20-1-1


ཇོ་ནང་ཆོས་མཛོད་ཆེན་མོ་ལས།
རྗེ་བཙུན་ཏཱ་ར་ནཱ་ཐའི་གསུང་འབུམ།
༼ཝ༽
20-1-2


20-1-3


20-1-4


20-1-5


དཀར་ཆག
གསོལ་འདེབས། རྒྱལ་བ་ཀུན་གྱི་ཡབ་གྱུར་མའི་རང་འགྲེལ། ༣
ཉིད་ཀྱི་གསོལ་འདེབས། ཕུན་ཚོགས་དགེ་ལེགས་མ་སོགས། ༡-༢ (གསལ་བཤད། དཀྱིལ་འཁོར་ཀུན་གྱི་མགོན་པོ་ཞེས་པའི་གསོལ་
འདེབས་དང༌། རྒྱལ་བ་སྲས་བཅས་ཀུན་གྱིས་མཁྱེན་ཞེས་པའི་ཤོ་ལོ་ཀ་གཅིག་གི་ཞབས་བརྟན་གཉིས་གོང་གི་ཕ་པོད་ནང་དུ་བཞུགས་ཡོད།)
བདེ་བ་ཅན་གྱི་སྨོན་ལམ་སོགས། ༢-༢ (དཔལ་ལྡན་ཆོས་ཀུན་དགའ་བའི་རྩེར་སོན་པ་ཞེས་པའི་ཤོ་ལོ་ཀ་གསུམ་གྱི་ཞབས་བརྟན་འདི་ཡང་གོང་གི་ཕ་
པོད་ནང་དུ་བཞུགས་ཡོད།)
བླ་མ་རྒྱང་འབོད། དཔལ་ལྡན་རྒྱལ་བ་ཐམས་ཅད་ཅེས་པ། ༡-༢
ཞལ་གདམས། བླ་མ་རྣམས་ལ་ཕྱག་འཚལ་ལོ། །སེམས་གུས་ལྡན་གྱི་སློབ་མ་ཞེས་པ་ལ། ༢-༣
འཕོ་བ་ཧིག་དགུ་མ། ༣-༤ (མཛད་བྱང་མི་སྣང་ཡང་ཏཱ་ར་ནཱ་ཐའི་གསུང་ཡིན་པར་གྲགས།)
ཐུགས་རྗེ་ཆེན་པོ་ཚེམ་བུ་ལུགས་ཀྱི་སྨར་ཁྲིད་ཀྱི་བརྒྱུད་འདེབས། ༤-༤ (ངག་དབང་ཀུན་དགའི་མིང་ཅན་གྱིས།)
ཞལ་གདམས། བླ་མ་རྣམས་ལ་ཕྱག་འཚལ་ལོ། །སེམས་གུས་ལྡན་གྱི་སློབ་མ་ཞེས་པ་ལ། ༡ ལྷག་མ།
རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐའི་དགུང་ལོ་བཞི་པ་ཡན་གྱི་རྣམ་ཐར་མདོར་བསྡུས་ཞིག ༡༤ (ཚེ་བརྟན་དར་རྒྱས་
རྡོ་རྗེས།)
སློབ་དཔོན་ཆེན་པོ་པདྨ་འབྱུང་གནས་ཀྱི་རྣམ་པར་ཐར་པ་གསལ་བར་བྱེད་པའི་ཡི་གེ་ཡིད་ཆེས་གསུམ་ལྡན། ༡༨ (སློབ་
དཔོན་པདྨའི་རྣམ་ཐར་རྒྱ་གར་ལུགས།)
དཔལ་ལྡན་བླ་མ(སྟག་ལུང་པ་ཆེན་པོ་རྗེ་བཙུན་ཀུན་དགའ་བཀྲ་ཤིས་རྒྱལ་མཚན་དཔལ་བཟང་པོ)འི་རྣམ་ཐར་འཕྲིན་ལས་རྒྱ་མཚོ་རྣམ་པར་
རྒྱས་པ། ༤༥
རྗེ་བཙུན་བླ་མ་དམ་པ་ཀུན་དགའ་དཔལ་བཟང་པོའི་རྣམ་པར་ཐར་པ་ངོ་མཚར་གསེར་གྱི་རྔ་བོ་ཆེ། ༤༣ (ཤཱཀྱ་བསྟན་
འཛིན་བློ་གསལ་རྒྱ་མཚོས།)
20-1-6


གྲུབ་ཐོབ་ཤངས་པ་བཀའ་བརྒྱུད་ཀྱི་ཐབས་ལམ་གསེར་གྱི་ཕུང་པོ། ༡༥
གྲུབ་ཐོབ་བརྒྱད་ཅུ་རྩ་བཞིའི་འབྲི་ཚུལ། ཤིང་པར་ལ་ཆད།
མངོན་པར་རྟོགས་པའི་རྒྱན་གྱི་འགྲེལ་པ་མདོ་ལུགས་མའི་དོན་ཁོལ་བུར་ཕྱུང་བ། ༥༩ (ཤཱཀྱའི་དགེ་སློང་ཡེ་ཤེས་རྒྱ་མཚོས།)
འཆི་མེད་གྲུབ་པའི་ཞལ་ལུང་བདུད་རྩིའི་བུམ་བཟང༌། ཤིང་པར་ལ་ཆད།
འཆི་མེད་གྲུབ་པའི་གདམས་ངག ༡-༡༠
འཆི་མེད་གྲུབ་པའི་ཁྲིད་ཡིག་གསལ་བར་མ་ཐོན་པའི་མན་ངག་འཇུག་ཚུལ། ༡༡-༡༢
རྡོ་རྗེ་རྣལ་འབྱོར་མ་རྩེན་མའི་སྐུར་སྟོན་པའི་ཞལ་ལུང༌། གྲུབ་བརྙེས་ཀྱི་སློབ་དཔོན་ཧ་ར་དཱ་རས་མཛད་པའི་རྫོགས་
རིམ་དེ་ཉིད་གསལ་བ་དང༌། རིག་པ་འཛིན་མ་རྩེན་མའི་སྒྲུབ་ཐབས་གཉིས་ཀྱི་དཀའ་འགྲེལ་རྫོགས་རིམ་གྱི་ཡིག་
ཆུང་སློབ་དཔོན་དེ་ཉིད་ལས་བརྒྱུད་པའི་མན་ངག དབང་བཞི་པའི་རབ་བྱེད་རྣམས། ༡༥
བཀའ་བབས་དྲུག་ལྡན་གྱི་ཁྲིད་ཡིག་འཕགས་ཡུལ་གྲུབ་པའི་ཞལ་ལུང༌། ༤༧ (ཤཱཀྱའི་དགེ་སློང་ཡེ་ཤེས་རྒྱ་མཚོས།)
བློ་སྦྱོང་དོན་བདུན་མའི་བླ་མ་བརྒྱུད་པའི་གསོལ་འདེབས། ༡-༡
སྙིང་པོ་དོན་གསུམ་གྱི་བླ་མ་བརྒྱུད་པའི་གསོལ་འདེབས། ༡-༡
ཕྱག་རྒྱ་ཆེན་པོ་གའུ་མའི་རང་བབས་རྣམ་གསུམ་ཞེས་བྱ་བའི་ཁྲིད་ཡིག ༡-༧
ཕྱག་རྒྱ་ཆེན་པོ་རང་བབས་རྣམ་གསུམ་གྱི་དོགས་པ་གཅོད་པའི་ལན། ༨-༨
ཡེ་ཤེས་མཁའ་འགྲོ་ནཻ་གུའི་དབང་བཀའ་ཆེ་ཆུང་རྣམས་ཀྱི་སྔོན་དུ་འགྲོ་བའི་ཆོས་བཅུ་དང་ལྔར་དབྱེ་བའི་ཁྱད་པར།
༡-༧
དཔལ་དུས་ཀྱི་འཁོར་ལོ་ལ་གསོལ་བ་འདེབས་པ་དང་ཡན་ལག་དྲུག་གི་ལམ་གྱི་ཟབ་གནད་དག ༧-༨ (རང་ལོ་
བཅུ་དྲུག་དང་བཅུ་དགུ་ལ་བྲིས།)
ནཻ་གུའི་བརྒྱུད་འདེབས་ཨ་ཡིག་ཆོས་འབྱུང་མ། ༥ (ཁ་སྐོང་རྗེ་ཚུལ་ཁྲིམས་ཀྱིས།)
སྒྱུ་ལུས་དབང་མོ་ཆེ་བསྐུར་ཚུལ་གྱི་ལག་ལེན། ༡༡
གསེར་ཆོས་ཕྱི་མ་བཞིའི་སྙིང་པོ། ༢
རྣལ་འབྱོར་པ་རྣམ་པ་གཉིས་ཀྱི་རྩ་བ། ༣
20-1-7


རྣལ་འབྱོར་པ་རྣམ་པ་གཉིས་ཀྱི་གསལ་བྱེད་ཀྱི་ཊཱི་ཀ་བི་ཛཱ་ཧ་རི་པཱ་རུ། ༢༦ (ལྡེབ་༢པའི་ནང་ནས་ལྡེབ་༡་ཆད་ཡོད་ཅེས་འཁོད།) འདི་
པོད་འདིའི་མཇུག་ཏུ་ཡོད་པའི་འདིར་འཛུད་རོགས་ཞུ།
མཁའ་འགྲོ་རྣམ་གསུམ་གྱི་གདམས་པ། ༧
མཁའ་འགྲོ་རྣམ་གསུམ་གྱི་ཞལ་གདམས་གུང་བསྒྲིགས་ཏེ་ཉམས་སུ་ལེན་བདེ་བ། ༥
ལམ་ཁྱེར་རྣམ་གསུམ་གཅིག་ཏུ་དྲིལ་བ། ཤིང་པར་ལ་ཆད།
གཅོད་ཡུལ་ཟབ་མོའི་ཁྲིད་ཡིག་གནད་དོན་སྙིང་པོ། ༡༠
གཅོད་ཡུལ་ཟབ་མོའི་ཁྲིད་ཡིག་གནད་དོན་སྙིང་པོའི་ངག་འདོན་གསོལ་འདེབས། ༡༤ (གྲགས་པ་དཔལ་བཟང་
གིས་བསྡེབས།)
གཅོད་ཡུལ་བརྒྱུད་པའི་གསོལ་འདེབས། ༡-༡
གསོལ་འདེབས་དགོངས་བསྐྱོད་མ། ༡-༣
གཅོད་དབང་ནམ་མཁའ་སྒོ་འབྱེད་ཀྱི་ལོ་རྒྱུས་མུ་ཏིག་ཕྲེང་བ། ༦ (ཀརྨཱ་བི་ཛ་ཡས།)
གཅོད་དབང་ནམ་མཁའ་སྒོ་འབྱེད་དུ་གྲགས་པ། ཤིང་པར་ལ་ཆད།
འཕོ་བའི་མན་ངག ༢
ཕྱིར་བཟློག་དྲུག་གི་ཁྲིད་ཡིག་ཚིགས་བཅད་མ། ༡-༣
ཁྲིད་ཡིག་ཚིགས་བཅད་མའི་ཞལ་ཤེས། ༣-༥
དཔལ་ལྡན་ཀ་ལཱ་པར་འཇུག་པ་ཞེས་བྱ་བ་ཡུལ་རྣམས་ཀྱི་མཆོག་ཏུ་གྱུར་པ་ཤམ་བྷ་ལར་འགྲོ་ཚུལ་གྱི་ལམ་ཡིག་
འཕགས་པ་དོན་ཡོད་ལྕགས་ཀྱུས་གསུངས་པ། ༡༨
གསོལ་འདེབས་དགོངས་བསྐྱོད་མ། ༣ ལྷག་མ།
20-1-8


20-1-9


༄༅། །གསོལ་འདེབས་རྒྱལ་བ་ཀུན་གྱི་ཡབ་གྱུར་མའི་
རང་འགྲེལ་བཞུགས།
༄༅། །ༀ་སྭཱ་སྟི། རྒྱལ་བ་ཀུན་གྱི་ཡབ་གྱུར་རྒྱལ་བའི་སྲས། །སྲིད་ཞི་ཀུན་སྤངས་སྲིད་
ཞི་ཀུན་གྱི་བདག །དཔལ་ལྡན་འཁོར་ལོ་སྡོམ་པ་བླ་མའི་ཚུལ། །སྒྲོལ་བའི་མགོན་པོའི་ཞབས་
ལ་གསོལ་བ་འདེབས། །
འདིར་བསྟོད་པའི་དོན་འཆད་པ་ལ། བསྟོད་པ་དངོས་ཀྱི་དོན་དང༌། འཇུག་གི་དོན་ནོ། །
དང་པོ་ནི་དགོས་དོན། བསྡུས་དོན། ཚིག་དོན་གསུམ་ལས། དང་པོ་ནི་བླ་མའི་ཡོན་ཏན་
སངས་རྒྱས་དང་དབྱེར་མེད་སྟོན་པ་ནི། བརྗོད་པར་བྱའོ། །བསྟོད་པའི་བསོད་ནམས་རྒྱ་
ཆེན་པོ་འབྱུང་བ་ནི་དགོས་པའོ། །བསོད་ནམས་ཀྱི་མཐུས་ཚོགས་གཉིས་ཡོངས་སུ་རྫོགས་
ནས་སངས་རྒྱས་པ་ནི། དགོས་པའི་ཡང་དགོས་པའོ། །ཕྱི་མ་ཕྱི་མ་སྔ་མ་སྔ་མར་རག་ལས་
པ་ནི་འབྲེལ་པའོ། །གཉིས་པ་ནི། རྒྱལ་བ་ཀུན་གྱི་ཡབ་གྱུར། ཞེས་བྱ་བ་ཚིགས་སུ་བཅད་པ་
གཅིག་ལས། ཚིག་རྐང་དང་པོ་ནི་རྒྱུའི་སྒོ་ནས་བསྟོད། གཉིས་པས་ནི། འབྲས་བུའི་སྒོ་ནས་
བསྟོད། གསུམ་པ་དང་བཞི་པས་ནི་མཛད་པའི་སྒོ་ནས་བསྟོད་པའོ། །གསུམ་པ་ནི་ཁྱོད་ནི་
རྒྱལ༷་བ༷་ཀུན༷་བསྐྱེད་པར་བྱེད་པའི་ཡ༷བ་ཏུ་གྱུར༷་པ་དཔལ་རྡོ་རྗེ་སེམས་དཔའ་དང་གཉིས་སུ་
མེད་པའི་ངོ་བོ་སངས་རྒྱས་ཀུན་ལས་ཀྱང་སྔར་སངས་རྒྱས་ཡིན་ཀྱང་ཕྱོགས་བཅུའི་རྒྱལ༷་བ༷་
ཐམས་ཅད་ཀྱིས་སྲས༷་ཀྱི་ཚུལ་བཟུང་ནས་བྱང་ཆུབ་སེམས་དཔའི་སྤྱོད་པས་སེམས་ཅན་གྱི་
དོན་མཛད་པར་སྟོན་པ་དང༌། ཇི་སྐད་དུ། ཤེས་པས་སྲིད་ལ་མི་གནས་ཤིང༌། །སྙིང་རྗེས་ཞི་ལ་
མི་གནས་པ། །ཞེས་གསུངས་པ་ལྟར། སྟོང་པ་ཉིད་ཀྱི་དོན་མངོན་སུམ་དུ་གཟིགས་པས་སྲིད༷་
20-1-10


པའི་མཐའ་སྤངས་ཤིང༌། སྙིང་རྗེ་ཆེན་པོས་སེམས་ཅན་གྱི་དོན་རྒྱུན་མི་འཆད་པར་སྤྱོད་པའི་
ཞི༷་བ་ཆད་པས་མྱང་འདས་ཀྱི་མཐའ་ཀུན༷་སྤང༷ས་མོད་ཀྱིས། ཁྱོད་ཀྱིས་སྲིད༷་པའི་སེམས་ཅན་
ཐམས་ཅད་དང་ཉན་ཐོས་རང་རྒྱལ་ལ་སོགས་པ་ཞི༷་བའི་གོ་འཕང་ཐོབ་པ་ཀུན༷་གྱི༷ས་བད༷ག་
པོའམ། གཙོ་བོའམ་བླ་མར་གྱུར་པ་ཡིན་ནོ། །གསུམ་པ་ནི། མཛད་པའི་སྒོ་ནས་དཔ༷ལ་ལྡན༷་
འཁོ༷ར་ལོ༷་སྡོམ༷་པ༷་ཧེ་རུ་ཀ་ཉིད་བླ༷་མ༷་དམ་པ་རྡོ་རྗེ་སློབ་དཔོན་གྱི་མཚན་ཉིད་དང་ལྡན་པའི་
ཚུལ༷་བཟུང་ནས། འགྲོ་བའི་དོན་སྤྱོད་པའི་བླ་མ་དང་ལྷག་པའི་ལྷས་རྗེས་སུ་བསྩལ་བའི་མིང་
ཏཱ་ར་ནཱ་ཐ་སྒྲོལ༷་བ༷འི་མགོ༷ན་པོ༷་ཞེས་བྱ་བའི་ཞབས༷་ལ༷་གསོ༷ལ་བ༷་འདེབ༷ས་སོ། །ཞེས་པའོ། །
མཚན་ཉིད་དང་མི་ལྡན་པའི་སློབ་དཔོན་གང་ཞེ་ན། སྙིང་རྗེ་མེད་ཅིང་ཁྲོ་ལ་གདུག།
ཁེངས་ཤིང་ཆགས་ལ་མ་བསྡམས་པ། །རང་འདོད་བླ་མ་སློབ་མའི་ནི། །བློ་བཟང་ལྡན་པའི་
མི་བྱའོ། །ཞེས་པའི་སྐྱོན་ནི་རྣམས་སྤངས་ཤིང༌། །བརྟན་ཞིང་དུལ་ལ་བློ་གྲོས་ལྡན། །བཟོད་
ལྡན་དྲང་ལ་གཡོ་སྒྱུ་མེད། །སྔགས་དང་རྒྱུད་ཀྱི་སྦྱོར་བ་ཤེས། །སྙིང་བརྩེར་ལྡན་ཞིང་བསྟན་
བཅོས་མཁས། །དེ་ཉིད་བཅུ་ནི་ཡོངས་སུ་ཤེས། །དཀྱིལ་འཁོར་འབྲི་བའི་ལས་ལ་མཁས། །
གསང་སྔགས་འཆད་བྱེད་སློབ་དཔོན་དེ། །དང་བའི་བདག་ཉིད་དབང་པོ་བཏུལ། །ཞེས་
པའི་ཡོན་ཏན་དང་ལྡན་པ་ཡིན་ལ། ཁྱད་པར་ཚིག་ཅིག་གིས་སངས་རྒྱས་ལ་དཀྲི་བར་བྱེད་པ་
ལ། ཤེས་རབ་ཡེ་ཤེས་དག་ནི་སེམས་དང་དེའི་རྣམ་པ་དག་ཀྱང་རྣམ་པ་བཅུ་པོ་ཉིད་དུ་གྱུར། །
དབང་པོ་ནི་དྲི་མེད་རི་བོང་ཅན་མཚུངས་མེ་ལོང་གཟུགས་བརྙན་ལྟ་བུ་འདི་ལ་བཞུགས་པ་
གང་ཡིན་པ། །དེ་ལས་ལྷན་ཅིག་སྐྱེས་པའི་བདེ་བ་འཕོ་བ་མེད་པའི་རང་བཞིན་འགྱུར་མེད་
ཉིད་ནི་བཞི་པ་སྟེ། །སངས་རྒྱས་ཞལ་འདི་གང་གིས་ཐུགས་དང་ཞལ་ལ་གནས་པར་གྱུར་པ་
དེ་ནི་དཔལ་ལྡན་བླ་མའོ། །ཞེས་རྣམ་ཀུན་མཆོག་ལྡན་གྱི་སྟོང་པ་ཉིད་དང༌། ཐིག་ལེ་འགྱུར་བ་
མེད་པའི་བདེ་ཆེན་རང་གིས་ཀྱང་ཉམས་སུ་མྱོང་ཞིང༌། དེ་ལྟ་བུའི་ལམ་ལ་སློབ་མ་ཡང་དཀྲི་
20-1-11


བར་ནུས་པ་སྟེ། མཚན་ཉིད་དེ་དག་ལྡན་དགོས་ལ། འདི་ཉིད་དང་ལྡན་ན་གོང་གི་ཐམས་ཅད་
དང་མི་ལྡན་ཡང་ཚེ་གཅིག་སངས་རྒྱས་ལ་དཀྲི་བར་ནུས་པའི་སློབ་དཔོན་ཡིན་ལ། དེ་གཉིས་
དང་མི་ལྡན་པ་ནི་གོང་དུ་བཤད་པ་བཞིན་ཐམས་ཅད་ཚང་ཀྱང༌། སྐྱེ་བ་འདི་ཉིད་ལ་མཆོག་
སྟེར་བར་མི་ནུས་པའི། ཡོན་ཏན་དེ་གཉིས་ཚང་བ་གལ་ཆེའོ། །ཚིག་རྐང་དང་པོས་རྒྱལ་
བ་ཀུན་གྱི་སྲས་སུ་བསྟན་པ་ནི་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་ཞུགས་པའི་
བསོད་ནམས་ཀྱིས་ཚོགས་དང༌། ཆོས་ཉིད་མངོན་སུམ་རྟོགས་པའི་ཡེ་ཤེས་ཀྱི་ཚོགས་རྒྱ་ཆེན་
པོ་དང་ལྡན་པར་གྱུར་པ་ནི། རྒྱུ་ཚོགས་ཀྱི་སྒོ་ནས་བསྟོད་པ་ཡིན་ནོ། །གཞན་ཡང་འདིར་ཚིག་
རྐང་དང་པོས་རྒྱལ་བ་ཀུན་གྱི་ཡབ་ཡིན་པར་བསྟན་ལ། གཉིས་པ་དེའི་ཡོན་ཏན་གྱི་ཁྱད་པར་
རྣམས་བཤད། རྐང་པ་ཕྱི་མ་གཉིས་ཀྱི་ནི། མི་གནས་པའི་མྱ་ངན་ལས་འདས་པ་ནི་སངས་
རྒྱས་ལ་མ་གཏོགས་གཞན་ལ་མེད་པས། སངས་རྒྱས་གང་ཡིན་པའི་མཚན་ཉིད་ཡང་ཅི་སྙམ་
ན། དཔལ་ལྡན་འཁོར་ལོ་སྡོམ་པ་ཞེས་སྒྲོལ་འགྲེལ་ལོ། །ཚིག་རྐང་དང་པོ་གཉིས་ཀྱིས་ཚིག་
རྒྱན་ནི་དགའ་རྒྱན་ཞེས་བྱ་བ། ཚིག་འགལ་འགལ་འདྲ་ཡང་དོན་མི་འགལ་ཏེ། སྙན་ངག་གི་
བརྡ་ཆད་རགས་པ་ཙམ་ཆགས་ན་གོ་མོད་ཀྱིས། ད་ལྟ་ཆེན་པོར་རློམ་པ་རྣམས་ཀྱང་འགའ་
ཞིག་ནི་ཚིག་ལ་རྨོངས། ཁ་ཅིག་དོན་ལ་རྨོངས། གཞན་དག་ན་གཉིས་ཀ་ལ་རྨོངས་པ་ཡང་
མཐོང་ངོ༌། །འོན་ཀྱང་འདི་ལྟ་བུའི་བླ་མ་ལ་བསྟོད་པ་མི་མཛེས་སམ་སྙམ་ན། དྲང་སྲོང་ཆེན་པོ་
ཉི་མའི་ཤིང་རྟས། རང་གི་རྡོ་རྗེ་སློབ་དཔོན་འཇམ་དབྱངས་ཀྱི་སྤྲུལ་པ་མིའི་དབང་པོ་འཇམ་
དཔལ་གྲགས་པ་ལ་ཡང་འདི་ལྟར་བསྟོད་དོ། །ཁྱོད་ནི་རྒན་ཡང་གཞོན་ནུ་མཐའ་དག་རྒྱལ་
བའི་སྲས་པོ་ཡིན་ཀྱང་ཐོག་མར་དང་པོས་སངས་རྒྱས་ཁྱོད། །བུད་མེད་སྦྱོར་ཤིང་ཚངས་པར་
སྤྱོད་ལྡན་མཆོག་གི་ཐུགས་རྗེ་ཉིད་ཀྱི་འཇིག་རྟེན་གཉེན་ཏེ་གཤིན་རྗེའི་དགྲ། །ཁྱོད་ནི་ཞི་
ཡང་རྡོ་རྗེ་བཟང་པོ་འཆི་བའི་འཇིགས་འཕྲོག་ཁྱོད་ནི་རྟག་ཏུ་བདུད་ཀྱི་བདུད། །ཁྱོད་ནི་གྲོལ་
20-1-12


ཡང་སྲིད་པ་འདིར་ནི་འགྲོ་བ་སྨིན་པའི་སླད་དུ་གྲགས་པ་ཁྱོད་ནི་རབ་ཏུ་འཇུག །ཅེས་དུས་ཀྱི་
འཁོར་ལོའི་རྒྱུད་དུ་གསུངས་སོ། །
གཉིས་པ་མཇུག་གི་དོན་ལ། བསྐུལ་བ་པོ་རྩོམ་པ་པོ། རྒྱན་ངོས་འཛིན་ཁེངས་{བྱུང[་
སྐྱུང]བ་སྟེ། དོན་ཚན་བཞི་ནི་འདི་ལྟར་བསྐུལ་བ་པོ་ཀུན་དགའ་སྐྱབས་གྲོལ་གྱི་བསྐུལ་
བའི་ཕྱིར། བརྩམ་པ་པོ་ཏཱ་ར་ནཱ་ཐ་ཡིས། སྙན་ངག་གྱི་རྒྱན་ནི། ཆུང་ངུ་ལའང་ཆེན་པོར་སྒྲོ་
བཏགས་པའི་ཕུལ་ཕྱུང་གི་རྒྱན་གྱིས་རབ་ཏུ་བརྒྱན་ཏེ། རང་ལ་མངོན་པའི་ང་རྒྱལ་མེད་མོད་
ཀྱང༌། གཞན་གྱིས་བསྐུལ་བའི་ཕྱིར་གཡར་ཁྲལ་ཁོ་ན་ཉིད་དུ་སྨྲས་པའོ། །ཞེས་པ་ནི་བསྟོད་
ཡུལ་རང་ཉིད་ཀྱིས་བསྟོད་པ་འགྲེལ་པ་དགེ་སློང་བསོད་ནམས་ཕུན་ཚོགས་ཀྱིས་བསྐུལ་ནས་
གནས་རྙིང་གཟིམས་ཁང་དུའོ། །མངྒ་ལམ།།
༄༅། །ༀ་སྭཱ་སྟི་པྲ་ཛ་བྷྱཿ ཕུན་ཚོགས་དགེ་ལེགས་ཀུན་གྱི་གཞིར་གྱུར་པ། །དམ་ཆོས་
རྒྱལ་པོའི་དཔལ་ལ་དབང་བསྒྱུར་ཞིང༌། །རབ་དགའི་ཡེ་ཤེས་སྙིང་པོའི་དོན་གསལ་མཛད། །
རྗེ་བཙུན་བླ་མའི་ཞབས་ལ་གསོལ་བ་འདེབས། །དངོས་ཀུན་ལྷན་ཅིག་སྐྱེས་དགའི་རང་
བཞིན་མཆོག །རྒྱལ་བའི་སྙིང་པོའི་མཉམ་ཉིད་མངོན་གྱུར་པ། །མཚུངས་བྲལ་བླ་མ་དཀྱིལ་
འཁོར་འཁོར་ལོའི་མགོན། །སྐྱབས་གནས་ཀུན་འདུས་མཆོག་ལ་གསོལ་བ་འདེབས། །དཔའ་
བོ་རྣལ་འབྱོར་མ་ཚོགས་ཀུན་གྱི་གཙོ། །དགའ་ཆེན་འཁོར་ལོ་སྡོམ་པའི་ངོ་བོ་ཉིད། །མཐའ་
དག་འགྲོ་རྣམས་བྱང་ཆུབ་སྙིང་པོར་འགོད། ཁམས་གསུམ་དབང་ཕྱུག་ཁྱེད་ལ་གསོལ་
འདེབས། །གང་ཁྱོད་མཁྱེན་བརྩེ་ནུས་ཀུན་དཔག་ཡས་ཀྱིས། །རབ་དགའ་རིགས་ལྡན་མ་
ལུས་ཟིལ་གྱིས་མནན། །སྲིད་ཞིའི་སྙིང་པོ་ཡིད་བཞིན་ནོར་འདྲའི་སྐུ། །སྒྲོལ་བའི་མགོན་པོའི་
ཞབས་ལ་གསོལ་བ་འདེབས། །མཆོག་གསུམ་ངོ་བོ་རྡོ་རྗེ་སློབ་དཔོན་ཁྱེད། །བསླབ་གསུམ་
རྣམ་དག་ཕ་རོལ་ཕྱིན་བཅུ་རྫོགས། །སྐུ་གསུམ་རང་བཞིན་སྟོབས་བཅུ་དབང་བསྒྱུར་བ། །
20-1-13


ཀུན་དགའ་སྙིང་པོའི་ཞབས་ལ་གསོལ་བ་འདེབས། །བདག་ཅག་དུས་དང་གནས་སྐབས་
ཐམས་ཅད་དུ། །སྐྱབས་མགོན་ཁྱེད་ཀྱི་ཞབས་པད་བརྟན་པ་དང༌། །གསུང་བཞིན་སྒྲུབ་དང་
དགོངས་པ་ཇི་བཞིན་སྐྱོངས། །རྟག་ཏུ་དགྱེས་བྱེད་ནམ་ཡང་རྗེས་འཛིན་ཤོག །གཞན་ཡང་
འགལ་རྐྱེན་བར་ཆད་ཀུན་ཞི་ཞིང༌། །ཚེ་རིང་ནད་མེད་དཔལ་འབྱོར་དབང་ཐང་རྒྱས། །བསམ་
པའི་དོན་ཀུན་གེགས་མེད་ལྷུན་གྱིས་གྲུབ། །རྡོ་རྗེ་འཆང་དབང་ཉིད་དང་མཚུངས་པར་ཤོག།
ཅེས་ཏཱ་ར་ནཱ་ཐས་རང་ལ་བསྟོད་པ་འདི་ནི། ས་སྐྱོང་དབང་ཕྱུག་གཞོན་ནུ་ཀུན་དགའ་རབ་བརྟན་དབང་གི་རྒྱལ་པོའི་གསུང་གིས་
བསྐུལ་ནས་ངེས་པར་བརྗོད་པའོ། །དགེ་ལེགས་འཕེལ། བཀྲ་ཤིས། །
༄༅། །ༀ་སྭཱ་སྟི། བདག་གཞན་དགེ་བའི་རྩ་བ་མ་ལུས་པ། །གཅིག་ཏུ་བསྡོམ་ཞིང་
མཁའ་དང་མཉམ་པར་སྤེལ། །ཆོས་ཉིད་ཆེན་པོར་རོ་གཅིག་རྟག་པའི་ངང༌། །གདོད་ནས་
འོད་གསལ་ཆེན་པོར་རྒྱས་བཏབ་སྟེ། །སྣང་གྲགས་ཐམས་ཅད་ཡེ་ནས་ཆོས་སྐུའི་ངང༌། །སྣང་
བ་མ་འགགས་གཟུགས་སྐུ་རང་ཤར་བ། །གང་འདུལ་འཕྲིན་ལས་ལྷུན་གྲུབ་རྒྱུན་མི་འཆད། །
ཟུང་འཇུག་ཆེན་པོའི་ངོ་བོར་ཡོངས་སུ་བསྔོ། །གནས་སྐབས་ཀུན་ཏུ་བདག་གཞན་སེམས་
ཅན་ཀུན། །རྣམ་དཀར་དགེ་བའི་ལས་ལ་འཇུག་པ་དང༌། །ཕུན་ཚོགས་བདེ་སྐྱིད་ལེགས་
ལམ་ཀུན་ལྡན་ཞིང༌། །ཇི་ལྟར་བསམ་པའི་དོན་ཀུན་འགྲུབ་པར་ཤོག །ཚེ་འདིའི་སྣང་བ་ནུབ་
པར་གྱུར་མ་ཐག །བླ་མ་སངས་རྒྱས་སྲས་བཅས་ཀུན་གྱི་ཞིང༌། །འོད་དཔག་མེད་མགོན་སྨོན་
ལམ་ལས་གྲུབ་པ། །བདེ་བ་ཅན་གྱི་ཞིང་དུ་སྐྱེ་བར་ཤོག །ཕྱོགས་བཅུའི་སངས་རྒྱས་ཀུན་གྱི་
རབ་བསྔགས་ཤིང༌། །སྨོན་ལམ་ལས་གྲུབ་འདོད་དོན་དཔག་མེད་དང༌། །རྒྱན་རྣམས་ཀུན་གྱི་
རྣམ་པར་བརྒྱན་པ་ཡི། །ཞིང་མཆོག་བདེ་བ་ཅན་དུ་སྐྱེ་བར་ཤོག །སྨོན་ལམ་མ་ལུས་ཡོངས་
སུ་རྫོགས་པ་དང༌། །སེམས་ཅན་མཐའ་དག་ཡོངས་སུ་སྨིན་བྱས་ནས། །ཞིང་རྣམས་ཐམས་
ཅད་མྱུར་དུ་སྦྱངས་གྱུར་དེ། །དག་པའི་བདེ་བ་ཅན་དུ་སྐྱེ་བར་ཤོག །ཞིང་དེར་སྐྱེ་མ་ཐག་ཏུ་
20-1-14


ཏིང་འཛིན་དང༌། །གཟུངས་དང་ཡེ་ཤེས་རྣམ་ཐར་ཀུན་གྲུབ་ནས། །བླ་མེད་མཆོད་སྤྲིན་རྒྱ་
མཚོའི་ཚོགས་སྤྲུལ་ཏེ། །རྒྱལ་བ་ཐམས་ཅད་མཆོད་པས་མཉེས་བྱེད་ཤོག །སྣ་ཚོགས་སྤྲུལ་
པའི་འཇིག་རྟེན་ཁམས་ཀུན་ཏུ། །གང་ལ་གང་འདུལ་འགྲོ་བའི་དོན་སྤྱོད་པའི། །བསམ་ཡས་
མཁའ་དང་མཉམ་པའི་སེམས་ཅན་རྣམས། །དག་པའི་ཞིང་མཆོག་གང་དེར་ཁྲིད་པར་ཤོག།
ཅེས་པ་བདེ་བ་ཅན་གྱི་སྨོན་ལམ་འདི་ཡང༌། ཏ་པའི་དོན་ཅན་ས་སྐྱོང་དབང་མོ་ཡིད་འཛིན་དཔལ་ལེགས་ཀྱིས་བསྐུལ་ནས་ཏཱ་ར་
ནཱ་ཐས་གཏིང་ཁོབས་གཉན་ཡོད་དུ་སྨྲས་པའོ། །མངྒ་ལམ། བཀྲ་ཤིས། །
༄༅། །ༀ་སྭཱ་སྟི། དཔལ་ལྡན་རྒྱལ་བ་ཐམས་ཅད་འདུས་པའི་སྐུ། །བརྒྱུད་པ་ཀུན་
འདུས་ནོར་བུ་རིན་པོ་ཆེ། །མཚན་ཙམ་དྲན་པས་འདོད་དགུའི་དཔལ་སྩོལ་བ། །འགྲོ་བའི་
འདྲེན་པ་བདག་ལ་ཐུགས་རྗེས་གཟིགས། །གཟིགས་ཤིག་གཟིགས་ཤིག་ད་ལྟ་བྱིན་གྱིས་
རློབས། །ཆོས་མེད་བདག་ལ་ཐུགས་རྗེས་བཟུང་དུ་གསོལ། །བླ་མ་ཁྱེད་དང་འབྲལ་བ་མེད་
པ་དང༌། །རྗེ་བཙུན་ཁྱེད་ཀྱི་གོ་འཕང་ཐོབ་པར་ཤོག །བླ་མ་ལ་གསོལ་བ་འདེབས། །ཆོས་རྗེ་
ལ་གསོལ་བ་འདེབས། །ཉམས་རྟོགས་རྣམས་བསྐྱེད་དུ་གསོལ། །བྱིན་རླབས་རྣམས་སྩལ་དུ་
གསོལ། །དབང་མཆོག་རྣམས་བསྐུར་དུ་གསོལ། །དལ་འབྱོར་མི་ལུས་རྙེད་པའི་བརྒྱ་ལམ་
ན། །དམ་པའི་ཆོས་དང་མཇལ་བ་རེས་འགའ་ཙམ། །མི་ཚེ་སྟོང་པར་ཟད་པའི་སྙིང་མེད་པོ། །
ཉམས་ལེན་བྱེད་སྙམ་ངང་ལ་འདས་པ་ན། །གཟིགས་ཤིག་གཟིགས་ཤིག་ད་ལྟ་བྱིན་གྱིས་
རློབས། །ཆོས་མེད་བདག་ལ་ཐུགས་རྗེས་བཟུང་དུ་གསོལ། །བླ་མ་ཁྱེད་དང་འབྲལ་བ་མེད་
པ་དང༌། །རྗེ་བཙུན་ཁྱོད་ཀྱི་གོ་འཕང་ཐོབ་པར་ཤོག །བླ་མ་ལ་གསོལ་བ་འདེབས། །ཆོས་རྗེ་
ལ་གསོལ་བ་འདེབས། །ཉམས་རྟོགས་རྣམས་བསྐྱེད་དུ་གསོལ། །བྱིན་རླབས་རྣམས་སྩལ་དུ་
གསོལ། །དབང་མཆོག་རྣམས་བསྐུར་དུ་གསོལ། །འགྱུ་བའི་དབུགས་ཀྱང་ཆད་ལ་ཉེ་བ་དང༌། །
ཁམ་གཅིག་ཟོས་པའང་དང་གར་མི་འོང་ཞིང༌། །རང་གིས་རང་ལ་ཡིད་ཆད་བྱེད་པ་དང༌། །
20-1-15


གྲོགས་དང་གཉེན་ལ་རེ་ཐག་ཆད་པའི་དུས། །གཟིགས་ཤིག་གཟིགས་ཤིག་ད་ལྟ་བྱིན་གྱིས་
རློབས། །ཆོས་མེད་བདག་ལ་ཐུགས་རྗེས་བཟུང་དུ་གསོལ། །བླ་མ་ཁྱེད་དང་འབྲལ་བ་མེད་
པ་དང༌། །རྗེ་བཙུན་ཁྱོད་ཀྱི་གོ་འཕང་ཐོབ་པར་ཤོག །བླ་མ་ལ་གསོལ་བ་འདེབས། །ཆོས་རྗེ་
ལ་གསོལ་བ་འདེབས། །ཉམས་རྟོགས་རྣམས་བསྐྱེད་དུ་གསོལ། །བྱིན་རླབས་རྣམས་སྩལ་དུ་
གསོལ། །དབང་མཆོག་རྣམས་བསྐུར་དུ་གསོལ། །གཤིན་རྗེའི་སྐྱེས་བུས་དབང་མེད་བཅིངས་
ནས་ཁྲིད། །དམྱལ་བའི་མེ་ཚོགས་འབར་བའི་ནང་དུ་ལྷུང༌། །འཇིགས་རུང་མཚོན་ཆའི་ཆར་
པ་ལུས་ལ་ཕོག །ལས་ངན་དབང་གིས་ཚེ་ལ་འཁྱོལ་དུ་མེད། །གཟིགས་ཤིག་གཟིགས་ཤིག་
ད་ལྟ་བྱིན་གྱིས་རློབས། །ཆོས་མེད་བདག་ལ་ཐུགས་རྗེས་བཟུང་དུ་གསོལ། །བླ་མ་ཁྱེད་དང་
འབྲལ་བ་མེད་པ་དང༌། །རྗེ་བཙུན་ཁྱོད་ཀྱི་གོ་འཕང་ཐོབ་པར་ཤོག །བླ་མ་ལ་གསོལ་བ་
འདེབས། །ཆོས་རྗེ་ལ་གསོལ་བ་འདེབས། །ཉམས་རྟོགས་རྣམས་བསྐྱེད་དུ་གསོལ། །བྱིན་
རླབས་རྣམས་སྩལ་དུ་གསོལ། །དབང་མཆོག་རྣམས་བསྐུར་དུ་གསོལ། །གྲང་བས་ཉེན་ནས་
བརྒྱ་ཚལ་སྟོང་ཚལ་དུ། །གས་པའི་དུས་ན་མགོན་སྐྱབས་གཞན་མ་མཆིས། །ལོ་བརྒྱའི་བར་དུ་
ཟས་སྐོམ་ཁམ་གཅིག་ཀྱང༌། །མ་རྙེད་བཀྲེས་སྐོམ་འཇིགས་པས་ཉེན་པའི་དུས། ། གཟིགས་
ཤིག་གཟིགས་ཤིག་ད་ལྟ་བྱིན་གྱིས་རློབས། །ཆོས་མེད་བདག་ལ་ཐུགས་རྗེས་བཟུང་དུ་
གསོལ། །བླ་མ་ཁྱེད་དང་འབྲལ་བ་མེད་པ་དང༌། །རྗེ་བཙུན་ཁྱོད་ཀྱི་གོ་འཕང་ཐོབ་པར་ཤོག།
བླ་མ་ལ་གསོལ་བ་འདེབས། །ཆོས་རྗེ་ལ་གསོལ་བ་འདེབས། །ཉམས་རྟོགས་རྣམས་བསྐྱེད་
དུ་གསོལ། །བྱིན་རླབས་རྣམས་སྩལ་དུ་གསོལ། །དབང་མཆོག་རྣམས་བསྐུར་དུ་གསོལ། །
གཅིག་ལ་གཅིག་ཟ་སྲོག་གཅོད་བཀོལ་དང་བརྡེག །སྐྱེ་རྒ་ན་འཆིའི་འཕྲང་ནི་ཉམས་རེ་
ང༌། །མཐོ་དམན་འབྱོར་རྒུད་མི་རྟག་ཡིད་རེ་འབྱུང༌། །འགྲོ་བ་དྲུག་གི་སེམས་ཅན་སྙིང་རེ་རྗེ། །
གཟིགས་ཤིག་གཟིགས་ཤིག་ད་ལྟ་བྱིན་གྱིས་བརློབས། །ཆོས་མེད་བདག་ལ་ཐུགས་རྗེས་
20-1-16


བཟུང་དུ་གསོལ། །བླ་མ་ཁྱེད་དང་འབྲལ་བ་མེད་པ་དང༌། །རྗེ་བཙུན་ཁྱོད་ཀྱི་གོ་འཕང་ཐོབ་
པར་ཤོག །བླ་མ་ལ་གསོལ་བ་འདེབས། །ཆོས་རྗེ་ལ་གསོལ་བ་འདེབས། །ཉམས་རྟོགས་
རྣམས་བསྐྱེད་དུ་གསོལ། །བྱིན་རླབས་རྣམས་སྩལ་དུ་གསོལ། །དབང་མཆོག་རྣམས་བསྐུར་དུ་
གསོལ། །ངུར་སྨྲིག་གྱོན་ཡང་ཤེས་རྒྱུད་རྩུབ་ཅིང་གྱོང༌། །དགེ་སྦྱོར་ཀུན་ཡང་ཚེ་འདིའི་ཆེ་ཁར་
སོང༌། །ཆོས་སྐད་འགྲིག་འགྲིག་སྨྲ་ཡང་སེམས་མ་ཐུལ། ཁ་དང་ལག་ལེན་འགལ་བའི་ཟོག་
པོ་ལ། །གཟིགས་ཤིག་གཟིགས་ཤིག་ད་ལྟ་བྱིན་གྱིས་རློབས། །ཕ་བླ་མའི་སྐུ་ཡིས་བྱིན་གྱིས་
རློབས། །ཕ་བླ་མའི་གསུང་གིས་བྱིན་གྱིས་རློབས། །ཕ་བླ་མའི་ཐུགས་ཀྱིས་བྱིན་གྱིས་རློབས། །
སྤྲང་ཆོས་མེད་པོ་ལ་གཟིགས་ཤིག་ད་ལྟ་བྱིན་གྱིས་རློབས། །ཆོས་མེད་བདག་ལ་ཐུགས་རྗེས་
བཟུང་དུ་གསོལ། །བླ་མ་ཁྱེད་དང་འབྲལ་བ་མེད་པ་དང༌། །རྗེ་བཙུན་ཁྱོད་ཀྱི་གོ་འཕང་ཐོབ་
པར་ཤོག །བླ་མ་ལ་གསོལ་བ་འདེབས། །ཆོས་རྗེ་ལ་གསོལ་བ་འདེབས། །ཉམས་རྟོགས་
རྣམས་བསྐྱེད་དུ་གསོལ། །བྱིན་རླབས་རྣམས་སྩལ་དུ་གསོལ། །དབང་མཆོག་རྣམས་བསྐུར་
དུ་གསོལ། །ཞེས་པ་འདི་ཡང་སྐྱོར་མོ་ལུང་པ་དར་རྒྱས་དཔལ་འབྱོར་གྱིས་བསྐུལ་ནས་ཏཱ་ར་ནཱ་ཐས་སྨྲས་པའོ། །
༄༅། །ༀ་སྭཱ་སྟི། བླ་མ་རྣམས་ལ་ཕྱག་འཚལ་ལོ། །སེམས་གུས་ལྡན་གྱི་སློབ་མ་ཁྱེད་
རྣམས་ལ། །སྙིང་པདྨ་འདབ་བརྒྱད་ཁ་ཕྱེ་ནས། །དོན་འཁྲུལ་མེད་ཀྱི་གདམས་པ་གསལ་པོར་
དགོད། །ལར་མི་ལུས་ཐོབ་པའི་གནས་སྐབས་འདིར། །ཆོས་རྩེ་གཅིག་ཉམས་སུ་མ་བླངས་
ན། །ཕྱི་ལང་ལིང་ཆོས་ཀྱིས་མི་ཕན་པས། །བློ་ནང་དུ་ཁུག་ལ་ནན་ཏན་མཛོད། །ཆོས་ཡོད་
ལོ་ངག་གི་སྟོང་ཟོབ་འདིས། །མ་སེམས་ཅན་ཐམས་ཅད་བསླུས་པར་འགྲོ། །ལུས་ངག་ཡིད་
ཆོས་དང་མཐུན་མ་མཐུན། །སྙིང་ཐག་པས་རྟོག་དཔྱོད་ཡང་ཡང་འཚལ། །མཆོག་བླ་མ་ཡིན་
རིང་བསྟེན་པ་ཡང༌། །ལས་བསགས་པ་རབ་ལ་བདུད་རྩི་ཡིན། །མི་ཕལ་ཆེར་གདམས་ངག་
ཆོས་དྲེད་ཁྱེར། །སེམས་ལོག་ལྟས་དཀྲུགས་ནས་དམྱལ་བར་འགྲོ། ཁྱེད་ཀུན་ཡང་བླ་མས་
20-1-17


ཅི་གསུང་སྒྲུབས། །དེ་བྱས་ན་འདུན་མ་རྩེ་མོར་འགྲོ། །ཕལ་གཞན་གྱི་ངོ་དགའི་དབང་སོང་
ན། །ཚེ་འདི་ཕྱི་གཉིས་མེད་སྡུག་ལ་སྐྱེལ། །སེམས་ཉམས་ལེན་ནམ་མཁའ་ལྟར་ཡངས་ལ། །
ཕྱི་བླང་དོར་སྤྱོད་པ་ཞིབ་པ་འདི། །ལར་ལྟ་སྤྱོད་འཛོམས་པ་དམ་པའི་མཆོག །རྒྱལ་བ་སྲས་
བཅས་དགྱེས་པའི་ལམ་བཟང་ཡིན། །ལུས་ཆོས་ཆས་སུ་ཞུགས་པའི་རྩིང་སྤྱོད་ནི། །ཉམས་
མཐོ་ཡང་གང་ལའང་མི་ཕན་པས། །ལས་ཐོ་ཆོར་མ་སོང་གནད་དུ་ཆེ། །ཆོས་བརྒྱུད་བཅས་ཀྱི་
ཞབས་འདྲེན་མ་བྱས་ཙམ། །བློ་ཆགས་སྡང་ཟུར་མགོ་རགས་པ་ལ། །མིང་ཆོས་པར་བཏགས་
ཀྱང་ག་ལ་ཕན། །ཕུང་བདག་འཛིན་གྱི་མདུད་པ་ཤིགས་ཀྱིས་བཤིག །དབྱིངས་རྩོལ་བྲལ་གྱི་
ངང་དུ་ལྷོད་ཀྱིས་གློད། །འཕྲལ་ཟས་གོས་དོན་གཉེར་ལས་མེད་པ་ཡི། །སྐྲ་བྲེགས་ཙམ་གྱི་
ཆོས་པའི་གཟུགས་བརྙན་ཏེ། །ནང་རང་སེམས་ལ་ལྟས་ན་ཡི་མུག་ལྡང༌། །ཕྱི་སྐྱེ་བོའི་མི་ཁ་
དིར་རེ་བ། །ལར་དུད་འགྲོ་དང་ཁྱད་པར་མི་གདའ་བས། །ཟས་ཞིམ་འདོད་ཀྱི་སྲེད་པ་སྤོང་
བ་དང༌། །གོས་ལེགས་འདོད་ཀྱི་ཆོས་བརྒྱད་མ་ཆེ་བར། །སྤྲང་དམན་ཆ་བཟུང་ན་ལེགས་པ་
ཡིན། །རང་ཚེ་གཅིག་ཆོས་བཞིན་སྤྱོད་པ་ན། །ཁ་ཞན་ཞན་འདྲ་ཡང་ལེགས་པའི་རབ། །ནོར་
ཅུང་ཟད་བསོགས་ཀྱང་ཆོས་དང་འགལ། །དེ་ལྷ་འདྲེ་མི་གསུམ་ལ་མངོན་ལོ་འཕྱར། །དུས་
ནམ་ཞིག་འཆི་བ་སླེབ་དུས་སུ། །ནོར་མང་ཡང་རོ་ནོར་རོ་གོས་ཤིག །ཟས་མང་ཡང་རོ་ཟས་
ཁམ་གང་ཡིན། །རྫས་ལོངས་སྤྱོད་གཞན་གྱིས་སུས་ཐོབ་བྱེད། །ཚེ་ཕྱི་མ་ཕན་ཆེད་ཀྱི་གདེང་
མེད་ན། །འཕྲལ་བཟང་བཟང་འདྲ་ཡང་དེ་ཁའི་རྒྱུ། །གནས་བསམ་གཏན་ཁང་བུར་ཚུགས་པ་
དང༌། །ཡིད་ཆོས་ལ་དགའ་བདེ་རྙེད་པ་དང༌། །འཕྲལ་ཆོས་མཐུན་གྱི་འཚོ་བས་མི་བྲེལ་བར། །
ཕ་བླ་མས་བྱིན་གྱིས་བརླབ་ཏུ་གསོལ། །ཞེས་པའང་ཏཱ་ར་ནཱ་ཐས་གཡུ་ནང་གི་རི་ལ་སྡོད་པའི་སྒོམ་མོ་ཞིག་ལ་
གདམས་པའོ། །དར་རྒྱས་འཕེལ། 
20-1-18


༄༅། །འཕོ་བ་ཧིཀ་དགུ་མ་བཞུགས།
ༀ་སྭཱ་སྟི། སྐྱབས་སེམས་སྔོན་དུ་འགྲོ་བའི། རང་ཉིད་ཤ་ཁྲག་གི་གདོས་བཅས་མ་ཡིན་པ།
རང་དུས་འཁོར་ལྷན་སྐྱེས་སྐུ་མདོག་སྔོན་པོ་རྐྱལ་པ་སྦུབ་སྟོང་དག་ཤེལ་སྔོན་པོའི་དབྱིབས་
སུ་བསྒོམ་པའི། རྩ་དབུ་མ་མདའ་སྙུག་འབྲིང་པོ་ཙམ་ལུས་ཀྱི་དབུས་སུ་སྲོག་ཤིང་ཚུལ་དུ་
ཡོད་པ། མར་སྣེ་ལྟེ་འོག་སོར་བཞི་ཙམ་ལ་ཟུག་པ། ཡར་སྣེ་སྤྱི་བོར་ཚངས་བུག་ཏུ་ཟུག་པའོ། །
སྤྱི་བོར་ཧཾ་དཀར་པོ་མགོ་བོ་ཐུར་དུ་ལྟ་བ། དཔྲལ་བར་ༀ་དཀར་བོ་མགོ་བོ་ཐུར་དུ་བལྟ་བ།
མགྲིན་པར་ཨཱཿདམར་པོ་མགོ་བོ་ཐུར་དུ་བལྟ་བ། སྙིང་གར་ཧཱུཾ་སྔོན་པོ་མགོ་བོ་གྱེན་དུ་བལྟ་
བ། ལྟེ་བར་སྭཱ་སེར་བོ་མགོ་བོ་གྱེན་དུ་བལྟ་བ། དབུ་མའི་མར་སྣའི་ཨ་ཡིག་དམར་པོ་ཡེ་ཤེས་
ཀྱི་མེ་འབར་བའི་དབྱིབས་ཅན་རྣམས་བསྒོམས་པའི་མཐར་བཤང་སྒོ་བསྡམས་པ་དང༌། ཧིཀ་
ཅེས་བརྗོད་པའི་ཚེ་མེ་རླུང་དྲངས་པའི་རྐྱེན་གྱིས་ཨཱཿཡིག་ལ་མེ་འབར་བའི་དབུ་མའི་ནང་
ནས་ཡར་སོང་བས། ཡང་ཧིག་ཅེས་བརྗོད་པའི་ཡང་རླུང་དྲངས་པའི་རྐྱེན་གྱི་ལྟེ་བའི་སྭཱ་ཡིག་
སེར་པོ་ལ་ཕོག་པས་ཐིག་ལེ་སེར་པོར་གྱུར། ཡང་ཧིཀ་ཅེས་བརྗོད་པའི་རྐྱེན་གྱི་སྙིང་གའི་ཧཱུཾ་
ཡིག་ལ་ཕོག་པས་ཐིག་ལེ་ནག་པོར་གྱུར། སྔར་གྱི་ཐིག་ལེ་སེར་པོ་དང་རོ་གཅིག་ཏུ་འདྲེས་
པས་སེར་ནག་ཏུ་གྱུར། ཡང་ཧིཀ་ཅེས་བརྗོད་པའི་རྐྱེན་གྱི་སྟེང་རླུང་ཐུར་དུ་མནན་པའི་སྤྱི་བོར་
ཧཾ་དཀར་པོ་ལ་ཕོག་པས་ཧཾ་ཡིག་ཐིག་ལེ་དཀར་པོའི་རྣམ་པར་ཞུ། ཡང་ཧིཀ་ཅེས་བརྗོད་པས་
རླུང་ཐུར་དུ་མནན་པའི་རྐྱེན་གྱི། དཔྲལ་བར་ༀ་དང་འདྲེས་པས་ཐིག་ལེ་དཀར་པོ་གྱུར། ཡང་
ཧིཀ་ཅེས་བརྗོད་པས་རླུང་ཐུར་དུ་མནན་པའི་མགྲིན་པར་ཨཱཿལ་ཕོག་སྔར་གྱི་ཐིག་ལེ་དཀར་
པོ་དང་རོ་གཅིག་ཏུ་འདྲེས། ཐིག་ལེ་དཀར་དམར་འདྲེས་པ། ཡང་ཧིག་ཅེས་བརྗོད་པས་རླུང་
ཐུར་དུ་མནན་པའི་རྐྱེན་གྱི་ཐིག་ལེ་དམར་པོ་དེ་ཉིད་སྙིང་གའི་ཐིག་ལེ་སེར་ནག་ལ་ཐིམ་པའི་
20-1-19


ཐིག་ལེ་ཁྲ་བོ་སྲན་མ་ཙམ་མམ་ཡུངས་འབྲུ་ཙམ་གང་རུང་བསྒོམ་པའི་མཐར་ཧིག་གསུམ་
དང་བཅས་དབུ་མའི་ནང་ནས་ཡར་སོང་བས་སོར་བཅུ་དྲུག་གཞལ་བའི་སྤྱི་གཙུག་སྟེང་གི་
ནམ་མཁའ་ལ་ཆོས་སྐུའི་བླ་མ་དུས་ཀྱི་འཁོར་ལོའི་ཐུགས་ཀར་ཡིད་གཉིས་ཐེ་ཚོམ་མེད་པར་
འཕོས། །
༈ སྤྱི་བོར་ཐར་པའི་སྒོ་ཆེན་ཡངས་པ་རུ། །སྐྱབས་གནས་བསླུ་བ་མེད་པའི་རྡོ་རྗེ་འཆང༌། །
ངེས་འབྱུང་གདུང་ཤུག་དྲག་པོས་གསོལ་བ་འདེབས། །བླ་མའི་ཐུགས་ཀར་འཕོ་བར་བྱིན་
གྱིས་རློབས། །དཔལ་ལྡན་བླ་མའི་རྣམ་པར་ཐར་བ༴ སོགས། སྐྱེ་བ་ཀུན་ཏུ་ཡང་དག༴ སོགས།
ཡི་དམ་ལ་མོས་ན། ཡི་དམ་ཐུགས་རྗེའི་དབང་ཕྱུག་རྣམས། །དུས་ད་ལྟ་བྱིན་གྱིས་བརླབ་ཏུ་
གསོལ། །ཞེས་མན་ཆད་སྔར་བཞིན་སྦྱར་བས་ཆོག་གོ །འདིའི་མཛད་བྱང་མི་སྣང་ཡང་ཏཱ་ར་
ནཱ་ཐའི་གསུང་ཡིན་པར་གྲགས་སོ། །མངྒལཾ། 
20-1-20


༄༅། །རྗེ་བཙུན་ཐམས་ཅད་མཁྱེན་པ་ཏཱ་ར་ནཱ་ཐའི་དགུང་ལོ་
བཞི་པ་ཡན་གྱི་རྣམ་ཐར་མདོར་བསྡུས་
ཞིག་བཞུགས།
༄༅། །ན་མོ་གུ་རུ། རྗེ་བཙུན་ཐམས་ཅད་མཁྱེན་པ་ཆེན་པོ། ཁམས་གསུམ་ན་ནི་འགྲན་
ཟླ་དང་བྲལ་བ། མཐོང་ཐོས་དྲན་རེག་ཏུ་གྱུར་པའི་འགྲོ་བ་རྣམས་ཀྱི་དེད་དཔོན་འདི་ཉིད་ནི།
དང་པོ་ལྷུམས་སུ་གཞུག་པ་དང༌། སྐུ་བལྟམས་པའི་ངོ་མཚར་ཆེ་བ་རྣམས་མཐའ་ཡས་ཤིང༌།
བརྗོད་ཀྱི་མི་ལང་བར་གདའ་སྟེ། དེ་ལ་བདག་རང་རྒྱུས་ཆེ་ཞིང༌། ཡུལ་མི་དེ་སྐབས་པ་རྣམས་
དང༌། ད་ལྟའི་རྒྱལ་རྒྱུད་བྱེད་པ་རྣམས་ཡིད་ཆེས་ཁུངས་བཙུན་པ་ལྟར་ཡོད་ཅིང༌། བཅོས་མ་
མ་ཡིན་པ་ངེས་ཤེས་འདྲོངས་པ་རྣམས་ཡི་གེར་བཀོད་པ་ཡིན།
༈ གཡོན་དུ་བརྟན་མ་བཅུ་གཉིས་ཀྱི་ནང་ནས། རྡོ་རྗེ་གཡུ་སྒྲོན་མའི་གནས། ཁ་རག་
འབྲང་གི་ཕུ་དང་པོ་རྭ་ལོ་ཙཱ་བ་ཆེན་པོ། དེའི་བརྒྱུད་པ་རིམ་པར་བྱོན་པའི་བསྟི་གནས། ད་
ལྟ་ཆོས་འཁོར་སྟེང་དུ་གྲགས་པ་ན། སྔགས་ཀྱི་རྡོ་རྗེ་འཛིན་པ་རྗེ་ཚུལ་ཁྲིམས་རྒྱ་མཚོ་ལ་སྲས་
བཞི་བྱུང་བའི་ཁབ་ཏུ། ཡུམ་རྡོ་རྗེ་བུ་དགའ་ལྷ་མོ་བཞེས་པས་དེ་ནི་དགེ་བ་ལ་དཀར་ཞིང་
སྡིག་པ་ལ་འཛེམས་པ། ངན་སློང་ལ་བྱམས་པ་ཞིག་ཡོད་དེ། ཡུམ་དགུང་ལོ་བཅུ་དགུ་ལ། རྗེ་
བཙུན་འདི་ཉིད་ལྷུམས་སུ་ཞུགས་པའི་སྐབས། ཡུམ་གྱི་རྨི་ལམ་དུ་ཉི་མའི་འོད་ལས། གསེར་
གྱི་རྡོ་རྗེ་གྲུ་གང་བ་འོད་ཟེར་འཕྲོ་བ་གཅིག་བབས་ཏེ། འོད་ཟེར་དེས་འཇིག་རྟེན་གྱི་ཁམས་
ཐམས་ཅད་ཁྱབ་པར་གྱུར་ཏེ། ཡང་འོད་ཟེར་དེ་རྣམས་དང༌། གསེར་གྱི་རྡོ་རྗེ་དྲི་མ་མེད་པ་
20-1-21


དེ། ཡུམ་གྱི་སྤྱི་བོར་ཐིམ་ནས་ཡུམ་སྔར་ལས་ཀྱང་སྐུ་གཟི་མདངས་དཔག་ཏུ་མེད་པ་རྒྱས་པ་
དང༌། གཞན་ཡང་སྐུ་ལ་དར་སྣ་ཚོགས་པའི་ན་བཟའ་དང༌། རིན་པོ་ཆེའི་ཁྲི་ལ་བཞུགས་པ་ལ།
བུད་མེད་གཞོན་ནུ་མ་ལང་ཚོ་རྒྱས་པ། འགའ་ཞིག་གིས། རིན་པོ་ཆེའི་སྣོད་དུ་ཟས་སྣ་ཚོགས་
ཅུང་ཟད་བཟུང་ནས་ཕུལ་བ་དང༌། ཕྱག་དང་སྐོར་བ། བསྟི་སྟང་བསམ་ལས་འདས་པ་བྱེད་པ་
དང༌། མི་ནག་པོ་གསེར་གྱི་སྐེ་རགས་བཅིང་པ། ལག་ཏུ་གྲི་གུག་བཟུང་བ་གཅིག་གི་སྒོ་བསྲུང་
བ་དང༌། ལྷའི་བུ་དང་བུ་མོ་མང་པོས་ནམ་མཁའ་ནས་སྐུ་ཁྲུས་གསོལ་ཞིང༌། མཆོད་བསྟོད་
བྱེད་པ་དང༌། སྐུ་ལ་རུས་པའི་རྒྱན་དང༌། རིན་པོ་ཆེའི་ཆས་ཀྱིས་བརྒྱན་པ་ལ་སོགས་པའི་
རྨི་ལྟས་བཟང་པོ་ཇི་སྙེད་དུ་མ་བྱུང་བ་རྣམས་ཡུམ་གྱི་མི་རྣམས་ལ་འདི་ལྟར་རྨི་ཚུལ་བཤད་
པས། མི་གཞན་མ་རྣམས་ཀྱིས་ནི་བརྗོད་མ་ཤེས་པར། ལ་ལས་ནི་རྨི་ལམ་དེ་དགའ་རྒྱུ་མེད་
པས། ཡུམ་སྐུ་རིམས་དང་བརྟན་བཞུགས་གང་དྲག་གྱིས་ཟེར། ཡིད་མི་བདེ་བ་ཙམ་བྱུང༌།
སྔགས་འཆང་ཆེན་པོ་ཚུལ་ཁྲིམས་རྒྱ་མཚོ་ཞེས་པ། མདོ་སྔགས་རིག་གནས་ཐམས་ཅད་ལ་
མཁས་པ། ཡི་དམ་གྱི་ལྷ་དང་ཆོས་སྐྱོང་གི་གྲངས་བསྙེན་མང་དུ་སོང་ཞིང༌། ཡི་དམ་གྱི་ཞལ་
གཟིགས་པ་ཞིག་ཡོད་པ། དེ་ཉིད་ཀྱི་ཞལ་ནས། བུ་དགའ་ལྷ་མོའི་རྨི་ལམ་དེ་རྣམས་ཤིན་ཏུ་
བཟང་བར་གདའ། དེང་སང་བདག་ལ་ཡང་རྨི་ལྟས་བཟང་བ་མང་དུ་བྱུང་བས། བུ་དགའ་ལྷ་
མོ་ལ་གཙང་སྦྲ་ཆེ་བར་གྱིས། མི་གང་གི་བཟའ་བཟའ་སོགས་སྤོང༌། དེ་ནས་རྨི་ལམ་སོགས་
ཀྱང་སུ་གང་ལ་ཡང་མ་བཤད་གསུངས་ནས། ཡུམ་ལ་ཤིན་དུ་བརྩེ་བར་མཛད་དོ། །དེ་ནས་
ཕག་ལོ་ཧོར་ཟླ་དང་པོའི་ཚེས་བཅུའི་སྔ་ཞོགས་ཉི་མ་རྩེ་ཤར་ལ། ཡུམ་སྙེལ་བ་ཆེར་མེད་པའི་
ངང་ནས། གྲོད་པུ་འཇའ་ཚོན་ཁ་དོག་ལྔ་ལྡན་ཡོད་པ་ཞིག་འཁྲུངས་སོ། །མེས་པོ་རིན་པོ་ཆེ་དེ་
ཉིད་ཀྱིས་ཞལ་ནས། ཨེ་ཨེ་ངེད་ཚོ་ལ་རིགས་རྒྱུད་འདི་ལྟར་ཡོང་བ་ཡིན། འདི་ཡི་ཞལ་འབྱེད་
པར་བྱེད་པ་ལ། ལྕགས་དང་ཟངས་ཀྱི་རིགས་ཀྱི་ཞལ་འབྱེད་མི་རུང་འདི་ནི་ངེས་པར་དུ་ཤིང་
20-1-22


གི་ལྡེ་མིག་གིས་སྒོ་འབྱེད་ཚུལ། ཐགས་འཐག་པའི་འུ་ལུ་ཞིག་གིས་ཞལ་འབྱེད་པ་སོགས་
བྱེད་དགོས་གསུངས་ནས། འུ་ལུ་དང་ཤིང་གི་ལྡེ་མིག་སོགས་ཀྱིས་ཞལ་ཕྱེ་བས་དེའི་ནང་ནས་
ཁྱེའུ་སྐུ་མདོག་དཀར་ལ་དམར་བའི་མདངས་དང་ལྡན་པ། སྐུ་ལ་ཤ་མཚན་ཁྲག་ཞག་གི་ཐིག་
ལེ། ལི་ཁྲིའི་ཚངས་སྐུད་ཀྱི་རྣམ་པ་ཡོད་པ། ཕྱག་ཞབས་འཁོར་ལོའི་མཚན་པ། ག་བུར་དང་
གུར་གུམ་གྱི་དྲི་མཆོག་དང་ལྡན་པ། པདྨ་རྒྱས་པའི་མཆུ་འགྲོས་དང༌། ཨུཏྤལ་མཆོག་གི་སྤྱན་
ནི་ཕྱོགས་ཐམས་ཅད་ལ་ཧྲིག་ཧྲིག་གཟིགས་ཤིང༌། ཞལ་ནས་ༀ་སུམྦྷ་ནི་སུམྦྷ་ནི་ཧཱུཾ། སོགས་
ཀྱི་སྔགས་ལན་གསུམ་དུ་མཛད་པ་ཞིག་སྐུ་བལྟམས་སོ། །ལྟེ་བ་གཅོད་པ་སོགས་ནི་མ་དགོས་
སོ། །དེ་སྐབས་ཀྱི་སྐུ་འཁོར་བ་རྣམས་ཀྱིས་འདི་ལྟ་བུ་ནི་བཟང་ངན་གང་ཡིན་ཀྱང་འདི་ནི་
ཐམས་ཅད་ནས་ཡ་མཚན་པའི་རང་བཞིན་ཡིན་པ་ལ། སྐྱེ་མ་ཐག་ཏུ་ལབ་ལབ་ཤེས་པ་ཞིག་
འདུག་ཟེར་བས། མེས་པོ་དྲུང་གི་ཞལ་ནས། ཤ་མཚན་དང་ལྟས་ཤིན་དུ་ངོ་མཚར་ཆེ་བ་འདུག
ལབ་ལབ་ནི་བསངས་སྦྱངས་ཀྱི་སྔགས་མཛད་པར་གདའ། དང་པོ་རྗེ་ཀུན་དགའ་སེང་གེ་དེ་
ཉིད་ཀྱི་དགོན་པ་འདིངས་པ་མཛད་དུས། ས་དཔྱད་དང་རྟེན་འབྲེལ་གང་ལ་དཔག་ཀྱང་ངེད་
ཀྱི་མི་བརྒྱུད་ཁ་ཅིག་ནས་རྒྱུད་སྡེ་ཐམས་ཅད་ཀྱི་བདག་པོ་རྡོ་རྗེ་འཛིན་པ་ཆེན་པོ་གཅིག་བྱོན་
པར་གདའ་གསུངས་པ་དང༌། འདི་ཉིད་ཡུམ་གྱི་ལྷུམས་སུ་ཞུགས་པའི་སྐབས་རྨི་ལྟས་བཟང་
བ་བསམ་ལས་འདས་པ་ཡང་བྱུང་བ་དང༌། ད་ནང་གཉིད་མ་སད་གོང་དུ་འཕགས་པ་འཇམ་
དཔལ་ཡིན་ཟེར་བའི། སྐྱེས་བུ་ཆེན་པོ་མཚན་དཔེས་རབ་ཏུ་བརྒྱན་པ་ཞིག་གིས། རྒྱལ་བའི་
གསུང་རབ་ཀྱི་པོ་ཏི་མང་པོ། དེང་རང་གི་མཆོད་ཁང་དུ་སྤྱན་དྲངས་ནས་འདི་རྣམས་ཀྱི་བདག་
པོ་ཁྱོད་རང་ཡིན་གསུངས་ཤིང༌། གསུང་རབ་དེ་རྣམས་ལ་བུ་དགའ་ལྷ་མོས་བཀུར་སྟི་མཆོད་
པ་བསམ་ལས་འདས་པ་བྱེད་པ་རྨིས། འདི་ཉིད་རྒྱལ་བའི་གསུང་རབ་རྣམས་ལ་མཁས་པའི་
མི་གཅིག་ཡོང་བར་འདུག །དེ་རིང་གུ་རུ་རིན་པོ་ཆེའི་དུས་བཟང་ལ་བྱོན་པས་འདིའི་མིང་
20-1-23


དར་ཅིག་ལ་སྔར་གྱི་ཆུང་སྲི་ཞིག་ཡོད་པས། དེ་གནོད་པའི་ཕྱིར་དར་ཅིག་ལ་པདྨ་སྲི་གཅོད་
རྡོ་རྗེ་ཐོགས་ཤིག །དེ་བས་མཚན་དངོས་ནི། བྱང་ཆུབ་སེམས་དཔའ་ཀུན་ཟིན་པ་ཞིག་གིས་
གནང་བ་འདུག་གསུངས་ཤིང༌། ཤིན་དུ་དགེས་པའི་གསུང་གླེང་མང་དུ་མཛད། བཙས་སྟོན་
ཀྱང་དེའི་ཉིན་ཤིན་དུ་རྒྱས་པར་མཛད་དོ། །དེ་སྐབས་མེ་ཏོག་ལྡུམ་རར་རྒྱ་མེན་ལྔ་ཙམ་ཁ་
བྱེད་ཅིང༌། ཁ་འབུས་པ་ཡང་མང་དུ་བྱུང༌། ཉེ་འཁོར་གྱི་སེ་བ་རྣམས་ལ་ཡང་མེ་ཏོག་ཐོར་རེ་
བ་ཤར། ཁམ་བུ་དང་ལོ་མ་སྣང་ཞིང་འདེབ་ཀྱི་སྐབས་དང་འདྲ་བ་བྱུང༌། འཁུར་མང་གི་མེ་
ཏོག་ཀྱང་དེའི་ཉིན་རང་ལ་མང་དུ་ཤར། ནམ་མཁའ་ལ་མེ་ཏོག་གི་ཆར་ཞག་བདུན་ཁོར་ཡུག་
ཏུ་བབས་པ་དང༌། ནམ་མཁའ་གཡའ་དག་པའི་ངང་ནས་འཇའ་འོད་ཀྱི་གུར་ཁང་བཞི་རིམ།
ཉིན་མཚན་དུ་ཡོད་པ་དང༌། བྱ་བྱེའུ་རྣམས་ཀྱང་སྐད་ཀྱི་རྣམ་འགྱུར་སྙན་པར་སྒྲོགས་ཞིང༌།
དགའ་སྤྲོ་རྣམ་འགྱུར་དཔག་ཏུ་མེད་པ་བྱེད་པ་དང༌། རི་དྭགས་རྣམས་ཀྱང་དགའ་བའི་རྩེ་
འཁོར་བྱེད་ཅིང༌། ཐམས་ཅད་ཡུལ་དེར་འཁོར་ནས་ཡོང་བ་དང༌། ད་ལྟར་བླ་བྲང་གི་ལྡུམ་ར་
ན། སེ་བ་གཞན་ལས་སྟོབས་ཆེ་བ། མེ་ཏོག་རྒྱ་མཚོའི་མདོག་ཏིང་ཕོར་ཙམ་དང༌། སེ་འབྲུ་མི་
རྒན་གྱི་མཐེབ་བོང་ལས་ཆེ་ཞིང༌། རོ་ཁ་བ་དང༌། སྐྱུར་བ་དང༌། ནུས་པ་ཚ་བ་ཡོད་པ་འདི་ཡང་
དེ་སྐབས་སུ་སྐྱེས་པ་ཡིན་པར་འདུག་ལགས། ཤིང་དེ་ཡང་གཞན་ལས་ངོ་མཚར་ཆེ་བ་ཡོད།
བྱང་ཆུབ་ལྗོན་ཤིང་གི་མཚན་ཉིད་ཡོད་པ་ནི། དང་པོ་སྐུ་བལྟམས་སྐབས་མྱུ་གུ་སྐྱེས། རབ་ཏུ་
བྱུང་སྐབས་མེ་ཏོག་ཤར། བསྙེན་པར་རྫོགས་སྐབས་སེ་འབྲུ་སྨིན། ད་ལྟ་ཡལ་ག་ལོ་འདབ་
བསམ་ལས་འདས་ཤིང༌། ད་ལྟའི་མི་དྲག་ཞན་ཀུན་གྱིས་སེ་བ་དེའི་འབྲས་བུ་མེ་ཏོག་ཚེར་མ་
ཤུན་པ་རྣམས་བྱིན་རླབས་རྟེན་རྫས་སུ་ཞུས་ཤིང༌། ཐམས་ཅད་ཡ་མཚན་དུ་བྱེད་པ་ཡོད་དོ། །
དེ་ནས་མི་ནད་ཕྱུགས་ནད་མི་འབྱུང་ཞིང༌། མི་རྒན་རྣམས་ནི་ཚེ་འཕེལ་ནས་གཞན་ཤ་ཅན་
དུ་གྱུར་པ་དང༌། ལོང་བ་རྣམས་མིག་རང་འབྱེད་དུ་གྱུར་ནས་སྔར་ལས་ཀྱང་གསལ་བར་བྱུང་
20-1-24


བ་དང༌། མཆོག་གི་སྤྲུལ་སྐུའི་འདི་ནི་ཕྱི་ནང་གི་མི་ཀུན་གྱི་གཅེས་པར་གྱུར་ཞིང༌། སྐུ་རྫི་བཞི་
དང་བཅས་ནས་བསྐྱེད་བསྲིངས་སོ། །སྐུ་ལྷུམས་སུ་ཞུགས་པ་དང༌། བལྟམས་པའི་རྣམ་ཐར་
མདོར་བསྡུས་པའི་ལེའུ་སྟེ་དང་པོའོ།། །།
༈ དེ་ནས་ཞག་བཅུ་ཙམ་ནས། ཁམས་པ་སྨྲི་ཏི་ལོང་བ་ཡིན་ཟེར་བའི། ལོང་འཁྲིད་བྱེད་
དགོས་པ་ཞིག་བྱུང༌། ང་ལྷ་ས་བསམ་ཡས་བསྐོར་བར་ཡོང་བ་ཡིན་ཏེ། འདིར་བྱང་ཆུབ་
སེམས་དཔའ་ཆེན་པོ་ས་བཅུའི་དབང་ཕྱུག་ཆེན་པོ་ཞིག་བྱོན་པ། ང་ཚོས་སྲིན་པོ་རིར་ཤེས་
ནས་འདིར་འོང་བ་ཡིན། ཁྱེད་ཀྱི་སྲས་མཇལ་དགོས་ཟེར་བས་སྐུ་གཅེས་པས་མཇལ་ཁ་མ་
གནང་བས། ཁོང་རྣམས་བླ་བྲང་ལ་ཕྱག་འཚལ་བསྐོར་བ་བྱས་སྨོན་ལམ་མང་དུ་བཏབ་ནས་
ལོག་སོང་ངོ༌། །ཞལ་ངོ་ཡུམ་སྐུ་འཁོར་རྣམས་ལ་ཁ་ངན་གཏོང་ཞིང་མ་མགུ་བར་གྱུར་ནས་
སོང་ངོ༌། །དེ་སྐབས་ཡུལ་མི་ལ་ལས་མོ་ལན་གཉིས་བཏབ་འདུག་ཀྱང༌། མོ་སྔ་ཕྱི་ཚང་མ་ཤིན་
དུ་བདེན་པར་འབྱུང་ཞིང༌། མངོན་ཤེས་དང་ལྡན་ཞིང་དཔྱད་པ་ཀུན་ལ་ཉམས་རྒྱུས་ཆེ་ཞིང་
མིང་འདོགས་ཤེས་པ་ཞིག་བྱུང༌། མོ་བཏབ་པ་ཐམས་ཅད་དུ་དེ་རྣམས་ལ་ཁྱེད་བསོད་ནམས་
ཆེ། བྱང་ཆུབ་སེམས་དཔའ་སྐུ་བལྟམས་པས་གནས་ཆུ་བཏུང་བས་ངན་སོང་མྱོང་མི་དགོས་པ་
ཡིན་པ་ལ། ཁྱེད་ཀྱི་ཡུལ་དུ་བྱང་ཆུབ་སེམས་དཔའ་བལྟམས་པ་ཡིན་པས་བསོད་ནམས་ཆེ།
འདིས་ནི་སེམས་ཅན་གྱི་དོན་དཔག་ཏུ་མེད་པར་མཛད་དེ། རྩང་དབུས་ཀྱི་སྡེ་དཔོན་བསོད་
ནམས་ཆེ་བ་རྣམས་ཀྱི་བཀུར་སྟི་ཞུ་བར་གདའ། འདི་ལ་འབྲེལ་བ་དོན་ལྡན་རང་ཡིན་ཟེར།
དེ་རྣམས་ཡུམ་ལ་མི་རྣམས་ཀྱི་འདི་བཞིན་ཟེར་བ་འདུག་ཞུས་པས་མེས་པོ་དྲུང་གི་ཞལ་ནས།
དེ་ཡ་མཚན་པར་གདའ། དང་པོ་བདག་གི་བླ་མ་དབུས་སྨྱོན་མཇལ་སྐབས་སུ། བླ་མ་དེ་རྟེན་
འབྲེལ་དང༌། མངོན་ཤེས་རང་མཛད་པ་ཞིག་གདའ་བས། བདག་ལ་ཡང་ཁྱོད་ལ་ཚ་བོ་སུས་
ཀྱང་འགྲན་མི་ནུས་པའི་མཐུ་རྩལ་ཤིན་ཏུ་ཆེ་བ་ཞིག་འབྱོན་གསུངས་པ་ན། བདག་གིས་
20-1-25


བསམ་པ་ལ་རྭ་ལོ་ཙཱ་བའི་བརྒྱུད་པ་ལ་སྔགས་འཆང་བཟང་པོ་ལོས་ཡོང་བསམ་པ་བྱུང་ཚེ། དེ་
ཡང་བླ་མས་མཁྱེན་ནས། དེ་ནི་ཁྱོད་ཀྱི་ཕ་མེས་རིགས་རྒྱུད་ཐམས་ཅད་ལས་ལྷག་པར་འགྱུར་
གསུངས། འོ་ན་ཅི་ལྟ་བུ་ཞིག་འབྱུང་ཞུས་པས། དེ་ནི་བྱང་ཆུབ་སེམས་དཔའ་སྐད་གཉིས་སྨྲ་
བ། རྡོ་རྗེའི་གླུ་ལེན་པ། སྙིགས་མའི་སྟོན་པ་ཞིག་འབྱོན་པར་འདུག་གསུངས་ཡོད་པ་དང༌། དེ་
རྣམས་མཐུན་པར་གདའ་གསུངས་སོ། །དེ་ནས་མཆོག་གི་སྤྲུལ་སྐུ་དེ་ནི་གཞན་གྱི་ཟླ་བསྐྱེད་
ལས། ཁོང་གི་ཞག་བསྐྱེད་ཆེ་བ་ཙམ་བྱུང༌། ཟླ་བ་བརྒྱད་ནས་ཐམས་ཅད་ལ་འབྱོན་ཐུབ་པ་
ཞིག་བྱུང༌། ཟླ་བ་བཅུ་གཉིས་ནས་སྨྲ་བརྗོད་མཁྱེན་ཞིང་ཤིན་ཏུ་ནས་ཀྱང་སྒོམ་པ་དང་དབང་
པོ་རབ་ཏུ་དྭངས་ཞིང་ཀློག་ཀློག་པ་དང་འབྲི་བ་དང༌། ཡི་དམ་ཆོས་སྐྱོང་གི་མངོན་རྟོགས་རྩ་
སྔགས། གཏོར་ཆོག་རྣམས་ནི་སུས་ཀྱང་སློབ་པའི་རྣམ་པ་དང༌། དཀའ་སྤྱད་གཅིག་ཀྱང་མ་
དགོས་པར་རང་ཤེས་སུ་མཁྱེན་པ་དང༌། སྔར་གྱི་བྲིས་རྙིང་གི་ཐང་སྐུ་གཤིན་རྗེ་དགྲ་ནག་
གདོང་དྲུག འཆར་ཀའི་ཚེ་བདག་ཁམས་གསུམ་རྣམ་རྒྱལ་ལ་སོགས་པའི་བྲིས་ཐང་དུ་བས་
ནག་པ་མང་པོ་ཡོད་པས། སྔར་གྱི་ཡབ་མེས་རྣམས་ཀྱི་ཐུགས་དམ་ཐང་སྐུ་ཡིན་པས། མོས་པ་
ཙམ་བྱས་ནས་བཞག་པ་མ་གཏོགས། དེ་དག་ལྷ་གང་ཡིན་དང༌། རིགས་གང་ཡིན་སུ་ལ་ཡང་
རྒྱུས་མེད་པ་ལ། མཆོག་གི་སྤྲུལ་སྐུས་ནི་ཐང་སྐུ་དེ་རྣམས་ཞལ་ཕྱེ་ནས། རེ་རེ་ནས་འདི་ལྷ་
འདི་རྣམས་ཡིན་པ་གསུངས་ནས་དེ་ཐམས་ཅད་རེ་རེ་ནས་ངོ་མཁྱེན་པ་དང་མེས་པོ་དྲུང་གིས་
མཚན་པདྨ་སྲི་གཅོད་རྡོ་རྗེ་ཕུལ་བ་ཡིན་ཀྱང༌། མི་རྣམས་ཀྱི་མཚན་མགྱོགས་བཅོས་སུ་བྱས་
ནས། དབོན་པོ་སྲི་གཅོད་ཞེས་པ་བྱུང་བས། མཚན་ནས་བོས་པའི་ཚེ། དེ་ལ་མི་དགྱེས་པའི་
ཚུལ་མཛད་ནས། ངའི་མིང་ནི་བླ་མ་འཇམ་མགོན་གྲུབ་པའི་དཔའ་བོ་དཔལ་ལྡན་ཀུན་དགའ་
གྲོལ་མཆོག་ཟེར་བ་ཡིན། དབོན་པོ་སྲིད་གཅོད་སུ་ལ་ཟེར་བ་ཡིན། ང་ལ་དེ་སྐད་མ་ཟེར་ཞིག་
གསུངས་ནས། མཚན་ནས་བོས་པ་ལ་མི་མཉེས་ཞིང་གསུངས་ལན་ཀྱང་མི་མཛད་པ་བྱུང༌།
20-1-26


དེ་སྐབས་ཀྱི་མི་རྣམས་ཀྱིས་བླ་མ་ཀུན་དགའ་གྲོལ་མཆོག་བྱ་བའི། བླ་མའི་མཚན་ནི་སྔར་
ཐོས་མ་མྱོང་ཟེར་ནས་ཡ་མཚན་དུ་གྱུར་ཏོ། །དེ་ནས་མི་རྣམས་ཀྱི་དྲི་བ་ཞུས་པས། དེ་རྣམས་
ལ་ཐོགས་པ་མེད་པར་སྐུ་ཚེ་སྔོན་གྱི་གནས་ཚུལ་དང༌། སྦྱིན་བདག་གྲྭ་རིགས་དགོན་གནས།
ཕྱག་རྫས་ཀྱི་སྐོར་དབང་རྫས། རྟེན་རྫས་ལ་སོགས་པ་གང་ན་ཅི་ཡོད་པ་རྣམས་དང༌། ཉེ་
གནས་དཔལ་འབྱོར་གྱི་ཕྱག་ཕྱི་ཞུས་ནས་སྣ་དཀར་རྩེར་ཕེབས་པ་དང༌། སྡེ་པ་བསྟན་འཛིན་
པས་ཚོགས་འཁོར་རྒྱ་ཆེན་པོ་ཞུས་པ་དང༌། དེ་ནས་རོང་རིན་དཔུངས་ཕྱོགས་ནི་མུན་པ་ནག་
པོར་འདུག་པ་དང༌། འབྲིང་གི་ཁ་ནི་འོད་གསལ་ཆེ་བར་འདུག་པས། དེར་ངེད་གཉིས་ཀྱི་ཡོང་
ནས། ལ་ཁར་སྣ་དཀར་རྩེའི་འཁྱོས་མ་ཟོས། ལྷག་མ་རྣམས་དེ་ཁར་སྤུངས་ནས་བཞག་ཡོད།
དེ་ནས་ལ་བབས་ནས་འོང་བའི་ཚེ། ཡུམ་གྱི་བ་ཕྱུགས་ལ་ཆུ་བླུད་ནས་ཟུར་ཁ་རྒྱབ་ནས་ཕར་
བྱོན་སོང་བ་ན། བདག་རྒྱུག་ནས་ཡུམ་གྱི་ན་བཟའ་ལ་འཇུག་ནས་ཡོང་བ་ཡིན། ཉེ་གནས་
དཔལ་འབྱོར་གྲོང་ཕ་གི་ལ་སོང་བ་ཡིན། གསུངས་ནས་ཕྱག་མཛུབ་ཀྱི་སྟོན་པ་སོགས་མཛད་
པ་དང༌། བདག་གི་ཉེ་གནས་གཞན་མ། དྲུང་ཀུན་ཆོས་པ་དང་མཆེད་གྲོགས་བཞུད་མ་དང༌།
ཕ་བ་ལ་སོགས་པའི་གྲྭ་པ་རྣམས་དང༌། རྟ་དྲེལ་རྣམས་ཆོས་ལུང་བྱང་རྩེ་ན་ད་ལྟ་ཡོད་གསུངས་
པ་སོགས་དྲིས་ལན་གསུང་གླེང་ཞིབ་པར་གནང་བས། སྤྱིར་རིགས་ནི་ཕུ་རགས་པའི་མི་
མཐོང་བ་དང་མྱོང་བ་ཆུང་བ་ཀུན་གྱི་ཆོས་ལུགས་ཡིན་ཞིང༌། ཁྱད་པར་འབྲང་ཕུའི་མི་རྣམས་
ནི་ཕུ་རག་གི་མི་དང༌། ཕུ་རག་གི་ཆུའི་དཔེར་སོང་ནས། གོ་ཤེས་ཆུང་བ་དང་མ་བཅོས་པའི་བྱ་
བ་ལྷུག་གྲོལ་དུ་གནས་པ། རྫི་སང་དང༌། རྣམ་དཔྱོད་ཀྱི་དྲི་མས་མ་གོས་པ་མེད་པ་ཕུ་གོང་ལ་
དང༌། མདའ་ཐེམ་པ་ལ་བྱེད་པའི་དཔེ་ལྟར་མཐོང་མྱོང་ཤིན་ཏུ་ཆུང་བ་ནི་འབྲིང་གི་མི་རྣམས་
ཀྱི་ཆོས་ལུགས་ཡིན་པས། གསུང་གླེང་དེ་དག་རྣམས་ཐོས་མ་མྱོང་བ་འདི་ཡ་རེ་མཚར། འདི་
ལབ་ལབ་མང་ལུགས་དང༌། སྐུ་སྐྱེད་ཡོད་སྟངས་གང་ལ་དཔག་ན། ལྷའི་བུ་ཆེན་པོ་གཅིག་
20-1-27


ཡིན་པ་འདྲ་འདི་ནང་གི་ཕུག་ཏུ་གཞུག་ལ། ཕྱི་ལ་མ་གཏོང་ཟེར་ནས། ནང་རང་དུ་སྦས་ཐབས་
ཀྱི་སྒོ་ནས་སྐྱེད་བསྲིངས་སོ། །དེ་ནས་ནམ་ཞིག་འཚོགས་པ་དགེ་འདུན་སྒང་པའི་ཆོས་བཞི་
འབྲང་སྣ་བཞི་རུ་ནས་གཉེར་བ་བཞི་ཡོད་པའི་ནང་ནས། དཔལ་གནས་ཆོས་བྱ་བ་ཞིག་གིས་
ཁམས་ཅུང་ཟད་མི་བདེ་བའི་ཁོང་གཉིས་འབྲང་ཕུར་སྨན་ཞུ་བ་དང༌། རྩ་དང་ཆུ་སྤྱན་ལམ་
འབེབས་པར་བྱུང་བས་དེ་སྐབས་མེས་པོ་རིན་པོ་ཆེ་དང༌། ཨ་ཁུ་ལགས་ཀྱི་སྨན་དཔྱད་ལ་
མངའ་ཤིན་ཏུ་བརྙེས་པས། ཁོང་ཇོ་གདན་པ་གཉིས་ནང་དུ་བོས་ནས་གཞི་ལེན་རྒྱས་པར་
མཛད་པ་དང༌། སྨན་སོགས་གནང་ནས་ཡོད་སྐབས་མཆོག་གི་སྤྲུལ་སྐུ་ནི་རྒྱུན་དུ་མི་ཀུན་ལ་
ཆོས་ཀྱི་ཆེ་བ་དང༌། ལས་རྒྱུ་འབྲས། འཁོར་བའི་སྡུག་བསྔལ། དལ་འབྱོར་རྙེད་དཀའི་ཆོས་
དང༌། གཞན་ཡང་དབང་རྗེས་གནང་སོགས་གནང་གིན་ཡོད་པ་དེ་ཁོང་གཉིས་ཀྱི་མཐོང་བས་
ཁོང་གཉིས་ནི་ཡ་མཚན་དུ་གྱུར་ནས་ཕྱག་འཚལ་ཞིང་བྱིན་རླབས་ཞུས། འདི་ནི་རྗེ་བཙུན་བླ་
མ་ཀུན་དགའ་གྲོལ་མཆོག་པའི་སྐུའི་སྐྱེ་བ་གསལ་བར་འདུག །འདི་དབུས་གཙང་གི་སྡེ་
དཔོན་ཆོས་སྡེ་གནད་ཆེ་བའི་བླ་མ་ཡིན། ངེད་དགེ་འདུན་སྒང་པ་རྣམས་བླ་མ་དེ་ལ་མི་ཕྱེད་
པའི་དད་པ་ཡོད། བླ་མ་དེ་ཀའི་ངེད་འཚོགས་པ་རྣམས་ལ་གསུང་ཆོས་མང་དུ་གནང་བ་ཡིན།
ངེད་གཉིས་པོས་ཀྱང་གསུང་ཆོས་མང་དུ་ཐོབ་ཟེར་ནས་ཡབ་ཡུམ་རྣམས་ལ་རྗེ་གོང་མའི་ལོ་
རྒྱུས་མང་དུ་ཞུས། འདིའི་བླ་མ་འདི་གཞན་དང་མི་འདྲ་བའི་ངེད་རང་ཚོ་བསོད་ནམས་ཆེ་ཟེར་
ནས་སོང་ངོ༌། ཁོང་གཉིས་ཀྱི་རྗེ་བཙུན་ཀུན་དགའ་གྲོལ་མཆོག་གི་ལོ་རྒྱུས་བཤད་དུ་བྱུང་བ་
མ་གཏོགས་སུ་གང་གི་ཀྱང་མི་ཤེས། དེ་ནས་ཡབ་ཕུན་ཚོགས་རྣམ་རྒྱལ་བྱ་བ༌། ཡི་དམ་
གཤིན་རྗེ་གཤེད་མཐའ་དག་དང༌། བཀའ་བརྒྱད་སྐོར་དང༌། ཕྱག་རྡོར་རྣམས་ལ་འདྲིས་ཤིང༌།
ཁྱད་པར་དུ་མ་ནིང་ལ་གྲངས་བསྙེན་མང་དུ་སོང་ཞིང༌། མ་ནིང་གི་ཞལ་ཡང་ཡང་གཟིགས་པ་
ནུས་མཐུ་ཆེ་བ། མདོར་ན་དྲག་སྔགས་ཀྱི་རྡོ་རྗེ་འཛིན་པ་ཆེན་པོ་ཡིན་པ་ལ། འཇིག་རྟེན་གྱི་བྱ་
20-1-28


བ་མཁྱེན་པ་མ་བཅོས་པའི་ཁུལ་དོག་པ། བུ་དུང་ཆེ་བ་ཞིག་ཡོད་པས། དེའི་གསུང་ནས། ངའི་
བུ་གཅིག་པོ་འདི་དཔྲལ་བའི་མིག་དང་འདྲ་བ། འདི་བླ་མའི་སྐུ་སྐྱེ་ཡིན་པ་འདུག་སུ་གང་གི་
ཟེར་བ་བྱུང་ན་སྐུ་རྒྱབ་ལ་གཏོར་སྒམ་རླང་པ་ཐུལ་ལེ་བ་ཞིག་ཡོད་པ་ངས་མི་རྒྱག་ན་དཀོན་
མཆོག་གསུམ། ངའི་བུ་གཅིག་པོ་འདི་ངེད་རང་གི་རྒྱུད་པ་གསེར་གྱི་འཕྲེང་བ་ལྟ་བུ་འདི་ཟིན་
པ། ཆོས་རྗེ་ཀུན་དགའ་སེང་གེའི་རྡོ་རྗེ་གདན་འདི་དང་སྦྱིན་བདག་ཁ་ཤས་འདི་རྣམས་སྐྱོང་
དགོས་པ་ཡིན་གསུངས་ནས། ཐམས་ཅད་ལ་གསང་ནས་བཞུགས། དེ་ནས་ཞག་ཁ་ཤས་
ཞིག་ནས་ནམ་ཞིག་ཞལ་ངོ་འཁོར་དང་བཅས་པ་རྣམས་ནང་དུ་གསོལ་བ་གཅིག་གནང་
སྐབས་ཡང་ལུང་ནས་ཡིན་ཟེར་བའི་རྣལ་འབྱོར་པ་སྐུ་ཤ་སྔོ་སང་ངེ་བ་སྐུ་ལ་རས་དང་སྟག་
ལྤགས་ཀྱི་ན་བཟའ་གསོལ་ཞིང༌། མི་ཐོད་རློན་པ་ལག་ཏུ་བཟུང་བ་རལ་པའི་ཐོད་བཅིང་པ་
ཞིག སྒོ་འབྱེད་པ་དང་ཁྱི་བཀག་པ་སོགས་མ་དགོས་པར་ནང་དུ་ཐལ་ལེ་བྱུང་བས། ཚང་མ་
ཤིན་ཏུ་འཇིགས་ཤིང་སྐྲགས་པ་ཞིག་བྱུང་བ་ལ། མཆོག་གི་སྤྲུལ་སྐུ་ནི་ཤིན་ཏུ་དགེས་པར་
མཛད་ཅིང༌། རྣལ་འབྱོར་པ་དེས་ཀྱང་མཆོག་གི་སྤྲུལ་སྐུ་ལ་ཕྱག་འཚལ་ཞིང་ཐལ་མོ་སྦྱར་ནས་
སྔར་འདྲིས་པ་བཞིན་གསུང་གླེང་མང་དུ་མཛད་ཅིང༌། གསུང་གླེང་དེ་རྣམས་ཁོ་རང་དཔོན་
སློབ་གཉིས་ཤིན་ཏུ་སྨྲ་བར་གདའ། ཞལ་ངོ་འཁོར་བཅས་རྣམས་ཀྱི་ཚིག་འབྲུ་གཅིག་ཀྱང་མ་
གོ །དེ་ནས་རྣལ་འབྱོར་པ་དེ་ཉིད་ཀྱིས་མཆོག་གི་སྤྲུལ་སྐུ་ཉིད་ལ། རྡོ་རྗེ་རྣམ་འཇོམས་ཀྱི་ཁྲུས་
ཆོག་ཅིག་ཕུལ། ལྕགས་ཀྱི་ཕུར་བུ་གྲུ་གང་བ་ཞིག་ཕུལ་ནས་ཕུར་བུ་འདི་སློབ་དཔོན་པདྨ་
འབྱུང་གནས་ཀྱིས། ཡེ་ཤེས་མཚོ་རྒྱལ་ལ་གནང་དེ་ནས་སྣ་ནམ་རྡོ་རྗེ་བདུད་འཇོམ་གྱི་བསམ་
ཡས་སུ་གཏེར་ལ་གཞུག་སྟེ། ཡེ་ཤེས་མཁའ་འགྲོ་མ་རྣམས་ཀྱིས་ལུང་བསྟན་ནས་བླ་མ་
གཡུང་སྟོན་པས་གཏེར་ནས་བཏོན་དགྲ་བགེགས་ལན་གསུམ་བསྒྲལ་ནས་ཡེ་ཤེས་ཀྱི་མཁའ་
འགྲོ་རྣམས་ཀྱི་ཕྱག་ཏུ་ཡུན་རིང་དུ་བཞུགས་པ་ཡིན། འདི་ནི་བགེགས་དང་ལོག་འདྲེན་གྱིས་
20-1-29


མི་ཚུགས་པའི་ཕྱིར་སྐུ་ལ་འཆང་བར་ཞུས་ནས་ཕུལ། དེ་ནས་ཡུམ་དྲུང་གིས་ཆང་ལེགས་ཤིག་
ཞུས་པས་རྟེན་འབྲེལ་ལེགས་གསུངས་ནས། མི་ཐོད་རློན་པ་ཤ་ཚལ་གྱིས་བཀང་ནས་ནང་
མཆོད་བྱིན་རླབས་མཛད་ནས། མཆོད་པ་སྤྲོ་བར་གསོལ་ནས་ཐེག་སོང་ངོ༌། །རྣལ་འབྱོར་པ་
དེ་ནི་སྒོ་ཕྱི་ལ་ཐོན་པ་དང་མི་མངོན་པར་གྱུར། སྒོ་ཐོན་ནས་མི་སུས་ཀྱང་མཐོང་ཚོད་སུ་ལ་མ་
བྱུང་བར་ངའི་འདིར་ཡང་སྤྲུལ་པའི་རྣལ་འབྱོར་པ་ཞིག་ཡིན་འདུག ཕུར་བུ་དེ་ཡང་མཆོག་གི་
སྤྲུལ་སྐུ་ལ་བསྲུངས་བའི་ཚུལ་དུ་ཕྱིས་མཁན་ཆེན་ལུང་རིག་རྒྱ་མཚོ་ཡི་སྤྱན་འདྲེན་ལ་ཞུས་ཀྱི་
བར་དུ་སྐུ་ལ་བཅིངས། དེ་ནས་ཕུར་བུ་དེ་འབྲང་ཕུ་དགོན་པར་བཞུགས་པ་ནི་ད་ལྟ་མཆོད་
ཁང་གི་ནང་རྟེན་ཁྲོད་ན་བཞུགས་པ་འདི་ཡིན་ནོ། །གང་ལྟར་ཡང་མཆོག་གི་སྤྲུལ་སྐུ་འདི་ཉིད་
ནི། ངན་ལོང་ལ་བྱམས་ཤིང༌། མི་ཐམས་ཅད་ལ་ཁོ་རང་རྣམས་དང་འདྲ་བའི་སྒོ་ནས་གང་ལ་
གང་འཚམས་ཀྱི་ཆོས་དང༌། སངས་རྒྱ་བའི་གདམས་ངག་རང་སྟོན་པ་དང༌། བྱིས་པ་རྣམས་ལ་
བྱིས་པ་རང་དང་མཐུན་པའི་ཆོས་སྟོན་པ་དང༌། མི་རྒན་རྣམས་ལ་མི་རྒན་རང་དང་མཐུན་པའི་
ཆོས་སྟོན་པ། མི་ཐམས་ཅད་ལ་རང་རང་དང་མཐུན་པའི་བསླབ་བྱ་དང་ཆོས་འབྲེལ་གནང་བ་
ཞིག་བྱུང༌། སེམས་ཅན་བྱོལ་སོང་རྣམས་ལ་སྙིང་རྗེ་ཆེན་པོའི་སྒོ་ནས་བྱིན་རླབས་དང་སྲོག་
ལས་སྐྱོབ་པ་མང་དུ་མཛད། བཟོ་དང་གསོ་བ་རིག་པ་ལ་སོགས་པའི་རིག་གནས་ཀྱང་མཐའ་
དག་ལ་མངའ་བརྙེས་པ་བྱུང༌། མཆོག་གི་སྤྲུལ་སྐུ་དེ་མི་ཀུན་གྱིས་ཡ་མཚན་དུ་གྱུར་པའི་ལེའུ་
སྟེ་གཉིས་པའོ།། །།
ན་མོ་གུ་རུ། སངས་རྒྱས་ཀུན་གྱི་ངོ་བོ་ཁྱབ་བདག་རྡོ་རྗེ་འཆང་ཆེན་པོ། རིག་ཀུན་གྱི་
བདག་པོ་མཐོང་ཐོས་དྲན་རེག་རྣམས་ཀྱི་དེད་དཔོན། རྗེ་བཙུན་རྡོ་རྗེ་འཆང་ཐམས་ཅད་
མཁྱེན་པ་ཆེན་པོ། སྒྲོལ་བའི་མགོན་པོ་དེ་ནི། དགུང་ལོ་གསུམ་དང་ཟླ་བ་ཕྱེད་དྲུག་བཞེས་
པའི་སྐབས་ཉིན་ཞིག་ཉི་མ་སྔ་ཕྱེད་ཙམ་ལ། ཆོས་རྗེ་བསྟན་འཛིན་པའི་བང་ཆེན་ཡིན་ཟེར་
20-1-30


བའི་གྲྭ་པ་གཉིས་བྱུང་སྟེ། འདི་ན་ངེད་དཔོན་སློབ་ཀྱི་བླ་མ་དམ་པའི་སྐུ་སྐྱེ་འཁྲུངས་ཡོད་
འདུག་ཟེར་བས། དེ་ཡིན་མིན་ལ་གཟིགས་པར་ཆོས་རྗེ་བསྟན་འཛིན་ཕེབས་ཀྱིན་ཡོད། དེ་
ཁའི་ཁྱེད་ཞལ་ངོ་གང་དུའང་མི་ཐེག་པ་ཞུ་ཟེར་བའི་སྔོན་འགྲོས་ཞིག་བྱུང༌། མཆོག་གི་སྤྲུལ་
སྐུའི་ཞལ་ནས་ང་ངོས་འཛིན་པའི་སྐལ་བ་ཁོ་ལ་མེད་དེ། ཐོག་མར་བསྟན་འཛིན་ཉི་མ་བཟང་
པོ་བྱ་བ་ཁོ་བོ་ལ་རྟེན་འབྲེལ་བཟང་བས་ཤར་རེ་བདག་གི་རྩར་ཐོང་ཞིག་གསུངས། དེ་ནས་
ཉི་མ་སྔ་ཕྱེད་ཙམ་ལ་དགོན་གནས་མཐོང་བར་རྒྱ་གླིང་དང་དུང་དཀར་གཏོང་གིན་བྱུང་བས།
དེ་ཡང་རྟེན་འབྲེལ་ལེགས་གསུངས། དེ་ནས་ཁོང་དཔོན་སློབ་རྣམས་བླ་བྲང་དུ་ཕེབས་ནས།
ཁོ་རང་ལ་བཞུགས་ཁྲི་ཆེ་བ་ཞིག་བྱས་མཆོག་གི་སྤྲུལ་སྐུ་ལ་ཁོ་རང་གི་གཡས་སུ་ས་གདན་
དང་བཅས་པའི་བཞུགས་ཁྲི་ཞིག་གི་སྟེང་དུ་བཞུགས་ཕྱག་འཚལ་བ་ནི་མ་བྱས། ཇ་ཡང་ཁོ་
རང་སྔོན་དུ་གསོལ། དེ་ནས་ཆོས་རྗེ་བསྟན་འཛིན་པས་མཆོག་གི་སྤྲུལ་སྐུ་ལ་དྲི་བ་སོགས་
གང་ས་ནས་ཞུས་རུང༌། མཆོག་གི་སྤྲུལ་སྐུའི་ངེད་བླ་མ་ཡིན། ཁོ་ངེད་ཀྱི་གྲ་རིགས་སུ་གྱུར་
པ་ཙམ་ནི་ཡིན། དེ་ལས་སྤྲོས་པ་མིན་པ་ལ་ཁོ་རང་ཁམ་ཆེ་རྒྱུ་བྱེད་པ་ནི། དགའ་མོ་མིན་པ་
འདུག་དགོངས་ནས་མི་མཉེས་པའི་ཚུལ་མཛད་ནས་བཀའ་ལུང་ཆེན་པོ་མི་གནང་བས་ཡང་
ཆོས་རྗེ་བསྟན་འཛིན་པས་སྒམ་ཆུང་ཞིག་ན་ཙན་དན་དམར་པོའི་ཌཱ་མ་རུ་གཅིག་བསྟན་ནས་
འདི་ཁྱེད་ཀྱི་ངོ་ཨི་ཤེས། འདི་གང་ཡིན་པ་གདའ་ཞུས་པས། མཆོག་གི་སྤྲུལ་སྐུའི་ཞལ་ནས་དེ་
ངོ་ལོས་ཤེས། དང་པོ་ངེད་རང་གི་ཡིན་པ་ལ། ཁྱེད་ཀྱི་བྱང་སྟག་རྩེར་བདེ་མཆོག་དུས་འཁོར་
འཇིགས་བྱེད་སོགས་ཀྱི་དབང་ཞུས་རྟེན་འབྲེལ་དང་བྱིན་རླབས་ཡིན་པས་བདག་ལ་བླ་ཆས་
འོས་རིགས་དགོས་ཚུལ་ནན་གྱི་བྱུང་བས་དེ་དུས་ངེད་ཀྱི་བླ་ཆས་ཞིག་སྦྱིན་པའི་ཙནྡན་གྱི་ཌཱ་
མ་རུ་དེ་ཡིན་པ་འདུག་གསུངས་པས། དེ་གཅིག་པོ་ཡིད་ཆེས་ནས་ཕྱག་འཚལ། དར་རས་ཀྱི་
འབུལ་བ་དགུ་ཚན་གཅིག་ཕུལ་ཡབ་ཡུམ་ལ་དར་རས་ཀྱི་ལྔ་ཚན་ཞིག་ཕུལ་ནས། ཁྱེད་ཀྱི་
20-1-31


སྔོན་ཆད་གཙང་སྦྲ་ཐོན་པ་བྱུང་འདུག་ད་རུང་གཙང་སྦྲས་ཐོན་པ་དང༌། སྐས་ཁ་སོགས་ལ་སྐུ་
བབས་མ་བྱུང་བ་མཛད་དགོས་འདི་ངེད་ཀྱི་བླ་མ་ཡིན་ད་ལྟ་སྤྱན་འདྲེན་སྔ་ནས་ཡོད་པ་འདུག།
བདག་ཁ་རག་གི་རྫོང་དུ་རབ་གནས་ཞིག་ལ་ཞག་ཁ་ཅིག་སྡོད་དེ་ནས་ཆུ་བོ་རི་དང༌། གོང་
དཀར་ཕྱོགས་ལ་འགྲོ་དེ་ཚོ་རུ་ཟླ་བ་ཁ་རེ་སྡོད་དགོས་ཤས་ཆེ། དེ་ནས་སླར་སྐུ་དྲུང་རིན་པོ་ཆེ་
ཡོང་ངོ་གསུངས་ནས་ཐེག་སོང་ངོ༌། །དེ་མ་ཐག་ཏུ་ཡབ་དྲུང་པ་ནི་ཤིན་ཏུ་མི་མཉེས་པས། ངའི་
བུ་ཆུང་ལྷ་ཕྲུག་འདྲ་བ་འདི་ལ་ཁོང་མ་ཎི་བར་སོང་བས། ཟ་འདོད་ལངས་པ་ཞིག་ཡིན་ནམ་
གསུངས་ནས་འབུལ་བ་དར་དཀར་གཅིག་གཟན་ལེགས་པོ་གཅིག་རས་ཡུག་དཀར་ཡོལ་
སྣམ་དཀར་བུབ་གཅིག་རྣམས་ཁུར་ནས་ཁོང་གི་རྗེས་ལ་སོང་ནས། ཆོས་རྗེ་བསྟན་འཛིན་པ་
ཕྱིས་བྱོན་ཁར་ཡབ་དྲུང་གི་ཆོས་རྗེ་བསྟན་འཛིན་པ་ལ་འབུལ་བ་མཛད་ནས། ངེད་རྭ་ལོ་ཙཱ་བ་
རྡོ་རྗེ་གྲགས་ཀྱི་རྒྱུད་པ་གསེར་གྱི་འཕྲེང་བ་ལྟ་བུ་ཟམ་མ་འཆད་པ་ནི། དགོན་གནས་ཐབས་
ཤེས་ཟུང་དུ་འབྲེལ་བ་འདི་སྔགས་ཀྱི་བསྟན་པ་འཛིན་ཞིང༌། དད་པ་དམ་ཚིག་དང་ལྡན་པའི་
སྦྱིན་བདག་རྒྱ་ཆེ་བར་ཡོད་པས་འདི་རྣམས་སྐྱོང་དགོངས་པ་ཡོད་པས་ད་ལྟ་ངེད་རྒས་ཁོག་
ཤ་བའི་རྭ་ལྕོ་འདྲ་བ་ཞིག་ལ་རྒྱུད་འཛིན་དཔྲལ་བའི་མིག་ལྟར་གཅེས་པ་ལྟ་བུ་འདི་ཀ་ཡིན།
གཅིག་པོ་འདི་གོང་དུ་ཞུ་བ་བཞིན་མི་གནང་བ་ཞུ། བུ་ཆུང་གཅིག་པོ་དེ་ནི་འདི་ཁར་དགོས་
པ་ཡོད་པས་ཁྱེད་ཀྱི་བླ་མའི་སྐུ་སྐྱེས་མིན་པའི་འཕྲོག་མི་གནང་བ་ཞུ། དེའི་ཞུ་རྟེན་དུ་འབུལ་
བ་འདི་རྣམས་མཛོད་གསུངས་པས་ཆོས་རྗེ་བསྟན་འཛིན་པའི་གསུངས་ནས་ཁྱེད་དེ་འདྲ་མི་
གསུངས་བ་ཞུ། ཁྱེད་ཀྱི་རྒྱུད་འཛིན་ད་རུང་ལོས་ཡོང་སྐུ་གཞོན་པར་གདའ་བ་ད་ལྟ་འདི་ནི་
རྗེ་བླ་མ་དམ་པའི་སྐུ་སྐྱེ་གསལ་བ་ཡིད་ཆེས་པ་རང་གདའ་འདི་ཉིད་རང་ཚོ་སྐུ་སྐྱེས་མིན་བྱ་
བ་ཟེར་དགོས་མེད། ཁྱེད་རང་ཞལ་ངོ་རྣམས་ཀྱང་ཕུན་སུམ་ཚོགས་པར་ཡོང༌། འབྲང་བ་
ཞེས་པའི་ཕུ་འདི་ཙམ་ཞིག ཁྱེད་ཡབ་ཡུམ་གྱི་ཕྱག་ཏུ་བླ་མ་དམ་པའི་སྤྲུལ་སྐུ་སྤྱན་འདྲེན་པའི་
20-1-32


བླུ་ཡོན་དུ་འབུལ་རྒྱུ་ཡོད་པ་ད་ལམ་བདག་གི་ཁ་རག་ཏུ་ཞག་མལ་ཞིག་བསྡད་ནས་འཕྲལ་
དུ་གོང་དཀར་དུ་ཕྱིན་ནས་བླ་མ་དམ་པའི་སྤྲུལ་སྐུ་སྤྱན་འདྲེན་པ་དང༌། བླུ་ཡོན་མི་ཟེར་འདི་
རྣམས་ཀྱི་རྒྱུ་མཚན་འབུལ་དུ་འགྲོ་དར་ཅིག་ལ་ཁྱེད་རང་གི་ཐུགས་འདོད་ཀྱང་ཡིན་ལགས་
དགོས་པ་ཞིག་འདུག་པས་བླ་མ་དམ་པའི་སྐུ་སྐྱེ་ཡིན་པ་ཕྱི་ནང་ཐམས་ཅད་དུ་གསང་བ་ཞུ་
ངེད་རྣམས་ཀྱིས་ཀྱང་གསང་ངོ༌། །ཕུགས་སུ་བླ་མའི་སྐུ་སྐྱེ་མིན་བྱ་བ་གསང་བ་ངེད་རང་ཀུན་
གྱི་མི་ཐུབ། དར་ཅིག་ངེད་རང་ཚང་མས་གསང་གསུངས་ནས་ཡབ་ཀྱི་ཕྱག་ནས་བཅང་བཅང་
མང་དུ་མཛད་ནས་ཐེགས་སོང་ངོ༌། །དེ་བཞིན་ཁ་རག་རྫོང་དུ་ཡང༌། ཁོང་རྫོང་དཔོན་རྣམས་
ཀྱིས་ཀྱང་སྐུ་སྐྱེ་ངེས་ཤེས་འདྲོང་མི་འདྲོང་གི་དྲི་བ་མཛད་འདུག་པས། ཡབ་དྲུང་དང་གསུངས་
ཆད་མཛད་པ་ལྟར། ད་ལམ་བདག་གིས་ལམ་ཞོར་ལ་འདུག་པ་དང༌། རྣ་ཐོས་ལ་ཡང་གསུང་
ཆོས་དང་དབང་རྗེས་གནང་སོགས་བསླབ་མི་དགོས་པར། རང་ཤེས་སུ་འདུག་ཟེར་བའི་སྙན་
གྲགས་བྱུང་བ་ནས། ཚུར་ལམ་ཞིག་བལྟས་པ་ཡིན་ཀྱང༌། དེ་སྐྱེས་བུ་ཆེན་པོ་གཞན་རང་མིན་
པ་འདུག་གསུངས་ནས་ཐམས་ཅད་ལ་གསང་ནས་བཞུགས་འདུག དེ་ཁའི་དབུས་ཕྱོགས་ཀྱི་
སྡེ་དཔོན་རྣམས་དང༌། གྲྭ་རིགས་ཀུན་ཐེ་ཚོམ་བྱས་ནས་ངོས་འཛིན་ཆེ་འདོན་འགྱངས་པ་ཞིག་
བྱུང༌། དེའི་ངང་ནས་ཡུན་རིང་བ་ན། མཁན་ཆེན་ལུང་རིག་རྒྱ་མཚོ་ངོས་འཛིན་སྤྱན་འདྲེན་ཞུ་
སོང་ཟེར་བ་ཀུན་ལ་གྲགས་པས་ཆོས་རྗེ་བསྟན་འཛིན་པ་ནི་ཞལ་སྐྱེངས་པ། སྤྲེའུ་ཤིང་འབྲས་
གཞན་གླེང་དཔེ་ལྟར་བྱུང༌། ཁོང་ཞལ་སྐྱེངས་པ་ཆེན་པོ་བྱུང་བའི་སྟབས་ཀྱི། དེ་རྗེ་བླ་མ་དམ་
པའི་སྐུ་སྐྱེ་མིན་ནོ་ཞེས་པའི་གླེང་གཞི་ཆེན་པོ་བཅུག་གོ །ཆོས་རྗེ་བསྟན་འཛིན་པའི་ངོས་
འཛིན་དང་མཇལ་དཀའ་ཞུས་པའི་ལེའུ་སྟེ་གསུམ་པའོ།། །།
༈ ན་མོ་གུ་རུ། བྱང་ཆུབ་སེམས་དཔའ་ཆེན་པོ་ལུང་རིག་རྒྱ་མཚོ་དེ་ཉིད་དཔལ་འཁོར་
ཆོས་སྡེ་ཆེན་པོའི་བླ་བྲང་དཀར་པོ་ན་བཞུགས་པའི་སྐབས། སྟག་ལོ་ཧོར་ཟླ་བརྒྱད་པའི་ཚེས་
20-1-33


བཅོ་ལྔའི་ཉིན་དཔལ་འཁོར་ལོ་སྡོམ་པའི་ཆོ་ག་གཅིག་མཛད་པའི་ནུབ་མོ་རྨི་ལམ་དུ་རྗེ་དེ་
ཉིད་དང་མཇལ་ཞིང༌། དགེས་པའི་འཛུམ་ཞལ་དཔག་ཏུ་མེད་པ་དང་གསུང་གླེང་དངོས་སུ་
མཇལ་བ་ལྟར་གྱི་དགའ་བ་དཔག་ཏུ་མེད་པ་མཛད་པ་བྱུང༌། ཐོ་རངས་ཁར་བུད་མེད་རྒྱན་
གོས་མཛེས་པ་ལ་སོགས་མང་པོ་ནམ་མཁའ་ལ་དགྱེས་པའི་གར་བསམ་ལས་འདས་པ་བྱེད་
ཅིང་ཐམས་ཅད་ཀྱིས་ཀྱང་མགྲིན་གཅིག་ཏུ་དཔལ་ནག་པོ་སྤྱོད་པ་འགྲོ་བ་སེམས་ཅན་གྱི་དོན་
ལ་བྱོན་པ་དེ་ནི། ལྷའི་ཡུལ་གྱི་བྱེ་བྲག་དཔའ་བོ་དང་མཁའ་འགྲོ་མའི་འདུ་ས་རྒྱ་བོད་ཀྱི་
མཁས་གྲུབ་དུ་མའི་བརྟེན་པའི་གནས་ཁ་རག་འབྲང་གི་ཕུ་ནས་བྱོན་ཡོད་པ་ལུང་རིག་རྒྱ་མཚོ་
ཞེས། རྣ་འོན་པོ་མཚན་ལྡན་བླ་མའི་དྲུང་དུ་མྱུར་བ་ཉིད་དུ་གཤེགས་པར་འཚལ། ཞེས་མགྲིན་
གཅིག་ཏུ་ཟེར་རོ། །དེ་མ་ཐག་ཏུ་མནལ་ཡང་སངས་བར་བྱུང་བ་དང༌། ནམ་ལངས་འདུག་སྐུ་
ལུས་སྔར་དང་མི་འདྲ་བའི་བདེ་བ་ཆེན་པོས་གང་བ་དང༌། ཐུགས་དགའ་སྤྲོ་བརྗོད་མི་ཤེས་པ་
ཞིག་བྱུང་བས་བདག་གི་བླ་མ་དེའི་སྤྲུལ་སྐུ་དེ་ཉིད་ཅིག་བྱོན་ཡོད་པ་ཐག་ཆོད་འདུག །མདང་
རྨི་ལམ་དུ་བྱུང་བའི་བུད་མེད་དེ་རྣམས་མཁའ་འགྲོ་མའི་ལུང་བསྟན་པ་ཞིག་ཡིན་པར་གདའ་
དགོངས་ནས་ཐུགས་དམ་གྲོལ་བ་དང༌། སྔར་དང་མི་འདྲ་བའི་སྐུ་བདེ་ཚོར་བྱེད་ཅིང༌། རབ་
གསལ་དུ་ཕེབས་པ་དང༌། ཉི་མ་ཤར་བ་དང་གསོལ་དཔོན་གྱི་ཇ་ཁྱེར་བ་དང༌། སྡེ་པ་སྣ་དཀར་
རྩེ་བས་བང་ཆེན་ཞུ་ཤོག་རྟེན་དང་བཅས་པ་འབྱོར་བ་མཉམ་དུ་བྱུང་བས། སྣ་དཀར་རྩེ་བའི་
ཞུ་ཤོག་ལ་གཟིགས་པས། འབྲང་ཕུ་ན་རྗེ་བཙུན་ཀུན་དགའ་གྲོལ་མཆོག་གི་སྐུ་སྐྱེ་ཡིད་ཆེས་
ཤིང་གསལ་བ་ངེས་ཤེས་འདྲོངས་པ་ཞིག་འདུག་པ་སོགས་ཀྱི་རྒྱས་བཤད་དུ་འདུག་པ་ཁོང་
བང་ཆེན་གཉིས་ཀྱང་སྐུ་གཞོགས་སུ་བཏང་ནས་འབྲང་ཕུའི་དྲི་བ་གནང་ནས། ཁོང་གཉིས་ཀྱི་
འབྲང་ཕུའི་གནས་ཚུལ་རྣམས་ཞུས་པས། དེ་དང་པོ་མཁན་ཆེན་རང་ལ་ཞལ་གདམས་དང༌།
ཡུལ་བཀོད་པ་ཤོག་ཁྲ་ཞིག་གནང་བ་དང་མཐུན་བྱུང་བས་མཁན་ཆེན་ནི་ཆར་འདོད་བྱེའུ་
20-1-34


འབྲུག་སྒྲ་བཞིན་དགའ་བ་བརྗོད་ཀྱི་མི་ལང་བ་བ་སྤུ་གཡོ་བ་བཞིན་དུ་བྱུང་ཞིང་མཁན་ཆེན་
གྱི་གསུངས་ནས་མདང་རྨི་ལམ་དུ་ཡང་བདག་གི་བླ་མ་དང་མཇལ་བ་ཡང་རྨིས། ད་ནང་རྟེན་
འབྲེལ་སོགས་གང་གི་ས་ནས་ཤིན་ཏུ་ལེགས། སྡེ་པ་བསྟན་འཛིན་པ་ཞེས་པའི་མིང་བཀྲ་ཡང་
ལེགས་པ་འདི་དག་དང༌། བདག་གི་བླ་མའི་ལུང་བསྟན་མཛད་པ་རྟེན་འབྲེལ་སོགས་འདི་ལྟ་
བུའི་ལེགས་གསུང་ཤིན་ཏུ་དགྱེས་པར་གྱུར། དེའི་ཉིན་རང་རྩང་བྱང་གི་གྲྭ་རིགས་སྦྱིན་བདག་
ཆེ་གྲ་རྣམས་མི་སྣ་བསྐུལ་བའི་ཕོ་ཉ་བར་བཏང༌། དེ་དག་རྣམས་ནས་ཀྱང་མཆོག་གི་སྤྲུལ་སྐུ་
སྤྱན་འདྲེན་ལ་མི་སྣ་རྟ་པ་ལྔ་དྲུག་རེ་དང༌། ཡབ་ཡུམ་ལ་འབུལ་བ་དང་བཅས་སོ་སོ་ནས་བྱུང་
མཁན་ཆེན་དཔོན་སློབ་དབུ་མཛད་པའི་རྩང་བྱང་གི་གྲྭ་རིགས་སྡེ་དཔོན་སོ་སོའི་མི་སྣ་དང་
བཅས་པའི་རྟ་པ་བརྒྱད་ཅུ་རྩ་ལྔ་ཙམ་རང་རང་སོ་སོའི་ཡོ་བྱད་དང༌། འཁོར་བུ་རྟ་མང་པོ་དང་
བཅས་ནས་ཧོར་ཟླ་དགུ་བའི་ཡར་ཚེས་བཟང་པོ་བེའུ་སྤེལ་གྱི་འགྲུབ་སྦྱོར་ལ་རྒྱལ་དཀར་
རྩེའི་དཔལ་འཁོར་བདེ་ཆེན་ནས་འབྲང་གི་ཕུ་ལ་མཆོག་གི་སྤྲུལ་སྐུ་སྤྱན་འདྲེན་པར་ཆས། སྣ་
དཀར་རྩེར་ཞག་གཅིག་མལ་ཞིག་མཛད། འབྲང་ཕུར་སྔ་མགྱོགས་སུ་རྟ་པ་གཉིས་བཏང་ནས་
དེའི་ནུབ་ཡར་གཟིགས་སུ་བཞུགས། ཁོང་སྔ་མགྱོགས་པ་རྣམས་ཀྱང་འབྲང་ཕུར་བྱོན་མཁན་
ཆེན་དཔོན་སློབ་རྣམས་མཆོག་གི་སྤྲུལ་སྐུ་སྤྱན་འདྲེན་དུ་ཕེབས་ཀྱིན་ཡོད་ངེད་ཚོར་སྙན་
འབུལ་ཞུ་རུ་ཡོང་བ་ཡིན། ད་ལམ་ཁོང་དཔོན་སློབ་ཤིན་ཏུ་རགས་བསྡུས་མང་པོ་ཡོད། དོ་
ནུབ་ཡར་གཟིགས་སུ་ཕེབ་རྒྱུ་ཡིན། སང་ཉིན་སྔ་མོར་ཕེབས་ཡོང༌། དེ་ཀའི་གྲ་བཤོམ་གནང་
དགོས་ཟེར་བས། ཡབ་ཡུམ་རྣམས་མ་མཉེས་ཤིང༌། ཁོང་དཔོན་སློབ་མང་པོ་ཞིག་འོང་ནས་
ངེད་ཀྱི་བུ་ཆུང་འཕྲོག་རྩིས་ཨི་ཡིན། ཁོང་རྟ་ཧྲག་མི་ཧྲག་བྱས་ཀྱང་ངའི་བུ་ཆུང་ཅི་ལ་འཕྲོག་རྒྱུ་
ཡིན་པ་ཁྱེད་གཉིས་པོ་ཡང་སོང་འདི་ཚོར་མ་སྡོད་ཅིག །འཕྲལ་དུ་ལོག་པ་དགའ་འབང་གི་བུ་
འཕྲོག་པ་བྱུང་ན་འདི་ལས་དགྲ་ཆེ་བ་མེད་ཁོང་རང་དཔོན་སློབ་རྣམས་ཀྱང་ངེད་སྔགས་པའི་
20-1-35


དགྲ་འདི་མི་དགའ་ངེད་ལ་ཆོས་སྐྱོང་རི་དྭགས་ལ་ཤ་ཁྱི་ལས་སྦུང་རྦད་སླ་བ་མཐུ་གློག་དམར་
ལས་མྱུར་བ་ཞིག་ཡོད། སུ་གང་ཡང་བརྙེས་པ་མ་བྱེད་ཅིག་ཟེར་ཁོང་རྣམས་ལ་ཁྲིམས་གཏམ་
མང་དུ་བསྒྱུར་ནས། ད་ལྟ་སོང་ཟེར་ཞིང་གོས་གོང་བ་ནས་བཟུང་སྟེ་ཕྱིར་ཕུད་དོ། །ལུང་པའི་
མི་རྣམས་ཀྱང་བླ་བྲང་པའི་སྲས་འདི་འཁྲུངས་ནས་ཡུལ་འདི་བཀྲ་ཤིས་པ་བྱུང༌། འདི་ནི་ཕྱིར་
འགྲོ་རུ་མི་འཇུག །འདི་ཕྱོགས་གཞན་ལ་སོང་ན་ཡུལ་འདི་ཅི་འདྲ་ཞིག་ཡོང་མི་ཤེས་ཟེར་ཞིང་
སྡུག་བསྔལ་བར་གྱུར། ཡབ་ཡུམ་རྣམས་ཤིན་ཏུ་ཡིད་མུག་པར་གྱུར་ཏེ། མཆོག་གི་སྤྲུལ་སྐུ་ནི་
ཤིན་ཏུ་མཉེས་པས། ལུང་རིག་པ་ངའི་གྲྭ་པ་དམ་ཚིག་དང་ལྡན་པ་སྨོན་ལམ་དང་འབྲེལ་བ་
ཞིག་ཡིན་པས་འདི་ང་ཡི་རྩར་ཕེབས་སུ་ཆུག ཁོང་སྔ་མགྱོགས་པ་འདི་གཉིས་ཡང་ནང་དུ་
ཁྲིད་ལ་ལྟོ་སྦྱིན་ཞིག །ཡབ་ཡུམ་རྣམས་ཀྱང་དེ་བཞིན་དུ་སྡུག་བསྔལ་བར་མ་མཛད་ཅིག།
བདག་ཀྱང་བདག་རང་གི་དགོན་པ་དང་གྲྭ་རིགས་རྣམས་དང༌། དད་ལྡན་གྱི་འགྲོ་བ་སེམས་
ཅན་གྱི་དོན་དུ་ཆོས་ཟབ་མོ་ཞིག་བྱས་ནས། རྒྱལ་ཁམས་ཐམས་ཅད་ལ་འགྲོ་བ་སེམས་ཅན་
གྱི་དོན་དུ་ཉི་ཟླ་ལྟར་འགྲོ་འོ་གསུངས་ནས། ཡབ་ཡུམ་རྣམས་ཀྱི་ཐུགས་གསོས་ཤིང༌། སྤྲོ་
སེམས་གཞན་དང་མི་འདྲ་བའི་སྒོ་ནས་ཞལ་བརྡ་མཛད་ཅིང༌། ཁོང་སྔ་མགྱོགས་པ་རྣམས་ལ་
ཞུ་ལན་རྒྱས་པར་གནང༌། སང་མཁན་ཆེན་ལུང་རིག་པ་ལ་བསུ་ཆང་གྱིས་ཤིག་གསུངས་སོ། །
སང་ཉིན་དེ་འབྲང་ལ་རུ་ཕེབས་པའི་ཚེ་མི་ལམ་རྒྱུས་ཤེས་པ་རྣམས་ཀྱི་འབྲང་ཕུ་ཟེར་བ་འདི་
ཡིན་ནོ། །ཟེར་ནས་མཛུབ་མོ་བཙུགས་པས་མཁན་ཆེན་གྱི་ཕྱག་ན་སྔོན་རྗེ་བཙུན་གོང་མའི་
ཞལ་གདམས་ཕྱག་དཔེ་ཤོག་ཁྲ་སོགས་གནང་འདུག་པ་དང་ཨི་མཐུན་ཞལ་ཕྱེ་ནས་ལེགས་
པར་གཟིགས་པས། འདི་གཉིས་ནི་ཐིག་བཏབ་པ་དང་འདྲའོ་གསུངས་ནས་འབྲང་གི་ཕྱོགས་
ལ་ཕྱག་འཚལ་བར་མཛད་ནས་ཐུགས་དགྱེས་པར་འགྱུར་ཞིང༌། དང་པོ་བླ་མ་དེ་ཉིད་ཀྱི་
བདག་ལ་ཤོག་ཁྲ་གནང་བ་དེ་ནི་ཡུལ་འདིའི་ཁོག་ཤར་གྱི་རི་མཎྜལ་ལྟར་ཡོད་པ། བྱང་རི་
20-1-36


ནག་པོ་གནམ་དུ་ལངས་པ་འདྲ་བ། ནུབ་གངས་དཀར་པོ་རྒྱལ་བློན་གྱི་ཚུལ་དུ་ཡོད་པ། མེ་
ཏོག་པདྨ་ཁ་ཕྱེ་བ་འདྲ་བ། རྩ་བ་ཆབ་གནས། ཡུལ་གྱི་ཆུ་བོ་ཐམས་ཅད་དབུས་སུ་འབབ་པ།
རི་ཀླུང་ཐམས་ཅད་སྨན་ལྗོངས་དྲི་ཞིམ་པོས་གང་བ། བྱ་རི་དྭགས་སྣ་ཚོགས་པས་མཛེས་ཤིང༌།
ཤིང་ཚེར་མ་ཅན་གྱི་ནགས་ཚལ། རྒྱབ་རི་དར་དཀར་གྱི་ཡོལ་བ་འདྲ་ཞིང༌། མདུན་རི་དཔའ་
བོ་ཆས་སུ་ཞུགས་པ་བཞིན་གནས་གཞི་བྱ་ངང་པའི་སྒོ་ང་འདྲ་བ་ཞིག་ཏུ་འབྱོན་པར་མཛད་པ་
ཡིན། ཤོག་ཁྲ་ཞལ་གདམས་གཉིས་ཀ་ནས་འདི་ཤིན་ཏུ་གསལ་བར་གདའ། འདི་ལྟ་བུ་
ཐམས་ཅད་མཁྱེན་པ་ཆེན་པོ་འཇིག་རྟེན་གྱི་ཁམས་ན་ད་ལྟ་ཞལ་གསུང་ཐོས་པ་འདི་འོ་ཅག་
ཚོ་བསོད་ནམས་ཆེ། བསྐལ་པ་བཟང་པོ་ཡིན། ན་ནིང་ནས་ལྷ་བདག་པོའི་སྐུ་སྐྱེ་ཆུ་ཤེལ་བ་དེ་
ནས་སྤྱན་དྲངས་ཟེར་བ་དེ་ཡང༌། ཡུལ་འདི་དང་འདྲ་སེ་བ་འདུག་པས་བདག་གིས་བླ་མ་དེ་
ཁོང་རྣམས་ཀྱིས་བླ་མའི་ངོས་འཛིན་བྱས་པ་མིན་ནམ་བསམ་སེམས་མ་བདེ་བ་འབྱུང་ཞིང༌།
བླ་མ་ལ་གསོལ་བ་དྲག་ཏུ་བཏབ་པས། ནུབ་གཅིག་ནམ་མཁའ་ལ་བདག་གི་བླ་མའི་ཆོས་
སྐྱོང་ཡིན་ཟེར་བའི་མི་ནག་པོ་རྟ་ནག་ལ་བཞོན་པ་ལག་ན་མདུང་དར་ནམ་མཁའ་གང་བ་ཞིག་
ཀླད་ལ་བསྐོར་ཞིང༌། ཧ་ཧའི་གད་མོ་འབྲུག་སྒྲ་ལྟར་སྒྲོགས་པ། ནམ་མཁའ་ལ་མེ་དང་གློག་
དམར་རབ་ཏུ་འཁྱུག་པ་ཞིག ཉི་མ་དབུས་ཀྱིས་ཕྱོགས་ནས་མཚན་ལྡན་བླ་མའི་སྤྲུལ་སྐུ་
བལྟམས་ནས་ཞག་ཁ་ཅིག་སོང་ངོ༌། །ངེད་སྐྱེད་བསྲིང་པའི་བར་ཆད་སྲུངས་བར་འགྲོ་བ་ཡིན་
ཟེར་ཞིང་ས་དང་བར་སྣང་ཐམས་ཅད་གཡོ་བ་ཞིག་བྱུང་བས་བླ་མ་དེ་དང་མཇལ་བ་འདུག་
བསམ་ནས་བློ་བདེ་བ་ཞིག་བྱུང༌། ཁྱད་པར་ཉི་མ་དེ་རིང་ནས་མི་བདག་གི་བསམ་དོན་ཐམས་
ཅད་འགྲུབ་བོ་གསུངས་ཞིང་དགྱེས་པའི་རྣམ་འགྱུར་མང་པོ་དང་བཅས་ཏེ། ལ་བབས་ནས་
ཕེབས་ལ་དམངས་ཀྱི་ད་ལ་ལྟ་ལ་སྣང་སྤང་འབོར་གྲགས་པའི་མདུན་དུ་ཕེབས་པའི་ཚེ་ཆོས་
འཁོར་སྡིངས་གཟིགས་པས་ཤོག་ཁྲ་ན་ཡོད་པའི་བཀོད་པ་དང༌། སྤུ་ཙམ་གྱི་འཁྲུལ་པ་མི་
20-1-37


འདུག །འདི་ལྟར་གསལ་བ་ཡོད་པ་འདི་ཐམས་ཅད་མཁྱེན་པའི་གཟིགས་པ་ཆེན་པོ་ཡིན་པ་
འདུག །དེ་ལྟར་ན་ཁོ་བོ་ཡང་བྱང་ཆུབ་སེམས་དཔའ་ཆེན་པོ་ཞིག་ཡིན་པར་གདའ་གསུངས་
ཞིང་ཞལ་འཛུམ་མུལ་གྱི་ཤོར་ནས་ཆིབས་བཤོལ་ནས་ཆོས་འཁོར་སྡིངས་ལ་ཕྱག་མང་དུ་
མཛད། ཐལ་མོ་སྦྱར་ཞབས་པུས་མོ་ས་ལ་བཙུགས་སྟེ་མཎྜལ་རྒྱས་པ་ཞིག་དང་ཡན་ལག་
བདུན་པ་ལན་གསུམ་མཛད། དེ་ནས་ཆོས་འཁོར་སྡིངས་ཐུག་གི་བར་ཞབས་ཐང་ལ་ཕེབས་
པ་ཡིན་ཞིང༌། བཀྲ་ཤིས་བྲག་ཏུ་ཕེབས་པའི་ཚེ་བླ་བྲང་ནས་བསུ་ཆང་ཆང་བརྫིའུ་ཤིན་ཏུ་ཆེ་བ་
ལྔ་ཇ་སྟིབས་རྒྱུགས་བྱུང་བས། མཁན་ཆེན་གྱིས་གསུང་ནས། ཕྱི་ནང་གི་རྟེན་འབྲེལ་ཤིན་ཏུ་
ལེགས། ད་སེར་འཕྲེང་དང༌། རོལ་མོ་སོགས་གྱིས་གསུངས་ནས། དུང་ཆེན་ཆ་གཉིས་དང་
དུང་དཀར་ཆ་གཅིག རྒྱ་གླིང་ཆ་གཅིག །མཁར་རྔ་ལ་སོགས་པའི་རོལ་མོ་མང་པོའི་སྒྲ་དང་
བཅས་ཆོས་འཁོར་སྡིངས་སུ་ཕེབས་སོ། །བཞུགས་གནས་གཡུལ་ས་ཆེན་པོ་རུ། གུར་དཀར་
པོ་བསམ་ལས་འདས་པ་ལ། ཡོལ་གོར་ཕྱི་ནང་མང་པོ་དང༌། བླ་རེ་གདུགས་དང་རྒྱལ་མཚན་
དང༌། བ་དན་དག་དར་ལྕོག་བསམ་ལས་འདས་པ་ནི། ལྷའི་ཡུལ་རྣམ་པར་རྒྱལ་བའི་ཞིང་
ཁམས་ལྟར་ལོངས་སྤྱོད་མངའ་ཐང་བརྗོད་ཀྱི་མི་ལང་བ་བྱུང་ངོ༌། །རྗེ་བཙུན་མཆོག་གི་སྤྲུལ་
སྐུ་དང༌། ཆོས་རྗེ་མཁན་ཆེན་གཉིས་ནི་གཅིག་གི་གཅིག་ལ་འཇུས་ཤིང༌། དགྱེས་པའི་གསུང་
གླེང་ཟབ་མོ་འཆད་ཅིང༌། བཞུགས་ཁྲི་ཆེན་པོ་རྒྱ་དཔངས་མཐོ་བ་རེ་ལ་བཞུགས་སོ། །ཆོས་རྗེ་
མཁན་ཆེན་གྱི་རྗེ་བཙུན་སྤྲུལ་སྐུ་ལ་ཕྱག་འཚལ་གསེར་ཞོ་ཉི་ཤུ་རྩ་ལྔ། གོས་དར་སོགས་ཀྱི་
དགུ་ཚན་གཉིས་ཕུལ། དེ་སྐབས་མེ་ཏོག་གི་ཆར་བབ་ཅིང༌། འཇའ་དཀར་པོ་གུར་ཕུབ་པ་
སོགས་བྱུང༌། དེ་ནས་ཞག་པོ་དྲུག་ནས། མཁན་ཆེན་དཔོན་སློབ་རྣམས་གོང་དཀར་སོགས་ལ་
ཞག་པོ་བདུན་ཕེབས་ནས། མཆོག་གི་སྤྲུལ་སྐུ་རྩང་ཕྱོགས་ལ་སྤྱན་འདྲེན་གྱི་དགོངས་བ་ཞུ་
བར་ཐེགས། དེ་སྐབས་འབྲང་ཕུ་གོང་དཀར་བའི་བདག་རྐྱེན་མཛད་སྐབས་ལགས། ཡར་
20-1-38


ཕེབས་དུས་ལ་ནང་དཀར་མོ་བྱ་བའི་ཞིང་ཁར་གུར་ཕུབ་ནས་དེར་ཞག་པོ་བདུན་བཞུགས་པ་
གནང༌། མཆོག་གི་སྤྲུལ་སྐུ་ཡང་ཉིན་རེ་བཞིན་གུར་ཁང་དུ་ཕེབས། གུར་དུ་ཕེབས་དུས་ནམ་
མཁའ་ནས་མེ་ཏོག་གི་ཆར་དང༌། འཇའ་འོད་དཀར་པོ་དང༌། སིལ་སྙན་དང༌། དུང་དང༌། པི་
ཝཾ་དང༌། རྔ་ཆུང་རྣམས་ཀྱི་སྐད་སྙན་པ་བསམ་ལས་འདས་པ་ཉིན་རེ་བཞིན་བྱུང༌། དེ་དུས་
ཡབ་ཡུམ་རྣམས་ལ་གསེར་ཞོ་ལྔ་བརྒྱ། རྟ་ཕོ་སེར་པོ་གཅིག བྱི་རུ་སྤོས་ཤེལ་བད་བུ་གང༌།
ཟངས་ལྕགས་གོས་དར། རས་ལ་སོགས་པའི་དགུ་ཚན་བཅུ་གཅིག་འབུལ་བ་མཛད་དེ། སྣ་
དཀར་རྩེ་ནས་སྡེ་པ་བསྟན་འཛིན་པས། སྐུ་རྫི་བ་གཅིག རྟ་འཛམ་གླིང་རྡོ་མགྱོགས་ཟེར་བའི་
རྟ་གཅིག་རྟ་རྫི་དང་བཅས་པ་མཆོག་གི་སྤྲུལ་སྐུ་ལ་ཕུལ། ཡབ་ཡུམ་རྣམས་ལ་གསེར་ཞོ་བཞི།
ཁྲོ་གཅིག་རས་དར་གྱི་དགུ་ཚན་གཅིག །ས་ཆ་ཐེམ་སྐང་ཉི་ཤུའི་བཀའ་བཞེས་དང་བཅས་
གནང༌། ཟླ་བ་བཅུ་པའི་ཚེས་བཞི་ལ་རྩང་ཕྱོགས་ལ་ཆིབས་ཁ་བསྒྱུར་བ་ཡིན་ཞིང༌། ཡུལ་གྱི་
མི་མང་པོ་དང༌། ཡབ་ཡུམ་གྱི་བཀྲ་ཤིས་བྲག་མདོ་ཐུག་གི་བར་ཕེབས་སྐྱེལ་ལ་ཕེབས། བཀྲ་
ཤིས་བྲག་ལ་ཡི་གེ་རང་བྱོན་སྔར་གཅིག་ལས་མེད་པ་ལ་དེའི་ཉིན་མཆོག་གི་སྤྲུལ་སྐུའི་ཕྱག་
གིས་རེག་པ་རྣམས་ལ་ད་ལྟ་ཡང་ཡི་གེ་གསལ་བར་ཡོད། འདི་ཡང་འཁོར་ལོ་སྡོམ་པའི་སྙིང་
པོ་ནི་ཡིན། བྱ་བྱེའུ་དང་རི་དྭགས་རྣམས་ཀྱང་སྐྱོ་བའི་རྣམ་འགྱུར་དང༌། ཕེབས་སྐྱེལ་གྱི་རྣམ་
པར་བྱུང༌། ཡུལ་གྱི་མི་རྣམས་ནི་ཐམས་ཅད་མཁྱེན་པ་ལ་ལྟ་ཞིང༌། འོ་དོད་ཆེན་པོ་འདོན་ཏེ།
ལ་ལ་སྨོན་ལམ་བཟང་པོ་འདེབས་ལ་ལ་ནི་བདག་ལྟ་བུ་སེམས་ཅན་སྐལ་བ་མེད་པ་རྣམས་
ལ་ཐུགས་རྗེས་གཟིགས་ཤིག་ཟེར་ཞིང་ལུས་ས་ལ་རྡེབ། ལ་ལ་ནི་ངེད་ཡུལ་མི་རྣམས་ད་ཅི་
འདྲ་ཞིག་ཡོང་ཟེར་གདོང་མཆི་མས་གང་ཞིང་སྨྲེ་སྔགས་འདོན་པ་བྱུང༌། ཡུལ་མི་ཕལ་ཆེར་བ་
ལ་ཐུགས་ཕྱིར་འབྲངས་དེ་ཐུབ་བྱ་རི་དྭགས་རྣམས་ཀྱིས་ཀྱང་ཕེབས་སྐྱེལ་ལ་ཡོང༌། དུས་དེ་
ནས་ལོ་བཅུ་གཅིག་བར་དུ། མཆོག་གི་སྤྲུལ་སྐུའི་འབྱོན་སྐབས་བཞིན། མི་ལ་ཤི་ཆད་མེད་པ་
20-1-39


དང༌། ལོ་ཕྱུགས་དང་འབྲས་བུ་རྒྱས་ཤིང་། བྱ་རི་དྭགས་རྣམས་ཀྱང་གོང་དུ་འཕེལ། མདོར་ན་
ཡུལ་དེ་ཡང་ཁྱད་པར་དུ་འཕགས་པ་བྱུང༌། ད་ལྟ་ཡང་མི་རྣམས་ཀྱི་གཏམ་རྒྱུད་གླེང་ཞིང་
ཐམས་ཅད་ལ་རྒྱུས་ཡོད་པ་མང་པོ་ཡོད། ལྷག་པར་བདག་ཀྱང་ཤིན་ཏུ་ངེས་པར་ཡི་གེར་བྲིས་
པ་ཡིན། དེ་ནས་མཆོག་གི་སྤྲུལ་སྐུ་དཔོན་སློབ་ཤིན་ཏུ་མང་བ་དང་བཅས། ཡར་འབྲོག་སྣ་
དཀར་རྩེར་ཕེབས་སྡེ་པ་བསྟན་འཛིན་པ་ལ་སོགས་པའི་དཔོན་གཡོག་རྣམས་ལ་བླ་མའི་རྣལ་
འབྱོར་དང༌། སྤྱན་རས་གཟིགས་ཀྱིས་སྒོམ་ལུང་གཅིག་གནང་བས། ཚང་མ་ཀུན་གྱི་ཧ་ལས་
ཤིང༌། ཆུང་ཆུང་ནས་རྣམ་སྤྱོད་དང་སྤོབས་པ་འདི་ལྟ་བུ་ཟེར་ཞིང༌། དད་པ་ཆེན་པོ་གུས་པས་
འདུད་དོ། །དེ་ནས་ཞག་བཅོ་ལྔ་ནས་རྒྱལ་རྩེར་ཕེབས། ཐུགས་སྲས་ལྷ་དབང་གྲགས་པ་དང་
རིན་པོ་ཆེ་རྡོ་རིང་པ་དང༌། རྗེ་ཀུན་དགའ་དཔལ་བཟང་ལ་སོགས་པའི་གྲྭ་རིགས་མང་པོ་དང་
མཇལ། རྒྱལ་རྩེ་བདག་པོ་ཞལ་ངོ་རྣམས་ཀྱི་ཡུན་རིང་དུ་ཞབས་ཏོག་བསམ་ལས་འདས་པ་
ཞུས། དེ་ནས་ཐམས་ཅད་ལ་སྔར་གྱི་དྲི་བ་དང་གསུང་གླེང་རྗེ་དེ་ཚོ་དང་དངོས་སུ་མཇལ་བ་
ལྟར་མཛད། དེ་ནས་སྒྲ་དང་རྩིས་ཚད་མ་རྣམ་འགྲེལ་ལ་སོགས་པའི་མདོའི་ཕྱོགས་ལ་སྦྱང་པ་
མཛད། བླ་མ་ཡང་རྗེ་བྲག་སྟོད་པ་དང༌། རྗེ་རྡོ་རིང་པ་དང༌། ཡེ་ཤེས་དབང་པོ་དང༌། ཀུན་
དགའ་བཀྲ་ཤིས་དང༌། རྗེ་བྱམས་པ་ལྷུན་གྲུབ་དང༌། རྗེ་ལུང་རིག་རྒྱ་མཚོ་ལ་སོགས་པའི་བླ་
མ་མང་དུ་བསྟེན་ནས། མདོ་རྒྱུད་ཐམས་ཅད་ལ་མཁས་ཤིང་སྐུའི་ཡོན་ཏན་དང༌། མཛད་པ་
འཕྲིན་ལས་གོང་ནས་གོང་དུ་འཕེལ་ཞིང་རྒྱས་པ་ནི། ས་ཐོག་གི་ལྷ་འདྲེ་མི་གསུམ་ཚང་མ་ལ་
རྒྱུས་ཡོད་པ་དེ་ཡིན་པར་འདུག །ཆེ་བརྗོད་མི་དགོས་ཤིང་རྗེ་བཙུན་ཐམས་ཅད་མཁྱེན་པ་རང་
གི་མཛད་པའི་ཕྱི་ནང་གསང་གསུམ་གྱི་རྣམ་ཐར་རྒྱས་བཤད་དུ་འདུག་པས་འདིར་མ་བཀོད།
འདི་ནི་དགུང་ལོ་བཞི་པ་ཡན་གྱི་རྣམ་ཐར་གསལ་ཞིང་ནོར་འཁྲུལ་གཏན་ནས་མེད་པ་ཞིག་
ཡིན། འདིས་རྒྱལ་བའི་བསྟན་པ་རིན་པོ་ཆེ་ལ་ཕན་ཞིང་འགྲོ་བ་སེམས་ཅན་ལ་ཕན་བདེ་རྒྱ་
20-1-40


ཆེན་པོར་གྱུར་ཅིག །ཅེས་རྗེ་བཙུན་བླ་མའི་རྣམ་ཐར་ཆུང་ངུ་འདི། །སྙན་ངག་སྡེབ་སྦྱོར་ལ་
སོགས་པ་མི་ཤེས་པས། །འདི་ལ་གཟིགས་པོ་རྣམས་ཀྱིས་བཟོད་པར་གསོལ་ཅིག །དགུང་ལོ་
བཞི་པ་ཡན་རྒྱུས་ཆེ་བའི་སྙན་ངག་སྡེབ་སྦྱོར་མེད་ཀྱང༌། ཀུ་སུ་ལིའི་ཡི་གེར་བཀོད་པ་ཡིན།
འདི་ནི་སྐྱེ་ཡུལ་མ་ག་དྷཱ་དང་དབྱེར་མེད་པའི་འཕགས་ཡུལ་འབྲང་ཕུ་དང་ད་ལྟ་གནས་ངེས་
མེད་བྱེད་པ། མཚན་ལྡན་བླ་མའི་མིང་གནང་བའི་ཚེ་བསྟན་དར་རྒྱས་རྡོ་རྗེ་ཕ་མས་མིང་
བཏགས་པ་ཙིཏྟ་ཞེས་པར་གྱུར་པ། ཡོངས་རྫོགས་དགེ་བསྙེན་ལ་གནས་པ་བདག་གི་
འཕགས་པ་འཇིག་རྟེན་དབང་ཕྱུག་གི་བསྒྲུབ་གནས་ཆེན་པོར་ཡོས་ལོ་ཧོར་ཟླ་ལྔ་པར་བྲིས་
སོ།། །།བཀྲ་ཤིས་ཤོག །སརྦ་མངྒ་ལཾ། དགེའོ། །
20-1-41


༄༅། །སློབ་དཔོན་ཆེན་པོ་པདྨ་འབྱུང་གནས་ཀྱི་རྣམ་པར་ཐར་པ་
གསལ་བར་བྱེད་པའི་ཡི་གེ་ཡིད་ཆེས་གསུམ་ལྡན་
ཞེས་བྱ་བ་བཞུགས།
འདི་ལ་སློབ་དཔོན་པདྨའི་རྣམ་ཐར་རྒྱ་གར་ལུགས་ཞེས་བྱའོ། །
༄༅། །ༀ་སྭཱ་སྟི། སློབ་དཔོན་ཆེན་པོ་པདྨ་འབྱུང་གནས་ཀྱི་རྣམ་པར་ཐར་པ་གསལ་བར་
བྱེད་པའི་ཡི་གེ་ཡིད་ཆེས་གསུམ་ལྡན་ཞེས་བྱ་བ། བླ་མ་ལ་ཕྱག་འཚལ་ལོ། །གང་ཞིག་རྒྱལ་
གསུང་ཆད་པ་མི་མངའ་སྒྲ་དབྱངས་རྒྱ་མཚོ་དེ་ཡང་རེས་འགའ་སློབ་དཔོན་ཚུལ་བཟུང་ནས། །
དམ་ཆོས་འོད་ཀྱིས་ཕྱོགས་ཀུན་འགེངས་ཤིང་ལ་ལར་བགྲང་ཡས་དཀྱིལ་འཁོར་འཁོར་
ལོའི་རྣམ་པར་སྟོན་མཛད་ཀྱང༌། །ནམ་ཡང་འོད་གསལ་རྡོ་རྗེའི་ཐུགས་ལས་གཡོ་མེད་པདྨ་
འབྱུང་གནས་དེ་ལ་གུས་པས་བཏུད་ནས་ནི། །གང་དེའི་གཏམ་ནི་ཚད་མར་གྱུར་པ་ཇི་ཙམ་
རྙེད་པ་དེ་ཙམ་མུ་ཅོར་སྤངས་ཏེ་བྲི་བར་བྱ། །དེ་ཡང་སྟོན་པ་ཡང་དག་པར་རྫོགས་པའི་སངས་
རྒྱས་ཀྱི་བསྟན་པ་འབྲས་བུའི་ཚུལ་ལྷག་པར་དར་བའི་སྐབས་ཤིག །ཡུལ་གྱི་མཆོག་མ་ག་
དྷཱར་རྒྱལ་པོ་དེ་བ་པཱ་ལས་རྒྱལ་སྲིད་སྐྱོང་བར་བྱེད་ལ། དཔལ་ཨོ་ཌི་ཡཱ་ནའི་ཡུལ་ན་རྒྱལ་པོ་ཧ་
ཡ་ལཱི་ལ་ཞེས་བྱ་བ་རྒྱལ་སྲིད་ཆོས་བཞིན་དུ་བྱེད་དོ། །དེའི་ཚེ་རྒྱལ་རིགས་རིག་པ་སྨྲ་བ་པོ་
དཀོན་མཆོག་གསུམ་བླ་མར་བྱེད་པ་སྲ་དོ་ཞེས་བྱ་བ་དེ་ཨཽ་ཌི་ཡཱ་ནའི་སྐད་ཀྱི་མིང་སྟེ། རྒྱ་གར་
སྐད་དུ་ན་སྲི་ག་དྷ་ར་སྟེ་མེ་ཏོག་ཕྲེང་བ་འཛིན་པ་ཞེས་བྱ་བ་ཡོད་དོ། །དེ་ལ་སྲས་མཚན་དང་
ལྡན་པ་ཁ་དོག་དཀར་ལ་དམར་བ། སྲིན་ལག་ལ་པདྨའི་རི་མོ་ཡོད་པ་པདྨ་རྒྱས་པ་ལྟ་བུའི་
20-1-42


མིག་དང་མཆུ་སྒྲོས་ཅན། པདྨ་ཨུཏྤལ་ལྕགས་ཀྱུ་ཞགས་པ་ལ་སོགས་པ་ཤ་མཚན་དགེ་བའི་
ལྟས་དུ་མ་ཡོད་པ་ཞིག་བཙས་ཏེ་བཙས་སྟོན་ལ་སོགས་པ་ཆེར་བྱས། བྲམ་ཟེ་རྣམས་ཀྱིས་
ལྟས་བརྟགས་པས་འགའ་ཞིག་གིས་རྒྱལ་སྲིད་བྱེད་པར་ལུང་བསྟན། འགའ་ཞིག་གིས་
ཁམས་ཀྱི་རྒྱལ་ཕྲན་བྱེད་པར་ལུང་བསྟན། ཁ་ཅིག་གིས་ནི་དུར་ཁྲོད་ན་གནས་ཤིང་རིགས་
ཉམས་པར་བྱེད་པར་ལུང་བསྟན། དེ་ལྟར་བཟང་ངན་མ་ངེས་པ་སྣ་ཚོགས་པར་ལུང་སྟོན་པ་
ལས་གཅིག་ཏུ་མ་ངེས་པ་ལ། འོན་ཀྱང་ཐམས་ཅད་མཐུན་པར་གཞན་གྱིས་ཐུབ་པར་དཀའ་
བར་ལུང་བསྟན་ཏོ། །དེར་ལེགས་པར་སྦྱངས་པའི་རྣལ་འབྱོར་བ་ཞིག་བྱུང་བ་ལ་དྲིས་པས།
འདི་ནི་གསང་སྔགས་ཀྱི་སྒྲུབ་པ་པོ་མཆོག་ཏུ་འགྱུར་ཞིང༌། པདྨའི་རིགས་ཀྱི་མཚན་ཉིད་
ཐམས་ཅད་ཚང་བས་ན་འོད་དཔག་མེད་པས་བྱིན་གྱིས་རློབ་པར་འགྱུར་རོ། །དེའི་ཕྱིར་འདིའི་
མིང་ནི་པདྨ་ཨ་བ་བྷ་སི་སྟེ་མཚམས་སྦྱར་བས་པདྨ་བ་བྷ་སི་ཞེས་ཐོགས་ཤིག་ཟེར་བ་ལྟར་
བྱས་སོ། །དེ་ནས་ཁྱེའུ་དེ་ཆེར་སྐྱེས་ཙམ་ན་ཡི་གེ་དང༌། བརྡའ་སྤྲོད་པ་དང༌། རྟོག་གེ་དང༌།
སྨན་དཔྱད་དང༌། བཟོ་གནས་རྣམས་དང༌། བརྟག་པ་བརྒྱད་ལ་སོགས་པ་རིག་པའི་གནས་ཕྲ་
མོ་ཐམས་ཅད་ལ་ཚེགས་མེད་པར་བློ་གྲོས་བྱང་བར་གྱུར་ཅིང༌། ཥཾ་རག་ཥ་ཞེས་བྱ་བའི་གྲོང་
ཁྱེར་གྱི་གཙུག་ལག་ཁང་དུ་འདུལ་བ་འཛིན་པ་ཞིག་ལས་སྐྱབས་སུ་འགྲོ་བ་དང༌། བསླབ་པའི་
གཞི་ལྔ་བླངས། ཆོས་མངོན་པ་དང་མདོ་སྡེའི་གཞུང་ལུགས་མང་དུ་ཐོས་པར་བྱས། སློབ་
དཔོན་སྔགས་མཁན་ཤཱནྟི་རཱུ་པ་ཞེས་པ་ལ་བྱ་སྤྱོད་རྣལ་འབྱོར་རྒྱུད་གསུམ་གྱི་དཀྱིལ་འཁོར་
མང་པོར་དབང་བསྐུར་བ་ཞུས་ཏེ་མེ་ཏོག་ཐམས་ཅད་པདྨའི་རིགས་ཀྱི་ལྷ་ཁོ་ན་ལ་ཕོག་གོ །དེ་
བཞིན་དུ་ཚོང་དཔོན་གྱི་བུ་སུ་ཁ་དེ་བ་ཞེས་བྱ་བ་གྲུབ་ཐོབ་འཕགས་པ་སྤྱན་རས་གཟིགས་
དང་གཉིས་སུ་མེད་པ་ཞིག་དང༌། སྨད་འཚོང་མ་སུ་ཁ་དྷ་དཱི་ཞེས་བྱ་བ་ཨུ་རྒྱན་གྱི་གནས་དེ་
ཉིད་དུ་བྱུང་བའི་གྲུབ་བརྙེས་ཆེན་མོ་རྡོ་རྗེ་འཆང་དངོས་ལ་ཆོས་གསན་པ་དེ་དག་ཀྱང་བསྟེན་
20-1-43


ནས་གསང་སྔགས་ནང་གི་གདམས་པ་ཡང་ཐོབ་པར་བྱས་སོ། །དེ་ནས་སྐྱེད་མོས་ཚལ་ཞིག་
ཏུ་བསྙེན་པ་དང༌། ཉེར་སྒྲུབ་དང༌། སྒྲུབ་པ་དང༌། སྒྲུབ་པ་ཆེན་པོ་རྣམས་བྱས་པས། དང་པོར་
ཐུག་ཆོམ་གྱི་སྒྲ་ཆེན་པོ་དང་འཇིགས་པའི་གཟུགས་སྣ་ཚོགས་པ་དང༌། ཚལ་ལ་མེ་ཤོར་བ་
དང༌། ཁྱིམ་ཞིག་པ་སོགས་མི་འཚམ་པའི་ལྟས་དུ་མ་བྱུང་ཡང༌། དེ་དག་གི་དབང་དུ་མ་བཏང་
བར་བསྒོམས་པས་རིག་སྔགས་གྲུབ་སྟེ་དེ་བཞིན་གཤེགས་པ་འོད་དཔག་ཏུ་མེད་པ་གཙོ་བོར་
གྱུར་བའི་སངས་རྒྱས་བྱང་སེམས་མང་པོ་མནལ་ལམ་དུ་ཞལ་གཟིགས་པ་དང༌། ཁྲོ་བོའི་རྒྱལ་
པོ་རྟ་མགྲིན་དངོས་སུ་ཡང་ཞལ་གཟིགས། མཁའ་འགྲོ་མ་དང་འབྱུང་པོ་ཕྲ་མོ་རྣམས་བྲན་དུ་
འཁོལ་ལོ། །དེ་ནས་མི་རིང་བར་ཁྱིམ་གྱི་བྱ་བ་རང་ཉིད་ཀྱིས་མཛད་པར་བབ་པའི་ཚེ། ཡབ་
ཀྱི་རིགས་ཀྱི་བྱ་བ་ལས་བྲམ་ཟེ་མདུན་ན་འདོན་རྣམས་དང་སྤྱོད་པ་མཚུངས་པར་རྒྱལ་པོའི་ཕོ་
བྲང་དུ་ཡང་ཡང་འགྲོ་ཞིང་སྲིད་ཀྱི་བྱ་བ་དང༌། སྐར་རྩིས་སོགས་ཀྱི་ལུང་སྟོན་པར་བྱེད་པ་
ལས། དུས་དེའི་ཚེ་རྒྱལ་པོ་ཧ་ཡ་ལཱི་ལའི་བུ་ཨ་ཀྵ་ལཱི་ལ་ཞེས་བྱ་བ་རྒྱལ་སྲིད་ལ་འཁོད་ནས་མི་
རིང་བ་ཞིག་ཡིན་པས། དེའི་རྒྱལ་སྲིད་དམ་པའི་ཆོས་ལ་འགོད་པར་བཞེད་དེ་རྒྱལ་པོ་ཉིད་
ཀྱང་དགེ་བ་རྒྱ་ཆེན་པོ་ལ་བསྐུལ། རང་གིས་ཀྱང་སྐྱེད་མོས་ཚལ་གྱི་དབུས་སུ་ལྷ་ཁང་དང་
དགེ་འདུན་གྱི་གནས་བྱས། མཐའ་མཆོད་རྟེན་གྱིས་བསྐོར། ལྕགས་རི་རིམ་པ་མང་པོ་བྱས་
སོ། །དེའི་ཚེ་སློབ་དཔོན་གྱི་གཡོག་ཏུ་གྱུར་པ་གཅིག་ནི་རྒྱལ་པོའི་ཡིག་མཁན་བྱེད་ལ། གཉིས་
ནི་བློན་པོར་གཏོགས་པ་ཡོད་པས་དེ་རྣམས་ངན་སེམས་སྐྱེས་ཏེ། ཡུལ་འཁོར་འདི་རྣམས་རང་
ཅག་གསུམ་གྱིས་བདག་གིར་བྱ་བའི་ཐབས་བྱའོ་ཞེས་ལྐོག་ཏུ་བགྲོས་ནས་དུས་ལན་གཅིག་
ཡིག་མཁན་དེས་རྒྱལ་པོ་ལ། པདྨ་ཨ་བ་བྷ་སི་འདི་ནི་ངེས་པར་རྒྱལ་སྲིད་བྱེད་པར་འདོད་དེ།
འདི་ཉིད་དང་འདིའི་སྐྱེད་མོས་ཚལ་ན་གནས་པའི་རབ་ཏུ་བྱུང་བ་སྟོང་ཙམ་ཡོད་པ་ཡང་དགྲ་
ཐབས་ལ་མཁས་ཤིང་གཡུལ་དུ་དཔའ་བ་ཁོ་ན་ཡིན་ལ། སྐྱེད་མོས་ཚལ་དེ་ཡང་གཙུག་ལག་
20-1-44


ཁང་དུ་བསྒྱུར་བ་ཡིན་ནོ་ཞེས་བརྫུ་བར་བྱས་མོད་ཀྱི། དོན་དུ་ནི་ལྕགས་རི་བརྟན་པོས་བསྐོར་
བ་སོགས་རྒྱལ་པོ་དང་འཐབ་པའི་དོན་དུ་བྱས་པ་ཡིན་ནོ་ཞེས་བྱས། རྒྱལ་པོས་བློན་པོ་རྣམས་
ལ་དྲིས་པས་ཀྱང་བློན་པོ་གཉིས་པོ་དེས་བསྒྲགས་པའི་རྐྱེན་དང་ཕྲག་དོག་གི་དབང་གིས་
ཐམས་ཅད་ཀྱང་དེ་དང་མཐུན་པར་སྨྲ་བ་ན། རྒྱལ་པོས་བློན་པོ་དེ་རྣམས་དམག་ཚོགས་དང་
བཅས་པ་བཏང་ངོ༌། །དེ་སྐབས་ཨུ་རྒྱན་ན་རྒྱལ་པོ་རྣམས་བྲམ་ཟེ་དང་དགེ་སྦྱོང་དང་པཎྜི་ཏ་
གསོད་པའི་ཁྲིམས་ནི་མེད་པས་མདུན་ན་འདོན་ཁྱོད་དང་ཁྱོད་ཀྱི་མཆོད་གནས་དགེ་འདུན་
རྣམས་ཡོ་བྱད་བོར་ལ་རང་ཉིད་ཡུལ་གཞན་དུ་སོངས་ཤིག་ཅེས་རྒྱལ་པོའི་བཀའ་བརྗོད་པས་
དགེ་འདུན་རྣམས་སོང་ངོ༌། །སློབ་དཔོན་ཡང་དེ་ལྟར་འགྲོ་བ་ལ། བློན་པོ་རྣམས་ཀྱིས་འདི་མ་
བསད་ན་ཕྱིས་རང་ཅག་ལ་གནོད་པ་འོང་ཟེར་ནས་གཤེད་མ་མང་པོ་བཏང༌། དེ་དག་གིས་
སློབ་དཔོན་ཞགས་པ་དང་ལྕགས་སྒྲོག་གིས་བཅིངས་པའི་ཚེ་རིག་སྔགས་ཀྱི་མཐུས་ཞགས་པ་
རྣམས་བཅད། ལྕགས་སྒྲོག་རྣམས་བཅག མཚོན་ཆ་རྣམས་བསྣུན་པས་ནི་སློབ་དཔོན་གྱི་སྐུ་
ལ་གནོད་པ་མེད་ཅིང་མཚོན་ཆ་རྣམས་དུམ་བུ་མང་པོར་ཆག མེ་ལ་བསྲེགས་པས་ཀྱང་མ་
ཚིག་ཆུ་ལ་འཕངས་པས་བྱེའུ་ཟུལ་བྱེད་ཅིང་སོང༌། གཡང་སར་འཕངས་པས་ཀྱང་མ་གནོད།
ས་བྲུས་ནས་བསྐུངས་པས་ཀྱང་ཐག་རིང་པོར་ས་ཕུག་ནས་སོང་སྟེ་བཟུང་ཡང་མ་ཐུབ་བོ། །དེ་
ནས་སློབ་དཔོན་གྲོང་ཁྱེར་རྣམས་སུ་མ་སོང་སྟེ། ཡུལ་གཞན་གྱི་དུར་ཁྲོད་ནས་དུར་ཁྲོད་དུ་རྒྱུ་
ཞིང་སྤྱོད་ལ། དུར་ཁྲོད་ཀྱི་འདྲེ་དང་སྲིན་པོ་རྣམས་ཀྱིས་གྲོགས་བྱས་ཏེ། སྔར་གྱི་རྒྱལ་པོའི་
ཡིག་མཁན་དང༌། བློན་པོ་དང་གཤེད་མ་དེ་དག་ཞག་བདུན་གྱི་ཁོངས་སུ་ལ་ལ་ཁང་ཁྱིམ་
ཚིག་ནས་ཤི། ལ་ལ་རང་སྲོག་རང་གིས་བཅད་དེ་གཅིག་ཀྱང་མ་ལུས་སོ། །རྒྱལ་པོ་ཡང་སྦྲུལ་
གདུག་པས་ཟིན་ཏེ་དུས་ལས་འདས། དེ་ནས་ཀྱང་སློབ་དཔོན་དུར་ཁྲོད་དེ་དག་ཏུ་ཡུན་རིང་དུ་
གནས་ནས་འབྱུང་པོ་དང་སྲིན་པོ་དང་ཤ་ཟ་དང་མཁའ་འགྲོ་མ་ལ་སོགས་མཐུ་ཆེན་རྣམས་
20-1-45


དང་གྲོགས་བཤེས་སུ་གྱུར། རིག་སྔགས་ཀྱི་བཟླས་པ་ལ་བརྩོན་པར་བྱས་པས་ཁམས་
གསུམ་རྣམ་རྒྱལ་དང་གཤིན་རྗེ་གཤེད་ལ་སོགས་པ་རྡོ་རྗེ་ཁྲོ་བོ་ཐམས་ཅད་ཞལ་གཟིགས་
ཤིང་གསུང་ཐོས། ནག་པོ་ཆེན་པོ་དང་མ་མོ་བདུན་སོགས་དང་མི་ལབ་པ་བཞིན་དུ་བྱེད། ཀླུ་
དང་གནོད་སྦྱིན་གདུག་པ་ཅན་ཐམས་ཅད་བྲན་དུ་འཁོལ། འཇིག་རྟེན་དང་འཇིག་རྟེན་ལས་
འདས་པའི་དྲག་སྔགས་འབུམ་ཕྲག་བརྒྱ་ལ་དབང་ཐོབ་བོ། །དེ་སྐབས་མི་མ་ཡིན་མཐུ་ཆེན་
རྣམས་དང་ལྷན་ཅིག་ཏུ་འཛམ་བུའི་གླིང་ན་གདོད་ནས་གྲུབ་པའི་དུར་ཁྲོད་ཆེན་པོ་བརྒྱད་ཡོད་
པ་རྣམས་སུ་ཡང་སྔགས་བཟླས་པའི་རྫུ་འཕྲུལ་གྱིས་ཡང་ཡང་བྱོན། དེ་དག་ཏུ་གདོད་ནས་
གྲུབ་པའི་ལྷའི་སློབ་དཔོན་བརྒྱད་དང་ཡང་མཇལ། ཐུན་མོང་གི་དངོས་གྲུབ་རེ་རེ་བསྒྲུབས་
སོ། །དེ་ཡང་དུར་ཁྲོད་གྷོ་ར་ཨནྡྷ་ཀ་ར་ན་སློབ་དཔོན་དྷ་ནུ་སྐྲ་ཏ་ཞེས་བྱ་བ་གནས། རལ་གྲིའི་
དངོས་གྲུབ་བསྒྲུབས། དུར་ཁྲོད་ཚང་ཚིང་འཁྲིགས་པར་སློབ་དཔོན་སའི་བུ་ཞེས་བྱ། དངོས་
གྲུབ་རིལ་བུའོ། །དུར་ཁྲོད་འབར་བ་འཁྲིགས་པར་སློབ་དཔོན་ཉི་མའི་བུ་ཞེས་བྱ། དངོས་
གྲུབ་མིག་སྨན་ནོ། །དུར་ཁྲོད་འཇིགས་བྱེད་ཐོད་པར་སློབ་དཔོན་ཨ་མྲྀ་ཏ་པྲ་བྷ། དངོས་གྲུབ་
མཆིལ་ལྷམ། དུར་ཁྲོད་ཨཊྚཊྚ་ཧ་ས་ན་སློབ་དཔོན་ཤི་བཾ་ཀ་ར། དངོས་གྲུབ་ནད་མཐའ་དག་
འཇོམས་པའི་སྨན། དུར་ཁྲོད་དཔལ་གྱི་ནགས་སུ་སློབ་དཔོན་བ་ར་རུ་ཙི་སྟེ་མཆོག་སྲེད།
དངོས་གྲུབ་འཆི་བ་མེད་པའི་བཅུད་ལེན། དུར་ཁྲོད་ཅ་ཅོ་ཅན་དུ་སློབ་དཔོན་གཅེར་བུ། དངོས་
གྲུབ་གཏེར་གྱི་བུམ་པ། དུར་ཁྲོད་གཏུམ་དྲག་ཏུ་སློབ་དཔོན་ངན་སྤོང༌། དངོས་གྲུབ་གསེར་
འགྱུར་རྩིའོ། །དེ་རྣམས་ཐོབ་པས་རིག་པ་འཛིན་པར་ནི་གྱུར། ད་ནི་སྤྱོད་པ་སྤྱད་དེ་སངས་
རྒྱས་ཐོབ་པར་བྱའོ་སྙམ་པ་ལ། མནལ་ལམ་དུ་སངས་རྒྱས་འོད་དཔག་ཏུ་མེད་པས། དེ་ཁོ་ན་
ཉིད་མ་མཐོང་ཞིང་མངོན་ཤེས་མེད་པར་དྲག་ཤུལ་དཔའ་བོའི་ལས་ཀྱིས་ནི་འདོད་པའི་དངོས་
གྲུབ་ལ་ཤིན་ཏུ་བར་དུ་གཅོད་པ་ཡིན་ཞིང༌། ཁྱོད་ཀྱི་འདི་ཙམ་གྱིས་ཕྱག་རྒྱ་ཆེན་པོའི་དངོས་
20-1-46


གྲུབ་མི་ཐོབ་ལ། ཁྱོད་ཀྱི་ལས་འབྲེལ་ཡོད་པའི་སློབ་དཔོན་སངས་རྒྱས་དཔལ་ཡེ་ཤེས་ཡིན་
པས་དེས་བསྟན་པ་བཞིན་དུ་སྒོམས་ཤིག་ཅེས་ལུང་བསྟན་བྱུང༌། བདག་ཉིད་ཀྱིས་རྣམ་པར་
བརྟགས་པས་ཀྱང་ནུས་པ་ནི་ཆེར་ཐོབ་ཀྱང་དེ་ཁོ་ན་ཉིད་བསྒོམ་པའི་གནས་ལུགས་ལ་ཕྱོགས་
བསླད་པར་རིག་ནས་ཡུལ་དབུས་མ་ག་དྷར་བྱོན། དེའི་ཚེ་ཡུལ་མ་ག་དྷཱ་ར་རྒྱལ་པོ་དྷཱརྨཱ་པཱ་
ལས་རྒྱལ་སྲིད་བསྐྱངས་ཏེ་ལོ་མང་དུ་ལོན། སློབ་དཔོན་སངས་རྒྱས་ཡེ་ཤེས་ཞབས་གྲུབ་པ་
བརྙེས་ནས་སློབ་མ་སྐྱོང་བའི་དུས་ཀྱི་མགོ་ལ་སླེབ། ཆོས་ཀྱི་མྱུ་གུའི་དགོན་པར་མཁན་པོ་
སངས་རྒྱས་ཡེ་ཤེས་ཞབས་ཀྱིས་མཛད་ནས་དགེ་འདུན་ཕལ་ཆེར་སྡེ་པའི་སྡེ་ལ་རབ་ཏུ་བྱུང་
ཞིང་བསྙེན་པར་རྫོགས་པར་མཛད་དོ། །འདུལ་འཛིན་གཅིག་ལ་འདུལ་བ་འབུམ་སྡེ་ལན་
གཅིག་ཉན་པས་དོན་ཐུགས་སུ་ཆུད་པར་མཛད། དེར་སློབ་དཔོན་སངས་རྒྱས་ཡེ་ཤེས་ཞབས་
ལ་ཤེས་རབ་ཀྱི་ཕ་རོལ་ཏུ་ཕྱིན་པ་གསན་པས་ལྟ་བ་ནམ་མཁའ་དང་མཉམ་པར་གྱུར། སློབ་
མ་གཞན་རྣམས་དབང་བསྐུར་ཞུ་བ་ལ་དཀའ་ཚེགས་ཆེན་པོ་དགོས་པ་ལ། སློབ་དཔོན་འདིས་
དཀའ་ཚེགས་མེད་པ་ལ་དབང་ཐམས་ཅད་རྫོགས་པར་ཐོབ། སློབ་དཔོན་ཡེ་ཤེས་ཞབས་ཀྱི་
སློབ་མ་སངས་རྒྱས་གསང་བ་ལ་ཡང་རྣལ་འབྱོར་གྱི་རྒྱུད་དུ་དབང་བསྐུར་བ་དང་མན་ངག་
ཐོབ། སློབ་དཔོན་ཡེ་ཤེས་ཞབས་ལ་འདུས་པ་དང༌། སྒྱུ་འཕྲུལ་དྲྭ་བ་དང༌། ཟླ་གསང་ཐིག་ལེ་
དང༌། སངས་རྒྱས་མཉམ་སྦྱོར་དང༌། ལས་ཀྱི་ཕྲེང་བ་སྟེ་ནང་རྒྱུད་སྡེ་ལྔ་ལ་སོགས་པ་རྒྱུད་དང་
མན་ངག་མཐའ་དག་གསན་ནོ། །དེར་དབང་གི་ཡེ་ཤེས་ཇི་བཞིན་དུ་ངོ་འཕྲོད། ཟབ་གསལ་
གཉིས་སུ་མེད་པའི་རྟོགས་པ་ལ་བརྟེན་པ་ཐོབ། གནས་ལུགས་ལ་རེག་པར་གྱུར་ནས། ད་ནི་
བདག་གིས་ཇི་ལྟར་བགྱི་ཞུས་པས། སློབ་དཔོན་ཡེ་ཤེས་ཞབས་ན་རེ། ཤར་ཕྱོགས་བྷངྒ་ལའི་
ཡུལ་གྲོང་ཁྱེར་བཎ་ཌུ་བའི་བྱང་ངོས་བར་ཤི་ཞེས་བྱ་བའི་ནགས་ཀྱི་མཐོངས་ན་རི་དེའུ་ཆུང་
ཞིག་ཡོད་པ་དེར་དཔལ་ཧེ་རུ་ཀའི་སྒྲུབ་པ་གྱིས་ཤིག །ཅེས་གསུངས་པ་ལྟར་དེར་བྱོན་ཕྱག་རྒྱ་
20-1-47


པདྨ་ཅན་ཡང་འབད་མེད་དུ་རྙེད་ནས་ཟླ་བ་དྲུག་བསྐྱེད་རྫོགས་ཟུང་འཇུག་གི་སྒྲུབ་པ་ཆེན་པོ་
ཉམས་སུ་བླངས་པས་ཕྱོགས་བཅུའི་སངས་རྒྱས་མང་པོ་རྟག་ཏུ་ཞལ་གཟིགས་ཤིང་གསུང་
འདྲི་བར་བྱུང༌། མི་རིང་བ་ན་ཕྱག་རྒྱ་ཆེན་པོ་མཆོག་གི་དངོས་གྲུབ་ཀྱི་གོ་འཕང་ཐོབ། རྡོ་རྗེའི་
སྐུ་མངོན་དུ་མཛད་དོ། །དེ་ནས་ད་ནི་སེམས་ཅན་གྱི་དོན་ཅི་རིགས་པར་བྱའོ་ཞེས་དགོངས་
ནས་ཡུལ་ཏི་རཱ་ཧུ་ཏི་ལ་སོགས་པ་ཐ་རུའི་རྒྱལ་ཁམས་རྣམས་དང༌། ཀཱ་མ་རུ་དང་བལ་པོ་ལ་
སོགས་པ་བྱང་ཕྱོགས་ཀྱི་ཡུལ་རྣམས་སུ་ལོ་ཤས་ཤིག་སྐལ་པ་དང་ལྡན་པ་ཅི་རིགས་པ་ལ་
ཆོས་སྟོན་པ་དང༌། གསེར་འགྱུར་གྱི་རྩི་དང༌། བཅུད་ལེན་གྱི་སྨན་སོགས་ཀྱིས་སྐྱེ་བོ་སྟོང་ཕྲག་
མང་པོ་ཚེ་བསྲིང་བ་དང་ལོངས་སྤྱོད་རྒྱས་པར་མཛད། ཆུ་མེད་པ་རྣམས་སུ་ཆུ་དབྱུང་བ་དང༌།
ཆུ་ཆེ་བ་རྣམས་སུ་ས་འོག་ཏུ་འཇུག་པ་སོགས་མང་དུ་མཛད་དེ། ཐ་རུའི་ཡུལ་དང༌། ཙམྤའི་
ཕྱོགས་དང༌། ཁ་སྱ་སོགས་ཀྱི་ཡུལ་ཀུན་ན་སློབ་དཔོན་འདིའི་སྒྲུབ་ཆུ་དང༌། ཆུ་ས་འོག་ནས་
རྒྱུག་བཅུག་པ་སོགས་ད་ལྟ་ཡང་མང་དུ་ཡོད། ཙམྦཱརྞའི་ཡུལ་ན་བྷ་ཏི་ཟེར་བའི་ཆུ་ཆེན་པོ་ཞིག་
ཉིན་ལམ་གཅིག་ཙམ་སའི་སྦུབས་སུ་བཅུག་པ་གཅིག་དང༌། ཚ་ལམ་ཙམ་རེ་བཅུག་པ་གཉིས་
ཡོད། དུས་དེ་ཙམ་ན་རྒྱ་གར་གྱི་ཡུལ་ལྷོ་ཕྱོགས་ཏྲི་ལིང་ག་དང་ཉེ་བ་ཏྲི་མ་ལ་ཙན་དན་གྱི་
ནགས་ན་ལཀྵ་མཱན་གྱི་གནས་དང་ཉེ་བ་ན། ཤྲཱི་བས་ཐཱ་ན་ཞེས་བྱ་བར་དབང་ཕྱུག་གི་ལིངྒ་ཁྲུ་
གང་ཙམ་ཞིག་རང་བྱུང་དུ་བྱུང༌། ཉིན་རེ་བཞིན་སྲོག་ཆགས་མང་པོ་བསད་པའི་ཁྲག་མཆོད་
བྱེད་དགོས། དེར་མུ་སྟེགས་པ་རྣམས་ཀྱིས་དམོད་པ་དྲག་པོ་བྱས་པ་ཙམ་གྱིས་ནང་པའི་སྡེ་
རྣམས་ལ་ནད་ཡམས་སོགས་མི་འཚམ་པ་དུ་མ་འབྱུང་བ་ཞིག་ཡོད། ཏྲི་མ་ལ་དེ་ཡུལ་བཟང་
ཞིག་ནང་པ་མང་ལ། དཔལ་ཨོ་ཏནྟ་པུ་རིའི་མཆོད་པ་ཕལ་ཆེ་བ་ཡང་ཡུལ་དེ་ནས་འབྱུང་བ་
ཡིན། དེ་ལ་རྟེན་རང་བྱུང་དེས་གནོད་པ་ཆེ་བ་ཞིང་བྱུང༌། ཡང་ཤར་ཕྱོགས་བྷངྒ་ལ་དང་ཉེ་བ་
བ་ལེནྡྲའི་ལྷོ་ནུབ་ན་ཡུལ་བཱ་ག་ལ་ཞེས་བྱ་བར་མཚོ་ཆུང་ངུ་ཞིག་གསར་དུ་བརྡོལ་ཞིང་དེར་མུ་
20-1-48


སྟེགས་ལ་དགའ་བའི་ཀླུ་གདུག་པ་ཅན་ཞིག་གནས་བཅས། མུ་སྟེགས་རྣམས་ཀྱིས་མཚོ་ལ་
མཆོད་གཏོར་ཕུལ་བ་ཙམ་གྱིས་གསེར་དངུལ་མུ་ཏིག་རིན་པོ་ཆེ་སོགས་དཔག་ཏུ་མེད་པ་རྙེད་
འོང་ཞིང༌། ཡོ་བྱད་དེ་དག་ལ་བརྟེན་ནས་ཤར་ཕྱོགས་ཀྱི་ཡུལ་ཚོ་ལྔར་མུ་སྟེགས་ཀྱི་གྲྭ་གསར་
མང་པོ་ཚུགས། སངས་རྒྱས་པའི་སྡེ་རྣམས་ལ་ཀླུ་དེ་ཤིན་ཏུ་ཆོས་འཕྲུལ་ཆེ་བས་གནོད་པར་
བྱུང༌། མ་ག་དྷཱའི་རྒྱལ་པོའི་ཁབ་ན་ཤེལ་གྱི་ཕ་བོང་གཅིག་ལ་མུ་སྟེགས་པའི་ལྷ་བྲམ་ཟེའི་
རིགས་ཀྱི་འབྱུང་པོ་མང་པོ་གནས་ནས་དཀའ་བས་སྒྲུབ་མི་དགོས་པར་མིག་མཐོང་དང་རྣ་
ཉན་དང་མོ་རྩིས་ཀྱི་མངོན་ཤེས་སྟོན་པ་ཞིག་ཡོད་དོ། །དེ་རྣམས་བྱུང་ནས་རིང་པོ་མ་ལོན་པའི་
སྐབས་ཡིན་པས་དེ་དག་འདུལ་བར་བཞེད་དེ། དཔལ་རྡོ་རྗེ་གདན་དུ་སྒོམ་ཁང་མཛད་ནས།
རིག་པའི་ལྷ་འཁོར་ལོས་སྒྱུར་བའི་དཀྱིལ་འཁོར་ཆེན་པོ་དྲུག་ཞལ་ཕྱེ། དཔལ་ཧེ་རུ་ཀའི་རིག་
སྔགས་ཀྱིས་བསྒྲུབས་པས་འབར་བ་དང་བཞད་པ་སོགས་གྲུབ་པའི་རྟགས་ཉི་ཤུ་རྩ་གཅིག་
བྱུང་ཞིང༌། བརྟན་པའི་ཕུར་བུ་གསུམ་བྱུང་བ་ལས་ཁྲོ་བོ་འཇིག་རྟེན་གསུམ་རྒྱལ་གྱི་ཕུར་བུ་
སློབ་དཔོན་ཉིད་ཀྱིས་བླངས་ནས། རྫུ་འཕྲུལ་གྱི་ཡུད་ཙམ་ལ་ལྷོ་ཕྱོགས་ཏྲི་མ་ལར་བྱོན། ལིང་
ག་དང་ཉེ་བའི་ཤིང་སྡོང་གཅིག་ལ་བཏབ་པས་དེ་སྐོར་གྱི་ནགས་ཐམས་ཅད་ཚིག ལིང་གའི་
ཕྱེད་ལྷག་ཙམ་ཐལ་བར་སོང༌། ཕྱིན་ཆད་ནང་པ་ལ་གནོད་པ་མ་བྱུང༌། ཨོ་ཏནྟ་པུ་རིའི་མཆོད་
པ་ཉམས་པ་རྣམས་གསོས། ཁྲོ་བོ་བདུད་རྩི་འཁྱིལ་པའི་ཕུར་པ་ནི་དཀྱིལ་འཁོར་གྱི་གཟུངས་
མ་རྣལ་འབྱོར་མ་ངང་ཚུལ་ཅན་ཞེས་བྱ་བ་ཞིག་གིས་བླངས་ཏེ་ཡུལ་བྷང་ག་ལའི་མཚོ་དེ་ལ་
བཏབ་པས། ཀླུ་འཁོར་བཅས་ཐལ་བར་སོང༌། ཞག་བདུན་ནས་མཚོ་ཡང་བསྐམས། མུ་
སྟེགས་ཀྱི་གྲྭ་དེ་རྣམས་ཞིག ཆུང་བ་དེ་སྒྲུབ་གཡོག་ཀཱ་མ་རཱུའི་རྣལ་འབྱོར་པ་རཏྣ་ཤྲི་ལ་ཞེས་
བྱ་བས་བླངས་ཏེ་རྒྱལ་པོའི་ཁབ་ཀྱི་ཤེལ་གྱི་ཕ་བོང་དེ་ལ་བཏབ་པས་སིལ་གྱིས་ཤིག །དེས་
ཀྱང་ནང་པ་ལ་ཕན་པར་བྱུང༌། དེ་གཉིས་ཀྱིས་ཀྱང་རིག་པ་འཛིན་པ་གྲུབ་སྟེ་མི་སྣང་བར་གྱུར་
20-1-49


ལ། འདོད་ན་སྤྲུལ་པའི་ལུས་ཀྱིས་སྣང་བར་ཡང་བྱེད་དོ། །སློབ་དཔོན་གྱི་ཏྲི་མ་ལར་ཅུང་ཟད་
བཞུགས་ཏེ། ཙན་དན་ལས་འཕགས་པ་སྤྱན་རས་གཟིགས་ཀྱི་སྐུ་ཞིག་བཞེངས་སོ། །བི་ཀྲ་མ་
ཤྲཱི་ལར་སྒྲོལ་མའི་ལྷ་ཁང་ཆུང་ངུ་ཞིག་མཛད། དཔལ་ཨོ་རྒྱན་དུ་ཡང་བྱོན་ཏེ་སྐལ་པ་དང་ལྡན་
པའི་སློབ་མ་ཅི་རིགས་པར་འདུས། ལྷ་ཁང་གཅིག་ཀྱང་བཞེངས། དེ་སྐབས་ཨོ་རྒྱན་དང་ཉེ་
བའི་ཡུལ་ཀ་ཙྪན་ནང་པའི་སྡེ་དར་ཞིང་བཟང་བར་ཡོད། རྒྱལ་པོ་ཡང་དགེ་བསྙེན་པཎྜི་ཏ་
ཞིག་གིས་བྱེད་པ་ཡིན་པ་ལ། ཡུལ་མོ་ལ་ཏཱ་ནའི་གྲོང་ཁྱེར་པཱ་ག་དའི་རྒྱལ་པོ་ནི་སྟག་གཟིག་ཏུ་
རུཥྐ་ཡིན་པས་དེའི་དམག་གིས་ཀཙྪའི་ཡུལ་རྣམས་བཅོམ། ཆོས་གྲྭ་འགའ་ཞིག་ནི་བཤིག།
མང་པོ་ཞིག་འཇོམས་ལ་ཁད་ཀྱི་སྐབས་སུ་ཆུ་ཀླུང་ནི་ལའི་སྟེང་ན་ཚུར་དམག་རྣམས་གྲུ་དང་
རྐྱལ་གྱི་སྦྱོར་བས་བྱུང་བ་ལ། ཆུ་ཚུར་ཁ་ནས་སློབ་དཔོན་གྱིས་ལྟ་སྟངས་དང་སྡིགས་མཛུབ་
དྲག་ཏུ་མཛད་པས་གྲུ་ཆེ་བ་བདུན་དང་ཤིང་གཅིག་པའི་གྲུ་ཆུང་ལྔ་བརྒྱ་ཙམ་དང་རྐྱལ་ཞིང་
འོང་བའི་མི་དང་བཅས་པ་ཐམས་ཅད་ཆུར་བྱིངས། ཏུ་རུཥྐའི་དཔའ་བོ་ཐམས་ཅད་ཤིའོ། །དེ་
ཕྱིན་ཆད་མི་རབས་མང་པོར་ཡུལ་དེར་ཏུ་རུཥྐའི་གནོད་པ་མ་བྱུང་ངོ༌། །དེ་ལྟར་ན་རབ་ཏུ་བྱུང་
བའི་མཚན་པདྨ་ཨཱ་ཀ་ར་སྟེ་པདྨ་འབྱུང་གནས། དཀྱིལ་འཁོར་དུ་དབང་བསྐུར་བའི་གསང་
མཚན་པདྨ་སཾ་བྷ་ཝ་སྟེ་པདྨ་འབྱུང་ལྡན། སྔོན་དུས་ཨོ་རྒྱན་གྱི་སྐྱེ་བོས་བླ་དགས་སུ་བཏགས་
པ་ཀ་མ་ལ་ཀུ་ལི་ཤ་སྟེ་པདྨ་རྡོ་རྗེ། དེ་ཡང་དཔྲལ་བ་ན་རྡོ་རྗེས་མཚན་པའི་པདྨ་རྒྱས་པའི་རི་མོ་
ཡོད་པས་སོ། །ཆུང་ངུའི་དུས་སུ་བཏགས་པའི་རིགས་ཀྱི་མིང་ནི་པདྨ་ཨ་བ་བྷ་སི་སྟེ་པདྨ་འོད་
ཟེར་ལྡན། སློབ་མ་རྣམས་ཀྱིས་གུས་པས་མཚན་གསོལ་བ་ནི་ཤྲཱི་མཧཱ་སུ་ཁ་སྟེ་དཔལ་བདེ་བ་
ཆེན་པོ། ཕྱིས་ཨོ་རྒྱན་དུ་བྱོན་པའི་སྐབས་ཨོ་ཌི་ཡཱ་ན་པ་རྣམས་ཀྱིས་མཚན་གསོལ་བ་སྔོན་གྱི་
དཔལ་བདེ་བ་ཆེན་པོ་པདྨ་བཛྲ་དང་མཛད་པ་མཚུངས་པས་པདྨ་བཛྲ་ཞེས་གྲགས་སོ། །རྒྱ་
གར་ཤར་ནུབ་ལྷོ་དང་དབུས་རྣམས་སུ་གོང་དུ་སྨོས་པ་དེ་དག་གཙོ་བོར་གྱུར་པའི་འགྲོ་དོན་ཅི་
20-1-50


རིགས་པ་ཙམ་མཛད་ལ། དེ་བས་ཆུ་བོ་གངྒཱའི་བྱང་ཕྱོགས་བལ་པོ་ཕན་ཆད་འགྲོ་བའི་དོན་
ཆེར་མཛད། དེ་བས་ཀྱང་འགྲོ་ལྡིང་གི་ཡུལ་དུ་འགྲོ་དོན་ཆེ་སྟེ་ཡུལ་ཁམས་དེ་དང་པོར་འདུལ་
བར་མཛད་པ་པོ་ཡིན་པ་དང༌། གསུང་གི་རྗེས་སུ་འབྲང་བ་རྣམ་དག་ད་ལྟའི་བར་དུ་ཤིན་ཏུ་
མང་བས་སོ། །དེ་བས་ཀྱང་བོད་ཁམས་སུ་འགྲོ་དོན་ཆེ་སྟེ། ཕྱོགས་འདིའི་སྔོན་ནས་ད་ལྟའི་
བར་གྱི་མི་དང་མི་མ་ཡིན་པའི་འགྲོ་བར་གྱུར་པ་ལ་དངོས་བརྒྱུད་ཀྱི་ཁྱད་པར་ཙམ་མ་
གཏོགས་སྤྲུལ་པའི་སྐུའི་རྣམ་པ་འདི་ཉིད་དང༌། མཚན་འདི་ཉིད་རྟགས་མཚན་དུ་བྱས་ཏེ་
གདུལ་བྱའི་ཞིང་དུ་མ་གྱུར་པ་གཅིག་ཀྱང་མེད་པ་ལྟ་བུར་སྣང་བས་སོ། །དེ་དག་ཀྱང་རྣམ་པ་
འདི་དང་མཚན་འདིས་མཚོན་པའི་དབང་དུ་བྱས་ཀྱི། གཞན་དུ་ན་ཟུང་འཇུག་ཐོབ་པ་རྣམས་
ཀྱི་རྣམ་པར་ཐར་པའི་མཐའ་ནི་སུ་ཞིག་གིས་བརྗོད་པར་ནུས། སློབ་དཔོན་འདི་ནི་གཙོ་བོར་
མི་མ་ཡིན་འདུལ་བའི་འཕྲིན་ལས་ཅན་ཡིན་ཏེ། སྔོན་སྨོས་པ་དེ་དག་ཐམས་ཅད་ལས་ཀྱང་རྔ་
ཡབ་གླིང་ཕྲན་སོགས་སུ་མི་མ་ཡིན་གྱི་འགྲོ་དོན་སྤྱོད་པ་ཆེས་ཆེར་རྒྱ་ཆེ་བ་ཡིན་ཏེ། སྔ་མ་དེ་
དག་ནི་ཡུལ་ཉི་ཚེ་བ་སྐྱེ་བོ་ཉུང་ངུ་ལ་དུས་ལོ་གྲངས་བརྒྱ་སྙེད་དང་སྟོང་སྙེད་སོགས་ཡུན་ཐུང་
དུ་ཡིན་ལ། ཕྱི་མ་འདི་ལ་ནི་ཡུལ་དང་དུས་དང་སྐྱེ་བོ་གཞལ་བར་དཀའ་བའི་ཕྱིར་རོ། །དེ་ལ་
འཕགས་ཡུལ་གྱི་གཏམ་རྒྱུད་ལ། རི་ཁ་བ་ཅན་གྱི་ཁོངས་སུ་བྱོན་ནས་ཀླུ་དང་གནོད་སྦྱིན་
གདུག་པ་ཅན་ཐམས་ཅད་བཏུལ། རྒྱལ་པོ་ལ་སོགས་པ་རྫུ་འཕྲུལ་གྱིས་དད་པར་བྱས་སོ་
ཞེས་པ་ཙམ་ལས་བོད་དུ་བྱོན་པའི་ལོ་རྒྱུས་རྒྱས་པ་མི་སྣང་ལ། དེ་ཡང་འགྲོ་ལྡིང་བཏུལ་བའི་
སྔ་ཕྱི་གང་ཡིན་མི་གསལ་ཞིང༌། བོད་པ་རྣམས་བོད་ཡུལ་ནས་སྲིན་པོའི་གླིང་ལ་བྱོན་པར་
འདོད་པ་དང༌། འགྲོ་ལྡིང་བ་རྣམས་ནི་འགྲོ་ལྡིང་ནས་དེར་བྱོན་པར་འདོད་དོ། །སྐུའི་བཀོད་པ་
གཉིས་ཅིག་ཅར་བསྟན་པར་བྱས་ཀྱང་མི་འགལ་མོད། འགྲོ་ལྡིང་དུ་བྱུང་བའི་སློབ་མ་དང་
ཡང་སློབ་འགའ་ཞིག་གིས་འགྲོ་དོན་མཛད་པའི་དུས་དང་བསྟུན་ན་བོད་དུ་བྱོན་པའི་རྗེས་སུ་
20-1-51


འགྲོ་ལྡིང་དུ་བྱོན་པར་མངོན་ནོ། །དེ་ལ་བོད་དུ་བྱོན་པའི་ལོ་རྒྱུས་རྣམ་ཐར་དང་ཐང་ཡིག་ཏུ་
གྲགས་པ་རྣམས་ལ་མང་པོ་ཞིག་སྣང་ཡང་རེ་ཞིག་བཏང་སྙོམས་སུ་བཞག རྙིང་མ་བཀའ་མར་
གྲགས་པ་རྣམས་ཀྱི་ནང་ནས་མན་ངག་ལྟ་ཕྲེང་དང༌། ཕུར་པ་དང་རྟ་མགྲིན་སོགས་ཀྱི་ཆོས་
སྐོར་མང་པོ་ཞིག་ལ་ལོ་རྒྱུས་སྤྱི་ཁོག་མཚུངས་པ་ཡིད་བརྟན་རུང་བར་སྣང་ལ། ནང་སེལ་མི་
འདྲ་ཙམ་ནི་ཤིན་ཏུ་མང་ངོ༌། །དེ་ཡང་སློབ་དཔོན་བརྫུས་སྐྱེས་སུ་གླེང་བ་དང༌། མངལ་སྐྱེས་སུ་
གླེང་བ་དང༌། འདམ་ཁར་གླེང་བ་སོགས་ཅི་རིགས་ཡོད་ལ། བོད་དུ་ཇི་ཙམ་བཞུགས་པ་ཡང་
འགའ་ཞིག་ལས་ལོ་གསུམ། འགའ་ཞིག་ལས་ལོ་དྲུག གཞན་འགའ་ལས་ལོ་བཅུ་གཉིས། ཁ་
ཅིག་བཅོ་བརྒྱད་ཅེས་སོགས་ཡོད་ལ། གཏེར་མ་རྣམས་ལས་ནི་ཉུང་བ་རྣམས་ལྔ་བཅུ་དང༌།
ཕལ་ཆེར་ལས་བརྒྱ་ལྷག་པར་འཆད་དོ། །དེ་ལ་དོན་གཞན་གདུལ་བྱ་སྣང་བ་དག་པ་རྣམས་
ཀྱི་སྣང་ངོར་བསམས་ན་ནི་ད་ལྟར་ཡང་བཞུགས་ཤིང༌། ཞིང་ཁམས་ཀུན་ཏུ་སྐུའི་སྣང་བ་ཅིག་
ཅར་རྟག་ཏུ་སྟོན་པའང་ཡིན་པས་ཕྱོགས་གཅིག་ནས་ཚད་གང་ལྟར་བྱས་ཀྱང་རུང་མོད། འོན་
ཀྱང་སྔ་ཕྱིའི་དུས་སྒྲིག་པ་སོགས་ལ་ནི་དེ་མི་རུང་སྟེ། འདི་ལ་ནི་དེ་སྐབས་ཀྱི་མིའི་འགྲོ་བ་ཕལ་
པ་རྣམས་ཀྱི་སྤྱི་མཐུན་པའི་སྣང་ངོར་སྣང་དུ་རུང་བ་ཞིག་གི་སྟེང་ནས་འཇོག་དགོས་པའི་ཕྱིར་
རོ། །དེས་ན་རྒྱལ་པོའི་བཀའ་ཆེམས་ཀྱི་ཡི་གེ་རྣམ་པ་གསུམ་ཡོད་པར་གྲགས་པའི་རྦ་བཞེད་
དངོས་དང༌། རྦ་བཞེད་ལ་སྔ་དར་གྱི་འཕྲོ་མཐུད་ཅིང༌། དེ་ལའང་བཀའ་གདམས་ཕྱོགས་པ་
ཞིག་གིས་ཁ་སྐོང་བྱས་པ་ཞིག་དང༌། རྦ་བཞེད་རྣམས་མཐོང་ཞིང༌། རྒྱལ་བཞེད་ཀྱི་དོན་བླངས་
ནས་བཀོད་པའི་ལོ་རྒྱུས་ཀྱི་ཡིག་རྙིང་འགའ་རེ་ཡང་མཐོང་བ་ལས་རྒྱས་བསྡུས་ཕྲན་བུ་མ་
གཏོགས་ཕལ་ཆེར་གཏམ་རྒྱུད་ངོ་བོ་གཅིག་པ་ཁོ་ནར་སྣང་ལ། མཁས་མཆོག་དམ་པ་ཀུན་
གྱིས་ཀྱང་དེ་གསུམ་ཡིད་ཆེས་ཀྱི་ཁུངས་སུ་མཛད་ཅིང༌། དེའི་ནང་གི་སློབ་དཔོན་པདྨའི་ལོ་
རྒྱུས་རྣམས་ནི་སྔ་འགྱུར་བཀའ་མ་པ་རྣམས་ཀྱི་ལོ་རྒྱུས་ཕལ་ཆེ་བ་དང་སྤྱི་འགྲོས་འགྲིག་པར་
20-1-52


ཡང་སྣང་ངོ༌། །དབའ་བཞེད་དང་རྦ་བཞེད་ཡི་གེ་འདོན་ཚུལ་ཙམ་སྟེ་ངོ་བོ་གཅིག་ལ། འབའ་
བཞེད་བྱ་བ་གཞན་ཞིག་ཡོད་ཟེར་ནའང་དེའི་ལུགས་འདི་ཡིན་བྱ་བ་མ་མཐོང་ལ། རྦ་བཞེད་
ལ་ཡིག་ནོར་བྱུང་བའི་གནས་ཀྱང་སྲིད་དོ། །འདིར་དེ་དག་གུང་སྤྲོས་ཏེ་བཤད་ན་ཤིན་ཏུ་ཡིད་
ཆེས་པའི་གནས་སུ་འགྱུར་རོ། །དེ་ཡང་དེའི་ཚེ་སྤྲུལ་པའི་རྒྱལ་པོ་བཙན་པོ་ཁྲི་སྲོང་ལྡེ་བཙན་
གྱིས་བོད་ཡུལ་དུ་དམ་ཆོས་དར་བར་བཞེད་ནས། ཨཱཙཱཪྻ་བོ་དྷི་ས་ཏྭ་ཞེས་གྲགས་པ་ཞི་བ་འཚོ་
ཞེས་ཀྱང་བྱ། སློབ་དཔོན་དྷརྨ་ཤཱནྟི་གྷོ་ཥ་ཞེས་བྱ་བ་སྤྱན་དྲངས་ཏེ་ཕོ་བྲང་ཀླུང་ཚུགས་ཞེས་བྱ་
བའི་ཡང་ཐོག་དར་གྱི་གུར་ཕུབ་པར་བཞུགས་སུ་བཅུག ཟླ་བ་བཞིར་དགེ་བ་བཅུ་རྟེན་འབྲེལ་
བཅུ་གཉིས་ཁམས་བཅོ་བརྒྱད་རྣམས་ལས་བརྩམས་ཏེ་སློབ་དཔོན་གྱིས་ཆོས་བཤད་པས།
བོད་འདྲེ་རྣམས་ཁྲོས་ནས་ཕོ་བྲང་འཕང་ཐང་ཆུས་ཁྱེར། དམར་པོ་རི་ལ་ཐོག་བརྒྱབས། ཡུལ་
ཁམས་རྣམས་སུ་མི་ནད་ཕྱུགས་ནད་དང༌། སད་དང་སེར་བ་ཆེར་བྱུང་བས། བོད་འབངས་
ཐམས་ཅད་ཆོས་བྱས་པས་ལན་ཟེར་ཆོས་བྱར་མ་བཏུབ་ནས། རྒྱལ་པོ་རྦ་གསལ་སྣང་སོགས་
ཆོས་བློན་ལྔ་དང་ལྷན་ཅིག་ཨཱཙཱཪྻའི་དྲུང་དུ་སོང༌། གསེར་ཕྱེ་བྲེ་གང་ཡོན་དུ་ཕུལ། དེ་འདྲ་
ལན་གསུམ་སོང་ནས་འདི་སྐད་ཅེས། ཨཱཙཱཪྻ་རེ་ཞིག་བལ་པོའི་ཡུལ་དུ་བཞུད་ལ། དེ་བར་
རྒྱལ་པོས་བོད་མི་རྣམས་ལྷ་ཆོས་མི་བྱེད་དུ་མི་རུང་བར་གླེང༌། རྔན་པ་སྦྱིན། ཞང་བློན་རྣམས་
ཐབས་ཀྱིས་བྲིད་ནས། ཆོས་བྱེད་དུ་བཏུབ་པའི་ཚེ་སླར་ཡང་སྤྱན་འདྲེན་ནོ་ཞེས་ཞུས། ཨཱ་ཙཱརྱ་
ན་རེ། བོད་ཀྱི་འདྲེ་སྲིན་གདུག་པ་ཅན་རྣམས་འདུལ་བ་ལ་སྔགས་མཁན་པདྨ་སཾ་བྷ་བ་ཞེས་
བགྱི་བ་ད་ལྟ་ས་སྟེང་ན་མཐུ་རྩལ་ཆེ་ཤོས་དེ་སྤྱན་འདྲེན་དགོས་གསུངས། གསེར་ཕྱེ་ཁྱོར་བ་
གང་བལ་པོའི་རྒྱལ་པོ་ལ་སྦྱིན་དགོས་གསུངས་ནས་བསྣམས། ལྷག་མ་བཙན་པོ་ཉིད་ལ་
གཏད། ཕྱི་ལྟར་དུ་བསྐྲད་པ་ལྟར་བྱས་ཏེ་ཡར་བཞུད་དོ། །ལང་གྲོ་སྣ་ར་དང༌། གསལ་སྣང་
གཉིས་ཀྱིས་བལ་ཡུལ་དུ་བསྐྱལ། སླར་ལྡོག་ནས་རྦ་གསལ་སྣང་ཆོས་ཀྱི་སྤྱན་པར་བསྒོས། ཕོ་
20-1-53


ཉ་སུམ་ཅུས་བསྐོར་ཏེ། ཆོས་ཀྱི་དོན་ལ་རྒྱ་ནག་ཏུ་ཕོ་ཉར་ཕྱིན། དེ་བར་ཞང་བློན་ཐམས་ཅད་
བསྡུས་ནས། ཆོས་བྱེད་པའི་ཆད་སོ་གྲུབ། སློབ་དཔོན་སྤྱན་མ་འདྲོངས་པའི་དུས་སྐབས་དེར་
ཕོ་ཉ་རྣམས་ལ། རྒྱ་རྗེས་སོ་སོར་བྱ་དགའ་ཆེན་པོ་དང༌། བཙན་པོ་ལ་དར་ཡུག་ཁྲི་ཕྲག་སོགས་
སྐྱེས་ཆེན་པོ་དང་བཅས་ཏེ་སླེབ། དེ་ནས་ཡང་གསལ་སྣང་གིས། ཨཱཙཱཪྻ་གཉིས་པོ་སྤྱན་འདྲེན་
དུ་བལ་པོར་ཕྱིན། འདིའི་སྐབས་སུ་རྦ་བཞེད་ལས། ཨཱཙཱཪྻ་བོ་དྷི་སཏྭ་དང༌། སློབ་དཔོན་པདྨ་
སམྦྷ་བ་དང༌། ལྷ་ཁང་བརྩིག་པའི་ཆ་མཁན་མཁས་པ་ཞིག་སྟེ་གསུམ་བོད་དུ་འབྱོན་པའི་
གྲབས་སོབ་བྱས་ནས་འདུག་སྐད། དེ་ནས་ཨཱཙཱཪྻ་བོ་དྷི་ས་ཏྭས་གཞུང་ལམ་ལ་མགྱོགས་པར་
བྱོན། སློབ་དཔོན་པདྨ་དང་ཆ་མཁན་དང་བལ་པོའི་རྡོ་བཟོ་བ་སོགས་བསྡེབས་ནས་ཕེབས་
ཏེ། ཡུལ་སོ་སོའི་མི་མ་ཡིན་འདུལ་བ་དང༌། ས་ཆ་རྣམ་རྟོག་གིན་བྱོན། ཞེས་འབྱུང་ལ། རྦ་
བཞེད་ལས། ཨཱཙཱཪྻ་བོ་དྷི་ས་ཏྭ་སྤྱན་འདྲེན་དུ་ཕྱིན་པར་མྱུར་བར་འགྲན་བཟང་དུ་བྱོན།
བཙན་པོ་དང་བཀའ་མཆིད་མཛད། པདྨ་སམྦྷ་བ་སྤྱན་དྲངས་ནས་ལྷ་སྲིན་བཏུལ་ན་ལེགས་
ཞེས་གསུངས་པ་ལྟར་རྦ་མང་རྗེ་གསལ་སྣང་དང༌། སེང་མགོ་ལྷ་ལུང་གཟིམས་གཡོག་ལྔ་དང་
བཅས་པ་སྤྱན་འདྲེན་དུ་བཏང་བ། སློབ་དཔོན་གྱིས་ཀྱང་མཁྱེན་ནས་མང་ཡུལ་དུ་བྱོན་འདུག་
ཟེར་བ་སྣང་བ་གང་ལྟར་ཡང་མི་འགལ་མོད་སྔ་མ་འཐད་པར་བྱའོ། །དེ་སྐབས་སྐྱིད་གྲོང་ནས་
ཚུར་བྱོན་དུས་བོད་ཀྱི་ལྷ་སྲིན་རྣམས་ཀྱིས་ཁ་ཆར་དྲག་པོ་ཕབ། ཕན་ཚུན་གྱི་རི་ཁ་ལྟེབས་བར་
བྱུང་བ་ན་འཁོར་རྣམས་རྗེས་སུ་བཞག སློབ་དཔོན་སྔོན་ལ་བྱོན་ཏེ་རིའི་ཁོང་སེང་ནས་བཞུད་
ནས་ལྷ་སྲིན་དེ་རྣམས་བཅིངས་ཤིང་དམ་ལ་བཏགས་སོ། །དེ་ནས་བཟུང་ལམ་གྱི་མི་མ་ཡིན་
ཐམས་ཅད་འདུལ་ཞིང་བྱོན། གཙང་པོ་ལ་རྫིང་བཅས་ཏེ་ཆུ་གཞུང་ལ་སྤྱན་དྲངས་ཀྱིན་བྱོན་པ་
ཡང་མང༌། འོ་ཡུག་གི་ཐད་ཀ་ནས་ཕར་ཐོན། ལ་འདི་བརྒལ་བ་ན་ཉི་ཚེ་བའི་དམྱལ་བ་མང་པོ་
ཡོད་པས་སྙིང་རྗེ་བྱའོ་གསུངས་ནས་ཕེབས། ཆུ་ཚན་དྲག་ཏུ་ཁོལ་བའི་དབུས་ན་སྲོག་ཆགས་
20-1-54


ཡོད་པ་རྣམས་ལ་སློབ་དཔོན་གྱིས་དགོངས་པ་མཛད་པས་ཆུ་རྣམས་འཇམ་གྱིས་འགྲོ་བ་བྱུང་
རྣལ་འབྱོར་བའི་བྱམས་པའི་ནུས་པ་བསྟན་པ་ཙམ་ཡིན། ལར་མྱོང་ངེས་ཀྱི་ལས་ལ་སངས་
རྒྱས་ཀྱིས་ཀྱང་མཛད་དུ་མེད་གསུངས། དགོངས་པ་བཞག་པས་སྔར་བཞིན་སོང༌། རུ་
མཚམས་སུའང་ཕེབས། གངས་དཀར་འཇིགས་ནས་ཐག་རིང་དུ་བྲོས། གནམ་དུ་ཕེབས་ནས་
ད་ནི་ཐང་ལྷ་འདུལ་དགོས་གསུང་དེ་ཕྱོགས་སུ་ཆས། ཟངས་ཁལ་ཚད་མ་ཞིག་ཏུ་ལུག་བོང་ཤི་
བའི་ཤ་བཙོས་པ་དང༌། ཀླུ་ཚ་ཟེར་བའི་མི་ཚན་ཞིག་ན་རེ། འདི་ཅི་ཡིན་ཟེར། ལོ་རྒྱུས་བསྙད་
པས། ཧ་ཧ་བྱས་གནོད་སྦྱིན་འདུལ་བའི་ཐབས་ལྟ་ཟེར་བ་ལ། སློབ་དཔོན་གྱིས་གནོད་སྦྱིན་
ཆེན་པོ་དམར་ཐབ་འཚལ་གསུངས་ནས་ཟངས་ལ་རྡོག་པ་བརྒྱབས་ནས་བསྒྱེལ། དེར་ཐང་ལྷ་
ཁྲོས་ཏེ་གངས་ལ་ཐུག་ཚོམ་བྱུང༌། སྤྲིན་ནག་ཆགས་ནས་སྐྱེ་བོ་ཕལ་བས་བཟོད་པར་དཀའ་
བའི་འབྲུག་དང་སེར་བ་དང་གློག་རྒྱུན་མི་འཆད་པ་བྱུང་ངོ༌། །སློབ་དཔོན་གྱིས་གངས་རི་ལ་
སྡིགས་མཛུབ་བསྟན་པས་གངས་ཆེར་ཞུ། ཐང་ལྷ་ཡ་ཞུར་དུ་དེ་ནས་གྲགས། སྙིང་དྲུང་དུ་འདི་
ན་ཆོས་བྱེད་དུ་མི་སྟེར་བའི་ཀླུ་གདུག་པ་ཅན་ཞིག་འདུག་གསུངས། འདུལ་བར་དགོངས་པ་
ལ་ཀླུ་དེ་ཕྱིའི་རྒྱ་མཚོར་བྲོས། ཕུག་པ་ཞིག་ཏུ་དཀྱིལ་འཁོར་ལྔ་བཞེངས། ཞག་གསུམ་
དགོངས་པ་མཛད་པས་གངས་ཀྱི་ཐུག་ཆོམ་ཞི། ཡུལ་ཡང་འཇམ་པོར་གྱུར། ཀླུ་དང་ཐང་ལྷ་
ཡང་དམ་འོག་ཏུ་ཆུད་ཅིང་ཆོས་ལ་བཀོད། གཞན་ཡང་གནམ་མཚོ་ལ་གནས་པའི་ལྷ་འདྲེ་
རྣམས་དང༌། ཇོ་མོ་གངས་དཀར་ལ་སོགས་པ་ལྷ་སྲིན་དཔག་ཏུ་མེད་པ་ཞིག་དེ་སྐབས་བཏུལ་
ལོ། །དེ་ནས་ལ་ཤོད་དུ་བྱོན། འཕན་ཡུལ་ལ་ཡུལ་ངན་ལུང་པ་རྟ་རོ་ཁ་ཕྱེ་བ་འདྲ་གསུངས་
དངོས་སུ་མ་ཕེབས། ལྷ་འདྲེ་རྣམས་དམ་འོག་ཏུ་སྩལ། སྟོད་ལུང་གི་གཡའ་རལ་མོ་ནས་མར་
བྱོན། རི་ཉིལ་བ་ལ་སྡིགས་མཛུབ་བསྟན་པས་ལོག བཙུན་མོ་འཕྲང་གི་ཕྲག་མུ་སྟེགས་རལ་
པ་ཅན་བྲོ་འཁྲབ་པ་འདྲ་བ་འདིའི་གོང་མ་བཅད་ན། བོད་མུ་སྟེགས་ཀྱིས་འགེངས་གསུངས་
20-1-55


ནས་བཅད། ཞོང་པར་ཚོང་པ་ཀུན་ལ་གྲོ་ཐོབ་གསུང་བ་ལ། ཆུ་མ་མཆིས་ཞུས་པས། གསེག་
ཤིང་ས་ལ་ཐམ་ཐམ་བརྒྱབས་པས་ཆུ་མིག་བདུན་བྱུང༌། ཞོང་བ་ལྷ་ཆུར་གྲགས། མཁར་ནག་
འདི་ཀླུ་བཙན་ཐུ་བ་ཞིག་འདུག འདུལ་བྱེད་ཅིག་བྱ་གསུངས། བྲག་ལ་རྡོ་རྗེ་སེམས་དཔའི་སྐུ་
ཞིག་མཛད། བོད་ཀྱི་རྡོ་ལ་བཟོ་ཨེ་རུང་ཟེར་བལ་པོའི་བཟོ་བོས་ཤ་བ་ཞིག་ཀྱང་བརྐོས། དེ་
ནས་ངམ་ཤོད་ལ་བྱོན། ཟུར་མཁར་མདའ་རུ་རྡོའི་མཆོད་རྟེན་ལྔ་བཞེངས་རབ་གནས་མཛད།
དེ་ནས་ཕོ་བྲང་བྲག་དམར་འོམ་བུ་ཚལ་དུ་ཕེབས། བཙན་པོ་དང་མཇལ་བ་ལ་ཕོ་ཉས་བརྡ་
སྦྱར། ཕྱག་བཞེད་ཟེར་བ་ལ། སློབ་དཔོན་ན་རེ། ང་ཡི་ཕྱག་བཙན་པོས་མི་ཐུབ་གསུངས་ནས་
ཕ་བོང་ཞིག་ལ་ཕྱག་མཛད་པས་ཤག་ཏེར་གས། རྒྱལ་པོའི་ན་བཟའ་ཕུད་པ་ལ་ཕྱག་མཛད་
པས་ཐུལ་གྱིས་ཚིག དེར་བཙན་པོས་སློབ་དཔོན་གྱི་ཞབས་ལ་ཕྱག་ཕུལ། དེའི་གོང་དུ་སང་
ཤིག་བྲག་དམར་འགྲན་བཟང་དུ་རྒྱ་ནག་གི་ལྷ་ཁང་འགོའུ་དེ་ཤན་ལ་དཔེ་བླངས་པ་ཞིག་
བཞེངས་ནི་གྲུབ། ཞལ་དྲོ་ནི་མ་གྲུབ་པའི་སྐབས་ཡིན་པས། སློབ་དཔོན་ཆེན་པོ་དེར་གདན་
ཕེབས་པར་ཞུས་ནས་ཕེབས། རབ་གནས་མངའ་གསོལ་གྱི་ཚེ་རྒྱལ་པོ་དང་བློན་པོ་ཆེན་པོ་ནི་
མ་བྱོན། གནངས་ཆེན་པོ་དང་གཟིམ་མལ་བ་ཀུན་གྱིས་བལྟ་བར་འོངས། སློབ་དཔོན་གྱིས་
ལྷ་སྐུ་ཆེན་པོ་ཐམས་ཅད་མི་ལ་བྱ་བ་བཞིན་དུ་བྱས་ནས། སྟོན་མོ་བྱེད་པའི་སར་སྤྱན་དྲངས་
སོང་བས་ཡིད་མ་ཆེས་ཏེ། ནམ་ཕྱེད་ལ་དེ་ཀུན་གྱིས་མར་མེ་ཁྱེར་ནས་བལྟས་པས་ནང་ན་
འཇིམ་སྐུ་གཅིག་ཀྱང་མེད་པར་སྟོང་སང་ངེ་འདུག དབྱུག་སྐོར་གྱིས་བཙལ་བས་ཀྱང་རེག་
ཐོགས་མི་འདུག་པས་ཡིད་ཆེས། ནངས་པར་སྒོ་སེང་ནས་བལྟས་པས་སྐུ་གཟུགས་ཐམས་
ཅད་སྔར་བཞིན་འཁོད་པ་ལ། སློབ་དཔོན་པདྨས་མཆོད་པ་མཛད་པ་དང༌། ལྷ་རྣམས་བཤོས་
གསོལ་ཞིང་གཏམ་མཛད་པར་དངོས་སུ་མཐོང༌། དེའི་ཉིན་མོ་སྤོས་དང་མར་མེ་ཐམས་ཅད་
རང་འབར། རོལ་མོ་ཐམས་ཅད་རང་འཁྲོལ། ཅོང་རྣམས་རང་སྒྲ་སྒྲོགས། འཕན་ལྔ་བཏགས་
20-1-56


པ་ལྔ་བརྒྱར་འཕེལ། སྡེར་གཅིག་ཏུ་རྒུན་འབྲུམ་སྙིམ་པ་གང་ཙམ་ཞིག་ཀ་ཡོད་པ་ཡང་དེར་
འཚོགས་ཀྱི་མི་རྣམས་ཀྱིས་ཅི་ཙམ་ཟོས་ཀྱང་ཉུང་དུ་མ་སོང༌། ཐམས་ཅད་ངོ་མཚར་སྐྱེས་སོ། །
དེའི་ནངས་པར་གཟིམ་མལ་བ་ལྷ་ལུང་མཚོ་གཞེར་གཉན་ལེགས་ཞེས་བྱ་བ་ལ་པྲ་རྟེན་བྱས།
ལྷ་མོ་འོད་ཟེར་ཅན་མའི་པྲ་སེ་ན་ཕབ་སྨྲ་རུ་བཅུག་པས། བོད་ཀྱི་ལྷ་ཀླུ་མི་སྲུན་པ་ཐམས་ཅད་
ཀྱི་མིང་སྨྲས། འཕང་ཐང་དུ་ཆུ་ཐོག་འབེབས་པ་ཤམ་པོ། དམའ་པོ་རི་ལ་ཐོག་འབེབས་པ་
ཐང་ལྷ། མི་ནད་ཕྱུགས་ནད་གཏོང་བ་བརྟན་མ་བཅུ་གཉིས། སད་སེར་གཏོང་བ་བོད་ཀྱི་ལྷ་
གཉན་དགུ་ཡིན་ནོ་ཞེས་སོགས་སྨྲས། དེའི་ནངས་པར་ནས་བཟུང་ནས་ཀྱང་ཆོ་རིགས་བཟང་
བའི་བྱིས་པ་མང་པོ་ལ་རྒྱལ་ཆེན་བཞིའི་པྲ་ཕབ། གནོད་སྦྱིན་མེ་ལྷས་ཞལ་མངོན་སུམ་དུ་
བསྟན། ལྷ་ཀླུ་གདུག་པ་ཅན་ཐམས་ཅད་ཀྱི་མིང་དང་གནས་དང་སྤྱོད་ཚུལ་སྨྲས། དེ་ནས་རྒྱལ་
བློན་སོགས་ཡིད་ཆེས་པའི་ཕྱིར་དུ་ལྷ་འདྲེ་མ་རུངས་པ་རགས་རིམ་ཞིག་དངོས་སུ་མི་ལ་ཕབ་
ནས། བསྡིགས་ཤིང་གཟིར་བ་དང་ཆོས་བཤད་ནས་དམ་འོག་ཏུ་བཅུག །རང་རང་གི་སྲོག་
སྔགས་དང་ཆོ་ག་རྣམས་སློབ་དཔོན་ལ་ཕུལ། དེས་ཀྱང་མ་ཐུལ་བ་རྣམས་སྦྱིན་སྲེག་མཛད་པ་
སོགས་ཐབས་སྣ་ཚོགས་ཀྱིས་བཏུལ། དེ་འདྲ་བ་ལན་གཉིས་མཛད། དེར་སློབ་དཔོན་ན་རེ།
སླན་ཆད་ལྷ་ཆོས་ཅི་བདེར་མཛོད། གཙུག་ལག་ཁང་དགོངས་པ་བཞིན་དུ་རྩིགས་ཤིག །སྔར་
ལྷ་ཀླུ་དམ་འོག་ཏུ་ལན་གཉིས་ཆུད་ལགས་ཏེ། ད་དུང་ལན་གཅིག་བགྱིད་དེ་འཚལ་གསུངས།
དེ་ནས་ཕོ་བྲང་ཟུར་ཕུད་རྐྱང་བུ་ཚལ་དུ་ཡང་ཕེབས། དེར་བཞུགས་དུས་མ་གྲོ་གཟི་ཅན་ལ་
སོགས་པའི་ཀླུ་རྣམས་བཏུལ། མ་གྲོ་གཟི་ཅན་ན་རེ། ས་སྟེང་ན་བཙན་པོ་ཁྲི་སྲོང་ལྡེ་བཙན་ཆེ།
ས་འོག་ན་ང་ཆེ། ངེད་གཉིས་གྲོགས་པོ་བྱ། རྒྱལ་པོ་ལྷ་ཁང་བཞེངས་པའི་གསེར་ཕྱེ་དྲེའུ་ཁལ་
བཅུ་བཞི་འབུལ། གསེར་ཁུང་གླང་པོ་སྣར་ལེན་དུ་ཐོང་ཟེར་བ་བཞིན་གསེར་རྣམས་དེ་ཁོ་ན་
ལྟར་བྱུང༌། རྒྱལ་པོ་པེ་ཀར་ཡང་བཏུལ་ཏེ། དེ་ཡང་ཁོང་འདུལ་བའི་དཀྱིལ་འཁོར་སྒྲུབ་དུས་
20-1-57


པེ་ཧར་གྱིས་དཀྱིལ་འཁོར་བལྟར་འོངས་པས་མིག་ལ་ཕུར་བུ་བཏབ། སྔགས་ཉན་པས་རྣ་བ་
ལ་བཏབ། སྔགས་ཟློས་པའི་ལད་མོ་བྱས་པས་ལྕེ་ལ་བཏབ། དེ་ནས་འབྲོས་པར་འདོད་པ་ལ་
ཡན་ལག་བཞི་ལ་བཏབ་པས་འགྲོ་མ་ཐུབ། ད་བསྲེག་གོ་ཞེས་གསུངས་པས་ཤིན་ཏུ་སྐྲགས་
ཏེ་ཡང་འཁོར་དམ་ལ་བཏགས། དེ་རྗེས་ཡར་ལྷ་ཤམ་པོ་འདུལ་དུ་བྱོན་པས། སློབ་དཔོན་གྱི་
ཐོག་ཏུ་ཁོས་ཆུ་ཕབ། སློབ་དཔོན་གྱིས་བེར་སྣ་ནས་རྡོ་རྗེ་གདེངས་པས་ཆུ་གྱེན་ལ་ལོག་སླར་
ལྷ་རྫིང་བམ་རྫིང་དུ་བླུག །དེར་རྡོ་རྗེ་འཕངས་པས་ཆུ་ཁོལ་ཏེ་ཤམ་པོའི་གངས་ཀྱི་སུམ་ཆ་
ཙམ་ཞུ། དེར་ཁོ་གངས་ཀྱི་རྩེ་ལ་བསྡད་ནས་ང་ལ་དེ་ཙམ་དུ་མཐོ་འཚམ་པ་ཟེར། སློབ་དཔོན་
གྱི་ཞལ་ནས། ཁྱོད་ཀྱང་ང་ལ་དེ་ཙམ་མཐོ་འཚམ་པ་ད་ཕྱིན་དམ་འོག་ཏུ་མི་འཇུག་ན་བསྲེག་
གོ་གསུངས་པས། དེར་སློབ་དཔོན་གྱི་ཞབས་ལ་ཕྱག་འཚལ་བཞིན་དུ། བདག་ནག་པོའི་
རིགས་ཡིན་པས་ཆོས་བགྱི་བའི་རྔོ་མི་ཐོགས། ད་ཕྱིན་ཆད་གནོད་པ་མི་བགྱིའོ་ཞེས་དམ་
བཅས། དེ་ལྟར་ཟླ་བ་དྲུག་ཙམ་གྱི་རིང་ལ་མི་མ་ཡིན་ཕལ་ཆེར་དམ་འོག་ཏུ་ཚུད་པར་མཛད་
དོ། །དེ་ནས་རྒྱལ་སྲིད་དང་བོད་འབངས་སྤྱི་ལ་ཕན་པའི་ཕྱིར་སྦྱིན་སྲེག་རྒྱ་ཆེན་པོ་ཞིག་བགྱིའོ་
གསུང་པའི་སྐབས་ཤིག་དགའ་སྟོན་ཆེན་པོ་ཞིག་ལ་བཙན་པོའི་དབུ་སྐྲ་འཁྲུའོ་ཞེས་ཡོད་པ་
ལ། ཨཱཙཱཪྻ་བོ་དྷི་ས་ཏྭས་རི་རབ་ཀྱི་བྱང་ངོས་ན་ཆུ་མིག་རྟག་ཏུ་སྣང་བྱ་བ་ཡོད། དེ་ནས་ཆབ་
བླངས་ཏེ་བཙན་པོའི་དབུ་བསིལ་ན་སྐུ་ཚེ་རིང༌། རིགས་རྒྱུད་འཕེལ། ཆབ་སྲིད་ཆེན་པོ་ཤ་
སྟག་འབྱུང་བ་ལགས་ཏེ་གསུངས། ཆབ་ཏེ་སུས་ལེན་པར་རྔོ་ཐོགས་ཞུས་པས། སློབ་དཔོན་
སྔགས་མཁན་གྱིས་ནུས་གསུངས། སློབ་དཔོན་ལ་ཞུས་པས། གསེར་གྱི་བུམ་པའི་ཁ་དར་
དཀར་གྱིས་བཅད། མཎྜལ་གྱི་དབུས་སུ་བཞག །སྔགས་བཟླས་ནས་བུམ་པ་ནམ་མཁའ་ལ་
འཕངས་པས་ཇེ་མཐོ་ལ་མི་སྣང་བར་སོང༌། ཟན་ཟ་ཡུན་གཅིག་ཙམ་ནས་སློབ་དཔོན་གྱི་
མདུན་དུ་བུམ་པ་ཁྲོངས་ཀྱིས་བྱུང༌། དེར་བཙན་པོའི་དབུ་ཁྲུས་ཤིག་བྱས་བློན་པོ་ཀུན་ལ་
20-1-58


གཏད་པས། ཁ་ཕྱེ་བའི་ནང་ན་ཆུ་སྐྱ་ཉོག་གེ་འདུག་ནས་བློན་པོ་ཀུན་ཚོགས་པའི་མདུན་སར་
བྲིམས་པས། འདི་མོན་གྱི་སྨྱོ་ཆུ་ཡིན་ལས་ཆེ། ཕོ་ཐོང་ཟེར་ནས་ཕྱིར་ཕོ། དེ་མེད་པར་བྱས།
དེས་ཀྱང་དོན་མེད་ཆེན་པོ་བྱུང༌། དེ་ནས་རྒྱལ་པོ་དང་འབངས་སྐལ་ལྡན་རྣམས་ལ་ཀྲི་ཡ་དང༌།
གསང་སྔགས་ནང་གི་དབང་བསྐུར་བ་ཡང་མཛད། རྗེ་འབངས་སྐལ་ལྡན་མང་པོ་ལ་མན་ངག་
ལྟ་བའི་ཕྲེང་བ་གསུངས། རྡོ་རྗེ་རྣམ་འཇོམས་དང༌། ཕུར་བུ་འབུམ་སྡེ་དང༌། གཞན་ཡང་སྒྲུབ་
ཐབས་མན་ངག་ཅི་རིགས་པ་སྟོན་ཞིང༌། ཡུན་རིང་པོར་བཞུགས་ནས་བོད་ཁམས་ཐམས་ཅད་
བདེ་སྐྱིད་དང་ལྡན་པར་བྱའོ་གསུང་པ་ཞིག་ཡོད་པ་ལ། ཕྱིས་སེམས་ཅན་སྤྱི་མཐུན་གྱི་ལས་
ཀྱིས་རྒྱུ་བྱས། ནག་ཕྱོགས་ཀྱི་ལྷ་སྲིན་གདུག་པ་ཅན་སྙིང་ལ་ཞུགས་པའི་བློན་པོ་རྣམས་ཀྱིས་
རྐྱེན་བྱས་ཏེ་མ་འགྲུབ་བོ། །དེ་ཡང་བཀའ་ཆེམས་ཀྱི་ཡི་གེ་རྣམས་ན། བོད་ཡུལ་བཟང་པོར་
གཏོང་གསུང་པའི་སྐབས་དེ་ཡན་ཆད་ཙམ་མ་གཏོགས་མ་བྲིས་པ་ནི་གསང་སྔགས་ནང་གི་ལོ་
རྒྱུས་ཚོགས་སུ་མི་སྒྲོགས་པའི་དབང་དུ་བྱས་པར་སྣང་ལ། དེར་དབང་བསྐུར་བ་ལ་ཡང་རིམ་
པ་བྱེད་པ་ཞེས་གབ་ཚིག་ཏུ་ཡོད་དེ། སྔོན་དུས་གསང་སྔགས་པ་ནང་མ་གཏོགས་ཐུན་མོང་དུ་
དབང་བསྐུར་བའི་མཚན་དོན་ཡང་གསང་བའི་སྲོལ་བྱུང་བས་རིམ་པ་ཞེས་བྱ་བའི་བརྡ་ཆད་
འདི་ཡིག་རྙིང་མང་པོ་ན་སྣང་ངོ༌། །མན་ངག་ལྟ་ཕྲེང་གི་ལོ་རྒྱུས་རྙིང་པ་རྣམས་དང༌། འོ་བྲན་
དཔལ་གྱི་གཞོན་ནུའི་ཕུར་བུའི་གཏོང་ཐུན་དང༌། གཞན་ཡང་ལོ་རྒྱུས་ཁ་འཐོར་བ་ཁུངས་མ་
རྣམས་སུ་སྦྱི་ཁོག་དེ་དང་མཐུན་པར་འབྱུང་བ་ལ། རྒྱལ་པོ་ལ་རིམ་པ་མཛད་པའི་ཚེ་བཙུན་མོ་
ཚེ་སྤོང་བཟའ་མེ་ཏོག་སྒྲོན་དང༌། འགྲོ་བཟའ་ཁྲི་རྒྱལ་མོ་བཙུན་ཞེས་བྱ་བ་ཕྱིས་རབ་ཏུ་བྱུང་
བའི་མཚན་ཇོ་མོ་བྱང་ཆུབ་རྗེ་ཞེས་པ་དེ་སོགས་བཙུན་མོ་མཆོག་རྣམས་ཀྱིས་དཀྱིལ་འཁོར་
མཆོད་པའི་གཟུངས་མ་བྱེད་པར་ཞུས་པས། དེ་ཀུན་སྐལ་པ་དང་ལྡན་པ་ཁོ་ནར་ཡང་མི་སྣང་
གསུང༌། མཆིམས་བཟའ་ལྷ་མོ་བཙན་དང་མཁར་ཆེན་བཟའ་མཚོ་རྒྱལ་གཉིས་མཆོད་པའི་
20-1-59


གཟུངས་མ་བྱེད་པའི་སྐལ་བ་ཅན་དུ་ལུང་བསྟན་པས། ས་ཐག་རིང་བ་ལ་ཇི་ལྟར་བགྱི་ཞུས་
པས། འདི་ལ་ཚེགས་མེད་གསུངས་ནས། སློབ་དཔོན་གྱིས་དགོངས་པ་ལ་མཉམ་པར་བཞག་
པས། ཡུད་ཙམ་ཞིག་ན་དེ་གཉིས་དཀྱིལ་འཁོར་གྱི་མཐའ་རུ་སླེབ་བོ། །དེར་མ་ཟད་དེ་གཉིས་
ལ་ལྷུན་གྱིས་གྲུབ་པའི་དགོངས་པ་སྐྱེས་ནས་ཕྱིས་འཇིག་རྟེན་གྱི་ལས་སྤངས་ཏེ་སྒྲུབ་པ་ལ་
ཞུགས་སོ། །བཀའ་ཆེམས་ཀྱི་ཡི་གེ་གསུམ་ལས་དེ་གཉིས་གཞོན་ནུ་ནས་སྒྲུབ་པ་ལ་གཤེགས་
པས་ཕྱག་རྗེས་ལྷ་ཁང་མེད་ཅེས་འབྱུང་བའི་དོན་ཡང་དེར་སྣང༌། དེ་སྐབས་དབང་བསྐུར་བ་
གྲོལ་བ་ན་རྒྱལ་པོའི་གཟིམ་མལ་བ་རྨ་ཅོ་ཅོ་བྱ་བས་ཞང་བློན་རྣམས་ལ་བཤད་ཀྱང་ཡིད་མ་
ཆེས་པར་དེ་ཙམ་གྱི་ནུས་པ་མེད་དམ་སྙམ་པའི་སྐབས། རྒྱལ་པོའི་ལྷ་ཁང་གི་ས་འདུལ་མཛད་
པའི་དུས་དཀྱིལ་འཁོར་བཞེངས་པའི་ཐིག་སྐུད་འཐེན་པ་ལ་བོད་ཀྱི་ཡུལ་ཁམས་ཀྱི་བུ་མོ་
གཙང་མ་མཚར་བའི་མཐར་ཐུག་པ་གཉིས་དགོས་པ་བྱུང་བ་ལ། བོད་ཙམ་གྱི་ཡུལ་ཁམས་ཆེ་
བ་ན་མཚར་བའི་མཐར་ཐུག་པ་སུ་ཡིན་མི་ཤེས་པའི་སྐབས། སྔགས་མཁན་ལ་དེའི་ནུས་པ་
ཡོད་ཟེར་བས་བདེན་ན་འགུགས་པར་ཞུ་བྱས་པས། སློབ་དཔོན་གྱིས་དགོངས་པ་ལ་མཉམ་
པར་བཞག་པས། དར་ཅིག་ནས་ལྕོག་རོ་བཟའ་བུ་ཆུང་སྨན་དང༌། ལྕོག་རོ་བཟའ་ལྷ་བུ་སྨན་
གཉིས་གང་ནས་བྱུང་ཆ་མེད་པ་དེར་བྱུང༌། དེ་ལ་ཡེ་ཤེས་ཀྱི་ལྷ་ཕབ་སྟེ་ཐིག་སྣ་བ་བྱས་སོ། །
ཕྱིས་བོད་འབངས་ཀྱི་མི་ཐམས་ཅད་བསྡུས་པས་ཀྱང་དེ་གཉིས་ལས་མཚར་བ་ཡེ་མ་བྱུང་
སྐད། དེར་བློན་པོ་རྣམས་ལྐོག་ཏུ་བགྲོས་ནས་སྔགས་མཁན་འདིས་བོད་འབངས་ཀྱི་ངོ་མཚར་
ཅན་རྣམས་དང་ནོར་བཟང་པོ་ཐམས་ཅད་རྒྱ་གར་ལ་གཏོད་དམ་ཟེར། ཡང་ཁྱུང་པོ་སྟག་ཚ་
ཟེར་བའི་བློན་པོ་གཅིག་ཆོས་ལ་ཤིན་ཏུ་མི་དད་པ་དེས་བསམ་པ་ལ། བྲག་དམར་འགྲན་
བཟང་དང་སྔགས་མཁན་འདི་མེ་ལ་བསྲེག་དགོས་པར་འདུག་བསམས་ནས་སློབ་དཔོན་གྱི་
དྲུང་དུ་ཕྱིན་པ་ཞིག་ལ། བློན་པོ་སོགས་སྐྱེ་བོ་མང་པོ་ཡོད་པའི་དབུས་དེར་ཁྱོད་འདི་ལྟ་བུ་
20-1-60


བསམ་མམ་ཞེས་གསུངས་པས། ཤིན་ཏུ་ངོ་ཚ་ཞིང་ཕྱིར་སོང་ནས་མཐའི་མོན་བུ་འདིས་ཅི་
ཡང་ཤེས་པར་འདུག་ཟེར་སྐད། ཡང་དབས་ལྡོང་གཟིགས་ཟེར་བ་ཆོས་ལ་ཤིན་ཏུ་ཞེ་གནག་
པ་ཞིག་ཡོད་པ་ལ། འདི་མི་རིང་བར་དབང་ཆེ་བར་གྱུར་ཏེ་ཆོས་དར་དུ་མི་སྟེར་བ་ཞིག་ཡོང་བ་
འདུག་པས་ཚར་གཅོད་པའི་དུས་ལ་བབ་འདུག་གསུངས། ཡུད་ཙམ་ཞིག་དགོངས་པ་མཛད་
པས་ཁོ་ཡང་དུས་དེ་རང་དུ་ལུས་ནས་ཁྲག་ཟགས་ལས་ཤི། དེ་ཡང་སྔ་ཕྱིར་མི་དང་མི་མ་ཡིན་
བཏུལ་བའི་ནུས་མཐུ་རྣམས་མཐོང་བས། བློན་པོ་རྣམས་རང་རང་གི་བསམ་པ་ངན་པ་དང༌།
བྱེད་སྤྱོད་ངན་པ་བྱེད་པ་ལ་སློབ་དཔོན་བཞུགས་པ་ཤིན་ཏུ་བག་དོགས་པར་གྱུར་ཏེ་སློབ་
དཔོན་རྒྱ་གར་དུ་འབྱོན་པའི་ཐབས་ཁོ་ན་སེམས་ཤིང་ཡོད་པའི་སྐབས། སློབ་དཔོན་གྱི་
གསུང་ནས། བཙན་པོ་ཁྱོད་ཀྱི་ཡུལ་འདི་བཟང་པོར་བྱ། ངམ་ཤོད་ཀྱི་བྱེ་མ་ཚལ་དང་ནེའུ་
གསིང་དུ་བྱ། གྲ་དང་དོལ་དང་རྟ་ལ་དང་ཡུལ་པོ་ཆེ་ཚུན་ཆད་ཆབ་མེད་པ་རྣམས་སུ་ཆུ་དབྱུང༌།
གྲམ་པ་ཐམས་ཅད་ཀྱང་ཞིང་སར་འགྱུར་བར་བྱས་ལ་བོད་ཀྱི་འཚོ་བ་བྱས། བཻ་ཤྲ་མ་ཎ་ལ་
ནོར་བླངས་འཛམ་བུའི་གླིང་གི་དཀོར་ནོར་ཡོད་དོ་ཅོག་གི་འབྱུང་ཁུངས་བོད་དུ་འབྱུང་བར་བྱ།
གཙང་པོ་སྦུབས་སུ་འཇུག །ཆབ་འདི་བས་ཆེ་བ་གཅིག་ཀྱང་ངས་སྦུབས་སུ་བཅུག་པ་ཡིན་
གསུངས་པ་དང༌། རྒྱ་དང་ཧོར་ལ་སོགས་པའི་རྒྱལ་པོ་ཐམས་ཅད་ཀྱང་བོད་ཀྱི་དབང་དུ་
འདུས་པར་བྱའོ་སོགས་བཀའ་མཆིད་རྒྱ་ཆེར་གསུངས་པ་ལ། དེ་ལྟར་འོང་ངམ་ཉམས་སད་
པའི་ཕྱིར་མཛད་པར་ཞུས་པས། དཀྱིལ་འཁོར་བཞེངས་ནས་སྔ་དྲོ་གཅིག་དགོངས་པ་མཛད་
པས་བྲག་དམར་གྱི་སྐམས་ཤིག་ཏུ་ཆུ་ཆེན་པོ་བརྡོལ། མིང་ཀླུ་རྫིང་དུ་བཏགས། ད་དུང་མཛད་
དགོས་ཞུས་པས། བྲག་དམར་མཚོ་མོ་མགུར་སྔར་བྱེ་མར་ཡོད་པ་ནེའུ་གསེང་དུ་སྔོ་ཆམ་གྱིས་
སོང༌། དེའི་ཕྱིར་དྲོ་བྲག་གླ་བའི་གདོང་དུ་ནགས་ཆེན་པོ་སྐད་ཅིག་ལ་བྱུང་བས་གླ་བའི་ཚལ་དུ་
མིང་བཏགས་ཡང་དེའི་སང་ཉིན་སྔ་དྲོ་དགོངས་པ་མཛད་པས། སྔར་ཟུང་མཁར་ལ་ཕུ་ཆུ་མེད་
20-1-61


པ་ལ་ཕུ་ཆུ་ཆེན་པོ་ནར་གྱིས་བྱུང༌། ད་ཞིང་ས་གང་དུ་བྱེད་གསུངས། དེ་ལྟར་ཐམས་ཅད་འོང་
ངེས་པར་འདུག་པས། བློན་པོ་རྣམས་ཀྱིས་མདུན་ས་ཆུང་ངུར་གྲོས་བྱས་ནས། ཞིང་དང་ན་
ཡར་ཀླུང་གིས་ཆོག །སྔགས་མཁན་འདིས་ཡུལ་བཟང་པོར་བཏང་ནས་རྒྱ་གར་བ་ལ་གཏོད་
འདོད་པ་ཡིན། དེ་འཕྲོ་བ་སྐུམས་ལ་མཐའི་མོན་བུ་འདི་རང་ཡུལ་ལ་བརྫངས་པ་ལེགས་ཞེས་
དབང་ཆེ་ཆེ་རྣམས་ཁ་འཆམ་ནས་བཙན་པོ་ལ། རྗེ་གཅིག་ལགས། མཐའི་མོན་བུ་འདི་མཐུ་
རྩལ་ཆེ། བཙན་པོ་ཐུགས་ནི་ཆོས་ལ་གཏད། ཆབ་སྲིད་ནི་རྒྱ་གར་བས་ཕྲོགས་ཏེ་འགྲོ་བར་
མཆིས། ཞེས་སོགས་ཕྲ་མ་མང་པོ་དང༌། སྔར་གྱི་གསུང་རེ་རེ་ལ་དེ་ལྟར་བྱར་མི་རུང་བའི་རྒྱུ་
མཚན་ལོག་པ་མང་པོ་བཀོད། ད་ནི་ཨཱ་ཙཱཪྻ་སྔགས་མཁན་རང་ལ་བྱ་དགའ་ཆེར་ཕུལ། སླར་
རྒྱ་གར་དུ་བཞུད་པས་ཞུ་དགོས་ཡང་ཡང་ཞུས། སློབ་དཔོན་ཉིད་ལ་ཡང་བློན་པོ་རྣམས་ཀྱི་དེ་
ལྟར་ཞུ་བ་ཕུལ། དེར་བཙན་པོ་ཐུགས་མ་བདེ་སྟེ་སློབ་དཔོན་ལ་གསེར་ཕྱེ་བྲེ་གང་ཕུལ། ཕྱག་
དང་བསྐོར་བ་བྱས། རང་ཚུལ་རྣམས་བརྗོད་པས། ང་གསེར་འདོད་ནས་འོངས་པ་མ་ཡིན།
བོད་མཐའ་འཁོབ་ཀྱི་འདྲེ་སྲིན་གདུག་པ་ཅན་བཏུལ་ནས་ཆོས་དར་བར་བྱ་བ་དང༌། ཡུལ་
བཟང་པོར་བསྒྱུར་ནས་བོད་རྣམས་བདེ་བ་ལ་འགོད་པའི་ཕྱིར་འོངས་པ་ཡིན། གསེར་འདོད་
ན་འདི་ལྟར་བྱས་ནས་ཆོག་གསུངས་ནས་ཐན་ཀོར་གྱིས་རྡོ་ལ་ཕྱག་རེག་རེག་མཛད་པ་ཙམ་
གྱིས་གསེར་དུ་སོང༌། འོན་ཀྱང་བཙན་པོའི་ངོ་བསྲུང་བའི་ཕྱིར་ཁྱོར་གང་ཙམ་ཕྱག་ཏུ་བཞེས་
ནས། རྡོ་རྗེ་གདན་ལ་མཆོད་པ་ཞིག་བྱ་གསུངས། ལྷག་མ་བཙན་པོ་ཉིད་ལ་གནང་ནས།
བཟང་སེམས་བྱུར་གྱི་སྣ་འདྲེན་ཡིན། །སྙིང་རྗེ་རྒས་པ་ཞེ་སྡང་རྒྱུ། །རྗེ་ཡི་ཁ་ལོ་བློན་གྱིས་
བསྒྱུར། །བོད་ཀྱི་བློན་འདྲེ་གདུག་པ་ཆེ། །སེམས་ཅན་ལས་ངན་སྤྱོད་པ་ལ། །རྒྱལ་བ་རྣམས་
ཀྱི་ནུས་པའང་རྡུགས། །ཞེས་གསུངས་ཏེ་བློན་པོ་རྣམས་ཟེར་བ་ལྟར་ཆད་སོ་བྱས། རྒྱལ་པོའི་
ཡི་དམ་དུ་འཕགས་པ་སྤྱན་རས་གཟིགས་ལྷ་ལྔ་ཕོག་པ་ལས་ཕྱིས་རྒྱལ་པོས་ལྷ་ལྔའི་ནང་གི་
20-1-62


རྟ་མགྲིན་གྲུབ། ཨཱཪྻ་པ་ལོའི་གླིང་གི་རྟ་མགྲིན་གྱིས་རྟ་སྐད་བཏོན། འཛམ་བུ་གླིང་གི་གསུམ་
གཉིས་སུ་ཐོས་པར་གྲགས། ཨཱཪྻ་པ་ལོའི་གླིང་གི་རྟ་མགྲིན་གྱི་སྐུ་འདྲ་དེ་ལར་སྒྱུ་འཕྲུལ་དྲྭ་བ་
ནས་བཤད་པ་དེར་འདུག །དེའི་ཚེ་མན་ངག་ལྟ་ཕྲེང་གི་འཕྲོ་ཡང་མདོར་བསྡུས་ཏེ་གསུངས་
ནས། ངའི་ཆོས་འདི་ལྟ་བ་ཆོས་ཀྱི་སྐུ་དང་བསྟུན་དགོས། སྤྱོད་པ་བྱང་ཆུབ་ཀྱི་ཕྱོགས་དང་
བསྟུན་དགོས། ལྟ་བའི་ཕྱོགས་སུ་སྤྱོད་པ་ཤོར་ན་དགེ་མེད་སྡིག་མེད་ཀྱི་ཆད་ལྟ་སྐྱེས་ནས་
ཕྱིས་གསོར་ཡང་མི་རུང་པ། སྤྱོད་པའི་ཕྱོགས་སུ་ལྟ་བ་ཤོར་ན་དངོས་པོའི་མཚན་མས་
བཅིངས་ནས་གྲོལ་བར་མི་འགྱུར། ངའི་སེམས་ཕྱོགས་འདི་ལྟ་བ་ཤས་ཆེ་བས། མ་འོངས་པ་
ན་ཚིག་གི་མདོ་ནི་ཤེས། ཉམས་མྱོང་གི་གདིངས་ནི་མ་རྙེད་ནས་འདྲ་མིན་མང་པོས་སེམས་
ཅན་གྱི་དོན་བྱེད་པར་འདོད་པ་འོང་གསུངས། མན་ངག་རྣམས་ཀྱང་མཐར་རྒྱས་མ་རྫོགས།
རྒྱལ་བརྒྱུད་མངའ་ཐང་འཕེལ་བའི་སྦྱིན་སྲེག་ཀྱང་མཛད་འཕྲོ་ལ་ལུས། ལྷ་ཀླུ་དམ་བཞག་
ལན་གསུམ་ཡང་མ་གྲུབ་བོ། །འོན་ཀྱང་མ་འོངས་པ་མཁྱེན་པས་སློབ་མ་རྣམས་ལ་དྲག་
སྔགས་མང་དུ་གསུངས། དྲག་སྔགས་མང་པོ་དང་ཆོས་ཀྱི་དཔེ་མང་པོ་རྫ་ལ་སྦས། སྤྱིར་རྫུ་
འཕྲུལ་གྱི་བཀོད་པས་ཆོས་དང་ནོར་གྱི་གཏེར་ཁ་ཆེན་པོ་ཡོངས་བསྡོམས་བརྒྱ་རྩ་བརྒྱད་ཡུལ་
ཐ་དད་དུ་སྦས་ནས་མཐར་འདི་སྐད་དུ། བདག་དང་གཏན་པ་མེད་པའི་སྦྱིན་བདག་རྣམས། །
ཚེ་རབས་འདིའམ་ཚེ་རབས་གཞན་ཡང་རུང༌། །འོག་མིན་ཞེས་བྱའི་གནས་མཆོག་དམ་པ་རུ། །
རྣལ་འབྱོར་ཐེག་ཆེན་འབྲས་བུ་སྤྱོད་པར་ཤོག །ཅེས་སྨོན་ལམ་ཡང་ཡང་མཛད། སོ་སོ་ལ་
ཞལ་གྱི་གདམས་པ་མང་དུ་གསུངས་ནས། གློ་བུར་དུ་ཡར་ལ་གཤེགས་ཏེ་ཡར་ལམ་རུ་ལག་
བརྒྱུད་ནས་ཕེབས། ཆིབས་འཁྲིད་པ་དང༌། ལོ་སྟེ་དགུ་སྣ་གོང་དང༌། ཞང་ཉང་ཟང་ཞེས་བྱ་བ་
བློན་པོ་དད་པ་ཅན་དེ་གཉིས་ཀྱིས་མང་ཡུལ་བར་དུ་སྐྱེལ་བར་བྱས་པ་ལས། བློན་པོ་ཁ་ཅིག་
ན་རེ། སྔགས་མཁན་དེ་ནུས་པ་ཆེ་བས་མ་བསད་ན་བོད་ལ་བྱད་མ་བྱས་པར་འོངས་ཟེར་ནས་
20-1-63


ལྐོག་ཏུ་གཤེད་མ་ཤིན་ཏུ་དཔའ་བ་བཅོ་བརྒྱད་རྟ་ལ་བསྐྱོན་ནས་བཏང༌། སློབ་དཔོན་མང་
གུང་དུ་བྱོན་དུས། ནངས་པར་འུ་ཅག་ལ་འཚེ་བ་བྱེད་པ་འོང་གསུངས། སང་ཉིན་དོང་བབས་
ཀྱི་འཕྲང་ལ་བྱོན་དུས། གཤེད་མ་བཅོ་བརྒྱད་མཚོན་ཆ་ལག་ཏུ་བསྟར་ཏེ་སློབ་དཔོན་ལ་
བརྡེག་པར་གཟས་པ་ཙམ་ལ་སློབ་དཔོན་གྱིས་ཕྱག་རྒྱ་བསྟན་པས། ཐམས་ཅད་ལུས་འཇིམ་
གཟུགས་བཞིན་རེངས། ངག་སྨྲ་བརྗོད་མ་ཤེས། དེའི་བར་ལ་སློབ་དཔོན་སྐྱེལ་མི་དང་བཅས་
པ་ཕར་གཤེགས། དེ་ནས་སྐྱེལ་མ་རྣམས་ཡུལ་དེའི་ལ་ཁ་ཞིག་ནས་ཚུར་ལྡོག་པའི་སྐབས་
གསུང་ལས། བོད་ཀྱི་འདྲེ་སྲིན་ལྷ་ཀླུ་གདུག་པ་ཅན་རྣམས་ལན་གསུམ་འདུལ་དགོས་པས།
གཅིག་འཕྲོ་ལ་ལུས། དེ་མ་ལུས་ན་རྒྱལ་པོ་སྐུ་ཚེ་རིང༌། ཆབ་སྲིད་ཆེ། རྒྱལ་པོའི་རིགས་བརྒྱུད་
ཐམས་ཅད་ཀྱང་མངའ་ཐང་ཆེ། ཆོས་ཡུན་རིང་དུ་གནས་པ་ལས་དེ་ལུས་པ་དེ་ཡིད་ལ་
གཅགས་སོ། །ཆོས་འཁོར་གཅིག་ལྟ་འབྱོངས་ནས་འོང་སྟེ་དེར་འཁྲུག་པ་ཆེན་པོ་ཞིག་ཀྱང་
འོང༌། ཆོས་ལ་སྐེད་ཉག་བག་རེ་འོང༌། ཀླུ་དང་རྒྱལ་པོ་འདི་ཕུགས་ཞེ་གནག་པར་འདུག །
རྒྱལ་བརྒྱུད་ཀྱང་ཁྲིམས་ལ་མི་གནས་པར་སིལ་བུར་འགྲོ། ཁ་སང་གི་འཚེ་བ་བྱེད་མི་རྣམས་
ལ་འདི་གཏོར་ཞེས་ཡུངས་ཀར་སྦར་གང་གཏད། ལྷོ་ནུབ་མཚམས་སུ་སྲིན་པོ་འདུལ་དུ་འགྲོ་
གསུངས་ནས། ཆིབས་ཀྱི་ཁ་ནས་ནམ་མཁའ་ལ་འཕུར་ཏེ་སྤྲིན་གསེབ་ན་ཡར་ཆོས་གོས་སྤུར་
རེ་གསེག་ཤང་ཁྲོལ་ལེ་བཞུད་པར་ཐམས་ཅད་ཀྱིས་མཐོང༌། འདིའི་ས་ཡུལ་ནི་བོད་རྣམས་ལ་
གུང་ཐང་ལ་ཐོག་ཡིན་པར་གྲགས་ཀྱང༌། དོང་བབས་འཕྲང་གི་ཕ་རོལ་ཡིན་པར་བཤད་པས་
རྒྱ་བོད་མཚམས་ཀྱི་རི་གཅིག་ཡིན་པས་ངེས་སོ། །སྐྱེལ་མི་རྣམས་ཚུར་ལོག །གཤེད་མ་རྣམས་
ལ་ཡུངས་ཀར་དེ་གཏོར་བས་སྨྲ་ཤེས་འགྲོ་ནུས་པར་བྱུང་ངོ༌། །ཕོ་ཉ་གཉིས་པོས་ཀྱང་སློབ་
དཔོན་གྱི་གསུང་རྣམས་སླར་རྒྱལ་པོའི་སྙན་དུ་ཕུལ་བས། བཙན་པོའི་ཐུགས་ལ་ཤིན་ཏུ་
འགྱོད་པ་གཅགས་པར་གྱུར་ཞིང༌། དེ་སྐབས་སློབ་དཔོན་གྱི་ཆོས་འཕྲོ་ལུས་པ་རྣམས་གསན་
20-1-64


པའི་ཕྱིར་ཕྱིས་པཎྜི་ཏ་བི་མ་ལ་མི་ཏྲ་དང༌། ཤཱནྟིཾ་གརྦྷ་ཆེད་ཀྱིས་སྤྱན་དྲངས་པ་ཡིན་པར་བཤད་
དོ། །དེའི་རྗེས་སུ་བཙན་པོས་ལྷ་ཁང་བརྩིགས་པ་ལྟ་བུར་རྦ་བཞེད་ཁ་སྐོང་ཅན་ནས་འབྱུང་བ་
ནི་ཚིག་བརྗོད་ཚུལ་གྱི་གོ་རིམ་དུ་སྣང་ངོ༌། སྔགས་རྙིང་མར་གྲགས་པའི་ཡིག་རྙིང་ཀུན་ན་
ཨཱཪྻ་པ་ལོའི་གླིང་ལ་སློབ་དཔོན་གྱིས་རབ་གནས་མཛད་པ་དང༌། ཆོས་འཁོར་བསམ་ཡས་
ཀྱི་ས་ཆོག་མཛད་པ་མགྲིན་གཅིག་ཏུ་བཤད་པར་སྣང་བ་འཐད་པར་ཡང་སེམས་ལ། དེས་ན་
གོང་དུ་ལྷ་ཁང་བརྩིགས་པའི་ཐིག་སྣ་འདྲེན་པ་སོགས་ཀྱི་ལོ་རྒྱུས་ཀྱང་ཨཱཪྻ་པ་ལོའི་གླིང་གི་
ཡིན་པར་མངོན། རྦ་བཞེད་ན་བོད་ཡུལ་དབུས་སུ་ཟླ་བ་བཅོ་བརྒྱད་བཞུགས་བྱ་བ་དང༌། རྦ་
བཞེད་ཁ་སྐོང་ཅན་ན་བོད་ཡུལ་དུ་ཟླ་བ་བཅོ་བརྒྱད་བྱ་བ་དང༌། བླ་བཞེད་ན་ཟླ་གྲངས་ཀྱི་
གསལ་ཁ་མེད་ཅིང༌། རྒྱལ་བཞེད་ཀྱི་དོན་བླངས་ཏེ་བྲིས་ཟེར་པའི་ཡིག་རྙིང་རྣམས་ན། བོད་
ཡུལ་དབུས་ཀྱི་བྲག་དམར་དུ་ཟླ་བ་བཅོ་བརྒྱད་བཞུགས་བྱ་བ་ཡོད་པས། དུས་རིང་ཐུང་ལ་
འདོད་ལུགས་ཕྲ་མོ་མ་གཏོགས་གཙོ་བོའི་དོན་ལ་མཐུན་ནོ། །འོན་ཀྱང་སྔགས་རྙིང་མའི་ལོ་
རྒྱུས་ཡིག་རྙིང་ཁུངས་ཆེ་ཆེ་མང་པོར་ཡང་ཆོས་འཁོར་བསམ་ཡས་ཡོངས་སུ་རྫོགས་པའི་རབ་
གནས་ཀྱང་མཛད་པར་བཤད་ཅིང༌། མཁས་མཆོག་བུས་ཀྱང་དེ་དང་མཐུན་པར་བཀོད་དོ། །
རྣམ་འཕྲུལ་བསམ་གྱིས་མི་ཁྱབ་པས་ན་དེ་ཡང་ཡིན་མོད། གདུལ་བྱ་ཇི་ཙམ་གྱི་སྣང་ངོ་ཡིན་
ནི་མ་འཚལ་ལོ། །དུས་ཡུན་ཐུང་ངུ་ཙམ་ལ་ཡང་ཡུལ་ཐམས་ཅད་དུ་བྱོན་པ་དང༌། དེ་དག་ཏུ་
ཡང་དངོས་སུ་ཆོས་མང་པོ་སྟོན་པ་དང༌། གཏེར་ཁ་མང་དུ་སྦེད་པ་སོགས་དང༌། ཡུལ་སོ་སོར་
བྱོན་པ་དང༌། བཞུགས་པ་དང་གཤེགས་པ་སོགས་མཛད་པ་སྣ་ཚོགས་པ་སྟོན་པ་མི་ཚར་རོ་
སྙམ་དུ་ནི་བསམ་པར་མི་བྱ་སྟེ། མཐའ་ཡས་པའི་རྫུ་འཕྲུལ་ལ་མངའ་བརྙེས་པའི་ཕྱིར་རོ། །
ཕྱིས་ཀྱང་སྐལ་བ་དང་ལྡན་པའི་གང་ཟག་གཅིག་གམ་མང་པོ་ལ་ཡང་སྐུ་དང་གསུང་གི་སྣང་
བ་ཐུན་མོང་དུ་སྟོན་པ་དང༌། སྐལ་ལྡན་གྱི་གང་ཟག་ཤས་ཆེར་ཚོགས་པའི་ཡུལ་ཕྱོགས་ལ་
20-1-65


ལར་དངོས་སུ་བྱོན་པ་ཡང་སྲིད་དེ། འཕགས་པའི་ཡུལ་དུ་བི་རུ་པ་དང༌། ལཱུ་ཡི་པ་དང༌། ཛ་
ལནྡྷ་རི་པ་ལ་སོགས་པ་ལན་མང་དུ་བྱོན་ཞིང༌། ཕྱིས་བྱུང་རང་ཡང་བྱོན་པ་བཞིན་ནོ། །ཡང་རྒྱ་
གར་ལྷོ་ཕྱོགས་ནས་ནུབ་དྲང་ཐད་དུ་གྲུ་བརྒལ་ཏེ་འགྲོ་དགོས་པའི་ས་རྒྱ་མཚོའི་དབུས་ཀྱི་
གླིང་ཆུང་ཌཱ་མི་ཌོ་དྭཱི་པ་ཞེས་བྱ་བ་ཡོད་དེ། སྔོན་སྲིན་པོ་དང༌། མཁའ་འགྲོ་མ་ནམ་མཁའ་ལ་
ལྡིང་ཞིང་འགྲོ་བ་ཁོ་ནས་གང་བ་ཡིན་པས་ཌཱ་མི་ཌོ་སྟེ་འགྲོ་ལྡིང་ངོ༌། །དུས་དེའི་ཚེ་ཡང་བུད་
མེད་ཤས་ཆེ་བ་ཞིག་ནི་གདུག་པའི་མཁའ་འགྲོ་མ་རིག་སྔགས་སྣ་ཚོགས་པ་བྱེད་པའི་ཕྱིར་
སྔགས་འཆང་མ་ཞེས་བྱ་བ་དེ་འདྲ་ཡིན་ལ། སྐྱེས་པ་ཡང་འབྱུང་པོ་མིའི་གཟུགས་ཅན་མང་པོ་
ཡོད་དོ། །དེར་སློབ་དཔོན་པདྨ་འབྱུང་གནས་ཡུལ་གྱི་སྐྱེ་བོ་རྣམས་འདུལ་བར་བཞེད་དེ་གླིང་
དེའི་བྲག་ཕུག་གཅིག་ཏུ་བཞུགས། སློབ་དཔོན་གྱིས་དགོངས་པ་བཏང་པས། ཡུལ་དེའི་
བདག་མོ་མ་མོ་དྲུག་ཅུ་རྩ་བཞིའི་སྤྲུལ་པ་རྒྱལ་པོའི་བཙུན་མོ་སྔགས་འཆང་མ་དྲུག་ཅུ་རྩ་བཞི་
ཡོད་པས་དེ་རྣམས་ཏིང་ངེ་འཛིན་གྱི་མཐུས་དངོས་སུ་བཀུག་ནས། སྔགས་དང་ཕྱག་རྒྱ་དྲག་
པོས་གཟིར་བས་བརྒྱལ་བ་དང༌། རེངས་པ་དང༌། ཚོར་བ་དྲག་པོ་གནད་དུ་ཕོག་པར་གྱུར། ད་
སྦྱིན་སྲེག་གི་ཐབ་ཏུ་བསྲེག་གོ་ཞེས་བསྡིགས་པས་དེ་རྣམས་ཐུལ་ཏེ་སློབ་དཔོན་ཅི་གསུང་
སྒྲུབ་པར་ཁས་བླངས་སོ། །དེ་རྣམས་ལ་སྔགས་འཆང་མའི་གཙོ་མོ་གཞན་ཐམས་ཅད་ཀྱང་
བསྡུར་བཅུག་ནས་ཐམས་ཅད་འདུས་པ་ལ་ཆོས་བསྟན་ཏེ་དམ་བཞག་དང་པོ་མཛད་དོ། །
ལན་ཅིག་སློབ་དཔོན་གྲོང་ཁྱེར་དུ་བཞུད་པ་ལ། སྔགས་འཆང་མ་མང་པོས་འཛམ་བུ་གླིང་གི་
མི་མང་པོ་ཁྲིད་ནས་ཟ་བར་གཟིགས་ཏེ། ཡང་བྲག་ཕུག་ཅིག་ཏུ་ཁྲོ་བོའི་དཀྱིལ་འཁོར་ཆེན་པོ་
བཞེངས། མཁའ་འགྲོ་མ་ཐམས་ཅད་དབང་མེད་དུ་བཀུག་ནས་བསྡིགས་པས་དེ་རྣམས་བྲོས་
པར་བརྩམས་པ་ལ། ཐམས་ཅད་ཀྱི་ཡན་ལག་ལ་ཕུར་བུས་བཏབ། ཕྱིན་ཆད་འཛམ་བུ་གླིང་
པའི་མི་རྣམས་ལ་གནོད་པ་མི་བྱེད་པའི་མནའ་བོར་རོ། །དེ་རྣམས་ལ་སེམས་བསྐྱེད་ཕོག་སྟེ་
20-1-66


དམ་བཞག་གཉིས་པ་མཛད་དོ། །ཡང་དུས་གཞན་ཞིག་ན་མགྲོན་ཁང་ཞིག་ཏུ་བྱོན་པས། དེ་
ན་བུད་མེད་མང་པོ་སྣོད་མང་པོར་ཆུ་སྐོལ་གྱིན་འདུག་པ་ཇི་ཞིག་ན་ཆུ་རྣམས་ལ་ལ་ཁྲག་ཏུ་
འགྲོ། ལ་ལ་ཚིལ་དུ་འགྲོ། ལ་ལ་ཐིག་ལེར་འགྲོ། ལ་ལ་ཤ་ཆེན་དུ་འགྲོ། ལ་ལ་མར་ཁུར་འགྲོ།
ལ་ལ་བུ་རམ་དུ་འགྲོ། ལ་ལ་འབྲུ་ཆན་དུ་འགྲོ། ལ་ལ་ཆང་དུ་འགྲོ་བ་སོགས་གཟིགས་ནས་དེ་
རྣམས་ལ་དྲིས་པས། སློབ་དཔོན་ཡིན་པ་ངོ་མ་ཤེས་ཏེ། འདི་དག་ནི་འཛམ་བུ་གླིང་པའི་མི་
རྣམས་ཀྱི་ལུས་བཅུད་ཟས་བཅུད་བཀུག་པ་ཡིན་ཟེར། ཁྱོད་རྣམས་ཀྱིས་སློབ་དཔོན་པདྨ་ཨཱ་
ཀ་རའི་དྲུང་དུ་མནའ་བོར་བ་མ་ཡིན་ནམ་བྱས་པས། ངེད་རྣམས་ཀྱི་དཔོན་མོས་མནའ་བོར་
ཡང་ཁོ་མོ་ཅག་གིས་མ་བོར་རོ་ཟེར་བས། ཡང་སྔར་གྱི་རི་ཕུག་དེར་དཀྱིལ་འཁོར་གྱིས་
སྔགས་འཆང་མ་གཙོ་འཁོར་བསྡུས་པས་འབུམ་ཕྲག་བཅུ་གཉིས་བྱུང་སྐད་དེ། ཐམས་ཅད་ཀྱི་
སྲོག་སྔགས་དང་སྒྲུབ་ཐབས་བླངས། གཙོ་མོ་རྣམས་དཀྱིལ་འཁོར་དུ་བཅུག། འཁོར་རྣམས་
ལ་སེམས་བསྐྱེད་ཕོག །ཐམས་ཅད་ཀྱང་མནའ་འདོར་དུ་བཅུག་སྟེ་དམ་བཞག་གསུམ་པ་
མཛད་དོ། །གཞན་ཡང་ཡུལ་དེའི་གནོད་སྦྱིན་དང་སྲིན་པོ་དང་ཀླུ་གདུག་པ་ཅན་རྣམས་ཀྱང་
བཏུལ། ཡི་དྭགས་པརྦཱ་རེ་ཞེས་བྱ་བ་ཡུལ་དེའི་རྒྱལ་པོའི་ཕོ་ལྷ་གདུག་རྩུབ་ཆེ་བ་ཞིག་ཡོད་
ཀྱང༌། རྒྱལ་པོ་བཏུལ་ན་དེ་ཡང་ཞོར་ལ་ཐུལ་བར་མཁྱེན་ནས་སངས་རྒྱས་ཀྱི་བསྟན་པ་དར་
བའི་ཕྱིར། མི་རྣམས་ཀྱང་འདུལ་དགོས་པར་དགོངས་ཏེ་རྒྱལ་པོའི་ཕོ་བྲང་དང་ཉེ་བའི་ནགས་
ཞིག་ཏུ་བཞུགས། དེར་རྒྱལ་པོའི་བཙུན་མོ་ཐམས་ཅད་དཀྱིལ་འཁོར་མཆོད་པའི་གཟུངས་
མའི་དོན་དུ་ཏིང་ངེ་འཛིན་གྱི་མཐུས་ཡང་ཡང་བཀུག་པས། རྒྱལ་པོས་ཀྱང་བཙུན་མོ་རྣམས་མི་
སྡོད་པར་ཤེས་ནས་ཕལ་པའི་གཟུགས་སུ་བསྒྱུར་ནས་ཕྱི་བཞིན་དུ་འབྲངས་པས། དེ་རྣམས་
སློབ་དཔོན་གྱི་མཐའ་བསྐོར་ནས་འདུག་པ་མཐོང་ངོ༌། །ནངས་པར་རྒྱལ་པོ་དམག་དང་
བཅས་པ་མཚོན་ཆ་སྣ་ཚོགས་ཐོགས་ཏེ་སློབ་དཔོན། འཇོམས་སུ་འོངས་པ་ན། སློབ་དཔོན་
20-1-67


གྱིས་ཡུངས་ཀར་གཏོར་བས་རྒྱལ་པོ་འཁོར་བཅས་ཀྱི་གོ་ཆ་དང་མཚོན་ཆ་རྣམས་ནི་ཚིག །མི་
ཐམས་ཅད་ཀྱང་ཡན་ལག་ནས་ཁྲག་འཛག་ཅིང་ལུས་རེངས། ངག་ལྐུགས། སེམས་མྱོས་ཏེ་
ཞག་གསུམ་ལུས། དེ་ནས་འཆི་བ་ལ་ཐུག་པ་ན། སྐྱེ་བོ་ཐམས་ཅད་ཀྱིས་གསོལ་བ་བཏབ་
པས་སློབ་དཔོན་གྱིས་བུམ་པའི་ཆུས་བཀྲུས་པས་སྐད་ཅིག་ལ་ཐམས་ཅད་བདེ་བར་གསོས་
སོ། །དེ་ནས་རྒྱལ་པོ་འཁོར་བཅས་ཀྱིས་ཀྱང་ཞབས་ལ་ཕྱག་བཙལ། སློབ་དཔོན་གྱི་གསུང་
བཞིན་བསྒྲུབ་པར་བྱས་པས། སངས་རྒྱས་ཀྱི་བསྟན་པ་ཚུགས་ཤིག་གསུང༌། ཡུལ་དབུས་མ་
ག་དྷཱ་ནས་འདུལ་བ་མཁན་པོ་དང༌། མདོ་སྡེ་མཁན་པོ་དང༌། མངོན་པ་མཁན་པོ་སྤྱན་དྲངས།
བི་དྷཱ་ཞེས་བྱ་བ་དང༌། ཨརྡྷཱ་ཞེས་བྱ་བ་དང༌། སུ་དྷཱ་ཞེས་བྱ་བ་སྟེ་གཙུག་ལག་ཁང་གསུམ་
བཞེངས། རབ་གནས་སློབ་དཔོན་གྱིས་མཛད། སྡེ་སྣོད་གསུམ་གྱི་བཤད་པ་དང་ལག་ལེན་
རྐང་ཚུགས་པ་བཙུགས། སློབ་དཔོན་ཉིད་ཀྱིས་ནི་ཡུལ་དེར་མདོ་ལུགས་ཀྱི་ཐེག་པ་གཞན་ནི་
ཆེར་མ་གསུངས། རྒྱལ་པོ་འཁོར་བཅས་ལ་ཆོས་ཀྱི་གདམས་པ་མང་དུ་གསུངས། སྐལ་པ་
དང་ལྡན་པའི་སློབ་མ་དྲུག་ལ་རྒྱུད་དྲུག་བཤད། རྫོགས་རིམ་དང་ལས་ཚོགས་མང་དུ་གསུང༌།
སློབ་མ་དྲུག་པོས་ཀྱང་གྲུབ་པ་ཐོབ་བོ། །ཡུལ་སོ་སོ་ན་ལྷ་ཁང་ཆུང་ངུ་ལྔ་ཙམ་བཞེངས་ཏེ་
ཐམས་ཅད་ཆུ་ཚོད་གཅིག་ལ་དུས་གཅིག་ཏུ་གྲུབ་པ་ཡིན་སྐད། དེ་ལྟར་ཡུལ་དེར་ལོ་བཅུ་
གཉིས་ཙམ་བཞུགས་ནས་མཐར་བླ་གོས་ཀྱིས་གཤོག་པའི་ཚུལ་དུ་བྱས་ནས་ནམ་མཁའི་
ལམ་ལས་གྱ་གྱུར་གཤེགས་ནས་ལྷོ་ནུབ་རྔ་ཡབ་སྲིན་པོའི་གླིང་དུ་བཞུད་དོ་ཟེར། ལོ་བཅུ་
གཉིས་ཞེས་པ་ཕྱེད་ལོ་ཡིན་ནམ་སྙམ་མོ། །དེང་སང་འགྲོ་ལྡིང་གི་གླིང་ན་དཔལ་ཟླ་གསང་
ཐིག་ལེའི་རྒྱུད་ལ་བཤད་སྒྲུབ་བྱེད་ཚད་སློབ་དཔོན་འདིའི་ལུགས་ཁོ་ན་ཡིན་ལ། དེ་བཞིན་དུ་
རྡོ་རྗེ་སྙིང་པོ་རྒྱན་གྱི་རྒྱུད་ཆེན་མོ་དང༌། ཕྱག་རྡོར་དང༌། རྡོ་རྗེ་གཎྜ་རི། གཤིན་རྗེ་གཤེད་དང་
རྟ་མགྲིན་དང༌། ནག་པོ་ཆེན་པོ་དང༌། མ་མོ་བདུན་སོགས་ཀྱི་རྒྱུད་དང༌། རྟོག་པ་ཆུང་ངུ་མང་དུ་
20-1-68


ཡོད་ཅིང༌། ཡུལ་དེ་ན་མཧཱ་ག་ནི་ཟེར་བའི་སྡེ་གཅིག་ཡོད་པར་སྣང་བ་སློབ་དཔོན་ཡེ་ཤེས་
ཞབས་ཁོ་ནའི་རྗེས་འབྲང་ཡིན་ཞིང༌། ཡེ་ཤེས་ཞབས་ཐུགས་སྲས་བཞི་དང་བཅས་པའི་
གསུང་ཁོ་ན་ལ་རྩིས་སུ་ཆེ་བས། དེ་རྣམས་ལ་སློབ་དཔོན་པདྨ་འབྱུང་གནས་ཀྱི་ལུགས་སྲོལ་
དགེས་རྡོར་དང༌། དཔལ་མཆོག་དང་པོ་དང༌། གོང་དུ་སྨོས་པ་དེ་རྣམས་ཤིན་ཏུ་དར་བར་ཡོད།
རྒྱུད་དེ་དག་དང་འབྲེལ་བའི་བསྟན་བཅོས་དང༌། གསང་བ་འདུས་པའི་མན་ངག་ཀྱང་སློབ་
དཔོན་འདིས་མཛད་ཡོད་པར་སྣང་ངོ༌། །མཁའ་འགྲོ་མ་རྣམས་དམ་གཞག་དང་པོ་མཛད་པའི་
གནས་དེ་ལ་མ་པསྠཱ་ཟེར། བྲག་ལ་ཕྱག་གིས་བཅོས་པའི་མེ་ཐབ་ཡོད། དམ་གཞག་ཕྱི་མ་
གཉིས་མཛད་པའི་གནས་ལ་ཨཱལྤ་སྠཱ་ཟེར་ཏེ། མཁའ་འགྲོ་མ་རྣམས་ལ་ཕུར་བུས་བཏབ་པའི་
ཕུར་བུའི་རྗེས་སྟོང་ཕྲག་ཙམ་དང༌། གྲུབ་པའི་ཕུར་བུ་དེ་རྣམས་སྐྱེ་བོ་ཕལ་བའི་སྤྱོད་ཡུལ་དུ་
མི་སྡོད་པས་གཞན་རྣམས་ཡལ་ཀྱང༌། གཅིག་མ་འོངས་པའི་སེམས་ཅན་ཡིད་ཆེས་པའི་དོན་
དུ་ཡེ་ཤེས་པ་སློབ་དཔོན་གྱི་སྐུ་ལ་བསྟིམས་ནས་རྫས་ཀྱི་ཕུར་བུ་བཞག་པ་ཡིན་ཟེར་བ་རྒྱུ་རྡོ་
ཤིང་ཟངས་ལྕགས་སོགས་གང་དུ་ཡང་མཚོན་དུ་མེད་པ། བཅོས་མ་མི་འདྲ་བའི་རང་བྱོན་ལྟ་
བུ་ཆེ་ཁྱད་མིའི་བོངས་སུམ་འགྱུར་ཙམ་ཞིག་ཡོད་ཅིང༌། དེ་ཡང་དང་པོ་ཤིང་ལ་བཅོས་པའི་
ཕུར་བུ་ཆུང་ངུ་རེ་ཡོད་པ་ལ། དེ་འགྲུབ་པའི་དུས་རབ་ཏུ་འཕེལ་ཞིང་ཆེ་ཆུང་བློས་གང་བྱས་སུ་
འགྲོ་བ་འགྲོ་འོང་དང་གསུང་གི་སྣང་བ་སོགས་ལྷ་དངོས་དང་འདྲ་བ། འབར་འཕྲེང་འཁྲིགས་
པ་ཞིག་ཏུ་གྱུར་ལ། དེ་སྐབས་ཕྲ་མེན་སྔགས་འཆང་མའི་གཙོ་མོ་ཞིག་ལུས་རི་རྒྱལ་ཙམ་དུ་
བསྒྱུར་ནས་བྲོས་པར་བརྩམས་པ་ལ། ཕུར་བུ་དེ་ཡང་རི་བོ་ཙམ་དུ་གྱུར་ནས་བཏབ། སླར་ཡེ་
ཤེས་པ་སློབ་དཔོན་གྱི་སྐུ་ལ་བསྟིམ་པས་འོད་འཕྲོ་བ་དང་མེ་འབར་བ་སོགས་ཞི་ནས་ལྷག་རོ་
ལུས་པའི་ཚུལ་དུ་དེ་ལྟར་གྱུར་སྐད་དོ། །དེ་ལྟར་སློབ་དཔོན་འདིའི་གཏམ་རྒྱུད་གྲུབ་ཆེན་ཞི་བ་
སྦས་པའི་གསུང་རྒྱུན་སོགས་འཕགས་ཡུལ་ན་གྲགས་པ་ཐོར་རེ་བ་དང༌། དེ་ལས་ཀྱང་ཞིབ་
20-1-69


ཅིང་རྒྱས་པར་འགྲོ་ལྡིང་གི་སློབ་དཔོན་ལྷའི་འབྱུང་ལྡན་ལས་བརྒྱུད་པ་དེ་གཉིས་ཀྱི་དངོས་
སློབ་རྣམས་ཀྱི་ཞལ་ལས་དངོས་སུ་ཐོས་པ་རྣམས་དང༌། བོད་དུ་འགྲོ་དོན་མཛད་པའི་ཚུལ་
ཡིག་རྙིང་ཁུངས་མ་མང་པོ་ཞལ་མཐུན་པར་བྱུང་བ་རྣམས་མཆོག་ཏུ་ཡིད་ཆེས་པར་བཟུང་སྟེ་
བཀོད་པ་ཡིན་ལ། འགྲོ་ལྡིང་གི་ཡུལ་ལས་བྱུང་བ་རྒྱ་གར་མཁས་པ་ལས་བརྒྱུད་ནས་སློབ་
དཔོན་འདིའི་གདམས་ངག་སྣ་རེ་ཙམ་ཡང་ཐོས་ཤིང༌། ལོ་རྒྱུས་ཀྱི་ཡི་གེ་ནི་འཕགས་ཡུལ་
ལས་བྱུང་བ་བདག་ཅག་གིས་དངོས་སུ་མཐོང་ཡང་ཁོ་བོ་ཅག་གི་བླ་མ་པཎ་གྲུབ་དེ་རྣམས་ཀྱི་
བླ་མ་བརྒྱུད་པའི་གཏམ་རྒྱུད་ཀྱི་ཡི་གེ་གཏོགས་པ་དང༌། འགྲོ་ལྡིང་གི་ཡུལ་དུ་ཆོས་དར་བའི་
གཏམ་རྒྱུད་ཀྱི་ཡི་གེ་སོགས་ཀྱི་ནང་ན་ཡོད་པའང་མང་དུ་གཟིགས་ཤིང༌། མཁས་གྲུབ་སྐྱེས་
བུ་དམ་པ་རྣམས་ཀྱི་སྙན་ནས་སྙན་དུ་བརྒྱུད་པའི་གསུང་སྒྲོས་དྲི་མ་མེད་པ་རྣམས་གུང་བསྟུན་
པ་སྟེ། དེ་ལྟར་ན་གཏམ་གྱི་སྦྱོར་བ་འདི་ལ་དབྲི་ཞིང་དོར་བར་བྱ་རྒྱུ་ཅུང་ཟད་ཀྱང་མེད་ལ། ངོ་
མཚར་བའི་གཏམ་རྒྱུད་བདེན་པའི་དོན་ཅན་བསྣན་པར་བྱ་རྒྱུ་ནི་མང་དུ་འབྱུང་ངོ༌། །འཕགས་
ཡུལ་གྱི་གཏམ་ལས་ཀྱང་སློབ་དཔོན་འདིས་ཧུ་ར་མུ་ཛུ་ཞེས་བྱ་བའི་གླིང་དང༌། སི་ཀོ་དྷ་ར་
དང༌། དྷ་ན་ཀོ་ས་དང༌། རུག་མ་ལ་སོགས་པར་ཡང་བྱོན་ཏེ་འགྲོ་བའི་དོན་མཛད་དོ་ཞེས་
འབྱུང་ཡང་དེ་དག་གི་ལོ་རྒྱུས་མ་རྙེད་པ་དང༌། བོད་ཀྱི་ཆོས་གདམས་ངག་སོ་སོའི་ཐུན་མོང་མ་
ཡིན་པའི་དོན་དང་འབྲེལ་བའི་གཏམ་རྒྱུད་ངོ་མཚར་ཆེ་བ་མང་པོའང་མཐོང་མོད་ཀྱི་འདིར་ཧ་
ཅང་མང་བར་འགྱུར་བའི་ཕྱིར་མ་བྲིས་པ་བཞིན་ནོ། །
འདིར་སྨྲས་པ། བློ་ཆུང་འགའ་རེས་བླུན་དད་ཁོ་ནས་འགྲོ་རྣམས་དད་པ་སྤེལ་ཕྱིར་རང་
བཟོ་གཏམ་རྒྱུད་མང་པོ་སྦྱར། །སྐྱེ་བོ་ཕལ་ཆེར་ཤིན་ཏུ་རྨོངས་པས་བདེན་མིན་ཚིག་དོན་
ལེགས་པ་མིན་ལའང་དད་པ་འཕེལ་སྲིད་མོད། །དཔྱོད་ལྡན་རྣམས་ཀྱིས་མཐོང་ཐོས་གྱུར་ཚེ་
ཁྲེལ་བདས་བྱེད་ཅིང་དེ་ཡི་རྒྱུ་ལས་ཆོས་དང་སྐྱེས་བུ་ནི། །རྣམ་དག་ཀུན་ལའང་ཐེ་ཚོམ་ཟར་
20-1-70


འཇུག་འདི་ནི་བདུད་ཀྱི་ལས་ཡིན་འདི་ལས་གནོད་པ་ཆེ་བའང་གང༌། །དེང་འདིར་ངོ་མཚར་
གཏམ་ལ་ཡིད་གཉིས་སྤངས་ཤིང་ཧ་ཅང་ཐལ་བའི་ཆེ་བ་བརྗོད་པའང་མ་ཡིན་མོད། །གཏམ་
གྱི་སྦྱོར་བ་ཉུང་ངུ་འདིས་ཀྱང་རང་བཟོའི་གླེགས་བམ་ཆེན་པོའི་གཏམ་དག་ལན་བརྒྱར་ཟིལ་
གྱིས་མནན། །འདི་བྲིས་དགེ་བས་བདག་ཀྱང་མགོན་པོ་དེ་ཡི་གོ་འཕང་ཐོབ་ནས་འགྲོ་ཀུན་
ཐར་པར་འདྲེན་གྱུར་ཅིག །གསལ་དག་ཡིད་ཆེས་གཏམ་འདི་སྨྲ་བའང་ངེས་པར་མགོན་དེའི་
བྱིན་རླབས་སྙིང་ལ་ཞུགས་པ་ཁོ་ནས་སོ། །འཇིག་རྟེན་གྲགས་རྗེས་འབྲངས་དང་ཕྲ་མ་སྔ་
བཙན་ཅན། །དེ་རྣམས་ཚུལ་འདི་མོས་སྙམ་བདག་ལ་རེ་བའང་མེད། བདག་དང་བདག་ཚིག་
རྗེས་འབྲང་རྣམས་ཀྱི་དད་པའི་རྐྱེན། །དཔྱོད་ལྡན་རྣམས་ཀྱི་ཡིད་དང་རྣ་བའི་བདུད་རྩི་ཡིན།།    །།
དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་སྤྲུལ་པའི་སྐུ་ཨོ་རྒྱན་གྱི་སློབ་དཔོན་
ཆེན་པོ་པདྨ་འབྱུང་གནས་ཀྱི་རྣམ་པར་ཐར་པ་ཡིད་ཆེས་གསུམ་ལྡན་ཞེས་བྱ་བ་འདི་ཡང༌།
རང་དང་ལྷན་ཅིག་གནས་ཤིང་རྒྱུ་བ་གཙང་སྨྱོན་ཀུན་དགའ་དཔལ་བཟང་ཞེས་བྱ་བས་
བསྐུལ་ཞིང་རང་ཉིད་ཀྱི་དད་པའི་གསོས་སུ་འགྱུར་བར་བསམས་ནས། རྒྱལ་ཁམས་པ་ཏཱ་ར་
ནཱ་ཐས་རང་ལོ་སུམ་ཅུ་སོ་དྲུག་པ་ལ་ནགས་རྒྱལ་གྱི་དབེན་གནས་ཇོ་མོ་ནང་དུ་སྦྱར་བ་དགེ་
ལེགས་འཕེལ།
20-1-71


༄༅། །དཔལ་ལྡན་བླ་མའི་རྣམ་ཐར་འཕྲིན་ལས་རྒྱ་མཚོ་
རྣམ་པར་རྒྱས་པ་ཞེས་བྱ་བ་བཞུགས།
༄༅། །ༀ་སྭཱ་སྟི་པྲ་ཛ་བྷྱཿ དཔལ་ལྡན་བླ་མ་དམ་པ་མགོན་པོ་སྟག་ལུང་བ་ཆེན་པོ་དོན་
གྱི་སླད་དུ་མཚན་ནས་སྨོས་ཏེ་རྗེ་བཙུན་ཀུན་དགའ་བཀྲ་ཤིས་རྒྱལ་མཚན་དཔལ་བཟང་པོའི་
ཞབས་ཀྱི་རྣམ་པར་ཐར་པ་འཕྲིན་ལས་རྒྱ་མཚོ་རྣམ་པར་རྒྱས་པ་ཞེས་བྱ་བ། བླ་མ་མཆོག་གི་
ཞབས་ལ་གུས་པས་ཕྱག་འཚལ་ལོ། །དུས་ཐམས་ཅད་དུ་བརྩེ་བ་ཆེན་པོས་རྗེས་སུ་བཟུང་དུ་
གསོལ། དཔལ་ལྡན་མཆོག་ཏུ་རྟག་བརྟན་གཞོམ་མེད་སྐུ། །བརྗོད་བྲལ་སྒྲ་དབྱངས་ཀུན་ལ་
འཇུག་འགྱུར་གསུང༌། །ལྷུན་འགྲུབ་བདེ་སྟོང་ཇི་སྙེད་གཟིགས་པའི་ཐུགས། །འཕྲིན་ལས་
རྒྱུན་མི་འཆད་ཁྱོད་ཕྱག་གི་གནས། །རབ་བརྟན་བྱང་ཆུབ་སེམས་ཀྱི་གཞིར། །རྨད་བྱུང་ཕན་
བདེའི་ལོ་ཏོག་དག །མཐའ་ཡས་བསྐལ་བར་མི་ཟད་པ། །བསྐྲུན་མཛད་བླ་མ་མཆོག་འདི་
རྒྱལ། །ཨེ་ཡིག་ཀུན་ལྡན་སྟོང་པའི་ཁྲིར། །ཝཾ་ཡིག་བདེ་ཆེན་རང་རྒྱལ་པོ། །ཟུང་འཇུག་ལྷན་
སྐྱེས་རང་བཞིན་དངོས། །བླ་མ་རྡོ་རྗེ་ཅན་ཞབས་འདུད། །ཐོག་མེད་རྫུ་འཕྲུལ་བསྒྲོད་པ་ཅན། །
མཚན་དཔེའི་གཟི་བྱིན་དཔག་ཡས་ཀྱི། །འཕྲིན་ལས་ཀུན་ཁྱབ་གར་ཡང་སོན། །སྒྱུ་འཕྲུལ་
སྐུ་ལ་ཕྱག་འཚལ་བསྟོད། །འགགས་མེད་གཞོམ་དུ་མེད་པའི་ཚུལ། །བརྗོད་བྲལ་སྒྲ་དབྱངས་
ཐམས་ཅད་པ། །སེམས་ཅན་བསམ་པ་ཇི་བཞིན་འཇུག །འགྲོ་མགོན་གསུང་ལ་ཕྱག་བགྱིའོ། །
རང་བཞིན་དག་པ་རྣམ་མི་རྟོག །ལྷུན་འགྲུབ་འབད་རྩོལ་བྲལ་བའི་དབྱིངས། །ཇི་ལྟ་ཇི་
སྙེད་ཇི་བཞིན་གཟིགས། །རྗེ་བཙུན་ཐུགས་ལ་ཕྱག་འཚལ་ལོ། །གང་ཞིག་འགྲོ་ཀུན༷་དག༷འ་
བའི་བཀྲ༷་ཤིས༷་ཆོས་སྒོ་རབ་གསལ་ཐར་པའི་རྒྱལ༷་མཚ༷ན་དཔ༷ལ་ལྡན་སྙིང་རྗེ་བཟ༷ང་པོ༷་
20-1-72


ཅན། །ཀུན༷་ནས་དག༷འ་བས་མཐའ་བྲལ་སྟོང་ཉིད་བཀྲ༷་ཤི༷ས་ལམ་མཆོག་རྒྱ༷ལ་བའི་མཚ༷ན་
གྱི་དཔ༷ལ་འབར་ཀུན་ཏུ་བཟང་པོའི་ལམ། །སྐལ་ལྡན་ཀུན་ལ་དགའ་བཞིའི་ལམ་སྟོན་བཀྲ་
ཤིས་བདུད་ལས་རྒྱལ་བའི་མཚན་མཆོག་སྲིད་ཞིའི་དཔལ་ཡོན་བཟ༷ང་པོ༷་པ། །ཀུ༷ན་ཏུ་རབ་
དག༷འ་བཀྲ༷་ཤི༷ས་རྩིབས་སྟོང་རབ་བཀྲ་ཞབས་བཟུང་ཆོས་ཀྱི་རྒྱལ༷་མཚ༷ན་སྐྱེ་འགྲོའི་དཔ༷ལ་
གྱུར་བཟ༷ང་པོ༷ར་འདུད། །ཆད་པ་མེད་པའི་དུས་ཀྱི་མཐའ་ཡང་མངོན་པར་བྱང་ཆུབ་ཟག་
བྲལ་འགྱུར་མེད་དུས་ཀྱི་ངེས་པ་སྟེ། །སླར་ཡང་ངེས་པར་མཐའ་ཡས་ཁམས་སུ་ངོ་མཚར་
བྱང་ཆུབ་མཆོག་ཏུ་ཐུགས་བསྐྱེད་མཛད་པ་རྒྱ་ཆེན་དང༌། །གཞན་དུ་ཆོས་ཀྱི་འཁོར་ལོ་བསྐོར་
དང་ཁ་ཅིག་ཏུ་ནི་ཉན་ཐོས་དེ་བཞིན་རང་བྱང་ཆུབ་པའི་ཚུལ། །འཕྲོག་བྱེད་མེས་པོ་སྲེད་མེད་
བུ་དང་མི་སྦྱིན་རྒྱས་པ་དཔག་བསམ་ཤིང་དང་འདོད་འཇོ་བུམ་པ་བཟང༌། །ཐ་དད་ཡི་གེ་དང་
ནི་རིགས་བྱེད་སྣ་ཚོགས་རིགས་སྔགས་གཞན་ཡང་ཆུ་བོ་གཟིང་དང་ཟམ་པ་སོགས། །འབྱུང་
བ་འབྱུང་འགྱུར་སེམས་ཅན་ཁམས་ཏེ་མཐའ་དག་གཟུགས་ཀྱིས་སྤྲུལ་པ་སྒྱུ་མའི་དྲྭ་བ་མཛད་
པ་འདིར། །རྟོག་གེའི་བློ་གྲོས་སྣ་ཚོགས་ཚིག་གིས་འཇུག་པའི་གོ་སྐབས་ནམ་ཡང་མ་མཆིས་
ཚངས་སོགས་ལྷ་རྣམས་ཀྱང༌། །བྱོལ་སོང་ཉིད་བཞིན་ལུང་དང་རིག་པའི་ཁེངས་ལྡན་དག་
ཀྱང་མུ་ཅོར་རང་བཞིན་བྱས་པའི་བརྟུལ་ཞུགས་འཛིན། །དེ་སླད་བླ་མ་མཆོག་རྗེས་བཟུང་
གང་ཁེངས་བཏང་སྟེ། །རབ་ཏུ་ཡེ་ཤེས་བདུད་རྩི་ཅུང་ཟད་རྙེད་གྱུར་ན། །གནས་འདི་ཡོན་ཏན་
རྒྱ་མཚོ་ཡིན་ཞེས་ཤེས་གྱུར་གྱི། །རང་བཟོར་དཔྱད་པས་ཉམས་པའི་རི་བོ་འདི་དག་རྨོངས། །
གང་གི་དྲིན་གྱིས་བསྐྱེད་པའི་ཆུ་སྐྱེས་དགའ། །ཚིག་སྙན་ཟེའུ་འབྲུ་རྒྱས་པས་ཉེར་བརྒྱན་མོད། །
ལོག་པའི་ཀུན་རྟོག་གེ་སར་རྡུལ་རྒྱས་པའི། །ཐུགས་མཚོ་རྙོག་བྱེད་དེ་ཡང་མགོན་ཁྱོད་ཀྱི། །
ཐུགས་རྗེས་བྱང་ཆུབ་བར་དུ་རྗེས་བཟུང་ནས། །གནོད་པ་ལས་ཀྱང་བདེ་བའི་འབྲས་འདིར་
མཚར། །བློ་ཞན་ཕན་ཆེན་བཏགས་པའང་འབྲས་མེད་དེ། །དམ་པར་གནོད་པའི་ལན་ཡང་
20-1-73


ཕན་པར་སྤྱོད། །རྒྱལ་བ་རྒྱལ་བའི་སྲས་ཀྱི་ཚུལ་འཛིན་པ། །འདྲེན་པ་འདྲེན་མཆོག་རྣམས་
ཀྱིས་གུས་བཏུད་ཅིང༌། །བློ་ལྡན་བློ་གྲོས་ཆེན་པོའི་ལམ་སྟོན་པ། །གསུང་མཆོག་གསུང་གི་
བདག་པོ་ཁྱེད་ལ་བསྟོད། ཁྱོད་ཀྱི་ཡོན་ཏན་འཕྲིན་ལས་ནི། །བསམ་མི་ཁྱབ་ཅེས་འདིར་སྟོན་
གྱི། །རེ་རེ་ནས་བརྗོད་ངལ་བ་ནི། །དཔྱོད་ལྡན་རྣམས་ཀྱིས་ཅི་ཕྱིར་བརྟེན། །དེ་ལ་ཁོ་བོ་ཅག་
གི་བླ་མ་དམ་པ་དོན་གྱིས་སླད་དུ་མཚན་ནས་སྨོས་ཏེ་རྗེ་བཙུན་དམ་པ་ཨ་ནནྡ་མངྒ་ལ་ཞེས་
མཚན་ཡོངས་སུ་གྲགས་པ་འདི་ཉིད་ནི། ཤེས་དང་ཤེས་བྱ་གཅིག་པུའི་སྐུ། ཐབས་དང་ཤེས་
རབ་གཉིས་ཀྱི་བདག་ཉིད། རྡོ་རྗེ་གསུམ་གྱི་རང་བཞིན་སྐུ་བཞིའི་ངོ་བོར། ཡེ་ཤེས་ལྔའི་རྣམ་
རོལ། རྒྱུ་དྲུག་གི་འགྲོ་བ་སྒྲོལ་བར་མཛད་པ། འཇིག་རྟེན་བདུན་ལས་ཡོངས་སུ་འདས་པའི་
ཞིང་ཁམས་ཅན་འཕགས་པའི་ལམ་ཡན་ལག་བརྒྱད་སྟོན་པ། ཡན་ལག་དགུ་དང་ལྡན་པའི་
གསུངས་རབ་ཀྱི་སྒྲ་སྒྲོག་པ། ས་བཅུ་རྣམ་པར་གནོན་པའི་དབང་ཕྱུག བདེན་དོན་རྣམ་པ་བཅུ་
གཉིས་དང༌། དེ་ཉིད་རྣམ་པར་བཅུ་དྲུག་ཟུང་དུ་འཇུག་པ། རྣམ་པ་ཉི་ཤུས་མངོན་པར་བྱང་
ཆུབ་པ། མཚན་སུམ་ཅུ་རྩ་གཉིས་དང་དཔེ་བྱད་བརྒྱད་ཅུས་ཉེ་བར་བརྒྱན་པ། རིགས་བརྒྱའི་
དཀྱིལ་འཁོར་སྤྲོ་བ། བསམ་གྱིས་མི་ཁྱབ་པ་མི་ཟད་རྒྱན་གྱི་འཁོར་ལོའི་སྣང་བརྙན་ཆད་པ་
མེད་པའི་ཞིང་རྣམས་སུ་མུ་མཐའ་མེད་པའི་བསྐལ་པར་བརྗོད་དུ་མེད་པའི་ཚུལ་གྱིས་འཇུག་
པར་བྱའོ། །ཞེས་བརྗོད་པར་བྱའོ། །ཐ་སྙད་ཀྱི་ཚད་མས་ནི་གཞལ་མི་སྤྱོད་དོ། །འོན་ཀྱང་ཅུང་
ཟད་ཐོས་པ་དག་ཅིག་གླེང་ན། གྲུབ་མཆོག་སྟོང་གིས་ཞབས་ཟུང་ཉེར་མཆོད་པ། །མཆོག་
གྱུར་མཁས་པ་ལྔ་བརྒྱས་གུས་པས་མཆོད། །ཕྱོགས་བཞིས་མུ་སྟེགས་ཕམ་མཛད་མཁའ་ལ་
གཤེགས། །སངས་རྒྱས་བསྟན་པའི་རྒྱལ་མཚན་ལེགས་པར་བཟུང༌། །འཇམ་དབྱངས་རང་
ཉིད་འཇམ་དབྱངས་སྲས་པོའི་ཚུལ། །སྲིད་གསུམ་སྡུག་བསྔལ་ཞི་བར་མཛད་པའི་ལྷ། །བྱང་
ཆུབ་སེམས་དཔའ་ལམ་བཟང་སྤྱོད་པའི་མཆོག །སྲིད་གསུམ་ཕྱོགས་བཅུར་གསལ་བར་
20-1-74


མཛད་ཅེས་ཐོས། །ཞེས་པ་ལྟར། འཕགས་པ་འཇམ་དཔལ་གྱི་ཐུགས་ཀྱི་སྲས་འཇམ་དཔལ་
ཉིད་ཀྱིས་སྤྲུལ་པར་གྲགས་པ་སློབ་དཔོན་ཆེན་པོ་ཞི་བ་ལྷ་ཞེས་བྱ་བ། རྫུ་འཕྲུལ་གྱིས་མུ་
སྟེགས་ཐམས་ཅད་བཏུལ་ཞིང༌། མཁས་པའི་བྱ་བ་རྣམ་པ་གསུམ་གྱིས་ཐེག་ཆེན་གྱི་བསྟན་པ་
ཉིན་མོ་ལྟར་མཛད་ཅིང༌། རིག་པ་བརྟུལ་ཞུགས་ཀྱི་སྤྱོད་པ་སྤྱད་དེ་ཟུང་འཇུག་འཇའ་ལུས་ཀྱི་
སྐུ་བརྙེས་པ་དེས། གངས་རིའི་ཁྲོད་དུ་ཡང་སྲིད་བཟུང་བའི་ཚུལ་མཛད་པ་ནི། རྒྱལ་བའི་སྲས་
པོ་ཐོགས་མེད་བཟང་པོ་དཔལ་ཡིན་ཏེ།
༈ དལ་འབྱོར་ནོར་འཛིན་ལྷག་བསམ་ལྗོན་པའི་བརྒྱན། །བྱང་ཆུབ་སེམས་ཀྱི་ཡལ་
འདབ་ཕྱོགས་བཅུ་རྒྱས། །དོན་གཉིས་འབྲས་བཟང་མངོན་པར་བརྡོལ་བ་འདིས། །སྲིད་པའི་
འགྲོ་བ་ཐམས་ཅད་མགྲོན་དུ་གཉེར། །དམ་པ་འདི་ནི་བདག་བས་གཞན་གཅེས་ཀྱི་ཐུགས་
བཅོས་མ་མ་ཡིན་ལ་ཆུང་ངུའི་དུས་ནས་མངའ་ཞིང༌། གཞན་གྱིས་མ་བསྟན་པར་ཕ་རོལ་
ཏུ་ཕྱིན་པ་དྲུག་ལ་འཇུག་པ་ལ་སོགས་པ་བྱང་སེམས་འཕགས་པའི་ཆོས་མ་འདྲེས་པ་བཅོ་
བརྒྱད་ལ་སོགས་པ་སོ་སོ་སྐྱེ་བོ་ཕལ་གྱི་མཐུན་སྣང་དུ་གྲུབ་པར་མངའ་བ། ལུང་རིག་སྨྲ་བའི་
དབང་ཕྱུག་ཡིན་ཞིང༌། རྩེ་གཅིག་ཏུ་སྒྲུབ་པ་ལ་གཞོལ་བའི་ཚུལ་མཛད་དེ། ལོ་རྒྱུས་རྒྱས་པར་
གངས་རིའི་ཁྲོད་འདིར་ཡོངས་སུ་ཁྱབ་པའི་རྣམ་ཐར་རྣམས་སུ་ཤེས་པར་བྱའོ། །གཞན་ཡང་
ཐེག་ཆེན་ཆོས་ཀྱི་རྒྱལ་པོ་ཡང༌། དམ་པ་འདི་ཉིད་དང་ཐུགས་རྒྱུད་གཅིག་པའི་རྒྱུ་མཚན་དོན་
རྟགས་དང་བཅས་པ་མང་དུ་སྣང་ངོ༌། །གང་འདི་ས་ཆེན་དམ་ཆོས་དང༌། །སྲིད་ཀྱི་ཕུན་སུམ་
ཚོགས་མཛད་པ། །འདི་ལྟ་གཞན་ནི་མ་མཆིས་ཏེ། །ཐེག་ཆེན་ཆོས་ཀྱི་རྒྱལ་པོར་གྱུར། །དེ་
ཚེ་འཇུངས་ལྡན་ཆེན་པོ་འགས། །རང་གི་རྫས་ཀྱིས་རང་ཉིད་བཅོམ། །གང་འདི་ཆོས་འབྱོར་
འཕེལ་བ་དང༌། །ཡུན་རིང་འཚོ་ཞིང་བཞེས་པ་ལགས། །དེ་ལྟར་རིམ་པར་བརྒྱུད་དེ་སླར་ཡང་
དབུ་རུ་བྱང་ཕྱོགས་འདིར། རྟོགས་ལྡན་བསོད་ནམས་དབང་ཕྱུག་ཅེས་བྱ་བར་སྐྱེ་བ་བཞེས་ཏེ། 
20-1-75


མགུལ་གྱི་ངོས་ལ་དཔའ་བོའི་རྟགས་མཚན་རྨེ་བ་དམར་པོས་མཚན་པ་ལས་དཔག་ཏེ། སྐྱེ་བོ་
རྣམས་ཀྱིས་བྱུ་རུ་སྐེ་ཞེས་བླ་དྭགས་སུ་མཚན་གསོལ་བ་ཞིག་སྟེ། དེ་ནི་གྲུབ་ལུང་གི་རི་ཁྲོད་དུ་
གཙོ་བོར་བཞུགས་པ། ཤངས་པ་བཀའ་བརྒྱུད་ཀྱི་སྒྲུབ་པའི་རྒྱལ་མཚན་འཛིན་ཞིང༌། མྱུར་
མཛད་མགོན་པོ་དང་མི་ལབ་པ་བཞིན་ཡོད་པ། རིག་པ་བརྟུལ་ཞུགས་ཀྱི་སྤྱོད་པ་སྤྱོད་ཅིང༌།
སྒྲིབ་པ་མེད་པའི་མངོན་ཤེས་ཀྱིས་ལུང་སྟོན་པ་སེམས་ཅན་གྱི་དོན་མཛད་པ། ཤེས་ཆེར་
མགོན་པོས་བྱིན་གྱིས་བརླབས་པའི་བྱ་རོག་དང་ལྷན་ཅིག་རྩེད་མོ་མཛད་ཅིང༌། ཉིད་ཀྱིས་
མདའ་ཆུང་ངུ་འཕེན་པར་མཛད་པར་བྱ་རོག་གིས་གཤོག་པ་བརྐྱངས་ནས་ལེན་པར་མཛད་
པ་སོགས་ངོ་མཚར་གྱིས་རོལ་བ་མཐའ་ཡས་པ་སྟོན་པ་ཡོད་པར་སྣང་ངོ༌། །དཔག་ཡས་རྫུ་
འཕྲུལ་རོལ་རྩེད་ལ། །ཤིན་ཏུ་ངོ་མཚར་འགྱུར་བ་ཅི། །སྒྲོན་མེ་གཏམས་ལ་འོད་གསལ་བ། །
སྤྱི་ལུགས་འདི་ལ་ཅི་ཞིག་དཔྱོད། །འོན་ཀྱང་ཐུགས་རྗེའི་རི་མོ་རྣམ་བཀྲ་བ། །ཇི་བཞིན་ལྟ་
བྱེད་དག་པའི་མིག་འདི་མཚར། །རྒྱལ་བའི་ཡེ་ཤེས་ཡིས་ཀྱང་གཞལ་དཀའ་བའི། །རྣམ་ཐར་
མཐོང་བ་འདི་ཡང་དེ་ཡིས་མཐུ། །
༈ དེ་ཉིད་ནས་སྐུ་ཡི་སྐྱེ་བ་བར་མ་ཆད་པ་བྱོན་པ་ནི་རྗེ་བཙུན་འདི་ཡིན་ནོ། །རྣམ་འདྲེན་
གསེར་གྱི་འདབ་རྒྱས་སྟོང་གིས་རབ་བརྒྱན་པའི། །ཞིང་བཟང་བདུད་རྩིའི་རོལ་མཚོ་མི་
མཇེད་ཅེས་གྲགས་པ། །གང་འདིའི་རྒྱུན་གྱུར་གོ་ཏམ་རིགས་འཁྲུངས་ཤཱཀྱའི་སྲས། །ལེགས་
འཁྲུངས་འཛམ་བུའི་སྒྲ་ལྡན་དབྱིག་འཛིན་སྙིང་པོ་འདི། །ཤེས་བྱའི་གནས་ལ་ཐོགས་མེད་
མཐུ་ལྡན་དང༌། །དངོས་གྲུབ་ལང་ཚོ་རྒྱས་པའི་སྐལ་བཟང་ཅན། །རྒྱུ་སྐར་གྲངས་ཀྱིས་ཉེ་བར་
མི་དཔོག་པས། །ལན་བརྒྱར་ཕྱག་བྱས་སྲིད་གསུམ་མ་ལུས་པ། །ཀུན་གྱི་གཙུག་གི་ནོར་བུར་
མངོན་མཆོད་ཅིང༌། །རིག་སྔགས་འཆང་གི་འཁོར་ལོ་བསྒྱུར་གཅིག་པུ། །བདེ་ཆེན་ལམ་གྱིས་
མངོན་པར་བྱང་ཆུབ་པ། །ས་བདག་མི་དབང་ཨིནྜ་བྷུ་ཏི་སྟེ། །མ་རིག་སྤྱོད་པའི་འདམ་རྫབ་
20-1-76


ལས་རིང་དུ། །རབ་གྲོལ་བསོད་ནམས་གཟི་འོད་བརྒྱ་འབར་འདི། །རྒྱལ་སྲིད་ལེགས་བྱས་
དབང་གི་རིང་མོ་ནས། །སྲིད་པའི་ནགས་སུ་འབད་རྩོལ་བྲལ་བས་རྙེད། །རྒྱལ་པོ་ཆོས་བཞིན་
སྤྱོད་པའི་ཚེ། ཁང་བཟང་རྩེ་མོ་ཉེར་བརྟེན་པས། །དགྲ་བཅོམ་དགེ་སློང་མཆོད་འོས་རྣམས། །
བླ་གོས་འཆར་ཀའི་སྣང་བ་ཡི། །ཞིང་འདིའི་མུན་པ་ཀུན་འཇོམས་ཤིང༌། །ཕྱོགས་གྲོལ་བདེ་
བའི་ལམ་ཡངས་ལས། །འོང་ཞིང་འགྲོ་བ་མཐོང་བ་ན། །སྔོན་བསགས་ལེགས་བྱས་ཤིང་རྟ་
ཡིས། །ཡིད་མཁར་དད་པའི་འོད་སྟོང་དྲངས། །དེ་ནས་རྒྱལ་ལ་དད་པ་ཡིས། །མཆོད་བཅས་
གསོལ་བ་བཏབ་པར་གྱུར། །མངོན་ཤེས་དྲུག་གི་སྤྱན་ལྡན་གང༌། །སྲིད་འདིའི་ཕུན་ཚོགས་
ཐམས་ཅད་ཀྱིས། །ཉེར་བརྒྱན་འཁོར་བཅས་ལྷ་ཡི་ལམ། །གོ་སྐབས་དམན་པས་ཉེར་བྱོན་
ཚེ། །མཆོད་པའི་ཡ་མཚན་ཅི་ཡང་སྤྲུལ། །གཉིས་མེད་གསུངས་ལ་མི་དབང་གིས། །བྱང་ཆུབ་
མཆོག་གི་རྒྱུ་ཞེས་པས། །ས་བདག་རབ་ཏུ་བྱུང་ནས་ནི། །བསླབ་གསུམ་རིན་ཆེན་ཟུང་ཞིག་
གསུངས། །དེ་ཞུས་བསྐལ་པ་བརྒྱ་ཡིས་ནི། །དོན་ཆེན་འགྲུབ་ལ་ངོ་མཚར་ཅི། །བཅོམ་ལྡན་
གྱིས་ནི་འབད་གྱུར་ན། །རི་རྒྱལ་ཐལ་བར་བྱེད་ཅེས་མཆི། །ཟས་གཅོད་བསྙུན་དང་གཏར་
དཔྱད་སོགས། །ངལ་བ་འབུམ་གྱིས་ནད་བསལ་ཡང༌། །གྲགས་པའི་འབྱོར་པ་དམན་པ་དེས། །
སྨན་དང་སྨན་པ་ཉིད་ཚོར་བྱས། །འབད་མེད་བཅིངས་པ་ཙམ་གྱིས་ནི། །བདུད་རྩིས་འབྲས་
བུ་ནད་འཕྲོག་བྱེད། །རིགས་སྔགས་ཁོ་ནས་ནད་འཇོམས་སོགས། །སྔགས་དང་སྨན་འདི་ཡ་
མཚན་རྨད། །གོམས་པའི་སེམས་ནི་བཟློག་དཀའ་བས། །རྒྱལ་བ་ཁྱེད་ནི་ཐམས་ཅད་མཁྱེན། །
དེ་ཕྱིར་འདོད་པས་བྱང་ཆུབ་མཆོག །ཐོབ་འགྱུར་གང་ཡིན་བདག་ལ་གསུངས། །དེ་ནས་ངུར་
སྨྲིག་ཐུན་མཚམས་ཀྱི། །དམར་འོད་རྣམ་པར་ཉམས་ལས་སླར། །དཔག་ཡས་དཀྱིལ་འཁོར་
འོད་དཀར་བརྒྱ། །རབ་སྤྲོས་གང་སྐུའི་ཟླ་བ་ནི། །རིག་མ་རི་བོང་མཚན་མས་འཁྱུད། །རིག་
འཛིན་རྒྱུ་སྐར་ཚོགས་བཅས་ཤར། །དེས་དེར་མི་བདག་དབང་བསྐུར་ནས། །རྒྱལ་བའི་ཡེ་
20-1-77


ཤེས་ཟེའུ་འབྲུ་རྒྱས། །མཐའ་དག་གསང་སྔགས་མདངས་བཀྲ་བའི། །རིག་འཛིན་འདབ་
རྒྱའི་གཡོགས་པའི་སྐུ། །རྡོ་རྗེ་འཆང་བ་དེ་ཡིས་ནི། །མ་ལུས་རྒྱལ་བའི་གསང་སྔགས་མཛོད། །
མཐའ་དག་བཟུང་ཞིང་མངོན་བསྟན་པས། །མི་དང་མི་མིན་ཀུན་གྲོལ་ཏེ། །གྲོག་སྦུར་རྡོ་རྗེ་
འཛིན་ཐོབ་ན། །དེ་ལས་གཞན་པ་ཅི་ཞིག་གཏམ། །ཕྱི་ནས་ཡུན་རིང་འདས་པའི་འོག །ཨོ་
རྒྱན་ཞེས་པའི་ཡུལ་མཆོག་དེར། །དཔལ་ལྡན་གསང་བའི་བདག་པོ་སྟེ། །སླར་ཡང་མི་བདག་
ཚུལ་བཟུང་ནས། །ལྭ་བའི་ཞབས་དང་མཚོ་སྐྱེས་ཞབས། །ལྷན་ཅིག་སྔགས་ཀྱི་ལམ་སྟོན་
ཞིང༌། །མཐའ་ཡས་སྐྱེ་བོས་དངོས་གྲུབ་ཐོབ། །དེ་ནས་ཕྱི་མའི་དུས་ཀྱི་ཚེ། །སླར་ཡང་མཁའ་
འགྲོའི་གླིང་མཆོག་དེར། །ས་བདག་དབང་པོའི་བློན་གྱུར་ནས། །རྡོ་རྗེ་ཐེག་པ་རྒྱས་བསྟན་ཏེ། །
སྔགས་རྒྱུད་མཁའ་དང་མཉམ་པར་བྱས། །དེ་ལྟར་ན་དུས་གསུམ་སངས་རྒྱས་ཐམས་ཅད་ཀྱི་
ཐུགས་ཀྱི་གསང་བའི་མཛོད་འཛིན་པ། གསང་བའི་བདག་པོ་རྡོ་རྗེ་འཆང་བ་གསང་སྔགས་ཀྱི་
བསྟན་པ་སྤེལ་བའི་སླད་དུ། མི་ཡི་བདག་པོའི་ཚུལ་བཟུང་ཨིཎྜ་བྷུ་ཏི་ཞེས་པའི་མཚན་འཆང་
བ་ལན་གསུམ་བྱོན་པ་ལགས་ཏེ། དེ་ཉིད་ཤིན་ཏུ་སྙིགས་མའི་དུས་སུ་འགྲོ་བ་དམུ་རྒོད་རྣམས་
འདུལ་བའི་སླད་དུ། འགྲོ་བའི་མགོན་པོ་རྡོ་རྗེ་རྒྱལ་པོ་ཞེས་གྲགས་པ། དགེ་སློང་རྡོ་རྗེ་འཛིན་
པ་ཆེན་པོའི་སྐུར་ཉེ་བར་བསྟན་པ་སྟེ། འགྲོ་བའི་མགོན་པོ་ཉིད་ཀྱིས། རྗེས་ཐང་པ་རིན་པོ་
ཆེ་བཀྲ་ཤིས་དཔལ་ལ་བཀའ་བསྩལ་པར་ཡང༌། ཨིཎྜ་བྷུ་ཏི་གསུམ་བྱུང་བ་ལ་ཐོག་མཐའ་
གཉིས་ང་ཡིན། བར་མ་ཁྱོད་ཡིན། ལར་གསུམ་ཀ་ངོ་བོ་གཅིག་ཅེས་གསུངས་ཏེ། དེའི་ཕྱིར་
འགྲོ་བའི་མགོན་པོ་འདིའི་རྣམ་པར་སྤྲུལ་བ་ནི། ཇི་སྐད་དུ། རྒྱུད་ལས། འཆད་པ་པོ་ང་ཆོས་
ཀྱང་ང༌། །རང་གི་ཚོགས་ལྡན་ཉན་པ་ང༌། །ཞེས་པ་ལྟར། བདག་ཉིད་ཀྱི་དྲུང་དུ་གནས་པ་ཆོས་
ལས་འཁྲུངས་པའི་སྲས་ཀྱི་ཐུ་བོར་མངོན་པར་དབང་བསྐུར་བ་འགྲོ་མགོན་སྟག་ལུང་ཐང་པ་
ཆེན་པོ་བཀྲ་ཤིས་དཔལ་ཞེས་མཚན་ཡོངས་སུ་གྲགས་པ་འདི་ཉིད་ཡིན་ཏེ། འདི་ཉིད་གཅིག་
20-1-78


པུར་མ་ཟད། དཔལ་སྟག་ལུང་ཐང་གི་སེང་གེའི་ཁྲི་ལ་མངོན་པར་འཁོད་པའི་རྡོ་རྗེ་འཆང་གི་
གནས་བརྙེས་པ་མཐའ་དག་ཀྱང་སྤྲུལ་པ་དང་ཡང་སྤྲུལ་དང་སུམ་སྤྲུལ་དང་བསམ་གྱིས་མི་
ཁྱབ་པའི་སྤྲུལ་པའི་ཚུལ་གྱི་སྐུ་ཐ་དད་པར་བསྟན་པ་ཙམ་མ་གཏོགས་ངོ་བོ་ཐ་དད་པར་མི་
བསམ་མོ། །དེ་ཡང་ཡེ་ཤེས་ཆེན་པོ་གཅིག་པུ་གཉིས་སུ་མེད་པའི་ཟློས་གར་ལས། འགྲོ་བའི་
དོན་རྒྱ་ཆེར་སྤྱོད་པའི་བཤེས་གཉེན་དམ་པ་མཆོག་གི་ཚུལ་བཟུང་བ། སོ་སོའི་སྐྱེ་བོ་རྣམས་ཀྱི་
སྣང་ངོར་ཞིང་དང་གདུལ་བྱ་ཐ་དད་པར་སྣང་བ་ཅན། གཞལ་བར་མི་སྤྱོད་པའི་སྣང་བརྙན།
བརྒྱུད་པ་ནས་བརྒྱུད་པར་རང་བྱུང་བར་ལུང་བསྟན་པ་བཞིན་ལགས་ཏེ། ནམ་མཁའ་ཟླ་བ་
གཅིག་པུ་ཤར་བའི་ཚེ་ཡུལ་དང་གནས་ཐ་དད་པའི་ཆུ་བོ། རྒྱ་མཚོ་རྫིང་བུ། ལྡེང་ཀ་སྣོད་ཀྱི་
ཆུ་ཐ་དད་པ་རྣམས་དང༌། སྒྲིབ་གཡོགས་དང་བྲལ་བའི་ཆུ་ཐིགས་གཅིག་ཚུན་ཆད་ལ་ཡང་དེ་
ཉིད་ཀྱིས་གཟུགས་བརྙན་འཆར་བ་བཞིན་ནོ། །དེས་ན་བདག་ཅག་གི་རྗེ་བཙུན་བླ་མ་དམ་
པ་འདི་ཡང༌། མཉམ་མེད་ཐང་པ་ཆེན་པོ་ཉིད་དང་ཐུགས་གཉིས་སུ་མེད་པར་ངེས་ཤིང༌། དེ་
ཉིད་གསང་བའི་བདག་པོ་ཕྱག་ན་རྡོ་རྗེའམ། རྒྱལ་པོ་ཆེན་པོ་ཨིཎྜ་བྷུ་ཏི་དང་མི་གཉིས་པའི་
རང་བཞིན་ཅན་དང༌། ཡང་གཅིག་ཏུ་ན། སྐལ་བཟང་གི་འདྲེན་པ་སྟོང་གི་ཐོག་མ་བདེ་བར་
གཤེགས་པ་འཁོར་བ་འཇིག་ཉིད་ཡིན་པར་ཡང་གྱུར་ཏེ། འགྲོ་བའི་མགོན་པོ་ཕག་མོ་གྲུབ་
པ་ཉིད་ཀྱི་བཀའ་ཡང་དག་པའི་ཚད་མས་གྲུབ་པ་ཉིད་ཡིན་ནོ། །དེར་མ་ཟད་རྒྱལ་སྲས་ཞི་བ་
ལྷ་ནི་འཕགས་པ་འཇམ་དཔལ་གྱིས་རྣམ་པར་སྤྲུལ་པ་ཡིན་པ་དང༌། དཔལ་སྟག་ལུང་ཐང་པ་
ཆེན་པོ་འཕགས་པ་སྤྱན་རས་གཟིགས་ཀྱིས་རྣམ་འཕྲུལ་ཏེ། རྒྱལ་བའི་སྲས་པོ་ཆེན་པོ་ཐོགས་
མེད་བཟང་པོ་དཔལ་དེ་ཉིད་ཀྱང༌། འཕགས་པ་སྤྱན་རས་གཟིགས་ཀྱི་ཡེ་ཤེས་ཆེན་པོའི་རྣམ་
འཕྲུལ་དུ་གྲགས་ཤིང་གྲུབ་པའི་ཕྱིར་ཁོ་བོ་ཅག་གི་འདྲེན་པ་དམ་པ་འདི་ནི། དུས་གསུམ་གྱི་
སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་སྤྱིའི་གཟུགས་རྒྱལ་བའི་སྲས་པོ་གཞོན་
20-1-79


ནུའི་སྐུ་འཆང་བ་འཕགས་པ་འཇམ་དཔལ་དང༌། ཐུགས་རྗེ་ཆེན་པོ་ཕྱག་ན་པདྨོ་ཅན་དང༌།
གསང་བའི་བདག་པོ་ཕྱག་ན་རྡོ་རྗེ་གསུམ་ཆར་གྱི་ཡེ་ཤེས་ཀྱི་རྣམ་འཕྲུལ་གཅིག་པུ་སྟེ། དེ་
དག་མི་འགལ་བའི་རྒྱུ་མཚན་ཡང༌། རིགས་གསུམ་གྱི་སེམས་དཔའ་འདི་རྣམས་ལྷས་སྦྱིན་
དང་མཆོད་སྦྱིན་ལྟར་རྒྱུད་ཐ་དད་པ་ནི་མ་ཡིན་ཏེ། དུས་གསུམ་གྱི་བདེ་བར་གཤེགས་པ་
ཐམས་ཅད་ཀྱི་སྐུ་གསུང་ཐུགས་ཀྱི་སྤྱི་གཟུགས་ཆེན་པོ་ཡིན་ལ། སངས་རྒྱས་རྣམས་ཀྱི་སྐུ་རྡོ་
རྗེ་གང་ཡིན་པ་དེ་ཉིད་གསུང་དང་ཐུགས་ཀྱང་ཡིན་པའི་ཕྱིར་བསམ་གྱིས་མི་ཁྱབ་པའི་གནས་
འདིར་ནི། རང་བཞིན་མཉམ་པ་ཉིད་དུ་ཤེས་པའི་སྒོ་ནས། མཆོག་ཏུ་གུས་པ་ཆེན་པོས་ཆད་པ་
མེད་པའི་དུས་ཀྱི་མཐར། ཞིང་གི་རྡུལ་སྙེད་དུ་རྣམ་པར་སྤྲུལ་པའི་ལུས་ཀྱིས་ཕྱག་འཚལ་བར་
རིགས་ཀྱི་མཁས་པའི་མངོན་པའི་ང་རྒྱལ་གྱིས། རྟོག་གེའི་རིག་པས་འཇུག་པ་ནི་ཉག་ཕྲན་གྱི་
རྩེ་མོས་ཆུ་གཏེར་གྱི་གཏིང་མཐའ་ཚོལ་བ་བཞིན་ནོ། །
སྨྲས་པ། ཆོས་རྣམས་རང་བཞིན་མཁའ་འདྲ་གཞལ་དུ་མེད། །ཡེ་ཤེས་རང་བཞིན་
མཁའ་འདྲ་གཞལ་དུ་མེད། །སྒོ་གསུམ་མཛད་པ་མཁའ་འདྲ་གཞལ་དུ་མེད། །རྣམ་འཕྲུལ་
འཇུག་པ་མཁའ་འདྲ་གཞལ་དུ་མེད། །བསམ་གྱིས་མི་ཁྱབ་གནས་འདི་ལ། །བདག་ཅག་
དད་པས་རྟོགས་བྱ་ཡི། །ཤེས་རབ་དམན་པའི་མེ་ཁྱེར་གྱིས། །མཛད་པའི་འཇིག་རྟེན་ཇི་
ལྟར་གསལ། །སྲིད་གསུམ་འཇིག་རྟེན་བདུན་ལ་སོགས། །འཁོར་འདས་ཆོས་རྣམས་རང་
བཞིན་ནི། །གཉིས་མེད་བརྗོད་བྲལ་བསམ་དུ་མེད། །རྣམ་པ་མ་འགགས་ཅིར་ཡང་སྣང༌། །
རང་བཞིན་གསལ་སྟོང་འགགས་མེད་ཕྱིར། །རང་བཞིན་འབྲས་བུ་མངོན་གྱུར་པའི། །རྣམ་
ཐར་བརྗོད་བྲལ་བསམ་ཡས་འདི། །རང་བཞིན་འགྱུར་བ་མེད་པའི་རྒྱུ། །ས་དང་ཆུ་དང་མེ་
དང་རླུང༌། །ནམ་མཁའ་ལས་བྱུང་ནམ་མཁའི་དངོས། །ཕྱོགས་རྣམས་ཀུན་ཏུ་ནམ་མཁའ་
བཞིན། །ཚད་མེད་བསམ་གྱིས་མི་ཁྱབ་སྟེ། །འབྱུང་བ་འདི་དག་བསམ་མེད་ཅིང༌། །འབད་
20-1-80


རྩོལ་མེད་པ་ཕྱོགས་བཅུ་ཡིས། །སེམས་ཅན་ཀུན་གྱི་ཉེར་འཚོ་དང༌། །རང་རང་ལས་ལ་མ་
འདྲེས་འཇུག །ཇི་ལྟར་ས་རྡུལ་ཚད་མེད་པ། །རང་རང་མ་འདྲེས་བྱ་བ་ལ། །རྣམ་རྟོག་མེད་
ཅིང་འཇུག་གྱུར་པ། །མགོན་ཁྱོད་འཕྲིན་ལས་དེ་དང་མཚུངས། །ཇི་ལྟར་རྒྱ་མཚོ་རླབས་གཡོ་
བ། །ཆུ་རླབས་རྣམ་འགྱུར་ཐ་དད་ཅིང༌། །རང་བཞིན་རྒྱ་མཚོ་གཅིག་པུར་འཇུག །རྒྱལ་ཁྱོད་
རྒྱ་མཚོ་དང་མཚུངས་ཏེ། །མགོན་པོ་ཀུན་གཞི་གནས་གྱུར་བརྙེས། །རང་བཞིན་མི་ཤེས་བྱིས་
པ་རྣམས། །ཆུ་རླབས་རྒྱ་མཚོ་ཇི་བཞིན་དུ། །དབྱིངས་དང་རྣམ་འཕྲུལ་སོ་སོར་རྟོགས། །ཇི་
ལྟར་ཉི་མའི་འོད་ཟེར་གཅིག །ཤར་བས་ས་གཞི་རི་བཅས་ཀུན། །ཅིག་ཅར་སྣང་བར་བྱེད་
གྱུར་ཅིང༌། །ལས་རྣམས་སྣ་ཚོགས་བྱེད་གྱུར་ཏེ། །ལོ་ཐོག་སྨིན་པར་བྱེད་པ་དང༌། །སྐེམ་དང་
རྒྱས་དང་འཇུ་བ་དང༌། །པདྨ་ལ་སོགས་ཁ་འབྱེད་པ། །འདི་ལ་རྣམ་པར་རྟོག་པ་མེད། །པདྨའི་
མཚོ་དང་ཞིང་ས་དང༌། །ཉི་མའི་འཇུག་བྱ་གཞན་དང་གཞན། །གང་རྣམས་དེ་དག་ཀུན་ལ་ནི། །
 འོད་ཟེར་གཅིག་འཇུག་ཐ་དད་མེད། །ཉིད་ཀྱི་ཡེ་ཤེས་འཇུག་པ་ཡང༌། །གཅིག་པུ་འཇིག་
རྟེན་འདིར་ཤར་བས། །མོས་པ་སོ་སོའི་སེམས་ཅན་གྱི། །བསམ་པ་ཐ་དད་སྣ་ཚོགས་འཇུག།
བསམ་གྱིས་མི་ཁྱབ་གནས་འདི་ལ། །འཇུག་སེལ་དབྱིག་གི་སྙིང་པོ་དང༌། །རལ་པ་ཅན་ཡང་
ཕྱུགས་དང་མཚུངས། །པ་ནཏ་པ་ནཏ་གཞོན་ནུ་དང༌། །རྒྱས་པ་གྲོགས་མཁར་ཨི་གི་རས། །
མི་བྱིན་སེར་སྐྱ་མར་ཀན་ཊེ། །ནེ་ཙོ་འོད་སྲུང་ཀཱ་ཏའི་བུ། །དེ་དག་རྒྱུ་མའི་ཤིན་ཏུ་འཁོར། །
མགོན་པོ་ཁྱོད་ཀྱི་གནས་འདི་ནི། །སྟོབས་བཅུ་མངའ་བ་ཁོ་ནས་མཁྱེན། །ས་འདི་རྒྱུ་དང་མི་
རྒྱུ་ཀུན། །རྟེན་ཞིང་གནས་པའི་གཞི་ཡིན་པ། །དེ་བཞིན་བརྟན་གཡོ་ཐམས་ཅད་ཀྱི། །བསྐྱེད་
མ་གཞི་ནི་མགོན་ཁྱོད་ལགས། །ཡོན་ཏན་ཐམས་ཅད་བསྐྱེད་མཛད་པའི། །ཟླ་མེད་ས་གཞི་
ཁྱོད་ལ་འདུད། །མགོན་པོ་ཁྱོད་མཚུངས་ཕྱོགས་བཅུའི་རྒྱལ་བ་སྟེ། ཁྱོད་ཉིད་རྒྱལ་བ་ལགས་
པས་དཔེ་མ་རྙེད། །དཔེ་མེད་མི་འགྱུར་རྟག་པ་རྡོ་རྗེའི་སྐུ། ཁྱབ་བདག་རྡོ་རྗེ་སེམས་ཁྱོད་ཕྱག་
20-1-81


གི་གནས། །འདི་དག་ནི་སྔོན་གྱི་སྐུའི་སྐྱེད་རབས་ལ་བརྩམས་ཏེ་དམ་པའི་ཡོན་ཏན་ཅི་རིགས་
པ་བསྙད་པའི་སྡེ་ཚན་ཏེ་དང་པོའོ།། །།
ད་ནི་སྐུའི་སྐྱེ་བ་འདི་ཉིད་ཀྱིས་མཛད་པའི་ཚུལ་སོ་སོའི་སྐྱེ་བོ་དག་ལ་ཐུན་མོང་དུ་སྣང་བ་
ཞིག་བརྗོད་པར་བྱ་སྟེ། དེ་ལ་གང་དུ་སྐུའི་སྐྱེ་བ་བཟུང་བའི་ཡུལ་ནི། ཐ་སྙད་འཇིག་རྟེན་གྱི་
གཙུག་ལག་ལ། ཡོངས་སུ་གྲགས་པའི་དགེ་བཅུའི་ལུས་ཡོངས་སུ་རྫོགས་ཤིང༌། ཁྱད་པར་དུ་
ཡང་བདེ་བ་འབྱོར་པ་སྐྱེ་བོ་མང་པོས་ཡོངས་སུ་གང་བ། ཡུལ་ཐ་དད་པའི་སྐྱེ་བོ་མཐའ་ཡས་
པའི་རང་རང་གི་ཟོང་དང་འདོད་དགུའི་ལོངས་སྤྱོད་ཐམས་ཅད་མངོན་པར་ཐོགས་ཏེ་ལང་
ལོང་ཏུ་རྒྱུ་བས་ར་བ་དང་སྲང་ཐམས་ཅད་མཛེས་པར་བྱས་པ། སྐྱེ་བོ་ཐམས་ཅད་ཀྱང་གཅིག་
ཏུ་དགེ་བ་ལ་མངོན་པར་དགའ་ཞིང༌། སྐུ་གཟུགས་དང༌། མཆོད་རྟེན་དང༌། གླེགས་བམ་དང༌།
དགེ་འདུན་དག་ལ་ལྟ་ཅི་སྨོས། ངུར་སྨྲིག་གི་རྟགས་ཅུང་ཟད་ཙམ་འཆང་བ་ལ་ཡང་བདག་
ཅག་གི་ཡོན་གནས་དམ་པའོ། །ཞེས་ལན་བརྒྱར་ཕྱག་བགྱིད་པ་སོགས་དད་པའི་ནོར་གྱིས་
ཕྱུག་པ། ཡུལ་འཁོར་ཐམས་ཅད་ཆོས་སྨྲ་བ་འཁོར་དང་བཅས་པས་ཡོངས་སུ་གང་བ། སངས་
རྒྱས་ཀྱི་ཞིང་ཁུད་པ། འཕན་ཡུལ་རིགས་པའི་འབྱུང་གནས་སའི་ཆ། སྤྲས་ཞེས་བྱ་བའི་ཡུལ་
འཇིག་རྟེན་གསུམ་གྱི་དགེ་ལེགས་ཐམས་ཅད་ལྷུན་གྱིས་གྲུབ་པའི་ཕོ་བྲང་ཆེན་པོ་སྟེ། དེར་
དམ་པ་འདིའི་ཡབ་ཏུ་གྱུར་པ་ནི། དཔལ་སྟག་ལུང་ཐང་པ་ཆེན་པོའི་དཔོན་གྱི་རིགས། རིགས་
སྔགས་འཆང་བ་རྣམས་ཀྱི་འཁོར་ལོས་བསྒྱུར་བ། ཆོས་བཞིན་པས་ས་སྐྱོང་བའི་རྒྱལ་པོ་བྱང་
ཆུབ་སེམས་དཔའ་ཆེན་པོ་བཀྲ་ཤིས་རྒྱ་མཚོ་ཞེས་བྱ་བ་ཡིན་ཏེ། འདི་ཉིད་ཀྱང་ལྷག་པའི་ལྷ་
བཅོམ་ལྡན་འདས་ཀྱཻ་རྡོ་རྗེ་དང༌། རྡོ་རྗེ་ཕུར་པ་ས་ལུགས་དང༌། བདེ་མཆོག་ལྷན་སྐྱེས་དང༌།
མཧཱ་ཀ་ལ་ཙ་ཏུར་བྷུ་ཛའི་བཟླས་བརྗོད་ཀྱི་མཐར་སོན་ཞིང༌། སྐྱེ་འགྲོ་གདོན་གྱིས་གཙེས་པ་
ལ་སྔགས་འདེབས་པ་དང༌། བྱིན་རླབས་མཛད་པ་ཙམ་གྱིས་ནད་གདོན་མ་ལུས་པ་ཞི་བར་
20-1-82


འགྱུར་བ་སོགས་བྱིན་རླབས་ཀྱི་གཟི་བྱིན་ལྷག་པར་རྒྱས་པ། འབངས་རྣམས་ཐམས་ཅད་
བདེ་བར་བསྐྱངས་བས་ཐམས་ཅད་ཀྱིས་ཀྱང་ཕ་མའམ། མཁན་པོའམ། སློབ་དཔོན་མཆོག་
གི་བཞིན་དུ་གུས་པས་བལྟ་བ། འཐབ་པ་དང་རྩོད་པ་མེད་པར་བྱམས་པའི་ངང་ཚུལ་ཁོ་ནས་
འགྲན་ཟླ་ཐམས་ཅད་ཀྱང་གུས་པས་འདུད་པར་བྱེད་པ་ཞིག་སྟེ། ཡུམ་དུ་གྱུར་པ་ནི་སྡེ་པ་
ཆེན་པོ་དགའ་བའི་སྲས་མོ་བདེ༷་སྐྱིད༷་བུ༷་འདྲེ༷ན་ཞེས་བྱ་བ་ཇི་སྐད་བཤད་པའི་བུད་མེད་ཀྱི་
སྐྱོན་ཐམས་ཅད་ནི་སྤངས། ཡོན་ཏན་ཐམས་ཅད་ཀྱི་མངོན་པར་བརྒྱན་པ་སྟེ། རིགས་དང༌།
གཟུགས་དང༌། བློ་གྲོས་དང༌། འབྱོར་བ་དང་བསོད་ནམས་ཀྱི་དཔལ་དང་ལྡན་པ་སྒོ་གསུམ་
ཤིན་ཏུ་བསྲུང་བའི་རང་བཞིན་ཅན་ཞིག་སྟེ། ཡབ་ཡུམ་གཉིས་ལ་སྲས་ལྔ་དང་ལྕམ་གཉིས་ཏེ།
མཆེད་བདུན་གྱི་རྟིང་མ་བདུན་པ་ནི་དམ་པ་འདི་ཡིན་ཏེ། མེ་ཕོ་སྤྲེལ་འུའི་ལོ་ལ་དགེ་མཚན་
ཐམས་ཅད་ཀྱིས་མངོན་པར་སྤྲས་ཏེ་སྐུ་བལྟམས་སོ། །དེ་ཡང་རྗེ་འདི་ཉིད་ལྷུམས་སུ་ཞུགས་
པ་ནས་བརྩམས་ཏེ། ཆབ་འོག་ཐམས་ཅད་བདེ་ཞིང་ལོ་ལེགས་པ་དང༌། དགེ་མཚན་གྱི་ལྟས་
འགའ་ཞིག་གོང་ནས་གོང་དུ་མངོན་པར་འཕེལ་བར་འགྱུར་ཞིང༌། སྐུ་བལྟམས་པ་ན་ཡང་
ཡུམ་ལ་གནོད་པ་མེད་ཅིང༌། མེ་ཏོག་གི་ཆར་འབབས་པ་ལ་སོགས་པ་ངོ་མཚར་བའི་ལྟས་
གཞལ་དུ་མེད་པ་འཇིག་རྟེན་འདིར་འབྱུང་ངོ༌། །
༈ སུམ་རྩེན་གནས་པའི་དགེ་མཚན་ཀུན། །ས་སྟེང་འཇིག་རྟེན་འདིར་འཕོས་པ། །བསོད་
ནམས་མཐུ་ལས་མངོན་འགྲུབ་ཀྱི། །རྒྱུ་གཞན་དག་གིས་ག་ལ་ཞིག །མདོངས་མཐའི་འདབ་
མས་མཆོག་ཏུ་ལེགས་བརྒྱན་པ། །མར་གད་ཞི་བ་འཁྱིལ་འདྲའི་ནོར་འཛིན་ནམ། །སྲིད་
གསུམ་མཛེས་པའི་ཡོན་ཏན་ཀུན་མཛེས་ཏེ། །སྐྱོན་མེད་གནས་ཀྱི་མཛེས་སྡུག་ཐམས་ཅད་
འཕྲོགས། །ལྗོན་ཤིང་བུ་མོ་གཉེན་ལྕུག་ལོ་འདབ་བགོས། །རབ་འབར་མེ་ཏོག་མཆོག་དགའི་
མིག་གི་ཟེར། །ཕྱོགས་ཀུན་ཟུར་མིག་གཡོ་ལྡན་བཅུད་བཟང་འབྲས། །ནུ་རྒྱས་འདོད་པའི་
20-1-83


ལོངས་སྤྱོད་དག་གིས་མཛེས། །རྣམ་བཀྲ་གྲོང་ཁྱེར་བ་དན་བརྒྱན་སྤྲས་པ། །ཉི་ཟླ་སྐར་བཅས་
ས་ལ་འཁོད་པ་སྙམ། །འཕྲོག་བྱེད་དགའ་མའི་དབྱངས་ཀྱི་རྗེས་སྙེག་པ། །སྒྲ་འདི་ཁྱད་པར་
འཕགས་ཕྱིར་སུམ་རྩེན་གྲོང་། །མཁར་ཉལ་རྣམས་ནི་བག་མེད་ཆང་གིས་མྱོས། །ལེགས་བྱས་
བདུད་རྩིས་རོལ་པས་འདི་ཉིད་མཆོག །རྒྱལ་ཁྱོད་དགྱེས་རོལ་འདི་ཉིད་འོག་མིན་ཏེ། །གཞན་
ནས་ཚོལ་བའི་ངལ་བ་དེང་འདིར་ཟད། །རྒྱལ་བ་ཡུམ་ཀུན་ཤེས་རབ་ཕ་རོལ་ཕྱིན། །དམིགས་
མེད་ཐུགས་རྗེ་གང་ཡིན་དེང་འདིར་ཡབ། །རྡོ་རྗེའི་སྐུ་ལ་སྲིད་པའི་ཕ་མ་མེད། །འགྲོ་བའི་
མགོན་པོ་སྤྲུལ་བའི་སྒྱུ་མ་མཛད། །དེ་ནས་སྐུ་བལྟམས་མ་ཐག་དཔལ་སྟག་ལུང་ཐང་པ་ཆེན་
པོ་རྗེ་རྣམ་རྒྱལ་བཀྲ་ཤིས་ཀྱི་སྙན་དུ་ཕུལ་ཞིང་མཚན་གནང་བར་ཞུས་པས། མཆོག་ཏུ་དགྱེས་
པའི་འཛུམ་ཞལ་དང་བཅས། བཀྲ་ཤིས་དོན་འགྲུབ་ཞེས་མཚན་དོན་དང་ལྡན་པ་གསོལ་ཞིང༌།
བསྲུང་སྐུད་དང་གཏོར་མའི་བྱིན་རླབས་སོགས་ཀྱང་ཟབ་རྒྱས་སུ་བསྩལ། མ་མ་རྣམས་ཀྱིས་
གཙང་སྦྲའི་སྤྱོད་ལམ་དང་ལྡན་པའི་སྐུ་བསྐྱེད་བསྲིངས་པས་མཚོའི་ནང་གི་པདྨའམ། ཆར་ཆུ་
རྒྱས་པའི་ཆུ་བོའམ། ཟླ་བ་ཡར་གྱི་ངོ་བཞིན་དུ་གང་སྐུའི་ལང་ཚོ་མཆོག་ཏུ་མངོན་པར་བརྟས་
པར་གྱུར། དེ་ནས་སྨྲ་མཁྱེན་ཙམ་ན་ཡང་སྐུའི་རྩེ་གྲོགས་གཞན་དག་གི་སྲོག་ཆགས་ལ་འཚེ་
བ་སོགས་སྡིག་པའི་ལས་ལ་སྤྱོད་པ་དག་ཆེ་ཐང་དུ་བཟློག་པར་མཛད་ཅིང༌། མ་ཎི་བཟླས་པ་
ལ་སོགས་ཆོས་སྤྱོད་དང་དགེ་བའི་རིམ་པ་ལ་བདག་ཉིད་རྩོལ་ཞིང་གཞན་ཡང་བསྐུལ་བར་
མཛད་པ་དང་སྐུ་ཆས་ཕྲ་མོ་ཚུན་ཆད་ཀྱང་སོ་སོ་ལ་སྦྱིན་པར་མཛད་པ་དང༌། སྐབས་གཞན་
དང་གཞན་དུ་ས་སྟེགས་དང་ཁྲིའུ་དག་ལ་མངོན་པར་འཁོད་ནས། ཆོས་འཆད་པ་དང་དབང་
བསྐུར་བ་ལྟར་མཛད་པ་དང༌། རེས་འགའ་ནི་སྐུ་ལུས་གནད་དང་ལྡན་པས་ནང་ལ་མཆོག་ཏུ་
གཞོལ་བ་ལྟར་ཡང་མཛད་ནས། མདོར་ན་འདི་ནི་མ་བསྟན་པར་སྦྱིན་པ་དང༌། སྙན་པར་སྨྲ་
བ་དང༌། དོན་མཐུན་པ་དང༌། དོན་སྤྱོད་པ་སྡེ་བསྡུ་བའི་དངོས་པོ་བཞི་ལ་འཇུག་པ་ཞེས། བྱང་
20-1-84


ཆུབ་སེམས་དཔའ་འཕགས་པ་རྣམས་ཀྱི་མ་འདྲེས་པའི་ཆོས་ཡིན་པར་འཕགས་པ་རྣམ་པར་
འཕྲུལ་པས་ཞུས་པའི་མདོ་ལས་བྱུང་བ་བཞིན་ཡིན་ནོ། །གཞན་ཡང་མཛད་པ་ཐམས་ཅད་
ཆོས་ཀྱིས་མཛད་པ་འབའ་ཞིག་གི་བག་ཆགས་སད་པས། བསྐང་གསོ་དང༌། གཏོར་བཟློག་
དང༌། སྒྲུབ་མཆོད་ཀྱི་ཚུལ་མཛད་པ་དང༌། འཁོར་ཚོགས་ཀྱི་སྐྱེ་བོ་མང་པོས་བསྟི་སྟངས་དང་
བཅས་པའི་ཚུལ་དུ་ཞུགས་པར་མཛད་པ་སོགས་བྱུང་སྟེ། མདོར་ན་དེ་དག་ཀུན་ནི་ཕྱིས་ཀྱི་
འཕྲིན་ལས་ཀྱི་རྟེན་འབྲེལ་དུ་གྱུར་པ་འདྲ་ཞེས་ཤེས་ལྡན་རྣམས་ཀྱིས་གླེང་ངོ༌། །དེ་ན་སོ་སོ་སྐྱེ་
བོ་རྣམས་ཀྱིས་རང་གི་བློས་རྒྱས་བཀབ་ཀྱིས་སྐུའི་སྤྱོད་ལམ་བསྲངས་སུ་འཇུག་པའི་བསམ་
པས་ནན་ཏུར་གྱི་ཚུལ་དུ་འབུལ་བར་བྱེད་པ་ན། དེ་སྐད་དུ་ངམ་ཤོད་ཕྱེ་མའི་དཀྱིལ་ན་མི་མོ་
ཞིག །རྒྱལ་བློན་རྒྱལ་སྲིད་སྐྱོང་བའི་བྱ་བ་ལས། །མ་སྨད་འཁྲུག་པ་བསྡུམ་ནས་བྱར་དགའ་
འོང༌། །རྒྱལ་བློན་བློ་རེ་ཆུང་ཞེས་ཟེར་བ་ཐོས། ། ཞེས་པའི་དཔེ་དང་འདྲའ་འོ་སྙམ་དུ་སེམས་
སོ། །དེ་སྐབས་སུ་རྗེ་བཙུན་འཇམ་པའི་དབྱངས་ཀྱི་དངོས་སུ་བྱིན་གྱིས་རླབས་པའི་འཁོན་
རིགས་དམ་པ་མཁྱེན་བརྩེ་ནུས་གསུམ་གྱི་དབང་ཕྱུག་བདག་ཆེན་རིན་པོ་ཆེ་ངག་གི་དབང་
ཕྱུག་དང༌། གངས་རིའི་ཁྲོད་འདིར་སྒྲུབ་བརྒྱུད་འགྲན་ཟླ་དང་བྲལ་བ་དཔལ་ལྡན་འབྲུག་པའི་
གཙུག་གི་ནོར་བུ་རིན་པོ་ཆེ་ངག་དབང་ཆོས་ཀྱི་རྒྱལ་པོ་དང༌། རྡོ་རྗེ་འཛིན་པའི་དབང་ཕྱུག་
མཚར་ཆེན་བློ་གསལ་རྒྱ་མཚོ་དང༌། འབྲི་གུང་རིན་ཆེན་ཕུན་ཚོགས་སོགས་སྐྱེས་བུ་དམ་པ་
དུ་མ་ལ་དབང་སྐུར་མང་པོ་དང༌། ཡི་དམ་ཆོས་སྐྱོང་སོ་སོའི་བཀའ་བསྒོ་རྗེས་གནང་གཏོར་
དབང་སོགས་བགྲང་བར་མི་དཔྱོད་པ་གསན་པའི་སྙིམ་པས་བཞེས་ཤིང༌། ཁྱད་པར་མདོ་
སྔགས་རིག་གནས་དང་བཅས་པའི་གཞུང་ལུགས་རྒྱ་མཚོའི་མངའ་བདག་ཆེན་པོ། དབང་
ལུང་མན་ངག་དུ་མའི་འབྱུང་གནས་རིན་པོ་ཆེ་མ་ལུས་པ་དཀོན་མཆོག་གྲགས་པ་ལ་ཡང་
བཀའ་ཆོས་ཀྱི་འབྲེལ་བ་མང་དུ་གསན་ཞིང༌། གཞན་ཡང་མཁས་པ་དང་རྣལ་འབྱོར་བ་ཀུ་ས་
20-1-85


ལི་ཚད་དང་ལྡན་པ་འགའ་ཞིག་ལ་དབང་དང་བྱིན་རླབས་ཅི་རིགས་པར་གསན། ཁྱད་པར་
དུ་རིན་པོ་ཆེ་ཆོས་ཀྱི་རྒྱལ་མཚན་པས། རྟ་མགྲིན་གྱི་གཏོར་དབང་ཞིག་ཕུལ་དུས། ཁྲོ་རྒྱལ་
རྟ་མགྲིན་གྱིས་ཞལ་གཟིགས་གསལ་བའི་མཐར་ཐུག་པ་བྱུང་ངོ༌། །དེ་སྐབས་ཤིག བསྐལ་
པ་གཞལ་དུ་མེད་པར་ཚོགས་གཉིས་རྒྱ་ཆེར་བསགས་པ་ཡང་སྨོན་ལམ་རྒྱ་མཚོའི་སྟོབས་
ཀྱིས་རྒྱལ་བ་ཐམས་ཅད་ཀྱི་བསྐྱེད་པའི་ཡུམ་དུ་མངོན་པར་སྤྲུལ་པ། ཤེས་རབ་ཀྱི་ཕ་རོལ་
དུ་ཕྱིན་པའི་བདག་ཉིད་དེ་ཉིད་བསྙུན་གྱིས་བཏབ་པ་ལ་སོགས་པའི་ཕྱི་རོལ་མི་འཚམ་པའི་
རྐྱེན་གང་ཡང་མེད་པར་རང་གནས་མཁའ་ལ་སྤྱོད་པའི་ཞིང་དུ་བདེ་བར་བཞུད་དོ། །དེ་ནས་
མི་རིང་བར་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་དགོངས་ཤིང༌། བླ་མ་རིན་པོ་ཆེ་རྣམ་
རྒྱལ་བཀྲ་ཤིས་ཀྱི་བཀའ་འཕེབས་པས་ཀྱང་ཉེ་བའི་རྐྱེན་བྱས་ཏེ་དགུང་ལོ་བདུན་པ་ཆུ་ཕོ་
སྟག་གི་ལོ་ལ། སྐྱེས་བུ་དམ་པ་དུ་མས་བྱིན་གྱིས་བརླབས་པའི་གནས། འཕགས་པ་འཇིག་
རྟེན་དབང་ཕྱུག་གི་ཞིང་ཁམས། དཔལ་སྟག་ལུང་ཐང་གི་ཆོས་གྲྭ་ཆེན་པོར་ཕེབས་ཤིང་དང་
པོ་འཇམ་མགོན་གྲུབ་པའི་དཔའ་བོ་དང་མཇལ། སླར་བདེ་བར་གཤེགས་པ་རིན་པོ་ཆེ་བཀྲ་
ཤིས་རྣམ་རྒྱལ་དང་སེང་གླེང་དུ་མཇལ་བ་ཡིན་གསུངས་སོ། །དགུང་ལོ་བརྒྱད་པ་ལ་ཆོས་གྲྭ་
དེ་ཉིད་དུ། རྒྱལ་བས་ལུང་བསྟན་བརྙེས་པ་གྲུབ་པའི་འཁོར་ལོས་བསྒྱུར་བ་སློབ་དཔོན་ཆེན་
པོ་ནག་པོ་སྤྱོད་པ་ཉིད། མཆོག་གི་དགེ་བའི་བཤེས་གཉེན་གྱི་རྣམ་པར་སྐུར་བསྟན་པ་འཇམ་
མགོན་གྲུབ་པའི་དཔའ་བོ་དཔལ་ལྡན་ཀུན་དགའ་གྲོལ་མཆོག་བློ་གསལ་རྒྱ་མཚོའི་སྡེའི་དྲུང་
དུ་མཁན་པོ་ཞུས་ཤིང༌། ཞུ་བའི་ཡུལ་དགེ་སློང་སྡོམ་བརྩོན་དུ་མ་དང་བཅས་པའི་དབུས་སུ།
ཚིགས་སྔ་མ་དགེ་བསྙེན་གྱི་སྡོམ་པ་དང༌། བར་མ་ཡང་དག་པར་བླང་བ་གསུམ་སྔོན་དུ་འགྲོ་
བའི་དགེ་ཚུལ་གྱི་སྡོམ་པ་ལེགས་པར་ནོད་པ་མཛད་དེ། མཚན་ནི་ཀུན་དགའ་བཀྲ་ཤིས་རྒྱལ་
མཚན་དཔལ་བཟང་པོ་ཞེས་གནང་སྟེ། ཐེག་ཆེན་ཆོས་ཀྱི་རྒྱལ་པོའི་མཚན་དེ་ཀ་ཡིན་ནོ་ཞེས་
20-1-86


བཀའ་བསྩལ་ལོ། །
༈ ཕྲ་ཞིང་གོས་མེད་འོད་སྟོང་བདག་པོའི་འོད། །གངས་དང་སྲེག་ཟ་ལ་ཡང་མངོན་
འབབ་སྟེ། །ཉི་མའི་ཟེར་ལ་ཚ་གྲང་དབྱེ་བ་མེད། །དེ་བཞིན་འདིར་ཡང་བདག་གིས་ལེགས་
པར་འཁུམས། །ཡེ་ཤེས་སྒྱུ་མའི་སྤྲུལ་པས་འགྲོ་བའི་དོན། །ཉི་འོད་བཞིན་དུ་ཀུན་ལ་ཁྱབ་
སྤྱོད་པ། །འདི་ལ་ཁྱིམ་ནས་རབ་ཏུ་འབྱུང་བ་ཞེས། །བཟང་ངན་དབྱེ་བ་ཅི་ཞིག་བློ་ལྡན་རྣམས། །
ཡིད་བཞིན་ནོར་བུ་ཇི་བཞིན་ལྷུན་འགྲུབ་ཏུ། །མཐའ་ཡས་སྐྱེ་བོའི་ཉེར་འཚོར་སྤྱོད་པ་ལ། །
ངུར་སྨྲིག་ཚལ་བུས་གཡོགས་པས་ཅི་ཞིག་འཕགས། །ལྷ་རྫས་འབུམ་ཕྲག་བརྒྱ་ཡིས་ཉེས་པ་
ཅི། །བཻཌཱུར་འོད་འཕྲོག་ཀ་ཤིའི་གོས་མཆོག་གིས་གཡོགས་རིན་ཆེན་ཟ་མ་ཏོག་ཏུ་སྩོལ། །ཤིང་
དྲུང་རྣམས་ནི་བཞི་མདོ་རྒྱུའོ་དེ་འདིར་ཅིར་མི་རུང་གང་རིན་ཆེན་བརྒྱན། །རེག་འཇམ་འཇའ་
འོད་མདངས་བཀྲའི་གཡོགས་མས་ལེགས་གཡོགས་སྲིད་གསུམ་རིན་ཆེན་གཅིག་པུ་འདི། །
ནོར་བུ་གོས་མཆོག་གཞན་གྱིས་སྤྲས་པ་མངོན་པར་བཏང་ནས་ངུར་སྨྲིག་ཚུལ་ལ་བརྟེན་འདི་
མཚར། །གང་གང་བཟང་པོར་གྱུར་བ་དེ་དག་ནི། །ཤིན་ཏུ་སྦས་ཤིང་མཆོག་ཏུ་བརྒྱན་འདི་
ལ། །འགྲོ་ཀུན་ལ་སོན་ཡིད་བཞིན་ནོར་བུ་འདི། །རྒྱན་བྱེད་གཞན་མེད་ཕྱིར་ན་རྒྱན་སྤངས་
བཞིན། །བློ་ལྡན་ཡིན་ཡང་འདོད་ལ་སྲེད་པས་འཁྱམས། །དེ་དག་རྣམས་ལ་གདམས་ངག་
མཛད་པའི་ཕྱིར། །སྲིད་གསུམ་ཕུན་ཚོགས་སྐུ་ལ་ཡོངས་བཟུང་ནས། །བུང་བའི་མདངས་
ཅན་གཙུག་ཕུད་བཅད་ཅེས་གྲགས། །ཀུ་མུད་འཛུམ་ཞལ་ཀུན་དགའི་ཟླ་སྣང་ཅན། །བཀྲ་
ཤིས་དགེ་མཚན་བདུད་རྩིའི་ཟེར་འཕྲོ་བས། །དཔག་ཡས་འགྲོ་ཀུན་ཆོས་ཀྱི་མགྲོན་དུ་གཉེར། །
འདི་ཡང་ཁྱེད་ཀྱིས་ཐབས་མཁས་འབའ་ཞིག་ལགས། །དེ་ལྟར་ན་ཁྱབ་བདག་འདི་ནི་ཡེ་
ཤེས་ཀྱི་རང་བཞིན་གཅིག་པུའི་ཕྱིར། ཁྱིམ་ན་གནས་པ་རྣམས་དང་མངོན་པར་འབྱུང་བ་ཞེས་
བྱ་བའི་བྱེ་བྲག་མེད་མོད་ཀྱི། འདི་ལྟར་ངུར་སྨྲིག་འཛིན་པའི་ཚུལ་བསྟན་པ་འདི་ཡང་དང་པོའི་
20-1-87


ལུས་ཅན་རྣམས་འདོད་ཡོན་ལ་བརྐམ་པའི་བྱང་ཆུབ་ཐོབ་དཀའ་བར་གཟིགས་ནས། ཉེས་
དམིགས་ཅན་གྱི་ཁྱིམ་སྤོངས་ལ་ཐར་པའི་གྲོང་ཁྱེར་དུ་འཇུག་པར་བྱོས་ཤིག །ཅེས་གདམས་
ངག་མཛད་པ་ཡིན་ནོ། །ཞེས་པ་འདི་ནི་ངེས་པར་འབྱུང་བའི་ཚུལ་བསྟན་པ་ལས་བརྩམ་སྟེ་ཅི་
རིགས་པར་བསྙད་པའི་སྡེ་ཚན་གཉིས་པའོ།། །།
དེ་ནས་འགྲོ་བ་འདྲེན་པའི་སྤྲུལ་པའི་སྐུ་ཆེན་པོ་མཁྱེན་པ་དང་བརྩེ་བ་དང༌། ནུས་མཐུ་
གཞལ་དུ་མེད་པ། རིན་པོ་ཆེ་ངག་དབང་རྣམ་རྒྱལ་བཀྲ་ཤིས་གྲགས་པ་རྒྱལ་མཚན་དཔལ་
བཟང་བོའི་ཞབས་ཀྱི་པདྨོ་ཡུན་རིང་དུ་བསྟེན་པར་མཛད་པ་དང༌། ལྷོ་པ་སློབ་དཔོན་དུ་
གྲགས་པ་གསང་བདག་ཕྱག་ན་རྡོ་རྗེ་འཁོར་ལོ་ཆེན་པོའི་བཟླས་པ་དུང་ཕྱུར་ལྷག་ཅིག་མཛད་
པས། ལྷག་པའི་ལྷས་བྱིན་གྱིས་རླབས་པའི་རྟགས་མཚན་ཐམས་ཅད་མངོན་དུ་གྱུར་པ་ནུས་
མཐུའི་མངའ་བདག་དེ་ཉིད་ལས་བསླབས་པར་བྱ་བའི་གནས་ཆེ་ཕྲ་ཐམས་ཅད་དཀའ་བ་
མེད་པའི་ཐུགས་སུ་ཆུད་པར་མཛད་ཅིང༌། སྐུ་ན་ཚོད་ཤིན་ཏུ་ཕྲ་བ་དེ་སྐབས་ཀྱང་ཐམས་ཅད་
མཁྱེན་པ་ཕྱོགས་ཐམས་ཅད་ལས་རྣམ་པར་རྒྱལ་བ་འཇིགས་མེད་གྲགས་པའི་བཀའ་སྲོལ་གྱི་
རྒྱུད་སྡེ་བཞིའི་དཀྱིལ་འཁོར་དུ་མ་ལ་ཕྱག་ལེན་མཐའ་རྒྱས་སུ་སྦྱོང་བར་མཛད་པས། ཕྱི་ནང་
གི་དེ་ཉིད་བཅུའི་མངའ་བདག་ཏུ་གྱུར་ཞིང༌། ཞབས་འབྲིང་བ་འགའ་ཞིག་དང་ལྷན་ཅིག་ཏུ་
དཔལ་གསང་བ་འདུས་པ་འཇམ་པའི་རྡོ་རྗེའི་བསྙེན་སྒྲུབ་ལ་བརྩོན་པར་གནང་བས། སྔ་གོང་
ཅུང་ཟད་ལྗགས་མི་བདེ་བའི་རྣམ་པའང་དེ་ཉིད་ཀྱིས་རང་གྲོལ་ཞིང༌། གཞན་ངོར་ཚུལ་བསྟན་
པར་སྣང་ཡང་ལྷག་པའི་ལྷ་འདི་ཉིད་ཀྱི་བྱིན་རླབས་ཀྱིས་མཁྱེན་པའི་དཀྱིལ་འཁོར་ཡོངས་སུ་
རྒྱས་པ་ཡིན་ཞེས་ཞལ་སྔ་ནས་དངོས་སུ་ཐོབ་བོ། །ལན་གཅིག་བཅོམ་ལྡན་འདས་དཔལ་ཧེ་
བཛྲ་ལྷ་དགུའི་བདག་ཉིད་ཅན་གྱི་སྒྲུབ་མཆོད་རས་བྲིས་ཀྱི་དཀྱིལ་འཁོར་ལ་བརྟེན་པ་ཞིག་
གནང་སྐབས། སྤྱིར་བྱང་ཕྱོགས་ས་ཁང་བསིལ་ཞིང༌། སྒོས་སུའང་དེ་དུས་དགུན་གྲངས་
20-1-88


སྒང་རང་ཡིན་སྣང་བས་ཆུ་རྣམས་འབབ་འཕྲོ་ལ་རྣོ་བའི་དངོས་པོ་འཛིན་སྐབས་ཡིན་ནའང༌།
བུམ་པ་ལ་དཀྲིས་སོགས་གང་ཡང་མེད་པར་ཡང་བུམ་ཆུ་མ་འཁྱག་པ་ཙམ་དུ་མ་ཟད། ཉི་མ་
གཅིག་གཉིས་ལ་བུམ་ནང་ནས་ལྗང་བུ་རིང་པོ་ཐོན་པ་འབྱུང་ཞིང༌། དེ་ཉིད་ལོ་གྲངས་མང་
པོའི་བར་དུ་མོས་རྟེན་དུ་བཟུང་ནས་ཡོད་པར་སྣང་ངོ༌། །དེས་ན་ཆུང་ངུ་ནས་སྔགས་ཀྱི་ནུས་པ་
རྙེད་པའི་ཚུལ་ཡང་རྒྱ་ཆེར་བསྟན། དེ་ནས་རིམ་པས་སྔ་ཕྱི་ལན་མང་པོར་འཇམ་མགོན་གྲུབ་
པའི་དཔའ་བོ་ལ། དམ་པའི་ཆོས་ཀྱི་ཚུལ་ཕྱོགས་མེད་དུ་གསན་པར་མཛད་དེ། ས་བཀའ་ཇོ་
ཞལ་ཤངས་ལུགས་བཀའ་གདམས་སོགས་དབང་ལུང་མན་ངག་གཞལ་དུ་མེད་པ་གསན་
ཞིང་ཐུགས་སུ་ཆུད་པར་མཛད་པས། རིས་མེད་པའི་བསྟན་པ་མཐའ་དག་གི་བདག་པོར་གྱུར་
པ་ཡིན་ནོ། །རྗེ་བཙུན་བླ་མ་དམ་པ་རྣམ་རྒྱལ་བཀྲ་ཤིས་ཀྱི་དྲུང་དུ། འཇིགས་བྲལ་ཐམས་
ཅད་མཁྱེན་པའི་བཀའ་སྲོལ་རྨ་མེད་པ་རྣམས་དང༌། ཁྱད་པར་དུ་འཇིག་རྟེན་དབང་ཕྱུག་གི་
རྣམ་སྤྲུལ་དཔལ་སྟག་ལུང་ཐང་པ་ཆེན་པོ་ནས་ཉེ་བར་བརྒྱུད་པ། སྟག་ལུང་བཀའ་བརྒྱུད་
ཅེས་ཡོངས་སུ་གྲགས་པའི་སྨིན་གྲོལ་གྱི་ལམ་མཐའ་དག་ཡོངས་སུ་རྫོགས་པར་གསན་པ་
དང་རྗེས་སུ་འབྲེལ་བར་ཀར་འབྲུག་འབྲི་གུང་བ་སོགས་བཀའ་བརྒྱུད་པ་བཞིའི་གདམས་པ་
མཐའ་དག་གསན་ཞིང་ཐུགས་སུ་ཆུད་པར་མཛད་ནས། ཁྱད་པར་བརྒྱུད་པའི་བཀའ་སྲོལ་
འདི་ནི་རྟོགས་པ་དོན་གྱི་བརྒྱུད་པར་བཞེད་པ་ཡིན་ལ། ཁྱད་པར་རྗེ་བཙུན་དམ་པ་འདིས་ནི་
ཆོས་དབྱིངས་སྤྲོས་པ་དང་བྲལ་བའི་གནས་ལུགས་གདོད་མ་མངོན་སུམ་དུ་གཟིགས་པ་ཡིན་
ཞིང༌། གནས་སྐབས་གདུལ་བྱ་གཞན་ངོ་དང་བསྟུན་ནས་དེ་སྐབས་བླ་མའི་ཞབས་དྲུང་དང༌།
དབེན་གནས་རྣམས་སུ་ཉམས་ལེན་སྒྲུབ་པ་ལ་རྩེ་གཅིག་ཏུ་གཞོལ་བར་མཛད་དེ། དེས་ན་
ད་ལྟ་ཉམས་ལེན་ཟླ་བ་གཅིག་ཙམ་མ་བྱས་པར། བྱིན་རླབས་དོན་གྱིས་འཕོས་པ་ཡིན་ནོ་
ཞེས་སྟོང་སྐད་ཀྱི་རྦད་ཁམས་འཐག་པའི་རྫུན་པོ་ཆེ། ལོངས་སྤྱོད་དང་མངའ་ཐང་ལ་མངོན་
20-1-89


པར་ཞེན་པ། གཡོ་སྒྱུ་གདུལ་བྱ་ཆེན་པོ་འགྲུབ་པའི་རྒྱབ་བསྟེན་དུ་ཞེན་པ་གཏིང་ནས་ལོག་
པ་ལ་ཟང་ཟིང་ལོངས་སྤྱོད་ཆར་ལྟར་འབབ་པ་ཡིན་ནོ། །ཞེས་པའི་ལུང་ཚིག་འདྲེན་པར་བྱེད་
པ་འདི་དག་ནི། རྗེ་བཙུན་མི་ལ་དང༌། རྗེ་དྭགས་པོ་རིན་པོ་ཆེ་ལ་སོགས་པ་མཉམ་བཞག་ལ་
རྩོལ་བ་དང༌། འདུ་འཛི་སྤངས་པ་རྣམས། དབང་པོ་རྟུལ་ཞིང་ཞེན་པ་མ་ལོག་པ་ཡིན་ལ། ཁོ་
བོ་ཅག་ནི་དབང་པོ་རྣོ་ཞིང་ཞེན་པ་གཏིང་ནས་ལོག་པ་ཡིན་པས་རྩོལ་བ་མེད་པའི་ལྷུན་འགྲུབ་
ཏུ་བསྒོམ་སྐྱེ་ཤིང༌། འདུ་བ་འདི་ཙམ་འབྱུང་བ་ཡིན་ནོ་ཞེས་དོན་གྱིས་སྨྲ་བར་སྣང་ངོ༌། །
༈ མ་ལུས་སྲིད་པའི་སྣང་བ་འདི། །འོད་གསལ་ཆེན་པོར་རོ་གཅིག་གྱུར། །རང་བཞིན་
སྤྲོས་དང་བྲལ་བ་ལ། །བསྒོམ་དང་མ་བསྒོམ་མཉམ་ཉིད་གྱུར། །སྣང་བ་སྒྱུ་མའི་འཁྲུལ་འཁོར་
འདི། །རླུང་སེམས་རྟེན་འབྲེལ་མ་འགགས་རྩལ། །རང་བཞིན་བྱར་མེད་བརྗོད་དུ་མེད། །མེ་
ལོང་གཟུགས་བརྙན་ལྟ་བུར་གཟིགས། །ནང་དུ་རང་རིག་འཛིན་པའི་སེམས། །བདེ་གསལ་
སྣང་བ་རྒྱུན་ཆད་མེད། །སྣང་བཞིན་བྱར་མེད་དབྱིངས་སུ་འདྲེས། །ཕྱི་ནང་རོ་གཅིག་ཕྱག་རྒྱ་
ཆེ། །གདོད་མ་རང་བཞིན་དག་པ་སྟེ། །ཐོག་མེད་དུས་ནས་མཁྱེན་ལགས་ཀྱང༌། །འདིར་ཡང་
འབད་རྩོལ་དུ་མ་ཡིས། །མངོན་དུ་གྱུར་བའི་ཚུལ་ཡང་བསྟན། །ཡང་སྐབས་ཤིག །མཆོད་ཁང་
རྩེ་ཉིད་དུ་གདན་ཕབ་ནས་ནག་པོ་ཆེན་པོ་ཙ་ཏུར་བྷུ་ཛའི་ཕྱི་ནང་གསང་བའི་འཁྲིད་ཀྱི་རིམ་
པ་རྣམས་བླ་མ་མཆོག་ལས་ཉམས་འཁྲིད་དུ་གསན་པའི་ཚེ། ཇི་སྐད་དུ་བཤད་པ་བཞིན་གྱི་
རྟགས་མཚན་ཐམས་ཅད་མངོན་དུ་གྱུར། ཁྱད་པར་ལས་མགོན་བྱ་རོག་གདོང་ཅན་གྱི་སྤྲུལ་
པ་མངོན་གསུམ་དུ་ཞལ་གཟིགས་ཤིང༌། གཟིགས་སྣང་དེ་ཡང་ཤིན་ཏུ་བརྟན་ཞིང་ཡུན་རིང་
དུ་གནས་པ་ཞིག་བྱུང༌། དེ་ཡང་ཞལ་མང་པོ་ཅན་ཁྲོ་ཞལ་རྣམས་གསལ་བར་མངོན་དུ་སྟོན་
ཞིང༌། བྱ་རོག་གི་གདོང་དར་ནག་གིས་གཡོགས་པའི་རྣམ་པ་ཅན་དུ་འདུག་གསུང་ངོ༌། །སྤྱིར་
ནི་ཆོས་དང་ལྡན་པ་ཐམས་ཅད་ལ་ཆོས་སྐྱོང་རྣམས་ཀྱིས་བུ་བཞིན་སྐྱོང་བར་མཛད་པ་ཡིན་ན།
20-1-90


སྤྲུལ་པའི་སྐྱེས་མཆོག་འདི་ལྟ་བུ་ལ་ལྟ་སྨོས་ཀྱང་ཅི་དགོས། ཁྱད་པར་རྗེ་འདིས་གཞན་ངོར་
བསྙེན་སྒྲུབ་ཀྱང་ཆེས་མཐར་སོན་པར་མཛད་པས་འཕྲིན་ལས་ཐམས་ཅད་ཡེ་ཤེས་ཀྱི་མགོན་
པོ་འདིས་རྩོལ་མེད་དུ་སྒྲུབ་པར་མཛད་པ་ནི་བདག་ཅག་རྣམས་ཀྱིས་ཀྱང་མངོན་གསུམ་དུ་
མཐོང་ངོ༌། །དེ་ཡང་སྒྲུབ་ཡིག་རྣམས་སུ་འབྱུང་བ་བཞིན་རབ་ལ་དངོས་སུ་ཞལ་བསྟན་ནས་
ལས་བྱེད་པ་དང༌། འབྲིང་ལ་མི་ནག་པོའི་གཟུགས་ཀྱིས་ལས་བྱེད་པ་དང༌། ཐ་མ་ལའང་
སྤྲུལ་པའི་བྱ་རོག་གི་གཟུགས་སྟོན་ཞིང་ལས་བྱེད་པར་གསུངས་བ་ལས། བདག་ཅག་ཤིན་ཏུ་
བསྐལ་པ་དམན་པ་རྣམས་ཀྱི་སྣང་ངོར་ཡང་ཕྱི་མ་འདི་གཉིས་མངོན་སུམ་དུ་གྱུར་པ་ནི་ཞབས་
འབྲིང་དུ་ཅུང་ཟད་རེ་འཁོད་པས་ཀྱང་སྒྲོ་བཏགས་མེད་པར་རྟོགས་པར་གྱུར་པ་ཞིག་གོ །རྗེ་
དེ་ཉིད་ཀྱིས་གསན་པ་རྒྱ་མཚོ་ལྟ་བུ་ནི་གསན་ཡིག་ཏུ་ཤེས་པར་བྱའོ། །དེ་ནས་དགུང་ལོ་ཉི་
ཤུར་སོན་པ་ན། རྗེ་བདེ་བར་གཤེགས་པ་རིན་པོ་ཆེ་བཀྲ་ཤིས་རྣམ་རྒྱལ་ཉིད་ཀྱིས་མཁན་པོ་
མཛད་དེ། ཇི་སྐད་བཤད་པའི་མངོན་འགྱུར་བཅུའི་སྒོ་ནས་བསྙེན་པར་རྫོགས་པ་དགེ་སློང་གི་
དངོས་པོ་བསྙེན་པར་མཛད་ནས་བསྟན་པ་མཐའ་དག་གི་བདག་པོར་གྱུར་པ་ཡིན་ནོ། །འདི་
སྐབས་མཚན་ཡང༌། ངག་དབང་ཀུན་དགའ་ལེགས་གྲུབ་བཀྲ་ཤིས་རྒྱལ་མཚན་དཔལ་བཟང་
པོ་ཞེས་མཚན་གསུམ་པ་གསོལ་ལོ། །སྔོན་དུས་ངུར་སྨྲིག་གི་རྒྱན་བཞེས་པ་ཙམ་ནས་བཟུང་
བསླབ་པའི་གནས་ཕྲ་ཞིང་ཕྲ་བ་ལ་ཡང་སྤྱན་གྱིས་འབྲས་བུ་ལྟར་དགོངས་པའི་གཅེས་སྤྲས་
སུ་གནང་བ་ཡིན་ན། འདི་ཕྱིན་ཆད་དུ་ནི་ལྟ་སྨོས་ཀྱང་ཅི་དགོས་ཏེ། ངུར་སྨྲིག་འཛིན་པ་ཐམས་
ཅད་ཀྱི་གཙུག་གི་ནོར་བུ་སྐུ་གསུང་ཐུགས་ཀྱི་ངང་ཚུལ་ཞི་བ་དང༌། དུལ་བ་དང༌། ངེས་པ་དང༌།
ལེགས་པར་གདམས་པའི་ཚུལ་འདི་གཅིག་པུས་ཀྱང༌། ད་ལྟའི་ཆེན་པོར་གྲགས་པ་ཐམས་
ཅད་ཀྱི་ཡོན་ཏན་མ་ལུས་པ་ཟིལ་གྱིས་གནོན་པ་འདི་ཡིན་ནོ། །དེ་ནས་རྗེ་རྣམ་རྒྱལ་བཀྲ་ཤིས་
དེ་ཉིད་དབེན་པ་ལ་ཐུགས་ལྷག་པར་གཞོལ་བའི་ངང་ཚུལ་གྱིས་ཀུན་སྤངས་ཀྱི་རྣལ་འབྱོར་
20-1-91


མཛད་པར་དགོངས་ནས། དམ་པ་འདི་ཉིད་དཔལ་འཇིག་རྟེན་གྱི་མགོན་པོ་ཐང་པ་ཆེན་པོའི་
གདན་ས་མི་འཇིགས་པ་སེང་གེའི་ཁྲིར་རྒྱལ་ཚབ་ཏུ་ཉེ་བར་འཁོད་དེ། སྔར་རྗེ་སངས་རྒྱས་
ཡར་བྱོན་གྱི་དུས་སུ་མཆོག་ཏུ་བཅའ་ཁྲིམས་དམ་པར་ཡོད་པ་རིམ་པ་བཞིན་དུ་གདན་སར་
བྱོན་པ་རྣམས་ཀྱིས་ཀྱང་སྤྱིར་བཅའ་ཁྲིམས་ཐམས་ཅད་ཡར་ལྡན་དུ་མཛད་པ་ལགས་ཀྱང༌།
དུས་ཀྱི་དབང་གིས་ཆ་ཤས་ཉམས་པར་གྱུར་པ་དག་སོར་ཆུད་པར་མཛད་དེ། ཆོས་རྗེའི་རྣམ་
ཐར་བཅུ་གསུམ་ཚོགས་ཀྱི་བཅའ་བ་བཅུ་གསུམ། གླིང་གི་འདུལ་ཁྲིམས་བཅུ་གསུམ་རྣམས་
རྗེ་སངས་རྒྱས་ཡར་བྱོན་གྱིས་སྐབས་ཉིད་སྤར་བཏབ་པ་བཞིན་མཛད་ཅིང༌། དེ་ཡང་ཤིང་མོ་
བྱ་ལོ་ཟླ་བ་དང་པོ་ལ་གདན་སར་ཕེབས་པ་ཡིན་ཞིང༌། ཁྲི་ཐོག་ཏུ་ཕེབས་ནས་མངའ་དབུལ་
བགྱིད་པའི་སྐབས། མེ་ཏོག་གི་ཆར་པ་བབས་པ་སོགས་ངོ་མཚར་བའི་ལྟས་དུ་མ། ཁྱད་པར་
ཉི་ཟླ་སྐར་གསུམ་འཛོམས་པ་དང༌། ཕུ་ཆུའི་འཁྱག་པ་ཐམས་ཅད་ཞུ་ནས་བྲག་ཆུར་འདྲེ་བ་
སོགས་བྱུང་སྟེ། དཔལ་སྟག་ལུང་པའི་ལུགས་གཉིས་ཀྱི་བསྟན་པ་རྒྱུན་མི་འཆད་པར་འབྱུང་
བའི་རྟེན་འབྱུང་ཡ་མཚན་ཅན་རྨད་དུ་བྱུང་བའོ། །དེར་སྟག་ལུང་ལྷ་སྡེའི་མངའ་ཞབས་བོད་
འབྲོག་སྡེ་དང་བཅས་པ། སྔ་སྲོལ་གྱི་ཕྱག་རྒྱུན་བཟང་པོ་ཡོད་པ་ལྟར། ཐམས་ཅད་ཕྱག་ཏུ་
གནང་སྟེ། མདོར་ན་སྟག་ལུང་པའི་ལུགས་གཉིས་ཀྱི་མངའ་བདག་ཏུ་དབང་བསྐུར་རོ། །རབ་
འབྱམས་ཕྱོགས་བཅུའི་ཞིང་ཁམས་ཚད་མེད་ན། །ཇི་སྙེད་མཐའ་ཡས་མགོན་གྱི་རྒྱལ་ཁྱོད་
ལ། །སྲིད་ཞིའི་ཕུན་ཚོགས་འབྱོར་པ་ཀུན་བཅས་ཏེ། །སྲས་ཀྱི་གཙོ་བོ་གཅིག་པུ་ཁྱོད་དབང་
བསྐུར། །འགྲོ་བ་ཀུན༷་ལ་སྲིད་ཞིའི་དག༷འ་སྟོན་འགྱེད། །བཀྲ༷་ཤི༷ས་རྒྱལ༷་མཚ༷ན་ཕྱོགས་
བརྒྱར་བསྒྲེང་བཞིན་དུ། །མཐའ་དག་སྐྱེ་དགུའི་ཉེར་འཚོ་འདྲེན་པ་ཁྱོད། །རབ་བརྟན་སེང་
གེའི་ཁྲི་ལ་མངོན་པར་འཁོད། །དེ་ཚེ་ཕྱོགས་བཅུའི་འདྲེན་པ་སྲས་བཅས་རྣམས། །ཀུན༷་ནས་
རབ་དག༷འི་ཐུགས་ཀྱི་ལྷ་ལམ་ལ། །བཀྲ༷་ཤིས༷་ལན་བརྒྱར་བརྗོད་ཅིང་མེ་ཏོག་ཆར། །ཅི་
20-1-92


ཡང་ཕབ་པས་ཕྱོགས་ཀུན༷་ཉེ་བར་འགོག །བསྟན་འཛིན་ཀུན་གྱི་དབུས་ནས་དག༷འ་བའི་
ཏོག །བཀྲ༷་ཤི༷ས་དགེ་མཚན་བརྒྱ་ཡི་མངོན་འབར་བའི། ། མཚུངས་མེད་བསམ་འཕེལ་ཡིད་
བཞིན་ནོར་བུ་ལ། ཡང་ཡང་བསམ་བཞིན་སྙིང་ནས་དད་པ་སྐྱེས། །ཞེས་པ་འདི་ནི་རྒྱལ་ཚབ་
ཏུ་མངོན་པར་དབང་བསྐུར་བ་ལས་བརྩམ་སྟེ་བསྙད་པའི་སྡེ་ཚན་ཏེ་གསུམ་པའོ།། །།
དེ་ལ་ཁོ་བོ་ཅག་གི་འདྲེན་པ་དམ་པ་འདི་ནི། དཔལ་སྟག་ལུང་གི་གདན་སའི་རབས་ཇི་
སྙེད་བྱོན་པ་རྣམས་ཀྱི་ནང་ནས་ཀྱང༌། ལུགས་གཉིས་ཆར་གྱི་སྒོ་ནས་བསྟན་པ་རིན་པོ་ཆེ་
གསལ་བར་མཛད་པ་ལ། རྗེ་རིན་པོ་ཆེ་འདི་ནི་འགྲན་ཟླ་དང་བྲལ་བ་ཡིན་ནོ། །དེ་ནས་མི་
རིང་བའི་སྐབས་ཤིག་ན་ཀརྨ་པའི་བུ་ཆེན། ཀར་ལུགས་འཛིན་པ་རྣམས་ཀྱི་ནང་ན་མཆོག་ཏུ་
མཁས་པར་བཀུར་བ། ཆོས་རྗེ་དཔའ་བོ་གཙུག་ལག་འཕྲེང་བར་གྲགས་པས་ཀྱང༌། རྗེ་རྣམ་
རྒྱལ་བཀྲ་ཤིས་ལ་གུས་པའི་སྤྱི་བོས་ཞབས་ཀྱི་པདྨོ་ལ་ཉེར་བར་མཆོད་པར་བྱས་ཤིང༌། ཁོང་
གྲགས་ཆེ་བས་སྟག་ལུང་དགེ་འདུན་རྣམས་ཀྱིས་ཆོས་ཅི་རིགས་པར་གསན་སྣང༌། ཕྱིར་
ཕེབས་ཀར་རྗེ་འདིས་རྙེད་བཀུར་ལ་སྤྱན་འདྲེན་པར་མཛད་འདུག་པས། བཞུགས་གྲལ་གྲོལ་
ནས་ཐུགས་ཀར་རྗེ་འདི་ཉིད་ལ་གུས་པས་ཐལ་མོ་སྦྱོར་བཞིན་པས། སངས་རྒྱས་རྣམས་ཀྱི་
ཐུགས་རྗེ་བསྐུལ་བཞིན་དུ་སྐུ་ཚེ་བརྟན་པ་དང་འཕྲིན་ལས་རྒྱས་པར་གསོལ་བ་བཏབ་ནས་
ཐེགས་སོང་ཞེས་ཟེར། དེ་ལྟར་ན་རྒྱལ་པོ་རྣམས་ཀྱིས་ལྷག་པར་བཀུར་བའི་སྟོབས་ཀྱི་ཆེ་
ཐབས་ལ་ཤིན་དུ་བརྩོན་པའི་དྲེགས་ལྡན་ཆེན་པོ་མཆོག་ཏུ་གྲགས་པ་རེ་རེ་ལས། སྐུ་གསུང་
ཐུགས་ཀྱི་རྟེན་ཤས་ཆེར་ལ་ཡང་འདུད་པ་དང་བྲལ་བ་དག་ཀྱང་འདི་ལྟར་ཐུགས་རྗེའི་ཟིལ་
གྱིས་ཆེར་མནན་ནས་གུས་པས་འདུད་ན་གཞན་ལྟ་སྨོས་ཀྱང་ཅི་དགོས། དེ་ནས་གཙུག་ལག་
ཁང་གི་གསེར་ཏོག་གཉྫིར་ར་ཆེན་མོ་ཁྲུ་བཞི་བཅུའི་ཚད་ཙམ་གྱི་གཟི་འོད་རབ་ཏུ་འབར་བ་
འདི་ཉིད་བཞེངས་པར་བཞེད་པ་ལ། བལ་པོའི་ཡུལ་ནས་བཟོ་བོ་ཚན་ཆེ་བ་སྐུ་དྲུང་དུ་ལྷགས་
20-1-93


ཤིང༌། བཟོ་ཕུད་ལ་འཇམ་མགོན་གྲུབ་པའི་དཔའ་བོའི་སྐུ་བརྙན་དངུལ་སྐུ་རྐང་གང་མ་ཞིག་
གྲུབ་རྗེས། གསེར་ཏོག་ཆེན་མོ་ཉིད་བཞེངས་པར་མཛད་ཅིང༌། འདི་ཡི་བྱུག་གསེར་ལ་གསེར་
འདུལ་ཞོ་དགུ་བརྒྱ་དང་དགུ་བཅུ་རྩ་ལྔ་སོང་ཞིང༌། གཟུངས་གཞུགས་ཡང་གདུང་ཤ་རི་རཾ་
ཡུངས་འབྲུ་ལྟ་བུའི་རིང་སྲེལ་དང༌། གཟུངས་སྔགས་འཁོར་ལོ་ལ་སོགས་པས་ཉེ་བར་
གཏམས་པ། མཁས་པའི་ཕྱག་བཞེས་མཐོང་བ་བརྒྱུད་པ་མ་ཉམས་པ་ལྟར་གནང་ཞིང༌། རྗེ་
རྣམ་རྒྱལ་བཀྲ་ཤིས་ཀྱིས་གཟུངས་གཞུག་རྣམས་ཀྱང་ཕྱག་ལྟར་བར་མཛད་ཅིང༌། རབ་ཏུ་
གནས་པའང་ཤིན་དུ་རྒྱས་པ་དགའ་སྟོན་བློ་ལས་འདས་པ་དང༌། བཟོ་རིས་པ་རྣམས་ལ་
བཟའ་བཏུང་དང་ཡོན་གྱི་གནང་སྦྱིན་དཔེ་བྲལ་བློ་འདས་ཀྱིས་མགུ་བ་བསྐྱེད་པར་མཛད།
འདིའི་སྔ་ཕྱི་ཐམས་ཅད་དུ་ཀུན་སྤངས་རིན་པོ་ཆེ་རྣམ་རྒྱལ་བཀྲ་ཤིས་ཉིད་ཀྱིས་བསྟན་པ་སྤྱི་
དང་བྱེ་བྲག་ཐམས་ཅད་དར་ཞིང་རྒྱས་པ་དང༌། རྗེ་འདིའི་བཞེད་དོན་ཐམས་ཅད་འགྲུབ་པའི་
སྨོན་ལམ་ཡང་ཡང་མཛད་པས། ཕྱིས་རྟེན་བཞེངས་སོགས་རླབས་པོ་ཆེའི་མཛད་པ་ཐམས་
ཅད་གེགས་མེད་དུ་འགྲུབ་པའི་རྟེན་འབྲེལ་ཐམས་ཅད་ལེགས་པར་འགྲིགས་པ་ཡིན་ནོ་ཞེས་
གྲགས་སོ། །དེ་ནས་རིམ་གྱིས་དུས་གཞན་དང་གཞན་དུ་གཙུག་ལག་ཁང་ཆེན་མོའི་བད་
དཀར་པོའི་ཁྱོན་རྣམས་དང༌། ལྷ་ཁང་མཐིལ་གྱི་ལོགས་རྣམས་སུ་བྲིས་སྐུ་མཐོང་བ་དོན་ལྡན་
གྱི་སྐུའི་བཀོད་པ་གཟབ་བྲིས་སུ་མཛད་པ་དང༌། བསྐལ་བཟང་གི་དེ་བཞིན་གཤེགས་པ་སྟོང་
གི་སྐུ་བརྙན་གྱི་རྒྱུད་རིས་དང༌། ཐུབ་དབང་གནས་བརྟན་བཅུ་དྲུག་གི་སྐུ་བརྙན་སོགས་གཙུག་
ལག་ཁང་ཆེན་མོ་རྒྱ་ཁྱོན་བསམ་གྱིས་མི་ཁྱབ་པའི་ལོགས་བྲིས་ཤས་ཆེ་བ་ཡང་གྲུབ་པར་
མཛད། བྲིས་ཐང་ཡང་མགོན་ཁང་རྙིང་མར་བཞུགས་པའི་མགོན་ཐང་ཆེན་མོ་དང༌། རྣམ་སྲས་
ཀྱི་གོས་ཐང་ཆེན་མོ། བདེ་མཆོག །དགྱེས་རྡོར། འཇིགས་བྱེད། ལས་མགོན་གཉིས་དང་
བཅས་པ། བཟོ་རིས་མཁས་པའི་གཟབ་བྲིས་སུ་མཛད་པ་དཔེ་བྲལ་དེ་རྣམས་ཀྱང་ལེགས་
20-1-94


པར་གྲུབ་ཅིང༌། རབ་གནས་ཀྱི་བར་གྱི་མཐའ་རྒྱས་ཀྱང་བརྩལ། དེ་ནས་རིང་པོར་མི་ཐོགས་
པར། འགྲོ་བ་འདྲེན་པའི་སྤྲུལ་པའི་སྐྱེས་མཆོག་ཆེན་པོ་ཀུན་སྤངས་རིན་པོ་ཆེ་རྣམ་རྒྱལ་བཀྲ་
ཤིས་དེ་ཉིད་ཆོས་ཀྱིས་དབྱིངས་སུ་ཞི་བར་གཟིམས་པའི་ཚུལ་བསྟན་པའི་ཚེ། ཟབ་ཡང་
མཆོད་པའི་སྤྲིན་གྱི་ཕུང་པོ་གཞལ་དུ་མེད་པའི་བཀོད་པ་དང༌། སྐུ་གདུང་རིན་པོ་ཆེ་དེ་ཉིད་ས་
གཞི་བྱིན་གྱིས་རློབས་པ་དང༌། མཐོང་ཐོས་དྲན་རེག་གི་འགྲོ་བ་རྣམས་ལ་ཐར་པའི་ས་བོན་
མཆོག་བསྐྲུན་པའི་སླད་དུ། དངུལ་གྱིས་གདུང་ཁང་བྱ་བར་བཞེད་དེ། གསེར་རྐྱང་ཞོ་ཉིས་
བརྒྱ་ལྷག་པ་སོགས་རྒྱུ་ཚོགས་བསམ་གྱིས་མི་ཁྱབ་པའི་རིན་པོ་ཆེའི་ཕུང་པོ་ཆེན་པོའི་འདི་
ཉིད་དང༌། དཔལ་ཡེ་ཤེས་ཀྱི་མགོན་པོ་ཕྱག་བཞི་པའི་སྐུ་བརྙན་བར་ཆད་ཀུན་སེལ་དུ་གྲགས་
པ་འདི་ཉིད་ལ་དངུལ་སྲང་སྟོང་བརྒལ་བ་དང༌། གདན་དང་རྒྱན་བཀོད་ལ་གསེར་ཞོ་བཞི་
བཅུའི་སྐུད་གསེར་བཏང་བ་དང༌། ནང་བཞུགས་སུ་བྱིན་རླབས་རྟེན་བསམ་གྱིས་མི་ཁྱབ་པ་
དང༌། བྲིས་འབུར་གྱི་སྐུ་བརྙན་བྱིན་རླབས་ཅན་དང༌། གསེར་དངུལ་ལས་གྲུབ་པའི་གཟུངས་
སྔགས་རྣམས་རྒྱུད་སྡེ་རིན་པོ་ཆེ་ནས་ཇི་སྐད་གསུངས་པ་ལྟར་སློབ་དཔོན་མཁས་པའི་ཕྱག་
བཞེས་ལྟར་གཟུངས་བཞུགས་ཀྱི་གཏམས་པར་མཛད་ཅིང་དངུལ་གདུང་རིན་པོ་ཆེ་འདི་ཉིད་
བླ་མ་གོང་མ་རྣམས་ཀྱི་ཐུགས་དམ་རྟེན་སོགས་བྱིན་རླབས་རྟེན་བློ་ལས་འདས་པས་གང་བ་
ཡིན་ནའང༌། ཡི་གེ་མང་བས་འདིར་མ་བརྗོད། དེ་དག་གི་རབ་གནས་ལ། འཇམ་མགོན་གྲུབ་
པའི་དཔའ་བོ་སྤྱན་འདྲེན་པར་མཛད་དེ། དངུལ་གདུང་གི་གཟུངས་བཞུགས་ཀྱང་རྗེ་བཙུན་
མ་ཆོག་པ་ཅུང་ཟད་ཀྱང་མ་བྱུང༌། ལམ་གྱི་དཀའ་བ་ཐམས་ཅད་ཁྱད་དུ་བསད་ནས་ཆོས་ལུང་
བྱང་རྩེར་ཕེབས་པའི་ཚེ། སྒྲུབ་གནས་དམ་པ་དེར་བཞུགས་པའི་སྒྲུབ་པ་པོ་རྣམས་ཀྱིས་
ཕེབས་བསུའི་བཀོད་པ་མཛད་པ་ན། ནམ་མཁའ་ལ་མེ་ཏོག་གི་ཆར་སྔོན་ཆད་སུས་ཀྱང་མིག་
ལམ་དུ་མ་ཕེབས་པ་དག་ཀྱང་བྱུང་ཞིང༌། ཁྱད་པར་མེ་ཏོག་བཟུང་དུ་རུང་བ་ཡང་དུ་མ་བྱུང་ངོ༌། །
20-1-95


 དེར་དཀར་མེ་རྒྱུན་སྦར་དང༌། མཆོད་རྫས་མཆོད་པའི་ཐེབས་སོགས་བློས་གཞལ་བར་
དཀའ་བ་སོགས་འབུལ་བར་གནང་ཞིང༌། བསྟན་འགྲོའི་དོན་དུ་སྨོན་ལམ་རྒྱ་ཆེན་པོ་གནང་
བཞིན་དུ་ཟླ་གཅིག་སྐོར་བཞུགས་རིང་རྙེད་བཀུར་རྣམས་ནི་དཔོན་དྲུང་ཚེ་དབང་འཕན་དར་
བས་དང་བཞེས་སུ་མཛད། གཡས་རུ་བྱང་ནས་ཆོས་རྒྱལ་ཀུན་དགའ་རིན་ཆེན་ཡང་མཇལ་
བར་ཕེབས་ཤིང་གུས་པས་ཞབས་ལ་གཏུགས། དེ་ནས་སླར་ཡང་རིམ་གྱིས་གཞུང་ལམ་
བརྒྱུད་ནས་ཕེབས་ཏེ་གང་དང་གང་དུ་ཕེབས་པ་དེར། བླ་མ་སློབ་དཔོན་སྐྱ་སེར་ཆེ་ཕྲ་ཐམས་
ཅད་ཀྱིས་ཞབས་ལ་གཏུགས་ཤིང༌། ཆོས་དང་ཟང་ཟིང་གི་འབྱོར་བས་ཚིམ་པར་མཛད་དེ།
རང་གནས་ཐང་པ་ཆེན་པོའི་གདན་ས་ཉིད་དུ་ཕེབས་ནས་དགེ་འདུན་འདུས་པ་རྒྱ་མཚོའི་
དབུས་སུ་བསྟི་བར་མཛད་དོ། །དེ་ནས་འབྲུག་ལོའི་ནང་དུ་ཞྭ་དམར་ནག་གཉིས་འདུས་ཀྱི་
སྒར་པ་འབྲི་གུང་ནས་འཕན་ཡུལ་བརྒྱུད། དཔལ་སྟག་ལུང་ཐང་གི་གདན་ས་མཇལ་བར་
ཕེབས་ཤིང༌། ཞག་བདུན་ཙམ་བཞུགས། རྙེད་བཀུར་དང་འབུལ་བའི་གནང་སྐྱེས་རྒྱ་ཆེར་
གནང་ཞིང༌། གླིང་གི་དགེ་འདུན་བྱིངས་ཀྱིས་ཀྱང་རྙེད་བཀུར་འབུལ་བ་དཔེ་བྲལ་མཛད། ཞྭ་
དམར་ཅོད་པཎ་འཛིན་པ་དཀོན་མཆོག་ཡན་ལག་ལ་བཀའ་འབྲེལ་ཙམ་གསན། དེའི་ཕྱིར་
ལོར་རྗེ་དྲུང་ཞྭ་དམར་བས། རྗེ་འདི་ཉིད་སྤྱན་འདྲེན་གནང་བས་ཡངས་ཅན་དུ་ཕེབས་པའི་ཚེ།
སྒར་གྱི་གྲྭ་ཚང་སོ་སོའི་དགེ་འདུན་རྣམས་ཀྱིས་སེར་འཕྲེང་དང༌། ཕྱག་མཛོད་སྐུ་མཆེད་
སོགས་དྲུང་འཁོར་རྣམས་ཀྱི་ཆིབས་ཧྲག་གིས་ཕེབས་བསུའི་བཀོད་པ་རྒྱ་ཆེར་མཛད། སྒར་
ཆེན་གྱིས་ལོ་གསར་སྨོན་ལམ་དང་བཅས་པ་དུས་འགྲིགས་པས། རྙེད་བཀུར་བསམ་ལས་
འདས་པ་བྱུང༌། གན་རྡོ་ལའི་མཆོད་བཤམས་སུ་གྲགས་པ་རྣམས་ཀྱང་ཞིབ་རྒྱས་སུ་གཟིགས་
པ་ཕུལ། སྐབས་འདིར་རྗེ་ཞྭ་དམར་བ་ལ་ཀརྨ་ཀཾ་ཚང་གི་ཆོས་བཀའ་ཡོད་པ་ཐམས་ཅད་
གསན། རྗེ་འདི་ཉིད་ལ་ཚུར་རིན་ཐང་གཞལ་དུ་མེད་པའི་རིན་པོ་ཆེ་མ་ནུ་ཧུའི་ཞལ་བུ་སོགས་
20-1-96


ཁྱད་ནོར་གྱི་འབུལ་བ་རྔམས་སུ་བརྒལ་བ་བྱུང་བླ་མ་གཡུང་སོགས་བུ་ཆེན་རྣམས་དང་ཕྱག་
མཛོད་སྐུ་མཆེད། སྡེ་པ་ནས་རིན་པ་སོགས་སྒར་གྱི་དྲག་ཞན་མ་ལུས་པ་ཡང་མཆོག་ཏུ་གུས་
པ་ཐོབ་སྟེ། ཆོས་འབྲེལ་མ་ཐོབ་པ་གཅིག་ཀྱང་མེད། དེ་ནས་ཕོ་འདོའི་སྡེ་པ་དོན་བཟང་བ་
གཤེགས་པར་ཉེ་བའི་བང་ཆེན་གྱིས་བསྐུལ་ཏེ། སྟག་ལུང་དུ་ཕེབས། མི་རིང་བར་འཁོན་
རིགས་དམ་པ་གྲུབ་པའི་དབང་ཕྱུག་བདག་ཆེན་རིན་པོ་ཆེ་ཀུན་དགའ་བསམ་འགྲུབ་དཔོན་
སློབ་རྣམས་སྟག་ལུང་དུ་ཕེབས། ཡང་དགོན་དུ་སྤྱན་འདྲེན་ཞུ་བར་མཛད། རྡོ་རྗེ་ཕུར་པ་ལ་
སོགས་པ་ཟབ་ཆོས་མང་དུ་གསན། རྙེད་བཀུར་འབུལ་བ་དཔེ་བྲལ་གནང་ཞིང་བདག་ཆེན་
རིན་པོ་ཆེས་ཀྱང་གསེར་དམར་ལས་གྲུབ་པའི་དྲིལ་བུ་བཟོ་ཁྱད་ཆེས་འཕགས་པ་ཕྱག་ཏུ་
འབུལ་བར་སྣང༌། སྐུ་རིམ་གཏོར་བཟློག་ཕྱག་ལེན་མཐའ་རྒྱས་ཀྱང་གཟིགས་ཡུལ་དུ་ཕེབས།
ཡང་ལན་ཅིག་བྱང་རིགས་ལ་ཕེབས་དུས། གཉན་ཆེན་ཐང་ལྷས་མཆོད་པ་དང་འདུད་པའི་
གཟིགས་སྣང་ཆེར་བྱུང་བར་སྣང་བས། སྤྱི་མཐུན་མཐོང་སྣང་ལ་སྒྲ་དང་འཇའ་འོད་དང༌། མེ་
ཏོག་གི་ཆར་བབས་པ་སོགས་དང༌། ཁྱད་པར་འཇའ་ཚོན་ལ་བཀྲ་ཤིས་རྟགས་བརྒྱད་ཤིན་ཏུ་
གསལ་བར་བྱུང༌། དེ་ནས་སྐྱེ་རབས་བརྒྱ་རྩའི་གཟབ་བྲིས་ཐང་ཀ་བཞི་བཅུ་ཙམ་ལ་གྲུབ་པ་
ཞིག་བཞེངས་པར་གནང་ཞིང༌། རབ་གནས་ཡོན་རྫོགས་སོགས་ཀྱིས་བར་ཐམས་ཅད་མཐའ་
རྒྱས་སུ་འགྲུབ་པར་མཛད། དེ་ནས་ལྕགས་ཕོ་རྟའི་ལོ་ལ། བལ་ཡུལ་བཟོ་རིགས་མཁས་པའི་
མཐར་ཕྱིན་པ། དཔོན་མོ་ཆེ་ཛཱ་ཏི་པཱ་ལ་སོགས་སྐུ་གཞོགས་སུ་འབྱོར་བ་ལ། རྟེན་ཐོག་མར་
བཟོ་ཕུད་དུ་བདེ་མཆོག་ལྷན་སྐྱེས་ཀྱི་སྐུ་རྒྱབ་མཐོ་གང་བ་ཞིག་བཞེངས་པར་མཛད། སླར་
ཐུབ་ཆེན་མཐོང་བ་དོན་ལྡན་ཉིད་བཟོ་དབུ་འཛུག་པར་མཛད་དེ། རིང་པོར་མི་ཐོག་པར་
གེགས་མེད་དུ་མཐར་ཕྱིན་འདི་ནི་སྐུ་ཚད་ཆེས་ཆེ་དྲགས་པས་མཆོད་ཁང་དུ་མ་ཤོང་བར་ཞལ་
རས་ལྷ་ཁང་གསར་དུ་བཞེངས་དགོས་བྱུང་ཞིང༌། འདིའི་ནང་བཞུགས་སུ་ཐུབ་པ་ཆེན་པོའི་
20-1-97


རིང་སྲེལ་རྣམ་བཞི་སོགས་བྱིན་རླབས་བརྗོད་ལས་འདས་པ་བཞུགས། རྟེན་བསྒྲིགས་གནང་
བས་རྒྱ་མཐོ་བཞི་བཅུ་ཞེ་ལྔ་བྱུང་ཞིང༌། རབ་གནས་དགའ་སྟོན་ཡོན་རྫོངས་ཀྱི་བར་དུ་ཐམས་
ཅད་མཐའ་དག་ཚང་བར་གནང་ངོ༌། །འདི་དག་གི་སྐབས་ཤིག་དཔལ་ལྡན་ཨ་ཏི་ཤའི་བཤད་
སྒྲུབ་ཀྱི་བཀའ་སྲོལ་སྐྱོང་བ་ལ་འགྲན་ཟླ་དང་བྲལ་བ། དཔལ་ལྡན་ས་སྐྱ་བའི་བསྟན་འཛིན་
ཀུན་གྱི་སྙིང་པོ། སྤྱན་སྔ་ཚུལ་ཁྲིམས་འབར་གྱི་རྣམ་འཕྲུལ་དུ་གྲགས་པ། ལོ་པ་སྤྱན་སྔ་རིན་
པོ་ཆེ་ངག་དབང་ཆོས་གྲགས་པ་ཆེད་ཀྱིས་སྤྱན་འདྲེན་པ་མཛད་དེ། བཀའ་གདམས་ཀྱི་ཆོས་
སྐོར་མཐའ་ཡས་པ་གསན་ཞིང་ཐུགས་སུ་ཆུད་མཛད་ཅིང༌། ཇི་སྐད་བཤད་པའི་བླ་མ་དམ་
པའི་མཚན་ཉིད་ཐམས་ཅད་ཡོངས་སུ་རྫོགས་པར་མངའ་བའི་བཤེས་གཉེན་དམ་པ་མཆོག་
དེ་ལ་བསམ་གྱིས་མི་ཁྱབ་པའི་གུས་པ་དང༌། རྙེད་བཀུར་དང༌། ཡོན་འབུལ་དང༌། ཕུ་དུད་དུ་
བྱ་བར་མཛད་ཅིང༌། སྤྱན་སྔ་རིན་པོ་ཆེ་འདི་དེ་དུས་དགུང་ལོ་བརྒྱར་ཉེ་བར་བཞེས་པའི་
སྐབས་ཡིན་ལ། དེ་ལྟར་སྐུ་ཚེའི་དཔལ་བརྙེས་པའི་རྟེན་འབྲེལ་དུ་དགོངས་ནས་ཕྱིར་ཕེབས་
དུས་ཚེ་དབང་བརྒྱ་རྩ་ཞིག་ཀྱང་གསན། དེ་ཉིད་ཀྱིས་རྟེན་འབྲེལ་ལས་བསྐལ་བརྒྱའི་བར་དུ་
ཞབས་པད་བརྟན་པར་གསོལ་བ་ཡང་འདེབས་སོ། །དེ་ནས་བར་སྐབས་སུ་ཆོས་ཀྱི་བར་དུ་
གཅོད་པ་ཅུང་ཟད་ལ་བརྟེན་པའི་ཞལ་ངོ་ནས་ཀྱང་རྗེ་བཙུན་བླ་མ་དམ་པ་འདིར་ཅུང་ཟད་
ཐུགས་འཛེར་བག་ཅན་དུ་མཛད་པ་འབྱུང་ཞིང༌། དེ་ཀའི་རྒྱབ་ཞིང་འབྲི་ཁུང་ནས་མཛད་པས་
ལོ་ཤས་ཤིན་ཏུ་ཐུགས་སུན་པར་བྱུང་ལ་འོན་ཀྱང་རྗེ་འདི་ཉིད་ཀྱི་དམ་པའི་ཆོས་ཀྱི་མཛད་པ་
རླབས་པོ་ཆེ་ལ་ནི་བར་དུ་གཅོད་པ་མ་ནུས་ཏེ། ལྷ་ཆེན་བཞེངས་པའི་སྒང་ཉིད་ལ་དུས་འཁྲུག་
ཆེར་བྱུང་འདུག་ཅིང༌། ཉིན་གཅིག་གི་བཟོ་ཙམ་ཡང་མ་ཆགས་པར་རབ་གནས་ཞལ་གྲོའི་
བར་ཏུ་མཐར་ཕྱིན་པ། རྟེན་འབྲེལ་གྱི་སྒོ་མ་ལུས་པ་རང་འགྲིག་སྟེ། ཧ་ཧོར་གྱི་རྒྱལ་ཁམས་ཀྱི་
ལས་སྒོ་བཟང་པོ་འདི་ལྟ་བུ་ལོངས་སྤྱོད་ཟད་མི་ཤེས་པའི་གཏེར་ཆེན་པོ་ལེགས་པར་བརྡོལ་
20-1-98


བ་ཡིན་ནོ། །ཀུན་མཁྱེན་ངག་གི་དབང་བོའི་ཐུགས་དམ་རྟེན་གྱི་གཙོ་བོ་རྗེ་བཙུན་འཇམ་པའི་
རྡོ་རྗེ་རྒྱ་གར་མ་ལས་ཀྱང་བཟོ་ཁྱད་བླ་ལྷག་ཙམ་དུ་མངོན་པ་དེ་ཉིད། གཙུག་ལག་ཁང་མེས་
བཞེས་དུས། སྐུ་ངོ་བོ་ལ་སྐྱོན་མ་བྱུང་ཡང༌། ནང་ཟུངས་རྣམས་ཞུགས་བཞེས་འདུག་པ། སླར་
ཡང་བྱིན་རླབས་ཀྱི་རྟེན་དང་ནོར་ཁྱད་འཕགས་མང་པོས་འགེངས་པར་གནང་ནས་ལེགས་
པར་གསོས། གནས་བཅུ་ལྷ་ཁང་གི་ལོགས་བྲིས་དང་སྐུ་འབུམ་གྱི་ཞིག་གསོས་དང༌། མཆོད་
སྙིང་གི་ཞིག་གསོས། བསྟན་སྲུང་དགེ་བསྙེན་ཆེན་པོའི་རྟེན་ཁང་ལོགས་བྲིས་སོགས་ཀྱང་
རིམ་པས་གནང་ངོ༌། །
འདིར་སྨྲས་པ། གང་གི་མཛད་པ་དཔག་ཡས་གཞལ་དུ་མེད། །འདི་ལ་བློ་ལྡན་གྱིས་ཀྱང་
དཔྱད་དུ་མེད། །འཁོར་བའི་ཁམས་ལ་འཕེལ་མེད་འགྲིབ་པ་མེད། ཁྱེད་ཀྱི་འཕྲིན་ལས་འདི་
ལ་ཆད་པ་མེད། །མཁས་ཀུན༷་མངོན་པར་དག༷འ་བའི་ལེགས་བཤད་དང༌། །སྐྱེ་བོ་མཐའ་དག་
བཀྲ༷་ཤིས༷་དགེ་ལེགས་ཅན། །ཆོས་ཀྱི་རྒྱལ༷་མཚ༷ན་སྲིད་མཐར་བསྒྲེང་ལ་མཁས། །འགྲོ་བའི་
དཔ༷ལ་གྱུར་མཛད་པ་བཟ༷ང་པོ༷་ཅན། ཁྱེད་ལྟར་སྲིད་འདིར་གཞན་མ་མཆིས། །འགྲོ་བའི་
སྐྱབས་གནས་མགོན་པོ་ཁྱོད། །བསྐལ་བརྒྱའི་བར་དུ་བཞུགས་གསོལ་ཞེས། །བདག་ནི་རྩེ་
གཅིག་གསོལ་བ་འདེབས། །བསྟན་པའི་མཛད་པ་རླབས་པོ་ཆེ་ལས་བརྩམས་ཏེ། ཅུང་ཟད་
བསྙད་པའི་སྡེ་ཚན་ཏེ་བཞི་པའོ།། །།
དམ་པ་འདི་སྔ་ཕྱི་ལན་མང་པོར་ཧོར་སྟོད་སྨད་ཀྱི་མངའ་ཞབས་བྱང་རིགས་ཀྱི་སའི་ཁྱོན་
ཐམས་ཅད་དུ་ཕྱག་ཕེབས་ཅིང༌། དབྱར་དུས་གནམ་ཆུ་ཤིན་དུ་ཆེ་བ་ལ་ཀོ་གྲུ་སོགས་ཡུལ་
གྱིས་གཤེས་ནས་གཏན་མེད་ཀྱང་ཕྱག་ནས་འཐོར་བ་ཙམ་མམ། ཐུགས་དམ་གཏོར་མ་རེ་
ཙམ་གནང་བ་ཁོ་ནས་འཕྲལ་དུ་ཆུ་བྲི་ནས། བྱིས་པ་ཆུང་ངུས་ཀྱང་བདེ་བླག་ཏུ་བརྒལ་བར་
ནུས་པ་ཙམ་དུ་འགྲོ་ཞིང༌། དཔོན་སློབ་རྣམས་ཕེབས་གྲུབ་མ་ཐག་ཏུ་སྔར་ལུགས་བཞིན་དུ་ཆུ་
20-1-99


བྲུབ་ནས་འགྲོ་བ་ཤ་སྟག་བྱུང་བས། མཐའ་ཡས་པའི་སྐྱེ་བོ་ཐམས་ཅད་ཤས་ཆེར་རྫུ་འཕྲུལ་
ལ་ཡིད་རྟོན་པའི་ཕྱིར། མཆོག་ཏུ་གུས་པའི་ཐལ་མོ་ལན་བརྒྱར་སྦྱོར་བར་བྱེད་དོ། ། གཞན་
ཡང་ཇི་ཙམ་པའི་སྐྱེ་བོའི་ཚོགས་ཆེ་བ་འདི་ཙམ་སྐུ་དྲུང་དུ་རྟག་ཏུ་རྗེས་སུ་འབྲང་བ་ལ། འཐབ་
རྩོད་ཀྱི་རྣམ་པ་ཅུང་ཟད་དམ། རིམ་གྱིས་བཏབ་པའམ། གནག་ཕྱུགས་སོགས་སྲོག་ཆགས་
ཇི་སྙེད་ཅིག་འབུལ་བ་འབྱུང་བ་ལ་ཡང༌། ཕྱུགས་ནད་ཀྱི་རྣམ་པས་བཏབ་པ་སོགས་ནི་གྲོང་
འཁོར་ཆེས་རྒན་པོ་རྣམས་ཀྱིས་ཀྱང་གཏན་མི་དྲན། ཇ་གོས་དར་གོ་ཁྲབ་རྩི་བཅུད་རྟ་ནོར་
སོགས་དེ་རིང་ཁོ་ན་དངོས་པོའི་འབུལ་བ་མང་སྙམ་པ་ཉག་གཅིག་རྟག་པར་ཡོད་ཅིང༌། སྐྱེ་
བོ་ཚོགས་ཆེན་རྣམས་ལ་བསྙེན་གནས་སེམས་བསྐྱེད་ཡིག་དྲུག་གི་སྒོམ་ལུང་སོགས་ཡི་དམ་
དང་ཆོས་སྐྱོང་གི་དབང་དང་རྗེ་གནང་སོ་སོ་གང་ལ་གང་འདོད་འཚམ་པར་སྩོལ་བ་དང༌།
ཟང་ཟིང་གིས་སྐྱེ་དགུ་ཐམས་ཅད་ཀྱི་བསམ་པ་རྫོགས་པར་མཛད་ཅིང་ཧོར་སྟོད་སྨད་སོགས་
འཐབ་རྩོད་འབའ་ཞིག་གིས་དུས་འདའ་བར་སྣང་བས། ཐུགས་སྙིང་རྗེ་ཆེན་པོས་བྱིན་རླབས་
ཀྱི་མཐུས། རྗེ་འདིའི་བཀའ་སྩལ་ཕེབས་པ་ལ། ཐམས་ཅད་ཀྱང་ཞི་བའི་སེམས་ཀྱི་ཉན་ཤེས་
དང་ལྡན་པར་གྱུར་ཞིང༌། སེམས་ཅན་ཐམས་ཅད་བདེ་བའི་ཐབས་ལ་དགོངས་ནས། ཕྱག་
རྫས་རྔམ་ཆེ་བ་ཀུན་ཡང་སོ་སོར་སྩོལ་བར་མཛད་དོ། །ཕྱོགས་ལྷུང་སྤངས་པའི་གཟི་ཡིག་
གིས་བཅད་དེ་དམ་བཞག་གནང་བ་ལ་བརྟེན། ལོ་བཅུ་གཉིས་ཙམ་མམ་ལོ་གྲངས་ཅི་རིགས་
པར་དུས་ཁམས་ཤིན་དུ་བདེ་བར་གྱུར་བ་ཞི་ཚེ་ཡིན་ཏེ། ཕྱི་རབས་ཀྱི་ཆེན་པོ་འགའ་ཞིག་ལྟར་
གྱིས་དུས་འཁྲུགས་སྡུམ་པ་ལྟར་བཅོས་ཏེ་ནོར་གྱི་བྱ་དགའ་སོགས་ཀྱིས་འཕྲལ་གཉིས་ཐད་
ནས་མི་མགུ་བ་མེད་ཙམ་ལ། ཕུགས་སུ་རང་ཕྱོགས་ཆེས་ང་རྒྱལ་བར་བྱེད་པའི་གཡོ་སྒྱུས་
ཞལ་ལྕེ་གཅོད་པ་འདི་ལྟ་བུ་དང༌། གཞན་དག་སྡུམ་པའི་ཟོལ་གྱིས་གཉིས་བར་ནས་བདག་
ཉིད་ཀྱི་དབང་ཐང་ལོངས་སྤྱོད་ཁོ་ན་ཡིད་ལ་བརྣགས་པས་སྒྲུབ་རྩོལ་བྱེད་ཅིང༌། གཞན་ཐེས་
20-1-100


མེད་དུ་བྱས་ནས་རང་གིས་ཐོབ་བརྩི་བ་སོགས་སྐྱེས་བུ་དམ་པ་ཡིན་ནོ་ཞེས་རླུང་ལྟར་གྲགས་
པ་རྣམས་ལ་ཡང་དམ་པ་མ་ཡིན་པའི་སྤྱོད་པ་རྒྱ་མཚོ་ལྟ་བུར་བྱིང་བའི་སྐྱོན་དག་མཐོང་བའི་
ཚེ། བདག་ཉིད་ཀྱི་དོན་ཐམས་ཅད་ཁྱད་དུ་བསད་དེ་གཞན་བདེ་འབའ་ཞིག་བསྒྲུབ་པར་
དགོངས་པ་ཁྱོད་ལ་ཟོལ་མེད་སྙིང་ཐག་པ་ནས་དད་པའི་ཡིད་ཀྱིས་འཁོར་བ་མ་སྟོང་གི་བར་
དུ་ཕྱག་འཚལ་ལོ། །གཞན་ཡང་བདག་ཉིད་ཆེན་པོ་འདི་ཉིད་གདུང་རིགས་ཀྱི་མཆོག་འདི་ལྟ་
བུར་སྐུའི་སྐྱེ་བ་བརྙེས་ཤིང༌། ལུགས་གཉིས་ཀྱིས་མངོན་པར་མཐོ་བ་འདི་ཙམ་གྱིས་མངོན་
པར་བརྒྱན་པ་དང༌། མཁས་བཙུན་བཟང་བོའི་སྐུ་གསུང་ཐུགས་ཀྱི་ཡོན་ཏན་འཕྲིན་ལས་
བློ་ལས་འདས་པ་འདི་ཙམ་དུ་བཞུགས་ཀྱང་ཐུགས་ཁེངས་པའི་དྲི་མ་ཐམས་ཅད་ཡོངས་སུ་
བྲལ་བ་དང༌། ཞབས་དྲུང་དུ་མི་ལོ་བཞི་བཅུ་ཙམ་ཉེ་བར་བསྟེན་པ་དག་གིས་ཀྱང་རང་བསྟོད་
བདག་ཉིད་སྒྲོགས་པའི་ཚིག་གཅིག་ཀྱང་གསུངས་པ་མ་ཚོར་བར་སྣང་ཞིང༌། མུ་ཏོ་བ་ཚུན་
ཆད་ལ་ཡང་ཞེ་ས་དང་བཅས་པའི་ཚིག་གིས་བསྟི་སྟངས་མཛད་པ་ལས་བརྙས་པའི་དྲི་མ་
ཙམ་ཡང་མི་མཛད་ཅིང༌། དགེ་བའི་ལས་བགྱི་བ་ཅུང་ཟད་དང་ལྡན་པའི་སྐྱེ་བོ་གཞན་ཐམས་
ཅད་ཀྱིས་འཕྱ་ཞིང་སྨོད་པར་བྱེད་པའི་གནས་ཀུན་ལ་ཡང༌། བདག་ཉིད་ལས་ཆེས་ལྷག་པར་
བསྔགས་པར་མཛད་ཅིང༌། སྐུ་གསུང་ཐུགས་ཀྱི་རྟེན་གྱི་ཆ་ཤས་ཡིག་འབྲུ་ཙམ་མམ། མཆོད་
རྟེན་ཞིག་རོ་ཚུན་ཆད་དང་དགེ་འདུན་གྱི་ཆ་ཤས་ངུར་སྨྲིག་གི་རྟགས་ཙམ་འཛིན་པ་ཀུན་ལ་
ཡང་མཆོག་ཏུ་གུས་པ་ཆེན་པོས་ཐལ་མོ་སྦྱར་བ་སོགས་མཐོང་ཏེ། སྐྱེས་བུ་དམ་པ་ལས་ཀྱང་
ཆེས་དམ་པའི་རྣམ་པར་ཐར་པའོ། །
འདིར་སྨྲས་པ། ཡོན་ཏན་རྒྱ་མཚོ་ཁྱོད་ནི་རྒྱ་མཚོ་བཞིན། །ཡོན་ཏན་ཆུ་བོ་སྟོང་གིས་
ཁེངས་མི་མངའ། །བློ་ཆུང་སྣོད་ངན་ས་ཡི་བུམ་པ་དག །རྙེད་བཀུར་ཆུ་ཐིགས་གཅིག་གིས་
ཁེངས་ཤིང་འཇིག །འགྲོ་ལས་རྒྱལ་སླད་གཞན་འཕྲུལ་བདག་པོ་ཡིས། །སྒྱུ་ཐབས་སྒྱུ་ཅན་
20-1-101


རྣམས་ལ་དབང་ཕྱུག་དང༌། །འབྱོར་བའི་རྐྱེན་བྱས་ཆོས་བཞིན་སྤྱོད་པ་རྣམས། །ཆད་པ་སྦྱིན་
འདིས་བདུད་རྩིས་ལམ་ཆེན་བཀུམ། །སྲིད་པའི་ཆུ་མཚོར་སྒྱུ་ཅན་ཆུ་སྐྱར་འགའ། །བཤེས་
གཉེན་ཡིད་འོངས་བ་དཀར་ལྟར་བསྡུས་ནས། །འབུམ་ཕྲག་སྐྱེ་བོའི་ཉ་རྣམས་བསླུ་བྲིད་ཀྱིས། །
ངན་འགྲོའི་མྱ་ངམ་ཐང་ལ་ཟ་བར་མཐོང༌། །བདག་དོན་ཚེར་མའི་ཁུར་པོ་བོར་གྱུར་ནས། །
གཞན་དོན་ཤིང་རྟར་འཇུག་པའི་ཁ་ལོ་བ། །གྱ་གྱུ་སྤངས་ཏེ་དྲང་པོའི་ལམ་སྟོན་མཁན། །འགྲོ་
བའི་སྐྱབས་གཅིག་ཁྱོད་ལ་བདག་ཡིད་གུས། །
དེ་ནས་བྱ་ལོའི་ནང་དུ་འཇིགས་བྲལ་ཐམས་ཅད་མཁྱེན་པའི་བསྟན་པའི་སྲོག་ཤིང་
ཆེན་པོ་རིན་པོ་ཆེ་བསྟན་འཛིན་གྲགས་པ་ཉིད་ཀྱང་དཔལ་སྟག་ལུང་ཐང་གི་ཆོས་གྲྭ་ཆེན་
པོར་གཟིགས་དགོས་ཤིང་སྤྱན་འདྲེན་གྱིས་ཀྱང་མཚམས་སྦྱར་ནས་ཕེབས། རྡོ་རྗེ་འཛིན་པ་
ཆེན་པོ་དེ་ལ་འཇིགས་བྲལ་གྱི་སློབ་དཔོན་ཆེན་པོ་ཉིད་ཀྱི་རང་ལུགས་ལས་འོང་བའི། ཕྱག་
བཞེས་རྒྱུད་སྡེ་བཞིའི་དཀྱིལ་འཁོར་མང་པོར་དབང་བསྐུར་གསན་ཞིང༌། ཁྲིད་ཚུལ་མཐའ་
ཡས་འདུས་པའི་རྒྱ་མཚོ་ཚེ་གཅིག་ལ་སངས་རྒྱས་པའི་ཉེ་ལམ་ཆེན་པོ་སྦས་དོན་ཀུན་གསལ་
སོགས་ཆོས་ཚུལ་མང་དུ་གསན། རྙེད་བཀུར་དང་འབུལ་བའི་དངོས་པོ་གྱ་ནོམ་པའི་ཚོགས་
ཀྱིས་མཁས་པའི་དབང་པོ་དེ་ཉིད་སློབ་མར་བཅས་པ་ཆེས་དགྱེས་པ་ཆེན་པོར་བསྐྱེད་ནས་
ཐེགས། དེ་སྐབས་ཤིག་སྔོན་གྱི་བླ་མ་གོང་མ་རྣམས་ཐོག་རེར་བཞུགས་ཤིང༌། བར་སྐབས་
ཤིག་མི་ཚན་བཅུ་གསུམ་གྱིས་ནོར་རྫོང་བྱས་པ་དྲངས་བཞི་རྫོང་ཞེས་པ། ཕྱིས་བདག་མེད་
དུ་ལུས་པ་ཞིག་བྱུང་འདུག་པ་དེ། སྟག་ལུང་གི་ས་གནད་ཤིན་ཏུ་ཆེ་བར་དགོངས་ནས། ཐོག་
མར་གཟིམ་ཁང་དང་བཅས་པ་མཐར་ཐོན་གནང་སྟེ། ཆོས་རྫོང་རྣམ་རྒྱལ་རབ་བརྟན་དུ་མིང་
འདོགས་སྣང༌། འདི་ནི་འཇིག་རྟེན་དངོས་ཀྱི་ས་གནད་ཙམ་མ་ཡིན་པ། ས་ཆུ་ནམ་མཁའ་
གསུམ་ཤེས་རབ་ཨེ་གྲུ་གསུམ་གྱི་རྣམ་པ་ཅན་དང༌། རྫོང་རི་ཉིད་ཝཾ་ཡིག་གི་ཚུལ་དུ་གནས་
20-1-102


པ་དང༌། གཞན་ཡང་ཕྱི་ནང་གི་རྟེན་འབྲེལ་ས་དཔྱད་མིང་འདོགས་སོགས་དཔལ་སྟག་ལུང་
ཐང་གི་བསྟན་པ་རིན་པོ་ཆེ་ལ་ལྷག་པར་གལ་ཆེ་བ་ཞིག །ཡེ་ཤེས་ཀྱི་གཟིགས་པ་སྒྲིབ་མེད་
ཀྱིས་གཟིགས་ནས་གནང་འདུག་པས། རིང་པོར་མི་ཐོག་པར་མངོན་དུ་གྱུར་པ་འདི་ཡིན།
ཡང་སྐབས་ཤིག་ཐམས་ཅད་མཁྱེན་པ་ཕྱོགས་ལས་རྣམ་རྒྱལ་གྱི་ཐུགས་ཀྱི་གསང་བ་འཛིན་
པ། བསམ་བཞིན་སྐྱེ་བ་བཞེས་པའི་སྤྲུལ་པའི་སྐུ་འཆི་མེད་འོད་ཟེར་ཡང་རྗེ་ཉིད་མཇལ་དུ་
ཕེབས། ཞབས་ཀྱི་པདྨོ་ལ་ཉེ་བར་གཏུགས་ནས་ཀུན་མཁྱེན་ངག་གི་དབང་པོས་ཕྱག་ལེན་གྱི་
དཀྱིལ་འཁོར་མང་པོའི་དབང་བསྐུར་དང༌། ཐུགས་དམ་ཟབ་ཆོས་མང་དུ་གསན་ཏེ། མཆོག་
ཏུ་ཐབས་གུས་པ་ཆེན་པོས་རྩ་བའི་བླ་མར་མཛད་དོ། །དེ་ནས་ཤིང་ཕོ་ཁྱི་ལོ་ལ། བལ་པོའི་
ལྷ་བཟོ་བུདྡྷ་པ་ལ་སོགས་བཟོ་ཚན་ལྔ་པ་ཞིག་ཞབས་དྲུང་དུ་འབྱོར་བས་ཉེ་བའི་རྐྱེན་བྱས་ཏེ།
བཅོམ་ལྡན་འདས་ཐུབ་པའི་དབང་པོ་མི་ཚད་མ་དང་འཕགས་པའི་གནས་བརྟན་ཆེན་པོ་བཅུ་
དྲུག །ཧ་ཤངས་དྷརྨ་ཏ་ལ་རྒྱལ་ཆེན་བཞི་དང་བཅས་པའི་སྐུ་བརྙན་ཐམས་ཅད་ཀྱང་སྐུ་ཚད་
མདའ་གང་ཙམ་པ་བཟོ་ཁྱད་ཕུལ་དུ་བྱུང་བ་ལེགས་པར་གྲུབ་ཅིང༌། སྐུད་གསེར་ལ་གསེར་
ཞོ་བརྒྱ་ཕྲག་ལྔ་ལྷག་གཅིག་སོང་སྣང་བ། རྒྱུའི་ཁྱད་པར་གཞན་རྣམས་དེས་དཔག་པར་ནུས་
སོ། །འདི་ལ་གཟུངས་བཞུགས་ཀྱང་ཐུབ་པའི་དབང་པོ་ཉིད་ཀྱི་སྐུ་གདུང་རིང་བསྲེལ་ཤིན་དུ་
ཚོགས་ཆེ་བ་དང༌། སྟག་ལུང་བཀའ་བརྒྱུད་ཉིད་ཀྱི་བླ་མ་གོང་མ་རྣམས་གཙོ་བོར་གྱུར་བའི་
བྱིན་རླབས་ཀྱི་རྟེན་མང་པོ་དང༌། གསེར་དངུལ་གྱི་གཟུངས་ཡིག་བསྒྲང་བར་མི་དཔྱོད་པ་དང་
བཅས་པ་ཕྱག་ལེན་དག་པས་གཟུངས་བཞུགས་གནང༌། འདིའི་གཙོ་བོ་བཞེངས་པའི་ཞལ་
ལྟ་གནང་ནས། ཧོར་སྟོད་པའི་སྤྱན་འདྲེན་པ་བཞིན་ཕེབས་ནས་བཞུགས་སྒར་ཤེལ་རྗེའི་རྒྱུད་
དུ་གནང་སྐབས། ཕྱག་ནས་གནང་བ་སྟག་ལུང་ཉིད་དུ་ཉིན་པར་སྐྱེ་བོ་མང་པོའི་མཐུན་སྣང་
དུ་གྲུབ་པར་གཙོ་བོའི་སྐུ་གཟུགས་ཀྱི་སྐུ་འཕང་དུ་ནམ་མཁའ་ནས་མེ་ཏོག་མང་དུ་ཕེབས་པ་
20-1-103


བརྫུན་མེད་ཡིད་ཆེས་འདྲོངས་པར་བྱུང་སྣང་ཞིང༌། དེ་ཡང་གཞན་དག་ལྟར་མཚན་མོའི་དུས་
དང་ལྐོག་ཏུ་མི་ནས་ཐོགས་པ་དག་སྦེད་པ་ལ་སོགས་པའི་གཡོ་ཐབས་དང༌། སྐལ་ལྡན་འགའ་
རེའི་མཐོང་སྣང་ལ་བྱུང་སྐད་པ་དང༌། སྟོན་རྒྱུ་མེད་བཞིན་དུ་དཔོན་དབང་གི་ཕྱུག་དག་གིས་
འབྱུང་ངོ་ཞེས་དབང་ཆེའི་ཚིག་གིས་རྗེས་སུ་འབྲང་བ་ཙམ་མ་ཡིན་པར་མངོན་སུམ་དུ་སྐྱེ་བོ་
ཐམས་ཅད་ཀྱིས་སྤྱི་མཐུན་དུ་མཐོང་བ་ཡིན་ནོ། །འདི་ཡང་དྲང་པོར་བརྗོད་པ་ཙམ་ཡིན་གྱི་མི་
མ་ཡིན་གྲུབ་པར་དང་བོན་པོ་སོགས་ལའང་ཐུན་མོང་གི་ཡོན་ཏན་སྟོན་རྒྱུ་ཡོད་དེ་འདི་ཙམ་
གྱི་རྟགས་ལ་འདྲེན་པ་མཆོག་ག་ལ་རེ། ཐུགས་དུལ་བ་དང་བཙུན་པ་དང་མཁས་པ་དང་ལྷག་
པའི་ཐུགས་སྟོང་ཉིད་སྙིང་རྗེ་སྙིང་པོ་ཅན་མངའ་བ་སོགས་ཐུན་མོང་མ་ཡིན་པ་མཆོག་གི་ཡོན་
ཏན་གཞལ་དུ་མེད་པ་མངའ་བ་འདི་ཉིད་སྐྱེས་བུ་དམ་པའི་རྟགས་ཡང་དག་པ་ཡིན་ནོ། །དེ་
དག་དང་སྟབས་གཅིག་ཏུ། རྒྱལ་པོ་ཆེན་པོ་རྣམ་ཐོས་སྲས་ཀྱི་སྐུ་དགོས་འདོད་ཀུན་འབྱུང་
གསེར་ཞོ་ལྔ་བཅུའི་བྱུགས་གསེར་ཅན་ཕུལ་དུ་ཕྱུང་བའི་ནང་བཞུགས་དང་བཅས་པ་འདི་ཉིད་
ཀྱང་བཞེངས་པར་མཛད། རབ་གནས་ཀྱང་རྗེ་ཉིད་རིགས་པ་འཛིན་པའི་དགེ་འདུན་རྒྱ་མཚོ་
དང་བཅས་པས་གནང༌། རབ་གནས་ལེགས་ཤིང་ཤིན་ཏུ་བཀྲ་ཤིས་པས་འཕྲིན་ལས་ཀྱི་བར་
ཆད་ཐམས་ཅད་ལས་ལེགས་པར་གྲོལ་བའི་རྟེན་འབྲེལ་འགྲིགས་རིགས་བྱེད་པ་རྣམས་ལ་
ཡོན་རྫོང་བཅད་ཐང་ལས་བརྒལ་བའི་དཔེ་བྲལ་བློ་འདས་དགེས་པ་ཆེན་པོ་དང་བཅས་ཏེ་
གནང་བས། ཁོང་རྣམས་ཀྱང་གཞན་དུ་ལོ་བདུན་ལས་ཀྱང་འདིར་ཧ་ལམ་རྙེད་པ་བཟང་བ་
བྱུང་ཞེས་བསམ་གྱིས་མི་ཁྱབ་པའི་མགུ་བ་ཐོབ། དེ་ནས་མེ་ཕོ་བྱི་བའི་ལོ་ལ་རྒྱལ་བའི་བཀའ་
འགྱུར་རོ་འཚལ་གན་ཤོག་ལ་རིན་པོ་ཆེའི་ཁུ་བས་བྲི་བར་གནང་བ། ལོ་དེ་ཉིད་ལ་གླེགས་
བམ་བརྒྱད་ཅུ་རྩ་དྲུག་ལ་ན་བཟའ་རྟེན་ཁེབས་བཟང་བསྒྲིགས་ཏོག་དཀར་ཞལ་ཁེབས་སུམ་
བརྩེགས་མ། བཟང་གོས་ཀྱི་གླེགས་ཐག་དང་གླེགས་ཤིང་སོགས་རྣམ་པ་ཐམས་ཅད་ནས་
20-1-104


དཔེ་དང་བྲལ་བ་ལེགས་པར་གྲུབ་ཅིང༌། བཟོ་རིས་པ་ཉིས་བརྒྱ་བུད་ཙམ་ཀུན་ལ་ཡང་ནམ་
མཁའ་མཛོད་ལས་ཡིད་བཞིན་གྱི་ཆར་ཕབ་པས་མཆོག་ཏུ་ཚིམ་པ་ཐོབ་བོ། །འདི་སྐབས་སུ་
མདའ་དར་འབུལ་དབོན་གྲགས་པ་འོད་ཟེར་བ་དཔོན་གཡོག་སོགས་ཡུལ་ཕྱོགས་ལ་འབུལ་
སྡུད་དུ་གནང་བ་རྒྱལ་པོ་ཆེན་པོ་ཨ་དན་ཁན་གྱིས་གུས་པས་བཏུད་དེ། རྒྱལ་པོའི་གསེར་
ཡིག་དང་བཅས་ལྷན་ཅིག་ཏུ་གདན་ས་ཆེན་པོ་སྟག་ལུང་དུ་འབྱོར། གསེར་དངུལ་གོས་དར་
ཇ་རས་རྟ་དྲེའུ་རྔ་མོང་སོགས་ཀྱིས་འབུལ་བའི་ས་སྟེང་ཁྱབ་པར་ཕུལ་ཞིང༌། དེ་སྐབས་འཇམ་
མགོན་གྲུབ་པའི་དཔའ་བོའི་སྐུ་དབོན་པོ། རིགས་ལྡན་སྤྲུལ་པའི་སྐུ་ཇོ་ནང་ཀུན་མཁྱེན་ཆེན་
པོའི་སེང་གེའི་ཁྲི་ལ་མངོན་པར་འཁོད་པ། རྗེ་དྲུང་ཀུན་དགའ་དཔལ་བཟང་པོ་ཞེས་སྐུ་བཙུན་
ཞིང་གྲུབ་པ་དང་བྱིན་རླབས་ཀྱིས་ཉེ་བར་བརྒྱན་པ། བདག་ཉིད་ཆེན་པོ་དེ་ཡང་མཇལ་བར་
ཕེབས་ཏེ། དཔོན་སློབ་ཐུགས་ནང་གཙང་བའི་ཤིན་ཏུ་དགྱེས་པ་ཆེན་པོར་གྱུར། ཟབ་ཆོས་
རྨད་དུ་བྱུང་བ་མང་བོ་ཕན་ཚུན་དུ་གསན་རེས་གནང༌། ལོ་འདི་ཉིད་ཀྱི་ནང་དུ་དུས་གསུམ་
གྱི་དེ་བཞིན་གཤེགས་པ་ཐམས་ཅད་ཀྱི་མཁྱེན་བརྩེ་འཕྲིན་ལས་ཀྱི་ངོ་བོ་རྒྱལ་དབང་སྤྲུལ་
པའི་སྐུ་སྟག་ལུང་རིན་པོ་ཆེ་འདིས་ཀྱང་གདན་ས་ཆེན་པོར་ཕེབས་པའི་ཐོག་མ་ཡིན་ཞིང༌། ཕྱི་
ལོ་དབྱར་སོས་ནོར་རྣམས་ཀྱི་དུས་འཁྲུག་གི་སྡུམ་ལ་བྱང་རྒྱབ་ཏུ་ཕེབས། ལེགས་པར་སྡུམ་
པའི་སྐབས་ཤིག་མ་རུང་བའི་སེམས་ཅན་འགའ་ཞིག་གིས་མི་བཟད་པའི་ལས་མངོན་པར་
སྒྲུབ་པ་ནི་འདི་ལྟར་ཏེ། ཉིན་གཅིག་བཞུགས་སྒར་ན་འཁོར་ཚོགས་མང་པོའི་ཞབས་འབྲིང་
དང་བཅས་ནས་བཞུགས་སྐབས་ཤིག་བཀའ་སྩལ་ནས། མི་ང་ལ་ནི་མངོན་སུམ་ཐབས་སུ་
ཕྱག་ཏུ་ཡི་གེ་རྒྱ་ཅན་ཞིག་འབུལ་བ་བྱུང་བས། ཐེའུ་ཚེའི་ཁ་རིས་ལ་རྗེ་བཙུན་མི་ལའི་སྐུ་ཞིག་
སྣང༌། ཡི་གེའི་ནང་ནའང་ཞག་བདུན་ནས་མི་འདི་བཞིན་བྱུང༌། མི་འདི་ལྟ་བུ་ཐ་ན་གོས་ལྷམ་
ཀྱང་འདི་བཞིན་དུ་འོང་ཞེས་སོགས་དོན་འདི་བཞིན་འདུག་ཅེས་གདུག་སེམས་ཅན་གྱི་མི་དེ་
20-1-105


དང་དེ་ཡི་མིང་མི་གསལ་ཙམ་མ་གཏོགས་མ་སྦས་ལྷུག་པར་བཀའ་སྩལ་གནང༌། དེ་ཇི་ལྟར་
བཀའ་སྩལ་གནང་བ་བཞིན་ཞག་བདུན་གྱི་མཚམས་ནས་གསོལ་ཟས་ངན་པས་སྐུ་བསྙེལ་
ཞིང༌། དབོན་པདྨས་མི་དེ་རྣམས་ཀྱིས་མིང་གང་ཡིན་བཀའ་སྩལ་གནང་དགོས་ཞེས་ནན་ཆེར་
ཞུས་འདུག་ནའང༌། དེ་ཀུན་ལ་གནོད་པ་བྱུང་བར་དགོངས་ནས་ཡེ་བཀའ་སྩལ་མ་གནང༌། སྐུ་
ཁམས་ཤིན་ཏུ་དུབ་པས་ན་རེ་ཞིག་གདན་སར་ཕེབས་པ་གནང་མ་ཐུབ་པར། དབྱར་ངོས་དེ་
ས་ཕྱོགས་དེ་ཉིད་རང་དུ་བཞུགས་ཤིང༌། སྨན་པ་མཁས་པ་རྣམས་ཀྱི་གསོ་དཔྱད་རྣམས་རིམ་
པར་ཕུལ། དེ་དུས་ཞྭ་དམར་དཀོན་མཆོག་ཡན་ལག་ཡངས་པ་ཅན་དུ་བཞུགས་སྐབས་ཡིན་
ཞིང༌། རིན་ཆེན་རིལ་བུ་ཁྱད་པར་ཅན་སོགས་གསོལ་སྨན་ཁྱད་པར་ཅན། ཕལ་ཆེ་བའང་ཞྭ་
དམར་ཅོད་པཎ་འཛིན་པའི་ཕྱག་ནས་འབུལ་བ་གནང༌། སྟོན་གྱི་དུས་ནས་སྐུ་ཁམས་རིམ་
གྱིས་བདེ་ནས་གདན་ས་ཉིད་དུ་ཕྱག་ཕེབས་སོ། །ད་ལྟར་གྱི་བར་དུ་ཡང་རྗེ་ཉིད་ཞལ་ཟས་
ངན་པ་གསོལ་བས་གདུག་པ་ཅན་དེ་ཀུན་ལ་ཆེད་དུ་དམིགས་ནས་བྱང་ཆུབ་ཀྱི་སེམས་རིན་
པོ་ཆེ་བསྒོམ་པར་མཛད་ཅིང༌། འདི་དང་ཕྱི་མ་ཐམས་ཅད་དུ་ཕན་བདེའི་རྒྱུ་འགྱུར་བ་སྨོན་
ལམ་ཡང་དག་པར་ཐུགས་ཐག་པ་ནས་གནང་བ་ནི་བདག་ཅག་གིས་ཀྱང་ཡང་ཡང་མཐོང་
སྟེ། སྔོན་དུས་རྗེ་འགྲོ་བའི་མགོན་པོ་ཕག་མོ་གྲུབ་པ་ལ་ཡང་འདི་བཞིན་འབྱུང་བ། འགྲོ་བའི་
མགོན་པོའི་གསུང་ལས། འདི་ངན་སོང་དུ་མི་གཏོང་བའི་གཉེར་ཁ་ཁོ་བོ་ལ་ཡོད་པ་ལགས།
ཞེས་གསུངས་པ་ཡང་རྣམ་ཐར་འདི་ལས་གཞན་དུ་མེད་དེ། དེས་ན་གང་དག་གནོད་པ་ཅུང་
ཟད་བྱེད་པའི་དགྲ་ལ་ཡང་ཡུལ་འབུད་པ་དང༌། ཆད་པ་གཅོད་པ་དང༌། ཡོན་བདག་དང༌།
རྒྱལ་པོ་གཞན་དང་གཞན་ནས། སྡུག་ལས་ཅི་ཐོན་བྱེད་བཞིན་དུ། ཕྱི་མར་སེམས་ཅན་རྣམས་
འཁོར་བ་ལས་འདྲེན་པའི་སྨོན་ལམ་བྱེད་སྐད་དེ། ཕ་མའི་མགོ་གཅོད་བཞིན་དུ། རི་དྭགས་
ཆུས་ཁྱེར་བ་ལ་སྙིང་རྗེ་ཞེས་ཟེར་བ་དང་འདྲའོ། །དེས་ན་རང་གི་ལོངས་སྤྱོད་མངའ་ཐང་ལ་
20-1-106


ཅུང་ཟད་གནོད་པར་མཐོང་ན། ཡོན་བདག་དང་རྒྱལ་པོ་དུ་མ་བསྐུལ་ནས་གཙུག་ལག་ཁང་དུ་
མ་མེས་སྲེགས་པ་དང༌། ཁྱིམ་པ་དང་རབ་བྱུང་བརྒྱ་སྟོང་གཡུལ་དུ་གསོད་པ་སོགས་མཐོང་སྟེ།
དེ་དག་ནི་བསྟན་འཛིན་གྱི་སྐྱེས་བུ་ལྟ་ག་ལ་ཞིག །བདུད་སྡིག་ཅན་དགེ་སློང་ག་གཟུགས་ཞེས་
བྱ་བ་ཡང་འདི་ལས་གཞན་དུ་མེད་ཅིང༌། དེ་ལྟ་ན་སྐུ་ལ་བསྡོ་བར་བྱེད་པ་དེ་ལྟ་བུ་མངོན་སུམ་
མཁྱེན་བཞིན་དུ་མི་གསུངས་ཞིང༌། གཞན་རྣམས་ལས་ཀྱང་ཆེས་ལྷག་པར་ཐུགས་བརྩེ་བའི་
ཡུལ་དུ་མཛད་པ་འདི་ལྟ་བུ་སྔོན་གྱི་དུས་སུ་མང་དུ་བྱུང་མོད་ཀྱི་ད་ལྟར་གྱི་དུས་སུ་ནི་བདག་
ཅག་གི་འདྲེན་པ་འདི་གཅིག་པུའི་མཛད་པའོ། །
འདིར་སྨྲས་པ། གཞན་བདེ་དགེ་བ་ཅུང་ཟད་ཙམ་ལ་ཡང༌། །བདག་དོན་མ་ལུས་གཏོང་
བ་རྒྱལ་སྲས་ལུགས། །འགྲོ་ལ་སྙོམས་པར་བརྩེ་བ་ཉིད་ལགས་ཀྱང༌། །གནོད་བྱེད་རྣམས་
ལ་ལྷག་པར་བརྩེ་འདི་མཚར། །འདི་ན་དམ་པར་ཁས་འཆེ་ཆེན་པོ་འགའ། །ནད་དང་བཅས་
པའི་དགེ་སློང་གཞན་མཆོད་ནས། །ཡུན་རིང་བདག་ལ་བྱམས་ཤིང་བཀུར་བ་ཡང༌། །བརྩེ་
མེད་སེམས་ཀྱིས་ཆད་པས་གཅོད་པ་མཐོང༌། །དཔའ་བོ་མི་བསྲུན་དགེ་སློང་སྟག་གི་ཚུལ། །
ཟས་ནོར་སྒྱུ་མའི་ཁྲག་ལ་སྣོམས་པ་ནི། །ཉེས་པ་ཅི་ལའང་དགའ་མའི་སྲོག་གཅོད་མ། །
འདི་ལ་གཞན་དག་བག་ཡོད་ཅིས་མི་འོང༌། །འོད་གསལ་ངུར་སྨྲིག་གདེངས་ཀའི་ནོར་བུ་
ཅན། །གདུག་རྩུབ་ཡན་ལག་ཁོང་དུ་རྣམ་པར་སྦས། །གྱ་གྱུས་འཇུག་ཅིང་སྙན་འཇམ་ཕུད་
ཀྱི་སྒྲས། །འདྲི་བྱེད་ལག་འགྲོའི་ཚུལ་ཅན་འགའ་མེད་དམ། །འགྲོ་ཀུན་དག་བྱེད་ཐུགས་རྗེའི་
འོད་དཀར་ཅན། །བདག་ལ་བརྩེ་བྲལ་རི་དྭགས་ཀྱིས་གནག་པ། །ངན་སྤྱོད་མཚན་མོའི་མུན་
པར་འཁྱམས་པའི་མགོན། །གདུང་སེལ་བཀྲ་ཤིས་གཅིག་པུ་འདི་ན་ཤར། །བྱང་ཆུབ་སེམས་
དཔའི་མཛད་སྤྱོད་ཁྱད་པར་ཅན་འབའ་ཞིག་ལས་བརྩམས་ཏེ་ཅུང་ཟད་བསྙད་པའི་སྡེ་ཚན་དེ་
ལྔ་པའོ།། །།
20-1-107


དེ་ནས་འབྲུ་མང་ཞེས་པ་ས་ཕོ་སྟག་གི་ལོ་ཤར་བ་ན་སྟོབས་ཀྱི་འཁོར་ལོས་བསྒྱུར་བའི་
རྒྱལ་པོ་ཇི་གིར་གན་གྱི་རྒྱལ་རྒྱུད་མ་ཉམས་པ། སྭོག་པོའི་རྒྱལ་པོ་རྣམས་ཀྱིས་སྤྱན་འདྲེན་
ནན་ཞུས་བྱུང་བའི་ཚེ། ཕེབས་པར་དགོངས་པ་གཏད་ཅིང་གཞིར་བཞུགས་དྲག་ཞན་ཀུན་
དང༌། ཡོན་བདག་སྡེ་རིགས་ཀུན་གྱིས་ཀྱང་ནན་ཏན་གྱིས་བཞུགས་པར་ཞུས་ཀྱང༌། ཅིས་
ཀྱང་ཕེབས་པར་ཐག་ཆོད་གནང༌། དེ་ཁའི་སྟབས་ཀྱིས་ཆོས་འབྲེལ་ཞུ་བ་དང༌། སྐུ་གཞོགས་
སུ་དོན་གཅོད་པར་འོང་བའི་རྫོངས་བཀོད་གནང་དགོས་སོགས་ལུགས་གཉིས་ཀྱིས་ཐུགས་
བྲེལ་ཤིན་དུ་ཆེ་བའི་ངང་ནས་ཀྱང་མཆོག་གི་སྤྲུལ་སྐུ་རིན་པོ་ཆེ་ལ་ཉེ་བར་མཁོ་བའི་བཞེས་ཀྱི་
དབང་བསྐུར་མང་པོ་དང༌། རྗེས་གནང་ཟབ་བསྡུས་མཐའ་ཡས་པ་དང་བཀའ་རྒྱུད་གོང་མ་
རྣམས་ཀྱི་བཀའ་འབུམ་ཕལ་ཆེར་གྱི་བཀའི་གླེགས་བམ་རྣམས་ཀྱི་བཀའ་གཏད་ཀྱང་གནང་
ཞིང༌། ལྷ་སར་ཇོ་བོ་རིན་པོ་ཆེར་མཆོད་རྫས་དཔག་ཏུ་མེད་པ་དང་བཅས་སྨོན་ལམ་གནང་
བར་ཕེབས་སྐྱི་ཤོད་ཀྱི་ཞལ་ངོ་རྣམས་དང་སེར་འབྲས་དགེ་གསུམ་གྱི་བླ་མ་ཆེ་ཕྲ་ཐམས་ཅད་
རྗེ་འདི་ཉིད་མཇལ་བར་ཕེབས་ཤིང་གུས་པས་བཏུད། ཕལ་ཆེར་གྱིས་བཀའ་ཆོས་ཀྱི་འབྲེལ་
བ་རེ་ཡང་ཞུས། སྐྱི་ཤོད་ཞལ་ངོ་རྣམ་པས་སྒོ་ལའི་བར་དུ་ཕེབས་སྐྱེལ་ལ་ཕེབས་ཤིང༌། མྱུར་
དུ་ཕེབས་པར་ཞལ་གྱིས་བཞེས། སླར་ཡང་གདན་ས་ཉིད་དུ་ཕེབས་ཏེ་ཅུང་ཟད་གདན་ཆགས།
རྗེ་དྲུང་ཀརྨ་པ་དབང་ཕྱུག་རྡོ་རྗེས་ཀྱང༌། བཀའ་རྒྱུད་ཆུ་བོའི་འབྱུང་ཁུངས་དགེ་ལེགས་དག་
བྱེད་ཆུ་བོའི་རྒྱུན། །ས་གསུམ་ཁྱབ་པར་མཛད་མཁས་ལས་ཆེན་བཞི་དང་གྲུབ་ཆེན་བརྒྱད། །
ཀུན་གྱི་མངའ་བདག་དཔལ་ལྡན་སྟག་ལུང་ཐང་པ་ཆེན་པོ་ཡིས། །མི་འཇིགས་སེང་གེའི་ཁྲི་
ལ་བཞུགས་བཞིན་བཀྲ་ཤིས་དགེ་ལེགས་ཅན། །ཞེས་སོགས་ཀྱིས་བརྟན་བཞུགས་དང༌། དེ་
ཚེ་སྐུ་གསུང་ཐུགས་འཁོར་དང༌། །འཕྲིན་ལས་བཟང་པོའི་འོད་ཟེར་གྱིས། །མཐའ་ཡས་མུན་
རུབ་རབ་བསལ་ནས། །དབུ་གཙང་ཆོས་ཀྱི་རྒྱལ་ཁམས་སུ། །བྱམས་པས་སྐྱོང་ཞིང་བརྟན་པ་
20-1-108


དང༌། །བསྟན་ལ་རིམ་འགྲོ་བགྱིས་པ་དང༌། །གནས་སྐབས་མཐར་ཐུག་ལེགས་བྱས་ལ། །སྐྱེ་
དགུ་མཐའ་དག་འགོད་པར་འཚལ། །དེ་དང་དེ་ཡི་མཛད་འཕྲིན་ལ། །གེགས་བྲལ་སྨོན་ལམ་
ཡང་ཡང་འབུལ། །ཞེས་སོགས་བཞེད་དོན་འགྲུབ་པའི་སྨོན་ལམ་འབུལ་སྐྱེལ་དང་བཅས་པ་
དང༌། འདི་སྐབས་སྨོན་ལམ་གྱི་མཇུག་ཏུ། དག་པའི་འཇིག་རྟེན་དག་ཏུ་རྒྱལ་བའི་མཛད་པ་
དང༌། །སྐལ་བཟང་ཚེ་ན་ལེགས་ལམ་ཇི་སྙེད་མཆིས་པ་གང༌། །མ་དག་དུས་འདིར་དགེ་སློང་
སྐད་ཀྱི་ངོ་མཚར་ཅན། །གདུལ་དཀའ་འདུལ་བའི་མཛད་བཟང་བཞད་པར་སྩོལ། །ཞེས་
བསྐལ་བཟང་སངས་རྒྱས་ཡིན་པའི་བསྔགས་བརྗོད་གནང་འདུག་གོ །དེ་མཐུན་རྗེ་ཞྭ་དམར་
བས་ཀྱང༌། བདེ་བར་གཤེགས་པའི་རང་ལུགས་རྨད་བྱུང་བ། །ཆོས་ཀྱི་རྒྱལ་བོ་ཐང་པ་ཆེན་པོ་
ཡི། །འཕྲིན་ལས་རྣམ་བཞི་དུས་འདིར་འགྲུབ་གྱུར་ནས། །ཡངས་པའི་རྒྱལ་ཁམས་བདེ་བར་
མཛད་དུ་གསོལ། །ཞེས་སོགས་ཀྱི་གསོལ་འདེབས་ཞུ་ཡིག་བཞུགས་གདན་དང་བཅས་པ་
འབུལ་བར་བྱུང༌། ཧོར་ཟླ་བཞི་པའི་ནང་གཟའ་སྐར་སྦྱོར་བྱེད་ཐམས་ཅད་ཕུན་སུམ་ཚོགས་
པའི་ཉིན་གཅིག་སྒར་གྲྭ་ཆེན་པོ་བསྒྲིགས་པར་གནང༌། དེ་ཉིན་མེ་ཏོག་གི་ཆར་འབབས་པ་
དང༌། འཇའ་འོད་ལ་དགེ་མཚན་གྱིས་ལྟས་རྒྱལ་མཚན་དང་བ་དན་ལ་སོགས་པའི་རྣམ་པ་ཇི་
སྙེད་དང་བཅས་པ་ཤར་བས། སྭོག་པོའི་མི་རྣམས་ཤིན་ཏུ་ངོ་མཚར་དུ་གྱུར།དེ་ནས་རིམ་གྱིས་
གདན་བཏེགས་ཏེ། སྙིང་དྲུང་དང་འདམ་སོགས་བརྒྱུད་དེ་ཧོར་སྨད་པའི་སར་ཕེབས། ཡང་
བྱང་ལམ་བརྒྱུད་དེ་འབྲི་ཆུ་ལ་རྫུ་འཕྲུལ་གྱི་བཀོད་པས་སྒྲོལ་ཏེ། འབྲི་ཚྭ་ཁར་སྭོག་པོའི་
ཕེབས་བསུ་བ་རྣམས་ཀྱིས་སླེབས་ཀྱང་རིམ་གྱིས་ཕེབས་པས། ཆ་རྒན་འུ་སུ་ཞེས་པའི་སར་
སྭོག་པོའི་རྒྱལ་པོ་ཨ་རྦལ་གྱིས་མཇལ་ཞིང་མཆོག་ཏུ་དད་པ་ཐོབ། སྔ་སོར་གྱི་སྙུང་རེས་ཡང་
ཡང་བསྙེལ་བ་ཡོང་གིན་ཡོད་འདུག་ལ་ཡོན་མཆོད་རྟེན་འབྲེལ་ཁྱད་པར་ཅན་ཞིག་གིས་ཡིན་
སྣང་བ། སྭོག་ཡུལ་དུ་ཕེབས་ཙམ་ཉིད་ནས་དྭངས། དབུའི་ཚྭ་མཚོའི་འགྲམ་དུ་རྒྱལ་པོ་ཆེན་པོ་
20-1-109


ཨ་བ་དན་གྱིས་སྤྱན་དྲངས་པས་ཀྱང་འབྱོར། ཐོག་མར་རྒྱལ་བོ་ཨ་རྦལ་གྱི་བརྒྱུད་པ་ཡོད་
པའི་སར་ཕེབས་ཏེ། རྙེད་བཀུར་དང་འབུལ་བ་གཞལ་བར་དཀའ་བ་བྱུང་ཞིང༌། སླར་ཡང་
གདན་འདྲེན་པས་བསྐུལ་ཏེ། གུ་གུ་ནོའི་མཚོ་འགྲམ་དུ་སྤྲུལ་པའི་རྒྱལ་པོ་ཨ་བ་དན་ཁན་དང་
མཇལ། སྤྱིར་ངོ་མཚར་བའི་ལྟས་དུ་མ་དང༌། སྔ་སོར་རྒྱལ་པོ་ཉིད་ཀྱི་མནལ་ལམ་དུ་མཐའ་
འཁོབ་འདུལ་བ་དང་རྒྱལ་པོ་ཉིད་རྗེས་སུ་བཟུང་ནུས་པའི་བླ་མ་ཞིག་ཡང་ཡང་ལུང་བསྟན་
པར་བྱུང་སྣང་ཡང༌། སྐུའི་དབྱིབས་སོགས་རྒྱུ་མཚན་དུ་མས། རྗེ་རིན་པོ་ཆེ་འདི་ཉིད་ཡིན་པར་
ཡིད་ཆེས། བསྟན་པ་སྤྱི་དང་བྱེ་བྲག་གི་དོན་མཛད་བཞིན་བཞུགས་པ་ལ། ལྷོ་ནས་ཝ་ཤུལ་
འབུམ་སྐྱབས་དར་གྱིས་ནན་གྱིས་སྤྱན་དྲངས་པ་བཞིན་ཕེབས་པས། འཁྲུགས་པ་བསྡུམས་པ་
དང་དམ་པའི་ཆོས་ཀྱིས་འགྲོ་དོན་དཔག་ཏུ་མེད་པ་བྱུང༌། ཁྱད་པར་ཕྱོགས་དེའི་དགེ་འདུན་
བགྲངས་བ་ལས་འདས་པ། འདུས་པ་ལ་ཆོས་འཁོར་རྒྱ་ཆེན་པོར་བསྐོར། ཡོས་ལོ་སར་ནས།
ཨོར་རུས་པའི་བེ་ཐུ་རྒྱལ་པོ་དང༌། འཛམ་ཐང་བའི་བུ་ཆེན་ཀརྨ་བླ་མས་སྤྱན་འདྲེན་གྱི་ཕོ་ཉ་
བྱུང་བ་བཞིན། རྨ་ཆེན་སྤོམ་རིའི་གངས་ཀྱི་མགུལ་ལ་སྔོན་གཞན་སུས་ཀྱང་མ་བགྲོད་པའི་
ལམ་ཞིག་ལ་རྗེ་ཉིད་ཀྱིས་ཆོ་འཕྲུལ་གྱི་བཀོད་པ་དང་བཅས་བྱང་ཕྱོགས་ལ་ཕེབས། རྒྱལ་པོ་
ཆེན་པོ་ཨལ་དན་དང་མཇལ་དཔལ་དེ་བཞིན་གཤེགས་པ་སྟག་ལུང་བ་ཆེན་པོ་ཞེས་མཚན་
གསོལ། འཇའ་ས་ཀ་འོ་མིང་ལས་ཞྭ་ལས་གོས་དངུལ་སྲང་བརྒྱད་ཅུ་གྱ་ལྔ་ལས་གྲུབ་པའི་
ཐམ་ཀ །གཞན་ཡང་དངུལ་སྟོང་ཕྲག་མང་པོ་འབུལ་བ་སོགས་འབྱུང་ཞིང༌། རྒྱལ་པོ་ཆེན་པོ་དེ་
ཉིད་ཀྱི་སར་འཇིག་རྟེན་དབང་ཕྱུག་གི་རྣམ་འཕྲུལ་དུ་གྲགས་པ། ངུར་སྨྲིག་འཛིན་པ་ཐམས་
ཅད་ཀྱི་གཙུག་གི་ནོར་བུ། སྤྲུལ་པའི་སྐུ་ཐམས་ཅད་མཁྱེན་པ་བསོད་ནམས་རྒྱ་མཚོ་དཔོན་
སློབ་ཀྱིས་སྒར་དུ་སྤྱན་དྲངས། དགེ་འདུན་འདུས་པ་དཔག་ཏུ་མེད་པའི་བསུ་བ་དང་མཇལ་
འཕྲད་ཕྱག་མཉམ་སོགས་ཀྱི་ལེགས་ཚོགས་ཕུན་སུམ་ཚོགས་པ་དང༌། རྒྱལ་པོ་ཆེན་པོས་ཀྱང་
20-1-110


མཇལ། འཕྲད་གཟིགས་རྟོག་མཛད་ཅིང༌། སྔ་སོར་ཕྱོགས་རིས་ཀྱི་བརྗོད་པ་ཅི་རིགས་པ་
ཐམས་ཅད་རིས་མེད་དུ་ཞི་ནས་རྒྱལ་པོ་ཆེན་པོ་ཡང་དད་པ་ཆེན་པོ་སྔར་ལས་ཀྱང་ཆེས་བླ་
ལྷག་ཏུ་སྐྱེས། དེ་ནས་རིམ་གྱིས་ཆིབས་ཁ་བསྒྱུར། ཁྲི་ཤོར་རྒྱལ་མོའི་མཚོ་དང་ཉེ་བ་ནས་ཤར་
ཙོང་ཁའི་ཆ་ལ་སྟག་ལུང་ལ་གསར་ཞེས་ཟི་ལིང་ནང་སོས་སྤྱན་དྲངས། དྲངས་ཏི་ལྔ་མཆོད་
པས་ཀྱང་སྤྱན་དྲངས་ཤིང་ཞབས་ཏོག་ཕུལ་དུ་བྱུང་བ་བསྒྲུབ། རིམ་གྱིས་ཟི་ལིང་མཁར་མོ་
ཆེར་ཕེབས། རྒྱ་ནག་གོང་མ་ཆེན་མོ་ཝན་ལིའི་བཀའ་རྟགས་ཀྱི་ལས་ཀ་འཛིན་པའི་རྒྱའི་མི་
དཔོན་རྣམས་ཀྱིས་ཕུན་སུམ་ཚོགས་པའི་ཞབས་ཏོག་གིས་རི་མོར་བྱས། འཛུ་ལམ་ཅོང་རོང་
དུ་གྲགས་པའི་ཆུ་བོ་ཆེན་པོ་ལ་ངོ་མཚར་བའི་བཀོད་པ་དང་བཅས་ཏེ་དཔོན་སློབ་བདེ་བར་
སྒྲོལ་ཏེ། རྒྱའི་མི་དཔོན་ཞིག་གིས་འབུལ་བ་དང་མཆོད་པའི་སྤྲིན་གྱི་ཕུང་བོ་བསམ་གྱིས་མི་
ཁྱབ་པས་བསྟབས། རིམ་པས་ཨོ་རུས་བེ་ཐུ་དང་ཀརྨ་བླ་མ་སོགས་ཀྱིས་བསྙེན་བཀུར་ཞབས་
ཏོག་དཔག་ཏུ་མེད་པ་མཛད། སྭོག་ཕྲུག་བཅུ་ཕྲག་ཙམ་རབ་ཏུ་བྱུང་ནས་ཞབས་འབྲིང་དུ་
འོང༌། གསེར་དངུལ་གོས་དར་རྟ་ནོར་སོགས་དང་མཆོད་པའི་སྤྲིན་གྱི་དངོས་པོ་ཚད་གཞལ་
བར་དཀའ་བ་ཕུལ། རྒྱལ་བའི་བསྟན་པ་ལ་སྟོན་པ་གཉིས་པ། རིགས་ལྡན་སྤྲུལ་སྐུ་ཀུན་
མཁྱེན་ཇོ་ནང་པ་ཆེན་པོའི་རང་ལུགས་འཛིན་པ། མཁྱེན་བརྩེ་ནུས་པའི་དབང་ཕྱུག་རླབས་
ཆེན་སྤྱོད་པས་རྒྱལ་བའི་བསྟན་པ་སྐྱོང་བ་ལ་འགྲན་ཟླ་དང་བྲལ་བ། སྤྲུལ་པའི་སྐུ་ཆེན་པོ་རྗེ་
བཙུན་རྒྱལ་བ་སེང་གེས་ཀྱང་ཇ་ཞུས་འབུལ་བ་བསམ་གྱིས་མི་ཁྱབ་པ་དང་བཅས་ལེགས་
སོའི་སྐྱེས་དང་འཛམ་ཐང་ཕྱོགས་སུ་སླར་ཡང་ཕེབས་དགོས་པའི་སྙན་ཞུ་ཙམ་བྱུང་ནའང་ཕྱིས་
ཕེབས་ནི་མ་ཐུབ། ཡོས་ལོའི་སྟོན་ཁར་ཨལ་དན་རྒྱལ་པོས་དངུལ་སྲང་སྟོང་དང་ལྔ་བརྒྱ་ལས་
གྲུབ་པའི་དངུལ་བཟང༌། གཞན་ཡང་དངུལ་སྤྱད་གཙོ་བོར་གྱུར་པའི་འབུལ་བ་དཔག་ཏུ་མེད་
པ་དང༌། གོས་དར་གྱི་དོས་ཆེན་པོ་བཅུ་བཞི་ཙམ་འབུལ་བ་སོགས་མུ་མཐའ་མེད་པའི་མཆོད་
20-1-111


རྫས་ཕྱག་ཏུ་ཕེབས། དེ་སྐབས་རྒྱལ་པོ་ཡབ་ཡུམ་འཁོར་བཅས་ལ་རྒྱ་བོད་དུ་དམ་པའི་ཆོས་
ཇི་ལྟར་བྱུང་བའི་ལོ་རྒྱུས་དང༌། ལས་རྒྱུ་འབྲས་ཀྱི་རྣམ་བཞག་དཔག་ཏུ་མེད་པ་ཉིན་རེ་བཞིན་
གསུངས་པས། ས་སྐྱོང་འདི་ལྷག་པར་དད་དེ་འདི་ཕྱི་ཐམས་ཅད་དུ་སྐྱབས་གནས་བསླུ་བ་
མེད་པར་ཤེས་ཤིང༌། དཔལ་ཀྱཻ་རྡོ་རྗེ་ལ་སོགས་པ་བླ་མེད་ཀྱི་དབང་བཀའ་མང་པོས་སྨིན་
པར་མཛད། རྗེས་གནང་དང་བཀའ་ལུང་གྲངས་མེད་པར་སྩལ། རྗེ་འདི་ཉིད་རྩ་བའི་བླ་མ་
ཆེས་མཆོག་ཏུ་འཛིན་ནོ། །དེ་ནས་དཔོན་སློབ་རྣམས་ཨོར་རྒྱུས་ཀྱི་རྒྱལ་པོ་སེ་ཆེན་ཧུང་ཐའི་
ཙིས་ཞབས་ཏོག་མུ་མཐའ་མེད་པར་རྒྱ་ཆེན་མཆོད་བཞིན་པའི་ངང་ནས། རྒྱའི་ནང་མི་ཆུར་
ཕེབས་མི་དབོན་ཆེན་པོ་ཀམ་ཆུ་དུའུ་ཐང་གིས་སྤྱན་དྲངས་ཏེ་རྙེད་བཀུར་དཔག་ཏུ་མེད་པ་དང་
བཅས། སྔོན་རྒྱལ་པོ་གོ་དན་གྱིས་བཏབ་པའི་ཕོ་བྲང་ལང་གྱུར་ཕེབས་ཁྱད་པར་འཇམ་པའི་
དབྱངས་ཀྱི་རྣམ་འཕྲུལ་ཆོས་རྗེ་ས་སྐྱ་པཎྜི་ཏ་ཁུ་དཔོན་གྱིས་བཏབ་པའི་ཤར་ཕྱོགས་སྤྲུལ་པའི་
སྡེར་ཞབས་ཀྱིས་བཅགས་ཏེ། དེ་དང་ཉེ་བའི་ལྷོ་དབང་སྡེ། ནུབ་པདྨོའི་སྡེ། བྱང་རྒྱ་མཚོའི་སྡེ།
ཞེས་པ་རྣམས་སུ་མཆོད་པའི་སྤྲིན་བསམ་གྱིས་མི་ཁྱབ་པས་གཏིབ་པར་མཛད་སླར་ཡང་ཀརྨ་
ལྷ་ཁང་ནས་འབུལ་ནོད་རྒྱ་ཆེན་པོ་དང༌། ཨོར་རྒྱུས་རྒྱལ་པོའི་དངུལ་སྲང་ལྔ་བརྒྱ་ལས་གྲུབ་
པའི་མཎྜལ་སོགས་འབུལ། མོས་པ་དང་འཚམ་པའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར།
ཤིང་ཀུན་མཁར་སོགས་མཇལ་བར་བཞེད་པ་བྱུང་ནའང༌། ཚད་པ་སོགས་ཀྱིས་དགག་དགོས་
ལ་བརྟེན་ནས་མ་ཕེབས་ཤིང༌། དེ་སྐབས་ཀམ་ཆུ་དུའུ་ཐང་གི་ཞུ་བ་ལ་སྤྲུལ་པའི་སྡེའི་གཙུག་
ལག་མེས་བཞེས་པའང་ལེགས་པར་ཞིག་གསོས་གྲུབ་པ་དང༌། གཞན་པདྨོའི་སྡེ་ལ་སོགས་
པའི་གཙུག་ལག་ཁང་འདི་རྣམས་ས་པཎ་ཁུ་དབོན་གྱི་དུས་ནས་ཡིན་ཞིང༌། བླ་མ་ཁྱེད་ཀྱང་ས་
སྐྱའི་རང་ལུགས་འཛིན་པ་ལ་ཉེ་བ་ཞིག་ཡིན་པར་སྣང་བས། དགོན་གནས་འདི་རྣམས་ལྷ་
འབངས་དང་བཅས་པ་ཕྱག་ཏུ་འབུལ་བས་ཅིས་ཀྱང་བཞུགས་པར་ཞུ་ཞེས་ནན་གྱིས་ཞུ་བ་
20-1-112


བྱུང་ནའང༌། བོད་ཡུལ་གྱི་བསྟན་པ་ལ་དགོངས་ནས་བཞུགས་པར་མ་གནང༌། རིམ་པས་ཟི་
ལིང་མཁར་ཕྱོགས་སུ་ཕེབས་པས། མཁར་ཆེན་ཀྲོང་ནང་ཞེས་པ་ནས་འཇའ་ལམ་བརྒྱུད་
ནས། རྒྱའི་སྐྱེ་བོ་ཆེ་ཕྲ་རྣམས་ལ་སོ་སོའི་བསམ་པ་དང་མཐུན་པའི་ཆོས་ཀྱི་འཁོར་ལོ་རྒྱ་ཆེར་
བསྐོར་ཞིང་ཐར་པའི་ལམ་ལ་བཀོད་ནས། རིམ་གྱིས་ལ་གསར་དུ་ཕེབས། སྟག་ལུང་འབུམ་
དཔོན་གྱི་སར་བཞུགས་པའི་སྐབས་སྡེ་བ་ལྷུན་འགྲུབ་རྫོང་པ་འདི་ཕྱོགས་སུ་འདས་པ་ཡེ་
ཤེས་ཀྱིས་གསལ་བར་མཁྱེན་ཏེ། འཁོར་རྣམས་ལ་བཀའ་བསྩལ། དེ་ནས་རིམ་གྱིས་དབུས་
པའི་གདན་འདྲེན་རྣམས་ཀྱང་འབྱོར། རྒྱ་དང་སྭོག་པོའི་སྐྱེ་བོ་མཐའ་ཡས་པ་ཆོས་ཀྱིས་ཚིམ་
པར་མཛད། དེ་ལ་སྤྱིར་གོང་མ་རྒྱལ་པོ་ཐོ་གན་ཐེ་མུར་གྱི་རྗེས་ལ་བླ་མ་རྣམ་གཉིས་ཀྱིས་མ་
བྱོན་ཕན་ཆད་དུ་སྭོག་པོ་རྣམས་ནི་སྲིན་པོའི་སྤྱོད་ཡུལ་འཛིན་པ་དང༌། ཕྱིས་ནི་རྒྱའི་ནང་ཀུན་
ཀྱང་མུ་སྟེགས་པ་དང་མཐུན་པའི་ཟྭིན་ཤིང་དང༌། སྟོད་ཧོར་སྟག་གཟིག་གི་ལུགས་སོགས་
ཆོས་ལོག་མང་ཞིང༌། བོད་ནས་དགེ་བའི་བཤེས་གཉེན་རྣམས་གཞན་མ་བྱོན་པས། སངས་
རྒྱས་པའི་ཕྱོགས་ཀུན་ཡང་ཆོས་ཚུལ་ངན་པར་ཡོད་པ། རྗེ་འདིས་བསྟན་པའི་སྲོལ་རྨ་མེད་པ་
ལ་བཀོད། སྭོག་པོའི་ཡུལ་ཀུན་དུ་ནི་བསྙེན་གནས་ལེན་པ་དང༌། སྲོག་གཅོད་སྤངས་པ་དང༌།
དགེ་བསྙེན་དགེ་ཚུལ་དགེ་སློང་གི་སྡོམ་པ་ལེན་པ་སོགས་དཔག་ཏུ་མེད། རྗེ་འདི་ཉིད་ཀྱིས་
དོན་གསུངས་ཤིང་སྭོག་པོའི་པག་ཤི་མཁས་པས། ཟ་མ་ཏོག་བཀོད་པ་སོགས་མདོ་སྡེ་མང་པོ་
དང༌། གཞན་ཡང་རྣམ་ཐར་དང་སྒྲུབ་ཐབས་མང་པོ་སྭོག་པོའི་སྐད་དུ་བསྒྱུར་ཞིང༌། ལས་
འབྲས་སྤངས་བླང་གི་གནས་ལ་མིག་ཕྱེ་བར་མཛད་དོ། །འབྲུག་ལོ་ཟླ་བ་གསུམ་པའི་ཚེས་
གསུམ་ལ་སྭོག་ཡུལ་གཞི་ནས་ཕྱག་བཏེགས་ཏེ། དེ་ནས་རིམ་གྱིས་བྱང་ལམ་བརྒྱུད། གདན་
ས་ཆེན་པོ་སྟག་ལུང་ཐང་དུ་ཕྱག་ཕེབས། དབུས་གཙང་གི་དགེ་འདུན་གྱི་སྡེ་ཐམས་ཅད་ལ་སྐུ་
སྐྱེས་ཀྱིས་ཚུལ་དུ་མང་ཇ་དང༌། འགྱེད་བཅས་བསམ་གྱིས་མི་ཁྱབ་པས་དགེ་འདུན་རྣམས་
20-1-113


ཡིད་མགུ་བ་ཐོབ་པར་མཛད། རྗེ་ཞྭ་དམར་དཀོན་མཆོག་ཡན་ལག་སྤྱན་འདྲེན་པར་མཛད་དེ་
འབུལ་བའི་དངོས་པོ་གྱ་ནོམ་པ་བློས་གཞལ་བར་དཀའ་བ་དཔག་ཏུ་མེད་པ་སྟོབས་པར་
མཛད་ཅིང༌། དམ་པ་དེས་ཀྱང་རྗེ་འདི་ཉིད་ཀྱི་དྲུང་དུ་པཎྜི་ཏ་ཆོས་མཆོག་གི་ཐུགས་དམ་རྟེན་
ཕྱག་བཟོ་མར་གྲགས་པའི་ཐུབ་པའི་དབང་པོའི་སྐུ་ལི་མ་ཆེས་ཁྱད་པར་དུ་འཕགས་པ་ཞིག་
འབུལ་བར་མཛད། ཕན་ཚུན་ཐུགས་ལྷག་བསམ་རྣམ་པར་དག་པ་དཔེ་བྲལ་དུ་བཞུགས་སོ། །

༈ རྒྱལ་བ་བསྐྱེད་མཛད་ཁྱེད་ཀྱི་གསང་བ་གསུམ། །ནམ་མཁའི་རྗེས་འགྲོ་འདི་ལ་ཅི་
ཞིག་བརྗོད། །འོན་ཀྱང་ཐུགས་རྗེའི་འོད་བརྒྱ་ཤར་བ་ལས། ། མཐའ་འཁོབ་སྡིག་པའི་མུན་པ་
དྲུང་ནས་ཕྱུང༌། །ཀློག་དང་བསམ་གཏན་ཚུལ་ཁྲིམས་ལྡན་པ་ཡིས། །རྣམ་པར་གང་བའི་སྔོན་
ཆད་ལོག་ལྟའི་ཡུལ། །ད་ནི་རྒྱལ་བའི་ཞིང་གི་ཁུད་པར་གྱུར། །ཡ་མཚན་འདི་ནི་བླ་མ་ཆོས་
རྗེའི་མཐུ། །མཚོན་དང་མེ་ཆར་འབེབས་ལྡན་མཆོད་འོས་འཇོམས། །འདི་དག་རྒྱལ་བའི་
འཕྲིན་ལས་ཅན་ཡིན་ན། །ཡིད་སྲུབ་ཕོ་ཉ་སུ་ཞིག་བློ་ལྡན་དཔྱོད། །རྗེ་འདི་ཁོ་ནའི་འཕྲིན་
ལས་འགྲོ་བའི་དོན། །ཅེས་པ་མཐའ་འཁོབ་འདུལ་བར་བསྟན་པ་སོགས་ཀྱི་མཛད་པ་ལས་
བརྩམ་སྟེ་ཅུང་ཟད་བསྙད་པའི་སྡེ་ཚན་ཏེ་དྲུག་པའོ།། །།
དེ་ནས་ལྕགས་མོ་སྦྲུལ་ལོ་ཆོ་འཕྲུལ་ཆེན་པོའི་ཟླ་བའི་ཡར་ཚེས་དགེ་བ་ཞིག་ལ་སྲིད་
འདིའི་ཕུན་ཚོགས་ཐམས་ཅད་ཀྱི་འབྱུང་གནས་ར་ས་འཕྲུལ་སྣང་གི་ལྷ་ཁང་ཆེན་པོའི། གཙུག་
ལག་ཁང༌། དབུས་མ་ཇོ་བོ་རིན་པོ་ཆེ་ཉིད་བཞུགས་པའི་སྟེང་གི་གསེར་ཕིབས་ཆེན་མོ་ལ་
ཞིག་གསོས་བྱ་བར་དགོངས་ནས། གཟའ་སྐར་བཟང་བ་ཞིག་ལ་དབུ་གཙུགས། ཟངས་ལེབ་
རྣམས་ཐད་བརྡུང་དང༌། གད་བརྡར་དགོས་པ་རྣམས་དང༌། ཕལ་ཆེར་གསར་བཞེངས་སུ་
མཛད་དགོས་པ་དང༌། མདའ་ཡབ་སྒོར་མ་འབྲུག་མགོ་བཞི་དང་བཅས་པ་ཐམས་ཅད་གསར་
20-1-114


དུ་བརྡུང་ཏེ། ཀུན་དྲིལ་བ་གསེར་ཕིབས་ཆེན་མོ་འདིའི་སྐུད་གསེར་འབའ་ཞིག་ལ། གསེར་
ཞོ་སྟོང་ཕྲག་ལྔ་ཁ་འཐོར་ཅི་རིགས་པས་བརྒྱན་པ་དང༌། དངུལ་ཆུ་དེའི་དྲུག་བསྐོར་དང་
བཅས་པ་ཤིང་ཆ་ཐམས་ཅད་གསར་པ་རྗེས་ཚོན་རྩི་སོགས་དང༌། གཙུག་ལག་ཁང་གི་བྱང་
ཕྱོགས་ཀྱི་འཁོར་ཕིབས་ཐམས་ཅད་ཞིག་གསོས་གནང་བ་དང༌། གཞན་ཡང་སྟེང་ཤོད་ཀུན་
ན་ཞིག་གསོས་མཛད་དགོས་ཤིན་དུ་མང་པོར་ཡོད་སྣང་བ་ཐམས་ཅད་རྫོགས་པར་གནང་
ཞིང༌། འདིའི་རྒྱུ་སོགས་གཞན་རྣམས་ལྟ་སྨོས་ཀྱང་ཅི་དགོས། དངུལ་ཆུ་འབའ་ཞིག་གི་རིན་
ལའང་གཟིམས་དྲེའུ་ཉིས་བརྒྱར་ཉེ་བ་གནང་བ་སོགས། དོན་གྱི་གཙོ་བོ་སེམས་ཅན་རྣམས་
མགུ་བར་བྱེད་པ་བྱང་ཆུབ་སེམས་དཔའ་རྣམས་ཀྱིས་བསྒྲུབ་པར་བྱ་བ་ཡིན་པ་ལྟར། རིན་
ལ་བརྩེག་པ་དང༌། རྒྱུ་ཐབས་ཀྱིས་མགོ་བསྐོར་ནས་རང་ཉིད་ཚོང་རྒྱལ་བར་བྱེད་པ་སོགས་
གཏན་ནས་མི་བྱེད་པའི་བཀའ་ཁྱབ་ཕྱག་གཡོག་སོ་སོར་གནང་ནས་རིན་ཡིན་ལུགས་བཞིན་
ལས་ཀྱང་ཆེས་ལྷག་ཙམ་སྩལ་བ་སོགས་ཐོག་མཐའ་བར་གསུམ་ཐམས་ཅད་དུ་ཆོས་མཐུན་
འབའ་ཞིག་གིས་བསྒྲུབ་པར་གནང་བ་ཡིན་ཏེ། སེམས་ཅན་བསླུས་ནས་སངས་རྒྱས་ལ་
མཆོད་ཀྱང་བུ་བསད་པའི་ཤ་ཕ་མ་ལ་དྲངས་པ་ལྟར་རྒྱལ་བ་མཉེས་པའི་ལམ་ལས་གོལ་བ་
ཡིན་པ། རྒྱལ་བ་འདིས་མཁྱེན་ཞིང་གཟིགས་པས་ཡང་དག་པའི་ལམ་ལ་འགོད་པར་མཛད་
པ་ཡིན་ཏེ། དཔྱོད་ལྡན་རྣམས་ཀྱིས་ཀྱང་འདི་བཞིན་དུ་བྱོས་ཤིག །དེ་སྐབས་སུ་བལ་བོ་ཉི་
ཤུ་ལྷག་ཅིག་དང༌། རི་མོ་བ། ཤིང་བཟོ་བ། རྡོ་བཟོ་བ། ཇ་ལག་པ་སོགས་བཟོ་པ་ཉིས་བརྒྱ་
སྐོར་གྱི་ཆས་ཕོག་མར་གནང་ཞིང༌། གྲངས་སུ་མ་བཏབ་པའི་ལོངས་སྤྱོད་ནི་གཞལ་དུ་མེད།
ཐུགས་རྗེའི་མཐུས་དེ་བར་འཐབ་འཁྲུག་ན་བ་སོགས་ཅུང་ཟད་མེད་པ། ཧོར་ཟླ་བཅུ་གཉིས་
པའི་ནང་དུ་ཕལ་ཆེར་གྲུབ་ནས། ཐུབ་པའི་རིང་བསྲེལ་དང་གཟུངས་བཞུགས་འཁོར་ལོ་
སོགས་ནང་བཞུགས་ཁྱད་པར་ཅན་རྣམས་ཀྱིས་ཕྱུར་བུར་གཏམས་པ། གཉྫི་ར་ལྔས་ཡོངས་
20-1-115


སུ་མཛེས་པར་མཛད། དཔལ་རི་བོ་དགའ་ལྡན་གྱི་ཁྲི་ཐོག་པ་དང༌། དགེ་སློང་སྡོམ་བརྩོན་
བསྙེན་པ་སོང་བ་བརྒྱ་ཕྲག་མང་བོའི་འཁོར་དང་བཅས་ནས་རབ་གནས་ཞལ་གྲོར་བཅས་པ་
མཛད། ཀྱི་ཤོད་པའི་ཞལ་ངོའི་ཐོག་དྲངས། དཔག་ཏུ་མེད་པ་ལ་དགའ་སྟོན་རྒྱ་ཆེན་པོ་དང༌།
རབ་གནས་ཀྱི་རྡོ་རྗེ་སློབ་དཔོན་ནས་བརྩམ་གང་ལ་གང་དགོས་ཐམས་ཅད་ལ་གནང་སྦྱིན་
དཔེ་བྲལ་དུ་སྩལ། ཁྱད་པར་བལ་པོ་རྣམས་ལ་གསེར་འདབ་ཀྱི་ཡོན་སོགས་བཟོ་བོ་རྣམས་
ལ་གནང་སྦྱིན་བློ་འདས་དང༌། ལྷ་སར་སྡེ་བཞིར་ཇ་དང་ཚྭའི་སྒོ་འགྱེད་སོགས་ལྷ་སའི་ཞིག་
གསོས་འདིའི་སྐབས་སུ་ཇི་ལྟར་གནང་བའི་རྣམ་གཞག་རྣམས་ཞིབ་མོར་བརྗོད་ན་ནི་ཉིན་
ཞག་མང་པོས་ཀྱང་རྫོགས་པར་མི་འགྱུར་རོ། །འདི་ནི་ད་ལྟར་གྱི་དུས་ན་རིག་སྔགས་དང་
གཡོ་ཐབས་དང་ཚུལ་འཆོས་ལ་སོགས་པ་ངན་ཐབས་ཐམས་ཅད་ཀྱིས་ལོངས་སྤྱོད་རྒྱ་ཆེར་
བསྒྲུབ་ནས། བདག་དང་གཞན་བག་མེད་པའི་རྒྱུར་སྦྱོར་བའི་ལོག་འཚོ་དང༌། ཞིང་མ་ཡིན་པ་
རྒྱལ་པོ་སྡིག་ཅན་རྣམས་ལག་འགྱངས་ཀྱིས་མགུ་བར་བྱས་ནས་རང་ཕྱོགས་སུ་བསྡུ་བར་བྱེད་
པ་དང༌། སེར་སྣའི་དབང་གིས་མི་སྦྱིན་མི་སྤྱོད་པར་རྣམ་པར་འཆུམས་ཤིང་གནས་པ་དང༌།
ཁ་ཅིག་ནི་ལོངས་སྤྱོད་གྱ་ནོམ་པ་ཐམས་ཅད་འདྲེ་རྒོད་མི་སྲུན་པ་དག་ལ་རྣམ་པར་གཏད་
དེ། རང་ཕྱོགས་འཕེལ་བའི་ཕྱིར་དེ་ལ་སྙིང་ཐག་པ་ནས་གསོལ་བ་བཏབ་པས། དེས་ཀྱང་དེ་
དག་གླ་རྔན་དུ་བཟུང་ནས་སྐལ་བ་དམན་པ་རྣམས་ཀྱི་སེམས་རྒྱུད་བསྐུལ་ཏེ། དེའི་ཕྱོགས་
ལ་ཉེ་བར་སྦྱོར་བར་བྱེད་པ་ཙམ་ཞིག་ལ་སྙིང་པོར་བྱེད་པ་སོགས་ལོག་པའི་འཚོ་བ་ལྷུར་ལེན་
པ་རྣམས་ལ་ཁྲེལ་བསྡས་ཆེན་པོ་མཛད་པའོ། །འདིས་ནི་བདག་ཅག་གི་བླ་མ་དམ་པ་འདི་
ཉིད་ཀྱི་འཕྲིན་ལས་ཀྱི་བར་ཆད་ཐམས་ཅད་འཕྲལ་དུ་ཉེ་བར་ཞི་ནས། དཔལ་སྟག་ལུང་པའི་
ལུགས་གཉིས་ཀྱི་བསྟན་པ་ཟླ་བ་ཡར་ངོ་ལྟར་འཕེལ་རྒྱས་སུ་གྱུར་པ་འདི་ཡིན་ནོ། །
དེར་སྐབས་དང་མཐུན་པར་ཀླུ་སྒྲུབ་ཀྱིས་ཕྱག་བཟོའི་གྷན་དྷོ་ལ་ངོ་མཚར་ཅན་དེ་ལ།
20-1-116


ཙན་དན་དཀར་པོ་ལས་གྲུབ་པའི་དྲི་གཙང་ཁང་ཕྱུང་བའི་ཟབ་བརྐོས་དང་བཅས་པ་ལེགས་
པར་གྲུབ་ཅིང༌། སློབ་དཔོན་ཟླ་བ་གྲགས་པའི་ཐུགས་དམ་གྱི་ཐུབ་པའི་དབང་པོའི་སྐུ་བརྙན་
བླ་མེད་ལེགས་པའི་རྩེར་སོན་པ་དེ་ཉིད་ནང་དུ་བཞུགས་པར་མཛད། འདི་ནི་ད་ལྟར་ཡང་སྐུ་
དང་འབྲལ་མེད་དུ་ཕྱག་མཆོད་ཀྱི་རྟེན་དུ་བཞུགས་པ་ལགས། སྭོག་ཡུལ་ནས་ཕེབས་འཕྲལ་
སྟག་ལུང་གི་དགེ་འདུན་སྤྱི་ལ། གླིང་གི་ཞིག་གསོས་ཀྱི་ཐེས་སུ་གནང་སྦྱིན་སྤུང་ཆེ་བསྩལ་
འདུག་པས། འདི་ལས་ངེས་པར་གླིང་འདི་ལ་ལྕགས་རི་ཞིག་གྲུབ་ན་ལེགས་ཞེས་ཐམས་ཅད་
བློ་གྲོས་གཅིག་ཏུ་གྱུར་པ་ནས། སྟག་ལོ་ཧོར་ཟླ་བཞི་པའི་གནམ་གང་གཟའ་སྐར་དགེ་བ་ལ་
ཞབས་ཀྱིས་བཅགས་ཤིང་ཕྱག་ནས་གནང༌། ཕྱིས་རིམ་པས་ལེགས་པར་གྲུབ་སྟེ་ཤིན་ཏུ་རྒྱ་ཆེ་
བ་འདི་ཙམ་ལའང་དེ་དང་དེར་ཉེས་སྐྱོན་གྱི་རྣམ་པ་ཅུང་ཟད་ཙམ་ཡང་མེད་པར་གྲུབ་པ་ཡིན་
ནོ། །ལོ་འདི་ཉིད་ཀྱི་དབྱར་སྨད་དུ་བདག་གིས་གསོལ་བ་བཏབ་ཅིང་སྤྱན་དྲངས་པས་ཕེབས་
པའི་ལམ་དུ། ཧོར་སྟོད་པས་རྙེད་བཀུར་འབུལ་ནོད་ཀྱིས་མཆོད་རིམ་གྱིས་ལམ་དུ་འགྲོ་བའི་
དོན་རྒྱ་ཆེན་པོ་དང་བཅས་ཏེ། དཔལ་འཁོར་ལོ་སྡོམ་པའི་ཕོ་བྲང་ཆེན་པོ་ཆོས་ལུང་བྱང་རྩེར་
ཕྱག་ཕེབས། སྐུ་གསུང་ཐུགས་ཀྱི་རྟེན་ངོ་མཚར་བ་བསྒྲང་བར་མི་སྤྱོད་པ་བཞུགས་པ་ཐམས་
ཅད་ལ་ཀུན་དུ་བཟང་བོའི་རྣམ་པར་ཐར་པ་ལས་བྱུང་བའི་མཆོད་པའི་སྤྲིན་གྱི་ཕུང་པོ་ལྟ་བུས་
མཆོད་པར་མཛད། དེ་སྐབས་དོན་གྱི་སླད་དུ་མཚན་ནས་སྨོས་ཏེ་རྗེ་བཙུན་རྡོ་རྗེ་འཆང་ཆེན་
པོ་འཇམ་དབྱངས་ཀུན་དགའ་རྒྱལ་མཚན་དཔལ་བཟང་བོའི་ཞལ་སྔ་ནས་དང༌། རྒྱལ་བ་
ཀུན་འདུས་པའི་ངོ་བོ་རྗེ་གྲུབ་ཆེན་རིན་པོ་ཆེ་ལྷ་དབང་གྲགས་པ་དང༌། རྗེ་དྲུང་རིན་པོ་ཆེ་ཀུན་
དགའ་དཔལ་བཟང་པོ་དང༌། བསྟན་འཛིན་སྤྲུལ་སྐུ་རིན་པོ་ཆེ་སོགས་བླ་མ་ཆེ་དགུ་མཁས་
ཤིང་གྲུབ་པ་ཟད་མི་ཤེས་པ་ཞལ་འཛོམས་ཤིང༌། ཐམས་ཅད་ཀྱིས་ཀྱང་དམ་པ་འདི་ཉིད་ལ་
ཕུ་དུད་དུ་བཀུར་བ་དང༌། བཀའ་ཆོས་ཀྱི་འབྲེལ་བ་རེ་གསན། རྗེ་འདིས་ཀྱང་རྗེ་བཙུན་རྡོ་
20-1-117


རིང་བ་ཆེན་པོ་ཀུན་དགའི་མཚན་ཅན་ལ་ཚེ་དཔག་མེད་ལྷ་དགུའི་དབང་སོགས་དང༌། རྗེ་
ཐུབ་པའི་དབང་ཕྱུག་ལ་ཡང་འཇམ་མགོན་གྲུབ་པའི་དབང་པོའི་བཀའ་འབུམ་ཡོངས་རྫོགས་
དང༌། རས་ཆུང་སྙན་བརྒྱུད་ཀྱི་ཆོས་སྐོར་མ་ལུས་པ་དང༌། དཔལ་མགོན་དྲག་ཤད་ཀྱི་སྐོར་
སོགས་མཐའ་ཡས་པའི་ཆོས་སྒོ་གསན་ཞིང༌། གཞན་ཡང་བདག་ཅག་དེར་འདུས་པ་ཀུན་ལ་
ནི་ཆོས་དང་ཟང་ཟིང་གི་འབྱོར་པས་ཉིན་མཚན་ཀུན་དུ་འདའ་བར་གྱུར་ཏེ། བདག་གིས་ཀྱང་
རབ་ཏུ་བྱུང་བའི་མཁན་པོ་ཞུས་ཤིང༌། དགེ་ཚུལ་གྱི་སྡོམ་པའི་བར་གྱིས་བཀའ་དྲིན་ནོད་དོ། །
 གཞན་ཡང་རབ་བྱུང་བསྙེན་རྫོགས་ཞུ་བ་དང༌། སོ་སོའི་འདོད་པ་དང་མཐུན་པའི་ཆོས་ཞུ་
བ་སོགས་དམ་པའི་ཆོས་ཀྱི་འགྲོ་དོན་གྱིས་ལ་སྟོད་ཀྱི་ཕྱོགས་ཐམས་ཅད་ཁྱབ་པར་མཛད་དོ། །
རིམ་པས་རི་ཁྲོད་ཆེན་མོ་མཇལ་བ་ལ་ཇོ་མོ་ནང་དུ་ཕེབས་པ་ན། ཆོས་རྡོ་རྗེའི་རྣལ་འབྱོར་
སྦྱོར་བ་ཡན་ལག་དྲུག་པའི་ཏིང་ངེ་འཛིན་གྱིས་མྱོས་པའི་སྒྲུབ་པ་མོ་རྣམས་ཀྱིས་ཕེབས་བསུའི་
བཀོད་པ་རྒྱ་ཆེན་པོ་དང་བཅས་ཏེ་སྤྱན་དྲངས། དེར་བཞུགས་ཀྱི་སྒྲུབ་པ་ཕོ་མོ་ཐམས་ཅད་
དང༌། དད་འདུན་གྱི་སྐྱེ་བོ་སྟོང་ཕྲག་མང་པ་ལ་ཆོས་འཁོར་རྒྱ་ཆེར་བསྐོར། སླར་ཡང་འཇེང༌།
རྟ་ནག་ཤིངས་སོགས་ཕེབས་ལམ་གྱི་ཡུལ་ཐམས་ཅད་དུ་དགེ་འདུན་དང་སྐྱེ་བོའི་ཚོགས་
བགྲང་བ་ལས་འདས་པ་ལ་ཆོས་དང་འབྱོར་པས་ཚིམ་པར་མཛད། གང་དང་གང་དུ་ཕེབས་
པ་དེ་དང་དེར་འདི་ཉིད་ཁོ་ན་མི་ཚོགས་ཆེ་ཞིང་མོས་ཤུགས་ཆེ་ལ། ཆོས་ཀྱིས་འགྲོ་དོན་ཡང་
དེ་ཙམ་དུ་ཆེའོ་སྙམ་པ་ཤ་སྟག་བྱུང་ངོ༌། །དེ་ནས་སླར་ཡང་གདན་ས་ཉིད་དུ་ཕེབས་ཤིང༌། དེའི་
ཕྱིར་ལོ་གཙོ་བོ་ཡང་དག་འཇོག་གནང་ཞིང་བར་བར་དུ་འགྲོ་བའི་དོན་ཡང་རྒྱ་ཆེར་མཛད།
སྤྲེའུ་ལོ་སྭོག་པོའི་ཡུལ་དུ་དད་ཅན་རྣམས་ཀྱིས་ཕུལ་བའི་གོས་ཆེན་ལ་སོགས་པ་སྭོག་པོའི་རྒྱུ་
ཕུན་སུམ་ཚོགས་པ་རྣམས་དགེ་བ་ལས་ཀྱང་དགེ་བ་སྲིད་མཐའི་བར་དུ་བསྐྲུན་པར་བཞེད་
ནས། སྤྲུལ་སྐུ་སྨན་ཐང་པ་བློ་བཟང་རྒྱ་མཚོ་སོགས་དང༌། འབྲས་སྤུངས་སོགས་ནས་གོས་སྐུ་
20-1-118


བཞེངས་པ་ལ་བཟོ་རིས་མཁས་པ་རྩེར་སོན་པ་ཤ་སྟག་བསྡུ་བར་གནང༌། ཕྱིས་ཀྱི་གོས་ཆེན་
ལས་བཟང་ཐག་ཆོད་པ་འབའ་ཞིག་ལ། གོས་ཡུག་བཅོས་མེད་སྟོང་དང་བརྒྱད་བརྒྱ་ཙམ་
ཐོག་མར་འདོན་པ་གནང་ཞིང༌། དེ་དག་གི་སྡེར་ལུས་ཅི་རིགས་ལ་ཕྱིས་གཞན་དང་གཞན་
ཡང་བསྣན་ཏེ། མདོར་ན་ཟབ་ཆེན་ཡུག་སྟོང་ཕྲག་གཉིས་ཙམ་ལས་བསྒྲུབ་པས་ཐུབ་ཆེན་
གྱི་གོས་སྐུ་ལྷ་མགྲོན་མང་པོའི་ཚོགས་དང་བཅས་པ་རྩེ་མཆོད་ཁང་གི་གཙུག་ལག་ཁང་ཆེན་
མོ་ལས་ཀྱང་ཆེས་དཔངས་མཐོ་ཞིང༌། ཞིང་དུའང་དེ་མཚུངས་སུ་ཡོད་པ་འདི་ཉིད་བཞེངས་
པར་གནང་བའི་ཚེ་ངོ་མཚར་བའི་ལྟས་དུ་མ་བྱུང་བ་དང༌། རྗེ་འདི་ཉིད་ཁུ་དཔོན་འདུས་པ་རྒྱ་
མཚོའི་ཚོགས་དང་བཅས་པས། དཔལ་ཀྱཻ་རྡོ་རྗེའི་དཀྱིལ་འཁོར་ཆེན་པོ་ཞལ་ཕྱེས་ཏེ། རབ་
གནས་ཀྱི་མེ་ཏོག་གཏོར་བ་གནང་བའི་སྐབས་མེ་ཏོག་གི་ཆར་ཡིད་ཆེས་མངོན་རྟགས་ཅན་
ཕེབས་པ་ཡུན་རིང་དུ་བྱུང༌། བཀྲ་ཤིས་དགེ་མཚན་དཔག་ཏུ་མེད་པའི་གཟི་འོད་འབར་བར་
བཞུགས་པར་སྣང་ངོ༌། །
༈ ཀུན༷་གནས་ངོ་མཚར་རབ་དག༷འི་བསྟི་གནས་མཆོག །བཀྲ༷་ཤིས༷་འཕྲུལ་སྣང་དགེ་
བར་སྤྱོད་པ་ལས། །མི་མཐུན་གཡུལ་ནས་རྒྱལ་བའི་རྒྱལ༷་མཚ༷ན་བརྙེས། །འགྲོ་བའི་དཔ༷ལ་
གྱུར་བཟ༷ང་པོ༷་ཁྱོད་ཉིད་ཀྱི། །འགྲོ་དོན་འཕྲིན་ལས་ཕ་མཐའ་བགྲང་ཡས་འདི། །མངོན་
འགྱུར་རྣམས་ལའང་གཞལ་བར་མི་ནུས་ན། །ལྐོག་ཏུ་གྱུར་ལ་སུ་ཞིག་ཚད་འཇལ་བྱེད། ཁྱོད་
ཉིད་ཁོ་ནས་ཁྱོད་ཀྱི་རྣམ་ཐར་མཁྱེན། །ཞེས་པ་ཁྱད་པར་གྱི་མཛད་པ་འབའ་ཞིག་ལས་བརྩམ་
སྟེ་ཅུང་ཟད་བསྙད་པའི་སྡེ་ཚན་ཏེ་བདུན་པའོ།། །།
བླ་མ་དེ་ཉིད་ཀྱི་ཐུགས་རྗེས་གོས་སྐུ་སྔ་ཕྱིར་བཞེངས་པར་མཛད་པ་ཐམས་ཅད་ལ་སྐྱ་
རིས་ལ་སྤོ་ལེན་མི་དགོས་པ་དང༌། གོས་ཆེན་བསྒྲིག་པའི་ཚེ་དང་ཚོན་ཡིག་སོགས་མི་དགོས་
པར་ཡིད་ཙམ་གྱི་འགྲིག་པ་སོགས་ཡ་མཚན་དཔག་ཏུ་མེད་པ་བྱུང་ངོ༌། །དེ་ནས་ཤིང་མོ་བྱ་ལོ་
20-1-119


ལ། སྟག་ལུང་མ་ཐང་དུ་གྲགས་པ་དཔལ་རི་བོ་ཆེ་ནས་སྤྱན་འདྲེན་པའི་ཕོ་ཉ་བ་རྣམས་ཀྱིས་
ཀྱང་བསྐུལ་ཏེ། མཆོག་གི་སྤྲུལ་པའི་སྐུ་ཆེན་པོ་རྒྱལ་ཚབ་ཏུ་མངོན་པར་དབང་བསྐུར་ནས།
དཔལ་རི་བོ་ཆེར་ཕེབས་པའི་སྒར་གྲྭ་བསྒྲིག་པར་མཛད་ཅིང༌། མཆོག་གི་སྤྲུལ་པའི་སྐུ་དང་
དགེ་འདུན་གྱི་ཚོགས་ཀྱིས་ཕེབས་སྐྱེལ་ལ་ཕེབས། མྱུར་དུ་སླར་ཕེབས་པའི་རྟེན་འབྲེལ་དུ་
ཕེབས་སྐྱེལ་བ་རྣམས་ལ་ཆོས་དྲུག་ཡིད་བཞིན་ནོར་བུའི་མགོ་བཙུགས་ཙམ་གནང༌། ལུགས་
གཉིས་ཀྱི་བསླབ་བྱ་མཐིལ་ཕྱིན་དང་མྱུར་དུ་ཕེབས་པའི་ཞལ་བཞེས་ཀྱིས་དབུག་དབྱུང་རིམ་
པས་ཧོར་སྟོད་སྨད་དང་ཨ་གྲགས་སོགས་ཀྱི་རི་ཁྲོད་བརྒྱུད་ནས། དཔལ་རི་བོ་ཆེ་དང་ཉེ་
བར་ཕེབས་བསུ་ཇ་འདྲེན་སྔ་ཕྱི་རིམ་པ་གསུམ་ཙམ་དང༌། དེ་ནས་ཉེ་བར་སྡེ་པ་མགོན་པོ་རྡོ་
རྗེ་དཔོན་གཡོག་གིས་ཆིབས་བསུ་དང༌། མཆོད་རྫས་སྣ་ཚོགས་ཐོགས་པའི་དགེ་འདུན་རྒྱ་
མཚོ་ལྟ་བུ་རྣམས་ཀྱིས་མདུན་བརྡར་ཏེ་ཕེབས་བཀའ་བརྒྱུད་ཀྱི་རིང་ལུགས་འཛིན་པ་ཀུན་གྱི་
གཙུག་གི་ནོར་བུ། འདྲེན་པ་གོང་མ་རྣམས་ཀྱི་རྣམ་ཐར་མ་ཉམས་པ་གཅིག་པུ་བ། མཁས་
བཙུན་བཟང་པོས་མཐར་ཐུག་དངོས་གྲུབ་མཆོག་གི་གནས་བརྙེས་པ་སྤྲུལ་པའི་སྐྱེས་མཆོག་
རིན་པོ་ཆེ་མཚོ་སྐྱེས་རྡོ་རྗེས་ཉིད་ཀྱང་གཙུག་ལག་ཁང་གི་སྒོ་དྲུང་དུ་ཕེབས་བསུར་ཕེབས་
ཤིང༌། མཇལ་བ་ཙམ་གྱིས་ཐུགས་ཡིད་གཅིག་ཏུ་འདྲེས་ཏེ། ཤིན་ཏུ་ཐུགས་ཕེབས་པའི་
དགྱེས་པ་ཆེན་པོས་གཏམ་གྱིས་མཚམས་སྦྱོར་ཏེ། རྗེ་འདི་ཉིད་ཀྱིས་ཀྱང་སྤྲུལ་པའི་སྐྱེས་
མཆོག་ཆེན་པོ་མཚོ་སྐྱེས་རྡོ་རྗེའི་ཞལ་སྔ་ནས་ལ། རྗེ་རིན་པོ་ཆེ་སངས་རྒྱས་དབོན་གྲགས་པ་
དཔལ་གྱིས་བཀའ་འབུམ་པོད་ཆེན་བདུན་གྱི་ལུང་དང༌། དེ་ཀའི་ནང་ན་བཞུགས་སོ་ཅོག་གི་
དབང་བཀའ་བྱིན་རླབས་རྗེ་གནང་རབ་འབྱམས་འབྱམས་ཀླས་པ་དང༌། སྟག་ལུང་བཀའ་
བརྒྱུད། རྒྱ་གར་གྱི་གྲུབ་ཆེན་ཛྙཱ་ན་ཏ་པའི་གདམས་ངག་སོགས་ཁྲིད་བཀའ་དཔག་ཏུ་མེད་
པ་དང་བཅས་པ་དང༌། ཁྱད་པར་སྟག་ལུང་བཀའ་བརྒྱུད་ཉིད་ཀྱི་གདམ་ངག་རྗེ་བཀྲ་ཤིས་
20-1-120


བླ་མ་མན་ཆད་དུ་སྟག་ལུང་མ་ཐང་ན་ཡང་མི་བཞུགས་པ་ཇི་སྙེད་གཅིག་གསན་ཞིང༌། རྡོ་རྗེ་
ཐེག་པ་གསང་སྔགས་རྙིང་མའི་སྐོར་ཡང་དཔག་ཏུ་མེད་པ་གསན། རྗེ་འདི་ཉིད་ཀྱིས་བླ་མ་
དམ་པ་དེ་ཉིད་ལ་ཡང༌། གཙོ་བོར་ཐམས་ཅད་མཁྱེན་པ་ཕྱོགས་ལས་རྣམ་རྒྱལ་གྱིས་བཞེད་
སྲོལ་བླ་མེད་ཀྱི་དཀྱིལ་འཁོར་མང་པོར་དབང་བསྐུར་པ་དང༌། གཞན་ཡང་སྟག་ལུང་མ་ཐང་
ནས་བརྒྱུད་པའི་ཟབ་ཆོས་དཔག་ཏུ་མེད་པ་གནང༌། དབོན་རིན་པོ་ཆེ་སྐུ་ཕྲ་མོར་བཞུགས་
པའང་རྗེ་འདི་ཉིད་ཀྱི་སྐུ་དྲུང་དུ་དབུ་སྐྲ་བསིལ། སྤྱིར་རྗེ་དྲུང་རིན་པོ་ཆེ་མཚོ་སྐྱེས་རྡོ་རྗེ་དེ་
ཉིད། ལུགས་གཉིས་ཆར་ནས་དགོངས་པའི་རྒྱ་མཚོར་བཞུགས་པས། དཔལ་སྟག་ལུང་བའི་
གདན་ས་གོང་འོག་གཉིས་ཆོས་བརྒྱུད་ཀྱི་ཁུངས་འདོད་པ་གཅིག་པ་ཙམ་དུ་མ་ཟད། ཐུགས་
དམ་ཉམས་བཞེས་ཀྱི་ཆོས་ཐམས་ཅད་ཐིག་གཅིག་སྤར་གཅིག་ཏུ་བཞུགས་མོད། རྗེ་རིན་པོ་
ཆེ་བཀྲ་ཤིས་བླ་མ་ནས་བཟུང་བདེ་གཤེགས་རིན་པོ་ཆེ་རྣམ་རྒྱལ་བཀྲ་ཤིས་ཀྱི་བར་དུ་གདན་
ས་ཡར་མར་ཧ་ཅང་ཐུགས་འབྲེལ་ཆེ་བ་མ་བྱུང་འདུག་པས་ཀྱང༌། རང་ལུགས་ཀྱི་གྲུབ་མཐའ་
འཛིན་པ་ལ་རང་རྐང་ཚུགས་པར་མ་བྱུང་ཞིང༌། དུས་ཚོད་འདི་སྐབས་ན་རྗེ་དྲུང་རིན་པོ་ཆེ་
ཉིད་ཀྱང་སྐུ་ན་ཚོད་སྨིན་པ་དང༌། དབོན་རིན་པོ་ཆེ་ཡང་སྐུ་ཕྲ་བ་སོགས་ཀྱི་རྗེ་རིན་པོ་ཆེ་འདི་
ཉིད་མ་ཕེབས་ན་རིམ་པས་གྲྭ་རིགས་གསར་པ་ཀུན་ནི་ཉི་མ་གང་དྲོ་དང་གོང་གང་ཆེའི་རྣམ་
པས། ཀར་ལུགས་སོགས་ལ་འགྱུར་བའི་གནས་ཀྱང་ཡོད་པར་དགོངས་ནས། རྗེ་འདི་ཉིད་
ཆེད་ཀྱི་སྤྱན་འདྲེན་པར་ཡང་མཛད་པ་ཡིན་སྣང་ལ། གཞན་ཡང་བཀའ་བསྩལ་ལ། མ་ཐང་
གི་གཙུག་ལག་ཁང་མེས་བཞེས་པ་སོགས་ཀྱིས་ད་ལྟ་བྱིན་རླབས་རྟེན་སོགས་རི་བོ་ཆེ་ཉིད་
ཆེས་བཀང་བར་བཞུགས་པས། བླ་མ་གོང་མའི་ཐུགས་དམ་རྟེན་སོགས་གཏོས་ཆེ་བ་འབུལ།
ཞེས་གསུངས་ཤིང༌། དེ་ཀ་བཞིན་ཕྱག་ཏུ་འབུལ་བར་མཛད་པ་ཡང༌། ཐང་པ་ཆེན་པོ་ཉིད་ཀྱི་
ཐུགས་དམ་འགྲོ་མགོན་ཕག་མོ་གྲུབ་པའི་དངུལ་སྐུ་ཁྲི་རྒྱབ་ཅན་དང༌། རྗེ་སངས་རྒྱས་ཡར་
20-1-121


བྱོན་གྱི་ཐུགས་བཞུགས་པའི་དངུལ་གདུང་བཀྲ་ཤིས་འོད་འབར་སྐུ་ཡལ་རིན་པོ་ཆེ་རིན་ཆེན་
མགོན་པོ་སོགས་ཀྱི། དངུལ་སྐུ་རྒྱབ་ཡོལ་ཅན་ཕྱག་ནས་མ་མང་པོ། ཀླུ་འཇིམ་གྱི་མཛད་
བརྒྱ། རྡོ་རྗེ་འཆང་གི་དངུལ་སྐུ་རྒྱབ་ཡོལ་མ་གྲུབ་ཐོབ་བརྒྱད་ཅུའི་ཚོགས་ཀྱི་སྐུའི་བཀོད་པ་
ཅན། འཛམ་བུས་གླིང་ན་བཟོ་བཀོད་ལེགས་པའི་དཔེར་བཞག་པ་སོགས་ཐུགས་དམ་རྟེན་
བྲིས་འབུར་གྱི་ཚོགས་ངོ་མཚར་བ་ཅན་མཐའ་ཡས་པ་དང་རྗེ་བཙུན་མར་པ་ནས་བརྩམས་
བརྒྱུད་པའི་བླ་མ་ཐམས་ཅད་ཀྱི་དབུ་སྐྲ་དང་ན་བཟའ་སོགས་བྱིན་རླབས་ཀྱི་རྟེན་ཆ་ཚང་བ།
སངས་རྒྱས་དབོན་གྱི་བཀའ་འབུམ་ཚར་གཉིས་དང༌། གཞན་ཡང་ཕྱག་དཔེ་དཀོན་པ་མང་པོ་
དང༌། དྭངས་ཤེལ་གྱི་སྤོས་ཕོར། གཟི་ཡོན་ཆེན་གྱི་གསོལ་ཁྲབ་སོགས་ཁྱད་པར་ནོར་མང་པོ་
ཕྱག་ཏུ་ཕུལ། བར་སྐབས་ཤིག་ཏུ་ཟུར་མང་དང་ཀརྨ་པའི་ཕྱོགས་ཀྱི་དགེ་འདུན་རྣམས་ཀྱིས་
སྤྱན་དྲངས། ཁོང་རྣམས་ཀྱི་བློ་དང་མཐུན་པར་ཀརྨ་ཀམ་ཚང་གི་ཟབ་ཆོས་མང་པོའི་འཁོར་
ལོ་བསྐོར་བས་སེམས་ཅན་ཚིམ་པར་མཛད། སྒོམ་སྡེ་ནང་ཆེན་པས་སྤྱན་དྲངས། འབུལ་བའི་
དངོས་པོ་རྒྱ་ཆེར་ཕུལ། ཚོགས་བདག་གིས་ཆོས་སྐོར་སོགས་བློ་དང་མཐུན་པའི་ཆོས་མང་དུ་
གནང༌། སླར་ཡང་དཔལ་རི་བོ་ཆེར་ཕེབས་ཏེ། སྟག་ལུང་གི་གདན་ས་ཡར་མར་གཉིས་ཆོས་
དང་སྲིད་ཀྱི་འཕྲིན་ལས་ཐམས་ཅད་སྒོ་གཅིག་ཏུ་འགྱུར་བར་བཀའ་བགྲོས། འབུལ་ནོར་
བསམ་གྱིས་མི་ཁྱབ་པ་དང་བཅས། ཕན་ཚུན་ཐུགས་ཡིད་གཅིག་ཏུ་འདྲེས་པའི་ཐུགས་ལྷག་
པར་འཕྲེང་བཞིན་པས་ཕེབས་སྐྱེལ་གྱི་བཀོད་པ་རྒྱ་ཆེན་པོ་དང་བཅས་རིམ་པས་ཡར་ཕེབས།
ཕག་ལོ་ཟླ་བ་བརྒྱད་པའི་ཉེར་ལྔ་ལ་སྟག་ལུང་ཐང་དུ་ཕེབས་ཤིང༌། རི་བོར་ཆེར་གསན་པའི་
བཀའ་ཆོས་རྣམས་དང༌། ཞལ་ཐང་སོགས་བྱིན་རླབས་ཅན་མང་པོ་མཆོག་གི་སྤྲུལ་པའི་སྐུ་
ལ་སྐྱེས་ཀྱིས་ཚུལ་དུ་འབུལ་བ་གནང༌། དཔལ་སྟག་ལུང་ཐང་གི་གཙུག་ལག་ཁང་ཆེན་མོའི་
སྟེང་གི་གསེར་ཕིབས་སྔ་གོང་ནས་རིམ་པས་ཕལ་ཆེར་གྲུབ་ནའང༌། ལྷག་མ་རྣམས་སྐབས་
20-1-122


འདིར་ཞབས་མཇུག་རྫོགས་པར་གནང་ཞིང༌། བྱང་རཱ་སྒྲེང་དུ་ཕེབས་སྐབས་ཤིག །དེ་ཉིད་དུ་
བཞུགས་པའི་ཐུགས་དམ་པ་བགྲེས་པོ་ཞིག་གིས་རང་གི་རྫས་གང་ཡོད་གསེར་དུ་བསྒྱུར་བའི་
གསེར་ཞོ་ཁ་ཤས་གཅིག་ཕྱག་ཏུ་ཕུལ་ནས། ལྷ་ཁང་ཀ་གཉིས་མའི་གསེར་ཐོག་གསེར་གདན་
དགོས་པའི་རྒྱུ་མཚན་ཕུལ་བས་ཉེ་བར་ཐུགས་བསྐུལ་ཏེ། འཕགས་པ་སྤྱན་རས་གཟིགས་ཀྱི་
ཞིང་ཁམས་གནས་མཆོག་དེའི་གནད་ཀྱི་སྙིང་པོ། འཇམ་པའི་རྡོ་རྗེའི་སྤྲུལ་པའི་སྐུ་དངོས་བྱོན་
སོགས་བྱིན་རླབས་ཀྱི་གཟི་བྱིན་མུ་མཐའ་མེད་པའི་སྐུ་གསུང་ཐུགས་ཀྱི་རྟེན་དཔག་ཏུ་མེད་པ་
བཞུགས་པའི་གཙུག་ལག་ཁང་ཀ་གཉིས་མའི་གསེར་ཐོག་དེ་ཉིད་སྔོན་དུས་སྐྱེས་བུ་དམ་པ་
འགའ་ཞིག་གིས་ཅུང་ཟད་མགོ་རྩོམ་པར་མཛད་ཀྱང་འཕྲོར་ལུས་ནས་ཕལ་ཆེར་མ་གྲུབ་པ་ལ་
ཡོངས་སུ་རྫོགས་པ་སྒྲུབ་པའི་ཞལ་བཀོད་གནང་ནས་རིང་པོར་མི་ཐོགས་པར་ལེགས་པར་
གྲུབ། འདིའི་སྐུད་གསེར་ལ་ཡང་གསེར་ཞོ་དྲུག་བརྒྱ་ལྷག་གཅིག་སོང་ཞིང༌། དེ་ཀའི་ཡོན་དང་
རབ་གནས་ཀྱི་བར་དུ་རྒྱ་ཆེར་གནང་ངོ༌། །
འདི་ན་གང་གི་མཛད་པ་བགྲང་ཡས་ཀྱང༌། །ཐམས་ཅད་གཞན་ལ་ཕན་པ་འབའ་ཞིག་
ལགས། །རིས་མེད་མཆོད་པའི་ཡུལ་རྣམས་མཆོད་པ་དང༌། །རིས་མེད་དམ་ཆོས་རྒྱ་ཆེར་
སྤེལ་བར་མཛད། །དམ་ཆོས་བདུད་རྩི་ནུབ་པར་ཉེ་བ་རྣམས། །མགོན་པོ་ཁྱོད་ཀྱིས་ཤིན་དུ་
དར་བར་མཛད། །དབྱར་དུས་ཆུ་བོ་རྒྱས་ལ་ངོ་མཚར་ཅི། །དཀོན་པ་ཙམ་དུ་རིན་ཐང་ཆེ་ཞེས་
གྲགས། །བཟང་ངན་མི་དཔྱོད་རང་ཕྱོགས་ཁོ་ན་ཞེས། །སྙིང་ལ་བརྣག་པའང་གཞན་ལུགས་
སྐྱོན་མེད་དག །སྨོད་བྱེད་ཆེན་པོ་དག་གིས་ཡིད་འཇིགས་ནས། །སྐྱབས་གནས་སྐྱབས་མཆོག་
ཁྱེད་ལ་སྐྱབས་སུ་མཆི། །ཞེས་པ་བསྟན་པ་རིན་པོ་ཆེ་ཡུན་རིང་དུ་གནས་པར་མཛད་པའི་ཁྱད་
པར་འགའ་ཞིག་ལས་བརྩམ་སྟེ་བསྙད་པའི་གཏམ་སྟེ་བརྒྱད་པའོ།། །།
གླང་ལོ་ཟླ་བ་བཞི་པའི་ཚེས་བཅུ་དགུ་ལ་མཆོག་གི་སྤྲུལ་པའི་སྐུ་ངག་དབང་རྣམ་རྒྱལ་
20-1-123


ཀུན་དགའ་རིན་ཆེན་དཔལ་བཟང་པོའི་ཞབས་ཀྱང༌། རྗེ་འདི་ཉིད་ཀྱིས་མཁན་པོ་མཛད་
ཅིང༌། སློབ་དཔོན་དུ་འོས་པ་གཉིས་དང༌། གྲིབ་ཚོད་པ་དང་དད་པའི་དགེ་འདུན་རྒྱ་མཚོ་ལྟ་
བུའི་དབུས་སུ། ཇི་སྐད་བཤད་པའི་ཆོ་ག་བཞགས་པར་མི་འོས་པས་བསྙེན་པར་རྫོགས་པར་
མཛད་དོ། །དེ་སྐབས་སུ་སོག་པོའི་རྒྱལ་བོ་ཨ་སྦལ་གྱིས་ནན་ཆེས་ཀྱིས་ཕེབས་པར་གསོལ་
བ་བཏབ་པའི་ཕོ་ཉ་བའང་སྐུ་དྲུང་དུ་བཅར་སྡོད་དུ་ཡོད་ཅིང༌། སྤྱིར་སྐུ་ན་ཚོད་སྨིན་པ་དང་
སོག་ཡུལ་ཐག་རིང་ཞིང་བགྲོད་དཀའ་བ་སོགས་རྒྱུ་མཚན་དུ་མས། གྲྭ་བུ་སློབ་ཡོན་བདག་སྡེ་
དཔོན་སོ་སོ་ཐམས་ཅད་དང༌། བདག་ཅག་ཕྱོགས་མཐའ་བ་ཐམས་ཅད་ཀྱིས་ཀྱང་མེ་ཕེབས་
པར་བཞུགས་པའི་གསོལ་བ་བཏབ་ཀྱང༌། རྗེ་ཉིད་དུས་གསུམ་མཁྱེན་པའི་ཡེ་ཤེས་ཀྱིས་ཆོས་
ཐམས་ཅད་སྒྲིབ་མེད་གཅིག་ཆར་དུ་གཟིགས་པའི་བཀའ་ལས། ད་ལན་ཅིས་ཀྱང་སོག་ཡུལ་
དུ་འགྲོ་དགོས་ཡོད་ཅིང༌། ལོ་གསུམ་ནས་ངེས་པར་ཉེས་སྐྱོན་མེད་པར་འཁོར་འོང་ཞེས་ཞལ་
བཞེས་བཟང་པོས་བདག་ཅག་རེ་ལྟོས་བཅས་ཐམས་ཅད་ལ་དབུགས་འབྱིན་པར་གནང༌།
ཧོར་ཟླ་དྲུག་པའི་ནང་དུ་དཔོན་སློབ་རྣམས་གདན་ས་ཉིད་ནས་ཕྱག་བཏེགས། ཧོར་སྟོད་ནས་
དཔོན་སས་མཇལ་བར་ཕེབས། ལམ་གྱི་སེམས་ཅན་རྣམས་ཀྱི་དོན་རྒྱ་ཆེར་གནང་ནས་བྱང་
ལམ་བསྲང་ནས་ཕེབས་པས་འབྲི་ཆུ་ཤིན་དུ་རྒྱས་པ་ལ་ཕྱག་ནས་གནང་བ་ཙམ་གྱིས་ཆུང་ངུ་
སོང་ནས་དཔོན་སློབ་རྣམས་ཉེ་ཞོ་མེད་པར་ཕར་ཐོན། དེ་བཞིན་དུ་རྨ་ཆུ་ལ་ཡང་ཕྱག་ནས་
གནང་བས་དེ་བཞིན་དུ་བྱུང་ཞིང༌། དཔོན་སློབ་རྣམས་ཆབ་ཀྱི་ཕ་ཀར་ཐོན་འཕྲལ་ཆུ་ནི་སྔར་
ལུགས་བཞིན་རྒྱས་ནས་འདུག་ཟེར། ཆུ་བོ་ཆེན་པོ་གཅིག་ལ་ཉག་གཅིག་ཡོང་བར་འདུག་པ་
ཆད་ནས་གཞན་རྣམས་ཀྱིས་ཅི་བྱར་ཡང་མེད་པ་གཅིག་བྱུང་འདུག་པ། རྗེ་ཉིད་ཀྱི་དགོངས་
པས་དཔྱད་དེ་ལམ་སྣ་གནང་བརྒལ་ཕེབས་འདུག་པ་ཐམས་ཅད་བདེ་བར་ཐོན་དེ། སླར་
ཡང་དེ་མ་ཐག་ཆུའི་གཏིང་བལྟས་དུས་རབ་ཚུགས་པའི་ས་གཏན་མེད་པར་འདུག །དེ་ནས་
20-1-124


རིམ་གྱིས་དབ་ཕྱི་ཐུ་རུ་སོག་པོའི་གདན་འདྲེན་པ་རྣམས་ཀྱང་སླེབས། ཐམས་ཅད་མཁྱེན་པ་
བསོད་ནམས་རྒྱ་མཚོ་ཞིང་བརྫེས་པའི་གཏམ་བྱུང་བས་ཕྱག་གཡོག་རྣམས་སེམས་འཇིགས་
པ་ལ། རྗེ་ཉིད་ཀྱིས་རང་རེ་རྣམས་ལ་ཉེས་སྐྱོན་མེད་ཅེས་དབུགས་འབྱིན་པར་མཛད་པས་
ཡིད་བདེ་བ་ལ་བཀོད། དེ་ནས་མཚོ་སྐྱ་རེངས་དང་སྔོ་རེངས་གཉིས་ཀྱི་བར་གྱི་ལམ་བཟུང་
ནས་ཕེབས་པས། ཆལ་ཕྱི་ཞེས་པའི་བར་རིམ་གྱིས་ཕེབས་ཤིང༌། ཐོག་མར་ཨ་སྦལ་གྱི་དཔོན་
མོ་མཇལ་དུ་བྱུང༌། སླར་མི་ཕྱེད་པའི་དད་པ་ཅན་གྱི་རྒྱལ་པོ་ཨ་སྦལ་ཉིད་ཀྱིས་སྤྱན་དྲངས།
རྒྱལ་བུ་ཉིད་བྲོ་ཚབས་ཆེན་པོ་ཞིག་གིས་བཏབ་ནས་ཡུན་རིང་པོ་ལོན་པ་སྨན་དཔྱད་སོགས་
གང་གིས་ཕན་པར་མ་བྱུང་སྣང་བ། རྗེ་རིན་པོ་ཆེ་ཉིད་ཕེབས་ནས་ཁྲུས་ཆོག་དབང་བཀའ་
སོགས་གནང་བ་དང༌། བཀའ་བསྩལ་ལྟར་གྱི་ཟས་སྤྱོད་བགྱིས་པ་ཙམ་གྱིས་ནད་ཚབ་ཆེན་པོ་
ཡང་འཕྲལ་ཉིད་ནས་ཇེ་དྲག་ལ་སོང༌། ཕེབས་སྐོར་འདི་ལ་སྔར་གྱི་ཡོན་བདག་རྙིང་པ་ཐམས་
ཅད་ཀྱིས་ཀྱང་སྔར་སྲོལ་གྱི་ལུགས་ཁོ་ནས་བསམ་གྱིས་མི་ཁྱབ་པའི་གུས་པ་ཆེན་པོས་མཆོད་
ཅིང༌། བོད་ཆར་གཏོགས་པའི་ཨ་རག་གི་སྡེ་རྣམས་སུ་ཡང་འཕྲིན་ལས་ཀྱི་སྒོ་བསམ་གྱིས་
མི་ཁྱབ་པ་བྱུང་ཞིང༌། སྟག་ལོའི་ནང་དུ་ཐོ་ཡེ་ཤེས་ཀྱི་རྒྱལ་པོ་ཆེན་པོ་ཨལ་དན་གྱི་ཚ་བོ་པེ་
ཆེན་ཁན་གྱིས་སྤྱན་དྲངས། རྒྱལ་མོ་ཁ་ཐུན་སོགས་ཐམས་ཅད་ཀྱིས་མཇལ། མཆོག་ཏུ་གུས་
པ་ཆེན་པོས་འབུལ་ནོད་བསམ་གྱིས་མི་ཁྱབ་པ་བྱུང་ཞིང༌། རང་རང་སོ་སོའི་བློ་དང་མཚུངས་
པར་ཆོས་ཀྱི་འཁོར་ལོ་བསྐོར། འདི་སྐབས་ཀྱང་ཙོང་ཁའི་ས་ཆ་སྟག་ལུང་ལ་གསར་ལྷ་ཁང་
དུ༌། མདའ་དར་འབུམ་དཔོན་གྱིས་སྤྱན་དྲངས་ཤིང་རྙེད་བཀུར་བྱས། ས་ཕྱོགས་དེ་རྣམས་སུ་
ཆོས་ཀྱི་འཁོར་ལོ་རྒྱ་ཆེར་བསྐོར། སོག་པོའི་རྒྱལ་པོ་གུ་ཡེང་ཙོང་ཆི་དེས་ཆིང་གིས་སྤྱན་དྲངས་
ནས་ཆོས་འབྲེལ་མང་དུ་ཞུས། དེ་ནས་རིམ་པས་ཨོ་རུས་ཇུ་ལང་རྒྱལ་པོས་སྤྱན་དྲངས། སྔ་མ་
བཞིན་དུ་འགྲོ་བའི་དོན་དཔག་ཏུ་མེད་པ་བྱུང༌། འབྲུག་གི་ལོ་ལ་ཐོ་མིས་ཀྱི་རྒྱལ་པོ་འཁོར་ལོ་
20-1-125


ཆིང་བས་ངུར་གྱིས་སྤྱན་དྲངས། ཕེབས་བསུའི་ཚེ་མཆོག་ཏུ་དཀར་བའི་རྟ་མཆོག་བཅུ་གསུམ་
དར་དཀར་ཡུག་གི་མཐུར་མདའ་དང་བཅས་ཏེ་ཕུལ། མཇལ་བ་ཙམ་གྱིས་མཆོག་ཏུ་གུས་པ་
ཆེན་པོ་ཐོབ་ནས་ཆོས་མང་དུ་ཞུས་ཤིང༌། དངུལ་གཞོང་མང་པོར་མར་མེ་སྦར་ནས་འབུལ་
བ་སོགས་མཆོད་པའི་ཡོ་བྱད་བསམ་གྱིས་མི་ཁྱབ་པ་བློ་ལས་འདས་པ་བྱུང༌། རྗེ་འདི་ཉིད་
རྩ་བའི་བླ་མ་མཐར་ཐུག་ཏུ་འཛིན་ཞིང་མི་ཕྱེད་པའི་དད་པ་གཞན་དང་མི་མཉམ་པ་ཐོབ། དེ་
ནས་དུས་སྐབས་བདེ་བར་བྱུང་ན། སོག་ཡུལ་མཐུལ་གྱི་རྒྱལ་པོ་གཞན་དང་གཞན་དག་ཀྱང་
སྤྱན་འདྲེན་པའི་འདུན་པ་རྩེ་གཅིག་ཏུ་ཡོད་པར་སྣང་བས། ལོ་མང་པོའི་བར་དུ་ཕེབས་ཐུབ་
པ་དཀའ་བ་འདུག་ཀྱང་རྗེ་ཉིད་ཀྱི་ཡེ་ཤེས་ཀྱིས་གཟིགས་པས་བཀའ་སྩལ་ཕེབས་པ་དེ་ཁོ་ན་
བཞིན་ཡིན་པར་སྣང་བས། རྒྱ་དང་སོག་པོ་འཐབ་དགོས་པའི་སྟབས་ནས། རྒྱལ་བརྒྱུད་སོ་སོ་
གཞན་དང་གཞན་དག་གིས་སྐུ་གཞོགས་སུ་ཇ་འདྲེན་མྱུར་དུ་འབྱོར་ཞིང་སྤྱན་འདྲེན་སོགས་
འཕྲལ་སླེབ་མ་བྱུང་བའི་བར་ལ། ཡར་ཕེབས་པའི་དགོངས་གཏད་གནང་བ་ཕྱག་ཐོག་ཏུ་
ཁེལ་ཐུབ་སྟེ། འདི་ནི་འོ་སྐོལ་ཁ་བ་ཅན་པ་རྣམས་ཀྱི་བསོད་ནམས་ཀྱི་མཐུའོ། །ཡར་ཕེབས་
པའི་ལམ་དུ་ཡི་གེ་སྦ་ཁོམ་ཞེས་པའི་ས་ཆར་སྒར་བྱིངས་རྣམས་ལོགས་ཞིག་ན་ཡོད་ཅིང༌།
གཟིམས་གུར་ཅུང་ཟད་འགོལ་ས་ཞིག་ན་ཡོད་པ། ནམ་ཕྱེད་ཙམ་ཞིག་གི་དུས་སྐུ་གཞོགས་ན་
མི་སུ་ཡང་མེད་པ་ལ། བཀའ་བསྩལ་མང་པོ་ཞིག་གནང་གིན་འདུག་པ། དེ་དང་ཉེ་བ་ན་མཆོད་
གཡོག་པས་ཐོས་ཏེ། བླ་རྡོལ་གྱི་གསུངས་ཡིན་ནམ་སྙམ་དུ་སེམས་ནས་སྙན་དུ་ཕུལ་བས་ཁ་
རོག་སྡོད་གསུངས། ཕྱི་རོལ་ཏུ་བལྟར་སོང་བས། གཟིམས་གུར་གྱི་ལོགས་ན་བྱ་ཤིན་ཏུ་ཆེ་བ་
གཤོགས་སྒྲོ་རེ་ལའང་འདོམ་གཉིས་རེ་ཙམ་ཡོད་པ་ཞིག་རྗེ་རིན་པོ་ཆེའི་ཕྱོགས་ལ་འདུད་པར་
བྱེད་པ་ཞིག་འདུག་པ་མཐོང་བ་ན། དྲུང་དུ་བཏུད་པས་འཕུར་ཐབས་ལ་མི་སྣང་བར་སོང་ངོ༌། །
ནང་དུ་འོང་བས་དེ་ཉིད་མཁྱེན་ཏེ། བྱ་དེའི་དྲུང་དུ་ཁྱོད་ཀྱིས་བཏུད་པ་མ་ལེགས། ཁྱེད་རྣམས་
20-1-126


ཀྱིས་བྱར་མཐོང་བ་ཡིན་གྱི། རྨ་ཆེན་སྦོམ་ར་འཁོར་དང་བཅས་པ་འདིར་འོང་ནས་ཆོས་གཏམ་
འཕེལ་བདོ་པའི་སྐབས་ཡིན་པ་ལ། དེ་ལ་ཆོས་གཏམ་གྱི་བར་ཆད་ཅུང་ཟད་བྱུང་གསུངས། དེ་
ནས་རིམ་གྱིས་བྱང་ལམ་བརྒྱུད་ནས་མྱུར་ཤར་དུ་ཕེབས་པས། རིམ་པས་འབྲི་ཆུ་གོས་གོང་ལ་
རུ་ཕེབས་པའི་ཚེ། གཉན་ཆེན་ཐང་ལྷས་ཕེབས་བསུའི་བཀོད་པ་རྒྱ་ཆེན་པོའི་གཟིགས་སྣང་
བྱུང་བར་སྣང༌། བྱང་ལམ་བརྒྱུད་པའི་སྟབས་ས་ཡང་མཐོ་རབ་ཏུ་ཕེབས། འབྲུག་ལོ་ཧོར་ཟླ་
བཅུ་གཉིས་པའི་ནང་ཡིན་ནའང༌། ནམ་མཁའ་འཇའ་འོད་ཀྱིས་ཁེངས་ཤིང་ས་ཆུ་དྲོས་སོང་སྟེ།
འཁྱགས་པའི་ཞུན་ཆུ་ལ་མི་ཐར་པ་ཙམ་བྱུང་ཞིང༌། གདན་ས་ཆེན་པོ་སྟག་ལུང་དུ་ཕེབས་པ་
དང༌། ཐང་པ་རིན་པོ་ཆེའི་དངུལ་སྐུ་ཕྱག་ནས་མའི་རྒྱབ་ཡོལ། རྒྱ་ཁྱོན་བཟོ་བཀོད་རྒྱུ་ཚོགས་
བསམ་གྱིས་མི་ཁྱབ་པ་དང་བཅས་པ་དེ་ཉིད་ལེགས་པར་གྲུབ་པའི་རབ་གནས་དགའ་སྟོན་
དང་འཛོམས། མཆོག་ཏུ་བཀྲ་ཤིས་ཤིང་རྟེན་འབྲེལ་འགྲིགས་སོ། །
༈ ཡུལ་གང་དམ་ཆོས་སྣང་བ་རྒྱས་མཛད་ནས། །སླར་ཡང་ཀུན༷་ཏུ་དག༷འ་བ་རྡོ་རྗེའི་
གནས། །བཀྲ༷་ཤི༷ས་རྣམ༷་པར་རྒྱལ༷་བའི་ཁང་བཟང་མཆོག །ལྷུན་པོའི་སྤོ་ལ་མགོན་པོ་མཆོག་
ཉིད་བཞུགས། །དུས་གསུམ་ཤེས་བྱའི་གནས་ལ་ཡེ་ཤེས་ནི། །རྣམ་བཀྲའི་གཟུགས་ལ་མིག་
གིས་བལྟ་བ་བཞིན། །མ་ནོར་མཁྱེན་པའི་བཀའ་སྩལ་མངོན་སུམ་གྱུར། །མི་ཤེས་ཡིད་ཀྱི་རི་
མོར་འབྲི་བ་ནི། །མཁྱེན་ལྡན་རྣམས་ཀྱིས་མཆོག་ཏུ་འགྲེལ་བའི་གནས། །འོན་ཀྱང་བླུན་པོ་
རྟག་ཏུ་རང་བློས་སྤྱོད། །འདི་ཡང་ཤིན་ཏུ་རྨད་བྱུང་འབའ་ཞིག་ལགས། །ཞེས་པ་འཕགས་
པའི་བཀའ་མཆོག་ཏུ་མི་བསླུ་བ་ལས་བརྩམས་ཏེ་བསྙད་པའི་སྡེ་ཚན་ཏེ་དགུ་པའོ།། །།
སོག་ཡུལ་དུ་ཕེབས་པའི་བར་ལ་རྗེ་འདི་ཉིད་ཀྱི་ལྕམ་དུ་གྱུར་པ་དཔོན་ས་རྣམ་རྒྱལ་
དཔའ་མོ་གཤེགས་པའི་ནང་རྟེན་དུ། རྗེ་བཙུན་རྡོ་རྗེ་རྣལ་འབྱོར་མ་བདེན་གཉིས་ཞལ་ཅན་གྱི་
སྐུ་བརྙན་མི་ཚད་ཆུང་ཙམ་ཞིག །བལ་པོའི་བཟོ་བོ་མཁས་པས་ལག་འཕྲུལ་ལས་སྔགས་སྐུ་
20-1-127


གསེར་ཟངས་ལས་བཞེངས་པ་ལ་མཚར་བའི་དཔེར་ཐོན་པ་ཞིག་བསྒྲུབ་པར་མཛད།
གཟུངས་བཞུགས་ལ་སོགས་པའི་རིམ་པ་ཐམས་ཅད་གཟབ་རྒྱས་སུ་གནང༌། དེ་ནས་རིམ་
པས་འཁོར་ལོ་བདེ་མཆོག་གི་གསེར་སྐུ། རྗེ་བཙུན་མ་དེ་ཉིད་དང་སྐུ་ཚད་མཉམ་པ་ཞིག་དང༌།
སློབ་དཔོན་རིན་པོ་ཆེ་པདྨ་འབྱུང་གནས་དང་འགྲོ་བའི་མགོན་པོ་ཨ་ཏི་ཤ འབྲོམ་སྟོན་ཆེན་
པོ་རྒྱལ་བའི་འབྱུང་གནས་རྣམས་ཀྱི་སྐུ་བརྙན་མི་ཚད་མ་རེ་རེ་བཞེངས་པར་གནང་ཞིང༌།
གཟུངས་བཞུགས་དང་རབ་ཏུ་གནས་པའི་བར་ཟབ་རྒྱས་སུ་གནང༌། དེ་དག་གི་བར་དུ་ཡང་
ཧོར་དང་བོད་ཀྱི་འགྲོ་དོན་མཛད་པ་ནི་དཔག་ཏུ་མེད། དེ་ནས་འབྲུག་ལོའི་ནང་བདག་ཅག་
སྟོད་ཕྱོགས་ན་ཡོད་པའི་སྐབས་ཤིག་སྒྲོ་རོང་ནས་གཟིམས་དཔོན་ནམ་མཁའ་འབོད་མིར་
གནང་བྱུང་བ་བཞིན། སྐུ་གཞོགས་སུ་འབྱོར། དམ་པའི་ཆོས་ཀྱི་སྒོ་བསམ་གྱིས་མི་ཁྱབ་པ་
བཀའ་དྲིན་དུ་ཞུས་པ་ཡང་བསྩལ། དེ་ནས་སོག་ཡུལ་དུ་ཕེབས་པའི་སྐབས་དད་ཅན་རྣམས་
ཀྱིས་ཕུལ་བའི་གོས་ཡུག་ཤིན་ཏུ་མང་བ་ཕྱག་ཏུ་བཞུགས་པ་རྣམས། སྔ་མ་བཞིན་འགྲོ་བའི་
བསོད་ནམས་ཀྱི་རྟེན་བསྒྲུབ་པར་བཞེད་ཏེ། གོས་སྐུ་སྔ་མའི་སྐབས་ལས་ཀྱང་ཆེས་རྒྱུ་ཚོགས་
བཟང་པོའི་གོས་སྐུ་ཁྱད་པར་ཅན་བསྒྲུབ་པར་དགོངས་ཤིང༌། འདི་སྐབས་ཀྱང་གོས་ཡུག་ཆེན་
པོ་སྟོང་ཕྲག་སྐོར་སོང་ཞིང༌། ཇུས་གསར་རྙིང་སྔོ་ལྗང་མཆིན་ཁ་སོགས་གསེར་མ་ཆེས་ཤིན་ཏུ་
བཟང་བ་རང་ཡང་དཔག་ཏུ་མེད་པ་འདོན་པར་མཛད་འདུ་བྱེད་པ་སྤྲུལ་སྐུ་སྨན་ཐང་བ་
སོགས་ཀྱང་བཀའ་བསྩལ་གྱིས་བསྡུ་བར་མཛད་དེ། རྣམ་རྒྱལ་རབ་བརྟན་གྱི་ནུབ་ཕྱོགས་ཀྱི་
ས་ཁད་སྙོམས་པ་ཞིག་ཏུ། གཟའ་ཚེས་དགེ་བ་ལ་སྤྲུལ་སྐུ་སྨན་ཐང་བས་སྐྱ་རིས་བཏབ་ཉི་མ་
གཉིས་ཙམ་ལ་སྐྱ་རིས་རྣམས་ཡོངས་སུ་རྫོགས། དེ་འཕྲལ་དུ་རྩེའི་མཆོད་ཁང་ཞིག་གི་ཁྱམས་
སུ་བཟོ་པ་རྣམས་ཀྱིས་བཟོ་བཙུགས་ཏེ། ཟླ་བ་གཅིག་ལྷག་ཙམ་ནས་ཡོངས་སུ་རྫོགས་པར་
འགྲུབ། འདི་ཡང་སྔར་གྱི་གོས་སྐུ་ཆེན་མོའི་འཁོར་གྱི་ཚུལ་དུ། འཕགས་པའི་གནས་བརྟན་
20-1-128


ཆེན་པོ་བཅུ་དྲུག །རྒྱལ་ཆེན་བཞི། ཧ་ཤང༌། དྷརྨ་ཏ་ལ། གཞན་ཡང་ལྷ་ཆེན་འགའ་ཞིག་དང་
བཅས་དཀྱུས་ཀྱི་རིང་ཐུང་གོས་སྐུ་ཆེན་མོ་དང་མཉམ་ཞིང༌། ཞིང་ནི་གཉིས་ཀར་ལ་ཕན་ཚུན་
འདོམ་དྲུག་ཙམ་ཡིན་པ། བཟོ་ཁྱད་མཚར་བའི་ཕུལ་དུ་ཕྱིན་པ་བྱུང༌། གཟའ་ཚེས་བཟང་བ་ལ་
བདག་ལ་རབ་གནས་གྱིས་ཞེས་བཀའ་སྩལ་ཏེ། འཁོར་ལོ་བདེ་མཆོག་གི་དཀྱིལ་འཁོར་ཆེན་
པོ་ཞལ་ཕྱེ་ཞིང༌། རབ་གནས་ཀྱི་ཆོ་ག་བྱིངས་རྣམས་ལེགས་པར་གྲུབ་པ་ན། གཙུག་ལག་ཁང་
གི་བྱང་དངོས་སུ་ལེགས་པར་བཀྲམ་སྟེ། འདྲེན་པ་ཁུ་དབོན་གཉིས་གཙོ་བོར་བཞུགས་པའི་
དགེ་འདུན་པ་རྒྱ་མཚོའི་ཚོགས་ཐམས་ཅད་ཀྱིས་བརྟན་བཞུགས་ཤིས་བརྗོད་དང་བཅས་ཏེ་
མེ་ཏོག་གཏོར། དེ་སྐབས་ནམ་མཁའ་ལ་འཇའ་འོད་ཀྱི་གུར་ཁྱིམ་རིམ་བརྩེགས་མང་པོ་དང༌།
མེ་ཏོག་གི་ཆར་འབེབས་ཤིང་ཉི་ཟླ་སྐར་གསུམ་འཛོམས་པ་སོགས་ཡ་མཚན་པའི་ལྟས་མང་
པོ་བྱུང༌། དེ་ནས་སླར་ཡང་མི་འཇིགས་སེང་གེའི་ཁྲི་ལ་ཆོས་ཀྱི་རྗེ་རིན་པོ་ཆེ་ཉིད་བཞུགས་པ་
ལ། བདག་ཅག་རྣམས་ཀྱིས་ཤིས་བརྗོད་མངའ་གསོལ་བགྱིས། རྗེ་བཙུན་བླ་མ་སྐུ་ཚེ་བརྟན་
པ་ལ་སོགས་པའི་རྟེན་འབྱུང་གི་སྒོ་འགྲིག་པར་ངེས་ཤེས་སྐྱེས། ཉིན་ཕྱེད་ཙམ་ལ་བསྟན་པའི་
གཙོ་བོ་རྗེ་བཙུན་ཁུ་དབོན་རྣམ་གཉིས་སྐུ་ཆས་ཤིན་ཏུ་ཟབ་པ་སོགས་ཀྱིས་མཐོང་བ་ཙམ་
གྱིས་མཆོག་ཏུ་ཟིལ་ཆེ་བའི་སྐུའི་རྣམ་ཆ་རིན་པོ་ཆེའི་ཁྲི་ལ་ཞབས་ཟུངས་བརྟན་པར་མཛད།
ཕྱག་ཕྱིར་བདག་དང་མཁས་པའི་དབང་པོ་དུས་ཞབས་པ་ཆེན་པོ་བྱམས་པ་ལྷུན་གྲུབ་པ་དང༌།
དྲུང་པ་ཀ་དྲུག་པ་དང༌། དྲུང་པ་དཀྱིལ་སྲང་བ་དང༌། དྲུང་པ་འོལ་བ་སོགས། བླ་མ་སློབ་དཔོན་
ཤིན་ཏུ་མང་བ་དང༌། ལྷ་བཟོ་བ་གནས་བརྟན་ཆེན་པོ་བློ་བཟང་རྒྱ་མཚོ་བ་ལ་སོགས་པ་བཟོ་
རིས་པ་ཐམས་ཅད་དང༌། གྲྭ་ནང་གླིང་གསུམ་གྱི་མི་སྡེ་ལ་སོགས་པའི་དྲག་བསྡུས་འབའ་ཞིག་
པ་ལ་གྲྭ་པ་ལྔ་རྒྱ་ཙམ་བྱུང་ཞིང༌། ལྷ་ཁང་ཤོད་གོ་མཚམས་མེད་པར་གང་བའི་སྟོན་མོའི་བཀོད་
པ་བསམ་གྱིས་མི་ཁྱབ་པ་གཙང་ཞིང་གྱ་ནོམ་པ། སྔོན་ཐུབ་པ་ཆེན་པོ་འཕགས་པའི་དགེ་
20-1-129


འདུན་དང་བཅས་པ་ལ། ལྷ་དང་མི་ཡི་རྒྱལ་པོ་རྣམས་ཀྱིས་བསྙེན་བཀུར་བའི་རྣམ་ཆ་ལ་ཡང་
འདི་ལྟ་བུའོ། །ཞེས་རྗེས་སུ་དཔོག་པར་བསྐྱེད་ཅིང༌། བདག་ཅག་རབ་གནས་བགྱི་བ་རྣམས་
ནས་བརྩམས་གང་ལ་གང་འོས་ཀྱི་ཡོན་རྫོངས་གནང་སྦྱིན་གཞལ་བར་དཀའ་བས་གཙུག་
ལག་ཁང་ཆེན་མོ་དེ་ཉིད་ཀྱང་བུན་ལོང་དུ་གྱུར་ཞིང༌། ཕུན་སུམ་ཚོགས་པའི་དགེ་མཚན་ནམ་
མཁའ་ལ་རེག་པར་གྱུར་ཏོ། །དེ་དུས་བདག་གིས་ཀྱང་སྐུ་དྲུང་དུ་ཟླ་བ་བཞིར་ཉེ་བར་བསྡད་
ཅིང༌། བཀའ་བསྩལ་ནན་གྱིས་གནང་བ་ལ་བརྟེན་ནས། བདག་ལྟ་བུ་ལ་འབུལ་བའི་ནུས་པ་
གཏན་མེད་ཀྱང༌། བླ་མའི་བཀའ་བསྩལ་དེ་ཉིད་བྱིན་རླབས་ཀྱི་སྒོ་ཡིན་པར་བསམ་ནས།
དགོངས་བཞེད་ཀྱི་ཆོས་ཐམས་ཅད་འབུལ་བའི་ལུགས་སུ་བགྱིས། དེ་དག་ཀྱང་བསམ་མི་
ཁྱབ་ཀྱི་ཡན་ལག་བླ་མ་སྒྲུབ་པ། ཕྱག་རྒྱ་བཞིའི་སྙིང་པོ་ཡེ་ཤེས་འཆར་བ། དྲན་པ་གཅིག་པ།
སྒྲོན་མེ་གཅིག་པ། ཡན་ལག་དྲུག་ལ། ཛཱ་ལན་དྷ་རའི་དོ་ཧའི་སྐོར། སེམས་ཀྱི་ཕྱག་རྒྱ་ཡི་གེ་
བཞི་པ། རང་བྱིན་གྱིས་བརླབས་པའི་རིམ་པ་དང༌། རྔོན་པའི་གདམ་ངག །ཕག་མོ་སྣ་ཚོགས་
མདོག །ཕག་མོ་ཀེང་རུས་ལ་བཞུགས་པ། རིག་པ་འཛིན་མ་རྩེན་མ། ཁམས་གསུམ་དབང་
བསྡུད་ཀྱི་སྤྱན་རས་གཟིགས། ནག་པོ་ཆེན་པོའི་སྒྲུབ་ཐབས་རིགས་གསུམ་ཙམ། ཕག་མོ་ཅ་
ཅོ་སྒྲོགས་མ། བདག་མེད་མ་དང་བའི་རྡོ་རྗེ་མ་ལ་སོགས་པ་རྣམས་དང༌། རྡོ་རྗེ་ཐེག་པའི་ལམ་
བཟང༌། བཀའ་བབས་བདུན་ལྡན་གྱི་སྐོར་རྣམས་ཏེ་སློབ་དཔོན་ཆེན་པོ་ཞི་བ་སྦས་པ་ནས་
བརྒྱུད་པ་རྣམས་དང༌། ས་ལུགས་ཀྱི་དམར་མོ་སྐོར་གསུམ་ལ་སོགས་པ་མང་དུ་ཕུལ། བདག་
ཕྱིར་འོང་ཁར་བརྟན་བཞུགས་ཟབ་རྒྱས་སུ་ཕུལ་ནས། མྱུར་དུ་མཇལ་བར་སྨོན་ལམ་བཏབ་
ནས་སྟོད་ཕྱོགས་ལ་འོང་ཞིང༌། དུས་འདི་སྐབས་ཕྱིན་ཆད་ནས་ཕལ་ཆེར་རྣམ་རྒྱལ་རབ་བརྟན་
ཉིད་དུ་ཡང་དག་འཇོག་ཉིད་ལ་གཙོ་བོར་བཞུགས་ཤིང༌། རྣམ་རྒྱལ་རབ་བརྟན་གྱི་མདུན་
ངོས་ཀྱི་རི་དེ་ལ་ས་དཔྱད་ལ། རྡོ་རྗེ་ཕག་མོ་དང༌། གུ་རུ་པདྨ་སམ་བྷ་ཝ་དང༌། ནོར་བུ་དགའ་
20-1-130


འཁྱིལ་གྱི་གཟུགས་བརྙན་འདྲ་རུང་དུ་ཡོད་པ་དེ་རྣམས་དངོས་སུ་ཡེ་ཤེས་ཀྱི་གཟིགས་པའི་
གསལ་སྣང་ལ་ཡང་ཡང་ཤར། འདི་ནི་སངས་རྒྱས་དང་བྱང་ཆུབ་སེམས་དཔའ་རྣམས་གནས་
ཆེན་བྱིན་རླབས་ཅན་གྱི་ཚུལ་དུ་ཡང་སྤྲུལ་ནས་སེམས་ཅན་གྱི་དོན་མཛད་པར་བཤད་པ་
བཞིན། ཇི་ལྟ་བའི་དངོས་གནས་ཀྱི་གནས་ཚུལ་གཟིགས་པ་ཡིན་གྱི་ཉམས་ཀྱིས་སྣང་བ་ཙམ་
ནི་མ་ཡིན་ནོ། །དེའི་ཕྱིར་དེ་དག་ས་རྡོ་ཕལ་པར་བལྟ་བར་མི་བྱའོ། ལུག་ལོར་རྣམ་རྒྱལ་རབ་
བརྟན་དུ་མགོན་ཁང་གསར་བཞེངས་གནང༌། ལ་སྟོད་ཉི་ཤར་བ་ཡིན་པའི་ལྷ་བཟོ་བླུན་བླུན་
འདྲ་བ་ཞིག་གིས་འདུ་བྱས་པའི་ཡེ་ཤེས་ཀྱི་མགོན་པོ་ཕྱག་བཞི་པའི་སྨན་སྐུ་དངོས་བྱོན་འདི་
ཉིད་བཞེངས་པར་གནང་སྟེ། མགོན་སྐུ་དེ་ནི་བཟོ་ཁྱད་མཁས་པའི་ཕུལ་དུ་ཕྱིན་པའི་རིག་
བྱེད་པ་མཐའ་ཡས་པའི་བློ་གྲོས་བསྡུ་བར་ཡང༌། བློ་ལ་མི་འཆར་བའི་བཟོ་བཀོད་ཕུན་སུམ་
ཚོགས་པར་རང་བྱུང་འདུག་ཅིང༌། སྐུ་ལ་ནམ་ཡང་རྡུལ་མི་ཆགས་པ། སྐུ་ཚད་དངོས་གནས་ལ་
མི་ཚད་གཞོན་ཙམ་དུ་འདུག་ནའང་མ་བརྟགས་པའི་ཚེ་སྐུ་ཚད་ཆེས་ཆེ་བ་ལྟར་སྣང་བ། མཐོང་
བ་ཙམ་གྱིས་དགའ་བ་དང་འཇིགས་པ་དང་བག་དྲོ་བ་དང༌། དཔའ་ཉམས་སྐྱེ་བ་ལ་སོགས་
པའི་སེམས་ཉམས་དུ་མ་འཆར་ཐུབ་པ་ཞིག་སྣང་སྟེ། འདི་བཞེངས་པའི་སྐབས་སུ་ཤིན་ཏུ་
འཚུབ་འགྱུར་ཆེ་བ་བྱུང་ཞིང༌། མཚན་མོ་ལྟ་ཅི་སྨོས་ཉིན་མོ་ཡང་ས་ཕྱོགས་དེར་ཟིལ་གྱིས་མི་
ཚུག་པ་ཙམ་བྱུང་འདུག་ཅིང༌། ཁྱད་པར་ལྷ་བཟོས་དངོས་སུ་མཐོང་བ་ལ། ཁྱི་ནག་ཤིན་ཏུ་ཆེ་
བ་མེ་སྟག་ལྟ་བུའི་མིག་ཡོད་པ་ཞིག་ཁོང་རང་གི་རྩར་མངོན་སུམ་དུ་བྱུང༌། གཞན་ཡང་མེ་
འབར་བ་སོགས་ཆོ་འཕྲུལ་མང་དུ་བྱུང་བར་སྣང༌། འདིའི་གཟུངས་བཞུགས་སུ་དཔལ་ཆེན་རྒ་
ལོའི་ཐུགས་དམ་རྟེན་ལ་སོགས་པ་བྱིན་རླབས་རྟེན་དཔག་ཏུ་མེད་པ་བཞུགས། དེ་ཉིད་མགོན་
ཁང་དུ་སྤྱན་འདྲེན་པ་མཛད་དོ། །གཞན་ཡང་གཉན་ཐོག་པའི་རྡོ་རྗེ་འཛིན་པ་རྣམས་ཀྱི་ཐུགས་
དམ་རྟེན། བདེ་མཆོག་མགོན་པོ་ཕུར་བ། གཤིན་རྗེ་གཤེད་ལ་སོགས་པ་བྱིན་རླབས་ཅན་གྱི་
20-1-131


རྟེན་དུ་མ་དང༌། རྒྱལ་པོ་ཆེན་པོ་རྣམ་ཐོས་སྲས་ཀྱི་རྟེན་སྐུ་བྱིན་རླབས་ཅན་ཕྱག་བཞེངས་
གནང་བ་ཡང༌། ཁང་བཟང་དང་བཅས་པ་རྟེན་འབྲེལ་དུ་མ་དང་བཅས་པའི་བཞུགས་སུ་
གསོལ་སྤྱན་གཟིགས་མཆོད་རྫས་བསམ་གྱིས་མི་ཁྱབ་པ་གཏིབས་པར་གནང༌། ཡང་མགོན་
པོའི་དངུལ་སྐུ་རྐང་གང་མ་ཞིག་ཀྱང་བཞེངས་པར་གནང་ཞིང༌། སྔ་ཕྱི་ཞལ་ཐང་བཞེངས་པར་
གནང་བ་ནི་བགྲང་བར་མི་སྤྱོད་པས་མ་བྲིས་སོ། །གཞན་ཡང་རྣམ་རྒྱལ་རབ་བརྟན་གྱི་གནས་
མཆོག་འདིར། རྗེ་བཙུན་མ་འཕགས་མ་སྒྲོལ་མ་དཀར་མོའི་ཞལ་གཟིགས་ཡང་ལན་མང་དུ་
བྱུང་བར་སྣང༌། ལོ་རེ་བཞིན་དབྱར་ཐོག་ལ་སྐུ་ཆབ་མཚན་ཏུ་བཞུགས་པ་རེ་གནང་བ་དང་
སྦྲགས། བྱང་ཕྱོགས་ཀྱི་འབྲོག་རིས་དང༌། ཧོར་སོགས་ཀྱི་འགྲོ་དོན་རྒྱ་ཆེར་གནང་ནས་ཕལ་
ཆེར་གནས་མཆོག་དམ་པ་རྣམ་རྒྱལ་རབ་བརྟན་ཉིད་དུ་གདན་ཕེབས། རིམ་པར་གཟིམ་ཁང་
ཚོམ་ཆེན་སོགས་ཀྱང་ལེགས་པར་གྲུབ། དེ་ནས་བཞུགས་ཡུལ་ཡེ་འུར་མཛད་ཅིང༌། དེར་ཕྱིན་
མི་དང་ཕྱག་གཡོག་བྱིངས་མི་འགྲོ་ཞིང༌། དཔོན་སློབ་ཉུང་བསྡུས་ཙམ་ཕྱི་མཚམས་ཁོ་ནས་
བཞུགས་པ་དང༌། དོན་མི་འགང་ཆེ་བ་རྣམས་ལ་ཡུག་རེ་ཚོམས་ཆེན་དུ་མཇལ་འཕྲད་གནང༌།
གཞན་ངོར་ཚུལ་སྟོན་པ་ལ་འདི་སྐབས་ཐུགས་དམ་རྟོགས་པ་གོང་ནས་གོང་དུ་འཕེལ་བ་ལ།
སྔ་དགོང་གཞན་གང་ལས་ཀྱང་བོགས་ཆེ་བའི་ཚུལ་དུ་བྱུང༌། སྔོན་སྐྱེར་རྒང་བ་ཆེན་པོ་ལ། ཏེ་
སེའི་རི་པ་རྣམས་ཀྱིས་ཞུས་པ་ལྟར་འདུག་པ་དམ་པ་འདིས་སྔོན་དུ་བསྙེན་པ་ཆེད་དུ་གནང་བ་
རྣམས་ཕར་བཞགས། ད་ལྟ་མི་ཚིག་དང་འདྲེས་མར་གསུངས་བཟླས་གནང་བ་རྣམས་ཀྱང་
གྲངས་མ་བཏབ། ལྷ་གཞན་དང་གཞན་གྱི་གསུངས་བཟླས་གནང་བ་རྣམས་ཀྱང་བོར་ནས།
ཉིན་མཚན་སྔ་དགོང་སོ་སོའི་ཐུགས་དམ་ཐུན་གྱི་གསུངས་བཟླས་འབའ་ཞིག་བསག་པ་
ལའང༌། ཕྱག་འཕྲེང་སྔ་མ་ཞིག་གི་སྟེང་ནས་བདེ་མཆོག་གི་ཉེ་སྙིང་རང་ཡང་དུང་ཕྱུར་དུ་ཉེ་བ་
ཙམ་དང༌། ད་ལྟའི་ཕྱག་འཕྲེང་འདི་ཀའི་སྟེང་ནས་ནི་དུང་ཕྱུར་ལྷག་ཙམ་ཡང་སོང་བར་སྣང་
20-1-132


ངོ༌། །ཐུགས་དམ་གྱི་རིམ་པ་གཞན་ཡང་འདིས་དཔག་པར་ནུས་པས། རྒྱལ་བ་རྒོད་ཚང་བ་
ཆེན་པོ་སྤྲོས་མེད་ཀྱི་ངང་ནས་སྤྲོས་བཅས་ཀྱི་ཐུགས་དམ་མི་བཅུས་ཀྱང་མི་ཟིན་པ་ཙམ་མཛད་
པར་གྲགས་པ་ཡང་འདི་ལས་གཞན་དུ་ཅི། ཁྱི་ལོའི་དབྱར་སྨད་ཀྱི་དུས་གསོལ་གྱི་སྙུང་རོ་
ལངས་པའི་རྣམ་པས། སྐུ་ཤིན་ཏུ་བསྙེལ་བའི་ཚུལ་གྱི་སྐུ་ཁམས་དུབ་པར་བཞུགས་པ་ལ།
སྨན་དཔྱད་སོགས་ཀྱིས་འཕྲོད་བརྟེན་ཅིས་ལེགས་ལམ་འབུལ་བཞིན་ཡོད་པའི་སྐབས། རྗེ་
བཙུན་རྡོ་རྗེ་འཆང་ཆེན་པོ་ལྷ་དབང་གྲགས་པའི་ཞབས་ཀྱིས་བདུད་རྩིའི་རིལ་བུ་སྒྲུབ་པར་
གནང་བས་སྐུ་སྐལ་འབུལ་བའི་གདོང་གྲོགས་བདག་ལ་གྱིས་ཞེས་བཀའ་བཀོད་གནང་བ་
དང༌། བདག་གི་རྨི་ལམ་གྱི་ལྟས་ལ། རྗེ་ཉིད་མཁའ་འགྲོ་མ་གཉིས་ཀྱིས་སྤྱན་འདྲེན་པ་ལྟར་
འདུག་པ་ལ། བདག་གིས་གསོལ་བ་དྲག་ཏུ་བཏབ་པས་བཤོལ་ཐེབས་པའི་སྣང་བ་ཞིག་བྱུང་
བ་ལ་བརྟེན། བརྟན་བཞུགས་ཤིག་དང་སྦྲགས་ཕོ་ཉ་ཟུང་འབྲེལ་མྱུར་ཤན་དུ་བརྫངས། ཁོང་
རྣམས་ཀྱིས་སྐུ་དྲུང་དུ་ཕྱིན་དུས་སྐུ་ཁམས་ཤིན་ཏུ་བསྙེལ་བ་རང་གིས་སྐུ་མཚམས་དམ་པོར་
ཡོད་འདུག་པ། ཐོག་མར་བརྡ་ལེན་འཕྲོད་དཀའ་ཙམ་བྱུང་འདུག་ཀྱང་ཐུགས་རྗེས་འཕྲལ་དུ་
འབུལ་ཐུབ་འདུག་ཅིང་དེ་མ་ཐག་བཞུགས་གདན་ལས་ལྡིངས་བར་ཡང་གནང་ཞིང༌། ཤིན་དུ་
དགྱེས་པ་ཆེན་པོས་ད་ནི་ཁམས་བདེ་བར་འོང་ཞེས་བཀའ་བསྩལ་བ་བཞིན། ཉིན་རེ་བཞིན་
ཇེ་དྭངས་ལ་སོང༌། ཞག་བཅུ་སྐོར་ཙམ་ནས་སོར་ཆུད། བླ་མ་ཉིད་ཀྱི་ཐུགས་རྗེས་དང༌། བདག་
ཅག་གི་མོས་པ་དང༌། གྲུབ་ཐོབ་རྣམས་ཀྱི་རྟེན་འབྲེལ་ཕྱིན་ཅི་མ་ལོགས་པའི་རྟགས་སུ་སྣང་
ངོ༌།།
༈ མོས་གུས་ཨནྡ་རྙིལ་གྱི་མེ་ལོང་དུ། །ཡ་མཚན་གཟུགས་བརྙན་མ་འགགས་འདིར་
ཤར་ཏེ། །རྒྱུ་རྐྱེན་ལེགས་པར་ཚོགས་པ་གང་ཡིན་ལས། །ངེས་པར་འབྲས་མཆོག་སྨིན་པ་
དངོས་པོའི་གཤིས། །དབང་བཅུ་བརྙེས་རྣམས་གཤིན་རྗེའི་གྲོང་བཅོམ་ནས། །དུས་ཀྱི་ཉིན་
20-1-133


པར་གྱུར་པ་སྲིད་མ་ཡིན། །བཻཌཱུར་ས་གཞིར་ལྷ་དབང་གཟུགས་བརྙན་བཞིན། །དད་པའི་ས་
གཞི་རྙོག་བྲལ་མ་བྲལ་ཁྱོད། །དེ་སླད་དད་པའི་དབང་པོའི་བརྟས་པ་ལས། །ཞབས་པད་ཡུན་
རིང་འཚོ་ཞིང་གཞེས་པ་འདིས། །སྲིད་པའི་མུན་པར་དམ་ཆོས་ཉི་མ་ཡི། །བསྐལ་བཟང་གྱུར་
པ་འདི་ལས་ངོ་མཚར་གང༌། །ཞེས་བཤད་སྒྲུབ་ཀྱིས་འགྲོ་བའི་དོན་བླ་ལྷག་ཏུ་གྱུར་པ་དང༌།
མོས་གུས་ཀྱི་མཐུ་གསལ་བར་བསྟན་པ་ལས་བརྩམས་ཏེ་བསྙད་པའི་སྡེ་ཚན་ཏེ་བཅུ་པའོ།། །།
དེ་སྐབས་བཀའ་གནང་ལ། བདག་ལ་ཕག་ལོའི་ནང་དུ་ཅིས་ཀྱང་སླེབས་པར་གྱིས་ཞེས་
ཕེབས་པ་བློ་ལ་བཞགས་ཏེ། ཕག་ལོའི་ནང་དུ་ཅི་སླེབས་ཀྱི་རྩིས་བྱས་རུང༌། བྲེལ་བས་བག་
ཙམ་འགྱངས་ཏེ། བྱི་ལོ་ཧོར་ཟླ་དང་པོའི་ཚེས་བཅོ་ལྔ་ལ་ཞབས་དྲུང་དུ་སླེབས། ཞལ་མཇལ་
མ་ཐག་ཤིན་ཏུ་དགྱེས་པ་ཆེན་པོས་ཞལ་འཛུམ་གྱིས་བསུ་བར་གནང་བྱུང་བས། དད་པ་དང་
དགའ་བས་བསྐུལ་བའི་ལུས་སེམས་བཟུང་མི་ཐུབ་པ་ལྟ་བུས་སྣང་བ་བན་བུན་དུ་འགྲོ་བ་
ཞིག་བྱུང་ཞིང༌། སྔ་མ་ཐམས་ཅད་ལས་ཀྱང་འདི་སྐབས་སུ་ལྷག་པར་ཐུགས་རྗེས་བཟུངས།
ཆོས་དང་གདམས་ངག་ཟབ་དགུ་ཐམས་ཅད་བཀའ་དྲིན་དུ་ལྷུག་པར་བསྩལ་ཏེ། དཔལ་རི་བོ་
ཆེའི་གདན་རབས་ནས་བརྒྱུད་པའི་གདམས་ངག་ཡོངས་སུ་རྫོགས་པ་དང༌། འགྲོ་མགོན་ཕག་
གྲུའི་བཀའ་འབུམ། མགོན་པོའི་ཉམས་ཁྲིད་རྒྱབ་བརྟེན་ཆོས་སྐོར་མཐའ་དག་དང་བཅས་
པ་བཀའ་དྲིན་ནོད་པས་མཆོག་ཏུ་ཚིམ་པ་ཐོབ། བདག་སྐུ་དྲུང་དུ་སླེབས་ཙ་ན་སྐུ་ཁམས་ཅུང་
ཟད་དུབ་པ་ཞིག་སྣང་ཞིང༌། དེ་མཐུན་གྱི་བླ་མ་ཉིད་ཀྱིས་བཀའ་གནང་ཁུར་ལེན་པའི་གྲུབ་
རྒྱལ་མ་དང་ལྷ་དགུ་མའི་ཚེ་དབང་བརྒྱ་རྩ། རྣམ་འཇོམས་ཀྱི་ཁྲུས་བྱབ་སོགས་ཕུལ་བས་སྐུ་
ཁམས་དྭངས་སྐྱེད་ཤིན་ཏུ་ཆེ་བར་བྱུང་ཞིང༌། དེ་རྗེས་སུ་བརྟན་བཞུགས་གསོལ་འདེབས་
ཤིག་ཀྱང་ཕུལ་བས་རྟེན་འབྲེལ་ཤིན་ཏུ་ལེགས་ཤིང༌། སྐུ་ཁམས་ཤིན་ཏུ་བཟང་བར་བྱུང༌།
སྤྱིར་ནས་རྗེ་རིན་པོ་ཆེ་འདི་ཉིད་སྐུ་བསྙེལ་བ་ལྟར་སྟོན་པ་འདི་དག་ནི། གཞན་ངོར་རྟོགས་པ་
20-1-134


ཁྱད་པར་ཅན་རེ་མངོན་དུ་གྱུར་བའི་ལྷོངས་ཀྱི་ཚུལ་ཡིན་པར་སྣང་བས། སྐུ་བསྙུན་པར་གྱུར་
བའི་ཚེ་ཟླ་བ་མང་པོར་ཕྱག་རྩ་རྣམས་མི་མངོན་པ་སོགས་ནི་ད་ལྟའི་སྐྱེ་བོ་རྣམས་ཀྱིས་རང་བློ་
དང་བསྟུན་པའི་སྣ་ཚོགས་པར་གླེང་བ་ཞིག་ཡོད་ནའང༌། དངོས་གནས་ནི་རྩ་རྣམས་དབུ་མར་
དག་པ་དང༌། རླུང་རྣམས་ཐིག་ལེར་ཐིམ་པའི་མངོན་རྟགས་ཁྱད་པར་ཅན་དུ་སྣང་ལ། དོན་
དམ་པར་ནི་གཞན་རྣམས་ཀྱིས་སྐུའི་རིམ་འགྲོ་བགྱིད་པ་ལ་སོགས་པས་ཀྱང་བསོད་ནམས་
ཀྱི་ཚོགས་རྒྱ་ཆེན་པོ་སྤེལ་བའི་སླད་དུ་ཚུལ་དེ་བཞིན་དུ་སྟོན་པར་མཛད་པ་ཡིན་ནོ། ། བར་
སྐབས་འདིར་ཧོར་སྟོད་སྨད་རྣམས་ཀྱི་དཔོན་རྣམས་ཐམས་ཅད་སྟག་ལུང་ཉིད་དུ་འཛོམས་པ་
ལ། ལེགས་བསྒྲིགས་ཀྱི་བཀའ་བསྩལ་ཡང་དག་པར་གནང༌། སྔ་གོང་ཁྱི་ལོར་ཞིག་གསོས་
ཀྱི་དགོངས་པ་ཤར་ཡང་སྡེ་གཟར་ལ་བརྟེན། འཐེན་པ་གནང་དགོས་ཤར། སླར་འདི་སྐབས་
ཕྱག་གི་དངོས་པོ་བུང་ཆེ་བ་ཞལ་ངོ་སོ་སོར་བསྩལ། གླིང་གི་སྤྱིལ་བུར་ཞིག་གསོས་གནང་སྟེ།
སྤྱིལ་བོ་བརྒྱ་དང་བརྒྱད་བཞེངས། མངའ་ཞབས་ལ་བུ་ཁྲལ་གནང་དུས་བཙུན་པ་བརྒྱ་ཉི་ཤུ་
ཙམ་རབ་ཏུ་འབྱིན་པར་མཛད་དོ། །དེ་ནས་དབྱར་སྟོད་དེ་ཆབ་ཚན་ལ་ཕེབས་པ་དང༌། སྐུ་ལ་
ཤིན་ཏུ་འཇུག་པར་འབྱུང་ཞིང༌། བྱང་རིགས་ཀྱི་སེམས་ཅན་རྣམས་ཀྱི་འགྲོ་བའི་དོན་ཅི་རིགས་
པར་མཛད་དེ། སླར་ཡང་གནས་མཆོག་དམ་པ་ཉིད་དུ་ཕྱག་ཕེབས། འདི་སྐབས་བདག་གིས་
ཞབས་པད་ཟླ་བ་དྲུག་ལྷག་ཙམ་འབྲལ་མེད་དུ་བསྟེན། གདམ་ངག་ཟབ་མོ་ལྷུག་པར་སྩལ།
ཟབ་ཆོས་ཀྱི་གླེགས་བམ་མང་པོའང་བདག་ལ་གནང་སྟེ། རྒྱ་ཆེར་ཤོད་ཅེས་བཀའི་གནང་བ་
བྱུང༌། རྗེ་བཙུན་དམ་པ་འདིས་བདག་ལ་དམ་པའི་ཆོས་ཀྱི་བཀའ་དྲིན་རྣམས་ལྟ་སྨོས་ཀྱང་ཅི་
དགོས་འཇིག་རྟེན་ངོ་དང་བསྟུན་པའི་བཀའ་དྲིན་ཡང༌། ཚེ་འདིར་ནམ་ཡང་འཁོར་བའི་ཐབས་
མེད་པའི་ཇི་སྲིད་མངོན་པར་སངས་མ་རྒྱས་ཀྱི་བར་དུ་གསོབ་པར་བགྱིད་ཅིང༌། ནམ་ཞིག་
མངོན་པར་རྫོགས་པར་སངས་རྒྱས་པའི་ཚེ། སེམས་ཅན་གྱི་ཁམས་རྒྱ་མཚོ་འཁོར་བ་ལས་
20-1-135


བསྒྲལ་བ་དེའི་ཚེ་སྐྱབས་གནས་མཐར་ཐུག་དམ་པ་ཁྱེད་ཀྱིས་བདག་ལ་བཀའ་དྲིན་སྩལ་པ་
ཐམས་ཅད་ཀྱི་དྲིན་ལན་བསབས་པ་ཡིན་ནོ་སྙམས་དུ་སེམས་མོ། །བདག་གིས་ཇི་ལྟར་བཀའ་
དྲིན་དུ་ནོད་པའི་དམ་པའི་ཆོས་ཀྱི་སྒོ་རྣམས་ནི་གཞན་དུ་བྲིས་ཟིན་པས་འདིར་མ་བརྗོད་དོ། །
འདི་སྐབས་ཐོ་མིས་ཀྱི་རྒྱལ་བརྒྱུད་དུ་གཏོགས་པ། སོག་པོའི་རྒྱལ་པོ་ཁ་དན་བག་དུར་ཡང་
མཇལ་ཞིང་བཀའ་ཆོས་ཀྱི་འབྲེལ་བ་ཞུར་བྱུང༌། སྔ་གོང་མཇལ་མ་མྱོང་འདུག་ནའང་མཆོག་
ཏུ་གུས་པ་ཆེན་པོས་ཡིད་ཀྱིས་གསོལ་བ་འདེབས་པར་སྣང༌། དེ་ནས་བདག་ཅག་རྣམས་སྐུ་
གཞོགས་ནས་ཡོང་དུས་བཞུགས་གདན་ཕུལ་ཞིང༌། ཚོགས་ཀྱི་འཁོར་ལོ་དང་བཅས་ཞབས་
པད་བརྟན་པར་གསོལ་བ་བཏབ་མཆོག་ཏུ་དགྱེས་པ་ཆེན་པོས་འཚོ་ཞིང་བཞུགས་པར་ཞལ་
གྱིས་བཞེས་པའི་ཕྱིར་འཕགས་པའི་ཚིག་མི་བསླུ་བ་ཡིན་པས། བདེ་བ་དང་ཡིད་བདེ་བ་བླ་
ན་མེད་པ་ཐོབ་པར་གྱུར་ཏོ། །གང་ཞིག་ཞབས་ཟུང་སྲིད་ཞིའི་སྐྱབས་གཅིག་པུ། །མི་འགྱུར་
གཡུང་དྲུང་དཔལ་གྱིས་མངོན་རྒྱས་པ། །འདི་ཉིད་ཁོ་ནས་མཐའ་དག་འགྲོ་བ་རྣམས། །ཆོས་
དང་སྲིད་ཀྱིས་སྐལ་བཟང་ཕུན་ཚོགས་ཐོབ། །འབུམ་ཕྲག་རྒྱུ་སྐར་ཡོད་དམ་མེད་ཀྱང་བླ། །
ཉིན་བྱེད་མགོན་དང་བཅས་ན་ཉིན་མོར་གྱུར། །སྲིད་གསུམ་ཕུན་ཚོགས་གཞན་ནི་ཅི་བདེར་
གྱིས། །རྒྱལ་ཁྱོད་མཆོག་ཏུ་བསྟན་པའི་བཀའ་དྲིན་འཚལ། །དཔག་ཡས་རྒྱལ་བ་སྲས་བཅས་
ཐམས་ཅད་དང༌། །བསྟན་སྲུང་རྣམས་ཀྱང་མགོན་པོ་ཁྱོད་ཉིད་ཀྱི། ། ཞབས་པད་བསྟེན་པའི་
ཐབས་བཟང་མཛོད་ཅིག་ཅེས། །འདི་ཉིད་ཁོ་ན་གསོལ་བ་གདབ་པར་བྱ། །ཞེས་པ་འགྲོ་བ་
ཐམས་ཅད་ཀྱི་བསོད་ནམས་ཀྱི་ཞིང་དུ་འཚོ་ཞིང་གཞེས་པ་བདེན་པའི་ཚིག་གིས་ཞལ་གྱིས་
འཆེས་པ་ལས་བརྩམས་ཏེ་བསྙད་པའི་སྡེ་ཚན་ཏེ་བཅུ་གཅིག་པའོ།། །།
དེ་བས་ན་ད་ལྟ་བདག་ཅག་འགྲོ་བ་ཐམས་ཅད་ཀྱི་མགོན་སྐྱབས་སུ་ཞབས་པད་བརྟན་
པར་གདན་ཆགས་པ་འདིས་འཇིག་རྟེན་མཐའ་དག་བསྐལ་པ་བཟང་པོར་གྱུར་པ་ཡིན་ཞིང༌།
20-1-136


ད་དུང་སྲིད་མཐའི་བར་དུ་ཞབས་པད་བརྟན་ནས་བཞུགས་པར་གསོལ་བ་འདེབས་སོ། །
འདིར་སྨྲས་པ། གང་ཞིག་མཐའ་དག་རྒྱལ་བའི་གསང་བ་གསུམ། །མགོན་པོ་ཁྱོད་
ཀྱི་གསང་གསུམ་དཀྱིལ་འཁོར་ཉིད། །བརྗོད་བྲལ་བསམ་ཡས་དཔག་པར་དཀའ་བ་འདི། །
གསུང་གི་རྡོ་རྗེ་ཅན་གྱིས་བརྗོད་བྱ་ཡིན། །ཡན་ལག་དྲུག་ཅུའི་དབྱངས་ལྡན་གསེར་མངལ་
ཅན། །ཚིག་གི་བདག་མོ་དབྱངས་ཅན་ལ་སོགས་ཀྱང༌། །ཆུ་གཏེར་ཆེན་པོ་སྐྱལ་བས་འཇུག་
པ་བཞིན། །ཆ་ཤས་ཙམ་ཡང་གཞལ་བར་མི་དཔྱོད་ན། །མ་རིག་འཁྲུལ་འཁོར་རྣམས་པར་
འཁོར་བ་ཡི། །བྱིས་པ་རྨོངས་པ་དག་གིས་གོ་སྐབས་ཅི། །འོན་ཀྱང་བསྐལ་མཉམ་གཞན་ལ་
ཕན་པ་དང༌། །རང་གི་བརྗེད་བྱང་ཙམ་དུ་བྲིས་པ་འདིས། །མགོན་པོ་ཁྱོད་ཀྱི་རྣམ་ཐར་ཡོངས་
འཛིན་པའི། །གོ་འཕང་ཐོབ་པའི་རྒྱུར་ཡང་ཅིས་མི་འགྱུར། །དམ་པའི་ཡོན་ཏན་བརྗོད་པའི་
བསོད་ནམས་ནི། །ནམ་མཁའི་ཁམས་སུ་ཤོང་བ་མིན་ཞེས་གསུངས། །འདིར་བརྗོད་གང་
ཡིན་སེམས་ཅན་སྤྱི་མཐུན་ལ། །དངོས་སུ་སྣང་བ་ཁོ་ནས་ཆ་ཙམ་སྟེ། །ཆུང་ངུར་ཆེན་པོར་
བསྔགས་པའི་སྒྲོ་བཏགས་ཀྱིས། །ཕུལ་བྱུང་གཏམ་གྱིས་བརྗོད་པ་ལྷུར་མ་བྱས། །ཀུན་གྱིས་ད་
ལྟ་མངོན་གསུམ་མཐོང་བ་དང༌། །ཞབས་པད་ཡུན་རིང་བརྟན་པ་མང་བའི་ཕྱིར། །བདེན་རྫུན་
རྟགས་དཔྱད་དངོས་སུ་བྱར་ཡོད་པས། །བརྟགས་ན་ཁོ་བོའི་ཚིག་འདིར་ཡིད་ཆེས་འགྱུར། །
དཔག་ཡས་རྒྱལ་བ་རྣམས་ཀྱི་རྣམ་ཐར་རྒྱ་མཚོར་འཇུག་འགྱུར་བ། །རྡོ་རྗེ་འཆང་དབང་
རྣམ་པར་ཐར་པ་དལ་འབབ་ཆུ་རྒྱུན་ཆད་མི་མངའ། །དེ་ལས་མོས་བློའི་སྙིམས་པས་ཅུང་ཟད་
བླངས་བའི་འགྲོ་ལ་སྦྱིན་པ་འདིས། །འགྲོ་ཀུན་སྙིང་གི་གདུང་བ་བསལ་ནས་རྒྱལ་བའི་རྣམ་
ཐར་ཆེར་འཇུག་ཤོག །གཞན་ཡང་མཐའ་ཡས་སྲིད་འདིར་མ་ལུས་དགེ་ལེགས་དཔལ་གྱི་
རོལ་བ་དང་འགྲོགས་པའི། །ཀུན་ཏུ་དགེ་བ་དང་བཅས་ཕྱོགས་ལས་བཀྲ་ཤིས་རྣམ་པར་རྒྱལ་
བའི་དགེ་མཚན་ཅན། །རྒྱུ་དང་མི་རྒྱུ་འགྲོ་འདིའི་དཔལ་མགོན་བྱང་ཆུབ་ཡེ་ཤེས་བཟང་པོ་
20-1-137


ཐོབ་གྱུར་ནས། །འཁོར་བ་ཇི་སྲིད་མ་སྟོང་བར་དུ་ལྷུན་འགྲུབ་རྒྱུན་མི་འཆད་པའི་འཕྲིན་ལས་
ཅན། །རང་གཞན་དོན་གཉིས་རྟག་ཏུ་འགྲུབ་གྱུར་ཅིག །སྲིད་གསུམ་རྒྱལ་བའི་གོ་འཕང་ཐོབ་
གྱུར་ཅིག །ཆོས་ཀྱི་རྒྱལ་སྲིད་དགའ་སྟོན་འཕེལ་གྱུར་ཅིག །ཕྱི་ནང་ཕྱོགས་ཀྱི་ཕན་བདེ་རྒྱས་
གྱུར་ཅིག །རྒྱལ་བ་སྲས་བཅས་བྱིན་རླབས་དང༌། །མགོན་པོ་ཁྱོད་ཀྱིས་ཐུགས་རྗེ་ལས། །སྲིད་
གསུམ་དགེ་ལེགས་ཀུན་འགྲུབ་ཅིང༌། །ཕན་བདེ་འབྱོར་བའི་བཀྲ་ཤིས་ཤོག །ཅེས་པ་དཔལ་
ལྡན་བླ་མ་དམ་པ་དཔལ་སྟག་ལུང་པ་ཆེན་པོ་དོན་གྱིས་སླད་དུ་མཚན་ནས་སྨོས་ཏེ་རྗེ་བཙུན་
ཀུན་དགའ་བཀྲ་ཤིས་རྒྱལ་མཚན་དཔལ་བཟང་པོའི་ཞབས་ཀྱི་རྣམ་པར་ཐར་པ་འཕྲིན་ལས་
རྒྱ་མཚོ་རྣམ་པར་རྒྱས་པ་ཞེས་བྱ་བ་འདི་ནི་རྗེ་བཙུན་བླ་མ་དམ་པ་དེ་ཉིད་ཀྱི་ཐུགས་རྗེས་འཚོ་
ཞིང་ཟབ་མོའི་དོན་ཅུང་ཟད་རིག་པའི་རྒྱལ་ཁམས་ཀྱི་རྣལ་འབྱོར་བ་ཀུན་དགའ་སྙིང་པོ་རྒྱལ་
མཚན་དཔལ་བཟང་པོ་ཞེས་དམ་པ་ཉིད་ཀྱིས་བསྩལ་བའི་མིང་ཅན་གཞན་ཏུ་ཏཱ་ར་ནཱ་ཐ་ཞེས་
མངོན་པར་འབོད་པ་ལ། ལྷ་བཟོ་ཕོ་ལུང་བ་སོགས་རྗེ་བཙུན་འདི་ཉིད་ལ་མི་ཕྱེད་པའི་དད་པ་
ཅན་མང་པོས་བསྐུལ་བ་དང༌། བདག་ཉིད་ཀྱིས་ཀྱང་དད་པའི་གསོས་སུ་འགྱུར་ཞིང༌། རང་
དང་སྐལ་མཉམ་གཞན་ལའང་རྒྱ་ཆེར་ཕན་པར་མཐོང་ནས་དཔལ་ལྡན་བླ་མའི་རྣམ་ཐར་
རྒྱ་མཚོ་ལྟ་བུ་ལས། ཤིན་ཏུ་ལས་ཅན་དག་གིས་མཐོང་བའི་སྤྱོད་ཡུལ་ཅན། ཀུ་ཤའི་རྩེ་མོར་
ཆགས་པའི་ཆུ་ཐིགས་ཙམ་ཞིག་ཉེ་བར་བརྗོད་པ་འདི་ཡང་རང་ལོ་ཉེར་བདུན་པ་ལ་ལྕང་ལོ་
ཅན་ཞེས་བྱ་བའི་གནས་སུའོ། །འདིས་ཀྱང་དམ་པ་འདི་ཉིད་སྐུ་ཚེ་བརྟན་ཅིང་འཕྲིན་ལས་
རྒྱས་པ་དང་སེམས་ཅན་ཐམས་ཅད་བདེ་སྐྱིད་འབྱུང་བའི་རྒྱུར་གྱུར་ཅིག། །།མངྒ་ལཾ།
ལེགས་བཞེངས་འདི་ཡིས་མཐུ་ལས། །བསྟན་འགྲོར་དགེ་མཚན་ཤར་ཏེ། །སྐལ་ངན་
རྒུད་ཚོགས་ཞི་ནས། །རྫོགས་ལྡན་ཆོས་སྤྱོད་གྱུར་ཅིག །
20-1-138


༄༅། །རྗེ་བཙུན་བླ་མ་དམ་པ་ཀུན་དགའ་དཔལ་བཟང་པོའི་
རྣམ་པར་ཐར་པ་ངོ་མཚར་གསེར་གྱི་རྔ་བོ་ཆེ་
ཞེས་བྱ་བ་བཞུགས།
༄༅། །ན་མོ་གུ་ར་ཝེ། དཔལ་ལྡན་བླ་མ་མཆོག་ཏུ་གྲུབ་པའི་དབང་ཕྱུག་ཀུན་དགའ་
དཔལ་བཟང་པོའི་ཞབས་ཀྱི་རྣམ་པར་ཐར་པ་ངོ་མཚར་གསེར་གྱི་རྔ་བོ་ཆེ་ཞེས་བྱ་བ། རྗེ་
བཙུན་བླ་མ་དམ་པ་གྲུབ་པའི་དབང་པོ་གང་གི་ཞབས་ལ་གུས་པས་ཕྱག་འཚལ་ལོ། །བདེ་
ཆེན་དངོས་པོ་ཀུན༷་གྱི་ངོ་བོ་ཉིད། །ལྷན་སྐྱེས་དག༷འ་བའི་ཡེ་ཤེས་མཆོག་བརྙེས་ཏེ། །དཔ༷ལ་
ལྡན༷་སྐལ་བ་བཟ༷ང་པོ༷འི་གདུལ་བྱའི་ཚོགས། །རྡོ་རྗེའི་ས་ལ་འགོད་མཛད་གང་ཁྱོད་རྒྱལ། །
ཕུན་ཚོགས་དངོས་ཀུན་ངོ་བོ་གདོད་ནས་རྙོགས་བྲལ་བདེ་ཆེན་རླབས་བརྒྱ་གཉེར་བ་ཆོས་
ཉིད་མཆོག་གི་རྒྱ་མཚོ་དང༌། །ཟག་མེད་ཡོན་ཏན་ཆ་ཤས་རབ་བཀང་འོད་གསལ་ཆུ་མཐོང་
རྗེས་འགྲོ་རྒྱལ་བ་ཀུན་གྱི་ཡེ་ཤེས་འོད་བརྒྱའི་མཛོད། །བཅུ་གཉིས་འཕོ་བ་དག་པས་བདེན་
དོན་འོད་ཟེར་འབར་བ་ཆོས་ལ་རྫོགས་པར་ལོངས་སྤྱོད་ཉིན་མོར་བྱེད་པའི་སྐུ། །བཅུ་དྲུག་
དགའ་བའི་རྩེ་མོར་སོན་པས་དེ་ཉིད་མངོན་རིག་སྒྱུ་འཕྲུལ་རྡོ་རྗེའི་རང་བཞིན་དཔལ་ལྡན་བླ་
མར་འདུད། །གང་ཡང་འཇིག་རྟེན་སྒྲོན་མེ་རྣམས། །མུན་པའི་བསྐལ་པ་གཞོམ་པའི་ཕྱིར། །
མོས་པར་ལྡན་པའི་གཞན་དབང་བཞིན། །དུས་དང་དུས་སུ་འཇུག་པ་ཉིད། །དེ་སླད་གྲུ་
འཛིན་བདག་པོའི་ཐུགས་རྗེའི་ཟེར། །བོད་ཡུལ་ཀུན༷་དའི་དག༷འ་ཚལ་འདིར་ཤར་བ། །
དཔ༷ལ་ལྡན༷་སྐལ་བ་བཟ༷ང་པོ༷འི་འདབ་མ་དག །ཆེས་ཆེར་རྒྱས་པའི་དུས་སྟོན་ལྷག་པར་
20-1-139


འཕེལ། །ཀུན༷་ལ་བྱམས་དང་བརྩེ་བས་སྐྱོང་བ་ལ། །དག༷འ་ལྡན་བདག་པོ་དེ་དང་དབྱེར་མེད་
ཅིང༌། །དཔ༷ལ་འབྱོར་སྲིད་ཞིའི་ཕུན་སུམ་ཚོགས་པའི་དངོས། །བཟ༷ང་པོ༷འི་འགྲོ་ཀུན་སྐྱོང་
བའི་མཛད་པ་ནས། །དམ་པའི་མཛད་པ་ཕ་མཐའ་མེད་པའི་མཁའ། །བདག་བློའི་བུང་པས་
གཞལ་བར་མི་ནུས་མོད། །འོན་ཀྱང་རང་ཉིད་མོས་དང་སྐལ་མཉམ་ལའང༌། །ཕན་ཕྱིར་མདོ་
ཙམ་དགོད་ལ་སྐྱོན་ཡོད་མིན། །རྣམ་ཐར་ངོ་མཚར་གསེར་གྱི་རྔ་བོ་ཆེ། །བསྐུལ་མཁས་དབྱུག་
གུའི་བྱེད་པ་མང་སྟོན་པས། །དྲང་པོའི་དབྱངས་ཀྱིས་འབྲུག་སྒྲ་འབུམ་གྱི་ཤུགས། །འགོག་
ནུས་འདི་ལ་ཐར་འདོད་རྣ་བ་བྱེ། །འདིར་བདག་ཅག་གི་འདྲེན་པ་དམ་པ་འཕགས་པ་སྤྱན་
རས་གཟིགས་ཀྱི་ཐུགས་རྗེའི་ཁྱད་པར་གངས་ཅན་ལྗོངས་འདིར་ངུར་སྨྲིག་འཛིན་པར་བསྟན་
པ། དོན་གྱི་སླད་དུ་མཚན་ནས་སྨོས་ཏེ་རྗེ་བཙུན་དམ་པ་ཀུན་དགའ་དཔལ་བཟང་པོའི་རྣམ་
པར་ཐར་པ་ཐུན་མོང་དུ་གྲགས་པ་ཅུང་ཟད་བཀོད་ན། རྗེ་བཙུན་འདིའི་རིགས་རུས་ཆོ་འབྲང་
ནི། རྒྱལ་ཐང་དུ་ལྷ་རྒྱལ་ཐང་དཀར་པོ་ལས་མཆེད་དེ། གཉག་སྟོན་ཤཱཀྱ་མུ་ནེ་ལ་སོགས་པ་
མཁས་པ་དང་གྲུབ་པའི་དཔལ་འཛིན་པ་དང༌། འཇིག་རྟེན་གྱི་ལུགས་དང་རྗེས་སུ་འབྲེལ་
བའི་དཔའ་བ་དང་རྟུལ་ཕོད་པ་དང༌། བློ་གྲོས་ཆེ་བ་དང༌། གཞུང་བཟང་བ་ལ་སོགས་པའི་
ཡོན་ཏན་དུ་མ་དང་ལྡན་པར་རིམ་པར་བྱོན་པ་ཞལ་ངོ་གཅིག་གིས་གློ་བོའི་ཕྱོགས་ཡུལ་དགེ་
བཅུ་ཚང་ཞིང་བཀྲ་ཤིས་པའི་དགེ་མཚན་དུ་མ་དང་ལྡན་པའི་ཡུལ་ལྗོངས་སུ་ཕེབས། དེའི་ཚེ་
ས་ཆེན་སྐྱོང་བ་དགེ་སྦྱོང་ཨ་མ་དཔལ་ཟླ་བ་གསར་དུ་ཚེས་པ་དང་དཔོན་བློན་དུ་གྱུར། སྒེར་
དུའང་ཡངས་པའི་ས་ཆེན་པོ་ལ་དབང་མཛད། རྡོ་རྗེ་འཆང་ཀུན་དགའ་བཟང་པོ་གདན་དྲངས།
ཆོས་ཀྱི་འཁོར་ལོ་བསྐོར་བ་དང༌། ཐུབ་ཆེན་རྣམ་པར་རྒྱལ་བའི་གཙུག་ལག་ཁང་བཞེངས་པ།
དགེ་འདུན་གྱི་སྡེ་འཛུག་པ་སོགས་ཀྱི་བདག་གཉེར་མ་ལུས་པ་མཛད། དེའི་སྲས་དབོན་དྲུང་
ཚེ་དབང་བཟང་པོ་ཞེས་བྱ་བ་དེས། ཚངས་པ་ཆེན་པོ་བཀྲ་ཤིས་མགོན་སྐུ་མཆེད་ཀྱི་བཀའི་
20-1-140


བློན་པོ་མཛད། ལུགས་གཉིས་ཀྱི་བྱ་བ་ལ་མཁས་པས་དཔོན་བློན་གཉིས་ཀའི་ཕྱྭ་སྲིད་ཡར་
ངོ་ཟླ་བ་ལྟར་འཕེལ་དགྲ་བོའི་སྡེ་མི་བསྲུན་པ་མཐའ་དག་ཚར་བཅད། རང་སྲིད་རྣམས་
བྱམས་པ་ཆེན་པོས་བསྐྱངས། ཐུབ་དབང་གཉིས་པ་པཎྜི་ཏ་ཆེན་པོ་ཤཱཀྱ་མཆོག་ལྡན་སློབ་
མའི་ཚོགས་རྒྱ་མཚོ་ལྟ་བུས་བསྐོར་བ་སའི་ཕྱོགས་དེར་དཔོན་བློན་གྱིས་གདན་དྲངས། ལོ་
གསུམ་དུ་ཆོས་ཀྱི་འཁོར་ལོ་བསྐོར་བའི་བདག་རྐྱེན་མཛད་པ་སོགས་ལུགས་གཉིས་ཀྱི་བྱ་བ་
བསམ་གྱིས་མི་ཁྱབ། སྤྲུལ་པའི་གང་ཟག་ཏུ་གྲགས། དེ་ཉིད་ཀྱི་གཅུང་པོ་ནི་དཔལ་བརྩེ་བ་
ཆེན་པོ་ཀུན་དགའ་མཆོག་གྲུབ་ཡིན། དཔོན་དྲུང་ཚེ་དབང་བཟང་པོ་དེས་བཙུན་མོ་གཉིས་
ཁབ་ཏུ་བཞེས་པའི་སྔ་མའི་སྲས་དབོན་དྲུང་ཚེ་དར་སྐྱབས་པ་སྐུ་མཆེད་རྣམས་ཡིན་ཞིང༌། ཕྱི་
མའི་སྲས་ནི་དཔལ་འཁོར་ལོ་སྡོམ་པའི་ཡེ་ཤེས་ཀྱི་སྣང་བརྙན་རྗེ་བཙུན་དམ་པ་འཇམ་མགོན་
གྲུབ་པའི་དཔའ་བོ་དཔལ་ལྡན་ཀུན་དགའ་གྲོལ་མཆོག་ཡིན་ནོ། །དཔོན་དྲུང་ཚེ་དར་སྐྱབས་
པ་དེ་ཉིད་ལུགས་གཉིས་ཀྱི་མཁྱེན་པ་ཆེ་བས་མངའ་རིས་ཉིད་དུ་ཞལ་ངོ་སྔ་མ་རྣམས་ལས་
ཀྱང་ཆེས་ལྷག་པ་ཙམ་མཛད་ཅིང༌། དབུས་གཙང་གི་ལྗོངས་སུ་བྱོན། པཎྜི་ཏ་ཆེན་པོ་ཤཱཀྱ་
མཆོག་ལྡན་ལ་ཟབ་ཆོས་དུ་མ་གསན། གསེར་མདོག་ཅན་གྱི་གཙོས་པའི་དབུས་གཙང་གི་
ཆོས་སྡེ་དང་ཆོས་འཁོར་ལྷ་ས་ལ་སོགས་པའི་གཙུག་ལག་ཁང་ཁྱད་པར་ཅན་ཕལ་ཆེར་
མཇལ་ཞིང༌། དེ་ཐམས་ཅད་དུ་མང་ཇ་འགྱེད་བཅས། མཆོད་པའི་སྤྲིན་ཕུང་བསམ་གྱིས་མི་
ཁྱབ་པ་ཕུལ། བྱང་ངམ་རིང༌། རྒྱ་མཁར་རྩེ་གཞིས་ཀ་རིན་སྤུངས་སོགས་སུ་རྒྱང་ས་རེ་
བཞུགས་ཤིང༌། ཁྱད་པར་གཞིས་ཀར་ཞབས་དྲུང་ངག་དབང་རྣམ་རྒྱལ་ཤིན་ཏུ་དགྱེས། དེ་
དག་ཏུ་སྒྱུ་རྩལ་ཐམས་ཅད་ལ་བྱང་ཞིང་བློ་གྲོས་ཆེ་བ་བློན་པོ་ཤིང་གི་ལག་པ་ཅན་ཞེས་གཙུག་
ལག་གཉིས་ལ་ཕུལ་དུ་ཕྱིན་པའི་གྲགས་པ་ཅན་དེ། རྗེ་ཉིད་ཀྱི་ཡབ་ཡིན་ལ། ཡུམ་དཔོན་མོ་
དཔལ་ཁྲིད་ཅེས་བྱ་བ་མཁའ་འགྲོའི་མཚན་རྟགས་དང་ལྡན་པ་དེ་ཡིན། དེ་གཉིས་ཀྱི་སྲས་སུ་
20-1-141


མངའ་རིས་སྨད་ཀྱི་སའི་ཆ། སྨོན་ཐང་རྒྱལ་པོའི་ཁབ་དང་ཉེ་བའི་ནུབ་བྱང་མཚམས། བསམ་
འགྲུབ་རབ་བརྟན་ཞེས་བྱ་བ། རྣམ་ཐོས་སྲས་ཀྱི་ཕོ་བྲང་ལྟ་བུ་དེར། དཔལ་གདོང་ཞེས་པ་ཆུ་
མོ་བྱའི་ལོར་ཧོར་ལུགས་ཀྱི་ཟླ་བ་བདུན་པའི་ཚེས་བཅུ་གཟའ་སྐར་དུས་སྦྱོར་བཟང་པོ་ལ་ངོ་
མཚར་བའི་ལྟས་དུ་མ་དང་བཅས་སྐུ་བལྟམས། དེ་ནུབ་དཔལ་བརྩེ་བ་ཆེན་པོ་ཀུན་དགའ་
མཆོག་གྲུབ་ཀྱི་མནལ་ལམ་དུ། ཐུབ་པའི་གསེར་སྐུ་དྲི་མས་ཅུང་ཟད་གོས་པ་ཞིག་ལ་ཁྲུས་
ཆབ་ཕུལ་བའི་མཚན་མ་བྱུང༌། དེའི་སར་ཁྲུས་ཞུ་མཁན་བྱུང་བས། དེ་ལ་བྱིས་པ་འདི་བསྟན་
པ་ལ་ཕན་ཐོགས་མཁན་གཅིག་འོང་གིས་གཙང་སྦྲ་ལེགས་པར་གྱིས་གསུངས་སོ། །རྗེ་དེ་དང་
བྱང་སེམས་ཤེས་རབ་དཔལ་འབྱོར་གཉིས་ཀྱིས། རྗེ་འདི་ཉིད་ཡུམ་གྱི་ལྷུམས་སུ་ཞུགས་ནས་
བསྲུང་འཁོར། བལྟམས་ནས་སྒྲོལ་དཀར། རྣམ་འཇོམས། སྨེ་བརྩེགས་སོགས་ཀྱི་ཁྲུས་ཆོག་
དང་རྗེས་གནང༌། ཚེ་དབང༌། མགོན་པོའི་བཀའ་བསྒོ་སོགས་ཡང་ཡང་གནང་ངོ༌། །མཐོ་རིས་
ཆུ་འཛིན་འཐུག་པོའི་འཕྲེང་བ་ལས། །ཉེ་བར་འོངས་པའི་རིགས་རྒྱུད་ཆུ་བོའི་རྒྱུན། །གཉག་
སྟོན་ཤཱཀྱ་ལ་སོགས་དབུ་བ་ཡི། །འཛུམ་དཀར་རྒོད་པ་ཞིང་འདིའི་དཔལ་དུ་དངར། །མངའ་
རིས་འཛིན་མའི་ལྟེ་བར་ལེགས་བྱས་ཀྱི། །མྱུ་གུ་སྨིན་པ་གུར་གུམ་གཞོན་ནུའི་འཕྲེང༌། །
བསྔགས་འོས་དྲི་བཟང་འབར་བ་གློ་བོ་ཡི། །མི་དབང་རིམ་པས་སྤྱི་བོའི་རྒྱན་དུ་མཛེས། །དེ་
ཡི་ལུགས་བཟང་རིན་ཆེན་འབྱུང་གནས་ཆེ། །རྒྱས་བྱེད་གཙུག་ལག་བདུད་རྩིའི་འོད་འབར་
བ། །བཀའ་ཡི་བློན་པོ་ཕུར་བུའི་བློ་གྲོས་ཅན། །རབས་དང་རབས་སུ་རིམ་པར་འབྱུང་བར་
གྱུར། །དེ་ལས་སྒྱུ་རྩལ་སྲིད་སྒྲུབ་ཟིལ་གནོན་ཞིང༌། །ཚེ་དར་སྐྱབས་པ་ཤིང་ལག་ཅན་ཞེས་
གྲགས། །དེ་ཡི་བཙུན་མོ་བདེ་སོགས་སྐྱེ་མཆེད་ཅན། །ལུས་མེད་རྩེ་དགའི་འཁྲི་ཤིང་དར་པའི་
དཔྱིད། །ལང་ཚོའི་མེ་ཏོག་མཆོག་ཏུ་འཛུམ་པ་ཡི། །མཛེས་སྡུག་སྙིང་པོ་དཔལ་ཁྲིད་ཅེས་པ་
བྱུང༌། །དགེ་བའི་ལས་ཀྱི་སྲད་བུ་ལ་རྒྱུས་པའི། །བསྔགས་པར་འོས་པ་རིན་ཆེན་ཅོད་པཎ་
20-1-142


འཕྲེང༌། །མཐའ་དག་སྐྱེ་བོའི་མགོ་ལ་འགོད་མཁས་པ། །འདོད་དགུའི་ཕུན་ཚོགས་ཅི་ཡང་
དར་བར་གྱུར། །ཨ་དི་ཏི་ལས་ནམ་མཁའི་ནོར་བུ་དང༌། །རིན་ཆེན་འབྱུང་གནས་ཆེ་ལས་ཟླ་
བ་བཞིན། །ཐབས་དང་ཤེས་རབ་འདུས་པའི་ངོ་མཚར་ལས། །ཟུང་འཇུག་མཚན་དཔེ་འབར་
བ་གང་ཁྱོད་བལྟམས། །དེ་ནས་དགུང་ལོ་བདུན་ཙམ་བཞེས་ཀྱི་བར་ཁབ་ཏུ་བཞུགས་ཏེ་ཡབ་
ཡུམ་གྱིས་བྱམས་པས་བསྐྱངས། དགུང་ལོ་བདུན་གྱི་སྟེང་དུ་དཔལ་བརྩེ་བ་ཆེན་པོ་ཀུན་
དགའ་མཆོག་གྲུབ་ཀྱི་དྲུང་དུ། དགེ་བསྙེན་སྔོན་དུ་འགྲོ་བས་དབུའི་གཙུག་ཕུད་ཕུལ། ངུར་
སྨྲིག་གི་རྒྱལ་མཚན་བཞེས་ཏེ་བར་མ་རབ་ཏུ་བྱུང་བ་དང༌། དགེ་ཚུལ་གྱི་སྡོམ་པ་ནོད་དེ་མཚན་
ཀུན་དགའ་དཔལ་བཟང་དུ་འདོགས་པར་མཛད། ལས་པ་ཆོས་སྐྱོང་དཔལ་མཆོག་གིས་ཀློག་
ཡིག་ཆོས་སྤྱོད་སོགས་ཉེར་མཁོའི་བསླབ་སྦྱངས་ཕུལ། རྗེ་ཀུན་དགའ་མཆོག་གྲུབ་ལས་གོང་
སྨོས་ཀྱི་དབང་བཀའ་རྗེས་གནང་ཡང་ཡང་དང༌། གཞན་ཡང་ཛེ་ཏཱ་རིའི་ལུགས་ཀྱི་ཚེ་དབང་
ལྷ་དགུ་སོགས་བཀའ་ཆོས་སོགས་མང་དུ་གསན་ཞིང་མཉམ་མེད་ཆོས་ཀྱི་རྒྱལ་པོ་ལས། སྒྲོལ་
དཀར་རྗེས་གནང་ཁྲིད་བཅས། ཚེ་དབང་ལྷ་དགུ་དབང་མང་པོ་དང༌། མཉམ་མེད་ཉིད་ཀྱི་
བཀའ་འབུམ་གྱི་ལུང་ལ་སོགས་པ་དང༌། མཁས་པའི་རྗེ་དཔལ་ལྡན་ཚུལ་ཁྲིམས་ལས་ཕག་
དཀར་ཤེས་རབ་གསལ་བྱེད། འཇམ་དབྱངས་དམར་སེར་སོགས་ཀྱི་རྗེ་གནང༌། བྱང་སེམས་
ཤེས་རབ་དཔལ་འབྱོར་ལས་ཚེ་དབང༌། རྒྱལ་ཐང་ལུགས་ཀྱི་གཅོད་འཁྲིད། རྗེ་བཙུན་མི་ལ་
དང༌། གྲུབ་ཐོབ་གཙང་སྨྱོན་གྱི་རྣམ་ཐར་ལུང་སོགས་གསན། དེ་ནས་དགུང་ལོ་བཅུ་དགུ་པའི་
སྟེང་དུ། འགྲན་ཟླ་དང་བྲལ་བའི་ཆོས་གྲྭ་ཆེན་པོ་ཐུབ་བསྟན་གསེར་མདོག་ཅན་དུ་ཐུགས་
གཉེར་ལ་ཕེབས་བར་ཆས་ཏེ། ཉིད་ཀྱི་སྐུ་མཆེད་ཆོས་རྗེ་ཀུན་དགའ་བློ་མཆོག་དང་གཉིས་
ཕྱག་གཡོག་ཏུ་སློབ་གཉེར་བ་ཤ་སྟག་གཏོས་ཆེ་བ་དང་བཅས་སྟོན་ཁ་མྱུར་བར་ཤངས་སུ་
ཕེབས། དུས་དེའི་ཚེ་པཎ་ཆེན་ཆོས་ཀྱི་རྒྱལ་པོའི་ཁྲི་ཐོག་ལ་མཁས་མཆོག་བློ་གྲོས་བཟང་པོ་
20-1-143


དང༌། ཤངས་པ་གྲྭ་ཁང་དུ་སློབ་དཔོན་མཁས་མཆོག་གཙུག་གི་ནོར་བུ་བཞུགས་པ་དང་
མཇལ། མང་ཇ་དང་མཁན་སློབ་སོ་སོར་ཕྱག་མཇལ་ཕུལ། དེ་མཚམས་གཙང་དུ་འབྲུམ་པ་
བྱུང་བ་ནས་འབྲུམ་མཛེམ་དང༌། ཆོས་ཞུ་སྦྲགས་ཏེ་དབུས་སུ་ཕེབས། ཆོས་འཁོར་ལྷ་ས་གཙོ་
བོར་གྱུར་པའི་གནས། རྟེན་ཁྱད་པར་ཅན་རྣམས་མཇལ་དེར་ཏྲེ་བོ་ཆོས་རྒྱལ་ལ་ཚེ་དབང་དང་
ཕག་མོ་ལྔ་ཁྲིད་གསན། ཞོགས་རྩེ་དམར་དུ་ལོ་དེའི་ལྷ་བབས་དུས་ཆེན་ལ་རྗེ་དབུས་སྨྱོན་པ་
གཤེགས་པའི་གདུང་མཇལ་གནང༌། ཞུན་ཐིག་མང་དུ་གསོལ། ལྕང་ལུང་ཆོས་སྡིངས་སུ་
ཕེབས་ནས་རྗེ་གཞོན་ནུ་ཆོས་གྲུབ་ལ་མཇལ་ཁ་ཞུས་པས། མདང་དུང་དཀར་གཉིས་ཁ་སྤྲོད་
བྱས་འབུད་པ་རྨིས་ཤིན་དུ་བཟང་གསུངས། དགྱེས་བཞིན་དུ་སྐུ་མཆེད་ཚ་རོང་ནམ་མཁའ་བློ་
གསལ་དང་གསུམ་ཀས་ཚལ་དེར་པཎ་ཆེན་རིན་པོ་ཆེར་བརྒྱུད་པའི་གསུངས་ངག་རིན་པོ་ཆེ་
ལམ་འབྲས་བུ་དང་བཅས་པ་སོགས་ལམ་སྐོར་ཞལ་བྱུང་མ་ལུས་པ་སོགས་དབང་ཁྲིད་ལུང་
མཐའ་ཡས་པ་གསན། ཁྱད་པར་མནལ་ལམ་དུ་དར་ཚོན་གྱི་ཕུང་པོའི་ནང་ན་རུས་པའི་མདུད་
པ་མ་ཞིག་པའི་ཀེང་རུས་ཀྱི་གཟུགས་ཅན་འཇིགས་སུ་རུང་བ་ཞིག་གཟིགས་པས། སང་
གསོལ་བ་མ་བཏབ་པར་དུར་ཁྲོད་བདག་པོའི་རྗེས་གནང་སྩལ། མགོན་པོ་གུར་ལྕམ་དྲལ་ལྷ་
བརྒྱད། ཞལ་བཞི་པ་བསྙེན་སྒྲུབ་སོ་སོའི་རྗེས་གནང༌། དེ་དག་དང་འབྲེལ་བའི་ཐུན་མོང་དང་
ཐུན་མོང་མ་ཡིན་པའི་གདམས་ངག་མཐའ་ཡས་པར་གསན། ཆོས་འཁོར་རྩེར་པཎ་ཆེན་རྡོ་རྗེ་
རྒྱལ་མཚན་གྱི་དྲུང་དུ་གསུངས་ངག་རིན་པོ་ཆེ་ཆ་ཚང༌། སྦྱོར་བ་ཡན་ལག་དྲུག་པའི་ཁྲིད་ཇོ་
ནང་ལུགས་གཙོ་བོར་གྱུར་པའི་གཞན་མ་བུ་ལུགས། དཔལ་ལྡན་བླ་མའི་ལུགས། ཤ་ཝ་རས་
དམར་སྟོན་རིན་ཆེན་ཤཱཀྱ་ལ་གནང་བ་དང༌། པཎ་ཆེན་ནགས་རིན་གྱི་ལུགས་སོགས་ཀྱི་ཁྲིད་
དང༌། རྒྱ་བོད་ཀྱི་ལུགས་སྲོལ་ཐ་དད་པ་མང་པོ་སོགས་རྒྱས་པར་གསན་ཞིང༌། མུན་ཁང་དང་
ཉིན་མོའི་རྣལ་འབྱོར་སོགས་ལ་བརྟེན་རྩེ་གཅིག་ཏུ་མཉམ་པར་འཇོག་པ་གནང་བས་རྟགས་
20-1-144


སྣང་འབྱམས་ཀླས་པ་མངོན་དུ་གྱུར། པཎ་ཆེན་གྱི་གསུངས་ནས་སྦྱོར་དྲུག་གི་སྒོ་ནས་ཁྱེད་ལ་
འགྲོ་དོན་ཆེན་པོ་འོང་གསུངས་པའི་ལུང་བསྟན་པའང་ཐོབ། གཞན་ཡང་ཟབ་ཆོས་མཐའ་
ཡས་པ་གསན་ནས། སླར་གསེར་མདོག་ཅན་དུ་ཕེབས། མཁན་ཆེན་ལས་ཚེ་དབང་དང༌། སྤྱི་
ཆོས་ཐོབ་པ་གསན་ཞིང༌། སློབ་དཔོན་མཁས་མཆོག་གཙུག་གི་ནོར་བུའི་དྲུང་ལས། ཐོག་མར་
ཕར་ཕྱིན་གྱི་གཞུང་ཆོས་རྒྱས་པར་གསན། དེ་ནས་རིམ་པར་འདུལ་བ། མངོན་པ་མཛོད།
སྡོམ་གསུམ་རབ་དབྱེ་རྣམས་ལ་གསན་མཐིལ་ཕྱིན་པ་གནང༌། སླར་ཡང་དབུས་སུ་ཕེབས་
ནས། སྔགས་ཆོས་ཀྱི་འཕྲོ་རྣམས་དང༌། བསྙེན་རྫོགས་ཞུ་བ་མཛད་དེ། ལྕང་ལུང་པ་གཞོན་ནུ་
ཆོས་གྲུབ་ཀྱིས་མཁན་པོ། པཎ་ཆེན་རྡོ་རྗེ་རྒྱལ་བས་ལས་སློབ། ལྕང་ལུང་པ་གཞོན་ནུ་རྒྱལ་
མཆོག་གིས་གསང་སྟོན། རིགས་གཏེར་སློབ་དཔོན་ཆོས་རྗེ་བསམ་གཏན་པས་དུས་བསྒོ་བ་
མཛད་ནས། དགེ་འདུན་གྲངས་ཚང་པ་ལས་བསྙེན་པར་རྫོགས་ཏེ་ཤིན་དུ་བཙུན་པའི་མཆོག་
ཏུ་བཞུགས། ཕྱིར་ཕེབས་སྐབས་ལྕང་ལུང་རིན་པོ་ཆེ་ཉིད་ཀྱི་ཞལ་གཟིགས་ཀྱི་དཔལ་མགོན་
གྱི་བྲིས་སྐུ་བྱིན་རླབས་ཅན་སོགས་ཀྱིས་གནང་སྦྱིན་དང༌། ཐུགས་བརྩེ་བའི་བསླབ་བྱ་ལུང་
བསྟན་མང་དུ་གནང༌། པཎ་ཆེན་རྡོ་རྗེ་རབ་རྒྱལ་བས་ཀྱང་ཆོས་འཕྲོ་དང༌། གནང་སྦྱིན་བསླབ་
སྟོན་རྒྱས་པར་བསྩལ། དེ་སྐབས་འཕན་ཡུལ་དུ་ཀརྨ་པ་མི་བསྐྱོད་རྡོ་རྗེ་དང་མཇལ། མ་ཎིའི་
ལུང་བཀའ་འགྲེལ་དུ་གསན་ནོ། །དེ་ནས་གསེར་མདོག་ཅན་དུ་ཕེབས། མངའ་རིས་ནས་སྤྱན་
འདྲེན་ནན་ཅན་བྱུང་ནས། མཁན་སློབ་སོ་སོའི་རྫོངས་ཆོས་གནང་སྦྱིན་བསླབ་བྱ་དཔག་མེད་
གནང་ནས་མངའ་རིས་ལ་ཕེབས། ཕུན་ཚོགས་བསམ་གཏན་གླིང་གི་དགེ་འདུན་རྣམས་ཀྱིས་
ཕེབས་བསུ་དང༌། སྐྱེ་བོའི་ཚོགས་མང་པོས་བསུས། ཐོག་མར་རྗེ་བཙུན་ཐམས་ཅད་མཁྱེན་པ་
དང་མཇལ། བྱིན་གྱིས་བརླབས་ཐུགས་ཡིད་གཅིག་འདྲེས་སུ་གྱུར། དེ་ནས་རྒྱ་ཧོར་དཔལ་
བཟང་དང་མཇལ་ཞིང༌། བླ་མ་སློབ་དཔོན་སོ་སོ། སྡེ་པ་དཔོན་བློན། སྐུ་ཉེ་རྣམས་དང་བཅས་
20-1-145


པས་གཞི་ལེན་རྒྱས་པ་བྱུང༌། ཁྱི་ལོ་དེའི་དགུན་ལ་རྗེ་ཀུན་དགའ་མཆོག་གྲུབ་ཞིང་བརྗེས་ནས་
ལོ་སྐོར་གཅིག་སོང་བའི་དུས་ཆེན་དང༌། རྗེ་བཙུན་ཐམས་ཅད་མཁྱེན་པའི་ཡུམ་གྱི་ལོ་མཆོད་
སྦྲགས་པར་སྒྲུབ་མཆོད་རྒྱ་ཆེར་གནང་བའི་སྐབས། དེ་ཉིད་སྐུ་མཆེད་ཀྱིས་སྨན་བླའི་མདོ་
མཆོད་ཀྱི་གཙོ་བོ་གནང་། སྒྲུབ་མཆོད་གྲོལ་འཕྲལ་ཕུན་ཚོགས་བསམ་གཏན་གླིང་གི་གསེར་
ཁང་དུ་རྗེ་སྐུ་མཆེད་གཉིས་ཀས་ཀྱཻ་རྡོ་རྗེའི་གཞིའི་བསྙེན་པ་སྦྱིན་སྲེག་དང་བཅས་པ་བར་ཆད་
མེད་པར་གྲུབ་རྗེས། ཚེ་དཔག་མེད་ཀུན་རིག་སོགས་ཀྱི་ལྗགས་བསྙེན་མཛད། དེ་རྣམས་
མཐར་ཕྱིན་ནས་སོས་ཀར། རྗེ་ཐམས་ཅད་མཁྱེན་པའི་དྲུང་དུ་གསུངས་ངག་རིན་པོ་ཆེ་ལམ་
འབྲས་བུ་དང་བཅས་པའི་གདམས་པ་ཆ་ལག་ཡོངས་རྫོགས། བརྟག་གཉིས་བཤད་པ། བདེ་
མཆོག་ལཱུ་ནག་དྲིལ་གསུམ་གཤེད་དམར། འཇིགས་བྱེད་རྣལ་འབྱོར་མ་སོགས་ཀྱི་དབང་བྱིན་
རླབས་ཁྲིད་ལུང་སོགས་མཐའ་ཡས་པ་དང༌། ཤངས་ཆོས་ཡོངས་རྫོགས། གཞན་ཡང་སྒྲུབ་
ཐབས་བརྒྱ་རྩ། མགོན་པོ་ཆེ་ཆུང་གི་སྐོར། དམར་པོ་སྐོར་གསུམ་གྱི་རྗེས་གནང་སྒྲུབ་སྐོར་
སོགས་བསམ་གྱིས་མི་ཁྱབ་པ་གསན། སྤྱིར་བླ་མ་སོ་སོ་ལས་བཀའ་ཆོས་བསམ་གྱིས་མི་ཁྱབ་
པ་གསན་མོད། འདིར་བྲི་བར་མ་ནུས། རྒྱས་པར་གསན་ཡིག་སོགས་སུ་ཤེས་པར་བྱའོ། །དེ་
ནས་རྗེ་དེ་ཉིད་དགུང་ལོ་ཉེར་དགུར་ཕེབས་པ་འཕར་བ་ཞེས་པ་ལྕགས་མོ་གླང་གི་ལོ་ཕུན་
ཚོགས་བསམ་གཏན་གླིང་གི་གདན་ས་ལ་རྗེ་དེ་ཉིད་སྐུ་མཆེད། རྗེ་བཙུན་ཐམས་ཅད་མཁྱེན་
པས་བཀོད་པ་གནང༌། པཎ་ཆེན་རིན་པོ་ཆེ་ཆོས་རྗེ་བློ་གྲོས་རྒྱལ་མཚན་ལ་གནང༌། དེས་རྗེ་
ཀུན་དགའ་མཆོག་གྲུབ་དང༌། དེས་རྗེ་བཙུན་ཐམས་ཅད་མཁྱེན་པ་ལ་གནང་བའི་སྟོན་པའི་
སྐུ། རྒྱ་དྲིལ་ཟླམ་སྐྱོར་ཆེན་གསུམ་གྱིས་གཙོས་པའི་གནང་སྦྱིན་སྟོབས་ཆེ་བ་དང་བཅས་ཤིས་
བརྗོད་མེ་ཏོག་བཅས་བསྩལ། དེ་མཐུན་སྡེ་པ་དཔོན་སློབ་སོགས་ཐམས་ཅད་ཀྱིས་ཁྲི་སྟོན་
འབུལ་བ་རྒྱས་པར་བྱས། དེ་ནས་རྗེ་བཙུན་ཐམས་ཅད་མཁྱེན་པ་དབུས་གཙང་ལ་ཕེབས་
20-1-146


སྐྱེལ་ལ། བཀྲ་དུམ་གྱི་བར་དུ་སྐུ་མཆེད་གཉིས་ཀས་ཕེབས། དེར་སྐུ་མཆེད་གཉིས་དང་རྗེ་བློ་
གྲོས་དབང་ཕྱུག ཚ་རོང་ནམ་མཁའ་བློ་གསལ་སོགས་གློ་བོ་བྱང་དགོན་དང་བཅས་པའི་ཆེ་
དགུ་ཐམས་ཅད་ཀྱིས་ཡར་གང་མྱུར་ཕེབས་དགོས་པས་རྒྱུ་མཚན་ནན་སྐྱེད་ཕུལ་ཞིང༌། བཀའ་
ལས། ཁྱེད་འདིར་འདུས་ཀྱིས་དད་ལྡན་རྣམས་ལ་མ་ཡིན་ཏེ། །ལར་རང་ཡུལ་ཕྱོགས་ལྷུང་
ཅན་གྱི་ཚེར་ནག་འདིར། །བློ་གཏད་སུ་ལ་བཀལ་ཡང་ཐུབ་པ་མེད། །མཁས་མཆོག་ངང་པའི་
རྒྱལ་པོ་གྲོལ་མཆོག་དང༌། །ཉི་མ་དབུས་གཙང་དག་པའི་པད་མཚོ་རྙོག །གསུངས་པ་སོགས་
ནས་ཡར་ཕེབས་པའི་ཞལ་བཞེས་མ་གནང༌། ཕྱིས་ཁྱེད་རང་སྐལ་ལྡན་རྣམས་དང་འཕྲད་པ་
འོངས་གསུངས་པ་བྱུང༌། ཕྱིས་སྐྱ་སྐྱར་དད་ལྡན་རྣམས་དང་མཇལ་བ་ལ་གསུངས་པར་ངེས་
གསུངས། དེ་ནས་ཚུར་ཕེབས་ནས་དགོན་པའི་དུས་ཆོས་དང་སྐྱོང་དར་སྔར་སྲོལ་བཟང་པོ་
གང་ཡོད་ལྟར་མཛད་ཅིང༌། མི་དབང་ཁྲི་ཐོག་པའི་བཀས་བསྐུལ་ཏེ། རི་ཤིང་སྡོམ་གསུམ་
གླིང་གི་ཞལ་བདག་ཀྱང་གནང་ནས་འཛིན་སྐྱོང་སྤེལ་གསུམ་གནང༌། དེར་ཆོས་སྡེའི་ལས་
སློབ་ཀྱིས་གཙོས་པའི་དགེ་འདུན་སྤྱི་དགོས་སུ་ཐུགས་འདོད་དང་བསྟུན་པའི་ཆོས་ཀྱིས་
ཚིམས་པར་གནང༌། བློན་རིགས་དཔོན་རིགས་ལ་སོགས་ཀུན་གྱིས་ཀྱང་མོས་དད་ཆེན་པོས་
རང་རང་གི་འདོད་ཆོས་ཞུ་བའི་འཕྲིན་ལས་ཡར་རྒྱས་ཀྱི་ངང་ནས་སྡེ་པའི་བཀའ་བཀོད་ཀྱི་ས་
སྡེ་པ་ཨོ་ངའི་དྲུང་ཐུབ་བསྟན་གསེར་མདོག་ཅན་དུ། ཐུགས་གཉེར་ལ་ཕེབས་པའི་དབུ་འདོན་
དང༌། གདན་ས་ཆེན་པོས་གཙོས་པའི་གྲྭ་དགོན་ཐ་དད་དུ་བསྙེན་བཀུར། །སློབ་གཉེར་བ་
གཏོས་ཆེ་བ་དང་བཅས་མྱུར་ཤར་ཕེབས་ཏེ། ངམ་རིང་དུ་ཆོས་རྒྱལ་ནམ་མཁའ་ཚེ་དབང་རྡོ་
རྗེ་དང་མཇལ་ནས་སྨན་སྡིངས་སུ་ལོ་ཆེན་རཏྣ་བྷ་དྲ་དང་མཇལ། བཀའ་འགྲེལ་གསན། རིམ་
པས་གསེར་མདོག་ཅན་དུ་ཕེབས། མཁན་ཆེན་ཆོས་རྗེ་འཇམ་དབྱངས་དཔལ་བཞུགས་པ་
དང༌། ཤངས་པ་གྲྭ་ཁང་དུ་རྗེ་འབུམ་ཕྲག་གསུམ་པ་དགེ་འདུན་ཉི་མ་བཞུགས་པ་མཇལ།
20-1-147


མང་ཇ་འགྱེད་བཅས་སོགས་རྒྱ་ཆེར་མཛད། མཁན་སློབ་ཐམས་ཅད་ཐུགས་ཤིན་དུ་དགྱེས་
པར་གྱུར། ཨོ་ངའི་དྲུང་མཁན་ཆེན་གྱི་དྲུང་དུ་རབ་བྱུང་མཛད་པའི་རབ་སྟོན་ལེགས་པར་གྲུབ་
ནས། དཔོན་སློབ་ཐམས་ཅད་ཐུགས་གཉེར་ལ་བཀོད་ནས། འབྲུམ་བུ་འཇོམས་པས་ཨོ་ངའི་
དྲུང་ཆུ་དབར་ཆོས་རྫོང་སུ་ཕེབས། རྒྱང་ཙམ་སོང་ནས་རྗེ་འདིས་རྗེ་བཙུན་ཐམས་ཅད་མཁྱེན་
པ་དབུས་ནས་ཕེབས་པའི་ཕེབས་བསུར་ལྷི་ཁུང་དུ་ཕེབས། དེར་མཇལ་ནས་བཀའ་བཀོད་
ལ་ངེད་རྣམ་པ་རྣམས་བརྒྱུད་ནས་ཁྲི་ཁང་དུ་འགྲོ་བས་ཁྱེད་རང་དཔོན་སློབ་ཡང་དེར་ཤོག་
གསུངས་པ་བཞིན། གསེར་མདོག་ཅན་དུ་ཕེབས་ནས་སྐུ་ཆས་གང་ཡོད་མང་ཇ་གྲྭ་ཇ་སོགས་
སུ་བཏང༌། བསམ་འགྲུབ་རྩེ་བརྒྱུད་ཁྲི་ཁང་དུ་ཕེབས་པའི་ནུབ་མན་སྐུ་འབྲུམ་བསྙུང་ནས།
ཁྱུང་པོ་ལྷས་པ་གཞོན་ནུ་བསོད་ནམས་པའི་དགོན་གནས་དེར་སྤོ་བ་གནང་ནས་ལེགས་པར་
ངེས། དེ་ནས་དཔོན་སློབ་ཚང་མ་ཁྲི་ཁང་དུ་ཕེབས། རྗེ་འདིར་སྡེ་བ་མ་ཆིན་དྲུང་དུ། ཀིནྡྷ་རའི་
སྒྲ་ལས་དྲངས་པའི་གྲུབ་ཐོབ་བརྒྱད་ཅུའི་བསྟོད་པའི་གཱི་ཏ་ཡང་བསླབ་སྦྱངས་ཕུལ། སླར་
བསམ་འགྲུབ་རྩེར་ཕེབས། བྲག་དམར་ཆོས་སྡེར་མཁན་ཆེན་གཙུག་གི་ནོར་བུ་མཇལ། དེ་
ནས་སྣར་ཐང་ལ་གནང༌། སྟག་ལ་བརྒྱུད་ནས་ཕེབས་པས་བཞུགས་ས་ཞག་གཅིག་བྲག་
གཞུག་ཏུ་གནང༌། དེར་བཞུགས་མཚེར་གྱི་སྟེང་དུ་རྗེ་བཙུན་ཐམས་ཅད་མཁྱེན་པ་ཞབས་
འཆག་གནང་བའི་ཕྱག་ཕྱི་གནང་བས། རྗེ་བཙུན་རིན་པོ་ཆེའི་ཕྱག་ན་དུང་ཆུང་ཞིག་བསྣམས་
ཡོད་པ་འཕང་བ་གནང་སོང་བས་སྤའུ་མཁྲེགས་པ་ཞིག་ལ་འཕོག་འདམ་ལ་བརྒྱབ་པ་བཞིན་
སོང༌། དེ་རྡོ་ཞིག་ལ་འཕོག་ན་ཡང་དེ་བཞིན་འགྲོ་རྒྱུ་ཡིན་འདུག་གསུངས། དེ་ནས་འཇེད་
བརྒྱུད་རིན་ཆེན་གླིང་དུ་ཕེབས། དེར་ཟླ་ཕྱེད་ཙམ་བཞུགས་ནས་ཡུལ་སྤེའུར་ཕེབས་ཏེ། དེར་
རྗེ་བཙུན་ཐམས་ཅད་མཁྱེན་པས། རྗེ་འདི་གཙོ་བོར་གྱུར་པའི་དགེ་ཆུ་དང་ལོ་ཕུའི་གདན་ས་
བ་སོགས་ལ་རྡོ་རྗེ་འཕྲེང་བའི་དབང༌། དེ་ནས་བརྟག་གཉིས་ལུང་རྐྱང་དང༌། དེ་རྗེས་རྡོ་རྗེ་
20-1-148


གུར་དང་སཾ་པུ་ཊ་ལས་བླ་མ་གོང་མའི་ས་བཅད་ཐོ་ཡིག གུར་ལ་གུར་བརྒྱན། སཾ་པུ་ཊ་ལ་
གནད་ཀྱི་གསལ་བྱེད་དེ། རྗེ་བཙུན་སྐུ་མཆེད་ཀྱི་ཡིག་སྟེང་ནས་གཟབ་བཤད་གནང་བ་
གསན། ངམ་རིང་རྩེར་ཕེབས་ནས་བདེ་མཆོག་ནག་པོའི་ཡབ་བཀའ་ཡུམ་བཀའ་གསན། དེ་
ནས་རྗེ་བཙུན་རིན་པོ་ཆེ་གདན་ས་ཆེན་པོ་བརྒྱུད་ཁའུར་ཕེབས་ནས་ལས་ཆེན་ཡེ་ཤེས་ལྷུན་
གྲུབ་གདན་དྲངས་ཏེ་ས་སྐྱ་བཀའ་འབུམ་གྱི་ལུང་གསན་པ་གནང༌། རྗེ་དེ་ཉིད་ཀྱི་གདན་ས་
ཆེན་པོར་མང་ཇ་འགྱེད་བཅས་ཞུས་ནས། འཇམ་དབྱངས་གཟི་འོད་འབར་བ་དང༌། སྒོ་རུམ་
གྱི་བསེ་འབག་སོགས་ཀྱིས་གཙོས། སྒོ་རུམ་བཞི་ཐོག་བླ་བྲང་ཤར། ལྷ་ཁང་ཆེན་མོ་སོགས་
གདན་ས་ཆེན་པོའི་གནས་བརྟེན་ཁྱད་པར་ཅན་ཐམས་ཅད་མཇལ། གུས་པ་ཆེན་པོས་ཕྱག་
མཆོད་སྨོན་ལམ་གནང༌། དེ་ནས་ཁའུར་རྗེ་བཙུན་རིན་པོ་ཆེས་ཤངས་ཆོས་སོགས་གནང་བ་
མཐའ་དག་གསན། དེར་ཁའུ་རི་བྲག་སྒོར་རབ་བརྗིད་བརྡོ་ཡི་ཁྱིམ། ཡོངས་སུ་གྲུབ་ཚེ་སྒྱུ་མ་
ལྟ་བུའི་ཏིང་ངེ་འཛིན་གྱིས་བར་ཆད་ལས་ཡོངས་སུ་རྒྱལ་བའི་གྲུབ་རྟགས་གནང་དུས། རྗེ་
ཉིད་སྐུ་གཞོགས་རང་དུ་ཡོད། ཉེས་སྐྱོན་སྤུ་ཙམ་མ་བྱུང༌། དེ་ནས་གཏིང་སྐྱེས་སུ་ཕེབས་ནས་
ས་སྐྱ་བཀའ་འབུམ་གྱི་ལྗགས་ལུང་གནང་པས། དེ་ལོ་ས་པཎ་གྱི་བཀའ་འབུམ་ཡན་གསན།
དེ་ནས་རྗེ་བཙུན་རིན་པོ་ཆེ་ངམ་རིང་དུ་ཕེབས། བདེ་མཆོག་མཁའ་འགྲོ་རྒྱ་མཚོའི་སྐུ་བཞེངས་
པའི་བསྲུང་འཁོར་ཕྱག་ནས་སོགས་གནང༌། དེ་ནས་དབུས་སོགས་ལ་ཕེབས་པའི་ཕྱག་ཕྱིར་
སྒོ་མར་ཕེབས་ཏེ། དེ་ཡང་མཁའ་འགྲོ་རྒྱ་མཚོའི་རབ་གནས་གྲུབ་རྗེས་སྣར་ཐང༌། ཚོང་འདུས།
འབྲོང་རྩེ་སོགས་ནས་རིམ་གྱིས་རྒྱ་ཆེར་ཕེབས། མཁན་ཆེན་བཀྲ་ཤིས་རྣམ་རྒྱལ་མཇལ།
ཆོས་འབྲེལ་གསན། མཁའ་རོ་བརྒྱུད་ནས་རྒྱལ་ཆེན་གླིང་དུ་ཕེབས། དེར་རྡོ་རྗེ་ཕུར་པའི་སྟོད་
ལས་སྨད་ལས་ཀྱི་དབང་སོགས་གསན། བྱམས་པ་གླིང་དུ་ཕེབས་མཆོད་རྟེན་ཆེན་མོའི་རྩེར་
བདེ་མཆོག་གསེར་སྐུའི་རབ་གནས་གནང་བའི་གསུངས་ཆོག་ཕྱག་ཕྱི་གནང་ནས། བྲག་
20-1-149


དཀར་དང་ལྕགས་ལུང་བརྒྱུད། ལྷུན་གྲུབ་རྫོང་དུ་མུས་པ་དཀོན་མཆོག་གྲགས་པ་སྤྱན་དྲངས་
ནས་རྗེ་བཙུན་རིན་པོ་ཆེས་དུས་འཁོར་གྱི་དབང་གསན་ཞིང༌། རྗེ་འདིས་ཆོས་འབྲེལ་ཙམ་
གསན་ཏེ་སྟག་ལུང་དུ་ཕེབས། ཟླ་བ་གཅིག་ཙམ་ནས་རྗེ་བཙུན་རིན་པོ་ཆེ་ཡར་རྒྱབ་ཏུ་ཕེབས།
རྗེ་འདིས་སྟག་ལུང་རིང་དུ་བཞུགས་ནས་མཆོག་གི་སྤྲུལ་པའི་སྐུ་རྣམ་རྒྱལ་བཀྲ་ཤིས་ལས་
སྟག་ལུང་བཀའ་བརྒྱུད་ཀྱི་ཆོས་སྐོར་ཕལ་ཆེ་བ་གསན་ཞིང་རྗེ་བཙུན་རིན་པོ་ཆེའི་ཐུགས་དམ་
ཐང་སྐུ་རྔོག་དཀྱིལ་བདུན་དཀྱིལ་ཐང་བཞེང་པའི་ཞལ་བཀོད་གནང༌། ཟླ་བ་གཉིས་ཙམ་ནས་
རྗེ་བཙུན་རིན་པོ་ཆེ་སྟག་ལུང་དུ་ཕེབས། རྗེ་བཙུན་རིན་པོ་ཆེས་མཁན་པོ། སྟག་ལུང་རིན་པོ་
ཆེ་ལས་སློབ། རྗེ་འདིས་གསང་སྟོན་གནང་ནས་དགེ་སློང་ཉིས་བརྒྱར་ཉེ་བ་བསྒྲུབ་པ་གནང་
ཞིང༌། ཕེབས་ཀར་སྟག་ལུང་རིན་པོ་ཆེ་སྐུ་མཆེད་ཐམས་ཅད་ཀྱིས་གནང་སྦྱིན་བསམ་གྱིས་མི་
ཁྱབ་པ་གནང༌། ཉན་པོ་དང་ནམ་མཁའ་ཁྱུང་རྫོང་སོགས་བརྒྱུད་ནས་ལྷ་སར་ཕེབས། ཇོ་
མཇལ་རྒྱས་པར་མཛད། ཡར་ལམ་ནུབ་ཆོས་ལུང་དང༌། དངུལ་ཆུ་སོགས་སུ་ཕེབས་ནས་རྟེན་
མཇལ་གནང་ནས་ངམ་རིང་དུ་ཕེབས་སོ། །དེ་ལྟར་ལོ་གཉིས་ལྷག་ཙམ་རྗེ་བཙུན་ཐམས་ཅད་
མཁྱེན་པའི་ཞབས་ཕྱིར་བཞུགས་ཏེ། དེ་བར་དུ་གསུངས་པའི་ཟབ་པ་དང་རྒྱ་ཆེ་བའི་ཆོས་
བཀའ་བསམ་གྱིས་མི་ཁྱབ་པ་གསན་ཞིང༌། དེར་བསླབ་བྱ་དང་ཟང་ཟིང་གི་གནང་སྦྱིན་མང་
པོ་གནང༌། མངའ་རིས་ནས་སྤྱན་འདྲེན་པ་དང་བསྟུན་རྗེ་བཙུན་རིན་པོ་ཆེས་ཀྱང་ལྗོངས་ལྟར་
གནང་ནས་གློ་བོར་ཕེབས། རྗེ་ཉིད་དགུང་ལོ་སུམ་ཅུ་སོ་ལྔ་བཞེས་པ། སྤྲེའུ་ཞེས་པ་མེ་མོ་ལུག་
གི་ལོ་ཟླ་ཚེས་གཟའ་སྐར་དགེ་བ་ལ། ཆོས་སྡེ་ཆེན་པོ་ཐུབ་བསྟན་དར་རྒྱས་གླིང་གི་མཁན་
པོར་མངའ་གསོལ་ནས། སྡེ་སྲིད་ཁྲི་སྟོན་ཟབ་རྒྱས་དང༌། དགོན་ཆེན་བདུན། དགོན་ཆུང་བཅུ་
སོ་སོའི་བླ་མ་སློབ་དཔོན། ཆོས་སྡེ་ལས་སློབ། བློན་ཆེན་གོ་གསུམ། བློན་ཕྲན། དཔོན་སྐྱ་
སོགས་ཀུན་གྱི་ཁྲི་སྟོན་རྒྱས་པ་ཕུལ། གློ་བོ་ཕྱི་ནང་གི་ཆེ་དགུ་ཀུན་གྱི་མཆོད་ཡུལ་དུ་གྱུར་ནས།
20-1-150


ཆོས་སྡེ་ཆེན་པོར་སྤྱི་ཆོས་སུ་ཐེག་པ་ཆེན་པོ་དབུ་མ་པ་དང་སེམས་ཙམ་ལུགས་ཀྱི་སེམས་
བསྐྱེད་ཐུབ་པ་དགོངས་གསལ། སྡོམ་རིགས་གཉིས། བྱམས་ཆོས་སྡེ་ལྔ། ས་སྐྱ་གོང་མ་ལྔའི་
རྣམ་ཐར་གྱི་ལྗགས་ལུང་དགོས་ཆོས་སོ་སོའི་འདོད་པ་དང་མཐུན་པར་བློ་སྦྱོང་དཔལ་ཡེ་མའི་
ཁྲིད་ལེགས་བཤད་ཀུན་འདུས། རྒྱལ་སྲས་བཀའ་འབུམ། བཀའ་གདམས་གླེགས་བམ་
སོགས་དང༌། གསང་སྔགས་དོན་གཉེར་ལས་ཀྱཻ་རྡོ་རྗེ་མཚོ་སྐྱེས་ལུགས། མན་ངག་ལུགས།
ཌོཾ་བྷི་ལུགས། ནག་པོ་ལུགས་ཏེ་བཀའ་བབས་བཞིའི་དབང༌། ཡུམ་བཀའ་གཞན་དང་ཀུན་
རིག མི་འཁྲུགས་པ། ཚེ་དཔག་མེད་སོགས་ཀྱི་དབང་དང་རྗེས་གནང་མང་པོ། ཁྲོམ་ཆོས་སུ་ཚེ་
དབང་མ་ཎིའི་བཟླས་ལུང༌། ཤ་ཝ་རིའི་རྗེས་གནང་སོགས་ཡང་ཡང་གནང་སྟེ་འགྲོ་དོན་
འཕེལ་བར་གྱུར་ཏོ། །
མཆོག་གི་དགེ་ལེགས་ས་བོན་ནོར་འཛིན་མའི། །ལྟེ་བར་ཡོངས་སྨིན་རྒྱས་པའི་ས་ལཀྵ། །
ཡོན་ཏན་སྙེ་མ་གཡུར་ཟ་ལྡེམ་པ་འདི། །ཡིད་བཞིན་རིན་ཆེན་མཆོག་གི་ནོར་བུ་བཞིན། །
ལང་ཚོ་འབར་བའི་འོད་ཟེར་འཆར་ཀ་ནས། །སྲིད་པའི་བདེ་བ་པད་ཚལ་རྒྱགས་འཛུམ་མར། །
ཆགས་བྲལ་ཐུན་མཚམས་ངུར་སྨྲིག་ཉེར་བཟུང་ནས། །སྨྲ་བའི་ཉི་མ་གཞོན་ནུ་ལྷག་པར་
མཛེས། །དེ་ནི་སྨོན་ལམ་རྣམ་དག་དྲི་བཞོན་གྱིས། །ཉེར་དྲུངས་དབུས་གཙང་དག་པའི་མཁར་
འཕགས་ཏེ། །ལུང་རིགས་འོད་ཟེར་འབུམ་ཕྲག་རབ་འཕྲོ་ཞིང༌། །མཐའ་ཡས་སེམས་ཅན་
ཀུན་གྱི་ཉེར་འཚོར་གྱུར། །ཕུན་ཚོགས་ལྔ་ཕྲག་གིས་བརྒྱན་མཁན་པོ་ཡི། །ཉིན་མོར་བྱེད་
ལས་ཡོངས་རྫོགས་སྡོམ་པའི་འོད། །གང་སྐུ་འདབ་བརྒྱ་རྒྱས་པར་འཕོས་པ་ལས། །མཐའ་
ཡས་ཡོན་ཏན་དྲི་བཟང་གང་བར་གྱུར། །རྒྱུད་སྡེ་བཞི་ཡི་བཀའ་སྲོལ་ཆུ་བོའི་རྒྱུན། །གང་
ཐུགས་རྒྱ་མཚོ་ཆེན་པོར་འབབས་པ་ལས། །དངོས་གྲུབ་རིན་པོ་ཆེ་རྣམས་ཀུན་གྱི་མཛོད། །
དབང་ལུང་གདམས་པའི་རླབས་ཕྲེང་ཕྱོགས་བཅུར་སྤྲོས། །དེ་ནས་ཐུབ་ཆེན་རྣམ་པར་རྒྱལ་
20-1-151


བ་ཡིས། །ཆོས་ཀྱི་སྡེ་ཆེན་རྡོ་རྗེ་གདན་གཉིས་པའི། །མི་འཇིགས་སེང་གེའི་ཁྲི་ལ་མངའ་
གསོལ་ཏེ། །ཆོས་དང་སྲིད་ཀྱི་དཔལ་འབྱོར་ཡོངས་སུ་གང༌། །སྐུ་གསུང་ཐུགས་ལ་ཉེས་པའི་
དྲི་ཙམ་གྱིས། །ཡུལ་དུས་གནས་སྐབས་ཀུན་ཏུའང་རེག་མིན་ཏེ། །མིག་སྟོང་ལྡན་དང་རྣ་བ་
བརྒྱ་པས་ཀྱང༌། །མཐོང་དང་ཐོས་པའི་ཡུལ་དུ་གྱུར་པ་མིན། །བུམ་པའི་མཆུ་སྒྲོས་གསལ་
བའི་འཛུམ་ངོམས་ནས། །ཚེམས་ཕྲེང་ཀུན་དའི་འོད་ཟེར་དང་ལྷན་ཅིག །དམ་ཆོས་སྣང་བ་
སྤྲོས་ཚེ་སྐལ་བཟང་ལ། །རྫོགས་ལྡན་དཔྱིད་ཀྱི་དགའ་སྟོན་གསར་དུ་ཤར། །དེ་ལྟར་བསྟན་
པ་དང་སེམས་ཅན་གྱི་དོན་རྒྱ་ཆེ་བའི་ངང་ནས་གཙོ་བོར་ཆོས་སྡེ་ཆེན་པོར་བཞུགས་ནས་ཆོས་
ཀྱི་འཁོར་ལོ་བསྐོར་ཞིང་སྐབས་མཚམས་སུ། དོལ་ཕྱོགས་དང་འབྲོག་ཕྱོགས་རྣམས་སུའང་
ཕེབས་ནས་སེམས་ཅན་མང་པོའི་དོན་མཛད། སྐབས་འགར་སྒྲུབ་གནས་ཆེན་པོ་བྲག་སྟེང་རྡོ་
རྗེའི་བྲག་རྫོང་ལ་སོགས་པར་ཟབ་དོན་ལ་མཉམ་པར་འཇོག་པར་མཛད་པའི་སྒོ་ནས་ལོ་བཅུ་
ཙམ་སོང་བ་ན། བདུད་ཀྱིས་བྱིན་གྱིས་རླབས་པ་འགའ་ཞིག་གིས་བྱེད་སྤྱོད་ལ་བརྟེན། གློ་
བུར་དུས་ཟིང་རྒྱ་ཆེན་ལང་གྲབས་བྱུང་བས། གཙོ་བོར་སྡེ་བདག་དཔོན་བློན་ཀུན་ཞལ་འཆམ་
པ་དེང་རང་གི་གཟིར་བུན་འདི་ཞི་བར་བྱེད་པ་ལ་རྗེ་བཙུན་ཐམས་ཅད་མཁྱེན་པ་དང༌། ངོར་
པ་མཁན་ཆེན་སྤྱན་འདྲེན་དགོས་འདུག་ཅིང༌། དེ་ལ་གཞན་མས་སྤྱན་འདྲེན་ལ་ཕེབས་དགོས་
ཞུ་བ་ནན་ཅན་བྱུང་ཞིང༌། རྗེ་ཉིད་རང་ཡང་རྗེ་བཙུན་རིན་པོ་ཆེ་མཇལ་བར་ཕེབས་སྤྲོ་བ་
སོགས་ནས་ཕེབས་ཏེ། ཇོ་ནང་དུ་རྗེ་བཙུན་ཐམས་ཅད་མཁྱེན་པ་ལྕགས་ཕོ་སྤྲེའུ་ལོ་དགུན་
ཁྲིད་ཚུགས་མཚམས་སུ་ཕེབས། གློ་བོ་སྡེ་སྲིད་ཀྱི་ཞུ་ཡིག་འབུལ་ཆས་སོགས་དང་ཞུ་དག་
རྣམས་དང༌། བླ་མ་དམ་པ་ཉིད་ཀྱི་གསེར་ཟངས། བྱུ་རུ་སྤོས་ཤེལ། ཁྱད་རས་སོགས་མང་དུ་
འབུལ་བ་མཛད། ཁྱད་པར་རྗེ་ཉིད་ཀྱི་སྐུ་རྒྱན་མང་དག་ཕུལ་བ་རྣམས་ལ་བརྟེན། ཇོ་ནང་ཆོས་
གྲྭའི་བལ་པོ་ཤིང་ཀུན་གྱི་བཀོད་པའི་མཆོད་རྟེན་ཁྱད་པར་དུ་འཕགས་པ་འདི་བཞེངས་པ་
20-1-152


གནང་སོང༌། ཞུ་དོན་རྣམས་ལ་ཡང༌། མི་རྒས་ནས་ཡུལ་གྱི་དཔེ་ཡིན་པས་ཕེབས་གསུངས་བ་
བྱུང༌། དེ་ནས་གསེར་མདོག་ཅན་དེར་དུས་ཁྲིད་གཙོ་བོར་གྱུར་པའི་བཀའ་ཆོས་གསན། གྲོལ་
མཚམས་གཞིས་ཀ་རིན་སྤུངས་རྒྱལ་རྩེ་གཙོ་བོར་གྱུར་པའི་རྗེ་བཙུན་རིན་པོ་ཆེ་སྤྱན་འདྲེན་
འདུག་པ་ལ་མྱུར་སྐོར་གནང་ནས་མངའ་རིས་ལ་ཕེབས་རྩིས་དང༌། དེ་བར་ལ་རྗེ་འདི་ལ་ངོར་
དུ་རྒྱུ་མཚན་རྣམས་ཕུལ་ལ་བྱ་ལོ་ལོ་ཐོག་ཏུ་འདུག་པས། ངེད་མངའ་རིས་ལ་འགྲོ། འགྲོ་བའི་
བར་སྤན་ནོར་བུ་གླིང་དུ་མཚམས་གྱིས་གསུངས་པ་ལྟར། ཁྲི་ཁང་བར་ཕྱག་ཕྱི་གནང་ནས་
ངོར་དུ་ཕེབས་རྗེས་སངས་རྒྱས་སེང་གེ་དང་མཇལ། ཆོས་འབྲེལ་གསན། མང་ཇ་ཞུས་ནས་
ཕེབས་དོན་རྣམས་ཞུས་པས། རྗེ་བཙུན་རིན་པོ་ཆེ་ཕེབས་ན་ངེད་ཀྱང་འགྲོ་ཐུབ་པ་བྱེད་
གསུངས་པ་བྱུང༌། དེ་ནས་གསེར་མདོག་ཅན་དུ་རྟེན་མཇལ་གནང་ཞིང་མང་ཇ་ཞུས་ནས་ནོར་
བུ་གླིང་དུ་རེ་ཞིག་སྐུ་མཚམས་དམ་པའི་ཁོངས་ནས་ཡང་དག་འཇོག་ཁོ་ན་གནང་ངོ༌། །དེ་ནས་
རྗེ་བཙུན་ཡར་ཕེབས་པའི་ཁྲི་ཁང་ནས་ཕྱག་ཕྱི་གནང༌། ངམ་རིང་དུ་ཕེབས་ནས་སྤྱིར་ཡང་
བཀའ་ཆོས་མང་བ་དང༌། ཁྱད་པར་རྗེ་ཉིད་ལ་སྒེར་ཆོས་སུ་གསུང་ངག་ལམ་འབྲས་ཤིན་ཏུ་
སྨིན་པ། མགོན་པོའི་མན་ངག་ཡོངས་རྫོགས། སྔར་གྱི་ས་སྐྱ་བཀའ་འབུམ་གྱི་འཕྲོ་འཕགས་
པའི་བཀའ་འབུམ་གྱི་ལུང་རྣམས་གནང་ཞིང༌། དེར་མངའ་རིས་ལ་ཕེབས་དགོས་པའི་རྒྱུ་
མཚན་ནན་སྐྱེད་འབུལ་བ་གནང་ནས། སྡེ་པ་གཞིས་བྱང་རྒྱང་གསུམ་པོ་འདི་ད་ལྟ་ངེད་ཀྱི་ཁ་
ཏ་དང༌། ཆོས་དབང་དམ་ཚིག་ལ་བསམ་ན་སྡེ་གཟར་མེད་པར་དུས་བདེ་བ་ཡིན། ངེད་སྟོད་
ཕྱོགས་ལ་སོང་ན་སྡེ་གཟར་ཡོངས་ཟེར། ཁོང་གསུམ་ག་ཞལ་འཆམ་འདུག་པས་ཕེབས་མ་
ཐུབ་ཅིང༌། སྤྱིར་ཡང་ངེད་དབུས་གཙང་དུ་བསྡད་པ་བསྟན་པ་དང་སེམས་ཅན་ལ་ཕན་སྟོབས་
ཆེ་གསུང་བ་བྱུང་ནས་སྤྱན་མ་འདྲོངས། སྔ་སོར་ནོར་བུ་གླིང་དུ་བཞུགས་སྐབས་རྗེ་ཉིད་ཀྱི་
མནལ་ལམ་དུ་འཁར་རྔ་ཞིག་བརྡུང་བ་མཛད་ཀྱི་འདུག་པ་ལ་སྐད་མེད་པ་ཞིག་བྱུང་བ་ཡང༌།
20-1-153


རྗེ་བཙུན་རིན་པོ་ཆེ་སྤྱན་མི་འདྲོངས་པའི་ལྟས་སུ་དགོངས། དེར་རྗེ་བཙུན་རིན་པོ་ཆེ་སྤྱན་མ་
འདྲོངས་ཕྱིན་བདག་ཀྱང་མི་འགྲོ་བ་བསྡད་ཆོག་པ་དགོས་ཞུས་པས། ད་ལན་ངེད་འགྲོ་མ་
ཐུབ་པའི་ཁར་ཁྱེད་ཀྱང་མ་ཕྱིན་ན་ཅི་ལ་འོངས། ཅིས་ཀྱང་སོང་ཕྱིས་འདིར་བྱོན་དགོས་པ་
ཡོང་བས་དེ་སྐབས་ཐེ་ཚོམ་མེད་པར་ཤོག་གསུངས་ཚེ་དབང༌། མགོན་པོ་གུར་ཞལ་སོགས་ཀྱི་
རྗེས་གནང་སོགས་དང༌། དངོས་པོའི་གནང་སྦྱིན་རྒྱ་ཆེ་བ་དང་བཅས་རྫོངས་དར་གནང༌།
དེར་ཞབས་ལ་གཏུགས་སྨོན་ལམ་རྒྱ་ཆེར་བཏབ། འདི་ཕྱིའི་དོན་འབྲེལ་མང་པོ་ཡང་སྙན་
ལམ་དུ་ཕུལ། ཐུགས་ཤིན་ཏུ་སྐྱོ་བཞིན་པས་མངའ་རིས་སུ་ཕེབས་ཏེ་འདི་མཇལ་བའི་རྗེས་མ་
ཡིན་ནོ། །སྐྱ་སྐྱར་བྱང་རི་ཆོས་རྗེ་རྒྱལ་མཚན་ཡེ་ཤེས་ཀྱི་ཞབས་ཏོག་ཞུས། བཀའ་ཆོས་ཐོར་
པ་གནང་ནས་གློ་བོར་ཕེབས་ཆེ་དགུ་ཀུན་གྱིས་བསུ་བའི་རིམ་པ་གཟབས་མས་བསུས་ཏེ་
ཆོས་སྡེ་ཆེན་པོར་ཕེབས། འཚོགས་ཆེན་ལ་མང་ཇ་འགྱེད་བཅས། ཐུབ་ཆེན་རྗེ་བློ་གློས་རྒྱལ་
མཚན་གྱི་གདུང་འབུམ། དཔལ་བརྩེ་བ་ཆེན་པོའི་གསེར་གདུང་སོགས་རྟེན་སོ་སོ་སྙན་དར།
དཀར་མེ། མཆོད་རྫས། གཙུག་ལག་ཁང་དུ་དར་འཕན་འབུལ་བ་གནང༌། ཆོས་སྡེ་འཛིན་
སྐྱོང་སྔ་མ་ཁོ་ན་ལྟར་གནང་མུས་ནས། ཕུན་ཚོགས་བསམ་གཏན་གླིང་གི་གཙུག་ལག་ཁང་ཀ་
ཆེན་བཅུ་གཉིས་ཡོད་པ་གསར་འདེབས་གནང༌། ལོགས་བྲིས་ལ་གཙོ་བོ་ཐུབ་དབང་གནས་
བཅུ། གཡས་སུ་པཎ་ཆེན་རིན་པོ་ཆེ། བརྩེ་བ་ཆེན་པོ་ཀུན་དགའ་མཆོག་གྲུབ། གཡོན་དུ་རྗེ་
བཙུན་རིན་པོ་ཆེ། རྗེ་བློ་མཆོག་རྣམས་ཀྱི་ཞིང་ཁམས་ཏེ། བྱིངས་ལ་ཕྱོགས་བཅུའི་སངས་
རྒྱས། ཚེ་དཔག་མེད། ཨོ་རྒྱན་རིན་པོ་ཆེ། གུར་ལྷ་བརྒྱད། རྣམ་སྲས་རྟ་བདག་བརྒྱད་རྣམས་
ཀྱི་ཞིང་ཁམས་སྦྱིན་བདག་དང་བཅས་པ། དེའི་བར་རྣམས་ལ་སངས་རྒྱས་སྟོང་སྐུ་ལེགས་
པར་བཞེངས། རབ་གནས་དགའ་སྟོན་གྲུབ་མཚམས་བྱང་སྤང་ལེར་སྤྱན་འདྲེན་བྱུང༌། དགོན་
པའི་ཞལ་བདག་མཛད་ནས་གཙུག་ལག་ཁང་ཀ་བ་བཅུ་གཉིས་མ་ཤིང་ཆ་གློ་བོ་ནས་དྲངས་
20-1-154


ནས་བཞེངས། རི་མོ་འཕན་སྤྱི་སྤུན་ལྔས་སྦྱིན་བདག་བྱས། ལེགས་པར་གྲུབ་ནས་རབ་ཏུ་
གནས་པ་གནང་པས་མེ་ཏོག་གི་ཆར་འབེབས་པ་དང༌། བརྟན་བཞུགས་སྐབས་གཙོ་བོ་ཐུབ་
དབང་གི་ཐུགས་ཀར་མེ་ཏོག་ནས་གསུམ་ཆགས་པ་ཡུན་རིང་པོར་གནས་པ་བྱུང་ཞིང༌། འཕན་
སྤྱི་བ་སོ་སོས་འབུལ་བ་ཡང་རྒྱ་ཆེར་བར་ཕུལ། དེར་ཚོགས་པ་ལ་ཚེ་དབང་གྲུབ་རྒྱལ་མ། ལྷ་
དགུ་ངོར་ལུགས་དང་བོ་དོང་ལུགས་ཀྱི་ཀུན་རིག་གི་དབང་སོ་སོར་མི་འཁྲུགས་པ། ཀྱཻ་རྡོ་རྗེ་
ཡབ་བཀའ། ཡུམ་བཀའ་བོ་དོང་ཐམས་ཅད་མཁྱེན་པའི་ཐུགས་དམ་ལྷ་ལྔའི་རྗེས་གནང་དེའི་
རྣམ་ཐར་དང༌། པཎ་ཆེན་རིན་པོ་ཆེའི་རྣམ་ཐར་ཞིབ་མོ་རྣམ་འབྱེད་ཀྱི་ལུང་སོགས་གནང༌། བླ་
བྲང་དུ་མི་འཁྲུགས་པའི་ལྗགས་བསྙེན་བཏང་དུས། སྡིག་སྒྲིབ་དག་པ་ཡིན་དགེ་སྦྱོར་གསལ་
སྣང་ཆེ་བ་བྱུང་གསུངས། སྦྱིན་བདག་སོ་སོ་ཡང་འདོད་ཆོས་ཀྱིས་ཚིམ་པར་མཛད། དབུ་
ལེགས་མཁན་པོ་ཆོས་ལེགས་བཟང་པོས་སྤྱན་འདྲེན་ཞུས། ཆོས་དགོན་གསུམ་གྱི་མཁན་
པོས་སེར་སྦྲེངས་རྒྱས་པར་ཕུལ། གང་ལ་གང་འདོད་ཀྱི་ཆོས་རྒྱ་ཆེར་བསྩལ་ནས་གློ་བོར་
ཕེབས། རྗེ་འདིས་བཀའ་ཕེབས་ནས། ས་སྐྱོང་བསོད་ནམས་རྒྱལ་པོ་རབ་རྒྱལ་རྩེ་ནས་གདན་
དྲངས། སྨོན་ཐང་གི་རྒྱལ་སྲིད་ལ་མངའ་གསོལ་ཤིས་བརྗོད་ཁྲི་སྟོན་རྒྱས་པ་དང་བཅས་པ་
ཕུལ། གློ་བོ་ཕྱི་ནང་ཀུན་དུས་བདེ་འཇམ་ལ་བཀོད། བྲག་སྟེངས་སུ་རེ་ཞིག་དབེན་པ་བསྟེན་
པ་གནང་ནས་སྒྲོལ་དཀར་སོགས་ཀྱི་ཚེ་སྒྲུབ་འགའ་ཤས་དང༌། དེ་རྗེས་མགོན་པོ་ལྷ་བརྒྱད་
སྦྲག་སྒྲུབ་གནང་དུས་མགོན་པོས་རྗེས་སུ་འཛིན་པའི་རྟགས་དང༌། མནལ་ལམ་གྱི་ཚུལ་དུ་ས་
ཕྱོགས་འདི་འདྲར་འགྲོ་དོན་འབྱུང་སོགས་ཀྱི་ལུང་བསྟན་ཐོབ། སླར་རི་ཤིང་དུ་ཐུགས་སྒྲུབ་ཀྱི་
བསྙེན་པ་གནང་དུས། ཁང་བཟང་མཐོན་པོའི་རྩེར་སློབ་དཔོན་ཆེན་པོ་པདྨ་འབྱུང་གནས་སྐུ་
ལ་ཕོད་ཀ་གསོལ་ཞིང༌། རྒྱན་དུ་མས་བརྒྱན་པ་དང་མཇལ་བའི་གསལ་སྣང་བྱུང་གསུངས།
དེ་སྐབས་ས་སྐྱོང་དཔོན་གཡོག་མཆོད་ཡོན་གྱིས་ཐུགས་རྩོལ་གནང་ནས། སྟོན་པ་ཐུབ་པའི་
20-1-155


དབང་པོའི་སྐུ་རྒྱུ་གསེར་ཟངས་ལས་གྲུབ་པ། པད་གདན་ཡན་ལ་མཐོ་ཚད་གསུམ། ཡོད་པ་
ཞིག་བཞེངས། ནང་བཞུགས་རྒྱས་པ་གནོད་སྦྱིན་འཁོར་ལོའི་བར་དུ་ལེགས་པར་གྲུབ། རབ་
ཏུ་གནས་པ་རྗེ་ཉིད་ཀྱི་ཕྱག་ཕྱིར་བླ་མ་སློབ་དཔོན་སྡེ་སྣོད་འཛིན་པ་མང་དག་པ་དང་བཅས་
པས། བཅོམ་ལྡན་འདས་ཀྱཻ་རྡོ་རྗེའི་རྡུལ་ཚོན་གྱི་དཀྱིལ་འཁོར་ཆེན་པོའི་ཞལ་ཕྱེ། རབ་གནས་
རྒྱས་པར་གནང་སྐབས་མེ་ཏོག་གི་ཆར། འཇའ་འོད་ཀྱི་གུར་ཁྱིམ་སོགས་བྱུང་ཞིང༌། སྦྱིན་
བདག་བསྒོ་བའི་སྐབས་ས་སྐྱོང་དཔོན་བློན་འཁོར་བཅས་ཟབ་སྤྲོད་རྒྱས་པ་དང་བཅས་
ཕེབས་པར་བཀྲ་ཤིས་རྫས་བརྒྱད་འབུལ་བ་སོགས་ཤིས་བརྗོད་གནང་སྐབས། གདུང་བརྒྱུད་
འཕེལ་ཞིང་མངའ་ཐང་རྒྱས་པའི་དགེ་མཚན་བྱུང༌། སྡེ་སྲིད་ནས་རབ་ཏུ་གནས་པའི་ཡོན་ཡང་
སྐུ་གསུང་ཐུགས་རྟེན་སྤུས་གཙང་བ། གསེར་དངུལ་བྱུ་རུ་དང་སྦོས་ཤེལ་གྱི་ཤལ་པ་སོགས་
སྤུས་གཙང་བ་ཕུལ། བླ་སྒྲུབ་བླ་སློབ་དགེ་འདུན་གྱི་སྡེ་སོགས་ལ་ཡང་འབུལ་བ་གྱ་ནོམ་པ་
བྱུང་སྟེ། བཀྲ་ཤིས་དགའ་སྟོན་གྱི་ཡུན་རིང་དུ་དུས་འདའ་བར་གྱུར། དེའི་ཕྱི་ལོ་རྒྱལ་བུ་
བལྟམས་པའི་མཚན་ཡང་རྗེ་ཉིད་ཀྱིས་འདོགས་པར་མཛད་དེ་ཀུན་དགའ་རྣམ་རྒྱལ་དུ་
གསོལ། སྐུ་ཁྲུས་ཡང་ཡང་ཕུལ། སྐུ་ཚེའི་ལེགས་ལམ་སྤེལ་ཕྱིར་ཚེ་དབང་གྲུབ་རྒྱལ་མ་དང་ལྷ་
དགུ། སྒྲོལ་དཀར་བར་ཆད་བསྲུང་ཕྱིར། ཕྱག་རྡོར་དང་མི་གཡོ་བའི་རྗེས་གནང་སོགས་
བསྩལ། གླང་ལོའི་དབྱར་ཆོས་ལ་ཆོས་སྡེ་ཆེན་པོར་དམར་ཁྲིད་ཚེ་ཁྲིད་པཎ་ཆེན་རིན་པོ་ཆེའི་
རྣམ་ཐར་གྱི་ལུང་སོགས་གནང་སྐབས་མནལ་ལྟས་ལ། ཉི་མ་སྒྲ་གཅན་གྱིས་བསྒྲིབས་པ་
སོགས་ངན་པ་དང༌། ཐུན་གཏོར་བྱ་རོག་གིས་མི་ཟ་བ་སོགས་བྱུང་བས། ད་ལོ་དོགས་ཆ་
གཅིག་རང་འདུག་གསུངས། སྟོན་རྒྱབ་དབུས་གཙང་ནས་རྗེ་རིན་པོ་ཆེའི་བཀའ་ཤོག་ཕེབས་
དོན། ངོས་ཀྱང་གཟུགས་པོ་བདེ་མོ་མི་འདུག་པས་ཡུན་རིང་སྡོད་པར་མི་འདུག་ནའང༌།
འདིར་འཕྲལ་གྱི་གཡོག་སོགས་འཕན་ངེས་ཡོང་བ་འདུག་པས། ཁྱེད་རང་འཕྲལ་དུ་ཡོང་པའི་
20-1-156


ཙབ་ཙོབ་མ་བྱེད། ངེད་ཀྱིས་རྗེས་སུ་འཛིན་གསུངས་པ་བྱུང་བས། ཐུགས་ཤིན་ཏུ་སྐྱོ་ན་ཡང་
ཐུགས་དམ་ཕེབས་སྒོ་དང་བསྟུན་པས་འཕྲལ་དུ་ཕེབས་མ་ནུས། སྐུ་རིམ་ཡང་ཡང་གནང་
ཀྱང༌། དབོན་དྲུང་རིན་པོ་ཆེས། རྗེ་བཙུན་ཐམས་ཅད་མཁྱེན་པ་སྟག་ལོ་ཟླ་བ་དང་པོའི་ཚེས་
བརྒྱད་ལ་སྤྲུལ་པའི་སྣང་བ་བསྡུ་བ་གནང་བའི་ཚུལ་གྱིས་བང་ཆེན་ཆེད་བཏང་བྱུང་བས། རེ་
ཞིག་ཐུགས་ལ་བཟོད་གླགས་མེད་པར་གྱུར་ཀྱང༌། བླ་མ་རྗེ་བཙུན་དག་པའི་ཞིང་དུ་ཕེབས་པ་
ལ་དགོངས་པ་རྫོགས་ཕྱིར་མཆོད་འབུལ་མ་གཏོགས། འཇིག་རྟེན་ལུགས་ཀྱི་མྱ་ངན་བྱ་མི་
རིགས་པར་དགོངས། ཆོས་སྡེ་ཆེན་པོས་གཙོས་པའི་གློ་བོ་ནང་གི་དགོན་པ་རྣམས་དང༌། བྱང་
དགོན་རྣམས་དང༌། དོལ་ཕྱོགས་ཀྱི་དགོན་པ་ཐམས་ཅད་ལ་བསྙེན་བཀུར་འབུལ་བ། སྐྱེ་བོའི་
ཚོགས་ལ་སྦྱིན་གཏོང་དཔག་མེད་གནང་ཞིང༌། ཁྱད་པར་གུར་བརྟགས་སཾ་གསུམ་བདེ་གསང་
དང་ལྔའི་རྡུལ་ཚོན་གྱི་དཀྱིལ་འཁོར་ཞལ་ཕྱེ། རྗེ་ཉིད་ཀྱི་ཀྱཻ་རྡོ་རྗེའི་ཚོགས་དབུ་གནང་སྟེ་བླ་
མ་དང་དཀྱིལ་འཁོར་གྱི་གཙོ་བོ་ཐ་མི་དད་པར་གསལ་བཏབ་པ་ལ་མཆོད་འབུལ་གསོལ་
བཏབ་གནང༌། གཞན་ཡང་སྡེ་སྲིད་དཔོན་བློན་སོགས་ཆེ་དགུ་ཀུན་གྱིས་མཆོད་འབུལ་རྒྱས་
པར་གནང་བའི་ཚོགས་དབུ་གནང་ནས་མཆོད་བསྔོ་རྒྱས་པར་ཕུལ། དེ་དག་གི་སྐབས་སུ་
མནལ་ལམ་དུ་རྗེ་དམ་པ་ཕེབས་ནས། བླ་མའི་སྐུ་འདྲ་བརྒྱ་རྩ་བཞེངས་ན་ཕན་ཡོན་ཆེ་
གསུངས་པ་བྱུང་བས། སྐུ་འདྲ་བརྒྱ་རྩའི་བྲིས་སྐུ་འདི་འཕྲལ་དུ་བཞེངས་པ་གནང༌། དེ་གྲུབ་
མཚམས་རྗེ་དམ་པ་མནལ་ལམ་དུ་ཕེབས་ནས། འདི་ལ་རབ་གནས་ང་རང་གིས་བྱས་པ་ཡིན་
པས་རབ་གནས་ཟུར་པ་བྱེད་མི་དགོས་གསུངས། ཆོས་ལུང་དུ་མི་འཕྲལ་མར་ཆེད་གཏད་དུ་
གནང་ནས། སྐུ་གདུང་རིན་པོ་ཆེར་སྙན་དར་དཀར་མེ། མཆོད་འབུལ་རྣམས་ལ་བསྙེན་བཀུར་
འབུལ་བ་དང་བཅས་པའི་ཆས། ཆོས་ལུང་ཇོ་ནང་ཤུད་ཁྲོད་རྣམས་སུ་མང་ཇ་དང་བཅས་
གནང༌། དེ་རྗེས་བརྟེན་བཞེངས་ཀྱི་རྒྱུར་གསེར་དངུལ་ཟངས་སོགས་གཏོས་ཆེ་བ་འབུལ་བ་
20-1-157


དགེ་སློང་བསྲུང་སྐྱོབས་རྫོངས་ལྟ་གནང༌། དེ་ནས་རྟེན་བཞེངས་ནོན་པ་གཞིར་བཅས་གནང་
ནས་སྟག་ལོའི་དགུན་ཤར་ལ་ཕེབས་ནས། གཞིས་བྱང་རྒྱང་གསུམ་བཀའ་གྲོས་སུ་བསྟུན་
པའི་རྐང་ལེན་བྱང་ནས་གནང༌། རི་ཁྲོད་ཆེན་པོ་ཇོ་ནང་གི་གདན་ས་གནང་དགོས་ཚུལ་གྱི་
སྙན་ཞུས་ཀྱི་ཞུ་ཡིག་དང་བཅས་གདན་འདྲེན་པ་རྣམས་དང་བྱང་ལམ་མགྲོན་ཆེན་དུ་མཇལ།
ཕེབས་ལམ་བདེ་བར་བྱང་ངམ་རིང་དུ་ཕེབས། ཆོས་རྒྱལ་ཀུན་དགའ་རིན་ཆེན་དང་མཇལ།
ཇོ་ནང་གི་གདན་ས་གནང་དགོས་པ་སོགས་ཀྱི་བཀའ་གྲོས་རྒྱས་པ་བྱུང༌། མཆེད་གྲོགས་
དཔལ་བ་སོགས་རྗེ་བཙུན་རིན་པོ་ཆེའི་ཕྱག་གཡོག་རྣམས་དང༌། སྨོན་གྲོ་ནས་ཕྱག་གཡོག་
དྲག་ཁ་རྣམས་ཀྱང་ངམ་རིང་དུ་ཕེབས་བསུ་འབྱོར་པ་བཞིན་རིམ་པས་བརྒྱུད་དེ་དཔོན་དྲུང་
འཕན་ནེ་དཔོན་གཡོག་གིས་ཕེབས་བསུ་གཟབས་མ་དང་བཅས་སྨོན་གྲོར་ཕེབས། ཞག་
གཉིས་བཞུགས་ཆོས་ལུང་བྱང་ཆུབ་རྩེ་མོར་གྲུབ་སྡེ་ཆེན་པོའི་སེར་སྦེངས་རྒྱས་པས་སྤྱན་
དྲངས་ནས་ཕེབས། ཐུགས་རྩོལ་ཆེ་བས་དངུལ་གདུང་རིན་པོ་ཆེ་ཁྲི་ཐོག་ཏུ་ཕེབས་གྲུབ་འདུག།
དེར་གུས་འདུད་ཆེན་པོས་ཕྱག་མཆོད་སྨོན་ལམ་རྒྱས་པར་མཛད་དེ། སྙན་དར་དུ་གོས་ལྗང་
ཁུ་མུ་ཏིག་གི་ལཉྩ་བཀོད་པ་ཆ། གོས་འཕན་དམར་པོ་མུ་ཏིག་རྒྱན་ཅན་ཆ། གུ་གུ་ཤའི་མཎྜལ།
དངུལ་ཏིང་བདུན་ཚར། དངུལ་གྱི་ཀོང་བུ་དཀར་མེ་རྒྱུན་འབར་དང་བཅས་པ། སྒྲུབ་སྡེར་མང་
ཇ་འགྱེད་སོགས་གནང༌། རྗེ་རྡོ་རིང་བ་དང་མཇལ། ཐུགས་མཉེས་པའི་གསུང་གླེང་ཞིབ་རྒྱས་
གནང༌། དེ་མཚམས་གཞིས་རྒྱང་བྱང་གསུམ་སོ་སོའི་ཞུ་ཡིག་མི་སྣ་དང་བཅས་རྒྱུ་མཚན་ཕུལ་
ཏེ། རྗེ་ཉིད་དགུང་ལོ་ལྔ་བཅུ་ང་ལྔར་ཕེབས་པ་རབ་བྱུང་ཞེས་པ་མེ་མོ་ཡོས་ལོ་རི་ཁྲོད་ཆེན་
མོའི་ནང་དུ་སྒྲུབ་སྡེའི་ཕེབས་བསུ་རྒྱས་པ་དང་བཅས་སྤྱན་དྲངས། ཀུན་མཁྱེན་ཆེན་པོ་རྟོན་པ་
བཞི་ལྡན་སོགས་མཁས་གྲུབ་རིམ་པར་བྱོན་པའི་ཁྲི་ཐོག རྗེ་བཙུན་ཐམས་ཅད་མཁྱེན་པའི་
གདན་ས་དྲོན་མོར་རྒྱལ་ཚབ་ཏུ་མངའ་གསོལ། སྡེ་སྲིད་གོ་གསུམ་གྱི་མང་ཇ་དང་འབུལ་ཆས་
20-1-158


གཟབ་མ་བསྐོ་འཇག་དང་བཅས་ཕུལ། དེ་ནས་གཏིང་སྐྱེས། སྨོན་གྲོ་ཁྲི་སྣར་གདོང་དགའ་
སོགས་ཐ་དད་ནས་ཁྲི་སྟོན་ཕུལ། དེ་གོང་དུ་ཆོས་བདག་སྨན་བཙུན་མ་བབས་ནས། ངས་བླ་
མའི་གྲབས་བྱས་ཟིན་ཉི་མྱུར་འབྱོན་རྒྱུ་ཡིན་ཟེར་བ་བྱུང༌། དེ་མཚམས་བླ་མ་གོང་མའི་ཕྱག་
སྲོལ་ལྟར་སྦྱོར་དྲུག་གི་ཁྲིད་དབུ་བཙུགས། ཕྱོགས་ཀྱི་ཁྲིད་གསར་པ་སྟོབས་ཆེ་བ་དང་བཅས་
ལ་སྔོན་འགྲོའི་སྐབས། ཀུན་སྤངས་ཀུན་ཏུ་བཟང་པོ། བྱང་སེམས་རྒྱལ་བ་ཡེ་ཤེས། མཁས་
བཙུན་ཡོན་ཏན་རྒྱ་མཚོ། ཀུན་མཁྱེན་དུས་གསུམ་སངས་རྒྱས། རྗེ་བཙུན་ཐམས་ཅད་མཁྱེན་
པ་རྣམས་ཀྱི་རྣམ་ཐར་གྱི་ལུང༌། མཆོག་དབང་གི་སྐབས་དབང་ཞུ་མི་བདུན་བརྒྱ་འགྲོར་ངེས་
ཤེས་པ་བྱུང༌། སོར་སྡུད་དང་བསམ་གཏན་གྱི་ཁྲིད་ངོ་སྤྲོད་དང་བཅས་པ་གྲུབ་ནས། ཟླ་བ་
གཉིས་ཙམ་སྐུ་མཚམས་དམ་པ་གནང་ནས་བཞུགས་སྐབས་མནལ་ལམ་ལ་རྗེ་བཙུན་ཐམས་
ཅད་མཁྱེན་པ་སྐུ་ཆོས་ངུར་སྨྲིག་གི་རྒྱལ་མཚན་གསོལ་བ། སྐུ་གཟི་བརྗིད་ཆེ་ཞིང་ཞལ་འཛུམ་
མདངས་དང་ལྡན་པས། ཕྱག་གཉིས་ཀྱིས་གསེར་གྱི་འཁོར་ལོ་ཞིག་གནང་ནས་འགྲོ་བ་
རྣམས་ཐར་ལམ་ལ་འགོད་པ་ཞིག་བྱ་དགོས་གསུངས་པ་ཞིག་གི་ངང་ལ་མནལ་ལམ་སད་
པས། བླ་མ་དྲན་པ་དང་དད་པས་སྤུ་ལོངས་གཡོ་བ་བྱུང་གསུངས། གཞན་ཡང་དུས་འཁོར་
སྙན་བརྒྱུད་ཀྱི་ཁྲིད་དང༌། སྣ་ཚོགས་ཡུམ། སྨན་བཙུན་མའི་སྲོག་དབང་སོགས་གནང༌། དེར་
གློ་བོ་ནས་སྡེ་པ་དཔོན་བློན་ལྷ་སྡེ་མི་སྡེ་ཀུན་གྱིས་གདན་འདྲེན་བྱུང་བས་ཐོག་མར་དབུས་
ཕྱོགས་སུ་ཕེབས། དེ་རྗེས་ཕེབས་པའི་བཀའ་གནང༌། དུས་འདི་ནས་བཟུང་རྗེ་བཙུན་རིན་པོ་
ཆེའི་ཕྱག་གཡོག་དྲག་པ་རྣམས་རྗེ་འདི་བྱང་ཕྱོགས་ལ་ཕེབས་དུས་ཕྱག་གཡོག་ལ་འཁྲིད།
རྒྱུན་དུ་ཆོས་ལུང་དུ་དཔོན་དྲུང་རིན་པོ་ཆེས་ཞབས་ཏོགས་གནང་བ་མཆོག་གི་སྤྲུལ་པའི་སྐུ་
ཉིད་ནམ་ཕེབས་ཀྱི་བར་ལ་གནང༌། ཕེབས་ནས་མཆོག་གི་སྤྲུལ་པའི་སྐུ་ཉིད་ཀྱི་ཕྱག་ཕྱིར་
ཕུལ། ཕྱག་གཡོག་ཏུ་གཏོགས་ཙམ་ཡན་ཆད་བར་མ་དོར་མ་ལྷུང་བར་མགོ་འདོན་བདག་
20-1-159


རྐྱེན་མཐར་ཕྱིན་པར་གནང་ངོ༌། །དེ་ནས་དཔོན་སློབ་རྣམས་བསམ་གྲུབ་རྩེར་ཕེབས། ཞབས་
དྲུང་རྒྱལ་བུ་ངག་དབང་ནོར་བུ་བཟང་པོ་དང་མཇལ། སྐུ་མདུན་ཞལ་ངོ་སོགས་ལ་བཀའ་
དབང་གནང༌། ལེགས་ལམ་ཆེ་བའི་མུ་ནས་གསེར་མདོག་ཅན་དུ་ཕེབས། མཁན་རིན་པོ་ཆེ་
དཔལ་མཆོག་བཟང་པོ་སོགས་ཀྱིས་དད་གུས་ཀྱིས་མཆོད། དངུལ་གདུང་རིན་པོ་ཆེ། སྐུ་འདྲ་
ཡིད་བཞིན་ནོར་བུ། རྗེ་བཙུན་བྱམས་མགོན་སོགས་དང༌། ལམ་འབྲས་ལྷ་ཁང༌། མགོན་ཁང་
སོགས་ཀྱི་རྟེན་མཇལ་དང༌། རྟེན་བྱིན་རླབས་ཅན་དེ་རྣམས་ལ་སྙན་དར་དཀར་མེ་ཕུལ། མང་
ཇ་བསྔོ་རྟེན་རྣམ་གཞག་དང་བཅས་པ་གནང་ནས་ཕོ་བྲང་ཆེན་པོ་རིན་ཆེན་སྤུངས་པར་
ཕེབས། སའི་བརྒྱ་བྱིན་ངག་དབང་འཇིག་རྟེན་དབང་ཕྱུག་གྲགས་པ་སྟེང་ཞལ་དང་མཇལ།
ལེགས་ཚོགས་ཆེ་བ་ནས་རོང་ཆེན་བརྒྱུད་སྨུག་ལར་ཕེབས། སྡེ་པ་དཔོན་བློན་གྱིས་ཕེབས་
བསུ་དང་ཞབས་ཏོག་དད་མོས་རྩེ་གཅིག་པས་བསྒྲུབས། རིམ་གྱིས་ལྷ་སར་ཕེབས་ཇོ་ཤཱཀ་
རྣམ་གཉིས་རང་བྱོན་ལྔ་ལྡན་སོགས་ལ་ཞལ་གསེར་སྙན་དར། གཞན་ལྷ་ཁང་ཐམས་ཅད་དུ་
ཡང་དཀར་མེ་ལྷག་པར་རྗེ་བཙུན་གོང་མ་ལྔ། ཀུན་མཁྱེན་ཆེན་པོའི་སྐུ་འདྲ་རྣམས་ལ་སྙན་
དར་དཀར་མེ་ཕུལ་ནས་གླང་ཐང་དུ་ཕེབས། རྟེན་འཇལ་གནང་ཞིང་ཚོགས་ལ་མང་ཇ་བསྔོ་
རྟེན་དང༌། གདན་ས་བས་གཙོས་པ་འགའ་ཤས་ལ་ཆོས་འབྲེལ་གནང༌། ལྕང་ལུང་ཆོས་སྡིངས་
དང་ཆོས་འཁོར་རྩེ་སོགས་སུ་ཕེབས་ཏེ། ལྕང་ལུང་པ་གཞོན་ནུ་བློ་གྲོས་དང༌། བཀའ་དྲིན་
ཅན་གཞོན་ནུ་ཆོས་གྲུབ། པཎ་ཆེན་རྡོར་རྒྱལ་བ་སོགས་ཀྱི་སྐུ་འདྲ་དང་ནང་རྟེན་རྣམས་ལ་
སྙན་དར་མཆོད་མེ་སོགས་ཕུལ། སྨོན་ལམ་རྒྱ་ཆེར་འདེབས་པ་གནང༌། དགོན་གནས་གཉིས་
པོར་མང་ཇ་དང་བསྔོ་རྟེན་སྩལ་ནས་བྱང་སྟག་ལུང་དུ་ཕེབས། རྗེ་ཀུན་དགའ་བཀྲ་ཤིས་དང་
མཇལ། སྟོང་རྫས་ལ་བརྟེན་པའི་འབུལ་བ་རྒྱ་ཆེར་ཕུལ། དེ་རྗེས་གྲོགས་ཁར་རྗེ་རས་པ་ཆེན་
པོ་རྣམ་རྒྱལ་ཕུན་ཚོགས་དང་མཇལ་བཀའ་འབྲེལ་གསན། དེ་རྗེས་སྟག་ལུང་ནས་རྗེ་སྐུ་
20-1-160


མཆེད་གཉིས་ཀས་བཀའ་ཆོས་དགོས་གསུངས་ནན་སྐྱེད་ཆེ་བ་ནས་སོ་སོར་ཚེ་དབང་ལྷ་དགུ།
གྲུབ་རྒྱལ་མ་བརྒྱ་ཚར། དུས་འཁོར་སྙན་རྒྱུད་ཀྱི་ཁྲིད། རྣམ་སྲས་དཀར་པོའི་རྗེས་གནང་
སོགས་འབུལ་བ་གནང༌། སྟག་ལུང་གི་ཆེ་དགུ་གཞན་རྣམས་དང༌། ཁྲ་ཁྱུ་བ། སྨུག་ཆུ་བ་
སོགས་ཁང་ཚན་སོ་སོས་ཀྱང་འབུལ་བ་དཔག་ཏུ་མེད་པ་ཕུལ་ཞིང༌། སོ་སོར་ཚེ་དབང༌། ཛཾ་
དམར། མགོན་དཀར་སོགས་འདོད་ཆོས་གནང༌། ར་སྒྲེང་དུ་ཕེབས། གནས་བརྟེན་ཁྱད་པར་
ཅན་ཐམས་ཅད་མཇལ་ཞིང་ཕྱག་མཆོད་གནང་ནས་སླར་སྟག་ལུང་དུ་ཕེབས། རྗེ་སྐུ་མཆེད་ཀྱི་
གཙོས་ཐམས་ཅད་ཀྱིས་འབུལ་བ་བསམ་གྱིས་མི་ཁྱབ་པ་ཕུལ། ཕྱིར་ཕེབས་ཏེ་ལྕང་ལུང་
སོགས་གང་ཕེབས་ཀྱི་དགོན་གནས་རྣམས་སུ་མང་ཇ་དང་རྟེན་རྣམས་ལ་མཆོད་པ་འབུལ་
བཞིན་པས་སྣ་དཀར་རྩེར་ཕེབས། ཞབས་ཏོག་དཔེ་མེད་པ་བྱུང༌། གཞིས་ཀ་རིན་སྤུངས་སུ་
ཕེབས། སྡེ་སྲིད་ཞལ་ངོ་རྣམས་དང་མཇལ། ར་ལྔ་རྩེར་དཔོན་ས་བདག་མོའི་དྲུང་དུ་ཐུགས་
བཞེད་ལྟར་ཚེ་དབང་སྒྲོལ་དཀར། མགོན་པོའི་བཀའ་བསྒོ་སོགས་ཕུལ། བཀའ་ནན་ཆེ་བ་
ནས་གཟའ་སྐར་དགེ་བ་ལ། མིའི་དབང་པོ་ཡབ་སྲས་རྣམས་ལ་ཚེ་དབང་བརྒྱ་རྩ། ལྷ་དགུ་
རྣམ་སྲས་དཀར་པོ་དུས་འཁོར་ལུགས་ཀྱི་བླ་མའི་རྣལ་འབྱོར་སོགས་ཕུལ་བ་གནང་རྗེས།
གཡུང་ལ་བརྒྱུད་རྒྱལ་མཁར་རྩེར་ཕེབས། སྡེ་པ་དང་མཇལ། བཞུགས་གདན་སོགས་བཀུར་
བསྟི་ཆེན་པོ་མཛད། ལི་མ་ལྷ་ཁང་སངས་རྒྱས་ཀྱི་འཕེལ་གདུང་སོགས་མཇལ། མཆོད་སྡེའི་
བླ་བྲང་དཀར་པོར་ཞབས་ཏོག་ཆེར་ཞུས། དེ་ནས་རྩེ་ཆེན་ཆོས་སྡེར་སྤྱན་འདྲེན་དང་བསྟུན་
ཕེབས། ཚོགས་སུ་དུས་འཁོར་ལུགས་ཀྱི་བླ་མའི་རྣལ་འབྱོར་གནང༌། འཇམ་དབྱངས་དཀོན་
མཆོག་བཟང་པོའི་དངུལ་གདུང་ལ་སྙན་དར། དཀར་མེ། ཕྱག་མཆོད་སྨོན་ལམ་གནང་ནས།
ཤོ་མ་རི་ཆུང་ངུ༌། གྲུབ་ཆེན་ཀུན་བློའི་གདུང་རྟེན་མཇལ། ཁྲི་ཁང་དུ་ཕེབས། སྡེ་པ་གྲྭ་ལྔ་ཡབ་
སྲས་ལ་ཚེ་དབང་དང༌། ཛམ་དཀར་སོགས་གནང་ནས་སྣར་ཐང་དུ་ཕེབས། སྡེ་པ་ལ་ཚེ་དབང་
20-1-161


སོགས་གནང༌། ཆོས་སྡེའི་རྟེན་མཇལ་ཕྱག་མཆོད་སྨོན་ལམ་རྒྱས་པར་མཛད་ནས་རི་ཁྲོད་
ཆེན་པོར་ཕེབས། དགུན་ཁྲིད་རྒྱས་པ་ངོ་སྤྲོད་དང་བཅས་པ་དང༌། གྲོལ་ཁར་ཁྲོམ་ཆེན་པོ་ལ་
ཚེ་དབང་གྲུབ་རྒྱལ་མ། ཐུགས་རྗེ་ཆེན་པའི་སྒོམ་ལུང་དང་བཅས་གནང་ངོ༌། །
ཞབས་སེན་སིནྡྷུ་ཝ་རའི་ཀླུང་བརྒྱ་པས། །དབང་པོ་ཀུན་སིམ་རྐང་སྦས་སྙིང་པོའི་རྡུལ། །
བྱིན་རླབས་བདུད་རྩིར་འབབས་པས་གདུལ་བྱ་རྣམས། །ཀུན་དཀྲིས་ཚ་གདུང་ཞི་ལ་ཟླ་བ་
བཞིན། །བདག་གཞན་མཉམ་དང་བརྗེ་བའི་སེམས་མཆོག་གིས། །འགྲོ་ཀུན་རང་ལས་
གཅེས་པར་འཛིན་པའི་ལུགས། །བྱམས་པ་ཆེན་པོའི་ཆུ་བོས་དགྲ་སྡེ་ཡི། །ཁྲོ་བའི་འདམ་རྫབ་
སྐེམ་པར་མཛད་འདིར་མཚར། །གཟུང་འཛིན་དག་པའི་ཏིང་འཛིན་མཁའ་དབྱིངས་སུ། །
རིགས་ལྔའི་འཇའ་ཚོན་རི་མོ་རྣམ་བཀྲ་ཞིང༌། །རྡོ་རྗེའི་སྔགས་ཀྱི་ན་ད་གླུར་བླངས་བས། །
གཞོམ་མེད་ནུས་པའི་སྙིང་པོ་མངོན་དུ་གྱུར། །ལུས་དང་ངག་ཡིད་རྫོགས་པའི་རྣལ་འབྱོར་
གྱིས། །སྣང་སྲིད་བདེ་ཆེན་མཆོག་གི་རོལ་བར་ཤར། །དེ་ལས་གནས་གསུམ་མཁའ་འགྲོས་
གུས་བཏུད་དེ། །རྡོ་རྗེ་འཛིན་པ་ཀུན་གྱི་ཁྱབ་བདག་མཛད། །རྗེ་བཙུན་མཆོག་གི་བྱིན་རླབས་
ནོར་བུའི་ཕྲེང༌། །སྤྱི་བོར་བཀོད་པའི་སྐད་ཅིག་དེ་ཉིད་ལ། །གྲུབ་རིག་འཛིན་པ་ཀུན་དང་སྐལ་
མཉམ་པའི། །སྤངས་རྟོགས་ཡོན་ཏན་ཀུན་གྱི་མཛོད་དུ་གྱུར། །དེ་ཚེ་རྗེ་བཙུན་བླ་མ་དམ་པ་
དེས། །བྱིན་རླབས་ཅོད་པཎ་གང་གི་གཙུག་བཅིངས་ནས། །སྐུའི་རྒྱལ་ཚབ་མཆོག་ཏུ་དབང་
བསྐུར་ནས། །དེ་ཉིད་དག་པའི་ཞིང་ཁམས་ཆེན་པོར་བཞུད། །དེ་ཡི་ཐུགས་དགོངས་རྒྱ་མཚོ་
བསྐང་པའི་སླད། །ཀུན་དུ་བཟང་པོའི་མཆོད་སྤྲིན་རྒྱ་མཚོ་ལས། །ཉེ་བར་འོངས་པ་མཆོད་
པའི་ཆར་ཆེན་གྱིས། །སྲིད་པ་ཡངས་པའི་ཁོང་ཀྱང་ཡོངས་སུ་གང༌། །རྟོན་པ་བཞི་ལྡན་ཆེན་
པོའི་སེངྒེའི་ཁྲི། །རྗེ་བཙུན་མཆོག་གི་ཞབས་རྡུལ་གྱིས་གཙང་བར། །གང་ཁྱོད་མངོན་པར་
འཛེག་ནས་ངེས་དོན་གྱི། །ཆོས་ཀྱི་སྒྲ་དབྱངས་འགོག་པ་མེད་པར་བསྒྲགས། །དེ་ནས་མངའ་
20-1-162


རིས་ལ་ཕེབས་པའི་དགོངས་རྩེ་གཏད་དེ་ཆོས་ལུང་བྱང་རྩེར་ཕེབས། དངུལ་གདུང་རིན་པོ་
ཆེར་བཀྲ་ཤིས་ཁ་བཏགས་ཉིན་བདེ་མ་སུམ་སྦྲེལ་དང༌། གོས་ཡུག་གི་ན་བཟའ། གཞན་མ་སྐུ་
སོ་སོར་ཡང་སྙན་དར་དཀར་མེ་སོགས་ཕུལ། ཕྱག་མཆོད་སྨོན་ལམ་རྒྱས་པ་མཛད། ཚོགས་
ལ་མང་ཇ་འགྱེད་བཅས་གནང༌། སྨོན་གྲོར་ཕེབས། ཞལ་ངོ་རྣམས་ལ་ཚེ་དབང་བརྒྱ་རྩ་
སོགས་དང༌། ཟང་ཟིང་གི་གནང་སྦྱིན་བསླབ་སྟོན་ཞིབ་རྒྱས་གནང༌། མགོན་ཁང་དུ་མཆོད་
རྫས་ཕུལ་ཞིང་བསྐང་གསོ་རྒྱས་པར་གནང་ནས་ཇོ་ནང་དུ་ཕེབས། རྡོར་འཛིན་པ་དང་གཙོ་མོ་
གསུམ་གྱིས་གཙོས་པ་ལ། ངེད་མྱུར་སྟབས་སུ་སླེབས་པར་བྱེད་པས་དེ་བར་ལ་དབྱར་
མཚམས་དགུན་མཚམས་སོགས་བསྒྲིགས་རྣམས་སྔར་ལས་མ་གཡོས་པར་བྱེད་དགོས་པའི་
བསླབ་སྟོན་རྒྱས་པ་དང་ཚོགས་ལ་མང་ཇ་དང་བཅས་པ་གནང༌། མངའ་རིས་ཕྱོགས་ལ་
ཆིབས་ཁ་བསྒྱུར། དགོན་པ་བདེ་ཆེན་དུ་ཁྲོམ་དབང་གནང༌། ལྷ་རྩེར་བདག་པོ་ནམ་མཁའ་
རྒྱལ་པོ་དང་མཇལ། སྐུ་རིམ་དུ་བསྐང་གསོ་བརྒྱ་ཚར་གནང་ནས་རིམ་གྱིས་ངམ་རིང་དུ་ཆོས་
རྒྱལ་ཀུན་དགའ་རིན་ཆེན་དང་མཇལ། ལམ་གྱི་དགོས་ཆ་མཐའ་དག་ཕུལ། སྐྱ་སྐྱར་ཕེབས།
ཆོས་རྗེ་བྱང་རི་བས་ཞབས་ཏོག་ཞུས་ཤིང་འདོད་ཆོས་མང་དུ་གནང༌། རིམ་པས་བརྒྱུད་གློ་བོ་
ནང་དུ་ཐོག་མ་རེ་ཤིང་དུ་ཕེབས། དེ་ནས་ཐུབ་བསྟན་དར་རྒྱས་གླིང་དུ་ཕེབས་ཏེ། དགེ་འདུན་
ཚོགས་ཆེན་གྱིས་གདུགས་རྒྱལ་མཚན། བ་དན་ལྡ་ལྡི། ཕྱེ་ཕུར། རོལ་མོའི་བྱེ་བྲག་མཐའ་
ཡས་པ་ཐོགས་པའི་སེར་སྦྲེང་ཟབ་རྒྱས། སྐྱེ་བོའི་ཚོགས་ཀྱིས་སྐྱ་རགས་དང་བཅས་པས་
གདན་དྲངས། རྟེན་སོ་སོར་སྙན་དང་དཀར་མེ་སོགས་མཆོད་རྫས། ཚོགས་སུ་མང་ཇ་འགྱེད་
བཅས་གཟབས་མ་སོགས་སྐུ་སྐྱེས་རྒྱས་པ་བསྩལ། དེ་ནས་སྨོན་ཐང་རྒྱལ་པོའི་ཕོ་བྲང་དུ་བསུ་
བའི་བཀོད་པ་རྒྱ་ཆེན་པོ་དང་བཅས་ཕེབས། ཆོས་རྒྱལ་བསོད་ནམས་རྒྱལ་པོ་དང་མཇལ།
སྔར་བས་ཀྱང་སྲི་ཞུ་ཆེར་གནང༌། རྒྱལ་བུ་ལ་ཚེ་དབང་སོགས་བསྩལ། དེ་ནས་རྣམ་རྒྱལ་རྩེར་
20-1-163


ཕེབས་ནས་ཚེ་དཔལ་དྲུང་སོགས་ལ་ཚེ་དབང་རིགས་མི་གཅིག་པ་མང་པོ་དང་འཛམ་སེར་
ནག རྣམ་འཇོམས་སོགས་རྗེས་གནང་མང་དག་གནང་དེ་ནས་ལས་པ་བློ་ལྡན་དང༌། སློབ་
དཔོན་བསོད་ནམས་རྒྱལ་མཚན་སོགས་བླ་མ་སློབ་དཔོན་འགའ་ཤས་ལ་སྒྱུ་ལུས་དབང་མོ་
ཆེས་སྒོ་ཕྱེས་ཏེ་ནི་གུ་ཆོས་དྲུག་གི་ཁྲིད། གཞན་ཡང་ཁྲིད་བརྒྱ་དང༌། པཎ་ཆེན་རིན་པོ་ཆེ་དང་
རྗེ་རིན་པོ་ཆེའི་རྣམ་ཐར་གྱི་ལུང༌། ཚོགས་ཆེན་ལ་བློ་སྦྱོང་དོན་བདུན་མའི་ཁྲིད། མི་དམངས་
ལ་ཁྲོམ་ཆོས་སོགས་ཆོས་ཀྱི་འཁོར་ལོ་རྒྱ་ཆེན་པོ་བསྐོར། སླར་རྣམ་རྒྱལ་རྩེར་རྗེ་བཙུན་རྡོ་རྗེ་
རྣལ་འབྱོར་མའི་གསུང་བསྙེན་སྦྱིན་སྲེག་དང་བཅས་པ་དང༌། དཔའ་བོ་དུར་ཁྲོད་བདག་པོའི་
ལྗགས་བསྙེན་མཛད་དུས་དེ་ཉིད་དངོས་སུ་ཞལ་གཟིགས། དེ་ནས་འཚར་དགར་ཕེབས།
འཚར་ཁ་རབ་འབྱམས་པ་ཆོས་སྐྱོང་རྡོ་རྗེ་ལ་ཁོང་རང་གི་འདོད་ཆོས་དང་མཐུན་པར་དབུས་
སྨྱོན་གྱི་རྣམ་ཐར་དང༌། རྗེ་དམ་པའི་རྣམ་ཐར་གྱི་ལུང་གནང༌། དེ་ནས་བར་བོང་བྲག་དམར་དུ་
ཕེབས། ཀྱཻ་རྡོ་རྗེའི་རྒྱུད་དང་དབང༌། ཚེ་ཁྲིད་སོགས་གསུང་ཆོས་མང་དག་གནང༌། བར་བོང་
དགོན་གསར་དུ་ཕེབས། དྲུང་ཡོན་དར་བ་དཔོན་སློབ་རྣམས་ལ་རྗེས་གནང་འགའ་ཡར་དང༌།
རི་ཆོས་སྐོར་གསུམ་གྱི་ལུང་གནང༌། རྗེ་ཉིད་ཀྱིས་ཀྱང་དྲུང་ས་ཡོན་དར་བ་ལ། རྗེ་བཙུན་
ཐམས་ཅད་མཁྱེན་པ་ནས་བརྒྱུད་པའི་རྒྱུད་འབུམ་དང༌། ནག་པོ་གཞུང་དྲུག་གི་ལུང་སོགས་
གསན། ཀོ་མོང་དུ་ཕེབས། དེ་སོགས་གང་ཕེབས་སུ་ཁྲོམ་ཆོས་ཚེ་དབང་དང་ཐུགས་རྗེ་ཆེན་
པོའི་བཟླས་ལུང་གནང༌། བྱ་ཚང་ཆོས་སྡེར་མཁན་པོ་བསོད་ནམས་དཔལ་འབྱོར་གྱིས་གཙོས་
པའི་དགེ་འདུན་རྣམས་ཀྱིས་བསུ་བ་གཟབས་མ་དང་བཅས་པས་གདན་དྲངས། སྒྲོལ་དཀར་
གྱི་རྗེས་གནང་དང༌། མཁན་ཆེན་མཉམ་མེད་ཀྱི་རྣམ་ཐར་ལུང་གནང༌། སླར་ཀོ་མང་དུ་ཕེབས།
དོལ་ཕྱོགས་ཀྱི་བླ་མ་སློབ་དཔོན། དོལ་གྲུ་བཞིར་དབང་གནང་ནས། ཀུན་མཁྱེན་ཆེན་པོའི་
འཁྲུངས་ཡུལ་སྤུ་རུ་ཕེབས། གསེར་མཆོད་དར་ཅོག་འཛུག་པ་གནང་དུས། མངའ་རིས་སུ་
20-1-164


གཏན་ནས་མི་ཡོང་བ་ལ། བྱ་སྐྱ་ཀ་གཅིག་ཀུན་གྱིས་མཐོང༌། དེ་སྨན་བཙུན་མའི་བསུ་བར་
དགོངས། དེ་ནས་དགོན་པ་གྲྭ་ལུང་དུ་ཆོས་རྗེ་རྣམ་གྲོལ་དཔོན་སློབ་གྱིས་བསུ་བ་རྒྱས་པས་
སྤྱན་དྲངས། ཆོས་རྗེ་ལ་ཚེ་དབང་བརྒྱ་རྩ་ལྷ་དགུ་རས་ཆེན་དཔལ་འབྱོར་བཟང་པོ་ནས་བརྒྱུད་
པའི་ཚེ་དཔག་མེད་ལྷ་བཅུ་བདུན་མའི་དབང༌། ཀུ་རུ་ཀུལླེའི་ཁྲིད། སྒྲོལ་དཀར་གྱི་ཁྲིད། རྗེ་
བཙུན་ཐམས་ཅད་མཁྱེན་པའི་སྐུ་སྐྱེ་བཅུ་གཅིག་གི་རྟོགས་བརྗོད་དང་རྣམ་ཐར་ཆེན་མོའི་ལུང་
གནང༌། རྗེ་ཉིད་ཀྱིས་ཀྱང་གུ་རུ་དྲག་དམར་གྱི་དབང་ལུང༌། ཕྱག་བཞི་པ་དང༌། མགོན་སེར་
གྱི་སྐོར་རྣམས་གསན། དེ་ནས་བྱང་རྣམ་རྒྱལ་ལྷ་རྩེར་ཕེབས། ཆོས་དགོན་གསུམ་གྱི་ཕེབས་
བསུ་གཟབས་རྒྱས་བཅས། བླ་བྲང་དུ་ཕེབས་མཁན་པོ་ལྷ་མཆོག་བས་གཙོས་པའི་དགེ་བའི་
བཤེས་གཉེན་ཤ་སྟག་འདུས་པ་ལ་ཚེ་དབང་གྲུབ་རྒྱལ་མ། ལྷ་དགུ་མི་འཁྲུགས་པ་ཀྱཻ་རྡོ་རྗེ་
ཡབ་བཀའ། ཡུམ་བཀའ་རྣམས་གནང༌། བྱང་དགོན་ཐ་དད་ཀྱི་བསྙེན་རྫོགས་ཞུ་མི་མང་པོ་
བྱུང་བ་ལ། རྗེ་ཉིད་ཀྱིས་མཁན་པོ། ཆོས་རྗེ་ལྷ་མཆོག་གིས་སློབ་དཔོན། རབ་འབྱམས་པ་
རབ་བརྟན་གྱིས་གསང་སྟོན། རབ་འབྱམས་པ་མཐར་ལེགས་ཀྱིས་དུས་བསྒོ་བ་བྱས། ཁ་སྐོང་
གི་དགེ་འདུན་དང་བཅས། བསྒྲུབ་བྱ་མང་པོ་ལ་བསྙེན་རྫོགས་གནང་ནས་སྤོང་ལེར་ཕེབས།
བོ་ཟི་གཉིས་འདུས་ལ་དབང་རྗེས་གནང་ལུང་མང་དག་གནང༌། དེ་སོགས་དགོན་པ་གང་
ཕེབས་ཐམས་ཅད་དུ་མང་ཇ། བསྔོ་རྟེན་འཚོགས་ཆོས་ཁྲོམ་ཆོས་སོགས་གནང་ངོ༌། །དེ་ནས་
གློ་བོ་ནང་དུ་ཕེབས་ནས་ཆོས་སྡེ་ཆེན་པོར་བཞུགས། དེའི་དགུན་ལ་བལ་པོ་ཀུ་སུ་འཇུ་དང་
ཟངས་འཇུ་སོགས་མཁས་པ་མང་དག་གིས་རྗེ་ཐམས་ཅད་མཁྱེན་པའི་ནང་རྟེན། རྣམ་རྒྱལ་
མཆོད་རྟེན་མཐོ་ཚད་ཆེ་བ་ཞིག་གསེར་ཟངས་ལས་བཞེངས་པ་གནང༌། སྦྲུལ་ལོ་ཟླ་བ་བདུན་
པའི་ནང་དུ་གྲུབ། དེའི་ཚེས་བརྒྱད་ཉི་མ་མེ་བཞིའི་ཉིན་རབ་གནས་རྗེ་ཉིད་ཀྱིས་གནང་བའི་
ཕྱག་ཕྱིར་ལས་པ་བློ་ལྡན་སོགས་སློབ་དཔོན་དང་དགེ་སློང་ཉི་ཤུ་རྩ་ལྔ་ཙམ་གྱིས་ཀྱཻ་རྡོ་རྗེའི་
20-1-165


རྡུལ་ཚོན་གྱི་དཀྱིལ་འཁོར་ལ་བརྟེན་ནས་བླ་མ་གོང་མའི་ཕྱག་ལེན་བཞིན་རྒྱས་པར་གནང་
སྐབས། འཇའ་ཚོན་གྱི་གུར་མེ་ཏོག་གི་ཆར་སོགས་ཕྱི་ནང་གི་ལྟས་ངོ་མཚར་བ་དུ་མ་བྱུང༌། སྡེ་
སྲིད་ཀྱི་གཙོས་པའི་ཆེ་དགུ་ཀུན་གྱིས་དགའ་སྟོན་རྒྱ་ཆེར་ཕུལ། བལ་པོ་རྣམས་བཀོན་སྐྱོན།
བྱུ་གསེར་གྱི་དོད་པོ་གསེར་རྐྱང་དང་གཞན་ཡང་གནང་སྦྱིན་དཔག་མེད་བསྩལ་བས་ཡིད་
མགུ་བ་ཐོབ་པར་གྱུར། རབ་གནས་ཕྱག་གཡོག་པ་སློབ་དཔོན་ལྔ་ལ་ཟངས་ལྕགས། རས་སྔོ་
དམར་དར་ཁ་རེ། ཆོ་ག་བ་བྱིང་ལ། ཟངས་ལྕགས་ཇ་རྣམས་ཞོ་རེ། རས་སྣམ་བུ་དར་རྣམས་
ཞོ་གཉིས་རེ་གནང༌། གསེར་གདུང་ལ་གོས་དར་གྱི་ན་བཟའ། མཆོད་རྫས་བསམ་གྱིས་མི་
ཁྱབ་པ་དང༌། དགེ་འདུན་ལ་བསྙེན་བཀུར། སྡེ་པ་བླ་དཔོན་རྣམས་བཀྲ་ཤིས་དགའ་སྟོན་ལ་
སྤྱན་དྲངས། དེ་ཐམས་ཅད་ལ་ཙཱ་རུའི་བཟའ་བ་བཟང་ཞིང་རྒྱ་ཆེ་བ་དང༌། སྐྱེ་བོའི་ཚོགས་
མཐའ་ཡས་པ་ལ་སྦྱིན་གཏོང་རྒྱ་ཆེར་གནང༌། གཏང་རག་ཏུ་ཆོས་སྐྱོང་ལ་བསྐང་གསོ་མངའ་
གསོལ་རྒྱས་པར་གནང༌། དེ་ནས་མཁན་ཁང་དུ་སྐུ་མཚམས་ཟླ་བ་གཅིག་ཙམ་མཛད་དེ་གྲོལ་
མཚམས་ཚོགས་པ་ལ་སྙིང་པོ་དོན་གསུམ་གྱི་ཁྲིད། ནི་གུའི་ཁྲིད། བརྒྱུད་པའི་རྣམ་ཐར། ཡིག་
ཆ་གསར་རྙིང་རྣམས་ཀྱི་ལུང༌། ཡེ་ཤེས་མགོན་པོ་ཕྱག་དྲུག་པའི་རྗེས་གནང་གནང་ནས་སྨོན་
ཐང་དུ་ཕེབས། དཔོན་དྲུང་ཐ་དད། དྲུང་སྐོར་དྲག་བསྡུས་སྐོར་རྣམས་ལ་ཚེ་དབང༌། རྣམ་སྲས།
མགོན་པོ་ལྷ་བརྒྱད་སོགས་དབང་རྗེས་གནང་མང་བར་གནང༌། དེ་ནས་རྣམ་རྒྱལ་རྩེར་ཟླ་བ་
གསུམ་གྱི་བར་དུ་རྡོ་རྗེ་རྣལ་འབྱོར་མའི་ལྗགས་བསྙེན་སྦྱིན་སྲེག་དང་བཅས་པ་གནང༌། ད་
རེས་ཀྱི་མཚམས་འདི་གསལ་སྣང་ཆེ་ཞིང་རྗེ་བཙུན་མས་རྗེས་སུ་འཛིན་པའི་ལྟས་ཀྱང་བྱུང་
གསུངས་པའི་བཀའ་ཕེབས། དེ་ནས་ཆོས་སྡེའི་སྒྲུབ་མཆོད་རྒྱས་པའི་གཙོ་བོར་ཕེབས།
དཀྱིལ་འཁོར་རྒྱ་ཆེ་ཞིང་སྟེང་དུ་བླ་བྲེ། འཁོར་ཡུག་ཏུ་སི་ཏ་ཧཱུས་ཐག་པ་ལ་གོས་དར་ཡུག་
གདང་འགེལ་གྱི་ལྡ་ལྡི། གཞན་ཡང་འཕན་གཏོར་གུར་སོགས་གྲངས་མང་བ་དང༌། དར་ཡོལ་
20-1-166


ཉིས་སྦྲག་གིས་བསྐོར་བའི་དབུས་སུ་དཔོན་སློབ་འདུས་པའི་ཚོགས་རྣམས་བཞུགས་པའི་རེ་
རེ་ལ་ཡང་དབུ་རྒྱན་གསེར་མ། དར་དཔྱངས། རྡོ་རྗེ་དྲིལ་བུ། ནང་མཆོད་སྣོད་ཐོད་བཟང་པོ།
རྟེན་ཁེབས་བཟང་སྒྲིགས་སོགས་མ་ཚང་བ་མེད་པ་མཛད། དབང་རྫས་དང་མཆོད་པའི་
བཀོད་པ་རྣམས་མ་ཉམས་པར་ལོ་ལྟར་བཞིན་དགོས་པའི་བཀའ་བཀོད་བསྩལ་ལ། དེ་ལྟར་
སྒྲུབ་མཆོད་རྒྱས་པ་གནང་བ་གྲོལ་བའི་རྡུལ་མཚོན་སྤྱན་འདྲེན་གྱི་དུས་སུ། དུང་དཀར། རྒྱ་
གླིང༌། ཕྲ་དུང༌། སྦོམ་དུང༌། སིལ་སྙན། རྔ་བོ་ཆེ་སོགས་རོལ་མོ་མང་བ། གདུགས་སུམ་ཐོག་
མ་དང་ཉིས་ཐོག་བདུན་ཚར་རེ། གདུགས་ཐོག་གཅིག་མ་བདུན་ཚར་གཉིས། རྒྱལ་མཚན།
འཕྱར་དར་ཕྱེ་ཕུར་སོགས་གྲངས་མང་བ། དྲི་བཟང་གི་དུད་སྤྲིན་དང་བཅས་ཆུ་བོ་ཆེན་པོར་
སྤྱན་འདྲེན་མཛད། འཁོར་མཚམས་ཆོས་སྐྱོང་ལ་གཏང་རག་གི་མཆོད་གཏོར་རྒྱ་ཆེར་མཛད་
ཅིང༌། པུ་ཊ་ཕོ་མོ། རུ་འདྲེན། དུར་ཁྲོད་བདག་པོ་སོགས་ཀྱི་མཚམས་དཔལ་ལྡན་ས་སྐྱའི་ཕྱག་
ལེན་བཞིན་མཛད། དེའི་སོས་ཀ་བྱང་སྤོང་ལེར་ཕེབས་ནས། ཚ་རོང་ནམ་མཁའ་བློ་གསལ་
གདན་སའི་བསྐོ་བཞག་གནང༌། རྣམ་རྒྱལ་ལྷ་རྩེ་བརྒྱུད་ནས་ཆོས་སྡེ་ཆེན་པོར་ཕེབས། དེ་
མཚམས་དབུས་གཙང་ནས་ཇོ་ནང་ཆོས་ཁྲིམས་པ་སོགས་ལ་བྱང་བདག་པོའི་ཞུ་ཡིག་དང་
བཅས་གདན་འདྲེན་རྣམས་སླེབས། དེར་བསྐང་གསོ་རྒྱས་པར་མཛད་སྐབས། དགོང་མོའི་
མཆོད་གཏོར་དང་རྒྱན་གྱི་ཐུགས་དམ་རྣམས་གྲོལ་ནས་མཚན་ཕྱེད་ཙམ་སོང་བ་ན། མནལ་
གྱིས་སྲབ་སྲིབ་ཀྱི་ངང་དུ་རོལ་མོའི་སྒྲའི་རྣམ་པ་ཞིག་བྱུང༌། དེ་ལ་སྙན་གཏད་རིང་དུ་ཤ་ཆེན་
གྱི་དུད་པས་གཟིམས་ཆུང་ཁེངས་བྱུང་བས། ཆོས་སྐྱོང་དགྱེས་པའི་མཚན་མ་བྱུང་གསུངས་པ།
དེ་སྐབས་མགོན་པོ་འཁོར་བཅས་ཞལ་གཟིགས་པར་གདོན་མི་ཟ་ཡང་གསལ་བར་མི་
གསུངས་ཞེས་སྐུ་གཞོགས་པ་རྣམས་གསུངས། དེ་ནས་ཤར་ཕྱོགས་སུ་ཕེབས་པ་ལ། སྡེ་པ་
དཔོན་བློན། ཆོས་སྡེ་མི་སྡེ་ཐམས་ཅད་ཀྱིས་ཡར་ལོ་གཅིག་ཙམ་ནས་ཕེབས་དགོས་པའི་ཞུ་བ་
20-1-167


ནན་ཅན་བྱུང་ནས། ཡར་ཁྱུག་ཙམ་ཕེབས་པའི་བཀའ་བཞེས་གནང༌། དེར་རྗེ་ཉིད་ཀྱི་སྐུའི་
དབོན་པོ་སྐུ་ཆོས་གནང༌། དེ་དང་སྐྱ་སྐྱར་སྒང་པའི་ཞལ་ངོ་གཅིག་ཀྱང་རབ་བྱུང་མཛད། དེ་
ལྟར་ཆོས་མཛད་གཉིས་ཀྱིས་གཙོས་པའི་སོ་མ་སྟོབས་ཆེན་དང་བཅས་བྱང་ལི་རྩེར་ཕེབས།
ཆོས་རྗེ་ནམ་མཁའ་བློ་གསལ་སྐུ་མཆེད་ལ་ཚེ་དབང་སྒྲོལ་དཀར་སོགས་གནང་ནས་སྐྱ་སྐྱར་
ཕེབས། བྱང་རི་ཆོས་རྗེ་རྒྱལ་མཚན་མཆོག་གྲུབ་སྐུ་མཆེད་ལ་ཚེ་དབང་བརྒྱ་རྩ། སྒྲ་མི་སྙན་
པའི་ཚེ་སྒྲུབ། ནི་གུའི་ཁྲིད་བསྡུས་པ་རྣམས་གནང༌། ངམ་རིང་དུ་ཕེབས་ཆོས་རྒྱལ་ཀུན་དགའ་
རིན་ཆེན་གྱིས་གཞི་ལེན་རྒྱས་པར་མཛད། ལྷ་རྩེ་བརྒྱུད་ནས་རི་ཁྲོད་ཆེན་པོར་ཕེབས། སྒྲུབ་
སྡེའི་སེར་སྦྲེངས་རྒྱས་པས་སྤྱན་དྲངས། ཐེབས་འཕྲལ་ལ་ཕྱག་དབང་གནང༌། སང་ནས་སྐུ་
འཁྱོས་སུ་མང་ཇ་འབྲས་འཇམ་འགྱེད། ལྷ་ཁང་སོ་སོར་སྙན་དར་འབུལ་བ་གནང་ནས། སྨོན་
གྲོར་སྤྱན་དྲངས། བཀའ་དབང་དང་དངོས་པོའི་སྐུ་འཁྱོས་གནང༌། ཆོས་ལུང་བྱང་རྩེར་ཕེབས་
བསུ་ཟབ་རྒྱས་དང་བཅས་ཏེ་ཕེབས། དངུལ་གདུང་རིན་པོ་ཆེར་སྨན་ཚེ་ཡུག །གོས་འཕན་ཆ།
དཀར་མེ་བརྒྱ་ཀོང་སོགས་མཆོད་རྫས་རྒྱ་ཆེ་བ་དང༌། ཚོགས་པ་ལ་མང་ཇ་ཉིས་སྦྲེལ་འགྱེད་
བཅས་གནང་རྗེས། སླར་རི་ཁྲོད་ཆེན་པོར་ཕེབས། ཆོས་མཛད་བཅུ་གཉིས་ཀྱིས་གཙོས་པའི་
སོ་མ་རྣམས་མང་ཇ་དང་བཅས་གྲྭ་ས་ཆེན་པོར་རྫོངས་ལྟར་གནང་ནས། རྟ་ལོའི་དགུན་འཁྲིད་
འཛུག་པ་གནང༌། དེ་གྲོལ་ནས་གཏིང་སྐྱེས་ནས་སྤྱན་འདྲེན་བྱུང་ནས་དབྱར་ཆོས་གྲོལ་ནས་
ཕེབས་པ་གནང༌། ཕར་ལམ་གདོང་སྒར་ནང་སོ་བསྟན་པ་སྐུ་མཆེད་ཡབ་སྲས་ཀྱིས་གཙོས་
པའི་ཆིབས་རགས་ཀྱིས་ཕེབས་བསུ་དང་ཆོས་སྡེ་སེར་སྦྲེངས་དང་བཅས་ཕེབས། ཞལ་ངོ་
རྣམས་ལ་ཚེ་དབང་སོགས་འདོད་ཆོས་གནང༌། རིམ་གྱིས་གཏིང་སྐྱེས་མཁར་ཆེན་རྩེར་ཕེབས།
ཆོས་སྡེ་གསུམ་གྱིས་སེར་སྦྲེངས་དང༌། སྡེ་པ་ཞལ་ངོས་གཙོས་པའི་ཆིབས་རགས་ཀྱིས་ཕེབས་
བསུ་མཛད། ཆོས་སྡེ་སོ་སོར་མང་ཇ་བསྔོ་རྟེན། སྡེ་པ་ཡབ་སྲས་ལ་གནང་སྐྱེས་རྒྱས་པར་
20-1-168


གནང༌། བྲག་དཀར་དུ་སེམས་དཔའ་ཆེན་པོ་བསོད་ནམས་རིན་ཆེན་གྱི་སྐུ་གདུང་དང༌།
ཏྲཀྴད་ཀྱི་མགོན་ཁང་མཇལ། སྙན་དར་དཀར་མེ་སོགས་འབུལ་བ་གནང༌། དེ་དུས་མགོན་
པོའི་སྐུའི་ཐད་ནས་གོས་ཆེན་ལྕགས་ནག་ཁ་གང་མདུན་དུ་རང་བབས་སུ་བྱུང་བ་སོགས་རྟེན་
འབྲེལ་རང་འགྲིག་ཏུ་གྱུར། ཆོས་གྲྭར་ཕེབས། ཞལ་ངོ་རྣམས་ལ་སྒྲོལ་དཀར་རྣམ་འཇོམས་
རྣམས་ཀྱི་རྗེས་གནང་ཁྲུས་ཆོག་དང་བཅས་པ་ཚེ་དབང་གྲུབ་རྒྱལ་མ་བརྒྱ་ཚར། ཚེ་འཁྲིད་ཚེ་
དཔག་མེད་ལྷ་དགུ་མ་བརྒྱ་ཚར། ཚེ་དཔག་མེད་ལྷ་བཅུ་བདུན་མའི་དབང་གནང་དུས། ཚེ་
མདའ་མཐོ་གང་ཙམ་འཕེལ་པས་ཐུགས་ཡ་མཚན་ཞིང་དགྱེས་པར་མཛད། མགོན་པོའི་སྐོར་
མང་པོ་དང༌། པཎ་ཆེན་རིན་པོ་ཆེ་དང་རྗེ་བཙུན་རིན་པོ་ཆེའི་རྣམ་ཐར་གྱི་ལུང༌། དགོན་གསུམ་
ཀའི་དགེ་འདུན་ཚོགས་པ་ལ་ཛཾ་དཀར་གྱི་རྗེས་གནང༌། པཎ་ཆེན་རིན་པོ་ཆེའི་སྐུ་བསྟོད་
རྣམས་ཀྱི་ལུང༌། གཤིན་གྱི་གདུང་བརྒྱུད་འགྲོ་མགོན་དཔོན་སློབ་རྣམས་ཆེད་གཏད་མཇལ་
བར་ཕེབས། ཁོང་གིས་ནན་ཞུས་མཛད་ནས་ཀྱཻ་རྡོ་རྗེའི་རྒྱུད་དབང༌། རྣལ་འབྱོར་མའི་བྱིན་
རླབས། ཚེ་དབང༌། ཛཾ་ལྷ་དཀར་པོའི་རྗེས་གནང་སོགས་མང་བ་དང༌། ཆོས་སྡེའི་དྲག་པ་
རྣམས་དང༌། དྲུང་འཁོར་རགས་བསྡུས་རྣམས་ལ་ཡང་གང་ལ་གང་འདོད་ཀྱི་བཀའ་ཆོས་
གནང༌། ཟླ་བ་དྲུག་ཙམ་བཞུགས་ནས། ཕྱིར་ཕེབས་དུས་རྣམ་སྲས་དཀར་པོ་དང༌། མགོན་
དཀར་ཡིད་བཞིན་ནོར་བུའི་རྗེས་གནང་ཕེབས་སྐྱེལ་རིམ་ཅན་དུ་བྱུང༌། དགོང་གཅིག་ཚུལ་
ཕེབས་མཚམས་གཏིང་སྐྱེས་ནས་ཕུལ་བའི་ཆིབས་པ་དེ་འགྲོགས་ནས་ཕར་ཤོར་བ་ལ་རྟ་
བས་དེད་ཀྱང་མ་ཟིན་པ་ལ། མགོན་ཁྱི་རྗེས་ལ་བརྒྱུགས་ནས་ཚུར་བཀུག་པས་ཡ་མཚན་པར་
བྱུང༌། དེ་ནས་གདོང་རྒར་ཕེབས། ནང་སོ་ཞལ་ངོ་རྣམས་ལ་བཀའ་ཆོས་གནང་ནས་དགོན་པ་
བདེ་ཆེན་དུ་ཕེབས། ལྷ་རྩེ་ནས་མ་ཆེན་ཧེ་པ་སོགས་དྲག་པ་ཐམས་ཅད་མཇལ་དུ་བྱུང་བ་ལ།
ཚེ་རྟ་སོགས་གནང་ནས། ཇོ་ནང་དུ་ཕེབས་ཕྲལ་བོ་དོང་གཉེར་པ། ཤེལ་དཀར་ནང་སོ་ཡབ་
20-1-169


སྲས་སོགས་མཇལ་མཁན་མང་དག་བྱུང་བ་ལ། སོ་སོའི་འདོད་ཆོས་དང་མཐུན་པའི་བཀའ་
ཆོས་གནང་ནས་ཆོས་ལུང་བྱང་རྩེར་ཕེབས། དངུལ་དུང་རིན་པོ་ཆེར་སྙན་དར་དཀར་མེ་ཕྱག་
མཆོད་སྒྲུབ་སྡེ་ལ་མང་ཇ་འགྱེད་བཅས་གནང༌། ཚོགས་ཆོས་སུ་བདེ་མཆོག་ལྷ་ལྔའི་དབང༌།
རྣལ་འབྱོར་མའི་བྱིན་རླབས། རྩ་དབུ་མའི་ཁྲིད། རྗེ་བཙུན་ཀུན་དགའ་མཆོག་གྲུབ་ཀྱི་བཀའ་
འབུམ་འདོད་འཇོའི་ལུང་རྣམས་གནང༌། སྨོན་གྲོར་ཕེབས་སྐུ་སྐྱེས་གནང་སྦྱིན་གནང་ནས།
ཚེ་དབང་བརྒྱ་རྩ། ཁྲུས་ཆོག །སྒྱུ་ལུས་དབང་མོ་ཆེ། ནི་གུའི་ཁྲིད་ཕྱག་དྲུག་པ་དང་གུར་གྱི་
བཀའ་བསྒོ་གནང་ནས་རི་ཁྲོད་ཆེན་མོར་ཕེབས། དགུན་འཁྲིད་ཕྱོགས་ཐ་དད་ཀྱི་དཔོན་སྐྱ་ཆེ་
ཆུང༌། ཁྲིད་གསར་པ་སྟོབས་ཆེ་བ་དང་བཅས་པ་ལ་སྔར་ལྟར་གནང༌། ངོ་སྤྲོད་ཀྱི་སྐབས་
གཞིས་ཀ རྒྱལ་རྩེ། བྱང་ངམ་རིང་བ་སོགས་ནས་མང་ཇ་འགྱེད་བཅས་བསྔོ་རྟེན་སོགས་
གཏོས་ཆེ་བར་བྱུང༌། དགུན་སྨད་སྐུ་མཚམས་གནང་སྐབས། བྱང་སྟག་ལུང་ནས་གདན་འདྲེན་
ནན་ཏན་བྱུང་བ་ལ། དབྱར་ཆོས་གྲོལ་མཐར་ཕེབས་པའི་བཀའ་བཞེས་གནང༌། དབྱར་ཆོས་
ལ་དམར་འཁྲིད་སྦྱོར་ཚ་མ་དང༌། ངེས་དོན་རྒྱ་མཚོའི་ལུང་གནང༌། དབུས་ལ་ཕེབས། གདོང་
དུ་རྡོར་འཛིན་པ་སོགས་དྲག་བསྡུས་རྣམས་ལ། ངེད་གཙུག་ལག་ཁང་འདི་ཞིག་གསོས་བྱེད་
འདོད་ཡོད་པས། ཤིང་ཆ་རགས་པ་ཁ་ཡར་གཅོད་དགོས་འདུག་ཅིང༌། ལས་མགོ་ནམ་བཙུག་
པ་དགའ་བའི་བཀའ་གྲོས་གནང་ནས། ཁོང་རྣམས་ཀྱི་ཞུ་ཆ། འདི་ཀུན་མཁྱེན་གྱི་ཕྱག་ནས་
མ་ཡིན་པ་དང༌། ཤིང་ཆ་ཕལ་ཆེར་ཆོས་སྐྱོང་གི་སྤྱན་གཟིགས་ཡིན་པས་མི་ལེགས་སམ་ཞུ་བ་
བྱུང་བས། གཙུག་ལག་ཁང་བཤིག་རང་དགོས་པའི་ངེས་པ་མེད། ཞིག་གསོ་བྱེད་དགོས་
གསུངས། རྗེ་ཉིད་རང་གི་ཤིང་སྟ་བསྣམས་ནས་སྡོང་པོ་གསུམ་བཞི་ལ་གནང༌། ད་བཅད་ན་
སྐྱོན་མི་ཡོང་གསུངས་པ་དང༌། གཉེར་ལ་ཚོགས་གདན་རྣམས་བསྒྲིལ་ལ་ཕུགས་སུ་ཞོག
དབྱར་ཆར་བས་སྐྱོན་ཞིག་ཡོད་གསུངས་པ་ནན་གྱིས་བྱུང༌། ཚོགས་པ་ལ་མང་ཇ་འགྱེད་
20-1-170


སོགས། གནང་ནས་ཤར་ལ་ཆིབས་ཁ་བསྒྱུར། ལམ་བར་གྱི་སྡེ་དཔོན་སོ་སོས་ཀྱང་སྤྱན་
འདྲེན་པ་སླེབས་ནས། ཐོག་མར་སྣར་ཐང་དུ་ཕེབས། སྡེ་པ་ལ་དབང་བྱིན་རླབས་མང་དུ་
གནང་ནས་ཁྲི་ཁང་དུ་ཕེབས། སྡེ་པ་ཡབ་སྲས་རྣམས་ལ་ཚེ་དབང་གྲུབ་རྒྱལ་ལ། ཚེ་དཔག་
མེད་ལྷ་བཅུ་བདུན་མ། ཀྱཻ་རྡོ་རྗེའི་རྒྱུད་དབང༌། ལམ་དབང་རྣལ་འབྱོར་མ་རྣམས་དང༌། རྗེས་
གནང་མང་བར་གནང་ནས་རིམ་པས་བརྒྱུད། གཞིས་ཀ་རིན་སྤུངས་སུ་ཕེབས། ཡབ་སྲས་
སྟེང་ཞལ་རྣམས་དང་མཇལ་དཔལ་ཚེ་དཔག་མེད་དཀར་པོ། གྲུབ་རྒྱལ་མ་དང་ལྷ་དགུ་བརྒྱ་
རྩ་རེ་རེ། ཐུབ་པ་མེ་རུ་སིདྷའི་ཚེ་སྒྲུབ། སྒྲོལ་དཀར། མི་གཡོ་བ་སོགས་རྗེས་གནང་མང་བ།
ཛམྦྷ་ལ་དམར་པོའི་བྱིན་རླབས། དུར་ཁྲོད་བདག་པོའི་རྗེས་གནང༌། རྣམ་འཇོམས་ཛ་ལི་མ་
དཀར་པོའི་བྱབ་བསྲུང་རྣམས་ཕུལ། ངུར་སྨྲིག་ཏུ་སྒྲོལ་མ་མཇལ་ནས་རོང་ཆེན་བརྒྱུད། སྨྱུག་
ལར་ཕེབས་ཚེ་དབང་ཛམ་སེར་སོགས་རྗེས་གནང་འགའ་དང༌། རྗེ་བཙུན་ཐམས་ཅད་མཁྱེན་
པའི་རྣམ་ཐར་གྱི་ལུང་གནང༌། གཞིས་ཀ་གོང་དཀར་ནས་ཡུམ་སྲས་ཀྱིས་སྤྱན་དྲངས།
དགོངས་བཞེད་ལྟར་ཚེ་དབང་བརྒྱ་རྩ། རྣམ་རྒྱལ་ཛཾ་བྷ་ལ་རིགས་ལྔའི་རྗེས་གནང༌། ཚེ་དབང་
ལྷ་དགུ་སོགས་འབུལ་བ་གནང༌། དེ་སྐབས་ཇོ་ནང་གི་གཙུག་ལག་ཁང་ཕྱོགས་ནས་ཞིག་
པས། རྡོར་འཛིན་པ་སོགས་ཀུན་གྱིས་འདི་རྗེ་རང་གིས་དགོངས་པ་འདུག་ཟེར་ཡ་མཚན་
ཞིང༌། སྐུ་གཞོགས་སུ་བང་ཆེན་བྱུང༌། དེ་ནས་ལྷ་སར་ཕེབས། ཇོ་བོ་རིན་པོ་ཆེར་བཀྲ་ཤིས་ཁ་
བཏགས་ཟུང་གིས་སྙན་དར། དར་ཆེན་གྱི་སྣམ་སྦྱར། གཞན་མ་ཇོ་བོ་བཅུ་གཅིག་ཞལ་སོགས་
རྟེན་གཙོ་སོ་སོར་སྙན་དར། དཀར་མེ་གཞན་ཡང་གུར་གུམ། ལི་སུག ཛཱ་ཏི། ཙནྡན་དང་ཨ་
ག་རུའི་ཕྱེ་མ་གསེར་གྱི་ཕྱེ་མ་དང་བསྲེས་པ་སྐུ་སོ་སོར་འཐོར་བ་དང༌། སྤོས་ཀྱི་དུད་སྤྲིན་
སོགས་ཀྱིས་མཆོད། སྨོན་ལམ་ཐུགས་ཚིམ་པར་གནང་ནས། ལྕང་ལུང་ཆོས་སྡིངས་སུ་མཁན་
ཆེན་ཀརྨ་བཟང་པོ་དཔོན་སློབ་ཀྱིས་སེར་སྦྲེངས་རྒྱས་པས་སྤྱན་དྲངས། རིག་འཛིན་ལོ་བརྒྱ་
20-1-171


བ་ལྕང་ལུང་པ་ཆེན་པོ་དང༌། བཀའ་དྲིན་ཅན་རྗེ་བཙུན་གཞོན་ནུ་ཆོས་གྲུབ་ཀྱི་སྐུ་སོགས་ལ་
སྙན་དར་དང་མཆོད་པ་དཔག་མེད་གནང༌། ཚོགས་པ་ལ་ཚོགས་ཆོས་མང་ཇ་འགྱེད་བཅས་
དང་མཁན་ཆེན་རང་ལ་ཚེ་དབང་ལྷ་དགུ་སོགས་གནང༌། སྟག་ལུང་ནས་ཕེབས་བསུ་དང་
བཅས་ཕེབས། རྗེ་རིན་པོ་ཆེ་ཀུན་དགའ་བཀྲ་ཤིས་པ་དང་མཇལ། གུར་གུམ་སོགས་སྨན་
བཟང་དྲུག གསེར་སྲང་གང༌། བྱུ་རུ་སྤོས་ཤེལ། རས་སྤུས་གཙང་བ་སོགས་སྟོད་ཟོག་སྤུས་
གཙང་མང་པོས་སྐུ་སྐྱེས་ཕུལ། དེ་ནས་རྗེ་གྲོགས་ཁ་པ་ཆེན་པོ་དང་མཇལ། སྐུ་སྐྱེས་སྔར་
བཞིན་ཕུལ། སྟག་ལུང་བའི་ཆེ་བཙུན་ཀུན་གྱིས་ཕྱག་མཇལ་ཕུལ།
དེ་ནས་རྗེ་ཀུན་དགའ་བཀྲ་ཤིས་ལས་ཚེ་དབང་དབྱངས་ཅན་མའི་རྗེས་གནང༌། སྟག་
ལུང་ཐང་པ་ཆེན་པོའི་རྣམ་ཐར་གྱི་ལུང་གསན། དེ་ནས་རྗེ་ཉིད་ལ་ཚེ་དཔག་མེད་དཀར་པོ།
སྒྲོལ་དཀར་འཇམ་དཀར། གྲུབ་རྒྱལ་ལུགས་ཀྱི་ཚེ་དབང་བརྒྱ་རྩ། ཛེ་ཏཱ་རི་དགྲ་ལས་རྣམ་
རྒྱལ་གྱི་བཀའ་སྲོལ། ས་སྐྱ་པ་ཡབ་སྲས་ལ་བཀའ་བབས་པའི་ཚེ་དཔག་མེད་ལྷ་དགུའི་འཆི་
བླུ་དང་བཅས་པ། ཚེ་ཁྲིད་ཛཾ་དམར། རྗེ་བཙུན་ཐམས་ཅད་མཁྱེན་པའི་སྐུ་སྐྱེ་བཅུ་གཅིག་གི་
རྟོགས་བརྗོད། རྣམ་ཐར་ཡོངས་རྫོགས་མགུར་འབུམ་དང་བཅས་པའི་ལུང་ཕུལ། རྗེ་གྲོགས་
ཁ་བ་ཆེན་པོ་ཚེ་དབང་རིགས་མི་གཅིག་པ་འགའ་ཤས། བཀའ་གདམས་ཐོར་བུ་པ་དང༌། རྗེ་
བཙུན་ཐམས་ཅད་མཁྱེན་པའི་རྣམ་ཐར་ཆེན་མོའི་ལུང་ཕུལ། ཅོག་གྲྭ་སློབ་དཔོན་པས་གཙོས་
པའི་དོན་གཉེར་མང་དག་ལ། སྙིང་པོ་དོན་གསུམ་གྱི་འཁྲིད་བྱིངས་པ་རྣམས་ལ་རང་རང་གི་
འདོད་པའི་རྗེས་གནང་ལུང་སོགས་གནང༌། དེ་ནས་རྭ་སྒྲེང་མཇལ་བར་ཕེབས། ཇོ་བོ་ལ་
དཀར་མེ། ཞལ་གསེར། སྙན་དར་ཕྱག་མཆོད་སྨོན་ལམ་གནང་ནས་སླར་སྟག་ལུང་དུ་ཕེབས།
རྗེ་སྐུ་མཆེད་ལ་ཀུ་རུ་ཀུལླེའི་གསང་འཁྲིད། གུར་གྱི་རྗེས་གནང༌། མན་ངག་ཟབ་མོ་དང་
བཅས་པ་གནང༌། དཔོན་རིན་པོ་ཆེ་སོགས་དྲག་པ་རྣམས་ལ་ཡང་ཚེ་དབང་སོགས་དང༌། སོ་
20-1-172


སོར་འདོད་ཆོས་མང་བ་གནང༌། དེ་ནས་སྟག་ལུང་ནས་དཔོན་སློབ་སོ་སོས་འབུལ་བ་རྒྱ་ཆེ་
བ་རང་མཛད། དེ་ནས་ལྷུན་གྲུབ་སྒང་དུ་ཕེབས། ཞལ་ངོ་རྣམས་ལ་ཚེ་དབང་རྟ་མགྲིན་སོགས་
གནང༌། ཚུར་ཡོང་ལྕང་ལུང་ཆོས་སྡིངས་སུ་ཕེབས། མཁན་རིན་པོ་ཆེ་དང་སྤྱི་ཆོས་དགོས་ཆོས་
སོགས་གནང་ནས་ལྷ་སར་ཕེབས། ཞལ་གསེར་གསེར་སྟོན་རྒྱས་པ་བཅས་སྙན་དར་སོགས་
སོ་སོར་འབུལ་བ་གནང༌། རིམ་གྱིས་རོང་ངུར་སྨྲིག་དང༌། གཞིས་ཀ་བྱམས་ཆེན་སོགས་ཀྱི་
རྟེན་མཇལ་གནང་ནས། གཞིས་ཀ་རིན་སྤུངས་སུ་ཕེབས་ནས་སྡེ་སྲིད་དང་མཇལ། རྒྱང་ཙམ་
བཞུགས་ནས་དགོངས་བཞེད་ལྟར་ཚེ་དབང་སོགས་དབང་བཀའ་རྗེས་གནང་མང་བ། དུས་
འཁོར་སྙན་བརྒྱུད་ཀྱི་འཁྲིད། མགོན་པོའི་རྗེས་གནང་སོགས་གནང༌། ཇ་བཟང་དང་རྫོང་ཁ་
བརྒྱུད་ཁྲི་ཁང་དུ་ཕེབས། ཚེ་དབང་གནང༌། གཞིས་ཀ་བསམ་འགྲུབ་རྩེར་ཕེབས། སྡེ་པ་རྒྱལ་
བུ་དཔོན་བློན་ལ་ཚེ་དབང་སོགས་གནང༌། གསེར་མདོག་ཅན་ལ་མང་ཇ་སྐོལ་བ་རྫོང་དར་
གནང༌། རིམ་གྱིས་རི་ཁྲོད་ཆེན་མོར་ཕེབས། ལྷ་ཁང་སོ་སོར་སྙན་དར་མར་མེ། ཚོགས་པ་ལ་
མང་ཇ་གནང༌། སྨོན་འགྲོ་བརྒྱུད་ནས་ཆོས་ལུང་བྱང་རྩེར་ཕེབས། དངུལ་གདུང་རིན་པོ་ཆེར་
སྙན་དར་གོས་ཡུག །རྗེ་ཀུན་དགའ་མཆོག་གྲུབ་ཀྱི་སྐུ་ལ་སོགས་པ་སྐུ་ཆེ་གྲྭ་རྣམས་ལ་སྙན་
དར། དཀར་མེ་བརྒྱ་རྩ་སོགས་མཆོད་པ་དང༌། ཚོགས་སུ་མང་ཇ་ཟུང་སྦྲེལ་འགྱེད་བཅས། རྗེ་
དྲུང་རྡོ་རིང་པར་བཀྲ་ཤིས་ཁ་བཏགས། གསེར་སྲང༌། དངུལ་ཕོར། གོས་ཕྱི་ནང༌། ཇ་སིགས་
འབུལ་བ་གནང༌། རྒྱང་ཙམ་བཞུགས་རིང་རྗེ་རིན་པོ་ཆེ་ལ་ཚེ་དབང་བརྒྱ་རྩ། རྗེ་བཙུན་ཐམས་
ཅད་མཁྱེན་པའི་རྣམ་ཐར་ཡོངས་རྫོགས། གསན་ཡིག་འཁྲིད་བརྒྱའི་ལུང་རྣམས་ཕུལ། ཚུར་
ཡང་ཚེ་དབང༌། ཞལ་བཞི་པ་རིགས་མི་འདྲ་བ་བཅུ་གཅིག་གི་རྗེས་གནང་ལུང་བཅས་རྩ་དབུ་
མའི་འཁྲིད་སོགས་གསན། སྒྲུབ་སྡེ་ལ་ཚེ་འཁྲིད། རྗེ་བཙུན་རིན་པོ་ཆེའི་རྣམ་ཐར་གྱི་ལུང་
རྣམས་གནང་ངོ༌། །
20-1-173


༈ བྱང་ཆུབ་ཕྱོགས་ཆོས་གཟུགས་སུ་སྣང་བའི་སྤོ། །རིན་ཆེན་དུ་མ་ལས་གྲུབ་ཆོས་སྐུའི་
རྟེན། །ཉིན་བྱེད་འོད་དུ་འབར་བའི་གཟི་འོད་ཀྱིས། །རྩོད་དུས་མུན་པའི་ཚོགས་རྣམས་རིང་དུ་
བསྐྲད། །གང་ལ་བདེ་ཆེན་འཁོར་ལོ་སྡོམ་པ་ཡི། །ཡེ་ཤེས་རང་བཞིན་རྗེ་བཙུན་བླ་མའི་
ཐུགས། །གཉིས་སུ་མེད་པའི་ཡེ་ཤེས་སྤྱན་དྲངས་པས། །རྡུལ་སྙེད་རྒྱལ་བའི་བྱིན་རླབས་མ་
ལུས་ཞུགས། །སྔགས་རྒྱ་ཏིང་འཛིན་ཆོ་གའི་རིམ་པ་ལས། །ལྷག་གནས་མེ་ཏོག་གཏོར་ཚེ་
ཕྱོགས་བཅུ་ཡི། ། རབ་འབྱམས་ཞིང་གི་རྒྱལ་བ་མ་ལུས་པས། །ཤིས་བརྗོད་མན་ད་ར་བའི་
ཕྲེང་བ་སྤེལ། །དེ་ཚེ་མཁའ་དབྱིངས་ཆུ་འཛིན་གོས་བྲལ་བར། །འཇའ་ཚོན་ཕྲེང་བས་ཡོངས་
སུ་བྲིས་བྱས་ཤིང༌། །ལྷ་རྫས་མེ་ཏོག་སིལ་མའི་ཆར་ཆེན་གྱིས། །ནམ་མཁའ་ཡངས་པ་མ་
ལུས་འགེངས་པར་བྱེད། །རྒྱལ་བའི་དགོངས་པ་དྲང་ངེས་ཆོས་ཀྱི་ཚོགས། །གང་ལ་གང་
འདུལ་བློ་དང་འཚམས་སྟོན་ཞིང༌། །སྐལ་ལྡན་མཆོག་ལ་རྡོ་རྗེ་ཐེག་པ་ཡི། །ཉེ་ལམ་གྲུབ་པའི་
ཞལ་ལུང་གཙོ་བོར་བསྟན། །ཕྱོགས་བཅུའི་སྐྱེ་འགྲོའི་བསོད་ནམས་གསོག་ཕྱིར་དུ། །རིན་
ཐང་ཆེ་བའི་དངོས་པོ་ཀུན་ཕུལ་བ། །སླར་ཡང་མི་ཟད་ནམ་མཁའ་མཛོད་ཕྱེ་ནས། །དཀོན་
མཆོག་མཆོད་དང་དམན་ལ་སྦྱིན་གཏོང་མཛད། །ཟབ་མོའི་དོན་མཆོག་བསྐྱེད་རྫོགས་ཡེ་
ཤེས་ལ། །སྐད་ཅིག་ཡེངས་པ་མེད་པར་མཉམ་འཇོག་ཅིང༌། །བསྡུ་དངོས་བཞི་དང་ཕ་རོལ་
ཕྱིན་དྲུག་གི །སྤྱོད་པའི་ཚུལ་འདི་ལག་ལེན་ཐེབས་པར་མཛད། །མང་པོའི་དབུས་སུ་ཁ་
བཤད་ནེ་ཙོའི་ཚིག །ཡིན་ཡིན་ལྟར་སྨྲའི་ཆེར་རློམ་མང་མོད་ཀྱི། །དམ་ཆོས་ཆོས་ནས་བཤད་
བཞིན་མཛད་པ་དེས། །རྗེ་བཙུན་ཁྱེད་ཀྱི་རྣམ་པར་ཐར་པ་ཡིན། །དེ་ནས་སླར་ཡང་སྨོན་གྲོར་
ཕེབས། ཞལ་ངོ་རྣམས་ལ་ཚེ་དབང༌། ཆོས་སྐྱོང་གི་བཀའ་བསྒོ་སོགས་གནང་ནས་ཇོ་ནང་དུ་
ཕེབས། ཕྱོགས་ཀྱི་བླ་མ་སློབ་དཔོན་སོགས་སེར་སྐྱ་དད་འདུས་ལ་རང་རང་གི་བསམ་པ་ལྟར་
གྱི་རྗེས་གནང༌། ཚེ་དབང་ལུང་སོགས་གནང༌། དེ་ནས་ཟླ་བ་གཉིས་ཙམ་སྐུ་མཚམས་གནང་
20-1-174


བ་གྲོལ་མཚམས། ནང་སོ་གྲོ་ལུང་ཆོས་མཛད་པ་སོགས་ལ་ཚེ་དབང༌། དམར་པོ་སྐོར་གསུམ།
ནི་གུའི་འཁྲིད་སོགས་གནང་རྗེས། དགུན་ཁྲིད་སོགས་ཀྱི་འཁྲིད་གསར་པ་གཏོས་ཆེ་བ་དང་
བཅས་པ་མཐར་ཕྱིན། དུས་ཀྱི་འཁོར་ལོའི་བསྙེན་པ་ཟླ་སྦྲེལ་ཙམ་གནང༌། དེ་ནས་བྲག་
དམར་ཆོས་སྡེའི་མཁན་པོ་ཆོས་ཀྱི་རྗེ་དོན་ཡོད་རྡོ་རྗེ་དཔོན་སློབ་རྣམས། པཎ་ཆེན་རིན་པོ་ཆེ་
དང་རྗེ་དམ་པ་ནས་བརྒྱུད་པའི་སྒྲུབ་ཐབས་བརྒྱ་རྩ་དང་རྒྱ་མཚོ་སོགས་གསན་པར་ཆེར་
གཏད་དུ་ཕེབས་ཟླ་བ་གསུམ་ཙམ་བཞུགས་པར་སྒྲུབས་ཐབས་བརྒྱ་རྩ་དང་རྒྱ་མཚོ་གཉིས་
ཀའི་རྗེས་གནང༌། སླ་ཆོས་སུ་མ་སོང་བར་རྗེས་གནང་རྟིང་མ་རྣམས་སྒྲུབ་རིང་ཚོགས་པས་
སྒྲོལ་མ་གནང༌། རྗེས་གནང་གྲུབ་འཕྲལ་སྒྲུབ་ཐབས་ཀྱི་ལུང་གནང༌། ཡང་དགོས་རྗེས་གནང་
རྟིང་མ་སྒྲུབ་པ་སོགས་ཕྱག་ལེན་ཤིན་དུ་གཙང་བའི་སྒོ་ནས་གནང༌། གཞན་ཡང་རྗེས་གནང་
ཟུར་བཀའ་མང་དག་དང༌། འཕགས་པ་བརྒྱད་སྟོང་པའི་ལུང་སོགས་གནང་ནས་ཤར་ལ་
ཐོགས་ཕེབས། རིང་པོ་མ་ལོན་པར་གསེར་མདོག་ཅན་དུ་གནང་འདུག །དེ་ནས་ཉི་མ་མེ་
བཞིའི་འགྲུབ་སྦྱོར་ཡོད་པ་ཞིག་གི་ཉིན་རི་ཁྲོད་ཆེན་པོ་ཇོ་ནང་གི་གཙུག་ལག་ཁང་གི་འགྲམ་
བསྐྱེད་ནས་གསར་དུ་གཙུག་ལག་གི་བླའི་དཔོན། ཆོས་རྗེ་ཀུན་བཟང་རྒྱལ་པོ་ལ་བསྐོ་བཞག་
གནང༌། རྡོ་བཟོ་ཤིང་བཟོ་སོགས་གང་མཁས་ནས་འབོད་པ་གནང་སྟེ། གཙུག་ལག་ཁང་སྔར་
བས་རྒྱ་ཆེ་ལ་དཔངས་མཐོ་བའི་ཞལ་བཀོད་གནང༌། དེ་ནས་རིང་པོ་མ་ཐོགས་པར་འདུ་ཁང་
ཀ་ཆེན་སུམ་བཅུ་ཡོད་པ། ཤིང་ཆ་སོགས་གཟབས་ལྡན་ཕུགས་ཐིག་ཁང་དང་བཅས་པ་གྲུབ་
མཚམས། བཟོ་རིས་པ་རྣམས་ལ་གནང་སྦྱིན་རྒྱ་ཆེར་གནང་ནས་རྫོངས་ལྟར་གནང༌། དེ་རྗེས་
སྤྲུལ་སྐུ་སྨན་ཐང་བ་སྐུ་མདུན་བློ་བཟང་བ་དང་ལྷུན་གྲུབ་པ་གཉིས་ཕྱག་ཕྱིར་རྒོད་ཁུངས་
བསོད་དཔལ་བ་དང༌། སྣར་ཐང་པ་ཚེ་རིང་འཕེལ་སོགས་མཁས་བསྡུས་དཔོན་སློབ་ཉི་ཤུ་
ཕྱིར་ཕེབས། གཙུག་ལག་ཁང་ལ་གཟིགས་ནས། གཙུག་ལག་ཁང་ཆེ་ཞིང་ཤིང་ཆ་བཟང་
20-1-175


བསྒྲིགས་རང་དུ་འདུག་པས་ཚོན་མང་པོ་དགོས་པར་འདུག་པ་ལ། གཞིས་ཀ་རིན་སྤུངས་ནས་
སྤང་མཐིང་གཏོས་ཆེ་བ་འབུལ་བ་གནང་འདུག་པ་འདིས་ལྡངས་ཀྱང་མཚལ་ལི་ཁྲི་སྟོབས་
ཆེན་དགོས་པ་འདུག་ཞུས་པས་དེས་རང་ཐོགས་མི་འོང་གསུངས། བར་ཆད་སེལ་ཕྱིར་ཁོང་
དཔོན་སློབ་ལ་ཚེ་དབང་དང༌། ལྷ་ཞི་དྲག་གི་རྗེས་གནང་འགའ་རེ་གནང༌། སྐྱ་རིས་ཚུགས་
མཚམས་ཤེལ་དཀར་ནས་སྒྲུབ་སྡེ་ཆེན་པོར་མང་ཇ་བསྙེན་བཀུར། རྗེའི་དྲུང་དུ་འབུལ་བ་སྤྱི་
དང༌། ཁྱད་པར་ལོགས་བྲིས་གནང་གི་ཡོད་འདུག་པས་ཟེར། མཚལ་ལེགས་པ་གྲོ་འབོ་ཕྱུར་
པ་གཅིག་ཕུལ་བྱུང་བས་ལྷག་འཐོར་པ་བྱུང༌། ཤིང་རྩི་ལོགས་བྲིས་ཚང་མ་ཚོན་བཟང༌།
གསེར་ཚ་བྱུགས་ཤིང་རི་མོ་གཟབ་པའི་ངོས། ཐུབ་དབང་གཙོ་བོར་གྱུར་པའི་ཀུན་མཁྱེན་ཆེན་
པོ་དང༌། རྗེ་བཙུན་ཐམས་ཅད་མཁྱེན་པའི་སྐུ་སྐྱེ་བཅུ་གཅིག དུས་ཀྱི་འཁོར་ལོ་ཞལ་ཕྱག་
རྫོགས་པ། ཆོས་རྒྱལ་རིགས་ལྡན། སྦྱོར་དྲུག་བརྒྱུད་པ། འདོད་ལྷ་འགའ་ཤས་དང་བཅས་པ་
རྣམས་རི་མོ་འབབ་ཅིང་གྲུབ་སྐྱེན་པ་རང་བྱོན་ལྟ་བུར་བྱུང་ནས། ཟླ་བ་བཞི་ལྷག་པ་ལ་བར་
ཆད་ཀྱི་མཚན་མ་ཅུང་ཟད་ཙམ་ཡང་མེད་པར་མཐར་ཕྱིན། བཟོ་རིས་པ་རྣམས་ཀྱང་རྗེ་ཉིད་ཀྱི་
ཐུགས་རྗེ་དང་བྱིན་རླབས་ལས་གྲུབ་པར་འདུག་ཞུ་བ་བྱུང༌། རབ་ཏུ་གནས་པར་རྗེ་ཉིད་
ཕེབས་དགོས་པའི་ནན་ཞུས་བྱུང་བས། ལྗགས་བསྙེན་གྱི་འཕྲོས་གང་མྱུར་གནང་ནས་ཞག་
དྲུག་ནས་སྐུ་མཚམས་གྲོལ་ནས་ཕེབས་པས་དབོན་དྲུང་རིན་པོ་ཆེ་འཕན་ནེ་དེ་ཉིད་གཤེགས་
པའི་བང་ཆེན་དང་ལམ་དུ་མཇལ་ནས་མྱུར་བར་སྨོན་གྲོར་ཕེབས། སྐུ་རྗེས་རྒྱ་ཆེར་བྱེད་
དགོས་པའི་བཀའ་བཀོད་གནང་སྟེ་རྗེ་བཙུན་མཆོག་གི་སྤྲུལ་སྐུ་དང༌། རྗེ་རྡོ་རིང་པ་ཡར་
འབྲོག་ན་བཞུགས་པ་ལ་འབུལ་བ་དང་སྤྱན་འདྲེན་སྦྲགས་པ། གཞན་སྟག་ལུང་ཆོས་རྗེ་
སོགས་ཆོས་འབྲེལ་ཡོད་པའི་བླ་མ་ཀུན་ལ་འབུལ་བ། ཆོས་ལུང་བྱང་རྩེར་སྙན་དར་དང་
དཀར་མེ་སོགས་གཏོས་ཆེ་བ་སྨོན་འགྲོ་རང་དུ་ཆོས་ལུང༌། ཤུག་ཁྲོད། དགོན་པ་དཀར་པོ་བ།
20-1-176


ཇོ་ནང་སྒྲུབ་སྡེ་རགས་པ༌། གསེར་མདོག་ཅན་གྱི་ཕུ་ཐུག་པའི་སློབ་གཉེར་བ་སོགས་དགེ་
འདུན་སུམ་བརྒྱ་བུད་པས་དཀྱིལ་འཁོར་མང་པོའི་སྒྲུབ་མཆོད་དང་སྨོན་ལམ་མཛད། རྗེ་ཉིད་
དཔོན་སློབ་ཉུང་བསྡུས་ཀྱིས་རྣལ་འབྱོར་མ་དང༌། མི་འཁྲུགས་པའི་ཆོ་ག་གནང༌། མཐར་དགེ་
འདུན་ཐམས་ཅད་འདུས་པའི་དབུས་སུ་གསུངས་བསྔོ་རྒྱས་པ་ཤིས་བརྗོད་དང་བཅས་པ་
གནང་ཞིང༌། ངམ་རིང་ཆོས་སྡེ། བཟང་ལྡན། ཇོ་ནང་སོགས་བྱང་ཁོག་གི་དགོན་པ་ཕལ་ཆེ་བ་
དང༌། ངོར་གསེར་མདོག་ཅན་སོགས་སུ་མང་ཇ་བསྔོ་རྟེན་གྲྭ་ལ་འགྱེད། སྙན་དར་དཀར་མེ།
འཕན་སོགས་མཆོད་རྫས་དཔག་མེད་འབུལ་བ་སོགས་ཞལ་བཀོད་ཀྱིས་ཁྱབ་པར་མཛད་
ནས་ཇོ་ནང་དུ་ཕེབས། མགོན་པོ་ལྕམ་དྲལ་གྱི་འཆམས། སྐུ་འཁོར་རྣམས་ཀྱི་ཞལ་འབག་དང་
བཅས་པ་བཞེངས་པ་གནང༌། རབ་ཏུ་གནས་པ་གནང་ནས་ཡེ་ཤེས་པ་བཞུགས་ངེས་པའི་
ཟིལ་ཅན་དུ་གྱུར། དེ་སྐབས་ཇོ་ནང་གི་ཆེ་བགྲེས་རྣམས་ཀྱིས་རྗེ་ཉིད་ཀྱི་སྐུ་འདྲ་ཕྱག་ནས་མ་
གཅིག་བཞེང་ཟེར། རྒྱུ་དར་ཟབ་སྨན་བཟང་དྲུག རིན་པོ་ཆེའི་ཕྱེ་མ་སྣ་ཚོགས་པ་བསྲེས་པ་
ལས་གྲུབ་པ། ནང་གཞུག་སྐུ་གསུང་ཐུགས་ཀྱི་རྟེན་གཟུངས་སྔགས། རིང་བསྲེལ་སོགས་
དཔག་ཏུ་མེད་པས་བཀང་བ་འདི་བཞེངས་ནས། རབ་ཏུ་གནས་པ་རྒྱས་པར་གནང་ནས་འདུ་
ཁང་དུ་བཞུགས་སུ་གསོལ། རྟ་ལོ་སྐུ་མཚམས་དམ་པར་གནང་ཡོད་པའི་སྐབས་དབྱར་སོས་
བསམ་འགྲུབ་རྩེ་ནས་དཔོན་ས་བདག་མོའི་དྲུང་ཆོས་བྲོས་མཛད་ནས་ཕེབས། དེ་ནས་མྱུར་
སྟབས་སུ་སྡེ་པ་ཀུན་སྤངས་དྲུང་སྐུ་མཆེད་ཀྱང་མྱུར་ཤངས་སུ་ཕེབས། དཔོན་ས་རིན་པོ་ཆེ་
ནས་གཙུག་ཕུད་བཞེས་དགོས་ཚུལ་ནན་ཞུས་བྱུང་ན་ཡང༌། སྐུ་མཚམས་སྟབས་ནས་སུ་ལ་
ཡང་མཇལ་ཁ་མ་གནང༌། འོན་ཀྱང་བཀའ་བཀོད་གནང་བའི་ཞལ་ངོ་མཐུན་གྲུབ་ཀྱི་སྒོ་ནས་
དབུ་བསིལ་གནང༌། སྡེ་པ་སྐུ་མཆེད་ཀྱིས་ཀྱང་འབུལ་བ་རྒྱ་ཆེ་བ་མཛད་ནས་ཕྱིར་ཐེགས།
ལུག་ལོ་རྗེ་དབོན་དྲུང་མངའ་རིས་ལ་རྣམ་རྒྱལ་ཆོས་སྡེའི་མཁན་པོར་རྫོང་ལྟར་གནང༌། དེ་
20-1-177


ནས་སྤྲེའུ་ལོ་ལོ་གསར་དབུ་ལེགས་ནས་ཀྱི་ཞབས་ཕྱིར་ཆོས་ལུང་སྒྲུབ་སྡེ་བ་ཉི་ཤུ་ཙམ་གྱིས་
ཀྱཻ་རྡོ་རྗེ་ཆོས་ལུང་སྒྲུབ་པ་བྱིན་གྱིས་བདེ་མཆོག་ལྷ་ལྔ། ཇོ་ནང་ཆོ་ག་ཤེས་པ་རྣམས་ཀྱིས་དུས་
འཁོར་ཇོ་ནང་ལུགས། དགོན་པ་བདེ་ཆེན་པ་རྣམས་ཀྱིས་དུས་འཁོར་བདག་ཆེན་ལུགས།
བྲག་རམ་པས་ཀུན་རིག །དཀར་པོ་བས་ཀྱཻ་རྡོར་སྒྲུབ་མཆོད་བྱེད་མི་རྣམས་ཚེས་དྲུག་ལ་
འཛོམས་ཐིག་བཏབ། བདུན་པ་སྟ་གོན་ཚེས་བརྒྱད་རྒྱལ་ཕུར་འཛོམ་པ་ལ་དངོས་གཞི་སྟེ།
དཀྱིལ་འཁོར་ཡང་དུས་འཁོར་རས་བྲིས་དང༌། གཞན་རྣམས་རྡུལ་ཚོན་ལས་བཞེངས། རབ་
ཏུ་གནས་པ་གནང་བས། སྟོན་པ་དུས་འཁོར། ཀུན་མཁྱེན་རྗེ་བཙུན་ཐམས་ཅད་མཁྱེན་པ་
རྣམས་ཀྱི་སྐུས་མེ་ཏོག་བཞེས་ཤིང༌། ནམ་མཁར་འཇའ་འོད་ཀྱི་གུར་ཁྱིམ་ཕུབ་པ་ཀུན་གྱིས་
མཐོང་བས་དད་མོས་ངོ་མཚར་དཔག་མེད་དུ་གྱུར། རབ་གནས་དགའ་སྟོན་ཡང་ཙཱ་རུའི་
བཟའ་བ་རྒྱ་ཆེ་དཔངས་མཐོ་བ་དང༌། དེ་སྐབས་གཞིས་རྒྱང་བྱང་གསུམ་གཙོ་བོར་གྱུར་པའི་
ཁྲི་སྣར་གཏིང་སྐྱེས་སོགས། སོ་སོ་ནས་འབུལ་བ་རྒྱ་ཆེ་བ་འབྱུང༌། དེ་ནས་རིག་བྱེད་པ་རྣམས་
ལ་ཇ་གོས་དར་གཙོ་བོར་གྱུར་པ། དཔོན་སློབ་སོ་སོར་གང་ལ་གང་འཚམས་བློ་ཡུལ་ལས་
འདས་པ་ལྟ་བུའི་གནང་སྦྱིན་གནང་བས་ཡིད་མགུ་བ་བླ་ན་མེད་པ་ཐོབ་ཅིང༌། རྗེ་ཉིད་ཀྱིས་
བསྔོ་བ་སྨོན་ལམ་རྒྱས་པར་གནང་སྟེ། སྟག་ལུང་གཙོ་བོར་གྱུར་པའི་དད་པ་ཅན་རྣམས་ཀྱིས་
ཕུལ་བའི་དངོས་པོ་རྣམས་ཆུད་མི་ཟོས་པར་སོང་ཞིང་ཐུགས་བདེ་བར་གྱུར། དེ་ནས་ཟླ་བ་
གཉིས་སྐུ་མཚམས་གནང་བ་གྲོལ་མཚམས། གནས་རྙིང་ནས་རྗེ་གསང་བའི་དྲུང་བཀའ་ཆོས་
གསན་པ་ལ་ཆེད་གཏད་ཕེབས་པ་ལ། ཚེ་དབང་ཁྲིད་བཅས། སྒྲོལ་དཀར་གྱི་ཚེ་ཁྲིད་རྡོ་རྗེ་
རྣལ་འབྱོར་མའི་སྐོར་རྣམས་དང་རྗེ་བཙུན་རིན་པོ་ཆེའི་རྣམ་ཐར་ཡོངས་རྫོགས་ཀྱི་ལུང་
སོགས་བཀའ་ཆོས་མང་བར་གནང༌། དེ་ནས་དཔལ་འཁོར་བདེ་ཆེན་གྱི་མཁན་རིན་པོ་ཆེ་
ལུང་རིག་པ་དཔོན་སློབ་རྣམས་ཆོས་ལུང་བྱང་རྩེའི་རྟེན་མཇལ་དང༌། རྗེ་ཉིད་དུ་བཀའ་ཆོས་
20-1-178


གསན་པ་ལ་ཕེབས་བྱུང་བ་ནས། ཇོ་ནང་དུ་སྤྱིར་བཀའ་ཆོས་མང་བ་དང༌། ཁྱད་པར་རས་ཆེན་
དཔལ་འབྱོར་ནས་བརྒྱུད་པའི་ཚེ་དབང་གནང་བས། ཚེ་མདའ་འཕེལ་བའི་རྟེན་འབྲེལ་བྱུང་
བས་ཤིན་ཏུ་ཐུགས་དགྱེས་པར་གྱུར། རྗེ་ཉིད་ཀྱིས་ཀྱང་དུས་འཁོར་ལུགས་ཀྱི་བླ་མའི་རྣལ་
འབྱོར་གསན་ནས། མཁན་ཆེན་པ་དཔོན་སློབ་ཕྱིར་ཐེགས། དགུན་ཁྲིད་གྲོལ་ནས་སྐུ་
མཚམས་རྒྱང་ཙམ་གནང༌། བདག་གཞན་བརྗེ་བའི་བྱང་ཆུབ་ཀྱི་སེམས་བསྒོམ་པ་གཙོ་བོར་
གནང་ནས་ལྟས་ཁྱད་པར་རྣམས་བརྙེས། དེ་མཚམས་ཁྲི་ཁང་ནས་ཡུམ་གྲོངས་སོང་བས་
དགོངས་རྫོགས་ལ་སྤྱན་འདྲེན་བྱུང་བ་ནས། ཆོས་ལུང་དང་ཇོ་ནང་གི་སྒྲུབ་སྡེ་དྲག་བསྡུས་དང་
བཅས་ཕེབས། སྔ་དྲོ་མི་འཁྲུགས་པ་དང༌། དགོང་མོ་རྣལ་འབྱོར་མའི་གསུང་ཆོག་མཛད་པའི་
སྒོ་ནས་རྗེས་སུ་བཟུང༌། གྲོལ་ཁར་དགེ་འདུན་མང་དག་འདུས་པའི་དབུས་སུ་བསྔོ་བ་སྨོན་
ལམ་རྒྱས་པར་གནང་ནས་ཇོ་ནང་དུ་ཕེབས། བྱ་རྒོད་གཤོངས་ཀྱི་མཁན་ཆེན་སངས་རྒྱས་
རྒྱལ་མཚན་པ། ཁྲོ་ཕུ་གདན་ས་པ་ཤག་ཚལ་འབུམ་རམ་པ་སོགས་མང་དག་ལ་ནི་གུའི་ཁྲིད་
ལུང་དང་བཅས་པ་དང༌། རྗེས་གནང་འགའ་ཤས་གནང༌། བྱང་པ་བདག་པོས་རྨ་བྱ་ཤུག་ཁྲོད་
ཀྱི་ལོགས་བྲིས་རབ་གནས་ལ་སྤྱན་འདྲེན་ཞུས་ནས་ཕེབས། རབ་གནས་ཞག་གསུམ་གནང༌།
མེ་ཏོག་གི་ཆར་འབབས་པ་སོགས་ལྟས་ཀྱང་ལེགས་པར་བྱུང༌། དེར་ས་སྐྱོང་ཆེན་པོ་སྐུ་གཞོན་
པ་ཡིད་བཞིན་ནོར་བུའི་དྲུང་ལ་ཚེ་དབང་ལྷ་དགུ། གྲུབ་རྒྱལ་མ་བརྒྱ་རྩ་སོགས་གནང་ནས་
ངམ་རིང་རྩེར་ཕེབས། དེར་ཡང་བཀའ་ཆོས་མང་བར་གནང་ནས། རྔོད་ལ་བརྒྱུད་གདོང་
དགར་ཕེབས། ཞག་འགའ་ཡར་སོང་དུས་ནུབ་གཅིག་གཟིམ་ཆུང་གི་ལྷོ་ནུབ་མཚམས་སུ་
ཐོག་བབས། རྗེ་ཉིད་ཀྱི་ཞབས་སུས་གཡས་པའི་བཞུགས་གདན་ནས་སོང་བས། ནང་སོ་
བསྟན་པ་ལེགས་སོགས་ཞལ་ངོ་ཐམས་ཅད་ཐུགས་འཚབས་པའི་ངང་ལ་ཕེབས་བྱུང་བས།
ངེད་ལ་ཅི་ཡང་གནོད་པ་མ་བྱུང་འོག་ཏུ་གཟིགས་གསུངས། གཟིགས་པས་མི་གཉིས་ལ་མེ་ལྕེ་
20-1-179


གནོད་པ་བྱུང་ན་ཡང་ཕུགས་སྐྱོན་མ་བྱུང༌། དེའི་སང་མདང་དགོང་གྲུབ་པའི་རྟགས་དངོས་སུ་
སྟོན་པ་མཛད་པའི་སྐུ་ལ་ཉེས་སྐྱོན་མེད་པའི་དགའ་སྟོན་ཡིན་གསུངས། ཀརྨ་གན་ཀར་གྱིས་
གཙོས་པའི་འབུལ་བ་རླབས་ཆེ་བ་བྱུང༌། དེར་ཚེ་དབང་དང་མགོན་པོའི་བཀའ་བསྒོས་སོགས་
གནང་ནས། ལྷ་རྩེ་བརྒྱུད་ཇོ་ནང་དུ་ཕེབས། དེ་ཐམས་ཅད་དུ་ངམ་རིང་སྡེ་སྲིད་དཔོན་བློན།
གཞིས་ཀ་ཞབས་དྲུངས། ཁྲི་སྣར། གཏིང་སྐྱེས་སོགས་ཕྱོགས་ཐ་དད་ནས་གྲུབ་པའི་རྟགས་
མངོན་གྱུར་དུ་སྟོན་པ་གནང་བའི་དགའ་སྟོན་གྱི་འབུལ་བ་རྒྱ་ཆེ་བ་དང༌། བསྟོད་བཀུར་
བསྔགས་པའི་འཕྲེང་བ་ཕུལ་ལོ། །དེ་ནས་དགུན་ཁྲིད་འཛུག་པ་གནང༌། སྔོན་འགྲོའི་སྐབས་
སུ་དུས་འཁོར་ཆོས་འབྱུང་སོགས་སྤྱི་བཤད་རྒྱས་པ་དང་མཆོག་དབང་གི་སྐབས་ལས་ཅན་
འགའ་ཤས་ཀྱིས་རྗེ་ཉིད་རྡོ་རྗེ་ཤུགས་དངོས་སུ་མཐོང་བ་ཡང་བྱུང༌། དངོས་གཞིའི་སྐབས་
ཁྲིད་ཞུ་བ་ཕལ་ཆེ་བ་ལ་རྟགས་སྣང་ཅི་རིགས་སུ་ཤར་ཞིང༌། ཆོས་ལུང་དུ་དུས་ཆེན་ལ་ཕེབས།
གྲོལ་འཕྲལ་སྣར་ཐང་ནས་སྤྱན་འདྲེན་བྱུང་བ་བཞིན། དཔོན་ས་ཡུམ་ཞིང་བརྗེས་པའི་
དགོངས་རྫོགས་སུ་འདུག་པས་ཟླ་ཕྱེད་ཙམ་བཞུགས་ནས་མི་འཁྲུགས་པའི་གསུང་ཆོག་དང༌།
མཐར་མཚན་བྱང་བཞུ་བ་ཚྭ་ཚྭའི་བར་དུ་གྲུབ་ནས། སྣར་ཐང་ཚོགས་སུ་ས་དགེ་གཉིས་འདུས་
ཀྱི་དགེ་འདུན་ཚོགས་པ་རྒྱ་མཚོ་ལྟ་བུའི་དབུས་སུ། བཅོམ་ལྡན་རིགས་རལ་གྱི་བཞུགས་ཁྲིའི་
སྟེང་ནས་བསྔོ་བ་ཤིས་བརྗོད་ཀྱི་མཐའ་རྟེན་དང་བཅས་པ་གནང༌། ཡར་ལམ་ཆུ་མིག་གི་རྗེ་
བཙུན་མ་ལ་ཕྱག་མཆོད་གནང་ནས་རི་ཁྲོད་ཆེན་མོར་ཕེབས། དབྱར་ཆོས་ལ་སྨར་ཁྲིད་སྦྱོར་
རྩ་མ་གནང༌། དེ་ནས་དབོན་དྲུང་རིན་པོ་ཆེའི་གདན་འདྲེན་དང་བསྟུན་ཆོས་ལུང་བྱང་རྩེར་
ཕེབས། སྒྲུབ་སྡེ་ལ་ནི་གུའི་ཁྲིད་རྒྱས་པ་དང༌། སྨོན་གྲོར་ཞལ་ངོ་རྣམས་ལ་ཚེ་དབང་བརྒྱ་རྩ་
སོགས་གནང་སྐབས། བྱང་ནས་བདག་པོ་རིན་པོ་ཆེ་བཀྲ་ཤིས་སྟོབས་རྒྱལ་ཕེབས། བཀའ་
ཆོས་དགོས་གསུངས་ནན་སྐྱེད་ཆེ་བ་ནས་དགོངས་བཞེད་དང་བསྟུན་ཚེ་འཛིན་དཀར་པོའི་
20-1-180


རྗེས་གནང་ཐོག་མར་གནང་ནས། དེ་རྗེས་ཚེ་དབང་གྲུབ་རྒྱལ་མ་བརྒྱ་རྩ། ཚེ་ཁྲིད་ཚེ་དབང་
ལྷ་དགུ་མགོན་པོའི་རྗེས་གནང་སོགས་བཀའ་ཆོས་མང་དག་གནང་ནས། ཇོ་ནང་དུ་ཕེབས།
སྒྲུབ་སྡེ་ལ་སྙིང་པོ་དོན་གསུམ་གྱི་ཁྲིད་མི་ཏྲཱ་ཛོ་ཀིའི་རྣམ་ཐར། བུ་སྟོན་ཆོས་འབྱུང་གི་བཤད་
ལུང་སོགས་གནང༌། བྱང་སྟག་ལུང་སོགས་དབུས་ཕྱོགས་ནས་སྔར་ནས་སྤྱན་འདྲེན་སྙན་ཞུས་
མང་དག་བྱུང་ཞིང༌། དེ་སྐབས་སྤྱན་འདྲེན་ནན་ཆེ་ནས་ཤར་ཕྱོགས་ལ་ཆིབས་ཁ་བསྒྱུར་ནས།
སྣར་ཐང་བསམ་འགྲུབ་རྩེ་ཁྲི་ཁང་སོགས་སུ་བཀའ་ཆོས་རིམ་པར་གནང་ནས། རོང་རལ་
ལྔར་ཞབས་དྲུང་སྟེང་ཞལ་མཇལ། ཚེ་དབང་ཀྱཻ་རྡོར་གྱི་དབང༌། དུས་འཁོར་སྙན་བརྒྱུད་ཀྱི་
ཁྲིད་རྗེས་གནང་འགའ་ཡང་གནང༌། ངུར་སྨྲིག་ཏུ་སྒྲོལ་མ་གསུངས་འབྱོན་ལ་སྙན་དར་ཞལ་
གསེར་ཕྱག་མཆོད་དང༌། བླ་མ་ས་སྐྱ་པ་ཆེན་པོའི་ཕྱག་རྗེས་ལ་ཕྱག་མཆོད་སྨོན་ལམ་གནང་
ནས་རོང་གྲགས་སར་ཕེབས། ཚེ་རྟ་སྦྲགས་མ་སོགས་གནང༌། རིམ་གྱིས་རོང་ཆེན་བརྒྱུད་དེ་
དཔལ་དེར་ཕེབས། དེར་ཡང་བཀའ་ཆོས་མང་བར་གནང༌། གམ་པ་ལ་ལ་ཕེབས་ནས་ཆུ་བོ་
རིའི་ཤན་ལ་བརྒྱུད་ནས། གདན་འདྲེན་དང་བསྟུན་ནས་སྨྱུག་ལ། ཆུ་ཤུལ་གྱེ་རེ། འཚར་ས་སྣ་
ལྗངས་སྙེ་ཐང་རྣམས་སུ་རིམ་པས་ཕེབས། གང་ལ་གང་འདོད་ཀྱི་ཆོས་ཀྱི་སྦྱིན་པ་རྒྱ་ཆེར་
བསྩལ། ལམ་བར་ན་ཡོད་པའི་གཉོས་སངས་རྒྱས་རས་ཆེན་གྱི་སྐུ་ལྡེར་ཕྱག་ནས་མ་སོགས་
གྱི་རེའི་ལྷ་ཁང་གི་རྟེན་གསུམ་རྣམས་དང༌། སྙེ་ཐང་འཁོར་གྱི་ཇོ་བོའི་གནས་རྟེན་རྣམས་དང༌།
ཆོས་རྫོང་གི་དཔལ་ལྡན་བླ་མ་དམ་པའི་བཞུགས་གནས་རྟེན་གསུམ་སོགས་ཐམས་ཅད་ལ་
ཕྱག་མཆོད་སྨོན་ལམ་རྒྱས་པར་གནང༌། དེ་ནས་ཆོས་འཁོར་ལྷ་སར་ཕེབས། ཇོ་བོ་རིན་པོ་ཆེ་
སོགས་འོད་ཟེར་འཕྲོས་པའི་ལྷ་བརྒྱད་ཀྱི་གཙོས་པའི་རྟེན་བྱིན་རླབས་ཅན་རྣམས་ལ་ཞལ་
གསེར། སྙན་དར་དཀར་མེ་ཕྱག་མཆོད་རྒྱས་པ་དང༌། གསེར་སྟོན་རྒྱ་ཆེ་བ་གནང༌། དཔོན་ས་
ཆོས་སྐྱོང་དབང་མོས་སྤྱན་དྲངས། ཡེར་པ་ལྷ་རི་སྙིང་པོར་ཕེབས། གནས་ཐམས་ཅད་ཞིབ་
20-1-181


མཇལ་གནང་ཞིང་བཀའ་ཆོས་ཤིན་ཏུ་འཕེལ། དེ་ནས་གླང་ཐང་དུ་ཕེབས་ཚོགས་པ་ལ་མང་
ཇ་དང་ཆོས་འབྲེལ་གནང༌། ཤར་བ་འབུམ་པ་དང༌། པོ་ཏོ་སོགས་མཇལ་ནས་སྟག་ལུང་དུ་
ཕེབས་བསུའི་བཀོད་པ་རྒྱ་ཆེན་པོ་དང་བཅས་ཏེ་ཕེབས། རྗེ་རིན་པོ་ཆེ་རྩེ་བ་ཁུ་དབོན་དང་
མཇལ་ཐོག་མར་ཚེ་དཔག་མེད་དཀར་པོའི་རྗེས་གནང༌། དེ་ནས་ཚེ་དཔག་མེད་ལྷ་དགུ་བརྒྱ་
རྩ། གྲུབ་རྒྱལ་མ་བརྒྱ་རྩ། ཚེ་ཁྲིད་རྒྱས་པ། སྒྲོལ་དཀར་གྱི་ཁྲིད། དམར་པོ་སྐོར་གསུམ། ཀུ་རུ་
ཀུལླེའི་གསང་ཁྲིད་ནི་གུའི་ཁྲིད་འབྲིང་བོ་ཆོས་དྲུག་སོ་སོའི་བཀའ། ཡེ་ཤེས་མགོན་པོའི་
བཀའ་ནི་གུའི་རྣམ་ཐར་དང་ཁྲིད་ཡིག་སོགས་པོ་ཏི་གཉིས་ཀྱི་ལུང༌། ཛམ་དམར་ཚེ་རིང་
མཆེད་ལྔ་བོ་དོང་བའི་ལུགས་ཀྱི་ཐུགས་དམ་ལྷ་ལྔའི་རྗེས་གནང་རྣམས་དང༌། ཚོགས་ཆེན་ལ་
བཀའ་གདམས་གླེགས་བམ་དང༌། ཐམས་ཅད་མཁྱེན་པའི་རྣམ་ཐར་གྱི་ལུང་དང༌། སྨྲ་ཁྲིད་
རྣམས་གནང༌། སོ་སོའི་འདོད་ཆོས་གང་ལ་གང་འཚམས་སུ་གནང༌། སྟག་ལུང་པ་དཔོན་སློབ་
ཐམས་ཅད་ཀྱི་ཞབས་ཏོག་འབུལ་བ་མཐའ་ཡས་པ་མཛད། བྱང་རྭ་སྒྲེང་དུ་ཕེབས། ཇོ་བོ་
འཇམ་དཔལ་རྡོ་རྗེ་ལ་ཞལ་གསེར་སྙན་དར་སོགས་མཆོད་པ་དང༌། གནས་མཇལ་ཞིབ་པ་
དང༌། དེ་ཐམས་ཅད་དུ་སྨོན་ལམ་རྒྱས་པར་གནང་ནས་ལྕང་ལུང་ཆོས་སྡིང་དུ་ཕེབས། རྟེན་
རྣམས་ལ་དཀར་མེ་སྙན་དར་སོགས་མཆོད་པ་དང༌། མཁན་པོ་དབུ་མཛད་ཚོགས་པ་ལ་ཆོས་
འབྲེལ་མང་ཇ་འགྱེད་བཅས་གནང༌། ཆོས་འཁོར་རྩེར་པཎ་ཆེན་རྡོར་རྒྱལ་པའི་ནང་རྟེན་ལ་
ཞལ་གསེར་སྙན་དར། ཚོགས་པ་ལ་མང་ཇ་ཞུ་མི་གནང་ནས་ལྷ་སར་ཕེབས། ཞལ་གསེར་
སྙན་དར་སོགས་འབུལ་བ་རྒྱས་པ་གནང༌། ཡར་རྒྱབ་ནས་སྡེ་པ་དཔོན་ཆེན་ཡང་དེར་ཕེབས་
པ་དང་ཐུགས་མཇལ་བར་ཕེབས་བྱུང་ཞིང་ཆོས་འབྲེལ་གནང༌། ཕྱིས་ཡར་རྒྱབ་ལ་ཕེབས་
དགོས་ཞུ་བ་བྱུང་ཡང་ཕེབས་མ་ཐུབ། གུང་ཐང་དང་མཚལ་གྱི་རྟེན་མཇལ་གནང་ནས། ཤེལ་
གྲོ་ལུམ་པ་སོགས་བརྒྱུད་ནས་དྲང་སྲོང་སྲིན་པོ་རིའི་རྟེན་མཇལ་མཛད། སྤྱན་འདྲེན་བྱུང་བ་
20-1-182


བཞིན་གོང་དཀར་དུ་ཕེབས། སྲས་ཡུམ་ལ་བཀའ་ཆོས་གནང༌། གམ་པ་དང་དཔལ་དེ་ནས་
གྲགས་སར་ཕེབས། ཚེ་དབང་ལྷ་དགུ་དང་བརྒྱ་རྩ་སོགས་གནང༌། བདག་གིས་རབ་ཏུ་བྱུང་
བའི་བཀའ་དྲིན་མནོས། འཇམ་དཀར་དང་མི་ཏྲའི་རྗེས་གནང་ཡང་གནང༌། ཕོ་བྲང་རིན་པོ་ཆེ་
སྤུངས་པར་ཕེབས། ཞབས་དྲུང་སྟེང་ཞལ་སྲས་བཅས་སུ། ཚེ་དབང་ཀྱཻ་རྡོ་རྗེའི་དབང༌། མགོན་
པོའི་རྗེས་གནང་སོགས་གནང་ནས་བཀྲ་ཤིས་རྫོང་དཀར་ཕེབས། ཚེ་དབང་སོགས་གནང༌།
གཉེན་ཡོད་གསེར་མདོག་ཅན་གྱི་ཆོས་གྲྭར་ཆེན་པོར་དགེ་འདུན་ཚོགས་ཆེན་གྱི་སེར་སྦྲེངས་
ཟབ་རྒྱས་ཀྱིས་སྤྱན་དྲངས། བླ་བྲང་ཆེན་པོར་ཕེབས། མཁན་ཆེན་ཟླ་བ་བཟང་པོས་ཀྱང་
ཕེབས་བསུ་སོགས་སྲིད་ཞུ་དཔག་མེད་མཛད། དེར་ཚོགས་ཆེན་ལ་མང་ཇ་འགྱེད་བཅས།
བསྔོ་རྟེན་གཟབས་མ། དངུལ་གདུང་རིན་པོ་ཆེར་གོས་ཡུག །རྗེ་བཙུན་བྱམས་པ་ལ་དར་ཡུག་
གི་སྙན་དར། སྐུ་འདྲ་ཡིད་བཞིན་ནོར་བུ་ལ་ཞལ་གསེར་བྱམས་ཁང་ལམ་འབྲས་ལྷ་ཁང༌།
མགོན་ཁང་ཀུན་མཁྱེན་དོན་ཡོད་དཔལ་འབྱོར་སོགས་སོ་སོར་སྙན་དར། མར་མེ་མཆོད་རྫས་
ཕུལ་ཞིང༌། ཕྱག་མཆོད་སྨོན་ལམ་དཔག་མེད་གནང༌། ཀ་དྲུག་མར་མཁན་སློབ། བཀའ་
བཅུར་རབ་འབྱམས་དཔོན་ཆོས་མཛད། རགས་བསྡུས་ལ་པཎ་ཆེན་རིན་པོ་ཆེའི་རྣམ་ཐར།
ཁྲིད་བརྒྱ་དུས་འཁོར་བསྡུས་རྒྱུད་སོགས་ཀྱི་ལུང་དང་ཚེ་དབང༌། ཚོགས་ཆོས་སུ་འཇམ་དཀར་
གྱི་རྗེས་གནང་གནང་ནས་ཕོ་བྲང་བསམ་འགྲུབ་རྩེར་ཕེབས། སྡེ་པ་ཞིང་གི་བསྙེན་བཀུར་
ཞབས་ཏོག་ཞུས། སྣར་ཐང་ཤེལ་དཀར་སོགས་སུ་འདོད་ཆོས་གནང་ནས་རི་ཁྲོད་ཆེན་མོར་
ཕེབས། དབྱར་ཚེས་ལ་བློ་སྦྱོང་འགྲོ་མགོན་དཔལ་ཡེའི་ཡིག་ཆ་ལྟར་གྱི་ཁྲིད་དང༌། རྒྱབ་ཆོས་
སུ་ལེགས་བཤད་ཀུན་འདུས་སོགས་ཀྱི་ལུང་གནང་ནས། མཚན་ལྟས་འཚུབ་ཙམ་བྱུང་ནས་ཚེ་
སྒྲུབ་ཀྱི་སྐུ་མཚམས་ཤིན་ཏུ་དམ་པ་གནང༌། ཟླ་བ་གཅིག་ལྷག་ཙམ་སོང་བའི་ཐོ་རངས་ཁ་
ཅིག་གི་མནལ་ལམ་ན། གློ་བོའི་རྨ་བྱ་ཤུག་ཁྲོད་ཀྱི་ལུང་པ་ཀུན་མེ་ཏོག་གསེར་གཙོ་མའི་
20-1-183


མདོག་ཅན་གྱིས་ཁེངས་པར་བྱུང་བས། དེ་ཚེ་སྒྲུབ་ཀྱི་ལྟས་སུ་ལེགས་པར་བཤད་འདུག་པས་
ཚེ་མཐར་ཕྱིན་ཡོད་པ་ཡིན་ནམ་གསུངས་བ་བྱུང༌། དེ་ནས་སྨོན་གྲོར་ཕེབས། ཟླ་བ་གཉིས་
ཙམ་བཞུགས་ནས་ཆོས་ལུང་དུ་ཕེབས། དངུལ་གདུང་རིན་པོ་ཆེར་སྙན་དར་མཆོད་འབུལ་
གནང༌། རྗེ་དྲུང་རྡོ་རིང་པ་དང་མཇལ་ཐུགས་སྣང་དག་པའི་སྒོ་ནས་བླ་མ་གོང་མའི་ལོ་རྒྱུས་
སོགས་གསུངས་གླེང་ཞིབ་པར་གནང༌། རྗེ་རྡོ་རིང་པར་བཀའ་འབུམ་འདོད་འཇོའི་ལུང་ཕུལ་
ཞིང༌། ཚུར་ཀུན་སྤངས་རིན་པོ་ཆེའི་རྣམ་ཐར་དང༌། བདེ་མཆོག་ལྷ་ལྔའི་དབང་གསན། སླར་
ཇོ་ནང་དུ་ཕེབས་བློ་སྦྱོང་དོན་བདུན་མའི་ཁྲིད། རྒྱལ་སྲས་བཀའ་འབུམ་གྱི་ལུང་དང་བཅས་པ་
གནང༌། དེ་ནས་ཇོ་ནང་སྐྱིད་ཕུག་ཏུ་ཟླ་བ་གཉིས་ལྷག་ཙམ་སྐུ་མཚམས་གནང༌། ཐོ་རངས་
ཤིག་གི་མནལ་ལམ་དུ་རྗེ་ཐམས་ཅད་མཁྱེན་པ་དང་མཇལ། ཕྱག་དབུ་ཐོག་ཏུ་བཞག་ནས་
ལམ་ཟབ་མོ་བླ་མའི་རྣལ་འབྱོར་གནང་ནས། ཚེ་རབས་ཀུན་དུ་འབྲལ་བ་མེད་གསུངས་པའི་
སྣང་བ་བྱུང་བས། མནལ་སད་ནས་ཐུགས་དགྱེས་པ་ཆེན་པོ་འཁྲུངས། སྔར་ལྟར་དུས་ཁྲིད་
གནང་བ་གྲོལ། རྗེ་ཉིད་དགུང་ལོ་རེ་དྲུག་ཏུ་ཕེབས་པ་ས་ཕོ་སྟག་ལོ་ཤར། དེ་ལོ་རྗེ་བཙུན་
རིན་པོ་ཆེ་དག་པའི་ཞིང་དུ་ཕེབས་ནས་ལོ་སྐོར་གཅིག་ཙམ་སོང་བའི་དུས་མཆོད་ཆེན་མོ་ཡིན་
པ་ནས། དབོན་དྲུང་རིན་པོ་ཆེས་གདན་འདྲེན་གནང་བ་བཞིན་ཆོས་ལུང་བྱང་རྩེར་ཕེབས།
དུས་ཆེན་སྟེང་དུ་རྗེ་ཉིད་ཀྱིས་ཀྱཻ་རྡོ་རྗེ། རྗེ་རྡོ་རིང་པ་དཔོན་སློབ་གྱིས་བདེ་མཆོག་ནག་པོ་པ།
བསྟན་འཛིན་རིན་པོ་ཆེ་དཔོན་སློབ་ཀྱིས་བདེ་མཆོག་ནག་པོ་པ། རིན་པོ་ཆེ་བྲག་སྟོད་པ་
དཔོན་སློབ་ཀྱིས་རྣལ་འབྱོར་མ། ཕ་དྲེ་བོ་དཔོན་སློབ་ཀྱིས་ཕག་མོ། དགོན་པ་དཀར་པོ་པ་
རྣམས་ཀྱིས་ཀྱཻ་རྡོ་རྗེ། ཆོས་ལུང་སྒྲུབ་སྡེ་བྱིན་གྱིས་བདེ་མཆོག་ལྷ་ལྔ་དང་རྣལ་འབྱོར་མ། རྨ་བྱ་
ཤུག་ཁྲོད་སྒྲུབ་སྡེ་བ་རྣམས་ཀྱིས་རྣལ་འབྱོར་མའི་ཆོ་ག་གནང་སྟེ། སོ་སོས་རྡུལ་ཚོན་གྱི་
དཀྱིལ་འཁོར་བཞེངས། དཀྱིལ་འཁོར་མཆོད་པའི་ཡོ་བྱད་བསམ་གྱིས་མི་ཁྱབ་པ་བཤམས་
20-1-184


ནས་སྒྲུབ་མཆོད་དང་མཆོད་འབུལ་རྒྱས་པར་མཛད། དེ་སྐབས་རྗེ་ཉིད་ཀྱི་ཕྱག་ནས་དངུལ་
གདུང་རིན་པོ་ཆེ་ལ་གོས་དར་ཡུག་རིང་གིས་གཙོ་བའི་ན་བཟའ། མཆོད་རྫས་བསམ་གྱིས་མི་
ཁྱབ་པ་དང༌། བླ་མ་ཆེ་ཆུང་ཐམས་ཅད་ལ་འབུལ་བ། ཚོགས་པ་རྣམས་གྲལ་འགྱེད་བསྙེན་
བཀུར་དཔག་ཏུ་མེད་པ་གནང༌། དེ་བཞིན་དུ་བླ་ཆེན་གཞན་རྣམས་ཀྱིས་ཀྱང་མཆོད་རྫས་
བསྙེན་བཀུར་འགྱེད་བཅས་དང༌། དེར་མ་ཕེབས་པའི་རྗེ་བཙུན་རིན་པོ་ཆེའི་དངོས་སློབ་
ཕྱོགས་ན་བཞུགས་པའི་ཆེ་ཕྲ་མང་དག་དང༌། སྦྱིན་བདག་ཏུ་གཏོགས་པའི་སྡེ་དཔོན་ཐམས་
ཅད་ཀྱིས། དངུལ་གདུང་རིན་པོ་ཆེར་གོས་དར་ཡུག་གི་གཙོས་པའི་སྙན་དར། མཆོད་རྫས།
བླ་མ་སོ་སོ་ལ་འབུལ་བ་ཚོགས་པ་ལ་བསྙེན་བཀུར་དཔག་མེད་འདུག་ཅིང༌། ཁྱད་པར་སྨོན་
འགྲོ་ནས་ཞབས་ཏོག །རྐང་ལེན་རྒྱ་ཆེར་མཛད། དེ་དག་གི་སྐབས་སུ་ནམ་མཁའ་ལ་འཇའ་
འོད་ཀྱི་གུར་ཁྱིམ། མེ་ཏོག་གི་ཆར་འབབ་པ་སོགས་ལྟས་ཡ་མཚན་པ་མང་དུ་བྱུང༌། རྗེ་ཉིད་
ཀྱིས་ཕ་དྲེ་བོའི་སྐུ་སྐྱེས་གཙོས་པའི་དྲག་བསྡུས་ལ་ཀྱཻ་རྡོ་རྗེའི་དབང༌། བྱིན་རླབས་ཁོག་ཕུབ་
ཀྱི་བཀའ་གཉིས་ཀྱིས་སྒོ་ཕྱེ་སྟེ་ནི་གུའི་ཁྲིད་རྒྱས་པ་ཆོས་དྲུག་སོ་སོའི་བཀའ་དང་བཅས་པ།
ཕྱག་དྲུག་པ་དཀར་ནག་གཉིས་རྗེས་གནང༌། ནི་གུའི་བརྒྱུད་པའི་རྣམ་ཐར་དང་ཡིག་རྙིང་མང་
པོའི་ལུང༌། རྗེ་བཙུན་རིན་པོ་ཆེའི་རྣམ་ཐར་གྱི་ལུང་སོགས་དང༌། དྲེ་བོ་སྐུ་སྐྱེ་སྐུ་རྐྱང་ལ་ཚེ་
དབང་གྲུབ་རྒྱལ་མ་བརྒྱ་རྩ། ལྷ་དགུའི་དབང༌། ནག་པོ་གཞུང་དྲུག་རྣམས་གནང༌། བླ་མ་
གཞན་རྣམས་ཀྱིས་ཀྱང་རང་རང་གི་བློ་འདོད་དང་མཐུན་པའི་ཆོས་བཤད་གནང༌། དེ་ལྟར་
དུས་མཆོད་རྒྱས་པ་གནང་བ་གྲོལ་ནས། གཏིང་སྐྱེས་ནས་རབ་འབྱམས་པ་བསྟན་པས་གཙོས་
པའི་སྤྱན་འདྲེན་ནན་ཅན་རང་བྱུང་བ་ལྟར། ཇོ་ནང༌། གདོང་དགའ། རྨ་བྱ། དཔལ་རྩེ། བྱམས་
གླིང་སོགས་བརྒྱུད་ནས་ལམ་དུ་ཡོད་པའི་སྡེ་དཔོན། བླ་མ་སློབ་དཔོན་རྣམས་གང་འཚམས་
ཀྱི་བཀའ་ཆོས་གནང་ནས། གཏིང་སྐྱེས་སྡེ་སྲིད་ཀྱིས་གཙོས་པའི་ཕེབས་བསུ། སེར་སྦྲེངས་
20-1-185


རྒྱས་པ་དང་བཅས་མཁར་ཆེན་རྩེར་ཕེབས། སྡེ་སྲིད་བཅས་ལ་ཐོག་མར་སྒྲོལ་དཀར་ཁྲུས་
ཆོག་དང་བཅས་པ། ཚེ་དབང་གྲུབ་རྒྱལ་ལྷ་དགུ། རྣམ་འཇོམས། སྨེ་བརྩེགས། མི་གཡོ་བ་
དཀར་པོ། སྔོན་པོ། འཇམ་དབྱངས་དཀར་པོ། དམར་སེར། རྣལ་འབྱོར་མའི་བྱིན་རླབས།
རྣམ་སྲས། མགོན་སེར་སོགས་དབང་རྗེས་གནང་ཁྲུས་ཆོག་མང་བར་གནང༌། དེར་རྗེ་དྲུང་རྡོ་
རིང་པ་ཡང་ཕེབས། རྒྱང་ཙམ་བཞུགས་པ་གནང༌། རྗེ་ཉིད་ཀྱིས་མཁན་པོ། རྗེ་དྲུང་རྡོ་རིང་
པས་ལས་སློབ་གནང་སྟེ་བསྒྲུབ་བྱ་བཞི་བཅུ་ཙམ་ལ་བསྙེན་རྫོགས་གནང༌། དེ་ནས་མདོ་ཁར་
མཆོད་ཡོན་གཉིས་ཀས་ཕེབས། ཞག་ཤས་སོང་མཚམས་ཆུ་སྤེ་གསར་འདེབས་ཤིག་བྱེད་
དགོས་འདུག་པས། གང་དུ་ཆུ་བྲུས་ན་ལེགས། བསླབ་སྟོན་དགོས་ཞུ་པ་ལ། དེ་ནས་དཔོན་
སློབ་རང་ཐུགས་ཉམས་ཆེ་བས་ངེད་ཀྱིས་ཚུལ་འབུལ་མི་དགོས་པ་ཕེབས་པས། བྱིན་རླབས་
ཀྱང་ཡོད་ཞིང༌། སང་གཟའ་སྐར་བཟང་བས་ཞབས་འཆག་ཙམ་གནང་དགོས་ཞུས་ནས་སང་
ཉིན་ཕེབས། སྡེ་པ་དཔོན་བློན་རྣམས་ཀྱིས་དམིགས་གཏད་ཀྱི་སར་རྗེ་ཉིད་ཀྱིས་གསུངས་
བཀོད་མ་གནང་བར་རླན་ཆེར་མེད་པའི་ས་ཁད་མཐོ་སྙོམས་པ་ཞིག་ཏུ་ཕྱག་མཁར་འཛུགས་
པ་གནང་ནས་འདིར་དགྱེས་པ་འདུག །ནང་སོ་ཆོས་རབ་སོགས་བྱིངས་རྣམས་ཅུང་ཟད་ཐེ་
ཚོམ་དུ་གྱུར་ཀྱང༌། སྡེ་པ་རང་དད་མོས་ཆེ་བས་བཀའ་ཕེབས་འདི་ཀར་བྲུས་གསུངས་ཞག་
མང་པོར་བྲུས་ཀྱང་རླན་ཚད་ཡེ་མ་བྱུང་བས། ཆུ་ཐོན་མི་ཐོན་ཐུགས་དམ་བརྟག་པ་ཞིག་གནང་
དགོས་ཞུ་བར། རྗེའི་གསུངས་ལས། བརྟག་པ་ནི་མི་དགོས་པར་མཆིས། སང་ཉིན་གཞི་
བདག་གཏོར་མ་ཞིག་བྱེད་གསུངས་བ་བྱུང༌། དེ་ནས་ཞག་གཉིས་ནས་ཕ་བོང་ཟུར་ཅན་ཞིག་
འདུག་པ་དེ་ཐོན། དཀོན་མཆོག་གིས་མི་བསླུ་གསུངས། ཕ་བོང་ཐོན་འཕྲལ་རྫོང་ངོས་ནས་ཆུ་
བཟང་པོ་ཐོན། དེ་དམ་པ་རྣམས་ཀྱིས་ཆུ་ཕུད་འབུལ་དུ་བྱུང་སྐབས། སྡེ་པ་དཔོན་གཡོག་
ཐམས་ཅད་ཐུགས་ཤིན་ཏུ་དགྱེས། སྐུ་གཞོགས་སུ་འབུལ་བ་མང་དུ་མཛད། དེ་ནས་ཚུར་
20-1-186


ཕེབས་པའི་བཀའ་བཀོད་གནང་བས། ཆུ་སྤེ་མཐར་ཐོན་གྱི་བར་བཞུགས་པའི་ཕྱག་ནས་
གནང་དགོས་ཞེས་ནན་ཞུས་ཆེ་བ་ནས་ཆུ་སྤེ་མཁར་ལས་གྲུབ་ཀྱི་བར་བཞུགས། དེ་སྐབས་
ནང་སོ་མགོན་ཚེ་བས་རྩེ་ཆེན་དུ་ཕྱིན་པའི་སྐད་ཆ་ལ། རྗེ་བཙུན་ཐམ་ཅད་མཁྱེན་པའི་མཆོག་
གི་སྤྲུལ་པའི་སྐུ་རྗེ་ཏཱ་ར་ནཱ་ཐའོ་དབུས་ཕྱོགས་སུ་སྐུ་བལྟམས་པའི་གཏམ་སྙན། སྣ་དཀར་རྩེ་
ནས་རྒྱལ་རྩེ་བརྒྱུད་པའི་སྐད་ཆ་དང༌། དེ་མཚུངས་སྨོན་གྲོ་ནས་ཀྱང་གཏམ་སྙན་འབུལ་བ་
དང་སྤྱན་འདྲེན་པ་བྱུང༌། ཆུ་སྤེ་ཡང་མཐར་ཐོན་གྱིས་ཕྱག་ནས་མཛད། ལྕེ་ལུང་ནས་སྤྱན་
འདྲེན་བྱུང༌། དེར་དགོངས་པ་ལྟར་གྱི་བཀའ་ཆོས་ཐོག་མ་གནང༌། རིམ་པས་བརྒྱུད་རི་ཁྲོད་ཇོ་
ནང་དུ་ཕེབས། དེ་ནས་སྤྲུལ་སྐུ་རིན་པོ་ཆེ་སྤྱན་འདྲེན་ལ་རྗེ་ཉིད་ཕེབས་ཏེ། དེ་དང་ཆབ་གཅིག་
པར་རྗེ་དྲུང་རྡོ་རིང་པ། རིན་པོ་ཆེ་བྲག་སྟོད་པ། དབོན་དྲུང་འཕན། ངམ་རིང་ནས་མི་སྣ་དྲག་
སྦྲེལ་དང་བཅས་ནས་དཔལ་འཁོར་ཆོས་སྡེར་ཕེབས། དེར་མཇལ་ཁ་ཞུས། ཤིན་ཏུ་ཐུགས་
དགྱེས་པ་ཆེན་པོ་དང་ལྡན་པར་གྱུར། རྒྱལ་རྩེ་ནས་མཆོད་ཡོན་གྱིས་གཞི་ལེན་རྒྱས་པར་ཞུས།
མཁན་ཆེན་པོ་ལ་ཐུགས་འདོད་ཀྱི་ཆོས་གནང༌། རྩེ་ཆེན་ཁྲི་ཁང་བསམ་འགྲུབ་རྩེ། སྣར་ཐང་
བརྒྱུད་རི་ཁྲོད་ཆེན་མོ་ཇོ་མོ་ནང་དུ་ཕེབས་བསུ་རྒྱས་པ་དང་བཅས་སྤྱན་དྲངས། ཞབས་ཏོག་
རྒྱས་པར་ཞུ་བ་གནང་ཞིང་འགའ་ཤས་བཞུགས། མཆོག་གི་སྤྲུལ་པའི་སྐུའི་ཞབས་དྲུང་དུ་
བཀྲ་ཤིས་ཁ་བཏགས་གསེར་སྲང་གང༌། ཧོར་དཀར་ཆག་མེད། གོས་བེར། ཆིབ་བཟང་བ་
སོགས་ཉི་ཤུ་རྩ་ལྔ་ཚན་དང༌། རྗེ་རྡོ་རིང་པ། རྗེ་བྲག་སྟོད་པ་སོགས་སོ་སོར་ཡང་འབུལ་གནང་
མཛད་དོ། །
དྲེགས་ལྡན་ས་སྐྱོང་འབུམ་གྱི་རལ་པ་ཡིས། །ཡོངས་སུ་ཕྱེས་པ་ཞབས་སེན་ཉི་མའི་འོད། །
འབར་ཡང་ཞུ་དུལ་ཟླ་འོད་མི་འགོག་པ། །ཕུལ་དུ་བྱུང་བའི་ཁྱད་ཆོས་ཡོངས་སུ་གཟུང༌། །
རྡོ་རྗེའི་བྲག་ཡང་འགོག་ནུས་གནམ་ལྕགས་ལྕེས། །སྐུ་ལ་བརྫི་བར་མ་ནུས་མཚར་ཅི་ཞིག །
20-1-187


རྡུལ་སྙེད་བདུད་སྡེས་འཕངས་པའི་མཚོན་ཆའི་ཚོགས། །ཟས་གཙང་སྲས་ལ་མེ་ཏོག་ཆར་
དུ་གྱུར། །ཐུགས་རྗེའི་ཉི་འོད་དང་འགྲོགས་དམ་ཆོས་ཀྱིས། །བདུད་རྩི་ཟིལ་ཆར་དལ་བུར་
བབས་པ་ན། །སྐལ་ལྡན་རྣམས་ལ་ཡེ་ཤེས་ལྔའི་རང་གཟུགས། །འཇའ་འོད་གསལ་བའི་
རྟགས་བཅུ་མངོན་དུ་གྱུར། །སྐད་ཅིག་གཅིག་ལ་གླིང་བཞི་ཐེར་འབུམ་སྙེད། །མྱུར་ཞིང་སྡང་
བར་སེམས་པའི་དགྲ་དང་བགེགས། །བསྲེགས་ལས་དུས་མཐའི་མེ་བས་ཆེས་དཔའ་བའི།
དམ་ཅན་རྒྱ་མཚོའི་ཚོགས་ཀྱིས་འཕྲིན་ལས་བསྒྲུབ། །སྐྱོན་མེད་བསམ་གཏན་གྱིས་བསྒྲུབས་
ལྷ་མིག་གིས། །གཞལ་ཚེ་ཇི་སྙེད་དངོས་པོའི་རང་གཟུགས་རྣམས། །གསལ་བས་ཤིན་ཏུ་
རྟོགས་ཀའི་ས་ཕྱོགས་སུའང༌། །དལ་འགྲོའི་གཏེར་ཆེན་ཡོད་པ་དགོངས་ཏེ་བསྟན། །ཐུགས་
རྗེའི་སྟོབས་ཅན་གང་གིས་སྐམ་པོའི་སར། །ཆུ་རྒྱུན་ཕྱུར་ལ་ངོ་མཚར་ཅི་ཞིག་ཡོད། །འདི་ཡི་
ཟད་པར་ཆུ་ཡི་ཏིང་འཛིན་གྱིས། །སྟོང་གསུམ་ཆུ་ཡིས་འགེངས་ལ་དཀའ་བ་མེད། །ཐེའུ་རང་
བསྒྲུབས་དང་མིག་མཐོང་རྫས་འཕྲུལ་ལ། །མངོན་ཤེས་རྫུ་འཕྲུལ་དུ་རེའི་ཆེན་པོ་འགའ། །
མཐོང་གིན་གྲུབ་པའི་རྟགས་མཚན་མངོན་གྱུར་པ། །ཉེར་སྟོན་རྗེ་བཙུན་ཁྱོད་ལ་སྙིང་ནས་
དད། །དེ་ནས་རྗེ་བཙུན་བླ་མ་ཐམས་ཅད་མཁྱེན། དག་པའི་ཞིང་ནས་སླར་ཡང་ཟླ་བ་བཞིན། །
སྒྱུ་འཕྲུལ་དྲ་བའི་སྣང་བརྙན་ཤར་བ་ལ། །གུས་དང་མཆོད་པའི་རྒྱུན་གྱིས་སྤྱན་འདྲེན་མཛད། །
དེ་ནས་སྤྲུལ་སྐུ་རིན་པོ་ཆེ་དཔོན་སློབ་ཀྱང་སྨོན་གྲོ་བརྒྱུད་ཆོས་ལུང་བྱང་རྩེར་ཕེབས། རྗེ་ཉིད་
ཀྱིས་སྐུ་མཚམས་ཟླ་བ་གཉིས་ཙམ་གནང་བ་གྲོལ་ནས་དགུན་ཁྲིད་གནང༌། དེ་ནས་ཆོས་ལུང་
བྱང་རྩེར་ཕེབས། གཟའ་སྐར་དགེ་བ་ལ་རྗེ་བཙུན་མཆོག་གི་སྤྲུལ་པའི་སྐུ་ལ་ཐོག་མར་ཚེ་
དབང་ཕུལ། དེ་ནས་དབང་ལུང་རྗེས་གནང་མང་བར་འབུལ་བ་གནང་ནས་སྨོན་གྲོར་ཕེབས་
དུས་དབང་རྣམས་གནང་ནས་ཇོ་ནང་དུ་ཕེབས། བདེ་མཆོག་ནག་པོའི་གསུངས་བསྙེན་ཟླ་བ་
བདུན་གནང༌། ལེགས་པར་གྲུབ་ནས་ཁ་གསོའི་སྦྱིན་སྲེག་གནང་སྐབས་ནམ་མཁའ་གཡའ་
20-1-188


དག་པ་དང༌། མེ་ཏོག་གི་ཆར་བབས། ལྟས་ཡ་མཚན་པ་བྱུང༌། བཀའ་བཀོད་ལ་འདིའི་བསྙེན་
པ་བྱེད་པ་འཕྱིས་འདུག་ཡང་ཡང་བཀའ་ཕེབས་པ་ཞིག་བྱུང༌། དེ་མཚམས་ཁྲི་ཁང་ནས་སྡེ་པ་
དོན་གྲུབ་ལ་གཤེགས་ནས་སྤྱན་འདྲེན་ནན་ཅན་བྱུང་བས། པ་སྣམ་ལྷུན་གྲུབ་རྩེར་ཕེབས།
དགུང་ཞག་གི་བར་ལ་མི་འཁྲུགས་པ་དང༌། རྣལ་འབྱོར་མའི་གསུང་ཆོག་མཛད། མཚན་
བྱང་བཞུ་བ་གྲུབ་རྗེས། ཞལ་ངོ་རྣམས་ལ་ཚེ་དབང་བརྒྱ་རྩ། སྒྲོལ་དཀར། མགོན་པོའི་རྗེས་
གནང་སོགས་གནང་ནས་ཇོ་ནང་དུ་ཕེབས། མ་ཅིག་བཀའ་པོ་མའི་ཁྲིད་ལུང་དང་བཅས་པ་
གནང༌། དེ་ནས་རྒྱུ་དང་བཀོད་པ་ཁྱད་པར་དུ་འཕགས་པའི་ཚོགས་ཁྲོ་ཆེ་བ་གསང་བླུགས་
གནང༌། ཤིས་བརྗོད་མཛད་ནས་ཞལ་དྲོའི་ཚུལ་དུ་མང་ཇ་འབྲས་འཇམ་སོགས་གནང༌། དེ་
ནས་སྐུ་མཚམས་རྒྱང་ཙམ་གནས་སྐབས་ཐོ་རངས་ཤིག བུད་མེད་གཞོན་ནུའི་རྣམ་པ་གཡུའི་
ཐོར་ཚུགས་དང་རིན་ཆེན་རྒྱན་གྱིས་སྤྲས་པ། དར་གྱི་གོས་ལྷབ་ལྷུབ་ཏུ་གྱོན་པ། ལག་ན་མེ་
ལོང་དང་མདའ་དར་འཛིན་པ་འཁོར་དང་བཅས་པ་ཞིག་བྱུང་ནས། སྙན་པའི་གླུ་ལེན་ཞིང་
རིན་པོ་ཆེའི་སྣོད་བདུད་རྩིས་གང་བ་ཐོགས་ནས། ངེད་ལ་ཆོས་ཀྱི་སྦྲང་རྩིའི་ཟིམ་ཆར་སྤེལ་
བའི་ལེགས་ལམ་ཡིན་ཟེར་བྱུང་བའི་ངང་ལ་མནལ་སད། དེ་ནས་ཀྱང་སྒྲ་དེ་སྙན་ལམ་ན་ལྷང་
ངེ་འདུག་གསུངས། དེ་ནས་དུས་ཀྱི་དགུན་ཁྲིད་ལ་ཕྱོགས་ཀྱི་བླ་མ་སློབ་དཔོན། ཆ་ལུང་སྒྲུབ་
ཆེན་མ་སོགས་ཆོས་དོན་གཉེར་བ་ཕྱོགས་ནས་ཀྱང་མང་དུ་བྱུང་བ་ལ་སྦྱོར་དྲུག་རྒྱས་པ། བླ་
མ་བརྒྱུད་པའི་རྣམ་ཐར། ཀུན་སྤངས་ཆེན་པོའི་ཁྲིད་ཡིག ཆོས་རྗེ་ཕྱོགས་རྒྱལ་པའི་སྔོན་འགྲོ་
ཐོག་མཐའ་བར་དགེ། ངོ་སྤྲོད་གསང་དོན་རབ་གསལ་གྱི་ཁྲིད་ལུང་གནང༌། དེ་ནས་ཁྱུ་མཆོག་
ཅེས་པ་ལྕགས་མོ་སྦྲུལ་ལོའི་དུས་ཆེན་ལ་རྗེ་དྲུང་རྡོ་རིང་པ་གཏིང་སྐྱེས་ནས་ཕེབས་ལོངས་མ་
བྱུང་བར། རྗེ་ཉིད་ལ་སྤྱན་འདྲེན་བྱུང་བས་ཆོས་ལུང་དུ་ཕེབས། བདེ་མཆོག་ནག་པོ་པའི་སྒྲུབ་
མཆོད་གཙོ་བོ་གནང༌། གྲུབ་སྡེ་ལ་བསྙེན་བཀུར་གཟབས་མ་བསྩལ། དེ་སྐབས་སྡེ་པ་བཀའ་
20-1-189


བཞི་ནས་ཚུལ་ཁྲིམས་འགྱུར་མེད་ཕེབས། ཐུགས་འདོད་བཞིན་གཞུང་བཀའ་ཉེར་ལྔ་དང་
འབྲེལ་བའི་ནི་གུའི་ཁྲིད་རྒྱས་པ་ལུང་དང་བཅས་པ་གཞན་ཡང་ཚེ་དབང་རྣམ་གྲངས་མང་བ་
སོགས་གནང༌། སླར་ཇོ་ནང་དུ་ཕེབས། དེ་ལོའི་དབྱར་ཆོས་ལ་གྲུབ་ཐོབ་བརྒྱད་ཅུ་རྩ་བཞིའི་
བྱིན་རླབས་ལུང་དང་བཅས་པ་གནང༌། དེ་ནས་དེ་ལོ་རྨི་ལྟས་འཚུབ་པས་མཚམས་དམ་པར་
བྱེད་གསུངས་བཅད་རྒྱ་དམ་པར་མཛད། རྒྱང་ཙམ་སོང་ནས་སྨོན་གྲོར་དཔོན་དྲུང་རིན་པོ་
ཆེ་སྐུ་ཁམས་བསྙེལ་བས། འཕྲལ་དུ་ཆོས་རྗེ་ལྷ་མཆོག་པ་ཕེབས་པ་ལ། ས་སྐྱ་བཀའ་འབུམ་
ཡོངས་རྫོགས་ཀྱི་ལུང༌། ཚེ་དབང་ཚེ་ཁྲིད་སོགས་བཀའ་ཆོས་མང་དུ་གནང༌། དེ་ནས་གཏིང་
སྐྱེས་ནས་ས་སྐྱོང་ངག་དབང་རྣམ་རྒྱལ་ཡབ་སྲས་ཀྱིས་སྤྱན་དྲངས། མཁར་ཆེན་དུ་ཕེབས། སྡེ་
པ་ཡབ་སྲས་རྣམས་ལ་ཚེ་དབང་ལྷ་དགུ། གྲུབ་རྒྱལ་མའི་ཚེ་དབང་བརྒྱ་རྩ་ཚེ་ཁྲིད། གཞན་
ཡང་སྒྲོལ་མ་དཀར་སྔོ། འཇམ་དབྱངས་དཀར་སེར་མགོན་པོའི་རྗེས་གནང་སོགས་དང༌།
བྱིངས་རྣམས་ལ་ཡང་འདོད་ཆོས་དཔག་མེད་སྩལ་ནས་ཚུར་ཕེབས་ཏེ། བྱམས་གླིང་དཔལ་རྩེ།
གདོང་དགའ་རྣམས་སུ་རིམ་པས་ཕེབས་ཤིང་སོ་སོའི་འདོད་ཆོས་རྣམས་གནང་ནས་ཇོ་ནང་དུ་
ཕེབས། དེར་རྗེ་དབོན་རིན་པོ་ཆེ་ཡང་གློ་བོ་ནས་ཕེབས་ཏེ། རྗེ་དབོན་དང༌། ཚ་རོང་གྲགས་
པ་བློ་གྲོས་སོགས་དྲག་བསྡུས་ལ་ཤངས་ཆོས་རྒྱས་པར་གནང་སྟེ། རྩ་བ་ནི་གུའི་ཆོས་དྲུག སྡོང་
པོ་ཕྱག་རྒྱ་ཆེན་པོ། ཡལ་ག་ལམ་འཁྱེར་རྣམ་གསུམ། མེ་ཏོག་མཁའ་སྤྱོད་དཀར་དམར།
འབྲས་བུ་འཆི་མེད་འཆུག་མེད་རྣམས་ཀྱི་ཁྲིད་དང་ལུང༌། གཞུང་བཀའ་ཉེར་ལྔ་དང་འབྲེལ་
བར་གནང༌། དེར་བདག་གིས་ཀྱང་མཇལ་བར་སླེབས་ཏེ། མགོན་པོའི་རྗེས་གནང་སོགས་
ཐོབ། སྨོན་གྲོར་ཕེབས་པའི་ཕྱག་ཕྱིར་བདག་ཀྱང་དཀྲིས་པའི་ཚེ་དབང་སོགས་གནང༌། སླར་
བདག་གིས་ཀྱང་ངམ་རིང་གི་གྲྭ་སྐོར་འཁོར་ནས་སྨོན་གྲོ་དང་ཇོ་ནང་སོགས་སུ་ཚེ་དབང་བརྒྱ་
རྩ། ཚེ་ཁྲིད་ཚེ་དཔག་མེད་ལྷ་བཅུ་བདུན་མའི་དབང་སོགས་དབང་ལུང་ཁྲིད་མང་བར་ཐོབ་
20-1-190


ཅིང༌། ཐུགས་རྗེ་ཆེན་པོས་བརྩེ་བར་བསྐྱང༌། ཡང་སྐབས་ཤིག་ཇོ་ནང་དབྱར་ཆོས་ལ་དུས་
འཁོར་སྙན་བརྒྱུད་ཀྱི་ཁྲིད་གནང་ཞིང༌། ལོ་ཕུ་གདན་ས་བ་སོགས་ལ་ཡང་ཁྲིད་བརྒྱ་མང་བར་
གནང༌། དེ་ནས་ལྷ་རྩེར་སྤྱན་དྲངས་ནས་བྱང་པ་བདག་པོ་ནམ་མཁའ་རྒྱལ་པོ་སྟེང་ཞལ་ལ།
ཚེ་དཔག་མེད་ལྷ་དགུ་མའི་དབང་དང༌། གྲུབ་རྒྱལ་མའི་ཚེ་དབང་བརྒྱ་རྩ་ཁྲིད་བཅས་གནང༌།
སླར་ཇོ་ནང་དུ་དུས་ཚིགས་ཀྱི་དགུན་ཁྲིད། བྱ་གཤོངས་མཁན་ཆེན་པ་སོགས་ལ་གསུང་ཆོས་
མང་བར་གནང༌། དགུན་ཁྲིད་གྲོལ་ནས་ཆོས་ལུང་དུ་དུས་ཆེན་ལ་ཕེབས། རྗེ་བཙུན་མཆོག་
གི་སྤྲུལ་སྐུ་མཇལ། ཚེ་དབང་ལྷ་དགུ་སོགས་འབུལ་བ་གནང༌། རྗེ་རྡོ་རིང་རིན་པོ་ཆེ་དང་
བཀའ་ཆོས་འབུལ་རེས་གནང༌། དགུན་ཁྲིད་གྲོལ་ནས་ཆོས་ལུང༌། སྨོན་གྲོར་བཀའ་ཆོས་
ཐོགས་མ་གནང་ནས་ཇོ་ནང་དུ་ཕེབས། ས་སྐྱ་གོང་མ་རྡོ་རྗེ་འཆང་མུས་ཆེན་རྗེ་བཙུན་ཐམས་
ཅད་མཁྱེན་པ་སོགས་བླ་མ་གོང་མ་རྣམས་ཀྱི་བདུད་རྩིའི་རིལ་བུ་མ་ལྟ་གནང་ནས། ཡི་དམ་
ཀྱཻ་རྡོ་རྗེ་ལ་བརྟེན་ནས་བདུད་རྩི་རིལ་བུ་ཕྱག་ལེན་བཞིན་དུ་བསྒྲུབ་པ་གནང་ནས། ལྡེ་གུའི་
སྐབས་ནས་དྲི་བཟང་རྒྱང་རིང་པོར་ཚོར་བ་དང༌། རིལ་བུ་འཕེལ་ཤིན་ཏུ་ཆེ་བ་བྱུང་ནས། བྱང་
སྟག་ལུང་ངམ་རིང༌། གཏིང་སྐྱེས་སོགས་གནང་འོས་རྣམས་སུ་གནང༌། དེ་ནས་ངེད་རང་
ཁམས་བཟང་སྐབས་ཇོ་ནང་གི་གདན་ས་འདི་མཆོག་གི་སྤྲུལ་པའི་སྐུར་འབུལ་ཐུབ་པ་ཞིག་ཅི་
ནས་ཀྱང་བྱེད་གསུངས། ངམ་རིང་སྟེང་ཞལ་དུ་ཞུ་བ་གནང་བས་ཁྲོལ་དཀའ་བ་བྱུང་ན་ཡང༌།
འབུལ་ཆས་གང་དྲག་དང་བཅས་ནན་སྐྱེད་ཞུ་བ་གནང་བས་ཁྲོལ་ནས་ཕེབས་བསུ་གཟབས་
མ་དང་བཅས་གདན་དྲངས། གཟའ་སྐར་དགེ་བ་ལ་ཁྲི་ཐོག་ཏུ་ཕེབས། ཤིས་བརྗོད་ཀྱི་མེ་
ཏོག་འབུལ་བ་དང་མཉམ་དུ་སྐུ་གསུང་ཐུགས་ཀྱི་རྟེན། དབང་རྫས་རོལ་མོའི་རིགས། ཇ་གོས་
དར། གསེར་དངུལ། བྱུ་རུ་སྤོས་ཤེལ་རས་ཆ་སོགས་སྐུ་ཆས་གང་ཡོད་སྤྲུག་པའི་འབུལ་བ་རྒྱ་
ཆེར་གནང༌། དེར་ཞག་ཉི་ཤུ་སྐོར་བཞུགས་པར་ཞབས་ཏོག་གང་ཟབ་དང༌། བཀའ་ཆོས་སྦྱོར་
20-1-191


དྲུག་གི་ཁྲིད། བརྒྱུད་པའི་རྣམ་ཐར། འགྲེལ་ཆེན་དྲི་མེད་འོད་ཀྱི་ལུང༌། ནི་གུའི་མགྱོགས་ཁྲིད་
སོགས་འབུལ་པ་གནང༌། དེ་ནས་རྗེ་དབོན་དྲུང་མངའ་རིས་ལ་རྫོངས་ལྟར་མཛད་དོ། ། ཆོས་
དང་ཟང་ཟིང་གི་གནང་སྦྱིན་མང་དུ་གནང་ངོ༌། །
ཟུང་འཇུག་སྒོམ་པའི་གོམ་སྟབས་གཅིག་ཉིད་ཀྱིས། །བཅུ་གསུམ་ས་ཡི་ཐེམ་སྐས་ངེས་
བགྲོད་ནས། །བདེ་ཆེན་འཁོར་ལོ་སྡོམ་པ་རྒྱལ་སྲིད་ལ། །དབང་བསྒྱུར་དེ་ཚེ་སྒྲིབ་པའི་སྟོབས་
ལྡན་བཅོམ། །གང་ལ་ས་གསུམ་མཁའ་འགྲོས་ག་མ་ཀའི། །དབྱངས་དང་ལྷན་ཅིག་བདུད་
རྩིས་མཆོད་པར་བྱས། །དད་པའི་བློ་ཅན་ཡིད་སྐྱེས་རྣམ་མང་གིས། །གཞལ་བར་དཀའ་བའི་
ཟང་ཟིང་དངོས་པོས་ཀྱང༌། །གང་དང་འབྲེལ་བས་སྲིད་མཐར་བདེ་བའི་རྒྱུན། །སྐྱེད་བྱེད་
བདུད་རྩིའི་བུམ་པ་ཆེས་འཕྱུར་བ། །མདུན་དུ་རྒྱུ་ཡང་དོན་གཉེར་མེད་པ་ཡི། །སྐྱེ་བོ་འགའ་
དང་འགའ་ཡང་བྱུང་བར་གྱུར། །རྣམ་པར་རྟོག་པ་མེད་བཞིན་རེས་བྲལ་ལ། །གང་འདོད་
བསམ་པར་མཐུན་པའི་མཆོད་སྦྱིན་ཆེ། །སྤྲོ་བ་དཔག་བསམ་ཤིང་དང་མཚུངས་བསམ་ཡང༌། །
དེ་ནི་སེམས་མེད་ཁྱེད་ཐུགས་རྣམ་ཀུན་མཁྱེན། །ཡོན་ཏན་གྱིས་ལྕི་བླ་མའི་ཞབས་པད་
ཟུངས། །འདེགས་ལ་ཁྱབ་འཇུག་སྟོབས་ཀྱང་ཕམ་བགྱིད་པས། །ནོར་བཟང་སེམས་དཔའ་
ཆེ་དང་ནཱ་རོ་པའི། །བླ་མར་མོས་པ་དག་ཀྱང་ཟིལ་གྱིས་མནན། །གདམས་ངག་བདུད་རྩིའི་
བཅུད་ཀྱིས་སྙིང་མྱོས་པའི། །གྲུབ་པའི་གར་གྱིས་ཞིང་འདི་བཀང་བ་ན། །གྲུབ་དབང་གཞན་
གྱིས་གོ་སྐབས་ཐོབ་མིན་ཞེས། །དག་པའི་ཞིང་ཁམས་གཞན་དུ་བཞུད་པ་བཞིན། །རིན་ཆེན་
དུ་མ་ལས་གྲུབ་མཚན་དཔེའི་གཟུགས། །དེ་ལ་གང་ཐུགས་ཡེ་ཤེས་རྗེས་ཞུགས་པས། །དེ་
དང་མཚུངས་པར་རྒྱལ་བའི་ཡེ་ཤེས་ཀུན། །འདུས་པ་ལྷ་མིའི་མཆོད་གནས་མཆོག་ཏུ་གྱུར། །
ལྷ་ལྡན་གཙུག་ལག་ཁང་ན་ཟས་གཙང་སྲས། །རྗེས་མཚོན་སྐུ་དེ་འགྲན་ཟླ་མེད་སྙམ་པའི།
ཁེངས་པ་གཞིལ་ཕྱིར་བྱོན་པ་ཡིན་ནོ་ཞེས། །ཅུང་ཟད་འཛུམ་པའི་ཚུལ་གྱིས་བཞུགས་པ་སྙམ། །
20-1-192


དེ་ནས་མྱོས་བྱེད་ཅེས་པ་ཤིང་མོ་ལུག་གི་ལོ་རྗེ་ཉིད་དགུང་ལོ་བརྒྱད་ཅུ་རྩ་གསུམ་བཞེས་
པའི་ཧོར་ཟླ་གཉིས་པའི་ནང་དུ་སྐུ་གྲིབ་ལ་བརྟེན་པའི་ཅུང་ཟད་སྐུ་ཁམས་བསྙེལ་བ་བྱུང་
ཡང༌། སྐུ་རིམས་དང་ལྷ་རྗེ་གསོལ་སྨན་གྱི་འཕྲོད་བསྟེན་ཕུལ་བས་ཞག་ཤས་ནས་སྐུ་ཁམས་
བདེ་བར་གྱུར། དེ་ནས་ཉིན་གཅིག་ཉི་མ་ཕྱེད་ཡོལ་ཙམ་ལ། ཁར་སང་ནས་ཁྱེད་རྣམས་ཀྱིས་
རྗེ་རྡོ་རིང་པ་ཞིང་བརྗེས་པ་ངེད་ལ་གསང་འདུག་པས། ད་ལྟ་རང་འདིར་སྒྲུབ་སྡེ་ལ་མང་ཇ།
སྐུ་འབུམ་ལྷ་ཁང་སོ་སོར་དཀར་མེ་སྙན་དར་ཕུལ། ཆོས་ལུང་བྱང་རྩེར་དངུལ་གདུང་རིན་པོ་
ཆེར་མཆོད་རྫས་ན་བཟའ། མང་ཇ་སོགས་ཐོངས་གསུངས་ནས། ཕྱག་གཡོག་རྣམས་ཀྱིས་
དེ་རྣམས་འཕྲལ་དུ་བསྒྲུབས། དེར་བླ་མ་མཆོད་པ་རྒྱས་པ་རེ་མཛད་མཚམས། ངེད་རྒན་པོ་
རྣམས་དུས་གཅིག་ལ་འགྲོ་རན་གསུངས་པ་བྱུང་ནས། ཡང་སྐུ་ཁམས་མི་བདེ་བའི་ཚུལ་སྟོན་
པ་གནང༌། ཧོར་ཟླ་གསུམ་པའི་ཉེར་བདུན་གྱི་སྔ་དྲོ། ད་ནངས་ཐོ་རངས་སུ་རྗེ་བཙུན་ཐམས་
ཅད་མཁྱེན་པའི་སྐུའི་སྣང་བ་བྱུང་གསུངས། དེ་ནས་ཐུགས་དམ་གྱི་རིམ་པ་རྣམས་མཛད་
རྗེས་མཐར་ནི་གུའི་འཕོ་བ་གནང་སྟེ། གཟིམ་ཆུང་འགག་ན་ཡོད་པ་རྣམས་ཀྱིས་ཐག་ཅེས་
པའི་སྒྲ་བྱུང་མ་ཐག་ནང་དུ་ཕྱིན་དུས། ཞལ་རས་ཟིལ་པ་ཁྲོམ་མེ་བ་དང་དབུ་གཙུག་འཕར་
ཞིང་རླངས་འཚུབ་ཡོད་པ་མཐོང་ཞིང༌། མཁའ་སྤྱོད་དུ་གཤེགས་སོ། །དེ་མ་ཐག་ནམ་མཁའ་
གཡའ་དག མེ་ཏོག་གི་ཆར་བབས། རོལ་མོའི་སྒྲ་དབྱངས་གྲགས་པ་ཕལ་ཆེར་བས་ཚོར།
དེར་ཆོས་ལུང་སྒྲུབ་སྡེའི་དྲག་པ་རྣམས་དང༌། ཇོ་ནང་ཉིད་ཀྱི་གྲུབ་སྡེའི་དྲག་པ་རྣམས་ཀྱིས་སྐུ་
གདུང་སྐུ་གཞོགས་སུ་རྡོ་རྗེ་རྣལ་འབྱོར་མའི་སྒྲུབ་མཆོད་བྱས་ཤིང༌། རྗེ་བཙུན་མཆོག་གི་སྤྲུལ་
པའི་སྐུ་བསམ་སྡིངས་སུ་བཞུགས་པ་མྱུར་ཤད་དུ་སྤྱན་འདྲེན་བཏང་ནས་སྤྱན་འདྲོངས། ཆོས་
ལུང༌། ཇོ་ནང༌། ངོར་པ། བདེ་ཆེན་པ། བྲག་རམ་པ་སོགས་ཆོས་སྡེ་མང་པོ་ཕེབས་ཏེ། དཀྱིལ་
འཁོར་མང་པོ་ཞལ་ཕྱེས་ནས་ཞག་མང་པོའི་བར་དུ་སྒྲུབ་མཆོད་རྒྱས་པར་མཛད། དེ་མཐུན་
20-1-193


གསེར་མདོག་ཅན་སོགས་དབུས་གཙང་གི་ཆོས་གྲྭ་དང༌། ཐུབ་བསྟན་དར་རྒྱས་གླིང་སོགས་
མངའ་རིས་སྨད་ཀྱི་ཆོས་གྲྭ་རྣམས་སུ་མང་ཇ་འགྱེད་བཅས་རྒྱ་ཆེར་བསྒྲུབས། དགོངས་རྫོགས་
དངོས་གཞིའི་ཉིན་སྐུ་ཆས་དྲག་ཁ་གང་ཡོད་རྗེ་བཙུན་རིན་པོ་ཆེར་ཕུལ། གཞན་བླ་མ་སློབ་
དཔོན་དགེ་འདུན་གྱི་སྡེ་དེར་ཚོགས་ཐམས་ཅད་ལ་འབུལ་བའི་དངོས་པོ་བསམ་གྱིས་མི་ཁྱབ་
པ་ཕུལ་ཏེ། ཐུགས་ཀྱི་དགོངས་པ་ཡོངས་སུ་བསྐོངས་པར་མཛད་དོ།།
༈ འགྲོ་བློའི་རེ་བ་ཡོངས་སུ་སྐོང་ལ་དཔག་བསམ་ཤིང་ཡང་མིང་གི་ཟོལ། །ཡིད་ཀྱི་
གདུང་བ་འཕྲོག་པར་བྱེད་ལ་ལྷོ་ཕྱོགས་མེ་ཡང་ཟིལ་གྱིས་མནན། །ཀུན་ལ་མཁྱེན་བརྩེའི་
བསིལ་ཟེར་འགྱེད་ལ་འོད་དཀར་ཅན་ལ་ཐ་མི་དད། །དེ་ཕྱིར་མཛད་པའི་ཆ་ཤས་འགའ་
ལའང་དཔེ་དང་འགྲན་ཟླས་དབུལ་བར་གྱུར། །སྙིང་རྗེའི་བདུད་རྩིའི་རང་བཞིན་ཟླ་བ་དེ། །
འཛམ་གླིང་གདུལ་བྱའི་ཀུ་མུད་བཞད་མཛད་ནས། །ལྷོ་གླིང་མཛད་པའི་ཆུ་མཐོང་རྫོགས་སོ་
ཞེས། །ནུབ་ཕྱོགས་བདེ་བ་ཅན་དེར་གཤེགས་པར་རྩོམ། །དེ་ཚེ་དེ་ཡི་ལྷ་ཚོགས་མཁའ་འགྲོའི་
ཚོགས། །ནམ་མཁའ་གང་བའི་འཇའ་ཚོན་གདུགས་མཛེས་དང༌། །མེ་ཏོག་ཆར་དང་པི་ཝཾ་
སོགས་ཐོགས་ནས། །སྤྱན་འདྲེན་སླད་དུ་ཞིང་འདིར་ལྷགས་པར་གྱུར། །འགྱུར་མེད་རྡོ་རྗེའི་
དངོས་ཀྱང་འགའ་ཞིག་གིས། །རྟག་པར་འཛིན་པའི་བློ་མུན་འཇོམས་སོ་ཞེས། །རབ་ཞིའི་ཉི་
མ་འབུམ་གྱི་གཟི་བྱིན་ལ། །མཆོག་ཏུ་བཞུགས་པའི་ཏིང་འཛིན་མངོན་དུ་མཛད། །དེ་ཚེ་ཞིང་
འདིའི་སྐྱེ་དགུ་ལྷར་བཅས་ལ། །མྱ་ངན་མེ་ལྕེས་སྙིང་གི་དངོས་བསྲེགས་ཤིང༌། །མཆོད་པའི་
དུད་སྤྲིན་འཇའ་ཚོན་སྣ་ལྔ་རུ། །འཐུལ་བས་ཕྱོགས་ཀྱི་ཡངས་པ་འགེངས་པར་བྱས། །ཆོས་
དབྱིངས་གདོད་མའི་ནམ་མཁའ་རྙོག་བྲལ་ལ། །སྤྲུལ་པའི་ཟླ་ཚེས་འགོག་པ་མེད་འཆར་བས། །
བདག་ཅག་གདུལ་བྱའི་བློ་མཚོར་བརྙན་པའི་གཟུགས། །ཅིར་ཡང་རྩོལ་ཞེས་གསོལ་གདབ་
དབྱངས་སུ་ཚེར། །འགའ་ཞིག་བླ་མ་དམ་པ་གྲུབ་པའི་དབང༌། །འདི་ལ་གཤེགས་དང་བཞུད་
20-1-194


པ་མི་མངའ་ཡང༌། །རང་ཅག་བློ་ཡི་མེ་ལོང་རྙོག་པ་ལ། །འདི་ལྟར་སྣང་འདི་བྱིས་པའི་བློ་ཞེས་
སྨྲ། །
དེ་ནས་སྨོན་གྲོ་ནས་ཞལ་ངོ་རྣམས་ཀྱིས་གདུང་རྟེན་གསེར་ཟངས་ལས་གྲུབ་པ་ཐོག་
སོ་ཙམ་གྱི་ཚད་ལོངས་བ། བལ་པོ་བཟོ་བོ་མཁས་པས་བཞེངས་ཏེ། གཟུངས་རྫོགས་ཕུན་
སུམ་ཚོགས་པ་ཕུལ། རྡོ་རྗེ་འཛིན་པ་མང་པོས་རབ་ཏུ་གནས་པ་བགྱིས་ཏེ། འདུ་ཁང་ཆེན་
མོར་མཆོད་པའི་ཡུལ་དང་ཚོགས་གསོག་པའི་རྟེན་དུ་བཞུགས་སོ། །དེ་ལྟར་ན་རྗེ་བཙུན་བླ་
མ་མཆོག་འདི་གཞོན་ནུ་ནས་རབ་ཏུ་བྱུང༌། ཐོས་བསམ་མཛད། རྗེ་བཙུན་ཐམས་ཅད་མཁྱེན་
པའི་ཐུགས་སྲས་ཀྱི་གཙོ་བོར་གྱུར། དེ་བརྗོད་འདོད་ཙམ་ཡིན་མིན་ནི། རྗེ་གོང་མའི་རྣམ་ཐར་
རྣམས་ལ་བལྟས་པས་ཤེས་པར་ནུས། གཙོ་བོར་སྒོམ་པ་ལ་ཐུགས་གཞོལ་དངོས་པོ་ལ་འཛིན་
པ་མི་མངའ། ཚུལ་ཁྲིམས་ཡོངས་སུ་དག གནོད་བྱེད་ལ་བཟོད་པ་ཙམ་དུ་མ་བཞག་གནོད་
ལན་ཕན་པས་འཇལ་བ་སོགས་ཕ་རོལ་དུ་ཕྱིན་པ་དྲུག་ལ་སྤྱོད་པས། བྱང་ཆུབ་སེམས་དཔའི་
སྤྱོད་པ་རླབས་པོ་ཆེ་སྐུ་ཉམས་སུ་བསྟར། ངེས་དོན་ཟབ་མོའི་ཆོས་འཁོར་གཙོ་བོར་བསྐོར།
རྒྱུ་མཚན་དེས་ན་སྒྲུབ་སྡེ་ཇོ་ནང་ཡང་འཕེལ་རྒྱས་ཤིན་དུ་ཆེ་ཞིང༌། སྒྲུབ་པ་མོ་གཙོ་བོར་གྱུར་
པའི་སྒྲུབ་ཆེན་ཐུགས་དམ་གྱི་རྩལ་འབྱོངས་པ། ཉམས་རྟོགས་ཕུལ་དུ་བྱུང་བ་བསམ་གྱིས་མི་
ཁྱབ་པ་བྱུང་སྟེ། ངེས་དོན་གྱི་བསྟན་པ་ཉི་མ་ཤར་བ་ལྟར་མཛད་པ་འདི་ནི་ལྷུན་གྱིས་གྲུབ་པ་
དང༌། རྒྱུན་མི་འཆད་པའི་འཕྲིན་ལས་སུ་གྱུར་ཞིང༌། རྣམ་པར་ཐར་པའི་སྙིང་པོའོ། །
རིགས་བརྒྱའི་གཙུན་རྒྱན་འཇམ་མགོན་ཀུན་དགའི་མཚན་འཆང་གི ། བྱིན་རླབས་རིན་
ཆེན་སྣ་ལྔའི་སྲད་བུ་མདངས་གསལ་བ། །གང་ཐུགས་ཤེལ་གྱི་དཔལ་བེའུར་བཞུགས་པའི་
མོད་ཉིད་ལ། །ཡེ་ཤེས་ཁ་དོག་སྣ་ལྔར་འབར་བའི་གཏམ་བཟང་པོ། །བསྒྲགས་པའི་དགེ་
བས་བདག་དང་འགྲོ་བ་ཀུན། །དུས་འདི་ནས་བཟུང་བྱང་ཆུབ་སྙིང་པོའི་བར། ཁྱབ་བདག་
20-1-195


བླ་མ་གང་དེས་རྗེས་བཟུང་ནས། །འབྲལ་བ་མེད་པར་ཆོས་ལ་སྤྱོད་པར་ཤོག །ཚུལ་ཁྲིམས་
དག་པའི་ཉེ་བ་འཁོར་དང་ནི། །བྱང་ཆེན་སྤྱོད་ལ་ཀུན་ཏུ་བཟང་པོ་དང༌། །རྒྱལ་བའི་ཆོས་ཚུལ་
རྡོ་རྗེ་ཐེག་པའི་དོན། །འཛིན་ལ་གསང་བའི་བདག་པོ་དང་མཚུངས་ཤོག །ཀླུ་སྒྲུབ་ཡབ་སྲས་
བཞེད་པའི་ལྟ་བ་དང༌། །ཐོགས་མེད་མཆེད་པའི་རྒྱ་ཆེན་སྤྱོད་པའི་སྲོལ། །མཐུ་སྟོབས་དབང་
ཕྱུག་བཞེད་པའི་རིམ་གཉིས་ཀྱིས། །རྒྱལ་བའི་བསྟན་པ་རྒྱས་པར་བྱེད་ནུས་ཤོག །ཚུལ་
ཁྲིམས་དག་པའི་གཞི་ལ་ལེགས་གནས་ཤིང༌། །སྡེ་སྣོད་རྒྱུད་སྡེའི་ཚིག་དོན་ཤེས་པ་དང༌། །དེ་
དོན་རྒྱུད་ལ་འབྱོར་བའི་ཉམས་ལེན་གྱིས། །དམ་ཆོས་ཚུལ་བཞིན་བསྒྲུབ་ལ་བརྩོན་པར་ཤོག །
དེ་ནས་ལམ་ལྔ་ས་བཅུ་མ་ལུས་པ། །མོས་པའི་གོམས་སྟབས་གཅིག་གིས་བགྲོད་བྱས་ནས། །
སྟོབས་བཅུ་མངའ་བ་གང་དེའི་གོ་འཕང་ཆེ། །བྱིན་རླབས་སྟོབས་ཀྱིས་མྱུར་དུ་ཐོབ་པར་ཤོག །
ཇི་སྲིད་ཉི་མས་སྣང་བའི་བྱ་བ་བྱེད་པ་དང༌། །བསིལ་ཟེར་བྱེད་པ་བདུད་རྩིའི་འོད་དཀར་
སྤྲོ་བྱེད་པ། །དེ་སྲིད་རྣམ་ཐར་ཨུཏྤལ་བཞད་པའི་ཆུན་པོ་འདི། །དད་ལྡན་རྣམས་ཀྱི་རྣ་བའི་
རྒྱན་དུ་གནས་གྱུར་ཅིག །ཅེས་རྗེ་བཙུན་བླ་མ་དོན་གྱི་སླད་དུ་མཚན་ནས་སྨོས་ཏེ་ཀུན་དགའ་
དཔལ་བཟང་པོའི་ཞལ་སྔའི་རྣམ་པར་ཐར་པ་ངོ་མཚར་གསེར་གྱི་རྔ་བོ་ཆེ་ཞེས་བྱ་བ་འདི་ནི།
རང་ཉིད་ཀྱང་མོས་རྟེན་དུ་རྣམ་པར་ཐར་པ་ཞིག་འབྲི་བསམ་ཡོད་པ་ལ། སླར་གཏིང་སྐྱེས་
ནས་ས་སྐྱོང་མིའི་དབང་པོའི་གསུང་གིས་བསྐུལ་བས་རྐྱེན་བྱས་ཏེ། རྗེ་ཉིད་ཀྱི་སྐུའི་དབོན་
གློ་བོ་མཁན་ཆེན་རིན་པོ་ཆེས་མཛད་པ་ལ་གཞི་བྱས། དེར་མི་གསལ་བ་ཅུང་ཟད་རྗེ་བཙུན་
ཐམས་ཅད་མཁྱེན་པའི་རྣམ་ཐར་ནས་ཁ་བསྐངས། རང་ཉིད་ཀྱིས་མཐོང་ཐོས་སུ་གྱུར་པ་ཅུང་
ཟད་ཀྱང་བསྣན་ཏེ་རྗེ་བཙུན་བླ་མ་དེ་ཉིད་ཀྱི་ཞབས་རྡུལ་སྤྱི་བོས་བླངས་ཤིང༌། གསུང་གིས་
བདུད་རྩིས་འཚོ་བའི་དགེ་སློང་ཀློག་པ་བ་དཔལ་ལྡན་ཤཱཀྱ་བསྟན་འཛིན་བློ་གསལ་རྒྱ་མཚོའི་
སྡེ་ཞེས་པས་མཉན་ཡོད་གསེར་མདོག་ཅན་གྱི་ཆོས་གྲྭར་སྦྱར་བའོ།། །།བཀྲ་ཤིས།
20-1-196


༄༅། །གྲུབ་ཐོབ་ཤངས་པ་བཀའ་རྒྱུད་ཀྱི་ཐབས་ལམ་
གསེར་གྱི་ཕུང་པོ་ཞེས་བྱ་བ་བཞུགས།
༄༅། །ༀ་སྭཱ་སྟི། ན་མོ་གུ་རུ་བྷྱེཿ རྒྱུད་སྡེ་ལྔ་ཡི་དཀྱིལ་འཁོར་དང༌། །གཉིས་མེད་ཁྱུང་
པོ་རྣལ་འབྱོར་ལ། །བཏུད་ནས་གང་དེའི་མན་ངག་གིས། །གསང་བ་ཅུང་ཟད་བཤད་པར་བྱ། །
འདིར་བདེ་བ་ལམ་བྱེད་ཀྱི་སྐོར་མཁས་གྲུབ་ཁྱུང་པོ་ནས་བརྒྱུད་པ་ལ་ད་ལྟ་བཀའ་མ་ཆད་
པ་འདི་སྙེད་ཅིག་ཡོད་དེ། ནཻ་གུའི་གཞན་ལུས་དང༌། སུ་ཁའི་ལུགས་དང༌། མཁའ་འགྲོ་རྣམ་
གསུམ་གྱི་དགོངས་འདུས་དང༌། མེ་ཏྲི་བའི། ཨ་དྭ་ཡ་བཛྲ་ཀྱི་མན་ངག་སྟེ་ལྔའོ། །
དང་པོ་ལ། གཏུམ་མོ་དང་འབྲེལ་བ་དང༌། སྒྱུ་ལུས་དང་འབྲེལ་བ་གཉིས་ལས། དང་
པོ་ལ། རང་སེམས་བདེ་བ་བསྒོམ་པ། རླུང་གི་ལམ་སྦྱངས་བ། སྦྱོར་བྱ་ཡུམ་གྱི་མཚན་ཉིད།
བརྟེན་ཚུལ་དངོས་ཏེ་བཞི་ལས། དང་པོ་ནི། ཆོས་དྲུག་གི་རང་ལུས། ཐབས་ལྡན་གྱི་གཏུམ་
མོ་ལམ་ཁྲིད་ལེགས་པར་སྦྱང་བ་ཞིག་གིས་བསྒོམ་སྟེ། རང་བདེ་མཆོག་ལྷན་སྐྱེས་ཡབ་ཡུམ་
དུ་གསལ་བས་ལུས་ཀྱི་དབུས་སུ་རྩ་གསུམ་གསལ་བཏབ། ཡས་སྣར་ཧཾ་དང་མས་སྣར་ཨ་
ཡང་གསལ་བཏབ་སྟེ། རླུང་བུམ་ཅན་བཟུང༌། ཨ་དམར་པོ་ཅུང་ཟད་ཞུ་བ་ཁྲོ་ཆུ་ལྟར་ཚ་བའི་
རཀྟའི་འཁོར་ལོ་བཞི་མས་རིམ་གྱི་གང༌། ཧཾ་ཞུ་ཐིག་ལེ་དཀར་ལ་བསིལ་བའི་ཡས་རིམ་གྱིས་
གང༌། གཉིས་པོ་འགྲོས་འདེད་ལྟ་བུ་ལ་སེམས་གཏད། ཐུན་འཇོག་ཁར་དཀར་ཆ་ཧཾ་ལ་སྟིམ།
དམར་ཆ་ཨ་ལ་སྟིམ་ཏེ་དམིགས་པས་ནོར་བུའི་ནང་དུ་ཧཱུཾ་སྔོན་བོ་ཞབས་ཀྱུ་ཕྱིར་ཐོན་པ་པདྨའི་
ལྟེ་བར་སུ་ཡིག་སེར་པོ། དེ་གཉིས་ཀྱི་ཞབས་ཀྱུ་ལུ་གུ་རྒྱུད་དུ་འབྲེལ་བ། ཡབ་ཀྱི་དབུ་མ་ཐིག་
ལེ་དཀར་པོའི་འཕྲེང་བ་དང༌། ཡུམ་གྱི་དབུ་མ་ཐིག་ལེ་དམར་པོའི་ཕྲེང་བས་བསྟིམས་པས།
20-1-197


སྙོམས་པར་ཞུགས་ཤིང་བསྐྱོད་པའི་ལྷོད་ཙམ་དང་ལྟོ་བ་ཕྱིར་ཕུལ་ཙམ་གྱི་བཟུང༌། དེ་ནས་
ཐུར་སེལ་འཕུལ་འཐེན་དང༌། ཨ་ཨ་ཨ་ཞེས་སྟོང་འདྲེན་དྲག་པོ་དང༌། ཡང་རྔུབ་སྟེ་རླུང་གི་
བགང་འདྲེན་དྲག་པོ་གཉིས་ལ་ལན་གསུམ་སྤེལ་ཏེ་འདྲེན། བགང་འཐེན་དྲག་པོ་གཉིས་བྱས་
པའི་རང་གི་ནོར་བུའི་ནང་གི་ཧཱུཾ་བཅས་དྲང༌། རྡོ་རྗེ་དང་དབུ་མ་སྒྱུ་མ་ཟློག་ཏུ་སོང༌། སྤྱི་བོར་
ཐོན་པར་བསམ། སྐྲུག་འགྲེམས་དང༌། འབེབས་ཆུང་མང་དུ་བྱས་ཏེ། དེ་ལ་ཡང་རླུང་བགང་
བ་འབུད་པ་ཡང་ཡང་སྤེལ། དམིགས་སྐོར་གཉིས་སོ། །
གཉིས་པ་ནི་བུམ་པ་ཅན་གནས་བཞིན་པའི་སྐྱིལ་ཀྲུང་གྱེན་ཐུར། སེང་གེ་འགྱིང་སྣོལ།
འགྱིང་བག་བཅུ་པ། ཟླ་དཔྱད་ཕྲག་སྒང་ལྟར་འགྱིང་བ། གླང་བཞི་གནད་སོར། དགྲང་བའི་
མཐའ་སྟེ། འཁྲུལ་འཁོར་བཅུའམ། བཅུ་གཉིས་བྱ། ཁྱད་པར་གསེར་ཆོས་ཀྱི་འཁྲུལ་འཁོར་
བཞི་ནི་ཐོགས་ལ། ལ་ལ་རིང་བར་རྔུབ་ལྟེ་འོག་ཏུ་ཁ་སྦྱོར་དྲག་པོ་བྱ། དེ་ནས་བགང་འདྲེན་
འདར་ཐོན་པ་དང༌། བགང་གནོན་དྲག་པོ་འཕོངས་སུ་སྲིག་གྲུ་བཞུར་དྲག་པོ་མནན། དེ་ནས་
ལྟོ་བ་བཅར་ཏེ་དྲག་ཏུ་བུས། རྒྱུ་ཞབས་སུ་སྟོང་གནོན་ལན་གསུམ་ནས་ཉེར་ཡང་ཙོག་པུའི་
ངང་ནས་དྲག་པོར་རྔུབ་ལ་མདུན་རྒྱབ་མཉམ་པོར་རྡེག །དེ་ཉིད་སྟོད་དུ་སྒྲིལ་བ་འདར་ཐོན་པ་
དང༌། དེ་ལན་བདུན་སྤེལ། དེ་ནས་འཕོངས་བཏེགས་ཤིང་རྡེབ། འདོམ་འཇལ་གི་མཐར་གྲུ་
མོ་རྩེགས། སྒལ་ཚིགས་སྲང༌། འཕོངས་སྟེགས་པུས་མོ་དགྲད། ཕྱིར་བུས་དེ་ཀ་བ་བཙུགས་
ལ་གསང་རྩ་འཐེན། ཡང་དྲག་ཏུ་རྔུབ་ལ་སྟེང་མནན་ལན་གསུམ་དང༌། གྱེན་དུ་འཕར་ཞིང་
འོག་ཏུ་རྡབ་པ་ལན་གསུམ་བཞི་བྱས་ནས་སྦྲག་འགྲེམ་དྲག་པོ་བྱ་སྟེ། འདྲེན་འགྲེམས་སོ། །
ཡང་ཙོག་པུ་སྟོད་དཀྱིལ་བྱས་ལ། ཕོ་བར་ཁ་སྦྱོར་དྲག་པོ་བྱ། སྟོད་སྒྲིམ་སྨད་གློད། ཡང་རླུང་
སྨད་དུ་སྡིག །སྨད་སྒྲིམ་སྟོད་གློད། འོག་སྒོ་འབྱེད་འཛུམ་བྱ། ལྟོ་བ་ལྡིར་བྱས་ལ་རླུང་བུས།
མ་ནང་གི་གྲུ་བཞུད་ལས། གྱེན་འཐེན་དང༌། གྱེན་དུ་འཕར། མཐུད་གནོན་དང་འཕོང་རྡེབ་
20-1-198


པ་བསྟུན་ལུས་སྒྲིམ་ཞིང་སྟང་བ་དེ་འདྲ་ལན་ལྔ་བྱ། དབུག་ཤུགས་ལ་འོང་དུ་བཅུག་ནས། ལྟེ་
འོག་དྲག་ཏུ་མནན་ལ་སྤྲུག་པ་དང༌། ཧ་ཞེས་སྟོང་སྤྲུག་བྱ་སྟེ། འཛིན་འདྲེན་འགྲེམས་པ་དང་
དངས་སྙམས་འབྱེད་པ་བཞི་ཆར་དུས་གཅིག་འབྱུང་བ་སྟེ་གཅིག་རྫོགས་སོ།། །།
ཡང་ཧ་ཞེས་རྒྱ་མཚོའི་བཅིར་ལ་ཀ་བ་བཙུགས། སྟོད་སྒྲིམ་ལ་སྟོང་འདྲེན་དང༌། སྨད་
སྒྲིམ་ལ་སྟོད་གནོན་བྱས། འོག་སྒོ་འཐེན། དེ་འདྲ་ལན་གསུམ་ནས་གྲུ་བཞུད་ལས་བགང་
འདྲེན་བགང་བྱོན་ལན་གསུམ་དང༌། བགང་སྤྲུག་དང་སྟོང་སྤྲུག་བྱ། ལྟོ་བ་བསྐྱེད་པའི་བགང་
འདྲེན་འདར་ཐོན་པ་དང༌། བགང་གནོན་གྲུ་བཞེད་དྲག་པོ་བུང་བསྐྱེད་བའི། ནད་སོགས་
འོག་སྒོ་ནས་ཐོན་པར་བསམ་ཏེ། སྙིགས་མ་དང་སྐྱོན་འདོན་པ་དག་བྱེད་དེ་རླུང་ཐིམ། འདྲེན་
འགྲེམས་གཅིག་རྫོགས། དག་བྱེད་བཞི་པོ་འདི་ལ། ཚོགས་འཁོར་རེ་དང༌། གསེར་གྱི་མེ་ཏོག་
གི་བཅད་ཐང་མཛད་པ་ཡིན་པར་གདའ་འོ། །
གསུམ་པ་ནི། སྦྱོར་བྱ་ཡུམ་གྱི་མཚན་ཉིད་དེ། སྤྱིར་བཤད་ཚོད་མང་ཡང་འདིར་དེ་མི་
གཙོའོ། །དེ་ལ་བུ་མོ་ལོ་བཅུ་དྲུག་ནས་སུམ་ཅུ་སོ་ལྔ་ཚུན་ཆད་ལ་བདེ་བ་འཕེལ་ནུས། ལུས་
དང་བཞིན་མཛེས་པ། སྐྲ་བཟང་བ། མཁུར་ཚོས་ལ་མེ་ཏོག་ཡོད་པ། ཁ་དྲི་ཞིམ་པ། འཕོངས་
ཟླུམ་པ། སྨད་དྲོད་ཆེ་ཞིང་དམ་ལ་ཡང་དོག་རན་པ་དང༌། བདེ་བ་དང་འདོད་ཆགས་ཆེ་བ།
ནོར་ཡུལ་ཕྱོགས་ཟས་གོས་དགྲ་གཉེན་གྱི་ཞེན་པ་དང་རྣམ་རྟོག་ཆུང་བ། མང་པོའི་དབུས་སུ་
སྤྱོད་ལམ་མཛངས་ཞིང་སྔགས་ཀྱི་སྤྱོད་པའི་སྐབས་ངོ་ཚ་ཆུང་བ། སྙིང་རྗེ་དང་ངེས་འབྱུང་དང་
དད་པ་རྣམས་རང་བཞིན་གྱི་ཆེ་ན་རབ། མ་བྱུང་ན་ཡང་གསོས་བཏབ་ཅིང་སྒོམ་ཏུ་བཅུག་ན་
སྐྱེ་བའོ། །མཚན་ཉིད་གཞན་རྣམས་རྙེད་དཀའ་ཞིང་དགོས་པ་ཆུང་གསུང༌། །
༈ བཞི་པ་ལ་གསུམ་གྱི། དང་པོ་ནི། ཡིད་དུ་འོང་བའི་བུ་མོ་ལ་སྦྱོར་བར་བསམ་པ་གསུམ་
པའི་སྐབས་ལྟར་བྱ་བ་སྟེ། ཡིད་ཀྱི་རིག་མའོ། །གཉིས་པ་ནི། ལག་སོར་ལ་སྦྱོར་བ་སྟེ། ལག་
20-1-199


པའི་ཕྱག་རྒྱའོ། །གསུམ་པ་ནི། དྭངས་སྙིགས་འབྱེད་པ་ལས་རྩ་རྣམས་དྭངས་སྙིགས་དབྱེ་བ་
སྟེ། རྩའི་སྟོང་ར་ཆེ་ཆུང་བྱེད་པ་ལ་བསླབ་པ་དང༌། རླུང་དྭངས་སྙིགས་དབྱེ་བ་ལ་གསུམ་གྱི་
དང་པོ་ལྟེ་བའི་ཆོས་འབྱུང་ཐིག་ལེར་བཅས་པ་ལ་རླུང་ཐིམ་པར་བསམ་ཤིང༌། སྟེང་རླུང་ཐུར་
དུ་མནན། གཡས་ལྕོག་གཡོན་ལྕོག་སྤྲུག་རྡིག་རྣམས་བྱ། སོར་མོ་བསྐུམ་ལ་གྲུ་བཞུར་བྱ།
༈ གཉིས་པ་ནི། དབུ་མ་ཀ་ལིང་འདྲ་སྙིང་གའི་ཐིག་ལེ་ལ་ཐིམ་པར་མོས་ཏེ། རླུང་རྔུབ་
སྟེ་འོག་རླུང་དང་སྲེས། འཕྲལ་དུ་དྲག་ཏུ་བུས་ཏེ་སྟོང་འདྲེན་གྱི་ངང་ནས་གཡས་ལྕོག་གཡོན་
ལྕོག་སྤྲུག་རྡིག་བྱའོ། །འདི་གཉིས་ལ་ཙོག་བུ་བྱ།
༈ གསུམ་པ་བར་རླུང་རྒྱང་ཏེ་ལུས་སྟང་བའོ། །དེ་དག་ཕྱག་རྒྱ་ལ་སྦྱོར་བའི་སྔོན་དུ་ཐུན་
རེ་ཞིང་བྱའོ། །ཐིག་ལེ་དྭངས་སྙིགས་དབྱེ་བ་ནི། གཟུགས་སྒྲ་དྲི་རོ་རེག་བྱ་ལ་བསླབ་པ་སྤྱི་དང་
འདྲ་སྟེ་ཞོར་ལ་འོང་ཞིང་གནད་ཀྱང་ཆུང་གསུངས། དེ་ནས་ཐོག་མར་རང་སྐྱིལ་ཀྲུང་གི་པང་
དུ་རིག་མ་བཞག་ལ་ལུས་ཡི་དམ་ཡབ་ཡུམ་མཁའ་གསང་དང༌། གནས་གསུམ་བྱིན་རླབས་
དྲན་ཙམ་བྱ། རྡོ་རྗེ་པདྨར་བཅུག་ཏེ་དར་ཅིག་ཀློད། དེ་ནས་དལ་བུས་བསྐྱོད་ཅིང༌། བདེ་བ་
མགོ་གཡོས་པ་ལ་སྐྱོད་འཕྲོ་བཅད་ཀྱིན་བཟུང་དགོས་ཏེ། འོག་སྒོ་ཀློད་པའི་བཟུང་སྟོང་འདྲེན་
བགང་འདྲེན་གྲུ་བཞུད་དྲག་པོ་རྣམས་ཀྱིས་དྲངས། སྤྲུག་འགྲེམས་རེ་བྱས་ལ་འཁྲུལ་འཁོར་
བཞི་པ་དང་བཅུ་པ་དང༌། ཁ་བུབ་འཕོངས་ཀློད་རྐྱང་སྐུམ་རུས་སྦལ་འགྲོས། །རྐང་གཤིབ་
ལང་འདུག་ལན་གསུམ་མཐུར་གནོན་ཡིན། །ནོར་བུ་བསྡམས་ཏེ་བགང་འཐེན་ཁ་ཆིང་ཡིན། །
སོ་སྤྲིག་སྒྲ་བཅས་འབུད་སྐྲུག་སི་སྒྲའོ། །ཞེས་པའི་ཐིམ་བཞིར་གྲགས་པ་འདི་ཡང་བྱ་སྟེ།
འདི་ཐོག་མར་རང་དུ་ལེགས་སོ། །དེ་ནས་རིམ་པའི་བསླབ་པས། ཐིག་ལེ་གསང་བར་འཛིན་
པའི་ཚེ་ཟིན་དཀའ་ན་སྐུ་གསུམ་གྱི་ཐིག་བུ་སྟེང་ནས་བརྡབ། བྱ་རོག་སྲོག་ཐུམས་འོག་ནས་
བརྡབ། དྲུག་ཐེབ་ལོགས་ནས་བཏབ་པར་བྱ། ཞེས་ཏེ་དྲི་ཨངྒུ་ལི་དང་བརྙིང་བ་དང༌། སྲིན་
20-1-200


པོར་བྱང་བའི་སྦྱོར་བའོ། །དེ་ནས་སེམས་དྭངས་སྙིགས་འབྱེད་པ་ནི། བདེ་བ་ཕྱག་རྒྱ་ཆེན་
པོར་ངོ་སྤྲོད་པའོ། །དེ་དག་ནི་གཞན་ལུས་ཀྱི་གཏུམ་མོའི་གདམས་པའོ། །
༈ གཉིས་པ་ནི། སྒྱུ་ལུས་སྦས་དོན་ཞེས་བྱ་སྟེ། འདི་ལ་རླུང་སྦྱང་བ་བུམ་པ་ཅན་ཁོ་ན་དང་
གཞན་སྔ་མ་དང་འདྲ་བས། འདིར་འཁྲུལ་འཁོར་དངོས་གཞིའོ། །དང་པོ་ནི། དབབ་པའི་
འཁྲུལ་འཁོར་རྣམ་གསུམ་ནི། རྡོ་རྗེའི་སྐྱིལ་ཀྲུང་ལན་གསུམ་འདེག །རྡོ་རྗེ་ཁུ་ཚུར་ཐུར་དུ་
མནན། །བྱ་སྙོང་བྱ་ཞིང་ལན་གསུམ་རྡིག །བཟུང་བའི་འཁྲུལ་འཁོར་རྣམ་གསུམ་ནི། །ལུས་
གནད་མཉམ་བཞག་ས་གནོན་ལ། །རླུང་གནད་བླ་མའི་ཞལ་ལས་ཤེས། །ཟློག་པའི་འཁྲུལ་
འཁོར་རྣམ་གསུམ་ནི། །ལུས་གནད་རུས་སྦལ་ཁ་བུབ་ལ། །ཧཱུཾ་གཉིས་རེ་མོས་བཤང་ལམ་
ཟློག །འགྲམ་པའི་འཁྲུལ་འཁོར་རྣམ་གསུམ་ནི། །གཅན་ཟན་རྒྱལ་པོའི་སྟེ་སྤྲུག་སྟེང་དང༌། །
སྤྱང་མོ་སྡུག་དང་རྒོད་ལྡང་བྱ། །མི་ཆེན་འདུག་ཀྱང་གནོན་པར་བཞེད། །དང་པོ་ནི། རྡོར་
དཀྱིལ་ལག་གཉིས་དཔྱི་ཐད་པར་བཙུགས་རྡེབ། གཉིས་པ་ནི། སེམས་དཀྱིལ་པུས་མོར་
ཁུ་ཚུར་གན་རྐྱལ་ནས། རླུང་བཟུང་ཚུར་དྲངས་བརླ་ཡི་རྩ་བར་མནན། གསུམ་པ་ནི། ཁུར་
ཚུར་རླར་བཞག་པུས་བཙུགས་འཕར་རྡེབ་བྱ། འཐེན་གནོན་དང་སྦྱོར་ཞིང་དེ་གསུམ་ལ་མགོ་
བཀུག །མིག་གྱེན་དུ་ཟློག །ལྕེ་རྐན་ལ་སྦྱར། དམིགས་པ་ཧཾ་ལ་གཏད་དོ། །བཞི། ལྔ། དྲུག་
པ་གསུམ་ནི། སེམས་དཀྱིལ་སྟེང་མནན་འོག་རླུང་རང་ས་ལ། །གཡས་གཅུ་གཡོན་པ་མཉམ་
བཞག་གཡས་ས་གནོན། །དེ་ཉིད་གོ་བཟློག་དབུ་ལ་གཉིས་ས་གནོན། །ལྟེ་བར་སེམས་
བཏོད་མིག་སོགས་གོང་དང་འདྲ། །བདུན། བརྒྱད། དགུ་པ་གསུམ་ནི། རྐང་ངར་ལག་ངར་
སར་བཙུག་ལུས་རྒུར་ལ། །ལག་སོར་སྣོལ་ལ་མགོ་དགུར་ཧཱུཾ་རངས་བུས། །མགོད་གྱེད་རྔུབ་
ནས་ཧཱུཾ་ཐུང་བགང་འཐེན་དང༌། །བཤང་ལམ་གྱེན་ཟློག་བགང་སྟོང་འདྲེན་གཉིས་སོ། །བཅུ་
པ་ནི། རྐང་ལག་སོར་མོ་སར་བཙུག་སྡེར་བཞི་བསྒྲད། །གཡས་གཡོན་དབུས་སུ་ལྕོག་ཅིང་
20-1-201


སྤྲུག་པའོ། །བཅུ་གཅིག་པ་ནི། ཁུ་ཚུར་བཅིང་ཏེ་སུག་བཞི་འཛུག་པ་སོགས་གཞན་དང་འདྲའོ། །
དེ་གཉིས་ལ་རྗེས་འཕོངས་རྡེབ་ཅིང་རླུང་འབུད་ཅིང་སྤྲུག་འགྲེམས་བྱའོ། །བཅུ་གཉིས་པ་
ནི་ལངས་ཏེ་རྐང་སྒྲད་ལགས་པ་སྐེད་གཟེར་བྱ། །དཔུང་པ་གཡས་གཡོན་ལྕག་བྱས་མདུན་
དུ་འཕར། །སྒྱིད་པ་སྡེམ་བྱས་རླུང་བཏང་སྤྲུག་སྤྲུག་པའོ། །བཅུ་གསུམ་བྱེད་ན་སྤྱི་དང་འདྲའོ། །
གཉིས་པ་ནི་གཞན་དང་འདྲ་བ་ལས་རང་དང་རིག་མ་ཕྱག་རྒྱ་སྣང་སྟོང་སྒྱུ་མར་ཤེས་པ་དང༌།
ལྷ་སྐུ་གསལ་སྟོང་དུ་རྒྱས་ཐེབས་བཞིན་པའི། གཟུགས་མཛེས་པ་ལྟ་བ་མེ་ལོང་གི་གཟུགས་
བརྙན་ལྟར་སྣང་སྟོང་དང༌། འཁྲིག་ཚིག་དང་དགའ་བའི་སྒྲ་སོགས་བྲག་ཆ་ལྟར་གྲག་སྟོང་
དང༌། འཁྱུད་པ་དང་རྡོ་རྗེ་པདྨར་རེག་པ་སོགས་ཀྱི་བདེ་བ་མྱོངས་ཡང་འདི་ཡིན་བཟུང་དུ་མེད་
པ། སེམས་བདེ་སྟོང་དང༌། རྡོ་རྗེ་པདྨར་སྐྱོད་པའི་བདེ་གསལ་མི་རྟོག་པ་ངོས་བཟུང་དུ་མེད་པ་
བློས་དཔྱད་དུ་མེད་པ། ཚིག་གིས་བརྗོད་དུ་མེད་པ་སྒྱུ་མ་སྒྱུ་འཛིན་དང་བྲལ་བ་ལ་སྙོམས་པར་
བྱའོ། །འདིར་རྩོལ་བ་རབ་གཏུམ་མོ་རང་ལུས་ལ་འབད་པ་རྣམས་གཞན་ལུས་སྒོམ་དུས་ལམ་
གྱི་རྐང་ཚུགས་པའི་དབང་དུ་བྱས་ནས། གཞན་ལུས་གཏུམ་མོར་རྒྱས་པར་བསྟན་པ་ཡིན།
ཁ་ཅིག་གཏུམ་མོ་མི་ལྕོག་པར་སྒྱུ་ལུས་མན་ཆད་སྒོམ་པའི་སོ་སོའི་དགེ་སྦྱོར་བཟང་རབ་བྱུང་
བ་ལ། རླུང་ཕྱོགས་བསྡུས་ཙམ་བསྟན་ནས་གཞན་ལུས་ཀྱི་ཉིན་པར་དང༌། རྨི་ལམ་དང་འོད་
གསལ་གསུམ་ལ་བོགས་འབྱིན་པ་ནི་སྒྱུ་ལུས་སྦས་དོན་གྱི་གོ་བ་སྟེ། ཆགས་ལམ་རྒྱས་བསྡུས་
གཉིས་ཁྲིད་ཀྱི་གཞུང་ཤིང་གཅིག་ལ་ཡོད་པས་རྒྱུ་མཚན་དེ་ཡིན་ནོ། །འདི་ནི་སློབ་དཔོན་ཨ་
ཡི་སེང་གེ་དང༌། གསེར་གླིང་པ་བཀྲ་ཤིས་དཔལ་གྱི་ཡིག་ཆུང་ལས་ཞལ་གདམས་སྙན་རྒྱུན་
གྱིས་རྒྱན་པ་ལྟར་བཀོད་པ་ཡིན་ལ། ཤིང་སྟོན་ཆེན་པོའི་ཡིག་ཆུང་ཡང་དོན་འདི་ཀར་འདུག
ཕྱིས་སུ་རོ་སྙོམས་རྡོ་རྗེས་ཟིན་བྲིས་ལ་ནི། ལྷད་ཆེ་ཞིང་ལྷག་ཆད་གཉིས་ཀ་ཡོད་དོ། །འདི་
ལག་ལེན་ཁྲིགས་ཆགས་སུ་གསལ་བར་བཀོད་པའོ། །ཡེ་ཤེས་མཁའ་འགྲོ་ནཻ་གུ་མའི་གསང་
20-1-202


ལམ་བཤད་ཟིན་ཏོ། །
༈ གཉིས་པ་མཁའ་འགྲོ་རྣམ་གསུམ་གྱི་རི་བོང་དབབ་བཟུང་ལ་ནི། དོན་གསུམ་སྟེ།
རིག་མ་བརྟག་ཅིང་དགུག་པ། སྟ་གོན་སྦྱང་བ། ལས་ལ་སྦྱར་བ་འཕྲོས་དང་བཅས་པའོ། །
དང་པོ་ནི། དཀར་མོ་དཔྲལ་བར་སྨེ་པ་ཡོད་པ་བུདྡྷའི་རིགས། དམར་མོ་ལྟེ་བར་སྨེ་བ་ཡོད་
པ་དཔྲལ་བར་རྩེ་གསུམ་ཡོད་པ་རིན་ཆེན་རིགས། དཀར་ལ་དམར་བ་མགྲིན་པར་སྨེ་བ་ཅན་
སྐྱེས་པའི་རེག་ན་མི་བཟོད་པ་པདྨའི་རིགས། སྔོ་སངས་ནུ་ཕྲག་དོག་པ་རྣ་བ་གཡོན་པ་ལ་སྨེ་
བ་ཅན་ལས་ཀྱི་རིགས། སྔོ་སངས་སྙིང་ཁ་ལ་སྨེ་བ་ཅན་ཐུགས་ཀྱི་རིགས་ཡིན་ནོ། །ཞེས་སུ་
ཁ་སིདྡྷི་གསུངས་སོ། །དུང་ཅན་མ་གནས་ལྔ་པོ་གང་རུང་དུ་དུང་འདྲ་བའི་རི་མོ་ཡོད་པ། གླང་
ཆེན་མ་དེར་སྨེ་བ་སྨུག་པོ་ཡོད་པ། པདྨ་ཅན་ལ་ཐིག་ལེའི་རི་མོ་ཡོད་པ། རི་དྭགས་ཅན་མ་ལ་
རི་མོ་དགུ་པོ་རྒྱབ་སྤྲོད་དུ་ཡོད་པ། རི་མོ་ཅན་མ་ལ་རི་མོ་དྲང་པོ་གསུམ། ལྕུག་ཕྲན་མ་ལ་ལྔ།
ཆོས་འབྱུང་མ་ལ་གྲུ་གསུམ་འབྱུང་བའོ། །དེ་དག་ལ་བདེ་བ་མྱུར་བ་དང༌། སྟོང་ཉམས་ཆེ་བ་
དང༌། བདེ་བ་རྒྱས་པ་དང༌། བདེ་བ་འབྲིང་དང༌། ཐིག་ལེ་འཛིན་སླ་བ་དང༌། གསལ་ཉམས་
ཆེ་བ་དང༌། བདེ་བ་ཤུགས་ཆེ་བ་རྣམས་ཀྱི་དགོས་པ་ཡོད་དོ། །ཞེས་གང་ག་དྷཱ་ར་གསུངས་སོ། །
ཡང་ཁའི་མཆུ་ལས་བྷ་ག་བརྟག །མཆུ་མཐུག་ན་བྷ་ག་ཤ་རྒྱས། ཁ་ཆེ་ཆུང་ལ་བྷ་ག་ཆེ་ཆུང་
ཡོད། བྷ་ག་ལོ་དགུ་ལ་སོར་ལྔ། བཅུ་དྲུག་ལ་ཁྱུད་གང༌། ཉི་ཤུ་ལ་སོར་བཅུ་གཉིས་ཆེ་ཚད་ཡིན་
ཏེ། དེ་ལས་དཀྱུས་རིང་བ་ནི་མི་བརྟེན་ནོ། །བདེ་བ་ཆེ་ཆུང་མིག་ལ་བརྟག་སྟེ། མིག་དཀྱུས་
རིང་ཤིང་མིག་འབྲས་ནག་བ་སྲི་ག་དང༌། མིག་འཛུམ་ཡོད་ན་བཟང༌། སྐྲ་དང་ནུ་མ་ལེགས་ན་
བདག་པོ་ལ་གུས་ཏེ། སྐྲ་ལི་ན་རབ། སེར་ན་འབྲིང༌། ནག་པོ་རྐྱང་པ་ཐ་མའོ། །ནུ་མ་འབུར་
ཤིང་ཟླུམ་པ་རབ། རྣོ་བ་འབྲིང༌། འཕྱང་བ་ཐ་མའོ། །ཨོལ་མདུད་དང་སྙིང་སྤུ་འདུག་ན་གསང་
ཐུབ་པར་ཡོད། བྷ་ག་ཡང་སྤུ་མེད་པ་དང༌། སྤུ་ནག་པོ་མཐུག་པོ་དང༌། སེར་ཁམ་གསུམ་རབ་
20-1-203


འབྲིང་ཐ་མའོ། །བྷ་ག་ཕྱི་དཀར་ནང་དམར་བ་དང་སྨུག་པ་དང༌། སྔོ་བ་རྣམས་སྤྱིར་ཤ་མདོག་
དཀར་བ་གཞིར་བཞག་པ་ལ་རབ་འབྲིང་ཐ་མ་སྟེ། ལྕེ་དང་སྙིང་ལས་བྷ་གའི་ཁ་དོག་དང༌།
མཆན་ཁུང་གི་སྤུ་ལས་དེའི་སྤུ་བརྟག་དགོས་ཏེ། དེ་དང་དེ་དག་མཚུངས་པར་འོང་ངོ༌། །ཞེས་
ཀུན་དུ་བཟང་མོས་གསུངས་སོ། །དགུག་པ་ནི་བུ་མོ་དེའི་ཆུ་རྡུལ་གྱི་ས་ལ་གཟུགས་བརྙན་
བྱ། སྙིང་གར་གི་ཧཾ་དང་པདྨ་རཀྟའི་མིང་རུས་བྲིས་པའི་ཤོག་དྲིལ་གཞུག །དགུག་གཞུག་བྱ།
ཟངས་ཀྱི་ལིང་གའི་ཁབ་ཀྱི་བྷ་ག་འཚག་ཅིང༌། ཨ་ཧ་ར་ནི་ས། ཆྒཻ་མོ། ཁུག་རྣམ་ཤེས་བྲང་
བྲང་དུང་དུང་བདག་གི་དབང་དུ་བསྡུས་ཨ་ཧ་རི་ནི་ས། ཞེས་ཞག་བདུན་བཟླས། སྔགས་དེ་
བཟླས་པའི་བཟའ་བཏུང་བྱིན་ན་དབང་དུ་འདུས་སོ། །ཡང་མཁའ་འགྲོ་སུ་ཁ་སིདྡྷིས་གཉན་
སྟོན་ལ་དངོས་སུ་གནང་བའི་དགུག་པ་ཟབ་མོ་ནི། རྫས་སྦལ་པའི་ནང་དུ་མིང་རུས་བྲིས་ལ་
གཞུག་ཡུངས་དཀར་བདུན་ནང་དུ་གཞུག་བདུན་སྦལ་པའི་ཁོག་ཏུ་བཅུག །རང་ཕག་མོའི་
ཐུགས་ཀ་ནས་ཕོ་ཉ་མོ་དམར་མོ་མང་པོ་སྤྲོས་ཁམས་གསུམ་དབང་དུ་བསྡུས་པར་བསམ་ལ་
ངག་བཅད་དེ། སྭཧཱ་བྷས་ཤ་ཁོལ་ཙག་ཙག་དུང་དུང་འདུར་ཡེད་ཡེད་ཆྒཻ་མོ། །ཙིཏྟ་དཀྲུག་
བདག་གི་དབང་དུ་གྱུར་ཅིག །ཅེས་སེམས་མ་ཡེངས་པར་རབ་ཞག་གཅིག །འབྲིང་གཉིས།
ཐ་མ་གསུམ་ན་རྨི་ལམ་དུ་བུད་མེད་འདུ་བ། ཁྲོམ་འཚོགས་པ། གཏེར་རྙེད་པ་སོགས་འབྱུང་
ངོ༌། །ལས་སྦྱོར་ནི་ཉི་མ་དམར་ཐག་ཆོད་བ་ན་རྫས་ལ་སྔགས་སྟོང་ཙམ་ཟླས། རབ་ཕྱེས་
ཉུང་དཀར་གཏོར་བ། འབྲིང་ཤ་ལ་སླན་པ་ཙམ་དང༌། ཐ་མའང་སྦལ་བས་ལུས་ལ་ཐེབ་ན་
ཐེ་ཚོམ་མེད། ལུས་འཁྱོར་བ་དང༌། སེམས་མི་གནས་པ་ཡོང་ཉེན་ཡོད། དེ་ལ་འདོད་པ་སྤྱད་
པས་སེལ། དགྲོལ་བར་འདོད་ན། གངས་ཆུ་གྲང་མོ་ལུས་ལ་རྒྱབ། སྔགས་མགོ་མཇུག་ཟློག།
སྦལ་བ་བཅག མིང་རུས་སྤོས་ཆུས་ཁྲུས་བྱས་པས་གྲོལ་བར་འགྱུར་རོ། །རྩ་འཚོལ་བ་ནི།
སྤྱི་བོར། གླ་རྩི། ཙནྡན་དཀར་པོ། ཏིལ་དམར་གསུམ་སྲེས་པའི་མཉེ། སྒ་ཤིང་སྟེང་དུ་མཁལ་
20-1-204


སྣོལ་དང་ཤིང་ལེབ་དང༌། སྐེ་རགས་བསྡམ། བཤང་ལམ་དུ་འབེ་ལྟོ་འཕྱང་བུ་བཅུག་པའི། བྷ་
གའི་མཁུར་ཤ་ནུ་མ་འདྲ་བར་འགྲོ། རྩའི་རྩེ་མོ་རིབ་རིབ་འོང༌། ཡང་ན་བཅོས་མའི་རྡོ་རྗེའི་ཕྱི་
ནས་ཅིག ནང་དུ་སྐོར་བའི་རྩ་ཡོད་པར་འཕྲད་པ་ལ་འཁུན་ཞིང་སྔངས་ཡོད་པ་འོང༌། རྩ་སྦོམ་
ན་པདྨ་དཀར་པོའི་རྩ་བ་དགོས་ཏེ། བོད་དུ་མི་རྙེད་པའི་ཨུག་ཆོས་མེ་ཏོག་རྩ་བ་དང་བཅས་པ་
བ་དཀར་མོའི་འོ་མ། ཀ་ར། མར་གསར། གང་སྦ་ལམ། ད་བྱིད་སྨུག་པོའི་ཚིལ་སྦྱར་བ་བྱུག་
པའམ། ཆང་དང་སྦྱར་བ་པདྨར་བླུག་པའི་ཕྲ་བར་འགྱུར་རོ། །རྒྱ་ཚོས་ཀྱི་ཁུ་བ་ཆུ་རྩའི་མེ་ལ་
སྐོལ། སྤང་རྒྱན་མེ་ཏོག་བཏབ་པ་བཏུང་པ་དང༌། གཉེར་པོ་ཆེར་གསེར་གྱི་མེ་རྩ་བྱེད་པ། བྷ་
ག་ཆུ་ལྕག་དང༌། འཕོངས་ཚོས་ལ་བེར་ཀའི་དལ་བུར་རྡུང་བ་སོགས་ནི་སྲིད་རྒྱུན་སྐེམ་པའོ། །
གཉིས་པ་བུམ་པ་ཅན་ལ་བརྟན་པོ་སྒོམ་པ་ཡིན་ན། འཁྲུལ་འཁོར་རྣམས་ལས་ལ་སྦྱར་
བའི་སྐབས་སུ་དགོས་ནའང༌། ད་ལྟ་ནས་སྦྱང་དགོས་པས་ཐམས་ཅད་ལ་རླུང་ཁྲབ་སྔོན་དུ་
གཏོང་བ་ཤེས་པར་བྱའོ། །འཛིན་པ་ལ་གསུམ་གྱི། དང་པོ་ཀློད་པ་ནི། ལུས་སེམས་ཁོང་ཀློད།
སྲིན་ཞལ་ཕན་པའོ། །གཉིས་པ་ནི། རྒྱ་མཚོ་བཅེར་བ་སོགས་འགྱུར་བ་བཞིའོ། །གསུམ་པ་
སེམས་ཀྱི་འཁྲུལ་འཁོར་ཏེ་བདེ་བའི་ངོ་བོ་ལ་ལྟས་ནས་ཀློད་པའོ། །བཟློག་པ་ལྔའི་དང་པོ་
ནི། སྤྱིར་རྡོ་རྗེ་ཐལ་མོ་འཐེན་ལ་སྟོང་འདྲེན་བྱས་ལ་སེམས་ནམ་མཁའ་འཕང་ལངས་ཏེ་ལན་
གསུམ་སྐྱེད་ཅིང་སྟོད་འདྲེན་བྱེད། གཉིས་པ་ནི། པུས་བཙུག་རྡོ་རྗེ་ཁུ་ཚུར་མདུན་དུ་བཅུག་ལ་
ཧག་ཧིག་ཧོག་ཅེས། སྙིང་ག །མགྲིན་པ། སྤྱི་བོ་རྣམས་སུ་དྲང་ངོ༌། །གསུམ་པ་ནི། རྩལ་སྤྲུག་
གི་མཐར། སྟེང་རླུང་ཕྱིར་འཕང་ཐུར་སེལ་མཐེན། སྐྱིལ་ཀྲུང་རྡོ་རྗེ་ཁུ་ཚུར་བརླ་རྒང་ལ་བཅུག་
སྟེ་རྒང་འདྲེན་བྱའོ། །བཞི་པ་ནི། སེམས་དཀྱིལ་སྟོད་སྐྱིལ་ཡང་བཅས་ནས་སྨད་ཀྱི་རླུང་
ཁོང་འདྲེན་དང་སྟོང་འདྲེན་བྱའོ། །ལྔ་པ་ནི། ལག་པ་གཡོན་རྐྱང་གཡས་དཔུང་བར་ཁུ་ཚུར་
བཅིང༌། རྐང་པ་རྟ་ལ་གཡོན་ཞོན་བྱེད་ཚུལ་གྱི་གཡོན་ནས་རྒང་འཐེན་བྱ། དེ་ཉིད་གོ་བཟློག་
20-1-205


རེའང་བྱའོ། །དགྲམས་པ་ལ་དགུ་ལས། དང་པོ་ནི། ལངས་ཏེ་སླར་བསྡད་ཐལ་མོ་རྩེགས།
ལག་པ་བརྐྱང་མགོ་བོ་ལ་ཐལ་ལྕགས་རེ་མོས་སུ་རྡེག་པ་དང་འཕགས་ཅིང་ལག་པའང་སྤྲུག་
གོ །གཉིས་པ་ནི། དགུར་ལ་རྐང་ལག་རེ་མོས་སུ་འཁྲབ་བོ། །གསུམ་པ་ནི། དཀྱིལ་ཀྲུང་
ལག་གཉིས་དཔུང་འཛིན་ཕོ་ཁར་སྣོལ། བཞི་སྤྲུག་བྱས་ནས་མཆན་ཁུང་རྡེབ་ཅིང་འཕགས་
པའོ། །བཞི་པ་ནི། རྡོ་རྗེ་སྐྱིལ་ཀྲུང་དང་རྡོ་རྗེ་ཁུ་ཚུར་མཁལ་མའི་ཐད་དུ་བཙུག་ལ་ཕོ་བ་སྐོར།
གསང་བ་ལྕོག་ཅིང་གཡས་འཐེན་གཡོན་འཐེན་བྱའོ། །ལྔ་པ་ནི། ལང་ལ་ལག་གཉིས་སྤྲུག
དྲུག་པ་ནི། ཅུང་ཟད་རྒན་རྐྱལ་སུག་བཞི་ཕུ་བའོ། །བདུན་པ་ནི། སུག་བཞི་བཙུག་ལ་གཡས་
གཡོན་དབུས་གསུམ་དུ་བཏེག་ཅིང་འཐེན་ནོ། །བརྒྱད་པ་ནི། གདུང་སྣ་སོགས་ལ་འཇུག་ཏེ་
བརྐྱང་སྐུམ་བྱའོ། །དགུ་པ་ནི། གན་རྐྱལ་དང་ཁ་བུབ་རུང་སུག་བཞི་ཕྱོགས་བཞིར་བརྐྱང་ནས་
བཅུད་ལ་བོར་རོ། །དེ་དག་ལས་འདྲེན་ཀུན་ལ་སྨད་སྒྲིམ་སྟོད་ཀློད་རྒྱ་མཚོ་བཅེར་བ་སོགས་
གང་འགྲུབ་དགོས། འགྲེམས་ཀུན་ལ་ཁ་སྦྱོར་ལུས་ལྷོད་ཅིང་འཆུན་དང་ལྡན་པ་དགོས། ཀུན་
ཁྱབ་ཏུ་སེང་གེ་རྣམ་རོལ་ཡང་བྱའོ། །དེ་དག་ལ་སྡོམ་འདི་སྐད་ཅེས་བྱ་སྟེ། །ཀློད་དང་འགྱུར་
བཞི་གཞོམ་པ་སྟེ། །འཛིན་པ་རྣམ་པ་གསུམ་དུ་འདོད། །རྡོ་རྗེ་ཐལ་མོ་ཁུ་ཚུར་པུས་བཙུག་
དང༌། །རྩལ་སྤྲུག་ཁོང་འདྲེན་རྟ་ཞོན་ཚུལ། །འདྲེན་པས་འཁྲུལ་འཁོར་རྣམ་ལྔའོ། །དགྲམ་
པའི་འཁྲུལ་འཁོར་རྣམ་དགུ་ནི། །དང་པོ་མགོ་ལྕོག་འཕར་སྤྲུག་བྱ། །གཉིས་པ་རྐང་ལག་རེ་
མོས་འཁྲབ། །གསུམ་པ་དཔུང་འཛིན་བཞི་སྤྲུག་རྡེབ། །བཞི་པ་མཁའ་མནན་ཕོ་བ་སྐོར། །ལྔ་
དྲུག་ལག་སྤྲུག་གན་རྐྱལ་འཁྲབ། །བདུན་པ་སུག་བཞི་གཡས་གཡོན་འཐེན། །བརྒྱད་དགུ་
བརྐྱང་སྐུམ་གན་རྐྱལ་རྒྱངས། །འདི་དག་མཁའ་འགྲོ་གསུམ་གྱི་མན་ངག་གུང་སྤྲོས་པ་ཡིན་ནོ། །
གསུམ་པ་ནི། དབབ་བཟུང་ཟློག་དགྲམ་རླུང་དང་བསྲེ་བ། ཡེ་ཤེས་ཆེན་པོར་སྲེ་བའོ། །དེ་
དག་ཀྱང་སུ་ཁ་སིདྡྷི་འདོད་ཡོན་ལྔ་ལ་རིམ་སློབ་མི་བཞེད། གངྒ་རྡ་རས། རོ་ལ་བསླབ་པ་ནས་
20-1-206


རེག་བྱ་སྤྱི་དང་རྡོ་རྗེ་པདྨར་རེག་པ་ཡན་ཆད་སྡོམ་པ་ལ་ཐུན་གཅིག་ཏུ་མཛད་པ་ཡིན། ཀུན་དུ་
བཟང་མོ་ནི། གླུ་སྙན་པ་དང༌། གཟུགས་ལ་ལྟ་བ་དང༌། ཀུ་རེ་བྱེད་པ་དང༌། ལུས་ཀྱི་རྩེད་མོ་
དང༌། ལག་བཅིང་དང༌། འོ་དང༌། འཁྱུད་དང་སོ་དང་སེན་མོས་འདེབས་པ་དང༌། བདེ་རེག་
བྱེད་པ་དང༌། ཕྱི་རོལ་དྲུད་པ་སྟེ་དྲུག །ཕྱིས་རེག་བྱ་ལ་བསླབ་པ་དང༌། སྙོམས་པར་འཇུག་པ་
སྟེ། ཆགས་སྤྱོད་བདུན་དུ་བཞེད་དོ། །དེ་ལ་རྡོ་རྗེ་པདྨར་ཅུང་ཟད་གསོར་ཞིང༌། ནོར་བུ་ཧཱུཾ་ནག་
པོ་མགོ་གྱེན་བསྟན་གྱིས་བཀག་པར་བསམ། འཛིན་པའི་འཁྲུལ་འཁོར་གཉིས་པའི་འཛིན་པ་
ཡིན། ཟིན་དཀའ་ན་ཧཱུཾ་གི་ཕུལ་ནས་ཐིག་ལེ་བ་ཐག་ལྟ་བུ་སྤྱི་བོར་ལྷན་ལྷན་ཐིམ་པར་བསམ་
ལ། ཧཱུཾ་འདྲེན་དྲག་ཏུ་བྱའོ། །དེ་ནས་ལུས་ཀུན་སྤྲུག་ཅིང་གླང་བཞི་འཕང་བ་དང་བརྐྱང་བསྐུམ་
བྱའོ། །ཡང་དང་པོར་དལ་བུ་དང་མཐར་དྲག་ཏུ་སྲུབ་པའི་རང་དང་རིག་མ་གཉིས་ཀའི་ཐིག་
ལེ་ཞུ་བར་བྱས། དེ་ནས་མི་སྲུབ་པར་རྒྱ་མཚོ་སྦྱར་ཏེ་ཧཱུཾ་འདྲེན་དྲག་པོ་བྱས་ལ་བུ་མོ་འོད་དུ་ཞུ་
ནས་རྡོ་རྗེས་དྲངས་ཏེ་རང་ལུས་ཁྱབ་པའི་མདངས་རྒྱས་པར་མོས། དེའི་ཤེས་རབ་མས་པདྨར་
གྲགས་སིང་བ་དང་ཁྱུར་ཁྱུར་དྲང་བའི་ཉམས་དང༌། བདེ་བ་ཟུག་དང་བཅས་པ་མི་བཟོད་པ་
བྱུང་ན་འདྲེན་ཐུབ་པའི་རྟགས་སོ། །སུ་ཁའི་ལུགས་སོ། །ཡང་ཤ་ཆེན་དུག་ཕྱུང་བ་བ་དམར་
མོའི་འོ་མར་བཙོས། ཤིང་ཀུན་དང་ཁ་རུ་ཚྭ་བཏབ་པ་བསྟེན་མཆིལ་པའི་ཤ་དང༌། ད་བྱིད་
ཀྱང་བཏང༌། ལུག་ཤ་དང༌། ཆང་འཇམ་པོ་ཟུང་ཏེ་བརྟེན། ར་མོ་ཤའི་ཁནྡ་དང༌། ཞོ་མ་སྐྲོག་
པ་བཟའ་བའི་བདག་དང་རིག་མ་གཉིས་ཀའི་ལུས་ཟུང་སྐྱེད། རྩ་རིང་ན་རྐང་པ་བརྐྱང༌། ཐུང་
ན་རིག་མའི་རྐང་པ་འཕྲག་པར་བཀལ་ནས་སྐལ་ལ་སྤྱོད། པདྨའི་ནང་གི་གཡས་གཡོན་སྟེང་
འོག་ཏུ་རྡོ་རྗེས་དྲུད་པའི་རྩ་བཙལ། རིག་མའི་ཀྱང་འོག་རླུང་བསྐུམ་སྟེང་རླུང་གནོན་པའི་རྩ་
སྟེར་བར་བྱ། ཐིག་ལེ་འབྱུང་བ་སྙམ་བྱེད་ན་འཕོངས་བསྒྲད། མིག་གྱེན་དུ་བལྟ། ཤེས་རབ་
མའི་སྐེད་པ་ཉགས་བཏང་ལ་རླུང་གསང་གནས་སུ་ཕུལ་བས་ཟིན་ཡོད་ལ། དེ་ནས་དྲང༌།
20-1-207


ཡང་བདེ་བ་ཡལ་དུ་མི་འཇུག་པར་བསྐྱོད་ཅིང་འབེབ། འཕོངས་བདེ་བའི་སྒྲིད་ནས་འབྱེད་མི་
ཐུབ་ན། ལག་པས་དབྱེའོ། །གངྒ་རྡ་རའི་ལུགས་སོ། །ཕལ་ཆེར་དེ་དང་འདྲ་བ་ལ་མིག་གྱེན་
དུ་གཏད། པུས་མོ་ལ་ལག་པ་བཀབ། ཧཱུཾ་རིང་གི་མཐར་ཧིག་གི་འདྲེན་ཡུན་རིང་སྦྱངས་ནས།
ལྕམ་པའི་རྐང་འཇམ་པོ་རྡོ་རྗེའི་བུ་གར་ཅུང་ཟད་འཇུག་ཅིང་མཐར་རྩ་བར་ལྷན་གྱི་གཏོང་ངོ༌། །
དེ་ནས་དེ་འདྲེན་པ་ལ་བསླབ། དེ་ནས་མདུན་མནན་ཏེ་འཕོངས་འབྱེད་འཛུམ་གྱི་དབྱུང་བ་
ལ་བསླབ། དེ་ནས་དངོས་གཞི་ལ་འཇུག །འཛིན་པ་ལ་སེམས་ཀྱི་ཐིམ་བུ་སྟེ་འཁྲུལ་འཁོར་
གསུམ་པ་དང་རྟིང་བས་དྲ་བ་དང༌། བརྡེགས་པའི་གནོན་པ་ཁོ་ན་ཡིན་ནོ། །ཀུན་ཏུ་བཟང་
མོའི་ལུགས་སོ། །དེ་ནས་ཐམས་ཅད་ལ་ཡང་རུས་སྦལ་འགྲོས་ཀྱིས་ཕབ། སོ་སོའི་མན་ངག་
གིས་ཕྱག་རྒྱ་ལ་སྦྱོར་བཞིན་པའི་ངང་ནས་བཟུང་ཀློག་གང་འགྲུབ་བྱ། དེ་ནས་འདྲེན་ལྔ་དང་
འགྲེམ་དགུ་པོ་དེ་རྣམས་ཅི་རིགས་པ་བྱ། ཐམས་ཅད་ལ་སེང་གེ་རྣམ་རོལ་གང་མང་བྱ་སྟེ།
ཟློག་པ་དང་ཁྱབ་པར་བྱའོ། །དེ་ནས་བུམ་པ་ཅན་གང་མང་བསྒོམ་ཏེ་རླུང་དང་བསྲེའོ། །ཡེ་
ཤེས་ཆེན་པོར་སྐྱེལ་བ་ནི་སྒྱུ་ལུས་སྦས་དོན་དང་འདྲའོ། །མ་རྒྱུད་སྤྱིའི་རྫོགས་རིམ་མཁའ་
འགྲོ་རྣམ་གསུམ་གྱི་གསང་ལམ་བཤད་ཟིན་ཏོ། །
འདི་ལ་གཞུང་ཤིང་ཡིག་རྙིང་ཁོ་ན་ལས་ཕྱིས་ཡི་གེ་གསར་པའི་བསྲེ་སླད་མེད་ཅིང༌།
ཕྱིས་ཀྱི་ཡི་གེ་འཁྲུལ་འཁོར་ཉི་ཤུ་པ་དང་ཉེར་གཅིག་ཟེར་བ་གཉིས་གདའ་ནའང༌། གཞན་
ནས་རྐུས་ཤིང་ཁུངས་མེད་ལ། ཕྱི་མ་རྣམས་འདི་ཡང་ནཻ་གུའི་གསང་ཁྲིད་ཡིན་ཟེར་བ་ཆེས་
འཁྲུལ་ལོ། །འདི་ལ་ཡིག་རྙིང་ཡིག་ཆུང་དྲུག་ཡོད་དོ། །ཨྠྀི། ཤུབྷཾ། །
༈ གསུམ་པ་ནི་མངའ་བདག་མཻ་ཏྲི་པའི་ལས་རྒྱུས་མན་ངག་ནི། བདེ་བ་བཟུང་བ་དང༌།
བདེ་བ་སྐྱེད་པ་དང༌། བདེ་བ་སྦྱང་བ་དང༌། བདེ་བ་གནས་པའི་ཐབས་སོ། །དང་པོ་ནི། གཏུམ་
མོ་དང་ཕྱག་ཆེན་ལ་གོམ་པར་བྱེད་པའོ། །གཉིས་པ་ལ་མཐར་སྐྱེས་ཀྱི་གྲོང་དུ་ཞུགས་ཏེ་
20-1-208


མཚན་ལྡན་གྱི་རིག་མ་བཙལ་བ་དང༌། འགྱུར་བ་བཅོ་ལྔའི་རླུང་ལ་རབ་ཏུ་གོམ་པ་དང༌། སྦྱོར་
བ་ལ་མཁས་པའི་རབ་ཏུ་གོམ་པ་དང༌། སྐུ་བཞིའི་བདེ་བ་སྐྱེད་པའོ། །དང་པོ་ནི། རིགས་
དང་མཐུན་པ་དང༌། རྩ་དང་ལྡན་པ་དམན་པའི་རིག་མའོ། །དང་པོ་ནི། དཀར་ཤམ་མོ་རྡོ་
རྗེའི་རིགས། སེར་སྐྱ་མོ་རིན་ཆེན་རིགས། དམར་སྨུག་མོ་པདྨའི་རིགས། སྨེ་བ་ཅན་མ་ལས་
ཀྱི་རིགས། སྔོ་སངས་མ་དེ་བཞིན་གཤེགས་པའི་རིགས་སོ། །གཉིས་པ་ནི། དུང་ཅན་མ་རྩ་
རྩེགས་པའི་རྩེ་མོ་ལྟ་བུ། པདྨ་ཅན་མཁལ་མ་བཞིབ་པ་ལྟ་བུ། གླང་སྣ་ཅན་ཐུང་ཞིང་གུག་པ།
ལི་རི་ཅན་ཐག་བཅུས་ཀྱི་རྩེ་མོ་ལྟ་བུའོ། །གསུམ་པ་ནི། བྲམ་ཟེ་རྒྱལ་རིགས་རྗེ་རིགས་གསུམ་
སྤང༌། དམངས་རིགས་ང་རྒྱལ་ཆུང་བའི་ཤེས་པའི་ཡུལ་དུ་ཕན་འདོགས་ཆེ་བའོ། །གཉིས་པ་
འགྱུར་བ་བཅོ་ལྔ་ནི། འདུག་སྟངས་ལྔ། སྐད་ལྔ། དམིགས་པ་བཏོད་པ་ལྔའོ། །དེ་དག་ལ་
འདུག་སྟང་དང་སྐད་དང་དམིགས་པ་རེ་རེ་སྦྲགས་ཏེ་སྒོམ་དགོས་པའི། དང་པོ་ནི། གཅེར་བུའི་
འདུག་སྟངས༌། ཙོག་བུར་འདུག་ནས་ལག་པ་བྲང་ལ་སྣོལ། སྒྲ་གླང་ཆེན་ཧཾ་སྐད་ཀྱིས་འདྲེན།
དམིགས་པ་ལྟེ་བར་བཏོད། དང་པོའོ། །གྱད་སྟོབས་པོ་ཆེའི་འདུག་སྟངས། རྐང་པའི་རྟིང་པ་
འོག་སྒོར་གཏད་ལག་པ་དང་པུས་མོ་ས་ལ་བཙུགས། སེང་གེའི་ངུར་སྐད་ཁྱུང་ཁྱུང་ཕཊ་ཀྱིས་
སྒྲས་དྲངས། སེམས་སྙིང་ཁར་བཏོད། གཉིས་སོ། །དྲང་སྲོང་བསྟན་མའི་འདུག་སྟངས། རྡོར་
དཀྱིལ་ལག་མགོ་འཕོངས་ཚོས་ཀྱིས་མནན་ཧིག་འདྲེན། མགྲིན་པར་སེམས་གཏོད་གསུམ་
པའོ། །རིགས་ངན་གྱི་འདུག་སྟངས། ཙོག་བུ་པུས་འཁྱུད་དང༌། གཅན་གཟན་སྣོམ་སྐད་སྣ་
ནས་འབུད། སྨིན་མཚམས་སུ་སེམས་བཏོད་བཞི་པའོ། །སྒེགས་པོ་འགྱུར་བའི་འདུག་སྟངས་
ལངས་ཏེ་ཡང་རྐང་ངར་ས་ལ་བཙུག ཁུ་ཚུར་མཆན་ཁུང་དུ་བཅུག །ཝ་སྐད་འདོན་པ་ལྟ་བུ་
ཝ་མོའི་བཞད་སྒྲ་ཁ་ནས་འདོན། སྤྱི་བོར་སེམས་གཏོད་དོ། །གསུམ་པ་སྦྱོར་བ་ལ་མཁས་པ་
ལས། གདན་{དིངས་[གདིང་]པ་ནི་དངུལ་ལམ་གཤའ་ཚེའི་རིགས་ཀྱི་སྣོད་ཕུག་རོན་གྱི་སྒོང་
20-1-209


ང་ཙམ་སྒོང་གཟུགས་མ་ཁ་དང་ལྡན་པ། ཁབ་ཤུལ་ཙམ་གྱི་བུ་ག་མང་པོ་ནང་དུ་ཅུང་ཟའི་ཕྱེ་
ཧྲོས་དང་བའི་འོ་སྐོལ་བླུག་པའི་རྣམ་ལྔའི་ཁ་བཅད་དེ་ལའང་ཁབ་ཤུལ་གསུམ་བཏོད། ཐག་
པ་བཏག་དེ་སྐེད་པ་ལ་གདག་ལ་དེ་ཉིད་འཕོངས་སུ་ཆུད་ཙམ་བྱའོ། །སྐུ་འདྲེན་པ་ནི་བལ་གྱི་
བགང་རྡུར་གྱི་འབེ་ལྟོ་ཕྱག་རྒྱའི་སྐུར་བཅུག །ཆུས་འཆང་བའི་བཅིང་བ་ནི་ནུ་མ་དང་མཆན་
ཁུང་བསྡམ་པའོ། །རྒྱབ་ཡོལ་བྲེ་བ་ནི། རས་འབོལ་དཀྱུས་ལ་མཐོ་དོ་ཞེང་དུ་མཐོ་གང་ཡོད་
པ་སྐེད་པའི་འོག་ཏུ་འཇུག་པའོ། གདུགས་འབུག་པ་ནི་རས་དེ་ཙམ་ཞིག་འཇིང་འོག་ཏུ་འཇུག་
པའོ། །རྩ་གསོ་བ་ན་རིག་མ་ལ་འཇམ་བཤལ་བཏང༌། དེ་རྗེས་བའི་འོ་མ་སུམ་ཆ་ཙམ་སྐམས་
སྐམས་སུ་བསྐོལ་བར་བྱས་ལ། གུར་གུམ་ཨ་ཀར་ནག་པོ། ལི་ཤི་གསུམ་བཏགས་ལ་བཏབ་
དེ་བཏང༌། ར་ཤ་ཆུ་སེར་བཏོན་པ་སོགས་ཚད་བརྟེན་དུ་འཇུག་གོ །དེ་ནི་རྒྱ་གར་གྱི་དབང་
དུ་བྱས་པ་སྟེ། བོད་ཡུལ་གྱི་ཟས་སྤྱོད་དང་བསྟུན་དགོས་སོ། །རྩ་བླང་བ་ནི་བུར་དཀར་དང་
བདུད་རྩི་སྲེས་ལ་སྙུག་སྦུགས་བཀང༌། རྩེ་མོ་རྩ་ལ་རགས་ཚོད་བཏང་ཏེ་བྷ་གར་བླུགས་པའོ། །
རྩ་མཐུ་སྐྱེད་པ་ནི་ཆགས་སྤྱོད་སྣ་ཚོགས་ཀྱི་གཡའ་བླང་བའི་འཁྲང་པོར་བྱེད་པ་ཆང་གར་མ།
ཕུལ་གང་ཙམ་བླང་བའི་ངོ་བཟི་ཙམ་བྱེད་པའོ། །བཞི་པ་རྒྱུ་བཞིའི་བདེ་བ་སྐྱེད་པ་ནི། རྩ་དང་
སྤྲད་པ་ཏེ་དུང་ཅན་མ་ཡིན་ན་རྡོ་རྗེ་པདྨའི་གཏིང་ཕྱིན་པར་འབུར། པདྨ་ཅན་མ་ལ་བཤང་ལམ་
ཕྱོགས་ནས་རྡར་ཏེ་པདྨར་བཅུག །པདྨའི་ནང་རྡོ་རྗེ་ཀྲུག་ནས་གཏིང་ལས་སོར་གཉིས་ཙམ་
ཚུར་འཐེན་པ་བཙལ། དུང་ཅན་མ་ལ་རྒྱབ་འཕོང་ཕྱོགས་ལ་བཞར་ནས་བཅུག །ལི་རི་ཅན་ལ་
སྟེང་ཏེ་བྱ་ལྕེའི་འོག་ཏུ་དྲུད་དོ། །དེས་རྩ་དང་འཕྲད་འོང༌། སྤྱིར་རིགས་བཅོ་ལྔ་ཡོད་ཀྱང་རྩ་སྤྲོ་
བ་བཞི་ལས་མེད་གསུང༌།
གསུམ་པ་བདེ་བ་སྦྱང་བ་གསུམ་སྟེ། མཉམ་བཞག་དང་རྗེས་ཐོབ་དང༌། ཤེས་པ་གསལ་
བཏབ་པའོ། །དང་པོ་ལ་དབབ་པ་དང་ཟློག་པ་དང༌། དཀྱིལ་བ་དང༌། སྤར་པ་བའོ། །དང་
20-1-210


པོ་ལ་ཏིང་ངེ་འཛིན་དང༌། འདུག་སྟངས་དང༌། རྡོ་རྗེ་ཅུང་ཟད་སྐྱོད་པའི་དབབ་པའོ། །དང་
པོ་ནི་བྷ་གའི་ནང་གི་དབུས་ནས་འོད་དམར་པོ་བྱུང༌། ནོར་བུར་ཞུགས་དབུ་མའི་ལམ་རྒྱུད་
སྤྱི་གཙུག་གི་ཐིག་ལེ་ཞུ་གསང་བའི་བར་དུ་ཕྱིན་པར་བསམ་པའོ། །གཉིས་པ་ནི། ཤེས་རབ་
མ་ལ་ལྷག་པོར་རས་འབོལ་དཔངས་སོར་བཞི་རྒྱ་མཐོ་གང་བཏང༌། བུ་མོའི་རྐང་པ་ཐབས་
ཀྱིས་བརླ་སྟེང་ནས་བཏང་རྒྱབ་ཏུ་འཁྱུད་ལྡེམ་བྱ། དཔའ་བོ་རྐང་པ་དགྲ་མེད་བསྐྱང་བའོ། །
གསུམ་པ་ནི། རུས་སྦལ་འགྲོས་སོ། །གཉིས་པ་ཟློག་པ་ནི་གསུམ་སྟེ། རླུང་དམིགས་ཀྱི་ཟློག།
ལུས་ཆ་སྒྲིམས་པའི་ཟློག །རིག་མའི་རླུང་གི་ཟློག་གོ །དང་པོ་ནི་འགྱུར་བ་བཞིའོ། །གཉིས་པ་
ལ་གོ་བར་ཟད་ལ། གསུམ་པ་ནི། རིག་མའི་རླུང་གསང་བར་སྡིག་པའོ། །རྩ་རྙེད་ན་ཧཱུཾ་དགུར་
འགྱུར་ལན་དྲུག་གིས་མར་ཆ་དྲང་ལ་དཀྱིལ་བ་དང་གནས་ཐབས་བྱའོ། །གསུམ་པ་དཀྱིལ་བ་
ནི་འགྱུར་བ་བཅོ་ལྔའི་སྒྲ་སྐད་རྣམ་གསུམ་བཏུད་པའོ། །བཞི་པ། སྤར་བ་ནི་རོ་རྩ་བའི་ཁ་ཟས་
བཟའ། བུད་མེད་མཛེས་མ་ལ་ལྟ་བ་དང༌། རྒོད་པ་དང༌། འཁྱུད་པ་དང༌། འཁྲིགས་ཐབས་
བྱེད་པ་ལ་སོགས་པའོ། །གཉིས་པ་རྗེས་ཐོབ་ནི་དཔའ་བོའི་ཡུལ་གྱི་ཞེན་པ་ཟློག་ལ་སྒོམ་པ་
བྱ་བ། འདོད་ཡོན་བཟང་པོ་ལ་མ་ཆགས་པར་རོལ་བའོ། །ཆགས་པའི་ཡིད་ཀྱི་ལྟ་བའི་སྒོམ་བྱ་
བ། བུད་མེད་ཐམས་ཅད་ལ་འདོད་ཆགས་སྐྱེས་ཏེ་དབྱིངས་སུ་བསྲེ་བའོ། །སྣང་བ་ཐུག་ཕྲད་
དུ་སྒོམ་པ་བྱ་བ་ཐམས་ཅད་ལ་བདེ་བས་འདེབས་པའོ། །གསུམ་པ་ནི། མཉམ་རྗེས་ཁྱད་མེད་
པར་སྟོང་པ་དང་བདེ་བས་རྒྱས་བཏབ་པའོ། །བཞི་པ། བདེ་བ་གནས་པའི་ཐབས་ནི། བུམ་
ཅན་དང་ཕྱག་ཆེན་དང་རྣམ་རོལ་བསྲེ་བའོ། །ཡང་ཡིག་རྙིང་གཅིག་ན་སྦྱང་བ་དང༌། དཀྱིལ་
བ་ལ་བཅས་པ་ལུས་ཀྱི་གནད་དམིགས་པའི་གནད་རླུང་གི་གནད་དེ་གསུམ་ཚང་དགོས་ཞེས་
པ་ཡོད་དེ། འགྱུར་ལྔ་གསུམ་བཅོ་ལྔ་ཉིད་དོ། །དགྱེས་མཛད། འདུས་པ། བདེ་མཆོག་གསུམ་
གྱི་མན་ངག་མངའ་བདག་མཻ་ཏྲི་བའི་གསང་ལམ་བཤད་ཟིན་ཏོ། །དགེའོ། །
20-1-211


བཞི་པ་ནི། མཻ་ཏྲི་བའི་སློབ་མའང་ཡིན་མོད། གདམ་ངག་གཞན་མང་པོས་ཐུགས་རྒྱུད་
འཆུག་པ་མི་མཉམ་རྡོ་རྗེའི་ཁོལ་པོ་ཞེས་པའམ། ཨ་ཏུ་ལ་དྭ་ས་བཛྲ་གྱི་ཆགས་ལམ་འདི་ལ་
མཉམ་པར་སྦྱོར་བའི་ཡུལ་དང༌། སྙོམས་འཇུག་དངོས་སོ། །དང་པོ་ནི། གཞན་བརྟག་ཐབས་
སྤྱི་དང་མཐུན། པདྨ་བརྒྱ་བྱིན་གྱི་མིག་འདྲ་བ་རྡོ་རྗེའི་རིགས། ཤིན་དུ་ཡང་བ་རིན་ཆེན་རིགས་
འདི་གཉིས་རླན་ཆེར་འབབ་པའོ། །རན་ཞིང་དྲོད་ཆེ་བ་རྣམ་སྣང་གི་རིགས། ཤིན་དུ་དམ་པ་
པདྨའི་རིགས། པདྨ་ཆགས་པའི་རླུང་གི་སྒྲ་འབྱུང་བ་ལས་ཀྱིས་རིགས་སོ། །རིམ་པའི་བྱ་ལྕེ་
ཡང་ཁྲོ་བོའི་སྣ་ལྟར་རྟོག་པོར་འགྲིལ་བ་དང༌། སྲབ་ཅིང་ཆེ་བ་དང༌། སྲབ་ཅིང་ཆུང་བ་དང༌།
སྡིགས་མཛུབ་ལྟར་སྒྲེང་བ་དང༌། སྣ་རྩེ་ལྟར་རྣོ་བའོ། །ཡང་རིམ་པ་ལྟར་རྣམ་འགྱུར་གྱི་དབང་
དུ་བྱས་ན། རིག་མའི་ཐབས་ལ་འོ་འཁྱུད་སོ་སེན་འདེབས་སོགས་རང་ཤུགས་སུ་འཆོར་བ་
དང༌། སྤྱོད་ལམ་བཏང་སྙོམས་སུ་འདུག་པ་དང༌། གཞན་མི་འབྱུང་བར་དམ་དུ་འཁྱུད་ཅིང་ཡར་
འདེགས་ཀྱི་སྒུལ་སྐྱོད་སྣ་ཚོགས་བྱེད་པ་དང༌། རེག་པ་མི་བཟོད་ཅིང༌། པདྨ་འཛུམ་སྡེབ་འབྱུང་
ལ་རྒོད་པ་དང༌། སྔངས་ཤིང་མཁུན་ཆེ་ཆུང་འདོན་ལ་གཏམ་ཚིག་མི་གོ་བར་སྨྲ་བ་རྣམས་སོ། །
གཉིས་པ་ལ། དབབ། དཀྱིལ། ཟློག་དྲངས་གནས་སུ་སྐྱལ་ལུས་ལ་དགྲམ་ཡན་ལག་ལ་སྤྲོ་
བའོ། །དང་པོ་ནི། རིག་མ་ལ་དལ་བུའི་སྲུབ་ཅིང༌། སྦྱོར་བ་དང་རིག་མ་ལ་མི་བསམ། ཤེས་
པ་དབྱིངས་སུ་གཏད་ལ་ཡེངས་སུ་གཞུག །གཉིས་པ་ནི། དེས་ཐིག་ལེ་རྡོ་རྗེའི་རྩ་བར་བབ།
བདེ་བ་རྒྱས། ཐིག་ལེ་འཆོར་ཚད་པ་ལ་མ་ཤོར་བའི་སྐབས་དེར། མིག་གྱེན་ལ་ཟློག །འོག་
སྒོ་སྡམས། རྒྱ་མཚོ་བཅིར། ཉ་བཞི་སྒྲིམ་ལག་པའི་སོར་མོ་གསུམ་འཇིབ། དབུགས་རྔུབ་སྟེ་
བསྡམས་རླུང་སེམས་སྙིང་ཁར་བསྡུས་ལ་བཞག །འདི་སྐབས་སྐྱོད་འཕྲོ་བཅད་ལ་རྡོ་རྗེ་པདྨ་
གཡོ་འགུལ་མེད་པར་བཞག །དེ་འདྲ་དབུགས་ཐེངས་གསུམ་བཏུད་ལ་བྱའོ། །
གསུམ་པ་ནི། དེ་ནས་ཀྱང་རྡོ་རྗེ་པདྨ་མ་ཕྲལ་བ་ཉིད་དུ་སྦྱོར་བ་དྲུག་པ་གཞན་དང་འདྲ་
20-1-212


བ་ལ། ཧལ་ཞེས་པའི་ཧི་རི་རི་ཞེས་འདྲེན། དེའི་བདེ་བ་ཡལ་ལ་ཁད་སོང་བ་ན། ཡང་དབབ་
སྐྱིལ་ཟློག་པ་སོགས་གོང་བཞིན་སྦྱང༌། དེ་ལྟར་ལན་གསུམ་བཞི་བྱ། བཞི་པ་ནི། རྡོ་རྗེ་པདྨ་
ཕྲལ་ཏེ། དེ་འཕྲལ་སྦྱོར་བ་དྲུག་པ་ཧཱུཾ་སྒྲ་དྭངས་བའི་ལན་གསུམ་བརྒྱུད་མར་དྲག་ཏུ་དྲངས།
དམིགས་པ་རྩ་དབུ་མ་རྙོག་སྤུ་ཙམ་གྱི་ནང་ན་ཡར་ཐིག་ལེ་སྐྱ་ཆིལ་ལི་ལི་སོང༌། སྤྱི་བོའི་ཧཾ་ལ་
སིབ་སིབ་ཐིམ་པར་བསམ་མོ། །འདི་སྐབས་ཧཱུཾ་དང་ཧིག་དང་ཎིར་སོགས་རང་གང་མོས་ཡིན་
ལ། ཐམས་ཅད་བྱས་ཀྱང་ཡོང༌། དེ་གསུམ་ཀར་སྣ་ནས་འབུད་པ་གཙོ་ཆེ་གསུང་ངོ༌། །ཧཱུཾ་ལ་
ངེས་པར་ཁ་སྡམ་པར་བྱའོ། །ལྔ་པ་ནི་ལྔ་སྟེ། དང་པོ་ཐིག་ལེ་སྒྲ་ཅན་དང་འདྲ་བ་ལ་ཨཾ་ཞེས་
དྲངས་པས། གསང་བ་ནས་ལྟེ་བར་སླེབ་པར་བསམ། །
༈ གཉིས་པ་ཙོག་པུ་པུས་བྲང་སྦྱར། ལག་སོར་གྲུ་མོར་འཇུས། ལག་ངར་པུས་མོར་
འཁྱུད་ལ་སྒོམ་ཐག་གི་ཕྱག་རྒྱ་བཅས། རླུང་ནང་དུ་དྲངས། འོག་འཐེན་པ་དང་གྲེ་བར་ངུར་
ངུར་གྱི་སྒྲ་ལྟེ་བ་ནས་སྙིང་ཁར་སླེབ་པར་བསམ། གསུམ་པ་དཀྱིལ་ཀྲུང་རྡོ་རྗེ་ཁུ་ཚུར་ལྟེ་ཁུང་
གཉིས་སུ་བཙུག །སྟོད་སྒུར་ལ་ཧག་ཧག་ཅེས་དྲངས་པའི་སྙིང་ཀ་ནས་མགྲིན་པར་སླེབ་པར་
བསམ། བཞི་པ་སྐྱིལ་ཀྲུང་རྡོ་རྗེ་ཐལ་མོ་ཁ་བུབ་རླ་གཡས་གཡོན་གྱི་སྟེང་ནས་གནོན་ཞིང་
འདྲེན་པས་ཧི་ཧིག་ཅེས་མགྲིན་པ་ནས་སྤྱི་བོར་སླེབ་པར་བསམ། ལྔ་པ་དཀྱིལ་ཀྲུང་ལུས་
སྲང་རྡོ་རྗེ་ཁུ་ཚུར་མཆན་ཁུང་གཡས་གཡོན་དུ་བཅུག །དབུགས་རྔུབ་པ་སྒྲ་གདངས་འོག་རླུང་
འཐེན་བྲང་སྐྱེད་མགྲིན་པ་དགུག་པའི་སྤྱི་བོ་ནས་གཙུག་ཏོར་ཏུ་དྲངས་བར་བསམ་མོ། །
༈ དྲུག་པ་ནི། སེང་གེ་རྣམ་རོལ། ༈ བདུན་པ་ནི། ལང་ལ་མགོ་དང་རྐང་ལག་ལན་
གསུམ་སྤྲུག་ལྡན་ནས་ཀྱང་དེ་བཞིན་དང༌། གན་རྐྱལ་ལས་ཀྱང་དེ་བཞིན་བྱའོ། །ལས་རྒྱའི་
གདམས་ངག་བོད་དུ་འགྱུར་བ་གཅིག་ལ་འདི་ལས་ཟབ་པ་མེད་ཅེས་གྲགས་ལ་གྲུབ་ཐོབ་
ཞིང་ཆོས་སང་ནས་བརྒྱུད་པ་ཡིན་ནོ། །གྲུབ་ཆེན་མི་མཉམ་རྡོ་རྗེའི་མན་ངག་ལས་རྒྱའི་སྦྱོར་བ་
20-1-213


བཤད་ཟིན་ཏོ། །ཀ་ལྱཱ་ཎ་བི་སུ་ལི།
༈ ལྔ་པ་ནི། སློབ་དཔོན་ར་ཧུ་ལ་ལས་རླུང་ལ་བུམ་པ་ཅན་དང་རླུང་འཁོར་ལོ་བཅིང་གྲོལ་
དང༌། ཕྱག་རྒྱ་འཆིང་གྲོལ་ཞེས་པ་རྣམས་རང་ལུས་ཀྱི་གདམས་པ་ཁོ་ན་ཡིན་པས། འདིར་
མི་འཆད་ལ། འདིར་ཤིང་རྟ་ཅན་བཤད་པར་བྱའོ། །འདི་རླུང་བཟུང་བ་དང༌། སྒོམ་པ་དང༌།
བོགས་དབྱུང་བ་གསུམ་མོ། །དང་པོ་ནི། དབེན་པར་དཀོན་མཆོག་མཆོད་པ་དང༌། སྨོན་ལམ་
བཏབ། བདུད་རྩི་ལྔའི་ཆུ་ཚན་དང༌། བའི་འོ་མ་སྐོལ་བས་བ་བྱུང་ལྔ་དང་བཟའ་བ་བདུད་རྩི་
ལྔ་སྲེས་བའི་ཁྲུས་བྱ། ཨ་རུ་ར། འོ་མར་བཙོས་པ་མུར་ཅི་བདེར་འདུག་པ་ཞག་ལྔའམ། བདུན་
བྱ། ཁྲིའུ་ཁྲུ་དོ་བ་བརྙན་པོ་གཉིས་གཞུ་སྙི་བ་གཉིས་ཆང་བཟུང་མར་བསྟན་ལ་གཡས་གཡོན་
དུ་བཅིང༌། དབུས་ཀྱི་སྟེང་དུ་ཤིང་གཅིག་གཉིས་གསུམ་གང་འོས་བཏང་ལ་བཅིང༌། རྗེ་བཙུན་
མ་དང་མགོན་པོ་གཙོ་བོར་གྱུར་པ་དང་མཁའ་འགྲོ་ལྔ་ལ་གཏོར་མ་བཟང་དུ་ཕུལ། ཚོགས་
མཆོད་རྒྱས་པར་བྱ། ནང་གཏོར་མ་བསྡུས་པས་སྐབས་སུ་སློབ་མ་ཤིང་རྟ་ལ་སྐྱོན། རྐང་པའི་
ཕྲང་བའི་གཞུའི་ཆང་ཟུང་ནམ་ཙམ་བྱ། ལག་གཉིས་ཐལ་མོ་སྤྱི་བོར་སྦྱར་ལ་རྐྱང༌། ལུས་ཁོང་
སྟོང་གི་དཀྱིལ་གྱི་དབུ་མ་ནས་སེམས་ཐིག་ལེ་འུ་རུ་རུ་ཐོན་ཚངས་བུག་རྒྱུད། མཁའ་དབྱིངས་
མཐོན་པོར་ཐིག་ལེ་ལ་སེམས་གཏད། རྐང་པ་བརྐྱང་ཏེ་འོག་སྒོ་བསྡམ་དུ་བཅུག །བླ་མ་དང་
གྲོགས་ཀྱི་རོལ་མོའི་སྒྲ་བྱ། གུ་གུལ་བདུག །བླ་མ་ཡི་དམ་མཁའ་འགྲོ་གསུམ་ལ་གསོལ་བ་
དྲག་ཏུ་བཏབ། ཡང་ཡང་གཞུ་རྒྱུད་སྐུལ་ལོ། །དེ་འདྲ་ལན་མང་དུ་བྱས་པས་འོག་གི་རླུང་ཟིན་
པར་འགྱུར་རོ། །ཡང་ཙོག་པུ་བྱ་རོག་འདུག་སྟངས་ལ། རྐང་མཐེབ་ལ་གཞུ་རྒྱུད་རིག་གེ་བྱ།
རླུང་གི་འདེགས་པར་བསམ། འོག་རླུང་སྡམས། རོལ་མོ་སོགས་གོང་བཞིན་བྱའོ། །འདིས་
སྟེང་རླུང་ཟིན་པར་འགྱུར་རོ། །དེ་ཡང་རླུང་ཚེས་གཅིག་གི་སྔ་དྲོ། མེ་རླུང་གནམ་སྟོང་གི་སྲོད།
ཆ་མཉམ་ཉེར་གཉིས་ཀྱི་ཉིན་ཕྱེད་ལ། རླུང་ཆེན་པོ་ཚེས་བརྒྱད་ཐོ་རངས་འཛིན་ཏེ། ཚ་ཤས་ཆེ་
20-1-214


བ་དང༌། གྲང་ཤས་ཆེ་བ་དང༌། བད་ཀན་ཅན་དང༌། རླུང་ལྷག་པར་ཆེ་བ་རྣམས་ལ་རིམ་པས་
ཤེས་སོ། །འདི་སྐབས་འཕར་གཡོ་བརྒྱལ་བ་སོགས་བྱུང་ན་རླུང་ཟིན་ཞིང་ཚུད་པ་ཡིན་ལ། བླ་
མའི་གྲོགས་ཀྱི་རྟག་ཏུ་ལྟ་བ་གལ་ཆེའོ། །ཐལ་ཉེན་བྱུང་ན་སྦྱོར་བ་ཀློད། ཐུན་མཚམས་སུ་དབུ་
མའི་ནང་སྨིན་མཚམས་སུ་ཧཾ་དཀར་པོ། རྡོ་རྗེའི་རྩེར་ཨཾ་དམར་པོ། རླུང་ཁ་སྦྱོར་དྲག་པོ་སྒོམ།
བདེ་ཤས་ཆེ་ན་འོག་ཀློད་སྟོང་ཤས་ཆེ་ན་སྟེང་ཀློད། མཉམ་ན་ཟུང་དུ་འཇུག་པར་མནན་ནོ། །
དྷུ་ཏིར་ཤེས་པ་ཡར་འགྲོ་མར་འགྲོ་བྱས་ལ་ལྟ་རེས་བྱའོ། །འཕར་གཡོ་ཀུ་ཅོ་རྒྱལ་བ་སོགས།
ཆེས་ན་རླུང་གི་དུག་དབྱུང་བ་བྱ་སྣ་རྩེར་ཁབ་ཙག་བྱས་ཁྲག་དབྱུང་བ་སོགས་བྱའོ། །སྤྱི་གཙུག་
དང་སྙིང་ཀར་བདུད་རྩི་ལྔ་དང་མི་ཚིལ་བྱུག་ལུས་གཡེར་མ་དང་སྲན་ཕྱེའི་མཉེས། ཆུ་སྐོལ་ལ་
ཏང་འཁུན་པའི་ཕྱེ་བ་བཏབ་པ་བཏུང་པའི་ཁྱབ་བྱེད་ལོག་པ་སེལ། འབྲུ་མར་དང་གཡེར་མ་
ཚིགས་པར་བྱུག་ལ། རྐང་འོག་གི་ཡཾ་ལ་སེམས་གཏད། དེ་དག་གི་སྙོ་པ་དང༌། ཁྱབ་བྱེད་ལོག་
པ་དང༌། ཤ་ལྤགས་བར་དུ་ཞུགས་པ་དང༌། རྩུབ་མོའི་སྦྱོར་བ་ཞི་བར་འགྱུར་རོ། །གཉིས་པ་
ལ། སྦྱང་བ། སྤེལ་བ། དབང་དུ་བྱའོ། །དང་པོ། དབུགས་འགྲེང་བ་ལ་དམིགས་སྐོར་གཅིག
གསང་འདུས་དང་མཐུན་པའི་རྡོར་བཟླས་ལ་དམིགས་སྐོར་གཅིག སྟེང་རླུང་འོག་རླུང་འཐེན་
པ་ལ་དམིགས་སྐོར་རེ་རེ། ཁ་སྦྱོར་གནོན་པ་ལ་དམིགས་སྐོར་གཅིག རྩ་གསུམ་ལྟེ་བར་སྲད་
བུ་ལྟར་དཔྱང་པ་ལ་གཡས་སུ་ཨེ་དམར་གཡོན་དུ་ཝཾ་དཀར་བབས་འོག་རླུང་འཐེན་པས་ཨེ་
ཝཾ་དབུ་མར་ཞུགས། སྤྱི་གཙུག་ཏུ་དྲངས་པོ་ལུས་བདེ་བ་དང༌། ཡང་བ་དང༌། ཟོ་མདོག་པ་དེ་
བ་འབྱུང་ངོ༌། །
གཉིས་པ་ནི། སྦྱོར་བའི་དོན་དང༌། ཡི་གེའི་དོན་དང༌། དེ་ཁོ་ན་ཉིད་ཀྱི་དོན་དང༌། ཕྱག་
རྒྱ་ཆེན་པོའི་མན་ངག་སྟེ་བཞི་ལས། དང་པོ་ནི། སེམས་ཅན་ཐམས་ཅད་སེམས་དཔའ་སུམ་
བརྩེག་ཏུ་ཡེ་ནས་གནས། རང་སེམས་འོད་དཀར་པོ་སྲན་རྡོག་ཙམ་འོག་སྒོ་ནས་དྷུ་ཏི་ནང་ལ་
20-1-215


འུ་རུ་རུ་ཐོན། ཉི་ཟླ་ཐུག་པར་འཕོང༌། ནམ་མཁའ་ལྟར་རྒྱ་སྐྱེད་པ་སྟེ། སེམས་ཅན་ཐམས་ཅད་
ཀྱི་སེམས་མཁའ་ཁྱབ་ལ་སེམས་གཏད། རླུང་གཏོང་བའི་ཚེ་མར་བབ་སྟེ་འོག་སྒོར་སླེབ་པར་
བསམ་མོ། །གཉིས་པ་ནི། ལྟེ་བ་ནས་འབྲུ་གསུམ་སྦོར་བ་སྟེ་གཞན་དེ་དང་འདྲ། གསུམ་པ་ནི།
ལྟེ་བ་ནས་རིམ་པའི་སྟོང་པར་གཏོང་བ་ལ་སེམས་གཏོད་ཚུལ་གྱི་སྤྲོ་བསྡུ་གོང་དང་འདྲ། བཞི་
པ་ནི། དོན་དམ་པའི་ལྷ་སྔགས་གཉུག་མའི་གནས་ལུགས་ལ་མཉམ་པར་བཞག་པའོ། །བཞི་
ཀ་ལ་ཐུན་འཇིག་ཁར་སེམས་ཅན་ཐམས་ཅད་སེམས་དཔའ་སུམ་བརྩེག་ཏུ་གསལ་བས་ཧཱུཾ་
གི་མཐར་སྔགས་ཀྱི་སྐོར་བར་བསྒོམ་མོ། །ཐམས་ཅད་ལ་མདའ་ལྟར་འཕང་བ་དང༌། ནམ་
མཁའ་ལྟར་རྒྱ་སྐྱེད་པ་འདྲའོ། །གསུམ་པ་དབང་དུ་བྱ་བ་ནི། ལྟེ་བར་འཁོར་ལོ་དྲག་ཏུ་སྐོར་
ཞིང་རྒྱ་སྐྱེད་པ་དང༌། གསེར་གྱི་འཁོར་ལོ་འོག་སྒོ་ནས་དྷུ་ཏིར་བརྒྱུད་སྤྱི་བོ་ནས་མཐོན་མཁའ་
དབྱིངས་མཐོན་པོར་འགྲོ་ཞིང་སླར་འོང་བར་སྒོམ། གསུམ་པ་བོགས་དབྱུང་བ་ལ། རྒྱས་
བཏབ་པ་དང༌། ཟུང་དུ་འཇུག་པའོ། །དང་པོ་བདེ་བ་རོ་མཉམ་པ་ནི། ཕྱག་རྒྱ་མཚན་ལྡན་
ཁྲུས་བྱ། ལུས་ཟུང་སྐྱེད་རླུང་ལ་སླབས། གུར་གུམ་གྱིས་བྱུག །དངུལ་ཆུ་དུག་བཏོན་པ་ཐིགས་
པ་གཉིས་གསུམ་བྷ་གར་བྱུག །ཆང་གར་མ་ཅུང་ཟད་འཐུང་དུ་བཅུག་རང་གི་པང་དུ་ཙོག་པུར་
གནས་པའི་པདྨའི་སྐྱིལ་ཀྲུང་གིས་འཁྱུད་རྡོ་རྗེ་པདྨར་བཅུག རིག་མ་རླུང་འཇམ་པོར་གནོན་
དུ་བཅུག །དལ་བུས་སྲུབ། ཐིག་ལེ་རྡོ་རྗེར་སོན་པ་ན། འགྲོན་བུའི་རྒྱལ་པོའི་སྦྱོར་བ་དང༌།
རང་གི་འོག་སྒོ་སྡམས་སྟེང་མནན། བུ་མོའི་སྟེང་རླུང་མནན་འོག་རླུང་གསང་བར་ཀློད་པའི་
བདེ་བ་བཟུང་ཞིང་ཡེ་ཤེས་ངོས་བཟུང་ངོ༌། །དེ་ནས་ཧཱུཾ་དགུར་སྦྱོར་གྱིས་དྲངས་ཏེ། གསང་བ་
ནས་ཡར་སྤགས་པ་ཙམ་མམ། ལྟེ་བར་གཏད་ལ། ཧྲིང་འདྲེན་དང༌། སྙིང་ཀར་གཏད་ལ་ཨུཥྞི་
ཥ་དང༌། མགྲིན་པར་གཏད་ལ་ཧིག །ཅེས་སྟག་མོ་སྐྱུག་ཚུལ་དང༌། སྨིན་མཚམས་སུ་གཏད་
ལ་རྔུབ་ཅིང་སེང་གེའི་ངུར་སྡང་དང༌། སྤྱི་གཙུག་ཏུ་གཏང་རླུང་སྐོར་བ་གསུམ་གྱི་རྩ་གསུམ་
20-1-216


སྤྱི་གཙུག་ཏུ་ཐིམ་པར་བསམ་པ་སྟེ། ཕྱི་མ་གསུམ་དགང་འདྲེན་ཡིན་ནོ། །འགྲམ་པ་སྤྱི་དང་
འདྲའོ། །དེ་ནས་བདེ་བའི་ཤེས་པ་དེས་སྣང་གྲག་ལ་རྒྱས་འདེབས་པའོ། །
གཉིས་པ་ཟུང་དུ་འཇུག་པ་ནི། སྟོང་པར་རོ་སྙོམས་པ་སྟེ། དེ་ལ་དང་པོ་ཚིག་དྲུག་དང་
སྟེང་སྒོ་བཅད་པ་ནི། རྩ་གསུམ་ཐིག་གུ་ལྟ་བུ་ལས་རྡོ་རྗེ་རྩེ་གཅིག་ཧཱུཾ་གིས་མཚན་པ་མདའ་
ལྟར་འཕང་བ་སོགས་བྱེད། འདི་སྐབས་སུ་སྐུ་མཉེས་བྱའོ། །སྣང་གྲགས་ལ་སྟོང་པའི་རྒྱས་
བཏབ་ཏེ་དབྱིངས་སུ་སྐྱོལ། གཉིས་པ་དབུ་མར་འཛུད་པ་ནི། རྡོར་དཀྱིལ་རྡོ་རྗེ་བསྡོམ་པ་
གསང་བར་བརྐྱང་སྤྲུག་ཅིང་ལུས་སྒྲིམ་མིག་འབྱེད་འཛུམ་ཅུང་ཟད་སྤེལ་བསུས་པ་འགྱུར་
བྱ། རྩ་གསུམ་ལ་ཝཾ་དཀར་ཧཾ་སྔོ་ཨི་དམར་བའི་མཚན་པ། རླུང་མནན་པས་རྩ་གསུམ་འདུས་
མདོར་སླེབ། འོག་རླུང་སྡམས། རྡོ་རྗེ་སྡམས་པ་ཁ་ཐུར་སུབ། མིག་བཟློག་སྟེ། ཧཱུཾ་ཞེས་དྲངས།
ཡིག་གེ་གསུམ། སྤྱི་བོར་དྲངས་ཡང་ཡི་གེ་རྣམས་ཡར་འགྲོ་མར་འགྲོ་བྱའོ། །སེམས་རྟགས་ལྔ་
ཡོན་ཏན་བརྒྱད་འབྱུང་ངོ༌། །ཡང་དེ་ཐམས་ཅད་ཀྱི་ཉམས་སྣང་གྲགས་རྒྱས་བཏབ། བདག་
མེད་མའི་ནང་ཁྲིད་རྫོགས་རིམ་དང༌། དེ་ཡང་ཟུང་འཇུག་ཏུ་བྱའོ། །བར་ཡིག་རྙིང་ལས་ཤེས་
པར་བྱའོ། །གྲུབ་ཐོབ་ར་ཧུ་ལའི་གདམ་པ་ལས་རྒྱ་དང་འབྲེལ་བ་བཤད་ཟིན་ཏོ། །
གཞན་ཡང་ར་ཧུ་ལའི་རླུང་ཕྱོགས་གཞན་རྣམས་དང༌། སུ་ཁའི་སྐོར་གྱི་ལྟེ་བ་སྤྲུལ་འཁོར་
གྱི་རྫོགས་རིམ་དང༌། བདག་མེད་མའི་ནང་ཁྲིད་ཀྱི་རྫོགས་རིམ་དང༌། ཕྱིས་གཉེན་སྟོན་ཆེན་
པོ་ལས་བྱུང་བའི་འཆི་མེད་གྲུབ་པ་སོགས་ཀྱང་ལེགས་པར་འབྱོར་ན། གཞན་ལུས་ཀྱི་རྫོགས་
རིམ་ལ་ཐོགས་པ་མེད་པའི་མཐུ་ཐོབ་པར་འགྱུར་རོ། །ཤངས་ཆོས་ཀྱི་མན་ངག་དར་ཡང་བདེ་
བ་ལམ་བྱེད་ཀྱིས་འདི་རྣམས་དེང་སང་ཕལ་ཆེར་ལ་དཀོན་ཞིང༌། ར་ཧུ་ལའི་མན་ངག་གི་དཔེ་
རྣམས་ཅུང་ཟད་མོད་ཀྱང་ལག་ལེན་ཕྱོགས་མགོ་ཙམ་ཡང་མ་ཐེང་བ་ཤས་ཆེ་ཞིང༌། ལྷག་མ་
རྣམས་དཔེ་ཡང་ཅུང་ཟད་དཀོན། ནི་གུའི་གསང་ལམ་ལ་ལག་ལེན་ཅུང་ཟད་ཡོད་མོད་ཀྱང༌།
20-1-217


བསྲེ་སླད་བྱས་པ་དང༌། ཁུངས་མེད་སྦྱོར་བ་སོགས་སྣང་བས། དེ་དག་ལ་ཕན་པའི་ཕྱིར་ཡི་གེ་
རིགས་ཆིག་ཆོག་རྒྱལ་པོ་འདི་བྱས་པ་ཡིན་ནོ། །རབ་ཟབ་ལམ་འདི་བཤད་པས་ཀྱང༌། །འགྲོ་
ཀུན་བདེ་ཆེན་སྐུ་འགྲུབ་སྟེ། །ཟག་མེད་བདེ་བ་ཆེར་རྒྱས་པའི། །མཆོད་སྤྲིན་རྒྱུན་མི་འཆད་
པར་ཤོག། །།
ཅེས་ཤངས་པ་བཀའ་བརྒྱུད་ཀྱིས་མན་ངག་ཆགས་ལམ་འཁྲིད་ཚུལ་རིམ་པ་ལྔ་ཡོད་པ་
ཆབ་གཅིག་ཏུ་སྒྲིགས་པ་སྟེ། ཐབས་ལམ་གསེར་གྱི་ཕུང་པོ་ཞེས་བྱ་བ་འདི་ཡང་གཙང་སྨྱོན་
ཀུན་དགའ་དཔལ་བཟང་གིས་བསྐུལ་ནས། ཏཱ་ར་ནཱ་ཐས་སྦྱར་བའོ། །མངྒ་ལཾ་བི་སྟཱ་ར་ཀུ་རུ།
ཞུས་དག དགེའོ། །དགེའོ། །
20-1-218


༄༅། །གྲུབ་ཐོབ་བརྒྱད་ཅུ་རྩ་བཞི་འབྲི་ཚུལ་ཞེས་བྱ་བ་བཞུགས།
༄༅། །ན་མོ་གུ་རུ། གྲུབ་ཐོབ་བརྒྱད་ཅུ་རྩ་བཞིའི་འབྲི་ཚུལ་ལ། དང་པོ། གཙོ་བོ་རྡོ་རྗེ་
འཆང༌། ཡི་དམ་མཚོན་བྱེད་ཁྲོ་བོ་མི་གཡོ་བ་སྔོན་པོ་པུས་བཙུགས། ཆོས་སྐྱོང་མཚོན་བྱེད་
མགོན་པོ་ཕྱག་བཞི་པ། བེ་ཏའི་འབྲས་བུ་འཛིན་པ་དེའི་རིག་མ་ཡིན་པར་ཕྱག་གཡས་ཀྱི་དང་
པོ་གྲི་གུག་གམ་མཆོག་སྦྱིན་གང་རུང༌། གཞན་སྤྱི་དང་འདྲ་བ་བྱ། ༼༡༽ གྲུབ་ཐོབ་རྣམས་ཀྱི་
སྔོན་དུ་ལཱུ་ཡི་པ་ནི་ཅུང་ཟད་སྐུ་ཤ་སྐམ་པོ་སྔ་སངས་མདུན་དུ་ཉའི་རྒྱུ་ལྟོ་སྤུངས་ནས་ཞལ་དུ་
གསོལ་བ། རལ་པའི་ཐོར་གཙུག་ཅུང་ཟད་ཡོད་པ་བྲང་སྤུ་དང་བཅས་པ། ༼༢༽ལི་ལཱ་པ་ནི་
རྒྱལ་པོའི་＜འདི་ཡན་གྱི་སྐུ་མདོག་མི་གསལ་བ་རྣམས་ནི་མཐིང་ཁ་སྨུག་ནག་གི་རྣམ་པ་ཅན་ཡིན་པར་མངོན།＞རྣམ་པ་
ཅན་ཁྲི་ལ་བཞུགས་པ། འཁོར་བློན་པོ་དང་བཙུན་མོ་ལ་སོགས་པས་བསྐོར་བའི་རྣམ་པ་ཅུང་
ཟད་ཡོད་ལ། ༼༣༽ བིརྺཱ་པ་ནི་ཡོངས་སུ་གྲགས་པ་བཞིན་ལ་མི་འདྲ་བའི་ཁྱད་པར་ནི། དབུ་
ཅོ་བྲེགས་ལ་མེ་ཏོག་གི་ཕྲེང་བ་ཙམ་མ་གཏོགས་རྒྱན་མེད་པ། ཕྱག་གཡས་སྡིགས་མཛུབ་
མཛད་པ། གཡོན་པ་བ་མེན་གྱི་རྭ་ཞལ་ཆང་གིས་གང་བ་འཛིན་པ། ༼༤༽ ཌོམྦི་ཧེ་རུ་ཀ་པ་ནི་
སྐུ་ལ་རུས་རྒྱན་ཚང་མ་ཡོད་པ། ཕྱག་གཡས་ན་དུག་སྦྲུལ་གྱི་ལྕག་འཛིན་པ་སྦྲུལ་མགོའི་
གདེང་ཀ་ཅན། སྐུའི་གཡོན་ནས་ཡུམ་གྱིས་འཁྱུད་ཅིང་སྟག་ལ་ཆིབས་པ། ༼༥༽ ཤཱ་བཱ་རི་པ་ནི་
སྐུ་ཤ་ནག་པོ་ཕྱག་གཡས་ན་མདའ་དང༌། གཡོན་ན་འོད་མའི་གཞུ་བསྣམ་པ། གཞུ་མཆོག་
ལག་པར་ཁོག་སྟོད་དང་ཁོག་སྨད་བཀལ་བ་རྨ་བྱའི་མདོངས་གཤིབས་པའི་སྨད་གཡོགས་
ཅན། མེ་ཏོག་དང་འབྲས་བུའི་རྒྱན་ཡོད་པ་རིག་མ་གཉིས་ཀྱང་རྒྱན་གཙོ་བོ་དེ་འདྲ་བའི་
རིགས་ཡིན་པས། རྒས་འཁོགས་པའི་རྣམ་པ་མི་བྱའོ། །༼༦༽ ས་ར་ན་པ་ནི་སྐུ་ཤ་དཀར་བ་
20-1-219


ཚངས་སྐུད་ཅན། མདའ་སྲོང་བ་གྲུབ་པའི་སློབ་དཔོན་རྒས་པ་མེད་པ་དེ་འདྲ་བའི་རིགས་ལ།
རྒས་འཁོགས་པའི་རྣམ་པ་བྱའོ། །༼༧༽ འདི་པ་ལཱ་ནི་དུར་ཁྲོད་ན་བཞུགས་ཤིང༌། མདུན་ན་
ཀེང་རུས་ཉལ་བ། རྒྱན་མེད་པ། དབུ་སྐྲ་ཅོ་བྲེགས་སྐུ་མདོག་སྔོ་སངས་མཉམ་བཞག་མཛད་
པའོ། །༼༨༽ ལི་ན་པ་ནི་ཉ་ཆེན་པོའི་ཁོག་པ་གཤག་པའི་དབུ་ནས་ཐོན་པའི་ཚུལ་གྱིས་ཞབས་
གཉིས་ཀའམ་གཅིག་ཁོག་པའི་ནང་དུ་ཆུག་ཙམ། ཕྱག་གཉིས་གར་མཛད་པའི་ཚུལ། སྐུ་ཤ་
སྔོ་སངས་རྒྱན་མེད་ཅིང་སྐྲ་འཛིངས་པ། ༼༩༽ གོ་རཀྵ་ནི་སྐྲ་བྲེགས་པ། ཕྱག་གཉིས་མཉམ་
བཞག་སྐུ་ཤ་སྔོ་སངས་དཀར་བ་སྙན་ལ་མུ་དྲ་ནག་པོ་དང༌། མགུལ་དུ་རྭ་དུང་བཏགས་པ། སྐུ་
ལུས་གཅེར་བུའམ། ཙནྡྲ་ཀནྟ་ཞེས་བྱ་བ་འཁོར་ལོ་ལྟ་བུའི་བེམ་པོ་གཤེགས་སུ་གསོལ་བ།
མདུན་དུ་བ་ལང་གི་ཁྱུ་མཚོན་བྱེད། ༼༡༠༽ ཙཽ་ར་གི་པ་ནི་དབུ་སྐྲ་རལ་པའི་ཐོར་ཚུགས་ཆུང་
དུ་ཡོད་པ། ཤིང་དྲུང་ན་གནས་ཤིང་མཉམ་བཞག་བྱེད་པ། ལོགས་གཅིག་ནས་ཕར་ཚོང་
བདག་ཞིག་གིས་ཚོང་ཟོག་རྣམས། སོལ་བར་སོང་བ་བྲིས། ༼༡༡༽ བི་ན་ས་ནི་ཛན་ཏར་དུ་
གྲགས་པ་སྐུད་པ་གསུམ་ཡོད་པའི་རྒྱུད་ཅན་བརྡུང་ཞིང༌། ཐོད་བཅིངས་པ་སོགས་རྒྱལ་པོའི་
རྣམ་པ་ཅན་བྱ། ༼༡༢༽ ཤཱནྟི་པ་ནི་དགེ་སློང་པཎྜི་ཏ་ཅུང་བགྲེས་པའི་རྣམ་པ་ཅན་པཎ་ཞྭ་
གསོལ་བ། ༼༡༣༽ ཏིཎྟ་པ་ནི་སྨ་ར་རིང་བ། ཤིན་ཏུ་རྒན་པོའི་ཆ་བྱད་ཅན། ཁྲི་ཐག་འཐགས་
པ། ༼༡༤༽ ཙ་མ་རི་པ་ནི་ལྷམ་བཟོའི་བྱ་བ་མཛད་པ། ༼༡༥༽ གརྒ་པ་ནི་རལ་པའི་ཐོར་
ཚུགས་ཅན་རལ་གྲི་ཐོགས་ནས་ནམ་མཁའ་ལ་འཕུར་བ། དེའི་ཉེ་བསྐོར་གཅིག་ན་མཆོད་
རྟེན་གྱི་བུ་གའི་སྒོ་ནས་སྦྲུལ་ཆེན་པོ་ཞིག་ལུས་ཕྱེད་ཙམ་ཐོན་པ་འབྲི། མཆོད་རྟེན་གྱི་ནང་ནས་
སྤྲིན་སྤྲིན་ཚོགས་ཀྱི་སྐུ་རིབ་ཙམ་མངོན་པ་བྲིས་ན་ལེགས། ༼༡༦༽ འཕགས་པ་ཀླུ་སྒྲུབ་ནི་
ཡོངས་སུ་གྲགས་པ་བཞིན་ནམ། ཡང་ན་སྐུ་ཤ་སྔོ་སངས་ཤིན་ཏུ་མཚར་བ་ལྟ་བུ་ལ་གཙུག་
ཏོར་མེད་པ། དགེ་སློང་གི་ཆ་བྱད་སྦྲུལ་འགོའི་གདེངས་ཀ་ཅན་དུ་བྱས་ན་དོན་དང་མཐུན་
20-1-220


ཞིང༌། ཅི་སྟེ་མཚན་དཔེ་ཅན་གྱི་སྐུ་ལ་མོས་ན་ནི། དེ་འཇའ་ལུས་ཀྱི་སྐུ་ཡིན་པའི། འཁོར་ལོ་
བསྒྱུར་བའི་རྒྱལ་པོའི་ཆ་བྱད་དུ་བྱས་ན་ལེགས་པར་མངོན་ནོ། །༼༡༧༽ ནག་པོ་སྤྱོད་པ་ནི་སྐུ་
ཤ་སྔོ་སངས་ཕྱག་ན་ཌཱ་མ་རུ་དང་ཐོད་པ་ཁ་ཊྭཱཾ་ག་བསྣམས་པ་ནམ་མཁའ་གདུགས་བདུན་
བདུན་རང་འཁོར་དང༌། ཌཱ་མ་རུ་བདུན་འཁྲོལ་སྲིན་མོ་རོ་ལངས་མ་ལ་ཆིབས་པ། རལ་པའི་
ཐོར་ཚུགས་དང་རུས་པའི་རྒྱན་དྲུག་གམ་སྟག་ལྤགས་ཀྱི་སྨད་དཀྲིས་སོགས་ཅི་ལྟར་རིགས་པ་
འབྲིའོ། །༼༡༨༽ ཨརྱ་དེ་ཝ་ནི་དགེ་སློང་ཤིང་ཀརྞའི་སློབ་མ་སྟེ། ཤིང་ལོ་ཆེན་པོ་ཞིག་ཕྱག་ན་
བསྣམས་པ། ༼༡༩༽ ཐ་ག་པ་ནི་གཡས་གཡོན་ཕན་ཚུན་དུ་ནགས་ཚལ་དང༌། གྲོང་ཁྱེར་རེ་རེ་
འབྲི་ཞིང༌། ཤིང་སྡོང་གཅིག་ཕྱེད་བསྙེས་སུ་བཞུགས་པ། དེའི་མདུན་དུ་དགེ་སློང་ཞིག་འགྲེང་
ནས་གཏམ་སྨྲ་བ། ༼༢༠༽ ནཱ་རོ་པ་ནི་རལ་པའི་ཐོར་ཚུགས་དང་རུས་རྒྱན་ཅན། མི་པགས་
གསོལ་བ། མི་ལྤགས་ཀྱི་རྐང་ལག་གཉིས་ནས་ཕྱག་གིས་བཟུང་ནས་ཞབས་བརྐྱང་བསྐུམ་གྱི་
ཚུལ་དུ་བཞུགས་པའི་གར་སྟབས་མཛད་པ། ༼༢༡༽ བི་ར་ལཱ་པ་ནི་རྣལ་འབྱོར་པ་ཅེ་སྤྱང་གི་
རོ་ཕྲག་པར་བཀལ་བ། ༼༢༢༽ ཙནྡྲ་ཏཻ་ལོ་པ་ནི་སྐུ་ཤ་སྔོ་ནག་ཏིལ་བརྡུང་བའི་རྣམ་པ་ཅན།
མདུན་དུ་རིག་མས་སྣོད་གཅིག་ནས་ཏིལ་བླུག་པའི་རྣམ་པ་ཅན། ༼༢༣༽ ཙནྡྲ་པ་ནི་པུ་ཏི་
རྒྱབ་དུ་ཁུར་ཞིང་པོད་ཆུང་ཞིག་ལག་ཏུ་ཐོགས་པ། རབ་བྱུང་གི་ཆ་བྱད་ཅན་ནོ། །༼༢༤༽ བྷ་
ཏྲ་པ་ནེ་ཕག་ཤ་དང་ཆང་བུམ་མདུན་དུ་བཞུགས་པ། ཚངས་སྐུད་ཅན། སྐྲ་ཤད་བཅིངས་པའི་
ཐོར་ཅོག་ཅན། རྒྱན་སོགས་རིན་པོ་ཆེའི་རྒྱན་ཅུང་ཟད་ཡོད་པ། དེའི་གཡས་ཕྱོགས་བྲག་
སྟེགས་ལྟ་བུའི་མཐོ་བ་ན། བླ་མ་རྣལ་འབྱོར་པ་རལ་པའི་ཐོར་ཚུགས་ཅན་གཅིག་བཞུགས་
པའོ། ། ༼༢༥༽ རུ་མཁའ་རུ་པ་ནི་ཕྱག་དར་ཁྲོད་ཀྱི་གོས་ལྷན་ཧྲུལ་པོ་ཕྱོགས་གཅིག་ཏུ་བསྡུས་
ནས་ཚོམ་བུ་མཛད་པ། ༼༢༦༽ ཛོ་ཀི་པ་ནི་དུར་ཁྲོད་གཅིག་ཏུ་འཕྲེད་ཉལ་མཛད་པ། རལ་
པའི་ཐོར་ཚུགས་ཅུང་ཟད་ཡོད་པ། ༼༢༧༽ ཀ་ལ་ཀཱ་པ་ནི་རལ་པའི་ཐོར་ཚུགས་ཅུང་ཟད་ཙམ་
20-1-221


དང་གཟུགས་མཛེས་པ། ཕྱག་མཉམ་བཞག་མཛད་པ། དུར་ཁྲོད་ན་གནས་པའོ། །༼༢༨༽ ཧུ་
ལི་པ་ནི་གཞོང་པ་རྣམས་སུ་གོས་རྙིང་པ་འཁྲུད་པའི་རྣམ་པ་ཅན་ནོ། །༼༢༩༽ ཀཾ་ཀ་ན་པ་ནི་
རྒྱལ་པོའི་རྣམ་པ་ཅན། རང་གི་ལག་གདུབ་ལ་བལྟ་ཞིང་འདུག་པ་ལ། ནམ་མཁའ་ན་ལྷ་དང་
ལྷ་མོས་མཆོད་པ་འབུལ་བ། ༼༣༠༽ ཀོ་པཾ་ལ་པའི་ལྭ་བ་པ་ནི་ས་ལ་རང་ཤོང་བཞིན་དུ་ས་
བྲུས་པའི་ཁ་མཚམས་ནས་མི་མགོ་སྐམ་པོས་བསྐོར་བའི་དབུས་ན་གཟིམས་པའམ། ཡང་ན་
བྲག་ཕུག་ན་གཟིམ་པ་མཉམ་བཞག་མཛད་པ་བྱས་ཀྱང་རུང༌། དགེ་སློང་གི་ཆ་བྱད་ཅན་ནོ། །
༼༣༡༽ ཌེངྒི་པ་ནི་སྣོད་གཅིག་ཏུ་འབྲས་བླུགས་ནས། གཏུན་ཤིང་གིས་འབྲས་བུ་སྦྲུ་ཞིང་ཆུ་
ལ་འཁྲུད་པའི་རྣམ་པ་ཅན། ཕྱོགས་གཅིག་ན་ཆང་ཚོང་མ་ཞིག་ཡོད་པ་བྲི། ༼༣༢༽ བནྡྷ་ས་ནི་
རྒྱལ་པོའི་རྣམ་པ་ཅན་ཞིག་ནམ་མཁའ་ལ་དགེ་སློང་ལྷུང་བཟེད་འཁར་བསིལ་ཐོགས་པ་འགྲོ་
བ་ལ་བལྟ་ཞིང༌། མདུན་ནས་ལྷའི་བཟོ་བོས་གཏམ་སྨྲ་བ། ༼༣༣༽ ཏིནྠ་པཱ་ནི་ཤོ་རྩེ་བ་ཞིག་
འབྲི། ཤོ་བརྒྱག་པ་གར་ལུགས་སུ་བྱེད། ༼༣༤༽ ཀུ་ཀུ་རི་པ་ནི་རུས་པའི་རྒྱན་དང་ཐོར་
ཚུགས་ཅན། བར་དུ་ཁྱི་མོ་ཡོད་པ་འབྲི། ༼༣༥༽ ཀུ་ཛི་པ་ནི་མདུན་ནས་སློབ་དཔོན་ཀླུ་སྒྲུབ་
ཡོད་པ། ལྟག་པར་ལྦ་བ་སྐྱེད་པའི་རྣལ་འབྱོར་བ་གཅིག་འབྲི། ༼༣༦༽ དྷ་མུ་པ་ནི་བྲམ་ཟེའི་
ཆ་བྱད་པུ་ཏི་མང་པོ་དང་བཅས་པ། ༼༣༧༽ མ་ཧི་ལ་ནི་ཡན་ལག་སྦོམ་ཞིང་ཤ་སུལ་ཅན་
གཞན་ལ་ལུས་སྟོབས་འགྲན་པའི་ཚུལ་ཅན་ནོ། །༼༣༨༽ ཨཎྜི་པ་ནི་ནགས་ན་ཤིང་ཁ་གཅོད་
ཅིང་ཤིང་ཁུར་འཁུར་ནས་འགྲོ་བ། ༼༣༩༽ བ་བྷི་ཧི་ནི་རྒྱལ་པོའི་རྣམ་པ་གཡོན་ཕྱོགས་ནས་
བཙུན་མོས་འཁྱུད་པ། ༼༤༠༽ ནི་ལོ་པ་ནི་པདྨའི་མཚོ་ནས་མེ་ཏོག་པདྨ་རྩ་བ་དང་ཡན་ལག་
དེ་གཅོད་པ། ༼༤༡༽ བུ་སུ་ཀུ་པ་ནི་ཞི་བ་ལྷ་སྟེ་མཐའ་དགེ་འདུན་གྱིས་བསྐོར་བའི་ཁྲི་སྟེང་
ནས་ནམ་མཁའ་ལ་ཅུང་ཟད་འཕགས་པ། དགེ་སློང་གི་ཆ་བྱད་ཆོས་འཆད་མཛད་པ། མདོག་
དཀར་ལ་དམར་བའི་ཤ་ཉམས་རྒྱས་པའོ། །༼༤༢༽ ཨིནྡྲ་བྷུ་ཏི་ནི་རྒྱལ་པོའི་ཆ་བྱད་ལ་བུད་
20-1-222


མེད་གླུ་དང་རོལ་མོ་བྲོ་གར་བྱེད་པ་མང་པོས་བསྐོར་བའོ། །༼༤༣༽ མི་དགོངས་ནི་འཁར་བ་
འཆང་ཞིང་ཁ་ཟས་སྣ་ཚོགས་པའི་དོན་དུ་བཀྲེས་པའོ། །༼༤༤༽ ཏོག་ཙེ་པ་ནི་དབུ་ལྭ་ཐོད་
བཅིངས་ཤིང་ཏོག་ཙེས་ཞིང་ཐ་རེངས་བརྐོས་པའོ། །༼༤༥༽ ཀཾ་བྷ་རི་པ་ནི་ལྕགས་མགར་གྱི་
ལས་བྱེད་པའི་རྣམ་པ་ཅན་ནོ། །༼༤༦༽ ཛ་ལན་དྷ་རི་པ་ནི་རྣལ་འབྱོར་བ་རལ་པའི་ཐོར་
ཚུགས་དང་རུས་རྒྱན་ཅན། ཞབས་ཕྱོགས་གཅིག་ནས་དཔུང་པ་ལ་བཀལ་བ། ཕྱོགས་གཅིག་
བཞེངས་པའི་པུས་བཙུག ཕྱག་སོར་མཛུབ་མོ་གཉིས་རྩེ་སྤྲད། གཞན་རྣམས་བསྣོལ་བའི་
ཕྱག་རྒྱ་མཛད་ནས། ཕྱག་རྒྱ་དེ་མགོ་འཇུག་མེ་ཏོག་གིས་སྤྱི་བོར་བཅིངས་པ་ཕྱོགས་གཅིག་
ནས་རིག་མས་བརྟེན་པའམ་ཕྱག་འཚལ་བ། ༼༤༧༽ ར་ཧུ་ལ་པ་ནི་དུར་ཁྲོད་དུ་འདུག་ཅིང་
སྐུ་ཤ་སྔོ་སངས་ཡིད་ཙམ་བགྲེས་པ། དབུ་སྐྲ་བྲེགས་པ་ཕྱག་གཉིས་མཉམ་བཞག་བྱས་ཤིང་
དུར་ཁྲོད་ཀྱི་མི་ལ་ལྟ་བ་ཞིག་འབྲི། ༼༤༨༽ དྷརྨ་པ་ནི་དགེ་སློང་བགྲེས་པོ་པུ་ཏི་ཕྱག་ན་
བསྣམས་པ། ༼༤༩༽ དྷ་ཀ་ན་པ་ནི་མཛོ་ལའི་ནང་དུ་སྣོད་ཆེན་པོ་ཞིག་བཅུག་ནས་སླང་མོ་
སློང་བའི་ཚུལ་དུ་བཞེངས་པ། ༼༥༠༽ བེད་དྷ་པ་ནི་གླང་གཉིས་ལ་གཉའ་ཤིང་བཙུག་ནས་
ཞིང་རྨོ་བའི་རྣམ་པ་ཅན། ༼༥༡༽ པད་ཀ་ཛ་པ་ནི་པདྨའི་རྫིང་བུའི་འགྲམ་ནས་སྤྱན་རས་
གཟིགས་ཀྱི་ལྷ་ཁང་གཅིག་ཡོད་པ་ལ། དགེ་སློང་གཅིག་གི་མཆོད་པ་འབུལ་བ། ཁོ་རང་བྲམ་
ཟེ་གཞོན་ནུའི་ཆ་བྱད་ཅན། འདིའི་ལོ་རྒྱུས་ནི་སྤྱན་རས་གཟིགས་དང་དབང་ཕྱུག་ཆེན་པོ་ནོར་
བའི་ལོ་རྒྱུས་ཡོད་པའི་སྤྱན་རས་གཟིགས་དམར་མོར་ཕྱག་གཡོན་ན་པདྨ་གཡས་དེའི་ཁ་
འབྱེད་པ། ཡུམ་གྱིས་གཡོན་ནས་འཁྱུད་པ། སྐུའི་གཡས་གཡོན་དུ་རྩེ་གསུམ་དང་ཐོད་པ་
བཞག་པའོ། །༼༥༢༽ དྲིལ་བུ་པ་ནི་སློབ་དཔོན་ཉིད་རྣལ་འབྱོར་པའི་ཆ་ལུགས་རུས་རྒྱན་སྟག་
ལྤགས་རལ་པའི་ཐོར་ཚུགས་སོགས་ཡོད་པ། སྐུ་ལུས་མི་ཤ་ཁའམ་སྔོ་སངས་རྡོ་རྗེ་དང་དྲིལ་
བུ་འཛིན་པས་ཡུམ་ལ་འཁྱུད་པ་ལ། ཡུམ་ནི་རྡོ་རྗེ་རྣལ་འབྱོར་མ་དངོས་སྐུ་མདོག་དམར་
20-1-223


པོའམ་གྲི་གུག་དང་ཐོད་པ་འཛིན་པ། དེ་ཡང་ནམ་མཁའ་ལ་འཕུར་སྟབས་སམ་བདེ་མཆོག་
ལྷན་སྐྱེས་བཞིན་གཡོན་བསྐུམ་བྱས་ཀྱང་རུང་སྟེ། ནམ་མཁའ་ལ་གཤེགས་པའི་མཚོན་བྱེད་
དུ་སྤྲིན་གསེབ་ཏུ་བཞུགས་པ། འོག་གི་ཕྱོགས་ནས་མཚོ་ལུད་པས་གྲོང་ཁྱེར་གྱི་ཕྱེད་ཙམ་པ་
ཁྱེར་བ་དང༌། མཚོའི་དཀྱིལ་ན་ཁ་སར་པཱ་ཎའི་སྐུའི་ཕྱེད་ཙམ་ཐོན་པ་འབྲི། ༼༥༣༽ ཛོ་གི་པ་
ནི་རྣལ་འབྱོར་པ་གཅེར་བུ་འཁར་བ་ཐོགས་ཤིང་ཡོ་བྱད་རྣམས་ཕྲག་རྒྱུག་གི་རྩེ་ལ་བཀྱོན་
ནས་ཕྲག་ཁུར་ཐོགས་པ་ཞིག་འབྲི། ༼༥༤༽ ཙ་ལུ་ཀ་པ་ནི་རྣལ་འབྱོར་པ་གཅིག་ལ་གྲི་སྔས་
སུ་བཙུག་ནས་ཉལ་བ། རི་དྭགས་ཀྱི་པགས་པའི་གདན་བཏིང་ཤིང༌། མདུན་དུ་བསྣོམས་ཤིང་
བསྐུར་བ། ༼༥༥༽ གོ་རུ་ཊཱ་ཤ་ནི་སྨད་ལ་ཤིང་ལོའི་གོས་ཅན་དབུ་སྐྲ་ཅོ་བྲེགས། སྙི་བཙུགས་
ཏེ་བྱ་ཤོར་བའི་རྣམ་པ་ཅན། ༼༥༦༽ ལུ་ཙི་ཀ་པ་ནི་བྲམ་ཟེའི་རྣམ་པ་ཅན་ལ་སྐྲ་དང་ཁ་སྤུ་
འཇབ་ཙེས་བཏོགས་སོ་ཟད་ཟད་གཅིག་འབྲི། ༼༥༧༽ ནིརྦུ་ཎི་པ་ནི་མལ་ཁྲི་ལ་རྒྱབ་བསྙེས་
སྙམ་ནས་ཟས་ཟ་བ། མདུན་དུ་རྣལ་འབྱོར་པ་གཅིག་ཡོད་པ་འབྲི། ༼༥༨༽ ཛ་ཡོན་ཏན་པ་ནི་
ཕྱག་ན་ཏིང་ཤག་བསྣམས་པ་གཏོར་མ་སྣ་ཚོགས་གཏོང་བའི་རྣམ་པ་ཅན། བྱ་སྣ་ཚོགས་
འདུས་པ། འཁོར་སློབ་མ་རྫ་རྔ་བརྡུང་བ་དང༌། གླིང་བུ་འབུད་པ་དང༌། སིལ་སྙན་སྒྲོགས་པ་
དང༌། པི་ཝང་བརྡུང་བ་སོགས་འབྲི། ༼༥༩༽ པ་ཙ་རི་པ་ནི་ཤིང་དྲུང་གཅིག་ན་རྣལ་འབྱོར་པ་
སྐྲ་བྲེགས་པ། ན་བཟའ་ཀ་ཙོ་རི་བྱ་བ་མདོམས་དཀྲིས་གྲུ་གསུམ་གཅིག་ལས་མེད་པ། སྣུམ་
ཁུར་ཕྱེད་ཙམ་ཟ་བ་མདུན་དུ་སྤྱན་རས་གཟིགས་དེའི་སྤྲུལ་པ་དགེ་སློང་གཅིག་ཡོད་པ་ཞིག་
འབྲི། ༼༦༠༽ ཙམྤ་ཀ་པ་ནི་རྒྱལ་པོའི་རྣམ་པ་ཅན། སྐྱེད་མོ་ཚལ་གྱི་དབུས་ན་བཞུགས་པ།
མཐའ་རྣམས་ཤིང་ཙམྦྷ་ཀ་སྟེ་ཡལ་ཀ་རྣམས་ཟླུམ་པོར་སྐྱེས་པ། ལོ་མ་ལྗང་ནག་མེ་ཏོག་སེར་
སྐྱ་ཡོད་པ། ༼༦༡༽ བྷི་ཀྵ་ཎ་པ་ནི་ཕྱག་ནི་གུ་བའི་སྣོད་བསྣམས་པ་དེའི་མདུན་དུ་མཁའ་འགྲོ་
མ་དམར་པོ་ཞི་བའི་རྣམ་པ་ཅན་སྐྲ་གྲོལ་བ། རུས་རྒྱན་ཡོད་པ་ཆོས་བསྟན་པའི་རྣམ་པ་ཅན།
20-1-224


གྲུབ་ཐོབ་དེ་རང་གིས་སོ་བཏོན་ནས་མཁའ་འགྲོ་ལ་འབུལ་བ། ༼༦༢༽ དྷེ་ལི་པ་ནི་མར་ནག་
གི་སྣོད་མང་པོ་བཤམས་ཏེ་འཚོང་བའི་ཚུལ་དང༌། ཁ་ཟས་སྣ་ཚོགས་བཤམས་པ། མདུན་དུ་
པཎྜི་ཏ་གཅིག་གི་ཆོས་སྟོན་པའི་རྣམ་པ་ཅན། ༼༦༣༽ ཀུམྦྷ་རི་པ་ནི་རྫ་མཁན་གྱི་རྣམ་པ་རྫ་
བཟོ་བ་བུད་མེད་དང་བཅས་པ། ༼༦༤༽ ཙ་རུ་ཊི་པ་ནི་ན་བཟའ་མི་ཁ་ལི་གསོལ་བ། སེལ་མི་
ཁ་ལི་ནི་རྔུལ་གཟན་འདྲ་བའི་དཀྱིལ་ནས་མགོ་འདོན་པ་ཡོད་པ་ལ་མགོ་བཏོན་པ། ཕྱེད་ཕྱེད་
མདུན་རྒྱབ་ཀྱི་གོས་ཡིན་པ་ལ་སྐ་རགས་བཅིངས་པའོ། །ཤིང་དྲུང་གཅིག་ནས་མེ་བཏང་ཞིང་
དུ་བ་འཐུལ་བ། ཕྱོགས་གཅིག་ནས་བཅུད་ལེན་གྱི་སྣོད་ཡོད་པ། མི་རྣམས་ལ་བཅུད་ལེན་དེ་
ནས་ཤིང་ལོ་གཅིག་གིས་འཐོར་ཚུལ་བྱེད་པ། མདུན་དུ་བུད་མེད་གཅིག་དང་བྱིས་པ་གཅིག་
ཐལ་མོ་སྦྱར་བ། དེའི་སྔས་སུ་མ་མོང་ཟླ་བོའི་ཚུལ་གྱི་ཡོད། དེའི་ལྟག་ཙམ་ན་བྲག་ཕུག་
གཅིག་ནས་དབུས་སུ་ལྷ་གཅིག །གཡས་སུ་ལྷ་ཆུང་བ་གཅིག །གཡོན་དུ་ལྷ་མོ་གཅིག་རྣམས་
གདན་གཅིག་ལ་སུམ་སྒྲིགས་སུ་འདུག་པ་འབྲི། ༼༦༥༽ རྣལ་འབྱོར་མ་མ་ཎི་བྷ་ཊ་བུད་མེད་
རྒྱན་ཐམས་ཅད་ཀྱིས་བརྒྱན་པ་ནམ་མཁའ་ལ་འཕུར་བའི་རྣམ་པ། འོག་གི་ས་གཞི་ལ་ཆུ་བུམ་
ཆགས་པ་གཅིག་འབྲི། ༼༦༦༽ རྣལ་འབྱོར་མ་མི་ཁ་ལི་ནི་གཅེར་བུ་རུས་པའི་རྒྱན་ཅན།
མཆན་དུ་ཁ་ཊྭཱཾ་ག་བཅུག་པ། སྐྲ་གྲོལ་བ་ཞལ་ནས། རལ་གྲི་བྱུང་བ་ཕྱག་གཡས་པའི་འཛིན་
ཚུལ། ཕྱག་གཡོན་ན་ཐོད་པ་བསྣམས་པ་ཞིག་འབྲི། ༼༦༧ ཨརྡྷ་དེ།༽ ༼༦༨༽ རྣལ་འབྱོར་མ་
ཀ་ན་ཁ་ལ་ཨརྡྷ་དེ་དང་འདྲ་བ་ལས་ཕྱག་གཡས་ན་གྲི་གུག་གམ་རལ་གྲི། གཡོན་པས་རང་གི་
དབུ་བཅད་དེ་བསྣམས་པ་འབྲི་བ་ཡིན་པ་ལ་རང་འགའ་ཞིག་ཕལ་བའི་རྣམ་རྟོག་གིས་དེ་འདྲ་
འབྲི་བ་མི་སྤྲོ་ན། ཕག་མོ་དབུ་བཅད་མའི་བྲིས་ཐང་རྙིང་པ་འགའ་རེ་ལ་འབྱུང་བ་བཞིན། སྐུ་
གཟུགས་ལ་ཡང་དབུ་ཡོད་ཅིང༌། ཕྱག་ན་ཡང་དབུ་གཅིག་བསྣམས་པ་བྲིས་ཀྱང་མི་འགལ།
འདི་གཉིས་ཀར་ནམ་མཁའ་ལ་གར་སྟབས་བརྐྱང་བསྐུམ་གྱི་ཚུལ་དུ་འབྲི། སྤྱིར་རྣལ་འབྱོར་
20-1-225


འདི་གཉིས་མཛད་པ་འདྲ་བ་བྱུང་བས་བཀོད་པའང་འདྲ་རུང་བས་ཆོག་གོ ། ༼༦༩༽ ཀ་ལ་པ་
ནི་ཁ་དོག་སྔོ་ནག་དུར་ཁྲོད་ནས་བྱས་པ། དེའི་མདུན་མཐོ་བ་ནས་རྣལ་འབྱོར་པ་རུས་པའི་
རྒྱན་ཅན་ཞིག་གིས་ཆོས་གསུངས་པའི་རྣམ་པ་ཅན་གཅིག་འབྲི། ༼༧༠༽ ཀནྡྷ་ལི་ཡར་གོས་
མཚམས་བྱེད་པའི་རྣམ་པ་ཅན་ལ་མདུན་ནས་མཁའ་འགྲོ་མ་གཅིག་གིས་ཆོས་སྟོན་པའི་རྣམ་
པ་འབྲི། ༼༧༡༽ དྷ་ཧུ་ལི་པ་ནི་རྩ་ཐག་འཚོང་བའི་རྣམ་པ་ཅན་འབྲི། ༼༧༢༽ ཨུ་ཊི་ལི་པ་ནི་
མགོ་ལ་ཐོད་བཅིངས་ཤིང་ལུས་ལ་ཙོ་མ་ཤེ་གོས་ཕུ་རུང་ཅན་གྱོན་པ། རིན་པོ་ཆེའི་རྒྱན་ཐོར་
ཙམ་ཡོད་པ། ཁ་སྤུ་བཟང་པོ་ཅན་ནམ་མཁའ་ལ་བལྟ་བ། ནམ་མཁའ་ལ་སྤྲིན་ཁ་དོག་སྣ་ལྔ་
པ་ལ། གླང་པོ་དང༌། རྟ་དང༌། བྱ་ལ་སོགས་པའི་སྲོག་ཆགས་ཀྱི་རྣམ་པ་སྣ་ཚོགས་པ་འདྲ་རུང་
གི་དབྱིབས་ཅན་ཡོད་པ། དེ་དང་ཉེ་བར་ངང་དང་ངང་མོ་གཉིས་འཕུར་བ། དེའི་མདུན་དུ་རྣལ་
འབྱོར་པ་ཤིང་ལོ་ཐོགས་པ་གཅིག་ཡོད་པ་འབྲི། ༼༧༣༽ ཀ་པཱ་ལི་པ་ནི་ཁ་དོག་ནག་པོ་དུར་
ཁྲོད་ནས་བུད་མེད་ཀྱི་རོ་ཞིག་ཡོད་པའི་ཐོད་བྲེག་ཏེ་ཕྱག་ན་བསྣམས་པ། ལུས་ལ་རུས་རྒྱན་
ཆ་ཚང་ཡོད་པའོ། །༼༧༤༽ ཀི་རཏྣ་མོ་པ་གི་ཁ་སྤུ་བཟང་བ་ཁྲོ་ཉམས་ཅན། མགོ་ལ་ཅོད་པཎ་
ཞེས་བྱ་གཅིག་དབུས་དང་ཕྱོགས་བཞི་སྟེ་རྩེ་མོ་ལྔ་ཡོད་པ། རིན་པོ་ཆེའི་ཏོག་ཅན་སྐྲ་མཚམས་
ལ་དཔའ་བོ་དར་དཔྱངས་ཞེས་བྱ་བ་གསེར་གྱི་འཁྱུད་མོ་ལས་རྣ་བའི་ལྟག་གཡས་གཡོན་
ནས་མར་ལ་དར་དཔྱངས་འཕྱང་བ། རལ་གྲི་དང་ཕུབ་འཆང་བ་ཁྲི་ལ་གནས་པ། ༼༧༥༽ ས་
ཀ་རི་པ་ནི་དགེ་སློང་གི་རྣམ་པ་ཅན། མདུན་ནས་འཕགས་པ་སྤྱན་རས་གཟིགས་བཞེངས་པ་
གཅིག་འབྲི། ༼༧༦༽ སརྦ་བྷ་ཉཱ་པ་ནི་མདུན་དུ་སྣོད་ཆེན་པོ་གཅིག་ན་ཟས་བཟང་ངན་སྣ་
ཚོགས་བླུགས་ནས་དེ་ཟ་བ་འབྲི། ༼༧༧༽ ནཱ་ག་བྷོ་དྷི་ནི་དགེ་སློང་གི་རྣམ་པ་ཅན་མཉམ་
བཞག་མཛད་པ། དེའི་ཕྱོགས་གཅིག་གི་བྲག་ཕུག་ཞིག་གི་ནང་དུ་རྣལ་འབྱོར་པ་མགོ་ལ་རི་
དྭགས་ཀྱི་རྭ་སྐྱེས་པའི་རྣམ་པ་ཅན་འབྲི། ༼༧༨༽ དཱ་རི་ཀ་པ་ནི་རུས་རྒྱན་ཅན་རྡོ་རྗེ་དྲིལ་བུ་
20-1-226


བརྡུང་ནས་ནམ་མཁའ་ལ་འཕུར་ཏེ་འགྲོ་བ། འོག་ཕྱོགས་ཀྱི་ས་ཞིག་ལ་གྲོང་ཁྱེར་ནས་མི་
རྣམས་ཀྱི་སློབ་དཔོན་ལ་བལྟ་བ་དང༌། རྡོ་རིང་གི་རྩེ་ན་རྡོའི་གླང་ཆེན་གཅིག་ཡོད་པ་འབྲི།
༼༧༩༽ པཱུ་ར་ལི་པ་ནི་དགྱེས་རྡོར་ཐང་ཁ་བཀྲམ་པ། དེའི་མདུན་གྱི་ཕྱོགས་ནས་རྒྱལ་པོའི་ཆ་
བྱད་ཅན་གྱིས་གཏམ་སྨྲ་བ་འབྲི། ༼༨༠༽ ས་ར་ཧ་ན་པ་ནིས་ལྷམ་ཡུ་བཅད་ལ་གསེར་ཁ་
སོགས་རྒྱན་མང་པོ་བཏགས་པ་གྱོན་རྒྱུག་པའི་རྣམ་པ་ཅན་འབྲི། ༼༨༡༽ ཀོ་ཀི་ལཱི་པ་ནི་རྒྱལ་
པོའི་རྣམ་པ་སྐྱེད་མོའི་ཚལ་འབྲས་བུ་ཅན་གྱི་ཤིང་གིས་གང་བའི་དབུས་ན་མང་པོ་ཡོད་པ།
གཞོན་ནུ་མ་མང་པོ་གླུ་དང་གར་དང་རླུང་གཡབ་དང་ཁྲུས་གསོལ་བའི་རྣམ་པ་ཅན། ཤིང་
རྣམས་ལ་བྱ་ཀོ་ཀི་ལཱི་སྟེ་ཁུག་ནོག་མང་པོ་ཡོད་པ། མདུན་དུ་དགེ་སློང་གཅིག་དང་གཏམ་སྨྲ་
བ་འབྲི། ༼༨༢༽ ཨ་ནི་གོ་ས་ནི་རྩྭ་ཁྱིམ་ཞིག་ན་གནས་པའི་གཟུགས་མཛེས་པ་གཅིག་གི་
མདུན་དུ་དགེ་སློང་ཤིན་ཏུ་མཚར་བ་གཅིག་གིས་བསོད་སྙོམས་མཛད་པ་འབྲི། ༼༨༣༽ རྣལ་
འབྱོར་ལ་ཀྵྨི་ཀ་ར་ནི་དུར་ཁྲོད་ན་བཞུགས་པ་སྐྲ་གྲོལ་བ། གྲི་གུག་དང་ཐོད་པ་ཁ་ཌཱཾ་ག་
བསྣམས་ཤིང༌། ཡང་ན་སྨྱོན་ཐབས་ཅན་འབྲི་བའང་ཡོད། ༼༨༤༽ སཱ་མུ་དྲ་པ་ནི་རྒྱ་མཚོ་ལ་
གཟིངས་ཕར་བཏང་ནས་འགྲོ་བའི་རྣམ་པ་ཅན་ལ་ཁོང་རང་གི་མདུན་ནས་གྲུབ་ཐོབ་ཨ་ཙིན་
དྷ་པ་གཅེར་བུ་རལ་པ་ཅན་གཅིག་གིས་ཆོས་སྟོན་པ། མདུན་དུ་གཞོང་པ་དང་བུམ་པ་དངུལ་
ཆུའི་བཅུད་ལེན་གྱིས་གང་བ། ལྕགས་མང་པོ་གསེར་དུ་བསྒྱུར་བའི་ཚུལ་དང༌། ཁོ་རང་བྲམ་
ཟེའི་ཆ་བྱད་ཅན་དུ་འབྲི། གཡོན་གྱི་ཕྱོགས་སུ་བུད་མེད་དང་མདུན་དུ་རྟ་ཞིག་ཀྱང་འབྲི། དེའི་
ཕྱོགས་གང་རུང་ཞིག་ཏུ་མཚོ་ཡི་དཀྱིལ་ན་བྲག་རི་གྲུ་བཞི་པ་རྩེ་ན་ལྷ་ཁང་གཅིག་དང་བཅས་
པ་འབྲིའོ། །དེ་ལྟར་གྲུབ་ཐོབ་བརྒྱད་ཅུ་རྩ་བཞིའི་འབྲི་ཡིག་སོ་སོའི་རྣམ་ཐར་དང་མཐུན་པར་སྦྱར་བ་ཏཱ་ར་ནཱ་ཐས་བཀོད་
པའོ།། །།མངྒ་ལཾ། །
20-1-227


༄༅། །འཆི་མེད་གྲུབ་པའི་ཞལ་ལུང་བདུད་རྩིའི་
བུམ་བཟང་ཞེས་བྱ་བ་བཞུགས།
༄༅། །ན་མ་མྲྀ་ཏ་ལོ་ཀེ་ཤྭ་རཱ་ཡ། གང་ལ་རྟག་ཏུ་བསྟེན་ཞིང་མི་ཕྱེད་པའི། །སྡོང་པོའི་
དཔལ་མངའ་འགྱུར་བྲལ་བདེན་ཆེན་གྱི། །མ་ལུས་འགྲོ་བའི་མེ་ཏོག་རྣམ་བྲལ་ཏེ། ཁྱོད་ལ་
འཆི་མེད་བདུད་རྩིའི་འབྲས་བུར་ཤོག །གང་གི་ཞབས་ཀྱི་པདྨོ་ལ། །ཡོངས་སུ་བརྙེས་པ་ཙམ་
གྱིས་ནི། །ཉི་ཟླའི་ལམ་ནི་ལམ་མིན་དང༌། །དྷཱུ་ཏཱིའི་འཚོ་བ་བརྟས་པ་ལས། །འཆི་མེད་བཅུད་
ལེན་དཔྱིད་ཀྱི་དཔལ། །གང་གི་སྙིང་དུ་རྣམ་ཐོས་པ། །འཇིག་རྟེན་མཁྱེན་ལ་གུས་བཏུད་
དེ། །འཆི་མེད་སྒྲུབ་ཐབས་འདིར་བཤད་བྱ། །དེ་ལ་སྐལ་པ་དང་ལྡན་པ་འགའ་ཞིག་རྡོ་རྗེ་
ཐེག་པའི་ལམ་པོ་ཆེ་ལས་ཡང་དག་པར་གཤེགས་ཏེ། མི་འགྱུར་བའི་བདེ་བའི་ཁང་བཟང་
དམ་པར་འཆི་མེད་ཀྱི་སེང་གེའི་ཁྲི་མཆོག་ལ་དུས་རྟག་ཏུ་འཁོད་པར་འདོད་པས་ནན་ཏན་དུ་
བྱ་བའི་འོས་སུ་ངེས་པ་ནི་འདི་ཡང་སྟེ། དེ་ལ་སྐལ་པ་དང་ལྡན་པ་སྐྱབས་སེམས་རྡོ་རྗེ་སློབ་
དཔོན་གྱི་རྣལ་འབྱོར་སྔོན་དུ་འགྲོ་བ་ཅན་གྱི་ལམ་འདི་ནི་རྣལ་འབྱོར་བཞིས་བྱེད་པ་ལས།
རྣལ་འབྱོར་དང་པོ་ནི་འདི་ལྟར་བསྐྱེད་རིམ་རྒྱས་པ་དང་འབྲེལ་བའམ་གཞན་ཡང་རུང་སྟེ། ཤཱུ་
ནྱ་ཏའི་སྔགས་ཀྱིས་རང་གི་ལུས་ཕུང་པོ་ལྔས་མཚོན་པའི་འཁྲུལ་པའི་སྣང་བ་ཀུན་དབྱིངས་
སུ་སྦྱངས། སེམས་ཉིད་མི་ཤིགས་པའི་ཁོ་བོ་སྐད་ཅིག་གིས་ལོ་ཀེ་ཤྭ་ར་མོར་ཕྱག་བཞི་མདའ་
གཞུ་ལྕགས་ཀྱུ་ཞགས་པའམ་དགྲ་སྟ་འཛིན་པ་ལྭ་དམར་དང་ལྷོ་ཕྱོགས་ཀྱི་ལོ་ཧཱའི་གོས་ཅན།
ཞི་ཞིང་འཛུམ་ལ་དཔའ་ཞིང་རྗེས་སུ་ཆགས་པའི་ཉམས་དང་ལྡན་པ། རྡོ་རྗེའི་གདན་གྱིས་
པད་ཉི་ལ་བཞུགས་པ། ཐོར་ཚུགས་ཆུ་ཤེལ་གྱི་སྤྲས་ཤིང་ནོར་བུ་བཞིས་བརྒྱན་པ། ཆུ་ཤེལ་
20-1-228


དང་ལཱ་ལའི་དང་པོ་ས་མདའ་བཅས་པ་ཕྲག་པར་ཐོགས་པ་ལྷ་མོ་གཉིས་དང་བཅས་འོད་འཕྲོ་
བ་གསལ་གདབ། ༀ་ཙི་ཊི་ཙི་ནི་ཌི་བི་ཀློ་ལི་མ་མ་ཨཱ་ཡུཿཔུཥྚིཾ་ཀུ་རུ་སྭཱཧཱ། ཞེས་བཟླས་པ་
བྱ། དེའི་ཚེ་མདའ་འཕངས་པས། དེའི་ནམ་མཁའི་མཐས་གཏུག་པའི་ཞིང་དུ་སོང་སྟེ། སའི་
བཅུད་འཆི་མེད་ཀྱི་བདུད་རྩི་བཀུག་སྟེ་ལུས་ལ་ཤིན་ཏུ་ཞུགས་པས་རྣམ་པ་ཐམས་ཅད་པར་
གྱུར་པར་བསམ། དེ་བཞིན་དུ་ཆུ་མེ་རླུང་ནམ་མཁའ་དང་རིག་པའི་ཡེ་ཤེས་རྣམས་ཀྱི་ལྷའི་
སྤྱན་ལྗགས་རྣམ་པ་ཐམས་ཅད་དང༌། སྐུ་བདེ་བ་མཆོག་དང་ལྡན་པ། ལྷའི་རྣ་བ་རྣམས་ཐོབ་
ཐང་ཡིད་ཀྱི་རྣམ་རྟོག་འགགས་པར་བསམ་པའི་རྣམ་རྟོག་ཁོ་ནས་རྟོག་བྲལ་དུ་བྱེད་པ་ནི་ཏིང་
ངེ་འཛིན་དང་པོའོ། །དེ་ལྟར་འབྱུང་བ་དྲུག་གི་བཅུད་བསྟིམ་པའི་རྐྱེན་གྱིས་འབྱུང་ལུས་སྙིགས་
མ་གནས་འགྱུར། དངོས་མ་གཞིག་མི་ནུས་པའི་ངོ་བོར། རང་ལྷར་གསལ་པ་ནམ་མཁར་
ཐིམ་པ་སྙམ་བྱེད་ཅིང༌། སླར་ཡང་གསལ་བ་སྙམ་བྱེད་པ་ལ་ཡིད་འཇུག་ཡུལ་གཅིག་ཏུ་བགྱིད་
ཅིང༌། ཤཱུ་ནྱ་ཏའི་གསང་སྔགས་བཟླས་པར་བྱ་སྟེ་ཏིང་ངེ་འཛིན་གཉིས་པའོ། །
རླུང་གཏོང་འཇུག་གནས་གསུམ་ཧཱུཾ་ༀ་ཨཱཿཡིག་གདངས་དང་བཅས་པ་ལན་དུ་མར་ནན་
ཏན་དུ་བགྱིས་པ་ནི་རྣལ་འབྱོར་གསུམ་པ་སྟེ་སྦྱོར་བའི་ཏིང་ངེ་འཛིན་ནོ། །དེ་ནས་རང་གི་སྙིང་
གའི་འོད་ཀྱིས། དག་པ་དང་མ་དག་པའི་སྣོད་བཅུད་ཐམས་ཅད་བདུད་རྩིར་གྱུར་པ་སྤྱན་
དྲངས། ལཱ་མའི་དོང་ལ་བསྟིམ། དེ་ནས་འཆི་མེད་ཀྱི་རྒྱུན་བྱུང་བ་ཙནྡྲ་ཀཻནྡྱའི་དོང་པར་བསྟིམ་
པར་བསྒོམ་ནས། རླུང་དལ་བ་གསུམ་དང་དྲག་པོ་གསུམ་དང༌། ཧཱིསྟ་ཧསྟྱ་ཧ་དཱ་ད་རྣམས་ཀྱི་
རླུང་རོ་བསམ། དེ་ནས་རླུང་ནང་དུ་དྲངས་པས་དེ་དང་ལྷན་ཅིག་དོང་པ་མདའ་དང་བཅས་པ་
ལས་འཆི་མེད་ཀྱི་རྒྱུན་བྱོན་པ། སྣ་ནང་དུ་གཅིག་ཏུ་འདྲེས་པ་དཔྲལ་བ་ནས་བརྒྱུད་སྤྱི་བོར་
སོན། སླར་མགྲིན་པ་སྙིང་ག་ལྟེ་བ་གསང་བ་གསུམ་ནས་བརྒྱུད་དེ་བ་སྤུའི་ཁུང་བུ་ཀུན་ཏུ་ཡང་
ཁྱབ་ཅིང་བརྟན་པར་གང་བས་ནམ་དུ་ཡང་གཞིག་ཏུ་མེད་པའི་གཞོམ་མེད་ཀྱི་ཁྱབ་ལ་ཆེན་
20-1-229


པོའི་དབྱིངས་སུ་སེམས་ཉིད་རྩོལ་མེད་དུ་མཉམ་པར་བཞག །ལྟེ་བའི་གནས་སུ་བུམ་པ་ཅན་
བརྟན་པར་བཟུང་བར་བྱ་ཞིང༌། དལ་བུས་དབྱུང་བར་བགྱིད་པ་ནི་རྗེས་སུ་རྣལ་འབྱོར་གྱི་
རིམ་པའི་ཏིང་ངེ་འཛིན་ཏོ། །དེ་ནས་རང་ཉིད་འཕགས་པ་འཇིག་རྟེན་དབང་ཕྱུག་ཏུ་སད་པའི་
ཐུགས་ཀ་ནས་འཕྲོས་པའི་སྣང་བ་ལུས་པ་མེད་པའི་ཞིང་ཐམས་ཅད་གདོད་མའི་ངོ་བོར་མི་
ཤིགས་པའི་བདུད་རྩིར་བྱས། དེ་ལས་ལྷ་མོ་སྒྲོལ་མ་སྔོ་དམར་རམ། བྷྲ་ཀུ་ཌི་དཀར་དམར་
གཉིས་ལས་ཅི་འདོད་པར་བསྒྱུར་ནས། ཨ་ར་བ་ཌིར་བྱས་པ་པང་དུ་བྱོན། ཀོ་ཤི་ཀྱར་གྱུར་པ་
ལས། ཀུ་ཙ་ཡ་ན་བ་ར་ཏི། ཀྲ་སྟི་སྟས་བདེ་བ་ཆེན་པོར་རྣམ་པར་བརྟས་པས། ཡབ་ཡུམ་གྱི་
རྩ་སྟོང་ཕྲག་བཅུ་བདུན་རྩ་གཉིས་སུ་བྱང་ཆུབ་ཀྱི་སེམས་རྣམ་པར་གཡོས་པས། རི་མོ་ཐ་དང་
ལྷན་ཅིག་བྱང་ཆུབ་ཀྱི་སེམས་དཀར་པོ་དང་དམར་སྐྱས་སྐུ་ལྷག་པར་གང༌། དེ་ནས་ཡབ་ཀྱི་
ཕྱག་གཡས་པས་འཁྱུད་པ་དང་ལྷན་ཅིག་ཡུམ་གྱི་སྙན་གཡས་པ་དང་ལན་བུ་ཕྱོགས་གཅིག་
ཏུ་བཟུང་བ། གཡོན་ཡུམ་གྱི་སྟ་ཟུར་གཡོན་པ་བསྐུལ་བཞིན་པས་བརྟན་པར་བསམ། དེ་
ནས་ཡུམ་གྱི་སྐུའི་ནང་དུ་བརྟན་གཡོ་ཀུན་འཆར་བཞིན་པ་ལ་སེམས་རྩེ་གཅིག་ཏུ་གཏད་དེ་
སྔར་བཞིན་རླུང་ཕྱིར་བྱུང༌། རྗེས་སུ་ཆགས་པས་བསྐུལ་ཏེ་ས་ནི་ཧས་གཟུགས་བརྙན་རྣམས་
ལས་སྟེང་འོག་ཏུ་བྱང་ཆུབ་ཀྱི་སེམས་བདུད་རྩིའི་རྒྱུན་བབས་པས་སྐུ་གང་བར་བསྒོམ། དེ་
ནས་རླུང་ནང་དུ་འཇུག་པ་ན། པ་ཏི་ཀི་དང༌། སྭེ་ཏ་ཀས། འཆི་མེད་བཅུད་ཀྱི་རྒྱུན་ཞལ་དུ་
སོན་ཏེ། དཔྲལ་བ་ནས་བརྒྱུད། སྤྱི་བོར་གཤེགས་ནས་ཧཾ་ལས་བྱུང་བའི་ཐིག་ལེའི་རྒྱུན་དང་
གཅིག་ཏུ་གྱུར་པ། ལྕེ་ཆུང་ནས་འབབ་པར་བསམ་ཞིང༌། བ་ཧཱུ་ས་མའི་ཕྱག་རྒྱ་བཅིངས་ཏེ་
ལྕེའུ་ཆུང་གཞིབ། དེ་ནས་མགྲིན་སྙིང་ལྟེ་གསང་ནོར་བུར་བྱོན་པས་སྟོང་པ་ནམ་མཁའ་ཕྱོགས་
གྲོལ་དང༌། བགྲོད་པ་རིའི་རྩ་ཞེས་པ་རྣམས་གང་བར་གྱུར་པས། བདེ་བ་རྒྱས་ཤིང་མྱུར་བར་
བསྒོམ་ཞིང༌། སྟེང་རླུང་ལྡེར་མནན། དེ་དང་ལྷན་ཅིག་ཏུ་འོག་རླུང་དྲངས་པས། ཡུམ་གྱི་མངལ་
20-1-230


དུ་བྱོན་པས་རཀྟའི་དྭངས་མ་རྒྱ་སྐྱེགས་ཀྱི་ཁུ་བ་ལྟ་བུ་རྡོ་རྗེའི་སྦུ་གུར་སོན་པས་རི་བོང་ཅན་
དང་འདྲེས་པས་སླར་གྱེན་དུ་གཤེགས་པས་གསང་བ་ལྟེ་མགྲིན་པ་སྤྱི་བོ་དཔྲལ་བ་རྣམས་
སུ་བྱོན། ལུས་ཐམས་ཅད་ཁྱབ་པའི་དབང་ལས། བརྗོད་བྲལ་མི་འགྱུར་བའི་བདེ་བ་རྣམ་པ་
ཐམས་ཅད་པ་བསྐལ་པའི་རླུང་གིས་ཀྱང་གཞིག་པར་མི་ནུས་པའི་གདོད་མའི་དཔལ་ཐོབ་
པར་བསམ་ཞིང༌། རྩོལ་མེད་ཀྱི་ཤེས་པ་ལྷུག་པར་བཞག །རླུང་འབྱུང་བ་ཡང་ཨ་ནུ་ཡོ་ག་
བཞིན་ཏེ་ཤིན་ཏུ་རྣལ་འབྱོར་གྱི་ཏིང་ངེ་འཛིན་ནོ། །མ་ན་ཨ། མཧཱ་ཡོ་ག་ནི། གཉིས་ཀྱི་བདག་
ཉིད་ཅན་རྣལ་འབྱོར་བ་དངོས་གཞིའོ། །
སྦྱོར་བ་ནི་མྱུར་འགྲོ་སོགས་ཤས་ཆེ་བ་ནི་ཨ་ཏི་ཡོ་ག་བཞིན་ཏེ། འོན་ཀྱང་འདིར་ནི་ཧཾ་
ལས་བབ་པའི་ཁུ་བ་དང༌། མཁའ་ལས་དྲངས་པའི་རྡུལ་གཉིས་ཀ་འབྱུང་བ་ལྔའི་མྱུར་འགྲོ་
སྲད་བུ་ཁ་དོག་ལྔ་པ་ལྟ་བུས་དཀྲིས་ཏེ་གཅིག་ཏུ་འདྲེས་པ་ན་ཡང་ངོ༌། །དབབ་ཀྱང་གཤེགས་
པ་ཡང་ཨ་ཝ་དྷཱུ་ཏཱི་སྔོ་སྐྱ། དྭངས་ཤིང་ཕྲ་བ་གཙུག་ཏོར་ནས་གསང་བའི་བར་དུ་སོན་པར་
འཁྱིལ་པས། རྩ་རྣམས་གང་ཞིང་འབྱུང་བ་ལྔའི་རླུང་རྣམས་ཀུན་དར་ནང་གི་སྟེང་འོག་ཏུ་
ཤུགས་དང་ལྡན་པས་གཤེགས་པ་ནི། ཁུ་བ་རྣམས་སྤྱི་བོ་དང༌། རྡུལ་རྣམས་གསང་བར་
སོན། སླར་ཡང་རླུང་རྣམས་སྟེང་འོག་ཏུ་གཤེགས་ཤིང་རེག་པས། རྡོ་རྗེ་རི་བོང་ཅན་དང་རྡོ་རྗེ་
ཉིན་མོར་བྱེད་པ་སད་པའི་དབང་ལས། ལུས་སེམས་མཐའ་དག་བདེ་བ་ཆེན་པོས་ཡང་དག་
པར་ཁྱབ་ཅིང་བརྟན་པར་བསམ། དེ་ནས་རླུང་རྣམས་གཅིག་ཏུ་འདྲེས་པ་ཡེ་ཤེས་ཀྱི་རླུང་ཁ་
དོག་སྔོན་པོས་ཨ་ཝ་དྷཱུ་ཏཱི་གང༌། དེས་ཉི་མ་གནོན་ཞིང་ཟླ་བ་འདེགས་པར་བསམ་པ་དང༌།
དམིགས་མེད་ཀྱི་ངང་ནས་རྡོ་རྗེའི་བཟླས་པ་སྐད་ཅིག་ཙམ་རྣལ་འབྱོར་དུ་བྱེད་པའོ། །
དངོས་གཞི་ནི། རྡོ་རྗེ་ཉི་མ་སྣང་བ་ཆེ། །རྡོ་རྗེ་ཟླ་བ་དྲི་མེད་འོད། །ཡོག་པོར་པདྨ་ཟླ་བ་
ཡིས། །རེག་བྱ་མ་ཡིན་རེག་བྱ་སྦྱིན། །ཆགས་བྲལ་དང་པོ་ཆགས་པ་ཆེ། ཁ་དོག་སྣ་ཚོགས་
20-1-231


འབར་བའི་འོད། །ཅེས་དང༌། མཁའ་འགྲོ་དཔའ་བོ་གཉིས་མེད་པ། །པདྨའི་འོད་ནི་དྲི་མེད་
པ། །རྣལ་འབྱོར་ནང་ལ་མཁས་པས་མཆོད། །ཅེས་དང༌། མདོ་རྒྱན་ལས། དཔལ་ལྡན་རྡོ་
རྗེ་དབང་གི་མཆོག །ག་པུར་སིཧླ་མཉམ་སྦྱོར་བ། །མགོ་བོར་པདྨ་ཟླ་ཉི་ཡིས། །རེག་བྱ་མ་
ཡིན་རེག་བྱ་སྦྱིན། །རྡོ་རྗེ་ནམ་མཁའི་དཀྱིལ་འཁོར་ནས། །སངས་རྒྱས་རྒྱལ་པོ་སྒྱུ་འཕྲུལ་
ཆེ། །བུད་མེད་རྒྱ་ལས་གཞན་དུ་འགྱུར། །རྡུལ་བྲལ་མི་མོ་དྲི་མ་མེད། །རྣམ་པ་ཐམས་ཅད་
མཚན་ཉིད་བྲལ། །ལྷ་མོའི་རེག་པ་རྣམས་བསྟེན་ན། །ཟླ་བ་དྲུག་གི་ཚངས་སྤྱོད་ཅན། །མགོ་
བྲེག་འཆི་མེད་བརྟུལ་ཞུགས་ཐོབ། །ཅེས་པ་རྣམས་ཀྱི་ངེས་པ་ལས་བརྩམས་ཏེ། མདོར་ན་
ཉེར་བསྡོགས་ཀྱི་ཨ་ནུ་རཱ་གའི་བདེ་བ་ལ་དམིགས་མེད་དུ་བྱས་ནས། བུམ་ཆེན་དང་བཅས་
བཞིན་པའམ། གཞན་དུའང་སྟེ། སེམས་ཉིད་རྩོལ་བྲལ་མི་འགྱུར་བའི་བདེ་བ་རྣམ་པ་ཐམས་
ཅད་པ། ལྷན་སྐྱེས་ཀྱི་དགའ་བ་རིས་མེད་པ་བརྟན་གཡོ་ཀུན་གྱི་རང་བཞིན་གདོད་མའི་ངོ་བོ་
མི་ཤིགས་པ། རྟག་བརྟན་གཡུ་དྲུང་གི་དཔལ་ལ་གཡོ་མེད་དུ་མཉམ་པར་འཇོག་པ་སྟེ། ས་
ར་ཛཿམུ་དྲ་ལ་སྦྱོར་བ་འདི་ཁོ་ནའོ། །དཔལ་ལྡན་འཆི་མེད་བདུད་རྩི་རྣམ་པར་གྲུབ་པའི་མན་
ངག་འདི་ནི། སློབ་དཔོན་འཆི་བ་མེད་པའི་སྡེས་འཕགས་མཆོག་ནཱ་ག་ཛུ་ནའི་གདམས་པའི་
བདུད་རྩི་ལེགས་པར་མྱོང་བའི་བཅུད་ལེན་དམ་པ་སྟེ། ཨོ་རྒྱན་ལས། འབྱུང་བ་རྣམས་དང་
དཔྲལ་བ་ཡི། །དབྱངས་དང་ཐིག་ལེ་རྣམ་པར་འཐུང༌། །བྷ་ག་དྲུག་ནི་ཡོངས་སུ་གང༌། །ཤེས་
རབ་བུད་མེད་དག་དང་སྦྱར། །ལྕེ་ཆུང་བཅུད་ཀྱི་ལེན་བཤད་པ། །འཆི་མེད་གྲུབ་པའི་མཆོག་
ཏུ་གྱུར། །ཞེས་རྡོ་རྗེའི་ཚིག་ལ་བརྟེན་ནས་སོ། །
འདིའི་ངེས་པ་ལས་ནི། རྗེས་སུ་རྣལ་འབྱོར་གྱི་ཚེ་དཔྲལ་བར་གཙོ་ཆེར་སེམས་འཇོག་
ཅིང༌། བདག་ཉིད་ཆེན་པོ་བིཥྞུ་ཙནྡྲའི་ཧཾ་ཡིག་དབྱངས་ཡིག་གིས་བསྐོར་བ་ལས་བཅུད་བབས་
པ་ཡི་དམ་དུ་བགྱིས་པ་འདི་ཡང་རིགས་པ་ཁོ་ནའོ། ། དེ་ལྟར་འདིར་ནི་སྨྲ་བའི་ཁྱུ་མཆོག་གྲུབ་
20-1-232


པའི་དབང་པོ་རྣམས་ཀྱི་སྐུ་ཉམས་སུ་བསྐུར་བའི་ལམ་པོ་ཆེ་སྟེ། རྗེ་བཙུན་སྦས་པའི་ཞབས་
ཀྱིས་བརྩེ་བ་ཆེན་པོས་ཉེ་བར་བཟུང་བའི་དབང་ལས། དྲན་པའི་སྙིམ་པ་ལ་ཆགས་པ་གཅིག་
ཀུན་དགའ་སྙིང་པོས་བདག་ཉིད་ཡི་དམ་དུ་བྱས་པའི་སླད་ཁོ་ནར་བརྗེད་བྱང་དུ་འཚལ་བའོ།
ཁྱབ་བདག་གྲུབ་པའི་དབང་པོ་མདའ་བསྣུན་དང༌། །ཀུན་མཁྱེན་གཉིས་པ་ཀླུ་སྒྲུབ་ཡབ་སྲས་
ཀྱི། །རྟག་བརྟན་གཡུང་དྲུང་དཔལ་གྱི་ལོངས་སྤྱོད་དེ། །མཁར་ཉལ་བུ་ཡི་དཔལ་ལ་ལོངས་
སྤྱོད་བཞིན། །དཔལ་ལྡན་འཆི་མེད་སྡེས་ཀྱང་དེ་བཞིན་སྤྱད། །ཡེ་ཤེས་རྡོ་རྗེའི་གོ་འཕང་
མཆོག་བརྙེས་པ། ཁྱབ་འཇུག་ཟླ་བའི་གསུང་གིས་ཆུ་སྐྱེས་ལས། །སྦྲང་རྩིའི་བཅུད་མཆོག་བློ་
ཡིས་བླངས་ལས་སོ། །རིགས་པའི་དབང་ཕྱུག་སེང་གེ་འཇིགས་མེད་དང༌། །ལྷན་སྐྱེས་དགའ་
བའི་ཕ་མཐར་རབ་གཤེགས་ནས། །འཆི་མེད་རྡོ་རྗེའི་ས་བརྙེས་ཞིང་ཁམས་སྐྱོངས། །འགྲན་
ཟླ་སྤངས་པའི་མཁས་མཆོག་ཉི་མ་ཡི། །སྒྲོལ་མས་རྗེས་བཟུང་བཱིཪྻ་བརྨ་དང༌། །རིགས་བྱེད་
དགའ་སོགས་འཆི་མེད་བརྙེས་ལ་འདུད། །མངོན་པར་ལམ་བཟང་ཆེ་དེ་མཁས་པའི་གཙོ། །
ཉིན་བྱེད་དགའ་བས་ཉིན་དང་ཉིན་བཞིན་མཛད། །རིགས་ཀྱིས་རྡོ་རྗེ་གོ་འཕང་མཆོག་
བརྙེས་ནས། །བླ་མེད་མཁྱེན་པའི་མཚོན་ཆ་རྣོན་པོ་ཡིས། །རྟོག་གེའི་སྙིམ་པ་མ་ལུས་བཅིལ་
ལས་སླད། །ཡང་དག་རིགས་པའི་ལམ་མཆོག་སྟོན་དེ་རྒྱལ། །གང་དེའི་ཞལ་བུམ་བབས་
སྟེགས་ལས་འོངས་པའི། །རྡོ་རྗེ་འཆང་དབང་གསུང་གི་བདུད་རྩིའི་རྒྱུན། །འཐུངས་པས་ཡེ་
ཤེས་ལང་ཚོ་རྣམས་བརྟེན་ཤིང༌། །མཐར་བྱེད་མུན་པའི་ལང་ཚོ་མ་ལུས་པ། །རྟག་ཏུ་འགོག་
མཛད་རསྨི་ཧ་རི་ཞེས། །རབ་གྲགས་ནོར་འཛིན་ལ་འཁོད་མིག་སྟོང་དེའི། །ཞབས་སེན་རྙོག་
བྲལ་ཟླ་བའི་ཅོད་པན་གང༌། །མཐའ་ཡས་འགྲོ་བའི་གཙུག་ཏུ་ངེས་གྱུར་ཅིག །སངས་རྒྱས་ཡེ་
ཤེས་འགྲོ་རྣམས་ཀྱིས། །སྙིང་ལ་རབ་སྦས་ཐུགས་རྗེ་ཡིས། །ལེགས་པར་ཕྱུང་སྟེ་སྦྱིན་མཛད་
པ། །མགོན་པོའི་གོ་འཕང་མྱུར་ཐོབ་ཤོག །
20-1-233


འདིར་སྨྲས་པ། བགེགས་མེད་དུས་ནས་མ་ལུས་འགྲོ་འདི་གཡུང་དྲུང་གི །དཔལ་སར་
སྤྱོད་མེད་མཐར་བྱེད་གཡོ་ཅན་གྱིས། །ཉི་ཟླའི་མིག་འཕྲུལ་བསླུ་བྲིད་སྟོན་འདི་ག་ཞའི་རྒྱུ། །
ཨེ་མ་བདུད་རྩིའི་འབྱོར་བ་རྙེད་པས་དེ་ལས་སོ། །གང་དག་སྒྱུ་མའི་དམག་དང་རྨི་ལམ་གྱི། །
དགའ་བའི་དགའ་སྟོན་ན་ཡང་འཇིགས་པ་དང༌། འདོད་པས་མནར་བའི་ཚུལ་དེ་འདིར་
མཐོང་ནས། །བདུད་རྩིའི་དཔལ་དེ་གང་གི་ལག་རྩེ་རུ། །སྐད་ཅིག་གིས་ཐོབ་འགྲོ་ཀུན་དགའ་
བའི་སྐྱེས། །དཔལ་ལྡན་བདེ་ཆེན་འགྱུར་མེད་རི་བོང་ཅན། །འདོད་པ་འཇོ་བའི་ཐབས་བཟང་
རྩེ་དགེའི་དཔལ། །སྙིང་པོའི་དོན་དེ་སྙིང་པོ་ལ་དགའ་བ། །ཀུན་དགའ་སྙིང་པོ་ཀུན་དགའི་
ལམ་མཆོག་འདིར། །མ་གྱུར་འགྲོ་བ་མ་ལུས་གདོད་མའི་གཤིས། །བདུད་རྩི་མཆོག་དེ་བདུད་
རྩི་ལོངས་སྤྱོད་མཆོག །མ་ལུས་འགྲོ་བའི་ཉེ་བར་སྤྱོད་དོན་དུ། །ཡི་གེའི་ལམ་དུ་མ་གྱུར་པའི། །
དོན་མཆོག་ཡི་གེར་མཚོན་འདི་ལས། །མ་ལུས་འགྲོ་རྣམས་བདག་ཉིད་ཀྱི། །གོ་འཕང་འཆི་
མེད་ཐོབ་པར་ཤོག། །།རང་ལོ་བཅུ་དྲུག་པ་ལ་ལི་ཁཾ་ཏཾ། །ཞུས་སོ། །
20-1-234


༄༅། །འཆི་མེད་གྲུབ་པའི་གདམས་ངག་བཞུགས།
༄༅། །དཔལ་འཆི་མེད་བདེ་བ་ཆེན་པོ་ལ་ཕྱག་འཚལ་ལོ། །དང་པོར་སློབ་མ་སྣོད་དུ་རུང་བ་གཅིག་
གིས། བདག་འཆི་མེད་སྒྲུབ་པའི་གདམས་ངག་ཀུན་ཞུ་ཟེར་ན། ཙནྡན་དམར་པོའི་ལྡེ་གུའམ། ལི་ཁྲིའི་བཙག་གིས་ཆོས་འབྱུང་གྲུ་
གསུམ་གཅིག་བྱ། དེ་ལ་ཚོམ་བུ་གསུམ་བཀོད། མཐའ་མཆོད་གཏོར་གྱིས་སྐོར། ཚོགས་ཀྱི་ཡོ་བྱད་བཤམས། སྤྲོས་པ་ལ་དགའ་
ན་མཁའ་འགྲོ་སྤྱི་གཏོར་གྱིས་སྔོན་འགྲོའི་གཏོར་མ་བཏང༌། གནས་ཡོ་བྱིན་རླབས། བསྡུ་ན། སུམྦྷ་ནི་མང་དུ་བཟླས་ཏེ་བགེགས་
བསྐྲད། ༀ་ཨཱཿཧཱུཾ་ཁོ་ནས་མཆོད་གཏོར་ཐམས་ཅད་བྱིན་གྱིས་རླབས། འོག་ནས་འབྱུང་བ་ལྟར་མངོན་རྟོགས་བསྒོམས། གཏོར་
བསྔོ་བྱ། སློབ་དཔོན་རང་ཉིད་རྫོགས་རིམ་བསྒོམས། བཟླས་པ་ཡང་ཅུང་ཟད་བྱ། འགྲུབ་ན་སྐབས་འདིར་ཡང་ཚོགས་འཁོར་
གཅིག་བྱེད། དེ་ནས་སློབ་མས་མཎྜལ་ཕུལ། སྤྱི་དང་མཐུན་པར་བགེགས་གཏོར་བཏང་ལ་བགེགས་ཕྱིར་བསྐྲད། དགའ་
ཆེན་ཁྱོད་བདག་སོགས་ཀྱིས་གསོལ་བ་བཏབ། དཀོན་མཆོག་གསུམ་ལ་བདག་སྐྱབས་མཆི། །སོགས་
རྒྱུན་བཤགས་བྱ། ས་གཞི་ལ་ཆང་གིས་ཆོས་འབྱུང་གྲུ་གསུམ་གཅིག་བྲིས། དེའི་སྟེང་དུ་སློབ་མ་ལངས་ཏེ་སྡོད་དུ་འཇུག །སློབ་
མ་སངས་རྒྱས་མཁའ་འགྲོ་མ་དམར་སེར་གྲི་གུག་ཐོད་པ་ཁ་ཊྭཱཾ་ག་འཛིན་པའི་སྐུར་ལམ་སྟེ་
བསྒོམས། ལྟེ་འོག་ཏུ་ཆོས་འབྱུང་གྲུ་གསུམ་ཟུར་གསུམ་པ་ལ་ༀ་ཨཱཿཧཱུཾ། དབུས་སུ་སྔགས་ཚན་
གསུམ་ཡི་གེ་བརྩེགས་མ། དེའི་སྟེང་ལྟེ་བའི་ཐད་དུ་ཧྲཱིཿདམར་སེར་སྒོམ་དུ་བཅུག་ལ། ཆོས་
འབྱུང་དེ་གཡོན་བསྐོར་དུ་སྒོ་རེ་རེ་འཁོར། ལུས་སེམས་བདེ་བས་གང་བ་ལ་སེམས་གཏོད་དུ་
གཞུག །རྣལ་འབྱོར་མ་དཔག་ཏུ་མེད་པ་སྤྱན་དྲངས་ཏེ་སློབ་མ་ལ་ཐིམ་པར་སློབ་དཔོན་གྱིས་བསམ་
ཞིང༌། རོལ་མོའི་སྒྲ་ཡུན་རིང་ལ་དྲག་པོའམ། ཇེ་དྲག་ཇེ་ཞན་བྱ་ཞིང༌། ༀ་གསུམ་མ་དྲག་ཏུ་བཟླས། གུ་གུལ་བདུད་རྩི་ལྔའི་རིལ་
བུ་དང༌། ཤ་ཆེན་གྱི་བདུག་པ་བདུག་གོ །དེས་མ་ཕེབས་ན་སྤོགས་ཆོག་བྱ་གསུངས་ཏེ་འོན་ཀྱང་དེང་སང་འདི་ལྟར་བྱ། གཞན་ཁྱེད་
རང་ལུས་ཐང་ཤ་བཅད་དེ་ཉྭ་བཞི་སྒྲིམས་མིག་གྱེན་དུ་བཟློག །རླུང་སྣ་ནས་ཕྱིར་སང་སང་འབུད་པ་ཡང་ཡང་བྱེད་ཅིང༌། དམིགས་
20-1-235


པ་འདི་ལ་སེམས་གཏོད་ཅིག་བྱས་ལ། དེ་ཡང་རང་གི་སྤྱི་བོའི་སྟེང་ན་བླ་མ་དང༌། རྡོ་རྗེ་ཕག་མོ་གཙོ་
འཁོར་གསུམ་དབྱེར་མ་མཆིས་པ་སྐུ་ལུས་གར་སོགས་ལོག་ལོག་བསྒྱུར། ཞལ་ནས་གསུངས་
དབྱངས་ལྷང་ལྷང་འབྱོན། རང་གི་གཡས་ནས་ལྷ་མོ་དཔལ་གྱི་བློ་གྲོས་མ་དང་གཡོན་ན་ནག་
པོ་བིརྺ་པ། གཞན་དཔའ་བོ་རྣལ་འབྱོར་མ་མང་པོ་དང༌། ཞབས་བྲོ་བརྡུང༌། ཕྱག་གར་བྱེད་པ།
གསུང་རྡོ་རྗེའི་གསུང་དབྱངས་ལྷང་ལྷང༌། ཁྱེད་རང་ལ་བྱིན་གྱིས་རློབས་པའི་ཚུལ་དུ་བཞུགས་
སྙམ་གྱིས་ལ། རོལ་མོ་འཇམ་པོས་བརྡའ་དང་སྦྱར་ཏེ། ཨེ་མ་ཧོཿ ཀྱཻ། བུ་ཁྱོད་ཚུར་ཤོག་ཚུར་ལ་ཤོག།
ལུས་ངག་ཐམས་ཅད་སེམས་ཉིད་ཡིན། །ཨེ་མ་ཧོཿ སེམས་ལས་གཞན་དུ་ལུས་ངག་མེད། །
སེམས་ལ་སྐྱེ་དང་འཇིགས་པ་བྲལ། །ཨེ་མ་ཧོཿ ཁྱོད་ཀྱི་ལུས་ལ་འཆི་བ་མེད། །བུ་ཁྱོད་འཆི་
མེད་རང་གྲོལ་ལ། །ཨེ་མ་ཧོཿ སངས་རྒྱས་མཁའ་འགྲོ་ད་ཚུར་བྱོན། །རྣལ་འབྱོར་མ་དཔལ་ད་
ཚུར་བྱོན། །རྡོ་རྗེ་ཕག་མོ་ད་ཚུར་བྱོན། །རིགས་ཀྱི་བུ་འདི་ལ་བྱིན་གྱིས་རློབས། །འཇའ་ལུས་
རྡོ་རྗེའི་སྐུ་ཐོབ་པར་བྱིན་གྱིས་རློབས། །ངག་ལ་ནུས་པ་བསྐྱེད་དུ་གསོལ། །ངག་འཆི་མེད་
ཐོབ་པར་བྱིན་གྱིས་རློབས། །བརྗོད་བྲལ་རྡོ་རྗེའི་གསུང་ཐོབ་སོགས། །སེམས་ལ་ཡེ་ཤེས་
འཆར་དུ་གསོལ། །སེམས་འཆི་མེད་ཐོབ་སོགས། སྤྲོས་བྲལ་རྡོ་རྗེའི་ཐུགས་ཐོབ་སོགས་གོང་བཞིན་
སྦྱར། དེ་བཞིན་དུ། ལྷ་མོ་དཔལ་གྱི་བློ་གྲོས་ད་ཚུར་བྱོན་སོགས་གོང་བཞིན་ཐམས་ཅད་སྦྱར། ནག་པོ་བི་རུ་
པཀྵ་ད་ལྟར་བྱོན་ལའང་གོང་བཞིན་སྦྱར། ནམ་མཁའ་ན་བཞུགས་པའི་ལྷ་མོ་གསུམ་སོ་སོ་རང་རང་
གི་ལྟེ་བའི་ཆོས་འབྱུང་གི་ཧྲཱིཿལ་ཐིམ། དེའི་ཤུགས་ཀྱིས་རང་གི་ལུས་ནམ་མཁའ་ལ་ཡེར་གྱི་
བཏེག །ལྷ་མོ་དཔལ་གྱིས་བློ་གྲོས་དང་བིརྺ་པས་ཀྱང་གཡས་གཡོན་ནས་མེ་ཏོག་སྟེ་མཆོད་
པ་མང་པོ་སྤྲིན་ལྟར་གཏིབས། སྣ་ཚོགས་པའི་རོལ་མོའི་སྒྲ་དང་བཅས་ཏེ་ཁྱེད་རང་སྟེང་གི་
ནམ་མཁའ་མཐའ་མེད་ལ་ཡེ་རེ་རེ་འགྲོ་བར་བསམ་ཞིང་མཐར་དེའི་ངང་ལ་མི་དམིགས་པར་
ཞོག་ཅིག་བྱས་ལ། ༀ་ཨཱཿཧྲིཿཧཱུཾ་ཧཱུཾ་ཧཱ། ཞེས་བརྗོད་པ་དང་བསྟུན་ནས་རོལ་མོའི་སྒྲ། དང་པོ་ཅུང་ཟད་དལ་ཞིང༌།
20-1-236


མཐར་ཇེ་དྲག་ཇེ་དྲག་བཏང་སྟེ་ཡུན་རིང་དུ་འབུད་དཀྲོལ་བྱ། རོལ་ཆེན་མི་འབྱོར་བའི་ཡུལ་དང་གང་ཟག་འཛོམས་པ་མི་མེད་ལུང་
སྟོང་དུ་བྱ་བཏང་དཔོན་སློབ་འཛོམས་པ་ལྟ་བུ་ཡིན་ན་ཡང༌། ཌཱ་དྲིལ་ལམ། ཏཱིང་ཤག་ཙམ་མི་དགོས་ཁ་མེད་ཡིན་ནོ། །འདི་སྐབས་
ཡེ་ཤེས་ཕེབས་ན་དངོས་གྲུབ་མྱུར་དུ་ཐོབ་ཅིང༌། བྱིན་རླབས་དཔག་ཏུ་མེད་གསུངས། བ་སྤུ་ལྡང་ཞིང་སྐྱི་གཡའ་བ་དང༌། རྣམ་རྟོག་
ཅུང་ཟད་ལོག་ཅིང༌། འཕར་གཡོ་ཅུང་ཟད་ཙམ་བྱང་ནའང་བྱིན་རླབས་ཆེ་བའོ། །ཡིད་དགའ་ཞིང་དམིགས་པ་གསལ་བ་ཙམའང་
བྱིན་རླབས་འབྲིང་ངོ༌། ། རྣམ་འགྱུར་གང་ཡང་མ་བྱུང་ན་བྱིན་རླབས་ཆུང་ངུའོ། །འདི་དབང་གི་དངོས་གཞི་ཡིན། དེ་ནས་དཀྱིལ་
འཁོར་གྱི་གཙོ་མོའི་སྐུའི་དཔྲལ་བ་ནས་ༀ་དཀར་པོ་བྱུང༌། སློབ་མའི་དཔྲལ་བར་ཐིམ། བུམ་
དབང་ཐོབ་པར་བསམ། དེ་བཞིན་དུ། མགྲིན་པའི་ཨཱཿ གསང་དབང༌། ཐུགས་ཀའི་ཧཱུཾ་གིས་ཤེར་
དབང༌། ལྟེ་བའི་ཧྲིཿཡིག་གིས་དབང་བཞི་པའོ། །དེ་ནས་ༀ་གསུམ་མའི་སྔགས་ཀྱི་བཟླས་ལུང་སྤྱི་དང་མཐུན་
པར་བྱིན། སྭ་བྷཱ་ཝ་ནས། འགོག་པའི་བཟླས་པའི་བར་དམིགས་པ་རྣམས་མངོན་རྟོགས་ལྟར་ཕོག །རླུང་བུམ་ཅན་གཅིག་
འཛིན་དུ་བཅུག །ཛི་ཏ་དཀར་བའི་འཁྲུལ་འཁོར་བསྡུས་པ་དེ་བསླབ་བོ། །
རྗེས་མཎྜལ་ཕུལ་བ་སོགས་སྤྱི་དང་འདྲ། བར་འདིར་ཚོགས་ཀྱི་འཁོར་ལོ་བྱ། རྗེས་ཆོག་གཞན་མི་དགོས་ཏེ། འོག་ནས་
འབྱུང་བའི་མཎྜལ་གྱི་མཆོད་པ་བྱས་ནས་སློབ་དཔོན་རང་ཉིད་ཀྱི་ལུས་ལས་བསྡུའོ། །སྨོན་ལམ་དང་བཀྲ་ཤིས་བྱའོ། །སྔར་ཀུན་
ལ་འཕྱན་པའི་ལུས་འཆི་མེད་ཀྱི་དབང་བཀའ་ཡིན་གསུངས་པ་སེམས་འཆི་མེད་ཀྱི་དབང་བཀའ་དང་འདྲ་སེ་བ་དེ་ལ་བཀའ་
འགའ་རེ་རྒྱུན་དུ་ལག་ལེན་ལ་མཛད་མོད་ཀྱང་དེ་ཟང་མ་ཡིན། ལུས་འཆི་མེད་གྲུབ་པའི་དབང་བཀའ་དངོས་སྨྲ་མ་དེ་འདི་ལགས་
སོ། །
༈ ད་ནི་འཁྲིད་ཚུལ་ཉམས་སུ་ལེན་པ་ལ་མན་ངག་བཤད་པར་བྱ་སྟེ། དེ་ལ་སྔོན་འགྲོ་
སྐྱབས་འགྲོ་སེམས་བསྐྱེད་སྤྱི་དང་འདྲ་སྟེ། ཞག་ཤས་སྒོམས་སུ་གཞུག །རྡོ་རྗེ་སེམས་དཔའི་
སྒོམ་བཟླས་ཀྱང་བབས་ཀྱི་སྤྱི་དང་འདྲ་སྟེ། ཧེ་རུ་ཀའི་ལུགས་སུ་བྱེད། མཎྜལ་བླ་མའི་རྣལ་
འབྱོར་གྱི་སྐབས་མཎྜལ་འབུལ་བའི་ཡུལ་གྱི་གཙོ་བོ་རང་གི་རྩ་བའི་བླ་མ་དང་དབྱེར་མེད་པ་
རྗེ་བཙུན་རྡོ་རྗེ་ཕག་མོ་གཙོ་འཁོར་གསུམ་གསལ་བཏབ། དེའི་སྐུའི་མདུན་ཕྱོགས་སུ་གྲུབ་
20-1-237


ཐོབ་ནག་པོ་བིརྺ་པ། དབུ་ལ་རྟེན་འབྲེལ་གྱི་བྱིན་རླབས་ཀྱི་ཅོད་པཎ་སྔོན་པོ་གསོལ་པ།
ཕྱག་གཡས་པ་བ་མེན་གྱི་རྭ་བདུད་རྩིས་གང་བ་འཛིན་པ་གསོལ་བ། གཡོན་པ་པུས་མོའི་སྟེང་
དུ་བཞག་པ། སྐུའི་མདུན་དུ་ཀ་པཱ་ལ་མཧཱ་བ་ལས་གང་བ་བཞག་ཅིང༌། དབྲ་ཙོ་རེའི་པགས་
པའི་གདན་དང་འདོམས་དཀྲིས་ཅན་ལྷག་མ་རྒྱན་དང་ན་བཟའ་སྤངས་ཤིང༌། རྣལ་འབྱོར་བ་
ཧུར་བག་ཆགས་པ་གཅིག །སྐུའི་གཡོན་གྱི་ཕྱོགས་སུ་རིག་མ་ཐལ་མོ་སྦྱར་བ་དང་བཅས་པ་
བསྒོམས། གཞན་མཐའ་སྐོར་དུ་བླ་མ་དཀོན་མཆོག་མཆོད་ཡུལ་ཐམས་ཅད་ཀྱིས་བསྐོར་བ།
མཎྜལ་ཡང་དེ་ལ་འབུལ་ཞིང་བླ་མའི་རྣལ་འབྱོར་གྱི་སྐབས་ཀྱང༌། དབང་བཞི་ལེན་པ་རྣམས་
ངོ་བོ་རྩ་བའི་བླ་མ། རྣམ་པ་རྡོ་རྗེ་ཕག་མོ་གཙོ་འཁོར་གསུམ་དང་ནག་པོ་བིརྺ་པའི་སྐུ་ལས་
ལེན་པ་ནི་ཁྱད་པར་ཡིན། གཞན་ཐམས་ཅད་འདྲ་པའི་ཁྲིད་ཚུལ་སྤྱི་ཁྱབ་ཀྱི་སྔོན་འགྲོ་ཆོས་ལ་
ངེས་པ་རྙེད་པ་ཞིག་གལ་ཆེའོ། །
བརྒྱུད་པའི་གསོལ་འདེབས་ཀྱི་སྐབས་འདི་སྐད་ཅེས་བྱ་སྟེ། རྩ་བའི་བླ་མ་དང་རྡོ་རྗེ་
འཆང་སོང་བའི་རྗེས་སུ། གནས་མཆོག་བདེ་ཆེན་ཕོ་བྲང་དུ། །བཅོམ་ལྡན་རྡོ་རྗེ་ཕག་མོ་ལ་
གསོལ་བ་འདེབས། །གནས་ཨོ་རྒྱན་མཁའ་འགྲོའི་ཞིང་ཁམས་སུ། །སློབ་དཔོན་ནག་པོ་
བིརྺ་ལ་གསོལ་བ་འདེབས། །ཡུལ་ཕྲེང་བ་ཅན་གྱི་ནགས་ཁྲོད་དུ། །བླ་མ་དུར་ཁྲོད་ནག་པོ་
ལ་གསོལ་བ་འདེབས། །གནས་ཨོ་ཊི་བི་ཤའི་དུར་ཁྲོད་དུ། །སློབ་དཔོན་བྲམ་ཟེ་ནག་པོ་ལ་
གསོལ་བ་འདེབས། །ཡུལ་གང་གའི་བྱང་ཕྱོགས་ངེས་མེད་དུ། །གྲུབ་ཐོབ་ལ་ཐོད་མགོན་པོ་
ལ་གསོལ་བ་འདེབས། །གནས་རི་གོང་དཔལ་གྱི་ཡང་དགོན་དུ། །གཉན་སྟོན་སྦས་པའི་རྣལ་
འབྱོར་ལ་གསོལ་བ་འདེབས། །རྗེ་གྲུབ་བརྙེས་མཆོག་དེའི་གདན་ས་རུ། །འགྲོ་མགོན་སངས་
རྒྱས་སྟོན་པ་ལ་གསོལ་བ་འདེབས། །དེ་མན་ཆད་ནཻ་གུ་ཆོས་དྲུག་གི་བརྒྱུད་འདེབས་བཞིན་
བྱས་པས་ཆོག །འཆི་མེད་གྲུབ་པ་འདི་ལ་སྔོན་ལོ་ཙྪ་བ་གཞན་དང་གཞན་གྱིས་བསྒྱུར་བ།
20-1-238


འགྱུར་མི་གཅིག་པ་འགའ་རེ་སྣང་ཞིང་གདམ་ངག་གི་མཚན་དོན་རང་ཡང་འཆི་མེད་གྲུབ་པ་
བདུད་རྩི་གྲུབ་པ། འཇིགས་མེད་གྲུབ་པ་སོགས་འགྱུར་མི་གཅིག་པ་མང་པོ་བྱུང་འདུག་ཅིང༌།
ཕྱིས་པཎྜི་ཏ་ནགས་ཀྱི་རིན་ཆེན་དང༌། ཤཱ་རི་བུ་ཊ་སོགས་ཀྱིས་བསྒྱུར་བཤད་ལག་ལེན་མཛད་
གདབ། འོན་ཀྱང་གཞན་དེ་དག་སྐབས་འདིར་མི་ལེན་གྱི། བྱིན་རླབས་བརྒྱུད་པ་ཅན་གཉན་
སྟོན་ཆེན་པོའི་ལུགས་འདི་ཁོ་ན་རྩིས་སུ་བཟུང་བར་བྱའོ། །
གཉིས་པ་དངོས་གཞི་ལ། བསྐྱེད་རིམ་དང༌། རྫོགས་རིམ་གཉིས། དང་པོ་ནི། སྟན་བདེ་
བ་ལ་འདུག་མདུན་དུ་བྲིས་སྐུའི། ཙནྡན་དམར་པོའི་མཎྜལ་འབྱོར་ན་བཤམས། བྲིས་སྐུ་
མཎྜལ་མེད་ཀྱང་ཉམས་རྟོགས་མི་སྐྱེ་བའི་ལུགས་མ་ཡིན། དངོས་སམ་ཡིད་ཀྱིས་སྤྲུལ་པའི་
མཆོད་པ་བཤམས། ཐོད་པ་ལ་སོགས་པའི་སྣོད་གང་ཡང་རུང་བར། ཆང་ལ་དམ་རྫས་རིལ་
བུ་སྦྱར་བའི། མདོར་ན་ནང་མཆོད་ཀྱི་རྣམ་གྲངས་གཅིག་མེད་དུ་མི་རུང༌། དེ་ཡང་སྐྱབས་འགྲོ་
སེམས་བསྐྱེད་སྔོན་དུ་བཏང༌། བླ་མ་ཡི་དམ་མདུན་དུ་བསྒོམས་ཏེ། གང་གི་དྲིན་གྱིས་བདེ་
ཆེན་ཉིད་སོགས་དང༌། དཔལ་ལྡན་རྡོ་རྗེ་མཁའ་འགྲོ་མ་སོགས། ཤློ་ཀ་གཉིས་དང༌། ཨརྒྷཾ།
ནས། ཤཔྟའི་བར་གྱིས་མཆོད། དཀོན་མཆོག་གསུམ་ལ་བདག་སྐྱབས་མཆི། །སོགས། རྒྱུན་
བཤགས་རྣམས་བྱ་རྗེས་ཚད་མེད་བཞི་སྤྱི་དང་མཐུན་པར་བསྒོམ་མོ། །ནང་མཆོད་སུམྦྷས་
བསངས། སྭ་བྷཱ་ཝས་སྦྱངས། སྣོད་ཨ་ལས་བྱུང་བའི་ཐོད་པའི་ནང་གི་དབུས་སུ་ཧྲཱིཿཟུང་
གསུམ་ལ་གཡོན་བསྐོར་དུ་ༀ་ཨཿཧཱུཾ། གཞན་ༀ་གསུམ་ལས་དམར་རི་མོ་བཀང༌། ༀ་ཨཱཿཧཱུཾ་
ལན་མང་དུ་བརྗོད། སངས་རྒྱས་བྱང་སེམས་ཁམས་གསུམ་སྣོད་བཅུད་ཐམས་ཅད་ཀྱི་བཀྲག་
མདངས་བཅུད་རྣམས་ཚུར་བསྡུས། བདུད་རྩི་དང་འདྲེས་ཤིང་ཡི་གེ་རྣམས་ཀྱང་འོད་དུ་ཞུ་
བར་གྱུར། སུམྦྷ་བརྗོད་ཅིང་ནང་མཆོད་མྱང༌། གདན་སྲུང་བ་ཡིན། ཡང་སུམྦྷ་བརྗོད་དེ་གནས་
ཁང་དག་གདན་དང་ས་ཕྱོགས་ལ་གཏོར། གནས་སྲུང་བ་ཡིན། ཡང་རང་ཉིད་ལ་ནང་མཆོད་
20-1-239


གཏོར་ཏེ། ༀ་ཨཱཿཧཱུཾ་ཞེས་ཆོས་ཐམས་ཅད་སྟོང་པ་ཉིད་དུ་བསྒོམ། ༀ་སྭབྷ་ཝས་སྦྱངས། རང་
ལུས་འོད་ཀྱི་ཕུང་པོར་གྱུར་པའི་ལྟེ་བར་པདྨ་དཀར་པོ་དང༌། ཉི་མ་ལ་ཧྲཱིཿཡིག་དམར་སེར་དེ་
ལས་འོད་འཕྲོས། འཕགས་པ་མཆོད། སེམས་ཅན་གྱི་དོན་བྱས། སླར་འདུས་པ་ལས། སྐད་
ཅིག་ཆོས་འབྱུང་གཞལ་མེད་ཁང་པད་མ་ཉི་ཟླའི་གདན་དང་བཅས་པའི་དབུས་སུ། གཙོ་བོ་
སངས་རྒྱས་མཁའ་འགྲོ་མ་དམར་སེར་གཡས་གྲི་གུག་གཡོན་ཐོད་ཁྲག །མཆན་ཁུང་དུ་ཁ་ཊྭཱཾ་
ག །གཡོན་དུ་རྡོ་རྗེ་རབ་སྔགས་མ་ལྗང་ཁུ་གཡས་གྲི་གུག །གཡོན་ཐོད་པ། ཞབས་གཡོན་
བརྐྱང༌། གཡས་སུ་རྡོ་རྗེ་རྣམ་སྣང་མ་སེར་མོ། གཡས་གྲི་གུག །གཡོན་ཐོད་པ། ཞབས་
གཡས་བརྐྱང༌། ཐམས་ཅད་ཀྱང་གྲི་གུག་ཐུར་དུ་སྡིགས་ཤིང་ཐོད་ཁྲག་སྟེང་དུ་འཕྱར་པ། སྤྱན་
གསུམ། སྐྲ་གྲོལ་གཅེར་བུ་ཕྱག་རྒྱ་ལྔས་བརྒྱན་པ། མི་བཟད་ཅིང་དྲག་ཏུ་བཞད་ལ། བདེ་
བ་རྒྱས་ཤིང་ལྷག་པར་ཁྲོས་པ། ཐོད་སྐམ་གྱི་དབུ་རྒྱན་དང༌། ཐོད་རློན་གྱི་དོ་ཤལ་ཅན། མེ་
དཔུང་འབར་བའི་དབུས་ན་བཞུགས་པའོ། །གཙོ་བོའི་ཞབས་འོག་ཏུ་འཇིགས་བྱེད་དང་དུས་
མཚན་མནན་པ། འཁོར་གཉིས་ལ་གདན་གསུམ་ཆར་གྱི་ལྟེ་འོག་སོར་བཞིའི་འོག་གསང་
བའི་གནས་སུ། ཆོས་འབྱུང་དམར་པོ་གྲུ་གསུམ་རེ་རེ། གཙོ་མོ་ལ་དབུས་སུ་བཾ་དང་དེའི་རྒྱབ་
ཏུ། །ༀ་སརྦ་བུདྡྷ་ཊ་ཀི་ནི་ཡེ་ཧཱུཾ་ཕཊ་སྭཱ་ཧཱ་ཡི་གེ་བརྩེགས་མ་དང༌། གཡོན་གྱི་ལ། ༀ་བཛྲ་ཝརྞ་
ནི་ཡེ་ཧཱུཾ་ཕཊ་བརྩེགས་མའོ། །གཡས་ལ་ༀ་བཛྲ་བཻ་རོ་ཙ་ན་ཡེ་ཧཱུཾ་ཕཊ་བརྩེགས་མའོ། །དེ་ལྟར་
གསལ་བ་ནན་དུ་ལན་གཉིས་བསྒོམ། དེ་ནས་གཙོ་མོའི་དབུ་སྐྲ་ཕྱེད་ཕྱག་གཡོན་པས་བཟུང༌།
གཡས་ཀྱི་གྲི་གུག་གིས་མགུལ་གྱི་རྩ་བ་ནས་བཅད་དེ། དབུ་ནི་ཕྱག་གཡོན་པར་ཐོད་པ་དང་
ལྷན་ཅིག་བཟུང་བར་གྱུར། དེས་རྩ་གསུམ་ཆད་པ་ན། རྩ་དབུ་མ་ནས་བྱང་ཆུབ་ཀྱི་སེམས་
དང་རང་བྱུང་འདྲེན་པའི་རྒྱུན་བྱུང་སྟེ། རང་ཉིད་ཀྱི་ཞལ་དུ་ཐིམ་བཞིན་པ་དང༌། རྐྱང་མ་ནས་
དཀར་པོའི་རྒྱུན་དང༌། བཞི་མཉམ་གྱི་དྭངས་མ་བྱུང་སྟེ། རྡོ་རྗེ་རབ་སྔགས་མའི་ཞལ་དུ་འཇུག་
20-1-240


བཞིན་པ་དང༌། རོ་མ་ནས་རཀྟ་དང་གླ་རྩིའི་རྒྱུན་འདྲེན་པ་སྟེ། རྡོ་རྗེ་རྣམ་སྣང་མའི་ཞལ་དུ་
འབབ་བཞིན་པར་གྱུར། རླུང་ཕྱིར་ཡང་ཡང་བཟུང་ཞིང་ཡིད་ཙམ་བསྒོམ། ལྟེ་བའི་བཾ་ལས་
འོད་འཕྲོས། རོ་རྐྱང་གི་ལམ་རྒྱུད་བཅད་མཚམས་ནས་གཡས་གཡོན་དུ་འཕྲོས་ཏེ་མཁའ་
འགྲོ་མ་གཉིས་ཀྱི་སྐུ་ལ་ཕོག །དེ་གཉིས་ཚུར་སྤྱན་དྲངས་ཏེ་ལྷ་དང་ལྷ་མོ། ཆོས་དང་ཆོས་
འབྱུང་དབྱེར་མེད་དུ་འདྲེས། ཡིག་འབྲུ་བརྩེགས་པའི་སྔགས་གཉིས་དབུས་ཀྱི་ཡིག་འབྲུའི་
གཡས་གཡོན་དུ་ཞུགས་སླར་དེ་རང་ཉིད་དབུ་རང་གནས་སུ་བཞག་པས་འབྱར་པར་འགྱུར།
འོག་རླུང་བསྐུམ་ཞིང་ལྟེ་བའི་ཡིག་གེ་ལ་སེམས་གཏད་དེ། ༀ་སརྦ་བུདྡྷ་ཊཱ་ཀི་ནི་ཡེ་ༀ་བཛྲ་
བརྞ་ནཱི་ཡེ། ༀ་བཛྲ་བཻ་རོ་ཙ་ནཱ་ཡེ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱཧཱ། ཞེས་ཟླ་བ་ཉིད་གཙོ་བོར་མཛད་
ལ། སྔགས་བསྡུས་པ་ལ་མོས་ན། གཡས་གཡོན་གྱི་སྔགས་ཐོག་བརྩེགས་གཉིས་དབུས་མ་
ལ་ཐིམ་པར་བསམ་སྟེ། ༀ་སརྦ་བུདྡྷ་ཌཱ་ཀི་ནཱི་ཡེ་ཧཱུཾ་ཕཊ་སྭཱཧཱ། ཞེས་པ་ཉིད་བཟླའོ། །ཡང་ས་
བོན་གྱི་ཡི་གེ་ཧཱུཾ་ཉིད་ཡིད་བཟླས་སུ་བྱེད་པའང་ལུགས་གཅིག་གོ །ཡང་འཇམ་རླུང་བཟུང་
སྟེ་ལྟེ་བའི་ཧྲཱིཿལས་མེ་འབར་དབུ་མའི་ལམ་ནས་སོང༌། སྤྱི་བོའི་ཧཾ་ལ་རེག །དེ་ལས་བདུད་
རྩིའི་རྒྱུན་བབས་ཏེ་ཧྲཱིཿལ་ཐིམ་པར་བསྒོམ་ཞིང༌། ཧྲཱིཿཧཾ་ཞེས་བཟླས་པ་ཡང་ལུགས་གཅིག་
གོ །སྤྱིར་གནས་སྐབས་འདིར་ལྷ་སྐུ་བསྒོམ་པ་དང༌། ཡིད་བཟླས་གཙོ་ཆེ་ཞིང༌། ངག་བཟླས་
གཙོ་ཆུང་ངོ༌། །ལྷ་སྐུ་འོད་གསལ་དུ་བསྡུ་བ་སོགས་མི་དགོས། ནམ་ཕྱེད་ན་ས་གཞི་དུར་ཁྲོ་
ཆེན་པོར་བསམ་སྟེ། གཏོར་མ་འབུལ་བ་ནི་བྱིན་རླབས་སྤྱི་དང་འདྲ། འབྲུ་གསུམ་ཁོ་ནས་ཀྱང་
ཚིག་རྒྱས་བསྡུས་ཁྱད་པར་མེད་གསུངས་ཏེ། བདེ་མཆོག་ཡབ་ཡུམ་གང་ཡང་རུང་བའི་ལུགས་
གཅིག་དང་བསྟུན་ན་ལེགས། ཕེཾ་ཞེས་རྗེ་བཙུན་མ་གཙོ་འཁོར་གསུམ་སྤྱན་དྲངས། སྤྲོས་པ་
ལ་དགའ་ན། སྔགས་གསུམ་ལ་སོགས་པ་ཇི་ལྟར་འོས་པས་འབུལ་ཏེ། ཆོས་དང་ལོངས་སྤྱོད་
རྫོགས་པའི་སྐུ། །སྤྲུལ་པ་བདེ་བ་ཆེན་པོའི་སྐུ། སོགས། ཞེས་བསྟོད་ཅིང༌། མཆོད་སྦྱིན་གཏོར་
20-1-241


མ་འདི་བཞེས་ལ་སོགས། སྤྱི་དང་མཐུན་པར་འདོད་དོན་གསོལ་བ་བཏབ་ཡི་གེ་བརྒྱ་པའི་
མཐར། ༀ་ཡོ་ག་ཤུདྡྷ༴ ཞེས་རང་ལ་ཐིམ། གལ་ཏེ་གཏོར་མ་མི་ལྕོགས་ན། ཁ་ཟས་བཟའ་
བའི་ཚེ་ཕུད་ཅུང་ཟད་བཅད་ནས། ཆོ་ག་འདི་བཞིན་བྱས་པས་ཆོག །
༈ གཉིས་པ་རྫོགས་རིམ་ནི། ཐོག་མར་འཁྲུལ་འཁོར་མི་བྱ་སྟེ། སྐྱབས་སེམས་བླ་མའི་
རྣལ་འབྱོར་སྔོན་དུ་བཏང༌། རང་རྗེ་བཙུན་མའི་སྐུར་སྐད་ཅིག་གིས་གསལ་འདེབས་པ་ཡུད་
ཙམ་ཡང་ཡང་དྲན་པར་བྱ། ལུས་གནད་སྤྱི་དང་མཐུན་པར་བཅས། མིག་དང་ཡིད་སྣའི་རྩ་
བར་གཏད། རླུང་དལ་བུས་ཕྱིར་འབུད་པ་ལ་ལག་ལེན་བཞིན་དུ་བསླབ། ཞག་བདུན་སོགས་
སྦྱངས། དེ་ནས་ཡང་དེ་བཞག་སྟེ་རླུང་དལ་བུས་ནང་དུ་འཐེན་པ་ལག་ལེན་བཞིན་དུ་བསླབ།
དེ་ནས་ཡང་ཞག་བདུན་ལ་སོགས་པ་བྱའོ། །དེ་འོག་རླུང་རང་གནས་སུ་བཅིངས། ཡར་མི་
འཐེན། སྟེང་རླུང་རན་པར་དྲངས་ཏེ་ལྟེ་འོག་ཏུ་མནན། གཞིལ་བ་སོགས་མི་བྱེད། མི་བདེ་
བ་བྱུང་ན་སང་གིས་བཏང༌། མིག་སྣ་རྩེར་བལྟ་བའི། སྨིན་མཚམས་སུ་བལྟ་བ་གང་བདེ་ཞིག་
བྱ། ཟླ་བ་ཕྱེད་ཙམ་བསྒོམ། དེ་ནས་གཞན་སྔར་དང་འདྲ་བ་ལས། མི་བདེ་བ་སྐྱེས་ཀྱང་ཅུང་
ཟད་བཟུང་བ་སོགས་ཉིན་རེ་བཞིན་ཅུང་ཟད་རེ་ཡུན་སྲིངས་ཏེ་བསྒོམ་པ་ཟླ་བ་ཕྱེད་ཙམ་བྱ།
དེ་མཚམས་ནས་རང་རེ་བོད་ཡུལ་ལྟ་བུར་ཉི་འོད་ལ་བརྟེན་ཞིང༌། སྔ་དྲོ་སུག་ཆུས་ལུས་བཀྲུ།
ཕྱི་ཕྲེད་ཏིལ་དམར་རམ། རབ་ཏུ་ཞུན་གྱིས་དབང་བྱུགས་ཞེས་བཤད་ཀྱང་མི་རྙེད་པས། འབྲུ་
མར་གྱི་བྱུག་པ་འཐེམས་པར་བྱ། ཡང་རེ་གོ་བཟློག་ཀྱང་རུང་གསུངས་ཏེ་ཞག་བདུན་སོགས་
ཞག་ཤེས་བྱ། ཡང་དྲི་ཆུས་ལུས་བཀྲུས་པ་དང༌། བཀུ་མཉེས་སྤེལ་བ་ཞག་ཤས་བྱ། མང་
ཐང་ཕྲ་མོ་དཀར་ནག་གང་རིགས་ཀྱི་རྩ་རྩེ་ཚང་མ་བརྡུངས་པའི་ཁུ་བ་བཅིང་བ་ལ་ཤིང་ཐལ་
ལམ་ལྕི་ཐལ་འཇམ་པོ་བཏབ་པ་དེ་ལུས་ལ་བྱུག་ཅིང་མཉེས་ནས་སླར་ཆུ་གཙང་གིས་བཀྲུ་
བ་དང༌། བཀུ་མཉེས་སྤེལ་བ་ཡང་ཞག་ཤས་བྱ། དེ་དག་གི་སྐབས་སུ་རླུང་སྦྱོར་སྔར་གྱི་དེ་ཁ་
20-1-242


ཅི་རིགས་པར་འབད། རྩོལ་བ་ཧ་ཅང་དྲག་པས་བཅུར་བཅུར་མི་བྱའོ། །དེ་ནས་ཛི་ཏ་ཀརྨའི་
འཁྲུལ་འཁོར་བྱང་བར་བསླབ་སྟེ། རླུང་སྦྱོར་སྔ་མའི་སྟེང་ནས་ཉི་མ་དང་པོ་ལ་ཐུན་རེ་བཞིན་
ཚར་ལྔ་ལྔ་ཙམ་བྱ་སྟེ། ཐུན་གསུམ་གྱིས་ཆོག །དེ་ནས་ཉིན་རེ་བཞིན་ཐུན་རེ་ལ་ཚར་རེ་བསྣན་
ཏེ། ཟླ་བ་ཕྱེད་ཙམ་ན་ཉིན་ཞག་གཅིག་ལ་ཛི་ཏ་ཀརྨ་ཚར་དྲུག་ཅུར་འགྱུར། དེ་ནས་ཟླ་ཕྱེད་
ཙམ་སླར་ལྷག་པོར་མི་སྤོར་བར། དེ་ཁའི་རྒྱུན་བསྐྱངས། དེ་དག་གི་འཁྲུལ་འཁོར་མི་བྱེད་པ་
སྐབས་ཐམས་ཅད་དུ། ལུས་གནད་ཁྲོང་ངེ་པའི་ངང་ནས། མི་རྟོག་པ་གཙོ་བོར་སྐྱོང་པས། ཟླ་
བ་གཅིག་པོ་དེ་ལ་ཏིང་འཛིན་གྱི་ཤུགས་ཀྱིས་མི་སྐྱེ་མི་སྲིད། སྔར་རླུང་གི་སྦྱངས་པ་གསུམ་ལ་
ཟླ་བ་ཕྱེད་དང་གཉིས། རྫས་ཀྱི་སྦྱངས་པ་ལ་ཟླ་བ་ཕྱེད། ཛི་ཏ་ཀརྨ་ཟླ་བ་གཅིག་ལ་བྱས་པས།
ལུས་ཤིན་དུ་སྦྱངས་པར་འགྱུར་རོ། །དེ་ནས་ཕྱི་ནང་གསང་གསུམ་རང་གང་འོས་པ་གཅིག་གི་
ཕྱག་ཆེན་གྱི་ལུས་གནད་བཅས་རླུང་བུམ་པ་ཅན་སྦྱོར་བ་བཞི་ལྡན་སྤྱི་དང་འདྲ་བར་བསྒོམ།
སེམས་རང་བབས་སུ་ལྷོད་དེ་བའི་ངང་ནས་རང་བབས་སུ་ཆེར་རེ་བལྟ། ཐུན་མཚམས་སུ་ཛི་
ཏ་ཀརྨ་ཡང་ཇི་ལྟར་འོས་པར་རྡེག་གོ །དེ་ལྟར་ཟླ་གཅིག་ཙམ་སོང་བ་ན། ཐུན་གྱི་མགོར་ཛི་ཏ་
ཀརྨ་ལན་གསུམ་ཙམ་རེ་སོང་བའི་རྗེས་སུ། ཕྱིའི་ཨཾ་གྲོལ་གྱི་ལུས་གནད་བྱས། རྟིང་པ་ཕྱོགས་
གཅིག་གིས་འོག་སྒོ་གཉིས་ཀྱི་བར་བསྡམ། གཅིག་གི་སྟེང་ནས་མནན་ཏེ་ཅུང་ཟད་སྒུར་བ་
ཡིན། ལག་གཉིས་གཅིག་གིས་རྐང་རྩེ་དང་གཅིག་གིས་བོལ་གོང་ནས་བཟུང་བ་ཡིན། རླུང་
བཤང་སྒོ་བཙུམ་སྟེ་འོག་རླུང་ལྟེ་བར་དྲངས། དེ་ལ་སྟེང་རླུང་ཁ་སྦྱར་ཏེ་གཡས་གཡོན་དབུས་
གསུམ་གྱིས་གཏུན་རྡུང་དྲག་ཏུ་བྱེད་པ་ཡིན། འདི་རླུང་ལ་བསྣན་པ་ཡིན། དེ་ལྟ་བུའི་རླུང་
སྦྱོར་ཉེར་གཅིག་ཚུན་བསྒོམས་པའི་རྗེས་སུ་ཨཾ་གྲོལ་ཕྱི་ནང་གསང་གསུམ་གང་རུང་གི་འཁྲུལ་
འཁོར་ཉུང་མཐའ་ཡང་ཐུན་རེ་རེ་སུམ་ཅུ་སོ་དྲུག་རེ་བྱེད། རབ་ཏུ་ཐུན་རེ་རེ་ལ་བརྒྱ་རྩ་བརྒྱད་
དོ། །ཐུན་གྱི་མཇུག་ལ་སྔར་བཞིན་ཕྱག་རྒྱ་ཆེན་པོ་བསྐྱངས། དེ་ལྟར་ཟླ་ཕྱེད་ཙམ་བསྒོམ། དེ་
20-1-243


ནས་ཡང་ཐུན་མགོར་ཛི་ཏ་ཀརྨ་འགའ་ཟུང་དང༌། ཨཾ་གྲོལ་བདུན་ཙམ་སོང་བའི་རྗེས་རླུང་ཁ་
སྦྱོར་བུམ་ཅན་གྱི་ངང་ནས། ཡར་སྟོད་ལ་འཐེན་པའི་རྗེས་སུ་ཤུགས་དྲགས་པ་རྒྱུ་ཞབས་སུ་
དྲག་ཏུ་བརྡབས་ཏེ་གང་རུང་དུ་མནན། འདིས་རླུང་བསད་པ་ཡིན། དེ་འདྲ་ལན་ཉེར་གཅིག་
ལས་མི་ཉུང་བར་སོང་བའི་རྗེས་སུ། ཕྱི་ནང་གསང་གསུམ་གང་རུང་གི་བེ་ཏ་གཅིག་ཐུན་རེ་རེ་
བཞིན་སུམ་ཅུ་སོ་དྲུག་ནས་བརྒྱ་རྩའི་བར་སོགས་བྱེད། ཐུན་གྱི་མཇུག་ཏུ་ཕྱག་ཆེན་བསྒོམ།
དེ་ཡང་ཟླ་བ་ཕྱེད་དོ། །ཡང་ཐུན་གྱི་མགོར་ཛི་ཏ་ཀརྨ། ཨཾ་གྲོལ། བེ་ཏ་རྣམས་ལྔ་ལྔར་བདུན་
བདུན་ཏེ་སྒོམ་སྟེ། རླུང་བུམ་ཅན་གྱི་ངང་ནས། རླུང་ཐེངས་རེའི་ཕྱེད་རྗེས་མའི་ཆ་ལ་སླེབ་པ་ན།
རྐེད་པ་ཉག་བྱ་སྟེ་དབུས་སུ་སྒྲིལ་ནས། དེ་མཚམས་སྟེང་དུ་དྲག་ཏུ་མནན། འཕོངས་སྟེགས་
ནས་འབེབས་ཆུང་གཅིག་བྱ་རྗེས་སྣ་ནས་སང་སྟེ་བཏང༌། འདི་རླུང་འཆིང་བའི་ཐབས་ཡིན།
དེ་འདྲ་བའི་རླུང་སྦྱོར་ཉེར་གཅིག་སོགས་སོང་མཚམས་ཕྱི་ནང་གསང་གསུམ་གྱི་བེ་ཏ་གང་
འོས་གཅིག་སུམ་ཅུ་སོ་དྲུག་ནས་བརྒྱད་རྩའི་བར་དུ་བྱེད་པ་དང༌། རྗེས་ཕྱག་ཆེན་སྔར་དང་
འདྲ། དེ་ཡང་ཟླ་ཕྱེད་དོ། །དེ་དག་ཡང་ན་ཕྱིའི་བཞི་ཁོ་ན་སྒོམ་པ་དང༌། ཡང་ན་ནང་གི་བཞི།
ཡང་ན་གསང་བའི་བཞི་བྱས་ཀྱང་ཆོག །ཡང་ཨཾ་གྲོལ་གཅིག་བེ་ཏ་གཅིག་བནྡྷ་གཅིག་ཕྱག་
ཆེན་གཅིག་ཡང་མོས་སུ་བྱས་ཀྱང་ཆོག ཡང་ཨཾ་གྲོལ་ཕྱི་ཟབ། བྷནྡྷ་ནང་ཟབ། བེ་ཏ་གསང་
བ་ཟབ། ཕྱག་ཆེན་གསུམ་ལ་ཁྱད་མེད་ཟེར་བ་ལྟར་བྱས་ཀྱང་རུང་ལ། འགྲོ་མགོན་སངས་
རྒྱས་སྟོན་པས་འཁྲུལ་འཁོར་གསལ་བྱེད་ཉི་མའི་ནང་གི་བེ་ཏ་ཁོ་ན་ཡང་བསྔགས་པ་ཆེ་བར་
མཛད་པའང་ཡོད། གང་ལྟར་ནའང་རྩ་བའི་རྐང་གི་འཁྲུལ་འཁོར་ཐུན་རེ་མོས་དང༌། ཉི་མ་རེ་
མོས་སུ་མ་ངེས་པ་འཆོལ་བར་བྱས་ན་ཕན་ཡོན་ཆུང་བས་འཁྲུགས་ཅིང༌། གང་ཡིན་ཡང་རུང༌།
ཐོག་མར་གང་བརྩམས་པ་དེ་ཉིད་ཉམས་ལེན་གྱི་མཐིལ་དུ་ཉིན་རེ་བཞིན་དུ་དྲག་ཏུ་མི་འགྱུར་
བར་བྱ། ཐུན་མཚམས་ཀྱི་འཁྲུལ་འཁོར་དང་བོགས་འདོན་དང༌། གེགས་སེལ་ལ་ངེས་པ་མེད་
20-1-244


དོ། །ཡང་དེ་རྗེས་སྔར་གྱི་རྣམས་མ་ཆགས་པར་བྱ། ལྷག་པོ་ཐུན་མགོར་ཛི་ཏ་ཀརྨ་ལན་འགའ་
བཟུང་བར་བྱ། རྐང་པ་གཉིས་མདུན་དུ་བརྐྱངས། ལག་པ་གཉིས་གཡས་གཡོན་དུ་བཙུགས་
ཏེ་རླུང་ཁ་སྦྱོར་ཅུང་ཟད་བཟུང་ནས། བཤང་སྒོར་དྲག་ཏུ་འཐེན། ཧཱུཾ་སྒྲ་དྲག་པོ་དང་བཅས་པའི་
སྟོང་འདྲེན་གྱི་མཐར། རོ་སྟོད་རོ་སྨད་དྲག་ཏུ་གཅུས་ཤིང་འདར་སི་ལི་ལི་དྲག་ཏུ་སྤྲུག །འདི་
རླུང་བཤིག་པ་ཡིན། དེ་འདྲ་བ་ཉེར་གཅིག་ཙམ་སོང་ནས། ཕྱིའི་ཨཾ་གྲོལ་གྱི་མཐར་ཐིག་ལེ་
སྒྲ་གཅན་གྱེན་དུ་བཟློག འགྲེམས་པ་གཉིས་དང་བཅས་པ་དེར། ཚར་བཅུ་ནས་སུམ་ཅུའི་
བར་བྱ། དེ་རྗེས་ཕྱག་ཆེན་གོང་བཞིན། དེ་ཡང་ཟླ་བ་ཕྱེད་དོ། །འདི་ཐམས་ཅད་ཐུན་གསུམ་
གྱི་དབང་དུ་བྱས་སོ། །དེ་ལྟར་ཟླ་བ་དྲུག་གིས་ལག་ཁྲིད་སོང་ནས། ཐུན་གྱི་མགོར་དབུ་
བཅད་མའི་བསྐྱེད་རིམ་སྒོམ་དགོས་ཏེ། སྤྲོས་པ་ཆེ་ན་ཡོངས་རྫོགས་བསྒོམ། བསྡུ་ན། ཤུ་ནྱ་
ཏ་ནས། ཡིད་བཟླས་ཀྱི་བར་བྱེད་དགོས་པ་ལ་ངག་བཟླས་མེད་ཀྱང་ཆོག །དེ་རྗེས་ཨཾ་གྲོལ།
བེ་ཏ་བྷནྡྷ་རྣམས་ཡུན་རིང་ཐུང་ཆ་མཉམ་དུ་བསྒོམས་ཀྱང་ཆོག་མོད་ཀྱི། གཙོ་ཆེར་སུམ་ཆའི་
རིམ་པ་མཛད་པས་རླུང་ལ་བསྣུན་པའི་རྗེས་སུ། ཨཾ་གྲོལ་རླུང་ཐེངས་ཉི་ཤུ་རྩ་བདུན་སོང་ནས་
རླུང་བསད་པ་བསྒོམས་ཏེ། བེ་ཏ་རླུང་ཐེངས་དགུ་རླུང་འཆིང་བ་བྱས་ནས། བནྡྷ་རླུང་ཐེངས་
གསུམ། ཐིག་ལེ་སྒྲ་གཅན་འགྲེམས་གཉིས་དང་བཅས་ཏེ། བསྣུན་པས་འཆིངས་གསུམ་པོ་
རེ་རེ་ལའང་བར་བར་དུ་ཚར་གསུམ་འཇུག་པའམ། ཀུན་གྱི་མཇུག་ཏུ་ལན་དགུ་ཙམ་བྱས་
ཀྱང་རུང༌། དེ་ལྷག་ཡན་བུམ་ཅན་དང༌། ཕྱག་ཆེན་སྦྲགས་པ་བྱེད། དེ་རྣམས་ངེས་པ་ཅན་ཡིན།
ཐུན་མཚམས་སུ་སྤྲོ་ན། ཡན་ལག་གི་འཁྲུལ་འཁོར་རྣམས་ཚར་རེ་བྱེད་པའམ། དགོང་ཐུན་
ལྟ་བུ་ཐུན་གཅིག་གི་མཇུག་ལས་འཁྲུལ་འཁོར་སུམ་ཅུ་རྩ་གཉིས་ཆ་ཚང་རེ་བྱས་པས་ཀྱང་
དོན་འགྲུབ་སྟེ། སྤྱིར་དེ་དག་ལ་མཐའ་གཅིག་ཏུ་ངེས་པ་མེད་དོ། །དེ་ཡང་འཇིག་རྟེན་བྱ་བྱེད་
ལ་བརྟེན་པའི། བྲེལ་བ་དང་བསམ་མནོ་མི་བྱེད་ཅིང༌། ཆོས་ལ་བརྟེན་པའི་སྤྲོས་པ་གཞན་
20-1-245


ཡང་སྤངས་ཏེ། འདི་ཉིད་ཀྱི་ཉམས་ལེན་རྣམས་ལ་རྩོལ་བ་ཆེ་ཞིང༌། ཐུན་མཚམས་སུ་བཅུར་
བཅུར་མ་ཡིན་པའི་བག་ཡངས་པ་དང༌། རླུང་གི་རྣལ་འབྱོར་ལ་གནོད་པའི་ཟས་དང་སྤྱོད་
ལམ་སྤངས། ཁ་ཟས་རན་པ་ཐེངས་རེ་བཟའ་བའམ། ཉུང་ངུ་དུས་གཉིས་སམ་གསུམ་བརྟེན་
ཀྱང་རུང༌། མཚན་མོ་གཉིད་ཚིམས་པར་ལོག །དད་པ་མོས་གུས་ངེས་འབྱུང་སྙིང་རྗེ་སོགས་སྤྱི་
དང་འདྲ་ཡང༌། སེམས་ལེ་ལོའི་རྟོག་པར་འགྲོ་བར་མི་བྱེད་པར་ལྷོད་དེ་བའི་ངང་ནས་རླུང་གི་
གནད་མ་འཆུག་ཅིང་བརྩོན་པར་བྱས་ན། འདིའི་བསྐྱེད་རྫོགས་ཁོ་ནས་ཉམས་རྟོགས་སྐྱེ་མྱུར་
ལ་ཚན་ཆེ་ཞིང༌། གེགས་མེད་པ་འབྱུང་བ་དང༌། དྲོད་ཀྱི་ཡོན་ཏན་མྱུར་དུ་སྐྱེ་ཞིང༌། དྲོད་ཐོབ་
ནས་བརྟུལ་ཞུགས་ཀྱི་སྤྱོད་པ་སྤྱད་པས། མྱུར་དུ་ཕྱག་རྒྱ་ཆེན་པོའི་མཆོག་གི་དངོས་གྲུབ་ཐོབ་
པར་འགྱུར་རོ། །རྒྱས་པར་སློབ་དཔོན་གྲུབ་ཐོབ་ཆེན་པོ་ཨུ་རྒྱན་ཡུལ་གྱི་བིརྺ་པ་ཡི་གཞུང་
ཉིད་ལས་རྟོགས་པར་འགྱུར་ཏེ། ཆོས་གདམས་ངག་གཞན་ལ་མ་ལྟོས་པར། འདི་ཁོ་ནས་རྐང་
ཚུགས་པར་འདུག །ད་ལྟའི་ལག་ལེན་ལྟར་ན། སློབ་མ་དབང་བསྐུར་ཐོབ་པ་གཅིག་ལ། སྔོན་
འགྲོའི་ཁྲིད་རྣམས་རིམ་གྱིས་ཕོག་ནས། ཟླ་བ་གཅིག་གཉིས་ཉམས་ལེན་བྱེད་དུ་བཅུག་དེ་
ནས་བསྐྱེད་རིམ་གྱི་སྐོར་ལེགས་པར་བསླབ་ནས། ཐུན་གསུམ་དུ་ཉམས་ལེན་བྱེད་དུ་འཇུག་
ཅིང༌། ལྷ་སྐུ་ལ་སེམས་འཛིན་པ་དང༌། ཡིད་བཟླས་དྭངས་པ་དེ་དག་མ་མཐའ་ཡང་ཟླ་རེ་ཙམ་
སྒོམ་དུ་གཞུག ཁྲིད་ཉམས་སུ་ལེན་པའི་ཡན་ལག་ཏུ་བསྙེན་པ་དགོས་པ་མ་ཡིན་ཞིང༌། སྤྱིར་
བྱིན་རླབས་འཇུག་པ། བར་ཆད་བསྲུང་བ་དང༌། ནུས་པ་རྙེད་པ་དང༌། ཉམས་རྟོགས་མྱུར་
བའི་གནད་ཡོད་པ་དང༌། དེ་རྗེས་བསྙེན་པ་སྐྱེལ་དུ་བཅུག་ན་ཤིན་ཏུ་ལེགས། དེ་ནས་གོང་དུ་
བཤད་པ་ལྟར་དངོས་གཞི་རླུང་ཁྲིད་ལ་འཇུག །ཛི་ཏ་ཀརྨ་ཚར་རེ་ཙམ་ཐུན་གྱི་མགོར་བྱེད་པ་
དེ་སྔོན་མ་ནས་ཀྱང་སྐྱོན་མེད། ཡན་ལག་འཁྲུལ་འཁོར་རྣམས་དངོས་གཞིས་འཁྲིད་རྫོགས་
པའི་རྗེས་ནས་ཉམས་ལེན་བྱས་ཀྱང་ཆོག །ཨཾ་གྲོལ་གྱི་ཁྲིད་ལ་འཇུག་པ་ནས་ཐུན་གཞུག་
20-1-246


ཐུན་མཚམས་མ་བྱས་ཀྱང་ཆོག གང་མོས་ཡིན་ནོ། །འཆི་མེད་གྲུབ་པའི་གདམ་ངག་འདི་ལ་
སྔོན་གྱི་ལོ་ཙྪ་བ་གཞན་སོ་སོ་འཁྲུལ་འཁོར་བརྒྱ་ལས་མེད་པས་བསྡུས་པ་དང༌། ཡང་ལྔ་བཅུ་
པ་དང༌། བརྒྱ་ཉི་ཤུ་ལ་སོགས་པའི་སྤྲོས་པ་ཅན་ཡང་བྱུང་འདུག ལ་ཐོད་མགོན་པོའི་མན་ངག་
གཉན་སྟོན་ཆེན་པོའི་ལུགས་འདི་ལ་སྔོན་གྱི་ལོ་ཙྪ་བས་སུམ་ཅུ་རྩ་གཉིས་མཛད་པ་ཡིན་ཏེ།
ཕྱིས་པཎྜི་ཏ་ནགས་རིན་དང༌། ཤཱ་རི་བུ་དྲའི་གདམ་ངག་ལས་བྱུང་བ་རྣམས་ཀྱང་རྣམ་འགྱུར་
ཕྲ་མོ་རེ་ཙམ་མ་གཏོགས་འཁྲུལ་འཁོར་སོ་གཉིས་པོ་འདི་དང་གཅིག་པར་འབྱུང་བས། ཤིན་
ཏུ་ཡིད་ཆེས་པའི་གནས་སུ་ངེས་པས། ལྷག་པར་ཁུངས་ཆེ་བ་དེ་གཉན་སྟོན་གྱི་ལུགས་འདིར་
འདུག །འདི་ལ་སྔོན་ཆད་འཁྲིད་ཡིག་ཞལ་གསལ་ཅན་ཡི་གེར་འཁོད་པ་མི་འདུག་པས་ལུས་
སྦྱོང་འཁྲུལ་འཁོར་སློབ་པ་ཙམ་ལས་གཞན་ལམ་གྱི་དངོས་གཞི་ཉམས་ལེན་གྱི་རྐང་གཏད་
ལ་ཁད་ནུབ་ཏུ་ཉེ་བར་མཐོང་ནས། སྒྲུབ་བརྒྱུད་འདིའི་ཉམས་ལེན་ཞབས་ཏོག་ཏུ་བསམ་
ནས། རྒྱལ་ཁམས་པ་ཏཱ་ར་ནཱ་ཐས་བར་སྐབས་སུ་བརྗོད་པའོ།། །།མངྒལཾ།
20-1-247


༄༅། །འཆི་མེད་གྲུབ་པའི་ཁྲིད་ཡིག་གསལ་བར་མ་ཐོན་པའི་
མན་ངག་འཇུག་ཚུལ་ཞེས་བྱ་བ་བཞུགས།
༄༅། །ན་མོ་གུ་རུ། ཤིན་ཏུ་ཟབ་པའི་མན་ངག་མཆོག །དཔལ་ལྡན་འཆི་མེད་གྲུབ་པ་
ལ། །དཀྱུས་ཀྱི་རིམ་པ་བཞིན་དུ་བཤད། །གནད་ཀྱི་ཞལ་བཞེས་འདིར་བསྟན་ཏེ། །ལྟེ་བའི་
ཨཾ་ཡིག་འབར་བའི་མེ། །ལུས་རྣམས་ཐམས་ཅད་ཁྱབ་པ་ལས། །གཏུན་བརྡུང་བྱས་པས་
མེ་ལྕེ་རྣམས། །ཐུར་དུ་བབ་པར་བསྒོམ་པར་བྱ། །མེ་ལྕེ་གསང་བའི་སྒོ་རུ་ཐོན། །ལྟེ་གསང་
གཉིས་ལ་སེམས་གཏོད་ཅིང༌། །མིག་ནི་སྣ་རྩེར་བལྟ་བར་བྱ། །ལས་ཀྱི་ཕྱག་རྒྱའི་མན་ངག་
ཡིན། །སྙིང་གར་ཧཱུཾ་ཡིག་བསྒོམ་པ་ལས། །ཡར་འཐེན་པ་དང་མར་བྱོན་པ། །གཉིས་ཀའི་དུས་
སུ་མེ་དང་རླུང༌། །འཐབ་ནས་སྙིང་ཁར་ཐིམ་པར་བསྒོམ། །དེ་ཡི་བར་སྐབས་ཡང་ཡང་དུ། །ཁ་
སྦྱོར་ངང་ནས་སྤྲུགས་པ་དང༌། །ཧ་སྤྲུགས་བྱེད་པ་གནད་དུ་ཆེ། །ཆོས་ཀྱི་ཕྱག་རྒྱའི་མན་ངག་
ཡིན། །རྐང་མཐིལ་གཉིས་དང་བཤང་སྒོ་གཉིས། །འོད་ཟེར་དཀར་དང་ལྗང་ཁུ་དང༌། །ལུས་
ནང་གང་ཞིང་སྤྱི་བོ་དང༌། །མགྲིན་པའི་གནས་སུ་འཁྱིལ་ནས་ཀྱང༌། །རེས་འགའ་གནས་
དེར་ཡལ་བར་བསྒོམས། །རེས་འགའ་བ་སྤུ་ཀུན་ལས་སྤྲོ། །རེས་འགའ་སྤྱི་བོའི་གཙུག་ནས་
སྤྲོ། །དམ་ཚིག་ཕྱག་རྒྱའི་མན་ངག་ཡིན། །མགྲིན་པའི་འཁོར་ལོ་མེ་འོད་བསྒོམ། །རླུང་གིས་
ཡང་ཡང་ཕྱིར་བསལ་བས། །མེ་འོད་སྣ་ནག་རྒྱང་རིང་འགྲོ། །རེས་འགའ་མགྲིན་པར་སྒོར་
ཞིང་སྤྲུག །བུམ་པ་ཅན་གྱི་གེགས་སེལ་དང༌། །བོགས་འདོན་དག་ཀྱང་གལ་ཆེ་སྟེ། སྐབས་སུ་
སྐབས་སུ་རྒྱུན་དུ་མིན། །ཕྱག་རྒྱ་ཆེན་པོའི་མན་ངག་ཡིན། །ནང་ནས་འོད་འབྱུང་སྣ་ནས་ཐོན། །
ཕྱི་ནང་ཐམས་ཅད་གསལ་བར་བསྒོམ། །སྐྱོན་རྣམས་ཕྱིར་བསལ་འདོད་རིགས་གསལ། །
20-1-248


རྡུལ་མཐའ་ཅན་ལ་དགོས་པ་ཡིན། །ལྟེ་འོག་སོར་བཞི་མེ་ཐབ་བསྒོམ། །རླུང་རྣམས་དེའི་
ངང་ནང་དུ་ཐིམ། །ཐབས་ལྟེ་གཡས་གཡོན་ཡང་ཡང་འཁོར། །གང་བ་ཅན་ལ་དགོས་པ་ཡིན། །
ཨ་ཝ་དྷུ་ཏི་སྟོང་པ་གཅིག །བསམ་ནས་ཡར་ལྟ་མར་ལྟར་བྱེད། །བུམ་པ་ཅན་གྱི་སྔོན་འགྲོ་
ཡིན། །འཛམ་གླིང་འཛིན་དུ་དགོས་པ་ཡིན། །རིག་པ་ནང་ནས་ཕྱིར་སྤྲོས་ཏེ། །ནམ་མཁའ་
དག་ལ་ཡལ་བར་བསྒོམ། །རེས་འགའ་ཕྱི་ནས་ནང་དུ་བསྡུ། །སྒྲ་གཅན་གདམས་ངག་ཡིན་
ཞེས་གསུངས། །ཕྱག་རྒྱ་གསུམ་པོའི་རྣལ་འབྱོར་ལ། །སྒྲ་གཅན་གྲོགས་སུ་མེད་ཐབས་མེད། །
ཨཾ་གྲོལ་དྲག་པོའི་གྲོང་ཁྱེར་འཇིགས། །བེ་ཏས་འཕྲོག་བྱེད་གྲོང་ཁྱེར་བརྩོམ། །ནན་དྷ་ཆིང་
པའི་གྲོང་ཁྱེར་བཤིགས། །ཕྱག་རྒྱ་གསུམ་གྱི་མཐའ་བསྐོར་ནས། །བཤིག་པར་བྱེད་མཁན་
སྒྲ་གཅན་ཡིན། །གནད་འདི་རྣམས་ནི་ལོ་གསུམ་དུ། །སྒོམ་ན་རླུང་ལས་རྣམ་པར་རྒྱལ། །རྩ་
རྣམས་དག་ཀྱང་མཉེན་བཅུག་འགྱུར། །ཐིག་ལེ་དྭངས་ཤིང་རང་དབང་འདུས། །རིག་འཛིན་
མངོན་ཤེས་དཔག་མེད་འཆར། །གྲོལ་ལམ་རང་ལུས་ཐབས་ལྡན་གྱིས། །ཡེ་ཤེས་གོང་ནས་
གོང་སྤེལ་བ། །གདམས་ངག་འདི་ཡི་གཞུང་ཤིང་ཡིན། །གཞན་ལུས་ཤེས་རབ་ཡན་ལག་
བཅིང༌། །ལམ་གཞན་དག་དང་མ་འདྲེས་པར། །ལུགས་འདི་ཉིད་ཀྱི་སྲོལ་བཟུང་ནས། །རང་
གི་ལུས་ཀྱི་ཕྱག་རྒྱ་དང༌། །ལྷན་ཅིག་བསྒྲུབ་པས་འགྲུབ་པར་འགྱུར། །གོང་དུ་བཤད་པའི་
མན་ངག་རྣམས། །ཡུན་རིང་བསྒོམ་པའི་དུས་སུ་ནི། །ཆེད་དུ་བསྒོམ་པ་མ་ཡིན་པར། །གསལ་
སྟོང་བདེ་ཉམས་ལྡན་པ་ལ། །ཆུ་ཚོད་རེ་ཙམ་གནས་པ་ཡོད། །ཏིང་འཛིན་དེ་ལྟར་མ་སྐྱེས་ནའོ། །
བནྡྷ་དང་ནི་སྒྲ་གཅན་ལ། །རླུང་དམར་དྲག་པོ་བཏབ་པའི་ཚེ། །ཕྱི་རུ་ནང་དུ་འདྲེན་པ་ཡོད། །
དེ་ཡང་ངེས་པའི་རྟགས་གཅིག་ཡིན། །སྤྱིར་ནི་ཏིང་འཛིན་མ་ཐོབ་ན། །རླུང་གི་རྒྱུ་བ་སྐྱོད་
ཐུབ་ཀྱང༌། །རྣམ་དག་ལས་ལམ་མིན་ཞེས་གསུངས། །དེ་ཕྱིར་ཕྱི་ནང་འཛོམ་པ་གཅེས། །རྟག་
སྣང་མཁྱེན་བསྒྲོད་སྒྲ་ཡང་འབྱུང༌། །བནྡྷ་འགྲེམས་པའང་རང་སྒྲ་ཡོད། །རེས་འགའ་གཙུག་
20-1-249


ཏུ་ཀྱེར་བར་འབྱུང༌། །དེ་ལ་ཧ་སྲང་ཡོ་ག་ཞེས། །དུས་སྐབས་གཞན་དུ་ལོག་བྱུང་ན། །ཀརྨ་མུ་
དྲའི་དུས་ཡིན་ནོ། །སྣུན་པ་ལས་ཀྱི་ཕྱག་རྒྱ་དགག །དེ་རྗེས་སྒྲ་གཅན་རླུང་གི་དཀྱིལ། །འཆིང་
ན་དམ་ཚིག་ཕྱག་རྒྱས་འདྲེན། །སྒྲ་གཅན་གྱིས་ཀྱང་གནས་སུ་སྐྱེལ། །བསད་པ་ཆོས་ཀྱི་ཕྱག་
རྒྱས་དགྲོལ། །སྒྲ་གཅན་ལག་པ་གཉིས་བཅིང་བ། །རྩ་དམིགས་འདེབས་པ་མན་ངག་ཡིན། །
འདེབས་གསུམ་རླུང་དང་ཚིག་མ་དབབ། །དེ་རྗེས་ཕྱག་རྒྱ་ཆེན་པོ་ཡིན། །ཡེ་ཤེས་ཆེན་པོའི་
གནས་སུ་སྐྱེལ། །མགྲིན་པ་ནས་ནི་རླུང་གཡང་བས། །རླུང་གི་དུག་ཀྱང་སེལ་བར་བྱེད། །དེ་
དུས་བུམ་ཅན་བཟུང་ནས་ནི། །ཡུན་རིང་དུས་སུ་ཏིང་འཛིན་སྐྱོང༌། །རླུང་དང་ཐིག་ལེ་སེམས་
གསུམ་འདྲེས། །ཡང་དག་གནས་ལུགས་དོན་མ་རྟོགས། །རེལ་ཚགས་གནས་ཐེམ་སྦྱོར་བ་
དང༌། །འགྱུར་བཞི་རྣམ་རོལ་བསྒྲོད་པའི་མཐའ། །གླིང་བཞི་གཅུད་ལ་འབོར་བ་སོགས། །སྤྱི་
འགྲོས་ཡིན་པས་བླངས་ཀྱང་ཆོག །མཚན་ལྡན་བླ་མས་དེ་སྐད་གསུངས། །འོན་ཀྱང་གོང་དུ་
བཤད་པ་ལྟར། །འཆུག་མེད་གནད་དོན་ཉམས་བླངས་ན། །འདི་ཉིད་ཁོ་ན་འཕྲལ་དུ་ཟབ། །
ཕུགས་སུ་ཡོན་ཏན་སྐྱེ་ཕུལ་ཆེ། །
ཞེས་འཆི་མེད་གྲུབ་པའི་ཁྲིད་ཡིག་གསལ་བར་མ་ཐོན་པའི་མན་ངག་འཇུག་ཚུལ་མ་
འགའ་ཞིག རྒྱལ་ཁམས་པ་ཏཱ་ར་ནཱ་ཐས་ཚིགས་བཅད་ལྡེབས་པའོ།། །།བཀྲ་ཤིས། མངྒལཾ།
དགེའོ། །
20-1-250


༄༅། །རྡོ་རྗེ་རྣལ་འབྱོར་མ་རྩེན་མའི་སྐུར་སྟོན་པའི་ཞལ་ལུང༌། གྲུབ་
བརྙེས་ཀྱི་སློབ་དཔོན་ཧ་ར་དཱ་རས་མཛད་པའི་རྫོགས་རིམ་དེ་ཉིད་
གསལ་བ་དང༌། རིག་པ་འཛིན་མ་རྩེན་མའི་སྒྲུབ་ཐབས་
གཉིས་ཀྱི་དཀའ་འགྲེལ་རྫོགས་རིམ་གྱི་ཡིག་ཆུང་
སློབ་དཔོན་དེ་ཉིད་ལས་བརྒྱུད་པའི་མན་ངག །
དབང་བཞི་པའི་རབ་བྱེད་
རྣམས་བཞུགས།
༄༅། །ༀ་ཛྭཱ་ལ་སཾ་བྷ་ར་ཡ། དང་པོར་བླ་མ་ལ་བཏུད་དེ། །དྲྭ་བ་སྡོམ་མཛད་དེ་ཡིས་
སྐྱོངས། །འདོད་པའི་དངོས་གྲུབ་དོན་གཉེར་ལ། །ངེས་པ་འགའ་ཞིག་སྦྱིན་པར་བྱ། །དབུས་
ནས་ཧཱུཾ་དམར་པོ། བུམ་པ་ཅན་འདི་ཐབས་མཆོག་གི ། རྡོ་རྗེ་རྩེ་མོར་ནོར་བུ་གང༌། །ཧཱུཾ་བཾ་
དཀར་དང་དམར་བའོ། །ཟླ་བ་རྡོ་རྗེ་ཧཱུཾ་བཅས་པ། །འདི་ནི་ཐིག་ལེ་ཆོས་འབྱུང་ཉི་མར་ཐིག་
ལེ་ནི། ཁ་དོག་ལྔ་པ་བསྒོམ་པར་བྱ། ཨཾ་དང་ཧཱུཾ་ཧཾ་གསེར་མདོག་དང༌། །འོད་སྔོན་ཅན་དཀར་
ཁ་བའི་མདོག །ཧེ་རུ་ཀ་ཧཾ་རྩེན་ཡ་ཨཾ། །དམ་ཚིག་ཕྱག་རྒྱའི་ངེས་པའོ། །ད་དུང་ངེས་པ་དམ་
པ་ནི། །བླ་མའི་ཁ་ལས་རྟོགས་ན་ཀོ།འགྲོ་ལ་ཕན་ཕྱིར་ཤཱཀྱ་ཡི། དགེ་སློང་ཀུན་དགའ་
སྙིང་པོ་དེའི། །གང་དུ་སྦས་པ་འདིར་གསལ་བྱ། །སྐྱུད་པར་སྤོབས་སམ་ཐར་འདོད་ཀྱི། །
སྟབནྟུསུཁཱཀཱརསརྦཛགཏཱཾ། མངྒ་ལཾ། ཤྲ ཤྲིབྷགཱིམཏྒཛྙཱནཡབྷིབྷབཏུ། །
༈ མ་ལུས་པའི་འགྲོ་བ་ལ་ཐུགས་བརྩེ་བའི་ཉེ་བར་བཟུང་སྟེ་མི་འགྱུར་བའི་བདེ་བ་ཆེན་
20-1-251


པོའི་ལམ་མ་ནོར་བར་སྦྱིན་པར་མཛད་པའི་དཔལ་ལྡན་བླ་མའི་ཞབས་ལ་ཕྱག་འཚལ་ནས།
རིག་པ་འཛིན་མ་རྩེན་མའི་སྒྲུབ་ཐབས་ཧ་རི་དཱ་རས་མཛད་པའི་སྐལ་ལྡན་འགའ་ཞིག་གི་དོན་
དུ་ཅུང་ཟད་གསལ་བར་བྱ་སྟེ། ༀ་རྡོ་རྗེ་མཁའ་འགྲོ་སོགས་ནི། འདོད་པའི་ལྷ་ལ་ཕྱག་འཚལ་
བ་སྟེ། བཅོམ་ལྡན་འདས་དང་རྡོ་རྗེ་རྩེན་མ་ལའོ། །དེ་ལྟར་ཕྱག་འཚལ་ནས་ཅི་ཞིག་བགྱིད་
ཅེ་ན། རིག་འཛིན་མ་བརྗོད་འདོད་ཞེས་སོགས། དེ་ནས་རྒྱུད་རྒྱལ་དཔལ་ལྡན་སྡོམ་ལས་
སོ། ཞེས་པའི་བར་གྱི་བརྗོད་བྱ་དང༌། དགོས་པ་ལ་སོགས་པ་བསྟན་ཏེ། དེ་ཡན་ཆད་རིམ་
པ་གཉིས་ཀའི་དོན་བསྡུས་པ་ཡིན་ལ། དེ་དག་གི་དོན་ཅུང་ཟད་འོག་ནས་འཆད་པར་འདོད། །
སྤྲུལ་པའི་སྐུ་ཡི་ཞེས་སོགས་ཚིགས་བཅད་གཅིག་གིས་བསྐྱེད་རིམ་གྱི་རྩོམ་པར་དམ་བཅས་
པའོ། །ཆོས་ཀུན་སོགས་ཤློ་ཀ་གཅིག་ནི་ཆེད་དུ་བརྗོད་པ་དང༌། འཇིགས་རུང་ནས་སྔགས་
ཞེས་པའི་བར་གྱིས་གང་དུ་རྣལ་འབྱོར་དུ་བྱ་བའི་གནས་བསྟན་ནས། དོན་དངོས་ལ་བསྐྱེད་
པའི་རིམ་པའི་ཏིང་ངེ་འཛིན་དང༌། གཏོར་མའི་ཆོ་ག་དང༌། སྤྱོད་ལམ། ཟས། གཉིད། ལྡང་
བའི་རྣལ་འབྱོར་དང༌། ལུང་དང་སྦྱར་བ་དང༌། རྣལ་འབྱོར་གྱི་ཡན་ལག་བྲིས་སྐུའི་ཆོ་ག །ཚེས་
བཅུའི་མཆོད་པ། །སྦྱིན་སྲེག་རྣམས་ནི་བསྐྱེད་རིམ་ཡན་ལག་དང་བཅས་པའོ། །རྫོགས་པའི་
རིམ་པ་ནི་འདིར་ཐུན་མོང་མ་ཡིན་པ་སྟེ། །རྫོགས་པའི་རིམ་པ་དངོས་ཐུན་མཚམས་ཀྱི་བྱ་བ་
ལ་སོགས་པའི་མཇུག་བསྡུ་བའོ། །
དེ་དག་མཐར་སློབ་མ་རྗེས་སུ་བཟུང་བའི་ཆོ་ག་སྟེ། དེ་ལ་དང་པོར་བསྐྱེད་པའི་རིམ་
པའི་ཏིང་ངེ་འཛིན་ལ། ཏིང་ངེ་འཛིན་མཆོག་གི་གནས་སུ་ཞེས་པ་ལ་སོགས་པ་སྟེ་འོག་ཏུ་ཁྲུས་
དང་སྟན་དང༌། རླུང་བྱིན་གྱིས་རླབས་ཞེས་པས། ༀ་བཛྲ་སཏྭ་བ་ཡུ་ཞེས་རླུང་བྱིན་བརླབ་བོ། །
རྫོགས་སངས་ཞབས་ལ་རབ་བསྙེན་ནི། དེ་ལ་སོགས་པ་ལ་སྐྱབས་སུ་འགྲོ་བའོ། །སེམས་
ཅན་སོགས་ནི་སེམས་བསྐྱེད་པ་བསྟན་ཏེ། དེ་ནས་ༀ་རྡོ་རྗེ་ཕག་མོ་ཡེ་ཤེས་རྡོ་རྗེ་མའི་བདག་
20-1-252


ཉིད་ངའོ། །ཞེས་རང་སེམས་རྣལ་འབྱོར་མའི་ངོ་བོ་བཞུགས་པ་རིག་པའི་སླད་དུའོ། །དེ་
ལྟར་སེམས་བྱིན་ནས་ངག་དག་པ་སྙིང་ནང་སོགས་ཏེ་མི་ཤིགས་ཐིག་ལེ་བཾ་དང༌། ན་ད་ནི་ཧཱུཾ་
གི་ཞེས་པའོ། །དེ་ནས་ལུས་དག་པ་ནི་འོད་ཀྱི་སོགས་ཏེ། དང་པོར་ཐ་མལ་གྱི་དབྱིབས་ཕྱི་
ནས་རྩེན་མའི་སྐུར་བསྒྱུར་བ་སྟེ། ཡིད་ཀྱི་ངོ་བོ་གཡོ་བའི་རླུང་གིས་ལུས་འགྲུབ་པའི་གོ་རིམ་
མ། ཁམས་དང་ནས། རྣམ་པར་བསམ་ཞེས་པའི་བར་གྱིས་བདག་བསྲུང་བ་དང༌། ན་ད་
ཐིག་ལེ་ཞེས་པ་ནས་སྲུང་བའི་འཁོར་ལོ་བྱིན་གྱིས་རློབས་པའི་གནས་སྲུང་བ་དང༌། དྲི་མེད་
འཆར་ཀའི་ཁ་དོག་སོགས་ཀྱི་རྣལ་འབྱོར་སྲུང་བའོ། །སྔགས་དག་ནི་ང་རྒྱལ་འཛིན་པ་ཡིན་
ལ། པདྨ་དང་ཟླ་བ་ནི་ལུས། སྙིང་རྗེ་སོགས་ནི་རང་བཞིན་ཏེ་སེམས་ཞེས་བྱ་བ་སྟེ། དེ་ནས་
སྙན་མེད་སོགས་ཀྱིས་སྲུང་བ་གསུམ་བརྟན་པའི་ཕྱིར་དྲན་པར་བྱའོ། །ཡི་གེ་ཐེག་ལེ་ཞེས་
པ་ནས་བསིལ་བ་སྦྱིན་པར་ཤོག་གི་བར་གྱིས་བསོད་ནམས་ཚོགས་བསག་གོ །བདག་དང་
སོགས་ནི་ཡེ་ཤེས་ཚོགས་བསགས། བདག་ཤཱུ་ནྱ་ཏ་སོགས་དང༌། བརྟན་གཡོ་གཞན་རྣམས་
སྭ་བྷཱ་ཝ་སོགས་ཀྱིས་སྦྱང་བའོ། །དེ་ནས་བྷྲུཾ་སྣོད་ཀྱི་དག་པ་དང༌། འབྲུ་བཞིས་དུས་གཅིག་ལ་
འགྲུབ་པར་སྒོམ། ཅི་ཞེ་ན་རྣམ་པར་རྩེན་མ་ཞེས་པ་ཡིན་ལ། མི་ཤིགས་ཐིག་ལེ་སོགས་ནི་རྗེ་
བཙུན་མ་དཔག་ཏུ་མེད་པ་སངས་རྒྱས་རྣམས་དང་སྙོམས་པར་ཞུགས་པའི་ཐིག་ལེས། དབང་
བསྐུར་ཁྱོད་ཀྱི་སོགས་ནི་དེ་དག་རྩེན་མའི་གོ་འཕང་ལ་བཀོད་པའོ། །ༀ་ཨཱཿནས་ཞེས་བྱ་བའི་
བར་འོད་གསལ་དུ་བསྡུ་བའོ། །འོད་གསལ་དངོས་ནི་ཛྙཱ་ན་བཛྲ་སོགས་ཏེ། དེ་དག་ནི་སྣོད་
ཆགས་ནས་དུས་ཐ་མའི་བར་མི་བསྡུས་ཏེ་སྐྱེས་པ་ཉིད་ཇི་ཞིག་ནས་ཁམ་ཟས་ཀྱི་ལུས་དམན་
པར་གྱུར། བགས་ཀྱི་ཚུལ་བཞིན་མ་ཡིན་པ་ཡིད་ལ་བྱེད་ཅིང་སྤྱོད་ལ། །ཇི་ཙམ་ན་དུས་ལས་
བཟླས་པ་རྣམས་མཚོན་ཞིང་སྦྱོར་བར་བྱེད་དེ་རྫུས་སྐྱེས་ཀྱི་རིམ་པའོ། །ཧཱུཾ་ཨཱཿༀ་ལྡང་བ་སྟེ།
རྣམ་མེད་ཀྱི་སྟོང་པའི་ངང་ནས་སེམས་བྱུང་ཕྲ་བ་རྣམས་གསལ་བར་གྱུར། དེ་ཚེ་སྣང་བ་ཀུན་
20-1-253


གཡོ་ལ། དེ་ནས་བསྟན་པར་བསམ་པ་ཡིན་ནོ། ཨེ་ཨེ་སོགས་བསྐྱེད་པའི་ཚུལ་ཏེ། ཀུཎྜལ་
རྣམས་ནི་བཞི་ཡིན་ལ། ཡེ་ཤེས་ཁུ་བ་དེ་བཞིན་གཤེགས་པ་རྣམས་ཏེ། དེ་ལ་གནས་རིགས་
ཀུན་ཏེ་ཤེས་པའི་བར་རྡོ་རྗེ་སེམས་མའི་རྣམ་པ་དང༌། ཀུན་གཞིའི་ངོ་བོ་དེའི་ཞེས་པའོ། །ཟླ་
བ་ནི་ཐིག་ལེ་བཞིའི་རང་བཞིན་རང་སྟེ་ཨེ་ཡིག་ནས་ནམ་མཁའ་མཉམ་པར་ཞེས་པའི་བར་
འཕྲིན་ལས་སམ་མཛད་པ་སྟོན་པ་ཡིན་ལ། ཕྲང་བས་ཞེས་པ་ནི་ཐམས་ཅད་ཀྱི་མཁར་པདྨ་
བསམ་པ་སྟེ་འདི་ནི་དྲོད་གཤེར་སྐྱེས་སྦྱོང་བ་སེམས་མ་མཛད་པ་བཅས་པའི་ཏིང་ངེ་འཛིན་
ཏེ། འདི་ནས་བསྐུལ་ནས་ཞེས་པའི་བར་ཞུ་ཞིང་གླུས་བསྐུལ་བ། ལྷ་མོ་ནས་བསྐྱེད་མའོ་
བར་གྱི་རྩེན་མ་སྒོམ་ཚུལ་ཏེ། ཅི་ལྟར་རོ་གཅིག་ན་ཉིན་བྱེད་སོགས་ཏེ། བྱང་ཆུབ་སེམས་ཀྱི་
དབང་བསྐུར་ཞིང་ཐིམ་སྟེ་ཞེས་བྱ་ལ། དེ་ནས་དེ་ཡི་སོགས་ཀྱི་གོ་ཆ་དགོད་པ་དང༌། དེ་ནས་
སོགས་ཀྱིས་རྡོ་རྗེ་བཞི་དང་སྙིང་ཀའི་སོགས་ཀྱི་རླུང་བཅུ་དང༌། གཞན་ཡང་སོགས་ཀྱིས་ཁུ་
རྡུལ་དང༌། ཆོས་ཀྱི་འབྱུང་གནས་སོགས་ཀྱིས་འོད་གསལ་གྱི་སྒྲིབ་པ་རྣམས་ཀྱི་རང་བཞིན་དུ་
བྱེད་པ་བྱིན་གྱིས་རླབས་པ་སྟེ། གོ་ཆ་རྣམས་རྩེན་མ་ལྟ་བུ་དང༌། པདྨ་དམར་པོ་བེ་བླང་ཤར་
གྱི་སྔོ། སྟེང་དཀར་འོག་དམར་ཨཾ་ཧཾ་ཉི་ཟླ་སྟེང་དང་འོག་ཏུ་ཆོས་འབྱུང་གི་དབུས་སུ་གནས་པ་
དང༌། དེ་ནས་རྩ་ལྕུག་ནས་དེ་ལྟར་ན་ཞེས་པའི་མཐར་ཐུག་པ་གནས་བྱིན་རླབས་ཏེ་བྱིན་གྱིས་
རླབས་པའི་ཏིང་ངེ་འཛིན་ཞེས་བྱའོ། །བདེ་བ་རྒྱལ་པོ་སོགས་ནི་རྗེས་ཆགས་ཏེ། འདིར་མང་
པོའི་ལུས་ཅན་དུ་གྱུར་ནས་སོ། །ཀུན་གྱི་སོགས་ནི་རྡོ་རྗེའི་བཟླས་པ་སྟེ། འཁོར་བར་ནི་ཡུལ་
ལ་གཡོ་བའི་སེམས་དང༌། འབྲས་བུ་ནི་ཡེ་ཤེས་ཀྱི་ལུས་བཅད་དུ་མེད་པ་རླུང་གི་བག་ཆགས་
ཀྱི་རང་བཞིན་ཏེ། སྔགས་ཀྱང་དེའི་གདོངས་ཡིན་ལ་བཛྲ་ཛཿབྱ་ཚུལ་ཟླ་བར་སོགས་ཏེ། པདྨ་
སྔོན་པོ་དང༌། ཟླ་གདན་ལ་ཧཱུཾ་ཕྱིར་ནི་ཡུལ་གསལ་པ་སྙིང་སྟོབས་བདེ་བ་ལ་དམིགས་ཙམ་དང་
གནས་པ་ནི་སྣང་བ་གཡོ་ཞིང་ཧཱུཾ་གསལ་བར་དམིགས་པ་དང༌། འཇུག་པ་ཕྱི་རོལ་གྱི་སྣང་བ་
20-1-254


བསྡུས་ནས་འོད་ཟེར་ཙམ་ལ་དམིགས་པའོ། །དེ་ནི་གནས་སྐབས་ཀྱི་དབང་དུ་བྱས་པའི་དོན་
དམ་དང༌། གཞན་གྱི་ཏེ་ཀུན་རྫོབ་བོ། །དེ་ནས་ཀུན་རྫོབ་ཀྱི་བཟླས་པས་སྤྱོད་པ་རྒྱུ་བ་སོགས་
ནི་སྤྲུལ་པ་འཆང་སོགས་གསང་སྔགས་ཆེན་པོ་རྫོགས་པའི་བར་རོ། །དེ་ནས་འོད་གསལ་དུ་
གཞུག་པ་ནི་སྤྲོས་པ་སོགས་ཏེ། །འགྲོ་བ་རྣམས་ཐིག་ལེར་ཞུ་ནས་དབང་བཞི་ཐོབ་ཅིང་རྡོ་རྗེ་
སེམས་དཔར་བསམ་ནས་ༀ་ཀཱ་ཡ་སོགས་བརྗོད་པར་བྱ་བ་མཛད་དེ་མཛད་ནས་ཞེས་པའོ།
ཁ་ཅིག་ལས་ནི་སྤྱོད་པ་ཉིད་དུ་འདུས་པའི་འདི་མེད་ཀྱང་རུང་ཞེས་གསུང་ངོ༌། །དེ་ནས་འོད་
གསལ་ལ་གཞུག་ཅིང་མཉམ་པར་བཞག་པ་ནི། ༀ་སོགས་ཏེ་ཇི་ལྟར་ཞེ་ན། བདེ་ཆེན་སོགས་
སོ། །དེ་རྣམས་མངལ་སྐྱེས་སྦྱོང་བ་རྩེན་མའི་ཏིང་ངེ་འཛིན་ཏོ། །སླར་ཡང་ནི་སྐུར་བཞེངས་
ཏེ་ཞེས་པ་འགྲེས་པ་སྟེ་བྱང་ཆུབ་པའོ། །ཞེས་པའི་བར་དུ་སྟེ་ཟླ་བ་དང་ཟླ་བ་ལ་སོགས་པ་
མངོན་པར་བྱང་ཆུབ་པ་ལྔས་བསྐྱེད་པའོ། །གལ་ཏེ་ཐུན་མཚམས་སུ་མི་འཇུག་ན་སྤྱོད་པ་ལ་
རྒྱུ་སྟེ་རྡོ་རྗེ་བཞི་བྱིན་གྱིས་རླབས་ནས་འཇུག་པ་འདི་ནི་སྒོང་སྐྱེས་སྦྱོང་བྱེད་དོ། །ཅི་སྟེ་ཐུན་
མཚམས་སུ་ལྡང་བར་འདོད་ན། དེ་ནས་གོ་ཆ་སོགས་རྡོ་རྗེ་བཞི་ནི་མངོན་སུམ་དུ་བསམ་པར་
བྱ་བ་ཡིན་ནོ། །གང་གི་མཚན་མོའི་སོགས་གཏོར་མའི་ཆོ་ག་སྟེ། ཧེ་རུ་ཀ་དཔལ་ནས་མཛོད་
ཅིག་གི་བར་བསྟོད་ཅིང་གསོལ་བ་གདབ། ཚུལ་ཁྲིམས་སོགས་ཀྱིས་བཞུགས་སུ་གསོལ་ནས་
སྤོས་དང་སོགས་ཀྱི་མཆོད་པ་དང༌། རྣམ་པར་རྟོག་པ་སོགས་ཀྱིས་བསྟོད་ཅིང་རྗེས་སུ་འཛིན་
པར་གསོལ་བ་གཏབ། བཛྲ་ཨཱ་རལླི་སོགས་ཀྱི་འཇིག་རྟེན་པའི་གཏོར་མ་དང༌། ནཱ་ཐཱ་ཧོའི་
བར་གྱིས་མེ་ཏོག་འབུལ་བ་དང༌། དེ་ནས་ནི་ཁམས་ལ་ཏེ་རང་བཞིན་གཞུག་པར་བྱ་སྟེ། དེ་
ལྟར་ན་གཏོར་མའི་ཆོ་གའོ། །དེ་ནས་སོགས་ཀྱིས་སྤྱོད་ལམ་དང༌། ཟས་རྣམས་ཀྱི་སོགས་ཁ་
ཟས་ཀྱི་རྣལ་འབྱོར་དང༌། གཉིད་ནི་རྨི་ལམ་སོགས་སད་རྨིའི་རྣལ་འབྱོར་བསྡུས་ཏེ་བསྟན་པ་
དང༌། འོད་གསལ་གྱི་རྣལ་འབྱོར་གྱི་ཉལ་བ་དང༌། སྔགས་ཀྱི་སོགས་ལྡང་བ་སྟེ། དེ་ལ་དངོས་
20-1-255


པོ་མེད་པའི་ཚུལ་ནི་ཐམས་ཅད་ལ་རྣམ་པར་མི་རྟོག་པར། སྟོང་པ་ཉིད་ནི་རྟག་པའོ། །ཅི་ལྟར་
དབང་པོ་མི་འགག་ཞེ་ན། ཐབས་དང་སོགས་ཏེ་འདིས་ནི་ཨ་ནུ་ར་ག་ཡང་བརྟན་ལ། དེ་ནས་
ལུང་དང་སྦྱར་བ་ནི་རྨི་ལམ་ལྟ་བུའི་ནས་རྣམ་པར་བཀྲལ་བས་སོ་ཞེས་པའི་བར་ཧེ། སྤུ་དང་
སོགས་ནི་འོད་འཕྲོ་བ་དང༌། སྤྲུལ་པ་འགྱེད་པ་དང༌། བྱང་ཆུབ་ཀྱི་སེམས་ཀྱི་རྒྱུན་གྱི་ཚིམ་པ་
དང༌། རྩ་རྣམས་རང་འདྲས་གང་བ་སྟེ་ཁྱད་པར་བཞི་ལྡན་དང༌། དག་པའི་རང་བཞིན་ནི་ལུས་
དག་པས་དང༌། བདེ་བའི་རྒྱལ་པོ་ནི་རྗེས་ཆགས་དང༌། རྒྱུད་ཆུང་དེར་གཏོར་མ་བྱིན་རླབས་
ཡང༌། རང་བཞིན་གྱིས་ཞེས་འབྱུང་བའི་འབྲུ་དྲུག་གིས་འབྱུང་བའི་རང་བཞིན་གསལ་གདབ་
པ་ཙམ་སྟེ། ཚེས་བཅུའི་མཆོད་པ་ནི་མ་གཏོགས་སོ། །གང་གིས་སོགས་བཟླས་པའི་གྲངས་ཏེ་
རྣལ་འབྱོར་དངོས་རྫོགས་སོ། །གཞན་ཡང་ནས་ཤིན་ཏུ་གསང་བས་ཞེས་པའི་བར་གྱིས་བྲིས་
སྐུའི་ཆོ་ག་སྟེ་རྡོ་རྗེ་རྣམ་བཞི་དང་ནི་དེའི་ས་བོན་མཁས་ནི་ཆོས་འབྱུང་ཉིས་བརྩེག་གོ །སྒོམ་
ཞིང་སོགས་ནི། ལྷར་སྒོམ་པ་སྟེ་ཡེ་ཤེས་པ་གཞུག་པ་དང་དབང་བསྐུར་བའོ། །ཅི་ལྟར་སྒོམ་
ན་བརྟན་པའི་དངོས་པོ་ལ་དྲོད་གཤེར་སྐྱེས་ལྟར་སྔགས་ཙམ་གྱིས་ཏེ་འཁྱུད་པ་སྔོན་དུ་འགྲོ་
བ་ལྷག་པར་བསྔགས་ལ། དེ་ནས་མཆོད་བསྟོད་བཟོད་པ་གསོལ་བ་བྱའོ། །ཞེས་པའོ། །རྩེ་
གཅིག་ནི་རྡོ་རྗེ་དང༌། རྡོ་རྗེ་ནི་རྩེ་དགུ་པ་དང༌། ཕྱི་མ་ནི་རྩེ་ལྔའོ། །ཧཱུཾ་ཛྲིཾ་ཨ་ཧཱུཾ་མཾ་ཁཾ་པཾ་བྲུཾ་གྱིས་
མཚན་པ་དགའ་བ་འཁྱིལ་པ་ཅན་ནོ། །རྡོ་རྗེ་བཞིའི་སྔགས་ནི། ༀ་ཨཱཿཧཱུཾ་ༀ་སརྦ་བུདྡྷ་ཌཱ་ཀི་ནི་
ཡེ་ཧཱུཾ་ཕཊ་སོགས་ཀྱིས་བསྐོར་བ་དང༌། རེག་པའི་ཕྲེང་བ་ཆེན་པོ་རྣམས་ཡིན་ལ། སྤྱན་དབྱེར་
བཅས་སོགས་ནི། དང་པོ་ལེགས་པར་བཞུགས་སུ་གསོལ་བ། དེ་ལ་བགེགས་སྦྱངས་བ་དང་
དྲི་མ་བཀྲུས་ནས་སྤྱན་དབྱེ་བྱས་ཏེ་དབང་བཞི་པོ་རྣམས་བསྐུར་ནས་བརྟན་བཞུགས་སོགས་
བྱ་སྟེ། ཅིའི་ཚུལ་གྱིས་འབྲི་ཞེས་ན་འབྲི་བ་པོ་སོགས་སོ། །
༈ ཟླ་བ་མར་སོགས་ཚེས་བཅུའི་ཆོ་ག་སྟེ། བནྟུ་སོགས་ནི་མཆོད་པ་སྣ་ཚོགས་སོ། །
20-1-256


ལྕགས་ཀྱུ་ལྔ་སོགས་ཀྱི་ས་བོན་ནི་རིགས་ལྔ་དང་ཡུམ་བཞིའི་འོ། །རྡོ་རྗེ་ནི་ལྟེ་བར་ཉི་མ་
དང་ༀ་ཐུར་ལྟས་ཅན་དང༌། རྡོ་རྗེ་བཞིའི་བྱིན་རླབས་ནི། ༀ་ཀ་ཡ་ཝ་ཀ་ཙིཏྟ་ཛྙཱ་བཛྲ་སྭཱ་བྷ་
བ་ཤུདྡྷ་སརྦ་དྷརྨ་ཀ་ཡ་ཝཀ་ཙིཏྟ་ཛྙཱ་ན་བཛྲ་སྭཱ་བྷཱ་ཝ་ཤུདྡྷོ྅ཧཾ། ཞེས་པ་དང༌། ལག་མཆོད་ནི་
ལག་བྱིན་རླབས་སོགས་དང༌། མཁའ་འགྲོ་དང་ཕྱོགས་སྐྱོང་ལ་བ་ལ་བྱས་ཏེ་སྔར་བཤད་པའི་
ཏིང་ངེ་འཛིན་གྱི་རིམ་པའི་མཐར་མདུན་བསྐྱེད་བཟླས་པ་དང་བཅས་པ་དང༌། ཕྱི་ནང་རྗེས་
ཆགས་བསྟོད་པ་གཏོར་མ་སོགས་ཀྱི་མཆོད། དེ་བཞིན་སོགས་བུམ་པ་སྒྲུབ་པ་དང༌། གང་
ཡང་སོགས་ཀྱི་ནི་གཞོན་ནུ་མའི་མཆོད་པ་བསྟན་ཏེ་དགོས་པ་ཅི་ཞེ་ན། སངས་རྒྱས་རྡོ་རྗེ་
སློབ་དཔོན་སོགས་ཏེ། མདོར་ན་དེ་དག་གིས་མཐར་རང་རྒྱུད་དག་ལ་སོགས་ཏེ་བྱིན་རླབས་
ཀྱི་ཏིང་ངེ་འཛིན་འོག་ནས་འབྱུང་བ་བཞིན་ནོ། །དངོས་གྲུབ་ཕྱིར་ནས་ཤེས་བྱའི་བར་གྱིས་
སྦྱིན་སྲེག་སྟེ། དེ་ལ་འཁོར་ལོ་ལྷག་པར་མོས་པ་ནི་རྗེ་བཙུན་མ་སྒོམ་པ་སྟེ་དབང་བསྐུར་བའི་
མཐར་ཐུག་པའོ། །འདི་ལ་སོགས་པ་གཞན་དུ་རྒྱས་པ་བཤད་དོ་ཞེའོ། །
༈ དེ་ནས་རྫོགས་རིམ་ནི་ཐིག་ལེའི་རྣལ་འབྱོར་དང༌། གཏུམ་མོ་དང༌། དྲོད་རྟགས་ཐོན་
པའི་བྱ་བ་སྟེ་དེ་རྣམས་ཡིན་ལ་མི་ཤིགས་པའི་ཐིག་ལེ་ནི་ཧཱུཾ་སྔོན་པོ་དང༌། ཁམས་ནི་མདུན་
གྱི་བར་སྣང་དང་བརྗོད་དུ་མེད་པ་ནི་ཐིག་ལེ་ལ་སོགས་ཛྱཽ་ཏི་དང༌། ཇི་ཙམ་དུ་བསྒོམ་ཞེ་ན་ཛྱཽ་
ཏི་བརྟན་ཞིང་རྨི་ལམ་སོགས་ཏེ་ཙནྡྲ་ལ་ལ་འཇུག་གོ །ནམ་མཁའི་ལམ་ནི་སྟོང་པའི་གནས་
མཚན་མ་འཛིན་མི་ནུས་པ་དང༌། སྨན་ལྗོངས་ནི་བྷ་ག་དང༌། ཆུ་སྐྱེས་ནི་ཉི་མ་དང་བཅས་པ་
དང༌། དྲི་མེད་བདུད་རྩིའི་ཧཾ་ལས་བྱུང་བ་སྟེ། མཉེས་པ་སོགས་ནི་ཐིམ་ནས་དྲོད་རྟགས་ནི་མེ་
དང་སོགས་ཏེ་དུར་ཁྲོད་སོགས་ནི་དེ་ནས་སྒོམ་པར་བྱ་ཞེས་པ་སྟེ། དེ་བརྟན་པ་རྨི་རྟགས་འོད་
ཀྱི་སོགས་དང༌། ཉམས་རྟགས་ནི་རི་དྭགས་སོགས་ཏེ་རྟགས་ལྔའོ། །ཁམས་གསུམ་སོགས་
ནི་དེ་ལྟར་སྔར་བཤད་པའི་མཉམ་བཞག་ཐུན་མཚམས་བསྐྱེད་རྫོགས་རྣམས་ཀྱི་དོན་བསྡུས་
20-1-257


པ་སྟེ་རང་གི་རྣལ་འབྱོར་རོ། །དེ་ནས་སློབ་མ་རྗེས་སུ་འཛིན་པར་འདོད་ན་དད་བརྩོན་སོགས་
ཀྱི་མཚན་ཉིད་ཅན་དེས་ཁྱོད་ནི་སོགས་གསོལ་བ་བཏབ་པས། རྫས་དག་སོགས་དྲེས་ན། དེ་
ཚེ་གདུག་པའི་ཚོགས་བགེགས་སྦྱང་བ་སྟེ། སུམྦྷས་མ་མོ་སྤྲོས་ལ་དེ་ནས་ཕུར་བུས་སོགས་
དང༌། སྔོན་དུ་དབང་མ་ཐོབ་ན་མཁའ་འགྲོ་རྒྱ་མཚོ་ལ་སོགས་པའི་དཀྱིལ་འཁོར་དུ་བཅུག་
ཅིང་དབང་བསྐུར་བར་བྱའོ། །དེ་མཐར་རྒྱུ་བ་མེད་པ་སོགས་ཀྱི་གནས་སུ། ཚེས་བཅུའི་ཆོ་ག་
བཞིན་བྱ་ལ། བཅོམ་ལྡན་ཡེ་ཤེས་ཀྱིས་གསོལ་བ་བཏབ་ནས། དབང་གི་བུམ་པ་དང་སློབ་
མ་ལ་བསང་བའི་ཆུ་དང་བྱིན་གྱིས་རླབས་པའི་ཆོ་ག་རྣམས་ཀྱང་བྱས་ཏེ། གཞོན་ནུ་མ་སོགས་
ཀྱི་པདྨ་ཅན་ལ་སོགས་ཡང་ཞེས་པའོ། །རྡོ་རྗེ་སློབ་དཔོན་གང་དག་མཉེས་པས་ལམ་དུ་ཡང་
མ་གོས་དག་གིས་ནི་བྱིན་གྱིས་རླབས་པའི་ཏིང་ངེ་འཛིན་ལ་འཇུག་མི་དགོས་ལ། ཕྱི་རོལ་
སོགས་ནི་འབྲུ་ལྔས་མིག་རས་ཀྱང་བཅིངས་ལ་སུམ་བྷས་བགེགས་བསྐྲད་འབྲུ་གསུམ་གྱིས་
སྲུང་བྱང་ཆུབ་ཏུ་སེམས་བསྐྱེད། དམ་ལ་བཞག་ནང་དུ་གཞུག །བཟང་པོའི་ཡི་གེ་འཕྲེང་བ་ནི་
སྔར་བཤད་པའི་རྡོ་རྗེ་བཞིའི་སྔགས་ཏེ་འདིར་ཆོས་འབྱུང་སོགས་ནི་མི་སྒོམ་ལ། ཐིག་ལེ་ནི་ༀ་
སོགས་ཐིག་ལེ་དབུས་སུ་གནས་པ་དཔག་ཏུ་མེད་པ། སྒྲིབ་པ་ཞེས་པ་དེས་སློབ་མའི་སྒྲིབ་པ་
ཞེས་པའོ། །དེ་ནི་བྱིན་གྱིས་རླབས་ཀྱི་ཉེར་བསྡོགས་དང༌། ཧཱུཾ་ཡིག་སོགས་ཤེས་རབ་ཀྱི་དང༌།
དགེ་སློང་སོགས་བདེ་ཆེན་གྱི་ཉེར་བསྡོགས་སོ། །དེ་ནས་རྣལ་འབྱོར་རོ་གཅིག་སོགས་དང་ཇི་
ལྟར་སོགས་ཀྱིས་གསོལ་བ་བཏབ། དེ་ལ་སློབ་དཔོན་གྱི་ལུས་ངག་ཡིད་དང་གནས་ཁང་དག་
པར་བསྟན། ༀ་ཨཱཿཧཱུཾ་ཞེས་དང༌། ༀ་སི་ཐོསྶི་ཐ་སོགས་གཞུག་དེ་དག་ནང་འཇུག་གི་སྔོན་
འགྲོའོ། །
དངོས་གཞི་ནི་ལྷུག་པ་སོགས་ཏེ་སློབ་མའི་ལུས་ཐང་ཤ་བཅད། སློབ་མ་རང་ཉིད་རྩེན་མ་
ག་ཆ་ཅན་རྩ་གསུམ་ལ་ཨ་བ་དྷཱུ་ཏཱི་ཡས་མས་དབུས་སུ་ཉི་ཟླ་ཐིག་ལེ། སངས་རྒྱས་རྣམས་སྤྱན་
20-1-258


དྲངས་རླུང་གི་ཚུལ་གྱིས་དྷཱུ་ཏཱིར་འཁོར་བས་ལུས་དང་སོགས། ཕྱི་རོལ་དང་ལྷན་ཅིག་རླུང་ཐིག་
ལེར་བསྡུའོ། །པྲ་ཏི་གྲྀཧྞ་སོགས་ཀྱང་བརྗོད་པར་བྱའོ། །དེ་ནས་དཀྱིལ་འཁོར་བསྟན། ལྷ་མོ་
ཞེས་པ་ནས་ཏཪྻ་མའི། དབང་བཞི་ལ་སོགས་ཤེས་པར་བྱ་སྟེ། དངོས་པོའི་རང་བཞིན་སྒྲུབ་
བཞིན་དང༌། དབང་གིས་སོགས་ཀྱིས་ཆུ་ཅོད་ཀྱི་དབང་བསྐུར་བ། སྐུའི་བྱིན་རླབས་དངོས་ནི་
ལྟོས་ཤིག་སོགས། ང་རྒྱལ་བཟུང་བ་ནི། ༀ་ཀཱ་ཡ་སོགས་བྱིན་གྱིས་རླབས་པ་སོགས་ནི་ཕན་
ཡོན་དང༌། དེ་ནས་སོགས་ནི་ཡོན་འབུལ་བ་བཟའ་བཏུང་སོགས་ཀྱི་ཚོགས་ཀྱི་འཁོར་ལོ་བྱ་
ཞེས་ཏེ་ཚུལ་འདིའི་ཆོ་ག་ནི་བདག་གིས་གཞན་དུ་བཤད་ཞེས་ཏེ། སྐུའི་བྱིན་རླབས་བུམ་པའི་
དབང་ངོ༌། །པདྨ་ན་གོང་སོགས་ནི་གསང་དབང་སྟེ། གསོལ་གདབ་ཕྱག་འཚལ་ངག་འབུལ་
སྟེ། ཆུ་ཅོད་ཀྱི་དབང་བསྐུར་ནས་སློབ་དཔོན་སོགས། བདེ་བར་གཤེགས་རྣམས་ཞུ་བའི་ཁུ་བ་
སོགས། ཕྱག་རྒྱའི་བྷ་གར་མེ་ཏོག་འབུལ་བ་ནི། སླར་ཡང་སོགས། དངོས་གཞི་ནི་ལྟ་ཞིང་སྒོམ་
ཞེས་དང༌། དེ་ནས་ང་རྒྱལ་བཟུང་ནས་བཟླས་ལུང་སྦྱིན་པ་སློབ་དཔོན་གྱི་སྙིང་ཁའི་ཧཱུཾ་གི་ནཱ་
དའི་སོགས་སོ། །དེ་ནས་མཎྜལ་ལ་གསོལ་གདབ་ཕྱག་འཚལ། ཡོན་ཕུལ་ན་ཆུ་ཅོད་ཀྱི་དབང་
བསྐུར། དངོས་གཞི་ནི་དེ་ལ་ནི་སོགས་རྣལ་འབྱོར་ཅན། སློབ་མ་རང་དེར་བསྒོམ་པ་སྟེ། དེ་
ནས་མཁའ་གསང་སོགས། ནཱ་ཊི་ནི་བཛྲ་དྷ་ཏི་ཤྭ་རི་ཞེས། ཡི་གེ་རྡོ་རྗེ་བཞི་དང་གོ་ཆའོ། །འོལ་
བྱི་སོགས་བརྡའ་སྤྲད་ནས་ཕྱི་རོལ་དུ་འབྱུང་བར་བྱ་ཞེས་པའོ། །དེ་ནས་ང་རྒྱལ་བཟུང་ནས།
བཞི་པའི་དོན་དུ་མཎྜལ་དང་གསོལ་གདབ་ཕྱག་འཚལ་ཏེ་ལ་ཀ་ཕུལ་ཏེ་ཆུ་ཅོད་ཀྱི་དབང་
བསྐུར་སླར་ཡང་གསོལ་བ་གདབ། བུམ་དབང་སོགས་དངོས་གཞི་ནི་གཤེགས་དང་སོགས་
འདིར་དབང་པོའི་ཚོགས་རྣམས་སོགས་ཀྱང་བརྗོད་པར་བྱ་ཞིང༌། གསུང་ཐུགས་སོགས་ནི་
སྔར་བཤད་པ་ཀ་ཡའི་གནས་སུ་ཝཱཀ་ཙིཏྟ་ཛྙཱ་ན་རྣམས་གཞུག་པ་སྟེ་ཡང་ན་བ་དང༌། རེ་རེའི་
མཐར་ཐིག་ལེ་སོགས་ཏེ་དཀྱིལ་འཁོར་ནི་སིནྡྷུ་ར་ཙནྚ་ལིའི་བདག་ཉིད་ཀྱི་ཐིག་ལེ་བྱས་ནས་
20-1-259


ཆེད་དུ་བརྗོད་པ་དང༌། དམ་རྫས་རྣམས་བརྗོད་ནས་ༀ་ཨཱ་ཤུ་ནྱ་ཏ་ཧཱུཾ་ཛྙཱ་ན་བཛྲ་ཏེ་འོད་གསལ་
སོགས། རྟགས་པ་ནི་དངོས་མེད་ཀྱི་རང་བཞིན་ནོ། །དེ་ནས་ང་རྒྱལ་བཟུང་བ་སྟེ་བྱིན་རླབས་
དངོས་སོ། །སིནྡྷུ་རའི་དཀྱིལ་འཁོར་ཐིག་ལེ་གསང་དབང་གི་མཐར་དཔྲལ་མགྲིན་དང༌། བཞི་
པའི་མཐར་སྙིང་ལྟེ་བར་ཆབ་གཅིག་ཏུ་བྱེད་པ་སོགས་འགའ་ཞིག་གི་ལག་ལེན་དུ་ངེས་པ་ཅུང་
ཟད་རེ་ཡང་སྣང་ངོ༌། །དེ་ནས་བུས་ཆེད་དུ་བརྗོད་པ་ནི། བདག་ནི་སོགས། དེང་ནས་སོགས་
ཡོན་དབུལ་བའི་གཙོ་བོ་སྨོས་པ་སྟེ། དེས་གཞན་ཤུགས་ལ་བསྟན་པ་སྟེ། འདི་སློབ་མའི་
དབང་པོ་དང་འཚམ་པར་ཉེར་བསྡོགས་དངོས་པོ་བཞིའི་ཚུལ་དུ་སྦྱིན་པ་དང༌། དངོས་གཞི།
དང་པོ་ཅི་སྦྱིན་པ་དང༌། དེས་ངེས་པས་རྫོགས་སོགས་དེ་བཞིན་དང་ཚངས་པར་སྤྱོད་པའི་
ཚངས་པར་སྤྱོད་པ་ལ། གཉིས་པ་དང་གསུམ་པ་ཡང་ཚིག་གི་སྦྱིན་པ་ནི། ཕྱག་བཞེས་ཀྱི་ངེས་
པ་དམ་པར་ཤེས་པར་གྱིས་ཤིག །དེ་ནས་སོགས་ཀྱི་དོན་དཀྱིལ་འཁོར་ཉེ་བར་བསྡུ་བ་ནི། ཆོ་
ག་གཞན་རྣམས་དང་ཕལ་ཆེར་མཐུན་པར་སྣང་བས། འདིར་མ་བྲིས་ལ། ཅུང་ཟད་ཙམ་གྱི་
ཁྱད་པར་ནི་ཤེས་པར་བྱ་དགོས་ཏེ། བླ་མའི་ཞལ་སྔ་ནས་དྲིས་ནས་སོ་སྡོམ་པའི་རྒྱུད་སོགས་
དགེ་བ་བསྔོ་བ་དང༌། ཀོངྐུན་སོགས་མཇུག་བསྡུའོ། །ཞེས་བྱ་བ་འདི་ཡང༌། རིས་མེད་དམ་པ་
བདེ་ཆེན་གྱི་ལམ་བཟང༌། འཕགས་པའི་ཡུལ་ལས་བྱུང་བ་རྨ་མེད་པའོ།། །།མངྒ་ལཾ་བྷ་ཝནྟུ།
༄༅། །དཔལ་ལྡན་བླ་མ་དམ་པ་རྣམས་ཀྱི་ཞབས་ཀྱི་པདྨོ་ལ་གུས་པས་ཕྱག་འཚལ་
ནས། སེམས་ཅན་ཐམས་ཅད་དེ་ཁོ་ན་ཉིད་མཐར་ཐུག་བདེ་ཆེན་གྱི་ས་ལ་གནས་པར་གྱུར་
ཅིག །ཅེས་སྨོན་པ་སྔོན་དུ་འགྲོ་བས་རིག་པ་འཛིན་མ་རྩེན་མའི་རྣལ་འབྱོར་དང་འབྲེལ་བའི་
རྫོགས་པའི་རིམ་པ་འདིས་དོན་ཅུང་ཟད་ཙམ་གྲོལ་བར་བྱ་སྟེ། ཐུན་མོང་མ་ཡིན་པའི་མན་
ངག་འདི་ལ་ནི་དྲན་པ་གཅིག་པ། སྒྱུ་མ། གཏུམ་མོ། འོད་གསལ། བདེ་ཆེན་རྣམས་ལས།
དང་པོ་ལ་ཕྲ་བའི་དང༌། ཤིན་ཏུ་ཕྲ་བའི་རྣལ་འབྱོར་གཉིས། དང་པོ་ལ་ཉི་ཟླ་ཡི་གེ་ལ་སེམས་
20-1-260


བཟུང༌། གཉིས་པ་ལ་སྟོང་པ་ལ་དམིགས་པ་མེད་དེ། གཉིས་ཀའང་ཆོས་ཀྱི་འཁོར་ལོའི་དབུས་
སུ་ཨ་ཝ་དྷཱུ་ཏཱིའི་ནང་དུ་བསྒོམ། སྒྱུ་མ་གསུམ་ལས་མཉམ་པར་བཞག་པ་རྟོག་མེད་དུ་འཇོག།
སྐབས་འགར་ལྷ་བླ་མ་སྒྱུ་མ་རྣམས་སྒོམ། ཡང་ཡང་རྟོག་མེད་དུ་འཇོག །མིག་ཆེར་གྱིས་ཐད་
ཀར་ལྟའོ། །རྗེས་ཐོབ་ཐུག་འཕྲད་དུ་དྲན་པས་སྐྱོང་བ་སྟེ། རེ་ཞིག་སྒྱུ་མའི་འདུན་པ་གཙོ་ཆེའོ། །
རྨི་ལམ་ནི་མགྲིན་པར་ཆུ་སྐྱེས་ཐིག་ལེ་དང་བཅས་པ་སྒོམ་མཐར་ཡལ་བ་རྟོག་མེད་འཇོག།
དེ་ནས་རྟོག་པ་གང་ཤར་རྨི་ལམ་དུ་ཤེས་པར་བྱ། དེའི་ཚེ་རླུང་བུམ་པ་ཅན་ཐིག་ལེ་དཀར་པོ་
སོགས་ཀྱི་གདམས་ངག་ཀྱང་སྒོམ། དེ་ནས་དབང་བརྟུལ་ཐོག་མར་རྨི་ལམ་སྦྱོངས་བ་དང༌།
དབང་རྣོན་འོད་གསལ་ཉིད་ལ་འཇོག་པར་བྱའོ། །གཏུམ་མོའི་སྔོན་འགྲོ་ལ་ཐིག་ལེ་དང༌།
རླུང་ལས་སུ་རུང་བར་བྱ་བ་ལས། དང་པོ་ལ་འཛིན་པ་ནི། རྡོ་རྗེ་སྒོམ་པ་ལ་སོགས་པ་དང༌།
རྒྱས་པར་བྱེད་པ་སྤྱི་བོར་ཟླ་བ་སྒོམ་པ་ལ་སོགས་པ་སྟེ། བརྟན་པ་ཐོབ་ནས་མིག་ལ་བཀོད་
ནས་གཟུགས་དང་བསྲེ་བ་སོགས་ཀྱང་བྱའོ། །འཁོར་ལོ་བཞིའི་ལྟེ་བར་བཀོད་པས་ཞིང་སྣ་
ཚོགས་མཐོང་བ་ལ་སོགས་པ་འབྱུང༌། གཉིས་ཀ་ལས་ཐུར་སེལ་ལ་ཆོས་འབྱུང་ལ་སོགས་པ་
བསྒོམས་པ་དང༌། སྲོག་དབང་དུ་བྱེད་པ་ལ་རྡོ་རྗེའི་བཟླས་པ་སྟེ། དངོས་གཞི་ནི། སྙིང་ཁའི་
མི་ཤིགས་པའི་ཐིག་ལེ་དཀར་པོ་འགོ་ཐུར་བསྟན་འོད་སྔོན་པོ་འཕྲོ་བ། རྩ་གསུམ་འཁོར་ལོ་
གཉིས་ལྟེ་བར་ཨཾ་དང་བཅས་པ་སྒོམ་ནས་རླུང་བཟུང་ནས་འབར་འཛག་གི་དམིགས་པ་བྱ་སྟེ།
དེས་སྟོང་པ་ཉིད་རྟོགས་པར་འགྱུར་ཏེ་སྔར་རྟོགས་པའི་སྒྱུ་མ་དེའོ། །དེ་ནས་འཁོར་ལོ་བཞི་
གཏུམ་མོ་ཧཾ་དང་བཅས་པ་སྒོམ་ནས་འབར་འཛག་དམིགས་པར་བྱ་སྟེ་གཉིས་ཀ་ལ་ཡང་སྔོན་
དུ་གཏུམ་མོའི་སྤྱི་བོ་ནས་ཐོན་སངས་རྒྱས་ཐམས་ཅད་ཀྱི་བྱང་སེམས་སྤྱན་དྲངས་ནས་བསྟིམ་
པ་བྱ་དགོས་སོ། །འོད་གསལ་འཇུག་པ་ནི་ཐོག་མར་ཧཾ་རྡོ་རྗེ་སེམས་དཔར་བསྒྱུར། དེ་ནས་
ཨཾ་རྩེན་མར་བསྒྱུར། ཕྱི་ནས་དམ་ཚིག་ཕྱག་རྒྱའི་རིམ་པ་ཤེས་པར་བྱས་ནས་འོད་གསལ་ལ་
20-1-261


འཇུག་གོ །དེ་ཡང་ཧཾ་ཡིག་ལྷར་བསྒྱུར་ནས་འབར་འཛག་གི་ཚེ་རང་ལས་ཐོབ་པའི་སྐད་ཅིག་
མ་གཉིས་དང༌། ཅིག་ཤོས་ལས་གཞན་ལ་ཐོབ་པ་གཉིས་ཆ་འདྲ་བ་ཙམ་འཆར་རོ། །དམ་ཚིག་
ཕྱག་རྒྱ་ལ་གོམས་ནས་དབང་པོ་འབྲིང་ཨེ་རྒྱལ་འཇུག དབང་པོ་རྣོན་པོ་ཕྱག་ཆེན་ལ་འཇུག་
སྟེ། མདོར་ན་ལྷན་སྐྱེས་ཀྱི་འོད་གསལ་ལ་དང་པོར་ཡུན་རིང་དུ་གནས་དཀའ་བས་ཡང་ཡང་
ལྡང་འཇུག་བྱ་ཞིང༌། ཕྱི་ནས་གནས་པ་ཇེ་རིང་ལ་འགྲོ་སྟེ་མཐར་གྱིས་འོད་གསལ་སད་རྨི་
ཅེར་ཡང་ཅི་ཙམ་འདོད་པར་འཇོག་ནུས་ཤིང༌། སྐད་ཅིག་བཅུ་དྲུག་པོ་གང་ནས་ཀྱང་འཇུག་
ནུས་པ་ན་འོད་གསལ་བརྟན་པ་ཞེས་བྱ་ཞིང༌། བདེ་བ་ཆེན་པོ་ལ་འཇུག་པ་ནི་འོད་གསལ་
བརྟན་ནས་ཀྱང་ལྷན་སྐྱེས་ཀྱི་བདེ་བ་མཉམ་རྗེས་ཀུན་ཏུ་འདྲེན་པ་ལ་ཡང་ཡང་ནན་ཏན་དུ་
བྱས་པས། སྐད་ཅིག་མ་བཅུ་དྲུག་ལྷན་སྐྱེས་ཉིད་དུ་དག་ནས། ནམ་ཞིག་སེམས་ཡུལ་རྗེས་སུ་
འགྲོ་བ་ན། ལྷན་སྐྱེས་མངོན་སུམ་དུ་བྱེད་པ་དེའི་ཚེ་བདེ་བ་ཆེན་པོ་དངོས་ནི། མཉམ་བཞག་
གི་ཚེ་འོད་གསལ་དུ་ཞུགས་ནས། སྐད་ཅིག་གི་རིམ་གྱིས་རང་དང་སྣང་བ་ཐམས་ཅད་ལྷར་
སྒོམ་པར་བྱ་བ་དང་རྗེས་ཐོབ་སྤྱོད་ལམ་ཀུན་དུ་རྒྱུ་དབང་ཡུལ་ལྷར་ཤེས་ནས་ལྷན་ཅིག་སྐྱེས་
པའི་བདེ་བ་ལ་སྤྱད་པར་བྱ་སྟེ། མི་རིང་བ་རྡོ་རྗེ་འཆང་གི་གོ་འཕང་མངོན་དུ་བྱེད་ལ། འདིར་
སྐལ་ལྡན་རྣམ་པ་གཅིག་གིས་ཀྱང་ཞེས་བྱ་སྟེ། དེ་ནི་འདིར་ལྟར། དབང་རྣོན་དྲན་པ་གཅིག་
གི་ཚེ་གཏུམ་མོ་འགྲུབ་པར་འགྱུར་བས་དེ་ནས་འོད་གསལ་ལ་འཇུག །འགའ་ཞིག་ཐོག་མ་
ནས་གཏུམ་མོ་སྒོམ་ནས་འོད་གསལ་ལ་དང༌། དབང་པོ་འབྲིང་སད་རྨིའི་སྒྱུ་ལུས་གང་རུང་
ནས་འོད་གསལ་དུ་འཇུག་ཚུལ་རྣམས་ཀྱང་རིག་པར་བྱོས་ཤིག །དེ་ལྟར་མངོན་པར་རྟོགས་
པ་བསྟན་ནས། ད་ནི་ཚིག་གི་དོན་ལ་འཇུག་པར་བྱ་སྟེ། དེ་ལ་མདོར་བསྟན་ནི་འོད་གསལ་
འཆར་བ་སོགས་ཏེ་མཁའ་ནི་སྙིང་ག་མཐོ་རིས་རྣམ་སྣང་ནི་སྒྲ་གཅན་ཏེ། མི་ཤིགས་པའི་ཐིག་
ལེ། དེའི་ཁྱད་པར་ཀུན་འགྲོ། ངོ་བོ་ཐིག་ལེ། བྱེད་ལས་རྟེན་བརྟེན་པའི་སྒྱུ་མ་སྣ་ཚོགས་སུ་
20-1-262


སྣང་བས་བྱེད་པས་སོ། །སྒྱུ་མ་དེ་ཡང་ཇི་ལྟ་བུ་སྙམ་ན་མ་དག་པ་ཡུལ་དབང་རྣམ་ཤེས་འཁོར་
བཅས་དང༌། དག་པ་ནི་སྨིག་རྒྱུར་སྣང་བ་ལ་སོགས་པ་སྟེ། ཅིའི་ཕྱིར་དག་པ་ཞེ་ན། གང་ཞིག་
ཤར་བས་དུས་མཉམ་དབང་པོ་དང༌། །ཡུལ་རྣམས་དབུ་མར་འཇུག་པ་དེ་ལ་འདུད། །དེ་ཉིད་
རླུང་གིས་བསྐུར་བས་གཏུམ་མོ་ཞེས་པ་རང་ཉམས་སུ་གྱུར་བས་གློག་གི་འོད་ལྟར་སྣང་བ་སྟེ།
འཇིག་རྟེན་འཇིག་རྟེན་ལས་འདས་འཇིགས་མ་གློག་འགྱུ་བ་ཞེས་པ་ནས། གཡོ་བའི་ལུས་
ཀྱང་འགྱུར་མེད་མཛའ་མོ་མཛའ་མོར་འདུད། །ཅེས་པའི་བར་དུའོ། །ཅིས་གཡོ་བ་ཡིན་ཞེ་
ན་རླུང་གིས་སྟེ། ཡུལ་དུ་བགྲོད་པའི་སེམས་སམ་བག་ཆགས་ཀྱིས་ཐིག་ལེ་རྡུལ་དུ་བྱེད། དེ་
ཡང་གཡོ་བའི་ཐིག་ལེ་རྣམས་གཡོ་བར་བྱེད་དེ་རླུང་གཅིག་པུས་ནི་མ་ཡིན་ནོ། །དེ་ཡི་དབང་
ལས་ཁྱབ་པ་སྟེ། དངོས་པོ་ཐམས་ཅད་ལ་ཁྱབ་པ་ས་དང་དེའི་རང་བཞིན་དག་པའི་སྒྱུ་མའི་
རང་ཉམས་ཙཎྜ་ལཱི་དེ་འདོད་པ་རྒྱས་པའི་ཡས་བབས་ཀྱི་དགའ་བཞི་དང་དགའ་བ་རྒྱས་པས་
འོད་གསལ་སོགས་བཞི་སྟེ། འདོད་དང་དགའ་བའི་ཡིད་ལ་སད་ཅིང་གང༌། །རྒྱལ་བའི་སྐུ་
མཛེས་གང་དུ་མངོན་དགའ་ལའོ། །ཡིད་ལ་ཅིའི་ཕྱིར་སད་ཅི་གང་ཞེ་ན། རྒྱལ་བའི་སྐུ་མཛེས་
ཞེས་སྨྲས་པ་སྟེ། འདོད་པའི་ཕྱོགས་ལས་ནི་ལྷན་སྐྱེས་རྣམ་པ་ཐམས་ཅད་པ་དང༌། དགའ་
བའི་ཕྱོགས་ལས་དགའ་བ་དང་པོ་གསུམ་གྱི་མཐར་ལོངས་སྤྱོད་རྫོགས་སྐུ་གྲུབ་པའོ། །དེ་
ལྟར་རྣམ་པ་ཐམས་ཅད་པ་ལྷན་སྐྱེས་སུ་སྡོམ་པ་ན་མཁའ་འགྲོའི་དྲ་བ་སྡོམ་ལ་འདུད། ཅེས་
སོ། །རྣལ་འབྱོར་དག་པ་པའི་ལམ་དེ་རྣམས་ཉིད་ཀྱི་འབྲས་བུ་ཅི་སྙམ་ན། སྔགས་དང་ཆོས་
ཀྱི་སྐུ་སྟེ། གཉིས་ཀ་བདེན་གཉིས་ཀྱི་དབྱེ་བས་བཞི་སྟེ། དབྱིབས་དམིགས་བཅས་ཀྱི་ལྷ་སྒྱུ་
མ་ལ་འཇུག་པ་དང༌། དེ་ཉིད་ལས་སྒྱུ་མའི་སྐུ་བདེ་སྟོང་ཡེ་ཤེས་དང༌། ལྷན་སྐྱེས་ཡེ་ཤེས་ཆོས་
དང༌། བདེ་ཆེན་ཟུང་འཇུག་ཀྱང་སྟེ། དབྱིབས་དང་ཡེ་ཤེས་དཔལ་ལྡན་དབང་པོའི་དྲ། །སྒྱུ་
མའི་བྱེད་པོ་ཁོ་ན་གཟུགས་ཞེས་བྱ། །སྒྱུ་འཕྲུལ་དྲ་བ་ཀུན་འགྲོ་ཡེ་ཤེས་དྲན། །དེ་ནི་དམ་པའི་
20-1-263


དོན་གྱི་སྔགས་སུ་བརྗོད། །བདེ་ཆེན་ཆོས་ཤེས་བྱ་བ་དང༌། །རྣམ་པའི་ཕ་མཐའ་མིག་འཕྲུལ་
ཀྱང༌། ཁྱབ་བདག་སྐུ་ཞེས་བྱ་བ་སྟེ། །རྒྱུད་རྒྱལ་དཔལ་ལྡན་སྡོམ་ལས་སོ། །གཞན་ཡང་ཀུན་
འགྲོ་མི་ཤིགས་པ་ཐིག་ལེ་རྟེན་བརྟེན་པའི་སྒྱུ་མའི་བྱེད་པོ། དེ་ཡུལ་གྱི་བག་ཆགས་ཀྱི་སྟོབས་
རླུང་དུ་ཤར་བས་སྤྱོད་པའི་ཡུལ་སྣང༌། དེའི་དབང་ལས་རྡུལ་གྱི་ཁམས་རྒྱས་པས་རྣམ་རྟོག་
ཕྲ་རགས་འབྱུང༌། དེའི་དངོས་ལ་རང་བཞིན་མི་གནས་པར་གཡོ་ཞིང་འཕོ་སྟེ་ཐིག་ལེ་སོ་སོ་
འཕོས་པའི་དབྱེ་བས་ལས་དང་ཉོན་མོངས་དང་ལུས་ལ་སོགས་པ་གྲུབ་པའོ། །ཞེས་པ་སྟེ།
འཁོར་བར་འཁོར་བ་སྤངས་བྱའི་ངེས་པའོ། །དེ་ནས་རྒྱས་བཤད་ལ་སྲིད་དང་སོགས་ཀྱི་ལམ་
བཟང་གི་སྣོད་དུ་མི་རུང་བ་རྣམས་རྒྱུ་མཚན་དང་བཅས་པ་བཤད་ནས། དེ་ལས་ཟློག་པ་ལ་
བཤད་པར་བྱའོ། །ཞེས་ཏེ་གཞན་དུ་ན་ལམ་དང་གང་ཟག་ཆུད་འཛའ་བའི་ཕྱིར་རྣམ་པར་ལྟུང་
བའོ། །ལམ་བཟང་འདི་ལྟ་བུ་དང་བྲལ་ནས་བསྐྱེད་རིམ་གྱི་མཆོག་མི་ཐོབ་པར་བསྟན་པ་ནི་
གང་དུ་སོང༌། བསྐྱེད་རིམ་པའི་ལྷ་སྔགས་སོགས་ནི་སྒྱུ་མའི་སྐུའི་རྒྱུ་དང་དངོས་གྲུབ་ཀྱི་ཐབས་
སུ་གསུངས་ན་དེ་བཀག་པས་ནོར་བུའི་ལམ་སྙམ་ན་རྣལ་འབྱོར་སོགས། ལྷ་སྒྱུ་མའི་བདེ་བ་
སྔགས་གཞོལ་མེད་ཀྱི་ནཱ་ད། བསམ་གཏན་ནི་སྒྱུ་མ་ཉིད་ལ་གོམ་པ་ལས་གྱུར་པའི་ལྷན་སྐྱེས་
བྱེད་པོ་ནི་བདེ་ཆེན་གྱི་སྐུའོ། །ཞེས་སམ། ཡང་ན་སྤྲོས་པའི་བྱེད་ལས་ཐམས་ཅད་འགྲུབ་པ་
དང་ཡིན་ཏེ་བསམ་གྱིས་མི་ཁྱབ་སོགས་སོ། །དེ་ནས་ལུང་དང་སྦྱར་བ་ནི། དེ་ལ་ནས་ཞེས་
པས་སོ་སོའི་བར་འཇུག་སྒོ་དང༌། ཡོངས་སུ་རྫོགས་པར་མདོར་བསྟན་པ་ནི། རང་གི་སོགས།
དེའི་རང་གི་སྐུ་ནི་མི་ཤིགས་པའི་ཐིག་ལེ་ཡིན་ཏེ། དེ་སྒྱུ་མར་མཉམ་པ་སྒྱུ་མར་སྒོམ་པ་ནི་
གང་འདྲའི་སོགས། དེ་དང་འོག་མ་རྣམས་ཀྱང་འོད་གསལ་སོགས་ཀྱིས་བསྟན་ཏེ། དབང་པོ་
སོགས་ཀྱིས་ལྷན་སྐྱེས་སམ་འོད་གསལ་དུ་འཇུག་པ་དང༌། རང་བཞིན་འོད་གསལ་ཉིད་དང༌།
རྡོ་རྗེ་སོགས་ཀྱིས་ཕྱག་རྒྱ་དང་སྟོང་ཉིད་སོགས་ལྡང་བ། དོན་དམ་སོགས་ཀྱིས་བདེ་ཆེན་གྱི་
20-1-264


སྐུའོ། །ཡང་ན་འོད་གསལ་སོགས་མདོར་བསྟན། དབང་པོ་ནས་སྤངས་པར་བྱ་བའི་བར་གྱི་
གཏུམ་མོ་ནས་ཁྱད་དགའི་བར་འོད་གསལ་འཇུག་པ། དོན་དམ་སོགས་འོད་གསལ་དངོས་
དང༌། རྟག་ཏུ་སོགས་ཟུང་འཇུག་བདེ་ཆེན་ནོ། །ཞེས་ཀྱང་བྱའོ། །སྤྱི་དོན་ནམ་ཐུན་མོང་བ་སྒྱུ་
མ་ལྟ་བུའི་ཏིང་ངེ་འཛིན་གཞུང་འདིར་བསྟན་པའི་སྒྱུ་མའམ་སྒྱུ་ལུས་ཞེས་པ་ནི། བདག་བྱིན་
རླབས་པའི་སྒྱུ་ལུས་དང་མི་གཅིག་ཅིང༌། འོན་ཀྱང་རྨི་ལམ་སྒྱུ་མ་ནི་ཕལ་ཆེར་འདྲའོ། །དེ་ཀུན་
ལ་མཁའ་འགྲོ་མའི་དྲ་བ་སྡོམ་པ་ཞེས་བྱ་སྟེ། དེ་དག་ཀྱང་སོགས་སྟེ་སྒྱུ་མའི་དངོས་ཀྱང་བདེན་
པ་ཁོ་ན་སྟེ་ཞེས་བྱའོ། །དེ་བཞིན་དུ་བཱ་ར་ཧཱི་ཡང་སྟེ། རྣམ་པ་ཀུན་ལྡན་རྒྱ་ཆད་མེད་འཆར་ཡང་
ངོ་བོ་རྣམ་མེད། དེ་ལྟར་ན་རང་རིག་པའི་ཕྱིར་མི་བརྫུན་པ་བརྗོད་དུ་མེད་པས་ངག་གི་གཞིར་
གྱུར་པ། །
༈ སྒྱུ་མ་ལྟ་བུར་བཅད་བཟུང་དུ་མེད་པའི་རྣམ་རྟོག་བཅོམ་པའི་ཤེས་རབ་དང་རོ་གཅིག་
པ་སྟེ། རྣམ་པ་ཀུན་བཅས་སྟོང་ཆེན་རྣམ་མེད་ལྡན། །རྡོ་རྗེ་ནམ་མཁའི་རང་བཞིན་རྟག་ཏུ་
ཡོད། །སྐྱེ་དགུ་བྱེ་བ་བརྒྱ་ཡི་དག་སྦྱིན་མ། །དབང་པོ་དྲ་བ་རྣམ་རྟོག་སྲེག་ཕྱག་འཚལ། །
༈ དེ་ལྟར་ན། བརྗོད་བྲལ་རྣམ་མེད། རང་རིག་གཞོམ་མེད་བདག་མེད་རྟོགས་པའི་
ཤེས་རབ། རྣམ་པ་ཀུན་ལྡན་རྣམས། བཱ་ཨཱར་ཨཱ་ཧཱ་ཨཱི། རྣམས་ཀྱི་དོན་ནོ་ཞེས་སྟོན་པ། དེའི་
ཕྱིར་སོགས། དེ་ལྟར་བཤད་པའི་དོན་དེ་རྣམས་དང་ལྡན་པའི་ལམ་དངོས་བཤད་པ་ལ། གང་
ནས་གསལ་བར་གསུངས་ཀྱི་བར་ཀྱིས་དྲན་པ་གཅིག་པ་དང་གལ་ཏེ་ནས་རྗེས་སུ་སྤྲོ་བའི་
བར་གྱིས་རྒྱས་དང༌། དེ་མཐར་ནས་ཤེས་པར་འགྱུར་གྱི་བར་གྱིས་ཙཎྜ་ལི་འཁོར་བཅས་དེད་
ནས་འདོད་པ་མེད་ཀྱི་བར་གྱིས་འོད་གསལ་དང༌། འོད་གསལ་གྱི་ཡན་ལག་གཏུམ་མོ་སོགས་
རྣམས་གཞན་དུ་ནས། ངེས་པར་རྟོགས་ཀྱི་བར་གྱིས་བདེ་ཆེན་སྐུ་ཟུང་འཇུག་དང༌། རྟག་ཏུ་
ཡང་དག་སོགས་ཀྱི་མཇུག་བསྡུའོ། །དེ་ལ་དྲན་པ་གཅིག་པ་ནི་གང་གི་སོགས་ཀྱི་དོན། སྐྱེས་
20-1-265


བུ་སུས་ཀྱང་གང་རྟོགས་ན་བདེ་བ་ཆེན་པོ་རྟོགས་པ་ནི་མི་ཤིགས་པའི་ཐིག་ལེ་སྟེ། ཀུན་གཞི་
རྣམ་ཤེས་འདིས་འཁྱམས་ཤིང་རང་བཞིན་གྱི་མེད་པར་ཡེ་ཤེས་རང་ངོ་ཤེས་པ་ན་སངས་རྒྱས་
ཤིང་ཞེས་སོ། །དེའི་ཕྱིར་ན་དེ་དག་མ་རིག་དབང་ལས་གཟུགས་སོགས་རྣམ་པ་སོགས། ཀུན་
གཞི་རྣམ་ཤེས་དེ་ཡང་ངོ་བོ་ཅི་སྙམ་ན། རྟེན་དང་སོགས་ཏེ་དེའི་བག་ཆགས་ཀྱི་རང་བཞིན་ནོ། །
འོ་ན་དེའི་ཆོས་ཉིད་ཡེ་ཤེས་ལ་ཡང༌། མི་ཤིགས་ཐིག་ལེ་ཞེས་དྲན་ན་ཅི་འདྲ་ན་བརྗོད་པར་
བྱ་བ་ནི་མ་ཡིན་ཞིང་ཚུལ་ཙམ་ནི་བཤད་ཟིན་ལ། དེ་རྟེན་བརྟེན་པའི་འབྲེལ་བ་ཡིན་ནམ་ཞེ་ན་
མ་ཡིན་ནོ། །དེ་ལྟར་ནའང་བག་ཆགས་དེའི་རང་བཞིན་མིན་པའི་དབང་ལས་སྐུ་དང་དཀྱིལ་
འཁོར་རབ་འབྱམས་སུ་སྣང་བ་ཡིན་ནོ། །ཡན་ལག་སོགས་ནི། ལྷ་ཞལ་ཕྱག་ཅན་སྒོམ་པ་ཡང་
བག་ཆགས་འདི་སྦྱོང་བའི་ཕྱིར་སྒོམ་པ་ཡིན་མོད་ཀྱི། དེ་བས་མཆོག་ཏུ་གྱུར་པ་ཡན་ལག་སྟེ་
ཞལ་ཕྱག་མེད་པ་མི་ཤིགས་པའི་ཐིག་ལེ་ལ་གནད་དུ་བསྣུན་པ་འདིས་མི་ཤིགས་སོགས་ཞེས་
སོ། །དེ་ཡང་འདིའི་སྒོམ་རྒྱུན་གྱིས་ཡིན་ལ། དྲན་པ་གཅིག་པ་ཙམ་གྱིས་ནི་མ་ཡིན་ཏེ། བག་
ཆགས་ཏེ་སངས་རྒྱས་ཀྱི་ཡེ་ཤེས་མ་གཏོགས་པས་ཡོངས་སུ་སྤངས་པར་མི་ཤེས་པས་དང༌།
དེ་སྤངས་པ་དང་ལྷན་ཅིག་ལོངས་སྤྱོད་སོགས་སྒོམ་ཚུལ་ལས་ཕྲ་བ་ནི་སངས་རྒྱས་སོགས་
ཏེ། སངས་རྒྱས་རྗེས་དྲན་ནི་ལྷར་དྲན་པ་དང༌། ཆོས་རྗེས་དྲན་ཐིག་ལེ་ལ་དྲན་པ་གཅིག་པའོ། །
ཤིན་ཏུ་ཕྲ་བ་ནི་དེ་ལྟར་སོགས། རྟག་ནི་དེའི་སོགས་ཏེ་དེ་རྣམས་བསྟན་པའོ། །འདི་ཧེ་རུ་ཀ་
སྟེ་དཔལ་ལྡན་སོགས་དེ་ལྟར་དྲན་པ་གཅིག་པ་ཐོབ་ནས་སྒྱུ་ལུས་སྒོམ་པ་ལ་ཡང༌། མཉམ་
བཞག་ནི་གལ་ཏེ། སོགས་ཏེ། དེའི་ཚེ་སྒྱུ་འཛིན་སྤངས་པ་ནི། ཤིང་ནི་སོགས་སྒོམ་ཚུལ་ནི་
སྒྱུ་མའི་སོགས་རྗེས་ཐོབ་དེ་དག་ཉིད་ཀྱིས་བསྟན་ཏོ། །རྨི་ལམ་ནི་བརྒྱལ་དང་སོགས་བརྒྱལ་
བ་ནི་ཤེས་པ་ངལ་བ་ནང་དུ་བསྡུས་པ་དང༌། ཡུལ་ལ་རིང་དུ་གནས་པ་དང༌། དགའ་བའི་ནང་
དུ་ནུབ་པ་ལ་སོགས་པ་དང༌། ཡུལ་དུ་ནི་བགྲོད་སེམས་ནི་དེ་ལ་རྣམ་པར་གཡེང་བ་དང༌། ཇི་
20-1-266


ལྟར་སོགས་དེ་གཉིས་བག་ཆགས་ཆ་མཚུངས་པས་དེ་ལྟར་སྒོམ་ཞེས་པའོ། ཁུ་རྡུལ་སོགས་
ཡོན་ཏན་གསུམ་སུ་གཙོ་ཆེ་བ་དང་ལྡན་པའི་རྨི་ལམ་ན་ཡང་རྣམ་པ་གསུམ། དེའི་ཕྱིར་དེ་
སྦྱངས་པའི་ཐབས་བྱའོ། །ཞེས་པའོ། །སྒོམ་ཚུལ་ནི་ཆོས་ཀུན་སོགས། སྨྲ་བའི་སོགས་རྨི་ལམ་
གྱི་རྒྱུ་གཉིས་དང༌། དེ་ལས་ཇི་ལྟར་འབྱུང་བ་དང༌། སད་དུས་ཀྱང་དེ་ལྟ་བུ་ཞེས་བསྟན་ཏེ། སྨྲ་
བ་ནི་ངག་སྟེ་དེའི་ཁུ་བ་སྟེ། ངག་གི་ཐིག་ལེ་ཞེས་དང༌། སད་དུས་ཀྱང་ལུས་ཀྱི་ཐིག་ལེ་གཡོས་
པ་ཡིན་ལ། གཞན་དུ་མཚུངས་སོ་ཞེས་སོ། །དེ་དག་ཀྱང་རང་བཞིན་དང་ལམ་གྱིས་དག་པའོ། །
ཞེས་པ་ནི་རང་བཞིན་སོགས། རྨི་ལམ་ལ་གོམས་པས་ནི། དེ་ནས་སོགས་དབང་པོ་རྣོ་རྟུལ་
གྱི་དབྱེ་བས་ཡང་ན་ཞེས་སོགས་བཤད་པའོ། །དེ་ལྟར་སྒྱུ་ལུས་མཐར་ཕྱིན་ནས་གཏུམ་མོ་ལ།
སྔོན་དུ་ཐིག་ལེ་ལས་སུ་རུང་བ་དང༌། རླུང་ལས་སུ་རུང་བ་གཉིས་སོ། །
དང་པོ་ལ་འཛིན་པར་བྱེད་པ་དང༌། རྒྱས་པར་བྱེད་པ། ཕྱི་མ་ལ། ཐུར་སེལ་དང་སྲོག་
དབང་དུ་བྱེད་པ་སྟེ། བཞིའི་དང་པོ་ནི། དེ་མཐར་སོགས་འཕྲོས་དོན་གང་དུ་སོགས། གཉིས་
པ་ཕྲ་མོ་སོགས། བརྟན་པའང་མཐར་ཕྱིན་པའི་རྟགས་མཐོང་ན་མངོན་ཤེས་བསྒྲུབ་པ་ནི་
དབང་སོགས་དགའ་བས་ཐིག་ལེ་འཆིང་བ་འཆིང་བ་བསྒྲུབ་པ་ནི། དེ་བཞིན་སོགས། དེ་དག་
གི་འབྲས་བུ་ན་གང་གའི་སོགས་དང༌། ཇི་སྙེད་སོགས་གསུམ་པ་ནི་དེ་མཐར་སོགས། བཞི་པ་
ནི་སྲོག་སོགས་ཏེ། རྫོགས་རིམ་པའི་རྣལ་འབྱོར་བཟླས་སྤྲོས་པ་དང་བཅས་པ་དང༌། གཞན་
ཡང་དོན་དམ་རྡོར་བཟླས་ཀྱི་དབང་དུ་བྱས་པ་ལ་སྣང་བ་ནི་ༀ་དང་ཡུལ་ལ་སེམས་པ་དང༌།
གནས་པ་ནི་ཨཱཿདང་རྩེ་གཅིག་གསལ་བར་སེམས་པ་དང༌། འགོག་པ་ནི་ཧཱུཾ་དང་མི་བསམ་
པའོ། །འཇུག་གནས་ལྡང་གསུམ་འབྲུ་གསུམ་གྱི་བདག་ཉིད་ཀྱི་ཕྱིར་ལམ་འདི་ལ་བརྫུན་པ་
སྟེ། བསྐྱེད་རིམ་པའམ་སྤྲོས་པ་ཅན་གྱི་རྡོར་བཟླས་མེད་དོ། །རྡོར་བཟླས་ཀྱི་རླུང་དྷཱུ་ཏཱིར་ཐིམ་
པས། གཏུམ་མོ་འབར་བར་བྱེད་པས། དེ་ནས་སྐད་ཅིག་སོགས་ཀྱི་ཙཎྜ་ལི་དངོས་བསྟན་ཏེ།
20-1-267


འོད་གསལ་འཆར་བར་བྱེད་པ་ནི་མི་ཤིགས་པའི་ཐིག་ལེ་གདུང་པ་དང༌། ཧཾ་ཡིག་གསུང་པ་ནི་
བདེ་ཆེན་སོགས་ཇི་ལྟར་གདུང་བ་བསྒོམ་ཞེ་ན། རྡོ་རྗེ་འཛིན་མཆོད་སོགས། ཞར་བྱུང་ལ་སྤྱིར་
དམིགས་པ་བརྟན་པའི་ཆེད། དམིགས་པའི་སོགས། གཏུམ་མོ་བརྟན་པའི་རྟགས་འོད་གསལ་
སོགས། འབྱུང་བའི་རླུང་བརྟན་པའི་རྟགས། དཔུང་རྒྱས་སོགས་ཡེ་ཤེས་ཀྱི་རླུང་འགག་པ་ལ།
ཉེ་བའི་ལྟས་དངོས་མེད་སོགས། དེ་ལྟར་གཏུམ་མོ་ལ་སོགས་ལ་གོམས་པའི་འོད་གསལ་དུ་
འཇུག་སྟེ། དབང་པོ་དམན་པའི་རིམ་གྱིས་ཚུལ་བྱས་ཏེ། འཇུག་ཚུལ་དངོས་ནི་དེ་ནས་སོགས།
སྣང་བ་ཉེར་བསྡུས་ནི་ཡུལ་སྣང་རགས་པའི་སྣང་བ་བསྡུ་ན། གསལ་བ་ཉེར་བསྡུ་ཡུལ་ཅན་ཏེ།
ཁྱད་དགའ་ནི་སེམས་བྱུང་ཕྲ་མོ་རྣམས་གཡོ་བ་ཅན་གྱི་ཕྱིར་ན་ཡུལ་ཅིང་དེ་ཚེ་གཡོ་བར་སྣང་
ལ། དེའི་མཐར་སྟོང་པ་སྟེ་དབང་པོ་རྣམས་ནུབ་པར་སྐྱལ་བའོ། །ལྷན་ཅིག་སྐྱེས་དགའ་ནི་
དོན་དམ་པ་སྟེ། དཔེའི་འོད་གསལ་གྱི་བདག་ཉིད་དོ། །གཏུམ་མོ་ལ་བརྟེན་ནས་འོད་གསལ་
སྐྱེས་པ་ལུང་གིས་བསྟན་པ་ནི། རླུང་ནི་སོགས་རྒྱུ་མཚན་བསྟན་པའི་རྒྱུད་དང༌། སོགས་
ཏེ། རྒྱུ་འབྲས་ཀྱི་གཏུམ་མོ་གཉིས་ལ། རང་བཞིན་རྣལ་འབྱོར་ལས་གསུམ་གྱི་དབྱེ་བའི། རྒྱུ་
ཡི་རྣམས་ཀྱི་ནི་འཇུག་སྒོ་ཙམ་དང༌། གཞན་ནི་དངོས་པོ་ཏེ། དེས་སྒྲུབ་པའི་འོད་གསལ་ནི་
གསལ་སོགས། རྟགས་ནི་ནམ་མཁའི་སོགས། འོད་གསལ་ཉིད་ཀྱི་བདེ་བའི་རང་བཞིན་ལ་
ས་ཧ་ཛཱ་ཞེས་བྱ་སྟེ་དེ་བཤད་པ་ནི། ལྷན་ཅིག་སྐྱེས་པ་སོགས་ལུང་གིས་བསྟན་ལ་མཐར་ཕྱིན་
པའི་རྟགས་ནི། གང་ནས་སོགས། དེ་ཡང་དམ་རྒྱ་ལས་འདོད་པ་གང་བ། འབར་བ་ཨཊྚོ་
བཞི། ཡེ་རྒྱ་ལས་དགའ་བ། མཆོག་དགའ་དགའ་བྲལ་ལྷན་སྐྱེས་ལས་རྒྱ་ལས་གཡོ་བ་འཆར་
བ་རྒྱལ་བ་གཉིད་ཡུལ། ཕྱག་ཆེན་ལས། འདར་དང་ནུབ་དང་ཐིག་ལེ་ནཱ་ད་སྟེ་བཞི་བཞི་གཙོ་
བོ་དང་བཅུ་གཉིས་ཀྱི་འཁོར་དུ་འཆར་བ་དེ་དག་ཅི་འདོད་པ་ནས་ཀྱང་ངང་གི་འོད་གསལ་དུ་
འཇུག་ནུས་པ་ནི། འདོད་དགུའི་དོན་ཡིན་ལ། སྐད་ཅིག་རྣམས་འཆར་ཚུལ་ཕྱག་རྒྱ་གང་ལ་
20-1-268


གང་གཙོ་ཆེ་བ། ཞི་བདེ་དང་མས་བརྟན་སོགས། རྣམ་གཞག་མི་མཚུངས་པ་འགའ་ཡང་ཡོད་
མོད། གཞན་དུ་རིགས་པར་གྱིས་ཤིག་བུ། ཡས་ལྷན་སྐྱེས་ཕ་མཐར་སོན་པའི་རྟགས། རྟགས་
དུ་སོགས་ལམ་འདི་ལ་གནས་སྐབས་སུ་ཡེ་ཤེས་ཀྱི་ཕྱག་རྒྱ་ལ་བསྟེན་པ་གཙོ་བོ་སྟེ། དེ་ལ་
གོམས་པའི་མཐར་ཕྱག་རྒྱ་ཆེན་པོ་ཉིད་ལ་ནན་ཏན་དུ་བྱས་ལ། ཙཎྜ་ལཱི་གེ་ཡ་སོགས་ནི་ལས་
ཀྱི་ཕྱག་རྒྱའི་རྣལ་འབྱོར་ཏེ། རྡོ་རྗེའི་རིགས་ཀྱི་གཏུམ་མོ་གླུ་གར་མཁན་གྱི་ནི་པདྨའི་འོད།
པདྨ་ཅན་ནི་མཆོག་གོ །ཨཾ་གུ་ལི་ནི་སོར་མོའམ་ཤིང་ལས་གྱུར་པའམ་བོ་ལ་རྣམས་ཏེ་རྩ་སྲ་
བ་དང༌། སྙི་བའི་ཁྱད་པར་རོ། །སྦྱོར་བཅས་ནི་སོ་སོའི་ཀ་ར་ཎ་འཁྱོགས་དང༌། སྤྱང་ཐག་ལ་
སོགས་པའོ། །འདོད་ཡོན་ནི་རིག་མའི་ཁ་སྦྱོར་གྱི་སོ། །དེ་ལ་ཁ་ཅིག་དང་པོར་བ་མ་ཚིག་ལ་
གོམས་ནས། ཛྙཱ་ན་མི་ཏྲ་དང༌། ལས་རྒྱ་ལ་འཇུག་པའི་རིམ་པ་ཤེས་པར་བྱོས་ཤིག །འདི་དག་
གིས་དཔེའི་འོད་གསལ་མཐར་ཐུག་པའི་མིང་ཅན་དུ་གྲུབ་པ་ཡིན་ཏོ། །དེ་ནས་བདེ་བ་ཆེན་པོ་
ལ་འཇུག་པར་འདོད་པས་དུས་ཅི་ཙམ་ན་ཞེ་ན། །རྣམ་པ་སོགས་ཇི་ལྟར་ཡེ་ཤེས་འོད་གསལ་
གྱི་སྐུ་ལ་ཞེ་ན་འོད་གསལ་སོགས་སོ། །ཚུལ་ཅི་ལྟ་བུར་སྒོམ་ཞེ་ན་ཇི་ལྟར་སོགས་ཏེ་ཅིའི་ཕྱིར་
དུ་སྒོམ་ཞེ་ན་མས་བརྟན་གྱི་མཐར་བདེ་བ་ཆེན་པོ་ཐོབ་པས་སོ། དེ་ལྟ་མོད་ཀྱི་འོད་གསལ་ལ་
རང་དུ་གོམས་པའི་ཕྱིར་ན་འདིའི་དགའ་བའི་རིམ་པ་དང་པོ་གསུམ་ཤིན་ཏུ་མྱུར་བ་དང༌། བཞི་
པ་ལ་བདེ་བའི་སྐད་ཅིག་དེ་ཟབ་ཅིང་ཕྲ་བས་དེའི་ཚེ་མ་རྟོགས་རེ་ཞིག་རྟོགས་དཀའ་བ་ཉིད་
དུ་རིག་པར་བྱའོ། །དེ་ལ་གོམས་པ་མཐར་ཕྱིན་པས། དོན་གྱི་འོད་གསལ་མངོན་དུ་བྱེད་དོ། །
དེ་ནས་ཟུང་འཇུག་ཏུ་འགྱུར་རོ། །དེ་དག་མངོན་དུ་གྱུར་པའི་རྟགས་ནི་སངས་རྒྱས་སོགས་
རྣལ་འབྱོར་བརྟན་པའི་ཐབས་ནི་བདེ་བ་ཆེན་པོའི་སོགས། མཉམ་རྗེས་གཉིས་ཀར་སྤྱོད་
པའི་ཏིང་ངེ་འཛིན་ནམ་མཁའ་ཞེས་པ་ནས། ངེས་པར་རྟགས་ཀྱི་བར་ཏེ། འདིས་ནི་འབྲས་
བུ་ཡང་བསྟན་པ་ཡིན་ལ། ཅི་ལྟར་ན་ནམ་མཁའ་སོགས་ཀྱི་འོད་གསལ་ཆོས་ཀྱི་སྐུ། དཔལ་
20-1-269


ལྡན་བདེ་ཆེན་སོགས། དཔལ་ལྡན་སོགས་ཀྱི་བདེ་ཆེན་གཟུགས་ཀྱི་སྐུ་བསྟན་པ་ཡིན་ནོ། །དེ་
ལྟར་ལམ་དེ་དག་ཀུན་དུ་ཡང་རྟག་ཏུ་ཡང་དག་སོགས། ལམ་གྱི་རིམ་པ་བསྡུ་བ་ནི། དེ་ལྟར་རྡོ་
རྗེ་སོགས། དབང་པོ་མཆོག་དམན་གྱི་དཀྲི་ཚུལ། སྐལ་ལྡན་སོགས་རྫོགས་པའི་མཆོག་རིམ་
སོགས་མཇུག་སྡུད་པ་སྟེ། འཚོ་བ་འཕྲོག་བྱེད་ནི་ཡེ་ཤེས་ཀྱི་རླུང་ངོ༌། །ཡེ་ཤེས་མཐོང་ནས་
སོགས་ནི། ངག་གི་ཕྲེང་རྒྱུད་དམ་གླེགས་བམ་བཀླགས་པ་ཙམ་གྱིས་ནི་མ་ཡིན་ནོ། །བདག་
གི་དགེ་འདིས་ཐར་པ་ཆེ་རང་དགའ། །མཁའ་འགྲོ་མིག་སྨན་གནོད་སྦྱིན་མོ་སོགས་ཀྱི། །རི་
དབང་སྟེང་ན་ཡེ་ཤེས་སྤྱོད་པའི་གཞི། །དོན་དམ་རིག་པ་འཛིན་པ་རྣལ་རྩེན་ཤོག །ཅེས་པ་ནི།
དགེ་བ་བསྔོ་བ་སྟེ་གོ་སླའོ། །འདི་ཡང་རྡོ་རྗེ་ཐེག་པའི་ལམ་བཟང་ཟབ་མོ་ཟབ་པར་སྣང་བ་མ་
སླད་པ་ཁོ་ན་སྟེ་ཐར་འདོད་རྣམས་ཀྱི་སྒོམ་པའི་རིགས་སོ། །ཞེས་འདོམས་པར་བྱའོ།། །།
20-1-270


༄༅། །བློ་སྦྱོངས་དོན་བདུན་མའི་བླ་མ་བརྒྱུད་པའི་
གསོལ་འདེབས་བཞུགས།
༄༅། །ཐུབ་པའི་དབང་པོ་རྒྱལ་ཚབ་བྱམས་པ་དང༌། །ཐོགས་མེད་སྐུ་མཆེད་གྲོལ་སྡེ་
རྣམ་གཉིས་དང༌། །གུ་ཎ་མི་ཊ་སེང་བཟང་གང་བ་སྤེལ། །ཀུ་ས་ལི་པ་ཆེ་ཆུང་གསེར་གླིང་པ། །
ཨ་ཏི་ཤ་དང་འབྲོམ་སྟོན་པོ་ཏོ་བ། །སྤྱི(ས)ལ་(འོད་ཟེར་གཞོན་ནུ་)བུ་པ་དང་འོད་ཟེར་(ལྷ་)བླ་
མ་དང༌། །ལྷ་(རམ་པ་)སྡིངས་ཁུ་(བྱང་ཆུབ་འབུམ་)དབོན་གཉིས་དང་ཡོན་ཏན་དཔལ། །བདེ་བ་
དཔལ་དང་བཀའ་བཞི་གྲགས་གཞོན་དང༌། །བསོད་ནམས་གྲགས་དང་རྒྱལ་སྲས་བཟང་པོ་
དཔལ། །ཤཱཀྱ་བསོད་ནམས་གཞོན་ནུ་བློ་གྲོས་དང༌། །པཎ་ཆེན་ཆོས་རྗེ་ཀུན་དགའ་མཆོག་
གྲུབ་དང༌། །རྗེ་བཙུན་གྲོལ་མཆོག་ལུང་རིག་རྒྱ་མཚོའི་ཞབས། །སྐྱབས་གནས་ཀུན་འདུས་
རྩ་བའི་བླ་མ་སྟེ། །བློ་སྦྱོང་བརྒྱུད་པ་རྣམས་ལ་གསོལ་བ་འདེབས། ། བྱམས་དང་སྙིང་རྗེ་བྱང་
ཆུབ་སེམས་འབྱོངས་ཤིང༌། །བློས་བཏང་ཟློག་སྒོམ་ནུས་པར་བྱིན་གྱིས་རློབས། །རྭ་སྒྲེང་བ་ཤཱཀ་
བསོད་ནམས་ཀྱི་དོན་དུ། དགྲ་བཅོམ་ཡོན་ཏན་བློ་གྲོས་བཅུག་ན་ཡོང་ཞེས་མཁན་ཆེན་རིན་པོ་ཆེའི་གསུང་། ཡང་ན་མང་འཁར་ལ་
ཚུལ་ཁྲིམས་དཔལ། གཞོན་ནུ་རྒྱལ་མཆོག །མུས་པ་དཀོན་རྒྱལ། རྭ་སྟོན་ཡོན་ཏན་དཔལ་བཟང༌། ཀུན་དགའ་མཆོག་གྲུབ་པ་
བྱས་ཀྱང་ཆོག་ལགས། ཏཱ་ར་ནཱ་ཐས་སོ།། །།
20-1-271


༄༅། །སྙིང་པོ་དོན་གསུམ་གྱི་བླ་མ་བརྒྱུད་པའི་
གསོལ་འདེབས་བཞུགས།
༄༅། །ན་མོ་གུ་རུ་ཝེ། ཐུགས་རྗེའི་མངའ་བདག་སྤྱན་རས་གཟིགས་དབང་པོ། །ལྷ་
སྲས་བློ་གྲོས་རིན་ཆེན་སྤྲུལ་པའི་སྐུ། །གྲུབ་པ་མཆོག་བརྙེས་ཏེ་ལོར་གྲགས་པའི་ཞབས། །
གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གནས་ལྔར་རིག་པའི་པཎ་ཆེན་ནཱ་
རོ་པ། །བཤེས་གཉེན་རྣལ་འབྱོར་མཚན་གསོལ་སྒྱུ་མའི་སྐུ། །བྱམས་པའི་རྣམ་འཕྲུལ་རྗེ་
བཙུན་ལོ་ཙཱ་བ། །གསོལ་བ་འདེབས་སོ་བདག༴ །དེ་སྲས་མཚུངས་མེད་སེམས་དཔའ་ཆེན་པོ་
དང༌། །ཡང་རྩེ་བར་གྲགས་རིན་ཆེན་སེངྒེའི་ཞབས། །དགྲ་བཅོམ་ཆེན་པོ་ཡོན་ཏན་བློ་གྲོས་
ལ། །གསོལ་བ་འདེབས་སོ་བདག༴ ལྕང་ལུང་པར་གྲགས་མཁས་གྲུབ་གཞོན་ནུའི་མཚན། །
གདམས་པའི་མཛོད་འཛིན་མཆོག་ལྡན་ལེགས་པའི་བློ། །གཞོན་ནུ་ཆོས་འགྲུབ་དམན་
འགྲོ་ཕ་མའི་མགོན། །གསོལ་བ་འདེབས་སོ༴ །འཇམ་མགོན་གྲུབ་པའི་དཔའ་བོ་ཆོས་ཀྱི་
རྗེ། །ལུང་རིག་རྒྱ་མཚོ་ཡེ་ཤེས་རོལ་པའི་མཚོ། །རྩ་བའི་བླ་མ་སྐྱབས་གནས་ཀུན་གྱི་དངོས། །
གཞན་ཡང་རྩ་བརྒྱུད་བླ་མ་ཐམས་ཅད་ལ། །གསོལ་བ་འདེབས་སོ༴ །སྔོན་འགྲོའི་ཆོས་ཀྱི་
ཆོས་མིན་སྤོང་པ་དང༌། །དངོས་གཞིའི་ཆོས་ཀྱིས་རང་རྒྱུད་སྨིན་པ་དང༌། །བསྲེ་འཕོ་ཆོས་ཀྱིས་
གཞན་རྒྱུད་གྲོལ་བྱས་ནས། །སྤྱན་རས་གཟིགས་ཀྱི་གོ་འཕང་དེ་ཐོབ་ཤོག། །།ཅེས་པའང་ཏཱ་
ར་ནཱ་ཐས་སྨྲས་པའོ། །ཞུས་དག དགེ་ལེགས་འཕེལ།
20-1-272


༄༅། །ཕྱག་རྒྱ་ཆེན་པོ་གའུ་མའི་རང་བབས་རྣམ་གསུམ་
ཞེས་བྱ་བའི་ཁྲིད་ཡིག་བཞུགས།
༄༅། །ན་མོ་གུ་རུ་ཝེ། ཕྱག་རྒྱ་ཆེན་པོ་གའུ་མའི་རང་བབས་རྣམ་གསུམ་ཞེས་བྱ་བ། ཡེ་
ཤེས་མཁའ་འགྲོ་ནི་གུ་མའི་གདམས་ངག་འདི་ལ། ཁྲིད་ཀྱི་སྔོན་འགྲོ་དལ་འབྱོར་རྙེད་དཀའ།
མི་རྟག་པ་སྡུག་བསྔལ་སོགས་སྤྱི་དང་མཐུན། སྐྱབས་འགྲོ་སེམས་བསྐྱེད་དང༌། ཨ་ཡི་སྟོང་
ར་རྣམས་ནི་གུ་ཆོས་དྲུག་དང་འདྲ། ཐུན་གྱི་སྔོན་འགྲོ་བླ་མའི་རྣལ་འབྱོར་ནི། གཞན་སྒྱུ་ལུས་
དང་འདྲ་བ་ལས་མཎྜལ་མང་དུ་འབུལ། བདག་འཛིན་བློ་ཡི་ཐོངས་པར་མཛོད་དུ་གསོལ།
དགོས་མེད་རྒྱུད་ལ་སྐྱེ་བར་མཛད་དུ་གསོལ། འོད་གསལ་ཕྱག་རྒྱ་ཆེན་པོ་རྟོགས་པར་མཛད་
དུ་གསོལ། ཞེས་པ་ཁྱད་པར་རོ། །
ཁྲིད་དངོས་ལ། སྔོན་འགྲོ་རང་བབས་རྣམ་གསུམ། དངོས་གཞི་སྐྱོན་བཞི་རང་གྲོལ།
རྗེས་སྐུ་གསུམ་རང་ཤར་གྱི་ཁྲིད་དོ། །དང་པོ་ལ་ཞི་གནས་ཀྱི་ཁྲིད་དང༌། ལྷག་མཐོང་གི་ཁྲིད་
གཉིས། དང་པོ་ལ་དམིགས་པའི་གཞི་དང༌། བོགས་འདོན་ནོ། །དང་པོ་ནི། སྔར་སྒོ་གསུམ་གྱི་
བྱ་བ་ཐམས་ཅད་དོན་མེད་ལ་དོར་སོང་འདུག་པས། ད་ཕྱིན་ཆད་སྒོམ་ལ་བརྟན་པ་ཅུང་ཟད་
ཅིག་མ་སྐྱེས་པར་མི་དགེ་བ་དང༌། ལུང་མ་བསྟན་ལྟ་ཅི་སྨོས། སྤྲོས་བཅས་དགེ་བ་ཡང་རྩོལ་
བ་གློད། ལུས་རྣམ་སྣང་གི་ཆོས་བདུན། ངག་རླུང་རོ་ལན་གསུམ་བསལ་ནས་སྨྲ་བརྗོད་ལྟ་
ཅི་སྨོས་རླུང་འཛིན་འདྲེན་ཙམ་ཡང་སྤོང་པའི་རང་བབས། སེམས་མ་བཅོས་པ་ལྷོད་དེ་གློད།
དམིགས་སྐོར་གཅིག །རྣམ་རྟོག་སྣ་ཚོགས་འཕྲོ་ན་ལམ་གྱིས་སྐྱེས་པ་ལ་ངོ་ཤེས། འཕྲོ་རྦད་
ཀྱི་བཅད་ལ་བཞག །དམིགས་སྐོར་གཉིས། འོག་འགྱུ་རྒྱ་འབྱམས་སུ་འགྲོ་ན། ནམ་དྲན་དུས་
20-1-273


ཕྱིན་ཆད་འདི་འདྲ་གཏན་ནས་མ་བྱུང་བ་བྱེད་སྙམ་ཞེ་དམ་བྱ། རྣམ་རྟོག་བྱུང་ཙ་ན་དྲན་ཞིང་
ངོ་ཤེས་པ་བྱེད་སྙམ་པ་བྱས་པས་སེལ་ཏེ། དམིགས་སྐོར་གསུམ། དེ་དུས་ཤེས་པ་མི་གསལ་
བར་སོང༌། བརྗེད་ངེས་ཀྱང་ཆེར་འགྲོ་ན་བྱིང་བའི་སྐྱོན་ཡིན། རིག་པ་བསྒྲིམ། མིག་དཔངས་
གཏོད། མཐོངས་དཀར་བ་དང་ཡང་ཐོག་ལ་སོགས་པར་བསྒོམ། བྱིང་བ་འཕྲོ་བཅད་དེ་
ལངས་པ་སོགས་བྱེད། ཡང་ཚིག་པ་ཟ་ཞིང་སྦུན་ལངས་ན་རྒོད་པ་ཡིན་པས་ལྷོད་ཀྱིས་གློད།
ལྟ་སྟངས་སྨད། འདོད་ཡོན་ལ་དགའ་བས་སེམས་གཡེངས་ན། མི་རྟག་སྡུག་བསྔལ་ལ་ཡིད་
འབྱུང་བར་བྱ་སྟེ་དམིགས་སྐོར་བཞི་པའོ། །གཉིས་པ་ལ་ལྟ་སྟངས་ངེས་མེད་ལ་བསླབ་པ།
ཆོས་སྤྱོད་སྣ་ཚོགས་ལ་བསླབ་པ། སྤྱོད་ལམ་སྣ་ཚོགས་དང་བསྲེ་བའོ། །
དང་པོ་ནི། མིག་གི་ལྟ་སྟངས་མཐོ་བ་ཐག་ཉེ་བ་ཐོག་མཐིལ་ལྟ་བུ་དང༌། རིང་བ་རི་
རྩེའམ་ནམ་མཁའི་དབྱིངས་ལྟ་བུ་ལ་མཉམ་པར་བཞག་སྟེ་དམིགས་སྐོར་ལྔ། དམའ་བ་ཉེ་
བ་རྩིག་འཁྲིས་སམ་རིང་བ་རི་རྩིབ་ལྟ་བུ་ལ་མཉམ་པར་བཞག་སྟེ་དྲུག་པའོ། །ཐད་ཀ་ཉེ་བ་
གྱང་ལྡན་ནམ་རིང་བ་རི་ལྡན་ལྟ་བུ་ལ་མཉམ་པར་བཞག་སྟེ་བདུན་པའོ། །གཉིས་པ་ནི། མདོ་
འདོན། སྔགས་ཟློས། གཏམ་སྣ་ཚོགས་དང་བསྲེ་ཞེས་པའི་དོན་མདོ་ལ་སོགས་པ་ཁ་ཏོན་བྱང་
བ་རྣམས་དང་ཐོག་མར་བསྲེ། རིམ་གྱིས་ཁ་ཏོན་ཐམས་ཅད་དང་བསྲེ་གང་ཐུབ་བྱ་སྟེ་བརྒྱད་
པའོ། །སྔགས་ཐུང་བ་རྣམས་དང་ཐོག་མར་བསྲེ། དེ་ནས་བཟླས་པ་ཐམས་ཅད་དང་བསྲེ་སྟེ་
དགུ་པའོ། །དང་པོར་ཆུ་སྒྲ་སོགས་འབྱུང་བའི་སྒྲ་དང་བསྲེ། དེ་ནས་མི་མང་པོའི་ཅ་ཅོ་དང་སྒོ་
འཐེན་སོགས་དང་བསྲེ། དེ་ནས་མི་གཞན་གྱིས་གཏམ་སྨྲ་བ་ལ་བསྲེས་ཏེ་དེ་དག་གི་སྒྲ་ལྷང་
ལྷང་བ་དེར་ཧད་དེ་བཞག་སྟེ་དམིགས་སྐོར་བཅུ་པའོ། །
གསུམ་པ་སྤྱོད་ལམ་སྣ་ཚོགས་ལ་བསླབ་སྟེ། ཟས་ཟ་ན་ཡང་རང་བབས་ཀྱི་ངང་ནས་ཟ།
ལམ་དུ་འགྲོ་ན་ཡང་དེ་བཞིན་དུ་སྦྱང༌། གཏམ་སྨྲ་ན་ཡང་རང་བབས་ཀྱིས་ངང་ནས་མ་བྲལ་
20-1-274


བར་བྱ་སྟེ། དང་པོར་སྒྲིམ་མི་དགོས་པར་དོ་གལ་ཆུང་བ་རྣམས་ལ་སྦྱངས་པས་མཐར་ཐམས་
ཅད་ལ་འབྱོངས་པ་ཡིན་ནོ། །དེ་བཞིན་དུ་བདེ་སྡུག །དགའ་མི་དགའ། ཡ་ང་བག་ཚ་ངོ་ཚ་
སྐྱུག་བྲོ་སོགས་མཐོ་དམན་གྱི་རྣམ་རྟོག་སྐྱེ་བའི་ཡུལ་ཐམས་ཅད་ལ་རང་བབས་སུ་བསྲེས་
ཀྱིན་སྦྱང༌། ཐམས་ཅད་ཀྱང་སྔར་ལྟར་དགེ་སྦྱོར་གྱི་ངང་དུ་ཚུད་འོང་སྟེ་དམིགས་སྐོར་བཅུ་
གཅིག་པའོ། །དེ་ལྟར་ན་ཞི་གནས་ལ་དམིགས་སྐོར་བཅུ་གཅིག་གོ །གཉིས་པ་ལྷག་མཐོང་གི་
ཁྲིད་སེམས་ཚོལ་ནི། བླ་མའི་ཞལ་རྒྱུན་ལས་རྒྱས་པར་འབྱུང་བའི་དབང་དུ་བྱས་ན། དང་པོ་
སྔར་བཞིན་རང་བབས་གསུམ་གནད་དུ་བབས་ནས་ལྷོད་ཀྱི་ཀློད་པའི་ངང་ནས་འཚོལ་བ་ནི་
ཐམས་ཅད་ཀྱི་སྔོན་འགྲོ་ཡིན་ནོ། །
དངོས་གཞི་དམིགས་ཐུན་བདུན་ཏེ། སེམས་ཀྱི་ངོ་བོ་ལ་འཚོལ་བ། སྐྱེ་འགག་ལ་འཚོལ་
བ། ཡུལ་སྣང་བ་ལ་འཚོལ་བ། རྣམ་རྟོག་ལ་འཚོལ་པ། ཡུལ་སྣང་ཡོད་མེད་ཀྱི་ཁྱད་པར་ལ་
འཚོལ་བ། རྣམ་རྟོག་ཡོད་མེད་ཀྱི་ཁྱད་པར་ལ་འཚོལ་བ། རང་བཞིན་དབྱིངས་སུ་ཐག་བཅད་
པའོ། །དང་པོ་ནི། སེམས་ཀྱི་ངོ་བོ་ལ་ཆེ་རེ་ལྟ་ཞིང་ཞིབ་ཏུ་གཞིག་པ་འཇུག་པ་སྟེ། དེར་རྩོལ་
བ་རང་ཞིག་ལ་སོང་ནས་འདི་ཡིན་བརྗོད་དུ་མེད་པའི་ཉམས་སྐྱེས་པ་ན་རང་བབས་སུ་འཇོག་
སྟེ་དམིགས་སྐོར་གཅིག་གོ །གཉིས་པ་ནི། སེམས་རྟོག་མེད་ཁོ་ན་ལ་བལྟས་ནས་སྐྱེ་འགག་
གཏན་མི་བྱེད་པའི་རྟག་པ་བརྟན་པ་ཞིག་འདུག་གམ། སྐྱེ་འགག་བྱེད་པའི་ཅི་མེད་ཅིང་མེད་
ཅིག་འདུག །སྐྱེ་འགག་བྱེད་ན་ཇི་ལྟར་སྐྱེ་ཡིན་འདུག །གནས་ན་ཇི་ལྟར་གནས། ཁ་དོག་
དབྱིབས་སོགས་ཇི་ལྟ་བུ། ཕྱི་ནང་གང་ན་འདུག །འགག་ན་ཇི་ལྟར་འགག་ཅེས་སོགས་ཞིབ་
ཏུ་བརྟགས་པ་ན། ངོས་བཟུང་མེད་པ་ལ་ཞི་སྟེ། དམིགས་སྐོར་གཉིས་པའོ། །གསུམ་པ་ནི།
མིག་གིས་གཟུགས་མཐོང་ན། གཟུགས་སུ་ལམ་མེར་མཐོང་བ་དེ་ངོ་བོ་ཇི་ལྟར་འདུག་པ་ལྟ།
དེ་དང་སེམས་རིག་རིག་ཏུར་ཏུར་འདི་གཅིག་གམ། ཐ་དད་ཁྱད་ཅི་འདུག་ཞིབ་ཏུ་དཔྱད། དེ་
20-1-275


བཞིན་རྣ་བས་སྒྲ་ཐོས་པ་སོགས་ལའང་སྦྱར་ཏེ། དམིགས་སྐོར་གསུམ་པའོ། །བཞི་པ་ནི།
ཡང་རྣམ་རྟོག་ལམ་གྱི་འཆར་བ་འདི་དང་སེམས་ཀྱི་རང་བཞིན་ལ་ཁྱད་པར་ཅི་འདུག །དེ་
གཉིས་གཅིག་མི་གཅིག་བརྟག །རྣམ་རྟོག་སྐྱེས་པའི་ཚེ་ཇི་ལྟར་སྐྱེད། སྐྱེས་ནས་མ་འགགས་
པའི་སྐབས་ཡོད་ལུགས་ག་འདྲ་ཞིག་འདུག །འགག་ཙ་ན་འགག་ལུགས་ཅི་འདྲ་ཞིག་འདུག་
ཞིབ་ཏུ་བརྟགས་ཏེ། དམིགས་སྐོར་བཞི་པའོ། །ལྔ་པ་ནི། མིག་གིས་གཟུགས་མཐོང་བའི་
དུས་ཀྱི་སེམས་དང་མ་མཐོང་བའི་དུས་ཀྱི་སེམས་ལ་ཁྱད་ཅི་འདྲ་ཞིག་འདུག །ཡོད་ན་ཡོད་
ལུགས་དང་མེད་ན་མེད་ལུགས་ཇི་ལྟར་ཡིན་བརྟགས་ཏེ་དམིགས་སྐོར་ལྔ་པའོ། །དྲུག་པ་ནི།
རྣམ་རྟོག་སྐྱེས་པའི་དུས་ཀྱི་སེམས་དང་མ་སྐྱེས་པའི་དུས་ཀྱི་སེམས་ལ་བཟང་ངན་གསལ་མི་
གསལ་སྟོང་མི་སྟོང་ཁྱད་ཡོད་མེད་ལེགས་པར་བརྟགས། འཚོལ་ཐབས་དེ་བཞི་ལའང་མཐར་
དམིགས་གཏད་ཞིག་པ་ཞིག་འབྱུང་བའི་དེ་ཁོ་ནའི་ངང་བསྐྱོང༌། དམིགས་སྐོར་དྲུག་པའོ། །
བདུན་པ་ནི། སྣང་བ་འདི་ཐམས་ཅད་རང་གི་སེམས་སུ་ཐག་བཅད། སེམས་ལ་ལེགས་པར་
བརྟགས་པ་ན་ངོས་བཟུང་ཅི་ཡང་མེད་པ་དང་དེ་ཁའི་ངང་ལ་བཞག་ད་རུང་མང་དུ་བཙལ་
བས། ངོས་བཟུང་མེད་བཞིན་དུ་ཅི་མེད་ཅིང་མེད་ཀྱང་མ་ཡིན་པར་སྟོང་བཞིན་དུ་སྣ་ཚོགས་
སུ་འཆར་བའི་རིག་སྟོང་རྗེན་ནེ་བ། ཝ་ལེ་ཁྱུག་གེ་བ། ཧྲིག་གེར་མྱོང་བ། བརྗོད་མི་ཤེས་པ་དེ་
ལ་ཆམ་གྱིས་བཞག་སྟེ་དམིགས་སྐོར་བདུན་པའོ། །དེ་ལྟར་ལྷག་མཐོང་ལ་བདུན་ནོ། །སྔོན་
འགྲོ་རང་བབས་རྣམ་གསུམ་ལ་དམིགས་སྐོར་བཅོ་བརྒྱད་དོ། ཁྱུང་པོའི་བླ་མ་ནི་གུ་མས་སྔོན་
འགྲོ་ལ་གཙོ་བོར་མཛད། མཻ་ཏྲི་པས་དངོས་གཞི་ལ་གཙོ་བོར་མཛད། སུ་ཁ་སིདྷིའི་རྗེས་ལ་
གཙོ་བོར་མཛད་གསུངས་ཏེ་སྔོན་འགྲོའི་སྐབས་འདིར་རྟོགས་པ་སྐྱེ་དགོས་སོ། །
དངོས་གཞི་ལ་ཐོག་མར་བྱིན་རླབས་ཀྱི་སྒོ་ནས་བརྐུ་ཐབས་སུ་ངོ་སྤྲོད་པ་ནི། མཎྜལ་ཆོས་
འབྱུང་མཐིང་ཁ་ཞིག་བཞེངས། དེར་མཉྫིའི་སྟེང་དུ་གཏོར་མ་ཆེ་བ་ལ་མདའ་དར་བཙུགས་
20-1-276


ཤིང་རྒྱན་བཟང་པོས་བརྒྱན་པ་ཞིག་བཞག །མདུན་དུ་འབུལ་གཏོར་དང་མཆོད་པ་དང་
ཚོགས་རྫས་རྣམས་བཤམས། མཆོད་པ་བྱིན་རླབས་སྤྱི་དང་འདྲ། སློབ་དཔོན་རང་གིས་བདེ་
མཆོག་ལྷན་སྐྱེས་ཀྱི་མངོན་རྟོགས་བསྒོམས་ལ། མདུན་བསྐྱེད་མཎྜལ་དང་གཏོར་མ་སུམྦྷས་
བསངས། སྭཱ་བྷ་ཝས་སྦྱངས། གཏོར་ཆོག་ལྟར་མགོན་པོར་བསྐྱེད་པ་ནས་བཟླས་པའི་བར་
བྱ། དེ་ནས་སློབ་མ་རྣམས་ལ་ཁྲུས་དང་མེ་ཏོག་བཀྱེ་བསྡུ་སོགས་བྱ། མཎྜལ་ལན་གསུམ་ཕུལ་
ལ། སློབ་མ་རྣམས་ལ་བདེ་མཆོག་ལྷན་སྐྱེས་ཀྱི་མངོན་རྟོགས་ཕོག་ལ་ཅུང་ཟད་སེམས་འཛིན་
དུ་འཇུག །མདུན་བསྐྱེད་མགོན་པོར་སྐད་ཅིག་གིས་བསྒོམ་དུ་བཅུག་ཅིང༌། སྟེང་གི་ཆ་ལ་
བརྒྱུད་པའི་བླ་མ་ཐམས་ཅད་ཀྱིས་བསྐོར་བའི་དབུས་སུ། ཡེ་ཤེས་མཁའ་འགྲོ་ནི་གུ་མ་སྐུ་
མདོག་སྨུག་ནག་ཌཱ་མ་རུ་དང་ཐོད་པ་ཁ་ཊཱཾ་ག་བསྣམས་པ་གར་སྟབས་དང་རུས་པའི་རྒྱན་
ཅན། ལང་ཚོ་དར་ལ་བབས་པ། སངས་རྒྱས་དང་བྱང་ཆུབ་སེམས་དཔའ་ཡི་དམ་དཀྱིལ་
འཁོར་གྱི་ལྷ་ཚོགས་མཁའ་འགྲོ་སྡེ་ལྔ་མཁའ་འགྲོ་མ་བྱེ་བ་འབུམ་སྡེའི་ཚོགས་དང་བཅས་པ་
བཞུགས་པར་བསམ། དེ་རྣམས་ལ་དངོས་སུ་བཤམས་པའི་མཎྜལ་འདི་ཉིད་སྟོང་གསུམ་གྱི་
འཇིག་རྟེན་གྱི་ཁམས་སུ་མོས་ཏེ་གསེར་གྱིས་བཀང་ཞིང་འབུལ་བར་བསམ། དཔོན་སློབ་
རྣམས་ཀྱིས་ལྷན་ཅིག་ཏུ་ཚོགས་དང་གཏོར་མ་བྱིན་གྱིས་བརླབས། བྱིན་རླབས་ཀྱི་ཆོ་ག་ནི་ཡི་
དམ་གང་བྱེད་ཀྱི་ནང་མཆོད་ལྟར་བྱིན་གྱིས་བརླབ། ༀ་ཧྲཱིཿཧ་ཧ་ཧཱུཾ་ཧཱུཾ་ཕཊ་གྱི་མཐར། ༀ་ཨ་ཀཱ་
རོ་བཏགས་པས་དང་པོར་བླ་མ་དང་ཡི་དམ་ལ་ཕུལ། དེ་ནས་གཏོར་ཆོག་ལྟར་མགོན་པོ་
འཁོར་བཅས་ལ་ཕུལ། ༀ་སརྦ་ཌཱ་ཀི་ནི་ས་པ་རི་ཝཱ་ར་ཨ་ཀཱ་རོ་སོགས་ཀྱིས་མཁའ་འགྲོ་མ་ལ་
འབུལ། སྙིམས་པ་མེ་ཏོག་དང་བཅས་པས་གསོལ་འདེབས་འདིའི་རྗེས་ཟློས་མཛོད་བྱས་ལ།
ཕྱོགས་བཅུ་ན་བཞུགས་པའི་སངས་རྒྱས་ལ་སྐྱབས་སུ་མཆིའོ། །ཕྱོགས་བཅུ་ན་བཞུགས་པའི་
ཆོས་ལ་སྐྱབས་སུ་མཆིའོ། །ཕྱོགས་བཅུ་ན་བཞུགས་པའི་དགེ་འདུན་ལ་སྐྱབས་སུ་མཆིའོ། །བླ་
20-1-277


མ་དང་ཡི་དམ་གྱི་ལྷ་ཚོགས་ཡེ་ཤེས་ཀྱི་མགོན་པོ་ཕྱག་དྲུག་པའི་ལྷ་ཚོགས་འཁོར་དང་བཅས་
པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། །རྩ་བ་དང་བརྒྱུད་པའི་བླ་མ་རྣམས་དང་ཡི་
དམ་གྱི་ལྷ་ཚོགས་རྣམས་ཀྱིས་བདག་ལ་ཕྱག་རྒྱ་ཆེན་པོའི་རྟོགས་པ་ངོ་འཕྲོད་པར་བྱིན་གྱིས་
བརླབ་ཏུ་གསོལ། མཁའ་འགྲོ་ཆོས་སྐྱོང་བའི་སྲུང་མ་རྣམས་ཀྱིས་བདག་ཕྱག་རྒྱ་ཆེན་པོ་ཞུ་བ་
དང་ཉམས་སུ་ལེན་པ་ལ་ཕྱི་ནང་གི་བར་དུ་གཅོད་པ་གང་ཡང་མི་འབྱུང་བར་མཛད་དུ་གསོལ།
ཞེས་ལན་གསུམ་གྱིས་གསོལ་བ་བཏབ། རྩ་བའི་བླ་མ་ལ་མོས་གུས་དུང་བ་བྱེད་དུ་བཅུག།
ལུས་གནད་བཅས་རླུང་རང་བབས་སུ་རྒྱུ་རུ་གཞུག །བླ་མ་ཡི་དམ་མཁའ་འགྲོའི་ཚོགས་དང་
བཅས་པ་ཐམས་ཅད་འོད་དུ་ཞུ་ནས་སློབ་མ་རང་ཉིད་ལ་ཐིམ་པར་མོས་ལ་དར་ཅིག་ལྷོད་
ཀྱིས་གློད་ནས། སེམས་ཀྱི་རང་ངོ་ལ་ལྷན་ནེར་ལྟོས་ཤིག་བྱས་ལ་ཡུད་ཅིག་མཉམ་པར་འཇོག་
ཏུ་བཅུག །ད་ལྟ་སེམས་ངོས་བཟུང་ཐམས་ཅད་དང་བྲལ་བ། རྗེན་ནེ་ཡེ་རེ་བ་འདི་ཀ་རང་
སེམས་སྐྱེ་མེད་ཆོས་སྐུའམ། ཐ་མལ་ཤེས་པའམ་རང་བབས་ཞེས་བྱ་བ་ཡིན་པས། ད་ཕྱིན་
ཆད་འདི་ཀ་མཉམ་རྗེས་ཐམས་ཅད་དུ་བཟོ་བཅོས་མེད་པར་སྐྱོངས་ཤིག་བྱས། མཎྜལ་འབུལ་
བ་དང་སྨོན་ལམ་བཏབ་པ་སོགས་སྤྱི་དང་མཐུན། གཉིས་པ་ནི། ཐུན་གྱི་སྔོན་འགྲོ་སྔར་ལྟར་
ལས། གནས་འགྱུ་ཐམས་ཅད་དུ་དྲན་པས་ཟིན་པ་ཞིག་བྱའོ། །ཞེས་ཡང་ཡང་འདུན་པ་བྱས་
ནས། དམིགས་པའི་དངོས་གཞི་ལ་སེམས་གནས་པའི་ཚེ། ཁ་ནང་ལོག་ཏུ་རང་ངོ་ཤེས་པ་
ཙམ་བྱས་ནས། བཟོ་བཅོས་མེད་པའི་ཚུལ་དུ་བཞག །ཡུལ་སྣང་གི་འཆར་སྒོའམ། རྣམ་རྟོག་
གི་འཆར་སྒོ་ཅི་བྱུང་ཡང་ཆེད་གཏད་དགག་སྒྲུབ་བླང་དོར་མི་བྱ་བར་གང་ཤར་དེ་རང་ངོ་ཤེས་
ཙམ་གྱི་ངང་ལ་མཉམ་པར་བཞག་པས་རྣམ་རྟོག་ཁོ་རང་མ་འགགས་བཞིན་དུ་གསལ་སེང་ངེ་
བ་དེའི་ངང་བསྐྱང༌། ངོ་མི་ཤེས་སུ་གཅིག་ཀྱང་མ་ཤོར་བར་བྱ། ངོ་ཤེས་དང་མ་བྲལ་ཕྱིན་ཆད་
འགྱུ་ནའང་འགྱུ་རུ་བཅུག་རང་ལོག་ཏུ་འགྲོ་ནའང་འགྲོ་རུ་བཅུག་དྲན་པ་ལ་ཆེད་གཏད་དུ་
20-1-278


འབད། འདི་ལ་བསྒོམ་དུ་རྡུལ་ཙམ་མེད། ཡེངས་སུ་སྐད་ཅིག་ཀྱང་མེད་ཅེས་བྱ། དེ་ཉིད་ལ་
སྐྱོན་བཞི་རང་གྲོལ་བར་ངོ་སྤྲད་དེ། ཉེ་དྲགས་པས་ངོ་མ་ཤེས། ཟབ་དྲགས་པས་ངོས་མ་ཟིན་
སླ་དྲགས་པས་ཡིད་མ་ཆེས། བཟང་དྲགས་པས་བློར་མ་ཤོང་ཞེས་པའི་སྐྱོན་བཞི་ལས་གྲོལ་
བ་སྟེ། དང་པོ་ནི་རང་ངོ་མ་ཤེས་པ། གཉིས་པ་ནི། སྔར་འཆི་བ་དང་ཤུགས་ཆད་ཀྱི་ཉམས་ལ་
སོགས་པའི་དུས་སུ་ཐ་མལ་ཤེས་པ་རང་ངོ་གསལ་བར་སྟོན་པ་མང་དུ་བྱུང་མོད་ཀྱང༌། བླ་
མའི་གདམས་ངག་གིས་ངོ་མ་སྤྲད་པ་དེ་སྲིད་ཐབས་གང་གིས་ཀྱང་མ་ཤེས་པའོ། །གསུམ་པ་
ནི། མཁས་རྨོངས་ཐམས་ཅད་བྱར་མེད་ལ་བློས་མ་ཁེལ་བའོ། །བཞི་པ་ནི། སེམས་ཀྱི་རང་
བཞིན་སངས་རྒྱས་ཡིན་པ་བློར་མ་ཤོང་པའོ། །དེ་ལ་གནས་འགྱུ་ཐམས་ཅད་རང་ངོ་ཤེས་ཙམ་
ན་རང་བཞིན་སྟོང་གསལ་དུ་འདུག །དེས་ན་གང་ཤར་ལ་བཟོ་བཅོས་བྱེད་དོན་མེད། རང་
བཞིན་གསལ་སྟོང་འདི་ལས་ལོགས་སུ་འཁོར་འདས་གང་ཡང་མེད་པར་ཤེས་ཚེ་སྐྱོན་དེ་བཞི་
རང་གྲོལ་བ་ཡིན། གསུམ་པ་རྗེས་སྐུ་གསུམ་རང་ཤར་ལ་སྐུ་གསུམ་རང་ཤར་ངོ་སྤྲད་པ་དངོས་
དང༌། དེའི་བོགས་འདོན་པའོ། །དང་པོ་ནི། སྔར་གྱི་ཐ་མལ་ཤེས་པ་མ་བཅོས་སོ་མ་དེ་ཉིད་
སྔོན་གདོད་མ་གསལ་སྟོང་ཟུང་འཇུག་ཏུ་རང་ཤར་བར་རང་ངོ་ཤེས་པ་ནས་སྟོང་པ་ཆོས་ཀྱི་
སྐུ། གསལ་བ་སྤྲུལ་སྐུ། ཟུང་འཇུག་ལོངས་སྐུར་ཐག་བཅད་ངེས་ཤེས་བསྐྱེད་ནས་རང་བབས་
དེ་ཀའི་ངང་དུ་བསྐྱང་བར་བྱའོ། །དེ་ལྟར་ཉམས་སུ་མྱོང་བའི་ཚེ། སེམས་སྐད་ཅིག་མ་གཅིག་
ཀྱང་སྐུ་གསུམ་དུ་ངོ་འཕྲོད། རྣམ་རྟོག་སྐད་ཅིག་མ་གཅིག་ཀྱང་སྐུ་གསུམ་གྱི་རང་བཞིན་ནོ། །
དེ་ལྟར་ཉམས་མྱོང་དུ་ཤར་བར་བྱས་ནས་རྟག་ཏུ་སྐྱོངས་དགོས་པ་ཡིན་ནོ། །གཉིས་པ་ལ།
བོགས་འདོན་དང་གེགས་སེལ་གཉིས་ལས། དང་པོ་ལ། མོས་གུས་ཚད་མེད་ལ་བརྟེན་ནས་
བོགས་འདོན་པ། སྙིང་རྗེ་ཚད་མེད་ལ་བརྟེན་ནས་བོགས་འདོན་པ། ཐབས་ཁྱད་པར་ཅན་ལ་
བརྟེན་ནས་བོགས་འདོན་པའོ། །དང་པོ་ནི། སྤྱི་རྟོགས་པ་སྐྱེས་ན་མོས་གུས་ཤུགས་འབྱུང་ལ་
20-1-279


འབྱུང༌། མ་རྟོགས་པའི་སེམས་ཅན་ལ་སྙིང་རྗེ་རང་ཤུགས་ཀྱིས་སྐྱེ་ཡང༌། དེ་ལ་སླར་ཡང་མོས་
གུས་དང་སྙིང་རྗེ་བསྒོམ་པས་མེ་འབར་བ་ལ་ཤིང་གཅེར་བ་བཞིན་དུ་ཆེར་འཕེལ་ཏེ་ལམ་གྱི་
བོགས་འདོན་བླ་ན་མེད་པར་འགྱུར་པ་ཡིན་ནོ། །དེ་ལྟར་ཡང་ཡང་ལམ་ཕྱག་རྒྱ་ཆེན་པོ་བསྒོམ་
བཞིན་དུ་མོས་གུས་དང་སྙིང་རྗེ་དྲག་ཏུ་བསྒོམས་པས་མཐར་ཐུག་རྟོགས་པའི་ཐབས་སུ་
འགྱུར་རོ། །དེ་ཡང་མོས་གུས་ནི་སྤྱིར་རྩ་བའི་བླ་མ་དེ་ཉིད་སངས་རྒྱས་དངོས་ཡིན་པ་དང༌།
ཐུགས་ཆོས་ཀྱི་སྐུ་མཛད་སྤྱོད་འཕྲིན་ལས་ཐམས་ཅད་གཞན་དོན་གཟུགས་སྐུ་རྣམ་གཉིས་
སངས་རྒྱས་བྱང་སེམས་ཡི་དམ་མཁའ་འགྲོ་ཆོས་སྐྱོང་ཐམས་ཅད་འདུས་པའི་ངོ་བོ་ཡིན་པར་
ཐག་གཅོད། བདག་གནས་ལུགས་ལ་དཀྲི་བར་མཛད་པས་བཀའ་དྲིན་ཆེ། བཀའ་དྲིན་ལ་
ནམ་ཡང་འཁོར་བ་མེད་སྙམ་པ་མོས་གུས་ཀྱི་གདུང་ཤུགས་དྲག་པོས་གསོལ་བ་རྩེ་གཅིག་ཏུ་
འདེབས། བླ་མའི་མོས་གུས་ཀྱིས་ཡིད་བསྒྱུར་བས་རང་བཞིན་སྤྲོས་བྲལ་གྱི་ཡེ་ཤེས་ལྷག་
གེར་ཤར་བ་ན། དེ་ཁའི་ངང་དུ་མཉམ་པར་བཞག །གཉིས་པ་ནི། སེམས་ཅན་ཐམས་ཅད་
དྲིན་ཅན་གྱི་ཕ་མ་ཡིན་པར་རང་སེམས་ངོ་མ་ཤེས་པས་ཉོན་མོངས་དང་ལས་བསགས་ཏེ་
འཁོར་བར་འཁྱམས་པ་འདི་ཅིས་ཀྱང་སྙིང་རེ་རྗེ་ཞེས་ཡིད་ལ་བསམ་ཞིང་ངག་ཏུ་ཡང་བརྗོད།
མཐར་སྙིང་རྗེ་བྱ་ཡུལ་སྙིང་རྗེ་བྱེད་མཁན་ཐམས་ཅད་ངོས་བཟུང་དང་བྲལ་བའི་ངང་དེར་ཆམ་
མེར་བཞག །གསུམ་པ་ལ་གསུམ་ལས། དང་པོ་ནི། ཐ་མལ་ཤེས་པ་རླུང་དང་བསྲེ། །རྣམ་
རྟོག་མ་རིག་འགག་པར་འགྱུར། །ཞེས་པའི་དོན་ནི། སེམས་མ་བཅོས་པར་ཕྱག་རྒྱ་ཆེན་པོའི་
ངང་ལ་མཉམ་པར་འཇོག་ཅིང༌། རླུང་བུམ་པ་ཅན་དྲག་ཏུ་བཟུང་ནས་རླུང་སེམས་འཇུག་པ་
གཅིག་པའི་ཕྱིར། རྟོགས་པ་གོང་ནས་གོང་དུ་འཕེལ་བར་འགྱུར། གཉིས་པ་ནི། འོད་གསལ་
ལྷ་སྐུ་རླུང་དང་བསྲེ། །ཉམས་མྱོང་ཡར་ངོ་བཞིན་དུ་འགྱུར། །ཞེས་གསུངས་ཏེ། རང་ཉིད་བདེ་
མཆོག་ལྷན་སྐྱེས་ཆུ་ནང་གི་ཟླ་གཟུགས་ལྟར་སྣང་ལ་རང་བཞིན་མེད་པར་བསྒོམ། ལྷ་སྐུར་
20-1-280


སྣང་བ་མ་འགག་པ་དེ་ཀ་མ་བཅོས་སོ་མ། འོད་གསལ་ཕྱག་རྒྱ་ཆེན་པོས་ཟིན་པར་བྱས་ལ་
རླུང་དྲག་ཏུ་གཅུན་པས་ཕྱག་ཆེན་ལ་ལྷ་སྐུས་བོགས་ཐོན་ཏེ། ཉམས་མྱོང་གོང་འཕེལ་དུ་འགྱུར་
རོ། །གསུམ་པ་ནི། ཟུང་འཇུག་ཤེས་པ་རླུང་དང་བསྲེ། །འབྲས་བུས་སྐུ་གསུམ་མངོན་དུ་
འགྱུར། །ཞེས་གསུངས་ཏེ། རང་ལྷ་སྐུ་གསལ་སྟོང་དུ་བསྒོམ། གཞན་ལུས་ཤེས་རབ་མའམ།
རང་ལུས་ཐབས་ལྡན་ལྟར་ན་གཏུམ་མོ་དང་འོད་གསལ་གྱི་ཉམས་མྱོང་གིས་ལྷ་སྐུ་ལ་རྒྱས་
བཏབ་སྟེ། དེ་ཉིད་ཕྱག་ཆེན་གྱིས་ཟིན་པར་བྱས་ལ་གཞུར་ཏེ་བསྒོམ། ངག་རླུང་བུམ་པ་ཅན་
དྲག་ཏུ་བཟུང༌། ལྷ་སྐུ་གསལ་བ་སྤྲུལ་སྐུ། ཕྱག་ཆེན་མི་རྟོག་པ་ཆོས་སྐུ། བདེ་བ་ལོངས་སྐུ། དེ་
གསུམ་ཀའི་གྲོགས་རླུང་གིས་བྱས་ཏེ། ལམ་དུས་ཀྱི་སྐུ་གསུམ་ཉམས་སུ་བླངས་པས་གཞི་
དུས་ཀྱི་སེམས་ཀྱི་རང་བཞིན་འབྲས་བུའི་ཚུལ་དུ་མངོན་དུ་འགྱུར་རོ། །ཇི་སྲིད་དུ་རྩ་བྲལ་
མངོན་དུ་མ་གྱུར་བ་དེ་སྲིད་འབད་རྩོལ་ཆེན་པོའི་འདུ་འཛི་སྤངས་ནས་དབེན་པར་བསྒོམ་པ་
གལ་ཆེའོ། །གཉིས་པ་གེགས་སེལ་ནི། རྩ་ལོག་རླུང་ལོག་སོགས་གེགས་སེལ་ཏེ་ཆོས་དྲུག་
སོགས་ཐབས་ལམ་གྱི་ཡན་ལག་ཡིན་པས་ཐུན་མོང་བར་སོང་སྟེ་འདིར་མི་འཆད། འདིར་
ཐུན་མོང་མ་ཡིན་པའི་གེགས་བསལ་བ་ནི། ཉམས་ཀྱི་རྩིས་མ་བཅིངས་པ་དང༌། སྣང་སྟོང་
ཕྱོགས་རེར་མ་ཤོར་བ་ལ་འབད་པ་སྟེ། དེ་ཡང་བདེ་གསལ་མི་རྟོག་པ་གསུམ་ལ་ཞེན་ན་གོལ་
བས། ལུས་སེམས་དགའ་བདེ་ཅི་སྐྱེས་དང༌། རིག་པ་ལ་དྭངས་ཆ་དང་གསལ་ཆ་ཅི་བྱུང་དང༌།
སྟོང་སང་སང་པོའི་མི་རྟོག་པའི་ཉམས་ཅི་ཤར་ལ་དགའ་ཞེན་མེད་པར་བསྐྱུར། ཉམས་མཐུག་
དྲགས་པ་བཤིག་མི་ཐུབ་པ་འདྲ་བ་བྱུང་ན་མི་སྒོམ་པར་སྣང་བའི་སྟེང་དུ་གང་དགར་བསྐྱུར་ལ་
འཇོག །བདེ་གསལ་སྟོང་པར་ཞིག་པ་ན་གནས་ལུགས་རྗེན་གྱིས་འཆར། སེམས་ཀྱིས་སྣང་
ཆ་དང་གསལ་ཆ་དང་འཆར་སྒོ་ལ་བདེན་ཞེན་སྐྱེ། ཆགས་སྡང་འཛིན་ཞེན་རགས་སུ་སོང་བའི་
ཉམས་བྱེད་ན། སྒྱུ་མ་ལྟ་བུར་མོས་ཤིང་བཙལ་བའི་མི་རྙེད་པ་ལ་འཇོག ། དེས་དེ་སྟོང་པར་
20-1-281


འཆར། རང་སེམས་ཀྱི་ངོ་བོ་ལའང་ཁྱད་མི་འདུག་པས་ལས་འབྲས་སྤང་བླང་མི་དགོས་སོ་
སྙམ་པའི་ལོག་ལྟ་སྐྱེས་ན། ལས་འབྲས་བདེན་པར་མེད་ཀྱང་ཀུན་རྫོབ་རྒྱུ་འབྲས་བསླུ་བ་
མེད། མེ་མི་བདེན་ཀྱང་ཤིང་ཚིག །ཆུ་མི་བདེན་ཀྱང་གཤེར་བ་མི་འགག་པ་ལྟར་ལས་འབྲས་
ལ་ཡིད་ཆེས་བསྐྱེད་དགོས་སོ། །དེ་ལྟར་ཉམས་སུ་བླང༌། དེ་ལ་སེམས་གསལ་སྟོང་འཛིན་
མེད་དུ་གནས་ན་ཞི་གནས་ཡིན་ཏེ། བྱིང་རྒོད་གཉིས་སེལ་བ་ཞིག་དགོས། སྣང་བ་ཐམས་
ཅད་སེམས། གནས་འགྱུ་ཐམས་ཅད་ངོས་བཟུང་མེད་པར་མྱོང་ཐོག་ཏུ་ཕེབས་ན་ལྷག་མཐོང་
སྐྱེས་པ་ཡིན་ནོ། །གང་ཤར་ལ་རང་ངོ་ཤེས་པས་བཟོ་བཅོས་མེད་པར་སྐྱོང་ཐུབ་ན་ཕྱག་ཆེན་
དངོས་གཞིའི་རྟོགས་པ་སྐྱེས་པ་ཡིན་ནོ། །སེམས་ལ་ཅི་བསམ་སྣང་བ་ལ་ཅི་ཤར་ཐམས་ཅད་
དྲན་པ་དང་རྩོལ་བ་བརྟེན་མི་དགོས་པ་ཐམས་ཅད་རང་ངོ་ཤེས་པའི་གསལ་སྟོང་རྒྱ་འབྱམས་
སུ་སོང་བའི་ཚེ། རྩ་བྲལ་ཞེས་བྱ་བ་རྗེས་ཀྱི་ཉམས་མྱོང་མཐར་ཕྱིན་པ་ཡིན་ནོ།། །།ཞེས་པ་འདིའང་
ཏཱ་ར་ནཱ་ཐས་ཤར་ཀོང་པོའི་ཡུལ་གྱི་བཤེས་གཉེན་མཁྱེན་རབ་ཅེས་བྱ་བའི་དོན་དུ་ཉེ་བར་གདམས་པའོ། །མངྒ་ལཾ། བཀྲ་ཤིས།
ཛམ་སྨོན་ཡོད།
20-1-282


༄༅། །ཕྱག་རྒྱ་ཆེན་པོ་རང་བབས་རྣམ་གསུམ་གྱི་དོགས་པ་
གཅོད་པའི་ལན་ཞེས་བྱ་བ་བཞུགས།
༄༅། །ཁྲིད་འཇུག་ཏུ། ཕྱག་རྒྱ་ཆེན་པོ་རང་བབས་རྣམ་གསུམ་འདི་ལ་རྗེས་ཀྱི་སྐབས།
སྔགས་ཐུན་མོང་མ་ཡིན་པའི་ཉམས་མྱོང་དང་འདྲེས་ནས་ཉམས་མྱོང་ཚད་དུ་ཕྱིན་པ་ཕན་ཆད་
ནས། སྔགས་ཀྱི་ཐུན་མོང་མ་ཡིན་པའི་ཕྱག་ཆེན་དུ་འགྲོ་བ་ཡིན་གྱི་དེ་ཕྱིན་ཆད་མདོ་དང་ཐུན་
མོང་མ་ཡིན་པ་ཡིན་ནོ། །འདི་ལྟ་བུའི་ཕྱག་རྒྱ་ཆེན་པོ་འདི་ལ་འགྲོ་མགོན་ཞང་འཚལ་པས་
ཀྱང་ས་ལམ་ཚིག་ཆོད་ཡིན་པར་བཞེད་དེ། ཕྱག་རྒྱ་ཆེན་པོ་ཚིག་ཆོད་ལ། །ས་ལམ་བརྩི་པའི་
རྨོངས་པ་འཁྲུལ་ཞེས་སོགས་གསུངས། འདིར་ནི་སྔོན་རང་བབས་རྣམ་གསུམ་ཚད་དུ་ཕྱིན་ན་
ཚོགས་ལམ་ཆེར་པོར་འགྱུར། དངོས་གཞི་སྐྱོན་བཞི་རང་གྲོལ་ཚད་དུ་ཕྱིན་ན། སྦྱོར་ལམ་དྲོད་
ཀྱི་རྟོགས་པ་སྐྱེ། རྗེས་སྐུ་གསུམ་རང་ཤར་ཚད་དུ་ཕྱིན་ན་སྦྱོར་ལམ་བཟོད་པར་སླེབས། འབྲས་
བུ་ཚད་དུ་ཕྱིན་ན་མདོ་ཕྱོགས་ཀྱི་ས་དང་པོ་དང་སྔགས་ཕྱོགས་ཀྱི་ཟུང་འཇུག་འགྲུབ་པ་ཞེས་
བྱ་བ་ཡིན་ནོ། །ཕྱག་ཆེན་རང་ངོས་ཀྱི་ལྟ་སྒོམ་གཉིས་ཀྱི་སོ་སོའི་ཉམས་མྱོང་ཤར་ཡང་སྤྱོད་པ་
བསོད་ནམས་ཀྱི་ཚོགས་མ་རྫོགས་ན་ལམ་དེ་རྗེས་མཐུན་པ་ཡིན་གྱི་དངོས་མ་ཡིན། དཔེར་ན་
མགྲོན་པོ་སྔ་ཕྱི་འབོད་དུ་མི་རུང་བ་སྟབས་གཅིག་ཁོ་ནར་འགྲོ་དགོས་པ་ཡིན་པ་ལ། གཅིག་
གིས་གྲབས་མ་ཟིན་ན་གཅིག་ཤོས་རྒྱ་གྲབ་ཐམས་ཅད་གྲུབ་ཀྱང༌། དེ་སྒུག་པའི་ཡུན་རིང་དུ་
སྡོད་དགོས་པ་བཞིན་དུ་སྔོན་འགྲོའི་ཚང་མ་བཅོས་ཐ་མལ་གྱི་ཤེས་པ་རང་ཤར། གཡེང་སྐྱེན་
གྱིས་མི་གནོད་པའི་བརྟན་པ་ཐོབ་པ་ཡོད་ཀྱང་ལྟ་སྒོམ་དེ་ཁ་དང་མཉམ་པའི་བསོད་ནམས་གྱི་
ཚོགས་མ་རྫོགས་ན་ཚོགས་ལམ་ཆུང་འབྲིང་གི་ཡོན་ཏན་ཙམ་འབྱུང་སྲིད་ཅིང༌། ཆེན་པོའི་ཡོན་
20-1-283


ཏན་རྫུ་འཕྲུལ་གྱི་རྐང་བཞི་ཐོབ་པ་སོགས་མི་འབྱུང༌། དེ་གཉིས་ཟུང་འཇུག་ཏུ་ཡོད་ན་ཡོན་
ཏན་དེ་ཡང་འབྱུང༌། དེ་ལ་སྔོན་འགྲོ་ནི་ཐེག་པ་ཆེན་པོའི་ཞི་གནས་གཙོ་ཆེ་བ་ཡིན་ལ། དངོས་
གཞིའི་སྐབས་སྣང་སེམས་ཡིད་ལ་མི་བྱེད་པ་རང་ནི་གཟུང་བ་རང་བཞིན་མེད་པ་ལ་གསལ་
སྣང་ཆུང་ངུ་སྐྱེས་པ་ཡིན་པས་དེ་ལ་བརྟན་པ་ཐོབ་ནས་ཐུན་ཐུན་མཚམས་སྒོམས་འཁོར་ཡུག་
ཏུ་སོང་བ་ནི་ཆོས་ཀྱི་སྣང་བ་འཕེལ་བའི་ཕྱིར་སྦྱོར་ལམ་རྩེ་མོ་ཡིན་ནོ། །རྗེས་ཉམས་མྱོང་རང་
ཤར་ནི་གཟུང་བ་རང་བཞིན་མེད་པ་མཐོང་ཞིང་དེ་ལྟར་མ་རྟོགས་པའི་སེམས་ཅན་ལ་སྙིང་
རྗེ་ཞུགས་པ་ཡིན་པས་སྦྱོར་ལམ་བཟོད་པ་ཡིན་ལ། དེ་ལ་བརྟན་པ་ཐོབ་ཅིང་མི་གཡོ་བ་ནི་
འཛིན་པ་སེམས་ཀྱི་རྣམ་རྟོག་མངོན་གྱུར་པ་ཡང་འགགས་པའི་རྒྱུ་མཚན་གྱི་ཡིན་པས་སྦྱོར་
ལམ་ཆོས་མཆོག་གོ །འབྲས་བུའི་རྟོགས་པ་སྐྱེས་པའི་བློ་འདས་ཟུང་འཇུག་རང་ཤར་ཞེས་བྱ་
བ་ནི་སྒྲ་དང་རྣམ་རྟོག་གི་ཡུལ་ལས་འདས་ཤིང་གནས་ལུགས་ཟུང་འཇུག་དེ་ཉིད་མངོན་སུམ་
དུ་ཤར་བའི་ཚུལ་གྱིས་རྟོགས་པ་དེ་མཐོང་ལམ་ཐོབ་པ་ཕན་ཆད་འཕགས་པའི་ས་ཐམས་ཅད་
དུ་ཡོད་ལ་བརྟན་པའི་ཚད་འཕྲིན་ལས་ཕྱོགས་མེད་རང་ཤར་ནི་ས་བརྒྱད་པ་ཡན་ཆད་དག་
པའི་ས་གསུམ་ཡིན་པ་ཤེས་པར་བྱའོ། །དེ་ལྟར་དོགས་པ་གཅོད་པའི་ལན་རྗེ་བཙུན་ཏཱ་ར་ནཱ་
ཐས་གསུངས་པ་ཡིན་ནོ།། །།མངྒ་ལཾ།
20-1-284


༄༅། །ཡེ་ཤེས་མཁའ་འགྲོ་ནཻ་གུའི་དབང་བཀའ་ཆེ་ཆུང་རྣམས་ཀྱི་
སྔོན་དུ་འགྲོ་བའི་ཆོས་བཅུ་དང་ལྔར་དབྱེ་བའི་
ཁྱད་པར་བཞུགས།
༄༅། །ན་མོ་གུ་རུ། ཡེ་ཤེས་མཁའ་འགྲོ་ནཻ་གུ་མ་ནས་བརྒྱུད་པའི་དབང་བཀའ་ཆེ་ཆུང་རྣམས་ལ་ཉེ་བར་མཁོ་བའི་
སྔོན་འགྲོ་རྣམ་པ་བཅུ་དང༌། ལྔའི་དབྱེ་བ་བཤད་པར་བྱ་སྟེ། དེ་ལ་སྔོན་འགྲོ་བཅུ་ནི་བསམ་པ་འཆོས་པ་དང༌། སྐྱབས་འགྲོ་སེམས་
བསྐྱེད་དང༌། སྤྲོ་བ་བསྐྱེད་ནས། དེ་རྗེས་གསོལ་བ་བཏབ་པ། གནང་པ་སྦྱིན་པ་དང༌། ཉན་པར་གདམས་པ་དང༌། ཡན་ལག་ལྔ་
པ་བྱ་ཞིང༌། སྡོམ་པ་བཟུང་བ། གསང་བ་བསྒྲགས་ཏེ་ཡེ་ཤེས་དབབ་པའོ། །འདི་ལ་བསམ་པ་འཆོས་པ་ཡན་ལག་ཏུ་བཏང་ནས།
སྐྱབས་འགྲོ་སེམས་བསྐྱེད་སོ་སོར་བགྲང་བས་བཅུར་བྱེད་པའི་སྐབས་ཀྱང་ཡོད་མོད་དོན་གཅིག་གོ །ཡིག་རྙིང་འགའ་ཞིག་ན། སྤྲོ་
བ་བསྐྱེད་པ་མེད་པར། གཟེང་བསྟོད་དང༌། གསང་བ་བསྒྲགས་པ་སོ་སོར་བྱེད་པའང་ཡོད་དོ། །འདིར་འགྲོ་མགོན་སངས་རྒྱས་
སྟོན་པའི་ཡི་གེ་ལྟར་བྱས་ཏེ། དེ་ལ་དང་པོ་བསམ་པ་འཆོས་པ་ནི།
ད་རེས་རང་རེ་རྣམས་ཀྱི་རྙེད་པར་དཀའ་བའི་དལ་འབྱོར་ཀྱི་མི་ལུས་རིན་པོ་ཆེ་ཐོབ།
མཇལ་བར་དཀའ་བའི་སངས་རྒྱས་ཀྱི་བསྟན་པ་རིན་པོ་ཆེ་སྤྱི་དང་དགོས་སུ་སྔགས་ཀྱི་ཐེག་
པ་ཟབ་མོ་དང་མཇལ་བའི་སྐབས་འདིར་ཆོས་ལ་འབད་ན་བླ་ན་མེད་པའི་སངས་རྒྱས་ཀྱང་
བསྒྲུབ་པར་དཀའ་བ་མིན་ན། འཇིག་རྟེན་དང་འཇིག་རྟེན་ལས་འདས་པའི་ཕུན་ཚོགས་
གཞན་རྣམས་ལྟ་སྨོས་ཀྱང་ཅི་དགོས། འོན་ཀྱང་ད་རེས་ཆོས་ལ་མ་འབད་ན། ཕྱིས་མི་ལུས་
ཐོབ་པ་ཙམ་ཡང་རྙེད་དཀའ། མི་ལུས་མ་ཐོབ་ན་ཆོས་བྱེད་པའི་སྐལ་བ་མེད། ཆོས་མ་བྱས་
ན་འཁོར་བའི་སྡུག་བསྔལ་ལས་གྲོལ་བ་མི་སྲིད། མི་ལུས་ལན་གཅིག་ཐོབ་པས་ཕན་པ་ཡང་
20-1-285


མིན་གྱིས། ངེས་པར་འཆི། མྱུར་དུ་འཆི། ནམ་འཆི་ཆ་མེད་འཆི་བ་ལ་ཅིས་ཀྱང་མི་ཕན། ཤི་
ནས་ཁུངས་མེད་དུ་སོང་ན་ཏ་ཁོ་རང་ཤེས་ཏེ། ད་ལྟའི་དགྲ་གཉེན་ལོངས་སྤྱོད་ཚེ་འདིའི་སྣང་
བ་ཀུན་དང་བྲལ་ཡང་སེམས་ཁུངས་མེད་དུ་མི་འགྲོ། སྔར་བྱས་ཀྱི་སྡིག་པ་རྣམས་ཚེ་འདིའི་
ལོངས་སྤྱོད་བཞིན་ཤུལ་ཏུ་སྤངས་པ་མི་འདོད། ལས་ཀྱི་དབང་གིས་རིགས་དྲུག་གང་རུང་དུ་
སྐྱེ་བ་ལས་འོས་མེད། གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ཁོ་ན་ཡིན༌། སྡུག་བསྔལ་
དེ་ཡང་ཟད་མི་ཤེས་ཤིང་ཐར་བར་དཀའ་བ་རྒྱ་མཚོ་དང་མཚུངས་པ་བཞིན་འདུག་པ་ལས།
ངེས་པར་ཐར་དགོས་པར་འདུག །རང་གཅིག་པུ་ཐར་བས་མི་ཕན་གྱིས་སེམས་ཅན་ཐམས་
ཅད་ཐར་དགོས་པ་འདུག་སྙམ་པའི་འདུན་པ་མཛོད། །ཅེས་བརྗོད།
གཉིས་པ་སྐྱབས་འགྲོ་དང་སེམས་བསྐྱེད་གཉིས་ཀྱི་སྐྱབས་འགྲོ་ནི། ཕྱོགས་བཅུ་ན་བཞུགས་པའི་སངས་
རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་
བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་ནས།
ཇི་སྲིད་སྙིང་པོར་བྱང་ཆུབ་ལ་མཆིས་ཀྱི་བར་དུ། རྐང་གཉིས་རྣམས་ཀྱི་མཆོག་སངས་རྒྱས་
བཅོམ་ལྡན་འདས་རྣམས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག
ཞི་བ་མྱ་ངན་ལས་འདས་པའི་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་བྱང་ཆུབ་
སེམས་དཔའ་ཕྱིར་མི་ལྡོག་པའི་འཕགས་པའི་དགེ་འདུན་རྣམས་ལ་སྐྱབས་སུ་མཆིའོ། །ཞེས་
ལན་གསུམ།
གཉིས་པ་སེམས་བསྐྱེད་ལ་གཉིས་ཀྱི། སྨོན་པ་སེམས་བསྐྱེད་ནི། ཕྱོགས་བཅུ་ན་བཞུགས་པའི་སངས་རྒྱས་
དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་
དགོངས་སུ་གསོལ། བདག་མིང་འདི་ཞེས་བགྱི་བའི་ཚེ་རབས་ཐོག་མ་མེད་པ་ནས་ད་ལྟ་ལ་
ཐུག་གི་བར་དུ་སྦྱིན་པའི་རང་བཞིན་དང༌། ཚུལ་ཁྲིམས་ཀྱི་རང་བཞིན་དང༌། སྒོམ་པའི་རང་
20-1-286


བཞིན་གྱི་དགེ་བའི་རྩ་བ་དེས། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱ་བཅོམ་ལྡན་འདས་རྣམས་དང༌། ས་ཆེན་པོ་ལ་རབ་ཏུ་བཞུགས་
པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཇི་ལྟར་ཐུགས་རིན་པོ་ཆེ་སྐྱེད་
པར་མཛད་པ་དེ་བཞིན་དུ། བདག་མིང་འདི་ཞེས་བགྱི་བས་ཀྱང་དུས་འདི་ནས་བཟུང་ནས།
སྙིང་པོ་བྱང་ཆུབ་ལ་མཆིས་ཀྱི་བར་དུ་བྱང་ཆུབ་ཀྱི་མཆོག་ཏུ་སེམས་བསྐྱེད་པར་བགྱིད་དོ། །
སེམས་ཅན་མ་སྒྲལ་བ་རྣམས་བསྒྲལ་བར་བགྱིའོ། །མ་གྲོལ་པ་རྣམས་དགྲོལ་བར་བགྱིའོ། །
དབུགས་མ་དབྱུངས་བ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་
འདས་པ་རྣམས་ཡོངས་སུ་མྱ་ངན་ལས་འདའ་བར་བགྱིའོ། །ཞེས་ལན་གསུམ།
གཉིས་པ་འཇུག་པ་སེམས་བསྐྱེད་ནི། དགོངས་གསོལ་གོང་བཞིན། བདག་མིང་འདི་ཞེས་བགྱི་བས་དུས་
འདི་ནས་བཟུང་ནས་ཇི་སྲིད་སྙིང་པོ་བྱང་ཆུབ་ལ་མཆིས་ཀྱི་བར་དུ་སྦྱིན་པའི་ཕ་རོལ་ཏུ་ཕྱིན་
པ་ལ་མཐར་གྱིས་བསླབས་པ་དང༌། མཐར་གྱིས་སྦྱངས་པ་དང༌། མཐར་གྱིས་བསྒྲུབས་པར་
བགྱིའོ། །དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང༌། བཟོད་པའི་ཕ་རོལ་ཏུ་ཕྱིན་པ་
དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་རྣམས་ལ་
མཐར་གྱིས་བསླབས་པ་དང༌། མཐར་གྱི་སྦྱངས་པ་དང༌། མཐར་གྱིས་བསྒྲུབ་པར་བགྱིའོ། །
གསུམ་པ་སྤྲོ་བ་བསྐྱེད་པ་ནི། སྔགས་ཀྱི་དངོས་གྲུབ་དོན་གཉེར་གང༌། །དཀྱིལ་འཁོར་འདིར་
ནི་གཞུག་པར་བྱ། །བསོད་ནམས་འདོད་པས་དེ་ལས་གཞན། །གཞན་ནི་འཇིག་རྟེན་ཕ་རོལ་
གཉེར། །དད་པ་ཆེན་པོ་ལྡན་པ་དག །འཇིག་རྟེན་ཕ་རོལ་ལ་དམིགས་ན། །དཀྱིལ་འཁོར་
དམ་པ་གཞུག་བྱ་སྟེ། །ཚེ་འདིའི་འབྲས་བུ་གཉེར་མི་བྱ། །བདག་དོན་ཚེ་འདིར་གཉེར་བྱེད་ན། །
གཞན་དོན་སངས་རྒྱས་ག་ལ་བྱུང༌། །འཇིག་རྟེན་ཕ་རོལ་ལ་དམིགས་ན། །འབད་པ་མེད་
པར་འདི་འབྲས་འགྲུབ། །
20-1-287


བཞི་པ་མཎྜལ་འབུལ་ཞིང་གསོལ་བ་གདབ་པ་ནི། ཐོག་མར་སློབ་མས་མཎྜལ་ཕུལ་ཏེ། ཚིགས་ལྷུག་པ་རྒྱས་བསྡུས་གང་
ཡང་རུང་བ་ཞིག་གིས་མཎྜལ་ཕུལ་བའི་རྗེས་ལ། བཀོད་པ་ཤིན་ཏུ་ལེགས་པའི་མཎྜལ་མཆོག །ཞེས་སོགས་
བརྗོད། གསོལ་བ་གདབ་པ་ནི། དགའ་ཆེན་ཁྱོད་བདག་སྟོན་པ་སྟེ། །སློབ་དཔོན་ཁྱོད་ནི་དགོངས་
སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་
ཚིག་དེ་ཉིད་བདག་ལ་སྩོལ། །སྡོམ་པ་རྣམས་ཀྱང་བདག་ལ་སྩོལ། །སངས་རྒྱས་ཆོས་དང་
དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །
མགོན་པོས་བདག་ནི་འཇུག་པར་འཚལ། །ཞེས་ལན་གསུམ།
ལྔ་པ་གནང་བ་སྦྱིན་པ་ནི། བུ་ཚུར་ཐེག་པ་ཆེན་པོ་ཡི། ཁྱོད་ནི་ཚུལ་ཆེན་སྣོད་ཡིན་ཏེ། །གསང་
སྔགས་སྤྱོད་ཚུལ་ཆོ་ག་འདི། ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་
གང་འདས་དང༌། །དེ་བཞིན་གང་དག་མ་བྱོན་དང༌། །ད་ལྟར་བྱུང་བའི་རྫོགས་སངས་རྒྱས། །
འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་
འདི་མཁྱེན་ནས། །དཔའ་བོ་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །
གསང་སྔགས་སྦྱོར་བ་མཉམ་མེད་དེས། །ཡེ་ཤེས་མཉམ་མེད་ཐོབ་པས་ན། །སྐྱོབ་པ་སངས་
རྒྱས་ཧེ་རུ་ཀས། །བདུད་ནི་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་
བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་བརྗོད་ལ་དོན་བཤད་དོ། །
དྲུག་པ་རྟོག་པ་བསྡུ་བ་ནི། རྟོག་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་
བཟང་པོའི་སེམས་ཀྱིས་ཉོན། །བརྗེད་ངེས་བློ་ལ་ཧེ་རུ་ཀ་སོགས་དང༌། །བདེ་བར་གཤེགས་
པ་རྣམས་ཀྱིས་བྱིན་མི་རློབས།།ཞེས་བརྗོད་ལ་དོན་བཤད་དོ། །
བདུན་པ་ཡན་ལག་ལྔ་པ་བྱ་བ་ནི། བདག་གི་སྡིག་པ་བགྱིས་པ་དང༌། །བགྱིད་རྩལ་རྗེས་སུ་ཡི་
རང་གང༌། །སངས་རྒྱས་སྤྱན་སྔར་མཆིས་ནས་སུ། །དེ་དག་བདག་གིས་བཤགས་པར་བགྱི། །
20-1-288


སངས་རྒྱས་བྱང་ཆུབ་སེམས་དཔའ་དང༌། །རང་རྒྱལ་དགྲ་བཅོམ་འགྲོ་རྣམས་ཀྱིས། །སྒོམ་
དང་བཟླས་བརྗོད་བསོད་ནམས་ཀྱི། །ཚོགས་ལ་བདག་ནི་ཡི་རང་ངོ་། །སེམས་བསྐྱེད་མངོན་
པར་སངས་རྒྱས་ནས། །ཆོས་ཀྱི་འཁོར་ལོ་བསྐོར་བ་དང༌། །བྱང་ཆུབ་སེམས་དཔའི་ཚོགས་ཀྱི་
མཆོག །དེ་ལ་བདག་ནི་སྐྱབས་སུ་མཆི། །སངས་རྒྱས་འབྱུང་བ་ཇི་ལྟར་བར། །སྐལ་ལྡན་བྱང་
ཆུབ་སེམས་དཔའ་ཡིས། །བྱང་ཆུབ་ཏུ་ནི་སེམས་བསྐྱེད་ལྟར། །དེ་བཞིན་བདག་ནི་སེམས་
བསྐྱེད་དོ། །བདག་གི་དགེ་བའི་ལས་རྣམས་འདི་དག་གིས། །འཇིག་རྟེན་འདིར་ནི་མྱུར་དུ་
སངས་རྒྱས་ཤོག །འགྲོ་ལ་ཕན་ཕྱིར་ཆོས་ནི་སྟོན་བགྱིད་ཅིང༌། །སེམས་ཅན་སྡུག་བསྔལ་མང་
པོ་གཟིར་ལས་སྒྲོལ། །ཞེས་ལན་གསུམ།
བརྒྱད་པ་སྡོམ་པ་འབོགས་པ་ནི། སངས་རྒྱས་བྱང་ཆུབ་སེམས་དཔའ་རྣམས། །ཇི་ཙམ་དུས་
ནས་བཟུང་ནས་སུ། །མ་ལུས་བདག་ལ་དགོངས་སུ་གསོལ། །བདག་མིང་འདི་ཞེས་བགྱི་བ་
ཡིས། །དུས་འདི་ཉིད་ནས་བཟུང་ནས་སུ། །ཇི་སྲིད་བྱང་ཆུབ་སྙིང་པོ་ལ། །ཡོངས་སུ་གནས་
པའི་བར་དག་ཏུ། །བདག་གིས་བྱང་ཆུབ་མཆོག་གི་སེམས། །མ་ལུས་པར་ནི་སྐྱེད་པར་བགྱི། །
སངས་རྒྱས་རྣལ་འབྱོར་སྡོམ་པ་ལ། །ཚུལ་ཁྲིམས་ཀྱི་ནི་བསླབ་པ་དང༌། །དགེ་བའི་ཆོས་ནི་
སྡུད་པ་དང༌། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་
བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །
དེང་ནས་བརྩམས་ཏེ་བཟུང་བར་བགྱི། ནམ་དུ་ཡང་ནི་མི་སྤང་ངོ་། །རྡོ་རྗེ་རིགས་མཆོག་ཆེན་
པོ་ལ། །རྡོ་རྗེ་དྲིལ་བུ་ཕྱག་རྒྱ་ཡང༌། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་
ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡིས། །དམ་ཚིག་ཡིད་དུ་འོང་བ་ལ། །
ཉིན་རེ་བཞིན་ཡང་དུས་དྲུག་ཏུ། །སྤྱིན་པ་རྣམ་བཞི་རྟག་ཏུ་སྤྱིན། །བྱང་ཆུབ་ཆེན་པོ་ལས་བྱུང་
བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་
20-1-289


མ་ལུས་བཟུང༌། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་
དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་
མེད། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་
གིས་སྡོམ་པ་མ་ལུས་བཟུང༌། །མ་གྲོལ་བ་ནི་དགྲོལ་བར་བགྱི། །མ་བསྒྲལ་བ་ནི་བསྒྲལ་བར་
བགྱི། །དབུགས་མ་ཕྱིན་པ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་འགོད། །ཅེས་
བརྗོད།
དགུ་པ་གཟེངས་བསྟོད་ཅིང་གསང་བ་བསྒྲགས་པ་སོགས་ནི། འཇིག་རྟེན་དུ་ནི་ཀུན་མཁྱེན་རྣམས། །ཨུ་
དམ་ཝ་རིའི་མེ་ཏོག་བཞིན། །བརྒྱ་ལམ་ན་ནི་རེ་འགའ་ཞིག །འབྱུང་འགྱུར་ཡང་ནི་མི་འབྱུང་
སྲིད། །གསང་སྔགས་སྤྱོད་ཚུལ་ཆོ་ག་ནི། །དེ་བས་ཀྱང་ནི་དཀོན་པ་སྟེ། །གཉིས་མེད་ཟབ་
མོའི་སྤྱོད་ཡུལ་འདིས། །སེམས་ཅན་ཐམས་ཅད་སངས་རྒྱས་བྱེད། །གང་གིས་བསྐལ་པ་བྱེ་བ་
རུ། །སྡིག་པའི་ལས་རྣམས་བྱས་པ་ཡང༌། །ཟབ་མོའི་དཀྱིལ་འཁོར་འདི་མཐོང་བས། །དེ་དག་
ཐམས་ཅད་བྱང་གྱུར་ནས། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་
ཅི་དགོས༌། །གང་གི་བསྐལ་བ་དཔག་མེད་དུ། །བསོད་ནམས་ཡེ་ཤེས་ཚོགས་བསགས་ཀྱང༌། །
འདི་ནི་རྙེད་པ་ཤིན་ཏུ་དཀའ། །དེ་བས་འདི་ལ་དགའ་བར་གྱིས། །ཞེས་བརྗོད།
དེ་ནས་གསང་བ་བསྒྲགས་པ་ནི། སློབ་མའི་གནས་གསུམ་དུ་དྲི་བཟང་གིས་ཐིག་ལེ་བྱས། དཔྲལ་བར་ༀ།
མགྲིན་པར་ཨཱཿསྙིང་གར་ཧཱུཾ། དེ་རྣམས་ཀྱི་འོད་ཀྱིས་ལུས་གང་བས། ལུས་ངག་ཡིད་གསུམ་གྱི་
དྲི་མ་དག་པར་གྱུར། སྙིང་གར་ཀུན་རྫོབ་བྱང་ཆུབ་སེམས་ཀྱི་ངོ་བོ། ཟླ་བའི་དཀྱིལ་འཁོར་གྱི་
སྟེང་དུ། དོན་དམ་བྱང་ཆུབ་སེམས་ཀྱི་ངོ་བོ་རྡོ་རྗེ་དཀར་པོ་རྩེ་ལྔ་པ། ༀ་སརྦ་ཡོ་ག་ཙིཏྟ་ཨུ་པ་
ཏ་ཡ་མི། སྙིང་གར་རྡོ་རྗེ་བཞག་ལ། ༀ་སུ་ར་ཏ་ས་མ་ཡ་སྟྭམ། ཧོཿསིདྡྷི་བཛྲ་ཡ་ཐཱ་སུ་ཁཾ། ཞེས་བརྗོད།
དེ་ནས་དམ་ལ་བཞག་པ་ནི། རྡོ་རྗེ་མགོ་བོར་གཞག་ལ། འདི་ནི་དམ་ཚིག་རྡོ་རྗེ་སྟེ། ཁྱོད་ཀྱི་སྤྱི་བོར་བཞག་པ་
20-1-290


ཡིས། །སངས་རྒྱས་སྐུ་རུ་ཁྱོད་འགྲུབ་ཅིང༌། །མི་ཕྱེད་ཡེ་ཤེས་ཐོབ་པར་འགྱུར། །རྡོ་རྗེ་སྙིང་གར་
བཞག་ལ། རྡོ་རྗེ་འཛིན་པ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་གྱུར། །གལ་ཏེ་ཚུལ་འདི་
སྨྲ་ན་ནི། །དེ་མ་ཐག་ཏུ་གྲལ་ཏེ་གཤེགས། །བདུད་རྩི་ལྔ་ཡིས་ཆུ་བླུད་ལ། འདི་ནི་ཁྱོད་ཀྱི་དམྱལ་བའི་
ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །ཡེ་ཤེས་བདུད་
རྩིའི་ཆུ་འདིས་འགྲུབ། །ༀ་བཛྲ་སརྦ་པཉྩ་ཨ་མྲྀ་ཏ་ཨུ་ཏ་ཀ་ཧཱུཾ། ཡང་རྡོ་རྗེ་སྤྱི་བོར་བཞག་ལ། དེང་ནས་
བཟུང་སྟེ་བུ་ཁྱོད་ཀྱི། །རྡོ་རྗེ་འཛིན་པ་ང་ཡིན་གྱི། །ང་ཡི་ཇེ་ལྟར་བཀའ་སྩལ་པ། །གུས་པའི་
ཚུལ་གྱིས་ཉན་པར་གྱིས། །གལ་ཏེ་ང་ལ་བརྙས་ན་ནི། །སངས་རྒྱས་ཐམས་ཅད་བརྙས་པ་
ཡིན། །མི་བདེ་མ་སྤངས་དུས་བྱས་ནས། །དམྱལ་བ་ཆེན་པོར་འགྱུར་ཏ་རེ། །
བཅུ་པ་ཡེ་ཤེས་དབབ་པར་གསོལ་བ་གདབ་པ་ནི། དེ་བཞིན་གཤེགས་པ་ཐམས་ཅད་ཀྱིས། །བདག་
ལ་བྱིན་གྱིས་རློབས་མཛོད་ལ། །རྡོ་རྗེ་ཡེ་ཤེས་བླ་མེད་ནི། །ད་ལྟ་ཉིད་དུ་དབབ་ཏུ་གསོལ། །
ཅེས་པའམ། བདེ་བར་གཤེགས་པ་ཐམས་ཅད་ཀྱི། །བྱིན་གྱིས་བརླབ་པའི་ཡེ་ཤེས་མཆོག།
སེམས་ཅན་ཀུན་གྱི་དོན་གྱི་ཕྱིར། །གཙོ་བོས་བདག་ལ་སྩལ་དུ་གསོལ། །ཞེས་པ་གང་རུང་གིས་
ལན་གསུམ་གསོལ་བ་གདབ། སྔོན་འགྲོ་བཅུ་ནི་དེ་རྣམས་ཡིན་ལ། ཡེ་ཤེས་དབབ་པ་ནི། སོ་སོ་ལ་ཅུང་ཟད་མི་འདྲ་སྟེ། སྤོས་
དང་རོལ་མོའི་སྒྲ་བྱ་སྟེ། སྒྱུ་ལུས་དབང་མོ་ཆེའི་ཡེ་ཤེས་དབབ་པ་ལ། སློབ་དཔོན་གྱི་ཐུགས་ཀ་ནས་འོད་ཟེར་
འཕྲོས། མདུན་བསྐྱེད་རྒྱུད་སྡེ་ལྔའི་དཀྱིལ་འཁོར་གྱི་ལྷ་ཚོགས་རྣམས་དང༌། རྗེ་བཙུན་རྡོ་རྗེ་
རྣལ་འབྱོར་མ་མཁའ་འགྲོ་སྡེ་ལྔའི་ལྷ་ཚོགས་དང་བཅས་པ་རྣམས་དང༌། མྱུར་མཛད་ཡེ་ཤེས་
ཀྱི་མགོན་པོའི་ལྷ་ཚོགས་རྣམས་དང༌། བླ་མ་རྡོ་རྗེ་ཧེ་རུ་ཀ་མཁའ་འགྲོའི་ཚོགས་དང་བཅས་
པ་རྣམས་ལས་དེ་དང་འདྲ་བའི་ལྷ་ཚོགས་དཔག་ཏུ་མེད་པ་བྱུང་ཁྱོད་རང་རྣམས་ཀྱི་སྤྱི་བོ་ནས་
ཞུགས་ལུས་གང་ལུས་སེམས་བདེ་བས་ཁྱབ་པར་གྱུར། ཕྱོགས་བཅུའི་སངས་རྒྱས་བྱང་ཆུབ་
སེམས་དཔའ་དཔའ་བོ་མཁའ་འགྲོའི་ཚོགས་ཐམས་ཅད་དང་བླ་མ་ཡི་དམ་མཁའ་འགྲོ་ཆོས་
20-1-291


སྐྱོང་གི་ལྷ་ཚོགས་ས་གཞི་བར་སྣང་ཐམས་ཅད་ཁྱབ་པ་ཙམ་སྤྱན་དྲངས་ཏེ་ཁྱེད་རང་རྣམས་ཀྱི་
ལུས་ལ་སིབ་སིབ་ཐིམ་པར་མོས་པ་མཛོད། ཅེས་བརྗོད་ལ། སྤོས་ཕུལ། རོལ་ཆེན་དབབ། རྒྱུད་སྡེ་ལྔ་དང་རྣལ་
འབྱོར་མ་དང༌། མགོན་པོའི་སྙིང་པོ་དང༌། ན་མོ་བུདྡྷ་ཡའི་སྔགས་རྣམས་ཀྱི་མཐར། ཨཱ་བེ་ཤ་ཡ་ཨ་ཨཱཿ ཞེས་བཏགས་
ལ་ཡེ་ཤེས་འབེབས། ཏིཥྠ་བཛྲ་སོགས་ནི་འདི་རྣམས་ལ་མི་དགོས། འདི་རྣམས་ཀྱིས་གཞན་རྣམས་ལའང་རིགས་འགྲེ། བདེ་
མཆོག་ལྷ་ལྔའི་དབང་བཞི་ལུས་བསྒྲེས་སུ་གྲགས་པ་ཏིང་ངེ་འཛིན་གྱི་དབང་དང་འཕོ་བའི་དབང་མོ་ཆེ་དང༌། ཆོས་དྲུག་སོ་སོའི་
སྒོས་བཀའ་དང༌། ཕྱག་ཆེན་བཀའ་ལྔ། མཁའ་སྦྱོད་བཀའ་ལྔ། གཞན་ཡང་རྒྱུད་སྡེ་ལྔའི་ཏིང་ངེ་འཛིན་གྱི་དབང་བཀའ་སོགས་
ཕལ་ཆེ་བ་ཞིག་ལ། སྒྱུ་ལུས་དབང་མོ་ཆེ་འདི་ཁ་འདོན་པ་སྤོ་བས་ཆོག་སྟེ། མདུན་བསྐྱེད་གང་བསྐྱེད་བ་དེ་དང་འདྲ་བའི་ལྷ་ཚོགས་
སྤྲོས་ནས་སློབ་མའི་སྤྱི་བོར་བསྟིམ་པ་དང༌། ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་རྣམས་ཀྱང་བདུན་བསྐྱེད་ཀྱི་ལྷ་
རྣམས་དང་རྣམ་པ་མཐུན་པར་སྤྱན་དྲངས་ཏེ། ལུས་ཀྱི་ཆ་ཐམས་ཅད་ནས་བསྟིམ། མདུན་བསྐྱེད་ལ་ཇི་ལྟར་བསྐྱེད་པའི་ལྷ་དེའི་
སྔགས་ལ་ཨ་བེ་ཤ་བཏགས་པས་འབེབས། སྒྱུ་ལུས་དབང་མོ་ཆེའི་དབང་ཆོག་ལས་ཡེ་ཤེས་འབེབས་པའི་སྐབས་མིག་དར་
བཅིངས་པར་གསུང་ནའང༌། ལག་ལེན་ལ་མི་མཛད་དོ། །
བསྡུས་པ་སྔོན་འགྲོ་ལྔ་པ་ནི། མཎྜལ་ཕུལ་ནས། དགའ་ཆེན་ཁྱོད་བདག་སྟོན་པ་སོགས་ཀྱིས་གསོལ་བ་གདབ།
དཀོན་མཆོག་གསུམ་ལ་བདག་སྐྱབས་མཆི། །སོགས། རྒྱུན་བཤགས་བྱ། ཟླ་བ་རྡོར་སེམས་བསྐྱེད་པ་དང༌།
མནའ་ཆུ་བླུད་པའི་དམ་བཞག་དང༌། གསོལ་བ་བཏབ་ནས་ཡེ་ཤེས་འབེབས་པ་རྣམས་ཡིན་ཏེ། ཡིག་རྙིང་རྣམས་ལ་དབང་བཀའ་
ཐམས་ཅད་ལ་སྔོན་འགྲོ་བཅུ་པ་འདི་བྱེད་པར་གསུང་པས། དེ་བཞིན་ལྕོགས་ན་བཟང་བའོ། །དངོས་གཞིའི་ཆོ་ག་ཤིན་ཏུ་བསྡུས་
པ་ལ་སྔོན་འགྲོ་རྒྱས་པ་དེ་མི་མཛེས་པས་ཕྱག་ལེན་ལ་བདེ་མཆོག་ལྷ་ལྔའི་དབང་རྒྱས་པ་དང༌། སྒྱུ་ལུས་དབང་མོ་ཆེ་ལ་སྔོན་འགྲོ་
བཅུ་པ་འདི་མཛད་ཅིང༌། གཞན་རྣམས་ལ་སྔོན་འགྲོ་ལྔ་པ་འདི་མཛད་ན། དགོས་དོན་འགྲུབ་པས་ཤིན་ཏུ་ལེགས་སོ། ཁོ་བོ་ཅག་
གི་བླ་མ་དམ་པ་དོན་ལ་སངས་རྒྱས་དང་གཉིས་སུ་མེད་ཅིང༌། ཚུལ་སྟོན་དུ་ཡང་རྫོགས་རིམ་གྱི་མན་ངག་རྩོམས་པ་ལ་མཁྱེན་པ་
རྒྱས་པ་དང༌། བྱེ་བྲག་ཏུ་ཡང་གདམས་པ་འདིའི་སྐོར་ལ་ཐོས་བསམ་སྒོམ་པའི་ཉམས་མྱོང་ཕྱག་ལེན་དེ་རྣམ་པ་ལྔའི་སྒོ་ནས་རང་
བྱན་ཆུད་པ་དེ་ཉིད་ཀྱི་ཕྱག་ལེན་བཞིན་དུ་བདག་གིས་འཁུམ་པ་ལགས། གཞན་དེང་སང་ཆོས་འདིའི་སྐོར་ལ་མཁས་པར་གྲགས་
20-1-292


ཤིང་མཁས་པར་རློམ་པ་འགའ་ལའང་ལག་ལེན་ༀ་སོ་ལས་མི་གདའོ།། །།སྔོན་འགྲོའི་ཡིག་ཆུང་བསྡུས་པ་འདི་ཡང་ཏཱ་ར་ནཱ་ཐས་
སྨྲས་པའོ། །སརྦ་མངྒ་ལམ། དགེ་ལེགས་འཕེལ། འདི་བྲིས་དགེ་བས་ལས་སྒྲིབ་དག་གྱུར་ཅིག །བཀྲ་ཤིས་བདེ་ལེགས།
20-1-293


༄༅། །ནཻ་གུས་བརྒྱུད་འདེབས་ཨ་ཡིག་ཆོས་འབྱུང་མ་
ཞེས་བྱ་བ་བཞུགས།
༄༅། །ཨ་ཡིག་ཆོས་ཀྱི་འབྱུང་གནས་ཕོ་བྲང་དུ། །ཨ་དཀར་ཟག་མེད་བདུད་རྩིའི་
ཆུ་རྒྱུན་གྱིས། །ཨ་བྷི་ཥིཉྩས་སེམས་ཀྱི་དྲི་མ་འཁྲུད། །ཨ་ཧཾ་མི་ཕྱེད་བདེ་སྟོང་རྡོ་རྗེ་འཆང༌། །
གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དག་བྱེད་སྟོང་རའི་རྣལ་འབྱོར་
བསྒོམས་པའི་མཐུས། །འགལ་རྐྱེན་ནད་གདོན་སྡིག་སྒྲིབ་སྦྱངས་པ་དང༌། །མཐུན་རྐྱེན་
རྟགས་གསུམ་ཅི་རིགས་ཤར་ནས་ཀྱང༌། །ཏིང་འཛིན་མྱུར་དུ་སྐྱེ་བར་བྱིན་གྱིས་རློབས། །མི་
རྟོག་གཏུམ་མོས་རྣམ་རྟོག་བུད་ཤིང་བསྲེགས། །བདེ་ཆེན་གཏུམ་མོས་སྡུག་བསྔལ་ཚང་ཚིང་
འཇོམ། །ཟུང་འཇུག་གཏུམ་མོས་ཡེ་ཤེས་མེ་ལྕེ་འབར། །གཏུམ་མོ་མཐར་བྱིན་མཁའ་འགྲོ་
ནཻ་གུ་མ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཟས་དང་གོས་དང་སྟན་གྱི་
རྣལ་འབྱོར་གྱི། །སྤྱོད་ལམ་ཀུན་ཏུ་གཏུམ་མོ་འབྲལ་མེད་ཅིང༌། །སྲིད་པའི་དབང་ཐོབ་གེགས་
ཀུན་རང་སར་གྲོལ། །རླུང་འབྱོང་བདེ་དྲོད་འབར་བར་བྱིན་གྱིས་རློབས། །སྣང་བ་སྒྱུ་མར་
རྟོགས་པའི་ཆགས་སྡང་གྲོལ། །རང་སེམས་སྒྱུ་མར་ཤར་བའི་འཁྲུལ་པ་དག །གཉིས་འཛིན་
སྒྱུ་མ་ཤར་པའི་འོད་གསལ་ཤར། །སྒྱུ་མའི་དོན་རྟོགས་ཁྱུང་པོ་རྣལ་འབྱོར་ལ། །གསོལ་བ་
འདེབས་སོ་བདག་རྒྱུད་བྱིན་གྱིས་རློབས། །ཡང་རབ་བླ་མའི་མོས་གུས་འབྲལ་མེད་ཅིང༌། །
འབྲིང་གིས་བརྗོད་བྲལ་བར་མ་ཆད་དུ་སྒོམས། །ཐ་མའི་ཀུན་ཀྱང་སྒྱུ་མར་སྦྱངས་ནས་ནི། །
ཞེན་མེད་རང་སར་གྲོལ་བར་བྱིན་གྱིས་རློབས། །རྨི་ལམ་ལྟ་བུར་ཆོས་རྣམས་ཐུགས་སུ་ཆུད། །
སྨི་ལམ་ཉིད་ཀྱང་བདེན་མེད་སྒྱུ་མར་གཟིགས། །རྨི་ལམ་སྒྱུ་མའང་འོད་གསལ་གནས་གྱུར་
20-1-294


ཏེ། །རྨི་ལམ་མཐར་ཕྱིན་མཉམ་མེད་རྨོག་ཅོག་པ། །གསོལ་བ་འདེབས་སོ་བདག་རྒྱུད་བྱིན་
གྱིས་རློབས། །འདུན་པའི་གནད་ཀྱིས་རྨི་ལམ་བཟུང་ནས་ནི། །སྦྱང་དང་སྤེལ་དང་སྤྲུལ་སྒྱུར་
སྣ་ཚོགས་ཀྱིས། །ཡུལ་སྣང་རྣམ་བཞི་གཏན་ལ་ཕབ་ནས་ཀྱང༌། །གསལ་སྟོང་འཛིན་མེད་
འཆར་བར་བྱིན་གྱིས་རློབས། །གསལ་སྟོང་ཞེན་མེད་འོད་གསལ་རང་གསལ་གྱིས། །ཟབ་
ཞི་སྤྲོས་བྲལ་འོད་གསལ་མཐར་སྦྱང་ནས། །བདེ་ཆེན་མཐར་ཐུག་འོད་གསལ་མངོན་གྱུར་
ཏེ། །འོད་གསལ་དག་པ་གཉིས་ལྡན་སྐྱེར་སྒང་བ། །གསོལ་བ་འདེབས་སོ་བདག་རྒྱུད་བྱིན་
གྱིས་རློབས། ། འོད་གསལ་ཟུང་བཞི་ལམ་དུ་ཁྱེར་བ་དང༌། །བསྲེ་འཕོའི་གནད་དང་གེགས་
སེལ་བོགས་འདོན་གྱིས། །དམ་ཚིག་མ་ཉམས་འཆར་སྒོ་ངོ་ཟིན་ནས། །འོད་གསལ་ཉམས་
མྱོང་འབྱོང་པར་བྱིན་གྱིས་རློབས། །ཆོས་སྐུ་འཕོ་བའི་སྒྱུ་མ་ལམ་དུ་ཁྱེར། །ཟུང་འཇུག་འཕོ་
བའི་ཡི་དམ་ལམ་དུ་ཁྱེར། །བྱིན་རླབས་འཕོ་བའི་བླ་མ་ལམ་དུ་ཁྱེར། །འཕོ་བའི་ལམ་ལ་
མངའ་བརྙེས་གཉན་སྟོན་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ལམ་
ཁྱེར་གསུམ་གྱིས་འཕོ་བ་མཐར་ཕྱིན་ནས། །འཆུག་མེད་མཁའ་སྤྱོད་གནས་སུ་འཁྲིད་པ་
དང༌། །མཐར་ཐུག་རྒྱལ་བ་ལོངས་སྤྱོད་རྫོགས་པའི་སྐུ། །འབད་མེད་ལྷུན་གྱི་འགྲུབ་པར་བྱིན་
གྱིས་རློབས། །རྨི་ལམ་བར་དོར་སྤྲུལ་བསྒྱུར་མཐར་ཕྱིན་ནས། །སྐྱེ་ཤི་བར་དོར་འོད་གསལ་
རྒྱུན་ཆད་མེད། །སྲིད་པ་བར་དོའི་རང་ཞལ་ལྷུན་གྱིས་གྲུབ། །བར་དོར་རང་དག་སངས་རྒྱས་
སྟོན་པ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །འཇིགས་པའི་སྒྲ་བཞི་ཡ་
ངའི་གཡང་ས་སོགས། །བར་དོའི་འཕྲང་དུ་མཆུག་མེད་ཐབས་ཀྱི་གནད། །ལམ་ཁྱེར་གསུམ་
གྱིས་འཇིགས་པ་རང་སར་དག །སྐུ་གསུམ་མངོན་དུ་གྱུར་པར་བྱིན་གྱིས་རློབས། །ཕྱི་རོལ་
ཡུལ་རྣམས་སྣང་སྟོང་རྒྱས་བཏབ་ཅིང༌། །ནང་གི་སེམས་ཉིད་གསལ་སྟོང་རྒྱ་ཡིས་བཏབ། །
རང་ལུས་ལྷ་སྐུ་བདེ་སྟོང་རྒྱས་བཏབ་ནས། །ཕྱག་རྒྱ་ཆེན་པོའི་དོན་རྟོགས་ཤངས་སྟོན་པ། །
20-1-295


གསོལ་བ་འདེབས་སོ་བདག་རྒྱུད་བྱིན་གྱིས་རློབས། །སྔོན་འགྲོ་རང་བབས་རྣམ་གསུམ་
གནད་ལ་དབབ། །དངོས་གཞི་སྐྱོན་བཞི་ལས་གྲོལ་ཉམས་ལེན་གྱིས། །མཐར་ཐུག་སྐུ་བཞི་
རང་ཤར་ལྷུན་གྱིས་གྲུབ། །ཕྱག་ཆེན་གནས་ལུགས་རྟོགས་པར་བྱིན་གྱིས་རློབས། །སྣང་བའི་
རོལ་པ་བླ་མ་ཡིན་དམ་ལྷ། །གྲག་སྟོང་བརྗོད་བྲལ་ཡན་ལག་དྲུག་ཅུའི་གསུངས། །གསལ་
ལ་འཛིན་མེད་བདེ་གསལ་མི་རྟོག་ཐུགས། །ལམ་ཁྱེར་མཐར་ཕྱིན་ཁྱུང་པོ་ཚུལ་ཁྲིམས་མགོན།
གསོལ་བ་འདེབས་སོ་བདག་རྒྱུད་བྱིན་གྱིས་རློབས། །སྤྱོད་ལམ་ཀུན་ཏུ་སྣང་བ་སྣ་ཚོགས་
ཀུན། །བླ་མ་ཡི་དམ་སྒྱུ་མར་ལམ་ཁྱེར་ནས། །སེམས་ཉིད་འོད་གསལ་འཛིན་མེད་གནད་ཀྱི་
ནི། །མཚན་རྟོགས་རང་སར་གྲོལ་བར་བྱིན་གྱིས་རློབས། །མཁའ་འགྲོའི་དབང་མོ་བྱེ་བའི་
ཞལ་གྱི་གསུང༌། །མཁའ་འགྲོའི་དབང་ཕྱུག་མཆེད་ལས་ལེགས་བརྒྱུད་ནས། །མཁའ་འགྲོའི་
གསང་ཚིག་ནཻ་གུ་སུ་ཁའི་ཆོས། །མཁའ་འགྲོས་རྗེས་བཟུང་ཚད་ལྡན་རི་ཁྲོད་པ། །གསོལ་
བ་འདེབས་སོ་བདག་རྒྱུད་བྱིན་གྱིས་རློབས། །མཁའ་སྤྱོད་དཀར་དམར་བསྐྱེད་རྫོགས་ཟུང་
འཇུག་མ། །མཁའ་སྤྱོད་རིལ་བུའི་སྒྲུབ་པ་མཐར་ཕྱིན་ནས། །མཁའ་སྤྱོད་འཕོ་བའི་རིག་
འཛིན་ཉེ་ལམ་གྱིས། །མཁའ་སྦྱོད་ཞིང་དུ་བསྒྲོད་པར་བྱིན་གྱིས་རློབས། །རང་ལུས་ལྷ་སྐུ་སྣང་
སྟོང་མཐའ་དང་བྲལ། །སེམས་ཉིད་འཛིན་མེད་འོད་གསལ་ལྷུན་གྱིས་གྲུབ། །འཆིང་བར་
བྱེད་པ་རང་སང་དག་པ་སྟེ། །འཆི་མེད་དོན་རྟོགས་མཁྱེན་ལྡན་ཤངས་དཀར་བ། །གསོལ་བ་
འདེབས་སོ་བདག་རྒྱུད་བྱིན་གྱིས་རློབས། །བློས་བྱས་རྩོལ་བའི་དྲི་མ་ཀུན་སྤངས་ཤིང༌། །ཐ་
མལ་ཞེན་པའི་འཛིན་པ་རང་དག་ནས། །སྣང་ལ་རང་བཞིན་མེད་པར་ལྷ་ཡི་སྐུ། །རང་སེམས་
འཆི་མེད་རྟོགས་པར་བྱིན་གྱིས་རློབས། །བར་དོའི་སྲིད་པ་ལག་མཐིལ་སྤུ་ཇི་བཞིན། །མ་
འདྲེས་ཡེ་ཤེས་སྤྱན་གྱིས་ལེགས་གཟིགས་ནས། །སྙིང་རྗེས་འགྲོ་དྲུག་སེམས་ཅན་ཐམས་ཅད་
ཀྱང༌། །ཐར་པའི་ལམ་དུ་འཁྲིད་མཛད་སངས་རྒྱས་དཔལ། །གསོལ་བ་འདེབས་སོ་བདག་
20-1-296


རྒྱུད་བྱིན་གྱིས་རློབས། །རྣམ་མང་འགྲོ་བའི་སྐྱེ་སྒོ་མཐའ་ཡས་པ། །རྣམ་དག་ཡེ་ཤེས་འཁོར་
ལོའི་ལེགས་སྦྱངས་ནས། །རྣམ་པར་མྱོང་བའི་ལམ་སྒྲིབ་ཀུན་བསལ་ཏེ། །འཆུག་མེད་ལོངས་
སྐུ་ཐོབ་པར་བྱིན་གྱིས་རློབས། །རོ་རྐྱང་ཉི་ཟླའི་བསྒྲོད་པ་དྷུ་ཏི་རུ། །ཡོངས་སུ་འཇུག་པའི་
བཙན་ཐབས་སྦྱོར་བ་ཡིས། །ལས་རླུང་རྒྱུ་བའི་གྲོང་ཁྱེར་ཀུན་བཅོམ་ནས། །གྲུབ་པའི་དབང་
ཕྱུག་ནམ་མཁའ་རྒྱལ་མཚན་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཕྱག་
རྒྱ་བཅིང་གྲོལ་བུམ་པ་ཤིང་རྟ་ཅན། །ལུས་སེམས་འཆི་མེད་གྲུབ་པའི་འཁྲུལ་འཁོར་གྱིས། །
ཆགས་ཅན་རྣལ་འབྱོར་ཕོ་ཉའི་མྱུར་ལམ་ལས། །འཇའ་ལུས་དངོས་སུ་འགྲུབ་པར་བྱིན་གྱིས་
རློབས། །ཞི་བའི་དབྱིངས་ལས་ཐུགས་རྗེའི་ཁྲོས་པའི་གར། །མྱུར་མཛད་ཡེ་ཤེས་མགོན་པོའི་
སྐུར་བཞེངས་ནས། །བར་ཆད་བདུད་དཔུང་གཡུལ་ལས་ལེགས་རྒྱལ་བའི། །རྒྱ་སྒོམ་བླ་མ་
མགོན་པོ་དབྱེར་མེད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ལས་བཞིའི་
འཕྲིན་ལས་བསྒྲུབ་པའི་སྲུང་མའི་ཚོགས། །དུས་ལས་མི་འདའ་བྲན་དུ་འཁོལ་ནུས་ཤིང༌། །
སྲིད་ཞིའི་ཕན་བདེའི་དཔལ་གྱི་སྐལ་བཟང་རྣམས། །རེ་བ་ཇི་བཞིན་འགྲུབ་པར་བྱིན་གྱིས་
རློབས །དུས་གསུམ་རྒྱལ་བའི་ཐུགས་བསྐྱེད་རྨད་བྱུང་དང༌། །རྒྱལ་སྲས་སེམས་དཔའི་རླབས་
ཆེན་མཛད་པ་དང༌། །བསྟན་འཛིན་སྐྱེས་བུ་ཀུན་གྱི་ལྟ་སྤྱོད་ལ། །རྗེས་སུ་ཡི་རང་མཐར་ཕྱིན་
གྲོལ་མཆོག་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཐར་པའི་ལམ་སྟོན་
དགེ་བའི་བཤེས་གཉེན་དང༌། །ཐར་པའི་ལམ་མཆོག་ཡང་དག་དམ་པའི་ཆོས། །ཐར་པའི་
ལམ་དུ་ཆེས་པའི་མཆེད་གྲོགས་ལ། །དག་སྣང་ཕྱོགས་མེད་འབྱུང་པར་བྱིན་གྱིས་རློབས། །
ཐབས་ལམ་གཏུམ་མོ་ལས་རྒྱ་ཟུང་འབྲེལ་ཞིང༌། །གྲོལ་ལམ་གཏུམ་མོ་སྒྱུ་ལུས་ཟུང་འཇུག་
གི །འཕྲིན་ལས་དོན་གཉིས་ཕུན་ཚོགས་ལྷ་དབང་གྲགས། །གསོལ་བ་འདེབས་སོ་བདག་
རྒྱུད་བྱིན་གྱིས་རློབས། །དགྱེས་མཛད་གཏུམ་མོ་བདེ་མཆོག་གཞན་ལུས་དང༌། གསང་འདུས་
20-1-297


སྒྱུ་ལུས་མཱ་ཡ་འོད་གསལ་སོགས། །འཇིགས་མཛད་འཕྲིན་ལས་རྣམ་བཞིའི་དོན་འགྲུབ་པར། །
རྣམ་ལྔའི་བརྒྱུད་དོན་རྟོགས་པར་བྱིན་གྱིས་རློབས། །དྲི་མཛད་གཞན་དོན་བསྔོ་བའི་རྒྱས་
འདེབས་ཤིང༌། །སྨོན་ལམ་དབང་གིས་སྔགས་ལམ་བཀྲ་ཤིས་ཆོས། །བཀའ་རྒྱ་གྲོལ་བར་
སྟོན་མཛད་སྒྲོལ་བའི་མགོན། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རིན་
ཆེན་སྒྲོམ་བུ་ལྟ་བུར་དམིགས་པའི་གནད། །ཟབ་དོན་འཕྲུལ་གྱིས་གནད་དོན་ཀུན་ཤེས་ཤེང༌། །
རིག་སྔགས་འཁྲོས་པའི་དབང་མོ་དཔག་ཡས་ཀྱི། ཁམས་གྱི་དབང་བསྒྱུར་སྩོལ་བར་བྱིན་
གྱིས་རློབས། །གཞིའི་གནས་ལུགས་སྐུ་གསུམ་རང་ཤར་གྱིས། །ལམ་གྱི་འཁྲུལ་པ་གློ་བུར་
སྒྲིབ་སྦྱངས་ནས། །འབྲས་བུ་དག་པ་གཉིས་ལྡན་ཀུན་དགའི་མཚན། །གསོལ་བ་འདེབས་སོ་
བདག་རྒྱུད་བྱིན་གྱིས་རློབས། །ཐབས་མཁས་གཞན་གྱི་དོན་ལ་མ་རྨོངས་ཞིང༌། །གང་དུ་སྤྲུལ་
པ་ཕྱོགས་བཅུར་འགྱེད་ནུས་པའི། །བསམ་པའི་དོན་རྣམས་ཡིད་བཞིན་ཀུན་འགྲུབ་པ། །སྨོན་
ལམ་ཡིད་བཞིན་འགྲུབ་པར་བྱིན་གྱིས་རློབས། །འཁྲུལ་མེད་ལམ་གྱི་ཡོན་ཏན་ཀུན་རྫོགས་
ཤིང༌། །འཁྲུལ་པའི་སྣང་བརྙན་དགེ་ལེགས་དཔལ་གྱུར་པའི། །དགེ་ལེགས་ཀུན་འབྱུང་རྣལ་
འབྱོར་བྱམས་པ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །འཁོར་འདས་
ཀུན་གྱི་བཀྲ་ཤིས་དགེ་ལེགས་རྣམས། །བཀྲ་ཤིས་དཔལ་ཡོན་བཟང་པོའི་ཕུན་ཚོགས་ཀྱིས། །
དཔལ་ལྡན་ཤངས་པ་བཀའ་བརྒྱུད་ཕྱོགས་ཀུན་ཏུ། །དར་ཞིང་རྒྱས་ལ་ཡུན་གནས་བྱིན་གྱི་
རློབས། །མདོ་སྔགས་རྒྱུད་སྡེ་ཀུན་གྱི་གསང་བའི་མཛོད། །མ་ལུས་ཐུགས་སུ་ཆུད་ཅིང་དཔལ་
ཤངས་པའི། །བསྟན་པའི་སྲོག་ཤིང་བྱམས་པ་ཡོན་ཏན་མགོན། །གསོལ་བ་འདེབས་སོ་
བདག་རྒྱུད་བྱིན་གྱིས་རློབས། །ཚེ་གཅིག་སངས་རྒྱས་སྒྲོད་པའི་ཐེགས་པའི་མཆོག །ལམ་དུ་
སྒོམས་པས་བར་ཆད་ཀུན་ཞི་ཞིང༌། །མཐར་ཐུག་སྐུ་བཞིའི་ཡེ་ཤེས་མངོན་དུ་གྱུར། །འབད་
མེད་མྱུར་དུ་རྟོགས་པར་བྱིན་གྱིས་རློབས། །སྐྱེས་ཀུན་སྨོན་ལམ་བཟང་པོའི་རྒྱུད་སྡེའི་བཅུད། །
20-1-298


ངེས་གསང་མཁའ་འགྲོའི་བཀའ་བབས་མན་ངག་ལ། །བློ་གྲོས་ཡངས་པ་ཀུན་དགའ་ལྷུན་
གྲུབ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཆོས་བདག་མཁའ་འགྲོའི་
བཀའ་རྒྱ་ཉམས་མེད་ཆོས། །བྱིན་རླབས་ཆུ་བོའི་བཀའ་རྒྱུན་མི་ཉམས་ཤིང༌། །གྲུབ་ཐོབ་
བརྒྱུད་པའི་ཟམ་པ་མ་ཆད་པར། །ཉམས་དང་རྟོགས་པ་འཆར་བར་བྱིན་གྱིས་རློབས།། །།ཞེས་
པ་འདི་ནི་ཏཱ་ར་ནཱ་ཐས་སྨྲས་པའོ། །
༈ འདིའི་ཁ་སྐོང་རྗེ་ཚུལ་ཁྲིམས་ཀྱིས་མཛད་པ་ནི། སྔོན་གོམ་སྨོན་ལམ་བཟང་པོའི་ལེགས་བྱས་ཀྱིས། །
ཉེར་གྲངས་མཁའ་འགྲོའི་སྙན་རྒྱུད་བདུད་རྩིའི་བཅུད། ཁྱོད་ཐུགས་རིན་ཆེན་བུམ་བཟང་
ཆུད་སོར་ལྡེམས། །ཆོས་དྲུག་མཐར་ཕྱིན་ངག་དབང་བློ་གྲོས་ལ། །གསོལ་བ་འདེབས་སོ་
བདག་རྒྱུད་བྱིན་གྱིས་རློབས །སྒྲིབ་གཉིས་བག་ཆགས་འཐུག་པོའི་ནོན་པའི་དྲི། །ཆོས་དྲུག་
ཆབ་ཀྱིས་ལྷག་མེད་འཁྲུད་པ་དང༌། །འགྲོ་བའི་ནད་གསོ་སྦས་པའི་རྣལ་འབྱོར་གྱིས། །རང་
གཞན་སྨིན་ཞིང་གྲོལ་བར་བྱིན་གྱིས་རློབས། ཁྱོད་གསུང་ཐུགས་ཀྱི་ཉིང་ཁུ་འཛིན་པ་ལ། །
མཁྱེན་རབ་ཐུགས་རྗེས་ནམ་ཡང་མི་དོར་ཞིང༌། །སངས་རྒྱས་ཀུན་ལས་ལྷག་པའི་བརྩེ་བ་
ཅན། །རྡོ་རྗེ་འཆང་ཆེན་ངག་དབང་འཇམ་དབྱངས་ལ། །གསོལ་བ་འདེབས་སོ་བདག་རྒྱུད་
བྱིན་གྱིས་རློབས། །རྣམ་ཀུན་རྩ་རྒྱུད་བླ་མའི་རྣམ་ཐར་ལ། །མི་ཕྱེད་དད་པའི་རྗེས་འཇུག་སྙིང་
ཁོང་ནས། །རྩེ་གཅིག་གུས་པའི་གསོལ་བ་བཏབ་པའི་མཐུས། །ཟབ་ལམ་མཐར་ཕྱིན་མཁའ་
སྤྱོད་བསྒྲོད་པར་ཤོག །བཀའ་དྲིན་འཁོར་མེད་རྒྱལ་བ་རྡོ་རྗེ་འཆང༌། །བཅུ་གསུམ་སྙིང་པོའི་
དོན་རྩོལ་སྒྲོལ་བའི་མགོན། །སྙིགས་མའི་དུས་འདིར་འདྲེན་མཆོག་ཆོས་ཀྱི་རྗེ། །ཀིརྟི་དྷརྨ་
ཝརྟིའི་མཚན་ཅན་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། ཁྱེད་ཀྱི་ཟབ་
གསུང་ཆོས་དྲུག་བདུད་རྩིའི་རོ། །བདག་བློ་མ་དག་འཛིན་རྟོག་ཀུན་བཀྲུས་ཏེ། །འཁོར་བ་
གནས་འགྱུར་ཡེ་ཤེས་མངོན་མཐོང་བའི། །ཧེ་རུ་ཀ་ཉིད་ཐོབ་པར་བྱིན་གྱིས་རློབས།། །།ཞེས་སོ། །
20-1-299


བཀྲ་ཤིས།
20-1-300


༄༅། །སྒྱུ་ལུས་དབང་མོ་ཆེ་བསྐུར་ཚུལ་གྱི་ལག་ལེན་
ཞེས་བྱ་བ་བཞུགས།
༄༅། །ན་མོ་གུ་རུ། སྒྱུ་ལུས་དབང་མོ་ཆེ་བསྐུར་བ་འདོད་པའི་གོ་སྐབས་ཡངས་པར་སྟེགས་བུའི་སྟེང་དུ་རྡུལ་ཚོན་
གྱི་དཀྱིལ་འཁོར་རྒྱས་འབྲིང་བསྡུས་གསུམ་གང་རུང་ཞིག་འབྲིའོ། །དེ་ལ་རྒྱས་པ་ནི། ཕྱི་ནས་རིམ་པས་མུ་ཁྱུད་དཀར་པོ་དང་
དམར་པོ་དང་སྔོན་པོ་གསུམ་གྱིས་བསྐོར་བའི་ཟླུམ་པོ་འཁོར་ཡུག་ཆེན་པོ་སྟེ། དེ་ཡང་ཕྱི་དཔལ་ལྡན་འབྲས་སྤུངས་ཀྱི་མཆོད་རྟེན་
དང༌། དེའི་ནང་དུ་མེ་རི། དེའི་ནང་རྡོ་རྗེའི་ར་བ་རྣམས་ཡོད་པ་མཚོན་པ་ཡིན་ལ། སྐུ་གསུང་ཐུགས་གསུམ་མཚོན་པའང་ཡིན་ནོ། །
དེའི་ནང་དུ་གཞལ་མེད་ཁང་གྲུ་བཞི་སྤྱི་དང་མཐུན་པ། རྩིགས་པའི་ནང་དབུས་ལ་ཐུགས་ཀྱི་བར་དང༌། ཕྱིའི་ཁྱམས་གཉིས་ཀར་
ཤར་དཀར། ལྷོ་སེར། ནུབ་དམར། བྱང་ལྗང༌། ཕྱོགས་མདོག་ཡིན་ལ། གཞལ་ཡས་ཁང་གི་ནང་དུ་ཚངས་ཐིག་གིས་བཅད་པའི་རེ་
མིག་བཞི་པོ་ལ། ཟླུམ་སྐོར་རེ་བྱ་སྟེ། དེ་ཡང་ཤར་ལྷོའི་ཟླུམ་སྐོར་ལ་ཆོས་འབྱུང་ཉིས་བརྩེགས་དཀར་པོ། བཅད་མཐིང་ནག།
རྩིབས་མཆན་དམར་པོ། དབུས་སུ་ཉི་གདན་ལྔ་ཚོམས་ལ། ཚོམས་བུ་མཐིང་ཁ་རེ་རེ་བཀོད། ལྷོ་ནུབ་ཀྱི་གྲར་པདྨ་འདབ་བཞིའི་
ཕྱོགས་མདོག །ལྟེ་བར་ཉི་གདན་ལ་ཚོམ་བུ་སྔོན་པོ། བྱང་ཤར་གྱི་གྲྭར་ཆོས་འབྱུང་དམར་པོ་བཅད་ལྗང་ཁུ་གྲུ་ཆད་དཀར་པོ་ནུབ་
བྱང་གི་གྲྭར་ཆོས་འབྱུང་ནག་པོ། མེ་རི་དམར་པོ། གྲུ་ཆད་ལྗང་ཁུ། ཟླུམ་བསྐོར་བཞི། བཅད་ཀྱི་མུ་ཁྱུད་ནག་པོ། ཆོས་འབྱུང་དམར་
པོའི་དབུས་སུ། ཉི་གདན་ལྔ་ཚོམས་ལ། དབུས་དཀར་ཤར་ནག །ལྷོ་སེར་ནུབ་དམར་བྱང་ལྗང་བའི་ཚོམས་བུ་དང༌། ཆོས་འབྱུང་
ནག་པོའི་དབུས་སུ་ཉི་གདན་ལ་ཚོམས་བུ་ནག་པོ། གཞལ་ཡས་ཁང་གི་དབུས་རང་དུ་ཉི་གདན་ལ་རྡོ་རྗེ་སྔོན་པོ་རྩེ་ལྔ་པ་གཅིག་བྲི།
འདི་བཤད་ཚོད་ལ་མེད་ནའང་བླ་མའི་ཕྱག་ལེན་ལ་མཛད་དོ། །འབྲིང་པོ་ནི། འདོད་སྣམ་ཕ་གུ་དྲྭ་ཕྱེད་ཤར་བུ་མདའ་ཡབ་རྣམས་
དོར་ཏེ། རྩིགས་པ་ལྗང་ཁུ། སྒོ་ཁྱུད། སྒོ་འགྲམ། སྒོ་ལོགས། སྒོ་སྟེང་གི་གདུང་དང་བཅས་པ་ཞིག་བྱ། གཞན་སྔ་མ་དང་འདྲ།
བསྡུས་པ་ནི། རྩིགས་པ་ཕན་ཆད་མི་འབྲི་བར། མཎྜལ་གྲུ་བཞི་ཕྱོགས་ཀྱི་མདོག་ཅན་ལ་ཟླུམ་སྐོར་བཞི་པོ་གོང་བཞིན་འབྲི། ཕྱིའི་
མུ་ཁྱུད་གྲུ་བཞིར་རེ་ཁ་དཀར་པོ་འབྲིའོ། །སྟེགས་བུ་དེའི་མདུན་དུ་ཟླུམ་གཏོར་མཾ་སས་བརྒྱན་པ་གཉིས། གོ་སྐབས་ཅི་བདེར། ཆུ་
20-1-301


གཉིས་སྔོན་དུ་འགྲོ་བའི་མཆོད་པ་རྣམས་དང༌། འོག་ཏུ་དགོས་པའི་དབང་རྫས་དང་ཚོགས་ཀྱི་ཡོ་བྱད་སོགས་བཞག་གོ །བུམ་པ་
ནི་ལྷོ་ནུབ་ཀྱི་གྲྭའི་པདྨ་འདབ་བཞིའི་དཀྱིལ་འཁོར་དེར་འཇོག་པ་དབང་ཆོག་ལས་གསུངས་པ་ལྟར་དཀྱིལ་འཁོར་རྒྱ་ཁྱོན་ཆེན་པོ་
ཡོད་ན། དེར་མཉྫུའི་སྟེང་དུ་བཞག་རྒྱུ་ཡིན་ནའང༌། ཕྱག་ལེན་ལ་ནི། དཀྱིལ་འཁོར་ཆེ་ན་ཟླུམ་སྐོར་བཞི་ཚོམ་གྱི་དབུས་སུ་མཉྫུ་ལ་
འཇོག་ཀྱིན་འདུག །དཀྱིལ་འཁོར་ཆུང་ངུ་ལ་བུམ་པ་ལོགས་སུ་བཤམས་པ་ལེགས། བུམ་པ་ནི་མགུལ་ཆིངས་ཁ་རྒྱན་དང་བཅས་
པ་སོགས་བཤམས་ལུགས་སྤྱི་དང་འདྲ་བ་ལས། དུང་ཆོས་གཟུངས་ཐག་སོགས་མི་དགོས་སོ། །འདི་ཉིད་ཀྱི་དབང་ཆོག་ལས་པདྨ་
འདབ་བཞིའི་དཀྱིལ་འཁོར་ལ་ཚོམ་བུ་ལྔ་འགོད་པ་ལྟར་གསུངས་ཤིང༌། དེར་ལྷ་མི་བསྐྱེད་ཀྱང་བུམ་པའི་གདན་ཡིན་པས་བུམ་
ནང་གི་ལྷ་རྣམས་ཉིད་མཚོན་པ་འདྲ་བ་དང༌། ཆོས་འབྱུང་དམར་པོའི་སྟེང་དུ་བདེ་མཆོག་ལྷ་ལྔ་བསྐྱེད་པ་ལྟར་གསུངས་ཤིང་དེང་
སང་ཡང་ཕལ་ཆེར་ཡི་གེ་ནག་འདེད་ལྟར་བྱེད་ལ། ལྷན་ཐབས་ཀྱི་ཡི་གེ་འགའ་རེ་ན་ཡང༌། དེ་དང་འདྲ་མིན་ཙམ་བཤད་ཀྱང༌། བླ་
མའི་ཞལ་ནས་དེ་རྣམས་མན་ངག་གབ་པ་ཡིན་ཞིང༌། ཁྱད་པར་ལྷན་ཐབས་ཀྱི་ཡི་གེ་ན། པདྨ་འདབ་བཞིའི་དབུས་སུ་རྩ་བའི་བླ་མ།
མདུན་དུ་ཡི་དམ། གཡས་སུ་འདས་པའི་བླ་མ་ཞེས་སོགས་འཆད་པ་ནི། ཤིན་ཏུ་མ་དག་གསུངས། དེས་ན་རང་ལུགས་ཞལ་བཞེས་
ཕྱག་ལེན་ནི། ཆོས་འབྱུང་ཉིས་བརྩེགས་དང་བུམ་པའི་ནང་དུ་རྒྱུད་སྡེ་ལྔའི་གཙོ་བསྡུས། པདྨ་འདབ་བཞི་ལ། བླ་མ་རྡོ་རྗེ་འཆང་ལ་
མཁའ་འགྲོ་སྡེ་ལྔའི་བསྐོར་བའམ། བླ་མའི་ངོ་བོ་བདེ་མཆོག་ལྷ་ལྔ། ཆོས་འབྱུང་དམར་པོའི་ནང་དུ་རྡོ་རྗེ་ཕག་མོ་ལྷ་ལྔ་བསྒོམ་པ་
ཡིན་ནོ། །དེ་ལྟར་ན་སྔོན་འགྲོ་གཏོར་མ་མཁའ་འགྲོ་སྤྱི་གཏོར་བཞིན་ཏུ་བཏང༌། གནས་དང་མཆོད་པ་བྱིན་རླབས་ཀྱང་བདེ་མཆོག་
ལྷ་ལྔ་དང་འདྲ་སྟེ། སྤྱི་དང་མཐུན་སྐྱབས་འགྲོ་ནས་བརྩམས་ཏེ། སླར་ཡང་རང་ཉིད་ཧེ་རུ་ཀ་ཡབ་ཡུམ་ཀྱི་ང་རྒྱལ་ལ་གནས་གསུམ་
བྱིན་བརླབས་ཀྱི་བར་རྒྱུད་སྡེ་ལྔའི་སྒྲུབ་ཐབས་བསྡུས་པ་ནས་བཤད་པ་བཞིན། བདག་བསྐྱེད་བཟླས་པ་དང་བཅས་པ་བྱ། དེ་ནས་
མདུན་བསྐྱེད། ཨ་མྲྀ་ཏས་བསངས། སྭཱ་བྷ་ཝས་སྦྱངས། སྟོང་པའི་ངང་ལས་དུར་ཁྲོད་ཆེན་པོའི་དབུས་
སུ་ཕྱི་དཔལ་ལྡན་འབྲས་སྤུངས་ཀྱི་མཆོད་རྟེན། ནང་བསྲུང་འཁོར་རྡོ་རྗེའི་ས་གཞི་རྭ་གུར་མེ་
དཔུང་དང་བཅས་པའི་གཞལ་མེད་ཁང་གྲུ་བཞི་སྒོ་བཞི་རྟ་བབས་བཞིས་བརྒྱན་པ་འདོད་
སྣམ་དང་ཕ་གུ་དང་དྲྭ་ཕྱེད་དང་མདའ་ཡབ་ལ་སོགས་པ་མཚན་ཉིད་ཐམས་ཅད་ཡོངས་སུ་
རྫོགས་པ། ནང་ཕྱོགས་ཀྱི་མདོག་ཅན་དུ་གྱུར་བའི་དཀྱིལ་འཁོར་དང་པོའི་ནང་དུ་ཆོས་འབྱུང་
20-1-302


གྲུ་གསུམ་ཉིས་བརྩེགས་ཀྱི་དབུས་དང༌། མཚན་ཉིད་ཐམས་ཅད་ཡོངས་སུ་རྫོགས་པའི་བུམ་
པའི་ནང་དུ་སྣ་ཚོགས་པདྨ་དང་ཉི་མའི་གདན་ལྔ་ཚོམས་སུ་གནས་པའི་དབུས་ཀྱི་གདན་གྱི་
སྟེང་དུ་བཅོམ་ལྡན་འདས་དཔལ་ཧེ་རུ་ཀ་འཁོར་ལོ་བདེ་མཆོག་སྐུ་མདོག་མཐིང་ཁ་ཨིནྡྲ་ནི་
ལ་ལྟར་རབ་ཏུ་འབར་བའི་འོད་ཟེར་འཕྲོ་བ་ཞལ་གཅིག་ཕྱག་གཉིས་དམར་ལ་ཟླུམ་པའི་སྤྱན་
གཡོ་བ་འཕྲོ་ཞིང་སྒེག་པ་ལ་ཆགས་པའི་ཉམས་ཅན་མཆེ་བའི་མྱུ་གུ་ཅུང་ཟད་གཙིགས་པ་
བཞིན་ཤིན་ཏུ་འགྱུར་པས་ཁྲོ་གཉེར་ཅན་བུང་བ་ལྟར་གནག་པའི་དབུ་སྐྲ་རལ་པའི་ཐོར་
ཚུགས་སྤྱི་བོར་བཅིངས་པའི་རྩེ་མོར་རུས་པའི་འཁོར་ལོ་ལ་གནས་པའི་ནོར་བུ་དང་རལ་པའི་
ངོས་ལ་སྣ་ཚོགས་རྡོ་རྗེ་དང༌། གཡོན་ངོས་སུ་ཟླ་བ་ཕྱེད་པའི་བརྒྱན་པ་མི་རུས་ཀྱི་རྣ་ཆ་དང༌།
མགུལ་རྒྱན་དང་གདུབ་བུའི་ཚོགས་དང༌། སྐ་རགས་དང་མཆོད་ཕྱིར་ཐོག་གིས་བརྒྱན་པ་ཐལ་
བ་ཆེན་པོའི་ཉེ་བར་བྱུགས་ཤིང་མི་མགོ་སྐོམ་པོ་ལྔའི་དབུ་རྒྱན། དཔའ་བོའི་དར་དཔྱང་དང་
བཅས་པ་མིའི་རྒྱུ་མ་ལ་རྒྱུས་པའི་ཁྲག་འཛག་མགོ་བོ་ལྔ་བཅུའི་དོ་ཤལ་ཅན། སྟག་གི་པགས་
པའི་ཤམ་ཐབས་བཀྲོལ་བ། ཕྱག་གཡས་རྡོ་རྗེ་དང་གཡོན་དྲིལ་བུ་འཛིན་པས་ཡུམ་ལ་འཁྱུད་
པ་ཞབས་གཡོན་བསྐུམ་པས་འཇིགས་བྱེད་ནག་པོ་དང༌། གཡས་བརྐྱང་བས་དུས་མཚན་
དམར་མོ་མནན་པ། གར་གྱི་ཉམས་དགུ་དང་ལྡན་ཞིང་མཚན་དང་དཔེ་བྱད་ཡོངས་སུ་རྫོགས་
པའོ། །དེ་ལ་འཁྱུད་པའི་ཡུམ་རྡོ་རྗེ་ཕག་མོ་སྐུ་མདོག་དམར་མོ་བསྐལ་བའི་མེ་ལྟར་གཟི་
བརྗིད་འབར་བ་ཕྱག་གཡས་རྡོ་རྗེ་གྲི་གུག་དང་བཅས་པའི་སྡིགས་མཛུབ་ཀྱིས་ཕྱོགས་ཐམས་
ཅད་གནོན་ཞིང༌། གཡོན་ཐོད་པ་ཁྲག་གིས་བཀང་བ་འཛིན་པས་ཡབ་ལ་འཁྱུད་པ་གཅེར་བུ་
སྐྲ་གྲོལ་ཞིང་ཕྱག་རྒྱ་ལྔས་བརྒྱན་པ། ཐོད་སྐམ་གྱི་དབུ་རྒྱན་དང་དོ་ཤལ་ཅན་ཞབས་གཡས་
བསྐུམ་གཡོན་བརྐྱང་པའི་ཡབ་ལ་འཁྱུད་ཅིང་ཡབ་ཡུམ་གཉིས་ཀ་ཡང་ལང་ཚོ་གསར་དུ་བརྡོ་
བ་མེ་དཔུང་འབར་བའི་དབུས་ན་བཞུགས་པའོ། །ཤར་དུ་གསང་བ་འདུས་པ་སྐུ་མདོག་སྔོན་
20-1-303


པོ་ཡིད་ཙམ་ཁྲོ་བ་རྡོ་རྗེ་དང་དྲིལ་བུ་འཛིན་པས་རང་མཚུངས་ཀྱིས་ཡུམ་ལ་འཁྱུད་པ་རྡོ་རྗེ་
སྐྱིལ་ཀྲུང་གིས་པད་ཉི་ལ་བཞུགས་ཤིང་དར་དང་རིན་པོ་ཆེའི་བརྒྱན་པའོ། །ལྷོར་དགྱེས་
མཛད་རྡོ་རྗེ་མཐིང་ཁ་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས། ཡུམ་བདག་མེད་མ་
སྔོན་མོ་གྲི་ཐོད་འཛིན་པ་ལ་འཁྱུད་པ་སྐྲ་སེར་པོ་གྱེན་དུ་བརྫེ་བ་གཡས་བརྐྱང་གིས་པད་ཉི་ལ་
ཚངས་པ་དང་དྲག་པོ་མནན་པའོ། །ནུབ་ཏུ་མཧཱ་མཱ་ཡ་མཐིང་ཁ་ཕྱག་གཉིས་ཀྱིས་མདའ་གཞུ་
འཛིན་པས་ཡུམ་སངས་རྒྱས་མཁའ་འགྲོ་མ་དམར་མོ་རང་དང་མཚུངས་པ་ལ་འཁྱུད་པ་སྐྲ་
སེར་བརྫེས་པ་གཡས་བརྐྱང་གི་པད་ཉི་ལ་མི་རོ་མནན་པའོ། །བྱང་དུ་རྡོ་རྗེ་འཇིགས་བྱེད་
མཐིང་ནག་མ་ཧེའི་ཞལ་གཅིག་ཕྱག་གཉིས་ཀྱིས་གྲི་གུག་ཐོད་ཁྲག་འཛིན་པས་ཡུམ་ཕག་མོ་
དམར་མོ་གྲི་ཐོད་འཛིན་པ་ལ་འཁྱུད་པ་སྐྲ་སེར་གྱེན་དུ་བརྫེས་ཤིང་དུར་ཁྲོད་ཀྱི་ཆས་རྫོགས་
པ་གཡོན་བརྐྱང་གིས་པད་ཉི་ལ་མ་ཧེ་མནན་པའོ། །ཡང་དབང་ཆོག་གི་དཔེ་མང་པོ་ལས། ཤར་དུ་དགྱེས་
མཛད། ལྷོར་གསང་འདུས་བཤད་པ་ལྟར་བྱས་ཀྱང་རུང་སྟེ་འདམ་ཁའོ། །དཀྱིལ་འཁོར་གཉིས་པའི་དབུས་སུ་
པདྨའི་ལྟེ་བ་ལ་རྩ་བའི་བླ་མ་རྡོ་རྗེ་འཆང་གསང་བ་འདུས་པ་དང་མཚུངས་པ་ལས་ཡུམ་རྡོ་རྗེ་
ཕག་མོ་དམར་མོ་འཁྱུད་པ། འདབ་མ་བཞི་ལ། ཤར་དུ་མཁའ་འགྲོ་མ་ནག་མོ། བྱང་དུ་ལཱ་མ་
ལྗང་ཁུ། ནུབ་ཏུ་དུམ་སྐྱེས་མ་དམར་མོ། ལྷོར་གཟུགས་ཅན་མ་སེར་མོ་རྣམས་གྲི་གུག་དང་
ཐོད་པ་ཁ་ཊཾ་ག་འཛིན་པ་གཡས་བརྐྱང་གི་སྟབས་ཀྱི་བཞུགས་པའོ། །དཀྱིལ་འཁོར་གསུམ་
པ་ཆོས་འབྱུང་དམར་པོའི་དབུས་སུ་རྡོ་རྗེ་ཕག་མོའི་ངོ་བོ་སངས་རྒྱས་མཁའ་འགྲོ་མ་དམར་མོ།
ཤར་དུ་རྡོ་རྗེ་མཁའ་འགྲོ་མ་སྔོན་མོ། ལྷོར་རིན་ཆེན་མཁའ་འགྲོ་མ་སེར་མོ། ནུབ་ཏུ་པདྨ་
མཁའ་འགྲོ་མ་དཀར་མོ། བྱང་དུ་ལས་ཀྱི་མཁའ་འགྲོ་མ་ལྗང་མོ་རྣམས་ཌཱ་མ་རུ་དང་ཐོད་པ་
ཁ་ཊྭཱཾ་ག་འཛིན་པ། གཅེར་བུ་ཕྱག་རྒྱ་ལྔ་དང་མི་མགོའི་འཕྲེང་བས་བརྒྱན་པ། རང་མཚུངས་
ཀྱི་འཁོར་དཔག་ཏུ་མེད་པ་དང་བཅས་པའོ། །དཀྱིལ་འཁོར་བཞི་པའི་དབུས་སུ་མྱུར་མཛད་
20-1-304


ཡེ་ཤེས་མགོན་པོ་ཞལ་གཅིག་ཕྱག་དྲུག་པ་སྐུ་མདོག་ནག་པོ་ཕྱག་གཡས་རྣམས་ན་ཐོད་སྐམ་
གྱི་འཕྲེང་བ་དང༌། གྲི་གུག་དང་ཌཱ་མ་རུ་དང༌། གཡོན་རྣམས་ན་ཐོད་ཁྲག་དང་རྩེ་གསུམ་དང་
ཞགས་པ་བསྣམས་པ། དགྲ་བགེགས་དང་ཡི་དྭགས་ཀྱི་གདན་ལ་བཞུགས་པ། གཙང་རིགས་
ཀྱིས་མགོན་པོ་བདུན་ཅུ་རྩ་ལྔ་སོགས་དམ་ཅན་རྒྱ་མཚོའི་ཚོགས་ཀྱིས་བསྐོར་བའོ། །རང་གི་
སྙིང་ག་ནས་འོད་ཟེར་འཕྲོས། ཡེ་ཤེས་སེམས་དཔའི་ཚོགས་ཐམས་ཅད་བཛྲ་ས་མཱ་ཛཿ ཞེས་
སྤྱན་དྲངས་རྡོལ་དྲིལ་གཡབ་མོ་དང༌། སྤོས་དང་རོལ་མོ་སྒྲ་ཆེན་པོ་དང་བཅས་ཏེ། ༀ་ཧྲི་ཧཱ་ཧཱ་ཧཱུཾ་ཧཱུཾ་ཕཊ། བཛྲ་ས་མཱ་
ཛཿ ཞེས་ལན་གསུམ། དེ་བཞིན་དུ་སྦྱར་ཏེ། ༀ་བཛྲ་བཻ་རོ་ཙ་ན་ཡེ་ཧཱུཾ་ཧཱུཾ་ཕཊ་སྭཱཧཱ། བཛྲ་ས་མཱ་ཛཿ ༀ་ཨ་
བཛྲ་དྷྲིཀྐ་ཧཱུཾ་ཧཱུཾ་ཕཊ་སྭཱཧཱ། ༀ་བཛྲ་ས་མཱ་ཛཿ ༀ་ཨ་ཧྲི་ཧཱུཾ་ཧཱུཾ་ཕཊ་སྭཱཧཱ། ༀ་བཛྲ་ས་མཱ་ཛཿ ༀ་དེ་ཝ་
པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱཧཱ། ༀ་བཛྲ་ས་མཱ་ཛཿ ༀ་ཧྲཱིཿཥྚཱིཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ། ༀ་བཛྲ་ས་
མཱ་ཛཿ ༀ་ༀ་ༀ་སརྦ་བུདྡྷ་ཌཱ་ཀི་ནཱི་ཡེ། བཛྲ་ཝརྞཱ་ནི་ཡེ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་
སྭཱཧཱ། བཛྲ་ས་མཱ་ཛཿ ༀ་བཛྲ་མཧཱ་ཀ་ལ་ཀྵིཾ་ཀྵེ་དྲ་བིགྷྣན་བི་ན་ཡ་ཀ་ཧཱུཾ་ཧཱུཾ་ཕཊ་སྭཱཧཱ། བཛྲ་ས་མཱ་
ཛཿ ཁྱད་པར་མགོན་པོ་ལ། ཀྵིཾཿ མང་དུ་བརྗོད་པས་སྤྱན་དྲངས་སོ། །དེ་ནས་ཛཿཧཱུཾ་བཾ་ཧོཿ ལན་མང་དུ་བརྗོད། གཉིས་
སུ་མེད་པར་ཐིམ། ལྷ་ཐམས་ཅད་ཀྱི་དཔྲལ་བར་ༀ་དཀར་པོ། མགྲིན་པར་ཨཱཿདམར་པོ།
ཐུགས་གར་ཧཱུཾ་སྔོན་པོ། ཡང་སྙིང་ཁའི་ཧཱུཾ་ལས་འོད་ཟེར་འཕྲོས། དབང་གི་ལྷ་སངས་རྒྱས་བྱང་
ཆུབ་སེམས་དཔའ་ཁྲོ་བོའི་དབང་པོ་བཙུན་མོར་བཅས་པ་ཐམས་ཅད་སྤྱན་དྲངས། ཕྱི་ནང་
གསང་བའི་མཆོད་པ་ཐམས་ཅད་ཀྱིས་མཆོད་པར་གྱུར། ༀ་སརྦ་ཏ་ཐཱ་ག་ཏ་ཨ་བྷི་ཥིཉྩ་ཏུ་མཾ།
གཙོ་བོའི་ཐུགས་ཀ་ནས་ཡུམ་ལྔ་བདུད་རྩིའི་བུམ་པ་ཐོགས་པ་སྤྲོས། ༀ་བཛྲ་བྷ་ཝ་ཨ་བྷི་ཥིཉྩ་
ཧཱུཾ། ཞེས་གསུངས་ཤིང་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་དྲི་མ་དག །ཆུའི་ལྷག་
མ་ཡར་ལུད་པ་ལས། རྒྱུད་སྡེ་ལྔའི་གཙོ་བོ་རྣམས་དང༌། བླ་མ་དང་ནག་པོ་ཆེན་པོ་ལ་མི་བསྐྱོད་
པས་དབུ་རྒྱན། མཁའ་འགྲོ་ལྔ་པོ་རྣམས་ལ་རིགས་ལྔ་སོ་སོའི་དབུ་བརྒྱན་པར་གྱུར། དེ་ནས་ཕྱི་
20-1-305


མཆོད་ནང་མཆོད་གསང་མཆོད་རྣམས་བདེ་མཆོག་ལྷ་ལྔའི་དཀྱིལ་ཆོག་ལྟར་ཕུལ། བསྟོད་པ་ནི། ཆོས་དབྱིངས་རྣམ་དག་
དབྱིངས་ལས་མ་གཡོས་ཀྱང༌། །ཐབས་ཀྱི་ཁྲོ་བོའི་སྐུར་བསྟན་གདུག་པ་འདུལ། །ཆེ་བའི་ཆེ་
མཆོག་ལྷ་ཡི་ལྷར་གྱུར་པ། །ཀུན་བཟང་ཧེ་རུ་ཀ་ལ་ཕྱག་འཚལ་ལོ། །ཧེ་རུ་ཀ་དཔལ་དཔའ་བོ་
ཆེ། །རྣམ་དག་རྡོ་རྗེ་དབང་ཕྱུག་དང༌། །རྗེས་ཆགས་ཆགས་པ་ཆེ་རྣམས་ཀྱིས། །རྡོ་རྗེ་ཕག་མོ་
ལ་འདུད་དོ། །ཐམས་ཅད་དངོས་པོ་རང་བཞིན་མཆོག །གདོད་ནས་ཐམས་ཅད་བདག་ཉིད་
གནས། །ཐབས་དང་ཤེས་རབ་གཉིས་མེད་པའི། །དགྱེས་མཛད་རྡོ་རྗེ་ལ་ཕྱག་འཚལ། །མི་
བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་པ་ཆེ། །རྡོ་རྗེ་གསུམ་མཆོག་དཀྱིལ་འཁོར་
གསུམ། །གསང་བའི་དབྱིངས་ལ་ཕྱག་འཚལ་བསྟོད། །དཔལ་ལྡན་རྡོ་རྗེ་མཁའ་འགྲོ་དང༌། །
མཁའ་འགྲོ་མ་ཡི་འཁོར་ལོ་བསྒྱུར། །ཡེ་ཤེས་ལྔ་དང་སྐུ་གསུམ་ཉིད། །འགྲོ་བ་སྐྱོབས་ལ་
ཕྱག་འཚལ་བསྟོད། །དུར་ཁྲོད་རྒྱན་གྱི་ལེགས་བརྒྱན་པའི། །ཞེ་སྡང་གཤིན་རྗེ་གཤེད་པོ་ནི། །
དངོས་མེད་ནམ་མཁའ་ལྟ་བུ་ལ། །ཐུགས་རྗེས་སྤྲུལ་པའི་སྐུར་སྟོན་པ། །ཡེ་ཤེས་ཁྲོ་རྒྱལ་
རབ་འཇིགས་པ། །དུད་ཁ་མུན་ཆེན་ཁྱོད་ལ་འདུད། །ཆོས་དབྱིངས་ངང་ལས་མ་གཡོས་ཀྱང༌། །
གདུག་པ་འདུལ་ཕྱིར་ཁྲོས་པའི་སྐུ། །བསྟན་པའི་རུ་ཊ་འཇོམས་མཛད་པ། །ནག་པོ་ཆེ་ལ་
ཕྱག་འཚལ་བསྟོད། །ཅེས་སོགས་ཀྱི་བསྟོད།
གཏོར་མ་ནི། བདག་སྐྱེད་བཞིན་བསང་སྦྱངས་བྱིན་གྱིས་རླབས། རྒྱུད་སྡེ་ལྔ་དང༌། རྡོ་རྗེ་ཕག་མོ་དང༌། མགོན་པོའི་སྙིང་པོ་
རྣམས་ཀྱི་མཐར། ཨ་ཀཱ་རོ། བཏགས་པ་ལན་གསུམ་གསུམ་དང༌། མགོན་པོ་ལ། ཤཱ་ས་ན་ལན་གསུམ་གྱིས་ཀྱང་ཕུལ་ལ།
སླར་ཡང་ཨརྒྷཾ་ནས་ཤཔྟའི་བར་གྱིས་མཆོད། སངས་རྒྱས་ཀུན་གྱི་སྐུ་གསུང་ཐུགས། །ཡོན་ཏན་འཕྲིན་
ལས་རབ་རྫོགས་པ། །དཀྱིལ་འཁོར་ལྔ་པོ་ཐམས་ཅད་ལ། །ཀུན་ནས་དང་བས་ཕྱག་འཚལ་
ལོ། །ཧཱུཾ་མྱུར་མཛད་སྤྱན་རས་གཟིགས་ལ་ཕྱག་འཚལ་ལོ། །ཞབས་གདུབ་དང་བཅས་བི་ནཱ་
ཡ་ཀ་མནན། །ནག་པོ་ཆེན་པོ་སྟག་གི་ཤམ་ཐབས་ཅན། །ཕྱག་དྲུག་སྦྲུལ་གྱི་རྒྱན་གྱིས་རྣམ་
20-1-306


པར་བརྒྱན། །གཡས་པ་གྲི་གུག་བར་པ་ཕྲེང་བ་འཛིན། །ཐ་མས་ཌ་མ་རུ་ནི་དྲག་ཏུ་འཁྲོལ། །
གཡོན་པས་ཐོད་ཁྲག་དང་ནི་མདུང་རྩེ་གསུམ། །དེ་བཞིན་ཞགས་པ་བཟུང་ནས་འཆིང་བར་
བྱེད། །དྲག་པོའི་ཞལ་གདངས་མཆེ་བ་རྣམ་པར་གཙིགས། །སྤྱན་གསུམ་དྲག་པོ་དབུ་སྐྲ་
གྱེན་དུ་འབར། །དཔྲལ་བར་སིནྡྷུ་ར་ཡིས་ཐིག་ལེ་བྱུགས། །སྤྱི་བོར་མི་བསྐྱོད་རྒྱལ་པོས་རྒྱས་
བཏབ་བརྟན། ཁྲག་འཛག་མི་མགོ་ལྔ་བཅུའི་དོ་ཤལ་ཅན། །རིན་ཆེན་ཐོད་སྐམ་ལྔ་ཡིས་དབུ་
ལ་བརྒྱན། །ཤིང་ལས་བྱོན་ནས་གཏོར་མ་ལེན་མཛད་པའི། །དཔལ་ལྡན་ཕྱག་དྲུག་པ་ལ་
ཕྱག་འཚལ་ལོ། །མཆོད་སྤྱིན་གཏོར་མ་འདི་བཞེས་ལ། །ནས། ཡིད་ལ་འདོད་པ་ཀུན་འགྲུབ་
ཤོག །གི་བར་འཕྲིན་ལས་བཅོལ། མདུན་བསྐྱེད་དང་བུམ་པ་ལ་དམིགས་ནས་བཟླས་པ་ཅི་འགྲུབ་བྱ། འོག་ནས་འབྱུང་བའི་
དབང་གི་དངོས་གཞི་རྣམས་དམིགས་པས་བདག་འཇུག་གི་ཚུལ་དུ་བླངས། ཚོགས་འཁོར་བྱིན་གྱིས་རླབས་པ་ཡང༌། སྐབས་
འདིར་བྱས་ན་ལེགས་ཏེ་སློབ་དཔོན་གྱི་བྱ་བའོ། །
དེ་ནས་སློབ་མ་རྣམས་ནང་དུ་འདུས་པ་ལ། ཐོག་མར་བགེགས་གཏོར་སྤྱི་དང་འདྲ་བར་བཏང་ལ་བགེགས་བསྐྲད། ལག་
ལེན་བསྡུས་པའི་སྐབས། སྔར་གྱི་སྔོན་འགྲོའི་གཏོར་མ་ལ་འདིའི་དོན་ཚང་པས། བགེགས་གཏོར་མ་བཏང་ཀྱང་རུང་ངོ༌། །དེ་ནས་
སེམས་བསྐྱེད་གསོལ་བ་འདེབས་པ་སོགས་ཆོས་དང་ལོ་རྒྱུས་ཅུང་ཟད་བཤད། འགྲོ་མགོན་སངས་རྒྱས་སྟོན་པས་མཛད་པའི་
སྔོན་འགྲོ་རྒྱས་པའོ། །མདོ་ཙམ་ལོགས་སུ་འབྲི་བ་ལྟར་སྔོན་འགྲོ་བཅུ་པོ་རྣམས་བྱ། དེ་རྗེས། ད་ལན་གྱི་སྐབས་འདིར་
དངོས་གཞི་ལ་བཏགས་པ་བརྡའ་ཡི་དབང་བཞི། ཐོབ་པ་དོན་གྱི་དབང་བཞི། མཐར་ཐུག་
གསང་བའི་དབང་བཞི་སྟེ། ཏིང་ངེ་འཛིན་གྱི་མཆོད་དབང་བཞི་གསུམ་བཅུ་གཉིས་ཡོད་པ་
ལས། ཐོག་མར་བཏགས་པ་བརྡའི་དབང་བཞིའི་དོན་དུ་མཎྜལ་འབུལ་བར་ཞུ། ཞེས་པས་བསྐུལ།
སློབ་མས་མཎྜལ་ཕུལ། དེ་ལྟར་མཎྜལ་ཕུལ་ནས་གསོལ་བ་གདབས་པ་འདིའི་རྗེས་བཟློས་མཛོད།
བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་སྐྱབས་པའི་
དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ལན་གསུམ་གྱི་གསོལ་བ་བཏབས། མདུན་བསྐྱེད་ཀྱི་
20-1-307


དཀྱིལ་འཁོར་ལ་སློབ་མའི་ངོར་གོང་བཞིན་གསལ་བཏབ། མདུན་དུ་བཞུགས་པའི། སྐུ་གསང་བ་འདུས་པ།
གསུང་མཧཱ་མཱ་ཡ། ཐུགས་དགྱེས་མཛད་རྡོ་རྗེ། ཡོན་ཏན་འཁོར་ལོ་སྡོམ་པ། འཕྲིན་ལས་རྡོ་
རྗེ་འཇིགས་བྱེད་ཀྱི་ལྷ་ཚོགས་རྣམས་དང༌། རྩ་བརྒྱུད་ཀྱི་བླ་མ་མཁའ་འགྲོ་སྡེ་ལྔ། མྱུར་མཛད་
དམ་ཅན་རྒྱ་མཚོའི་ཚོགས་དང་བཅས་པས་དབང་བསྐུར་བའི་དགོངས་པ་མཛད། ཕྱོགས་
བཅུའི་རྒྱལ་བ་ཐམས་ཅད་ཀྱིས་ཤིས་པ་བརྗོད། རྡོ་རྗེ་ཕག་མོ་དང༌། མཁའ་འགྲོ་མ་ལ་སོགས་
པས་ཕྱག་ན་བུམ་པ་ཐོག་ནས་དབང་བསྐུར་བས་ལུས་ཀྱི་སྡིག་སྒྲིབ་དག་པའི་མོས་པ་མཛོད།
ཧཱུཾ། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་གྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་
པ་ཡིས། །དེ་བཞིན་བདག་གིས་སྐུ་ཁྲུས་གསོལ། །ༀ་སརྦ་ཏ་ཐཱ་ག་ཏ་ཀཱ་ལ་ཤ་ཨ་བྷི་ཥིཉྩི་མཾ།
བུམ་པའི་ཆུ་རྒྱུན་གྱིས་སྤྱི་བོའི་འཁོར་ལོར་སླེབ། དེས་བུམ་པའི་དབང་བསྐུར་བ་ཐོབ་པས།
ལུས་ཀྱིས་དྲི་མ་དག །འབྲས་བུ་སྤྲུལ་སྐུ་ཐོབ་པའི་སྐལ་པ་ཅན་དུ་བྱས། ཕྱོགས་བཅུའི་སངས་
རྒྱས་སྲས་དང་བཅས་པ་ཡབ་ཡུམ་ཐམས་ཅད་བདེ་བའི་ངོ་བོར་ཞུ། དཀྱིལ་འཁོར་གྱིས་གཙོ་
བོ་རྣམས་ཀྱི་ཞལ་དུ་ཞུགས། སྐུའི་ཆ་ཐམས་ཅད་རྒྱུད། རྡོ་རྗེའི་ལམ་ནས་ཤེས་རབ་ཀྱི་གསང་
བའི་མཚོ་སྐྱེས་སུ་བྱོན་པའི་བྱང་ཆུབ་ཀྱི་སེམས་ལྕེ་ཐོག་ཏུ་བཞག་པར་གྱུར། ནང་མཆོད་ལ་བུམ་ཆུ་
ཅུང་ཟད་བསྲེས་ཏེ། ཧཱུཾ་ཕྱོགས་དུས་སངས་རྒྱས་ཐམས་ཅད་ཀྱིས། །གསང་གསུམ་གནས་ལས་བྱུང་
བ་ཡིས། ཁམས་གསུམ་ཀུན་གྱིས་ཕྱག་བྱས་པས། །རྡོ་རྗེའི་དབང་བསྐུར་སྦྱིན་པར་བྱ། །ༀ་
སརྦ་ཏ་ཐཱ་ག་ཏ་གུ་ཧྱེ་ཨ་བྷྱི་ཥིཉྩ་མཾ། ཞེས་བདུད་རྩི་སྦྱིན། བུམ་ཆུ་དང་བདུད་རྩིའི་རྒྱུན་གྱིས་མགྲིན་
པར་སླེབས། དེས་གསང་དབང་ཐོབ། ངག་གི་དྲི་མ་དག །ལོངས་སྐུ་ཐོབ་པའི་སྐལ་བ་དང་
ལྡན་པར་བྱས། ཡང་བུམ་ཆུ་སྤྱི་བོར་གཏོར་ལ། ཁྱེད་རང་རྣམས་ལྷ་སྐུ་ཡབ་ཡུམ་ཞལ་སྦྱོར་གྱིས་རྣམ་
པར་གནས་པ་ལ་ཐུགས་རྒྱུད་བདེ་བ་ཆེན་པོའི་ཡོངས་སུ་གང་བར་གྱུར། བུམ་ཆུའི་རྒྱུན་དང་
བདུད་རྩི་སྙིང་གར་སླེབས་པས། དབང་གསུམ་པའི་ཡེ་ཤེས་སྐྱེས་པས་མོས་པ་མཛོད། ༀ་
20-1-308


སརྦ་ཏ་ཐཱ་ག་ཏ་པྲ་ཛྙ་ཛྙཱ་ན་ཨ་བྷི་ཥིཉྩ་མཾ། དེས་ཤེས་རབ་ཡེ་ཤེས་ཀྱི་དབང་བསྐུར་བ་ཐོབ་
པས། ཡིད་ཀྱི་དྲི་མ་དག །འབྲས་བུ་ཆོས་སྐུ་ཐོབ་པའི་སྐལ་བ་ཅན་དུ་བྱས། ཡང་བུམ་ཆུ་གཏོར།
བུམ་ཆུ་དང་བདུད་རྩིའི་རྒྱུན་ལྟེ་བར་སླེབས། ལུས་ཐམས་ཅད་གང༌། གཟུང་འཛིན་གྱི་རྟོག་པ་
དབྱིངས་སུ་དག་པར་མོས་ལ། ཅུང་ཟད་མཉམ་པར་བཞག་པར་མཛོད། ༀ་སརྦ་ཏ་ཐཱ་ག་ཏཱ་ཙ་ཏུརྠ་ཨ་བྷི་
ཥིཉྩ་མཾ། དེའི་དབང་བཞི་པ་ཐོབ་པས་ལུས་ངག་ཡིད་གསུམ་གྱི་དྲི་མ་བག་ཆགས་དང་བཅས་
པ་ཐམས་ཅད་དག །ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས། དེས་བཏགས་པ་བརྡའ་ཡི་
དབང་བཞི་སོང༌། གཉིས་པ་ཐོབ་པ་དོན་གྱིས་དབང་བཞིའི་དོན་དུ་མཎྜལ་ཕུལ། ཅེས་བསྐུལ།
སློབ་མས་མཎྜལ་ཕུལ། འདི་ལ་དབང་གདམས་ངག་དང་འབྲེལ་བ་དང༌། གདམས་ངག་དབང་དང་
མ་འབྲེལ་བ་གཉིས་ལས། དང་པོ་ནི། ཁྱེད་རང་རྣམས་ཀྱིས་ལུས་དང་ལོངས་སྤྱོད་ཕྱི་ནང་གསང་
གསུམ་གྱི་མཆོད་པ་བསམ་གྱིས་མི་ཁྱབ་པ་སྤྲུལ་ཏེ། བླ་མ་ཡི་དམ་མཁའ་འགྲོ་ཆོས་སྐྱོང་
རྣམས་ལ་ཕུལ་བར་མོས་ཏེ། འདིའི་རྗེས་བཟློས་མཛོད། རྩ་བ་དང་བརྒྱུད་པར་བཅས་པའི་
དཔལ་ལྡན་བླ་མ་དམ་པ་རྣམས་ཀྱིས་བདག་ལ་ཡང་དག་པར་སྒྱུ་ལུས་ཀྱི་དབང་བསྐུར་དུ་
གསོལ། ཡི་དམ་དཀྱིལ་འཁོར་གྱིས་ལྷ་ཚོགས་རྣམས་ཀྱི་བདག་ལ་ཡང་དག་པར་སྒྱུ་ལུས་ཀྱི་
དབང་བསྐུར་དུ་གསོལ། ཡེ་ཤེས་ཀྱི་མཁའ་འགྲོ་ཆོས་སྐྱོངས་བའི་སྲུང་མ་རྣམས་ཀྱིས་བདག་
ལ་ཡང་དག་པར། སྒྱུ་ལུས་ཀྱི་དབང་བསྐུར་དུ་གསོལ་ཞུ་བ་དང༌། ཉམས་སུ་ལེན་པ་ལ་བར་
ཆད་ཐམས་ཅད་བསྲུང་བར་མཛད་དུ་གསོལ། ཞེས་པ་ལན་གསུམ། དེ་ནས། ཁྱེད་རང་རྣམས་ཀྱི་སྤྱི་
བོར་ༀ་དཀར་པོ་དེ་ལས་འོད་ཟེར་དཀར་པོ་འཕྲོས། སངས་རྒྱས་བྱང་ཆུབ་སེམས་དཔའ་
ཐམས་ཅད་ཀྱི་སྐུའི་བྱིན་རླབས་ཐམས་ཅད་ༀ་དཀར་པོའི་རྣམ་པར་བསྡུས། སྤྱི་བོའི་ༀ་ལ་
ཐིམ། ༀ་དེ་ཉིད་འོད་ཟེར་དཀར་པོར་ལྡེམ་ལྡེམ་ཞུ་སྟེ། སྤྱི་བོ་ནས་ཞུགས། ལྟེ་བར་བྱོན་པས་
དེ་ཉིད་ཐིག་ལེ་དཀར་པོ་གཅིག་ཏུ་གྱུར། དེའི་འོད་ཀྱིས་ལུས་གང་བས་ཁྱེད་རང་རྣམས་ཀྱི་
20-1-309


ལུས་ཀྱང་འོད་དཀར་པོའི་ངོ་བོར་ལྡེམ་ལྡེམ་འདུག །ཉོན་མོངས་པ་གཏི་མུག་སངས་ཀྱིས་
དག་པར་མོས། དེའི་རིགས་འགྲེས་ཏེ། ཁྱེད་རང་རྣམས་ཀྱི་མགྲིན་པར་ཨཱཿདམར་པོ་དེ་ལས་འོད་
ཟེར་དམར་པོ་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་གསུང་གི་
བྱིན་རླབས་ཐམས་ཅད་ཨཱཿདམར་པོའི་རྣམ་པར་བསྡུས། མགྲིན་པའི་ཨཱཿལ་ཐིམ། ཨཱཿདེ་
ཉིད་འོད་ཟེར་དམར་པོར་ལྡེམ་ལྡེམ་ཞུ་སྟེ། མགྲིན་པ་ནས་ཞུགས། ལྟེ་བར་བྱོན་པས་དེ་ཉིད་
ཐིག་ལེ་དམར་པོ་གཅིག་ཏུ་གྱུར། དེའི་འོད་ཀྱིས་ལུས་གང་བས་ཁྱེད་རང་རྣམས་ཀྱི་ལུས་ཀྱང་
འོད་དམར་པོའི་ངོ་བོར་ལྡེམ་ལྡེམ་འདུག །ཉོན་མོངས་པ་འདོད་ཆགས་སངས་ཀྱིས་དག་པར་
མོས། ཁྱེད་རང་རྣམས་ཀྱི་སྙིང་གར་ཧཱུཾ་སྔོན་པོ་དེ་ལས་འོད་ཟེར་སྔོན་པོ་འཕྲོས། སངས་རྒྱས་
དང་བྱང་ཆུབ་སེམས་དཔའ་ཐམས་ཅད་ཀྱི་ཐུགས་ཀྱི་བྱིན་རླབས་ཐམས་ཅད་ཧཱུཾ་སྔོན་པོའི་རྣམ་
པར་བསྡུས། ཐུགས་ཀའི་ཧཱུཾ་ལ་ཐིམ། ཧཱུཾ་དེ་ཉིད་འོད་ཟེར་སྔོན་པོར་ལྡེམ་ལྡེམ་ཞུ་སྟེ། ཐུགས་
ཀ་ནས་ཞུགས། ལྟེ་བར་བྱོན་པས་དེ་ཉིད་ཐིག་ལེ་སྔོན་པོ་གཅིག་ཏུ་སོང༌། དེའི་འོད་ཀྱིས་
ལུས་གང་བས། ཁྱེད་རང་རྣམས་ཀྱི་ལུས་ཀྱང་འོད་སྔོན་པོའི་ངོ་བོར་ལྡེམ་ལྡེམ་འདུག །ཉོན་
མོངས་པ་ཞེ་སྡང་སངས་ཀྱིས་དག་པར་མོས། ཁྱེད་རང་རྣམས་ཀྱི་ལྟེ་བར་ཏྲཾ་སེར་པོ་དེ་ལས་
འོད་ཟེར་སེར་པོ་འཕྲོས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡོན་ཏན་
གྱི་བྱིན་རླབས་ཐམས་ཅད་ཏྲཾ་སེར་པོའི་རྣམ་པར་བསྡུས། ལྟེ་བའི་ཏྲཾ་ལ་ཐིམ། ཏྲཾ་དེ་ཉིད་འོད་
ཟེར་སེར་པོར་ལྡེམ་ལྡེམ་ཞུ་སྟེ། སྤྱི་བོ་ནས་ཞུགས། ལྟེ་བར་བྱོན་པས་དེ་ཉིད་ཐིག་ལེ་སེར་
པོ་གཅིག་ཏུ་སོང༌། དེའི་འོད་ཀྱིས་ལུས་གང་བས། ཁྱེད་རང་རྣམས་ཀྱི་ལུས་ཀྱང་འོད་སེར་
པོའི་ངོ་བོར་ལྡེམ་ལྡེམ་འདུག །ཉོན་མོངས་པ་ང་རྒྱལ་དང་སེར་སྣ་སངས་ཀྱིས་དག་པར་མོས།
ཞེས་སོགས་འདོན་པ་སྤོས། ཁྱེད་རང་རྣམས་ཀྱི་སྤྱི་བོར་ཨ་ལྗང་ཁུ་དེ་ལས་འོད་ཟེར་ལྗང་ཁུ་འཕྲོས།
སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་འཕྲིན་ལས་ཐམས་ཅད་ཨ་ལྗང་ཁུའི་
20-1-310


རྣམ་པར་བསྡུས། སྤྱི་བོའི་ཨ་ལ་ཐིམ། ཨ་དེ་ཉིད་འོད་ཟེར་ལྗང་ཁུར་ལྡེམ་ལྡེམ་ཞུ་སྟེ། སྤྱི་བོ་
ནས་ཞུགས། ལྟེ་བར་བྱོན་པས་དེ་ཉིད་ཐིག་ལེ་ལྗང་ཁུ་གཅིག་ཏུ་སོང༌། དེའི་འོད་ཀྱིས་ལུས་
གང་བས། ཁྱེད་རང་རྣམས་ཀྱི་ལུས་ཀྱང་འོད་ལྗང་ཁུའི་ངོ་བོར་ལྡེམ་ལྡེམ་འདུག ཉོན་མོངས་
པ་ཕྲག་དོག་སངས་ཀྱིས་དག་པའི་མོས་པ་མཛོད། དེ་ལྟར་ན་ཁྱེད་རང་རྣམས་ཀྱི་སེམས་ཉིད་
དྭངས་མ་ཡེ་ཤེས་ལྔ་ལྡན། བདེ་མཆོག་ལྷན་ཅིག་སྐྱེས་པའི་སྐུར་གསལ་སེང་ངེར་གྱུར་པ་ལ་
མཉམ་པར་བཞག་མཛོད།
གཉིས་པ་ནི། དཀྱིལ་འཁོར་གྱི་དབུས་སུ་རིན་པོ་ཆེའི་ཁྲི་ཡངས་ཤིང་རྒྱ་ཆེ་བའི་གདན་ལ་བླ་
མ་རྡོ་རྗེ་འཆང་ཆེན་ལ་ཡུམ་རྡོ་རྗེ་ཕག་མོས་འཁྱུད་པ། འཁོར་མཁའ་འགྲོ་མ་བཞིས་བསྐོར་བ་
ལ། མོས་གུས་ཀྱི་གདུང་ཤུགས་དྲག་པོ་དང་བཅས་ཏེ། ཁྱེད་རང་རྣམས་ཀྱི་ལུས་དང་ལོངས་
སྤྱོད་དུས་གསུམ་གྱི་དགེ་བའི་དངོས་པོ་དང་བཅས་པ་ཐམས་ཅད་བློས་ལིང་གིས་ཕུལ་ནས་
འདིའི་རྗེས་བཟློས་མཛོད། དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་བླ་མ་རིན་
པོ་ཆེས་སེམས་ཅན་ཐམས་ཅད་ཀྱི་དོན་དུ། བདག་ལ་བུམ་པའི་དབང་བསྐུར་དུ་གསོལ། ལན་
གསུམ། བླ་མའི་སྐུའི་སྨིན་མཚམས་ནས་འོད་ཟེར་དཀར་པོ་བྱུང༌། ཁྱེད་རང་རྣམས་ཀྱི་སྨིན་ཕྲག་
ཏུ་ཐིམ། ལུས་ཀྱི་སྡིག་སྒྲིབ་དག ཁྱེད་རང་རྣམས་ཀྱི་ལུས་ལྷ་སྐུ་གསལ་སྟོང་འཇའ་ཚོན་ལྟ་
བུར་གྱུར་པ་ལ་མཉམ་པར་ཞོག་མཛོད། ཡང་གསང་བའི་དབང་གི་དོན་དུ་འདིའི་རྗེས་བཟློས་
མཛོད། དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་བླ་མ་རིན་པོ་ཆེས། སེམས་ཅན་
ཐམས་ཅད་ཀྱི་དོན་དུ་བདག་ལ་གསང་བའི་དབང་བསྐུར་དུ་གསོལ། ལན་གསུམ། བླ་མ་ཡབ་
ཡུམ་གྱི་གསང་བའི་སྦྱོར་མཚམས་ནས། བྱང་ཆུབ་སེམས་ཀྱི་ངོ་བོ་འོད་ཟེར་དཀར་དམར་
འདྲེས་པ་བྱུང༌། ཁྱེད་རང་རྣམས་ཀྱི་ལྕེ་ལ་ཐིམ་པས། ངག་གིས་དྲི་མ་དག ལྷ་སྐུ་སྔ་མ་ལས་
ཀྱང་ཆེས་གསལ་བར་གྱུར་པ་ལ་མཉམ་པར་ཞོག་མཛོད། ཡང་ཤེས་རབ་ཡེ་ཤེས་ཀྱི་དབང་
20-1-311


གི་དོན་དུ་འདིའི་རྗེས་བཟློས་མཛོད། དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་
བླ་མ་རིན་པོ་ཆེས་སེམས་ཅན་ཐམས་ཅད་ཀྱི་དོན་དུ། བདག་ལ་ཤེས་རབ་ཡེ་ཤེས་ཀྱི་དབང་
བསྐུར་དུ་གསོལ། ལན་གསུམ། བླ་མའི་ཐུགས་ཀ་ནས་འོད་ཟེར་ཁ་དོག་སྣ་ལྔ་བྱུང༌། ཁྱེད་རང་
རྣམས་ཀྱི་སྙིང་གར་ཐིམ་པས། ཡིད་ཀྱི་སྡིག་སྒྲིབ་དག་ནས། ལྷ་སྐུ་གསལ་བ་རབ་ཀྱི་མཐར་
ཐུག་པར་གྱུར་པ་ལ་མཉམ་པར་ཞོག་མཛོད། ཅེས་བརྗོད། དབང་དེ་གསུམ་རེ་རེའི་མཐར་ལྷ་སྐུ་ལ་ཅུང་
ཟད་སེམས་འཛིན་དུ་འཇུག །ཡང་དབང་བཞི་པའི་དོན་དུ་འདིའི་རྗེས་བཟློས་མཛོད། དུས་གསུམ་
སངས་རྒྱས་ཐམས་ཅད་འདུས་པའི་ངོ་བོ་བླ་མ་རིན་པོ་ཆེས་སེམས་ཅན་ཐམས་ཅད་ཀྱི་དོན་དུ།
བདག་ལ་བཞི་པའི་དབང་བསྐུར་དུ་གསོལ། ལན་གསུམ། ཁྱེད་རང་རྣམས་ཀྱི་ལུས་སེམས་ཁོང་
ཀློད་ལ་གཤིས་ཅིར་ཡང་མ་གྲུབ་ཅིང་གདངས་གང་དུ་ཡང་འགག་པ་མེད་པ། ཐོལ་སྐྱེས་རང་
བྱུང་གི་ཤེས་པ་སོ་མ་འདི་ལ་བཟོ་བཅོས་མེད་པར་ལྷན་ནེ་མཉམ་པར་ཞོག་ཅིག །ཅེས་བརྗོད་ལ་
ཅུང་ཟད་བསྒོམ་དུ་གཞུག་གོ །དེ་ནི་སེམས་སྤྲོས་མེད་ལྷན་ཅིག་སྐྱེས་པའི་ཡེ་ཤེས་བྱ་བ། དབང་བཞི་
པའི་ཡེ་ཤེས་ལགས་སོ། །དེས་ཐོབ་པ་དོན་གྱི་དབང་བཞི་སོང༌། གསུམ་པ་མཐར་ཐུག་གསང་
བའི་དབང་བཞི་ཞུ་བའི་ཡོན་དུ་མཎྜལ་ཕུལ། ཞེས་བསྐུལ་ལ་སློབ་མས་མཎྜལ་ཕུལ།
དེ་ནས་མཐར་ཐུག་གསང་བའི་དབང་བཞི་འདི་གསུམ་སྟེ། སྟོང་པའི་གཞི་འཆའ་བ་དང༌། རྩ་ལམ་སྦྱང་བ་དང༌། དག་པའི་
ལྷ་སྐུར་བསྒོམ་པའོ། །དང་པོ་ནི། ཁྱེད་རང་ལྷ་སྐུར་གསལ་བའི་ལུས་ཀྱི་དབུས་སུ་རྩ་དབུ་མ་ཁ་དོག་
དཀར་བ། ཡར་རྩེ་ཚངས་བུག་དང༌། མར་རྩེ་གསང་གནས་སུ་ཟུག་པ་ཞིག་གསལ་བཏབ།
དབུ་མ་དེའི་ནང་སྙིང་གའི་ཐད་དུ་ཨ་དཀར་པོ་དྭངས་གསལ་འོད་ཀྱི་རང་བཞིན་ཅན་གསལ་
བཏབ། ངག་ཏུ། ཨ་ཞེས་ལན་མང་དུ་བརྗོད་ཅིག་བྱས་ལ། བརྗོད་དུ་གཞུག །ཨ་ལས་འོད་ཟེར་འཕྲོས། ཐོག་
མར་དབུ་མ་དང༌། དེ་ནས་རང་ལུས་གང༌། མཐར་རང་གཞན་སྣོད་བཅུད་ཐམས་ཅད་ཨ་ཡིག་
གི་འོད་ཀྱིས་ཁྱབ་པས། ཐམས་ཅད་འོད་དུ་ལྡེམ་ལྡེམ་འདུག་པ་ལ། ཅུང་ཟད་སེམས་གཏད་
20-1-312


པས། དེ་རྣམས་ཀྱང་ནམ་མཁའ་ལ་འཇའ་ཡལ་བ་བཞིན་དུ་གྱུར་པའི་ངང་དུ་ཅུང་ཟད་མཉམ་
པར་ཞོག་མཛོད། གཉིས་པ་རྩ་ལམ་སྦྱངས་བ་ནི། ཡང་ཁྱེད་རང་རྣམས་ལྷ་སྐུར་གསལ་བའི་ལུས་ཀྱི་
དབུས་སུ། རྩ་དབུ་མ་ཁ་དོག་དཀར་པོ་ཡར་རྩེ་ཚངས་བུག་དང༌། མར་རྩེ་གསང་གནས་སུ་
ཟུག་པ་ཞིག་གསལ་བཏབ། དབུ་མའི་ནང་སྤྱི་བོའི་ཐད་དུ་ཧཾ་དཀར་པོ་མགོ་བོ་ཐུར་དུ་བལྟ་
བ། མགྲིན་པའི་ཐད་དུ་ཨཱཿདམར་པོ་མགོ་བོ་གྱེན་དུ་བལྟ་བ། སྙིང་གའི་ཐད་དུ་ཧཱུཾ་མཐིང་ནག་
མགོ་བོ་ཐུར་དུ་བལྟ་བ། ལྟེ་བའི་ཐད་དུ་ཨཾ་དམར་སེར་མགོ་བོ་གྱེན་དུ་བལྟ་བ། སྤྱི་བོའི་ཧཾ་
ལས་འོད་ཟེར་གསལ་སེང་གིས་བྱུང༌། མགྲིན་པའི་ཨཱཿལ་ཕོག དེ་ལས་འོད་ཟེར་གསལ་སེང་
གིས་བྱུང༌། སྙིང་གའི་ཧཱུཾ་ལ་ཕོག །དེ་ལས་འོད་ཟེར་གསལ་སེང་གིས་བྱུང༌། ལྟེ་བའི་ཨཾ་ལ་ཕོག།
ལུས་སེམས་ཐམས་ཅད་བདེ་ཆམ་ཆམ་སོང༌། ཡང་འོད་ཟེར་ཡར་ལོག་སྟེ་སྔར་གྱི་རིམ་པས་
ལུགས་བཟློག་ཏུ་སོང་སྟེ། སྤྱི་བོའི་ཧཾ་གི་བར་དུ་གསོས། དེ་ལྟར་ཡས་རིམ་དང་མས་རིམ་དུ་
འཕྲོས་པའི་འོད་ཟེར་དེ་རྣམས་ཀྱི་རྩ་གནས་ཐམས་ཅད་གང༌། འཁོར་ལོ་བཞི་ལ་སོགས་པའི་
རྩ་མདུད་ཐམས་ཅད་གྲོལ། རྩ་ནང་ཐམས་ཅད་འོད་ཟེར་གྱིས་གང་བའི་རྐྱེན་གྱིས་རྩ་རྣམས་
ཀྱང་འཇའ་འོད་དུ་ལྡེམ་ལྡེམ་འདུག་པར་བསམ་མོ། །
གསུམ་པ་ལྷ་སྐུར་བསྒོམ་པ་ནི། ཡང་ཁྱེད་རང་རྣམས་བདེ་མཆོག་ལྷན་ཅིག་སྐྱེས་པའི་སྐུ་འཇའ་
ཚོན་ལྟ་བུར་གསལ་བའི་རྡོ་རྗེ་ནོར་བུའི་ནང་དུ་ཧཱུཾ་སྔོན་པོ་མགོ་བོ་གྱེན་དུ་བསྟན་པ། ཧཱུཾ་གི་
རྩེ་མོ་ལ་ཐིག་ལེ་དམར་པོ་སྲན་མ་ཙམ་གྱིས་མཚན་པ། སྤྱི་བོར་ཧཾ་དཀར་པོ་མགོ་བོ་ཐུར་དུ་
བསྟན་པ་ཧཾ་གི་རྩེ་མོ་ལ་ཐིག་ལེ་དཀར་པོ་སྲན་མ་ཙམ་གྱིས་མཚན་པ། དེ་ནས་འོག་རླུང་ཅུང་
ཟད་འཐེན་པའི་རྐྱེན་གྱིས་ཧཱུཾ་དེ་ཡར་ཡོང་བས་གསང་བའི་དབང་པོ་ཕྱི་ནང་བཟློག་པ་བཞིན་
ཏུ། ཧཱུཾ་གིས་འཁྲིད་ནས་ཡར་བྱུང་སྟེ། ཧཱུཾ་སྙིང་གར་སླེབས་ཉོན་མོངས་པ་འདོད་ཆགས་དག།
སྟེང་རླུང་ཅུང་ཟད་མནན་པས་སྤྱི་བོའི་ཧཾ་སྙིང་གར་སླེབས། ཉོན་མོངས་པ་གཏི་མུག་དག་
20-1-313


གཉིས་པོ་སྙིང་གར་འཛོམས་པས། ཞེ་སྡང་རང་དག་ལ་སོང་བར་བསྒོམས་ཤིག །མཐར་ཐུག་
གསང་བའི་དབང་གི་སྐབས་དེར། དེ་མན་ཆད་ནི་སྔོན་འགྲོ་གདམས་ངག་དབང་དང་འབྲེལ་བ་ཞེས་
བྱ་བ་ཡིན་ལ། ད་ནི་དངོས་གཞི་དབང་གདམས་ངག་དང་མ་འབྲེལ་པ་ནི། ཁྱེད་རང་རྣམས་
ཀྱི་སྙིང་གའི་ཧཾ་ཡིག་དེ་ཐིག་ལེ་དཀར་པོ་ལ་ཐིམ། སྙིང་ཀའི་ཧཱུཾ་ཡིག་དེ་ཐིག་ལེ་དམར་པོ་ལ་
ཐིམ། ཐིག་ལེ་དཀར་དམར་དེ་གཉིས་སྙིང་གར་འབྲོས་འདེད་ཀྱི་ཚུལ་དུ་འཁོར་བ་ལ་སེམས་
གཏོད་ལ་འདི་ཐམས་ཅད་སྒྱུ་མ་ལྟ་བུ་ཡིན་སྙམ་དུ་འདུན་པ་སྦྱོངས་ཤིག །དེ་བུམ་དབང་ཡིན།
ཐིག་ལེ་གཉིས་པོ་སྙིང་གར་འཁོར་བས་གཅིག་རྗེས་གཅིག་གིས་ཟིན་པའི་ཚུལ་གྱིས་རིག་
རིག་འདུག་པ་ལ་སེམས་གཏོད་ལ་སྒྱུ་མའི་འདུན་པ་སྦྱོངས་ཤིག །དེ་གསང་དབང་ཡིན། དེ་
ལྟར་ཐིག་ལེ་གཉིས་རེག་པས་ལུས་སེམས་བདེ་བས་ཁྱབ་པ་ལ་སེམས་གཏོད་ལ་སྒྱུ་མའི་
འདུན་པ་སྦྱོངས་ཤིག །དེ་ཤེར་དབང་ཡིན། ཐིག་ལེ་གཉིས་པོ་གཅིག་ལ་གཅིག་ཐིམ་ནས་
ནམ་མཁའ་ལ་འཇའ་ཡལ་བ་ལྟར་གྱུར་པའི་ངང་དེར་གང་ཡང་སྒོམ་དུ་མེད་བསམ་དུ་མེད་
པའི་ཚུལ། རིག་པ་གཅེར་བུ་བརྟེན་མེད་ཀྱི་ངང་དུ་རང་གར་ཞོག་ཅིག །དེ་དབང་བཞི་པ་ཡིན།
སྤྲོས་བྲལ་དེའི་ངང་ལས་བདག་དང་སྣང་བ་ཐམས་ཅད་ལྷ་སྐུ་འཇའ་ཚོན་ལྟ་བུའི་ཟུང་འཇུག་
ཏུ་གསལ་ཐོབ་ལ་མཉམ་པར་བཞག་གོ །དེ་དག་གིས་གནས་སྐབས་སུ་ཐོབ་པའི་དམ་ཚིག་
དང་སྡོམ་པ་བསྲུང་སྡོམ་ཚུལ་བཞིན་དུ་བགྱིད་སྙམ་པས་འདིའི་རྗེས་བཟློས་མཛོད་ཅིག །གཙོ་
བོའི་ཇི་ལྟར་བཀའ་སྩལ་པ། །དེ་དག་ཐམས་ཅད་བདག་གིས་བགྱི། ། ལན་གསུམ། དབང་ཟབ་
མོ་ལེགས་པར་ཐོབ་པའི་བཀའ་དྲིན་གཏང་རག་ཏུ་མཎྜལ་འབུལ། ༀ་བཛྲ་བྷུ་མེ་ཨ་ཧཱུཾ། མཎྜལ་
རྒྱས་བསྡུས་སྐབས་དང་སྦྱར། ལུས་ལོངས་སྤྱོད་དུས་གསུམ་དགེ་བའི་དངོས་པོ་ཐམས་ཅད་བླ་མ་དང་
དཀྱིལ་འཁོར་གྱི་ལྷ་ཚོགས་ལ་འབུལ། ཆ་ཤས་ནས་ལོངས་སྤྱད་དུ་གསོལ་སྙམ་པས་འདིའི་
རྗེས་བཟློས་མཛོད། དེང་ནས་བརྩམས་ཏེ་བདག་བྲན་དུ། ཁྱེད་ལ་བདག་ནི་འབུལ་ལགས་
20-1-314


ན། ཁྱོད་ཀྱིས་སློབ་མར་བཟུང་བ་དང༌། །ཆ་ཤས་ཀྱང་ནི་སྤྱད་དུ་གསོལ། །ལན་གསུམ་མོ། །སྒྱུ་
ལུས་དབང་མོ་ཆེའི་དབང་ལེགས་པར་ཐོབ་ནས་རང་གཞན་གྱི་དོན་རྒྱ་ཆེན་པོ་མཛད་པར་ཞུ།
བསོད་ནམས་འདི་ཡིས་ཐམས་ཅད་སོགས། སྒྲོལ་བར་ཤོག །ཚོགས་ཕུད་འབུལ་བ་ནས། ཚོགས་ལྷག་གི་
བར་ཚོགས་འཁོར་གྱིས་བྱ་བ་རྣམས་ཀྱང་སྐབས་འདིར་བྱེད།
རྗེས་ཆོག་མཆོད་པ་ཁ་གསོས། དེ་ནས་བྱིན་རླབས་བྱ། ཨརྒྷཾ་ནས་ཤཔྟའི་བར་གྱིས་མཆོད། སྙིང་པོ་སོ་སོའི་མཐར་
འབྲུ་གསུམ་བཏགས་ལ་ནང་མཆོད་འབུལ། སངས་རྒྱས་ཀུན་གྱིས་སྐུ་གསུང་ཐུགས་སོགས་ཀྱིས་བསྟོད། ཡིག་
བརྒྱ་ལན་བདུན་བཟླས། གང་ཡང་བདག་བློ་གཏི་མུག་པས། །སོགས་ཀྱིས་བཟོད་པར་གསོལ། ༀ་ཁྱེད་ཀྱིས་
སེམས་ཅན་དོན་ཀུན་མཛོད། །སོགས། གཤེགས་སུ་གསོལ། སེམས་ཅན་ཐམས་ཅད་བདེ་གྱུར་ཅིག།
སོགས་ཀྱི་སྨོན་ལམ་བཏབ། ཡོན་ཏན་རབ་རྫོགས་སོགས་ཀྱི་བཀྲ་ཤིས་བརྗོད། དགེ་བའི་ཚོགས་རྣམས་
བསགས་པ་ཀུན། །བདག་གིར་ཡོངས་སུ་བཟུང་མེད་པར། །སེམས་ཅན་མ་ལུས་ཀུན་དོན་དུ། །
ཆོས་དབྱིངས་བླ་ན་མེད་པར་བསྔོ། །སོགས་ཀྱི་བསྔོ་བ་བྱའོ།། །།ཞེས་སྒྱུ་ལུས་དབང་མོ་ཆེའི་ལག་ལེན་འདི་ཡང༌།
རྒྱལ་ཁམས་པ་ཏཱ་ར་ནཱ་ཐས་སྨྲས་པའོ། །མངྒ་ལཾ། བཀྲ་ཤིས།
ཛམ་སྨོན་ཡོད།
20-1-315


༄༅། །གསེར་ཆོས་ཕྱི་མ་བཞིའི་སྙིང་པོ་སོགས་བཞུགས།
༄༅། །ན་མོ་མཧཱ་མུ་དྲ་ཡ། ཕྱག་ཆེན་གའུ་མར་གྲགས་པའི་སྙིང་པོ་ནི། ཐུན་མགོར་
སྐྱབས་སེམས། རང་ལྷ་སྐུ་བླ་མའི་རྣལ་འབྱོར་རྣམས་ཆོས་དྲུག་དང་མཚུངས། མཇུག་ཏུ་བསྔོ་
བ་སྤྱི་དང་འདྲའོ། །ཉམས་ལེན་དང་པོ་ལ་སྔོན་འགྲོ་རང་བབས་རྣམ་གསུམ་ནི། ལུས་གནད་
བཅས་རླུང་རོ་ལན་གསུམ་བསལ། དེ་ནས་ལུས་ལྷོད་བདེ་བ། ངག་རླུང་རང་གར་བཞག།
སེམས་མ་བཅོས་པ་ཧད་དེ། དྲན་པ་ཏུར་རེ་བྱ། ཡང་ན་ཐོལ་སྐྱེས་རྦད་གཅོད་དམ། ཡེངས་
པའི་ངོ་བོ་དེ་ཀ་ལ་ཅེ་རེ་ལྟ། རྟོག་པ་རྒྱ་འབྱམས་བྱུང་ན་ཞེ་བཅད་དང་འདུན་པ་ཤུགས་ཅན་
དང༌། དྲན་པ་རྟག་ཏུ་བརྟན་པ་སྒྲིམས། ཐུན་མཚམས་ཀུན་དུ་སེམས་སྣང་དབྱེར་མེད་ལ་རང་
གར་ཧད་དེ་འཇོག་པའི་སྒོམ་དང༌། མ་བྲལ་བྱ་བྱེད་སྤྱོད་ལམ་ཆོས་སྤྱོད་ཀུན་དང་འདྲེས་ཏེ་
དྲན་འདུན་གལ་ཆེའོ། །དེ་ནས་རགས་ཕྲ་རྒྱང་རིང་ཐུང༌། གྱེན་ཐུར་བར་གསུམ། མདོ་འདོན་
སྔགས་བཟླ། གཏམ་སྣ་ཚོགས་སྤྱོད་ལམ་ཀུན་དང༌། ཁྱད་པར་རྟོག་པ་ཆོམས། དཀའ་ཚད་ལ་
རྩལ་ཕྱོགས་མེད་དུ་སྦྱངས་གསུང༌། གཙོ་བོར་དམིགས། རྟེན་གང་ཡང་མེད་པར་ཆེ་རེ་འཇོག།
ནང་དུ་གཞུག་ལ་སེམས་རང་ལ་ལྷན་ནེ་ལྟ། རྣམ་རྟོག་ཆེད་དུ་དགག་སྒྲུབ་མེད་ངོ་མི་ཤེས་སུ་
ཡེ་མ་སོང་བ་གལ་ཆེའོ། །དེ་ན་སེམས་ཚོལ་བྱ་སྟེ། ཇི་ལྟར་སྐྱེ་འགག་གནས། ངོ་བོ་གཅིག་
བཞིར་གཅིག་ལུས་སམ་མིང་ངམ། སྤྱི་བོའི་དངོས་པོ་གང་ལ་འདུག །གཅིག་གམ། ཐ་དད་
དུ་འདུག །གཟུགས་སུ་འདུག་གམ། ཤེས་པའམ་ཅིང་མེད་དུ་འདུག་ཆེས་ཁ་ནང་དུ་ཕྱོགས་
ལ་རང་གིས་རང་ལ་བརྡ་སྦྱོར་རོ། །དངོས་པོ་ནི་སྐྱོན་བཞི་རང་གྲོལ་ནི། ལར་ཕྱག་ཆེན་བྱ་བ་
བཟང་བཟང་སྐད་པ། བདེ་བདེ་མོ། སྟོང་སྟོང་པོ། གསལ་གསལ་མོ་ཞིག་གི་ཆེད་འཛིན་གྱིས་
20-1-316


ཕུད་དུ་བཏང༌། དོན་མེད་དུ་རང་བཞག་པས་བཅིངས་པ་ཡིན། དེ་ཐ་མལ་ཤེས་པ་ཡེངས་མེད་
རྗེད་ཆེ་རེ་བ་ངོས་བཟུང་མེད་པ་ལ་གསལ་རིག་གེ་པ། སྣང་བ་ཅི་ཡང་འཆར་བ་ལ། གནས་
རུང་འགྱུ་རུང་རང་སྟོང་རྩ་བྲལ་དུ་ཐག་ལེ་བ། སོ་ཁད་དེ་བ། ལྷུག་གེ་བ། ཡེ་རེ་བ། ཅི་སྣང་
ཡང་ཆ་ལེ་བ། འདི་ཀ་བཟང་ངན་གང་གིས་ཡང་མ་བཅོས་པ། བཅོས་རུང་དེ་ཀ་ལ་མ་འདའ་
བའི་རང་གྲོལ་འདི་ཀ་ལ། འཁོར་འདས་སྣང་བ་ཐམས་ཅད་འདིའི་ཆོ་འཕྲུལ་ཙམ། འདི་
དང་ངོ་བོ་ཡིན་མིན་ཡོང་མེད་ལས་ཡེ་ནས་འདས་འདི་ཉེ་གྲགས་ངོ་མ་ཤེས༌། ཟབ་གྲགས་
ངོ་མ་ཟིན། སླ་གྲགས་ཡིད་མ་ཆེས་བཟང་གྲགས་བློར་མ་ཆུད་པས་འཁོར་བར་འཁྱམས་པ་
ཡིན། རྒྱུན་དུ་ངོ་ཤེས་ཀྱི་དྲན་པ་དང་མ་བྲལ་བར་ཉོན་མོངས་གང་སྐྱེར་རང་སྟོང་ཚུལ་མི་ཐུབ་
ཝལ་ལེ་བ་འཁྱེར་བ་གནད། ཡང་སྐབས་སུ་ཉོན་མོངས་པའི་ཡུལ་ཡིད་ལ་བྱས་ནས་ཆེད་
དུ་བཅུག་ལ། དེ་ཁའི་ངོ་ལ་ཆེར་རེ་འཇོག་དགེ་མི་དགེ་ལུང་མ་བསྟན་གྱི་སེམས་ཅི་བྱུང་ལ་
དེ་ལྟར་བསྐྱང་ངོ༌། །རྗེས་སྐུ་གསུམ་རང་ཤར་ནི། འདི་ལ་སྒོམ་བོགས་ཐོན་ནས། སྣང་བ་ཅི་
ཤར་ལ་སེམས་ཀྱི་རྩལ་གང་ཡང་ཅི་ཡང་འཆར་ཀྱང༌། རྣམ་རྟོག་རང་ཁ་གདོད་མ་ནས་ཡེ་སྐྱེ་
རྒྱུ་རང་མེད་པ། སེམས་རང་ངོ་ཤེས་པའི་ཐག་ཆོད་རྩལ་ཕྲལ་དུ་འོང་རྟོགས་འོངས། མཉམ་
རྗེས་དབྱེར་མེད་དུ་འདྲེས། རྒྱ་མ་ཆད། ཕྱོགས་སུ་མ་ལྷུང་བའི་རྩལ་འགག་མེད་གུ་ཡངས་རྒྱ་
འབྱམས་ཉམས་ལེན་གྱི་སྙིང་པོ་ཕྱོགས་མེད་དུ་འཆར་བ་དང༌། སྤྱོད་ལམ་ཐོ་ཆོ་དང༌། སྒོམ་
ཚོགས་ཚོལ་དུ་མི་འགྲོ་བ་ཡིན། དེ་ལ་དང་པོ་ནས་སྣང་སྟོང་དབྱེར་མེད། སྐུ་གསུམ་རང་གྲོལ་
ཏེ། དེའི་དུས་རང་ཤར་པ་ཡིན། ཡེངས་མེད་དང་ཐག་ཆོད་ཀྱིས་སྐྱངས་པ་གལ་ཆེ། དམིགས་
པ་མེད་པའི་རང་མདངས་མ་འགགས་པའི་ངང་ནས་ཐབས་ལམ་རྣམས་དང༌། མོས་གུས་དང་
སྙིང་རྗེ་བོགས་འདོན། སྤྲོས་བཅས་ཀྱི་དགེ་བ་ཐམས་ཅད་སྤྲོས་མེད་རྩ་བྲལ་ངང་ནས་བོགས་
ཕྱུངས་པའི་རྡོ་རྗེ་འཆང་མངོན་དུ་བྱེད་པ་གདོན་མི་ཟའོ། །ཕྱག་རྒྱ་ཆེན་པོའི་སྙིང་པོ་བསྟན་པ་
20-1-317


འདི་ཡང་དད་ལྡན་སློབ་མ་འགས་བསྐུལ་ཏེ་དགེ་སློང་སྤོང་པ་པར་རྫུ་བ་ཀུན་དགའ་སྙིང་པོ་ཏཱ་
ར་ནཱ་ཐས་གྲུབ་པའི་གནས་མཆོག་བསམ་སྡིངས་སུ་སྦྱར་བ་དགེ་ལེགས་འཕེལ།། །།
༄༅། །ༀ་སྭཱ་སྟི་པྲ་ཛ་བྷྱཿ མཐུ་སྟོབས་དབང་ཕྱུག་འཇིག་རྟེན་ཀུན་ལ་དབང་བསྒྱུར་བ། །
གང་གི་སྐུ་ལ་ལྷ་རྫས་མཆོག་འདི་འབུལ་ལགས་ན། །སྔོན་གྱི་ཁས་བླངས་དྲན་པར་གྱིས་
ཤིག་རྒྱལ་བ་ཡིས། །བསྟན་ལ་གནོད་བྱེད་འདི་དག་མྱུར་དུ་བརླག་པར་མཛོད། །འགྲོ་བ་ཀུན་
གྱི་མགོན་གྱུར་པ། །རྒྱལ་བའི་བསྟན་པ་རིན་པོ་ཆེ། །བཤེས་གཉེན་དམ་པར་བཅས་པ་དག།
ཁྱོད་ཀྱི་ཡོངས་སུ་སྐྱོངས་པར་རིགས། །མཧཱསམཡནནཧཱུཾ། མངྒ་ལ་བསྟིར་ཀུ་རུ། བརྩེ་ཆེན་
གྱི་ཆོས་བསྲུངས་ལའོ། །
༈ ༀ་སྭཱ་སྟི་ཛ་སེབྷབནྟུམཧཱཀཱལྱཾ། མིག་སྨན་རྗེས་འགྲོ་དུས་མཐའི་རླུང་ཤུགས་ཅན། །
སྟོང་གསུམ་སྐད་ཅིག་གིས་འཁོར་བདུད་ཀྱི་སྡེ། །མ་ལུས་འཐག་ལ་མངོན་རྩོལ་རྟ་མཆོག་
འདི། །རྡོ་རྗེ་ནག་པོ་ཆེན་པོ་རྟེན་དུ་འབུལ། །དགེ་ལ་བར་གཅོད་མ་ལུས་བདུད་དཔུང་དང༌། །
ཆོས་སྤྱོད་ལ་འཚེ་བསྟན་དགྲ་གདུག་ཅན་རྣམས། །དྲག་པོའི་མེ་ལྕེ་སྟོང་གིས་མི་བཟད་པ། །
མངོན་སྤྱོད་རྡོ་རྗེས་སྐད་ཅིག་ཉིད་ལ་སྒྲོལ། །སྲིད་མཚོ་བརྒལ་ཕྱིར་ཐར་འདོད་དོན་མཐུན་
གང༌། །དམ་ཆོས་གྲུ་ཆེན་གཟིངས་རྣམས་དམ་དུ་ཡང༌། །ཐུགས་རྗེའི་ཕྱག་གིས་རྗེས་བཟུང་ཕྱི་
ནང་གི ། འཇིགས་པ་ཀུན་ལས་གཡེལ་བ་མེད་དུ་སྲུངས། །ཏིང་སྐྱེས་བྲག་དཀར་མགོན་གྱི་དྲཀྴད་ལ་རྟ་
ནག་གི་གཟུངས་བཙུགས་པའི་ཚིག་གོ །མངྒ་ལཾ། ༀ་སམཛ།
20-1-318


༄༅། །རྣལ་འབྱོར་རྣམ་པ་གཉིས་ཀྱི་རྩ་བ་བཞུགས།
༄༅། །ༀ་སྭཱ་སྟི། དེ་ལ་ལམ་རྣམས་ཀྱི་རིམ་པ་མདོར་བསྡུས་པའི་དབང་དུ་བྱས་ཏེ།
ཡན་ལག་བདུན་པའི་རིམ་པའོ། །དེ་ཡང་ཕྱོགས་བཅུར་བཞུགས་པའི་རྫོགས་སངས་རྒྱས། །
སྲས་བཅས་འགྲོ་ལ་ཕན་མཛད་པ། །ནམ་མཁའ་ལྟ་བུའི་ཐུགས་མངའ་བ། །ཀུན་ལ་དང་
བས་ཕྱག་འཚལ་ལོ། །དེང་ནས་བརྩམས་ཏེ་དུས་རྟག་ཏུ། །བདག་དང་མ་ལུས་སེམས་ཅན་
རྣམས། །འདྲེན་པ་མཆོག་དང་མྱ་ངན་འདས། །འཕགས་པའི་ཚོགས་ལ་སྐྱབས་སུ་མཆི། ༡།
མེ་ཏོག་རྣམས་དང་བདུག་པ་མར་མེ་དྲི། །རྣམ་མང་ཞལ་ཟས་རོལ་མོ་གོས་རྣམས་དང༌། །
བྱས་དང་བྱེད་གྱུར་དགེ་བ་དཔག་མེད་པས། །རྣམ་འདྲེན་སྲས་དང་བཅས་པ་མཆོད་པར་
བགྱི། ༢ །རབ་མེད་འཁོར་བའི་རྒྱ་མཚོ་ཆེར་ལྷུངས་པའི། །རྨོངས་པ་བདག་དང་མཐའ་ཡས་
བདག་གིས་མས། །མི་དགེ་བཅུ་དང་མཚམས་མེད་ལྔ་ལ་སོགས། །ཉེས་པ་སྤྱད་པ་ཐམས་
ཅད་སོ་སོར་བཤགས། ༣ །སོ་སོ་སྐྱེ་བོ་ལམ་མ་ཞུགས་པ་དང༌། །རྒྱུན་ཞུགས་ཕྱིར་འོང་ཕྱིར་
མི་འོང་དགྲ་བཅོམ། །རང་རྒྱལ་རྒྱལ་བ་སྲས་དང་བཅས་རྣམས་ཀྱིས། །བྱས་དང་བྱེད་འགྱུར་
དགེ་ལ་རྗེས་ཡི་རང༌། ༤ །ཞི་བར་བཞེད་པའི་འབུམ་ཕྲག་བརྒྱ་པ་རྣམས། །སྲིད་པ་ཇི་སྲིད་
གནས་པ་དེ་སྲིད་བཞུགས། །ཉོན་མོངས་དུག་གིས་རྣམ་ཉམས་སྡུག་བསྔལ་གྱི། །ངན་སྐྱུགས་
ཁང་བུ་དག་ལ་རབ་ཆགས་པ། །འདི་དག་ཞི་བའི་དགའ་ཚལ་མཐོང་བའི་སླད། །བདུད་རྩི་
དམ་ཆོས་སྩོལ་ཞིག་བཅོམ་ལྡན་གྱི། ༥ །མ་ལུས་ཕྱོགས་བཅུའི་འདྲེན་པ་བདག་ལ་དགོངས། །
བདག་གིས་དེང་ནས་བརྩམས་ཏེ་བདག་གི་མ། །མི་རྟག་མཐའ་ཡས་འདི་རྣམས་ཡོངས་
བཟུངས་ཤིང༌། །དེ་ལ་གནོད་པ་ཅི་ཡང་མི་བགྱིའོ། །བདག་ནི་འཁོར་བའི་རྒྱ་མཚོ་འདིར་
20-1-319


མི་གནས། །ཞི་བའི་འབྲོག་དགོན་དེར་ཡང་བདག་མི་འགྲོ། །ལུས་པ་མེད་པའི་འགྲོ་རྣམས་
བྱང་ཆུབ་ཕྱིར། །བདག་ནི་བླ་མེད་བྱང་ཆུབ་དེར་ཐོབ་བྱ། ༦ །འདི་ལྟར་བགྱིས་དང་མ་ལུས་
དགེ་བ་ཡིས། །བླ་མེད་བྱང་ཆུབ་གསལ་བར་མཐོང་བར་ཤོག ༧ །དངོས་པོ་མེད་པའི་རང་
བཞིན་ནི། །ཐམས་ཅད་སྒྱུ་མ་ལྟ་བུ་སྟེ། །རྣལ་འབྱོར་པ་གང་དེ་རིག་འདོད། །དེས་ནི་འདི་ལྟར་
བསྒོམ་པར་བྱ། །གྲོང་ངམ་དགོན་པར་འདུག་ན་ཡང༌། །བྱང་ཆུབ་སེམས་ནི་མ་ཉམས་པས། །
བྱང་ཆུབ་སྦྱོད་པ་བླ་མེད་པ། །ཡིད་ཀྱིས་ཀྱང་ནི་རྟག་ཏུ་སྦྱོད། །འདི་ལྟར་ཁྱིམ་ནི་ཉེས་མང་
ཅན། །ནམ་ཡང་སྡིག་པའི་ལས་ཀྱི་གནས། །འཇོ་སྒེག་འཐབ་དང་གླག་ཅོར་ཅན། །རྟག་ཏུ་
ཟིལ་གྱི་གནོད་བྱེད་མང༌། །ཀྱེ་མ་ནམ་ཞིག་འདི་ལས་ཐར་འགྱུར་ཞེས། །བློ་ལྡན་དེ་ནི་དབེན་
པ་འཚོལ་བར་བྱེད། །ཉེས་མང་ཁྱིམ་ཏེ་གདོན་མི་ཟ་བར་སྤང༌། །གནོད་པ་མེད་པའི་ནགས་
སུ་དེ་འགྲོ་སྟེ། །མང་ངམ་ཉུང་ངུར་ཐོས་ཀྱང་རྒྱལ་སྲས་རྣམས། །རྟག་ཏུ་བསྒོམ་པ་ལྷུར་ལེན་
བྱས་པ་རྣམས། །ཐོས་པ་ཙམ་གྱིས་འདི་ལ་ཁེངས་པར་བྱེད། །དེ་ནི་འཚོ་བ་པ་བཞིན་རྣམ་
པར་ཉམས། །དེ་ནས་བློ་དང་ལྡན་པ་སྟེ། །དགེ་བའི་བཤེས་གཉེན་བསྟེན་པ་ཡིན། །དམ་པའི་
ཆོས་ནི་འཚོལ་བར་བྱེད། །མན་ངག་མཆོག་གི་ནོར་བླངས་ནས། །ནགས་འདབ་བབ་ཅོལ་སྐྱེ་
བོ་ཡིས། །ནམ་ཡང་བགྲོད་པ་མེད་པའི་གནས། །མི་མཆོག་དེ་ནི་དེར་སོང་ནས། །དྲང་པོའི་
ལུས་ཀྱིས་གནས་པར་བྱ། །སེམས་ཀྱིས་སེམས་ནི་བཟུང་བྱས་ནས། །འདིར་ནི་དཔའ་བོ་རྣམ་
པར་བསྡུད། །རྣམ་རྟོག་མང་པོ་རྣམ་ཉམས་ཆེ། །རྒྱ་མཚོའི་རླབས་བཞིན་ཞི་བར་བྱ། །ཡིད་
ནི་རྣམ་པར་གཡེངས་གྱུར་ན། །དེ་ཚེ་དྲན་པའི་འདུལ་བར་བྱ། །འདོད་ཡོན་སྤྱོད་བ་དྲན་ལ་
སོགས། །དེ་ཚེ་དཔལ་དང་ལུས་འདོད་པ། །འདུས་བྱས་ཡིད་ཙམ་གར་མཁན་དང༌། །དུས་
ཀྱི་སྤྲིན་པ་གློག་འགྱུ་མཚུངས། །འཁོར་བ་སྦྲུལ་གྱི་རོ་འཛིན་ན། །ཀྱེ་མ་བདག་ནི་གཡེངས་
པའི་གནས༌། །གཞན་ཡང་ཞེ་སྡང་འདོད་ཆགས་རྨོངས། །ཆོམ་རྐུན་འཇིགས་ཆེན་འདི་དག་
20-1-320


རྣམས། །བྱམས་དང་རྟེན་ཅིང་འབྲེལ་འབྱུང་དང༌། །མི་སྡུག་ཏིང་འཛིན་དཔུང་གིས་བཅོམ། །
སེམས་ནི་སྒོ་གཏན་བཅུག་པ་ལྟར། །རྣམ་རྟོག་རླུང་གིས་གཡོ་བ་མེད། །འདོད་པ་རྣམས་ལ་
དགར་མི་འགྱུར། །ཤིན་ཏུ་སྦྱང་བའི་བདེ་བ་ཐོབ། །དེ་ནས་ཐོས་པ་ཆེན་པོ་ལས། །ཤེས་རབ་
ཕ་རོལ་ཕྱིན་གང་གསུང༌། །དེ་ལས་འབྱུང་བཞིན་བློ་ལྡན་ནི། །གདམ་ངག་ལྡན་པས་བསྒོམ་
པར་བྱེད། །སཱ་ལུའི་མྱུ་གུ་འཇའ་ཚོན་ལྟར། །རྟེན་ཅིང་འབྱུང་བ་ངོ་མཚར་རྨད། །ཆོས་རྣམས་
བདེན་པའི་སྟོང་པའོ་ཞེས། །ཡང་ཡང་རང་བཞིན་དེ་སྒོམ་བྱ། །དྲན་དང་ཤེས་བཞིན་ལྡན་པ་
ཡིས། །སྤྱོད་ལམ་ཀུན་ཏུ་བག་ཡོད་བརྟེན། །བྱ་བ་ཀུན་ལའང་ཇི་ཞིག་ལྟར། །སེམས་མི་གཡོ་
ཞིང་ཆོས་རྣམས་འབྱེད། །དེ་ནས་གཞན་ཡང༌། བློ་ལྡན་ཁྱིམ་ན་འདུག་གམ། ཡང་ན་བས་
མཐར་འདུག་ཀྱང་རུང༌། མཉམ་པར་འཇོག་ཀྱང་རུང༌། འདོད་པ་ལ་སྤྱོད་ཀྱང་རུང༌། ཡུན་
རིང་པོར་བསླབ་པའམ། ལས་དང་པོ་པ་ཡིན་ཡང་རུང་སྟེ། རེ་ཞིག་སེམས་ཅན་ཐམས་ཅད་ལ་
སྙིང་རྗེ་བསྒོམ་པར་བྱའོ། །གང་ཅི་ཡང་རུང་བ་དག་ལ་བསད་པར་སེམས་པ་རྣམས་ལ་དགེ་
བའི་བཤེས་གཉེན་ནམ་ཕ་དང་མར་འདུ་ཤེས་པར་བྱའོ། །གལ་ཏེ་དེ་ཁོང་དུ་ཆུད་པར་གྱུར་
ན། གཟུགས་བརྗེ་ཞིང་བསྒོམ་པར་བྱ་སྟེ། ཡང་ན་རེ་ཞིག་བྱམས་པ་བསྒོམ་ཞིང་ཕྱི་ནས་ངེས་
པར་སྙིང་རྗེ་ལ་ནན་ཏན་དུ་བྱ་སྟེ། གཞན་དུ་ན་བྱང་ཆུབ་ཀྱི་སེམས་རྒྱས་པར་མི་འགྱུར་རོ། །དེ་
ལྟར་འགྲོ་བ་ཀུན་བྱང་ཆུབ་ལ་འགོད་པར་འདོད་པས་སྙིང་རྗེ་ལ་གོམས་པར་བྱ་ཞིང༌། གནོད་
པ་དང་སྡུག་བསྔལ་བཟོད་པ་ནན་ཏན་དུ་འབད་ནས། རིམ་གྱིས་ན་ཕ་རོལ་དུ་ཕྱིན་པ་དྲུག་ལ་
ཡང་དག་པར་བསླབ་པར་བྱའོ། །གཞན་ཡང་བྱང་ཆུབ་སེམས་དཔའ་སྙིང་རྗེ་ལ་བསླབ་པར་
བྱེད་པ་རྣམས་འཕགས་པ་སྤྱན་རས་གཟིགས་དབང་ཕྱུག་ལ་མཆོད་པར་བྱའོ། །བརྗོད་པར་
བྱའོ། །བསྙེན་པར་བྱ་ཞིང་བསྒོམ་པར་བྱའོ། །ལམ་མདོར་བསྡུས་པ་རྫོགས་སོ། །བདག་གིས་
འདི་བྲིས་དགེ་བ་ཡིས། །སེམས་ཅན་ཚོགས་རྣམས་མ་ལུས་པ། །མྱུར་དུ་བླ་ན་མེད་བྱང་ཆུབ། །
20-1-321


རྟག་ཅིང་བདེ་བ་མྱུར་ཐོབ་ཤོག། །།དགེ་སློང་ཀུན་དགའ་སྙིང་པོས་བྲིས། །དགེའོ། །
དེར་བརྟེན་མཛད་བཟང་འོད་སྟོང་གིས། །བསྟན་འགྲོའི་ལེགས་ཚོགས་པདྨོའི་ཚལ། །
ཕྱོགས་དང་དུས་སུ་ཡོངས་བཞད་དེ། །ཕན་བདེའི་གཟི་འོད་འབར་གྱུར་ཅིག །
20-1-322


༄༅། །རྣལ་འབྱོར་པ་རྣམ་པ་གཉིས་ཀྱི་གསལ་བྱེད་ཀྱི་
ཊཱི་ཀ་བི་ཛཱ་ཧ་རི་པཱ་རུ་བཞུགས།
༄༅། །ན་མོ་བུདྡྷ་ཡ། གང་གིས་ཡང་དག་རྫོགས་སངས་མངོན་དུ་བགྱིས་རྣམས་དང༌། །
འདི་ན་བདེ་དགེ་ཕྲ་མོ་གང་དེའང་སངས་རྒྱས་དྲིན། །བདག་གིས་ནུས་མིན་ཅུང་ཟད་སྤོབས་
པའང་རྒྱལ་ཉིད་ཀྱིའོ། །དེ་ཕྱིར་དེ་ལ་ཕྱག་འཚལ་ནམ་ཡང་གཟིགས་པའི་རིགས། །དེ་ཡང་
ཇི་སྐད་དུ། ཤཱན་ཏ་དེ་བའི་ཞལ་སྔ་ནས། ཇི་ལྟར་མཚན་མོ་མུན་ནག་སྤྲིན་རུམ་ན། །གློག་འགྱུ་
སྐད་ཅིག་རབ་སྣང་སྟོན་པ་ལྟར། །དེ་བཞིན་སངས་རྒྱས་མཐུ་ཡིས་བརྒྱ་ལམ་ན། །འཇིག་
རྟེན་བསོད་ནམས་བློ་གྲོས་ཐང་འགའ་འབྱུང༌། །ཞེས་པ་ལྟར། སངས་རྒྱས་ཀྱི་མཐུས་ལུས་
ཅན་རྣམས་ལ་ཕན་པའི་བློ་གྲོས་སམ་དགེ་བའི་སེམས་འགའ་འབྱུང་སྟེ། དེའི་ཕྱིར་འདི་ཡང་
སངས་རྒྱས་ཀྱི་མཐུར་བལྟའོ། །དེ་ལ་འདིའི་དགོངས་པ་དང༌། བརྗོད་བྱ་དང༌། དགོས་པའི་
དགོས་པ་རྣམས་ཅི་ཞེ་ན། སྙིང་རྗེ་ཆེ་དང་སྟོང་པ་ཉིད་＜བདེ་བླག་ཏུ་རྟོགས་པས་＞བསྒོམ་པ། དེ་
འདིར་དགོས་པ་ཉིད་ཡིན་＜བརྗོད་བྱ་སྟོང་ཉིད་སྙིང་རྗེ་＞སྟོན་པར་བྱེད། གཞན་＜སྙིང་རྗེ་དགོས་＞
དག་སྒྲོལ་བའི་＜ཕྱིར་ཐོས་པའི་＞བྱང་ཆུབ་ཆེད་དུའོ། །＜སྟོང་པ་ཉིད་དང་སྙིང་རྗེའི་རྣམ་གཞག་བསྟན་
པའི་དེ་གོ་བར་འགྱུར་ལ་གོ་བ་དེ་རྣམས་དགོས་ཤིང༌། སྒོམ་པས་བླ་མེད་ཐོབ་པར་འགྱུར་ཏེ། དེའི་ཕྱིར་སྒོམ་པ་ཉིད་འབྲེལ་བར་
བྱའོ། །＞སྒོམ་པ་ལྷུར་བྱེད་ཐོས་ཙམ་འདི་ལ་མིན། །ཞེས་བྱའོ། །དེ་ཡང་ཇི་སྐད་དུ། ཚེ་ནི་ཡུན་
ཐུང་ཤེས་བྱའི་གནས་ཀྱང་མང༌། །ཚེ་ཡི་ཚད་ཀྱང་ཇི་ཙམ་མི་རྟོགས་པས། །ངང་བས་ཆུ་ལ་འོ་
མ་ལེན་པར་ལྟར། །རང་གི་འདོད་＜འདིའི་མཚམས་ནས་མ་ཡིག་གི་ལྡེབ་གཉིས་པ་མ་རྙེད་པའི་སྐབས་འདིར་སྐོ་
རྒྱུ་ལྷག་ཡོད་པའི་རྗེས་སོར་མ་ཡིག་རྙེད་སྐབས་སྐོ་དགོས་ལགས།＞ ཁྱིམ་ན་སོགས་ཀྱིས་གང་དུ་བསྒོམ་པའི་
20-1-323


གནས་དང༌། བསྒོམ་པ་པོའི་གང་ཟག་དང༌། རེ་ཞིག་སེམས་ཅན་ཐམས་ཅད་ལ་སོགས་པས།
ཇི་ལྟར་བསྒོམ་པ་ལ་འཇུག་པ་སྟེ། སྙིང་རྗེ་རྐྱེན་གཞན་གྱིས་མི་འཕྲོག་པར་བྱ་བའི་ཐབས་
དང༌། མ་སྐྱེས་པ་བསྐྱེད་པའི་ཐབས་དང༌། བྱང་ཆུབ་ཀྱི་སེམས་ཀྱི་མཐུན་ཕྱོགས་རྣམས་ལ་
ནན་ཏན་ཏུ་བསླབ་དགོས་པར་བསྟན་པ་དང༌། སྤྱོད་པ་ཕ་རོལ་ཕྱིན་པ་དྲུག་ལ་སྦྱོར་བ་དང༌།
ཇི་ལྟར་གསང་སྔགས་ལས་འབྱུང་བ་ལྟར། སྙིང་རྗེ་དང་བྱང་ཆུབ་ཀྱི་སེམས་རིན་པོ་ཆེ་བསྐྱེད་
པའི་ཐབས་གཞན་བསྟན་པ་རྣམས་ཏེ། བསྒོམ་པར་བྱ་ཞེས་པའི་བར་དུ་སྦྱར་རོ། །མཇུག་གི་
དོན་ནི་ལམ་མདོར་བསྡུས་རྫོགས་སོ་ཞེས་བྱའོ། །བདག་གི་འདི་བྲིས་སོགས་ནི་དགེ་བ་བསྔོ་
བའོ། །ད་ནི་ཚིག་གི་དོན་ཅུང་ཟད་བརྗོད་པར་བྱ་སྟེ། དེ་ལ་ལམ་རྣམས་ཀྱི་རིམ་པ་མང་དུ་ཡོད་
པ། རྣལ་འབྱོར་རྣམ་པ་གཉིས་མདོར་བསྡུ་བའི་དབང་དུ་བྱས་ཏེ། ནན་ཏན་དུ་བྱེད་པར་འདོད་
པས་རེ་ཞིག །སེམས་ཀྱི་དྲི་མ་འགོ་གནོན་ཞིང༌། ཏིང་ངེ་འཛིན་སྐྱེ་སླ་བའི་ཕྱིར། བློ་ཆོས་ལ་
འཇུག་པའི་སྒོ། ཡན་ལག་བདུན་པའི་རྣལ་འབྱོར་འདི་ལམ་གྱི་རིམ་པ་རྣམས་ཀྱི་དང་པོའོ། །
ཞེས་གླེང་བའི་རྩ་བ་དང་འབྲེལ་བར་ཡན་ལག་བདུན་པ་མདོར་སྨོས་སོ། །
དེ་ནས་ཡན་ལག་བདུན་པ་དངོས་ནི། ཕྱོགས་བཅུར་བཞུགས་པའི་ལ་སོགས་པ་སྨྲོས་ཏེ།
ཕྱག་འཚལ་ཞིང་སྐྱབས་སུ་འགྲོ་བ། ༡ མཆོད་པ། ༢ སྡིག་པ་བཤགས་པ། ༣ བསོད་ནམས་
ལ་ཡི་རང་བ། ༤ མྱ་ངན་ལས་མི་འདའ་བར་ཆོས་འཁོར་བསྐོར་བར་བསྐུལ་པ། ༥ བྱང་ཆུབ་
མཆོག་ཏུ་སེམས་བསྐྱེད་པ། ༦ རྫོགས་པའི་བྱང་ཆུབ་ཏུ་བསྔོ་བ་༧སྟེ་བདུན་གྱི། དང་པོ་ལ་
ཕྱག་འཚལ་བ་ནི། ཕྱོགས་བཅུར་བཞུགས་པ་སྟེ། རབ་འབྱམས་མཐའ་ཡས་པའི་རྫོགས་པའི་
སངས་རྒྱས་སྲས་དང་བཅས་པ་འགྲོ་བ་མ་ལུས་པ་ལ་ཕན་པར་མཛད་པ་སྟེ། བྱང་ཆུབ་སེམས་
དཔའ་རྣམས་བསྡུ་བའི་དངོས་པོ་བཞིས་འགྲོ་བའི་དོན་མཛད་པ་ལ་ཡང༌། བྱང་སེམས་སོ་
སོའི་སྐྱེ་བོ་དང༌། མ་དག་ས་བདུན་དང༌། དག་པ་ས་གསུམ་ལ་གནས་པ་རྣམས་རིམ་པ་བཞིན།
20-1-324


རྗེ་བཙུན་གྱིས། ཕལ་ཆེར་དོན་མེད་དོན་ཡོད་དང༌། །རྣམ་ཀུན་དོན་ཡོད་ཤེས་པར་བྱ། །ཞེས་
གསུངས་ཏེ་འགྲོ་བའི་དོན་དེ་དག་ཀྱང་ཕ་རོལ་དུ་ཕྱིན་པ་དྲུག་གི་སྒོ་ནས་གཅིག་ཏུ་ཕན་པར་
མཛད་ཀྱང༌། ནམ་མཁའ་ལྟ་བུ་སྟེ་དོན་དམ་བདེན་པ་ཆོས་ཉིད་སྟོང་པ་རྟོགས་པའི་མཁྱེན་ཅན་
རྣམས་དང༌། རྫོགས་སངས་རྒྱས་རྣམས་གཟུགས་ཀྱི་སྐུས་སེམས་ཅན་རྣམས་གྲོལ་བར་མཛད་
པས་འགྲོ་ལ་ཕན་པར་མཛད་པ་དང༌། དེ་ལྟར་གཞན་དོན་མཛད་པ་ཡང༌། ནམ་མཁའ་ལྟ་
བུའི་ཐུགས་མངའ་བ་སྟེ། ཆོས་སྐུ་ཁོ་ནའི་རྣམ་རོལ་ཉིད་ལས་ནམ་དུ་ཡང་མ་འདས་མོད། འོན་
ཀྱང༌། སྔོན་གྱི་སྨོན་ལམ་གྱིས་དབང་ལས་དང༌། བསམ་གྱིས་མི་ཁྱབ་པའི་ཚུལ་གྱིས་སོ། །
ཞེས་པ་དང༌། རྒྱལ་སྲས་རྣམས་ཀྱང་གནས་འདི་ལ་མངོན་དུ་ཕྱོགས་པའི་ཕྱིར་ཕན་པ་དང༌།
དོན་དམ་པའི་ཐུགས་མངའ་བ་བསྡུས་པར་རིག་སྟེ། མདོར་ན་ཕན་པར་མཛད་པ་དང༌། དོན་
དམ་པའི་ཐུགས་ནི་རང་གཞན་དོན་གྱི་སྐུ་གཉིས་དང༌། བྱང་ཆུབ་ཀྱི་སེམས་གཉིས་སོ། །དེ་
ཡང་ཇི་སྐད་དུ། སངས་རྒྱས་བྱང་ཆུབ་སེམས་དཔའ་ལས་འཁྲུངས་ཤིང༌། །སྙིང་རྗེའི་སེམས་
དང་གཉིས་སུ་མེད་བློ་དང༌། །བྱང་ཆུབ་སེམས་ནི་རྒྱལ་སྲས་རྣམས་ཀྱི་རྒྱུ། །ཞེས་པ་ལྟར།
སངས་རྒྱས། རྒྱལ་སྲས། བྱང་ཆུབ་ཀྱི་སེམས་རྣམས་ལས། སངས་རྒྱས་ནི་བྱང་སེམས་ཀྱི་རྒྱུ་
ཅན་དང༌། དེ་ནི་བྱང་ཆུབ་ཀྱི་སེམས་རྣམ་གཉིས་ཀྱི་རྒྱུ་ཅན་གྱི་ཕྱིར་རིམ་པ་འདི་ལྟར་སྨོས་པ་
ཡིན་ནོ། །ཕྱག་འཚལ་ནས་སྐྱབས་སུ་འགྲོ་བ་ནི། དུས་ཀྱི་ཁྱད་པར་དེང་ནས་བརྩམས་ཏེ་དུས་
རྟག་ཏུ་སྟེ། ཇི་སྲིད་མངོན་པར་བྱང་ཆུབ་པའི་བར་དུའོ། །ཞེས། དམིགས་པའི་ཁྱད་པར་
དམིགས་པ་ནི། །བདག་དང་མ་ལུས་སེམས་ཅན་རྣམས། ཞེས་པ་སྟེ། སེམས་ཅན་ཐམས་ཅད་
དོ། །དེ་ཡང་ཇི་སྐད་དུ། གང་ཞིག་སེམས་ཅན་ཐམས་ཅད་སྒྲལ་བར་ཞུགས་པ་དང༌། །ཞེས་རྗེ་
བཙུན་གྱིས་གསུངས་སོ། །དམིགས་པའི་ཡུལ་གང་ལ་སྐྱབས་སུ་འགྲོ་བ་ནི། འདྲེན་པ་མཆོག་
དང་མྱ་ངན་འདས། །འཕགས་པའི་ཚོགས་ལ་ཞེས་སོ། །ངོ་བོ་ནི་སྐྱབས་སུ་མཆིའོ་ཞེས་པ་
20-1-325


ཁས་ལེན་པ་སྟེ། རྗེ་བཙུན་གྱིས། འདི་ནི་དེ་དངོས་འདོད་པའི་ཁས་ལེན་དེ་ཡང་སྙིང་བརྩེ་
ལས་རིག་བྱ། །ཞེས་གསུངས་པ་ཡིན་ཏེ། དེ་བས་ན། སེམས་ཅན་ཐམས་ཅད་ཀྱི་དོན་དུ་
སྐྱབས་ཡུལ་ཐོག་མར་འདོད་པས་ཁས་ལེན་པ་ཉིད་ཡིན་ནོ། །གནས་འདི་རྒྱས་པར་རྗེ་བཙུན་
གྱིས་རྒྱན་དང༌། རྒྱུད་བླ་མར་གསུངས་པ། དེ་ངེས་པར་བལྟ་བར་བྱ་ལ། དེ་ལྟར་སྐྱབས་སུ་
སོང་ནས་ལས་ཅི་ཞིག་བགྱི་ཞེ་ན། བསོད་ནམས་ཀྱི་ཚོགས་བསགས་པའི་སྒོ་བྱིན་པ་ལས་
གྱུར་པ་དང༌། ཡེ་ཤེས་ཀྱི་ཚོགས་བསགས་པའི་སྒོར་གྱུར་པ། ཚུལ་ཁྲིམས་ལས་གྱུར་པ་དང༌།
ཚོགས་གཉིས་རྫོགས་པའི་སྒོར་ཞུགས་པའི་དགེ་བ་སངས་རྒྱས་སུ་བྱེད་པའི་ཡན་ལག་དང༌།
དེ་ལས་གཞན་དོན་བསྒྲུབ་པའི་ཡན་ལག་དང༌། ཕྱི་མ་གཉིས་ནི། དགེ་བ་ཐམས་ཅད་འབྲས་
བུ་བྱང་ཆུབ་སྙིང་པོ་ཅན་དུ་བྱེད་པའི་ཡན་ལག་སྟེ་འདི་དག་བྱེད་དོ། །དེ་རྣམས་ལས། དང་པོ་
གསུམ་ནི་རང་དོན་གཙོ་བོ་དང༌། བཞི་པ་གཞན་དོན་གཙོ་བོ་དང༌། ལྔ་པ་དང་དྲུག་པ་ནི་ཐུན་
མོང་ཡིན་ཏེ། དེ་ཡང་གཉིས་པ་ཡེ་ཤེས་ཚོགས་ལས་ཏིང་ངེ་འཛིན་གྱི་སྒོ་དང༌། གསུམ་པ་ཕྱི་མ་
གཉིས་ནི་ཤེས་རབ་གཙོ་བོར་གྱུར་པ་དང༌། ལྷག་མ་བསོད་ནམས་ཀྱི་སྒོ་སྟེ། ཀུན་ཀྱང་བསོད་
ནམས་ཀྱི་ཚོགས་ཡིན་པར་རིག་གོ །དེ་ཡང་སྐྱབས་སུ་སོང་ནས། ལོངས་སྤྱོད་ལ་ལྟོས་པ་མེད་
པར་སྦྱིན་པ་བྱས་ནས། མི་མཐུན་ཕྱོགས་སྡིག་པ་བཤགས་ཤིང་བསལ་ཏེ། མཐུན་ཕྱོགས་
དགེ་བ་རྒྱས་པས། གཞན་ལ་ཕན་པ་བླ་མེད་བསྒྲུབ་ནས། ཐམས་ཅད་ཀྱང་བླ་མེད་བྱང་ཆུབ་
ཀྱི་སྙིང་པོ་ཅན་དུ་བགྱིས་ཏེ། ཕྱིས་དགེ་བ་ཆུད་མི་ཟ་ཞིང་སངས་རྒྱས་སུ་བྱེད་པ་ནི། མི་གནས་
པའི་མྱང་འདས་ལ་འཇུག་པའི་སྒོ་ཡིན་ནོ། །ཞེས་ཤེས་པར་བྱ་སྟེ། འདི་ནི་ཡན་ལག་བདུན་
པའི་གོ་རིམ་ཡིན་ནོ། །དེ་ལྟར་ཡན་ལག་ཕྱི་མ་དྲུག་ལས། དང་པོ་མཆོད་པ་ནི། མེ་ཏོག་རྣམས་
དང་བདུག་པ་མར་མེ་དྲི། རྣམ་མང་ཞལ་ཟས་རོལ་མོ་གོས་རྣམས་དང་སྟེ། ཟང་ཟིང་དང༌།
བྱས་དང་བྱེད་འགྱུར་དགེ་བ་དཔག་མེད་ཀྱི་མཐུ་ལས་བྱུང་བ། རྣམ་བྱང་གི་ཞིང་དང༌། ཡོ་བྱད་
20-1-326


དབུལ་བ་མཆོག་གི་སྦྱིན་པ་ལས་གྱུར་པ་འདིས་རྣམ་འདྲེན་སྲས་དང་བཅས་ལ་མཆོད་པར་
བགྱི། ཞེས་སོ། །གཉིས་པ་ནི། རབ་མེད་དེ་བརྒལ་དཀའ་བའི་འཁོར་བའི་རྒྱ་མཚོར་ལྷུང་
བའི་བདག་དང་མཐའ་ཡས་པའི་བདག་གི་མ་སེམས་ཅན་རྣམས། ཆོས་ཀྱི་དེ་ཁོ་ན་ཉིད་དང༌།
ལས་དང་འབྲས་བུའི་གནས་ལ་ཤིན་ཏུ་རྨོངས་པ་ཡིན་ཏེ། དེའི་ཕྱིར། མི་ཤེས་པའི་དབང་
གིས། མི་དགེ་བ་བཅུ་དང་མཚམས་མེད་པ་ལྔ་ལ་སོགས་པའི་ཉེས་པ་སྤྱད་པ་ཐམས་ཅད་སོ་
སོར་བཤགས་ཤིང༌། སླན་ཆད་སྲོག་ལ་བབས་ཀྱང་མི་བགྱིའོ། །ཞེས་བྱ་སྟེ། ཅི་ནི་ཚུལ་ཁྲིམས་
ལས་གྱུར་པ་ཡིན་ཙ་ན། འདི་ནི་ཉེས་པ་དང་མི་འགྲོགས་ཤིང༌། ཕྱིན་ཆད་སྡོམ་པ་ཡིན་ལ་ཚུལ་
ཁྲིམས་ཀྱང་དེའི་ལས་ཅན་ཏེ། དེའི་ཕྱིར་དེ་ལྟར་སྨྲས་སོ། །གསུམ་པ་ནི། སོ་སོའི་སྐྱེ་བོ་ལམ་
ལ་ཞུགས་པ་དང༌། །རྒྱུན་ཞུགས་ཕྱིར་འོང་ཕྱིར་མི་འོང་དགྲ་བཅོམ། །རང་རྒྱལ་རྒྱལ་བ་སྲས་
དང་བཅས་རྣམས་ཀྱི། །བྱས་དང་བྱེད་འགྱུར་དགེ་ལ་རྗེས་ཡི་རང༌། །ཞེས་པའོ། །སངས་རྒྱས་
རྣམས་ཀྱི་དམ་པའི་ཆོས་ཀྱིས་གཞན་གྲོལ་བར་མཛད་པ་ནི། གཞན་དོན་གྱི་གཙོ་བོ་ཡིན་ལ་དེ་
ལྟ་བུའོ། །བཞི་པ་གཞན་དོན་གྱི་ཡན་ལག་ནི། ཞི་བར་བཞེད་པའི་འབུམ་ཕྲག་རྒྱལ་བ་རྣམས། །
སྲིད་པ་ཇི་སྲིད་གནས་པ་དེ་སྲིད་བཞུགས། །ཞེས་པས་མྱ་ངན་ལས་མི་འདའ་བར་གསོལ་
ནས་ཉོན་མོངས་ཏེ་མ་རིག་པ་ལ་སོགས་པ་རྩ་བ་དང་ཉེ་བའི་ཉོན་མོངས་པའི་དུག་གིས་རྣམ་
པར་ཉམས་ཤིང་ཉེས་པའི་མ་རིག་པ་དང་འདོད་ཆགས་ལ་སོགས་པའི་དབང་གིས་སྡུག་
བསྔལ་ཏེ་འཁོར་བའི་ཕུང་པོ་དང་ཉེར་སྤྱོད་ངན་སྐྱུགས་ཀྱི་ཁུང་བུ་ལྟ་བུ་དག་ལ་རབ་ཏུ་ཚང་
བའི་སེམས་ཅན་འདི་དག་རྣམས་ཞི་བ་ནི་སྡུག་བསྔལ་ཀུན་གྱིས་མྱ་ངན་མེད་པ་དང༌། དེ་སྐད་
དུ་ཡང༌། རྫོགས་སངས་རྒྱས་དང་ཉན་ཐོས་རྣམས། །སྲིད་པ་ཟད་པས་དགྱེས་པར་འགྱུར།
ཞེས་གསུངས་པའི་ཚུལ་གྱིས་སོ། །ཟག་མེད་ཀྱི་དགའ་བའི་གཞིར་གྱུར་པས་དགའ་ཚལ་དང་
ཆོས་མཚུངས་ལ། དེ་མཐོང་བ་སྟེ་མངོན་དུ་བགྱི་བའི་སླད་དུ། བདུད་རྩི་ལྟ་བུའི་དམ་ཆོས་སྩོལ་
20-1-327


ཞིག་སྟེ། ཆོས་འཁོར་བསྐོར་དུ་གསོལ། ཀྱཻ་ཕྱོགས་བཅུ་མ་ལུས་པའི་བཅོམ་ལྡན་འདས་རྣམས་
ཞེས་ཆོས་གསུང་བར་བསྐུལ་པའོ། །ལྔ་པ་ནི། མ་ལུས་ཕྱོགས་བཅུ་ན་བཞུགས་པའི་འདྲེན་པ་
རྣམས་བདག་ལ་དགོངས་སུ་གསོལ། བདག་གིས་དུས་དེང་ནས་བརྩམ་སྟེ་བདག་གི་མ་སྟེ།
སེམས་ཅན་འཁོར་བར་རྟག་ཏུ་འཁོར་བས་དང༌། ཞི་བ་རྟག་ཅིང་བརྟན་པ་མ་ཐོབ་པས་མི་
བརྟན་པ་མཐའ་ཡས་ཤིང་བགྲང་བ་ལས་འདས་པ་མ་ལུས་པ་འདི་རྣམས་བུ་གཅིག་པ་ལྟར།
བརྩེ་བས་ཡོངས་སུ་བཟུངས་ཤིང༌། བསླབ་བྱ་དེ་ལས་གནོན་པ་ཅི་ཡང་མི་བགྱིའོ། །ཞེས་
པས། སེམས་བསྐྱེད་ཀྱི་བསླབ་བྱ་ལ་སློབ་པར་ཁས་བླངས་ནས། སེམས་བསྐྱེད་པ་དངོས་ནི།
བདག་ནི་འཁོར་བའི་རྒྱ་མཚོར་འདིར་མི་གནས་ཏེ་ལས་ཉོན་གྱི་སྐྱེ་བ་མི་ལེན་པ་དང༌། ཞི་བ་
ཆད་པའི་མྱང་འདས་ཀྱི་འབྲོག་དགོན་དེར་ཡང་བདག་མི་འགྲོ་སྟེ། ལྷག་མེད་དུ་ཞི་བར་མི་
བྱེད་པར། སྨོན་ལམ་དང༌། སྤྲུལ་པ་དང༌། བསམ་གྱིས་མི་ཁྱབ་པའི་ལུས་ཀྱིས་འགྲོ་བའི་དོན་
བྱེད་དོ། །ཞེས་སོ། །ཚུལ་དེ་དང་ལྡན་པས་བདག་གིས་བླ་ན་མེད་པའི་བྱང་ཆུབ་མི་གནས་
པའི་མྱ་ངན་ལས་འདས་པ་ངེས་པར་འཐོབ་པར་བྱ་སྟེ། ལུས་པ་མེད་པའི་འགྲོ་བ་རྣམས་བྱང་
ཆུབ་ལ་འགོད་པའི་ཕྱིར་ཁོ་ནར་ཡིན་གྱི་བདག་ཉིད་སྲིད་པའི་འཇིག་པ་ཙམ་གྱིས་ནི་མ་ཡིན་
ནོ། །ཞེས་སོ། །དྲུག་པ་ནི། ཡན་ལག་དྲུག་པོ་འདི་ལྟར་བགྱིས་པ་དང༌། སྲིད་ཞི་མ་ལུས་པའི་
དགེ་བའི་མཐུ་ཡིས་བླ་མེད་བྱང་ཆུབ་གསལ་བར་མཐོང་པར་ཤོག་ཅེས་པ་སྟེ། མྱུར་དུ་ཐོབ་
པར་གྱུར་ཅིག་ཅེས་ཡི་རང་དང༌། སེམས་བསྐྱེད་དང༌། བསྔོ་བ་རྣམས་ཤེས་རབ་ཀྱི་སྒོ་ཅི་ཞེ་ན།
ལྷག་མཐོང་ལམ་ནི་དེ་དོན་དང༌། །རྣམ་པར་སྤྱོད་པར་ཤེས་པར་བྱ། །ཞེས་གསུངས་པ་དང་
ཚུལ་མཚུངས་པ་ཉིད་དུ་ཡི་རང་ནི། དགེ་བའི་བསམ་པ་དང༌། བྱེད་པ་དང༌། འབྲས་བུ་ལ་
སོགས་པ་ཇི་སྙེད་པའི་གནས་ལ་དམིགས་ནས་ཡི་རང་བའི་ཕྱིར་དང༌། ཐ་མ་གཉིས་ནི། བྱང་
ཆུབ་ཕྲ་ཞིང་ཟབ་པ་ཇི་ལྟ་བའི་གནས་ལ་དམིགས་པའི་ཕྱིར། དེ་སྐད་ཅེས་སྨྲས་སོ། །དེ་ལྟར་
20-1-328


ཡན་ལག་བདུན་པ་བཤད་ནས། གང་ལ་འཇུག་པའི་རྣལ་འབྱོར་ཉིད་བརྗོད་ན། དེ་ལ་ཐོག་
མར་མདོར་བསྟན་པ་ལ། དོན་དམ་སེམས་བསྐྱེད་ནི། དངོས་པོ་ཀུན་གྱི་སྟེ་ཆོས་ཐམས་ཅད་
ཀྱི་རང་བཞིན་ནམ། གཤིས་ནི་ཐོག་མ་ཉིད་ནས་ཐམས་ཅད་སྟེ་གཟུང་བ་དང༌། འཛིན་པའམ་
ཡུལ་དང་ཡུལ་ཅན་རྣམ་ཤེས་དང་ཡེ་ཤེས་ལ་སོགས་པ་ཐམས་ཅད་ཀྱིས་ཐམས་ཅད་དུ་སྒྱུ་མ་
ལྟ་བུར་སྟོང་བཞིན་དུ་སྣང་བ་སྟེ། རྣལ་འབྱོར་པ་གང་སྟེ། འདིས་ནི། རྣལ་འབྱོར་ཏིང་ངེ་འཛིན་
ལ་མངོན་དུ་ཕྱོགས་པ་རྣམས་ཀྱང་བསྡུས་པར་བསྒོམ་པར་བྱ། ཞེས་པ་དང་འབྲེལ་ཏེ། དེ་ལ་
རྣལ་འབྱོར་པ་དེས་ནི་འདི་ལྟར་ཏེ། འོག་ནས་ཇི་ལྟར་འབྱུང་བ་བཞིན་དུ་བསྒོམ་པར་བྱ་སྟེ།
དངོས་པོ་ཀུན་གྱི་རང་བཞིན་དེ་ནི་རིག་ཅིང་མངོན་པར་བགྱི་བར་འདོད་པ་ཁོ་ནས་སོ། །དེ་
ནས་ཀུན་རྫོབ་བྱང་སེམས་སྤྱོད་པ་དང་བཅས་པ་མདོར་བསྟན་པ་ནི། གྲོང་ལ་སོགས་པ་འདུ་
འཛི་དང་བཅས་པའི་ཡུལ་ལམ། འབྲོག་དགོན་པར་འདུག་ནའང༌། གནས་འདི་མ་རུང་སྟེ།
རྒྱལ་པོ་བྱམས་པའི་སྟོབས་དང༌། ཤཱི་སི་ར་ཛ་དང༌། ཚོང་དཔོན་སྦྱིན་པ་ལ་དཔའ་བ་དང༌།
ཟིལ་གྱིས་མི་གནོན་པ་ལ་སོགས་པ་བྱང་ཆུབ་སེམས་དཔའི་སྐྱེས་པའི་རབས་དག་བསྐང་བར་
འོས་ལ། གང་ཡང༌། དོན་དམ་བྱང་ཆུབ་ཀྱི་སེམས་ལ་ནི། རྒྱལ་སྲས་ཤིན་ཏུ་ལས་དང་པོ་པས་
དེ་ལྟར་མ་ཡིན་ཏེ། འདོད་ཡོན་རྣམ་པར་མ་སྤངས་པས་ནི། སེམས་རྩེ་གཅིག་ཙམ་ཡང་སྒྲུབ་
མི་ནུས་སོ། །དེ་ལྟར་བྱང་ཆུབ་སེམས་དཔའ་དེས་བྱང་ཆུབ་སེམས་དཔའི་གྲོགས་སྙིང་རྗེ་དང་
སྟོབས་མ་ཉམས་པས། བྱང་ཆུབ་སྤྱོད་པ་སྟེ། བྱང་ཆུབ་ཀྱི་ཕྱིར་སྤྱད་པར་འོས་པ་གང་ཡིན་པ་
དེའོ། །དེ་ལ་བྱང་ཆུབ་ནི་བླ་ན་མེད་པ་ཉིད་ཡིན་ལ། དེ་བས་ན་སྤྱད་པ་ཡང་བླ་ན་མེད་པ་སྟེ།
སྦྱིན་པ་ལ་སོགས་པ་རྒྱ་ཆེན་པོ་དངོས་སུ་སྤྱད་པར་བྱ་ཞིང་ཅི་སྟེ་མི་ནུས་ན། ཡིད་ཀྱིས་ཀྱང་ནི་
རྟག་ཏུ་སྟེ་ནམ་ཡང་ཉོན་མོངས་པས་ལྷག་པར་ཟིལ་གྱིས་མ་མནན་པར་སྤྱད་པར་བྱ་ཞིང༌།
དེའི་ཚུལ་ཡང༌། ཟླ་བའི་ཞལ་སྔ་ནས། སྦྱིན་སོགས་ཆོས་གསུམ་འདི་དག་ཕལ་མོ་ཆེར། །བདེ་
20-1-329


བར་གཤེགས་པས་ཁྱིམ་པ་རྣམས་ལ་བསྔགས། །ཞེས་གསུངས་པ་ལྟར། ཁྱིམ་པའི་སྔ་མ་
གསུམ་དང༌། རབ་ཏུ་བྱུང་པའི་ཕྱི་མ་གསུམ་ལ་གཙོ་ཆེར་བསླབ་པར་གསུང་སྟེ། དེ་ཡང་ཁྱིམ་
པས་སྦྱིན་པ་ཕལ་ཆེ་བ་ལ་སློབ་ཅིང༌། ཚུལ་ཁྲིམས་དང༌། བཟོད་པ་ཕལ་ཆེར་ལ་ཕྱིས་སློབ་
ཅིང་འཇུག་པར་བྱ་བ་ཡིན་ལ། རབ་ཏུ་བྱུང་ནས་ནི། རབ་ཏུ་བྱུང་ཕྱིན་འཚོ་བ་རྣམ་པར་དག་པ་
ལ་བརྟེན་དགོས་པའི་ཕྱིར། ལོངས་སྤྱོད་སྤང་དགོས་པས་སྦྱིན་པ་དང༌། བསྲུང་བྱ་ཚུལ་ཁྲིམས་
ཀྱི་གཙོ་བོ་སོ་སོར་ཐར་པའི་སྡོམ་པ་ལ་གནས་དགོས་པས་ཚུལ་ཁྲིམས་དང༌། དགེ་སྦྱོང་དུ་
བྱེད་པའི་ཆོས་བཞི་ལ་གནས་པས་གནོད་པ་ལ་བཟོད་པ་ཡང་འགྲུབ་པས་ན། དང་པོ་གསུམ་
ལ་གནས་ནས། བསྒྲུབ་པར་བྱ་བ་ཐོས་བསམ་སྒོམ་གསུམ་ལ་རྩོལ་བ་ཆེས་ཆེན་པོས་འབད་
དགོས་པའི་ཕྱིར། ཕྱི་མ་གསུམ་ལ་སླེབ་པར་འགྲུབ་སྟེ། རྒྱལ་སྲས་རྣམས་ཀྱི་དབང་དུ་བྱས་པ་
ཡིན་ནོ། །ད་ནི་དོན་དམ་བྱང་ཆུབ་ཀྱི་སེམས་བསྒོམ་པའི་རིམ་པ་ཅུང་ཟད་རྒྱས་པར་བཤད་ན།
ཞི་གནས་དང་ལྷག་མཐོང་གི་ལམ་གྱི་རིམ་པས་འགྲུབ་སྟེ། དེ་སྐད་དུ་ཡང༌། རྒྱལ་སྲས་ཤནྟ་དེ་
བའི་ཞབས་ཀྱིས། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་
འཇོམས་པ་ཤེས་བྱས་ནས། །ཞེས་ཀྱང་གསུངས་ཤིང༌། དགོང་པ་ངེས་པར་འགྲེལ་པ་ལས་
ཀྱང་བཀའ་སྩལ་ཏེ། རྣལ་འབྱོར་པ་ཡི་ཞི་གནས་དང༌། །ལྷག་མཐོང་བསྒོམ་པར་བྱས་པས་ནི། །
མཚན་མའི་མཆིང་དང་དེ་བཞིན་དུ། །གནས་ངན་ལེན་གྱི་འཆིང་བས་གྲོལ། །ཞེས་པའོ། །དེ་
ལྟར་ཞི་གནས་ཀྱིས་ཉོན་མོངས་པ་དང༌། ལྷག་མཐོང་གིས་ཤེས་བྱའི་སྒྲིབ་པ་སྦྱངས་པས་ནི།
མང་དུ་སྨྲ་བ་ངལ་ཏེ། མདོར་བསྡུ་ན། ཞི་གནས་བསྒོམ་པའི་ཚུལ་ཡང༌། ཞི་བའི་ལྷ་ཆེན་པོས།
ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །
ཅེས་གསུངས་པ་ལྟར། འདོད་ཡོན་ལ་མ་ཆགས་པ་སྔོན་དུ་འགྲོ་བ་ཡིན་ལ། དེའི་ཕྱིར་དུ། ཇི་
སྐད་དུ། འདོད་ལྡན་ལ་ལ་ལུས་ཀྱང་བཅད། །ཁ་ཅིག་གསལ་ཤིང་རྩེ་ལ་བཙུག །ཞེས་པ་དང༌།
20-1-330


བྱིས་དང་སྐལ་པ་མཉམ་སྤྱོད་ན། །ངེས་པར་ངན་འགྲོར་འགྲོ་འགྱུར་ཏེ། །སྐལ་མི་མཉམ་པར་
འཁྲིད་བྱེད་ན། །བྱིས་པ་བརྟེན་པས་ཅི་ཞིག་བྱ། །སྐད་ཅིག་གཅིག་གི་མཛའ་འགྱུར་ལ། །ཡུད་
ཙམ་གྱིས་ནི་དགྲར་ཡང་འགྱུར། །དགའ་བའི་གནས་ལ་ཁྲོ་བྱེད་པ། །སོ་སོའི་སྐྱེ་བོ་མགུ་བར་
དཀའ། །ཕན་པར་སྨྲས་ན་ཁྲོ་བར་བྱེད། །བདག་ཀྱང་ཕན་ལས་བཟློག་པར་བྱེད། །དེ་དག་
ངག་ནི་མ་ཉན་ན། ཁྲོ་བས་ངན་འགྲོར་འགྲོ་བར་འགྱུར། །ཞེས་དང༌། བྱིས་དང་འགྲོགས་ན་
བྱིས་པ་ལ། །བདག་བསྟོད་གཞན་ལ་སྨོད་པ་དང༌། །འཁོར་བར་དགའ་བའི་གཏམ་ལ་སོགས། །
མི་དགེ་ཞེས་ཀྱང་ངེས་པར་འབྱུང༌། །དེ་ལྟར་བདག་དང་གཞན་བརྟེན་པ། །དེས་ནི་ཕུང་བར་
འགྱུར་བར་ཟད། །ཅེས་གསུངས་ཏེ། །དེའི་ཕྱིར་འདི་ལྟར་ཁྱིམ་ནི་ཉེས་མང་ཅན། །ནམ་ཡང་
སྡིག་པའི་ལས་ཀྱི་གནས། །འཇོ་སྒེག་འཐབ་དང་ཀླག་ཅོར་ཅན། །ཞེས་སྨྲས་པ་ཡིན་ནོ། །
གཞན་ཡང་མཧཱ་ཙརྱ་ཤནྟ་དེ་བས། མཐོ་ལ་ཕྲག་དོག་མཉམ་ལ་འགྲན། །དམའ་ལ་ང་རྒྱལ་
བསྟོད་ན་དྲེགས། །མི་སྙན་བརྗོད་ན་ཁོང་ཁྲོ་སྐྱེ། །ནམ་ཞིག་བྱས་ལ་ཕན་པ་འཐོབ། །ཅེས་
དང༌། ནགས་ན་རི་དྭགས་བྱ་རྣམས་དང༌། །ཤིང་རྣམས་མི་སྙན་བརྗོད་མི་བྱེད། །འགྲོགས་ན་
བདེ་བ་དེ་དག་དང༌། །ནམ་ཞིག་ལྷན་ཅིག་བདག་གནས་འགྱུར། གཞན་ཡང་ནམ་ཞིག་རྒྱབ་
ཏུ་མི་ལྟ་ཞིང༌། །ཆགས་པ་མེད་པར་འགྱུར་ཞིག་གུ། །ས་ཕྱོགས་བདག་གིར་གཟུང་མེད་པ། །
རང་བཞིན་གྱིས་ནི་ཡངས་རྣམས་སུ། །རང་དབང་སྤྱོད་ཅིང་ཆགས་མེད་པར། །ནམ་ཞིག་
བདག་ནི་གནས་པར་གྱུར། །ལྷུང་བཟེད་ལ་སོགས་ཉེ་ཚེ་དང༌། །ཀུན་ལ་མི་མཁོའི་གོས་འཆང་
ཞིང༌། །ལུས་འདི་སྦ་བ་མ་བྱས་ཀྱང༌། །འཇིགས་མེད་གནས་པར་ནམ་ཞིག་འགྱུར། །ཞེས་
གསུངས་ཏེ། དེ་ཉིད་མདོར་བསྡུ་ན། རྟག་ཏུ་ཟིལ་གྱིས་གནོད་བྱེད་མང༌། །ཀྱེ་མ་ནམ་ཞིག་
འདི་ལས་ཐར་འགྱུར་ཞེས། །བློ་ལྡན་དེ་ནི་དབེན་པ་འཚོལ་བར་བྱེད། །ཉེས་མང་ཁྱིམ་དུ་
གདོན་མི་ཟ་བར་སྤངས། །ཞེས་སྨྲས་པའོ། གནོད་པ་མེད་པའི་གནས་སུ་དེ་འགྲོ་སྟེ། །ཞེས་པ་
20-1-331


ནི། དེ་ཉིད་ལས། ཇི་སྐད་དུ། ཁང་སྟོང་ཤིང་དྲུང་ཕུག་དག་ཏུ། །གང་དུ་ཇི་སྲིད་འདོད་གནས་
ཏེ། །ཡོངས་འཛིན་བསྲུང་པའི་སྡུག་བསྔལ་སྤངས། །ལྟོས་པ་མེད་པར་བག་ཡངས་སྤྱོད། །
རང་དབང་སྤྱོད་ཅིང་ཆགས་མེད་ལ། །གང་དག་ཡང་ནི་འབྲེལ་མེད་པ། །ཆོག་ཤེས་བདེ་སྤྱོད་
གང་ཡིན་པ། །དབང་པོས་ཀྱང་ནི་དེ་སྙེད་དཀའ། །ཞེས་སོ། །དེ་ལྟར་བསམ་ནས་རྣལ་འབྱོར་
དུ་བྱ་བ་ནི་མང་ངམ་ཉུང་ངུ་ཐོས་ཀྱང༌། ཞེས་སོགས་འབྲེལ་ཏེ། དེ་ལ་ནང་རྣལ་འབྱོར་ལ་
གཞོལ་པའི་སེམས་དཔའ་དེ་དབེན་པ་འཚོལ་ཞིང༌། མང་ངམ་ཉུང་ངུར་ཐོས་ཀྱང་རྒྱལ་སྲས་
རྣམས། རྟག་ཏུ་བསྒོམ་པ་ལྷུར་ལེན། ཞེས་པ་ནི་རྒྱལ་བའི་གསུང་རབ་ནི་སྒོམ་པ་ལྷུར་ལེན་
གྱིས། ཐོས་པ་དང་རྩོད་པ་ལྷུར་ལེན་པའི་རྒྱུད་ནི། རྒྱལ་སྲས་ཆེན་པོ་ཨ་ཏི་ཤས། མངོན་སུམ་
རྗེས་དཔག་དགོས་པ་མེད། །མུ་སྟེགས་རྩོད་པ་བཟློག་ཕྱིར་ཡིན། །ཞེས་ཀྱང་གསུང་སྟེ། རྟོག་
གེ་དང་རིག་བྱེད་དང༌། བྷ་ར་ཏ་དང༌། ཀླུའི་འབུམ་པ་དང༌། ལྷའི་ཨིནྡྲ་བྱ་ཀ་ར་ཎ་ལ་སོགས་
པའི་འདའ་བར་བྱེད་པ་ལ། མང་ངམ་ཉུང་ངུར་ཐོས་ཀྱང་བྱིས་པ་རྣམས། །ཐོས་པ་ཙམ་གྱིས་
འདི་ན་ཁེངས་པར་བྱེད། །ཞེས་སོ། །མདོར་ན། རྒྱལ་སྲས་ཁྱིམ་སྤངས་པ་སྟེ་ཇི་ལྟར་ཐོས་པ་དེ་
ལྟར་བསྒོམ་པའི་སྙིང་པོ་ཅན་དུ་བྱེད་དོ། །ཅི་རྒྱལ་སྲས་རྣམས་བསྒོམ་པ་ལྷུར་ལེན་ན། ཉུང་
ངུར་ཐོས་པས། ཆོག་གམ་ཞེ་ན། ཐམས་ཅད་མཁྱེན་པ་བསྒྲུབ་པར་འདོད་པས་ཤིན་ཏུ་མང་དུ་
ཐོས་དགོས་པ་ཡང༌། ཐོས་པས་མི་ངོམ་ཉིད་དང་ནི། །ཞེས་གསུངས་པ་བཞིན་ས་ཐོབ་ནས་
ཀྱང་ཐོས་པ་ཚོལ་བའི་ཕྱིར། འདི་ན། ཕྱུག་བདག་གི་བརྟུལ་བཞུགས་ཅན་ཐོས་པ་དྲི་མེད་ལ་
ལྷག་པར་བརྙས་པ་དག་ནི་བདུད་ཀྱི་འཇུག་པ་ལས་གཞན་དུ་ཅི། དེ་བས་འདིར་བྱང་སེམས་
དང་བྱིས་པ་ཐོས་པའི་དགོས་པ་མིན་མཚུངས་ཏེ། དང་པོ་ནི། ཚིགས་བཅད་གཅིག་ཁོ་ན་ཐོས་
པ་ཡང་སྒོམ་པའི་སྙིང་པོ་ཅན་དུ་བྱེད་པ་དང༌། བྱིས་པ་ཞེས་པ་སྤྱིར་སོ་སོ་སྐྱེ་བོ་ཐམས་ཅད་ལ་
འཇུག་ཀྱང༌། འདིར་ནི་ཡང་དག་པའི་ལམ་ལ་ཞུགས་པ་རྣམས་འཕགས་པ་ལ་མངོན་དུ་
20-1-332


ཕྱོགས་པས་འཕགས་པའི་རིགས་ཡིན་པས། བྱིས་པ་ནི་ཡང་དག་པའི་ཁམས་ལ་མི་དགའ་བ་
རྣམས་ཏེ། དེ་རྣམས་ཐོས་པ་ཙམ་གྱིས་ཆོག་ཤེས་ནས། མི་བསྒྲུབ་པོ་ཞེས་བསྟན་པ་ཡིན་ནོ། །
ཐོས་པ་ཙམ་གྱིས་ཁེངས་པ་དེ་ནི་འཚོ་བ་པ་བཞིན་རྣམ་པར་ཉམས་ཞེས་པ་ལ། འཚོ་བ་པ་ནི་
མི་དབུལ་པོའི་ཁྱད་པར་ཞིག་སྟེ། འཚོ་བ་པ་རིགས་ཀྱི་གཙོ་བོ་ལ་མི་སྨོན་པ་ཉིད་ཀྱིས་བྱ་བ་
བཟང་པོ་ལ་མི་འཇུག་པས་རྟག་ཏུ་སྡུག་བསྔལ་བ་བཞིན་ནོ། །ཞེས་པའོ། །དེ་ནས་བློ་དང་
ལྡན་པ་དེ། དགེ་བའི་བཤེས་གཉེན་བསྟེན་པ་ཡིན། དམ་པའི་ཆོས་ནི་འཚོལ་བར་བྱེད། །མན་
ངག་གི་སྙིང་པོ་ཅན་གྱིས་ཐོས་པ་དེ་དག་གང་ལས་ཐོས་པར་འགྱུར་བ། དམ་པའི་ཆོས་ལ་སྤྱོད་
པའི་རྐྱེན་གྱི་གཙོ་བོ་དགེ་བའི་བཤེས་གཉེན་ལས་ཏེ། བསྟེན་ཚུལ་རྗེ་བཙུན་གྱི། སྐྱོ་བ་སྤང་ལ་
བརྟེན། བཀུར་སྟི་རྙེད་པ་དག་དང་རིམ་གྲོ་དང༌། །སྒྲུབ་པའི་སྒོ་ནས་བཤེས་གཉེན་བསྟེན་
པར་བྱ། །ཞེས་གསུངས་པ་ལྟར་རོ། །བསྟེན་ནས་ཀྱང་དམ་པའི་ཆོས་འཚོལ་བར་བྱེད་དོ། །
དེའི་ཕྱིར་བསྟེན་པས་སོ། །དཔེར་ན་དཔལ་འབྱུང་པའི་རྣམ་ཐར་ལས། བླ་མ་བསྟེན་པའི་
ཚུལ་ལྟར་བསླབ། །ཞེས་གསུངས་པ་དང༌། ནོར་བཟང་གི་བླ་མ་བརྒྱ་རྩ་བསྟེན་པ་བཞིན།
བདག་ཅག་རྣམས་ཀྱིས་ཀྱང་བསླབ་པར་བྱའོ། །མན་ངག་མཆོག་གིས་ནོར་བླང་ནས་ཞེས་པ་
ནི། དེ་ལྟར་དམ་ཆོས་འཚོལ་ཞིང་མང་དུ་ཐོས་ནས་ཀྱང༌། ཐོས་པ་ཐམས་ཅད་ཀྱང་མན་ངག་
དང་ལྡན་པར་བྱས་ནས་སྒོམ་པ་ལ་ཕྱོགས་པའོ། །ཞེས་པའོ། །དེ་ནས། གང་དུ་བསྒོམ་པའི་
གནས་བརྟན་དེ། ནགས་འདབ་བབ་འཆོལ་སྐྱེ་བོ་ཡིས། །ནམ་ཡང་བསྐྱོད་པ་མེད་པའི་
གནས། །དེ་སྐད་དུ། རྒྱལ་སྲས་ཙནྡྲ་གོ་མིས། ནགས་ཀླུང་ཆུ་གཙང་ངོས་བདེ་དབེན་པ་སྐྱིད་པ་
གང༌། །ཅི་སྟེ་ལྷ་ཡི་བུ་མོ་དྲི་ཞིམ་བྱུག་པ་ཡི། །ལན་བུའི་རྒྱན་དུ་ཐོགས་པའི་རྒྱུན་ལྡན་མེ་ཏོག་
བཅས། །མཛེས་པ་ཟིལ་གནོན་ལྷ་ཡི་ཚུལའང་ཡོད་འགྱུར་རམ། །ཞེས་དང༌། རྩ་བ་འབྲས་བུ་
ཤུན་པ་ལོ་མ་ཕུན་སུམ་ཚོགས་པའི་ལྗོན་ཤིང་ལྡན། །ནགས་ཚལ་ལྟོས་མེད་རི་བོའི་ཆུ་རྒྱུན་
20-1-333


གསལ་བབས་ཆགས་པ་མེད་པའི་གནས། ཆུ་ཀླུང་ཡངས་པའི་མཐའ་རུ་འབྲས་བུ་རྒྱ་ཆེན་
ལྷུང་བས་བརྒྱན་པ་ཡི། །ཉམས་དགའ་བས་མཐའ་ཅི་ཞིག་མེད་དེ་དམྱལ་དོང་ཁྱིམ་དུ་བསླུས་
ཏེ་སྡོད། །རི་སུལ་ཡངས་པ་སྐྱེ་བོ་ལྷུག་པ་མེད་པས་རབ་བདེ་བ། །ཉེར་སྤྱོད་རྒྱ་ཆེན་ཁོར་ཡུག་
ནགས་ཚལ་སྔོ་འཁྲུངས་འཕྲེང་བ་སྒྲེངས། །ཆུ་ངོགས་སྙན་པ་ཕུ་ཆུའི་རྒྱུན་སྒྲ་རྔ་ལྟར་སྙན་པ་
ཡི། །བདག་ཅག་ཉོན་མོངས་ཡུལ་མ་ཡིན་ཞེས་མགྲོན་ལ་སྒྲོགས་པ་བཞིན། །ཞེས་གསུངས་
ཏེ། ཚིགས་བཅད་དང་པོས། ལྷ་ཡི་ཆུ་བོ་ནགས་ཀླུང་མཆོག་སྟེ། དང་པོས་ཉོན་མོངས་འཕེལ་
ཞིང༌། ཕྱི་མ་ཆགས་བྲལ་ཡིད་འབྱུང་བའི་གནས་ཡིན་པའི་ཕྱིར། ཞེས་བསྟན་ལ། ལྗོན་ཤིང་
ལྡན་ཡན་ཆད་རི་དང་རི་བོའི་ཆུ་རྒྱུན་ནས་དགའ་ཞེས་པའི་བར་དང༌། ཉེར་སྤྱོད་རྒྱ་ཆེན་མན་
ཆད་ཀྱིས་དེར་བཟའ་བཏུང་སོགས་ཀྱིས་ངལ་ཏེ། ལས་ཀྱི་མཐའ་ལ་མ་ཞུགས་ཀྱང༌། བདག་
པོས་མ་བཟུང་བ་དག་བདེ་བླག་ཏུ་རྙེད་པས་སོ། །གཞན་ཡང༌། འབྲོག་དགོན་པར་བསམ་
གཏན་བསྒོམ་པ་ལ་མི་སྐྱོ་བའི་ཉེར་སྤྱོད་དང་ལྡན་ལ། ཁྱིམ་གྱི་ཉེར་སྤྱོད་ནི། རྣམ་པར་གཡེང་
བར་བྱེད་པ་ཡིན་པས་ན། བས་མཐའ་ཅི་ཞིག་མེད་དེ་སོགས་གསུངས་སོ། །ནགས་ཚལ་ལྟོས་
མེད་ནི་དགྲ་དང་གཉེན་གྱི་བྱ་བ་ལ་མི་ལྟོས་པས། གཡེང་བའི་རྒྱུ་མེད་པས་དང༌། རི་སུལ་
ཡངས་པ་ནི་བདག་ལ་གནོད་པ་དང་ཆགས་པའི་སྐྱེ་བོ་མེད་ཅིང༌། གཞན་གྱིས་མ་བཟུང་པས་
སྤྱོད་པ་སྤང་པའོ། །དེའི་ཕྱིར་ནགས་འདབ་ཞེས་སྨྲོས་ལ། སྐྱེ་བོ་ལྷུག་པ་ནི། ཉོན་མོངས་པའི་
སྤྱོད་པ་མ་བསྡམས་པར་ལྷུག་པར་སྤྱོད་པ་སྟེ། དེ་བས་ནི་བབ་ཅོལ་སྐྱེ་བོ་ཡིས། །ནམ་ཡང་
བགྲོད་པ་མེད་པའི་གནས། །ཞེས་སྨྲས་པའོ། །དེ་ལྟར་མ་བསྡོམ་པ་ཁྱིམ་པ་ལ་སོགས་པ་དང་
ལྷན་ཅིག་ཏུ་འདུག་ན། རང་ཉིད་ཀྱང་ཉོན་མོངས་པ་མ་བསྡམས་པར་སྤྱོད་ལ། ཤིན་ཏུ་ཉོན་
མོངས་པར་སྤྱོད་པ་དག་སྣང་བ་ནི། རང་ཉིད་ཡང་ཉོན་མོངས་སྟོབས་སུ་འགྱུར་པ་ལས། དེ་
དག་མེད་པའི་ཕྱིར། ཏིང་ངེ་འཛིན་ཆེར་སྐྱེས་སླ་བས་རབ་བདེ་བའོ། །དེའི་ཕྱིར་རྔ་ལྟར་སྙན་
20-1-334


པ་ཡིན་སོགས་ཀྱི་དོན། ནགས་ཚལ་སོགས་དབེན་པ་ནི། བདག་ཅག་ཉོན་མོངས་ཞེས་སོགས་
བརྗོད་པར་བྱའོ། །མི་མཆོག་དེ་ནི་དེར་སོང་ནས། །དྲང་པོའི་ལུས་ཀྱི་གནས་པར་བྱ། །ཞེས་པ་
ནི། དབེན་པ་དེར་རྗེ་བཙུན་རྣམ་པར་སྣང་མཛད་ཀྱི་ཆོས་བདུན་གྱི་ལུས་གནད་དང་ལྡན་པར་
བྱའོ། །ཞེས་པ་སྟེ། འདི་ཡན་ཆད་རྣལ་འབྱོར་ལ་འཇུག་པའི་རིམ་པ་སྔོན་དུ་འགྲོ་བ་ཡིན་ནོ། །
དེའི་ཚུལ་ཡང་མཧཱ་ཨ་ཙརྱ་པདྨའི་ངང་ཚུལ་གྱིས། དེ་ལྟར་ཚུལ་ཁྲིམས་ལ་སོགས་པ་ཞི་
གནས་ཀྱི་ཚོགས་རྣམས་ལ་གནས་ཏེ། ཡིད་དུ་འོང་བའི་ཕྱོགས་སུ་སངས་རྒྱས་དང་བྱང་ཆུབ་
སེམས་དཔའ་ཐམས་ཅད་ལ་ཕྱག་འཚལ་ལ་སོགས་པ་བྱས་ཤིང༌། སྡིག་པ་བཤགས་པ་དང༌།
བསོད་ནམས་ལ་རྗེས་སུ་ཡི་རང་བར་བྱས་ལ། སྙིང་རྗེ་ཆེན་པོ་ཁོ་ན་སྔོན་དུ་བྱས་པས། འགྲོ་
བ་མཐའ་དག་འདོན་པའི་བསམ་པ་ནན་དུ་གྱུར་ནས། ལུས་དྲངས་པོར་བསྲང་ལ་སྟན་བདེ་
བའི་སྟེང་དུ་འདུག་སྟེ་སྐྱིལ་མོ་ཀྲུང་བཅས་ལ་ཏིང་ངེ་འཛིན་མངོན་པར་བསྒྲུབ་པོ། །ཞེས་
གསུངས་པ་ལྟར་བྱ་བ་སྟེ། དེ་ལྟར་ཚུལ་ཁྲིམས་ལ་སོགས་པ་ཞི་གནས་ཀྱི་ཚོགས་རྣམས་ལ་
གནས་ཏེ། ཞེས་པ་ཞི་གནས་ཀྱི་རྒྱུ་ཚུལ་ཁྲིམས་སྔོན་དུ་འགྲོ་བ་སྟེ། འདི་ལྟར་ཁྱིམ་ནི་ཞེས་
སོགས་བཤད་པ་ཡིན་ནོ། །ཡིད་འོང་པའི་ཕྱོགས་ནི། ནགས་འདབ་ཞེས་སོགས་སྨྲས་པ་སྟེ།
སངས་རྒྱས་དང་ཞེས་བྱ་བ་ལ་སོགས་པ་ནི། དབེན་པ་དེར་སྔར་བཤད་པ་ལྟར་ཡན་ལག་
བདུན་པ་བྱ་བ་ཡིན་ལ། སྙིང་རྗེ་ཆེན་པོ་ཁོ་ན་སྔོན་དུ་བྱེད་པ་ནི་བསྒོམ་པ་དང༌། འགྲོ་བ་མཐའ་
དག་འདོན་པའི་བསམ་པ་ནི། བྱང་ཆུབ་ཏུ་སེམས་བསྐྱེད་པ་སྟེ། དེ་ནས་ལུས་དྲང་པོར་བསྲང་
བ་ལ་སོགས་པས། ལུས་གནད་བསྟན་ཏེ། དེའི་ཕྱིར་དྲང་པོའི་ལུས་ཀྱི་སོགས་སྨྲས་པ་ཡིན་ནོ། །
ད་ནི་ཏིང་ངེ་འཛིན་མངོན་པར་སྒྲུབ་བོ་ཞེས་པ་འདིར་བཤད་པར་བྱ་བ་སྟེ། སེམས་ཀྱི་སེམས་
ནི་བཟུང་བྱ་སྟེ། །ཞེས་པ། རྣལ་འབྱོར་པ་གང་ནང་སེམས་ཉིད་ཀྱི་གནས་ལ། སེམས་ཁོ་ནར་
དམིགས་ཏེ། རྟོག་མེད་དུ་འཇོག་པ་དང༌། དེ་ཉིད་ཡུན་བསྲང་བ་སྟེ། འཇོག་པ་དང༌། རྒྱུན་དུ་
20-1-335


འཇོག་པའོ། །འདིར་ནི་དབང་པོ་རྣམ་པར་བསྡུ་བ་ནི། སྔ་མ་ནས་བྱིང་རྒོད་སྤངས་ཏེ། རྣམ་
རྟོག་གི་རྒྱུ་སྤངས་ནས་དབང་པོ་ནང་དུ་བསྡུས་ཏེ་མཉམ་པར་འཇོག་པ་ཉེར་འཇོག་གོ །རྣམ་
རྟོག་མང་པོས་རྣམས་ཉམས་ཚེ། རྒྱ་མཚོའི་རླབས་བཞིན་ཞི་བར་བྱ་བ་ནི་བླན་ཏེ་འཇོག་པ་སྟེ།
རྣམ་རྟོག་མང་དུ་སྐྱེས་པ་ན་དེ་ཤེས་པར་བྱས་ནས་སླར་ཡང་མཉམ་པར་འཇོག་པའོ། །ཡིད་ནི་
རྣམ་པར་གཡེང་གྱུར་ན། དེ་ཚེ་དྲན་པས་གདུལ་བར་བྱ་ཞེས་པ་ནི། ཞི་བར་བྱེད་པ་དང་རབ་
ཏུ་ཞི་བར་བྱེད་པ་སྟེ། རྣམ་རྟོག་འཕྲོས་ཀྱང་དང་དུ་མི་ལེན་པ་དང༌། བརྗེད་ནས་རྣམ་པར་
གཡེངས་ན་དྲན་པས་ཟིན་པར་བྱས་ནས་དེ་ལ་ཉེས་པར་ལྟ་ཞིང་མཉམ་པར་འཇོག་པ་ལ་མི་
དགའ་བ་སྤངས་ཏེ་འཇོག་པ་ཡིན་ཏེ། ཇི་སྐད་དུ། ཀ་མ་ལ་ཤཱི་ལ་མཧཱ་པུ་རུ་ཥས་སྒོམ་རིམ་
ལས། གང་གི་ཚེ་དེ་ལ་མི་དགའ་བར་མཐོང་བ་དེའི་ཚེ། ཏིང་ངེ་འཛིན་གྱི་ཡོན་ཏན་ལ་བལྟས་
ནས་དེ་ལ་དགའ་བར་བསྒོམ་ཞིང༌། རྣམ་པར་གཡེང་བ་ལ་ཉེས་པར་ལྟ་བས་མི་དགའ་བ་རབ་
ཏུ་ཞི་བར་བྱའོ། །ཞེས་གསུངས་ཤིང༌། འདོད་ཡོན་སྤྱད་པ་དྲན་པ་སོགས། །དེ་ཚེ་དཔལ་དང་
ལུས་འདོད་པ། །འདུས་བྱས་ཡུད་ཙམ་གར་མཁན་དང༌། །དུས་ཀྱི་སྤྲིན་དང་གློག་འགྱུ་
མཚུངས། །འཁོར་བ་སྦྲུལ་གྱི་རོ་འཛིན་ན། །ཀྱེ་མ་བདག་ནི་གཡེང་བའི་གནས། །ཞེས་པས་
འདོད་པའི་ཉེས་པ་དང༌། དེ་སྤང་ནས་དབེན་པ་དང་བསམ་གཏན་གྱི་ཕན་ཡོན་ཡིད་ལ་བྱེད་
པ་ནི། འདུལ་བར་བྱེད་པ་སྟེ། དེ་ཉིད་ལས། ཅི་སྟེ་གང་གི་ཚེ་སྔོན་རྒོད་པ་དང་རྩེས་པ་ལ་
སོགས་པ་དྲན་ཞིང་བར་བར་དུ་སེམས་རྒོད་པར་མཐོང་བ་དེའི་ཚེ་མི་རྟག་པ་ལ་སོགས་པ་
ཡིད་འབྱུང་བར་འགྱུར་བའི་དངོས་པོ་ཡིད་ལ་བྱེད་པས་རྒོད་པ་ཞི་བར་བྱའོ། །ཞེས་གསུངས་
སོ། །གཞན་ཡང་འདོད་ཆགས་ཞེ་སྡང་རྨོངས། །ཆོམ་རྐུན་དགྲ་ཆེན་འདི་དག་རྣམས། །བྱམས་
དང་རྟེན་ཅིང་འབྲེལ་འབྱུང་དང༌། །མི་སྡུག་ཏིང་འཛིན་དཔུང་གིས་བཅོམ། །ཞེས་པ་ལ་གཏི་
མུག་ཤས་ཆེ་བར་བྱིང་བ་དང༌། འདོད་ཆགས་ཤས་ཆེ་བར་རྒོད་པ་དང༌། ཞེ་སྡང་ཡང་དེ་དང་
20-1-336


ཕྱོགས་མཐུན་པར་རིག་སྟེ། དེ་རྣམས་ལ་རིམ་པ་བཞིན་རྟེན་འབྲེལ་དང༌། བྱམས་པ་དང༌། མི་
སྡུག་པ་བསྒོམ་པས་བསལ་ཞིང༌། དེར་མདོར་བསྡུ་ན། བྱིང་རྒོད་སྤང་སྟེ་སེམས་ཀྱི་རྒྱུན་རྩེ་
གཅིག་ཏུ་བྱེད་པ་བསྒྲུབ་པ་ལ། བྱིང་བ་ལ་སྤྲོ་བ་བསྐྱེད་པ་དང༌། རྒོད་པ་ལ་སེམས་མི་སྡུག་པ་
ལ་སོགས་པས་བསལ་བར་བྱ་སྟེ། ཇི་སྐད་དུ། གང་གི་ཚེ་བར་སྐབས་འདོད་ཆགས་ལ་སོགས་
པ་སེམས་ཕྱིར་རོལ་དུ་རྣམ་པར་གཡེང་བ་དེའི་ཚེ། སེམས་རྣམ་པར་གཡེང་བ་ཤེས་པར་བྱས་
ལ། མི་སྡུག་པ་ལ་སོགས་པ་བསྒོམ་པས་རྣམ་པར་གཡེང་བ་ཞི་བར་བྱས་ཤིང༌། མྱུར་དུ་དེ་
ཉིད་ལ་བྱང་སེམས་ཕྱི་ཕྱིར་རོལ་གཞུགས་པར་བྱའོ། །ཞེས་དང༌། ཅི་སྟེ་གང་གི་ཚེ་གཉིད་དང་
རྨུགས་པས་ནོན་ཏེ་དམིགས་པ་འཛིན་པ་ལ་མི་གསལ་ཞིང་སེམས་བྱིང་བར་གྱུར་པ་དེའི་ཚེ།
སྣང་བའི་འདུ་ཤེས་བསྒོམ་པའི་མཆོག་ཏུ་དགའ་བའི་དངོས་པོ་སངས་རྒྱས་ལ་སོགས་པའི་
ཡོན་ཏན་ཡིད་ལ་བྱེད་པས་བྱིང་བ་བསལ་ལ། དམིགས་པ་དེ་ཉིད་ལ་དམ་དུ་བཟུང་ངོ༌། །ཞེས་
གསུངས་སོ། །སེམས་ནི་སྒོ་གཏན་བཅུག་པ་ལྟར། །རྣམ་རྟོག་རླུང་གིས་གཡོ་བ་མེད། །ཅེས་
པ་ནི་དེ་ཉིད་ལས། གང་གི་ཚེ་བྱིང་བ་དང་རྒོད་པ་གཉིས་ཀ་དང་བྲལ་བའི་ཚེ། མཉམ་པར་
འཇུག་ཅིང་སེམས་རང་གི་ངང་གིས་འབྱུང་བར་མཐོང་བ་དེའི་ཚེ་རྩོལ་བ་ཀློད་དེ་བཏང་
སྙོམས་སུ་བྱའོ། །ཞེས་གསུངས་ཏེ། བྱིང་རྒོད་དང་བྲལ་ནས། སྒོ་གཏན་བཅུག་པ་ལྟར་སེམས་
མི་གཡོ་བར་གནས་པ་ལ་རིང་དུ་འཇོག་པ་ནི། མཉམ་པར་འཇོག་པ་ཞེས་བྱ་སྟེ། ཞི་གནས་
གྲུབ་བོ། །ཕན་ཡོན་ནི། འདོད་པ་རྣམས་ལ་དགར་མི་འགྱུར། །ཤིན་ཏུ་སྦྱངས་པས་བདེ་བ་
ཐོབ། ཅེས་ཏེ་དང་པོ་ཞི་གནས་གྲུབ་པའི་སེམས་ཀྱིས་དང༌། ཕྱི་མ་ལུས་ཀྱི་གཙོ་ཆེ་སྟེ། དེ་ལྟར་
ན་ཚིག་གི་དོན་ཏོ། དེ་ལ་སེམས་གནས་པའི་ཐབས་དགུ་པོ་ཉིད་དང༌། སྤོང་པའི་འདུ་བྱེད་
བརྒྱད་པོ་ཅི་ཞེ་ན། དང་པོ་རྗེ་བཙུན་གྱིས་རྒྱན་ལས། དམིགས་པ་ལ་ནི་སེམས་གཏན་ནས། །
དེ་རྒྱུན་རྣམ་པར་གཡེང་མི་བྱ། །རྣམ་གཡེང་མྱུར་དུ་རྟོག་བྱས་ནས། །དེ་ལ་སླར་ཡང་སླན་
20-1-337


པར་བྱ། །བློ་ལྡན་གང་ནས་གོང་དུ་ཡང༌། །སེམས་ནི་གང་དུ་བསྡུ་བར་བྱ། །དེ་ནས་ཡོན་ཏན་
མཐོང་བའི་ཕྱིར། །ཏིང་ངེ་འཛིན་ལ་སེམས་འདུལ་ལོ། །རྣམ་གཡེང་ཉེས་པ་མཐོང་བའི་ཕྱིར། །
དེ་ལ་མི་དགའ་ཞི་བར་བྱ། །རློམ་སེམས་ཡིད་མི་བདེ་ལ་སོགས། །ལགས་པ་དེ་བཞིན་ཞི་
བར་བྱ། །དེ་ནས་སྡོམ་བརྩོན་ཅན་གྱི་ནི། །སེམས་ནི་མངོན་པར་འདུ་བྱེད་བྱས། །རང་གི་ངང་
གིས་འབྱུང་བ་ཐོབ། །དེ་གོམ་པ་ལས་འདུ་མི་བྱ། །ཞེས་པ་རྣམས་ཏེ་དམ་པའི་ཆོས་མངོན་པ་
ཀུན་བཏུས་ལས་ཀྱང༌། ཞི་གནས་གང་ཞེ་ན་འདི་ལྟ་སྟེ། ནང་ཉིད་ལ་སེམས་འཇོག་པ་དང༌།
རྒྱུན་དུ་འཇོག་པ་དང༌། བླན་ཏེ་འཇོག་པ་དང༌། ཉེ་བར་འཇོག་པ་དང༌། འདུལ་བར་བྱེད་པ་
དང༌། ཞི་བར་བྱེད་པ་དང༌། རྣམ་པར་ཞི་བར་བྱེད་པ་དང༌། རྩེ་གཅིག་ཏུ་བྱེད་པ་དང༌། མཉམ་
པར་འཇོག་པའོ། །ཞེས་སོ། །འདིའི་དོན་ནི། མཧཱ་བྷོ་དྷི་ས་ཏྭ་པདྨའི་ངང་ཚུལ་གྱི་སྒོམ་རིམ་
ལས། དེ་ལ་འཇོག་ཅེས་བྱ་བ་ནི། དམིགས་པ་ལ་སེམས་འདོགས་པའོ། །རྒྱུན་དུ་འཇོག་ཅེས་
བྱ་བ་ནི། དམིགས་པ་དེ་ཉིད་ལ་རྒྱུན་དུ་འཇོག་པའོ། །བསླན་ཏེ་འཇོག་ཅེས་བྱ་བ་ནི། རྣམ་
པར་གཡེང་བ་ཤེས་ནས་དེ་སྤང་པའོ། །ཉེ་བར་འཇོག་ཅེས་བྱ་བ་ནི། རྣམ་པར་གཡེང་བ་སྤང་
ནས་ཕྱི་ཕྱིར་བསྟུན་ཏེ་དམིགས་པ་དེ་ཉིད་ལ་འཇོག་པའོ། །འདུལ་ལོ་ཞེས་བྱ་བ་ནི་དགའ་བ་
བསྐྱེད་པའོ། །ཞི་བར་བྱེད་དོ་ཞེས་བྱ་བ་ནི། རྣམ་པར་གཡེང་པའི་ཉེས་པ་མཐོང་ནས་མི་
དགའ་བར་རབ་ཏུ་ཞི་བར་བྱེད་པའོ། །རྣམ་པར་ཞི་བར་བྱེད་པ་ནི། རྨུགས་པ་དང་གཉིད་ལ་
སོགས་པ་ལང་བ་རྣམ་པར་སེལ་པའོ། །རྩེ་གཅིག་ཏུ་བྱེད་པ་ནི་མངོན་པར་འདུ་བྱེད་པ་མེད་
པས་འཇུག་པར་འབད་བྱེད་པའོ། །མཉམ་པར་འཇོག་ཅེས་བྱ་བ་ནི། སེམས་པར་གྱུར་པ་ན་
བཏང་སྙོམས་སུ་བྱེད་པ་སྟེ། མཉམ་པར་འཛིན་ཞེས་བྱ་བའི་ཐ་ཚིག་གོ །ཚིག་འདི་རྣམས་ཀྱི་
དོན་འདི་རྣམས་ནི་འཕགས་པ་བྱམས་པ་དང༌། སྔོན་གྱི་མཁན་པོ་རྣམས་བཤད་དོ། །ཞེས་
གསུངས་ཏེ། ཐོག་མར་དམིགས་པ་ལ་སེམས་རྩེ་གཅིག་ཏུ་གཏོད་དེ་འཇོག་པ། རེ་ཞིག་དང་
20-1-338


པོར་སེམས་བཞག་པ་དེ་ཉིད་ལ། རང་དུ་མཉམ་པར་འཇོག་ཅིང༌། དམིགས་པ་ཁོ་ན་ལ་
ཡེངས་སུ་འཇུག་པ་རྒྱུན་དུ་འཇོག་ལ། སེམས་རྣམ་པར་གཡེང་ན། དེ་ངོ་ཤེས་པར་བྱས་ནས་
སླར་མཉམ་པར་འཇོག་པ་བསླན་ཏེ་འཇོག་པ། སེམས་ཕྱི་རོལ་དུ་མི་འཕྲོ་བའི་ཆེད་དུ། དང་
པོ་ཉིད་དུ་དྲན་པ་དང་ལྡན་པས་རྣམ་གཡེངས་སྤངས་ཤིང་འཇོག་པ་ཉེ་བར་འཇོག་པ། ཏིང་ངེ་
འཛིན་ལ་སོགས་པའི་ཕན་ཡོན་དང༌། གཡེངས་པའི་རྒྱུ་འདོད་ཡོན་ལ་ཉེས་དམིགས་སུ་
བལྟས་ནས་སེམས་འཕྲོར་མི་འཇུག་པ་འདུལ་བར་བྱེད་པ་དང༌། སེམས་འཁྲུགས་པས་མི་
གནས་པའི་རྒྱུ་རྣམ་གཡེང་ལ་ཉེས་པར་ལྟ་བས། སེམས་མཉམ་པར་འཇོག་པ་ལ་མི་དགའ་བ་
སྤངས་ནས་མཉམ་པར་འཇོག་པ་ཞི་བར་བྱེད་པ་དང༌། དམིགས་པ་བརྗེད་ནས་དེ་ལས་
གཞན་དུ་ཡེངས་ནས་བྱིང་རྒོད་རྣམ་རྟོག་སོགས་མངོན་དུ་གྱུར་ཀྱང༌། སྐབས་མི་འབྱེད་པར་
རབ་ཏུ་ཞི་བར་བྱེད་པ་དང༌། དེ་ནས་སེམས་བརྩོན་པས་རྩེ་གཅིག་ཏུ་མངོན་པར་འདུ་བྱེད་པ་
དང་བཅས་པས་བྱིང་རྒོད་ཅི་ཙམ་སྤངས་པ་དེ་ཙམ་དུ་མཉམ་པར་འཇོག་པ་སེམས་ཀྱི་རྒྱུན་
གཅིག་ཏུ་བྱེད་པ་དང༌། དེ་ལས་ཤིན་ཏུ་གོམས་པས་འབད་རྩོལ་མངོན་པར་འདུ་བྱེད་མེད་
པར་རང་གིས་གནས་པ་ནི་མཉམ་པར་འཇོག་པའོ། །སྔར་བཤད་པའི་ལུང་གི་ཚིག་དོན་ནི་
དཔེ་བཤད་པའི་ཕྱིར་རེ་ཞིག་བཞག་གོ །གཉིས་པ་ལ། ཏིང་ངེ་འཛིན་གྱི་ཉེས་པ་ལྔ་ནི། ལེ་ལོ་
དང་ནི་གདམ་ངག་དང༌། །བརྗེད་དང་བྱིང་དང་རྒོད་པ་དང༌། །འདུ་མི་བྱེད་དང་འདུ་བྱེད་དེ། །
འདི་དག་ཉེས་པ་ལྔར་འདོད་དོ། །ཞེས་དང༌། དེ་སྤངས་པའི་འདུ་བྱེད་བརྒྱད་ནི། གནས་དང་
དེ་ལ་གནས་པ་དང༌། རྒྱུ་དང་འབྲས་བུ་ཉིད་དུའོ། །ཞེས་དང་པོ་བཞི་དང༌། དམིགས་པ་བརྗེད་
པར་མ་གྱུར་དང༌། །བྱིང་དང་རྒོད་པ་རྟོག་པ་དང༌། །དེ་སྤངས་མངོན་པར་འདུ་བྱེད་དང༌། །ཞི་
ཚེ་རྣལ་དུ་འཇོག་པའོ། །ཞེས་ཕྱི་མ་བཞི་པོ་རྣམས་ཏེ། །འདིའི་དོན་ནི། མཧཱ་ར་བ་ཀ་མ་ལ་ཤི་
ལས། མདོར་ན་ཏིང་ངེ་འཛིན་གྱི་ཉེས་པ་དྲུག་ཡོད་དེ། ལེ་ལོ་དང༌། དམིགས་པ་བརྗེད་པ་
20-1-339


དང༌། བྱིང་བ་དང༌། རྒོད་པ་དང༌། མི་རྩོལ་བ་དང༌། རྩོལ་བའོ། །འདི་རྣམས་ཀྱི་གཉེན་པོ་
ཡང༌། སྤོང་བའི་འདུ་བྱེད་བརྒྱད་ཀྱིས་སྤོང་ངོ༌། །འདི་ལྟ་སྟེ། དད་པ་དང༌། འདུན་པ་དང༌།
རྩོལ་བ་དང༌། ཤིན་ཏུ་སྦྱང་པ་དང༌། དྲན་པ་དང༌། ཤེས་བཞིན་དང༌། སེམས་པ་དང༌། བཏང་
སྙོམས་སོ། །དེ་ལ་གོང་མ་བཞི་ནི་ལེ་ལོའི་གཉེན་པོ་སྟེ། འདི་ལྟར་ཏིང་ངེ་འཛིན་གྱི་ཡོན་ཏན་
དག་ལ་མངོན་པར་ཡིད་ཆེས་པ། མཚན་ཉིད་དང་ལྡན་པའི་དད་པའི་རྣལ་འབྱོར་པ་རྣམས་ལ་
འདོད་པ་སྐྱེའོ། །དེ་ནས་འདོད་པའི་བརྩོན་འགྲུས་རྩོམ་མོ། །དེ་བརྩོན་འགྲུས་ཀྱི་སྟོབས་ཀྱི་
ལུས་དང་སེམས་ལས་སུ་རུང་བ་ཉིད་བྱེད་དོ། །དེ་ནས་ལུས་དང་སེམས་ཤིན་ཏུ་སྦྱངས་པར་
གྱུར་པས་ལེ་ལོ་ལྡོག་སྟེ། དེ་བས་ན་དད་པ་ལ་སོགས་པ་ནི་ལེ་ལོ་སྤང་པའི་ཕྱིར་སྒོམ་མོ། །
དྲན་པ་ནི་དམིགས་པ་བརྗེད་པའི་གཉེན་པོའོ། །ཤེས་བཞིན་ནི་བྱིང་བ་དང་རྒོད་པའི་གཉེན་
པོ་སྟེ། དེས་བྱིང་བ་དང་རྒོད་པ་ཡང་དག་པར་རྟོགས་པའི་ཕྱིར་རོ། །བྱིང་བ་དང་རྒོད་པ་རབ་
ཏུ་མ་ཞི་བའི་དུས་ན་མི་རྩོལ་བ་ཉེས་པ་སྟེ། དེའི་གཉེན་པོར་སེམས་པ་བསྒོམ་མོ། །བྱིང་བ་
དང་རྒོད་པ་རབ་ཏུ་ཞི་སྟེ། གང་གི་སེམས་རྣལ་དུ་འཇུག་པ་དེའི་ཚེ་རྩོལ་བ་ཉེས་པ་ཡིན་ཏེ།
དེའི་གཉེན་པོར་བཏང་སྙོམས་སོ། །སྤང་བའི་འདུ་བྱེད་བརྒྱད་པོ་དེ་དག་དང་ལྡན་པ་ཏིང་ངེ་
འཛིན་ཤིན་ཏུ་ཞུགས་པ་ཡིན་ཏེ། ཞེས་སྒོམ་རིམ་ལས་གསུངས་ཏེ། དེ་ལ་རྩོལ་བའི་རྒྱུ་དད་པ།
གཞིའམ་གནས་འདུན་པ། དེ་ལ་གནས་པ་རྩོལ་པ། རྩོལ་བའི་འབྲས་བུ་ཤིན་ཏུ་སྦྱངས་པ་སྟེ།
སེམས་གནས་པའི་ཐབས་དང་པོ་བཞི་ཡི་གནས་སྐབས་དང་རིམ་པར་སྦྱར་བར་བྱའོ། །
དམིགས་པ་བརྗོད་པ་སྟེ། རྣམ་རྟོག་ལས་འབྱམས་པའི་གཉེན་པོར་དྲན་པ་སྟེ། འདུལ་བར་
བྱེད་པ་དང༌། ཞི་བར་བྱེད་པའི་སྐབས་སུ་རིག་ལ། ཤེས་བཞིན་གྱིས་ནི་གང་གི་ཚེ་ཇི་ལྟར་བྱིང་
བ་དང་རྒོད་པ་ཤེས་ཏེ། དེའི་ཕྱིར་བྱིང་རྒོད་ཀྱིས་སེམས་ལས་སུ་མི་རུང་བའི་གཉེན་པོར་ཤེས་
བཞིན་ཏེ། རབ་ཏུ་ཞི་བར་བྱེད་པ་དང༌། སེམས་པ་ནི་སེམས་རྩེ་གཅིག་ཏུ་བྱེད་པའི་སྐབས་སུ་
20-1-340


རིག་ལ། མི་རྩོལ་པའི་གཉེན་པོའི་ཅིའི་ཕྱིར་སེམས་པ་མི་རྩོལ་བའི་གཉེན་པོ་ཞེ་ན། དེ་ཡང་མི་
རྩོལ་བ་ནི། རྩེ་གཅིག་པ་ལ་མི་རྩོལ་བ་སྟེ། བྱིང་རྒོད་གྱི་སྐབས་རྙེད་དུ་རུང་བ་ཡིན་ལ། སེམས་
པ་ནི། དེ་སྐད་དུ་ཡང༌། སེམས་པ་གང་ཞེ་ན། མངོན་པར་འདུ་བྱེད་པ་ཡིད་ཀྱི་ལས་དེ་དགེ་བ་
དང་མི་དགེ་བ་དང་ལུང་མ་བསྟན་པ་རྣམས་ལ་སེམས་འཇུག་པའི་ལས་ཅན་ནོ། །ཞེས་
གསུངས་ཏེ། སྐབས་འདིར་ཡང་ཁབ་ལེན་གྱི་རྗེས་སུ་ལྕགས་འགྲོ་བ་ལྟར། ཏིང་ངེ་འཛིན་ལ་
སེམས་རྩེ་གཅིག་ཏུ་འགྲོ་བའོ། །བཏང་སྙོམས་ནི་མཉམ་པར་འཇོག་པའི་ཚེ་རང་བཞིན་གྱི་
སེམས་གནས་པ། རྩོལ་བ་ཉེས་པ་ཡིན་ཏེ། དེའི་ཕྱིར་ཞིང་རྣམ་རྟོག་གིས་འཁྲུགས་ཏེ་དེའི་
གཉེན་པོར་བསྒོམ་པར་བྱ་སྟེ། འདི་དག་བསྒོམ་པའི་རིམ་པ་མདོར་བསྡུས་སུ་བཤད་ཟིན་ཏོ། །
ད་ནི་ལྷག་མཐོང་བསྒོམ་ཚུལ་ཤིན་ཏུ་ཅུང་ཟད་ཅིག་བརྗོད་ན། དེ་ལྟར་ཞི་གནས་གྲུབ་
པ་དེ་ནས་ཞེས་པ། ཆོས་མངོན་པ་ལས། ཡང་ཞི་གནས་དང་ལྷག་མཐོང་དེ་དག་ལ་བརྟེན་
ནས་ལམ་བཞིར་གྱུར་ཏེ། ལ་ལ་ནི་ཞི་གནས་ཐོབ་པ་ཡིན་གྱི། ལྷག་མཐོང་ནི་མ་ཐོབ་སྟེ། དེ་
ཞི་གནས་ལ་བརྟེན་ནས་ལྷག་མཐོང་ལ་བརྩོན་པར་བྱེད་དོ། །ལ་ལ་ནི་ལྷག་མཐོང་ཐོབ་པ་
ཡིན་གྱི། ཞི་གནས་ནི་མ་ཐོབ་སྟེ། དེ་ལྷག་མཐོང་ལ་བརྟེན་ནས་ཞི་གནས་ལ་བརྩོན་པར་བྱེད་
དོ། །ལ་ལ་ནི། ཞི་གནས་ཡང་ཐོབ་པ་མ་ཡིན་ལ། ལྷག་མཐོང་ཡང་ཐོབ་པ་མ་ཡིན་ཏེ། དེ་ལ་
ཆོས་ལ་རྒོལ་བ་མངོན་པར་ཚར་བཅད་པའི་སེམས་ཀྱིས་གཉིས་ཀ་ལ་བརྩོན་པར་བྱེད་དོ། །
ལ་ལ་ནི་ཞི་གནས་དང་ལྷག་མཐོང་ཡང་ཐོབ་པ་ཡིན་ཏེ། དེའི་གནས་དང་ལྷག་མཐོང་ཡང་
འདྲེས་པར་གྱུར་ནས་མཉམ་པར་ཟུང་དུ་འཇུག་གོ །ཞེས་གསུངས་པས་དང་པོའི་དབང་དུ་
བྱས་པའོ། །དེ་ལྟར་དེ་ནས་ཐེག་པ་ཆེན་པོའི་མདོ་རྣམས་ལས། ཤེས་རབ་ཀྱི་ཕ་རོལ་ཏུ་ཕྱིན་
པ་བསྒོམ་པའི་རིམ་པ་གང་གསུང་པ་དེ་ལས་བྱུང་བ་བཞིན་མན་ངག་དང་ལྡན་པས་བློ་ལྡན་
20-1-341


ཏེ། བྱང་ཆུབ་སེམས་དཔས་བསྒོམ་པར་བྱེད་དོ་ཞེས་པ་མཚམས་སྦྱར་བའོ། །དེ་ནས་བསྒོམ་
པ་དངོས་ནི། དེ་སྐད་དུ་ལྷག་མཐོང་གང་ཞེ་ན། འདི་ལྟ་སྟེ། ཆོས་རྣམས་ལ་རྣམ་པར་འབྱེད་
པ་དང༌། རབ་ཏུ་རྣམ་པར་འབྱེད་པ་དང༌། ཡོངས་སུ་རྣམ་པར་རྟོག་པར་བྱེད་པ་དང༌། ཡོངས་
སུ་རྣམ་པར་དཔྱོད་པར་བྱེད་པའོ། །ཞེས་གསུངས་ཏེ། རྣམ་པར་འབྱེད་པ་ནི་ཇི་སྙེད་པའི་ཆོས་
ལ་འདི་དག་གོ །ཞེས་ལྟ་བ་དང༌། རབ་ཏུ་རྣམ་འབྱེད་ནི་ཆོས་ཉིད་ཇི་ལྟ་བའི་དོན་ལ་རྣམ་པར་
འབྱེད་པ་དང༌། ཡོངས་སུ་རྟོག་པ་ནི། རྟོག་པ་དང་བཅས་པའི་ཤེས་རབ་ཀྱིས་མཚན་མར་བྱེད་
ཅིང་ངོ་བོ་ལ་རང་སར་འཚོལ་བ་དང༌། ཡོངས་སུ་དཔྱོད་པ་ནི་ཁྱད་པར་ལ་ཞིབ་ཏུ་འཚོལ་བ་
ཡིན་ནོ། ཁྱད་པར་དེ་དག་དང་ལྡན་པའི་ཟབ་མོ་སྟོང་པ་ཉིད་སྒོམ་ཚུལ་ཡང༌། མཧཱ་ས་ཏྭ་ཀ་
མ་ཤི་ལའི་སྒོམ་རིམ་དུ། གང་གི་ཚེ་ཡིད་ལ་བྱེད་པ་དེ་དག་ཞུགས་པར་གྱུར་པ་དེའི་ཚེ། ཕུང་
པོ་དང་ཁམས་ལ་སོགས་པའི་བྱེ་བྲག་གིས་རྒྱས་པར་དམིགས་པ་བྱེད་པ་ཁོ་ན་སྟེ། འདི་སྐད་
དུ། དགོངས་པ་ངེས་པར་འགྲེལ་པ་ལ་སོགས་པ་ལས་ཀྱང༌། རྣལ་འབྱོར་པ་རྣམས་ཀྱིས་སྟོང་
པ་ཉིད་རྣམ་པ་བཅོ་བརྒྱད་དམིགས་པ་ལ་སོགས་པའི་བྱེ་བྲག་གིས་དམིགས་པའི་རྣམ་པ་མང་
དུ་བཀའ་སྩལ་ཏོ། །ཞེས་གསུངས་ཏེ། བྱེ་བྲག་གིས་རྒྱས་པར་དམིགས་པ་ཞེས་པ། ཇི་སྙེད་
པ་རྣམ་འབྱེད་དང༌། དམིགས་པ་ལ་སོགས་པའི་བྱེ་བྲག་གིས་ཞེས་པ། ཇི་ལྟ་བ་རབ་ཏུ་རྣམ་
འབྱེད་དང་ཕྱི་མ་གཉིས་ཡིན་ལ། ད་ནི་འདིའི་རྗེས་སུ་འབྲང་བར་བྱ་སྟེ། ས་ལས་མྱུ་གུ་དང་
འཇའ་ཚོན་ལྟར་ཆོས་འདི་དག་ཐམས་ཅད་རྟེན་ཅིང་འབྲེལ་བར་འབྱུང་བ་ཙམ་སྟེ། སེམས་ཀྱི་
སྣང་བ་ཙམ་ལས་ལེགས་པར་དཔྱད་ན་ངོས་བཟུང་དང་བྲལ་བའི་ཕྱིར་ངོ་མཚར་རྨད་དུ་འབྱུང་
བའོ། །དེའི་ཕྱིར་སྣང་བའི་ཆོས་འདི་ཀུན་སྒྱུ་མ་ལྟ་བུར་བདེན་པའི་སྟོང་པའོ་ཞེས་སྔར་བཤད་
པའི་ཞི་གནས་ཀྱི་ངང་ནས་ཡང་ནས་ཡང་དུ་ཆོས་རྣམས་ཀྱི་རང་བཞིན་སྟོང་པ་ཉིད་དེ་བསྒོམ་
པར་བྱའོ། །དེ་ལ་འདིར་ནི་ལང་ཀར་གཤེགས་པ་ལས་བཀའ་སྩལ་ཏེ། སེམས་ཙམ་ལ་ནི་རབ་
20-1-342


བརྟེན་ནས། །ཕྱི་རོལ་དོན་ལ་མི་རྟོག་གོ །དེ་བཞིན་ཉིད་ལ་དམིགས་ནས་ནི། །སེམས་ཙམ་
ལས་ཀྱང་འདའ་བར་བྱེད། །སེམས་ཙམ་ལས་ནི་འདས་ནས་སུ། །སྣང་བ་ལས་ནི་འདའ་བར་
བྱ། །སྣང་མེད་གནས་པའི་རྣལ་འབྱོར་པ། །ཡེ་ཤེས་ཐེག་པ་ཆེན་པོ་མཐོང༌། །ཞེས་སོ། །དེ་
ཡང་སེམས་ཙམ་ལ་ནི་རབ་བརྟེན་ནས་ཞེས་པ་ནས་བརྩམ་སྟེ། སེམས་ཙམ་ལས་ཀྱང་འདའ་
བར་བྱ། །ཞེས་པའི་བར་ནི། སཱ་ལུའི་མྱུ་གུ་ཞེས་པ་ནས། དེ་བསྒོམ་བྱ། ཞེས་པས་བཤད་
དེ། སྣང་མེད་ལ་གནས་པ་དང༌། ཡེ་ཤེས་ཐེག་པ་ཆེན་པོ་མཐོང་བ་ནི་སྔ་མ་གོམས་པ་ལས་
འབྱུང་ཞིང༌། སེམས་མི་གཡོ་ཞིང་ཆོས་རྣམ་འབྱེད་ཅེས་པས་བཤད་དོ། །དེ་ལ་སཱ་ལུའི་མྱུ་གུ་
རྟེན་འབྱུང་ཙམ་གྱི་དཔེ་དང་འཇའ་ཚོན་ནི་བར་སྣང་ལས་ལོགས་སུ་མེད་པ་ལྟར། ཆོས་ཀུན་
སེམས་ལས་གཞན་དུ་མེད་པའི་དཔེའོ། །སྐབས་འདིར་ངེས་ཤེས་སྐྱེས་དཀའ་ན། རྒྱལ་བའི་
སྲས་ཀྱི་དབང་ཕྱུག་ཀླུ་སྒྲུབ་དང༌། གནས་བརྟེན་ཆེན་པོ་རྒྱལ་སྲས་དབྱིག་གཉེན་སོགས་ཀྱིས་
ཇི་སྐད་བཤད་པའི་རིམ་པ་དང་ལུང་གིས་ཀྱང་ཅི་རིགས་སུ་གཏན་ལ་དབབ་བོ། །བསྡུས་པ་
ནི་འདི་ཡིན་ཏེ། ཆོས་ཀུན་གྱི་རང་བཞིན་གཅིག་པ་ནི། མཐའ་ཀུན་བྲལ་བའི་སྟོང་ཉིད་རྟོགས་
པ་དེ་བསྒོམ་པའི་ཕྱིར། ཡང་ཡང་སྟོང་པའོ་ཞེས་ཀྱང་བསྒོམ་པར་བྱའོ། །ཞེས་པའོ། །འདི་
ཚིག་དོན་ལྟག་འོག་མི་མཐུན་པའོ་སྙམ་ན་མ་ཡིན་ཏེ། དེ་ཡང་ཇི་ལྟར་བྷ་ར་ཏ་ལས། མེས་སྨིན་
པའི་འཁུར་བ་གསོད་པ་འོན་ཅིག་ཅེས་པའི་དོན་ལ། གྲུབ་པ་མེ་ཡིས་བསྲེག་པ་ཡི། །འཁུར་
བ་གསོད་པ་འོན་ཅིག་བུ། །ཞེས་པ་ལྟ་བུ་སྟེ། དེའི་ཕྱིར་ཚིག་ལ་སྐྱོན་མེད་དོ། །དེ་ལྟར་མཉམ་
བཞག་ཏུ་བསམ་གཏན་གྱི་སྐྱོན་དང༌། ཡིད་ལ་བྱེད་པ་དང་བསམ་གཏན་ཉིད་དྲན་པ་དང༌།
སྐྱོན་དང་ཡོན་ཏན་དང༌། ཡང་དག་པའི་གནས་ལ་སེམས་སོན་མ་སོན་སོགས་ཤེས་བཞིན་
དང༌། སྤྱོད་ཡུལ་འཇུག་པ་ནས་ཀྱང་སྨྲས་པ། བདག་གི་ལས་དང༌། དཀོན་མཆོག་གི་ཡོན་ཏན་
འཁོར་བའི་ཉེས་པ་དང༌། རང་གི་སེམས་ལ་དྲན་པ་དང༌། ཤེས་བཞིན་དུ་ཡང་བརྟག་པར་བྱ།
20-1-343


སྤྱོད་ལམ་ཀུན་ཏུ་སྲོག་ལ་བབས་ཀྱང་ཉོན་མོངས་པ་དང་ལས་ངན་པ་བསྡོམ་པའི་བག་ཡོད་
བརྟེན་པར་བྱའོ། །ཞི་གནས་དང་ལྷག་མཐོང་ཆ་མཉམ་པ་དེ་ཅི་ཙམ་ན་རབ་ཏུ་ཞུགས་ཞེ་ན།
བྱ་བ་ཀུན་ལ་ཅི་ཞིག་ལྟར། །སེམས་མི་གཡོ་ཞིང་ཆོས་རྣམས་འབྱེད། །ཞེས་པའོ། །དེ་ལྟར་
རབ་ཏུ་སྨྲས་པ་གང༌། །འདི་ལ་ལེགས་རྣམས་རྒྱལ་བ་དང༌། །མཁན་པོ་སློབ་དཔོན་རྣམས་
ཀྱིའོ། །ཉེས་པ་གང་ཡིན་བདག་གི་བཟུང༌། །ཉེས་སྨྲས་ལྷག་པར་སྡིག་ཆེ་བས། །ནོངས་པ་
གང་ཡིན་མཆོག་ལ་བཤགས། །མགོན་པོ་ཀླུ་དབང་འཕགས་པ་ལྷ། །ཟླ་གྲགས་འཕགས་པ་
ཐོགས་མེད་དང༌། །སློབ་དཔོན་དབྱིག་གཉེན་བློ་བརྟན་དང༌། །ཙནྡྲ་གོ་མི་བདག་ཉིད་ཆེ། །ཞི་
བ་ལྷ་ལ་སོགས་པ་ཡི། །དངོས་པོ་རྣམས་ལ་སྐྱབས་སུ་མཆི། །དེང་འདིར་གཅིག་ཏུ་ཕན་པའི་
བློས། །བཤད་མོད་ཉེས་པ་གང་མཆིས་ཏེ། །བདག་ནི་ཤེས་བྱ་ཀུན་ལ་རྨོངས། །དེ་ལྟ་ན་ཡང་
བསྒོམ་པའི་ཚུལ༌། །འདི་ལ་འཁྲུལ་པ་ཡོད་མ་ཡིན། །ཏིང་འཛིན་འདི་ལ་གང་གནས་པ། །དེས་
ནི་རིན་ཆེན་བཟང་པོ་ལྟའི། །ཏིང་ངེ་འཛིན་སོགས་ཀུན་འཇུག་ནུས། །
༈ ད་ནི་ཀུན་རྫོབ་བྱང་ཆུབ་ཀྱི་སེམས་བསྒོམ་ཚུལ་ཅུང་ཟད་གཅིག་ཏུ་བརྗོད་པར་བྱ་སྟེ།
དེ་ནས་ཞེས་པ་སྔར་དེ་བཤད་པའི་རྗེས་ཐོག་དེ་ནས་བཤད་པར་བྱའོ་ཞེས་པ་ཡིན་གྱི། བསྒོམ་
པའི་རིམ་པ་བཞིན་དུ་བསྟན་པ་ནི་མ་ཡིན་ནོ། །དེ་ལ་དེ་ནས་གཞན་ཡང་བློ་ལྡན་བྱང་ཆུབ་
གཉེར་བ་དག་གིས་གཅིག་ཏུ་འབད་པར་བྱ་བ་འདི་ལ་ནི། དང་པོར་གང་དུ་བསྒོམ་པའི་
གནས་སྔར་བཤད་པ་ཉིད་ཆེས་མཆོག་ཡིན་མོད། གཅིག་ཏུ་དེ་ལྟར་དགོས་པ་ཡང་མ་ཡིན་ཏེ།
ཁྱིམ་ན་འདུག་གམ་ཡང་ན་བས་མཐར་འདུག་ཀྱང་རུང་སྟེ། དཔེར་ན་ཐམས་ཅད་སྒྲོལ་དང༌།
བྲམ་ཟེ་སྤུན་དུ་གྱུར་པ་ལྟ་བུའོ། །བསྒོམ་པའི་གང་ཟག་ནི་གཙོ་བོར་ནང་གི་ནང་ལ་རབ་ཏུ་
འཇོག་ཉིད་ཡིན་མོད། གཞན་ཡང་མཉམ་པར་འཇོག་ཀྱང་རུང༌། འདོད་པ་ལ་སྤྱོད་ཀྱང་རུང༌།
ཞེས་ཀུན་རྫོབ་བྱང་ཆུབ་ཀྱི་སེམས་ལ་ཐོག་མར་འཇུག་པ་ནི། དཀའ་ཐུབ་པ་དང་འདོད་ལྡན་
20-1-344


ཀུན་རུང་བར་མཚུངས་ཏེ། མདོར་ན་སེམས་ཅན་དམྱལ་བ་པ་ལ་ཡང་སྐྱེ་བར་རུང་ངོ༌། །དེའི་
ཕྱིར་བདག་སྔོན་དགེ་བ་མ་བསགས་ཞེས། །ཞུམ་པ་ཉིད་དུ་མི་བྱ་སྟེ། །མི་གང་ལམ་འདི་ཐོས་
གྱུར་པ། །དེ་དག་ཀུན་ཡང་མཐུ་དང་ལྡན། །འདི་ནི་ལམ་གྱི་གནས་སྐབས་ཕྱོགས་གཅིག་པ་
ཡང་མ་ཡིན་ཏེ་ཡུན་རིང་མོར་བསླབ་པ་མདོར་ན་དག་པའི་ས་ལ་གནས་པ་དང༌། ལས་དང་པོ་
པ་སེམས་བསྐྱེད་མ་ཐག་ཡན་ཆོད་ཀྱང་འདི་ཉིད་བསྒོམ་པར་བྱ་སྟེ། འོན་ཀྱང་དབང་པོ་དང་
ལམ་གྱི་བྱེ་བྲག་གིས་དམིགས་པ་དང་རྣམ་པ་ཐ་དད་པའོ། །ད་ནི་དེ་ཉིད་སྒོམ་ཚུལ་ཡང་
བསྡུས་ཏེ་བརྗོད་ན། རེ་ཞིག་དང་པོར་སེམས་ཅན་ཐམས་ཅད་ལ་སྙིང་རྗེ་བསྒོམ་པར་བྱ་སྟེ།
དེ་ཡང་ཐོག་མར་སེམས་ཅན་རྣམས་ཀྱི་ནང་ནས་དགྲ་ལ་སོགས་པ་རྣམས་ལ་བཟོད་པ་བསྒོམ་
པ་དང༌། དེ་ལྟ་བུའི་སྙིང་རྗེ་དེ་ཡང་རྐྱེན་གྱིས་མི་འཕྲོག་པའི་ཕྱིར་སེམས་ཅན་གང་ཅི་ཡང་རུང་
བ་བདག་རང་ལ་གནོད་པའི་སེམས་ཀྱིས་བསད་པར་བྱའོ་སྙམ་དུ་སེམས་པའི་དགྲ་ལ་
སོགས་པའི་དྲིན་དྲན་པ་དང་བྱམས་པའི་སེམས་སྐྱེ། དེ་ལ་སྙིང་རྗེ་སྐྱེ་སྟེ། གལ་ཏེ་དེ་ཡང་རྒྱུད་
ལ་མི་སྐྱེ་བར་ཁོང་དུ་ཆུད་པར་མ་གྱུར་ན། ཕ་མ་དང་དགྲ་སོགས་གཟུགས་བརྗེ་ཞིང་བསྒོམ་
པར་བྱ་ལ་ཡང་ན་རེ་ཞིག་སྡུག་བསྔལ་གཙོ་བོར་མི་བསམ་པར་འགྲོ་རྣམས་བདེ་བར་གྱུར་ན་
ཅི་མ་རུང་ཞེས་བྱམས་པ་བསྒོམ་པར་བྱ་ཞིང༌། ཕྱིས་ནས་ངེས་པར་སྙིང་རྗེ་ལ་ནན་ཏན་དུ་བྱ་
སྟེ། གཞན་དུ་ནི་བྱང་ཆུབ་ཀྱི་སེམས་རྒྱས་པར་མི་འགྱུར་རོ། །དེ་ལྟར་འགྲོ་བ་ཀུན་བྱང་ཆུབ་
ལ་འགོད་པར་འདོད་པས་སྙིང་རྗེ་ལ་བསྒོམ་པར་བྱ་དགོས་ཏེ། དེ་མེད་ན་རང་གི་དོན་ཉིད་
སེམས་པས་ན་གཞན་དོན་ལ་བཏང་སྙོམས་པར་འགྱུར་བས་གནོན་པ་དང༌། སྡུག་བསྔལ་ལ་
བཟོད་པ་ཡང་ནན་ཏན་དུ་བྱ་དགོས་ཏེ། གཞན་ཡང་བླ་ན་མེད་པའི་བྱང་ཆུབ་ལས་ཕྱིར་ལྡོག་
པར་འགྱུར་ཏེ། གཞན་གྱིས་གནོད་པ་བྱས་པས་ཁྲོ་བའམ་སྐྱོ་བར་འགྱུར་བ་དང༌། བྱང་ཆུབ་
ཀྱི་ཕྱིར་བསྐལ་བ་གྲངས་མེད་པར་དཀའ་བ་མེད་པར་དུ་མ་འབད་དགོས་པའི་ཕྱིར། དེ་ལ་
20-1-345


ཡིད་སྐྱོ་བས་བྱང་ཆུབ་ཆེན་པོ་བསྒྲུབ་པར་མི་བྱེད་ལ། སྙིང་རྗེ་མཚུངས་པ་མེད་པ་དང་ལྡན་
པའི་གང་ཟག་རྣམས་དེ་དག་བཟོད་པར་འགྱུར་བའི་ཕྱིར་རོ། །འདི་རྣམས་ནི་བྱང་ཆུབ་ཀྱི་
སེམས་མི་ཉམས་ཤིང་འཕེལ་རྒྱས་སུ་བྱེད་པའི་ཐབས་ཡིན་ནོ། །དེ་ལྟར་ན་ཐབས་དེ་རྣམས་
ལ་ནན་ཏན་དུ་འབད་ན་རིམ་གྱིས་ཏེ། གང་ཟག་དབང་པོ་དམན་པས་དང་པོར་སོ་སོའི་སྐྱེ་
བོས་བྱ་སླ་བའི་སྦྱིན་པ་སོགས་ལ་འབད་ན། ཕྱི་ནས་ཕ་རོལ་དུ་ཕྱིན་པ་ཐམས་ཅད་ལ་ཡང་
དག་པར་བསླབ་པར་བྱའོ། །དེ་ཡང་ཇི་སྐད་དུ། ཚོད་མ་ལ་སོགས་སྦྱིན་པ་ལ། །འདྲེན་པའི་
ཐོག་མར་སྦྱོར་བ་མཛད། །དེ་ལ་གོམ་ནས་ཕྱི་ནས་ནི། །རིམ་གྱིས་རང་གི་ཤ་ཡང་གཏོང༌། །
དེའི་རྒྱུ་མཚན་ཡང༌། གང་ཚེ་རང་གི་ལུས་ལ་ནི། །ཚོད་སོགས་ལྟ་བུའི་བློ་སྐྱེས་ནས། །དེ་ཚེ་
ཤ་ལ་སོགས་གཏོང་བ། །དེ་ལ་དཀའ་བ་ཅི་ཞིག་ཡོད། །ཅེས་སོ། །དེ་ལ་ཕ་རོལ་དུ་ཕྱིན་པའི་
རྣམ་པར་བཞག་པའི་རྒྱན་ལས། གྲངས་དང་དེ་ཡི་མཚན་ཉིད་གོ་རིམ་དང༌། །ངེས་པའི་ཚིག་
དང་གོམས་པའི་ཡོན་ཏན་དང༌། །དེ་དག་རབ་དབྱེ་བསྡུ་དང་མི་མཐུན་ཕྱོགས། །ཡོན་ཏན་
ཕན་ཚུན་རྣམ་ངེས་ཡིན་ཞེས་བྱ། །ཞེས་སོགས་རྒྱས་པར་གསུངས་པ་ལས། །འདིར་མདོར་
བསྡུས་ཏེ་བཤད་ན། མཚན་ཉིད་དང༌། དབྱེ་བ་དང༌། ངོ་བོ་དང༌། གྲངས་ངེས་དང༌། གོ་རིམ་
དང༌། ངེས་ཚིག་དང༌། འབྲས་བུའོ། །སྡོམ་ནི། མཚན་ཉིད་དབྱེ་བ་ངོ་བོ་དང༌། །གྲངས་དང་གོ་
རིམ་ངེས་ཚིག་འབྲས། །དེ་ལ་དང་པོ་ནི། རྗེ་བཙུན་གྱིས། སྦྱིན་པ་མི་མཐུན་ཕྱོགས་ཉམས་
དང༌། །རྣམ་པར་མི་རྟོག་ཡེ་ཤེས་ལྡན། །འདོད་པ་ཐམས་ཅད་ཡོངས་རྫོགས་བྱེད། །སེམས་
ཅན་རྣམ་སྨིན་དེ་རྣམ་གསུམ། །དེ་བཞིན་དུ་ཤེས་རབ་ཀྱི་བར་དུ་གསུངས་ཏེ། སྦྱིན་པ་ནས་
ཤེས་རབ་ཀྱི་བར་དུ་ཕར་ཕྱིན་དུ་འགྱུར་བ་ལ་ཁྱད་པར་བཞི་དང་ལྡན་པ་དགོས་ལ། དེ་དག་
ནི་སྦྱིན་པའི་མི་མཐུན་ཕྱོགས་སེར་སྣ་ཉམས་པ། སྦྱིན་པ་སྦྱིན་བྱ་ལེན་པོ་གཏོང་པོས་སྟོང༌། །
ཞེས་པ་ལྟར། སྦྱིན་པའི་འཁོར་གསུམ་རྣམ་པར་མི་རྟོག་པའི་ཤེས་རབ་ཀྱིས་ཟིན་པས། ཟང་
20-1-346


ཟིང་དང་ཆོས་ལ་སོགས་པའི་སྦྱིན་པས་འདོད་པ་ཐམས་ཅད་ཡོངས་སུ་རྫོགས་པར་བྱེད། ཟང་
ཟིང་སོགས་ཀྱིས་འགྲོ་བ་བསྡུས་ནས་རྒྱུད་སྨིན་པར་བྱེད་པས་མཚམས་སྦྱར་བའོ། །དེ་ལྟར་
ཆོས་བཞི་དང་ལྡན་པའི་གཏོང་པའི་སེམས་པ་ནི་སྦྱིན་པའི་ཕ་རོལ་དུ་ཕྱིན་པའོ། །དེ་བཞིན་དུ་
ཚུལ་ཁྲིམས་ཀྱི་མི་མཐུན་ཕྱོགས་ཚུལ་འཆལ་ལ་སོགས་པ་དང༌། བཟོད་པའི་མི་མཐུན་ཕྱོགས་
ཁོང་ཁྲོ་ལ་སོགས་པ་དང༌། ལེ་ལོ་སོགས་བརྩོན་འགྲུས་ཀྱི་མི་མཐུན་ཕྱོགས་དང༌། རྣམ་
གཡེངས་སོགས་བསམ་གཏན་གྱི་མི་མཐུན་ཕྱོགས་དང༌། ཤེས་འཆལ་སོགས་ཤེས་རབ་ཀྱི་མི་
མཐུན་ཕྱོགས་རྣམས་ཉམས་པ་དང༌། རང་རང་གི་འཁོར་གསུམ་རྣམ་པར་མི་རྟོག་པའི་ཤེས་
རབ་ཀྱིས་ཟིན་པ་དང༌། ཚུལ་ཁྲིམས་ཕུན་སུམ་ཚོགས་པས་ཡིད་དང་བ་སོགས་དཔག་ཏུ་མེད་
པས་དང༌། བཟོད་པས་གཞན་གྱིས་གནོན་པ་བྱས་པས་བཟོད་པ་ལ་སོགས་པས་དང༌། བརྩོན་
པས་གཞན་གྱི་གྲོགས་བྱེད་པ་དང༌། བསམ་གཏན་གྱིས་མངོན་ཤེས་ལྔ་སོགས་ཀྱིས་དང༌།
ཤེས་རབ་ཀྱིས་བླང་དོར་གྱི་གནས་དང་གནས་མ་ཡིན་པ་རྣམ་པར་འབྱེད་པ་ལ་སོགས་པས་
གཞན་གྱི་འདོད་པ་ཡོངས་སུ་རྫོགས་པར་བྱེད་པ་དང༌། དེ་ཀུན་གྱིས་ཀྱང་འདོད་པ་རྫོགས་
པར་བྱས་ནས་ཆོས་བསྟན་པས་སྔ་མ་ལྔས་རྒྱུད་སྨིན་པར་བྱེད་པ་ལ་མཚམས་སྦྱོར་ལ་དྲུག་
པས་སྨིན་པར་བྱེད་པ་སྟེ། དེ་ལྟར་ཆོས་བཞི་བཞི་དང་ལྡན་པས་སྤོང་བའི་སེམས་པ་ཚུལ་
ཁྲིམས་དང༌། མི་འཁྲུགས་པའི་ནི་བཟོད་པ་དང༌། སྤྲོ་བའི་ནི་བརྩོན་འགྲུས་དང༌། རྩེ་གཅིག་
པའི་བསམ་གཏན་དང༌། རབ་ཏུ་རྣམ་པར་འབྱེད་པའི་སེམས་པ་ནི་ཤེས་རབ་བོ། །གཉིས་པ་
དབྱེ་བ་ནི། སྦྱིན་པ་ལ། ཟང་ཟིང་མི་འཇིགས། ཆོས་ཀྱི་སྦྱིན་པའོ། །ཟང་ཟིང་ལ་གཏོང་བ་
དང༌། ཤིན་ཏུ་གཏོང་བ། གཏོང་བ་ཆེན་པོའོ། །ཚུལ་ཁྲིམས་ལ་ཉེས་སྤྱོད་སྡོམ་པ་དང༌། དགེ་བ་
ཆོས་སྡུད་དང༌། སེམས་ཅན་དོན་བྱེད་ཀྱི་ཚུལ་ཁྲིམས་གསུམ་གྱི་དང་པོ་ལ། སོ་སོར་ཐར་པ་
རིགས་བདུན་ནོ། །བཟོད་པ་ལ་སྡུག་བསྔལ་དང་ལེན་གྱི་དང༌། གནོད་པ་ལ་ཇི་མི་སྙམ་པ་
20-1-347


དང༌། ཆོས་ལ་ངེས་པའི་བཟོད་པ་དང་གསུམ་མོ། །བརྩོན་འགྲུས་ལ་གོ་ཆའི་བརྩོན་འགྲུས།
སྦྱོར་པའི་བརྩོན་འགྲུས། མི་ལྡོག་པའི་བརྩོན་འགྲུས་སོ། །བསམ་གཏན་ལ་མཐོང་ཆོས་ལ་
བདེ་བར་གནས་པའི་བསམ་གཏན། ཡོན་ཏན་མངོན་པར་བསྒྲུབ་པའི་བསམ་གཏན། སེམས་
ཅན་གྱི་དོན་བགྱིད་པའི་བསམ་གཏན་ནོ། །ཤེས་རབ་ལ། ཀུན་རྫོབ་ལ་དམིགས་པ་དོན་དམ་
ལ་དམིགས་པ། སེམས་ཅན་ལ་དམིགས་པའི་ཤེས་རབ་བོ། །གསུམ་པ་ངོ་བོ་ནི། ལན་དང་
རྣམ་པར་སྨིན་པ་ལ་མི་རེ་བའི་སྦྱིན་པ་ཡང་སྲིད་ལ་འདུན་པ་དང་བྲལ་བའི་ཚུལ་ཁྲིམས།
སེམས་ཅན་ལ་ཁོང་ནས་ཞེ་འགྲས་པ་མེད་པའི་བཟོད་པ། རང་བཞིན་གྱི་དགེ་བའི་ཆོས་
མཐའ་དག་ལ་ངང་གིས་སྤྲོ་བའི་བརྩོན་འགྲུས། བསམ་གཏན་གཟུགས་མེད་ཀྱི་སྙོམས་འཇུག་
བསལ་བའི་ཏིང་ངེ་འཛིན། ཐབས་སྙིང་རྗེ་ཆེན་པོ་དང་ཡ་མ་བྲལ་བའི་ཤེས་རབ་རྣམས་སོ། །
དེ་ཀུན་ཡང་རྟེན་དམ་པ་བྱང་ཆུབ་ཀྱི་སེམས་དང་ལྡན་པ། དངོས་པོས་དམ་པ་སྦྱིན་སོགས་ཀྱི་
དངོས་པོ་རྣམས་ཕྱོགས་རེ་བ་མིན་པས་རིས་མེད། ཆེད་དུ་བྱ་བ་དམ་པ་གཞན་དོན་དུ་སྦྱོར་བ།
ཐབས་དམ་པ་འཁོར་གསུམ་རྣམ་པར་མི་རྟོག་པའི་ཤེས་རབ་ཀྱིས་ཟིན་པ། བསྔོ་བ་དམ་པ་
བྱང་ཆུབ་ཆེན་པོར་བསྔོ་བ་དུག་མེད། དག་པ་དམ་པ་སྒྲིབ་གཉིས་དངོས་ཀྱི་གཉེན་པོར་སྤྱོད་
པ་སྟེ་དམ་པ་དྲུག་དང་ལྡན་པས་ཉམས་སུ་བླང་ངོ༌། །བཞི་པ་ནི་ཅིའི་ཕྱིར་ཕྱིན་དྲུག་ཏུ་གྲངས་
ངེས་ཞེ་ན། བྱང་ཆུབ་སེམས་དཔའ་ཆོས་ཐམས་ཅད་ནི་མདོར་ན་བསླབ་པ་གསུམ་མོ། །དེའང་
སྦྱིན་པས་ལོངས་སྦྱོད་ཐམས་ཅད་ལ་ཆགས་པ་དང་བྲལ་བར་བྱས་པ་ལས་ཚུལ་ཁྲིམས་ཕུན་
སུམ་ཚོགས་པར་འགྱུར་ལ། ཚུལ་ཁྲིམས་ལ་ཁྲོས་ཀྱང་སླར་མི་ཁྲོ་བ་སོགས་ཀྱིས་དགེ་སྦྱོང་དུ་
བྱེད་པའི་ཆོས་བཞི་དང་ལྡན་པར་འགྱུར་བས་བཟོད་པ་སྟེ། དེ་ལྟར་གསུམ་ནི་ལྷག་པ་ཚུལ་
ཁྲིམས་བསླབ་པའི་ངོ་བོ་ཡིན་ལ། བསམ་གཏན་ནི་ལྷག་པ་ཏིང་ངེ་འཛིན་དང༌། ཤེས་རབ་ནི་
ལྷག་པ་ཤེས་རབ་ཀྱི་བསླབ་པ་དང༌། བརྩོན་འགྲུས་ནི་ཐམས་ཅད་ཀྱི་གྲོགས་སུ་འགྱུར་བས་
20-1-348


ན། དེའི་ཕྱིར་གྲངས་ངེས་པའོ། །ལྔ་པ་གོ་རིམ་ནི། སྔ་མ་སྔ་མ་ལས་ཕྱི་མ་ཕྱི་མ་སྐྱེ་བས་ན། སྔ་
མ་ལས་ཕྱི་མ་མཆོག་ཏུ་གྱུར་པས་སྔ་མ་རྣམས་རགས་པ་ལ་ཕྱི་མ་རྣམས་ཕྲ་བའི་ཕྱིར་བསྟན་
སྟེ། ཇི་སྐད་དུ། སྔ་མ་མ་བསྟན་ཕྱི་མི་སྐྱེ། །དམན་དང་མཆོག་ཏུ་གནས་ཕྱིར་དང༌། །རགས་པ་
དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན་ཞེས་སོ། །དྲུག་པ་སྒྲ་དོན་ནམ་ངེས་
ཚིག་ནི། རྗེ་བཙུན་གྱིས། དབུལ་བ་འདོར་བར་བྱེད་པ་དང༌། །བསིལ་བ་ཐོབ་དང་ཁྲོ་བཟོད་
དང༌། །མཆོག་སྦྱོར་བ་དང་ཡིད་འཛིན་ལ། །དོན་དམ་ཤེས་པའི་ཕྱིར་བཤད་དོ། །འདི་ནི། སཾ་
ཀྲྀ་ཏའི་སྐད་ལས་ཤེས་དགོས་ཏེ། དེ་ཡང་དཱ་ན་ཞེས་པ། ད་རི་ཏྲ་ངན་པར་འགྲོ་བ་ལའོ། །ཞེས་
པའི་དབྱིངས་ལས་དཱ་ནི་དབུལ་བ་ཡིན་ལ། ན་ནི་བཤན་ཏེ་དེ་ཡིས་བཀའ་བས། དེ་ལྟར་
དབུལ་བ་འདོར་བས་སྦྱིན་པའོ། །ཤཱི་ལ་ལས་ཤཱི་ཏ་བསིལ་བ་དང་ཊུལ་བྷ་ཥ་ཐོབ་པ་ལའོ། །
ཞེས་པའི་བྱིངས་ལས་ལ་ཐོབ་པ་སྟེ། དེ་ལྟར་ན་བསིལ་བ་ཐོབ་པས་ཚུལ་ཁྲིམས་སོ། །དེ་ཡང་
ཡུལ་གྱི་ཚ་བའི་གདུང་བས་མི་བརྫི་བར་བསིལ་བ་ཐོབ་པའོ། །ཀྵནྟིཿལས་ཀྵ་མུ་དཀའ་ཐུབ་
དང་བཟོད་པ་ལ་ཡང་ངོ༌། །ཞེས་པའི་བྱིངས་ལས་སྡུག་བསྔལ་གྱི་ཚོགས་ལ་སྲན་ཚུགས་པར་
བཟོད་པས་བཟོད་པའོ། །བིརྱ་ལས་བཱི་ནི་བིར་རྣམ་པར་གནོན་པ་ལའོ། །ཞེས་པའི་བྱིངས་
ལས། དཔའ་བ་དང་རྟུལ་ཕོད་པ་ལ་འཇུག་པས་མཆོག་གི་སྙིང་སྟོབས་མ་ཞུམ་པར་སྦྱོར་བའི་
དོན་ཀྱིས་བརྩོན་འགྲུས་སོ། །དྷྱེ་ན་ཞེས་པ་དྷྱེ་སེམས་པ་ལའོ། །ཞེས་པའི་བྱིངས་ལས་སེམས་
པའི་རྒྱུན་གཞན་དུ་གཡེང་བ་མེད་པར་སྒོ་གཏན་བཅུག་པ་ལྟར་མི་གཡོ་བའི་དོན་གྱིས་ན་
བསམ་གཏན་ནོ། །པྲཛྙཱ་ནི་ཛྙཱ་ཁོང་དུ་ཆུད་པའམ་རྟོགས་པ་ལའོ། །ཞེས་པའི་བྱིངས་ལས་ཉེར་
བསྒྱུར་པྲ་སྔོན་དུ་བཞག་པས། རབ་ཏུ་ཁོང་དུ་ཆུད་པའམ་རབ་ཏུ་རྟོགས་པ་ཞེས་པ་ཡིན་ཏེ། དེ་
ལྟར་རབ་ཏུ་རྟོགས་བྱའི་ཡུལ་ནི་དོན་དམ་པ་ཡིན་ལ། དོན་དམ་པ་ནི་འཕགས་རྒྱུད་ཀྱི་མཉམ་
བཞག་ཡེ་ཤེས་ཡིན་པས། དོན་ནི་དེའི་སྤྱོད་ཡུལ་དུ་གྱུར་པ་སྟེ། དེའི་ཕྱིར་དམ་པའི་དོན་ཤེས་
20-1-349


པས་ཤེས་རབ་བོ། །བདུན་པ་འབྲས་བུ་ནི། གནས་སྐབས་སུ། སྦྱིན་པས་ལོངས་སྤྱོད་ཁྲིམས་
ཀྱིས་བདེ། །བཟོད་པས་གཟུགས་བཟང་བརྩོན་པས་བརྗིད། །བསམ་གཏན་གྱིས་བདེ་བློ་
ཡིས་གྲོལ། །ཞེས་རིན་ཆེན་འཕྲེང་བར་གསུངས་པ་ལྟར་རོ། །མཐར་ཐུག་གི་འབྲས་བུ་སྦྱིན་
སོགས་དང་པོ་གསུམ་བསོད་ནམས་ཀྱི་ཚོགས་ཏེ། གཟུངས་སྐུའི་དངོས་རྒྱུ་དང༌། ཤེས་རབ་ནི་
ཡེ་ཤེས་ཀྱི་ཚོགས་དང༌། བསམ་གཏན་ཕལ་ཆེར་ཡང་ཡེ་ཤེས་ཀྱི་ཚོགས་ཏེ། དེའི་ཕྱིར་དེ་
གཉིས་ཆོས་ཀྱི་སྐུའི་དངོས་རྒྱུ་དང༌། བརྩོན་འགྲུས་ཀྱིས་ཐམས་ཅད་ཀྱི་གྲོགས་བྱེད་དོ། །
འདིར་བསམ་གཏན་དང་ཤེས་རབ་ནི་གཙོ་བོར་བཤད་པར་བྱ་བ་ཡིན་མོད། དེ་ལྟ་མོད་ཀྱི་
སྐབས་སུ་བབ་པའི་མདོར་བསྡུས་བསྒོམ་ཚུལ་ཅུང་ཟད་བཤད་ཟིན་ལ། འདི་སྐབས་ཀྱི་ཏིང་
ངེ་འཛིན་ནི་ཏིང་ངེ་འཛིན་རྣམ་པ་ལྔའི་མདོར། རིན་ཆེན་བཟང་པོ་ལྟ་བུ་དང༌། རབ་འབྱམས་
རྒྱ་མཚོའི་ཏིང་ངེ་འཛིན་དང༌། ཡང་དག་པའི་མཐའ་དང༌། སྤྱོད་པ་མཆོག་ཏུ་སྤྱོད་པ་དང༌།
འདོད་དགུར་བསྒྱུར་བ་རྣམས་ཀྱི་ཕྱི་མ་ཡིན་ལ། ཤེས་རབ་ནི་དེའི་མཐའི་ཏིང་ངེ་འཛིན་ཡིན་
ལ། འདི་དག་གི་རྣམ་པར་བཞག་པ་ནི་ཡི་གེ་མང་བའི་འཇིགས་པས་རེ་ཞིག་བཏང་སྙོམས་སུ་
བྱའོ། །ཕ་རོལ་ཕྱིན་པ་འདི་དག་ལ། །གང་རྣམས་སློབ་པར་འདོད་དེ་དག །བླ་མེད་བྱང་ཆུབ་
འདོད་དགུར་བསྒྱུར། །གཞན་དུ་མཁས་པ་རྣམས་ཀྱང་འཁྱམས། །ཞེས་ཀྱང་སྨྲས་སོ། །གཞན་
ཡང་བྱང་ཆུབ་སེམས་དཔའ་སྙིང་རྗེ་ལ་བསླབ་པར་བྱེད་པ་རྣམས་འཕགས་པ་སྤྱན་རས་
གཟིགས་དབང་ཕྱུག་ལ་མཆོད་པར་བྱའོ། །བརྗོད་པར་བྱའོ། །བསྙོན་པར་བྱ་ཞིང་བསྒོམ་པར་
བྱའོ། །ཞེས་ཏེ། འདིའི་བསྒོམ་ཚུལ་འོག་ནས་ཅུང་ཟད་བཤད་པར་བྱའོ། །དེ་ལ་འཕགས་པ་
སྤྱན་གཟིགས་ནི་སྔོན་གྱི་སྨོན་ལམ་གྱིས་དབང་ལས་རྒྱལ་བ་ཀུན་གྱི་ཐུགས་རྗེའི་བདག་ཉིད་
དུ་བཞུགས་པ་སྟེ། དེ་ཡང་ཇི་སྐད་དུ། ཟག་མེད་དབྱིངས་ནས་སངས་རྒྱས་རྣམས། །སྔོན་གྱི་
ལུས་རྗེས་འབྲང་ཕྱིར་དང༌། །མཁའ་ལྟར་ལུས་ནི་མེད་པའི་ཕྱིར། །གཅིག་མིན་དུ་མ་ཉིད་ཀྱང་
20-1-350


མིན། །ཞེས་གསུངས་པ་དྲན་པར་བྱའོ། །ད་ནི་དེ་ལྟར་ཅུང་ཟད་བཤད་པས་གྲུབ་པའི་དོན།
ཉམས་སུ་བླང་པ་རིམ་པ་མདོར་བསྡུས་ན་འདི་ཡིན་ཏེ། རྣམ་པར་དབེན་པའི་རི་བོ་དང༌།
ནགས་འདབ་ཆུ་ངོགས་ལ་སོགས་པ་སྐྱེ་བོའི་རྒྱུ་འགྲུལ་དང༌། བཀླག་ཅོར་དང༌། བྱ་གྷྲ་དང༌།
ཆོམ་རྐུན་ལ་སོགས་པས་བགྲོད་པར་མི་འགྱུར་ཞིང་འཇིགས་པ་མེད་པའི་གནས་སུ། དཀོན་
མཆོག་གི་རྟེན་དག་བཞུགས་སུ་གསོལ་བའམ། གཅིག་ཏུ་དགོས་པ་ཡང་མ་ཡིན་པས་མེད་
ཡང་རུང་སྟེ། དེ་ལྟ་ན་ཕྱོགས་བཅུའི་རབ་འབྱམས་མ་ལུས་པའི་རྒྱལ་བ་སྲས་དང་བཅས་པ་
ཀུན་ལ་དང་པའི་སེམས་དང༌། འགྲོ་བ་ཀུན་ལ་མཐར་ཐུག་ཏུ་ངེས་པར་ཕན་གདགས་པའི་
བློས། སངས་རྒྱས་སྲས་བཅས་མ་ལུས་པའི་སྤྱན་སྔར་འདུག་པར་བསམ་ནས་སྔར་བཤད་པ་
ལྟར་དོན་དྲན་བཞིན་པས་ཡན་ལག་བདུན་པ་ལན་མང་དུ་བྱའོ། །དེ་ལ་ཕྱག་འཚལ་བའི་
སྐབས་སུ་བདག་དང་འགྲོ་བ་ཀུན་གྱི་ལུས་ཀྱང་ཞིང་ཁམས་རྒྱ་མཚོའི་རྡུལ་སྙེད་དུ་སྤྲུལ་ནས་
ཕྱག་འཚལ་བར་སྒོམས་པ་དང༌། མཆོད་པའི་སྐབས། བདག་སོགས་སེམས་ཅན་རྣམས་ཀྱིས་
དུས་གསུམ་དུ་བསགས་པའི་དགེ་བ་རྣམས་དང༌། སེམས་ཅན་རྣམས་ཀྱི་དོན་དུ་བདག་གི་
ལུས་ཀྱང་དབུལ་བར་བྱ་སྟེ། རྒྱལ་དང་དེ་སྲས་རྣམས་ལ་བདག་གིས་ནི། །བདག་གི་ལུས་ཀུན་
གཏན་དུ་དབུལ་བར་བགྱི། །སེམས་དཔའ་མཆོག་རྣམས་བདག་ནི་ཡོངས་བཞེས་ཤིག །གུས་
པས་ཁྱེད་ཀྱི་འབངས་སུ་མཆི་བར་བགྱི། །བདག་ནི་ཁྱེད་ཀྱི་ཡོངས་སུ་བཟུང་བས་ན། །སྲིད་
ན་མི་འཇིགས་སེམས་ཅན་ཕན་པར་བགྱིད། །ཞེས་བཀའ་སྩལ་པ་ཡང་བརྗོད་ལ་དོན་བསམ། །
དེ་ལྟར་གནས་སྐབས་འདི་དག་ཏུ་ཡང༌། །སྤྱིར་སེམས་ཅན་ཐམས་ཅད་དང༌། ཁྱད་པར་
གནོད་བྱེད་ཐམས་ཅད་ལ་ཆེས་ཆེར་བསྒོམ་པར་བྱའོ། །དེ་ནས་འཁོར་བའི་ཉེས་དམིགས་
དང༌། འདོད་པ་རྣམས་ནི་སྣོག་ཆུང་ཞིང་ཉེས་པ་མང་པ་དང༌། དབེན་པའི་ཕན་ཡོན་དང༌།
དལ་འབྱོར་རྙེད་དཀའ་དང༌། འདུས་བྱས་མི་རྟག་པ་དང༌། ལས་དང་འབྲས་བུ་མི་བསླུ་བ་
20-1-351


རྣམས་ཡིན་ལ་ཡང་ཡང་བསམ་པར་བྱ་ཞིང༌། ཐབས་དུ་མས་ཞིབ་མོ་ནས་སྒོམ་པར་བྱ་སྟེ།
ཐུན་གྱི་སྐབས་སུ་རེ་ཞིག་དེ་དག་ལ་ནན་ཏན་དུ་སྒོམ། ཐུན་མཚམས་སུ་མཆོད་པ་དང༌།
སྐྱབས་སུ་འགྲོ་བ་བྱང་ཆུབ་ཀྱི་སེམས་བསམ་པ་དང༌། གསུང་རབ་ཀློག་པ་དང༌། ཕྱག་དང་
བསྐོར་བ་སོགས་སྤྲོས་བཅས་ཅི་རིགས་པ་ལ་ནན་དུ་བྱའོ། །ཇི་ཞིག་ལྟར་ན། ཡིད་ལ་བྱེད་པ་
དེ་དག་ཅུང་ཟད་གོམ་པ་ན། དེ་ནས་དངོས་གཞི་ལ་འཇུག་སྟེ། དེ་ཡང་མདུན་དུ། བཅོམ་ལྡན་
འདས་མི་འཁྲུགས་པའམ། འོ་སྐོལ་གྱི་སྟོན་པ་བཅོམ་ལྡན་འདས་ལྟ་བུའི་རྒྱལ་བའི་སྐུ་
གཟུགས་རི་མོར་བྲིས་ལ། གསེར་སོགས་ཧ་ཅང་འཆོར་བག་ཆེ་བ་མ་ཡིན་པ་ཞིག་མདུན་དུ་
བཞག་ལ། དེ་ལ་མིག་གཏད་དེ། སེམས་མ་ཡེངས་པ་ཙམ་དུ་བཟུང༌། དེ་ལ་གོམས་ནས་མིག་
སྣ་རྩེའི་ཐད་ཀར་བལྟས་ནས་མདུན་དུ་རྒྱལ་བའི་སྐུ་བརྙན་བསམ་ལ། དེ་ལ་མ་ཡེངས་བ་ཙམ་
དུ་སེམས་བཟུང༌། དེ་ལ་གོམས་ནས་སེམས་ལ་སེམས་བཞག་ནས་རྩེ་གཅིག་ཏུ་བསྒོམ། དེ་
སྐབས་སེམས་གཡེངས་བ་མ་ཚོར་བར་ཅུང་ཟད་འགྱུ་ན། ཡང་ནས་ཡང་དུ། བླན་ཏེ་བསྒོམ་
ནམ་གནས་པ་ན། སྐད་ཅིག་རེ་རེ་ནས་འཕྲོ་མཐུད། དེ་ནས་ཡང་ཅུང་ཟད་གཡེངས་པ་དེའི་ཚེ་
བསྒོམ་པ་ལ་སྤྲོ་བའམ། མ་ཡིན་བརྟག་ལ་སྤྲོ་ན། བྱིང་རྒོད་རྣམ་རྟོག་གང་གིའང་དབང་དུ་མ་
སོང་བར་སེམས་འཇོག་གོ་སྙམས་པའི་འདུན་པ་ཆེས་དྲན་པ་བཏང་ལ་ཤུགས་འཕྱུང་ནས་རྩེ་
གཅིག་ཏུ་བཞག །གལ་ཏེ་མི་སྤྲོ་བའམ། འཇོག་ཅིང་སྔ་མ་ལས་ཕྱི་མ་ཡུན་ཐུང་ཞིང་མི་གསལ་
བ་དང༌། སེམས་དུབ་ཅིང་སྐྱོ་ན། འཁོར་འདས་དང༌། ཁྱིམ་དང༌། དབེན་པ་དང༌། ཉོན་མོངས་
དང༌། མཉམ་པར་འཇོག་པ་རྣམས་ཀྱི་ཕན་ཡོན་དང༌། ཉེས་དམིགས་རྣམས་དྲན་བཞིན་པས།
ཅུང་ཟད་འདུག་ནས་བསྒོམ་པ་དང་ཐུན་ཆུང་ལ་གྲངས་མང་བར་བྱེད་ཅེས་གྲགས་པ་བཞིན་དུ་
བྱའོ། །ཡང་སེམས་ཡན་ཏེ་མི་འགྲོ་ཡང་རྣམ་རྟོག་ཆུ་བུར་ལྟ་བུ་མང་པོས་སེམས་དབྱེན་སྤྱོས་
ནས། རྣམ་རྟོག་སྐྱེ་བའི་ཚེ་དེ་ཉིད་ལ་སེམས་གཏན་ནས་ཡང་མི་དམིགས་པར་བཞག །དེ་ལྟ་
20-1-352


བུ་བྱུང་ཚད་སྐྱེས་ཚད་ལ་སྦྱོར། དེ་ལྟར་འབད་པས་ཅི་ཙམ་ན། སེམས་དུམ་ཞིག་ནི་གནས་ལ་
སྐབས་འགར་ནི་འཁྲུག་གོ །དེ་ནི་སེམས་གནས་པ་ལ་ཕྱོགས་པ་ཞེས་བྱའོ། །དེ་ནས་སྔོན་
འདོད་ཡོན་སྤྱོད་པ་དྲན་པ་དང༌། འདོད་ཡོན་སེམས་པ་དང༌། ཚེ་འདིའི་བྱ་བས་སེམས་བྲེལ་ན་
འདོད་ཡོན་གྱི་ཉེས་དམིགས། འཁོར་བའི་སྡུག་བསྔལ་ཚེ་མི་རྟག་པས་ནམ་འཆི་ཆ་མེད། ཚེ་
འདི་བ་རྣམས་ཀྱི་གདེངས་དེས་ཅི་འདྲ་ཞེས་དྲན་པས་བཟློག །ཡང་རྣམ་རྟོག་སྐྱེས་པ་ན། ཀུན་
རྟོག་ལས་ནི་འདོད་སྐྱེ་ཞིང༌། །འདོད་པ་ལས་ནི་སྡིག་པར་འགྱུར། །འགྲོ་རྣམས་རྣམ་པར་
འཁྱམས་བྱེད་པའི། །འདོད་པའང་ཀུན་ཏུ་རྟོག་ལས་འབྱུང༌། ། ཞེས་སེམས་འཁྲུགས་པའི་རྒྱུ་
རྣམ་རྟོག་གི་ཉེས་དམིགས་དྲན་པར་བྱའོ། །ཡང་མཉམ་པར་འཇོག་པ་ལ་མི་དགའ་བ་སྐྱེས་ན།
འབྲས་བུ་ཞི་བ་དང༌། ལམ་མཉམ་པར་འཇོག་པའི་ཡོན་ཏན་དྲན་པས་འདུལ་ཞིང༌། གོང་དུ་
བཤད་པའི་ཐབས་སྣ་ཚོགས་ཀྱིས་ཀྱང་འདུལ་བར་བྱ་སྟེ། བྱིང་ན་སྤྲོ་བ་དང༌། རྒོད་ན་མི་རྟག་
པའི་འདུ་ཤེས་སོགས་ཞུམ་པས་འདུལ། གཞན་ཡང་འདོད་ཆགས་ལ་མི་སྡུག་པ། ཞེ་སྡང་ལ་
བྱམས་སྙིང་རྗེ། གཏི་མུག་ལ་བདག་མེད་བསྒོམ་པས་བཟློག་ནས་མཉམ་པར་འཇོག་གོ །དེ་
ལ་གོམས་པས་ཇི་ཞིག་ནས་སྒྲིམ་སྟེ་བཞག་ན་གནས་པས་བྱིང་རྒོད་ཀྱི་གོ་སྐབས་མི་འབྱུང་
ཞིང༌། མ་བསྒྲིམ་ན་འབྱུང་བ་དེ་ལྟ་བུ་ལ་ཏིང་འཛིན་གྱི་སྒོ་ཞེས་བྱའོ་དེ་ལ་གོམས་ནས་སེམས་
རྩོལ་མེད་གནས་པ་འབྱུང་བས་དེ་ཚེ་དེ་སེམས་སྒྲིམ་པར་ལྷོད་དེ་ཤིག་གེ་བ་ལ་མཉམ་པར་
བཞག་འཇོག་སྟེ་ཞི་གནས་སོ། །དེ་ལ་རིང་དུ་གོམས་ནས་ལྷག་མཐོང་བསྒོམ་སྟེ། དེ་ཡང་ཐོག་
མར་རང་ལུས་ལ་དམིགས་རྟེན་བྱས་ནས། ལྷོད་དེ་གློད་ནས་བཞག་པའི་ངང་ནས་ལུས་དང་
སེམས་དེ་བདག་གི་ཕུང་པོ་འདི་དག་སེམས་ཙམ་ཉིད་དོ་སྙམས་པ་ཡང་ཡང་སྒོམ། དེ་གོམ་
ནས་འདི་དག་ནི་བྲག་ཆ་ལྟར་རྟེན་འབྱུང་ཙམ་མ་གཏོགས་སྟོང་པའོ་སྙམ་དུ་ཡང་ཡང་བསྒོམ།
དེ་ཡང་གོམ་ནས་སྣང་བ་ཐམས་ཅད་དང་ཁྱད་པར་བདེན་འཛིན་ཤས་ཆེ་བ་རྣམས་ལ་ཆེད་
20-1-353


ཆེར་བསྒོམ། དེ་ཡང་འདི་ཞི་གནས་གྲུབ་རྗེས་ལྷག་མཐོང་བསྒོམ་པ་ཡིན་པས་ཐོག་མར་
སྐབས་འགའ་ཞིག་ཙམ་དུ་ལྷག་མཐོང་ཕལ་ཆེར་ཞི་གནས། དེ་ཡང་ཞི་གནས་ཇེ་ཉུང་དང་
ལྷག་མཐོང་ཇེ་མང་ཡང་ལྷག་མཐོང་སྟོབས་ཆེས་རྩུབ་ན། ཞི་གནས་ཇེ་མང་བསྒོམ་པས་ཇི་
ཞིག་ལྟར་ལ་ཆ་མཉམ་པར་འགྱུར། དེ་ལྟར་འཇུག་ལྡོག་ཡང་ཡང་བསྒོམ་པས་དབང་པོ་རབ་
གྱིས་མཐའ་བྲལ་རྗེས་མཐུན་གྱི་ཤེས་རབ་དང་སེམས་གནས་པ་རོ་མཉམ་དུ་འགྱུར། དབང་
པོ་དམན་པས་ནི། དེ་ནས་སྟོང་པའི་གདེང་དེ་ལ། མི་དམིགས་པར་ཞེན་པ་མེད་པས་མཉམ་
པར་འཇོག་པ་སོགས་སྔར་བཞིན་བསྒོམ་པས་འགྲུབ་བོ། དེ་ལ་གོམ་ནས་རྗེས་ཐོབ་ཏུ་ཡང་དེ་
འདྲའི་ཏིང་ངེ་འཛིན་ཏེ་ཡང་ཡང་དྲན་ཞིང་ལས་ལ་འཇུག་སྟེ། ཚུལ་འདི་དང་ལྡན་བཞིན་པས་
སྦྱིན་སོགས་སྤྱད་པས་ནི། རྣམ་པར་མི་རྟོག་ཡེ་ཤེས་ལྡན། ཞེས་པ་ལ་ཕྱོགས་པར་འགྱུར་གྱི།
མི་རྟོག་པ་ཙམ་པོས་ནི་མ་ཡིན་ནོ། །དེ་ནས་རིན་ཆེན་བཟང་པོ་ལྟ་བུའི་ཏིང་ངེ་འཛིན་དང༌།
རབ་འབྱམས་རྒྱ་མཚོ་དང༌། ཡང་དག་པའི་མཐའི་ཏིང་ངེ་འཛིན་རྣམས་ཀྱི་ནང་གི་དབྱེ་བ་སོ་
སོ་ནས་རིམ་བཞིན་བསྒོམ་པའི་ཆོས་མཆོག་གི་བར་དུ་བགྲོད་པར་འགྱུར་ལ། འདི་དག་ཡི་གེ་
མང་བས་འཇིགས་ནས་མ་བྲིས་སོ། །སྐྱེས་བུ་ཆེ་ཞེས་རབ་ཏུ་གྲགས་སྨྲ་བས། །ཕྱོགས་འདི་
མཁས་མང་གོ་མཚམས་བྲལ་བ་བཞིན། །བརྟགས་ཚེ་ཇི་ལྟར་མཆོད་སྦྱིན་འོས། །དེ་ལྟར་སྙིང་
པོ་མེད་པས་ཉོན་མོངས་སོ། །དེའི་ཕྱིར་རེ་ཞིག་ཆོག་གོ །ད་ནི་ཀུན་རྫོབ་བྱང་སེམས་བསྒོམ་
ཚུལ་བཤད་དེ། དེ་ལ་འདི་ནི་ཐམས་ཅད་ཀྱིས་བསྒོམ་པར་བྱའོ། །དེ་ཡང་བདག་དང་འགྲོ་བ་
ཐམས་ཅད་སངས་རྒྱས་ཐོབ་པར་བྱ་སྙམས་པའི་བློའི་ཤུགས་དང་བཅས། ཐོག་མར་སེམས་
ཅན་རྣམས་ཀྱི་སྡུག་བསྔལ་དང༌། དེ་ལས་ཐར་བར་མི་ནུས་པའི་འགྲོ་བ་རྨོངས་པ་རྣམས་དྲན་
བཞིན་པས་འདི་རྣམས་སྙིང་རེ་རྗེ། སྡུག་བསྔལ་བསྐྱབས། བདེ་བ་ལ་འགོད་པར་བྱ་ཞེས་ཡང་
ཡང་བསྒོམ། དེའི་སྙིང་རྗེ་མི་སྐྱེ་ན་སེམས་ཅན་ཐམས་ཅད་ཕ་མར་ཤེས་པར་དྲིན་དྲན་པའི་སྒོ་
20-1-354


ནས་དང༌། འདི་རྣམས་ཆོས་ཀུན་བདེན་མེད་ཁོང་དུ་མ་ཆུད་པས། ལས་ངན་བསགས་པའི་
དབང་ལས་སྡུག་བསྔལ་ལ་སྤྱོད་པ་འདི་ལྟ་བུ་ཀྱེ་མ་སྙམ་དུ་ཡང་ཡང་བསམ། དེ་ལ་གོམ་ནས་
སྐྱེ་དཀའ་བ་གནོད་བྱེད་རྣམས་ལ་སྔར་བཞིན་དུ་སྒོམ་དེའི་ཀྱང་མི་སྐྱེ་ན། ཡང་འདི་དག་
བདག་ཆོས་ལ་བསྐུལ་བའོ་སྙམ་དུ་དྲིན་དྲན་བཞིན་པས་བསྒོམ། གཞན་ཡང་འདི་དག་ལ་ཕ་
མ་ཁོ་ན་ཡིན་པ་ལ་མ་རིག་པས་འཁྱམས་ནས། བདག་ལ་གནོད་པ་བྱས་པས་ངན་སོང་དུ་
ལྷུང་བ་འདུག་པས་སྙིང་རྗེ་སྙམ་པ་ཡང་ཡང་དུ་བསྒོམ་པས་ཞེ་སྡང་གིས་བརྫི་བར་མི་ནུས་སོ། །
དེས་ཀྱང་མ་སྐྱེས་ན་གཟུགས་བརྗེ་ཞིང་བསྒོམས་པས་སྐྱེ་བར་འགྱུར་ཏེ། དེ་དག་ལ་གོམས་
ནས། ཡང་སྙིང་རྗེས་བསྐུལ་ནས་སངས་རྒྱས་ཀུན་ལ་གསོལ་བ་བཏབ་ནས་དངོས་སུ་བྱོན་
ནས་ཆོས་གསུང་བ་དང༌། འོད་ཟེར་སྤྲོ་བ་ལ་སོགས་པས་སྐད་ཅིག་དེ་ལ་སེམས་ཅན་གཅིག་
ཀྱང་མ་ལུས་པར་སངས་རྒྱས་ཐོབ་པར་བསྒོམ། ཁྱད་པར་གནོད་བྱེད་གདོན་དང་དགྲ་སོགས་
ལ་གཙོ་ཆེར་བསྒོམ་པར་བྱ་སྟེ། དེ་ལྟར་ན་འདི་དག་བདག་གཞན་མཉམ་པ་བསྒོམ་ཚུལ་ལོ། །
གལ་ཏེ་ཆེས་མཆོག་ཏུ་གྱུར་པ་བརྗེ་བ་བསྒོམ་པར་འདོད་ན། དབུགས་རྔུབ་པ་དང་ལྷན་ཅིག་
སེམས་ཅན་གྱི་སྡིག་སྡུག་ལེན། དབྱུང་བ་དང་ལྷན་ཅིག་རང་གི་བདེ་དགེ་སེམས་ཅན་ལ་སྦྱིན་
པར་བྱ་སྟེ་ཚུལ་འདི་སྔོན་གྱི་དམ་པ་ཆེས་མང་བ་རྣམས་ཀྱིས་རྒྱ་ཆེར་གསུངས་སོ། །དེའི་
སྐབས་སུ་མགོན་པོ་སྤྱན་རས་གཟིགས་ཕྱག་བཞི་པ་ལ་མཆོད་པ་ལ་སོགས་པ་བྱ་སྟེ། སློབ་
དཔོན་བུདྡྷ་གུ་ཧྱ་སོགས་ཀྱིས་མཛད་པའི་མཎྜལ་གྱི་ཆོ་གར་བལྟའོ། །བསྒོམ་ཚུལ་སྔགས་
ལས་འབྱུང་བ་ལྟར་མདོར་བསྡུས་སུ་བཤད་ན། སྐྱབས་འགྲོ་སེམས་བསྐྱེད། སྟོང་པར་སྦྱངས།
པད་ཟླ་ལ། ཧྲཱིཿ ལས་མགོན་པོ་སྤྱན་རས་གཟིགས་ཕྱག་བཞི་པ། ཕྱག་དང་པོ་གཉིས་ཐལ་མོ་
སྦྱར་བ། འོག་མ་གཉིས་ཤེལ་འཕྲེང་དང་པདྨ་དཀར་པོ་འཛིན་པ། རྡོ་རྗེ་སྐྱིལ་ཀྲུང་ཅན། རྒྱན་
ཐམས་ཅད་ཀྱིས་བརྒྱན་པ་ཡེ་ཤེས་ཀྱི་སྐུ་ཅན་ཞིག་མདུན་དུ་ལམ་གྱིས་གྲུབ་པར་བསྒོམ།
20-1-355


གནས་གསུམ་དུ་ཡི་གེ་འབྲུ་གསུམ། ཐུགས་ཀར་ཧྲཱིཿརྣམས་བཀོད། ཡེ་ཤེས་པ་དགུག་གཞུག་
བྱ། དབང་བསྐུར་རིགས་བདག་གི་རྒྱས་བཏབ་ནས། ༀ་མ་ཎི་པདྨེ་ཧཱུཾ། ཞེས་བཟླས་ཏེ། མདུན་
བསྐྱེད་ཀྱི་ཐུགས་རྒྱུད་བསྐུལ། ཐུགས་ཀའི་ས་བོན་ལས་འོད་ཟེར་འཕྲོས་སེམས་ཅན་ཐམས་
ཅད་ལ་ཕོག་པས་སངས་རྒྱས་ཐོབ་པར་བསྒོམ། ཡང་ན་ཇོ་བོ་ཁ་སར་པ་ནི་དཀར་པོ་མཆོག་
སྦྱིན་དང་པདྨ་ཅན་རོལ་སྟབས་སུ་བཞུགས་པ་བསྒོམ་ནས་བཟླས་པའི་ཚེ། ༀ་ཨཱཿཧྲཱིཿསྭཱཧཱ།
ཞེས་བཟླ་བ་ནི། ཁྱད་པར་ཙམ་ཡིན་ལ་གཞན་འདྲའོ། །དེ་ལ་སེམས་ཅུང་ཟད་བརྟན་ནས་
རང་ཡང་དེ་ལྟར་སྒོམ། དེ་ཡང་བརྟན་ནས་དངོས་པོ་ཐམས་ཅད་རྗེ་བཙུན་ལོ་ཀི་ཤྭ་རར་
བསྒོམ། དེ་དག་གིས་སྐབས་ཐམས་ཅད་སྙིང་རྗེ་ཁོ་ན་བསྒོམ་པར་བྱ་སྟེ། སྙིང་རྗེས་བོགས་
དབྱུང་པའོ། །མདོར་ན་དེ་ལྟར་བྱང་ཆུབ་ཀྱི་སེམས་རྣམ་པ་གཉིས་རེ་ཞིག་རེས་འཇོག་རེས་
འཇོག་ཏུ་བསྒོམ། ཕྱི་ནས་གཅིག་གིས་གཅིག་ལ་རྒྱས་བཏབ་ཀྱིན་བསྒོམ་པས་ཇི་ཞིག་ལྟར་ལ་
རོ་མཉམ་དུ་འགྱུར་རོ། །དེ་ཀུན་ལ་ཐུན་མགོར་ཡན་ལག་བདུན་པ་ལ་ནན་ཏན་དང༌། མཇུག་
ཏུ་རྒྱལ་བ་དང་སར་བཞུགས་ཀྱི་སེམས་དཔའ་རྣམས་ཀྱི་ཞལ་སྔ་ནས་མཛད་པའི་སྨོན་ལམ་
ཡང་དག་པ་གདབ་པར་བྱའོ། །འགའ་ཞིག་ལམ་འདི་རྒྱས་འདེབས་ཀྱིས་བཅིངས་པ་ཡིད་ལ་
བྱེད་པའི་དུས་འདའ་བ་རྣམ་རྟོག་གི་དྲི་མ་ལ་ཞེན་པའོ་ཞེས་སྨྲ་བ་དག་འབྱུང་སྲིད་ནའང༌།
དམ་པའི་ཆོས་ལ་རྒྱལ་བ་ཉིད་ཚད་མ་ཡིན་ལ་ཕན་པའི་བློ་ཁོ་ནས་བྲིས་པའི་ཕྱིར་དང༌། ལོག་
པར་གཅེས་པ་མེད་པས་མི་འཇིགས་སོ། །འདི་སྐད་ཀྱང་བསམ་སྐད། བདག་འཛིན་འདུལ་བ་
ཉིད་ཀྱི་ཕྱིར། །རྟོག་པས་བཅིང་པ་ཉིད་ནའང་བླ། །གཞན་དུ་རྨོངས་པའི་རང་བཞིན་ལས། །
གྲོགས་དག་ཐར་པ་ཡོད་དམ་ཅི། །ཉོན་མོངས་སྐྱེས་ཚེ་གཉེན་པོས་མ་ཕྱིན་ན། །ཆོས་ཀྱི་
དགོས་པ་སྟོར་ཞེས་དམ་པས་གསུངས། །རྫོགས་སངས་རྒྱས་ཀྱི་གསུངས་ལས་ཕྱིར་ཕྱོགས་
ན། །ཇི་ལྟར་བསྒོམ་ཆེན་ཡིན་ཞེས་བསམ་པའི་རིགས། །འགྲོ་འདི་འཁོར་བར་སྤྱོད་ལ་རབ་
20-1-356


དགའ་བས། །ལོག་པར་སྤྱོད་ལ་ཉེ་བར་བརྒྱུག་པ་མཐོང༌། །ལུས་མེད་ཕོ་ཉའི་རྣམ་འཕྲུལ་
དཔག་མེད་པས། །དམ་ཆོས་རྗེས་འབྲང་འདི་ན་སྨོན་བྱེད་པ། །ཡིད་འོང་ཚུལ་ཁྲིམས་དྲི་
བསྲུང་ཐོས་མང་པོའི། །འདབ་རྒྱས་ལ་འོད་སྒྲུབ་པའི་སྙིང་པོ་ཅན། །ནག་པོའི་རྩ་ལག་མ་ཥི་
དིར་མི་མོས། །ངན་སྐྱུག་ཁོང་བུར་བརྒྱུག་པ་དེ་ཡི་ལུགས། །ལེགས་ལྡན་ལེགས་བྱས་ཕྲག་
ཅན་གྱིས། །གང་གི་ཞབས་ཟུང་ཉེར་བསྟེན་ནས། །འབུམ་ཕྲག་བསྟོད་དབྱངས་འདབ་བརྒྱའི་
འཕྲེང་བཅས་ཕྱོགས་གྲོལ་བཀང་ནས་མཆོད་བྱས་པ། །བཅོམ་ལྡན་དེ་ཡི་བཀའ་དྲིན་དྲན་
པས་རྟག་ཏུ་ཕྱག་འཚལ་ནམ་ཡང་སྐྱོངས༌། །སྙིང་ནས་ཁྱོད་ལས་སྐྱབས་གཞན་སྤངས་ནས་
ཁྱོད་ཀྱི་གསུང་བཞིན་བསྒྲུབ་པར་ཤོག །ལམ་མདོར་བསྡུས་པ་རྫོགས་སོ།། །།བདག་གི་འདི་
དང་མ་ལུས་དགེ་བ་ཡི། །མ་གྱུར་སེམས་ཅན་ཚོགས་རྣམས་མ་ལུས་པ། །མྱུར་དུ་བླ་མེད་བྱང་
ཆུབ་སྐུ་གསུམ་དངོས། །རྟག་ཅིང་བདེ་བའི་གོ་འཕང་མྱུར་ཐོབ་ཤོག །ཤཱཀྱའི་དགེ་སློང་ཀུན་
དགའ་སྙིང་པོས་རྩ་བ་སྔགས་དང་སྦྱར་བ་ལས། མཁྱེན་ཡང་མའི་དབང་པོའི་བཀས་བསྐུལ་
ཏེ་རྒྱས་འགྲེལ་སྦྱར་བའོ། །རང་ལོ་བཅུ་དགུ་པ་ལ་ལི་ཁཾ་ཏི། ༀ་ཨ་ཐ་མངྒ་ལཾ་ཡ་པོཥྚི་ཀཾ་ཀུ་རུ།
ༀ་སུ་པྲ་ཏིཥྛ་བཛྲ་ཡེ་སྭཱཧཱ། །མངྒ་ལཾ།
20-1-357


༄༅། །མཁའ་འགྲོ་རྣམ་གསུམ་གྱི་གདམས་པ་བཞུགས།
༄༅། །ༀ་སྭཱ་སྟི། བླ་མ་རྣམས་ལ་ཕྱག་འཚལ་ལོ། །གསང་སྔགས་རྡོ་རྗེ་ཐེག་པ་ལ། །
ཉོན་མོངས་ལམ་དུ་བྱེད་པ་ཡོད། །བདེ་བས་བདེ་བ་འགྲུབ་འགྱུར་ཞིང༌། །འདོད་ཆགས་
ཀྱིས་ནི་འདོད་ཆགས་དག །སུ་ཀ་སིདྷའི་ཞལ་ན་རེ། །གཞན་ལུས་ལམ་དུ་ལེན་པ་ལ། །རིག་
མ་བརྟག་ཅིང་དགུག་པ་དང༌། །བདེ་བ་སྒོམ་པ་གསུམ་དུ་བཞེད། །དང་པོ་རིག་མ་བརྟག་
པ་ནི། །དཔྲལ་བར་སྨེ་བ་དཀར་པོ་ཡོད། །དེ་ནི་བུདྡྷ་བཟང་མོར་བཞེད། །ནག་པོ་ཡོད་ན་རྡོ་
རྗེའི་རིགས། །སེར་པོ་རཏྣ་སྔོན་པོ་ལས། །དམར་པོ་ཡོད་པ་པདྨའི་རིགས། །ཀུན་ཀྱང་རྣམ་
སྣང་རིགས་ལ་བྱེད། །ལྟེ་བར་སྨེ་བ་ཡོད་པ་དང༌། །དཔྲལ་བར་རྩེ་གསུམ་ཡོད་པ་ནི། །རིན་
ཆེན་འབྱུང་ལྡན་རིགས་སུ་འདོད། །དེ་ལའང་ནང་ཚན་རིགས་ལྔ་ཡོད། །མགྲིན་པའི་དབུས་
སུ་སྨེ་བ་ཅན། །ཐབས་ཀྱི་རེག་ན་མི་བཟོད་པ། །འོད་དཔག་མེད་པའི་རིགས་སུ་འདོད། །རྣ་
བ་གཡོན་པར་སྨེ་བ་ཅན། །དོན་ཡོད་གྲུབ་པའི་རིགས་ཡིན་གསུངས། །ནུ་འཕྲག་དབུས་སུ་
སྨེ་བས་མཚན། །མི་འཁྲུགས་པ་ཡི་རིགས་ཡིན་ཏེ། ཁ་དོག་བྱ་བ་མི་འདྲ་ལྔ། །ཀུན་ལ་ཡོད་
དེ་ཉེར་ལྔ་ཡིན། །གཞན་ཡང་དཀར་པོ་བུདྡྷའི་རིགས། །དཀར་ལ་དམར་བ་པདྨའི་རིགས། །
ལས་ཀྱི་རིགས་དང་རྡོ་རྗེའི་རིགས། །གཉིས་ཀ་སྔོ་བསངས་ཡིན་ཞེས་གསུངས། །ཤ་མདོག་
དམར་བ་རིན་ཆེན་རིགས། །བུདྡྷའི་རིགས་ནི་བདེ་བ་བུལ། །འཁུལ་བ་བཟང་སྟེ་ཟློས་པ་སླ། །
རཏྣ་དེ་དང་འདྲ་བ་ལས། །འཛིན་པ་སླ་བའི་ཡོན་ཏན་ཡོད། པདྨའི་རིགས་ནི་བདེ་བ་མྱུར། །
ཆགས་པར་བྱེད་ལའང་བསྔགས་པ་ཡིན། །ལས་རིགས་བདེ་བ་བརྟན་པ་དང༌། །རྡོ་རྗེའི་
རིགས་ནི་གསལ་ལ་དྭངས། །འདི་གཉིས་རྗེས་ནི་བཟང་བར་འདོད། །
20-1-358


༈ གཉིས་པ་དགུག་པར་བྱ་བ་ནི། །མི་བསྐྱོད་པ་ལ་གཟུགས་བརྙན་བྱ། །རཀྟ་དང་ནི་
གྷི་ཧང་གི །མིང་རུས་བྲིས་ལ་སྙིང་ཁར་གཞུག །ཟངས་ཀྱི་ཁབ་བམ་རྟགས་ཀྱིས་ནི། །བྷ་གར་
བསྐུལ་ཞིང་ཞག་བདུན་བསྒྲུབ། །ལྟེ་བའི་འཁོར་ལོ་བཅུག་ནས་ནི། །གནས་པ་མེད་པ་རྣམ་
གསུམ་སྒོམ། །ཆགས་པས་དྭངས་མ་འཛག་པར་བསམ། །དེ་ཡང་ཡི་གེ་ལྔ་ལ་སྟིམ། །ཨ་ཧ་རི་
ནི་ས་ཆེ་གེ་མོ་ཁུག །རྣམ་ཤེས་བྲེང་བྲེང་དུང་དུང༌། །བདག་གིས་དབང་དུ་བསྡུས། །ཨ་ཧ་རི་
ནི་ས། ཞག་བདུན་བར་དུ་སྒྲུབ་ནས་ནི། །སྔགས་ཀྱིས་བཏབ་པའི་བཟའ་བཏུང་བྱིན། །དེས་ནི་
དབང་དུ་འདུ་བར་ངེས། །གསུམ་པ་བདེ་བ་སྒོམ་པ་ནི། །དབབ་དང་བཟུང་དང་ཟློག་པ་དང༌། །
དགྲམ་དང་རླུང་དང་བསྲེ་བ་དང༌། །ཡེ་ཤེས་ཆེན་པོར་བསྐྱེལ་བའོ། ཁ་ཅིག་འདོད་ཡོན་ལྔ་
པོ་ལ། །རིམ་བཞིན་སློབ་པར་འདོད་མོད་ཀྱང༌། །དུས་གཅིག་དག་ཏུ་འབྱུང་བའི་ཕྱིར། །ཅིག་
ཅར་སློབ་པ་བཟང་བར་བཞེད། །ཅུང་ཟད་སྲུབ་ཅིང་རྩོལ་བ་ན། །ནོར་བུ་ཧཱུཾ་གྱིས་བཀག་པར་
བསམ། །འགྱུར་བ་བཞི་ཡིས་འཛིན་པ་ཡིན། །ཟིན་པས་དཀའ་ན་ཐིག་ལེ་ནི། །ཧཱུཾ་གིས་ཕུལ་
ནས་ཧཱུཾ་གིས་འདྲེན། །སྤྱི་བོར་ཧན་ཧན་བསྟིམ་པར་བསམ། །སྤྲུག་ཅིང་གླིང་བཞི་འཕངས་བ་
དང༌། །གཉིས་ཀའི་བོ་དྷི་ཞུ་བར་བྱ། །དེ་ནས་བདུན་སྲུབ་རྒྱ་མཚོ་སྦྱར། །ཧུཾ་གིས་དྲག་ཏུ་དྲངས་
པར་བྱ། །ཤེས་རབ་འོད་དུ་ཞུ་ནས་ནི། །རྡོ་རྗེའི་ལམ་ནས་རང་ལུས་ཁྱབ། །འོལ་མ་སེའི་
མདོག་འདྲ་བ། །རང་ཉིད་བཀྲག་མདངས་རྒྱས་པར་མོས། །དེའི་ཆོས་འབྱུང་དབུས་སུ་ནི།
ཁྱུར་ཁྱུར་ཉམས་སུ་མྱོང་ནས་ཀྱང༌། །ཟུག་ངུར་བཅས་པ་འབྱུང་བར་འགྱུར། །རྡོ་རྗེ་ཐལ་མོ་
པུས་བཙུག་གཉིས། །བཟློག་པའི་ལས་ལ་བསྔགས་པ་ཡིན། །ལྕགས་འབར་དང་ནི་རེ་མོས་
ཕྲ། །དགྲམ་པའི་མན་ངག་ཡིན་པར་བཞེད། །ཐིག་ལེ་རླུང་ལ་བསྲེ་བའི་ཕྱིར། །བུམ་ཅན་ཚར་
འགའ་སྒོམ་པར་བྱ། །དབྱིངས་སུ་བསྐྱེལ་བར་བྱེད་པ་ནི། །སེམས་ནི་མི་རྟོག་ནམ་མཁའ་འདྲ། །
སྣང་བ་བདེན་མེད་སྒྱུ་མ་བཞིན། །རླུང་གི་ཡོན་ཏན་སེམས་ལ་ཐིམ། གསང་སྔགས་གནད་ཀྱི་
20-1-359


གདམས་པ་ནི། །སྐལ་མེད་རྣམས་ལ་སྦ་བར་བྱ། །ཨྠི། ༡
ན་མོ་གུ་རུ། རྫའི་སྦལ་བའི་ནང་དུ་མིང་རུས་བྲིས་ལ་གཞུག ཡུངས་དཀར་བདུན་ནང་
དུ་གཞུག བདུན་སྦལ་པའི་འོག་ཏུ་བཅུག །རང་ཕག་མོའི་ཐུགས་ཀ་ནས་ཕོ་ཉ་མང་པོ་སྤྲུལ།
ཁམས་གསུམ་དབང་དུ་བསྡུས་པར་བསམ་ལ་ངག་བཅད་དེ། སྭཧཱ་སྦལ་ཤ་ཁོལ། ཙག་ཙག་
དུང་དུང༌། འདུར་འདུར་ཡེད་ཡེད། ཆྒཻ་མོའི་ཙིཏྟ་དཀྲུག །བདག་གིས་དབང་དུ་གྱུར་ཅིག།
ཅེས་སེམས་མ་གཡེངས་བར་རབ་ཞག་གཅིག །འབྲིང་གཉིས། ཐ་མ་གསུམ། རྨི་ལམ་དུ་བུད་
མེད་འདུ་བ། ཁྲོམ་འཚོགས་པ། གཏེར་རྙེད་པ་སོགས་འབྱུང་ངོ༌། །ལས་སྤྱོར་ནི་ཉི་མ་དམར་
ཐག་ཆོད་པ་ནི། རྫས་ལ་སྔགས་སྟོང་ཙམ་བཟླས། རབ་ཕྱིའི་ཉུངས་དཀར་གཏོར་བ། འབྲིང་
ཤ་ལ་བརླན་པ་ཙམ་དང༌། ཐ་མའང་སྦལ་པ་ལུས་ལ་ཐེབས་ན་ཐེ་ཚོམ་མེད། ལུས་འཁྱོར་བ་
དང་། སེམས་མི་གནས་པ་ཡོང་ཉིན་ཡོད། དེ་ལ་འདོད་པ་སྤྱོད་པས་སེལ། གྲོལ་བར་འདོད་ན་
གངས་ཆུ་གྲང་མོ་ལུས་ལ་རྒྱག །སྔགས་མགོ་མཇུག་བཟློག །སྦལ་བ་བཅག །མིང་རུས་སྤོས་
ཆུས་ཁྲུས་བྱས་པས་གྲོལ་བར་འགྱུར་རོ། །ཨྠི། ༢
ན་མོ་གུ་རུ། ཀློད་དང་འགྱུར་བཞི་གཞོམ་པ་སྟེ། །འཛིན་པ་རྣམ་པ་གསུམ་དུ་འདོད། །
རྡོ་རྗེ་ཁུ་ཚུར་ཐལ་མོ་པུས་བཙུག་དང༌། །རྩལ་སྤྲུག་ཁོང་འདྲེན་རྟ་ཞོན་ཚུལ། །འདྲེན་པའི་
འཁྲུལ་འཁོར་རྣམ་ལྔའོ། །དགྲམ་པའི་འཁྲུལ་འཁོར་རྣམ་དགུ་ནི། །དང་པོར་མགོ་ལྕོགས་
འཕར་སྤྲུག་བྱ། །གཉིས་ཀ་རྐང་ལག་རེ་མོས་འཁྲབ། །གསུམ་པ་དཔུང་འཛིན་ཞི་སྤྲུག་རྡེབས། །
བཞི་པ་མཁལ་མནན་ཕོ་བ་བསྐོར། །ལྔ་དྲུག་ལག་སྤྲུག་གན་རྐྱལ་འཁྲབ། །བདུན་པ་སུག་
བཞི་གཡས་གཡོན་འཐེན། །བརྒྱད་དགུ་བརྐྱང་བསྐུམ་གན་རྐྱལ་རྒྱངས། །ལུས་ཀྱི་འདུག་
སྟངས་འཁྲུལ་འཁོར་གྱིས། །ཡང་དག་ཏིང་འཛིན་བསྐྱེད་པ་འདི། །མཁའ་འགྲོ་བདེ་བའི་
དངོས་གྲུབ་དང༌། །དཔལ་ལྡན་གང་ག་དྷ་རི་དང༌། །ཌཱ་ཀི་ཀུན་དུ་བཟང་མོ་ཡི། །དགོངས་པ་
20-1-360


གཅིག་ཏུ་གུང་སྤྲོས་པ། །རྟོགས་ལྡན་ཞང་སྒོམ་གསུང་བཞིན་དུ། །ལྷག་ཆད་མེད་པར་བཀོད་
པའོ། །ཨྠི། ༣
འགྱུར་བ་བཞི་ནི། རྒྱ་མཚོ་རི་རབ་ལ་གཅེར་པ། གླིང་བཞི་དབང་དུ་བསྡུ་བ། དར་པོ་
ཆེ་རང་གནས་སུ་འཆར་བ། ཉི་ཟླ་ནམ་མཁར་བཟུང་བ་སྟེ་བཟུང་པའོ། །བཟློག་པ་ནི། རྡོ་རྗེ་
ཐལ་མོ་སྤྱི་བོར་འཐེན་ལ། རླུང་སེམས་ནམ་མཁར་འཕང་པའོ། །ཡང་པུས་མོ་དང་རྡོ་རྗེ་ཁུ་
ཚུར་བཙུགས་ལ་ཧག་ཧིག་ཧོག་ཅེས་སྙིང་ཁ། མགྲིན་པ་སྤྱི་བོ་རྣམས་སུ་དྲངས་སོ། ཁྱབ་པར་
བྱེད་པ་ལ་ལངས་ཏེ་མགོ་ལ་ཐལ་ལྕག་རེ་མོས་སུ་རྡེག་པ་དང༌། འཕགས་ཤིང་ལག་པའང་
སྤྲུག་གོ །གཉིས་པ་ནི་རྒུར་ནས་རྐང་ལག་རེ་མོས་སུ་འཁྲབ་བོ། །མཁའ་འགྲོ་སུ་ཀ་སིདྷིའི་
གདམས་པའོ། །ཨྠི། ༤
འཛིན་པའི་ཀློད་པའི་མན་ངག་ནི། ལུས་སེམས་ཁོང་ཀློད་ཅིང་སྲིན་ཞལ་ཡན་པའོ། །
བཟློག་པ་ནི་ལུས་སྤྲུག་སྟེ། རླུང་ཕྱིར་འཕང་སྲིན་པོས་འཐེན། ཁུ་ཚུར་བརླ་ལ་བཙུགས་ཏེ་
འདྲེན་ནོ། །ཡང་གཉིས་པ་ནི། ལག་པ་གཉིས་ཀྱི་ཕན་ཚུན་དུ་དཔུང་པ་བཟུང་ནས། སྨད་ཀྱི་
རླུང་ཁོང་ནས་དྲངས་སོ༌། །འགྲེམ་པ་ལ་དང་པོ། ལག་པ་གཉིས་ཀྱིས་དཔུང་བ་བཟུང་ལ་
ཕོ་ཁར་བསྣོལ་བཞི་སྤྲུག་བྱས་ནས་མཆན་ཁུང་དང་འཕོངས་ཚོས་རྡེབ་པའོ། །ཡང་ཁུ་ཚུར་
མཁལ་མའི་ཐད་དུ་བཙུགས་ལ་འཕོ་བ་བསྐོར། གསང་བར་གཅོག་ཅིང་གཡས་གཡོན་འཐེན་
ནོ། །ཡང་ལངས་ནས་ལག་པ་གཉིས་སྤྲུག་གོ །ཡང་ཅུང་ཟད་གན་རྐྱལ་དུ་བྱས་ནས་སུག་བཞི་
འཁྲབ་བོ། །གང་ག་དྷ་རའི་ལུགས། །ཨྠི། ༥
ན་མོ་གུ་རུ། བོ་དྷི་ཙིཏྟ་བཟུང་འདོད་ན། །ཆགས་པའི་དང་པོ་དབྱིངས་སུ་གཞོམ། །རླུང་
ཡང་རང་ཡན་ལུས་ཀྱང་ཀློད། །དགའ་བའི་རང་ཞལ་ལྟ་བར་བྱེད། །དེས་ནི་གྲོལ་བར་ཐེ་ཚོམ་
མེད། །ལག་པ་གཅིག་བརྐྱང་གཅིག་ཤོས་ནི། ཁུ་ཚུར་དཔུང་པའི་ཐད་དུ་བཅངས། །རྐང་པ་
20-1-361


གཅིག་ཤོས་བཙུགས་ནས་ནི། ། གཅིག་ནི་རྟ་ལ་འགོད་ཚུལ་བྱེད། ཁ་སྤྱོར་སྟོང་དུ་འཐེན་པར་
བྱ། །གནས་སུ་བསྐྱེལ་བའི་མན་ངག་ཡིན། །ཡན་ལག་སུག་བཞི་བཙུགས་ནས་ནི། །གཡས་
གཡོན་དབུས་སུ་རྡེག་ཅིང་འཐེན། །གདུངས་སྣ་ལ་འཇུག་དཔྱངས་ནས་ནི། །ལུས་ཀྱང་བརྐྱང་
བསྐུམ་དྲག་ཏུ་བྱ། །རྩ་མིག་གནས་སུ་འདེབས་པ་ཡིན། །མཁའ་འགྲོ་ཀུན་ཏུ་བཟང་མོའི་
ལུགས། །ཨྠི། ༦
ན་མོ་གུ་རུ། གསང་སྔགས་མགྱོགས་བྱེད་ཕོ་ཉའི་ལམ། །བློ་ངན་རྣམས་ལ་མི་བསྟན་
ཏེ། །དུག་ཆེན་ཧ་ལ་ཧ་ལ་འགྱུར། །དཔེར་ན་བཅུད་ཆེན་འོ་མི་ང༌། །གདུག་པའི་སྦྲུལ་ལ་
བླུད་པ་འདྲ། །འགའ་ཞིག་ཆོས་ལ་སྐུར་བ་འདེབས། ཡང་ན་ཆོས་ཀྱི་གང་ཟག་བརླག །དེ་
བས་སྣོད་ལྡན་འཚོལ་བ་གཅེས། །རིག་མ་མཚན་ལྡན་རྙེད་སླ་སྟེ། །རྟེན་གྱི་གང་ཟག་ཤིན་ཏུ་
དཀོན། །རབ་ནི་མངོན་ཤེས་སྟོབས་ཀྱི་བརྟག །འབྲིང་ནི་མཁའ་འགྲོའི་ལུང་བསྟན་ཚོལ། །ཐ་
མ་རྟེན་གྱི་གང་ཟག་སྟེ། །བླ་མས་ཅི་གསུང་སྒྲུབ་ནུས་ཤིང༌། །ཆོས་ཀྱི་ཕྱིར་དུ་དཀའ་བ་སྤྱོད། །
ངོ་ཚ་ཆེ་ཞིང་སྡིག་པ་འཛེམ། །བརྩོན་འགྲུས་ཆེ་ཞིང་གསང་ཐུབ་པ། །ཆོས་ཕྱིར་འབད་མེད་
གཏོང་ནུས་ན། །སྐལ་ལྡན་དེ་རང་ཡིན་ཞེས་གསུང༌། །འདི་ལ་རིག་མ་བརྟག་པ་དང༌། །རྩ་
འཚོལ་བ་དང་རྩ་བརྐྱེད་དང༌། །སྦྱངས་དང་ལས་ལ་སྦྱར་བ་དང༌། །མཐར་ཐུག་སྒོམ་པ་དྲུག་
ཏུ་བཞེད། །དེ་ལ་དང་པོ་བརྟག་པ་ནི། །དུང་ཅན་མ་ནི་བདེ་བ་མྱུར། །དེ་ཡི་དཔྲལ་བ་མགྲིན་
པ་དང༌། །སྙིང་ཁ་ལྟེ་བ་སྐྱེ་གནས་ཏེ། །གནས་ལྔ་དེ་དག་གང་རུང་དུ། །དུང་དང་འདྲ་བའི་རི་
མོ་ཡོད། །གླང་ཆེན་མ་ནི་སྨེ་བ་སྨུག །སྟོང་ཉིད་བསྒོམ་ན་བོགས་སུ་ཆེ། །པདྨ་ཅན་ནི་བདེ་བ་
རྒྱས། །ལུས་ལ་ཐིག་ལེའི་རི་མོ་འབྱུང༌། །རི་མོ་དགུར་པོར་རྒྱབ་སྤྲོད་དུ། །ཡོད་ན་རི་དྭགས་
ཅན་མ་ཡིན། །བདེ་བ་མི་ཆེ་ཤིན་ཏུ་བརྟན། །རི་མོ་ཅན་ལ་ཊི་མི་ནི། །དྲང་པོ་ཕལ་ཆེར་གསུམ་
སྒྲིགས་ཡོད། །གནས་སུ་དཀྱིལ་བ་ཤིན་ཏུ་སླ། །ལྕུག་ཕྲན་མ་ལ་ལྔ་ཡོད་དེ། །གསལ་ཉམས་
20-1-362


མཐར་དབུས་མེད་པར་འཆར། །ཆོས་འབྱུང་མ་ནི་ཆོས་འབྱུང་གཟུགས། །ཟག་བཅས་བདེ་
བ་ཤུགས་དང་ལྡན། །གཉིས་པ་ན་མི་འཚོལ་བ་ནི། །སྤྱི་བོར་གླ་རྩི་ཙནྡན་དམར། །ཏིལ་མར་
གསུམ་པོ་བསྲེས་པས་མཉེ། །རྒྱབ་བསྟན་སྟེང་དུ་ཁལ་བསྣོལ་དང༌། །ཤིང་ལེབ་དང་ནི་སྐ་
རགས་བསྡམས། །ཀྵུ་ཡིག་གནས་སུ་འཕྱིང་བུ་བཞག །དེས་ནི་རྩ་དེ་རྙེད་པར་འགྱུར། །སྦོམ་
ན་པུན་ད་རི་ཀ་ཡི། །རྩ་བ་དགོས་ཏེ་མི་རྙེད་དེ། ཁུག་ཆོས་བ་དཀར་འོ་མ་དང༌། །ཀ་ར་མར་
གསར་རྒྱ་ཙང་ཚིལ། །ཆང་དང་སྦྱར་བ་བྱུག་ན་ནི། །ཕྲ་ཞིང་ཤིན་དུ་རྣོ་བར་འགྱུར། །གསུམ་
པ་རྩ་ནི་སྐྱེད་པ་ལ། །ན་ཆེན་ཆུ་བོར་ཕྱུང་ནས་ནི། །དགའ་བའི་དམར་པོར་བཅུད་དུག་གཙོ།
ཁ་རུ་ཚ་དག་ཤིན་ཤིན་བཏབས། །ཡང་ན་མཁའ་ལྡིང་རྒྱ་གཙང་བཏགས། །ར་མོ་ཤ་དང་
དཀར་གསུམ་དང༌། །ཐབས་ཤེས་དམ་རྫས་བརྟེན་པ་ཡིས། །གཉིས་ཀ་ལུས་བཟུང་སྐྱེད་པར་
བྱ། །བཞི་པ་སྔོན་འགྲོ་སྦྱངས་པ་ནི། །གཟུགས་སྣང་སྒྱུ་མར་ཤེས་བྱ་ཞིང༌། །ངག་ནི་ལས་རླུང་
ཁེགས་པར་བྱ། །སེམས་ནི་འཛིན་མེད་ནམ་མཁའ་འདྲ། །མ་རྟོགས་འགྲོ་དྲུག་སེམས་ཅན་ལ། །
སྙིང་རྗེ་མཁའ་ཁྱབ་སྒོམ་པ་གཅེས། །ལྔ་པ་ལས་ལ་སྦྱར་བ་ནི། །དང་པོ་གཟུགས་ལ་ལྟ་བ་
དང༌། །གཉིས་པ་སྒྲ་ལ་བསླབས་པ་དང༌། །གསུམ་པ་དྲི་ཞིམ་བདེ་བ་རྒྱས། །བཞི་པ་ལུས་ཀྱི་
རེག་བྱ་དང༌། །རོ་མཆོག་ཁྱད་པར་མྱོང་བ་ནི། །འཁྱུད་དང་ཙིམ་པ་བྷ་གར་རེག །ལྔ་པ་སྙོམས་
པར་འཇུག་པ་ཡིན། །རྩ་སྣ་རིག་ན་རྐང་པ་བརྐྱང༌། །ཐུང་ན་ཕྲག་པར་སྐལ་བ་ཡིན། །ཕྱོགས་
བཞིར་རྡོ་རྗེས་བཙལ་བྱ་ཞིང༌། །ཅིག་ཤོས་ཀྱིས་ཀྱང་འོག་རླུང་བསྐུམ། །སྲོག་རྩོལ་མནན་པས་
གཏེར་བར་བྱ། །འཕོ་འཕོ་འདྲ་ན་ཀློད་པར་གཅེས། །མིག་ནི་གྱེན་དུ་ལྟ་བར་བྱ། །ཅིག་ཤོས་
སྐེད་པ་ཉག་གིས་བཏང༌། །རླུང་ནི་གསང་བར་ཕུལ་བ་ན། །བདེ་བ་ཟིན་པར་ཐེ་ཚོམ་མེད། །
ཉམས་ཏེ་ཡལ་དུ་མི་འཇུག་པར། །ཡང་ཡང་དབབ་པར་བྱ་བ་ལས། །བདེ་བ་ཀློད་པར་མི་
ནུས་ན། །ལག་པ་སོགས་ཀྱི་ཀློད་པར་བཞེད། །རྩ་སྤྲུག་བྱེད་ཅིང་ཁོང་ནས་འདྲེན། །མཁལ་
20-1-363


མནན་ཕོ་བ་བསྐོར་བ་དང༌། །ལག་པ་སྤྲུག་ཅིང་གན་རྒྱལ་འཁྲབ། །གནས་སུ་བཟློག་ཅིང་
གནས་སུ་ཁྲེམས། །དྲུག་པ་མཐར་ཐུག་སྒོམ་པ་ནི། །རིག་པ་དྭངས་སྙིགས་ཕྱེ་བ་ན། །བདེ་བ་
རང་གི་རིག་པ་ཙམ༌། །རིག་པ་གསལ་སྟོང་བརྗོད་དུ་མེད། །ནམ་མཁའི་དབྱིངས་དང་མཉམ་
པར་བསྲེ། །མཁའ་འགྲོ་གང་ག་དྷ་ར་དང༌། །རྗེ་བཙུན་རིན་ཆེན་ལྷ་མོ་གཉིས། །ཡི་དམ་ཞལ་
གཟིགས་དངོས་གྲུབ་བརྙེས། །གདམས་པ་མཁའ་འགྲོའི་བསྟན་པ་ཡིན། །ཨྠི། ༧
ན་མོ་གུ་རུ། མན་ངག་ཟབ་མོ་སྨིན་མཛད་པའི། །བླ་མ་སངས་རྒྱས་ཞབས་ལ་འདུད། །
མགྱོགས་བྱེད་ལས་ཀྱི་ཕྱག་རྒྱའི་ལམ། །མཁའ་འགྲོའི་སྙིང་ཁྲག་ལྟ་བུ་ལ། །ཀུན་དུ་བཟང་
མོའི་ཞལ་ན་རེ། །སེངྒེའི་འོ་མ་འདྲ་ཞེས་གསུངས། །དཔེར་ན་སེངྒེའི་འོ་མ་སྟེ། །ཕལ་བའི་
སྣོད་དུ་བླུག་པ་ན། །སྣོད་ཀྱང་འཆག་ལ་བཅུད་ཀྱང་འབོ། །རིན་ཆེན་སྣོད་དུ་བླུག་ན་ནི། །དྲི་
ཞིམ་རོ་མཆོག་ལྷག་པར་འཕེལ། །བརྟེན་དང་རྩ་སྟོབས་རྒྱས་པར་འགྱུར། །འདོད་ཆགས་
ཐ་མལ་ཉོན་མོངས་འདི། །སྐྱེ་བོ་ཀུན་ལ་དུག་ཡིན་ཞིང༌། །ལམ་དུ་ལོངས་ན་འཆི་མེད་སྟེར། །
དུས་གསུམ་སངས་རྒྱས་བྱང་སེམས་ཀྱི། །ཡོན་ཏན་མ་ལུས་ཐམས་ཅད་ཀྱང༌། །ལྷན་སྐྱེས་
བདེ་བ་ཆེ་ལས་བྱུང༌། །བདེ་བ་ཀུནྡ་ཡིན་པས་ན། །ལས་རྒྱ་ལམ་དུ་བྱེད་པ་བསྔགས། །འདི་ལ་
མཚན་ཉིད་བརྟག་པ་དང༌། །སྐེམ་དང་བདེ་གནས་འཚོལ་བ་དང༌། །སད་དང་ལས་ལ་སྦྱར་བ་
སྟེ། །རྩེས་མགོ་རྣམ་པ་ལྔ་རུ་བཞེད། །དང་པོ་རིགས་ནི་མ་གསུངས་ཀྱང༌། །བརྟེན་རྒྱུ་རུང་སྟེ་
དེ་ལྟར་ཡང༌། །རབ་འབྲིང་ཐ་མའི་ཁྱད་པར་ཡོད། །མཆུ་ལ་བྷ་ག་བརྟག་པར་བྱ། །སྲབ་དང་
རྒྱས་དང་བར་མས་ཡིན། ཁ་ཡིས་དཀྱུས་ལ་ཅིག་ཤོས་བརྟག །དགུ་ལ་སོར་ལྔ་ལྷག་པ་སྤངས། །
བཅུ་དྲུག་ལ་ཡང་འཁྱུད་གང་དང༌། །རྩལ་རྫོགས་ན་ཡང་ཉི་ཤུའོ། །དེ་བས་རིང་བ་མ་བརྟེན་
ནོ། །མན་ཆད་བསྟེན་དུ་རུང་བ་ཡིན། །བདེ་བས་མཚན་ཉིད་མིག་ལ་བརྟག །མིག་དཀྱུས་རིང་
ཞིང་མིག་འབྲས་སྣུམ། །སྲི་ལ་འཛུམ་པ་ཡོད་ན་བཟང༌། །ནུ་མ་དང་ནི་སྐྲ་དག་ལས། །གུས་
20-1-364


དང་མི་གུས་བརྟག་ཏུ་རུང༌། །ལི་ན་བཟང་སྟེ་སེར་ན་འབྲིང༌། །ནག་ཅིང་རྩུབ་པ་ཐ་མ་ཡིན། །
ཟླུམ་པོ་བཟང་སྟེ་རྣོ་བ་འབྲིང༌། །ཤིན་ཏུ་འཕྱང་ན་མི་བཟང་ངོ༌། །ཨོལ་མདུད་སྦོམ་ཞིང་སྙིང་
གི་སྤུ། །འདུག་ན་གསང་སྒྲོགས་ཐུབ་པ་འོང༌། །ཆོས་འབྱུང་བ་སྤུ་སྤངས་པ་རབ། །སེར་ཁམ་
འབྲིང་དང་ནག་པོ་ངན། །རུས་སྦལ་དཀར་ཞིང་ནང་དམར་མ། །དེ་ནི་མཆོག་ཏུ་འདོད་པ་ཡིན། །
སྨུག་པ་འབྲིང་ཡིན་གཞན་ནི་སྤངས། །ལྕེ་དང་སྙིང་ལ་ཁ་དོག་དང༌། །མཆན་ཁུང་ལས་ནི་བ་
སྤུ་བརྟག །སྐེམ་ནི་རྒྱ་སྐྱེགས་ཁུ་བ་སྟེ། །ཆུ་རྩེའི་མེ་ལ་སྐོལ་ནས་ནི། །སྤང་རྒྱན་མེ་ཏོག་བཏབ་
པ་འཐུང༌། །གཉེར་པོ་ཆེ་ནི་གསེར་གྱིས་བསྲེག །བྷ་གར་ཆུ་བཅག་བཏབ་པ་དང༌། །བེར་ག་
སོར་ནི་བརྒྱད་པ་ཡི། ཚང་ར་བཅོས་སོ་དལ་བུས་བརྡུང༌། །གསུམ་པ་བདེ་གནས་འཚོལ་བ་
ནི། །བཅོས་མའི་འོབ་ལས་ཕྱི་དང་ནི། །ནང་དུ་ཡང་ཡང་རེག་པར་བྱ། །གང་ལ་ངོ་གཅིག་བྱུང་
བ་དེར། །རྡོ་རྗེ་དབྱིངས་ཕྱུག་ཡོད་པ་ཡིན། །བཞི་པ་སད་པར་བྱ་བ་ནི། །མིག་ནི་གྱེན་བསྟན་
ལག་པ་གཉིས། །པུས་མོ་དག་ལ་བཀབ་པར་བྱ། །ཧཱུཾ་ཡིག་རིང་པོ་རིང་པོའི་མཐར། །ཧིག་
ནི་མང་དུ་བརྒྱུད་པ་ཡིན། །དེ་འདྲ་ཡང་ཡང་སྦྱངས་ནས་ནི། །འོག་སྒོ་འབྱེད་འཛུམ་སྦྱོར་བ་
ལས། །གསང་བའི་གནས་སུ་བཙུད་པར་བྱ། །དེ་ནས་ལན་གཅིག་ལྕམ་པ་ཡི། །རྐང་གི་རྩལ་
ཏེ་ཡང་ཡང་དྲངས། །འབྱེད་འཛུམ་སྦྱོར་བས་ཡང་ཡང་དབྱུང༌། །འདི་ལ་རྟགས་སུ་ཐོན་ན་ནི། །
དངོས་གཞིའི་ལས་ལ་འཇུག་པར་བྱེད། །ལྔ་པ་ལས་ལ་སྦྱར་བ་ནི། །དང་པོར་གླུ་དང་དགའ་
ཚིག་ཉན། །དེ་རྗེས་ལུས་ཀྱི་ཆ་ལ་བརྟག །དེ་རྗེས་ཀུ་རེ་འཁྲིག་ཚིག་དང༌། །དེ་ནས་རྩེ་འཇོ་
སྣ་ཚོགས་དང༌། །དེ་འོག་ཕྱི་ཡི་རེག་བྱ་སྟེ། །ལག་བཅིངས་མོ་དང་འཁྱུད་པ་དང༌། །སོ་དང་
སེན་མོ་འདེབས་པ་དང༌། །བདེ་རེག་བྱེད་ཅིང་ཕ་རོལ་འདྲུད། །དེ་ནས་སྙོམས་པར་འཇུག་པ་
སྟེ། །ཆགས་སྤྱོད་བདུན་དུ་བཞེད་པ་ཡིན། །རུས་སྦལ་འགྲོས་ཀྱི་འབེབས་པར་བྱ། །སྐད་ཅིག་
དེ་ལ་ཕྲད་གཞོམ་དང༌། །སྟེང་པ་གསེར་གླིང་གནས་སུ་བཞག །དེས་ནི་བརྟེན་པར་འགྱུར་བ་
20-1-365


ཡིན། །རྟ་ཞོན་ཚུལ་གྱིས་གནས་སུ་བསྐྱལ། །སུག་བཞི་གཡས་གཡོན་འཐེན་ནས་ནི། །བརྐྱང་
བསྐུམ་བྱ་ཞིང་གན་རྐྱལ་རྒྱངས། །དེ་འདྲས་རྩ་མིག་དག་ཏུ་འདེབས། །ལུས་གནད་རྣམ་སྣང་
ཆོས་བདུན་ལས། །སེམས་ནི་མི་རྟོག་མཐའ་དབུས་མེད། །ངག་ནི་རང་བབས་འགྲོ་འོངས་
བྲལ། །ཆགས་མེད་མཉམ་པར་བཞག་པ་ལས། །བདེ་བ་ཞེན་མེད་ངོ་མཚར་ཆེ། །དབྱིངས་སུ་
སྐྱིལ་བའི་གདམས་ངག་ཡིན། །ཨྠི༨ ན་མོ་གུ་རུ། གསང་སྔགས་བདེ་བ་ལམ་བྱེད་ནི། །རྣམ་
རྟོག་ཉིད་ཀྱི་རྣམ་རྟོག་དང༌། །སྲིད་པ་ཉིད་ཀྱི་སྲིད་པ་དག །ཇི་ལྟར་མེ་ཡི་ཚིག་པ་ལ། །མེ་ཡི་
ཡང་ནི་གདུང་བར་བྱ། །དེ་བཞིན་འདོད་ཆགས་མེས་ཚིག་པ། །འདོད་ཆགས་མེས་ནི་གདུང་
བར་བྱ། །ཞེས་གསུང་གནད་དུ་ཆེ་ན་ཡང༌། །ལས་རྒྱ་བརྟེན་པ་མི་ནུས་ན། །ཡིད་ཀྱི་སྒོམ་ནས་
སྦྱོར་བར་བཞེད། །སྣང་སྟོང་སྒྱུ་མ་ལྟ་བུ་ལ། །འབད་རྩོལ་མེད་པར་བྱང་བར་གཅེས། །གཞན་
དུ་ཐར་མེད་གནས་སུ་ལྷུང༌། །རང་ཤར་ལྷ་སྐུའི་ལམ་ཁྱེར་བྱ། །ཚོགས་ཟླུམ་བྱིན་གྱིས་རློབས་
པ་ཡིན། །རྩ་ཡིག་སྔགས་ཀྱིས་བྱིན་གྱིས་རློབས། །བར་ཆད་མི་འཇུག་ལམ་དུ་འགྲོ། །གཟུང་
དུ་མེད་ཅིང་ཐོབ་པ་མེད། །བྱར་མེད་ནམ་མཁའི་དབྱིངས་དང་མཉམ། །ཆོས་ཉིད་འོད་
གསལ་རྟོགས་པར་འགྱུར། །བླ་མ་ཤངས་པ་ཆེན་པོ་དེས། །མ་རྒྱུད་སྤྱི་ཡི་རྫོགས་རིམ་གནད། །
མཁའ་འགྲོ་རྣམ་པ་གསུམ་གྱིས་ནི། །ཞལ་གདམས་ཐུགས་ལ་ཆུད་པར་མཛོད། །རྟོགས་
ལྡན་ཞང་སྒོམ་ཆོས་སེང་གིས། །བླ་མ་ཆེན་པོ་དེ་ལ་ནི། །ལུས་ཀྱི་ཞབས་རྟོག་ཕུལ་བ་དང༌། །
སྒྲུབ་པ་ཉམས་མྱོང་ཤར་བ་ཡིན། །སྒྲུབ་པའི་མེ་ཏོག་སྤུངས་པའི་དུས། །པདྨ་སྟེང་དུ་ཐུགས་
བཅུད་གནང༌། །དེ་ལ་བླ་མ་རིན་ཆེན་གྱིས། །རྐང་ཐག་སྤངས་ཏེ་གསན་པ་ཡིན། །བྱིན་རླབས་
བརྒྱུད་ལྡན་མན་ངག་འདི། །སློབ་བུའི་དོན་དུ་གསལ་བར་བཀོད། །མཁའ་འགྲོ་རྣམ་གསུམ་
གྱི་མན་ངག་རྫོགས་སོ།། །།མངྒ་ལཾ།
20-1-366


༄༅། །མཁའ་འགྲོ་རྣམ་གསུམ་གྱི་ཞལ་གདམས་གུང་བསྒྲིགས་
ཏེ་ཉམས་སུ་ལེན་བདེ་བ་བཞུགས།
༄༅། །ༀ་སྭཱ་སྟི། མཁའ་འགྲོ་རྣམ་གསུམ་གྱི་རི་བོང་དབབ་བཟུང་ལ་ནི། དོན་གསུམ་
སྟེ། རིག་མ་བརྟག་ཅིང་དགུག་པ་དང༌། སྟ་གོན་སྦྱངས་པ་ལས་ལ་སྦྱར་བ་འཕྲོས་དང་བཅས་
པའོ། །དང་པོ་ནི། དཀར་མོ་དཔྲལ་བར་སྨེ་བ་ཡོད་པ་བུདྷིའི་རིགས། དམར་མོ་ལྟེ་བར་སྨེ་བ་
ཡོད་པ་དཔྲལ་བར་རྩེ་གསུམ་ཡོད་པ་རིན་ཆེན་རིགས། དཀར་ལ་དམར་བ་མགྲིན་པར་སྨེ་བ་
ཅན། སྐྱེས་པས་རེག་ན་མི་བཟོད་པ་པདྨའི་རིགས། སྔོ་བསངས་ནུ་ཕྲག་དོག་པ་རྣ་བ་གཡོན་
པ་ལ་སྨེ་བ་ཅན་ལས་ཀྱི་རིགས། སྔོ་བསངས་སྙིང་ག་ལ་སྨེ་བ་ཅན་ཐུགས་ཀྱི་རིགས་ཡིན་ནོ། །
ཞེས་སུ་ཀ་སིདྡྷིའི་གསུང་ངོ༌། །དུང་ཅན་མ་ལ་གནས་ལྔ་པོ་གང་རུང་དུ་དུང་དང་འདྲ་བའི་རི་
མོ་ཡོད་པ། གླང་ཆེན་མ་དེར་སྨེ་བ་སྨུག་པོ་ཡོད་པ། པདྨ་ཅན་མ་ཐིག་ལེའི་རི་མོ་ཡོད་པ། རི་
དྭགས་ཅན་མ་རི་མོ་སྒུར་པོ་རྒྱབ་སྤྲོད་དུ་ཡོད་པ། རི་མོ་ཅན་མ་ལ་རི་མོ་དྲང་པོ་གསུམ། ལྕུག་
ཕྲན་མ་ལ་ལྔ། ཆོས་འབྱུང་མ་ལ་གྲུ་གསུམ་འབྱུང་བའོ། །དེ་དག་ལ་བདེ་བ་མྱུར་བ་དང༌། སྟོང་
ཉམས་ཆེ་བ་དང༌། བདེ་བ་རྒྱས་པ་དང༌། བདེ་བ་འབྲིང་བ་དང༌། ཐིག་ལེ་འཛིན་སླ་བ་དང༌།
གསལ་ཉམས་ཆེ་བ་དང༌། བདེ་བ་ཤུག་ཆེ་བ་རྣམས་ཀྱི་དགོས་པ་ཡོད། ཅེས་གང་ག་དྷ་རས་
གསུང་ངོ༌། །ཡང་ཁའི་མཆུ་ལ་བྷ་ག་བརྟག །མཆུ་འཐུག་མ་བྷ་ག་ཤ་རྒྱས། ཁ་ཆེ་ཆུང་ལ་བྷ་
ག་ཆེ་ཆུང་ཡོད། བྷ་ག་ནི་ལོ་དགུ་ལ་སོར་ལྔ། བཅུ་དྲུག་ལ་མཁྱུད་གང༌། ཉི་ཤུ་ལ་སོར་བཅུ་
གཉིས་ཆེ་ཚད་ཡིན། །དེ་ལས་དཀྱུས་རིང་བ་མི་བརྟེན་ནོ། །བདེ་བ་ཆེ་ཆུང་མིག་ལ་བརྟག་སྟེ།
མིག་དཀྱུས་རིང་ཞིང་མིག་འབྲས་ནག་པ། སྲི་ཁ་དང་མིག་འཛུམ་ཡོད་ན་བཟང༌། སྐྲ་དང་ནུ་མ་
20-1-367


ལེགས་ན་བདག་པོ་ལ་གུས་ཏེ། སྐྲ་ལི་ན་རབ། སེར་ན་འབྲིང༌། ནག་པོ་རྐྱང་པ་ཐ་མའོ། །ནུ་མ་
འབུར་ཞིང་ཟླུམ་ན་རབ། རྣོ་བ་འབྲིང༌། འཕྱང་བ་ཐ་མའོ། །ཨོལ་མདུད་དང་སྙིང་སྤུ་འདུག་ན་
གསང་ཐུབ་པར་འོངས། བྷ་ག་ཡང་སྤུ་མེད་པ་དང༌། ནག་པོ་འཐུག་པོ་དང༌། སེར་ཁམ་གསུམ་
རབ་མཐའ་འབྲིང༌། བྷ་ག་ཕྱི་དཀར་ལ་ནང་དམར་བ་དང༌། སྨུག་པ་དང༌། སྔོ་བ་རྣམས་སྤྱིར་
ཤ་མདོག་དཀར་བ་གཞིར་བཞག་པ་ལ་རབ་འབྲིང་ཐ་མ་སྟེ། ལྕེ་དང་སྙིང་ལས་བྷ་གའི་ཁ་
དོག་དང༌། མཆན་ཁུང་གི་སྤུ་ལས་དེའི་སྤུ་བརྟག་དགོས་ཏེ། དེ་དང་དེ་དག་མཚུངས་པར་འོང་
ངོ༌། །ཞེས་ཀུན་ཏུ་བཟང་མོས་གསུངས་སོ། །དྲུག་པ་ནི། བུ་མོ་དེའི་ཆུ་ཤུལ་གྱི་ས་ལ་གཟུགས་
བརྙན་བྱས། སྙིང་ཁར་གི་ཧཾ་དང་པདྨ་རཀྟས་མིང་རུས་བྲིས་པའི་ཤོག་དྲིལ་གཞུག །དགུགས་
གཞུག་བྱ། ཟངས་ཀྱི་ལིང་གའམ། ཁབ་ཀྱིས་བྷ་ག་འཚག་ཅིང༌། ཧ་རི་ནི་ས་ཆྒཻ༷་མོ་ཁུག རྣམ་
ཤེས་བྲེང་བྲེང་དུང་དུང་བདག་གི་དབང་དུ་བསྡུས། ཞེས་ཞག་བདུན་བཟླས་པའི་བཟའ་
བཏུང་བྱིན་ན་དབང་དུ་འདུས་སོ། །ཡང་ཡེ་ཤེས་མཁའ་འགྲོ་མ་སུ་ཀ་སིདྡྷིའི་གཉན་སྟོན་ལ་
དངོས་སུ་གནང་བའི་དགུག་པ་ཟབ་མོ་ནི། རྫས་སྦལ་པའི་མིང་རུས་བྲིས་ལ་གཞུག །ཡུངས་
དཀར་བདུན་ནང་དུ་གཞུག །བདུན་སྦལ་པའི་འོག་ཏུ་བཅུག །རང་ཕག་མོའི་ཐུགས་ཀ་ནས་
ཕོ་ཉ་དམར་མོ་མང་པོ་སྤྲོས། ཁམས་གསུམ་དབང་དུ་བསྡུས་པར་བསམ་ལ། ངག་བཅད་
དེ། སྭཱཧཱ་སྦལ་ཤ་ཁོལ། ཙག་ཙག །དུང་དུང༌། འདུར་འདུར་ཡེད་ཡེད་ཆྒཻ་མོའི་ཙིཏྟ་དཀྲུགས།
བདག་གི་དབང་དུ་གྱུར་ཅིག །ཅེས་སེམས་མ་གཡེང་བར་རབ་ཞག་གཅིག །འབྲིང་གཉིས།
ཐ་མ་གསུམ། རྨི་ལམ་དུ་བུད་མེད་འདུ་བ། ཁྲོམ་འཚོགས་པ། གཏེར་རྙེད་པ་སོགས་འབྱུང་ངོ༌། །
ལས་སྦྱོར་ནི་ཉི་མ་དམར་ཐག་ཆོད་པ་ན། རྫས་ལ་སྔགས་སྟོང་ཙམ་བཟླས། རབ་ཕྱིའི་ཉུངས་
དཀར་གཏོར་བ། འབྲིང་ཤ་ལ་བརླན་པ་ཙམ་དང༌། ཐ་མའི་སྦལ་བ་ལུས་ལ་ཐེབས་ན་ཐེ་ཚོམ་
མེད། ལུས་འཁྱོར་བ་དང་སེམས་མི་གནས་པ་ཡོངས་ཉེན་ཡོད། དེ་ལ་འདོད་པ་སྤྱད་པས་
20-1-368


སེལ། གྲོལ་བར་འདོད་ན་གངས་ཆུ་གྲང་མོ་ལུས་ལ་རྒྱབ། སྔགས་མགོ་འཇུག་བཟློག །སྦལ་
བ་བཅག །མིང་རུས་སྤོས་ཆུས་ཁྲུས་བྱས་པས་བྲོལ་བར་འགྱུར་རོ། །རྩ་འཚོལ་བ་ནི། སྤྱི་བོར་
གླ་རྩི། ཙནྡན་དཀར་པོ། ཏིལ་མར་གསུམ་བསྲེས་པས་མཉེས། རྒ་ཤིང་སྟེང་དུ་མཁལ་མ་
གནོན་པ་དང༌། ཤིང་ལེབ་དང་སྐེ་རག་བསྡོམས། བཤང་ལམ་དུ་འབེ་ལྡོགས་འཕྱིང་བུ་བཅུག་
པས་བྷ་གའི་མཁུར་ཤ་ནུ་མ་འདྲ་བར་འགྲོ། རྩའི་རྩེ་མོར་རིབ་རིབ་འོང༌། ཡང་ན་བཅོས་མའི་
རྡོ་རྗེས་ཕྱི་ནས་བཙགས། ནང་དུ་བསྐོར་བས་རྩ་ཡོད་པར་ཕྲད་པ་ལ་འཁུན་ཞིང་སྡང་ཡེད་པ་
འོང༌། རྩ་སྦོམ་ན་པདྨ་དཀར་པོའི་རྩ་བ་དགོས་ཏེ་བོད་དུ་མི་རྙེད་པས། ཨུག་ཆོས་མེ་ཏོག་རྩ་བ་
བཅས་པ། བ་དཀར་པོའི་འོ་མ། ཀ་ར། མར་སར། གངས་སྦལ། ད་བྱིད་སྨུག་པོའི་ཚིལ་སྦྱར་
བ་བྱུག་པའམ། ཆང་དང་སྦྱར་པདྨར་དག་པས་ཕྲ་བར་འགྱུར་རོ། །རྒྱ་ཚོས་ཀྱི་ཁུ་བ་ཆུ་རྩའི་མེ་
ལ་སྐོལ། སྤངས་རྒྱན་མེ་ཏོག་བཏབ་པ་བཏུང་པ་དང༌། གཉེར་པོ་ཆེར་གསེར་གྱི་མེ་རྩ་བྱེད་
པ། བྷ་གར་ཆུ་དུགས་དང༌། འཕོངས་ཚོས་ལ་བེར་གས་དལ་བུས་བརྡུང་བ་སོགས་ནི་སྲིད་
རྒྱུན་སྐེམ་པའོ། །གཉིས་པ་བུམ་པ་ཅན་བརྟན་པོ་སྒོམ་པ་ཡིན་ན། འཁྲུལ་འཁོར་རྣམས་ལས་
ལ་སྦྱར་བའི་སྐབས་སུ་དགོས་ནའང༌། ད་ལྟ་ནས་སྦྱང་དགོས་པས་ཐམས་ཅད་ལ་རླུང་འཁྲབ་
སྔོན་དུ་གཏོང་བར་ཤེས་པར་བྱའོ། །འཛིན་པ་ལ་གསུམ་གྱི་དང་པོ་ཀློད་པ་ནི། ལུས་སེམས་
ཁོང་ཀློད། སྲིན་པོ་ལ་ཡན་པའོ། །གཉིས་པ་ནི། རྒྱ་མཚོ་བཅེར་བ་སོགས་འགྱུར་བ་བཞིའོ། །
གསུམ་པ་སེམས་ཀྱི་འཁྲུལ་འཁོར་ཏེ། བདེ་བའི་ངོ་བོ་ལ་བལྟས་ནས་ཀློད་པའོ། །
བཟློག་པ་ལ་ལྔའི་དང་པོ་ནི། སྤྱི་བོར་རྡོ་རྗེ་ཐལ་མོ་འཐེན་ལ། སྟོང་འདྲེན་བྱས་ལ་སེམས་
ནམ་མཁར་འཕང་ངོ༌། །ལངས་ཏེ་ལན་གསུམ་སྐྱེད་ཅིང་སྟོང་འདྲེན་བྱེད། གཉིས་པ་ནི། པུས་
བཙུགས་རྡོ་རྗེ་ཁུ་ཚུར་མདུན་དུ་བཙུགས་ལ་ཧག་ཧིག་ཧོག་ཅེས། སྙིང་ཁ་མགྲིན་པ། སྤྱི་བོ་
རྣམས་སུ་དྲང་ངོ༌། །གསུམ་པ་ནི་རྩལ་སྤྲུགས་ཀྱི་མཐར། སྟེང་རླུང་ཕྱིར་འཕངས༌། ཐུར་སེལ་
20-1-369


འཐེན། སྐྱིལ་ཀྲུང་རྡོ་རྗེ་ཁུར་ཚུར་བརླ་སྒང་ལ་བཙུགས་ཏེ་རྒང་འདྲེན་བྱའོ། །བཞི་པ་ནི་སེམས་
སྐྱིལ་སྟོད་སྐྱིལ་བཅས་ནས། སྨད་ཀྱི་རླུང་ཁོང་འདྲེན་དང༌། སྟོ་འདྲེན་བྱའོ། །ལྔ་པ་ནི་ལག་པ་
གཡོན་བརྐྱང་། གཡས་དཔུང་པར་ཁུ་ཚུར་བཅངས། རྐང་པ་རྟ་ལ་གཡོན་ཞོན་བྱེད་ཚུལ་གྱིས།
གཡོན་ནས་རྐང་འཐེན་བྱ། དེ་ཉིད་མགོ་བཟློག་རེའང་བྱའོ། །དགྲམ་པ་ལ་དགུ་ལས། དང་
པོ་ནི། ལངས་ཏེ་སླར་བསྡད་ཐལ་མོ་རྩེགས་ལག་པ་བརྐྱང༌། མགོ་བོ་ལ་ཐལ་ཅག་རེ་མོས་སུ་
རྡེག་པ་དང༌། འཕག་ཅིང་ལག་པའང་སྦྲུག་གོ །གཉིས་པ་ནི། སྒུར་ལ་ལང་རྐང་ལག་རེ་མོས་
སུ་འཁྲབ་པོ། །གསུམ་པ་ནི། སྐྱིལ་ཀྲུང་ལག་གཉིས་དཔུང་འཛིན་ཕོ་ཁར་བསྣོལ། བཞི་སྤྲུག་
བྱས་ནས་མཆན་ཁུང་རྡེབ་ཅིང་འཕགས་པའོ། །བཞི་པ་ནི། རྡོ་རྗེ་སྐྱིལ་ཀྲུང་དང༌། རྡོ་རྗེ་ཁུ་ཚུར་
མཁལ་མའི་ཐད་དུ་བཙུག་ལ། གཡས་གཡོན་དབུས་གསུམ་དུ་བརྟེག་ཅིང་འཐེན་ནོ། །བརྒྱད་
པ་ནི། གདུང་སྣ་སོགས་ལ་འཇུས་ཏེ་བརྐྱང་བསྐུམ་བྱའོ། །དགུ་པ་ནི། གན་རྐྱལ་དང་ཁ་ཕུབ་
རུང་སུག་བཞི་ཕྱོགས་བཞིར་རྒྱངས་ནས་བཅུད་ལ་བོར་རོ། །དེ་དག་ལ་འདྲེན་ཀུན་ལ་སྨད་
སྒྲིམ་སྟོད་གློད་རྒྱ་མཚོ་གཅེར་བ་སོགས་གང་འགྲུབ་དགོས། འགྲེམས་ཀུན་ལ་ཁ་སྦྱོར་ལུས་
ལྷོད་ཅིང་འཆུན་དང་ལྡན་པ་དགོས་སོ། །
ཀུན་ཁྱབ་ཏུ་སེངྒེ་རྣམ་གྲོལ་ཡང་བྱའོ། །དེ་དག་ལ་སྡོམ་འདི་སྐད་ཅེས་བྱ་སྟེ། གློད་དང་
འགྱུར་བཞི་གཞོམ་པ་སྟེ། །འཛིན་པ་རྣམ་པ་གསུམ་དུ་འདོད། །རྡོ་རྗེ་ཁུ་ཚུར་པུས་བཙུགས་
དང༌། །རྩལ་སྤྲུག་ཁོང་འདྲེན་རྟ་ཞོན་ཚུལ། །འདྲེན་པའི་འཁྲུལ་འཁོར་རྣམ་ལྔའོ། །དགྲམ་པའི་
འཁྲུལ་འཁོར་རྣམ་དགུ་ནི། །དང་པོ་མགོ་ལྕོག་འཕང་སྤྲུག་བྱ། །གཉིས་པ་རྐང་ལག་རེ་མོས་
འཁྲབ། །གསུམ་པ་དཔུང་འཛིན་བཞི་སྤྲུག་རྡེབ། །བཞི་པ་མཁལ་མནན་ཕོ་བ་བསྐོར། །ལྔ་
དྲུག་ལག་སྤྲུག་གན་རྐྱལ་ཕྲ། །བདུན་པ་སུག་བཞི་གཡས་གཡོན་འཐེན། །བརྒྱད་དགུ་བརྐྱང་
བསྐུམ་གན་རྐྱལ་རྒྱངས། །འདི་དག་མཁའ་འགྲོ་གསུམ་གྱི་མན་ངག་གུང་སྤྲོས་པ་ཡིན་ནོ། །
20-1-370


གསུམ་པ་ནི། དབབ་བཟུང་བཟློག་དགྲམ་རླུང་དང་བསྲེ་བ། ཡེ་ཤེས་ཆེན་པོར་བསྲེ་
བའོ། །སུ་ཁ་སིདྡྷི་འདོད་ཡོན་ལྔ་ལ་རིམས་སློབ་མི་བཞེད། གཾ་ག་དྷ་ར་རོ་ལ་བསླབ་པ་ནས།
རེག་བྱ་སྤྱི་དང༌། རྡོ་རྗེ་པདྨར་རེག་པ་ཡན་ཆད་སྡོམས་པ་ལ་ཐུན་གཅིག་ཏུ་མཛད་པ་ཡིན།
ཀུན་ཏུ་བཟང་མོ་ནི། གླུ་ལ་ཉན་པ་དང༌། གཟུགས་ལ་བལྟའ་བ་དང༌། ཀུ་རེ་བྱེད་པ་དང༌།
ལུས་ཀྱི་རྩེད་མོ་དང༌། ལག་བཅངས་དང༌། འོ་དང་འཁྱུད་པ་དང༌། སོ་དང་སེན་མོས་འདེབས་
པ་དང༌། བདེ་རེག་བྱེད་པ་དང༌། ཕྱི་རོལ་དུ་དྲུད་པ་སྟེ་དྲུག །ཕྱིའི་རེག་བྱ་ལ་བསླབ་པ་དང༌།
སྙོམས་པར་འཇུག་པ་དེ་ཆགས་སྤྱོད་བདུན་དུ་བཞེད་དོ། །དེ་ལ་རྡོ་རྗེ་པདྨར་ཅུང་ཟད་གསོར་
ཞིང༌། ནོར་བུར་ཧུཾ་ནག་པོ་མགོ་གྱེན་བསྟན་གྱིས་བཀག་པར་བསམ། འཛིན་པའི་འཁྲུལ་
འཁོར་གཉིས་པས་འཛིན་པ་ཡིན། ཟིན་དཀའ་ན་ཧཱུཾ་གི་ཕུལ་ནས་ཐིག་ལེ་བ་ཐག་ལྟ་བུ་སྤྱི་
བོར་ལྷན་ལྷན་བསྟིམ་པར་བསམ་ལ་ཧཱུཾ་འདྲེན་དྲག་ཏུ་བྱའོ། །དེ་ནས་ལུས་ཀུན་སྤྲུག་ཅིང་གླིང་
བཞི་འཕང་བ་དང༌། བསྐྱང་བསྐུམ་བྱའོ། །ཡང་དང་པོར་དལ་བུ་དང་མཐར་དྲག་ཏུ་སྲུབ་པས་
རང་དང་རིག་མ་གཉིས་ཀའི་ཐིག་ལེ་ཞུ་བར་བྱས། དེ་ནས་མི་སྲུབས་པར་རྒྱ་མཚོ་སྦྱར་ཏེ་ཧུཾ་
འདྲེན་དྲག་པོ་བྱས་ལ། རིག་མ་འོད་དུ་ཞུ་ནས་རྡོ་རྗེར་དྲངས་ཏེ་རང་ལུས་ཁྱབ་པས་མདངས་
རྒྱས་པར་མོས། དེས་ཤེས་རབ་མའི་པདྨར་གྲང་སིང་བ་དང༌། ཁྱུར་ཁྱུར་དྲངས་པའི་ཉམས་
དང༌། བདེ་བ་ཟུག་ངུར་དང་བཅས་པ་མི་བཟོད་པ་བྱུང་ན་འདྲེན་ཐུབ་པའི་རྟགས་སོ། །སུ་ཁའི་
ལུགས་སོ། །ཡང་ཤ་ཆེན་དུག་ཕྱུང་བ་བ་དམར་པོའི་འོ་མར་བཅོས། ཤིང་ཀུན་དང་ཁ་རུ་ཚྭ་
བཏབ་པ་བརྟེན། མཆིལ་པའི་ཤ་དང༌། ད་བྱིད་ཀྱང་བཏང༌། ལུག་ཤ་དང་ཆང་འཇམ་པོ་དུམ་
རེ་བརྟེན། ར་མོ་ཤའི་ཁ་ད་དང༌། ཞོ་མ་དཀྲོགས་པ་གཟའ་བས་བདག་དང་རིག་མ་གཉིས་ཀ་
ལུས་ཟུང་བསྐྱེད། རྩ་རིང་ན་རྐང་པ་བརྐྱངས། ཐུང་ན་རིག་མའི་རྐང་པ་ཕྲག་ལ་བཀལ་ནས་
སྤྱོད། པདྨའི་ནང་གི་གཡས་གཡོན་སྟེང་འོག་ཏུ་རྡོ་རྗེས་དྲུད་བྲུད་པས་རྩ་རྩལ། རིག་མས་
20-1-371


ཀྱང་འོག་རླུང་བསྐུམ་སྟེང་རླུང་མནོན་པས་རྩ་གཏེར་བར་བྱ། ཐིག་ལེ་འབྱུང་བ་སྙམས་བྱེད་
ན་འཕོངས་བསྒྲད་མིག་གྱེན་དུ་བལྟའི། ཤེས་རབ་མས་སྐེད་པ་ཉག་བཏང་ལ། རླུང་གསང་
གནས་སུ་ཕུལ་ནས་ཟིན་ཡོངས་ལ་དེ་ནས་དྲངས། ཡང་བདེ་བ་ཡལ་དུ་མི་འཇུག་པར་བསྐྱོད་
ཅིང་འབེབས། །བདེ་བས་སྤྲིད་ནས་འཕོངས་འབྱེད་མི་ཐུབ་ན་ལག་པས་དབྱེའོ། །གང་ག་
དྷའི་ལུགས་སོ། །ཕལ་ཆེར་དེ་དང་འདྲ་བ་ལ་མིག་གྱེན་དུ་གཏད། པུས་མོ་ལ་ལག་པ་བཀབ།
ཧཱུཾ་རང་གིས་མཐར་ཧིག་གི་འདྲེན་ཡུན་རིང་སྦྱངས་ནས། ལྕམ་པའི་རྐང་འཇམ་པོ་རྡོ་རྗེ་བུ་གར་
ཅུང་ཟད་འཇུག་ཅིང༌། མཐར་རྩ་བར་ལྷན་གྱིས་གཏོང༌། དེ་ནས་དེ་འདྲེན་པ་ལ་བསླབ། དེ་
ནས་མདུན་མནན་ཏེ་འཕོངས་འབྱེད་འཛུམ་གྱིས་དབྱུང་བ་ལ་བསླབ། དེ་ནས་དངོས་གཞི་ལ་
འཇུག །འཛིན་པ་ལ་སེམས་ཀྱི་ཐེམ་བུ་སྟེ། འཁྲུལ་འཁོར་གསུམ་པ་དང༌། རྟིང་པས་གནོན་པ་
ཁོ་ན་ཡིན་ནོ། །ཀུན་ཏུ་བཟང་མོའི་ལུགས་སོ། །དེ་ནས་ཐམས་ཅད་ལ་ཡང་རུས་སྦལ་འགྲོས་
ཀྱི་ཕབ། སོ་སོའི་མན་ངག་གིས་ཕྱག་རྒྱ་ལ་སྦྱོར་བཞིན་པའི་ངང་ནས། བཟུང་བཟློག་གང་
འགྲུབ་བྱ། དེ་ནས་འདྲེན་ལྔ་དང་འགྲེམས་དགུ་པོ་དེ་རྣམས་ཅི་རིགས་པར་བྱ། ཐམས་ཅད་ལ་
སེངྒེའི་རྣམ་རོལ་གང་མང་བྱས་ཏེ། བཟློག་པ་དང་ཁྱབ་པར་བྱའོ། །དེ་ནས་བུམ་པ་ཅན་གང་
མང་བསྒོམ་སྟེ་རླུང་དང་བསྲེའོ། །ཡེ་ཤེས་ཆེན་པོར་སྐྱེལ་བ་ནི་སྒྱུ་ལུས་སྦས་དོན་དང་འདྲའོ། །
མ་རྒྱུད་སྤྱིའི་རྫོགས་རིམ་མཁའ་འགྲོ་རྣམ་གསུམ་གྱི་གསང་ལམ་བཤད་ཟིན་ཏོ།། །།འདི་ལ་
གཞུང་ཤིང་ཡིག་རྙིང་ཁོ་ན་ལས་ཕྱིས་ཡི་གེ་གསར་པའི་བསྲེ་སླད་མེད་ཅིང༌། ཕྱིས་ཀྱི་ཡི་གེ་
འཁྲུལ་འཁོར་ཉི་ཤུ་པ་དང༌། ཉེར་གཅིག་ཟེར་བ་གཉིས་གདའ་ནའང༌། གཞན་ནས་རྐུས་ཤིང་
ཁུང་མེད་ལ། ཕྱི་མ་རྣམས་འདི་ཡང་ནི་གུའི་གསང་ཁྲིད་ཡིན་ཟེར་བ་ནི་ཆེས་འཁྲུལ་ལོ། །འདི་
ལ་ཡིག་རྙིང་ཡིག་ཆུང་དྲུག་ཡོད་དོ། །ཨྠི། ཞེས་པ་འདིའང་ལྕགས་ཟོམ་ཆོས་རྗེ། རིག་འཛིན་
མཁའ་སྤྱོད་དབང་པོའི་ཉམས་ལེན་དུ་མཁོ་བར་བསམ་ནས། ཏཱ་ར་ནཱ་ཐས་སྨྲས་པའོ། །
20-1-372


20-1-373


༄༅། །ལམ་ཁྱེར་རྣམ་གསུམ་གཅིག་ཏུ་དྲིལ་བ་བཞུགས།
༄༅། །བླ་མ་དང་ཡི་དམ་གྱིས་དགེ་བར་མཛོད་ཅིག །ལམ་ཁྱེར་རྣམ་གསུམ་གཅིག་
ཏུ་དྲིལ་ནས་ཉམས་སུ་ལེན་པའི་ཚུལ་ནི། སྔོན་འགྲོ་དང་རྗེས་ཆོས་དྲུག་གི་སྒྱུ་ལུས་ལྟར་བྱ།
དངོས་གཞི་རང་ཡི་དམ་བདེ་མཆོག་སྤྱི་བོར་བླ་མ་ཡིད་དམ་དབྱེར་མེད་ཀྱི་བསྐུར་མོས་ཤིང་
རྣམ་པ་བླ་མ་གསལ་བཏབ་ནས། མོས་གུས་དྲག་པོས་ཡང་གསོལ་འདེབས་བྱ། ཡང་ན་རྣམ་
པ་བླ་མས་དབུ་བརྒྱན་པའི་ཡི་དམ་དུ་སྒོམ་ཡང་རུང་ངོ༌། །དེ་ནས་དངོས་དང་དྲན་ཡུལ་དུ་
བྱུང་བའི་རང་གཞན་གྱི་སྒྲ་ཟིན་མ་ཟིན་ཐམས་ཅད་ལ་བླ་མ་ཡིད་དམ་དབྱེར་མེད་ཀྱི་གསུང་
སྔགས་སུ་མོས། སེམས་ཀྱི་འཆར་སྒོ་ཅི་བྱུང་ཡང་བླ་མ་ཡིད་དམ་དབྱེར་མེད་ཀྱི་ཐུགས་སུ་
མོས་ཤིང༌། སྣང་བ་ཐམས་ཅད་སེམས་དང༌། སེམས་སྐྱེ་འགག་གནས་གསུམ་གདོད་མ་ནས་
སྟོང་པའི་རང་ངོ་ལ་ཆེར་བལྟ་ཞིང་ཐག་ཆོད་བྱ། དེ་ཀའི་ངང་ལ་དུག་ལྔ་དང་ཐ་མལ་རྣམ་རྟོག་
ཅི་བྱུང་རུང༌། དེ་རང་གི་ངོ་བོ་ལ་ངོ་ཤེས་ངང་བསྐྱངས་པས། མ་སྤངས་རང་དག་ཅེས་བྱ། ཐུན་
མཚམས་ཀུན་ལ་བཟླ། སྣང་བ་སྐུ། གྲགས་པ་གསུང་རྟེན་རྟོགས་ཐུགས་སུ་ཐག་ཆོད་པ་དང༌།
མོས་གུས་ལྷ་སྐུ། སྣང་བ་རང་སེམས། སེམས་སྒྱུ་མ་ལྟར་རང་བཞིན་མེད་པའམ། དྲན་འདུན་
རྩ་བྲལ་ལམ། མིན་ནའང་ངོ་ཤེས་དང་མ་བྲལ་བའི་ངང་ནས་བྱ། བླ་མས་རང་གནས་ལུགས་
ཟབ་མོ་ལ་དཀྲི་བར་མཛད་པའི་བཀའ་དྲིན་དྲན་པས་བླ་མ་ཡི་དམ་རོ་གཅིག་པ་ལ་མཆོད་
བསྟོད་ཡན་ལག་བདུན་པ་བྱ་ཞིང་ཚོགས་བསོགས། འདི་ལ་མྱོང་བ་ཅི་རིགས་བྱུང་ནས། འགྲོ་
དྲུག་སྒྱུ་མར་འཆར་བྱེད་ཀྱི་སྒྱུ་ལུས། རྨི་ལམ་བཟུངས་སྦྱངས་སྤེལ་བསྒྱུར་བ་རྣམས་དང་སྦྲེལ་
ནས་ཉམས་སུ་ལེན་པ་འདི་ནི་སྙིང་པོའོ། །བླ་མ་ལམ་འཁྱེར་ལ་སྣང་བ་ལ་བརྟེན་ནས་བླ་མ་
20-1-374


ལམ་དུ་འཁྱེར་བ་དང༌། དེ་བཞིན་དུ་བླ་མ་ལ་མོས་གུས། དེ་ལ་བཀའ་དྲིན། དེ་ལ་ཚོགས་
བསོགས། དེ་ལ་རང་ཤར་ལམ་དུ་འཁྱེར། ཡི་དམ་ལམ་འཁྱེར་ལ། སྣང་བ་ཡིད་དམ། དག་
སྣང་ཚོགས་བསོགས། རང་ཤར་ཟུང་འཇུག་གི་ལྷ་སྐུ་དང༌། སྒྱུ་མ་ལམ་འཁྱེར་ལ། སྣང་བ་
རང་སེམས་སྒྱུ་མ་རྨི་ལམ། འོད་གསལ་རང་ཤར་རྣམས་ལམ་དུ་འཁྱེར་བ་སྟེ་དེ་ལྟར་ཤེས་
པར་བྱའོ། །དེ་ལྟར་ན་སྣང་བ་བླ་མ་ཡི་དམ་དུ་ཤེས། དེ་རང་སེམས་སུ་ཤེས། དེ་སྒྱུ་མ་ལྟ་བུ་
གསལ་ཤིང་བདེ་བ་རང་ཤར་རོ།། །།ཞེས་པ་འདི་ཡང་ཀུན་དགའ་སྙིང་པོ་ཏཱ་ར་ནཱ་ཐས་སྦྱར་
བའོ། །མངྒ་ལཾ།། །།
20-1-375


༄༅། །གཅོད་ཡུལ་ཟབ་མོའི་ཁྲིད་ཡིག་གནད་དོན་
སྙིང་པོ་ཞེས་བྱ་བ་བཞུགས།
༄༅། །ན་མོ་གུ་རུ། དངོས་གྲུབ་འབྱུང་གནས་བླ་མ་རིན་པོ་ཆེ། །སྐྱབས་གནས་ཀུན་
འདུས་འགྲོ་མགོན་རིན་པོ་ཆེ། །གནས་ལུགས་དོན་སྟོན་ཆོས་རྗེ་རིན་པོ་ཆེ། །བདུད་བཞི་
འཇོམས་མཛད་དཔའ་བོས་བྱིན་གྱིས་རློབས། །འདིར་གཅོད་ཟབ་མོ་ཉམས་སུ་ལེན་པའི་
གང་ཟག་གིས། །ནམ་འཆི་ཆ་མེད་དྲན་པས་ཚེ་འདི་བློ་ཡིས་ཐོང༌། །ཆོས་མིན་བསམ་རྒྱུ་མེད་
ཅིང་སྙིང་རུས་ཞེ་བཅད་ཆེ། །བླ་མས་ཅི་གསུང་སྒྲུབ་ཅིང་གཉན་ཁྲོད་རི་ལ་ཚུགས། །རྐྱེན་ངན་
ཀློད་ལ་བསྲེ་ཞིང་གང་བྱུང་རོ་སྙོམས་པ། །ཞེས་གསུངས་པ་ལྟར་དགོས་པ་ལགས། དེ་ནས་
ཉམས་སུ་བླང་པའི་ཆོས་ནི་འདི་ཡིན་ཏེ། བརྒྱུད་པ་ལ་མོས་གུས་ཚུགས། བྱིན་རླབས་འཕོ་
བའི་དབང་བསྐུར་ཐོབ་ནས། འཁྲིད་ཀྱི་ངོ་བོ་ལ་སྔོན་འགྲོ། དངོས་གཞི་རྗེས་གསུམ་མོ། །
དང་པོ་ལ་སྐྱབས་འགྲོ་སེམས་བསྐྱེད་མཎྜལ་བླ་མའི་རྣལ་འབྱོར་དང་བཞི་ལས། དང་པོ་
རང་གི་མདུན་གྱི་ནམ་མཁར་སེང་ཁྲི་པདྨ་ཉི་ཟླའི་གདན་ལ། དབུས་སུ་རྩ་བའི་བླ་མ། མདུན་
དུ་ཡི་དམ་དང་སངས་རྒྱས། གཡས་སུ་དམ་ཆོས་ཀྱི་ངོ་བོ་གླེགས་བམ། གཡོན་དུ་ཐེག་པ་
ཆེ་ཆུང་གི་དགེ་འདུན། རྒྱབ་ཏུ་མཁའ་འགྲོ་ཆོས་སྐྱོང་རྣམས་གསལ་བཏབ་ལ། བདག་དང་
མཁའ་མཉམ་སེམས་ཅན་ཐམས་ཅད་ཀྱི་སྐྱིད་སྡུག་ལེགས་ཉེས་ཁྱེད་རང་ཤེས་བསམ་པས།
བདག་སོགས་འགྲོ་བ་ནམ་མཁའ་དང་མཉམ་པའི་སེམས་ཐམས་ཅད་སངས་རྒྱས་གཙོ་ལ་
སྐྱབས་སུ་མཆི། དམ་པའི་ཆོས་ལ་སྐྱབས་སུ་མཆི། དགེ་འདུན་རྣམས་ལ་སྐྱབས་སུ་མཆི།
ཀུན་འདུས་བླ་མ་ལ་སྐྱབས་སུ་མཆི། ཞེས་པ་དང༌། སངས་རྒྱས་ཆོས་དང་དགེ་འདུན་གསུམ་
20-1-376


ལ་སྐྱབས་སུ་མཆི། བླ་མ་ཡི་དམ་མཁའ་འགྲོ་གསུམ་ལ་སྐྱབས་སུ་མཆི། རང་སེམས་སྟོང་པ་
ཆོས་སྐུ་གསུམ་ལ་སྐྱབས་སུ་མཆི། ཞེས་སྐྱབས་འགྲོ་ཅི་ནུས་སུ་བྱའོ། །མཐར་སྐྱབས་ཡུལ་
རྣམས་རང་ལ་ཐིམ།
གཉིས་པ་ནི། ནམ་མཁའ་དང་མཉམ་པའི་སེམས་ཅན་ཐམས་ཅད་ལ་བྱམས་སྙིང་རྗེ་
བྱང་ཆུབ་ཀྱི་སེམས་དུང་བའི་ངང་ནས། མ་རྒན་སེམས་ཅན་འདི་རྣམས་བདེ་བ་དང་བདེ་བའི་
རྒྱུ་མཐའ་དག་དང་ལྡན་པར་བྱའོ། །སྡུག་བསྔལ་དང་སྡུག་བསྔལ་གྱི་རྒྱུ་མཐའ་དག་དང་བྲལ་
བར་བྱའོ། །མྱུར་དུ་བླ་ན་མེད་པའི་བྱང་ཆུབ་རེ་ཐོབ་པར་བྱའོ། །ཞེས་ངག་ནས་བརྗོད་ཅིང་
ཡིད་ལ་བསམ་མོ། །
གསུམ་པ་ནི། རང་གི་མདུན་དུ་བླ་མ་དང་མ་ཅིག་ལབ་སྒྲོན་དབྱེར་མེད་པ། མདུན་དུ་ཡི་
དམ་སོགས་སྐྱབས་ཡུལ་བཞིན་གསལ་བཏབ། འཇིག་རྟེན་གྱི་ཁམས་ཐམས་ཅད་མཆོད་རྫས་
འདོད་ཡོན་ལོངས་སྤྱོད་ཐམས་ཅད་ཀྱིས་ཕྱུར་བུར་བཀང་སྟེ། རང་གི་ལུས་ངག་ཡིད་གསུམ་
དུས་གསུམ་དགེ་ཚོགས་དང་བཅས་པ་བླ་མ་དཀོན་མཆོག་ལ་ཕུལ་བར་མོས་ལ། མཎྜལ་ཚོམ་
བུ་བདུན་མའམ་གང་ཡང་རུང་བ་འབུལ་ཞིང༌། མགོ་ཞབས་སུ་མཎྜལ་རྒྱས་པ་རེ་ཡང་འབུལ་
ཞིང༌། མཎྜལ་རེ་རེའི་མཐར་བདག་གི་ལུས་དང་ལོངས་སྤྱོད་དང༌། །དུས་གསུམ་བསགས་
པའི་དགེ་བ་ཀུན། །བླ་མ་དཀོན་མཆོག་ཁྱེད་ལ་འབུལ། །ཐུགས་རྗེས་དགོངས་ལ་བཞེས་སུ་
གསོལ། །ཞེས་པ་ལན་རེ་རེ་བརྗོད།
བཞི་པ་ནི། རང་གི་སྤྱི་བོར་བླ་མ་དང་མ་ཅིག་དབྱེར་མེད་པ་བསྒོམ་ལ། སྙིང་ཐག་པ་ནས་
མོས་གུས་དྲག་པོ་བསྐྱེད་ཅིང༌། འདི་ཉིད་ཀྱི་བརྒྱུད་འདེབས་ཀྱང་སྤྲོ་ན་བྱ། ཁྱད་པར་བདག་
སོགས་སེམས་ཅན་ཐམས་ཅད་བླ་མ་ལ་མོས་འདུན་དྲག་པོའི་གསོལ་བ་འདེབས་པར་བསམ་
ནས། མཚན་ལྡན་གྱི་བླ་མ་རིན་པོ་ཆེ། །བདག་ལ་བྱིན་གྱིས་བརླབ་ཏུ་གསོལ། །རེ་ས་གཞན་
20-1-377


ན་མེད་པས་ད་ལྟ་བྱིན་གྱིས་བརླབ་ཏུ་གསོལ། །བདག་འཛིན་བློ་ཡིས་ཐོངས་བར་བྱིན་གྱིས་
རློབས། །སྐྱེ་མེད་གཅིག་ཆོད་དུ་རྟོགས་པ་བྱིན་གྱི་རློབས། །བར་ཆད་དངོས་གྲུབ་ཏུ་ལོངས་
པར་བྱིན་གྱི་རློབས། །བདུད་ཚོགས་རང་སར་ཆོད་པར་བྱིན་གྱི་རློབས། །ཚེ་གཅིག་སངས་
རྒྱས་འགྲུབ་པར་གྱིས་རློབས། །ཞེས་གསོལ་བ་རྩེ་གཅིག་ཏུ་བཏབ། ཐུན་གྱི་མཇུག་ཏུ། བླ་
མ་འོད་དུ་ཞུ་ནས་རང་ལ་ཐིམ། བླ་མས་རྗེས་སུ་འཛིན་པར་སྨོན་ལམ་བཏབ་སྟེ་ཅུང་ཟད་ངལ་
བསོ། །རེ་ཞིག་དེ་དག་རེ་རེ་ལ་དམིགས་པ་འབྱོངས་འབྱོངས་སུ་བསྒོམ་ནས། སླར་ཡང་སྔ་དྲོ་
སྐྱབས་འགྲོ། ཉིན་གུང་སེམས་བསྐྱེད། དགོང་མོ་མཎྜལ། སྲོད་ལ་བླ་མའི་རྣལ་འབྱོར་རྣམས་
དྲག་ཏུ་བསྒོམ་པ་ཞག་བདུན་ནམ། ཟླ་བ་ཕྱེད་ལ་སོགས་པ་བསྐྱངས་པས། དེ་དག་ལ་མྱོང་བ་
ཅི་རིགས་པ་ཐོན་ཡོང་ཞིང༌། དངོས་གཞི་དང་མཐུན་པའི་ཉམས་རྟོགས་ཀྱང་ཐན་ཐུན་སྐྱེ་བ་
སྲིད། གང་ལྟར་ནའང་སྔར་སོ་སོར་བསྒོམ་པ་རྣམས་ལ་ཡང་ཞག་བདུན་རེ་ཙམ་བྱ་ཞིང་ཀུན་
དྲིལ་བས་སྔོན་འགྲོ་ལ་མ་མཐའ་ཡང༌། ཟླ་བ་ཕྱེད་གཉིས་ཙམ་རེ་བྱེད་པ་གལ་ཆེ།
གཉིས་པ་དངོས་གཞི་ལ། ཡུམ་དོན་ངོ་སྤྲོད་པ་དང༌། བདུད་བཞི་དབྱིངས་སུ་གཅོད་
པའོ། །དང་པོ་ལ་སེམས་འཛིན་གྱི་གདམས་ངག་དང༌། ངོ་སྤྲོད་གཉིས་སོ། །དང་པོ་ནི། ལུས་
རྣམ་སྣང་གི་ཆོས་བདུན་བཅས། ངག་རླུང་རང་སོར་བཞག། སེམས་དུས་གསུམ་གྱི་རྟོག་པའི་
སྤྲོས་པ་བཅད་ནས། སྔར་གྱི་རྣམ་རྟོག་འགགས། ཕྱི་མ་སྐྱེས་པ། ད་ལྟར་བའི་ཤེས་པ་སྐད་
ཅིག་མ་འདི་ལ་སོ་མ་ཁད་དེ་བཞག རྣམ་རྟོག་ཐོལ་ཐོལ་སྐྱེན་རྦད་རྦད་འཕྲོ་བཅད་ལ་སྔར་
ལུགས་བཞིན་བསྐྱངས། འོག་འགྱུ་རྒྱ་འབྱམས་སུ་འགྲོ་ན་སྐྱོན་ཆེ་བས་ཕྱིན་ཆད་འདི་ལྟ་བུ་
མ་བྱུང་བ་བྱེད་དགོས་སྙམ་པ་དང༌། ཞེ་བཅད་ཆེན་པོ་བྱས་ལ། ཡང་དྲན་པས་བཟུང་སྟེ་སྔར་
བཞིན་བསྒོམས་པས་དེ་ཇེ་ཉུང་དུ་འགྲོ།རེ་ཞིག་དེ་ཁ་མ་གཏོགས་ཐབས་གཞན་མི་བྱ། ཡུན་
རིང་དུ་བསྒོམས་ཀྱང་རྣམ་རྟོག་དྲག་ཏུ་འཁྲུག་པ་ཁོ་ན་བྱུང་ན། རང་གི་མདུན་དུ་གསེར་གྱི་རྡོ་
20-1-378


རྗེ་ནས་འབྲུ་ཙམ་ཞིག་གསལ་བཏབ་ལ་ཟན་ཁམ་གསུམ་ཟ་ཡུན་ཙམ་ཞིག་དེ་ལ་རིག་པ་དྲག་
ཏུ་གཏད་ཅིང་གཟིར། དེ་འཕྲལ་ལ་སྔར་བཞིན་མ་བཅོས་སོ་མ་བསྐྱང་། ཡང་རྡོ་རྗེ་ལ་སེམས་
གཏད། ཡང་སོ་མའི་ངང་བསྐྱངས། ཡང་རྡོ་རྗེ་ལ་སེམས་གཏད། ཚུལ་དེ་ལྟ་བུ་བཞུར་ལ་ལན་
ཉི་ཤུ་རྩ་གཅིག་ཙམ་བསྒོམ། ཉིན་རེ་རེ་བཞིན་དེ་ལྟར་བྱས་པས་རྣམ་རྟོག་ཤུགས་ཆད་དེ་སལ་
ཏིང་གིས་འགྲོ། གལ་ཏེ་དེས་མ་ཕན་ན་རྡོ་རྗེའི་ཚབས་སུ་བཅོམ་ལྡན་འདས་ཐུབ་པའི་དབང་
པོའི་སྐུ་ཆེ་ཆུང་ཚོན་གང་ཙམ་ཞིག་བསྒོམ། གཞན་སྔར་དང་འདྲ། དེས་ཀྱང་མ་ཕན་ན་བླ་མ་
དང་མ་ཅིག་དབྱེར་མེད་པ་ཞལ་ནས་ཕཊ་ཀྱི་སྒྲ་དྲག་པོ་ལྷང་ལྷང་སྒྲོགས་པ། སྐུ་ལུས་གནམ་
ལྕགས་འབར་བ་བཞིན་གང་ལའང་ཐོག་མེད་དུ་འགྲོ་བ་ཚོན་གང་བ་ཙམ་ཞིག་གང་ནས་བྱུང་
ཆ་མེད་པ་བྱོན་ཏེ། རང་གི་ལུས་འདི་ལ་ཡར་ཐལ་མར་ཐལ་ཕར་ཐལ་ཚུར་ཐལ་དུ་ཕུག་པ་ལ་
སེམས་དྲག་ཏུ་གཏད། དེ་འཕྲལ་མི་རྟོག་པའི་ངང་བསྐྱངས་པ་སོགས་གོང་བཞིན་བསྒོམ་པས་
རྣམ་རྟོག་གྱ་མ་གྱུ་དང་གཞན་ཡང་ཏིང་འཛིན་སྐྱེ་བ་ལ་བར་ཆད་ཐམས་ཅད་ངེས་པར་སེལ་བ་
ཡིན། དེ་ལྟར་ཐབས་དེ་རྣམས་དང་བཅས་པས་སྔར་བཞིན་མཉམ་པར་བཞག་པ་ན་སེམས་
གསལ་ཧྲིག་གེ་བ་དང་བཅས་སོང་བ་ཅི་འདོད་བྱས་པར་འབྱུང་ཞིང༌། བསམ་མནོ་སོགས་
དགོས་པ་རྣམས་ཀྱང་དྲན་ཐུབ་ཅིང༌། མི་འདོད་བཞིན་དུ་རྣམ་རྟོག་འདྲེ་བ་མ་ཡིན་པས། ཞི་
གནས་ཀྱང་ཀླུང་དུ་ཕེབས་པར་འགྱུར་རོ། །སྐབས་འདི་དག་ཏུ་ཤེས་པ་མི་གསལ་ཞིང་མུན་
མུན་པ་དང༌། ཐུན་མཚམས་སུ་རྨོངས་ཤིང་དྲན་པ་མི་གསལ་ན། བྱིང་བ་བསང་པའི་ནུས་པ་
ཡིན་པས་ཁང་སྟེངས་སམ། རི་རྩེའི་གཞན་ཡང་བསིལ་ཞིང་ཐོངས་དཀར་སར་ཕྱིན། མིག་
གྱེན་ལ་གཏད། རིག་པ་ཧུར་ཕྱུངས་ཏེ་བསྒོམ་ན་ངེས་པར་སེལ་བ་ཡིན།
གཉིས་པ་ངོ་སྤྲོད་པ་ནི། སྔར་གྱི་དེ་ཁའི་ངང་ལས་ཁ་ནང་ལོག་གི་ཤེས་པས་སེམས་
ཁོ་རང་གི་ངོ་བོ་ལ་ཆེར་རེ་བལྟས། ཕྱི་སྣང་བ་སྣ་ཚོགས་དང་བཅས་པ་ལ་མ་ཡེངས་ཙམ་དུ་
20-1-379


བཞག་པས། ཅི་ཡང་མ་ཡིན་ཞིང༌། ངོས་བཟུང་རྒྱུ་མེད་པ་དེ་ཁ་ཡང་ཡང་བསྒོམ། དེ་ལ་རང་
གི་ཉམས་མྱོང་སྐྱེ་ཚུལ་དང་བསྟུན་ནས་བླ་མས་ངོ་སྤྲོད་དགོས་པ་ཡིན། འོན་ཀྱང་ངོ་སྤྲོད་པའི་
དོན་ཉམས་སུ་ལེན་ཚུལ་ནི། སེམས་འདི་ཉིད་གནས་པའི་དུས་ན་ངོས་བཟུང་གཅིག་ཀྱང་
མེད་ཅིང་རང་སྣང་གསལ་གསལ་བ་ཞེས་ཀྱང་འཆར་འཆར་དུ་བཏུབ་པ། འགྱུ་བའི་དུས་ན་
འགྱུ་བ་ཉིད་ངོ་བོ་ཡུལ་ཡུལ་བའི་འགྱུ་སྟོངས་འགྱུ་བའི་སྣང་བ་མ་འགགས་ཀྱང་ངོས་བཟུང་
གཅིག་ཀྱང་མེད། ཡུལ་གྱི་སྣང་བ་སྣ་ཚོགས་སུ་ཤར་བའང༌། སྣང་བ་འགགས་མེད་ལམ་ལམ་
འཆར་བཞིན་པའི་དུས་ནས་ངོས་བཟུང་དུ་མེད་པ་དེ་ལྟ་ཡུལ་སྣང་དང༌། རྣམ་རྟོག་དང་སེམས་
གནས་པའི་ངོ་བོ་གསུམ་ཐ་དད་དུ་མ་གྲུབ་སྟེ་དབྱེ་བ་མེད། གཅིག་ཏུ་ཡང་མ་གྲུབ་སྟེ། ཐམས་
ཅད་ཡུལ་སྟོང༌། དེ་ཁ་ཡུམ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་པའི་དོན་ཡིན། དུས་གསུམ་
རྒྱལ་བའི་དགོངས་པ་ཡིན། སྟོང་པ་ཉིད་དང༌། སྤྲོས་བྲལ་དང༌། བརྗོད་བྲལ་དང༌། དོན་དམ་
ལ་སོགས་པའི་ཐ་སྙད་ཇི་སྙེད་པ་ཞིག་བཏག་མོད། དོན་རང་སེམས་སྐད་ཅིག་མ་གཅིག་བུ་
དེ་ཡིན་པས་དེ་ཀ་ལ་རང་ངོ་ཤེས་ཙམ་གྱིས་སྒོ་ནས། གནས་སམ་འགྱུ་བ་གང་བྱུང་དེ་ལ་བཟོ་
བཅོས་མེད་པར་མཉམ་པར་འཇོག །
གཉིས་པ་བདུད་བཞི་དབྱིངས་སུ་བཅད་པ་ལ་བཞི་ལས། དང་པོ་ཐོག་བཅས་ཀྱི་བདུད་
དབྱིངས་སུ་བཅད་པ་ནི། དགྲ་གཉེན་སོགས་ཆགས་སྡང་གི་ཡུལ་གཟུགས་སྒྲ་དྲི་རོ་རེག་བྱ་
རྣམས་ལ་བརྟེན་ནས། རྣམ་རྟོག་འཛིན་པ་དང་བཅས་པ་སྐྱེས་ཆེད་ཐོག་བཅས་ཀྱི་བདུད་ཅེས་
བྱ་བ་ཡིན། ཐོག་བཅས་ཀྱི་གོ་དོན་གཟུགས་སོགས་ཕྱིའི་དངོས་པོ་ལ་བརྟེན་པའི་དོན་ཡིན།
དེ་གཅོད་པར་བྱེད་པ་ནི། དཔེར་ན་དགྲ་ལྟ་བུ་ཞིག་དྲན་ཏེ་ཞེ་སྡང་གི་རྣམ་རྟོག་ཚིག་པ་ཟ་བ་
རིམ་གྱིས་བྱུང་བ་ན། དེའི་དབང་དུ་མ་ཤོར་བ་སྐད་ཅིག་དེ་ཉིད་ལ་ཕཊ་ཅེས་དྲག་ཏུ་བརྗོད།
རྣམ་རྟོག་དེ་ལ་སྐྱོན་ཡོན་གང་དུ་ཡང་མི་བལྟ་བར་འཕྲོ་རྦད་ཀྱིས་བཅད་ནས་སྔར་གྱི་ཡུམ་དོན་
20-1-380


གྱི་དབྱིངས་དེར་ཆ་མེར་བཞག །དེ་བཞིན་དུ་གཉེན་དང་ནོར་རྫས་སོགས་ལ་ཆགས་སེམས་
དང༌། གཟུགས་སོགས་ཡིད་དུ་འོང་བ་ལ་ཆགས། མི་འོང་བ་ལ་སྡང་ཞིང་སྐྱུག་ལོག །འགའ་
ཞིག་ལ་འཇིགས། འགའ་ཞིག་ལ་སྐྱོ། བར་མ་རྣམས་ལ་ཡང་ཆགས་སྡང་སོགས་ཀྱི་མཐོ་
དམན་མེད་ཀྱང༌། དེར་འཛིན་གྱི་རྣམ་རྟོག་སྐྱེ་ཚད་ཐམས་ཅད་ལ་སྔར་བཞིན་སྦྱངས། དེ་ཡང་
རྣམ་རྟོག་ལམ་གྱིས་བྱུང་བ་ལྷོངས། དེའི་དབང་དུ་ཤོར་ན་བདུད་ཀྱི་ཁྱེར། དེ་ཉིད་དུ་ཕཊ་
བརྗོད་ནས་འཕྲོ་གཅོད་པ་ནི་གཅོད། དེ་རྗེས་སུ་སྔར་གྱི་བསྒོམ་ལ་བོགས་ཐོན་པ་ནི་ཚར་ཚད་
ཆོད་ཚད་ཡིན། འདི་འོག་མ་རྣམས་ལ་ཡང་རིགས་འགྲེའོ། །གཉིས་པ་ཐོག་མེད་ཀྱི་བདུད་
གཅོད་པ་ནི། ཐོག་མེད་ཀྱི་བདུད་ཀྱི་གོ་དོན། ཕྱི་རོལ་གྱི་རྐྱེན་ལ་མ་རག་པར་རྐྱེན་མེད་ཀྱང་
དགའ་བའམ། མི་དགའ་བའམ། སྤྲོ་སྣང་ངམ། སྐྱོ་བའམ། འཇིགས་པ་ལ་སོགས་པའི་མཐོ་
དམན་གྱི་རྣམ་རྟོག་སྐྱེ་བ་རྣམས་ཡིན་ཏེ། དེ་ཡང་ལམ་གྱིས་ཤར་བ་ན་ཕཊ་ཀྱིས་འཕྲོ་བཅད་
ལ་དབྱིངས་སུ་བཞག་གོ །
གསུམ་པ་དགའ་བྲོད་ཀྱི་བདུད་གཅོད་པ་ནི། བླ་མ་དང་ཆོས་བརྒྱུད་བཟང་བ་དང༌། རང་
ལ་དགེ་སྦྱོར་འཕེལ་བའམ། མཐུན་རྐྱེན་འཛོམས་པ་སོགས་ཀྱི་བཟང་འཛིན་དང༌། ང་རྒྱལ་ལ་
བརྟེན་ནས་དགའ་བྲོད་སྐྱིད་སྣང་སྐྱེས་ན་དགའ་བྲོད་ཀྱི་བདུད་ཡིན་ཏེ། གོང་བཞིན་དབྱིངས་
སུ་གཅོད་དོ། །
བཞི་པ་སྙེམས་བྱེད་ཀྱི་བདུད་གཅོད་པ་ནི། རྣམ་རྟོག་དང་འཛིན་པ་ཅི་བྱུང་ཐམས་ཅད་
སྙེམས་བྱེད་ཀྱི་བདུད་ཡིན། གང་ཤར་ཐམས་ཅད་གོང་བཞིན་ཕཊ་ཀྱིས་དབྱིངས་སུ་བསྐྱལ་
བས་ཆོད་པར་འགྱུར་རོ། །འདི་ལ་གོང་མ་གསུམ་ཆར་འདུས། འདི་ཡན་ཆད་ལ་རང་སྟོབས་
ཀྱི་ཉམས་ལེན་རྐང་ཚུགས་པའི་མྱོང་པ་མེད་པར་གཉན་ཁྲོད་འགྲིམས་པ་སྟོང་ཟོབ་ཡིན།
སྒོམ་གྱི་རྐང་འདི་ཡན་ཆད་ལ་ཚུགས་དགོས། གཉན་ཁྲོད་བྱེད་པ་བོགས་འདོན་དག་འགྲོ་
20-1-381


བའི་དོན་ཡིན་པས་དེ་བཞིན་གོ་དགོས་སོ། །
གསུམ་པ་རྗེས་ཉམས་སྐྱོང་བ་ལ་དོན་གསུམ་སྟེ། ཞི་གཅོད། དྲག་གཅོད། ཞི་དྲག་ཕྱེད་
མའི་གཅོད་དོ། །དེ་ལ་དང་པོ་ནི། རང་གི་གནས་ཁང་དུ་སེམས་ཅན་ཐམས་ཅད་ལ་བྱམས་
སྙིང་རྗེ་ཐུན་བཞིར་དྲག་ཏུ་བསྒོམ་ཞིང༌། ཐུན་བཞི་ཀར་དཀར་འབྱེད་ཚར་རེ་བྱེད་པ་གལ་ཆེ།
དེ་ཡང་རང་གི་མདུན་དུ་མི་མགོའི་སྒྱེད་བུ་གསུམ་བྱུང༌། རང་སེམས་རྡོ་རྗེའི་ཕག་མོའི་རྣམ་
པས་སྨིན་མཚམས་ནས་ཕྱིར་ཐོན། ཐོད་པ་བྲེག་སྟེ་སྒྱེད་པུའི་སྟེང་དུ་བཀལ། རང་ལུས་ལྷག་
མ་རྣམས་དུམ་བུར་གཏུབས་ཏེ་དེར་བླུག རྒྱ་ཁྱོན་ནམ་མཁའི་མཐའ་དང་མཉམ་པར་གྱུར།
ༀ་ཨཱཿཧཱུཾ་ཞེས་བརྗོད་པའི་བདུད་རྩིའི་རྒྱ་མཚོར་སོང༌། རྩ་བརྒྱུད་ཀྱི་བླ་མ་ཡི་དམ་སངས་རྒྱས་
བྱང་སེམས་དཔའ་མོ་མཁའ་འགྲོ་ཆོས་སྐྱོང་སྲུང་མའི་ཚོགས་ཐམས་ཅད་སྤྱན་དྲངས། དེ་
ཐམས་ཅད་ལ་མཆོད་པས་དེ་རྣམས་ཚིམས་ཤིང་དགྱེས། འགྲོ་དྲུག་གི་སེམས་ཅན་ཐམས་
ཅད་ལ་སྦྱིན་པས་གནས་སྐབས་སུ་ཚིམ་ཞིང་མཐར་ཐུག་སྡིག་སྒྲིབ་ཐམས་ཅད་སྦྱངས། བདུད་
རྩིའི་ལྷག་མ་གཏོར་བས་མཆོད་པའི་ལྷ་མོ་དཔག་ཏུ་མེད་པར་བྱུང་ནས། མཆོད་པ་བསམ་
གྱིས་མི་ཁྱབ་པས་མཆོད་པར་བསམ། དེ་ཐམས་ཅད་རང་སེམས་སུ་ཤེས། དེའི་ངོ་བོ་ལ་ཆེར་
གྱིས་བལྟས་ལ་ཕཊ་ཅེས་བརྗོད་ལ་དབྱིངས་རིག་བསྲེ། ཡང་དེ་རྣམས་ལམ་ཏེ་དྲན་པར་བྱས་
ལ། སླར་ཡང་ཕཊ་ཅེས་དབྱིངས་རིག་བསྲེ། དེ་ལྟ་བུ་ལན་མང་དུ་བྱའོ། །དེ་ལྟར་བསྒོམ་ལ་
དམིགས་པ་ཅུང་ཟད་འབྱོངས་པ་ན། རང་ཉིད་གཉན་ཁྲོད་གང་དུ་འགྲོ་བ་དེར་འདུན་པ་བཏང་
ལ། སྤྱིར་སེམས་ཅན་ཐམས་ཅད་དང་བྱེ་བྲག་ཏུ་གཉན་ཁྲོད་དེའི་གཞི་བདག་དང་འབྱུང་པོ་
འདྲེ་གདོན་སོགས་ཐམས་ཅད་ལ་བྱམས་སྙིང་རྗེ་དྲག་ཏུ་བསྒོམ་ཞིང༌། སྔར་གྱི་དཀར་འགྱེད་
ཀྱི་དམིགས་པ་དེ་ཁ་ཡང་ཡང་བསྒོམ་པ་གཉིས་ཞག་གཉིས་གསུམ་བྱས་ལ། ལམ་དུ་འགྲོ་ཚེ་
ཡང་བྱམས་སྙིང་རྗེ་དང་དབྱིངས་རིག་བསྲེ་བ་སྤེལ་མ་དེ་ཀ་བསྒོམ། གནས་དེར་སླེབ་ནས་ས་
20-1-382


གནད་ཆེ་བ་ཞིག་བཙལ་ལ་བསྡད། དེར་ཐོག་མར་གཞི་བདག་དང་འབྱུང་པོ་སོགས་ལ་སིལ་
གཏོར་དང༌། མཁའ་འགྲོ་སྤྱི་གཏོར། གཞི་བདག་གཏོར། བགེགས་གཏོར་སོགས་ཤེས་ཚད་
གཏང༌། དེ་དག་ཏུ་ཡང་བྱམས་སྙིང་རྗེ་དྲག་ཏུ་བསྒོམ་པ་གལ་ཆེ། དེ་ནས་སྐྱབས་འགྲོ་སོགས་
སྔོན་འགྲོ་རྣམ་བཞི་དྲག་ལ་འཇུར་བ་ཡུན་རིང་བ་བྱ། དེའི་རྗེས་སུ་སྔར་བཞིན་དཀར་འགྱེད་
ཀྱི་དམིགས་པ་དེ་ལན་མང་དུ་བསྒོམ། སླར་ཡང་སྤྱིར་འགྲོ་དྲུག་གི་སེམས་ཅན། དགོས་
གཉན་ཁྲོད་འདིའི་འདྲེ་གདོན་ལ་གཙོ་བོར་དམིགས་ནས་བྱམས་སྙིང་རྗེ་དྲག་ཏུ་བསྒོམ། ཡུལ་
ཕྱོགས་དེ་དང་འདྲེ་གདོན་སོགས་སེམས་ཅན་དུ་སྣང་བ་ལམ་ལམ་པ་དེའི་སྟེང་དུ་ཤེས་པ་ཆེར་
གྱིས་གཏད་ལ་ཕཊ་ཅེས་དབྱིངས་རིག་བསྲེས་ལ་འཛིན་མེད་དུ་བཞག །ཡང་སྙིང་རྗེ་བསྒོམ།
ཡང་དབྱིངས་རིག་བསྲེ་བ་སོགས་དེ་ཁོ་ན་བསྒོམ། ལྟས་དང་ཆོ་འཕྲུལ་ཅི་བྱུང་ན་ཡང་དབྱིངས་
རིག་བསྲེ་བ་དང་སྙིང་རྗེ་བསྒོམ་པ་གཉིས་པོ་རང་ལ་བསྒྲིམ། ཆོ་འཕྲུལ་དྲག་པོ་བྱུང་ཡང་རུང༌།
མ་བྱུང་ཡང་རུང༌། མཐར་གནས་བག་ཆགས་ཤིང་དགེ་སྦྱོར་འཕེལ་བའི་ཚེ། ཚར་ཚད་ཆོད་
ཚད་འགྲིགས་པ་ཡིན་པས། དགེ་སྦྱོར་བོགས་ཐོན་པའི་གཏང་རག་ཏུ་དམིགས་པའི་སྒོ་ནས་
དཀར་འགྱེད་ལན་མང་དུ་བཏང་ཞིང༌། ཡི་དམ་མཁའ་འགྲོ་ལ་གཏོར་བསྔོ་དང་གཞི་བདག་
རྣམས་ལ་གཏོར་མ་རྒྱ་ཆེར་བྱིན། སྨོན་ལམ་ཅི་ཤེས་འདོན། ལམ་དུ་ཡང་སྔར་བཞིན་བསྒོམ་
ལ། རང་གནས་སུ་སླེབ་པ་ན་དཀོན་མཆོག་ལ་གཏང་རག་གི་མཆོད་གཏོར་ཅི་ཤེས་འབུལ་
ལོ། །
གཉིས་པ་ནི། ཐོག་མར་རང་གི་གནས་ཁང་དུ་ཐུན་གྱི་ཉམས་ལེན་ཞི་གཅོད་དང་འདྲ་
བ་ལས། ཐུན་གྱི་མཐར་དམར་འགྱེད་གྱི་དམིགས་པ་རེ་བྱ། དེ་ལ་དམར་འགྱེད་ནི། རང་
སེམས་སྔར་བཞིན་ཕྱིར་བཏོན་ལ། རང་ལུས་དེ་སྟོང་གསུམ་ཁྱབ་པའི་མི་རོ་ཚོ་བཅུད་སྣུམ་
བག་དང་ལྡན་པ་ཞིག་ཏུ་གྱུར། འཇིག་རྟེན་ཁམས་ཀྱི་ལྷ་སྲིན་སྡེ་བརྒྱད་ཐམས་ཅད་ལ་འབོད་
20-1-383


པའི་སྐད་བཏང་བས། ཐམས་ཅད་སྐད་ཅིག་ལ་འདུས་ཏེ་ས་དང་ནམ་མཁའ་ཐམས་ཅད་ཁྱབ་
པར་བསམ། དེ་ནས་རང་ལུས་དུམ་བུ་དུམ་བུར་གཏུབ། ཁྱེད་ཅག་ཅི་འདོད་ཟོ། གང་འདོད་
ལོངས། ཞེས་བརྗོད་པས་སོ་སོའི་བསམ་པ་དང་མཐུན་པར། ཤ་ཁྲག་རུས་པ་ནང་ཁྲོལ་ཡན་
ལག་སོགས་ཟོས་འཐུང་ཁྱེར་བས། གནས་སྐབས་ཚིམ་ཞིང༌། མཐར་ཐུག་ཉོན་མོངས་ཞི་བར་
བསམ། སླར་དེ་དག་ཐམས་ཅད་རང་གནས་སུ་སོང་བར་བསྒོམ། དེ་ནས་དེ་ཡང་རང་སེམས་
སུ་ཤེས་བཞིན་པས་ཕཊ་ཅེས་དབྱིངས་རིག་བསྲེ་ལ་བཞག །དེ་ལྟ་བུ་ཡང་ཡང་བསྒོམ། དེ་ལ་
ཅུང་ཟད་གོམས་ནས་གཉན་ཁྲོད་ཞིག་ལ་དམིགས་ཏེ་སླར་ཡང་ཞག་གཉིས་གསུམ་བསྒོམ།
ལམ་དུ་བསྒོམ་ཚུལ་ཞི་གཅོད་དང་འདྲ། གནས་དེར་སླེབ་ནས་ས་གནད་གཉན་ས་ཞིག་
བཙལ་ནས་བསྡད།
སྔོན་འགྲོའི་ཆོས་བཞི་པོ་སྤྱིར་སྔར་དང་འདྲ་བ་ལས་རྩ་བའི་བླ་མ་དང་མ་ཅིག་དབྱེར་མེད་
པ་མཁའ་འགྲོ་སྡེ་ལྔའི་ཚོགས་དང་བཅས་པ་སྒོམ་པ་དང༌། བླ་མའི་རྣལ་འབྱོར་གྱི་སྐབས་བླ་
མ་དང་མ་ཅིག་དབྱེར་མེད་པ་རང་ལ་ཐིམ་པས། རང་ཉིད་ཡེ་ཤེས་ཀྱི་མཁའ་འགྲོ་མར་གྱུར།
དེ་ཉིད་ཡེ་ཤེས་ཀྱི་མེ་དྲག་ཏུ་འབར་བ་དང་བཅས་ཏེ། དྲག་པོའི་སྟེང་སྟབས་སྣ་ཚོགས་ཀྱི་གར་
མཛད། གསུང་སྐད་དྲག་སྔགས་སྣ་ཚོགས་འབྲུག་ལྟར་སྒྲོགས་པར་བསམ་ལ། འདིའི་སྐབས་
མ་ཅིག་གི་ང་རྒྱལ་དང་བཅས་པ་ནི་དགོས་ཤིང༌། འདྲེ་གདོན་རྣམས་ལ་གནོད་སེམས་གཏན་
ནས་མེད་པར་སྒྱུ་མ་རྨི་ལམ་ལྟར་ཤེས་བཞིན་དུ་གང་སྣང་གི་ངོ་བོ་ལ་རང་སེམས་ཆེད་ཆེར་
བསྲེ་བཞིན་དུ་ཕཊ་ཅེས་དབྱིངས་རིག་བསྲེ་བ་ཁོ་ན་བྱ། འཚུབ་དང་ཆོ་འཕྲུལ་ལྡང་ན་ཕཊ་
དང་བཅས་པར་མཆོང་རྒྱུག་དང༌། དྲག་སྔགས་ཤེས་ཚད་འདོན། དེ་ནས་ཡང་སྔར་གྱི་ཤུལ་
དུ་འདུག་སྟེ། སྟོང་པ་ཉིད་ཁོ་ན་ལ་མཉམ་པར་བཞག །སེམས་ཀྱི་མཐོ་དམན་དང༌། འཆར་
སྒོ་རྣམ་རྟོག་ཅིས་བྱུང་ཀྱང་ཕཊ་ཅེས་དབྱིངས་རིགས་བསྲེ་བ་ཁོ་ན་བྱ། འཚུབ་དང་ཆོ་འཕྲུལ་
20-1-384


ལྷོངས་ཀྱི་ཕྱི་མཐོང་སྣང་དང༌། ནང་ན་ཚ། གསང་བ་ཉོན་མོངས་ལོག་ལྟ་སོགས་ཅི་སྐྱེས་ཀྱང་
འཁྲུལ་པར་ཤེས་པས་དབྱིངས་རིགས་བསྲེ་བ་ཁོ་ན་ལས་གཞན་གང་ཡང་མི་བྱེད་ཅིང་ཡུམ་
དོན་ཁོ་ན་ལ་མཉམ་པར་བཞག །ངག་གི་སྨྲ་བརྗོད་དང༌། ལུས་ཀྱིས་འགུལ་བསྐྱོད་སོགས་
གཏན་ནས་མི་བྱེད་པའི་དམ་འཆའ་དང་ཞེ་མནའ་ལག་ཏུ་ལོངས་པ་བྱ། རྣམ་པ་ཐམས་ཅད་
དུ་ལུས་སེམས་ལ་གཅེས་འཛིན་རྡུལ་ཙམ་མེད་པར་བྱ། ལྷ་འདྲེ་དྲག་པོས་དངོས་སུ་སྡོད་པ་སྤོ་
དགོས་བྱུང་ན་སྔར་གྱི་ཤུལ་དེར་སྡོད་པ་བྱ། དངོས་སུ་གང་དུ་བཞག་བྱུང་བ་དེར་སྡོད། དངོས་
གཞི་རང་གི་སྐབས་འདིར་གཞན་ལ་སྐྱབས་ཞུ་བར་མ་སོང་བ། བསྲུང་འཁོར་དུ་མ་སོང་བ།
འདྲེ་འདུལ་དུ་མ་སོང་བ། རེ་དོགས་སུ་མ་སོང་བ་གལ་ཆེ་ཆུང་ཅི་བྱུང་རུང་ཁྱད་པར་མེད་པའི་
བློ་བཏད་དང༌། དབྱིངས་རིགས་བསྲེ་བའི་མི་རྟོག་པ་དང་མ་བྲལ་བ་གལ་ཆེ། གོང་དུ་བཤད་
པ་ལྟར་གྱི་ཚད་ལྷོངས་འགྲིགས་པ་ན། དམར་འགྱེད་ཀྱི་དམིགས་པ་ཡང་འགའ་རེ་བྱ་ཞིང༌།
རྗེས་ཀྱི་བྱ་བ་ཞི་གཅོད་དང་འདྲ་བ་ལས། ཆབ་གཏོར་ཀླུ་གཏོར་སོགས་གཏོར་མ་ཅི་མང་
གཏོང་བ་དང༌། སྨོན་ལམ་མང་དུ་འདེབས་པ། ཆོས་བཤད་མདོ་འདོན་པ་སོགས་ལ་བརྩོན་
པ་གལ་ཆེ། དེ་ལྟར་བྱས་པས་ཁོས་གནས་ལུས་ལོངས་སྤྱོད་ཉམས་པ་གསོས། སྔར་ལས་ཀྱང་
ལྷག་པར་སོང་བསམ་པ་དང༌། ཆོས་དང་ལྡན་པར་སོང་སྙམ་པ་ཡང་ཡང་བསམ། རྗེས་ཀྱི་བྱ་
བ་ཡང་སྔར་དང་འདྲ།
གསུམ་པ་ནི། སྔོན་འགྲོ་སྔ་མ་དང་འདྲ་བ་ལས་དཀར་འགྱེད་དམར་འགྱེད་གཉིས་ཀ་
བསྒོམ། གཉན་ཁྲོད་དུ་སླེབ་མ་ཐག་ཏུ་ཞི་གཅོད་ལྟར་གཏོར་མ་རྒྱ་ཆེར་བཏང༌། སྔོན་འགྲོ་
ཆོས་བཞི་སྔ་ཐུན་གཉིས་ལ་ཞི་གཅོད་ལྟ་བུ་དང༌། ཕྱི་ཐུན་གཉིས་ལ་དྲག་གཅོད་ལྟར་བསྒོམས།
དངོས་གཞི་ཉམས་ལེན་ཡང་ཞི་གཅོད་ཀྱི་དམིགས་པ་ལན་མང་དུ་འགྲོ་བའི་མཐར་དྲག་
གཅོད་ལྟར་སྟོང་ཉིད་ཁོ་ན་བསྒོམ་པ་ཐུན་རེ་བཞིན་བྱ། ཡུན་རིང་པོར་ལྷོངས་མ་བྱུང་ན་དྲག་
20-1-385


གཅོད་ཀྱི་སྐབས་ལྟར་ལྷོངས་ཀློངས་པའི་སྤྲོས་བཅས་ཀྱི་གཅོད་ཚུལ་དེ་ལན་རེ་བྱས་པས་ངེས་
པར་ལྷོངས་ཡོང་བར་གདོན་མི་ཟ། རེ་ཞིག་དེ་མ་ཞི་བར་ལ་དྲག་གཅོད་བཞིན་དུ་སྟོང་ཉིད་ཁོ་
ན་བསྒོམས། ལྷ་འདྲེ་དངོས་སུ་རྒོལ་དུ་བྱུང་ན། སྙིང་དམར་ཙར་གྱིས་བཏོན་ནས་སྟེར་བའམ།
མགོ་དང་རྐང་ལག་རྦད་ཀྱིས་བཅད་ནས་སྟེར་བ་སོགས་ལུས་སེམས་མ་བྲལ་བཞིན་དུ་ལུས་
ལ་གཅེས་འཛིན་རྡུལ་ཙམ་མེད་པར་ཕུང་པོ་གཟན་དུ་བསྐྱུར་བ་འདི་གལ་ཆེ། ཚར་ལྷོངས་
འགྲིགས་པ་ན་རྗེས་ཀྱི་བྱ་བ་གོང་དང་འདྲའོ། །འདི་དག་ལ་ཉེ་བར་མཁོ་བའི་སྐབས་དོན་
ཅུང་ཟད་ཅིག་བརྗོད་ན། ཐོག་མར་གཉན་ཁྲོད་བཀྲ་ཤིས་པའི་དགེ་མཚན་ཅན། གཞི་བདག་
འཇམ་ཞིང་ཆོས་ལ་དཀར་བ་ཞིག་ཏུ་ཞི་གཅོད་ཉམས་སུ་ལེན་དུ་འགྲོ། ཐོག་མ་ནས་དྲག་
གཅོད་བྱེད་པ་དང༌། གནས་རྩུབ་པ་དང༌། ནག་ཕྱོགས་ཀྱི་འདྲེ་གདོན་གནས་པའི་སར་འགྲོ་
བ་ལམ་དུ་ལོང་དཀའ་ཞིང༌། དེ་ཉིད་ལམ་དུ་སོང་ཡང་ཆོས་བརྒྱུད་དང་མཆེད་གྲོགས་སོགས་
གང་ཅིར་རྟེན་འབྲེལ་མི་ལེགས་པ་ཡིན། དེ་ནས་ཐོག་མར་ཞི་གཅོད་ལ་བརྟེན་ནས་གཉན་
ཁྲོད་བཀྲ་ཤིས་པ་ལན་གཉིས་གསུམ་ཙམ་འགྲིམ་པའི་རྗེས་སུ་གཉན་ཁྲོད་འབྲིང་པོ་འགའ་
རེར་ཞི་དྲག་བསྒོམས། དེ་ནས་གཉན་ཁྲོད་རྩུབ་པ་འགའ་རེར་ཞི་གཅོད་བསྒོམ། དེ་ལྟར་
གཉན་ཁྲོད་མང་དུ་བསྒོམ་ཞིང་འབྱོངས་བ་ན། གཉན་ཁྲོད་རྩུབ་པ་འགའ་རེར་ཞི་དྲག་ཕྱེད་མ་
ཅི་རིགས་པ་བྱ། འདྲེ་གདོན་གདུག་པ་ཅན་གནས་སར་དྲག་གཅོད་འབའ་ཞིག་ཀྱང་སྐབས་
རེར་བྱེད་པ་ཡིན། སྤྱིར་རྒྱུན་གྱི་ཉམས་ལེན་ཞི་དྲག་ཕྱེད་མ་ཡིན། ལྷ་འདྲེ་འཇམ་ཞིང་ཆོས་ལ་
དཀར་བའི་སར་གཙོ་བོར་ཞི་གཅོད་རང་བྱ་ཞིང༌། ཞི་དྲག་ཕྱེད་མའང་སྐབས་དང་བསྟུན་ནས་
བྱར་རུང༌། དྲག་གཅོད་འབའ་ཞིག་བྱ་མི་ཉན། ཞི་དྲག་ཕྱེད་མའི་སྐབས་འདིར་གོང་དུ་བསྟན་
པ་དེ་ལ། སྤྲོས་བཅས་ཟེར་ཞིང༌། དེའི་མཇུག་ཏུ་ཞི་གཅོད་ལྟར་བྱམས་སྙིང་རྗེ་དང་དབྱིངས་
རིག་བསྲེ་བ་སྤེལ་མ་བསྒོམ་པ་ལ་སྤྲོས་མེད་ཟེར། དེའི་རྗེས་སུ་ཡུམ་དོན་ཁོ་ན་ལ་མཉམ་
20-1-386


པར་འཇོག་པ་ལ་ཤིན་ཏུ་སྤྲོས་མེད་ཀྱི་གཅོད་ཟེར་བ་ཡིན་པས། དེ་དག་ཀྱང་འབྲེལ་ཆགས་
སུ་བསྒོམས་པར་བྱའོ། །གཅོད་ལས་ལ་འགྲོ་ཁར་ཉོན་མོངས་ཆགས་སྡང་གི་སེམས་དྲག་པོ་
སྐྱེས་པ་དང༌། བླ་མའི་མོས་གུས་ལ་ལྡེམ་འགྱངས་ཤོར་བ་དང༌། མཆེད་གྲོགས་དང་གཅོད་
པ་དམ་སེལ་ཞུགས་པ་དང༌། ཐིག་ལེ་ཉམས་པ་སོགས་བྱུང་ན་རྟེན་འབྲེལ་འཆུག་ནས་གཉན་
ཁྲོད་འགྲིམ་པ་གནད་དུ་མི་འགྲོ། དེས་ན་གསོལ་འདེབས། སྙིང་རྗེ། བཤགས་པ། སྨོན་ལམ།
ཚོགས་མཆོད། གཏོར་མ། རྩ་རླུང་སྒོམ་པ་སོགས་རྟེན་འབྲེལ་ཁྱད་པར་ཅན་བསྒྲིགས་ནས་
འགྲོ་བ་གལ་ཆེ། ལྷོངས་ལ་གསུམ་ལས། ཕྱིའི་ལྷོངས་ནི་ས་གཡོ་བ་དང༌། རི་འུར་བ་དང༌།
འཇིགས་པའི་མཐོང་སྣང་དང༌། ཐོས་སྣང་འདི་མི་འབྱུང་བ་མེད་པ་འོངས། ནང་གི་ལྷོངས།
སྙིང་རླུང༌། ཀླད་གཟེར། རྒྱུ་མ་གཟེར་བ་སོགས་ན་ཚ་དྲག་པོ་གློ་བུར་དུ་འབྱུང༌། གསང་ལྷོངས་
སེམས་ལ་བྱུང་སྟེ། དགའ་སྣང་དང༌། སྡུག་སྣང་མི་ཚུགས་པ་ལྟ་བུ་དང༌། འཇིགས་སྐྲག་དང༌།
སྐྱོ་ངས་དང༌། འདོད་ཡོན་གྱི་རྣམ་རྟོག་དང༌། ཆོས་བརྒྱད་ཀྱི་འཆར་སྒོ་ལ་སོགས་པ་དང༌།
དུག་གསུམ་གྱི་རྣམ་རྟོག་ཆེར་འཕེལ་བ་སོགས་འབྱུང་ཞིང༌། ཆོས་དང་བླ་མ་ལ་ལོག་ལྟ་ལྡང༌།
དེ་འདྲའི་རིགས་ཐམས་ཅད་ལྷོངས་སུ་ཤེས་པར་བྱའོ། །ལུས་མི་བསྐྱོད། ཁ་དོན་གྱི་རིམ་པ་
དང༌། ཕཊ་སྔགས་བརྗོད་པ་མ་གཏོགས་ཐ་མལ་གྱི་ངག་མི་སྨྲ་བ་ལ་ཟུང་ཐུབ་པ་དང༌། སེམས་
འཆར་སྒོ་ཅི་བྱུང་ཐམས་ཅད་དེའི་དབང་དུ་མི་གཏོང་བ་དབྱིངས་རིགས་བསྲེ་བ་རང་གལ་ཆེ་
བའོ། །ཡང་སྐྱེ་བོ་མང་པོ་འདུ་སར་སྡོད་དགོས་སམ་འགྲིམས་དགོས་བྱུང་བའི་ཚེ། མི་སྔོན་
དུ་དགེ་སྦྱོར་བྱེད་པ་དེ་སྤྱིར་ཡང་དགག་བྱ་ཆེ་ཞིང༌། ཁྱད་པར་ཕཊ་སྔགས་དྲག་པོ་བརྗོད་པ་
སོགས་མི་མཛེས་པས། ཕཊ་ཅེས་ཤུབ་ཤུབ་པོ་བརྗོད་ཅིང༌། ཉམས་ལེན་གྱི་གདེངས་གཏན་
ནས་མ་ཤོར་བ་གནད་དུ་ཤེས་ཆེ། ཡང་ས་ཆ་ཡུལ་མི་འདྲེ་གདོན་སོགས་མཐོང་བའི་ཡུལ་དང་
སེམས་སྣང་དུ་ལམ་དེ་འཆར་བར་བྱས། མི་དང་མི་མ་ཡིན་པ་རྣམས་ལ་སྙིང་རྗེ་དུང་བ་ཞིག་
20-1-387


བསྒོམ་ལ། འདི་ཐམས་ཅད་དབང་དུ་བསྡུ་སྙམ་པའི་འདུན་པ་ཞིག་བཏང༌། དེ་ནས་ཕཊ་ཅེས་
བརྗོད་པས་ཐམས་ཅད་དབྱིངས་སུ་བསྐྱལ། འདི་ལྟ་བུའི་དམིགས་པ་ཐོ་རངས་ལ་སོགས་
པར་ལན་ཅི་མང་བསྟུད་ནས་བསྒོམ། དེའི་མཐར་སྨོན་ལམ་རྒྱ་ཆེར་བཏབ། གང་ལ་ཡང་མ་
ཞེན་པར་སྒྱུ་མ་ལྟ་བུར་སྒོམ་ནས་ས་ཕྱོགས་དེ་དག་གི་མི་དང་མི་མ་ཡིན་ཐམས་ཅད་དབང་དུ་
འདུ་ངེས་སོ། །དེས་མཚོན་དེ་འཕྲིན་ལས་རྣམ་བཞི་གང་བསྒྲུབ་ཀྱང་དམིགས་པའི་གནད་འདི་
རིགས་འགྲེ་བར་བྱའོ། །
གཞན་ཡང་མོས་གུས་གསོལ་འདེབས་དབྱིངས་སུ་བསྐྱལ་བས། བླ་མས་ཐུགས་རྗེས་
འཛིན་ཞིང་བྱིན་རླབས་འཇུག །སྙིང་རྗེ་དབྱིངས་སུ་བསྐྱལ་བས་འགྲོ་དོན་འབྱུང་ཞིང་སེམས་
ཅན་དབང་དུ་འདུ། སྐྱོ་ཤས་ངེས་འབྱུང་དབྱིངས་སུ་བསྐྱལ་བས་རང་གི་དགེ་སྦྱོར་གནད་
དུ་འགྲོ་ཞིང་གཞན་རྒྱུད་ཆོས་ལ་འཁུལ་ཆེད། བསྐྱེད་རིམ་དབྱིངས་སུ་བསྐྱལ་བས་ནུས་པ་
ཆེ་ཞིང་འཇིག་རྟེན་དང་འཇིག་རྟེན་ལས་འདས་པའི་ཆོས་སྐྱོང་དབང་དུ་འདུ། རྩ་རླུང་ཐིག་
ལེའི་རྣལ་འབྱོར་དབྱིངས་སུ་བསྐྱལ་བས་རྟོགས་པ་གོང་ནས་གོང་དུ་འཕེལ་ཞིང་ཕྱི་ནང་གི་
མཁའ་འགྲོ་འདུ་བ་རྒྱུན་མི་འཆད། གཉན་ཁྲོད་འགྲིམས་ཤིང་གནད་དུ་སོང་ན་སྡེ་བརྒྱད་
དྲེགས་པ་ཅན་ཐམས་ཅད་བྲན་འཁོལ་ཐུབ། གཞན་ཡང་འདོད་ཆགས་དབྱིངས་སུ་བསྐྱལ་
བས་འདོད་ཆགས་ཅན་གྱི་འགྲོ་བ་འདུལ་ནུས་འཁོར་འདུ། འོན་ཀྱང་དེ་སྙིང་རྗེས་མ་ཟིན་ན་
རང་དང་ཉེ་འཁོར་སོགས་ལ་དེ་ལ་བརྟེན་ནས་བར་ཆད་འབྱུང་བས། འདོད་ཆགས་དབྱིངས་
སུ་བསྐྱལ་བའི་སྟོང་ཉིད་དང་སྙིང་རྗེར་སྐྱེས་བ་གལ་ཆེ། དེས་མཚོན་ཏེ་ཉོན་མོངས་ཀྱི་རྣམ་
རྟོག་གཞན་རྣམས་ལའང་རིགས་འགྲེ། དེ་ཐམས་ཅད་ཀྱང་རྩ་བ་རེ་དོགས་མེད་པ་གལ་ཆེ་
བས། སྤྱིར་གཅོད་ཀྱིས་བར་ཆད་ཐམས་ཅད་སེལ་ཞིང་དངོས་གྲུབ་ཐམས་ཅད་ཐོབ་པ་ཡིན་
ནའང༌། དངོས་གྲུབ་ཐོབ་ལ་རེ་བ་དང་ཕན་ཡོན་འབྱུང་ལ་རེ་བ་ཞེ་འདོད་པ་གཏན་མེད་པ་
20-1-388


གཅིག་དགོས། བློ་ཡི་གཏིང་སྐྱོན་མ་ཐོན་ན་དགེ་སྦྱོར་གནད་དུ་མི་འགྲོ་སྟེ། བླ་མ་ལོག་ལྟ་
ཅན་དང༌། ཆོས་ལ་ཚོད་ཡོད་པོ་དང༌། རང་བཟང་འདོད་ངན་མི་འདོད་པ་དང༌། ནོར་རྫས་
ལོངས་སྤྱོད་ལ་ཤི་བར་འཐམས་པ་དང༌། རེ་དོགས་ཀྱིས་ཁྱེར་ནས་བློ་ཐག་གཅད་མི་ནུས་པ་
རྣམས་ལ། གཉན་ཁྲོད་ལམ་དུ་ལོངས་བའི་སྒོམ་སྐྱེ་བ་ག་ལ་སྲིད། ལྷ་འདྲེ་གདུག་པ་ཅན་གྱི་
ལྷོངས་ཞི་བ་སྐད། ལོངས་སྤྱོད་སྙན་གྲགས་ཐན་ཐུན་གྲུབ་པ་སྐད། མགོ་བསྐོར་གཏོང་བ་མང་
བས། གཉན་ཁྲོད་ལ་དགེ་སྦྱོར་གྱི་བློ་སྐྱེད་ཆེན་པོ་མ་བྱུང་བར་ཚར་ཚད་བརྫུས་མ་སད་སུད་
དེ་ལ་ཡིད་བརྟན་མ་བྱེད་ཅིག །དགེ་སྦྱོར་གྱི་བོགས་ཐོན་བྱུང་ན་གཞན་དེ་ཚོ་བྱུང་མ་བྱུང་འདྲ།
འདུན་མ་ལེགས་པའི་ཡང་རྩེ་ཡིན་ནོ། །གཅོད་ཡུལ་ཀུན་གྱི་སྙིང་པོའི་དོན། །དགོངས་འདུའི་
སྒྲུབ་ཐབས་འདི་ཡིན་པས། །ཉམས་ལེན་གྱིས་ཤིག་སྐལ་ལྡན་བུ། །ཙབ་ཙོབ་བློ་སྣ་མ་མང་
ཞིག །གཅོད་ཡུལ་ཟབ་མོའི་ཁྲིད་ཡིག་གནད་དོན་སྙིང་པོ་ཞེས་བྱ་བ་འདི་ནི་བྱ་བྲལ་བ་རིན་
ཆེན་བཀྲ་ཤིས་ཞེས་བྱ་བས་བསྐུལ་ནས། ཏཱ་ར་ནཱ་ཐས་སྨྲས་པ་སྟེ། སྟག་ལུང་ཐང་གི་ཆོས་གྲྭར་
སྦྱར་བའོ།། །།དགེའོ། །
ཛམ་སྨོན་ཡོད།
20-1-389


༄༅། །གཅོད་ཡུལ་བརྒྱུད་པའི་གསོལ་འདེབས་བཞུགས།
༄༅། །ཕཊ། མ་མི་མིན་ཡེ་ཤེས་མཁའ་འགྲོ་མ། །རྣམ་ཐར་གསུམ་གྱི་སྒོ་འབྱེད་མ། །
བདུད་ཀྱི་དཔུང་རྣམས་འཇོམས་མཛད་མ། །ལབ་སྒྲོན་ཁྱེད་ལ་གསོལ་བ་འདེབས། །ཐུགས་
རྗེ་དགོངས་ལ་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། །འོག་མིན་ཆོས་
སྐུའི་ཕོ་བྲང་དུ། །ཡུམ་ཆེན་ཤེར་ཕྱིན་བྱིན་རླབས་ཅན། །བྱིན་རླབས་ཅན་ལ་གསོལ་བ་
འདེབས། །བློ་སྙེམ་ཐགས་ཆོད་པར་བྱིན་གྱིས་རློབས། །བྱ་རྒོད་ཕུང་པོའི་རི་བོ་ལ། །བཅོམ་
ལྡན་ཤཱཀ་ཐུབ་བྱིན་རླབས་ཅན། །སོགས། རྒྱ་ནག་རི་བོ་རྩེ་ལྔ་རུ། །འཇམ་དཔལ་སྨྲ་སེང་སོགས།
གཡུ་ལོ་བཀོད་པའི་ཞིང་ཁམས་སུ། །རྗེ་བཙུན་སྒྲོལ་མ་སོགས། དག་པའི་བདེ་སྟོང་མཁའ་སྦྱོད་
དུ། །རྡོ་རྗེ་ཕག་མོ་སོགས། ཨོ་རྒྱན་མཁའ་འགྲོའི་ཕོ་བྲང་དུ། སུ་ཁ་སིདྡྷི་སོགས། རྒྱ་གར་འཇགས་
མའི་སྤྱིལ་པོ་རུ། །ཨཱརྱ་དེ་བ་སོགས། ལ་སྟོད་དེང་རི་གླིང་སྟོད་དུ། །དམ་པ་སངས་རྒྱས་སོགས།
ར་ས་སྤང་ལུང་དགོན་པ་རུ། །བསོད་ནམས་བླ་མ་སོགས། ཟངས་རི་མཁར་དམར་དགོན་པ་
རུ། །མ་ཅིག་ལབ་སྒྲོན་སོགས། རྒྱལ་ཐང་ཆུ་གཙང་དགོན་པ་རུ། །བསམ་བསྟན་འོད་ཟེར་སོགས།
བྱང་ཆུབ་གླིང་གི་དབེན་གནས་སུ། །ནམ་མཁའ་འོད་ཟེར་སོགས། གཉན་ཁྲོད་བརྒྱ་རྩའི་གནས་
མཆོག་ཏུ། །ཤཱཀྱ་འོད་ཟེར་སོགས། ཕྱོགས་མེད་ཡངས་པའི་རི་ཁྲོད་དུ། །བདེ་གཤེགས་མཚན་
ཅན་སོགས། བྱིན་རླབས་བླ་མའི་ཞབས་དྲུང་དུ། །དབོན་སྲས་ཆོས་ལེགས་སོགས། ཁ་རག་བསམ་
གླིང་དགོན་པ་རུ། །གཡུ་ཕྲུག་ཤེར་དཔལ་སོགས། ཆོས་ལུང་བྱང་རྩེའི་དབེན་གནས་སུ། །རྗེ་
བཙུན་གྲོལ་མཆོག་སོགས། བྲག་སྟོད་རྡོ་རྗེའི་ཕོ་བྲང་དུ། །ཆོས་སྐུ་ལྷ་དབང་སོགས། ཆོས་འབྱུང་
བདག་མེད་ཕོ་བྲང་དུ། །ལུང་རིག་རྒྱ་མཚོ་བྱིན་རླབས་ཅན། །བྱིན་རླབས་ཅན་ལ་སོགས་བ་
20-1-390


འདེབས། །བློ་སྙེམ་ཐག་ཆོད་པར་བྱིན་གྱིས་རློབས། ཁམས་གསུམ་འགྲོ་བའི་སྤྱི་བོ་རུ། །ཀུན་
དགའ་སྙིང་པོ་སོགས། བདུད་རྩི་ཕུག་གི་དབེན་གནས་སུ། །གྲགས་པ་དཔལ་བཟང་སོགས།
གནོད་སྦྱིན་མིང་གི་དགོན་པ་རུ། །ཀུན་དགའ་རིན་ཆེན་སོགས། འབྲལ་མེད་སྙིང་གི་དཀྱིལ་
ནང་དུ། །འཕྲིན་ལས་རྣམ་རྒྱལ་སོགས། སྤྱི་གཙུག་ཉི་ཟླའི་གདན་སྟེང་དུ། །རྩ་བའི་བླ་མ་སོགས།
ཉི་ཤུ་རྩ་བཞིའི་གནས་མཆོག་ཏུ། །དཔའ་བོ་མཁའ་འགྲོ་སོགས། བསིལ་བ་ཚལ་གྱི་དུར་ཁྲོད་
དུ། །ཆོས་སྐྱོང་སྲུང་མ་སོགས། དག་སྣང་ཕྱོགས་མེད་གཞལ་ཡས་སུ། །རྡོ་རྗེ་སྤུན་གྲོགས་སོགས།
མཚན་ལྡན་གྱི་བླ་མ་རིན་པོ་ཆེ། །བདག་ལ་བྱིན་གྱིས་བརླབ་ཏུ་གསོལ། །རེ་ས་གཞན་ན་མེད་
པའི་བྱིན་གྱིས་རློབས། །བདག་འཛིན་བློའི་ཐོངས་བར༴ །སྐྱེ་མེད་འོད་གསལ་རྟོགས་པར༴།
བར་ཆོད་དངོས་གྲུབ་ལོང་བར༴ །བདུད་ཚོགས་རང་སར་ཆོད་པར༴ །ཚེ་གཅིག་སངས་རྒྱས་
འགྲུབ་པར་བྱིན་གྱིས་རློབས། །ཁྱད་པར་དུ་བདག་སོགས་སེམས་ཅན་ཐམས་ཅད་ཀྱི་བླ་མ་ལ་མོས་གུས་དྲག་པོའི་
གསོལ་བ་འདེབས་པར་བསམ། བརྒྱུད་པའི་གསོལ་འདེབས་དེ་ཉིད་བདག་འཇུག་གི་མགོར་འདོན་པར་བྱའོ། །
20-1-391


༈  གསོལ་འདེབས་དགོངས་བསྐྱོད་མ་ནི། མ་ཡུམ་ཆེན་ཐུགས་ལས་སྤྲུལ་པའི་སྐུ། །མ་ཅིག་ཇོ་མོ་
རྣལ་འབྱོར་མ། །སྐལ་ལྡན་རྣམས་ཀྱི་རྒྱུད་ཁྲོལ་མ། །ཕ་རོལ་ཕྱིན་མའི་གྲུབ་ཐོབ་མ། །བདག་
དང་མོས་པའི་གང་ཟག་ལ། །མ་ཡི་དབང་བསྐུར་བྱིན་གྱིས་རློབས། །མ་ཅིག་ཇོ་མོ་ལ་གསོལ་
བ་འདེབས། །བྱང་ཆུབ་ལམ་སྒྲོན་ལ་གསོལ་བ་འདེབས། །ཡེ་ཤེས་མཁའ་འགྲོ་ལ་གསོལ་བ་
འདེབས། །མ་སྐྱེ་བ་དམན་ལ་དགོངས་པ་མཐོ། །སྐུ་ལུས་ཆུང་ལ་གཟི་མདངས་ཆེ། །སྐུ་ཤ་
དཀར་ལ་འོད་ཟེར་འཕྲོས། །ཀུན་དང་མཐུན་པའི་སྤྱོད་པ་ཅན། །བདག་དང་མོས་སོགས། མ་
སེར་སྣ་མེད་པའི་དོན་རྟོགས་པའི། །ཀུན་ཁྱབ་སྦྱིན་པ་བློ་གཏོང་བའི༌། །རང་བྱུང་ཡེ་ཤེས་དོན་
རྟོགས་པའི། །ཉམས་པ་མེད་པའི་ཁྲིམས་སྲུང་མ། །མ་བདག་གཞན་མེད་པའི་དོན་རྟོགས་
པའི། །མ་སྐྱེ་མེད་བཟོད་པ་བསྒོམ་ཙ་ན། །མ་གཞི་རྩ་མེད་པའི་དོན་རྟོགས་པས། །འབད་
མེད་བརྩོན་འགྲུས་བརྩོམ་མཛད་མ། །བདག་དང་མོས་སོགས། མ་གཡེང་བ་མེད་པའི་དོན་
རྟོགས་པའི། །གཡེངས་མེད་བསམ་གཏན་སྒོམ་མཛད་མ། །མཉམ་པ་ཉིད་ཀྱི་དོན་རྟོགས་
པའི། །བདག་མེད་ཤེས་རབ་སྒོམ་མཛད་མ། །བདག་དང་མོས་སོགས། མ་ཕྱོགས་མེད་ལྟ་བུའི་
ཞེན་པ་ཁྲོལ། །མཉམ་ཉིད་སྒོམ་པའི་དམིགས་གཏད་གྲོལ། །རྟོགས་མེད་སྤྱོད་པའི་ཉམ་ང་
གྲོལ། །དམིགས་མེད་འབྲས་བུས་རེ་དོགས་གྲོལ། །གཏི་མུག་མེད་པའི་དོན་རྟོགས་པའི། །
རྣམ་མཁྱེན་ཐུགས་ལ་མངའ་མཛད་མ། །བདག་དང་མོས་སོགས། མ་མཉམ་ཉིད་ངང་ལ་
བཞུགས་ཙ་ན། །དོན་མཐའ་དབུས་མེད་པའི་ཉམས་དང་ལྡན། །དུག་ལྔ་སྤང་པའི་ཡེ་ཤེས་ཀྱི། །
སངས་རྒྱས་མཁའ་འགྲོ་འབུམ་གྱི་བསྐོར། །ཉམས་དབྱངས་མགུར་མ་ཁྲོལ་ལོ་ལོ། །གདམ་
ངག་སྦྲང་ཆར་སི་ལི་ལི། །བྱིན་རླབས་ན་བུན་ཐུ་ལུ་ལུ། །གཡས་ན་དཔའ་བོ་ཤ་ར་ར། །གཡོན་
ན་དཔའ་མོ་ཐིབས་སེ་ཐིབས། །མི་རྐང་གླིང་བུ་ཀྱུ་རུ་རུ། །ཚུལ་ཆེན་དུད་པ་ཆི་ལི་ལི། །ཧཱུཾ་གི་
20-1-392


གདམ་པ་ཤ་ར་ར། །ཕཊ་ཀྱི་འབྲུག་སྒྲ་དི་རི་རི། །བདག་དང་མོས་པའི་གང་ཟག་ལ། །མ་ཡི་
དབང་བསྐུར་བྱིན་གྱིས་རློབས། །མ་ཅིག་ཇོ་མོ་ལ་གསོལ་བ་འདེབས། །བྱང་ཆུབ་ལམ་སྒྲོན་
ལ༴ །ཡེ་ཤེས་མཁའ་འགྲོ་ལ༴ །མ་མཉམ་ཉིད་ངང་ལ་བཞུགས་ཙ་ན། །དོན་རྗེས་ཐོབ་གསལ་
བའི་ཉམས་དང་ལྡན། །སྣ་ཚོགས་མཁའ་འགྲོ་འབུམ་གྱིས་བསྐོར། །ཉམས་དབྱངས༴ སོགས་
བགྲེས་སོ། །མ་དགོངས་པ་ཤར་དུ་བསྐྱོད་ཙ་ན། །དོན་སྐྱེ་བ་མེད་པའི་དོན་དང་ལྡན། །རྡོ་རྗེ་
མཁའ་འགྲོ་འབུམ་གྱི་བསྐོར། །ཉམས་དབྱངས༴ སོགས། མ་དགོངས་པ་ལྷོ་རུ་སྐྱོད་ཙ་ན། །དོན་
ཡོན་ཏན་རྫོགས་པའི་ཉམས་དང་ལྡན། །རིན་ཆེན་མཁའ་འགྲོ་འབུམ་གྱི་བསྐོར། །ཉམས་
དབྱངས༴ སོགས། མ་དགོངས་པ་ནུབ་ཏུ་བསྐྱོད་ཙ་ན། །དོན་སྐྱོན་རྣམས་དག་པའི་ཉམས་དང་
ལྡན། །པདྨ་མཁའ་འགྲོ་འབུམ་གྱི་བསྐོར། །ཉམས་དབྱངས༴ སོགས། མ་དགོངས་པ་བྱང་དུ་
བསྐྱོད་ཙ་ན། །དོན་འགགས་པ་མེད་པའི་ཉམས་དང་ལྡན། །ལས་ཀྱི་མཁའ་འགྲོ་འབུམ་གྱི་
བསྐོར། །ཉམས་དབྱངས༴ སོགས། མ་དགོངས་པ་དབུས་སུ་བསྐྱོད་ཙ་ན། །དོན་མཐའ་དབུས་
མེད་པའི་ཉམས་དང་ལྡན། །རིག་པ་དབྱིངས་སུ་པུ་རུ་རུ། །རིག་མེད་ལྟ་བ་ཕྱ་ལ་ལ། །མཉམ་
ཉིད་དགོངས་པ་ཕྲི་ལི་ལི། །མཁའ་འགྲོའི་མ་ཚོགས་ཐིབས་སེ་ཐིབས། །བདག་དང་མོས་པའི་
གང་ཟག་ལ། །བྱིན་གྱིས་རླབས་པར་མཛད་དུ་གསོལ། །ཕཊཿ ཕཊཿ དེ་ལྟར་གསོལ་འདེབས་
དགོངས་བསྐྱོད་མ་འདི་ནི་སློབ་མ་དབང་བསྐུར་བའི་སྐབས་གཏོར་དབང་གི་མགོར་འདོན་
དགོས་ལགས། དབང་གི་མགོར་མི་དགོས་ལགས། སྒྲ་བསྒྱུར་སྨྲ་བའི་ཕྱག་ཏུ་ཕུལ། བྲན་པ་
བློས་ཚུལ་ནས་སོ། །མངྒ་ལཾ། དགེའོ། །
ཡིག་ཆུང་ལ་བརྟགས་དགོས།
20-1-393


༄༅། །གཅོད་དབང་ནམ་མཁའ་སྒོ་འབྱེད་དུ་གྲགས་པ་ཞེས་བྱ་བའི་
དབུ་ཕྱོགས་ལེགས་པར་བཞུགས་པ་ལགས།
༄༅། །ན་མོ་གུ་རུ། གཅོད་ཡུལ་གྱི་དབང་ནམ་མཁའ་སྒོ་འབྱེད་དུ་གྲགས་པ་བསྐུར་བར་འདོད་པས། མཎྜལ་
པདྨ་འདབ་བཞི་ཚོམ་བུ་ཕྱོགས་མདོག་ཅན་དེའི་སྟེང་དུ་མཉྫི་ལ་གཏོར་མ་དཀར་ཟླུམ་ལྔ་ཚོམ། མར་དང་ཤ་དང་བུ་རམ་གྱིས་
བརྒྱན་པ་བཞག །མཐའ་མཆོད་གཏོར་གང་འཛོམས་ཀྱིས་བསྐོར། བགེགས་གཏོར་སྤྱི་དང་མཐུན་པར་བཏང་ལ་བགེགས་
བསྐྲད། ཕྱོགས་སྐྱོང་དང་གཞི་བདག་ལ་སྔོན་འགྲོ་གཏོར་མའི་ཆོ་ག་གང་ཡང་རུང་བ་ཞིག་གིས་གཏོར་མ་བཏང༌། མཆོད་པ་བྱིན་
བརླབས་ཀྱང་སྤྱི་དང་མཐུན། སྐྱབས་འགྲོ་སེམས་བསྐྱེད་སྔོན་དུ་འགྲོ་བའི་མདོ་བསྒྲུབ་གང་ནུས་བྱས་སྟེ། སྔོན་འགྲོའོ། །དེའི་སྡོམ་
ནི། ཡོ་བྱད་ཆ་རྐྱེན་ལེགས་འཛོམས་ནས། །ལེགས་བཤམ་བགེགས་བསྐྲད་གཏོར་མ་བཏང༌། །མཆོད་པ་བྱིན་བརླབས་སྐྱབས་
འགྲོ་དང༌། །སེམས་བསྐྱེད་མདོ་བསྒྲུབ་སྤྱི་འགྲོ་ཡིན། །དེ་ནས་བདག་དང་མདུན་བསྐྱེད་གཉིས་ཀ་སྭ་བྷཱ་ཝས་སྟོང་པར་
སྦྱངས། སྟོང་པའི་ངང་ལས་སྐད་ཅིག་གིས་ཆོས་འབྱུང་གི་ནང་དུར་ཁྲོད་འབར་བའི་གཞལ་
ཡས་ཀྱི་དབུས་སུ། སྣ་ཚོགས་པདྨ་འདབ་མ་བཞི་པ། ༀ་བུདྡྷ་ཌཱ་ཀི་ནཱི་ༀ། དབུས་སུ་སངས་
རྒྱས་མཁའ་འགྲོ་མ་དཀར་མོ་འཁོར་ལོའི་ཐོར་ཚུགས་ཅན། ༀ་བཛྲ་ཌཱ་ཀི་ནཱི་ཧཱུཾ། ཤར་དུ་རྡོ་
རྗེ་མཁའ་འགྲོ་མ་སྔོན་པོའམ་རྡོ་རྗེའི་ཐོར་ཚུགས་ཅན། ༀ་རཏྣ་ཌཱ་ཀི་ནཱི་ཏྲཾ། ལྷོར་རིན་ཆེན་
མཁའ་འགྲོ་མ་སེར་པོའམ་རིན་པོ་ཆེའི་ཐོར་ཚུགས་ཅན། ༀ་པདྨ་ཌཱ་ཀི་ནཱི་ཧྲཱིཿ ནུབ་ཏུ་པདྨ་
མཁའ་འགྲོ་མ་དམར་པོའམ་པདྨའི་ཐོར་ཚུགས་ཅན། ༀ་ཀརྨ་ཌཱ་ཀི་ནཱི་ཨཱཿ བྱང་དུ་ལས་ཀྱི་
མཁའ་འགྲོ་མ་ལྗང་ཁུ་རྡོ་རྗེ་རྒྱ་གྲམ་གྱི་ཐོར་ཚུགས་ཅན། ཐམས་ཅད་ཀྱང་སྤྱན་གསུམ་པ་ཌཱ་
མ་རུ་དང་ཐོད་པ་ཁ་ཊྭཱཾ་ག་བསྣམས་པ། ཞབས་གར་སྟབས་བསྒྱུར་བ། རིན་པོ་ཆེ་དང་རུས་པ་
ལ་སོགས་པའི་རྒྱན་ཐམས་ཅད་ཀྱིས་བརྒྱན་པ། རང་མཚུངས་ཀྱི་འཁོར་འབུམ་སྡེ་དང་བཅས་
20-1-394


པའོ། །ཧྲཱིཿམཧཱ་ཌཱ་ཀི་ནིཿ ༀ་ཨཱཿཧཱུཾ། གཙོ་མོའི་མདུན་དུ་རང་ཉིད་ཡེ་ཤེས་ཀྱི་མཁའ་འགྲོ་མ་
གཙོ་མོ་དང་འདྲ་བ་ལས། ཕྱག་གཡོན་དྲིལ་བུ་འཁྲོལ་བའོ། །དེ་ནས་བདུག་སྤོས་དང་རོལ་མོའི་སྒྲ་དང་
བཅས་ཏེ། ཧྲཱི་མོས་གུས་དག་པའི་ཕོ་བྲང་ནས། །བླ་མ་དཀོན་མཆོག་གཤེགས་སུ་གསོལ། །རང་
བཞིན་རྣམ་དག་གཞལ་ཡས་ནས། །ཡི་དམ་ལྷ་ཚོགས་གཤེགས་སུ་གསོལ། །རྡོ་རྗེ་ཅན་གྱི་
ཞིང་ཁམས་ནས། །རྡོ་རྗེ་མཁའ་འགྲོ་སྤྱན་འདྲེན་ནོ། །རིན་ཆེན་འབར་བའི་ཞིང་ཁམས་ནས། །
རིན་ཆེན་མཁའ་འགྲོ་སྤྱན་འདྲེན་ནོ། །པདྨ་ཅན་གྱི་ཞིང་ཁམས་ནས། །པདྨ་མཁའ་འགྲོ་སྤྱན་
འདྲེན་ནོ། །འབྲུག་སྒྲ་སྒྲོགས་པའི་ཞིང་ཁམས་ནས། །ལས་ཀྱི་མཁའ་འགྲོ༴ འཁོར་ལོ་ཅན་
གྱི་ཞིང་ཁམས་ནས། །སངས་རྒྱས་མཁའ་འགྲོ༴ གར་བཞུགས་གནས་མཆོག་དམ་པ་ནས། །
མ་ཅིག་ཡེ་ཤེས་མཁའ་འགྲོ་སྤྱན་འདྲེན་ནོ། །ཉི་ཤུ་རྩ་བཞིའི་གནས་མཆོག་ནས། །དཔའ་བོ་
མཁའ་འགྲོ་གཤེགས་སུ་གསོལ། །བསྟན་པ་རིན་ཆེན་གཞལ་ཡས་ནས། །བསྟན་སྲུང་ཆོས་
སྐྱོང་གཤེགས་སུ་གསོལ། །ༀ་གུ་རུ་དེ་ཝ་ཌཱ་ཀི་ནཱི་ཨ་གུ་ཤ་ཛཿ པ་ཤ་ཧཱུཾ། སྥོ་ཊ་བཾ། གྷཎྜེ་ཧོཿ
སྙིང་གའི་ས་བོན་ལས་འོད་འཕྲོས། །བདེ་གཤེགས་རྒྱལ་བ་རྒྱ་མཚོའི་ཚོགས། །དབང་གི་དོན་
དུ་འདིར་བྱོན་ལ། །སྣ་ཚོགས་མཆོད་པས་མཉེས་གྱུར་ཅིག །ཇི་ལྟར་བལྟམས་པ་ནས། ཤྲི་ཡེ་
ཧཱུཾ་གིས། སངས་རྒྱས་མཁའ་འགྲོ་ལ་རྣམ་སྣང༌། རྡོ་རྗེ་མཁའ་འགྲོ་ལ་མི་བསྐྱོད་པ། རིན་ཆེན་
མཁའ་འགྲོ་ལ་རིན་ཆེན་འབྱུང༌། པདྨ་མཁའ་འགྲོ་ལ་སྣང་མཐའ། ལས་ཀྱི་མཁའ་འགྲོ་ལ་
དོན་གྲུབ། རང་ཉིད་མ་ཅིག་ཡེ་ཤེས་ཀྱི་མཁའ་འགྲོ་མ་ལ་རིགས་ལྔ་ཆར་གྱིས་དབུ་བརྒྱན། དྲི་
མེད་ཡིད་དུ་འོང་བ་ཡི། །ལྷ་རྫས་དམ་པའི་མཆོད་ཡོན་འདི། །བླ་མ་ཡི་དམ་མཁའ་འགྲོ་ལ། །
འབུལ་ལོ་བཞེས་ཤིག་བྱིན་གྱིས་རློབས། །ༀ་གུ་རུ་དེ་ཝ་ཌཱ་ཀི་ནཱི་ཨརྒྷཾ་པྲ་ཏཱིཙྪ་ཨཱཿཧཱུཾ་སྭཱཧཱ།
དེ་བཞིན་དུ་རོལ་མོ་ནས་ཤཔྟའི་བར་དུ་འདོན་པ་སྤོ། ༀ་གུ་རུ་དེ་ཝ་ཌཱ་ཀི་ནཱི་པཉྩ་ཨ་མྲྀ་ཏ་ཨཱཿཧཱུཾ། ཞེས་
ནང་མཆོད་འབུལ། སྤྲོ་ན། བནྡྷ་སྣོད་བཟང་ཡངས་པ་རུ། །རང་བྱུང་གདོད་ནས་རྣམ་པར་དག །རྩ་
20-1-395


བརྒྱད་སྟོང་ལ་སྦྱར་བའི་སྨན། །རིགས་ལྔའི་དམ་ཚིག་ལྔ་ཡི་དངོས། །ཡེ་ཤེས་ལྔ་རྫོགས་གྲུབ་
པའི་རྫས། །དུག་ལྔ་སེལ་བའི་བདུད་རྩི་འདི། །རྒྱུ་དྲུག་སེམས་ཅན་ཀུན་སྒྲོལ་ཤིང༌། །བླ་མ་
ཡི་དམ་ཚོགས་ལ་འབུལ། །མཆོད་པ་དམ་པ་འབུལ་གྱིས་བཞེས། །མཆོད་བཞེས་དངོས་གྲུབ་
སྩལ་དུ་གསོལ། །སྔགས་རྙིང་མའི་ལུགས་དང་མཐུན་པའི་གྱེར་བྱེད་པར་གདའ། གཏོར་མ་རྣམས་ཡི་དམ་གྱི་མངོན་རྟོགས་
གང་རུང་ཞིག་དང་མཐུན་པར་བྱིན་གྱིས་བརླབས་པར་བྱ། གཏོར་མ་དངོས་དེ་བླ་མ་ཡི་དམ་དབྱེར་མེད་དམ་པ་ལ་ཡི་དམ་གང་
བྱེད་ཀྱི་གཏོར་ཚོགས་ཀྱིས་འབུལ། གཉིས་པ་མཁའ་འགྲོ་སྡེ་ལྔ་ལ་གོང་གི་སྔགས་ཐུང་རེ་རེའི་མཐར། ཨ་ཀཱ་རོ་བཏགས་པ་
ལན་གསུམ་གསུམ་གྱིས་འབུལ། གསུམ་པ་སྟེ་ཆོས་སྐྱོང་ལ་རང་གི་གཏོར་ཆོག་གིས་འབུལ། བཞི་པ་མཁའ་འགྲོ་སྤྱི་གཏོར་དང༌།
ལྔ་པ་གཞི་བདག་གཏོར་མའི་ཆོ་ག་བཏང༌། དྲུག་པ་ཨ་ཀཱ་རོ་ལན་དྲུག་གིས་རིགས་དྲུག་ལ་བསྔོ། སློབ་མའི་རྒྱུད་ལ་ཉམས་རྟོགས་
ཁྱད་པར་ཅན་སྐྱེ་བར་གསོལ་བ་བཏབ།
བརྒྱུད་པའི་བླ་མའི་གསོལ་འདེབས་སྔོན་དུ་འགྲོ་བའི་སྒོ་ནས་སློབ་མ་ལ་ཇི་ལྟར་བསྐུལ་བའི་ཆོ་གའི་བྱ་བ་རྣམས་རང་གིས་
ཀྱང་དམིགས་པའི་སྒོ་ནས་བདག་འཇུག་དུ་བླངས། ཚོགས་རྫས་བཤམས་པ་རྣམས་ཡི་དམ་གང་བྱེད་ཀྱི་གཏོར་ཆོག་དང་མཐུན་
པར་བྱིན་གྱིས་རླབས་ཏེ་བཞག་གོ །དེ་དག་གི་སྡོམ་ནི། སྟོང་ཉིད་ལྷར་བསྐྱེད་སྤྱན་འདྲེན་དང༌། །དགུག་གཞུག་རྒྱས་བཏབ་མཆོད་
གཏོར་འབུལ། །གསོལ་འདེབས་བདག་འཇུག་ཚོགས་བྱིན་རླབས། །དཀྱིལ་འཁོར་བསྒྲུབ་པའི་སྤྱི་སྡོམ་ཡིན། །
དེ་ནས་སློབ་མ་རྣམས་ནང་དུ་གཞུག །ཆབ་བཏང་གྲལ་ལ་འཁོད། མེ་ཏོག་བཀྱེ་བསྡུ་བྱ། སྔོན་འགྲོ་ཆོས་བཤད་བྱས་ལ།
མཎྜལ་འབུལ་དུ་གཞུག་སྟེ། རྡོ་རྗེ་སློབ་དཔོན་དགོངས་སུ་གསོལ། ། ཐུགས་ཆོས་ཀྱི་དབྱིངས་ལས་མ་
གཡོས་ཀྱང༌། །འགྲོ་བ་འདྲེན་པའི་དོན་སླད་དུ། ། རྡོ་རྗེ་འཆང་དུ་སྐུ་སྤྲུལ་ནས། །དབང་བསྐུར་
ཟབ་མོ་སྩོལ་བ་དང༌། །ཆོས་ཀྱི་འཁོར་ལོ་བསྐོར་དུ་གསོལ། །ཚོགས་ཀྱི་འཁོར་ལོ་བླ་ན་མེད། །
ཤིན་ཏུ་རྒྱ་ཆེན་བསྐོར་དུ་གསོལ། །ཞེས་ལན་གསུམ་དང༌། དཔོན་སློབ་ཐམས་ཅད་ཀྱིས་ཤེར་སྙིང་ལན་གསུམ་
མམ་ལན་བདུན་བཟློག་པ་དང་བཅས་པ་བྱ། འདིའི་སྔོན་དུ་བགེགས་གཏོར་གཏོང་བའི་ལུགས་ཀྱང་འདུག་པས་སྤྲོ་ན་དེ་བཞིན་དུ་
བྱ། དེ་ནས་སྐྱབས་འགྲོ་འབོགས་ཏེ་འདིས་རྗེས་སུ་ཟློས་བྱར་གཞུག་གོ །སངས་རྒྱས་དང་བྱང་ཆུབ་སེམས་དཔའ་
20-1-396


ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་
མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་
དུ། རྐང་གཉིས་རྣམས་ཀྱི་མཆོག་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆིའོ། །
འདོད་ཆགས་དང་བྲལ་བ་རྣམས་ཀྱི་མཆོག །ཞི་བ་མྱ་ངན་ལས་འདས་པའི་ཆོས་རྣམས་ལ་
སྐྱབས་སུ༴ ཚོགས་རྣམས་ཀྱི་མཆོག །བྱང་ཆུབ་སེམས་དཔའ་ཕྱིར་མི་ལྡོག་པའི་འཕགས་པའི་
དགེ་འདུན་རྣམས་ལ་སྐྱབས་སུ་མཆིའོ། །ལན་གསུམ། སེམས་བསྐྱེད་ནི། དགོངས་སུ་གསོལ་གོང་བཞིན། ཇི་
ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་
རྣམས་དང༌། ས་ཆེན་པོར་བཞུགས་པའི་བྱང་ཆུབ་སེམས་དཔའ་རྣམས་ཀྱིས་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དེ་བཞིན་དུ། བདག་མིང་འདི་ཞེས་
བགྱི་བས་ཀྱང༌། དུས་འདི་ནས་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། བླ་
ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིས་ཏེ། སེམས་ཅན་
མ་བསྒྲལ་བ་རྣམས་བསྒྲལ་བར་བགྱིའོ། །མ་གྲོལ་བ་རྣམས་དགྲོལ་བར་བགྱིའོ། །དབུགས་
མ་དབྱུང་བ་རྣམས་དབུགས་དབྱུང་བར་བགྱིའོ། །ཡོངས་སུ་མྱ་ངན་ལས་མ་འདས་པ་རྣམས་
ཡོངས་སུ་མྱ་ངན་ལས་འདའ་བར་བགྱིའོ། །ལན་གསུམ། འཇུག་སེམས་ཀྱང་ལེན་པའི་སྲོལ་ཀྱང་ཡོད་མོད།
ལོགས་སུ་མ་བྱས་ཀྱང་ཆོག །བསྡུས་པ་ལ་མངོན་པར་དགའ་བས་གུར་ནས་བྱུང་བའི་རྒྱུན་བཤགས་སམ། སངས་རྒྱས་
ཆོས་དང་སོགས་ཀྱི་ཆོག་སྟེ་སྔོན་འགྲོའོ། །
དངོས་གཞི་ལ་ནམ་མཁའ་སྒོ་འབྱེད་དངོས་ནི། སྤྲོས་བྲལ་དངོས་མེད་ལ་བརྟེན་པའི་ངོ་སྤྲོད་པ་དང༌། སྤྲོས་བཅས་དངོས་
པོ་ལ་བརྟེན་ནས་ངོ་སྤྲོད་པའོ། །དང་པོ་ནི། ཁྱེད་རང་རྣམས་ཀྱིས་ལུས་གནད་བཅས། རླུང་རང་སར་
བཞག །སེམས་བཟོ་བཅོས་མེད་པར་ལྷན་ནེ་བའི་ངང་ནས་ཆེར་རེ་ལྟོས་ཤིག །དེའི་ངོ་བོ་
ནི་རང་གཞན་དུ་མ་གྲུབ་དེ་བཞིན་དུ་ཁ་དོག་དང་དབྱིབས་དང་ཕྱི་དང་ནང་དང་བེམ་པོ་དང༌།
20-1-397


ཤེས་པ་འགྲོ་བ་དང་གོ་བ་གང་ཡང་ངོས་བཟུང་མེད་པར་སྐྱེ་འགགས་གནས་གསུམ་དང་བྲལ་
བའི་ངང་དེ་ཉིད་ལ་འཁོར་འདས་ཐམས་ཅད་འཆར་དུ་རུང་བ་འདི་ཀ་དོན་དམ་ཤེས་རབ་ཀྱི་
ཕ་རོལ་དུ་ཕྱིན་པ་དེ་ཡིན་ནོ། །ཞེས་གནས་པའི་སྟེང་ནས་ངོ་སྤྲད། ཡང་ཁྱེད་རང་རྣམས་དྲན་པ་ལེགས་
པར་བཟུང་ལ་རྣམ་རྟོག་གི་སྐྱེ་འགགས་གནས་གསུམ་གྱི་སྟེང་དུ་འཆར་སྒོ་ཇི་ལྟར་འདུག་པ་
ལྟ་དགོས་པའི་རྣམ་རྟོག་ཞིག་བསྐྱེད་ལ་གཞིག་འགྲེལ་ཐོངས་ཤིག །ཅེས་ལྟ་རུ་གཞུག །ཡང་
འདི་སྐད་དུ། སེམས་གནས་པའི་རྣམ་རྟོག་སྐྱེས་པའི་ཚེ་ཡང་སྐྱེ་བཞིན་པའི་དུས་དེ་ཉིད་ནས་
ངོས་བཟུང་མེད། རྣམ་རྟོག་ཤར་ནས་མ་འགགས་པར་ལམ་མེ་ཡོད་པའི་སྐབས་དེ་ཉིད་ན།
ཕྱི་ནང་བར་གསུམ། མཐོང་ཐོས་རིག་གསུམ་གང་གི་ངོ་བོར་ཡང་འདི་ལྟ་བུའོ་ཞེས་མ་གྲུབ་
པར་གནས་པའི་དུས་ན་ཡང་ངོ་བཟུང་མེད། ཡང་རྣམ་རྟོག་ཡལ་བའི་ཚེ་ཡུལ་འདི་ལྟ་བུ་ཞིག་
ཏུ་ཚུལ་འདི་ལྟ་བུར་འགགས་ཞེས་ཀྱང་དམིགས་སུ་མེད། དེས་ན་སྐྱེ་འགགས་གནས་གསུམ་
དུ་སྣང་བ་འདི་ཐམས་ཅད་འཆར་སྒོ་མ་འགགས་ཙམ་མ་གཏོགས་ངོས་བཟུང་མེད་པ་འདི་
གསར་དུ་བྱུང་བ་མ་ཡིན་གདོད་ནས་གནས་ལུགས་ལགས་སོ། །དེ་ནས་རང་ངོ་མ་ཤེས་ན་
རྣམ་རྟོག་བདུད་ཡིན། རང་ངོ་ཤེས་ན་ཆོས་ཉིད་ཀྱི་རོལ་པ་ཞེས་གསུངས་ཞེས་སོགས་ངོ་སྤྲོད། རྒྱས་
བསྡུས་སློབ་མའི་རྒྱུད་དང་འཚམ་པར་བཤད། དེ་ལྟ་བུའི་གནས་ལུགས་མི་རྟོགས་ཤིང་ཕུང་དུ་འཇུག་
མཁན་བདག་གཅེས་འཛིན་འདི་ཡིན་པས། ལུས་འདི་ལ་གཅེས་པའི་སྙེམས་ཁྲིག་རྡུལ་ཙམ་
ཡང་མེད་པར་གནོད་བྱེད་འབྱུང་པོ་ཐམས་ཅད་ལ་བློས་རྒྱངས་ཀྱིས་ཐོངས་ཤིག །ཡང་ལུས་
སེམས་གཅེས་པར་འཛིན་པའི་ཕྱིར་རྣམ་རྟོག་ཁོ་རང་གི་ངོ་བོ་ལ་ཆེར་གྱི་ལྟོས་ལ། ཕཊཿ ཅེས་
བརྗོད་ལ་དེ་དབྱིངས་བལྟ་ཞིང༌། ཕཊཿ
གཉིས་པ་ནི། ཁྱེད་རང་རྣམས་ཀྱིས་མིག་མི་རིག་དགུ་རིག་འདི་རྐང་མཐིལ་གཉིས་སུ་འོད་
དཀར་པོ་བྱ་སྒོང་ཙམ་གཉིས་སུ་སོང༌། འགྲིལ་ནས་གསང་གནས་སུ་ཅུང་ཟད་འདུག །དེ་
20-1-398


བཞིན་དུ་ལྟེ་བ། སྙིང་ག །མགྲིན་པ། སྤྱི་གཙུག་གི་སྒོ་རྣམས་སུ་འགྲིལ། སྤྱི་གཙུག་ཚངས་པའི་
བུ་ག་ནས་འདོན་ལ་ཁད་ཁད་འདུག་པ་ལ། ཕཊཿ ཅེས་བརྗོད་པའི་རྒྱངས་ཀྱི་ཐོན་རྣམ་སྨིན་
གྱི་ལུས་སྐྱེད་རྣམས་ལ་ཟན་དུ་བོར། རིག་པ་གསལ་ལ་ངོས་བཟུང་མེད་པ་དེ་ནམ་མཁའ་ལ་
ཆམས་ཏེ་ཁྱབ་པའི་ངང་དེར་ལྷོད་ཀྱིས་ཞོག་ཅིག །ཕཊཿ དམིགས་པ་འདི་ལན་གསུམ་འབོགས་པ་ལས།
དང་པོ་ལ་སློབ་མ་རྣམས་སྐྱིལ་ཀྲུང་མཉམ་བཞག་བྱེད། གཉིས་པ་ལ་ཙོག་པུས་འཕོངས་ས་ལ་མ་རེག་ཙམ་དང་བཅས། ལག་པ་
སྙིང་ཁར་རྡོ་རྗེ་བསྡམས་པའི་ཕྱག་རྒྱ་བྱེད། གསུམ་པ་ལངས་ཏེ་རྐང་པའི་བྲང་ས་ལ་བཙུག །ཐལ་མོ་སྤྱི་བོར་སྦྱར། གསུམ་ཀ་ལ་ཉྭ་
བཞི་སྒྲེངས་ཞིང་གྱེན་དུ་བལྟའོ། །རོལ་མོའི་མཐར་རོལ་མོ་བྱེད་པའི་ལུགས་ཀྱང་ཡོད། འདི་སྐབས་ཡེ་ཤེས་ཕེབས་པའང་འབྱུང་
ངོ༌། །
དེ་ནས་ཕྱག་རྒྱའི་རྗེས་གནང་ནི། འདི་ནི་མཁའ་འགྲོ་ཐམས་ཅད་ཀྱིས། །ཕ་རོལ་ཕྱིན་དྲུག་མཚོན་
པའི་རྒྱན། །རྒྱན་དེ་ཐོགས་ལ་བདུད་རྣམས་མཆོད། །རྒྱན་དྲུག་རུས་པའི་དབུ་མར་རོ། །ༀ་
མཧཱ་ཌཱ་ཀི་ནཱི་ཀ་ཡ་ཨ་བྷི་ཥིཉྩ་ཧཱུཾ། ཞེས་རྒྱན་དྲུག་གཡོགས།
གསུང་སྔགས་ཀྱི་རྗེས་གནང་ནི། འདི་ནི་མཁའ་འགྲོ་ཐམས་ཅད་ཀྱི། །གཟུང་འཛིན་དབྱིངས་སུ་
གཅོད་པའི་སྒྲ། །སྒྲ་འདི་སྒྲོགས་ཅིང་བདུད་རྣམས་ཆོད། །གསུང་སྐད་ཕཊ་ཀྱི་དབང་བསྐུར་
རོ། །ༀ་མཧཱ་ཌཱ་ཀི་ནཱི་ཝཀ་ཨ་བྷི་ཥིཉྩ་ཧཱུཾ། དབྱིངས་རིག་བསྲེ་བའི། ཕཊཿ ལན་གསུམ་བརྗོད། འདི་ནི་
མཁའ་འགྲོ་ཐམས་ཅད་ཀྱི། །དོན་དམ་སྟོང་ཉིད་སྙིང་པོའི་དོན། །དོན་འདི་བསྒོམ་ཞིང་བདུད་
རྣམས་ཆོད། །ཆོས་ཉིད་དོན་གྱི་དབང་བསྐུར་རོ། །ༀ་མཧཱ་ཌཱ་ཀི་ནཱི་ཙིཏྟ་ཨ་བྷི་ཥིཉྩ་ཧཱུཾ། འདི་
ནི་མཁའ་འགྲོ་ཐམས་ཅད་ཀྱི། ཁམས་གསུམ་དབང་དུ་བསྡུད་པའི་སྒྲ། །སྒྲ་འདི་སྒྲོགས་ཅིང་
བདུད་རྣམས་ཆོད། །ཅང་ཏེའུ་སྒྲ་ཡི་དབང་བསྐུར་རོ། །ༀ་མཧཱ་ཌཱ་ཀི་ནཱི་གུ་ཎ་ཨ་བྷི་ཥིཉྩ་ཧཱུཾ།
ཞེས་ཅང་ཏེའུ་ཁྲོལ་དུ་བཅུག །འདི་ནི་མཁའ་འགྲོ་ཐམས་ཅད་ཀྱི། །སྣང་སྲིད་བདེན་མེད་རྟོགས་པའི་
སྐད། །སྐད་འདིས་བསྒྱུར་ཞིང་བདུད་རྣམས་ཆོད། །མི་རྐང་གླིང་བུའི་དབང་བསྐུར་རོ། །ༀ་
20-1-399


མཧཱ་ཌཱ་ཀི་ནཱི་ཀརྨ་ཨ་བྷི་ཥིཉྩ་ཧཱུཾ། ཞེས་རྐང་དུང་འབུད་དུ་བཅུག། འདིར་མིག་དར་མེ་ཏོག་སྦྱིན། དེ་ནས་བྱིན་རླབས་
ལྷ་ཡི་ཡེ་ཤེས་འབེབས་པ་ནི། མཎྜལ་ཕུལ། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས། སངས་རྒྱས་
བྱང་སེམས་ཐམས་ཅད་མཁའ་འགྲོ་སྡེ་ལྔའི་རྣམ་པར་སྤྱན་དྲངས། སྟེང་འོག་ཕྱོགས་མཚམས་
ཐམས་ཅད་ནས་བྱོན་ཏེ། ཁྱེད་རང་རྣམས་ལ་ཐིམ་པས། མདུན་བསྐྱེད་ཀྱི་ཐུགས་ཀ་ནས་ཀྱང་
མཁའ་འགྲོ་སྡེ་ལྔ་དཔག་ཏུ་མེད་པ་གར་སྟབས་ལིང་ལིང་བྱུང་སྟེ། རྒྱ་མཚོའི་ལ་ཆར་བབ་པ་
བཞིན་དུ་ཁྱེད་རང་ལ་སིབ་སིབ་ཐིམ། དེ་ནས་རོལ་མོའི་སྒྲ་དང་བཅས་ཏེ། གོང་གི་ལྷ་བསྐྱེད་པའི་སྔགས་ཀྱིས།
ཨ་བེ་ཤ་ཡ་ཨ་ཨཱཿ ཞེས་བཏགས་པ་མང་དུ་བརྗོད། ༀ་སུ་པྲ་ཏིཥྛ་བཛྲ་ཡེ་སྭཱཧཱ། ཞེས་སྤྱི་བོར་རྡོ་རྗེ་བཞག་པ་ལ་
མེ་ཏོག་གཏོར་ཞིང་བརྟན་པར་བྱ། སྙིང་ཁར་རྡོ་རྗེ་བཞག་ལ། གནས་གསུམ་མཁའ་འགྲོ་སྡེ་ལྔའི་ཚོགས། ཁྱེད་
ཀྱི་སྙིང་ལ་ཡང་དག་ཞུགས། །རྟག་ཏུ་བྱིན་གྱིས་བརླབས་པར་བྱེད། །ཚུལ་འདི་གཞན་ལ་མ་སྨྲ་
ཞིག །ཅེས་གསང་བར་གདམས། ཡེ་ཤེས་མཁའ་འགྲོའི་ཚོགས་བཅས་ལ། །རིགས་པ་མེ་ཏོག་འདི་
འབུལ་ནས། །རིགས་ལྔ་མཁའ་འགྲོས་རྗེས་བཟུང་ནས། །བདུད་ཚོགས་དབྱིངས་སུ་གྲོལ་
བར་ཤོག །ཅེས་མེ་ཏོག་འབུལ་དུ་གཞུག །ཨེ་མ་སྐལ་ལྡན་རིགས་ཀྱི་བུ། །ལྟོས་ཤིག་ལྟོས་ཤིག་འདི་
ལ་ལྟོས། །དཀྱིལ་འཁོར་བཟང་པོ་འདི་ལ་ལྟོས། ཁྱེད་ནི་ཡེ་ཤེས་མཁའ་འགྲོའི་རིགས། །ཧེ་
བཛྲ་པཱ་ཤེ།ཞེས་བལྟ་བར་བསྐུལ། མདུན་བསྐྱེད་ཇི་ལྟར་བསྐྱེད་པ་བཞིན་དུ་སློབ་མ་ལ་ལྷ་ངོ་བསྟན། མཎྜལ་སྟེང་གི་གཏོར་
མ་ལྔ་ཙམ་མ་ཅིག་ཡེ་ཤེས་ཀྱི་མཁའ་འགྲོ་མ་དང་མཁའ་འགྲོ་སྡེ་ལྔའི་ཚོགས་དང་བཅས་པ་གསོལ་འདེབས་སུ་བཅུག །ལས་ཀྱི་
རྡོ་རྗེས་ལག་ཏུ་བཟུང་ལ། དཔོན་སློབ་ཐམས་ཅད་ཀྱིས་གསོལ་འདེབས་དབྱངས་དང་བཅས་པ་བྱ། ལག་ལེན་ལ་རྒྱལ་བ་དོན་
འགྲུབ་ཀྱིས་མཛད་པའི་གསོལ་འདེབས་དགོངས་སྐྱོད་མ་མཛད་ཀྱིན་འདུག །དེ་རྗེས་གཏོར་དབང་དུ་སྤྱི་དང་མཐུན་པར་བསྐུར་
ལ་རོལ་མོའི་སྒྲ་བྱ། དེ་ནས་གཏོར་མ་ལས་དངོས་གྲུབ་ཀྱི་རྫས་ཅུང་ཟད་རེ་སློབ་མ་རྣམས་ལ་ཐོབ་བྱར་འཇུག །ཟན་ཞི་བ། མར་
རྒྱས་པ། བུ་རམ་དབང༌། ཤ་ནས་མངོན་སྤྱོད་གྲུབ་བོ་ཞེས་བྱ། རྗེས་ཁས་ལེན་མཎྜལ་ཡོན་འབུལ་བ་སྤྱི་དང་དང་འདྲ། དེ་དག་ལ་
སྡོམ་ནི། ཆོས་བཤད་མཎྜལ་གསོལ་བཏབ་དང༌། །བགེགས་གཏོར་མདོ་སྒྲུབ་སྐྱབས་སེམས་འབོགས། །ངོ་སྤྲོད་གཉིས་དང་རྗེས་
20-1-400


གནང་ལྔ། །ལྷ་ཡི་བྱིན་དབབ་རྟེན་གནས་ལ། །དམ་བཞག་མེ་ཏོག་གཏོར་བ་དང༌། །བལྟ་བར་བསྐུལ་ནས་ལྷ་ངོ་བསྟན། །གསོལ་
འདེབས་གཏོར་དབང་དངོས་གྲུབ་རྣམས། །རྗེས་ཀྱི་བྱ་བ་སྤྱི་དང་མཐུན། །ཞེས་སོ། །
དེ་ནས་ཚོགས་ཕུད་འབུལ་བ་ནས་བརྩམས། ལྷའི་གཏོར་མ་གཏོང་བའི་བར་དུ་བྱ་ཞིང༌། དེ་རྗེས་ཡིག་བརྒྱ་བཟོད་གསོལ་
གཤེགས་སུ་གསོལ། དམ་ཚིག་པ་རང་ལ་བསྡུ་བ། སྨོན་ལམ་བཀྲ་ཤིས་རྣམས་བྱའོ། །
ཚོགས་གཞུང་སོགས་ཆོ་གའི་རྒྱན་ཆོག་རྣམས་ལ། བླ་མ་སྔ་མ་རྣམས་ཀྱིས་འགྲོས་ནག་གི་ལུགས་བཞིན་མཛད་པ་ནི། དེ་ལ་
ཡི་དམ་མཛད་པའི་བག་ཆགས་བཏབ་པ་ཙམ་ཡིན་གྱི། གཅིག་ཏུ་ངེས་པར་དགོས་པ་མ་ཡིན་ལ། ཕག་མོ་བདག་མེད་མ་ལ་སོགས་
པ་རིགས་ཚད་ལྡན་ཞིག་གིས་ཆོ་ག་གང་ལ་བརྟེན་ཀྱང་ཆོག དེ་ལྟར་གཅོད་ཀྱི་ཆོས་དབང་སེམས་ལ་བསྐུར་བའི་ལག་ལེན་འདི་
ཡང༌། ལྷག་ཆད་འགལ་འཁྲུལ་ནོར་བའི་སྐྱོན་ཐམས་ཅད་སྤངས་ཏེ། བྱིན་རླབས་བླ་མ་བརྒྱུད་པའི་ཕྱག་ལེན་བཞིན་ཏཱ་ར་ནཱ་ཐས་
སྨྲས་པའོ།། །།
དེ་ལྟར་གཅོད་ཚོགས་པོ་ཏི་བརྒྱ་བརྒྱད་ཀྱི། །ཡང་སྙིང་མན་ངག་ལེགས་བཤད་རིན་ཆེན་འཕྲེང༌། །མཁའ་མཉམ་འགྲོ་བའི་
ཆོས་འབྱོར་གྱིས་འབུལ་བ། །སེལ་ཕྱིར་གྲགས་པ་དཔལ་བཟང་དེད་དཔོན་གྱིས། །རྡོ་རྗེ་འཆང་དངོས་ཏཱ་ར་ནཱ་ཐ་ཡིས། །གསུང་
རབ་རྒྱ་མཚོའི་ནུབ་གྱུར་རབ་དགོངས་ནས། །ཀུན་ལ་ཕན་ཕྱིར་ལག་ལེན་བཅའ་བར་བྲིས། །འདིས་མཚོན་དུས་གསུམ་དགེ་བ་རྒྱ་
མཚོ་ལས། །འགྲོ་ཀུན་ཀུན་མཁྱེན་སངས་རྒྱས་མྱུར་ཐོབ་ཤོག །གཅོད་ཡུལ་ནམ་མཁའ་སྒོ་འབྱེད་འདི་ཉིད་ཀྱིས། ཁམས་གསུམ་
འགྲོ་ཀུན་བདག་གིས་སྨིན་བྱས་ནས། །ཕན་དང་བདེ་བའི་མཁའ་དབྱིངས་གང་བ་དང༌། །ངེས་དོན་བསྟན་པ་དར་བའི་བཀྲ་ཤིས་
ཤོག །བཀྲ་ཤིས། །
20-1-401


20-1-402


༄༅། །འཕོ་བའི་མན་ངག་བཞུགས།
༄༅། །ན་མོ་གུ་རུ། འཕོ་བའི་མན་ངག་ནི། འཕོ་བ་འདེབས་ཡུལ་དེས། སྔར་ཆོས་ཀྱི་གོ་བ་ཡོད་པ་འདེབས་དགོས་
པ་དེས་ཀྱང་རིག་པ་དྭངས་ཤིང་དམིགས་པ་གསལ་ཐེབ་པ་འདུག་ན་འདི་ལྟར་བྱ་སྟེ་དེ་བླ་མ་ལ་མོས་ནས་བླ་མ་སྟེང་གི་ནམ་མཁའ་
ལ་བཞུགས་པར་མོས་ལ། ཡི་དམ་ལ་མོས་ནས་ཡི་དམ་སྟེང་གི་ནམ་མཁའ་ལ་བཞུགས་པར་བསམ། མོས་གུས་གདུང་བས་
གསོལ་འདེབས་སུ་བཅུག ཁོ་རང་གི་རྣམ་ཤེས་མར་མེ་འདྲ་བ་གཅིག་སྤྱི་བོ་སོགས་གང་བདེ་ཞིག་ལས་སྦྱངས་ཏེ་ཐོན་ལ། བླ་མ་
ཡི་དམ་ཀྱི་ཐུགས་ཀར་ཐིམ། ཡང་མོས་གུས་བྱེད་དུ་བཅུག །ཐུགས་ཀར་ཐིམ་པའི་མོས་གུས་བྱེད་དུ་བཅུག །དེ་ཀ་སྐྱར་གྱིན་ལན་
མང་དུ་གསལ་བཏབ་ནས་དེ་ཁོ་ན་མན་ངག་གི་དམིགས་པ་བྱེད་དུ་བཅུག །རང་རེ་ཡི་དམ་ཀྱི་བསྟོད་དབྱངས་གསོལ་འདེབས་
སུ་གྱེར། བསྟོད་པ་གསོལ་འདེབས་ལ་སོ་སོའི་རང་ལུགས་སུ་བྱས་པའི་ཆོག །དེ་དག་གི་བར་དུ་འདི་སྐད་ཅེས་བྱ་སྟེ། རང་
གི་སྤྱི་གཙུག་མདའ་གང་ཙམ་གྱི་སྟེང་གི་ནམ་མཁའ་ལ་རྩ་བའི་བླ་མ་རྡོ་རྗེ་འཆང་ཆེན་པོ་སྐུ་
མདོག་སྔོན་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་བཟུང་བ།
ཞབས་རྡོ་རྗེ་སྐྱིལ་ཀྲུང་གིས་བཞུགས་པ། དར་དང་རིན་པོ་ཆེའི་རྒྱན་ཐམས་ཅད་ཀྱིས་བརྒྱན་
པ། མཚན་དཔེ་རྫོགས་ཤིང་པད་ཟླའི་གདན་ལ་བཞུགས་པ་ཞིག་ལེགས་པར་གསལ་ཐོབ་
ལ། ཁྱེད་རང་གི་ལུས་འདི་ཉིད་ཁང་སྟོང་ཀ་བ་གཅིག་པ་ལྟ་བུ་ཕྱི་གསལ་ནང་གསལ་དྭངས་
གསལ་འོད་ཀྱི་རང་བཞིན་ཅན་ལྟེ་བ་ནས་སྤྱི་གཙུག་གི་བར་དུ་རྩ་དབུ་མ་དྲང་ཐ་ལེའི་ཡར་
ཟུག་ནས་སྤྱི་གཙུག་ཁ་ཡངས་སུ་སོང་བ་རྒྱ་མཐོང་ཁ་ཧ་རེ་ཕྱེས་ཡོད་པ་ལྟ་བུ། སྙིང་ཁའི་ཐད་
ཙམ་གྱི་རྩ་དབུ་མའི་ནང་ན་རྣམ་ཤེས་ཀྱི་ངོ་བོ་མར་མེ་མེ་ལྕེ་ལྟ་བུ་འོད་ལམ་མེ་ཡོད་པ་གཅིག་
གསལ་བཏབ་ནས་གསོལ་བ་འདེབས་པ་འདིའི་རྗེས་ཟློས་མཛོད།
༈ རྗེ་མཚན་ལྡན་གྱི་བླ་མ་རིན་པོ་ཆེ། །དུས་ད་ལྟར་བྱིན་གྱིས་བརླབ་ཏུ་གསོལ། །འགྲོ་
20-1-403


དྲུག་གི་སྐྱེ་སྒོ་བཀག་ཏུ་གསོལ། །བར་དོའི་འཁྲུལ་པ་བསལ་དུ་གསོལ། །ཐར་པའི་ལམ་སྣ་
འདྲེན་དུ་གསོལ། །བྱིན་རླབས་ཀྱི་ཚན་ཀ་དབབ་ཏུ་གསོལ། །ཆོས་ཉིད་ཀྱི་དོན་དང་སྤྲད་དུ་
གསོལ། །དུས་ལ་བབ་བོ་ཐུགས་རྗེ་ཅན། ཁྱེད་ཐུགས་ཆོས་ཉིད་ཀྱི་དཀྱིལ་འཁོར་དུ། །བདག་
སོགས་ཀྱི་རིག་པ་དྲི་མེད་ཐིམ། །མཉམ་ཉིད་ཀྱི་ངང་ལས་མ་གཡོས་ཀྱང༌། །མོས་གུས་ཀྱི་ས་
ལམ་བསྒྲོད་པར་ཤོག །ཅེས་གསོལ་བ་བཏབ་པ་ལ་བརྟེན་ནས་བླ་མའི་ཐུགས་ཀ་ནས་འོད་
ཟེར་ལྕགས་ཀྱུ་ལྟ་བུ་ཐུར་དུ་རྒྱུག་ནས་སྙིང་ཁའི་རྣམ་པར་ཤེས་པའི་ངོ་བོ་མར་མེ་མེ་ལྕེ་ལྟ་བུ་
འོད་ལམ་མེ་ཡོད་པ་དེ་ཡར་དྲངས་ནས་རྩ་བའི་བླ་མའི་ཐུགས་ཀར་ཐིམ། བླ་མའི་ཐུགས་དང་
ཁྱེད་རང་གི་སེམས་དབྱེར་མེད་དུ་འདྲེས་ནས་ནམ་མཁའ་ལ་འཇའ་ཡལ་བ་བཞིན་དུ་མོས་
པ་མཛོད། དེའི་ངང་དེར་ཅུང་ཟད་ཅིག་མཉམ་པར་བཞག་གོ །ཕཊ། ཅེས་ལན་གསུམ་བརྗོད་ལ་དབྱིངས་སུ་ཆམ་མེ་བཞག་
གོ །འོ་ཆེ་གེ་མོ་དེ་ལྟ་བུའི་དམིགས་པ་ཡང་ཡང་བྱང་དགོས་པས་སླར་ཡང་དམིགས་པ་འདི་བཞིན་མཛོད། ཁྱེད་རང་གི་སྤྱི་
གཙུག་མདའ་གང་ཙམ་གྱིས་སྟེང་གི་ནམ་མཁའ་ལ་སོགས་གོང་གི་རིགས་འགྲེ། དེ་ལྟ་བུའི་ཚུལ་གྱི་ལན་
གསུམ་ལན་བདུན་ཉེར་གཅིག་སོགས་སྐབས་དང་བསྟུན་པའི་རང་གིས་ཀྱང་ནང་ནུབ་ལ་མ་འཆགས་པར་སྦྱང་བ་དང༌། གཞན་ཚེ་
འདས་པ་ལའང་ལས་ལ་སྦྱར་བ་དེ་བཞིན་དུ་བྱའོ། །ཕྱིའི་སྣང་བ་ཅུང་ཟད་བསྡུས་པའི་སྐབས་སུ་སླེབ་ན་སྙན་ལ་སྐད་གསང་མཐོན་
པོས་བོས་ཏེ། ཁྱོད་བསོད་ནམས་བསགས་པའི་བླ་མ་ཆེ་གེ་མོ་འདི་ན་གྲོང་གི་བྱོན་གདའ། ད་དུང་
མོས་གུས་ཡང་ཡང་སྒོམ་ཤིག །ཅེས་སོགས་སྤྲོ་བ་བསྐྱེད་དུ་བཅུག །དེའི་བར་དུ་རང་གི་ཀྱང་འཕོ་བའི་དམིགས་པ་
ཁོ་ན་སྤོ་ལ་རང་གང་མོས་པའི་ཡི་དམ་མམ་བླ་མའི་ཐུགས་ཀར་འཕོ་བའི་དམིགས་པ་ཡང་ཡང་བསམ་ལ། ཟས་ནོར་གྱི་འདུན་
པ་དང་ཁེངས་དྲེགས་སོགས་མི་བྱེད་པར་ངེས་འབྱུང་དུང་ངེ་བ་དང་སྙིང་རྗེའི་སྒོ་ནས་སྦྱངས་པའི་ཕན་ཡོན་ནི་ཤིན་ཏུ་ཆེ་བར་ཡོད།
ཡི་དམ་ལ་མོས་ནའང་བསྟོད་པའི། ཡི་དམ་ཐུགས་རྗེ་དབང་ཕྱུག་རྣམས། །དུས་ད་ལྟ་བྱིན་གྱིས་བརླབ་
ཏུ་གསོལ། །འགྲོ་དྲུག་གི་སྐྱེ་སྒོ༴ སོགས། མོས་གུས་སོགས་སྔར་བཞིན་སྦྱར་བའི་ཆོག ། ལུགས་སོ་སོར་ནས་བླང་
བའི་འཕོ་བའི་དམིགས་པ་སྒོམ་མྱོང་བའི་མི་ཡིན་ན། ཁོ་རང་སྔར་བསྒོམ་མྱོང་བ་དེ་བསྒོམ་དུ་བཅུག་པས་ཆོག །གཞན་སྔར་དང་
20-1-404


འདྲ། སྔར་ཆོས་ཀྱི་གོ་བ་མེད་པས། དེ་དུས་དམིགས་པ་གསལ་མི་ཐེབས་པ་དང༌། སྔར་གོ་བ་ཡོད་ཀྱང་དེ་དུས་རིག་པ་གསལ་
དྭངས་ཉམས་འདུག་ན། དད་པའམ་སྙིང་རྗེའམ་ངེས་འབྱུང་སོགས་གང་རུང་ཞིག་རྣ་བར་བཤད་ནས་མཚམས་སྦྱོར་གྱིས་སེམས་
དགེ་བ་ཞིག་ཡོད་པར་བྱ། རང་རེས་རྩ་བརྒྱུད་གྱི་བླ་མ་ཡི་དམ་དབྱེར་མེད་དུ་མོས་ལ། དེའང་རང་ངོ་ལ་ཆེར་རེ་བལྟས་ལ། ཕཊ།
ཅེས་དབྱིངས་སུ་ཆམ་ཏེ་སྒྱུར། སྨོན་ལམ་ཡང་ཡང་འདེབས་པ་ཉིད་གནད་ཀྱི་སྙིང་པོ་ཡིན་ནོ། །སྔགས་ཆུ་སོགས་བྱིན། འཐུང་
དུ་བཅུག་ནས། སྐྲ་ཉག་ལན་གསུམ་འཐེན་པར་བྱ། མགྲོན་བུ་ཕོ་ཆེན་བསྲེགས་ཐལ། རྡོ་ཁབ་ལེན། རྒྱ་ཚ་ཚལ། ཅུ་གང་རྣམས་
ཀྱི་ཕྱེ་མ་སྦྲང་སྙོན་ལ་སྦྱོར་བའང་སྤྱི་གཙུག་གི་མཐིལ་དུ་བྱུགས། སྤྱི་བོའི་སྟེང་གི་ནམ་མཁར་སྒྲ་སྙན་པ་ཅུང་ཟད་ཅིག་ཡོད་པར་
བྱ། སྐབས་ཐམས་ཅད་དུ་སྨོན་ལམ་ཡང་ཡང་འདེབས་པ་གནད་དུ་ཆེ། སྔགས་ཆུའི་སྒོམ་བཟླས་བྱེད་ཚུལ་ནི། རང་ཉིད་ལྷ་
མོ་ཡེ་ཤེས་དབང་ཕྱུག་མ་དཀར་མོ་ཁ་ཊྭཱཾ་ག་དང་ཐོད་པ་འཛིན་པ་ཞི་མ་ཁྲོ་དབུ་སྐྲ་དམར་སེར་
དར་དང་རིན་པོ་ཆེ་དང༌། རུས་པས་བརྒྱན་པ་གཅིག་ཏུ་བསྒོམས་ནས། ༀ་ཨཱཿསྭཱཧཱ། སུཾ་ཀྵུ་ཡུཾ་ཧཱུཾ། སྨྼྻུཾ་ཀྵྨྼྻུཾ་ཡྨྼྻུཾ་ཧྨྼྻུཾ་
ཞེས་པ་ལ་སྔོན་དུ་བསྙེན་པ་འབུམ་ཙམ་བཟླས་ལ། དགོས་དུས་སུ་བརྒྱ་རྩ་བཟླ་བའི་སྔགས་ཆུས་འམ་བུམ་ཆུ་ཁོང་དུ་གཏོང་
བ་དང༌། བུ་ག་དགུའམ། ལྟེ་བ་དང་སྙིང་ག་སྨིན་མཚམས་ལ་སོགས་པར་ཐིག་ལེ་ཙམ་བྱས་པས་ཀྱང་ངན་སོང་གི་སྒོ་ཁེགས་པར་
བཤད་དོ། །འཕོ་བ་ཉེར་མཁོ་འདི་ཡང་རྒྱལ་ཁམས་པ་ཏཱ་ར་ནཱ་ཐས་སྨྲས་པའོ།། །།
འདིར་བཞེང་དགེ་བའི་ཟླ་ཟེར་གྱིས། །བསྟན་འགྲོའི་ལེགས་དགེའི་ཀུ་མུད་ཚལ། །ཡོངས་རྒྱས་དགའ་སྟོན་གསར་པའི་
དཔལ། །སྲིད་མཐའི་བར་ཏུ་ཉམས་མེད་ཤོག །དགེའོ། བཀྲ་ཤིས་པ་གྱུར་ཅིག།
20-1-405


༄༅། །ཕྱིར་བཟློག་དྲུག་གི་ཁྲིད་ཡིག་ཚིགས་
བཅད་མ་ཞུགས།
༄༅། །ན་མོ་མཉྫུ་ནཱ་ཐ་ཡ། རིས་མེད་རྡོ་རྗེའི་གསང་གསུམ་དཔའ་བོ་ནི། །གཟུང་འཛིན་
གཡེམ་མའི་ཅོ་འདྲི་ཉིད་ཀྱིས་ཀྱང༌། །ཟུང་འཇུག་རྩེ་དགའི་དགའ་སྟོན་རྒྱས་ནས་སླར། །རང་
བཞིན་བདེ་བའི་ཁྱིམ་དུ་ངལ་བསོས་ཤིག །འདིར་ནི་བླ་མའི་མན་ངག་ཞིག །དྲན་པའི་སྣོད་དུ་
ཅི་གནས་པ། །དེ་ཙམ་ཡི་གེར་འབྲི་བ་ལ། །གྲུབ་པ་རྣམས་ཀྱིས་དགྱེས་པའི་རིགས། །དེ་ཕྱིར་
དམ་ཚིག་མཁྱེན་པ་རྣམས། །མཉེས་ཤིང་བཟོད་པར་གྱུར་ན་ནི། །ཐོས་པ་ཙམ་གྱིས་མཁས་
རློམ་སོགས། ཁམས་གསུམ་གཤེ་བར་གྱུར་ཀྱང་སླ། །དེ་ལ་ཕྱིར་བཟློག་རྣམ་པ་བརྒྱད། །ཕྱི་
ཡི་བར་ཆད་བཟློག་པ་ཡི། །བསམ་གཏན་འཁྲུལ་འཁོར་གཞན་དུ་བཤད། །འདིར་གང་ངེས་
པའི་དོན་བཤད་དོ། །སྟག་དང་ཕག་གི་སྒྲ་དང་ནི། །གཏུན་ཤིང་དང་ནི་མཚོན་ཆའོ། །དགང་
དང་དགུག་དང་གཞོལ་དང་རེངས། །དེ་ལྟར་རླུང་གི་རྣལ་འབྱོར་རོ། །སྟག་གི་སྒྲ་ནི་ཧ་གསུམ་
དང༌། །ཧཱུཾ་གསུམ་ངག་ཏུ་བརྗོད་པར་བྱ། །པུས་མོར་ལག་བཀབ་གྲུ་མོ་ནི། །རྩིབས་ལོགས་ལ་
བརྡེག་ཕག་སྐད་འབྱིན། །ལག་པས་པུས་བཀབ་ལྟེ་འོག་ནི། །གཡས་གཡོན་མདུན་རྒྱབ་སྡེབ་
གཏུན་ཤིང༌། །མཚོན་ཆ་རྟིང་གཡོན་བཤང་ལམ་གཏད། །དེ་མདུན་གཡས་བཞགས་བོལ་
གཉིས་བཟུང༌། །གཡས་གཡོན་དབུས་རྔུབ་རང་ཕྱོགས་བསྐོར། །བགང་བ་ཐུབ་ཚད་རྔུབ་
པ་དང༌། །དགུག་པ་མཆིལ་མ་མིད་པས་མནན། །གཞིལ་བ་རྔུབ་ཆུང་བྱེད་པ་དང༌། །རེངས་
པ་རྩོལ་ཀློད་ཐད་ཀར་བལྟ། །སྦྱོར་བ་བཞི་ལ་དོར་བཟླས་སྦྱོར། །རྩོལ་མེད་རྡོ་རྗེའི་བཟླས་
པའང་བྱ། །ལྟེ་སྙིང་ལྟེ་ལ་ཟླ་བར་ཧཱུཾ། །སྤྱི་བོ་ནས་ནི་རྐང་པའི་བར། །གང་བ་བུམ་ཅན་བསྒོམ་
20-1-406


པའོ། །རྐང་གཉིས་གཡས་གཡོན་གསང་བར་སྲུབས། །ཀུམྦྷ་ཀ་ཡི་བོགས་འདོན་ནོ། །རླུང་
གི་ཕྱིར་བཟློག་གོ །དགའ་དང་སྐྱིད་དང་དགྲ་དང་གདོན། །མྱ་ངན་ནད་དང་མི་སྙན་སོགས། །
ཐམས་ཅད་རང་བཞིན་མ་གྲུབ་པས། །མཉམ་པ་ཉིད་དུ་བལྟ་བར་བྱ། །མཉམ་པ་ཉིད་ཀྱི་ཕྱིར་
བཟློག་གོ །བདེ་སྡུག་ཡ་ང་ངོ་ཚ་དང༌། །ཉོན་མོངས་གང་སྐྱེས་ཐམས་ཅད་ལ། །རང་བཞིན་
གསལ་སྟོང་མེ་ལོང་བལྟ། །རང་ལ་གཅེས་འཛིན་མེད་པར་བྱ། །ལུས་ནི་སངས་རྒྱས་རྣམས་
ལ་འབུལ། །གནོད་བྱེད་རྣམས་ལ་ལུས་ཀྱང་སྦྱིན། །ཐམས་ཅད་སྟོང་པར་ཤེས་པར་བྱ། །དེ་ནི་
མཉམ་ཉིད་ཡེ་ཤེས་སོ། །འདོད་ཆགས་སོ་སོར་རྟོག་པ་སྟེ། །ཕྱག་རྒྱ་བཞི་ལ་སྦྱོར་ཐབས་ཡིན། །
ལྟ་བར་འདོད་པའི་སྨྲ་གཏམ་དང༌། །དྲི་རོ་རེག་དང་གཉིས་སྤྲོད་བཞི། །རེག་དང་བཅུག་དང་
སྐྱོད་དང་མཐར། །ལྷན་སྐྱེས་ཕྱི་ནང་དགའ་བཞི་པོར། །རང་རིག་གསལ་སྟོང་བསྒོམ་པར་
བྱ། །ལས་རྒྱ་ལན་གཅིག་མྱོང་བྱས་ནས། །ཕྱི་ནས་མྱོང་པས་བསྒྲུབ་པར་བྱ། །སྙིང་རྗེ་དང་ནི་
བྱ་བ་ཀུན། །རང་བཞིན་སྟོང་པ་གསལ་རིག་བསྒོམ། །བྱ་བ་གྲུབ་པ་དེ་བཞིན་སྟེ། །མཐའ་
བྲལ་སེམས་ལ་མཐའ་མི་བསྒོམ། །མ་བཅོས་རང་བཞིན་ཉིད་ལས་ནི། ཁྲོ་བོ་བདེ་མཆོག་གར་
མཛད་པ། །ཡིད་གྱི་རང་བཞིན་སྟོང་པར་བསྒོམ། །རང་བཞིན་མེད་ཀྱང་ང་རྒྱལ་ནི། །ཆོས་
དབྱིངས་ཡེ་ཤེས་ཞེས་བྱའོ། །ཡེ་ཤེས་འཁོར་ལོས་ཕྱིར་བཟློག་པའོ། །དགྲ་དང་བགེགས་
སོགས་གནོད་བྱེད་རྣམས། །རང་བཞིན་གྱིས་ནི་མ་གྲུབ་ཀྱང༌། །ལས་ཉོན་གྱིས་ནི་འཁོར་བར་
འཁོར། །དེ་ལ་སྙིང་རྗེ་དྲག་ཏུ་བསྒོམ། །སེམས་ཅན་ཀུན་ལ་བྱང་སེམས་དང༌། །སྙིང་རྗེས་བདེ་
སྡུག་བརྗེ་བར་བྱ། །མི་དང་མི་མ་ཡིན་པ་ལ། །གནོད་པ་མི་བྱ་བརྩེ་བར་བྱ། །མི་འདོད་པ་ཡིས་
ནོན་པའི་ཚེ། །གཞན་གྱི་སྡུག་བསྔལ་བསྡུ་བར་བྱ། །སྙིང་རྗེས་ཕྱིར་བཟློག་པའོ། །ཅི་ཙམ་
གཟུང་འཛིན་སྣང་བ་ཀུན། །ཐམས་ཅད་ཡེ་ཤེས་ཉིད་དུ་ཤེས། །གཉིས་འཛིན་རྒྱུན་ཆགས་
ཐམས་ཅད་བྱུང་། །འཁྲུལ་པ་ཐམས་ཅད་སྐད་ཅིག་ཙམ། །རང་རིག་སྐད་ཅིག་འགྱུར་བ་མེད། །
20-1-407


 སྣང་བ་ཅི་དང་ཅི་ཤར་ལ། །གསལ་ཙམ་དེ་ལ་མཉམ་པར་བཞག །གསལ་སྟོང་ཙམ་ཡང་
མི་བསམ་དང༌། །བདེ་སྡུག་སྣང་ཙམ་ལ་ལྟ་དང༌། །ངོ་བོ་ཁྱད་པར་དཔྱོད་པ་གསུམ། །འདི་
ཡི་གདམས་ངག་ཡིན་ཞེས་ཀྱང༌། །རང་རིག་སྐད་ཅིག་གིས་ཕྱིར་བཟློག་པའོ། །རང་སེམས་
གནོད་བྱེད་སེམས་ལ་ཐིམ། །རང་གཞན་བརྗེ་བའི་དམིགས་པ་བྱ། །ལྷ་སྔགས་གནོད་བྱེད་
ལ་སོགས་པ། །ཐམས་ཅད་འཁྲུལ་པ་ཤེས་པར་བྱ། །འདི་ཉིད་གཉིས་མེད་ཡེ་ཤེས་ལ། །ཀུན་
རྟོག་དྲ་བས་བཅིངས་ནས་ཅི། །གནོད་བྱ་གནོན་བྱེད་ཐམས་ཅད་ནི། །སྒྱུ་མའི་དགྲ་གཉེན་
བཞིན་དུ་བལྟ། །ཐོབ་བྱ་ཐོབ་བྱེད་ཐམས་ཅད་ཀྱང༌། །རྨི་ལམ་རྒྱལ་པོའི་རྒྱལ་སྲིད་བཞིན། །
རེ་དོགས་མེད་པར་བསྒོམ་པར་བྱ། །དྲོད་རྟགས་གང་ལའང་དགའ་མི་བྱ། །གང་ལའང་མ་
ཞེན་སྐྱོན་མི་ལྟ། །རང་སེམས་ལས་གཞན་སངས་རྒྱས་མེད། །གནོད་བྱ་གནོད་བྱེད་ཐོབ་བྱ་
སོགས། །གང་བསམ་རིག་སྟོང་ངང་ལ་བཞག །བདག་བསྟོད་བསྙེམས་འཁྲིག་ཀུན་སྤངས་
སོ། །ལེགས་པ་ཐམས་ཅད་བླ་མའི་དྲིན། །རྐྱེན་ཀུན་ལྷ་དང་བླ་མར་བསྒོམ། །ཡུལ་དང་སྤྱོད་
པ་སྣ་ཚོགས་པས། །ཉམས་ནི་སྣ་ཚོགས་སྤྲོས་བྲལ་བསྒོམ། །སྲིད་ཞི་མཉམ་ཉིད་ཀྱིས་བཟློག་
པའོ། །ལྷ་སྔགས་བླ་མ་ལས་འབྲས་བརྙས་མི་བྱ། །འཇིག་རྟེན་མཐུན་འཇུག་ཀུན་སྤངས་སྨྱོན་
པའི་ཚུལ། །ཆོས་དབྱིངས་རང་བཞིན་ཡེ་ཤེས་གཉིས་བྲལ་བསྒོམ། །ཞེས་པ་འདི་ཡང་ཏཱ་ར་ནཱ་ཐས་སྨྲས་
པ་གྲུབ་པའི་གསུང་བཞིན་རང་ལོ་ཉེར་གཉིས་པ་ལ་བྲིས་པའོ།། །།མངྒ་ལཾ།
20-1-408


༄༅། །ཁྲིད་ཡིག་ཚིགས་བཅད་མའི་ཞལ་ཤེས་བཞུགས།
༄༅། །བླ་མ་ལ་ཕྱག་འཚལ་ལོ། །རླུང་གི་ཕྱིར་བཟློག་གི་སྐབས། ཧ་གསུམ་ལ་ཡིད་
ཀྱིས་ཧཱུཾ་གི་སྒྲར་མོས་ཧ་ཧཱུཾ་དྲུག་ཆར་ལ། ཧཱུཾ་རིང་པོ་དང་ཧོཿཐུང་ངུ་འབྱུང་རྔུབས་དང་སྦྱར་བའི་
རྡོར་བཟླས་བྱ་བ་ཡིན་ལ། ཕག་སྐད་ལ་ཡང་ཧཱུཾ་དང་འདྲ། གྲངས་ངེས་པ་མེད་པ་ཧཱུཾ་གསུམ་གྱི་
སྐབས་ཧཱུཾ་ངག་ཏུ་བརྗོད་པ་ནི། གྲེ་བའི་སྦུབས་ནས་སྣར་འདོན་གྱི་ཁ་ནས་མི་བྱེད་ཕག་སྐད་གྱི་
སྣ་ནས་ངུར་སྒྲ་འདོན་པ་ཡིན། གཏུན་ཤིང་བརྡེབ་པ་བཞི་པོ་ལན་གཉིས་གཉིས་བྱ། མཚོན་
ཆའི་སྐབས་བོལ་གཉིས་ལག་པས་འཛིན། རང་ཕྱོགས་སྐོར་བ་ནི། དཔུང་པ་གཡོན་པས་སྣ་
བུག་གཡོན་བཀབ། གཡས་ནས་རྔུབ། ཁ་སྦྱོར་གྲུབ་མ་ཐག་ལྟོ་བ་གཡས་སུ་བསྐོར། གཞན་
གཉིས་ལའང་ཕལ་ཆེར་འགྲེ། དབུས་གཉིས་ཀ་ལ་རྔུབ་གཡས་གཡོན་སྤེལ་མར་བསྐོར། བཞི་
པོ་གཅིག་རྟིང་ལ་གཅིག་བསྒོམ་པ་ལ་འབད་པ་ཞག་ཉི་ཤུ་ཙམ་བྱ། བར་བར་དུ་རྡོར་བཟླས་
སྤྱི་དང་མཐུན་པ་བྱ་སྟེ་འདི་རྣམས་ལ་དབུ་མ་མི་བསྒོམ། དངོས་གཞི་བུམ་ཅན་སྐབས་དབུ་
མའི་ནང་དུ་ཀྵཱུཾ་དམར་ནག་འོག་དང་དམར་སྐྱ་སྟེང་དུ་བྱ། ཡར་འགྲོ་མར་འགྲོ་མང་པོ་བྱས་ཧཱུཾ་
ལ་ཐིམ་པར་བསྒོམ། འདི་ལའང་རྡོར་བཟླས་སྦྱོར་ན། འདི་དང་ཕྱི་མ་གཉིས་ཀ་སྟེ་གསུམ་ལ་
འབྲུ་གསུམ་སྦྱོར། སྦྱོར་བ་ཕྱི་མ་རྩ་དྲྭ་བ་མ་གཏོགས་གཞན་མི་བསྒོམ། བོགས་འདོན་སྐབས་
རོ་རྐྱང་གསང་གནས་ནས་དབུ་མར་ཐིམ་པར་བསྒོམ། གྲུབ་ལུགས་དེ་ཕྱོགས་ཀྱི་འཕོངས་
ཚོས་དང་རྐང་པ་བཏེག གཅིག་ཤོས་ས་ལ་བཙུགས། གཉིས་ཆར་སྐྱིལ་ཀྲུང་མ་ཞིག་པའོ། །
ལུས་སངས་རྒྱས་ལ་འབུལ་བ་ལ་མཆོད་རྫས་དང་བདུད་རྩིར་བྱས་པར་འབུལ། གནོད་བྱེད་
ལ་གང་འདོད་པ་བཅད་ནས་སྟེར་བའང་མཛད། གཅེས་འཛིན་ནི་རང་ལ་གཅེས་འཛིན་ཏེ། ང་
20-1-409


ཞེས་བཟུང་ནས། ན་ཡིས་དོགས། ཤི་ཡིས་དོགས། སྡུག་གི་དོགས། གཏམ་མི་སྙན་པ་བྱུང་
གི་དོགས། དེའི་ལོགས་ཕྱོགས་རྣམས་ཡོངས་སུ་རེ་བའི་རང་འདོད་ང་མཐོ་ན་དགྲ་དམའ་
ན་སྙམ་པ་སོགས་གང་ཡང་མི་བྱེད་པའོ། ཁྲོ་བོ་བདེ་མཆོག་གར་མཛད་པ་ནི། སྤྲོས་བྲལ་གྱི་
ངང་ནས་ཐོལ་གྱིས་ཤར་བའི་རིག་པ་རང་ཧཱུཾ་མཛད་ལྟ་བུའམ་ཧེ་རུ་ཀར་བསྐྱེད་པའོ། །གཉིས་
འཛིན་རྒྱུན་ཆགས་ནི་ཤར་དུས་ཉིད་ནས་རང་གྲོལ་མ་སོང་བའི་འཁྲུལ་བའི་རབ་རིབ་བོ།
རང་གནོད་བྱེད་ལ་ཐིམ་པའི་མན་ངག་ནི། རང་ལུས་ལ་ནི་གནོད་བྱེད་ཁོ་ཅི་འདོད་པ་གཅིག་
བྱ། སེམས་ཧཱུཾ་གི་རྣམ་པ་དེའི་སྙིང་གར་ཐིམ་པས་རང་སེམས་དང་དེ་དབྱེར་མེད་དུ་སོང༌། དེ་
ནས་སྤྲོས་བྲལ་གྱི་ངང་སྐྱོང༌། ཟབ་གསལ་གཉིས་སུ་མེད་པ་བསྒོམ། རང་གཞན་བརྗེ་བ་ནི།
རང་དང་གནོད་བྱེད་ཅེས་བྱ་བ་དོན་ལ་མེད་ཀྱང་སེམས་ཀྱི་སྣང་བ་ཙམ་ཞེས་ངེས་པས་རང་དེ་
དང་དེ་རུ་བསྒོམ་པའོ། རྐྱེན་ལྷར་སྒོམ་པ་ནི། དགྲ་གདོན་བདེ་སྡུག་ཅིང་བྱུང་ཡང༌། རང་དང་
དེ་གཉིས་ཀ་ལྷའི་སྐུར་ཝལ་གྱིས་མོས། དེ་བླ་མའི་ངོ་བོར་བསྒོམ། མོས་གུས་དུང་དུང་གསོལ་
བ་བཏབ་རང་ལ་ཐིམ། སྤྲོས་བྲལ་གྱི་ངང་སྐྱོང༌། བྱ་བ་སྤྱོད་པ་ཐམས་ཅད་ལ་སྙེམ་ཆོད་ཆོད།
སྣང་སྟོང་ལ་ཅེར་ཅེར་མཉམ་པར་འཇོག །འདིའི་གཙོ་བོ་ཡེ་ཤེས་འཁོར་ལོའི་ཆོས་དབྱིངས་
ཡེ་ཤེས་ཀྱི་ཉམས་ལེན་ཡིན། དེའི་བོགས་འདོན་གྱི་གཙོ་བོ་སོར་རྟོག་ཡེ་ཤེས་ཕྱག་རྒྱའི་རྣལ་
འབྱོར་དང་རླུང་གི་ཕྱིར་བཟློག་གཉིས་ཡིན། གཞན་རྣམས་དེ་དག་གི་ཡན་ལག་ཡིན་ནོ། །
འདིར་དང་པོ་གསུམ་ནང་གི་བྱད་མ་ཕྱིར་བཟློག་སྟེ། ལས་དང་པོ་པ་ལ་ཐུན་དང་རྣལ་འབྱོར་
བ་ལ་ཡང་མཉམ་བཞག་གཙོ་ཆེ། ཕྱི་མ་གསུམ་ཆ་མཉམ། ཐ་མ་འབྲས་བུ་ལ་སྦྱོར་བ་ཡང་
ཉམས་ལེན་ད་ལྟ་བྱེད། འབྲས་བུ་ལ་དམིགས་པ་རེ་དོགས་འགོག་པ་དང༌། འབྲས་བུ་འགྲུབ་
པ་ལ་བར་ཆད་ལམ་དུ་ད་ལྟ་ནས་འཁྱེར་ཚུལ་ཡིན། དེ་ཐམས་ཅད་ལ་སྣང་བ་གང་སྣང་དེས་
རྩལ་མ་འགགས། མ་བཅོས་པ་ལ་གཤིས་ཅིར་ཡང་མ་གྲུབ་པའི་རིག་སྟོང་དེ་གལ་ཆེ་ཤོས་
20-1-410


ཡིན། གཞན་དཀྱུས་ན་གསལ། ངེས་དོན་ཟབ་མོ། བར་ཆད་ཐམས་ཅད་ནང་གི་རྣལ་འབྱོར་
གྱིས་བཟློག་པའི་ཚུལ་ཕྱིར་བཟློག་དྲུག་གི་མན་ངག་ཚིགས་བཅད་མའི་གབ་པ་མངོན་དུ་
གསལ་བའི་ཡིག་ཆུང་འདི་ཡང་ཏཱ་ར་ནཱ་ཐས་རང་ལོ་ཉེར་གཉིས་པ་ལ་བླ་མའི་གསུང་བཞིན་
བྲིས། མན་ངག་གི་ཡི་གེ་འདི་ཤིན་ཏུ་གསང་བ་ཆེན་པོ་ཡིན་པས་གཅེས་པ་བཟུང༌། འདིའི་
གོ་དོན་རྒྱུད་ལས་བསྟན་ཚོད་ཀྱི་མན་ངག་གི་བཤད་པ། མཁས་པའི་རྣར་འོང་ཞིང་ཡིད་ཆེས་
ངེས་པ་རྣམས་ཁྲོ་བོར་རྣམ་རོལ་དུ་བྲིས་ཟིན་ཏོ། །ཨོ་རྒྱན་ལས་བྱུང་མན་ངག་འདི། །གུ་རུ་ལྷོ་
ཕྱོགས་པ་ཡི་དྲིན། །གཞན་དག་མགུ་བ་མ་ཡིན་ཡང༌། །རང་ཉིད་ཡིད་ཆེས་རྨད་དུ་བྱུང༌། ཁྲོ་བོ་
རྣམ་རོལ་དང་མན་ངག་གི་ཡི་གེ་འདི་གཉིས་མི་སུས་ཀྱང་མ་བསྐུལ་ཞིང་བྲིས་པ་ལ་རྗེས་སུ་
ཡི་རངས་པ་ཙམ་ཡང་མི་སྣང་མོད་མཚན་མ་རྙེད་ནས་བརྗེད་ཐོར་བྲིས། །ཀལྱན་ཏིཥྛ། དགེའོ། །
20-1-411


༄༅། །དཔལ་ལྡན་ཀ་ལཱ་པར་འཇུག་པ་ཞེས་བྱ་བ་ཡུལ་རྣམས་ཀྱི་
མཆོག་ཏུ་གྱུར་པ་ཤམ་བྷ་ལར་འགྲོ་ཚུལ་གྱི་ལམ་ཡིག་
འཕགས་པ་དོན་ཡོད་ལྕགས་ཀྱུས་
གསུངས་པ་བཞུགས།
༄༅། །རྒྱ་གར་སྐད་དུ། ཀ་ལཱ་པ་ཨ་ཝ་ཏ་ར། བོད་སྐད་དུ། ཀ་ལཱ་པར་འཇུག་པ། འཇིག་
རྟེན་དབང་ཕྱུག་ལ་ཕྱག་འཚལ་ལོ། །འགྲོ་བའི་མགོན་པོ་ཐབས་དང་ལྡན། །དེ་བཞིན་
གཤེགས་ལ་རབ་བཏུད་ནས། །གང་གིས་དགའ་བའི་གནས་འཐོབ་འགྱུར། །ཐབས་དེ་འདིར་
ནི་བཤད་པར་བྱ། །གཞོན་ནུ་ཟུར་ཕུད་ལྔ་པ་ནི། །ཐུགས་རྗེ་ལྡན་པ་འཇམ་པའི་དབྱངས། །
རྒྱལ་སྲས་སྟོང་ཕྲག་བརྒྱད་དག་དང༌། །ལྷན་གཅིག་འདིར་ནི་རབ་གཤེགས་ནས། །དབང་
ཆེན་ཞེས་བྱ་རི་བོ་ཆེན་པོ་ནི། །ཤར་དང་ནུབ་ཏུ་ཆུ་གཏེར་ཟབ་མོ་གནས། །གང་གི་ཕྱོགས་
གཉིས་མེ་ཏོག་འབྲས་བུས་བརྒྱན། །རིག་འཛིན་རྣམས་ཀྱི་རོལ་པའི་གནས་དེར་བཞུགས། །
ཤེས་བྱ་ཀུན་ལ་མ་ཐོགས་པའི། །སྤྱན་དང་ལྡན་པ་འཇིག་རྟེན་དབང༌། །རྒྱལ་སྲས་བྱེ་བའི་
ཚོགས་བཅས་ལ། །གནས་སྐབས་དེ་ནི་དེ་གཤེགས་ནས། །ལྷ་དང་ལྷ་མིན་འབྱུང་པོའི་དབང༌། །
ལྟོ་འཕྱེའི་བདག་དང་ཀླུ་ཡི་གཙོ། །སྐལ་བཟང་མཐུ་དང་ལྡན་པ་ཡི། །མི་དང་མི་རྣམས་དེར་
འདུས་ལ། །གང་གི་བླ་ན་མེད་པ་མཆོག །གཟི་བརྗིད་ཆེན་པོའི་ཐེག་མཆོག་སྟེ། །བྱེ་བ་ཕྲག་
བརྒྱའི་ཆོས་ཀྱི་གཏམས། །ཡང་དག་བསྒྲོག་ནས་རབ་ཏུ་བསྟན། །བྷ་ཏའི་དུམ་བུ་འཛམ་གླིང་
20-1-412


སྐྱེས། །ཀོ་ས་ལ་དང་ཡངས་པ་ཅན། །ལུས་འཕགས་མཻ་ཐི་ལ་དག་ན། །སྐལ་བཟང་གཅིག་
ཅིག་དེ་དག་ཡོད། །བློ་གྲོས་ཆེ་ལྡན་ལྔ་བརྒྱའི་ནི། །དེ་འདྲའི་གཏམ་ནི་ཡང་ཡང་ཐོས། །གཞན་
ལ་ཕན་བྱེད་རིག་པའི་བློ། །རྨད་བྱུང་མང་པོ་སྐྱེས་པར་གྱུར། །དཀའ་བ་བརྒྱ་ཕྲག་འབད་པ་
ཡིས། །དབང་ཆེན་གྱི་ནི་རི་ལ་སོང༌། །གཞོན་ནུར་གྱུར་པ་མི་སྣང་ནས། །ཕྱག་ན་པདྨའི་ཞབས་
ལ་བཏུད། །ཡང་དག་མཆོད་ནས་རབ་དྲིས་པ། །ཚངས་ལ་སོགས་པ་ལྷས་བརྒྱུད་ཅིང༌། །འགྲོ་
བ་དྲུག་ལ་མཉམ་པར་བརྩེ། །ཐོས་ནས་བདག་ཅག་འདིར་འོང་ལགས། །གང་གི་ཞབས་
བཀྲུའི་ཆུ་འཐུངས་པས། །བདེ་མེད་བདེ་བ་ལྡན་གྱུར་ཞིང༌། །འདོད་པ་དང་ནི་ཐར་པ་འགྲུབ། །
ལྷ་ཡིའང་ལྷ་ཁྱོད་ཕྱག་འཚལ་ལོ། །གང་ཟག་དང་ནི་ཆོས་ལ་སོགས། །འགའ་ཡང་མ་
གཟིགས་དམིགས་སུ་མེད། །འོན་ཀྱང་མི་ཟད་ཐུགས་རྗེ་ཡིས། །ཀུན་ལ་སྐྱོབ་མཛད་འདི་རེ་
མཚར། །འདིར་འོང་འདི་དག་ལ་བརྩེ་བས། །དོན་ཆེན་འགའ་ཞིག་ཞུ་འཚལ་ནི། །ཕྱི་མའི་
དུས་འགར་ཕན་པའི་སླད། །ཡང་དག་གསུངས་པས་བཤད་དུ་གསོལ། །མ་འོངས་པ་ཡི་དུས་
ན་ནི། །རིགས་སྔགས་སྨྲ་བ་ཁས་འཆེ་ཞིང༌། །རྒྱལ་བའི་དགོངས་པ་མི་ཤེས་པ། །དེ་དག་ཕྱིན་
ཅི་ལོག་ཏུ་བལྟ། །གང་ཕྱིར་འདི་དག་ཡོངས་དག་པའི། །ལམ་དུ་ངེས་པར་འཇུག་འགྱུར་པ། །
ཇི་ལྟར་ཕྱུགས་ལ་དབྱུག་པ་ལྟའི། །ཐབས་དེ་གང་ལ་རྙེད་པར་འགྱུར། །དེ་ནས་བཅོམ་ལྡན་
སྙིང་རྗེ་ཆེ། །སྤྱན་རས་གཟིགས་ཀྱི་འདི་སྐད་གསུངས། །འགྲོ་རྣམས་མང་ལ་ཕན་འདོད་པས། །
འདྲི་བ་འདི་ནི་ལེགས་སོ་ལེགས། །དབང་ཆེན་རི་ལ་མཆོད་འོས་པའི། །གཞོན་ནུར་གྱུར་པ་
སྔོན་བཤད་དེ། །དོན་འདི་ཡང་ནི་ལེགས་པར་བསྟན། །མཉམ་མེད་སེམས་ཅན་དོན་བྱེད་
པའོ། །སྐྱེ་བོ་འདི་ལ་ཕན་བྱེད་ཕྱིར། །སྔགས་འཛིན་རལ་པ་གཅིག་མ་ལོངས། །སྙིང་རྗེ་ལྡན་
པ་དོན་ཡོད་པའི། །ལྕགས་ཀྱུ་ཁྱོད་ནི་མཐུ་ཆེན་ལྡན། ཁྱོད་བདག་ཕན་ཚུན་བསྒྲོས་པ་ཡི། །
དོན་ཆེན་འདི་ནི་སྨྲ་བར་གྱིས། །སྟོབས་བཅུ་ལྡན་པའི་བསྟན་པ་ལ། །ཕྱི་མའི་དུས་ན་དོན་
20-1-413


ཆེར་འགྱུར། །འཇམ་དཔལ་རྗེས་སུ་འཇུག་པས་ནི། ཁྱོད་ཀྱང་སྨྲ་བའི་མཐུ་དག་ལྡན། །དེ་
སྐད་གསུངས་ནས་འཇིག་རྟེན་མགོན། །སྟོང་པ་ཉིད་ཀྱི་གནས་ལ་བཞུགས། །དེ་ནས་ཡང་
དེའི་ཚེ་འཕགས་པའི་གཙོ་བོ་དོན་ཡོད་ལྕགས་ཀྱུས་གསུངས་པ། ཕྱི་མའི་དུས་ན་སྣ་ཚོགས་
པའི། །བློ་གྲོས་ངན་པ་བསྐྱེད་པས་ན། །ལྷ་མོ་སྒྱུ་འཕྲུལ་སྲས་ཀྱིས་བསྟན། །ཤིན་ཏུ་ནག་པོའི་
དྲི་མར་བྱས། །བརྗོད་པ་སྣ་ཚོགས་ཐ་དད་དེ། །སྐྱེ་བོ་ཐ་དད་སྤྱོད་ལ་བསྔགས། །དེ་ཕྱིར་དེ་
ལྟར་སྤྱོད་རྣམས་ལ། །དབང་པོ་མེད་པར་རྣམ་པར་འཁྲུགས། །འཇིག་རྟེན་འདས་པའི་དངོས་
གྲུབ་ཀུན། །ནམ་ཡང་ཐོས་པ་མེད་དེ་ནི། །གཞན་ཡང་དཀའ་བས་འགྲུབ་པ་དང༌། །ངལ་བ་
འབའ་ཞིག་བསྐྱེད་པར་བྱེད། །ཤིན་དུ་སྒྲིབ་བྱེད་ཀྱིས་བསྒྲིབས་པས། །ཡི་དྭགས་སོགས་ཀྱང་
ལྐོག་གྱུར་ན། །ལྷ་རྣམས་སྨོས་ཀྱང་ཅི་དགོས་ཏེ། །རྟོག་གེ་ཕྲན་ཚིག་འཇུག་ཤེས་ཉིད། །དེ་
ཙམ་གྱིས་ཀྱང་གྲུབ་པར་བལྟ། །འཕགས་པའི་སྐྱེ་བོ་ཡིད་ཀྱི་ལུས། །མཐོང་བའི་སྤྱོད་ཡུལ་
ནམ་ཡང་ཅི། །དོན་མཆོག་འདོད་པའང་རྙེད་མི་འགྱུར། །འདི་ནི་བྱང་གི་ཕྱོགས་ཆ་ན། །ཀེ་ལ་
ཤ་ཡི་རི་བོའི་ངོགས། །གྲོང་ཁྱེར་ཀ་ལ་པ་ཞེས་ཡོད། །རྟག་ཏུ་བདེ་ཞིང་འབྱོར་བ་ཡིན། །དེ་ན་
རྒྱལ་བའི་སྲས་པོ་མང༌། །མི་བདག་གཙོ་བོ་མཆོག་འཕགས་ཏེ། །དེ་ན་རྟག་ཏུ་ཆོས་དང་ལྡན། །
གཡོ་སྒྱུ་མེད་ཅིང་ཕྲ་མ་མེད། །རིགས་དང་རིགས་མིན་དབྱེན་མེད་དེ། །གཟུགས་ལྡན་སྟོབས་
དང་ལྡན་པ་ཡིན། སྐྱེ་བུའི་བགྲོད་པ་དཔག་ཚད་བཅུ། །རྟ་ཡི་ཉི་ཤུ་པོ་ལྡན་གྱི། །ལྔ་བཅུའི་ལམ་
དེ་ཉིན་གཅིག་ལའོ། །ཡམས་དང་ཉེར་འཚེ་ཡོངས་མེད་དེ། །འཕྲོག་བྱེད་ལག་ན་རྡོ་རྗེ་སོགས། །
ཉིན་རེ་རྟག་ཏུ་བསྲུང་བར་བྱེད། །རྣམ་པར་འདྲེན་པའི་བསྟན་བཅོས་ནི། །ཕྱོགས་དེ་དག་ཏུ་
རྣམ་པར་རྒྱལ། །ཤེས་རབ་ཕ་རོལ་ཕྱིན་མདོ་དང༌། །མདོ་སྡེའི་ལང་ཀའི་གྲོང་དུ་འཇུག།
དགོངས་ངེས་ངེས་པར་སྟོན་པ་དང༌། །འདུས་པ་ཆེན་པོའི་ཚོགས་ཀྱི་སྡེ། །སྒྲིབ་པ་རྣམ་པར་
སེལ་བ་ཡིས། །མངོན་དུ་བྱེད་པའི་དཀོན་མཆོག་སྤྲིན། །བདེན་པའི་ལེའུ་མཆོག་གི་རྒྱུད། །
20-1-414


དྲག་ཤུལ་སྟོབས་དང་ལྡན་པ་ནི། །སོར་མོའི་འཕྲེང་བའི་ཆེད་གསུངས་དང༌། །སྡོང་པོ་བརྒྱན་
པ་ལ་སོགས་པ། །ཐམས་ཅད་ཡུལ་དེ་ལས་རབ་འབྱུང༌། །འོད་དཔག་མེད་པའི་འཇིག་རྟེན་
དང༌། །མངོན་དགའི་བཀོད་པ་གསལ་བ་དང༌། །རྣམ་སྣང་མཛད་པའི་ཞིང་ཁམས་ནི། །རྒྱན་
གྱི་བཀོད་པར་བཅས་པ་དང༌། །སྟུག་པོ་བཀོད་པའི་མདོ་སྡེ་དང༌། །དབང་ཕྱུག་ཆེན་པོའི་
བཤད་པ་ནི། །གནས་གཙང་ཆེན་པོ་ལ་སོགས་པར། །རྡོ་རྗེ་སྙིང་པོའི་བཤད་དེ་ནི། །ཕལ་པོ་
ཆེ་ཡི་མདོ་སྡེ་རྣམས། །ཐམས་ཅད་དེ་ན་རྣམ་པར་དཔྱོད། །གང་ལ་དཔེ་ནི་འབུམ་དྲུག་གིས། །
གསལ་བར་བྱས་པ་ཕྱི་མའི་རྒྱུད། །དེ་བཞིན་གཤེགས་རྣམས་སྙིང་པོའི་དོན། །ཕྱིར་མི་ལྡོག་
པའི་གཏམ་ཡང་ཡིན། །ཕ་རོལ་ཕྱིན་པ་དྲུག་གི་མདོ། །སྟོང་ཕྲག་ལྔ་བཅུར་ལྡན་པ་ཡོད། །རིག་
པ་འཛིན་པའི་སྡེ་སྣོད་ནི། །འབུམ་ཕྲག་ཉི་ཤུ་དེར་སྤྱོད་དེ། །དེ་དག་རྗེས་སུ་འཇུག་པ་ཡིན། །
ངེས་པར་བསྟན་པ་འབུམ་ཕྲག་བརྒྱ། །མཁའ་དང་མཉམ་པ་རྒྱུད་ཀྱི་རྒྱལ། །དངོས་གྲུབ་ངེས་
པར་བསྟན་པ་ཡི། །དགེས་པས་རྡོ་རྗེ་ཆེན་པོ་དང༌། །རྗེས་སུ་རིགས་པ་རྣལ་འབྱོར་རྒྱུད། །བདེ་
གཤེགས་ཀུན་གྱི་འདུས་པ་ནི། །སྟོང་ཕྲག་ཉི་ཤུ་རྩ་ལྔ་པ། །དམ་པ་དང་པོའི་སངས་རྒྱས་རྒྱུད། །
སྒྱུ་འཕྲུལ་དྲྭ་བ་ཉེར་གཉིས་པ། །རྒྱལ་བ་རྒྱ་མཚོ་རྣམ་དབྱེ་བ། །རྣལ་འབྱོར་རྣལ་འབྱོར་མ་
རྒྱུད་ཀྱི། །རྣམ་པར་ཕྱེ་བ་བརྒྱད་པོ་རྣམས། ཁྲི་ཕྲག་གཉིས་དང་སྟོང་ཕྲག་ནི། །གཅིག་སྟེང་
དྲུག་བརྒྱའི་ལྷག་པའི་ལམ། །ལྷག་པའི་བརྒྱ་ཕྲག་མང་པོར་ནི། །ཕྱོགས་དེར་མངོན་གསུམ་
སྤྱོད་པའོ། །ཕྱག་ན་རིན་ཆེན་བློ་ཡི་བདག །སྤོས་ཀྱི་གླང་པོ་མ་ཕམ་པ། །བདེ་ལྡན་དབང་ཕྱུག་
ནམ་མཁའ་མཛོད། །རྡོ་རྗེ་གཟི་བརྗིད་རྡོ་རྗེ་སྙིང༌། །གནོད་སྦྱིན་གཙོ་བོ་ལ་སོགས་པས། །དེ་
རྣམས་རྗེས་སུ་འཇུག་པ་ཡིས། །ཚིག་རྣམས་དུ་མ་རྣམ་པར་ཕྱེ། །ནན་ཏན་ཆེན་པོས་གཏད་
པས་ན། །མ་ལོག་དོན་ཆེན་འཚོལ་བ་རྣམས། །གངས་རིའི་དབང་པོ་དེར་སོང་ནས། །མི་
བདག་གྲུབ་པ་རྣམས་ལ་དྲིས། །གདོན་མི་ཟ་བར་དོན་འགྲུབ་ཉིད། །དེ་ནས་འཕགས་མ་རྡོ་རྗེ་
20-1-415


སྲིན་མོ་རལ་གཅིག་མས་ཞུས་པ། ཀྱཻ་རྒྱལ་བའི་སྲས་པོ་མ་འོངས་པའི་དུས་ལྔ་བརྒྱ་ཐ་མ་ལ།
དེ་བཞིན་གཤེས་པའི་རྗེས་སུ་འཇུག་པ་རྣམས་ཀྱང༌། མུ་སྟེགས་ཅན་གྱི་གསང་ཚིག་འཚོལ་བ་
ལ་མངོན་པར་མོས་པས་མཆོག་ཏུ་གསང་བའི་དོན་ལས་ཕྱིར་ཕྱོགས་པ་དེ་དག་ཡང་དག་པའི་
ལམ་ལ་གཟུང་བ་དང༌། མཆོག་གི་སྐལ་བ་གང་དག་རང་དང་གཞན་ལ་ཕན་པའི་དངོས་གྲུབ་
ཀྱི་རྒྱུར་གྲོང་ཁྱེར་ཀ་ལཱ་པར་འགྲོ་བའི་ཐབས་དེ་ཡང་དག་པར་བསྟན་ཏུ་གསོལ། དགེ་བསྙེན་
རྣམ་པར་མི་རྟོག་པ་ཞེས་བྱ་བ་དང༌། བཟང་པོ་སྦས་པ་ཞེས་བྱ་བ་ལ་སོགས་པ་ལྔ་བརྒྱ་པོ་འདི་
རྣམས་ཀྱི་དངོས་གྲུབ་མཆོག་གི་དོན་དང༌། ཕྱི་མའི་དུས་ཀྱི་རིག་པ་འཛིན་པའི་སྡེ་སྣོད་ལ་
ཞུགས་པ་མང་པོ་དག་གི་བདེ་བར་འགྱུར་བ་དང༌། ཕན་པར་འགྱུར་བ་དང༌། གྲུབ་པ་མཆོག་
ཏུ་གྲུབ་པ་བླ་ན་མ་མཆིས་པའི་སླད་དུ་བཤད་པར་གསོལ། རབ་ཏུ་བཤད་པར་གསོལ།
ལེགས་པར་བཤད་དུ་གསོལ། དོན་ཡོད་ལྕགས་ཀྱུས་གསུངས་པ། སྔགས་རིག་རྣམས་ལ་
ཕན་པའི་ཕྱིར། ཁྱེད་རྣམས་ལེགས་པར་མཉན་པ་དང༌། །ལྔ་བརྒྱའི་ཚོགས་རྣམས་ང་ལ་ཉོན། །
ཕྱི་དུས་དོན་ཆེན་འདིར་འབྱུང་ངོ༌། །འདིར་སྒྲུབ་པ་པོ་གང་ཟག་གི་ལེགས་པའི་ལམ་ལ་
གནས་པ་བླ་ན་མེད་པའི་བྱང་ཆུབ་ཏུ་སེམས་བསྐྱེད་ཅིང༌། དཀྱིལ་འཁོར་དུ་དབང་བསྐུར་བ།
རིག་པའི་ཆོ་ག་ཤེས་ཤིང༌། དམ་ཚིག་ལ་ཡང་དག་པར་གནས་པ། དེ་བཞིན་གཤེགས་པས་
བསྟན་པའི་རྒྱུད་ལ་མངོན་དུ་ཕྱོགས་པ་གསལ་བ། ཡིད་གཞུངས་པ། ཤེས་པ་དང་ལྡན་པ་
དེས། དང་པོར་འདོད་པའི་ལྷ་མཉེས་པར་བྱའོ། །དེའི་འོག་ཏུ་གྱུར་བའམ། རྨི་ལམ་དུ་མཐོང་
བ་ཡིན་ཀྱང་རུང་སྟེ། འདོད་པའི་ལྷ་ལས་ནན་དུ་གནང་བ་ཐོབ་པར་གྱུར་ན། ཀེ་ལ་ཤར་
འཇུག་པའི་ཐབས་ལ་བརྩོན་པར་བྱ་བའི་གཞན་དུ་ན་ཀུན་ནས་ཉོན་མོངས་པར་འགྱུར་རོ། །
རབ་ཏུ་མི་གསལ་བསམ་གཏན་དང༌། །བཟླས་བརྗོད་སྟོབས་ཀྱིས་དམན་པ་དང༌། །མཚན་
མའི་དགེ་བས་བོར་བ་གང༌། །འདོད་པའི་གོ་འཕང་གྲུབ་པ་མེད། །ངན་པའི་ལམ་གྱི་ཁེངས་པ་
20-1-416


དག །ཆོ་ག་ཙམ་གྱི་འགྲུབ་པར་ལྟ། །བྱིས་རྨོངས་འཇིམ་པའི་གོང་བུ་ལ། །འཛེགས་ནས་ཟླ་བ་
འཛིན་པར་འདོད། །ཅི་སྟེ་གནང་བར་གྱུར་ན་འཕགས་པ་འཇམ་དཔལ་གྱི་སྙིང་པོ་འབུམ་
ཕྲག་བརྒྱད་བཟླས་ཤིང༌། ཨུ་དུམ་ཝ་རའི་སྦྱིན་བསྲེག་ཀྱང་ཁྲི་ཕྲག་བརྒྱད་བྱའོ། །བགེགས་
རྣམས་འཇོམས་པའི་དོན་དུ་བདུད་རྩི་འཁྱིལ་བའི་རིག་པ་འབུམ་ཕྲག་བཟླ་ཞིང༌། སྦྱིན་བསྲེག་
ཀྱང་ཁྲི་ཕྲག་གཅིག་གོ །སྡང་བ་ཐམས་ཅད་རབ་ཏུ་འཇིགས་པའི་དོན་དུ་ཁྲོ་བོ་ཆེན་པོ་རབ་ཏུ་
མི་བཟད་པ་གཤིན་རྗེ་མཐར་བྱེད་ཀྱི་རིག་པ་འབུམ་དུ་བཟླ་ཞིང༌། དེ་ནས་ཐོག་མ་ཉིད་དུ་ཀེང་
ཤུ་ཀའི་སྦྱིན་སྲེག་སྟོང་ཕྲག་གཅིག་འབུལ་ལོ། །དེའི་འོག་ཏུ་བཱ་ཊའི་ཤིང་གི་སྟོང་ཕྲག་བཅུའོ། །
དེའི་འོག་ཏུ་ནི་ཙནྡན་དམར་པོ་དང༌། ཨ་བྷ་རའི་ཁུ་བ་ལ་སོགས་པ་རྨད་དུ་བྱུང་བའི་གཏོར་
མ་དང་སྦྱིན་སྲེག་སྟོང་ཕྲག་བཅུས་མཉེས་པར་བྱ། དེ་ཐམས་ཅད་དུ་འདོད་པའི་དོན་ལ་གསོལ་
བ་གདབས་པར་བྱའོ། །སྒྲུབ་པོ་གང་ཟག་གི་ཆོ་ག་རྣམས་བརྩམས་ཤིང༌། རང་ཉིད་དངོས་
གྲུབ་མཆོག་གི་དོན་དང༌། ལྷོ་ཕྱོགས་ཀྱི་སྐྱེ་བོ་མང་པོ་ལ་ཕན་པ་དང་བདེ་བའི་ཕྱིར། གྲོང་ཁྱེར་
ཀ་ལཱ་པར་འཇུག་པར་འདོད་པས། སྡིག་མེད་ཅིང་གཡོ་སྒྱུ་མེད་པ་དེ་དག་ནི་འཆད་པར་
འགྱུར་བའི་རིམ་པ་འདིས། ངེས་པར་དེར་ཕྱིན་པར་འགྱུར་གྱི། བར་མ་དོར་ཉེས་པར་མི་
འགྱུར་རོ། །གལ་ཏེ་བདག་གི་ཚིག་འདི་བརྫུན་པར་གྱུར་ན་བདག་གི་མཚམས་མེད་པ་ལྔ་
བྱས་པར་འགྱུར་རོ། །ཅི་སྟེ་མཆོག་འཁྲུལ་བའམ། སྡིག་པའི་སེམས་དང་ལྡན་པ་གཅིག་ཡིན་
ན་ནི། ཀླུ་ཕྲན་ནམ། ལྟོ་ཕྱེའམ། གནོད་སྤྱིན་ནམ། འབྱུང་པོའམ། ལྷ་གང་དག་གཏུམ་པོ་
རྣམས་ཀྱི་ཆད་པ་ཐོབ་པ་འགྱུར་གྱི་སྒྲུབ་པ་ནི་ནམ་ཡང་མ་ཡིན་ནོ། །
འདི་གྲུབ་པ་ནི་དཀའ་བ་མིན། །འབྱོར་བའི་ཁྱད་པར་གཞན་དང་གཞན། །སྔགས་དང་
རླུང་གི་ལས་རྣམས་ཏེ། །རྒྱུད་ཀྱི་བགྲོད་པ་གཞན་ཡིན་ནོ། །ཤིན་དུ་ཉམས་ཆུང་འདི་མི་འགྲུབ། །
སྒྲུབ་པོ་ནུས་ལྡན་འགྲུབ་འདོད་པས། །མ་གྲུབ་དེ་ལྟར་ལེགས་ཐོབ་འགྱུར། །རིག་པའི་ཆོ་ག་
20-1-417


འདི་ཡིས་སོ། །དེ་ནས་སྒྲུབ་པ་པོ་དེས། གང་དུ་དེ་བཞིན་གཤེགས་པ་རྣམས་མངོན་པར་
རྫོགས་པར་བྱང་ཆུབ་པའི་ཤིང་ཨ་ཤད་ཐ་ལ་མཆོད་པ་སྟོང་གིས་ཡང་དག་པར་མཆོད་ནས།
ལམ་དུ་འཇུག་པར་བྱ་སྟེ། གླིང་འདིའི་ནུབ་ཕྱོགས་ཀྱི་རྒྱ་མཚོར་རཏྣ་སཱ་ག་ར་ཞེས་བྱ་ལ། དེད་
དཔོན་མཆོག་དང་ལྷན་ཅིག་གྲུ་ལ་ཞོན་པས་བྱང་ཕྱོགས་སུ་བགྲོད་དེ། གླིང་སི་ཀོ་དྷ་ར་ཞེས་བྱ་
བ་དང༌། དྷ་ན་ཀོ་ཥ་ཞེས་བྱ་བའི་གླིང་དུ་བགྲོད་པར་བྱའོ། །གླིང་དེའི་ནུབ་ཕྱོགས་ན་ཀླ་ཀློའི་
གྲོང་ཡོད་དེ། སྒྲུབས་པ་པོ་དེར་འགྲོ་བར་མི་བྱ་ཞིང༌། ཤར་གྱི་ཕྱོགས་ལ་ཉེ་བར་བརྟེན་པའི་
གྲོང་ཁྱེར་དུ་ཟླ་བ་དྲུག་སྡོད་པར་བྱའོ། །དེ་ན་བདེ་བར་གཤེགས་པ་གསེར་ཐུབ་ཀྱི་མཆོད་རྟེན་
ཡོད་དེ། དེ་ལ་བསྐོར་བ་སྟོང་ཕྲག་ལྔ་བྱས་ཏེ། དེ་བཞིན་གཤེགས་པའི་ཡི་གེ་བརྒྱ་པ་འདོན་
པར་བྱའོ། །དེ་ནི་འདི་ཡིན་ཏེ། ན་མ་སྟྲཻ་ཡཱ་དྷཱི་ཀ་ནཱཾ། ཏ་ཐཱ་ག་ཏཱ་ནཾ། སརྦ་དྲ་ཨ་པྲ་ཏི་ཧི་ཏ། བིསྟ་
དྷརྨ་ཏཱ་བ་ལིཾ་ནཱ། ༀ་ཨ་ས་མ་ས་མནྟ་ཏོ྅། ཨ་ནནྟ་བཱསྟི་ཤཱ་ས་ན། ཧ་ར་ཧ་ར། སྨ་ར་སྨ་ར་ཎ།
མི་ག་ཏ་རཱ་ག །བུདྡྷ་དྷརྨ་ཏེ་ས་ར་ས་ར། ས་མ་བ་ལ། ཧ་ས་ཧ་ས། དྲ་ཡ་དྲ་ཡ་ག་ག་ན། མཧཱ་བ་
ར་ལཀྵ་ཎེ། ཛྭ་ལ་ཛྭ་ལ་སཱ་ག་རེ་སྭཱ་ཧཱ། དད་པ་སྟོབས་ཞན་དེ་དང་དེས། །ནམ་ཡང་འགྲུབ་པ་
ཡོད་མ་ཡིན། །ཆོ་ག་མི་སྨོད་གཞན་ལ་མིན། །ལྷ་དང་ཆོས་ལ་འཕྱས་མི་གདགས། །ངེས་པར་
འགྲུབ་སྙམ་ཡིད་བརྟན་དང༌། །ཤིན་ཏུ་དད་པའི་ཤུགས་སྟོབས་ཀྱིས། །འབྱོར་བ་དང་ནི་གྲོལ་
བ་སྟེ། །དགེ་ཆོས་འཇོམས་ལ་ནམ་ཡང་མིན། །དེ་ནས་སྒྲུབ་པ་པོ་དེ་གྲུའི་བགྲོད་པས། བྷ་ར་
ཏིའི་དུམ་བུ་འདི་ཉིད་དུ་འོང་བར་བྱ་སྟེ། གཞན་དུ་ན་ནོར་གྱི་མཛོད་ཅེས་བྱ་བའི་གླིང་དེ་ཉིད་
ལས་བྱང་གི་ཕྱོགས་ལ་ཉེ་བར་བརྟེན་པའི། གླིང་གཞན་དང་ཡུལ་མཐའ་གཞན་མང་པོ་དག་
ནི་ལེགས་པར་སྤྱོད་པ་མ་ཡིན་པའི་ཕྱིར་རོ། །སྒྲུབ་པ་པོ་ཀུན་དུ་འཁྱམས་པར་འགྱུར་རོ། །དེ་
ལ་གླིང་འདི་ནི་ཆུ་ཀློང་སྔོན་པོ་ཞེས་བྱ་བའི་མཚོ་དང་འབབ་ཆུ་དག་དང་ཤར་ནུབ་ཏུ་ཐད་
མཉམ་པ་ཡིན་ཏེ། དེའི་ཕྱིར་དབང་པོའི་ཕྱོགས་བོར་ནས་སྒྲུབ་པ་པོ་དབང་ལྡན་གྱི་ཕྱོགས་སུ་
20-1-418


འགྲོའོ། །གྲོང་ཁྱེར་རུག་མ་དང༌། རཱ་པ་རི་དང༌། ཀ་ཊི་ཀཱི་ལ། མ་དྷུ་ཝཱན་དྷ་ལ་སོགས་པ། བྱང་
ཕྱོགས་ནས་བྱང་ཕྱོགས་སུ་ཟླ་བ་དྲུག་ཏུ་བགྲོད་པར་བྱ་སྟེ། དེ་དག་གི་ཕ་རོལ་ན་ཆུ་བོ་ཆེན་པོ་
ས་ཏྲུ་ཞེས་བྱ་བ་དང༌། ཀ་རི། ཀ་ཀཱ་རི་ཞེས་བྱ་བ་གངས་ཀྱི་རི་ཡོད་དེ་དེ་དག་ལས་ཀྱང་བརྒལ་
བར་བྱའོ། །ཡུལ་འཁོར་དེ་རྣམས་ན་གནས་པའི་མི་རྣམས་ནི། དྲང་པོའི་རང་བཞིན་ཅན་གྱི་
ཕྱིར། བགྲོད་པར་དཀའ་བ་མ་ཡིན་ཞིང་འཇིགས་པ་ཡང་མེད་དོ། །རི་དེ་ལ་རུ་ཛ་ན་ཡ་ཞེས་བྱ་
བའི་སྨན་རོ་མཆོག་ཏུ་མངར་བ་དང༌། ཏཱི་ལ་ཀ་ཞེས་བྱ་བ་ཤིན་དུ་ཁ་བ་སྟེ། དེ་དག་ཀྱང་འོ་མ་
ལྟར་འཛག་པ་དག་ཡོད་དོ། །གང་གི་མེ་ཏོག་ཉི་མ་འཆར་ཀའི་མདངས་ལྟར་རབ་ཏུ་དམར་བ།
དེའི་འདབ་མ་ཡང་དགྲ་སྟྭའི་སོ་ལྟ་བུ། ཚེར་མ་རྣོན་པོ་ཅན། ལྷོ་ངོས་སུ་མངོན་དུ་ཕྱོགས་པའི་
བྲག་ལས་འབྱུང་བ་དེ་ནི་རུ་ཛ་ན་མ་ཡིན་ནོ། །ངམ་གྲོག་དག་གི་ངོས་ལ། འཕྱངས་ཞིང་འཕྱང་
ན་མ་ཧེ་མོའི་ནུ་མ་ལྟ་བུའི་མེ་ཏོག་དཀར་པོ་དང་ལྡན་པ་ནི། ཏཱི་ལ་ཀའོ། ། དེ་དག་གི་ཕྱོགས་
བཞིར། རྡོ་རྗེ་སྲིན་པོ་སྟོབས་པོ་ཆེའི་རིག་སྔགས་ལན་བདུན་བཟླ་བཞིན་དུ། ཤིང་བ་ཏ་ལའི་
ཕུར་བུས་བཏབ་ནས། དེ་དག་གི་བ་ཐག་དབྱུང་བར་བྱའོ། །ཞག་བདུན་དུ་དེ་དག་ཡོངས་སུ་
སྐམ་པར་བྱས་ནས། བྲག་གི་ཕུག་པར་བདུད་རྩི་ཐལ་སྦྱོར་བཟླས་པས་བསྲུང་ཞིང་སྦ་བར་
བྱའོ། །ཕྱོགས་དེ་ན་བཙག་ཁ་དོག་ལྔ་པོ་ཡོད་དེ། དཀར་པོ་དང་སེར་པོ་དང་དམར་པོ་དང་
ནག་པོ་དང་ལྗང་ཁུ་དག་སྟེ། དེ་དག་བླངས་ནས་གངས་ཀྱི་ཆུ་བོས་ཁྲུས་བྱས་ནས་རྡོ་ལེབ་
དཀར་པོ་ཞིག་ལ་ལྷ་མོ་འོད་ཟེར་ཅན་མའི་སྐུ་གཟུགས་བྲི་བར་བྱ་སྟེ། མདོག་གསེར་བཙོ་མ་
ལྟ་བུ་ཀ་ར་བཱི་རའི་མེ་ཏོག་ལྟར་དམར་པའི་སྤྱན་གསུམ་པ། གཡས་ཀྱི་ཞལ་དམར་པོ། གཡོན་
གྱི་ཞལ་ནི་ཕག་གི་གདོང་ནག་པོ་རབ་ཏུ་འཁྲོས་པ། དར་སྔོན་པོའི་ག་ཤ་འཕྱང་བ། ནམ་
མཁའི་ཕྱག་རྒྱ་ཅུང་ཟད་གསལ་བར་བྱེད་པའི་ལྷ་དང་ལྷ་མ་ཡིན་དང་དབང་ཕྱུག་རྣམས་དབང་
དུ་བྱེད་པ། ཕྱག་དང་པོ་གཉིས་ཀྱིས་མེ་ཏོག་གི་མདའ་དང་གཞུ་འགེངས་པ། བར་མ་གཉིས་
20-1-419


ཀྱི་ཁབ་དང་སྐུད་པ་དང་མྱ་ངན་མེད་པ་བསྣམས་པ། ཐ་མ་གཉིས་ཀྱིས་ཐོད་པ་དང་ཁ་ཊཱཾ་ག་
ལྟེ་བའི་གཡས་གཡོན་དུ་འཛིན་པ། ཕག་གི་སྟེང་ན་སྡང་བ་དང་གདུག་པ་ཅན་ཐམས་ཅད་
ཡོངས་སུ་གནོན་པ། འདི་ལྟ་བུ་བྲིས་ནས་ཆོ་ག་ཇི་ལྟ་བུས་མཆོད་པ་དང་བཟླས་པ་བྱའོ། །དེ་
ལ་སྔགས་འདི་ཡིན་ཏེ། ན་མོ་རཏྣ་ཏྲ་ཡཱ་ཡ། ཏ་དྱ་ཐཱ། ༀ་བ་ཏཱ་ལི་བ་དཱ་ལི། བ་ར་ལི་བ་ར་ཧ་མུ་
ཁི་སརྦ་དུཥྚན་པྲ་དུཥྚན་བནྡྷ་བནྡྷ་མུ་ཁཾ་སྭཱཧཱ། ཞེས་པ་འདི་ཨ་ཤོ་ཀའི་ཤིང་དང་མེ་ཏོག་དམར་
པོ་བརྒྱ་ཕྲག་ལྔས་སྦྱིན་སྲེག་བྱའོ། །སྙིང་པོའི་སྔགས་འདི་ཡང་ཁྲི་ཕྲག་བཟླས་པ་བྱ་སྟེ། ༀ་
བཛྲ་བྷཻ་ཏཱ་ལི་ཧཱུཾ་ཕཊ། ཚངས་པར་སྤྱོད་ལ་ལེགས་གནས་ནས། །སྙིང་རྗེས་སྒྲུབ་པ་ལེགས་པ་
སྟེ། །གདུག་ལ་གདུག་པ་ངེས་སྦྱོར་ལ། །རྟག་ཏུ་བྱམས་པའི་ཡིད་ཀྱིས་སོ། །གང་གང་འདུལ་
བ་དེ་དང་དེ། །སྔགས་པའི་རབ་སྦྱོར་དེ་དེའོ། །ཉོན་མོངས་སྤྱོད་ལས་ནམ་ཡང་མིན། །ནང་གི་
བདག་ཉིད་དུལ་བས་སོ། །དེའི་འོག་ཏུ་བདུད་རྩི་འཛག་པའི་སྨན་དེ་དག་བཏགས་ཏེ། གངས་
ཀྱི་བ་མེན་དག་གི་འོ་མ་ལྟུང་བ་ཡོངས་སུ་བསྐོལ་ནས་བཅོམ་ལྡན་འདས་མའི་སྤྱན་སྔར་
བཞག་པར་བྱའོ། །སྙིང་པོའི་མཐར་བདུད་རྩི་ཐིགས་པ་སྒྲུབས་ཤིག་ཅེས་སྤེལ་བས། ལན་
སྟོང་དུ་བཟླས་པར་བྱས་ན། ལྷ་མོ་ཡང་དག་པར་མཆོད་དེ་དངོས་གྲུབ་བླངས་ནས་སྨན་བཏུང་
བར་བྱའོ། །ཕྱིས་ནས་སྐུ་གཟུགས་དེ་ཡང་བྱང་ཕྱོགས་ལ་བལྟས་ཏེ་བཞགས་ལ། མེ་ཏོག་དང་
འབྲས་བུ་སྣ་ཚོགས་པས་སྦ་བར་བྱའོ། །དེས་ནི་བཀྲེས་པ་དང༌། སྐོམ་པ་དང༌། ངལ་བ་དང༌།
དུབ་པ་མེད་དེ། ལྷ་མོའི་མཐུ་ལས་བར་དུ་གཅོད་པ་ཐམས་ཅད་ཀྱང་བདག་གི་དབང་དུ་བྱེད་
པར་འགྱུར་རོ། །དེ་ནས་བྱང་ཕྱོགས་སུ་བལྟས་ནས་ཉིན་ལམ་ཉི་ཤུ་རྩ་གཅིག་ཏུ་འགྲོ་བར་བྱ་
སྟེ། ལམ་དེ་ལ་ནི་རྩྭ་ཡང་མེད། ཤིང་འགེལ་བ་ཡང་མེད། ཆུ་ཡང་མེད་དོ། །དེའི་ཕ་རོལ་ན་
ནགས་འཐུག་པོ་དག་ཡོད་དེ། སྦྲུལ་དང་སྟག་ལ་སོགས་པ་གནས་པའི་འབྲོག་དགོན་པའི་
ལམ་ལ་ཉི་མ་བཅུ་གཉིས་འགྲོ་བར་བྱའོ། །དེའི་ཕ་རོལ་ན་རིའི་རྒྱལ་པོ་གནྡྷ་ར་ཞེས་བྱ་བ་
20-1-420


ཡོད་དེ། དཔངས་སུ་དཔག་ཚད་ཉི་ཤུའོ། །རི་དེ་ནི་སྨན་སྣ་ཚོགས་ཀྱི་གང་བ་ཡིན་ནོ། །དེ་ན་ནི་
སེང་གེ་གཤོག་པ་ཅན་དག་གནས་ཏེ། ཉི་མ་རེ་རེར་ཡང་སྲོག་ཆགས་མང་པོ་དག་གསོད་པར་
བྱེད་དེ། དེར་རི་དྭགས་ཀྱི་ཁྱད་པར་ཞིག་ལུས་བསྒྱུར་བ་ཞེས་བྱ་བ་ཡོད་དོ། །དེ་ལུས་ཀྱི་ཁྱད་
པར་རྣམ་པ་སྣ་ཚོགས་པར་བསྒྱུར་པ་ཡིན་ཏེ། དེ་སེང་གེ་དེས་བསད་པའི་ཁྲག་ལས། རྡོ་ལེབ་
ནག་པོ་ལ་སྲིན་མོ་མན་དེ་ཧ་ཞེས་བྱ་བ། རྣམ་པར་གཙིགས་ཤིང་འཇིགས་སུ་རུང་བའི་ལུས་
ཅན། ཁ་དོག་འབར་བ་མི་ཡིས་པགས་པས་སྨད་དཀྲིས་ཤིང༌། ལག་པ་གཡོན་པ་ན་རལ་གྲི་
འཛིན་པ། གཡས་པ་ན་བ་ལང་གི་པགས་པ་གསར་པའི་ནང་དུ་ཤ་ཁྲག་དང་སྙིང་གི་གང་བ་
འཛིན་ཞིང་ཟ་བར་བྲིས་ཏེ། སྣོད་དག་ཏུ་ཤ་ཁྲག་གི་གཏོར་མ་བཤམས་པར་བྱའོ། །བདག་
ཉིད་གཤིན་རྗེ་མཐར་བྱེད་མི་བཟད་པ་དབྱུག་པ་དང་ཞགས་པ་ཐོགས་པ་མ་ཧེ་ལ་གནས་པར་
བྱས་ནས། ༀ་ཧྲཱིཿཀཱ་ལ་རུ་པ་ཧཱུཾ་ཁཾ་སྭཱཧཱ། ཀྲ་ཀ་རེ་ཀྲ་ཀ་རེ། མནྡྷེ་ཧ་རཀྵ་སཱི། ཨཱ་གཙྪ་ཨཱ་གཙྪ་
ཧྲཱིཿཛ་ཞེས་སྟོང་ཕྲག་བཅུར་བཟླས་ནས། དེ་མངོན་དུ་འོང་བར་འགྱུར་ལ། ཁྲག་གི་མཆོད་ཡོན་
དང་ཤའི་གཏོར་མ་དག་སྦྱིན་ལ། ཐོད་པའི་ཕྱག་རྒྱ་བསྟན་ཏེ། ཁྲོ་བོ་ཆེན་པོའི་སྟོབས་ཀྱིས་
གཟིར་བར་བྱའོ། །དེས་ཀྱང་སྒྲུབ་པ་པོ་ཅི་འདོད་ཅེས་སྨྲ་བར་འགྱུར་རོ། །ཀྱཻ་སྲིན་མོ་བདག་
སེམས་ཅན་ཐམས་ཅད་ལ་ཕན་པར་འདོད་པས་བདེ་བར་འདོད་པས། གྲོང་ཁྱེར་ཀ་ལཱ་པར་
འགྲོ་ཡི། ཡུལ་སྟོང་པ་འདི་རྣམས་སུ་ཁ་ཟས་འབྱོར་བར་གྱིས་ཤིག །དེས་ཀྱང་དེ་བཞིན་དུ་
བྱའོ། །དེ་ནས་དེ་མི་སྣང་བར་གྱུར་ཏེ། ཤིང་ཨར་འཇུ་ནིའི་རྩ་བ་ལ། རབ་ཏུ་ཆགས་པ་མེ་ཏོག་
ཀུནྡ་ལྟར་ཁ་དོག་དཀར་བའི་བཅུད་རོ་སྦྲང་རྩི་འདྲ་བ་དག །ཉིན་མོ་དང་ནུབ་མོ་གནས་པའི་
ས་དག་ལ་གནས་པར་འགྱུར་རོ། །དེ་ནས་བྱང་ཕྱོགས་སུ་གངས་ཅན་ཆེན་པོ་ཞེས་བྱ་བའི་རི་
ཡོད་དེ། དཔག་ཚད་བརྒྱ་ཕྲག་གསུམ་གྱི་ཁོར་ཡུག་ཅན་དེ་ན་གནོད་སྦྱིན་རྣམས་དང༌། དཀའ་
ཐུབ་ཅན་རྣམས་དང༌། གྲུབ་པ་རྣམས་དང༌། མིའམ་ཅི་དག་གིས་ཡོངས་སུ་གང་བ་ཡིན་ནོ། །
20-1-421


ཅི་སྟེ་སྒྲུབ་པ་པོ་ཕ་རོལ་གནོན་པའི་རྫུ་འཕྲུལ་དང་ལྡན་པ་ཡིན་ན་ནི། དེར་སོང་ནས་དགའ་
བར་བྱ། རྩེ་བར་བྱ། ལོངས་སྤྱོད་དག་ཀྱང་བྱ་སྟེ། དེ་ནས་མཐར་གྱི་དེ་དག་གི་ཕྲག་པ་ལ་ཐོག་
ནས་གྲོང་ཁྱེར་ཀ་ལཱ་པར་ཡུད་ཀྱི་ཕྱིན་པར་འགྱུར་རོ། །ཅི་སྟེ་ཕ་རོལ་གནོན་པའི་སྟོབས་རེ་
མེད་ན་ནི་དེར་འགྲོ་བར་མི་བྱ་སྟེ། རླུང་གི་ཕྱོགས་ཀྱི་ལམ་ཆེན་པོ་རབ་ཏུ་གསལ་བ་ལ་ཉེ་བར་
བརྟེན་ཏེ་མྱུར་བར་འགྲོ་བར་བྱའོ། །སྲིད་གསུམ་གནས་ཀྱི་རྒྱུད་རྣམས་ནི། །བསོད་ནམས་
ཆུང་ཡང་འགྲུབ་པར་སླ། །ཚངས་འཇོམས་དེ་ཡིས་གྲོགས་ཀྱང་བྱེད། །ཆེ་བའི་ཆེ་བའང་རྙེད་
མ་ཡིན། །རྟག་ཏུ་དགེ་བའི་སྟོབས་དང་ལྡན། །བདག་མེད་དོན་གྱི་དེ་ཉིད་རིག །བྱང་ཆུབ་
སེམས་ནི་ཡང་དག་བསྐྱེད། །མཆོག་གི་རིག་སྔགས་དེ་ཡིས་འགྲུབ། །གངས་རི་དེ་ལ་ཤར་
དང་ནུབ་ཏུ་ཆུ་བོ་རབ་ཏུ་འབབ་པའི་གཞི་ལ་ལུ་མ་ཆེན་པོ་སྟོང་ཕྲག་བརྒྱད་ཅུ་དང་ཡོངས་སུ་
འདྲེས་ཏེ། མཚོ་ལྟར་སྣང་ཞིང་རྒྱུ་བ་ཡང་མི་མངོན་པ་ཁ་དོག་དཀར་པོ་སྣང་བ་ཡོད་དོ། །དེ་ལ་
ཆུ་བོ་སི་ཏ་ཞེས་བྱའོ། །ཆུ་ཀླུང་འདི་ནི་དཀྱུས་སུ་དཔག་ཚད་སྟོང་ཕྲག་ཕྱེད་དང་གསུམ་པ།
ཤར་དང་ནུབ་ཏུ་རྒྱ་མཚོ་དུག་ཅན་པ་ལ་སོགས་ཡོངས་སུ་འཇུག་པ། ཞིང་དུ་དཔག་ཚད་ཙམ་
མོ། །ཆུ་འདི་ནི་ཤིན་ཏུ་གྲང་བ་ཡིན་ཏེ། དམྱལ་བའི་འགྲོ་བ་མ་གཏོགས་པ། བྱ་དང་ཉ་ཆུ་སྲིན་
ལ་སོགས་པ་སྲོག་ཆགས་འགའ་ཡང་མེད་དོ། །ཆུ་བོ་དེའི་ཚུར་འགྲམ་ན་ཟངས་ཀྱི་མདོག་ཅེས་
བྱ་བའི་རི། ཕུག་པ་སྟོང་དང་ལྡན་པ་དག་ཡོད་དེ། ཤིང་རི་ཥ་ཀ་དང༌། ཀུ་ལུ་མ་ཀ་དང༌། ཏ་མ་
རུ་དང༌། དེ་བ་ད་རུ་དང༌། ཤུག་པས་ཡོངས་སུ་གང་བ་ཡིན་ནོ། །རི་དེ་ལ་ནི་སྲིན་མོ་གློག་འགྱུ་
མ་ཞེས་བྱ་བ་གནས་ཏེ། དེའི་ཆོ་ག་ལ་ཡང་སྔ་མ་དང་མཚུངས་པ་ལས། ལག་ན་ནི་གཏུན་ཤིང་
འཛིན་པ། གླང་པོ་ཆེན་པོའི་ལུས་ལ་ཟ་བ། ཆར་སྤྲིན་གྱི་མདོག་ཅན་ཏེ། གཉྫ་དང༌། ཧ་རི་ན།
ནགས་ཀྱི་བ་ལངས་དང༌། གླང་པོ་ཆེའི་ཁྲག་རྣམས་ཀྱི་བྲི་བར་བྱ་ཞིང༌། གཏོར་མ་ཡང་དེ་དག་
རྣམས་ཉིད་དོ། །བདག་ཉིད་རྣལ་འབྱོར་ནི་ཁྲོ་བོ་གཤིན་རྗེ་གཤེད་པོ། ཞལ་དྲུག་པ་དུས་
20-1-422


མཐའི་སྤྲིན་དང་མཚུངས་པ། ཞབས་དྲུག་པ། ཕྱག་བཅུ་གཉིས་པ་རལ་གྲི་དང༌། དགྲ་སྟ་དང༌།
གྲི་གུག་དང༌། ག་དཱ་དང༌། འཁོར་ལོ་དང༌། ཏྲི་ཤུལ་ལ་ལ་རྣམས་གཡས་ན་འཛིན་པའོ། །
གཤིན་རྗེའི་དབྱུག་པ་དང༌། དུས་ཀྱི་ཞགས་པ་དང༌། ཁ་ཊྭཱཾ་ག་དང༌། ལྕགས་ཀྱུ་དང༌། ཐོད་པ་
ཁྲག་གིས་གང་བ་དང༌། སྡིགས་མཛུབ་རྣམས་ནི་གཡོན་པ་ནའོ། །རྣམ་པ་འདི་ལྟ་བུ་ལས་
སྔགས་འདི་ཡིན་ཏེ། ༀ་སརྦ་དུཥྚ་སྟམྦྷ་ཡ་ཧཱུཾ། ན་དཱི་ཝཱ་ར་ཎི་ཀུ་མཱ་ར་ཀྲཱི་ཊ་རུ་པི་ཎི་བནྡྷ་བནྡྷ་ས་
མ་ཡ་མ་ནུ་ས་མ་ཕཊ་ཕཊ་སྭཱཧཱ། ཞེས་པའོ། །བི་ཡུ་ཙ་ལ་ཙ་ལ། པྲ་ཙ་ལ་པྲ་ཙ་ལ། བིངུྻ་ཛི་སྭཱཧཱ།
ས་ཧ་པྲ་མུ་ཁ། ས་ཧ་པྲ་བ་ཧ་བེ། ར་ར་ར་ར་རཀྵ་སི་བྷྱོཿབྷྱོཿ ཨ་ཀཪྵ་ཡ་ཛཿ ཞེས་པ་ནི་སྲིན་
མོའི་སྔགས་སོ། །དེ་ནས་སྒྲུབ་པ་པོ་ལམ་སྟོན་ཅིག་ཅེས་བརྗོད་པར་བྱ་སྟེ། དེས་ཀྱང་ཆུ་བོ་སི་
ཏ་ལ་ལམ་སྟོན་པར་འགྱུར་ཏེ། ཆུ་ཀླུང་དེའི་རབ་ཏུ་གྲང་བས་ནི། སའི་སྟེང་གི་གངས་དང་རླུང་
རེག་པ་ཐམས་ཅད་ཀྱང་ཟིལ་གྱིས་གནོན་པའི་ཕྱིར། དགུན་ཟླ་འབྲིང་པོ་ལ་ཡང་ཆབ་བྲོ་བ་
ཆགས་པ་མེད་ན། སྲིན་མོའི་རྫུ་འཕྲུལ་གྱིས། དབྱར་ཟླ་དང་པོའི་ཡང་ཆབ་བྲོམ་ཤིན་དུ་བརྟན་
པར་ཆགས་ནས་སྒྲུབ་པ་པོ་འཇིགས་པ་མེད་པ་ཉིད་ཀྱིས་ཆུ་བོའི་ཕ་རོལ་དུ་འགྲོ་བར་འགྱུར་
རོ། །ཆུ་བོ་འདི་ནི་བྷ་ར་ཏའི་དུམ་བུ་ཞེས་བྱ་བ། གླིང་འདིའི་ཕྱེད་ཀྱི་དབུས་ལ་རྒྱུ་བ་ཡིན་ཏེ།
ལྷོ་དང་བྱང་དུ་ཡུལ་ཆེན་པོ་དགུ་བཅུ་རྩ་དྲུག་དང༌། དགུ་བཅུ་རྩ་དྲུག་དག་གནས་པ་ཡིན་མོད་
ཀྱི། འོན་ཀྱང་ཤར་ནུབ་ཏུ་ནི་བྱང་ཕྱོགས་ལྷག་པར་ཡངས་པ་ཡིན་ནོ། །ཆུ་བོ་དེའི་ཕ་རོལ་ན་
ཤིང་ཀེ་ཏ་དང༌། བཻ་ལ་དང༌། ཀ་བྷི་ཏ་དང༌། པ་རུ་ཥ་དང༌། བ་ད་ར་དང༌། ཀ་སི་ཏ་དང༌། ཨར་
ཛུ་ན་དང༌། ཏ་ལའི་ནགས་ཚལ་དག་ཡོད་དེ། དེར་ཟླ་བ་གཅིག་ཏུ་ངལ་གསོ་བར་བྱ། རྩ་བ་
དང་འབྲས་བུ་དང་ལོ་མ་དང་མེ་ཏོག་དག་ནི་བཅུད་དང་ལྡན་པ་དང་མཐུ་དང་ལྡན་པ་དག་
ཡིན་ནོ། །དེར་ལྷ་མོ་སྐུལ་བྱེད་མའི་རིག་པ་སངས་རྒྱས་བྱེ་བ་ཕྲག་བདུན་གྱིས་བྱིན་གྱིས་
རླབས་པ། ཡི་གེ་དགུ་པའི་གཟུངས་སྔགས་སྟོང་ཕྲག་ལྔ་བཟླས་པས། སྒྲུབ་པ་པོ་རང་གི་ཡན་
20-1-423


ལག་ལས་ཁྲག་ནག་པོ་ནག་པོར་སྣང་བ་དག་ཟག་པར་འགྱུར་རོ། །ཅི་སྟེ་རྨི་ལམ་དུ་དེ་ལྟར་
གྱུར་ན་ཡང་རུང་སྟེ། ལུས་ནད་མེད་ཅིང་སྟོབས་དང་ལྡན་པ་དང༌། ཤིན་དུ་ཡང་བར་འགྱུར་རོ། །
དམ་ཚིག་རྣམ་པར་སྤོང་དང་བླ་མ་སྨོད། །དུས་མིན་འཆི་དང་དམྱལ་བ་བརྒྱད་པར་འགྲོ། །
དཀྱིལ་འཁོར་མ་མཐོང་དབང་བསྐུར་དམན་པ་ཡང༌། །རིག་སྔགས་སྦྱོར་བ་ནམ་ཡང་གྲུབ་པ་
མེད། ཁེངས་ཤིང་ང་རྒྱལ་ཁྲོ་ལ་མི་བདེན་པ། །དངོས་གྲུབ་ཐོབ་ཅེས་རྒྱལ་བས་མི་གསུངས་
ཏེ། །མི་རྟག་སྡུག་བསྔལ་སྟོང་པའི་དོན་སེམས་པ། །མི་དེ་དག་ནི་མྱུར་འགྲུབ་འཕགས་རྣམས་
གསུངས། །རིགས་དང་གཟུངས་དང་ནོར་བུ་དབང་ཕྱུག་དང༌། །ཆོས་དང་རིག་པ་སྔགས་ཀྱི་
མྱོས་པ་སྤངས། །རྨི་ལམ་གཟུགས་བརྙན་དྲི་ཟའི་གྲོང་ཁྱེར་བཞིན། །བྱེད་པོ་བྱ་བ་དང་ནི་ལས་
རྣམས་མཐོང༌། །མ་ཆགས་དུལ་དང་ཡང་དག་མཉམ་པའི་སེམས། །མཆོད་དང་སྦྱིན་པ་བཟོད་
དང་བརྩོན་འགྲུས་བསྐྱེད། །བདག་དང་བདག་གིས་སྤོང་ལ་མངོན་དགའ་བ། །དེ་དག་དངོས་
གྲུབ་མཆོག་ལ་རེག་པར་འགྱུར། །ཡང་དེ་ནས་ནགས་ཚལ་དེ་ལས་ཁདྦུ་ཛའི་འབྲས་བུ་གསེར་
གྱི་མདོག་དང་མཉམ་པར་དག་བླངས་ཏེ། ལམ་རྒྱགས་སུ་འཁུར་བར་བྱའོ། །འདིར་ནི་སྒྲུབ་
པ་པོ་རང་ཉིད་ཀྱིས་ཅི་ཙམ་ལེན་ནུས་པ་དེ་འཁུར་བར་བྱ་བའི་ནམ་ཡང་ལྕིད་ཀྱིས་ནོན་པར་
མི་འགྱུར་བས། མི་ཐེག་པར་དོགས་པ་མི་བྱའོ། །ནགས་དེ་ཉིད་བར་མཚམས་མེད་པར་
གངས་ཀྱི་རི་ཆུང་ངུ་དག་གྲལ་དུ་བསྒྲིགས་པས་ཤར་ནུབ་ཀྱི་རྒྱ་མཚོའི་བར་ཁྱབ་པ་ཡིན་ནོ། །
དེ་དག་ལས་ཆུ་འབབ་པ་ཐམས་ཅད་ཀྱང་ལྷོ་ཕྱོགས་ཀྱི་ངོས་སུ་འབབས་པ་ཡིན་པས། དེ་
དག་ཏུ་ཆུ་མང་པོ་ཅན་ནོ། །རི་དེ་དག་ལས་བརྒལ་ནས་བྱང་ཕྱོགས་སུ་དཔག་ཚད་ལྔ་བཅུ་ཚུན་
ཆད་ན་ནི་འཐུང་དུ་རུང་བའི་ཆུ་མེད་པ་ཡིན་ནོ། །འོན་ཀྱང་སྒྲུབ་པ་པོ་དེ་ལུས་སྟོབས་དང་ལྡན་
པ་དང་ཡང་པའི་ཕྱིར། ཞག་བདུན་དུ་ཐང་ཆེན་པོའི་ཕ་རོལ་དུ་ཕྱིན་པར་འགྱུར་ལ། ཁདྦུ་ཛའི་
འབྲས་བུ་དེ་ཟོས་པའི་བཀྲེས་པ་ཡང་མེད། སྐོམ་པ་ཡང་མེད་དོ། །ཐང་དེ་འདས་པ་ན། སྔོན་
20-1-424


མང་དུ་ཁྱེར་དུ་ཟིན་ཡང་རུང་སྟེ། འབྲས་བུ་དེ་ཡང་ཟད་པར་འགྱུར་རོ། །དེའི་ནུབ་ཀྱི་མཚམས་
ན་རི་བོ་ཤིན་དུ་དཀར་བ་ནགས་ཚལ་ཡིད་དུ་འོང་བ་དུ་མས་མཛེས་པ་ཞིག རྒྱང་རིང་མོ་ནས་
མཐོང་བར་འགྱུར་མོད་ཀྱི། སྒྲུབ་པ་པོ་དེར་འགྲོ་བར་མི་བྱ་སྟེ། དེ་ཅིའི་ཕྱིར་ཞེ་ན། སྲིན་མོ་
ཟངས་ཀྱི་མཆུ་ཅན་ལྔ་བརྒྱ་དག་གནས་ཏེ། ལྷ་མ་ཡིན་གྱི་ཕོ་ཉ་མོ་དེ་དག་གི་སྒྲུབ་པ་པོ་ལ་འཚེ་
བར་བྱེད་པའི་ཕྱིར་རོ། །དེ་ལྟ་བས་ན་བྱང་ཕྱོགས་དྲང་པོའི་ལམ་པོ་ཆེ་བཟུང་ནས་འགྲོ་བར་
བྱའོ། །ཉི་མ་གཅིག་གིས་རི་བོ་ཀི་ཏེ་ར་ཕྱིན་པར་འགྱུར་རོ། །དེ་ཡང་ཁ་དོག་ནག་ཅིང་དམ་པ་
འཇིགས་པ་བསྐྱེད་པར་བྱེད་པ། ཀ་བ་བཙུགས་པ་ལྟ་བུ་དཔག་ཚད་བཅུའི་དཔངས་དང་ལྡན་
པ་ཡོད་དོ། །རི་དེའི་ནང་ནི་གསེར་དངུལ་འབའ་ཞིག་གིས་གང་བ་ཡིན་ཏེ། དེའི་ཕྱོགས་བཞི་
ན་ནི་པདྨ་དང་ཨུཏྤ་ལའི་མཚོ། ངང་པ་དང་ཙ་ཀྲ་བཱ་ག་དང༌། ཀ་རཱནྚ་ལ་སོགས་པ། ཆུ་ལ་རྒྱུ་
བའི་འདབ་ཆགས་གཟུགས་དང་ཁ་དོག་མཛེས་པ་སྐད་སྙན་པས་གང་བ་དག་ཡོད་དོ། །རི་དེ་
ལ་འཇིག་རྟེན་སྐྱོངས་བ་འཕགས་སྐྱེས་པོ་དུས་དུས་སུ་དགའ་ཞིང་བརྩེ་བར་བྱེད་པ་ཡིན་ཏེ།
ལྷ་མིན་གྱི་ལང་ཚོ་མ་དག་དང༌། གདུག་ཅིང་གཏུམ་པའི་ཀླུ་རྣམས་ཀྱི་བུ་མོ་སྡུག་གུ་སྟོང་སྙེད་
ཀྱིས་མཆོད་པར་བྱེད་དོ། །དེའི་འཁོར་དུ་གཏོགས་པའི་ཡི་དྭགས་མཐུ་ཆེ་ཞིང༌། སྡུག་བསྔལ་
ཆེ་བ་མང་པོ་དག་ཀྱང་ཡོད་དེ། དེར་སྒྲུབ་པ་པོ་ཅི་སྟེ་འབྱོར་བར་གྱུར་ན་ནི། རྩ་མདང་འབྲས་
བུ་རྣམས་དང་ན་རི་ཀོ་ལོའི་འབྲས་བུ་རྣམས་དང༌། ཤ་དང་ཉ་ཤ་དག་གི་གཏོར་མ་རྣམ་པ་སྣ་
ཚོགས་པ་དག་བྱའོ། །ཅི་སྟེ་འབྱོར་བ་མ་གྱུར་ན་ཐམས་ཅད་ཡིད་ཀྱིས་བྱའོ། །དེ་ལ་སྔགས་ནི་
འདི་ཡིན་ཏེ། ༀ་བི་བི་བི་བི་བི་རུ་དྷ་ཀ ས་པཱ་རི་ཝ་རེ་བྷྱཿ ཁུ་ནི་ཁུ་ནི་པྲ་ཏོཏ་ཀྵི་པ་ཏ་ཨི་མམ་
པ་ལིཾ་གྲྀཧྞ་གྲྀཧྞ་ས་མ་ཡ་མུ་སྨ་ར་ཧཱུཾ་ཧཱུཾ་ཕཊ་ཕཊ་སྭཱཧཱ། དེ་བཞིན་དུ་སྤོས་དཀར་དང་ཐང་ཆུ་དང་
ཤའི་བདུག་པ་དག་ཀྱང་སྦྱིན་པར་བྱའོ། །དེ་ནས་ནི་དེས་སྲུང་བ་བྱེད་དེ་མིའམ་ཅི་དང༌། ལྷ་
མིན་དང༌། སྲིན་པོ་དང༌། ཡི་དྭགས་དང༌། ཤ་ཟ་དང༌། མཁའ་འགྲོ་མ་རྣམས་ཀྱིས་གནོད་པས་
20-1-425


མི་ཚུགས་པར་འགྱུར་རོ། །འགའ་ཞིག་རྣམ་ཐར་གསུམ་གནས་གཞན་ནི་བརྩེ་བའི་བདག་
ཉིད་དཔའ་བོ་དང༌། །བྱིན་རློབ་རིམ་པ་ཕན་ཚུན་རྒྱུ་དང་འབྲས་བུས་མཁས་པས་རིག་པ་བྱ། །
འདོད་པས་དཔུང་འཇོམས་དེ་ལས་དག་པའི་ལམ་སྟེ་གྲུབ་པ་རྗེས་སུ་འཇུག །མུན་པ་ཉམས་
དང་དགའ་བའི་རྒྱུ་ལས་རབ་བདེ་ཅི་ཕྱིར་ཐོབ་མ་ཡིན། །དེ་ནས་སྒྲུབ་པ་པོ་བྱང་ཕྱོགས་སུ་
སོང་ན། མི་རིང་བ་ན་མེ་ན་ཀོ་ཞེས་པའི་རི་བོ་ཆེན་པོ་ཡོད་དེ། དེ་ནི་ཙམ་པ་ཀ་དང་ཀརྐོ་ལ་
དང༌། མ་ར་ཀ་དང༌། ཀེ་རུ་ཀ་དང༌། ཀིམྦ་ཀ་དང༌། ནཱ་ག་སུཥྤ་དང༌། ཙནྡན་ས་མཆོག་རྣམས་ཀྱི་
ནགས་ཀྱིས་བསྐོར་བ། རིའི་དེ་ཁྲོད་ན་སྲིན་མོའི་བུ་མོ་རྟའི་གདོང་པ་ཅན། ལྷ་མིན་མོ་དག་
དང༌། ཀླུ་ཕྲན་གྱི་དག་གར་དང་དབྱངས་དང་རོལ་མོ་སྣ་ཚོགས་བས་རྟག་ཏུ་རྩེ་བར་བྱེད་པ་
དག་ཡིན། དེར་སྒྲུབ་པ་པོ་བུད་མེད་དེ་དག་ལ་ཆགས་པར་ཡང་མི་བྱ་གླུ་དང་རོལ་མོ་དག་ལ་
ཡང་དགའ་བར་མི་བྱའོ། །གཞན་དུ་ན་བསོད་སྙོམས་དག་བླངས་ཏེ་འགྲོ་བར་བྱའོ། །དེའི་ཕ་
རོལ་ན་ཆུ་བོ་ཆེན་པོ་ཤར་ནས་ནུབ་ཏུ་འབབ་ཅིང༌། རྦ་ཀློང་འཁྲུགས་པ་ཤིན་ཏུ་བགྲོད་དཀའ་
བ་ཡིན་ཏེ། ཆུ་ཀླུང་དེའི་མིང་ནི་ས་ཏྭ་ལོ་ཏ་ན་ཞེས་བྱའོ། །དེ་ལ་ནི་ཉ་རྣམས་ཁ་དོག་སྣ་ཚོགས་
པ་དང༌། གདོང་རྣམ་པ་སྣ་ཚོགས་པ་དག་ཡོད་དེ། སྟག་དང༌། སེང་གེ་དང༌། གུང་དང༌། བ་
ལང་དང༌། སྤྲེའུ་དང༌། ནེ་ཙོ་དང༌། ཁ་དང༌། མིའི་གདོང་པ་ལ་སོགས་པའོ། །ཆུ་ཀླུང་དེའི་
སྐབས་འགའ་ན་ནི། རྡོ་ལས་སྐྱེས་པའི་ནྱ་གྲོ་དྷའི་སྡོང་པོ་ཡལ་གས་ཕན་ཚུན་གྱི་འགྲམ་དུ་
ཁྱབ་པ་དག་ཡོད་དེ། ཤིང་དེ་ལ་བརྟེན་ནས་བསྒྲུབ་པ་པོ་འགྲོ་བར་བྱའོ། །ཡང་ན་ནི་ཉའི་
སྟོབས་ཀྱིས་འགྲོ་བར་བྱ་སྟེ། ཕྱོགས་དེ་དང་ཉེ་བ་ན། ལོ་ཧི་ཏ་ཞེས་བྱ་བའི་རི་དམར་པོ་ཆུང་ངུ་
མང་པོ་དག་ཡོད་དེ། དེ་དག་ལ་ནི་སཱ་ལི་དམར་པོ་དང༌། མུད་ག་དང༌། མན་རུ་བ་དག་མ་རྨོས་
པར་སྐྱེ་བ་ཡིན་ཏེ། དེ་ལ་བླངས་ནས་ཟན་དུ་བཙོས་ཏེ་ཕྱོགས་སུ་ཤིང་ལས་སྦྲང་རྩི་མང་པོ་
ལྟུང་ཀྱང་བླངས་ཤིང༌། དེ་དག་བསྲེས་ཏེ་ནམ་མཁའི་མཛོད་ཅེས་བྱ་བ་འཕགས་པའི་སྔགས་
20-1-426


ཀྱིས་ཡང་དག་པར་སྤེལ་ཞིང་སྦྱངས་ལ་སྔགས་འདིའི་ཉའི་ཚོགས་རྣམས་ལ་གཏོར་མར་སྦྱིན་
ནོ། །ༀ་མཾ་མཾ་མཾ་མཾ་མཾ་མ་ཏ་སྱ་རཱ་ཛ། མ་ཏ་སྱ་ག་ཎ་ས་ཧི་ཧ་བྷུཉྫ་ཧོ་བྷཀྵ་ཧོ། སརྦ་མཧཱ་སྱ་དེ་ཝ་
ཏ་ཨི་མམ་བ་ལིཾ་གྲྀཧྞ་གྲྀཧྞ་ཀ་ར་ཀ་ར། ཀི་རི་ཀི་རི་ཀུ་རུ་ཀུ་རུ་མ་ར་མ་ར་མི་རི་མི་རི་མུ་རུ་མུ་རུ།
མ་མ་ཀཱ་ཏྱཾ་སཱ་དྷ་ཡ། སརྦ་བུདྡྷྱ་ཨཱ་ཛྙཱ་པ་ཡ་ཏི་སྭཱཧཱ། དེ་ལྟར་ལན་ལྔ་བརྒྱས་གཏོར་མ་སྦྱིན་ཞིང༌།
འདོད་པའི་ལྷ་ལ་གསོལ་བ་གདབ་པར་བྱའོ། །དེར་ཉ་རྣམས་ཀྱི་རྒྱལ་པོ་སྒྲུབ་པ་པོའི་མདུན་
དུ་འོང་བ་ལ། སྒྲུབ་པ་པོའི་སྨྲས་པ། ཀྱཻ་ཉའི་རྒྱལ་པོ། སེམས་ཅན་ཐམས་ཅད་ལ་ཕན་པའི་
དོན་དུ་ཁོ་བོ་ནི་གྲོང་ཁྱེར་ཀ་ལཱ་པར་འགྲོ་ཡི། ཆུ་བོའི་ཕ་རོལ་ཏུ་བསྒྲལ་བར་མཛོད་ཅིག།
གནས་འདི་ལ་ནི་དེ་བཞིན་གཤེགས་པ་རྣམས་དབང་བའོ་ཞེས་བརྗོད་པར་བྱའོ། །དེ་ནས་
ཉའི་རྒྱལ་པོ་དེས་སྒྲུབ་པ་པོ་རྒྱབ་ཏུ་ཁུར་ནས་ཆུ་བོའི་ཕ་རོལ་དུ་འགྲོ་བར་འགྱུར་རོ། །ཀ་ཀ་
རིའི་གངས་ཀྱི་བྱང་ཕྱོགས་ནས་ཆུ་བོ་འདིའི་བར་གྱི་ལམ་གང་ཡིན་པ་དེ་དག་ནི། མིའི་འགྲོ་བ་
གནས་པ་མེད་དོ། །གང་མི་མ་ཡིན་པའི་འགྲོ་བ་དང༌། གནོད་སྦྱིན་གཏུམ་པོ་མི་བཟད་པ་དག་
གནས་པ་ཡིན་ནོ། །འོན་ཀྱང་ལམ་འདི་དག་གི་ཤར་དང་ནུབ་ཏུ་དཔག་ཚད་ལྔ་བརྒྱས་བཅད་
པའི་ཕ་རོལ་ན་ནི། གྲོང་དང་གྲོང་ཁྱེར་དང་གྲོང་བརྡལ་དག་ཀྱང་ཡོད་མོད་ཀྱི་ལམ་དེ་དག་
ནས་སོང་ན་ནི་ལོ་བརྒྱ་ཕྲག་གིས་ཀྱང་གྲོང་ཁྱེར་ཀ་ལཱ་པར་ཕྱིན་པར་མི་འགྱུར་ཏེ་ཀུན་ཏུ་
འཁོད་པར་འགྱུར་རོ། །ཆུ་ཀླུང་སཱི་ཏའི་བྱང་ཕྱོགས་དེའི་བར་མཚམས་ཐམས་ཅད་ནི་རི་ཁ་བ་
ཅན་མང་པོས་ཀུན་དུ་གང་བ་ཡིན་ནོ། །འོན་ཀྱང་གངས་ཀྱི་རི་བར་བཅད་པ་ནི་མེད་དོ། །དེ་
ནས་ཆུ་ཀླུང་དེ་ཡོངས་སུ་བརྒལ་བའི་བྱང་ཕྱོགས་ན་ནི། འཛམ་བུའི་གླིང་གི་བྱང་ཕྱོགས་ཀྱི་
གྲོང་ཁྱེར་རྣམས་ཡོད་དེ། ཡུལ་དང་གྲོང་དང་གྲོང་ཁྱེར་དང་གྲོང་བརྡལ་དག་གིས་གང་བ།
རབ་ཏུ་འབྱོར་བ་དང་བདེ་བ་དང་ལོ་ལེགས་པ་ཡིན་ནོ། །
གང་ལ་སྙིང་རྗེའི་བདག་པོ་ནི། །མིག་གསུམ་གཟུགས་ཀྱིས་གནས་པ་སྟེ། །དེ་ཡིས་
20-1-427


གནས་ཀྱིས་མཚན་པས་ན། །ཤམྦྷ་ལ་ཞེས་རབ་ཏུ་གྲགས། །སེང་གེས་མཚན་པའི་རྒྱལ་
མཚན་ནི། །སེང་གེའི་རྒྱལ་མཚན་རབ་གྲགས་ལྟར། །གང་ལ་ཤམ་བྷ་ལས་མཚན་པ། །
ཤམྦྷའི་ཡུལ་ཞེས་དེ་ལ་བརྗོད། །གང་ལ་ཀླ་ཀློ་མེད་པ་དང༌། །བདེན་སྨྲ་བརྫུན་པ་མ་ཡིན་
དང༌། །མུན་པའི་སྟོབས་ནི་ཉམས་གྱུར་ལ། །སྙིང་སྟོབས་ཡོན་ཏན་རྒྱས་པ་ཡིན། །ཆུ་བོ་དེ་དང་
ཀེ་ལ་ཤའི། །བར་གྱི་ཡུལ་ནི་རྣམ་པ་མང་པོ་སྟེ། ཉ་ཞེས་བྱ་བའི་ཡུལ་དཔག་ཚད་ཉི་ཤུའོ། །སུ་
མིན་ཏོ་ཞེས་བྱ་བ་དཔག་ཚད་ཉི་ཤུའོ། །བྷ་ཊ་སྱེ་ན་ཞེས་བྱ་བ་དཔག་ཚད་བརྒྱའོ། །ཙཱི་ན་ཞེས་
བྱ་བ་དཔག་ཚད་སྟོང་སྟེ་དབུས་ཀྱི་ཆ་ལའོ། །བར་དོ་ཞེས་བྱ་བ་དཔག་ཚད་བརྒྱའོ། །ཀུ་རུ་
ཞེས་བྱ་བ་དཔག་ཚད་བརྒྱའོ། །བྷ་དྲ་ཀ་ཞེས་བྱ་བ་དཔག་ཚད་ལྔ་བཅུའོ། །དེ་དག་གི་ཕ་རོལ་
ན། གནྡྷ་ར་ཞེས་བྱ་བ་དཔག་ཚད་ཉི་ཤུའོ། །ཀ་ཤ་ཞེས་བྱ་བ་དཔག་ཚད་ཉི་ཤུའོ། །བྷ་དྲ་ཞེས་
བྱ་བ་དཔག་ཚད་ཉིས་བརྒྱའོ། །མ་ཧཱ་ཙི་ན་ཞེས་བྱ་བ་དཔག་ཚད་སྟོང་སྟེ་དབུས་ཀྱི་ཆ་ལའོ། །
རྡ་ར་རྡོ་རྗེ་ཞེས་བྱ་དཔག་ཚད་བརྒྱ་སྟེ་རིའི་ངོས་ལ་གནས་པའོ། །བྲ་ཀི་ཀ་ཞེས་བྱ་བ་དཔག་
ཚད་ཉིས་བརྒྱའོ། །དེ་དག་གི་ཡང་ཕ་རོལ་ན། མ་ཧི་ཥ་ཀ་ཞེས་བྱ་བ་དཔག་ཚད་ཉིས་བརྒྱའོ། །
མ་ཧི་ལ་ཀོ་ཞེས་བྱ་བ་དཔག་ཚད་སྟོང་སྟེ་དབུས་ཀྱི་ཆ་ལའོ། །བརྣ་ར་ཞེས་བྱ་བ་དཔག་ཚད་
ཉིས་བརྒྱའོ། །སུ་ཏཱ་ཕ་ལ་ཞེས་བྱ་བ་དཔག་ཚད་ལྔ་བརྒྱའོ། །དེ་དག་གི་ཕ་རོལ་ན། ཀ་ཊུ་ཀ་
ཞེས་བྱ་བ་དཔག་ཚད་ལྔ་བཅུའོ། ཁཱ་ར་ཞེས་བྱ་བ་དཔག་ཚད་ལྔ་སྟེ་དབུས་ཀྱི་ཆ་ལའོ། །ཀོམྤ་
ཛི་ཞེས་བྱ་བ་དཔག་ཚད་བརྒྱའོ། །དེ་དག་གི་ཤར་དང་ནུབ་ཀྱི་ཆར་དག་ལ་ཡང༌། ཡུལ་འཁོར་
དང་གྲོང་ཁྱེར་གཞན་དག་ཀྱང་ཡོད་དོ། །དེ་དག་ཆུ་ནི་མང་པོ་དང༌། །མཚོ་དང་མཚོ་བྲན་དུ་
མས་བརྒྱན། །གངས་ཀྱི་རི་དང་རི་བོ་བཟང༌། །སྨན་ལྗོངས་ཉམས་དགའ་དུ་མ་དང༌། །ནགས་
དང་ཀུན་དགའ་ཡིད་འོང་དང༌། །སྨན་རྣམས་དག་གི་གང་བ་ཡིན། །རྒྱལ་པོའི་ཕོ་བྲང་སྣ་
ཚོགས་དང༌། །ཚོང་འདུས་དང་ནི་ཚོང་ཁང་དང༌། །ཟོང་རྣམས་རྣམ་པ་སྣ་ཚོགས་དང༌། །ཡོ་
20-1-428


བྱད་རབ་ཏུ་རྒྱས་པ་ཡོད། །དེ་ན་འཇིགས་པ་འགའ་ཡང་མེད། །ཉམ་ངར་གྱུར་པ་ཡོད་མ་ཡིན། །
འོན་ཀྱང་དེ་ལ་མི་བལྟ་སྟེ། །སྲིད་པས་སྒྲུབ་པོའི་གེགས་བྱེད་དོ། །གྲོང་ཁྱེར་མཆོག་ནི་ཀ་ལྔ་
པ། །འབའ་ཞིག་བསམས་ཏེ་འགྲོ་བར་བྱ། །རྒྱ་ཡུལ་རྒྱ་ཡུལ་ཆེན་པོ་དང༌། །བ་ཡི་ལ་ཀོ་ཁ་ར་
རྣམས། །བྱང་ནས་བྱང་དུ་བགྲོད་བྱ་སྟེ། །ལམ་སྟེར་ཤིན་ཏུ་རིང་པ་ཡིན། །སྟོང་ཕྲག་མང་པོ་དེ་
དག་ཀྱང༌། །སྔགས་ཀྱི་ཤུགས་འཆད་དེ་ཡིས་ནི། །ཞག་བདུན་ཟླ་བ་ཕྱེད་ལ་སོགས། །ཟླ་དྲུག་
ལས་གཞན་ལྷག་པས་མིན། །དེ་རྣམས་ལས་ཀྱང་རབ་བརྒལ་ན། །འབྱུང་ཁུངས་རྣམ་པ་སྣ་
ཚོགས་ཡོད། ཁ་གཅིག་ལ་ནི་དུག་གི་རྒྱུན། ཁྱད་པར་ཁྱད་པར་ལྡན་པ་འབབ། །གསེར་གྱི་
རྡུལ་བརྩེགས་རི་བོ་དང༌། །དེ་བཞིན་དངུལ་དང་ཟངས་ཀྱི་སྟེ། ཁ་ཅིག་ལྕགས་དང་ཨ་བྷ་དང༌། །
རང་ག་བྷང་ག་དེ་བཞིན་ནོ། །དེ་དག་ས་འདི་འཐུག་པོ་དང༌། ཁ་ཅིག་ལ་ནི་དུག་གི་རྒྱུན། །བྱེ་
མ་རྡོ་བས་གཡོགས་པ་ཡིན། །གསེག་མ་རྣམ་པ་སྣ་ཚོགས་དག ཁ་ཅིག་རིན་ཆེན་དུ་མས་ཁྱབ། །
ཡུལ་དེ་དག་གི་ས་ཕྱོགས་ན། །རྩ་དང་ལྗོན་ཤིང་རྣམ་པར་སྤངས། །ནོར་བུ་ཛི་བནྟི་དང་ནི། །
བྱུ་རུ་རྣམ་པ་དུ་མ་སྐྱེས། །གསེར་ལས་འཆི་བར་བྱེད་པའི་ཆུ། །སྨྱོ་བར་བྱེད་པ་དངུལ་ལས་ཏེ། །
གཞན་ནི་སྤུ་དང་པགས་པ་ལྟུང༌། ཁ་ཅིག་དུ་མའི་ནད་རྣམས་སོ། །འབྱུང་ཁུངས་དག་ནས་
དཔག་ཚད་གསུམ། །འདས་ནི་དྲི་བྲལ་ཆུ་ཉིད་དེ། །སྒྲུབ་པོ་སྔགས་ཀྱིས་མཐུ་ཡིས་ནི། །དེ་
ཀུན་ཡོན་ཏན་བྱེད་པ་ཡིན། །གསེར་གྱི་ཚེ་ནི་རིང་པོ་སྟེ། །དངུལ་གྱི་དེ་བཞིན་མདངས་བཟང་
བ། །ལྷག་མ་གང་རྣམས་དེ་རྣམས་ཀྱི། །ནད་ཀུན་འཇིགས་པར་བྱེད་པ་ཡིན། །ཡང་དག་
བརྒལ་པའི་ཕ་རོལ་ན། །རིགས་ལྔ་པ་ཞེས་བྱ་བ་རིན་པོ་ཆེ་དུ་མས་བརྒྱན་པ། ཤིང་ཨརྡ་དང༌།
སལླ་ལ། ཤལྨ་ལི་དང༌། སཱ་ལ་དང༌། ཏ་མ་ལ་དང༌། ད་ཤཱ་མ་དང༌། ནིཥྐ་ར་དང༌། ཨ་མྲ་དང༌།
ཀ་ར་བཱི་ར་དང༌། ཤིང་ལིན་དང༌། བ་ཀུ་ལི་དང༌། གནྡྷ་མོ་ད་ཧ་དང༌། མོ་ད་དྷ་མ་ལ་སོགས་པ་
ལྗོན་ཤིང་རིགས་བརྒྱ་ཕྲག་དུ་མས་གང་བ་ཡིན་ནོ། །རི་དེ་ལ་ནི་མིའམ་ཅི་དང༌། མིའམ་མོ་
20-1-429


དག་འདོད་པའི་ཡོན་ཏན་སྣ་ཚོགས་ཀྱི་བརྩེ་བར་བྱེད་ཅིང༌། རྟག་ཏུ་དགའ་བའི་གནས་པ་
ཡིན་ནོ། །དེ་རྣམས་ཀྱི་སྒྲུབ་པ་པོ་ལ་འདྲིད་པར་བྱེད་པའི་ཕྱིར། རབ་ཏུ་སྙན་པའི་གླུ་དང་རོལ་
མོ་བྱེད་པ་དག་ཀྱང་ཡོད་དོ། །སྡིགས་པའི་ཕྱིར་འཇིགས་པའི་སྒྲ་འབྱིན་པའམ་གཟུགས་སྣ་
ཚོགས་སུ་བསྒྱུར་བ་དག་ཀྱང་ཡོད། རབ་ཏུ་སྐྱོ་བའི་ཕྱིར། དུད་མོ་ལ་སོགས་པ་སྣ་ཚོགས་པ་
སྦྱོར་བར་བྱེད་དོ། །དེ་དག་ལ་སྒྲུབ་པ་པོ་ཆགས་པར་མི་བྱ། འཇིགས་པར་མི་བྱ། སྐྱོ་བར་མི་
བྱ་སྟེ། གཞན་དུ་ན་སྟོང་པ་ཉིད་ཀྱི་གནས་པས་ཟིལ་གྱིས་མནན་ཏེ་འགྲོ་བར་བྱའོ། །གལ་ཏེ་
རྣམ་པ་དེ་ལྟ་བུ་ལས་གཞན་པས་འགྲོ་བ་ནི། སྒྲུབ་པ་པོ་ལ་སྡུག་བསྔལ་ཆེན་པོ་སྟེར་རོ། །དེ་
ནས་རི་བོ་དེ་ཡང་འདས་པ་ན་བྷོ་ཊ་དང༌། སུ་ད་བྷོ་ཊ་དང༌། པྲ་བྷོ་ཊ་ཞེས་བྱ་བའི་ཡུལ་ཆུང་ངུ་
དག་ཡོད་དེ། དེ་དག་ན་ནི་རྡོ་རྗེ་མཁའ་འགྲོ་མ་དག་མིའི་བུ་མོ་རྫུ་འཕྲུལ་ཅན་གྱི་རྣམ་པར་
གནས་སོ། །དེར་སྒྲུབ་པ་པོས་ཞག་བདུན་དུ་གནས་པར་བྱ་ཞིང༌། གསོལ་བ་གདབ་པར་བྱའོ། །
དེ་ནས་དེ་རྣམས་ཀྱི་སྨྲས་པ། ཀྱཻ་སྒྲུབ་པ་པོ་ཁྱོད་ལ་ཅི་ཞིག་དགོས། སྒྲུབ་པ་པོས་སྨྲས་པ།
བདག་གྲོང་ཁྱེར་ཀ་ལཱ་པར་མྱུར་དུ་བགྲོད་པར་མཛོད་ཅིག །དེ་ནས་མི་མོ་རྫུ་འཕྲུལ་དང་ལྡན་
པ་གཅིག་གིས་སྒྲུབ་པ་པོ་ཕྲག་པ་ལ་ཐོགས་ཏེ་དཔག་ཚད་བཞི་ཡི་མཐོ་བའི་གངས་ཀྱི་རི་བོ་
ཆེན་པོ་དང༌། གངས་ཁྲོད་ཀྱི་ལམ་དཔག་ཚད་བརྒྱ་ཕྲག་ལྷག་པ་ཡང༌། ཆུ་ཚོད་གཅིག་གིས་
མངོན་པར་མགྲོད་ནས། །རི་བོ་ཙནྡྲ་ཀ་ལ་ཞེས་བྱ་བ་ཤིང་ཧིན་ཏ་ལ་དང༌། མ་ཏ་ལ་དང༌། ཀོ་
ལ་ཀ་དང༌། སནྡྷུ་ཝ་ར་དང༌། མ་གུ་མ་ལ་དང༌། དྭནྡྲ་དང༌། སོ་མ་ཝརྔྷ་དང༌། ས་མ་ན་དང༌། ནི་
ཙུ་ལད་དང༌། བི་དུརྨ་དང༌། ཏིན་ཏུ་ལ་སོགས་པས་ཡོངས་སུ་གང་བ། སྨན་ལྗོན་ཤིན་ཏུ་
ཉམས་དགའ་བ་དང་བཅས་པ་དེར་ཕྱིན་པར་འགྱུར་རོ། །སྒེག་པའི་གཟུགས་ལའང་དགའ་
མིན་ཏེ། །ཆ་བྱད་འཇིགས་པའང་དེ་བཞིན་ནོ། །རྡོ་རྗེ་མིག་དང་ལྡན་དེ་དག །དགེ་བར་སྤྱོད་
ལ་དགེས་པར་གྲགས། །དེ་དང་སྡིག་ལྡན་རྣམས་ལ་ཡང༌། །སྙིང་རྗེ་ལྡན་རྣམས་མཉམ་པར་
20-1-430


བྱམས། །སྒྲུབ་པོ་རང་ཉིད་སྡིག་པ་ནི། །ཟད་པའི་བདེ་བ་སྣང་བ་ཡིན། །རི་བོ་དེ་ནི་ཤམྦྷ་ལའི་
ཡུལ་མཐའ་ཡིན་ཏེ། ཕྱོགས་ཏེ་འཕགས་པ་བྷྲ་ཀུ་ཊི་ཐོར་ཚུགས་གཅིག་མ་བཞུགས་སོ། །དེ་
ལ་མེ་ཏོག་ཀུན་རྡ་དང་ཀུ་སུམྦྷའི་མེ་ཏོག་གིས་སྦྱིན་བསྲེག་སྟོང་ཕྲག་བརྒྱད་འབུལ་ནས།
དངོས་གྲུབ་ཀྱི་དོན་དུ་གསོལ་བ་བཏབ་སྟེ་འགྲོ་བར་བྱའོ། །དེ་ལས་གངས་ཀྱི་པུཎྜ་རཱི་ཀ་
གཅིག་དག་བླངས་ཏེ། ༀ་ཤྭེ་ཏ་ཤྭེ་ཏ་ཛྭ་ཊི་ནི་ཤུ་ཏི་སྨི་ཏི་བི་ཛ་ཡེ་བྷཾ་སྭཱཧཱ། ཞེས་པའི་རིག་པ་ལྔ་
སྟོང་དུ་བཟླས་ནས་སྤྱི་བོར་བཅིངས་བ་ཙམ་གྱིས་གནོན་སྦྱིན་གཏུམ་པོ་མཐའ་དག་དབང་དུ་
བྱེད་པ་དང༌། ཐམས་ཅད་ལ་འཇུག་པའི་ཤེས་རབ་ཐོགས་པ་མེད་པ་སྐྱེ་བར་འགྱུར་རོ། །དེ་
ནས་བྱང་ཕྱོགས་སུ་སོང་སྟེ། མེ་གྷ་ཀེ་ཏུ་ཞེས་བྱ་བའི་ཡུལ་ལོ། །བི་བི་ཛ་ལ་ཞེས་བྱ་བ། ཁ་དི་
ར་དང༌། ཙནྡན་གྱི་ནགས་ཆེན་པོ་དག་ཡོད་དེ། དེ་ཡང་བགྲོད་པར་བྱ་བ་དཔག་ཚད་བརྒྱ་པ་
ཡིན་ནོ། །དེའི་ཕ་རོལ་དུ་ལྗོངས་ཆེན་པོ་སམ་སུ་ཁ་ཞེས་བྱ་བ་ཡོད་དེ། གང་འཛམ་བུའི་གླིང་
ན་ཡོད་པའི་ཤིང་གིས་རིགས་གང་ཡིན་པ་དེ་ཐམས་ཅད་ཡུལ་དེ་ན་ཡོད་དེ། མ་ལུས་ཤིང་
ལུས་པ་མེད་པས་བརྒྱན་པའོ། །དེའི་ཕ་རོལ་ན་ཀུན་དུ་དགའ་ཞེས་པའི་ནགས་ཡོད་དེ། དེ་
ཡང་འདས་པའི་ཕ་རོལ་ན་གྲོང་ཁྱེར་ཀ་ལཱ་པ་ཡོད་དེ། དེར་སྒྲུབ་པ་པོ་བྱང་ཆུབ་སེམས་དཔའ་
སེམས་དཔའ་ཆེན་པོ་མི་བདག་གི་རྣམ་པ་འཛིན་པ་དེ་ལས་ཆོས་ཉན་པ་ཐོབ་པར་བྱ་བའི་
ཕྱིར། ཕོ་བྲང་ཆེན་པོ་ཀ་ལཱ་པ་དེའི་ཕྱོགས་བཞི་ཀུན་ནས་ཕྱག་འཚལ་བར་བྱ། བདུག་སྤོས་
ཀྱང་བཏུལ་བར་བྱ། མེ་ཏོག་དག་ཀྱང་གཏོར་བར་བྱ་སྟེ། བསྐོར་བ་དག་ཀྱང་བྱ་སྟེ། ཡང་ན་ནི་
ཞག་གཅིག །ཡང་ན་ནི་ཞག་བདུན། ཡང་ན་ནི་ཟླ་བ་ཕྱེད། ཡང་ན་ནི་ཟླ་བ་གཅིག་གོ །དེ་ལྟར་
སྒྲུབ་པ་པོས་ཉིད་ཀྱི་ཇི་ལྟར་སྡིག་པ་ཟད་པར་འགྱུར་བ་དེ་ལྟར་དེ་ལྟར་མི་བདག་བྱང་ཆུབ་
སེམས་དཔའི་བཀའ་ཡིས་གནང་བ་སྦྱིན་ཏེ། གང་གི་ཞབས་ཀྱི་པདྨོའི་དྲུང་དུ་འཁྲིད་པར་བྱེད་
དོ། །གང་གི་ཚེ་སེམས་དཔའ་ཆེན་པོ་མཐོང་བ་དེའི་ཚེ། སེམས་ཤིན་ཏུ་མཉམ་པར་བཞག་པ་
20-1-431


དང༌། གཡོ་བ་མེད་པ་དང༌། དང་བའི་སེམས་ཀྱིས་དབྱུག་པ་འགྱེལ་བ་ལྟ་བུའི་ཡན་ལག་
བརྒྱད་དང་ལྡན་པས་རབ་ཏུ་འདུད་པས། ལན་བརྒྱ་སྟོང་དུ་མར་ཕྱག་བྱའོ། །རིན་པོ་ཆེའི་མེ་
ཏོག་དག་ཀྱང་གཏོང་བར་བྱའོ། །གལ་ཏེ་སྒྲིབ་པ་ཤས་ཆུང་བ་ཞིག་ཡིན་ན་ནི། དེའི་ཞབས་ལ་
མགོ་བོས་གཏུག་པ་ཙམ་གྱིས་འདོད་པའི་དངོས་གྲུབ་ཐོབ་པར་འགྱུར་རོ། །རྣམ་པ་གཞན་ནི་
བྱང་ཆུབ་སེམས་དཔའ་དེའི་བཀའ་ལས་འདོད་པས་དངོས་གྲུབ་ཏུ་འགྱུར་ལ། དེ་བཞིན་དུ་
གཞན་ཡང་དངོས་གྲུབ་ཕྲ་མོ་དག་དང༌། ཤེས་པ་དག་ཀྱང་ཐོབ་པར་འགྱུར་རོ། །ཅི་སྟེ་འཛམ་
བུའི་གླིང་གི་ལྷོ་ཕྱོགས་སུ་སྐྱེ་བོ་མང་པོ་ལ་ཕན་པ་དང་བདེ་བའི་དོན་དུ་ངེས་པར་བསམ་པ་
ཡིན་ན་ནི། དེའི་ཐབས་གང་ཡིན་པ་དེ་ཡང་དྲི་བར་བྱ་ཞིང༌། དེས་ཅི་སྐད་བསྟན་པ་དེ་བཞིན་
དུ་སྒྲུབ་ན་དེ་ཁོ་ན་བཞིན་འགྲུབ་པར་འགྱུར་རོ། །དེ་ནས་སྒྲུབ་པ་པོས་ཡུལ་གྱི་མཆོག་དང་
མཆོག་དེ་དག་བལྟ་བར་བྱ། དེ་བཞིན་གཤེགས་པས་གསུངས་པའི་གླེགས་བམ་དག་ཀྱང་
མངོན་དུ་བྱ། གཙུག་ལག་ཁང་རྣམ་པ་སྣ་ཚོགས་པ་དང༌། མཆོད་རྟེན་རྣམ་པ་དུ་མ་དེ་དག་ལ་
ཕྱག་འཚལ་བར་བྱ། སྨོན་ལམ་ཀྱང་གདབ་པར་བྱའོ། །ཡུལ་དེ་ཟླུམ་བོར་མཉམ་པ་སྟེ། གངས་
དང་ལྡན་པས་བསྐོར་བ་ཡིན། །འབྱུང་པོ་ཡི་ནི་ཕྱོགས་ཆ་ན། །དཔག་ཚད་ལྔ་བཅུར་འཕགས་
པ་ནི། །མཆོག་དང་གྲགས་པ་རབ་ལྡན་པ། །འབྱུང་པོའི་དབང་པོ་མགྲིན་སྔོན་གྱིས། །རྟག་ཏུ་
བརྟེན་ཞིང་དགེ་བའི་ས། །རི་དབང་ཀེ་ལ་ཤ་ཞེས་བྱའོ། །སྣ་ཚོགས་རིག་པ་སྨན་གྱི་ལས། །སྒྱུ་
རྩལ་དབྱེ་བ་གཞན་དང་གཞན། །བཟོ་རྣམས་དུ་མ་མཐའ་ཡས་པ། །ཉིན་དང་ཉིན་ལ་རྟག་ཏུ་
སྦྱོང་། །ཕོ་བྲང་མཆོག་ནི་ཀ་ལཱ་པ། །རིན་ཆེན་སྣ་ཚོགས་ལས་གྲུབ་ཅིང༌། །གྲུ་བཞི་ལྷམ་པའི་
གཞི་ལ་གནས། །ལྷ་ཡི་བཟོ་བོས་བྱས་པ་སྟེ། །གྲོང་ཁྱེར་དེ་ཡི་གཡས་ངོས་ན། །ཙནྡན་ཨ་
དཀར་ནགས་ཀྱི་ཁྱབ། །དྭངས་ཤིང་གསལ་ལ་ཡིད་འོང་བའི། །ཡིད་ཀྱི་མཚོ་དག་ཡོད་པ་
ཡིན། །གང་གི་ཡུལ་དེའི་དབུས་ན་ནི། །དེ་བཤད་དེ་དག་གནས་པའོ། །ནགས་རྣམས་དང་ནི་
20-1-432


ལྗོངས་དག་གི །ཕྲེང་བ་རིམ་པ་གསུམ་གྱིས་མཛེས། །གྲོང་བརྡལ་ཉི་ཤུ་རྩ་བརྒྱད་དང༌། །ཡུལ་
ཕྲན་དུ་མས་རྣམ་པར་བརྒྱན། །ཕྱོགས་མཚམས་ཀྱི་ནི་ལམ་དག་ན། །རྩེ་མོ་བརྒྱ་དང་བརྩེགས་
པ་ཡང༌། །དེ་རྣམས་ལ་ནི་གོ་བགོས་པའི། །སྲུང་བ་པོ་ནི་འབུམ་ཕྲག་ཡོད། །གངས་དང་རི་བོ་
དེ་དག་ལ། །གླང་ཆེན་སྤོས་ཀྱི་གླང་པོ་དང༌། །མཆེ་བ་དྲུག་པ་མུ་ཏིག་ཅན། །ནགས་ཚལ་རི་
དྭགས་དུ་མས་མཛེས། །གདོང་ལྔ་པ་དང་རྐང་བརྒྱ་པ། །གླང་པོའི་གདོང་དང་བྱ་ཚོགས་དང༌། །
འདབ་ཆགས་སྐྱེས་བུའི་ལུས་ཅན་ཡོད། །དབུས་ལས་རྒྱབ་ཀྱི་ཕྱོགས་ཆ་ན། །རྒྱང་གྲགས་
ཚད་ཀྱི་རི་བོ་བཟང༌། །ཚར་དུ་དངར་བ་བཅུར་ཡིན་ཏེ། །བཟང་སྐྱོང་ལྷུན་པོ་རྩེ་འཛིན་དང༌། །
ས་ཡི་སྙིང་བོ་གཙུག་ཕུད་འཛིན། །ཧ་ལ་ཧ་ལ་སྒྲོགས་མཛོད་པ། །ལྕང་ལོའི་བདག་པོ་སྐྲ་ཅན་
མ། །དོན་དམ་ཡང་དག་འཕགས་དེ་བཞིན། །བཅུ་པ་མ་རྒྱལ་བ་ལས་རྒྱལ། །དེ་དག་རྣམས་
ཀྱི་བརྟེན་པ་སྟེ། །བྱེ་བ་ཕྲག་བརྒྱའི་ཆོས་ཀྱི་གནས། །རྟག་ཏུ་བྱང་ཆུབ་སེམས་དཔའ་ནི། །སྟོང་
ཕྲག་བཅུ་བཅུས་བརྟེན་པ་ཡིན། །ཀཻ་ལ་ཤ་ཡི་འགྲམ་ངོགས་ན། །མཁའ་ཁམས་རྡོ་རྗེ་ནམ་
མཁར་གནས། །སྟོང་ཕྲག་བརྒྱད་ཀྱི་སྨན་རྣམས་དང༌། །མཐུ་ལྡན་སྲོག་ཆགས་དུ་མ་དང༌། །མེ་
ཏོག་འབྲས་བུ་ཁྱད་པར་ཀུན། །དེ་ནས་རྟག་ཏུ་སྤྱོད་པ་ཡིན། །མུ་ཏིག་ཟླ་བ་ཆུ་ཤེལ་དང༌། །
དམར་པོ་ཨིནྜ་ནཱི་ལ་དང༌། །མར་ཏ་ཀ་དང་གཡས་སུ་འཁྱིལ། །པུཥྤ་རཱ་ག་བྱུ་རུའི་སྡེ། །ཨདྨ་
གརྦྷ་གསེར་ལ་སོགས། ཁམས་གསུམ་སྣ་ཚོགས་མཐའ་ཡས་ཡོད། །དངུལ་ཆུས་ཁྱད་པར་
མང་པོས་གང༌། །པ་རུ་ཤ་ཀ་བཻ་ཌཱུརྱ། །དེ་ན་རྙེད་པར་དཀའ་མིན་ཏེ། ཁ་ཟས་རོ་བཅུད་སྣ་
ཚོགས་པ། །དེ་དག་མི་འབྱུང་གང་ཡང་མེད། །སྣ་ཚོགས་གོས་ཕྱིར་ཁྱད་པར་ནི། །བསམ་པ་ཇི་
བཞིན་བགོ་བྱེད་དེ། །དགེ་མིན་ལས་ཀྱི་ལམ་བཅུ་པོ། །རྟག་ཏུ་སྤྱོད་པའི་སྐྱེ་བོ་ཉུང༌། །ཕལ་
ཆེར་དགེ་ལ་གནས་པ་ཡིན། །ཐེག་པ་གསུམ་གྱི་ལམ་གནས་པའི། །དྲང་སྲོང་དཔག་ཏུ་མེད་
པས་བརྟེན། །ཐམས་ཅད་ལྷ་ཡི་སྐད་དུ་སྨྲ། །དེ་ན་གནས་པའི་མི་རྣམས་ནི། །ཚེ་ནི་ལོ་བརྒྱ་
20-1-433


ལས་མི་ཐུང༌། །དུས་མིན་འཆི་བ་ཉུང་བ་ཡིན། །རྟག་ཏུ་འདོད་ལ་དགའ་བར་སྤྱོད། །འོན་ཀྱང་
དགེ་བ་ལས་མི་ཉམས། །ཆོས་དང་འདོད་པ་དེ་བཞིན་གཞན། །ནོར་དང་ཐར་པའི་དོན་ཞེས་
པ། །རྫོགས་ལྡན་བཞིན་དུ་རབ་སྤྱོད་དེ། །འདི་མཚུངས་གཞན་ནི་ཡོད་མ་ཡིན། །རྒྱལ་པོའི་བུ་
ནི་གང་བཙས་པར། །ནོར་བུ་རིན་ཆེན་འོང་འགྱུར་ལ། །ཞག་བདུན་འོད་བཟང་འཕྲོ་གྱུར་པ། །
དེ་ནི་བྱང་ཆུབ་སེམས་དཔར་ཤེས། །གང་གི་སྔོན་དུ་མ་མཐོང་པའི། །མེ་ཏོག་རབ་ཏུ་རྒྱས་པ་
ཆེ། ཁྱིམ་དུ་མངོན་པར་སྐྱེ་འགྱུར་བ། །དེ་ནི་ལྷ་ཡི་ཡན་ལག་མའོ། །མི་བདག་ཡན་ལག་མར་
བཅས་པ། །རྒས་པ་མེད་ཅིང་ན་མེད་དེ། །འཇམ་པོའི་ཁྲིམས་ཀྱིས་རྟག་ཏུ་འཚོ། །འཁོར་ལོས་
སྒྱུར་དང་མཚུངས་པ་ཡིན། །རྟག་ཏུ་བྱང་ཆུབ་སེམས་དཔའ་དང༌། །དྲང་སྲོང་སྔགས་ཀྱི་སྤྱད་པ་
ཅན། །ཡང་དག་རིག་པ་ཉིད་སྟོན་གྱི། །རྟོག་གེའི་བགྲོད་མེད་དེ་མིན་ཙམ། །ལས་རྣམས་རྣམ་
པ་སྣ་ཚོགས་དང༌། །གྲུབ་པ་བརྒྱད་ལ་སོགས་རྣམས་དང༌། །གང་གཞན་དངོས་གྲུབ་སྣ་ཚོགས་
དག །དེར་ནི་མངོན་སུམ་རྙེད་དཀའ་མིན། །ཟླ་བ་རེ་རེར་སྒྲུབ་པ་པོ། །འདི་དེ་འདོད་པའི་
དངོས་གྲུབ་ཅེས། །ཆོས་ཀྱི་དགའ་བའི་གཏམ་ཆེན་པོས། །རྟག་ཏུ་ངོ་མཚར་དགའ་བ་ཡིན། །
ཆགས་བྲལ་བྱེད་དང་དགའ་བ་དང༌། །སྤྱོད་པ་གཅིག་ཏུ་དགེ་བའི་བློས། །དག་པའི་སེམས་
ནི་མཉེས་གཤིན་པ། །སྦྱིན་དང་བཟོད་དང་དུལ་བ་དང༌། །མི་འཚེ་བ་དང་རྩེ་གཅིག་དང༌། །
རིག་དང་ཤེས་དང་ལེགས་པར་ཐོས། །བསམ་གཏན་བཟླས་དང་མཆོད་དེ་བཞིན། །ཡང་
དག་དེ་ཉིད་བསྒོམ་པའོ། །དེ་སྐད་གསུངས་པའི་འདུས་པ་སྟེ། །ཐམས་ཅད་རྗེས་སུ་ཡི་རང་
གྱུར། །སྐལ་བཟང་ལྡན་པ་ལྔ་བརྒྱ་པོ། །ཡང་ཡང་འདུད་ཅིང་བསྐོར་བ་བྱས། །དེ་ནས་བརྩེ་
ལྡན་འཇིགས་རྟེན་མགོན། །རབ་ཏུ་བཞད་ཅིང་ལེགས་སོ་ལེགས། །སྐྱེ་བོ་མང་པོ་གྲོལ་དོན་
དུ། །དོན་ཡོད་ལྕགས་ཀྱུས་འདི་བཤད་དོ། །འཁོར་རྣམས་ཀྱིས་ནི་འདི་བཟུང་ནས། །རྟག་ཏུ་
བྱང་ཞིང་ཆུབ་པར་གྱིས། །བློ་གྲོས་ལྡན་པ་ལྔ་བརྒྱ་པོ། །ཏིང་ངེ་འཛིན་གྱི་ཤུགས་ཐོབ་ནས། །
20-1-434


གྲོང་ཁྱེར་དྲུག་ཏུ་ཡུད་ཀྱིས་སོང༌། །ཐེག་ཆེན་ཆོས་ནི་རབ་བཤད་ནས། །རིམ་པའི་ཆོ་ག་འདི་
ཉིད་ཀྱིས། །གྲོང་ཁྱེར་ཀ་ལཱ་པར་སོང་ངོ༌། །དེ་ལས་བརྒྱ་ཕྲག་བཞི་རྣམས་ཀྱིས། །འདོད་པའི་
དངོས་གྲུབ་ཆེན་པོ་ཐོབ། །གང་མིང་རྣམ་པར་མི་རྟོག་པ། །དེ་སོགས་ལྷག་མ་གང་ཡིན་ཏེ། །
ཟབ་དང་རྒྱ་ཆེའི་ཚུལ་རྟོགས་ནས། །གྲོང་ཁྱེར་དྲུག་ཏུ་སླར་ཡང་འོང༌། །དོན་ཡོད་ཞགས་པའི་
མདོ་སྡེ་ནི། །སྟོང་ཕྲག་ལྔ་བཅུ་གཅིག་པ་དང༌། །རིག་པ་མཆོག་གི་འབུམ་སྡེ་སོགས། །གཞན་
ཡང་རིག་སྔགས་སྣ་ཚོགས་དང༌། །རལ་བ་གཅིག་མའི་ཆོ་ག་དང༌། །འཇམ་པའི་རྡོ་རྗེས་
རྟོགས་པ་ནི། །སྟོང་ཕྲག་ཉི་ཤུ་ལྔ་པ་སྟེ། །ཆོ་ག་དུ་མ་རྒྱས་པར་བྱས། །གང་ཞིག་ཀ་ལཱ་པར་
འཇུག་པའི། །ཐབས་འདི་བྲིས་པའི་བསོད་ནམས་ཀྱིས། །འགྲོ་བ་དྲུག་ཏུ་འཁོར་བ་རྣམས༌། །
འཇམ་པའི་དབྱངས་དང་མཚུངས་གྱུར་ཅིག །དཔལ་ལྡན་ཀ་ལཱ་པར་འཇུག་པ་ཞེས་བྱ་བ།
ཐེག་པ་ཆེན་པོའི་ཐབས་ཆོས་ཀྱི་རྣམ་གྲངས་ཇི་སྙེད་པ་རྫོགས་སོ།། །།རྒྱལ་ཁམས་པ་ཏཱ་ར་ནཱ་
ཐས་བལ་པོའི་དཔེ་ལས་བསྒྱུར་བ་སྟེ། དོན་དཀའ་བ་དཀའ་བ་རྣམས་བྲམ་ཟེ་པཎྜི་ཏ་ཀྲཥྞ་
ཞེས་བྱ་བ་ལ་དྲིས་ཤིང་གཏན་ལ་ཕབ་སྟེ་ཞུས་དག་བྱས་པའོ། །ཞུས་སོ། །དགེ་ལེགས་འཕེལ།
སརྦ་མངྒལཾ།