས། །རྨ་དང་སྣ་སྒོ་ཆུ་ལམ་ཆུ་སེར་(རྒྱ་ཚྭ་ཁ་རུ་ཚྭ་ཟེ་
ཚྭ་གསུམ་བྱང་པ་ཉ་ཕྱིས་དོམ་མཁྲིས་གསུམ་ནད་མ་ཚེར་སྔོན་ཨ་བི་ཥ་གསུམ་སྦྱར་ལ་)དྲང༌། །མ་ཐུབ་རུས་མཐོངས་
ཕྱེ་ལ་རྣག་ཆུ་འདོན། །འཐོར་ན་གསོ་དཀའ་གཅིག་ཏུ་འཁྱིལ་ན་འཚོ། །དར་བཙགས་རྣག་
ཕྱུངས་རྗེས་ལ་གསོ་སྨན་གདབ། དར་སྟེང་ཆུ་སེར་ལྷུང་བའི་རྟགས་ལྡན་ཞིང༌། །རྨ་མེད་
གཞན་དུ་རྒྱུན་དུ་ཐིག་ལེར་ན། །དོགས་སར་སྐྲ་བཞར་ཆུ་ལྕག་རྒྱབ་པ་ཡིས། །རླངས་དང་དྲོད་
ཆེ་མནན་ན་གང་ན་སར། །ཤ་དྲ་རུས་བདར་རྒྱུས་མདེས་རྣག་ཆུ་བཙལ། །ལོག་གནོན་བྱེད་
དུས་སྙིང་ཁམས་མ་ཆུང་བར། །ལྷ་བ་བྱེར་བ་གསོན་གཤིན་སྤྲད་པ་དང༌། །གླད་རུས་མཚམས་
ནས་རྣག་ཆུ་ཅི་ཐོན་གྱིས། །རྩ་ཁྲིད་པ་ལ་ཕྱི་ཁྲིད་ནང་ཁྲིད་གཉིས། །ཕྱི་ཁྲིད་བཤུལ་ཤ་ཁྲིད་
ཅིང་མཇུག་རྡོ་སྐྲངས། །ཡན་ལག་ཤལ་སྦྲིད་ཚོར་བ་ཆུང་བ་དང༌། །ལུས་སྤྱིར་ཚ་བ་སྐྱེས་ན་
25-1-402


ལུམས་སུ་གཞུག །ཕྱི་ནང་རྩ་སྦྱོང་ག་བུར་ཉེར་ལྔ་བཏང༌། །ནང་རྩར་ཁྲིད་ན་སྟོད་ལྕི་ཚ་བ་སྐྱེ། །
ལུས་ལྕི་ཕྲུམ་སེར་ཁྱེར་ལ་དབུགས་མི་བདེ། །གློ་ཆུང་སོར་ན་ཉི་ཤུ་རྩ་ལྔ་ལ། །མུ་ཏིག་ཉ་
སྐྱོགས་མི་དོམ་མཁྲིས་པ་བསྣན། །འབྲས་བུ་གསུམ་གྱི་ཁུ་བས་འཕུལ་ལ་བཏང༌། །བསྲེག་
དམིགས་བཅུ་བཞི་མེ་ཡིས་མནན་པར་བྱ། །བྱེ་བྲག་སྙིང་ལ་བབས་ན་ཛཱ་ཏི་ལྔ(སྙིང་འདར་ཡན་ལག་
སྤྲུག་ཁ་མིག་སླེ་སྨྲ་བ་ལྐུགས་ན་ག་བུར་ཨ་རུ་ཙན་དན་ཨ་བྱག་ཀ་ར་སྦྱར་ལ་བཏང་)། །གློ་ལ་བབས་ན་ཅུ་གང་ལྔ་པ་
(སྟོད་གཟེར་དབུགས་ཐུང་རྔམ་པ་ཆེ་ན་གི་ཝཾ་ཨུཏྤལ་རྒུན་འབྲུམ་སྲོལ་དཀར་ཀ་ར་)སྦྱར། །མཆིན་པར་བབས་ན་
གུར་གུམ་བཞི་པ་(ལུས་དང་ཤེས་པ་བྱིང་མིག་འཛུམ་དཀའ་ན་འབྲི་རྐང་ཀཎྜ་ཀ་རི་གསེར་གྱི་མེ་ཏོག་ཀ་ར་)སྦྱར། །
མཆེར་པར་བབས་ན་ལི་ཤི་ལྔ་པ་(མཆུ་འཕྱང་ལུས་སྦྲིད་ལ་བརྐྱང་བསྐུམ་མི་ཤེས་ན་ད་ལིས་རུ་རྟ་ལི་ག་དུར་ཧོང་
ལེན་ཀ་ར་)སྦྱར། །མཁལ་མར་བབས་ན་འབྲས་བུའི་སྨན་མར་(དཔྱི་མིག་བརླ་སྒང་ཟུག་ཚང་ར་མི་ཐེག་རྐང་
པ་བཤལ་དྲི་ཆུ་སྡོམ་དགྱེ་དགུ་མི་ཤེས་ན། སུག་སྨེལ་ད་ལིས་ཤིང་ཚ་སྡིག་སྲིན་དོམ་མཁྲིས་གསེར་བྱེ་སྦྲང་དང་)སྦྱར། །མེ་
གཏར་ཕྱེ་མ་རིག་པས་སྤྱི་དང་སྦྱོར། །གླད་པ་བཞའ་ན་ཤིང་ཀུན(་ཁ་རུ་ཚྭ་སྒ་)གསུམ་པ་བཏང་། །
ཤ་ཆང་བརྡེག་ཅིང་ཨ་ས་བ་ཡིས་བདུག །སྦོས་ན་ཚ་སྦོས་རྒྱལ་བློན་ཁོང་དུ་བཏང༌། །ཧོང་
ལེན་བསྣན་ལ་རྨར་གདབ་ཞ་ཉེས་བསྣན། །རྩེ་ཆུང་གཏར་ཞིང་རྨ་ཆས་ཟས་བསིལ་བསྟེན། །
གྲང་སྦོས་བཞའ་འདྲ་སྲིན་བལ་མར་བཙོས་མནན། །རྣག་སྦོས་ཕུག་ལ་ཉུལ་བཏང་གླང་ཁྲུས་
བྱ(དང་ག་མི་བདེ་གཉིད་བྲོ་ལུས་ལྕི་རྨྱོང་འདོད་མིག་སྤྲིན་དམར་གློ་མང་བྲང་འདབ་སྐྱ་ལ་སྐམ་པ་ན་སེང་བུག་ཏུ་ཚང་བས་རྣག་
དར་ཐོག་ཏུ་འཁྱིམས་པ་ཡིན་ཤའུ་མཛེར་ཐབས་སུ་སྐྱེ་བས་རྒྱ་ཚྭ་ཕུར་མོའི་ལོ་མ་དནྡ་རུ་རྟ་གདབ་ཞག་གཅིག་ལྟོ་བཀུག་ལ་གླད་
མྱུལ་བཏང་དེས་མ་ཐོན་ན་རྒྱ་ཚྭ་དོམ་མཁྲིས་གུར་གུམ་ཆང་སྦྱར་ལྒང་ཕུག་ཏུ་བླུག།ཟངས་ཀྱི་གཅེའུ་ཁ་ལེབ་ཀྱིས་བཏང་དེས་རྣག་
ཆུ་ཁྲིད་ནས་འོང༌། །གཏོང་ས་མ་རྙེད་ན་འཛག་སྒོ་བདེ་སར་གསང་བུག་གཏོད་ལ་དབྱུང་)། །གླད་མཛེར་ཆུ་སེར་མི་
བཅད་ཐུར་མར་བསྲེག །སྨྱོ་ན་གཙུག་མཐིལ་དྲུག་བདུན་སྙིང་ག་བསྲེག །ཞོ་ཤ་(ག་བུར་ཛཱ་ཏི་ཨ་ག་
རུ་གུར་གུམ་རྒྱ་ཚྭ་སྒོ་ང་དང་།)བདུན་སྦྱར་ཁ་ཟས་བཅུད་ཀྱིས་གསོ། །ལྐུགས་ལ་གླད་ལྐུགས་རུས་
25-1-403


ལྐུགས་རྩ་ལྐུགས་གསུམ། །གླད་ལྐུགས་ག་བུར་ཅུ་གང་གུར་གུམ་དང༌། །ཙན་དན་མུ་ཏིག་ཉ་
སྐྱོགས་དོམ་མཁྲིས་དང༌། །ཀ་ར་སྦྱར་བཏང་ལྟག་རྩ་གཏར་ལ་བསྲེག །སྣ་ནས་ཁྲག་དབྱུང་ལྕེ་
འོག་རྩ་ལ་གཏར། །ཆུ་ཆགས་བྱས་ཏེ་གན་རྐྱལ་ཉལ་བ་ལ། །ཡན་ལག་བཞི་ནས་འཐེན་ལ་
རྐང་མཐིལ་བརྡུང༌། །དེས་མ་ཕྱེད་ན་སྣ་སྦྱོངས་རྩ་སྦྱོངས་བཏང་། །རུས་ལྐུགས་བཟོ་བྱ་རྩ་
ལྐུགས་རྩ་དཀར་བཅོས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་
མན་ངག་གི་རྒྱུད་ལས་མགོ་བོའི་རྨ་གསོ་བའི་ལེའུ་སྟེ་བརྒྱད་ཅུ་རྩ་གསུམ་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། །ཡན་ལག་བྱང་ཁོག་མགོ་ལ་མ་གཏོགས་པའི། །སྐེ་ཡི་རྨ་ལ་
བཅོས་ཐབས་ཇི་ལྟར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་
པ་དང༌། དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་
ཉོན་ཅིག །སྐེ་ནི་ཡར་གྱི་མགོ་ལ་མི་གཏོགས་ཏེ། །མར་ལ་བྱང་ཁོག་སྟོད་སྨད་ལ་མི་གཏོགས། །
ཡན་ལག་རྣམ་པ་བཞི་ལའང་གཏོགས་མ་ཡིན། །སྐེ་ནི་རུས་པའི་མཁར་ལ་རྩ་ཡི་འཕྲང༌། །
ཤ་དང་ཆུ་རྒྱུས་ཀུན་གྱི་འདྲིལ་ས་ཡིན། །རུས་གཉན་ལྷ་བ་འབྱེར་བས་མགོ་དང་འདྲ། །རྩ་
གཉན་རྩ་ཐིགས་གསོག་པས་བྱང་ཁོག་འདྲ། །ཤ་དང་ཆུ་རྒྱུས་གཉན་པས་ཡན་ལག་འདྲ། །
དེ་ཕྱིར་གསུམ་འགྱུར་སྐེ་ཡི་བཅོས་ཐབས་བསྟན། །སྐེ་ལ་རུས་པའི་འཕང་ལོང་རྣམ་པ་ལྔ། །
ལྟག་པ་མཁར་དང་མཁར་མཚམས་བྱ་འདབས་བཞི། །ལྟག་པ་མཁར་མཚམས་རྒྱུངས་པའི་
གནད་ཡིན་ཏེ། །རྒྱུངས་པ་ཟིན་ན་ལྟག་པ་དགྱེ་བོར་འགྲོ། །མགོ་ལྕི་ཁ་ལྕེ་སྐམ་ལ་དྲི་ཆུ་སྡོམ། །
མིག་འགྲིབ་སྟོད་གཟེར་སྒྱིད་འཁྲིལ་ཡན་ལག་ཕྲ། །གསོ་བའི་ཐབས་མེད་བདུན་དགུའི་
དུས་ན་འཆི། མཁར་དང་བྱ་འདབས་རྩར་ཟིན་གསོ་དཀའ་སྟེ། །རྒྱ་ཚྭ་བྱང་པ་རུ་རྟའི་རེང་བུ་
གཞུག །རྣག་ཞུགས་རུས་པ་བྲུད་ལ་ལྷ་ཁྲག་སྤྲད། །ཕྱིང་པ་བག་འདག་སྦྱར་བས་ཁ་ཤ་ལྟེམ།  །
25-1-404

 
མར་ཚིལ་སྒོ་ང་སྦྱར་བའི་ཁ་ཞུན་བྱ། །ཧོང་ལེན་གླ་སྒང་སེང་ལྡེང་གྲུངས་ཐང་ངམ། །ཡང་
ན་ཏབ་སེང་ཤིང་མངར་བསྡུས་ཐང་བཏང༌། །སྐེ་ཡི་རྩ་ལ་ཕྱི་རྩ་ནང་རྩ་གཉིས། །ཕྱི་ཡི་རྩ་ལ་
ཁྲག་རྩ་ཆུ་རྩ་གཉིས། །རླུང་ཁྲག་གཉིས་འདོམ་འཕར་རྩ་དག་དང་གསུམ། །འཕར་རྩ་ཨོལ་
གོང་མིད་པའི་བར་ན་ཡར། །གློ་བུ་སྙིང་རྩ་གསེར་གྱི་སྐུད་པ་ཡོད། །དེ་ཆོད་རྩིད་བུ་སོ་སྙིང་
ཟིན་པ་འདྲ། །ཞག་གྲངས་བཅུ་གཅིག་ཚུན་ཆད་ནང་དུ་འཆི། །ཨོལ་གོང་པ་ཡི་གཡས་གཡོན་
འདབས་ན་ཡར། །སྙིང་རྩ་གཉིད་ལོག་རྩེ་འདྲ་རྣམ་གཉིས་ཡོད། །རྩ་དེ་རྦད་ཀྱིས་ཆོད་ན་ཨ་
ཅང་ཆེ། །བརྡབས་ཀྱང་ཕོག་སྔ་འགྱེལ་སྔར་འགྲོ་བ་ཡིན། །དེ་ནས་ཕྱིར་ལ་ཕུན་རེ་བཅལ་བ་
ན། །སྙིང་རྩ་རྩེ་ནག་རྣམ་པ་གཉིས་ཡོད་དེ། །རྩ་དེ་ཆོད་པར་མ་གྱུར་བཅོས་གླགས་ཡོད། །དེ་
ནས་ཕྱིར་ལ་ཕུན་རེ་བཅལ་བ་ན། །གློ་སྙིང་སྡོངས་པའི་ཁྲག་རྩ་རྩེ་ཆུང་ཡོད། །དེ་ཆོད་ཁྲག་མི་
ཆོད་དེ་བོར་ནས་འཆི། །དེ་དག་བཙན་བརྡུངས་འཐེམས་ཆོད་གསོ་བའི་ཐབས། །མོད་དུ་གོང་
འོག་མེ་རྒྱས་གདབ་པར་བྱ། །ཁྲག་མ་ཐུབ་ན་རྨ་ལ་རྒྱ་ཁྱིམ་བཅའ། །མི་དང་གླང་དང་ཁྱི་ནག་
ཉ་ཙ་མོ། །དོམ་མཁྲིས་ཀ་ར་དཀར་པོ་སྦྱར་ལ་བཏང༌། །རླུང་ཆེ་ནམ་ཟླ་གྲང་དུས་སྦང་གར་
དང༌། །ཞུན་མར་སྤོད་ནན་བག་ཕྱེ་བོང་སྤུས་མནན། །རྨ་བུག་ཁོལ་བཏོན་མཁྲིས་སྣ་ཞོ་སྦྱར་
བཏང༌། །ཚ་བ་རྒྱས་དང་དྲོ་དུས་བསྐོལ་ཞོ་དང༌། །བག་ཕྱེ་ཤིང་མངར་སྦྱར་བ་གོང་བཞིན་ནོ། །
ལྟག་པ་ཆུ་བའི་གཡས་གཡོན་གཉིས་ན་མར། །ཆུ་རྩ་སྦུ་གུ་ཅན་ཞེས་བྱ་བ་ཡོད། །དེའི་ཕྱིར་
མཚོན་གང་ཆུ་རྩ་སྒྲིལ་མ་ཡོད། །དེ་གཉིས་ཆོད་ན་གཡས་གཡོན་སྣེ་བསྣོལ་བྱེད། །གཉའ་
རེངས་སྨད་འཕྱེས་དྲི་ཆུ་འགགས་ནས་འཆི། །རྣ་ཤལ་འོག་ན་ཆུ་རྩ་རཏྣ་ཡོད། །དེ་ཆོད་ལག་པ་
ཤལ་སྦྲིད་བྱ་བ་ཉམས། །དེ་དག་བཅོས་ཐབས་གོང་འོག་མེ་རྒྱས་གདབ། །རྨ་ལ་ཨ་ས་སྣུམ་
ནན་ཚན་དོས་བདུག །རྨ་མཆེད་གླ་རིལ་བཙོས་པའི་ལུམས་སུ་གཞུག །གཉའ་རེངས་ལག་
པ་ཞ་ན་བདུད་རྩིའི་ལུམས། །དྲི་ཆུ་འགགས་ན་ཆུ་སྨན་ནི་རུས་དྲང༌། །ནང་རྩ་བཅུ་གསུམ་ཆོད་
25-1-405


ན་དྲི་ཆུ་སྡོམ། །ཡན་ལག་བཅུད་ལ་བོར་སྙམ་ལོག་པར་འཛིན། །ཁ་ཁ་ལྕེ་སྐམ་གདོང་སྣུམ་
མིག་སྤྲིན་སེར། །མགོ་འཁོར་ཟས་སྐྱུག་མཁས་ཀྱང་བཅོས་སུ་མེད། །མདུན་གྱི་རྒྱངས་ཤ་
ལས་བྱེད་ཆོད་པ་ན། །ཨ་ས་འོལ་སྐོམ་མར་ཚིལ་དྲོད་ཕབ་མནན། །ཧྲེམ་ན་ཨ་ས་བ་དང་ཚོས་
ལུམས་བྱ། །ཧྲེམ་མེད་སྐྲངས་ན་གོང་གི་ཆས་དང་འདྲ། །ཨོལ་གོང་མིད་པ་རྐེད་དུ་ཆད་ན་འཆི། །
བཤགས་ན་མཁྲིས་པ་བཏབ་ལ་རྒྱུས་པས་བརྩེམ། །སྐྱི་དཀར་སྤྱིན་ཆུ་བག་འདག་ཕྱིང་པ་
ལྟེམ། །ཟས་སྐོམ་བསིལ་ལ་འཇམ་པའི་ནུར་ཐུག་བཏང༌། །ཨོལ་གོང་རླུང་ཤོ་སྐྲངས་ན་དཀར་
ནག་མཚམས། །སྔོན་བུ་སྤྱི་གཙུག་གསེར་གྱིས་བསྲེག་པར་བྱ། །ལྟག་པའི་ཆུ་ལེབ་ཆོད་ན་ཨ་
ཅང་ཆེ། །བཤགས་ཀྱང་ཕོག་སྔ་འགྱེལ་སྔར་འགྲོ་བ་ཡིན། །ལུས་པོ་ཐག་པས་གཅུད་ལ་བོར་
བ་འདྲ། །མཁྲིས་སྣ་རྡོ་རྒྱུས་ཤུ་དག་ཨ་རུའི་ཐལ། །ཁུར་ཞོ་ཁྱེ་འཐུང་ནུ་ཞོའི་ལྡེ་གུ་ཡིས། །ཆུ་
བའི་ཉྭ་གཡོག་སྐྱི་དཀར་སྤྱིན་ཆུས་ལྟེམ། །རྨ་ཡི་འཇིབ་རྩིར་ཕྲུམ་སར་བཏབ་པར་བྱ། །ཉལ་
འདྲེས་མི་བྱ་ཙོག་གེ་བསྡད་ལ་གསོ། །མདོར་ན་རུས་པ་མགོ་ཡི་ཚུལ་དུ་བཅོས། །རྩ་གཉན་
བྱང་ཁོག་ཚུལ་དུ་བཅོས་པར་བྱ། །ཤ་དང་ཆུ་རྒྱུས་ཡན་ལག་ཚུལ་དུ་བཅོས། །བསིལ་འཇིབ་
དྲགས་ན་དྲི་ཆུ་སྡོམ་པར་བྱེད། །དྲོད་ལུམས་དྲགས་ན་རྩ་ཁ་འབུ་བར་བྱེད། །མེ་བཙའ་དྲགས་
ན་ཆུ་རྒྱུས་འཁུམས་པས་ན། །དེ་ཕྱིར་གསུམ་འཛོམ་བསིལ་དྲོད་སྙོམས་པར་བཅོས། །ཞེས་
གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྐེའི་རྨ་
གསོ་བའི་ལེའུ་སྟེ་བརྒྱད་ཅུ་རྩ་བཞི་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །བྱང་ཁོག་སྟོད་སྨད་གཉིས་ལ་མཚོན་ཕོག་ན། །དེ་ལ་རྟགས་དང་
བཅོས་ཐབས་ཇི་ལྟར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་
དང༌། དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་
25-1-406


ཅིག །འགྲོ་བ་མི་ལུས་བྱང་ཁོག་སྟོད་སྨད་ལ། །གནས་ལུགས་རྟགས་དང་གསོ་ཐབས་རྗེས་
བཅད་བཞི། །དང་པོ་བྱང་ཁོག་གནས་ལུགས་རྣམ་དྲུག་སྟེ། །བརྟེན་པ་རུས་པའི་གནས་
ལུགས་བསྟན་པ་དང༌། །གཡོགས་པ་ཤ་པགས་གནས་ལུགས་བསྟན་པ་དང༌། །གཉན་ས་
དོན་སྣོད་གནས་ལུགས་བསྟན་པ་དང༌། །ས་བཅད་ཡུལ་གྱི་གནས་ལུགས་བསྟན་པ་དང༌། །
འབྲེལ་བ་རྩ་ཡི་གནས་ལུགས་བསྟན་པ་དང༌། །རྒྱ་སྐར་གསེང་གི་གནས་ལུགས་བསྟན་
པའོ༌། དང་པོ་བརྟེན་པ་རུས་པའི་གནས་ལུགས་ནི། །སྒལ་ཚིགས་བྲང་རུས་རྩིབ་མ་ལྷ་རུ་ཙེ། །
སྒྲོག་རུས་དཔྱི་དང་སོག་པ་གཞུག་ཆུང་བརྒྱད། །ཚིགས་ལ་མཁར་དང་མཁར་མཚམས་བྱ་
འདབས་གསུམ། །དེ་དག་ལུས་ཀྱི་གཞི་རྟེན་གུར་ཕུབ་འདྲ། །དེ་ལ་གཡོགས་པ་ཤ་ཡི་གནས་
ལུགས་ནི། །སྒལ་འདབས་བཤུལ་ཤ་ནག་པོ་ཕྱི་ནང་གཉིས། །བྲང་གི་ནུ་ཤ་སྟ་ཟུར་རྟ་ཤ་
གཉིས། །མཆན་ཁུང་བཞག་ཤ་དཀར་ནག་རྣམ་པ་གཉིས། །ཐལ་གོང་གཉའ་ཤ་གཉའ་
འཁོར་འདར་ཤ་དང༌། །སོག་མཐིལ་འབྲོས་ཤ་དེ་ལྟར་ཤ་རིགས་བརྒྱད། །འབྱེར་ཞིང་སྐྲངས་
པའི་གནད་དུ་བསྟན་པ་ཡིན། །གཉན་པ་དོན་ལྔ་སྣོད་དྲུག་གནས་ལུགས་ནི། །སྙིང་ནི་རྒྱལ་པོ་
ཚེ་སྲོག་སེམས་ཀྱི་རྟེན། །བུ་ལྔ་རྒྱལ་སྲས་མ་ལྔ་བློན་གྱི་ཚུལ། །གློ་མའི་ཕང་དུ་སྙིང་ནི་བུ་
ཐོགས་འདྲ། །མཆིན་དྲི་དཀར་པོ་དར་དཀར་ཡོལ་བ་འདྲ། །མཆིན་པ་བྲག་གཡང་གཟར་འདྲ་
གྱེན་དུ་བསླང༌། །མཆེར་པ་མཐའ་མཐུག་དཀྱིལ་སྲབ་མཁུར་བ་འདྲ། །མཁལ་མ་གཡས་
གཡོན་གྱད་ཀྱི་གདུང་འདེགས་འདྲ། །ཕོ་བ་ཟས་སྣོད་ལ་ཕུག་སུལ་བཞི་འདྲ། །མཁྲིས་པ་
མཆིན་འདབས་གསེར་རྐྱལ་བཀལ་བ་འདྲ། །ལོང་ག་གསུམ་ཁྱོག་གསེར་སྦྲུལ་ལྕག་བྲབས་
འདྲ། །རྒྱུ་མ་སྟོད་སྨད་ཡུར་བ་ཆུས་བཀང་འདྲ། །གཉེ་མ་ལོང་འབྲེལ་གཡང་བཞག་བསྐོར་བ་
འདྲ། །ཚིལ་ཤུབས་དཀར་ནག་ལྕགས་སྦྲུལ་དཀྱུས་པ་འདྲ། །ལྒང་ཕུག་ཁ་ནི་ཐུར་བལྟས་ཆུ་
རྐྱལ་འདྲ། །བསམ་སེ་རྩ་ཡི་མདུད་པ་ཤ་རྨེན་འདྲ། །དེ་དག་གཉན་པས་འཆི་བའི་གནད་དུ་
25-1-407


བསྟན། །བགོ་སྐལ་ས་བཅད་ཡུལ་གྱི་གནས་ལུགས་ནི། །བྱང་ཁོག་སྟོད་སྨད་མཆིན་དྲིས་དབྱེ་
བ་སྟེ། །ལྷེན་རུས་འབྲེལ་མཚམས་ཚིགས་པ་བཅུ་གསུམ་པར། །ཆུ་བབས་ཐིག་གདབ་མཆིན་
དྲི་ནག་པོའི་ཡུལ། །ཚིགས་པ་བརྒྱད་ནས་རྩིབ་རིང་གྱེན་མཚོན་གང༌། །ཡོལ་གྱིས་བཅད་པ་
མཆིན་དྲི་དཀར་པོའི་ཡུལ། །མཆིན་དྲི་ཁུག་པ་བརྒྱད་དང་བཅུ་གསུམ་བར། །རྩིབ་སྟེང་དཀར་
ནག་མཚམས་ཏེ་ཁྲ་བོར་འདོད། །སྟོད་སྨད་དོན་སྣོད་ཡུལ་སྐལ་ཐིག་གིས་བཙལ། །ཁད་སྙམ་
སྟན་ལ་ལུས་བསྲང་སྐྱིལ་ཀྲུང་འདུག །མདུན་རྒྱབ་དཔུང་འཛུམ་གཉིས་སུ་གནམ་ཐིག་གདབ། །
ཨན་སྟོང་གཞུག་ཆུང་སྐེ་སྟོང་མཚན་མའི་སྟེང༌། །མདུན་རྒྱབ་གཉིས་སུ་མ་འདྲུས་གཞུང་ཐིག་
གདབ། །སྟོད་ན་གློ་བ་མ་བུ་སྙིང་དང་གསུམ། །གློ་མ་རྒྱབ་ལ་སྙིང་དང་བུ་རྣམས་མདུན། །
ཚིགས་པ་བཞི་ནས་གྱེན་བསེགས་ཆག་གང་ས། །བརྒྱད་ནས་ཐུར་བསེགས་མཛུབ་གང་
བཅལ་བའི་སར། །གྲུ་བཞིར་ཐིག་གདབ་དེ་ཡི་གྲ་བཞིར་བཅད། །དབུས་མ་སུམ་ཆ་སུམ་
གཉིས་དེ་དབུས་བཅལ། །སྟག་མགོ་སྒང་རྩིབས་གཤམ་དང་ཟགས་སྣ་ལྔ། །གློ་བ་མ་ལྔའི་
ཡུལ་དུ་འདོད་པ་ཡིན། །ནུ་མ་གཉིས་ནས་སྐེ་སྟོང་སོར་བཞིའི་འོག །གྲུ་གསུམ་ཐིག་གདབ་
དབུས་ན་རྒྱལ་པོ་སྙིང༌། །མཛོ་སྣ་དང་ནི་བྱ་སྒབ་ཐུགས་ཁབ་དང༌། །རྟེ་མིག་དགྲ་ལྕེ་བུ་ལྔ་སྙིང་
ལ་བསྐོར། །གློ་བུ་སྙིང་གི་ཡུལ་དུ་འདོད་པ་ཡིན། །ནུ་མ་གཉིས་ནས་ཕྱིར་ལ་སོར་གཉིས་
བཅལ། །དེ་ནས་སྐེ་སྟོང་ཙ་ར་ཁུང་དུ་གདབ། །གློ་བ་མ་ཡི་མཐའ་ཆག་གནས་པ་ཡིན། །ཡུལ་
ཐིག་དེ་ཡི་སྟེང་འོག་སྟོང་པར་གནས། །ནུ་མ་བྲང་དཀྱིལ་ཐིག་ཚད་ལྷེན་སྣ་ནས། །ཕོ་བའི་
ཟུར་འཐེན་དེ་ནས་ལྟེ་བར་གདབ། །དཔངས་སུ་སོར་བརྒྱད་ཞེང་སོར་བཅུ་གཉིས་ཏེ། །ཟས་
སྣོད་ཕོ་བའི་ཡུལ་དུ་བཤད་པ་ཡིན། །ལྷེན་རུས་ཚིགས་པ་བརྒྱད་ནས་གཡས་ངོས་སུ། །ཚོན་
གང་གྲེ་མོས་གར་སླེབ་མཆིན་པའི་ཡུལ། །རྩིབ་ཐུང་གཡོན་ནས་ཕོ་ཟུར་མཛུབ་བཅལ་བའི། །
ཞེང་དུ་སོར་ལྔ་མཆེར་པའི་ཡུལ་དུ་འདོད། །ཕོ་གསང་དབུས་ནས་གཡས་སུ་སོར་བདུན་ན།  །
25-1-408

 
དཀྱུས་སུ་སོར་དྲུག་ཞེང་གསུམ་མཁྲིས་པའི་ཡུལ། །ལྟེ་བའི་གོང་འོག་ཚོན་རེ་དཀྱུས་ཚོན་
བརྒྱད། །ལོང་གི་ཡུལ་ཡིན་ཁྲག་ལོང་གཡས་ན་གནས། །སྲིན་ལོང་གཡོན་ལ་ཙམ་ལོང་
དབུས་ན་གནས། །དེ་འོག་ཚོན་དོ་རྒྱུ་སྟོད་རྒྱུ་སྨད་ཡུལ། །དེ་འོག་ལྒང་པ་མདུན་ལ་གཉེ་མ་
རྒྱབ། །ཚིགས་པ་བཅུ་བཞིའི་གཡས་གཡོན་སོར་བདུན་དང༌། །དཔངས་སུ་སོར་ལྔ་མཁལ་
མའི་ཡུལ་སྐལ་ཡིན། །བསམ་སེ་ཚིགས་པ་བཅུ་གསུམ་འོག་ན་གནས། །དེ་ལྟར་ཡུལ་གྱི་ཐོབ་
སྐལ་སོ་སོར་བསྟན། །འབྲེལ་བ་རྩ་ཡི་གནས་ལུགས་ཕྱི་ནང་གཉིས། །ནང་རྩ་སྲོག་རྩ་དཀར་
ནག་སྡོང་པོ་སྟེ། །སྒལ་པའི་ནང་གཞུང་ཐང་ཤིང་བསླང་བ་འདྲ། །དེ་ལས་ཡལ་གའི་རྩ་ཕྲན་
ཀུན་ཏུ་གྱེས། །ཚིགས་པ་གསུམ་ནས་རྩ་གསུམ་མདུན་དུ་བྱུང༌། །དབུས་ཀྱི་རྩ་ལས་སྙིང་ནི་
འབྲས་བུའི་ཚུལ། །སུལ་གསུམ་ནང་ན་རྩ་ལྔ་རླུང་རྩ་དབུས། །རླུང་ཁྲག་འདྲེས་པའི་རྩ་བཞི་
ཕྱོགས་བཞིར་གནས། །གཡས་གཡོན་རྩ་ནི་གློ་བུ་གཉིས་ལ་ཟུག །གློ་ཡི་ནང་རྩ་སོག་ཕོན་
པགས་གཡོགས་འདྲ། །སོབ་བས་འཇུག་བླ་མང་བས་ནད་གདོན་དཀའ། །སྲོག་རྩའི་ཡལ་ག་
རྣམ་གཉིས་ལག་པར་རྒྱུ། །རྩེ་ནག་གཉིད་ལོག་རྩ་གཉིས་མགོ་ལ་གྱེས། །བཅུ་གསུམ་པ་ནས་
རྩ་གཉིས་མཆིན་པར་ཟུག །མཆིན་པའི་ལུང་ཆེན་མཆིན་དྲི་ནག་པོར་འབྲེལ། །དེ་བཞིན་
མཆེར་པ་མཁལ་མ་བསམ་སེར་འབྲེལ། །བཅུ་བཞི་པ་ནས་སྲོག་རྩ་གཉིས་སུ་གྱེས། །སྣེ་སར་
དོན་ནས་རྐང་པ་གཉིས་ལ་རྒྱུ། །དེ་ལས་གྱེས་པའི་དོན་སྣོད་ནང་རྩ་རྣམས། །འབྲལ་འབྲེལ་
མང་བས་ཐག་པ་འཛིངས་པ་འདྲ། །ཕྱི་རྩ་བྱང་ཁོག་སྟོད་ལ་སྙིང་རྩ་དྲུག །བྲང་རུས་གཡས་
གཡོན་ནུ་མདུན་ཚོན་དོ་ན། །སྙིང་རྩ་ཕྲ་ཁབ་ཐོང་གར་ཁབ་བཙུགས་འདྲ། །སྒྲོག་རུས་དཀྱིལ་
ནས་ཐུར་དུ་ཚོན་གང་ན། །སྙིང་རྩ་དངུལ་གྱི་འབུ་རུ་གཟེར་བཏབ་འདྲ། །ནུ་མའི་སྟེང་འོག་
མཚོན་རེ་བུ་རྩ་ཡོད། །གློ་བ་མ་བུའི་ཕྱི་རྩ་ཉི་ཤུ་བཞི། །གློ་མ་རྩིབས་ལས་བྱུང་བའི་ཚིགས་
འགྲམས་གཉིས། །ཚིགས་པའི་གཡས་གཡོན་ཚོན་རེ་ཕུན་རེ་ན། །ཀུན་ཏུ་རྒྱུ་སྟེ་བཞི་པའི་ཐད་
25-1-409


ཀར་གཉན། །དེ་ལ་བཞིར་གྱེས་གཉིས་ནི་བྲང་དུ་འདྲིམས། །གཉིས་ནི་ལྟག་ཆུའི་འདབས་
ནས་མགོ་ལ་འགྲོ། །རྩ་དེ་མཆིན་དྲི་ཡན་ཆད་གློ་བ་དབང༌། །མན་ཆད་མཁལ་མའི་རྩ་ཡིན་
བཅུ་བཞི་པའི། །ཐད་ཀར་མཁལ་མའི་རྩ་ནག་ཅེས་སུ་གྲགས། །དེ་ནས་བཞིར་གྱེས་གཉིས་
ནི་དཔྱི་སྟེང་དོན། །བརླ་སྒང་སྣེ་ས་བརྒྱུད་ནས་ལྒང་པར་འབྲེལ། །རྩ་གཉིས་མཇུག་ཐུང་བརླ་
ཡི་ཕྱི་སུལ་རྒྱུ། །གློ་མ་རྩིབས་ལས་བྱུང་བའི་ཚིགས་འགྲམ་གཉིས། །ཚིགས་པ་བཞི་པའི་
གཡས་གཡོན་ཚོན་རེར་གནས། །གློ་མ་ལྒང་ལས་བྱུང་བའི་ནང་རྒྱུག་གཉིས། །ཚིགས་པ་དྲུག་
པའི་སོར་ལྔའི་ས་ན་གནས། །གློ་མ་སྟག་མགོ་ལས་བྱུང་གྲོག་རྐེད་གཉིས། །ཚིགས་པ་བརྒྱད་
པའི་སོར་བདུན་ས་ན་གནས། །གློ་མ་ཟགས་སྣ་ལས་བྱུང་སྒེ་དོར་གཉིས། །ཚིགས་པ་བཅུ་
པའི་ཆག་གང་ས་ན་གནས། །གློ་མ་གཤམ་ལས་བྱུང་བའི་འགྲེང་བུ་གཉིས། །ནུ་མའི་ཐད་དྲང་
སྒྲོག་རུས་འོག་ཏུ་འགྲོ། །གློ་བུ་ཐུགས་ཁབ་ལས་བྱུང་ཕྱིར་རྒྱུ་གཉིས། །ནུ་མཆན་ཚོན་རེའི་ས་
ནས་སྒྲོག་ཆར་འགྲོ། །གློ་བུ་མཛོ་སྣ་ལས་བྱུང་བསྣོལ་མ་གཉིས། །ཕྱིར་རྒྱུག་རྩ་ནས་སྒྲོག་ཆར་
གཡས་གཡོན་བསྣོལ། །གློ་བུ་བྱ་སྒབ་ལས་བྱུང་གཟེར་མགོ་གཉིས། །མཆན་འོག་ཕྱི་ནང་
གྱེན་ཐུར་ཆག་གང་སར། །གློ་བུ་དགྲ་ལྕེ་ལས་བྱུང་ཟངས་མ་གཉིས། །མཆན་ཁུང་འོག་ནས་
རྩིབ་རིང་སྟེང་དུ་འགྲོ། །གློ་བུ་རྟེ་མིག་ལས་བྱུང་སྔོན་བུ་གཉིས། །སོགས་པ་མེ་ལོང་དཀྱིལ་གྱི་
འོག་ན་གནས། །མ་བུ་སྒྲོག་པ་ལུང་འཛིན་ཁུག་པ་གཉིས། །དཔུང་ཚིགས་ཆག་གང་ཨུ་ཟུར་ཁ་
ལ་བཀལ། །ཚང་ཚིང་ལས་བྱུང་གློ་རྩ་དུང་འབུད་གཉིས། །དཔུང་པའི་ནང་ངོས་ཆག་གང་ས་
ན་གནས། །མཆིན་རྩ་ཤ་རུ་མོན་རུ་རྣམ་པ་གཉིས། །ལྷེན་སྣ་ལས་བྱུང་ནུ་བདུན་ཚོན་དོའི་
སར། །ཡར་ལ་ཆག་གང་ས་ནས་གཉིས་སུ་གྱེས། །རྩ་གཉིས་དཔུང་པ་རྩ་གཉིས་རྣ་རྒྱབ་རྒྱུ། །
མཆེར་རྩ་བྱ་རྐང་རྟ་ཤའི་གསེབ་ན་གནས། །མཁྲིས་རྩ་ཆུ་མིག་གློ་ཡི་ཚང་ཚིང་གསེབ། །
གསེར་གྱི་ཀ་བ་དཔུང་སོག་བར་ན་གནས། །ཕོ་རྩ་སྦྲུལ་མིག་ཀ་བ་བོང་རྨེད་གསུམ། །སྦྲུལ་
25-1-410


མིག་ལྷེན་སྣའི་གཡས་གཡོན་ཚོན་རེའི་སར། །ཀ་བ་ཕོ་དཀྱིལ་གཡས་གཡོན་སོར་གསུམ་ན། །
བོང་རྨེད་ལྟེ་བའི་གྱེན་ཚོན་གང་ན་གནས། །ལོང་རྩ་ལྟེ་ཟུར་གཡས་གཡོན་ཚོན་རེ་ན། །རྒྱུ་རྩ་
དེའི་མཇུག་སྣེ་ཁུད་གཉིས་ན་འདྲིམས། །རྒྱུ་ལོང་ནང་རྩ་འཁྱོག་མཚམས་རྒྱུ་ཚིལ་འབྲེལ། །
བསམ་སེའི་རྩ་ནི་དཔྱི་ནས་སྣེ་སར་རྒྱུ། །ལྒང་པའི་ཆུ་རྩ་སྲོག་རྩ་སྲིད་རྩ་གསུམ། །མཚན་
དབྲག་བར་གྱི་དབུས་དང་གཡས་གཡོན་གནས། །དེ་ལྟར་བཤད་པའི་རྩ་རྣམས་ཆད་གྱུར་ན། །
ཕལ་ཆེར་འཆི་ཞིང་བཙན་གདུངས་ཐིགས་སུ་འགྱུར། །རྒྱ་སྐར་ལྟ་བུའི་གསང་ས་བསྟན་པ་
ནི། །གསང་ལ་རང་གསང་མདའ་གསང་ཕོག་གསང་དང༌། །དབྱེ་བའི་གསང་དང་རྣམ་པ་བཞི་
རུ་འདོད། །རང་གསང་ཁ་ནི་གློ་སྦུབས་ཕོ་སྟོད་གསང་། །འཕོངས་ནི་རྒྱུ་ལོང་ལྒང་མཁལ་རང་
གསང་ཡིན། །མདའ་གསང་སྟོད་གསང་ཕྱལ་མོ་གཅུར་འབྱིན་ཐུབ། །མཆིན་དྲི་ཁུག་པ་ཁྲ་
བོས་མཛུབ་རེ་ཐུབ། །སྒལ་འདབས་གཡས་གཡོན་ནུ་ཚོན་གང་གི་འོག །རྩེ་སོར་བཞི་བཞི་
སོང་ཡང་དོན་མི་སླེབ། །སྟོད་དུ་གང་ཡང་སོར་གསུམ་དོན་མི་སླེབ། །སྨད་དུ་གང་ཡང་སོར་
གཉིས་སྣོད་མི་སླེབ། །གཞན་ཡང་ལུས་ཀྱི་སྡོད་ལུགས་ཕོག་ལུགས་ཀྱིས། །གསང་མེད་སར་
ཡང་གཅུར་འབྱིན་ཐུབ་པ་ཡོད། །གསང་དུ་ཕོག་ཀྱང་དོན་སྣོད་སླེབ་པ་ཡོད། །ཕོག་གསང་
དབྱེ་གསང་རྣམས་སུ་མཚོན་ཕོག་པས། །མཚོན་ཕྱིར་ཁྲག་ཐོན་གསང་དབྱེ་མི་དགོས་སོ། །
དབྱེ་གསང་སྟོད་ལ་བྲང་གི་སྙིང་གསང་དྲུག །གློ་མའི་རྒྱབ་གསང་བཞི་དང་བུ་གསང་གཉིས། །
མ་བུ་གཉིས་རྒྱུག་ཟུར་གསང་རྣམ་པ་དྲུག །གསང་ས་བཅོ་བརྒྱད་རྒྱ་སྐར་འབྱེད་པ་འདྲ། །དེ་
ལ་བྲང་གི་སྙིང་གསང་དྲུག་པོ་ནི། །དཀར་ནག་མཚམས་ནས་གྱེན་དུ་ཚོན་གང་བཅལ། །དེ་
ནས་གཡས་གཡོན་གཉིས་སུ་ཚོན་རེ་དང༌། །ཕུན་རེ་བཅལ་བ་དཔལ་ཁབ་གསང་ས་ཡིན། །
དེ་སྟེང་ཚོན་གང་བཅལ་བ་ཐུགས་ཁབ་གསང༌། །དེ་སྟེང་ཚོན་གང་བཅལ་བ་བྱ་རོག་མིག །
རྒྱབ་ཀྱི་གློ་བའི་མ་གསང་རྣམ་བཞི་ནི། །ཚིགས་པ་བཞི་པའི་གཡས་གཡོན་སོར་བཞིའི་ས།  །
25-1-411

 
གློ་བ་བྲུངས་ཁུད་རྣག་གི་འབབ་ས་ཡིན། །ཚིགས་པ་བརྒྱད་ནས་དགུ་པའི་ཐད་ཀ་རུ། །
མཛུབ་གང་བཅལ་བ་སོག་པ་སོར་གཉིས་འོག །རྒྱབ་གསང་རིང་མོ་གློ་ཡུལ་རྣག་འབབ་ས། །
བུ་གསང་ནུ་མ་གཉིས་ནས་མཆན་ཁུང་ངོས། །སོར་བཞི་དེ་ནས་ཐུར་དུ་སོར་བཞི་བཅལ། །
ནུ་མ་ཆག་གང་བུ་ཡི་ཟུར་གསང་ཡིན། །མ་བུ་གཉིས་རྒྱུག་བཅུ་གཉིས་བཅུ་གསུམ་མཚམས། །
ཆག་གང་མཁྱིད་གང་མཛུབ་གང་བཅལ་བའི་ས། །རྩིབ་མི་ཞེང་གཅིག་ཞེང་གཉིས་ཞེང་
གསུམ་བར། །ཐེམ་ཁ་དང་པོ་བར་པ་ཐ་མ་གསུམ། །གློ་བ་མ་བུ་གཉིས་ཀའི་རྣག་འབབ་ས། །
སྨད་ཀྱི་དབྱེ་གསང་ཚིགས་པ་བཅུ་བཞི་ནས། །གཡས་གཡོན་སོར་དྲུག་མཁལ་མའི་རྣག་
འབབ་གསང༌། །ལྟེ་བ་སྣེ་དཀྱིལ་དཔྱི་ཟུར་མཚན་མའི་སྟེང༌། །ཐིག་བཏབ་རྒྱ་གྲམ་ལྟོ་བའི་སྤྱི་
གསང་ཡིན། །ཨ་ལོང་ཁ་ནས་ནང་དུ་སོར་བཞི་ན། །གཞང་གསང་ཞེས་བྱ་ནང་གི་རྣག་འབབ་
སའོ། །འོན་ཀྱང་སྟོད་སྨད་དབྱེ་གསང་མ་ཡིན་གཞན། །རྣག་གི་འབབ་ས་མ་ངེས་གར་བབས་
དབྱེ། །གཉིས་པ་ངོས་འཛིན་རྟགས་ལ་རྣམ་པ་བདུན། །དང་པོ་ཕོག་ས་ཡུལ་ལ་བརྟག་པ་
དང༌། །གཉིས་པ་མཚོན་གྱི་བགྲོད་ལམ་བརྟག་པ་དང༌། །གསུམ་པ་ནང་དུ་རྡོལ་དང་མ་རྡོལ་
བརྟག །བཞི་པ་ཁྲག་ངན་བབས་དང་མ་བབས་བརྟག །ལྔ་པ་དོན་སྣོད་ཟིན་དང་མ་ཟིན་
བརྟག །དྲུག་པ་འཚོ་འམ་འཆི་བའི་ལ་ཤན་དབྱེ། །བདུན་པ་མདོར་བསྡུས་ཁ་མར་གདགས་
པར་བྱ། །དང་པོ་ཕོག་ས་ཡུལ་ལ་བརྟག་པ་ནི། །མཁར་དང་མཁར་མཚམས་གཞུག་རུས་
གཉན་པ་སྟེ། །རྒྱུངས་པར་མ་སླེབ་མདེའུ་མ་ལས་འཚོ། །རྒྱུངས་ཟིན་ལྟག་པ་དགྱེ་ལ་སྒྱིད་པ་
འཁྲིལ། །སྨད་འཕྱེས་དྲི་ཆུ་སྡོམ་ན་བདུན་ན་འཆི། །བྲང་རུས་གཉན་ཏེ་ལྷ་བྱེར་འབྲས་སུ་འགྲོ། །
བྱ་འདབས་ལྷ་རུ་རྩེ་དང་དཔྱི་སོགས་འབྲིང༌། །སྒྲོག་རུས་རྩིབ་མ་ཉེན་ཆུང་ཟུག་གཟེར་ཆེ། །
ཕྱི་བཤུལ་བཅད་ན་སྐྲངས་ཤིང་སྒུར་པོར་འགྲོ། །བཞག་ཤ་དཀར་ནག་གསོག་ལ་གཟེར་
ཞིང་འབྱེར། །དེ་དག་རབ་གཉན་ཤ་གནད་ཕྱི་མ་འབྲིང༌། །ནང་རྩ་ཀུན་དང་གློ་བུ་སྙིང་རྩ་
25-1-412


གཉན། །གློ་མ་མཁལ་རྩ་འབྲིང་སྟེ་རྩ་གཞན་ཐ། །སྙིང་དང་གློ་བུ་མཆིན་མཁལ་རྒྱུ་མའི་ཡུལ། །
ཕོག་སའི་སར་ངན་གློ་མ་མཆེར་པ་དང༌། །ཕོ་ལོང་ལྒང་པའི་ཡུལ་རྣམས་འབྲིང་པོ་ཡིན། །
དོན་སྣོད་ཡུལ་མིན་གསང་སྟོང་ཕོག་ས་བཟང༌། །གཉན་དང་མི་གཉན་ཡུལ་ལ་བཟང་ངན་
ཤེས། །དེ་ཕྱིར་དང་པོ་ཕོག་ས་བརྟག་པར་བྱ། །གཉིས་པ་མཚོན་གྱི་བགྲོད་ལམ་བརྟག་པ་ནི། །
ཕོག་པའི་ས་ལ་ངེས་མེད་གར་ཕོག་ཀྱང༌། །གནད་ལ་སྙེག་དང་གནད་མེད་འཚེབས་པ་ཡོད། །
དེ་ཕྱིར་མཚོན་གྱི་བགྲོད་ལུགས་ཤེས་པ་གཅེས། །ཤ་བཤགས་རུས་ཕུག་རྩ་ཆོད་དོན་སྣོད་
ཟིན། །རིམ་པས་ཉེན་ཆེ་བཞི་སྦྲགས་ཕུག་པ་འཆི། །གློ་བ་མ་ལ་སྟེང་འོག་དྲང་ཐད་རྨ། །རིམ་
པས་འཚོ་འཆི་རྐྱེན་ལ་རག་ལས་འགྱུར། །གློ་སྟོད་མཚོན་ལམ་རིང་ན་ནང་རྩ་སྙེག །མོད་ལ་
ཁྲག་གིས་འབྱོར་ན་འཚོ་བ་ཡིན། །རྩ་ཁ་ཤོར་ན་ལུས་ཀུན་བུས་ལྟར་སྐྲངས། །ཁྲག་གིས་བྱང་
ཁོག་ཁེངས་ནས་འཆི་བར་འགྱུར། །དེ་ཕྱིར་རྩ་ཁ་འབུད་པའི་ཟས་སྤྱོད་གཟབ། །མཚོན་ལམ་
ཐུང་ན་རྩ་ཁ་མི་ཟིན་ཞིང༌། །ཆུ་སེར་ལྗིད་མི་ལྟུང་བས་མཁས་ན་འཚོ། །གློ་སྨད་མཚོན་ལམ་
ཐུང་ཡང་ཆུ་སེར་གསོག །མཚོན་ལམ་རིང་ཡང་རྩ་ལ་ཟིན་པ་ཉུང༌། །དེ་ཕྱིར་དོན་ཐིགས་
གསོག་པས་གསོ་དཀའ་སྦྱོང༌། །གསུམ་པ་ནང་བརྟོལ་མ་བརྟོལ་བརྟག་པ་ནི། །ནང་བརྟོལ་
སྨྲར་བཅུག་སྐད་ཀྱི་མཇུག་ཆད་ཅིང༌། །འགྲོ་བའི་སྟངས་ཞན་ཁོང་ལྕི་དབུགས་མི་བདེ། །གློ་
སོར་ལངས་པས་གང་རྒྱབ་ཕྱོགས་སུ་འཁྱོག །ཁ་ཟས་མི་འདོད་ཟུག་ཆེ་སྐྲ་མཚམས་རྔུལ། །དེ་
དགུ་ཚང་ན་ནང་དུ་བརྟོལ་བ་ཡིན། །གསང་སྟོང་ཕོག་དང་དོན་སྣོད་མ་ཟིན་ཞིང༌། །ཁྲག་མ་
ཤོར་ན་མདའ་ལམ་རིང་གྱུར་ཡང༌། །ཟུག་ཆུང་དབུགས་བདེ་མདངས་གསལ་འགྲོས་མ་
ཉམས། །ཚད་པ་མ་སྐྱེས་ཟས་ཞིམ་སྐད་གདངས་དྲག །དེ་ནི་བརྟོལ་བའི་མ་བརྟོལ་བ་ཞེས་བྱ། །
རྩ་གཉན་ཆོད་ན་ངམས་ནག་གདོང་པ་སྣུམ། །ལུས་ལྕི་སྐོམ་དད་ཆེ་ལ་དང་ག་འགག །ཉིན་
མོ་གཉིད་དང་ཟུག་ཆེ་གློ་མང་སོར། །རྩ་ཐིགས་གསོག་པས་མ་བརྟོལ་བརྟོལ་དང་འདྲ། །ཤ་
25-1-413


གཉན་རུས་གཉན་བཅད་བརྡུངས་ཟུག་གཟེར་ཆེ། །མ་བརྟོལ་བ་ཡང་བརྟོལ་བར་གོལ་ས་
ཡོད། །སྦོ་སྒྲེག་དྲི་ཆུ་སྲི་དང་ལྡང་དུབ་བྱེད། །བྱང་ཁོག་སྨད་ཀྱི་ནང་བརྟོལ་སྤྱི་རྟགས་ཡིན། །
བཞི་པ་ཁྲག་ངན་བབས་པའི་རྟགས་བསྟན་པ། །གླང་ཐབས་ན་ཞིང་ཁུག་པ་ལྷེན་འོག་
གཟེར། །ཙོག་པུར་མི་ཟུག་སྔས་ལ་ཉལ་མི་ཤེས། །ལུས་འདར་སྐྲ་འདབ་རྔུལ་ཞིང་སོ་དྲེག་
ཆགས། །གྲང་ན་ཟུག་ཆེ་དྲོས་ན་བདེ་བར་ཚོར། །ཞག་ཏུ་ལོན་ནས་ལྕེ་མཆུ་རྙིལ་བཀྲག་
འཆོར། །རྩ་གྲིམས་ཆུ་དམར་སྟོད་དགུ་ཤེད་ཉམས་བྲི། །དེ་རྟགས་ལྡན་ན་ཁྲག་ངན་བབ་པར་
ངེས། །ལྔ་པ་དོན་སྣོད་ཟིན་པའི་རྟགས་བསྟན་པ། །དོན་ཟིན་ཕོག་དུས་ཤེས་པ་ཟི་ཞིང་འཚུབ། །
གང་ཟིན་ཚིགས་གསང་ཁ་བྱེ་མནན་ན་ན། །དབུགས་ཐུང་དགྱེ་དགུ་མི་ཤེས་པང་ཆོས་
དགོས། །མོད་ལ་རྩ་ཆུའི་ཚ་བ་འུར་གྱིས་སྐྱེ། །དེ་དག་དོན་ལ་ཟིན་པའི་སྤྱི་རྟགས་ཡིན། །ཁྱད་
པར་སྙིང་ལ་མཚོན་ཕོག་བཏོན་དུས་འཆི། །སྙིང་ཚིལ་བརྒྱལ་འབོག་དངང་འདར་བཞིན་
མདངས་ཉམས། །ཆུ་གཏོར་ཁུས་གདབ་བསྐུ་བྱུག་འོ་དྲོན་བཏིག །དེ་རྗེས་གྲུངས་ནས་དྲན་
གསལ་གསོ་གླགས་ཡོད། །སྙིང་རྩ་བཙན་ཆོད་སྨྱོ་འདར་དངང་ཆུང་འབྱུང༌། །རྩ་ཐིགས་ཤོར་
ན་སྙིང་ལ་རྣག་ཆུ་གསོག །སྲོག་རྩ་ཆད་ཕུག་རྒྱབ་པའི་མོད་ལ་འཆི། །བཙན་བརྡུངས་ཟུག་
གཟེར་ཆེ་ཞིང་འདྲེ་ལོག་བྱེད། །ལག་པས་ས་འབྲད་ཚབས་ཆུང་འཚོ་བ་སྲིད། །གློ་ཕུག་གློ་ལུ་
མི་ཤེས་ཟ་ཟི་སྨྲ། །དབུགས་ནི་ཉི་མས་འཚིག་པའི་ཁྱི་དང་འདྲ། །རྨ་ནས་དབུགས་འབྱུང་ཁྲག་
སྦུ་ཅན་དུ་སྐྱུག །སྟག་མགོ་ཟིན་ན་ཞག་བདུན་ལོ་དུས་འཆི། །གློ་སྒང་བདུན་དགུ་རྩིབས་ལ་
དགུ་བཅུ་གཅིག །གློ་བཤམ་བཅུ་བདུན་བཅུ་དགུའི་དུས་ན་འཆི། །གློ་བུ་གང་ལ་ཕོག་ཀྱང་
མོད་ལ་འཆི། །འགོར་ཡང་ཞག་གསུམ་དག་ལས་རིང་མི་སྡོད། །གློ་རྩ་ཆོད་ན་ལུད་པ་ཙན་
དམར་ལུ། །རྩ་སྟེང་ཁྲིད་ཅིང་གཟེར་ལ་ཚ་བ་སྐྱེ། །གདོང་སྣུམ་དབུགས་མི་བདེ་ལ་གྲང་ཤུམ་
བྱེད། །རྩ་ཐིགས་ཤོར་ན་གློ་ལ་རྣག་ཆུ་གསོག །ཁྱད་པར་ཚིགས་འགྲམས་སྟོད་དུ་མཇིང་པ་
25-1-414


རེངས། །སྨད་དུ་མཁལ་རྐེད་ན་ཞིང་རྐང་པ་འཕྱེས། །ཁུག་པ་ལྡང་དུབ་སྔོན་བུ་སྐྱིགས་བུས་
འདེབས། །གཟེར་མགོ་སྐད་འཛེར་མགོ་རྨ་དུང་འབུད་སྐྲངས། །བསྣོལ་མ་ཉལ་དཀའ་ཆར་བུ་
སོག་དབྲག་གཟེར། །མཆིན་དྲི་དཀར་པོ་བཅད་ན་སྐད་མི་ཕྱིན། །དབུགས་བསྡམ་འབུར་
ཚུགས་བལྟ་ཞིང་ཡན་ལག་གཡོབ། །ཟུག་ཆེ་སྒྲེག་པ་མང་ལ་ཟས་ཟོས་ན། །ཚབས་ཆུང་
མཁས་པས་མོད་དུ་གསོས་ན་འཚོ། །རྟགས་ཚད་ལྔ་ལ་ནད་ལྡོག་བདུན་ན་འཆི། །ཡོལ་བ་
ཕུག་ན་སྟོད་ཁྲག་སྨད་དུ་འཆོར། །སྨད་རླུང་སྟོད་དུ་འཆོར་བས་འཕྲལ་དུ་འཆི། །ནག་པོ་མགོ་
ལྕི་མིག་འཛུམ་ཁྲག་ནག་སྐྱུག །ཁུས་འདེབས་མིག་རྩ་རྒོད་ལ་བར་སྣང་བལྟ། །འདུག་སར་མི་
ཚུགས་དགུ་ཡི་དུས་ན་འཆི། །སྨྲ་འདོད་ཞེ་ས་མཁས་ལ་འགྲོ་འདུག་བྱེད། །ཆང་འདོད་བླུད་ན་
ཡི་གར་མི་འོང་བ། །ནག་པོ་བཙན་བརྡུངས་རྟགས་དེ་གསོ་བར་ནུས། །མཆིན་པ་རྩི་ཉམས་
གྱུར་པས་འཆི་བ་སྟེ། །ཚབས་ཆེ་ཁྲག་ཏུ་འཁྲུ་སྐྱུག་ཕོག་དུས་འཆི། །བརྡབས་བརྡུངས་མིག་
དམར་མདོག་སྔོ་འཁུན་བུ་འབྱུང༌། །གདོང་སྣུམ་འགུལ་ན་རྩ་རྒྱས་ལྡང་དུབ་བྱེད། །ཚབས་
ཆུང་གྱུར་ན་མོད་དུས་གསོ་གླགས་ཡོད། །མཆིན་རྩ་བཙན་ཆོད་མགོ་དང་དཔུང་པ་ན། །ངོ་
གདོང་སྣུམ་ཞིང་མིག་སྤྲིན་དམར་པོར་འགྲོ། །མཆེར་པའི་ཆ་ག་སྙིང་འདར་གྲང་ཤུམ་བྱེད། 
ཁོང་སྦོ་ཕྱི་ས་འགགས་ཏེ་ལྔ་ན་འཆི། །བརྡབས་བརྡུངས་མཐིལ་དུ་ཕུག་ན་ཁོང་པ་སྦོ། །འཁྲུ་
འམ་རྒྱུན་འགག་གཡལ་སྦྲིད་མཆུ་སྙིལ་སྐྱ། །གདོང་མིག་ནག་ཐིག་འབྱུང་སྟེ་མཁས་པས་འཚོ། །
མཁལ་མ་གཉིས་ལ་རྩི་ཉམས་གྱུར་པས་འཆི། །མཁལ་ཐག་ཆད་ན་རྐང་པ་སྡུད་མི་ཤེས། །
ཁུས་འདེབས་ལུས་བགྲད་ཞག་གཅིག་ལོན་ནས་འཆི། །བརྡབས་བརྡུངས་མཁལ་ཚིལ་ཟིན་
ན་ལུས་པོ་ལྕི། །རྐང་ལག་སྡུད་དཀའ་ཆུ་སྲི་རྣ་བ་འོན། །དེ་ནི་མཁས་པས་འཚོ་ས་མང་བ་ཡིན། །
མཁལ་མའི་རྩ་ལ་སོང་ན་རྐང་པ་ཤལ། །དྲི་ཆུ་སྡོམ་ཞིང་རྩ་རྒྱུད་ཁྲིད་ནས་གཟེར། །སྣོད་ཕུག་
ཕྱི་རྟགས་རྩིབ་མ་ནང་ཟུག་འཁྲུ། །ཕོ་བ་ཕུག་པ་མི་སྦོ་བཙན་ཐེམས་སྦོ། །ཐེར་ཕོག་འཚོ་སྟེ་
25-1-415


རྫེམས་ལ་ཕོག་པ་འཆི། །དེ་རྟགས་གླང་ཐབས་ན་ལ་དྲི་ཆུ་སྡོམ། །ལུས་ཀྱི་སྟོབས་ཤོར་ཅི་ཟོས་
མི་ཆགས་སྐྱུག །འཚོ་སྙམ་བྱེད་ཀྱང་བཅུ་བཞི་ཉི་ཤུ་གསུམ། །སུམ་ཅུ་ལྔ་ལ་འཆི་བདག་ལག་
ཏུ་འགྲོ། །མཁྲིས་པ་ཕུག་ན་མཁྲིས་པ་འཁྲུ་སྐྱུག་འཆི། །བརྡབས་བརྡུངས་མིག་ཆུ་ཤ་མདངས་
སེར་པོར་འགྲོ། །མོད་དུས་མ་བཅོས་ཞག་ལྔའི་དུས་ན་འཆི། །ལོང་སྟོད་ལུ་གུ་མགོར་ཕོག་
གླང་ཐབས་ན། །ཁྲག་རུལ་འཁྲུ་སྐྱུག་དགུ་ཡི་དུས་ན་འཆི། །སྲིན་ལོང་སྲིན་བུ་འཁྲུ་སྐྱུག་གླང་
ཐབས་འབྱུང༌། །ལོང་ཐེར་སྦོ་ལྡེང་དྲི་ཆུ་སྲི་བར་བྱེད། །དེ་ཉིད་མཁས་པས་གསོས་ན་ཕལ་ཆེར་
འཚོ། །རྒྱུ་མ་ཕུག་ན་ལུས་པོ་འདུག་མི་ཚུགས། །ཟུག་ཆེ་མཚན་མ་ཉེད་ལ་ཚ་འབྲབ་བྱེད། །རྒྱུ་
མ་བུག་པ་དུ་ཡོད་ཞག་རེ་ཐུབ། །མ་ཕུག་ལུག་པ་བཅོས་པས་འཚོ་བ་ཡོད། །བརྡུངས་སམ་
བཅད་ན་ཁ་ཁ་ཚ་བ་སྐྱེ། །རྒྱུ་མ་གཟེར་ལ་འཁྲུ་ཞིང་མིག་ཆུ་སེར། །གཉེ་མ་ཕུག་ན་སྲིན་བུ་
གྱེན་ཐུར་འབྱུང༌། །ཧས་འདེབས་ཐལ་མོ་རྡེབ་ན་གཅིག་ན་འཆི། །གཞང་ལ་ཕོག་ན་དྲི་མ་ལྡུག་
གམ་སྡོམ། །ནག་པོ་འཚོ་དཀའ་དཀར་པོ་འཚོ་བར་འགྱུར། །ལྒང་པ་གནད་ཕུག་དྲི་ཆུ་སྲི་འམ་
ལྡུགས། །ཁ་ལ་སོང་ན་འཆི་སྟེ་ཐེར་ལ་འཚོ། །བསམ་སེར་སོང་ན་ལུས་སྦྲིད་གན་རྐྱལ་འགྱེལ། །
འདྲེ་ལྡོག་བྱེད་ཚབས་ཆུང་ན་འཚོ་བ་ཡོད། །མཆེར་པ་རྒྱུ་ལོང་ལྒང་པ་བསམ་སེ་སོགས། །རྩ་
རྣམས་རང་རང་རྟགས་དང་ཁྱད་པར་མེད། །དྲུག་པ་འཚོ་འཆིའི་ལ་ཤན་དབྱེ་བ་ནི། །རྒྱབ་
པའི་མོད་ནས་དྲན་པ་ཉམས་པ་དང༌། །བརྒྱལ་འབོག་དངང་འདར་ཁྲག་ཏུ་འཁྲུ་སྐྱུག་འཆི། །
མཚོན་ཕོག་གསུམ་དང་ལྔ་ཡི་བར་དག་ཏུ། །ཅིས་ཀྱང་ཚ་བ་མི་ཆོགས་ཟུག་མི་འབྲི། །ཇི་ལྟར་
བཅོས་ཀྱང་སྐྱེད་མེད་འཆི་བར་ངེས། །ཤེད་མེད་ཚ་བ་སྐྱེ་ལ་དང་ག་འགག །རྟག་ཏུ་འཁྲུ་སྐྱུག་
དྲི་ཆུ་སྲི་ན་འཆི། །མིག་མདངས་(རྩའི་བྱ་གཏོང་)ཉམས་ཤིང་འཛུམ་དཀའ་གྱེན་ཏུ་ཟློག །ཁ་སྣའི་
དབུགས་(རླུང་གི་བྱ་གཏོང་)གྲང་གདོང་ལ་བག་རྔུལ་ཆགས། །ལུས་ཀྱི་སྟོབས་(ཟུངས་གི་བྱ་གཏོང་)ཤོར་
སྟན་ལ་འབྱར་བ་ན། །འཆི་བའི་བྱ་གཏོང་གསུམ་ན་འཆི་བར་ངེས། །དོན་སྣོད་འཆི་ལྟས་འཆི་
25-1-416


དུས་གོང་དུ་བསྟན། །རྩ་རྒྱུད་མ་སྟོངས་ཟུག་གཟེར་བར་ཐག་རིང༌། །སྨན་དཔྱད་བདེ་སྐྱེད་ཆེ་
ན་འཚོ་བ་ཡིན། །བདུན་པ་མདོར་བསྡུས་ཁ་དམར་འདི་ལྟར་གདགས། །ནང་དུ་རྡོལ་ཡང་
ཁྲག་བབས་བུངས་ཆུང་ན། །ཉེན་ཆེ་བཅོས་སུ་ཡོད་པར་ཁ་མར་གདགས། །ཁྲག་བབས་ཆེ་
འམ་དོན་སྣོད་ཟིན་པ་ལ། །འཆི་བའི་བྱ་གཏོང་གསུམ་གྱིས་སླེབ་མ་སླེབ། །གསུམ་དང་ལྔ་ཡི་
བར་དུ་ཤན་མི་ཕྱེད། །ཞག་ལྔའི་བར་དུ་བྱ་གཏོང་མ་བྱུང་ན། །དེ་ལ་མཁས་པས་རྩལ་བཞི་
(སྨན། དཔྱད། ཟས། སྤྱོད་ལམ།)སྤྲུགས་པས་ཐུབ། །བྱ་གཏོང་(ཞག་གསུམ་དང་ལྔའི་བར་དུ་)སླེབ་ན་འཆི་བར་
ཁ་མར་གདགས། །དོན་སྣོད་མ་ཟིན་ཁྲག་ངན་མ་བབས་ན། །ནང་རྡོལ་གྱུར་ཀྱང་འཚོ་བར་ཁ་
མར་གདགས། །རྩ་ཆེན་ཆོད་དམ་ཁྲག་བབས་ཆེ་བ་དང༌། །གཉན་པ་དོན་སྣོད་སྟེང་དུ་མཚོན་
ལམ་རིང༌། །འཆི་བདག་བྱ་གཏོང་གསུམ་ལ་འོང་ལོང་མེད། །ལ་ཆེན་འདའ་བར་ཁ་མར་
གདགས་པར་བྱ། །དེ་བཞིན་ཕོག་ས་གཉན་དང་མི་གཉན་དང༌། །མཚོན་གྱི་བགྲོད་ལམ་ཞག་
ཀག་འཆི་རྟགས་དང༌། །བཅོས་སྐྱེད་སྦྱར་ལ་འཚོ་འཆིའི་ཁ་མར་གདགས། །ཐེ་ཚོམ་ཟ་ན་ཤན་
མི་ཕྱེད་པར་སྨྲའོ། །བཅོས་པའི་ཐབས་ལ་རྣམ་པ་གསུམ་ཡིན་ཏེ། །ཟུག་རྔུ་མཚོན་དང་སྦྱར་ལ་
བཅོས་པ་དང༌། །ཕོག་ས་གནས་དང་སྦྱར་ལ་བཅོས་པ་དང༌། །སྟོད་སྨད་ཡུལ་དང་སྦྱར་ལ་
བཅོས་པའོ། །ཟུག་རྔུ་མཚོན་དང་སྦྱར་ལ་བཅོས་པ་ནི། །རྡོ་དབྱུག་བརྡུངས་དང་གཡང་ལྷུང་
ཐིབས་འོག་ཚུད། །རྨ་མེད་བྱང་ཁོག་སྟོད་སྨད་ཕྱི་ནང་འགྲམས། །གཟེར་ཟུག་ཆེ་ཞིང་དགྱེ་
དགུ་དཀའ་བ་དང༌། །རྩ་ཆུ་ཚ་བ་སྐྱེས་ན་སྨུག་ཟིལ་འབྱུང༌། །དེ་ལ་ཐང་གཏར་ཕྱེ་མ་དུགས་ལ་
སོགས། །གང་འཚམ་བཅོས་ཀྱིས་འཚམ་པའི་ཚ་རླངས་བསད། །སྦྱོར་བ་འགྲམས་བཅོས་
ལེའུར་ཤེས་པར་གྱིས། །གྲིའམ་མདུང་གིས་བཤགས་བཅད་ཕུག་པའི་རྨ། །དང་པོ་ཨ་ས་སྦང་
མའི་ཆས་སུ་གཞུག །དེ་འོག་ཧྲེམ་ན་ཞུན་བྱ་རྣག་ན་འབྱར། །བྱེར་ན་དེབ་བཏང་སྐྱོན་སོལ་རྨ་
རྩིས་གསོ། །མདའ་ཡིས་ཕོག་ལ་ཟུག་རྔུ་ལས་མ་ལས། །ཟུག་རྔུ་མ་ལས་རྨ་ཁར་ཨ་སས་
25-1-417


བདུག །དེ་ཡིས་ཁྲག་འདོན་རླུང་བྱེར་རྨ་རེམས་འདུལ། །ཤ་གནད་མ་གཏོགས་ཆས་མེད་ཀྱི་
རྨར་བཞག །རྨ་སྐམས་རྩ་འབྱོར་ཆུ་སེར་ནད་མི་གསོག །ཟུག་རྔུ་ལས་ན་སྡོད་དམ་མི་སྡོད་
བལྟས། །སྡོད་རྟགས་ཟུག་ཆུང་སྡང་ཉལ་བདེ་ན་བཞག །མལ་བཅའ་(གང་བདེ་བར་ཉལ་ལ་ཨ་རུ་རའི་
ཐང་བཏང་)གོས་བསྐོན་སྟོད་ལ་མནན་ཐབས་(འབྲུ་མར་བཏང་། ཤ་ཆང་བཏང་། གཞུག་ཏུ་མེ་བཙའ་གདབ་)བྱ། །
སྡོད་དུ་མི་འདོད་དབྱུང་བར་བྱ་བ་སྟེ། །དེ་ལ་སྟོར་བ་བཙལ་དང་དབྱུང་བ་གཉིས། །སྟོར་བའི་
ས་ལ་ཕྱི་ནང་རྣམ་གཉིས་ཏེ། །ཕྱི་ལ་ཤ་སུལ་རུས་པར་མདེ་སྟོར་ན། །དེ་རྟགས་ཡན་ལག་དག་
དང་ཁྱད་པར་མེད། །ནང་དུ་དོན་སྣོད་སོ་སོར་མདེ་སྟོར་ན། །ཕྱི་རྟགས་ནང་རྟགས་གསང་
རྟགས་གསུམ་གྱིས་བཙལ། །ཕྱི་རྟགས་སྙིང་སྲོག་བར་དུ་མདེ་ལུས་ན། །གཟེར་བ་མང་ཞིང་
རྒྱབ་ཀྱིས་ཉལ་མི་ཤེས། །བྱ་རྨྱང་བྱེད་འདོད་ཁ་བུབ་བདེ་བར་ཚོར། །གློ་མའི་སྲུལ་ན་མདེ་
ཡོད་དབུགས་མི་བདེ། །སྦྲིད་པ་མང་ལ་འཆག་འདོད་མཆན་འོག་གཟེར། །ལོགས་གཉིས་
ཉལ་བ་མི་ཤེས་ཙོག་པུར་བདེ། །སྐེ་རྩ་འགྲེང་ཞིང་ལག་པ་བརྐྱང་བསྐུམ་དཀའ། གློ་བའི་བུ་
ལ་མདེ་ཡོད་ལུད་པ་དམར། །རང་གི་ལྟེ་བ་མི་མངོན་སྒུར་ན་གཟེར། །རྔས་སྨས་ཉལ་དཀའ་
དཀར་ནག་མཚམས་སུ་ན། །སྲོག་རྩར་མདེ་སྟོར་སྐས་ལ་འཛེག་མི་ཤེས། །མཆིན་དྲིར་མདེ་
ཡོད་ལུས་ལྕི་ངོ་སྣུམ་འཁྲུ། །ཙོག་པུར་བསྡད་ན་མཆིན་པ་ཁེངས་སྙམ་བྱེད། །ཀོར་ལེར་ལངས་
ན་དཔྱང་ལ་བཏང་སྙོམ་བྱེད། །མཆིན་སྟེང་མདེ་ཡོད་མཆིན་པ་གླང་ཐབས་ན། །སྒུར་འགྲོས་
པུས་བྲང་འཆའ་དང་གཅུ་མི་ཤེས། །མཆེར་ལ་མདེ་ཡོད་དབུགས་ཐུང་ཁོང་པ་སྦོ། །ཕོ་མཆིན་
བར་ན་མདེ་ཡོད་སྐོམ་འཐུངས་ན། །ལག་པས་མཉེ་བ་མི་བཟོད་གླང་ཐབས་ལྡང༌། །ཕོ་བ་ལ་
ཡོད་མི་སྦོ་ཁ་ཟས་སྐྱུག །བྲང་གི་ཞོལ་ལ་མདེའུ་ཡོད་ན་སྦོ། །མཁལ་མར་མདེ་ཡོད་ཆུ་སྲི་གླང་
ཐབས་ན། །རྐང་པ་འཁུམས་ནས་ཡོད་ངོས་ཉལ་མི་ཤེས། །རྒྱུ་མ་ལ་ཡོད་ཟས་སྐོམ་བཏང་ན་
ན། །མཉེ་བར་མི་བཟོད་ཐེམ་པ་རྒལ་མི་ཤེས། །གོམ་པའི་ཤུགས་ཆུང་དྲི་ཆུ་སྡོམ་པ་དང༌།  །
25-1-418

 
ཟུག་གཟེར་ཆེ་ཞིང་ལྡང་དུབ་བྱེད་ན་ཡོད། །ལོང་ལ་མདེ་ཡོད་བསླང་ན་ཟོས་འཐུངས་བདེ། །
ནང་བརྟག་བྱ་མོ་ནག་མོའི་སྒོང་ཁྲག་མཚལ། །ཆང་ཆུ་འོ་མ་(སྦྱར་དོགས་བར་)བྱུགས་པས་སྨྱུག་
མ་འཚུབ། །མདེ་འུ་ཉལ་ལ་རྭ་ཤིང་འགྲེང་བ་ཡིན། །སྣ་རྩེ་བྲང་གཞུང་མཐེབ་སྙིང་སྤྲ་བ་རེ། །
མེ་ཕེབས་སྨྲ་མི་ཤེས་དང་ཀོ་ལེར་ན། །གསང་རྟགས་ཁྱི་དཀར་ཕག་ནག་བྱ་རོག་ཤ །སྲིན་
བྱའི་ཤ་དང་ཆང་སྦྱར་ལྟོ་སྟོང་བཏང༌། །དོགས་སར་ལྕགས་གཡའ་སྲན་ཙམ་བྱུང་ན་ཡོད། །
རུས་སྦལ་ཕག་རྒོད་བྱ་བྱི་ཕོ་མོའི་ཤ །ཆང་སྦྱར་ཐོ་རངས་ན་མ་ལྔ་བཏང་ལ། །བཞི་ནས་ཁབ་
ལེན་ར་ཐུག་ཆུ་སྦྱར་བྱུག །དར་དཀར་ཤོག་བུ་བཀབ་པས་ལྕགས་གཡའ་འབྱུང༌། །ཧ་ཞིག་
དུང་ཐལ་སྟག་གི་རྩིབ་རུས་དང༌། །བྱ་རོག་བྲུན་རྣམས་ཆུར་སྦྱངས་ཁོང་དུ་བཏང༌། །ལྕགས་
གཡའ་འབྱུང་དང་ཀོ་ལེར་འགུལ་ན་ཡོད། །འདོན་པའི་ཐབས་ལ་སྨན་དང་དཔྱད་གཉིས་
ཡིན། །གནད་མེད་ལམ་ཐུང་ངོས་ཟིན་མདེ་ལག་སྤྲད། །སྐམ་པས་ཕྱུངས་ཏེ་ཡན་ལག་ལྟ་བུར་
བྱ། །ལམ་གཉན་གཏིང་རིང་མདེ་ལག་མ་ཕྲད་པ། །སྨན་གྱིས་དབྱུང་སྟེ་བྱ་མ་བྱི་ཡི་ཤ །བྱ་
རོག་ཤ་དང་ཁབ་ལེན་སྨུག་པོ་དང༌། །ཕག་རྒོད་མཆེ་བ་ཉ་ཤ་ཆང་སྦྱར་བཏང་། །བྱ་ནག་ཤ་
གསར་ཏིལ་ལྟོ་ཕྱུངས་པའི་ནང༌། །སོ་བ་ཕུལ་གང་ཁྲམ་ཁྲུམ་བརྡུངས་པ་དང༌། །ལྡོང་(དམར་པོ་
སྲང་བྱེད་)རོས་བཅའ་སྒ་ཨ་རུ་བཏགས་པ་བླུག(ལ་ཁ་ཙེམ་) །འཚོས་པར་བཙོས་སྐམས་བསྲེགས་
པའི་ཐལ་བ་དང༌། །ཉ་ཤ་སྦྱར་བཏང་ཕྱིར་ལ་འབྱུང་བར་ངེས། །གི་ཝཾ་རྩངས་པའི་ཤ་དང་ད་
བྱིད་དང༌། །རྒྱ་རུ་ཀ་ར་སྦྱར་བཏང་རྨ་ནས་འབྱིན། །རྨོན་ལྕགས་རྩེ་བརྡར་ལྕགས་ཕྱེ་བྱེ་སྒོང་
གང༌། །ལྕགས་འབྱེད་བཙའ་སྦྱར་ཆང་བྲེ་ཕྱེད་ལ་བསྡུ། །ཁཎྜ་བྱས་ཏེ་ཁོང་བཏང་(རྨ་འམ་གསང་
ལམ་ནས་)ཕྱིར་འབྱུང་བྱེད། །ཕྱི་ནས་ཁབ་ལེན་སྦྲུལ་ཚིལ་མི་གླད་སྦྱར། །རེང་བུ་རྨ་རུ་བཅུག་
པས་ཕྱིར་ལ་འདྲེན། །བྱ་མ་བྱི་དང་ཕག་པའི་ཤ་ལྷུ་རེ། །ཆུ་བྲེ་གང་ལ་བུམ་པར་བཙོས་པ་ཡི། །
རླངས་པས་རྨ་ཁར་བདུགས་པས་ཕྱིར་འབྱིན་བྱེད། །ཕོག་ས་གནས་དང་སྦྱར་ལ་བཅོས་པ་
25-1-419


ནི། །ཤ་གནད་འཇིབས་ལུམས་ཞུན་ནན་འབྱར་གྱིས་བཅོས། །རྨ་གསར་དང་པོ་ཨ་ས་བ་ཡིས་
བདུག །དེ་ནས་སྦང་མའི་འཇིབས་སུ་གཞུག་པར་བྱ། །སྐྲངས་ན་བསིལ་(བསིལ་པའི་སྔོ་དང་ཞོ་སྦྱར་
བ་)ལུམས་དྲོད་(མཁན་པ་སྦང་མ་ཕབས་སྦོད་)ལུམས་རིག་པས་སྦྱོར། །སྐྲངས་དམར་ཚ་བ་ཆེ་ན་གཏར་
(གང་ཉེ་ལ་)བ་ཤིས། །ཏིག་ཏ་ཧོང་ལེན་ཀྱི་ལྕེ་པར་པ་ཏ། །ཆུ་རྩ་བྲག་སྤོས་ཞོ་སྦྱར་ནན་གྱིས་
མནན། །གྲང་སྐྲངས་སྦྲང་གར་སྒ་ཕབས་པི་པི་ལིང༌། །གོ་སྙོད་གཡེར་མ་ལྕ་འབྲས་མར་ཚིལ་
བསྐོལ། །བྱུགས་ལ་སྟེང་དུ་ཧེལ་གེའི་འཇག་གིས་དཀྲིས། །ཤ་གནད་བྱེར་ཞིང་སྐྲངས་པ་གང་
ལ་ཡང་། །གླད་པ་ཉེའུ་ནས་ཕྱེ་རྐང་མར་དང༌། །སྤོད་སྣ་ཆང་སྦྱར་བཙོས་པའི་ཞུན་དུ་གཞུག །
སྐྲངས་གསོབ་མནན་ན་གསོག་ཅིང་གཟེར་བ་ལ། །ཞོ་དང་སྦང་གར་ཚིགས་མ་བག་ཕྱེ་སྦྱིན། །
སྒོ་ང་དུད་པ་སྦྱར་བྱུགས་སྤུ་དེབ་བཏང༌། །བྱེར་ཚེ་ཕྱིང་དེབ་བསེ་ཁྲབ་ཆིངས་ཀྱིས་བསྡམ། །
རུས་གནད་འཇིབ་རྩི་སྨན་བྲུད་མེ་ཡིས་བཅོས། །ལྷ་བ་ཅན་རུས་རྨ་ཁ་ཆེ་བ་ལ། །གུར་གུམ་
ཤེལ་ཏ་ཨ་བྱག་དོམ་མཁྲིས་སྦྱར། །རེང་བུ་རྨར་བཏང་ལུག་གི་རྐང་མགོ་བརྡུངས། །ཞོ་དང་
སྦྱར་བའི་འཇིབས་སུ་གཞུག་པར་བྱ། །དེ་ཡིས་ལྷ་བ་མི་འབྱེར་ཆུ་སེར་འདྲེན། །རྨ་ཁ་ཆུང་ན་
བསྲེགས་པས་ཐུབ་པ་ཡིན། །སྒྲོག་རུས་རྩིབ་རུས་ཆག་པ་བསྲེགས་པས་ཐུབ། །ཚབས་ཆེ་སྐྱ་
སྦྱོར་ཆིང་དེབ་བཏང་ལ་བཅིང༌། །རུས་པའི་རྨ་རྒན་གསེར་རམ་སྤྲ་བས་བསྲེག །ལྷ་བ་འབྱེར་
ན་ཀྱོང་བུས་བྲད་པ་དང་། །རྨ་སྨན་གདབ་སོགས་མགོ་བོ་བཞིན་དུ་བཅོས། །གཞུག་རུས་མི་
བསྲེག་བདུད་རྩི་ལྔ་ཡིས་བདུག །ཡང་ན་གླ་རིལ་སྤ་འུ་བསྲོས་པས་བདུག །བྱིན་གཞུག་ལོང་
རྩ་གཉིས་ལ་ཅི་རིགས་གཏར། །རྗེས་ལ་རྩ་སྦྱོངས་ཆུ་ཚན་བསྔགས་པ་ཡིན། །རྐེད་པ་ཆག་ན་
སྐྱ་སྦྱོར་ཕྱིང་དེབ་བཏང༌། །མི་འགུལ་གན་རྐྱལ་ཉལ་ལ་བསིལ་བཅུད་བསྟེན། །ཨ་བྱག་ཨ་བ་
གང་རུང་སྲང་གཉིས་ལ། །ཆ་བཞིར་བགོས་ལ་ཆ་གཅིག་སྦྲང་དང་སྦྱར། །ཆ་གཉིས་བ་མར་ཆ་
གསུམ་འོ་མར་སྦྱར། །ཆ་བཞི་པ་ནི་བུ་རམ་དཀར་པོ་བྱིན། །ཀུན་ལ་ན་མ་གསུམ་གསུམ་སྤེལ་
25-1-420


ལ་བཏང༌། །རྐེད་པ་ཆག་དང་གཤུལ་ཤ་ཆད་པ་དང་། །རྨ་ཆེན་རྣག་ཁྲག་གསར་རྙིང་མེད་པར་
སྐེམ། །རྩ་གནད་མེ་བཙའ་གཏར་ག་སྨན་གྱིས་བཅོས། །མེ་ལ་རྩ་ཆད་འཐུད་དང་ཁྲག་ཤུལ་བཅད། །གསང་
ཁ་བསྡམ་དང་ཨ་ན་ཚུགས་བཞིའོ། །དང་པོ་རྩ་ཆད་མེ་ཡིས་འཐུད་པ་ནི། །རྨ་ཁ་ཆེ་ན་རྩ་རྒྱུད་གོང་འོག་
བསྲེག །ཆུང་ན་རྨ་ཁ་དེ་ཉིད་བསྲེག་པར་བྱ། །འཁྱུག་འཕྲེང་གང་གཟེར་ཨ་ན་ཚུགས་སུ་
བསྲེག །ནང་རྩ་རྣམས་ལ་སྤྱི་གཙུག་སྡུད་སྒོ་དང༌། །རྐང་མཐིལ་མཐེ་བོང་སྤུ་སྐྱེས་སྲིན་ལག་
སྙིང༌། །སོག་དཀྱིལ་དྲུག་བདུན་གསེར་གྱིས་བསྲེག་པར་བྱ། །མཁྲིས་སྣ་གུར་གུམ་མགྱོགས་
མེས་རྩ་ཐིགས་བསྡམ། །མཁན་པ་ཞུ་མཁན་རྒྱ་སྐྱེགས་བཙོད་ཁུ་བསྡུས། །གུར་གུམ་དོམ་
མཁྲིས་བཏབ་བཏང་རྩ་ཆད་འཐུད། །གུར་གུམ་མཚལ་དཀར་དོམ་མཁྲིས་ལི་ག་དུར། །གི་ཝཾ་
ཤིང་ཚ་གསེར་གྱི་བྱེ་མ་དང༌། །རེ་སྐོན་མཚེ་ཐལ་(རྨ་བྱའི་)སྒྲོ་བཞོབ་སྨྱུག་མའི་རྩི། །ར་ཁྲག་
བསྲོས་པའི་ནང་དུ་སྤྲུ་འབུ་བསྡུས། །རྨ་ཁོང་གཉིས་ཀར་བཏང་བས་ཁད་སྤུ་གཞུག །གང་ཆད་
དེ་ཡི་དོན་སྣོད་རྩ་ལ་གཏར། །ངན་ཁྲག་རྩ་རུ་དྲངས་ཏེ་ཡང་ཡང་གཏར། །རྩ་ཚད་ཆུ་སེར་ཕྱེ་
མས་བསད་པར་བྱ། །གུར་གུམ་དོམ་མཁྲིས་མེ་ཏོག་ལེབ་རྒན་རྩི། །ལི་ཤི་ཤིང་མངར་མཚལ་
དཀར་དར་ཡ་ཀན། །ཀ་ར་སྦྱར་ལ་ལྟོ་སྟོང་བཏང་བར་བྱ། །གློ་རྩ་ཨ་བྱག་ཤེལ་ཏ་སྤྱི་ཞུར་
དང༌། །རྒྱ་སྐྱེགས་མི་མཁྲིས་གོང་སྟེང་བསྣན་ལ་བཏང་། །སྙིང་རྩ་ཙན་དན་དཀར་དམར་ཞོ་ཤ་
གསུམ། །མཆིན་རྩ་བྲག་ཞུན་མཁྲིས་ཆེན་གླ་རྩི་བསྣན། །མཁལ་རྩ་སུག་སྨེལ་རུ་རྟ་འབྲས་བུ་
གསུམ། །རྒྱུ་རྩ་གསེར་མེ་དུག་ཉུང་བོང་ང་དཀར། །གོང་ལ་བསྣན་པས་རྩ་ཚད་སེལ་བར་བྱེད། །རྩ་ཡི་
རྒྱལ་པོ་སྲོག་རྩ་བཅོས་པ་ནི། །ལྟེ་འོག་སོར་བཞི་མིག་དམར་ཨ་སོ་དང༌། །སྒྲོག་རུས་གཤོང་
དང་ཚིགས་པ་དྲུག་པ་བསྲེག །ལོང་རྩ་རྩ་ཆེན་སྣོད་ཀ་རྩེ་ཆུང་གཏར། །ལི་ཤི་ཀ་ར་འོ་མ་སྦྱར་
ལ་བཏང༌། །རྒྱལ་བློན་གསུམ་པ་བསྟུད་ལ་བཏང་བར་བྱ། །རྩ་ནད་རྙིང་པ་བདུད་རྩི་ལྔ་ཡིས་
བདུག །རྩ་སྦྱོངས་ཆུ་ལུམས་བྱས་ལ་ནད་ལྷག་གདོན། །སྟོད་སྨད་ཡུལ་དང་སྦྱར་ལ་བཅོས་པ་
25-1-421


ནི། །བྱང་ཁོག་སྟོད་ལ་བཅོས་ཚུལ་རྣམ་གཉིས་ཏེ། །བགྲོད་ས་ལམ་དང་སྦྱར་ཏེ་བཅོས་པ་
དང༌། །ཉེས་བྱེད་དུས་དང་སྦྱར་ལ་བཅོས་པའོ། །བགྲོད་ས་ལམ་དང་སྦྱར་ལ་བཅོས་པ་ནི། །
ནང་རྡོལ་ཁྲག་བབས་དོན་ལ་ཟིན་པ་གསུམ། །ནང་དུ་རྡོལ་ན་རྩ་ཁྲག་མ་ཤོར་ཡང༌། །མཚོན་
ཕྱིར་ཁྲག་བབས་ཞལ་ཅིག་འབྱུང་བའི་ཕྱིར། །དང་པོ་མགྱོགས་མེའི་སྦྱོར་བས་ཁྲག་ཐིགས་
བསྐམ། །གུར་གུམ་རྒྱ་སྐྱེགས་མཁྲིས་སྣའི་མགྱོགས་མེ་བྱ། །དྲོད་ཆས་བསྟེན་ན་ཁྲག་ཚད་
སྐྱེད་བྱེད་པས། །རྨ་ཁ་མི་སྐམ་ཆས་སྟེང་ཐེར་སྲབ་བཅིང༌། །ཚད་ཕྲན་སྐྱེར་མངོན་གཏར་ཕྱེ་
རིག་པས་སྦྱར། །ཟས་སྤྱོད་བསིལ་ཞིང་དྲག་ཤུལ་སྤངས་པས་འཚོ། །ནང་རྡོལ་རྩ་ཆད་ཁྲག་
ངན་ཤོར་བ་ན། །མེ་དང་སྨན་གྱིས་རྩ་ལ་ཁད་སྤུ་གཞུག །གུར་གུམ་ཕུར་ཐལ་མཁྲིས་སྣའི་
མགྱོགས་མེ་བསྟེན། །ཁྲག་འཁྱགས་ཟུག་གཟེར་དུགས་ཐང་ཁུགས་ཀྱིས་བཅག །སྦང་གར་
གཡེར་མ་ཚྭ་ཕབས་མར་ནག་ཕྱེ། །འཚོས་པར་བཙོས་པའི་ཟན་དྲོན་སླ་མོ་ཡི། །ཨ་སས་
བདུགས་པས་ཁྲག་འདྲེན་ཟུག་གཟེར་གཅོག །ཆུ་རྡེ་བརྔོས་ལ་སིངས་པོའི་ཁ་ཕྲུ་བཏབ། །
སྒྱེའུར་གཏུམས་ལ་གང་གཟེར་སྟེང་དུ་གླེན། །རྟ་སྦངས་སེར་ག་མ་ཡི་དུགས་ཀྱིས་བདུག །དེ་
མ་འཛོམ་ན་ཡོས་དུགས་བྱས་ཀྱང་བཏུབ། །གླ་ཤིང་སྙིང་པོ་བསེ་རུ་འོ་མ་ཆུར། །བསྡུས་ཁུར་
དོམ་མཁྲིས་ཀ་ར་བཏབ་ལ་བཏང༌། །ཁྲག་འཇུ་ཚ་བ་མི་སྐྱེ་ཟུག་གཟེར་གཅོག །དེ་མ་འཛོམ་
ན་འོ་མ་བསྐོལ་བ་ལ། །དོམ་མཁྲིས་བཏབ་བཏང་ཁྲག་འཁྱགས་འཇུ་ཞིང་སྐེམ། །ཨ་རུ་སྒེ་
གཤེར་རྒྱམ་ཚྭ་རྒྱ་སྐྱེགས་བསྡུས། །ཁུ་བར་དོམ་མཁྲིས་བཏབ་བཏང་གོང་བཞིན་ནོ། །འཚབས་
མེད་ཁ་ཆེ་ནང་རྩ་མ་ཆད་ཅིང༌། །གསང་དུ་ཕོག་ན་ཁྲག་ཁུགས་མར་འདྲེན་ཤིས། །བཀུ་སྟོང་
ལྷེན་འོག་དྲུ་གུ་སྙིམ་ཙམ་བཅུག །པུས་བྲང་བཅས་ལ་ཤམ་བུས་དམ་དུ་དཀྲི། །ཁུགས་ཤིང་
སྟེང་དུ་རྨ་ཁ་ཐུར་ལ་བསྟན། །ཁ་ཆུང་ཁྲག་ཐོན་ཆུང་ན་ཐུར་མས་གསེང༌། །དབུགས་བསྡམ་
ཁྲག་སྦུ་བྱུང་ན་ཁུགས་འཕྲོ་བཅད། །ཡོན་ཏན་ཟུག་འབྲི་གསོ་བླ་བརྗོད་མི་ལང༌། །རྨ་ཁར་མ་
25-1-422


ཐོན་ཁྲག་བཤལ་ཐུར་དུ་སྦྱང༌། །རྒྱ་ཚྭ་རུ་རྟ་ཨ་རུ་ལང་ཐང་ཙེ། །དུར་བྱིད་ལྕུམ་རྩ་ཐང་དུ་
བཏབ་ལ་བཏང༌། །ཡང་ན་རྒྱ་ཚྭ་དོམ་མཁྲིས་བོང་ང་དཀར། །མངལ་ཁྲག་ཁྲོན་བུ་དྲི་ཆུར་སྦྱར་
ལ་བཏང་། །ཁྲག་ཚད་ཁྲག་གསོད་ཐང་དང་ཕྱེ་མས་བསད། །ཐང་སྦྱོར་གུར་གུམ་དོམ་མཁྲིས་
དར་ཡ་ཀན། །རྒྱ་སྐྱེགས་བཙོད་དང་རྒུ་དྲུས་བ་ཤ་ཀ །རེ་སྐོན་ཧོང་ལེན་ཏིག་ཏ་བོང་ང་དཀར། །
ཨ་རུ་ར་རྣམས་བསྡུས་ཁུ་དྲོ་འཇམ་བཏང༌། །མ་ནུ་སླེ་ཏྲེས་ག་དུར་དུག་མོ་ཉུང༌། །བསྡུས་ཁུ་དྲོ་
འཇམ་ཁྲག་ཟེར་གཅོག་པའི་མཆོག །རྒྱ་སྐྱེགས་སྐྱུ་རུ་ར་དང་བ་ཤ་ཀ །བསྡུས་ཁུར་དོམ་
མཁྲིས་ཁ་ཚར་བཏབ་ལ་བཏང༌། །ཁྲག་ངན་ཚ་བ་རོལ་དུ་གསོད་པའི་མཆོག །ཕྱེ་མས་བསང་
པ་ཁྲག་དུས་སྐེམས་དང་འདྲ། །ཁྲག་མཚོ་རྩ་ཡི་ཡུར་དུ་གཏར་གྱིས་དྲང༌། །སྤྱོད་ལམ་གཟབ་
ཅིང་ཁ་ཟས་བསིལ་གྱིས་བཅོས། །ནང་རྡོལ་དོན་ཟིན་མོད་ལ་མ་ཤི་ན། །དང་པོ་དོན་ཐིགས་
མགྱོགས་མེས་བསྡམ་བྱ་སྟེ། །མི་དོམ་ཉ་སོགས་མཁྲིས་སྣ་གུར་གུམ་དང༌། །ཨ་བ་ཨ་བྱག་ལི་
གྲིའི་མགྱོགས་མེ་བསྟེན། །ཨ་རུ་གསེར་མདོག་དོམ་མཁྲིས་དར་ཡ་ཀན། །གསེར་ཐིག་རྟ་ཡི་
མཆེར་སྐམ་ཤ་རུའི་ཐལ། །སྦྲང་བསྒོར་ཕྱེ་མ་མགྱོགས་མེས་འཕུལ་ལ་བཏང༌། །དེ་མ་འཛོམ་
ན་དོམ་མཁྲིས་ལི་གྲི་དང་། །འགྲོན་བུའི་ཐལ་བ་ཀ་ར་མགྱོགས་མེས་དབུལ། །དོན་ལ་ཟུག་རྔུ་
མ་ལས་རྩ་མ་ཆོད། །དོན་སྙིང་རྨ་ལ་ཁྲག་འབྱོར་བྱེད་པ་ཡིན། །དོན་ཟིན་དགྱེ་དགུ་་མི་ཤེས་
པང་འཚོས་དགོས། །བཟང་ཁྲག་གཏར་གྱིས་འདོན་པ་དཔྱད་མཆོག་ཡིན(ཁྲག་ཤེད་རང་སྨད་དགོས་
)། །གློ་བུ་སྙིང་ལ་རྩ་ཆེན་ཡས་བབས་གཏར། །གློ་བ་མ་ལ་རྩ་ཕྲན་མས་འཛེག་གཏར། །དོན་
ཚད་རྒྱས་པ་བསིལ་བའི་ཕྱེ་མས་བསད། །གློ་ལ་ག་བུར་བཟང་དྲུག་ཙན་དན་གཉིས། །ཤིང་
མངར་རྒུན་འབྲུམ་སྲོ་ལོ་སྤང་རྒྱན་དཀར། །བསེ་རུ་གྭ་དོར་ཀ་ར་སྦྱར་ལ་བཏང་། །ག་བུར་ཅུ་
གང་ཛཱ་ཏི་ལི་ཤི་དང༌། །ཨུཏྤལ་ཤིང་ཚ་གནྡྷ་པ་ཏྲ་དང༌། །པདྨ་གེ་སར་ཧོང་ལེན་མོན་ཆ་ར། །ཆུ་
སྲིན་སྡེར་མོ་ཨ་རུ་ཀ་ར་སྦྱར། །སྙིང་ལ་ཛཱ་ཏི་ལི་ཤི་ཨ་རུ་ར། །ཞོ་ཤ་རྣམ་གསུམ་ཆུ་གྲང་འཕུལ་
25-1-423


ལ་བཏང༌། །སྙིང་མི་དྲན་ཞིང་འབོག་ན་བྱ་རྒོད་སྙིང༌། །ལི་ཤི་ཞོ་ཤ་གསུམ་དང་ཏི་མུ་ས། །
བསྡུས་པའི་ཐང་བཏང་བདུན་པ་དཀར་ནག་མཚམས། །སྒྱིད་ཁུང་མཐེ་བོང་སྤུ་སྐྱེས་བསྲེག་
པར་བྱ། །འདི་ལ་ཟས་སྤྱོད་ཁྲག་གི་སྐབས་ལྟར་བསྟེན། །ཉེས་བྱེད་དུས་ཀྱི་སྒོ་ནས་བཅོས་པ་
ནི། །དང་པོ་ཞག་བདུན་ཞུགས་པ་ཁྲག་གི་དུས། །བྲམ་ཟེ་ལྟ་བུར་གཙང་སྦྲའི་སྒོ་ནས་བཅོས། །
བར་དུ་ཞག་བདུན་རྒྱས་པ་ཆུ་སེར་དུས། །དགེ་སློང་ལྟ་བུར་སྤྱོད་ལམ་ཞིབ་མོར་བཅོས། །ཐ་
མ་ཞག་བདུན་སྨིན་པ་རྣག་གི་དུས། །རྒྱལ་པོ་ལྟ་བུར་ཟས་ཀྱིས་བཅོས་པའོ། །དང་པོ་ཁྲག་
དུས་ཟུག་གཟེར་བཅག་པ་དང་། །རྩ་ཁ་བསྡམ་དང་ཁྲག་ཚད་རོལ་དུ་བསད། །ཉེས་བྱེད་རྩར་
དྲང་ཕྱི་ཚད་ཆུ་ཡིས་བཅག །དང་པོ་གཟེར་བ་ཁྲག་རྩ་དོན་གཟེར་གསུམ། །དུགས་དང་མེ་
བཙའ་གཏར་གྱིས་བཅག་པ་གཅེས། །རྩ་ཁ་བསྡམ་པ་སྤྲ་བ་མགྱོགས་མེ་གཉིས། །མགྱོགས་
མེ་དར་དཀར་དྲི་མེད་གཙང་མ་རུ། །གུར་གུམ་མི་དོམ་མཁྲིས་པ་ཨ་བྱག་ཕུར། །སྨྱུག་མ་མཐོ་
གང་བཙུགས་ལ་རས་སྐུད་བཀྱིགས། །གཡའ་ཆུ་གཙང་ལ་མདོག་འགྱུར་བངས་སུ་གཞུག །
དྲུག་བདུན་བཏང་བས་རྩ་ཁ་སྡོམ་པ་དང༌། །ཁྲག་གསོད་དོན་རྨ་འབྱོར་ཞིང་ཆུ་སེར་སྐེམ། །
མགྱོགས་མེ་བཅུ་བཞི་ཡན་ཆད་སྐོམ་དུ་བསྟེན། །ནང་རྡོལ་རྩ་ཆོད་དོན་ཟིན་ཁྲག་བབས་
པས། །ཁྲག་འཕེལ་མཁྲིས་འཁྲུག་ཚ་བ་རྒྱས་འགྱུར་ཏེ། །ཆུ་དམར་རྩ་གྲིམས་གདོང་སྣུམ་རྔམ་
པ་ཐུང༌། །ནུབ་གཉིད་མི་ཕེབས་ཉིན་པར་གཉིད་མི་ཐུབ། །ཁ་ལྕེ་མཆུ་སྐམས་སོ་ལ་དྲེག་ནག་
ཆགས། །ཟས་ལ་མི་དགའ་སྐོམ་དད་ཤིན་ཏུ་ཆེ། །ཙོག་པུར་མི་ཟུག་སྔས་སྨས་ཉལ་མི་ཤེས། །
ཐལ་གོང་པ་དང་སོག་དབྲག་སྦོ་ཞིང་གཟེར། །ཁྲག་ཚད་རྒྱས་པ་ཟས་སྤྱོད་ཕྱེ་མས་བཅད། །
ཟས་སྐོམ་ཆག་ཚེ་བ་ར་མཛོ་ཡི་ཞོ། །དར་གསར་མར་དཀར་ཆུ་བསིལ་བསྟེན་པར་བྱ། །ལན་
ཚྭ་ཤ་ཆང་དྲོད་བཅུད་དུག་འདྲ་སྤང༌། །སྤྱོད་ལམ་བསིལ་སར་སོས་དལ་དྲག་ཤུལ་སྤང༌། །ཕྱེ་
མ་ག་བུར་ཙན་དན་དཀར་པོ་དང་། །ཅུ་གང་གུར་གུམ་ལི་ཤིས་ཁྲག་རླངས་གསོད། །མི་དོམ་
25-1-424


ཉ་ཕག་ཁྱི་ནག་གཡག་རོག་མཁྲིས། །ཟབ་ཆེན་འགྲོན་བུའི་ཐལ་བས་རྩ་ཁ་སྡོམ། །བསེ་རུ་གྭ་
དོར་གཉིས་དང་བ་ཤ་ཀ །གཙོད་ཁྲག་རེ་སྐོན་ལི་གྲིས་ཁྲག་ངན་སྐེམ། །ཀ་ར་སྦྱར་བ་བཞི་
ཡར་དྲུག་ཡར་བཏང༌། །ཡང་ན་དགུ་སྦྱོར་ཕྱེ་མ་ལྟག་པ་སྤྲད། །ག་བུར་ཅུ་གང་གུར་གུམ་
ཨུཏྤལ་མཚལ། །གླ་རྩི་སུག་སྨེལ་སྟོད་སྣག་བ་ལེ་ཀ །ཀ་ར་དཀར་སྦྱར་ནང་པར་ལྟོ་སྟོང་
བཏང༌། །བསེ་རུ་གྭ་དོར་ཙན་དན་ཨ་ག་རུ། །ཛཱ་ཏི་འགྲོན་བུའི་ཐལ་བ་ཨ་རུ་ར། །ལི་གྲི་རྒྱ་རུ་
ཀ་ར་སྲོད་ཁྱེར་བཏང་། །ལྟག་པ་སྤྲད་པས་ཡོན་ཏན་གོང་དང་མཚུངས། །ཡང་ན་བདུན་སྦྱོར་
ཕྱེ་མ་ལྟག་པ་སྤྲད། །གྭ་དོར་རྭ་གཡས་མཛོ་མོ་དཀར་མོའི་ཞོར། །ཞག་གསུམ་སྦངས་ལ་ཚེར་
མའི་མེ་ལ་བཙོ། །དེ་ནས་མི་ཞོར་ཞག་གསུམ་སྦངས་ལ་བཙོ། །དེ་ནས་རྩོས་ཞོར་ཞག་གསུམ་
སྦངས་ལ་བཙོ། །དེ་ཉིད་གྲིབ་སྐམས་རྒྱལ་པོ་ལྟ་བུ་སྟེ། །ག་བུར་བསིལ་གསུམ་ཛཱ་ཏི་ཕ་ལ་
དང༌། །ཧོང་ལེན་ཀ་ར་སྦྱར་ལ་ནང་པར་བཏང༌། །རྒྱ་རུ་ཙན་དན་དཀར་པོ་པད་གེ་སར། །
ཨུཏྤལ་ཛཱ་ཏི་ཀ་ར་རྒོངས་མོ་བཏང༌། །ཉེས་བྱེད་ངན་ཁྲག་རྩ་རུ་དྲང་བ་ནི། །སྨིན་དང་དབྱེ་
བར་བྱ་བ་མི་དགོས་ཏེ། །སྔ་དྲོ་རྒོངས་ཀ་བསྟུད་ཀྱིན་ཁྲག་ཤེད་སྨད། །སྨིན་དུས་བསྡད་ན་
སྟག་གདོང་ས་གཏོར་འདྲ། །རྩེ་ཆུང་དཔུང་རྩ་ཆུ་སེར་གླད་གཅོག་རྩ། །དྲུག་འགོ་རུ་ཐུང་
གཟེར་བ་ཟུག་གཅོག་རྩ། །སྣོད་ཀ་གཤའ་རིངས་དང་ག་འབྱེད་པའི་རྩ། །སྒང་རྩ་འདོམ་རྩ་ཆུ་
སེར་རྩད་གཅོད་རྩ། །རྒྱབ་སྒང་སོག་དབྲག་སྒང་རྩ་དྲུག་འགོ་དང༌། །ནུ་འཇིང་བྲང་གཟེར་རུ་
ཐུང་སྣོད་ཀ་དྲང༌། །ཡས་བབས་མས་འཛེག་ཚ་བའི་སྟོབས་དང་སྦྱར། །རྣག་མཁྲིས་ལྕགས་
གཡའ་ཆགས་ན་གཏར་གྱིས་འདྲོངས། །གཏར་སྐྱེད་ཆེ་ན་མང་གཏར་ཉུང་དུ་དབྱུང༌། །དམར་
ནག་གཞའ་རིས་མི་འདྲོངས་ཟོ་སྦྱར་གཏར། །ཁྲག་མི་ཆགས་ཤིང་ཆུར་འགྲོ་གཏར་ཚོད་
བཟུང༌། །མི་འདྲོངས་བུངས་ཆེས་གཏར་ཚོད་མ་ཟིན་ན། །རྣག་དུས་ཟུངས་ཟད་མདའ་ཟད་
དགྲ་བྱུང་འདྲ། །ཕྱི་ཡི་ཚ་རླངས་ཆུ་ཡིས་བཅག་པ་ནི། །ཞག་ལྔ་ལོན་ནས་སྐར་ཆུ་གྲང་མོ་ཡིས།  །
25-1-425

 
ཉི་དྲོས་འཕྲུལ་འཁོར་བསྐོར་བས་སྐེམ་པ་བླ། །ཚ་བ་ཕྱི་བྱེར་རང་སྐེམས་ཚ་རླངས་གཅོག །དེ་
ལྟར་བཅོས་པས་ཚ་བ་ནད་སྟོབས་བྲི། །བདེ་སྐྱེད་ཆེ་ན་མྱུར་དུ་འཚོ་བར་འགྱུར། །དེ་ལ་སྐྱེད་
མེད་ཞག་བདུན་འདས་པ་དང་། །བར་དུ་རྒྱས་པ་ཆུ་སེར་དུས་ཞེས་བྱ། །དེ་ལ་རྒྱུ་དང་རིགས་
རྟགས་སྐམ་ཐབས་བཞི། །དེ་རྒྱུ་བྱ་ཆད་བྱ་ཤོར་ཐིགས་སྡོད་དང༌། །སྨུག་ཟིལ་རྣམ་པ་བཞི་
ལས་གྱུར་པ་སྟེ། །བྱ་ཆད་མཚོན་ཕྱིར་ཁྲག་ཤོར་ཁྲག་བབས་ཏེ། །གཏར་གྱིས་མ་འདྲོངས་སྨན་
གྱིས་མ་འཆུན་དང༌། །བྱ་ཤོར་ཕྱི་རྩ་གཉན་པོ་ཆོད་པ་སྟེ། །དུས་སུ་མེ་ཡིས་རྩ་འཕྲང་མ་སྡོམས་
གཉིས། །སྔར་ཤོར་ཕྱིར་མི་སྐྱེ་བས་གྲང་བབས་རྒྱུ། །ཐིགས་སྡོད་རྩ་ཐིགས་དོན་ཐིགས་མདེ་
ཐིགས་གསུམ། །ནང་རྩའི་ཐིགས་ལ་ཁ་ཤོར་ངུ་བ་གཉིས། །རྩ་བྲན་ཁ་ཤོར་སོག་སྦུགས་ཆུ་
འཛག་འདྲ། །རྩ་ཆེན་བཙན་བརྡུངས་ཁྲག་དང་ཆུ་སེར་དུ། །དེ་གཉིས་སྨན་གྱིས་ཁད་པུ་མ་
ཚུད་དང༌། །དོན་རྨ་དང་པོར་ཁྲག་འབྱོར་མ་བྱུང་བས། །རྨ་རུལ་ཁྲག་དང་ཆུ་སེར་ཐིགས་པ་
དང༌། །མདེའུ་ལུས་སྡོད་པའི་མལ་ས་མ་རྙེད་པས། །འགྱར་འགྱུར་སྐྱོན་གྱིས་ཁྲག་ཆུ་འདུས་ཏེ་
འཐིག །ཁྲག་ཚད་རྒྱས་པ་སྨན་གཏར་མ་ཆོམས་པས། །ཚ་བ་རླངས་འཁྱིམས་ཁ་གཡམ་ཟིལ་
པ་འདྲ། །དེ་རྣམས་འཕྲལ་ལ་སྐྱེ་བས་ཚ་བབས་འགྱུར། །དེས་བསྐྱེད་ཆུ་སེར་ཚ་བབས་གྲང་
བབས་དང༌། །ཁྲག་བབས་པ་དང་ཆུ་སེར་རྐྱང་པའོ། །ཚ་བབས་རྩ་ཆུ་ཚ་ལ་གདོང་པ་སྣུམ། །
ཁ་ཟས་མི་འདོད་སྐོམ་སྙེག་ཁ་ལྕེ་སྐམ། །ལུས་ཚ་བྱ་འབྲུམ་འོང་ཞིང་གློ་མང་ལྡང༌། །དབུགས་
ཐུང་ཉིན་གཉིད་མི་ཐུབ་ནུབ་གཉིས་ཡར། །ཟུག་ཆེ་ཟ་ཟི་མང་ལ་གསང་ས་བྱེ། །གློ་མང་ལུད་
པའི་གསེབ་ཏུ་རྣག་འབྲུམ་འབྱུང༌། །སྐམས་པས་མི་སྐོམས་རྒྱ་བཤལ་གསང་སྒོར་དབྱུང༌། །
གྲང་བབས་རྩ་ཆུ་འཇམ་ལ་གདོང་པ་དཀར། །དང་ག་བདེ་ལ་ལྕེ་རློན་སྐོམ་དད་ཆུང༌། །ཤ་ཡི་
དྲོད་ཆུང་འདར་དང་གྲང་ཤུམ་མེད། །དབུགས་བདེ་ཉིན་གཉིད་ཆུང་ལ་ནུབ་གཉིད་ཕེབས། །
ཟུག་ཆུང་བླབ་ཆོལ་མི་སྨྲ་གསང་མ་བྱེ། །གློ་ཉུང་ལུད་པ་གཙང་ལ་ལུས་པོ་ཡང༌། །དེ་ལ་
25-1-426


གསང་དབྱེ་མི་དགོས་བསྐམས་པས་སྐོམ། །ཚབས་ཆུང་ཆུ་སེར་དུས་ཀྱང་ཁྲག་དང་བཅས། །
དེ་ཕྱིར་གཏར་གྱིས་འདྲོངས་ཤིང་སྐེམ་པ་བླ། །ཁྲག་གི་བབས་ཆེ་དོན་ལ་ཟིན་པ་དེ། །ཁྲག་
དུས་ཆུ་སེར་ཕྱིང་དྲིལ་མ་བཅོས་ན། །ཞག་བདུན་འདས་ནས་ཆུ་སེར་རྐྱང་པར་འགྱུར། །དེ་
ཉིད་གཏར་གྱིས་མི་འདྲོངས་སྐེམ་པ་དཀའ། །དེ་ཕྱིར་ཚབས་ཆུང་དུས་གསུམ་སོ་སོར་བཅོས། །
ཚབས་ཆེ་ཁྲག་དུས་ཆུ་སེར་ཆིང་དྲིལ་བཅོས། །ཆུ་སེར་སྐེམ་ཐབས་ཟས་སྤྱོད་སྨན་དཔྱད་
བཞི། །ཟས་ནི་བྲམ་ཟེའི་དུས་ཀྱི་སྟེང་དག་ཏུ། །གནའ་དགོ་བ་ལང་ཤ་གསར་བསྣན་ལ་
བཏང༌། །ཟུངས་ཞན་མངར་གསུམ་ལྡེ་གུས་ལུས་ཟུངས་གསོ། །སྤྱོད་ལམ་ལྡང་ཉལ་དྲག་ཤུལ་
སྐད་ཆེ་སྨྲ། །གློ་དྲག་ལུ་དང་དྲི་མ་འཚིར་བ་སོགས། །རྩ་ཁ་འབུད་པའི་དྲག་ཤུལ་ཁྲིམས་ལྟར་
བསྲུང་། །སྨན་གྱིས་སྐེམ་པ་སྤྱི་དང་བྱེ་བྲག་གཉིས། །སྤྱི་ལ་ཕྱེ་མ་ལྡེ་གུ་སྨན་མར་གསུམ། །
ཁྲག་དང་བཅས་པའི་དུས་སུ་ཕྱེ་མ་སྟེ། །ཆུ་སེར་རྐྱང་པའི་དུས་སུ་ལྡེ་གུས་བསྐམ། །རྣག་ཏུ་
ཁུགས་ནས་སྨན་མར་ཤིས་པར་གསུངས། །ཕྱེ་མའི་སྦྱོར་བ་རྣམ་པ་གསུམ་ཡིན་ཏེ། །ཉི་མ་ལྔ་
ཡི་ཕྱེ་མ་སྦྱར་བ་ནི། །བསེ་རུ་དཀར་པོ་གྭ་དོར་རྣམ་པ་གཉིས(རའི་ཉི་མ)། །ཙན་དན་དཀར་
དམར་ཨ་རུ་གསེར་མདོག་དང་(ཤིང་གི་ཉི་མ)། །ཅུ་གང་གུར་གུམ་ཛཱ་ཏི་གུ་གུལ་དཀར(རྩིའི་ཉི་མ)། །
ཐལ་ཀ་རྡོ་རྗེ་སོ་མ་ར་ཛ་དང༌། །ལི་གྲི་དོམ་མཁྲིས་(པའི་ཉི་མ་)ཟབ་འགྲོན་ཕུར་ཐལ་བ(བའི་ཉི་མ)། །
ཞིབ་བཏགས་ཀ་ར་དཀར་སྦྱར་སེང་ལྡེང་དང༌། །ཤི་ལ་(བྲག་ཞུན་)ཛཱ་ཏུ་བསིངས་པའི་དྭངས་
མས་དབུལ། །ཉི་མ་ལྔ་ཡིས་རྒྱ་མཚོ་སྐེམས་པ་ལྟར། །ཁྲག་དང་ཆུ་སེར་རྣག་གི་རྒྱ་མཚོ་སྐེམས། །
རྒྱལ་བློན་དམག་དཔུང་བཅས་པའི་ཕྱེ་མ་ནི། །མུ་ཟི་རྒྱལ་རིགས་གསེར་འདྲ་ཁྱོར་བ་ཕྱེད། །
ད་ཆུ་དུག་(དངུལ་ཆུ་)ཕྲལ་ཞོ་གཅིག་སྟར་བུ་གསུམ། །འདྲེས་པར་མཉེས་ལ་བསེ་རུ་གྭ་དོར་
གཉིས། །རྒྱ་རུ་ཙན་དན་དཀར་པོ་ཨ་ག་རུ། །གུར་གུམ་ཅུ་གང་ཏིག་ཏ་བ་ལེ་ཀ །མི་དོམ་ཁྱི་
མཁྲིས་ཧོང་ལེན་བ་ཤ་ཀ །དུར་ཐོད་དུང་འགྲོན་ཐལ་བ་ཀ་ར་སྦྱར། །བ་ཆུ་སྤྲུ་རྩའི་ཁུ་བས་
25-1-427


འཕུལ་ལ་བཏང༌། །རྣག་ཁྲག་ཆུ་སེར་ཞག་རེས་སྐེམ་པར་ནུས། །རྩལ་ཆེན་བསྡུས་པའི་ཕྱེ་མ་
སྦྱར་བ་ནི། །གཙོ་བོ་པ་ཌ་ཧྲི་ལ་གསེར་འདྲ་དེ། །ས་ཕྲལ་ལྕགས་སྣོད་མེ་ཡི་སྙིང་པོས་བཞུ། །
ཨ་རུ་ཆུར་བླུག་བསྡུས་གྲང་མེ་སྟོབས་སྦྱར། །གཙོ་བོ་ཁྱོར་གང་བསེ་རུ་གྭ་དོར་གཉིས(རའི་རྩལ་
ཆེན)། །ཙན་དན་དཀར་དམར་གཉིས་དང་ཨ་ག་རུ(ཤིང་གི་རྩལ་ཆེན)། །ག་བུར་ཅུ་གང་གུར་གུམ་
(རྩིའི་རྩལ་ཆེན་)དོམ་མཁྲིས་དང༌། །མི་དོམ་ཉ་མཁྲིས་(མཁྲིས་པའི་རྩལ་ཆེན་)གྲི་རུས་ཐལ་བ་དང༌། །
འགྲོན་ཐལ་ཤ་རུའི་ཐལ་བ་དུང་ཐལ་དང༌(རུས་པའི་རྩལ་ཆེན་)། །ཏ་བྱ་ར་མཉེ་ཉེ་ཤིང་ཨ་རུ་
ར(ལྡུམ་བུའི་རྩལ་ཆེན)། །ཨ་བ་ཨ་བྱག་རེ་སྐོན་(སྔོའི་རྩལ་ཆེན་)ཕུར་ཟབ་ཐལ། །ཀ་ར་སྦྱར་བ་སེང་
ལྡེང་ཁུ་བས་དབུལ། །མུ་ཟི་ཕྱེ་ལྟར་འགམ་པའི་སྦྱོར་བ་སྟེ། །ཁྲག་དང་ཆུ་སེར་རྒྱ་མཚོ་ཙམ་
ཡང་སྐེམ། །ས་རླན་སྟེང་དང་མེ་ཉི་སྤང་བར་བྱ། །མི་འཇུ་ཧྲེམ་ན་སྨན་དཔྱད་ཆུ་སྐོལ་བཏུང༌། །
འགོར་རམ་འབྱམས་ན་གླང་རྨིག་བསྲེགས་པ་དང་། །གོ་སྙོད་པི་པི་ལིང་གི་བསྡུས་ཐང་
བཏང༌། །དེ་ནས་ལྡེ་གུའི་སྦྱོར་བས་སྐམ་པ་ནི། །བ་འམ་མཛོ་མར་གསར་བཞུ་སྦུ་སྙིགས་
ཕྱུངས། །སྦྲང་རྩི་བཟང་པོ་ཆུ་བཅད་བསྲེས་པ་ལ། །རྩལ་ཆེན་འདུས་པའི་ཕྱེ་མ་བཏབ་ལ་
དཀྲུགས། །དེ་དག་རྐང་ལྟར་འདག་པའི་སྦྱོར་བ་སྟེ། །ཟུངས་ངན་ལུས་སྟོབས་སྐྱེ་ཞིང་རྣག་ཆུ་
སྐེམ། །འབྲི་མར་གསར་པ་སྦུ་སྙིགས་ཕྱུངས་པ་ལ། །མུ་ཟི་ཞིབ་བཏགས་བཏབ་ནས་དཀྲུག་
ཅིང་བསྐོལ། །སེར་ལྗང་དམར་ནག་མདོག་འགྱུར་ངད་ཡལ་ལ། །གོང་གི་ཕྱེ་མ་བཏབ་ལ་
ལེགས་དཀྲུགས་བཏང༌། །ཁྲག་ལྟར་བཏུང་ཞེས་རྣག་ཁྲག་སྐེམ་པའི་མཆོག །མུ་ཟི་མར་ནག་
སྦྱར་ལ་དཀྲུག་ཅིང་བསྡུས། །ཏིང་ཁྲོལ་ཚད་དུ་ཕྱིན་ནས་ངད་ཡལ་ལ། །ཕྱེ་མ་བཏབ་བཏང་ཤ་
ལྟར་བཟའ་བ་ཡིན། །ཞག་རེ་ལ་ཡང་རྣག་ཆུ་ཕུལ་རེ་སྐེམ། །སེང་ལྡེང་ཆང་དུ་ཞག་ལྔ་སྦངས་
ཁུ་ལ། །ར་མཉེ་ཉེ་ཤིང་བསྡུས་ལ་ལུག་ཞོ་ཙམ། །སྦྲང་རྩི་ཆུ་བཅད་བསྲེས་ཏེ་འདྲེས་པ་ལ། །མུ་
ཟི་ཁྱོར་ཕྱེད་བསེ་རུ་རྒྱ་རུ་དང་། །གྭ་དོར་མི་དོམ་ཉ་ཕག་བྱ་རྒོད་དང་། །འཕྱི་སྤྲེ་ཁྱི་མཁྲིས་ཙན་
25-1-428


དན་ཨ་ག་རུ། །བ་ལེ་ཀ་དང་ཆུ་སེར་སྨན་གསུམ་དང་། །གེ་སར་གཉིས་དང་གུར་གུམ་སྦྱར་ལ་
བཏང༌། །དེ་དག་ཀུན་གྱིས་སྐེམས་པར་མ་གྱུར་པའི། །རྣག་ཏུ་གྱུར་ནས་སྨན་མར་དག་གིས་
སྐམ། །སྦྱོར་བ་རྣག་གི་སྐབས་སུ་ཤེས་པར་བྱ། །ཁྱད་པར་བྱིས་པ་བད་ཀན་རང་བཞིན་ལ། །
རུས་ཐལ་སིག་སྣེའི་སྦྱོར་བས་སྐམ་པ་ནི། །གྲི་རུས་དུར་ཐོད་ཤ་རུ་འགྲོན་བུ་དང༌། །ཚ་བ་
གསུམ་དང་ཕུར་ཡོག་ཟ་འོག་རྣམས། །ཐལ་བར་བྱས་ཏེ་ཆུ་སེར་སྨན་གསུམ་དང༌། །ཀ་ར་
སྦྱར་བ་ཆུ་སྐོལ་དབུལ་བར་བྱ། །དར་མ་མཁྲིས་པའི་རང་བཞིན་ཅན་དག་ལ། །རིན་ཆེན་རྩི་
སྦྱོར་དག་གིས་སྐེམ་པ་ནི། །ཟངས་ཐལ་བྱུ་རུ་མུ་ཏིག་མཚལ་དཀར་གཞི། །ག་བུར་བསིལ་
གསུམ་ཙན་དན་དཀར་དམར་དང་། །མཁྲིས་སྣ་ཀ་ར་སྦྱར་བ་གངས་ཆུས་དབུལ། །རྒས་དང་
རླུང་ཤས་ཆེ་བའི་མི་རིགས་ལ། །རྭ་སྣའི་སྦྱོར་བ་དག་གིས་སྐེམ་པ་ནི། །བསེ་རུ་དཀར་ནག་རྒྱ་
རུ་གྭ་དོར་གཉིས། །རྣ་དགོ་གཙོས་དང་རྒོད་གཡུང་བ་མེན་རྭ། །གླང་རུ་ར་ལུག་ཐུག་པོའི་རྭ་
ལ་སོགས། །ཐལ་ཚན་མེ་ལ་སེར་ཙམ་བསྲེགས་པ་དང་། །བཟང་དྲུག་མི་དོམ་ཉ་མཁྲིས་ཀ་ར་
སྦྱར། །དཔྱད་ཀྱིས་བཅོས་པ་གཏར་དང་སྦྱང་བ་གཉིས། །གཏར་ཉུང་ཆུ་སེར་ཚ་བ་རྩད་མི་
ཆོད། །གཏར་དྲགས་ཟུངས་འཛད་དེ་ཕྱིར་རིགས་ལ་དྲིས། །སྨན་གཏར་བཅོས་གྱིས་ཚ་བ་མ་
བྲི་ན། །དུར་བྱིད་ཚ་ལ་པུ་རྩེ་ཤེལ་གྱིས་སྦྱང༌། །དེ་ལྟར་བཅོས་པས་ཚ་བ་ནད་སྟོབས་བྲི། །ཆུ་
སེར་བསགས་རྟགས་ནུབ་ན་ཐུབ་པ་ཡིན། །དེ་ལ་སྐྱེད་མེད་བཅུ་བཞི་ཕར་འདས་པ། །ཐ་མ་
སྨིན་པ་རྣག་གི་དུས་ཞེས་བྱ། །དེ་ལ་བརྟག་པའི་ཐབས་དང་བཅོས་ཐབས་གཉིས། །བརྟག་
པའི་ཐབས་ལ་རྣམ་པ་གསུམ་ཡོད་དེ། །ཕྱི་ཡི་རྟགས་ཀྱིས་ཡོད་མེད་ལ་ཤན་དབྱེ། །ནང་གི་
རྟགས་ཀྱིས་རྣག་གནས་དམིགས་གསུམ་བཟུང༌། །གསང་བའི་རྟགས་ཀྱིས་འདྲ་མིན་ནོར་ས་
བསལ། །དང་པོ་ཡོད་མེད་ལ་ཤན་དབྱེ་བ་ནི། །རོ་སྟོད་དགུ་ལ་གཉའ་ཆག་མིག་སྤྲིན་སེར། །
ལུས་གཅུ་གར་ཡོད་ངོས་ཀྱི་དཔུང་པ་ཤལ། །རྩ་དང་ཆུ་ཡི་ཚ་བ་སངས་མི་སྲིད། །མགོ་ན་
25-1-429


གདོང་པ་རྔུལ་ལ་ལུས་སྤྱིར་ལྕི། །གློ་ཆུང་མང་དུ་ཡོང་ཞིང་གློ་སྙིང་འདེག །སྐད་ཀྱི་གདངས་
ཆག་སྐབས་སུ་བག་རེ་འཁྲུ། །ཤ་མདོག་སྔོ་ལ་ལྕེ་རྙིལ་སེན་མོ་དཀར། །དེ་རྟགས་བཅུ་བཞི་
ཚང་ན་རྣག་ཡོད་ངེས། །རྣག་གི་གནས་གསུམ་གར་ཡོད་དམིགས་བཟུང་བ། །ངམ་ནག་རོ་
སྟོད་བརྒྱངས་ཤིང་སྐབས་སུ་གཟེར། །གཉིད་ཆེ་ཟ་ཟི་མང་ལ་མིག་བོལ་སྐྲངས། །ཁ་དྲི་ང་བ་
རང་གཞན་གཉིས་ཀས་ཚོར། །སྐབས་སུ་ལུད་པའི་གསེབ་ཏུ་རྣག་འབྲུམ་འབྱུང༌། །གློ་སྦུབས་
ནང་ན་རྣག་ཡོད་ངེས་པ་ཡིན། །གློ་རྩ་གང་ཡོད་སྐབས་སུ་གཟེར་བ་དང༌། །སྐབས་སུ་ཕྲུམ་
སེར་འོང་ཞིང་ཞེ་འཁུན་བྱེད། །གང་ཡོད་ངོས་ལ་བྱ་འབྲུམ་ཏམ་གྱིས་འོང༌། །སྟེང་དུ་བཏོན་ན་
ཁྱད་པར་ཟུག་གཟེར་ཆེ། །གློ་སྦུབས་གསང་དུ་བབས་པའི་རྟགས་གཞན་མེད། །ཚང་ཚིང་སྐྱི་
ཕུར་རྣག་ཡོད་ངེས་པ་ཡིན། །བེམ་ཏོལ་བ་སྤུའི་ཐིག་དང་སྤྲུགས་པའི་སྐད། །མེ་ཏོག་སད་
མདའ་མི་འགྱུར་རྟགས་དྲུག་ཚང༌། །ཕྱིར་བབས་དབྱེ་གསང་རྣག་ཡོད་ངེས་པ་ཡིན། །བེམ་
ཏོལ་དོགས་ས་ཀུན་ལ་སྙོམས་པར་བདེག །གཡས་གཡོན་མདུན་རྒྱབ་སྟོད་སྨད་འདྲར་སྣང་
བསྟུན། །སྟོང་སྐད་རྣག་མེད་གཅོར་སྐད་ཆུ་སེར་ཡོད། །འདར་སྐད་བྱུང་ན་རྣག་ཏུ་སྨིན་པ་
ཡིན། །དེ་ནས་གཉིས་པ་བ་སྤུས་བརྟག་པ་ནི། །སྐར་ཆུ་གྲང་མོས་ཉི་མ་ཁ་དྲོས་ལ། །ཁ་ཕྲུ་
བྲན་རྗེས་ཆང་གིས་ཁ་ཕྲུ་བཏབ། །གོས་མི་བཀོན་པར་(དར་གཅིག་བཞག་ལ་)ཉི་མའི་ཟེར་ལ་བལྟ། །
བ་སྤུ་གཟིངས་ན་རྣག་མེད་ཆུ་སེར་འཚུབ། །བས་ལྡགས་རྗེས་ལྟར་ཉལ་ན་རྣག་ཡོད་པའོ། །
དེ་ནས་གསུམ་པ་གཞལ་བ་ཐིག་ལ་བརྟག །མདུན་རྒྱབ་ཚངས་ཐིག་གནམ་ཐིག་འདྲུས་མེད་
གདབ། །ཟུར་ཐིག་གཉིས་གདབ་ཕྱེད་མར་ལན་གཉིས་གདབ། །བཅུ་གསུམ་པ་ནས་ལྟེ་བར་
འཕྲེད་ཐིག་གདབ། །དེ་སྟེང་འཕྲེད་ལ་གཉིས་གདབ་ཕྱེད་མར་བཅལ། །འདྲེན་ཐིག་བཅུ་དྲུག་
འཕྲེད་ཐིག་རྣམ་བདུན་གྱི། །བྱ་རྗེས་ཐིག་བར་གར་ཉམས་རྣག་ཡོད་རྟགས། །གསང་ས་
གཙང་ངོས་དཔེ་རུ་མཚོན་པར་བྱ། །དེ་ནས་བཞི་པ་སྤྲུགས་པའི་སྐད་ཀྱིས་བརྟག །མི་ཁྱི་ཆུ་
25-1-430


སོགས་སྒྲ་སྐད་མེད་པའི་སར། །ཁད་མཉམ་སྟན་ལ་སྐྱིལ་མོ་ཀྲུངས་སུ་འདུག །རྒྱན་ཕོག་སྐྲ་
རྫེས་ལག་པ་སྤྱི་བོར་བསྣོལ། །དཔུང་མགོ་གཉིས་ནས་དལ་བུས་ཇེ་དྲག་དཀྲོག །མཇུག་ཏུ་
ལན་གསུམ་དྲག་ཏུ་སྤྲུགས་ལ་ཉན། །འཁྲོག་སྐད་རླུང་ཡིན་ཤང་ཤང་ཆུ་སེར་ཡོད། །རྙོག་རྙོག་
རྒྱ་ཤལ་ཅུག་ཅུག་རྣག་ཏུ་ངེས། །སྟོད་དུ་སྒྲ་བྱུང་མང་ལ་སྨད་བྱུང་ཉུང༌། །དེས་མ་རྟོགས་ན་
ལོགས་ལ་བསྙལ་བྱས་ཏེ། །ལག་འོག་སྔས་ལ་གོང་མ་དཔྱི་སྟེང་བཀབ། །དཔྱི་དང་དཔུང་པ་
ནས་བཟུང་གོང་ལྟར་སྤྲུག །སྤྲུགས་པས་སྐད་སྟེར་གསང་དུ་ལག་མཐིལ་གཏང༌། །ཐོལ་ཐོལ་
ཁྱིལ་ཁྱིལ་བེའུ་འགུལ་འདྲ་ཡོད། །དེ་ནས་ལྔ་པ་གསང་སར་མེ་ཏོག་བརྟག །དུས་མེད་རྒྱུན་དུ་
གསང་དུ་གཟེར་བ་དང༌། །ཤ་ཡི་མདངས་ནི་གཞན་པས་དེ་ན་བཟང༌། །རྩིབ་བར་ཡངས་ལ་
བརྩེ་ཞིང་སྦོས་ལ་གསོབ། །རྫི་བར་མི་བཟོད་སེར་ག་དྲེག་ཆུང་ཆགས། །གསང་སར་རྣག་གི་
མེ་ཏོག་ཤར་བ་ཡིན། །དྲུག་པ་ཐེ་ཚོམ་ཟ་ན་སད་མདའ་བཏང༌། །བྱི་བྲུན་བརྔོས་ཕྱེ་ནུ་ཞོ་སྦྱར་
ལ་བསྐུ། །བྱི་བའི་པགས་པ་གླན་པས་གསང་སར་སྨྲ། །ཡང་ན་ཤ་ཁྲག་ཚྭ་(ནི་ཤ་བ་བོང་བུའི་ཕོ་
མདུད་བྱ་མ་བྱི་དང་སོ་བྱའི་ཤ་བྱ་མཚའ་ལུའི་ཟེ་ཁྲག་མངལ་ཁྲག་རྒྱ་ཚྭ་)དང་ཤུག་ཚེར་རྣམས། །བ་ཆུ་ཕུལ་ཕྱེད་བ་
ལུའི་མེ་ལ་བསྡུ། །ཁྱོར་གང་ཁྱེའུ་སུས་བསྡུས་བཏང་སྲོ་ལོས་བདུག །ཞག་གསུམ་ནང་པར་
གསང་དུ་རྣག་གིས་སྨྲ(བ་སྦུ་་ཉལ་ལམ་འཁྱིལ་ཅིང་ཟུག་ཆེ་སེར་གས་དང་སྐྱེ་ལོག་བྱ་རྗེས་འོང་)། །ཁྱད་པར་ཡོལ་
དང་སྐྱི་ཕུར་རྟོགས་པར་ངེས། །དེ་ལྟར་མི་འགྱུར་རྣག་རྟགས་དྲུག་ཚང་ན། །ཐེ་ཚོམ་མི་དགོས་
བཙགས་ཐུར་རྒྱབ་པས་ཆོག །མདོག་དམར་ཕྱི་སྐྲངས་པ་སྤུ་འབྱི་བ་དང༌། །སེ་བ་རྒན་པོའི་
པགས་པ་ལྟ་བུར་འགས། །ཡོལ་ནུབ་རུལ་མྱགས་གསང་མཆིས་དེ་སྲོག་འདོར། །གསང་
རྟགས་འདྲ་མིན་ནོར་ས་བསལ་བ་ནི། །ཡོད་འདྲ་མེད་དང་མེད་འདྲ་ཡོད་པ་གཉིས། །དེ་ལ་
ཡོད་ཡོད་འདྲ་ལ་མེད་པ་ནི། །རྩིབ་ལོགས་ཁྲག་ཤ་དྲེག་པར་ཆགས་པ་ཡིས། །རྩིབ་མའི་བར་
ཡང་གཟེར་སྦྲིད་དྲོད་ཆེ་ཞིང༌། །འདར་སྐད་འབྱུང་བས་ཡོད་པ་འདྲར་གྱུར་ཀྱང༌། །རྣག་རྟགས་
25-1-431


གཞན་མེད་གཏར་ཕྲན་ཆུ་ཆགས་གཅུན། །དེ་ཡིས་འཆུན་ནས་གོང་རྟགས་ནུབ་ན་མེད། །
འཁྱམས་སུ་རླུང་ཤོར་ཀྲོ་གསན་ཀྲོག་ཀྲོག་ཟེར། །ཡོད་ཡོད་འདྲ་ཡང་རྩ་སྟོང་ཆུ་མདོག་སྔོ། །
གློ་སྙིང་འདར་ལ་མིག་དཀར་རྣ་བ་འུར། །གདོང་སྐྱ་འཁྲོག་པའི་སྐད་ལ་འཕེལ་འབྲི་འོང༌། །
དེ་ལ་ཤ་ཆང་སྤྲུགས་པས་ཆད་ན་མེད། །གཉིས་པ་མེད་མེད་འདྲ་ལ་ཡོད་པ་ནི། །བྲང་རྣག་
རྐུན་བུ་ཉུང་ཞིང་ཡུན་ལོན་པས། །ཤ་སྐམ་ཡོད་ངོས་ཕྲ་བས་མེད་པ་འདྲ། །ཡོལ་བཅད་སྐྱི་ཕུར་
དཀྲོགས་ཀྱང་སྐད་མི་སྟེར། །མེད་པ་འདྲ་ཡང་རྟགས་གཞན་ཚང་ན་ངེས། །དེ་ཕྱིར་འདྲ་མིན་
གོལ་ས་བཅད་པ་གཅེས། །ངོས་ཟིན་བཅོས་ཐབས་སྨན་དཔྱད་ཟས་སྤྱོད་བཞི། །གློ་རྣག་དྲང་
ཞིང་སྐྱི་ཕུར་རྣག་རྒྱ་དབྲལ། །གསང་དུ་བབས་པ་བསུས་ལ་ཕྱིར་ལ་དབྱུང༌། །དང་པོ་གློ་ཡི་
སྦུགས་སུ་རྣག་ཞུགས་ན། །དང་པོ་རྣག་གི་སྐྱུགས་ཀྱིས་གྱེན་དུ་དྲང་། །དེ་རྗེས་གློ་བ་སྨན་དང་
ཟས་ཀྱིས་གསོ། །དང་པོ་སྟར་བུ་རུ་རྟ་སྐྱུ་རུ་ར། །ཤིང་མངར་པ་ཡག་བུལ་ཏོག་པི་པི་ལིང༌། །
སྦྲང་རྩི་སྦྱར་ནས་ལྟོ་སྟོང་བཏང་བས་འདྲེན། །ཡང་ན་ག་དུར་རྒུན་འབྲུམ་ཨ་རུ་ར། །སྲོ་ལོ་
ཤིང་མངར་ནུས་ལྡན་བསྲེགས་ཐལ་ལ། །སྟར་བུ་རུ་རྟ་དྲོད་སྨན་ཀ་ར་དང༌། །བོང་བུའི་འོ་མ་
སྦྱར་བས་འཇམ་པོར་འདྲེན། །དེ་ཡིས་འདྲོངས་དཀའ་རྒྱ་ཚྭ་རྒྱམ་ཚྭ་དང་། །བུལ་ཏོག་སོ་ཆ་སོ་
ཏོའི་གྲེ་བ་དང༌། །གོ་བོའི་གླད་པ་རྨིགས་པའི་ཁྲག་དང་བདུན། །ཁྱེའུའི་ཆུ་ལ་སྦྱར་བཏང་རྣག་
རྣམས་འདྲེན། །ཡང་ན་ཟངས་ཐལ་སྦྱར་བས་རྩ་ཁ་དབྱེ། །བོང་བུའི་འོ་མ་སྟར་བུ་ཨ་རུ་ར། །
ཝ་ཡི་གློ་བ་སྦྱར་བ་ཞག་གསུམ་མནན། །བཞུག་སྒྲོ་གསུམ་གྱི་ཐལ་བ་གླད་པ་གཉིས། །ཡ་
བཀྵ་ར་སྦྱར་བཏང་དྲག་པོར་འདྲེན། །ཡང་ན་སྦྲང་རྒོད་རྒྱ་ཚྭ་ག་བུར་དང༌། །ཅུ་གང་འབྲི་ཏ་ས་
འཛིན་ཆང་སྐྱུར་སྦྱར། །མདུན་རྒྱབ་བདུད་རྩི་ལྔ་པོ་བཙོས་པས་བདུག །དེས་མ་འདྲོངས་ན་
ཡུངས་ཀར་མུ་ཟི་དང༌། །གུ་གུལ་མར་ནག་རས་ལ་བསྟིམ་བྱས་ནས། །བུམ་ནང་མེས་
བསྲེགས་དུ་བ་ཁ་སྣར་བདུག །ཡང་ན་ལྡོང་རོས་གུ་གུལ་སོ་ཆ་དང༌། །རྡོ་དྲེག་རུ་རྟ་ལ་ཆ་སྦྱར་
25-1-432


ལ་བདུག །ཡང་ན་མཆུ་སྙུང་ལྡོང་རོས་ཡུང་བ་དང༌། །ཤིང་ཀུན་རྒྱ་སྐྱེགས་ཟངས་རྡོ་པི་པི་ལིང༌། །
ཤིང་མངར་གུ་གུལ་གླ་རྩི་པོ་སོ་ཆ། །མི་ཡི་ཚིལ་སྦྱར་དུ་བ་རྔུབས་པས་འདྲོངས། །རྣག་ཐོན་
པ་ཡི་ཚད་ནི་རྣག་ཤུགས་འབྱུང༌། །བརྐོ་བ་དྲགས་ནས་རྣག་ཟད་ཁྲག་ཤོར་ན། །རྩ་ཁ་བསྡམས་
དང་རྣག་རྗེས་བཅད་པར་བྱ། །དང་པོ་རྒྱ་སྐྱེགས་བ་འོ་ཆུར་བསྡུས་ཁུར། །དོམ་མཁྲིས་གུར་
ཀུམ་སྲན་བུས་བཏབ་ལ་བཏང༌། །ཡང་ན་ཅུ་གང་སྲིན་བྱ་ཝ་ཡི་གླད། །སྲོ་ལོ་ཤིང་མངར་བ་
མར་སྦྲང་སྦྱར་བཏང༌། །ཡང་ན་ཤིང་ཚ་སུག་སྨེལ་པི་པི་ལིང༌། །སྒེ་གཤེར་རྒྱ་སྐྱེགས་དོམ་
མཁྲིས་མ་རུ་ཙེ། །ཀ་ར་དཀར་པོ་སྦྱར་ལ་བཏང་བར་བྱ། །རྒྱ་སྐྱེགས་ལ་ཆ་བཏོན་བའི་ཁུ་བ་
དང༌། །འབྲི་མོག་ཁུ་བ་བ་མར་བཏོན་པ་དང་། །བོང་བུའི་འོ་མ་ཆ་གསུམ་ཕུལ་དོར་མཉམ། །
ཤུ་མོ་ཟ་ནི་ཕོ་ཚོམས་གཅིག་བཏབ་བཙོ། །ཆུ་ཆོད་ལི་ཤི་ཀ་ར་ཁ་ཚར་གདབ། །ནང་རེ་ཁྱེམ་
བུ་རེ་རེ་བསྟེན་པར་བྱ། །གློ་རྩ་ཆད་དམ་གློ་བ་འགྲམས་པའམ། །ལུད་པ་ཁྲག་བཅས་གློ་རྣག་
གཅོད་པའི་མཆོག །རྣག་རྗེས་དམར་པོ་གསུམ་གྱི་སྨན་མར་ལ། །བཟང་དྲུག་ཟངས་ཐལ་
སྦྲང་སྦྱར་ལྟོ་སྟོང་བཏང༌། །གློ་རྨ་གསོ་ཞིང་རྨ་ཡི་རྣག་རྗེས་གཅོད། །ཁ་ཟས་བ་ཡི་ཞོ་དར་སྐོམ་
ཤ་བཏང༌། །རྗེས་ལ་གྲོ་ཆང་སྲོ་ལོས་བསིངས་པ་དང༌། །ལུག་ཤ་གསར་པས་རླུང་སྒོ་དགག་
པར་བྱ། །རུལ་སྐྱུར་བཤུལ་ཤ་དྲག་ཤུལ་རྒྱུན་དུ་སྤང༌། །བར་གྱི་སྐྱི་ཕུར་རྣག་རྒྱ་དབྲལ་བ་ནི། །
ཕུ་ཡི་རྒྱལ་(སྦལ་བ་)བུ་མདའ་ཡི་རྔ་མོ་(ཉ་)དང་། །བར་གྱི་སྡེར་(རྩང་པའམ་རྨིགས་པ་)ཆགས་ཀླུ་ཡི་
(སྦྲུལ་)ཤ་རྣམས་བཏགས། །བསྡུས་པའི་ཚ་བ་གསུམ་ཡར་ཞག་གསུམ་བཏང༌། །ཨ་ཀྲོང་རྒོད་
ཀྱི་བཙོས་ལུམས་སྟེང་ནས་བདུག །དེ་ཡིས་སྐྱི་ཕུར་ཕྱི་ནང་གང་ཉེ་རྡོལ། །མ་རྡོལ་སྲིད་ན་ཚེ་
ཟད་ལས་ཡིན་སྤང༌། །གསང་དུ་བབས་པ་ཕྱིར་ལ་དབྱུང་བ་ནི། །གསང་གི་དབྱེ་དུས་གསང་
དམིགས་དབྱེ་ཐབས་དང༌། །རྣག་གི་དབྱུང་ཚད་རྣག་སྤྲ་རྨ་ཆས་དང༌། །ཐེམ་བུ་བཀྲུ་བཤལ་
ཟས་སྨན་སྤྱོད་ལམ་དང༌། །རྣག་གི་འཆད་དུས་བསྟན་དང་བཅུ་གཅིག་གོ །དབྱེ་དུས་ལྔ་བདུན་
25-1-433


དགུ་ལ་རྒྱ་བཤལ་དབྱེ། །བཅུ་གཅིག་བཅུ་གསུམ་བཅོ་ལྔ་ཆུ་སེར་དབྱེ། །བཅུ་བདུན་བཅུ་དགུ་
ཉེར་གཅིག་རྣག་གསང་དབྱེ། །འགྲམས་དང་རྩ་ཡི་བྱ་ཤོར་དབྱེ་དུས་མེད། །གསང་དམིགས་
མི་འགྱུར་རྟགས་དྲུག་ཚང་བ་དེ། །དབྱེ་ཐབས་གཟའ་སྐར་ཚེས་བཟང་སྔ་སྐད་དུས། །ཁད་
མཉམ་སྟན་ལ་ལུས་བསྲང་སྐྱིལ་ཀྲུང་འདུག །ལོ་མཐུན་གཡོག་གིས་བརྟེན་ལ་རྣ་བ་བསྡམ། །
སྦུབས་ཐུར་བྱིད་པོའི་མཆུ་འདྲ(ཞིང་རྩེ་མོ་ན་སོར་གཅིག་གཉའ་སྒང་ལོགས་ལ་དཀར་ཁུངས་ཡོད་པ་སྦུབས་ཀྱི་
དཀྱིལ་ཚད་དཀར་ཁུང་ཡོད་པ་ཐར་འབྱོངས་པ་རྩེ་མོ་རྣོ་བ་ཡི)ས་གསང་ས་ཡི། །སྟ་སྒབ་སྣེ་བསྣོལ་མེད་པར་
དྲང་པོར་བརྡེག །པགས་པ་ཤ་རུས་ནང་བརྡོལ་ལག་ཚོད་མྱང་། །ལག་པ་ཐུར་མ་པགས་པ་མི་
འབྲལ་ལྟེམ། །དབུགས་བསྡམ་རྒྱུས་མདེས་མྱུལ་ཞིང་རྣག་ཆུ་གདོན། །དབྱུང་བའི་བུངས་ཚད་
དང་པོ་སུམ་གཉིས་ཡིན། །རྣག་ཚབ་ཆང་ཕུལ་ཕྱེད་ལ་ཐལ་བྲན་བཏང་། །ཐ་མར་རྣག་སྦུ་ཆིར་
གྱིས་བྱུང་ན་བཞག །དང་པོ་ཟ་བཞོས་དེ་ནས་ཞག་བཞོས་བྱ། །རྣག་སྤྲ་དཀར་འཇམ་དྲི་མེད་
གསོ་བ་བླ། །སེར་སྐྱ་བསྐ་ལ་དྲི་མེད་ཕལ་གསོ་སླ། །དམར་སྐྱ་སྔོ་སྐྱ་དྲི་མེད་གསོ་རུ་རུང༌། །
སྐྱེར་ཁུ་ཚོད་ཁུ་འདྲ་ན་ཡུན་དུ་སྦྱོང༌། །ཤེ་རུལ་དུད་ཀ་དྲི་ཆེ་ཁྲག་རིས་ཅན། །རམས་ཁུ་འདྲ་
དང་ཤ་ཁོག་བཤལ་འདྲ་དང༌། །རྐྱང་ཆུ་ཉི་མས་འཚིག་འདྲ་འཆི་བ་ཡིན། །ཐེམ་བུ་རྨ་ཆས་རིམ་
པས་སྤེལ་ཏེ་བསྟེན། །ཐུར་མ་བཏོན་རྗེས་ལེབ་རྒན་ལྟབ་ཐེམ་གཞུག །དེ་སྟེང་ཨ་ས་བ་ཡིས་
ཐེངས་འགའ་བདུག །དེ་རྗེས་རྣག་མ་ཟད་པར་ཕྱིང་འབྱར་བྱ། །བར་དུ་གཅུས་ཐེམ་ཉུང་ཐེམ་
རེ་མོས་སྤེལ། །གྲོ་ལོ་སྦང་རོ་རྔ་གཟེབ་ཧེལ་གེ་དཀྲི། །ཐ་མ་ཞ་ཉེའི་འཕྲུལ་ཐེམ་གཞུག་པར་
བྱ། །སྐམ་ཆས་འབྲིའུ་སྣུམ་བཙོས་བཏང་ལ་དཀྲི། །བཀྲུ་བཤལ་ཚ་ན་ག་བུར་རྒྱལ་བློན་ཆུས། །
གྲང་རྣག་ཆང་འཇམ་རུལ་ཆགས་བུལ་ཏོག་ཆུ། །ཐུན་མོང་ཅུ་གང་དོམ་མཁྲིས་ཀ་རའི་ཆུ། །
ཁྱོར་རེ་ཆ་བྱད་འཚམ་པས་རྨ་ནང་བསྐྱལ། །རྨ་བཀབ་སྐྱོམས་ལ་དེ་ནས་ཕྱིར་ལ་དབྱུང༌། །
ལྷག་ཆད་མེད་ན་ཐེམ་བུ་གཞོན་པའི་རྟགས། །ཁྲུས་དྲགས་གློ་ཡི་དྲོད་འཆོར་གྲང་འབྱམས་
25-1-434


འགྱུར། །ཁྲུས་ཞན་རུལ་ཆགས་རྣག་གི་གཞུག་མི་ཆོད། །དེ་ཕྱིར་དབྱར་གསུམ་དགུན་བདུན་
དུས་ལ་བཀྲུ། །ཁ་ཟས་དང་པོ་རྣག་ཚད་མ་བྲི་བར། །བ་རའི་ཞོ་དར་རི་དྭགས་སྐོམ་ཤ་དང༌། །
ནས་ཐུག་ཡོས་ཐུག་ལ་སོགས་བསིལ་དུ་བཏང༌། །བར་དུ་རྣག་ཟད་ཚ་བ་ཆག་པ་དང་། །མར་
གསར་ལུག་ཤ་གསར་པ་བུར་དཀར་དང༌། །མངར་གསུམ་ལྡེ་གུ་གསར་འཇམ་བྲོ་མེད་
བཏང༌། །ཐ་མ་རྣག་གཞུག་ཆད་དཀའ་ཤ་ཡིབ་དང༌། །བུར་མར་ཆང་འཇམ་ཏིང་ཁྲོལ་བཅུད་
ཀྱིས་གསོ། །སྨན་ནི་རྣག་ཚད་ཡོད་པའི་དུས་དག་ཏུ། །དངུལ་ཆུ་དུག་ཕྲལ་མུ་ཟི་བཏུལ་བ་དང་། །
ཟངས་ཐལ་འབྲས་བུ་གསུམ་དང་བཟང་པོ་དྲུག །ག་བུར་གི་ཝཾ་ཙན་དན་དཀར་དམར་
དང༌། །བསེ་རུ་རྒྱ་རུ་གྭ་དོར་མཁྲིས་སྣ་ཚོགས། །ར་མཉེ་ཉེ་ཤིང་མངར་དཀར་སྦྲང་དང་སྦྱར། །
ཁྱེམ་བུ་གསུམ་གསུམ་ཁྱེའུ་སུས་བཏང་བས་སྐེམ། །ཡང་ན་མུ་ཟི་ཁྲག་ལྟར་བཏུང་བས་སྐམ། །
རྣག་ཟད་ཚད་སྟོབས་ཆག་ནས་སྨན་མར་སྦྱར། །འབྲས་བུ་གསུམ་དང་ར་མཉེ་ཉེ་ཤིང་གི །ཁུ་
ཕྱུང་འོ་མ་མར་དུ་ཆུ་བཅད་ལ། །རྩལ་ཆེན་བསྡུས་པའི་ཕྱེ་མ་ཁ་ཚར་གདབ། །སྦྲང་དང་སྦྱར་
བས་རྣག་རྣམས་མ་ལུས་ཀུན། །སྟོད་སྨད་ཕྱི་ནང་གང་ན་གནས་ཀྱང་རུང༌། །ཞག་གཅིག་གིས་
ནི་ཐམས་ཅད་སྐེམ་པར་ནུས། །ཨ་བར་ཉི་ཤུ་བ་ཆུར་ཞག་ལྔ་སྦངས། །འོ་མ་མར་བསྡུས་ཆུ་
ཆོད་དྭངས་མ་ལ། །དངུལ་ཆུ་དུག་ཕྲལ་སྟར་བུ་བ་ཆུ་དང༌། །བྱིས་པའི་ཆུས་བཤིག་མུ་ཟི་ཁྱོར་
གང་སྦྱར། །ག་བུར་བཟང་དྲུག་ཙན་དན་གི་ཝཾ་དང་། །བསེ་རུ་སེང་ལྡེང་སྤྱི་ཞུར་སོ་མ་ར། །
སྒྲོན་ཤིང་ཟངས་ཐལ་འགྲོན་བུའི་ཐལ་བ་དང་། །རྩ་བ་(ར་མཉེ་ཉེ་ཤིང་རེ་སྐོན་ཨ་བི་ཥ་དར་ཡ་ཀན་ལྔ་)ལོ་
མ་(ཨ་བ་བྲག་ལྕམ་སྟག་ཤ་གསུམ་)སྦྲང་རྩི་སྦྱར་བྱས་ཏེ། །སུམ་ཡར་མཐེབ་མོ་ཙམ་རེ་བཏང་བར་བྱ། །
རྣག་ཀུན་ཟིལ་པ་ཉི་མས་ཕོག་བཞིན་སྐེམ། །ཞུ་རྗེས་བ་སྤུ་རྔུལ་ཙམ་གོས་ཀྱིས་བྱིབ། །མ་ཞུ་
ཆུ་སྐོལ་གོ་ཐལ་རྒྱ་ཚྭ་ཤིས། །མགོ་འཁོར་ཁ་གདོང་སྐྲངས་ན་ཤ་ཆང་བཏང༌། །རུས་ཚིགས་
འབྲལ་སྙམ་བྱེད་ན་པི་པི་ལིང་། །རྒྱ་ཚྭ་རྒྱམ་ཚྭ་སྟར་བུའི་བསྐོལ་ཐང་བཏང༌། །ཐ་མ་རྣག་
25-1-435


གཞུག་གྲང་བར་འབྱམས་པའི་དུས། །ལྕགས་ལ་དབང་ཕྱུག་ས་བོན་ཨ་རུ་ར། །ཟངས་ལ་དར་
མཚུར་མུ་ཟིའི་ཐལ་བས་བཞུ། །བསེ་རུ་གྭ་དོར་གཉིས་དང་རྒྱ་རུ་དང༌། །གུར་གུམ་ཅུ་གང་ཛཱ་
ཏི་ཙན་དན་གཉིས། །ཤིང་ཚ་ཚ་བ་གསུམ་དང་དབྱི་མོང་དང༌། །དངུལ་ཆུ་སྟར་བུ་བ་ཆུས་
བཤིག་པ་དང༌། །ལ་ཆ་འཁར་པོ་དེ་རྣམས་རྩི་བཞིན་བཏགས། །ཨ་རུ་གསེར་མདོག་ཆང་དུ་
ཞག་ལྔ་སྦངས། །ཁུ་ཕྱུངས་འོ་མ་འབྲི་མར་བསྡུས་པའི་མར། །སྦྲང་སྦྱར་ནས་གསེབ་བཞག་
ལ་སུམ་ཡར་བསྟེན། །གྲང་རྣག་སྐེམ་པའི་མཆོག་ཏུ་ཤིས་པ་ཡིན། །སྤྱོད་ལམ་དྲག་ཤུལ་ཉལ་
པོ་བཞོན་པ་དང༌། །འགེངས་འདེགས་བརྡེག་སོགས་ལག་གི་འདུ་བྱེད་སྤང༌། །དེ་ལྟར་བཅོས་
རྗེས་རྩ་ཆུ་ཕྱི་ཚད་ཆག །ལུས་ཡང་དང་ག་བདེ་ལ་ཉམ་ཤེད་སྐྱེས། །རྣག་གཞུག་ཆད་པའི་དུས་
ཡིན་ཆད་དུས་བཞི། །ཤིང་རྩི་ཁ་འབུས་ཆར་ཀླུང་གཅིག་ཕེབས་དང༌། །སྐམ་ཐག་ཆད་དང་
འཁྱག་པ་ཨར་ལ་ཐེབས། །དུས་དེར་མ་ཆད་འབྱམས་པ་ཞེས་བྱ་སྟེ། །ལོག་གནོན་རྗེས་
གཅོད་ནང་དུ་ཤེས་པར་བྱ། །ད་ནི་བྱང་ཁོག་སྨད་ཀྱི་བཅོས་ཐབས་ལ། །སྤྱི་དང་བྱེ་བྲག་རྣམ་
པ་གཉིས་སུ་འདོད། །སྤྱི་ལ་བཅོས་དོན་རྣམ་པ་དགུ་ཡིན་ཏེ། །ཟས་ཀྱིས་གཞི་བཟུང་དུགས་
ཀྱིས་གཟེར་བ་བཅག །ཆས་ཀྱིས་དྲོད་བསྐྱེད་འདྲེན་གྱིས་འགགས་པ་བསལ། །སྨན་གྱིས་
དོན་སྣོད་ཚ་བ་བསད་པ་དང་། །གཏར་གྱིས་ངན་ཁྲག་རྩ་རུ་དབྱུང་བ་དང༌། །བཤལ་གྱིས་
མཁྲིས་ཚད་འོར་དུ་བསྐྱུར་བ་དང་། །མེ་ཡིས་རྩ་འཕྲང་བསྡམ་ཞིང་སྦོས་པ་གཞིལ། །རྣག་ཁྲག་
བབས་པ་གསང་དུ་གདོན་པར་བྱ། །དང་པོ་ཟས་ཀྱིས་གཞི་མ་བཟུང་བ་ནི། །སྨད་ནི་གཙོ་བོར་
སྣོད་ཀྱི་ཡུལ་ཡིན་པས། །ཟས་དང་སྐོམ་གྱི་སྦྱོར་བ་ཤིན་ཏུ་གཅེས། །འབྲས་དང་ཡོས་ཐུག་
ཉག་གིས་འཚོས་པ་ལ། །མར་གསར་འོ་མ་སྒ་སྐྱ་བཏབ་པ་དང༌། །སྐོམ་ཤ་གསར་པ་གྲི་ཚགས་
སྒ་སྐྱ་བྲན། །བུངས་ཆུང་མི་མང་ཡང་དང་ཡང་དུ་བསྟུད། །བསྐོལ་གྲང་ཆུ་གྲོག་མི་མང་སྐོམ་དུ་
བཏང༌། །འོ་ཟན་ལྟོ་རུ་གོང་སྒོང་ཚོད་རེ་སྦྱིན། །ཟས་སྐོམ་མང་ན་ཟུག་ཆེ་སྐྱུག་པ་དང་། །རྨ་མི་
25-1-436


འབྱོར་ཕྱིར་བཤལ་རྗེས་ལྟ་བུར་གཟབ། །དོན་ལ་ཟས་སྐོམ་གནོད་པས་སྤང་བ་མཆོག །སྐོམ་
ཤ་ཞོ་ཕྲུམ་ཆུ་གྲོག་ཚོད་སྦྱར་བཏང༌། །བསིལ་ཆེས་དྲོད་ཆེས་ཟས་སྐོམ་ཐམས་ཅད་སྤང༌། །
གཉིས་པ་དུགས་ཀྱིས་གཟེར་བ་བཅག་པ་ནི། །མཆིན་པ་རྟ་སྦང་མཆེར་པ་བྱི་སའི་དུགས། །
མཁལ་མ་སྦང་སྐམ་ཕོ་བ་ཚྭ་ཡིས་དུགས། །ལོང་ལ་ཆུ་རྡེ་རྒྱུ་མ་རྫ་བསྲེགས་དུགས། །དྲོ་ལ་རྒྱ་
ཆེ་ལན་མང་བཏང་བ་ཡིས། །ཟུག་ཆོག་བདེ་བ་མྱུར་དུ་སྟེར་བར་བྱེད། །གསུམ་པ་ཆས་ཀྱིས་
དྲོད་ལ་བཙའ་བ་ནི། །རྨ་གསར་དུས་སུ་ཨ་ས་བ་ཡིས་བདུག །དེ་ནས་མར་ཁུ་སྤོད་བྲན་རྔ་
རྫིང་བཙོས། །རྒྱ་ཆེར་བཏང་ལ་ཐེར་སྲབ་སྟེང་དུ་བཅིང༌། །རྨ་ཁ་ཆེ་ན་སྦང་རོ་ཚོམ་རེ་གླན། །
སྐམ་ཆས་རླན་དང་མི་འབྲལ་གཅེས་པ་ཡིན། །སྦང་མ་ལ་སོགས་དྲོད་འཇམ་སྤང་བར་བྱ། །
བཞི་པ་འདྲེན་གྱིས་འགགས་པ་བསལ་བ་ནི། །ན་འགྱུར་སྦོ་ལྡེང་དྲི་ཆུ་སྲི་བ་ལ། །དུར་བྱིད་
ལྕུམ་རྩ་མཁྲིས་སྣ་བུལ་ཏོག་ཕབས། །དུད་པ་ཚྭ་དང་བ་ཆུའི་མས་འདྲེན་བཏང༌། །སྨད་ཚད་དྲི་
མ་ཁྲག་རོ་འདོན་པར་བྱེད། །འཕྲལ་དུ་བདེ་ནུས་ཡང་ཡང་བསྟུད་ཀྱིན་བཏང༌། །ལྔ་པ་སྨན་
གྱིས་ཚ་བ་བསད་པ་ནི། །སྨད་ཀྱི་དོན་ལ་ཚ་བ་བཅག་པ་དང་། །རྩ་ཁ་བསྡམ་དང་ཆུ་སེར་སྐེམ་
པ་གཅེས། །དང་པོ་ཙན་དན་གི་ཝཾ་བསིལ་གསུམ་དང༌། །ཨུཏྤལ་དྲུག་གིས་དོན་གྱི་ཚ་བ་
གཅོག །དོམ་མཁྲིས་ཤིང་མངར་ཨ་བས་རྩ་ཁ་སྡོམ། །བསེ་རུ་གྭ་དོར་འགྲོན་ཐལ་ཕུར་ཐལ་
བཞི། །ཆུ་སེར་རྣག་ཁྲག་སྐེམ་པར་བྱེད་པ་ཡིན། །གཙོ་བོ་དེ་ལ་ཁ་སྒྱུར་སྣ་ཁྲིད་པ། །མཆིན་པ་
ལ་ནི་བྲག་ཞུན་པྲི་ཡང་ཀུ། །ཏིག་ཏ་མཚལ་དཀར་གོང་ལ་བསྣན་ལ་བཏང༌། །མཆེར་པ་ལ་ནི་
གསེར་གྱི་མེ་ཏོག་དང༌། །ཨ་རུ་ར་དང་པི་པི་ལིང་གསུམ་བསྣན། །མཁལ་མ་ལ་ནི་སུག་སྨེལ་
གླ་རྩི་དང་། །སྡིག་སྲིན་ལྕམ་པ་བསྣན་ལ་ཀ་ར་སྦྱར། །དེ་བཞིན་སྣོད་ལ་ཚ་བ་སེལ་བ་དང༌། །
ཉམས་པ་གསོ་དང་དྲོད་སྐྱེད་ཁ་སྒྱུར་གཅེས། །གི་ཝཾ་བསིལ་གསུམ་ཨུཏྤལ་སྣོད་ཚད་སེལ། །
དོམ་མཁྲིས་རྒུ་དྲུས་བཙོད་ཀྱིས་ཉམས་པ་གསོ། །སེ་འབྲུ་པི་པི་ལིང་གིས་མེ་དྲོད་སྐྱེད། །ཕོ་
25-1-437


བ་ལ་ནི་མ་ནུ་རུ་རྟ་བསྣན། །རྒྱུ་མར་དུག་མོ་ཉུང་དང་སྙ་ལོ་བསྣན། །ལོང་ལ་ཁ་རུ་ཚྭ་དང་རུ་རྟ་
བསྣན། །མཁྲིས་པར་གསེར་གྱི་མེ་ཏོག་དུག་ཉུང་བསྣན། །ལྒང་པར་སྡིག་པ་སྲིན་བུ་བསྣན་བྱ་
སྟེ། །ཀ་ར་སྦྱར་བ་འཇུ་དཀའ་ཆུ་བསྐོལ་དབུལ། །ཐུན་གྲངས་ཐུན་ཚད་ཚ་བའི་སྟོབས་དང་
སྦྱར། །ཕོ་བས་མ་འཆུན་ཚ་བ་གསུམ་ཐལ་བ། །ཨ་རུ་ཀ་ར་སྦྱར་ལ་ལྟག་པ་སྤྲད། །དྲུག་པ་
གཏར་གྱིས་ཁྲག་ངན་རྩར་དྲང་བ། །ཚ་བ་སྐྱེ་ཞིང་གཟེར་འབྱུང་ཚ་འབྲབ་བྱེད། །ལྟེ་བ་ཡན་
ཆད་སྣོད་ཀ་རུ་ཐུང་གཏར། །མན་ཆད་རྩ་བོ་ཆེ་དང་ལོང་རྩ་གཏར། །མཁལ་མ་བྱིན་གཞུག་
ཕན་སྐྱེད་ཁྲག་མདོག་སྦྱར། །སྣོད་ལ་གཏར་བ་དྲགས་ན་མེ་དྲོད་འཆོར། །བདུན་པ་བཤལ་
གྱིས་མཁྲིས་ཚད་འོར་སྒྱུར་བ། །སྨན་གཏར་ཚ་བ་མི་ཆག་ཆུ་མདོག་སེར། །ལྡང་དུབ་མང་ལ་
ཁ་ཁ་དང་ག་འགག །ལྕུམ་རྩ་དུར་བྱིད་ཨ་རུ་མཆུ་སྙུང་ཐང༌། །འཇམ་པོས་སྣོད་ཚད་སྦྱང་བ་
གཅེས་པ་ཡིན། །བརྒྱད་པ་མེ་ཡིས་སྦོས་གཞིལ་འཕྲང་བསྡམ་པ། །རྩ་ཆད་སྣོད་ཕུག་རྩ་ཁྲིད་
གཟེར་སྦོས་ན། །དཔྱད་མཆོག་མེ་དང་འདྲ་བ་གང་ཡང་མེད། །རྩ་ཆད་པ་ལ་རྨ་ཁར་ལྔ་བདུན་
གདབ། །སྣོད་ཕུགས་འཚེབས་པ་མེད་ན་རྨ་ཁ་བསྲེག །འཚེབས་ན་མདེ་ཕུགས་རྨ་ཡི་སྟེང་དུ་
བསྲེག །རྩ་ཁྲིད་གང་ཁྲིད་གང་གཟེར་སྟེང་དུ་བསྲེག །སྦོ་ལྡེང་ཟེར་ན་མདུན་རྒྱབ་རང་གསང་
བསྲེག །དགུ་པ་རྣག་ཁྲག་གསང་དུ་གདོན་པ་ནི། །གྱེན་ཐུར་དབྱེ་བའི་གསང་སར་འདོན་པ་
གསུམ། །མགོ་ན་ཁ་ཁ་དང་ག་མི་བདེ་ཞིང༌། །ཕོ་སྟོད་འཚིང་སྒྲེག་སྐྱུག་པ་སྙམ་དུ་སེམས། །མ་
ཞུའི་གནས་ན་གནས་ཏེ་སྐྱུགས་ཀྱིས་དྲངས། །གསེར་གྱི་ཕུད་བུ་དོང་ག་པི་པི་ལིང༌། །སོ་ཆ་
སྤྱང་ཚེར་དུས་གསུམ་རྟས་(ཁྲག་དུས་ཆུ། ཆུ་སེར་དུས་ཆུ། རྣག་དུས་ཆང་སིང་)བསྒྱུར་དྲང༌། །ཡང་ན་བསིལ་
གསུམ་ནིམ་པ་ཡུངས་ཀར་དང༌། །འབྲི་ཏ་ས་འཛིན་ཕུར་མོ་ལོ་ཅན་གྱི། །ཁུ་བར་བཏབ་བཏང་
རྣག་ཁྲག་ལྷུང་བ་སྐྱུག །དྲི་ཆུ་བསྡམས་དང་རྒྱུ་ལོང་གཟེར་བ་དང༌། །ཚ་རུམ་ལྡང་དུབ་བྱེད་
དང་རོ་སྨད་ལྕི། །ཞུ་བའི་གནས་སུ་བབས་པ་བཤལ་གྱིས་སྦྱང༌། །དནྡ་དོང་ག་སྔོན་བུ་ཨ་རུ་
25-1-438


ར། །ཐར་ནུ་ལྕུམ་རྩ་བུལ་ཏོག་པི་པི་ལིང་། །ཆུ་དང་བ་ཆུ་ཆང་བསིངས་རྟ་ཡིས་བསྒྱུར། །སྨད་
དུ་རྣག་ཁྲག་ལྷུང་བ་སྦྱོང་བར་བྱེད། །རྩ་ཆུ་ཚ་ལ་ཁ་སྐམ་དང་ག་འགག །ལྡང་དུབ་བྱེད་ཅིང་དྲི་
ཆུ་སྡོམ་པ་དང༌། །ཚ་འབྲབ་ཆེ་ལ་བརྩེ་ཞིང་རེག་མི་བཟོད། །རྣག་ཡུལ་མཐོང་ལ་མེར་མེར་
ལྟོང་ལྟོང་བྱེད། །གསང་དུ་གང་བབས་ས་དེར་ཕྱིན་ནས་དབྱེ། །དབྱེ་དུས་རྣག་པྲ་ཁྲུས་ཆས་
རྗེས་གཅོད་སོགས། །བྱང་ཁོག་སྟོད་དང་ཁྱད་པར་མེད་པར་བཅོས། །སྣོད་ཀྱི་ཕྱིར་བབས་
འཕོངས་སུ་མཛུ་གུས་བརྟག །འཕྲུལ་གསང་(ནས་རྩེ་སོར་བཞིའི་ཁོངས་སུ་དགུག དེ་ལས་རིང་ན་གཞང་ནག་པོ་
ལ་འགྲོ་)ན་ཞིང་མི་བཟོད་མེར་སར་དབུག །སྨད་ཀྱི་དོན་སྣོད་བྱེ་བྲག་བཅོས་པ་ནི། །མཆིན་དྲི་
དཀར་ནག་གཉིས་ལ་མཚོན་ཕོག་ན། །དང་པོ་དོམ་མཁྲིས་ར་འོ་སྦྱར་ལ་བཏང༌། །གཏར་སྤང་
ཚིགས་པ་བརྒྱད་དང་ལྷེན་སྣ་བསྲེག །ཕག་ཤ་སོལ་བ་བྱ་ཕོའི་མགོ་ཚོད་བསླུད། །རྔ་བྲན་ཤ་
དང་མཛོ་ཡི་ཞོ་དར་བཏང༌། །སྒོང་སྤྲིས་རྟ་ཁྲག་གོ་སྙོད་སྐམ་ནན་བྱ། །གཡེར་མ་གོ་སྙོད་སྤོད་
སྣ་དམར་པོ་གསུམ། །སྐམ་ནན་བྱ་ཞིང་བུད་མེད་ནད་གཡོག་སྤང༌། །མཆིན་དྲི་ནག་པོ་མཁྲིས་
སྦྱོར་ཁོང་དུ་བཏང༌། །རྩེ་ཆུང་ངར་གདོང་ལྟེ་འོག་རྩ་ལ་གཏར། །སྒྱིད་ཁུང་མེས་བསྲེག་འབྲས་
ཐུག་ཡོས་ཐུག་བཏང༌། །སྤྱི་གཙུག་རྐང་མཐིལ་སྣུམ་གྱི་བྱུག་པ་བྱ། །ཁ་ཟས་བསིལ་བསྟེན་
དྲོད་ཀྱང་ཅུང་ཟད་བསྟེན། །མཆིན་པ་རུ་ཐུང་ལོང་རྩ་བཞི་ལ་གཏར། །ཚིགས་པ་བརྒྱད་དགུ་
འཚོགས་དཀྱིལ་མཐེ་བོང་བསྲེག །གུར་གུམ་ཅུ་གང་བ་ལེ་བ་ཤ་ཀ །བྲག་ཞུན་སེ་འབྲུ་མཚལ་
དང་ཨ་རུ་ར། །ཀ་ར་སྦྱར་བཏང་མེ་(བ་ལུ་སྨག་ཤད་ཁྱི་ལྕེ་དཀར་པོ་བྲི་ཡང་ཀུ་ལ་སོགས་པ་)ཏོག་ཁཎྜ་སྦྱར། །
ཁ་ཟས་སྤྱོད་ལམ་གྲང་དྲོ་སྙོམས་པར་བཅོས། །མཆེར་པ་ངར་གདོང་རུ་ཐུང་བཞི་ལ་གཏར། །
གོ་སྙོད་སླེ་ཏྲེས་དུག་ཉུང་བསྡུས་ཐང་བཏང༌། །ཚིགས་པ་དགུ་པ་བཅུ་གཅིག་བསྲེག་པར་བྱ། །
འཕོངས་སུ་ལ་ཕུག་ཚྭ་སྦྱར་རེང་བུ་གཞུག །སྒོག་སྐྱ་མར་དཀར་བསྡུས་ཁུ་ཙི་ཏྲ་ཀ །གོ་སྙོད་
ལྡུམ་བུ་རྣམ་གསུམ་བཏབ་ལ་བཏང༌། །ཁ་ཟས་དྲོད་བྱ་སྐབས་སུ་ལོ་མར་བྱུག །དེ་ལ་བཅོས་
25-1-439


སྐྱེད་མེད་ན་འཇམ་བཤལ་བཏང༌། །མཁལ་མ་བཅུ་བཞི་པ་དང་རྩ་ནག་བསྲེག །ཡོབ་གོང་རྩ་
དང་བྱིན་གཞུག་བཞི་ལ་གཏར། །ཁ་ཟས་དྲོད་ལ་ཁོང་སྨན་བསིལ་དུ་བཏང༌། །ཆུ་བསྡམས་རྒྱ་
ཚྭ་གླ་རྩི་སྡིག་སྲིན་དང་། །ཉི་དགའ་འོ་མ་སྦྱར་ལ་བཏང་བར་བྱ། །མཁལ་ཚིལ་ཞུ་ན་གུར་གུམ་
བདུན་པ་སྦྱར། །ག་བུར་རྨར་གཞུག་བསིལ་བའི་ནན་གྱིས་མནན། །རྣག་ཞུགས་ཞོ་ཤ་(སྙིང་དང་
མཁལ་མ་བླ་གོར་)གསུམ་གྱི་སྨན་མར་སྦྱར། །ཕོ་བ་བཅུ་གཉིས་ཕོ་གསང་དབུས་མ་བསྲེག །སྐྱུག་
ན་འབྲས་ཁུར་འབྲས་ཡོས་པུ་ཤེལ་ཙེ། །སྦྲང་རྩི་སྦྱར་བཏང་སེ་འབྲུ་ཨ་རུ་ར། །མར་དཀར་ཀ་
ར་སྦྲང་སྦྱར་ཏིང་ཁྲོལ་དང༌། །ཚ་བ་སྐྱེས་ན་རུ་ཐུང་གཡས་གཡོན་གཏར། །གསོ་བ་དཀའ་ན་
དོང་གའི་འཇམ་བཤལ་བཏང༌། །ཕོ་ཐེར་རལ་ན་རྟ་རྐྱང་རྒྱུས་པས་བཙེམ། །ཤའུ་སྐྱེད་(གུར་
གུམ། དོམ་མཁྲིས། ཚ་ལ་དུལ་མ་)སྨན་བཏབ་ལ་དར་གྱིས་དགབ། །དེ་སྟེང་ཕྱིང་པ་མར་བཙོས་གླན་
ལ་དཀྲི། །ལྟོ་ཚིལ་ལུག་ན་དྲོད་ཕབ་ནང་དུ་གཞུག །མ་ཚུད་མཚམས་སུ་རྟ་རྔ་དར་སྐུད་བཅིང༌། །
རྒྱ་ཚྭ་ཤིང་ཚ་བཏབ་པས་ཚིལ་བུ་བཞུ། །ཚུད་ནས་རྨ་ཆས་གོང་མ་བཞིན་དུ་བྱ། །ཚ་བ་སྐྱེས་ན་
ཐང་ཕྱེ་གཏར་ཕྲན་དཔྱད། །མཁྲིས་པ་དོམ་མཁྲིས་འོ་མར་སྦྱངས་ལ་བཏང༌། །ཚིགས་པ་དགུ་
བསྲེག་གཤའ་རིངས་རུ་ཐུང་གཏར། །ཏིག་ཏ་དོམ་མཁྲིས་གསེར་གྱི་མེ་ཏོག་དང༌། །རུ་རྟ་ཧོང་
ལེན་རྩ་མཁྲིས་བོང་ང་དཀར། །སྐྱེར་ཞུན་ཀ་ར་སྦྱར་བའི་ཕྱེ་མ་བཏང༌། །ལོང་ལ་ཚིགས་པ་
བཅུ་དྲུག་བསྲེག་པར་བྱ། །སྲིན་ལ་ཤིང་ཀུན་གླ་རྩི་བྱི་ཏང་ག །ལང་ཐང་ཙེ་དང་འབུ་སྐྱོགས་མ་
རུ་ཙེ། །སྒོག་སྐྱ་འོ་མ་བུ་རམ་བཏབ་པ་བསླུད། །ཚ་བ་སྐྱེས་ན་ལོང་རྩ་གཉིས་ལ་གཏར། །དོང་
ག་སྔོན་བུ་ཁྲོན་བུ་ལྕུམ་རྩ་དང་། །སྒྲོན་ཤིང་སྐྱེར་ཤུན་ཨ་རུ་བ་རུ་སྒ། །བུ་རམ་བསྡུས་པའི་
འཇམ་བཤལ་བཏང་བར་བྱ། །རྒྱུ་མར་དོམ་མཁྲིས་འོ་མ་སྦྱངས་ལ་བཏང༌། །ཚ་བ་སྐྱེས་ན་རྒྱུ་
མའི་རྩ་ལ་གཏར། །རྒྱུ་མ་ལུག་ན་ཆུ་དང་ཆང་གིས་བཀྲུ། །དེ་ནས་ཚ་བ་གསུམ་གྱི་ཁུ་བཙགས་
བཀྲུ། །ལྟོ་ཚིལ་དྲོད་ཕབ་ནང་དུ་འཇུག་ཚུལ་བསྟན། །གདོང་ལ་ཆུ་གདབ་དངངས་པས་ནང་དུ་
25-1-440


འདྲོངས། །ཡང་ན་གྲེ་བར་སྒྲོ་བཅུག་སྐྱུགས་པས་ཚུད། །ཤ་པགས་རྟ་རྐྱང་རྒྱུས་པས་སྦལ་
འགྲོས་བཙེམ། །རྨ་སྨན་དར་དང་མར་ཕྱིང་འཇག་གིས་དཀྲི༌། དེ་རྟིང་གོས་ཕུད་བཅུག་ལ་
དལ་པུས་སྐྱོམ། །དེ་ཡི་རྒྱུ་མ་རང་སར་འདྲོངས་པར་འགྱུར། །འཆུས་སམ་འཁྲིལ་ན་མི་འཚོ་
འཆི་བ་ཡིན། །དེ་ནས་ཞག་བདུན་བར་དུ་གན་(ཞག་ཉི་ཤུ་བར་དུ་མི་ལྡང་)རྐྱལ་སྙལ། །དྲི་ཆུ་འོང་
སར་དོང་ཁུང་བྱས་ལ་བཏང༌། །ཟས་སྐོམ་ནུར་ཐུག་ཉུང་ཤས་འཇམ་པས་བཅོས། །གཉེ་མའི་
བཅོས་ཐབས་ལོང་དང་ཁྱད་པར་མེད། །ལྒང་པ་ཚིགས་པ་བཅོ་བརྒྱད་བསྲེག་པར་བྱ། །ཆུ་སྲི་
རྒྱ་ཚྭ་ལ་སོགས་ཆུ་(གླ་རྩི། སྡིག་སྲིན། ཉི་དགའ་སོགས་)སྨན་སྦྱར། །ཚ་བ་སྐྱེས་ན་ལོང་རྩ་གཏར་བར་
བྱ། །གཞང་ལ་ཕོག་ན་ཚིགས་པ་བཅུ་དགུ་བསྲེག །སྦོས་ན་དུགས་བྱ་ཚ་འབྲབ་ཆེ་ན་གཏར། །
དྲི་མ་འབྱུང་དཀའ་རེང་བུ་ནི་རུས་བསུ། །བསམ་སེ་རྩ་རྣམས་སྒོ་ཕྱེ་ཙམ་དུ་གཏར། །ཕོངས་
དང་རྐང་མཐིལ་སྤྱི་གཙུག་དྲོད་དུགས་དང༌། །ཚིགས་པ་བཅུ་གསུམ་པ་ལ་མེ་བཙའ་བྱ། །དང་
པོ་བསིལ་ལ་ཐ་མ་དྲོད་དུ་བཅོས། །ད་ནི་ཐ་མ་ལོག་གནོན་རྗེས་བཅད་པ། །འབྱམས་རྒྱུ་
འབྱམས་རྟགས་འབྱམས་པ་བཅད་པ་གསུམ། །དེ་རྒྱུ་ཚ་འབྱམས་བཞི་དང་གྲང་འབྱམས་
གཉིས། །དང་པོ་དོན་རྨ་ཟ་རྐོང་སོང་བ་དང༌། །རྩ་ཁ་འབུས་དང་རུལ་ཆགས་ཐེམ་ཁ་མཐོས། །
གཉིས་པ་བསིལ་སྦྱོར་ཐལ་དང་ཁ་ཟས་དམན། །རྒྱུ་དེ་དྲུག་གིས་རྣག་འབྱམས་ཆད་མི་
འགྱུར། །འབྱམས་རྟགས་དོན་རྨ་ཟ་རྐོང་སོང་བ་ལ། །དང་ག་མི་བདེ་ཤ་མདོག་སྔོ་ལ་སྐམ། །
སྟོད་གཟེར་རྩ་ཆུའི་ཚ་བ་ཤིན་ཏུ་ཆེ། །རྣག་མདོག་དམར་ཙ་སྐབས་སུ་ཤེ་རུལ་ཅན། །དེ་ནི་
དོན་གྱི་རྨ་ལ་འཛག་པ་ཡིན། །རྩ་ཁ་འབུས་པ་རྣག་གསེབ་རྩ་འབྲུམ་འབྱུང༌། །ཤེད་ཆུང་རྣག་
ལ་སྐྱེ་འབྲི་བྱེད་པ་ཡིན། །རུལ་ཆགས་དྲི་ཆེ་ཁུ་རྩིགས་ཅན་དུ་འཛག །མིག་སྤྲིན་སེར་ལ་དང་
ག་སྐྱེ་འབྲི་བྱེད། །གསང་འཕྱིས་ཁྲུས་ཞན་རྣག་ཤ་མཐོན་པའོ། །ཐེམ་ཁ་མཐོས་པས་ཁྲུས་ཆུ་
ལྷག་མ་ལས། །བསིལ་སྦྱོར་ཐལ་བ་རྩ་དལ་ཆུ་མདོག་སྔོ། །ཤེད་ཆུང་ཕོ་མཆིན་མི་བདེ་སྦོ་
25-1-441


འཁྲོག་བྱེད། །རྣག་མདོག་སྔོ་ལ་དྲི་དང་རླངས་པ་ཆུང༌། །ཁ་ཟས་དམན་པ་རྩ་སྟོང་དང་ག་བདེ། །
རྣག་མདོག་སླ་ལ་ལུས་ཤེད་ཆུང་བའོ། །བཅད་ཐབས་དོན་རྨ་ཟ་རྐོང་སོང་བ་ལ། །ཁ་ཟས་
དྲོད་སྤང་བསིལ་ལ་ཡང་བ་བསྟེན། །ལི་གྲི་ཨ་བ་རྒུ་དྲུས་ཕུག་རོན་རྐང༌། །དོམ་མཁྲིས་རྨ་ནང་
ཆུ་ཡིས་བཀྲུ་བར་བྱ། །རྩ་ཕྲན་གཏར་ཞིང་གློ་(གློ་བའི་ཚོད་མ་བཏང་། རེའུ་རྩ་ཟ་ཆུ་འཐུང་གི་གློ་བ་མ་རུངས་བ་
ལ་རྟ་བོང་གི་འོ་མས་རྒྱང་ལ་བཏང་། དམར་གསུམ་ཤུ་མོ་བ་རི་ཐང་འཚོགས་ཚད་བཏང་)གསོ་སྨན་མར་སྦྱར། །རྩ་ཁ་
འབུས་ན་འབྲས་བུའི་རྒྱུན་སྦྱོངས་བྱ། །མཁྲིས་སྣ་ཆུར་སྦྱངས་རྨ་བཀྲུ་ཁོང་དུ་བཏང༌། །གང་
ཉེའི་རྩ་གཏར་རྩ་འཕྲང་མེ་ཡིས་བསྡམ། །ཁ་ཟས་བསིལ་བསྟེན་སྤྱོད་ལམ་དྲག་ཤུལ་སྤང༌། །
རུལ་ཆགས་བུལ་ཏོག་ཚ་ལ་རུ་རྟ་དང༌། །ཨ་རུ་སྦྱར་བའི་ཆུ་ཡིས་རྨ་ནང་བཀྲུ། །ཕག་པའི་ཟེ་
བའི་ཡེ་འུས་རུལ་ཆགས་བྲུད། །དེ་རྟིང་ག་བུར་ཙན་དན་ཆུ་ཡིས་བཀྲུ། །མུ་ཟིའི་སྨན་མར་རྭ་
སྣའི་ཕྱེ་མ་སྦྱར། །ཐེམ་ཁ་མཐོས་ན་ཞག་གསུམ་རྣག་ཁ་བསྐྱིལ། །རྩིབ་མའི་གོ་བར་ཚིགས་
བར་ཕུག་ལ་བཅོས། །བསིལ་སྦྱོར་ཐལ་བ་སེ་འབྲུས་མེ་དྲོད་གསོ། །ལུག་ཤ་གོང་སྲེག་ཤ་དང་
གསར་འཇམ་བཏང༌། །ཚྭ་སྣ་ཚོགས་ཚད་བསྡུས་པའི་ཁཎྜ་ལ། །མར་གསར་མངར་གསུམ་
སྦྱར་བའི་ཏིང་ཁྲོལ་བཏང༌། །ཁ་ཟས་སྨན་ལ་རྟ་བོང་འཕྱི་བའི་ཤ །མི་ཤ་མར་དང་བུ་རམ་
གར་ཆང་བཏང༌། །རྩ་བ་ལྔ་ཡི་སྨན་མར་མཆོག་ཏུ་ཕན། །ཞེས་གསུངས་སོ། །བདུད་རྩི་སྙིང་
པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བྱང་ཁོག་སྟོད་སྨད་གསོ་བའི་ལེའུ་སྟེ་
བརྒྱད་ཅུ་རྩ་ལྔ་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །ལུས་ཀྱི་ཡན་ལག་བཞི་ལ་མཚོན་ཕོག་ན། །དེ་ལ་རྟགས་དང་
བཅོས་ཐབས་ཇི་ལྟར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་
དང༌། །སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་
25-1-442


པོ་ཉོན་ཅིག །ཡན་ལག་རྨ་ལ་གནད་དང་སྤྱི་རྟགས་དང༌། །བཅོས་པའི་ཐབས་དང་ལོག་
གནོན་རྣམ་བཞིས་བསྟན། །གནད་ནི་ཉྭ་རྨེན་རྩ་རུས་ཆུ་རྒྱུས་ལྔ། །དེ་ལ་དང་པོ་ཉྭ་ཡི་གནད་
བསྟན་པ། །ཕྲག་པའི་སྟེང་ན་གཉའ་ཤ་ནག་པོའི་གནད། །མེ་ལོང་སྟེང་ན་འབྲོས་ཤ་ཁྲ་བོའི་
གནད། །སོག་པའི་ཁ་འཁོར་སྡར་ཤ་ཁུག་པའི་གནད། །དཔུང་པའི་ཉྭ་ལ་སུལ་སྒོ་བདུན་ཡོད་
དེ། །དཔུང་ཚིགས་མཚམས་ནས་སོར་བཞི་ལུག་གཞུག་གནད། །ལག་ངར་ཉྭ་མོ་སྡང་ལ་
བརྒྱུས་པ་འདྲ། །ཉྭ་སུལ་དགུ་དང་ཉྭ་ཆེན་རྣམ་གཉིས་ཡོད། །མཁྲིག་མའི་ཚིགས་དང་གྲུ་མོ་
གཞུ་མཆོག་ནས། །མཁྱིད་གང་སོར་དྲུག་བཅལ་བ་ཉྭ་སྙིང་གནད། །ལག་མགོའི་མཐེབ་
མཛུབ་བར་ན་གར་ཤའི་གནད། །དཔྱི་ཡི་ཤ་ནི་རྒྱ་གྲམ་དག་ཏུ་གནས། །ཆང་བཟུང་སྟེང་གི་
ཤ་རྒོད་གཉན་པའི་གནད། །བརླ་ལ་སུལ་སྒོ་བཅུ་གསུམ་དར་སྦམས་འདྲ། །བརླ་སྒང་སོར་
གཉིས་སྒང་ཤ་དཀར་མོའི་གནད། །གཉན་གོང་སོར་བཞི་སྦལ་པ་ནག་པོའི་གནད། །བྱིན་ཉྭ་
སུལ་མེད་སྨྱུག་མ་སྦམས་པ་འདྲ། །བྱིན་པའི་དཀྱིལ་ན་ཉྭ་མང་རྣམ་པ་གསུམ། །སྲེ་ལོང་སྟེང་
ནས་མཁྱིད་གང་ཉྭ་མགོའི་གནད། །དེ་ནས་སོར་དྲུག་བཅལ་བ་བྱིན་སྙིང་གནད། །དེ་ལྟར་ཉི་
ཤུ་རྩ་གཉིས་སྐྲངས་པའི་གནད། །རྨེན་བུའི་གནད་ནི་སྐྱོགས་རའི་ཚིགས་མཚམས་ནས། །
ཕྲག་གོང་སོར་བཞི་རྨེན་བུ་མགོ་སྔོན་གནད། །ཁྱི་ཁྲོས་སྣ་ནས་གྱེན་དུ་སོར་ལྔ་ན། །དཔུང་
པའི་རྨེན་བུ་སྨུག་པོ་གནས་པ་ཡིན། །པུས་མོའི་ཕྱི་ཟུར་ཚིགས་ཀྱི་མཚམས་ན་ཡར། །མཐོ་
གང་བཅལ་བ་རྨེན་བུ་དཀར་པོའི་གནད། །དེ་ནས་སོར་གསུམ་སྦྲུལ་མགོ་གདེངས་པའི་
གནད། །དེ་བརྒྱད་ལྷོག་ཐབས་སྐྲངས་དང་སྲོག་འཕྲོག་གནད། །རྩ་གནད་རླུང་རྩ་ཁྲག་རྩ་
གཉིས་འདོམ་རྩ། །དེ་ལ་རླུང་རྒྱུ་བ་ཡི་རྩ་དཀར་ནི། །དཔུང་པའི་ལུག་གཞུག་ཕྱི་མཆན་ཆུ་
རྩའི་གནད། །གྲུ་མོའི་བར་ན་རླུང་རྩ་རཏྣའི་གནད། །པུས་མོའི་གཉན་གོང་རུས་རྩ་སྒྱེད་བུའི་
གནད། །སྲེ་ལོང་ཕྱི་ལོང་བར་ན་རྒྱུངས་རྩའི་གནད། །མཐེ་བོང་སྤུ་སྐྱེས་རྒྱུས་པ་པིར་མགོའི་
25-1-443


གནད། །དེ་བཅུ་རླུང་འཕྱོ་བྱ་བ་ཉམས་པའི་གནད། །ཁྲག་རྩ་མེ་ལོང་འོག་གི་སྔོན་བུ་དང༌། །
ཨུ་ཟུར་ཁུག་པ་དཔུང་ནང་དུང་འབུད་དྲུག །གློ་བའི་རྩ་ཡིན་ནང་དུ་ཐིགས་གསོག་གནད། །
སྐྱོགས་རའི་ཚིགས་མཚམས་གསེར་གྱི་ཀ་བའི་གནད། །མནག་ཆེན་གཉེར་རིང་མཁྲིས་རྩ་
སྐྱ་རིང་གནད། །མཁྲིས་རྩ་དེ་བཞི་མཁྲིས་ཚད་སྐྱེ་བའི་གནད། །སྣོད་ཀ་རུ་ཐུང་བརླ་ནང་རྩ་བོ་
ཆེ། །མཆིན་རྩ་སྨད་གསུམ་དེ་བརྒྱད་ཁྲག་འཆོར་གནད། །དཔྱི་ཡི་ཁ་གཟར་མཁལ་རྩ་ན་གུ་
དང༌། །བརླ་སྒང་སྟེང་གི་མཁལ་རྩ་རུས་ཞེན་དང༌། །བརླ་ཡི་ཕྱི་སུལ་མཁལ་རྩ་རྐང་འདེགས་
དྲུག །བརླ་ཡི་ཕྱི་ཟུར་མཆེར་པའི་རྩ་ནག་གཉིས། །དེ་བརྒྱད་བད་ཀན་གྲང་བ་སྐྱེད་པའི་
གནད། །དེ་ལྟར་ཉི་ཤུ་རྩ་དྲུག་ཁྲག་རྩའི་གནད། །རླུང་ཁྲག་གཉིས་འདོམ་འཕར་བའི་སྙིང་རྩ་
ནི། །རྐང་པའི་མཐིལ་ན་བཞག་འདྲ་མཐིལ་འཕྲོག་གནད། །བོལ་གོང་སྟེང་ན་འགུལ་རྩ་ནག་
པོའི་གནད། །ནང་ལོང་ནང་ཁུད་ལྕགས་ཀྱི་སྲན་མའི་གནད། །ངར་གདོང་ཐུར་བར་གསེར་རྩ་
ཀ་གདུང་གནད། སྒབ་ཁུང་ནང་ན་སྒབ་རྩ་ནག་པོའི་གནད། །སྣེ་རྩ་ཁུད་ན་སྙིང་རྩ་མིག་
དམར་གནད། །ལག་མཐིལ་སྲིན་ལག་འོག་ན་མྱུར་བའི་གནད། །མཛོད་པུ་ཆུང་གི་འོག་ན་
འགུལ་རྩའི་གནད། །རུས་པ་འབོར་པོའི་སྟེང་ན་བལྟ་རྩའི་གནད། །མར་ཟུར་ཆུ་བའི་བར་ན་
བླ་རྩའི་གནད། །གྲུ་མོ་ནང་ཁུད་ཨ་སོ་ལི་ཀའི་གནད། །མཆན་ཁུང་ནང་ན་སྙིང་རྩ་རྔུལ་འདུའི་
གནད། །དེ་ལྟར་རྩ་བཞི་ཁུག་པར་བརྒྱུས་པ་ལ། །ཕྱི་རུ་འབུར་བས་གནད་དུ་བསྟན་པ་སྟེ། །
སྟོད་དུ་ཚ་བ་འཆོར་ཞིང་འཆི་བའི་གནད། །རུས་པའི་གནད་ལ་ཚིགས་དང་རུས་ཕྲན་གཉིས། །
ཚིགས་ཆེན་བཅུ་གཉིས་དཔྱི་དང་དཔུང་པ་དང༌། །པུས་མོ་གྲུ་མོ་མཁྲིག་མ་ལོང་ཚིགས་
རྣམས། །ཡར་མར་སོར་བཞི་ལྷ་བར་བཅས་པ་ནི། །ཚིགས་ཀྱི་ཁོངས་སུ་འདུས་ཏེ་གཉན་པ་
ཡིན། །རུས་ལྷག་དཔྱི་སོགས་ལྷ་ང་ལོང་བུ་དང༌། །སྲེ་ལོང་པྲན་རྩེ་སྤུན་མང་ལ་སོགས་པ། །ཉི་
ཤུ་རྩ་དྲུག་ན་ཞིང་སྦྱོང་བའི་གནད། །ཆུ་རྒྱུས་གནད་ནི་སྒྱིད་ཁུང་གྲུ་མོ་དང༌། །མཁྲིག་མ་རྟིང་ཆུ་
25-1-444


ཆུ་བ་སྦལ་མགོ་བཅུ། །ཆུ་བ་རྒྱབ་ལ་རྒྱུས་པ་མདུན་ན་གནས། །ཞ་དང་རེངས་པར་བྱེད་པའི་
གནད་ཅེས་བྱ། །དེ་ཡང་རྩ་དང་རྨེན་བུ་རབ་གཉན་ཏེ། །ཉྭ་ཚིགས་འབྲིང་ཡིན་ཆུ་རྒྱུས་ཐ་མར་
བཤད། །རྩ་ལས་སྙིང་རྩ་རབ་ཏུ་གཉན་པ་སྟེ། །མཁྲིས་རྩ་རླུང་རྩ་འབྲིང་ཡིན་གཞན་རྣམས་
ཐ། །ཉྭ་ལས་བྱིན་སྙིང་སྦལ་ནག་རབ་ཏུ་གཉན། །བརླ་ཤ་འབྲིང་ཡིན་ཉྭ་ཤ་ཐ་མར་བཤད། །
ཚིགས་ལ་པུས་མོ་དཔུང་པ་རབ་ཏུ་གཉན། །དཔྱི་དང་གྲུ་མོ་འབྲིང་ཡིན་ཚིགས་གཞན་ཐ། །
རུས་ལྷག་ལོང་བུ་སྲེ་ལོང་རབ་ཏུ་གཉན། །དཔྱི་སོགས་འབྲིང་ཡིན་གཞན་དག་ཐ་མའོ། །ཆུ་
རྒྱུས་སྒྱིད་ཆུ་རབ་ཏུ་གཉན་པ་སྟེ། །གྲུ་མོ་འབྲིང་ཡིན་གཞན་དག་ཐ་མའོ། །ཚིགས་དང་ཆུ་རྒྱུས་
ཆུ་རྩ་རླུང་གི་གནད། །གློ་སྙིང་མཁྲིས་རྩ་མཁྲིས་པའི་གནད་དུ་བཤད། །རྩ་བོ་ཆེ་དང་མཆིན་
རྩ་ཁྲག་གི་གནད། །མཆེར་མཁལ་རྩ་དང་ཉྭ་རྨེན་བད་ཀན་གནད། །དེ་ལྟར་གནད་ཀྱི་གནས་
ལུགས་ཤེས་པ་ཡིས། །འཆི་སྦྱོང་གསོ་བླ་ཞ་རེངས་ཁ་དམར་ཐོགས། །གཉིས་པ་གནད་ཀྱི་སྤྱི་
རྟགས་བསྟན་པ་ནི། །སྤྱི་རུ་མོད་ལ་ལྷོག་ཐབས་སྐྲངས་པ་འམ། །ཟུག་གཟེར་ཆེ་འམ་རྡོས་བུ་
བཅུག་པ་འདྲ། །མེ་ལྟར་འབར་རམ་ཆུ་ལྟར་བསིལ་བ་སྟེ། །མདོར་ན་ལུས་ནི་གནད་ལ་ཕེབས་
པར་བྱེད། །དེ་དག་གསོ་དཀའ་འཆི་ཡང་སྲིད་པ་ཡིན། །ཁྱད་པར་ཉྭ་གནད་རྣམས་ལ་མཚོན་
ཕོག་ན། །མོད་ལ་སྐྲངས་ཤིང་རྨ་ཆས་ཚན་མོ་ཕན། །སྨུག་ནག་སྔོ་ཁྲ་དམར་ཁྲ་མེ་ལྕེ་རིས། །
ཟུག་ཆེ་རྡོ་ལྟར་སྲ་ལ་རེག་མི་བཟོད། །རྣག་མདོག་དམར་ལ་ཚིགས་ཅན་སྐད་གདངས་ཞན། །
རྨེན་བུ་རྣམ་བརྒྱད་ཞར་ན་བཅོས་སུ་མེད། །བཙན་བརྡུངས་མོད་དུ་ལྷོག་ཐབས་སྐྲངས་པ་
དང༌། །ཟུག་ཆེ་ཚ་བ་སྐྱེ་ལ་སྨྲ་ངག་ཐུང༌། །ཉྭ་སྒང་ཆུ་སེར་འཛག་ཅིང་དྲི་མི་ཞིམ། །རླུང་རྩ་
རྣམས་ལ་མཚོན་ཕོག་འཕྱོ་འདར་བྱེད། །མིག་རྩ་རྒོད་ཅིང་གཡལ་དང་སྐྱིགས་བུ་འབྱུང་། །
གཉིད་ཆུང་ཁ་མིག་ཡོ་ལ་ཇ་ལོག་སྐྲངས། །ཁྱད་པར་ལུག་གཞུག་ཆུ་རྩ་ཆོད་གྱུར་ན། །ལག་
པ་བཤལ་སྦྲིད་བྱ་བ་ཉམས་པར་འགྱུར། །རླུང་རྩ་རཏྣ་རྒོངས་དང་ཐོ་རངས་ན། །དངངས་ཤིང་
25-1-445


གཡལ་དང་སྐྱིགས་བུ་བཏུད་ནས་འོང༌། །རུས་རྩ་སྒྱིད་བུ་དངངས་ཤིང་ལྷོག་ཐབས་སྐྲངས། །
རྐྱལ་པ་བུས་འདྲ་མགོ་ན་བླབ་འཆོལ་སྨྲ། །བརྒྱུད་རྩ་ལྟག་དགྱེ་སོ་འཐམ་དྲི་ཆུ་སྡོམ། །པིར་
མགོ་དངངས་འདར་ཟུག་ཆེ་གཡང་ཆུ་རྨི། །གློ་རྩ་སྔོན་བུ་ངམ་ནག་སྐྱིགས་བུས་འདེབས། །
འདར་ཞིང་དངང་ལ་གློ་ལུ་ཚ་བ་སྐྱེ། །གློ་རྩ་ཁུག་པ་སོག་ཕྲག་གཟེར་བ་དང༌། །མགོ་ན་དཔུང་
པ་བཤལ་ལ་མཇིང་པ་རེངས། །དུང་འབུད་གསོག་ཅིང་གཟེར་ལ་བུས་ལྟར་སྐྲངས། །རྐང་
ལག་མཁྲིས་རྩ་བཞི་པོ་གང་ཉེན་ཡང༌། །མགོ་ན་མིག་ཆུ་རྨ་ཁ་བཞིན་རྣམས་སེར། །ཁ་ཁ་དང་
ག་མི་བདེ་སྐོམ་དད་ཆེ། །ལུས་ལྕི་རྨ་ཆས་ཚན་མོ་ཉེ་ཐབས་མེད། །བརླ་ནང་རྩ་ཆེན་ཆོད་ན་
ཁྲག་མི་ཐུབ། །ཆུ་དད་ཆེ་ལ་སྨད་འཕྱེས་ཁོང་པ་འཁྲོག །མཆིན་རྩ་མོད་ལ་ཁྲག་མི་ཐུབ་པ་ལ། །
སྨད་ལྕི་སྒྲེག་སྐྱུགས་ཁྲག་རུལ་དྲི་ཅན་འཛག །སྣོད་ཀ་རུ་ཐུང་ཁྲག་ཆོད་དཀའ་བར་འགྱུར། །
མཁལ་རྩ་རྨ་ཆས་གྲང་མོ་ཉེ་ཐབས་མེད། །སྨད་འཕྱེས་རྐང་པ་བཤལ་སྦྲིད་དཔྱི་མིག་ཟུག །
ཆུ་སྲི་རྣ་བ་འོན་ལ་ཕྲུམ་སེར་ཁྱེར། །མཆེར་རྩ་སྦོ་སྒྲེག་རླན་ཅན་ཉེ་ཐབས་མེད། །ཁྲག་རུལ་
འཛག་ཅིང་སྨད་འཕྱེས་རྒྱུ་ལོང་འཁྲོག །མགོ་ན་ལུས་ལྕི་ངམ་ནག་ཚ་བ་སྐྱེ། །སྙིང་གི་འཕར་རྩ་
གང་ཆོད་ཁྲག་མི་ཐུབ། །གདོང་པ་སེར་ལ་གཡལ་མང་འབོག་ཚུལ་སྟོན། །བཙན་བརྡུངས་
སྐྲངས་དམར་རྩ་རྒྱུད་འཁྲིད་ཅིང་ན། །རྨ་འཁྱིམས་རྩ་ཁ་འབུད་ཅིང་གཞན་དུ་འབྱེར། །ཞག་
གསུམ་ལོན་ནས་ཚ་བ་སྟོད་དུ་འཆོར། །མགོ་ན་ཕྲུམ་སེར་ཁྱེར་ལ་མིག་རྩ་གྲུང༌། །སྣ་སྐམ་ལྕེ་
རྩ་སྔོ་ལ་སོ་དྲེག་ཆགས། །དབུགས་ཐུང་གློ་སྙིང་མི་བདེ་སྐོམ་དད་ཆེ། །ཁྱད་པར་མཐིལ་
འཕྲོག་མྱུར་བ་སྟོང་སྐྱུགས་བྱེད། །མགོ་ན་དངངས་འདར་ཟུག་ཆེ་སྙིང་ག་གཟེར། །བལྟ་རྩ་བླ་
རྩ་དེ་བཞིན་གཉིད་མེད་བྱིང༌། །ཨ་སོ་རྔུལ་འདུ་མགོ་ན་གློ་སྙིང་འདར། །ཕོ་བ་མི་བདེ་སྐྱུག་
ཅིང་བླབ་འཆོལ་སྨྲ། །སྙིང་རྩ་མིག་དམར་སྙིང་སྤྲུག་རྐང་པ་འདར། །སྙིང་རྩ་ནག་པོ་ཁྲག་
འཆོར་སྐྲངས་པར་བྱེད། །ཀ་གདུང་དགུ་ནས་ཁྲག་འཆད་སྐྱིགས་བུ་འབྱུང༌། །འགུལ་རྩ་བྱིན་
25-1-446


རེངས་སྐྱུག་ཅིང་སོར་མོ་འཁུམས། །ཚིགས་གནད་མདེ་འུ་མི་དམ་སྡོམ་པ་བླ། །ཞག་གསུམ་
ནང་དུ་རྨ་ནས་ཚིགས་ཆུ་ལྡུགས། །བརྐྱང་བསྐུམ་མི་ཤེས་ཟུག་ཆེ་ཁ་ལྕེ་སྐམ། །མགོ་ན་སྒྱིད་པ་
སྐྱུར་ལ་སྟོང་སྐྱུགས་བྱེད། །ལོང་བུ་ལ་ཕོག་བཅོ་ལྔ་བཅུ་དགུ་ལ། །མདོག་སྣུམ་ལུས་འདར་
རྔུལ་འབྱུང་ཤེས་པ་འགྱུར། །ཟུག་གཟེར་ཆེ་ན་མཁས་ཀྱང་ཐུབ་མི་འགྱུར། །སྲེ་ལོང་གསུམ་ན་
བཤུལ་རེངས་ལྟག་པ་དགྱེ། །ལུས་རེངས་སོ་འཐམ་གླང་ཐབས་དག་ཏུ་ན། །བདུན་དང་དགུ་
ལས་ཚེ་ཚད་མེད་དེ་འཆི། །དཔྱི་དང་སོག་པ་ལྷ་ང་བྲན་རྩེ་རྣམས། །ཟུག་ཆེ་སྐྲངས་ཤིང་རྣག་
ཐག་རིང་བར་འགྱུར། །རྐང་སླེབ་ཟུག་རྔུ་ཇ་འདས་གདོན་པ་དཀའ། །ལྷ་བ་ནག་པོ་རུས་པ་ཚ་
བམ་འགྱུར། །ཆུ་རྒྱུས་བཅད་ན་རེངས་འགྱུར་རྨ་གཏིང་ནུབ། །ཕུག་བཤགས་རྣག་ཆུ་རྩིགས་
ཅན་བྱེ་འཕོངས་འོང༌། །གསུམ་པ་བཅོས་པའི་ཐབས་ལ་རྣམ་པ་དྲུག །ཉེས་བྱེད་དུས་དང་སྦྱར་
ཏེ་བཅོས་པ་དང༌། །ཕོག་ས་གནས་དང་སྦྱར་ཏེ་བཅོས་པ་དང༌། །རིམ་པ་ཤུགས་དང་སྦྱར་ཏེ་
བཅོས་པ་དང་། །དུས་གསུམ་དཔེ་དང་སྦྱར་ཏེ་བཅོས་པ་དང་། །གཉན་པ་གནད་དང་སྦྱར་ཏེ་
བཅོས་པ་དང༌། །མན་ངག་སྐབས་དང་སྦྱར་ཏེ་བཅོས་པའོ། །དང་པོ་ཉེས་བྱེད་དུས་དང་སྦྱར་
བ་ནི། །དང་པོ་ཞུགས་པ་ཁྲག་གི་དུས་ཡིན་པས། །དར་མ་མཁྲིས་ཤས་ཆེ་ལ་ཞག་ལྔ་དགུག །
བྱིས་པ་བད་ཀན་ཆེ་ལ་ཞག་གསུམ་སྟེ། །རྒས་སམ་རླུང་ཁམས་ཅན་ལ་ཞག་གཅིག་གོ །དེ་
ཡིས་སྐྲངས་པ་མི་རྒྱས་ཁྲག་མི་སྐྱེ། །ཟུག་ཆུང་གནད་ལ་མི་ཉེ་ཁྲག་འབྱོར་བྱེད། །རྨ་ཆས་སྦང་
མ་བཟང་པོ་ལེགས་བསྲོས་ལ། །དེ་ལ་ཞོ་ཡི་ཁ་ཕྲུ་བཏབ་ལ་དཀྲི། །རྩ་འམ་ཚིགས་ལ་ཕོག་ན་
རྒྱ་སྐྱེགས་བསྣན། །ཡང་ན་སྦང་ཞིམ་མཁན་པ་སྦྱར་བསྲོས་ལ། །ལྕམ་འབྲུམ་ཕབས་དང་
གཡེར་མའི་ཐལ་གྱིས་བྲན། །ཞོ་ཡི་ཁ་ཕྲུ་བཏབ་ལ་ནོན་པར་དཀྲི། །འཕྲོད་པར་གྱུར་ན་མ་
སོས་བར་དུ་ཤིས། །དེ་ཡིས་མ་ཐུབ་སྐྲངས་སྲིད་དམར་སྦྱོར་བྱ། །བཙོད་ཞུན་རམས་ཚོས་རྡོ་
དྲེག་དམར་པོས་མནན། །བར་དུ་རྒྱས་པ་ཆུ་སེར་དུས་ཡིན་པས། །ཤ་ལ་སྐྲང་ཤོར་གྱུར་ན་
25-1-447


གར་པོ་དང་། །བག་ཕྱེ་འབྲུ་མར་སྤོད་བཏབ་ཨ་སས་བདུག །དེས་མ་ཐུབ་ན་སེར་པོའི་སྦྱོར་
བས་གདུལ། །ཡུང་སྐྱེར་ཆུ་རྩ་ཞུ་མཁན་རྗེན་ཕྱེ་ཞོ། །ཞུན་དང་ནན་ནི་གང་འཕྲོད་སྐྲངས་ལ་
དྲིས། །ཡང་ན་ཡུང་བ་སྐྱེར་པ་ཆུ་རྩ་དང༌། །ཞུ་མཁན་བ་བླ་ལྡོང་རོས་ཞུན་ནན་བྱ། །དེས་མ་
ཐུབ་ན་ཁྲ་བོའི་ཆས་ཀྱིས་གདུལ། །ཡུང་སྐྱེར་ཆུ་རྩ་བཙོད་ཞུན་ཕོ་ཚོས་རམས། །སོ་ཐོག་ཝ་
སྤྱང་གོང་མོ་སྦྲེ་ཡི་བྲུན། །རི་བོང་རིལ་མའི་ཞུན་ནན་གང་འཕྲོད་སྦྱར། །ཡང་ན་ཝ་སྤྱང་རི་བོང་
གོང་མོའི་བྲུན། །གྲོག་ཞིང་ཐལ་བ་སོ་ཐོག་གྲོག་ཚང་ས། །ས་ཞག་བཙོད་རམས་ཞུ་མཁན་རྒྱ་
སྐྱེགས་དང༌། །ཡུང་སྐྱེར་ཆུ་རྩ་སྦང་གར་རྗེན་ཕྱེ་སྦྱར། །འཚོས་པར་བཙོས་ལ་སྐྲངས་པ་ནོན་
པར་བཏང༌། །ཅིས་ཀྱང་མ་ཐུབ་ནག་པོའི་ལུམས་ཀྱིས་གདུལ། །ཁྱི་ལུད་རེ་ཅག་སྤྱང་ཚེར་རྩ་
བ་དང༌། །དུག་(བཙན་དུག བུང་ང་། ར་དུག)གསུམ་བྲུན་(ཝ་སྤྱང་། རི་བོང་། གོང་མོ་)བཞི་རྒྱ་སྐྱེགས་གུ་གུལ་
རྣམས། །རྗེན་ཕྱེ་མར་ནག་སྦྱར་བཅོས་ཞུན་དུ་གཞུག །གང་རྒྱས་རྩ་ནས་གཏར་ཞིང་ཁོང་ནས་
སྦྱང༌། །ཐུལ་རྟགས་སྐྲངས་པའི་མདོག་ཤོར་ཅུང་ཟད་སྐྱ། །ཟུག་བྲི་གཉེར་ཆུང་འབྱུང་ངམ་རྣག་
ཏུ་ཁུགས། །རྣག་མེད་སྐྲངས་པ་སྔོ་སྐྱ་ན་ཚ་ཆེ། །གླད་རུལ་ཚྭ་དང་སྦྱར་ལ་ཁྱབ་པར་བྱུག །
མཁན་སྦང་ལྕམ་འབྲུ་གཡེར་ཕབས་འཇིབས་སུ་གཞུག །ཡང་ན་ཚོས་བཙོད་ཞུ་མཁན་ཚ་བ་
གསུམ། །སྦང་གར་སྦྱར་ལ་རྩེ་འཇམ་ཁྱབ་པར་བྱུག །ཚ་ལ་དྲོད་ཆེ་སྐྲངས་ལ་བསིལ་ཞུན་
ཤིས། །ཐ་མ་སྨིན་པ་རྣག་གི་དུས་ཡིན་པས། །རྣག་ཏུ་འགྲོ་རྟགས་སྐྲངས་པའི་མདོག་མི་
འགྱུར། །འཕར་ཞིབ་མི་བྱེད་བརྟན་ཞིང་སྲ་ལ་སྐྲེབ། །དེ་རྗེས་རྣག་གཡོས་སྐྲངས་མདོག་
དམར་ལ་དྭངས། །རྐྱལ་པ་བུས་ལྟར་མཐའ་དབུས་མེད་པར་རྒྱངས། །དྲོས་ཚེ་གས་ལྟར་ཚ་
ཁྱུག་རེག་མི་བཟོད། །ལུས་སྙོང་གཉིད་མེད་ཁ་བླ་དང་ག་འགག །དེ་ནས་རྣག་ཏུ་སྨིན་ནས་
མིག་སྤྲིན་སེར། །ཆུ་ལྡོག་སྐ་དུགས་རྩ་རྒྱུད་འདར་ལ་སྤུན། །སྐྲངས་པ་མཐའ་ནས་འཇུམ་ཞིང་
དབུས་སུ་འདུས། །སྐབས་སུ་ལྡང་དུབ་ཚ་འཁྱུགས་བ་སྤུ་འགྱེལ། །མཐོ་བས་སྐྲངས་པ་ཀུན་
25-1-448


སྙོམས་བརྫིས་པའི་ཚེ། །འབྲི་མིག་སྲུབས་འདྲ་བུ་ག་སྟོངས་ཀྱིས་འབྱུང༌། །སྐྲངས་ཀྱི་གོང་འོག་
གཉིས་ནས་མཐེ་བོས་མནན། །རྐྱལ་ཆུ་ལྟ་བུར་རླུང་ཉིད་ཕན་ཚུན་རྒྱུ། །རྣག་བྱེར་རུས་ཐོག་
གྲམ་དང་སུལ་ཁ་ཡན། །སྐྲངས་ཆུང་ཟུག་ཆེ་ལུས་ལྕི་དང་ག་འགག །སྨིན་རྟགས་མི་གསལ་དེ་
ལ་བྱེར་སྡུད་གཅེས། །སྒ་དང་མར་རྙིང་ཚིལ་ཆེན་དོགས་སར་བྱུག །ཨ་སས་བདུག་ཅིང་
མཐའ་ནས་ཆུ་ལྕག་བརྡེག །ཡང་ན་ཚ་ཕབས་གླད་པ་བྱུགས་བྱས་ལ། །སྟེང་དུ་བྱི་བྲུན་སྦང་
སྐམ་ལུམས་ཀྱིས་བདུག །ཡང་ན་བྱི་བྲུན་ནུ་ཞོ་སྦྱར་བས་བྱུག །དེ་ཡིས་བྱེར་འདུས་སྨིན་པའི་
རྟགས་ཚང་ན། །དབུག་ཐབས་སྔོན་དུ་ཆང་ཕུལ་ཕྱེད་བཏང་སྟེ། །མཐའ་ནས་བཅིངས་ཏེ་གར་
བབས་ལེགས་མྱངས་ལ། །ཤ་འགྲོས་སྦྱར་ཏེ་ལག་ཉམས་བླང་ཞིང་(རྣག་དང་མ་འཕྲོད་བར་དུ་)
དབུག །རྨ་ཁ་བུལ་དང་རྣག་ལས་སྦྱར་བར་བྱ། །རྒྱུས་མདེས་ཐུར་མས་འགགས་པ་བསལ་
ཞིང་སྦྱང༌། །རྩ་ཆོད་ཁྲག་ཤོར་སྤྲུ་དང་ཟོར་པ་རྫང༌། །རྗེས་ལ་ལེ་བརྒན་དར་གྱི་ཐེམ་བུ་གཞུག །
རྣག་པྲ་བརྟག་པ་དུད་ཀ་ཀོ་རུལ་དྲི། །སླ་ལ་སྦུ་ཕྲན་སིར་བ་ངན་པ་ཡིན། །དྲི་ཆུང་དཀར་
འཇམ་གར་པོ་བཟང་བ་ཡིན། །ཞག་གསུམ་བར་དུ་སྦང་མའི་རྣག་འཇིབས་བཏང༌། །དེབ་
ཆས་ར་མོ་ཤ་དང་མཚེ་ཡི་ཁུ། །གར་པོ་སྒོ་ང་བ་ཞོ་བག་ཕྱེ་དང༌། །འབྲུ་མར་སྦྱར་བ་ར་རི་མེད་
པར་བྱུག །ཡང་ན་ར་མོ་ཤ་ཡི་ཐལ་བ་དང༌། །ལྕུམ་རྩ་ཡུང་བ་ཆུ་རྩ་ལྡོང་རོས་དང༌། །བག་ཕྱེ་
སྦང་གར་བྱུགས་ཏེ་ཕྱིང་དེབ་བཏང༌། །པུས་མོ་ཚིགས་མིག་རྣམས་སུ་ཕྱིང་པ་བརྩེག །དེ་སྟེང་
མཐའ་ནས་འཇག་གི་དེབ་ཆིངས་བྱ། །ཧྲེམ་ན་སྐབས་སུ་ཆས་བཀྲོལ་ལུམས་སུ་གཞུག །
འབྱར་གྱིས་ཟུག་གཟེར་སྐྱེས་ན་འབོལ་ཆས་བྱ། །ཕོག་ས་གནས་དང་སྦྱར་ཏེ་བཅོས་པ་ནི། །
ཤ་ཡི་གནད་ལ་འཇིབ་ཞུན་ནན་གྱིས་བཅོས། །རྩ་ཡི་གནད་ལ་མེ་གཏར་སྨན་གྱིས་བཅོས། །
ཚིགས་ཀྱི་གནད་ལ་དེབ་ཆིངས་སྒྱོགས་ཀྱིས་བཅོས། །གཉེན་པོའི་བཅོས་དགུ་སྤྱི་རུ་འཕྲུལ་
བ་གཅེས། །འཇིབས་ཀྱིས་རྨ་ཡི་ཆུ་སེར་ཕྱིར་ལ་དྲང༌། །ཞུན་གྱིས་རྨ་ཡི་སྐྲངས་པ་བཞུ་བ་སྟེ།  །
25-1-449

 
ནན་གྱིས་བྱེར་སྦོས་སྐྲངས་པ་རང་སར་མནན། །མེ་ཡིས་རྩ་ཡི་ཟུག་བཅག་འབྲོས་འཕྲང་
བསྡམ། །གཏར་གྱིས་ཁྲག་ངན་ཆུ་སེར་ཕྱིར་ལ་དབྱུང༌། །སྨན་གྱིས་རྨ་ཁོང་གཉིས་ཀྱི་ཉེས་པ་
བསལ། །དེབ་ཀྱིས་རྣག་ཆུ་བྱེར་བ་གཅར་ལ་གདབ། །ཆིངས་ཀྱིས་ནན་དང་དེབ་གཉིས་རང་
སར་གཞག །སྒྱོགས་ཀྱིས་ཚིགས་ཀྱི་འཕྲུལ་འཁོར་བསྡམ་པ་གཅེས། །དང་པོ་འཇིབ་ལ་ཚ་(ན་
ཆང་འགག་སྦང་མ་མཁན་པ་ཕབས་གཡེར་མ་ལྕམ་འབྲུ་བསྲོས་པ་)བསིལ་(བ་ལ་མཚན་ཞོ་སྦྱར་བའམ་ཀྱི་ལྕེ་པར་པ་ཏ་ལུག་
ངལ་ར་ཞོ་སྦྱར་བ་)སྙོམས་པ་(ལ་སིངས་པོའི་སྦང་མ་ཀྱི་ལྕེ་)གསུམ། །ཞུན་ལ་ཕོག་ས་འདུ་བ་དུས་གནད་
བསྟུན། །ཕོག་ས་ཡུལ་དང་སྦྱར་ན་ཤ་འདུལ་དང་(ལ་ཨ་ས་བ་དང་)། །ཉྭ་འདུལ་(ལ་ཉྭ་བཞི་སྣ་ཚོགས་
བཙོས་པ་)རྨེན་བུ་འདུལ་(བ་ལ་རྨེན་བུ་སྣ་ཚོགས་བཙོས་པ་)དང་རྩ་འདུལ་(ལ་ཁྲག་སྣ་ཚོགས་བཙོས་པ་)དང༌། །
རུས་པ་(ལ་མི་རྟ་ཁྱིའི་རུས་པ་བཙོས་པ་)ཆུ་རྒྱུས་(ལ་སྣུམ་བཞིའི་ཨ་ས་བ་)དྲེག་བཞི་(ལ་ཞོ་བཙོས་འབྲུ་མར་སྦྱར་བས་)
འདུལ་བའོ། །གནོད་བྱེད་དུས་དང་སྦྱར་ན་རླུང་(ལ་སྣུམ་བཞི་ཚ་སྤོད་བཙོས་པ་)མཁྲིས་(པ་ལ་ཏིག་ཏ་ཚོས་
ཀྱི་ལྕེ་ཧོང་ལེན་ཞོ་བཙོས་)ཁྲག་(ལ་དམར་པོ་གསུམ)། །བད་ཀན་(ལ་གཡེར་མ་ཚ་བ་གསུམ་དབྱི་མོང་རྗེན་ཕྱེ་དར་བར་
བཙོས་)འདུས་པ་(ལ་བྲ་བོའི་ཞུན་གྱིས་)སྐྲངས་པ་འདུལ་བའོ། །ཉེས་བྱེད་དུས་དང་སྦྱར་ན་ཁྲག་དུས་
ཞུན་(དམར་པོ།།)ཆུ་སེར་ཞུན་(སེར་པོ་)དང་རྣག་དུས་ཞུན་(ཕུར་ཡོག་ཤ་རུའི་ཐལ་བ་རྗེན་ཕྱེ་ཞོ་བཙོས་སམ་ནག་
སྦྱོར་)གསུམ་མོ། །ཐོར་བུ་ནད་དང་སྦྱར་བའི་ཞུན་དྲུག་སྟེ། །རྣག་སྣ་གསུམ་ཞུགས་ཁྲོས་པ་རང་
སར་འདུལ་(བ་ལ་ཚ་ཕབས་་གླད་པ་བྱུགས་ཏེ་བྱི་བྲུན་སྦང་སྐམ་བཙོས་པ)། །རྩ་ནད་བྱེར་སྡུད་(ལ་མཁན་པ་མཚེ་
སྤང་སྤོས་སྤྲུ་མ་བཙོས་པ་)གཉན་ནད་སྐྲངས་པ་འདུལ་(བ་ལ་མུ་ཟི་འཛིམ་པ་ལྟག་ཤ་ཤུ་དག་མི་ཁྱི་སྤྱང་གསུམ་གྱི་བྲུན་
གར་པོ་རྣམས)། །རྨ་རྒན་འབྲས་འདུལ་(བ་ལ་རེ་ལྕག་སྤྲུ་མ་ཉ་མའི་རུས་པ་)ལྕགས་ཤིང་ཟུག་རྔུ་འབྱིན(པ་ལ་
རེ་རལ་སྦྲུལ་ཚིལ་དྲི་ཆུར་བཙོས་པས་བདུག)། །ནན་ལ་ཚིགས་ཆེན་བམ་པོ་བསྒྲང་བའི་ནན་(ལ་ཀྱི་ལྕེ་ཧོང་ལེན་
བྲག་ཞུན་ཞོ་སྦྱར་བ་བྱུག)། །ཚིགས་བར་འཕྲུལ་སྡོམ་(པ་ལ་ར་ཁྲག་ཚིལ་མཚེ་བག་ཕྱེ་ཞོ་)ཆག་པ་གནས་སུ་
སྦྱོར་(བ་ལ་རྒོད་ཁྲག་མཚེ་སྦྱིན་བག་ཕྱེ་གར་པོ)། །ཤ་བྱེར་སྐྲངས་འདུལ་(ལ་བྲག་ཞུན་གླད་པ་དྲི་ཆུ་རྗེན་ཕྱེ་སྦྱར་)
25-1-450


སུལ་རྣག་གཅར་ལ་འདེབས་(པ་ལ་སྒོ་ང་ཉེ་ཤིང་གར་པོ་རྗེན་ཕྱེ་སྦྱར)། །རུལ་མྱགས་འཐས་བྱེད་(ལ་ཤ་རུ་
ཕུར་ཡོག་དྲེས་མ་སུག་པ་རེ་སྐོན་ར་འོ་རྗེན་ཕྱེ་མར་ནག་)སྐྱི་བྱེར་སྲུན་པའི་ནན(ལ་དུད་པ་སླང་དྲེག་མར་དཀར)། །
རྨེན་ངན་སྐྲངས་འདུལ་(བ་ལ་བྲག་ཞུན་ཀླད་རུལ་ཚ་ཕབས་སྦྱར་)གཉན་དང་ལྷོག་པ་འཇོམས(པ་ལ་མུ་ཟི་
འཛིན་པ་སྟག་ཤ་ཀྱི་ལྕེ་ཤུ་དག་ར་གཞོབ་སྤྱང་བྲུན་དྲི་ཆུ་སྦྱར)། །དེ་ཡང་ན་སོ་ནད་ཁམས་ནམ་ཟླ་ཡིས། །རྟ་
དང་གྲང་དྲོ་མཐུག་སྲབ་ཤེས་པར་བྱོས། །མེ་ནི་རྩ་ཆད་ཁད་པུ་འཛུད་པའི་མེ(ནི་མཐེ་བོས་མནན་ན་
ཁྲག་ཕྲེང་སར་སྤྲ་བ་ལྔས)། །འབྲོས་པའི་ལམ་འགེགས་(པ་ལ་མིག་དམར་ཨ་སོ)ཁྲག་ཚད་བརྟོད་ལ་
གནོན(པ་ལ་མོད་ལ་རྨ་གོང་སོར་བཞིར)། །སྐྲངས་ཀྱི་སྣ་འདོན་(པ་ལ་སྐྲངས་སྣ་སུལ་སྣར་)རྩ་བྱེར་དབུས་སུ་
སྡུད(པ་ལ་རི་བོའི་རྩེ་ལ་མེ་རྒྱ་གདབ)། །ཨ་ནའི་ཟུག་གཅོག་(་ན་གང་ཕྲེང་སར་)རུས་ཟན་རྨེན་པ་འདྲུབ(པ་
ལ་རྨ་སྟེང་དུ་ཆུ་སེར་སྐམས་སྐམས་གདབ)། །གཏར་ག་སྐྲངས་ཀྱི་མགོ་གནོན་(ན་གང་ཉེ་ལ་མང་དུ་)ཚ་རླངས་
གསོད(ན་གང་རྒྱས་ལ)། །གཟེར་བའི་ཟུག་གཅོག་(ན་གང་ཁྲིད་ལ་)ཁྲག་ཤོར་འོལ་ཁ་སྒྱུར(ན་རྩ་རྒྱུད་གོང་
འོག་ལ)། །རུས་བམ་ཉེས་སེལ་(ན་གང་ཉེ་ལ་)ཁྲག་རྨྱོས་རྨ་མདོག་འབྱིན(ན་རྨ་བྲུད་ལ་ཁྲག་དབྱུང)། །སྨན་
ནི་རྩ་ཆད་ཁད་པུ་འཛུད་པའི་སྨན(ལ་དབྱར་སྤྲུ་ལོ་དགུན་རྩ་བའི་རེང་བུ་ལ་གུར་གུམ་དོམ་མཁྲིས་ཉ་མཁྲིས་སྤྲུ་འབུ་
བྱུགས་ལ་བརྫང་)། །ཁྲག་ཤོར་ཁོང་སྦེད་(ན་མཁན་སྐྱེར་གུར་གུམ་དོམ་མཁྲིས་ཤིང་ཚ་རེ་སྐོན་)རྩ་བྱེར་དབུས་སུ་
སྡུད(ན་ད་ལིས་ཀྱི་ལྕེ་ཤིང་མངར་ཁཎྜ་བཟང་དྲུག་མཁྲིས་སྣ་ད་ཏྲིག་ཚོས)། །ཆུ་སེར་རྣག་སྐེམས་(ལ་མུ་ཟི་བསེ་རུ་དོམ་
མཁྲིས་ཨ་བ་ཨ་བྱག་རྣམ་པར་ཅུ་གང་ཀ་ར་)རྨ་ཆེན་ཁོང་ནས་གསོ(བ་ལ་སྒོག་སྐྱ་འབྲས་ཡོས་ཨ་བྱག་བྲག་སྤོས་ཀ་ར་
སྦྲང་)། །ཤ་རོ་རྨེན་གཅོད་(ལ་དུར་བྱིད་རྒྱ་ཚྭ་ཡུང་བ་རུ་རྟའི་ཕྱེ་མ་)ཤའུ་བུ་ལྟར་གསོ(བ་ལ་དོམ་མཁྲིས་གུར་གུམ་རྒུ་
དྲུས་བྲག་སྤོས་ཚ་ལ་མཚལ་ཀ་ར)། །དེབ་ལ་(ཆག་ན་ཧེལ་གེ་སོགས་)པགས་དེབ་(རྩ་མྱགས་ལ་འཇག་སོགས་)རྩྭ་
དེབ་(སྐྲངས་ལ་བོང་སྤུ་རེ་བལ་ཕྲུག་ཀྱུགས་སོགས་)སྤུ་དེབ་དང༌། །(བྱེ་བ་ལ་)ཤོག་དེབ་(རྩ་ཆད་པ་ལ་)ཤིང་དེབ་
(རྣག་ལ་)ཕྱེང་དེབ་རྣམ་པ་དྲུག །དེ་ལ་(འོག་ཏུ་)མོ་དེབ་(སྟེང་དུ་)ཕོ་དེབ་(ཚིགས་མིག་འཁོར་བར་)ཡང་དེབ་
བོ། །འཆིངས་ལ་(སྐྲངས་པ་ལ་)ཆག་འཆིངས་(ཆག་པ་ལ་)གསོན་འཆིངས་(རྣག་ལ་)འདེད་འཆིངས་
25-1-451


དང་། །(ཉྭ་གཞི་ལ་)མདའ་ཆས་འཆིངས་དང་(ཚིགས་ལ་)སྡོམ་འཆིངས་དེ་ལ་བདུན། །སོག་པར་
འཁོར་ལོ་གཤོག་རྒྱངས་འཆིངས་སུ་བཅིང་(བ་ལ་དཔུང་པ་ནས་མཆན་འོག་ཏུ་བླངས་ལ་བཅིང་སྟེ་འགྱེན་ཤིང་
ཡོད་མེད་གཉིས་སོ)། །དཔུང་པ་ལ་ནི་སུམ་སྒྲོག་འཛུམ་འཆིངས་ཏེ(མཆན་འོག་ནས་ལེན་པ་དང་འགྱེན་ཐག་
ནས་ལེན་པ་གཉིས་སོ)། །གྲུ་མོར་བསྣོལ་འཆིངས་(ནི་སྟེང་འོག་གཉིས་ནས་)མཁྲིག་མར་རེ་ལྡེ་འཆིངས་(ནི་
ཡས་ལེན་མས་ལེན་བྱ)། །དཔྱི་ལ་རྭ་རྒྱངས་དྲ་བ་འཆིངས་སུ་བཅིང༌། །པུས་མོར་དྲུག་འཆིངས་(ནི་
བསྣོལ་འཆིངས་སྐྱོར་འཆིངས་གཉིས་)ལོང་ཚིགས་མོན་བུ་ལྷས་(ནི་ཡས་ལེན་མས་ལེན་གཉིས་སོ)། །རྒྱུ་ནི་དར་
ཆེན་མེན་ཏྲི་ཕྲ་རས་ལ། །ཞེང་ཚད་(དཔྱི་སོགས་དང་རྨ་མེད་ལ་)སོར་གསུམ་(ཕལ་ཆེར་ལ་)གཉིས་(པྲན་རྩེ་
དང་རྨ་མང་ན་)གཅིག་གནས་ཀྱིས་སྦྱར། །དམ་ན་ཟུག་སྐྱེ་ལྷོད་ན་ཆས་མི་ཆགས། །བཅིངས་ཉེས་
ཐེར་ཟུག་ཤོར་ན་དེབ་མི་ནོན། །དམ་དུ་དྲིལ་ལ་ཕྱི་ནས་རང་འགྲོས་བཅིང་། །སྒྱོགས་ལ་རྒྱུ་
དང་དབྱེ་བ་བསྐུར་བའི་ཡུལ། །གཞུག་དུས་དབྲལ་དུས་དམ་དང་ལྷོད་པའི་སྐྱོན། །ནང་ཚངས་
བསྡམ་ཚད་བསྡམ་ཐབས་ཉེས་པའི་སྐྱོན། །ལེགས་པའི་ཡོན་ཏན་རྣམ་གྲངས་བཅུ་གཉིས་སོ། །
དེ་རྒྱུ་གསོམ་དང་གླང་མ་ལྕང་མ་སོགས། །དྲང་བཤོན་གཅུ་མཛེར་མེད་ཡང་སྐམ་པ་ལ། །
ཐིག་ནས་ཞོགས་བཏོན་འཆུས་དང་ཕྲ་སྦོམ་མེད། །ཁོང་ལྡེམ་ཤེད་སྙོམས་ཚད་དང་ལྡན་པར་
བཅའ། །དབྱེ་བ་རྣམ་གཉིས་ཤིང་བཟོ་རིགས་ཀྱིས་དབྱེ། །བསྐུར་བའི་དུས་ཀྱིས་དབྱེ་བ་རྣམ་
པ་གཉིས། །དང་པོ་(ཚིགས་ལ་)སྒྱོགས་དང་(རྐང་ལ་)ཁྲ་དང་(གནས་མ་ངེས་པ་ལ་)བྱི་ཟེའོ། །སྒྱོགས་ལ་
སྒྲོམ་སྒྱོགས་(ཚེམས་ཡོད་མེད་)སྦ་སྒྱོགས་(ཕྱི་དྲ་ནང་དྲ་)བསིལ་སྒྱོགས་(འཁྲུལ་མ་)གསུམ། །ཁྲ་ལ་རུས་
ཆག་གནས་སུ་སྦྱོར་བའི་ཁྲ། །ཤ་ཡི་སྟེང་འཕྱང་རང་སར་སྡོམ་པའི་ཁྲ། །ཉྭ་སུལ་རྣག་འཁྱིམས་
བཅར་འདེབས་ཁྲ་དང་གསུམ། །བྱི་ཟེ་རྦད་ཆོད་ཁ་འཛིན་བྱི་ཟེ་དང༌། །ཁྲག་ཤོར་རྒྱ་འཁྱིམས་
བཅའ་བའི་བྱི་ཟེ་དང༌། །འབྱིན་ཐབས་ཟུག་རྔུ་དབྱུང་བའི་བྱི་ཟེ་གསུམ། །བསྐུར་དུས་དབྱེ་བ་
བསིལ་སྒྱོགས་(དྲ་བ་ཅན་དང་ཁོང་གསེང་ཅན་)དྲོད་སྒྱོགས་(སྒྲོམ་སྒྱོགས་པགས་པ་བཀབ་)དང༌། །སྐམ་སྒྱོགས་
25-1-452


(རྣག་ཁྲག་འཛག་པ་ལ་)གཤེར་སྒྱོགས་(དྲ་བ་ཁོང་གསེང་ཅན་)ཕྱི་སྒྱོགས་ནང་སྒྱོགས་དང༌། །སྡོམ་སྒྱོགས་
གློད་སྒྱོགས་རྣམ་པ་བརྒྱད་དུ་བཤད། །བསྐུར་ཡུལ་ཚིགས་དོན་རྐང་ཆག་ཆུ་བ་དགྱེས། །ཁྲག་
ཤོར་ཡུལ་སྟོངས་ཚིགས་འཁོར་རྣག་ལ་གཞུག །གཞུག་དུས་རྨ་ཡི་སྐྲངས་དང་ཚ་བ་ཆོགས། །
རྣག་གི་རུལ་ཆོད་དགོས་དུས་དྲུག་ཏུ་གཞུག །རྐང་ཆག་པ་དང་ཁྲག་ཤོར་མ་གཏོགས་པ། །
བམ་རུལ་རྣམས་ལ་སྐབས་སུ་གསེང་བ་གཅེས། །དབྲལ་དུས་ཚིགས་ཤོར་མལ་དུ་ཚུད་པ་
དང༌། །རུས་ཆག་འབྱོར་ཞིང་ཚིགས་ཀྱི་འཁོར་བ་སྡོམས། །ཆུ་མདུད་ཆགས་དང་རྩ་ལ་ཁད་པུ་
ཚུད། །ཤ་ཡི་སྟེང་འབྱོར་རྣག་གཞུག་ཆོད་པ་དང༌། །རྐང་ལག་ཟུངས་ཐུབ་འགྲོ་ནུས་གྱུར་ན་
དབྲལ། །དམས་སྐྱོན་ལྷང་ཀྱོག་ཆེ་ལ་གོང་འོག་སྐྲངས། །སྐོམ་དད་ཆེ་ལ་གཉིད་མེད་སྟོང་
སྐྱུགས་བྱེད། །དང་ག་མི་བདེ་མགོ་ན་རྣ་བ་འུར། །དེ་རྟགས་ལྡན་ན་ཤིང་ཆས་ཅུང་ཟད་གློད། །
ལྷོད་སྐྱོན་ཆག་པོ་ཚིགས་འཕྲུལ་སོར་མི་སྡོད། །རྣག་ཁྲག་མི་ཆོད་ནད་ཀྱི་ཟུག་མི་ཆོགས། །ཆུ་
བའི་སྣ་འབྲོས་ཆག་བསྣོལ་རིང་ཐུང་བྱུང༌། །དེ་ལ་ཤིང་ཆས་ཅུང་ཟད་བསྡམ་པར་བྱ། །ནང་
འཚངས་རྔ་མ་རས་སྦོད་ཐེམས་ལྡན་གཅེས། །ཡ་ཡོ་སྙོམས་དང་སྡོམ་པ་འདིར་རག་ལུས། །
བསྡམ་ཚད་དམས་ལྷོད་སྐྱོན་དང་བྲལ་བ་སྟེ། །བསྡམ་ཐབས་མཐའ་ནས་བསྡམ་ཞིང་དབུས་
ནས་དགྲོལ། །ཉེས་སྐྱོན་ལུས་དང་མ་འཚམས་ཆག་བསྣོལ་འགྱུར། །ཤིང་གི་བྱེར་ཟུག་མ་
སྙོམས་ཟུག་མི་ཆོགས༌། གཞུག་པ་ཉེས་ན་རེངས་དང་འཁུམས་པར་འགྱུར། །ཤིང་ལ་འཁོང་
གསེང་མེད་ན་ཚ་བམ་སྐྱེ། །དེ་ལས་ལོག་པ་ལེགས་པའི་ཡོན་ཏན་ཏེ། །བཙའ་རྫི་སླ་ཞིང་
གསོས་པ་མྱུར་བར་འགྱུར། །རིམ་པ་ཤུགས་དང་སྦྱར་ནས་བཅོས་པ་ནི། །དང་པོ་ཁྲག་ཤུགས་
ཁྲག་ཚད་རྨ་གསར་གདུལ། །གཉིས་པ་མཁྲིས་པའི་ཤུགས་འབྱུང་ཚ་བ་བཅག །གསུམ་པ་ཆུ་
སེར་ཤུགས་ལས་སྐྲངས་པ་གཞོམ། །བཞི་པ་རྣག་གི་ཤུགས་ལ་དབུག་ཅིང་བཅད། །ལྔ་པ་མ་
ངེས་ཤུགས་ལ་གང་བྱུང་བསལ། །དྲུག་པ་རླུང་ཤུགས་རྨ་ཁོང་བཅུད་ཀྱིས་གསོ། །བདུན་པ་
25-1-453


བད་ཀན་ཤུགས་ལས་རེད་པ་སྦྱང༌། །དེ་དག་མན་ངག་སྐབས་བཞིན་ཤེས་པར་བྱ། །དུས་
གསུམ་དཔེ་དང་སྦྱར་ཏེ་བཅོས་པ་ནི། །དང་པོ་རྨ་རྒོད་སྐྲངས་པ་ཞུན་གྱིས་གདུལ། །བར་དུ་
རྣག་ཤོར་ཕུག་ལ་ཐར་གྱིས་སྦྱང༌། །ཐ་མ་ཤ་གསོ་རྨེན་རྟས་ངར་གྱིས་གདགས། །ཞུན་དུ་
གཞུག་ལ་རྨ་གསར་སྐྲངས་པ་གཉིས། །རྨ་གསར་དང་པོ་འཇིབས་ཀྱིས་གདུལ་བར་བྱ། །སྦང་
ཞིམ་ལེགས་བཙིར་ཝ་སྤྱང་ཁྱི་ཡི་བྲུན། །སྦྱར་བའི་འཇིབས་ཀྱིས་རླུང་འདུལ་ཆུ་སེར་འཇིབ། །
དེ་འོག་སྐྲངས་ན་ནན་ཞུན་ལུམས་ཀྱིས་གདུལ༌། དམར་སེར་སྐྱ་སྦྱོར་ནག་པོ་ཁྲ་བོ་ལྔ། །ཀུན་
ལ་དབྱེ་བས་བསིལ་དྲོད་རྣམ་པ་གཉིས། །གང་ཡང་ནན་དུ་སྦྱོར་ན་ཞིབ་བཏགས་ལ། །ཙེ་
འཇམ་བསྲོས་ལ་ལུག་ཞོ་ཙམ་གྱིས་བྱུག །ཤོག་དེབ་སྤུ་དེབ་བཏང་ལ་འཇག་གིས་དཀྲི། །ཞུན་
དུ་སྦྱོར་ན་ཞིབ་བཏགས་འཚོས་པར་བཙོ། །འོ་ཟན་ཙམ་གྱི་མདག་པ་བྱུགས་པའི་སྟེང༌། །ཧེལ་
སྲབ་བཏང་ལ་དཀྲིས་མས་དཀྲི་བར་བྱ། །ལུམས་སུ་སྦྱོར་ན་ཁྲམ་ཁྲུམ་བརྡུངས་ལ་བཙོ། །ཆུ་
ཆོད་ཧེལ་གེའི་ཁུད་དུ་གཏུམས་ལ་བདུག །ཡང་ན་གྲང་མོ་ཁོ་ནའི་བསིལ་ལུམས་བྱ། །དེ་ལྟར་
ཞུན་དུ་བཅུག་པའི་ཡོན་ཏན་ནི། །རླུང་འདུལ་ཆུ་སེར་འཇིབ་ཅིང་སྐྲངས་པ་འཇོམས། །ཁྲག་
མཁྲིས་རྩ་ཡི་ཚད་པ་འདོན་པར་བྱེད། །སྐྱོན་ནི་བྲུན་གྱིས་རྩ་ཡི་ཁད་པུ་འཆོར། །སྤོད་ཀྱིས་
ཁྲག་མཁྲིས་རྩ་རུས་ཚད་པ་སྐྱེད། །སྣུམ་གྱིས་ཉྭ་ཡི་ཆས་འདྲེད་བད་མཁྲིས་སློང༌། །དེ་ཕྱིར་
གང་ལ་གང་འཚམ་དུས་དང་སྦྱོར། །བར་དུ་རྣག་བཏོན་ཐར་གྱི་སྦྱང་བ་ནི། །འཇིབས་དང་
ཁྲུས་ཀྱིས་རྣག་ཤ་ཐོན་པ་དང༌། །སྐྱ་སྦྱོར་སེར་སྦྱོར་དམར་པོ་ནག་པོའི་ནན། །བད་མཁྲིས་
ཁྲག་དང་རླུང་གི་བྱེ་བྲག་སྦྱར། །ཡང་ན་རྣག་མདོག་དམར་པོ་སྔོན་པོ་དང༌། །དུད་ཁ་དམར་རྩ་
སྐྱ་བོའི་རིགས་དང་སྦྱར། །ཡང་ན་སྐྲངས་པ་ཡོད་མེད་(ལ་དམར་སེར་གྱི་ཆས་སམ་ཡང་ན་ལྕུམ་རྩ་ཡུང་བ་ཆུ་
རྩ་ལྡོང་རོས་ར་མཉེའི་ཐལ་བ་བག་ཕྱེ་གར་པོའི་)ནན་སྦྱར་བའི། །ནན་གྱི་སྐྱོ་མ་བྱུགས་ཏེ་ཕྱིང་པ་བཏང༌། །
ཉྭ་སུལ་ཕྱིང་པའི་གྲངས་སྦྱར་ལུས་དབྱིབས་བསྟུན། །ཚིགས་ལ་རུས་མགོ་ཁོལ་བཏོན་
25-1-454


ཚིགས་མིག་དང༌། །རུས་པའི་དབྱིབས་དང་སྦྱར་བའི་ཕྱིང་པ་བཏང༌། །ཚིགས་མིག་སུལ་སྟེང་
ཕོ་དེབ་ཉིས་རིམ་བཏང༌། །རྣག་འཁྱིམས་ཡང་དེབ་བཏང་ལ་ཆིངས་ཀྱིས་བཅིང༌། །འབྱར་གྱི་
ཡོན་ཏན་རྣག་འཁྱིམས་བཅར་ལ་འདེབས། །སྐྲངས་ཀྱི་བྱེར་སྡུད་བྱེ་སྦོས་རང་སར་གནོན། །
རྩ་ཡི་ཁ་འཛིན་ཆག་པ་གནས་སུ་སྦྱོར། །ཚིགས་པར་འཁྲུལ་སྡོམ་ཆུ་རྒྱུས་འཐེམ་ལ་འདེབས། །
ཉེས་སྐྱོན་སྔས་ན་སྐྲངས་འབྱེར་རྣག་ཤ་ལྔས། །རྣག་ལམ་འགགས་ན་ཟུག་སྐྱེ་རུལ་མྱགས་
འགྱུར། །སྦོས་པ་ཧགས་མ་བྱས་ན་སུལ་དུ་འབྱེར། །པགས་བྱེ་གཟེར་མ་བཏབ་ན་འབྱོར་བ་
དཀའ། །དེ་ཕྱིར་དུས་ཚོད་ཐབས་ལ་མཁས་པས་སྦྱར། །ཐ་མ་རྨེན་བརྟས་ངར་དུ་གདགས་པ་
ནི། །འོ་མ་རྗེན་ཕྱེ་མར་དཀར་ཨ་སས་མནན། །སྤོད་སྣ་མར་སྦྱར་ཕྱིང་པ་རེ་བལ་བཙོས། །
རྨེན་པའི་སྟེང་དུ་བཀབ་ལ་དཀྲིས་མས་བཅིང༌། །གཡེར་མས་ཆུ་སེར་འདྲེན་ཞིང་བད་ཀན་
སེལ། །རྨ་ཚད་གཅོག་བྱེད་རྨ་གསར་དུས་སུ་ཤིས། །འདི་དུས་མི་བཏང་རླུང་འབྱེར་རྨ་འཚོ་
དཀའ། །གཉན་པ་གནད་དང་སྦྱར་ལ་བཅོས་པ་ནི། །(གང་ལ་ཡང་རྣ་ལ་སྤྱི་བཅོས་བྱ། མ་ཐུབ་ན་དགོས་
བཅོས་བྱ་)ཉྭ་གནད་རྣམས་ལ་མཚོན་ཕོག་ཨ་སས་བདུག །ཡང་ན་ཚ་བའི་འཇིབས་སུ་གཞུག་
པར་བྱ། །མ་ཐུབ་སྦང་གར་མཁན་ཆུང་ལུག་ཞོ་དང༌། །སྒ་སྤོད་མར་ནག་རྗེན་ཕྱེའི་ཞུན་དུ་
གཞུག །མ་ཐུབ་ཉྭ་སྣ་སྣ་ཚོགས་(ཉ་རྨང་མའི་ཤ་རྒོད་གཡུང་རྟ་བོང་ར་ལུག་བ་གླང་མཛོ་དྲེལ་གཅན་གཟན་བྱ་ཁྱི་མིའི་
ཉྭ་ཤ་འབྲུ་མར་དྲི་ཆུར་བཙོས་པའི)ལུམས་ཀྱིས་གདུལ། །དེས་ཀྱང་མ་ཐུལ་ཚ་གྲང་རྣམ་པ་གཉིས། །ཚ་
ཁྲོས་ཡུང་སྐྱེར་ལྕུམ་རྩ་ལྡོང་རོས་དང༌། །བག་ཕྱེ་ཞོ་དང་སྦྱར་བའི་ནན་གྱིས་མནན། །ཡང་ན་
ཀྱི་ལྕེ་དཀར་པོ་པར་པ་ཏ། །ལུག་ངལ་བ་དང་ར་ཞོ་སྦྱར་བས་མནན། །གྲང་ཁྲོས་སྤྱང་ཀི་ལ་
སོགས་གཅན་གཟན་ཤ །འུག་པ་བྱ་རྒོད་དྲོད་ཅན་ཤ་ཆང་བཙོས། །བག་ཕྱེ་མར་ཁུ་ཕབས་
སྤོད་ཞུན་གྱིས་གདུལ། །ཁྱད་པར་དཔུང་པའི་ལུག་གཞུག་རྣམ་གཉིས་ལ། །མཁན་སྦང་སྒ་
སྤོད་ཞོ་མར་རྗེན་ཕྱེའི་ཞུན། །གར་པོ་གླད་པ་ཉ་ལྕིབས་ཚྭ་བཙོས་གླན། །ལག་ངར་ཉྭ་ལ་སྦང་
25-1-455


གར་མཁན་པ་དང༌། །ལྕམ་འབྲུམ་ར་ཞོ་མཚེ་ཁུའི་ཞུན་དུ་གཞུག །བརླ་ལ་སྦང་གར་མཁན་པ་
གླད་པ་དང༌། །བག་ཕྱེ་ཆུ་རྩ་སྦྱར་བའི་ཞུན་དུ་གཞུག །སྦལ་པ་ནག་པོ་སྦང་མ་ཆང་འགག་
དང༌། །སྤྲུ་མ་དུད་པ་ཚྭ་ཕབས་སྦྱར་བས་གདུལ། །བྱིན་པའི་ཉྭ་ལ་མཛོ་ལྕི་སྦང་གར་དང༌། །
གོང་མོའི་བྲུན་སྦྱར་བསྲོས་པའི་ནན་དུ་བཏང༌། །གློ་སྙིང་མི་བདེ་ཚིགས་པ་དྲུག་པ་བསྲེག །
མགོ་བོ་ན་ན་ཨ་སོ་རུ་ཐུང་གཏར། །འབྲོས་ཤ་འདར་ཤ་སྒོ་ང་ར་ཕག་ཁྲག །གཅིན་དང་ར་ཞོ་
བོང་སྤུས་མནན་པ་དང༌། །གཉའ་ཤ་འཇིབས་ཞུན་སྤྱི་ལྟར་བཅོས་པར་བྱ། །རྨེན་བུའི་གནད་
བརྒྱད་ཨ་དཀར་ཀྱི་ལྕེ་ནག །ལྕགས་ཕྱེ་སོ་ཐོག་ཧོང་ལེན་བ་ཤ་ཀ །ཏིག་ཏ་ར་ཞོ་བྱུགས་ཏེ་
ཕྱིང་དེབ་བཏང་། །ཨ་དཀར་ཀྱི་ལྕེ་སོ་ཐོག་ལྕགས་ཕྱེ་རམས། །ཞུ་མཁན་བག་ཕྱེ་འབྲུ་མར་
བཙོས་སྦྱར་མནན། །ཡང་ན་དུད་པ་ཤུ་དག་ཀྱི་ལྕེ་དང༌། །སྤང་སྤོས་སྦང་གར་སྦྱར་བས་བྱུག་
པར་བྱ། །མ་ཐུབ་རྨེན་བུ་སྣ་ཚོགས་ལུམས་ཀྱིས་གདུལ། །ཁོང་དུ་ག་བུར་གླ་རྩི་ཨ་དཀར་
བཏང༌། །རླུང་རྩ་རྣམས་ལ་རྩ་རྒྱུད་རླུང་གསང་བསྲུང༌། །རྨ་ལ་འབའ་ཆ་ཨ་ས་ཕབས་དང་
སྤོད། །མཁན་པ་གླུམ་རྣམས་བསྲོས་པས་ཡང་ཡང་བདུག །མ་ཐུབ་ཛཱ་ཏི་ཤིང་ཀུན་པི་པི་ལིང༌། །
བཅའ་སྒ་རྒྱམ་ཚྭ་གོ་སྙོད་མཁན་པ་ཕབས། །བུ་རམ་གླུམ་ཉེ་དྲོ་བར་བསྲོས་པས་བདུག །ཁོང་
དུ་གསར་བཅུད་གསུམ་དང་མངར་གསུམ་གྱི། །ཏིང་ཁྲོལ་ཤིང་ཀུན་ཅུར་ནིས་བཏང་བར་བྱ། །
ཁ་མིག་ཡོ་ན་སྤུ་འཁྱིལ་ཚུ་རོལ་བསྲེག །རླུང་ཁྲག་སྡོངས་ན་བསིལ་གཏར་རིག་པས་དཔྱད། །
ཁྱད་པར་རླུང་རྩ་རཏྣ་བཅོས་པ་ནི། །ཆང་འགག་སྦང་མ་མཁན་པ་ཚ་བ་གསུམ། །ལྕ་འབྲུམ་
མར་ནག་ཚིལ་ཕྲན་དྲོན་མོས་དྲིལ། །ཡང་ན་ཨ་ས་འོལ་སྐོམ་འབའ་ཆས་བདུག །སྐྲངས་པ་ཐུ་
ན་བདུད་རྩི་ལྔ་ཡི་བདུག །རྨ་ནས་མཚོན་གང་བཅལ་བའི་གོང་འོག་བསྲེག །སྨྱོ་ལབ་ཨན་
སྟོང་འདར་ན་དྲུག་པ་བསྲེག །དཔུང་པའི་ཆུ་རྩ་ཨ་སའམ་དམར་པོའི་ལུམས། །རྩ་རྒྱུད་གོང་
འོག་མཆན་ཕུགས་སྒྲོག་རུས་གཤོངས། །དཔུང་ཚིགས་ལག་མཐིལ་སྤྲ་བ་ལྔ་ཡིས་བསྲུང༌།  །
25-1-456

 
རུས་རྩ་སྒྱིད་པུ་ཕྱིང་པ་སྣུམ་ལྡན་བདུག །མ་ཐུབ་སྦལ་ནག་ལྟ་བུར་ཞུན་དུ་གཞུག །བླབ་
འཆོལ་སྨྲ་ན་སྣེ་རྩ་སྤྱི་གཙུག་བསྲེག །གློ་སྙིང་མི་བདེ་ཚིགས་པ་བདུན་པ་བསྲེག །བཤུལ་པ་
རེངས་ན་སྒང་རྩ་ནག་པོ་བསྲེག །པིར་མགོ་གཞུང་རྩ་སྦང་མ་མཁན་པ་ཕབས། །ནས་ཚིག་ཞོ་
དང་སྦྱར་ལ་འཇིབས་སུ་བཏང༌། །གཞུང་རེངས་ལྟག་དགྱེ་རྩ་ནག་ཆུ་མགོ་བསྲེག །མགོ་བོ་ན་
ན་འགུལ་རྩ་ནག་པོ་བསྲེག །སོ་འཐམས་ནང་ལོང་རྩ་དང་གདོང་རྩ་བསྲེག །ལུས་པོ་འདར་ན་
སྒབ་ཁུང་སྙིང་རྩ་བསྲེག །སྙིང་རྩའི་རྨ་རྣམས་གསེར་གྱི་ཁང་པུ་གཞུག །མིག་དམར་ཨ་སོ་ལི་
ག་མྱུར་དུ་བསྲུང༌། །རྐང་ལག་མཐིལ་བཞི་སྤྱི་བོའི་གཙུག་ཏུ་བསྲེག །ཁོང་དུ་ཐང་དང་ག་བུར་
བདུན་དགུ་བཏང༌། །རྒྱ་སྐྱེགས་ཏིག་ཏ་མཚན་དཀར་པར་པ་ཏ། །ར་ཞོ་སྦྱར་ལ་བསྲོས་པའི་
འཇིབས་སུ་གཞུག །རྩ་ཁ་སྡོམ་ཞིང་རླངས་འབོར་ཁྲག་རོ་འཇུ། །གང་རྒྱས་རྩ་ལ་གཏར་ཞིང་
མ་ཐུབ་ན། །རྩ་རྒྱུད་གོང་འོག་གཏར་ཏེ་བསྲེག་པར་བྱ། །ཁྱད་པར་མཐིལ་འཕྲོག་མྱུར་བ་རྣམ་
གཉིས་ལ། །མར་ཚིལ་སྐྲ་ཤད་སྟེང་དུ་ཆུ་རྡོས་བདུག །དྲེད་ཁ་འཁོར་བའི་ཕྱིང་པ་སྣུམ་ལྡན་
བཏང༌། །རྟ་སྦངས་ཞོ་སྦྱར་རྨ་ལ་འཇིབས་སུ་སྦྱར། །མཁན་སྦང་གླད་པ་གོ་སྙོད་ཚ་བ་གསུམ། །
ཞོ་དང་སྦྱར་བ་རྒྱབ་ཀྱི་འཇིབས་སུ་བཏང༌། །ཁྱད་པར་མཐིལ་འཕྲོག་ནང་ལོང་བོལ་རྩ་
བསྲེག །རྒྱུ་མ་ན་ན་ཉྭ་གཞུག་རྒྱུ་རྩ་བསྲེག །རྐེད་པ་འཁོར་ན་སྒབ་རྩ་བསྲེག་པ་དང༌། །མགོ་
བོ་ན་ན་པིར་མགོ་བསྲེག་པར་བྱ༌། གློ་སྙིང་མི་བདེ་བླབ་འཆོལ་སྨྲ་ན་འཆི། །མྱུར་བའི་བལྟ་རྩ་
བླ་རྩ་བསྲེག་པར་བྱ། །སྐྲངས་ན་བཙོད་ཞུན་རམས་ཚོས་སྤོད་སྣ་ཚོགས། །གཡེར་མ་ལྕ་འབྲུམ་
གར་པོ་བག་ཕྱེ་ཞོ། །འབྲུ་མར་སྦྱར་བ་འཚོས་པར་བཙོས་པས་བདུག །འགུལ་རྩ་ལ་ཕོག་
སྐྱུགས་ན་ཨན་སྟོང་བསྲེག །བྱིན་རེངས་པིར་མགོ་ངར་གདོང་ཆུ་བ་བསྲེག །སོར་མོ་འཁུམས་
ན་སྦང་གར་ཨ་སས་བདུག །གསེར་རྩ་ཀ་གདུང་སྣེ་རྩ་སྒབ་ཁུང་བསྲེག །མཛོད་ཆུང་སྙིང་རྩ་
བལྟ་རྩ་བླ་རྩ་བསྲེག །ག་བུར་བདུན་པ་ཛཱ་ཏི་མཁྲིས་སྣ་བཏང༌། །ཚ་བཞའ་བསིལ་བའི་ནན་
25-1-457


སྟེང་སྤུ་དེབ་བཏང༌། །བལྟ་རྩ་བླ་རྩ་རྩ་སྟེང་སྦུགས་ངོས་བསྲུང༌། །སྦང་གར་བག་ཕྱེ་ཞོ་སྤོད་
མར་སྦྱར་གླན། །ཨ་སོ་བ་ཤ་ཀ་དང་ཨ་ཀ་རུ། །ཧོང་ལེན་ཏིག་ཏ་ཀྱི་ལྕེ་པར་པ་ཏ། །སྤང་རྩི་
བག་ཕྱེ་རི་ཤོ་ཤིང་མངར་བསྣན། །འདར་ན་རྔུལ་མདུང་སྐྱུགས་ན་བཅུ་གསུམ་བསྲེག །རྔུལ་
མདུང་བཅད་ན་སྒྲོག་རུས་འཕར་རྩ་བསྲེག །མགོ་ན་སྙིང་གདུང་རྩེ་ཆུང་དཔུང་རྩ་གཏར། །
མིག་དམར་མཁྲིས་པ་ཚོགས་ཚད་ཁོང་དུ་བཏང༌། །ལབ་མང་མིག་རྩ་གྲུང་ན་སྙིང་གར་བསྲེག །
སྙིང་རྩ་ཀུན་ལ་རྩ་རྒྱུད་གོང་འོག་བསྲུང༌། །ཁོང་ནས་ཚ་བའི་འབྲོས་འདེད་ཤེས་པར་བྱ། །རྨ་
ཁོང་གཉིས་ནས་རྩ་ཁ་བསྡམ་པ་གཅེས། །ཁྲག་རྩ་རྣམས་ལ་ཁྲག་ཤོར་ཆུ་ཡིས་བསྒྲང༌། །སྤྲུ་བ་
ཟོར་པ་རྨར་བརྫང་གོང་འོག་བསྲུང༌། །རྒྱ་སྐྱེགས་ཧོང་ལེན་གླ་སྒང་ཨ་རུ་ར། །སྤང་སྤོས་སྦང་
གར་སྦྱར་བ་བདུད་རྩི་ཡིན། །སྦང་མ་རྒྱ་སྐྱེགས་ཐལ་གྱིས་བྲན་ལ་གཡོགས། །ཡང་ན་ཞོ་
བཙགས་པ་འམ་བསིལ་འཇིབས་བྱ། །ཁྲག་རྒྱས་རྩ་ཡི་གཞུག་མ་གཏར་བ་གཅེས། །ག་བུར་
དགུ་པ་དོན་སྣོད་ཁ་འཛིན་སྦྱར། །ཁྱད་པར་གློ་རྩ་རྣམས་ལ་གོང་འོག་བསྲེག །དབྱར་གྱི་དུས་
སུ་སྔོ་ཁུ་ཞོ་སྦྱར་བཏང༌། །དགུན་གྱི་དུས་སུ་གཡེར་མ་ལྕ་འབྲུམ་དང༌། །སྤོད་སྣ་བག་ཕྱེ་འབྲུ་
མར་བྱུགས་ལ་དཀྲི། །མ་ཐུབ་ཨ་དཀར་སོ་ཐོག་ཚོས་བཙོད་རམས། །ཏིག་ཏ་བ་ལེ་བ་ཤ་ར་
ཞོ་བྱུག །ཧྲེམ་ན་ཨ་སས་བདུག་ཅིང་འཇིབས་སུ་གཞུག །ཁོང་སྨན་ག་བུར་གཙོ་བྱས་གློ་སྨན་
སྦྱར། །མཁྲིས་རྩ་རྣམས་ལ་ཏིག་ཏ་ར་ཞོ་དང༌། །སྦང་མ་ཧོང་ལེན་སྦྱར་བ་རྨ་ལ་གླན། །ཡང་ན་
ཏིག་ཏ་ཧོང་ལེན་ནད་མ་བཙོད། །དུག་ཉུང་ཀ་ར་ཞོ་སྦྱར་ནན་དུ་བཏང༌། །གཤའ་རིངས་
གསེར་མདུང་རུ་ཐུང་བྱིན་ལོང་གཏར། །གསེར་གྱི་མེ་ཏོག་བདུན་ནམ་ཏིག་ཏའི་ཐང༌། །བཞིན་
ལུད་རྨ་ཁ་སེར་བ་སེལ་བར་བྱེད། །མཁྲིས་རྩ་སྐྱ་རིངས་ལ་ཕོག་གླང་ཐབས་ན། །བྱིན་པའི་
ནང་ངོས་ཉྭ་མཚམས་རྩ་གཞུག་བསྲེག །གསེར་གྱི་ཀ་བ་དཔུང་འཛུམ་མགོ་སྔོན་བསྲེག །མགོ་
ན་ལུག་གཞུག་ཕྱི་ལྡེབས་རྩ་གཞུག་བསྲེག །མཁལ་རྩ་སྦང་སྐམ་འབའ་ཆའི་ལུམས་སུ་གཞུག །
25-1-458

 
དེས་མ་ཐུབ་ན་སྤོད་ནན་དྲོད་ལུམས་བྱ། །ཁོང་དུ་གསར་འཇམ་ལུག་ཤ་གསར་པ་བཏང༌། །
རྐང་བཤལ་བརླ་ཡི་ཕྱི་སུལ་རྐང་འདེགས་བསྲེག །དཔྱི་མིག་གཟེར་ན་ཚིགས་པ་བཅུ་བཞི་
བསྲེག །རྣ་བ་འོན་ན་མཁལ་མའི་རྩ་ནག་བསྲེག །དྲི་ཆུ་སྡོམ་ན་མཁལ་རྩ་རུས་ཞེན་བསྲེག །
ཁྲག་ཤོར་མཁལ་ཁུང་ཟུག་ན་དཔྱི་མིག་བསྲེག །འགུལ་དཀའ་ཟུག་ཆེ་ཚིགས་པ་བཅུ་བཞི་
བསྲེག །རྣག་མ་ཆོད་ན་ཆུ་རྩ་སྦུ་གུ་བསྲེག །མཆེར་རྩ་གླུམ་དང་གླད་པ་མཁན་པས་གདུལ། །
གོང་འོག་མེས་སྲུང་མཆེར་རྩ་རུ་ཐུང་གཏར། །མ་ཐུབ་ས་སྨྱག་གྲོག་ཞིང་ཆུ་རྩ་སྤྲུ། །སོ་ཐོག་
བག་ཕྱེ་གར་པོ་ཞོ་སྦྱར་བྱུག །ཕོ་བ་གཟེར་ན་ཚིགས་པ་བཅུ་པ་བསྲེག །གཉིད་མེད་འོ་དོད་
འབོད་ན་རུ་ཐུང་གཏར། །ཕོ་ལོང་སྦོས་ན་མ་ནུ་བཞི་ཐང་བཏང༌། །བརླ་ནང་རྩ་ཆེན་རྩ་ཁ་ཡར་
མར་བསྲེག །ཧོང་ལེན་བྲག་སྤོས་དོམ་མཁྲིས་སྒོ་ང་དང༌། །བག་ཕྱེ་སྦྱར་བྱུགས་ཕྱིང་པ་ཤིང་
བྱང་བཏང༌། །རྨ་ལ་བསིལ་འཇིབས་ལོང་འཁྲོག་དྲོད་སྨན་སྦྱར། །གླང་ཐབས་བྱུང་ན་ངར་
གདོང་མཆེར་རྩ་གཏར། །ཚིགས་པ་དྲུག་བསྲེག་མཇིང་རེངས་སྤྱི་གཙུག་བསྲེག །སྦོས་ན་ནི་རུ་
ཆུ་འགགས་སྣེ་སའི་རྩར། །དྲི་མ་འགགས་ན་དཔྱི་མིག་བསྲེག་པར་བྱ། །མཆིན་རྩ་སྨད་གསུམ་
སྐམ་ཆས་བསིལ་སྦྱོར་བྱ། །ཁྲག་ཤོར་སྒབ་རྩ་བསྲེག་ཅིང་མཁྲིས་ཐང་བཏང༌། །རུ་ཐུང་སྣོད་
ཀ་ལ་སོགས་སྤྱི་བཞིན་བཅོས། །ཚིགས་ལ་མདེའུ་ལུས་ཞག་འགའ་ལོན་ནས་དབྱུང༌། །རྙི་བ་
རིང་ན་སྐམ་པས་བསྲོ་བར་བྱ། །ཚིགས་ཆུ་ཁྲག་དང་འདྲེས་ན་གསོ་བ་བླ། །རྨ་ནང་དོམ་མཁྲིས་
ཚེར་སྔོན་ཨ་བྱག་དང༌། །ཅུ་གང་གུར་གུམ་ཤེལ་ཏ་ཧོང་ལེན་གཞུག །དེ་ཡིས་ཆུ་སེར་འདྲེན་
ཞིང་ཚིགས་ཆུ་སྡོམ། །སྒོ་ང་བག་ཕྱེ་གར་པོ་ཞོ་སྦྱར་བྱུག །མ་ཐུབ་བཙོད་ཞུན་བག་ཕྱེ་ཚོས་སྦྱར་
བྱུག །ཚ་བ་ཆེ་ན་ཞོ་བཙགས་ཁོ་ན་ཤིས། །ཀྱི་ལྕེ་ཧོང་ལེན་བྲག་ཞུན་ཞོ་སྦྱར་བྱུག །ཁོང་དུ་
བསིལ་བའི་སྨན་གཏང་གང་རྒྱས་གཏར། །ཞག་གསུམ་ཚུན་ཆད་ཆུ་མངས་བསྒྲེང་བར་བྱ། །
མ་ཐུབ་སྦང་གར་མཚེ་ཁུ་བག་ཕྱེ་ཞོ། །བྱ་མཚལ་ཟེ་ཁྲག་ཕག་པའི་སྣ་ཁྲག་དང༌། །ར་རོག་
25-1-459


གཉའ་ཁྲག་བོང་བུའི་གཞུག་ཁྲག་རྣམས། །བྱུགས་སྟེང་ཆིངས་ནན་ཕལ་ཆེར་སྐམ་སྦྱོར་བྱེད། །
ལྷ་བ་ཅན་གྱི་རུས་ལ་རྨ་བྱུང་ན། །རྨ་སྨན་གོང་བཞིན་རྨ་ཆས་རུས་(ལུག་གི་རྐང་མགོ་ཞོ་སྦྱར་)
འཇིབས་བྱ། །ལྷ་བ་བྱེར་ན་མགོ་བོ་བཞིན་དུ་བཅོས། །པྲན་རྩེའི་རུས་པ་འཇིབས་ཞུན་འབྱར་
འདུལ་གསུམ། །སྦང་རོ་ཞོ་དང་ནད་མ་ཕྱི་ཡི་འཇིབས༌། །ཚིལ་བུ་མར་དཀར་རྩིད་པ་དྲེག་གི་
འཇིབས། །བར་དུ་སྐྲངས་ན་སོ་ཐོག་ས་སྨྱག་དང༌། །གོ་སྙོད་ད་ལིས་བག་ཕྱེ་ཞོ་ཡི་ཞུན། །ཟུག་
ཆེ་ནས་ཚིག་རི་བོང་རིལ་ཐལ་དང༌། །ཏིག་ཏ་འབྲུ་མར་ཞུན་གྱིས་ཕྱི་རྒྱབ་གདུལ། །རྟ་སྦངས་
ཞོ་དང་སྦྱར་བ་དྲེག་གི་ཞུན། །ཡང་ན་ཐ་རམས་ནད་མ་གཡུ་ལོས་བྱ། །ཐ་མར་རྣག་གི་དུས་སུ་
འབྱར་འདུལ་བྱ། །ས་སྨྱག་ཞོ་དང་བག་ཕྱེ་སྦྱར་བའམ། །ཡང་ན་ཆུ་རྩ་ཞོ་དང་བག་ཕྱེ་བྱུག །
དྲེག་ལ་རྟ་སྦངས་ཁུ་བ་བག་ཕྱེ་དང༌། །འབྲུ་མར་འབྲི་མོག་བྱུགས་སྟེང་ཕྱིང་པ་བཏང༌། །དྲེག་
བཞི་ཚིལ་གནད་པྲན་རྩེ་རུས་པའི་གནད། །ཚིལ་དང་རུས་པའི་གནད་དུ་འདྲེས་པར་བཅོས། །
ཆུ་རྒྱུས་གནད་རྣམས་རླན་དྲོད་འཐེམས་ཀྱིས་བཅོས། །ཆུ་ཆེན་ཆོད་ན་རྟ་རྐྱང་རྒྱུས་པས་
བཙེམ། །རྨ་ལ་རྒྱུས་(རྡོ་རྒྱུས། འཐིང་རྒྱུས། བ་རྒྱུས་)གསུམ་རྟ་བོང་མཁྲིས་སྦྱར་གདབ། །རྡོ་རྒྱུས་ཤུ་
དག་བྲག་སྤོས་ཨ་རུ་ར། །གླ་སྒང་བསྐོལ་ཞོ་སྤྱིན་ཆུ་བག་ཕྱེ་བྱུག །ཡང་ན་གླ་སྒང་ཐལ་བ་
རྒྱུས་པ་(རྡོ་རྒྱུས། འཐིང་རྒྱུས་)གཉིས། །དོམ་མཁྲིས་བག་ཕྱེ་སྦང་གར་ཆང་སྐྱུར་སྦྱར། །རྒྱུས་པའི་ཤ་
བརྡུངས་བསྲེས་ཏེ་བྱུག་པར་བྱ། །རྨ་ཡི་གོང་འོག་ཕྱིང་པ་བརྩེགས་ལ་སྦྱར། །དེ་སྟེང་སྤ་སྲབ་
བཏང་ལ་གསོན་ཆིངས་དང༌། །དེ་ཡི་སྟེང་དུ་ཤིང་ཆས་བསྐུར་བར་བྱ། །ཁོང་དུ་ར་ཡི་གླད་པ་
བཙོས་ལ་བཏང༌། །ཚ་སྐྱེས་ཕག་མཁྲིས་གི་ཝཾ་ཀ་ར་སྦྱར། །རྨ་ཁར་སྐམ་ཆས་རླན་དང་ལྡན་(རེ་
བལ་སྣུམ་ལ་བཙོས་པ་)པ་སྟེ། །ཆུ་ཕྲན་ཆོད་ན་ཧེལ་གེ་སྣུམ་མེད་ནི། །སྤྱིན་གྱིས་ཟམ་བུར་སྦྱར་ཏེ་སྐྱོ་
མ་བྱུག །ཕྱིང་པ་སྦྱར་ཞིང་གོང་འོག་ཨ་སས་བདུག །རྨ་ལ་རྒྱུས་པ་གསུམ་དང་དོམ་མཁྲིས་
གདབ། །ཆུ་བ་ཁྲོས་ན་བུལ་ཏོག་ཚྭ་ཕྱེ་བཞུ། །འབྲུ་སྣ་ཆུ་རྒྱུས་ཚོགས་ཚད་ཞུན་གྱིས་གདུལ།  །
25-1-460

 
ཆུ་རྒྱུས་རུལ་ཏེ་རྒྱུས་པ་བལྡད་པ་འདྲ། །ག་བུར་དོམ་མཁྲིས་བྲག་སྤོས་ཨ་རུ་ར། །རྡོ་རྒྱུས་ཅུ་
གང་ཀ་ར་སྦྱར་ལ་གདབ། །རྒྱུས་པ་ལྔ་(རྟ་ཕག་ལུག་གསུམ་གྱི་ཆུ་རྒྱུས་མཐིང་རྒྱུས་རྡོ་རྒྱུས་དང་)དང་ཞོ་སྦྱར་
བག་ཕྱེ་དང༌། །ཅུ་གང་ཐལ་གྱིས་བྲན་ལ་སྐམ་ནན་བྱ། །མན་ངག་སྐབས་དང་སྦྱར་ལ་བཅོས་
པ་ནི། །ཟུག་རྔུ་དབྱུང་དང་ཁྲག་ཤོར་བཅད་པ་དང༌། །ཚ་བ་བསད་དང་ཆུ་གཏུང་སྐྲངས་པ་
གཞོམ། །རྣག་བཅད་ཟུག་པ་དབྱུང་དང་བྱུང་ཤོར་གཞུག །ཆག་པ་བཅིང་དང་སྤྱི་དོན་དགུ་
ཡིས་བསྟན། །མདེའུ་ཡོད་བརྟག་ཐབས་བཙལ་ཐབས་འདོན་ཐབས་གསུམ། །བརྟག་པ་
མདའ་ཆས་གཡའ་ཡོད་ཁྲག་འཛེལ་མེད། །རྨ་དབྱིབས་ཟུར་བཞི་ཁ་མ་ཉམས་པ་ལ། །མནན་
ན་མི་བཟོད་སྐད་ངན་འཆོར་བའམ། །ཚེར་མ་ཟུག་པ་མནན་འདྲ་དཀར་གྱི་འོང༌། །ཡང་ན་
གཏིང་དུ་ལྷང་གི་སྦྲིད་པ་དང་། །རྨ་རྙིང་དུས་སུ་ཆུ་དམར་མི་ལྡོག་ཅིང༌། །ལྕགས་གཡའ་ཆགས་
དང་རྩ་ལ་ལྕམ་དྲལ་འོང༌། །སྐད་ཕྲ་བྱུག་པ་སྐམས་སྐྱེན་བ་སྤུ་ལྡོག །ཤ་མདོག་དམར་སྔོ་ཡང་
ན་ནག་པ་ཡིན། །མུ་ཟི་ལྡོང་རོས་ཡུང་བ་ནུ་ཞོ་སྦྱར། །བྱུགས་པས་དངོས་སུ་མདོག་འགྱུར་བ་
སྤུ་ལྡང༌། །རྨ་ཁ་ཕྱིར་ལོག་ཟུག་ཆེ་སྐྲངས་པ་དང་། །རྣག་མདོག་སྔོ་དམར་ཁུ་རྩིགས་ཅན་དུ་
འབྱུང༌། །ཨ་རུ་ཆུ་རྩའི་རེང་བུ་རྨ་རུ་བསྐྱལ། །ནང་པར་ཉ་སྐྱོགས་འཁར་བའི་ནང་དུ་བཞོ། །
གཡའ་ཆགས་དྭངས་སྙིགས་བྱེ་ན་ཡོད་པ་ཡིན། །བཙལ་བའི་ཐབས་ལ་རྨ་གསར་ཕོག་
ལུགས་བསྡད། །རྨ་ཡི་དབྱིབས་དང་ཆ་བྱད་བསྟུན་ཏེ་བཙལ། །རྨ་མེད་སྲ་འདྲིལ་ཀར་གྱི་འོང་
བའི་ས། །ཐུར་མ་གཏང་ལ་ལག་ཉམས་བླངས་བར་བྱ། །ཆུ་ཏྲེབ་རུས་ཏྲེབ་མདེ་ཏྲེབ་རྣམ་པ་
གསུམ། །ཤིང་སྐད་རུས་སྐད་མདེ་སྐད་སོ་སོར་བརྟག །རྙེད་དཀའ་ཁབ་ལེན་མདེ་འབྱིན་དུར་
བྱིད་དང༌། །རྒྱ་རུ་དོམ་མཁྲིས་སྦྲང་གི་རིལ་བུ་ཡིས། །རྨ་བྱུགས་གང་ན་ཡོད་པར་ན་ཟུག་ལྡང༌། །
འདོན་ཐབས་ཕོག་པའི་ཉིན་པར་གདོན་པར་བྱ། །མ་ཐོན་ཕྱེ་དུས་མི་ཀྲོག་སྐྲངས་པ་འཆོར། །
རྣག་ཏུ་ཁུགས་པའི་དུས་སུ་དབྱུང་བར་བྱ། །དེ་ཡང་སྨན་དང་དཔྱད་ཀྱིས་དབྱུང་བ་གཉིས།  །
25-1-461

 
སྨན་ནི་ཁབ་ལེན་བེ་སྣབས་མཉྫི་ར། །བ་བླ་སྦྲང་སྨྱོན་ཤར་བལྟས་བྱི་ཁུང་ས། །སྦྲུལ་ཚིལ་
སྦྱར་བའི་ལྡེ་གུ་ཕྱི་ནས་བྱུག །ཁོང་དུ་བྱ་རོག་བྱ་མ་བྱི་ཡི་ཤ། །བྱ་རྒོད་ཁབ་ལེན་ར་མཉེ་བྱི་
བའི་བྲུན། །ཆང་སྦྱར་བཏང་བས་རྨ་རུ་འབྱིན་པར་བྱེད། །ཡང་ན་སྦྲུལ་ཤ་ཁབ་ལེན་མདེ་
འབྱིན་དང༌། །ལྕེ་ཚྭ་སྲུབ་ཀ་དུར་བྱིད་ཙན་དན་དམར། །དམིགས་སུ་བྱུགས་ཏེ་རྔབས་རས་
དྲངས་པས་འདྲོངས། །ཅིས་ཀྱང་མ་ཐོན་སྨན་གྱིས་བཞུ་བར་བྱ་(མིའི་མཇུག་ཏོ་ཁབ་ལེན་སྦྲུལ་ཤ་ཆུ་རྩ་
ལྕུམ་རྩ་ཤོ་རྩ་གོ་བོའི་གྲེ་བ་རྩི་སྟག་མོ་ལྕམ་པ་ཨ་རུ་སྦྱར་བ་རྨ་ལ་གདབ་ཁོང་དུ་བཏང་བས་དངོས་མེད་དུ་འགྲོ)། །དཔྱད་
ཀྱིས་དབྱུང་བ་ཐུར་བརྟགས་གཙགས་སྐྱོན་དྲལ། །མངོན་དང་མི་མངོན་དམ་དང་ལྷོད་པ་དང་། །
མི་འགྱུར་སུལ་འཕྱོས་རིང་ཐུང་བར་མ་དང་། །སྦང་རྒལ་རྙི་བ་ཆད་དང་རུས་པ་འཐམས། །
སེང་གེ་ཁ་དང་སྐམ་ཆུང་ཀང་ཀ་མཆུ། །འཕྲུལ་སྐམ་མདེ་ཞབས་འཇབ་རྩེ་མདེ་གསོར་
སོགས། །གང་ལ་གང་དགོས་རིག་པས་དཔྱད་དེ་དབྱུང༌། །རྩ་ཡི་ཁྲག་ཤོར་ཆོད་དང་རུལ་བ་
གཉིས། །རྦད་ཆོད་ཤོར་ན་རྩ་ལ་ཁད་པུ་གཞུག །བྱང་ཐེམ་བྱ་དང་ཨུར་ལ་མནན་པ་དང་། །
འོལ་ཁ་བསྒྱུར་དང་ཁོང་དུ་སྦ་བའོ། །དང་པོ་རྒྱ་སྐྱེགས་མཁན་པ་སྐྱེར་པ་མཚེའི། །ཁཎྜ་
མཁྲིས་པ་གསུམ་དང་སྤྲུ་མའི་འབྲུ། །སྒོང་ཐོག་སྦྱར་བའི་འདག་པ་རྨ་ལ་བརྫང༌། །ཡང་ན་སྤྲུ་
རྩའི་རེང་བུ་ཉ་དོམ་མཁྲིས། །གུར་གུམ་སྤྲུ་འབྲུའི་ལྡེ་གུ་བྱུགས་ལ་བརྫང༌། །ཡང་ན་ཁྲག་རྐང་
ཟོར་པ་དར་ཡ་ཀན། །དོམ་མཁྲིས་སྦྱར་བ་རྨ་ནང་བརྫང་བར་བྱ། །ཡང་ན་འགྲོན་ཐལ་སྨྱུག་
ཤུན་ཐལ་བ་དང༌། །ད་ལིས་མངལ་ཁྲག་མཁྲིས་པ་གསུམ་དང་ཚོས། །ཤིང་ཚ་བུ་རམ་སྦྱར་ལ་
རྨ་ནང་བཏང༌། །དར་བཀབ་སྟེང་དུ་བསིལ་བའི་འཇིབས་སུ་གཞུག །གཉིས་པ་རྨ་ནས་སོར་
དྲུག་གོང་འོག་ཏུ། །རྡེའུ་མནན་ལ་རས་ཀྱིས་དམ་དུ་བཅིང༌། །དེ་སྟེང་ཕྱིང་པ་དམ་སྦྱར་ཤིང་
བྱང་བཏང་། །དེ་སྟེང་ཤིང་བྱང་རྩ་ཡི་གཡས་གཡོན་བཏང༌། །རས་ཀྱིས་བསྡམས་ལ་རྨ་ཁོལ་
གཏོད་དེ་གསོ། །གསུམ་པ་ཡ་ཐོག་མ་ཐོག་མེ་ཡིས་མནན། །བཞི་པ་རྩ་རྒྱུད་གོང་འོག་གཏར་
25-1-462


བར་བྱ། །ཁོང་དུ་སྦ་བ་གོང་གི་ཁཎྜ་ལ། །གུར་གུམ་ལི་ཤི་མཁྲིས་པ་གསུམ་སྦྱར་བཏང༌། །ཡང་
ན་འབྲི་མོག་ཞུ་མཁན་མཁན་པ་ཚོས། །བསྡུས་ཁུར་དོམ་མཁྲིས་གུར་གུམ་ཤིང་ཚ་དང༌། །ག་
བུར་སྦྱར་བ་བཏང་བས་ཁོང་དུ་སྦེད། །རྩ་ཡི་རྨ་ཁ་རུལ་ནས་ཁྲག་ཤོར་ན། །དོམ་མཁྲིས་ཅུ་
གང་ནུ་ཞོས་བཀྲུ་བར་བྱ། །ག་བུར་དོམ་མཁྲིས་ཅུ་གང་ཀ་ར་གདབ། །ལྕགས་ཀྱི་ལྗང་པས་རྨ་
ཁ་དྲག་ཏུ་མནན། །ཁོང་དུ་ཚ་བའི་འབྲོས་འདེད་གཅེས་པ་ཡིན། །རྩ་ནད་ཁོང་ནས་མ་བཅོས་
ཐེམ་བྱས་ཀྱང༌། །ཁྲག་སྦ་བྱུང་ན་གསོ་དཀའ་དོན་མེད་འགྱུར། །ཡན་ལག་རྨ་ཚད་རྒྱུ་རྐྱེན་དབྱེ་
བ་དང༌། །རྟགས་དང་བཅོས་ཐབས་རྣམ་པ་བཞི་ཡིས་བསྟན། །ཚ་བའི་རྒྱུ་ནི་ཁྲག་དང་མཁྲིས་
པ་སྟེ། །དེ་ཡང་རྩ་དང་རུས་ལ་སྐྱེ་བ་ཡིན། །ཚ་བའི་དབྱེ་བ་སྤྱི་དང་བྱེ་བྲག་གཉིས། །སྤྱི་ལ་ཚ་
བ་ཤོར་དང་འཁྱིལ་བ་གཉིས། །རྐྱང་པ་ལྡན་འདུས་འཐབ་པར་སྐྱེ་བ་ལྔ། །བྱེ་བྲག་ཁྲག་དང་
ཆུ་སེར་རྣག་ཚད་གསུམ། །རྩ་ཚད་རུས་ཚད་ཟུག་རྔུའི་ཚ་བ་དྲུག །དེ་རྟགས་ཚ་བ་སྟོད་དུ་ཤོར་
བ་ནི། །གྲང་ཤུམ་བྱེད་ཅིང་མགོ་དང་ཚིགས་གཞི་ན། །དང་ག་མི་བདེ་དབུགས་ཐེག་གློ་སྙིང་
འདར། །གཉིད་ཆེ་ལུས་ལྕི་ཁ་ཁ་མིག་སྤྲིན་སེར། །ལྕེ་རྩ་སྔོ་ཞིང་སྐམ་ལ་སོ་དྲེག་ཆགས། །རྩ་
གྲིམས་ཆུ་དམར་རྨ་ཁ་དྲོད་ཆེ་སེར། །ཆུ་སེར་ཚ་བ་རྩ་སྦུབས་འཁྱིལ་བ་ནི། །རྩ་འཕྲིག་ཆུ་སེར་
གཞོགས་ལ་ཡང་ལྕི་འབྱུང༌། །ཕྲག་གོང་མི་བདེ་བཤུལ་ཤ་ན་བ་ཡིན། །སྐྲངས་དང་རྨ་ཚད་
སྐྱེས་པ་རྐྱང་པ་སྟེ། །དེ་ལ་རྩ་ཆུ་ཚ་ན་ལྡན་ཚད་ཡིན། །ཕྱི་ཡུལ་ན་ལུགས་ཚ་ན་འདུས་ཚད་དོ། །
འཐབ་ཚད་རྩ་ཆུ་ཚ་ལ་རྨ་ཚད་སྐྱེ། །ཡང་ན་རྨ་གྲང་རྩ་ཆུ་ཚ་བའོ། །བྱེ་བྲག་ཁྲག་ཚད་མིག་ཆུ་
སྐྲངས་པ་དམར། །བསིལ་ལ་མི་དགའ་སྙིང་ལ་དྲོན་མོ་འདོད། །ནུབ་མོ་གཉིད་ཆུང་ཟ་ཟི་མང་
བ་ཡིན། །ཆུ་སེར་ཚ་བ་ལྡང་དུབ་འདྲེ་ལྟར་ན། །མིག་སྤྲིན་ཆུ་དང་སྐྲངས་སེར་ཚ་ཞིང་འཁྱུག །
རྣག་ཚད་རྩ་ནི་འདར་རམ་སྤུན་པ་ལ། །དང་ག་མི་བདེ་གཉིད་ཆུང་ལྡང་དུབ་ན། །བླ་རྡོལ་
བྱེད་ཅིང་སྐྲངས་པ་མནན་མི་བཟོད། །རྩ་ཚད་གསུམ་དང་ལྔ་ལ་དྲག་པོར་སྐྱེ། །རུས་ཚད་
25-1-463


བདུན་དང་དགུ་ལ་རྐུན་བུར་སྐྱེ། །ཟུག་རྔུའི་ཚ་བ་དྲག་ཤུལ་རྗེས་ལ་སྐྱེ། །ཀར་གྱིས་ཟུག་ལྡང་
རྨ་ལ་ཁྲག་བཙན་འབྱུང༌། །ཟས་སྤྱོད་དལ་ཞིང་སྙོམས་དུས་བདེ་བ་ཡིན། །བཅོས་པའི་ཐབས་
ལ་སྤྱི་དང་བྱེ་བྲག་གཉིས། །སྤྱི་ལ་བཅོས་པའི་ཐབས་དང་བསད་ཐབས་གཉིས། །བཅོས་ཚུལ་
རྒྱལ་བློན་དམངས་དང་བཅས་པ་སྟེ། །རྩ་ཚིགས་གནད་ལ་རྒྱལ་པོ་ལྟ་བུར་བཅོས། །རྨ་ཆས་
བསིལ་ལ་གོང་འོག་དྲོད་སྦྱོར་བསྟེན། །ཁོང་ཚད་བསིལ་བཅག་ནད་ལ་རྣག་མི་འཇུག །ཚ་བ་
དྲོད་སྦྱོར་བསྟེན་པར་འདུ་བ་ཡིན། །ཉེན་མེད་འཚོ་སྐྱེན་རྒྱལ་པོའི་བཅོས་ཚུལ་ལོ། །ཉྭ་རྨེན་
གནད་ལ་བློན་པོ་ལྟ་བུར་བཅོས། །འཕྲང་བསྡམ་རྨ་ནས་དབབ་ཅིང་ཁོང་ནས་བསལ། །རྣག་
ཤོར་སྦྱོང་ཡང་སྲོག་མི་འདོར་བ་ཡིན། །རྨ་ནས་དཀྲོག་ཅིང་ཁོང་ནས་བསད་པ་ནི། །འཚོ་སྐྱེན་
འཆི་སྐྱེན་དམངས་ལྟར་བཅོས་ཚུལ་ལོ། །ཚ་བ་བསད་ཐབས་ཡར་འདྲེན་མར་འདྲེན་གཉིས༌། 
ཚད་སྟོབས་ཆུང་ན་མར་འདྲེན་འཇམ་པོས་བསད། །ཙན་དན་གི་ཝཾ་བསིལ་གསུམ་བ་ལེ་ཀ། 
ཧོང་ལེན་ཏིག་ཏ་ཨུཏྤལ་བ་ཤ་ཀ །ཀ་ར་སྦྱར་བཏང་རྩ་ཕྲན་མས་འཛེག་གཏར། །སྟོད་ཤོར་
སྟོབས་ཆེ་ཡར་འདྲེན་ཐོག་བབས་བསད། །ག་བུར་རྒྱལ་བློན་བདུན་པ་དགུ་པ་སྦྱར། །རྩ་ཆེན་
གང་རྒྱས་ཡས་བབས་ཁྲག་ཤེད་སྨད། །ཚ་བ་འཁྱིལ་ན་བསིལ་གསུམ་བ་ལེ་ཀ །གི་ཝཾ་དོམ་
མཁྲིས་སེང་ལྡེང་བ་ཤ་ཀ །སོ་མ་ར་ཛ་ཀ་ར་སྦྱར་ལ་བཏང༌། །གཟེར་བའི་ཕྱོགས་དང་རྩ་
དམིགས་གང་རྒྱས་གཏར། །རྐྱང་པའི་ཚ་བ་རྨ་ལ་བསིལ་ཞུན་བྱ། །ཁོང་དུ་ཆུ་འཐུང་སྨན་ལ་རྟ་
བྱས་ལ། །ཏིག་ཏ་སྤང་རྩི་ཨུཏྤལ་བ་ལེ་ཀ །ཀ་ར་སྦྱར་བ་ནམ་བཅག་མ་ལ་བཏང༌། །ལྡན་པའི་
ཚ་བ་རྨ་ལ་བསིལ་ནན་བྱ། །ཙན་དན་བསིལ་གསུམ་གི་ཝཾ་ལི་ག་དུར། །ཨུཏྤལ་ཀ་ར་སྦྱར་བ་
ཁོང་དུ་བཏང༌། །རྐང་ལ་ལོང་རྩ་ལག་པ་ཨ་སོ་གཏར། །འདུས་ཚད་ག་བུར་ཤིང་མངར་བ་ཤ་
ཀ །བ་ལེ་ཀ་རྣམས་གོང་ལ་བསྣན་ལ་བཏང༌། །རྩེ་ཆུང་སྣོད་ཀ་དྲུག་འགོ་ལ་སོགས་གཏར། །
འཐབ་པའི་ཚ་བ་རྨ་ཁོང་བསྣོལ་ལ་(གང་ཚ་བའི་སྟེང་དུ་བསིལ་གྱིས་བསད་ཅིང༌། །གྲང་བའི་སྟེང་དུ་དྲོད་སྦྱར་ལ་)
25-1-464


བསད། །ཁྱད་པར་ཁྲག་ཚད་དམར་ཆས་(ཧོང་ལེན་ཀྱི་ལྕེ་བ་ཤ་ཀ་བཙོད་)ཐང་བཏང་(ལ་རྩ་བོ་ཆེ)་གཏར། །
ཆུ་སེར་ཚ་བ་སེར་ཆས་(འབྲས་གསུམ་ཀྱི་ལྕེ་ཧོང་ལེན་སྟབ་སེང་བྲག་ཞུན་)ཐང་བཏང་(ལ་ཐུར་མ་ཅུས་ཙེས་)
བསུ། །རྣག་གི་ཚ་བ་ཕུག་ལ་འབྱར་སྐེམས་བྱ། །རྩ་ཚད་(སྐྱུ་རུ་ར་ཧོང་ལེན་བ་ཤ་ཀ་རེ་སྐོན་ཤིང་མངར་ཚོས་)
ཐང་གཏར་མེ་དང་བསིལ་གྱིས་བཅག །རུས་ཚད་(ལ་ཡར་འདྲེན་གྱི་)བསིལ་ཆས་ཆུ་དང་(མས་འདྲེན་
གྱི་)སྨན་གྱིས་བཅག །ཟུག་རྔུའི་ཚ་བ་(ལ་ཏིག་ཏ་བ་ཤ་ཀ་ཧོང་ལེན་གྱི་ཐང་)སྨན་གཏར་ཟས་ཀྱིས་བཅག །
ཁྲག་དུས་ཚ་བ་སྟོད་ཤོར་ཡེན་ལ་གཏད། །ཆུ་སེར་དུས་སུ་བསིལ་ལ་(ར་སྐོམ་རི་དྭགས་ཤ་གསར་
དམར་གསར་དང་)བཅུད་པ་བསྟེན། །རྣག་གི་དུས་སུ་རྒྱལ་པོ་ལྟ་བུར་(ལུག་དང་སྐོམ་ཤ་གསར་པ་མར་སྦྲང་
ཏིང་ཁྲོལ་གསར་འཇམ་གྱིས་)གསོ། །རྨ་རྒན་ཚ་བ་མི་ཆག་སྲ་ཞིང་ཧྲེམ། །རྩ་ལྟོ་སྦྲགས་ཏེ་ག་བུར་ཉེར་
ལྔ་སྦྱར། །གང་ཉེ་གཏར་ཞིང་རྨ་ལ་དྲོ་བ་བདུག །ཚ་བ་ཀུན་གྱི་རྒྱུ་ནི་ཆུ་སེར་ཁྲག །དེ་ཕྱིར་
གསོ་དཔྱད་གཙོ་བོ་གཏར་བ་མཆོག །ཆུ་འཐུང་སྐོམ་ལྟར་བཏུང་དང་སྨན་ལྟར་བཏུང༌། །སྐོམ་
ལྟར་བཏུང་བ་རྩ་སྒོ་དགག་པ་སྟེ། །ཧོང་ལེན་མྱང་རྩི་སྤྲས་དང་ཡུ་གུ་ཤིང༌། །ལྕམ་འབྲུ་ཆུར་
སྦངས་སྐོམ་དུ་བཏུང་བར་བྱ། །ཡང་ན་ཚོས་བཙོད་ཡུང་སྐྱེར་སྤྱི་ཞུར་དང༌། །སྤང་རྩི་ཙན་དན་
ཐོད་ལེ་ཀར་རྣམས་བཏུང༌། །སྨན་ལྟར་བཏུང་བ་ཁྲག་དུས་ཆུ་སེར་རྣག །ཁྲག་དུས་ཨ་བོ་ཧོང་
ལེན་ཨ་བྱག་དང་། །ཚེར་སྔོན་ཆུ་བཏུང་ཡང་ན་ཙན་དན་དཀར། །སེ་རྒོད་སྟབ་སེང་རེ་རལ་
ཆུར་སྦངས་བཏུང༌། །ཆུ་སེར་དུས་སུ་སྟབ་སེང་ཡུ་གུ་ཤིང༌། །ཤེལ་ཏ་ཨ་བྱག་ཕོ་རོག་ནོར་བུ་
དང་། །བུ་རམ་སྦྱར་བ་ཚོས་ཁུས་འཕུལ་ལ་བཏང༌། །ཁྱད་པར་གི་ཝཾ་བཟང་དྲུག་མཁྲིས་སྣ་
ཚོགས། །རིལ་བུས་རྩ་ཡི་ཆུ་སེར་སྐེམ་པར་བྱེད། །སྒོང་ཐོག་གླང་སྣ་ཐ་རམས་བྱ་རྐང་དང༌། །
བུ་རམ་རིལ་བུས་ཤ་ཡི་ཆུ་སེར་སྐེམ། །སྟབ་སེང་ཚེར་སྔོན་ཁྲག་རྐང་ཨ་བྱག་དང༌། །རེ་རལ་
རིལ་བུས་རུས་པའི་ཆུ་སེར་སྐེམ། །དེ་བ་སུམ་ཅུ་ཏིག་དང་ཁུར་རྩ་ཡི། །ཐང་གིས་ཆུ་རྒྱུས་ཆུ་
སེར་སྐེམ་པར་བྱེད། །ཤ་བ་ཁ་ཤ་བསེ་རུ་བུ་རམ་གྱི། །རིལ་བུས་ཚིགས་དང་པགས་པའི་ཆུ་
25-1-465


སེར་སྐེམ། །ཁམ་བུའི་ཐལ་བ་ཐ་རམས་བྲག་སྤོས་པ། །ཀ་རའི་རིལ་བུས་ཆུ་སེར་སྐེམ་པར་
བྱེད། །ཐོད་ལེ་ཀར་དང་ཕ་ཝཾ་ལོང་བུ་དང་། །དར་ཡ་ཀན་གྱི་བུ་རམ་རིལ་བུ་ཡིས། །ཆུ་སེར་
དུས་ཀྱི་སྐྲངས་པ་འཇོམས་པར་བྱེད། །རྣག་དུས་བསེ་རུ་བྲག་སྤོས་ཅོང་ཞི་དང་། །མུ་ཟི་ཞོ་དང་
སྦྱར་བ་ཟངས་ལ་བསྒོས། །དེ་བཞུར་ཕྱེ་མས་རྣག་གི་རྒྱ་མཚོ་སྐེམ། །མ་ནུ་མུ་ཟི་རྟ་པགས་རེ་
སྐོན་པ། །ཁོང་བཏང་ལྡེ་གུ་བྱུགས་ན་སྐྲངས་པ་འཇོམས། །ཕ་ཝཾ་ལོང་བུ་སེར་ཤ་ལྕགས་ཕྱེ་
དང༌། །སྒོ་ང་ཚོས་བྱུགས་ཁོང་བཏང་སྐྲངས་པ་འཇོམས། །བཟང་དྲུག་ཡུ་གུ་ཤིང་གིས་སྟོད་
ཚད་སྲུང༌། །པི་པི་ལིང་དང་ཨ་བོ་འོམ་བུ་ཡིས། །སྣོད་དུ་ཚད་པ་མི་འཆོར་འཁྲུ་མི་སྲིད། །ཆུ་ཡི་
ཡོན་ཏན་ཚ་བ་གཅོག་པ་དང༌། །དང་ག་བདེ་ཞིང་ལུས་ཤེད་སྐྱེ་བར་བྱེད། །གདོན་དང་བཀྲག་
ཤོར་ཕོ་བ་འབྱང་ན་སྤང༌། །ལྔ་པ་སྐྲངས་པ་གཞོམ་པའི་མན་ངག་ལ། །གདོན་དང་འདུ་བ་
གནས་ཀྱི་སྐྲངས་པ་གསུམ། །གདོན་སྐྲངས་རྨ་མདོག་ལོག་དང་གྲང་ཤུམ་བྱེད། །ཆུ་བུར་ཉྭ་
སྒང་འོང་ཞིང་སྐྲངས་མཆེད་སྐྱེན། །ཁྲག་རྣག་འཛག་ཅིང་ཤེ་རུལ་མནམ་པ་ལ། །འཛིམ་པ་
སྟག་ཤ་མུ་ཟི་ཀྱི་ལྕེ་བ། །ཤུ་དག་སྤྱང་བྲུན་རྭ་གཞོབ་དྲི་ཆུ་བྱུག །ཡང་ན་གྲོག་ཞིང་ཝ་སྤྱང་རི་
བོང་བྲུན། །ཁྱི་སྤུ་ར་སྤུ་རྭ་གཞོབ་ཁྱི་ལུད་དང༌། །སྒོག་སྐྱ་དྲི་ཆུར་སྦྱར་ལ་བྱུག་པར་བྱ། །ཡང་ན་
(སྦྲུལ་མགོ་སྡིག་པ་སྤྲུ་མ་སྦྱིན་སྲེག་གི་)ཐལ་བ་བཞི་དང་སྟག་ཤ་བ། །བ་ལྕི་ཆུ་ངན་ཞུན་སྟེང་ཁྱི་སྤུས་
མནན། །ཡང་ན་ནག་པོ་དགུ་དང་བཞི་སྦྱར་བྱ་(བྱ་རོག་དང་ཁྱི་ནག་གི་མཇུག་སྤུ་ར་རོག་གི་སྐོག་སྤུ་གླང་རོག་གི་
རྨོངས་སྤུ་བོང་ནག་གི་སྦངས་ཡུག་སའི་དོར་རྟ་ནས་ནག་བྲ་སྲན་མ་སྦང་གར་ཞོ་འབྲུ་མར་དང་ཀྱི་ལྕེ་ནག་པོ་བོང་ང་ནག་པོ་རེ་ལྕག་
ནག་པོའི་ཐལ་བ་བིག་པན་ཁུ་བར་ཞོ)། །འདུ་བས་སྐྲངས་པ་རླུང་མཁྲིས་བད་ཀན་གསུམ། །རླུང་སྐྲངས་
སྐྱ་ལ་གསོབ་ཅིང་རྣག་མི་འབྱུང༌། །འཕར་ཞིབ་བྱེད་ཅིང་ཚིགས་ཁར་སྐྲངས་པ་ཡིན༌། །དེ་ལ་
རྩ་འཕྲང་སྐྲངས་ན་མེ་བཙས་བསྲུང༌། །གོ་སྙོད་ལྕ་འབྲུ་ཀྱི་འབྲུ་ཚ་བ་གསུམ། །སྣེའུ་གཡར་ཞུ་
ཟྭ་ཡི་ཕྱི་མོ་དང༌། །ཆང་འགག་སྦང་མ་སྦྱར་ལ་འཇིབས་སུ་གཞུག །ཡང་ན་ལྕ་འབྲུ་མཁན་པ་
25-1-466


སླེ་ཏྲེས་མཚན། །ཤུ་མོ་ཟ་དང་ལྕམ་པ་ཚ་བ་གསུམ། །ཏང་ཀུན་མར་ནག་སྦང་མ་སྦྱར་བས་
མནན། །དམར་པོ་དགུ་དང་སེར་པོ་གསུམ་སྦྱོར་བསྔགས་(བྱ་མཚལ་ལུའི་ཟེ་ཁྲག་ར་སེར་སྐྱའི་སྣ་ཁྲག་ཁྱི་
རྒྱ་བོའི་སྣ་ཁྲག་བོང་བུ་གྭ་པའི་གཞུག་ཁྲག་མཛོ་གཡག་སེ་བོའི་སྦུབས་ཁྲག་རྟ་དྲུག་ཕྲོམ་གྱི་རྐན་ཁྲག་ན་ཆུང་མའི་མངལ་ཁྲག་ཚོས་
བཙོད་གར་པོ་ཞོ་རྗེན་ཕྱེ་མར་ནག་སྦྱར་བ་དང༌། སྒོ་ངའི་སེར་ཐིག་ཉ་ཚ་ཀུ་བ་ཁ་བོ། གླུམ་ཉེ་མཛོ་ཞོ་མར་ཁུ་སྦྱར)། །ཤིན་ཏུ་
སྟོང་སྦོས་ཆུ་བཙག་ཨ་སས་བདུག །འབའ་ཆ་མི་ཤ་མཁན་སྤྲུ་ཆང་བཙོས་མནན། །བད་ཀན་
སྐྲངས་པ་ཆེ་ལ་ཞི་བ་དཀའ། །དྲོད་མེད་མཁྲང་འཇམ་ཉྭ་ཡི་སྟེང་དུ་སྐྲངས༌། དེ་ལ་ཉེ་ཤིང་
ལྕུམ་རྩ་ཚ་བ་གསུམ། །གོ་སྙོད་ཚ་ཕབས་སྦང་གར་རྗེན་ཕྱེ་ཞུན། །ཡང་ན་སྲུབ་ཀ་དབྱི་མོང་ཚ་
བ་གསུམ། །མ་ནུ་ཉི་དགའ་གར་པོ་ཞུན་དུ་གཞུག །ཡང་ན་ར་དུག་རེ་ཅག་ཏང་ཀུན་དང༌། །
ཤུག་པ་མཁན་པ་བྱ་བྲའི་ལུམས་སུ་གཞུག །ཡང་ན་(རྨ་ལྷོག་སྐབས་ཀྱི་)སེར་པོ་བདུན་སྦྱོར་ཤིས་
པ་ཡིན། །མཁྲིས་སྐྲངས་དམར་རྩ་དྲོད་ཆེ་རེག་མི་བཟོད། །རྒྱ་སྐྱེགས་བཙོད་དང་ལི་གྲི་ཡུག་
རྣམ་མཚལ། །རྟ་བོང་ཁྲག་དང་སྦང་གར་ཞོ་བཙགས་མནན། །སེར་པོ་དགུ་(ཡུང་སྐྱེར་ལྕུམ་རྩ་ར་
མཉེ་བ་བླ་ལྡོང་རོས་ཉ་ཕག་མི་མཁྲིས་སྦང་མར་སྦྱར་བའི་ཞུན་ནན་)དང་(རྣ་ལྷོག་སྐབས་ཀྱི་)དམར་པོ་བདུན་སྦྱོར་བྱ། །
གནས་ཀྱིས་སྐྲངས་པ་ཉྭ་རྨེན་རྩ་ཚིགས་བཞི། །རྩ་སྐྲངས་དམར་མཁྲང་ཚ་འཁྱུག་རྩ་སྟེང་
སྐྲངས། །དམར་སྦྱོར་རྒྱས་འབྲིང་གསུམ་གྱིས་རྩ་ཤེད་བཅག །སྦང་གར་སྒོ་ང་བག་ཕྱེ་ཞོས་
གཞི་བྱས། །ལུག་ཞོ་ཙམ་པ་རྩེ་འཇམ་བསྲོས་ལ་བྱུག །རྒྱ་སྐྱེགས་བཙོད་རམས་ཡུག་རྣམ་འབྲུ་
མར་སྦྱར། །མ་ཐུབ་རྒྱ་སྐྱེགས་བཙོད་ཞུན་སེར་ཐིག་དང༌། །རྟ་བོང་ཁྲག་དང་འབྲུ་མར་སྦྱར་ལ་
བཏང༌། །དེས་ཀྱང་མ་ཆོམས་མངལ་ཁྲག་ཚོས་བཙོད་མཚལ། །སྤང་སྤོས་ག་དུར་སེར་ཐིག་
འབྲུ་མར་སྦྱར། །ཉྭ་སྐྲངས་སྐྱ་མཁྲང་དྲོད་མེད་ཕྱིག་པོར་སྐྲངས། །སྐྱ་སྦྱོར་རྒྱས་འབྲིང་གསུམ་
གྱིས་ཉྭ་ཁྲོས་འདུལ་(བ་ལ་དང་པོ་མཁན་པ་སྤྲུ་མ་སྒོ་རོང་གསུམ་དང་སྦྱར། དེས་མ་ཐུབ་སྐྱ་གསོབ་ཏུ་སྐྲངས་ན་གོ་སྙོད་
དབྱི་མོང་ཐལ་བ་ལྕམ་འབྲུམ་རེ་ལྕག་ཚ་བ་གསུམ་སྦྱར། །དེས་མ་ཐུབ་སྔོན་པོ་རྡོ་ལྟར་སྐྲངས་ན་ཚ་བ་གསུམ་མཁན་པ་སྤྲུ་མ་གླད་
25-1-467


པ་མིའི་རྐང་མགོ་བྱ་རྒོད་ཤ་ལྕ་འབྲུམ་སྦྱར་ལ་བྱུག)། །གླུམ་ཉེ་ལུག་ཞོ་སྒོ་ང་བག་ཕྱེ་སྦྱར། །རྩེ་འཇམ་བསྲོས་
པ་རྒྱ་ཆེར་ནོན་པར་བཏང༌། །ཚིགས་སྐྲངས་མདོག་ནག་དྲོད་དང་ལྷང་སྐྱོག་ཆེ། །ནག་སྦྱོར་
རབ་འབྲིང་གསུམ་གྱིས་རུས་ཚད་བཅག་(པ་ལ་དང་པོ་རྩ་བ་ལྔ་འབྲུ་མར་སྦྱར་ལ་བྱུག །དེས་མ་ཕན་ལྷང་སྐྱོག་ཆེ་
ན་ཐབ་འོག་ས་ཁང་སའི་སོ་ཐོག་འབྲུ་མར་སྦྱར། །དེས་མ་ཐུབ་རྨ་ཁ་གཞའ་སེར་ནག་ཏུ་སྐྲངས་ན་སོ་ཐོག་ལྕགས་ཕྱེ་རྒྱ་ཤོ་རི་བོང་
རིལ་མའི་ཐལ་བ་སྤང་རྒྱན་ཨ་རུ་སྦྱར་ལ་བྱུག)། །སྦང་གར་ར་ཞོ་སྒོ་ང་བག་ཕྱེ་དང་། །ནས་ཚིག་གཞི་བྱས་
ལུག་ཞོ་ཙམ་ཞིག་བྱུག །རྩ་ལ་བྲུན་གྱིས་ཁད་པུ་འཆོར་བ་སྟེ། །རུས་ལ་སྤོད་ཀྱིས་ཚད་པ་སྐྱེ་
བར་བྱེད། །ཉྭ་ལ་སྣུམ་གྱིས་ཞུན་ནན་འདྲེད་པས་སྤང༌། །མདོར་བསྡུས་སྐྲངས་ལ་ཚ་སྐྲངས་
གྲང་སྐྲངས་གཉིས། །ཚ་སྐྲངས་ཆས་སྐམ་རླངས་ཆེ་ཚ་ལ་དམར། །གང་དང་ཉེ་བའི་རྩ་ལ་མང་
དུ་གཏར། །ཐུར་མས་བཙགས་ལ་ཆུ་ལྕག་བཟོད་ཚད་བརྡེག །ཡང་ན་བུལ་ཏོག་ཆུས་བཀྲུ་
རྔབས་རྭ་གཟུགས། །འབུར་ནས་གཤགས་ལ་ཆུ་སེར་ཡང་ཡང་དབྱུང༌། །དེ་རྗེས་ཅུ་གང་ཧོང་
ལེན་ཆུ་རྩ་དང་། །ཡུང་བ་སྤང་རྒྱན་གངས་ཆུ་སྦྱར་བྱུགས་ལ། །ཀྱི་ལྕེ་བ་ཞོ་སྦང་མ་སྦྱར་ལ་
གཡོག །དེས་མ་ཐུབ་ན་སྐྱི་འབུར་(ཕུག་རོན་)སྒོ་ངའི་སེར། །གྲོ་ལོ་ཚེར་སྔོན་སྲད་མའི་མེ་ཏོག་
དང༌། །སྙི་བ་བྲག་སྤོས་སྐར་ཆུ་སྦྱར་ལ་བྱུག །དེ་སྟེང་སྦང་མ་བསྲོས་པའི་འཇིབས་ཀྱིས་དྲང༌། །
དེས་མ་ཐུབ་ན་སྐྱུར་གྱིས་དག་བཀྲུས་ལ། །བྱང་པ་མུ་ཟི་རྒྱ་ཚྭ་བུལ་ཏོག་དང༌། །སེང་ལྡེང་
མར་རྙིང་ཕག་ཚིལ་སྦྱར་བ་བྱུག །ཆང་འགག་སྦང་མ་བསྲོས་པའི་འཇིབས་ཀྱིས་དྲང༌། །དེ་
རྗེས་སྐྱི་བསྲུང་བྱུག་ཅིང་བསིལ་(ཧོང་ལེན་ཀྱི་ལྕེ་པར་པ་ཏ། ཚོས། བ་ཞོ། རྗེན་ཕྱེ་)ནན་བྱ། །དེས་མ་ཐུབ་ན་
རྩ་ལྟོ་སྦྲགས་པས་སྦྱང་། །དེས་ཀྱང་མ་ཐུབ་ཁྲ་བོ་ནག་པོས་དགུག །གྲང་སྐྲངས་སྐྱ་གསོབ་དྲོད་
མེད་མནན་ཤུལ་འོང༌། །ལྕ་རྒོད་སྤྲུ་མ་གོ་སྙོད་བཅའ་སྒ་དང༌། །ཤུག་པ་མར་ནག་སྤོད་སྦྱར་
བསྲོས་པ་བཏང༌། །ཡང་ན་མཚེ་མཁན་སྦང་བསྲོས་འཇིབས་སུ་གཞུག །མ་ཐུབ་ལུག་མིག་ལྕེ་
ཚ་སྲུབ་ཀ་དང༌། །སེར་ཤ་ཉ་མཁྲིས་ལྕམ་པ་སྒོ་ངའི་སེར། །བ་ཆུ་མེ་ལོང་གཡའ་སྦྱར་སྦང་
25-1-468


འཇིབ་བྱ། །དེས་ཀྱང་མ་ཐུབ་རྒྱ་ཚྭ་བཅའ་སྒ་དང༌། །ཚིལ་ཆེན་བྱུགས་ལ་སྟེང་དུ་སྦང་སྐམ་དང་། །
བྱི་བྲུན་ཆང་དུ་བཙོས་པའི་ལུམས་ཀྱིས་གདུལ། །སྐྱར་མོའི་སྤུ་གཞོབ་ཕོ་རོག་སྐྱ་ཀ་དང་། །
ཁྲ་ཡི་བྲུན་དང་ཟར་མའི་མར་ཁུ་བྱུག །དེ་སྟེང་ཁྲ་བོའི་ལུམས་ཀྱིས་རྣག་ཏུ་དགུག བདུད་རྩིའི་
ཐལ་བ་གླད་རུལ་ཚ་བ་གསུམ། །ཚིག་ཕྱེ་སྦང་གར་འབྲུ་མར་ཞུན་ཆེན་ཞོ། །ཤིན་ཏུ་རྣག་མ་
ཁུགས་ལ་བསྔགས་པ་ཡིན། །དྲུག་པ་རྣག་བཅད་པ་ཡི་མན་ངག་ལ། །རྒྱུ་དང་སྐྱེ་ཡུལ་གནས་
རིགས་བཅད་ཐབས་ལྔ། །ཚིགས་པར་ལས་བྱེད་ཤ་ལ་མཚོན་ལུས་དང༌། །ཉྭ་རྡུངས་རྩར་རྒྱུ་
རྨ་ཚད་རུས་ལ་ཞེན། །ཚ་བའི་ལུམས་སྔས་གཏར་ཕྱིས་རྣག་གི་རྒྱུ། །སྐྱེ་ཡུལ་རྩ་ཁ་ཤོར་དང་ཤ་
རུལ་མྱགས། །རུལ་མྱགས་རུས་པ་ཟ་ཀོང་གསུམ་ལ་སྐྱེ། །གནས་ས་ཤ་སུལ་རུས་དང་ཚིགས་
པར་གསུམ། །དེ་རིགས་ཚ་འབྱམས་གྲང་འབྱམས་རྣམ་པ་གཉིས། །རླུང་བརྟེན་རྣག་དང་རྣག་
ལ་བརྟེན་པའི་རླུང༌། །བཅད་པའི་ཐབས་ལ་སྤྱི་དང་བྱེ་བྲག་གཉིས། །སྤྱི་ལ་སྨན་དཔྱད་ཟས་
དང་སྤྱོད་ལམ་བཞི། །སྨན་ནི་མུ་ཟི་བསེ་རུ་དོམ་མཁྲིས་དང་། །ཅུ་གང་རྣམ་པར་ཨ་བྱག་ཨ་རུ་
ར། །ཀ་ར་སྦྱར་བའི་ཕྱེ་མས་རྣག་རྣམས་སྐེམ། །ཡང་ན་ག་བུར་བཟང་དྲུག་གྭ་དོར་གསུམ། །
ཨུཏྤལ་ཀ་ར་སྦྱར་བ་བ་ཆུས་དབུལ། །ཡང་ན་མུ་ཟི་ཅུ་གང་དོམ་མཁྲིས་དང༌། །བསེ་རུ་སྟབ་
སེང་འཇིབ་རྩི་སྦྲང་མར་སྦྱར། །རྣག་གཞུག་ལག་པར་འབྲས་གསུམ་མར་གྱིས་བཅད། །རྐང་
པའི་རྣག་གཞུག་རྩ་བ་ལྔ་ཡིས་བཅད། །བཟང་དྲུག་རྭ་སྣ་མཁྲིས་སྣ་ཁ་ཚར་གདབ། །དཔྱད་
ཀྱིས་བཅད་པ་དེབ་འཆིངས་ཁྲུས་དང་གཏར། །དེབ་ལ་ཕོ་དེབ་མོ་དེབ་ཡང་དེབ་གསུམ། །
སུལ་སྒོ་ཚིགས་མིག་ལ་སོགས་རྣག་ཡུལ་སྦྱར། །དེ་སྟེང་མཐའ་ནས་འདེད་ཆིངས་དག་ཏུ་
བཅིང༌། །ཁྲུས་ནི་དང་པོ་བུལ་ཏོག་ཆུ་ཡིས་བཀྲུ། །བར་དུ་ཅུ་གང་དོམ་མཁྲིས་ཀ་རས་བཀྲུ། །
ཐ་མ་གུར་གུམ་དོམ་མཁྲིས་ཆུ་ཡིས་བཀྲུ། །ཁྱད་པར་དམར་སྔོ་དུད་ཀ་སྐྱ་བོར་འགྱུར། །
གཏར་ག་ཚ་བ་རྣག་མདོག་ཁྲག་སྦྱར་གཏར། །ཁ་ཟས་དང་པོ་གསར་ལ་བཅུད་(སྐོམ་ཤ་གསར་པ་
25-1-469


རྟེན་)པ་བསྟེན། །ཐ་མ་རྒྱལ་(རྣག་གཞུག་གཅོད་དུས་ཤ་གསར་ཡོག་ཚད། སྦྲང་བུ་རམ། ཆང་)པོ་ལྟ་བུར་བཅོས་
པ་དང༌། །སྤྱོད་ལམ་དྲག་ཤུལ་བུད་མེད་སྤང་བར་བྱ། །ཁྱད་པར་རྩ་ཁ་ཤོར་ན་མེ་བཙའ་དང་། །
གཏར་ག་སྨན་(ག་བུར་ཅུ་གང་ཉ་སྲམ་འཕྱི་མཁྲིས་ཤེལ་ཏ་ཙན་དན་མར་ཁུ་ཀཎྜ་ཀ་རི་སྐྱེར་ཤུན་འོམ་བུའི་བར་ཤུན་ཀ་ར་
སྦྱར་ལ་བཏང་གུར་གུམ་དོམ་མཁྲིས་ཀ་ར་བཙོད་ཁུས་འཕུལ་བ་)དང་(རྟ་པགས་བྲག་སྤོས་སྒོ་ང་མཁྲིས་སྣ་བག་ཕྱེའི་སྐྱོ་མ་བྱུག་
རྩ་སྟེང་ཕྱིང་དེབ་ཉིས་རིམ་བཏང་བའི་)ཆས་ཀྱིས་བཅད་པར་བྱ། །རུལ་མྱགས་ཁྲུས་(དུར་བྱིད་དན་རོག་ཤྲཱི་ཁཎྜ་
སེར་མཚུར་སེ་འབྲུ་དོམ་མཁྲིས་ཀྱི་རིལ་བུ་རྣག་ཕུགས་བསྐྱལ་དེས་མང་དུ་སོང་ན་ཟས་རྡེག་པ་སྟེ་རྨའི་རྣག་བཤལ་)དང་(དྲེས་
ཐལ་ལྗང་ཐལ་བ་བླ་མཁྲིས་སྣ་ཞོ་བག་ཕྱེ་མར་ནག་སྦྱར་བའི་)ནན་དང་(མི་དང་ཉ་མཁྲིས་ད་ལིས་སྐྱེར་པ་འདམ་བུ་ཀ་ར་འོམ་
བུའི་བར་ཤུན་ཀ་ར་བཏབ་པའི་)སྨན་གྱིས་བཅད། །རུས་པ་ཟ་ཀོང་བྲུད་བསྲེག་སྨན་གྱིས་བཅད(པ་ནི་
བསེ་རུ་མུ་ཟི་རྣམ་པར་དོམ་མཁྲིས་འབྲུག་རུས་སྦྲང་སྦྱར་བ་ཁོང་དུ་བཏང་རྒྱ་ཚ་བྱང་པ་འབྲུག་རུས་མཚལ་སྦྱར་བ་རྨ་ལ་གདབ)། །
ཉྭ་སུལ་རྣག་ལ་སྨན(་མུ་ཟི་བསེ་རུ་བྲག་སྤོས་ར་མཉེ་ཉེ་ཤིང་འབྲུམ་རྩི་ཐུལ་བའི་མེ་ཏོག་ཨ་རུ་སྦྲང་སྦྱར་ཁོང་དུ་བཏང་། །
མཚེ་ཁུ་ར་མཉེ་སྒོ་ང་བག་ཕྱེ་ཞོ་བྱུག་སུལ་དང་འཚམ་པའི་དེབ་བཏང་འདེད་པའི་)འབྱར་འཆིངས་ཀྱིས་བཅད། །
བར་རྣག་སྨན་(སྟབ་སེང་ཆ་གཅིག་མུ་ཟི་ཆ་གཉིས་ཅུ་གང་དོམ་མཁྲིས་བསེ་རུ་ཆ་ཕྱེད་དངུལ་ཆུ་སྦྲང་མར་ལྡེ་གུ་བཏང་བ་)
དང་ཁྲུས་དང་འཆིངས་ཀྱིས་བཅད། །ཚིགས་རྣག་དེབ་འཆིངས་རྒྱོགས་ཀྱིས་བཅད་པར་བྱ། །
ཚ་འབྱམས་(ཤ་གྭ་དོར་ཤ་རུ་ཅོ་གའི་གླད་པ་སོ་བྱའི་ཁྲག་སྤང་མ་མཐིང་ཤུན་ཕུར་ཡོག་ཐལ་བ་ཀ་ར་སྦྱར་རྨ་ཁོང་གཉིས་ཀར་
བཏང་)གྲང་འབྱམས་(ལ་རྨ་ཁོང་དུ་ཚོས་སྨན་རུ་རྟ་སྦྲང་རྒོད་བསྣན་ལུག་ཤ་དང་ཆང་བཏང་)སྨན་དང་ཟས་ཀྱིས་
བཅད། །རླུང་ལ་བརྟེན་པའི་རྣག་རྣམས་ཁོང་ནས་བཅོས། །རྣག་ལ་བརྟེན་པའི་རླུང་ལ་རྨ་ནས་
བཅོས། །བདུན་པ་རུས་ལ་ཟུག་པ་དབྱུང་བ་ནི། །ཕྱི་ནས་ཟུག་དང་ནང་ནས་ཟུག་པ་གཉིས། །
ཕྱི་ནས་ཟུག་པ་རྣག་ཆུས་རུས་པ་ཟོས། །སྔོའམ་སྨུག་གམ་ནག་གམ་སྤ་བཅད་འདྲ། །དེ་ལ་རྩི་
ཉམས་ལྷ་བ་ཆུང་བའམ། །གཏིང་དུ་མ་ཞེན་པ་ལ་སྤྲ་བས་བསྲེག །ལྷ་བ་ཆེ་དང་མ་གདན་
བསླེབས་པ་ལ། །ལྕགས་ཀྱིས་འཚོས་པར་བསྲེགས་པས་མཚམས་སུ་དབོག །རྩ་དང་བཅས་
25-1-470


ན་ཞུན་མར་ཏེལ་པས་བསྐོལ། །ཤ་ཆུང་ལྷ་བ་ཆེ་ན་སྐྱུང་བུས་བྲུད། །འཇིབས་དང་ནང་
འཚངས་ཁ་ཞུན་མགོ་དང་མཐུན། །ནང་ནས་ཟུག་པ་རྐང་གས་ཆུ་སེར་ཞུགས། །ཟུག་ཆེ་ཤ་
སྐམ་མདོག་སྔོ་ལྷང་ལྷང་ན། །དེ་ལ་རུས་པ་བརྟོལ་ལ་ཆུ་སེར་འཇིབ། །སྟབ་སེང་ཁུ་བ་དོམ་
མཁྲིས་ཀ་ར་བླུག །དར་དང་མར་ཚིལ་སྲིན་བལ་རས་གཟེབ་བཏང༌། །རྒོད་རྐང་སྟབ་སེང་
དོམ་མཁྲིས་རྨ་རྩིར་གདབ། །སྦང་མས་འཇིབས་ཀྱིས་ཆུ་སེར་ལྷག་མ་དྲང༌། །གལ་ཏེ་སྐྲངས་
ན་ཨ་ས་འབའ་ཆས་བདུག །དེབ་ཆིངས་བསྡམ་ཞིང་ཁོང་ནས་སྨན་གྱིས་གསོ་(འབྲས་བུ་གསུམ་
སྟབ་སེང་འབམ་པོའི་སྨན་མར་སྤོས་དཀར་བྲག་སྤོས་པྲི་ཡང་ཀུ་སྐྱུ་རུ་སྐྱེར་པ་སྦྲང་སྦྱར་ཁོང་དུ་བཏང༌)། །སྐྲངས་རྒྱས་རྣག་
ཆུས་ཤ་རུས་རྩ་རྣམས་རུལ། །ལྷ་རུ་ཆད་དང་ཚིགས་ཆུ་འབོག་ཀྱང་སྲིད། །ནད་ཟོ་དང་ག་བདེ་
ན་གསོ་རུ་རུང༌། །(སྟབ་སེང་གི་ཐང་བཏང་ཨ་བ་མར་སྦྱར་བཏང་ཨ་བྱག་བྲག་སྤོས་སྒོག་སྐྱ་སྦྲང་དང་སྦྱར་བའི་)སྨན་
དང་ཁ་ཟས་(གོང་བསྲེག་ཁྱིམ་བྱ་སྐོམ་ཤ་སྦྲང་ཆང་ཡོས་ཆང་བཏང་ཤ་རོ་ལྕགས་ཀྱིས་)བསྲེག་དང་བཅད་པས་
བཅོས་(རུས་པ་སྐམ་པས་མཉམས་ལ་གསོན་གཤིན་མཚམས་སུ་སོག་ལེས་བཅད་འཇིབས་དང་ཁ་ཞུན་བྱ་རུས་རོ་གསོན་
གཤིན་མཚམས་སུ་བོག་པ་དང་རྨ་རྩི་ཁ་ཞུན་བྱ)། །བརྒྱད་པ་བྱུང་ཤོར་གཞུག་པའི་ཐབས་བསྟན་པ། །
འཆོར་ས་ཤོར་རྟགས་གཞུག་ཐབས་བསྟེན་པར་བྱ། །འཆོར་ས་གཡས་གཡོན་སྟེང་འོག་རྣམ་
པ་བཞི། །དཔུང་པ་(ཨུ་ཟུར་གྱིས་མནན་)པུས་མོ་སྟེང་(སླ་ང་བཀབ་ལ་)དུ་འཆོར་མི་སྲིད། །རྒྱ་(ཞེང་ཆེ་)
ཚིགས་འཁྲིག་(དུད་ཁང་གཉིས་ཀྱིས་སྦྱོང་བས་)མ་གཡས་གཡོན་འཆོར་མི་སྲིད། །གྲུ་(གཞུ་མཆོག་སྨེས་ཀབ་
)མོ་ལོང་ཚིགས་(སྲེ་ལོང་བས་བཀབ་ལ་)རྒྱབ་ཏུ་འཆོར་མི་སྲིད། །དཔྱི་ལ་ཕྱིར་(རིང་དུ་འགྲོ་)ཤོར་ནང་
(ཐུང་དུ་འགྲོ་)ཤོར་རྣམ་པ་གཉིས། །ཤོར་རྟགས་ཟུག་གཟེར་ཅུང་ཟད་ཙམ་ལ་ལྡང༌། །མོད་དུ་
སྐྲངས་ཤིང་བརྐྱང་བསྐུམ་བྱ་བ་ཉམས། །གང་ཤོར་འབུར་སྐྱོང་རིང་ཐུང་འབྱུང་བ་ཡིན། །དཔྱི་
ཡི་སྟུག་ཐག་སོག་པའི་གཉེན་ཐག་ཆད། །བཅུག་ཀྱང་མི་སྡོད་ཞ་འཐེང་འགྱུར་བ་ཡིན། །
གཞུག་ཐབས་མ་སྐྲངས་གསར་དུས་མོད་ལ་གཞུག །རྙིངས་ནས་ལུམས་ཀྱིས་ཤ་ཆུ་བཏུལ་
25-1-471


ལ་གཞུག །གང་ཡང་ཚིགས་ཁ་བྲལ་བར་དྲག་ཏུ་འཐེན། །ཤོར་ངོས་རུས་པའི་མགོ་ནས་ནང་
དུ་འཕུལ། །ཚིགས་ཁ་བྲལ་ནས་གང་ཤོར་ངོས་སུ་བཀན། །མ་བྲལ་བཀན་ན་ཚིགས་ཁ་
འཆག་ཅིང་འགྲམ། །བྲལ་ན་ཇི་ལྟར་བཀན་བཞིན་ཚུད་པར་འགྱུར། །ཡང་ན་ཐག་(ལུས་པོ་མིས་
བཟུངས་ལ་གང་ཤོར་ཡན་ལག་)པས་འཐེན་ལ་དབྱུག་པ་བརྡེག །སྒྲ་འབྱུང་(ཚུད་རྟགས་སུ་ཀྲིས་ཟེར་བ་)
འབུར་པོ་ནུབ་དང་བརྐྱང་བསྐུམ་བཏུབ། །ཟུག་གཟེར་བྲི་ན་གནས་སུ་ཚུད་པ་ཡིན། །བརྟན་
པར་བྱ་བ་(ཤོར་ངོས་ལ་ཕྱིང་བརྩེགས་པའི་)དེབ་བཏང་འཆིངས་ཀྱིས་བསྡམས། །ན་དང་ཟུག་མ་བྲི་ན་
སྐབས་སུ་བལྟ། །ཡིད་ཆེས་བརྟན་པར་གྱུར་ནས་བཅུད་ཀྱིས་གསོ། །ཡུན་ལོན་ཤོར་ལང་ཡོད་
ན་མེ་བཙའ་གདབ། །དེ་རྗེས་འཆིངས་དང་རྒྱོགས་སུ་གཞུག་པར་བྱ། །དགུ་པ་རུས་པ་ཆག་
གྲུག་བཅིང་བ་ནི། །ཆག་ལུགས་ཆག་རྟགས་བཅིང་ཐབས་ལོག་གནོན་ནོ། །ཆག་ལུགས་མ་
ལ་བུ་ཐོགས་ཆག་པ་དང༌། །སྨྱུ་གུ་ཁ་དང་སྡུམ་ཆག་གྲུམ་པ་བཞི། །དེ་ཡང་རྨ་ཅན་རྨ་མེད་
གཉིས་སུ་འདུས། །ཆག་རྟགས་གྲང་ཞིང་འཁྲོག་ལ་འགུལ་མི་ནུས། །རླུང་ཅན་སྦེག་དང་སྡུམ་
ཆག་གྲུག་པ་དང་། །རྨ་ཅན་ཟས་ཀྱིས་མ་ཐེག་གསོ་བ་དཀའ། །བཅོས་ཐབས་བཅིང་དང་ཁོང་
སྨན་རྒྱོགས་ཀྱིས་བཅོས། །དང་པོ་བཅོས་ཐབས་འཐེན་ལ་(ལག་པས་ནན་ནན་རྩིར་པས། ཕྱི་མ་ནང་དུ་
འགྲོ། ནང་མ་ཕྱིར་འགྲོ་)རུས་ཁོད་མཉམ། །རིང་ཐུང་མ་ཆག་ངོས་དང་བསྟུན་པ་གཅེས། །རུས་པ་
ཕྱིར་དོན་རྟ་བོང་ར་ལུག་གི །འོ་མས་བཀྲུས་ལ་ཚིལ་བུས་དྲོད་ཕབ་སྟེ། །ག་བུར་ཙན་དན་གུར་
གུམ་འོ་མ་བྱུག །ཞག་འདས་ཁོང་དུ་ཆང་བཏང་འབམ་པོས་བདུག །དེ་ཡིས་དྲོད་ཕེབས་རུས་
པ་འབྱོར་བ་སླ། །དྲག་ཏུ་འཐེན་པས་རུས་པ་ནང་དུ་འགྲོ། །ཅིས་ཀྱང་མ་ཚུད་སོག་ལེས་
བསྟུངས་ལ་གཞུག །ནམ་ཟླ་སྦྱར་ཏེ་ཞོའམ་གར་པོ་ལ། །སྒོ་ང་ར་ཁྲག་ར་མཉེ་མཚེ་ཡི་ཁུ། །
སྤྱིན་དང་བག་ཕྱེ་ལུག་ཞོ་ཙམ་དུ་བྱུག །ཚིགས་ཆེན་མཐོ་རེ་ཚིགས་ཕྲན་མཛུབ་རེ་བྱུག །རྐང་
རྣམས་ལ་ནི་རྐང་དང་མཉམ་པར་བྱུག །ཡང་ན་སྒོ་ང་ར་ཁྲག་བག་ཕྱེ་དང༌། །ཧོང་ལེན་མཁྲིས་
25-1-472


སྣ་སྦང་གར་སྦྱར་བ་བྱུག །ཕྱིང་པ་སྲབ་མཁྲེགས་སྤུ་དེབ་སྲད་བུས་དཀྲི། །དེ་སྟེང་རས་འཇག་
སོན་པའི་ཆིངས་སུ་བཅིང༌། །ལྷོད་ན་འཁྲུལ་ཞིང་དམས་ན་གོང་འོག་སྐྲངས། །ཚབས་ཆེ་བ་ལ་
དེ་སྟེང་ཤིང་ཆས་བསྐུར། །སྨན་དུ་སྟབ་སེང་ཁུ་བ་ཁོང་དུ་བཏང༌། །མར་གསར་འོ་མ་མངར་
གསུམ་ཚོས་ཁུ་ལྡན། །ཨ་བ་ཨ་བྱག་སྦྲང་རྩི་མར་སྦྱར་བཏང༌། །རྨ་ཅན་ཁོལ་དུ་བཏོན་ལ་
ཤེལ་ཏ་གཞུག །ག་བུར་དོམ་མཁྲིས་གུར་གུམ་ཙན་དན་དཀར། །སྟབ་སེང་ཀ་ར་སྦྱར་བས་
རུས་པ་སྦྱོར། །འཕྲོད་ཅིང་བདེ་ན་མ་རུང་བར་དུ་བཞག །མི་འཕྲོད་ན་ན་གསུམ་ལྔ་བདུན་ལ་
དགྲོལ། །ལོག་གནོན་རིང་ཐུང་ཡོན་པོ་བཅག་ལ་བཅིང༌། །རྣག་གཞུག་རྨ་ཆོད་རུས་པ་ཟོས་པ་
ན། །བྲུད་དང་བསྲེག་དང་སྨན་གྱིས་གསོ་བར་བྱ། །ཐ་མ་གནད་ཀྱི་ལོག་གནོན་བསྟན་པ་ནི། །
ཤ་ཡི་གནད་ལ་གཞའ་ཁྲོས་བམ་རུལ་བཞི། །རྩ་ཡི་གནད་ལ་བྱེར་ཁྲིད་རྒྱས་ཤོར་བཞི། །
ཚིགས་ཀྱི་གནད་ལ་བམ་དང་འཁོར་བ་གཉིས། །ཆུ་རྒྱུས་གནད་ལ་རེངས་དང་འཁུམས་པའོ། །
དང་པོ་ཤ་གཞའ་ཚ་གཞའ་གྲང་གཞའ་གཉིས། །ཚ་གཞའ་ཁ་སྙི་གཏིང་སྲ་སྟོད་ཚད་སྐྱེ། །
སྐྲངས་ཆུ་རེ་གཅིན་འདྲ་བའི་ཆུ་སེར་འཛག །དེ་ལ་ཁོང་ནས་སྨན་གྱིས་འཕུལ་བསང་བསྐམ་
(པ་ལ་ག་བུར་ཅུ་གང་གུར་གུམ་ཙན་དན་བསེ་རུ་དོམ་མཁྲིས་ག་དུར་ཧོང་ལེན་ཀ་ར་གངས་ཆུས་དབུལ)། །རྨ་ལ་ཁྲ་བོ་ནག་
པོའི་ཆས་ཀྱིས་བསླང༌། །རྨ་ཁར་མི་གཏར་གཞན་དུ་གང་རྒྱས་གཏར། །ཟུག་སྐྱེས་རྣག་མང་
སྐྲངས་དྲོད་ཆེ་ན་སློང༌། །གྲང་གཞའ་དྲོད་དང་སྐྲངས་ཆུང་རྣག་ཆུ་ཉུང༌། །དང་ག་མི་བདེ་གདོང་
སྐྱ་ཟུག་མ་ངེས། །ཁོང་དུ་གསར་བཅུད་སེ་འབྲུ་ལྔ་པ་བཏང༌། །རྨ་ལ་དྲོད་ལུམས་ཁྲ་བོའི་
ལུམས་ཀྱིས་བསླང་། །རླུང་གསང་སུལ་ཁ་རྣམས་སུ་མེ་ཡིས་བསྲོ། །དེ་ཡིས་མ་སློང་ཤ་ཆང་
བུར་མར་སྤྲུག །སློངས་ནས་སྤྱི་ལྟར་གང་ལ་འཚམ་པས་བཅོས། །ཁྲོས་ལ་རྡོ་ལྟར་སྲ་དང་ལྷོག་
ཐབས་གཉིས། །རྡོ་ལྟར་སྲ་ལ་ཚ་ཁྲོས་གྲང་ཁྲོས་གཉིས། །ཚ་ཁྲོས་དམར་མཁྲང་ཟུག་ཆེ་རེག་
མི་བཟོད། །དྲོད་ཆེ་ཚ་འཁྱུག་རྩ་ཆུ་ཕྱི་ཚད་སྐྱེད། །དེ་ལ་དང་པོ་གླད་སྦང་སྦྱོར་བ་བྱ། །དེ་རྗེས་
25-1-473


སེར་ཆས་(ལྡོང་རོས་ཡུང་སྐྱེར་ལྕུམ་རྩ་སྒོ་ང་རྭ་གཞོབ་བག་ཕྱེ་དྲོད་ཕབ་ལ་བྱུགས་ཏེ་ཤོག) དེབ་བཏང་གང་ཉེ་
གཏར། །དེས་ཀྱང་མ་ཐུབ་སྐྲངས་ན་ཆུ་རྩ་དང༌། །བྲག་ཞུན་གླད་རུལ་ར་ཞོ་བག་ཕྱེ་བྱུག །དེ་
ཡི་སྟེང་དུ་ཕྱིང་པ་ཆུར་སྦངས་བཏང༌། །ཡང་ན་སྐྲངས་དང་སྦྱར་བའི་ཆུ་བཙགས་ལ། །གངས་
ཆུས་བསྒྲངས་རྟིང་བསིལ་བའི་(ཀྱི་ལྕེ། པར་པ་ཏ། བྲག་ཞུན། བྲག་སྤོས། ར་ཞོ་བྱུག)ཆས་སུ་གཞུག །ཅིས་
ཀྱང་མ་ཐུལ་ཁྲ་བོ་ནག་པོས་དགུག །གྲང་ཁྲོས་སྐྲངས་པ་དྲོད་ཆུང་སྲ་ལ་སྐྱ། །ཟུག་ཆེ་ཕུག་ན་
རྣག་མེད་ཉུང་འཁྱགས་འདྲ། །ཤ་སྣ་ཆང་དུ་བཙོས་པའི་(འུག་པ་བྱ་རྒོད་སྤྱང་ཀི་མི་ཤ་བག་ཕྱེ་ཕབས་སྤོད་
སྦྱར་ཡང་ན་དེ་སྟེང་ཉ་ཤ་རྐྱང་རྟ་བོང་ར་ལུག་གི་ཉྭ་ཤ་འབྲུ་མར་སྦྱར་བའི་)ལུམས་སུ་གཞུག །ཡང་ན་སྔོ་ཡི་རྩ་བ་
ལྔ་ཡིས་མནན། །(རི་ཤོ་སྤྲུ་མ་སྤྱང་ཚེར་རེ་ཅག་སྲུབ་ཀ་ཞིབ་པར་བཏགས་པ་དྲི་ཆུར་སྦྱར་བས་)མ་ཐུབ་ཁྲ་བོ་ནག་
པོའི་ཆས་སུ་གཞུག །དེས་ཀྱང་མ་ཐུབ་ཚ་ཁྲོས་ལྟ་བུར་བཅོས། །ལྷོག་ཐབས་ཁ་དོག་དམར་
སྨུག་སྐྲངས་པ་ཆེ། །ཆུ་བུར་ཉྭ་སྒང་དཀར་ནག་འབྱུང་བ་དང༌། །དྲོད་ཆེ་བ་སྤུ་ལྡོག་ཅིང་ཚ་བ་
སྐྱེ། །དེ་ལ་ལྕགས་ཕྱེའི་(སོ་ཐོག་ཨ་ག་རུ་ཀྱི་ལྕེ་ཚོས་རམས་ཞུ་མཁན་སྦང་གར་འབྲུ་མར་བག་ཕྱེ་འཚོས་པར་བཙོས་པའི་)
ཞུན་ནམ་རྨེན་བུ(སྣ་ཚོགས་གླ་རྩི་དང་དྲི་ཆུར་བཙོས་པ)འི་ལུམས། །དེས་མ་ཐུབ་ན་ནག་པོའི་ཞུན་ནན་
བྱ། །ཆུ་བུར་བྱུང་ན་གཉེན་པོའམ་སྐམ་རྩིས་བྱུག(ཤ་རུའི་ཐལ་བ་དུད་པ་བྱ་བལ་མ་ནུ་ཞོ་འབྲུ་མར་བྱུག་ཡང་ན་
ཀྱི་ལྕེ་ལུག་ངལ་རེ་སྐོན་དྲེས་རུལ་སྲོ་ལོའི་ཐལ་བ)། །དེ་སྟེང་ཁྲ་བོའམ་ནག་པོའི་ལུམས་སུ་གཞུག །རྨ་
རོགས་འབྱུང་སྟེ་འབྲོས་འདོད་ཐོར་པ་འོང༌། །(དེ་ལ་ཀྱི་ལྕེ་བྲག་སྤོས་ལྕགས་ཕྱེ་ཤུ་དག་གུ་གུལ་གླ་རྩི་སོ་ཐོག་མུ་
ཟི་ར་ཁྲག་དྲི་ཆུས་བྱུག་ཡང་ན་ཝ་སྤྱང་ཁྱི་ཕག་གོ་བོ་གོང་མོ་ཕོ་རོག་གི་བྲུན་བཙན་དུག་གླ་རྩི་ཨ་རུ་དྲི་ཆུར་སྦྱར་བ་)བྱུགས་པའི་
སྟེང་དུ་ཤོག་བུ་བོང་སྤུས་མནན། །མ་ཐུབ་དམར་སེར་ནག་པོའི་ཞུན་ནན་དཔྱད(དེ་ལ་ལི་གྲི་རྒྱ་
སྐྱེགས་བཙོད་སེར་བཙག་མཚལ་རྟ་བོང་གི་ཁྲག་གར་པོ་ཞོ་འབྲུ་མར་དང་སྦྱར་བ། །མུ་ཟི་གི་ཝཾ་ཁྲག་རྐང་གསེར་རྡོ་ལྷང་ཚེར་སྤོས་
དཀར་སྒྲོ་མོན་གར་པོ་ཞོ་སྲན་ཕྱེ་དང་སྦྱར་བ། །ལྕགས་ཕྱེ་སོ་ཐོག་ཀྱི་ལྕེ་སྣག་ཚ་རམས་རྡོ་སོལ་ཡུང་ནག་གར་པོ་ཞོ་རྗེན་ཕྱེ་མར་
ནག་སྦྱར་བ)། །དེས་ཀྱང་མ་ཐུལ་འཕྲུལ་སྦྱོངས་(རེ་ལྕག་དབྱི་མོང་སྤོས་དཀར་ཐར་ནུ་རྒྱ་ཚྭ་བྱང་པ་ལོ་བརྒྱད་དྲི་ཆུར་
25-1-474


སྦྱར་ལ་བཏང༌། ཡང་ན་ཐར་ནུ་བྱང་པ་ཨ་རུ་རེ་རལ་ཤ་ཆེན་གྱིས་བྱེར་བ་བསྡུས་པའི་ཁཎྜ་སྦྱར་ལ་བཏང༌། ཡང་ན་ཤྲཱི་ཁཎྜ་སྔོན་
བུ་ཐར་ནུ་བྱང་པ་པི་པི་ལིང་ཉི་དགའ་ཀ་ར་དྲི་ཆུར་སྦྱར་བ་བུངས་ཆུང་ཡང་ཡང་བཏང་ཟུག་བྱུང་ན་མེ་དུགས་བྱ་)ལོག་གནོན་
ཡིན། །ཤ་གནད་བམ་པ་ཚ་བམ་གྲང་བམ་གཉིས། །ཚ་བམ་སྐྲངས་པ་སྨུག་ནག་དྲོད་རླངས་
ཆེ། །ཤེ་རུལ་དུད་ཀའི་རྣག་འཛག་བེམ་མེ་ན། །དེ་ལ་ཨ་རུ་བྲག་ཞུན་ཧོང་ལེན་ཞོ། །བྱུགས་
སྟེང་གྲོ་སོག་འཇག་མའི་དེབ་བཏང་ལ། །རས་སྲབ་བཅིངས་ལ་རྨ་ལ་སྦང་ཞོ་བཏང་། །སྐབས་
སུ་མཚན་ཆུས་བྲན་ལ་ས་སྨྱག་བྱུག །གང་ཉེ་གང་རྒྱས་སྐྲངས་ཀྱི་འོག་ཏུ་གཏར། །མ་ཐུབ་
བཤལ་གྱིས་སྦྱང་བ་ལོག་གནོན་ཡིན། །གྲང་བམ་སྐྲངས་ཆེ་དྲོད་ཆུང་སྐྱ་ལ་གསོབ། །རྣག་ཆུ་
ཉུང་ཞིང་ཟུག་གཟེར་ཆུང་བ་ཡིན། །དེ་ལ་(བག་ཕྱེ་གར་པོ་ཞུ་མཁན་གོ་སྙོད་སྒ་ཕབས་པི་པི་ལིང་ཚྭ་མར་ནག་
བཙོས་པའི་)ཨ་སས་བདུག་ཅིང་མཁན་ཆུས་བཀྲུ། །ཁོང་ནས་གསར་བཅུད་གསུམ་གྱིས་གསོ་
བར་བྱ། །རུལ་ལ་མྱགས་དང་ཟ་རྨ་ཟགས་པའོ། །མྱགས་པ་ཤ་རོ་རྒྱུས་པ་བལྡད་པ་འདྲ། །རྨ་
མཆེད་རྣག་མང་ཤེ་རུལ་དྲི་མི་ཞིམ། །དེ་ལ་དང་པོ་སྦང་ཞོས་རུལ་མྱགས་བསལ། །བུལ་ཏོག་
ཆུས་བཀྲུ་དེ་རྗེས་མཁྲིས་(ཉ་དོམ་མཁྲིས་པ་བྲག་སྤོས་ནུ་ཞོ་)པས་བཀྲུ། །རུལ་སོལ་ཨ་རུ་བྲག་ཞུན་ཧོང་
ལེན་ཞོ། །རྨ་མིན་བྱུགས་ལ་ཆུ་བྱའི་སྤུ་ཡིས་མནན། །རྨ་ལ་ནས་ཚིག་མཁྲིས་པ་བྲག་སྤོས་
དང༌། །ཆུ་རྩ་འབྲུ་མར་སྦྱར་བྱུགས་ཤོ་མང་དགབ། །དེ་སྟེང་རས་ཕྲན་སྲབ་མོས་ལྷོད་པར་
བཅིང༌། །ཡང་ན་སེར་ཐིག་ཞོ་དང་སྦྱར་ལ་བཏང༌། །ཡང་ན་ཐལ་སྦྱོར་(སུག་པ་བོང་ང་དཀར་པོ་རེ་སྐོན་
ཆུ་རྩ་དྲེས་རྙིང་ཕུག་ཡོག་ཐལ་བ་དཀར་པོར་བསྲེགས་པ་དང་མར་དཀར་མཁྲིས་སྣ་)མུ་ཟིའི་སྐམ་རྩི་བྱུག །(དོམ་མཁྲིས་
གུར་གུམ་ཅུ་གང་མཚལ་བྲག་སྤོས་ཚ་ལ་དུལ་མ་ཀ་ར་སྦྲང་རྩི་མར་དཀར་བྱུག་དར་དགབ་རེ་བལ་སྣུམ་དུ་བཙོས་པའི་)རྨ་རྩི་
ཁོང་སྨན་(སྟག་ཤའི་མེ་ཏོག་དོམ་མཁྲིས་བཙོད་ཁུས་དབུལ་ཁ་ཟས་གསར་བཅུད་ཏིང་ཁྲོལ་བཏང་)ཟས་ཀྱིས་རུལ་
མྱགས་གསོ། །ཟ་རྨ་རུལ་སྙིང་འདོད་པའི་རྨ་ཡིན་ཏེ། །ཁྲག་རུལ་འཛག་ཅིང་བྱི་བའི་ཟ་འཕྲོ་
འདྲ། །དྲི་མི་ཞིམ་ཞིང་ནུབ་རེ་ལོག་པོར་མཆེད། །དེ་ལ་རམས་ལོ་སྤྲུ་རྩ་ཞོ་སྦྱར་བཅིང༌། །གང་
25-1-475


ཉེའི་རྩ་གཏར་རྨ་ཡི་ཁྲག་ཆོད་ནས། །མཁྲིས་སྣ་ཆུ་རྩ་བྲག་སྤོས་ཚིག་མ་དང༌། །ནུ་ཞོ་འབྲུ་མར་
སྦྱར་བའི་ཁ་ཞུན་བྱ། །ཟགས་པ་བུ་ག་མང་པོ་འབྱུང་བ་སྟེ། །ཀྲད་རུལ་དུད་པ་སླང་དྲེག་མར་
དཀར་བྱུག །ཡང་ན་སྐམ་རྩི་ཐལ་བ་བྱུག་པར་བྱ། །ནམ་ཟླ་དྲོ་དུས་རྨ་ལ་འབུ་འབྱུང་ན། །བྱི་
རུག་རྒྱ་སྤོས་ཆུའམ་ཕྱེ་མ་གདབ། །རྩ་ནད་བྱེར་ལ་ཉེ་བྱེར་རིང་བྱེར་གཉིས། །ཉེ་བྱེར་རྩ་རྒྱུད་
ཁྲིད་མཁྲང་ན་ལ་ཚ། །རྨ་ཁ་མ་སྐྲངས་མཁན་སྦང་ཚིག་མ་དང༌། །གླད་པ་སྦྱར་བས་བྱེར་བ་
བསྡུ་བར་བྱ། །དེས་མ་འདུས་ན་རྩ་སྦྱོངས་བཏང་བས་སྡུད། །རིང་བྱེར་རླུང་རྩ་སྙིང་རྩའི་རྩ་
སྐྱོན་གྱིས། །ཤ་སུལ་རྩ་དང་ཚིགས་རྨིག་ལ་སོགས་སུ། །གཡས་གཡོན་སྟོད་སྨད་སྣེ་བསྣོལ་
སྐྲངས་པར་བྱེད། །དེ་ཡང་ཚ་གྲང་གཉིས་སུ་སྲིད་པ་ཡིན། །དེ་ལ་བྱེར་དངོས་རྨ་ཡི་ཐད་ཀར་
བསྲེག །རི་བོའི་རྩེ་ལ་(སྤྱི་གཙུག་རྐང་མཐིལ་བཞི། སྲིན་ལག སྔོན་བུ། དྲུག་ལ་གསེར་གྱིས་སྐྱི་ཚོས་ཙམ་བསྲེག་)
གསེར་གྱི་མེ་བཙའ་གདབ། །དར་ཡ་ཀན་(ཤིང་མངར་ཀྱི་ལྕེ་བྲག་སྤོས་ཁཎྜ་ཉ་དོམ་ཁྱི་མཁྲིས་ད་ཏྲིག་བྲག་ཞུན་
གསེར་ཐིག་ག་བུར་ཚ་ལ་བཏབ་པ་མཛོ་འོས་སྦྱངས་ལ་སྦྱིན)ནམ་ད་ལིས་(བྲེ་ཕྱེད་ཀྱི་ལྕེ་ཕུལ་གང་ཤིང་མངར་ཁྱོར་གང་
རྣམས་ལ་བཟང་དྲུག་མཁྲིས་སྣ་ད་ཏྲིག་ཚོས་ཕུག་རོན་སྒོ་ངའི་སེར་ཐིག་ཀ་ར་རའོ་སྦྱར་བའི་)ཁཎྜ་ཡིས། །བྱེར་སྡུད་རྩ་
ཁ་སྡོམ་ཞིང་ཁྲག་ཁོང་སྦེད། མ་འདུས་རྩ་ལྟོ་སྦྲགས་ནས་སྦྱང་བ་མཆོག །ཁྱད་པར་ཚ་བྱེར་
འཇིབས་ལུམས་གཏར་སྨན་བསྡུ(བཟང་དྲུག་ཙན་དན་དཀར་དམར་བསིལ་གསུམ་དོམ་མཁྲིས་ག་བུར་ཀ་ར་སྦྱར་
བས་)། །གྲང་བྱེར་བྱུག་ལུམས་ཟས་ཀྱིས་བསྡུ་བར་བྱ། །རྩ་གནད་ཁྲིད་པ་ཕྱི་ཁྲིད་ནང་ཁྲིད་
གཉིས། །ཕྱི་ཁྲིད་རྩ་ཡི་སྐར་མདའ་བྱི་ཁྲིད་དུ། །ཁྲིད་པས་རྩ་ལ་ནང་རྩ་སྐྲངས་མེད་ཀྱང༌། །
དང་ག་མི་བདེ་ཕོ་མཆིན་ན་བའམ། །མགོ་ན་སྟོད་གཟེར་ཚ་བ་སྐྱེ་བའམ། །རླུང་ལྡན་སྐབས་
སུ་འདྲེ་ལྟར་ལྡང་དུབ་བྱེད། །དེ་སོགས་ནད་སྣ་སྣ་ཚོགས་སྟོན་གྱུར་ན། །སྟོད་སྨད་གཡས་
གཡོན་ཀུན་ཏུ་བྱ་ར་བྱ། །སྐྲངས་སམ་ཚའམ་དྲེག་པ་ཐོར་པ་སོགས། །གར་འདུག་དེ་ཡི་སྟེང་
དུ་ལུམས་བྱ་ཞིང་། །ཁོང་ནས་རྩ་བྱེར་བསྡུ་བའི་སྨན་(དར་ཡ་ཀན་གྱི་སྦྱོར་བ་)བཏང་བས། །རྣག་
25-1-476


མགོ་བྱུང་ན་ཕུག་པས་འཚོ་བ་ཡིན། །ཁོང་ནད་ཡིན་སྙམ་ངོས་མ་ཟིན་ན་འཆི། །ནང་ཁྲིད་དོན་
ལ་ཆུ་སེར་གསོག་པ་སྟེ། །མགོ་ལུས་ལྕི་ཞིང་སྟོད་གཟེར་དང་ག་འགག །གློ་མང་གློ་ཡི་རྩ་དང་
གསང་ས་གཟེར། །འདི་ཡི་རྨ་ལ་ཚ་བ་མི་འདུས་པས། །རྨ་ལ་གང་འཚམས་ཁོང་དུ་སྐེམ་སྨན་
(རྨ་བྱའི་སྒྲོ་དར་ཚོན་སྣ་ལྔ་གྭ་དོར་གསུམ་བསིལ་བཞི་ག་བུར་དོམ་མཁྲིས་དར་ཡ་ཀན་ཀ་ར་སྦྱར་བ་)བསྟེན། །གང་ཁྲིད་
སོར་(སྙིང་མཐེབ་བོ། འཛུབ་མོ། གློ་གུང་མོ། མཆིན་སྲིན་ལག མཆེར་མཁལ་མ་མཐེབ་ཆུང་བསྲེག་)མོ་ཚིགས་པའི་
གསང་དུ་བསྲེག །མ་ཐུབ་གཉིས་ཀར་འཕྲུལ་སྦྱོངས་བསྔགས་པ་ཡིན། །རྩ་ནད་རྒྱས་ལ་ཚ་
རྒྱས་གྲང་རྒྱས་གཉིས། ཚ་རྒྱས་སྐྲངས་ཆེ་དམར་འཁྱུག་རྩ་རྒྱུད་སྐྲངས། །གང་ན་གང་མཁྲང་
གང་རྒྱས་རྩ་ལ་གཏར། ཁོང་དུ་བསིལ་(ཙན་དན་དཀར་དམར་བསིལ་གསུམ་དོམ་མཁྲིས་ག་བུར་ཨུཏྤལ་ཀ་ར་)
བཏང་རྨ་ལ་(ཧོང་ལེན་ཏིག་ཏ་ཀྱི་ལྕེ་པར་པ་ཏ་མཚན་དཀར་ཚོས་ར་ཞོའི་)གྲང་འཇིབ་བྱ། །དེས་མ་ཐུབ་ན་ཁྲ་
བོས་རྣག་ཏུ་དགུག །གྲང་རྒྱས་ཉུང་འཁྱགས་རྐྱལ་པ་བུས་པ་འདྲ། །དྲོད་དང་ཟུག་གཟེར་
ཚད་རྟགས་ཆུང་བ་ཡིན། །དེ་ལ་སུལ་སྒོ་རྩ་འཁྲང་སྐྲངས་མཚམས་བསྲེག །གསར་བཅུད་
ཤིང་ཀུན་(བཅའ་སྒ་བཟང་པོ་གསུམ་བུ་རམ་)ཕྱེ་མ་ཁོང་དུ་བཏང༌། །རྨ་ལ་བཅའ་སྒ་མི་ཞུན་ཁྲ་བོས་
དགུག །རྣག་ཏུ་མ་ཁུགས་དྲོད་དང་བྲལ་ན་སྤང༌། །དྲོད་བྲལ་མཚམས་སུ་མེས་བསྐོར་(ཕབས་
སྤོད་ལྕ་འབྲུམ་གཡེར་མ་གོ་སྙོད་འབམ་པོ་བུ་རམ་ཆང་འགག་སྦང་མ་བསྲོས་པའི་)དྲོད་འཇིབས་བྱ། །དྲོད་རྙེད་རྣག་
ཏུ་ཁུགས་ན་འཚོ་བར་འགྱུར། །ཆུ་བུར་བྱུང་ན་སྐམ་རྩིས་(དུད་པ་ཤ་རུ་ནུ་ཞོ་ཏིལ་མར་བྱུག དར་ཆིངས་བྱ་
དུད་པ་ཚིག་མ་སྒོག་སྐྱ་ཁྱི་ལུད་ཐལ་བ་དྲི་ཆུ་སྦྱར་བས)བྱུག་པར་བྱ། །རྩ་གནད་ཤོར་བ་རླུང་ཤོར་ཁྲག་ཤོར་
གཉིས། །དེ་ཡང་སྟོད་དང་སྨད་ལ་ཤོར་བའོ། །སྟོད་དུ་རླུང་ཤོར་འཕྱོ་འདར་རྔམ་པ་འདེག །
གཡལ་དང་སྐྱིགས་བུ་འོང་ཞིང་ཟ་ཟི་མང༌། །གཉིད་ཡེར་སྟོང་སྐྱུགས་བྱེད་ན་བྱུག་བདུག་བྱ། །
རུས་ཐང་བུར་དཀར་གསར་བཅུད་ཁོང་དུ་བཏང་། །དེས་མ་ཐུབ་ན་རླུང་གསང་མེ་ཡིས་
མནན། །སྟོད་དུ་ཚ་བ་ཤོར་ན་ཕྲུམ་སེར་ཁྱེར། །སྟོད་གཟེར་དབུགས་ཐུང་ཁ་སྐམ་སོ་དྲེག་
25-1-477


ཆགས། །གློ་མང་མགོ་ན་ལུས་ལྕི་དང་ག་འགག །རྩ་གྲིམས་ཆུ་དམར་རྨ་ལ་སྐྲངས་མེད་གཞའ། །
ག་བུར་ཙན་དན་གི་ཝཾ་ཚད་སྟོབས་སྦྱར། །རྩེ་ཆུང་ལ་སོགས་གཏར་ཞིང་བསིལ་ཆས་སྤང༌། །
ཚ་འཇིབས་བྱས་ལ་རྣག་ཏུ་དགུག་པར་བྱ། །རྨ་ཁར་ཤོར་ན་ལྦ་བ་འབྱུང་འགྱུར་ཏེ། །ཁ་ལྦ་
གཏིང་ལྦ་གང་དུ་བྱུང་གྱུར་ཀྱང༌། །རླུང་ཤོར་ལྦ་བ་འཁྱིལ་ཞིང་འགུལ་བ་སྟེ། །ཟ་འོག་ཕུག་
རོན་སྐེ་ལྟར་རི་མོ་འབྱུང་། །ཕུག་ན་རླུང་ཤོར་ཁྲག་མི་ཐུབ་པ་ཡིན། །དབུག་ཏུ་མི་རུང་བདུད་
རྩི་ལྔ་ཡིས་བདུག །ཁོང་ནས་རྩ་ཁ་འཛིན་པའི་ཐང་ཕྱེ་བཏང༌། །ཁྲག་ཤོར་ལྦ་བ་དམར་སྔོ་རེག་
ན་བརྩེ༌། འཕར་མེད་ཁོང་ནས་སྨན་བཏང་ཆས་བསིལ་བྱ། །རྩ་ནད་ཀུན་ལ་ཚ་བ་དབབ་
དཀྲོག་གཉིས། །ཚིགས་གནད་རྩ་ཁ་འབུས་ཀྱི་དོགས་པ་དང་། །སྟོད་དུ་ཤོར་དོགས་མེད་པ་
རྨ་ནས་དཀྲོག །རྩ་གཉན་བཙན་ཆོད་སྟོད་དུ་འཆོར་བའི་ཕྱིར། །ཁོང་ནས་བསད་ཅིང་རྨ་ཁར་
དབབ་པར་བྱ། །ཚིགས་གནད་བམ་ལ་ཚ་བམ་གྲང་བམ་གཉིས། །ཚ་བམ་ཚིགས་མགོ་དམ་
སྦོས་སྐྲངས་དམར་རྒྱས། དྲོད་ཆེ་ལྕི་ཞིང་འགུལ་དཀའ་དང་ག་འགག །ག་བུར་ཙན་དན་གི་
ཝཾ་ཚ་སྟོབས་སྦྱར། །(བསིལ་གསུམ་འབྲུག་རུས་སྟབ་སེང་ཧོང་ལེན་ཨ་རུ་ཀ་ར་སྦྱར་བའི་)བསིལ་གྱིས་རུས་ཚད་
བཅག་ཅིང་གང་རྒྱས་གཏར། །ཚིགས་མིག་ཆུ་སེར་ཆེར་རྒྱས་ཕུག་ཤུལ་བསྲེག །རྨ་ལ་ཆུ་ནན་
བསིལ་བའི་འཇིབས་ཀྱིས་དྲང༌། །དེས་མ་ཐུབ་ན་ཁྲ་བོས་རྣག་ཏུ་དགུག །གྲང་བམ་རླུང་གིས་
ཚིགས་ལ་ཆུ་སེར་སྐྱེ། །རེས་ཚ་རེས་གྲང་རེས་ན་རེས་འགའ་བདེ། །སྐྲངས་དྲོད་གཉིད་ཆུང་
གདོང་སྐྱ་འགུལ་ན་ན། །འདི་ལ་ཁོང་དུ་གསར་བཅུད་རྨ་ལ་དྲོད། །(མི་ཕྱུགས་རྐང་མགོ་སྣ་ཚོགས་ཚ་བ་
གསུམ་ལྕ་འབྲུམ་ཕབས་ཆང་དུ་བཙོས་པའི་)རུས་ཞུན་ཐུར་མ་སྣུམ་ལྡན་ཁྲ་བོས་གདུལ། །ཚིགས་འཁོར་
བ་ལ་སྐམ་འཁོར་གཤེར་འཁོར་གཉིས། །སྐམ་ཁོར་ཚིགས་ཆུ་རླུང་གིས་གཡོས་པ་ཡིན། །
ཚིགས་ཁ་ལྷོད་ལ་སྦོ་ཞིང་ཐུག་ཐུག་གཟེར། །ཚིགས་མདུད་འདྲུས་ལ་འགུལ་དཀའ་རྣག་ཆུ་
མེད། །གཉིད་ཆུང་ཟ་ཟི་མང་ལ་གཙེར་ལྷང་འདོན། །ལུས་དང་གདོང་པ་སྔོ་སྐྱ་སྐབས་སུ་
25-1-478


དངང༌། །འདི་ལ་བཅུད་བཏང་སྣུམ་ལྡན་(ཚ་བ་གསུམ་གཡེར་མ་འུ་སུ་མཚེ་ཕབས་ཤིང་ཚ་མར་ཁུ་སྦང་གར་རྗེན་
ཕྱེའི་)སྤོད་ལུམས་བྱ། །མ་ཐུབ་ཐུར་མས་གསེང་ཤུལ་མེ་ཡིས་མནན། །སྐྱ་སྦྱོར་སྤོད་དང་སྣུམ་
ལྡན་ནན་འབྱར་དང༌། །རྒྱོགས་ཀྱིས་བསྡམ་ཞིང་རྗེས་ལ་(འབྲས་བུ་གསུམ་ཚ་བ་གསུམ་ཆུ་སེར་སྨན་གསུམ་
སྦྲང་དང་སྦྱར་བའི་)སྨན་མར་བྱ། །གཤེར་འཁོར་ཟུངས་ཆུ་མཚོན་གྱིས་དཀྲུགས་པ་ཡིས། །རུས་
པའི་ཚ་བ་སྐྱེས་ཏེ་ལྡད་ཆུ་བསླང་(བ་ལ་དང་པོ་ཟུངས་ཆུ་ལ་མདོག་གཞན་དུ་འགྱུར་ཏེ་ཤེ་རུལ་ལམ་རྣག་དང་འདྲེས་
པའི་སྣ་རིང་འཛག་དེས་ནད་ལྡོག་ཅིང་ལྡད་པས་ལྡད་ཆུ་སྟེ་དྲང་བ་གཅེས་སོ)། །དེ་ཡིས་ཚིགས་ཆུ་རུལ་ནས་རྣག་ཏུ་
འགྱུར། །རྣག་གིས་ཚིགས་བར་ཁེངས་ནས་ཚིགས་མདུད་འཇིག །དེ་ལ་(རྣག་རྗེས་ལ་སྔོ་སྐྱ་དམར་སྐྱ་
སེར་སྐྱ་སྣ་རིང་བྱུང་ན་ཆུ་སེར་གྱི་རྒྱུ་ཡིན་རྣག་མི་ཆད་པར་སྐྱེ་བས་ན)སྐྱེ་ཆུ་(སྐྲངས་ཆེན་པོ་ཤོར་ནས་བེ་སྣབས་སུ་བྱུང་ན་འཆི། 
མ་སྐྲངས་པར་དུད་ཁུར་འཁྲུ་ན་འཆི། །ཤེ་རུལ་ལམ་ཞག་ཅན་ནམ་ཉ་མིག་བྱུང་ན་)འཆི་ཆུ་ཆད་ཆུར་(རྣག་རྗེས་ལ་སྔོ་སྐྱ་སྣ་
ཐུང་བ་བྱུང་ན་རྣག་ཆད་པས་དེ་རྣམས་ཀྱིས་བྱེ་བྲག་)དབྱེ། །དང་པོ་ཟུངས་ཆུ་སྨན་(དོམ་མཁྲིས་ཅུ་གང་ཆུ་སེར་སྨན་
གསུམ་སྤྱི་ཞུར་ཆང་ཕུལ་ཕྱེད་དང་སྦྱར་ལ་བཏང་བ་)དང་(བྲག་ཞུན་མཚེ་སྐྱེར་པ་འོམ་བུ་སོ་སོའི་ཁཎྜ་དང་རྭ་གཞོབ་ཚིག་མ་བག་
ཕྱེ་དུད་པ་སྤྱིན་རྣམས་བྱུག་ཅིང་དེབ་བཏང་ཆིངས་བྱ་རྨ་རུ་ཤེལ་ཏའི་རིང་བུ་གཞུག་པའི་)ཆས་ཀྱིས་བསྡམ། །ལྡད་ཆུ་
ཁོང་སྨན་(ག་བུར་བཟང་པོ་གསུམ་དོམ་མཁྲིས་རུ་རྟ་ཧོང་ལེན་ཀ་ར་སྟབ་སེང་གིས་འཕུལ་ལ། །ག་བུར་ཅུ་གང་ཧོང་ལེན་དོམ་
མཁྲིས་སྤོས་དཀར་ཀ་རའི་ཆུས་)ཁྲུས་དང་ཆས་ཀྱིས་བགྲང་(བ་ལ་ཆུ་ལྕག་བརྡེག་ར་མཉེ་པར་པ་ཏ་ཏིག་ཏ་ཀྱི་ལྕེ་
མཁྲིས་སྣ་སྦྲང་ཞོ་སྦྱར་བྱུགས་བྱེ་རློན་གྱི་འཇིབས་བྱའོ)། །དེ་ཡིས་འདྲོངས་ན་ཚིགས་ལ་རྣག་མི་འཆོར། །
དེས་མ་ཐུབ་ན་སྐྱེ་ཆུ་སྨན་གྱིས་བཅད་(པ་ལ་དོམ་མཁྲིས་ཤེལ་ཏ་ཧོང་ལེན་ཆུ་སེར་སྨན་གསུམ་ཁྱེ་འཐུང་ནུ་ཞོས་
རིལ་བུ་བྱས་ལ་རྨར་བརྫང་ཀ་ར་སྦྱར་བ་སེང་ལྡེང་སྟབ་སེང་ཆུས་འཕུལ་ལ་ཁོང་དུ་བཏང་)། །མཁྲིས་སྣ་རྒྱ་སྐྱེགས་སྒོ་ང་
བག་ཕྱེ་སྦྲང༌། །ཞོ་སྦྱར་བྱུགས་ལ་སྟེང་དུ་ཕྱིང་དེབ་བཏང༌། །མདོ་རུ་བསྡུས་པས་ཚིགས་ཆུ་ཚ་
གྲང་གཉིས། །དམར་སེར་དུག་ཅན་ཤེ་རུལ་ཚ་བ་ཡིན། །སྔོ་ལྗང་འོ་མ་ཆུ་འདྲ་གྲང་བ་ཡིན། །
གཉེན་པོ་རྨ་ཁོང་བསིལ་དྲོད་གཉིས་ཀྱིས་བགྲང༌། །དེ་ཡིས་མ་ཐུབ་འཁོར་ན་ཕྱི་ནང་གཉིས།  །
25-1-479

 
ཕྱི་ཚིགས་འཁོར་ན་མགོ་ན་སྣ་ཁྲག་འཛག །གཉིད་མེད་ཚ་བ་སྐྱེ་ལ་ཟ་ཟི་མང༌། །དང་ག་མི་
བདེ་དངང་འདར་སྟོང་སྐྱུགས་འོང༌། །སོ་བརྩེ་ཉྭ་སྣ་འཕྲིག་ཅིང་མཛུབ་མོ་འགུལ། །བརྐྱང་
བསྐུམ་མི་ཤེས་ཚིགས་མགོ་བེམ་ལ་སྦོམ། །ཁོང་དུ་སྟབ་སེང་བརྒྱད་(འབྲུག་རུས་རུ་རྟ་གི་ཝཾ་ཅུ་གང་གུར་
གུམ་སྤོས་དཀར་ཨ་རུ་ཀ་ར་སྦྱར་བ་གངས་ཆུས་འཕུལ་ལ་བཏང་)པས་རུས་ཚད་བསད། །རྣག་ཆུ་གང་འོང་
བསུས་ལ་ཆུ་ཡིས་བགྲང༌། །ཁྲག་གམ་མཁྲིས་པའི་ནན་(བྱའི་ཟེ་ཁྲག་ར་རོག་གཉའ་ཁྲག་བོང་བུ་གྭ་པའི་
གཞུག་ཁྲག་མ་གལ་ཡོམ་འབོག་ཤུག་པའི་ཐང་ཆུ་རྣམས་བསྲེས་ལ་ལེགས་པར་བྱུག་མཁྲིས་སྣ་རམས་ཚོས་མཚལ་བྲག་ཞུན་ཡུང་
བ་སྦྲང་ཞོ་བག་ཕྱེ་སྦྱར་ལ་བྱུགས་པའི་)སྟེང་ཕྱིང་དེབ་(རྣག་འཁྱིམ་ཚིགས་མིག་ཏུ་ཉིས་བརྩེགས་གསུམ་བརྩེགས་)བཏང༌། །
འཆིངས་ཀྱིས་བསྡམས་ལ་དེ་སྟེང་ཤིང་ཆས་བསྐུར། །ནང་ཚིགས་འཁོར་ན་ཅུང་ཟད་འགུལ་
ཐབས་མེད། །དཔྱི་ལ་སོགས་པའི་རུས་མགོ་མཐོ་མཐོ་རྡོལ། །རྔ་དང་རང་འཐག་ལ་སོགས་
སྐད་ཆེན་སྒྲ། །ནད་པའི་གམ་དུ་ཅུང་ཟད་བྱ་ཐབས་མེད། །གཉིད་མེད་རྣ་གླུ་ལེན་ཞིང་སྨྲེ་
གཅོང་འདོན། །ཁ་ལྕེ་སྐམ་ཞིང་རིངས་པར་ཟ་འཐུང་བྱེད། །ཚོགས་ཚད་ཤེ་རུལ་རྣག་འཛག་
ཁ་རྨ་ལྷོགས། །ཁོང་སྨན་གོང་བཞིན་ཁ་ཟས་བསིལ་བ་ལ། །སྐབས་སུ་ཐོར་བུའི་རླུང་སྣ་ཟས་
ཀྱིས་བསླན། །ཅུ་གང་སྤོས་དཀར་ཀ་རའི་ཆུ་ཡིས་བཀྲུ། །སྒོང་མཁྲིས་མཚེ་ཁུ་ར་མཉེ་བག་ཕྱེ་
དང༌། །སྦང་གར་ར་ཞོ་སྦྱར་ལ་སྙོམས་པར་བྱུག །དེ་སྟེང་ཕྱིང་པ་སྲབ་མཁྲེགས་སྙོམས་པར་
བཏང༌། །ཤེའམ་མེན་ཏྲིའི་འཇག་གིས་སྡོམ་འཆིངས་བྱ། །འཆིངས་ཀྱིས་ཚིགས་མལ་ཆས་སུ་
གཞུག་པ་གཅེས། །རྨ་ཁ་ཁོལ་དུ་བརྟོལ་ལ་ནང་རེ་སྤོ། །ཁ་ཞུན་ནམ་ཟླ་ཚ་གྲང་དུས་དང་
བསྟུན། །དེ་ཡི་སྟེང་དུ་ཤིང་ཆས་བསྐུར་བྱ་སྟེ། །རྒྱོགས་མལ་བཅུད་ལ་བོར་བ་གཅེས་པ་ཡིན། །
དུས་སྦྱར་ཆུ་སྤུ་འབྲུ་ཡི་འདིང་བཅས་ལ། །མལ་གྱིས་ལུས་པོ་ཆམ་ལ་དབབ་པ་གཅེས། །
བརྟས་ནས་ཁ་ཟས་རིམ་གྱིས་གློད་ལ་བཏང༌། །རྣག་ཆུ་ཆད་དཀའ་ཤེད་དམའ་ཡན་ལག་
གྱོང༌། །སྨན་མར་སྦྱར་ལ་ལུས་ཟུངས་བརྟས་པར་བྱ། །ཆུ་རྒྱུས་རེངས་སམ་འཁུམས་པར་གྱུར་
25-1-480


པ་ན༌། བརྐྱང་བསྐུམ་མི་བཏུབ་དེ་ལ་བཅོས་ཐབས་མེད། །ཅུང་ཟད་བཏུབ་ན་དང་པོར་ཆུ་
ཚན་སྦང༌། །དེ་ནས་མེ་ཏོག་སྣ་ཚོགས་ལུམས་སུ་གཞུག །ཡང་ན་སྦང་སྐམ་རྟ་རྐྱང་ལུག་རིལ་
ལུམས། །ཡང་ན་ཕུར་མོ་ཙན་དན་སྨུག་པོ་དང༌། །འོམ་བུ་ཆང་དུ་བཙོས་པའི་ལུམས་ཀྱིས་
བདུག །མཚན་མོ་ལུམས་ལ་ཉིན་པར་བསྐུ་མཉེ་བྱ། །ཤ་མར་བུར་ཆང་བཅུད་ཀྱིས་ཁོག་ནས་
དབུལ། །དེ་རྗེས་བལ་ཚིའི་སྦྱོར་བས་དྲིལ་བྱས་ལ། །ཆང་གར་བཟི་བ་འཐུངས་ལ་རྩེར་གྱིས་
རྒྱངས། །ཆ་ཡིས་མ་འགྲམས་རྗེ་དྲག་བརྐྱང་བསྐུམ་བསླབ། །སོ་རུ་ཚུད་ན་བཀྲུ་བྱུག་བསྲོ་ཞིང་
མཉེ། །འགྲམས་ན་གང་ཉེ་གཏར་ཞིང་ལུམས་(གློ་དྲོན། སྦང་མ། མཁན་པ། ཕབས་སྦྱར་བ་)སུ་གཞུག །
སྤྱིར་ན་བསིལ་གྱིས་མ་ཐུབ་ལོག་གནོན་དྲོད། །དྲོད་ཀྱིས་མ་ཐུབ་དེ་ཡི་ལོག་གནོན་བསིལ། །
ལོག་གནོན་དུས་ཚོད་སྦྱོར་ཤེས་མན་ངག་གནད། །དུས་མིན་ལོག་གནོན་འཁྲུལ་སྦྱོར་རྨོངས་
པ་ཡིན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་ཡན་ལག་གི་རྨ་གསོ་བའི་ལེའུ་སྟེ་བརྒྱད་ཅུ་རྩ་དྲུག་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །ཕྱི་ཡི་རྐྱེན་ལས་ནད་དུ་གྱུར་པ་ཡི། །དུག་ནད་གསོ་བའི་སྐབས་
ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་
པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག དུག་ལ་སྦྱར་བའི་དུག་དང་
གྱུར་པའི་དུག །རང་བཞིན་དུག་དང་རྣམ་པ་གསུམ་དུ་བཤད། །དེ་ལ་དང་པོ་སྦྱར་དུག་ཅེས་
བྱ་བ། །ལྔ་བརྒྱ་དུས་ཀྱི་ཐ་མར་གྱུར་ཙམ་ན། །དུས་ངན་དབང་གིས་སྤྱོད་ངན་སྣ་ཚོགས་བྱེད། །
དེ་དུས་མུ་སྟེགས་བསམ་ངན་སྦྱོར་བ་དར། །རྐང་གཉིས་སྲོག་ལ་དུག་གི་ཆན་པས་འདེབས། །
དེ་ལ་རིགས་དང་འཇུག་ཚུལ་ངོས་བཟུང་དང༌། །བཅོས་ཐབས་ལོག་གནོན་ཕྱི་རྗེས་བཅད་པ་
དྲུག །དང་པོ་དུག་རིགས་བསྐུར་བའི་རྟ་ཡིས་དབྱེ། །མཐོང་བ་ཉི་མའི་ཟེར་ལ་བསྐུར་བ་དང༌།  །
25-1-481

 
དུ་བ་རླུང་གི་རྫི་ལ་བསྐུར་བ་དང༌། །འགོམས་པ་ས་ཡི་རླངས་ལ་བསྐུར་བ་དང༌། །རེག་པ་
སྣུམ་གྱི་རྟ་ལ་བསྐུར་བ་དང༌། །ཁོང་པར་ཟས་ལ་བསྐུར་བ་རྣམ་ལྔའོ། །དེ་ལ་དབྱེ་བ་ཡུལ་དང་
རྫས་སྦྱོར་དང༌། །ནད་ཀྱི་རིགས་དང་ལྡང་བའི་དུས་ཀྱིས་དབྱེ། །ཡུལ་ནི་རྒྱ་གར་རྒྱ་ནག་དོལ་
པོ་མོན། །མཚོན་ཆ་གསལ་ཤིང་ཧོས་དང་རྩི་དང་བཞི། །རེ་རེ་ལ་ཡང་སྟོང་དང་རྩ་བཞིར་སྦྱོར། །
རྫས་སྦྱོར་རིན་ཆེན་རྡོ་དང་ཤ་སྦྱོར་དང༌། །རྩི་སྦྱོར་དངོས་དང་སྔོ་ལས་སྦྱར་བ་དྲུག །རིན་པོ་
ཆེ་ལ་གསེར་ཟངས་འཁར་བ་དང༌། །ལྕགས་དང་དངུལ་ཆུ་ཞ་ཉེ་ལས་སྦྱོར་ཏེ། །ཁྱད་པར་ཞ་
ཉེ་དངུལ་ལ་སྦྱར་བ་མང༌། །རྡོ་ནི་སྦལ་རྒྱབ་ཏི་ཙ་ཅོང་ཞི་མཚལ། །མུ་ཟི་ཕ་ཝཾ་ལོང་བུ་རྣམས་
ལ་སྦྱོར། །ཤ་སྦྱོར་ཤ་ཁྲག་མཁྲིས་པ་སྤུ་རུས་ལྔ། །ཤ་ནི་ཚེ་ཚེ་ར་དང་མཁའ་ལྡིང་བྱ། །ཁྱི་དང་
སྲེ་མོང་བྱང་པ་ཉ་སྦལ་སྡོམ། །སྡིག་པ་རྩངས་པ་ལ་སོགས་སྣ་ཚོགས་སྦྱོར། །ཁྱད་པར་ར་ཁྱི་བྱ་
དང་བྱང་པ་མང༌། །རྩི་སྦྱོར་དུག་རིགས་ཀུན་གྱི་བཅུད་བསྡུས་ཡིན། །དངོས་ལ་སྦྱོར་བ་བོང་ང་
ནག་པོ་དང༌། །བཙན་དུག་ར་དུག་གསུམ་ལ་སྦྱར་བའོ། །སྔོ་ལ་སྦྱར་བ་ཐང་ཕྲོམ་འོལ་མ་སེ། །
ཞོ་ཤ་གཟེ་མ་དུར་བྱིད་ཐར་ནུ་སོགས། །སྣ་ཚོགས་ཀུན་ལ་སྦྱོར་བ་བྱེད་ན་ཡང༌། །གཙོ་བོར་
ཐང་ཕྲོམ་པ་ལ་སྦྱར་བ་མང༌། །དེ་ལ་ལྡན་འདུས་དུ་མར་འགྱུར་བ་ཡིན། །མང་པོར་ཕྱེ་བས་
རྟོགས་པ་ཤིན་ཏུ་དཀའ། །གཉེན་པོ་ལོག་ན་སླར་ཉིད་གནོད་པར་འགྱུར། །མདོར་བསྡུས་ཚ་
སྦྱོར་གྲང་སྦྱོར་གཉིས་སུ་འདུས། །རིན་ཆེན་རྡོ་ལ་སྦྱོར་བ་གྲང་བ་སྟེ། །ཤ་རྩི་སྔོ་སྦྱོར་ཧ་ལས་
གཙོ་བྱས་པ། །གྲང་བར་མི་སྲིད་ཚ་སྦྱོར་དུག་ཏུ་འགྱུར། །འདྲེས་པའི་སྦྱོར་བ་ཚ་གྲང་འཐབ་
པར་བྱེད། །ནད་རིགས་མཛེ་དུག་སྨྱོ་དུག་གྲི་རྒོད་དུག །ཁ་རྨ་རྒྱུ་སྐམས་ཟ་རེངས་ལྟག་དགྱེ་
དང༌། །རྒྱ་ནད་རེངས་འཁུམས་སྲིན་བུ་སྣ་ཟན་དང་། །སྨུག་པོ་འཇུ་སྐེམས་མཁྲིས་ནད་མིག་
སེར་དང༌། །རིམས་ནད་རྩ་བྱེར་ནག་པོ་ཐོག་རྡེག་དང༌། །འཁྱམ་པོ་གཟའ་ནད་གཟེར་ནད་ཆུ་
འགགས་སོགས། །ངོ་མཚར་ན་ལུགས་དུ་མ་འབྱུང་བ་ཡོད། །ལྡང་དུས་ལོ་ཟླ་ཞག་གིས་བྱེད་
25-1-482


པའི་ཕྱིར། །ཞག་དུག་ཟླ་དུག་ལོ་དུག་གསུམ་དུ་འགྱུར། །འཇུག་ཚུལ་ཟེར་ལ་བསྐུར་བ་
མདངས་ལ་འཇུག །རྫི་ལ་བསྐུར་བ་རྩ་སྒོ་སྣ་ནས་འཇུག །རླངས་ལ་བསྐུར་བ་སྣ་སྒོ་བ་སྤུ་
གཉིས། །སྣུམ་ལ་བསྐུར་བ་བ་སྤུའི་སྒོ་ནས་འཇུག །ཟས་ལ་བསྐུར་བ་སོ་ལམ་ཁ་ནས་འཇུག །
དེ་ཉིད་དང་པོ་ཕོ་བའི་ནང་དུ་འབབ། །དུག་དེ་དྭངས་མ་ལ་ཞོན་ནད་བཅས་ཕྱིར། །སྒྲེག་སྐྱུག་
ཟས་ལ་འཁྲེན་པས་མ་ཞུའི་ཚུལ། །དྭངས་མ་མཆིན་པའི་གནས་སུ་ཁྲག་གྱུར་པས། །མཆིན་པ་
རོ་སྟོད་ན་གཟེར་རྩ་རྣམས་འཁྱུག །ཁྲག་ལས་ཤར་གྱུར་སྔོ་སྐམས་ཀོ་ལེར་ན། །ཤ་ལས་ཚིལ་
གྱུར་ཤེད་མེད་གཉིད་མི་སྙོམས། །ཚིལ་ལས་རུས་པར་གྱུར་པས་སོ་སེན་ན། །ཚིགས་གཞི་
རུས་པ་ཁོལ་བུར་ན་བ་ཡིན། །རུས་ལས་གླད་གཞུང་རྐང་དུ་འགྱུར་བའི་ཕྱིར། །མགོ་འཁོར་
ཉི་མ་མི་བཟོད་རྐང་རྣམས་འཁྱུག །སྒལ་ཚིགས་ཁ་བྱེ་བཙིར་ན་ཕན་སྙམ་བྱེད། །གླད་གཞུང་
ས་བོན་དཀར་དམར་གཉིས་སུ་སྨིན། །སྐྱེས་པའི་བཅུད་འཛག་ཆགས་པ་འཆོར་བ་དང༌། །
བུད་མེད་ཟླ་མཚན་འབྱམ་མམ་འཁྱིལ་བར་བྱེད། །ས་བོན་དྭངས་མ་མདངས་གྱུར་སྙིང་ལ་
གནས། །མདངས་འཕྲོག་བརྗེད་ངས་མྱོས་དང་སྙིང་མི་དགའ། །མདོར་ན་དྭངས་མའི་རྟ་ལ་
དུག་ཞོན་པས། །ལུས་ཟུངས་བདུན་དང་དྲི་མ་ཀུན་ལ་ཁྱབ། །གནས་ཀྱིས་བསྒྱུར་བ་ནད་
རྟགས་ཅིར་ཡང་སྟོན། །རླུང་མཁྲིས་བད་ཀན་འདུ་བ་འཁྲུག་པར་བྱེད། །དེ་ཕྱིར་དང་པོ་བར་
དང་ཐ་མའི་དུས། །ངོས་བཟུང་བཅོས་དང་རྗེས་གཅོད་ཤིན་ཏུ་དཀའ། །སྦྱོར་བའི་རིགས་དང་
ལུས་ཀྱི་ནད་ཁམས་དང༌། །ཁ་ཟས་རྟ་ཡིས་བསྒྱུར་བས་དོན་ལ་འབབ། །སྣོད་ལྷུང་རུས་ཞེན་
རྩ་རུ་རྒྱུག་པ་དང༌། །ཤ་པགས་ལ་སོགས་མ་ངེས་གར་ཡང་འབབ། །བརྟག་པའི་ཐབས་ལ་
རྣམ་པ་གསུམ་ཡིན་ཏེ། །སྤྱི་རྟགས་འཁྲུལ་མེད་མི་འགྱུར་ངོས་བཟུང་དང༌། །ནད་རིགས་
བབས་ས་སོ་སོའི་བརྟག་པ་དང༌། །མི་འཚོ་འཆི་ལྟས་བརྟགས་ལ་སྤང་བ་གསུམ། །དང་པོ་
ངོས་བཟུང་ཕྱི་ནང་གསང་བ་གསུམ། །ཕྱི་རྟགས་འདུ་བ་གཞན་དང་རྒྱབ་ཤ་བཅད། །ནང་
25-1-483


རྟགས་རྩ་ཆུ་ན་ལུགས་སློང་རྐྱེན་གྱིས། །ནད་ཀྱིས་ངོས་བཟུང་གསང་བས་ངེས་པ་བསྐྱེད། །
དང་པོ་ནམ་ལངས་མ་ལབས་ཟས་མ་ཟོས། །མཆིལ་མ་མ་དཀྲོགས་རང་ལུགས་ཆུ་གཙང་
བླུག །ཁར་ལྡིང་དུག་མེད་ཞབས་སུ་སོང་ན་ཡོད། །རྒྱ་རུ་ལ་བྱུགས་སྟེང་བཏབ་ཁོལ་ན་ཡིན། །
དཀར་གོང་མེས་བསྲེགས་སྟེང་དུ་(ལྟོ་སྟོང་གི་)མཆིལ་མ་བླུག །བཅག་པས་ནས་རེ་ནག་པོར་
སོང་ན་ཡིན། །བ་མེན་རྭ་ནང་(ལྟོ་སྟོང་གི་)དྲི་ཆུལ་ཆང་བསྲེས་བླུག །བྱི་ཐུར་དཀྲུགས་པས་འཇའ་
ཚོན་འདྲ་ན་ཡིན། །ཡང་ན་བ་མེན་རྭ་ནང་དྲི་ཆུ་བླུག །རི་བོང་སྨ་(བསོན་པོའི་)རས་དཀྲུགས་པས་
ཚིག་ན་ཡིན། །ནད་པའི་དྲི་ཆུར་མུར་གོང་སྐྲ་བཅུག་སྟེ། །ཞག་ལོན་ནང་པར་སྐམ་སྐྱོག་ཚིག་
འདྲ་ཡིན། །དྲི་ཆུར་བྱ་ཡི་ཟེ་བའི་ཁྲག་བླུག་ལ། །བོང་ང་བཏབ་པས་རྣག་ལྟར་སོང་ན་ཡིན། །ར་མེད་དངུལ་ལེབ་སོ་
(དར་བསྐུད་ཀྱིས་)ནང་རྟོད་ལ་བཞག །ནང་པར་མདོག་ཉམས་ཕྱི་བ་དཀའ་ན་ཡིན། །ཆང་ཁྱོར་
གང་དང་ཧུ་ལུ་ཀ་སྦྱར་བ། །སྲོད་ལ་འཐུངས་ལ་མི་སྨྲ་ནང་པར་བལྟ། །ལྕེ་རྙིལ་རྐན་ལ་འཇའ་
ཚོན་སྣང་ན་ཡིན། །རྨ་བྱའི་མདོངས་གཅིག་མར་གྲིལ་ཁྱུར་མིད་བྱ། །ནང་པར་ཆུས་བཀྲུས་
མདོག་མ་ཉམས་ན་ཡིན། །དེ་ལྟར་ཕྱི་ནས་བརྟག་ཐབས་ཀུན་ཚང་ན། །ཡིན་པར་ངེས་ཏེ་མེད་
ཀྱང་ངེས་མེད་ཕྱིར། །ནང་གི་རྟགས་ཀྱིས་ནད་ཀྱི་ངོས་བཟུང་བ། །རྩ་རྒྱུད་མ་ངེས་ཇི་ལྟར་
འདུག་གྱུར་ཀྱང༌། །འགྱུར་ལྡོག་མང་ལ་གདོན་རྩ་འདྲ་ན་ཡིན། །ཆུ་མདོག་མ་ངེས་ཇི་ལྟར་
འདུག་ན་ཡང༌། །འཁར་སྣོད་ཁ་སྦྱར་ས་འོག་རླངས་བསུབས་པས། །ས་རྡོ་རིན་ཆེན་སྔོ་ཡི་ཕྱེ་
མ་འམ། །སྦལ་སྒོང་འདྲ་དང་ནག་རིངས་འཇའ་ཚོན་འོད། །ཡང་ན་དྭངས་སངས་དུག་ཏུ་ངེས་
པ་སྟེ། །ཟངས་ལ་བྱུགས་ན་ནག་པོར་འགྲོ་ན་ཡིན། །ན་ལུགས་ཁོང་དུ་སོང་བའི་ཟླ་གཅིག་
ནས། །གློ་ཆམ་མོད་ཅིང་ཤེད་ཆུང་ཁམས་མི་བདེ། །ཟླ་བ་གཉིས་ནས་ཡང་ཡང་ལྡང་དུབ་བྱེད། །
གསུམ་ནས་གང་དུ་བབས་པའི་གནས་དེར་ན། །བཞི་ནས་ཟས་སྤྱོད་མི་འཕྲོད་རྐྱེན་གྱིས་
སློང༌། །དེ་ཡང་སྦྱོར་བ་ནད་ཁམས་ཟས་ཀྱི་རྟ། །བབས་སའི་དབང་གིས་རྟགས་ལ་ངེས་པ་
25-1-484


མེད། །འོན་ཀྱང་ཕལ་ཆེ་བ་ལ་འདི་རྣམས་འབྱུང༌། །ཟས་ལ་བྲོ་མེད་སྒྱིད་སྐྱུར་ཚིག་པ་ཟ། །
ལུས་ལྕི་སྟོབས་འཆོར་ཤ་སྐམ་ཁ་དོག་སྔོ། །ལྕེ་འགས་བ་སྤུ་བརྩེ་ལ་སེན་རྩ་སྦྲིད། །མགོ་
འཁོར་ཤེས་པ་ཟི་ལ་གོམ་པ་འཁྱོར། །མགོ་དང་ཕོ་མཆིན་ཁ་འཁོར་རོ་རྒྱབ་ན། །ཤ་སྣ་འགུལ་
འཕྲིག་ཉྭ་གཞི་རྐང་རྣམས་ན། །མེ་ཉི་བསིལ་གྲིབ་སྙེག་ཅིང་འདུག་མི་ཚུགས། །རྔུལ་དང་ཚད་
པ་གཉིད་ལ་འཕེལ་འགྲིབ་བྱེད། །མིག་འགྲིབ་ཁ་མངལ་གཡལ་དང་སྦྲིད་པ་མང༌། །སྐབས་
སུ་འཁྲུ་སྐྱུག་དྲི་ཆུ་སྲི་བ་དང༌། །གསང་གནས་མི་ལྡང་སྐབས་སུ་སྙིང་མི་དགའ། །སྟོད་སྨད་
ཡན་ལག་ཁོལ་བུར་ན་ཞིང་འཕོ། །ཟླ་མཚན་མི་རྒྱུ་ལྕེ་ཡི་བད་ཀུན་དག །མིག་འབྲས་སོ་དང་
རྣ་བ་མགོ་བོ་གཟེར། །མཇིང་པ་རེངས་དང་གྲེ་བ་འཛེར་བ་སོགས། །ངེས་མེད་སྣ་ཚོགས་དུ་
མའི་རྟགས་འབྱུང་སྟེ། །ཁ་སོ་རུས་པ་ན་བས་རླུང་དང་འདྲ། །མིག་སེར་ཚ་བ་སྐྱེ་བས་མཁྲིས་
པ་འདྲ། །འཇུ་དཀའ་སྒྲེག་སྐྱུག་འཚིངས་པས་བད་ཀན་འདྲ། །རྩ་འཁྱུག་རོ་སྟོད་གཟེར་བས་
ཁྲག་ནད་འདྲ། །ཟ་འཕྲུག་སྦྲིད་ལ་བེམ་པས་ཆུ་སེར་འདྲ། །གྲང་ཤུམ་ཚིགས་གཞི་ན་བས་
རིམས་དང་འདྲ། །ཁྲག་སྐྱུག་ཕོ་མཆིན་ན་བས་སྨུག་པོ་འདྲ། །སྟོབས་ཆུང་ཤ་པགས་སྐམ་པས་
ས་བདག་འདྲ། །དེ་དག་སྦྱོར་ངན་ཟས་ཀྱི་ན་ལུགས་ཡིན། །ཁྱད་པར་རྩ་དང་ཆུ་གཉིས་རྟག་མི་
ཐུབ། །སྣ་ཚོགས་ནད་སྣ་མང་ཞིང་འགྱུར་ལྡོག་ཆེ། །ཟོས་ཀྱང་མི་ཕན་ཤ་འབྲོས་ལུས་སྟོབས་
འཆོར། །ཕོ་མཆིན་མི་བདེ་ཆམ་འདེབས་སྙིང་མི་དགའ། །དོན་མེད་ན་ཞིང་བྱས་མེད་དར་རེ་
འདྲག །དེ་བདུན་ལྡན་ན་ངེས་པར་གདོན་མི་ཟ། །ཕན་གནོད་བསྟེན་པ་ཉལ་པོ་རྟ་བང་དང༌། །
ཉ་ཕག་ཤ་རུལ་དང་པོ་སྦྱར་བའི་རྟ། །གཏར་ཁྲག་ཚ་བས་ལྡང་ན་ནང་རྟགས་ཡིན། །ནང་
རྟགས་དེ་རྣམས་ཚང་ན་མི་འགྱུར་ཏེ། །རྟགས་མེད་ངོས་མ་ཟིན་ན་གསང་བར་བརྟག །ཆུ་ཆུང་
བ་ཡི་ཚ་བར་ཉ་ཕག་ཤ །བཏབ་པའི་ཚོད་མས་ལྡང་ན་ངེས་པར་ཡིན། །(མིག་མེད་ལྔ་)རཀྵ་ཆུར་
བསྡུས་སྲོད་ལ་ཁྱོར་གང་བཏང༌། །ཁམས་འཁྲུགས་ལུས་ལྕི་ཕྲུམ་སེར་ཁྱེར་ན་ཡིན། །རེ་རལ་
25-1-485


བ་འོར་བཏབ་བཏང་སྐྱུག་ན་ཡིན། །རྣམ་ཡུག་ཙན་དན་དཀར་པོ་སྐྱེར་ཤུན་ཕྱེ། །སྤྱི་ཞུར་ཁུས་
འཕུལ་འཁྲུ་སྐྱུག་གཟེར་ན་ཡིན། །ཨ་རུ་སྤང་རྒྱན་སེ་སྐྱེར་བར་ཞུན་ཐང༌། །བཏང་བས་ཚིགས་
གཞི་པྲན་རྩེ་ན་ན་ཡིན། །ཤུག་འབྲུ་ཤིང་ཀུན་གླ་རྩི་འབྲས་བུ་གསུམ། །བ་ཆུར་བསྐོལ་བཏང་
གར་བབས་ཟུག་ལྡང་ཡིན། །སེ་རྒོད་འོམ་བུའི་ཐང་བཏང་ཆུར་བཙོས་པས། །འདྲིལ་ན་དུག་
ནད་ཡིན་པའི་ངེས་ཤེས་བསྐྱེད། །ཀུན་གྱིས་མ་རྟོགས་སྡུད་སྨན་བཏང་བས་གསལ། །བྱེ་བྲག་
བརྟག་པ་འཇུག་སྒོ་རྫས་རིགས་དང༌། །ནད་རིགས་ལྡང་དུས་བབས་སའི་སྒོ་ནས་བརྟག །དང་
པོ་འཇུག་སྒོ་རིགས་ཀྱིས་བརྟག་པ་ནི། །ཉི་ཟེར་དུ་བ་རླངས་ལས་བྱུང་བའི་དུག །དང་པོར་
མཚུལ་པ་ན་ཞིང་མགོ་བོ་ན། །ལུས་སྤྱིར་སྙོམ་ལ་སྒྱིད་སྐྱུར་ཚིག་པ་ཟ། །ཚིགས་གཞི་བྱིན་ཉྭ་ན་
ཞིང་ཕྲུམ་སེར་ཁྱེར། །ཚབས་ཆེ་གཡོ་སྐམ་ཞ་འཁུམས་གཟའ་ཕོག་འདྲ། །རེག་པ་དང་པོ་
པགས་པ་ཚ་སྦྲིད་ཟ། །ཕྲུགས་རྗེས་འབྲུམ་ཐོར་ཤུ་བ་སྐྲངས་འབུར་འོང༌། །དེ་ནས་ཁ་ཅིག་རྩ་
ལ་བྱེར་བར་འགྱུར། །ཁ་ཅིག་ལྷོག་པ་ཁ་ཅིག་འབྲས་སུ་འགྲོ། །ཐ་མ་ཤ་རུལ་རྩ་ཆད་རུས་པ་
ཟ། །རྫས་རིགས་སྦྱོར་བའི་སྒོ་ནས་བརྟག་པ་ནི། །དབྱིག་དུག་ཤེད་ཆུང་ཤ་སྐེམས་ཇེ་སྔོར་
འགྲོ། །ན་ཚ་མི་ཆེ་ཕོ་བར་ཟུག་ཅིང་གྲང༌། །ཁ་ལ་གཡའ་བྲོ་མཚན་མ་ལྡང་མི་འགྱུར། །མིག་
སེར་སྦོ་སྒྲེག་ཞོ་ཟོས་ཁྲག་ཏུ་འབྱང༌། །རྡོ་སྦྱོར་ཕོ་བ་སྲ་ལྕི་ཡན་ལག་ཕྲ། །གདོང་སྦོ་ཚ་ཚུལ་
སྟོན་ལ་གྲང་བར་ལྡོག །མཆིན་མཁྲིས་ཕོ་མཆེར་སྟེང་དུ་སྐྲན་དུ་འདྲིལ། །ཤ་སྦྱོར་ཕོ་མཆིན་མི་
བདེ་མིག་སྤྲིན་དམར། །མིག་འགྲིབ་མིད་པ་ལྟེབ་ལ་གྲེ་བ་འཛེར། །ཁྲག་ཏུ་ཁྲུ་འམ་ལུད་པ་
ཁྲག་ཏུ་ལུ། །མགོ་དང་སྐེ་མཇིང་ཕྱི་ཤ་ནང་ཁྲོལ་སོགས། །གང་བཏང་དེར་འབབ་ཁོལ་བུར་ན་
བར་བྱེད། །སྤུ་སྦྱོར་རྒྱུ་ཞབས་སྲིན་བཞིན་འཁྱུག་ཅིང་ན། །རྒྱུ་ཁྲག་འདྲེས་ཤིང་ནང་རྩ་གཟེར་
བ་ཡིན། །རྩི་སྦྱོར་གཞོགས་ཕྱེད་ན་ཞིང་ངོས་ཤ་སྐམ། །མགོ་རྐང་ཚིགས་གཞི་ན་ཞིང་ཕྲུམ་
སེར་ཁྱེར། །ཚ་བ་སྐྱེ་ཞིང་མིག་འགྲིབ་མཆིན་དྲི་འཁོར། །དངོས་ལས་སྦྱར་བ་ལྕེ་དང་སེན་རྩ་
25-1-486


སྦྲིད། །མིག་འགྲིབ་སོ་ནག་ལྕེ་མཆུ་འགས་པ་ཡིན། །སྔོ་སྦྱོར་རུ་ཤིང་ན་ཞིང་ཆུ་བ་རེངས༌། །
ལུས་གྲང་སྙིང་འདར་སེམས་འཕྱོ་འགྲོ་ན་འབུབ། །རང་གིས་ཚོར་བས་ཁ་མཆུ་སྐྲངས་སྙམ་
བྱེད། །མདོར་བསྡུས་ཚ་གྲང་སྦྱོར་བ་རྣམ་པ་གཉིས། །ཚ་སྦྱོར་རྩ་གྲིམས་ཆུ་སྨུག་ཀུ་ཡ་མཐུག །
རུས་ཚིགས་ཉྭ་གཞི་མགོ་ན་གྲང་ཤུམ་བྱེད། །རོ་སྟོད་ཕོ་མཆིན་གཟེར་ཞིང་ཁ་ལྕེ་སྐམ། །མཆུ་
འགས་སོ་ནག་ཁོང་པ་ཚ་འཁྲུག་བྱེད། །ཤེས་པ་ཟི་ལ་རྨི་ལམ་མང་བ་སྟེ། །གཙོ་བོར་མཆིན་
མཁྲིས་གཉིས་ལ་འབབ་པ་ཡིན། །གྲང་སྦྱོར་སྦོ་སྒྲེག་ཁ་ཟས་མི་འཇུ་འཁྲེན། །རྩ་དལ་ཆུ་སྔོ་ལྕེ་
སྐྱ་གདོང་པ་གཡོ། །མཇུག་ཏུ་སྐྲན་དུ་འདྲིལ་ལམ་ཆུ་རུ་ལྡོག །གཙོ་བོར་མ་ཞུ་ཕོ་བར་འབབ་
པ་ཡིན། །སྦྱོར་བ་འདྲེས་པ་ཕོ་མཆིན་གཉིས་ཀར་འབབ། །གྲང་ཡང་ཚ་ཚུལ་ཚ་ཡང་གྲང་ཚུལ་
སྟོན། །ན་ལུགས་སྒོ་ནས་བརྟག་པ་མཛེ་དུག་ནི། །མཛེ་ཁྲག་བསེ་ཞོས་ཕལ་ཆེར་གཙོ་བྱས་
པས། །འགུལ་འཕྲིག་ཟ་བེར་རྩ་འཁྱུག་རུས་རྐང་ན། །གྲེ་བ་མི་བདེ་ཤ་སྦོ་ཐོར་ཤུ་འོང༌། །རུས་
ལ་བབས་པ་ཕོ་མཛེ་སྐམས་ནས་འཆི། །ཤ་དང་རྩར་བབས་མོ་མཛེ་རུལ་ནས་འཆི། །སྨྱོ་དུག་
ཕལ་ཆེར་གོང་མོའི་ཁྲག་དང་ནི། །ཐང་ཕྲོམ་པ་ཡིས་སྦྱོར་བའི་གཙོ་བྱས་མང༌། །སྟོད་རྒྱངས་
ཤེས་པ་འཕྱོ་ཞིང་ཤུ་ཡིས་འདེབས། །འདར་ཞིང་འཁྲོག་རྡེག་ཁ་ནས་སྣ་ཚོགས་འདོན། །ཡང་
ན་སོ་འཆའ་འགྱེལ་ཞིང་དྲན་མེད་འབོག །གྲི་དུག་ཚ་བསིངས་སྦུར་བ་རྒྱ་ཤོའི་འབྲུ། །འདྲེ་
འདར་གླད་པ་གྲི་ཁྲག་སོགས་ལ་སྦྱོར། །རྟ་སྲི་ཆུ་སྲི་རྦབ་སྲི་གཡང་སྲི་དང༌། །ལྕེབ་སྲི་སོགས་
ཀྱིས་འཆི་བར་བྱེད་པ་སྟེ། །སྐབས་སུ་མགོ་འཁོར་ལྡང་ཞིང་སྙིང་མི་དགའ། །འཁྱགས་ན་སྟོད་
སྒང་དྲན་པ་བག་རེ་ཉམས། །གཡའ་ཟ་རྩ་སྦྲིད་འགྲོ་སྙིང་འདོད་པ་འབྱུང་། །ཏིག་ཏའི་ཐང་
བཏང་ཉི་མ་ལ་ཉལ་བས། །མིག་ལ་འོད་(ཟེར་སྣ་ཚོགས་)འཕྲོ་དྲི་ཆུ་ཁྲག་ཏུ་འབྱུང་། །ཁ་རྨ་རྒྱུ་
སྐམས་རིན་པོ་ཆེ་ལ་སྦྱར། །ཁ་ལ་རྨ་འབྱུང་ཟས་སྐོམ་ཟ་མི་ཤེས། །རྒྱུ་མ་སྐམས་ན་ཟུག་ཆེ་དྲི་
མ་འགག །ཟ་རེངས་ལྟག་དགྱེ་ལྟོ་ཆེ་མཇིང་པ་རེངས། །རྒྱ་ནད་རེངས་འཁུམས་ཁྲག་ཏུ་
25-1-487


བཤལ་བ་ལ། །ལག་རྐང་རེངས་འཁུམས་མི་ཡིས་བརྐྱང་བསྐུམ་དགོས། །སྲིན་བུ་སྣ་ཟན་
རྟག་ཏུ་སྲིན་ནད་ལྡང༌། །སྨུག་པོ་འཇུ་སྐེམས་སྦྱོར་བ་འདུས་པའི་ནད། །ཕོ་མཆིན་མི་བདེ་ཁྲག་
འཁྲུ་སྣ་ཁྲག་འཛག །ཤ་སྐམས་ཤེད་མེད་མཆིན་པ་རུལ་ནས་འཆི། །མཁྲིས་པ་མིག་སེར་གི་
ཝཾ་ག་བུར་སྦྱར། །མཁྲིས་ཡུལ་རྒྱས་ནས་མིག་སྤྲིན་ཤ་མདངས་སེར། །རིམས་ནད་རྩ་བྱེར་
རིམས་ཀྱི་ན་ལུགས་འདྲ། །ནག་པོ་ཐོག་རྡེག་དུག་སྦྲུལ་མགོ་ལ་སྦྱར། །མིག་སྦྲིད་གླད་དཀྱིལ་
གཟེར་ལྡང་བསུས་པ་སྦོ། །འཁྱམ་པོ་གཟའ་ནད་འཕྲལ་དུ་རེངས་ཀྱིན་འགྱེལ། །རྐང་ལག་
བཤལ་སྦྲིད་མིག་འབོར་ཤ་སྐམ་འཆི། །གཟེར་ནད་ཆུ་འགགས་བྱང་པ་ལ་སྦྱར་བས། །རྩ་
མིག་རྒྱུ་ཞབས་གཟེར་ལ་དྲི་ཆུ་འགག །གཞུག་ལ་རྩར་བྱེར་ཁྲག་སྐྱུག་སྣ་ཁྲག་འཛག །དེ་ལ་
སོགས་ཏེ་སྦྱོར་བ་སྣ་ཚོགས་ལས། །ནད་རིགས་སྣ་ཚོགས་དུ་མ་འབྱུང་བར་འགྱུར། །ལྡང་དུས་
སྒོ་ནས་བརྟག་པ་ཞག་གི་དུག །སྦྱོར་བ་མ་སྨིན་རྣོ་འམ་རྐྱེན་ཕྲད་པས། །གློ་བུར་ལངས་ཏེ་མ་
ཞུ་ལྟ་བུ་འམ། །སྨུག་པོའམ་རིམས་ལྟར་ན་བ་ཕལ་ཆེ་སྟེ། །འཕྲལ་དུ་མིག་ལོང་ལྕེ་མཆུ་འགས་
པ་དང༌། །རེངས་སམ་འགྱེལ་ཞིང་དྲན་པ་ཉམས་ཀྱང་སྲིད། །ཟླ་དུག་ཤ་སྐམས་སེན་མོའི་
བཀྲག་མེད་ངལ། །མཆུ་སྐམ་སོ་ནག་མིག་འགྲིབ་རྣ་བ་འུར། །ཁོང་སྦོ་ཚིགས་གཞི་སྨུག་པོའི་
ཐིག་ལེ་འོང༌། །ཞོ་འཐུངས་སྦོ་ཞིང་ཆང་འཐུངས་ཟ་ཟི་མང༌། །ལོ་དུག་ཤ་སྐམས་མཆིན་པ་
འཕྱོངས་ནས་ན། །སྤྲོ་ཐུང་ངུ་སྙིང་འདོད་ཅིང་རྣ་བ་འུར། །མཁལ་མ་གྲང་ཞིང་ལྟོ་ཆེ་བག་རེ་
རྔུལ། །སྲིན་བུ་ལྡོག་ཅིང་ཆང་འཐུངས་ལུས་ཉམ་ཆུང༌། །སོ་ན་རྩིབ་ལོགས་འཕོ་ཞིང་ལྟག་པ་
དགྱེ། །གཉིད་མེད་ཕོ་བ་གཟེར་དང་ཟ་འཕྲུག་བྱེད། །བབས་ས་གནས་ཀྱི་སྒོ་ནས་བརྟག་པ་
ནི། །སྙིང་ལ་བབས་ན་ལྕེ་ལྡིབ་ཤེས་པ་འཕྱོ། །རྔུལ་ཆེ་སྦྲིད་པ་མང་ལ་ཤུགས་རིང་བྱེད། །གློ་
བབས་སྣ་འགགས་གཡལ་ལ་སྦྲིད་པ་འབྱུང༌། །གློ་མང་གྲེ་བ་འཛེར་ལ་སྐྱིགས་བུ་མང༌། །
མཆིན་པར་བབས་ན་མིག་ཞུ་མཆིན་དྲི་གཟེར། །མཁྲིས་སྐྱུག་འཚོགས་མ་ལྕི་ལ་ཁ་ཆུ་འཛག །
25-1-488

 
མཆེར་བབས་མཆུ་ན་སྦོ་ཞིང་རྩིབ་ཐུང་ན། །སྣ་ལྡང་གྲངས་ན་འགྱིང་ཞིང་ཚ་ན་འགྱུང༌། །
མཁལ་བབས་མཁལ་རྐེད་གྲང་ཞིང་མཁལ་རྩ་ཁྲིད། །རྐང་པ་ལྕི་ལ་ཆུ་སྲི་རྣ་བ་འུར། །སྣོད་
དུ་ལྷུང་ན་སྒྲེག་སྐྱུག་ཟས་མི་འཇུ། །རྒྱུ་ལོང་སྦོ་འཁྲོག་ཚ་འགྱུང་འཁྲུ་བ་ཡིན། །ཤར་བབས་
འགུལ་འཁྲིག་གྲིམས་ཆུང་པགས་པ་སྔོ། །རྩ་གྲིམས་རྩ་རྣམས་འཁྲིད་འཁྱུག་སྦྲིད་པ་སྟེ། །ཆུ་
བ་ལ་བབས་བཤུལ་རེངས་ཡན་ལག་འཁུམ། །རུས་བབས་ཚིགས་པ་ན་ཞིང་མཉེས་ན་ཕན། །
ཚིགས་ཁ་འཁོར་སྐྲངས་བརྐྱང་བསྐུམ་དཀའ་བ་དང༌། །རུས་པ་ཐམས་ཅད་སྐམ་ཁོལ་བྱེད་པ་
ཡིན། །དེ་ལྟར་བྱེ་བྲག་སོ་སོའི་ནད་རྟགས་རྣམས། །གཞན་དང་འཁྲུལ་ཕྱིར་ངེས་པ་རྙེད་
དཀའ་བས། །ཕྱི་ནང་གསང་རྟགས་གསུམ་གྱི་བར་ནས་འདོན། །དེ་ཡིས་འཁྲུལ་མེད་ངེས་
པར་གཏན་ལ་ཕེབས། །ཤིན་ཏུ་གསང་བའི་བརྟག་པ་འདི་ནི་གསང༌། །བསེ་རུ་བོང་ང་དཀར་
པོ་ཨ་རུ་ར། །ཞིབ་བཏགས་ཆུས་སྦྱངས་ན་མ་འགའ་རུ་བཏང༌། །ཆུ་དེ་སེམས་ཅན་གང་བསླུད་
མངས་ན་འཆི། །འདི་ནི་ཤིན་ཏུ་གསང་བའི་གསང་བའོ། །མི་ཐུབ་འཆི་ལྟས་ཤ་ཟད་མུར་གོང་
རྡིབ། །དང་ག་འགགས་སམ་ཟས་སྐོམ་ཟོས་ཚད་སྐྱུག །ལྕེ་རྙིལ་སེན་མོའི་བཀྲག་ཤོར་ལུས་
སྟོབས་ཟད། །འབྲུམ་པ་ནག་པོས་ཁྱབ་དང་རྔམ་པ་ཐུང༌། །(འདུས་སོ་གསུམ། མཆིན་གསང་བཅུ་དྲུག མདོ་
ཕོ་བ་བྲང་གཞུང་)གནས་ལྔར་སྐྲངས་དང་སྨྱོ་དུག་སྨན་མི་ལེན། །ནང་གྲོལ་རུལ་འཁྲུ་གསོན་ཁྲག་
འཁྲུ་སྐྱུག་བྱེད། །དེ་རྟགས་ལྡན་ན་མི་འཚོ་སྤང་བར་བྱ། །གསོ་བའི་ཐབས་ལ་སྤྱི་དང་བྱེ་བྲག་
གཉིས། །སྤྱི་ལ་དུག་ནད་སྨན་གྱིས་གསོ་བ་དང༌། །དུག་ནད་དུག་གིས་གསོ་དང་སྔགས་ཀྱིས་
གསོ། །དང་པོ་ཚ་སྦྱོར་གྲང་སྦྱོར་རྣམ་པ་གཉིས། །ཚ་སྦྱོར་གསར་རྙིང་ལུས་ཟུངས་སྟོབས་དང་
སྦྱར། །གང་ཡང་དང་པོ་སྨན་གྱིས་གཞི་བཟུང་ལ། །ཟུངས་བཟང་གསར་པ་བསྡུ་བསད་སྦྱང་
བས་བཅོས། །ཟུངས་ངན་རྙིངས་ན་བསྡུ་བསད་ཆིག་ཆོད་བྱ། །དང་པོ་ཚོགས་བསགས་གནོད་
པའི་གདོན་ཡང་བཅོས། །སྔ་དྲོ་ཟས་བསྲུང་ཕྱི་དྲོ་ནན་ཏུར་བསྐྱེད། །ཉ་ཕག་བཤུལ་ཤ་སྔོ་ངད་
25-1-489


རུལ་སྐྱུར་སྤང་། །བ་ལང་རྣ་དགོ་ཤ་གསར་ཁུར་མངས་དང༌། །འབྲས་དང་ཡོས་ཐུག་ཇ་དང་ཆུ་
བསིལ་བསྟེན། །ཟུངས་ངན་དྲོད་ཆུང་རྒས་ལ་ལུག་ཤ་གསར། །སྐམ་ཡིབ་ཆང་གསར་ཚོད་
དང་སྦྱར་ཞིང་བཏང༌། །མེ་ཉི་ངལ་དུབ་ཉལ་པོ་བཞོན་པ་དང༌། །སྨྲ་བརྗོད་རླན་གྲང་ཉིན་
གཉིད་སྤང་བར་བྱ། །ཚད་པ་ཅན་ལ་ཨ་རུ་གསེར་མདོག་ཐང༌། །གྲང་བ་ཆེ་ལ་འབྲས་གསུམ་
པི་པི་ལིང༌། །ཁྱོར་རེ་སྔ་དྲོ་ཞག་བདུན་བར་དུ་བསྟེན། །དེ་ཡིས་འདུ་བ་སྙོམས་ཤིང་ནད་ཟུངས་
འབྱེད། །རྔུལ་ཆད་ལུས་ཡང་དང་ག་བདེ་བ་དང༌། །བྱ་བ་ནུས་སྙམ་བྱེད་ན་སྨིན་པ་ཡིན། །དེ་
ནས་མ་བྱེར་གསར་ལ་བསྡུ་མི་དགོས། །རྙིངས་ཤིང་བྱེར་བར་གྱུར་ན་བསྡུ་བ་གཅེས། །སྡུད་
བྱེད་སྨན་ལ་སྤྱི་དང་བྱེ་བྲག་གཉིས། །དང་པོ་ལུག་ཁྲག་འོ་མ་གཉིས་བཙོས་ལ། །དེ་ལ་ལུག་
རུ་ཁ་ཚར་བཏབ་པས་སྡུད། །ཡུངས་ཀར་བོང་ང་རེ་རལ་ཨ་རུ་ར། །ཛཱ་ཏི་ནཱ་ག་པུཥྤ་བ་ལང་
ཁྲག །ལྕུམ་རྩ་གླད་པ་མ་རུལ་ཚྭ་དང་སྦྱར། །མི་ཕྱུགས་གསོན་ཁྲག་ལྡུམ་གསུམ་བར་ཤུན་
དང༌། །ཆུ་ཆུང་ཡུངས་ཀར་ཕྱེ་མ་སྦྱར་ལ་བཏང༌། །དཀར་པོ་ཆིག་ཐུབ་དབང་པོ་ལག་པ་དང༌། །
ཡུངས་ཀར་ཕག་ཁྲག་བི་ཥ་ཀ་ར་སྦྱར། །ཕག་ཁྲག་དབང་པོ་ལག་པ་ཡུངས་ཀར་དང༌། །གླད་
པ་སྦྱར་ཏེ་མ་འདུས་བར་དུ་བཏང༌། །འདུས་རྟགས་ལུས་ལྕི་སྒྱིད་སྐྱུར་དང་ག་འགག །ཁ་ལྕེ་
སྐམ་ལ་ཕོ་བ་ཚ་རུབ་བྱེད། །དེ་རྟགས་མེད་ན་མ་འདུས་སྨན་ཐུན་བསྐྱེད། །ཕོ་བར་རུས་དུགས་
རྒྱུ་ཞབས་བྱེ་དུགས་བྱ། །མཐིལ་བཞི་བསྐུ་མཉེ་མན་ངག་(དུག་སྣ་གསུམ་ཨ་རུ་བདུན་འགྱུར་དྲི་ཆུའི་)
རིལ་བུ་བཏང༌། །དེ་ཡིས་འདུས་ནས་གཉེན་པོའི་སྨན་གྱིས་བསད། །མ་འདུས་བསད་པ་རི་
དྭགས་ཐང་དེད་འདྲ། །བྱེར་བ་མི་གསོད་བཅོས་དཀའ་ཡུན་དུ་སྦྱོང༌། །འདུས་ན་མེ་སྟེང་ཆུ་
བཞིན་ཆོམས་པ་སྐྱེན། །བྱེ་བྲག་སོ་སོའི་སྡུད་བྱེད་བསྟན་པ་ནི། །ཛཱ་ཏི་གུར་གུམ་ལྕུམ་རྩ་ལི་ཤི་
ཡིས། །ཉེས་པ་གསུམ་ལ་བབས་པ་སྡུད་པར་བྱེད། །མ་ནུ་བཞི་ཐང་སྟོད་དུ་བྱེར་བ་སྡུད། །གྲོ་
སྲན་བོང་ཁྲག་སྣོད་བཞིར་བྱེར་བ་སྡུད། །ཚར་འབྲུམ་(མི་དོམ་མཁྲིས་པ་དབང་ལག་)བཞི་པས་ཡན་
25-1-490


ལག་བྱེར་བ་སྡུད། །ཁྲ་མེན་སྦྱོར་བས་(ར་མཆེར་རྟ་སྙིང་མཁལ་མ་ཞོ་ཤ་སྙིང་ཞོ་ཤ)ཚིགས་ལ་བྱེར་བ་སྡུད། །
རྒྱལ་བློན་(ག་བུར་ཅུ་གང་གུར་གུམ་)གསུམ་གྱིས་གྲེ་བར་བྱེར་བ་སྡུད། །ཏིག་ཏ(་སླེ་ཏྲེས་གསེར་མེ་)
གསུམ་པས་སོ་ལ་བྱེར་བ་སྡུད། །འདུས་ནས་བསད་ཐབས་རྣམ་པ་གསུམ་ཡིན་ཏེ། །སྔོ་སྦྱོར་
རྩི་སྦྱོར་རིན་པོ་ཆེ་དང་གསུམ། །སྟོབས་བཟང་ཚད་པ་ཆེ་ལ་ཕོ་བ་བཟང་། །གཉེན་པོ་བདུད་
རྩི་སྔོ་སྦྱོར་བསྔགས་པ་ཡིན། །རེ་རལ་ཧོང་ལེན་འོམ་བུ་སྤང་རྩི་དོ། །འཁོར་དུ་རྣམ་པར་སེར་
པོ་ཁྲག་རྐང་དང༌། །ཏིག་ཏ་སྤང་རྒྱན་སྐྲ་བཟང་གང་ག་ཆུང༌། །ར་མཉེ་བསྐོལ་ཁུ་སུམ་ཡར་
ཡུན་དུ་བསྟེན། །ཚ་བ་ཤིན་ཏུ་ཞེན་ཆེ་རྣམ་པར་དང༌། །རེ་རལ་སྤང་རྩི་འོམ་བུ་ཧོང་ལེན་དང༌། །
ཏིག་ཏ་གཙོ་བོ་དྲུག་པ་དེ་ཡི་འཁོར། །བྲག་ཞུན་བོང་ང་ཞིབ་བཏགས་གྲང་སིངས་བྱ། །གང་
ལ་བབས་པའི་ཁ་འཛིན་(དོན་ལ་བཟང་དྲུག་ཤ་ལ་ཨ་རུ་རུས་ལ་སྤྱི་ཞུར་རྩ་ལ་དོམ་མཁྲིས་)གྲོགས་དང་བཅས། །
འཇུ་ཚོད་སྦྱར་ལ་མ་བརྗེད་རྒྱུན་པར་བཏང༌། །འཇུ་དཀའ་སྐབས་སུ་རྒྱམ་ཚྭ་གསུམ་པ་
བསྟེན། །ཚ་སྟོབས་ཆག་གམ་འོན་ཏེ་སྣོད་དུ་འདུས། །ཨ་རུ་ལྕུམ་རྩ་དུར་བྱིད་བསྣན་ལ་སྦྱང༌། །
ཡང་ན་གཙོ་བོ་དྲུག་དང་སྤང་རྒྱན་དཀར། །སེ་སྐྱེར་བྲག་སྤོས་ཐ་རམས་གང་ག་ཆུང༌། །གང་
བབས་ཁ་འཛིན་(སྙིང་ལ་སྙིང་ཞོ་ཤ་གློ་ལ་སྲོ་ལོ་མཆིན་པ་ལ་གུར་གུམ་མཆེར་པ་ལ་ཀ་ཀོ་ལ་མཁལ་མ་ལ་ཙི་ཏྲ་ཀ་ཤ་ལ་
ཡུང་བ་རུས་པ་ལ་སྤྱི་ཞུར་རྩ་ལ་འབྲི་ཏ་ས་འཛིན་)བཅས་པ་ཐང་དུ་བཏང༌། །ཡང་ན་སྔོ་ཡི་མང་སྦྱོར་ཐུན་
མོང་བ། །གཙོ་བོ་གཉེན་པོ་གྲོགས་དང་དམག་མིར་བཅས(པ་ནི་གཙོ་བོ་དྲུག་པ། །གཉེན་པོ་བོང་ང་གསུམ་
ཨ་བ་ཁུར་རྩ་ལྔ། །གྲོགས་གང་ག་ཆུང་སྟག་ཤ་ལུག་མིག་བྱི་ཚེར་གོ་སྙོད་པར་པ་ཏ་ཁྲག་རྐང་བདུན། །དམག་མི་སྲོ་ལོ་རེ་སྐོན་ཀྱི་
ལྕེ་དེ་བ་སུམ་ཅུ་ཏིག་དར་ཡ་ཀན་སྒོང་ཐོག་ལྕང་མ་བརྒྱད)། །ཕྱག་བརྙན་ཁ་འཛིན་(སེ་རྒོད་སྐྱེར་ཤུན་ལུག་རུ་གསུམ། 
པྲི་ཡང་ཀུ་ལྕགས་ཕྱེ་སྲོ་ལོ་ཨ་ཀྲོང་སྟར་བུ་ལྔ་དང་)བཅས་པའི་སྦྱོར་བ་ལ། །ནད་གཞི(འི་རླུང་ལ་རུ་རྟ་མཁྲིས་ལ་
གསེར་མེ་བད་ཀན་ལ་མ་ནུ་ཁྲག་ལ་བ་ཤ་ཀ་ཆུ་སེར་ལ་སེང་ལྡེང་)དོན་(ལ་བཟང་དྲུག་)སྣོད་(ལ་དང་པོ་མ་སྨིན་པ་དང་ཐ་མ་
གྲང་བ་སྐྱེས་ན་བཏང༌། བར་དུ་ཚ་བ་འབྱུང་དུས་སུ་མི་བཏང༌། སྦོ་འཁྲོག་བྱེད་ན་སེ་འབྲུ་ཚ་བ་གསུམ་བསྣན་)ཤ་(ལ་ཨ་རུ་ཡུང་
25-1-491


བ་)རྩ་(ལ་དོམ་མཁྲིས་འབྲི་ཏ་)རུས་པ་(ལ་རྡོ་བཞི་མཚལ་)དང༌། །གྲེ་བ་(ལ་ལི་ཤི་སྤང་རྒྱན་ཨ་རུ་)གང་ལ་བབས་
པའི་སྣ་ཁྲིད་སྦྱར། །བསྡུས་གྲང་ཡུན་རིང་སུམ་ཡར་བཏང་བར་བྱ། །དེ་ལ་སོགས་པའི་སྔོ་སྦྱོར་
གང་ལ་ཡང༌། །(པི་ལིང་བྲག་ཞུན་གཉིས་ཀྱི་)དུག་འདོན་(སྐྱུ་རུས་)ནུས་སྐྱེད་(ཨ་རུས་)ལུས་ཟུངས་བསྲུང་
བ་གཅེས། །ཐང་རྗེས་འཁྲུར་མ་འདོད་ན་གྲོགས་པོ་(ལྕུམ་རྩ་དུར་བྱིད་མཆུ་རིང་)བསྣན། །གཟེར་
ཟུག་གང་བྱུང་གཙོ་བོ་དྲུག་གིས་བསྡུ། །ཚ་བ་ཆོམས་དཀའ་དེ་རྣམས་གང་ལ་ཡང༌། །སྦལ་
རྒྱབ་མཚལ་དང་རྣམ་པར་ཁ་ཚར་གདབ། །ནད་ཀྱིས་སྨན་བླངས་ལུས་ཡང་དང་ག་བདེ། །
སྙིང་རྩ་སེང་ན་ནད་འགོ་ནོན་པ་ཡིན། །ཡང་ན་བསླང་ནས་འཕྲལ་དུ་འཐབ་པ་ལ། །རྗེས་ལ་
གོང་གི་རྟགས་ལྡན་ཕལ་ཆེར་འབྱུང་། །བསྲིངས་ཀྱིན་གནོད་ན་མི་འཕྲོད་སྤང་བར་བྱ། །ཟུངས་
ངན་རྒས་སམ་དྲོད་ཆུང་དང་ག་ཞན། །དེ་ལ་རྩི་སྦྱོར་ཕྱེ་མས་བཅོས་པ་ཡི། །རྒྱལ་བློན་ཉི་ཤུ་རྩ་
བདུན་སྦྱར་བ་ནི། །བསེ་རུ་མུ་ཏིག་ལྕགས་ཕྱེ་ཚ་ལ་མཚལ། །ཨ་མྲྀ་ཏ་དང་གི་ཝཾ་བཟང་པོ་དྲུག །
རེ་རལ་འོམ་བུ་སེ་རྒོད་སྐྱེར་བར་ཤུན། །ཙན་དན་ཨ་རུ་སྤྱི་ཞུར་བོང་ང་དཀར། །མི་དོམ་ཕག་
མཁྲིས་ཕྱ་ཚན་རྣམ་པ་གསུམ། །རིན་ཆེན་རྩི་སྔོ་དངོས་དང་ཤ་སྦྱོར་འཇོམས། །གང་རྟགས་
ལྡན་པའི་གཉེན་པོ་ཆ་བསྐྱེད་ལ། །སྟག་ཤ་གོ་སྙོད་ཀྱི་ལྕེ་ཤིང་མངར་ཚོས། །ཡུང་བ་གླ་རྩི་དྲི་
ཆེན་བྲག་ཞུན་དང༌། །མི་ཤ་ལྕགས་ཞུན་ཕྱེ་མ་ཀ་ར་སྦྱར། །སེང་ལྡེང་ཁུ་བས་འཕུལ་བས་དུག་
རྣམས་འཇོམས། །ཚ་བ་ཆེ་ན་དེ་སྟེང་ག་བུར་བསྣན། །ཡང་ན་རིན་ཆེན་གཉེན་པོ་བྲག་ཞུན་
དང༌། །ཚ་ལ་ཨ་རུ་ར་གསུམ་རྡོ་སྦྱོར་ལ། །ཟེ་ཚྭ་རྨ་བྱའི་ཤ་དང་པི་པི་ལིང༌། །ཤ་ལ་རོ་ཚན་
གསུམ་དང་མི་རའི་མཁྲིས། །དངོས་ལ་སྦྱར་བའི་གཉེན་པོ་ཨ་རུ་ར། །བོང་དཀར་བོད་ཚ་སྟབ་
སེང་ཙན་དན་དཀར། །སྔོ་ལ་ལྡུམ་བུ་(རྒྱལ་བཙུན་བློན་པོ་རེ་རལ་)གསུམ་དང་བོང་ང་དཀར། །རྩི་ཡི་
གཉེན་པོ་གླ་རྩི་བཟང་པོ་དྲུག །གང་རྟགས་ལྡན་པའི་གཉེན་པོ་ཆེར་བསྐྱེད་ལ། །དེ་འཁོར་
བསེ་རུ་ཆོས་སྨན་ཡུང་བ་དང༌། །དཔའ་བོ་དཀར་སེར་ཁྱུང་སྡེར་དཀར་སྨུག་དང༌། །འོམ་བུ་
25-1-492


སྐྱེར་པ་བྲག་སྤོས་ཤིང་མངར་ཚོས། །ལྕགས་ཕྱེ་སེང་ཕྲོམ་རྣམ་པར་སོ་མ་ར། །མཚལ་དཀར་
སྤང་རྒྱན་རམ་བུ་ཀ་རའི་ཕྱེ། །ག་བུར་ཙན་དན་གི་ཝཾ་ཚ་སྟོབས་སྦྱར། །ནང་ནུབ་བྲག་ཞུན་ཁུ་
བས་འཕུལ་ལ་བཏང༌། །ཡང་ན་བྲག་ཞུན་གླ་རྩི་རྨ་བྱའི་ཤ །མི་དང་ར་ཡི་མཁྲིས་པ་རོ་ཚན་
གསུམ། །རེ་རལ་བོང་ང་དཀར་པོ་བཟང་པོ་དྲུག །དེ་འཁོར་ག་བུར་གི་ཝཾ་ཙན་དན་གཉིས། །
བསེ་རུ་ཨ་རུ་ར་དང་ཆོས་སྨན་དང༌། །ཡུང་བ་སྤང་རྩི་འོམ་བུ་སྐྱེར་པ་དང༌། །ཀྱི་ལྕེ་བྲག་སྤོས་
ཤིང་མངར་ཧོང་ལེན་དང༌། །སྲོ་ལོ་སེང་ཕྲོམ་རྣམ་པར་བ་ལེ་ཀ །སོ་མ་ར་ཛ་སྤང་རྒྱན་གང་ག་
ཆུང༌། །དཔའ་བོ་དཀར་སེར་ཁྱུང་སྡེར་དཀར་སྨུག་དང༌། །ཚ་ལ་ལྕགས་ཕྱེ་མཚལ་ཚོས་རམ་
བུ་རྣམས། །ཀ་ར་སྦྱར་བས་དུག་ཚད་རོལ་དུ་གསོད། །ཡང་ན་མི་དོམ་སྤྲེ་ཕག་ནེ་ཙོ་དང༌། །རྨ་
བྱའི་མཁྲིས་པ་རེ་རལ་རོ་ཚན་གསུམ། །བསེ་རུ་ཡུང་བ་གླ་རྩི་ཨ་རུ་ར། །ཆོས་སྨན་གི་ཝཾ་འོམ་
བུ་བོང་ང་དཀར། །ཙན་དན་དཀར་དམར་སྐྱེར་ཤུན་ཡུངས་ཀར་དང༌། །ཚ་ལ་བྲག་ཞུན་གངས་
ཆུས་བསིངས་པས་དབུལ། །ཡང་ན་དོམ་དང་རྨ་བྱའི་མཁྲིས་པ་དང༌། །མཁྲིས་པ་སྣ་ཚོགས་
ཁྱུང་སྡེར་ཨ་རུ་ར། །སྦལ་སྦྲུལ་ཟེར་མོའི་སྟོད་ཤ་མཆིན་མཁྲིས་བཅས། །གི་ཝཾ་ཙན་དན་གར་
བབས་བཟང་དྲུག་དང༌། །གང་ག་ཆུང་རྣམས་ཀ་ར་སྦྱར་ལ་བཏང༌། །ཡང་ན་མི་ཕག་འཕྱི་
མཁྲིས་སོ་མ་ར། །གླ་རྩི་ཤིང་ཀུན་སྤང་རྒྱན་ཀྱི་ལྕེ་དཀར། །རེ་རལ་སྐྱེར་པ་སྒོག་སྐྱ་ཆར་ཉུང་
རྣམས། །རིལ་བུར་བྱས་པས་དུག་རྣམས་འཇོམས་པར་བྱེད། །སྦྱོར་བ་དེ་རྣམས་ཀུན་གྱི་
གཉེན་པོ་སྟེ། །དུག་ཚད་རོལ་དུ་གསོད་པའི་དམ་པ་ཡིན། །ཚ་བ་ཐོན་དཀའ་སྨན་དྲེད་བསོད་
ལྡན་ལ། །རིན་པོ་ཆེ་ཡི་སྦྱོར་བས་བསད་པ་ནི། །གསེར་གཡུ་མུ་ཏིག་བྱུ་རུ་ཙན་དན་གཉིས། །
རྡོ་དྲེག་ཅུ་གང་གུར་གུམ་ཨུཏྤ་ལ། །ཀ་ར་སྦྱར་བཏང་ཡང་ན་མུ་ཏིག་དང༌། །ཉ་ཕྱིས་བྱུ་རུ་བསེ་
རུ་དཀར་པོ་དང༌། །གླ་རྩི་མི་དོམ་མཁྲིས་པ་ཙན་དན་དཀར། །ཅུ་གང་གུར་གུམ་ཕྱེ་མ་ཀ་ར་ལ། །
རླུང་(རུ་རྟ་)མཁྲིས་(ཏིག་ཏ་)བད་ཀན་(མ་ནུ་)ཁྲག་(བ་ཤ་ཀ་)དང་ཆུ་སེར་(སོ་མ་ར་ཛ)དང༌། །དོན་(བཟང་
25-1-493


དྲུག་)སྣོད་(ཕོ་བ་ལ་སེ་འབྲུ། རྒྱུ་ལོང་ལ་པི་པི་ལིང་། ལྒང་པ་ལ་སྡིག་སྲིན་)གང་ལ་བབས་པའི་ཁ་བསྒྱུར་བྱ། །
ཁྱད་པར་དབྱིག་ལ་སྦྱོངས་དང་དཀར་ཀུན་(ཡར་འཕེལ་འགྲོ་བས་)སྤང༌། །རྡོ་ཡི་དུག་ལ་མར་ནག་
མར་རྙིང་སྤང༌(ནང་འགྲེལ་ཏེ་འགྲོ་བས)། །ཤ་ཡི་དུག་ལ་ཉ་ཕག་རུལ་སྐྱུར་སྤང༌(འཕེལ་འགྲོ་བས)། །རྩི་
ཡི་དུག་ལ་གཏར་ཁྲག་ཚོད་མ་སྤང༌། །དུག་གང་གཉེན་པོའི་སྨན་གྱིས་མ་སོད་པར། །གཏར་
དང་མེ་བཙའ་བཤལ་སྐྱུགས་བྱས་གྱུར་ན། །ནད་བྱེར་སྟོད་ལ་འཛིན་ཞིང་སློང་ཕྱིར་སྤང༌། །དེ་
ལྟར་གཉེན་པོ་སྨན་གྱིས་གསོ་དུས་སུ། །ནད་རླངས་རླུང་ལ་ཞོན་ནས་རྩ་མིག་འཁྲུག །གཟེར་
འཁྱུག་སྐྲངས་དང་ཚ་སྦྲིད་འབྱུང་བར་བྱེད། །གཟེར་སར་གཙོ་བོ་དྲུག་པོ་བཙོས་ལ་བདུག །
ཡང་ན་རེ་ཅག་ཤོ་མང་རྩ་བ་དང་། །སྤང་རྩི་དོ་བོ་བཙོས་པས་བདུག་པར་བྱ། །ཡང་ན་གང་
ནའི་དངོས་པོ(འི་ཤ་རུས་)བཙོས་པས་བདུག །ལྟོ་བ་སྐྲངས་ན་མཆོད་རྟེན་སྤུ་ཡིས་བདུག །རུས་
ཚིགས་སྐྲངས་ན་བྱང་ལྟས་ས་ཡིས་བདུག །ཐུར་བརྐྱང་རླངས་ཐོན་རྩར་འདུས་ཁ་ཕྱེ་གཏར། །
སྒལ་ཚིགས་རྩིབ་མ་གཟེར་སར་མེ་ཡིས་མནན། །དེ་ལྟར་ནད་རླངས་མ་ཐོན་ཕྱིར་གྲམ་ནས། །
ནད་རེམས་གསོ་དཀའ་རོ་མི་ཐོན་པ་ཡིན། །བསད་རྗེས་ནད་འགོ་ཆོམས་ནས་རོ་སྦྱང་བ། །
སྤྱི་དང་བྱེ་བྲག་སྦྱང་བ་རྣམ་པ་གཉིས། །སྤྱི་རུ་ནད་གང་ཡིན་ཡང་བཤལ་གྱིས་སྦྱང༌། །སྔོན་
འགྲོ་མི་རིང་(རིང་ན་རུས་པ་བྱེར་ཏེ་འགྲོ་)ཁྲུས་དང་བསྐུ་མཉེ་བྱ། །སྟེང་རླུང་ཁ་ཡན་གཟེར་འཁྱུག་མེ་
ཡིས་མནན(མ་མནན་ན་བྱེར་ཏེ་སྨུ་སྐྲན་འོངས)། །ཕོ་ལོང་སྲིན་ཁྲོས་ལྡང་དུབ་རིལ་བུས་གདུལ(མ་བཏུལ་
ན་ཕོ་ལོག་གམ་སྲན་དུ་འགྲོ)། །སྣ་སེལ་འབྲས་བུ་གསུམ་དང་པྲི་ཡང་ཀུ། །ལྕུམ་རྩ་བྲག་ཞུན་སྐྱེར་
པའི་ཐང་བཏང་ལ། །དངོས་གཞི་ཨ་རུ་(ར་གཉིས་)སྐྱུ་རུ་(ར་གཅིག་)དནྡ་(ལྔ་)དང༌། །དོང་ག་(ཚིགས་
གཅིག་)བྱི་ཏང་ག་(ལྔ་)ལ་རིལ་བུ་སྦྱར། །དབྱིག་དུག་(ལ་ཤིང་ཀུན་ཁ་རུ་ཚྭ་ཤུ་དག་ཟི་ར་མ་ནུ་)རྡོ་དུག་(ལ་ཟེ་
ཚྭ་ཚ་ལ་པི་ལིང་)རྩི་དུག་(ལ་གུར་གུམ་དོམ་མཁྲིས་སྤོས་དཀར་དུར་བྱིད་ཀ་ར་)ཤ་དུག་ལ(ཀ་པེད་སོ་མ་ར་ཛ་ཆུ་སྲིན་སྡེར་
མོ་དུར་བྱིད་ཀ་ར)། །ནད་སྟེང་ཁྲིད་པ་ཁ་བསྒྱུར་བཤལ་གྱིས་སྦྱང༌། །བཤལ་འཕུལ་ཆུང་ན་ཨ་རུ་
25-1-494


ར་ཡི་ལྕག །མཆིན་པ་ན་ན་བྲག་ཞུན་ཁུ་བའི་ལྕག །ཕོ་བ་སྒངས་ན་རྒྱམ་ཚྭའི་ལྕག་གིས་བྲབ། །
ཡང་ན་ཨ་རུ་སྐྱེར་ཤུན་སོ་མ་ར། །དོང་ག་འབྲི་ཏ་ས་འཛིན་སྤང་རྒྱན་དཀར། །ལྕུམ་རྩ་བསྡུས་
ཁུ་དུར་བྱིད་བཏབ་པས་སྦྱང༌། །ཡང་ན་ཐར་ནུ་དུར་བྱིད་རྨ་བྱའི་ཤ །ཧོང་ལེན་ཚ་གྲང་(ཚ་ན་)
བྲག་ཞུན་(གྲང་ན་)གངས་ཐིགས་བསྒྱུར། །རིལ་བུ་ཕྱེ་མ་གང་འཕྲོད་རིག་པས་སྦྱང༌། །བྱེ་བྲག་
སྦྱང་བ་ཕོ་བར་བབས་ན་སྐྱུགས། །རྩ་ལ་བབས་ན་རྩ་བཤལ་བྱ་བ་སྟེ། །ཤ་པགས་རུས་ལ་
བབས་པ་རྔུལ་དུ་དབྱུང༌། །ནད་འདི་ཟུངས་དང་ཡུན་དུ་ཞེན་པའི་ཕྱིར། །བསྡུ་བསད་སྦྱང་
གསུམ་ཟུངས་སྦྱར་ཅི་རིགས་བསྐྱར། །སྦྱོར་སྐོར་ཚར་རེའི་བར་དུ་ལུས་ཟུངས་གསོ། །ཟུངས་
ངན་ནད་རྙིངས་བསྡུ་བསད་ཆིག་ཆོད་བྱ། །ཨ་རུ་བྲག་ཞུན་བོང་ང་རྣམ་པ་གསུམ། །དཔའ་བོ་
དཀར་སེར་ཙན་དན་དཀར་དམར་དང༌། །ཅུ་གང་གུར་གུམ་གི་ཝཾ་ཆོས་སྨན་དང༌། །རེ་རལ་
ཡུང་བ་དོམ་མཁྲིས་སེ་འབྲུ་དང༌། །སེ་རྒོད་སྐྱེར་པ་ཡུངས་ཀར་ཕྱེ་མ་སྦྱར། །བྲག་ཞུན་ཁུ་བས་
འཕུལ་བས་ཆིག་ཆོད་བྱེད། །ཡང་ན་བོང་ང་(དཀར་པོ་མཐེ་བོང་ཙམ། དམར་པོ་རིལ་མ་ཙམ། སེར་པོ་སྲན་མ་
ཙམ་)གསུམ་དང་ཨ་རུ་ར། །གི་ཝཾ་བསེ་རུ་དཀར་པོ་ཙན་དན་གཉིས། །དོམ་མཁྲིས་གླ་རྩི་ཚ་ལ་
རེ་རལ་དང༌། །ཡུང་བ་འོམ་བུ་སྐྱེར་ཤུན་ཀ་ར་སྦྱར། །བྲག་ཞུན་སེང་ལྡེང་ཐང་གིས་འཕུལ་ལ་
བཏང༌། །ཡང་ན་ཨ་རུ་ར་དང་བོང་ང་དཀར། །སྐྱེར་ཤུན་གི་ཝཾ་ཙན་དན་བསེ་རུ་དང༌། །ནད་
གཞི་དོན་སྣོད་(རིན་ཆེན་སྐབས་ལྟར་)ཁ་འཛིན་བཅས་པར་སྦྱར། །ཆུ་(གངས་ཆུ་དྲི་ཆུ་ཆང་གསུམ་)གསུམ་
བསྲེས་པས་འཕུལ་ཏེ་བྲིད་ལ་བཏང༌། །ཡང་ན་མི་དོམ་རྨ་བྱའི་མཁྲིས་པ་དང་། །དཔའ་བོ་
དཀར་སེར་ཁྱུང་སྡེར་དཀར་སྨུག་གཉིས། །བོང་ང་གསུམ་དང་རེ་རལ་རྒྱམ་ཚྭ་རྣམས། །ཐོ་
རངས་ཐུན་རེ་གངས་ཆུས་འཕུལ་ལ་བཏང༌། །ཚ་གྲང་ཐུན་མོང་སེལ་བྱེད་སྐྱུག་ན་བསྲུང༌། །
ཡང་ན་ཨ་རུ་ར་དང་བོང་ང་གསུམ། །དཔའ་བོ་དཀར་སེར་ཁྱུང་སྡེར་དཀར་སྨུག་གཉིས། །
སེ་རྒོད་དགུ་ཐུབ་གླ་རྩི་རེ་རལ་དང༌། །ཚ་ལ་ཡུང་བ་དོམ་མཁྲིས་ཕྱ་ཚན་གསུམ། །ཆོས་སྨན་
25-1-495


འོམ་བུ་བྲག་ཞུན་སྐྱེར་པ་དང༌། །གི་ཝཾ་བསེ་རུ་ཙན་དན་དཀར་པོ་རྣམས། །ཉེས་པ་བབས་
སའི་ཁ་འཛིན་(རླུང་ལ་རུ་རྟ་མཁྲིས་ལ་ཏིག་ཏ་བད་ཀན་པི་ལིང་ཁྲག་ལ་ཚོས་ཆུ་སེར་སོ་ར་དོན་ལ་བཟང་པོ་ལྔ་སྲོག་རྩ་ལ་ལི་
ཤི་)སྦྱར་བྱས་ཏེ། །ཟུག་ལ་མི་སྐྲག་ནད་དང་འཐབ་པ་ཡིན། །ཡང་ན་གི་ཝཾ་བོང་ང་ཨ་རུ་ར། །
གུར་གུམ་ཅུ་གང་ཙན་དན་མཁྲིས་སྣ་ཚོགས། །སྦལ་སྦྲུལ་ཟེར་མོའི་སྟོད་ཤ་མཆིན་མཁྲིས་
བཅས། །སག་རྩི་ཕག་ཚིལ་ཀ་ར་གངས་ཆུས་དབུལ། །ཡང་ན་རྨ་བྱ་དོམ་མཁྲིས་གླང་ཆེན་
མཁྲིས། །རིམ་བསྐྱེད་ཀུན་དང་སྦྲུལ་ཤ་སྟོད་ཆ་མཉམ། །ཨ་རུ་ར་དང་བོང་ང་སྦྲུལ་ཤ་མཉམ། །
བཟང་དྲུག་གང་ལ་བབས་པ་འགྲེ་ལོག་སྦྱར། །བྲག་ཞུན་སྤྱི་ཞུར་ཐང་གིས་འཕུལ་ལ་བཏང༌། །
མཆོག་ཏུ་ཟུངས་ངན་ཤ་ཟད་ནད་ལ་བསྔགས། །རྨ་བྱའི་མཁྲིས་པ་རྩད་དང་རྒུ་ཐུབ་དང༌། །
གླ་རྩི་རེ་རལ་རིམ་པས་ལོག་པོར་བསྐྱེད། །བྱི་ཀུ་སག་རྩི་ཉ་དང་མི་མཁྲིས་དང༌། །ལོ་བརྒྱད་
དྲི་ཆུའི་རིལ་བུ་བྱས་ལ་བཏང༌། །དེ་དག་ཀུན་གྱིས་བསྡུ་གསོད་ཆིག་ཆོད་བྱེད། །ཚ་བ་ཟུངས་
ལ་རྩི་ལྟར་ཞེན་པའི་ཕྱིར། །དར་དྲགས་པ་ཡིས་ཞེན་པ་མི་སེལ་བར། །ཕོ་བའི་མེ་འཆི་ཚད་རོ་
ལྡས་པའི་ཕྱིར། །ཐུན་བསྐྱུངས་ཡུན་དུ་བསྲིངས་ལ་རོལ་དུ་བསད། །སྐབས་སུ་རྒྱུན་བཤལ་
བཏང་ཞིང་ནད་རོ་སྦྱང༌། །ཤིན་ཏུ་ཟུངས་ངན་འཇམ་རྩི་ནི་རུ་སྤེལ། །རང་བཤལ་རང་རྔུལ་
བྱུང་ན་སྦྱང་མི་དགོས། །གྲང་སྦྱོར་བཅོས་པ་བྱི་བྲུན་པི་པི་ལིང༌། །སྒ་སྐྱ་ཚ་ལ་འོམ་བུ་སག་
རམ་རྩི། །རྒྱ་སྐྱེགས་བུ་རམ་སྦྱར་བ་ཆུ་སྐོལ་དབུལ༌། སྐབས་སུ་དུར་བྱིད་སྤོས་དཀར་པི་པི་
ལིང༌། །ཨ་རུ་སྒ་སྐྱ་སྦྱར་བས་ནད་རོ་སྦྱང༌། །སྐྱ་རྦབ་སྐྲངས་ན་སྲད་དཀར་རྩ་བ་བསྣན། །དེ་
རྗེས་མུ་ཟི་ཟངས་ཐལ་འགྲོན་ཐལ་དང༌། །ཚ་བ་གསུམ་ཐལ་གོང་སྟེང་བསྣན་ཏེ་བསྐམ། །སྐྲན་
དུ་འདྲིལ་ན་ཟེ་ཚྭ་ཡ་བཀྵ། །ཚ་བ་གསུམ་དང་འགྲོན་བུའི་ཐལ་བ་བསྣན། །ཚ་ལ་ཨ་རུ་སྐྱེར་
ཤུན་བུལ་ཏོག་སྦྱར། །ཡང་ན་འགྲོན་ཟངས་ཚ་བ་གསུམ་སོགས་ཐལ། །གངས་ཐིགས་བུལ་
ཏོག་ཚ་ལ་མི་རུས་བཙའ། །མི་དོམ་མཁྲིས་པ་བྲག་ཞུན་ཡུང་བ་དང༌། །ཁུར་རྩ་རྣམ་སྣང་གར་
25-1-496


བབས་བཟང་པོ་དྲུག །ཨ་རུ་ཆུ་བསྐོལ་འཕུལ་བས་གསོད་ཅིང་སྦྱོང༌། །འཁྲུར་མ་འདོད་ན་
དུར་བྱིད་པི་པི་ལིང༌། །ཚ་ལ་བ་ཆུར་སྦྱར་བས་ནད་རོ་སྦྱང༌། །ཡང་ན་ཅོང་ཞི་འཕྲུལ་གྱི་ཐལ་
སྨན་སྦྱར། །རྗེས་ལ་ཨ་རུ་དན་རོག་རིལ་བུས་སྦྱང༌། །གྲང་ཡང་ཚ་ཚུལ་སྟོན་ན་ཚ་བ་གསུམ། །
ཐལ་བ་ཚད་འཇོམས་སྤྱི་སྨན་སྦྱར་བས་སེལ། །ཁ་ཟས་ལུག་ཤ་གསར་དང་སྐམ་ཡིབ་དང༌། །
ཆང་འཇམ་ཟས་སྤྱོད་དྲོད་ལ་བསྟེན་པར་བྱའོ། །བྱེ་བྲག་བཅོས་ཐབས་འཇུག་སྒོ་རྫས་རིགས་
དང༌། །ནད་རིགས་ལྡང་དུས་བབས་སའི་སྒོ་ནས་བཅོས། །དང་པོ་འཇུག་སྒོའི་རིགས་ཀྱིས་
བཅོས་པ་ནི། །དུད་པ་ཉི་ཟེར་རླངས་དུག་རྣམ་གསུམ་ལ། །གཙོ་བོ་དྲུག་སྦྱོར་ཕྱེ་མའི་ཐང་སྟེང་
དུ། །བོང་ང་བྲག་ཞུན་བསྣན་པས་དུད་པ་འཇོམས། །གཙོ་བོ་དྲུག་གི་ལུམས་ཀྱིས་ཕྱི་ནས་
བདུག །རྗེས་ལ་དམར་པོ་གསུམ་གྱི་སྨན་མར་སྦྱར། །ཉི་ཟེར་རླངས་ལ་བདུད་རྩིའི་རླངས་
ལུམས་བྱ། །ཀོ་ལེར་ན་སྐྲངས་བྱུང་ན་ཐོན་པ་ཡིན། །རྗེས་ལ་གཙོ་བོ་དྲུག་གི་སྨན་མར་སྦྱར། །
རེག་པ་རྨ་ཁོང་གཉིས་ནས་བཅོས་པར་བྱ། །དྲི་ཆུ་དྲི་ཆེན་བཙིར་བའི་ཁུ་བ་ལ། །གུར་གུམ་གླ་
རྩི་ཤིང་ཀུན་སྒོག་སྐྱ་སྦྱར། །དེ་ཡི་ཁྲུས་བྱ་མུ་ཟི་ག་བུར་དང༌། །སོ་མ་ར་ཛ་ཆུ་རྩ་བུལ་ཏོག་དང༌། །
གླ་རྩི་ཤིང་ཀུན་བྱང་པ་གཡེར་མ་དང༌། །དུད་པ་ཞིབ་བཏགས་སྦང་གར་སྦྱར་ལ་བྱུག །ཡང་
ན་བཟང་དྲུག་མུ་ཟི་གླ་རྩི་དང༌། །བོང་ང་དཀར་པོ་སྤོས་དཀར་ཨ་རུ་ར། །བསེ་རུ་ར་ལུག་རྭ་
གཞོབ་མར་སྦྱར་བསྐུ། །ཀྱི་ལྕེ་སྔོན་བུ་སྤྱང་ཚེར་ལྕུམ་རྩ་སྒ། །པི་པི་ལིང་དང་ཟེ་ཚྭ་སྦྲང་རྒོད་
སྦྱར། །བྱུགས་པས་མཛེ་འབྲས་ལྷོག་པ་སེལ་བར་བྱེད། །མཚེ་དང་བ་ལུ་ཤུག་འབྲུ་ཙན་དན་
སྨུག །གླ་རྩི་ཨ་རུ་སྔོན་བུ་འབྲས་བུ་གསུམ། །ཙན་དན་དཀར་པོ་དབང་པོ་ལག་པ་དང༌། །སྙིང་
དང་གླ་གོར་ཞོ་ཤ་བ་ལེ་ཀ །ཆུར་བསྡུས་མི་ཚིལ་ཁྱོར་གང་སྦྱར་ལ་བྱུག །ཨ་རུ་རུ་རྟ་བོང་ང་
དཀར་པོ་དང༌། །མཛེ་ཚྭ་དོམ་དང་བ་ལང་མཁྲིས་པ་རྣམས། །རྨར་བླུག་ར་ཚིལ་འཇིབས་བྱ་ཤ་
རོ་ཆེ། །ལྕགས་བསྲེགས་མེ་ཏོག་སྒོ་ངས་ཞག་གསུམ་མནན། །དེ་འོག་མུ་ཟི་དུར་བྱིད་ཐར་ནུ་
25-1-497


དང༌། །རྒྱ་ཚིལ་དཀར་པོ་རུས་པ་བསྲེགས་པས་མནན། །ཤ་རོ་ཆོད་ནས་ར་རུ་བསྲེགས་པ་
དང་། །ཕ་བ་གོལ་གོལ་རྙིང་ཀྲད་གསོམ་ཐལ་དང༌། །ཨ་མྲྀ་ཏ་དང་སྦྱར་ལ་རྨ་ལ་བྱུག །ཚ་བའི་
རྨ་ལ་མི་བསྲེག་བསིལ་གསུམ་དང༌། །ག་བུར་ཙན་དན་གི་ཝཾ་ཨ་རུ་ར། །གླ་རྩི་ལྕགས་ཕྱེ་ར་
ཁྲག་སྦྱར་བ་བྱུག །བཟང་དྲུག་ཙན་དན་དཀར་དམར་ཨ་རུ་ར། །གླ་རྩི་དཔའ་བོ་དཀར་སེར་
སྤང་རྩི་དོ། །སྲོ་ལོ་ཏིག་ཏ་ཞིམ་ཐིག་བ་ཤ་ཀ །སེ་འབྲུ་ཤུག་འབྲུ་སྐྱུ་རུ་བོང་ང་དཀར། །དོམ་
དང་བ་ལང་མཁྲིས་པ་ཀ་ར་སྦྱར། །ཁོང་དུ་བཏང་ཞིང་ར་ཁྲག་ར་ཤ་བསྟེན། །རྫས་ཀྱི་སྦྱོར་
བའི་སྒོ་ནས་བཅོས་པ་ནི། །རིན་ཆེན་སྤྱི་ཡི་གཉེན་པོ་བྲག་ཞུན་དང༌། །ཨ་རུ་མུ་མེན་མུ་ཟི་ཀུན་
ལ་གཅེས། །ཁྱད་པར་གསེར་ལ་ཏིལ་དང་ཟར་མ་བསྣན། །ཟངས་ལ་ཚ་ལ་འཁར་བ་སྒོག་སྐྱ་
བསྣན། །དངུལ་ཆུའི་གཉེན་པོར་སྟར་བུ་བ་ཆུ་བཏང༌། །ཞ་ཉེ་མཛོ་མར་རྣ་བ་བླ་སྤུའི་གཞོབ། །
ཡང་ན་གསེར་དངུལ་ཟངས་ལྕགས་མུ་ཏིག་གཡུ། །བྱུ་རུ་ཙན་དན་དཀར་དམར་རྡོ་དྲེག་དང༌། །
ཨུཏྤལ་ཅུ་གང་གུར་གུམ་ཀ་ར་སྦྱར། །རང་རང་ངོས་ཟིན་གོང་(གཉེན་པོ་སོ་སོའི་)གི་མདེ་ཁ་
བསྒྱུར། །ཡང་ན་ར་ཁྲག་རཏྣ་(རྣ་ལྔ་སྲན་མ་ཙམ་རེ་སྦྱར་ལ་)ཞག་དགུར་བཏང༌། །དེ་འོག་བསེ་རུ་
བཟང་དྲུག་ཨ་བི་ཥ། །ཨུཏྤལ་གླ་རྩི་གི་ཝཾ་ཀ་ར་དང༌། །ར་ཡི་མཆིན་པ་སྦྱར་ལ་བཏང་བར་བྱ། །
བོང་ང་དོམ་སྦྲུལ་མཁྲིས་པའི་རིལ་བུ་བཏང༌། །རྡོ་སྦྱོར་སྤྱི་ཡི་གཉེན་པོར་ཚ་བ་གསུམ། །ཟེ་ཚྭ་
རྒྱ་ཚྭ་ཚ་ལ་རྨ་བྱའི་ཤ །ཁྱད་པར་སྦལ་རྒྱབ་ཏི་ཚྭ་ཅོང་ཞི་མཚལ༌། མུ་ཟིའི་གཉེན་པོར་ཆང་
བཟང་པི་པི་ལིང༌། །ཡུ་གུ་ཤིང་དང་སྒོག་སྐྱ་སྦྲང་རྩིས་བསྒྱུར། །ཡང་ན་གྲང་སྦྱོར་འཇོམས་པའི་
སྨན་སྟེང་དུ། །ཟེ་ཚྭ་རྒྱ་ཚྭ་བསྣན་པས་(ལུས་ལྕི། གཉིད་ཆེ། དང་ག་མི་བདེ། ཕོ་མཆིན་མི་བདེ། ཟས་མི་འཇུ། རྒྱམ་
ཚྭ་སྒ་སྐྱའི་ཐང་ཞག་གསུམ་བཏང་བས་བདེ་མི་བདེ་བྱུང་ན་ངེས་སོ།།)འཇོམས་པར་ངེས། །ཡང་ན་རྒྱ་ཚྭ་རྒྱམ་ཚྭ་
ཁ་རུ་ཚྭ། །ཟེ་ཚྭ་ཚ་ལ་ཚ་བ་གསུམ་སྦྱར་བཏང༌། །ཤ་སྦྱོར་སྤྱི་ཡི་གཉེན་པོར་དོམ་མཁྲིས་དང༌། །
མི་རྟའི་རོ་ཚན་དང་ནི་སྟག་ཤ་བ། །འོམ་བུ་བོང་ང་དཀར་པོ་ཚ་ལ་ཡིན། །ཁྱད་པར་ར་ལ་
25-1-498


གུར་གུམ་ཨ་རུ་ར། །ཨ་བི་ཥ་གསུམ་བྱ་ལ་གུར་གུམ་དང༌། །སྲེ་མོའི་སྨ་ར་བྱ་མོ་ནག་མོའི་ཤ། །
ཁྱི་ཡི་ཤ་ལ་དུད་པ་བྱ་བལ་མ། །སྲེ་མོའི་ཤ་ལ་འུག་པ་སྲིན་བྱ་བཏང༌། །ཡང་ན་འབྲས་བུ་
གསུམ་མམ་བཟང་དྲུག་སྦྱར། །བྱང་པ་ཆུ་སྦུར་ཆ་ག་བོང་ང་དཀར། །ཡང་ན་འབྲི་མོག་ཁུར་རྩ་
ར་ཁྲག་འཇོམས། །ཉ་ལ་སྐྱར་མོ་སྦལ་པ་རྨིགས་པས་འཇོམས། །སྡོམ་ལ་སྲད་དཀར་སྡིག་ལ་
ལྗོང་མོ་དང༌། །རྨིགས་པ་སྦལ་པ་དཔའ་བོ་སེར་པོས་འཇོམས། །གོང་མོ་མཛེ་ཁྲག་ཏིག་ཏ་
སྤང་རྩི་དོ། །རི་བོང་མཁྲིས་པ་དོམ་མཁྲིས་ཕྱ་ཚན་གསུམ། །གི་ཝཾ་ལ་ནི་ཁྱི་ལུད་དྲི་ཆེན་བཏང༌། །
སྤུ་ལ་བྲག་ཞུན་གུར་གུམ་ག་བུར་བསྣན། །ཡང་ན་རྒྱ་ཚྭ་རྒྱ་སྐྱེགས་བྲག་ཞུན་བཏང༌། །རུས་
པར་ཟེ་ཚྭ་མུ་ཟི་བོང་ང་དཀར། །མདེ་ཁ་སྤྱི་སྨན་སྦྱར་བས་འཇོམས་པ་ཡིན། །རྦ་བྱེ་ཨོག་
དཀར་ཤ་ནི་ཀུན་ལ་གཅེས། །ཡང་ན་གི་ཝཾ་ཉ་སྤྲེའི་མཁྲིས་པ་དང་། །གླ་རྩི་བྲག་ཞུན་ཆོས་
སྨན་སྦྱར་ལ་བཏང༌། །ཡང་ན་སྔོ་སྦྱོར་དགུ་ཡི་ཐང་གིས་འཇོམས(དེ་ལ་རེ་རལ་བྲག་སྤོས་ཧ་བོ་གསུམ་
སྐྱེར་པ་འོམ་བུ་པྲི་ཡང་ཀུ་གསུམ་རྩི་མར་སྤང་རྒྱན་སྟག་ཤ་གསུམ་བཏང་ཐབས་ཁ་བསྒྱུར་སྔོ་ཐང་དང་འདྲ་སྦྱར་དུག་ཀུན་སེལ་
ཁྱད་པར་ཤ་སྦྱོར་འཇོམས་པར་བྱེད)། །སྤུ་ལ་དུད་པ་བྲང་ཀྲད་ལྟག་སྤུའི་གཞོབ། །རྗེས་ལ་རྣོན་པོ(་དུར་ར་
བྱིད་དུང་རྒྱ་ཚྭ་སྟར་བུ)འི་བཤལ་གྱིས་སྦུ་རོ་སྦྱང༌། །རྨ་བྱའི་སྒོང་དུག་བྱ་མཚལ་མཁྲིས་པ་དང༌། །པུ་
ཤུད་ཅོ་གའི་སྒོ་ངས་འཇོམས་པར་བྱེད(ཀུན་ལ་ངོས་མ་ཟིན་ན་རང་རང་གི་གཉེན་པོ་ནང་མ་གསུམ་བཏང་བས་བདེ་
མ་བདེ་བྱུང་ན་ངེས་སོ)། །རྩི་དུག་གཉེན་པོར་གླ་རྩི་ཨ་བི་ཥ། །བསེ་རུ་བཟང་དྲུག་ཆོས་སྨན་གཅེས་
པ་ཡིན། །ཁྱད་པར་གླ་རྩི་མེད་དུ་མི་རུང་ངོ༌། །ཡང་ན་ལྷ་ཡི་བདུད་རྩིས་འཇོམས་པར་བྱེད། །
དུག་དངོས་བོང་ང་དཀར་སེར་དམར་པོ་གསུམ། །ཨ་རུ་ཧ་བོ་ཕྱ་ཚན་ཡུང་བ་དང༌། །རྒྱ་ཚྭ་
བུལ་ཏོག་དྲི་ཆུས་འཇོམས་པར་འགྱུར། །སྔོ་སྦྱོར་གཉེན་པོར་འོམ་བུ་ལུག་མིག་པ། །ཁུར་རྩ་
སྤྲ་ཐོག་བོང་ངའི་ལོ་མས་འཇོམས། །ཡང་ན་སེར་ཐིག་སྤྲ་ཐོག་ཨུག་ཆོས་དང་། །གི་ཝཾ་བསིལ་
གསུམ་བསེ་རུ་གླ་རྩི་དང༌། །བརྩོད་དང་ཀ་ར་དྲི་ཆུས་འཕུལ་བས་འཇོམས། །ཁྱད་པར་ཐང་
25-1-499


ཕྲོམ་(པ་ལ་སྦྱར་བས་ཤེས་པ་འཁྲུལ་)རེ་རལ་བ་ཤ་ཀ །ཡང་ན་རྒྱ་ལུད་སྒོག་སྐྱ་ནུ་ཞོས་འཇོམས། །
འོལ་མོ་སེ་ལ་བ་ལེ་བ་ཤ་ཀ །ཞོ་ཤ་སུག་སྨེལ་ཅུ་གང་ཏིག་ཏས་འཇོམས། །དུར་བྱིད་ལ་
སོགས་འཁྲུ་བྱེད་གཉེན་པོར་ནི། །དྲོད་སྐྱེད་བཞུ་དང་རོ་སྦྱང་གཅོད་པ་གཅེས། །འཁྲུ་བའི་
དུག་ལ་བཤལ་སྨན་ཀུན་གནོད་དེ། །དེ་ཕྱིར་ཨ་རུ་ལྕུམ་རྩས་བཀྲུ་བར་བྱ། །སྔོ་སྦྱོར་ཀུན་ལ་
རེ་རལ་གཅེས་པ་ཡིན། །ན་ལུགས་སྒོ་ནས་བཅོས་པ་མཛེ་དུག་ལ། །རྩ་སྦྱོངས་(བཤལ་དྲག་པོ་
བཏང་རྗེས་ལ་བ་ཤས་ཚས་བྱ་ལོ་བརྒྱད་དྲི་ཆུ་བཏུང་)ཐང་(སྐྱེར་ཞུན་གི་ཝཾ་བེ་དོ་ཨ་རུ་བོང་ང་ཏིག་ཏ་བྲག་ཞུན་ཞིམ་ཐིག་གངས་
ཆུ་ལ་བསྡུས་ལ་བཏང་རྔུལ་མང་བྱུང་ན་ཁམས་གསོ་བར་བྱའོ་)ཕྱེ་(རེག་པའི་སྐབས་སུ་བཤད་པ་ལྟར་བཏང་)རིལ་བུ་(ལ་རའི་
འོ་མ་ལྟོ་སྟོང་ལ་ཞག་ལྔ་བཏང་ཨ་རུ་རྨ་བྱའི་མདོངས་མུ་ཟི་ཅོང་ཞི་ཅུ་གང་ཀྱི་ལྕེ་ཀ་ར་མི་ཚིལ་སྦྲང་བུར་ལ་རིལ་བུ་བྱས་པའོ་)སྨན་
རྩིས་(མཁྲིས་པ་སྣ་ཚོགས་དངུལ་ཐལ་དུར་བྱིད་ལྡོང་རོས་ཁྱི་ལུད་སེར་ག་མ་ར་ཐུག་གི་སྦྲེ་དྲི་ཆེན་ཨ་མྲྀ་ཏ་སྦྲང་པོ་ཆེ་ར་ཁྲག་
བུ་མོ་ལོ་བཅོ་ལྔ་ལོན་པའི་ཆུ་ལ་སྦྱར་བས་བྱུག)བཅོས། །སྨྱོ་བའི་དུག་ལ་སྤང་རྒྱན་བཟང་དྲུག་སྦྱར། །སྒོག་
གཅིག་ས་མཚུར་གུར་གུམ་ཧ་བོ་དང༌། །རེ་རལ་རིམ་བསྐྱེད་ཧ་བོ་སྦྱར་ལ་བཏང༌། །འབྲས་བུ་
གསུམ་པོ་ཆང་དུ་སྦངས་ཁུ་བཏུང༌། །རུས་སྣའི་ཁུ་བར་ཤིང་ཀུན་པི་པི་ལིང༌། །ཁ་ཚར་བཏབ་
བཏང་དྲུག་བདུན་ནུ་དབྲག་བསྲེག །འབོག་ན་སེ་འབྲུ་སྒོག་སྐྱ་དྭ་བའི་འབྲུ། །སྨན་མར་སྦྱར་
བཏང་རྗེས་ལ་གོང་བཞིན་བསྲེག །དྲེ་རྒོད་དུག་ལ་བུ་མོ་ལོ་ལྔའམ། །ལོ་དགུ་ལོན་པའི་དོན་
ལྔ་དབང་པོ་ལྔ། །ཉུང་གཞི་མར་ཁུ་སྦྱར་ལ་སྔགས་འདི་གདབ། །ༀ་ཏྲིག་ལེ་ཧྲི་སྭཱཧཱ། །ཞག་
གསུམ་ལྟོ་བ་བཀུག་ལ་བཏང་བར་བྱ། །ཁ་རྨ་རྒྱུ་སྐམས་ཤུག་ལོས་རྒྱུ་ཞབས་བདུག །ཀྲད་
རྙིང་ཨ་བ་རྭ་གཞོབ་མཁུར་བཀང་བཅང༌། །ཨ་བི་ཥ་དང་རྨ་བྱའི་མཁྲིས་པ་དང་། །ཤ་གཉིས་
བཙོས་ཁྲག་སྦྲང་སྨྱོན་རིལ་བུ་སྦྱར། །ཟ་རེངས་ལྟག་དགྱེ་ལྡད་ཆུ་བྱ་ཡི་ཁྲག །གཙོད་ཁྲག་རྩད་
དང་གླ་རྩི་སྦྱར་ལ་བཏང༌། །རྒྱ་ནད་རེངས་འཁུམས་དོམ་མཁྲིས་ཨ་རུ་ར། །(ཤིང་རྟ་མོ་རྨིགས་པ་སྡིག་
པའི་)ཤ་གསུམ་མཛོ་ཡི་མར་དང་སྦྱར་ལ་བཏང༌། །སྲིན་བུ་སྣ་ཟན་བྱ་ཁྱུང་རིལ་བུས་འཇོམས།  །
25-1-500

 
སྨུག་པོ་འཇུ་སྐེམས་སྨུག་པོ་སྤྱི་ཡི་སྨན། །མང་སྦྱོར་ཆེན་མོ་ལྟག་པ་སྤྲད་པས་འཇོམས། །
མཁྲིས་པ་མིག་སེར་དང་པོ་(ར་ཁྲག་ཁྱི་ལུད་དྲི་ཆེན་ཁུ་བ་དང་སྦྱར་བའི་)ཁྲག་བཤལ་བཏང༌། །དེ་འོག་
(སྐྱེར་ཤུན་ཁུ་བ་ཕུལ་ཕྱེད་བྱིན་ཆུ་སྐོལ་ལན་བཞི་བཏང་བའི་)སྐྱུགས་དང་ཞི་བྱེད་(སྦྲང་དང་བ་ཆུ་ཕུལ་གང་བསྲེས་ལ་སྦྱིན་
རའི་རྭ་གཞོབ་ཆུ་ལ་སྦྱངས་ལ་བཏང་ཞག་བཞི་ན་ལོང་རྩ་ལ་)གཏར་གྱིས་བཅོས། །རིམས་ནད་རྩར་བྱེར་སྔོ་
ཐང་ཆེན་མོ་བཏང༌། །དེ་ནས་ཕྱེ་མ་རྗེས་ལ་མེ་ཡིས་བཅད། །ནག་པོ་ཐོག་བརྡེག་གཉེན་པོ་གི་
ཝཾ་སྟེ། །ཤ་སྦྱོར་སྤྱི་ཡི་གཉེན་པོར་སྡེབས་ཏེ་སྦྱར། །འཁྱམ་པོ་གཟའ་ནད་གཉེན་པོ་གུ་གུལ་
ནག །རེ་རལ་ཨ་རུ་ར་དང་དུད་པ་དང༌། །གསེར་སྐུད་རྒྱ་ཚྭ་ཀ་ཤོ་ཀན་ཏ་དང༌། །ར་སྲུས་ལྕུམ་
རྩ་རྒྱ་སྣེ་བུལ་ཏོག་འཇོམས། །རེ་རེ་གཉིས་གཉིས་བཞི་དང་བདུན་དུ་སྦྱར། །བ་ཡི་ཆུ་ལ་རིལ་
བུ་ཕྱེ་མ་བྱ། །རིལ་བུ་བདུན་བདུན་གླང་ཆུ་ཆང་གིས་དབུལ། །ཕྱེ་མ་ཞོ་རེ་ཆང་དང་དྲི་ཆུས་
དེད། །མཚོན་ཆ་གསལ་ཤིང་ཧོས་དང་རྩི་ལ་སོགས། །ལོ་ཟླ་ཞག་དང་ཕྱི་ནང་སྦྱོར་བའི་
རིགས། །ནད་རིགས་མི་འདྲ་སྣ་ཚོགས་སྟོན་གྱུར་ཀྱང་། །ཞག་བདུན་གྱིས་ནི་ངེས་པར་གསོས་
པར་ནུས། །སྡུད་གསོད་སྦྱོང་བ་ཆིག་ཆོད་བྱེད་པ་ཡིན། །གཟེར་ནད་ཆུ་འགགས་གླ་རྩི་བོང་ང་
དཀར། །ཆུ་སྦུར་ཡུང་བ་ཐལ་ཀ་རྡོ་རྗེ་དང་། །འབྲི་མོག་ཁུར་རྩ་ར་ཁྲག་སྦྱར་བས་འཇོམས། །
དེ་འོག་རྩ་སྦྱོངས་རྗེས་ལ་ཆུ་སྨན་བསྟེན། །ལྡང་བའི་དུས་ཀྱི་སྒོ་ནས་བཅོས་པ་ནི། །ཞག་དུག་
གཉེན་པོ་གོང་འདྲ་གཞན་ན་མེད། །ཟླ་དུག་བདུད་རྩི་སྔོ་ཡི་སྦྱོར་བས་སེལ། །ལོ་ཡི་དུག་ལ་
རིན་ཆེན་རྩི་སྦྱོར་བསྟེན། །བབས་ས་གནས་དང་སྦྱར་ལ་བཅོས་པ་ནི། །སྙིང་ལ་བབས་ན་མུ་
ཏིག་(ཅུ་གང་གུར་གུམ་རེ་རལ་འདམ་བུ་དབང་ལག་བོང་ང་དཀར་པོ་)བདུན་པའམ། །ཙན་དན་(གུར་གུམ་ག་དུར་
ཏིག་ཏ་སྙི་བའི་མེ་ཏོག་)ལྔ་དང་ཤ་སྦྱོར་(རི་བོང་གི་སྙིང་ཏེ་ལོའི་གླད་པ་སྲེག་པའི་སྒོ་ང་ག་བུར་རྣམ་སྣང་)ལྔ་པ་སྦྱོར། །
གློར་བབས་ག་བུར་(ཙན་དན་དཀར་དམར་ཅུ་གང་གུར་གུམ་བ་ལེ་ཀ་རྒུན་འབྲུམ་རྒྱ་ཚྭ་བྱི་ཏང་ག)དགུ་དང་ཤ་
སྦྱོར་(དོམ་གྱི་ཤ་གླ་བའི་སྙིང་སྲེག་པ་དང་སྲིན་བྱའི་གླད་པ་ཧོང་ལེན་ག་བུར་ཁྲུ་གང་འོག་ས་དྲི་ཆུ་)བརྒྱད། །མཆིན་
25-1-501


བབས་གུར་གུམ་(ཅུ་གང་ཏིག་ཏ་ཀ་ཀོ་ལ་ནཱ་ག་གེ་སར་ནཱ་ག་པུཥྤ་བ་ལེ་ཀ་ཨུཏྤལ་ལི་ཤི་པྲི་ཡང་ཀུ་ཤིང་ཚ་ཤིང་མངར་ཀ་ར)
བཅུ་གཉིས་ག་བུར་(གུར་གུམ་ཨ་ག་རུ་ལི་ཁྲི་མཚལ་ཏིག་ཏ་ཧོང་ལེན་རེ་རལ་གྲོ་ཆང་སྲོ་ལོས་བསིངས་པ་)དགུ། །
མཆེར་བབས་ལི་ཤི་(གུར་གུམ་ཅུ་གང་སུག་སྨེལ་ཏིག་ཏ་རྡོ་དྲེག་བ་ཤ་ཀ་སྟག་སྡེར་དོམ་མཁྲིས་གླ་རྩི་ཨུཏྤལ་ཀ་ར་དང་
སྦྱར་བའི་)བཅུ་གཅིག་སེ་འབྲུ་དགུ(ཤིང་ཚ་གུར་གུམ་པི་པི་ལིང་ཀ་ཀོ་ལ་རུ་རྟ་བོང་ང་བ་ལེ་ཀ་མཁྲིས་ཆེན)། །ཡང་ན་
ཤ་སྦྱོར་(ནས་ཟན་དང་པུ་ཤུད་གླད་པ་རའི་མཆེར་པ་གླ་བའི་སོ་སྟག་གི་ཤ་རུ་རྟ་བ་ལེ་ཀ་བེའུའི་སྙིང་རི་སྙིང་རྣམ་སྣང་ག་བུར་
སྲེག་པའི་བྲུན་)བཅུ་གཉིས་བསྟེན་པར་བྱ། །མཁལ་མར་བབས་ན་ད་བྱིད་(ཞོ་ཤ་གསུམ་གུར་གུམ་སུག་
སྨེལ་ཛཱ་ཏི་ལི་ཤི་ཀ་ཀོ་ལ་རྒྱ་མཚོའི་སྦུ་བ་པུ་ཤེལ་ཙེ་མཚེ་ཚིགས་སྲིན་བུ་དུག་མོ་ཉུང་ཐལ་ཀ་རྡོ་རྗེ་སོ་མ་ར་ཛ་དང་ཀ་ར)བཅུ་
དྲུག་སྦྱར། །སྣོད་དུ་བབས་ན་བཤལ་ལས་ལྷག་པ་མེད། །ཕྱེ་མ་སེ་འབྲུ་(སུག་སྨེལ་རྒྱ་ཚྭ་རྒྱམ་ཚྭ་སླེ་
ཏྲེས་སྟར་བུ་མ་ནུ་ཙི་ཏྲ་ཀ་ད་ཏྲིག་སྡིག་པ་ཤིང་ཚ་སེ་ཡབ་ལང་ཏང་ཙེ་ཨ་རུ་ཀ་ར་ཉུང་གཞིའི་མར་ཁུ་དང་སྦྱར་བ་གངས་ཆུས་དབུལ་
)བཅུ་བཞི་སྦྱར་བས་འཇོམས། །ཁྱད་པར་ཕོ་བར་བབས་ན་སེ་འབྲུ་(ཤིང་ཚ་ལི་ཤི་རྒྱམ་ཚྭ་ཁ་ཆེ་གོ་སྙོད་)
དྲུག །རྒྱུ་མར་བབས་ན་གླ་རྩི་(བོང་ང་དཀར་པོ་རེ་རལ་འདམ་བུ་ཀ་ར་ཅུ་གང་མཚལ་)དྲུག་པ་སྦྱར། །ལོང་དུ་
བབས་ན་སྒོག་སྐྱ་(ཆིག་སྐྱེས་བྱི་ཏང་ག་ཨ་རུ་གུར་གུམ་)བཞི་པ་སྦྱར། །ལྒང་པར་བབས་ན་སྡིག་སྲིན་(རྒྱ་
ཚྭ་སུག་སྨེལ་གླ་རྩི་ཉི་དགའ་ཨ་རུ་)དྲུག་པ་སྦྱར། །མཁྲིས་པར་བབས་ན་ག་བུར་(གུར་གུམ་ཅུ་གང་ཏིག་ཏ་བ་ལེ་
ཀ་ཤིང་མངར་ཧོང་ལེན་)བདུན་པ་སྦྱར། །ཤ་དང་པགས་ལ་བབས་ན་རྔུལ་དུ་དབྱུང༌། །དབྱུང་ཐབས་
གསུམ་སྦྱོར་(བཟང་དྲུག་གིས་དོན་ཚད་འཕུལ་ཚ་བ་གསུམ་གྱིས་སྣོད་ཚད་འཕུལ་འབྲས་བུ་གསུམ་གྱིས་ཕྱི་ཚད་འཕུལ་བར་
བྱེད་པས་ཆ་གསུམ་དུ་བྱས་ལ་གཅིག་ཐོ་རངས་ཆང་གིས་འཕུལ་ལ་བཏང་བས་ལམ་འབྱེད། གཅིག་སྔ་དྲོ་རུས་ཁུས་དབུལ་ཚ་བ་
འཕུལ་བས་གོས་དྲོ་བར་གོན། གཅིག་ཉི་ཕྱེད་ཆབ་ཚས་དབུལ་རྔུལ་དབྱུང་བར་བྱའོ་)རྒྱ་སྣེའི་སྦྱོར་བ་ཤིས(དུ་བ་བྱ་བལ་
མ་དང་གུ་གུལ་ནག་པོ་ཆ་མཉམ་དེའི་བརྒྱད་འགྱུར་རྒྱ་སྣེ་དམར་པོ་ཀ་ཤོ་གན་ཏ་བ་ཆུའི་རིལ་བུ་བྱ་ཐོ་རངས་ཆང་གིས་དབུལ་ནམ་
བདུན་ལོན་ནས་སྣེའུ་དེ་བཅོས་པས་བདུགས་ལ་རྔུལ་དྲག་ཏུ་དབྱུང་ངོ་)། །རྔུལ་རྗེས་བལ་དང་ཕྱེས་ཕྱེ་ཁམས་
གསོ་བཏང༌། །ནད་ཟུངས་སྦྱར་ལ་གསུམ་ལྔ་ཅི་རིགས་གདོན། །ཚད་རྙིང་བ་སྤུར་འདོན་པའི་
25-1-502


དཔྱད་མཆོག་ཡིན། །རུས་ཞེན་སྤྲ་ཡས་ཁོལ་བུར་གྲམ་པ་ལ། །རྔུལ་གྱིས་མི་འདྲོངས་རླངས་
ལུམས་བྱས་ལ་གདོན(ཚ་བ་ཆེ་ན་བདུད་རྩི་ལྔ་གྲང་རླུང་ཅན་ལ་མི་རུས་བཙའ་མས་ལ་ཐབ་བཅས་རླུང་སྒོ་དུད་ཁུང་བཞག་
ཟངས་སུ་བསྐོལ་ཞིང་ཁྲི་ལ་ཆ་ར་རྒྱངས་ལ་གླ་ལོག་སྤོས་ཀྱིན་དབྱུང་ཁམས་གསོ་བཏང་ངོ་)། །ཤིན་ཏུ་གདོན་དཀའ་
རང་བྱུང་ཆུ་ལུམས་བྱ། །རྩ་ལ་བབས་ན་ནང་རྩ་རྩ་ནས་སྦྱང༌། །ཕྱི་རྩར་བབས་ན་རྩ་ཁ་ཕྱེ་ཙམ་
གཏར། །དེ་རྗེས་ཨ་རུ་གཡག་མཁྲིས་ཉུང་གཞི་མར། །ཅོང་ཞི་བུ་མོ་ལོ་བརྒྱད་ཆུས་འཕུལ་
འཇོམས། །གསུམ་པ་དུག་ནད་དུག་གིས་བཅོས་པ་ནི། །ནང་ཡན་གྲོགས་པོ་མཚོན་ཆ་རྣམ་པ་
གསུམ། །རིན་ཆེན་ནང་ཡན་གསེར་དངུལ་བྱུ་རུ་ཟངས། །མུ་ཏིག་གཡུ་དྲུག་གྲོགས་སུ་རྡོ་དྲེག་
ལྔ། །གསོད་པའི་མཚོན་ཆར་བསེ་རུ་བསྐུར་བས་འཇོམས། །རྡོ་ལ་ནང་ཡན་གངས་ཐིགས་ཆུ་
རྡེའུ། །གཡུ་དང་མཚལ་དཀར་ཅོང་ཞི་རྣམ་པ་ལྔ། །ཚ་བ་གསུམ་གྱི་གྲོགས་ལ་ཟེ་ཚྭའི་མཚོན། །
ཤ་ལ་ནང་ཡན་བུ་མོ་རེ་འུ་ཁྱི། །བྱ་མཆིན་རྨ་བྱའི་ཤ་ལྔ་བྲག་ཞུན་གྲོགས། །གསོད་པའི་
མཚོན་དུ་བོང་ང་དཀར་པོ་བསྐུར། །དངོས་ལ་ནང་ཡན་དུག་སྣ་ཅི་ཚོགས་ལ། །གྲོགས་སུ་ཨ་
རུ་མཚོན་དུ་དྲི་ཆུ་བསྐུར། །སློང་སྡུད་ངོ་བོས་ངོ་བོ་འཇོམས་བྱེད་པ། །དཔེར་ན་སྲུངས་མ་
བདུད་དུ་བབས་དང་མཚུངས། །གཙོ་བོ་ངོས་འཛིན་གང་ཡིན་སྲན་ཙམ་རེ། །དེ་བས་ཆེས་ན་
ནང་ཡན་དགྲ་ལ་ལྡོག །སྦྱོར་འདི་སྨན་དང་ལྟག་པ་སྤྲད་ཀྱང་ཤིས། །དུག་ནད་སྔགས་ཀྱིས་
གསོ་བ་འདི་ལྟ་སྟེ། །ༀ་ཀ་ལི་ཀུ་ཀུ་རི་ཧང་འུང༌། །འབུ་འཛུ་བྷ་ཏི་སེ་དྷ་ན་དྷ་བྷིས། །བྷ་གང་
འུང༌། །ཨ་ན་བྷིས། རྡེས་གང་འུང༌། །བྷིས་པ་རི་ཀ་འུང༌། བྷིས་གང་དྷི་བྷིས། ཧ་ར་ཧ་ར་མེ་ཧཱུཾ་
ཁྱི་སྭཧཱ། སྲབ་བྷ་ར་བྷིས། ལ་ཧི་ཀ་རོ་ཨ་མྲྀ་ཏ་ཀ་རི་པ་རི་ན་ཧོ། །མ་ཧཱ་དེ་རོ། །ནི་ལེན་ཀན་དྷ་
ཏོ་ཧོར་ཙ། ཧ་རི་བྷིས། ནན་ཏི་བྷིས། ༀ་ཤད་དེ་ཤད་དེ་སྭཱཧཱ། ༀ་ཤེད་ཤེད་བི་ཤེད་སྭཱཧཱ། ༀ་
ཀྲུག་ལེ་ཧྲི་ཨ་ཧྲི་ཁ། ཉི་ཤུ་རྩ་རེས་རང་ཉིད་སྲུང་བ་སྟེ། །བརྒྱ་(ཆུ་དང་ཟས་གང་ལ་ཡང་བཏབ་ལ་བཏང་)
འམ་སྟོང་གིས་གཞན་གྱི་དུག་ནད་སེལ། །བཙན་དུག་ཤ་དུག་སྦྱར་དུག་མ་ལུས་འཇོམས།  །
25-1-503

 
ཚེག་མེད་གསེར་གྱིས་བྲིས་ནས་བཏགས་པས་ཐུབ། །དྲང་སྲོང་རྣམས་ཀྱིས་འདི་ལ་གཅེས་
པར་གྱིས། །དེ་ནས་གསོ་བའི་ལོག་གནོན་བསྟན་པ་ནི། །ཟས་དང་སྤྱོད་ལམ་འཁྲུལ་ནས་
ལོག་པ་དང༌། །གདོན་གྱིས་ལོག་དང་བླ་གཉན་ཐོར་བུའི་ནད། །འདུ་བ་ལོག་དང་གཅོང་དུ་
ལོག་པའོ། །ཟས་སྤྱོད་ལོག་པ་སྐྱོན་ཉིད་ཡོན་ཏན་འགྱུར། །གསོད་ཅིང་སྦྱོང་བ་རོ་མི་ལྡས་
པའི་རྒྱུ། །གདོན་གྱིས་ལོག་པ་མོ་ཕྱྭ་རིམ་གྲོས་བཅོས། །བླ་གཉན་ཐོར་བུའི་ནད་སྣ་གང་བྱུང་
བསལ། །མགོ་དང་གླད་པ་ན་ན་ག་བུར་(ཅུ་གང་བྲག་ཞུན་ཏིག་ཏ་ཨ་རུ་ཙན་དན་དུག་ཉུང་བ་ལེ་བ་ཤ་ཀ་ར་)
དགུ། །སྒོང་མར་སྦྱར་ལ་ར་མཁྲིས་ཆུ་ཡིས་དབུལ། །སྐྱེས་པའི་ཆུ་དང་གཉེན་པོ་(གཡག་མཁྲིས་བ་
སྤུ་གླ་རྩི་ལྕམ་པ་)བཞི་སྦྱར་བཏང༌། །ཡང་ན་རྡོ་སྦྱོར་(གངས་ཐིགས་སྦལ་རྒྱབ་ཚ་ལ་ཅོང་ཞི་ཆོ་ལོང་འབྲུག་རུས་)
དྲུག་པ་བཏང་བས་སེལ། །མིག་དམར་ཚ་འགྲིབས་བྱུག་སྨན་(ནི་ག་བུར་གླ་རྩི་སག་རྩི་མར་དཀར་ཨ་རུ་
བྱུག་ནུ་ཞོ་དང་སྐྱེར་པ་བླུག་ཆུ་ལྕག་བྱ་འབྲས་བུ་གསུམ་སྐྱེར་པ་གོ་སྙོད་ཨ་འབྲས་ཀ་ར་བ་མར་གྱི་སྨན་མར་སྦྱར་ལ་)གཏར་
བས་བསལ། །མིག་འགྲིབས་དོམ་མཁྲིས་གླང་རོག་མཁྲིས་པ་བཏང༌། །སྣ་ཁྲག་འཛག་ན་མེ་ཏོག་རྩ་
གཉིས་བདུན། །ཤིང་མངར་ཐང་ལ་དོམ་མཁྲིས་བཏབ་སྟེ་བཏང༌། །གྲེ་བ་འཛེར་འགགས་མཆེར་པ(་བ་ལང་མཆེར་
སྐམ་ལི་ཤི་ཆུ་གྲང་སྦྱར་བ)འི་སྦྱོར་བའམ། །སྤང་རྒྱན་(བོང་ང་སེ་བའི་མེ་ཏོག་འཕང་མའི་བསྡུས་ཐང་)ཨ་རུ་(གཅིག་
བསྲེགས་གཅིག་མ་བསྲེགས་པའི་བསྡུས་ཐང་)སེ་རུལ་(ཁུ་བ་སེ་རྒོད་བར་ཞུན་གླ་རྩི་བསྡུས་པའི་)སྦྱོར་བས་བསལ། །
གློ་སྙིང་གདུང་ན་གི་ཝཾ་(ཤུག་པ་གཡེར་མ་)སུམ་སྦྱོར་བཏང༌། །སྙིང་འཕྱོ་སྟབ་སེང་ཆང་དུ་སྦངས་
ཁུ་ལ། །ཛཱ་ཏི་བཏབ་བཏང་བདུན་པ་མེ་ཡིས་མནན། །གློ་སྐམ་མང་ལུ་བུར་དཀར་(སྤང་རྒྱན་ཅུ་
གང་ལི་ག་དུར་སྟར་བུ་རུ་རྟ་སེ་འབྲུ་སྲོ་ལོ་སྲིན་བྱའི་ཤའི་)ཏིང་ཁྲོལ་བཏང༌། །མཆིན་པ་ན་ན་བ་མཁལ་སྨུག་
པོའི་ཐང༌། །མཁལ་གཟེར་པི་པི་ལིང་དང་ཞོ་ཤའི་ཐང༌། །ཕོ་བ་སྦོས་ན་རུ་རྟ་(རྒྱམ་ཚྭ་ཤིང་ཚ་)སུམ་
ཐང་བཏང༌། །ཕོ་ལོག་གླང་ཐབས་ནད་ལ་(སོ་བྱ་དུར་བྱིད་དོམ་མཁྲིས་ཨ་རུའི་)རྒྱ་བཤལ་བྱ། །ཡང་ན་
རེ་རལ་(གཉིས་ཨ་རུ་གུར་གུམ་རྒྱམ་ཚྭ་ཐལ་ཚྭ་)དྲུག་གམ་ཚྭ་(རྒྱ་ཚྭ་ཁ་རུ་ཚྭ་རྭ་ཚ་ཐལ་ཚྭ་དྲི་ཆུའི)ཐང་བཏང་། །ཕོ་
25-1-504


བར་འདྲིལ་ན་(རྒྱམ་ཚྭ་སེ་འབྲུ་སུག་སྨེལ་གྱི་)ཐང་དང་(ཨ་རུ་གོ་སྙོད་མི་ཤ་མར་ནག་ལ་བསྐོལ་བའི་)སྣུམ་དུགས་
བྱ། །ཁྲག་ཏུ་འཁྲུ་སྐྱུག་ཕྱྭ་ཚན་ཅུ་གང་དང༌། །ག་བུར་གུར་གུམ་རེ་རལ་རིམ་པས་བསྐྱེད། །
ཁྱེའུ་འཐུང་བའི་ནུ་ཞོ་སྦྱར་ལ་བཏང༌། །ཆུ་འགགས་གླ་རྩི་གཟེ་མའི་བསྡུས་ཐང་དང༌། །རྒྱུན་
འགགས་སྨན་འདྲེན་བིག་པན་ཁུ་བ་བཏང༌། །སྐྱུག་གམ་འཁྲུ་ན་བ་ལྕིའི་སྦྱོར་བ་བྱ(མཚེའུ་སྐྱོང་ཁྲུ་
གང་འོག་གི་ས་བེའུ་ཞོ་འཐུང་གི་ལྕི་བ་ཆུར་སྦྱངས་ཏེ་བཙགས་ཁུར་སོ་མ་ར་ཛ་བསྐོལ་བ་བཏང་)། །འཁྲུ་བ་འབྱམས་ན་
ལུག་ཤའི་ཚོ་ཁུ་བཏང༌། །གཞན་ཡང་གཅོད་སྨན་སྦྱོར་བ་གང་ཤིས་བསྟེན། །སྨན་ཟས་འཇུ་
དཀའ་སྦང་སྐམ་བསྲོས་པས་བདུག །རྒྱམ་ཚྭ་པི་པི་ལིང་གི་བསྡུས་ཐང་བཏང་། །ཤ་ཟོས་ན་ན་
ཤ་ཁུ་ཁྲག་སྐྱུགས་བྱ(རྒོངས་མོ་ཤ་ཁུ་ལ་ཚྭ་སྣ་ཚོགས་ཚད་བཏབ་ལ་བཏང་ནད་པར་ར་ཁྲག་དྲོན་མོ་ཚུགས་ཚད་བཏང་བས་
སྐྱུག་གོ་རྗེས་ལ་སེ་འབྲུ་ལྔ་པ་སྦྱར་རོ)། །ནད་རླངས་ཁོལ་བུར་ན་ན་སྐྱེར་ཁཎྜ། །རྟ་ཡི་ཕྱྭ་ཚན་ཆུར་སྦྱངས་
ཡང་ཡང་བཏང་། །ཁོལ་བུར་གཟེར་འཕོ་མ་ནུ་བཞི་ཐང་བཏང་། །གཉའ་རེངས་སེར་ཤའི་
ཐང་བཏང་གཉའ་ཤས་བདུག །ཡན་ལག་རེངས་ན་གླ་རྩི་(བོང་ང་སྤང་སྤོས་ཛཱ་ཏི་)བཞི་པ་དང༌། །བུ་
མོའི་ཆུ་སྦྱར་རམ་པའི་བསྡུས་ཐང་བཏང༌། །མཚན་བཙོས་སྔོ་ཐང་ཁུ་བ་བྲན་པས་བདུག །ལྷུ་
ཚིགས་སྦྲིད་ན་ཉུང་ཁུ(མ་བཙོས་པའི་ཁུ་བ་དང་རའི་འོ་མ་ཉ་ཁུ་རྒོད་གཡག་ཤ་ཁུ་སྦྱར་བ་བུད་མེད་སྦྲུམ་མའི་ཆུས་འཕུལ་
བ)འི་སྦྱོར་བ་བྱ། །པྲན་རྩེ་རུས་ཚིགས་ན་ན་ནེ་སེག་ཐང༌། །ཆུ་སེར་སྐྱེས་ན་རུ་རྟ་(ཙི་ཏྲ་ཀ་བོང་ང་
དཀར་པོ་གཡག་མཁྲིས་)བཞི་པ་དང༌། །མཛེ་འབྲས་འབྲུམ་པ་ཙན་དན་མར་ཁུ་དང༌། །པགས་པ་ཚ་
ཙག་བྱེད་ན་གངས་ཆུས་བྱུག(ཡང་ན་སེ་སྐྱེར་བར་ཤུན་སོ་མ་ར་བྱུག་གཙོ་བོ་དྲུག་གི་ཆུ་ལྕག་རྡེག) །དེ་སོགས་
གཉིད་ཡེར་སྣ་ཁྲག་འཛག་པ་དང་། །རྔུལ་འབྱམས་ལ་སོགས་ཚ་བ་སྤྱི་མདོར་འཕྲུལ། །གཞན་
ཡང་དབུགས་མི་བདེ་ན་ཁུར་བསྐུར་ཞིང་། །རོ་སྟོད་མི་བདེ་རྡོ་བ་འཕང་བ་དང་། །རོ་སྨད་ན་
ན་རྟ་ཞོན་འདུར་བ་དང༌། །རྐེད་པ་ན་ན་ས་ཕད་འཁུར་ལ་སོགས། །ལུས་སྦྱོངས་འཇམ་པོས་
རྩ་ནད་རང་སར་འགྲེམས། །འདུ་བར་ལོག་ན་རླུང་མཁྲིས་བད་ཀན་གསུམ། །བཅོས་གཞུག་
25-1-505


ཕལ་ཆེར་ཕོ་བའི་མེ་དྲོད་འཆོར། །མཆིན་ཚད་སྐྱེ་ཞིང་ལོང་དུ་རླུང་འཕེལ་བྱེད། །དེ་ལ་དྲོད་
སྐྱེད་བཏང་དང་འཇམ་རྩིས་བསལ། །རྗེས་ལ་ཐོར་བུའི་རླུང་སྐྱེས་གཉིད་མེད་ཅིང༌། །གཡལ་
འདར་བོག་མྱོས་འཕྱོས་པར་འབྱུང་སྲིད་ན། །རུས་ཐང་ཚོ་ཁུ་བུར་ཆང་བསྐུ་མཉེ་བྱ། །ཁ་ཐལ་
ཟུངས་ཟད་རླུང་གྱུར་ཚ་བར་ལྡོག །དེ་བས་ཞུ་འཁྱགས་ས་མཚམས་ཟིན་པར་གྱིས། །བཅོས་
ཉེས་པ་འམ་སྔོན་གྱི་ལས་དབང་གིས། །ཕལ་ཆེར་དམུ་སྐྲན་གཅོང་དུ་ལོག་པ་མང༌། །སྐྲན་དུ་
ལོག་ན་རྒྱ་ཚྭ་རྒྱམ་ཚྭ་དང༌། །ཤིང་ཚྭ་མཛེ་ཚྭ་བིག་པན་ཚ་བ་གསུམ། །རུ་རྟ་ཨ་བྱག་སྲོ་ལོ་ཨ་རུ་
ར། །ཆང་སྦྱར་གསུམ་ཡར་བཏང་ལ་བཤིག་ནས་སྦྱང་། །ཡང་ན་འབྲས་བུ་གསུམ་དང་སེ་འབྲུ་
དང༌། །སྐྱུ་རུ་ཤིང་ཚ་དབྱི་མོང་ཚ་བ་གསུམ། །སྤང་རྩི་བུ་རམ་སྦྲང་དང་སྦྱར་ལ་བཏང༌། །དམུ་
ཆུར་ལོག་ན་དང་པོ་མགོ་སྐྲངས་དུས། །རེ་རལ་རི་ཤོ་ཁྱི་གླད་ར་འོ་སྦྱར། །ཁོང་དུ་བཏང་དང་
ཕྱི་ནས་བྱུག་པ་དང༌། །གནྡྷ་པ་ཏྲ་རྒྱ་རུ་ཙི་ཏྲ་ཀ །དོམ་མཁྲིས་འབྲས་ཀྱི་ཆུ་ཡིས་སྦྱངས་ལ་
བཏང༌། །མཚེ་ཡི་ཐལ་བ་བ་མར་སྦྱར་བས་བྱུག །ཆུར་སྨིན་སྦྱང་བྱས་སེ་འབྲུ་སྐྱུ་རུ་ར། །འགྲོན་
ཐལ་ཤིང་མངར་རྒྱ་ཚྭ་པི་པི་ལིང༌། །ཤིང་ཚ་ཨ་རུ་སྦྲང་དང་ཉུང་མ་ལས། །སྦྱར་བའི་རིལ་བུ་
གསུམ་གསུམ་བཏང་བས་སྐེམས། །དམུ་སྐྲན་གསོ་བའི་སྐབས་དང་འཕྲུལ་ཞིང་བཅོས། །
བཅོས་རྗེས་ཕྱིར་མི་ལྡོག་པའི་རྗེས་བཅད་ཐབས། །ཟས་སྤྱོད་གང་གནོད་བསླང་ཞིང་སྨན་
དཔྱད་བསྐྱར། །སྨན་དྲེད་ནད་ལ་མི་བརྐོ་སྦྱོར་བ་སྤོ། །གང་ཕན་སྨན་དེ་སྐྱོར་ན་སྨན་རྟ་བསྒྱུར། །
དུག་ནད་ལུས་ལ་ལོ་ཟླར་འདྲེས་པའི་ཕྱིར། །ཡང་ཡང་བསྐྱར་ལ་ཚ་བ་རྩད་ནས་འདོན། །
ཞེན་ཆེ་བ་ལ་སྦྱངས་རྗེས་ཆུ་ཚན་བྱ། །འབྲིང་ལ་ཁྲི་ལུམས་ཐ་མ་རྔུལ་དུ་དབྱུང༌། །ཟས་སྤྱོད་
གནོད་པས་མི་ལྡང་རྩད་ཐོན་པས། །ཨ་རུ་བོང་ང་དོམ་མཁྲིས་བྲག་ཞུན་བཞི། །ཆུ་བསིང་ཟླ་
བ་ཕྱེད་བསྟེན་ལྡོག་མི་སྲིད། །དེ་རྗེས་གཙོ་བོ་དྲུག་དང་དམར་པོ་གསུམ། །འབྲས་བུ་གསུམ་
དང་སེ་རུལ་སྨན་མར་ལ། །བཟང་དྲུག་མངར་གསུམ་སྦྱར་ལ་བཏང་བར་བྱ། །དེ་ཡིས་ལུས་
25-1-506


བརྟས་ཕྱིར་མི་ལྡོག་པར་བྱེད། །ཡང་ན་སྤང་རྒྱན་དཀར་པོའི་སྨན་(འོམ་བུ། ཙན་དན། རེ་རལ། སོ་ཏོག །
ཕུག་རོན་བྲུན།)མར་ལ། །མངལ་ཁྲག་ཕག་ཚིལ་རིལ་མ་སྦྲང་སྦྱར་བཏང༌། །ཉ་ཕག་བཤུལ་ཤ་
རུལ་སྐྱུར་དང་པོའི་རྟ། །རྟ་རྒྱུགས་ཆགས་སྤྱོད་ལོ་དུས་བར་དུ་བསྲུང༌། །དེ་ཡིས་ཚེ་སྲོག་མཐའ་
རུ་ཕྱིན་པར་ངེས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་སྦྱར་བའི་དུག་བཅོས་པའི་ལེའུ་སྟེ་བརྒྱད་ཅུ་རྩ་བདུན་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །གྱུར་པའི་དུག་ལ་རྣམ་པ་གཉིས་ཡོད་དེ། །མི་འཕྲོད་པ་ཡི་དུག་དང་ཤ་དུག་
གོ །དང་པོ་རྒྱུ་དང་རྟགས་དང་གསོ་ཐབས་གསུམ། །རྒྱུ་ནི་གཉིས་ཏེ་ངོ་བོས་མི་འཕྲོད་དང༌། །
དྭངས་མ་མ་ཞུ་ཟུངས་སུ་མ་སྨིན་པའོ། །ངོ་བོ་མི་འཕྲོད་ཆང་གསར་ཞོ་མ་ལངས། །སེར་
ཤ་ཡུངས་ཀར་མར་ལ་བརྔོས་པ་དང༌། །ཁྱིམ་བྱའི་ཤ་འམ་ཞོ་དང་འོ་རློན་དང༌། །ལ་ཕུག་
སྒོག་སྐྱ་ཡུངས་དཀར་ལོ་མ་འམ། །ཉ་དང་སྒོ་ང་འབྲུ་མར་སོ་མ་འམ། །ལ་ཕུག་རྣམས་སུ་མི་
འཕྲོད་དེ་དག་རྣམས། །སྔ་མ་མ་ཞུ་ཕྱི་མ་ཟོས་པ་འམ། །བསྲེས་ཏེ་ཟོས་སམ་ལྷན་ཅིག་ཟོས་
པ་ཡིས། །མི་འཕྲོད་ནུས་པ་འཐབས་ནས་ཉེས་པ་འཁྲུགས། །ཡང་ན་མི་འཕྲོད་ཁ་ཟས་མ་
ཡིན་ཀྱང༌། །མ་གོམས་དུས་མིན་ངོ་བོས་འཇུ་དཀའ་བས། །མ་ཞུ་དྭངས་རྙིངས་འདྲེས་ཏེ་རྩ་
མིག་བྱེར། །ལུས་ཟུངས་བདུན་པོ་རིམ་གྱིས་འགྲིབ་པར་བྱེད། །དེ་རྟགས་རྩ་ནི་ཕྲ་ལ་གཏིང་
ན་གྲིམས། །ཆུ་མདོག་དམར་རམ་སྨུག་ལ་ཀུ་ཡ་ཆད། །ཤ་མདོག་སྔོ་སྐམ་མིག་འགྲིབ་མགོ་
བོ་ན། །སྐབས་སུ་ལུས་བརྩེ་བྲང་རྒྱབ་རྩིབ་ལོགས་གཟེར། །སྒྲེག་ཅིང་ཁོང་སྦོ་འཇུ་དཀའ་
ཟོས་རྗེས་ན། །ཚིགས་གཞི་ན་ལ་རྐང་བོལ་བསུས་ཤ་སྦོས། །མི་འཕྲོད་ཟས་ཟོས་འཁྲུ་འམ་
སྐྱུག་ཚུལ་སྟོན། །མདོར་ན་ཕོ་བ་གྲང་ལ་མཆིན་པ་ཚ། །རླུང་ལྡན་སྦོ་སྒྲེག་མགོ་འཁོར་མཁྲིས་
པར་ལྡན། །ཁོང་ཚ་འཁྲུ་དང་ཁྲག་གིས་གཟེར་འཁྱུག་བྱེད། །བད་ཀན་ལུས་ལྕི་མགོ་ན་འཇུ་
25-1-507


དཀའ་འཁྲེན། །ཆུ་སེར་ལྡན་པས་གཡོ་སྐྲངས་ཚིགས་གཞི་ན། །སྣ་ཚོགས་ནད་རྟགས་འབྱུང་
བས་བརྟག་པར་དཀའ། །མ་རྟོགས་ལོག་རྟོག་ཕྱོགས་རྟོགས་མ་ཡིན་པར། །ཕྲ་ཞིབ་སྒོ་ནས་
ངོ་བོ་ཉིད་རྟོགས་ཀྱི། །བཅོས་ཐབས་གཞི་བཟུང་བསྡུ་བསད་སྦྱང་བས་བཅོས། །དང་པོ་སེ་
འབྲུ་བཞི་འམ་ད་ལིས་བཞི། །ཀ་ར་སྦྱར་བ་ནང་ནུབ་ཆུ་ཚན་དབུལ། །དྲོད་སྐྱེད་བེ་སྣབས་སྦྱོང་
ཞིང་བུ་ག་གསོ། །གསོ་བའི་སྨན་ཟས་སྨིན་པར་བྱེད་པ་ཡིན། །བསྡུ་བ་འོ་མ་ལན་ཚྭ་སྦྱར་བ་
དང་། །སྤོས་དཀར་ཕག་ཁྲག་སྟར་བུ་ཀ་ར་སྦྱར། །སྲོད་དང་ཐོ་རངས་ལྟག་སྤྲད་བྱེར་བ་སྡུད། །
འདུས་རྟགས་ཁོང་སྙོམ་ལུས་ལྕི་མཆིལ་སྣབས་མང༌། །ཁ་ཟས་མི་ལེན་སྟོབས་ཆུང་དེ་དུས་
སྦྱང༌། །ནད་སྟོབས་ཆེ་ན་འདུས་ནས་གཉེན་པོས་བསད། །གི་ཝཾ་ཨུཏྤལ་བསིལ་གསུམ་དུག་
མོ་ཉུང༌། །ཚ་ལ་ཧོང་ལེན་སྤོས་དཀར་སོ་མ་ར། །ཨ་རུ་དོམ་མཁྲིས་བྲག་ཞུན་བོང་ང་སེར། །ཤུ་
དག་དཀར་པོ་ཀ་ར་སྦྱར་བྱས་ལ། །ཚ་བའི་དུས་སུ་བསྐོལ་གྲང་ཆུ་ཡིས་དབུལ། །གཞི་འཛིན་
གང་རུང་ཐོ་རངས་ཆུ་སྐོལ་དབུལ། །ཡང་ན་གཉེན་པོ་(བོང་ང་དཀར་པོ་དོམ་མཁྲིས་ཕྱ་ཚན་གསུམ་)ཚད་
གཅོག་(ཙན་དན་ཏིག་ཏ་བྲག་ཞུན་གསུམ་)ཁ་འཛིན་(ཅུ་གང་གུར་གུམ་པི་ལིང་)གསུམ། །ཀ་ར་སྦྱར་བ་གཞི་
འཛིན་ལྟག་པ་སྤྲད། །དེ་རྗེས་གང་དང་ཉེ་བའི་གནས་ནས་སྦྱང༌། །ནད་སྟོབས་ཞི་བའི་རྟགས་
ལྡན་ཁ་ཟས་གློད། །ཞི་དཀའ་སྡུད་བྱེད་བསྐྱར་ལ་འདུས་ནས་སྦྱང༌། །མ་འབྱོངས་ནད་ལྷག་
གཉེན་པོས་བསད་པར་བྱ། །ཉེས་པ་གང་ཆེ་ཟས་སྨན་གཉེན་པོ་སྦྱར། །རྩ་ལ་འགྲམས་ཆེ་ལྟོ་
སྦྱོངས་རྩ་དང་སྦྲེལ། །མི་འཕྲོད་དྭངས་མ་གནས་སུ་མ་སྨིན་དང༌། །སྨུག་པོ་བྱེར་དང་འགྲམས་
འཁྲུགས་རིམས་རྙིངས་རྣམས། །སྦྱར་དུག་ཆ་མཐུན་གསོ་ཐབས་འཕྲལ་ཞིང་བཅོས། །ཤ་ཡི་
དུག་ལ་རྒྱུ་རྐྱེན་རིགས་དང་རྟགས། །བཅོས་པའི་ཐབས་དང་རྣམ་པ་ལྔ་ཡིས་བསྟན། །དེ་རྒྱུ་ཤ་
རློན་བེམ་དང་ཡུལ་ཕྱོགས་ཀྱི། །ས་ལ་དུག་ཡོད་རླངས་པ་ཕོག་པ་ཡིན། །དེ་རྐྱེན་ས་རླན་སྟེང་
དུ་བཞག་པ་དང་། །བཙོས་པའི་དྲོན་མོ་རླངས་པ་བསུབས་པ་དང༌། །དཀར་སྐྱུར་དབྲེ་དང་ཉི་
25-1-508


ཞུར་ཕོག་པ་དང༌། །འབྲུ་དང་ཙམ་པ་སྔོ་གསེབ་ལས་པ་དང༌། །བེ་ལོག་ཤན་པའི་ཁྲག་གིས་
ཕོག་པའི་རྐྱེན། །ཞག་བདུན་འདས་ནས་དུག་ཏུ་འགྱུར་བ་ཡིན། །དེ་རིགས་ཤ་དུག་ཤ་ནད་
གཉིས་སུ་འདོད། །རྟགས་ལ་སྤྱི་དང་བྱེ་བྲག་རྣམ་པ་གཉིས། །སྤྱི་རྟགས་མིག་མི་གསལ་ལ་
འབྲས་བུ་ལྡལ། །ཕོ་བ་སྦོ་འགྱུང་གླང་ཐབས་ན་བ་དང༌། །མིད་པ་ལྟེབ་ལ་སྐད་འཛེར་ཤེས་
པ་ཟི། །མགོ་བོ་འཁོར་ལ་རྐང་པ་གཏད་མི་ཚུགས། །བྱེ་བྲག་ཤ་ནད་མགོ་དང་ཚིགས་གཞི་ན། །
གཙོ་ཆེར་འཁྲུ་སྐྱུག་སྲོག་ལ་ཉེས་པ་ཆུང༌། །ཤ་དུག་གྲེ་བ་འགགས་ལ་སྐད་མི་ཐོན། །ཟས་
སྐོམ་མི་ཐར་ཤེད་བྲལ་མིག་མི་མཐོང༌། །དེ་ནི་མོད་དུ་སྲོག་འཕྲོག་གསོ་བ་སྒྲིམ། །ཟུག་མེད་
སྐྱུག་ཅིང་རྩ་ལ་ནད་མ་བབས། །འཆི་བདག་ཁར་ཚུད་ཅིས་ཀྱང་ལྷོགས་མི་འགྱུར། །བཅོས་
པའི་ཐབས་ལ་དང་པོ་མ་ཞུའི་དུས། །བར་དུ་དུག་རྒྱས་ཐ་མར་བླ་གཉན་བསལ། །མ་ཞུའི་
དུས་སུ་བསྡུས་ལ་སྦྱངས་རྗེས་བསད། །མ་བསྡུས་ཞུ་ནས་རྩ་དོན་ལ་འབྲོས་ཕྱིར། །སེ་སྐྱེར་
བར་ཤུན་ལུག་རུ་ཡུངས་ཀར་དང༌། །གསོན་ཁྲག་སྦྱར་བཏང་རྩ་རུ་མི་འབྲོས་འཛིན། །དེ་རྗེས་
མགྱོགས་བོ་རྟ་(དུར་བྱིད་དུས་སུ་བརྐོས་པ་)ལ་དཔའ་བོ་(ཚོས་དང་ཧོང་ལེན་)བསྐྱོན། །རྣོན་པོ་(རྒྱ་ཚྭ་)བསྐུར་
བ་སྣ་ཁྲིད་(འགྲོན་བུ་གླ་རྩི་)བཅས་པས་སྦྱང༌། །དེ་ལྟར་མ་ཡིན་མི་ཕིགས་གྱེན་དུ་ལྡོག །འོག་ནས་
བསུ་ཞིང་སྐེ་ལ་རྡོ་གྲང་བདུག །སྦྱངས་རྗེས་ནད་ལྷག་འོག་གི་ཕྱེ་མས་བསད། །བར་དུ་དུག་
རྒྱས་འཕྲང་བསལ་དུག་རླངས་བསད། །དང་པོ་གྲེ་བ་འགགས་པའི་འཕྲང་བསལ་བ། །ཉུང་
གཞི་རྩ་བ་ཆུར་སྦངས་ཁ་རུ་བཏིག །ཡང་ན་བཙོད་ཁུར་ཅུ་གང་ཚ་ལ་དུལ། །ཤིང་མངར་ཞིབ་
བཏགས་བཏབ་ལ་གྲེ་བར་བཏིག །ཡང་ན་མཚེ་སྐྱོང་ཁྲུ་གང་འོག་གི་ས། །ཆུ་བསིངས་ཁུ་བར་
ཅུ་གང་སྤང་རྒྱན་དཀར། །སྟར་བུ་ཤིང་མངར་བཏབ་ལ་གྲེ་བར་བཏིག །ཡང་ན་ཅུ་གང་སྤང་
རྒྱན་བོང་ང་དཀར། །ཚ་ལ་དུལ་མ་ཨ་རུ་ཆུ་སྦྱར་བཏིག །གྲེ་བ་མ་སྐམས་ཡང་ཡང་བསྟེན་པར་
བྱ། །སྐེ་ལ་ཆུ་བདུག་སྐེ་རྩ་སྐྱོར་གོང་གཏར། །གསོད་སྨན་གི་ཝཾ་དོམ་མཁྲིས་ཨ་རུ་ར། །ཡུང་
25-1-509


སྐྱེར་བོང་ང་སེར་པོ་བྲག་ཞུན་དང༌། །བྱེའུ་ལ་ཕུག་ཞིབ་བཏགས་ཆུར་སྦངས་པ། །དུག་རླངས་
ཚ་བ་འཇོམས་པའི་མཆོག་ཏུ་བཤད། །བེ་སྐྱེས་ཁཎྜ་སོ་མ་ར་ཛ་དང༌། །གི་ཝཾ་བོང་ང་དཀར་པོ་
བཏབ་ལ་བཏང༌། །ཡང་ན་བ་ལྕི་ས་ལ་མ་ལྷུང་བ། །བ་ཆུས་སྦྱངས་ཁུ་རེ་རལ་བོང་ང་དཀར། །
ལྕགས་ཕྱེ་བྱེའུ་ལ་ཕུག་ཆ་མཉམ་གདབ། །ཉིས་འགྱུར་ཆུས་སྦངས་དང་པོའི་ཚད་དུ་བསྡུ། །གླ་
རྩི་ཁ་ཚར་བཏབ་ལ་བཏང་བར་བྱ། །ཡང་ན་རྦ་བྱེའི་ཤ་དང་ཕྱ་ཚན་གསུམ། །རེ་རལ་གླ་རྩི་
འོམ་བུ་བོང་ང་རྩད། །གི་ཝཾ་བཟང་དྲུག་བྲག་ཞུན་ཨ་རུ་ར། །ཞིབ་བཏགས་ཆུར་སྦང་ཡང་ཡང་
བསྟེན་པར་བྱ། །ཡང་ན་ཉུང་མ་ཨ་རུའི་ཁཎྜ་ལ། །རྒྱ་ཚྭ་གླ་རྩི་བོང་ང་ཁ་ཚར་བཏབ། །རིལ་བུ་
ལོ་བརྒྱད་དྲི་ཆུར་སྦྱངས་ལ་བཏང༌། །བཙོད་དང་རྟ་སྦངས་བསིངས་པོས་བྲན་པའི་ཁུར། །མེ་
སྤྲིན་བཟང་པོ་སྦྱར་བ་གཉེན་པོ་ཡིན། །ཀུན་ལ་ཚ་བ་ཆེ་ན་ག་བུར་དང༌། །ཙན་དན་གི་ཝཾ་སྦྱར་
བཏང་གང་བབས་གཏར། །གྲང་བ་རྒྱས་ན་རྒྱ་ཚྭ་ད་ལིས་དང༌། །སྟག་ཤ་བསྣན་ཏེ་སྦོ་འཁྲོག་
དུགས་ཀྱིས་བསྲོ། །བརྒྱ་སྟོང་སྔགས་ཀྱིས་ངར་གདགས་སྨན་ནུས་སྐྱེད། །འཐུང་བ་མ་ཤེས་
ཁྱེམ་བུས་ཡང་ཡང་གཏིག །ཅིས་ཀྱང་གྲེ་བར་མ་ཐར་སྦུབས་ཐུར་གྱིས། །ཕོ་སྟོད་ཕུག་སྟེ་ལྒང་
ཕུག་བླུག་སྟེ་བཏང༌། །འདི་དུས་བཀྲུ་སྨན་མི་བཏང་དུག་དང་མཚུངས། །ཐ་མར་བླ་གཉན་
ཐོར་བུ་བསལ་བ་ནི། །རྒྱུན་འགགས་ཨུག་ཆོས་སོ་མ་ར་ཛ་བཏང་། །འདྲེན་བྱ་ཆུ་འགགས་
བོང་མིག་(ཆུ་སྦུར་ཉི་དགའ་སོ་བྱའི་སྒྲོ་ཐལ་བསིངས་པོ་དྲོ་ཙམ་ལ་སྦྱར་བའི་)སྦྱོར་བ་བྱ། །མིག་ཚ་འགྲིབ་ན་ག་
བུར་སྐྱེར་པ་བྱུག །ཆུ་དུགས་གཏར་ག་ལྕགས་ཁུ་འཇམ་བཤལ་ཤིས། །ཤ་པགས་སྦྲིད་ན་སྤང་
རྒྱན་དཀར་པོ་དང༌། །ཅུ་གང་གུར་གུམ་བཏང་བས་སེལ་བར་བྱེད། །ཕོ་བ་སྒངས་ན་ད་ལིས་
(རྒྱ་ཚྭ་སྟག་ཤ)གསུམ་པ་བཏང༌། །གློ་མང་འགོག་དཀའ་རུ་རྟ་སྤང་རྒྱན་དཀར། །སྟར་བུ་ཚ་ལ་ལོ་
བརྒྱད་ཆུར་སྦྱངས་བཏང༌། །ཁ་ཟས་ཕྱེ་ཐུག་འབྲས་དང་ཡོས་ཐུག་དང༌། །བསྐོལ་གྲང་བ་ཚྭ་
མེད་པའི་ཆུ་བསིལ་བསྟེན། །དཀར་དང་མངར་བག་ཤ་དང་རུལ་སྐྱུར་སྤང༌། །གྲང་ཤས་ཆེ་ན་
25-1-510


གསར་འཇམ་སྒོག་ཆབ་བཏང༌། །སྤྱོད་ལམ་དྲག་ཤུལ་དུ་བ་ས་རླན་དང་། །སྐད་ཆེན་སྨྲ་དང་
མྱ་ངན་སེམས་ལས་སྤང༌། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་
བ་མན་ངག་གི་རྒྱུད་ལས་གྱུར་པའི་དུག་བཅོས་པའི་ལེའུ་སྟེ་བརྒྱད་ཅུ་རྩ་བརྒྱད་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །རང་བཞིན་དུག་ལ་རྒྱུ་དང་མི་རྒྱུ་གཉིས། །སྔོན་གྱི་དུས་སུ་ལྷ་དང་ལྷ་མིན་
གྱིས། །བདུད་རྩི་འདོད་ནས་རྒྱ་མཚོ་བསྲུབས་པ་ལས། །སྐྱེས་བུ་སྐྲ་སེར་མིག་ནས་མེ་འབར་
བ། །འཇིགས་པའི་གཟུགས་ཅན་དོན་ཏེ་ཚངས་པ་ཡིས། །ཧཱུཾ་བརྗོད་པ་ཡས་རྒྱུ་མི་རྒྱུ་ལ་ཐིམ། །
མི་རྒྱུ་བོང་ང་བཙན་དུག་སྤྱང་དུག་དང༌། །ར་དུག་སེ་ཤིང་ཐང་ཕྲོམ་རྟ་སྤུ་སོགས། །རྒྱུ་བ་ཁྱི་
སྨྱོན་སྦྲུལ་དང་སྡིག་པ་དང༌། །སྲིན་བུ་བ་ཡི་དུག་ལ་སོགས་པ་ཡིན། །དེ་ལ་དང་པོ་མི་རྒྱུ་བོང་
ངའི་རིགས། །རྐྱང་པར་སོང་རྟགས་ལྕེ་མཆུ་བེར་ལ་ཚ། །སེར་ག་འགས་དང་མདོག་ནག་ཁ་
དབུགས་གྲང༌། །འགུལ་ན་མུན་སྲོ་དྲན་པ་ཉམས་ཤིང་འགྱེལ། །རྐང་ལག་ན་ཞིང་རེངས་ཏེ་
གྱེན་ལ་ལྡོག །ཕོ་བ་སྦོ་ཞིང་ཁོང་པ་གཏུབ་སྙམ་བྱེད། །དང་པོར་གསོན་ཁྲག་དྲོན་མོ་ཁྱོར་གང་
བཏུང་། །ཆུ་ནང་བཅིང་ངམ་སྟེང་ནས་རྒྱུན་དུ་བླུག །དེ་ཡིས་རྩ་རུ་མི་འབྲོས་ཕོ་བར་འཛིན། །དེ་
རྗེས་བུལ་ཏོག་ཡུང་བ་ཨ་རུ་ར། །ཆུ་སྦྱངས་བསླུད་ན་འཕྲལ་དུ་དེ་སྲོག་སྟེར། །ཡང་ན་ཨ་རུ་ར་
དང་བོང་ང་དཀར། །ཧ་བོ་དྲི་ཆུས་སྦྱངས་བཏང་ཞི་བར་བྱེད། །ཡང་ན་ཨ་རུ་བུལ་ཏོག་བོང་ང་
དཀར། །ཕྱ་ཚན་ཞིབ་བཏགས་ཆུར་སྦྱངས་བཏང་བར་བྱ། །སྦྱོར་བ་ཀུན་ལ་སྔགས་ཀྱིས་ངར་
བཏགས་པས། །སྨན་གྱི་ནུས་སྐྱེད་དུག་དབལ་གསོད་པར་ནུས། །མི་མཁས་རྨོངས་པས་བོང་
ང་རྐྱང་འདེད་བྱེད། །སྨན་གྱིས་དུག་དེད་སྲོག་རྩར་ཤོར་ཏེ་གསོད། །མན་ངག་འདི་ལྡན་ལས་
དབང་མིན་པ་འཚོ། །ཐང་ཕྲོམ་དཀར་ནག་ནད་མེད་ལུས་སྟོབས་འཁྱོལ། །དབང་པོ་འཁྲུལ་
ནས་མིག་སྔར་སྣ་ཚོགས་མཐོང༌། །སྨྲ་བ་འཆལ་ཞིང་གཏད་མེད་བུད་མེད་འདོད། །དེ་ལ་སླེ་
25-1-511


ཏྲེས་རེ་རལ་བ་ཤ་ཀ །ཞིབ་བཏགས་ཞུན་མར་ལ་སྦྱར་བཏང་བས་འཇོམས། །བསེ་ཤིང་རྟ་
སྤུ་ཕྱི་ནང་གང་རེག་སྐྲངས། །གྲེ་བ་མིད་པ་ཕོ་བ་གང་སྐྲངས་ཀྱང༌། །རྨ་ཡོད་སྙམ་སེམས་ཟུག་
ཆེ་ཧྲིལ་ཧྲིལ་ན། །ར་ཤ་ར་ཁྲག་དྲི་ཆུས་བསེ་ཤིང་འཇོམས། །འབྲུ་མར་(གྱི་ཕྱིར་བྱུག་ཁུང་དུ་བཏང་)
ཚིལ་མར་ཕག་ཚིལ་རྟ་སྤུ་འཇོམས། །དེ་ནས་རྒྱུ་བའི་དུག་གི་གསོ་ཐབས་ལ། །དང་པོ་ཁྱི་དུག་
མཚན་ཉིད་རྟགས་དང་ནི། །གསོ་བའི་ཐབས་དང་རྣམ་པ་གསུམ་ཡིན་ཏེ། །མཚན་ཉིད་ཁྱི་དེ་
འོན་ལོང་ཁ་ཆུ་འཛག །ཁ་གདངས་མགོ་བོ་སྨད་ཅིང་མཇུག་མ་ཕབ། །འཁྱོམ་ཞིང་ཕྱོགས་མེད་
ཀུན་ཏུ་རྒྱུ་བ་ཡིན། །དེ་ཡི་སོས་ཟིན་རྟགས་ལ་གསར་རྙིང་གཉིས། །གསར་དུས་རྨ་ནས་ཁྲག་
ནག་འཛག་པ་དང༌། །རྨ་མདོག་སྨུག་ནག་མི་སྡུག་ར་རི་འོང༌། །སྐྲངས་ཤིང་རྨ་ཡི་ནང་དུ་རྨེན་
བུ་ཆགས། །རྙིངས་ནས་མགོ་བོ་ན་ལ་གྲང་ཤུམ་བྱེད། །འཕྱོ་འདར་སྙིང་ག་ན་ལ་སྐབས་སུ་
འབོག །མེ་ལོང་ཆུ་མཐོང་དངངས་ལ་ཁྱི་སྤྱོད་བྱེད། །དུག་ལངས་རྒྱས་པའི་རྟགས་སུ་བཤད་
པ་ཡིན། །བཅོས་པའི་ཐབས་ཀྱང་གསར་རྙིང་དུས་ཀྱི་སྦྱར། །སོས་ཟིན་མོད་ལ་ཁ་དང་རྔབས་
རྭས་དྲང༌། །སོར་བཞིའི་གོང་དུ་རས་འཇག་བསྡམ་པར་བྱ། །ཞག་ལོན་པ་ལ་རྨ་དེ་ལྕགས་
ཀྱིས་བསྲེག །དེ་འོག་ཞུན་མར་བསྐོལ་བ་རྨ་ནང་དུ། །རྒྱ་ཚྭ་སྐྱེར་ཤུན་དུད་པ་བཙོད་ཀྱིས་བྱུག །
ཡུང་སྐྱེར་བོང་ང་གླ་རྩི་མར་གྱིས་བྱུག །དེ་སྟེང་རྟ་སྦངས་ཞོ་སྦྱར་རྨ་འཇིབས་བྱ། །དེ་རྗེས་
ལྡང་ངམ་མི་ལྡང་ཆུ་ལ་བརྟག(ལྕེ་དང་མཚུལ་བ་ཁྱི་འདྲ་བ་དང་ཆུ་གསེབ་དུ་བྱི་བ་བྱུང་སྙམ་པ་བྱེད་པ་དང་དངངས་ན་
ལྡང་བ་ཡིན་ནོ) །མི་ལྡང་བ་ལ་འོག་གི་གཉེན་པོ་བསྟེན། །ལྡང་བར་གྱུར་ན་མཆེ་བ་བྲང་ཀྲད་དང༌། །
དུད་པ་དྲི་ཆུ་(དགེ་སློང་ངམ་བྱིས་པ་ལོ་བརྒྱད་པའི་)སྦྱར་བཏང་དུག་ཞེན་བསླང༌། །ལངས་ནས་ལུས་
སྦྲིད་ཁོལ་བུར་ན་བ་དང༌། །ཁྱི་མཐོང་ཚིག་པ་ཟ་ལ་བཤུལ་ཤ་ན། །དེ་ལ་གི་ཝཾ་ཛཱ་ཏི་ཕ་ཝང་
ལོང༌། །བུར་དཀར་བཞི་འགྱུར་ཆུ་གྲང་འཕུལ་ལ་བཏང༌། །ཡང་ན་གི་ཝཾ་བཟང་དྲུག་ཐང་ཕྲོམ་
པ། །བ་སྤྲུ་གླ་རྩི་ཀ་རས་ཁ་བསླངས་བཏང༌། །རྒྱ་སྤོས་སེང་ཕྲོམ་ཤུ་དག་ཧོང་ལེན་དང༌། །པ་
25-1-512


ཋ་སུག་སྨེལ་གུར་གུམ་ཞུན་མར་སྦྱར། །བཟའ་བྱུག་མི་སྐྲ་ཡུངས་ཀར་བུར་རྙིང་གི །དུ་བས་
བདུགས་པས་རྨ་དང་སྐྲངས་པ་འཇོམས། །ཟླ་དྲུག་ཚུན་ཆད་ཞག་བཅུའི་སྨན་རེ་བསྟེན། །ཞག་
བཅུ་ཕར་འདས་ཟླ་ལོ་ལོན་པའམ། །དུག་ལང་རྟགས་ལྡན་དྲུག་བདུན་མེ་ཡིས་བསྡམ། །དུར་
བྱིད་ཧོང་ལེན་དྷ་དུ་ར་ཡིས་སྦྱང༌། །གུ་གུམ་དུད་པ་ཀ་ཤོ་ཀན་ཏ་དང༌། །རྒྱ་སྣེ་བ་ཆུའི་རིལ་བུ་
དྲི་ཆུས་དབུལ། །ཡང་ན་ཕ་ཝང་ལོང་བུ་རྣམ་པ་གསུམ། །བཟང་དྲུག་གི་ཝཾ་ཙན་དན་ཨ་རུ་
ར། །བུ་རམ་དཀར་པོ་བཞི་འགྱུར་སྦྱར་ལ་བཏང༌། །ནད་མགོ་ཆོམས་ནས་རྒྱ་སྤོས་ན་ལེ་ཤམ། །
སུག་སྨེལ་རུ་རྟ་ཤིང་མངར་སྦྲང་རྩི་དང༌། །ཞུན་མར་སྦྱར་བའི་ལྡེ་གུས་ནད་རྗེས་གཅོད། །
རྨེན་པ་སྐྲངས་ན་རུས་རྙིང་འབའ་ཆ་དང༌། །ཉ་ལྕིབས་སྦྱར་བའི་ལུམས་ཀྱིས་མནན་པ་དང༌། །
ཁོལ་བུ་ན་སར་ཧོར་གྱི་མེ་བཙའ་བྱ། །མེ་ལོང་ཁྱི་སྐད་ཆུ་རྒལ་ཞེ་སྡང་སྤང༌། །དེ་ཡིས་ཁྱི་དུག་
གིས་ཟིན་འཚོ་བར་ངེས། །སྦྲུལ་དུག་མཚན་ཉིད་རྟགས་དང་བཅོས་ཐབས་གསུམ། །མཚན་
ཉིད་གདེངས་(འཁོལ་ལོ་གཡུ་དྲུང་རྟགས་ཀྱི་རི་མོ་ཡོད་པ་)ཀ་ཅན་དང་ལུས་(རི་མོ་སྣ་ཚོགས་འོང་རི་ལ་འགྲོ་བུལ་)
འཁྱིལ་དང༌། །ཁྲ་བོ་གོ་དྷའི་བུ་བཞིས་འདུ་བ་འཁྲུགས། །རྟགས་ལ་ཟིན་ཚུལ་རིགས་དང་དུག་
ཤུགས་གསུམ། །དང་པོ་བལྡགས་དང་སོས་ཟིན་བཅད་དང་བཙིར། །དེ་རིགས་རྟོག་པའི་དུག་
དང་སྐྲག་པའི་དུག །མཆེ་བའི་དུག་དང་རྣམ་པ་གསུམ་ཡིན་ཏེ། །སྦྲུལ་དུག་ཁྲག་ལ་བརྟེན་ཏེ་
ཏིལ་མཆེད་(སྐ་གཅིག་རྨ་ཁར་གནས། དེ་ནས་མཆེད་དེ་གཞུག་སྙིང་ལ་འགྲོ་བས་)འདྲ། །གདེངས་ཀ་ཅན་ཤུགས་
ཁྲག་རྣག་འཛག་པ་དང༌། །ལུས་ལ་སྲིན་བུ་འགྲོ་སེམས་རྨེན་བུ་སྐྱེ། །མགོ་ལྕི་རྨ་སྣབས་ཚིལ་
མང་མིག་འབྱེད་དཀའ། །ཚིགས་བྱེར་སྙམ་སེམས་ལུས་ཚ་སྐྱིགས་བུ་འབྱུང༌། །འཁྲུ་ལྕི་སྙིང་
ག་རྒྱབ་དང་སྒལ་ཚིགས་ན། །ལུས་འཁྱིལ་ཁྲག་དང་ལུས་སེམས་ཚ་བ་སྐྱེ། །སྐྲངས་བརྣགས་
རིམས་འདེབས་ལུས་ཀུན་ཁྱབ་པར་ཚ། །ཁྲ་བོ་ཁྲག་དང་མདོག་སྐྱ་གྲང་རིམས་འདེབས། །
གོ་དྷའི་བུ་ཡི་ཤུགས་ལ་ཀུན་རྟགས་འབྱུང༌། །ཟིན་དུས་དབུགས་ཐུང་སྐྱུག་ཅིང་སྙིང་གཟེར་
25-1-513


སྤང༌། །གསོ་ཐབས་རྨ་ཡི་གོང་དུ་རས་ཀྱིས་བཅིངས། །ལུས་འཁྱིལ་མ་ཡིན་གསུམ་པོའི་རྨ་
བསྲེག་བྱ། །རྔབས་རྭ་ཀུ་བས་རྨ་ནས་ཁྲག་གཞིབ་དང༌། །ཁྱི་དུག་ལྟར་དུ་བྱུག་བདུག་རྨ་ཆས་
བྱ། །ཁྲག་ལ་གནས་ཕྱིར་རྨ་དང་གར་ཉེ་གཏར། །གུ་གུལ་བཞི་དང་རྒྱ་སྤོས་ལྔ་པས་ནི། །ཁྱི་
སྦྲུལ་སྲིན་བུ་བ་ཡི་དུག་རྣམས་འཇོམས། །བྱེ་རུག་རྒྱ་སྤོས་ཐང་ཤིང་ཀ་རཉྫ། །ཡུང་སྐྱེར་འབྲས་
བུ་གསུམ་དང་ཚ་བ་གསུམ། །བ་གཅིན་བཏགས་ཏེ་བཏུང་དང་རྨ་སྨན་བྱ། །བ་སྦྲུལ་སྲིན་བུ་
སྡིག་པའི་དུག་ཀུན་སེལ། །གླ་བ་འཁར་སིལ་དུགས་སོགས་སྦྲུལ་སོགས་འབྱེར། །སྡིག་པའི་
དུག་རེག་ཚ་ཞིང་ན་ལ་མཆེད། །དེ་ནི་སྦྲུལ་ཟིན་གསོ་བ་ཇི་བཞིན་ནོ། །སྲིན་བུའི་དུག་ལ་ནད་
རིགས་གསོ་བ་གཉིས། །དང་པོ་སྦྲུལ་ལས་གྱུར་དང་མཆུ་སྦོམ་གཉིས། །སྦྲུལ་གྱི་ཤ་དང་ལྕི་བ་
ཁ་ཆུ་ལས། །སྐྱེས་པའི་དུག་ཅན་སྲིན་བུ་རྐྱང་འདུས་བཞི། །ཟོས་རྗེས་ཚ་གཡའ་སྐྲངས་ཤིང་
ཤུ་བ་འབྱུང༌། །རླུང་སྲིན་ཟུག་ཆེ་མཁྲིས་སྲིན་ཚ་ལ་མཆེད། །བད་སྲིན་གྲང་འབྱམས་འདུས་པ་
སྦྲུལ་ཤུགས་འདྲ། །གསོ་ཐབས་བདུག་བྱུག་ཁོགས་སྨན་སྦྲུལ་ལྟར་གསོ། །རླུང་མཁྲིས་བད་
ཀན་སྦྱར་བའི་རྨ་ཆས་བྱ༌། དེ་བཞིན་བ་དུག་དབྱེ་བ་བཅུ་དྲུག་ཀྱང༌། །ངེས་མེད་དུག་ཅན་བ་
ནི་གཅིག་ཏུ་འདོད། །སོས་ཟིན་ཚ་ལ་སྐྲངས་ཤིང་ཤུ་བ་རྣག །མཁྲིས་གྱུར་ཆུ་བུར་ཚ་ལ་རིམས་
ཀྱིས་འདེབས། །བད་ཀན་གྲང་སྐྱ་གཡའ་ལ་གྲང་རིམས་འདེབས། །རླུང་གྱུར་རྩུབ་ནག་རུས་
ཚིགས་ན་བར་བྱེད། །བཅོས་ཐབས་མཁྲིས་གྱུར་སྣོད་སྟེང་གཏར་ཁྲག་དབྱུང༌། །གཉིས་པོ་རྨ་
གཏོད་བསྲེགས་རྗེས་དུག་སྨན་བྱུག །སྦྲུལ་གྱི་གསོ་བ་འདིར་སྦྱར་བ་དུག་འཇོམས། །བིལ་པ་
རྒྱ་སྤོས་ཙན་དན་ཨུཏྤ་ལ། །བཅའ་སྒ་ནིམ་པ་རུ་རྟ་པི་པི་ལིང༌། །ལྕང་མ་ཆུ་སྲིན་སྡེར་མོ་པོ་སོ་
ཆ། །ག་བྲ་ཤིང་ཚ་སྦྱར་བྱུགས་བ་དུག་འཇོམས། །ཞེས་གསུངས་སོ། །བདུད་རྩི་སྙིང་པོ་ཡན་
ལག་བརྒྱད་པ་གསང་བ་མན་ངག་གི་རྒྱུད་ལས་རྒྱུ་བ་དང་མི་རྒྱུ་བའི་དུག་གསོ་བའི་ལེའུ་སྟེ་
བརྒྱད་ཅུ་རྩ་དགུ་པའོ།། །། 
25-1-514


དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་
རིག་པའི་ཡེ་ཤེས་ལགས། རྒས་པ་གསོ་བའི་སྐབས་ལ་ཇི་ལྟར་བསླབ་པར་བགྱི། །འཚོ་
མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང༌། དྲང་སྲོང་རིག་པའི་ཡེ་
ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ཚེ་ཟད་རྒས་པའི་ནད་
ལས་བསྲིང་བ་ཡི། །བཅུད་ལེན་གྱི་ནི་ཆོ་ག་བཤད་པར་བྱ། །འདི་ལ་ཕན་ཡོན་གནས་རྟེན་
བྱ་ཐབས་བཞི། །ཕན་ཡོན་ཚེ་རིང་ན་ཚོད་དར་ལ་འཇོག །ལུས་མདངས་སྟོབས་སྐྱེ་དབང་
པོ་དྲན་པ་གསལ། །བློ་རྣོ་སྐད་མདངས་ལྡན་ཞིང་རོ་ཙར་བྱེད། །དེ་གནས་ས་གཙང་དབེན་
ཞིང་ཉམས་དགའ་ལ། །ཆུ་ཤིང་འཛོམ་ཞིང་བར་ཆད་མེད་པར་སྒྲུབ། །རྟེན་ནི་ཧ་ཅང་རྒས་
པ་མ་ཡིན་པས། །མེ་ཉི་ཆགས་སྤྱོད་ལུས་སེམས་དྲག་ལས་དང༌། །རུལ་སྐྱུར་རྗེན་ངད་ཚྭ་
སོགས་སྤངས་བྱས་ལ། །ཚེས་གྲངས་བཟང་ལ་ལྷ་མཆོད་ཁྲུས་བྱས་འཇུག །བྱ་བའི་ཐབས་
ལ་གཙོར་སྒྲུབ་ཞོར་སྤྱད་གཉིས། །གཙོ་བོར་སྒྲུབ་པ་སྣུམ་བཅོས་དུགས་བྱས་ལ། །ཨ་རུ་སྐྱུ་
རུ་རྒྱམ་ཚྭ་པི་པི་ལིང༌། །ཤུ་དག་བཅའ་སྒ་ཡུང་བ་བྱི་ཏང་ག །བུ་རམ་བ་ཆུར་སྦྱར་བའི་ཁྲུས་
ཀྱིས་སྦྱང༌། །མ་སྦྱངས་བཅུད་ལེན་རོ་ཙ་སྦྱོར་བྱེད་པ། །དྲི་བཅས་ཚོས་ལྟར་བྱས་པ་དོན་མེད་
འགྱུར། །ལྷ་མིན་ཁྲག་དེ་བཅུད་ལེན་མཆོག་ཡིན་པས། །ཤུན་པ་ཕྲལ་ལ་ཞག་གཅིག་ཆང་ནང་
སྦང༌། །ཁུ་བཙགས་དྭངས་མ་ནང་པར་རན་ཙམ་བསྟེན། །རྗེས་ལ་འོ་མ་ཞུན་མར་སྐམ་ས་ཡི། །
ཤ་ཁུ་ནད་དང་གང་འཕྲོད་བསྐོལ་ལ་བསླུད། །ཡང་ན་སྒོག་སྐྱ་ཞུན་མར་སྦྱར་ལྡེ་གུ། ནས་
སྣོད་བདུན་གསུམ་བཞག་པའི་ཞག་གྲངས་བསྟེན། །རླུང་ཤས་ཅན་གྱི་ཚེ་འཕེལ་རིང་འཇོག་
ཡིན། །བྲག་ཞུན་མདོག་ནག་ས་མེད་བ་གཅིན་བྲོ། །སྣུམ་ཞིང་ཁ་བསྐ་ལྕི་བ་ལྕགས་གྱུར་
མཆོག །གསེར་དངུལ་ཟངས་ལྕགས་སྦྱར་ཏེ་འོ་མས་དབུལ། །ཡང་ན་ནད་དང་གང་འཕྲོད་
སྨན་ཆ་མཉམ། །ལྕགས་ཀྱི་སྣོད་དུ་བཅུག་ལ་ཚད་(ཞག་བདུན་དུ་ཞོ་གཉིས་གཉིས་རྩ་གཅིག་ཏུ་སྲང་ཕྱེད། ཞེ་
25-1-515


དགུའི་བར་དུ་སྲང་རེ་རྟེན་)ལྡན་བཟའ། །འདི་ལ་མོན་སྣེ་རྒྱ་སྲན་རྟག་ཏུ་སྤང༌། །ས་སྟེང་བྲག་ཞུན་
མ་བཅོམ་ནད་ཡོད་མིན། །ཁྱད་པར་ཚ་ཤས་ཅན་གྱི་ཚེ་འཕེལ་མཆོག །ཙི་ཏྲ་ཀ་དང་སྦྲང་རྩི་
མར་སྦྱར་བ། །ཟླ་བ་གཅིག་ཏུ་འཕྲོད་པའི་ཟས་དང་བསྟེན། །ཚེ་རིང་ལུས་རྒྱས་མེ་དྲོད་འབར་
བར་འགྱུར། །བད་ཀན་གྲང་ནད་ཅན་གྱི་ཚེ་གནས་སོ། །དེ་དང་བ་ཆུར་སྦྱར་བསྟེན་མཛེ་ནད་
འཇོམས། །ཨ་རུ་བར་སྐྱུར་འབྲས་བུའི་སྨན་མར་གྱིས། །དབང་གསལ་སྟོབས་སྐྱེ་འདུས་པའི་
ནད་སེལ་ཏེ། །ན་ཚོད་དར་ལ་འཇོག་པའི་དམ་པ་ཡིན། །རྩི་བཞི་དྭངས་མ་ལྔ་ཡི་བཅུད་བླངས་
པ། །ས་ཡི་དྭངས་མ་བྲག་ཞུན་ཤ་ཡི་གསོས། །རྡོ་ཡི་དྭངས་མ་ཅོང་ཞི་རུས་པའི་གསོས། །ཤིང་
གི་དྭངས་མ་བུ་རམ་སྟོབས་ཀྱི་གསོས། །མེ་ཏོག་དྭངས་མ་སྦྲང་རྩི་མདངས་ཀྱི་གསོས། །རྩི་ཡི་
དྭངས་མ་མར་དཀར་བཅུད་ཀྱི་གསོས། །ཤུག་འབྲུ་བ་ལུ་མཚེ་དང་མཁན་པ་བཞི། །དགུན་
མི་སྐམས་པ་ཚེ་ཡི་གསོས་སུ་འགྱུར། །འདི་དགུའི་བཅུད་ལོངས་སྲོག་གཅོད་ནད་དགུ་གྲོལ། །
རྒས་པའི་རྟགས་ནུབ་བཅུ་དྲུག་ལྟ་བུའི་ལུས། །སེང་གེའི་རྩལ་ལ་གླང་པོ་ལྟ་བུའི་སྟོབས། །རྨ་
བྱའི་མདངས་ལྡན་མགྱོགས་པ་ཅང་ཤེས་རྟ། །ཚེ་སྲོག་ཉི་ཟླ་གཉིས་དང་མཉམ་པར་འགྱུར། །
དེ་ཡི་སྦྱོར་ཐབས་ཆེན་པོ་ཆུང་ངུ་གཉིས། །དང་པོ་ཅོང་ཞི་བྲེ་གང་ཞོ་གཅིག་ཆུར། །བསྡུས་
པའི་ཁུ་བ་བྲེ་གང་རྩིགས་མ་བཏོན། །བདུད་རྩི་བཞི་དང་བྲག་ཞུན་བྲེ་ཕྱེད་ཕྱེད། །གུད་གུད་
བསྡུས་པའི་ཁུ་བ་ཁྱོར་བ་རེ། །འོ་མ་མར་སྲང་སུམ་ཅུ་ཆུ་བཅད་ལ། །བུ་རམ་སྦྲང་བྲེ་དོ་སྦྱར་
ཐོད་བཟང་བླུག །བཻ་རོ་ཙ་ན་ༀ།(དབུས་རྣམ་སྣང་།) བཛྲ་ས་ཏྭ་ཧཱུཾ།(ཤར་རྡོར་སེམས།) རཏྣ་མི་ཏ་ཏྲཾ།(ལྷོ་
རིན་འབྱུང་།) ཨ་མི་ཏ་བྷ་ཧྲཱི།(ནུབ་སྣང་མཐའ།) ཀརྨ་བཛྲ་ཨཱ(བྱང་དོན་ཡོད་གྲུབ་པ)། རིགས་ལྔ་ཡབ་ཡུམ་
བྱང་སེམས་འཕྲོ་འདུ་བྱ། །ཟླ་བ་ཡར་ངོའི་ཚེས་གཅིག་ནང་པར་བཟའ། །དྲོ་གོང་རྒྱུན་བསྟེན་
རྔུལ་མ་བྱུང་ཙམ་བཅག །ཆུང་བ་ཅོང་ཞི་ཕུལ་གང་སྤང་མེར་བསྲེགས། །ཆུ་ནང་བཏོན་ཏེ་འོ་
མ་བྲེ་གང་དང༌། །མར་སྲང་གསུམ་བཅོས་ལུག་ཞོ་ཙམ་གྱུར་ལ། །བྲག་ཞུན་བཞི་ནམ་བདུད་
25-1-516


རྩི་བཞི་ཁྱོར་རེ། །སྦྲང་ཕུལ་སུམ་ཆ་བུར་སྲང་གསུམ་དང་སྦྱར། །དར་ཙམ་བཙོས་ཏེ་སྣོད་
བཟང་བཅངས་ལ་བསྟེན། །ཅོང་ཞི་ལྕགས་རྡོ་ཆ་མཉམ་མངར་གསུམ་སྦྱར། །ཐོད་པར་བླུག་
ལ་རང་ཉིད་ཡི་དམ་བསྒོམ། །བྷྲཱུཾ་ལས་སྣོད་དེ་རིན་ཆེན་གཞལ་ཡས་ཁང༌། །ནང་དུ་ཨཱ་ལས་
བཅོམ་ལྡན་ཚེ་དཔག་མེད། །ༀ་སརྦ་ཏ་ཐཱ་ག་ཏཱ་ཨ་མྲྀ་ཏ་ཤུདྔྷེ་ཨཱ་ཡུ་དྷ་ར་ཎི་པུཥྚིཾ་ཀུ་རུ་ཡེ་སྭཱཧཱ། །
སྤྲོ་བསྡུས་(བདག་གི་འོད་ཟེར་ཚེ་དཔག་མེད་ལ་འཕྲོས། ཚེ་དཔག་མེད་ཀྱི་འོད་ཟེར་ཕྱོགས་བཅུར་འཕྲོས་པས་སངས་རྒྱས་
དང་སེམས་ཅན་དང་འབྱུང་བ་དང་)ཕྱོགས་བཅུའི་ཚེ་བཀུག་བུམ་པར་བསྟིམ། །བསྙེན་པ་ཁྲི་བསྐྱལ་
འཆི་མེད་བདུད་རྩིའི་ཚེར། །རིལ་བུ་བདུན་ལྔ་གསུམ་ལ་སྔགས་བཏབ་བསྟེན། །ནད་གདོན་
སྡིག་སྒྲིབ་དག་སྟེ་(ལུས་དཀར་མེར་གང་བས་)ཚེ་འཕེལ་(ནས་འཆི་མེད་ཀྱི་ཡེ་ཤེས་སུ་)བསམ། །ར་མོ་ཤ་ཡི་
རྩ་བ་སོས་སྟོན་བརྐོས། །གཏུབས་ལ་ས་བཤལ་ཁུ་བ་ཐིམ་པར་བཙོ། །གྲིབ་སྐམས་དྲུས་ཕྱེ་
སུམ་ཆ་བསྲེས་པ་ཡི། །དང་པོ་ཚ་བ་ཟན་ཆང་ཟན་དྲོན་བྱ། །འདྲིས་གོམས་ཕྱེ་ཕྲི་རམ་ཤག་
ཆིག་ཚུགས་བཟའ། །ཆུ་སེར་སེལ་ཞིང་མཆོག་ཏུ་ཚེ་དབང་འཐོབ། །མེ་ཏོག་སྣ་ཚོགས་བསིལ་
དྲོད་ཆ་མཉམ་ལ། །མངར་གསུམ་སྦྱར་ཏེ་དྲོ་གོང་རྒྱུན་བསྟེན་ན། །ཁྱད་པར་མདངས་ལྡན་
འདུ་སྙོམས་རྒས་པ་སེལ། །མུ་ཟི་གསེར་འདྲ་ས་མེད་བཏུལ་བྱས་ལ། །ཨ་རུ་ར་དང་ཆ་མཉམ་
མངར་གསུམ་སྦྱར། །སྲན་མ་སེ་བ་ནམ་ཞོར་བསྐྱེད་ལ་བཟའ། །ཁྲག་ཏུ་འཁྲུ་ན་མན་ངག་སྨན་
གཅིག་(སྟེ་དང་པོ་དྲི་མ་ཁྲག་ཅན་གཅིག་འོང་དེ་གྲིབ་སྐམས་བྱས་པ་དང་བསྲེས་ལ་བཏང་བ་)གཅེས། །དྲོད་སྐྱེད་ཆུ་
སེར་ནད་དང་མཛེ་ནད་སེལ། །ཅོང་ཞི་ས་དུག་བཏོན་ཏེ་འཕྲོད་སྨན་སྦྱར། །མངར་བའི་རྟ་
བསྐྱོན་ཐུར་མགོ་རེ་རེ་བསྟེན། །ཡང་ན་(ཅོང་ཞི་འོ་མར་བཙོས་ལ་)དྲུས་ཕྱེ་པི་པི་ལིང་སྦྱར་ལ། །ཚ་བ་
ཟན་ཆང་ཟན་དྲོན་བསྟེན་པར་བྱ། །གཅོང་ནད་ཀུན་ཞི་སྟོབས་ཆེ་ཚེ་འཕེལ་མཆོག །མར་ནག་
ཤིང་ཏོག་ཤ་མོ་བསྲུང་བ་གཅེས། །དྲི་ཆེན་བཟང་དྲུག་ཨ་རུ་མངར་གསུམ་སྦྱར། །རིལ་བུར་
བསྟེན་བྱས་ཡང་ན་དུག་བཏོན་ལ། །གྲིབ་སྐམས་དྲུས་ཕྱེ་སྤེལ་ལ་ཟན་ཆང་བསྟེན། །གདོན་
25-1-517


སེལ་ཚེ་རིང་མཁའ་འགྲོས་བྱིན་གྱིས་རློབ། །སོ་མ་ར་ཛ་ཏིལ་ནག་མཛེ་རྒྱས་འཇོམས། །བྱི་
ཏང་ག་དང་གོ་བྱེ་བཅའ་སྒ་གསུམ། །སྦྲང་མར་སྦྱར་ཟོས་རྒས་པའི་ནད་ལས་གྲོལ། །དེ་དག་
ཟླ་གསུམ་ཟླ་དྲུག་ལོ་གཅིག་བསྟེན། །བཅུད་ཀྱིས་ལེན་གྱི་འབྲས་བུ་འགྲུབ་པར་འགྱུར། །
གཡོག་འཁོར་མི་ལྡན་ཞར་ལ་སྤྱད་པས་ཀྱང༌། །གོང་གི་འབྲས་བུ་ཅི་རིགས་ཐོབ་པར་འགྱུར། །
འདི་བར་ནད་གཞན་སྐྱེས་ན་བར་གཅོད་དེ། །ནད་གསོ་དེ་རྗེས་སྔར་གྱི་བཅུད་ལེན་བསྒྲུབ། །
ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་
རྒས་པ་གསོ་བ་བཅུད་ལེན་གྱི་ལེའུ་སྟེ་དགུ་བཅུ་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །དམར་ཁྲིད་ལག་ལེན་མན་ངག་རྒྱུད་འདི་ཡི། །རོ་ཙའི་སྐབས་ལ་
ཇི་ལྟར་བསླབ་པར་བགྱི། །རོ་ཙ་ཞེས་པའི་དོན་དེ་གང་ལ་བྱ། །རོ་ཙའི་ནད་དེ་དོན་སྣོད་གང་
ལ་གནས། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་
པས་བཀའ་སྩལ་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས། རོ་ཙ་ཞེས་པ་འདོད་པ་སྤྱོད་ནུས་
ཤིང༌། །རིགས་བརྒྱུད་བུ་ཚ་སྤེལ་བར་བྱེད་པ་སྟེ། །དེ་ལ་གཙོ་དང་ཡན་ལག་རྣམ་པ་གཉིས༌། 
དེ་ཡང་ལས་དང་ཉོན་མོངས་ཕོ་མོར་སྣང༌། །སྐྱེས་པ་ཕོ་ནི་རོ་ཙའི་གཙོ་བོ་སྟེ། །སྐྱེས་པས་
འདོད་པ་སྤྱོད་པར་མ་ནུས་ན། །བུད་མེད་བརྒྱ་ཡིས་བསྐོར་ཡང་དོན་མི་འགྲུབ། །སྐྱེས་པའི་
ཁུ་བ་སྐྱོན་མེད་འཕེལ་གྱུར་ན། །བུད་མེད་བུ་ཚ་འཕེལ་བ་བཙལ་དུ་རུང༌། །དེ་ཕྱིར་རོ་ཙའི་
གཙོ་བོ་སྐྱེས་པ་ཡིན། །དེ་ཡི་ཡན་ལག་ཟ་མ་བུད་མེད་དེ། །ས་བོན་འཛིན་ཞིང་སྤེལ་བའི་
གཞིར་འགྱུར་གྱི། །ཕ་ཡི་རབས་བརྒྱུད་བུ་མོས་མི་ཟིན་པས། །གཙོ་བོར་མི་འགྱུར་ཀུན་ལ་
སྤྱད་བཏུབ་ཀྱང༌། །ལས་དབང་བསོད་ནམས་དམན་ལ་བུ་མི་འབྱུང༌། །དེ་ལ་བུ་མེད་བཙལ་
ཐབས་ཡན་ལག་གཅེས། །དཔེར་ན་ས་བོན་མེད་པའི་ཞིང་ས་དང༌། །ཞིང་ས་ངན་ལ་ས་བོན་
25-1-518


བཏབ་དང་མཚུངས། །དོན་སྣོད་སྤྱི་དེ་བསམ་སེའི་ནད་དུ་བཤད། །བཅུད་ཀྱི་དྭངས་མ་ས་
བོན་དཀར་དམར་རྟེན། །དེ་ཕྱིར་ཕོ་མོ་གཉིས་ཀའི་ཐུན་མོང་ནད། །དེ་ལ་གཙོ་བོ་སྐྱེས་པའི་
རོ་ཙ་ལ། །སྦྱོར་བ་དངོས་གཞི་དགོས་ཆེད་རྣམ་པ་གསུམ། །སྦྱོར་བ་གང་ཟག་གནས་གྲོགས་
སྔོན་འགྲོ་འོ། །གང་ཟག་སྐྱེས་བུ་རྟག་ཏུ་ཡུལ་བསྟེན་པས། །བུད་མེད་ཡལ་ག་མེད་པའི་ཤིང་
དང་མཚུངས། །རེག་མཐོང་སོགས་ལ་བུ་འདྲ་གང་ཡང་མེད། །དེ་ཕྱིར་དེ་ཡིས་དེ་(སྐྱེས་པ་ཡུལ་རྟེན་
པར་འདོད་པས་)འདོད་དེ་ལ་འབད། །དེ་ཡི་གནས་ཁང་ཉེ་འཁོར་རྫིང་བུ་དང༌། །པདྨ་ནགས་ཚལ་
བསིལ་གྲིབ་སྙན་པའི་སྒྲ། །རླན་བསིལ་ཡིད་བདེར་གྱུར་པས་རོ་ཙ་ནུས། །གྲོགས་ནི་དར་
བབ་མཛེས་སྒེག་རྒྱན་དང་ལྡན། །ངག་སྙན་ཚིག་འཇམ་ཡིད་འོང་སྤྱོད་ཚུལ་ཤེས། །སྔོན་འགྲོ་
སྣུམ་འཆོས་ཁྲུས་ཀྱིས་སྦྱངས་བྱས་ལ། །ནི་རུ་ཧ་དང་འཇམ་རྩིར་བཅས་ལ་བཏང༌། །དངོས་ཞི་
སྐམས་པ་གསོ་དང་བླུགས་པ་བཅད། །གསོ་ལ་ཟས་དང་སྤྱོད་ལམ་སྨན་དཔྱད་བཞི། །ཟས་
ནི་ཀ་ར་བུ་རམ་སྦྲང་རྩི་དང༌། །ཤ་ཁུ་འོ་མ་ཞུན་མར་འོ་སྤྲིས་སོགས། །རོ་མངར་མདོག་དཀར་
ཡིད་དུ་འོང་བ་ལ། །སྟོབས་འཕེལ་ཉམས་བརྟས་བྱེད་པ་གང་ཡིན་བསྟེན། །སྤྱོད་ལམ་མིག་
ལྟས་འོ་བྱེད་འཁྱུད་པ་དང༌། །ཡིད་འོང་གཏམ་དང་འཛུམ་གྱིས་འགྲོགས་པར་བྱ། །སྨན་ནི་ཤ་
ཡི་རྒྱལ་པོ་ད་བྱིད་དེ། །ལུས་ཀྱི་སྟོབས་སྐྱེད་ཁུ་བ་འཕེལ་མཆོག་ཡིན། །དེ་ལ་སྦྱར་ཐབས་སྐྱིན་
ཀོར་ཅོག་ཀྲོང་དང་། །དགུ་སྦྱོར་བཅུ་གསུམ་པ་དང་ལྔ་པའོ། །སྐྱིན་གོར་རྩ་བ་ལྔ་དང་འབྲས་
བུ་གསུམ། །ད་བྱིད་སྨུག་པོ་བྲེ་ག་ལུག་ཐུག་འབྲས། །ཆུ་དང་འོ་མ་མར་བསྡུས་ཁུ་བ་ལ། །རྒྱ་
ཚྭ་སུག་སྨེལ་བཅའ་སྒ་པི་པི་ལིང༌། །བུ་རམ་སྦྱར་བ་ནས་གསེབ་ནུས་པ་བསྐྱེད། །ཅོག་ཀྲོང་
རྩ་བ་ལྔ་ཡི་སྨན་མར་ལ། །ད་བྱིད་སྨུག་པོ་ཛཱ་ཏི་ཏིལ་དཀར་ནག །ཐང་ཕྲོམ་པ་རྣམས་ཁ་ཚར་
བཏབ་ལ་བཏང༌། །ཡང་ན་ད་བྱིད་སྨུག་པོ་ཏིལ་དཀར་ནག །རྩངས་པའི་ཤ་རྣམས་མཆིལ་
པའི་ཁོག་པར་གཞུག །ཁ་བཙེམས་མར་དུ་བཙོས་ལ་སྐམས་བཏགས་ཕྱེ། །གོང་གི་མར་ཁུ་
25-1-519


བཏབ་ལ་བུ་རམ་སྦྱར། །དགུ་སྦྱོར་ད་བྱིད་སྨུག་པོ་ཛཱ་ཏི་དང༌། །མི་དང་བྱི་ལ་སྲམ་གྱི་མཇུག་ཏོ་
དང༌། །ཅོང་ཞི་མུ་ཟི་བྲག་ཞུན་ཐང་ཕྲོམ་པ། །ཁྲལ་ཁྲོལ་བརྡུངས་ཏེ་མཆིལ་པའི་ཁོག་པར་བླུག །
དར་སྐུད་ཀྱིས་བཙེམ་མར་གྱི་ནང་དུ་བཙོ། །མར་དེ་བུ་རམ་སྦྱར་ལ་ཤ་སྐམས་བཏབ། །ཁྱེའུ་
སུས་དུས་ན་ཁྱེམ་བུ་རེ་རེ་བསྟེན། །དེ་རྣམས་ཀུན་གྱིས་ལུས་སྟོབས་སྐྱེད་བྱེད་ཅིང༌། །མཁལ་
མའི་དྲོད་སྐྱེད་ས་བོན་ཟད་པ་གསོ། །བཅུ་གསུམ་པ་ནི་ད་བྱིད་སྨུག་སེར་གཉིས། །སྲམ་གྱི་ཤ་
དང་བྲག་གི་རྩངས་པ་དང༌། །ཁྱིམ་བྱ་ཕུག་རོན་མཆིལ་པ་ནས་ཟན་མགོ །གཙང་ཉ་ཐང་ཕྲོམ་
དབང་པོ་ལག་པ་དང༌། །ཉེ་ཤིང་པ་དང་ཅོང་ཞི་བུ་རམ་སྦྱར། །ཁུ་བ་ཟད་པ་འཕྲལ་དུ་སྐྱེད་
བྱེད་དེ། །ནུབ་རེ་ལ་ཡང་བུད་མེད་བརྒྱ་སྤྱོད་ནུས། །ལྔ་པའི་སྦྱོར་བ་ཅོང་ཞི་དམར་པོ་དེ། །བ་
ཡི་འོ་མས་འདམ་བཏགས་བྱས་ཕྱེ་དང༌། །དབང་པོ་ལག་པ་མཆིལ་པའི་མགོ་བོ་དང་། །ཐང་
ཕྲོམ་པ་དང་ད་བྱིད་སྨུག་སེར་གཉིས། །བུ་རམ་སྦྱར་བ་ཁྱེའུ་སུས་ཆང་གིས་དབུལ། །གཞན་
ཡང་ར་ཐུག་འབྲས་བུ་འོ་མར་བཙོས། །ཀ་ར་ཏིལ་བསྲེས་ཟོས་ན་དེ་དང་འདྲ། །པི་པི་ལིང་
དང་སྐྱུ་རུ་ར་ཁུར་སྦངས། །ཀ་ར་སྦྲང་མར་སྦྱར་ཟོས་འོ་མ་བཏུང༌། །བརྒྱད་ཅུ་ལོན་པའང་ཀུན་
ལ་སྤྱོད་པར་ནུས། །ཞོ་སྤྲིས་ཟོས་རྟིང་ཀ་ར་འབྲས་བཅས་ཟོས། །རྒན་པོ་ཡིན་ཡང་གཞོན་ནུ་
ལྟ་བུར་སྤྱོད། །དཔྱད་དུ་ཁྲུས་ལ་འབད་ཅིང་བསྐུ་མཉེ་བྱ། །ཁུ་བ་བླུགས་ན་འཕེལ་དང་ནད་
དུག་གདོན། །ལུས་རྒྱས་ཁུ་འཕེལ་བུད་མེད་རབ་ཏུ་གདུང༌། །དེ་ལ་ཆགས་པ་སྤྱད་པས་ཞི་
བར་ནུས། །ནད་ཀྱི་གྲང་རླུང་མཁལ་མའི་དྲོད་ཉམས་པས། །རྩ་ཁ་མ་ཐུབ་ཆུ་དང་སྡོངས་ནས་
འཛག །བཅུ་གསུམ་བཅུ་དགུ་ནང་ལོང་གདོང་ངོས་བསྲེག །བོང་ཤ་སྲམ་ཤ་ད་བྱིད་སྨན་མར་
སྦྱར། །ཚ་བ་ཚྭ་སྣའི་རིལ་བུ་ཆང་གིས་དབུལ། །དུག་བྱུང་ཕྱི་ནང་གསང་རྟགས་ངོས་བཟུང་
ལ། །དེ་ཡི་གཉེན་པོས་བསད་ཅིང་ལུས་ཟུངས་བསྲུང་། །གདོན་ཡིན་རྨི་ལམ་བུད་མེད་འདྲེན་
པར་འགྱུར། །མོ་ཕྱྭ་རིམ་གྲོ་རྟེན་འབྲེལ་(བ་རའི་འོ་མ་སྲུ་སྦྱར་བ་རྐང་མཐིལ་ལ་བྱུག)སྔགས་(བ་ནི་ལུག་ཐོང་
25-1-520


གི་བལ་མི་ལག་མ་འགྲིམས་བ་ཁྱེའུ་གཙང་མས་བཀལ་བའི་སྲད་བུ་ལ་རྡོ་རྗེའི་མདུད་པ་བདུན་བྱས་ཏེ་སྔགས་སྟོང་བཏབ་ལ་
བཅིང༌ༀ་ཧ་ར་ཧ་ར་བྷན་དྷ་ནི་ཤུ་ཏྲ་དྷ་རི་ནི་ཐར་ཏེ་སྭཱཧཱ།)ཀྱིས་གསོ། །དགོས་པ་ནད་མེད་ལང་ཚོར་ལྡན་པ་
ཡིས། །དུས་ཚིགས་རྣམས་སུ་ཉལ་པོ་དགག་པ་མིན། །འཕྲལ་དུ་སེམས་དགའ་བུ་ཚའི་རྒྱུད་
སྐྱེད་ཅིང་། །སྟོབས་ལྡན་བུད་མེད་ཀུན་ལ་ཐོགས་མེད་འགྲོ། །འདོད་ཡོན་ཀུན་ལས་ཆགས་པ་
མཆོག་ཏུ་གྲགས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་རོ་ཙ་བར་བྱ་བའི་ལེའུ་སྟེ་དགུ་བཅུ་རྩ་གཅིག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །རོ་ཙའི་ཡན་ལག་བུད་མེད་བཙལ་བའི་ཐབས། །དེ་རྒྱུ་གདོན་དང་འདུ་བ་
རོ་ལུས་དང༌། །བུ་རྩི་བཏང་དང་མོ་གཤམ་རྣམ་པ་ལྔ། །དང་པོ་མོ་རྩིས་ཕྱྭ་ལས་བརྟག་པར་བྱ། །
ཞི་དང་དྲག་པོ་སྔགས་ཀྱིས་གདོན་དེ་བཅོས། །འདུ་བ་རླུང་མཁྲིས་བད་ཀན་རྣམ་པ་གསུམ། །
རླུང་གིས་ཟླ་མཚན་སེར་ལ་དུས་མིན་འཛག །ཧར་པོར་ཡོད་སེམས་སྐབས་སུ་སྡོམ་ཞིང་
སྦོ། །མཁྲིས་པས་ཚ་འབྲབ་དུད་ཁུ་རྣག་ཏུ་འབྱུང༌། །བད་ཀན་བསིལ་ཞིང་ཞོ་ཁ་ཆུ་འདྲ་འཛག །
རླུང་ལ་ནང་ནུབ་སྒེ་གཤེར་ཐང་བཏང་ཞིང༌། །འབའ་ཆ་འབྲུ་ཡི་དུགས་ཀྱིས་རྒྱུ་ཞབས་བདུག །
དེ་རྗེས་ཕྱི་ཡི་རྩ་གཤེར་རེང་བུས་བསལ། །དེ་འོག་རྒྱུ་བཅུད་གཟེ་མའི་ཐང་བཏང་ལ། །མར་
བཅུད་སྦྱོར་བས་ཕྱི་རྗེས་བཅད་པར་བྱ། །མཁྲིས་པ་བད་ཀན་མེ་ཏོག་དུགས་ཀྱིས་བདུག །དེ་
ནས་ཁྲུས་གཤེར་ཆེན་མོས་ཁོང་སྦྱངས་ལ། །དེ་རྗེས་ཕྱི་ཡི་རྩ་གཤེར་མངལ་སྐྱོན་བསལ། །དེ་
རྟིང་རྒྱུ་བཅུད་སྦྱོར་བས་ཕྱི་རྗེས་བཅད། །མངལ་དུ་བུ་ལུས་བུ་རོ་ནད་རོ་ལུས། །ནད་ལུས་བུ་
བཙས་རྗེས་ལ་ཁྲག་རོ་ལུས། །མངལ་ཁ་འཆུས་པས་མངལ་ནང་ཁྲག་སྐྲན་ཆགས། །གང་ཡིན་
གྱུར་ཀྱང་བུ་ཆགས་བཞིན་དུ་འདྲིལ། །སྐབས་སུ་རྒྱུ་ཞབས་མཁལ་མ་ཚིགས་པ་ན། །མངལ་
ཁྲག་དམར་རྩའམ་རེས་འགའ་ནག་པོར་འཛག །དེ་ལ་ནང་ནུབ་སྒ་སྐྱའི་ཐང་བཏང་ལ། །བྱ་བྲ་
གྲོག་ཞིང་དག་གིས་རྒྱུ་ཞབས་བདུག །དེ་ནས་ཨ་རུ་དྭ་ཚ་རྩབས་(ལྕུམ་རྩ་ཞོ་གཅིག་)ཤིང་གསུམ།  །
25-1-521

 
སོ་སོར་བསྡུས་ནས་བསྲེས་པའི་ཁུ་བ་ལ། །དུར་བྱིད་ཁྲོན་བུ་འོལ་མོ་རྒྱ་ཚྭ་དང༌། །ཤིང་ཚ་
བཏབ་ལ་ཁྱེའུ་སུས་དུས་ན་བཏང༌། །མ་ཐེབས་རྒྱ་ཚྭ་ཕྲུ་དྲེག་འོལ་མོ་དང༌། །ཤ་རུས་ཐལ་
བ་རིམ་སྐྱེད་ཆང་སྦྱར་བཏང༌། །ཡང་ན་ཚ་བ་གསུམ་དང་ཨ་རུ་ར། །རྒྱམ་ཚྭ་དྭ་ཚ་ལྕུམ་རྩ་སོ་
སོར་བསྡུ། །ཁུ་བ་བསྲེས་པ་དུར་བྱིད་འོལ་མོ་དང༌། །རྒྱ་ཚྭ་ཤིང་ཚ་བཏབ་ལ་ཐོ་རངས་བཏང༌། །
ཟུག་གཟེར་སྐྱེས་ན་རྡོ་དང་འབྲུ་དུགས་བྱ། །མ་ཕིགས་སྲིད་ན་རྒྱ་ཚྭ་ཆང་སྦྱར་བཏང༌། །བུ་རོ་
མངལ་སྐྲན༌རྣག་འཐུམས་ཁྲག་ཚབས་དང༌། །མངལ་ཁ་འཆུས་ཏེ་བུ་མེད་བུ་སྐྱེད་དོ། །དེ་རྟིང་
ཕྱི་ཡི་རྩ་གཤེར་ཆེན་མོས་སྦྱང༌། །དེ་འོག་རྒྱུ་བཅུད་གཟེ་ཆང་ཕྱི་རྗེས་བཅད། །ལོ་གཅིག་བར་
དུ་དྲོད་བསྟེན་ཟས་སྤྱོད་གཟབ། །བུ་རྩི་བཏང་བས་ཆད་དམ་རྟག་ཏུ་འབྱང༌། །ནང་དང་ཕྱི་ཡི་
རྩ་གཤེར་རིམ་པས་སྦྱར། །དེ་རྗེས་གཟེ་མའི་ཆང་དང་ཁྲག་བཅུད་སྦྱར། །མོ་གཤམ་མངལ་
ཁྲག་མང་ལ་མདོག་མི་འགྱུར། །ཟླ་བ་རེ་བཞིན་དུས་ཐོག་འབྱུང་བ་སྟེ། །དེ་ལ་ཐབས་ཀྱིས་
བཙལ་བར་ནུས་མ་ཡིན། །དེས་ན་མཚན་ལྡན་གྲོགས་སུ་བཙལ་བར་བྱའོ། །ཞེས་གསུངས་
ནས་དྲང་སྲོང་རིག་པའི་ཡེ་ཤེས་དེ་སྨན་པའི་རྒྱལ་པོའི་སྐུའི་ལྟེ་བར་ཐིམ་པར་གྱུར་ཏོ། །བདུད་
རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བུ་མེད་པ་བཙལ་བའི་ལེའུ་སྟེ་
དགུ་ཅུ་རྩ་གཉིས་པའོ།། །།བདུད་རྩི་སྙིང་པོ་ཡན་ལག་བརྒྱད་གསང་བ་མན་ངག་གི་རྒྱུད་
ལས་ལག་ལེན་དམར་ཁྲིད་མན་ངག་གི་རྒྱུད་ཅེས་བྱ་བ་རྫོགས་སོ།། ༈ །། 
༈ རྗེ་བཙུན་ཏཱ་ར་ནཱ་ཐའི་ཐུགས་རྗེའི་ཤུགས། །རབ་འབྱམས་བརྒྱད་ཁྲི་བཞི་སྟོང་ཆོས་ཀྱི་
སྒོ། །མ་ལུས་དགོས་འདོད་སྩོལ་བའི་འཁྲུལ་འཁོར་ལས། །རྒྱུད་འདི་འགྲོ་བ་ཡོངས་ཀྱི་དཔལ་
དུ་བཀོད། །དགེ་ལེགས་འཕེལ། 
25-1-522


༄༅། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་
ལས་ཕྱི་མའི་རྒྱུད་ཅེས་བྱ་བ་བཞུགས་སོ། །
༄༅། །དེ་ནས་སྟོན་པ་བཅོམ་ལྡན་འདས་འཚོ་མཛད་སྨན་གྱི་བླ་བཻཌཱུཪྻ་འོད་ཀྱི་རྒྱལ་པོ་
དེས་ཏིང་ངེ་འཛིན་དེ་ལས་བཞེངས་ཏེ། ཐོགས་པ་མེད་པ་ཞེས་བྱ་བའི་སྨན་གྱི་ཏིང་ངེ་འཛིན་
ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་སྐུའི་གསང་བ་ལས་འོད་ཟེར་ཁ་
དོག་བརྒྱ་སྟོང་དུ་མ་ཕྱོགས་བཅུར་འཕྲོས་པས་ཕྱོགས་བཅུའི་འགྲོ་བ་སེམས་ཅན་ཐམས་ཅད་
ཀྱི་སེམས་ཞུམ་པ་དང་སྐྲག་པའི་ཉེས་སྐྱོན་ཐམས་ཅད་བསལ། ལུས་དང་ཚེ་ལ་བར་དུ་གཅོད་
པའི་ནད་དང་གདོན་ཐམས་ཅད་ཞི་བར་བྱས་ཏེ་སླར་སྐུའི་གསང་བར་འདུས་པ་ལས། སྤྲུལ་
པའི་སྟོན་པ་དྲང་སྲོང་རིག་པའི་ཡེ་ཤེས་ཞེས་བྱ་བ་ཞིག་ཕྲིན་ལས་ལས་སྤྲུལ་ཏེ་མདུན་གྱི་བར་
སྣང་ལ་བཞུགས་པ་ལས། གསུང་གི་སྤྲུལ་པ་དྲང་སྲོང་ཡིད་ལས་སྐྱེས་ཞེས་བྱ་བ་དེས་སྟོན་
པ་ལ་ཕྱག་དང་བསྐོར་བ་བྱས་ནས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་
ཡེ་ཤེས་ལགས། །རྒྱུད་སྡེ་བཞི་ལ་བསླབ་པར་བྱའོ་གསུངས་པ་ལས། །རྩ་རྒྱུད་བཤད་རྒྱུད་
མན་ངག་རྒྱུད་དང་གསུམ། །དབང་པོ་རབ་འབྲིང་ཐ་མའི་དོན་དུ་གསུངས་ལགས་ན། །ད་ནི་
ཕྱི་མའི་རྒྱུད་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །
ཞེས་ཞུས་པ་དང༌། །ཕྲིན་ལས་ཀྱི་སྤྲུལ་པ་དྲང་སྲོང་རིག་པའི་ཡེ་ཤེས་དེས་འདི་སྐད་ཅེས་
གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། རྒྱུད་བཞིའི་ཐ་མ་ཕྱི་མའི་རྒྱུད་ལ་བསླབ་པ་
ནི། །ནད་དང་གཉེན་པོ་གསོ་བའི་ཐབས་གསུམ་ལས། །གསོ་ཡུལ་ནད་ལ་བཞི་བརྒྱ་རྩ་བཞིར་
གསུངས། །རྒྱས་པར་ཕྱེ་ན་སྟོང་དང་ཉིས་བརྒྱ་ཡོད། །མདོ་རུ་བསྡུས་པས་བཅོས་དགོས་བརྒྱ་
25-1-523


རྩ་གཅིག །གསོ་བྱེད་གཉེན་པོ་སྟོང་དང་བཅུ་གཉིས་ཏེ། །མདོ་རུ་བསྡུས་པས་སྨན་དཔྱད་ཟས་
སྤྱོད་བཞི། །སྨན་ལ་ཞི་སྦྱང་ཞི་ལ་བསིལ་དྲོད་གཉིས། །སྦྱོང་བྱེད་ཀུན་ལ་དྲག་དང་འཇམ་པ་
གཉིས། །དཔྱད་ལ་འཇམ་རྩུབ་ཟས་ལ་ཕན་གནོད་གཉིས། །སྤྱོད་ལམ་དྲག་དལ་ཟས་སྨན་
སྤྱིར་འགྲོའོ། །དེ་ལྟར་གཉེན་པོ་བཅུ་ཡིས་ནད་ཀུན་འཇོམས། །གསོ་ཐབས་ལག་ལེན་སུམ་
བརྒྱ་དྲུག་ཅུ་ཡོད། །མདོར་བསྡུས་བརྟག་ཐབས་གསོ་ཚུལ་བཅོས་ཐབས་གསུམ། །བརྟག་
ཐབས་རེག་མཐོང་གཉིས་ཀྱིས་ནད་ངོས་བཟུང༌། །འཁྲུལ་གཞི་གལ་འགག་བཞི་ཡིས་དཔྱད་
ཕྲང་བསལ། །གསོ་ཚུལ་དགུ་ཡིས་ནད་དང་གཉེན་པོ་སྤྲད། །གསོ་ཐབས་ལག་ལེན་བཅོ་
བརྒྱད་ནད་དཔུང་གཞོམ། །སུམ་ཅུ་རྩ་གསུམ་ལག་ལེན་སྙིང་པོར་དྲིལ། །འདི་དག་ཕྱི་མ་རྒྱུད་
ཀྱི་སྡོམས་ཚིག་ཡིན། །དྲང་སྲོང་རྣམས་ཀྱི་སེམས་ལ་དེ་ལྟར་ཆོངས། །ཞེས་གསུངས་སོ། །
༈ དེ་ནས་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །རེག་མཐོང་གཉིས་ཀྱིས་ནད་ཀྱི་ངོས་འཛིན་པ། །རེག་པ་རྩ་ལ་ཅི་
ལྟར་བརྟག་པར་བགྱི། །མཐོང་བ་ཆུ་ལ་ཅི་ལྟར་བརྟག་པར་བགྱི། །གལ་འགག་བཞི་ཡི་
འཁྲུལ་སོ་ཅི་ལྟར་བསལ། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་
ལས། །སྟོན་པས་གསུངས་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས། །དང་པོ་རེག་པ་རྩ་ལ་
བརྟག་པ་ནི། །ནད་དང་སྨན་པ་བརྡ་སྦྱོར་འཕྲིན་པ་རྩ། །སྔོན་འགྲོ་ཟས་སྤྱོད་བསླབ་དང་བལྟ་
དུས་བསྟན། །བལྟ་གནས་མནན་ཚད་བལྟ་ཚུལ་ཤེས་པ་ཡིས། །ཐ་མལ་རྩ་ལ་རྩ་རྒྱུད་གསུམ་
དུ་བརྟག །དུས་བཞིའི་རྩ་ལ་ཁམས་ལྔའི་འབྱུང་བ་རྩི། །ངོ་མཚར་རྩ་བདུན་ནད་མེད་མི་ལ་
བལྟ། །ནད་དང་ནད་མེད་འཕར་བའི་གྲངས་ལས་དཔགས། །སྤྱི་དང་བྱེ་བྲག་རྩ་ཡིས་ནད་
ངོས་བཟུང༌། །འཆི་རྩ་གསུམ་གྱིས་འཚོ་འཆི་ཁ་དམར་གདགས། །གདོན་རྩ་གློ་བུར་ཡེ་འགྲོག་
རིམ་འགྲོ་འབོགས། །ཚེ་རྟགས་བླ་ཡི་རྩ་ལ་བརྟག་པ་སྟེ། །སྤྱི་དོན་བཅུ་གསུམ་རེག་པའི་
25-1-524


མདོར་བསྟན་ཡིན། །དང་པོ་སྔོན་འགྲོ་ཟས་སྤྱོད་བསླབ་པ་ནི། །ཤ་ཆང་ལ་སོགས་དྲོད་བཅུད་
དྲག་པོ་དང༌། །འཇུ་དཀའ་བསིལ་ཆེས་ནད་གཞི་འཁྲུག་པ་སྤང༌། །འགྲངས་ཆེས་ལྟོགས་ཆེས་
ཉལ་པོ་གཉིད་ཆག་དང༌། །སྨྲ་བརྗོད་སེམས་ལས་འགྲོ་འདུག་སྤངས་ཏེ་བརྟག །དེ་ཡི་འདུ་བ་
རྣམ་གསུམ་མི་འཁྲུག་གསལ། གློ་བུར་དུ་ཡང་དབུགས་མལ་ཚུད་པ་དང༌། །རྩ་སྤང་སྐྱུར་གྱིས་
མ་བཏེག་གཅེས་པ་ཡིན། བལྟ་དུས་མཁའ་ལ་ཉི་ཤར་ཀླུངས་མ་ཕེབས། །ནང་དབུགས་དྲོན་
མོ་ཕྱིར་མ་རྒྱུས་པ་དང༌། །ཕྱི་དབུགས་གྲང་མོ་ནང་དུ་མ་ཤོར་བ། །མལ་ནས་མ་འགུལ་ཁ་ཟས་
མ་ཟོས་པའི། །གདགས་སྲིབས་དབུགས་སྙོམས་རྩ་མལ་གནས་དུས་བལྟ། །བལྟ་གནས་
འཁྲིག་མའི་གཉེར་མ་དང་པོ་ནས། །མཚོན་གང་མར་བཅལ་རུས་པ་འབུར་པོའི་ལྡེབས། །
ཚོན་ཀན་ཆག་གསུམ་མ་འདྲུས་སྙོམས་པར་བཞག །ཅི་ཕྱིར་འཕར་རྩ་ཀུན་ལ་ཡོད་མོད་
ཀྱང༌། །དོན་དང་ཉེ་ན་ཕུ་ཆུ་འཁྲུག་དང་མཚུངས། །རིང་བ་ཐག་རིང་འགྲོན་པོའི་གཏམ་དང་
འདྲ། །འཚམ་པས་རྒྱང་གྲགས་དབྱར་སྐད་བཞིན་དུ་གསལ། །ཐམས་ཅད་རྒྱུ་བས་ཚོང་དུས་
བརྒྱ་སྲང་བཞིན། །དོན་སྣོད་དེར་མི་རྒྱུ་བས་འགལ་ཞེ་ན། །རླུང་ཁྲག་ཀུན་ཏུ་རྒྱུ་བས་ཚོང་
དཔོན་བཞིན། །བཅུ་གཉིས་མ་འདྲེས་ཕ་ཙེའི་རེ་སོ་འདྲ། །བླ་རྩ་མར་ཟུག་ཆུ་རྒྱུས་གསེབ་ཏུ་
བརྟག །མཐའ་ནས་སྡུད་ཕྱིར་འཆི་རྩ་བོལ་ལ་བརྟག །མནན་ཚད་མཚོན་གྱིས་པགས་པ་ཀན་
གྱིས་ཤ །ཆག་གིས་རུས་པ་ནོན་ཙམ་གསལ་བར་མནན། །ཅི་ཕྱིར་ཞེ་ན་རྩ་དབྱིབས་ལ་ཕུག་
འདྲ། །ཤ་རྟུགས་ཟབ་མི་ཟབ་ལས་བྱུང་བ་ཡིན། །བལྟ་ཚུལ་ལག་པའི་སོར་མོ་མ་གྲངས་པའི། །
འཇམ་ཞིང་མཉེན་ལ་དྲོད་དང་མཐུན་པ་ཡིས། །ཕོ་རྩ་གཡོན་ལ་མོ་རྩ་གཡས་སུ་བརྟག །དང་
པོ་ནད་པའི་ལག་གཡོན་སྨན་པའི་གཡས། །མཚོན་གྱི་འོག་ཏུ་སྙིང་དང་རྒྱུ་མའི་རྩ། །ཀན་གྱི་
འོག་ཏུ་མཆེར་པ་ཕོ་བའི་རྩ། །ཆག་གི་འོག་ཏུ་མཁལ་གཡོན་བསམ་སེ་བརྟག །ནད་པའི་ལག་
གཡས་སྨན་པའི་གཡོན་པས་བལྟ། །མཚོན་འོག་གློ་ལོང་ཀན་འོག་མཆིན་མཁྲིས་རྩ། །ཆག་
25-1-525


འོག་མཁལ་མ་གཡས་དང་ལྒང་པ་བརྟག །མོ་ལ་མཚོན་རྩ་གཉིས་པོ་གཡས་གཡོན་བཟློག །
ཅི་ཕྱིར་གློ་སྙིང་གཡས་གཡོན་ཕྱོགས་མེད་ཀྱང༌། །སྙིང་གི་རྩེ་མོ་དེ་ལྟར་བསྟན་པའི་ཕྱིར། །
གཞན་རྣམས་གནས་ཀྱིས་བསྐལ་ཕྱིར་གོང་ལྟར་ངེས། །ཐ་མལ་རྟེན་གྱི་རྩ་རྒྱུད་རྣམ་གསུམ་
ནི། །ཕོ་རྩ་མོ་རྩ་བྱང་ཆུབ་སེམས་རྩ་གསུམ། །ཕོ་ཡི་རྩ་ནི་སྦོམ་ལ་རགས་པར་འཕར། །མོ་ཡི་
རྩ་ནི་ཕྲ་ལ་མྱུར་བར་འཕར། །བྱང་ཆུབ་སེམས་རྩ་རྒྱུད་རིང་འཇམ་ལ་མཉེན། །ཕོ་ལ་མོ་རྩ་
ཆགས་ན་ཚེ་རིང་ལ། །མོ་ལ་ཕོ་རྩ་ཆགས་ན་བུ་དཔལ་ཆེ། །གཉིས་ཀར་བྱང་ཆུབ་སེམས་
དཔའི་རྩ་བྱུང་ན། །ཚེ་རིང་ནད་དཀོན་ཡས་བྱམས་མས་སྡང་སྟེ། །དྲུང་གསུམ་དགྲར་ལྡང་
མཐའ་ཕུགས་རབ་ཀྱང་ཆད། །ཕོ་རྩ་ནང་ཕྲད་ཕལ་ཆེར་བུ་མང་སྟེ། །མོ་རྩ་ནང་ཕྲད་བུ་མོ་
ཕལ་ཆེར་མང༌། །བྱང་ཆུབ་སེམས་རྩ་ཕོ་མོ་གང་ཕྲད་པ། །དེ་ཡི་དབང་གིས་གཅིག་འབྱུང་དེ་
ནས་མིན། །དུས་བཞི་ཁམས་ལྔའི་འབྱུང་བ་རྩི་བ་ནི། །དང་པོ་དུས་དོན་ཁམས་དང་རྩ་རུ་སྦྱར། །
མ་བུ་དགྲ་གྲོགས་བཞི་ཡིས་སྐོར་འགོ་རྩི། །དཔྱིད་དང་དབྱར་སྟོན་དགུན་བཞི་དུས་མཚམས་
ལྔ། །དཔྱིད་ཟླ་གསུམ་ནི་ཤིང་རྩི་ཁ་འབུས་དུས། །རྟ་པ་དབོ་དང་ནག་པས་ནམ་ཚོད་འཛིན། །
བྱིའུ་ཅོ་ག་རང་སྐད་འབྱིན་པའི་དུས། །བདུན་ཅུ་རྩ་གཉིས་ཤིང་ཁམས་མཆིན་རྩ་རྒྱུ། །ཅོ་གའི་
སྐད་ལྟར་ཕྲ་ལ་གྲིམས་པར་འཕར། །ལྷག་མ་བཅོ་བརྒྱད་ས་ཁམས་མཆེར་རྩ་རྒྱུ། །དབྱར་ཟླ་
གསུམ་ནི་འདབ་རྒྱས་ཆར་གྱི་དུས། །ས་ག་སྣྲོན་དང་ཆུ་སྟོད་ནམ་ཚོད་འཛིན། །བྱ་ཡི་རྒྱལ་པོ་
ཁུ་བྱུག་སྐད་འབྱིན་དུས། །བདུན་ཅུ་རྩ་གཉིས་མེ་ཁམས་སྙིང་རྩ་རྒྱུ། །ཁུ་བྱུག་སྐད་ལྟར་སྦོམ་
ལ་རིང་བར་འཕར། །ལྷག་མ་བཅོ་བརྒྱད་ས་ཁམས་མཆེར་རྩ་རྒྱུ། །སྟོན་ཟླ་གསུམ་ནི་རྩི་ཐོག་
སྨིན་པའི་དུས། །གྲོ་ཞུན་ཁྲུམས་སྟོད་དབྱུག་པས་ནམ་ཚོད་འཛིན། །བྱེའུ་འུར་པ་གཤོག་སྒྲ་
འབྱིན་པའི་དུས། །བདུན་ཅུ་རྩ་གཉིས་ལྕགས་ཁམས་གློ་རྩ་རྒྱུ། །བྱིད་པོའི་སྐད་ལྟར་ཐུང་ལ་
རྩུབ་པར་འཕར། །ལྷག་མ་བཅོ་བརྒྱད་ས་ཁམས་མཆེར་རྩ་རྒྱུ། །དགུན་ཟླ་གསུམ་ནི་ས་ཆུ་
25-1-526


འཁྱགས་སྒང་དུས། །སྨིན་དྲུག་མགོ་རྒྱལ་གསུམ་གྱིས་ནམ་ཚོད་འཛིན། །ཤ་བ་ནག་པོ་ངུ་སྐད་
འདོན་པའི་དུས། །བདུན་ཅུ་རྩ་གཉིས་ཆུ་ཁམས་མཁལ་རྩ་རྒྱུ། །ཐིང་རིལ་སྐད་ལྟར་འཇམ་ལ་
དལ་བར་འཕར། །ལྷག་མ་བཅོ་བརྒྱད་ས་ཁམས་མཆེར་རྩ་རྒྱུ། །ཉི་མ་གར་ལོག་དབྱར་དགུན་
འབྲིང་པོར་རྩི། །དུས་མཚམས་བཅོ་བརྒྱད་ཕྲག་བཞི་བདུན་ཅུ་གཉིས། །ས་ཁམས་མཆེར་རྩ་
དར་ཞིང་རྒྱུ་དུས་དེར། །ནས་ཟན་སྐད་ལྟར་ཐུང་ལ་འཇམ་པར་འཕར། །དེ་ལྟར་དུས་བཞི་
ཁམས་ལྔར་ཕྱེ་ནས་ནི། །ད་ནི་མ་བུ་དགྲ་གྲོགས་སྐོར་འགོ་རྩི། །ཤིང་མེ་ས་ལྕགས་ཆུ་ལྔ་མ་བུ་
བསྐོར། །མེ་ཆུ་ས་ཤིང་ལྕགས་ལྔ་དགྲ་གྲོགས་བསྐོར། །མ་བུ་དགྲ་གྲོགས་འབྱུང་བ་བརྟགས་
ལ་རྩི། །མ་དང་རང་རྩ་དར་ན་རབ་ཏུ་བཟང༌། །གྲོགས་རྩ་གྲོགས་འབྱུང་བུ་རྩ་དབང་ཐང་ཆེ། །
དགྲ་རྩ་དགྲ་འོང་ཡང་ན་གསོ་དཀའ་འཆི། །ངོ་མཚར་རྩ་བདུན་ཁྱིམ་ཕྱྭ་འགྲོན་ཕྱྭ་དང༌། །
དགྲ་ཕྱྭ་གྲོག་ཕྱྭ་མེ་ཆུ་གོ་བཟློག་དང་། །བུ་རྩ་གདོན་རྩ་བརྟག་པ་བདུན་ཡིན་ནོ། །དང་པོ་
བྱིང་ཞིང་འཐིབས་ན་མི་གཙང་རྩ། །རྨུགས་ཤིང་འཐིབས་ན་མྱ་ངན་འོང་བའི་རྩ། །འབྲུབ་ཅིང་
བརྒྱལ་ན་བྲེད་དངངས་འོང་བའི་རྩ། །སྐྱེར་ཚེར་འདྲ་ན་སྡུག་བསྔལ་ཐར་མེད་རྩ། །ཆུ་ཚན་
ཁོལ་འདྲ་མི་ཁ་འོང་བའི་རྩ། །མེ་ལྕེ་ཆད་འདྲ་ནོར་གོད་འོང་བའི་རྩ། །དེ་དག་གང་ཡང་རང་རྩ་
དར་དུས་སུ། །རང་གི་རྩ་ལ་གང་བྱུང་རང་ལ་འོང༌། །མ་རྩ་མ་ཞང་བུ་རྩ་བུ་ཚ་ལ། །གྲོགས་རྩ་
ནོར་ལ་དགྲ་རྩ་དགྲ་ལ་འོང༌། །འགྲོན་ཕྱྭ་གཞི་པ་གང་བརྩེ་གཅིག་ལ་བརྟག །མཆིན་རྩ་གློ་
སྙིང་མཆེར་མཁལ་གང་དྲག་པ། །གཞི་ལ་ཡོད་དང་ལམ་དུ་ཞུགས་པ་དང༌། །ཉེ་བར་སླེབ་དང་
ཕྱིན་ལ་ཁད་པ་དང༌། །འགྲོན་དགྲ་འོང་བ་རིམ་པས་བརྟག་པར་བྱ། །ཡང་ན་མ་དང་རང་རྩ་
གཞི་ལ་གནས། །བུ་རྩ་ལམ་ཞུགས་དགྲ་རྩ་ད་ལྟ་སླེབ། །དོན་གཉེར་འགྲུབ་བམ་མི་འགྲུབ་
བརྟག་པ་ནི། །སྙིང་མཆིན་མཁལ་རྩ་དྲག་པར་འཕར་བ་གསུམ། །དགྲ་འོང་དོན་འགྲུབ་སྟོང་
ལོག་བྱེད་པ་ཡིན། །དགྲ་རྩ་མི་འགྲུབ་གྲོགས་རྩ་བྱུང་ན་འགྲུབ། །དགྲ་ཕྱྭ་ཕར་རྒོལ་གློ་རྩ་
25-1-527


དྲག་ན་ཐུབ། །མཆེར་རྩ་དྲག་ན་མི་ཐུབ་དགྲ་གཡུལ་མཐོ། །དགྲ་ཡི་རྩ་ལ་དགྲ་རྩ་བྱུང་ན་ཐུབ། །
རང་ལ་དགྲ་རྩ་བྱུང་ན་ཐུབ་མི་འགྱུར། །ཚུར་རྒོལ་དེ་དང་འདྲ་ན་དགྲ་ཡིས་ཚུགས། །རང་དང་
མ་རྩ་དར་ན་ཚུགས་མི་འགྱུར། །གྲོག་ཕྱྭ་ནོར་བདག་རྩ་ལ་བལྟས་པ་ཡིས། །མཆིན་རྩ་དྲག་ན་
ནོར་འཕེལ་གོད་མི་འོང༌། །སྙིང་རྩ་མཆེར་རྩ་ཞན་ན་གོད་ཀ་འོང་། །གྲོག་གི་རྩ་ལ་གྲོགས་རྩ་
བྱུང་ན་རབ། །མ་རྩ་འབྲིང་ཡིན་རང་རྩ་ཐ་མ་ཡིན། །བུ་རྩ་གྲོག་མེད་དགྲ་རྩ་གྲོག་དགྲས་ཁྱེར། །
མེ་ཆུ་གོ་བཟློག་ཕ་ན་བུ་ལ་བལྟ། །མཆིན་རྩ་ཚང་ན་མི་འཆི་མ་ཚང་འཆི། །མ་རྩ་དར་ན་མི་
འཆི་གུད་ན་འཆི། །བུ་ན་ཕ་ཡི་རྩ་ལ་བལྟས་པ་ཡིས། །སྙིང་རྩ་ཚང་ན་མི་འཆི་མ་ཚང་འཆི། །བུ་
རྩ་དར་ན་མི་འཆི་གུད་ན་འཆི། །མ་དང་བུ་མོའི་རྩ་ཡང་དེ་ལྟར་བལྟ། །ཁྱོ་ན་ཆུང་མའི་རྩ་ལ་
བལྟས་པ་ཡིས། །མཆིན་རྩ་མ་ཚང་འཆི་ལ་ཚང་ན་འཚོ། །ཆུང་མ་ན་བ་ཁྱོ་ལ་རྩ་བལྟས་པས། །
མཁལ་རྩ་མ་ཚང་འཆི་ལ་ཚང་ན་འཚོ། །ཡང་ན་ཁྱོ་གྲོགས་ཆུང་མ་དགྲ་རུ་བརྩི། །དགྲ་གྲོགས་
རྩ་དར་མི་འཆི་གུད་ན་འཆི། །སྦྲུམ་མའི་རྩ་ནི་འབུར་ལ་འདྲིལ་བར་འཕར། །མཁལ་རྩ་གཡས་
པ་དྲག་ན་བུ་ཕོ་སྐྱེ། །གཡོན་པ་དྲག་ན་བུ་མོ་སྐྱེ་བར་འགྱུར། །བུ་ཡི་རྩ་ལ་མ་རྩ་བུ་རྩ་བྱུང༌། །
བཙས་ནས་གསོ་བླ་དགྲ་རྩ་བྱུང་ན་དཀའ། །གདོན་ཕྱྭ་ཤིང་རྩ་གཉན་དང་རྒྱལ་པོར་བཟུང༌། །
མེ་རྩ་བཙན་བདུད་ལྕགས་རྩ་རྒྱལ་པོ་དཀོར། །ས་ཡི་རྩ་ལ་ས་བདག་མ་མོར་བཟུང༌། །ཆུ་རྩ་
ཀླུ་དང་ཀླུ་སྲིན་དམ་སྲིར་བཟུང༌། །མ་ཡི་རྩ་ལ་ཕ་མའི་ཆགས་འདྲེར་བཟུང༌། །བུ་ཡི་རྩ་ལ་བུ་
ཚའི་ཞང་འདྲེར་བཟུང༌། །དགྲ་ཡི་རྩ་ལ་དགྲ་བོས་རྦད་འདྲེར་བཟུང༌། །གྲོགས་ཀྱི་རྩ་ལ་ནོར་
གྱི་ཕྱི་འདྲེར་བཟུང༌། །རང་གི་རྩ་ལ་གྲོགས་ཀྱི་གོད་འདྲེར་བཟུང༌། ནད་དང་ནད་མེད་འཕར་
བའི་གྲངས་བསྟན་པ། །ནད་མེད་ཐ་མལ་རྒྱུན་རྩ་སྨན་པ་ཡི། །ཕྱི་ནང་དབུགས་ལ་ལན་ལྔ་
འཕར་བར་འདོད། །དེ་ཡང་ལན་གྲངས་བརྒྱ་ཡི་བར་དག་ཏུ། །ཆེ་ཆུང་སྟོད་སྨད་དྲག་དལ་
བྱིང་རྒྱས་དང༌། །སྡོད་འཐེན་ཐང་ལྷོད་མེད་པར་འཕར་བར་འདོད། །དེ་ལས་བཟློག་པ་ནད་
25-1-528


ཅན་རྩ་ཡིན་ཏེ། །མང་འཕར་ཚ་བ་ཉུང་འཕར་གྲང་བ་ཡིན། །འོན་ཀྱང་ནད་མེད་རྩ་རྒྱུད་མུ་
ཏིག་འཕྲེང༌། །གོང་རྒལ་མ་ཚང་སྡོད་འཐེན་ལ་སོགས་པ། །ངེས་མེད་སྲིད་ཕྱིར་གོང་དུ་གཏན་
ལ་དབབ། །གཞི་རྩ་མ་རྟོགས་ཁ་མར་ལོག་པར་འགྲོ། །ཕོ་མོ་བུ་རྩ་མ་ཤེས་ཚ་བར་འཁྲུལ། །
བྱང་ཆུབ་སེམས་རྩ་གྲང་བར་འཁྲུལ་བ་དང༌། །མ་ཚང་གཅོད་སྡོད་འཆི་རྩར་འཁྲུལ་པ་ཡོད། །
རྒྱུས་མེད་རྣམས་ལ་ཐོག་མར་དྲི་བ་གཅེས། །ནད་ངོས་བཟུང་བ་སྤྱི་དང་བྱེ་བྲག་གཉིས། །སྤྱི་
རྩ་དྲུག་གིས་ཚ་གྲང་ལ་ཤན་དབྱེ། །དྲག་རྒྱས་འདྲིལ་མགྱོགས་དྲིམས་མཁྲང་ཚ་བའི་རྩ། །དེ་
ཡང་སྤངས་ཚ་གྲངས་ཚ་སྙུགས་ཚ་གསུམ། །སྤངས་དང་གྲངས་ཀྱི་ཚ་བ་འཁྲུགས་རིམས་
གསར། །སྙུགས་ཀྱི་ཚ་བ་རྙིངས་པའི་ཚ་བ་ཡིན། །གྲང་རྩ་ཞན་བྱིང་གུད་བུལ་ལྷོད་སྟོང་དྲུག །
སྙུགས་གྲང་གསར་ལ་གྲངས་སྤངས་གྲང་བ་རྙིངས། །བྱེ་བྲག་བརྟག་པ་རྣམ་པ་གཉིས་ཡིན་
ཏེ། །རྩ་རྒྱུད་སོ་སོས་ནད་རིགས་དབྱེ་བ་དང༌། །ཚོན་ཀན་ཆག་གསུམ་རྒྱུ་བ་བཅུ་གཉིས་ཀྱིས། །
སྟོད་སྨད་དོན་སྣོད་བྱེ་བྲག་གར་བབས་བརྟག །དང་པོ་རྩ་རྒྱུད་སོ་སོར་བརྟག་པ་ནི། །རླུང་གི་
རྩ་ནི་རྐྱལ་སྟོང་སྐབས་སུ་སྡོད། །མཁྲིས་པའི་རྩ་ནི་ཕྲ་ལ་གྲིམས་པར་འཕར། །བད་ཀན་སྐྱ་
བོའི་རྩ་ནི་བྱིང་ལ་རྒུད། །རླུང་ཚད་ལྡན་པའི་རྩ་ནི་སྟོང་ལ་རྒྱུག །བད་མཁྲིས་ལྡན་པ་ཁ་བྱིང་
གཏིང་ན་གྲིམས། །བད་རླུང་ལྡན་པའི་རྩ་ནི་སྟོང་ལ་དལ། །བད་ཀན་སྨུག་པོ་སྦོམ་ཁེངས་ཀན་
རྩ་ཞར། །ཁྲག་གི་རྩ་ནི་འབུར་ལ་འདྲིལ་བར་འཕར། །ཆུ་སེར་རྩ་ནི་འདར་ལ་རྒྱུ་བ་དཀའ། །
སྲིན་རྩ་འཁྱིག་ཅིང་ཞེང་དུ་ལེབ་མོར་འཕར། །ཞར་ཅིང་འདར་ལ་འཁྲིག་པ་མཛེ་ཡི་རྩ། །
འགྲམས་ཚད་རྩ་ནི་ཕྲ་མཁྲང་གྲིམས་པར་འཕར། །འཁྲུགས་ཚད་རྩ་ནི་སྦོམ་རྒྱས་འབུར་ལ་
འདྲིལ། །རིམས་ཚད་རྩ་ནི་ཕྲ་ལ་མགྱོགས་པར་འཕར། །གཉན་གྱི་རྩ་ནི་འཁྱིག་ཅིང་ལྕམ་དྲལ་
བྱེད། །གཟེར་ཐུང་རྩ་ནི་ཐུང་ཐུང་སྦུད་སྦུད་འཕར། །སྦྱར་དུག་རྩུབ་སྤུན་འཆོལ་པ་སྔོར་མི་བཏུབ། །ཤ་
དུག་རྩ་ནི་ཕྲ་མགྱོགས་ཞར་བྱིང་རྒྱུ། །མ་སྨིན་ཚ་བ་ཕྲ་མགྱོགས་རླུང་ལྟར་གཡོ། །རྒྱས་ཚད་རྩ་
25-1-529


ནི་དྲག་ལ་གྲིམས་པར་འཕར། །སྟོངས་ཚད་རྩ་ནི་སྟོང་ལ་རྒྱུག་པ་སྟེ། །གབ་པའི་ཚད་པ་རྩ་
སྤངས་དམའ་ལ་གྲིམས། །ཚད་པ་རྙིང་པ་ཕྲ་ལ་གྲིམས་པར་འཕར། །རྙོངས་ཚད་རྩ་ནི་ཕྲ་མོ་
གཏིང་ན་རྒྱུག །རྨ་ཚད་རྩ་ནི་སྦོམ་མཁྲང་མགྱོགས་པར་འཕར། །ཟུག་རྔུའི་རྩ་ནི་ཞར་ཅིང་
ལྕམ་དྲལ་བྱེད། །མགོ་ཆག་ཤ་རུས་གླད་པ་རྣམ་པ་གསུམ། །གང་ལ་སྐྱོན་ཡོད་ཚོན་ཀན་ཆག་
གི་རྩ། །རིམ་བཞིན་དྲག་ཅིང་གྲིམས་ལ་མགྱོགས་པའོ། །རྣག་རྩ་འདར་རམ་ཡང་ན་ཚ་ལ་
སྤུན། །གྲང་རྩ་མ་ཞུ་གསར་པ་སྦོམ་ལ་མཁྲང༌། །མ་ཞུ་རྙིང་པ་ཤེད་ཆུང་རྩ་རྒྱུད་ཕྲ། །སྐྲན་གྱི་
རྩ་ནི་ཞན་ཅིང་ཞར་བར་འཕར། །དམུ་འོར་སྐྱ་རྦབ་ཕྲ་བྱིང་གཏིང་ན་དམ། །སྐྱུག་ན་སྟོད་ཞན་
འཁྲུ་ན་རྩ་སྨད་ཞན། །འོན་ཀྱང་རྩ་ལ་ནོར་བའི་འཕྲང་དྲུག་སྟེ། །ཁྲག་རྩ་རླུང་རྩ་རྐྱལ་བྱེད་ནོར་
ར་རེ། །རྒྱས་ཚད་སྟོངས་ཚད་རྒྱུག་བྱེད་ནོར་ར་རེ། །བད་ཀན་ཁྲག་རྒན་བྱིང་བྱེད་ནོར་ར་རེ། །
དེ་དག་སྟོད་སྨད་དོན་སྣོད་གར་བབས་ནད། །མཚོན་རྩ་གཉིས་ཀྱིས་གློ་སྙིང་སྟོད་ནད་བརྟག །
ཀན་རྩ་གཉིས་ཀྱིས་ཕོ་མཆིན་བར་ནད་བརྟག །ཆག་རྩ་གཉིས་ཀྱིས་མཁལ་རྐེད་སྨད་ནད་
བརྟག །གདགས་སྲིབས་རྩ་ཡིས་དོན་ལྔ་སྣོད་དྲུག་བརྟག །ཡར་ཟུར་དོན་ལྔ་ཕྱིར་རྒྱུ་གདགས་
ཀྱི་རྩ། །མ་ཟུར་སྣོད་དྲུག་ནང་རྒྱུ་སྲིབས་ཀྱི་རྩ། །དོན་སྣོད་ཕལ་ཆེར་ཆོ་རོལ་མི་འབྱུང་ཞིང༌། །
དོན་ཚ་སྣོད་ལ་གྲང་བ་འབྱུང་སྲིད་ཀྱིས། །སྣོད་ཚ་དོན་ལ་གྲང་བ་འབྱུང་མི་སྲིད། །སྟོད་སྨད་
གཉིས་ཀྱང་དེ་བཞིན་ཤེས་པར་བགྱི། །དེ་དག་མ་འདྲེས་ཕྲ་ཞིབ་ཕྱེད་པར་རྟོགས། །འཆི་རྩ་
རྒྱུད་འགྱུར་མ་ཚང་སྡོད་པའོ། །རྩ་རྒྱུད་འགྱུར་བ་དར་ལྕེ་རླུང་བསྐྱོད་འདྲ། །ཁྲ་ཡི་མཇུག་རྩེ་
ཐིགས་ཟགས་ཆུ་གཞུག་འདྲ། །ཉ་མོ་རྔ་འདྲ་མཆིལ་པ་སྒུམ་འཐུ་འདྲ། །སྦལ་པ་མཆོངས་དང་གླང་རྒན་
ཁ་ཆུ་འདྲ། །སྟོབས་ཅན་གློ་བུར་ནད་ལ་རྩ་སྟོབས་ཕྲ། །ཡུན་རིང་ཟུངས་ཟད་ནད་ལ་རྩ་རྒྱས་
འབྲུབ། །གྲང་ལ་ཚ་བ་ཚ་ལ་གྲང་རྩ་བྱུང༌། །གློ་ཚད་ཤ་དུག་བད་མཁྲིས་ཕོ་ཁར་འདྲིལ། །འདི་
བཞི་ནད་མེད་རྩ་བྱུང་འཆི་བ་ཡིན། །མ་ཚང་འབྲེལ་(ཕྱི་འབྲེལ་ལྔ་དང་ནང་འབྱོར་དྲུག་ལས། ཕྱི་འབྲེལ་ལྔ་ནི། 
25-1-530


སྙིང་དང་ལྕེ་འབྲེལ། གློ་བ་དང་སྣ་འབྲེལ། མཆིན་པ་དང་མིག་འབྲེལ། མཆེར་བ་དང་མཆུ་འབྲེལ། མཁལ་མ་དང་རྣ་བ་འབྲེལ། 
ནང་འབྱོར་དྲུག་ནི། སྙིང་དང་རྒྱུ་མ་འབྱོར། གློ་བ་དང་ལོང་འབྱོར། མཆིན་པ་དང་མཁྲིས་པ་འབྱོར། མཆེར་པ་དང་ཕོ་བ་འབྱོར། 
མཁལ་མ་གཡས་དང་སྒང་པ་འབྱོར། མཁལ་མ་གཡོན་དང་བསམ་སེ་འབྱོར་པའི་དྲུག་གོ །)འབྱོར་ཕྱི་ཡི་རྟགས་ལ་
དཔག །སྙིང་རྩ་མ་ཚང་ལྕེ་ནག་འབྲུ་ཚུགས་བལྟ། །གློ་རྩ་མ་ཚང་སྣ་ཞོམ་ནང་སྤུ་ལོག །མཆིན་
རྩ་མ་ཚང་མིག་ཟློག་སྨིན་མ་འཚོམ། །མཆེར་རྩ་མ་ཚང་མཆུ་འཕྱངས་ལྷེན་སྣ་སྡིབ། །མཁལ་
རྩ་མ་ཚང་སྒྲ་ཆད་རྣ་བ་འབྱར། །ཞག་གཅིག་གཉིས་གསུམ་ལྔ་དང་བརྒྱད་ན་འཆི། །སྡོད་ལ་ན་
སྡོད་འཆི་སྡོད་འདྲེ་སྡོད་གསུམ། །ན་དུས་གང་ནའི་རྩ་སྡོད་ན་སྡོད་ཡིན། །འདྲེ་སྡོད་ངེས་མེད་
དྲག་དལ་བྱེད་པ་སྟེ། །གྲངས་དུས་ངེས་པར་སྡོད་པ་འཆི་སྡོད་ཡིན། །འདྲེ་ལ་ཡས་སྦྱིན་ནད་
ལ་སྨན་གྱིས་བཅོས། །དེ་བྱས་སྐྱེད་མེད་ཅིས་ཀྱང་འཆི་བར་འགྱུར། །ནད་བྱིང་རྐྱེན་གྱིས་གབ་
དང་གདོན་གྱིས་སྦས། །རྩ་མེད་གྱུར་ཀྱང་ངེས་མེད་ཕལ་ཆེར་འཚོ། །གདོན་རྩ་རྩ་རྒྱུད་མི་
སྙོམས་འགྱུར་ལྡོག་མང༌། །ངེས་མེད་སྡོད་འཐེན་ལྕམ་དྲལ་བྱེད་པ་སྟེ། །སྙིང་གི་རྩ་ལ་ལྷ་
བསྲུངས་རྒྱལ་པོ་བརྟག །གློ་བའི་རྩ་ལ་ཀླུ་བདུད་ཀླུ་བཙན་བརྟག །མཆིན་པར་ས་བདག་དམ་
སྲི་དྲི་མོ་བརྟག །མཆེར་པར་དྲི་ཕོ་གཉན་དང་ས་བདག་བརྟག །མཁལ་མ་གཡས་ལ་ཀླུ་དང་
གཉན་དུ་བརྟག །མཁལ་མ་གཡོན་པ་མཚོ་སྨན་ཀླུ་བསེན་བརྟག །ཆེ་རིང་མི་སྒྲུང་གཡས་ལ་
ཕོ་གདོན་བཟུང༌། །ཆུང་ཐུང་མི་སྒྲུང་གཡོན་ལ་མོ་གདོན་བཟུང༌། །རླུང་གི་ནད་ལ་དཀོར་
བདག་རྒྱལ་པོ་གནོད། །གློ་ཚ་གཟེར་ལ་བཙན་བདུད་ཀླུ་བཙན་གནོད། །རིམས་དང་མཁྲིས་
ནད་མ་མོ་བྱང་སྨན་གནོད། །དམུ་སྐྲན་འབྲས་ལྷོག་ཀླུ་གཉན་ས་བདག་གནོད། །ངོས་ཟིན་
བོན་དང་མདོས་དང་བསྐྲད་པ་དང༌། །བྱིན་རླབས་བཀའ་བསྒྲག་བསོད་ནམས་བསག་ལ་
སོགས། །ཡུལ་ལུགས་སྦྱར་ཏེ་གང་ལ་འཚམ་པས་བཅོས། །ཚེའི་རྟགས་བླ་ཡི་རྩ་ལ་བརྟག་པ་
ནི། །སེམས་ལ་རང་དབང་མ་ཐོབ་ཕྱིར་བལྟས་པས། །མ་རིག་སྲིད་པའི་ལུས་ངན་བླངས་པ་
ཡིས། །ཚེ་སྲོག་རྟེན་དུ་བླ་རྩ་འཁྱམ་པོ་བྱུང༌། །བླ་རྩ་གནས་ན་བླ་ཚེ་མལ་ན་གནས། །བླ་རྩ་
25-1-531


འགྱུར་ལྡོག་བྱེད་ན་ཚེ་མི་བརྟན། །བླ་རྩ་བྲོས་ན་བླ་ཚེ་ཡར་ཏེ་འཆི། །ཚེ་ཆོག་འཆི་བསླུས་
ཁུགས་པ་སྲིད་པ་ཙམ། །ཡར་མར་ཆུ་རྒྱུས་འོག་ནས་མི་རྒྱུ་ན། །བན་བོན་ཡིན་ན་བསྲུངས་མ་
བདུད་དུ་བབས། །སྐྱེ་བོ་ཡིན་ན་ཟོར་ཁ་ཀླུ་གཉན་འགྲས། །ཕོ་ལ་གཡས་པ་འཁྱིག་སྡོད་ཕ་
སྤུན་འཆི། །གཡོན་པ་འབྲུབ་ཅིང་སྡོད་ན་བུ་སྨད་འཆི། །གཉིས་ཀ་འཁྱིག་སྡོད་རང་ཉིད་གྲི་རུ་
འཆི། །ཐེངས་གཅིག་སྡོད་ན་གོད་ཀ་ཁ་ཡོག་འོང༌། །བུད་མེད་གཡས་པ་འཁྱིག་སྡོད་ཁྱོ་ཕྱོགས་
འཆི། །གཡོན་པ་འཁྱིག་ཅིང་སྡོད་ན་ཕ་མིང་འཆི། །གཉིས་ཀ་འབྲུབ་ཅིང་སྡོད་ན་བུ་ཁྱོ་འཆི། །
སྟོང་བརྒྱལ་གོད་འོང་ཐང་འཁྱིག་ཁ་སྨྲས་འོང༌། །མལ་མི་ཐུབ་ན་གདོན་གྱི་རྩ་ཡིན་ཏེ། །སྦོམ་
འབྲུབ་ཕོ་གདོན་ཐུང་རྩུབ་མོ་གདོན་བཟུང༌། །བླ་རྩ་སྙོམས་པར་ལན་བརྒྱ་འཕར་བ་ནི། །ལོ་
བརྒྱ་ཐུབ་སྟེ་ལྔ་བཅུས་ལྔ་བཅུ་ཐུབ། །དེ་བཞིན་འཕར་རེས་ལོ་རེ་ཐུབ་པར་བཤད། །དེ་ལྟར་
རྟོག་པའི་སྨན་པ་ཉན་པ་འདྲ། །ཤེས་པ་མ་ཡེངས་གཅིག་ཏུ་བསྡུས་ལ་སྤྲོ། །ཞེས་གསུངས་སོ། །
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རེག་པ་རྩ་ལ་ནད་ངོས་
བཟུང་བའི་ལེའུ་སྟེ་དང་པོའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཡིད་ལས་སྐྱེས། །མཐོང་བ་མེ་ལོང་ཆུ་ལ་ངོས་བཟུང་བ། །སྔོན་འགྲོ་བལྟ་དུས་སྣོད་
དང་གྱུར་ཚུལ་དང༌། །ཐ་མལ་ནད་ཆུ་འཆི་ཆུ་གདོན་ཆུ་སྟེ། །ས་བཅད་རྣམ་བརྒྱད་ཆུ་བརྟག་
མདོར་བསྟན་ཡིན། །དང་པོ་སྔོན་འགྲོ་བལྟ་བའི་ནུབ་མོ་ནས། །ཇ་དང་དར་བ་ཆང་དང་སིངས་
པོ་སོགས། །ཆུ་མདོག་འགྱུར་ཕྱིར་ཧ་ཅང་མང་བ་སྤང༌། །སྐོམ་པར་མི་སྡོད་ཉལ་པོ་གཉིད་ཆག་
དང༌། །འགྲོ་འཁྲུག་སེམས་ལས་ཆུ་འཁྲུགས་སྤང་བར་བྱ། །ནམ་ཕྱེད་ཕན་ཆད་ཟས་ཀྱི་ཆུ་ཕོ་
ལ། །ནམ་སྨད་ནད་ཆུ་བསགས་ཏེ་བལྟ་བར་བྱ། །བལྟ་དུས་མདོག་རླངས་ཀུ་ཡ་བརྟག་པའི་
ཕྱིར། །ཞོགས་པ་སྣོད་ལ་ཉི་མདངས་བྱུང་དུས་བརྟག །སྣོད་ཀྱི་ཁྱད་པར་ཆུ་མདོག་མི་འགྱུར་
25-1-532


བའི། །ཀར་ཡོལ་འཁར་གཞོང་ལྕགས་དཀར་སྣོད་དུ་བརྟག །རྫ་ཟངས་ར་གན་དམར་ཡོལ་
མདོག་འགྱུར་སྤང༌། །འོན་ཀྱང་འཇག་སོག་དཀར་པོས་བརྟག་ཏུ་རུང༌། །གྱུར་ཚུལ་ཟས་སྐོམ་
ཕོ་བར་དྭངས་སྙིགས་ཕྱེ། །སྙིགས་མ་རྒྱུ་མའི་ནང་ཚུད་སྐ་སླ་ཕྱེ། །སླ་བ་རྒྱུ་གྲོག་རྩ་ནས་ལྒང་
པར་འདྲིལ། །དྭངས་མ་མཆིན་པའི་གནས་བརྒྱུད་ཁྲག་ཏུ་འགྱུར། །ཁྲག་གི་སྙིགས་མ་མཁྲིས་
པའི་གནས་སུ་གསོག །མཁྲིས་པའི་དྭངས་མ་ལུས་ཀྱི་ཆུ་སེར་འགྱུར། །མཁྲིས་པའི་སྙིགས་མ་
ཆུ་ཡི་ཀུ་ཡར་འགྱུར། །རྩ་མིག་འགྲིམས་ནས་ལྒང་པའི་ནང་དུ་གསོག །དེ་ཕྱིར་ཆུ་ཡི་ཁ་དོག་
ཟས་ཀྱིས་སྒྱུར། །ཀུ་ཡ་ཁྲག་མཁྲིས་གནས་ནས་འབྱུང་བའི་ཕྱིར། །ལུས་ལ་ཚ་གྲང་གང་ཡོད་
ཆུ་ལ་གསལ། །དཔེར་ན་ཚོང་པས་ཚོང་དུས་གཏམ་བརྗོད་བཞིན། །ཐ་མལ་ནད་མེད་གནས་
པའི་ཆུ་བསྟན་པ། །ཁ་དོག་འབྲི་མར་བཞུས་འདྲ་སྲེ་དྲི་མནམ། །རླངས་པ་ཆེ་ཆུང་ཡུན་རན་མེ་
ཏོག་སྙོམས། །ཀུ་ཡ་སྙོམས་ཁྱབ་སྤྲིས་མ་ཀོ་ཆུ་ཙམ། །རླངས་ཡལ་དུས་ན་མཐའ་ནས་སྒོར་
མོར་ལྡོག །ལོག་རྗེས་དཀར་སེར་དྭངས་པ་ནད་མེད་ཡིན། །དེ་བཟློག་ནད་ཆུ་སྤྱི་དང་བྱེ་བྲག་
གཉིས། །སྤྱི་ལ་བརྟག་པའི་དུས་གསུམ་བརྟག་ཚུལ་དགུ། །དུས་གསུམ་ཚན་དེ་ངད་ཡལ་གྲང་
བ་གསུམ། །ཚན་དེའི་དུས་སུ་མདོག་རླངས་དྲི་མེ་ཏོག །ངད་ཡལ་དུས་སུ་ཀུ་ཡ་སྤྲིས་མ་བརྟག །
གྲང་ནས་ལྡོག་དུས་ལྡོག་ཚུལ་ལོག་རྗེས་བརྟག །དང་པོ་ཚ་བའི་དུས་ཀྱི་ཁ་དོག་ནི། །ལུ་མའི་
ཆུ་ལྟར་སྔོ་ལ་སླ་བ་རླུང༌། །སེར་ན་མཁྲིས་པ་དཀར་ན་བད་ཀན་ནད། །དམར་ན་ཁྲག་ནད་རྒྱ་
ཤལ་ཆུ་སེར་ཡིན། །སྨུག་ལ་དུགས་ན་བད་ཀན་སྨུག་པོར་བརྟག །ཆུ་མདོག་འདྲེས་ན་ལྡན་
དང་འདུས་པའི་ནད། །མར་ནག་འདྲ་ན་རིམས་དང་མཁྲིས་པ་རྒྱས། །དམར་སེར་སྐ་དུགས་
འགྲམས་སམ་འཁྲུགས་ཆུ་ཡིན། །ཆུ་མདོག་ནག་གམ་འཇའ་ཚོན་འདྲ་བ་དུག །རླངས་པ་ཆེ་
ན་ཚ་བ་རྒྱས་པའི་ཆུ། །ཆུང་ལ་ཡུན་རིང་ཚ་བ་གབ་བམ་རྙིངས། །རླངས་ཆུང་ཡུན་ཐུང་བད་
རླུང་གྲང་ཆུ་ཡིན། །རེས་ཆེ་རེས་ཆུང་ཚ་གྲང་འདྲེས་པར་བརྟག །དྲི་མ་དུགས་ལ་དཀུ་ན་ཚ་
25-1-533


བ་ཆེ། །དྲི་མ་མེད་དམ་ཆུང་ན་གྲང་བ་ཡིན། །ཟས་ཀྱི་དྲི་མནམ་གང་མནམ་དེ་མ་ཞུ། །སྦུ་བ་
སྔོ་ལ་ཆེ་བ་རླུང་ཡིན་ཏེ། །ཕྲ་སེར་སངས་པ་སྐྱེན་ན་མཁྲིས་པ་ཡིན། །སྦུ་བ་མཆིལ་མ་འདྲ་ན་
བད་ཀན་ནད། །དམར་ན་ཁྲག་ནད་འཇའ་ཚོན་འདྲ་ན་དུག །ཕུག་རོན་ཁྲ་ཡིས་གཏོར་འདྲ་
བྱེར་བའི་ནད། །ཀུ་ཡ་སྤུ་དང་འདྲ་ན་རླུང་གི་ནད། །བལ་འདབ་ཆུ་སྐྱུར་འདྲ་བ་ཁྲག་མཁྲིས་
ཡིན། །སྤུ་རྩེ་འདྲ་བ་བད་ཀན་གྲང་བའི་ནད། །སྤྲིན་འདྲ་གློ་ནད་རྣག་འདྲ་དེ་ཉིད་ཡོད། །བྱེ་
མ་འདྲ་ན་མཁལ་ནད་ཡོད་པ་ཡིན། །སྟེང་འོག་བར་གནས་ནད་ཀྱང་དེ་བཞིན་བརྟག །ཀུ་ཡ་
ཞོ་ཤི་འདྲ་བས་ཆུ་སྟེང་ཁྱབ། །རླུང་གིས་ལུས་ཟུངས་ཚ་གྲང་དཀྲུགས་པ་ཡིན། །མཐུག་དང་
སྲབ་ལས་ཚ་གྲང་ཤེས་པར་བྱ། །ཁ་དོག་ཆུ་མདོག་གང་བྱུང་དེ་ལྟར་རོ། །སྤྲིས་མ་སྲབ་ན་གྲང་
བ་མཐུག་ན་ཚ། །བླངས་བཞག་བཏུབ་ན་ཞག་རྒོད་ཅེས་བྱ་སྟེ། །མེར་བསྲེགས་གསུར་དྲི་བྱུང་
ན་བཅོས་མི་དགོས། །སྤྲིས་མ་དུམ་བུར་ཆད་ན་སྐྲན་ནད་ཡིན། །སྤྲིས་མའི་གཟུགས་ལས་
གདོན་ངོས་བཟུང་བར་བྱ། །ལྡོག་དུས་རླངས་མ་ཡལ་བར་ལྡོག་པ་ཚ། །ཡལ་རྗེས་གྲང་ནས་
ལྡོག་པ་གྲང་བ་ཡིན། །རླངས་ཡལ་ལྡོག་པ་དུས་མཚུངས་ཚ་གྲང་སྙོམས། །ལྡོག་ཚུལ་ཆུ་ལ་
སྲབ་མཐུག་མེད་པ་ལ། །གང་སྲབ་མཐའ་ནས་ལྡོག་པ་གྲང་བ་ཡིན། །གཏིང་ནས་ལོངས་པོར་
ལྡོག་པ་ཚ་བ་གསར། །མཐའ་ནས་ཤར་ཤར་ལྡོག་པ་རྙིངས་ཚད་ཡིན། །སྣ་ལ་ཀུ་ལ་ལྡོག་ན་
ཚ་གྲང་འཐབ། །ཚ་བ་བྱེར་དང་གྲང་བ་འབྱམས་པ་དང༌། །གདོན་ཤས་ཆེ་བའི་ཆུ་གསུམ་ལྡོག་
མི་འགྱུར། །ལོག་རྗེས་ཁ་དོག་ནད་གཞིའི་ཆུ་མདོག་བལྟ། །སྐ་ན་ཚ་བ་སླ་ན་གྲང་བ་ཡིན། །བྱེ་
བྲག་མདོར་བསྡུས་ཚ་ཆུ་གྲང་ཆུ་གཉིས། །ཚ་བའི་ཆུ་ནི་ཁ་དོག་དམར་རམ་སེར། །སྐ་ལ་དྲི་
དུགས་རླངས་པ་ཆེ་ཡུན་རིང༌། །སྦུ་བ་ཕྲ་སེར་སངས་རྐྱེན་སྤྲིས་མ་མཐུག །ཀུ་ཡ་ཆུ་ཡི་དཀྱིལ་
དུ་ལིང་གིས་འདྲིལ། །དྲོད་རླངས་མ་ཡལ་བ་ལ་ཚ་ལོག་བྱེད། །ལོག་རྗེས་སྨུག་ལ་གར་བ་
ཚ་ཆུ་ཡིན། །གྲང་ཆུ་ཁ་དོག་དཀར་རམ་སྔོ་ལ་སླ། །རླངས་དང་དྲི་མ་ཆུང་ལ་སྦུ་བ་ཆེ། །སྤྲིས་
25-1-534


དང་ཀུ་ཡ་སྲབ་ཅིང་གྲང་རྗེས་ལྡོག །ལོག་རྗེས་སྔོ་ལ་སླ་བ་གྲང་ཆུ་ཡིན། །ཁ་དོག་དཀར་སྔོ་
ཀུ་ཡ་མཐུག་པའི་ཆུ། །ལྟར་སྣང་གྲང་ཡང་གཏིང་ན་ཚད་པ་ཡོད། །དམར་སེར་དྲི་ཆུང་ཀུ་ཡ་
མེད་པ་ནི། །ལྟར་སྣང་ཚ་ཡང་ངོ་བོ་གྲང་བ་ཡིན། །ཚ་ཆུ་ལྡོག་བུལ་གྲང་ཆུ་ལྡོག་པ་སྐྱེན། ཚ་བ་
གབ་པའི་ནད་དུ་ཤེས་པར་བྱ། །ཚ་ཆུ་མེ་ཏོག་མེད་ན་ཁོང་ཤོར་བྱིང༌། །གྲང་ཆུ་མེ་ཏོག་མེད་ན་
གྲང་བ་འབྱམས། །ཚ་ཆུ་སྤྲིས་མ་མཐུག་ན་ལུས་ཟུངས་ཞུ། །དེ་བཞིན་གྲང་ཆུ་མར་མ་ཞུ་བར་
ངེས། །ལར་ན་སྟོངས་ཚད་ཁྲག་ཚད་དམར་པོར་འཁྲུལ། །བད་ཀན་སྨུག་པོ་ཆུ་སེར་སྨུག་པོར་
འཁྲུལ། །མཁལ་མ་མཆིན་པ་མཆེར་གསུམ་དམར་པོར་འཁྲུལ། །གབ་ཚད་བད་རླུང་གྲང་
བ་སྔོན་པོར་འཁྲུལ། །དེ་དག་མ་འཁྲུལ་ནད་ངོས་སོ་སོར་བཟུང༌། །འཆི་བའི་ཆུ་ནི་ཁྲག་འདྲ་
ཀོ་རུལ་མནམ། །བཅོས་ཀྱང་སྐྱེད་མེད་ཚ་བའི་འཆི་ཆུ་ཡིན། །དེ་བཞིན་ཀུ་ཡ་སངས་ནས་
མི་ལྡོག་འཆི། །སྔོ་ཞིང་དྲི་རླངས་བྲོ་བ་མེད་པ་ལ། །བཅོས་ཀྱང་མི་འགྱུར་གྲང་བའི་འཆི་ཆུ་
ཡིན། །ནག་ཐུག་ཆད་འདྲ་རླུང་གི་ནད་ཀྱིས་འཆི། །ཆུ་རྩ་ཆད་འདྲ་མཁྲིས་པའི་ནད་ཀྱིས་འཆི། །
མཚལ་ཆད་འདྲ་ན་ཁྲག་གི་ནད་ཀྱིས་འཆི། །འོ་མ་ཤི་འདྲ་བད་ཀན་ནད་ཀྱིས་འཆི། །སྣག་ཚ་
ཆད་པ་འདྲ་ན་དུག་གིས་འཆི། །མཁལ་ནད་མེད་པར་ཁོང་ནས་ཆུ་ལོག་ན། །འདུ་བ་ཁོང་རུལ་
ཞེས་བྱ་འཆི་བ་ཡིན། །གདོན་ཆུ་གང་བཏང་ངོས་དེ་ཤར་དུ་རྩི། །ཆུ་དེ་སྲིད་པའི་རུས་སྦལ་གན་
རྐྱལ་གནས། །མགོ་བོ་ལྷོར་བསྟན་ཐིག་བཞིས་ས་དགུར་བཅད། །གཡས་གསུམ་ལྷ་ས་མི་ས་
གདོན་གྱི་ས། །གཡོན་གསུམ་དུར་ས་ཁང་ས་ཞིང་གི་ས། །དབུས་གསུམ་ཕ་མེས་རང་དང་བུ་
ཚའི་ས། །ལིང་ཚེ་དགུ་པོའི་ས་དེར་གཟུགས་བརྙན་ནམ། །ལྡོག་སྐྱེན་ལྡོག་སྣ་རིང་དང་མི་ལྡོག་
དང༌། །ཉ་མིག་སྲུབས་འདྲ་སྦུ་བ་གང་བྱུང་བ། །ལྷ་སར་བྱུང་ན་བརྟེན་པའི་ལྷ་བསྲུངས་གནོད། །
མི་སར་བྱུང་ན་དྲི་ཕོ་དྲི་མོ་གནོད། །གདོན་སར་བྱུང་ན་སྲིད་པའི་སྤྱི་འདྲེ་གནོད། །ཕ་མེས་སར་
བྱུང་ཆགས་འདྲེ་རྦད་འདྲེ་གནོད། །རང་སར་བྱུང་ན་གྲོགས་ཀྱི་གོད་འདྲེ་གནོད། །བུ་ཚའི་སར་
25-1-535


བྱུང་ཞང་ཉེ་མ་སྲུའི་འདྲེ། །ཁང་དུར་ཞིང་སར་བྱུང་ན་དེ་ནས་གནོད། །གཞན་ཡང་ཤར་དུ་བྱུང་
ན་རྒྱལ་པོ་གཉན། །ལྷོ་རུ་བྱུང་ན་བཙན་དང་མ་མོ་གནོད། །ནུབ་ཏུ་བྱུང་ན་ཀླུ་བདུད་ཀླུ་བཙན་
ཏེ། །བྱང་དུ་བྱུང་ན་མཚོ་སྨན་ཀླུ་སྲིན་གནོད། །ཤར་ལྷོར་བྱུང་ན་རྒྱལ་པོ་བཙན་དྲི་མོ། །ལྷོ་ནུབ་
མཚམས་སུ་བཙན་བདུད་ནག་སྨུག་གནོད། །ནུབ་བྱང་མཚམས་སུ་ཀླུ་བདུད་ཀླུ་སྲིན་གནོད། །
བྱང་ཤར་ས་བདག་རིག་འཛིན་བཅོས་པར་བྱ། །འོན་ཀྱང་ལོག་རྗེས་ཉི་མའི་མདངས་ཤར་
ཚེ། །འདྲ་བའི་གཟུགས་ལ་གདོན་གྱི་ངོས་བཟུང་བ། །རྨ་བྱའི་མདོངས་འདྲ་ནག་སྨུག་གནོད། །
བ་དན་འཕྱར་འདྲ་མགོན་པོ་གནོད། །ལྕགས་སྒྲོག་འདྲ་ན་ལྷ་མོ་གནོད། །མདུང་རྩེ་འདྲ་ན་ཕོ་
ལྷ་གནོད། །ར་སྐྱེས་འདྲ་ན་དགྲ་ལྷ་གནོད། །ཤུག་པ་འདྲ་ན་ཡུལ་ལྷ་གནོད། །པདྨ་འདྲ་ན་མ་
ལྷ་གནོད། །འོད་སྐོར་འདྲ་ན་རྒྱལ་པོ་གནོད། །ཙིག་ཁུང་ཉི་ཤར་འདྲ་ན་བཙན། །དར་ལྕེ་འདྲ་
ན་ཀླུ་བཙན་གནོད། །སྡིག་པ་འདྲ་ན་ཀླུ་བདུད་གནོད། །ཤ་རུ་འདྲ་ན་ཡམ་ཤུད་གནོད། །གལ་
ཏེ་འདྲ་ན་ཐེ་བྲང་གནོད། །མེ་ལོང་འདྲ་ན་མཚོ་སྨན་གནོད། །ཏམ་བུ་ར་འདྲ་བདུད་མོ་གནོད། །
ཉ་དང་དུང་འདྲ་ས་བདག་གནོད། །ཆུ་སྲིན་སྦྲུལ་འདྲ་ཀླུ་གདོན་གནོད། །ན་བུན་སྤྲིན་འདྲ་མི་
གཙང་ལངས། །མདའ་འཕང་འདྲ་ན་དྲི་ཕོ་མོ། །མིག་མངས་འདྲ་ན་ཞིང་འདྲེ་གནོད། །ཕུར་
པ་ཡུངས་ཀར་ཕུར་ཁ་གནོད། །ཐོད་པ་འདྲ་ན་ཀླུ་གཏད་གནོད། །མ་ཧེ་འདྲ་ན་དམ་སྲི་གནོད། །
དེ་རྣམས་གནོད་པ་ས་དགུའི་ཕྱོགས་ལས་དཔག །ལྷ་སར་འདྲེ་ངོ་བྱུང་ན་འདྲེ་ལྷར་རྫུ། །འདྲེ་
སར་ལྷ་ངོ་ལྷ་ཁྲོས་འདྲེ་རུ་གནོད། །ལྡོག་ཏུ་མི་འདོད་བསྐོར་ཕྱྭ་བཏབ་སྟེ་བལྟ། །དེས་མ་
གསལ་ན་གདོན་ངོ་ཡིབ་ཅེས་བྱ། །སྤྱིར་ན་དོན་ནད་རྩ་གསལ་སྣོད་ནད་ཆུ། །འཚོ་འཆིའི་ལ་
ཤན་རྩ་ཡིས་འབྱེད་ན་ཡང༌། །ཚ་གྲང་ལ་ཤན་ཆུ་ལ་མཐོང་བས་གསལ། །དེ་ཕྱིར་མཁས་པས་
ཆུ་ལ་བརྟག་པར་བྱའོ། །གལ་འགག་བཞི་ཡིས་འཁྲུལ་སོ་བསལ་བ་ནི། །མན་ངག་རྒྱུད་ཀྱི་ཚ་
གྲང་གལ་མདོར་ལྟོས། །ཞེས་གསུངས་སོ། །
25-1-536


དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །ནད་དང་གཉེན་པོ་སྤྲོད་ཕྱིར་གསོ་ཚུལ་དགུ། །འཚོ་མཛད་སྨན་
པའི་རྒྱལ་པོས་བཤད་དུ་གསོལ། །དེ་སྐད་ཞུས་པའི་དོན་ལ་ལན་གསུངས་པ། །ཀྱེ་དྲང་སྲོང་
ཆེན་པོ་ཡིད་ལས་སྐྱེས། །ནད་དང་གཉེན་པོར་སྤྲོད་ཕྱིར་གསོ་ཚུལ་གཅེས། །གཅེས་པའི་དོན་
ལ་ཞུས་པ་ལེགས་ན་ཡང༌། །བཤད་པའི་རྒྱུད་དུ་ལེགས་པར་བསྟན་ནས་ཡོད། །དྲང་སྲོང་ཆེན་
པོ་ལྟ་རྟོག་འཐེམས་པར་གྱིས། །དེ་མ་ཡིན་ན་མུན་ཁུང་རྫས་སྟོར་འདྲ། །དཔེ་ལ་ལས་པས་
དགོས་དུས་སླེབ་མི་འགྱུར། །རྒྱུད་བཞིའི་ལྟ་རྟོག་འཐེམས་ནས་དོན་ལོངས་ན། །མུན་ཁུང་
མཛོད་དུ་ཉི་ཤར་ཇི་བཞིན་གསལ། །གསེར་གཡུའི་སྒྲོམ་བུར་ལག་པ་བཅུག་པ་བཞིན། །རང་
ལ་ནམ་དགོས་དུས་ན་སྤྱད་པས་ཆོག །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་
པ་གསང་བ་མན་ངག་གི་རྒྱུད་ལས་མཐོང་བ་མེ་ལོང་ཆུ་ལ་ངོས་བཟུང་བའི་ལེའུ་སྟེ་གཉིས་
པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །ལག་ལེན་བཅོ་བརྒྱད་ནད་ཀྱི་དཔུང་འཇོམས་པའི། །རྐང་གྲངས་
ལག་ཏུ་བླང་ཐབས་ཇི་ལྟར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་
ཞུས་པས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས། །གསོ་ཐབས་ལག་
ལེན་རྐང་གྲངས་འདི་ལྟ་སྟེ། །ལག་ཏུ་བླང་བའི་གཉེན་པོ་སྨན་དཔྱད་གཉིས། །སྨན་ལ་ཞི་
སྦྱང་གཉིས་ཏེ་ཞི་བྱེད་ལ། །ཐང་ཕྱེ་རིལ་བུ་ལྡེ་གུ་སྨན་མར་ལྔ། །སྡེ་ཚན་ལྔ་ཞེས་སྤྱི་རུ་གྲགས་
པ་ཡིན། །འོན་ཀྱང་ཐལ་སྨན་ཁཎྜ་སྨན་ཆང་གསུམ། །སྡེ་ཚན་བརྒྱད་ཀྱིས་ཞི་བྱེད་སྦྱོར་བ་
བསྟན། །ཞི་བྱེད་ལོག་གནོན་རིན་པོ་ཆེ་དང་དགུ། །གློ་བུར་ཐུག་ཕྲད་སྔོ་སྦྱོར་སྡེ་དང་བཅུ། །དེ་
ཡང་སྡེ་ཚན་ལྔ་རུ་མ་འདུས་མེད། །སྦྱོང་བྱེད་ལས་ལྔའི་སྔོན་འགྲོ་སྣུམ་འཆོས་དང༌། །བཤལ་
25-1-537


སྐྱུག་སྣ་སྨན་འཇམ་རྩི་ནི་རུ་ཧ། །སྦྱོངས་ཀྱི་ལོག་གནོན་རྩ་ནས་སྦྱང་དང་བདུན། །དཔྱད་ལ་
གཏར་བསྲེག་དུགས་ལུམས་བྱུག་པ་ལྔ། །དེ་ཡི་ལོག་གནོན་ཐུར་མའི་དཔྱད་དང་དྲུག །སྤྱི་རུ་
སྡོམས་པས་རྒྱས་བཤད་ཉི་ཤུ་གསུམ། །མདོ་རུ་བསྡུས་པའི་ལག་ལེན་བཅོ་བརྒྱད་འདི། །ནད་
ཀྱི་དགྲ་དཔུང་འཇོམས་པའི་མཚོན་ཆ་ཡིན། །དེ་རྣམས་ལག་ཏུ་བླང་བའི་རིམ་པ་ནི། །དང་པོ་
ཞི་བྱེད་སྨན་གྱི་སྡེ་ཚན་བསྟན། །ཀྱེ་དྲང་སྲོང་ཆེན་པོ་མ་ཡེངས་གུས་པས་ཉོན། །ཐང་སྦྱོར་སྡེ་
ཚན་ཚ་སེལ་གྲང་སེལ་གཉིས། །དེ་ལ་ཚ་བ་སེལ་བའི་སྡེ་ཚན་ནི། །མི་ཐོད་རྙིང་པ་འབྲུག་རུས་
ཏིག་ཏ་གསུམ། །སུམ་གཉིས་བསྡུས་གྲངས་མགོ་ནད་སེལ་བར་བྱེད། །ལྕགས་ཕྱེ་སྐྱེར་པའི་
བར་ཤུན་འབྲས་བུ་གསུམ། །ཁུ་བ་གྲང་བཏང་མིག་ནད་སེལ་བར་བྱེད། །རུ་རྟ་ཨ་རུ་ར་ཡི་ཁུ་
བ་ཡིས། །རྣ་བའི་རྣག་ཁྲག་ཟུག་གཟེར་འཇོམས་པར་བྱེད། །སྐྱེར་པ་མཁན་སྐྱ་བསྡུས་པའི་ཁུ་
བ་ལ། །དོམ་མཁྲིས་བཏབ་བཏང་སྣ་ཁྲག་འཛག་པ་གཅོད། །ནག་མཚུར་སེང་ཕྲོམ་ཨ་རུའི་
གྲང་ཐང་གིས། །མཁུར་བཀང་ཁ་ཡི་ཁྲག་ནད་ཟུག་གཟེར་འཇོམས། །བོང་ང་ཤིང་མངར་
སྤང་རྒྱན་དཀར་བསྡུས་ཁུར། །ཅུ་གང་ཀར་སྦྱར་སྐད་འགགས་ཚ་སྐམས་སེལ། །སོ་ཕག་(མེད་
ན་རྫ་གསར་པ་)བསྡུས་ཁུར་འུ་སུ་ཀ་ར་བཏབ། །མཁུར་བཀང་ཁ་ལྕེ་གྲེ་བ་སྐམས་པ་སེལ། །ཙན་
དན་ཛཱ་ཏི་སྙིང་ཞོ་ཤ་ཡི་ཐང༌། །བསྡུས་གྲངས་སྙིང་གི་ཚ་བ་འཇོམས་པར་བྱེད། །སྲོ་ལོ་ཤིང་
མངར་རྒྱ་སྐྱེགས་ག་དུར་ཐང༌། །གློ་ཡི་ཁྲག་ཚད་གཟེར་དང་ལུད་པ་སེལ། །བྲག་ཞུན་བ་ལེ་
བ་ཤ་ཀ་བསྡུས་ཁུར། །གུར་གུམ་དོམ་མཁྲིས་བཏབ་བཏང་མཆིན་ཚད་སེལ། །ལི་ཤི་གསེར་
གྱི་མེ་ཏོག་ཨ་རུ་ར། །ཐང་གིས་མཆེར་ཚད་སྦོ་འཁྲོག་སེལ་བར་བྱེད། །ཨ་རུ་ར་དང་རྒྱ་སྐྱེགས་
ཞུ་མཁན་བཙོད། །མཁལ་ཚད་གཟེར་ཁྲིད་རྒྱུ་ལོང་སྨད་ཚད་སེལ། །ལོ་བརྒྱད་དྲི་ཆུ་རྒྱ་སྣག་
ཕོ་ཚད་སེལ། །སྙ་ལོ་བཙོད་དང་བོང་ང་དཀར་པོའི་ཐང༌། །དུག་ཉུང་(ཨིན་དྲ་བཞི་ཐང་)བོང་ང་ག་
དུར་བ་ལེ་ཀའི། །ཐང་གིས་རྒྱུ་ལོང་སྣོད་ཚད་མ་ལུས་སེལ། །དེ་ལ་ཀ་པེད་འབྲས་བཏབ་ཚད་
25-1-538


འཁྲུ་གཅོད། །གཟེ་མ་ལྕམ་པ་སྡིག་སྲིན་ཆུ་འགགས་སེལ། །བ་སྤྲུ་ར་གཉེ་གཟེ་མས་མངལ་
ཚད་སེལ། །འབྲས་གསུམ་ཐང་གིས་རིམས་འཁྲུགས་ཚ་བའི་ནད། །གསར་རྙིང་མ་ལུས་སེལ་
ཞིང་སྨིན་པར་བྱེད། །མ་ནུ་ཀཎྜ་ཀ་རི་སླེ་ཏྲེས་དང༌། །སྒ་སྐྱའི་ཐང་གིས་རིམས་ཚད་སྨིན་པར་
བྱེད། །བད་ཀན་སྐྱ་སྨུག་སྟོངས་ཚད་ཁྲག་གཟེར་སེལ། །ཏིག་ཏ་སླེ་ཏྲེས་གསེར་གྱི་མེ་ཏོག་
དང༌། །བྱི་ཚེར་ཐང་གིས་རིམས་ཚད་ལྕི་ཐིབས་སེལ། །ཏིག་ཏ་ཧོང་ལེན་སྐྱུ་རུ་བ་ཤ་ཀ །ཁྲག་
འཁྲུགས་ཚ་བ་རོལ་གསོད་དྭངས་སྙིགས་འབྱེད། །ཨ་རུ་ལྡུམ་བུ་བོང་ངའི་བསྡུས་ཁུ་ལ། །ཚ་
ལ་བཏབ་བཏང་སྦྱར་དུག་ཤ་དུག་སེལ། །མ་ནུ་རུ་རྟ་པུ་ཤེལ་བ་ཤ་ཀ །བསྡུས་གྲང་སྨུག་པོ་
རྒྱས་པའི་འཕྲལ་ཟུག་གཅོག །སེང་ལྡེང་ཨ་རུ་ར་དང་ཀྱི་ལྕེ་བ། སྐྱེར་པའི་ཐང་གིས་ཆུ་སེར་ཚ་
བ་སྐེམ། །ཏིག་ཏ་ཀྱི་ལྕེ་བོང་ངས་མཁྲིས་ཚད་འཇོམས། །འབྲས་བཀྲུས་ཁུ་བར་པུ་ཤེལ་སྦྲང་
རྩི་བཏབ། །རྩེ་གུར་བཏང་བས་སྐྱུགས་པ་གཅོད་པར་བྱེད། བིལ་བ་མོན་ཆ་ར་དང་ད་ཏྲིག་
དང༌། །སྐྱེར་པའི་མེ་ཏོག་དར་བར་བཏབ་བྱས་ཏེ། །རྩེ་གུར་བཏང་ན་འཁྲུ་བ་གཅོད་པར་བྱེད། །
སོ་མ་ར་ཛ་བོང་ང་དཀར་པོ་ཡི། །བསྡུས་ཐང་དུག་གིས་སྐྱུག་པ་གཅོད་པར་བྱེད། །གུར་གུམ་
དོམ་མཁྲིས་ཚོས་ཐང་ཁྲག་སྐྱུགས་གཅོད། །སྤྲུ་རྩ་སྐྱེར་པ་མཁན་སྐྱ་རམ་པ་ཚོས། །བསྡུས་
ཁུར་གུར་གུམ་དོམ་མཁྲིས་མི་མཁྲིས་དང༌། །སྤྲུ་མའི་འབྲུ་དང་སྲན་མའི་མེ་ཏོག་བཏབ། །
ཁྲག་ཤོར་མ་ལུས་ཁོང་དུ་སྦེད་པའི་མཆོག །དབང་པོ་ལག་པ་སླེ་ཏྲེས་ཏིག་ཏ་ཡི། །ཐང་གིས་
ཡན་ལག་ཀོར་ལེའི་ཚ་བ་སེལ། །སླེ་ཏྲེས་བྲག་ཞུན་ཨ་རུས་དྲེག་ནད་སེལ། །ཤིང་མངར་ཙན་
དན་གླ་རྩི་ག་དུར་བཞིའི། །ཐང་གིས་རྩ་ཡི་ཚད་པ་སེལ་བར་བྱེད། །བ་སྤྲུ་སྐྱེར་པ་སླེ་ཏྲེས་ཨ་
རུ་ར། །བསྡུས་ཁུར་གུ་གུལ་དཀར་པོ་ཞོ་གཉིས་བཏབ། །ཤ་མདངས་ཆུ་སེར་པགས་པའི་
ནད་ཀུན་སེལ། །ཏིག་ཏ་བྱི་ཚེར་ཛཱ་ཏི་སྐྱུ་རུ་རའི། །ཐང་གིས་མིག་སེར་ཕོ་བའི་ཟུག་གཟེར་
འཇོམས། །སེ་འབྲུ་གོ་སྙོད་སྦྲང་བཏབ་དང་ག་འབྱེད། །ཨ་རུའི་ཆིག་ཐང་ཕོ་བའི་མཁྲིས་པ་
25-1-539


སེལ། །སྐྱུ་རུའི་ཆིག་ཐང་ཁྲག་ངན་འབྱེད་ཅིང་སྐེམ། །བ་རུའི་ཆིག་ཐང་ཆུ་སེར་ནག་པོ་སྐེམ། །
བ་ཤ་ཀ་ཡི་ཆིག་ཐང་ཁྲག་ནད་སེལ། །འུ་སུའི་ཆིག་ཐང་སྨུག་པོ་སྐོམ་དད་སེལ། །ལྕགས་
ཁུས་མཆིན་ཚད་མིག་ནད་ཤུ་བ་སེལ། །གླ་སྒང་ག་དུར་སྲོ་ལོ་དཀར་པོ་ཡི། །ཆིག་ཐང་གློ་ཡི་
ཚད་པ་མ་ལུས་སེལ། །སེང་ལྡེང་ཆིག་ཐང་ཆུ་སེར་སྐེམ་པར་བྱེད། །སླེ་ཏྲེས་ཆིག་ཐང་རིམས་
ནད་མ་སྨིན་འབྱེད། །བཙོད་དང་སྤང་རྒྱན་ཆིག་ཐང་འབྲུམ་ནག་སེལ། །བྲག་ཞུན་ཆིག་ཐང་
དྲེག་ནད་ཆུ་འགགས་སེལ། །ཆུ་རུག་ཐང་གིས་རྒྱུས་པའི་ཚད་པ་སེལ། །སྟབ་སེང་ཆིག་ཐང་
རུས་པ་གས་པ་སྦྱོར། །ཏིག་ཏའི་ཐང་གིས་བད་ཀན་ཚད་པ་སེལ། །གྲང་སེལ་བཅའ་སྒ་རྒྱམ་
ཚྭ་(གསུམ་ཐང་ངམ་ཆ་མཉམ་གསུམ་ཐང་)ཨ་རུ་ར། །ཚན་མོས་དྲོད་ཆུང་གྲང་བ་མ་ལུས་སེལ། །པི་པི་
ལིང་བསྣན་(པ་ལ་རྒྱམ་ཚྭ་བཞི་ཐང་ངམ་ཆ་མཉམ་བཞི་ཐང་ཞེས་གང་དུ་བཤད་ནའང་འདིའོ།།)སྨན་མ་ཞུ་བ་འཇུ། །
སྒ་དང་ཤིང་ཀུན་བསྡུས་པའི་ཁུ་བ་ལ། །ཁ་རུ་ཚྭ་བཏབ་སྙིང་རླུང་སེལ་བར་བྱེད། །སྒྲོན་ཤིང་
གླ་སྒང་ཤིང་ཀུན་ཨ་རུ་ར། །རླུང་རིམས་གྲང་རླུང་ཁ་གདོང་གཡོ་བ་སེལ། །སེ་འབྲུ་པི་པི་ལིང་
དང་སྒ་བསྡུས་ཁུར། །འབྲས་ཡོས་སྦྲང་རྩི་ཁ་ཚར་བཏབ་པ་ཡིས། །འཁྲུ་དང་སྐྱུག་པ་སྦོ་སྒྲེག་
སྐྱིགས་བུ་སེལ། །ད་ལིས་སུག་སྨེལ་སྒ་ཐང་ལྕེ་མཆུ་དཀར། །སྙིང་འདར་མཆིན་རྒུད་མ་ཞུ་
ངལ་བ་སེལ། །ཁ་རུ་ཚྭ་དང་ཟི་ར་པི་པི་ལིང༌། །ཤིང་ཚ་ལ་ལ་ཕུད་དང་ཕོ་བ་རིས། །ཐང་གིས་
ཁ་ཟས་མི་འཇུ་སྐྱུག་པ་སེལ། །ཤིང་ཚ་ཁ་རུ་ཚྭ་དང་ཚ་བ་གསུམ། །འོ་མར་བཏབ་བཏང་གྲང་
སེལ་འཁྲུ་བ་གཅོད། །སུག་སྨེལ་ཟི་ར་དཀར་པོ་པི་པི་ལིང༌། །འོ་མར་བསྡུས་ཐང་གཉིད་མེད་
ཡེར་བ་འགུགས། །སྒོག་སྐྱ་སྲང་(སྨན་རྣམས་ཀྱི་སྲང་ཚད་བ་རུ་ར་འབྲིང་པོ་ལ་བཞག་གོ །)བཞི་ཆུ་བོ་བརྒྱད་
འགྱུར་དུ། །ཆུ་བསྡུས་འོ་མས་རླུང་སྐྲན་རླུང་རིམས་དང༌། །གཟུགས་འཁུམས་ལ་སོགས་རླུང་
ནད་མ་ལུས་སེལ། །ཨ་རུ་བསྡུས་ཁུར་དོང་ག་བཏབ་བྱས་ནས། །ནང་རེ་བཏང་ན་སྐྲན་མཁྲིས་
མིག་སེར་སེལ། །ཐལ་ཚ་ཡ་བཀྵ་ཐང་སྦོས་པ་སེལ། །ཁ་རུ་ཚྭ་ཡི་ཆིག་ཐང་ཕོ་ལོག་འཇོམས།  །
25-1-540

 
རྒྱམ་ཚྭའི་ཆིག་ཐང་མ་ཞུ་གསར་པ་འཇུ། །རྒྱ་ཚྭའི་ཆིག་ཐང་དྲི་ཆུ་འགགས་པ་སེལ། །རྡོ་ཐལ་
ཆིག་ཐང་ཕོ་བའི་བད་ཀན་བཤིག །སྒ་ཡི་ཆིག་ཐང་དྲོད་སྐྱེད་མ་ཞུ་འཇུ། །སྲད་དཀར་ཆིག་
ཐང་མཆེར་ནད་དམུ་རྫིངས་སེལ། །བ་སྤྲུའི་ཆིག་ཐང་སྨད་ཀྱི་གྲང་བ་སེལ། །སོག་ཚིགས་ཆིག་
ཐང་ཆང་མ་ཞུ་བ་འཇུ། །ནས་བསྡུས་ཐང་གིས་དང་ག་འགགས་པ་འབྱེད། །སྲེ་ལོང་ཐང་གིས་
ཐོར་བུའི་རླུང་སྣ་གནོན། །དེ་སོགས་ཁུ་བའི་སྡེ་ཚན་སྦྱར་བའི་ཐབས། །གྲང་ཐང་ཁུ་བ་ཐོན་
པར་སྦང་བ་གཅེས། །བསྡུས་ཐང་ཀུན་ལ་ཁུ་བ་སུམ་གཉིས་བསྡུ། །ཚ་སེལ་གྲང་བཏང་གྲང་
སེལ་ཚ་མོར་བཏང༌། །ཚ་གྲང་འདྲེས་པའི་ནད་ལ་དྲོ་འཇམ་བསྟེན། །ཟས་དང་སྤྱོད་ལམ་ནད་
དང་མཐུན་པ་གཅེས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་
མན་ངག་གི་རྒྱུད་ལས་ཐང་གི་སྡེ་ཚན་བསྟན་པའི་ལེའུ་སྟེ་གསུམ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ཕྱེ་མའི་སྦྱོར་སྡེ་ཚ་སེལ་གྲང་སེལ་གཉིས། །ཚ་སེལ་ག་བུར་རྒྱལ་པོའི་སྦྱོར་
བ་དང༌། །གུར་གུམ་བདུན་པ་བློན་པོའི་སྦྱོར་བ་དང༌། །གཙོ་བོ་བརྒྱད་པ་རྗེའུའི་སྦྱོར་བ་དང༌། 
སྣ་ཚོགས་དམངས་ཀྱི་སྡེ་ཚན་རྣམ་པ་བཞི། །ཚ་བ་སྟོབས་རྒྱས་རྒྱལ་པོ་ག་བུར་སྦྱར། །དེ་
རིགས་མང་དང་སྟག་ཟིལ་ཤེལ་དང་གསུམ། །མང་ནི་སེར་ལ་སྣ་རིང་མཉེན་ལ་ཡང༌། །ཡང་
ན་དཀར་འཇམ་ཁ་བ་བསྒོངས་པ་འདྲ། །འཇམ་ལ་བསིལ་བས་རླུང་ལྡན་ཚད་པ་སེལ། །སྟག་
ཟིལ་མདངས་སེར་སུལ་མང་ཕོ་ཅོང་འདྲ། །མང་བས་རྩུབ་བསིལ་ཚ་བ་ཀུན་ལ་རྒྱུག །ཤེལ་ནི་
དཀར་ལ་ཀྲོན་ཏེ་འཁྱག་པ་འདྲ། །ཤིན་ཏུ་བསིལ་བས་རྒྱས་ཚད་རྐྱང་པ་འཇོམས། །ག་བུར་དེ་
ལ་སྦྱར་བའི་ཐབས་དྲུག་སྟེ། །མི་རྒོད་ལྟ་བུར་ཆིག་པུར་རྐྱང་རྒྱུགས་དང༌། །དཔའ་བོ་ལྟ་བུར་
མཚོན་ཆ་བསྐུར་བ་དང༌། །བཙུན་མོ་ལྟ་བུར་འཇམ་སྡེབས་བཙལ་བ་དང༌། །སྐྱེལ་མ་ལྟ་བུར་
དགྲ་ཟུན་སྦྲག་པ་དང༌། །དམག་དཔོན་ལྟ་བུར་འཁོར་གྱིས་བསྐོར་བ་དང༌། །རྒྱལ་བུ་ལྟ་བུར་
25-1-541


ཚོགས་སུ་འདོན་པའོ། །དང་པོ་ག་བུར་(ག་བུར་འདྲ་བའི་རྒྱལ་པོ་ལ། །ཅུ་གང་བློན་གྱི་མ་སྒྱུར་ན། །ནུས་པ་རྩུབ་
པས་ཚ་བར་ལྡོག །ཅེས་བཀའ་འཕྲེང་ནས་གསུངས་སོ།།)ཅུ་གང་ཆུར་སྦྱངས་པས། །རྒྱས་ཚད་སྟོབས་ཆེན་
ཐོག་བབས་གསོད་པའི་མཆོག །གཉིས་པ་དེ་ལ་མཚོན་ཆ་བསྐུར་བ་ནི། །འཁྲུགས་ལ་ཙན་
དན་རིམས་ལ་བོང་ང་དཀར། །ཁ་བསྒྱུར་ཀ་ར་སྦྱར་ལ་གངས་ཆུས་དབུལ། །ག་བུར་རྒྱལ་
བློན་གསུམ་པ་ཞེས་བྱ་སྟེ། །འཁྲུགས་རིམས་ཚ་བ་རྒྱས་པ་རོལ་དུ་གསོད། །གསུམ་པ་ག་བུར་
རྒྱལ་བློན་གསུམ་པ་ལ། །གུར་གུམ་གི་ཝཾ་བསྣན་པས་ལྔ་པ་དང༌། །གླ་རྩི་དོམ་མཁྲིས་བསྣན་
པའི་བདུན་པ་ནི། །འཇམ་པས་རླུང་མི་འཁྲུག་ཅིང་ཚ་བ་འཇོམས། །བཞི་པ་ག་བུར་ཆང་དང་
སྦྱར་བ་ནི། །རི་ཐང་མཚམས་སུ་རླུང་ཚད་དུས་གཅིག་འཇོམས། །ལྔ་པ་བདུན་དགུ་བཅུ་བཞི་
སྦྱར་བ་ནི། །བདུན་པ་ག་བུར་ཙན་དན་དཀར་པོ་དང༌། །གི་ཝཾ་ཅུ་གང་གུར་གུམ་ཧོང་ལེན་
དང༌། །ཏིག་ཏ་ཀ་ར་དཀར་པོ་བཞི་འགྱུར་སྦྱར། །སྟོད་གཟེར་འཁྲུགས་ཚད་རྒྱས་པ་སེལ་བར་
བྱེད། །དགུ་པ་ག་བུར་ཙན་དན་ཅུ་གང་དང༌། །གུར་གུམ་དོམ་མཁྲིས་ཏིག་ཏ་ལི་ག་དུར། །ཧོང་
ལེན་རྒྱ་སྐྱེགས་ཀ་རས་འགྲམས་འཁྲུགས་ནད། །སྟོད་གཟེར་ལུད་པ་དམར་སེར་དུད་ཁུ་
འཇོམས། །བཅུ་(རིན་ཆེན་ཞགས་པའི་སྦྱོར་བ་ཞེས་བཤད་པ་ཀུན་འདིའོ།།)བཞི་པ་ནི་ག་བུར་བཟང་པོ་(ཅུ་གང་
གུར་གུམ་ཛཱ་ཏི་ལི་ཤི་སུག་སྨེལ་ཀ་ཀོ་ལ་)དྲུག །ཙན་དན་བསེ་རུ་ཨུཏྤལ་ཨ་ཀ་རུ། །གླ་རྩི་ག་དུར་ཏིག་ཏ་
ཀ་ར་སྦྱར། །རིམས་རྒྱས་ལུས་ལྕི་དྲན་ཉམས་འབོག་ལྐུགས་སེལ། །དྲུག་པ་ག་བུར་ཉི་ཤུ་རྩ་
ལྔ་སྦྱར། །ག་བུར་བཟང་པོ་དྲུག་དང་ཨ་ཀ་རུ། །ཙན་དན་དཀར་དམར་ཨུཏྤལ་གེ་སར་གཉིས། །
རུ་རྟ་ཟི་ར་དཀར་པོ་བ་ལེ་ཀ །ཤིང་ཚ་ཆུ་སྲིན་སྡེར་མོ་པུ་ཤེལ་ཙེ། །སྤང་སྤོས་རྡོ་དྲེག་དམར་
པོ་འབུ་སུ་ཧང༌། །ཚ་གྲང་(ཚ་ན་འབྲས་བུ་གསུམ་སྟེ་ཨ་བར་སྐྱུར་གསུམ། གྲང་ན་ཚ་བ་གསུམ་སྟེ་སྒ་པི་ཕོ་གསུམ་མོ།།)
འབྲས་བུ་གསུམ་དང་ཚ་བ་གསུམ། །ཁ་བསྒྱུར་ཀ་ར་དཀར་པོ་དྲུག་འགྱུར་སྦྱར། །དོན་སྣོད་ཤ་
པགས་རྩ་རུས་ཚད་པ་དང༌། །འགྲམས་འཁྲུགས་རིམས་དུག་ཚད་པ་གསར་རྙིང་དང༌། །དྲེག་
25-1-542


གྲུམ་མེ་དབལ་བྱང་ཁོག་ཐིགས་ཟགས་རྣག །ལུས་ལ་གནས་པའི་ཚད་པ་མ་ལུས་འཇོམས། །
ཁྱད་པར་ཚད་རྙིང་བྱེར་བ་གཏིང་ནས་འདོན། །བློན་པོ་གུར་གུམ་བདུན་པའི་སྦྱོར་བ་ནི། །
གུར་གུམ་ཅུ་གང་གི་ཝཾ་(དང་གསུམ་པོ་གཞིར་བཞག་ལ་)གཙོ་བོ་ལ། །ཛཱ་ཏི་ཨ་ཀ་རུ་དང་སྙིང་ཞོ་ཤ། །
རུ་རྟ་སྡེབས་པས་སྙིང་གི་ཚད་པ་སེལ། །ཤིང་མངར་རུ་རྟ་རྒུན་འབྲུམ་ཨ་ཀྲོང་བཞི། །སྡེབས་
པས་གློ་བའི་ཚད་པ་སེལ་བར་བྱེད། །ཨུཏྤལ་བ་ཤ་ཀ་དང་པྲི་ཡང་ཀུ། །བྲག་ཞུན་སྡེབས་པས་
མཆིན་པའི་ཚད་པ་སེལ། །གསེར་གྱི་མེ་ཏོག་ལི་ཤི་ཨ་རུ་ར། །པི་པི་ལིང་སྡེབས་མཆེར་པའི་
ཚད་པ་སེལ། །སུག་སྨེལ་བྲག་ཞུན་ཤུག་པ་ཚེར་མ་ཅན། །ཨ་རུ་ར་སྡེབས་མཁལ་མའི་ཚད་པ་
སེལ། །དོམ་མཁྲིས་བྲག་ཞུན་བོང་ང་དཀར་པོ་དང༌། །པྲི་ཡང་ཀུ་སྡེབས་ཕོ་བའི་ཚད་པ་སེལ། །
ཨིནྡྲ་བཞི་སྡེབས་རྒྱུ་ལོང་སྣོད་ཚད་སེལ། །ཤིང་མངར་ལི་ག་དུར་དང་རེ་སྐོན་པ། །དོམ་
མཁྲིས་སྡེབས་པས་རྩ་ཡི་ཚད་པ་སེལ། །སྤྱི་ཞུར་འདམ་བུ་སྦལ་རྒྱབ་གངས་ཐིགས་བཞི། །
སྡེབས་པས་རུས་པའི་ཚད་པ་སེལ་བར་བྱེད། །སླེ་ཏྲེས་ཛཱ་ཏི་སྒོག་སྐྱའི་ཐལ་བ་དང༌། །གུ་
གུལ་སྡེབས་པས་རླུང་གི་ཚད་པ་སེལ། །ཏིག་ཏ་གསེར་གྱི་མེ་ཏོག་དུག་མོ་ཉུང༌། །བོང་ང་
དཀར་པོས་མཁྲིས་པའི་ཚད་པ་སེལ། །སེ་ཡབ་སེ་འབྲུ་མ་ནུ་འུ་སུ་དང་། །སྟར་བུ་སྡེབས་པས་
བད་ཀན་ཚ་བ་སེལ། །ཧོང་ལེན་བ་ཤ་ཀ་དང་རེ་སྐོན་པ། །སྤང་རྩི་དོ་བོ་སྡེབས་པས་ཁྲག་ཚད་
སེལ། །དེ་བ་གསེར་གྱི་མེ་ཏོག་ལི་ག་དུར། །པར་པ་ཏ་སྡེབས་རིམས་ཀྱི་ཚད་པ་སེལ། །ཀུན་
ལ་ཀ་ར་དཀར་པོ་བཞི་འགྱུར་སྦྱར། །གུར་གུམ་བདུན་པས་ཚ་བའི་ནད་ཀུན་སེལ། །ཙན་དན་
བསྣན་པས་ཙན་དན་བརྒྱད་སྦྱོར་ཏེ། །དེ་སྟེང་ག་བུར་བསྣན་པས་ག་བུར་དགུ། །ཚ་བ་ཐ་མ་
འབྲིང་རབ་སེལ་བར་ངེས། །རྗེའུ་གཙོ་བོ་བརྒྱད་པའི་སྦྱོར་བ་ནི། །བསིལ་གྱི་གཙོ་བོ་གི་ཝཾ་
ཙན་དན་དཀར། །རྩི་ཡི་གཙོ་བོ་ཅུ་གང་གུར་གུམ་གཉིས། །ཐང་གི་གཙོ་བོ་ཏིག་ཏ་བ་ཤ་ཀ། 
སྔོ་ཡི་གཙོ་བོ་ཧོང་ལེན་བོང་ང་དཀར། །ཀ་ར་དཀར་པོ་བཞི་འགྱུར་རྟ་ལ་བསྐྱོན། །དོན་སྣོད་
25-1-543


གློ་མཆིན་ཁྲག་མཁྲིས་འཁྲུགས་རིམས་ཀྱི། །ཚད་པ་གསར་རྙིང་མ་ལུས་འཇོམས་པར་ངེས། །
ཚ་སྟོབས་ཆེ་ན་དེ་སྟེང་ག་བུར་བསྣན། །གློ་མང་སོར་ན་ཤིང་མངར་ཨ་ཀྲོང་བསྣན། །གློ་
འགོགས་དཀའ་ན་སྟར་བུ་རུ་རྟ་བསྣན། །ལུད་པ་དམར་ན་མཚལ་དང་དོམ་མཁྲིས་བསྣན། །
སེར་ན་དོམ་མཁྲིས་གསེར་གྱི་མེ་ཏོག་བསྣན། །དུད་ཁུ་ལི་ག་དུར་དང་གླ་རྩི་བསྣན། །སྐྱ་
གསོབ་ཛཱ་ཏི་སྒོག་སྐྱ་ཨ་ཀར་བསྣན། །གཉན་གཟེར་གླ་རྩི་གུ་གུལ་ནག་པོ་བསྣན། །རིམས་
རྒྱས་མིག་ཆུ་སེར་ལ་ཟ་ཟི་མང༌། །དེ་བ་(ལྔ་སྦྱོར་ཞེས་པའང་ཁ་སྒྱུར་ཚུལ་དུ་བསྟན་པ་འདིའོ།།)གསེར་གྱི་མེ་
ཏོག་པར་པ་ཏ། །ག་དུར་ཨ་རུ་བསྣན་པས་འཇོམས་པ་ཡིན། །སྣ་ཚོགས་ཁ་འཐོར་དམངས་
ཀྱི་སྦྱོར་བ་ནི། །ཨ་ཀ་རུ་དང་ཛཱ་ཏི་སྙིང་ཞོ་ཤ། །ཅུ་གང་སྤོས་དཀར་རུ་རྟ་ཨ་རུ་ར། །ནཱ་ག་གེ་
སར་ཀ་ར་སུམ་འགྱུར་སྦྱར། །ཨ་ཀར་བརྒྱད་པས་སྙིང་ལ་མཚོན་ཕོག་དང༌། །འགྲམས་
འཁྲུགས་སྨྱོ་ལྐུགས་ནུ་མཆིན་གཟེར་བ་འཇོམས། །ཙན་དན་དཀར་པོ་བསིལ་(ཅུ་གང་གུར་གུམ་
གཉིས་ཀྱི་སྟེང་སྟོད་ལ་ལི་ཤི་སྨད་ལ་སུག་སྨེལ་སྡེབས་པའི་བསིལ་གསུམ་དང་གཉིས་ཀ་བསྣན་པས་བསིལ་བཞི་རྒྱུད་ཀྱི་སྨན་
སྦྱོར་ཀུན་ལ་ཤེས་པར་བྱའོ།།)གསུམ་ལི་ག་དུར། །སྲོ་ལོ་རྒུན་འབྲུམ་ཤིང་མངར་ཙན་དན་བརྒྱད། །ཀ་
ར་སྦྱར་བས་གློ་ཚད་རྣག་ཁྲག་སེལ། །སྟར་བུ་རུ་རྟས་འགོགས་དཀའི་རྣག་རྣམས་འདྲེན། །གི་
ཝཾ་གུར་གུམ་ཨུཏྤལ་བ་ལེ་ཀ །ཏིག་ཏ་བྲག་ཞུན་རུ་རྟ་བ་ཤ་ཀ །གསེར་གྱི་མེ་ཏོག་ཀ་ར་གི་ཝཾ་
དགུ། །མཆིན་པ་གནད་འགྲམས་མཆིན་ཁྲག་རྒྱས་པ་དང༌། །མཆིན་ཚད་བད་ཀན་སྨུག་པོ་
རྒྱས་པ་སེལ། །ཨ་རུ་ར་དང་ལི་ཤི་གསེར་མེ་ཏོག །སྤང་སྤོས་ནཱ་ག་གེ་སར་པི་པི་ལིང༌། །ཀ་
ཀོལ་ཀ་ར་སྦྱར་བའི་ཨ་རུ་བདུན། །མཆེར་པ་གནད་འགྲམས་ཚ་རྒྱས་སྦོས་གཟེར་འཇོམས། །
ཨ་རུ་ར་དང་གུར་གུམ་སུག་སྨེལ་དང༌། །བྲག་ཞུན་ཏིག་ཏ་མཁལ་མ་ཞོ་ཤ་དང༌། །སེང་(ཞུ་
མཁན་)ཕྲོམ་བཙོད་དང་རྒྱ་(ཚོས་)སྐྱེགས་ཤུག་ཚེར་ཅན། །ཀ་ར་སྦྱར་བའི་ཨ་རུ་བཅུ་པ་སྟེ། །
མཁལ་མ་གནད་འགྲམས་ཆུ་སྲི་རྐེད་པ་འཁོར། །བཤལ་འཕྲེས་མཁལ་ཚད་མ་ལུས་སེལ་
25-1-544


བར་བྱེད། །བྲག་ཞུན་གླ་རྩི་གུར་གུམ་སུག་སྨེལ་དང༌། །དོམ་མཁྲིས་བོང་ང་འཇིབ་(པྲི་ཡང་ཀུ་)
རྩི་ཨ་རུ་ར། །ག་དུར་ཀ་ར་ཆ་མཉམ་བྲག་ཞུན་དགུ། །ཕོ་བའི་ཁྲག་མཁྲིས་ཚད་པ་སེལ་བར་
བྱེད། །དོམ་མཁྲིས་གསེར་གྱི་མེ་ཏོག་དུག་མོ་ཉུང༌། །གླ་སྒང་བོང་ང་དཀར་པོ་བ་ལེ་ཀ །རེ་
སྐོན་ཀ་ར་སྦྱར་བའི་མཁྲིས་ཕྱེ་བདུན། །རྒྱུ་ལོང་གནད་འགྲམས་ཁྲག་མཁྲིས་ཚ་འཁྲུ་གཅོད། །
ཅོང་ཞི་སེ་འབྲུ་སུག་སྨེལ་པི་པི་ལིང༌། །མ་ནུ་གུར་གུམ་ཀ་ར་ཅོང་ཞི་དྲུག །བད་ཀན་བྲང་ཚ་
ཆུ་ཚན་སྐྱུག་པ་འཇོམས། །ཅོང་ཞི་འོ་མར་འདམ་བཏགས་གྲིབ་སྐམ་བྱ། །གི་ཝཾ་བཟང་དྲུག་
ཨུཏྤལ་ཙན་དན་(དཀར་དམར་)གཉིས། །གླ་རྩི་གསེར་གྱི་མེ་ཏོག་དུག་མོ་ཉུང༌། །ཏིག་ཏ་བོང་ང་
ཨ་རུ་བ་ཤ་ཀ །རུ་རྟ་པི་པི་ལིང་དང་ཀ་ར་སྦྱར། །ཅོང་ཞི་བསིལ་སྦྱོར་དུག་དང་སྨུག་པོ་དང༌། །
གབ་ཚད་ཚད་རྙིང་མ་ལུས་སེལ་བར་བྱེད། །ཅོང་ཞི་སེ་འབྲུ་བཞི་དང་ཨ་རུ་ར། །ཛཱ་ཏི་མ་ནུ་འུ་
སུ་སྐྱུ་རུ་ར། །རྒྱམ་ཚྭ་སྒ་དང་བུར་དཀར་སྦྱར་བ་ཡི། །ཅོང་ཞིའི་ཅུར་ནིས་སྨུག་པོ་འཐབ་པ་
དང༌། །མ་ཞུ་བད་ཀན་དང་ག་མི་བདེ་སེལ། །རུ་རྟ་སྐྱུ་རུ་སེ་འབྲུ་བ་ཤ་ཀ །སུག་སྨེལ་པི་པི་
ལིང་དང་ཀ་ར་སྦྱར། །རུ་རྟ་དྲུག་པས་སྨུག་པོ་འཐབ་པའི་ནད། །གླང་ཐབས་སྒྲེག་སྐྱུག་ཕོ་ཁར་
ཟུག་པ་སེལ། །ཏིག་ཏ་གསེར་གྱི་མེ་ཏོག་བོང་ང་དཀར། །རུ་རྟ་རྩ་མཁྲིས་ཧོང་ལེན་པར་པ་ཏ། །
སྐྱེར་ཤུན་ཀ་ར་སྦྱར་བའི་ཏིག་ཏ་བརྒྱད། །མཁྲིས་ཚད་མིག་ཆུ་ཤ་མདངས་སེར་བ་འཇོམས། །
སྤོས་དཀར་ཐལ་ཀ་རྡོ་རྗེ་སོ་མ་ར། །རུ་རྟ་བ་ཤ་ཀ་དང་འབྲས་བུ་གསུམ། །སླེ་ཏྲེས་བྲག་ཞུན་
ཀ་ར་གུ་གུལ་བཅུ། །དྲེག་གྲུམ་ཆུ་སེར་ཀོ་ལེར་ཚ་འཁྱུག་འཇོམས། །གུར་གུམ་ལི་ཤི་གི་ཝཾ་
བསེ་རུ་མཚལ། །ཙན་དན་གླ་རྩི་འཇམ་འབྲས་བོང་ང་དཀར། །རུ་རྟ་འབྲས་བུ་གསུམ་དང་ཀ་
ར་སྦྱར། །གུར་གུམ་བཅུ་གསུམ་མཆིན་རྒུད་སྦྱར་དུག་དང༌། །མཁལ་མ་གནད་འགྲམས་ཆུ་སྲི་
ཚ་སྦོས་དང༌། །ཡ་མ་ནག་པོའི་སྲིན་ནད་སེལ་བར་བྱེད། །གུར་གུམ་ཅུ་གང་ཨུཏྤལ་བ་ལེ་ཀ། 
ཏིག་ཏ་ཨ་རུ་མཚེ་ལྡུམ་ཀ་ར་སྦྱར། །གུར་གུམ་མཆོག་བདུན་མཆིན་ནད་གསར་རྙིང་དང༌།  །
25-1-545

 
མཆིན་པ་གནད་འགྲམས་ཁྲག་རྒྱས་མིག་སེར་སེལ། །བསིལ་གསུམ་ཏིག་ཏ་བ་ལེ་བ་ཤ་ཀ། 
པདྨ་ནཱ་ག་གེ་སར་པི་པི་ལིང༌། །སྟར་བུ་ཧོང་ལེན་ཟི་ར་པུ་ཤེལ་ཙེ། །ཀ་ར་སྦྱར་བས་ཅུ་གང་
བཅུ་གསུམ་སྟེ། །གློ་ཚད་ལུད་པ་རྣག་ཁྲག་ལུ་བ་འཇོམས། །བསིལ་གསུམ་བྲག་ཞུན་ཏིག་ཏ་
པི་པི་ལིང༌། །ཨ་རུ་མཚལ་དང་ཀ་ར་ཅུ་གང་བརྒྱད། །མཆིན་ཁྲག་རྒྱས་དང་སྨུག་པོའི་ཚ་བ་
སེལ། །བསིལ་གསུམ་ཨུཏྤལ་སེ་འབྲུ་པི་པི་ལིང༌། །ཤིང་ཚ་ཀ་ར་བཞི་འགྱུར་ཅུ་གང་(བདེ་བྱེད་
ཆུང་བ་)བདུན། །ཚ་གྲང་ཆ་སྙོམས་དང་ག་འབྱེད་པར་བྱེད། །(དེ་ལ་)རྒུན་འབྲུམ་ཤིང་མངར་
(བསྣན་པ་བདེ་བྱེད་འབྲིང་པོ་)གློ་ནད་རྙིང་པ་སེལ། །(འབྲིང་པོའི་སྟེང་)ཙན་དན་གི་ཝཾ་(བསྣན་པ་བདེ་བྱེད་ཆེན་པོ་
)ཚ་བ་གབ་རྙིང་སེལ། །ཅུ་གང་བདེ་བྱེད་ཆུང་འབྲིང་ཆེན་པོར་བཤད། །ཅུ་གང་གུར་གུམ་གི་
ཝཾ་ཀ་ར་སྦྱར། །བློན་པོ་གསུམ་སྦྱོར་བྱིས་པའི་ཚད་ནད་སེལ། །བསིལ་གསུམ་ཙན་དན་ཀ་ར་
གསུམ་འགྱུར་སྦྱར། །ལི་ཤི་བཞི་པས་གྲེ་བའི་ཚད་པ་འཇོམས། །ལི་ཤི་ཅུ་གང་ཤིང་མངར་
སྤང་རྒྱན་དཀར། །རུ་རྟ་ཨ་རུ་ར་དང་ཀ་ར་སྦྱར། །ལི་ཤི་དྲུག་པ་ལོ་བརྒྱད་དྲི་ཆུས་དབུལ། །གློ་
ནད་གྲེ་བ་ཚ་སྐམས་སྐད་འགགས་སེལ། །ཆུ་སྲིན་སྡེར་མོ་བསིལ་གསུམ་བ་ལེ་ཀ །ཨུཏྤལ་རྡོ་
དྲེག་ག་དུར་པི་པི་ལིང༌། །ཀ་ར་སྦྱར་བའི་ཆུ་སྲིན་སྡེར་མོ་དགུ། །སྣོད་དུ་ཚ་གྲང་འཐབས་དང་
སྨུག་སེར་འཇོམས། །ཙན་དན་དཀར་དམར་ཧོང་ལེན་བ་ལེ་ཀ །པདྨ་གེ་སར་ནཱ་ག་པུཥྤེ་དང༌། །
བཅའ་སྒ་སྤང་སྤོས་དུག་ཉུང་གསེར་མེ་ཏོག །བིལ་བ་པར་ཏ་ཛཱ་ཏི་འབྲས་བུ་གསུམ། །སུག་
སྨེལ་ཀ་རས་བུད་མེད་རིམས་བཏབ་དང༌། །བཙས་རྗེས་ཚད་པ་སྐྱེས་པ་སེལ་བར་བྱེད། །ག་
བུར་བསིལ་གསུམ་ཛཱ་ཏི་ཙན་དན་དཀར། །གི་ཝཾ་ག་དུར་སེ་འབྲུ་སྲ་འབྲས་མཚལ། །ཤུ་མོ་ཟ་
དང་ཀ་ར་བཞི་འགྱུར་སྦྱར། །ཀྲི་ཀ་ཧན་ཞེས་བྱིས་པའི་རིམས་ཚད་སེལ། །ཨུཏྤལ་ཅུ་གང་གུར་
གུམ་བ་ལེ་ཀ །སྟར་བུ་ཤིང་མངར་རྒུན་འབྲུམ་སྐྱུ་རུ་ར། །ཀ་ར་སྦྱར་བའི་ཨུཏྤལ་བརྒྱད་པ་སྟེ། །
མཆིན་ཁྲག་ཕོ་བར་རྒྱས་པ་སེལ་བར་བྱེད། །བ་ལེ་ཀ་དང་ཨུཏྤལ་བ་ཤ་ཀ །ཤིང་མངར་ཅུ་
25-1-546


གང་ཨ་རུ་ཀ་ར་སྦྱར། །ཚད་པ་ཀུན་སེལ་ཕོ་མཆིན་ཚ་བ་འཇོམས། །རྒུན་འབྲུམ་ཅུ་གང་གུར་
གུམ་ཤིང་མངར་དང༌། །གླ་སྒང་ཤིང་ཚ་སེ་འབྲུ་ཀ་ར་སྦྱར། །གློ་ཡི་ནད་དང་དབུགས་མི་བདེ་
བ་སེལ། །ཀྱི་ལྕེ་དཀར་པོ་སྤང་རྩི་དོ་བོ་དང༌། །སྤང་རྒྱན་དཀར་པོའི་ཕྱེ་མས་(མེ་ཏོག་གསུམ་པ་ཅེས་)
ལྷོག་པ་འཇོམས། །གྲང་བ་སེལ་བ་ཕྱེ་མའི་སྡེ་ཚན་ལ། །རྒྱལ་པོ་སེ་འབྲུ་བློན་པོ་ད་ལིས་དང༌། །
རྒོད་མ་ཁ་ཕྱེ་རྗེའུའི་སྦྱོར་བ་དང༌། །སྣ་ཚོགས་ཁ་འཐོར་དམངས་ཀྱི་སྦྱོར་བ་བཞི། །དང་པོ་
རྒྱལ་པོ་སེ་འབྲུའི་སྦྱོར་བ་ནི། །སེ་འབྲུ་ཤིང་ཚ་ཕོ་བ་རིས་དང་གསུམ། །ཁ་ཟས་མི་འཇུ་སྐད་
འགགས་དབུགས་མི་བདེ། །ཁྱད་པར་མཆིན་པ་ན་བ་རྣམས་ལ་ཕན། །དེ་སྟེང་ཁ་རུ་ཚྭ་བསྣན་
སེ་འབྲུ་བཞི། །སྦོ་འཁྲོག་སྐྲན་དང་མ་ཞུ་སྐྱུག་པ་སེལ། །སེ་འབྲུ་ཤིང་ཚ་སུག་སྨེལ་པི་པི་ལིང༌། །
བུར་དཀར་སྦྱར་བའི་སེ་འབྲུ་བཞི་པ་སྟེ། །ཕོ་བའི་གཞི་འཛིན་མེ་དྲོད་གསོ་བར་བྱེད། །ནད་
གཞི་ཅི་ལས་གྱུར་ཀྱང་དང་ག་འབྱེད། །དེ་སྟེང་དོང་གྲ་བསྣན་ཏེ་ཚད་ལྡན་སྦྱར། །སེ་འབྲུ་ལྔ་
པ་བད་ཀན་ཟས་མི་འཇུ། །ཕོ་བའི་གྲང་སྐྲན་སྐྱུག་དང་ཡི་ག་འཆུས། །སྙིང་རླུང་མཁལ་རྐེད་
ནད་ལ་མཆོག་ཏུ་ཕན། །ཡང་ན་གུར་གུམ་བསྣན་པའི་སེ་འབྲུ་ལྔ། །ཚ་གྲང་འཐབ་པའི་ཁ་
འཛིན་མེ་དྲོད་གསོ༌། །སེ་འབྲུ་ཤིང་ཀུན་སྒ་དང་ཁ་རུ་ཚྭ། །སྟར་བུ་ལྔ་ཡིས་མ་ཞུ་མཆིན་རྒུད་
སེལ། །ཚད་ལྡན་སྦྱོར་བས་སྙིང་གི་བད་རླུང་འཇོམས། །སེ་འབྲུ་ཁ་རུ་ཚྭ་དང་ཚ་བ་གསུམ། །
རྒྱམ་ཚྭ་དྲུག་གིས་ཕོ་བའི་མེ་དྲོད་སྐྱེད། །ཁ་ཟས་མ་ཞུ་འཇུ་ཞིང་བེ་སྣབས་སྦྱོང༌། །སེ་འབྲུ་
ཤིང་ཚ་སུག་སྨེལ་པི་པི་ལིང༌། །དེ་ཉིད་གཞིར་བཞག་བརྒྱད་པའི་ཁ་བསྒྱུར་བ། །སྒ་དང་ཛཱ་ཏི་
གུར་གུམ་ཀ་ཀོ་ལ། །ཚད་ལྡན་སྦྱར་བའི་སེ་འབྲུ་བརྒྱད་པ་འདིས། །ཕོ་མཆིན་སྟོད་ཀྱི་བད་
རླུང་སྙིང་སྐྲན་འཇོམས། །རྒྱམ་ཚྭ་ཁ་རུ་ཚྭ་དང་ཕོ་བ་རིས། །བཅའ་སྒ་སྡེབས་པས་མ་ཞུ་གསར་
རྙིང་འཇུ། །བཅའ་སྒ་བྱི་ཏང་ག་དང་ཙི་ཏྲ་ཀ །འཇམ་འབྲས་སྡེབས་པས་ཕོ་བའི་མེ་ཉམས་
གསོ། །མ་ནུ་འུ་སུ་སྟར་བུ་སེ་ཡབ་སྡེབས། །སེ་འབྲུ་བརྒྱད་འདིས་བད་ཀན་སྨུག་པོ་སེལ།  །
25-1-547

 
རྒྱམ་ཚྭ་གསེར་གྱི་མེ་ཏོག་ཨ་རུ་ར། །དོམ་མཁྲིས་སྡེབས་པས་མ་ཞུ་མིག་སེར་སེལ། །ཅོང་ཞི་
རྒོད་བཏུལ་རྒྱམ་ཚྭ་ཨ་རུ་ར། །བྱ་ཐལ་སྡེབས་པས་ལྷེན་སྐྲན་ཐལ་བར་རློག །འགྲོན་བུ་དུར་
ཐོད་ཤ་རུའི་ཐལ་བ་དང༌། །ཙི་ཏྲ་ཀ་སྡེབས་དམུ་རྫིངས་སྐེམ་པར་བྱེད། །ཤིང་ཀུན་ཁ་རུ་ཚྭ་
དང་ཕོ་བ་རིས༌། བཅའ་སྒ་སྡེབས་པས་ཕོ་ལོང་སྦོས་པ་སེལ། །ཤིང་མངར་ཅུ་གང་རྒུན་འབྲུམ་
ཟི་ར་དཀར། སྡེབས་པས་གློ་ནད་གྲང་བ་སེལ་བར་བྱེད། །ཛཱ་ཏི་ཤིང་ཀུན་ཁ་རུ་ཚྭ་དང་སྒ། །
སྡེབས་པས་སྙིང་གི་བད་རླུང་གྲང་བ་སེལ། །ཨ་འབྲས་སྲ་འབྲས་འཇམ་འབྲས་སྡིག་སྲིན་
སྡེབས། །སེ་འབྲུ་བརྒྱད་པས་མཁལ་རྐེད་གྲང་བ་སེལ། །རྒྱ་ཚྭ་ལྕམ་པ་སྡིག་པ་ཕོ་བ་རིས། །
སྡེབས་པས་གྲང་བ་ཆུ་འགགས་སེལ་བར་བྱེད། །ཤིང་ཀུན་གླ་རྩི་ཐང་ཕྲོམ་བྱི་ཏང་ག །
སྡེབས་པའི་སེ་འབྲུ་བརྒྱད་པས་གྲང་སྲིན་སེལ། །ད་ཏྲིག་ཀ་པེད་ཐ་རམས་མོན་ཆ་ར། །
སྡེབས་པས་འུར་འཁྲོག་ཙམ་པ་འཁྲུ་བ་གཅོད། །ཤུ་དག་འུ་སུ་དབྱི་མོང་ཙི་ཏྲ་ཀ །རྒྱ་ཚྭ་ཡ་
བཀྵ་ར་ཁ་རུ་ཚྭ། །སེ་འབྲུའི་ཅུར་ནིས་མ་ཞུ་ལྕགས་དྲེག་ལྷེན། །མེ་ཉམས་སྦོ་སྒྲེག་དམུ་སྐྲན་
འཁྲུ་སྐྱུག་དང༌། །མཁལ་རྐེད་ཆུ་སྲི་གྲང་ནད་སྟོང་ལ་ཕན། །སེ་འབྲུ་ཚ་བ་གསུམ་པོ་གཞིར་
བཞག་སྟེ། །ད་ཏྲིག་ཤིང་ཀུན་དབྱི་མོང་ཁ་རུ་ཚྭ། །སེ་འབྲུ་བརྒྱད་སྡེབས་གྲང་ནད་མ་ལུས་
སེལ། །རྒྱམ་ཚྭ་ལྕེ་མྱང་ཚྭ་དང་ཁ་རུ་ཚྭ། །ཐལ་ཚྭ་སྡེབས་པས་ཕོ་བ་སྦོས་པ་སེལ། །འུ་སུ་མ་ནུ་
སེ་ཡབ་སླེ་ཏྲེས་བཞི། །སེ་འབྲུ་བརྒྱད་སྡེབས་སྨུག་པོ་གབ་པ་སེལ། །རྒྱ་ཚྭ་སུག་སྨེལ་སྡིག་པ་
ལྕམ་པ་བཞི། །སྡེབས་པས་མཁལ་ནད་གྲང་བ་ཆུ་འགགས་སེལ། །ཤིང་ཚ་སུག་སྨེལ་ཟི་ར་
དཀར་ནག་སྡེབས། །སེ་འབྲུ་བརྒྱད་འདིས་བད་རླུང་གློ་ནད་སེལ། །ཤིང་ཚ་བཟང་པོ་(ཛཱ་ཏི་སག་
སྨེལ་ཀ་ཀོ་ལ། དྲོད་གསུམ་བཟང་པོ་གསུམ་ཞེས་བྱ་གསུངས་པ་ལྟར་རོ།།)གསུམ་དང་ལ་ལ་ཕུད། །སྡེབས་པའི་སེ་
འབྲུ་དགུ་པས་མེ་དྲོད་སྐྱེད། །འཁྲུ་བ་གསར་རྙིང་མ་ལུས་གཅོད་པར་བྱེད། །ཟི་ར་ནག་པོ་དབྱི་
མོང་ཙི་ཏྲ་ཀ །ལ་ལ་ཕུད་དང་སུག་སྨེལ་ཁ་རུ་ཚྭ། །སྡེབས་པའི་སེ་འབྲུ་བཅུ་པས་མེ་དྲོད་
25-1-548


ཉམས། །ཁ་ཟས་མི་འཇུ་སྦོ་སྒྲེག་གྲང་སྐྲན་འཇོམས། །ཛཱ་ཏི་ཀ་ཀོ་ལ་དང་ཁ་རུ་ཚྭ། །རྒྱམ་ཚྭ་
ཤིང་ཚ་དབྱི་མོང་ཙི་ཏྲ་ཀ །ཨ་རུ་ར་དང་ལ་ཕུག་ས་བོན་སྡེབས། །སེ་འབྲུའི་ཅུར་ནིས་བད་རླུང་
མ་ཞུ་སྦོ། །ཕོ་མཁལ་བུ་བཙས་གྲང་བ་རྒྱས་པ་འཇོམས། །གྲང་ནད་མ་ལུས་སེ་འབྲུའི་ཕྱེ་མས་
སེལ། །ཕོ་བའི་བད་ཀན་སྦྱོང་ཞིང་མེ་དྲོད་སྐྱེད། །དང་ག་འབྱེད་ཅིང་ཁ་ཟས་ལེན་པར་བྱེད། །
དེ་ཕྱིར་ཕྱེ་མ་ཀུན་གྱི་རྒྱལ་པོར་བཤད། །
གཉིས་པ་ད་ལིས་བློན་པོའི་སྦྱོར་བ་ནི། །ད་ལིས་ན་ལེ་ཤམ་དང་ཤིང་ཚ་དང༌། །སུག་
སྨེལ་བཅའ་སྒ་པི་པི་ལིང་དང་དྲུག །ཚད་ལྡན་སྦྱར་བས་འཁྲུ་སྐྱུག་དབུགས་མི་བདེ། །གཞང་
འབྲུམ་སྐྲན་དང་སྐྱ་རྦབ་གློ་ནད་སེལ། །ཟི་ར་སྡེབས་པས་སྟོད་ཚ་སྨད་གྲང་འཇོམས། །ཁ་རུ་ཚྭ་
སྡེབས་གྲང་རླུང་སྤྱི་ལ་ཕན། །ཛཱ་ཏི་སྡེབས་པས་སྙིང་རླུང་འཇོམས་པར་བྱེད། །སྟར་བུ་སྡེབས་
པས་ལུད་པ་འགོགས་དཀའ་འདྲེན། །ད་ཏྲིག་སྡེབས་པས་གྲང་བས་འཁྲུ་བ་གཅོད། །ད་ལིས་
ཤིང་ཚ་སུག་སྨེལ་ཀ་ཀོ་ལ། །ཟི་ར་པི་པི་ལིང་དང་ན་ལེ་ཤམ། །འཁྲུ་སྐྱུག་མ་ཞུ་ལྕགས་དྲེག་
ལྷེན་སྐྲན་འཇོམས། །ཕོ་བའི་ཟུག་གཟེར་འཇོམས་ཤིང་ཡི་ག་འབྱེད། །ད་ལིས་ཚ་བ་གསུམ་
གྱི་གཙོ་བོ་ལ། །ཤིང་ཚ་སུག་སྨེལ་ཟི་ར་ཁ་རུ་ཚྭ། །ད་ལིས་བརྒྱད་འདིས་བད་ཀན་གྲང་བ་
སེལ། །རྒྱམ་ཚྭ་ལྕེ་མྱང་ཚྭ་དང་ཁ་རུ་ཚྭ། །ཐལ་ཚྭ་སྡེབས་པས་ཕོ་བ་སྦོས་པ་སེལ། །ཛཱ་ཏི་སུག་
སྨེལ་ཟི་ར་ནག་པོ་དང༌། །ཀ་ཀོ་ལ་སྡེབས་སྙིང་རླུང་སེལ་བར་བྱེད། །མ་ནུ་སླེ་ཏྲེས་རྒྱམ་ཚྭ་པི་
པི་ལིང༌། །སྡེབས་པས་རོ་སྟོད་རྫིངས་པ་སེལ་བར་བྱེད། །རྒྱ་ཚྭ་སྡིག་པ་ལྕམ་པ་སུག་སྨེལ་
སྡེབས། །ད་ལིས་བརྒྱད་འདིས་མཁལ་ནད་ཆུ་འགགས་སེལ། །ཤིང་ཚ་སུག་སྨེལ་ཟི་ར་ནག་
པོ་དང༌། །ལ་ལ་ཕུད་སྡེབས་འཁྲུ་བ་གཅོད་པར་བྱེད། །ཛཱ་ཏི་སུག་སྨེལ་ཀ་ཀོ་ལ་དང་ནི། །རྒྱ་
ཚྭ་ལྦ་ཚྭ་དབྱི་མོང་ཙི་ཏྲ་ཀ །སྡེབས་པ་ད་ལིས་བཅུ་པའི་ཅུར་ནིས་འདིས། །གྲང་ནད་ཀུན་སེལ་
ལྷག་པར་བད་ཀན་འཇོམས། །ཀུན་ལ་ཀ་ར་དཀར་པོའི་རྟ་དང་སྦྱར། །རྗེའུའི་སྦྱོར་བ་གནོད་
25-1-549


སྦྱིན་རྒོད་མ་ཁ། །ཀ་རཉྫ་(འཇམ་འབྲས་)དང་བཅའ་སྒ་ཙི་ཏྲ་ཀ །བྱི་ཏང་ཀ་དང་ཨ་རུ་པི་པི་ལིང༌། །
ཀར་སྦྱར་མ་ཞུ་སྦོ་སྒྲེག་འགྱིངས་པ་འཇོམས། །ཁྱད་པར་ཕོ་བའི་མེ་དྲོད་སྐྱེད་པའི་མཆོག །
དེ་ལ་རྒྱམ་ཚྭ་གསེར་གྱི་མེ་ཏོག་སྡེབས། །དྭངས་མ་མ་ཞུ་མིག་སེར་སེལ་བར་བྱེད། །སེ་འབྲུ་
སྡེབས་པས་ཁྱད་པར་དང་ག་འབྱེད། །ཁ་རུ་ཚྭ་དང་ཤིང་ཀུན་ན་ལེ་ཤམ། །སྡེབས་པས་ལྷག་
པར་ཕོ་བ་སྦོས་པ་འཇོམས། །ན་ལེ་(ཕོ་བ་རི་) ཤམ་སྡེབས་ལྷག་པར་མེ་དྲོད་སྐྱེད། །རྒྱ་ཚྭ་རྒྱམ་
ཚྭ་ཁ་རུ་ཚྭ་དང་བསྡེབས། །ཁྱད་པར་མ་ཞུ་འཇུ་བར་བྱེད་པ་ཡིན། །ཐལ་སྨན་བསྡེབས་པས་
སྐྲན་རྣམས་ཐལ་བར་རློག །སྣ་ཚོགས་ཁ་འཐོར་དམངས་ཀྱི་སྦྱོར་བ་ནི། །སུག་སྨེལ་ནཱ་ག་
པུཥྤེ་གེ་སར་དང༌། །ལ་ལ་ཕུད་དང་སྒ་བཙོད་པི་པི་ལིང༌། །ཀ་ར་སྦྱར་བའི་སུག་སྨེལ་བདུན་
པ་སྟེ། །བད་ཀན་ཕོ་བར་འགྱིངས་དང་ལུད་པ་ལུ། །དང་ག་མི་བདེ་སྐྱུག་པ་སེལ་བར་བྱེད། །
སུག་སྨེལ་སྒ་དང་རྒྱམ་ཚྭ་པི་པི་ལིང༌། །གླ་རྩི་སྡིག་སྲིན་ལྕམ་པ་འབྲས་སྣ་(ཨ་འབྲས། སྲ་འབྲས། 
འཇམ་འབྲས་གསུམ། འབྲས་སྣ་གསུམ་ཞེས་བཤད་པ་ཡིན། སྨད་ཀྱི་འབྲས་བུ་གསུམ་ཀྱང་འདི། ཅེས་སོ།།)གསུམ། །བུར་
དཀར་སྦྱར་བའི་སུག་སྨེལ་བཅུ་པ་སྟེ། །མཁལ་མའི་གྲང་བ་རྡེ་ནད་ཆུ་འགགས་སེལ། །སྒ་
དང་ཤིང་ཀུན་མ་ནུ་ཁ་རུ་ཚྭ། །བུར་དཀར་སྦྱར་བའི་སྨན་སྒ་བཞི་པ་སྟེ། །མཁལ་རྐེད་རྩིབ་
ལོགས་ཟུག་དང་དབུགས་མི་བདེ། །སྐྱིགས་བུ་ཁ་གདོང་གཡོ་བའི་ནད་རྣམས་སེལ། །རུ་རྟ་མ་
ནུ་བཅའ་སྒ་ཨ་རུ་ར། །ཀ་ར་སྦྱར་བའི་རུ་རྟ་བཞི་པ་སྟེ། །བད་རླུང་ཕོ་མཆིན་སྐྲན་དང་མཆེར་
ནད་འཇོམས། །ཤུ་དག་རུ་རྟ་བཅའ་སྒ་ཁ་རུ་ཚྭ། །ཚད་ལྡན་ཀ་ར་སྦྱར་བའི་ཤུ་དག་བཞི། །མ་
ཞུ་སྐྱིགས་བུ་དབུགས་མི་བདེ་བ་དང༌། །བད་རླུང་སྟོད་གཟེར་སྐྱ་རྦབ་གཞང་འབྲུམ་འཇོམས། །
ཤིང་ཀུན་མ་ནུ་རུ་རྟ་ཨ་རུ་ར། །དོང་གྲ་ཀ་ར་སྦྱར་བའི་ཤིང་ཀུན་ལྔ། །སྙིང་ག་མཆེར་ནད་
རྩིབ་ལོགས་གཟེར་བ་འཇོམས། །ཤིང་ཀུན་ཤུ་དག་བཅའ་སྒ་ཁ་རུ་ཚྭ། །རུ་རྟ་མ་ནུ་ཟི་ར་ཨ་
རུ་ར། །ཤིང་ཀུན་བརྒྱད་པས་དྲོད་ཆུང་ལྕགས་དྲེག་ལྷེན། །སྦོས་ཤིང་གཟེར་འཇོམས་མཆོག་
25-1-550


ཏུ་མེ་དྲོད་སྐྱེད། །ཤིང་ཀུན་ཤུ་དག་སེ་འབྲུ་ཚ་བ་(སྒ་པི་པི་ལིང་ཕོ་བ་རིལ་ཙི་ཏྲ་ཀ་སྤྱི་མོང་དཀར་)ལྔ། །ཤུ་ཏི་
སེ་ཡབ་འུ་སུ་ཡ་བཀྵ། །མ་ནུ་ཟི་ར་རྒྱམ་ཚྭ་ལ་ལ་ཕུད། །ཨ་རུ་ལྕེ་མྱང་ཚྭ་དང་ཁ་རུ་ཚྭ། །ཏི་མུ་
ས་དང་བུར་དཀར་སྲང་བརྒྱད་སྦྱར། །ཤིང་ཀུན་ཅུར་ནིས་ལྟོ་སྦོས་ཡི་ག་འཆུས། །ཁ་ཟས་མི་
འཇུ་གདོང་སྐྲངས་དབུགས་མི་བདེ། །སྟོད་རྒྱངས་ལུད་པ་མཆིན་མཆེར་རྩིབ་ལོགས་གཟེར། །
མཁལ་རྐེད་རྐང་ལག་སྐྲངས་དང་དྲི་ཆུ་སྲི། །སྐྲན་དང་སྐྱ་རྦབ་དམུ་རྫིང་སྐྱུག་པ་སེལ། །བྱི་
ཏང་ག་དང་ཤིང་ཀུན་མ་རུ་ཙེ། །བཅའ་སྒ་གླ་རྩི་ཕུར་ཐལ་པི་པི་ལིང༌། །བུར་དཀར་སྦྱར་བའི་
བྱི་ཏང་བདུན་པ་སྟེ། །ཕོ་ལོང་སྲིན་ནད་གཞང་འབྲུམ་མ་ལུས་འཇོམས། །ད་ཏྲིག་སེ་འབྲུ་ཤིང་
ཚ་པི་པི་ལིང༌། །བཅའ་སྒ་ཀ་པེད་ཐ་རམས་མོན་ཆ་ར། །ན་རམས་བུར་དཀར་སྦྱར་བའི་ད་
ཏྲིག་དགུ། །འུར་འཁྲོག་སྒྲེག་ཅིང་འཁྲུ་བ་གཅོད་པར་བྱེད། །ད་ཏྲིག་སྨག་དང་ཐ་རམས་ལོ་
ཙན་སྤོད། །བཙོད་ཁྲག་ལུག་མུར་ད་ཏྲིག་བདུན་པ་སྟེ། །ཚ་གྲང་རྟས་བསྒྱུར་འཁྲུ་བ་གཅོད་
པའི་མཆོག །ཡ་བཀྵ་ར་སེ་འབྲུ་པི་པི་ལིང༌། །ཤིང་ཀུན་བཅའ་སྒ་སྟར་བུ་རྒྱམ་ཚྭ་རྣམས། །ཀ་
ར་སྦྱར་བའི་ཡ་བཀྵ་ར་བདུན། །གཞང་གཟེར་སྦུ་བ་བེ་སྣབས་འཁྲུ་བ་གཅོད། །ཤིང་མངར་
འབྲས་དང་སེ་ཡབ་བྱི་ཏང་ཀ །གོ་སྙོད་འུ་སུ་ཚ་གྲང་རྟ་ཡིས་བསྒྱུར། །ཤིང་མངར་དྲུག་པས་
སྐྱུག་པ་གཅོད་པའི་མཆོག །བྱི་ཏང་ཀ་དང་སྒོག་སྐྱ་མ་རུ་ཙེ། །སོ་མ་ར་ཛ་དྲེས་འབྲུ་ཕུར་ཐལ་
དང༌། །གླ་རྩི་ཚ་གྲང་རྟས་བསྒྱུར་སྲིན་སྨན་མཆོག །ཁོང་སྲིན་ལྟོར་བཏང་མགོ་སྲིན་སྣ་ནས་
བདུག །གཞང་སྲིན་མས་བཏང་པགས་སྲིན་ཕྱི་ནས་བྱུག །རྒྱམ་ཚྭ་ལ་ལ་ཕུད་དང་ཨ་ཟ་(སྤྱི་མོང་
དཀར་པོ་)མོ། །པི་པི་ལིང་དང་སྒ་རྣམས་ཆ་རིམ་བསྐྱེད། །ཀུན་དང་མཉམ་པའི་ཨ་རུ་བསྲེགས་
པའི་ཐལ། །བུ་རམ་སྦྱར་བ་མངོན་སུམ་མེ་དང་འདྲ། །དེ་སོགས་ཕྱེ་མ་གང་ཡང་སྦྱར་བའི་
ཐབས། །ཚད་མེད་ཆ་མཉམ་གཙོར་སྨོས་ཐུན་ཚད་བསྐྱེད། །ཚད་བཤད་ཚད་བཞིན་སྦྱར་བ་
གཅེས་པ་ཡིན། །རྭ་རྣམས་གང་གཏོང་ཐལ་ཚན་རྩི་ཧྲོག་བསྲེག །རྭ་དང་ཤིང་སོགས་གང་སྲ་
25-1-551


སྣ་ལ་བརྡུང༌། །རླན་ཅན་སྣུམ་པའི་རིགས་རྣམས་ཕྱི་ལ་བཞག །སྨན་ནུས་ཞིབ་ལས་འབྱུང་
བའི་རྩི་བཞིན་བཏགས། །ཚ་སེལ་ཐམས་ཅད་ཀ་ར་དྲུག་འགྱུར་སྦྱར། །གྲང་སེལ་ཐམས་ཅད་
བུ་རམ་བཞི་འགྱུར་སྦྱར། །སྨན་ནད་འདྲེས་ཡོད་འཆོལ་པར་སྦྱར་དུ་རུང༌། །ཅུར་ནིས་ཏྲེས་
སམ་ཕྱེ་མའི་མིང་དུ་བཤད། །ཚ་སེལ་ཐམས་ཅད་ཆུ་བསིལ་བསྐོལ་གྲང་དབུལ། །འཇུ་བ་
དཀའ་ན་དེ་ཡང་ཆུ་སྐོལ་ཤིས། །གྲང་སེལ་ཐམས་ཅད་ཆུ་སྐོལ་ཚ་མོས་དབུལ། །ཟས་ཞུ་སྨན་
ལ་སྨན་ཞུ་ཟས་བཏང་གཅེས། །རུལ་སྐྱུར་སྔོ་ངད་འཇུ་དཀའ་ཀུན་ལ་སྤང༌། །ཞེས་གསུངས་
སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཕྱེ་མའི་སྡེ་ཚན་
བསྟན་པའི་ལེའུ་སྟེ་བཞི་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །རིལ་བུའི་སྡེ་ཚན་ཚ་སེལ་གྲང་སེལ་གཉིས། །ཚ་སེལ་དུག་སྨན་དངུལ་ཆུ་མ་
གཏོགས་པའི། །སྒོས་ཀྱི་ཚ་སེལ་རིལ་བུ་མེད་ན་ཡང༌། །སྨན་ནད་གང་འཕྲོད་རིལ་བུར་དྲིལ་
དུ་བཏུབ། །གྲང་སེལ་རིལ་བུ་བི་ཥ་ནག་པོ་དང༌། །གླ་རྩི་རུ་རྟ་ཤུ་དག་ཨ་རུ་ར། །སྙིང་ཁྲག་
རུས་པ་རྒྱུས་པ་ཤ་དང་ལྔ། །ཚད་དུ་སྦྱར་ཏེ་དྲི་ཆུས་རིལ་བུ་དྲིལ། །བྱ་ཁྱུང་རྣམ་པ་ལྔ་ཡི་རིལ་
བུ་འདི། །སྲོད་དུས་ལྔ་བདུན་དགུ་རྣམས་རིམ་པས་བཏང༌། །ཕོ་ལོག་སྲིན་ནད་གཉན་གཟེར་
གག་ལྷོག་དང༌། །ཁྱད་པར་ཆུ་སེར་མཛེ་ནད་འཇོམས་པའི་མཆོག །དེ་ལ་ཛཱ་ཏི་སྡེབས་པས་
སྙིང་རླུང་སེལ། །ཁ་རུ་ཚྭ་སྡེབས་ཕོ་བའི་མེ་ཉམས་གསོ། །འགྲོན་བུའི་ཐལ་བ་སྡེབས་པས་
སྐྲན་རྣམས་བཤིག །ད་ལིས་སྡེབས་པས་སྐྱ་རྦབ་སྦོས་པ་འཇིལ། །ཤ་རུའི་ཐལ་བ་སྡེབས་པས་
དམུ་རྫིང་སྐེམ། །གུ་གུལ་གག་ལྷོག་གཉན་གཟེར་ས་གདོན་འཇོམས། །ཤིང་ཀུན་སྡེབས་པས་
གྲང་རླུང་མ་ལུས་འཇོམས། །བྱི་ཏང་ཀ་དང་སྡེབས་པས་སྲིན་ནད་སེལ། །རྒྱ་ཚྭ་རྒྱམ་ཚྭ་ལྕེ་མྱང་
ཁ་རུ་ཚྭ། །ཙབ་རུ་ཚྭ་དང་རྭ་ཚྭ་ཤིང་ཚ་དང༌། །མཛེ་ཚྭ་ཐལ་ཚྭ་ཡ་བཀྵ་ར་དང༌། །ཚ་བ་གསུམ་
25-1-552


དང་འབྲས་བུ་གསུམ་པོ་རྣམས། །ཐུན་གསུམ་ཆ་མཉམ་བུ་རམ་རིལ་བུར་དྲིལ(ཚ་སྣ་རྣམས་ཀྱི་ཆ་
གཅིག ཚ་བ་གསུམ་ཆ་གཅིག འབྲས་གསུམ་ཆ་གཅིག་ལ་ཐུན་གསུམ་ཚ་བའི་རིལ་བུ་ཞེས་བྱ་སྟེ)། །ལྷེན་སྐྲན་མངལ་
སྐྲན་ཁྲག་སྐྲན་ཐལ་བར་རློག །ཚ་བ་གསུམ་དང་སུག་སྨེལ་ཨ་རུ་ར། །འུ་སུ་གཡེར་མ་ཟི་ར་
ཁ་རུ་ཚྭ། །མཚོ་ཚ་ཤིང་ཚ་ཏིག་ཏ་གོ་སྙོད་རྣམས། །བུ་རམ་རིལ་བུས་མ་ཞུ་ལྷེན་སྐྲན་འཇོམས། །
གོ་བོ་བྱ་རྒོད་སོ་བྱ་གྲུམ་པ་སོགས། །གྲེ་བ་མཐའ་དག་གཡག་རྒོད་རྐྱང་གི་ཤ །བཟང་དྲུག་
ཚ་བ་གསུམ་དང་ཚྭ་སྣ་(རྒྱ་ཚ་རྒྱམ་ཚ་ཁ་རུ་ཚ་གསུམ་)གསུམ། །གོ་སྙོད་ལ་ལ་ཕུད་དང་ཟི་ར་ནག །བུ་
རམ་དྲིལ་བའི་ཟ་བྱེད་རིལ་བུ་སྟེ། །སྐྲན་ནད་ཚ་གྲང་མེད་པར་ཐལ་བར་རློག །འཇམ་འབྲས་
སྲ་འབྲས་བསིལ་གསུམ་ཨ་རུ་ར། །ཛཱ་ཏི་ལ་ལ་ཕུད་དང་པི་པི་ལིང༌། །བཅའ་སྒ་ཨུཏྤལ་བཙོད་
དང་ཙི་ཏྲ་ཀ །ཀ་པེད་མོན་ཆ་ར་དང་ད་ཏྲིག་དང༌། །སེ་འབྲུ་ཚད་ལྡན་བུ་རམ་རིལ་བུ་བྱས། །
གུ་ལིང་འབྲས་ཀྱི་རིལ་བུས་བད་རླུང་རྒྱས། །སྟོད་ཚ་སྨད་གྲང་འཁྲུ་བ་གསར་རྙིང་གཅོད། །
ད་ལིས་དབྱི་མོང་གནྔྷ་(སྤྲ་བའི་སྡོང་པོ་འདྲ་བའི་དྲི་ཞིམ་པོ་ཡོད་པ་དེ་ཡིནཏེ། གནྡྷ་ནི་དྲི། བྷ་དྲ་ནི་བཟང་པོའོ། །)བྷ་ཏྲ་
དང༌། །ནཱ་ག་པུཥྤེ་གེ་སར་པུ་ཤེལ་ཙེ། །དྭ་ཚ་ཡ་བཀྵ་ར་བཟང་པོ་གསུམ། །མར་ཆང་བུ་རམ་
ཏིང་ཁྲོལ་རིལ་བུ་དྲིལ། །ད་ལིས་འཇུ་བྱེད་རིལ་བུས་སྐྱ་རྦབ་འཇོམས། །གུར་གུམ་མ་ནུ་ཀ་
པེད་བྱི་ཏང་ག །པ་ཏྲ་སྦྲང་སྦྱར་རིལ་བུས་སྐྱ་རྦབ་དང༌། །ཤ་སེར་མཆིན་ནད་རླན་གྲངས་སྦོས་
པ་འཇོམས། །ད་ལིས་དབྱི་མོང་ཕོ་བ་རིས་དང་སྒ། །བྱི་ཚེར་པུ་ཙེ་ཤེལ་དང་དྲི་བཟང་(ད་ལིས་
སུག་སྨེལ་གནྡྷ་བྷ་དྲ་དང་། གེ་སར་བཅས་པ་འདི་རྣམས་དྲི་བཟང་བཞི་ཞེས་སོ།།)བཞི། །བུ་རམ་རིལ་བུས་མཆིན་
སྐྲན་དབུགས་མི་བདེ། །ལུད་པ་གཞང་འབྲུམ་རྟུག་སྐམས་འཇོམས་པར་བྱེད། །ཚ་བ་ལྔ་དང་
བུ་རམ་རིལ་བུ་ཡིས། །རྩིབ་ལོགས་གཟེར་དང་སྙིང་འདར་ཡིད་འཆུས་སེལ། །སུག་སྨེལ་ཤིང་
མངར་རྒྱམ་ཚྭ་ཙི་ཏྲ་ཀ །ཚ་བ་གསུམ་དང་ལྕེ་མྱང་ཁ་རུ་ཚྭ། །བུ་རམ་རིལ་བུས་གྲང་སེལ་སྐྲན་
རྣམས་འཇོམས། །སེ་འབྲུ་པི་པི་ལིང་དང་བུ་རམ་སྦྱར། །རིལ་བུས་མ་ཞུ་སྐྱུག་པ་སེལ་བར་
25-1-553


བྱེད། །དུར་ཐོད་ཤ་རུ་སྤེན་མའི་ཐལ་བ་གསུམ། །ཙ་(སྤྱི་མོང་དཀར་)བྱ་ཨ་རུའི་རིལ་བུས་དམུ་
རྫིང་སྐེམ། །དབྱི་མོང་སུག་སྨེལ་སྡིག་པ་ཚ་བ་གསུམ། །རྒྱ་ཚྭ་སྦྲང་རྩིའི་རིལ་བུས་ཆུ་སོར་ཟུག །
མེ་ཉམས་མཁལ་རྐེད་དཔྱི་མིག་གཟེར་བ་སེལ། །ཟི་ར་བཅའ་སྒ་ཤིང་ཀུན་བྱི་ཏང་ག །རྒྱ་
ཚྭ་སྦྲང་སྦྱར་རིལ་བུ་སོ་སྟེང་བཞག །སྲིན་འཇོམས་ཡུན་བསྟེན་སོ་ཡི་བཅུད་ལེན་འགྱུར། །དེ་
སོགས་རིལ་བུ་གང་སྦྱོར་ཞིབ་བཏགས་ལ། །རྟ་མེད་ཐམས་ཅད་རླན་གྱིས་འདམ་བཏགས་བྱ། །
ཞིབ་ནས་སྲན་མ་ཕོས་པ་ཙམ་དུ་དྲིལ། །དུག་གིས་གཙོ་བྱས་སྲན་མ་ཆུང་ཤོས་ཙམ། །རྟ་དང་
སྦྱར་ན་མ་སླས་དྲིལ་བཏུབ་ལ། །ལུག་རིལ་ཙམ་དང་སེར་བ་རུས་ཙམ་དྲིལ། །ཆུང་བ་མིད་ལ་
ཆེ་བ་མུར་བར་བྱ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་རིལ་བུའི་སྡེ་ཚན་བསྟན་པའི་ལེའུ་སྟེ་ལྔ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ལྡེ་གུའི་སྡེ་ཚན་ཚ་སེལ་གྲང་སེལ་གཉིས། །ཚ་སེལ་སོ་མ་ར་ཛ་ཨ་རུ་ར། །
བསིལ་གསུམ་འདམ་(རྩྭ་བུ་རམ་པ་)བུ་ཤིང་མངར་ལྕགས་ཀྱི་ཕྱེ། །ཀ་ར་མར་གསར་ལྡེ་གུ་བྱས་
པ་ཡིས། །གློ་མཆིན་ཚ་བ་རྙིངས་རྙོགས་སེལ་བར་བྱེད། །ཏིག་ཏ་གསེར་གྱི་མེ་ཏོག་བོང་ང་
དཀར། །མ་ནུ་པི་པི་ལིང་དང་བ་ལེ་ཀ །སྦྲང་རྩིའི་ལྡེ་གུས་མཁྲིས་པའི་གློ་ནད་དང༌། །ཆང་
ནད་མཁྲིས་པར་སྐྱུག་དང་མགོ་ནད་སེལ། །གུར་གུམ་མཚལ་དང་མཁྲིས་པ་སྣ་ཚོགས་དང༌། །
གེ་སར་(ནཱ་ག་གེ་སར། པདྨ་གེ་སར། པུས་པ་གེ་སར།)གསུམ་དང་མར་གསར་སྦྲང་ལ་སྦྱར། །གློ་མཆིན་
ཟླ་མཚན་རྨ་རྙིངས་སྣ་ཁྲག་གཅོད། །བྲག་ཞུན་ཨ་རུ་ར་དང་བ་ཤ་ཀ །གུར་གུམ་སྦྲང་རྩིས་
མཆིན་ཁྲག་དྲེག་ནད་སེལ། །ཙན་དན་ཨུཏྤལ་གུར་གུམ་སྐྱུ་རུ་ར། །ཀ་ར་སྦྲང་སྦྱར་མཁྲིས་
སྐྱུག་གློ་ནད་སེལ། །རླུང་ལྡན་མར་གསར་བད་ལྡན་ག་དུར་སྡེབ། །ཨ་རུ་རྒྱ་སྐྱེགས་བཙོད་
དང་འབྲི་མོག་རྩི། །བསིལ་གསུམ་འདམ་བུ་ཤིང་མངར་ལི་ག་དུར། །ཀ་ར་མར་གསར་སྦྲང་
25-1-554


གི་ལྡེ་གུ་ཡིས། །ལུད་པ་ཤེ་རུལ་རྣག་ཁྲག་གློ་རྡོལ་སེལ། །འབྲས་བུ་གསུམ་དང་ཨ་བ་ལྕགས་
ཕྱེ་དང༌། །གོ་སྙོད་ཤིང་མངར་མར་གསར་ཀ་ར་སྦྲང༌། །ལྡེ་གུས་མིག་ནད་དམར་ཚག་རབ་
རིབ་འཇོམས། །བསེ་རུ་མཁྲིས་པའི་ལྡེ་གུས་གློ་རྣག་སྐེམ། །ཙན་དན་དམར་པོ་སྐྱེར་པ་ཨ་རུ་
རའི། །ལྡེ་གུས་ཚད་རྙིང་ཆུ་སེར་ལྡན་པ་སེལ། །མཚལ་དང་རྒྱ་སྐྱེགས་དོམ་མཁྲིས་ལྡེ་གུ་ཡིས། །
རྟག་ཏུ་ཟླ་མཚན་འཛག་པ་གཅོད་པར་བྱེད། །ཅུ་གང་གུར་གུམ་ལི་ཤི་ཨ་རུ་ར། །སུག་སྨེལ་
མར་གསར་ལྡེ་གུས་རབ་རིབ་སེལ། །ཚད་ནད་རྙིངས་རྙོགས་དུག་ནད་ཞི་བར་བྱེད། །བསིལ་
བཞི་ཙན་དན་དཀར་དམར་རུ་རྟ་སྦྲང༌། །མར་གསར་ལྡེ་གུས་བུ་ཆུང་གློ་ནད་སེལ། །མཆིན་པ་
སྣ་ཚོགས་མ་རུལ་གུར་གུམ་དང༌། །མར་གསར་སྦྲང་སྦྱར་མིག་ནད་མཆིན་ནད་སེལ། །གྲང་
སེལ་ཚ་བ་གསུམ་དང་འབྲས་བུ་གསུམ། །ཙི་ཏྲ་བྱི་ཏང་ག་དང་ལི་ག་དུར། །རིམ་པས་ཆ་
བསྐྱེད་ལྕགས་ཕྱེ་སྤོས་དཀར་བརྒྱད། །སྦྲང་སྦྱར་མིག་སེར་སྐྱ་རྦབ་གཞང་འབྲུམ་འཇོམས། །
རྒྱ་ཚྭ་གླ་རྩི་སྡིག་སྲིན་ཚ་བ་གསུམ། །མཐིང་(སྙུག་མའི་རྩི་) ཤུན་མོ་(བུ་མེད་རྡེ་ནད་ཅན་ལ་ཐོན་པའི་རྡོ་)རྡོ་
ཉི་དགའ་འབྲས་སྣ་གསུམ། །བུ་རམ་མར་སྦྱར་མཁལ་ནད་ཆུ་སྲི་སེལ། །ཤིང་ཚ་སུག་སྨེལ་
དྲོད་སྨན་ཅུ་གང་དང༌། །ཀ་ར་རིམ་བསྐྱེད་མར་གསར་སྦྲང་ལྡེ་གུ། །བད་ཀན་གློ་ནད་འཇབ་
འཇིབ་ལུ་ལ་བསྔགས། །མ་ནུ་རུ་རྟ་སྒེ་གཤེར་འབྲས་བུ་གསུམ། །ག་དུར་པི་པི་ལིང་དང་
སྦྲང་རྩི་སྦྱར། །དབུགས་མི་བདེ་དང་བད་རླུང་གློ་ནད་སེལ། །སེ་འབྲུ་ཤིང་ཚ་སུག་སྨེལ་ཚ་
བ་གསུམ། །ཁ་རུ་ཚྭ་དང་རུ་རྟ་ཙི་ཏྲ་ཀ །གཟེ་མ་བུར་སྦྱར་སྐྱ་རྦབ་རླུང་ཚབས་དང༌། །མཁལ་
མ་ཕོ་བ་རྒྱུ་ལོང་གྲང་བ་སེལ། །དེ་སོགས་ལྡེ་གུའི་སྦྱར་ཐབས་སྦྲང་ཆུ་བཅད། །བུ་རམ་ཆུར་
བསྡུས་མར་གྱི་སྦུ་རྙིངས་ཕྱུངས། །སྨན་ཀུན་ཞིབ་བཏགས་བསྲེས་ལ་འདྲེས་པར་དཀྲུག །ཀ་
ར་ལ་སྦྱོར་ཞིབ་ཏུ་བཏགས་ལ་གདབ། །འཇུ་ཚོད་ལོན་ཙམ་ཁྱིའུ་སུས་བསྟེན་པར་བྱ། །ཞེས་
གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལྡེ་གུའི་
25-1-555


སྡེ་ཚན་བསྟན་པའི་ལེའུ་སྟེ་དྲུག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སྨན་མར་སྡེ་ཚན་ཚ་སེལ་གྲང་སེལ་གཉིས། །ཚ་སེལ་ཏིག་ཏ་ཧོང་ལེན་བ་
ཤ་ཀ །སྤང་རྩི་ཀྱི་ལྕེ་ཁུ་བ་ཕྱུངས་པ་ཡི། །དྭངས་མ་བ་མཛོའི་འོ་མ་མར་གསར་ལ། །སྦྱར་བའི་
མར་ཁུར་གུར་གུམ་གེ་སར་གསུམ། །ཀ་ར་སྦྲང་སྦྱར་མིག་སེར་སྐྱ་རྦབ་དང༌། །ཆུ་སེར་པགས་
ནད་ཚད་རྙིང་རླུང་ལྡན་འདོན། །ཏིག་ཏ་ཀྱི་ལྕེ་བ་དང་སུམ་ཅུ་ཏིག །བ་ལེ་ཀ་དང་འབྲས་བུ་
གསུམ་གྱི་མར། །མཆིན་མཁྲིས་སྙིང་གི་ཚ་བ་རྙིངས་པ་སེལ། །ཏིག་ཏ་ནིམ་པ་ཧོང་ལེན་པ་ཏོ་
(གསེར་གྱི་མེ་ཏོག་)ལ། །སྐྱེར་པ་བྱི་ཚེར་ཀྱི་ལྕེ་པར་པ་ཏ། །བསྐོལ་ཁུར་གླ་སྒང་རྩ་མཁྲིས་དུག་མོ་
ཉུང༌། །ཙན་དན་པི་པི་ལིང་རྣམས་ཕྱེ་མར་སྦྱར། །དེ་ལ་མར་ཕྱུངས་སྦྲང་སྦྱར་མཛེ་ནད་དང༌། །
ཤ་བཀྲ་མེ་དབལ་ཁོང་འབྲས་མཚན་བར་རྡོལ། །གཞང་འབྲུམ་སྐྱ་རྦབ་སྐོམ་དད་མགོ་འཁོར་
སེལ། །ཏིག་ཏ་གསེར་གྱི་མེ་ཏོག་བ་ཤ་ཀ །སྐྱེར་པའི་རྩ་བ་བྲག་ཞུན་བ་ལེ་ཀ །ཀྱི་ལྕེ་པར་པ་
ཏ་དང་སུམ་ཅུ་ཏིག །བྱི་ཚེར་དུག་མོ་ཉུང་དང་པུ་ཤེལ་ཙེ། །འབྲས་བུ་གསུམ་གྱི་མར་ལ་ཀ་ར་
སྦྱར། །ཚད་པ་རྙིངས་རྙོགས་རྣམས་ཀྱི་བདུད་རྩི་ཡིན། །དེ་དག་ཏིག་ཏ་རབ་འབྲིང་ཐ་མར་རོ། །
འབྲས་བུ་གསུམ་བསྡུས་འོ་མ་མར་ལ་བསྡུ། །ཆུ་ཆོད་དྭངས་མ་ལྕགས་ཕྱེ་ཨ་བ་སྦྲུལ། །གུར་
གུམ་གོ་སྙོད་མདུང་རྩེ་གསལ་བྱེད་དགུ། །མིག་འགྲིབས་རབ་རིབ་དམར་ཚག་སྐམ་ཚག་
སེལ། །སེང་ལྡེང་ཀྱི་ལྕེ་འབྲས་བུ་གསུམ་གྱི་མར། །སྦྲང་རྩི་ཆུ་སེར་སྨན་གསུམ་(སྤོས་དཀར། ཐལ་
ཀ་རྡོ་རྗེ། སོ་མ་ར་ཛ་)པི་པི་ལིང༌། །སྦྱར་བ་སེང་ལྡེང་དགུ་ཡི་སྨན་མར་ཏེ། །མཛེ་ནད་དྲེག་གྲུམ་ལུས་
ལ་རྒྱས་པ་སེལ། །སེང་ལྡེང་གུ་གུལ་ཐལ་ཀ་རྡོ་རྗེ་དང༌། །སོ་མ་ར་ཛ་ཀྱི་ལྕེ་ཨ་གར་ནག །སྐྱེར་
ཤུན་མར་ལ་སྦྲང་སྦྱར་སེང་ལྡེང་བདུན། ཆུ་སེར་རྩ་ཚིགས་པགས་ལ་རྒྱས་པ་དང༌། །དྲེག་དང་
གྲུམ་བུ་མཛེ་ནད་སེལ་བར་བྱེད། །ཨ་རུ་ཆང་སྦངས་ཤ་དང་བསིལ་གསུམ་དང༌། །ཤིང་ཚ་
25-1-556


ཤིང་མངར་བཅའ་སྒ་གེ་སར་གཉིས། །ག་དུར་མར་ཁུ་སྦྲང་སྦྱར་འབྲི་རྐང་མར། །གློ་ནད་རྒྱས་
དང་རུས་རླུང་སྙིང་ཚད་སེལ། །བ་གསར་དམར་ཟལ་ཆུ་དང་ལྕི་བ་དང༌། །འོ་མ་ཞོ་དང་མར་
ལ་སྦྲང་རྩི་སྦྱར། །བ་ཡི་རྣམ་ལྔའི་སྨན་མར་མཆིན་ནད་རྙིང༌། །ཚ་བ་རླུང་ལྡན་ཆུ་སེར་སྐྱ་རྦབ་
འཇོམས། །ཨ་གར་ཙན་དན་གུ་གུལ་སྙིང་ཞོ་ཤ །རྒུན་འབྲུམ་མར་ལ་ཀ་རས་ཁ་བླངས་པ། །
ཞོ་ཤའི་སྨན་མར་སྙིང་གི་ཚད་པ་འཇོམས༌། སྲོ་ལོ་ཨ་རུའི་མར་ལ་ཅུ་གང་དང༌། །ཤིང་མངར་
སྦྲང་སྦྱར་སྲོ་ལོའི་སྨན་མར་ཏེ། །གློ་རྣག་འབྱམས་དང་གློ་ཡི་ཚད་པ་སེལ། །ཙན་དན་དཀར་
དམར་སླེ་ཏྲེས་དུག་མོ་ཉུང༌། །གླ་སྒང་ཀཎྜ་ཀ་རི་ཀྱི་ལྕེ་བ། །ཧོང་ལེན་སྤང་སྤོས་སྐྱེར་ཤུན་སྐྱུ་
རུ་ར། །ཤུག་པའི་མར་ལ་བསིལ་གསུམ་ཀ་ར་སྦྱར། །ཙན་དན་མར་གྱིས་གློ་སྙིང་མཆིན་ཚད་
དང༌། །རིམས་སྨྱོ་སྟོང་སྐྱུགས་ཚིགས་གཞི་སྐྲངས་པ་སེལ། །འབྲི་མོག་ཚོས་བཙོད་ཨ་རུ་ར་ཡི་
མར། །ཀ་ར་སྦྱར་བས་གློ་ཚད་རྣག་ཁྲག་སྐེམ། །གུར་གུམ་མཚལ་དང་གེ་སར་རྣམ་པ་གསུམ། །
མཁྲིས་པ་སྣ་ཚོགས་མར་ལ་ཀ་ར་སྦྲང༌། །རྩ་རུལ་བུ་ག་དགུ་ནས་ཁྲག་འཛག་གཅོད། །གྲང་
སེལ་ཨ་རུ་བར་སྐྱུར་ཕྱེད་མ་སྐྱུང༌། །བསྡུས་ཁུ་དྭངས་མ་མར་ཕྱུང་བུ་རམ་སྦྱར། །ཛཱ་ཏི་ཁ་རུ་
ཚྭ་དང་པི་པི་ལིང༌། །སུག་སྨེལ་བཅའ་སྒ་ཁ་ཚར་བཏབ་པ་ཡི། །འབྲས་བུ་གསུམ་གྱི་སྨན་
མར་རྒས་ཀ་སྲ། །མིག་དང་རྣ་བ་སོ་དང་སྣ་ཡི་ནད། །མགོ་ནད་རྩ་བྱེར་རྣག་འབྱམས་རླུང་
ནད་སེལ། །ཁྱད་པར་སྙིང་ལ་རླུང་ཞུགས་འཇོམས་པའི་མཆོག །ར་མཉེ་ཉེ་ཤིང་ལྕ་བ་བ་སྤྲུ་
བ། །གཟེ་མ་འབྲི་མར་རྩ་བ་ལྔ་ཡི་མར། །ཚྭ་སྣ་གསུམ་དང་སླེ་ཏྲེས་བཟང་པོ་གསུམ། །བཅའ་
སྒ་པི་པི་ལིང་དང་བུ་རམ་སྦྱར། །མཁལ་མའི་གྲང་ནད་རླུང་ཚབས་སེལ་བར་བྱེད། །འབྲས་
བུ་གསུམ་དང་རྩ་བ་ལྔ་བསྲེས་པ། །འབའ་སམ་ཞེས་བྱ་སྟོད་སྨད་ཀུན་ལ་བསྔགས། །འབའ་
སམ་དེ་ནང་ད་བྱིད་ལུག་ཐུག་འབྲས། །མར་ལ་ཅོང་ཞི་བཅའ་སྒ་པི་པི་ལིང༌། །སླེ་ཏྲེས་རྒྱམ་ཚྭ་
སུག་སྨེལ་བྲེ་ག་དང༌། །བུ་རམ་སྦྱར་བ་ད་བྱིད་སྐྱིན་གོར་ཏེ། །རོ་ཙ་མཁལ་ནད་ཟ་ཁུ་འདོད་
25-1-557


ཉམས་སེལ། །སྒོག་སྐྱ་ཨ་རུ་སྒ་ཡི་སྨན་མར་ལ། །རྒྱམ་ཚྭ་ཁ་རུ་ཚྭ་དང་པི་པི་ལིང༌། །སུག་སྨེལ་
བུ་རམ་བཏབ་པས་དར་རྒན་དང༌། །རྒྱུ་ལོང་མཁལ་རྐེད་ནད་དང་རླིག་བླུགས་སེལ། །སྒོག་
སྐྱ་སྲང་བརྒྱད་འབྲི་མར་ཆ་མཉམ་སྦྱར། །(ཞག་)བཅུ་གཉིས་ནས་ཀྱི་གསེབ་ཏུ་ནུས་པ་བསྐྱེད། །
རླུང་ནད་མ་ལུས་ཀུན་སེལ་བཅུད་ལེན་འགྱུར། །བ་སྤྲུ་པི་པི་ལིང་རྩ་འབྲི་མར་སྦྱར། །མོ་
གཤམ་བུ་རྙེད་མཆོག་ཏུ་སྐྱིགས་བུ་སེལ། །སེ་འབྲུ་འུ་སུ་དོང་གྲ་ཙི་ཏྲ་ཀ །པི་པི་ལིང་གི་མར་
དང་བུ་རམ་སྦྱར། །བཟང་པོ་ལྔ་ཡི་སྨན་མར་བད་རླུང་རྒྱས། །སྐྱ་རྦབ་གཞང་འབྲུམ་མཆེར་
ནད་དབུགས་མི་བདེ། །མེ་དྲོད་སྐྱེད་ཅིང་ལུས་ཤ་རྒྱས་པར་བྱེད། །བུད་མེད་བུ་མེད་ལ་ཡང་
བུ་རྙེད་འགྱུར། །གཟེ་མ་ཆང་སྦངས་ཚད་ལྡན་ཆུར་བསྡུས་པའི། །མར་ལ་ཁ་རུ་ཚྭ་དང་ཚ་བ་
གསུམ། །རྒྱུ་ལོང་སྦོ་འཁྲོག་མཁལ་རླུང་གཟེར་བ་འཇོམས། །དེ་སོགས་སྨན་མར་མཐའ་
དག་སྦྱར་བའི་ཐབས། །འཚོས་པར་བཙོས་ལ་ཁུ་བ་ཡང་ཡང་གདོན། །ཁུ་ཕྱིན་དྭངས་མ་ཆུ་
བྲེ་གསུམ་དུ་བསྡུས། །དེ་ལ་བཞོས་ཐོག་འོ་མ་བྲེ་བཞི་བླུག །བཀྲུག་ཅིང་བཙོས་པས་ཆུ་དེ་འོ་
མར་སྟིམ། །དེ་ལ་ཚ་སེལ་བ་ར་མཛོ་ཡི་མར། །གྲང་སེལ་འབྲི་དང་ལུག་མར་རྙིང་པ་གཞུག །
འོ་མ་མར་ལ་ཐིམ་པར་བསྡུས་བྱས་ཏེ། །ཆུ་ཆོད་དྭངས་རྙིངས་བྱེ་ནས་མཛུབ་མོས་ཚུགས། །
མེར་བཅུག་སྒྲ་མེད་ཚིགས་མ་དྲིལ་དུ་བཏུབ། །ཆུ་ཆོད་ཚད་ཡིན་ཐལ་ན་ནུས་པ་འཚིག །མ་
ཆོད་ཕོ་བས་མི་ཆུན་ནུས་པ་ཆུང༌། །ཚད་ལྡན་ཕོག་ལ་ཁུ་བ་གུད་དུ་བཞུར། །དེ་ལ་ཁ་ཚར་སྨན་
གདབ་མངར་གསུམ་སྦྱར། །འདྲེས་པར་དཀྲུགས་ལ་ཐོ་རངས་ཁམ་རེ་བཏང༌། །རླན་གྲང་
བསེར་བུ་འཇུ་དཀའ་དྲག་ཤུལ་སྤང༌། །སྨན་མ་ཞུ་ན་རྒྱམ་ཚྭ་བཞི་ཐང་བཏང༌། །སྨན་ཟད་རྗེས་
ལ་ཟས་ཀྱིས་ལུས་ཟུངས་གསོ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་
གསང་བ་མན་ངག་གི་རྒྱུད་ལས་སྨན་མར་གྱི་སྡེ་ཚན་བསྟན་པའི་ལེའུ་སྟེ་བདུན་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
25-1-558


ཆེན་པོ་ཉོན་ཅིག །སྡེ་ཚན་ལྔ་ཡི་ནང་དུ་མ་བསྟན་པའི། །ཐལ་སྦྱོར་ཁཎྜ་སྨན་ཆང་སྦྱོར་བ་
གསུམ། །གྲང་བའི་ནད་ལ་ཐལ་སྨན་མཆོག་ཡིན་ཏེ། །ཚ་བའི་ནད་རྣམས་ཁཎྜས་སེལ་བར་
བྱེད། །སྨན་ཆང་རླུང་ནད་བད་མཁྲིས་ལྡན་པ་སེལ། །སྦྱོར་བ་འདི་གསུམ་གསང་ཕྱིར་གུད་དུ་
(གང་དུ་སྦས་ན་ཐལ་སྨན་ཕྱེ་མའི་གྲང་སེལ་དུ་སྦས། ཁཎྜ་ཐང་དུ་སྦས། སྨན་ཆང་སྨན་མར་གསེབ་ཏུ་)སྦས། །དང་པོ་ཐལ་
(ཐལ་སྨན་གང་ཡང་ཚོས་པ་ནུས་པ་ཆེ། མ་ཚོས་ན་འཇུ་དཀའ་བས་ནད་བསྐྱེད་པར་བྱེད་)སྨན་སྦྱོར་བ་བསྟན་པ་ནི། །
སྤྱི་རུ་རྣོ་འཇམ་བར་མའི་སྦྱོར་བ་དང༌། །བྱེ་བྲག་ཁ་འཐོར་མི་འདྲ་དུ་མ་བསྟན། །དང་པོ་རླུང་
མཁྲིས་བད་ཀན་ནད་གཞི་སྦྱར། །རླུང་དང་ལྡན་ལ་འཇམ་པོའི་སྦྱོར་བ་ནི། །སྒྲོན་ཤིང་དུར་
བྱིད་དན་ད་འབྲས་བུ་གསུམ། །པ་ཏྲ་སྭ་རྫི་(སྙི་ནག་མོ་)ཀ་དང་ཡ་བཀྵ། །རྒྱ་ཚྭ་ཁ་རུ་ཚྭ་དང་ཙབ་
རུ་ཚྭ། །ཤིང་ཚ་ཐལ་ཚྭ་པི་པི་ལིང་(གི་རྩ་བ་)མཱུ་ལ། །ཙི་ཏྲ་ཀ་དང་ཚ་བ་རྣམ་པ་གསུམ། །འོ་མ་ཞོ་
མར་ཞག་རྐང་ཚིལ་གྱི་སྦྲུ། །མཁྲིས་པར་ལྡན་ལ་བར་མའི་སྦྱོར་བ་ནི། །ཧོང་ལེན་བཙོད་དང་
ཞུ་མཁན་ཀྱི་ལྕེ་བཞི། །འཇམ་པོའི་སྟེང་བསྣན་བ་རའི་ཞོ་ཡིས་སྦྲུ། །གྲོགས་མེད་བད་ཀན་
རྐྱང་ལ་རྣོན་པོ་སྦྱར། །རྒོད་གཡག་རྭ་ཕྱེ་སྔོ་ཡི་ཚ་བ་(དབྱི་མོང་། སྲུབ་ཀ ལྕེ་ཚ་)གསུམ། །ཤུ་དག་ཤིང་
ཀུན་འཇམ་པོའི་སྟེང་དུ་བསྣན། །གཅན་གཟན་ཤ་རུས་ཁུ་བ་ཆང་གིས་སྦྲུ། །ཀུན་ཀྱང་གར་
སླ་གཟུགས་བཏུབ་འཕང་ལོ་བྱ། །མ་སྤྱད་རྫར་བླུག་ཁ་བཅད་མཚམས་བསྣན་ལ། །འདག་
པ་བྱུགས་ལ་བྱེ་མས་བར་མཚམས་བཅད། །བོང་མེས་འཚོས་པར་བསྲེགས་པའི་ཐལ་བ་དེ། །
གྲངས་(མ་གྲངས་པར་ཁ་མི་དབྱེ། ཕྱེ་ན་ནུས་ཆུང་དུ་འགྲོ།)ནས་ཞིབ་བཏགས་ཕྱེ་མ་རིལ་བུ་རུང༌། །བུ་རམ་
ཀ་ར་སྦྲང་གི་རྟ་ལ་བསྐྱོན། །མ་ཞུ་འཇུ་ཞིང་ཕོ་བའི་མེ་དྲོད་སྐྱེད། །ལྷེན་དང་སྐྲན་བཤིག་བད་
ཀན་ལྕགས་དྲེག་འགོགས། །སྐྱ་རྦབ་འཇིལ་ཞིང་འོར་དང་དམུ་ཆུ་སྐེམ། །མན་ངག་གྲོགས་
ཀྱིས་བསྒྱུར་བས་ནད་ཀུན་འཇོམས། །བྱེ་བྲག་ཅོང་ཞི་འཕྲུལ་གྱི་ཐལ་སྦྱོར་ལ། །ཆུང་ངུ་བར་
མ་ཆེན་པོ་རྣམ་པ་གསུམ། །ཨ་རུ་ཚ་ལ་རྒྱམ་ཚྭ་པི་པི་ལིང༌། །བོང་ང་དཀར་པོ་ཆ་མཉམ་ཉིས་
25-1-559


འགྱུར་གྱི། །ཅོང་ཞི་མུ་ཟི་རིལ་མ་ཙམ་ཞིག་སྦྱར། །ཞི་ཀའི་ཀོང་བུར་བླུག་ལ་འདམ་གྱིས་
སྦྱར། །སོལ་བའི་མེ་དབུས་བཅུག་ལ་འཚོས་པར་བསྲེག །མུ་ཟིའི་དྲི་སངས་འཚོས་པའི་ཚད་
ཡིན་འདོན། །ཐལ་བ་ཞིབ་བཏགས་ཀ་ར་སྦྱར་བ་ནི། །མ་ཞུ་བད་ཀན་ལྷེན་དང་ལྕགས་དྲེག་
དང༌། །རྡོ་དུག་དབྱིག་དུག་བད་མཁྲིས་སྨུག་པོའི་སྐྲན། །ཕོ་བའི་ནད་ཀུན་ཚ་གྲང་མེད་པར་
འཇོམས། །དེ་སྟེང་བཟང་དྲུག་རྒྱ་ཚྭ་པྲི་ཡང་ཀུ། །བསྣན་པ་ཅོང་ཞིའི་ཐལ་སྨན་འབྲིང་པོ་སྟེ། །
མ་ཞུ་ལ་སོགས་སྟོབས་རྒྱས་ལྡན་ཚད་འཇོམས། །ཆེན་པོ་ཚ་བ་ལྔ་དང་ཨ་རུ་ར། །རྒྱ་ཚྭ་རྒྱམ་
ཚྭ་ཐལ་ཚྭ་ཁ་རུ་ཚྭ། །མཛེ་ཚྭ་ཟེ་ཚྭ་ལན་ཚྭ་འགྲོན་བུ་དང༌། །བྱ་རྒོད་གྲེ་བ་སྲམ་དང་ཆུ་བྱ་དང༌། །
ཉ་རུས་ཀུན་གྱི་ཉིས་འགྱུར་ཅོང་ཞི་སྦྱར། །གོང་བཞིན་བསྲེགས་ཐལ་གྲང་སྐྲན་ཐལ་བར་རློག །
ཚྭ་བསྲེགས་སྦྱོར་བ་བ་ཚྭ་མེད་པའི་ཚྭ། །སྔོ་ཞིང་རོ་མངར་ལྡན་པ་ཁྱོར་བ་དོ། །བ་ཞོ་བྲེ་གང་
རྒོད་ཤ་མཐེམ་ཙམ་སྦྱར། །བཙོས་དཀྲུགས་ཆུ་ཆོད་ཕྲུལ་པོར་སོང་བ་དང༌། །རྫར་བླུག་དུ་བ་
མི་འཆོར་ཁ་བཅད་ལ། །བོང་མེས་འཚོས་པར་བསྲེགས་པའི་ཐལ་བ་དེ། །སྟར་བུ་པི་པི་ལིང་
དང་བུ་རམ་སྦྱར། །མ་ཞུ་ལྷེན་དང་ལྕགས་དྲེག་ཁྲག་སྐྲན་བཤིག །ག་བུར་ནག་པོའི་ཐལ་སྦྱོར་
ཕག་རིལ་དང༌། །སྲད་དཀར་ཧོང་ལེན་དེ་(མེ་ཏོག་ལུག་མིག་པ་)བ་ཤིང་སྔོན་(སྤྱི་ཤུལ་)བཞི། །གཙོ་
གྲོགས་དུ་བ་མ་ཤོར་སོ་སོར་བསྲེག །ཐལ་བ་དམར་ཟལ་བ་ཆུས་འདམ་ཐགས་བྱ། །ཀ་ར་
སྦྱར་བས་མ་ཞུ་བ་ཡི་རིམས། །གཟེར་ཐུང་གཉན་རིམས་མིག་སེར་སེལ་བར་བྱེད། །ཁྱད་
པར་ཕོ་བར་རིམས་བབས་བདུད་རྩི་ཡིན། །བིག་པན་སྲད་དཀར་སྙ་ལོ་ཀྱི་ལྕེ་བཞི། །དུ་བ་མ་
ཤོར་བསྲེགས་ཐལ་རླུང་རིམས་སེལ། །ཆང་སྦྱར་རི་ཐང་མཚམས་ཀྱི་བདུད་རྩི་ཡིན། །རིན་
པོ་ཆེ་ཡི་ཐལ་སྨན་སྦྱོར་བ་ནི། །གསེར་ཐལ་དང་པོ་སྦྲང་གཤོག་ཙམ་དུ་བརྡུངས། །དེ་ནས་
བྲུད་ལ་ལབ་ལེབ་མེད་པར་བཏགས། །ཚ་ལ་མུ་ཟི་ཏིལ་དང་ཟར་མ་སྦྱར། །རིལ་བུར་དྲིལ་
ལ་ཀོང་བུར་སོལ་མེས་བསྲེག །ཟངས་ཐལ་ཟངས་བསྲེགས་ཡང་ཡང་བལྟབ་ཀྱིན་བརྡུངས།  །
25-1-560

 
སྦྲང་གཤོག་ཙམ་གྱུར་སེན་མོས་དུམ་བུར་གཏུབས། །སིངས་པོས་གཡའ་འདོན་ཚ་ལ་མུ་
ཟི་སྦྱར། །ཀོང་བུར་བླུག་ལ་ཁ་བཅད་འཚོས་པར་བསྲེག །དངུལ་ཐལ་དངུལ་ཆུ་སྟར་བུས་
བཤིག་པ་དང༌། །ཚ་ལ་མུ་ཟི་སྦྱར་བ་གོང་བཞིན་བསྲེག །ལྕགས་ཐལ་སེག་བརྡར་བརྡར་ཕྱེ་
ཞིབ་ཏུ་བཏགས། །ཚ་ལ་ཨ་རུ་མུ་ཟི་འདག་པ་བྱ། །ཀོང་བུར་བསྲེགས་པས་ཐལ་བར་འགྱུར་
བ་ཡིན། །ཀུན་ལ་གཉེན་པོ་ཆུང་ན་མི་ཚོས་བསྐྱེད། །མཛེ་ནད་དུག་འཇོམས་བྱང་ཁོག་རྣག་
ཁྲག་སྐེམ། །མཚལ་ཐལ་རྫ་ཡི་ག་འུ་ཁ་སྦྱར་ལ། །མཚལ་དེ་ཞིབ་བཏགས་ག་འུའི་ནང་དུ་བླུག །
སྙོམས་པར་བརྡལ་ལ་བར་མཚམས་འདག་པས་བྱུག །བྱེ་མས་བར་བཙངས་རླངས་པ་ཤོར་
མི་རུང༌(ཤོར་ན་མཛེ་ཡོང་བས་བྱེད་མཁན་བཟབ)། །སྟེང་དུ་ཆུ་སྦྱུགས་འོག་ནས་མེ་ཡིས་བསྲེག །ཚོས་
ཚད་འོག་མའི་ཤམ་དེ་སྐྱ་བོར་འགྲོ། །མེ་བཅད་གྲང་ནས་ཁ་དབྱེ་དངུལ་ཆུ་(སྒྲོ་ཡི་ཕྱགས་ལ་མཛུབ་
མོས་ཉེ་)དྲིལ། །ཐལ་བས་ཤ་རོ་མ་ལུས་གཅོད་པའི་མཆོག །ཤ་རུ་དུང་དང་འགྲོན་བུ་ཐོད་པ་
རྣམས། །སོལ་མེས་དཀར་པོར་མ་སོང་བར་དུ་བསྲེག །ཚ་བ་གསུམ་དང་ཟ་འོག་ཕུར་མོ་དང༌། །
སྒོག་སྐྱ་བཙན་དུག་ཕག་རིལ་སྒྲོ་ལ་སོགས། །སླ་ངར་རྫ་སྦུབ་དུ་བ་མ་ཤོར་བསྲེག །ཐལ་བ་
དེ་རྣམས་ཕལ་ཆེར་རྣག་ཆུ་སྐེམ། །ཅོང་ཞི་རྒོད་འདུལ་སོལ་མེས་འཚོས་པར་བསྲེག །དཀར་
པོར་སོང་ནས་ཆང་ངམ་དར་བའི་ནང༌(བརླན་ཆུང་ན་ནག་པོར་འགྲོ། ཆེས་ན་སྐྱ་པོར་འགྲོ། རང་ལ་ཐིམ་ནས་མི་
སྐམ་ཙམ་བྱའོ)། །སོར་ཐོན་ཙམ་གྱིས་ངད་བསད་ཕྱེ་མར་འགྲོ། །གག་པ་ཤ་རོ་ལྷེན་སྐྲན་ལྕགས་
དྲེག་གཅོད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་
རྒྱུད་ལས་ཐལ་སྨན་གྱི་སྡེ་ཚན་བསྟན་པའི་ལེའུ་སྟེ་བརྒྱད་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་
པོ་ཉོན་ཅིག །ཁཎྜའི་སྡེ་ཚན་སྦྱར་ཐབས་བསྟན་པར་བྱ། །དང་པོ་འབའ་སམ་ཁཎྜ་སྦྱར་བ་ནི། །
སྔོ་སྨན་ཐང་སྨན་བསིལ་ཀུན་ཁཎྜ་སྦྱར། །རྩི་སྨན་མཁྲིས་སྨན་ཁ་ཚར་བཏབ་པ་ཡིས། །ཚ་
25-1-561


བའི་རིགས་སུ་གྱུར་པ་ཐམས་ཅད་སེལ། །སྔོ་ཡི་ཁཎྜ་བསིལ་གྱི་སྔོ་སྣ་ཚོགས། །བྲག་ཞུན་ཁཎྜ་
སྦྱར་བས་ཚད་པ་འཇོམས། །རྨ་རྩིའི་ཁཎྜ་རེ་སྐོན་བྲག་སྤོས་པ། །རི་དང་ཀླུངས་ཀྱི་རྟ་པགས་
དར་ཡ་ཀན། །བསེར་ཁ་བ་མོས་མ་ཕོག་རྩ་ལོར་བཅས། །ཁཎྜ་རྨ་རྣམས་ཀུན་གྱི་རྨ་རྩིར་
བཟང༌། །རེ་རལ་གསུམ་(ནི་རྒྱལ་པོ་རེ་རལ་ཞེས་པ་ལྡུམ་བུ་རེ་རལ། བཙུན་མོ་རེ་རལ་ཞེས་པ་བྲན་སྤོས། བློན་པོ་རེ་
རལ་ཞེས་པ་བྲག་སྐྱ་ཨ་བོ་དང་གསུམ་མོ་)དང་བཅད་འབྱོར་རྣམ་པ་གསུམ(ནི་སྟག་ཤ་འུག་པ་བཅད་འབྱོར། རྒུ་དྲུས་
ཕག་གླང་བཅད་འབྱོར། ཡུ་གུ་ཤིང་སྦྲུལ་དུག་བཅད་འབྱོར་ཞེས་གསུམ་དུ་གྲགས་པ་ལྟར་གཏོང་ལ། གཉིས་ཟེར་ཐ་མ་དག་པར་
ཤེས་པར་བྱའོ)། །རྟ་པགས་རེ་སྐོན་སྲོལ་གོང་དར་ཡ་ཀན། །ཨ་བི་ཥ་དང་ཚེར་སྔོན་ཆུ་རྩ་དང༌། །
སྔོ་ཡི་ཚ་བ་གསུམ་ལ་ཁཎྜ་བྱ། །གུར་གུམ་ཅུ་གང་མཁྲིས་སྣ་ཁ་ཚར་གདབ། །ཤ་རུས་མགོ་
དང་ཡན་ལག་རྨ་ཀུན་གསོ། །བཤལ་སྨན་ཁཎྜ་དུར་བྱིད་ཐར་ནུ་དང༌། །སྔོན་བུ་ཁྲོན་བུ་ལྕུམ་
རྩ་ཙི་སྟག་(ཆུ་མ་རྩི་)མོ། །དནྜ་དོང་ག་ཤྲཱི་ཁཎྜ་དང༌། །ཨ་རུ་མཆུ་སྙུང་བ་ཆུ་ཁཎྜ་བྱ། །འཇམ་ལ་རྣོ་
སྟེ་མཆོག་ཏུ་དམུ་ཆུ་སྦྱོང༌། །ཐར་ནུ་ཁཎྜ་བཙས་ཆོད་རྩ་བ་བརྐོས། །དུར་བྱིད་འཕྲོད་ཙམ་ཧོང་
ལེན་ཆུ་རུག་པ། །ཁུ་བ་ལེགས་བཏོན་ཁཎྜ་བདུད་རྩི་ཟར། །མི་སྐྱུག་མི་འགྱིང་མི་འབྱམས་ཆུ་
མི་གནོད། །ནམ་ཟླ་ཚ་གྲང་ན་སོ་རྒན་གཞོན་མེད། །མཁྲིས་པའི་ཁཎྜ་མི་དོམ་ཕག་པ་གླང༌། །
གཡག་དང་འཕྱི་མཁྲིས་མཚེ་ཚོས་བྲག་སྤོས་པ། །ཁཎྜར་གུར་གུམ་ཁ་ཚར་བཏབ་པ་ཡིས། །
སྣ་ཁྲག་གློ་ཁྲག་མངལ་ཁྲག་རྩ་ཁ་ཤོར། །ཁྲག་ཏུ་འཁྲུ་སྐྱུག་མ་ལུས་གཅོད་པར་བྱེད། །བྲག་
ཞུན་ཁཎྜ་བྲག་ཞུན་ཆུར་སྦངས་ལ། །ས་མེད་ཁུ་བ་ལེགས་བཙགས་མ་འདྲེགས་བསྡུ། །ཕོ་བ་
མཆིན་པ་མཁལ་ཚད་མིག་ནད་དང༌། །ཆུ་འགགས་སྨུག་པོ་དུག་ཚད་སེལ་བའི་མཆོག །བ་
གསར་དམར་སེར་ཆུ་ལ་ཁཎྜ་བྱ། །སྐྱ་རྦབ་འོར་ནད་དམུ་ཆུ་མཛེ་ནད་དང༌། །དབྱིག་དུག་ཚད་
རྙོགས་ཆུ་སེར་མ་ལུས་སྦྱོང༌། །སྟར་བུའི་ཁཎྜ་འབྲས་བུ་བཙོས་བྱས་ལ། །རུས་པ་ཕྱུངས་ལ་
ཁུ་བ་ཁཎྜར་བསྡུ། །གློ་ནད་བད་ཀན་ཁྲག་སྐྲན་འདྲིལ་བ་བཤིག །ཤུག་པའི་འབྲས་བུ་ཁཎྜ་
25-1-562


བུ་རམ་སྦྱར། །རྐང་ལག་ཆུ་སེར་ཚ་བ་ཐམས་ཅད་སྐེམ། །ར་མཉེ་ལྕ་བའི་ཁཎྜ་བུ་རམ་སྦྱར། །
མཁལ་རྐེད་སྨད་ཀྱི་ཆུ་སེར་གྲང་བ་འཇོམས། །སེང་ལྡེང་ཁཎྜ་མཛེ་ལ་མཆོག་ཏུ་ཕན། །ལྡུམ་
བུ་ཟངས་རྩིའི་ཁཎྜས་མཁྲིས་ནད་སེལ། །སྐྱེར་བའི་ཁཎྜ་མིག་ནད་བདུད་རྩི་ཡིན། །འབམ་
པོའི་ཁཎྜས་ཁོང་འབྲས་བཤིག་པར་བྱེད། །དྭ་བ་རྟ་སྦངས་སྤྲུ་རྩའི་ཁཎྜ་ལ། །བྱི་ཏང་ག་དང་
ཤིང་ཀུན་ཙི་ཏྲ་ཀ །དུག་སྣ་སྦྱར་བས་སྲིན་ཐོར་ཤ་བཀྲ་སེལ། །དེ་སོགས་ཁཎྜའི་སྡེ་ཚན་སྦྱར་
བའི་ཐབས། །ས་བཤལ་ཁྲམ་ཁྲུམ་བརྡུངས་བཙོས་ཁུ་བ་བཏོན། །རྔ་མས་ལེགས་བཙགས་
གཙང་མའི་རྫ་ནང་བསྡུ། །མ་འདྲེགས་ཀྲུག་ཅིང་སྐྱོ་མ་སྦུ་ནག་ཅན། །དེ་དུས་ཕོག་ལ་ཐིགས་
གཅིག་རྡོ་སྟེང་བླུག །དེ་གྲང་དྲིལ་དུ་བཏུབ་ན་ཚོས་ཚད་ཡིན། །མཐའ་ཡི་འདྲེགས་པ་མི་བཏང་
དྲོད་བུར་བཙའ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་ཁཎྜའི་སྡེ་ཚན་བསྟན་པའི་ལེའུ་སྟེ་དགུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སྨན་ཆང་སྡེ་ཚན་སྦྱར་བའི་ཐབས་བསྟན་པ། །སྦྲང་གི་ཆང་ལ་རྐྱང་ཁུག་
ཡོངས་རྫོགས་གསུམ། །སྦྲང་ཆང་རྐྱང་པ་སྦྲང་རྩི་བྲེ་གང་དང༌། །ཆུ་བྲེ་དྲུག་བསྲེས་བཙོས་ལ་
རྔ་མས་བཙགས། །བྲེ་དོར་དུ་ནས་ཆུ་བྲེ་གང་བླུག་ལ། །ངད་བསད་བཟར་བུས་ཕྱར་ཏེ་འོ་
དྲོད་ཙམ། །ཕབས་རྡོག་སྙིམ་གང་གྲིས་དྲིས་རྔ་མར་ཕུར། །ཅོང་ཞིའི་གཏིང་རྡོ་ལྡིང་ཐག་ཤིང་
ལ་གཏོད། །སུག་སྨེལ་ཐུན་གཅིག་བཏགས་ལ་བཏབ་སྟེ་མནན། །ཞག་དུས་བསྲོས་ཀྱིན་
ཞག་གསུམ་བར་དུ་བཞག །ལངས་ན་སྐྱུར་མནམ་སྦུ་བ་ཕྱིར་གྱིས་འོང༌། །དེ་ལ་ཚ་བ་གསུམ་
པོ་ཁ་ཚར་བཏབ། །རྒོངས་དང་ཐོ་རངས་ཇ་སུན་ཙམ་རེ་བསྟེན། །རླུང་ཚབས་ཆུ་སེར་སྡོངས་
ནས་ཚིགས་བྱེར་སེལ། །རུས་ཚད་མཁལ་ཚད་རླུང་ལྡན་ཆུ་སེར་འདོན། །ཁུག་པ་ཆུ་སེར་རླུང་
ལྡན་བུ་རམ་བསྣན། །ཡོངས་རྫོགས་ཆུ་སེར་ཚ་བ་སེང་ལྡེང་བསྣན། །མེ་ཏོག་ཀུན་དང་ཁྱད་
25-1-563


པར་གཡར་མོ་ཐང༌། །བཏུས་སྐམས་བུམ་པར་བསྡིགས་ལ་ཆུ་ཡིས་བསིང༌། །ཁུ་བ་བཞུར་
ཏེ་སྦྲང་རྩི་ཕུལ་གང་སྦྱར། །འོ་དྲོད་ཙམ་བསྲོས་ཞག་གསུམ་མནན་ལ་བཞག །པུཥྤེ་སྦྲང་ཆང་
ཞེས་བྱ་སྦྲང་དང་མཉམ། །བུར་ཆང་ནས་དང་གཟེ་མ་གྲོ་དང་གསུམ། །བཙོས་ཏེ་ལངས་པའི་
གླུམ་ལ་བུར་ཆུས་བསིང༌། །རླུང་ནད་མ་ལུས་སེལ་བར་བྱེད་པ་སྟེ། །ཁྱད་པར་གློ་སྙིང་མཁལ་
རུས་རླུང་ཚབས་འདོན། །ཡང་ན་ནས་ཆང་བུ་རམ་སྦྱར་བ་ཡང༌། །བུ་རམ་བུར་ཆང་ཞེས་བྱ་
རླུང་ཀུན་འཇོམས། །མར་ཆང་སྦྱོར་བ་ཆང་ནང་བུ་རམ་སྦྲང༌། །མར་དང་གོ་སྙོད་པི་པི་ལིང་
དུ་སྦྱར། །རྩེ་འཇམ་ཞག་གསུམ་མནན་པས་གྲང་རླུང་སེལ། །རླུང་ཚབས་མགོ་དང་མིག་ལ་
བྲོས་པ་འདོན། །གཟེ་ཆང་གཟེ་མ་ནས་བསྲེས་གླུམ་ནང་དུ། །གཟེ་མ་ཆུར་བསྡུས་ཁུ་བས་
བསིངས་པ་ནི། །རུས་ཚིགས་མཁལ་མའི་རླུང་དང་ཆུ་སེར་འཇོམས། །ཁྱད་པར་རླུང་ཚབས་
མཁལ་མར་བབས་པ་འདོན། །རུས་ཆང་སྦྱོར་བ་གཞུག་ཆུང་རུས་པ་འམ། །ཐོང་ཚེར་རུས་
པ་བུབས་གཅིག་ཞིབ་བརྡུངས་ལ། །མཆན་བསྲེས་གླུམ་ལ་བུ་རམ་ཆུས་བསིངས་པ། །རླུང་
ནད་ཀུན་སེལ་རུས་པའི་རླུང་ཚབས་འདོན། །སྲོ་ལོའི་ཆང་སྦྱོར་སྲོ་ལོ་ཆུར་སྦངས་པས། །གྲོ་
ཆང་བསིངས་པ་གློ་ཚད་རླུང་ལྡན་སེལ། །ཏིག་ཏའི་ཆང་སྦྱོར་ནས་དཀར་སེར་ཙམ་བརྔོས། །
དེ་ཡི་གླུམ་ལ་ཏིག་ཏ་ཨ་རུ་རའི། །ཁུ་བས་ཆང་བསིངས་ཚད་རྙིང་རླུང་ལྡན་སེལ། །ཀྱི་ལྕེས་
བསིངས་ན་ཚ་བ་ཆང་འཐུང་ཡིན། །དེ་བཞིན་སྙིང་ལ་ཛཱ་ཏི་རུས་ཆང་སྦྱར། །གློ་ཡི་ནད་ལ་རྒུན་
འབྲུམ་བུར་ཆང་སྦྱར། །བད་ཀན་ན་ལེ་ཤམ་གྱི་འབྲུ་ཆང་སྦྱར། །ལྒང་པའི་གྲང་བ་རྒྱ་ཚྭའི་ཚྭ་
ཆང་སྦྱར། །ཆུ་སེར་ནད་ལ་སེང་ལྡེང་སྒྲུངས་ཆང་སྦྱར། །དུག་ནད་ཟུངས་ཟད་གཙོ་བོ་དྲུག་ཆང་
(རྣམ་པར། རེ་རལ། འོམ་བུ། སྤང་རྩི། ཧོང་ལེན། ཏིག་ཏ།)སྦྱར། །གཞན་ཡང་ནད་དང་གང་འཕྲོད་སྨན་ཆུས་
བསིངས། །ཡང་ན་སྨན་ཕྱེ་ཆང་སྦྱར་མནན་པ་ཡིས། །ཕོ་བའི་དྲོད་སྐྱེད་རླུང་གནོན་ནད་སེལ་
འགྱུར། །ཟན་ཆང་སྦྱོར་བ་ར་མཉེ་ལྕ་བ་དང༌། །གཟེ་མ་ལྕམ་པ་ཡོས་བསྲེས་ཕྱེར་བཏགས་ལ།  །
25-1-564

 
ཟན་དྲོན་ཕབས་བྲན་ལངས་ནས་ཆང་དུ་བསིང༌། །རྙིངས་ནས་མཉེས་ལ་བུ་རམ་སྒ་དང་མར། །
བཏབ་བཙོས་ལྟོར་བསྟེན་གྲང་རླུང་མ་ལུས་འཇོམས། །ཁྱད་པར་མཁལ་རྐེད་གཟེར་དང་
རྐང་ལག་བཤལ། །ཚིགས་གཞི་སྐྲངས་དང་ད་རྒན་རྣ་བ་འོན། །གྲང་བས་ཆུ་འགགས་སྨད་ཀྱི་
དྲོད་ཤོར་སེལ། །རྐང་པ་མན་ཆད་གྲང་རྣག་འབྱམས་པ་གཅོད། །ཅེས་གསུངས་སོ། །བདུད་
རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྨན་ཆང་གི་སྡེ་ཚན་བསྟན་
པའི་ལེའུ་སྟེ་བཅུ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ཞི་བྱེད་རྒྱལ་པོ་རིན་ཆེན་སྦྱོར་སྡེ་བཤད། །ཐང་ཕྱེ་རིལ་བུ་ལྡེ་གུ་སྨན་མར་
སོགས། །ཡང་ཡང་བསྟེན་པས་སྨན་འདྲེད་ནད་མ་ཐོན། །ཞི་བྱེད་ཀུན་གྱི་ལོག་གནོན་རིན་པོ་
ཆེ། །ཁྲག་མཁྲིས་བད་རླུང་བཞི་བརྒྱ་རྩ་བཞིའི་ནད། །མགོ་དང་བྱང་ཁོག་ཡན་ལག་རྨ་རྣམས་
དང༌། །དམུ་འོར་མཛེ་འབྲས་གག་ལྷོག་གཉན་ནད་དང༌། །ཀླུ་གཉན་རྒྱལ་པོ་ལ་སོགས་འབྱུང་
པོའི་གདོན། །རིན་པོ་ཆེ་ཡིས་མི་སེལ་འགའ་ཡང་མེད། །ནད་གཞི་མེད་པའི་མི་ལ་བཅུད་ལེན་
འགྱུར། །སྦྱོར་བ་ཚ་སྦྱོར་གྲང་སྦྱོར་རྣམ་པ་གཉིས། །རིན་ཆེན་ཚ་སྦྱོར་གསེར་དངུལ་ཟངས་
ལྕགས་བཞི། །སྦྲང་གཤོག་ཙམ་དུ་བརྡུངས་ལ་དུམ་བུར་གཏུབས། །ཞི་ཀའི་ཀོང་བུར་བླུག་
སྟེང་དངུལ་ཆུ་བླུག །དེ་སྟེང་ཚ་ལ་མུ་ཟི་བླུག་པར་བྱ། །དེ་ཡི་ཁ་རུ་ལྕི་ཐལ་དམ་པར་བསྡིག །
དེ་སྟེང་འདག་པས་ཁ་བཅད་སོལ་མེས་བསྲེག །ཐལ་བ་མུ་ཟི་གུ་གུལ་སོ་མ་ར། །ཤུ་དག་ཙི་
ཏྲ་ཀ་དང་ཚ་བ་གསུམ། །རེ་སྐོན་སེང་ལྡེང་འགྲོན་ཐལ་ཞིབ་པར་བཏགས། །དངུལ་ཆུ་ཞོ་ཕྱེད་
སྟར་བུ་གཅིག་གིས་བཤིག །ཨ་རུ་ཆང་སྦངས་ཁུ་བ་བ་ཆུ་གཉིས། །ཁཎྜར་བཅོས་ལ་གོང་མ་
རྣམས་དང་སྦྱར། །རིལ་བུ་སྲན་མ་ཙམ་དྲིལ་ཐོ་རངས་དུས། །ལྔ་བདུན་དགུ་བསྐྱེད་ཆང་གིས་
འཕུལ་ལ་བཏང༌། །དྲེག་དང་གྲུམ་བུ་འབྲས་དང་སུར་ཡ་མཛེ། །རྩ་ནད་ཚ་སྐྲན་དམུ་འོར་
25-1-565


གྲང་རྣག་སྐེམ། །རིན་ཆེན་གྲང་སྦྱོར་བསྟེན་ཐབས་སྦྱོར་བ་དང༌། །ལོག་གནོན་གསུམ་ལས་
བསྟེན་ཐབས་རྣམ་པ་དགུ། །གཡའ་ཕྱི་དུག་འདོན་འཇམ་བཙལ་སྣ་ཁྲིད་དང༌། །བཤིག་དང་
རྩ་ཁ་དབྱེ་དང་སྣོད་བཏང་དང༌། །ཕྱི་བསྲུང་བ་དང་ནུས་པ་བསྐྱེད་པའོ། །དང་པོ་ཚ་བ་གསུམ་
དང་དངུལ་ཆུ་གཉིས། །གླ་ཧེལ་ནང་དུ་གཡའ་མ་ཐོན་པར་མཉེ། །དེ་རྗེས་བ་ཆུར་བཏགས་
ལ་གཡའ་ཁུ་འདོན། །དུག་འདོན་ཅོང་ཞི་དྲི་ཆུར་སྐམས་སྐམས་བཙོ། །འཛམ་བཙལ་པི་པི་
ལིང་དང་ཕོ་བ་རིས། །ཅོང་ཞི་ནག་མཚུར་བུལ་ཏོག་རྣམ་པ་ལྔ། །ནད་གཞིར་བསྟུན་ཏེ་ཚད་
ལྡན་སྦྱར་བར་བྱ། །སྣ་ཁྲིད་ལ་ཆ་དབྱི་མོང་ནད་དང་སྤྲོད། །ཚ་གྲང་གཉེན་པོར་གང་ཤིས་
ཁ་ལོ་བསྒྱུར། །བཤིག་པ་དངུལ་ཆུ་སྟར་བུ་ལོག་པོར་བཏང༌། །མཆིལ་མ་བ་ཆུས་འབྲུམ་བུ་
མེད་པར་མཉེ། །རྩ་ཁ་འབྱེད་པ་ཚྭ་སྡོར་གཡེར་མས་བྱ། །སྣོད་བཏང་བ་ནི་ཟངས་ཀྱི་ཐལ་
བ་སྡེབ། །ཟངས་ཐལ་མེད་ན་ལུས་ལ་རྔུལ་མི་འཆགས། །རིལ་བུའི་སྔོན་དུ་ཞུན་མར་ཞག་
འགའ་བསྟེན། །ཕྱི་བསྲུང་ཚ་(ཚ་ན་མར་དཀར་)གྲང་(གྲང་ན་མར་ནག་)སྦྱར་བའི་མར་གྱིས་བྱུག །ནུས་
པ་སྐྱེད་པ་རིལ་བུ་ཆང་གིས་དབུལ། །ཤ་ཆང་ལྟོར་བསྟེན་སྐབས་སུ་བ་སྤུར་དབྱུང༌། །བསྟེན་
ཐབས་མ་ཤེས་སྦྱོར་བ་དུག་ཏུ་འགྱུར། །སྣོད་ངན་སེང་གེའི་འོ་མ་བཞོས་དང་མཚུངས། །སྦྱོར་
བ་ཆིག་ཐུབ་དང་ནི་ཀུན་རྒྱུག་གཉིས། །དང་པོ་མུ་ཟི་འགྲོན་ཐལ་ཨ་རུ་ར། །སུག་སྨེལ་གསེར་
གྱི་བྱེ་མ་བྱང་སེམས་(བྱང་སེམས་གཉིས་ཚ་ལ་དང་ཅོང་ཞི་ལ་འདོད་པ་དང་། ཅོང་ཞི་དང་བྲག་ཞུན་ལ་འདོད་པ་སོགས་
ཡོད་ཀྱང་། འདི་སྐབས་ཕོ་མོའི་ཁམས་དཀར་དམར་དངོས་སོ།།)གཉིས། །ཀུན་དང་སྟར་བུ་མཉམ་སྟེ་སྦྲང་དང་
སྦྱར། །རྣག་དང་ཆུ་སེར་དམུ་ཆུ་སྐེམ་པར་བྱེད། །གླད་པ་འཛག་གཅོད་རྩ་ནད་བྱེར་འགྲམས་
སེལ། །བཟང་དྲུག་ཙན་དན་དཀར་དམར་འབྲས་བུ་གསུམ། །སྤོས་དཀར་ཐལ་ཀ་རྡོ་རྗེ་སོ་
མ་ར། །དོམ་མཁྲིས་རུ་རྟ་སྦྱར་བའི་རིལ་བུ་ཡིས། །ཚ་རྙོགས་འབྲས་དང་སུར་ཡ་རྩ་ནད་སེལ། །
བཙན་དུག་ཨ་རུ་མུ་ཟི་གླ་རྩི་དང༌། །ཤུ་དག་རུ་རྟ་གུ་གུལ་བཟང་པོ་དྲུག །སྤོས་དཀར་ཐལ་ཀ་
25-1-566


རྡོ་རྗེ་སོ་མ་ར། །སྦྲང་སྦྱར་རིལ་བུས་མཛེ་འབྲས་གག་ལྷོག་དང༌། །དམུ་འོར་སྐྱ་རྦབ་སྐྲངས་པ་
མ་ལུས་འཇོམས། །བཟང་དྲུག་གླ་རྩི་ཙན་དན་དཀར་པོ་དང༌། །བསེ་རུ་གི་ཝཾ་ཆོས་(པི་པི་ལིང་)
སྨན་ཨ་རུ་ར། །བྲག་ཞུན་བོང་ང་དཀར་དམར་ཕྱ་ཚན་(མི་རྟ་ཁྱི་གསུམ་གྱི་ཕྱ་ཚན་ཏེ་བྲུན་ནམ་རྩ་སྔན་མ་རང་
ཟས་སྐོམ་གྱི་སྙིགས་མ་མ་སོང་བ་དེའོ།།)གསུམ། །ཁྱུང་སྡེར་དཔའ་བོ་སེར་པོ་དོམ་མཁྲིས་དང༌། །ཏིག་
ཏ་མ་ནུ་རུ་རྟ་སྐྱེར་བར་ཤུན། །ཀ་ར་སྦྱར་བའི་རིལ་བུས་དུག་ཚད་འཇོམས། །བསིལ་གསུམ་
གི་ཝཾ་གླ་རྩི་བོང་ང་དཀར། །རུ་རྟ་བྲག་ཞུན་གསེར་གྱི་མེ་ཏོག་དང༌། །བྱེའུ་ལ་ཕུག་ཉུང་མའི་
ཁཎྜ་ལ། །རིལ་བུ་དྲིལ་བས་ཤ་དུག་སེལ་བར་བྱེད། །བསིལ་གསུམ་ཙན་དན་དཀར་དམར་
བ་ཤ་ཀ །ཧོང་ལེན་སྐྱུ་རུའི་རིལ་བུས་འཁྲུགས་ཚད་འཇོམས། །གི་ཝཾ་བོང་ང་དཀར་པོ་ཨ་རུ་
ར། །གསེར་གྱི་མེ་ཏོག་བསིལ་གསུམ་ཏིག་ཏ་སྦྱར། །རིལ་བུས་རིམས་ཀྱི་ཚད་པ་སེལ་བར་
བྱེད། །སྦལ་རྒྱབ་མདུང་རྩེ་གངས་ཐིགས་ཅོང་ཞི་དང༌། །ཚ་ལ་གླ་རྩིའི་རིལ་བུས་འབྲུམ་ནག་
སེལ། །བཙན་དུག་གླ་རྩི་གུ་གུལ་ཨ་རུ་ར། །སྦལ་པ་ནག་པོ་ཤུ་དག་རིལ་བུ་ཡིས། །ལྷོག་པའི་
ནད་རིགས་མ་ལུས་འཇོམས་པར་བྱེད། །བཙན་དུག་རྒྱ་ཚྭ་ཐར་ནུ་ཨ་རུ་ར། །རུ་རྟ་ཁྱི་ཡི་མཆེ་
བས་གག་པ་སེལ། །སྤང་རྩི་རེ་སྐོན་ཨ་བོ་གང་ག་ཆུང༌། །དུག་ཉུང་དོམ་མཁྲིས་བྲག་ཞུན་རྒྱུ་
གཟེར་སེལ། །དེ་ལ་སོགས་ཏེ་ནད་གང་གཉེན་པོ་དང༌། །དངུལ་ཆུ་སྦྱར་བས་གསོ་དཀའི་ནད་
རྣམས་སེལ། །གསེར་དང་རྒྱ་རུ་རྒྱ་སྐྱེགས་རྒྱ་ཚྭ་དང༌། །སྣག་ཚ་སྦྲུལ་དང་སྟག་ཤ་བུལ་ཏོག་
དང༌། །མཛོ་དྲེའི་རྒྱུངས་པ་སྦྱར་བས་སྐྱེ་རྒྱུན་གཅོད། །ཀུན་རྒྱུག་དངུལ་ཆུ་མུ་ཟི་སྟར་བུ་དང༌། །
རྒྱ་(འདི་སྐབས་དབང་པོ་ལག་པ་)བྱིན་སྦྲང་ལ་སྦྱར་བའི་ལྡེ་གུ་ལ། །ར་མཉེ་ཉེ་ཤིང་སྦྱར་བས་བཅུད་
ལེན་འགྱུར། །བསེ་རུ་གྭ་(ཤ་བའི་རྭ་ཅོ་འབུར་གྱི་བྱུང་བ་དེ་ལ་རུས་གོ་དོར་ཞེས་པ་དེ་གཏོང་)དོར་འགྲོན་ཐལ་རེ་
སྐོན་དང༌། །ཟངས་ཐལ་མར་གསར་བྱང་ཁོག་རྣག་ཁྲག་སྐེམ། །ཡ་བཀྵ་ར་འགྲོན་ཐལ་ཚ་བ་
གསུམ། །དགོ་རུ་ཐལ་ཚྭ་ཤིང་ཚས་དམུ་ཆུ་སྐེམ། །བཙན་དུག་གུ་གུལ་རྨ་བྱའི་མཁྲིས་པ་སྦྱར།  །
25-1-567

 
བྱུག་དང་ལྟོར་བཏང་མཛེ་ནད་འཇོམས་པར་བྱེད། །ཐལ་ཀ་རྡོ་རྗེ་སེང་ལྡེང་སོ་མ་ར། །སྤོས་
དཀར་སྦྱར་བས་ཆུ་སེར་ནད་ཀུན་སྐེམ། །འགྲོན་ཐལ་བྲག་ཞུན་སླེ་ཏྲེས་དྲེག་ནད་སེལ། །དོམ་
མཁྲིས་གུ་གུལ་སོ་མ་རཱ་ཛ་སྦྱར། །ཁོང་དུ་བཏང་དང་རྨར་བྱུགས་འབྲས་ནད་སེལ། །བསེ་
འབྲས་(བསེ་ཞོའི་འབྲས་བུ་གོ་ཕྱེ་)དངུལ་ཐལ་དར་མཚུར་(ཚ་ལ་བཟང་པོ་) ཤ་རོ་གཅོད། །ལོག་ནོན་བྱིང་
འཐིབས་བཟང་དྲུག་ཀ་ར་སྦྱར། །འཁྲུ་ན་བཟང་དྲུག་ཟངས་ཐལ་སྦྱར་བས་གཅོད། །ཁ་ལ་
རྨ་བྱུང་རྒྱུ་མ་གཟེར་བ་དང༌། །ཕོ་བར་མི་འཇུ་སྐྲན་དུ་འདྲིལ་བ་ན། །གཉེན་པོའི་སྨན་(པི་པི་ལིང་། 
 ཕོ་བ་རིལ། ཅོང་ཞི། ནག་མཚུར། བུལ་ཏོག སྟར་བུ་དང་)དྲུག་བསྐོལ་ཐང་ཚན་མོ་བཏང༌། །ཡང་ན་ཕྱེ་མ་
ཆུ་སྐོལ་ཚ་མོས་དབུལ། །ཟངས་རྒྱུགས་དོན་ལ་སྟར་བུ་བ་ཆུ་བཏུང༌། །མགོ་འཁོར་ཁ་གདོང་
གཡོ་ཞིང་སོ་སྙིལ་ན། །ཤ་ཆང་ཞུན་མར་སྒོག་སྐྱ་བསྟེན་པར་བྱ། །རུས་ཚིགས་འབྲལ་སྙམ་
བྱེད་ན་པི་པི་ལིང༌། །རྒྱ་ཚྭ་རྒྱམ་ཚྭ་སྟར་བུའི་གྲང་ཐང་བཏང༌། །བསྟེན་ཐབས་དགུ་ལྡན་ལོག་
པ་འབྱུང་མི་སྲིད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་རིན་པོ་ཆེ་སྦྱོར་བའི་སྡེ་ཚན་བསྟན་པའི་ལེའུ་སྟེ་བཅུ་གཅིག་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །ཞི་བྱེད་སྡེ་བརྒྱད་རིན་ཆེན་སྦྱོར་བ་རྣམས། །གསོ་བྱའི་ནད་ལ་
མི་སེལ་འགའ་མེད་ཀྱང༌། །ནམ་ཞིག་ལྔ་བརྒྱའི་དུས་སུ་སླེབ་ཙམ་ན། །དབུལ་པོའི་ནད་པ་
རྣམས་ཀྱིས་བསླུར་མི་ཐེག །མཐའ་འཁོབ་ཡུལ་དུ་བཙལ་བས་རྙེད་པ་དཀའ། །ཐག་རིང་
ཡུལ་དུ་བཙལ་བས་ནད་པ་འཆོར། །དེ་ཕྱིར་ས་ལ་སྐྱེས་པའི་སྔོ་རྣམས་ཀུན། །སྐྱེས་ཚད་མཐོང་
ཚད་སྨན་དུ་སྦྱར་ཐབས་ཞུ། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་
པ་ལས། སྟོན་པས་གསུངས་པ། ཀྱེ་མ་ལེགས་སོ་དྲང་སྲོང་ཡིད་ལས་སྐྱེས། །ཁྱོད་ཀྱིས་ཞུས་
པའི་གཏམ་ལ་དེ་ག་བདེན། །ལྔ་བརྒྱ་དུས་ཀྱི་ཐ་མར་སླེབ་པའི་ཚེ། །སྐྱེས་ཚད་མཐོང་ཚད་
25-1-568


སྨན་དུ་མ་འཁོལ་ན། །ནུས་ལྡན་དཀོན་པས་བཙལ་དུ་ག་ལ་རྙེད། །དཔེར་ན་ལྷ་དང་ཀླུ་ཡི་
ནོར་བུ་འདྲ། །རྙེད་ཀྱང་དབུལ་པོའི་ནད་པས་ཅི་ལ་ཐེག །དཔེར་ན་ཟོང་མེད་ཚོང་དུས་འཁྱམ་
པ་འདྲ། །དེ་བས་མཐའ་འཁོབ་དབུལ་པོའི་ནད་བསལ་ཕྱིར། །བྱམས་པའི་སེམས་ཀྱིས་སྔོ་
ཡི་སྦྱོར་བ་བསྟན། འོན་ཀྱང་ནུས་པ་རྩི་བས་སྔོ་རང་ཆེ། །ག་བུར་ཉིད་ཀྱང་ཟིལ་གྱིས་གནོན་
པར་ནུས། །སྔོ་མི་སྐྱེ་བའི་ཡུལ་ནི་གཅིག་ཀྱང་མེད། །དེ་ལ་གཅེས་པའི་ཡན་ལག་བདུན་
ལྡན་དགོས། །སྐྱེ་སར་སྐྱེས་དང་དུས་སུ་བཏུས་པ་དང༌། །སྐམ་སྲད་ལེགས་དང་སོ་མ་རྙིངས་
པ་དང༌། །དུག་འདོན་འཇམ་བཙལ་འཕྲོད་པར་སྦྱར་བའོ། །སྐྱེ་ས་ས་གཙང་ཉམས་དགའ་
བུདྔྷས་བཅགས། །བཀྲ་ཤིས་ཡོན་ཏན་ལྡན་ཞིང་ས་གཞི་གཤིན། །གངས་ཅན་འབིགས་བྱེད་
བསིལ་དྲོད་རང་གནས་སྐྱེས། །ཉི་ཟླའི་སྟོབས་ལྡན་སྐྱེ་སར་སྐྱེས་ཞེས་བྱ། །བཏུ་དུས་རྩ་བ་
ཡལ་ག་སྡོང་པོ་གསུམ། །སྡོང་པོའི་རིགས་ཡིན་རུས་རྩ་ཤ་ནད་སེལ། །སྟོན་ག་རྩི་སྐམ་དུས་
སུ་བཏུ་བར་བསྔགས། །ལོ་མ་ཞོ་དང་མྱུ་གུ་རྣམ་པ་གསུམ། །ལོ་མའི་རིགས་ཡིན་སྣོད་རྐང་ལྷ་
ནད་སེལ། །འདབ་རྒྱས་ཆར་གྱི་དུས་སུ་བཏུ་བར་བསྔགས། །མེ་ཏོག་འབྲས་བུ་རྩེ་མོ་རྣམ་པ་
གསུམ། །འབྲས་བུའི་རིགས་ཡིན་མིག་དོན་མགོ་ནད་སེལ། །སྟོན་སེར་སྨིན་པའི་དུས་སུ་བཏུ་
བར་བསྔགས། །ཀོགས་པ་བར་ཤུན་ཚི་བ་རྣམ་པ་གསུམ། །ཤུན་པའི་རིགས་ཡིན་པགས་རྒྱུས་
ཡན་ལག་སེལ། །ཁ་འབུས་དཔྱིད་ཀྱི་དུས་སུ་བཏུ་བར་བསྔགས། །བཤལ་སྨན་རྩི་སྐམས་
ནུས་པ་གཏིང་འགྲོའི་དུས། །སྐྱུགས་སྨན་ཁ་འབུས་གྱེན་འདྲེན་དུས་སུ་བཏུ། །ཁྱད་པར་ཟླ་
བ་ཡར་ངོའི་དུས་བཟང་ལ། །གཙང་མའི་བྱིས་པ་ཁྲུས་བྱས་མཛེས་པར་བརྒྱན། །གཟུངས་
སྔགས་རྟེན་འབྲེལ་སྙིང་པོ་བཟླ་ཞིང་བཏུ༌། དུག་དང་ཕྲལ་བ་རྩ་སྡོང་པགས་རྐང་དུག །ཡལ་
གའི་ཚིགས་དུག་ངར་པ་ལོ་མའི་དུག །མེ་ཏོག་གོས་དུག་རུས་པ་འབྲས་བུའི་དུག །ཞོ་རྐང་ཚི་
བ་གསུམ་ལ་དུག་མེད་དེ། །དྲེག་པ་པགས་དུག་ཤ་གདན་བར་ཤུན་དུག །དུག་ཕྲལ་སྨན་ནི་
25-1-569


འཇམ་ཞིང་འཇུ་བ་བླ། །སྐམ་སྲད་གང་ཡང་བཏུ་དུས་རྨ་ཕབ་ལ། །བསིལ་སྨན་གྲིབ་ལྷགས་
དྲོད་སྨན་མེ་ཉིས་སྐེམ། །གསེར་གྱིས་མ་ཞིག་མེ་ཉིས་མ་གདུངས་པ། །དུ་བ་མ་ཕོག་གཞན་
གྱི་དྲི་མ་གོས། །རང་གི་ནུས་ལྡན་ཡོན་ཏན་དཔག་ཏུ་མེད། །སོ་མ་རྙིངས་པ་ལོ་དུས་མ་ལོན་
པ། །དུས་འདས་ནུས་པ་འཆོར་ཕྱིར་ལོ་དུས་སྤོ། །འཇམ་བཙལ་གསུམ་སྟེ་སྦྱོར་བས་འཇམ་པ་
དང༌། །ཁ་འཛིན་འཇམ་དང་གཉན་པོས་འཇམ་པའོ། །སྦྱོར་བས་འཇམ་པ་རིགས་མཐུན་མང་
སྣ་སྤྲད། །ཁ་འཛིན་འཇམ་པ་ཕོ་བ་དོན་སྣོད་རྣམས། །གང་ལ་བབས་པའི་ཁ་འཛིན་བཅས་
ཏེ་བསྟེན། །གཉེན་པོས་འཇམ་བཙལ་སྔོ་རྣམས་ཐམས་ཅད་ཀུན། །རླུང་འབུད་ཕོ་བའི་མེ་
གསོད་ལུས་ཟུངས་སྐེམ། །དེ་ཕྱིར་རླུང་གནོན་ཤ་ཆེན་བུར་རྙིང་སྟེ། །ཕོ་བའི་མེ་གསོ་སེ་འབྲུ་
པི་པི་ལིང༌། །ལུས་ཟུངས་རྒྱས་པར་བྱེད་ལ་ཨ་རུ་ར། །དེ་རྣམས་མ་འཛོམ་ཁཎྜ་ཤིས་པ་ཡིན། །
འཕྲོད་པར་སྦྱར་བ་གནད་(རོས་ལས་བྱེད་པའི་གནད་དང་། ནུས་པས་ལས་བྱེད་པའི་གནད་དང་། ཞུ་རྗེས་ཀྱིས་
ལས་བྱེད་པའི་གནད་དང་)གསུམ་ཤེས་པ་ཡིས། །བསིལ་དྲོད་མ་འདྲེས་མཐུན་བསྡེབས་སྦྱར་བྱས་
ཏེ། །ཚ་སེལ་གྲང་སེལ་གཉིས་སུ་ཤེས་པར་བྱ། །ཚ་སེལ་ཐུན་མོང་བ་དང་ཁ་སྒྱུར་གཉིས། །
ཐུན་མོང་སྔོ་སྦྱོར་རྒྱལ་པོ་བཙུན་མོ་སྲས། །བློན་འབངས་དམག་དཔོན་དམག་མི་ཆིབས་པར་
བཅས། །རྒྱལ་པོ་ཟླ་བ་བསིལ་བའི་བདུད་(གཡའ་སྐྱིམ་)རྩི་སྟེ། །བཙུན་མོ་རེ་སྐོན་སྲོ་ལོ་འཇིབ་
རྩི་སྲས། །བློན་པོ་སྒོང་(འདྲེ་དཔལ་དགའ་)ཐོག་པ་དང་པར་པ་ཏ། །ཏིག་ཏ་སྤང་རྩི་ཧོང་ལེན་ཤ་
(ཁྱི་ལྕེ་)ལང་འབངས། །བློན་འབངས་དྲུག་པོ་ནད་རིགས་ཁ་བསྒྱུར་ཏེ། །ཐུན་ལོག་སྦྱར་བ་ནད་
འཇོམས་དམག་དཔོན་ཡིན། །དམག་མི་བསིལ་བའི་སྔོ་སྣ་གང་ཚོགས་སྦྱར། །འདི་རྣམས་
ཆིབས་པ་གངས་ཀྱི་ཆུ་ལ་སྐྱོན། །མ་སྨིན་གབ་ཚད་སུམ་གཉིས་བསྡུས་འཇམ་བཏང་། །ཚ་བ་
རྒྱས་པའི་དུས་ན་ཆུ་བསིལ་ཤིས། །རྙིངས་ཚད་བསྡུས་གྲངས་སྟོངས་ཚད་ངད་ཡལ་བསྟེན། །
ཁ་བསྒྱུར་སྔོ་སྦྱོར་བདུན་པ་སྦྱར་ཐབས་ནི། །ཧོང་ལེན་སྤང་རྩི་རེ་སྐོན་ཀྱི་ལྕེ་བཞི། །གཙོ་བོ་
25-1-570


རྒྱལ་པོ་སྡེ་བཞིས་གཞི་བཟུང་ལ། །བློན་པོ་སྤུན་མང་ནད་སྟེང་ཁ་བསྒྱུར་བ། །དེ་བ་སྔོ་སྤྲིན་སྐྲ་
(པར་པ་ཏ་)བཟང་རིམས་ཚད་སེལ། །སྟབ་སེང་རྟ་པགས་རི་(འབྲི་མོག་)ཚོས་འགྲམས་ཚད་སེལ། །
སྲོ་ལོ་སྒོང་ཐོག་བོང་ངས་འཁྲུགས་ཚད་འཇོམས། །བོང་ང་ཨ་བོ་རེ་རལ་སྦྱར་དུག་འཇོམས། །
འོམ་བུ་སྒོང་ཐོག་བྱེ་འུས་ཤ་དུག་འཇོམས། །གང་ག་ཆུང་བཙོད་བོང་ངས་ཚད་འཁྲུ་འཇོམས། །
སྲན་མ་གཡེར་ཤིང་བཙོད་ཀྱིས་འབྲུམ་ནག་སེལ། །ཆིག་(གཉན་གྱི་ཚིག་ཐུབ་འཛིན་པ་)ཐུབ་སྟག་
ཤ་མིང་(གཟེར་འཇོམས་ཏེ་ལུག་མིག་རྒོད་གཡའ་ལ་སྐྱེ་བ་)ཅན་གག་ལྷོག་འཇོམས། །ཨ་བྱག་དུག་(ར་དུག་
མེ་ཏོག་)པུས་སྤྲུ་རྩས་གཉན་གཟེར་འཇོམས། །མ་ནུ་ལུག་ཆུང་ཁུར་རྩས་སྨུག་པོ་སེལ། །སྟབ་
སེང་ཨ་བྱག་སྲོལ་གོང་མགོ་ཆག་གསོ། །རྣམ་པར་ཁྲག་རྐང་འབམ་པོས་ཡན་ལག་གི །ཆུ་
འཐུང་ཚད་པ་གཅོག་པར་བྱེད་པ་ཡིན། །རྒུ་དྲུས་སྤང་ཚན་སྤུ་རུ་དར་ཡ་ཀན། །བྱང་ཁོག་དོན་
འབྱོར་ཁྲག་སྐེམ་རྩ་ཆད་འཐུད། །ཕུར་ཐལ་སྟག་ཤ་འགྲོན་བུའི་ཐལ་བ་ཡིས། །བྱང་ཁོག་རྣག་
ཁྲག་ཆུ་སེར་སྐེམ་པར་བྱེད། །བཙོད་དང་འབྲི་མོག་ལུག་ཆུང་ཁྲག་ཚད་སེལ། །རྩ་མཁྲིས་བོང་
ང་སྐྱེར་པས་མཁྲིས་ཚད་སེལ། །སེ་(བ་མེ་ཏོག་དམར་པོ་ཡོད་པ་)རྒོད་སྐྱེར་པ་སྤ་འབྲུམ་ཆུ་སེར་སེལ། །
མཚན་དཀར་སྙི་བ་རྒོད་སྤོས་རྙིངས་ཚད་སེལ། །སྲོ་ལོ་སུག་འདྲ་སྤང་རྒྱན་གློ་ཚད་སེལ། །རྩི་
འུ་སུམ་ཅུ་ཏིག་མཚེ་མཆིན་ཚད་སེལ། །རྒོད་སྤོས་བྱི་ཚེར་ཁྲག་རྐང་མཆེར་ཚད་སེལ། །ཤུག་
ཚེར་བྱི་ཚེར་ཉི་དགས་མཁལ་ཚད་སེལ། །ཁུར་རྩ་སྙ་ལོ་འཇིབ་རྩིས་ཕོ་ཚད་སེལ། །སྙ་ལོ་བོང་
ང་བཙོད་ཀྱིས་རྒྱུ་ཚད་སེལ། །དེ་བ་ཡུང་བ་སྐྱེར་ཤུན་ཤ་ཚད་སེལ། །ལུག་རུ་བྲག་སྤོས་སྙི་བས་
རྩ་ཚད་སེལ། །སྟབ་སེང་སེ་རྒོད་གང་ཆུང་རུས་ཚད་སེལ། །ཐང་ཕྱེ་ཕོ་བའི་མེ་དྲོད་ཚ་སྟོབས་
སྦྱར། །ཕྱེ་མ་ཀ་རས་ཁ་བླང་གཅེས་པ་ཡིན། །གྲང་སེལ་དབྱི་མོང་ད་ལིས་སྟར་བུ་དང༌། །ཅོང་
ཞི་རྒོད་བཏུལ་བཞི་ཡིས་གཞི་བཟུང་ལ། །དེ་ལ་ལ་ཕུག་འཛིམ་དང་པི་པི་ལིང༌། །ཁ་བསྒྱུར་ཕོ་
བའི་མེ་དྲོད་སྐྱེད་པར་བྱེད། །སྲན་མ་ཕབས་དང་བུལ་ཏོག་ཙམ་པ་འཇུ། །ལྕེ་ཚ་ཟ་འབྲུ་འཛིམ་
25-1-571


(ནི་བྱང་འཛིམ་ཏེ་སྒོག་པའི་རིགས་)སྦྱར་སྔོ་ངད་འཇུ། །ཟེ་ཚྭ་བྱ་ཐལ་སྲུབ་ཀས་སྐྲན་འདྲིལ་བཤིག །བྱི་
ཟུང་(ནི་ལྕ་ནག་ལ་ངོས་འཛིན་པའང་ཡོད་ཀྱང་། ལོ་མ་མེ་ཏོག་སྲན་མ་འདྲ། གང་བུ་ཉའི་ཚིགས་པ་འདྲ་ཞེས་པའི་སྔོ་དེའོ།།)
ཟེ་ཚྭ་བ་སྤྲུས་རྡོ་སྐྲན་བཤིག །མཛེ་ཚྭ་བ་སྤྲུ་པ་ཡག་མངལ་སྐྲན་བཤིག །ལྕེ་ཚ་སྲུབ་ཀ་འགྲོན་
ཐལ་དམུ་རྫིངས་སྐེམ༌། ལྕ་བ་བ་སྤྲུ་ར་མཉེས་སྐྱ་རྦབ་འཇོམས། །བྲེ་ག་རྒོ་རོང་(ཏེ་བ་སྤུའི་རྩ་བ་
)རྩི་(པྲི་ཡང་ཀུ་)འུས་གློ་ནད་སེལ། །སེ་རྒོད་འཇིབ་རྩི་དྲོད་སྨན་མཆིན་ནད་སེལ། །ལྕ་བ་བ་སྤྲུ་
གཟེ་མས་མཁལ་ནད་སེལ། །བྲེ་ག་སྤ་འབྲུ་ར་མཉེས་ཆུ་སེར་སེལ། །ར་མཉེ་ཉེ་ཤིང་ཤ་རུས་
གྲང་རྣག་གཅོད། །ཀུན་ལ་བུར་དཀར་རྟ་སྦྱར་ཆུ་སྐོལ་དབུལ། །གཞན་ཡང་རྩ་བ་(ཉི་ཤིང་པ། ར་
མཉེ། བ་སྦྲུ། ལ་ཕུག ལྕ་བ། ཙོང་སྒོག་)དྲུག་དང་ལོ་མ་(ལྕེ་ཚ། སྲུབ་ཀ ད་ལིས། ཟ། སྤྱི་མོང་)ལྔ། །མེ་ཏོག་(བྱི་ཟུང་
)གཅིག་དང་འབྲས་བུ་རྣམ་པ་བཞི(གཟེ་མ། ལྕམ་པ། སྟར་བུ། ཐང་ཁྲོམ་པ)། །ཚ་གསུམ་(ཟེ་ཚྭ། བུལ་ཏོག
ཚོད་ཚྭ་)ཐལ་བ་གཉིས་(ཅོང་ཞི་རྒོད་བཏུལ། བྱ་ཐལ་)དང་བུ་རམ་སྦྱར། །ཆུ་ཚན་འཕུལ་བས་གྲང་ནད་
མ་ལུས་སེལ། །མཐའ་འཁོབ་ཡུལ་གྱི་སྔོ་སྦྱོར་མན་ངག་འདི། །སེམས་ལ་ལོང་ལ་བྱམས་པས་
འགྲོ་དོན་གྱིས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་
གི་རྒྱུད་ལས་སྔོ་སྦྱོར་གྱི་སྡེ་ཚན་བསྟན་པའི་ལེའུ་སྟེ་བཅུ་གཉིས་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ལས་ལྔའི་སྔོན་འགྲོ་སྣུམ་འཆོས་རུང་མི་རུང༌། །བསྟེན་ཐབས་ལེགས་ཉེས་
དེ་ཡི་ལོག་གནོན་ནོ། །སྣུམ་རུང་རྒས་སྦེག་སྟོབས་ཆུང་སེམས་ལས་ཆེ། །ལྟོ་སྐྱ་ཁྲག་ཟགས་
ཁོང་རྩུབ་ཁུ་བ་ཟད། །རླུང་ཆེ་མིག་འགྲིབས་སྦྱང་བ་དགོས་ལ་བཏང༌། །མི་རུང་མེ་དྲོད་ཆུང་
བ་མ་ཞུ་འཁྲུ། །དྲེག་གྲུམ་དབྱིག་དུག་ཡི་ག་འཆུས་པ་དང༌། །བད་ཀན་སྐྱུག་ནད་སྐོམ་དད་ཆེ་
ལ་སྤང༌། །བསྟེན་ཐབས་སྤྱི་དང་བྱེ་བྲག་རྣམ་པ་གཉིས། །དང་པོ་འབྲུ་མར་ཞུན་མར་རྐང་མར་
ཚིལ། །ལུས་དང་མགོ་བསྐུ་འཇམ་རྩི་ཁོང་དུ་བཏང༌། །རྣ་བ་མིག་དང་མཁུར་བཀང་སྣ་ནས་
25-1-572


དགང༌། །ནད་དང་ཇི་ལྟར་འཚམ་པ་བཞིན་དུ་སྦྱར། །བཟའ་བའི་ཐུན་ཚད་མེ་དྲོད་འཇུ་སྟོབས་
དཔག །ཆུང་འབྲིང་ཆེན་པོ་རིམ་པས་བསྐྱེད་ལ་བཏང༌། །རྟག་ཏུ་ལྟོ་སྐྱིད་སྣུམ་ལ་གོམས་པ་
ལ། །སྔོན་ལ་རྩུབ་འཆོས་བྱས་ལ་དེ་རྗེས་བསྟེན། །ལྟོ་སྐྱ་ཁོང་རྩུབ་སྣུམ་གཏོང་ལན་ཚྭར་
སྡེབ། །སྣུམ་འཆོས་ཀུན་ལ་ཆུ་ཚན་འཇུ་རྩི་ཡིན། །སྔོ་ངད་རུལ་སྐྱུར་རྗེན་ཟས་སྤང་བྱས་ལ། །
ཡང་ཞིང་དྲོ་ལ་འཇུ་བླ་ཅུང་ཟད་བསྟེན། །བུད་མེད་དྲག་ཤུལ་མྱ་ངན་མང་དུ་སྨྲ། །རྟ་ཞོན་ཉིན་
གཉིད་ཆུ་རླུང་དུད་པ་སྤང༌། །ཁྱད་པར་སྨན་མར་ལ་སོགས་ཞི་བྱེད་སྣུམ། །ལྟོ་སྟོང་ཟས་དང་མ་
སྦྲགས་རྐྱང་པར་བཏང༌། །ཚེ་རིང་མེ་དྲོད་སྐྱེད་ཅིང་དྲན་པ་གསལ། །བློ་འཕེལ་འདོད་ལ་ཞུན་
མར་བསྟེན་པར་བྱ། །རླུང་འཕེལ་ལྟོ་སྲ་མཁྲང་འདོད་འབྲུ་མར་ཕན། །དྲོད་ཆེ་བུ་བཙས་རྗེས་
དང་རྩོལ་བས་དུབ། །ཟུངས་ཟད་རྩ་སྦུགས་འགགས་ལ་རྐང་ཚིལ་ཕན། །རྨ་དང་མེས་ཚིག་
རུས་ཚིགས་ན་བ་དང༌། །ལྟོ་མངལ་རྣ་གླད་ན་ལ་ཚིལ་མཆོག་ཕན། །ཞུན་མར་དགུན་དུས་འབྲུ་
མར་དབྱར་བཏང་བསྔགས། །རྐང་ཚིལ་དཔྱིད་དུས་ཉིན་མོར་བསྔགས་པ་ཡིན། །སྦྱོང་བྱེད་
སྣུམ་འཆོས་ཐོ་རངས་ཞུན་མར་བཏང༌། །ཁོང་སྣུམ་བར་བསྟེན་དེ་ནས་མི་ཕན་འདྲེད། །བརྟ་
བྱ་བྱིས་པ་རྒས་དང་སྐྱིད་པར་འདུག །སྣུམ་འདྲིས་མེ་དྲོད་ཆུང་དང་སྐོམ་དད་ཆེ། །སྟོབས་ཆུང་
སོས་དུས་ཤ་ཁུ་ཡོས་ཐུག་འབྲས། །སྦྲང་དང་བུ་རམ་ཞུན་མར་སྦྱར་ཏེ་བཏང༌། །འཇུ་བླ་དང་
ག་མི་འགག་སྟོབས་སྐྱེད་མཆོག །དེ་དག་ཟོས་རྗེས་ཟས་གོང་ཟས་བར་དུ། །སྣུམ་བསྟེན་ལུས་
ཀྱི་སྟོད་སྨད་བར་ལ་ཤིས། །སྣུམ་ལེགས་ཁོང་སྣུམ་གྱུར་ཚད་རླུང་བདེར་རྒྱུ། །བཤང་བ་མི་སྲི་
དྲོད་ཆེ་སྣུམ་མི་འདོད། །ཕན་ཡོན་མདོག་སྟོབས་དབང་གསལ་རྒས་ཀ་སྲ། །སྣུམ་དྲགས་གྱེན་
ཐུར་སྣུམ་འབྱུང་དང་ག་འགག །དཔྱིད་སོས་འབྲུ་མར་བསྟེན་ན་བད་མཁྲིས་སློང༌། །དགུན་
དུས་ཚིལ་བསྟེན་ལུས་འཁྱགས་མ་ཞུ་སྐྱེད། །ལོག་གནོན་བཀྲེས་སྐོམ་དུགས་བྱ་སྐྱུག་ཏུ་གཞུག །
སྲན་མ་སོ་བ་དར་རྙིང་དྭངས་ཆང་བསྟེན། །ཞེས་གསུངས་སོ། །བདུད་རྩི་སྙིང་པོ་ཡན་ལག་
25-1-573


བརྒྱད་པ་གསང་བ་མན་ངག་གི་རྒྱུད་ལས་ལས་ལྔའི་སྔོན་དུ་འགྲོ་བ་སྣུམ་འཆོས་ཀྱི་ལེའུ་སྟེ་
བཅུ་གསུམ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ལས་ལྔའི་མཆོག་གྱུར་བཤལ་ལ་བརྟག་པ་དང༌། །བཏང་ཐབས་སྐྱོན་ཡོན་
རྣམ་པ་བཞི་ཡིས་བསྟན། །དང་པོ་རུང་དང་མི་རུང་ནད་གཞི་བརྟག །རན་དང་མི་རན་དུས་
ཚོད་བརྟག་པ་དང༌། །ཐུབ་དང་མི་ཐུབ་ལུས་ཤེད་བརྟག་པར་བྱ། །རུང་བ་རིམས་འཁྲུགས་ཚ་
བ་སྨིན་རྒྱས་དང༌། །དུག་དང་སྣོད་ཚད་མ་ཞུ་སྐྲན་ནད་དང༌། །སྐྱ་རྦབ་དམུ་ཆུ་བད་སྨུག་ཆུ་སེར་
མཛེ། །དྲེག་གྲུམ་སྲིན་ནད་རབ་རིབ་རྨ་རྙིང་སོགས། །ཕྱི་ནང་ཕལ་ཆེའི་ནད་ལ་བསྔགས་པ་
སྟེ། །ཁྱད་པར་མཁྲིས་པའི་ནད་ལ་མཆོག་ཏུ་བཤད། །མི་རུང་དགུན་དུས་ཟུངས་ཟད་རྒས་པ་
དང༌། །གདོན་ཅན་སྦྲུམ་མ་རླུང་ནད་མེ་དྲོད་ཉམས། །གཞང་ནད་ཐུར་སེལ་ལོག་དང་སྐྱུག་
ལང་ཅན། །ཟུག་རྔུ་ཁོང་དུ་ལས་ལ་བཏང་མི་བྱ། །རན་དང་མི་རན་དུས་ཚོད་བརྟག་པ་ནི། །
ནད་གང་སྨིན་འདུས་བཤིག་སློང་རྒྱས་དུས་སྦྱང༌། །དེ་ལྟར་མ་ཡིན་སྔས་ན་ནད་མི་འདྲོངས། །
དུས་སུ་མ་སྦྱངས་འཕྱིས་ན་བརྟས་པར་འགྱུར། །དེ་ཕྱིར་སྦྱང་བའི་དུས་ཚོད་ཤེས་པ་གཅེས། །
ཐུབ་དང་མི་ཐུབ་ལུས་ཤེད་བརྟག་པ་ནི། །ཟུངས་ཟད་སྟོབས་མེད་ཟས་ཀྱིས་བོར་བ་དང༌། །
རྩ་ཡི་ཤེད་ཤོར་སྤུན་སྡོད་སྦྱོངས་མི་ཐུབ། །ཅི་ཕྱིར་མི་དེའི་ནད་ལ་སྲོག་གནས་པས། །སྦྱོངས་
ཞན་ནད་སློང་སླར་ཡང་དང་ག་འགག །སྦྱང་བ་དྲགས་ན་ནད་སྲོག་གཉིས་ཀ་འཇོམས། །དེ་
ཕྱིར་བཀྲུ་སྨན་མི་བཏང་དུག་དང་མཚུངས། །དེ་འདྲ་འཇམ་རྩི་ནི་རུ་ཧ་སྤེལ་བསྔགས། །བཏང་
ཐབས་སྔོན་འགྲོ་དངོས་གཞི་ཕྱི་རྗེས་གསུམ། །སྔོན་དུ་འགྲོ་ལ་རིང་དང་ཉེ་བ་གཉིས། །རིང་
བའི་སྔོན་འགྲོ་གློ་བུར་ནད་མིན་ལ། །ཐང་དང་ཕྱེ་མས་བྱེར་བསྡུ་འདྲིལ་བ་བཤིག །ཞེན་པ་
འགོགས་དང་གབ་པ་སློང་བ་དང༌། །མ་སྨིན་སྨིན་པར་བྱས་ལ་བཏང་བ་བསྔགས། །ཉེ་བའི་
25-1-574


སྔོན་འགྲོ་གཟའ་སྐར་ཚེས་བཟང་ལ། །མཁན་པ་སྦང་མ་ཆུ་འཇམ་བསྲོས་པ་ཡིས། །ལུས་
ཀུན་དག་པར་བཀྲུས་རྗེས་མར་གསར་དང༌། །འབྲུ་མར་ཚ་གྲང་ནད་དང་སྦྱར་བྱས་ཏེ། །ལྟོ་བ་
མ་གཏོགས་བསྐུ་མཉེ་འཐེམ་པར་བྱ། །རླུང་ཤས་ཆེ་དང་ལྟོ་བ་སྲ་བ་ལ། །ཞུན་མར་ལྟོར་
བཏང་ཨ་རུ་མཆུ་རིང་མུར། །འཇམ་རྩི་མས་བཏང་རླུང་གཞིལ་བད་མཁྲིས་བསླང༌། །མདོར་
ན་བཤལ་དགྲ་རླུང་ཡིན་དེ་འདུལ་གཅེས། །ཤིན་ཏུ་ཉེ་བ་གཏོང་གོང་ཞག་གཅིག་ནས། །གྲོ་
སྲན་སྔོ་ངད་ཉ་ཕག་རུལ་སྐྱུར་དང༌། །འོ་མ་ལ་སོགས་གང་གནོད་ཟས་ཀྱིས་བསླང༌། །གཏོང་
ནུབ་ཟྭ་ཚོད་སྡོར་ཐལ་མེད་པ་བཏུང༌། །དེ་ཡིས་ནད་སློང་ལྟོ་སྙི་རླུང་ཁ་གནོན། །དངོས་གཞི་
སྨན་གྱི་སྦྱོར་སྡེ་བཏང་ཚུལ་དང༌། །ལྕག་དང་འདོན་ཚད་ལོག་གནོན་རྣམ་པ་ལྔ། །སྦྱོར་སྡེ་ཀུན་
ཏུ་རྒྱུག་པའི་སྤྱི་བཤལ་དང༌། །ཐོར་བུ་ནད་ཀྱི་སྒོས་བཤལ་རྣམ་པ་གཉིས། །དང་པོ་སྣ་སེལ་
དེད་དཔོན་ཁ་འཛིན་གསུམ། །སྣ་སེལ་ཨ་རུ་མཆུ་རིང་ལྕུམ་རྩ་དང༌། །ཆུ་མ་རྩི་དང་རྒྱམ་ཚྭ་པི་
པི་ལིང་། །བསྡུས་ཐང་དྲོ་འཇམ་ནམ་དགུང་བཏང་བྱས་པས། །འཁྲུ་ནུས་རྒྱུ་འཁྲོག་ཅི་ཡང་
མེད་དང་གསུམ། །དེ་ལས་ལྟོ་བ་སྲ་སྙི་དཔགས་བྱས་ཏེ། །དེད་དཔོན་ཐུན་ཚད་ཆེ་ཆུང་ཤེས་
པར་བྱ། །ཅི་ཕྱིར་ཞེ་ན་ལྟོ་སྲ་ཐུན་ཆུངས་པས། །ནད་སློང་ཕྱིར་མི་ཐོན་ཏེ་ཉེས་པ་ཆེ། །ལྟོ་སྙི་
ཐུན་ཆེས་མི་ཆོད་ལུས་ཟུངས་འཇོམས། །དེས་ན་ལྟོ་བ་བརྟག་ཕྱིར་སྣ་སེལ་གཅེས། །ལྟོ་སྙི་མི་
སྐྱུག་རྣོ་འཇམ་གྲོགས་སུ་འགྱུར། །དེད་དཔོན་ཨ་རུ་མཆུ་རིང་དན་རོག་དང༌། །ཤྲཱི་ཁཎྜ་དུར་
བྱིད་རྣམ་པ་བཞི། །ཨ་རུ་ར་ནི་ཐལ་ཚན་གསེབ་ཏུ་གདུལ། །དནྡ་རོག་པོ་ལྕེ་གདོན་ཕྱེ་ལ་
གདུལ། །ཤྲཱི་ཁཎྜ་(སེ་ཞོ་དཀར་པོའི་ཐང་ཆུ་)མར་དཀར་ནང་དུ་གདུལ། །དུར་བྱིད་རྐང་ཤུན་དུག་
ཕྲལ་ཡོས་སུ་གདུལ། །ཆ་མཉམ་ཞིབ་བཏགས་རིལ་བུ་དྲིལ་བ་ཡིས། །རྣོ་ལ་དྲག་སྟེ་སྟོབས་
ལྡན་ནད་ཀུན་འཇོམས། །ཡང་ན་ཐར་ནུ་དུར་བྱིད་ཨ་རུ་ར། །ལྕུམ་རྩ་སྔོན་བུ་ཁྲོན་བུ་ཤི་རི་
ཁན། །དན་རོག་དན་ཁྲ་དོང་ག་བ་ཆུར་བསྡུས། །སྣ་མ་ཚིག་པའི་ཁཎྜ་རྣོ་ལ་འཇམ། །མི་སྐྱུག་
25-1-575


མི་འབྱམས་ལྷེན་དང་རླུང་མི་སྐྱེ། །ནད་དང་སྦྱར་ནས་དྲག་ཞན་ཟོ་ཡིས་འཁྲུ། །དགུན་དུས་
སྦྲུམ་མ་རྒས་དང་ཟུངས་ཟད་དང༌། །ལམ་ཁའི་འགྲོན་པོ་ལ་ཡང་བཏང་དུ་བཏུབ། །གཙོ་བོ་དེ་
ལ་འཁོར་གྱིས་ཁ་བསྒྱུར་བ། །ཙན་དན་ཨ་ག་རུ་དང་སྙིང་ཞོ་ཤ །སྡེབས་པས་སྙིང་གི་ཚ་བ་
སྦྱོང་བར་བྱེད། །ཚ་ལ་ཤིང་མངར་རྒུན་འབྲུམ་ཨ་ཀྲོང་སྡེབས། །གློ་བའི་ནད་རྣམས་འཁྲུ་བར་
བྱེད་པ་ཡིན། །གུར་གུམ་བ་ཤ་ཀ་དང་བྲག་ཞུན་སྡེབས། །མཆིན་པའི་ཚ་བ་འཁྲུ་བར་བྱེད་པ་
ཡིན། །ཡ་བཀྵ་ར་ཐལ་ཚྭ་པི་པི་ལིང༌། །སྡེབས་པས་མཆེར་ནད་འཁྲུ་བར་བྱེད་པ་ཡིན། །ལྕམ་
པ་སུག་སྨེལ་དབྱི་མོང་སྡེབས་པ་ཡིས། །མཁལ་མའི་ནད་རྣམས་འཁྲུ་བར་བྱེད་པ་ཡིན། །མ་
ནུ་རྒྱམ་ཚྭ་པི་པི་ལིང་དང་གསུམ། །ཕོ་བའི་ནད་རྣམས་སྦྱོང་བར་བྱེད་པ་ཡིན། །ཏིག་ཏ་གསེར་
གྱི་མེ་ཏོག་དུག་མོ་ཉུང༌། །སྡེབས་པས་མཁྲིས་པའི་ནད་རྣམས་སྦྱོང་བར་བྱེད། །སྙ་ལོ་བཙོད་
དང་ཁ་རུ་ཚྭ་སྡེབས་པས། །རྒྱུ་ལོང་སྣོད་ནད་སྦྱོང་བར་བྱེད་པ་ཡིན། །བྱང་པ་སྡིག་སྲིན་སྤོས་
དཀར་སྡེབས་པ་ཡིས། །རྩ་ནད་ཐམས་ཅད་སྦྱོང་བར་བྱེད་པ་ཡིན། །དབྱི་མོང་སྲུབ་ཀ་བྱང་པ་
སྡེབས་པ་ཡིས། །མགོ་སྐྱོན་རྩ་ནད་སྦྱོང་བར་བྱེད་པ་ཡིན། །ལི་ག་དུར་དང་དོམ་མཁྲིས་ཉི་
དགའ་སྡེབས། །སྟོད་ཀྱི་རྩ་ནད་ཐམས་ཅད་སྦྱོང་བར་བྱེད། །རྒྱ་ཚྭ་སྡིག་སྲིན་སུག་སྨེལ་སྡེབས་
པ་ཡིས། །སྨད་ཀྱི་རྩ་ནད་ཐམས་ཅད་སྦྱོང་བར་བྱེད། །སེ་རྒོད་བར་ཤུན་དབྱི་མོང་སོ་མ་ར། །
པགས་པའི་ནད་རྣམས་སྦྱོང་བར་བྱེད་པ་ཡིན། མེ་ཏོག་ལུག་མིག་བིལ་བ་ཨ་འབྲས་སྡེབས། །
མགོ་བོའི་ནད་རྣམས་སྦྱོང་བར་བྱེད་པ་ཡིན། །ཨ་བ་ཨ་རུ་ར་དང་ལྕགས་དྲེག་སྡེབས། །མིག་
གི་ནད་རྣམས་སྦྱོང་བར་བྱེད་པ་ཡིན། །ག་བུར་ཙན་དན་གི་ཝཾ་སྡེབས་པ་ཡིས། །ཚད་པའི་ནད་
རྣམས་སྦྱོང་བར་བྱེད་པ་ཡིན། །པི་པི་ལིང་དང་རྒྱམ་ཚྭ་ན་ལེ་ཤམ། །སྡེབས་པས་གྲང་བའི་ནད་
རྣམས་སྦྱོང་བར་བྱེད། །འབྲས་བུ་གསུམ་སྡེབས་ཚ་གྲང་འདྲེས་པ་སྦྱོང༌། །སྤོས་དཀར་ཐལ་ཀ་
རྡོ་རྗེ་སོ་མ་ར། །སྡེབས་པས་ཆུ་སེར་ནད་རྣམས་སྦྱོང་བར་བྱེད། །ཁྱུང་སྡེར་རེ་རལ་བོང་ང་
25-1-576


དཀར་པོ་སྡེབས། །དུག་གི་ནད་རྣམས་སྦྱོང་བར་བྱེད་པ་ཡིན། །བསེ་ཡབ་འུ་སུ་པུས་ཀར་མཱུ་
ལ་སྡེབས། །བད་ཀན་སྨུག་པོའི་ནད་རྣམས་སྦྱོང་བར་བྱེད། །དབྱི་མོང་སྲུབ་ཀ་ཤུ་དག་སྡེབས་
པ་ཡིས། །སྐྲན་གྱི་ནད་རྣམས་སྦྱོང་བར་བྱེད་པ་ཡིན། །གླ་གོར་ཞོ་ཤ་སྔོན་བུ་པད་(བྱང་བ་)མེ་
སྡེབས། །དམུ་ཆུའི་ནད་རྣམས་སྦྱོང་བར་བྱེད་པ་ཡིན། །ནིམ་པ་(ཞེས་བྱ་བ་ཤིང་དམར་སྨུག་རོ་ཤིན་ཏུ་ཁ་
བ་དེའི་ལྐོགས་ཤུན་ནོ།།)རྒྱ་ཚྭ་ཛཱ་ཏི་ཕ་(ཛཱ་ཏིའི་ནང་ན་ཛཱ་ཏི་ཆུང་ངུ་ཡོད་པ་སྐྱོད་ན་ཀྲོག་ཀྲོག་ཟེར་བ་དེ་)ལ་སྡེབས། །
སྐྱུག་པའི་ནད་རྣམས་སྦྱོང་བར་བྱེད་པ་ཡིན། །ཟར་མ་ཤུ་ཟུར་ཟོམ་རྩི་(ཤ་པོ་རུ་རྟ་)སྡེབས་པ་
ཡིས། །ཕོ་ལོང་སྦོས་པའི་ནད་རྣམས་སྦྱོང་བར་བྱེད། །ཛཱ་ཏི་པི་པི་ལིང་དང་ན་ལེ་ཤམ། །གྱེན་
ལོག་རླུང་དང་རྒྱུ་ལོང་འཁྲོལ་བ་སྦྱོང༌། །བྱི་ཏང་ག་དང་གཡེར་མ་མ་རུ་ཙེ། །སྡེབས་པས་སྲིན་
ནད་མ་ལུས་སྦྱོང་བར་བྱེད། །གུར་གུམ་དབྱི་མོང་སོ་མ་ར་ཛ་སྡེབས། །དྲེག་གི་ནད་རྣམས་འཁྲུ་
བར་བྱེད་པ་ཡིན། །རུ་རྟ་མུ་ཟི་རྒྱ་ཚྭ་སྡེབས་པ་ཡིས། །ཤ་རུས་རྩ་ཡི་འབྲས་ནད་སྦྱོང་བར་བྱེད། །
ཨ་ཤོ་གནྔྷ་འོལ་(འོལ་མ་སེའི་རྩ་བ་)མོ་ཡ་བཀྵ། །སྡེབས་པས་བུ་སྣོད་ནད་རྣམས་སྦྱོང་བར་བྱེད། །
མི་རུས་བཙའ་མ་ཡ་བཀྵ་ར་སྡེབས། །ཙམ་པ་མི་འཁྲུ་ནད་རྣམས་སྦྱོང་བར་བྱེད། །བ་སྤྲུ་
སྡེབས་པས་སྦྲུམ་མའི་བུ་མི་འཆོར། །ཆུ་མ་རྩི་དང་སྡེབས་པས་སྐྱུག་མི་སྲིད། །དངུལ་ཆུ་དུང་
ཐལ་རྒྱ་ཚྭ་སྡེབས་པ་ཡིས། །མི་སྐྱུག་མི་འགྱིང་མྱུར་དུ་འབིགས་པར་བྱེད། །ཉང་རྩི་སྤྲས་(སྔོ་སྤྲིན་
ཏེ་ལྕགས་སྐྱུ་བ་འདྲ་བ་ལ་ལྕགས་སྐྱུ་རང་མེད་པ་དེ་)དང་སྡེབས་པས་འབྱམས་མི་སྲིད། །དྲི་ཆུ་ཆུ་(དྲི་ཆུ་མིའི་ཆུ་
དང་ཆུ་རུག་དུས་བཞིར་འཆི་མེད་ཀྱི་སྔོ་ཡིན་ལ། ཆུ་རུག་སྦལ་བའི་ལག་པ་འདྲ་ཟེར་བ་ཡང་རུང་ཞིང་དྲི་ཆུ་ཆུ་རུག་གཉིས་ཀའི་ཚབ་
ཏུ་ཆུའི་དཀྱིལ་གྱི་རྡོ་ལ་དྲེག་པ་ཆགས་པ་དེ་བཏང་ངོ་།།)རུག་སྡེབས་པས་ཆུ་མི་གནོད། །ཉི་དགའི་འབྲས་བུ་
སྡེབས་པས་ཁ་མི་སྐོམ། །ཁ་བསྒྱུར་སུམ་ཅུ་གནད་ཀྱི་མན་ངག་བདུན། །འདི་ལྡན་ནད་ཡུལ་
འབྱིན་པར་ཐེ་ཚོམ་མེད། །ཐོར་བུ་ནད་ཀྱི་སྒོས་བཤལ་བསྟན་པ་ནི། །ཐར་ནུ་དུས་བརྐོས་བ་
ཆུར་བཏུལ་བ་དང༌། །ཆུ་རྩ་ཁྲོན་བུ་ཧོང་ལེན་གསེར་མེ་ཏོག །འཁྲུགས་རིམས་རྒྱས་པའི་ཚད་
25-1-577


པ་སྦྱོང་བར་བྱེད། །ཐར་ནུ་ཆུ་རྩ་རེ་ཅག་རྩ་བ་གསུམ། །གག་ལྷོག་རྒྱུ་གཟེར་གཉན་གླང་
གཟེར་ཐུང་སྦྱོང༌། །དུར་བྱིད་ཧོང་ལེན་ཚ་ལ་སྟར་བུ་ཡིས། །བད་ཀན་སྨུག་པོའི་ཚད་པ་སྦྱོང་
བར་བྱེད། །ཁྲོན་བུ་ཚ་ལ་པ་ཏོལ་མཁྲིས་ནད་སྦྱོང༌། །དུར་བྱིད་སྟར་བུ་དུང་ཐལ་སྦྲུལ་གྱི་ཤ། 
རྒྱ་ཚྭ་བུ་རམ་སྦྱར་བའི་རིལ་བུ་ཡིས། །ཁྲག་མཁྲིས་མ་ཞུ་གླང་ཐབས་སྦོས་པ་འཇོམས། །ཤི་
རི་ཁཎྜ་སྔོ་ཡི་ཚ་བ་གསུམ། །རྒྱ་ཚྭ་བུ་རམ་རིལ་བུས་སྐྲན་ནད་སྦྱོང༌། །དུར་བྱིད་སྒྲོན་ཤིང་
བཅའ་སྒ་ལྕགས་ཕྱེ་དང༌། །བ་ཆུ་སྦྱར་བས་སྐྱ་རྦབ་སྦྱོང་བར་བྱེད། །དནྡ་དུར་བྱིད་ཤི་རི་ཁཎྜ་
དང༌། །ཐར་ནུ་ཁྲོན་བུ་ལྕུམ་རྩ་རེ་ཅག་པ། །དོང་ག་སྔོན་བུ་རྒྱ་ཚྭ་ཆུ་མ་རྩི། །ཟངས་དྲེག་པི་པི་
ལིང་དང་བུ་རམ་སྦྱར། །རིལ་བུས་འོར་དང་དམུ་ཆུ་སྦྱོང་བར་བྱེད། །ཨ་རུ་སྐྱེར་ཤུན་སོ་མ་ར་
ཛ་དང༌(ཅེས་པའི་འདི་སྐབས་སོ་མ་ར་ཛ་ནི་ཟླ་བའི་རྒྱལ་པོ་ཏེ་དུག་སྨན་སྔོ་དྲེས་ཆུང་བ་དཀར་པོ་ཆིག་ཐུབ་བོ)། །སྤང་རྒྱན་
འབྲི་ཏ་ས་འཛིན་དོང་ག་ལྕུམ། །བསྡུས་ཁུར་དུར་བྱིད་བཏབ་པས་དུག་ནད་སྦྱོང༌། །དུར་བྱིད་
ཧོང་ལེན་རྒྱ་སྐྱེགས་རྒྱ་ཚ་དང༌། །འགྲོན་ཐལ་གླ་རྩིའི་རིལ་བུས་ཤ་དུག་སྦྱོང༌། །དུར་བྱིད་དནྡ་
མཚལ་དང་པི་པི་ལིང༌། །རྒྱ་ཚྭ་རྒྱམ་ཚྭ་ཨ་རུ་ར་དང་སྒ། །བྱང་ཁོག་ནང་དུ་ཁྲག་བབས་སྦྱོང་
བར་བྱེད། །ལྕུམ་རྩ་ཨ་རུ་མཆུ་སྙུང་ཆ་མཉམ་སྟེ། །ཉི་དགའ་ཤིང་མངར་རྒྱམ་ཚྭ་པི་པི་ལིང༌། །
བསྐོལ་ཐང་མ་ཞུ་གསར་དང་རིམས་ནད་དང༌། །ལྷག་པར་ཕོ་མཆིན་ནད་རྣམས་སྦྱོང་བའི་
མཆོག །ཨ་རུ་མཆུ་རིང་བ་རུ་སྐྱུ་རུ་ར། །ལྕུམ་རྩ་དུར་བྱིད་སྤོས་དཀར་བ་ཆུར་བསྡུས། །རྒྱུན་
སྦྱོངས་དྲེག་དང་གྲུམ་བུ་ཆུ་སེར་དང༌། །རྙོངས་ཚད་རྙིངས་ཚད་ལུས་ལ་ཞེན་པ་སྦྱོང༌། །བཏང་
ཚུལ་ཐང་ཕྱེ་རིལ་བུ་སྨན་མར་བཞི། །རྒས་དང་ཟུངས་ངན་རྣམས་ལ་བསྐོལ་ཐང་ཤིས། །དེ་
ཡིས་བཏང་བཞག་རན་པར་ཚོད་ཟིན་འགྱུར། །ཟུངས་བཟང་ནད་རྒྱས་ཕྱེ་མ་རིལ་བུ་ཤིས། །
དེ་ཡང་སྐྱུག་པ་རྣམས་ལ་རིལ་བུ་བཏང༌། །ཤིན་ཏུ་ལྟོ་སྲ་སྐྱུག་ལང་ཡོད་པ་ལ། །སྨན་མར་
སྦྱར་ཏེ་གསངས་ལ་རྒྱུན་སྦྱོངས་བྱ། །སྨན་དྲེད་ཡི་ག་བསྡར་ལ་ཟས་དང་སྡེབ། །གཏོང་དུས་ཐོ་
25-1-578


རངས་སྨན་ལ་ཤིས་པ་བརྗོད། །སྨན་བཏང་ཁ་བཤལ་མངར་བ་ཅུང་ཟད་མུར། །འགྲུལ་སྲུང་
མི་སྨྲ་མི་ཉལ་ཙོག་པུར་འདུག །འོག་རླུང་གློད་ལ་ནད་གདོན་འཁྲུ་བར་བསམས། །ལྕག་ནི་
བཤལ་ཐེབས་གཉིས་གསུམ་ཁྲུས་པ་དང༌། །དང་ག་མེར་བ་སངས་ནས་ཆུ་སྐོལ་བཏང༌། །
སྔས་ན་སྐྱུག་ལ་ཕྱིས་ན་ནད་མི་ཁྲུས། །རླུང་ཤས་ཆེ་ན་རུས་ཁུའི་ལྕག་གིས་བསྐུལ། །ཟུངས་
ཟད་མི་ལ་བུར་ཁུའི་ལྕག་གིས་འཕུལ། །ཚ་བ་སྨིན་རྒྱས་དུས་སུ་གངས་ཆུའི་ལྕག །ཆུ་སེར་
ཚད་རྙིང་ནད་ལ་བ་ཆུའི་ལྕག །ཁྲུ་མའི་ཤུགས་དལ་ཨ་རུ་མཆུ་སྙུང་ལྕག །ཐུན་མོང་ལྕག་ཏུ་
རྒྱམ་ཚྭའི་ཆུ་སྐོལ་ཤིས། །ཤེད་ཆུང་ཤེས་པ་ཟི་ཉོག་སྟོང་སྐྱུགས་མང༌། །བསྐུ་མཉེ་བསུར་དུད་
རུས་ཁུས་རླུང་སྣ་མནན། །འདོན་ཚད་གྲངས་དང་བུངས་དང་ཁ་དོག་ལས། །གྲངས་ཚད་སུམ་
ཅུ་ཉི་ཤུ་ཐ་མ་བཅུ། །བུངས་ཚད་བྲེ་གསུམ་བྲེ་དོ་བྲེ་གང་ལ། །ཁ་དོག་ཆུ་དང་བད་ཀན་མཁྲིས་
པ་གསུམ། །རབ་འབྲིང་ཐ་མ་གསུམ་གྱི་ཚད་ཡིན་པས། །ནད་ཀྱི་སྟོབས་དང་ལུས་ཤེད་རྗེས་
དཔགས་ལ། །ཤེད་ཆེ་ནད་མ་ཟད་ན་ལྕག་གིས་བསྐུལ། །ནད་མ་དག་ཀྱང་ཟུངས་ཟད་ལྕག་
འཕྲོ་བཅད། །ནད་དག་ཆུར་འཁྲུ་ཇི་ལྟར་འདུག་ཀྱང་བཅད། །ལོག་གནོན་རྒལ་བ་མནན་དང་
སྟོར་བ་བཙལ། །འགྱིངས་པ་དྲང་དང་འབྱམས་པ་བཅད་པ་དང༌། །སྲོག་གི་བྱ་ར་བཞག་དང་
རྣམ་པ་ལྔ། །སྐྱུག་ན་རྡོ་གྲང་སྐེར་བདུག་དྲི་ཞིམ་མནམ། །སྤྱི་བོའི་སྐྲ་འཐེན་གདོང་དུ་ཁ་ཕྲུ་
གདབ། །ཕྲག་པ་གཉིས་ནས་མནན་ཞིང་སྒུལ་བསྐྱོད་གཟབ། །སྨན་རྩུབ་ཐུན་ཆེས་རླུང་མ་
ནོན་པ་དང༌། །ནད་ལས་བྱུང་དང་སྨན་སུན་ཡི་ག་བསྡར། །སྨྲ་འགུལ་གདོན་དགུ་སྐྱུག་པའི་རྒྱུ་
ཡིན་པས། །སྨན་རྩུབ་དུས་སུ་བརྐོས་ཤིང་འདུལ་ལེགས་གཅེས། །ཐུན་ཆེས་ཐུབས་སུ་བཅད་
ལ་ཞུ་རྗེས་མནན། །རླུང་མ་ནོན་ལ་སྔོན་འགྲོ་འཐེམས་པ་གཅེས། །ནད་ལས་བྱུང་ལ་ཆུ་མ་རྩི་
མཆོག་ཡིན། །སྨན་སུན་ཡི་ག་བསྡར་ལ་གསངས་ཏེ་བཏང༌། །མི་སྨྲ་མི་འགུལ་ཙོག་པུར་
འདུག་པ་དང༌། །གདོན་ལས་བྱུང་ལ་འདྲུལ་བསྲུང་བསྐྲད་ལས་བྱ། །བཤལ་སྟོར་བ་ལ་སྨན་
25-1-579


སྟོར་ནད་སྟོར་གཉིས། །སྨན་སྟོར་ཟུག་མེད་སྐྱར་ལ་བཏང་བར་བྱ། །ནད་སྟོར་ན་འགྱུང་བྱེད་
ན་སྐྱུར་བག་བཏང༌། །འགྱིངས་པ་ཕོ་བར་རྫིང་ལ་ཧྲེམ་པ་སྟེ། །ཕོ་བར་དུགས་བྱ་བཅག་ཅིང་
ནི་རུས་བསུ། །གཡའ་ཀྱི་མ་དང་སྔོན་བུ་ཆ་མཉམ་སྟེ། །ཞིབ་པར་བཏགས་ལ་བསྐོལ་ཁུ་ཕུལ་
གང་བཏང༌། །བཤལ་སྐྱུག་གཉིས་འབྱུང་ཕོ་བར་ནད་མི་ལུས། །འབྱམས་ལ་ཚ་འབྱམས་གྲང་
འབྱམས་རྣམ་པ་གཉིས། །སྨན་རོ་ལུས་དང་ནད་ཁ་བྱེ་བ་བཞི། །ཚ་འབྱམས་དམར་སེར་དྲི་ཆེ་
རྩ་ཆུ་ཚ། །བྱིན་ཉྭ་ཆུས་བསྒྲངས་རེ་སྐོན་སྐར་ཆུས་བཅད། །གྲང་འབྱམས་དྲི་མེད་ཆུར་འཁྲུ་ཚོ་
ཁུའམ། །ཞུན་མར་ད་ཏྲིག་ཤིང་ཚ་བཏབ་པས་གཅོད། །སྨན་རོ་ལུས་ལ་རྒྱམ་ཚྭའི་ཆུ་སྐོལ་
བཏང༌། །ནད་ཁ་བྱེ་ན་མི་བཅད་ལུས་ཟུངས་གསོ། །མཁྲིས་པའི་རྩ་ཁ་བྱེ་ན་མྱུར་དུ་བཅད། །
ཨིནྡྲ་བཞི་ཐང་དོམ་མཁྲིས་བཏབ་པས་གཅོད། །ཐུན་མོང་སྤྱི་རུ་འབྲས་ཀྱི་ཐུག་པའམ། །ནས་
ཐུག་ཤ་གསར་ཚོ་ཁུ་གང་རུང་ལ། །སྤྱིན་དང་ད་ཏྲིག་ཀ་པེད་མོན་ཆ་ར། །སྨག་དང་ཐ་རམས་
བཏབ་ལ་ཙེ་གུར་བཏང༌། །ཁ་སྐོམ་མི་བཏང་དེ་ཡིས་ཆོད་པར་ངེས། །སྲོག་གི་བྱ་རའི་གནད་
ནི་རྣམ་ལྔ་སྟེ། །ཐོར་བུའི་རླུང་སྐྱེས་སྣ་མ་ནོན་པ་དང༌། །སྨན་དང་ནད་དུ་མ་འཕྲོད་གཟེར་བ་
དང༌། །སྐྱུག་པ་མནན་པས་གློ་རྩར་ཤོར་བ་དང༌། །སྲིན་ཁྲོས་གླང་ཐབས་ནད་དུ་སོང་བ་ཡི། །
ནད་ལ་སྲོག་གནས་བཏོན་ན་འཆི་བའོ། །ཁྲུས་བཞིན་མི་བདེ་སྟོང་སྐྱུགས་བྱེད་པ་དང༌། །
ཤེད་ཆུང་ཤེས་པ་ཟི་ལ་ཉོག་ཉོག་བྱེད། །ཐོར་བུའི་རླུང་ཡིན་སུར་བདུག་བསྐུ་མཉེ་བྱ། །རུས་
ཐང་མེ་བཙས་སྣ་བསླན་སྦྱོངས་འཕྲོ་གཅད། །རུང་དང་མི་རུང་དུས་ཚོད་མ་ཟིན་ན། །ནད་དང་
དཔྱད་དུ་འཛོལ་བས་གཟེར་ཟུག་འབྱུང༌། །ཚ་གྲང་བརྟགས་ལ་གཉེན་པོ་བསིལ་དྲོད་བསྟེན། །
ཚད་གཟེར་མ་ནུ་རུ་རྟའི་གྲང་ཐང་བཏང༌། །བསིལ་གྱི་དུགས་དང་ཕྱེ་མ་གང་ཤིས་དཔྱད། །
གྲང་གཟེར་ཆ་མཉམ་ཐང་བཏང་དྲོད་དུགས་བྱ། །བཤལ་སྨན་གློར་ཤོར་གློ་མང་རོ་སྟོད་
གཟེར། །གློ་སྐྱུགས་གཏར་ག་ཕྱེ་མ་སྐེམ་སྨན་སྦྱར། །སྲིན་ཁྲོས་ཕོ་ལོག་བྱུང་ན་གཉེན་པོས་
25-1-580


བསད། །ཟུངས་ངན་ནད་མ་ཐོན་ཡང་གཅོད་པར་གཅེས། །ཅི་ཕྱིར་ནད་ཐོན་ཟུངས་ཟད་སྲོག་
འཕྲོག་བྱེད། །ཕྱི་རྗེས་བཅད་པ་སྦྱོང་བ་ཚར་ཆོད་ནས། །འབྲས་སམ་ཕྱེ་ཐུག་གཡོས་སུ་མ་
བྱས་པའི། །ཚྭ་སྡོར་བག་ཤས་ཡོད་པ་ཀྱང་ཀྱང་པོས། །ཁམས་གསོ་སྨན་རོ་འདོན་ཞིང་ནད་
ལྷག་འདེད། །དེ་རྗེས་སླ་དང་བར་མ་སྐ་བ་དང་། །ཚོ་ཁུ་ཟན་དྲོན་རིམ་པས་ཆ་ཡིས་བསྐྱེད། །
ཁྱད་པར་ཚ་རྗེས་གྲང་རྗེས་རྣམ་པ་གཉིས། །ཚ་བའི་རྗེས་ལ་གསར་དང་རྙིང་པ་གཉིས། །
རིམས་འཁྲུགས་ཚ་བ་གསར་པའི་བཤལ་རྗེས་རྣམས། །ཆུ་གྲོག་ནས་ཐུག་ཞོ་ཕྲུལ་བསིལ་
གྱིས་བཅད། །ཚ་བ་རྙིངས་པ་རྣམས་ལ་བསིལ་ཤ་གསར། །ཚིལ་མེད་ཚོ་ཁུ་ཇ་དང་བསྐོལ་
གྲངས་ཆུ། །ཞོ་ཕྲུལ་ལ་སོགས་བསིལ་བཅུད་ཟས་ཀྱིས་བཅད། །གྲང་རྗེས་ལུག་ཤ་གསར་
རྙིང་ཚོ་ཁུ་དང་། །ཆང་འཇམ་ཞུན་མར་ཟན་དྲོན་དྲོད་ཀྱིས་བཅད། །ཆ་དང་བགས་ཀྱི་རིམ་
པས་བསྐྱེད་ལ་བཏང་། །ཚ་རྗེས་དྲོད་ཀྱིས་བཅད་ན་མེ་རོ་འཕེལ། །གྲང་རྗེས་བསིལ་གྱིས་
བཅད་དམ་བཟའ་བ་དྲགས། །ཕོ་བའི་མེ་འཆི་མ་ཞུ་དམུ་སྐྲན་སྐྱེད། །སྦྱོངས་ཉེས་སྐྱོན་ལ་
དྲགས་ཞན་རྣམ་པ་གཉིས། །སྦྱོངས་དྲགས་ཟུངས་ཟད་རླུང་སྐྱེ་མེ་དྲོད་འཆི། །དེ་ལ་ཟས་སྨན་
དྲོད་བཅུད་མེ་ཡིས་གསོ། །སྦྱོངས་ཞན་ནད་དེ་བསླང་ནས་མ་དག་པས། །དང་ག་འགགས་ལ་
ཟས་སྐོམ་འཇུར་མི་འདོད། །ནད་ཀྱི་སྟོབས་སྐྱེད་བད་མཁྲིས་འཕེལ་བར་འགྱུར། །བཀྲེས་
སྐོམ་རྒྱམ་ཚྭ་སེ་འབྲུས་མེ་གསོས་ལ། །ཟུངས་བཟང་སྔོན་འགྲོ་བྱས་ལ་སྦྱང་བ་བསྐྱར། །ཟུངས་
ངན་ནི་རུ་ཧ་དང་འཇམ་རྩི་སྤེལ། །སྦྱོང་ལེགས་ནད་ཀྱི་རྩད་ཆོད་བད་མཁྲིས་དག །ལུས་ཡང་
ཁོང་པའི་དྲོད་འབར་ཡི་ག་འབྱེད། །བཀྲེས་སྐོམ་དུས་འབྱུང་བཤང་གཅི་བདེ་བར་འབྱིན། །
ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་
ལས་ལྔ་བཤལ་གྱི་ལེའུ་སྟེ་བཅུ་བཞི་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
25-1-581


ཆེན་པོ་ཉོན་ཅིག །ལས་ལྔ་སྐྱུགས་ལ་སྔོན་འགྲོ་དངོས་གཞི་དང༌། །ཕྱི་རྗེས་བཅད་དང་ཕན་
ཡོན་བསྟན་པའོ། །སྔོན་འགྲོ་ནད་གཞི་རུང་དང་མི་རུང་བརྟག །སྦྱོར་བའི་སྔོན་འགྲོ་ཉེ་རིང་
རྣམ་གཉིས་བྱ། །མི་རུང་ཟུངས་ཟད་རླུང་ཆེ་ཆུ་རྒྱུ་འགགས། །མིག་འགྲིབ་སྲིན་ནད་གཞང་
འབྲུམ་ཤ་དུག་རྒྱས། །རྒས་ཆེས་གཞོན་ཆེས་གདོན་ཅན་རྣམས་ལ་སྤང༌། །རུང་བ་མ་ཞུ་ལྷེན་
སྐྲན་ལྕགས་དྲེག་ཆགས། །དུག་དང་གླང་ཐབས་ཁྲག་མཁྲིས་ཕོ་བར་ལྷུང༌། །མགོ་ནད་དང་ག་
འགགས་དང་སྲིན་བུ་ལྡོག །ཁྱད་པར་བད་ཀན་ནད་ཀུན་སྐྱུགས་ཀྱིས་སྦྱང༌། །སྦྱོར་བའི་སྔོན་
འགྲོ་ཉེ་རིང་བཤལ་དང་མཐུན། །འཕྲལ་དུ་མ་ཞུ་མི་འཕྲོད་ཟོས་པ་དང༌། །བད་མཁྲིས་རྒྱས་
དང་མ་ཞུའི་གནས་སུ་འདུས། །རྒྱུན་དུ་ལྟོ་སྣུམ་སྔོན་འགྲོ་བྱ་མི་དགོས། །དངོས་གཞི་སྨན་སྦྱོར་
བཏང་ཐབས་ལྕག་དང་ཚད། །ལོག་པ་མནན་དང་རྣམ་པ་ལྔ་རུ་བཤད། །དང་པོ་སྨན་སྦྱོར་
གཙོ་བོ་ཁ་འཛིན་གཉིས། །གཙོ་བོ་རི་ཤོ་སྤྱང་ཚེར་དུར་བྱིད་གསུམ། །བྱེ་མ་ལ་སྐྱེས་ཁ་འབུས་
སོས་དུས་བརྐོས། །ཤུ་དག་རྒྱམ་ཚྭ་པི་པི་ལིང་དང་སྦྱར། །འཇམ་པོ་ཁུ་བ་དྲག་པོ་རིལ་བུ་དྲིལ། །
ཁ་འཛིན་མ་ཞུ་བ་ལ་བཅའ་སྒ་སྡེབ། །རླུང་ལྡན་སོ་ཆ་མཁྲིས་ལྡན་གསེར་ཕུད་བུ། །སྐྲན་ལ་
དབྱི་མོང་དུག་ལ་བོང་ང་དཀར། །འབྲི་ཏ་ས་འཛིན་བྱང་ཁོག་རྣག་ཁྲག་འདྲེན། །གློ་ཡི་ནད་ལ་
ཤིང་མངར་སྡེབ་པར་བྱ། །བཏང་ཚུལ་ནམ་ལངས་དུས་བཏང་ཁ་བཤལ་ལ། །མི་སྨྲ་མི་གྲང་
ཙོག་པུར་འདུག་པར་བྱ། །སྐྱུག་ན་ལན་འགའ་ཟློག་པས་ནད་ལ་བརྐོ། །བརྐོས་དྲགས་ཐུར་དུ་
འཕྱུག་པས་སློང་དུས་སྐྱུག །དེ་ནས་མགོ་དཔྱངས་པུས་མོ་ཕོ་གསང་གཏེམ། །སླ་ངར་བཟེད་
ལ་ནད་ཀྱི་ཁ་དོག་བལྟ། །ལྕག་ཏུ་སྤྱང་ཚེར་རི་ཤོ་དུར་བྱིད་བསྡུས། །རྒྱམ་ཚྭ་ཤུ་དག་པི་པི་ལིང་
དང་སྦྱར། །ཆུ་སྐོལ་ངད་ཡལ་ཙམ་དང་སྤེལ་གྱིན་བཏང༌། །སྒྲོའམ་སོར་མོས་གྲེ་བ་མ་གནད་
དྲངས། །སྐྱུག་པ་དྲག་ཞན་ལྕག་ལ་རག་ལུས་པས། །ལུས་ཟུངས་ནད་སྟོབས་སྦྱར་ལ་ཐོན་ཚད་
གདོན། །གདོན་ཚད་སྐྱུག་པའི་ནད་ལ་བཞི་དྲུག་བརྒྱད། །བུངས་ཚད་བྲེ་ཕྱེད་གང་དང་དོ་ཡིན་
25-1-582


ཏེ། །ཁ་དོག་བད་ཀན་མཁྲིས་པ་ཆུ་དང་གསུམ། །རིམ་པས་ཐ་མ་འབྲིང་རབ་ཚད་དུ་བཤད། །
ལོག་གནོན་ཐོར་བུའི་རླུང་དང་མཁྲིས་ཁ་ཤོར། །སྨུག་པོའི་མཚོ་དང་གློ་ཡི་རྩ་ཁ་རྡོལ། །སྨན་
གྱི་དྭངས་མ་མིག་ལ་བྲོས་པའོ། །མགོ་ན་སྟོང་སྐྱུགས་བྱེད་ཅིང་ཤེས་པ་ཉོག །བསྐུ་མཉེ་གསུར་
དུད་སྲེ་ལོང་ཐང་གིས་བཟློག །མཁྲིས་པ་ཁ་ཤོར་ཐང་བཏང་གཤའ་རིངས་གཏར། །མཚོ་
བརྡོལ་བ་ལ་དུགས་དང་ཕྱེ་མས་བཅད། །གློ་རྩ་འགྲམས་ན་སྨན་གྱིས་རྩ་ཁ་བསྡམ། །མགོ་ན་
མིག་དམར་གཏར་དང་ཆུ་ལྕག་བྱ། །བཅད་རན་རྗེས་ཀྱི་ཆོ་ག་བཤལ་དང་མཐུན། །ཟས་དང་
སྤྱོད་ལམ་དེ་བས་ལྷོད་པས་ཆོག །གུ་གུལ་གླ་སྒང་མར་གསར་དུ་བས་བདུག །སྨན་རོ་སྦྱོང་
ཕྱིར་རྒྱམ་ཚྭའི་ཆུ་སྐོལ་བཏུང༌། །སྐྱུགས་ལེགས་དབང་གསལ་ལུས་ཡང་དང་ག་བདེ། །ཁ་དྲི་
ཞིམ་ཞིང་མཆིལ་སྣབས་ལུད་པ་དག །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་
པ་གསང་བ་མན་ངག་གི་རྒྱུད་ལས་ལས་ལྔ་སྐྱུགས་ཀྱི་ལེའུ་སྟེ་བཅོ་ལྔ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ལས་ལྔའི་སྣ་སྨན་ཞི་དང་སྦྱང་བ་གཉིས། །ཞི་བྱེད་མི་རུང་ཕན་ཡོན་བཏང་
ཐབས་གསུམ། །སྣ་སྨན་མི་རུང་རིམས་གསར་འཕྲལ་དུ་རྨས། །ར་རོ་སྣུམ་འཐུངས་རྣམས་ལ་
སྤང་བར་བྱ། །ཕན་ཡོན་སྣ་ཉིད་གླད་པའི་སྒོ་ཡིན་ཕྱིར། །མགོ་དང་ནམ་ཚོང་ཡན་ཆད་ནད་ལ་
མཆོག །ཁྱད་པར་གུར་གུམ་ཞུན་མར་ཀ་ར་སྦྱར། །མགོ་རླུང་ཁྲག་འཐབ་གཟེར་ནད་འཁྱུག་
པ་འཇོམས། །ཤིང་མངར་སྐྱུ་རུ་ཀ་ར་ཞུན་མར་སྦྱར། །རྣ་བ་མིག་དང་ཟ་འགྲམ་གླད་ནད་སེལ། །
ལ་ཕུག་ཁུ་བས་རྣ་བ་མགོ་ནད་སེལ། །རྟ་སྦངས་སྣ་ཁྲག་གླད་ཁྲག་སོ་སྲིན་སེལ། །ཞུན་མར་
ནམ་ཚོང་ཡན་ཆད་རླུང་ནད་འཇོམས། །བཏང་ཐབས་སྔ་དྲོ་རྒོངས་དུས་གན་རྐྱལ་ཉལ། །སྔས་
སྨད་མགོ་དཔྱངས་ཐིགས་པ་ལྔ་བདུན་བླུག །དར་ཅིག་ཉལ་རྗེས་དུད་པ་བསེར་བུ་སྤང༌། །སྣ་
སྦྱོངས་སྤང་དང་ཕན་ཡོན་སྦྱོར་བ་དང༌། །བཏང་བའི་ཚུལ་དང་ལོག་གནོན་ལྔ་ཡིས་བསྟན།  །
25-1-583

 
མི་རུང་རླུང་གིས་མགོ་འཁོར་རབ་རིབ་དང༌། །རྫི་འཁོར་སོ་ནད་རྣག་ཁྲག་འཛག་ལ་སྤང༌། །
ཕན་ཡོན་ཆམ་རྒན་མཚུལ་པར་ཞེན་པ་དང༌། །ཚད་པ་གག་ལྷོག་རྫོང་ལ་བྲོས་པ་དང༌། །མིག་
དམར་མཛེ་ནད་ཆུ་སེར་གདོང་ལ་ལུད། །མགོ་ཆག་རྩ་བྱེར་ཆུ་སེར་ལྷུང་བ་སེལ༌། སྦྱོར་བ་
འགྲོན་བུ་བོང་ང་དཀར་པོ་དང༌། །སུག་པ་སྒ་སྐྱ་བཞི་པོ་བསྲེགས་ཐལ་དང༌། །བྱང་པ་རྒྱ་ཚྭ་དྲི་
ཆུར་སྦྱར་བར་བྱ། །ཡང་ན་འབྲི་ཏ་ས་འཛིན་རྒྱ་ཚྭ་དང༌། །ཤུ་དག་རུ་རྟ་ཤིང་མངར་བ་ཆུ་སྦྱར། །
བཏང་ཐབས་སྔ་དྲོ་སྣབས་སྦྱངས་གན་རྐྱལ་ཉལ། །འཕུལ་བྱེད་སྔས་ལ་མགོ་དཔྱངས་ཐིགས་
དགུ་བླུག །རྐན་ནས་བྱུང་ན་འགག་ཅེས་བྱས་ལ་བཟློག །བྱ་རྫོགས་སྐད་ཅིག་གྲངས་བརྒྱའི་
བར་དུ་ཉལ། །ཐེབས་དཀའ་དུ་བ་སུག་ཕྱེ་སྣ་ནང་བུད། །ཚ་གཡའ་སྣབས་མང་བྱུང་ན་ལངས་
ལ་ཕྱི། །དེ་རྗེས་ཆུ་སེར་རྣག་སོགས་གང་ཡོད་དབྱུང༌། །གྲེ་བ་མཚུལ་པ་དག་ཕྱིར་ཆུ་སྐོལ་
བཏུང༌། །སྤོས་དཀར་མར་གསར་བསྲེགས་པའི་དུ་བས་བདུག །ལོག་གནོན་ཁྲག་ཤོར་མགོ་
སྟོད་ཆུ་ཡིས་བྲན། །སྨན་དང་མེ་བཙའ་གཏར་སོགས་རིགས་པས་དཔྱད། །མ་ཐེབས་མིག་
དམར་མགོ་དང་དཔྲལ་བ་གཟེར། །སྣ་རྩ་དཔྲལ་རྩ་གཏར་རྗེས་ཆུ་ལྕག་བྱ། །ཞེས་གསུངས་
སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལས་ལྔ་སྣ་སྨན་གྱི་
ལེའུ་སྟེ་བཅུ་དྲུག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ལས་ལྔ་འཇམ་རྩི་རུང་དང་མི་རུང་དང༌། །སྦྱོར་བ་བཏང་ཐབས་ཕན་ཡོན་
ཉེས་དམིགས་སོ། །རུང་བ་རླུང་སྐྲན་ལྟོ་སྦོས་ཙམ་པ་འཁྲུ། །ཁུ་བ་ཟད་དང་ཟླ་མཚན་འབྱམས་
པ་དང༌། །རྒྱུ་ལོང་མཁལ་རྐེད་གྲང་བ་རྒྱས་པ་དང༌། །སྟོབས་ཆུང་སྨད་སྲིན་རླུང་ནད་ཀུན་ལ་
བཏང༌། །མི་རུང་དམུ་འོར་ནད་དང་ཡི་ག་འཆུས། །དུག་ནད་མཆིན་པ་རྒྱུ་ལོང་སྣོད་ཚད་དང༌། །
ཚིལ་ཆེས་མ་ཞུ་བད་ཀན་རྒྱས་ལ་སྤང༌། །སྦྱོར་བ་སླེན་འབྱམ་བཀྲུ་འཇམ་བཀྲུ་མ་སླེན། རླུང་
25-1-584


རྐྱང་མཁྲིས་པ་བད་ཀན་ལྡན་ལ་སྦྱར། །དང་པོ་ལུག་ཤ་འབྲི་ཡི་འོ་མ་མར། །རུ་རྟ་དེ་བ་དཱ་རུ་
(འདི་སྐབས་སེ་རུ་ཙན་དན་)པི་པི་ལིང༌། །རྒྱམ་ཚྭ་ཨ་རུ་ར་སྦྱར་སླེན་འཇམ་ཡིན། །གཉིས་པ་ཆུར་
གནས་ཤ་ཁུ་བ་འོ་མར། །གོང་སྨན་དུར་བྱིད་སྦྱར་བ་བཀྲུ་འཇམ་མོ། །གསུམ་པ་སྐམ་སའི་ཤ་
ཁུ་ར་འོ་མར། །གོང་སྨན་སོ་ཆ་སྦྱར་བ་བཀྲུ་མ་སླེན། །མར་རབ་ཤ་ཁུ་འབྲིང་ལ་འོ་མ་ཐ། །ཤ་
གྲོགས་འོ་མ་འོ་གྲོགས་མར་ཉིད་གཅེས། །ཁ་འཛིན་རླུང་ལ་ཤིང་ཀུན་ཁ་རུ་ཚྭ། །བད་ཀན་
ལྡན་ལ་སྒ་དང་པི་པི་ལིང་།༌། མཁྲིས་པར་ལྡན་ལ་སླེ་ཏྲེས་ཀྱི་ལྕེ་བ། །སྐྲན་ལ་རྒྱ་ཚྭ་སྲིན་ལ་བྱི་
ཏང་ག །ཕོ་ལོང་སྦོས་ལ་རུ་རྟ་སྡེབ་པར་བྱ། །བཏང་ཐབས་ཁྱོར་གང་ཕུལ་གང་ཕུལ་ལུ་ཕྱེད། །
འོ་དྲོད་ཙམ་བསྲོས་དྲོད་པ་གཅེ་འུ་ཡིས། །རྒོངས་དུས་བཤང་གསལ་ལུས་ཀྱི་བཅས་བྱས་ལ། །
གྲོད་པའི་དབུགས་བཏོན་མ་གནད་བཅུག་ལ་བཏང༌། །གན་རྐྱལ་ཉལ་ལ་རྐུབ་བཅོས་རྐང་
མཐིལ་བརྡུང༌། །རྐང་མཐེབ་ནས་བཟུང་གནམ་དུ་བཏེག་ལ་བསིག །སྔས་སྨད་འཕོངས་སྟོད་
གན་རྐྱལ་མ་གྲངས་བཉལ། །སླེན་འབྱམ་དབྱུང་དུས་ཉི་ནུབ་སྲོད་དུས་ཡིན། །དེ་མ་བྱུང་ན་ནི་
རུ་ཧ་ཡིས་བསུ། །རླུང་ཤས་མེ་དྲོད་ཆེ་ལ་བསྟུད་ལ་བཏང༌། །དེ་མ་ཡིན་ན་ལྕག་ལན་བཏང་
བར་བྱ། །ཕན་ཡོན་རླུང་གནོན་བད་མཁྲིས་ནད་ཞེན་སློང༌། །བཏང་དྲགས་ཡི་ག་འགག་ཅིང་
མེ་དྲོད་འཆི། །ནི་རུ་ཧ་སྤེལ་གནོད་མེད་ནད་ཀུན་འདྲེན། །དེ་ཕྱིར་ཟུངས་ངན་ནད་རྙིང་གསོ་
དཀའ་ལ། །གཅིག་དང་གཉིས་སྤེལ་ལན་མང་བཏང་བས་ཆོག །ཅེས་གསུངས་སོ། །བདུད་
རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལས་ལྔ་འཇམ་རྩིའི་ལེའུ་སྟེ་
བཅུ་བདུན་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །ལས་ལྔ་ནི་རུ་ཧ་ལ་སྤང་ཡུལ་དང༌། །ཕན་ཡོན་སྦྱོར་བ་ཇི་ལྟར་བཏང་ཚུལ་
ལོ། །སྤང་ཡུལ་གཞང་ལུག་འཁྲུ་བ་འབྱམས་པ་དང༌། །ཚད་གསར་མེ་ཉམས་ས་བོན་འཛག་
25-1-585


ལ་སྤང༌། །ཕན་ཡོན་སྤྱི་དང་བྱེ་བྲག་རྣམ་པ་གཉིས། །དང་པོ་སྨད་དུ་མཚོན་ཕོག་རྟུག་སྐམས་
དང༌། །གླང་ཐབས་སྨད་ཚད་དྲི་ཆུ་བསྡམ་པ་དང༌། །ལྟོ་སྦོས་སྲིན་ནད་སྐྲན་གསར་རིམས་
རྙིང་དང༌། །ཁྱད་པར་ནད་སྟོབས་ཆེ་ལ་རྣོན་པོ་བསྔགས། །གཅིན་སྙི་ཚད་པས་འཁྲུ་དང་གསོ་
དཀའི་རིམས། །དྲེག་འོར་ཁུ་བ་ཟད་པ་འཇམ་པོས་སེལ། །སྦྱོར་བ་བར་མ་རྣོ་འཇམ་རྣམ་པ་
གསུམ། །བར་མ་དུར་བྱིད་སུག་པ་བུལ་ཏོག་ཕབས། །བྱང་(ལག་ལེན་དུ་ཚྭ་བཏོང་)པ་དུད་པ་བ་
ཆུ་བསིངས་སྙིགས་སྦྱར། །མཚོན་ཕོག་མཁྲིས་པ་གླང་ཐབས་དབྱི་མོང་དཀར། །སྨད་ཚད་
ལྕུམ་རྩ་ལྟོ་སྦོས་ཨུག་ཆོས་སྡེབ། །སྲིན་ལ་སྒོག་སྐྱ་གྲང་ལ་པི་པི་ལིང༌། །ནད་སྟེང་ཁ་བསྒྱུར་
རྣོན་པོ་རེ་ལྕག་བསྣན། །འཇམ་པོ་ཨ་རུ་ར་དང་སེང་ཕྲོམ་བཙོད། །ཀྱི་ལྕེ་དུར་བྱིད་ལྕུམ་རྩ་བ་
འོ་ཆུ། །བཏང་ཐབས་བྲེ་ཕྱེད་ཕུལ་བཞི་ཕུལ་ལུ་དོ། །འོ་དྲོད་ཙམ་བསྲོས་འབྲུ་མར་ཅོར་ཅིག་
བླུག །གྲོད་པ་བཀང་ལ་གཅེ་འུ་ཚད་ལྡན་གཞུག །སྔས་སྨད་སྒུར་ལ་སེང་བུག་སྣུམ་བྱུགས་ཏེ། །
དབུགས་བཏོན་མ་གནད་དལ་བུས་སོར་བཞི་གཞུག །ཅུང་ཟད་ཕྱིར་བསྣུར་གྲོད་པ་བཙིར་
ལ་བཏང༌། །འགྲོར་མ་འདོད་ན་གཡས་གཡོན་སྟེང་འོག་གཅུ། །ལྷག་མ་ཅུང་ཟད་རླུང་ཡོད་
མི་བཏང་བཞག །གཅེ་འུ་བཏོན་ལ་འཕོངས་སུ་རས་ལྟོ་བརྟིག །གཞོགས་གཡོན་འོག་བཅུག་
ལན་གཉིས་ལན་གསུམ་བཟློག །མ་བཟློགས་མི་ཐེབས་དྲགས་ན་ལ་རྒལ་འགྱུར། །མི་ཐུབ་
ཙོག་པུར་འདུག་ལ་སྣོད་དུ་བཏང་། །སྐྱོ་འདུར་གོང་བུ་ཅོལ་ལེ་བྱུང་ན་ཐེབས། །མ་ཐེབས་ཆུ་
རུ་ལོག་ན་སྐྱར་ལ་བཏང༌། །སྨན་རོ་བདའ་ཕྱིར་རྒྱམ་ཚྭའི་ཆུ་སྐོལ་བཏུང༌། །ཞག་གཅིག་ལྟོ་
སྐྱུང་སྨད་ནད་ཀུན་འདྲེན་མཆོག །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་
གསང་བ་མན་ངག་གི་རྒྱུད་ལས་ལས་ལྔ་ནི་རུ་ཧའི་ལེའུ་སྟེ་བཅོ་བརྒྱད་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །སྦྱོངས་ཀྱི་ལོག་གནོན་རྩ་སྦྱོངས་བསྟན་པ་ལ། །སྔོན་འགྲོ་དངོས་གཞི་
25-1-586


རྗེས་དང་ཕན་ཡོན་ནོ། །སྔོན་འགྲོ་ཉེ་དང་རིང་བ་རྣམ་པ་གཉིས། །རིང་བ་ནད་གང་ཡིན་པའི་
གཉེན་པོ་དང༌། །འབྲས་གསུམ་ཆ་མཉམ་བསྡུས་ཐང་རྒོངས་དུས་བཏང༌། །བྱིས་པ་དགེ་སློང་
མཁལ་ནད་ཡོད་པ་ལ། །ད་བྱིད་(སྡིག་སྲིན། སུག་སྨེལ། ཉི་དགའ། གསེར་གྱི་བྱེ་མ། སྲ་འབྲས། མཁལ་མ་ཞོ་ས
རྩ་ཁུ་བྱུག བུ་རམ་རིལ་བུ་ཆག་གིས་འཕུལ། རྩ་ཁུ་བྱུག ཚབ་ཏུ་མཚལ་བཏང་ཀྱང་རུང་ངོ་།།)བརྒྱད་སྦྱོར་ཕྱེ་མས་རྩ་
ལམ་སྦྱང༌། །ཉེ་བ་གཟའ་སྐར་ཚེས་གྲངས་བཟང་བ་ལ། །མཁན་པ་སྤང་མ་ཆུ་འཇམ་བསྲོས་
པ་ཡིས། །ལུས་ཀུན་དག་པར་བཀྲུས་རྗེས་རྩི་མར་དང༌། །འབྲུ་མར་སྤང་སྤོས་སྦྱར་བས་ལུས་
ཀུན་བྱུག །ཁྱད་པར་སྤྱི་གཙུག་མཚན་པགས་ཚིགས་རྣམས་མཉེ། །གཡེར་མ་ཉི་དགའི་ཐང་
གིས་རྩ་ཁ་དབྱེ། །ཕོ་མོ་སྤྲད་དང་ར་ཡི་ཝ་གདོང་དང༌། །ཉི་དགའི་འདབ་ཚོད་ཚྭ་གཡེར་བཏབ་
པ་བཏང༌། །དངོས་གཞི་སྣ་སེལ་མདུང་སྨན་བྱང་པ་དང༌། །སྦྱར་ཚད་སྣ་ཁྲིད་བཏང་ཐབས་
ཐེབས་པའི་རྟགས། །ལྕག་དང་ལོག་གནོན་རྣམ་པ་དགུ་ཡིས་བསྟན། །སྣ་སེལ་སུག་སྨེལ་
སྡིག་སྲིན་རྩ་ཁུ་བྱུག །ཉི་དགའ་ཚ་གྲང་རྟས་བསྒྱུར་མྱུར་དུ་འབིགས། །མདུང་སྨན་རྒྱ་ཚྭ་ལི་
ཤི་སྡིག་སྲིན་མཚལ། །ལྕམ་པ་གོང་གི་རྟ་སྦྱར་ནད་སློང་འཁྲུག །བྱང་པའི་ཆོ་ག་དང་པོ་བཟང་
ངན་བརྟག །དུག་དབྱུང་འཇམ་བཙལ་ཟུག་ཆུང་ནད་འདྲོངས་ཆེ། །བཟང་བ་དམར་ཁྲ་སྐྱི་ཚེར་
སྲད་གསེབ་གནས། །ཐན་ཆེ་སྟོན་སེར་གྲིར་ཤི་བཟང་བ་ཡིན། །ངན་པ་སེར་ཁྲ་ཡོག་མོ་ལོ་
གསེབ་གནས། །ཆར་ཆེ་ནམ་གཞུག་ཆད་དུས་ཤི་བ་ངན། །དུག་ནི་བར་གཤོག་དཀར་པོ་ཟུག་
ཆེ་དབྱུང༌། །འཇམ་བཙལ་བ་ནི་སྦུར་(ཀོ་མོག་སོགས་ཆུ་དལ་བའི་དཀྱིལ་གྱི་)མགྱོགས་གྲོགས་དང་སྡེབ། །
དེ་མ་འཛོམ་ན་ཆ་གའི་མགོ་བོ་བཏང༌། །ཡང་ན་ཡོས་སམ་དྲི་ཆུར་བཏུལ་བ་ཤིས། །བྱང་པ་
མགོ་རྐང་ཆད་ན་ནད་འདྲོངས་ཆུང༌། །བཟང་ཞིང་མགོ་རྐང་ཚང་ན་བཅུ་གཅིག་དང༌། །ངན་
རྙིང་མགོ་རྐང་མེད་ན་བཅུ་བདུན་བཏང༌། །སྦྱར་ཚད་བྱང་པ་རྒྱ་ཚྭ་སྡིག་སྲིན་མཚལ། །གུར་
གུམ་ཧ་(ཐེ་ལེ་སྨུག་པོ་) ཤིག་དར་མཚུར་རྩི་བཞིན་བཏགས། །ཆང་གི་རིལ་བུ་སྲན་ཕོས་ཙམ་དུ་
25-1-587


དྲིལ། །ཡང་ན་རྒྱ་རུ་བྱ་མ་བྱི་རུས་དང༌། །བྱི་ཟུང་འོལ་མོ་སེ་དང་རྣོན་པོ་(རྒྱ་ཚ། སྡིག་སྲིན། གསེར་ཕྱེ།)
གསུམ། །སུག་སྨེལ་མཚལ་གྱི་རིལ་བུས་རྩ་ནད་སྦྱོང༌(བྱང་བ་བཏོང་མི་དགོས་པས་བྱང་ཆུབ་སེམས་དཔའི་རྩ་
སྦྱོང་ཅེས་ཟེར)། །སྣ་ཁྲིད་གློ་སྙིང་མཆིན་མཆེར་མཁལ་མ་དང༌། །དུག་དང་ཆུ་སེར་ནད་ལ་སོགས་
པ་ཡིས། །གང་ཤིས་སྨན་དང་བསྡེབས་པས་ནད་ཐོག་འཁྲིད། །ཡང་ན་མདུང་བའི་སྨན་དང་
སྦྱར་ལ་བཏང༌། །བཏང་ཐབས་རྒོངས་མོ་ཉི་དགའི་འདབ་ཚོད་བཏང༌། །སྲོད་ལ་སྣ་སེལ་
ནམ་གུང་མདུང་སྨན་བཏང༌། །ཐོ་རངས་དུས་ན་རྩ་སྦྱོངས་རིལ་བུ་དགུ། །ཚ་གྲང་སྦྱར་བའི་རྟ་
ཡིས་འཕུལ་ལ་བཏང༌། །ཉི་ཤར་དུས་སུ་ཕལ་ཆེར་ཐེབས་པ་ཡིན། །དེ་དུས་མ་ཐེབས་རིལ་
བུ་བདུན་བསྣན་བཏང༌། །ནམ་ཐེབས་དུས་ན་རིལ་བུ་ལྔ་ལྔ་ཡིས། །སྔ་མ་ཞུ་ཞིང་ཕྱི་མ་བསྟེན་
པར་བྱ། །དེ་ལྟར་རིལ་བུ་ཐུབས་སུ་བཅད་བཏང་བས། །བྱང་པའི་དུག་ནད་དུས་གཅིག་མི་
འབྱུང་སྟེ། །ནད་པ་ཟུག་ཆུང་འགགས་པའི་དོགས་པ་མེད། །ཡང་ཡང་མནན་པས་མི་ཐེབས་
མི་སྲིད་ཅིང༌། །འདྲོངས་ཆེར་འབྱུང་བའི་མ་འདྲོངས་བར་དུ་བཏང༌། །དེ་ལྟར་མི་ཤེས་རིལ་བུ་
དུས་གཅིག་བཏང༌། །བྱང་པའི་དུག་ལངས་ཆུ་སེར་དུས་གཅིག་འཕུལ། །ཆུ་འགགས་ཟུག་
ཆེ་རང་སྡུག་འཆི་ཡང་སྲིད། །ཐེབས་རྟགས་ལུས་སྦྲིད་ནད་གང་ཡོད་སར་ན། །རྒྱུ་ཞབས་ཚ་
རུམ་མཚན་མ་ཚ་ཞིང་འཕྲེང༌། །ཆུ་ངན་ཐིགས་པ་ཐོན་དཀའ་ཡང་ཡང་འབྱུང༌། །ལྕག་ཏུ་དེ་
དུས་སིངས་པོ་གསར་གླེག་གིས། །ཡང་ཡང་བསྐུལ་བས་རྩ་ལམ་ཆུ་ལམ་འདག །ཚ་བ་ཤས་
ཆེ་ཇའམ་ཆུར་ཁུ་བཏང༌། །ནད་ཞེན་ཆེ་ན་སྐབས་སུ་མདུང་སྨན་སྤེལ། །གང་ནར་རྡེའུ་ཆང་
བྲན་བསྲོས་པས་བདུག །སང་སེང་རྐང་པ་མི་རྐྱང་དྲོད་ལ་བསྒོར། །དེ་ལྟར་ལུས་མ་གྲང་པར་
དུགས་བསྟེན་བྱ། །རྩ་ཁྲུས་མི་ཆད་ནད་འདག་ཐེ་ཚོམ་མེད། །ལུས་གྲང་ཆུ་སེར་འགྱིངས་ན་
ནད་མི་ཐོན། །ཟུག་ཆེ་ལྕག་མ་བྲབས་ན་ནད་མི་འབྱོངས། །དེ་ཕྱིར་ལྕག་དང་དྲོ་བ་ཤིན་ཏུ་
གཅེས། །སྣོད་གཅིག་མཚན་མའི་འོག་ཏུ་རྒྱུན་དུ་བཟེད། །སྐབས་སུ་སྔས་ཁར་ཕྲུ་བའི་ནང་དུ་
25-1-588


བསག །སེར་པོ་སྨུག་པོ་རྣག་ཁྲག་སྤུ་སོགས་འབྱུང༌། །ནད་འདྲོངས་སྨན་འཕྲོ་བཅད་ལ་ལྕག་
འགའ་བརྡེག །ལོག་གནོན་དྲུག་སྟེ་རྒལ་པ་མནན་པ་དང༌། །སྟོར་བ་བཙལ་དང་འགྱིངས་པ་
དྲང་བ་དང༌། །གཟེར་བ་བཅག་དང་འགགས་བསལ་འབྱམས་པ་གཅོད། །མ་ཐེབས་སྐྱུག་
ན་མནན་ཐབས་བཤལ་དང་འདྲ། །སྟོར་ནས་ཅི་ཡང་མེད་ན་དེ་རྒྱུ་གདོན། །སོ་རྙིངས་གདུལ་
དྲགས་ཐུན་ཆུང་སྨན་རྟ་ལོག །གང་ཡིན་དེ་ཡི་གཉེན་པོས་སྟོར་བ་བཙལ། །འགྱིངས་ནས་ཕོ་
བ་རྫིངས་ན་བསྐུ་མཉེ་དུགས། །ཆུ་བསྐོལ་ལོ་བརྒྱད་དྲི་ཆུ་ཐེངས་འགའ་བཏུང༌། །རྒྱུ་ཞབས་
མཚན་མ་ཟུག་ཆེ་དུགས་ཀྱིས་བསྲོ། །དེས་མ་ཆོགས་ན་ཆུ་སེར་འགྱིངས་པ་ཡིན། །རྒྱ་ཚྭ་སྡིག་
སྲིན་དྲོད་སྨན་ཆང་སྦྱར་བཏང༌། །ཡང་ན་དྭ་(ཤིང་རྩ་མཐུག་པོ་)ཚ་མར་གསར་རིལ་བུ་མིད། །དེས་
མ་ཆོགས་ན་བྱང་པ་རྩུབ་པ་ཡིན། །ཆ་གའི་མགོ་བོ་གསུམ་དང་སྦུར་མགྱོགས་དང༌། །བོང་
ང་དཀར་པོ་ཆང་དང་སྦྱར་ལ་བཏང༌། །མ་ཆོགས་རླུང་ཡིན་རུས་རྙིང་ཚ་བ་བཏུང༌། །དེ་དག་
རྣམས་ཀྱིས་མི་ཆོགས་ག་ལ་སྲིད། །འགགས་ན་ས་བོན་འཁར་དང་སྤུ་འཐུམས་འཆེས། །ཁྲག་
ཤ་རྡེའུས་འགགས་མཚན་མ་མཉེ་ཞིང་བཞོ། །མ་ཕན་རྒྱ་ཚྭ་རུ་རྟ་ཤུ་དག་དང༌། །ཕོ་བ་རིས་
ཁུ་གཅེ་འུས་ལྒང་པར་བསྐྱལ། །འབྱམས་པ་ལུས་སྟོབས་བཟང་ན་མི་བཅད་བཞག །བཅད་
དགོས་ཚོས་ཁུར་དོམ་མཁྲིས་བཏབ་ལ་བཏང༌། །མ་ཆོད་དྲི་ཆུ་རང་ལོག་དོམ་མཁྲིས་བཅད། །
རྗེས་གཅོད་གྲང་བ་ཤས་ཆེ་གསར་འཇམ་དང༌། །ལུག་ཤའི་ཚོ་ཁུ་ཟན་དྲོན་རིམ་བསྐྱེད་
བཏང༌། །ཚ་བ་ཤས་ཆེ་སྐོམ་ཤའི་ཚོ་ཁུ་དང༌། །བསྐོལ་གྲང་ཆུ་དང་ཆབ་ཚ་ཟན་དྲོན་བཏང༌། །
མ་གྲངས་བཅད་ཅིང་ཟླ་ཕྱེད་ཟས་སྤྱོད་གཟབ། །ཕན་ཡོན་སྨན་དང་ནད་དུ་ཤེས་པར་བྱ། །
དང་པོ་བྱང་པས་རྩ་ཡི་ཆུ་སེར་འདྲེན། །རྒྱ་ཚྭ་སྡིག་སྲིན་རྩ་ལམ་འབྱེད་པར་བྱེད། །གུར་གུམ་
རྩ་མཉེན་མཚལ་གྱིས་དྭངས་སྙིགས་འབྱེད། །དར་ཚུར་ནད་སྡུད་ཧ་ཤིག་གཏིང་དུ་འཁྲིད། །
ནད་ནི་བུ་རྩི་བཏང་དང་སྐྱེ་འཕྲོ་ཆད། །བུ་རོ་ལུས་དང་མངལ་སྐྲན་ཁྲག་ཚབས་བྱེར། །ཁྲག་
25-1-589


མཁྲིས་དུག་སོགས་ཚ་བ་རྙིང་པ་དང༌། །དྲེག་དང་གྲུམ་བུ་འབྲས་དང་ཟ་འཕྲུག་དང༌། །མགོ་
ཆག་རྩར་བྱེར་རྨ་རྒན་འཚོར་མི་འདོད། །སུར་ཡ་དམུ་ཆུ་རྩ་སྐྲན་ཆུ་སེར་རྒྱས། །ད་རྒན་མཛེ་
ནད་རྩ་འགྲམས་ཐམས་ཅད་སྦྱོང༌། །ས་བོན་བླུགས་པ་མ་ཡིན་ཀུན་ལ་བསྔགས། །ཁྱད་པར་
རྩར་བབས་ནད་ཀྱི་གཉེན་པོའི་མཆོག །ཅེས་གསུངས་སོ། །བདུད་རྩི་སྙིང་པོ་ཡན་ལག་
བརྒྱད་པ་གསང་བ་མན་ངག་གི་རྒྱུད་ལས་སྦྱོངས་ཀྱི་ལོག་གནོན་རྩ་སྦྱོངས་ཀྱི་ལེའུ་སྟེ་བཅུ་
དགུ་པའོ།། །། 
དེ་ནས་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་
ཉོན་ཅིག དཔྱད་ལྔའི་མཆོག་གྱུར་གཏར་གའི་བརྡེག་ཐབས་ལ། །ཆ་བྱད་བརྟག་པ་ཐབས་
དང་སྐྱོན་ཡོན་ལྔ། །དང་པོ་ཆ་བྱད་རྣོ་མཉེན་ལྡན་པའི་ལྕགས། །མགར་བ་མཁས་པས་སྦུ་གུའི་
སྒྲོ་འདྲའི་དབྱིབས། །རྩེ་སྒུར་ཚེས་གཉིས་ཟླ་བ་ལྟ་བུ་འམ། །ལྟག་ཉལ་སོ་དྲང་བྲང་བ་ཅན་
དང་ནི། །སྟ་རེའི་ཁ་འདྲ་ཀུན་ཀྱང་སྲིད་སོར་དྲུག །ཐར་འབྱོངས་ངར་ལྡན་བརྡུངས་ཐེམས་
བདར་ལེགས་པ། །རྣོ་ཚད་གྱེན་དུ་སྤུ་གཤོག་ནུས་པ་སྟེ། །གཟེ་དང་མི་གཟེ་དེ་ལ་རག་ལས་
པས། །བཙགས་ལེགས་རྟག་ཏུ་ལུས་ལ་བཅང་བར་བྱ། །བརྟག་པ་རུང་དང་མི་རུང་ནད་གཞི་
བརྟག །རན་དང་མི་རན་དུས་ཚོད་བརྟག་པའོ། །གཏར་དུ་རུང་བའི་ནད་གཞི་འགྲམས་
འཁྲུགས་རིམས། །སྐྲངས་པ་རྨ་དང་དྲེག་ནད་སུར་ཡ་དང༌། །མེ་དབལ་ཆུ་སེར་མཛེ་ནད་ལ་
སོགས་པའི། །ཚ་བ་ཁྲག་མཁྲིས་ལས་གྱུར་གཏར་བའི་ནད། །མི་རུང་གདོན་ཅན་ཟུངས་ཟད་
སྦྲུམ་མ་དང༌། །བཙས་རྗེས་སྐྱ་རྦབ་གཅོང་ཆེན་མེ་དྲོད་ཉམས། །མདོར་ན་བད་རླུང་ལས་གྱུར་
ནད་ལ་སྤང༌། །འོན་ཀྱང་ཁྲག་མ་ཕྱེད་དང་རིམས་མ་སྨིན། །སྟོངས་ཚད་དུག་མ་གསོད་དང་
གཉན་ཚད་དང༌། །ཟུངས་ཟད་ཚ་བ་ཡིན་ཡང་གཏར་མི་རུང༌། །བད་རླུང་ནད་ཀྱང་ཁྲག་
མཁྲིས་བསྡོངས་ན་གཏར། །དོག་དང་རྩ་མདུད་བླ་གནས་སར་མི་གཏར། །དུས་ཚོད་ཐོག་མ་
25-1-590


བར་དང་ཐ་མ་གསུམ། །བྱང་ཁོག་ཁྲག་བབས་དོན་ལ་ཟིན་པ་དང༌། །ཁྲག་མ་ཆོད་དང་རྒྱས་
འཁྲུགས་སྨིན་ལོང་མེད། །དུས་ལ་མི་བསྡད་བརྩོན་པས་ཐོག་མར་གཏར། །བར་དུ་གཏར་
དུས་གཟེར་དུས་གྲང་ཤུམ་ཆད། །རྩ་རྒྱུད་ལྕི་སྦྲིད་རྒྱས་པའི་དུས་ན་གཏར། །ཁྲག་ཕྱེད་རི་མོ་
མེད་ན་དུས་ལ་ཕེབས། །དེ་ལྟར་མིན་ན་ཐང་གིས་ཕྱེ་ལ་གཏར། །ཁྲག་མཁྲིས་ངན་ཁྲག་རྩ་
མིག་བྱེར་བ་དང༌། །ཟས་ཀྱིས་ཚ་རོ་བསྐྱེད་ལ་ཐ་མར་གཏར། །གཏར་བ་སྔས་ན་རླུང་སྐྱེ་ཚ་བ་
འབྱེར། །ཕྱིས་ན་ངན་ཁྲག་རྩར་འགྲམས་རོ་མི་ཐོན། །ཚ་སྟོབས་ཆེ་ན་རྩ་དོན་རྣག་ཏུ་འདྲུལ། །
གཏར་ཐབས་སྔོན་འགྲོ་དངོས་གཞི་ཕྱི་རྗེས་གསུམ། །གཏར་བའི་སྔོན་འགྲོ་རིང་དང་ཉེ་བ་
གཉིས། །རིང་བ་མ་སྨིན་སྨིན་པར་བྱ་བ་དང༌། །ནད་ཁྲག་ཟུངས་ཁྲག་ཐང་གིས་དབྱེ་བར་བྱ། །
ཐང་མ་བཏང་བར་གཏར་ན་ཟུངས་ཁྲག་འཆོར། །ནད་ཁྲག་མི་ཐོན་རླུང་སྐྱེ་ཚད་རོ་ལྡས། །ཉེ་
བའི་སྔོན་འགྲོ་མེ་ཉིས་དྲོས་པར་སྲོ། །འདྲུལ་བསྲུང་གཉལ་སོགས་ཡབ་ཆ་སྟ་གོན་བྱ། །དངོས་
གཞི་གཉལ་ཐབས་གདབ་ཐབས་གདབ་དམིགས་དང༌། །ཁྲག་སྤྲ་དབྱུང་ཚད་ལོག་གནོན་
བསྟན་པའོ། །གཉལ་ཐབས་དཔྲལ་རྩ་ལྟག་རྩ་འཚོགས་གསང་རྣམས། །སྨིན་སྟེང་ཐི་གུས་
བསྐོར་ལ་ཤིང་བུས་གཅུ། །རྩེ་ཆུང་གཉིས་ལ་མཆན་ཁུང་ག་ཤར་བསྡམས། །ཐོང་རྩ་ཐི་གུས་
སྐེ་བསྐོར་རྒྱབ་ནས་འཐེན། །ལྕེ་རྩ་སྨྱུག་སྐམ་དར་དྲིལ་བར་དུ་བཏེམ། །དཔུང་རྩ་ལུག་གཞུག་
འོག་ཏུ་ཐི་གུས་བསྡམ། །ཨ་སོ་དྲུག་མགོ་སྒང་རྩ་རུ་ཐུང་དང༌། །གཤའ་རིངས་ལ་སོགས་དྲི་
ཁུང་སོར་གསུམ་གོང༌། །ཀྱོར་གོང་ཕྲན་བུ་རྒྱབ་རྩ་དྲུག་འདུས་སོགས། །སྤྲིན་རྩེའི་བར་རྩ་
མཁྲིག་མའི་གོང་དུ་བསྡམ། །རྩ་བོ་ཆེ་ལ་པུས་ནང་མཛུབ་གང་སར། །སྒབ་རྩ་རྟ་འཐུར་བྱིན་
གཞུག་ལྷམ་སྒྲོག་སྟེང༌། །ལོང་རྩ་གདོང་རྩ་ཡོབ་གོང་བྱིན་སྐྱོག་དང༌། །རྒྱུ་རྩ་ལ་སོགས་ལོང་
བུའི་སྟེང་དུ་བསྡམ། །སྦུབས་ཀྱི་རྩ་རྣམས་རྩ་རྒྱུད་ཤིང་བུས་གཅུ། །གང་ཡང་གཉལ་སྟན་སྟེང་
དུ་གཉལ་ཐག་གིས། །པགས་པ་མ་འཆུས་རྩལ་མཉམ་འཐེན་ལ་བསྡམ། །སྦྲིད་ཆིལ་རྩ་རྒྱུད་
25-1-591


ལྟང་གིས་བྱུང་ན་སྡོམས། །མ་སྡོམས་མི་ཐེབས་འཆུས་ན་ཁྲག་མི་ཐོན། །གཉལ་རྗེས་རྩ་རྣམས་
ལག་པས་མཉེ་ཞིང་བསྲུབ། །ཤ་སྦྲིད་རྩ་རྣམས་རྒྱས་པས་ཐེབས་པ་བླ། །གཉལ་མ་ཐོག་ཏུ་མི་
གཏར་ཐེབས་པ་དཀའ། །གདབ་ཐབས་རྩ་མ་འཆུས་པར་མཐེ་བོས་མནན། །ཅུང་ཟད་ཐུར་དུ་
ཐེན་པས་རྩ་མི་འགྱུར། །ཕལ་ཆེར་གཉལ་འོག་སོར་གསུམ་འོག་ཏུ་གཏར། །གློ་ཕུག་སྒང་
གཤགས་དོལ་ཆོད་ཉིས་ལེན་དང༌། །སྨྱུག་ཁ་ལ་སོགས་གང་བདེ་གང་གོམས་གདབ། །དེ་
ཡང་རྩ་ཆེན་རྣམས་ལ་སྒང་གཤགས་བྱ། །རྩ་ཕྲན་སྨྱུག་ཁ་ཤིན་ཏུ་ཕྲ་བ་བཅད། །གནད་སྟེང་
རྩ་ལ་ཉིས་ལེན་(སྔོན་ལ་པགས་པ་སྲལ་དེ་ནས་རྩ་ལ་གདབ་)བསྔགས་པ་ཡིན། །ཁྲག་པས་རླངས་ཕན་རྨ་
ཁ་ཆེ་བར་བྱ། །རྨ་ཆུང་སྐྲངས་དང་ཁྲག་གི་རླངས་མི་ཐོན། །རྩ་ཁ་པགས་ཁ་མཉམ་ན་ལེགས་
པ་ཡིན། །རུས་སྟེང་རྩ་ལ་སྟ་རེ་སོ་ཡིས་གཏར། །རྩ་སྟེང་མི་འགྱུར་འཕྲེད་བཙུགས་བེམ་
བརྡོལ་བརྡེག །ལྟག་རྩ་སྡུད་སྒོའི་གཡས་གཡོན་གྱེན་སོར་གསུམ། །རྩ་སྟེང་ཐིག་གདབ་
གཏར་རྗེས་མེ་ཡིས་བསྲུང༌། །འཚོགས་གསང་སྐྲ་མཚམས་སོར་བཞི་གྱེན་དུ་གཤག །མུར་
གོང་འཕར་རྩ་སྐྲ་ཡི་གསེབ་ཏུ་གཏར། །རྩེ་ཆུང་མས་ཀྱི་སོར་བཞི་བཅལ་བར་གཏར། །རུ་ཐུང་
གཞུ་མཆོག་སྣ་ནས་སོར་བཞིར་གཏར། །བྱིན་གཞུག་རྟིང་པའི་གྱེན་མཛུབ་གང་དུ་གཏར། །
གཏར་མ་ཐོག་ཏུ་མི་གློད་ཁྲག་མི་ཐོན། །མགོ་སྐེ་ལོང་རྩ་གསུམ་ལ་གློད་མི་བྱ། །གཞན་དག་
ཁྲག་ཆད་དུས་ན་ཆ་ཡིས་གློད། །གདབ་དམིགས་གཉའ་རེངས་འགྱུར་དཀའ་ལྟག་རྩ་གཏར། །
བད་མཁྲིས་མགོ་ནད་ཆང་འཐུང་དྲོས་ཚེ་ན། །དཔྲལ་གཟེར་འཚོགས་ཁ་ལྕི་ཞིང་མིག་མི་ཐེག །
འཚོགས་གསང་དབྱེ་ཞིང་གསེར་མདུང་དངུལ་གདུང་གཏར། །མིག་དམར་ལིང་ཐོག་མོད་ན་
མིག་རྩ་གཏར། །སྣ་ནད་སྣ་རྩེ་རྣ་བ་རྣ་རྩ་གཏར། །སྙིང་ཚད་སྐོམ་དད་སྨྲ་དཀའ་ལྕེ་རྩ་གཏར། །
སོ་མིག་སྣ་འགྲམས་ནད་ལ་ལྟག་རལ་གཏར། །སོ་ནད་སོ་རྩ་རྩེ་ཆུང་དཔུང་རྩ་གཏར། །གློ་
ལུ་སྙིང་ཚད་མྱོས་ཤིང་དབུགས་མི་བདེ། །སྐད་འགགས་ཨོལ་གོང་བར་གྱི་ཐོང་རྩ་གཏར།  །
25-1-592

 
གླད་སྲིན་བྱང་ཁོག་ཁྲག་བབས་དོན་ལ་ཟིན། །རྒྱས་འཁྲུགས་གློ་འགྲམས་སོ་ལ་ཁྲག་ཚད་
རྒྱས། །སྐྲངས་ལོང་འབྲས་ནད་ཀུན་ལ་རྩེ་ཆུང་གཏར། །སྟོད་གཟེར་གློ་ཚད་མགོ་ན་དཔུང་རྩ་
གཏར། །གློ་ཚད་སྟོད་ལྕི་དབུགས་ཐུང་གཟེར་ཆེ་ལ། །དྲུག་འགོ་སྒང་རྩ་གཉིས་ལ་གཏར་བར་
བྱ། །གློ་སྙིང་མཆིན་དྲི་བྲང་རྒྱབ་སྦྲགས་ཤིང་ན། །དོན་སྣོད་ཐུན་མོང་ནད་ལ་སྣོད་ཀ་གཏར། །
གློ་སྙིང་ཁྲག་རྒྱས་གློ་སྙིང་འདོམ་རྩ་གཏར། །མིག་སེར་ལུས་ལྕི་དང་ག་འགགས་པ་ལ། །
མཁྲིས་རྩ་གཤའ་རིང་ཕྲན་བུ་གཉིས་ལ་གཏར། །མཆིན་མཆེར་མཆིན་དྲི་འགྲམས་འཁྲུགས་
གཟེར་བ་དང༌། །སྨུག་པོ་ཚ་བའི་སྐྲན་ལ་རུ་ཐུང་གཏར། །སྐད་འགགས་གཅོང་ཐབས་ལུ་ལ་
སྒང་རྩ་གཏར། །རོ་སྟོད་ཕོ་མཆིན་མཆིན་དྲི་འཁོར་ཞིང་ན། །མཆན་འོག་གཟེར་ལ་གློ་མཆིན་
འདོམ་རྩ་གཏར། །ཁྲག་མཁྲིས་ནད་ལ་མཆིན་མཁྲིས་འདོམ་རྩ་གཏར། །ཕོ་མཆིན་ཁྲག་ནད་
རྒྱབ་རྩ་དྲུག་འདུས་གཏར། །རྒྱུ་ལོང་མཚོན་ཕོག་འགྲམས་དང་རླིག་པ་སྐྲངས། །སྨད་ལྕི་
གཞང་འབྲུམ་མངལ་ནད་རྩ་ཆེན་གཏར། །གཞུང་རེངས་ལྟག་འགྱེ་དཔྱི་རྐེད་འཁོར་བ་དང༌། །
མངལ་ཁྲག་འཛག་ལ་སྒྱིད་ཁུང་སྒབ་རྩ་གཏར། །མཆེར་པ་གནད་འགྲམས་ཤུ་བ་ཟ་རྐོང་
དང༌། །མཁྲིས་ནད་ཆུ་སེར་འོར་ལ་རྟ་ཐུར་གཏར། །མཁལ་འགྲམས་མཚོན་ཕོག་རྐེད་པ་སྨད་
མི་ཐེག །རྐང་བཤལ་བྱིན་པ་འགས་སྙམ་དཔྱི་མིག་གཟེར། །སུར་ཡ་མངལ་ཁྲག་འབྱམས་ལ་
བྱིན་གཞུག་གཏར། །སྨད་དུ་མཚོན་ཕོག་གླང་ཐབས་མངལ་ཁྲག་འཛག །དྲི་ཆུ་འགག་ལ་
ལོང་རྩ་གཏར་བར་བྱ། །རྒྱུ་མར་ཁྲག་རྒྱས་མགོ་སྐྱོན་སྙིང་ལ་བབས། །སྙིང་ནད་ཅིས་ཀྱང་མ་
ཕན་རྒྱུ་རྩ་གཏར། །རྐང་པའི་མཐིལ་དང་བོལ་སྐྲངས་ཚ་འབྲབ་བྱེད། །ཆུ་སེར་ནད་ལ་གདོང་
རྩ་ཡོབ་གོང་གཏར། །མདོར་ན་སྟོད་ནད་རྩེ་ཆུང་སྒང་རྩ་གཏར། །སྨད་ཀྱི་ནད་ལ་ལོང་རྩ་བྱིན་
གཞུག་གཏར། །བར་གྱི་ནད་ལ་སྣོད་ཀ་རུ་ཐུང་གཏར། །རོ་སྟོད་ནད་ལ་སྒང་རྩ་དྲུག་འགོ་
གཏར། །ནུ་འཇིང་བྲང་ནད་སྣོད་ཀ་རུ་ཐུང་གཏར། །སྙིང་ཚད་སྣོད་ཀ་ལྕེ་རྩ་ཐོང་རྩ་གཏར།  །
25-1-593

 
གློ་ཚད་དྲུག་འགོ་སྒང་རྩ་ཀྱོར་གོང་གཏར། །གློ་སྙིང་གཉིས་འདོམས་རྩེ་ཆུང་འདོམས་རྩ་
གཏར། །མཆིན་པའི་ཚ་བ་རུ་ཐུང་སྒང་རྩ་གཏར། །མཆེར་ཚད་རྟ་མཐུར་སྲིན་ལག་རྒྱབ་རྩ་
གཏར། །ཕོ་ཚད་ཕོ་བའི་རྭ་དང་དྲུག་འདུས་གཏར། །མཁྲིས་ཚད་གཤའ་རིང་ཕྲན་བུ་གསེར་
མདུང་གཏར། །མཁལ་ཚད་བྱིན་གཞུག་ཕོ་མཚན་འགྲམ་རྩ་གཏར། །རྒྱུ་ལོང་ལོང་རྩ་དཀུ་
འགྲམས་བྱིན་ཀྱོག་གཏར། །ཤ་ཡི་ཚད་པ་གློ་མཆིན་རྩ་ལ་གཏར། །རུས་པའི་ཚ་བ་མཁལ་
མའི་རྩ་ལ་གཏར། །པགས་ཚད་ཆུ་སེར་མཆིན་མཁྲིས་རྩ་ལ་གཏར། །ཟུག་ཆེ་གློ་རྩ་བྱིང་
འཐིབས་རུ་ཐུང་གཏར། །དང་ག་འགགས་ན་བད་མཁྲིས་རྩ་ལ་གཏར། །འོན་ཀྱང་གང་ཉེ་
གང་རྒྱས་གཏར་བ་ཤིས། །ཚ་བ་སྟོབས་ལྡན་རྩེ་ཆུང་ཡས་བབས་གཏར། །སྟོབས་ཆུང་ནད་ལ་
རྩ་ཕྲན་མས་འཛེག་གཏར། །ཚབས་ཆེའི་ནད་ལ་རྩ་ཕྲན་མང་གཏར་བས། །རྩེ་ཆུང་ལ་སོགས་
རྩ་ཆེན་གཏར་བ་བསྔགས། །དེ་ལྟར་མ་ཡིན་གཏར་དམིགས་མ་ཤེས་པས། །སྨད་ཁྲག་སྟོད་
དུ་དྲངས་པས་ལུས་ཟུངས་འཆོར། །སྟོད་ཁྲག་སྨད་དུ་དྲངས་ན་མེ་དྲོད་འཆི། །ཁྲག་པྲ་ཤུགས་
དྲག་སླ་ལ་སེར་དུགས་སྦོ། །བྱ་ཝང་རྒྱབ་འདྲ་ལྦུ་བ་དཀར་བ་དང༌། །བེ་སྣབས་རྣག་མཁྲིས་
ཆགས་ན་ནད་ཁྲག་སྟེ། །ཟུག་ཆོགས་སྐྱེད་ཆེ་ནད་འབྱང་བླ་བ་ཡིན། །དམར་ནག་རི་མོ་བྱུང་ན་
ཐང་རྗེས་གཏར། །རྣག་མཁྲིས་ཆགས་ན་ལུས་ཟུངས་གསོ་ཞིང་གཏར། །དམར་ལ་སྐ་ན་ཕན་
མེད་གཏར་སྐྱེད་སྦྱར། །རླུང་ཁྲག་ནག་ཅིང་རྩུབ་ལ་སྦུ་བ་དམར། །མཁྲིས་པའི་ཁྲག་ནི་སེར་
སླ་རྣག་དྲི་མནམ། །བད་ཀན་ཁྲག་ནི་དམར་སྐྱ་སྐ་ལ་འཇམ། །མཚལ་ཁུ་ཚོས་ཁུ་འདྲ་བ་ཟུངས་
ཁྲག་ཡིན། །དེ་རྣམས་ཅུང་ཟད་ཙམ་ཡང་གཏར་མི་རུང༌། །དབྱུང་ཚད་ནད་ཐོན་ཟུངས་ཁྲག་
བྱུང་ན་བཅད། །ཟུངས་ངན་ཁྲག་ཞབས་མེད་ཀྱང་རན་ཚོད་བཟུང༌། །དོན་གཟེར་ཟུག་གཅོག་
ཁྲག་གཟེར་དབྱུང་བ་དང༌། །འོལ་ཀ་བསྒྱུར་གསུམ་ཟུངས་ཁྲག་ཡིན་ཡང་གདོན། །ཟུངས་
ཟད་རླུང་ལྡན་ངན་ཁྲག་ཡིན་ཡང་བཞག །རྒྱས་འཁྲུགས་གཟེར་དང་བྱང་ཁོག་ཁྲག་རྒྱས་དང༌།  །
25-1-594

 
ཡན་ལག་སྐྲངས་ཤོར་བུངས་སྐྱེད་ཁྲག་ཤེད་སྨད། །དེ་མ་ཡིན་ལ་མང་གཏར་ཉུང་དུ་དབྱུང༌། །
སྦུ་བ་ཁྲག་དམར་སྤྲིས་གཡོགས་གཏར་འཕྲོ་བཅད། །ཟུངས་ངན་གཏར་ཚད་རྣག་ཏུ་འོང་བ་
འམ། །གཏར་ཁྲག་ཆུ་དང་འདྲ་ན་གཏར་ཚོད་བཟུང༌། །རྣག་ལ་བལྟས་ནས་མང་དུ་གཏར་བ་
ཡིས། །ཟུངས་འཛད་གསོ་དཀའ་དམུ་ཆུར་འགྱུར་བ་ཡོད། །ལོག་གནོན་ཁྲག་མ་ཐོན་དང་ངན་
ཁྲག་མེད། །ཁྲག་མ་ཆོད་དང་སྐྲངས་འབོག་རླུང་སྐྱེས་དྲུག །དང་པོ་ལུས་གྲང་མཚོན་རྟུལ་
འགྲངས་དྲགས་བྲེད། །གདོན་རང་འགྲུལ་སྣ་ཁ་ཆུང་པགས་པ་འཆུས། །གཉལ་མ་ཐོག་
གཏར་གཏར་མ་ཐོག་ཏུ་གློད། །དེ་དག་ཁྲག་མི་འབྱུང་པའི་རྒྱུ་ཡིན་པས། །རྒྱུ་བཅུ་སྤངས་ན་
གཏར་ག་རྡུགས་དོགས་མེད། །རྩ་ཆེན་གཏར་ཡང་ངན་ཁྲག་མེད་པ་ན། །རྗེས་དེ་བོར་ལ་རྩ་
གཞན་གཡར་བྱས་ཏེ། །ནང་པར་གཏར་བས་ནད་ཁྲག་འབྱུང་བ་ཡིན། །ཚ་བ་ལམ་ཆད་རྩ་
སྟོངས་ཁྲག་མེད་ན། །ཁོང་ཁྲག་སྤྱིར་ལ་འཕུལ་བའི་མན་ངག་(ཟས་ཀྱི་ཟུངས་གསོ། འབྲས་བུ་གསུམ་གྱི་
ཐང་བཏང་)གཅེས། །ཁྲག་མ་ཆོད་ན་རྩ་རྒྱུད་ཆུ་ཡིས་བསྒྲང༌། །ཕྱིང་པ་ཆུར་བཅུག་གླན་ལ་དཀྲིས་
མས་བསྡམ། །སྐྲངས་ན་ཚྭ་མར་ཁྱི་གཞོབ་བྱུགས་ལ་མཉེ། །དེས་མ་ཐུབ་ན་ཨ་ས་བ་ཡིས་
བདུག །ཁྲག་གིས་བོག་ན་བསུར་བདུག་ཁ་ཕྲུ་གདབ། །ཚབས་ཆེ་བ་ལ་གསོན་ཁྲག་སོབས་
སུ་བསླུད། །གཏར་རྗེས་རླུང་སྐྱེས་བསྐུ་མཉེ་བུ་རམ་མུར། །བུར་ཆང་རུས་ཐང་འཚོ་ཁུས་རླུང་
སྣ་སླན། །ཕྱི་རྗེས་གཉལ་དཀྲོལ་རྨ་ཁ་མཐེབ་མོས་མཉེ། །རྡོ་གྲང་གླན་ཞིང་བལ་དཀྲི་འགྲོ་
འགུལ་གཟབ། །ཁྲག་ངན་སྐྱེ་བས་ཆང་བསིངས་མི་བཏང་བསྲུང༌། །གཏར་སྐྱོན་དམན་ལྷག་
ལོག་དང་ཉེས་པ་བཞི། །གཏར་ཞན་ཁྲག་རོ་མི་ཐོན་ནད་གཞུག་ལུས། །མཆིན་སྐྲན་སྨུག་པོ་
མཛེ་འབྲས་སུར་ཡ་སྐྱེད། །བྱང་ཁོག་ཡན་ལག་ཆུ་སེར་རྣག་ཏུ་འགྱུར། །གཏར་དྲགས་ཟུངས་
འཛད་རླུང་སྐྱེ་མེ་དྲོད་འཆི། །གྲང་སྐྲན་སྐྱ་རྦབ་དམུ་ཆུར་འགྱུར་བ་མང༌། །ལོག་པ་མི་རུང་ནད་
ལ་གཏར་བ་འམ། །ཉེས་པས་ཤ་གདན་སྣད་དམ་ཆུ་རྒྱུས་བཅད། །གནད་ལ་སོང་ངམ་འཕར་
25-1-595


རྩ་བཅད་པ་ཡིས། །སྨན་པའི་ལག་དགྲས་བྱ་ཉེས་བསད་པ་ཡོད། །དེ་ཕྱིར་སྐྱོན་ལ་མཁས་
པས་གཟབ་པར་རིགས། །གཏར་ལེགས་ཡོན་ཏན་རྩ་ནད་ངན་ཁྲག་སྦྱོང༌། །གཟེར་བ་ཟུག་
གཅོག་སྐྲངས་པ་རྒྱུ་ནས་འཇོམས། །འདྲུལ་བ་བརྟས་བྱེད་རྣག་ཆུ་རྩད་ནས་གཅོད། །རྨ་ཡི་
མདོག་འབྱིན་ཁོལ་བུའི་ནད་རླངས་འདོན། །སྦོམ་པོ་འབྲི་ལ་སྐེམ་པོ་ཤ་རྒྱས་བྱེད། །ནད་
དངོས་ཕྱིར་འབྱིན་དཔྱད་མཆོག་གཏར་གར་བཤད། །ཅེས་གསུངས་སོ། །བདུད་རྩི་སྙིང་པོ་
ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔྱད་ལྔ་གཏར་གའི་ལེའུ་སྟེ་ཉི་ཤུ་པའོ།།    །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །དཔྱད་ལྔའི་མེ་བཙའ་སྤྲ་བ་རུང་མི་རུང༌། །མེ་དམིགས་གདབ་ཐབས་ཕྱི་
རྗེས་ཕན་ཡོན་བདུན། །སྤྲ་བ་སྟོན་ཟླ་གསུམ་གྱི་དུས་བཟང་བཏུ། །མ་ཆད་ཤིག་མེད་བརྡུངས་
ལ་མཁྲེགས་པར་དྲིལ། །རྩ་བ་བརྟན་ཟླུམ་རྩེ་རྣོ་མེ་ལེན་མྱུར། །ཚིགས་པའི་མཁར་ལ་མཛུབ་
མོའི་རྩེ་མོ་ཙམ། །མགོ་དང་ཡན་ལག་མདུན་ལ་མཐེབ་ཆུང་ཙམ། །རྩ་སྒོ་འགེགས་ལ་ལེབ་
མོ་རིལ་མ་ཙམ། །འབྲས་དང་སྐྲན་ལ་ཨ་རུ་ར་ཙམ་བྱ། །བྱིས་པའི་ལྷེན་སྣར་སྲན་མ་འཕོས་
པ་ཙམ། །མེ་བཙའ་གདབ་ཏུ་རུང་བའི་ནད་གཞི་ནི། །མ་ཞུ་མེ་ཉམས་སྐྱ་རྦབ་དམུ་ཆུ་སྐྲན། །
གྲང་མཁྲིས་མགོ་དང་ཡན་ལག་ཆུ་སེར་དང༌། །འབྲས་དང་ལྷོག་པ་སྟོངས་པའི་ཚ་བ་དང༌། །
སྨྱོ་བྱེད་རྗེད་བྱེད་རྩ་ནད་ཐམས་ཅད་དང༌། །ཚ་རྗེས་ཕལ་ཆེར་མེ་ཡིས་བཅད་པ་སྟེ། །མདོར་
ན་བད་རླུང་ལས་གྱུར་གྲང་བ་ཀུན། །རྩ་ནད་ཆུ་སེར་མེ་ཡིས་བསྲེག་པ་བསྔགས། །མི་རུང་
མཁྲིས་ཚད་ཁྲག་ནད་ཐམས་ཅད་དང༌། །དབང་པོའི་སྒོ་དང་ཕོ་མོའི་སྲིད་རྩར་སྤང༌། །མེ་
དམིགས་ནད་ཀྱིས་བསྟན་དང་སྨན་པས་བཙལ། །ནད་ཀྱིས་བསྟན་པ་ན་བའི་དམིགས་ཡོད་
ལ། །མནན་ན་ཕན་སྙམ་བྱེད་ལ་མཐེབ་རྗེས་འོང༌། །རྩ་འཁྱུག་རྩ་ནད་གར་ལངས་དམིགས་
25-1-596


སུ་གདབ། །སྨན་པས་བཙལ་བ་དོན་སྣོད་གསང་རྣམས་ཏེ། །ཨན་སྟོང་ཚིགས་པ་དང་པོ་རླུང་
གི་གསང༌། །སྨྱོ་འདར་འཕྱོ་ལྐུགས་ནད་ལ་གདབ་པར་བྱ། །གཉིས་པ་མཁྲིས་གསང་གྲང་
མཁྲིས་ནད་ལ་གདབ། །གསུམ་པ་བད་ཀན་གསང་སྟེ་གྲང་རླུང་དང༌། །གློ་སྙིང་མགོ་སྟོད་
བད་མཁྲིས་རྒྱས་ལ་གདབ། །བཞི་པ་གློ་མ་ལྔ་པ་གློ་བུའི་གསང༌། །གློ་ལ་རླུང་དང་བད་ཀན་
ཞུགས་ལ་གདབ། །དྲུག་པ་སྲོག་རྩ་བདུན་པ་སྙིང་གི་གསང༌། །འཕྱོ་འདར་སྨྱོ་འབོག་བད་
རླུང་ནད་ལ་གདབ། །བརྒྱད་པ་མཆིན་དྲི་དགུ་པ་མཆིན་པའི་གསང༌། །སྒྲེག་སྐྱུག་མཆིན་དྲི་
འཁོར་དང་གྲང་ཚེ་ན། །མཆིན་སྐྲན་མཆིན་པར་བད་རླུང་ཞུགས་ལ་གདབ། །བཅུ་པ་མཁྲིས་
གསང་མ་ཞུ་མིག་སེར་དང༌། །མཁྲིས་པའི་སྐྲན་དང་མེ་དྲོད་ཉམས་ལ་གདབ། །བཅུ་གཅིག་
མཆེར་གསང་སྦོ་འཁྲོག་འུར་ལ་གདབ། །བཅུ་གཉིས་ཕོ་བའི་གསང་སྟེ་མེ་དྲོད་ཉམས། །ལྷེན་
དང་ལྕགས་དྲེག་སྐྲན་གྱི་ནད་ལ་གདབ། །བཅུ་གསུམ་བསམ་སེའི་གསང་སྟེ་ཁུ་ཁྲག་བླུགས། །
མངལ་སྐྲན་སེམས་འཕྱོ་གྲང་རླུང་རྒྱས་ལ་གདབ༌། བཅུ་བཞི་མཁལ་གསང་མཁལ་མའི་གྲང་
ནད་སེལ། །བཅོ་ལྔ་དོན་སྣོད་སྤྱི་གསང་གྲང་རླུང་སེལ། །བཅུ་དྲུག་ལོང་གསང་འུར་འཁྲོག་
སྐྲན་ལ་གདབ། །བཅུ་བདུན་རྒྱུ་མའི་གསང་སྟེ་རྒྱུ་སྐྲན་དང་། །གྲང་རླུང་སྦུ་བ་བེ་སྣབས་འཁྲུ་
ལ་གདབ། །བཅོ་བརྒྱད་ལྒང་པའི་གསང་སྟེ་རྡེའུ་ནད་དང༌། །གྲང་བས་ཆུ་ཁ་སྲ་སྙིའི་ནད་
ལ་གདབ། །བཅུ་དགུ་ཁུ་བའི་གསང་སྟེ་འབྱམས་བླུགས་སེལ། །ཉི་ཤུ་ཐུར་སེལ་རླུང་སྒོའི་
གསང་ཡིན་ཏེ། །ཕྱེན་མི་ཐུབ་དང་འགགས་པའི་ནད་ལ་གདབ། །མདུན་གྱི་མེ་དམིགས་སྐེ་
སྟོང་ཙ་ར་ཁུང༌། །སྲོག་རྩ་སྙིང་དང་འདོམ་པའི་གསང་ཡིན་ཏེ། །སྙིང་འཆུས་སྐྱིགས་དང་གྲེ་བ་
འགགས་ལ་གདབ། །ནུ་མའི་དཀྱིལ་ཐད་བྲང་གཞུང་དཀར་ནག་མཚམས། །འཕྱོ་འདར་སྙིང་
མི་དགའ་ལ་གདབ་པར་བྱ། །ལྷེན་སྣའི་རྩེ་ནས་མཚོན་གང་ལྷེན་གྱི་གསང༌། །དེ་འོག་མཚོན་
གང་ཁ་གསུམ་སྐྲན་གྱི་གསང༌། །དེ་འོག་མཚོན་གང་ཁ་གསུམ་མེ་མཉམ་གསང༌། །ལྷེན་
25-1-597


སྐྲན་མེ་ཉམས་གྲང་རླུང་རྒྱས་ལ་གདབ། །ལྟེ་བའི་གཡས་གཡོན་མཚོན་རེ་ལོང་གི་ཐེར། །དེ་
ནས་གཡས་གཡོན་མཚོན་རེ་ལོང་ཕུགས་གསང༌། །ལོང་སྐྲན་སྦོ་འཁྲོག་འཁྲུ་བ་འབྱམས་ལ་
གདབ། །ལྟེ་འོག་མཚོན་གང་ཁ་གསུམ་རྒྱུ་སྟོད་གསང༌། །དེ་འོག་མཚོན་གང་ཁ་གསུམ་རྒྱུ་
སྨད་གསང༌། །རྒྱུ་མར་གྲང་རླུང་ཞུགས་དང་འཁྲུ་ལ་གདབ། །དེ་འོག་མཚོན་གང་ཁ་གསུམ་
ལྒང་པའི་གསང༌། །གྲང་བས་ཆུ་ཁ་སྲ་སྙི་སེལ་བར་བྱེད། །མགོ་དང་ཡན་ལག་མཛུབ་ཚུགས་
གསང་དམིགས་ནི། །སྡུད་སྒོ་སྤྱི་གཙུག་འཚོགས་མའི་འདུས་སོ་གསུམ། །རླུང་གིས་མགོ་
འཁོར་འགྱེལ་བུག་ནད་ལ་གདབ། །སྨྱོ་ལབ་འབོག་ན་ལྟག་པའི་སྤུ་འཁྱིལ་བསྲེག །རླུང་
རིམས་སྨྲ་མི་ཤེས་ལ་མ་མཆུའི་འོག །ལྐོག་ནད་སྨྲ་མི་ཤེས་ལ་ཕྱི་ལོང་སྟེང༌། །གྱེན་སོར་བཞི་
ཡི་ཆུ་བའི་བར་དུ་གདབ། །རིམས་ནད་ངུ་ལབ་འདྲེ་མཐོང་ལག་པ་ཡི། །མཁྲིག་མའི་སོར་
བཞི་ཆུ་བའི་བར་དུ་གདབ། །ཕོ་མཚན་མི་ལྡང་ས་བོན་ལུག་པ་ལ། །ནང་ལོང་ཐད་དྲང་གདོང་
གི་ཆུ་བར་བསྲེག །རྐང་བཤལ་འགྲོ་བ་དཀའ་ན་ལག་པ་ཡི། །གུང་མོས་གང་སླེབ་བརླ་ཡི་ཕྱི་
བསུལ་བསྲེག །བུད་མེད་བུ་བཙས་སྐྲངས་ལ་ཨོལ་འཛུམ་བསྲེག །ལྟག་པ་རེངས་སམ་རླིག་
པ་སྐྲངས་པ་དང༌། །སྨྱོ་ལྐུགས་རྐང་པའི་མཐེ་བོང་སྤུ་སྐྱེས་བསྲེག །མིག་ཚག་འབོག་ལ་རྟིང་
པའི་དྲེག་མཚམས་བསྲེག །རྒྱུ་ལོང་ཕོ་གླང་ནང་ལོང་འཕར་རྩ་བསྲེག །དངངས་དང་སྐྱིགས་
བུ་སྐྱུག་ལ་སྐེ་སྟོང་བསྲེག །མཆུ་ནད་སྲིན་ལག་གཡས་གཡོན་ཚིགས་མགོ་བསྲེག །སོ་ནད་རྣ་
དྲུང་སྲིན་ལག་རྩེ་མོ་བསྲེག །སྣ་ཁྲག་མ་ཆོད་དབུགས་ཀྱིས་གར་སླེབ་པའི། །དཔུང་པ་གཡས་
གཡོན་མགོ་ལ་མེ་བཙའ་གདབ། །གདབ་ཐབས་བཙོ་བསྲེག་བསྲོ་དང་སྡིག་པ་བཞི། །འབྲས་
དང་སྐྲན་ལ་ཉི་ཤུ་ཡན་ཆད་བཙོ། བད་ཀན་ཆུ་སེར་སྙིང་རླུང་བཅོ་ལྔས་བསྲེག །རླུང་སྲིན་རྩ་
ཆུ་སྤྲ་བ་ལྔ་བདུན་སྤྲ། །བྱིས་པའི་མེ་བཙའ་སྤྲ་ཚུགས་རེ་ཡིས་བསྡིག །བུ་བཙས་བཤལ་རྗེས་
རྩ་ཆད་འཐུད་པ་གསུམ། །ཧ་ཅང་བསྲེགས་པ་དྲགས་ན་ཉེས་པ་ཆེ། །སྤྲ་བ་བཞག་ལ་མེ་སྤར་
25-1-598


སྐྱབས་འགྲོ་བྱ། །མེ་ཕེབས་ཐལ་བ་མི་འགུལ་ཐུད་གྱིས་གདབ། །དུ་བ་ཆད་ནས་སྤྲ་ལྷག་ཁབ་
མགོས་བསེང༌། །སུམ་གཉིས་མཆེད་ནས་སྤྲ་བ་གཅིག་ལ་སྤར། །ཚ་བ་རྒྱུན་མི་ཆད་ན་ཚོས་
པ་སྐྱེན། །བསྲེག་ལེགས་ཁོད་སྙོམས་ཡ་ཡོ་མེད་པ་དང༌། །ཆུ་བུར་ཕྲ་མོས་མཐའ་བསྐོར་ན་
ཚ་མེད། །ཚོས་ཚད་མདུན་བཏབ་རྒྱབ་ཏུ་ཀར་རྩེ་ན། །རྒྱབ་བཏབ་མདུན་དུ་ན་ཞིང་སྐྱུག་སྙམ་
བྱེད། ཚོས་པ་ཡིན་པས་སྤྲ་བ་བསྲེག་འཕྲོ་བཅད། །ཏོག་ཐོན་སྤྲ་བ་ཡར་ན་ཕན་ཆེར་འདོད། །
ཕྱི་རྗེས་མེ་ཤི་སྤྲ་གྲངས་མཐེབ་རྒྱས་གདབ། །གོམ་པ་འགའ་བཅགས་དེ་ནུབ་ཆུ་མི་བཏུང༌། །
བཅགས་པས་ལུས་བརྟས་ཆུ་འཐུངས་མེ་དབལ་གསོད། །སྣོད་ལ་ཟས་ཟོས་རྗེས་ལ་མེ་མི་
གདབ། །ཕན་ཡོན་རྩ་ཡི་འབྲོས་འཕྲང་འགགས་པར་བྱེད། །ཨ་ནའི་ཟུག་གཅོག་རླུང་ནད་ཁ་
ཡན་གནོན། །མ་ཞུ་འཇུ་ཞིང་ལྷེན་སྐྲན་བཤིག་པར་བྱེད། །འབྲས་དང་རྨ་རྒན་ཤ་རོ་ངན་པ་
གཅོད། །སྐྲངས་པའི་མགོ་གནོན་ཆུ་སེར་འདྲེན་སྐེམ་སྡོམ། །དོན་སྣོད་སྒོ་བསྲུང་དྲོད་སྐྱེད་དྲན་
པ་གསལ། །གསོ་དཔྱད་གཞན་རྡུགས་ཕལ་ཆེར་མེ་ཡིས་གསོ། །ཞེས་གསུངས་སོ། །བདུད་
རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔྱད་ལྔ་མེ་བཙའི་ལེའུ་སྟེ་ཉི་
ཤུ་རྩ་གཅིག་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །དཔྱད་ལྔ་དུགས་ལ་རུང་དང་མི་རུང་དང༌། །བྱ་བའི་ཐབས་དང་ཕན་ཡོན་
རྣམ་པ་བཞི། །དང་པོ་བད་རླུང་མ་ཞུ་གླང་ཐབས་དང༌། །ཆུ་སེར་ཁྲག་འཁྱགས་ཚད་པའི་
གཟེར་ལ་བསྟེན། །མི་རུང་སྐྱ་རྦབ་ཀྵ་ཡ་ནག་པོ་དང༌། །བལ་ནད་མཛེ་དུག་དམུ་ཆུ་ནག་པོ་
དང༌། །ཚོ་ཆེས་འབྲུམ་ཐོར་ཟོས་རྗེས་སྤང་བར་བྱ། །བྱ་བའི་ཐབས་ལ་བསིལ་དུགས་དྲོད་
དུགས་གཉིས། །བསིལ་དུགས་འགྲམས་འཁྲུགས་ཚ་བས་གཟེར་བ་ལ། །སྐར་ཆུས་བརྡེག་
གམ་གྲོད་པར་བླུགས་པས་བདུག །རིམས་འཁྲུགས་ཚ་བ་བྱེར་རྙིངས་སྐར་ཆུས་བྲན། །མིག་
25-1-599


ལ་མཚོན་ཕོག་བཙན་སྐྲངས་ཆུ་དྲོད་བདུག །ཤ་དུག་གྲེ་བ་འགགས་ཤིང་ཚ་བ་ལ། །བོང་
ང་དཀར་པོ་གངས་ཆུ་དྲོད་བཀང་བདུག །རྒྱུ་གཟེར་བོང་ང་ཞུ་མཁན་ཆུ་སྦྱར་བདུག །ཁྲག་
མཁྲིས་ཚ་གླང་ཆུ་རྡོ་གྲང་མོས་བདུག །ཚད་གཟེར་ཆུ་རྡོ་བྱང་མའི་ལྕགས་ཀྱིས་བདུག །ཡང་
ན་ཚན་(གཡའ་ཚན། གངས་ཚན། བྲག་ཚན་)དང་ཞོ་སྦྱར་གྲང་མོས་བདུག །སྣ་ཁྲག་སྐར་ཆུ་འདག་པ་
ནག་པོས་(ཀོ་མོག་དང་མཚེའུ་སོགས་ཀྱི་རྟིང་ནས་བཏོན་པའི་འདམ་ནག་པོ་གཤིན་པོ་གྲང་མོ་དེ་སྨིན་དབྲག་དང་ལྟག་ཁུང་
སོགས་སུ་)བདུག །སོ་ཡི་ཁྲག་ཚད་རླུང་སྐྲངས་འདག་པས་བདུག །དྲེག་ནད་ཚ་འབྲབ་སླེ་ཏྲེས་
བ་ལྕིས་བདུག །དྲོད་དུག་མ་ཞུ་གླང་ཐབས་ཚ་བསྲོས་བདུག །མཚོན་ཁྲག་འཁྱགས་ལ་ཆུ་རྡོ་
བསྲོས་པས་བདུག །མཆིན་ཁྲག་འཁྱགས་ལ་གྲོག་ཤིང་བསྲོས་པས་བདུག །མཁལ་མ་གྲང་
གཟེར་ཆུ་སྲི་སྦང་སྐམ་བདུག །བུ་བཙས་རྒྱུ་ཞབས་ཚང་ར་མཁལ་རྐེད་གཟེར། །བྱི་ས་ཤར་
བལྟས་ཆང་བྲན་བསྲོས་པས་བདུག །སྨུག་པོ་འཐབ་པའི་གླང་ཐབས་ཨ་བོ་དང༌། །ཆུ་ལོ་ཞུ་
མཁན་ཆུར་སྦངས་བཙོས་པས་བདུག །དུག་དང་ཁྲག་རྒན་ཕོ་བར་ལྷུང་བ་འཇོམས། །མ་ཞུ་
གྲང་སྐྲན་ཕུག་རོན་བྲུན་བསྲོས་བདུག །གྲང་ནད་ལངས་ལ་སོ་ཕག་རྫ་བསྲོས་བདུག །སྲིན་
གླང་སྤྲུ་མའི་རྩ་ལོ་བསྲོས་པས་བདུག །གཞང་སྲིན་ཕུར་མོ་རྟ་སྦངས་བསྲོས་པས་བདུག །གྲང་
བས་གཞང་ལུག་སྣུམ་(ཆང་ངམ་འོ་མ་འཇམ་ཙམ་བསྲོས་པས་བཀྲུས་ཏེ། ཕུ་རུང་ཀློག་པ་ལྟར་སེན་མོ་བྲགས་ལ། མཛུག་
གུས་རྐུབ་ཀྱི་ནང་དུ་བཞུག ཕྱིང་བ་སྣུམ་ལྡན་གྱི་སྟེང་དུ་སྣུམ་གོང་བསྲོས་པས་བདུགས་)ཀོང་བསྲོས་པས་བདུག །རླུང་
གཟེར་ཕྱིང་པ་སྣུམ་ལྡན་ཆུ་རྡོས་བདུག །མཁལ་རྐེད་གྲང་ལ་དབྱི་སྤྱང་སྤུ་དུགས་བསྟེན། །ཕོ་
བ་རྒྱུ་ལོང་གྲང་ལ་ལག་མཐིལ་བདུག །ཚིགས་སུལ་ཆུ་སེར་ཤག་མ་ཆང་བྲན་བདུག །ཡང་
ན་སྦང་སྐམ་གྲོག་ཞིང་བསྲོས་པས་བདུག །གྲང་བས་ཆུ་འགགས་འབའ་ཆ་བྱ་བྲས་བདུག །
སྟོངས་ཚད་རླུང་གཟེར་འཁར་གོང་སྲིན་ཅན་དང༌། །རུས་རྙིང་ཆང་གིས་བྲན་ལ་བསྲོས་པས་
བདུག །ཡན་ལག་ཆུ་སེར་ལུག་རིལ་ཆང་བྲན་བདུག །ནད་ཟུག་འཕྲལ་གཅོག་དཔྱད་མཆོག་
25-1-600


དུགས་སུ་བཤད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་
ངག་གི་རྒྱུད་ལས་དཔྱད་ལྔ་དུགས་ཀྱི་ལེའུ་སྟེ་ཉི་ཤུ་རྩ་གཉིས་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །དཔྱད་ལྔ་ལུམས་ལ་རུང་དང་མི་རུང་དང༌། །བྱ་བའི་ཐབས་དང་ཕན་ཡོན་
རྣམ་པ་བཞི། །རུང་བ་ཡན་ལག་རེངས་འཁུམས་ཞ་བ་དང༌། །འབྲས་དང་ལྷོག་པ་རྨ་རྙིང་
རྨ་གསར་སྐྲངས། །ཚབས་དང་སྒུར་པོ་ཤ་རུས་ཆུ་སེར་གཡོས། །རླུང་ནད་མ་ལུས་ཀུན་ལ་
བསྔགས་པ་ཡིན། །མི་རུང་རིམས་འཁྲུགས་ཚ་རྒྱས་སྐྱ་རྦབ་དང༌། །ཉམ་ཆུང་དང་ག་འགགས་
ལ་སྤང་བར་བཤད། །མིག་དང་མཁུར་ཚོས་དྲེག་བཞི་རླིག་པ་དང༌། །ལྟོ་བ་སྙིང་གའི་གནས་
སུ་ལུམས་མི་རུང༌། །བྱ་བའི་ཐབས་ལ་ཆུ་ལུམས་བཅིང་ལུམས་གཉིས། །ཆུ་ལུམས་སྤྱི་མཐུན་
ལས་གྲུབ་ཆུ་ཚན་ཞུགས། །འགྲམས་དུག་ཚད་རྙིང་བྱེར་ཞིང་ཞེན་པ་དང༌། །འབྲས་དང་རྨ་
རྒན་སུར་ཡ་རྩ་ནད་དང༌། །རེངས་འཁུམས་སྒུར་པོ་ཤ་སྐམས་འདོན་པར་བྱེད། །དེ་མ་གྲུབ་ན་
བདུད་རྩི་རྣམ་པ་(ཤུག་འུམ་པ་ལུ་འཚེ་དང་མཁན་པ་ལྔ། འདི་ལ་མཁས་རྣམས་བདུད་རྩི་ལྔ་ཞེས་གྲགས། ཞེས་སོ།།)ལྔ། །
རླངས་ལུམས་ཆུ་ཚན་བཅིངས་པས་གོང་བཞིན་འགྲུབ། །མི་རུས་ཙ་མ་རླངས་ལུམས་ཆུ་ཚན་
གྱིས། །ཚ་རེངས་རླུང་ལྡན་འགྲམས་པའི་ཟུག་གཟེར་འཇོམས། །མཁན་པ་བུལ་ཏོག་ཕབས་
སྦྱར་ཆུ་ལུམས་ཀྱིས། །རྨ་རྒན་སྐྲངས་དང་ཞ་རེངས་སེལ་བར་བྱེད། །བཅིང་ལུམས་ཚ་སེལ་
གྲང་སེལ་རྣམ་པ་གཉིས། །ཚ་སེལ་མགོ་ཆག་རྩ་བྱེར་(ཟོ་ནས་འབྲས་སྲན་བྲ་འོ་ཏིལ་ཡུང་ཀར་དཔལ་དགའ་
སོགས་)འབྲུ་སྣའི་ལུམ། །ཀྱི་ལྕེ་མཛོ་ལྕི་ཞོ་སྦྱར་ཚ་སྐྲངས་འཇོམས། །རྩ་བྱེར་མེ་ཏོག་སྣ་ཚོགས་
ལུམས་ཀྱིས་གདུལ། །རྩ་དཀར་གཟའ་ཕོག་མཁལ་རྩ་འགྲམས་བྱེར་ལ། །བདུད་རྩི་ལྔའམ་
གླ་རིལ་ཆང་བཙོས་ལུམས༌། །རྩ་འགྲམས་སྐྲངས་རེངས་མཁན་པ་སྤྲུ་མ་འཚེ། །སྤང་སྤོས་དྲི་
ཆུར་བཙོས་པའི་ལུམས་ཀྱིས་གདུལ། །ཚད་རྙོགས་བྱེར་བ་མཚན་(གཡའ་མཚན་)དང་སྲོ་ལོའི་
25-1-601


ལུམས། །མཛེ་དུག་ར་རིལ་གླ་རྩི་དྲི་ཆུའི་ལུམས། །དབྱིག་གི་དུག་ལ་མཆོད་རྟེན་ན་བཟའ་
(དཀར་རྩི་)དང༌། །ཁྲུ་གང་འོག་ས་དྲི་ཆུར་བཙོས་ལུམས་བྱ། །གྲང་སེལ་ཡན་ལག་སྐྲངས་པ་རྣག་
འགུགས་ན། །སྦང་སྐམ་བྱི་བྲུན་ཆང་བཙོས་ལུམས་སུ་གཞུག །མདེ་འབྱིན་ར་རིལ་བྱི་བྲུན་
དྲི་ཆུའི་ལུམས། །ར་དུག་(འཛིན་པ་)སྤྱང་ཚེར་རི་ཤོ་སྤྱང་བྲུན་དང༌། །སྦང་གར་བཙོས་པས་ཆུ་
ལྷོག་གྲང་སྐྲངས་འདུལ། །ཡན་ལག་ཆུ་སེར་སྐྱ་རྦབ་སྦོས་པ་ལ། །རྟ་རྐྱང་བོང་བུའི་སློ་དྲོན་(ཆུ་
སེར་ལ་སྦང་དྲོན་མོས་ཀྱང་ཕན་པ་མྱོང་བས་གྲུབ་བོ།།)ལུམས་སུ་གཞུག །རྨེན་འབྲས་ཕུག་རོན་རིལ་མ་ཆང་
བཙོས་ལུམས། །འབྲས་འདུལ་མི་ཡི་རྐང་མགོ་ཉྭ་ཡི་ཤ །སྤྲུ་རྩ་རེ་ཅག་ཆང་བཙོས་ལུམས་སུ་
གཞུག །རྡོ་སྐྲན་འདུལ་ལ་སྤྱང་ཚེར་ལྕེ་ཚ་དང༌། །མཁན་པ་ལྕ་འབྲུམ་བྱི་བྲུན་སྦང་གར་དང༌། །
སྒ་སྤོད་སྦྱར་ཏེ་བཙོས་པའི་ལུམས་སུ་གཞུག །རུས་ཏྲེམ་ཚབས་ནད་མི་རུས་བ་སྤྲུའི་ལུམས། །
རླུང་འཕྱོས་སྨྱོ་འབོག་ཚབས་རླུང་སྙིང་སྣའི་ལུམས། །རིམས་གཞུག་རྐང་དང་རུས་པ་ན་བ་
ལ། །ཁྲུ་གང་འོག་ས་དྲི་ཆུར་བཙོས་པའི་ལུམས། །རུས་ཚིགས་གཟེར་ན་རུས་སྣ་ཆང་བཙོས་
ལུམས། །རླུང་སྐྲངས་འབའ་ཆ་ཆང་དུ་བཙོས་པའི་ལུམས། །ལུམས་ཀྱིས་ཚ་རླངས་ཆུ་སེར་བ་
སྤུར་འདོན། །རླུང་འདུལ་སྐྲངས་འཇོམས་སྐེམ་པོ་ཤ་རྒྱས་བྱེད། །ཅེས་གསུངས་སོ། །བདུད་
རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔྱད་ལྔ་ལུམས་ཀྱི་ལེའུ་སྟེ་ཉི་
ཤུ་རྩ་གསུམ་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །དཔྱད་ལྔ་བྱུག་པ་རུང་དང་མི་རུང་དང༌། །བྱ་བའི་ཐབས་དང་ཕན་ཡོན་རྣམ་
པ་བཞི། །རུང་བ་ལུས་རྩུབ་ཁྲག་དང་ཁུ་བ་ཟད། །སྟོབས་ཆུང་རྒས་དང་མྱ་ངན་སེམས་ལས་
ཆེ། །མིག་འགྲིབ་གཉིད་མེད་རྩོལ་བས་དུབ་པ་དང༌། །རླུང་ནད་ཀུན་ལ་སྣུམ་བྱུག་བསྟེན་པར་
བྱ། །པགས་ནད་འབྲུམ་ཐོར་སྐྲངས་ལ་ལྡེ་གུ་བྱུག །མ་ཞུ་བརླ་རེངས་དབྱིག་དུག་ཡི་ག་འཆུས།  །
25-1-602

 
དམུ་རྫིང་བད་ཀན་ནད་ལ་སྣུམ་བྱུག་སྤང༌། །བྱ་ཐབས་སྡུད་སྒོ་དྲུག་བདུན་མཐིལ་བཞི་ལ། །
མི་ཞུན་བྱུགས་མཉེ་སྐམས་ནས་ཕྱེ་ཡིས་ཕྱི། །སྙིང་རླུང་འདྲེ་ཆགས་འབྲས་ནད་འཇོམས་
པར་བྱེད། །བསྐུ་མཉེ་ཀུན་ལ་དེ་ལྟར་ཤེས་པར་གྱིས། །འབྲུ་མར་དེ་བཞིན་གཉིད་མེད་རླུང་
རྣམས་འཇོམས། །བློ་རྣོ་དྲན་གསལ་འདོད་ལ་ཞུན་མར་བྱུག །སྨྱོ་འབོག་བརྒྱལ་བའི་ནད་ལ་
ལོ་མར་བྱུག །ཆུ་སེར་ཟ་འཕྲུག་རྟ་རྐྱང་བོང་ཚིལ་བྱུག །མཁལ་མ་ཉམ་ཆུང་ས་བོན་འཛག་པ་
ལ། །སྲམ་མམ་ད་བྱིད་ཚིལ་བུས་རྐེད་ཚིགས་བྱུག །ཤིག་སྲོ་མང་ལ་ཤ་བའི་ཚིལ་བུ་བྱུག །ཁྱི་
རྨ་རེད་ལ་ཁྱི་ཡི་ཚིལ་བུ་བྱུག །གླང་ཤུ་ཕག་ཚིལ་མུ་ཟི་ནག་པོ་བྱུག །གདོང་པའི་འབྲུམ་ཤུལ་
ར་ཚིལ་འབྲི་མོག་བྱུག །ཤུ་བ་རྨ་རྒན་ཙན་དན་མར་ཁུ་བྱུག །མིག་འགྲིབ་བྱ་རྒོད་ཕག་པའི་
ཚིལ་བུ་འམ། །འབྲི་མར་གོ་སྙོད་སྦྱར་བས་རྐང་མཐིལ་བྱུག །རླུང་ནད་རུས་ཞུགས་གཏིང་
ནས་ལྷང་ལྷང་ན། །བཅའ་སྒ་འབྲུ་མར་སྦྱར་བའི་བྱུག་པ་བྱ། །གཉིད་མེད་གླ་རྩི་མར་དཀར་
མགོ་ལུས་བྱུག །ལྡེ་གུ་མུ་ཟི་ར་དུག་མི་ཁྱིའི་བྲུན། །ཤུ་དག་རྭ་གཞོབ་དྲི་ཆུས་ལྷོག་པ་འཇོམས། །
མུ་ཟི་ཚྭ་ཕབས་དུ་བ་མར་རྙིང་སྦྱར། །ལྡེ་གུ་བྱུགས་བསྲེགས་ཤུ་བ་སེལ་བར་བྱེད། །བྱི་བྲུན་
གསེར་རྡོ་ནུ་ཞོས་རྣག་སྣ་འདྲེན། །རྣག་མེད་སྐྲངས་དང་ཟུག་གཟེར་གཅོག་པར་བྱེད། །སྲད་
དཀར་ཐལ་བ་རྟ་བོང་འོ་མ་སྦྱར། །རྨ་རྒན་རྣག་འཛག་འབྲས་ཐབས་སོང་བ་སེལ། །ཏིལ་ཕྱེ་
ཆུར་ཁུར་བཏབ་བསྐོལ་དྲེག་ནད་སེལ། །ཤུ་དག་སོ་མ་ར་ཛ་འབྲས་བུ་གསུམ། །སླེ་ཏྲེས་བ་ལྕི་
ས་(རྫིང་ལྟ་བུར་ས་རྩི་ཞིབ་མོ་འཁྲིགས་པའི་ཐིགས་)སྨྱག་ཚ་སྐྲངས་སེལ། །དུད་པ་ཡུང་སྐྱེར་རུ་རྟ་དུག་མོ་
ཉུང༌། །དར་བས་ཤུ་ཐོར་ཁེ་མ་པགས་ནད་སེལ། །ཡུངས་ཀར་ཤུ་དག་རྒྱམ་ཚྭ་སེང་ཕྲོམ་གྱིས། །
གདོང་བྱུག་ངོ་ཁབས་ཁེ་མ་འབྲུམ་ཐོར་སེལ། །འོམ་བུ་ཨ་རུ་ར་དང་དྲི་ཆུ་སྦྱར། །དུག་ནད་
ཡན་ལག་སྐྲངས་པ་སེལ་བར་བྱེད། །ཙན་དན་ཀྱི་ལྕེ་ཧོང་ལེན་གངས་ཆུ་སྦྱར། །ཁྲག་གཟེར་
པགས་ནད་ཚ་བ་མེ་དབལ་སེལ། །སྐྱུ་རུ་ཨུཏྤལ་མར་གསར་ལུས་ཀུན་བྱུག །རྔུལ་འབྱམས་
25-1-603


རིམས་ནད་ཚ་བ་ཕྱི་ཤོར་སེལ། །དུད་པ་རུ་རྟ་ཆུ་རྩ་རེ་ཅག་ཐལ། །ཚྭ་ཕབས་ཟོ་(ཅེས་པ་ཞོ་དོང་
གི་ལོགས་ལ་འོ་མ་དང་དར་ཤ་ཆགས་པ་)མར་ལྐོགས་ཤུ་ཟ་འཕྲུག་སེལ། །སྦྲུལ་ནག་པགས་པ་དུ་བ་མ་
ཤོར་བསྲེགས། །ཕག་ཚིལ་སྦྱར་བྱུགས་ཤ་བཀྲ་བས་ལྡགས་སེལ། །སྔོན་བུ་སྲུབ་ཀ་ཞོ་སྦྱར་
ཟ་འཕྲུག་སེལ། །བྱུག་པའི་ཕན་ཡོན་ཚེ་རིང་དབང་པོ་གསལ། །ཞེས་གསུངས་སོ། །བདུད་རྩི་
སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔྱད་ལྔ་བྱུག་པའི་ལེའུ་སྟེ་ཉི་ཤུ་
རྩ་བཞི་པའོ།། །། 
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་
ཆེན་པོ་ཉོན་ཅིག །དཔྱད་ལྔའི་ལོག་གནོན་ཐུར་མའི་དཔྱད་མཆོག་ལ། །རུང་དང་མི་རུང་ནད་
གཞི་བརྟག་པ་དང༌། །ཆ་བྱད་དབྱིབས་དང་གསང་ས་དབྱེ་བ་དང༌། །ཆོ་ག་བརྡེག་ཐབས་ལག་
ཚོད་འཆི་རྟགས་དང༌། །ལོག་གནོན་ཕན་ཡོན་བསྟན་པ་བཅུ་གཅིག་གོ །ཐུར་མ་འཕང་དུ་རུང་
བའི་ནད་གཞི་ནི། །རླུང་དང་བད་ཀན་གྲང་བ་མ་ཞུ་སྐྲན། །དམུ་ཆུ་རླངས་འཁྱིམས་ཤ་བེམ་
སྐྲངས་པ་དང༌། །ཁྲག་དང་ཆུ་སེར་རྣག་དང་ཚིགས་ཆུ་སོགས། །གསོ་དཔྱད་གཞན་རྡུགས་
ཕལ་ཆེར་ཐུར་མས་གསོ། །རླུང་ནད་མགོ་རླུང་སྙིང་རླུང་གློ་རླུང་དང༌། །མཆིན་མཆེར་ཕོ་
མཁལ་རྒྱུ་ལོང་མཁྲིས་པའི་རླུང༌། །རྒལ་པ་རུས་ཚིགས་རླུང་ཞུགས་ཐུར་མས་གཞིལ། །སྙིང་
རླུང་སྨྱོ་བྱེད་ཆུ་སེར་བད་ལྡན་བཞི། །བད་ཀན་གྲང་བ་མེ་དྲོད་ཉམས་པ་དང༌། །ལྷེན་དང་
ལྕགས་དྲེག་མགོ་ལ་བད་ཀན་རྒྱས། །དོན་སྣོད་ཚིགས་ལ་བད་ཀན་རྒྱས་པ་རྣམས། །སྨན་
དཔྱད་དྲོད་ཀྱིས་མ་སེལ་ཐུར་མས་གསོ། །མ་ཞུ་སྙིགས་མ་རང་སོར་ལུས་པ་དང༌། །བད་ཀན་
བེ་སྣབས་རྒྱས་པ་ཐུར་མས་བཞུ། །སྐྲན་ནད་གློ་སྙིང་མཆིན་མཆེར་མཁལ་མ་དང༌། །ཕོ་ལོང་
མཁྲིས་པ་རྒྱུ་མ་ལྒང་པ་མངལ། །རྩ་སྐྲན་བཅུ་གཅིག་བད་རླུང་ལས་གྱུར་པའི། །གྲང་བའི་སྐྲན་
ལ་ཐུར་མ་མཆོག་ཡིན་ཏེ། །ཁྲག་མཁྲིས་ལས་གྱུར་ཚ་བའི་སྐྲན་རྣམས་ཀྱང༌། །བཅོས་རྡུགས་
25-1-604


ཚད་ཆོགས་རྙིངས་ནས་ཐུར་མས་བཤིག །དམུ་ཆུ་གྲང་བའི་ཟགས་ཆུ་འཁྱིམས་ཆུ་བཙག །
རླངས་འཁྱིམས་མགོ་ལ་བད་ཀན་རླངས་འཁྱིམས་དང༌། །བྱང་ཁོག་སྟོད་དུ་བད་རླུང་རླངས་
འཁྱིམས་དང༌། །གློ་སྙིང་ཕོ་བར་རླངས་འཁྱིམས་ཐུར་མས་གསེང༌། །ཤ་ལ་ཆུ་སེར་བེམས་དང་
སྐྲངས་པ་དང༌། །མགོ་དང་བྱང་ཁོག་ཡན་ལག་ཆུ་སེར་དང༌། །རྣག་ཁྲག་ཞུགས་པ་ཐུར་མས་
དབྱུང་བར་བྱ། །མི་རུང་ཤིན་ཏུ་རྒས་དང་བྱིས་པ་དང༌། །སྨན་པའི་སྒོ་བ་མི་ཉན་རྐྱེན་མ་འཛོམ། །
མཆིན་མཆེར་སྐྲན་ཟགས་ཚ་ཆུ་ཚ་སྐྲན་རྒྱས། །སྙིང་སོགས་དོན་སྣོད་འགྲམས་སམ་ཚ་རོ་
ཡོད། །ཁྲག་མཁྲིས་ལས་གྱུར་ཚ་བ་ཐམས་ཅད་དང༌། །སྲོག་གནས་གནད་སྟེང་ཐུར་མ་སྤང་
བར་བྱ། །ཆ་བྱད་དབྱིབས་ཚད་མགར་བ་མཁས་བརྡུངས་པའི། །ནས་འདྲ་གློ་སྙིང་ཚིགས་པ་
མཁལ་མར་བསྔགས། །སྦལ་མགོ་འདྲ་བ་མཆིན་མཆེར་རྒྱུ་ལོང་ལ། །ཆུ་གྲི་འདྲ་བས་ཡན་
ལག་ཅུར་འབྱིན་བྱ། །མདུང་རྩེ་འདྲ་བས་ཡན་ལག་རྣག་ལ་སྦྱར། །མཐོ་གང་དབལ་ལྡན་ཕོ་
བའི་ཅུར་འབྱིན་བྱ། །ལེབ་ཆུ་ཁ་ཡིས་མགོ་ལ་བཙག་པར་བྱ། །སྦུབས་ཐུར་སྦལ་མགོ་འདྲ་
བས་སྙིང་ཆུ་བཙག །བྱིད་པོའི་མཆུ་འདྲས་བྱང་ཁོག་རྣག་གསང་དབྱེ། །སྨྱུག་ཁས་དམུ་ཆུ་
བཙག་ཅིང་རླངས་འཁྱིམས་གདོན། ཟངས་ཐུར་བྲ་འོ་འདྲ་བས་མིག་འགྲིབས་བསལ། །ཀུན་
ཀྱང་མགོ་འོག་ལུས་ཤོང་ཐུར་ཞབས་ལྡིག །ཕྲ་ལ་མཁྲང་བ་སྲིད་སོར་དྲུག་པ་བྱ། །གསང་ས་
ཐུར་ལམ་རྣམ་པ་བཞི་ཡིན་ཏེ། །དོན་སྣོད་ཡུལ་དང་རྩ་གནད་ཤེས་པ་ཡིས། །སྤྱི་དང་བྱེ་བྲག་
གསང་ས་བསྟན་པའོ། །དང་པོ་དོན་སྣོད་ཡུལ་ས་མ་ཤེས་ན། །གང་ལ་ནད་ཞུགས་དཔྱད་ཀྱི་
དམིགས་མི་ཕྱེད། །རྩ་གནད་མ་ཤེས་དཔྱད་ལ་འཛོལ་མི་ནུས། །སྨན་པའི་ལག་དགྲ་སྤང་
ཕྱིར་རྩ་གནད་གཅེས། །དེ་ཕྱིར་བྱང་ཁོག་ཡུལ་ཚད་ཡིད་ལ་ཟུང༌། །གསང་ལ་དབྱེ་གསང་མེ་
གསང་ཐུར་གསང་གསུམ། །རྣག་ཁྲག་ཆུ་སེར་དབྱེ་གསང་བྱང་ཁོག་གསལ། །མེ་གསང་མེ་
བཙའི་འབྲུ་བཤག་ནང་དུ་བསྟན། །ཐུར་མའི་གསང་ལ་སྤྱི་དང་བྱེ་བྲག་གཉིས། །སྤྱི་གསང་
25-1-605


ཡངས་དང་ཤིན་ཏུ་ཡངས་པ་དང༌། །དོག་དང་ཤིན་ཏུ་དོག་པ་རྣམ་པ་བཞི། །ཡངས་པའི་
གསང་ལ་ཐུར་མ་གཡུལ་ཐབས་ཐུབ། །ཤིན་ཏུ་ཡངས་པ་རྒྱ་གྲམ་ཐུབ་པ་ཡིན། །དོག་པ་
གཉན་ཐོག་གཉན་བབས་ཞེས་བྱ་སྟེ། །ནད་ཀྱིས་གནད་ཀྱི་གོ་འཕྲོག་དེ་ལ་བྱ། །ཤིན་ཏུ་དོག་
པ་གནད་ཀྱིས་ནད་གོ་ཕྲོགས། །ཐུར་ལམ་གཅུས་ལ་བཙལ་ཞིང་བརྡེག་དགོས་པའོ། །བྱེ་བྲག་
སྙིང་ལ་གསང་ས་བཅུ་གཅིག་སྟེ། །ནུ་སྟེང་མཚོན་གང་བཅལ་བ་སྙིང་གི་སྟོད། །སྙིང་སྲོག་
འཛོམ་པའི་གསང་སྟེ་སྙིང་རླུང་སེལ། །ནུ་རྒྱབ་མཚོན་གང་སྲོག་རྩ་མྱོས་བྱེད་གསང༌། །སྲོག་
རྩར་རླུང་དང་ཆུ་སེར་ཞུགས་ལ་ཕན། །ཐུར་དུ་མཚོན་གང་སྙིང་རྩེ་སྙིང་ཆུ་བཙག །བྲང་ངོས་
མཚོན་གང་བཅལ་བ་སྙིང་གི་ལོགས། །ཆུ་སེར་བད་རླུང་རླངས་པ་འཁྱིམས་པའི་གསང༌། །དེ་
ནས་དཀར་ནག་མཚམས་སུ་མཚོན་གང་བཅལ། །གློ་སྙིང་འདོམ་པའི་གསང་སྟེ་གྲང་རླུང་
སེལ། །ཚིགས་པ་བདུན་པ་ཁ་གསུམ་དེ་དང་འདྲ། །སྲོག་རྩའི་གསང་ས་དྲུག་པ་ཁ་གསུམ་སྟེ། །
གཡོན་ངོས་བྱ་འདབ་བར་དུ་ནང་བཏོལ་བྱ། །བྱ་རོག་མིག་ནས་ཕྱིར་མཚོན་གང་བཅལ་བའི། །
རྩིབ་བར་གོང་འོག་གོ་ཆེན་གོ་ཆུང་གསང༌། །སྐེ་སྟོང་ཙ་ར་ཁུང་དང་རྣམ་པ་ལྔ། །གློ་སྙིང་
མཆིན་གསང་སྟོད་དུ་རླངས་པ་འཁྱིམས། །སྙིང་འཆུས་སྟོད་ཁེངས་དབུགས་བརྩེག་ནད་ལ་
དབྱེ། །གློ་ལ་གསང་ས་ཉི་ཤུ་རྩ་གཉིས་ཏེ། །སོག་འདབ་རྩིབ་མའི་གོ་བར་རྣམ་པ་གསུམ། །གློ་
ཡི་སྒང་ལ་སྐྲན་ཞུགས་གསང་དྲུག་ཡིན། །མཆན་འོག་རྩིབ་མའི་གོ་བར་རྣམ་པ་གསུམ། །གློ་
བ་བྱ་འདབ་སྐྲན་ཞུགས་གསང་དྲུག་ཡིན། །བྲང་གི་རྩིབ་མའི་གོ་བར་གཡས་གཡོན་བཞི། །
གློ་བ་བུ་ལ་སྐྲན་ཞུགས་གསང་བརྒྱད་ཡིན། །གློ་ཡི་རྒྱབ་གསང་ཚིགས་པ་བཞི་ལྔ་གཉིས། །
ཁ་གསུམ་རླུང་དང་བད་ཀན་ནད་ཞུགས་གསང༌། །ཚིགས་པ་བརྒྱད་པ་མཆིན་དྲིའི་གསང་ས་
སྟེ། །ཆུ་སྐྱུག་ཕོ་མཆིན་བྲང་ལ་ཐུར་མ་འཕང༌། །མཆིན་མཆེར་གཉིས་ལ་གསང་ས་བརྒྱད་ཡོད་
དེ། །ནུ་མ་ཐུར་ཚོན་དོ་བཅལ་མཆིན་དྲིའི་མཚམས། །དེ་འོག་རྩིབ་མའི་གོ་བར་རྣམ་པ་གསུམ།  །
25-1-606

 
གཡས་ཀྱི་དང་པོ་ཕོ་མཆིན་བར་གྱི་སྐྲན། །བར་པ་མཆིན་ཐེར་ཐ་མ་མཆིན་གཤམ་སྐྲན། །
གཡོན་ངོས་མཆེར་སྐྲན་དེ་བཞིན་ཤེས་པར་བྱ། །རྒྱབ་ཀྱི་ཚིགས་པ་དགུ་དང་བཅུ་གཅིག་པ། །
ཁ་གསུམ་རླུང་དང་བད་ཀན་གྲང་བའི་གསང༌། །མཁལ་མའི་གསང་ས་ཉི་ཤུ་རྩ་གཅིག་སྟེ། །
ཚིགས་པ་བཅུ་བཞི་པ་དང་གཡས་གཡོན་དུ། །མཚོན་གང་བཅལ་བ་མཁལ་མའི་རྩ་ནག་སྟེ། །
དེ་ནས་མཚོན་གང་བཅལ་བ་མཁལ་འབྲས་གསང༌། །དེ་ནས་མཚོན་གང་བཅལ་བ་མཁལ་
ཚིལ་གསང༌། །གཞུག་གུ་ཆུང་ནས་སྣག་པོ་ཆེ་ཡི་སྟེང༌། །མཛུབ་གང་བཅལ་བ་དཔྱི་ཡི་འཁོར་
མིག་ཡིན། །མཁལ་འབྲས་སྟེང་ནས་བཅལ་བས་སོར་དྲུག་ཡོད། །དེ་ནས་ཕྱོགས་བཞིར་ཚོན་
རེ་དབུས་དང་ལྔ། །བྱིན་བརླའི་ཕྱི་སུལ་ཆུ་སེར་འབབ་གསང་ཡིན། །དེ་རྣམས་ཀུན་གྱིས་
མཁལ་མའི་གྲང་རླུང་སེལ། །མཁལ་ཚིལ་མཁལ་འབྲས་སྟེང་དུ་མཁལ་སྐྲན་འབབ། །གསང་
དང་ནད་དམིགས་མཐུན་ན་ཐུར་མ་འཕང༌། །ཕོ་བ་མི་འགྱུར་གསང་དགུ་ཅུར་འབྱིན་གཉིས། །
ཚིགས་པ་བཅུ་གཉིས་པ་དང་གསང་བཅུ་གཉིས། །ལྷེན་སྣའི་སྣ་ནས་ཐུར་དུ་ཚོན་གང་བཅལ། །
གཡས་གཡོན་མཚོན་གང་ཁ་གསུམ་ལྷེན་གསང་ཡིན། །དེ་འོག་མཚོན་གང་ཁ་གསུམ་སྐྲན་
གསང་ཡིན། །དེ་འོག་མཚོན་གང་ཁ་གསུམ་མེ་ཉམས་གསང༌། །ཕོ་དབུས་གཡས་གཡོན་
མཚོན་དོ་ཅུར་འབྱིན་ནས། །མཆིན་རྒྱས་ཕོ་བའི་ཡུལ་ཕྱོགས་ཐུར་མ་སྤང༌། །སྐྲན་དང་ནོར་
ཕྱིར་ལག་ཚོན་རན་པར་བྱ། །ཚིགས་པ་བཅུ་གསུམ་བཅོ་ལྔ་བུ་སྣོད་གསང༌། །སྐྲན་ཞུགས་
གྲང་བས་བུ་མི་ཆགས་ལ་ཕན། །ལྟེ་བའི་གཡས་གཡོན་མཚོན་གང་ལོང་གི་ཐེར། །ལོང་དུ་
བད་རླུང་གྲང་བ་ཞུགས་ལ་ཕན། །དེ་ནས་གཡས་གཡོན་མཚོན་རེ་ལོང་སྐྲན་གསང༌། །ཚིགས་
པ་བཅུ་དྲུག་པ་དང་གསང་ས་ལྔ། །ལྟེ་འོག་མཚོན་གང་ཁ་གསུམ་རྒྱུ་སྟོད་གསང༌། །དེ་འོག་
མཚོན་གང་ཁ་གསུམ་རྒྱུ་སྨད་གསང༌། །ཚིགས་པ་བཅུ་བདུན་པ་དང་བདུན་དུ་བཤད། །རྒྱུ་
ཞབས་ཐེར་དུ་དཔྱི་ཡི་ཁ་གཟར་ནས། །ཆག་གང་བཅལ་བ་སྨད་ཀྱི་དབྱེ་གསང་སྟེ། །དེ་དང་
25-1-607


ཚིགས་པ་བཅོ་བརྒྱད་འབྲས་བུ་སྐྲངས། །གྲང་བས་ཆུ་ཁ་སྲ་སྙི་སེལ་བར་བྱེད། །ཡན་ལག་
ཚིགས་ཆེན་བཅུ་གཉིས་ཆུ་སེར་རྒྱས། །ཚིགས་མིག་ཆུ་བའི་བར་ན་གསང་དམིགས་ཡོད། །
རུས་ལ་བཏུག་དང་བཅུར་འབྱིན་གང་འོས་དཔྱད། །ཐུར་མའི་དབྱེ་བ་ཚ་ཐུར་གྲང་ཐུར་
གཉིས། །ཚ་ཐུར་གསུམ་སྟེ་ཚ་ཐུར་རྐྱང་པ་དང༌། །ཚ་ཐུར་གྱི་ནི་གྲང་ཐུར་ཚ་ཐུར་སྦྲག །དང་པོ་
ཐུར་མ་བསྲེགས་ནས་རྡེག་པ་སྟེ། །འབྲས་དང་ལྷོག་པ་ལྦ་བ་རྣག་ལ་བྱ། །གཉིས་པ་མེ་བཏབ་
རྗེས་ལ་ཐུར་རྐྱང་བརྡེག །ཐེ་ཚོམ་བཅས་པའི་རྣག་གསང་འབྱེད་ལ་སྦྱར། །གསུམ་པ་ཐུར་
བསྲེགས་སྟེང་དུ་མེ་འདེབས་པ། །འབྲས་དང་ལྷོག་པ་རྨ་རྒན་སྐྲན་ལ་བྱ། །གྲང་ཐུར་གསུམ་
སྟེ་གྲང་ཐུར་རྐྱང་པ་དང༌། །གྲང་ཐུར་གྱི་ནི་ཚ་ཐུར་གྲང་ཐུར་སྦྲག །དང་པོ་ཐུར་མ་རྐྱང་པར་
བརྡེག་པ་སྟེ། །དམུ་ཆུ་དབུག་དང་མིག་འགྲིབ་རྣག་གསང་དབྱེ། །གཉིས་པ་ཐུར་ཤུལ་མེ་ཡིས་
གདབ་པ་སྟེ། །རྣག་ཁ་འཁྱིམས་དང་ཚིགས་ཆུ་ཕུག་ལ་སྦྱར། །གསུམ་པ་ཐུར་མ་གྲང་མོར་
བཏབ་རྗེས་ལ། །འཁྱག་པ་རྡོ་གྲང་ཆུ་ཡིས་བྲན་པ་སྟེ། །ཤ་བེམ་ཚ་སྐྲངས་མགོ་ཡི་ཆུ་བཙག་
དང༌། །ཚ་སྐྲན་ཚ་རོ་རྙིང་པ་ཡོད་ལ་བསྔགས། །ཕལ་ཆེར་སྤྲ་བ་གཅིག་བཏབ་ཐུར་མ་འཕང༌། །
དེ་ཤུལ་མེ་ཡིས་བསྲེག་པ་ཤིས་པ་ཡིན། །ལུས་ཀྱི་ཆོ་ག་ཁད་མཉམ་སྟན་སྟེང་དུ། །སྐྱིལ་ཀྲུང་
བཅས་ལ་ལག་གཉིས་པུས་མོར་གླན། །ཅུ་མེད་དྲང་པོར་འདུག་ལ་གཡོག་གིས་བསྟེན། །དེ་
ལ་མདུན་རྒྱབ་ཐུར་མ་འཕང་བར་བྱ། །ཕོ་ཐུར་ཟོས་རྗེས་རྒྱབ་ནས་པུས་མོས་བརྟེན། །ཁྱི་
ཚུགས་མགྲིན་བཀུག་སྐེ་སྟོང་ཐུར་མ་འཕང༌། །ལག་རྒྱངས་ཀ་བ་ལ་བསྟེན་སྨྱོ་ཐུར་འཕང༌། །
དྲང་པོར་ལངས་ལ་དཔྱི་མིག་ཐུར་མ་འཕང༌། །རྐང་པ་བརྐྱང་ལ་པུས་མོའི་དྲུག་བསྐོར་
འཕང༌། །དེ་བཞིན་གསང་གསལ་ནད་ཕྲད་བརྡེག་ཚུལ་རྣམས། །གང་ལ་གང་བདེ་ཤེས་རབ་
རིགས་ལ་དྲིས། །བརྡེག་པའི་ཐབས་ལ་སྤྱི་དང་བྱེ་བྲག་གཉིས། །སྤྱིར་ནི་གཡས་པས་ཕུན་
གང་མཚམས་ནས་བཟུང༌། །གཡོན་པའི་གུང་མོས་གསང་དམིགས་གསལ་མཚོན་ཏེ། །དེ་
25-1-608


རྗེས་ཐུར་རྐེད་ནས་བཟུང་དྲང་པོར་དབུལ། །པགས་ཕིགས་ཧུན་རེ་སྣུད་ཀྱིན་དལ་བུ་ཡིས། །
ཤ་རུས་ནང་རྡོལ་དོན་གྱི་ལག་ཚོད་མྱང༌། །ཡིད་དང་མཐེབ་ཚོད་ཕྱི་རྟགས་བསྟུན་ལ་འཕང༌། །
ལག་ཚོད་ཐུར་འཛིན་འུག་པ་ཐུག་ཕྲད་ཡིན། །ཕོ་རོག་གཅེར་མཐོང་ཐུར་ཚོད་བརྟགས་ལ་
བཟུང༌། །ཡང་ན་དང་པོ་པགས་ལ་ཀོ་ཐེན་བྱ། །བྱེ་བྲག་གཡུལ་ཐབས་ཕྲེད་བཅུད་སྟ་དགབ་
དང༌། །ཐོད་སྐོར་རྒྱ་གྲམ་ཅུར་འབྱིན་རྣམ་པ་དྲུག །བུ་སྐོར་མ་ལ་མི་གནོད་པ་དང་བདུན། །མ་
སྐོར་བུ་ལ་མི་གནོད་པ་དང་བརྒྱད། །དང་པོ་ཐུར་མ་དྲང་ཐད་འཕང་བ་སྟེ། །མགོ་དང་སྒལ་
ཚིགས་རྒྱུ་སྨད་གསང་ལ་བྱ། །གཉིས་པ་ཐུར་རྩེ་གཡས་གཡོན་གཅུ་བ་སྟེ། །མཆིན་མཆེར་
མཁལ་མ་ལ་སོགས་ཕལ་ལ་ཤིས། །གསུམ་པ་ཐུར་རྩེ་ཐུར་བསྟན་འཕང་བ་སྟེ། །སྐེ་སྟོང་གློ་
སྙིང་ལྷེན་གསང་གསུམ་ལ་སྦྱར། །བཞི་པ་ཐུར་རྩེ་གྱེན་ལ་བསྟན་པ་སྟེ། །མེ་ཉམས་གསང་
དང་མཛོད་ཆུང་རྣག་འཚོལ་སྦྱར། །ལྔ་པ་ཐུར་རྩེ་ཕྱོགས་མཚམས་བསྐོར་བ་སྟེ། །ཕོ་དབུས་
སྐྲན་དང་རྣག་འཚོལ་བ་ལ་སྦྱར། །དྲུག་པ་ཐུར་མ་ཅུར་ཕྱིན་འཕང་བ་སྟེ། །ཕོ་ཐེར་མཛོ་མིག་
བརླ་ཡི་འོག་ཏུ་ཤིས། །བདུན་པ་བྱང་ཁོག་ཐུར་མ་འཕེན་པ་རྣམས། །དོན་དང་སྣོད་ལ་གནོད་
མེད་འཕང་ལ་བཤད། །བརྒྱད་པ་གནད་དུ་ཞུགས་པའི་ནད་ལ་འཕང༌། །དེ་ཡང་མིག་དང་
སྙིང་ཆུ་མཆིན་སྐྲན་དང༌། །མཁལ་སྐྲན་སྐྱི་ཕུར་རྣག་ལ་སྦྱར་བར་བྱ། །ཐུར་མའི་ལག་ཚོད་སྤྱི་
དང་བྱེ་བྲག་གཉིས། །སྤྱི་ཡི་ལག་ཚོད་པགས་ལ་སྲ་བ་སྟེ། །ཤ་ལ་སྙི་སྟེ་བྱོལ་གྱིས་འགྲོ་བ་
ཡིན། །རུས་ལ་ཐུག་ན་སྟུགས་ཀྱིས་རྡུགས་པར་འགྱུར། །དེ་ལ་རྩིབ་མའི་གོ་བར་བཙལ་ཏེ་
དབུལ། །ནང་དུ་རྡོལ་ནས་ཐུར་རྩེ་བྱོལ་གྱིས་འགྲོ། །ཡིད་ལ་ཐུར་མ་རྟེན་གྱིས་རྡུགས་སྙམ་
བྱེད། །ནད་པ་བཞིན་ལྡོག་སྐད་ངན་འཆོར་བ་གསུམ། །ཐུར་མ་ཚད་དུ་སླེབ་པའི་མན་ངག་
ཡིན། །མི་རྡུགས་ཕྱོལ་ཕྱོལ་འགྲོ་ན་བཏང་བས་ཆོག །དོག་ཅིང་འཐེན་ཡང་སྲན་བཟོད་ཟོ་
སླངས་བཏང༌། །སྲན་མི་བཟོད་ན་དེ་ལས་དབུལ་ཐབས་མེད། །བྱེ་བྲག་དོན་ལ་ཉེ་ན་ཤེས་པ་
25-1-609


འཁྲུག །ལུས་འདར་མིག་བཟློག་ཐུར་མ་འཕར་བ་ཡིན། །གཞན་རྣམས་དེས་ཆོག་སྙིང་ཆུ་
བཙག་པ་ལ། །ཐུར་རྩེ་འཕུལ་སྙམ་བྱེད་ན་སྙིང་པགས་སླེབ། །ཆུ་ལྕག་དབུགས་བསྡམ་སོར་
གཅིག་སྣུད་ལ་དབུལ། །སྲོག་རྩ་ཐུར་མའི་ལོགས་ལས་འཕར་བ་སྟེ། །གློ་ལ་སྣ་བུག་ཧར་ཞིང་
གློ་ཆུང་འོང༌། །མཆིན་མཆེར་སྐྱུག་མེར་བྱེད་ལ་ཁ་ཆུ་ལྡུགས། །མཁལ་མ་ན་ཞིང་མཁལ་རྩ་
འབྲལ་སྙམ་བྱེད། །དོན་རྣམས་ཚུར་སྙེག་བྱ་ཚང་སྦྲུལ་ཞུགས་འདྲ། །མཆིན་མཆེར་མཁལ་མ་
གསུམ་ལ་འབྲོས་སྙེག་མེད། །སྣོད་རྣམས་ཕར་འབྲོས་ཡོལ་བ་རླུང་དེད་འདྲ། །དལ་བུས་
འཕུལ་བས་རིམ་གྱིས་འབྲོས་པར་འགྱུར། །མགྱོགས་ན་འབྲོས་ལོང་མེད་པར་སྣོད་ལ་འཇུག །
ཕོ་བ་ཕྱི་ཡི་དར་ཤ་ཕུགས་པ་དང༌། །ཕོ་བའི་བར་ན་སྟོང་པ་སོར་གཅིག་ཡོད། །དེ་ནས་ཕོ་
བའི་རྩར་སླེབ་ཡིད་ཙམ་སྲ། །སྐབས་འདིར་མཆིན་པའི་ཇ་ལོག་འབྱུང་བ་ཡིན། །ནང་རྡོལ་
ནས་ནི་ཡངས་པར་ཕྱོལ་གྱིས་འགྲོ། །རྒྱུ་ལོང་པགས་པ་ཕིགས་ནས་བྱིལ་བྱིལ་འགྲོ། །སླེབ་ན་
སྐྱུག་ལོག་ན་འགྱུར་ཚ་འབྲབ་བྱེད། །སྐྲན་དང་ཕྲད་ན་རེག་པ་སྲ་བ་ལ། །ཐད་ཀར་གཟེར་ཞིང་
ཨ་ན་ཟེར་བ་འོང་། །གསར་དུས་མཐའ་བསྐོར་རྙིངས་ནས་རྨ་མང་གདོད། །རྣག་དང་དམུ་ཆུ་
རླངས་འཁྱིམས་དངོས་སུ་གསལ། །མགོ་དང་ཡན་ལག་ཚིགས་མིག་རུས་ལ་ཐུག །བཤུལ་
ཤའི་ཐུར་མ་ཚད་དང་ལག་ཚོད་བསྟུན། །ཆག་གང་ནང་རྡོལ་འཕར་ནས་དབུལ་ཐབས་མེད། །
ཡན་ལག་ཅུར་ཕྱིན་ཚིགས་པར་བཀྲུལ་ལ་གདོན། །འཆི་བའི་རྟགས་ལ་ནད་གཞི་སླེབ་པ་
དང༌། །གནད་ལ་ཉེ་དང་ཐོར་བུའི་རླུང་སྐྱེས་གསུམ། །དང་པོ་གཉིས་ཀ་ལག་ཚོད་སྐབས་སུ་
བསྟན། །ཁྱད་པར་རྩ་གནད་སྦྲེང་དང་རབ་ཀྱིས་འོང༌། །དེ་ཡང་ནད་པ་ཉིད་ལ་དྲིས་པས་
གསལ། །རླུང་སྐྱེས་གཡལ་དང་དངངས་འདར་སྐྱུག་པར་བྱེད། །ལོག་པ་ཚ་ལོག་གྲང་ལོག་
རྣམ་པ་གཉིས། །ཚ་ལོག་ཞག་གསུམ་གཉིས་ལ་འབྱུང་བ་སྟེ། །ཚ་གྲང་འཁྲུལ་ལམ་སྐྲན་ནད་
ཚ་བར་ལོག །གྲང་ལོག་སྤྱད་བྱས་རྗེས་ལ་འབྱུང་བ་སྟེ། །ཐོར་བུའི་རླུང་སྐྱེས་བསུར་དང་བྱུག་
25-1-610


པ་དང༌། །བུར་ཆང་རུས་ཁུ་བཅུད་བསྟེན་རླུང་གསང་མནན། །ཐུར་ཤུལ་ཁྲག་བབས་འཁྱགས་
ཏེ་དུགས་ཀྱིས་བསྲོ། །ཆུ་སྐྲན་རྡོལ་བས་སྣོད་འགྲིམས་བྱེར་སྐྲངས་ན། །དེ་ལ་དྲོད་སྨན་སྦྱོངས་
དང་སྐེམས་ཀྱིས་བཅོས། །དེ་རྟགས་བཅོས་ཐབས་རང་རང་སྐབས་ལྟར་བྱ། །ཕལ་ཆེར་
བསིལ་དུགས་སྦྱར་བ་མཆོག་ཏུ་བསྔགས། །དོན་སྣོད་གནད་ལ་ཟིན་ན་རྨ་བཞིན་བཅོས། །
ཐུར་སའི་ཕན་ཡོན་རླུང་ཁ་གནོན་པ་དང༌། །གྲང་བའི་དྲོད་སྐྱེད་སྐྲན་བཤིག་མ་ཞུ་འཇུ། །
རླངས་པ་འཁྱིམས་པ་གསེང་ཞིང་ཤ་བེམ་གསེང༌། །རྣག་ཁྲག་ཆུ་སེར་དམུ་ཆུ་ཕྱིར་ལ་འབྱིན། །
དེ་དག་ཐུར་མ་བྱས་པའི་ཕན་ཡོན་ཡིན། །དང་པོ་ཐུར་མའི་རུང་ཡུལ་མ་ཤེས་ན། །དཔྱད་ཀྱི་
ལ་འདའ་མི་ཤེས་ཁྱད་མི་ཐོན། །གཉིས་པ་མི་རུང་སྤང་ཡུལ་མ་ཤེས་ན། །ཐུར་ལོག་བྱུང་ན་
རང་སྐྱེངས་འཆར་ཁ་འོང༌། །གསུམ་པ་ཐུར་མའི་དབྱིབས་ཚད་མ་ལྡན་ན། །ལག་ཚོད་མི་སྐྱེ་
དམན་ཐལ་སྐྱོན་གྱིས་ཕོག །བཞི་པ་ཐུར་མའི་གསང་ས་མ་ཤེས་ན། །ལམ་འགགས་ནད་དང་
དཔྱད་དུ་ཕྲད་མི་བྱེད། །ལྔ་པ་ཐུར་མའི་དབྱེ་བ་མ་ཤེས་ན། །ནད་དང་དཔྱད་དུ་འཛོལ་ཞིང་
ཐུར་ལོག་འོང༌། །དྲུག་པ་ཐུར་མའི་ཆོ་ག་མ་ཤེས་ན། །ཐུར་ལམ་འགགས་ནས་གནད་སྙེག་
གནས་མི་སྐྱོལ། །བདུན་པ་ཐུར་མའི་བརྡེག་ཐབས་མ་ཤེས་ན། །ནད་དང་མི་ཕྲད་གནད་ལས་
འབྱོལ་མི་ནུས། །བརྒྱད་པ་ཐུར་མའི་ལག་ཚོད་མ་ཟིན་ན། །ཁ་ཐལ་སྨན་པའི་ལག་དགྲས་
ཕུང་བར་འགྱུར། །དགུ་པ་ཐུར་མའི་འཆི་རྟགས་མ་ཤེས་ན། །གསོ་ཤིའི་བྱ་ར་མེད་པས་ཚད་
མི་སྐྱོལ། །བཅུ་པ་ཐུར་མའི་ལོག་གནོན་མ་ཤེས་ན། །གསོ་དཔྱད་ནད་པའི་སྲོག་གི་བསྐུལ་
མར་འགྱུར། །བཅུ་གཅིག་ཐུར་མའི་ཕན་ཡོན་མ་ཤེས་ན། །དཔྱད་མཆོག་ཐུར་མའི་གདེངས་
མེད་སྤྱོད་མི་ནུས། །དེ་བཟློག་དེ་ཡི་ཡོན་ཏན་ཡིན་པར་བཤད། །ཅེས་གསུངས་སོ། །བདུད་རྩི་
སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔྱད་ཀྱི་ལོག་གནོན་ཐུར་མའི་
ལེའུ་སྟེ་ཉི་ཤུ་རྩ་ལྔ་པའོ།། །། 
25-1-611


དེ་ནས་དྲང་སྲོང་ཡིད་ལས་སྐྱེས་ཀྱིས་དྲང་སྲོང་རིག་པའི་ཡེ་ཤེས་ལ་འདི་སྐད་ཅེས་ཞུས་
སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། །རྒྱུད་བཞིའི་མཇུག་དོན་བསྡུ་ན་གང་དུ་
འདུས། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་དང༌། སྟོན་པས་
འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། །མདའ་གཤའ་ཕང་བ་
བཀང་ཡང་གཏད་ས་མདེ་རྩེ་གང༌། །སོ་ནམ་དུས་བཞིར་བཙལ་ཡང་མདོ་དོན་ལྟོ་རྒྱབ་གཉིས། །
རྣམ་གྲངས་དུ་མར་ཕྱེ་ཡང་འབྲས་བུ་གྲུབ་པར་བསྡུ། །དེ་བཞིན་རྒྱུད་དང་ཡན་ལག་གནས་
སྐབས་མདོ། །དུ་མར་བརྗོད་ཀྱང་མདོ་དོན་རྣམ་པ་གཉིས། །ནད་དང་ནད་མེད་བྱ་བ་ཧྲིལ་
གྱིས་དྲིལ། །ནད་མེད་དོན་དུ་རྒྱུན་སྤྱོད་དུས་སྤྱོད་དང༌། །བཅུད་ལེན་རོ་ཙ་བཞི་རུ་ཤེས་པར་
གྱིས། །ཟས་དང་སྨན་གཉིས་ཐུན་མོང་སྤྱི་རུ་སྦྱོར། །ནད་པའི་བྱ་བ་གཞི་བརྟག་གསོ་བ་
གསུམ། །ནད་ལ་བཞི་བརྒྱ་རྩ་བཞིར་ཕྱེ་ན་ཡང་། །ཚ་གྲང་གཉིས་སུ་མ་འདུས་ནད་གཞན་
མེད། །ངོས་བཟུང་བརྟག་ལ་སྟོང་དང་ཉིས་བརྒྱ་ཡང༌། །བལྟ་རེག་དྲི་བར་མ་འདུས་བརྟག་
ཐབས་མེད། །རེག་པ་རྩ་ལ་འཚོ་འཆི་དཔྱད་པས་རྟོགས། །བལྟ་བ་ཚ་གྲང་ཆུ་ལ་མཐོང་བས་
གསལ། །སློང་རྐྱེན་གར་བབས་ན་ལུགས་དྲིས་པས་ཤེས། །གསོ་བྱེད་གཉེན་པོ་སྟོང་དང་
རྩ་གཉིས་ཀྱང༌། །སྨན་དཔྱད་ཟས་སྤྱོད་བཞི་རུ་མ་འདུས་མེད། །ཞི་སྦྱོང་གཉིས་སུ་མ་འདུས་
སྨན་གཞན་མེད། །བསིལ་དྲོད་གཉིས་སུ་མ་འདུས་ཞི་བྱེད་མེད། །དྲག་འཇམ་གཉིས་སུ་མ་
འདུས་སྦྱོངས་གཞན་མེད། །འཇམ་རྩུབ་གཉིས་སུ་མ་འདུས་དཔྱད་གཞན་མེད། །ཕན་གནོད་
གཉིས་སུ་མ་འདུས་ཟས་གཞན་མེད། །དྲག་དལ་གཉིས་སུ་མ་འདུས་སྤྱོད་ལམ་མེད། །གསོ་
ཐབས་ལག་ལེན་སུམ་བརྒྱ་དྲུག་ཅུ་ཡང༌། །ངོས་བཟུང་གསོ་ཚུལ་གསོ་ཐབས་གསུམ་དུ་
འདུས། །ཀྱེ་དྲང་སྲོང་ཆེན་པོ་དེ་ལྟར་ཤེས་པར་གྱིས། །ནད་ངོས་ཐམས་ཅད་བལྟ་རེག་དྲི་བས་
བཟུང༌། །ལྟར་སྣང་ལྔ་ཕྲུགས་ཚ་གྲང་འཁྲུལ་སོ་བསལ། །བཅོས་ཚུལ་དགུ་ཡིས་ནད་དང་
25-1-612


གཉེན་པོ་སྤྲོད། །ལག་ལེན་བཅོ་བརྒྱད་ནད་ཀྱི་ངོ་བོ་གཞོམ། །ལེའུ་དྲུག་པས་མདོར་བསྟན་རྩ་
བ་བཟུང༌། །བཤད་པའི་རྒྱུད་ཀྱིས་གསོ་རིག་སྤྱི་ཁོག་ཁྲོལ། །མན་ངག་རྒྱུད་ཀྱིས་གང་བྱུང་
ནད་རྣམས་གསོ། །ཕྱི་མ་རྒྱུད་ཀྱིས་ལག་ལེན་མདོ་དོན་དྲིལ། །ཞི་བྱེད་ཐམས་ཅད་སྡེ་ཚན་ལྔ་
བཞིན་སྦྱོར། །སྦྱོང་བྱེད་ཐམས་ཅད་ལས་ལྔའི་ནང་བཞིན་སྦྱོངས། །དཔྱད་རྣམས་གང་བྱེད་
དཔྱད་ལྔའི་ནང་བཞིན་སྦྱོར། །རླུང་མཁྲིས་བད་ཀན་གསུམ་གྱིས་སྤྱི་ཁོག་ཕུག །རང་རང་ནད་
ཀྱི་གསོ་ཐབས་མདེ་ཁར་ཐོགས། །དུག་དང་སྨུག་པོ་ཚ་བ་རྙིངས་པ་གསུམ། །གཅིག་ལ་
གཅིག་ཕན་རྟགས་དང་བཅོས་ཐབས་འཕྲུལ། །མ་ཞུ་ལྷེན་དང་མེ་དྲོད་ཉམས་པ་གསུམ། །
གཅིག་ལ་གཅིག་ཕན་རྟགས་དང་བཅོས་ཐབས་འཁྲུལ། །འོར་དང་སྐྱ་རྦབ་དམུ་རྫིངས་རྣམ་
པ་གསུམ། །གཅིག་ལ་གཅིག་ཕན་རྟགས་དང་བཅོས་ཐབས་འཁྲུལ། །དེ་བཞིན་སྐྲན་དང་
ཁོང་འབྲས་བཅོས་ཐབས་འཁྲུལ། །འབྲས་དང་སུར་ཡ་རྨ་རྒན་རྣམ་པ་གསུམ། །གཅིག་ལ་
གཅིག་ཕན་རྟགས་དང་བཅོས་ཐབས་འཁྲུལ། །འཁྲུ་ནད་རྒྱུ་གཟེར་ཚད་པས་ཁྲུ་བ་གསུམ། །
གཅིག་ལ་གཅིག་ཕན་རྟགས་དང་བཅོས་ཐབས་འཁྲུལ། །དྲེག་དང་གྲུམ་བུ་རྐང་བམ་རྟགས་
བཅོས་འཁྲུལ། །རིམས་ལ་མ་སྨིན་སྟོངས་ཚད་གཅེས་པར་ཟུང་། །འགྲམས་དང་འཁྲུགས་ལ་
རྒྱས་ཚད་གཅེས་པར་ཟུང་། །དུག་དང་སྨུག་པོ་རྙིངས་ཚད་གཅེས་པར་ཟུང་། །བད་མཁྲིས་ནད་
ལ་གབ་ཚད་གཅེས་པར་ཟུང་། །ཚད་པ་ཀུན་ལ་ཞུ་འཁྱགས་གཙོ་བོར་ཟུང་། །ཕོ་མཆེར་
མཁལ་ནད་བད་ཀན་གཙོ་བོར་ཟུང་། །གློ་མཆིན་མཁྲིས་པ་ཚད་པ་གཙོ་བོར་ཟུང་། །སྙིང་
སྲོག་ལོང་ལ་རླུང་ཉིད་གཙོ་བོར་ཟུང་། །ཁོང་ནད་ཀུན་ལ་ཕོ་བ་གཙོ་བོར་ཟུང་། །ཚད་ནད་
བསིལ་གྱིས་མ་ཐུབ་ལོག་གནོན་དྲོད། །གྲང་ནད་དྲོད་ཀྱིས་མ་ཐུབ་ལོག་གནོན་བསིལ། །ཚིག་
འདི་དཔེ་ལ་མ་བཞག་དོན་ལ་ལོང༌། །དོན་འདི་ཡལ་བར་མ་བཏང་སེམས་ལ་འཆོངས། །མན་
ངག་ཁ་ཁྱེར་མ་བྱེད་དོན་ལ་ལོང༌། །སྨན་དཔྱད་ཤེས་ལོ་མ་བྱེད་རྟོག་དཔྱོད་གཟོབས། །མི་
25-1-613


སྲོག་ཚོད་ལེན་མ་བྱེད་གདེངས་ལྡན་སློབས། །ལག་འཛུད་མ་སྔ་ནད་ཀྱི་སྐད་ལ་དྲིས། །དཔྱད་
སྙིང་མ་ཆེ་སྨན་པའི་ལག་དགྲས་འཕུང༌། །རི་ཐང་མཚམས་སུ་སྤྱང་སྟེ་ཁྲ་འདྲས་དགོས། །ནད་
ཟོ་ལེན་དུས་གླན་ཏེ་ལུག་འདྲས་དགོས། །ནད་གཉའ་གཅོག་དུས་བསྡར་ཏེ་ཝ་འདྲས་དགོས། །
དཔྱད་ལོག་བྱེད་དུས་དཔའ་སྟེ་སྟག་འདྲས་དགོས། །ཞེས་གསུངས་སོ། །དེ་ནས་དྲང་སྲོང་
ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། །
རོ་ནུས་ཞུ་རྗེས་སྦྱོར་བ་མི་དགོས་པའི། །གཅིག་གིས་ནད་སེལ་སྨན་མཆོག་ཡོད་དམ་མེད། །
སྦྱར་བའི་སྨན་ལ་གང་གང་མཆོག་ཏུ་འགྱུར། །དེ་བཞིན་ཟས་སྤྱོད་ཀུན་གྱི་མཆོག་གང་
ལགས། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པས། སྟོན་པ་དྲང་
སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། །
ཁྱོད་ཀྱིས་ཞུས་པའི་དོན་ལ་ལན་མེད་ན། །ཉན་ཐོས་འགོག་པའི་གོལ་སར་ཤོར་ར་རེ། །
དེ་ཕྱིར་དྲིས་ལན་བཤད་ཀྱིས་གུས་པས་ཉོན། །ནད་རྣམས་ཀུན་ལ་ཨ་རུ་ར་ཉིད་མཆོག །
རླུང་ལ་རུས་ཁུ་བུར་རྙིང་སྒོག་སྐྱ་མཆོག །མཁྲིས་པར་ཏིག་ཏ་གསེར་གྱི་མེ་ཏོག་མཆོག །
བད་ཀན་ན་ལེ་ཤམ་དང་སྦྲང་རྩི་མཆོག །ཁྲག་ལ་བ་ཤ་ཀ་དང་ཧོང་ལེན་མཆོག །བད་ཀན་
སྨུག་པོའི་ནད་ལ་ཅོང་ཞི་མཆོག །མ་ཞུ་བ་ལ་ཁ་རུ་ཚྭ་ཉིད་མཆོག །སྐྲན་གྱི་ནད་ལ་རྡོ་ཐལ་
བསྲེགས་ཁུ་མཆོག །དམུ་རྫིངས་ནད་ལ་དར་ཡ་ཀན་ཉིད་མཆོག །སྐྱ་རྦབ་ནད་ལ་ད་ལིས་
ལྕགས་ཕྱེ་མཆོག །འོར་གྱི་ནད་ལ་སྲད་དཀར་བ་ཆུ་མཆོག །གཅོང་ཆེན་ནད་ལ་ཤ་ཆང་འོ་
མ་མཆོག །རིམས་ལ་པར་པ་ཏ་དང་གླ་སྒང་མཆོག །འཁྲུགས་ལ་ཙན་དན་དཀར་པོ་ཧོང་
ལེན་མཆོག །ཚད་པ་ཀུན་ལ་གི་ཝཾ་མཆོག་ཏུ་བཤད། །དུག་ལ་ཨ་རུ་ར་དང་ཉུང་མ་མཆོག །ཤ་
ཡི་དུག་ལ་བྱེའུ་ལ་ཕུལ་མཆོག །གཉན་ནད་ཀུན་ལ་གུ་གུལ་གླ་རྩི་མཆོག །མིག་ལ་སྐྱེར་པའི་
ཁཎྜ་འབྲས་གསུམ་མཆོག །ཁ་ཡི་ནད་ལ་མངར་གྱི་མཁུར་བཀང་མཆོག །སྙིང་གི་ནད་ལ་ཛཱ་
25-1-614


ཏི་ཕ་ལ་མཆོག །གློ་བའི་ནད་ལ་ཅུ་གང་མཆོག་ཏུ་བཤད། །མཆིན་པའི་ནད་ལ་གུར་གུམ་བྲག་
ཞུན་མཆོག །མཆེར་ནད་ཀ་ཀོ་ལ་དང་དྲོད་སྨན་མཆོག །མཁལ་མའི་ནད་ལ་སུག་སྨེལ་མཆོག་
ཏུ་བཤད། །ཕོ་བའི་ནད་ལ་སེ་འབྲུ་མཆོག་ཡིན་ནོ། །གཅིན་སྙི་སྐྱུ་རུ་ར་དང་ཡུང་སྐྱེར་མཆོག །
ཆུ་སྲི་རྒྱ་ཚྭ་གསེར་གྱི་བྱེ་མ་མཆོག །སྐྱུག་ལ་འབྲས་ཡོས་འཁྲུ་ལ་དུག་ཉུང་མཆོག །གློ་ལ་ཨ་
ཀྲོང་ཀཎྜ་ཀ་རི་མཆོག །གློ་རྡོལ་རྒྱ་སྐྱེགས་སྲན་མའི་མེ་ཏོག་མཆོག །སྐོམ་པའི་ནད་ལ་སོ་
ཕག་བསྲེགས་ཁུ་མཆོག །རྩིབ་ལོགས་གཟེར་ལ་པུཥྐར་མཱུ་ལ་མཆོག །གཞང་འབྲུམ་དར་བ་
སྲིན་ལ་བྱི་ཏང་ག །གླང་ཐབས་ཐང་ཕྲོམ་ཁོང་འབྲས་འབམ་པོ་མཆོག །དྲེག་ལ་སླེ་ཏྲེས་གྲུམ་
བུར་བོང་ཁྲག་མཆོག །ཆུ་སེར་དངུལ་ཆུ་མཛེ་ལ་སེང་ལྡེང་མཆོག །སྨྱོ་ལ་མར་རྙིང་བརྒྱལ་ལ་
ཆུ་ཕྲུ་མཆོག །གཉིད་མེད་འོ་མ་ལྐོག་ནད་ཉ་ཁུ་མཆོག །མེས་འཚིག་རྨ་ལ་སིནྔྷུ་ར་ཉིད་མཆོག །
རུས་ཆག་སྦལ་རྒྱབ་རུལ་གཅོད་དངུལ་ཐལ་མཆོག །ཁྲག་གཅོད་སྤྲུ་འབྲུ་རྨ་ལ་དོམ་མཁྲིས་
མཆོག །སྦྱར་སྨན་རྒྱས་ཚད་ག་བུར་རྒྱལ་བློན་མཆོག །རིམས་ཀྱི་ནད་ལ་དེ་བ་ལྔ་སྦྱོར་མཆོག །
འཁྲུགས་ཀྱི་ནད་ལ་ག་བུར་བདུན་པ་མཆོག །རྙིངས་ཚད་ཀུན་ལ་ཉི་ཤུ་རྩ་ལྔ་མཆོག །ཚད་
པ་ཀུན་ལ་གཙོ་བོ་བརྒྱད་སྦྱོར་མཆོག །ཚ་གྲང་འདྲེས་ལ་ཅུ་གང་བདེ་བྱེད་མཆོག །ལྡན་ཚད་
འབྱེད་ལ་མ་ནུ་བཞི་ཐང་མཆོག །ཁྲག་ངན་འབྱེད་ལ་འབྲས་བུ་གསུམ་ཐང་མཆོག །དུག་
ནད་ཀུན་ལ་མང་སྦྱོར་ཆེན་མོ་མཆོག །དང་ག་འབྱེད་ལ་སེ་འབྲུ་བཞི་པ་མཆོག །མེ་དྲོད་སྐྱེད་
ལ་རྒོད་མ་ཁ་ཕྱེ་མཆོག །གྲང་ནད་ཀུན་ལ་སེ་འབྲུ་བརྒྱད་པ་མཆོག །སྐྲན་ནད་ཀུན་ལ་འཕྲུལ་
གྱི་ཐལ་སྨན་མཆོག །སྨུག་པོའི་ནད་ལ་གཉེན་པོ་བདུན་སྦྱོར་མཆོག །སྙིང་རླུང་ནད་ལ་བཙན་
དུག་སྨན་མར་མཆོག །ཆུ་འགགས་ནད་ལ་ཚ་སྦྱོར་ཆེན་མོ་མཆོག །མིག་གི་ནད་ལ་གསལ་
བྱེད་དགུ་པ་མཆོག །གཉན་སྲིན་ནད་ལ་བྱ་ཁྱུང་ལྔ་པ་མཆོག །ཁྲག་ནད་དཔྱད་མཆོག་ཀུན་
ལ་གཏར་ག་མཆོག །མཁྲིས་པའི་ནད་ལ་ཁྲུས་དང་སྦྱང་བ་མཆོག །བད་ཀན་ནད་ལ་སྐྱུགས་
25-1-615


དང་མེ་བཙའ་མཆོག །རླུང་གི་ནད་ལ་བསྐུ་མཉེ་འཇམ་རྩི་མཆོག །འབྲས་ཀྱི་ནད་ལ་ལུམས་
དང་མེ་བཙའ་མཆོག །ཟས་ཀྱི་མཆོག་ཏུ་ནས་རྙིང་ཙམ་པ་མཆོག །སྐོམ་གྱི་མཆོག་ཏུ་ཤོང་
དཀར་རྩེ་མོ་མཆོག །མི་རྔུལ་བཅག་པ་སྤྱོད་ལམ་མཆོག་ཡིན་ནོ། །དེ་ལྟར་ནད་གཞི་རྣམས་
ཀྱི་སྨན་གྱི་མཆོག །བཤད་པས་མཐུ་སྟོབས་ནུས་པ་ཕུལ་དུ་ཕྱིན། །ཞེས་གསུངས་སོ། །དེ་ནས་
དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་
ལགས། །ད་ལྟ་དུས་བཟང་སྤྱོད་པ་བཙུན་གྱུར་ཀྱང༌། །ལྔ་བརྒྱའི་དུས་ན་ནད་ངན་དར་བའི་ཚེ། །
དེ་དུས་བདག་གཞན་སྲུང་ཐབས་ཡོད་དམ་མེད། །མེད་ན་གཞན་གསོ་རང་ལ་མི་འབྱུང་ངམ། །
ཡོད་ན་འགྲོ་བའི་མགོན་པོས་བཀའ་སྩལ་འཚལ། །ཞེས་ཞུས་པ་ལས། སྟོན་པས་གསུངས་
པ། ཀྱེ་དྲང་སྲོང་ཆེན་པོ་ཡིད་ལས་སྐྱེས། །བདེན་ནོ་ཁྱོད་བདེན་ངས་བཤད་གུས་པས་ཉོན། །
ལན་ཅིག་ལྔ་བརྒྱའི་ཐ་མར་བབ་དུས་ན། །འབྱུང་པོ་རྣམས་ཀྱིས་གློ་བུར་ཡེ་འགྲོག་གཏོང༌། །
མ་མོ་མཁའ་འགྲོས་ནད་ངན་ཡམས་སུ་འབེབས། །མུ་སྟེགས་གདུག་པས་རྫས་ཀྱི་སྦྱོར་བ་
བྱེད། །དེ་དུས་བདག་གཞན་སྲུང་བ་ཤིན་ཏུ་གཅེས། །དང་པོ་འབྱུང་པོའི་གདོན་ཚོགས་སྲུང་བ་
ནི། །ག་བུར་བཟང་པོ་དྲུག་ལ་སོགས་པ་ཡི། །གླ་རྩི་ཤིང་ཀུན་གུ་གུལ་ཤུ་དག་སོགས། །དྲི་
དང་ལྡན་པའི་སྨན་ནི་ཐམས་ཅད་དང་། །བ་བླ་ལྡོང་རོས་མུ་ཟི་བྱ་རྒོད་སྤོས། །ས་རྡོ་སྔོ་སྨན་དྲི་
ཅན་ཐམས་ཅད་དང༌། །བསེ་དྲི་ཅན་དང་བཤུལ་ཆགས་ཤ་རྣམས་དང༌། །བྱ་གཅན་ར་ལུག་ལ་
སོགས་སེམས་ཅན་གྱི། །སྤུ་བྲུན་ཆུ་དང་སེན་མོ་མཁྲིས་པ་དང༌། །སྦལ་སྦྲུལ་ཉ་དང་ལྗོང་མོ་ལ་
སོགས་ཤ། །འབྲུ་སྣ་དུག་སྣ་ཁྲག་སྣ་ཀུན་བསགས་ལ། །ཞིབ་ཏུ་བཏགས་ལ་རིལ་བུ་དྲིལ་
བྱས་ཏེ། །དུ་བས་བདུག་དང་ཁུ་བ་བསྐུ་བ་དང༌། །ཁོང་དུ་བཏང་བས་འབྱུང་པོ་ཐམས་ཅད་
འབྱེར། །སྟེང་གདོན་འོག་གདོན་ཀུན་དང་རིམས་རྣམས་ཐུབ། །ཁྱད་པར་རིམས་སྲུང་སྤྱི་དང་
བྱེ་བྲག་གཉིས། །སྤྱི་རུ་སྲུང་ཐབས་སྔགས་དང་རྫས་གཉིས་ཏེ། །དང་པོ་རང་ཉིད་མཐུ་སྟོབས་
25-1-616


བདག་པོར་བསྐྱེད། །ༀ་ཧྲི་དེ་བ་ལེ་ཁ་ཕུར། ཨ་ཏི་ཕུར། བི་ཕུར་སོད། བི་ཧུབ་སོད། མུར་
ཡ་སོད། ཀུ་མ་ར་ཡ་སོད། ལ་ཙི་སོད། བནྔྷ་བནྔྷ་སོད། བཛྲ་པ་ནེ་པ་ནེ་སོད། ཧྲི་དེ་ཧྲི་དེ་སོད། 
ཏི་ཀ་ཛྙཱ་ན་སོད། མ་མ་དུ་རུ་སོད། པུ་ཙ་ཡོ་གི་ནི་སོད། བརྒྱ་རྩ་བརྒྱད་ཀྱིས་རྒྱུན་གྱི་ཡི་དམ་བྱ། །
ཡུལ་ཕྱོགས་ཡོད་ན་སུམ་བརྒྱ་བཟླ་བར་བྱ། །ནད་པ་གསོ་ན་སུམ་ཡར་མ་ཆག་བཟླ། །ༀ་
མུག་ཐུམ་སརྦ་མུག་ཐུམ། ཏེ་ཙ་མུག་ཐུབ་ཐེ་ཕུར་སོད། ནི་ཕུར་སོད། བྱ་རྐང་སོད། ནད་
སོད། རིམས་སོད། དལ་སོད། ཡམས་སོད་སྭཱཧཱ། སུམ་ཡར་བརྒྱ་རྩ་མཆིལ་མ་སྲིན་ལག་གིས། །
རྐང་མཐིལ་དྲི་མ་སྣུར་ལ་སྣ་སྒོར་བྱུག །རྫས་སྲུང་བཙན་དུག་ཆོས་སྨན་གླ་རྩི་དང༌། །ཤུ་དག་
གུ་གུལ་མུ་ཟི་བྱ་རྒོད་སྤོས། །སྒོག་སྐྱ་དྲི་ཆེན་ཆུ་ཡིས་རིལ་བུ་བྱ། །ནང་རེ་སུམ་ཡར་གོང་བཞིན་
ཤེས་པར་བྱ། བཙན་དུག་གླ་རྩི་མུ་ཟི་ཤུ་དག་དང༌། །གུ་གུལ་དཀར་ནག་གཉིས་དང་སྒོག་སྐྱ་
ཡི། །ཁྲོལ་བུའི་ཐུམ་བུ་སྐེར་བཏགས་སྣ་སྒོར་བདུག །དེ་ཡིས་རིམས་ནད་བསྐལ་པའི་མེ་
འབར་ཡང༌། །རང་ལུས་རྡོ་རྗེ་འདྲ་སྟེ་ཅིས་མི་ཚུགས། །ལྟོ་སྟོང་སེམས་ཞུམ་དུས་སུ་ནད་དྲི་
བསྲུང༌། །འགྲངས་ངོམས་སྲུང་བས་དཔའ་སྐྱེད་དེ་དུས་བལྟ། །དུས་ཐུག་བདུད་རྩི་གཉིས་
ཀྱིས་སྒོ་དགུ་བསྡམ། །སྲུང་བ་མི་ལྡན་རིམས་ནད་བག་མེད་འཆོས། །དམག་གདོང་གཅེར་
བུར་རལ་ཁ་བྱེད་དང་མཚུངས། །ཁྱད་པར་ཚ་རིམས་སྲུང་(བ་ནི་རང་ཡི་དམ་དུ་བསྒོམས་ལ་བཅོམ་ལྡན་
འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་བླ་མ་འོད་ཀྱི་རྒྱལ་པོ་ལ་ཕྱག་འཚལ་ལོ། །
བདག་ཅག་རིམས་ནད་ཐམས་ཅད་ལས་བསྲུང་དུ་གསོལ། བསྐྱབ་ཏུ་གསོལ། མེད་པར་མཛད་དུ་གསོལ། རྨུགས་པ་སངས་པར་
མཛད་དུ་གསོལ། ཏངྱ་ཐཱ། ༀ་བཛྲེ་བཛྲེ་མཧཱ་བཛྲེ། སརྦ་བྱ་ཏི་ཏ་ཧ་ན་ཧ་ན་བཛྲ་ན་སྭཱཧཱ། ཐུང་ཟིམ་བུ་ཐུང་ཟིམ་བུ་སོད། ལང་ལང་
ལིང་ལིང་སོད། མེ་མེ་སོད། ལམ་ལམ་སོད། དབལ་སོད། ཚ་བ་མེ་ཡི་དབལ་སོད། བརྒྱ་རྩ་བརྒྱད་བཟླས་ལ་སྣར་གདབ། ག་བུར་
བཟང་དྲུག་ཙན་དན་བསེ་རུ། ཨ་ཀ་རུ། ཨུཏྤལ། གླ་རྩི་ག་དུར་ཀ་ར་དྲི་ཆུའི་རིལ་བུ་ནང་མ་རེ་བཏང་ངོ༌། །ག་བུར་ཛཱ་ཏི་ཙན་དན་
སྣར་བདུག་གོ །།)དང་འབྲུམ་པ་སྲུང༌(བ་ནི་ཙན་དན་གླ་རྩི་ཤིང་ཀུན་ཤུ་དག་མུ་ཟི་དྲི་ཆུ་ཁོང་དུ་བཏང༌། ཙན་དན་གླ་རྩི་གུར་
25-1-617


གུམ་མུ་ཟི་གུ་གུལ་སྒོག་སྐྱ་དྲི་ཆུ་ལུས་ལ་བྱུག གླ་རྩི་ཤིང་ཀུན་གུ་གུལ་རྡོ་དྲེག་སྐྱེར་པ་སྒོག་སྐྱའི་དུ་བས་བདུག །ཧེ་བྷ་ག་ཝན་མཉྫུ་
ཤྲཱི་ཀུ་མཱ་ར་སརྦ་ཏ་ཐཱ་ག་ཏ་ཡ་སམྦུད་ཏད་ཏ་སརྦ་ཏ་ཐཱ་ག་ཏ་ན་གེ་ཏི། སརྦ་ས་ཏ་ནན་སྭཱཧཱ། ༀ་ཏངྱ་ཐཱ། ཤམ་མེ་ཤམ་མེ་ཤམ་ཤམ་
ནེ་ཡ་སྭཱཧཱ། སྲན་མ་ལ་བཟླས་སྐེར་གདགས་ནང་རེ་བཟླས་སོ)། །གག་ལྷོག་སྲུང་དང་(བ་ནི་བྱ་ཁྱུང་དུ་བསྒོམས་ལ། ༀ་
ལྷང་ལྷང་ཙེར་ཙེར་ཀྲི་ཏ་ཀྲི་ཏ། ཤག་ཤག ཤེལ་ཤེལ། ཐུམ་ཐུམ། བེ་དུ་བེ་དུ། ལྷོག་པའི་བུ་སྤུན་བདུན་དང༌། འབྲས་ཀྱི་བུ་སྤུན་
གསུམ་དང༌། མཛེ་སོ་ཧ་མཛེ་སོ་ཧ། ད་ཧོ་ད་ཧོ་བྱ་ཀྲི་བྱ་ཀྲི། མུགས་རྒོད་པོ་ཆིག་བདུད་སྭཱཧཱ། ནང་རེ་བཟླས། ཕག་སྣ་དང་འཛིམ་པ་
ཤུ་དག་གུ་གུལ་གླ་རྩི་མུ་ཟི་ཕུར་པ་གདགས། བྱ་ཁྱུང་རིལ་བུ་ཁོང་དུ་བཏང་ངོ་།།)རྒྱུ་གཟེར་(སྲུང་བ་ནི་རང་ཤིའི་ཐོད་པ་ཆོས་
སྨན་དྲི་ཆུར་སྦྱངས་ལ་བཏང༌། ག་བུར་བཙན་དུག་གླ་རྩི་ཛཱ་ཏི་སྒོག་སྐྱ་སྤང་སྤོས་ཡུངས་ཀར་ཤུ་དག་རྣམས་མགུལ་དུ་བཏགས། 
ཏངྱ་ཐཱ། ཙ་བ་མ་རུ་རུ་ཨཱ་ཤུག་མེ་ཨཱ་ཡུར་ཛྙཱ་ན་བྲུམ་ནི་སམ་པུཥྚིཾ་ཀུ་རུ་སིངྔྷཾ་བདག་ལ་སྲུངས་ཤིག ཅེས་ནང་རེ་ལ་བརྒྱ་རྩ་བཟླས་སོ་
)ཆམ་པ་བསྲུང་(བ་ནི། ༀ་ཨ་ལོ་དཀར་པོ་ཤེ་ས་ཧཱུཾ་ཕཊ། ཅེས་བཟླས་ཤིང་སྣར་འབུད་དོ)། །རང་གིས་སྲུང་བའི་
དམ་ཚིག་མ་ཐུབ་པར། །རིམས་འགོས་དྲང་སྲོང་བཀའ་ལ་ཡིད་མི་ཤེས། །གཞུང་བཞིན་སྤྱོད་
དང་བསླུས་ན་ང་རང་ཤེས། །རྫས་སྦྱོར་དུག་གི་སྲུང་ཐབས་རྣམ་པ་གསུམ། །དུ་བ་སྣ་སྒོ་རེག་
པ་ཆུ་སྒོ་བསྲུང༌། །རླངས་པ་ཉི་ཟེར་བསྲུང་བ་གཉིས་ཀ་གཅེས། །ཟས་ལ་བསྐུར་བ་ཁོང་སྲུང་
འདི་ཉིད་ལ། །ཆར་མའི་ཉུང་མ་ཁྭ་ཚོས་བྱས་པ་དང༌། །ཨ་རུ་གསེར་མདོག་ཡུངས་ཀར་སུམ་
ཆ་མཉམ། །སྒོག་གཅིག་ཆུས་སྦྲུ་རིལ་བུས་ཞག་རེ་ཐུབ། །ཆག་ཚད་ངོས་འཛིན་ཞུ་ལོང་མེད་
པར་སྐྱུག །ཟས་ལ་བསྐུར་བ་ཁོང་སྲུང་འདི་ཉིད་ལ། །ཆར་མའི་ཉུང་མ་ཁཎྜ་བྱས་པའམ། །
འདྲེད་བྱེད་(མི་དང་ཤ་བའི་)ཚིལ་གཉིས་འཁྲེན་(བྱེད་ཡུངས་ཀར་རྡོག་པོ་སུམ་ཅུ་)དང་བྱ་ར་བ་(གླ་རྩི་རིལ་མ་
ཙམ)། །དོན་སྣོད་སྒོ་སྲུང་(ལ་བཟང་དྲུག་དང་ཚ་བ་གསུམ་ཐུན་རེ་)མན་ངག་སྨན་གསུམ་(ནི་སྦལ་པའི་སྨད་
གསེར་མདོག་བྲག་ཞུན་མཐེབ་ཙམ་རེ་)སྦྱར། །རིལ་བུ་བཞི་ལྔ་ཚེས་གཅིག་ནང་པར་ནས། །རྩ་ཁ་ཕྱེ་ལ་
ཞག་དགུ་རེ་རེ་བསྐྱེད། །སྔ་དྲོའི་ཟས་བསྲུང་ལྟོ་འཇམ་དྲོད་བཅུད་བསྟེན། །རྫོགས་ནས་ནང་
མ་གསུམ་དུ་རྩ་ཁ་བསྡམ། །དེ་ཡིས་ལོ་རེའི་བར་དུ་ཉམ་ང་མེད། །སྨན་མཆོག་རྒྱལ་པོ་ཀུན་གྱི་
གཉེན་པོ་(རྣམ་རྒྱལ་འཇིགས་མེད་གང་རྙེད་)དང༌། །བྱ་ར་བ་དང་འདྲེད་བྱེད་འཁྲེན་བྱེད་(གླ་རྩི་སྒོག་གཅིག
25-1-618


ཉུང་གཞི་ཅོང་ཞི་བདུད་རྩི་གསུམ་གྱི་མར་ཁུ། ཡུངས་ཀར་)དང༌། །དོན་སྣོད་ཤ་རུས་རྩ་ཡི་སྒོ་སྲུང་(བཟང་དྲུག སེ་
འབྲུ་པ་ཏོལ་དུག་ཉུང་པི་ལིང་སྡིག་སྲིན། བ་རུ་ཡུང་བ། སྤྱི་ཞུར། འབྲི་ཏ་ས་འཛིན་ཤིང་མངར་སྐྱུ་རུ་རེ་སྐོན་)དང༌། །རླུང་
མཁྲིས་བད་ཀན་ཁྲག་དང་ཆུ་སེར་སྲིན(རྣམས་ལ་སླེ་ཏྲེས། ཏིག་ཏ། མ་ནུ་འུ་སུ། བ་ཤ་ཀ ཚོས། སོ་ར་སེང་ལྡེང༌། མ་
རུ་ཙེ་དང་བྱི་ཏང་ག་སོགས)། །འདུ་བ་འཁྲུགས་པའི་ཁ་གནོན་གཉེན་པོ་དང༌། །དབྱིག་དུག་སྲུང་དང་
འཇོམས་པའི་གཉེན་པོ་(གསེར་གཡུ་ཟངས་ལྕགས་མུ་ཏིག་བྱུ་རུ་དངུལ་བདུན་སྲན་མ་ཙམ། ཚ་ལ་མུ་ཟི་བསེ་རུ་བྲག་ཞུན་
བཞི་ཐུན་རེ་)དང༌། །རྡོ་དུག་སྲུང་དང་འཇོམས་པའི་གཉེན་པོ་(སྦལ་རྒྱབ་གངས་ཐིགས་མཚལ་ཅོང་ཞི་བཞི་པོ་
ཐུན་གྱི་སུམ་ཆ་རེ། ཟེ་ཚྭ་རྒྱ་ཚྭ་ཚ་ལ་གསུམ་ཐུན་རེ་)དང༌། །རྩི་དུག་སྲུང་དང་འཇོམས་པའི་གཉེན་པོ་(དུག་སྣ་
ཚོགས་ཚད་ནས་ཙམ་རེ། གླ་རྩི་ཆོས་སྨན་ཧ་བོ་བོང་ང་གསུམ་ཐུན་རེ་)དང༌། །སྔོ་དུག་སྲུང་དང་འཇོམས་པའི་
གཉེན་པོ་(ཞོ་ཤ་གསུམ་ཐར་ནུ་དུར་བྱིད་ཐང་ཕྲོམ་འོལ་མོ་སེ་བ་མཁལ་གཟེ་མ་རྣམས་རིལ་མ་ཙམ་རེ། ཨུག་ཆོས་ལུག་མིག་
སྤྲ་ཐོག་ཁུར་རྩ་ཨ་བི་ཥ་རེ་རལ་རྣམས་ཐུན་རེ་)དང༌། །ཤ་དུག་སྲུང་དང་འཇོམས་པའི་གཉེན་པོ་(བུ་མོ་ལོ་བཅོ་
ལྔ་ལོན་པའི་མཆིན་པ། སྐྱེས་པ་གྲིར་ཤི་བའི་ཉྭ་ཤ ཁྱི་གུ་མིག་མ་བྱེ་བ་དང་རེའུ་རྒྱ་བོ་ཞོ་འཐུང་གི་ཤ ཕག་གློ་ཁྲའི་མཆིན་པ། བྱ་
མཚའ་ལུ་དང་རྨ་བྱའི་ཤ་རྣམས་མ་རུལ་བ་རིལ་མ་ཙམ་རེ། མི་རྟ་ཁྱིའི་ཕྱ་ཚན་བྱེའུ་ལ་ཕུག་རྦ་བྱེའི་ཤ་མི་ར་ཉ་ཕག་དོམ་མཚའ་ལུ་
རྣམས་ཀྱི་མཁྲིས་པ་རྣམས་ཐུན་རེ་)དང༌། །དུག་ནད་སྤྱི་འཇོམས་འཁོར་གྱི་དམག་མི་(ཁྱུང་སྡེར་དཀར་སྨུག་
བོང་ང་དཀར་དམར་རྩད་རྒུ་ཐུབ་ཡུག་ཤིང་གང་ཆུང་སྤང་རྩི་སྤང་རྒྱན་སྤང་སྤོས་བྲག་སྤོས་འོམ་བུ་གོ་སྙོད་སྟག་ཤ་སེ་རྒོད་སྐྱེར་
ཤུན་ཧ་བོ་རྣམས་ཐུན་རེ་)དང༌། །ཚ་བ་སྤྱི་བཅོས་སྨན་(ག་བུར་ཙན་དན་གི་ཝཾ་གསུམ་ཐུན་རེ། རྒྱས་པར་བྱེད་ན་སྨན་
ཀུན་ཚོགས་པར་བསག འབྲིང་དུ་བྱེད་ན་རྡོ་རྩི་སྔོ་བཞིའི་སྲུང་བྱེད་བཞག་ལ་གཞན་)རྣམས་རྩི་བཞིན་བཏགས། །
དར་ལ་བཙགས་ལ་ཉུང་མའི་ཁཎྜ་ཡི། །རིལ་བུ་སྲན་སྦོས་ཙམ་དྲིལ་གྲིབ་སྐམས་བྱ། །ཚེས་
གཅིག་ནང་མ་གསུམ་ནི་དྲི་ཆུས་འཕུལ། །དེ་ཡིས་ཟླ་བ་རེ་རེའི་བར་དུ་ཐུབ། །གསོ་ཡང་རང་
གྲོལ་སྨན་གྱི་རྒྱལ་པོ་ཡིན། །ཆར་ཉུང་འབྲས་བུ་གསུམ་དང་རྩ་བ་ལྔ། །གཙོ་བོ་དྲུག་ལ་སྨན་
མར་ཚུལ་བཞིན་སྦྱར། །དེ་ལ་གོང་གི་སྨན་(རྒྱས་འབྲིང་གང་རུང་ངམ། བསྡུ་ན་རིན་པོ་ཆེ་དྲུག བཟང་དྲུག་ཕྱ་ཚན་
25-1-619


གསུམ་བོང་ང་གསུམ་ཁྱུང་སྡེར་རྩད་ཡུང་བ་བཙན་དུག་རྣམས་ཀྱི་)ཕྱེ་ཁ་ཚར་བཏབ། །མངར་དང་སྦྱར་ལ་སྟོན་
ཟླ་ཐ་ཆུང་བཏང༌། །ཟད་ཀའི་དྲི་ཆེན་དྲི་ཆུ་བར་པ་གཉིས། །འཁར་གཞོང་ནང་དུ་ཆོས་སྨན་
གསུམ་སྦྱར་ལ། །རས་གཙང་སྣོད་བླུག་མཁན་གསེབ་ཞག་བདུན་བསྲུལ། །གྲིབ་ལྷགས་
སྐམས་ཕྱེ་ཐུན་བདུན་ཆང་གིས་འཕུལ། །དུག་རིགས་མ་ལུས་མ་ཤིའི་བར་དུ་ཐུབ། །ཀུན་ལ་
ཟས་དང་སྤྱོད་ལམ་འཇིག་རྩི་བསྲུང༌། །ནད་དང་སྦྱོར་བ་འཇིག་རྩི་བྱུང་ན་བསྐྱར། །དུ་བ་
རླངས་པ་རིམས་དྲི་སྣ་ནས་འཇུག །དེ་ཕྱིར་ཀུན་ལས་རྒྱལ་བའི་རྩ་སྒོ་བསྲུང༌། །ག་བུར་དྲི་ཆུ་
ཅོང་ཞི་ལག་མཐིལ་སྦྱར། །ནང་མ་བདུན་དུ་སྣར་རྔུབ་དེ་རྗེས་ལ། །ཛཱ་ཏི་གུར་གུམ་ནཱ་ག་གེ་
སར་དང༌། །སྤང་རྒྱན་ཙན་དན་དམར་པོའི་དུ་བས་བདུག །ཁེགས་རྟགས་མགོ་ལུས་ལྕི་འདར་
ཕྲུམ་སེར་ཁྱེར། །དུག་གདོན་རིམས་རྣམས་སྲུང་བའི་མཆོག་ཏུ་བཤད། །བ་སྤུའི་སྒོ་སྲུང་ཙན་
དན་མར་ཁུ་དང༌། །ཟོ་མར་རྩི་མར་ཤིང་མངར་མི་ཚིལ་རྣམས། །བསྡུས་ཁུ་དྲོད་མ་ཡལ་བའི་
ནང་དག་ཏུ། །ཛཱ་ཏི་གུར་གུམ་གླ་རྩི་སྤང་སྤོས་དང༌། །སྤང་རྒྱན་སྦྱར་ཏེ་ལུས་ཀུན་བཀྲུས་རྗེས་
བྱུག །ཡང་ན་གླ་རྩི་ཕག་ཚིལ་སྦྲུལ་ཤ་དང༌། །སྡིག་སྲིན་མུ་ཟི་ར་ཁྲག་བསེ་མར་ཁུར། །ཡང་ན་
ག་བུར་བསིལ་གསུམ་ཙན་དན་དང༌། །གླ་རྩི་ཆོས་སྨན་ཕག་ཚིལ་ར་ཁྲག་བྱུག །བ་སྤུའི་སྒོ་
འགགས་ལུས་སྦྲིད་ལྕི་བ་ཡིན། །རེག་པ་ཉི་ཟེར་རླངས་ཀྱིས་ཉམ་མི་ང༌། །ཞེས་གསུངས་སོ། །
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་
པའི་ཡེ་ཤེས་ལགས། །རྒྱུད་འདིར་མ་ཚང་གསོ་དཔྱད་མི་བདོག་གམ། །དེ་སྐད་ཞུས་པའི་དོན་
ལ་ལན་གསུངས་པ། །བདེ་གཤེགས་རྣམས་ཀྱིས་སྤྲུལ་པས་འགྲོ་དོན་དུ། །རྒྱ་གར་ཡུལ་དུ་
སྨན་གྱི་སྦྱོར་བ་གསུངས། །རྒྱ་ནག་ཡུལ་དུ་མེ་བཙའ་རྩ་སྦྱོངས་གསུངས། །དོལ་པོའི་ཡུལ་དུ་
གཏར་ག་གཙོ་བོར་བསྟན། །བོད་ཀྱི་ཡུལ་དུ་རྩ་ཆུའི་བརྟག་པ་བསྟན། །ལྷ་ཡི་འཁོར་ལ་གསོ་
དཔྱད་འབུམ་པ་གསུངས། །དྲང་སྲོང་འཁོར་ལ་ཙ་ར་ཀ་སྡེ་བརྒྱད། །མུ་སྟེགས་འཁོར་ལ་
25-1-620


དབང་ཕྱུག་ནག་པོའི་རྒྱུད། །ནང་པའི་འཁོར་ལ་རིགས་གསུམ་མགོན་པོའི་སྐོར། །གསོ་
དཔྱད་རྒྱུད་འདིར་ཐམས་ཅད་འདུས་པར་བསྟན། །འདིར་མ་འདུས་པའི་གསོ་དཔྱད་གཞན་
མེད་དེ། །འཕགས་པའི་ཐུགས་རྗེ་ཕྱོགས་རིས་མེད་མོད་ཀྱང༌། །གང་ཟག་མོས་པའི་མཐོང་
སྣང་སོ་སོར་ཤར། །དཔེར་ན་མཁའ་ལ་ཟླ་བ་གཅིག་ཤར་ན། །ཆུ་ཡི་སྐྱོགས་རེར་ཟླ་བ་རེ་རེ་
བཞིན། །གཅིག་ཏུ་གསུངས་ཀྱང་སོ་སོས་དུ་མར་གོ ། །ཞེས་གསུངས་སོ། །བདུད་རྩི་སྙིང་པོ་
ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྒྱུད་བཞིའི་མཇུག་དོན་བསྡུས་པའི་ལེའུ་
སྟེ་ཉི་ཤུ་རྩ་དྲུག་པའོ།། །། 
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་
རིག་པའི་ཡེ་ཤེས་ལགས། །དང་པོ་ནད་ཤུགས་མ་རྫོགས་མངོན་ཚུལ་དུས། །གསོ་བ་བྱས་
ཀྱང་ལམ་ནས་མི་ཟློག་ཅིང༌། །བར་དུ་ནད་རྒྱས་གཉེན་པོས་འཕྲལ་མི་ཆོམས། །ཐ་མར་ཡན་
ལག་བཅུ་གཉིས་ལྡན་གྱུར་པས། །ནད་ལས་མི་གྲོལ་སྲོག་ནི་ཟད་པར་སྣང༌། །གཞན་དག་དེ་
ལས་གོ་བཟློག་འགྱུར་བའི་ཕྱིར། །གསོ་རིག་སྨན་གྱི་དགོས་པ་ཅི་ཞིག་བྱ། །འཚོ་མཛད་སྨན་
པའི་རྒྱལ་པོས་ཐེ་ཚོམ་སོལ། །ཞེས་ཞུས་པ་ལས། སྟོན་པ་རིག་པའི་ཡེ་ཤེས་ཀྱིས་འདི་སྐད་
ཅེས་གསུངས་སོ། །དྲང་སྲོང་ཆེན་པོ་དེ་ལ་རྟོག་མི་འཚལ། །ནད་ལ་བཞི་བརྒྱ་རྩ་བཞིར་གྲགས་
པ་ལ། །བརྒྱ་དང་རྩ་གཅིག་ལྟར་སྣང་འཕྲལ་གྱི་ནད། །མ་བཅོས་རང་གར་བཞག་པས་འཚོ་
བ་ཡོད། །འོན་ཀྱང་བཅོས་ན་མྱུར་དུ་བདེ་བ་སྟེར། །དཔེར་ན་འགྱེལ་བུབ་ལག་ནས་འཐེན་པ་
འདྲ། །དང་པོ་མངོན་ཚུལ་ཆེ་བར་བྱུང་གྱུར་ཀྱང༌། །མ་བཅོས་རང་གར་ལམ་ནས་བཟློག་པ་
ཡོད། །དཔེར་ན་མཁའ་ལ་སྤྲིན་འཐིབས་ཆར་འབབ་པ། །གློ་བུར་སངས་ནས་ཐན་པར་
འགྱུར་བ་འདྲ། །བརྒྱ་དང་རྩ་གཅིག་ཀུན་བརྟགས་གདོན་ཡིན་པས། །དེ་མ་བཅོས་པར་སྨན་
དཔྱད་ལེན་མི་འདོད། །གདོན་བཅོས་སྨན་མེད་གྱུར་ཀྱང་འཚོ་བ་ཡོད། །དཔེར་ན་དཔུང་པ་
25-1-621


གཡར་བའི་བཙོན་བུ་འདྲ༌། །བརྒྱ་དང་རྩ་གཅིག་ཡོངས་གྲུབ་ཚེ་ཡི་ནད། །མ་བཅོས་འཆི་ལ་
བཅོས་ན་འཚོ་བ་ཡོད། །དེ་ཡང་དང་པོ་བར་དང་ཐ་མ་གསུམ། །ཚ་བའི་སྔོན་ཚུལ་ལམ་ནས་
མི་ཟློག་པ། །གཉེན་པོ་གྲོགས་ཀྱིས་ལེན་དུ་མི་སྟེར་ཕྱིར། །སྟོབས་ཆུང་གྲོགས་མེད་གསར་
དུས་མི་ཟློག་མེད། །བར་དུ་ནད་རྒྱས་གཉེན་པོས་ཆོམས་པ་དཀའ། །དཔེར་ན་ཤྭ་ཡི་གདོང་དུ་
རགས་བརྩིགས་པ། །ཞར་ལ་ཁྱེར་ཡང་ཞར་ལ་མནན་པ་ཡིས། །ཆུ་ཤུགས་ཟད་ནས་རགས་
ཀྱིས་ཐུབ་པར་སྣང༌། །དེ་བཞིན་ནད་རྒྱས་གཉེན་པོ་འཐབས་པ་ཡིས། །མི་ཆོམས་འདྲ་ཡང་
བསྟུད་ན་ནུས་པ་ཐོན། །གྲང་རྒྱས་ལྕི་བ་གཉེན་པོས་ཆོམས་དཀའ་སྟེ། །གོ་མཚོན་བཅས་པའི་
ཚོང་པ་དཔུང་བཅས་འདྲ། །བརྒྱ་དང་རྩ་གཅིག་གཞན་དབང་སྔོན་གྱི་ལས། །བཅོས་ཀྱང་མི་
ཐུབ་འཆི་བའི་ནད་ཡིན་པས། །དེ་ཡང་བསྡུ་ན་སྲོག་གཅོད་ནད་དགུར་འདུས། །ཚ་བ་ལ་
འདས་པ་དང་མ་འདས་གཉིས། །དཔེར་ན་མེ་ལོང་ཐབ་ཏུ་བཅུག་པ་འདྲ། །མ་ཞུ་ཆུས་སླེབ་ཞུ་
ནས་དེས་མི་བཟློག །གྲང་བ་གཏིང་ནས་འཁར་དང་མ་འཁར་གཉིས། །དཔེར་ན་ལྡུམ་བུ་དང་
ནི་སྡོང་རྒན་འདྲ། །དང་པོ་ཚོས་བླ་གཉིས་པ་ཚོས་མི་འགྱུར། །རླུང་ནད་སྲོག་རྟེན་ཆད་དང་མ་
ཆད་གཉིས། །དཔེར་ན་རྐོན་པ་ནང་གི་བྱ་དང་འདྲ། །མ་ཤོར་ཟིན་ལ་ཤོར་ན་ཟིན་ཐབས་མེད། །
ཟུངས་ཟད་ནད་ལ་དེ་སྲོག་གནས་པ་སྟེ། །ནད་བཅོས་གྱུར་ན་སྲོག་ཀྱང་འཇིག་པའི་ཕྱིར། །
དཔེར་ན་རྨང་གིས་མ་ཐུབ་རྩིག་པ་འདྲ། །རྣམ་པར་འཚེ་བ་གདོན་གྱིས་བླ་ཁྱེར་བ། །འཚོ་བ་
འདྲ་ཡང་ངེས་པར་འཆི་བ་སྟེ། །དཔེར་ན་རྒྱུ་མ་ཕུག་པའི་མི་དང་འདྲ། །འཚོ་བའི་ཚེ་ལས་
བསོད་ནམས་གསུམ་ཟད་པ། །ནད་གྲོལ་རྩ་ཤོར་འབྱུང་བ་འགག་པའི་ཕྱིར། །དཔེར་ན་ནམ་
གཞུག་ཆད་པའི་ཆར་པ་འདྲ། །གཤེད་དུ་བབས་པ་ཚ་གྲང་གཉིས་འདོམ་པས། །གཅིག་
བཅོས་གཅིག་སྐྱེ་གཉེན་པོ་ཀུན་མི་ལེན། །དཔེར་ན་ཐག་ཆོད་མི་ལ་གྲོས་འདེབས་འདྲ། །སྦྱོར་
བ་མཚུངས་པ་རྒྱུ་རྐྱེན་གཉེན་པོ་ལོག །གང་བཅོས་གྲོགས་ཀྱི་ཐོག་ཏུ་བབ་པ་སྟེ། །དུག་ཟིན་
25-1-622


མི་ལ་བཙན་དུག་བླུད་པ་འདྲ། །གནད་དུ་བབས་པ་སྲོག་གནས་བཅོམ་པ་སྟེ། །སྲོག་རྩ་ཆད་
པས་བཅོས་ཐབས་ཅི་ལ་རྙེད། །གྲས་ཁ་བཙན་པོ་དགྲ་ལ་ཤོར་བ་འདྲ། །དྲང་སྲོང་ཆེན་པོ་ཐེ་
ཚོམ་སྐྱེ་མི་རུང༌། །གསོ་བྱས་མ་བྱས་མཉམ་པོར་བྱ་མི་རིགས། །འཚོ་འཆི་ཀུན་ལ་སྨན་ཡོད་མ་
ཡིན་ཏེ། །ཀུན་ཏུ་སྨན་མེད་ཅེས་སྨྲ་དེ་མ་ཡིན། །མེ་སྟེང་ཆུ་བླུག་མི་སོད་ག་ལ་སྲིད། །དེ་ཡང་
དམན་ན་སོད་པ་ཤིན་ཏུ་དཀའ། །ཙམ་པས་ལྟོགས་པ་མི་སེལ་ག་ལ་སྲིད། །ཆུ་ཡིས་སྐོམ་པ་
མི་སེལ་ག་ལ་སྲིད། །གག་ལྷོག་གསོ་བ་མེད་པར་སུ་བདེར་འགྱུར། །ཆུ་འགགས་སྨན་དཔྱད་
མེད་པར་ཅི་ལ་ཐོན། །གཉེན་པོ་མེད་པར་དུག་ཟ་སུ་ཡིས་ནུས། །མཆོག་སོགས་ནུས་པ་ལུང་
ལས་གྲགས་བཞིན་སེལ། །དེ་ཕྱིར་གསོ་བ་ཐེ་ཚོམ་བཅས་མི་བྱ། །ཞེས་གསུངས་སོ། །དེ་ནས་
ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་
ཤེས་ལགས། །མི་ན་གནས་དང་ན་བ་གསོ་དགོས་པས། །དགོས་པའི་ཐབས་ལ་འབྲེལ་བ་
ཡོད་དམ་མེད། །འབྲེལ་མེད་ཆོས་ལ་སྤྱད་པས་ཅི་ཞིག་འགྲུབ། །མར་འདོད་བྱེ་མ་བཙིར་བར་
མི་འགྱུར་རམ། །འདི་ལ་སྨན་པའི་རྒྱལ་པོས་བཀའ་སྩོལ་ཞིག །ཅེས་ཞུས་པ་ལས། སྟོན་པས་
གསུངས་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས། །ཐབས་དང་ཐབས་བྱུང་འབྲེལ་བ་ཅི་སྟེ་
མེད། །འགྲོ་བའི་ལུས་འདི་འབྱུང་བ་བཞི་ལས་གྲུབ། །གསོ་བྱའི་ནད་ཀྱང་འབྱུང་བ་བཞི་ཡིས་
བསྐྱེད། །གཉེན་པོའི་སྨན་ཡང་འབྱུང་བཞིའི་ངོ་བོ་ཉིད། །ལུས་ནད་གཉེན་པོ་བདག་ཉིད་
གཅིག་པར་འབྲེལ། །གནོད་བྱ་གནོད་བྱེད་རྟེན་དང་བརྟེན་པར་འབྲེལ། །གསོ་བྱ་གསོ་བྱེད་
བསོད་ནམས་ལས་ཀྱིས་འབྲེལ། །རིན་པོ་ཆེ་དང་ཀླུ་ཡི་རྒྱལ་པོ་འདྲ། །མི་ཤེས་ཤེས་བྱེད་གསོ་
རིག་ཐབས་སུ་འབྲེལ། །ཐབས་ལས་བྱུང་བ་འདུ་བ་སྙོམས་པར་འབྲེལ། །འདུ་བ་སྙོམས་པ་
ནད་མེད་བདེ་བར་འབྲེལ། །ཐབས་དང་ཐབས་བྱུང་དེ་ལས་བྱུང་བར་འབྲེལ། །ཅི་ཕྱིར་དོན་
བྱེད་ནུས་ཕྱིར་རག་ལུས་ཕྱིར། །ཞེས་གསུངས་སོ། །དེ་ནས་དྲང་སྲོང་ཡིད་ལས་སྐྱེས་ལ་
25-1-623


སོགས་པ་རྣམས་ཀྱིས་མགྲིན་གཅིག་ཏུ་སྡེབས་ནས་སྟོན་པ་ལ་བསྟོད་པ། ཀྱེ་སྟོན་པ་འཚོ་
མཛད་སྨན་པའི་རྒྱལ་པོ་ཉིད། །སྟོན་པའི་ཐུགས་ལ་མ་རིག་མུན་པ་མེད། །རྟོག་མེད་སྤྲོས་
བྲལ་རིག་པའི་ཡེ་ཤེས་ཉིད། །ཐུགས་རྗེའི་འོད་ཀྱིས་འགྲོ་བའི་མུན་པ་སེལ། །ཐམས་ཅད་
འདུས་པའི་རྩ་རྒྱུད་ཐུགས་ལས་བྱུང༌། །མཉམ་ཉིད་ཆོས་ཀྱི་སྐུ་ལ་ཕྱག་འཚལ་ལོ། །སྟོན་པའི་
སྐུ་ལ་བགྲེས་རྒུད་བསྙེལ་བ་མེད། །གསལ་སྟོང་སྤྲོས་བྲལ་བཻཌཱུཪྻ་འདྲའི་སྐུ། །སྐུ་ཡི་འོད་ཟེར་
འགྲོ་བའི་ནད་རྣམས་སེལ། །ཐ་སྙད་མ་རྨོངས་བཤད་རྒྱུད་སྐུ་ལས་བྱུང༌། །མཚན་དཔེ་ལོངས་
སྤྱོད་རྫོགས་ལ་ཕྱག་འཚལ་ལོ། །སྟོན་པའི་ཡོན་ཏན་ཟད་མེད་འཕེལ་བ་མེད། །ཐམས་ཅད་
མཁྱེན་པ་སངས་རྒྱས་སྨན་གྱི་བླ། །ཡོན་ཏན་འོད་ཟེར་འགྲོ་བའི་སྡུག་འཕོངས་སེལ། །མན་
ངག་རྒྱུད་ནི་ཡོན་ཏན་ཉིད་ལས་བྱུང༌། །རིན་ཆེན་འབྱུང་ལྡན་སྐུ་ལ་ཕྱག་འཚལ་ལོ། །སྟོན་པའི་
ཕྲིན་ལས་གང་ཡང་ཐོགས་པ་མེད། །ཞི་རྒྱས་དབང་དྲག་བཞི་རྫོགས་རྒྱལ་ཆེན་པོ། །ཕྲིན་
ལས་འོད་ཟེར་འགྲོ་བའི་ནད་གདོན་སེལ། །ཕྱི་མ་རྒྱུད་ནི་ཕྲིན་ལས་ཉིད་ལས་བྱུང༌། །དཔའ་
བོ་སྤྲུལ་པའི་སྐུ་ལ་ཕྱག་འཚལ་ལོ། །སྟོན་པའི་གསུང་ནི་འགག་མེད་ཚངས་པའི་གསུང༌། །
གཅིག་ལ་ཀུན་གོ་འཁོར་ཚོགས་འདོད་པ་སྐོང༌། །གསུང་གི་འོད་ཟེར་འགྲོ་བའི་ངག་སྒྲིབ་
སེལ། །རྒྱུད་བཞིའི་ཞུས་ལན་སྟོན་པའི་གསུང་ལས་བྱུང༌། །གསལ་དག་པདྨའི་སྐུ་ལ་ཕྱག་
འཚལ་ལོ། །ཞེས་མངོན་པར་བསྟོད་དོ། །དེ་ནས་སྟོན་པ་དྲང་སྲོང་རིག་པའི་ཡེ་ཤེས་ཀྱིས་རྒྱུད་
ལ་བསྔགས་པ་འདི་ཆེད་དུ་བརྗོད་དོ། །ཨེ་མ་ཧོ་དྲང་སྲོང་ཡིད་ལས་སྐྱེས། །རྩ་བ་ཐུགས་ཀྱི་
རྒྱུད་འདི་ས་བོན་འདྲ། །འདི་ལས་མ་སྐྱེས་གསོ་དཔྱད་ཡོད་མ་ཡིན། །སྐུ་ཡི་བཤད་རྒྱུད་བར་
སྣང་ཉི་ཟླ་འདྲ། །ཚིག་དོན་མ་ལུས་སྒྲིབ་མེད་གསལ་བར་སྟོན། །མན་ངག་ཡོན་ཏན་རྒྱུད་འདི་
ནོར་བུ་འདྲ། །དགོས་པ་མ་ཚང་བ་ནི་གཅིག་ཀྱང་མེད། །ཕྱི་མ་ཕྲིན་ལས་རྒྱུད་འདི་ཕ་ལམ་
འདྲ། །ནད་ཀྱི་སྟེང་དུ་ཐོགས་པ་ཡོད་མ་ཡིན། །རིག་པའི་ཡེ་ཤེས་ནམ་མཁའི་མཛོད་དང་འདྲ།  །
25-1-624


དྲིས་པའི་ལན་ལ་ཟད་མི་ཤེས་པར་སྟོན། །གསུང་སྤྲུལ་ཡིད་ལས་སྐྱེས་ནི་སེང་གེ་འདྲ། །ཞུ་
བའི་ཚིག་ལ་ཞུམ་ཞིང་སྐྲག་པ་མེད། །ཐམས་ཅད་འདུས་པའི་རྒྱུད་འདི་ཁྱུང་ལྡིང་འདྲ། །ནད་
ཀྱི་གཡང་སར་ཉམས་ང་བག་ཚ་མེད། །ཡིད་དུ་འོང་བས་ཁུ་བྱུག་གསུང་སྙན་འདྲ། །འགྲོ་བ་
གང་གིས་ཐོས་པས་སྤྲོ་བ་སྐྱེད། །ཀུན་ཏུ་དཀོན་པས་ཨུ་དུམ་ཝ་ར་འདྲ། །ཐོས་མཐོང་སྤྱོད་པ་
སྐལ་ལྡན་རེ་རེ་ཙམ། །ཉི་མའི་འོད་ཀྱིས་ཟླ་སྐར་ཟིལ་གནོན་བཞིན། །རྒྱུད་རྒྱལ་འདི་ཡིས་
གསོ་རིག་ཀུན་ཟིལ་གནོན། །འདི་ནི་སྔགས་མེད་པ་ཡི་སྲུང་སྐུད་ཡིན། །འཆི་བདག་བདུད་སྡེ་
བཟློག་པའི་འཁྲུལ་འཁོར་ཡིན། །ནད་ཀྱི་དགྲ་དཔུང་འཇོམས་པའི་དཔའ་བོ་ཡིན། །འདུ་བ་
འཕེལ་ཟད་སྙོམས་པའི་སྤྱི་པ་ཡིན། །དུས་མིན་འཆི་ཞགས་གཅོད་པའི་འཁོར་ལོ་ཡིན། །ནད་
ཀྱི་ཟུག་གཟེར་གཅོག་པའི་ཐོ་བ་ཡིན། །སྡུག་བསྔལ་འདམ་ནས་འདྲེན་པའི་ལྕགས་ཀྱུ་ཡིན། །
འཆི་བའི་སྲོག་སྐྱོབ་མི་འཇིགས་སྦྱིན་པ་ཡིན། འཆི་བ་སློང་བྱེད་བདུད་རྩི་བུམ་པ་ཡིན། །དྲང་
སྲོང་རྣམས་ཀྱིས་འདི་ལ་གཅེས་པར་ཟུང་། །ཞེས་གསུངས་སོ། །དེ་ནས་ཡང་དྲང་སྲོང་ཡིད་
ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །རྒྱུད་
ཀྱི་རྒྱལ་པོ་གསང་བ་མན་ངག་རྒྱུད། །དུས་ཀྱི་ཐ་མ་ཇི་ལྟ་བུ་ལ་གཏད། །མི་བསྟན་སྦ་བའི་སྣོད་
ངན་གང་ལ་གསང༌། །གསང་དང་གཏད་པའི་སྐྱོན་དང་ཡོན་ཏན་གང༌། །འཚོ་མཛད་ཁྱོད་ཀྱིས་
བདག་ལ་ལུང་སྟོན་ཅིག །ཅེས་ཞུས་པ་ལས། སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་
སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཁྱོད་ཉོན་ཅིག །གཏད་པའི་སྣོད་ལ་བཟང་ངན་ཅི་
སྟེ་མེད། །སྣོད་ངན་རྣམས་ཀྱིས་གདམས་པའི་བཅུད་མི་ཐུབ། །དཔེར་ན་སེང་གེ་དཀར་མོའི་
འོ་མ་དེ། །རིན་ཆེན་མ་ཡིན་སྣོད་ངན་ཕལ་པར་བླུག །སྣོད་ཀྱང་ཆག་ལ་འོ་མའི་བཅུད་ཀྱང་
འབོ། །དེ་ཕྱིར་གསང་བའི་སྣོད་ངན་འདི་ལྟ་བུ། །སློབ་དཔོན་གསང་ཞིང་རབ་ཆེ་འབྱིན་པ་
དང༌། །ཐབས་ཀྱིས་བརྐུ་ཞིང་གཞོགས་སློང་བྱེད་པ་དང༌། །དྲིན་མེད་ཁྱད་སོད་བྱེད་ལ་ཤོར་ར་
25-1-625


རེ། །གཡོ་སྒྱུས་འགྲོ་བའི་ནོར་ལ་འཇབ་པ་དང༌། །ང་རྒྱལ་དྲེགས་པས་བཅིངས་དང་སྙིང་རྗེ་
མེད། །ཚེ་འདི་གཙོར་འཛིན་ལག་ཏུ་ཤོར་ར་རེ། །གསེར་གཡུ་རྟ་ཁྲབ་ཡོན་གྱིས་མི་སླུ་བར། །
ཁ་འཇམ་བྲིད་པོའི་ལག་ཏུ་ཤོར་ར་རེ། །དེ་ལྟར་སྐལ་མེད་སྣོད་དང་མི་ལྡན་ན། །ཆུ་སྲིན་གྲེ་
བར་རིན་ཆེན་ཚུད་པ་བཞིན། །བསྐལ་པ་འཁྲུགས་ཀྱང་ཁ་རུ་མི་དབྱུང་གསང༌། །སྲོག་སེར་
གཏད་དང་དུག་སྦྱོར་ལ་སོགས་པ། །མུ་སྟེགས་ཆོས་དང་རིག་པ་འདི་མི་རྗེ། །རྫུན་ལུང་མོ་
ཤེན་གསེར་འགྱུར་བཟོ་ཡི་རིགས། །ཁ་ཤགས་ཐ་སྙད་ཆོས་དང་འདི་མི་རྗེ། །དེ་ལྟར་སྣོད་
ངན་རྣམས་ལ་མ་གསངས་སྐྱོན། །གདམས་པ་མ་ཐུབ་སྤེལ་བས་མཁས་ཁྱད་མེད། །དུག་དང་
འདྲེས་པས་ཀུན་ལ་ཕན་མི་ཐོགས། །ཁོང་དུ་རུལ་བས་གདམས་པའི་མགོ་མི་ཐོན། །དམ་ཚིག་
ཉམས་པས་ཕྱི་མ་ངན་འགྲོར་ལྷུང༌། །དེ་ཕྱིར་ཤིན་ཏུ་གསོངས་ཤིག་དྲང་སྲོང་རྣམས། །རྒྱུད་
འདི་གཏད་པར་བྱ་བའི་སྣོད་ལྡན་ནི། །དམ་ཚིག་ལྡན་པས་བླ་མ་སྤྱི་བོར་འཁུར། །ནོར་དང་
སྲོག་ལ་ཕོངས་མེད་གཏོང་ཕོད་ནུས། །ཤེས་རབ་ཆེ་བས་ཚིག་དོན་འགལ་འབྲེལ་འབྱེད། །
བྱམས་སེམས་ཆེ་བས་གཞན་དོན་གཙོ་བོར་ལེན། །ཆོས་ལ་བྲང་གཏད་གཡོ་སྒྱུ་ཟོལ་ཟོག་
མེད། །སྨན་པའི་རྒྱུ་དྲུག་ཚོགས་པའི་སྐལ་ལྡན་ལ། །དྲང་སྲོང་ཆེན་པོའི་རྒྱུད་འདི་གཏད་པར་
བགྱི། །དེས་ཀྱང་མཉེས་པའི་ཡོན་གྱིས་མི་སླུ་ན། །བྱིན་པར་མི་བྱ་དམ་པར་འཛིན་མི་འགྱུར། །
དེ་ལྟར་སྣོད་ལྡན་གཅིག་ལས་གཅིག་བརྒྱུད་ནས། །རྒྱུན་མི་ཆད་པར་འགྲོ་དོན་བྱེད་པར་
བསྔོ། །སྣོད་དང་ལྡན་པས་རྒྱུད་འདི་སུས་འཆང་བ། །ཚེ་འདིར་བཙན་ཕྱུག་ཕན་དར་འཛོམ་པ་
དང༌། །འགྲོ་བ་སྤྱིས་ཁུར་དཔལ་གྲགས་ཐོབ་པ་དང༌། །ཕྱི་མ་བྱང་ཆུབ་གོ་ཕང་འགྲུབ་པར་
བསྔོ། །འགྲོ་ཀུན་ནད་ཀྱི་སྡུག་བསྔལ་བྲལ་བ་དང༌། །དུས་མིན་འཆི་བའི་རྐྱེན་ལས་ཐར་བར་
བསྔོ། །ང་ཡི་བཀའ་བཙན་བྱིན་ཆེ་དར་བ་དང༌། །ཇི་ལྟར་བསྔོས་པའི་སྨོན་ལམ་འགྲུབ་པར་
བསྔོ། །ཞེས་གསུངས་ནས་དྲང་སྲོང་རིག་པའི་ཡེ་ཤེས་དེ་བཅོམ་ལྡན་འདས་སྨན་གྱི་བླ་བཻཌཱུཪྻ་
25-1-626


འོད་ཀྱི་རྒྱལ་པོའི་སྐུའི་གསང་བར་ཐིམ་པར་གྱུར་ཏོ། །བདུད་རྩི་སྙིང་པོ་ཡན་ལག་བརྒྱད་པ་
གསང་བ་མན་ངག་གི་རྒྱུད་ལས་རྒྱུད་ཡོངས་སུ་གཏད་པའི་ལེའུ་སྟེ་ཉི་ཤུ་རྩ་བདུན་པའོ།། །། 
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ཅེས་བྱ་བ་སངས་རྒྱས་
སྨན་གྱི་བླ་བཻཌཱུཪྻ་འོད་ཀྱི་རྒྱལ་པོའི་བྱིན་རླབས་ལས་སྤྲུལ་པའི་སྟོན་པ་དྲང་སྲོང་རིག་པའི་ཡེ་
ཤེས་དང་དྲང་སྲོང་ཡིད་ལས་སྐྱེས་ཀྱིས་ཞུ་ལན་དུ་མཛད་པ་གསོ་དཔྱད་ཀུན་གྱི་རྒྱལ་པོ་ཞེས་
བྱ་བ་ཡོངས་སུ་རྫོགས་སོ།། །། 
༄༅། །ༀ་སྭཱསྟི། རབ་འབྱམས་དཀྱིལ་འཁོར་མ་ལུས་ཀུན་གྱི་བདག །མཐའ་ཡས་
བརྒྱད་ཁྲི་བཞི་སྟོང་ཆོས་ཀྱི་མཛོད། །ལྷ་དང་བཅས་པའི་སྲིད་གསུམ་འགྲོ་བའི་མགོན། །རྗེ་
བཙུན་ཏཱ་ར་ནཱ་ཐས་རྟག་ཏུ་སྐྱོངས། །མཐའ་དག་འགྲོ་བའི་ཅོད་པན་གསེར་གྱི་ཁྲིར། །མངོན་
མཐོ་མཚན་དཔེ་རིན་ཆེན་བྱེ་བ་ཡིས། །ལེགས་བརྒྱན་ཆོས་ཀྱི་རྒྱལ་པོ་ཤཱཀྱའི་ཏོག །གུས་པས་
མཆོད་དོ་སྲིད་ཞིའི་དགེ་ལེགས་སྩོལ། །གང་གི་མཚན་ཙམ་ཐོས་དང་དྲན་པའི་མོད། །ཁམས་
གསུམ་ལུས་ཅན་ཡོངས་ཀྱི་དུག་གསུམ་ནད། །མ་ལུས་དྲུངས་ནས་འབྱིན་མཛད་སྨན་གྱི་བླ། །
འོད་ཀྱི་རྒྱལ་པོའི་ཞབས་ལ་ཕྱག་བགྱིའོ། །ཟབ་དང་རྒྱ་ཆེ་ལེགས་བཤད་ཀུན་གྱི་གཏེར། །
མ་ལུས་དགོས་འདོད་མཐའ་དག་འབྱུང་བའི་གཞི། །འགྲོ་བ་ཡོངས་ཀྱི་སྤྱི་ནོར་ཐར་བའི་
ལམ། །གསོ་རིག་རྒྱུད་ཀྱི་རྒྱལ་པོ་ཕྱག་གི་གནས། །གཞུང་འདིའི་ཚིག་དོན་ཀུན་གྱི་བྱེད་པོ་ནི། །
མཁས་དང་གྲུབ་པའི་ཚོགས་ཀྱིས་མཁྲིན་གཅིག་ཏུ། །དབང་བསྐུར་ལན་བརྒྱར་བསྔགས་
པའི་དགའ་སྟོན་ཅན། །ཀུན་མཁྱེན་མི་ཡི་ཉི་མ་དེ་ལ་འདུད། །
ཞེས་མཆོད་པར་བརྗོད་ནས། འདིར་སྐྱེ་རྒུ་མཐའ་དག་གི་སྤྱི་ནོར་དུ་གྱུར་པ་གསོ་བ་རིག་
པའི་གཞུང་། རྒྱུད་ཐམས་ཅད་ཀྱི་རྒྱལ་པོ། ལུང་ཐམས་ཅད་ཀྱི་རྩ་བ། མན་ངག་ཐམས་ཅད་ཀྱི་
འབྱུང་གནས། མཁས་པ་ཀུན་གྱི་གཙུག་གི་ནོར་བུ་འམ་རྒྱལ་མཚན་གྱི་ཏོག་ལྟར་མངོན་པར་
25-1-627


མཐོ་བ་འདི་ཉིད་པར་དུ་ཇི་ལྟར་གྲུབ་པའི་ཚུལ་ནི། རྩོད་པའི་དུས་འདིར་རྒྱལ་བ་སྲས་དང་
བཅས་པའི་ཐུགས་རྗེས་ཡོངས་སུ་བསྐུལ་ཞིང་། འགྲོ་བ་སྤྱི་མཐུན་བསོད་ནམས་ཀྱི་རྒྱ་མཚོ་
ཆེན་པོའི་དཔལ་ལས། དུས་གསུམ་སངས་རྒྱས་ཐམས་ཅད་ཀྱི་སྤྱི་གཟུགས་བདེ་ཆེན་འཁོར་
ལོ་སྡོམ་པའི་ཟློས་གར་རམ། རིགས་ཀུན་གྱི་ཁྱབ་བདག་རྡོ་རྗེ་འཆང་ཆེན་པོ་ཀུན་དགའ་སྙིང་
པོ་བཀྲ་ཤིས་རྒྱལ་མཚན་དཔལ་བཟང་པོ་ཞེས་མཚན་ཉི་ཟླ་ལྟར་ཡོངས་སུ་གྲགས་པ་དེ་ཉིད་
འཇིག་རྟེན་དུ་བྱོན། མཁྱེན་པ་དང་། བརྩེ་བ་དང་། ནུས་པའི་སྒོ་ནས་སངས་རྒྱས་ཀྱི་བསྟན་
པ་རིན་པོ་ཆེ་སྤྱི་དང་བྱེ་བྲག་རྫོགས་ལྡན་ལྟར་གསལ་བར་མཛད་པ་དང་། སྐུ་གསུང་ཐུགས་
ཀྱི་ཕྱི་ནང་གསང་བའི་མཛད་པ་ངོ་མཚར་རྨད་དུ་བྱུང་བའི་རྣམ་ཐར་མཐའ་དག་ནི་འཕགས་པ་
ཁོ་ནའི་སྤྱོད་ཡུལ་དུ་གྱུར་པ་ལས་གཞན་པ་དཔྱོད་ལྡན་ཀུན་གྱིས་ཀྱང་བསྐལ་བརྒྱའི་བར་དུ་
ཕྱོགས་ཙམ་བརྗོད་པར་མི་ནུས་མོད། འདིར་མཛད་པའི་ཆ་ཤས་སམ་ཟེགས་མ་ལྟ་བུ་ལས། 
དཔལ་རྟག་བརྟན་དམ་ཆོས་གླིང་ངེས་དོན་དགའ་བའི་ཚལ་གྱི་ཆོས་སྡེ་ཆེན་པོ་འདི་ཉིད་
དུ། ཆོས་ཀྱི་སྒོ་མཐའ་དག་ཕྱོགས་ཀུན་ཏུ་ཡུད་ཙམ་ལ་གསལ་བར་སྟོན་པའི་པར་གྱི་འཁྲུལ་
འཁོར་ཆེན་པོ་བསྒྲུབས་པའི་ཚུལ། དཔལ་དུས་ཀྱི་འཁོར་ལོ། བདེ་ཀྱཻ་གསང་གསུམ། སྒྲོལ་མ་
འབྱུང་བའི་རྒྱུད་སོགས་རྒྱུད་སྡེ་འགངས་ཆེ་བའི་རིགས། སྙིང་པོ་མདོ་ལྔ་དང་གསེར་འོད་དམ་
པ་སོགས་ངེས་དོན་མདོ་སྡེ་ཉི་ཤུ། མཚན་བརྒྱ་དང་མདོ་ཕྲན་གྱི་རིགས་ཇི་སྙེད་པ་ལ་སོགས་
པ་རྒྱལ་བའི་བཀའ་དང་། དགོངས་འགྲེལ་བྱམས་ཆོས་སྡེ་ལྔ། སེམས་འགྲེལ་སྐོར་གསུམ། 
གཞན་ཡང་ཐོགས་མེད་སྐུ་མཆེད། ཀླུ་སྒྲུབ་ཡབ་སྲས། ཙནྡྲ་གོ་མི། སློབ་དཔོན་དཔའ་བོ། 
གྲུབ་པའི་ཁྱུ་མཆོག་སྤྱོད་འཆང་དབང་པོ་སོགས་རྒྱལ་བས་ལུང་བསྟན་པའི་འཕགས་ཡུལ་གྱི་
པཎ་གྲུབ་ཆེན་པོ་རྣམས་ཀྱིས་མཛད་པའི་མདོ་སྔགས་ཀྱི་གཞུང་དང་བསྟོད་ཚོགས། ངེས་དོན་
བསྟན་པའི་གསལ་བྱེད་ཀུན་མཁྱེན་དོལ་པོ་པ་ཆེན་པོའི་གསུང་སྤྱི་དང་བྱེ་བྲག རྗེ་བཙུན་
25-1-628


རྡོ་རྗེ་འཆང་དེ་ཉིད་ཀྱིས་མཛད་པའི་བཀའ་འབུམ་པོད་ཚད་བཞི་བཅུ་སྐོར། གངས་ཅན་དུ་
ཚད་མར་གྱུར་པའི་སྐྱེས་བུ་རྣམས་ཀྱི་གསུང་ཅི་རིགས་པ་འཁོད་པ་སོགས། པར་གྱི་བཞུགས་
ཚུལ་བསམ་གྱིས་མི་ཁྱབ་ཅིང་བགྲང་བ་ལས་འདས་པ་ཕྱོགས་མཚོན་ཙམ་སྤྱིར་སྨོས་ནས། 
ཁྱད་པར་གསོ་བ་རིག་པའི་རྒྱུད་རྣམ་པ་བཞི་ཡང་། རྗེ་བཙུན་ཉིད་ཀྱི་དགོངས་པ་བརྟད་པའི་
འཕྲོས་སྐྱོང་དུ། རྭ་ལོ་ཙཱ་བ་ཆེན་པོའི་གདུང་། རྗེ་བཙུན་དེ་ཉིད་ཀྱི་སྐུའི་དབོན་བྱམས་པ་དང་
བརྩེ་བའི་བདག་ཉིད་ཅན། ལེགས་བྱས་དཔལ་ཡོན་གྱི་ཁྲི་ལ་མངོན་པར་མཐོ་ཞིང་། ལུགས་
ཟུང་བསྟན་པའི་བྱ་བ་ལ་བཀའི་འཁོར་ལོ་སྒྱུར་བ་པོ། ཀུན་དགའ་བསྟན་པའི་རྒྱལ་མཚན་
གྱི་རྣམ་པར་དཀར་བའི་མཛད་བཟང་ལྷུན་གྱིས་གྲུབ་པའི་རབ་འགྲོས་ཀྱི་ཤུགས་སམ། ཞལ་
ལས་སུ་གནང་བར་བཞེད་པའི་ཞབས་འཇུག་སྐུལ་བ་པོ། འཇམ་པའི་དབྱངས་ཀྱི་རྣམ་པར་
སྤྲུལ་པ་ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི་བླའི་སྨན་པར་དབང་བསྐུར་བ། གནང་བ་
རིགས་ཀྱི་ཆེ་བའི་སྨན་པ་དགུའི་ཡ་རྒྱལ། སྙ་པའི་བརྒྱུད་འཛིན་གཞུང་ལུགས་འདི་ཉིད་ལ་
མི་ཕྱེད་པའི་དང་བ་རབ་ཏུ་རྒྱས་ཤིང་། ཐོས་བསམ་གྱི་བྱ་བ་ཅུང་ཟད་བགྱིས་པ། བྱང་ལྷུན་
གྲུབ་སྡིངས་ཀྱི་འཚོ་བྱེད་གཞོན་ནུ་གསོས་སམ། མིང་གཞན་བདུད་རྩི་འགྱུར་མེད་ཅེས་བྱ་
བས། མཁས་གྲགས་ཆེ་བའི་སར་བཞུགས་པའི་རྒྱུད་དཔེ་དག་པར་འཛིན་པ་གང་རྙེད་དང་། 
 གླེགས་བམ་ཁྲ་མོར་གྲགས་པ་ལའང་ཞིབ་ཏུ་གཏུགས། གཞུང་ལུགས་འདི་དང་འབྲེལ་ཆེ་
བར་འདུག་པ་ལྟར་དཔལ་དུས་ཀྱི་འཁོར་ལོའི་རྒྱུད་འགྲེལ་པ་དང་བཅས་པ་ཡང་བལྟས་ཤིང་
སྒོ་བསྟུན། རྒྱུད་ཤེལ་གྱི་མེ་ལོང་། གསེར་འོད་དམ་པ། ལུང་བཞི་སོགས་བཀའ་དང་། ཀླུ་
སྒྲུབ་ཀྱིས་མཛད་པའི་མདོ་ལྔ་དང་གཞུང་བཅུའི་ནང་སེལ་གང་རྙེད། བརྒྱད་པ། ཟླ་ཟེར། རྒྱུད་
ཆུང་བདུད་རྩིའི་སྙིང་པོ་སོགས་རྒྱ་གཞུང་གི་རིགས་དང་། བདུད་རྩི་བུམ་པ། བྷེ་རོའི་མིང་
དོན་བརྡའ་སྤྲོད། གཡུ་ཐོག་པའི་ཆ་ལག་བཅོ་བརྒྱད། བེ་ལྕེའི་པོ་ཏི་ཁ་སེར་སོགས་ལ་བརྟག་
25-1-629


གཞིག་བྱས། ཁྱད་པར་རྩ་བཤད་ཕྱི་མ་སོགས་ལ་ལྷོ་བྱང་སྟོད་སྨད་ཀྱི་མཁས་པ་སོ་སོས། 
རྒྱུད་འགྲེལ་སྔ་ཕྱིར་མཛད་པ་རྣམས་ལ་ཞིབ་ཏུ་དཔྱད། ཟུང་མཁར་བས་དག་ཆ་མཛད་པའི་
ཡར་རྒྱབ་ཀྱི་པར་འདི་དཔེ་གཞན་ལས་དག་པར་མངོན་ཞིང་ཡི་གེའི་བརྡ་དག་སོགས་བླང་
བྱར་བྱུང་ཡང་། འདི་ལའང་ཚིག་དོན་ལྟ་དཔྱོད་གཞི་འགངས་ཆེ་བའི་སྐབས་འགར་གོ་བབ་
ལོག་པ་ཤར་བ་དང་། ས་བཅད་འཁྲུགས་པ་དང་། གཞུང་ཚིག་ཆད་པ་དང་། ཚིག་ཟུར་མ་དག་
པ་དང་། ཉེ་བར་མཁོ་བའི་གནས་འགར་མཆན་བུ་མ་ཐེབས་པ་སོགས་མངོན་སུམ་གྱིས་གྲུབ་
པ་མང་བའི་ཕྱིར་བཅོས་མི་དགོས་པའི་ཕྱི་མོར་མ་གྱུར་པས། འདིར་གཙོ་བོར་སྙན་བརྒྱུད་
འགྲེལ་ཆེན་གྱི་དགོངས་དོན་ཕྱིན་ཅི་མ་ལོག་པའི་སྒོ་ནས། གཞུང་ལུགས་འདི་ཉིད་ཀྱི་ཚིག་
དོན་ཕྱག་བཞེས་མཐའ་དག་གི་བྱེད་པོར་གྱུར་པ། ཀུན་མཁྱེན་པའི་དབང་པོ་བྱང་པ་འཚོ་བྱེད་
དྲང་སྲོང་མིའི་ཉི་མའམ། མཐོང་བ་དོན་ལྡན་གྱི་དགོངས་བཞེད་མ་འཁྲུལ་བ་ཇི་ལྟ་བ་བཞིན་
དུ། རྗེ་ཉིད་དངོས་དང་སྲས་ཀྱི་གསུང་རྣམས་དང་བཅས་པར་ཞིབ་ཏུ་གཏུགས་ཏེ། ས་བཅད་
འཁྲུགས་པའི་རིགས་གཞུང་ཇི་ལྟ་བ་བཞིན་སྡེབས། ལོག་རྟོག་བློ་བཟོའི་ཚིག་རིགས་རྣམས་
སྤངས། གཞུང་ཚིག་ཆད་པ་རྣམས་རང་བཟོ་མ་ཡིན་པས་ཁ་བཀང་། དཔྱད་དོན་རྣམས་ཀྱི་
ལེགས་ཆ་ཚང་བར་བླངས། མཆན་བུ་ཡང་རྒྱུད་འདི་བཀའ་གཉན་པས་དཀའ་བའི་གནས་
འགའ་ཞིག་དང་། སྨན་མིང་སྣ་རེ་ཙམ་གསལ་བར་མ་བཀོད། གཞན་མ་དགོས་ཤིང་གལ་ཆེ་
བ་དང་ཉེ་བར་མཁོ་བའི་རིགས་རྣམས་ཕལ་ཆེར་ཞིག་མ་ཚང་བ་མེད་པར་ཞིབ་ཏུ་བཀོད་དེ། 
ལྕགས་ཕོ་འབྲུག་གི་ལོ་འབྲུ་བཅུད་ཐམས་ཅད་ཡོངས་སུ་སྨིན་པའི་དུས། སྟོན་ཟླ་འབྲིང་པོའི་
དཀར་ཕྱོགས་ཀྱི་དཔའ་བོ་མཁའ་འགྲོ་འདུ་བའི་ཚེས་བཟང་པོ་ལ། གདན་ས་ཆེན་པོ་དཔལ་
རྟག་བརྟན་གྱི་སྨན་ཁང་བདུད་རྩི་འཁྱིལ་པར་ཞུས་ཤིང་དག་པར་བགྱིས་ནས། པར་རྐོས་ཀྱི་
སྒྱུ་འཕྲུལ་དུ་ཡང་དག་པར་བསྒྲུབས་པ་ལ་སོགས་པས། གང་ན་གཟུ་བོར་འཚོ་ཞིང་གཞེས་
25-1-630


པའི་དཔྱོད་ལྡན་ཐམས་ཅད་ཀྱིས་ཐུགས་ཡིད་ཆེས་ཀྱི་གནས་སུ་མཛད་འཚལ་ལོ། །དེ་ལྟའི་
རྣམ་པར་དཀར་བའི་དགེ་ཚོགས་ཀྱིས། །སངས་རྒྱས་བསྟན་པ་སྤྱི་དང་གཞུང་ལུགས་འདི། །
ཆུ་འཛིན་བྲལ་བའི་མཁའ་ལ་ཉིན་བྱེད་བཞིན། །ཕྱོགས་ཀུན་མ་ལུས་སྣང་བས་ཁྱབ་གྱུར་
ཅིག །ཇི་བཞིན་རིང་ལུགས་འཛིན་པ་བསྟན་པའི་སྲོལ། །འབྱེད་མཁས་གྲུབ་པའི་ས་ལམ་
མངོན་མཐོ་བ། །རིས་མེད་འགྲོ་བའི་མགོན་དུ་གྱུར་པ་རྣམས། །བསྐལ་བརྒྱར་ཞབས་བརྟན་
འཚོ་ཞིང་གཞེས་གྱུར་ཅིག །ཚུལ་འདི་ལེགས་པར་སྒྲུབ་བྱེད་རྭ་ལོའི་གདུང་། །སྲིད་གསུམ་
འགྲོ་བའི་འདྲེན་པ་གཅིག་པུའི་དབོན། །གང་དེའི་སྐུ་ཚེ་ལྷུན་པོ་ལྟར་བརྟན་ཅིང་། །ཆོས་སྲིད་
དབྱར་མཚོ་བཞིན་དུ་རྒྱས་གྱུར་ཅིག །དེ་ཡི་རྣམ་པར་དཀར་བ་སྟོབས་ཀྱི་ཤུགས། །བསྐུལ་
ནས་རྒྱུད་འདི་ཚུལ་བཞིན་དག་བྱེད་མཁན། །ཚེ་རིང་ནད་མེད་དགའ་བདེ་རྒྱས་པའི་ལུས། །
རབ་དགའི་ཡེ་ཤེས་ས་ལ་བགྲོད་གྱུར་ཅིག །གཞན་ཡང་རྣམ་དཀར་འདི་ལ་ལེགས་འབྲེལ་
བའི། །ཡི་གེ་འབྲི་དང་པར་གྱི་འདུ་བྱེད་སོགས། །འགྲོ་ཀུན་ཕན་བདེའི་ལོ་ཏོག་རྒྱས་བཞིན་
དུ། །བླ་མེད་སངས་རྒྱས་འབྲས་བུ་ཐོབ་གྱུར་ཅིག །མངྒ་ལཾ། དགེ་ལེགས་འཕེལ། ཞུས་དག
ཤུ་བྷཾ། 
མ་ཡིག་རྟག་བརྟན་པར་མ་དངོས། གསལ་བཤད། བྱང་ལྷུན་གྲུབ་སྡིངས་ཀྱི་འཚོ་བྱེད་གཞོན་ནུ་གསོས་སམ། མིང་གཞན་བདུད་
རྩི་འགྱུར་མེད་ཅེས་བྱ་བས། ཕྱི་ལོ། ༡༦༡༤ དང་། རབ་བྱུང་བཅུ་གཅིག་པའི་ལྕགས་ཕོ་འབྲུག་གི་ལོའི་སྟོན་ཟླ་འབྲིང་པོའི་དཀར་
ཕྱོགས་ཀྱི་དཔའ་བོ་མཁའ་འགྲོ་འདུ་བའི་ཚེས་བཟང་པོ་ལ། གདན་ས་ཆེན་པོ་དཔལ་རྟག་བརྟན་གྱི་སྨན་ཁང་བདུད་རྩི་འཁྱིལ་
པར་ཞུས་ཤིང་དག་པར་བགྱིས་པའོ།། ཕྱི་ལོ་༢༠༡༦ ༥ ༢༡ཉིན་ཐུབ་གསུང་གཉིས་ནས་ཐེངས་པོ་གཅིག་ཞུས། དཔེ་གཞན་དང་
བསྡུར་ན་མང་ཚིག་མི་འདྲ་བ་དང་། ཚིག་རྐང་ཆད་ལྷག་ཡོད་པ་རྣམས་གཅིག་ཀྱང་མ་བཅོས་པར་རང་སོར་བཞག་ཡོད།