9-1-1a


༄༅། །རྗེ་ཐམས་ཅད་མཁྱེན་པ་ཙོང་ཁ་པ་ཆེན་པོ་བློ་བཟང་གྲགས་པའི་བཀའ་འབུམ་ཏ་པའི་དཀར་ཆག་བཞུགས་སོ།།
9-1-1b


༄༅། །སྭ་སྟི། མ་སྨད་སྙིང་སྟོབས་ལྷོ་ལམ་ལས་འོངས་པའི། །དཔྱད་བཟོད་གཏམ་གྱི་དྲི་བསུང་ཡོངས་རྫོགས་པ། །ལུང་རིགས་མགྱོགས་འགྲོའི་ཤུགས་ཀྱིས་འཛམ་གླིང་ཁྱོན། །ཀུན་
ཁྱབ་འཇམ་མགོན་ཡབ་སྲས་ཞིང་འདིའི་དཔལ། །གང་དེའི་བཞེད་སྲོལ་ཛམྦུའི་གསེར་བཞུན་རྒྱུན། །དབྱིག་ལྡན་སྒེག་མོའི་ལྟེ་བར་ཡུན་འཁྱིལ་སླད། །དགའ་ལྡན་སྐུ་བཅར་དང་ཧན་མཁན་པོ་ཡིས། །འཛད་
མེད་པར་གྱི་ཆོས་སྦྱིན་སྤེལ་བ་ལས། །སྔོན་རབས་མཁས་སྙེམས་མེས་རྒན་རྣམ་དཔྱོད་ཀྱིས། །མ་ལྕིགས་ཁུངས་ལྡན་མདོ་རྒྱུད་དཀའ་གནད་གཟུགས། །རྫོགས་པའི་ལེགས་བཤད་ཀུན་མཐོང་པུསྟ་ཀཿ
ཏ་པའི་ཆོས་ཚན་གྲངས་རིམ་འདི་ན་བསྟར། ། ༼ཏ༽ པར་ཟབ་ལམ་ནཱ་རོའི་ཆོས་དྲུག་གི་ཁྲིད་རིམ་ཡིད་ཆེས་གསུམ་ལྡན་ལ། ༦༠ ནཱ་རོ་ཆོས་དྲུག་གི་དམིགས་སྐོར་མདོར་བསྡུས་རྗེའི་གསུང་བཞིན་སེམས་
དཔའ་ཆེན་པོ་ཀུན་བཟང་པས་བཀོད་པ་ལ། ༢༠ བདེ་མཆོག་ལཱུ་ཨི་པའི་མངོན་རྟོགས་ངག་འདོན་གྱི་ཆོ་གའི་རིམ་པ་ལ། ༡༤ དཔལ་འཁོར་ལོ་བདེ་མཆོག་གི་མངོན་རྟོགས་རྒྱ་ཆེར་བཤད་པ་ལ། ༡༨༤
དཔལ་མངོན་པར་རྟོགས་པའི་འགྲེལ་པ་ཁྱད་པར་གསལ་བྱེད་ལས་ཟུར་དུ་བྱུང་བ་ལ། ༧ མཁའ་འགྲོ་རྒྱ་མཚོ་སྐོར་གྱི་ཟིན་བྲིས་ལ། ༡༠ རྣམ་འབྱོར་དབང་ཕྱུག་ལཱུ་ཨི་པའི་ལུགས་ཀྱི་འཁོར་ལོ་
9-1-2a


སྡོམ་པའི་སྒྲུབ་ཐབས་བདེ་ཆེན་གསལ་བ་ལ། ༣༧ དྲིལ་བུ་ལུས་དཀྱིལ་ལྷན་ཐབས་ལ། ༡༢ རྣལ་འབྱོར་དབང་ཕྱུག་ལུ་ཨི་པའི་ལུགས་ཀྱི་བདེ་མཆོག་རྫོགས་
རིམ་གྱི་རྣམ་བཤད་དངོས་གྲུབ་སྙེ་མ་ལ། ༦༢ དཀར་ཆག་ལ། ༢ བཅས་བསྡོམས་ཤོག་གྲངས། ༤༠༨ བཞུགས།།   །།
9-1-2b


empty page
9-2-1a


༄༅། །ཟབ་ལམ་ནཱ་རོའི་ཆོས་དྲུག་གི་སྒོ་ནས་འཁྲིད་པའི་རིམ་པ་ཡིད་ཆེས་གསུམ་ལྡན་ཞེས་བྱ་བ་བཞུགས་སོ།།
9-2-1b


༄༅། །རྗེ་བཙུན་དམ་པ་རྡོ་རྗེ་འཆང་དང་དབྱེར་མ་མཆིས་པ་རྣམས་ཀྱི་ཞབས་ཀྱི་པདྨོ་ལ་གུས་པ་ཆེན་པོས་ཕྱག་འཚལ་ལོ། །སྐུ་གསུང་ཐུགས་དང་རྫུ་འཕྲུལ་ཀུན་འགྲོ་དང་། །ཅི་འདོད་སྐྱེད་དང་ཡོན་ཏན་དབང་
ཕྱུག་སྟེ། །དབང་ཕྱུག་བརྒྱད་ལྡན་རྡོ་རྗེ་འཆང་དབང་གི། ངོ་བོ་དཔལ་ལྡན་བླ་མའི་ཞབས་ལ་འདུད། །ཤིན་ཏུ་ཟབ་པའི་རྒྱུད་སྡེའི་གནད་བསྡུས་པ། །གྲུབ་པའི་དབང་ཕྱུག་ཏེ་ལོ་ནཱ་རོ་ནས། །རིམ་བཞིན་བརྒྱུད་པ་ནཱ་རོ་ཆོས་
དྲུག་ཅེས། །སྙན་པའི་གྲགས་པས་ཕྱོགས་ཀུན་རབ་ཁྱབ་པའི། །ལམ་འདིར་འབད་ལས་སྐལ་ལྡན་མཐའ་ཡས་ཀྱི། །རྣམ་པར་འདྲེན་པའི་གོ་འཕང་མཐོར་གཤེགས་པའི། །གདུང་རབས་འཛིན་པའི་གསུང་གིས་ནན་
ཏན་དུ། །ཡང་ཡང་བསྐུལ་ཕྱིར་ལམ་དེ་འདིར་བཤད་བྱ། །འདིར་ཟབ་ལམ་ནཱ་རོ་པའི་ཆོས་དྲུག་ཅེས་ཀུན་ཏུ་གྲགས་པའི་གདམས་ངག་འཆད་པ་ལ་གཉིས་ཏེ། གང་ལ་བརྟེན་ནས་ལམ་འདི་སྒོམ་པའི་སྔོན་འགྲོ་དང༌། དེ་ལ་
བརྟེན་ནས་ལམ་འདི་ཇི་ལྟར་བསྒོམ་པའོ། །དང་པོ་ལ་གཉིས། སྔོན་འགྲོ་དང་པོ་ཐེག་ཆེན་ཐུན་མོང་བའི་ལམ་དང༌། ཐུན་མོང་མ་ཡིན་པ་བླ་མེད་ཀྱི་ཐེག་པའི་སྔོན་འགྲོའོ། །དང་པོ་ལ་གཉིས། ལམ་ཐུན་མོང་བ་ལ་སློབ་པ་
9-2-2a


ལུགས་འདི་ལའང་དགོས་པར་བསྟན་པ་དང༌། ལམ་དེ་ལ་བློ་སྦྱོང་བའི་རིམ་པའོ། །དང་པོ་ནི། ལམ་འདི་ལ་ཕ་རོལ་ཏུ་ཕྱིན་པའི་ཐེག་པ་དང༌། སྔགས་ཀྱི་ཐེག་པ་གཉིས་ཀྱི་ཐུན་མོང་གི་ལམ་ལ་སྦྱོང་བའི་རིམ་པ་
རྣམས་ངེས་པར་དགོས་ཏེ། རྗེ་མར་པའི་རྒྱུད་ཀྱི་བཤད་སྲོལ་འཛིན་པའི་བླ་མ་རྔོག་པ་སོགས་ཀྱིས། བརྟག་གཉིས་ལས། དང་པོར་གསོ་སྦྱོང་སྦྱིན་པར་བྱ། །ཞེས་པ་ནས། དེ་ཡི་རྗེས་སུ་དབུ་མ་བསྟན། །ཞེས་པའི་བར་གྱིས་
ཐེག་ཆེན་པ་གཉིས་ཐུན་མོང་གི་བསླབ་བྱ་བསྟན་པར་བཤད་ལ། དེ་རྒྱུད་ཀྱི་དོན་དུའང་སྣང་བའི་ཕྱིར་དང༌། རྗེ་བཙུན་མིད་ལས་ཀྱང༌། བར་དོ་འཕྲང་སྒྲོལ་གྱི་གདམས་ངག་གིས་འཁྲིད་པ་ན། ཐོག་མར་སྐྱབས་འགྲོ་དང༌། སྨོན་
འཇུག་གི་སེམས་བསྐྱེད་དུ་བཅུག་ཅིང༌། དེའི་ཚེ་ཡང་ཕུང་སྣ་གྲོགས་གིས་འདྲེན། མཛོ་སྦྲེལ་གཡང་ལ་ལྷུང༌། ཞེས་ཇི་བཞིན་དུ་མི་སྲུང་བར་ཁས་བླངས་ཙམ་བྱེད་པས། དཔོན་སློབ་གཉིས་ཀ་གཡང་ལ་ལྷུང་བ་དང༌། ཕན་ཡོན་རེ་
མཐོང་བ་ཙམ་གྱིས་ཞུགས་ན་ཕུང་གི་སྣ་འདྲེན་དུ་གསུངས་ནས། ཕྱིས་རྗེ་བཙུན་མའི་བྱིན་རླབས་མཛད་ནས་གདམས་ངག་ཕོག་ལ། བར་དོ་འཕྲང་སྒྲོལ་ཡང་གདམས་ངག་འདི་ཉིད་ཀྱི་མཚན་གྱི་རྣམ་གྲངས་ཡིན་པའི་ཕྱིར་དང༌། 
9-2-2b


འཁྲིད་ཚུལ་དེ་ཡང་ཀུན་གྱི་ཐུན་མོང་བ་ཡིན་པའི་ཕྱིར་རོ། །ཁྱད་པར་དུ་ཆོས་རྗེ་སྒམ་པོ་པས་ནི། ཆོས་བཞིའི་འགྲེལ་པར་འབྱུང་བ་ལྟར། སྐྱེས་བུ་གསུམ་གྱི་ལམ་གྱི་རིམ་པས་རྒྱུད་སྦྱངས་པ་སྔོན་དུ་བཏང་ནས་མཛད་པ་ཡིན་ནོ། །དེས་ན་ཆོས་རྗེ་ཕག་མོ་གྲུ་
པ་སོགས་འགའ་ཞིག་གི། ཆོས་དྲུག་གི་ཁྲིད་ཡིག་ན་ལམ་ཐུན་མོང་བའི་ཁྲིད་ཚུལ་མི་སྣང་བ་ནི། ཚོགས་ཁྲིད་ལམ་རིམ་བཞིན་དུ་ཁྲིད་པའི་རྗེས་སུ་གདམས་ངག་འདི་སྟེར་བའི་ལུགས་སུ་སྣང་བས། ཡང་དགོན་པའི་ཁྲིད་ཡིག་ན་འདུག་པ་བཞིན། ལམ་ཐུན་
མོང་བ་ལ་སྔོན་དུ་འཁྲིད་པ་ཤིན་ཏུ་གནད་ཆེ་བར་ཟུངས་ཤིག །དེ་ལྟར་བྱས་ན་ལམ་ཕྱོགས་རེ་བར་མ་སོང་བར། མདོ་རྒྱུད་གཉིས་ཀའི་ལམ་གྱི་གནད་རྫོགས་པའི་ཁྲིད་ལུགས་ཡིན་པས། ལུགས་འདིའི་ཁྱད་ཆོས་ཆེན་པོ་ཞིག་ཏུ་འདུག་པ་ལ། དེ་ལྟར་དུ་གོ་བ་
ཆགས་དགོས་སོ། །གཉིས་པ་ལམ་དེ་ལ་བློ་སྦྱངས་པའི་རིམ་པ་ནི། འོ་ན་ཐེག་ཆེན་གཉིས་ཐུན་མོང་བའི་ལམ་ལ་ཇི་ལྟར་སྦྱང་སྙམ་ན། ཇོ་བོ་ཆེན་པོའི་མན་ངག་ལས་འབྱུང་བ་ལྟར་བྱ་སྟེ། ཐོག་མར་ཐེག་པ་ཆེན་པོའི་བཤེས་གཉེན་མཚན་ཉིད་དང་ལྡན་པ་ཞིག་
ལ་བསམ་པ་དང་སྦྱོར་བ་བསྟེན་པ་ཚུལ་བཞིན་དུ་བྱའོ། །དེས་ཀྱང་དལ་བ་དོན་ཆེ་བ་དང་རྙེད་དཀའ་བའི་ཚུལ་བསྟན་ཏེ། བློ་སྦྱངས་པས་དལ་བའི་རྟེན་ལ་སྙིང་པོ་ལེན་འདོད་ཆེན་པོ་སྐྱེས་པ་ནི། སྙིང་པོ་ལེན་པའི་མཆོག་ནི་ཐེག་ཆེན་དུ་འཇུག་པ་ཉིད་མཆོག་ཡིན་ཏེ། 
དེའི་འཇུག་སྒོ་ཡང་བྱང་ཆུབ་ཀྱི་སེམས་ཉིད་ཡིན་ལ། དེ་ཡང་དག་པ་ཅིག་རྒྱུད་ལ་ཡོད་ན། དེའི་ཐེག་ཆེན་པ་ཡང་བཅོས་མ་མ་ཡིན་པར་འགྱུར་ལ། དེ་ཚིག་ཙམ་དུ་སོང་ན་ཐེག་ཆེན་པ་ཡང་ཚིག་ཙམ་དུ་འགྲོ་བའི་ཕྱིར་རོ། །དེ་ལྟར་ན་ཤེས་རབ་ཅན་གྱིས་
9-2-3a


སེམས་དེའི་མི་མཐུན་ཕྱོགས་རིམ་གྱིས་བསལ་ནས་མཚན་ཉིད་ཚང་བ་ཅིག་བསྐྱེད་པར་བྱའོ། །དེ་ལ་ཡང་ཐོག་མར་ཚེ་འདི་ལ་བློ་མ་ལྡོག་ན་ཐེག་པ་ཆེ་ཆུང་གང་གི་ཡང་ལམ་གྱི་གེགས་ཡིན་པས། ཚེ་འདིར་རིང་དུ་མི་གནས་པའི་འཆི་
བ་དྲན་པ་དང་། ཤི་བའི་འོག་ཏུ་ངན་འགྲོར་འཁྱམས་པའི་ཚུལ་རྣམས་བསམས་ནས། ཚེ་འདི་ལ་བློ་ལྡོག་པར་བྱའོ། །དེ་ནས་འཇིག་རྟེན་ཕྱི་མའི་ཕུན་ཚོགས་ལ་སྲེད་པའི་བློ་ཡང་འཁོར་བ་མཐའ་དག་ཉེས་དམིགས་ལེགས་པར་བསམས་ཏེ་བཟློག་
ནས་ཡིད་ཐར་པ་ལ་ཕྱོགས་པར་བྱའོ། །དེའི་འོག་ཏུ་རང་ཉིད་ཞི་བདེའི་སེམས་བཟློག་པའི་ཕྱིར་དུ། བྱམས་པ་དང་སྙིང་རྗེ་དང་དེའི་རྩ་བ་ཅན་གྱི་བྱང་ཆུབ་ཀྱི་སེམས་པ་རིང་དུ་སྦྱངས་ནས། བཅོས་མ་མ་ཡིན་པའི་བྱང་ཆུབ་ཀྱི་སེམས་སྦྱང་བར་བྱའོ། །དེ་ནས་བྱང་
ཆུབ་སེམས་དཔའི་སྤྱོད་པ་རྣམས་ཤེས་པར་བྱས་ལ་སློབ་འདོད་བསྐྱེད་དེ། རྒྱལ་སྲས་ཀྱི་སྤྱོད་པའི་ཁུར་བཟུང་བར་ནུས་པ་ན། བྱང་སེམས་ཀྱི་སྡོམ་པ་བཟུང་ནས་དེའི་བསླབ་བྱ་ཕྱིན་དྲུག་ལ་སློབ་པ་སྤྱི་དང༌། ཁྱད་པར་དུ་བསམ་གཏན་གྱི་ངོ་བོ་ཞི་གནས་
ཀྱིས་སེམས་ལས་རུང་དུ་བྱེད་པ་དང༌། ཤེར་ཕྱིན་གྱི་ངོ་བོ་ཆོས་རྣམས་སྒྱུ་མ་དང་ནམ་མཁའ་ལྟ་བུར་རྟོགས་པའི་ལྷག་མཐོང་ལ་བསླབ་པར་བྱའོ། །དེ་ནས་རྡོ་རྗེ་ཐེག་པའི་དམ་ཚིག་དང་སྡོམ་པའི་ཁུར་བཟུང་བར་ནུས་པ་ན། བླ་མ་ལྔ་བཅུ་པ་མཉན་ནས་བླ་མའི་
བསྟེན་ཚུལ་རྣམས་དག་པར་བྱས་ཏེ་སྔགས་ལ་འཇུག་པར་བྱའོ། །ཐེག་པ་ཐུན་མོང་གི་ལམ་གྱི་རིམ་པ་སྔར་བཤད་པ་འདི་དག་ལ་མ་སྦྱངས་ན། ཚེ་འདིའི་ཁྲི་བ་མི་ཆོད་པས་ཆོས་བྱེད་འདོད་བརྟན་པོ་མི་འབྱུང༌། དད་པ་ཁ་ཞེ་མེད་པ་མི་སྐྱེ་བས་སྐྱབས་གནས་
9-2-3b


ལ་བློ་ལིངས་སྐྱུར་མི་འོང་ལས་འབྲས་ལ་ངེས་པ་བརྟན་པོ་མི་རྙེད་པས་སྡོམ་པ་གང་གིས་ཡང་སྲུང་སྡོམ་ཞིབ་མོ་མེད་པའི་རྩིད་ཆོས་པར་འགྲོ། འཁོར་བ་ལ་ཞེན་ལོག་རྣལ་མ་མི་སྐྱེ་བས་ཐར་པ་དོན་གཉེར་གོ་བ་ཙམ་དུ་ཟད། བྱམས་པ་དང་སྙིང་རྗེའི་རྩ་བ་ཅན་གྱི་སྨོན་སེམས་
མ་བཅོས་པ་མི་སྐྱེ་བས། ཐེག་ཆེན་པ་མིང་ཙམ་དུ་འགྲོ། བྱང་སེམས་ཀྱི་སྤྱོད་པ་སྤྱི་ལ་སློབ་འདོད་དྲག་པོ་མི་འབྱུང་བས། འཇུག་སྡོམ་རྣལ་མ་མི་སྐྱེ། ཞི་གནས་དང་ལྷག་མཐོང་སྤྱིའི་གོ་བ་རྣམ་དག་མི་འཆགས་པས། ཏིང་ངེ་འཛིན་ཕྲ་མོ་ལ་ཡང་འཁྲུལ་ཞིང་། 
བདག་མེད་ཀྱི་ལྟ་བ་ལ་ངེས་པ་མི་སྐྱེ་བས། དེ་རྣམས་སུ་སོང་བ་འདོད་ན་ཐེག་ཆེན་གཉིས་ཀྱི་སྤྱིའི་ལམ་ལ་སྦྱང་བར་བྱའོ། །འདི་ནི་རྗེ་བཙུན་བྱམས་པ་ནས་ཐོགས་མེད་དང༌། རྗེ་བཙུན་འཇམ་དབྱངས་ནས་ཀླུ་སྒྲུབ་དང༌། ཞི་བ་ལྷ་ལ་བརྒྱུད་པའི་ཆུ་བོ་གསུམ་འདྲེས་ཀྱི། 
གདམས་པ་རྡོ་རྗེ་ཐེག་པ་དང༌། ཕར་ཕྱིན་ཐེག་པ་གང་གི་སྒོར་འཇུག་ཀྱང་བྱ་དགོད་པར་ཇོ་བོ་ཆེན་པོ་བཞེད་དོ། །རྗེ་བཙུན་མིད་ལས་ཀྱང༌། དགེ་དང་མི་དགེའི་ལས་རྣམས་ལ། །རྒྱུ་འབྲས་དག་པར་མ་བསམས་ན། །ངན་སོང་སྡུག་བསྔལ་མི་བཟོད་པས། །ཕྲ་ཞིང་ཕྲ་བའི་
རྣམ་སྨིན་ལ། །བག་ཡོད་དྲན་པས་ཟིན་ཀྱང་འཚལ། །འདོད་ཡོན་སྐྱོན་དུ་མ་བལྟས་ཤིང༌། །ཞེན་པ་ནང་ནས་མ་ལོག་ན། །འཁོར་བའི་བཙོན་ར་མི་སྒྲོལ་བས། །ཐམས་ཅད་སྒྱུ་མར་ཤེས་པའི་བློས། །ཀུན་འབྱུང་གཉེན་པོ་བསྟེན་ཡང་འཚལ། །འགྲོ་དྲུག་སེམས་ཅན་ཕ་
མ་ལ། །བྱས་པ་དྲིན་དུ་མི་གཟོ་ན། །ཐེག་པ་དམན་པར་གོལ་བའི་སྐྱོན། །དེ་ཕྱིར་བརྩེ་བ་ཆེན་པོ་ཡིས། །བྱང་ཆུབ་སེམས་ལ་བསླབ་ཀྱང་འཚལ། །ཞེས་དང༌། ང་མི་ཁོམ་བརྒྱད་ལ་འཇིགས་འཇིགས་ནས། །མི་རྟག་འཁོར་བའི་ཉེས་དམིགས་བསྒོམས། །སྐྱབས་
9-2-4a


དཀོན་མཆོག་གསུམ་ལ་བློ་ཕུགས་གཏད། །ལས་རྒྱུ་འབྲས་ཆོས་ལ་ནན་ཏན་བྱས། །ཐབས་བྱང་ཆུབ་སེམས་ལ་རྒྱུད་སྦྱངས་པས། །བག་ཆགས་སྒྲིབ་པའི་རྒྱུན་ལམ་ཆད། །སྣང་བ་ཅིར་སྣང་སྒྱུ་མར་རྟོགས། །ད་ངན་སོང་གསུམ་ལ་
ཉམ་ང་མེད། །ཅེས་གསུངས་པ་ལྟར་ལམ་ཐུན་མོང་བ་དེ་དག་ལ་ངེས་པ་བརྟན་པོ་མ་བྱུང་བར་དུ་བསྒོམ་པར་བྱའོ། །ལམ་གྱི་ལུས་ཡོངས་སུ་རྫོགས་པ་རེ་ལ་གོ་བ་ལེགས་པར་ཆགས་ནས་ཉམས་སུ་ལེན་པ་ནི། ལམ་རྫོགས་པར་བགྲོད་པའི་གཞི་ཚང་བར་
ཐངས་པ་ཡིན་པས་གཞན་དང་མི་འདྲ་ལ། ལམ་ཐུན་མོང་བ་ལ་བསླབ་ཚུལ་ནི་གཞན་དུ་རྒྱས་པར་བཤད་ཟིན་ཏོ། །གཉིས་པ་ཐུན་མོང་མ་ཡིན་པ་བླ་མེད་ཀྱི་ཐེག་པའི་སྔོན་འགྲོ་ལ་གཉིས། སྤྱིའི་སྔོན་འགྲོ་དང༌། ཁྱད་པར་གྱི་སྔོན་འགྲོའོ། །དང་པོ་ལ་
གཉིས། དབང་རྫོགས་པར་ཐོབ་དགོས་པར་བསྟན་པ་དང༌། དམ་ཚིག་རྣམས་བསྲུང་དགོས་པར་བསྟན་པའོ། །དང་པོ་ནི། རྗེ་མར་པའི་རྒྱུད་སྡེའི་བརྒྱུད་འཛིན་མེས་སྟོན་དང་རྔོག་སྟོན་ལ་སོགས་པ་རྣམས་ཀྱི་ལུགས་ལ་ཡང༌། གསང་སྔགས་ཀྱི་ལམ་རིམ་
པ་གཉིས་སྒོམ་པ་ལ་དབང་བཞི་རྫོགས་པར་བསྐུར་བ་དགོས་པར་བཞེངས་ལ། རྗེ་བཙུན་མིད་ལས་ཀྱང༌། སྒམ་པོ་པ་དང་མཇལ་ནས་ལམ་འདི་ལ་འཁྲིད་པའི་སྔོན་དུ། ཁྱོད་ཀྱིས་དབང་ཐོབ་བམ་གསུངས་པས། སྒམ་པོ་པས་ཟངས་དཀར་གྱི་སློབ་མ་
མར་ཡུལ་བློ་ལྡན་ལ་ཐོབ། ཅེས་ཞུས་པའི་རྗེས་སུ་ཁྲིད་མཛད་ཅིང༌། དེ་བཞིན་དུ་ཁོང་ལ་གདམས་ངག་ཞུས་པ་ན། བ་རི་ལོ་ཙཱ་བ་ལ་དབང་ཞུས་ལ་ཤོག་གསུངས་པ་མང་དུ་མཛད་འདུག་པ་དང༌། དཔལ་ཕག་མོ་གྲུ་པས་མཛད་པ་ན་ཡང༌། སྔོན་དུ་དབང་
9-2-4b


བཞི་རྫོགས་པར་བསྐུར་བའི་ལུགས་མཛད་འདུག་པས། མར་ལུགས་ལའང་རྒྱུད་ཀྱི་གཞུང་དང་གདམས་ངག་འཛིན་པའི་བླ་མ་སྔ་མ་ཆེན་པོ་རྣམས་ཀྱི་བཞེད་པས། དབང་བཞི་ཡོངས་སུ་རྫོགས་པར་ཐོབ་པ་ཅིག་ངེས་པར་དགོས་སོ། །དེ་ནི་རྒྱུད་མང་པོ་ལས་ཀྱང་
ཤིན་ཏུ་ནན་ཆེ་བར་གསུངས་ཏེ། ཕྱག་ཆེན་ཐིག་ལེའི་གཉིས་པ་ལས། དང་པོར་རེ་ཞིག་གང་ཚེ་སློབ། །ལན་ཅིག་དབང་རྣམས་ཀྱིས་ནི་བསྐུར། །དེ་ཚེ་གསང་ཆེན་བཤད་པ་ཡི། །ངེས་པར་སྣོད་དུ་གྱུར་པའོ། །དབང་མེད་ན་ནི་དངོས་གྲུབ་མེད། །བྱེ་མ་བཙིར་ལ་མར་
མེད་ལྟར། །གང་ཞིག་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་འཆད་བྱེད་པ། །སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་འགྲོ། །དེ་བས་འབད་པ་ཐམས་ཅད་ཀྱིས། །བླ་མ་ལས་ནི་དབང་དོན་ཞུ། །ཞེས་དང་། རྒྱུད་རྡོར་འཕྲེང་གི་གཉིས་
པ་ལས་ཀྱང༌། དབང་བསྐུར་བ་ནི་གཙོ་བོ་སྟེ། །དངོས་གྲུབ་ཐམས་ཅད་རྟག་ཏུ་གནས། །ང་ཡིས་ཇི་བཞིན་དོན་བཤད་ཀྱིས། །དེ་ཕྱིར་ཐོག་མར་ཡང་དག་ཉོན། །ཐོག་མར་སློབ་མ་གང་གི་ཚེ། །བློ་ལྡན་ཡང་དག་དབང་བསྐུར་ན། །རྫོགས་པའི་རིམ་པའི་རྣལ་འབྱོར་ལ། །དེ་
ཡི་ཚེ་ན་སྣོད་དུ་འགྱུར། །ཡང་དག་དབང་བསྐུར་གྱིས་དབེན་ན། །སྒྲུབ་པོས་རྒྱུད་ཀྱི་དོན་ཤེས་ཀྱང༌། །སློབ་དཔོན་སློབ་མ་མཚུངས་པར་ནི། །མི་བཟང་དམྱལ་བ་ཆེན་པོར་འགྲོ། །ཞེས་གསུངས་པས་གསང་ཆེན་བཤད་པ་དང་སྒོམ་པའི་སྣོད་དུ་རུང་བ་དབང་རྣམ་དག་
ཐོབ་པ་ལ་རག་ལས་པས། དབང་ནི་དངོས་གྲུབ་ཀྱི་རྩ་བ་ཡིན་ཏེ། དེ་མེད་ན་རྒྱུད་དོན་ཤེས་ནས་ལམ་ལ་ཅི་ཙམ་འབད་ཀྱང་དངོས་གྲུབ་ཁྱད་པར་ཅན་ཐོབ་མི་སྲིད་ལ། དེ་མ་ཐོབ་པའི་ཉེས་དམིགས་ཙམ་དུ་མ་ཟད་དངོས་གྲུབ་ཕྲ་མོ་ཐོབ་ཀྱང་དཔོན་སློབ་གཉིས་ཀ་དམྱལ་
9-2-5a


བར་འགྲོའོ། །དབང་བསྐུར་བ་ཡང་བདེ་མཆོག་རྩ་རྒྱུད་ལས། སྔགས་པས་དཀྱིལ་འཁོར་མ་མཐོང་བར། །གང་ཞིག་རྣལ་འབྱོར་པ་ཉིད་འདོད། །མཁའ་ལ་ཁུ་ཚུར་གྱིས་རྡེག་དང༌། །སྨིག་རྒྱུའི་ཆུ་ནི་འཐུང་དང་མཚུངས། །ཞེས་གསུངས་
པས་སྔོན་དུ་དཀྱིལ་འཁོར་དུ་བཅུག་ནས་དཀྱིལ་འཁོར་མཐོང་བ་དང༌། དེ་ནས་ཆུ་ཅོད་པན་ལ་སོགས་པའི་དབང་རྫོགས་པར་བསྐུར་བ་དགོས་ཀྱི། དེ་ལྟ་མིན་པར་དབང་གི་ཆ་འགའ་རེ་དང་ལྷ་རེའི་བྱིན་རླབས་ཀྱི་རྗེས་གནང་ཙམ་ལ་བརྟེན་པ་ནི། དབང་རྣམ་
དག་གཞན་སྔོན་དུ་སོང་བ་ཡིན་ན། མི་རུང་བ་མེད་ཀྱང་དང་པོ་དབང་རྣམ་དག་གཞན་སྔོན་དུ་མ་སོང་ན། དེ་ཙམ་གྱིས་དབང་གི་གོ་མི་ཆོད་པས་དབང་རྫོགས་པ། རྒྱུད་སྡེ་རྣམ་དག་ནས་གསུངས་པ། པཎ་གྲུབ་ཀྱིས་ཀྱང་ལེགས་པར་བཤད་པ། བླ་མ་དམ་
པ་རྣམས་ལས་རིམ་པ་བཞིན་དུ་བརྒྱུད་པས་རྒྱུད་སྣོད་དུ་རུང་བར་བྱའོ། །དེ་ཡང་འདིར་ཀྱེ་རྡོ་རྗེའམ། འཁོར་ལོ་བདེ་མཆོག་ལྟ་བུའི་དབང་བསྐུར་བར་བྱས་ན། དེ་དག་དང་འབྲེལ་ཆེ་བས་ལེགས་སོ། །གཉིས་པ་དམ་ཚིག་རྣམས་བསྲུང་དགོས་པར་བསྟན་པ་ནི། དེ་
འདྲ་བའི་དབང་རྣམ་དག་ཐོབ་པའི་དུས་སུ་བླ་མ་དང་རྒྱལ་བ་སྲས་བཅས་དཔང་དུ་བཞག་ནས། ཇི་སྐད་གསུངས་པ་བཞིན་སྒྲུབ་པར་ཁས་བླངས་པའི་དམ་ཚིག་དང༌། སྡོམ་པ་རྣམས་ཀྱི་བསྲུང་མཚམས་ལེགས་པར་ཤེས་པར་བྱས་ནས། ཚུལ་བཞིན་དུ་སྲུང་
དགོས་པ་ཡིན་ཏེ། བདེ་མཆོག་རྩ་རྒྱུད་ལས། ཤིན་ཏུ་མཉམ་གཞག་སྒྲུབ་པ་པོས། །དམ་ཚིག་རྟག་ཏུ་བསྐྱང་བར་བྱ། །དམ་ཚིག་ཉམས་པས་དཀྱིལ་འཁོར་དུ། །དབང་བསྐུར་དངོས་གྲུབ་ཐོབ་མི་འགྱུར། །ཞེས་དང༌། མཉམ་སྦྱོར་ལས། དཀྱིལ་འཁོར་དུ་ནི་མ་ཞུགས་
9-2-5b


ཤིང༌། །དམ་ཚིག་རྣམས་ནི་སྤངས་པ་དང༌། །གསང་བའི་དེ་ཉིད་མི་ཤེས་པས། །བསྒྲུབས་ཀྱང་ཅི་ཡང་མི་འགྲུབ་བོ། །ཞེས་དཀྱིལ་འཁོར་དུ་གཞུག་པ་སྔོན་དུ་འགྲོ་བའི་དབང་མ་ཐོབ་པ་དང༌། བསྲུང་བྱའི་དམ་ཚིག་རྣམས་ཡལ་བར་དོར་བ་དང་། རིམ་གཉིས་ཀྱི་གསང་
བའི་གནད་རྣམས་ལེགས་པར་མི་ཤེས་པས། རིང་དུ་བསྒྲུབས་ཀྱང་འདོད་པའི་དངོས་གྲུབ་ཅི་ཡང་མི་འགྲུབ་པར་གསུངས་པས། རྣལ་འབྱོར་བླ་མེད་པའི་སྒྲུབ་པ་པོར་ཁས་བླངས་ནས། ལུགས་དེ་ལ་རྩ་ལྟུང་གི་གྲངས་དུ་ཡོད་ཀྱང་མི་ཤེས་ན་མི་འོང་བས། རྩ་བ་དང་ཡན་
ལག་གི་དམ་ཚིག་བསྲུང་མཚམས་ལེགས་པར་ཤེས་པར་བྱས་ནས་སྲུང་བ་གལ་ཆེའོ། །གཉིས་པ་ཁྱད་པར་གྱི་སྔོན་འགྲོ་ནི། སྤྱིར་སྔོན་འགྲོའི་མཆོག་ནི། ལམ་ཐུན་མོང་བ་ལ་སྦྱོར་བ་དང༌། དབང་རྣམ་དག་བསྐུར་བ་དང་། རྩ་བ་དང་ཡན་ལག་གི་དམ་ཚིག་རྣམས་
ཚུལ་བཞིན་དུ་སྲུང་བ་ཡིན་པས། དེ་ལ་ངེས་པ་རྙེད་པ་དགོས་ལ། བླ་མའི་རྣལ་འབྱོར་དང༌། རྡོར་སེམས་ཀྱི་བསྒོམ་བཟླས་དང༌། མཎྜལ་དབུལ་བ་སོགས་ཀྱང༌། སྔགས་ཀྱི་བསླབ་བྱ་སྲུང་བའི་ཁོངས་ཉིད་ནས་འབྱུང་བ་ཡིན་ནོ། །འོན་ཀྱང་བླ་མ་རྣམས་ཀྱི་ཕྱག་བཞེས་ལ་
དེ་དག་ལོགས་སུ་འབྱུང་བ་ལྟར་བཤད་པ་ལ་གཉིས། སྡིག་སྒྲིབ་དག་པར་བྱ་བའི་ཕྱིར་རྡོར་སེམས་ཀྱི་བསྒོམ་བཟླས་བྱ་བ་དང་། བྱིན་རླབས་འཇུག་པའི་ཕྱིར་བླ་མའི་རྣལ་འབྱོར་བསྒོམས་ནས་མཆོད་པའོ། །དང་པོ་ནི། ཐོག་མར་དཀོན་མཆོག་གསུམ་ལ་བློ་ལིངས་
སྐྱུར་གྱི་སྐྱབས་འགྲོ་རྒྱུད་དང་འདྲེས་ངེས་པ་བྱ། རང་ཉིད་སྲིད་མཚོར་ལྟུང་བ་བཞིན་དུ་སེམས་ཅན་རྣམས་ཀྱང་དེ་དང་འདྲ་བར་བལྟ་ཞིང༌། དེ་རྣམས་ཀྱང་རང་གི་མ་ཡིན་པ་དང༌། མ་བྱས་རེས་ཀྱིས་ཕན་པ་བསྒྲུབས་ཤིང༌། གནོད་པ་བསལ་བའི་དྲིན་ཆེ་བ་དང༌། དེ་ལ་
9-2-6a


ལན་དུ་ཕན་འདོགས་པའི་དྲིན་གཟོའི་བློ་བརྟན་པོ་བསྐྱེད་ནས། དེ་ནས་དེ་རྣམས་བདེ་བས་ཕོངས་ལུགས་དང་། སྡུག་བསྔལ་གྱིས་མནར་ལུགས་རྣམས་བསམས་ལ། དེ་རྣམས་ཅི་ནས་ཀྱང་བདག་གིས་བདེ་བ་མཐའ་དག་པ་དགོད་པ་དང༌། 
སྡུག་བསྔལ་མཐའ་དག་ལས་བསྒྲལ་བར་བྱའོ་སྙམ་པའི་འདུན་པ་དྲག་པོ་བསྐྱེད། དེ་ནས་དོན་དེ་གཉིས་རྫོགས་པར་སྒྲུབ་པ་ནི། སངས་རྒྱས་ཉག་གཅིག་ཏུ་མཐོང་ནས། དེ་རྣམས་ཀྱི་དོན་དུ་སངས་རྒྱས་ཐོབ་འདོད་ཀྱི་བློའི་འགྱུར་བ་དྲག་པོའི་སྒོ་
ནས་བྱང་ཆུབ་ཏུ་སེམས་བསྐྱེད། དེ་འདྲ་བའི་སངས་རྒྱས་ཐོབ་པའི་དོན་ཏུ་ལམ་འདི་ལ་བསླབ་སྙམ་པའི་ལམ་ལ་བརྟེན་པའི་ཡི་དམ་བརྟན་པོ་ཡང་དང་ཡང་དུ་བྱའོ། །དེ་ཡང་སྙིང་པོ་རྒྱན་ལས། སངས་རྒྱས་ཀུན་གྱི་སྐུ་གཅིག་པུ། །པད་དཀར་ཟླ་བའི་
དབུས་གནས་ཤིང༌། །རྡོ་རྗེ་དྲིལ་བུ་རྒྱན་སྤྲས་པའི། །རྡོ་རྗེ་སེམས་དཔའ་ལེགས་དམིགས་ཤིང༌། །ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་ནི་རེ་རེ་བཟླས། །ལྟུང་སོགས་བྱིན་གྱིས་བརླབས་གྱུར་པས། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་
རྣམས་ཀྱིས་བཤད་པས། །ཐུན་མཚམས་སུ་ནི་སྤྱད་པར་བྱ། །འབུམ་ཕྲག་ཏུ་ནི་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་ཐུན་མཚམས་སུ་རྡོར་སེམས་བསྒོམས་ནས། ཡིག་བརྒྱ་ཉེར་གཅིག་རེ་མ་ཆག་པར་བཟླས་ནས་ལྟུང་བ་མི་
འཕེལ་བ་དང༌། འབུམ་ཕྲག་གཅིག་བཟླས་ན་ཉེས་པ་རྣམས་འདག་པར་གྲུབ་པ་མཆོག་བརྙེས་པ་རྣམས་ཀྱིས་གསུངས་པས་དེ་ལྟར་བྱའོ། །ཞེས་གསུངས་པ་བཞིན་དུ་དགོས་པ་དེ་གཉིས་ཀྱི་ཕྱིར་དུ་རྡོར་སེམས་ཀྱི་བསྒོམ་བཟླས་བྱའོ། །དེའི་རིམ་པ་ནི་རང་གི་
9-2-6b


སྤྱི་བོར་པཾ་ལས་པདྨ་དཀར་པོ། ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཧཱུཾ་ལས་རྡོ་རྗེ་རྩེ་ལྔ་པ་དཀར་པོ་ལྟེ་བ་ལ་ཧཱུཾ་གིས་མཚན་པ། དེ་ལས་འོད་ཟེར་འཕྲོས། དོན་གཉིས་བྱས། ཚུར་འདུས་ཡོངས་སུ་གྱུར་པ་ལས། རྡོ་རྗེ་སེམས་དཔའ་སྐུ་མདོག་དཀར་པོ་གཡས་རྡོ་རྗེ། 
གཡོན་དྲིལ་བུ་འཛིན་པ། ཡུམ་རྡོ་རྗེ་བསྙེམས་མ་དཀར་མོ་གྲི་གུག་དང་ཐོད་པ་འཛིན་པས་འཁྱུད་པ། རིན་པོ་ཆེའི་རྒྱན་སྣ་ཚོགས་པས་སྤྲས་པ། མཚན་དང་དཔེ་བྱད་དུ་ལྡན་པ། རྡོ་རྗེའི་སྐྱིལ་ཀྲུང་གིས་བཞུགས་པ་བསྐྱེད་ལ། དེའི་ཐུགས་ཀར་ཟླ་བའི་སྟེང་དུ་ཧཱུཾ་དཀར་
པོ་བསམ། དེ་ལས་འོད་ཟེར་འཕྲོས་རང་འདྲའི་ཡེ་ཤེས་སེམས་དཔའ་སྤྱན་དྲངས་པ་ལ་མཆོད་པ་ལྔས་མཆོད། ཛཿཧཱུཾ་བཾ་ཧོཿས་དགུག་གཞུག་བཅིང་མཉེས་པར་བྱ། ཡང་ཐུགས་ཀའི་ཧཱུཾ་ལས་འོད་ཟེར་འཕྲོས། དབང་གི་ལྷ་རྣམས་སྤྱན་དྲངས་པ་ལ་མཆོད་ནས། 
དེ་བཞིན་གཤེགས་པ་ཐམས་ཅད་ཀྱིས་མངོན་པར་དབང་བསྐུར་དུ་གསོལ་ཞེས་གསོལ་བ་བཏབ་པས། དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། ཡུམ་རྣམས་ཀྱིས་རིན་པོ་ཆེའི་བུམ་པ་ཡེ་ཤེས་ཀྱི་བདུད་རྩིས་གང་བ་ཐོགས་
ནས། ཇི་ལྟར་བལྟམས་པ་སོགས་དང༌། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་ཞེས་པས་དབང་བསྐུར། ལུས་ཡེ་ཤེས་ཀྱི་བདུད་རྩིས་གང༌། མི་བསྐྱོད་པས་དབུ་བརྒྱན་པར་བསམ། དེ་ནས་སྒོ་གསུམ་གུས་པ་ཆེན་པོས། བཅོམ་ལྡན་འདས་
རྡོ་རྗེ་སེམས་དཔའ་བདག་གཞན་ཐམས་ཅད་ཀྱི་སྡིག་སྒྲིབ་དང་། དམ་ཚིག་ཉམས་ཆགས་ཐམས་ཅད་དག་པར་མཛད་དུ་གསོལ། ཞེས་གསོལ་བ་བཏབ་པས། ཐུགས་ཀའི་ཧཱུཾ་ལས་འོད་ཟེར་འཕྲོས། སེམས་ཅན་ཐམས་ཅད་ལ་ཕོག །དེ་དག་གི་སྡིག་སྒྲིབ་
9-2-7a


ཉེས་ལྟུང་ཐམས་ཅད་དག་པར་བྱས། ཕྱོགས་བཅུའི་སངས་རྒྱས་སྲས་བཅས་ཐམས་ཅད་ལ་མཆོད་པ་ཕུལ། དེ་རྣམས་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་འོད་ཟེར་གྱི་རྣམ་པར་བསྡུས་ནས། ཐུགས་ཀའི་ཧཱུཾ་
ལ་ཐིམ་པས་གཟི་བརྗིད་དང་མཐུ་སྟོབས་ཕུན་ཚོགས་སུ་གྱུར་པར་བསམས་ལ། ཧཱུཾ་གི་མཐའ་མར། ཨོཾ་བཛྲ་ཧེ་རུ་ཀ་ས་མ་ཡ། མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་བ། སརྦ་སིངྔྷི་མྨེ་
པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཾ། ཀུ་རུ་ཧཱུཾ། ཧ་ཧ་ཧ་ཧ་ཧོཿ བྷ་ག་ཝན། བཛྲ་ཧེ་རུ་ཀ་མཱ་མེ་མུཉྩ། ཧེ་རུ་ཀ་བྷ་ཝ། མཧཱ་ས་མ་ཡ་ས་ཏྭ་ཨཱཿཧཱུཾ་ཕཊ། ཅེས་པས་བསྐོར་བ་ལ་དམིགས་ཏེ་བཟླས་པས་ཡིག་འབྲུ་ལས་འོད་ཟེར་འཕྲོས། སེམས་ཅན་གྱི་
སྡིག་སྒྲིབ་སྦྱངས། སངས་རྒྱས་སྲས་བཅས་ལ་མཆོད་པ་བསམ་གྱིས་མི་ཁྱབ་པ་ཕུལ། སྐུ་གསུང་ཐུགས་ཀྱི་བྱིན་རླབས་ཐམས་ཅད་བསྡུས་ཏེ་ཡིག་འབྲུ་ལ་ཐིམ། ཡིག་འབྲུ་ལས་བདུད་རྩིའི་རྒྱུན་དཀར་པོ་བྱུང༌། ཡབ་ཡུམ་གྱི་སྦྱོར་མཚམས་ལས་བབས་
ནས། རང་གི་སྤྱི་བོ་ཚངས་བའི་བུ་ག་ནས་ཞུགས་ཏེ། སྒོ་གསུམ་གྱི་སྡིག་སྒྲིབ་ཐམས་ཅད་དབང་པོའི་སྒོ་དང་བ་སྤུའི་བུ་ག་ནས་ནག་ཕུངས་ཀྱིས་འཐོན། སྡིག་སྒྲིབ་སངས་ཀྱིས་དག །ལུས་ཐམས་ཅད་ཡེ་ཤེས་ཀྱི་བདུད་རྩིའི་རྒྱུན་གྱིས་དཀར་མེར་གྱིས་
གང༌། རྟོགས་པ་དང་ཡོན་ཏན་བདག་གཞན་ཐམས་ཅད་ལ་སྐྱེས་པར་བསམ་ཞིང་བཟླས་སོ། །ཐུན་འཇོག་ཁར་སྟོབས་བཞིའི་བཤགས་པ་བྱས་ལ། སྡིག་སྒྲིབ་ཀྱི་འཁོར་གསུམ་མི་དམིགས་པར་བསམ་ཞིང༌། བདག་ནི་མི་ཤེས་རྨོངས་པ་ཡིས། །དམ་
9-2-7b


ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་བོ་བདག་ལ་སྐྱོབས། །ཞེས་གསོལ་བ་བཏབ་པས། རྡོ་རྗེ་སེམས་དཔའི་ཞལ་ནས། རིགས་ཀྱི་བུ་
ཁྱོད་ཀྱི་སྡིག་སྒྲིབ་དང༌། དམ་ཚིག་ཉམས་ཆགས་ཐམས་ཅད་དག་གོ། ཞེས་གསུངས་ནས་རང་ལ་ཐིམ་པས། རང་གི་སྒོ་གསུམ་དང་རྡོ་རྗེ་སེམས་དཔའི་སྐུ་གསུང་ཐུགས་དབྱེར་མེད་དུ་གྱུར་པར་བསམས་ལ། དགེ་རྩ་བསྔོ་བ་དང་སྨོན་ལམ་གདབ་བོ། །གཉིས་
པ་བྱིན་རླབས་འཇུག་པའི་ཕྱིར་བླ་མའི་རྣལ་འབྱོར་སྒོམ་པ་ལ་གཉིས། ཚོགས་ཞིང་དུ་བླ་མ་སྒོམ་པ་དང༌། དེ་ལ་མཆོད་ནས་གསོལ་བ་གདབ་པའོ། །དང་པོ་ནི། མདུན་གྱི་ནམ་མཁར་རིན་པོ་ཆེའི་ཁྲི་སེང་གེས་བཏེག་པའི་སྟེང་ན་པད་ཉིའི་གདན་ལ། ངོ་བོ་རང་གི་བླ་
མ་ལ་རྣམ་པ་རིགས་དྲུག་པ་རྡོ་རྗེ་འཆང་སྐུ་མདོག་སྔོན་པོ་ཞལ་གཅིག་ཕྱག་གཉིས་པ་གཡས་རྡོ་རྗེ་གཡོན་དྲིལ་བུ་འཛིན་པས་རང་འདྲའི་ཡུམ་ལ་འཁྱུད་པ། ལྷ་རྫས་ཀྱི་གོས་ཀྱི་སྟོད་གཡོགས་དང༌། སྨད་གཡོགས་ཅན། རིན་པོ་ཆེའི་རྒྱན་གྱིས་བརྒྱན་པ། 
ཞབས་རྡོ་རྗེའི་སྐྱིལ་ཀྲུང་དུ་བཞུགས་པ། འོད་ཟེར་རྣམ་པ་ལྔ་རབ་ཏུ་འབར་བར་བསྒོམས་པའི་སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་པདྨ་ལ་ཨཱཿདམར་པོ། སྙིང་གར་ཉི་མ་ལ་ཧཱུཾ་སྔོན་པོ་འོད་ཟེར་འཕྲོ་བ་བསྒོམ། ཧཱུཾ་ལས་འོད་ཟེར་འཕྲོས་པས་རྡོ་རྗེ་འཆང་ནས་
བཟུང་སྟེ། བླ་མ་བརྒྱུད་པ་རྣམས་དང༌། ཡི་དམ་གྱི་ལྷ་ཚོགས་རྣམས་སྤྱན་དྲངས་ཏེ་བསྟིམས་ལ། སྡོམ་འབྱུང་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཉིད། །ཅེས་གསུངས་པ་ལྟར། སྐྱབས་གསུམ་ཀུན་འདུས་ཀྱི་ངོ་བོར་བསྒོམ། རིམ་
9-2-8a


ལྔ་ལས། འདི་ནི་རང་བྱུང་བཅོམ་ལྡན་འདས། །ལྷག་པའི་ལྷ་ནི་གཅིག་པུ་ཉིད། །མན་ངག་རབ་ཏུ་སྟེར་བའི་ཕྱིར། །རྡོ་རྗེ་སློབ་དཔོན་དེ་བས་ལྷག །ཅེས་གསུངས་པ་ལྟར་རང་ལ་ཕན་འདོགས་པའི་ཞིང་དུ་ནི་རྡོ་རྗེ་འཆང་ལས་ཀྱང་
ཆེས་ལྷག་པ་ཡིན་སྙམ་དུ་བསམ། ཞལ་ལུང་ལས། འདི་ཡི་དོན་ལྡན་འགའ་ཞིག་ལ། །ད་ནི་དེ་ཡི་ལུས་གནས་ཏེ། །སྒྲུབ་པོ་གཞན་ལ་མཆོད་པ་ལེན། །དེ་ཡིས་དེ་མཉེས་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཞེས་གསུངས་པ་ལྟར་ཡང་དག་
པའི་གདམས་ངག་གི་དོན་སྟོན་པའི་བླ་མ་སློབ་མས་མཆོད་པའི་དུས་སུ། སངས་རྒྱས་རྣམས་བྱོན་ཏེ་བླ་མའི་ལུས་ལ་བཞུགས་ནས། མཆོད་པ་བཞེས་ཏེ་སློབ་མའི་རྒྱུད་དག་པར་བྱེད་ལ། མཆོད་པ་གཞན་གྱི་ཚེ་རང་གིས་སངས་རྒྱས་ལ་བཏང་བའི་བསོད་
ནམས་འཐོབ་ཀྱང༌། སངས་རྒྱས་ཉིད་ཀྱིས་བཞེས་པའི་ངེས་པ་མེད་པའི་ཚུལ་ཤེས་པར་བྱས་ལ། མཆོད་པའི་ཞིང་གོང་ན་མེད་པའི་ངེས་པ་བསྐྱེད་དེ། དེ་བཞིན་གཤེགས་པ་ཐམས་ཅད་ཀྱི་ངོ་བོ་བལྟས་ལ། སྐྱོན་རྟོག་པའི་བློ་ལ་སྡོམ་སེམས་མང་པོ་དང༌། 
ཡོན་ཏན་རྣམས་བརྟགས་ནས་དེ་ལ་དམིགས་པའི་དད་པ་སྦྱོང་བ་མང་དུ་བྱ་སྟེ། སྐྱོན་གྱི་ངོས་ནས་བརྟགས་ན་དངོས་གྲུབ་ཀྱི་གེགས་བྱེད་ལ། ཡོན་ཏན་གྱི་ངོས་ནས་བརྟགས་ན་དངོས་གྲུབ་མྱུར་དུ་འགྲུབ་པའི་ཕྱིར་རོ། །དེ་ལྟ་བུ་ལ་སོགས་པའི་ཚུལ་གྱིས་བླ་མ་དེ་ཉིད་
ལ་དམིགས་པའི་དད་པ་དང༌། བཀའ་དྲིན་རྗེས་སུ་དྲན་ཏེ་གུས་པ་ཆེན་པོ་མང་དུ་སྦྱང་ངོ༌། །གཉིས་པ་དེ་ལ་མཆོད་ནས་གསོལ་བ་གདབ་པ་ནི། རིམ་ལྔ་ལས། མཆོད་པ་ཐམས་ཅད་རྣམ་སྤངས་ནས། །བླ་མ་ལ་མཆོད་ཡང་དག་བརྩམ། །དེ་མཉེས་པས་ནི་ཀུན་
9-2-8b


མཁྱེན་པའི། །ཡེ་ཤེས་མཆོག་ནི་ཐོབ་པར་འགྱུར། །བླ་མེད་བྱེད་པ་སློབ་དཔོན་གྱི། །རྡོ་རྗེ་སེམས་དཔའ་མཆོད་བྱས་པས། །དེ་ཡིས་བསོད་ནམས་མ་བྱས་ཅི། །དཀའ་ཐུབ་མ་བསྟེན་གང་ཞིག་ཡོད། །ཅེས་གསུངས་པ་ལྟར་མཆོད་པ་ཀུན་གྱི་ནང་ནས་བླ་མ་ལ་
མཆོད་པ་ཉིད་ལྷུར་བླང་བའི་ཚུལ་ལ། ངེས་པ་དྲག་པོ་བསྐྱེད་ནས་བླ་མ་ལ་མཆོད་དོ། །དེ་ཡང་མཎྜལ་གྱི་མཆོད་པ་ནི། སའམ་རིན་པོ་ཆེ་ལ་སོགས་པའི་མཎྜལ་བ་བྱུང་གིས་བྱུགས་པ་ལ། དྲི་བཟང་དང་བདུད་རྩི་ལྔ་དང་བཅས་པའི་ཆུས་བྱུག་ཅིང༌། ཨོཾ་བཛྲ་བྷཱུ་མི་
ཨཱཿཧཱུཾ་ཞེས་པས་དབང་ཆེན་གསེར་གྱིས་གཞི་དང༌། ཨོཾ་བཛྲ་རེ་ཁེ་ཨཱཿཧཱུཾ་ཞེས་པས་ལྕགས་རིའི་མུ་ཁྱུད། དྲི་བཟང་དང་བཅས་པའི་བདུད་རྩི་ལྔས་སྦགས་པའི་མེ་ཏོག་གི་ཚོམ་བུ་དབུས་སུ་དགོད་ཅིང༌། དབུས་སུ་རི་རབ་དེ་བཞིན་དུ་ཤར་ལ་སོགས་པར་མེ་ཏོག་གི་
ཚོམ་བུ་འགོད་ཅིང༌། ཤར་ལུས་འཕགས། ལྷོ་འཛམ་བུ་གླིང༌། ནུབ་བ་ལང་སྤྱོད། བྱང་སྒྲ་མི་སྙན། ཤར་གྱི་གཡས་གཡོན་གཉིས་སུ་མེ་ཏོག་དགོད་ཅིང༌། ལུས་དང་ལུས་འཕགས། ལྷོའི་གཡས་གཡོན་གཉིས་སུ་དགོད་ཅིང༌། རྔ་ཡབ་དང་རྔ་ཡབ་གཞན། ནུབ་
ཀྱི་གཡས་གཡོན་གཉིས་སུ་དགོད་ཅིང༌། གཡོ་ལྡན་དང་ལམ་མཆོག་འགྲོ། བྱང་གི་གཡས་གཡོན་གཉིས་སུ་དགོད་ཅིང༌། སྒྲ་མི་སྙན་དང་སྒྲ་མི་སྙན་གྱི་ཟླ། དེ་ནས་གླིང་གི་ནང་གི་ཤར་དུ་དགོད་ཅིང༌། གླང་པོ་རིན་པོ་ཆེ། ལྷོར་དགོད་ཅིང་ཁྱིམ་བདག་རིན་པོ་ཆེ། ནུབ་
ཏུ་དགོད་ཅིང་རྟ་མཆོག་རིན་པོ་ཆེ། བྱང་དུ་དགོད་ཅིང་བཙུན་མོ་རིན་པོ་ཆེ། ཤར་ལྷོར་དགོད་ཅིང་དམག་དཔོན་རིན་པོ་ཆེ། ལྷོ་ནུབ་ཏུ་དགོད་ཅིང་འཁོར་ལོ་རིན་པོ་ཆེ། ནུབ་བྱང་དུ་དགོད་ཅིང་ནོར་བུ་རིན་པོ་ཆེ། བྱང་ཤར་དུ་དགོད་ཅིང་གཏེར་ཆེན་པོ། ནང་གི་ཤར་དུ་དགོད་ཅིང་
9-2-9a


ཉི་མ། ནང་གི་ནུབ་ཏུ་དགོད་ཅིང་ཟླ་བ་རྣམས་སོ་སོའི་རྣམ་པ་ཇི་བཞིན་དེ་གསལ་གདབ། རིན་པོ་ཆེ་སྣ་ཚོགས་ཀྱིས་བཀང་བར་དམིགས་ཏེ། བདག་གཞན་ལུས་ངག་ཡིད་གསུམ་ལོངས་སྤྱོད་དུས་གསུམ་དགེ་བའི་ཚོགས། །རིན་
ཆེན་མཎྜལ་བཟང་པོ་ཀུན་བཟང་མཆོད་པའི་ཚོགས་བཅས་པ། །བློ་ཡིས་བླངས་ནས་བླ་མ་དཀོན་མཆོག་རྣམས་ལ་འབུལ། །ཐུགས་རྗེའི་དབང་གིས་བཞེས་ལ་བདག་ལ་བྱིན་གྱིས་བརླབ་ཏུ་གསོལ། །ཞེས་བརྗོད་དེ་བླ་མ་ལ་དབུལ། མེ་ཏོག་སོགས་ཕྱི་དང་
ནང་བདུད་རྩིའི་མཆོད་པ་དང༌། གསང་བའི་མཆོད་པས་ཀྱང་མཆོད། བསྟོད་པས་ཀྱང་བསྟོད་ལ། བླ་མའི་སྤྱན་སྔར་སྤྱི་དང་ཁྱད་པར་གྱི་སྡོམ་པ་གཟུང་ངོ༌། །དེ་ནས་གུས་པ་ཆེན་པོས་ཐུན་མོང་དང༌། ཐུན་མོང་མ་ཡིན་པའི་ལམ་རྣམས་མྱུར་དུ་རྒྱུད་ལ་སྐྱེ་བ་དང༌། 
དེ་དག་གི་འགལ་རྐྱེན་ཞི་ཞིང་མཐུན་རྐྱེན་ཡིད་བཞིན་དུ་འགྲུབ་པའི་གསོལ་བ་བཏབ་པས། དགྱེས་ཏེ་བླ་མའི་གནས་གསུམ་གྱི་ཡི་གེ་ལས་འོད་ཟེར་དཀར་དམར་མཐིང་གསུམ་འཕྲོས་པ། རང་གི་གནས་གསུམ་དུ་རིམ་པ་བཞིན་དུ་ཞུགས་པས། ལུས་ཀྱི་
ནང་ཐམས་ཅད་འོད་ཟེར་གསུམ་གྱིས་རིམ་པ་བཞིན་དུ་ཁེངས། སྒོ་གསུམ་གྱི་དྲི་མ་སྦྱངས། བུམ་པ་དང་གསང་བ་དང་ཤེས་རབ་ཡེ་ཤེས་ཀྱི་དབང་རིམ་པ་བཞིན་ཐོབ། སྐུ་རྡོ་རྗེ་སོགས་གསུམ་གྱི་དངོས་གྲུབ་རིམ་པ་བཞིན་ཐོབ་པར་བསམ། དེ་ནས་སྐུའི་གནས་
ཐམས་ཅད་ལས་འོད་ཟེར་སྣ་ཚོགས་འཕྲོས། རང་གི་ལུས་ཀྱི་སྒོ་ཐམས་ཅད་ནས་ཞུགས་སྒོ་གསུམ་གྱི་སྒྲིབ་པ་ཕྲ་བ་སྦྱངས་དབང་བཞི་པ་ཐོབ། རྡོ་རྗེ་གསུམ་དབྱེར་མི་ཕྱེད་པའི་དངོས་གྲུབ་ཐོབ་པར་བསམ་མོ། །ཡི་གེ་གསུམ་ནི་རྡོ་རྗེ་གསུམ་གྱི་མཚོན་བྱེད་
9-2-9b


ཡིན་ལ། དེ་གསུམ་གྱིས་སྒྲིབ་པ་གསུམ་སྦྱོང་བ་བཞིན་དུ། དབང་གསུམ་གྱིས་ཀྱང་སྦྱོང་བ་འདྲ་བ་ཙམ་དང་། དོན་གྱི་དབང་བཞི་པ་རྡོ་རྗེ་གསུམ་དབྱེར་མི་ཕྱེད་པས་ཕྲ་བའི་སྒྲིབ་པ་སྦྱོང་བ་ལ་བསམས་ནས། སྔར་བཤད་པའི་དབང་བཞི་ཐོབ་པའི་ཐ་སྙད་བྱས་པ་ཙམ་
ཡིན་གྱི། དེས་དབང་དངོས་ཐོབ་པ་མིན་ནོ། །དེ་ནས་མདུན་གྱི་བླ་མ་རང་གི་སྤྱི་བོར་རྡོ་རྗེ་བསྡུ་བའི་སྔགས་རྒྱས་སམ། དམིགས་པས་སྤྱན་དྲངས་ཏེ། སྤྱི་བོ་ནས་ཐིམ་པས་རང་གི་ལུས་ངག་ཡིད་གསུམ་དང༌། བླ་མའི་སྐུ་གསུང་ཐུགས་དབྱེར་མི་ཕྱེད་པར་བསམས་
ལ་ཡི་གེ་བརྒྱ་པས་བརྟན་པར་བྱ་སྟེ། དེ་རྣམས་ནི་ཐུན་སྔ་ཕྱིའི་བར་དང་ཐུན་མགོ་རྣམས་སུ་བྱའོ། །གཉིས་པ་ལམ་དེ་ལ་བརྟེན་ནས་ལམ་འདི་ཇི་ལྟར་བསྒོམས་པ་ལ་གཉིས། བསྐྱེད་པའི་རིམ་པ་བསྒོམ་པ་དང༌། རྫོགས་པའི་རིམ་པ་བསྒོམ་པའོ། །དང་པོ་ནི།
བསྐྱེད་རིམ་སྒོམ་པ་ནི་འཇིག་རྟེན་པའི་དངོས་གྲུབ་སྒྲུབ་པ་ལ་དགོས་ཀྱི། མཆོག་སྒྲུབ་པ་ལ་མི་དགོས་སོ་ཞེས་པའི་ལོག་རྟོག་བོད་ན་ལུགས་འགའ་ཞིག་ལ་སྣང་ཡང༌། བླ་མ་མར་པ་ནས་བརྒྱུད་པའི་མེས་ལུགས་དང༌། མཚུར་དང་རྔོག་གསུམ་གའི་ལུགས་
ལ་སྔོན་དུ་བསྐྱེད་རིམ་ལ་འཁྲིད་པ་སྣང་ཞིང༌། བླ་མ་མིད་ལས་ཀྱང༌། སྣང་བ་སྐྱེ་ཤིའི་བར་དོ་རུ། །རིག་པ་སེམས་ཀྱི་རྩལ་སྦྱང་ཕྱིར། །ལམ་བསྐྱེད་རྫོགས་གཉིས་ལ་འབད་ཀྱང་འཚལ། །ཞེས་གསུངས་ཤིང༌། བླ་མ་ཆེ་བ་སྔ་མ་གཞན་རྣམས་ཀྱང་རིམ་པ་
གཉིས་ཀ་སྒོམ་དགོས་པར་བཞེད་པས། བསྐྱེད་རིམ་ལ་མི་འཁྲིད་ན། རྒྱུད་སྡེ་དང་དེའི་དགོངས་འགྲེལ་ཚད་ལྡན་རྣམས་དང་འགལ་ལ། རང་གི་ལུགས་དང་ཡང་འགལ་བས་རྫོགས་རིམ་གྱི་སྔོན་དུ་བསྐྱེད་རིམ་ལ་བསླབ་པར་བྱ་སྟེ། ཀྱེ་རྡོ་རྗེ་ལས། རིམ་
9-2-10a


གཉིས་མཉམ་པར་གནས་ནས་ནི། །རྡོ་རྗེ་ཅན་གྱིས་ཆོས་འཆད་དོ། །ཞེས་དང༌། བསྐྱེད་པའི་རིམ་པའི་རྣལ་འབྱོར་གྱིས། །བརྟུལ་ཞུགས་ཅན་གྱི་སྤྲོས་པ་བསྒོམ། །སྤྲོས་པ་རྨི་ལམ་ལྟར་བྱས་ནས། །སྤྲོས་པ་ཉིད་ཀྱང་སྤྲོས་མེད་བྱ། །ཞེས་དང༌། 
མགོན་པོ་ཀླུ་སྒྲུབ་ཀྱིས་ཀྱང༌། བསྐྱེད་པའི་རིམ་ལ་ལེགས་གནས་ཤིང༌། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་སོགས་གཞུང་དུ་མ་ཞིག་ནས་སྔོན་དུ་བསྐྱེད་རིམ་སྒོམ་དགོས་པར་
གསུངས་པས། བསྐྱེད་རིམ་གྱི་དངོས་ཀྱི་དགོས་པའི་གཙོ་བོ་ནི། རྫོགས་རིམ་གྱི་རྟོགས་པ་ཚང་བར་སྐྱེ་བའི་རྒྱུད་ལེགས་པར་སྨིན་པར་བྱེད་པ་ཡིན་ནོ། །འདི་ཡང་སྔོན་དུ་བསྐྱེད་རིམ་གྱི་ཏིང་ངེ་འཛིན་བརྟན་པོ་རྙེད་ན། ད་གཟོད་རྫོགས་རིམ་སྒོམ་པའི་སྐབས་སུ་ཡབ་ཡུམ་
ཟུང་རེའི་ལྷའི་རྣལ་འབྱོར་སྒོམ་པ་སྔོན་དུ་བཏང་ནས་སྒོམ་པ་སྐྱོན་ཆུང་ཡང༌། དང་པོ་ནས་དེ་ཙམ་གྱིས་ཆོག་པར་བྱེད་པ་རྒྱུད་སྡེའི་དགོངས་པ་མིན་ནོ། །འོ་ན་ཇི་ལྟར་བསྒོམ་སྙམ་ན། ལུགས་འདིའི་རྒྱུད་ཀྱི་བཤད་སྲོལ་འཛིན་པ་རྣམས་འདིའི་ལམ་གྱི་རྨང་རྡོ་གཏུམ་མོ་
ཡིན་ལ། དེ་ཡང་གཙོ་ཆེར་ཀྱེ་རྡོར་གྱི་རྒྱུད་ལ་བརྟེན་པས། རྒྱུད་དེར་གསུངས་པའི་ཀྱེ་རྡོར་རིགས་བཞི་པོ་གང་རུང་ཞིག་ལ་འཁྲིད་པར་བཞེད་དོ། །འདི་ཡི་མན་ངག་ལ་གཙོ་བོར་མཛད་པའི་བླ་མ་གོང་མ་རྣམས། བདེ་མཆོག་ལ་མཛད་པ་མང་སྟེ། སྒམ་པོ་པས་ནི་
ཟངས་དཀར་གྱི་སློབ་མ་མར་ཡུལ་བློ་ལྡན་ལ་བརྟེན་ནས། ཟངས་དཀར་གྱི་ལུགས་ཀྱི་བདེ་མཆོག་དང༌། དཔལ་ཕག་མོ་གྲུ་པས་ནི། ལོ་ཆུང་ནས་བརྒྱུད་པ་མར་ལུགས་ཀྱི་བདེ་མཆོག་དང༌། ཆོས་རྗེ་འབྲི་གུང་པས་ནི། མར་དོ་ནས་བརྒྱུད་པའི་ཅོག་རོ་ལུགས་ཀྱི་བདེ་
9-2-10b


མཆོག་ལ་མཛད་སྣང་སྟེ། དེ་གསུམ་ག་ཡང་དཔལ་ལཱུ་ཨི་པའི་ལུགས་ཀྱི་བདེ་མཆོག་དྲུག་ཅུ་རྩ་གཉིས་པའི་དཀྱིལ་འཁོར་ལ་བརྟེན་པའོ། །དེ་ལྟར་གཉིས་ཡོད་ཀྱང་འདིའི་གཏུམ་མོ་ནི་བདེ་དགྱེས་གཉིས་ཀའི་ཐུན་མོང་བ་ཡིན་པས། བསྐྱེད་རིམ་དེ་གཉིས་
གང་བྱས་ཀྱང་ཆོག་ལ། དཀྱིལ་འཁོར་གྱི་འཁོར་ལོའི་བསྐྱེད་རིམ་བསྒོམས་པས་རྒྱུད་སྨིན་པ་འདྲ་བ། ལྷ་དཔའ་བོ་གཅིག་པ་དང་དཔའ་མོ་གཅིག་པ་ལ་མི་འབྱུང་བས། དྲིལ་བུ་ཞབས་ཀྱི་ལྷ་ལྔ་ལྟ་བུ་ཡན་ཆད་ཀྱི་དཀྱིལ་འཁོར་གྱི་འཁོར་ལོ་ཞིག་ལ་འཁྲིད་
པའི་ཐུན་བཞིའི་རྣལ་འབྱོར་བྱའོ། །བསྐྱེད་རིམ་ལ་མྱོང་བ་འདོན་ཚུལ་ནི། དང་པོར་སེམས་མ་ཡེངས་པར་བཤར་སྒོམ་བྱེད། དེ་རྫོགས་པ་དང་གཙོ་བོ་ཞལ་མང་དང་ཕྱག་མང་ཡིན་ན། ཞལ་ཕྱག་གཞན་སྒོམ་པ་རེ་ཞིག་བཏང་སྙོམས་སུ་བྱས་ལ། ཞལ་
གཅིག་ཕྱག་གཉིས་པ་ལ་སེམས་བཟུང་བ་ལ་བསླབ་སྟེ། དེ་ལ་ཡང་གཉིས་ལས་རྣམ་པ་ལ་བསླབ་པ་ནི། ལྷ་དེའི་རྣམ་པ་ཡས་རིམ་མམ། མས་རིམ་ནས་སྐུའི་ཆ་ཤས་རགས་པ་ཅིག་གསལ་གདབ་ལ། ཡིད་ངོར་ཆ་ཕྱེད་པ་ལམ་མེ་བ་ཅིག་འཆར་ཐུབ་པ་དང༌། 
དེ་ཀ་ལ་སེམས་གྲིམས་ལྷོད་རན་པར་རྩེ་གཅིག་ཏུ་བཞག །དང་པོ་གང་གསལ་བཏབ་པ་དེ་མིན་པའི་རྣམ་པ་གང་ཤར་ཡང༌། རེ་ཞིག་ལ་དེའི་རྗེས་སུ་འབྲངས་ན་མི་དགའ་བས། དང་པོའི་དམིགས་པ་དེ་ཀ་ལ་བཞག །མི་གསལ་བར་སོང་ན་བསྐྱར་ལ་གསལ་
བཏབ་ནས་བསྒོམས་པས། རྣམ་པ་གསལ་བར་སོང་སོང་གི་བར་དུ་བསླབ། དེ་ཡང་གང་གསལ་བཏབ་པ་དེ་འཆར་ཐུབ་པ་དང༌། དེ་ལས་གཞན་གསལ་མ་བཏབ་པ་མི་འཆར་ཞིང༌། ཤིན་ཏུ་གསལ་བ་མིག་གིས་མཐོང་བ་ལས་ཀྱང་ལྷག་པ་སྙམ་བྱེད་པ་དང༌། 
9-2-11a


གསལ་བ་དེ་ཉིད་ལ་སེམས་བཞག་ན་བྱིང་རྒོད་དང་བྲལ་བར་ཐུན་འཁྱོངས་པའི་བརྟན་པ་ཅིག་དགོས་སོ། །ལྷའི་སྐུ་རགས་པ་ལ་དེ་ལྟར་བྱང་བ་ནས། ཞལ་ཕྱག་གཞན་དང་རྒྱན་ལ་སོགས་པའི་ཆ་ཕྲ་མོ་རྣམས་རྫོགས་པར་འཆར་བ་
ལ་སྔར་བཞིན་བསླབ། དེ་ནས་དེའི་སྟེང་དུ་ཡུམ་བསྣན་ལ་དེ་ལྟར་བསྒོམ། དེ་ནས་འཁོར་གྱི་ལྷ་གཞན་དང་ཡང་སྦྲེལ་བ་དང༌། མཐར་བརྟེན་པ་ལྷ་ཐམས་ཅད་དང་རྟེན་གཞལ་ཡས་ཁང་གི་སྐོར་རྣམས་དུས་གཅིག་ཏུ། ཕྲ་རགས་ཐམས་ཅད་གསལ་ལམ་
མེར་ཤར་བ་ལ་སེམས་རྩེ་གཅིག་ཏུ་གནས་ཐུབ་པ་ཅིག་དགོས་སོ། །ང་རྒྱལ་ལ་བསླབ་པ་ནི། རང་ལྷ་དེའི་སྙམ་པའི་ང་རྒྱལ་བསྐྱེད་ནས། དེ་ལ་རྩེ་གཅིག་ཏུ་གནས་པར་བྱེད། དེའི་ཤུགས་ཡལ་བ་ན་ཡང་སྔར་ལྟར་ལྷའི་ང་རྒྱལ་ཤུགས་ཅན་བསྐྱེད་
ནས་དེ་ལ་འཇོག །དེ་ལྟར་བྱས་པས་དང་པོར་བློས་བཅོས་ནས་དེ་ལྟར་སྒོམ་པ་ཡིན་ཀྱང༌། མཚམས་ཤིག་ནས་ལྷའི་ང་རྒྱལ་བརྟན་པ་ན་བློ་དེར་ཁྱུར་གྱིས་འགྲོ་བའི་ང་རྒྱལ་འཕོ་ཐུབ་པ་འབྱུང་ཞིང༌། དེ་ཡང་ཐུན་འཁྱོངས་འཁྱོངས་ཀྱི་བར་དུ་བྱའོ། །
ལྷའི་སྣང་བ་དང་ང་རྒྱལ་སྒོམ་པ་གཉིས་དང་པོ་ནས་རེ་མོས་སུ་བྱས་ནས་བསྐྱང་། རྟེན་དང་བརྟེན་པའི་སྣང་བ་ཁྱད་པར་ཅན་བསྒོམས་པའི་མཐར་དེ་དྲན་པ་ན། ཡིད་ངོར་ཐ་མལ་གྱི་སྣང་བ་འཆར་མི་ཐུབ་པར་ཁྱད་པར་ཅན་གྱི་སྣང་བ་ཉིད་འཆར་བ་ན། ཐ་མལ་
པའི་སྣང་བ་ཡིད་ངོར་དག་པར་བྱེད་ནུས་པ་ཡིན་ལ། སྔར་བཤད་པའི་བཅོས་མིན་གྱི་ང་རྒྱལ་འཕོ་ནུས་པ་བྱུང་བ་ན། ཐ་མལ་པའི་ཞེན་པ་ཡིད་ངོར་དག་པར་བྱེད་ནུས་པ་ཡིན་ནོ། །དེ་ནས་མཉམ་གཞག་ལས་ལངས་ཏེ། སྣོད་བཅུད་ཀྱི་སྣང་བ་གང་ཤར་
9-2-11b


ལ་ལྷ་དང་གཞལ་ཡས་ཁང་དུ་བལྟས་པ་ན། དེ་དང་དེའི་ངོ་བོར་འཆར་བའི་ཏིང་ངེ་འཛིན་བརྟན་པོ་འབྱུང་བས། བསྐྱེད་རིམ་གྱིས་ཐ་མལ་གྱི་སྣང་ཞེན་སྦྱངས་པ་ཞེས་བྱ་བའི་གྲངས་སུ་འགྲོའི་འདི་ཡང་སྡོམ་པ་འབྱུང་བ་ལས། ཁམས་གསུམ་རང་བཞིན་
གཞལ་ཡས་ཁང༌། །སྲོག་ཆགས་རྣམས་ནི་དཀྱིལ་འཁོར་པ། །ཞེས་གསུངས་ཤིང༌། འཕགས་པ་ལྷས་ཀྱང༌། སྣ་ཚོགས་འདི་རྣམས་དཀྱིལ་འཁོར་འཁོར་ལོར་ཤེས་པར་གྱིས་དང་སེམས་ཁྱོད་ཅི་ལ་འཁྲུལ། །ཞེས་བཤད་དོ། །ཚུལ་འདི་ཡང་རིམ་པ་
གཉིས་ཀའི་སྐབས་སུ་འབྱུང་ངོ༌། །ཐེག་པ་འདི་ལ་གང་སྣང་ལྷའི་འཁོར་ལོ་དང༌། ཉམས་མྱོང་བདེ་བ་ཆེན་པོ། རྟོག་པ་སྐྱེ་མེད་ཀྱིས་རྒྱས་འདེབས་པ་ཅིག་དགོས་པ་ཡང་རིམ་པ་དང་པོ་ནས་འབྱུང་ལ། སྲོག་དྷཱུ་ཏཱིར་ཚུད་པ་ལས་བྱུང་བའི་རྫོགས་རིམ་པའི་
བདེ་ཆེན་སྐབས་འདིར་མེད་ཀྱང༌། ཡབ་ཡུམ་དངོས་ལྟ་བུའི་གསལ་སྣང་ཤིན་ཏུ་བརྟན་པ་རྙེད་པས། དེ་འདྲ་བའི་ཐབས་ཤེས་མཉམ་པར་སྦྱར་ཞིང༌། ཕཊ་ཡིག་གིས་བྱང་ཆུབ་ཀྱི་སེམས་ཕྱིར་འཕོ་བ་བཀག་པ་ལས་བྱུང་བའི་བསྐྱེད་རིམ་པའི་བདེ་ཆེན་དུ་མ་
ཞིག་འབྱུང་བ་ཤེས་དགོས་སོ། །དཀྱིལ་འཁོར་གྱི་འཁོར་ལོའི་བསྐྱེད་རིམ་བསྒོམས་པས་རྒྱུད་སྨིན་པར་བྱེད་པའི་གཙོ་བོ་ནི་འདི་ཉིད་ཡིན་ནོ། །གཉིས་པ་རྫོགས་པའི་རིམ་པ་བསྒོམ་པ་ལ་གསུམ། གཞི་དངོས་པོའི་གནས་ཚུལ། ལམ་བགྲོད་པའི་
རིམ་པ། འབྲས་བུ་མངོན་དུ་བྱེད་ཚུལ་ལོ། །དང་པོ་ལ་གཉིས། སེམས་ཀྱི་དངོས་པོའི་གནས་ཚུལ་དང༌། ལུས་ཀྱི་དངོས་པོའི་གནས་ཚུལ་ལོ། །འདི་ཡང་བསྒོམ་རྒྱུ་དོན་གྱི་གནས་ལུགས་ཤེས་པའི་ཕྱིར་དུ། གནས་ཚུལ་དང་པོ་འཆད་ལ། 
9-2-12a


ལུས་ཀྱི་གནས་གང་དུ་དམིགས་པ་གཏོད་སའི་ལུས་ཀྱི་གནད་ཤེས་པའི་ཕྱིར་དུ་གནས་ཚུལ་གཉིས་པ་སྟོན་ནོ། །དེས་ན་དང་པོ་སེམས་ཀྱི་གནས་ཚུལ་སྟོན་པ་ནི། བརྟག་གཉིས་ལས། ངོ་བོ་གཟུགས་མེད་མཐོང་བ་པོ། །
སྒྲ་མེད་ཐོས་པ་པོ་ཡང་མེད། །དྲི་མེད་སྣོམ་པ་པོ་ཡང་མེད། །རོ་མེད་མྱོང་བ་པོ་ཡང་མེད། །རེག་མེད་རེག་པ་པོ་ཡང་མེད། །སེམས་མེད་སེམས་ལས་བྱུང་བའང་མེད། །ཅེས་དང༌། དབང་པོ་དང་ནི་ཡུལ་ཉིད་དང༌། །དབང་པོའི་རྣམ་པར་ཤེས་པ་ཉིད། །
རྣམ་འབྱོར་མ་རྣམས་གོ་བྱའི་ཕྱིར། །ཁམས་ནི་བཅོ་བརྒྱད་རྣམས་སུ་བཤད། །རང་བཞིན་གདོད་ནས་མ་སྐྱེས་པ། །རྫུན་མིན་བདེན་མིན་དེ་བཞིན་དུ། །ཐམས་ཅད་ཆུ་ཡི་ཟླ་བ་ལྟར། །འདོད་པས་རྣལ་འབྱོར་མས་ཤེས་གྱིས། །ཞེས་གསུངས་སོ། །དེ་ལ་
གཟུགས་སྒྲ་དྲི་རོ་རེག་བྱ་ལྔ་དང༌། མཐོང་བ་པོ་ནས་རེག་པ་པོའི་བར་ལྔས། མིག་ནས་ལུས་ཀྱི་དབང་པོའི་བར་དབང་པོ་སྟོན་ཏེ། ཕུང་པོའི་ནང་ནས་གཟུགས་ཀྱི་ཕུང་པོ་དང༌། སྐྱེ་མཆེད་ཀྱི་དབང་དུ་བྱས་ནས། གཟུགས་ཅན་གྱི་སྐྱེ་མཆེད་བཅུ་རང་བཞིན་མེད་
པར་བསྟན་ལ། སེམས་ཞེས་པས་ནི་རྣམ་ཤེས་ཀྱི་ཕུང་པོ་དང་ཡིད་ཀྱི་སྐྱེ་མཆེད་དང༌། སེམས་ལས་བྱུང་བ་ཞེས་པས་ནི། ཚོར་བ་དང་འདུ་ཤེས་དང་འདུ་བྱེད་ཀྱི་ཕུང་པོ་གསུམ་དང༌། དེས་མཚོན་ནས་ཡིད་ཀྱི་དམིགས་སུ་ཡུལ་གྱི་ཆོས་ཀྱི་སྐྱེ་མཆེད་རང་
བཞིན་མེད་པར་བསྟན། ཡང་མཐོང་བ་པོ་ལ་སོགས་པའི་ཚིག་གིས། གཟུགས་མཐོང་བ་པོ་དང༌། སྒྲ་ཐོས་པ་པོའི་གང་ཟག་དང་བདག་ལ་སོགས་པ་ཡང་སྟོན་པས། མདོར་ན་གང་ཟག་དང་ཆོས་ལ་བདག་མེད་པའི་བདག་མེད་གཉིས་སྟོན་ལ། ངོ་བོ་
9-2-12b


ཉིད་མེད་ཚུལ་ནི། ངོ་བོས་མེད་ཅེས་པས་སྟོན་ཏེ། གང་ཟག་དང་གཟུགས་ལ་སོགས་པའི་ཆོས་ལ་ངོ་བོ་ཉིད་ཀྱིས་གྲུབ་པའི་རང་བཞིན་མེད་ཅེས་པའོ། །བཤད་པ་དེ་དག་ནི་གྲུབ་ཆེན་མཚོ་སྐྱེས་ཀྱི་འགྲེལ་པའི་དགོངས་པའོ། །འདི་ནི་རང་བཞིན་གྱིས་དང་རང་གི་
མཚན་ཉིད་ཀྱིས་མེད་ཅེས་གསུང་རབ་ལས་མང་དུ་འབྱུང་བ་རྣམས་ཀྱི་དོན་ནོ། །དེ་འདྲ་བའི་རང་བཞིན་ནམ་ངོ་བོ་ཉིད་ཀྱིས་གྲུབ་པ་མེད་པ་དང༌། རང་བཞིན་གྱིས་མ་སྐྱེས་པ་དེ་ཡང་སྔར་མི་སྟོང་པ་ཅིག་གསར་དུ་ལུང་རིགས་ཀྱིས་བསྒྲུབས་པ་མིན་གྱི། ཡེ་གདོད་མ་
ནས་དེ་ལྟར་ཡིན་པ་ལ་ཡིན་པར་ངོ་ཤེས་པར་བྱེད་པ་ནི། གདོད་ནས་ཞེས་པས་སྟོན་ནོ། །བླ་མ་མར་པའི་ཞལ་ནས། ཤར་ཆུ་བོ་གངྒཱའི་འགྲམ་དུ་ཕྱིན། །རྗེ་མཻ་ཏྲི་ཆེན་པོའི་བཀའ་དྲིན་གྱིས། །གཞི་ཆོས་ཉིད་སྐྱེ་བ་མེད་པར་རྟོགས། །སེམས་སྟོང་པ་ཉིད་ལ་སྦར་ཟིན་
བྱས། །དོན་སྤྲོས་བྲལ་གཉུག་མའི་ངོ་བོ་མཐོང༌། །སྐུ་གསུམ་མ་དང་མངོན་དུ་མཇལ། །མི་ཁོ་བོའི་སྤྲོས་པ་དེ་ནས་ཆོད། །ཅེས་ཕྱག་རྒྱ་ཆེན་པོའི་ལྟ་བ་གཙོ་བོར་མངའ་བདག་མཻ་ཏྲི་པ་ལས་རྙེད་ཅེས་འབྱུང་ལ། སློབ་དཔོན་དེས་མཛད་པའི་དེ་ཁོ་ན་ཉིད་བཅུ་པ་ལས། དེ་
བཞིན་ཉིད་ནི་ཤེས་འདོད་པས། །རྣམ་བཅས་མ་ཡིན་རྣམ་མེད་མིན། །ཞེས་ཡིན་ལུགས་ཀྱི་དེ་བཞིན་ཉིད་ཤེས་པར་འདོད་པས། རྣམ་བཅས་དང་རྣམ་མེད་ཀྱི་ལུགས་ཀྱི་དེ་ཁོ་ན་ཉིད་བླང་བར་བྱ་བ་མ་ཡིན་པར་བཤད་པའི་འགྲེལ་པ། མཻ་ཏྲི་པའི་དངོས་སློབ་པཎྜི་ཏ་ལྷན་ཅིག་
སྐྱེས་པའི་རྡོ་རྗེས་མཛད་པ་ལས། ཉན་ཐོས་སྡེ་པ་རྣམ་བཅས་མདོ་སྡེ་པ་དང༌། རྣམ་མེད་བྱེ་བྲག་སྨྲ་བ་དང༌། སེམས་ཙམ་རྣམ་བདེན་རྫུན་གཉིས་དང༌། རྣལ་འབྱོར་སྤྱོད་པའི་དབུ་མ་པ་ཐ་སྙད་དུ་རྣམ་བདེན་དང༌། རྣམ་རྫུན་ལྟར་འདོད་པ་རྣམས་ཀྱི་ལུགས་བླང་བར་
9-2-13a


བྱ་བ་མ་ཡིན་པར་བསྟན་ཅིང༌། དེ་ཉིད་ལས། དེ་ལྟར་དེས་ནི་དབུ་མ་པ་འཕགས་པ་ཀླུ་སྒྲུབ་དང་འཕགས་པ་ལྷ་དང་ཟླ་བ་གྲགས་པ་ལ་སོགས་པའི་བཞེད་པ་རྟེན་ཅིང་འབྲེལ་པར་འབྱུང་བའི་མཚན་ཉིད་དེ་བཞིན་ཉིད་ཤེས་པར་འདོད་པས་ཡིན་པར་
འགྱུར་རོ། །ཞེས་དེ་གསུམ་གྱི་ལུགས་བླང་བྱ་ཡིན་ནོ། །ཞེས་བཤད་ལ། མགོན་པོ་ཀླུ་སྒྲུབ་དང་འཕགས་པ་ལྷ་གཉིས་ནི་གཞུང་ཕྱི་མོའི་དབུ་མ་པ་ཡིན་པས། འདི་གཉིས་ཀྱི་རྗེས་སུ་དབུ་མའི་གྲུབ་མཐའ་སྨྲ་བ་གཞན་རྣམས་ཀྱང་འབྲང་མོད་ཀྱང༌། དེ་གཉིས་ཀྱི་
ལུགས་འཛིན་པ་མི་འདྲ་བ་མང་དུ་ཡོད་པ་ལ་མངའ་བདག་མཻ་ཏྲི་པ། དཔལ་ལྡན་ཟླ་བ་གྲགས་པའི་རྗེས་སུ་འབྲང་བར་བཤད་ལ། ཡང་དེ་ཁོ་ན་ཉིད་བཅུ་པ་ལས། བླ་མའི་ངག་གིས་མ་བརྒྱན་པའི། །དབུ་མའང་འབྲིང་པོ་ཙམ་ཡིན་ནོ། །ཞེས་ཟླ་བའི་ཞབས་ཀྱི་ལུགས་
འདིའི་མན་ངག་གིས་མ་བརྒྱན་པའི་སློབ་དཔོན་གཞན་གྱི་དབུ་མ་རྣམས་འབྲིང་པོ་ཙམ་དུ་བཤད་པས། ལུགས་འདི་ལ་ཡིན་ལུགས་ཀྱི་དོན་མཐར་ཐུག་པ། ཟླ་བའི་ཞབས་ཀྱི་རྗེས་སུ་འབྲངས་ནས་ཤེས་པར་བྱ་དགོས་སོ། །བདེན་མིན་རྫུན་མིན། ཞེས་སོགས་ཀྱི་
དོན་ནི། རིགས་པ་དྲུག་ཅུ་པ་ལས། གང་དག་བརྟེན་ནས་ངོ་བོ་རྣམས། །ཆུ་ཡི་ཟླ་བ་ལྟ་བུར་ནི། །ཡང་དག་མ་ཡིན་ལོག་མིན་པར། །འདོད་པ་དེ་དག་ལྟས་མི་འཕྲོགས། །ཞེས་གསུངས་པ་བཞིན་ཤེས་པར་བྱ་སྟེ། ཤེས་རབ་ཅན་གང་དག་ཟག་དང་ཆོས་ཀྱི་ངོ་བོ་
རྣམས། རང་རང་གི་རྒྱུ་དང་རྐྱེན་ལ་བརྟེན་ནས་འབྱུང་བ་དང༌། བརྟེན་ནས་བཏགས་པ་ཡིན་པའི་ཕྱིར་ན། བདེན་པ་དང་ཡང་དག་པར་མེད་དོ། །ཞེས་འདི་དག་ལ་རང་གི་ངོ་བོ་ཉིད་ཀྱིས་གྲུབ་པའི་རང་བཞིན་ཅུང་ཟད་ཀྱང་མེད་དེ། རང་ལ་ཚུགས་ཐུབ་ཀྱི་རང་བཞིན་
9-2-13b


ཡོད་ན། རྒྱུ་རྐྱེན་སོགས་གཞན་ལ་བལྟོས་ནས་བཞག་དགོས་པ་མ་ཡིན་ནོ། །ཞེས་བདེན་འཛིན་གྱི་དམིགས་གཏད་བྱ་ས་རྡུལ་ཙམ་ཡང་མེད་སྙམ་པའི་ངེས་པ་དྲང་ངོ༌། །དེ་ལྟར་མཚན་མར་འཛིན་པ་བདེན་འཛིན་གྱི་དམིགས་གཏད་རྡུལ་ཙམ་ཡང་མ་
གྲུབ་ཀྱང༌། ལས་འབྲས་ལ་སོགས་པའི་རྒྱུ་འབྲས་ཀྱི་འཁོར་འདས་ཀྱི་བྱ་བྱེད་ཐམས་ཅད་ཉམས་པ་མེད་པ་སྒྱུ་མ་དང༌། རྨི་ལམ་དང་གཟུགས་བརྙན་གྱི་བྱ་བྱེད་བཞིན་དུ་འཆར་བ་ཡོད་དོ། །དེའི་ཕྱིར་ཆོས་འདི་རྣམས་རི་བོང་གི་རྭ་ཡོད་དོ་ཞེས་པ་ལྟ་བུའི་བརྫུན་པ་
ཡང་མིན་ལ། ཐག་པ་ལ་སྦྲུལ་དུ་འཁྲུལ་བ་ལྟ་བུའི་ཕྱིན་ཅི་ལོག་འབའ་ཞིག་གིས་བཞག་པ་ཡང་མིན་ནོ། །དེ་ལྟར་ཆོས་གང་ལ་ཡང་བདེན་འཛིན་གྱི་དམིགས་གཏད་བྱ་ས་རྡུལ་ཙམ་ཡང་མེད་པར་མཐོང་བའི་སྟོང་ཉིད་ཀྱི་ལྟ་བ་གོ་བ་ཅིག་དང༌། ལྟ་ཐོག་དེར་
བཞག་ནས་སྒོམ་པ་ཅིག་མེད་ན། ལམ་ཅི་ཙམ་བསྒོམས་ཀྱང་སངས་རྒྱས་ལྟ་ཞོག་འཁོར་བ་ལས་ཀྱང་བརྒལ་མི་ནུས་སོ། །དེའི་ཕྱིར་རྡོ་རྗེ་གུར་ལས། བདག་ཏུ་འཛིན་པ་བཟློག་པའི་ཕྱིར། །སྟོང་པ་རྒྱལ་བ་རྣམས་ཀྱིས་གསུངས། །ཞེས་གང་ཟག་དང་ཆོས་ཀྱི་
བདག་ཏུ་འཛིན་པ་བཟློག་པའི་ཕྱིར་དུ། སངས་རྒྱས་ཀྱིས་སྟོང་པ་ཉིད་ཀྱི་ལྟ་བ་གཏན་ལ་འབབས་པ་གསུངས་སོ། །དོན་དམ་པར་སྔར་བཤད་པ་ལྟར་ཡིན་ཀྱང༌། མིང་ཙམ་དང་བཏགས་པ་ཙམ་གྱི་ཆོས་རྣམས་ལ། ཀུན་རྫོབ་ཏུ་རྫུན་པ་སྒྱུ་མ་དང་རྨི་ལམ་ལྟ་བུའི་
རྒྱུ་འབྲས་ལ་ངེས་པ་འདྲེན་ས་མེད་པར་སོང་ནས། རང་ལུགས་ལ་དེ་དག་བྱེད་པ་མ་བདེ་ནས། གཞན་གྱི་འཁྲུལ་ངོ་ཁོ་ན་ལ་སྐྱེལ་དགོས་པར་སོང་ན། ཆད་པ་སྐུར་འདེབས་ཀྱི་ལྟ་བ་མི་བཟད་པའི་གཡང་སར་ལྟུང་བས། རྟེན་འབྲེལ་སྒྱུ་མ་ལྟ་བུའི་ངེས་པ་ཤིན་ཏུ་
9-2-14a


ཆེ་བ་ཅིག་དགོས་སོ། །བདེན་གཉིས་ཀྱི་རྣམ་གཞག་དེ་འདྲ་ཅིག་དགོས་པར་ལམ་འདིའི་རྣལ་འབྱོར་པ་ཆེན་པོ་མིད་ལས་ཀྱང༌། ཁྱེད་བློ་དམན་རྣམས་ཀྱི་བསམ་ངོ་དང༌། །བསྟུན་ནས་སངས་རྒྱས་ཀུན་མཁྱེན་གྱིས། །ཐམས་ཅད་ཡོད་
ཅེས་གསུངས་པ་ཡིན། །དོན་དམ་བདེན་པའི་དབང་དུ་ནི། །བགེགས་ལས་སངས་རྒྱས་ཉིད་ཀྱང་མེད། །སྒོམ་པ་པོ་མེད་བསྒོམ་བྱ་མེད། །བགྲོད་བྱ་ས་དང་ལམ་རྟགས་མེད། །འབྲས་བུ་སྐུ་དང་ཡེ་ཤེས་མེད། །དེ་ཕྱིར་མྱ་ངན་འདས་པ་མེད། །མིང་དང་ཚིག་
གིས་བཏགས་པ་ཙམ། །ཁམས་གསུམ་བརྟན་དང་གཡོ་བར་བཅས། །གདོད་ནས་མ་གྲུབ་སྐྱེ་བ་མེད། །གཞི་མེད་ལྷན་ཅིག་སྐྱེས་པ་མེད། །ལས་དང་ལས་ཀྱི་རྣམ་སྨིན་མེད། །དེ་ཕྱིར་འཁོར་བའི་མིང་ཡང་མེད། །མཐར་ཐུག་དོན་ལ་དེ་ལྟར་གདའ། །ཞེས་
དོན་དམ་པར་འཁོར་འདས་ཀྱི་ཆོས་གང་ཡང་རྡུལ་ཙམ་ཡང་མ་གྲུབ་པར་གསུངས་ནས། ཨེ་མ་སེམས་ཅན་མེད་གྱུར་ན། །དུས་གསུམ་སངས་རྒྱས་ཅི་ལས་བྱུང༌། །རྒྱུ་མེད་འབྲས་བུ་མི་སྲིད་པས། །ཀུན་རྫོབ་བདེན་པའི་དབང་དུ་ནི། །འཁོར་བ་དང་ནི་མྱ་ངན་
འདས། །ཐམས་ཅད་ཡོད་ཅེས་ཐུབ་པས་གསུངས། །ཡོད་པ་དངོས་པོར་སྣང་བ་དང༌། །མེད་པ་སྟོང་པའི་ཆོས་ཉིད་གཉིས། །ངོ་བོ་དབྱེར་མེད་རོ་གཅིག་པས། །རང་རིག་གཞན་རིག་ཡོད་མིན་ཏེ། །ཐམས་ཅད་ཟུང་འཇུག་ཡངས་པ་ཡིན། །དེ་ལྟར་རྟོགས་པའི་མཁས་
པ་ཡིས། །རྣམ་ཤེས་མ་མཐོང་ཡེ་ཤེས་མཐོང༌། །སེམས་ཅན་མ་མཐོང་སངས་རྒྱས་མཐོང༌། །ཆོས་ཅན་མ་མཐོང་ཆོས་ཉིད་མཐོང༌། །ཞེས་དོན་དམ་པར་འཁོར་འདས་ཀྱི་ཆོས་རྣམས་ཀྱི་མིང་ཙམ་ཡང་མ་གྲུབ་པ་དང༌། དེ་ལྟར་ཡིན་ཀྱང་ཀུན་རྫོབ་ཏུ་ནི། སེམས་
9-2-14b


ཅན་གྱིས་སངས་རྒྱས་ཐོབ་པ་ལ་སོགས་པ་འཁོར་འདས་ཀྱི་རྣམ་གཞག་ཀུན་ཡོད་པ་དང་། དེ་ཡང་མིང་དང་ཚིག་གིས་བཏགས་པ་ཙམ་ལ་འཇོག་པ་དང༌། དངོས་པོར་སྣང་བའི་རྟེན་འབྲེལ་དང༌། རང་བཞིན་གྱིས་གྲུབ་པ་མེད་པའི་སྟོང་པ་གཉིས། ངོ་བོ་གཅིག་ཏུ་
གནས་པས་སྣང་སྟོང༌། གཅིག་གིས་གཅིག་མ་དོར་བར་གསུངས་པ་ནི། ལུགས་འདིའི་བླ་མ་གོང་མའི་ཁྱད་ཆོས་ཅིག་ཏུ་སྣང་བས། ལུགས་འདི་ལ་ལྟ་བ་གཏན་འབེབས་དབུ་མའི་གཞུང་རྣམས་ལས་འབྱུང་བ་བཞིན། བདེན་གཉིས་ཀྱི་རྐྱ་བར་ནས་དྲངས་ནས་
བཤད་པ་མི་དགོས་སོ། །ཞེས་མི་གཟུང་སྟེ། དེ་ལྟར་སྨྲ་ན་གསུང་རབ་དང༌། དགོངས་འགྲེལ་སྤྱི་དང་འགལ་ཞིང༌། རང་གི་ལུགས་དང་ཡང་འགལ་བས་བདེ་སྟོང་དབྱེར་མེད་དུ་སྦྱོར་བར་འདོད་པས། སྔར་བཤད་པའི་སྟོང་པ་ཉིད་ཀྱི་ལྟ་བ་ངེས་པར་བཙལ་བར་བྱའོ། །
གཉིས་པ་ལུས་ཀྱི་དངོས་པོའི་གནས་ཚུལ་ནི། ལྟེ་བ་སྤྲུལ་པའི་འཁོར་ལོ་ལ་སོགས་རྩ་འཁོར་གང་ན་ཡོད་པའི་དབུས་དང༌། དྷཱུ་ཏཱིའི་ཡར་སྣ་མར་སྣ་སོགས་ནི་ལུས་ལ་གནད་དུ་བསྣུན་པའི་ཐབས་ལམ་ཟབ་མོའི་གནད་དུ་བསྣུན་ས་ཡིན་ནོ། །དེ་ཡང་མར་ལུགས་
ཀྱི་གདམས་ངག་པ་རྣམས་ཀྱི་ལུགས་ཀྱིས། གཉིད་ལོག་པ་དང་སད་པའི་དུས་གཉིས་ལས། དང་པོའི་སྐབས་སུ་དགེ་སྦྱོར་སྐྱོང་བ་ལ་ནི། སྙིང་ཁ་དང་མགྲིན་པའི་གནད་ཤེས་དགོས་ཤིང༌། སད་དུས་སུ་གཏུམ་མོ་སྒོམ་པ་ལ་ནི་ལྟེ་བ་དང༌། ལས་རྒྱ་དང་སྙོམས་
པར་འཇུག་པ་ལ་ནི། སྤྱི་བོའི་གནད་ཤེས་དགོས་པར་འདོད་དེ། དུས་དེ་དག་གི་ཚེ་སེམས་རྟེན་གྱི་ཐིག་ལེ་གནས་དེ་བཞིར་གནས་པར་འདོད་པའི་ལུགས་སོ། །འདི་ནི་དུས་ཀྱི་འཁོར་ལོའི་སྐོར་ནས་དཔྲལ་བ་དང་ལྟེ་བ་ན་སད་པའི་གནས་སྐབས་སྐྱེད་པ་དང༌། 
9-2-15a


མགྲིན་པ་དང་གསང་གནས་ན་རྨི་ལམ་གྱི་གནས་སྐབས་དང༌། སྙིང་ཁ་དང་ནོར་བུ་ན་གཉིད་འཐུག་གི་གནས་སྐབས་དང༌། ལྟེ་བ་དང་གསང་གནས་ཀྱི་རྩེ་ན་བཞི་པའི་གནས་སྐབས་སྐྱེད་པའི་ཐིག་ལེ་ཡོད་པར་གསུངས་པ་
དང་མཐུན་ཤས་ཆེའོ། །གཉིད་དུ་འགྲོ་བའི་དུས་སུ་སྙིང་ཁ་དང་ནོར་བུར་རླུང་འདུ་ཚབས་ཆེ་ལ། དེ་འཐུག་པའི་རིང་ལ་རྨི་ལམ་མེད་པའི་གཉིད་འོང་ངོ༌། །དེ་ནས་གནས་དེ་གཉིས་ནས་རླུང་ཅུང་ཟད་སྲབ་ཏུ་སོང་ནས། མགྲིན་པ་དང་གསང་གནས་སུ་
འོངས་པ་ན་རྨི་ལམ་འཆར་ལ། དེར་འདུས་པའི་རིང་ལ་རྨི་ལམ་ཉིད་འབྱུང་ངོ༌། །དེ་ནས་རླུང་གནས་དེ་གཉིས་ནས་གྱེས་ཏེ་དཔྲལ་བ་དང་ལྟེ་བར་སོང་ནས་སད་པར་འགྱུར་རོ། །སྤྱི་བོ་ནས་བྱང་སེམས་བབ་པ་ལྟེ་བ་དང་ནོར་བུའི་རྩེར་སླེབ་པ་ན། རང་གི་གནས་གོང་
མ་རྣམས་ལས་འགྱུར་བའི་བདེ་བ་ཆེ་བ་རེ་རེ་འབྱུང་བ་ནི་བཞི་པའི་གནས་སྐབས་ཡིན་ལ། དེ་ཉིད་རླུང་སྟོབས་ཀྱིས་ལམ་དུ་བསླངས་པ་ན་ཡང༌། ཡས་བབས་ཀྱི་ལྷན་སྐྱེས་ཀྱི་མགོ་རྩོམ་པ་ལྟེ་བ་ནས་དང༌། མཚན་ཉིད་རྫོགས་པ་ནོར་བུའི་རྩེར་ཟིན་པ་ན་འཆར་
རོ། །དེ་ལྟར་གནས་བཞིར་གཉིད་དང་རྨི་ལམ་གྱི་དགེ་སྦྱོར་སྐྱོང་བའི་གནས་ཆེ་མོད་ཀྱང་། གནས་དེ་དག་ཏུ་སད་དུས་སུ་སེམས་བཟུང་ན་གནད་དུ་མི་འགྲོ་བ་ཡང་མིན་ནོ། །འཁོར་ལོ་རྣམས་ཀྱི་ནང་ནས་ལུགས་འདི་ལ་ཐོག་མར་གནད་དུ་བསྣུན་ནས་ནི་སྤྲུལ་པའི་
འཁོར་ལོ་ཡིན་ནོ། །དེ་དག་གིས་ནི་རྩ་འཁོར་སོ་སོར་དམིགས་པ་གཏད་ནས་སྐྱོང་བ་ལ། རང་རང་གི་ལག་རྗེས་ཐུན་མོང་མ་ཡིན་པ་ཇི་ལྟར་འོང་གཞན་ཡང་ཤེས་དགོས་པ་རྟོགས་པར་བྱའོ། །གཉིས་པ་ལམ་བགྲོད་པའི་རིམ་པ་ལ་གཉིས། སྔོན་དུ་འཁྲུལ་
9-2-15b


འཁོར་དང་སྟོང་ར་སྒོམ་པ་དང༌། དེའི་རྗེས་སུ་ལམ་དངོས་སྒོམ་པའི་རིམ་པའོ། །དང་པོ་ནི། མར་ལུགས་ཀྱི་བརྒྱུད་པ་གཞན་གྱི་གདམས་པ་ལས། རླུང་ལྡང་འཇུག་གནས་པ་གསུམ་ལ་བརྟེན་པའི་ཧཱུཾ་གིས་བསྲུང་བ་དང༌། ཁྲོ་ཆུང་གི་བསྲུང་བ་དང༌། བླ་
མའི་རྣལ་འབྱོར་གྱིས་བསོད་ནམས་གསོག་པར་བྱེད་ཅིང༌། འཁྲུལ་འཁོར་དང་སྟོང་ར་སྒོམ་པ་མེད་ཀྱང་། རྗེ་བཙུན་མིད་ལ་ནས་སྒམ་པོ་པ་ལ་བརྒྱུད་པ་ལ་སྔ་མ་མེད་ཅིང༌། ཕྱི་མ་ཡོད་པའི་ལུགས་བཞིན་དུ་འདིར་འཆད་པ་ལ་གཉིས་ཡོད་པའི་དིང་པོ་
འཁྲུལ་འཁོར་ནི། སྐྱབས་སུ་འགྲོ་བ་དང༌། སེམས་བསྐྱེད་པ་དང་བླ་མ་སྤྱི་བོར་བསྒོམས་ནས་གསོལ་བ་གདབ་པ་རྒྱུད་དང་འདྲེས་ངེས་པ་རེ་དང༌། རང་ཡི་དམ་ཡབ་ཡུམ་དུ་གསལ་འདེབས། ཐུན་གང་བྱེད་ཀྱི་མགོར་སྔོན་དུ་བཏང་། དེ་ནས་འཁྲུལ་འཁོར་ལ་མང་
ཉུང་དང་བྱེད་ལུགས་མི་འདྲ་བ་མང་དུ་སྣང་ནའང་། འདིར་དཔལ་ཕག་མོ་གྲུ་པས་མཛད་པའི་ཐབས་ལམ་ཚིགས་བཅད་མའི་ལྷན་ཐབས་ལས། ལུས་སྦྱོང་ནི། བུམ་པ་ལྟར་དགང༌། འཁོར་ལོ་ལྟར་བསྐོར། ལྕགས་ཀྱུ་ལྟར་དགུག །རྡོ་རྗེ་བསྡམས་པའི་ཕྱག་རྒྱ་
གནམ་དུ་འཕངས་ཤིང་འོག་ཏུ་བསྐྱུར། ཁྱི་མོའི་སྐྱུག་ཚུལ་གྱིས་མདའ་ལྟར་བསྲང༌། ལུས་ལ་རྩ་དང་ཁྲག་གནས་པར་བྱ་བའི་ཕྱིར་མགོ་ལུས་མེད་པ་སྤྲུག་ཅིང་ཚིགས་པ་བསྒྲེང༌། དེ་ལྟར་དྲུག་གོ། ཞེས་འབྱུང་བ་ལ་ནཱ་རོ་དྲུག་སྐོར་དུ་གྲགས་པས། དེ་ལྟར་
དུ་བྱ་བ་ལ་བུམ་པ་ལྟར་དགང་བ་ནི། སྟན་བདེ་བ་ལ་སྐྱིལ་ཀྲུང་གང་བདེ་བྱ་ལ་རྐང་པ་བསྲང༌། ལག་པ་གཉིས་པུས་མོ་ལ་དགབ། རླུང་སྣ་བུག་གཡས་ནས་ཐེན་ནས་གཡོན་དུ་བལྟས་ཏེ། དེ་ངོས་ཀྱི་སྣ་བུག་ནས་དལ་བུས་རིང་བར་ལྷག་མ་མེད་པར་བུད། ཡང་
9-2-16a


གཡོན་ནས་ཐེན་ནས་གཡས་སུ་བལྟས་ཏེ། དེ་ངོས་ཀྱི་སྣ་བུག་ནས་སྔར་བཞིན་དུ་བུད། དེ་ནས་དབུས་ནས་སྣ་བུག་གཉིས་ཀ་ནས་ཐེན་ཏེ། ཐད་ཀར་ལན་ཅིག་སྔར་བཞིན་བུད། དེ་འདྲ་བའི་ཚུལ་གྱིས་སླར་ཡང་གསུམ་ཚན་གཉིས་
ཏེ། དགུ་ཕྲུགས་སུ་རླུང་རོ་བསལ་ཏེ། དེ་ཡང་ཕར་ལ་འབུད་པ་དང༌། ཚུར་འདྲེན་པའི་དུས་གཉིས་ཀར་ཁ་ནས་འགྲོ་འོང་མེད་པར་བྱའོ། །དེ་ནས་ལུས་དྲང་པོར་བསྲང་སྟེ། ལག་པ་གཉིས་ཀྱི་མཐེབ་ཆེན་ནང་དུ་དགུག །ཐད་ཀ་ནས་རླུང་ཤིན་ཏུ་དལ་ལ་རིང་བར་
ནང་དུ་བརྔུབས་ཏེ། ལྟེ་འོག་ཙམ་དུ་མཆིལ་མ་སྒྲ་མེད་པར་མིད་ནས་ཆིར་གྱིས་མནན་དེའི་རྗེས་སུ་འོག་རླུང་ལྟེ་འོག་ཏུ་མི་དྲག་པ་ཅིག་དྲངས་ཏེ། ཁ་སྦྱར་དུ་བཟུང༌། ཤེས་པ་ལྟེ་བའི་རྩ་འཁོར་གྱི་དབུས་སུ་གཏད་ལ། ནུས་ཚད་དུ་འཛིན་པ་ནི་བུམ་པ་ལྟར་དགང་
བ་སྟེ། འཁྲུལ་འཁོར་བྱེད་པ་ཐམས་ཅད་འདིའི་ངང་ནས་བྱེད་པས། འཁྲུལ་འཁོར་གྱི་དབྱེ་བའི་གསེབ་ཏུ་བགྲངས་པ་ཙམ་མོ། །རླུང་མི་ཐུབ་པ་ན་ཁ་ནས་ཡེ་མ་ཤོར་བར་སྣ་སྒོ་ནས་དལ་བུས་གཏོང་བ་ནི། དམིགས་བསལ་མེད་པ་ཐམས་ཅད་དུ་ཤེས་
པར་བྱའོ། །འཁོར་ལོ་ལྟར་བསྐོར་བ་ནི་རྐང་པ་སྐྱིལ་ཀྲུང་བྱས་པའི་རྐང་པ་གཡས་པའི་མཐེབ་ཆེན་ལག་པ་གཡས་པས་བཟུང༌། རྐང་པ་གཡོན་པའི་མཐེབ་ཆེན་ལག་པ་གཡོན་པས་བཟུང་ཞིང༌། རྐང་པ་དྲང་པོར་བསྲང་ལ། ཕོ་བ་དང་རྐེད་པ་གཡས་སུ་
ལན་གསུམ་བསྐོར། དེ་བཞིན་དུ་གཡོན་དུ་ཡང་བསྐོར། དེ་ནས་གཡོན་ནས་གཡས་སུ་ཀྱོག་པ་དང་། གཡས་ནས་གཡོན་དུ་ཀྱོག་པ་དང༌། མདུན་ནས་རྒྱབ་ཏུ་འཕུལ་བ་རེ་དང༌། རྒྱབ་ནས་མདུན་དུ་འཕུལ་བ་རེ་བྱའོ། །ལྕགས་ཀྱུ་ལྟར་དགུག་པ་ནི། 
9-2-16b


ལག་པ་གཉིས་རྡོ་རྗེ་ཁུ་ཚུར་བཅངས་ལ་སྙིང་ཁ་ནས་ཐད་ཀར་མདུན་ངོས་སུ་གཤིབས་ལ་ཤུགས་ཆེ་བར་བརྐྱངས། དེ་ནས་གཡོན་ངོས་སུ་ལག་པ་གཉིས་བརྐྱངས་པའི་གཡས་པ་སྔོན་ལ་དལ་བུས་ཤུགས་ཆེ་བར་གཡས་པའི་དཔུང་མགོ་བར་དུ་དགུག་ལ་གྲུབ་མོས་མཆན་
ཁུག་དུ་བརྡབ། དེ་ནས་གཡོན་པ་ཡང་སྔ་མ་བཞིན་དུ་དཔུང་མགོ་གཡོན་པ་བར་དུ་བཀུག་ལ་བརྡབ་སླར་ཡང་ལག་པ་གཉིས་རྡོ་རྗེ་ཁུ་ཚུར་བཅངས་པ་སྙིང་ཁ་ནས་ཐད་ཀར་མདུན་ངོས་སུ་ཤུགས་ཆེ་བར་གཤིབས་ལ་བརྐྱང༌། དེ་ནས་གཡས་སུ་ལག་པ་གཉིས་བརྐྱངས་
ནས་སྔ་མ་བཞིན་དགུག་ལ་བརྡབ་བོ། །རྡོ་རྗེ་བསྡམས་པའི་ཕྱག་རྒྱ་གནམ་དུ་འཕང་ཞིང་འོག་ཏུ་བསྐྱུར་བ་ནི། པུས་མོ་གཉིས་བཙུགས་ཏེ་ལུས་བསྲང༌། དེ་ནས་ལག་པ་གཉིས་ཀྱི་སོར་མོ་རྣམས་ཕྱི་རུ་བསྣོལ་བའི་ལག་ལྕགས་བཅུག་པ། ཡར་ལ་རིམ་པ་
བཞིན་སྤྱི་བོའི་བར་དུ་ཤུགས་ཆེ་བར་བཏེག་ལ། དེ་ནས་ལག་པ་གཉིས་ཁ་སྦུབ་ལ་རིམ་པ་བཞིན་ཤུགས་ཆེ་བར་ས་ལ་དབབ་ལ་བསྐྱུར་རོ། །ཁྱི་མོའི་སྐྱུག་ཚུལ་གྱིས་ལུས་མདའ་ལྟར་བསྲང་བ་ནི། པུས་མོ་གཉིས་བཙུགས་ལ་ལུས་བསྲང༌། དེ་ནས་ལག་པ་གཉིས་
ས་ལ་བཞག་པའི་བར་དུ། མགོ་བོ་བཞག་པ་རིམ་གྱིས་གྱེན་དུ་ཤུགས་ཆེ་བར་བཏེག་ནས་ལུས་དྲང་པོར་བསྲང་ལ། སླར་ཡང་ལག་པ་གཉིས་རིམ་གྱིས་ཕབ་པའི་བར་དུ་མགོ་བོ་བཞག་ནས། ཧ་ཞེས་སྐྱུག་སྟངས་བྱས་པའི་མཐར། ལངས་ལ་རྐང་པ་གཉིས་
ལན་གསུམ་གསུམ་དུ་སྤྲུག་གོ། མགོ་ལུས་སྤྲུག་ཅིང་ཚིགས་པ་བསྒྲེང་བ་ནི། ལག་པས་ཕན་ཚུན་གྱི་སོར་མོའི་ཚིགས་པ་འཐེན་པའི་རྗེས་ལ། མགོ་དང་ལུས་པོ་སྤྲུག་ཅིང་ལག་པ་གཉིས་ཕན་ཚུན་དུ་མཉེར་ཏེ་བཀྲུ་བའི་ཚུལ་བྱེད་པའོ། །ལུས་སྦྱོང་རྣམས་
9-2-17a


ལ་རླུང་ལེགས་པར་འཛིན་པ་དང༌། སྤྱོད་ལམ་དལ་བ་དང་འཆུན་ཆེ་བ་དགོས་ལ། བྱེད་པའི་དུས་ནི་ཟས་མ་ཟོས་པའི་གོང་དང༌། ཟས་ཟོས་རྗེས་ཡིན་ན་ལྟོ་བ་བདེ་བར་སོང་བའི་མཚམས་ནས་བྱ་སྟེ། ལུས་ཤིན་ཏུ་མཉེན་པར་མ་སོང་བར་དུ་བྱའོ། །
སྟོང་ར་བསྒོམ་པ་ནི། རང་ཡི་དམ་དུ་གསལ་གདབ་པ་སོགས་སྔར་བཞིན་དུ་བྱ་ལ། འདིའི་དམིགས་པ་ཁྱད་པར་བ་ནི་སྤྱི་གཙུག་ནས་རྐང་མཐིལ་གྱི་བར་དུ་ཕྲུ་མ་ཕུས་བཏབ་པ་ལྟར་སྟོང་སང་ངེ་བ་ལ་དམིགས་པ་གཏད་ནས། དེ་ལ་སེམས་བརྟན་བརྟན་དུ་སྒོམ་པ་
ཡིན་ཏེ། འདི་དང་ལུས་སྦྱོང་གཉིས་སྤེལ་མར་བསྐྱང་ངོ༌། །སྟོང་ར་འདི་ལུས་ཐོགས་རྡུགས་ཅན་དུ་མེད་པའི་འཇའ་ཚོན་བཞིན་དུ་ཡིད་ངོར་སྒོམ་པ་ཡིན་གྱི། འདིས་དངོས་སུ་ལུས་དེ་ལྟར་བྱ་མི་ནུས་ཀྱང་། དམིགས་པ་དེ་ལ་སེམས་བརྟན་ན། རྩ་རླུང་དྲག་པོ་སྒོམ་
པ་ལ་རྩ་ཟུག་དང་རླུང་ཟུག་དྲག་པོ་མི་འབྱུང་བ་དང༌། གལ་ཏེ་བྱུང་ཡང་དམིགས་པ་དེ་བསྒོམས་པས་ཞི་བར་བྱེད་ནུས་པ་ལ། ཁྱད་ཆེ་བས་སྒོམ་པ་ཡིན་ཏེ། ལུས་སྦྱོང་གི་དགོས་པ་ཡང་དེ་དང་འདྲའོ། །སྟོང་ར་ལ་རྟོག་བཟོ་གཞན་མང་པོ་འདུག་ནའང༌། དཔལ་ཕག་
མོ་གྲུ་པའི་ཁྲིད་ཡིག་ལས་དེ་ཙམ་ཞིག་ལས་མི་འབྱུང་སྟེ། དེ་གས་ཆོག་གོ། སྟོང་ར་ལུས་སྦྱོང་འདི་དག་རྒྱ་གཞུང་ཁུངས་ཐུབ་ཆེ་བ་ལས་མི་འབྱུང་ཡང་། བླ་མ་རྣམས་ཀྱི་མན་ངག་གིས་མཛད་འདུག་ལ། དེ་ཡང་རྩ་རླུང་སྒོམ་པ་ལ་འཇམ་སྦྱོར་གྱིས་ཏིང་ངེ་འཛིན་སྐྱེ་
དཀའ་བར་བྱུང་ན། དྲག་སྦྱོར་གྱིས་བྱེད་པ་ལ་འདི་དག་སྦྱངས་ན་གེགས་ཆུང་བ་ལ་བསམས་སོ། །གཉིས་པ་དེའི་རྗེས་སུ་ལམ་དངོས་བསྒོམ་པའི་རིམ་པ་ལ་གཉིས། ལམ་གྱི་ཆིངས་བྱེད་ཚུལ་དང༌། ལམ་ལ་འཁྲིད་པའི་རིམ་པའོ། །དང་པོ་ནི། གདམས་པ་འདི་ལ་ཆོས་
9-2-17b


གཉིས་དང་། གསུམ་དང་བཞི་དང་། དྲུག་དང་བཅུར་བྱེད་ཚུལ་མང་དུ་འདུག་ནའང༌། འདི་ལ་སྒོམ་པ་པོ་གང་ཟག་གི་དབང་པོའི་རིམ་པ་དང་བསྟུན་ནས་བྱེད་ན། ཚེ་འདི་དང་བར་དོ་དང༌། སྐྱེ་བ་བརྒྱུད་ནས་འཚང་རྒྱ་བའི་ལམ་གསུམ་དུ་བྱེད་དགོས་ལ། བསྒོམ་རྒྱུའི་ལམ་
གྱི་དབང་དུ་བྱས་ནས་བྱེད་ན། རྫོགས་རིམ་གྱི་ལམ་དཀྱུས་མའི་དབང་དུ་བྱས་པ་ཅིག་དང༌། དེ་ལ་བོགས་འབྱིན་པའི་ཐབས་སྤྱོད་པ་དང་གཉིས་དགོས་པའི་ཕྱི་མ་འདི། ལུགས་འདིའི་བླ་མ་གོང་མ་གདམས་ངག་ཙམ་ལ་གཙོ་བོར་མཛད་པ་རྣམས་ཀྱི་མན་ངག་ཕལ་ཆེར་
ལ་མི་སྣང་ཡང༌། མར་ལུགས་ཀྱི་རྒྱུད་ཀྱི་བཤད་སྲོལ་འཛིན་པ་རྣམས་ཀྱིས་བཤད་འདུག་པ་བཞིན་དགོས་སོ། །བླ་མ་མར་པའི་ཞལ་ནས། སྒོ་སྲུངས་ནཱ་རོ་པཎ་ཆེན་ལ། །རྒྱུད་ཟབ་མོ་དགྱེས་པ་རྡོ་རྗེ་ཐོས། །བསྲེ་འཕོ་མཚམས་སྦྱོར་གྱི་གདམས་ངག་ཐོབ། །ཁྱད་པར་
གཏུམ་མོ་ལས་རྒྱ་ཞུས། །སྙན་བརྒྱུད་ཀྱི་གནད་ལ་ངོ་སྤྲོད་བྱས། །ཞེས་སྤྱིར་བསྲེ་འཕོ་སྙན་བརྒྱུད་ཀྱི་ངོ་སྤྲོད་དང༌། ཁྱད་པར་དུ་ཀྱེ་རྡོར་ནས་འབྱུང་བའི་ནང་གཏུམ་མོ་ལ་བརྟེན་ནས་དགའ་བཞི་སྐྱེད་ཚུལ་དང༌། ཕྱི་ལམ་ཀྱི་ཕྱག་རྒྱ་ལ་བརྟེན་ནས་དགའ་བཞི་སྐྱེད་ཚུལ་ཞུས་པར་
གསུངས་པས། གཙོ་བོར་ཀྱེ་རྡོར་ལ་བརྟན་པ་ལ་གཏུམ་མོ་དང་ལས་རྒྱ་གཉིས་སོ། །ཡང་མར་པའི་ཞལ་ནས། ནུབ་དུ་ལ་ཀྵེ་ཏྲའི་གྲོང་ཁྱེར་དུ། །དཔལ་ཡེ་ཤེས་སྙིང་པོའི་ཞབས་ལ་གཏུགས། །ཕ་རྒྱུད་གསང་བ་འདུས་པ་མཉན། །སྒྱུ་ལུས་འོད་གསལ་གྱི་གདམས་ངག་
ཐོབ། །ལམ་རིམ་པ་ལྔ་ཡི་དོན་ལ་བསླབས། །ཞེས་གསུངས་ལ། དཔལ་ནཱ་རོ་པ་ལ་རྒྱུད་ཁྱད་པར་དུ་འཕགས་པ་བཞི་ལ་བརྟེན་པའི་གདམས་པ་ཁྱད་པར་དུ་འཕགས་པ་བཞི་གསན་པའི་གཅིག །དཔལ་གསང་བ་འདུས་པ་ལ་བརྟེན་པའི་རིམ་པ་ལྔའི་གདམས་
9-2-18a


ངག་ཡིན་པས། ཡེ་ཤེས་སྙིང་པོ་དང་ནཱ་རོ་པ་གཉིས་ཀ་ལ་རིམ་པ་ལྔ་གསན་པའི་སྒྱུ་ལུས་དང༌། འོད་གསལ་གྱི་གདམས་པ་འདུས་པ་ལ་གཙོ་ཆེར་བརྟེན་པ་ཡིན་ནོ། །འཕོ་བ་དང་གྲོང་འཇུག་ནི་གཙོ་བོར་གདན་བཞི་ལ་བརྟེན་པར་སྣང་ངོ༌། །ནཱ་རོའི་
ཆོས་དྲུག་ཏུ་བྱེད་ཚུལ་ནི། གཏུམ་མོ་དང་སྒྱུ་ལུས་དང་འོད་གསལ་དང་འཕོ་བ་དང་གྲོང་འཇུག་དང་བར་དོའི་གདམས་ངག་དྲུག་ཏུ་བྱེད་དོ། །དེ་ལ་རྨི་ལམ་དང་བར་དོ་ནི་སྒྱུ་ལུས་ཀྱི་ཡན་ལག་རེ་ཡིན་ཞིང༌། གཉིད་ཀྱི་འོད་གསལ་ཡང་སྒྱུ་ལུས་སུ་སྡུད་པ་ལེགས་
ལ། འཕོ་བ་དང་གྲོང་འཇུག་གཉིས་ཕྱོགས་གཅིག་ཏུ་བཤད་ན་བདེའོ། །རྗེ་བཙུན་མིད་ལའི་གདམས་ངག་ཏུ། གདམས་པ་འདི་ལ་བསྐྱེད་རིམ་དང༌། གཏམ་མོ་དང་ལས་རྒྱ་དང༌། གནས་ལུགས་ལྟ་བའི་དོན་གོ་བ་དང༌། མཚོན་བྱེད་ལམ་གྱི་འོད་གསལ། 
མཚོན་བྱེད་ལམ་གྱི་སྒྱུ་མ་རྨི་ལམ་དང་དོན་དྲུག་ཏུ་བསྡུས་ནས། རྗེ་ལྷོ་བྲག་མར་པའི་ཐུགས་ཀྱི་བཅུད་ཕྱུང་བ། སྙན་བརྒྱུད་དོན་གྱི་ངོ་སྤྲོད་ཐབས་ལམ་གནད་ཀྱི་མཐར་ཐུག་ཀྱང་དེ་ལས་མེད་དོ། །རྣལ་འབྱོར་པ་དེའི་དགོངས་པ་ཞེ་ཕུགས་བློའི་གདེང༌། འཕྲལ་
ཉམས་སུ་བླངས་རྒྱུ་དེ་ལས་མེད། ཅེས་གསུངས་པའི་དང་པོ་མ་གཏོགས་པ་རྣམས་ཆོས་དྲུག་གི་རྫོགས་རིམ་འདི་ཉིད་དུ་འདུག་ཅིང༌། མར་པའི་རྒྱུད་ཀྱི་བཤད་སྲོལ་འཛིན་པ་རྣམས་ཀྱི་ལུགས་ཀྱང་དེ་ཁོ་ན་ལྟར་ཡིན་པས། ལུགས་འདི་ལ་ནཱ་རོ་ཆོས་དྲུག་ལས་
ཟབ་པའི་གདམས་པ་གཞན་ཡོད་པར་འདོད་པ་ནི་མུན་སྤྲུལ་ལོ། །དེ་ལ་སྤྱིར་རྣལ་འབྱོར་བླ་མེད་ཀྱི་རྫོགས་རིམ་རྣམས་ལ་སྔོན་དུ། རོ་རྐྱང་གི་རླུང་དབུ་མར་འཛུད་པའི་ཐབས་ཁྱད་པར་ཅན་ཅིག་མེད་མི་རུང་ཡིན་ལ། དེ་ལ་ཡང་རྒྱུད་སྡེ་སོ་སོ་ལ་བརྟེན་པའི་གྲུབ་
9-2-18b


ཆེན་གྱི་ལུགས་མི་འདྲ་བ་མང་དུ་ཡོད་ཀྱང༌། འདིར་ནི་ལྟེ་བ་སྤྲུལ་པའི་འཁོར་ལོ་ལ་བརྟེན་པའི་གཏུམ་མོ། ཨ་ཐུང་གི་སྲོག་རྩོལ་གྱི་སྒོ་ནས་སྲོག་དྷཱུ་ཏཱིར་སྡུད་པ་ཡིན་ནོ། །དེས་ན་སྲོག་དྷཱུ་ཏཱིར་བཙུད་པ་ལས་བྱུང་བའི་དགའ་བཞིའི་མཐར་སྐྱེས་པའི་ལྷན་སྐྱེས་ཀྱི་
ཡེ་ཤེས་ཀྱི་ཕྱག་རྒྱ་ཆེན་པོ་སྐྱོང་བ་དགོས་ཀྱི། དེ་འདྲ་བའི་ཐབས་ལམ་ཟབ་མོ་ལ་མ་བརྟེན་པར། སེམས་ཅིར་ཡང་མི་རྟོག་པའི་ཏིང་ངེ་འཛིན་དྲན་ཤེས་ཀྱིས་རིང་དུ་བསྐྱངས་པའི་བདེ་གསལ་མི་རྟོག་པའི་སེམས་གནས་བརྟན་པོ་ནི། ཐེག་པ་ཆེ་ཆུང་དང་སྔགས་དང་
ཕར་ཕྱིན་གྱི་ཐེག་པ་ཀུན་གྱི་ཐུན་མོང་བ་ཡིན་པས། དེ་གཉིས་མ་འདྲེས་པར་ཕྱེད་པ་ཤིན་ཏུ་གལ་ཆེའོ། །དེའི་ཕྱིར་མིད་ལ་དང་སྒམ་པོ་པ་གཉིས་མཇལ་བ་ན་ཡང༌། སྒམ་པོ་པས་ཁོ་བོ་ལ་ཞག་མང་པོར་ཏིང་ངེ་འཛིན་ཐུན་རེ་ལ་འགྲོ་བའི་སེམས་གནས་ལེགས་པོ་ཡོད་
ཞུས་པས། མིད་ལའི་གསུང་ནས་བྱེ་མ་བཙིར་བ་ལ་མར་ཁུ་མི་འོང་དེ་འདྲའི་ཏིང་ངེ་འཛིན་གྱིས་མི་ཆོག་པས། ངའི་གཏུམ་མོ་ཨ་ཐུང་གི་སྲོག་རྩོལ་སྒོམ་དགོས་ཞེས་གསུངས་པའི་དོན་ལེགས་པར་གོ་དགོས་སོ། །གཏུམ་མོ་ལམ་གྱི་རྨང་རྡོ་ཞེས་ལུགས་འདི་ལ་
གྲགས་ཆེ་བ་ཡང༌། རྫོགས་རིམ་ལ་ཐོག་མར་སྲོག་དྷཱུ་ཏཱིར་བཙུད་པ་ལས། ལྷན་སྐྱེས་ཀྱི་བདེ་ཆེན་སྐྱེད་པ་ཅིག་གཞིར་བཞག་པ་ལ་བརྟེན་ནས། རྫོགས་རིམ་གཞན་རྣམས་ཀྱི་འགྲོས་ཤེས་པ་ཅིག་དགོས་པའི་དོན་དུ་བྱ་དགོས་སོ། །གཏུམ་མོས་སྲོག་དྷཱུ་ཏཱིར་
བཙུད་དེ་རླུང་ཞུགས་གནས་ཐིམ་གསུམ་ལ་ལེགས་པར་བྱང་བ་ན། དེའི་མཐུས་བྱང་སེམས་ཕྱི་རོལ་ཏུ་འཛག་མེད་དུ་འཆིང་ནུས་པ་ན། དེས་དགའ་བཞི་སྐྱེད་པའི་ལྷན་ཅིག་བྱེད་རྐྱེན་ལས་རྒྱ་ལ་བརྟེན་ནས། ལྷན་སྐྱེས་ཀྱི་དགའ་བ་སྐྱེད་པ་ནི་ཁྱད་པར་གཏུམ་
9-2-19a


མོ་ལས་རྒྱ་ཞུས་ཞེས་པའི་དོན་དེའོ། །དེ་འདྲ་བའི་ལྷན་སྐྱེས་ཀྱི་བདེ་སྟོང་སྦྱར་བ་ལ་བརྟེན་ནས། སད་དུས་སུ་སྒྱུ་ལུས་སྒོམ་པ་དང༌། སྒྱུ་ལུས་ལ་བརྟེན་ནས་འོད་གསལ་སྒོམ་པ་གཉིས་དང༌། མཚན་མོ་གཉིད་དུས་སུ་རྨི་ལམ་གྱི་སྒྱུ་མ་སྐྱོང་
བ་དང༌། དེ་ཡང་གཉིད་ཀྱི་འོད་གསལ་སྔོན་དུ་བཟུང་ནས། དེའི་རྗེས་སུ་རྨི་ལམ་ལ་འཇུག་པ་ཡིན་ལ། གཉིད་ཀྱི་འོད་གསལ་རླུང་གི་ནུས་པས་ཟིན་པ་ལ་སད་དུས་སུ་སྲོག་དྷཱུ་ཏཱིར་སྡུད་ནུས་པ་ཅིག་སྔོན་དུ་འགྲོ་དགོས་པས། དེ་གཉིས་ཀྱི་རྨང་རྡོ་ཡང་གཏུམ་
མོའོ། །དེ་འདྲ་བའི་རྨི་ལམ་གྱི་སྒྱུ་མ་ཐོབ་པ་ཞིག་གིས། ད་གཟོད་ཀྱི་བར་དོ་འཛིན་ནུས་པས། དེའི་ཡང་རྨང་རྡོ་གཏུམ་མོ་ཡིན་ཞིང་། དེ་གསུམ་ག་སྒྱུ་ལུས་སུ་སྡུད་པའི་ཚུལ་ཡང་དེའོ། །འཕོ་བ་ཁྱད་པར་ཅན་དང་གྲོང་འཇུག་གཉིས་ཀྱང་སྲོག་དྷཱུ་ཏཱིར་སྡུད་
ནུས་པ་ཅིག་སྔོན་ཏུ་བཏང་ནས་བྱེད་པས། དེའི་རྨང་རྡོ་ཡང་འདིར་གཏུམ་མོའོ། །དེ་ལྟར་ཤེས་ན་ལམ་གྱི་ཆིངས་ཀྱི་གྲངས་མང་ཉུང་ལ། ཁྱད་པར་འགངས་ཅན་མེད་པས་ཇི་ལྟར་བྱས་ན་གོ་བ་ཆེ་བ་ཅིག་ལ་བྱས་པས་ཆོག་གོ། །གཉིས་པ་ལམ་ལ་འཁྲིད་པའི་རིམ་པ་
ལ་གཉིས། ལམ་ལ་འཁྲིད་པའི་དཀྱུས་ཀྱི་དོན་དང་། ལམ་ལ་བོགས་འབྱིན་པའི་ཐབས་སྤྱོད་པའོ། །དང་པོ་ལ་གཉིས། ལམ་དངོས་ཀྱི་དོན་དང༌། ལམ་གྱི་ཡན་ལག་འཕོ་བ་དང་གྲོང་འཇུག་གོ། /དང་པོ་ལ་གཉིས། སྲོག་དབུ་མར་བཙུད་ནས་དགའ་བཞི་བསྐྱེད་
པ་དང༌། དེ་ལ་བརྟེན་ནས་སྒྱུ་མ་དང་འོད་གསལ་བསྒོམ་པའི་ཚུལ་ལོ། །དང་པོ་ལ་གཉིས། ནང་གི་རྐྱེན་གཏུམ་མོ་བསྒོམ་པ་དང༌། ཕྱིའི་རྐྱེན་ལས་ཀྱི་ཕྱག་རྒྱ་ལ་བརྟན་པའོ། །དང་པོ་ལ་གཉིས། གཏུམ་མོ་བསྒོམས་ནས་སྲོག་དབུ་མར་གཞུག་པ་དང༌། བཙུད་པ་
9-2-19b


ལ་བརྟེན་ནས་དགའ་བཞི་བསྐྱེད་ཚུལ་ལོ། །དང་པོ་ལ་གཉིས། གཏུམ་མོ་བསྒོམ་ཚུལ་དང༌། དེ་ལྟར་བསྒོམས་པས་སྲོག་དབུ་མར་ཞུགས་གནས་ཐིམ་གསུམ་བྱེད་ཚུལ་ལོ། །དང་པོ་ལ་གསུམ། རྩ་གསལ་བཏབ་ནས་བསྒོམ་པ་དང༌། ཡི་གེ་གསལ་བཏབ་ནས་
བསྒོམ་པ་དང༌། རླུང་བུམ་པ་ཅན་བསྒོམ་པའི་ཚུལ་ལོ། །དང་པོ་ནི། མདུན་གྱི་ནམ་མཁའ་ལ་རྩ་བའི་བླ་མ་བརྒྱུད་པའི་བླ་མ་དང་བཅས་པ། དཔའ་བོ་དང་མཁའ་འགྲོའི་ཚོགས་ཀྱིས་བསྐོར་བ་དམིགས་ལ། ལུས་ལོངས་སྤྱོད་ལྟོས་པ་མེད་པ་མཆོད་པར་དབུལ་ཞིང༌། 
སྤྱིར་གསོལ་བ་མང་དུ་གདབ། ཁྱད་པར་དུ་རླུང་བདེ་རྩ་འཇམ། བདེ་སྟོང་གི་ཉམས་རྟོགས་ཁྱད་པར་ཅན་སྐྱེ་བའི་གསོལ་བ་དྲག་ཏུ་གདབ། དེ་ནས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྡོ་རྗེ་འཆང་གི་གོ་འཕང་ཐོབ་པར་བྱ་བའི་ཕྱིར་ཙཎྜ་ལི་ཉིས་
སུ་བླང་སྙམ་དུ་བསམ་ཞིང༌། བྱང་ཆུབ་ཀྱི་སེམས་རྒྱུད་དང་འདྲེས་ངེས་པ་བསྒོམ། དེ་ནས་རང་ཡི་དམ་གྱི་ལྷར་གསལ་གདབ་པ་སྔོན་དུ་བཏང་ནས། བསམ་གཏན་གྱི་སྟེགས་བུར་ཞུགས། སྒོམ་ཐག་གྱོན། རྐང་པ་རེ་མིག་ཏུ་བསྣོལ། སྒལ་ཚིགས་དྲང་པོར་བསྲང༌། 
མགྲིན་པ་ཅུང་ཟད་དགུག །མིག་སྣ་རྩེར་དབབ། ལྕེ་རྩེ་ཅུང་ཟད་རྐན་ལ་སྦྱར། སོ་དང་མཆུ་རང་ལུགས་སུ་གཞག །ལུས་སེམས་ཅུང་ཟད་བསྒྲིམ། རོ་སྟོད་འཕེལ་ཀ་བསྐྱེད། མཉམ་གཞག་གི་ཕྱག་རྒྱ་ལྟེ་འོག་ཏུ་བཅར་བ་བྱས་ལ། རྩ་གསུམ་གསལ་གདབ་པ་
ནི། ལྟེ་བའི་བུག་པའི་ཐད་ནི་འོག་ཏུ་སོར་བཞི་སོང་བར། ལུས་ཀྱི་ནང་གི་སྒལ་ཚིགས་ངོས་ལ་ཉེ་བར། དབུས་སུ་རྩ་ཨ་བ་དྷཱུ་ཏཱི། གཡས་སུ་རོ་མ། གཡོན་དུ་རྐྱང་མ་གསུམ་འཁོར་ལོ་བཞིའི་སྲོག་ཤིང་གི་ཚུལ་དུ། སྤྱི་གཙུག་བར་དུ་གཤིབས་ནས་གནས་
9-2-20a


ཤིང༌། སྔར་བཤད་པའི་མར་སྣར་རོ་རྐྱང་གཉིས་དབུ་མའི་རྩའི་ནང་དུ་གུག་ནས་ཡོད་པར་བསམ་མོ། །འདི་ལྟར་སྒོམ་པ་ནི་སྲོག་དྷཱུ་ཏཱིར་འཛུད་པའི་དགོས་པའི་དབང་གིས་སྒོམ་མ་ཤེས་པར། ཁ་ཅིག་ལྟེང་འོག་སོར་བཞི་ཙམ་ནས་
རྩ་གསུམ་ག་ཟད་པ་དང༌། ཁ་ཅིག་རོ་རྐྱང་གཉིས་དེ་ནས་རྫོགས་པར་འདོད་པ་ལྟར་མིན་གྱི། འོག་ཏུ་ཡང་ནོར་བུའི་རྩེའི་བར་ལ་སོགས་པར་འགྲོ་བ་དང༌། སྟེང་དུ་སྨིན་མཚམས་ཀྱི་འོག་གི་དབུས་དང༌། སྣའི་རྩ་བའི་གཡས་གཡོན་ལ་སྒོ་གཏད་ནས་ཡོད་པར་
གསུངས་པ་ལྟར་བྱའོ། །འཁོར་ལོ་བཞི་པོ་རེ་རེའི་དབུས་སུ་རོ་རྐྱང་གཉིས་ཀྱིས་དབུ་མ་ལ་འཁྱུད་པའི་མདུད་པ་བྱས་ནས་ཡང་དྲང་པོར་འགྲོ་བ་ཡིན་ནོ། །རྩའི་སྦོམ་ཕྲ་ནི་བསྒོམས་པ་དང་མ་བསྒོམས་པའི་དུས་སུ་སྣ་ཚོགས་ཤིག་འོང་བས། མཐའ་གཅིག་ཏུ་
མ་ངེས་སོ། །ཁ་དོག་ནི་དབུ་མ་ནས་གཏུམ་མོ་འབར་བའི་དུས་སུ། ཏིལ་གྱི་མར་མེའི་མདོག་བཞིན་འོང་བ་ཁ་སྦྱོར་གྱི་རྒྱུད་དོན་དུ་མན་ངག་སྙེ་མ་ལས་བཤད་ཀྱང༌། དེར་མ་སླེབ་པའི་སྔོན་དུ་སྒོམ་པ་ན་གཡས་དམར་གཡོན་དཀར་དབུས་སྔོ་བའི་རྣམ་པ་ཅན་དུ་སྒོམ་
པ་ལྟར་བྱའོ། །དེ་ནས་འཁོར་ལོ་བཞི་གསལ་འདེབས་པ་ནི། ལྟེ་བ་སྤྲུལ་བའི་འཁོར་ལོ་ཕྱི་དབྱིབས་ཨེ་གྲུ་གསུམ་གྱི་རྣམ་པ་ཅན། རྩ་འདབ་ཀྱི་གྲངས་རེ་བཞི་པ། ཁ་དོག་དམར་པོ། ཁ་གྱེན་དུ་ཕྱོགས་པའི་རྣམ་པ་ཅན་དུ་བསྒོམ་མོ། །འདི་དག་ལ་འདབ་མའི་གྲངས་
རགས་པ་རྣམས་སྨོས་ནས། ཞིབ་བར་མ་སྨོས་འདུག་པ་བཞིན་འདིར་ཆོག་པར་སྣང་བས་མ་བཤད་དོ། །སྙིང་ག་ཆོས་ཀྱི་འཁོར་ལོ་ཕྱི་དབྱིབས་བཾ་ཡིག་ཟླུམ་པོའི་རྣམ་པ་ཅན། རྩ་འདབ་ཀྱི་གྲངས་བརྒྱད་པ་ཁ་དོག་དཀར་པོ། ཁ་འོག་ཏུ་ཕྱོགས་པའི་རྣམ་པ་ཅན་
9-2-20b


དང༌། མགྲིན་པ་ལོངས་སྤྱོད་ཀྱི་འཁོར་ལོ་ཕྱི་དབྱིབས་བཾ་ཡིག་ཟླུམ་པོའི་རྣམ་པ་ཅན། རྩ་འདབ་ཀྱི་གྲངས་བཅུ་དྲུག་པ། ཁ་དོག་དམར་པོ། ཁ་གྱེན་དུ་ཕྱོགས་པའི་རྣམ་པ་ཅན་དང༌། སྤྱི་བོ་བདེ་ཆེན་གྱི་འཁོར་ལོ་ཕྱི་དབྱིབས་ཨེ་གྲུ་གསུམ་གྱི་རྣམ་པ་ཅན། རྩ་འདབ་ཀྱི་གྲངས་སོ་གཉིས་
པ། ཁ་དོག་སྣ་ཚོགས་པ། ཁ་འོག་ཏུ་ཕྱོགས་པའི་རྣམ་པ་ཅན་དུ་བསྒོམ་སྟེ། འཁོར་ལོ་ཟུང་རེ་རེ་ཐབས་ཤེས་ཟུང་རེའི་ཚུལ་དུ་སྒོམ་པ་ཡིན་ནོ། །དེ་ཡང་ཐོག་མར་རྩ་གསུམ་གསལ་གདབ་ལ། དེ་གསལ་བ་དང་དེ་ལ་སེམས་བཟུང་གིན་རྩའི་གསལ་སྣང་དང་དེ་ལ་སེམས་གནས་
པ་གཉིས་ཚོགས་བསྒྲུབ་སྟེ། སེམས་འཛིན་པ་ནི་རྩ་གསུམ་འདུས་པའི་དྷཱུ་ཏཱིའི་ནང་དུ་གཟུང་བ་གནད་ཆེའོ། །དེ་ལ་བརྟེན་ནས་འཁོར་ལོ་རྣམས་ཀྱི་རྩ་འདབ་ཀྱི་གྲངས་གསལ་གདབ་ལ་སེམས་གཟུང༌། དེ་ནི་བསྒོམས་ན་རྩ་འདབ་ཇེ་གསལ་དུ་འགྲོ་བ་དང༌། དེ་ལ་སེམས་
འཛིན་ཇེ་ཐུབ་ཏུ་འགྲོ་ན་བྱའི། ཅི་བྱས་ཀྱང་འདབ་མ་རྣམས་གསལ་མི་ཐུབ་ན། རྩ་གསུམ་ཉིད་ལ་སེམས་གཟུང༌། འདི་ལ་སྙིང་ཁ་ཡན་ཆད་ལ་གསལ་འདེབས་རེ་དང༌། སེམས་ཅུང་ཟད་རེ་མིན་པ་སེམས་འཛིན་ཡུན་རིངས་ན། གེགས་ཀྱི་ཉེན་ཆེ་བས། ཤས་ཆེར་རྩ་གསུམ་
གྱི་འདུས་སོར་ནན་ཏན་བྱས་ལ་སེམས་བཟུང་ངོ༌། །ལུགས་འདི་ལ་རྩའི་གསལ་སྣང་གི་གནས་ཆ་བརྟན་པོ་རིང་དུ་སྒྲུབ་པ་དང་མི་སྒྲུབ་པ་གཉིས་སྣང་ནའང༌། སྔ་མ་ལྟར་བྱས་ན་ལེགས་པ་ཡིན་ཏེ། གྲུབ་ཆེན་ལྭ་བ་པའི་གཞུང་ལས། རྩའི་གསལ་སྣང་སྒྲུབ་པར་བཤད་
དོ། །འདིའི་སྐབས་སུ་རླུང་འཛིན་འདོད་ན་སྔར་བཤད་པ་བཞིན་གཟུང་བར་བྱ་ལ། འདི་དང་འཁྲུལ་འཁོར་དང་སྟོང་ར་སྒོམ་པ་རྣམས་སྤེལ་མ་བྱ་སྟེ། སྐབས་འོག་མར་ཡང་ཤེས་པར་བྱའོ། །གཉིས་པ་ཡི་གེ་གསལ་བཏབ་ནས་སྒོམ་པ་ནི། གཏུམ་མོའི་སྐབས་སུ་རྩ་འཁོར་
9-2-21a


བཞི་གསལ་བཏབ་ནས་སྒོམ་པ་ལ། རྩ་གསུམ་དང་འཁོར་ལོ་བཞི་དང་དེ་དག་ལ་ཡི་གེ་བཀོད་ནས་སྒོམ་པ་ནི། རྩ་རྒྱུད་ཀྱི་རྡོ་རྗེ་དང༌། བཤད་རྒྱུད་སཾ་བྷུ་ཊ་སོགས་ཀྱི་དགོངས་པ་ཡིན་ལ། ནག་པོ་སྤྱོད་པ་སོགས་གྲུབ་ཆེན་མང་པོས་
ཀྱང་གསུངས་སོ། །ཡི་གེ་འགོད་པ་ལ་རྒྱས་བསྡུས་གཉིས་ཀྱི་ལུགས་ཡོད་དེ། རྒྱས་པ་ནི་འཁོར་ལོའི་ལྟེ་བ་དང་འདབ་མ་གཉིས་ཀ་ལ་ཡི་གེ་སྒོམ་པ་ཡིན་ཀྱང༌། ལུགས་འདིའི་མན་ངག་ན་མི་གསལ་ལོ། །བསྡུས་པ་ནི་འཁོར་ལོ་བཞིའི་ལྟེ་བར་ཡི་གེ་བཞི་
སྒོམ་པ་ཡིན་ཏེ། བཤད་རྒྱུད་ལས་གསལ་ཞིང་གྲུབ་ཆེན་དུ་མའི་གཞུང་ལས་ཀྱང་འབྱུང་ངོ༌། །དེའི་ཕྱིར་ལྟེ་བའི་ཨ་ཐུང་གཅིག་པུ་སྒོམ་པ་དང༌། སྤྱི་བོའི་ཧཾ་ཡིག་དང་གཉིས་ཙམ་ལས་མི་སྒོམ་པ་ནི་མི་ལེགས་པས། སྙིང་ཁ་དང་མགྲིན་པ་གཉིས་ཀྱི་ཡི་གེ་ཡང་སྒོམ་
དགོས་ཏེ། གནད་ཤིན་ཏུ་ཆེ་བའི་ཕྱིར་རོ། །དེ་སྒོམ་པའི་ཚུལ་ནི། ལུས་གནད་སོགས་སྔར་དང་འདྲ་བར་བྱས་ཏེ། ཨ་ཐུང་སྒོམ་པའི་གནས་ནི། ལྟེ་བའི་འཁོར་ལོའི་དབུས་ཀྱི་རྩ་དབུ་མ་སྒལ་པའི་ནང་ངོས་ལ་ཉེ་བ། དེའི་ནང་ཁོ་ནར་སྒོམ་དགོས་སོ། །དེར་སྒོམ་པའི་
ཚུལ་ནི་ཟླ་གདན་ཆུང་དུ་ཞིག་གི་སྟེང་དུ་རྒྱུ་ཡིག་གི་ཨ་ཐུང་བོད་ཡིག་གི་དབུ་ཅན་གྱི་ཤད་འདྲ་བ་ཅིག་ཡོད་པས། ཡི་གེ་ཨ་ཐུང་ཤད་ཀྱི་རྣམ་པ་འདྲ་བ་གྱེན་དུ་འགྲེང་བ་མདོག་དམར་པོ་ཞིག་བསྒོམ། སྙིང་ཁར་ཡི་གེ་སྒོམ་པ་ལ་སྒོམ་པའི་གནས་ནི། ཆོས་ཀྱི་འཁོར་
ལོ་འདབ་མ་བརྒྱད་པའི་དབུས་ཀྱི་རྩ་དབུ་མ་ནུ་མ་གཉིས་ཀྱི་དབུས་ཐད་དྲང་ནས། སྒལ་པ་ལ་ཉེ་བར་ཡོད་པའི་དྷཱུ་ཏཱིའི་ནང་ཁོ་ནར་སྒོམ་དགོས་སོ། །སྒོམ་པའི་ཚུལ་ནི། དེར་ཟླ་གདན་ལ་ཧཱུཾ་ཡིག་སྔོན་པོ་མགོ་ཐུར་དུ་ལྟ་བ། བྱང་ཆུབ་ཀྱི་སེམས་ཁ་བ་ལྟ་བུ་འཛག་པ་
9-2-21b


ཅིག་བསྒོམ་མོ། །མགྲིན་པར་ཡི་གེ་སྒོམ་པ་ལ་སྒོམ་པའི་གནས་ནི། ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་པའི་དབུས་ཀྱི་རྩ་དབུ་མ། མགྲིན་པའི་དབུས་ནས་ནང་གི་སྒལ་པ་ངོས་ལ་ཉེ་བའི་དྷཱུ་ཏཱིའི་ནང་ཁོ་ནར་སྒོམ་དགོས་སོ། །སྒོམ་པའི་ཚུལ་ནི་ཟླ་གདན་ལ་ཨོཾ་ཡིག་
དམར་པོ་མགོ་གྱེན་དུ་ལྟ་བ་ཅིག་བསྒོམ་མོ། །སྤྱི་བོར་ཡི་གེ་སྒོམ་པ་ལ་སྒོམ་པའི་གནས་ནི། སྤྱི་གཙུག་ཏུ་བདེ་ཆེན་གྱི་འཁོར་ལོ་རྩ་འདབ་སོ་གཉིས་པའི་དབུས་ཀྱི་རྩ་དབུ་མའི་ནང་ཉིད་དུ་སྒོམ་དགོས་སོ། །སྒོམ་པའི་ཚུལ་ནི་དེར་ཟླ་གདན་ལ་ཧཾ་ཡིག་དཀར་པོ་མགོ་ཐུར་དུ་
ལྟ་བ་ཅིག་བསྒོམ་སྟེ། དེ་བཞི་ཀ་ཡང་འཁོར་ལོ་སོ་སོའི་དབུས་ཀྱི་དྷཱུ་ཏཱི་ལ་རོ་རྐྱང་གི་མདུད་པས་དཀྲིས་པའི་ཐད་ཀའི་རྩ་དབུ་མའི་ནང་དུ་སྒོམ་པ་གནད་ཆེ་བ་ཡིན་ནོ། །བཤད་རྒྱུད་སམ་བྷུ་ཊ་ལས། སྙིང་གི་ནང་སོན་པད་མ་ནི། །འདབ་མ་བརྒྱད་པ་སྙིང་པོར་བཅས། །དེ་ཡི་
ནང་དུ་སོན་པའི་རྩ། །མར་མེའི་ནང་གི་ངོ་བོ་ཅན། །ཆུ་ཤིང་གི་ནི་མ་ཏོག་ལྟར། །བརྐྱང་ཞིང་ཁ་ནི་འོག་ཏུའོ། །དེ་ཡི་ནང་གནས་དབའ་པོ་ནི། །ཡུངས་ཀར་གྱི་ནི་སྤོམ་ཕྲ་ཙམ། །མི་ཤིགས་ཧཱུཾ་གི་ས་བོན་ནི། །ཁ་བ་ལྟ་བུ་འཛག་པ་ཉིད། །ཅེས་གསུངས་ཏེ། དེའི་ནང་དུ་སོན་
པའི་རྩ་ནི་སྙིང་པོ་ཞེས་པ་རྩ་དབུ་མའོ། །དེའི་ནང་དུ་གནས་པ་ཞེས་ཧཱུཾ་ཡིག་རྩ་དབུ་མའི་ནང་སྒོམ་པར་གསུངས་པ་ནི། ཡི་གེ་གཞན་གསུམ་ལའང་འདྲའོ། །འཁོར་ལོ་བཞིའི་དབུས་སུ་ཡི་གེ་བཞི་སྒོམ་པ་མན་ངག་མང་པོ་ལས་འབྱུང་ཡང༌། སྒོམ་སའི་གནད་དྷཱུ་ཏཱིའི་
ནང་ཁོ་ནར་སྒོམ་པ་གསལ་བར་མ་ཐོན་སྣང་སྟེ། འདི་མ་ཤེས་ན་དམིགས་པ་འདི་དག་བསྒོམས་པ་ལ་བརྟེན་ནས། སྲོག་དྷཱུ་ཏཱིར་སྡུད་པ་མི་ཤེས་པས། གདམས་ངག་གི་སྐབས་དོན་སྟོར་བར་འགྲོའོ། །ཡི་གེ་ཆེ་ཆུང་གི་ཚད་ཧཱུཾ་ཡིག་གི་སྐབས་སུ། ཡུངས་ཀར་སྦོམ་
9-2-22a


པོའི་ཚད་ཙམ་དུ་གསུངས་པ་ཡང༌། ཡི་གེ་བཞི་ཀ་ལ་འདྲ་བས། ཡི་གེ་ཇི་ལྟར་ཆུང་ཞིང་རྣམ་པ་གསལ་བ་ལ་སེམས་འཛིན་ཐུབ་ན། རླུང་ཤིན་ཏུ་འདུ་སླ་བའི་གནད་ཆེའོ། །ཨ་ཐུང་ཀླད་ཀོར་ཅན་དུ་སམ་བྷུ་ཊ་ལས་མ་གསུངས་ཀྱང༌། མན་
ངག་གིས་ཀླད་ཀོར་ཅན་དུ་བྱེད་པར་མན་ངག་སྙེ་མ་ལས་བཤད་པ་བཞིན་དུ། བདེ་མཆོག་སྡོམ་འབྱུང་ལས་གསུངས་པས། ཡི་གེ་བཞི་ཀའི་མགོར་ཟླ་ཕྱེད་དང༌། ཐིག་ལེ་ནཱ་ད་དང་བཅས་པ་དང༌། བྱང་ཆུབ་ཀྱི་སེམས་པ་མོ་ལྟ་བུ་འཛག་པའི་རྣམ་པ་ཅན་དུ་
བསམས་ཏེ། འདི་ལ་བདེ་བ་ཆེ་བའི་གནད་ཡོད་དོ། །ཤིན་ཏུ་འཚེར་བའི་འོད་ཅན་བསྒོམས་ན། བྱིང་བ་གཅོད་སླ་ཞིང་ཏིང་ངེ་འཛིན་གསལ་ཉམས་ཆེའོ། །དམིགས་པ་དེ་རྣམས་ལ་སེམས་འཛིན་ཚུལ་ནི། དམིགས་རྟེན་ཕྲ་མོའི་ནང་དུ་སེམས་
ཞུགས་པའི་ཚུལ་གྱིས་འཛིན་པར་གསུངས་པས། ཚུར་ངོས་ནས་ཕར་ལ་ལྟ་བའི་རྣམ་པར་མི་བྱའི། ཡུལ་ཅན་གྱི་སེམས་ཡུལ་དེའི་ནང་དུ་འདྲེས་པ་བཞིན་དུ་བྱ་སྟེ། སྐྱོང་ཚུལ་འདི་ལྟར་བྱས་ན་ད་གཟོད་སེམས་ཐིག་ལེ་དང་འདྲེས་པར་འགྱུར་
བའི་ཉམས་སྐྱེས་ནས་རླུང་འདུ་བར་ཤིན་ཏུ་སླའོ། །དེ་ལྟར་སེམས་འཛིན་པ་ཧ་ཅང་གྲིམས་དྲགས་པ་དང༌། ཧ་ཅང་ལྷོད་དྲགས་པས་བྱིང་རྒོད་སྐྱེད་པས་དེ་གཉིས་སྤངས་ནས་སེམས་གཟུང་བར་བྱའོ། །དེ་ཡང་སྙིང་ཁ་ཡན་ཆད་ཀྱི་ཡི་གེ་གསུམ་
ལ་དང་པོ་ཡུན་ཐུང་བར་བཟུང་ལ། ཤས་ཆེར་ཨ་ཐུང་ལ་སེམས་བཟུང༌། དམིགས་པ་ཕྲ་མོ་ལ་གང་བྱས་ཀྱང་སེམས་འཛིན་པ་དཀའ་བར་སྣང་ན། ཅུང་ཚེ་འུ་བཏང་ལ་དེ་ལ་བརྟན་པ་ན། དམིགས་པ་ཕྲ་མོར་བྱས་ལ་སེམས་བཟུང་ངོ༌། །འདི་འདྲ་བའི་གཏུམ་
9-2-22b


མོ་བསྒོམ་པ་ནི་དགའ་བ་བཞི་སྐྱེད་པའི་ཆེད་ཡིན་ལ། དེ་སྐྱེད་པ་ལ་ཐོག་མར་རྩ་རྣམས་ནས་ཞུ་བའི་བྱང་སེམས་དང༌། རླུང་གཉིས་སྤྱི་བོའི་རྩ་འཁོར་དུ་འདུས་པ་ན་དགའ་བ་སྐྱེ། དེ་ནས་ཡང་རྩ་གནས་སོ་སོར་གྱེས་ནས། མགྲིན་པའི་རྩ་འཁོར་དུ་འདུས་ནས་མཆོག་དགའ་
སྐྱེ། དེ་ནས་ཡང་སོ་སོར་གྱེས་ནས་སྙིང་ཁའི་རྩ་འཁོར་དུ་འདུས་ནས་ཁྱད་པར་གྱི་དགའ་བ་སྐྱེ། དེ་ནས་ཡང་སོ་སོར་གྱེས་ནས་ལྟེ་བའི་རྩ་འཁོར་དུ་འདུས་ནས་ལྷན་སྐྱེས་ཀྱི་དགའ་བ་སྐྱེད་དགོས་སོ། །དེའི་ཕྱིར་འཁོར་ལོ་བཞི་པོ་སོ་སོའི་ལྟེ་བའི་དྷཱུ་ཏཱིའི་ནང་དུ་ཡི་
གེ་ལ་སེམས་བཟུང་བས། གནས་དེ་བཞིར་རླུང་སེམས་ཤིན་ཏུ་འདུ་སླ་བ་དང༌། གནས་དེ་བཞིར་དགའ་བ་རེ་སྐྱེས་ནས། དེ་ཉམས་མྱོངས་གིས་ལེགས་པར་མཚོན་ཐུབ་པ་དགོས་པ་ལ། གནས་གོང་མ་ནས་བྱང་སེམས་ཞུ་ནས་བབ་པ་གནས་དེ་དག་ཏུ་གནས་
ཡུན་མི་རིང་ན། དགའ་བ་རྣམས་ཀྱི་ཁྱད་པར་ལེགས་པར་ངོས་མི་ཟིན་ཞིང༌། ཁྱད་པར་དུ་ལྷན་སྐྱེས་ཀྱི་དགའ་བ་ལེགས་པར་ངོས་མི་ཟིན་ནོ། །གནས་བཞི་པོ་དེར་སེམས་འཛིན་ཡུན་རིང་པའི་གནས་ཆ་བརྟན་པོ་རྙེད་ན། དེ་དག་ཏུ་བྱུང་སེམས་བབས་པ་རིང་
དུ་གནས་པའི་གནད་ཆེའོ། །གཞན་ཡང་སྤྱི་བོའི་ཧཾ་ཡིག་ལ་སེམས་བརྟན་ན། དེ་ཐིག་ལེ་དཀར་པོའི་གནས་ཡིན་པས་དཀར་ཆ་འཕེལ་བ་སྟོབས་ཆེ། མགྲིན་པའི་ཡི་གེ་ལ་སེམས་བརྟན་ན། དེ་རོ་མས་ཁྲག་འཕེན་འཛིན་བྱེད་པའི་གནས་ཡིན་པས། ལྟེ་བ་
ནས་འོངས་པའི་གཏུམ་མོའི་རྡུལ་ཐིག་ལེའི་གནས་སུ་འཁྲིད་པ་ལ་སྟོབས་ཆེ་ཞིང༌། རྨི་ལམ་གྱི་དགེ་སྦྱོར་ལ་བོགས་ཐོན་པ་ཅིག་འོང༌། སྙིང་ཁའི་ཧཱུཾ་ཡིག་ལ་སེམས་བརྟན་ན་དེ་འོད་གསལ་འཆར་བའི་གནས་མཆོག་ཡིན་པས། སད་དུས་དང་གཉིད་དུས་
9-2-23a


གཉིས་ཀའི་འོད་གསལ་འཆར་བ་ལ་སྟོབས་ཆེའོ། །ལྟེ་བའི་ཨ་ཐུང་ལ་སེམས་བརྟན་ན། དེ་རྐྱང་མས་ཁུ་བ་འཕེན་འཛིན་བྱེད་པའི་གནས་ཡིན་པས་ལྟེ་བ་ནས་བྱང་སེམས་དཀར་པོས། ལུས་ཀུན་རྒྱས་པར་བྱེད་པའི་
གནད་ཆེ་ལ། ཡང་གནས་དེ་གཏུམ་མོའི་མེ་གནས་པའི་གནས་ཁྱད་པར་ཅན་ཡིན་པས། བྱང་སེམས་ཞུ་བྱེད་ཀྱི་མེ་འབར་བ་ལ་མཆོག་ཏུ་བསྔགས་པས། རྩ་འཁོར་དང་དེ་ལ་བཀོད་པའི་ཡི་གེ་སྒོམ་པའི་གནད་རྣམས་ལེགས་པར་ཤེས་པ་
གལ་ཆེའོ། །རྩ་ལ་བཀོད་པའི་ཡི་གེ་ཡང་གསལ་སྣང་བྱུང་གི་བར་དུ་སྒོམ་པར་ལྭ་བ་པས་གསུངས་སོ། །གསུམ་པ་རླུང་བུམ་པ་ཅན་བསྒོམ་པའི་ཚུལ་ནི། སྔར་བཤད་པ་ལྟར་དང་པོར་རྩའི་གསལ་སྣང་ལ་སེམས་འཛིན་པ་སྤྱི་དང༌། གཙོ་བོར་རྩ་
གསུམ་འདོམ་སའི་དྷཱུ་ཏཱིར་སེམས་འཛིན་པ་བརྟན་པ་དང༌། དེའི་རྗེས་སུ་སྤྱིར་རྩ་ལ་བཀོད་པའི་ཡི་གེ་བཞི་དང༌། ཁྱད་པར་དུ་ལྟེ་འོག་གི་དྷཱུ་ཏཱིའི་ནང་གི་ཨ་ཐུང་ལ་སེམས་གཏོད་པ་ལ་གོམས་པས། དེར་སེམས་ཟིན་པའི་གནས་ཆ་བརྟན་ན། རླུང་སེམས་འཇུག་
པ་གཅིག་པའི་གནད་ཀྱིས་སེམས་བཟུང་ས་དེར་རླུང་སེམས་ངེས་པར་འདུ་བ་ལ་དགོངས་ནས། བདེ་མཆོག་སྡོམ་འབྱུང་དང་བདེ་དགྱེས་ཀྱི་བཤད་རྒྱུད་སམ་བྷུ་ཊ་ལ་སོགས་པར། གཏུམ་མོ་འཁོར་ལོ་བཞི་མ་ལ་ཡི་གེ་བཀོད་ནས་སྒོམ་པའི་སྐབས་
སུ་རླུང་བུམ་པ་ཅན་གྱི་རླུང་སྦྱོར་མ་བཤད་པ་བཞིན་དུ། གྲུབ་ཆེན་ནག་པོ་སྤྱོད་པ་དང་ལྭ་བ་པ་དང༌། མཚོ་སྐྱེས་སོགས་ཀྱི་གཞུང་མང་པོར་ཡང་དེ་བཞིན་དུ་བཤད་ལ། ཁྱད་པར་དུ་རྒྱུད་ཀྱི་རྫོགས་རིམ་གྱི་གདམས་ངག་གལ་ཆེ་བ་རྣམས་ཚང་བར་བཀོད་
9-2-23b


པའི་མན་ངག་སྙེ་མར་ཡང༌། སྐབས་དེར་རླུང་བུམ་པ་ཅན་སྒོམ་པ་མ་བཤད་དོ། །དེས་ན་སྔར་བཤད་པའི་སེམས་འཛིན་ལུགས་ལེགས་པར་ཤེས་ནས་བསྒོམ་ན། དེ་ཙམ་གྱིས་སྲོག་དྷཱུ་ཏཱིར་ཚུད་ནས་གཏུམ་མོ་འབར་སྟོབས་ཀྱིས། བྱང་སེམས་བཞུས་
པ་ལ་བརྟེན་ནས་དགའ་བཞི་སྐྱེ་བ་ནི་ངེས་པར་འོང་ངོ༌། །འོན་ཀྱང་བོད་ཀྱི་བླ་མ་རྣམས་ཀྱིས་གཏུམ་མོའི་མན་ངག་ལ་རྩ་དང་ཡི་གེ་སྒོམ་པ་རླུང་བུམ་པ་ཅན་དང་སྦྲགས་ནས་བྱེད་པ་མང་བར་བྱུང་བ་ནི། གཏུམ་མོའི་ཉམས་མྱོང་སྐྱེ་བ་མྱུར་བའི་ཆེད་དུ་མཛད་
སྣང་བ་བཞིན་འདིར་ཡང་བཤད་ན། རྔུབ་དང་དགང་དང་གཞིལ་བ་དང༌། །མདའ་ལྟར་འཕང་དང་རྣམ་བཞིའོ། །ཞེས་རླུང་བུམ་པ་ཅན་གྱི་རླུང་སྦྱོར་ཁྱད་པར་བཞི་ལྡན་ཅིག་དགོས་པར་འདི་པའི་བླ་མ་གོང་མ་རྣམས་བཞེད་དོ། །འདི་ཡང་བླ་མ་རྣམས་ཀྱི་མན་
ངག་ལས་འབྱུང་བ་ཡིན་གྱི། ཁྲིད་ཡིག་ཁ་ཅིག་ལས་གདན་བཞི་ནས་བཤད་ཟེར་བ་ནི། རྒྱུད་ན་ཡོད་མེད་ཞིབ་ཏུ་མ་བརྟགས་པའི་སྐྱོན་ནོ། །རླུང་སྦྱོར་སྒོམ་པའི་ལུས་གནད་སོགས་ནི་སྔར་དང་འདྲ་ལ། སྒོམ་པའི་དུས་ནི་དཔལ་ཕག་མོ་གྲུབ་པའི་ཁྲིད་
ཡིད་ལས། བླ་མ་རྣམས་ཀྱིས་རླུང་མཉམ་རྒྱུའི་དུས་སུ་སྒོམ་པར་བཤད་ཀྱང༌། ཉམས་ལེན་ལ་ཉིན་མཚན་ཀུན་ཏུ་སྒོམ་པ་ཡིན་གསུངས་ཏེ། དང་པོ་གསར་དུ་སྒོམ་པའི་མགོ་འཛུགས་ལ། སྤྱི་ཙམ་ནས་རླུང་གསུང་རྡོ་རྗེའི་ངོ་བོ་ཡིན་ལ། དེའི་ནང་ནས་
ཀྱང་པད་མ་མགོན་པོའི་རླུང་གྱེན་རྒྱུ་གཙོ་བོར་རྒྱུ་དུས་སུ་སྒོམ་པར། སྡོམ་འབྱུང་གི་འགྲེལ་པ་པད་མ་ཅན་ལས་བཤད་དོ། །དེ་ལ་རྔུབ་པའི་སྦྱོར་བ་ནི། ཁ་ནས་མི་རྔུབ་པར་སྣ་བུག་ནས་བྱེད་པ་དང༌། དེ་ཡང་དྲག་པོ་མིན་པར་འཇམ་པོ་རིང་བར་རྔུབ་གསུང་
9-2-24a


བ་ལྟར་རོ། །དགང་བའི་སྦྱོར་བ་ནི། ནང་དུ་རྔུབ་པའི་མཚམས་དེ་ནས་ཕྱིར་མི་གཏོང་བར་ནང་དུ་མནན་པས། རོ་རྐྱང་གི་རྩ་གཉིས་ནས་སི་རི་རི་སོང་བས་རྒྱུ་མ་ཕུས་བཏབ་པ་བཞིན། རྩ་གཉིས་པོ་ཁྲིག་གིས་གང་བར་བསམ་པའོ། །
གཞིལ་བའི་སྦྱོར་བ་ནི། དེ་ལྟར་རྩ་གཉིས་པོ་ཁེངས་པའི་མཚམས་དེ་ནས། རྩ་གཉིས་ཀྱི་རླུང་ཐམས་ཅད་དབུ་མའི་ནང་དུ་སུར་གྱིས་ཆུད་པར་བསྒོམས་ལ། མཆིལ་མ་ཞིག་སྒྲ་མེད་དུ་མིད་དེ་སྟེང་རླུང་གནས་དེར་མནན། དེ་ནས་འོག་སྒོ་གཉིས་
ནས་འོག་རླུང་འཇམ་པོ་ཞིག་ཨ་ཐུང་གི་སར་ཐེན་ལ། དེར་དམིགས་པ་གཏད་ལ་རླུང་ཐུབ་ཚད་དུ་བཟུང་ངོ༌། །འདི་ལ་དཔལ་ཕག་མོ་གྲུ་པའི་ཁྲིད་ཡིག་ཚིགས་བཅད་མར། རོ་རྐྱང་གི་རྩ་གཉིས་ནས་དབུ་མར་ཆུད་པར་སྒོམ་པ་དགང་བའི་སྦྱོར་བ་དང༌། 
ཐུབ་ཆེད་དུ་བཟུང་ནས་མི་ཐུབ་པ་ན་སེ་གོལ་གཅིག་གི་ཡུན་ཙམ་ཞིག་ཕྱིར་བཏང་ནས་ལྷག་མ་སྡོམ་པ་གཞིལ་བའི་རླུང་སྦྱོར་དུ་བྱས་ལ། ཁྲིད་ཡིག་ལྷུག་པ་མར་སྔར་བཞིན་བཤད་པའི་མི་མཐུན་པ་གཉིས་བྱུང་ཡང༌། བཞི་པ་མ་གཏོགས་པ་གསུམ་རླུང་
ནང་དུ་འདྲེན་ཚུལ་དང༌། འཛིན་ལུགས་སུ་འདུག་ཅིང༌། ཕྱིར་གཏོང་བ་ཐ་མས་སྟོན་པར་སྣང་བས་དགང་བ་ནི་ནང་དུ་དྲངས་པའི་རླུང་གི་རོ་རྐྱང་འགེངས་པ་ཡིན་ལ། གཞིལ་བ་ནི་དེ་གཉིས་ཀྱི་རླུང་རྣམས་དབུ་མར་བཙུད་པས། དབུ་མ་དགང་བ་ཡིན་
ཀྱང་རྩ་གཞན་གཉིས་ཀྱི་རླུང་གཞིལ་བ་ཡིན་ནོ། །ལྟེ་བའི་བུམ་པ་ཅན་སྒོམ་པ་འདི་ལ། ཁ་ཅིག་འོག་རླུང་ཡར་ལ་མི་འཐེན་པར་སྟེང་རླུང་གནོན་པ་གཅིག་པུ་བྱེད་པ་དང༌། གཞན་དག་དང་པོའི་རིང་ལ་སྟེང་རླུང་གནོན་པ་གཅིག་པུ་བྱེད། མཚམས་ཤིག་
9-2-24b


ནས་འོག་རླུང་འཐེན་ལ། དེ་ཡང་ལན་གསུམ་འཐེན་པ་ཡིན་ཟེར་བ་ནི། ལྟེ་བའི་བུམ་པ་ཅན་སྒོམ་པའི་གནད་མ་རྟོགས་པ་ཡིན་ཏེ། དེ་སྒོམ་པ་ནི་ལྟེ་བ་ཡན་ཆད་ཀྱི་སྲོག་རླུང་དང༌། ལྟེ་བ་ཕྱིན་ཆད་ཀྱི་ཐུར་སེལ་གྱི་རླུང་གཉིས་ལྟེ་བར་བསྲེ་བར་བཤད་པ་བཞིན་
ཡིན་ལ། དེ་བཞིན་དུ་སྡོམ་འབྱུང་ལས་ཀྱང༌། སྟེང་དང་འོག་ཏུ་འགྲོ་བའི་རླུང༌། །ཡིད་ཀྱིས་ཁ་སྦྱོར་དུ་བྱ་སྟེ། །ཞེས་བུམ་པ་ཅན་ལ་སྟེང་འོག་གི་རླུང་ཁ་སྦྱོར་བྱེད་པར་གསུངས་པའི་ཕྱིར་རོ། །དེ་ནས་སྟེང་འོག་གི་རླུང་གཉིས་ཀ་ཁ་སྦྱོར་དགོས་ལ། དེ་གཉིས་དུས་
གཅིག་ཏུ་མི་འཐེན་པར་རིམ་གྱིས་ཐེན་ནས་བྱེད་དགོས་པ་ལ། དམིགས་བསལ་ཅན་གྱི་དགོས་པ་གཞན་མ་བྱུང་ན་སྟེང་རླུང་སྔོན་ལ་ཐིམ་ནས། ལྟེ་བར་མནན་པའི་རྗེས་སུ་འོག་རླུང་ཡར་ལ་ཐེན་ལ་སྔ་མའི་སར་གནོན་པ་ཡིན་ལ། དེ་ལ་འཐེན་ཐེབས་རེ་
རེས་ཆོག་གི་གསུམ་གསུམ་མི་དགོས་སོ། །མདའ་ལྟར་འཕང་བའི་སྦྱོར་བ་ནི། རླུང་ཕྱིར་གཏོང་བ་ན་རྩ་དབུ་མའི་ནང་ན་ཡར་བདེ་ཕྲི་ལི་ལི་འགྲོ་བར་བསམས་ཀྱི། སྤྱི་གཙུག་ནས་འཐེན་པར་བསམ་པར་མི་བྱའོ། །དེ་ལྟར་སྟེང་འོག་ནས་ལྟེ་བར་དྲངས་ཏེ་
འཛིན་པ་ན། ལུས་བྱིན་པོ་རླུང་གིས་ཁེངས་པ་དང༌། མགྲིན་པ་དང་སྙིང་ག་ཡན་ཆད་ཁེངས་པ་ལ་དམིགས་པ་གཏོད་པ་སོགས་བྱར་མི་རུང་གི། ཨ་ཐུང་གང་དུ་བསྒོམས་དེར་རླུང་གཉིས་ཁ་སྦྱོར་བ་ལ་དམིགས་པ་གཏོད་པ་ནི་གནད་དམ་པ་ཡིན་ཏེ། 
སྲོག་དབུ་མར་འཛུད་པ་ལ་སྲོག་ཐུར་གཉིས་རྩ་དེའི་ནང་དུ་ཁ་སྦྱོར་བ་ཅིག་དང༌། དེར་ཡི་གེ་སྔར་བཞིན་བསྒོམ་པ་ལ་དམིགས་པ་གཏོད་པའི་སེམས་ཀྱི་གནད་གཉིས་དང་ལྡན་དགོས་པའི་ཕྱིར་རོ། །དེ་ཡང་རོ་རྐྱང་ཁ་བྱེ་བའི་ཚེ་དབུ་མ་ཁ་ཟུམ་ལ། དབུ་མ་
9-2-25a


ཁ་བྱེ་བའི་ཚེ་རོ་རྐྱང་ཁ་ཟུམ་པར་ངེས་པ་ཡིན་པས། བུམ་པ་ཅན་གྱིས་རོ་རྐྱང་ནས་རླུང་ཕྱི་རོལ་ཏུ་རྒྱུ་བ་འགོག་པ་དང༌། དབུ་མར་འཛུད་པའི་དམིགས་པ་གཉིས་གོམས་པར་བྱས་པས། གོམས་པའི་མཐར་དབུ་མར་འཛུད་ནུས་
པ་འབྱུང་ངོ༌། །རླུང་འགོག་ལུགས་དང་ཡུན་ཅི་ཙམ་ཞིག་ནས་ཕྱིར་གཏོང་བ་ནི། དཔལ་ཕག་མོ་གྲུ་པའི་གདམས་ངག་ལས། དང་པོ་རྩ་སྦྱོང་བ་ཡིན་པས་རླུང་མི་ཐུབ་བཞིན་དུ་མི་གནོན་པར། དབུགས་ཀྱིས་ཐུབ་ཚད་མི་དྲག་ཙམ་དུ་མནན་ལ། ཕྱི་
ནས་ཇེ་དྲག་ཇེ་དྲག་ཏུ་གནོན་པ་ཡིན་ནོ། །ཞེས་གསུངས་པ་ལྟར་རླུང་འཇམ་པོར་རེ་དགའ་གཅིག་ཏུ་མ་སོང་བར་དུ། རོ་སྟོད་བསིགས་ཀྱིན་གནོན་པ་དང༌། དྲག་རླུང་ཐེན་ནས་གནོན་པ་སོགས་ཀྱི་དྲག་པོ་མི་བྱ་བ་དང༌། ཡུན་ཀྱང་མི་བདེ་བར་མངོན་པ་མ་བྱུང་བར་
དུ་བྱའི་མི་བདེ་བ་བྱུང་ཡང་འཛིན་ཡུན་བསྲིང་བ་མི་བྱ་སྟེ། དེ་ལྟར་བྱས་ཀྱང་རླུང་དབུ་མར་འདུ་བ་ལ་དེ་ཙམ་མི་ཕན་པའི་ཕྱིར་ཏེ། ཡུད་ཅིག་གི་རིང་ལ། སྤྲུལ་པའི་འཁོར་ལོའི་དབུས་སུ་བཟུང་བ་དེ་ཡུན་ཅུང་ཟད་རེ་ལས་དེར་མི་གནས་པར་ཕྱིར་ལ་འཕྱུགས་
འགྲོ་བའི་ཕྱིར་དང༌། འཁོར་ལོའི་དབུས་ལས་ཕྱིར་རིང་བར་རླུང་ཟིན་པ་ལ། དྲོད་དང་བདེ་བ་ཐན་ཐུན་སྐྱེ་ཡང་སྲོག་དྷཱུ་ཏཱིར་ཆུད་པ་ལ་ཕན་ཆུང་བའི་ཕྱིར་རོ། །དཔེར་ན་སེམས་འཛིན་གསར་དུ་སྒྲུབ་པ་ལ། ཡུད་ཅིག་གི་རིང་ལ་སེམས་རྩོལ་བས་ཕར་ལ་
བཞག་པ་ཙམ་མིན་པར། རང་ཤུགས་ཀྱིས་གནས་པ་མི་འོང་ཡང༌། མཚམས་ཤིག་ནས་རང་ཤུགས་ཀྱིས་གནས་པ་འོང་བ་བཞིན་དུ་རླུང་འཁོར་ལོའི་ལྟེ་བར་འཛིན་པ་ལ་ཡང༌། རེ་ཞིག་གི་རིང་ལ་རང་གི་རྩོལ་བས་དེར་འཛིན་པ་ཙམ་མིན་པར། གནས་
9-2-25b


དེར་རང་ཤུགས་ཀྱིས་གནས་པ་མི་འོང་ངོ༌། །དེས་ན་རང་ཤུགས་ཀྱིས་གནས་པ་མ་བྱུང་བར་དུ་འཛིན་ཡུན་བསྲིངས་པས། ཡུན་རིང་དུ་ཟིན་པ་བྱུང་ཡང༌། འདོད་པའི་གནས་སུ་ཟིན་པ་མི་འོང་བས། གེགས་ཆེ་ལ་དགོས་པ་ཆུང་བ་མི་བྱས། རླུང་འཁོར་ལོའི་
ལྟེ་བར་རང་ཤུགས་ཀྱིས་གནས་པ་བྱུང་བའི་མཚམས་ནས། ཡུན་བསྲིང་བ་ཤེས་དགོས་སོ། །དེ་དག་ལ་རྟོག་པ་ཞིབ་མོས་སྐྱོང་ཤེས་ན། རང་ཤུགས་ཀྱིས་རླུང་གནས་པ་བྱུང་མ་བྱུང་དང༌། འདོད་པའི་གནས་སུ་ཟིན་མ་ཟིན་ལེགས་པོར་ཤེས་པ་འབྱུང་ངོ༌། །
བུམ་པ་ཅན་སྒོམ་པ་ནི་ལྟོ་སྟོང་དང༌། ཟས་ཟོས་པའི་རྗེས་ཡིན་ན། ལྟོ་བདེ་མོར་སོང་བའི་མཚམས་རྣམས་སུ་བྱ་ལ། བར་མ་ཆད་དུ་ཧ་ཅང་རྒྱུན་རིང་མི་བྱ་བར་བར་སྐབས་སུ་ངལ་བསོ་ཞིང་བསྒོམ་མོ། །དེ་ལྟར་བུམ་པ་ཅན་སྒོམ་པ་བྱང་བའི་མཚམས་སུ། 
བུམ་པ་ཅན་གྱི་རླུང་སྦྱོར་སྒོམ་བཞིན་པའི་སྟེང་ནས། ལྟེ་བ་དང་སྙིང་ཁ་དང་མགྲིན་པ་དང་སྤྱི་བོའི་རྩ་འཁོར་བཞིའི་ལྟེ་བར་རྩ་མདུད་ཀྱིས་དཀྲིས་པའི་བུ་གར་སྔར་བཤད་པ་བཞིན་དུ། ཨཾ་ཧཱུཾ་ཨོཾ་ཧཾ་བཞི་གསལ་གདབ་བོ། །དེ་ནས་གསང་གནས་ཀྱི་འཁོར་ལོར་གནས་པའི་
རླུང་གིས། མེ་བསྐུལ་བའི་གཏུམ་མོའི་རང་བཞིན་གྱི་ཨཾ་ཡིག་འབར་བའི་མེའི་འོད་ཟེར། དྷཱུ་ཏིའི་ནང་ནས་གྱེན་དུ་སོང་ནས། ཧཾ་ཨོཾ་ཧཱུཾ་གསུམ་བཞུས་པ་ལྟེ་བར་ཨཾ་ཡིག་ལ་བབས་ཏེ། དེ་དང་དབྱེར་མེད་དུ་གྱུར་ཏེ་ལྷན་ཅིག་སྐྱེས་དགའི་རང་བཞིན་གྱི་ཐིག་ལེར་
བལྟས་ལ་སེམས་གཟུང་ངོ༌། །དེ་ལ་སེམས་ཟིན་པར་ཐིག་ལེ་དེ་ལས་གཏུམ་མོའི་མེ་ཕྲ་མོ་མེ་ལྕེ་གཅིག་ཏུ་འབར་བ་ལྟར་གནས་པར་བསྒོམ་མོ། །དེའི་འོད་ཀྱིས་འཁོར་ལོ་གོང་མའི་གནས་ནས་བྱང་ཆུབ་ཀྱི་སེམས་ཞུ་བའི་བདུད་རྩི་འཛག་པས་ལྟེ་བའི་ཨཾ་ཡིག་གང་
9-2-26a


ཞིང༌། ཨཾ་ཡིག་དེ་ལ་སེམས་རྩེ་གཅིག་པས་བརྟན་པ་ཐོབ་པའི་མཚན་མ་མཐོང་བ་དེ་སྲིད་དུ་བསྒོམ་མོ། །སེམས་བརྟན་པ་ན་གཏུམ་མོའི་འོད་ཟེར་གྱི་སྣང་བས། ལུས་ཀྱི་ཕྱི་ནང་དང་གནས་ཁང་སོགས་ཐམས་ཅད་ལག་མཐིལ་གྱི་སྐྱུ་
རུ་ར་བཞིན་དུ་གསལ་བར་བསྒོམ་ཞིང་མེ་ཕྲ་ཞིང་མེ་ལྕེ་གཅིག་ཏུ་གྱུར་པ་ལ་སེམས་འཛིན་པ་གལ་ཆེའོ། །དེས་ནི་ཏིང་ངེ་འཛིན་གསལ་ཉམས་ཆེ་ཞིང༌། ཏིང་ངེ་འཛིན་མྱུར་དུ་རྫོགས་པར་འགྱུར་རོ། །གཉིས་པ་དེ་ལྟར་བསྒོམས་པས་སྲོག་དབུ་མར་ཞུགས་
གནས་ཐིམ་གསུམ་བྱེད་ཚུལ་ནི། སྔར་བཤད་པའི་སྒོམ་ཚུལ་གསུམ་པོ་དེ་དག་གིས་སྲོག་དྷཱུ་ཏཱིར་ཞུགས་པའི་རྟགས་མི་འཁྲུལ་བ་ཇི་ལྟ་བུ་འབྱུང་སྙམ་ན། འདི་ནི་ཤིན་ཏུ་གལ་ཆེ་ཞིང་རྟགས་བཤད་པ་གཞན་མང་དུ་སྣང་བ་རྣམས་ནི། ལྟར་སྣང་
འབའ་ཞིག་ཏུ་སྣང་བས་ཡིད་ཆེས་པའི་རྟགས་མྱོང་བས་ངེས་ཐུབ་པ་ནི་འདི་ཡིན་ནོ། །ཐུན་འཁྱོངས་པའི་འོག་ཏུ་རང་གི་སྣ་བུག་གང་རུང་རེ་རེ་བར་རྒྱུ་བའི་འཕོས་མ་ཐག་པའི་སྐབས་ངོས་གཟུང་ལ། དེ་ནས་ལུས་གནད་དང་སེམས་ཀྱི་འཛིན་ལུགས་སྔར་བཞིན་
བྱས་པའི་མཐུས། རིང་པོ་མི་ཐོགས་པར་སྣ་སྒོར་བརྟགས་པ་ན། རླུང་མཉམ་རྒྱུར་ཐེངས་པ་དང༌། དེ་ཡང་ལན་རེ་རེ་གཉིས་གཉིས་ཙམ་ལ་ངེས་པ་མེད་ཀྱི། འགལ་རྐྱེན་གཞན་མེད་ན་ངེས་ཅན་དུ་ཐེངས་ཀྱིན་འདུག་པ་དང༌། མཉམ་རྒྱུ་ཡང་གང་རུང་
ཅིག་དྲག་ལ། ཅིག་ཤོས་ཞན་པ་མེད་པར་དྲག་ཞན་ཤེད་མཚུངས་སུ་རྒྱུ་བ་འོང་བར་སྣང་ན། རྣལ་འབྱོར་དེའི་སྟོབས་ཀྱིས་སྲོག་དབུ་མར་འཛུད་ནུས་པ་ཙམ་དུ་འཇོག་ནུས་མོད་ཀྱང༌། ལན་ཅིག་ཚུད་ནས་གཡས་གཡོན་རེ་རེ་བར་མི་འཕོ་བ་མིན་ནོ། །དེ་ནི་
9-2-26b


སྲོག་དྷཱུ་ཏཱིར་ཞུགས་པ་ཡིན་ལ། སྲོག་དྷཱུ་ཏཱིར་གནས་པ་ནི་མཚམས་འདི་ནས་དྲིལ་ཏེ་བསྒོམས་པས། སྣ་བུག་གི་རྒྱུ་བ་ཞན་དུ་སོང་བའི་མཐར་ཞིབ་དུ་བརྟགས་པ་ན། རྒྱུ་བ་ཕྲ་མོ་ཡང་ལྡོག་པ་ཅིག་འོང་ངོ༌། །རྗེ་བཙུན་མིད་ལའི་ཞལ་ནས་ཀྱང༌། རླུང་རོ་རྒྱང་དྷཱུ་ཏཱིར་
ཚུད་དེ་བདེ། །ཞེས་དང༌། དབུགས་ལ་འགྲོ་འོང་མེད་ན་བདེ། །རྒྱུ་བ་ཆད་ན་ཡོངས་ཀྱང་བདེ། །ཞེས་གསུངས་སོ། །སྣ་བུག་གི་རྒྱུ་བ་ཕྲ་མོ་ཡང་ལོག་པ་ལ་ཐིམ་དཀའ་སླ་གཉིས་ལས། ཐིམ་དཀའ་ན་ཡུད་ཙམ་ལ་ལྟེ་བ་རླུང་གིས་ཁེངས་པ་འབྱུང་ཞིང༌། དེ་ནས་ཞི་བར་
འགྱུར་ལ། ཞི་མ་ཐག་ལྟེ་བ་དང་གསང་གནས་ཀྱི་མེ་གནས་པའི་ཐད་ནས། དྲོད་ཁྱད་པར་ཅན་སྐྱེ་དེ་ནས་རིམ་གྱིས་ཞུ་བདེ་འདྲེན་ནོ། །སྣ་བུག་གི་རྒྱུ་བ་ཕྲ་མོ་ཡང་ལོག་པ་འདི་བྱིང་བ་ཕྲ་མོ་མཆོད་པར་བསགས་པས། བྱིང་བ་ཤས་ཆེ་བ་ཞིག་ལ་ཡང་འོང་ལ། རྩ་འཁོར་
གྱི་ལྟེ་བར་གནད་དུ་བསྣུན་པ་ལ་མི་མཁས་པར་བུམ་པ་ཅན་མང་དུ་བསྒོམ་པ་བྱས་ཤིང༌། སྲོག་དྷཱུ་ཏཱིར་འཆིང་བར་ནི་མི་ནུས་པའི་རླུང་གནས་གཞན་དུ་བྱེར་བ་ལ་ཡང༌། རླུང་འབྱུང་འཇུག་ཀྱང་མི་བྱེད་ཅིང་ནང་དུ་འཛིན་རྒྱུ་ཡང་མེད་པ་ཞིག་འོང་ལ། དེ་ནི་དྷཱུ་ཏཱིར་ཚུད་
པ་དང་ཐིམ་པ་གང་ཡང་མིན་པས། ཁྱད་པར་དེ་རྣམས་ལེགས་པར་ཕྱེད་པར་བྱའོ། །བུམ་པ་ཅན་གྱིས་རླུང་ཟིན་པའི་ཡུན་ཚད་ནི། སྡོམ་འབྱུང་ལས། བུམ་པ་ཅན་སྔར་ཤེས་བྱས་ནས། །བདག་ཉིད་སྐྱིལ་མོ་ཀྲུང་བཅས་ཏེ། །ལག་པ་ལན་གསུམ་མཉེས་
ནས་ནི། །དེ་ནས་ལན་དྲུག་སེ་གོལ་བརྡབ། །ཇི་སྲིད་སུམ་ཅུ་རྩ་དྲུག་ཙམ། །དེ་སྲིད་བུམ་པ་ཅན་བྱ་སྟེ། །སུམ་འགྱུར་མཆོག་གིས་གཞོམ་པར་ནི། །བརྒྱད་ལྷག་པ་ཡི་བརྒྱ་ཙམ་མོ། །ཞེས་གསུངས་པ་ལྟར་ལག་པ་གཡས་པའི་ཐལ་མོས། གཡོན་པ་གན་རྐྱལ་
9-2-27a


དུ་བཞག་པ་ལ། ལན་གསུམ་མཉེས་ནས་སེ་གོལ་ལན་དྲུག་རེ་བརྡབས་པ་ལ་རེ་རེར་བྱས་པའི་རབ་བརྒྱ་རྩ་བརྒྱད་དང༌། འབྲིང་དོན་གཉིས། ཐ་མ་སོ་དྲུག་གི་བར་དུ་རླུང་འཛིན་པར་ནུས་ན། འཆི་བ་འཇོམས་པར་བཤད་པ་ལྟར་རོ། །
གཉིས་པ་བཙུད་པ་ལ་བརྟེན་ནས་དགའ་བཞི་སྐྱེད་ཚུལ་ལ་གསུམ། རྟགས་འཆར་བ་དང་གཏུམ་མོ་འབར་ཚུལ་དང༌། བྱང་སེམས་ཞུ་བ་ལ་བརྟེན་ནས་དགའ་བཞི་སྐྱེད་ཚུལ་དང༌། ལྷན་ཅིག་སྐྱེས་པའི་ཡེ་ཤེས་སྒོམ་པའི་ཚུལ་ལོ། །དང་པོ་ནི། ལྟེ་བའི་རྩ་
འཁོར་གྱི་དབུས་སུ་དམིགས་ནས་སྲོག་དབུ་མར་འཇུག་པ་འདི་ལ། རྟགས་འཆར་ཚུལ་ནི། གྲུབ་ཆེན་ལྭ་བ་པས། དང་པོ་རི་དྭགས་སྲེད་བཞིན་སྣང་བ་སྟེ། །མཚན་མ་གཉིས་པ་དུད་ཁའི་རྣམ་པ་ཅན། །གསུམ་པ་སྲིན་བུ་མེ་ཁྱེར་དང་འདྲ་བ། །བཞི་པ་སྒྲོན་མེ་
འབར་བ་ལྟ་བུར་གསལ། །མཚན་མ་ལྔ་པ་རྣམ་པར་མ་བརྟགས་པར། །སྤྲིན་བྲལ་ནམ་མཁའ་ལྟ་བུར་སྣང་བ་ཡིན། །ཞེས་གསུངས་སོ། །དེ་ལ་རི་དྭགས་སྲེད་ནི་སྨིག་རྒྱུའོ། །རྟགས་བཞི་པོ་འདི་སྔ་མ་ལས་ཕྱི་མ་གསལ་དུ་སོང་བ་ལ་སྨིག་རྒྱུ་སོགས་དང་
འདྲ་བར་གསུངས་ཀྱི། དེ་རྣམས་དང་འདྲ་བའི་སྣང་བ་འཆར་བ་མིན་ཞེས་པ་དང༌། ཁ་ཅིག་རྟགས་ཅན་གྱི་ཤེས་པ་བརྟན་གཡོའི་ཚད་ཡིན་ཞེས་པ་དང༌། ཁ་ཅིག་དུ་བ་སོགས་དང་འདྲ་བའི་སྣང་བ་འཆར་བ་ལ་བཞེད་པ་གསུམ་བྱུང་བ་ནི། ཕྱི་མ་ཉིད་ལེགས་
པ་ཡིན་ནོ། །རླུང་འདུ་ཕུལ་ཆེ་ཆུང་སོགས་ཀྱི་གནད་ཀྱིས་རྒྱ་ཆེ་ཆུང་དང༌། བརྟན་མི་བརྟན་སོགས་སྣ་ཚོགས་ཤིག་འོང་བས་མཐའ་གཅིག་ཏུ་མ་ངེས་སོ། །དུ་བ་ལ་སོགས་པ་འདི་རྣམས་ལ་སྲོག་དབུ་མར་སྡུད་པའི་ཐབས་ཁྱད་པར་ཅན་གྱི་སེམས་འཛིན་དང༌། 
9-2-27b


དེ་ལྟ་བུ་མིན་པའི་སེམས་མི་རྟོག་པར་འཇོག་པ་བསྐྱངས་པ་རྣམས་ལའང་འབྱུང་བ་གཉིས་ཡོད་པ་ཁྱད་ལེགས་པར་ཕྱེད་དགོས་སོ། །ཐབས་སྔ་མ་ལ་འབྱུང་བ་ལ་ཡང་ཕྱིན་ཅི་ལོག་གི་སའི་རླུང་ལ་སོགས་པ་རྣམས་ལྡོག་རུང་དུ་སོང་བ་དང༌། ཅུང་ཟད་ལོག་
པ་དང་གཏན་ནས་ལོག་པའི་རྟགས་གསུམ་འོང་བར་བཤད་པ་ལྟར། དབང་པོའི་སྒོ་རྣམས་ནས་ཕྱིར་ཧ་ཅང་གཡོ་བའི་རླུང་ཅུང་ཟད་ནང་དུ་ལྡོག་པར་རྩོམ་པ་དང༌། ཅུང་ཟད་ལོག་པ་དང༌། དབུ་མར་ཅུང་ཟད་ཚུད་པ་སོགས་ཀྱི་རྟགས་ནས་བཟུང་སྟེ། ལམ་མཐོན་
པོར་སོང་བའི་སྐབས་ཀྱི་ལྡོག་པ་དང༌། ལོག་རྟགས་ཁྱད་པར་ཅན་དུ་གྱུར་བའི་རིམ་པ་དུ་མ་ཞིག་ཡོད་པ་ལས། འདིར་ནི་སྲོག་དབུ་མར་ཐིམ་པར་རྩོམ་པའི་ཐིམ་རིམ་གྱི་སྐབས་ཡིན་ཏེ། སྨིག་རྒྱུ་ནས་ནམ་མཁའ་སྤྲིན་མེད་ཀྱི་བར་རྣམས་བར་མ་ཆད་དུ་
འབྱུང་བའི་སྐབས་སོ། །དེ་ཡང་ས་ཆུ་ལ་ཐིམ་པ་ན་སྨིག་རྒྱུ་དང༌། ཆུ་མེ་ལ་ཐིམ་པ་ན་དུ་བ་དང༌། མེ་རླུང་ལ་ཐིམ་པ་ན་མེ་ཁྱེར་དུ་སྣང་བ་དང༌། ཀུན་རྟོག་གི་བཞོན་པའི་རླུང་སེམས་ལ་ཐིམ་པའི་དུས་སུ་རླུང་མེད་པའི་མར་མེ་འབར་བ་ལྟ་བུར་སྣང་བ་འབྱུང་ཞིང༌། 
མཚན་མ་འདི་དག་རིམ་པ་བཞིན་དུ་བྱུང་བའི་མཐུས། ཕྱག་རྒྱ་ཆེན་པོ་འཐོབ་པར་གསུངས་པའི་བསྔགས་པ་མཛད་དོ། །དྷཱུ་ཏཱིའི་ནང་གི་གཏུམ་མོ་ཐོག་མར་ལྟེ་བ་དང་གསང་གནས་ནས་འབར་བ་དང༌། དྷཱུ་ཏཱིའི་ཕྱིའི་གཏུམ་མོ་ཕལ་བ་འབར་བ་དང༌། 
དྲོད་འབར་ཚུལ་ལ་ལུས་ཀྱི་གཏིང་ནས་འབར་བ་དང༌། ཤ་ལྤགས་ཀྱི་བར་ལྟ་བུར་ཁ་ནས་འབར་བ་དང༌། དང་པོར་འབར་བའི་དྲོད་ཀྱི་རྒྱ་ཆུང་བ་དང་ཆེ་བ་དང༌། དྲོད་གྱེན་དུ་འཚུག་་པ་བུལ་བ་དང་མྱུར་བ་དང༌། དྲོད་འཐུག་པ་དང་སྲབ་པ་རྣམས་ཀྱི་སྔ་མ་
9-2-28a


རྣམས་བཟང་ལ། ཕྱི་མ་རྣམས་དེ་ཙམ་དུ་མི་བཟང་པ་སོགས་ཀྱི་ཁྱད་པར་ལས་བདེ་བ་སྐྱེ་ལུགས་ཀྱང་དེ་དང་འདྲ་བར། རིམ་པ་དུ་མ་ཞིག་འོང་བའི་སྟེང་ནས། གཏུམ་མོ་ཁྱད་པར་ཅན་འབར་བ་དང༌། དྲོད་ཕལ་བ་འབར་བ་དང༌། རླུང་ཙམ་
གྱིས་དྲངས་པའི་བདེ་བ་དང༌། ཁམས་ཞུ་བའི་བདེ་བ་ལ་སོགས་པའི་ཁྱད་པར་ཤེས་དགོས་སོ། །གཏུམ་མོ་ཁྱད་པར་ཅན་འབར་ན་དེ་དང་མཐུན་པའི་བྱང་སེམས་ཞུ་བ་རེ་འོང་བས། ཁམས་མི་མཉམ་པར་སོང་བའི་ནད་མི་སྐྱེད་ཀྱང༌། དེ་མིན་པའི་
དྲོད་འབར་བ་ལ་བྱང་སེམས་འཇུ་བའི་ངེས་པ་མེད་པས། ཤས་ཆེར་མཁྲིས་པ་འཕེལ་བ་དང༌། བདེ་ཉམས་མི་ཆེ་བར་དྲོད་ཀྱིས་གདུང་བ་སོགས་འབྱུང་ལ། གཏུམ་མོ་འབར་བ་གནད་དུ་སོང་ན་དེས་བྱང་སེམས་དཀར་པོ་ཞུ་ནས་འཕེལ་བར་མ་ཟད། 
བྱང་སེམས་ཞུ་བ་བབས་པ་དེས་ཀྱང་བྱང་སེམས་དམར་པོའི་གཏུམ་མོ་རྒྱས་པར་བྱེད་པར་གསུངས་སོ། །གཉིས་པ་བྱང་སེམས་ཞུ་བ་ལ་བརྟེན་ནས་དགའ་བཞི་སྐྱེད་ཚུལ་ནི། བྱང་སེམས་ཞུ་བས་གནས་གང་དུ་སླེབ་པ་ན་ཡས་བབས་ཀྱི་དགའ་བཞི་སྐྱེ་
ཚུལ་ནི། རྒྱུད་རྡོ་རྗེ་ཕྲེང་བ་ལས། དེ་རྗེས་ལུགས་འབྱུང་བཤད་བྱ་སྟེ། །བདེ་ཆེན་འཁོར་ལོ་སྤྱི་བོ་ལ། །དེ་ནི་དགའ་བར་བཤད་པ་ཡིན། །ལོངས་སྤྱོད་འཁོར་ལོར་མཆོག་དགའ་དང༌། །བྲལ་དགའ་ཆོས་ཀྱི་འཁོར་ལོར་གནས། །སྤྲུལ་པའི་འཁོར་
ལོར་ལྷན་ཅིག་སྐྱེས། །དགའ་བ་ཉམས་སུ་མྱོང་བར་བྱེད། །ཅེས་གསུངས་ཏེ། བྱང་སེམས་སྤྱི་བོ་ནས་མགྲིན་པར་སླེབ་པ་ན་དགའ་བ་དང༌། མགྲིན་པ་ནས་སྙིང་གར་སླེབ་པ་ན་མཆོག་དགའ་དང༌། སྙིང་ཁ་ནས་ལྟེ་བར་སླེབ་པ་ན་ཁྱད་དགའ་དང༌། ལྟེ་
9-2-28b


བ་ནས་གསང་གནས་ནོར་བུའི་རྩེར་སླེབ་པ་ན་ལྷན་ཅིག་སྐྱེས་པའི་དགའ་བ་སྐྱེ་ལ། མས་བརྟན་གྱི་སྐྱེ་ཚུལ་ཡང་དེ་ཉིད་ལས། སྤྲུལ་པའི་འཁོར་ལོར་དགའ་བ་དང༌། །མཆོག་དགའ་ཆོས་ཀྱི་འཁོར་ལོར་གནས། །ལོངས་སྤྱོད་བྲལ་བའི་དགའ་བ་དང༌། །
ལྷན་ཅིག་སྐྱེས་པ་བདེ་བ་ཆེ། །ལུགས་ལྡོག་རིམ་པ་ཞེས་ནི་གསུངས། །ཞེས་ཏེ། འདིའི་གནས་ཀྱང་སྔར་བཤད་པའི་རིགས་པས་ཤེས་སོ། །འདི་ནི་ཕྱག་ཆེན་ཐིག་ལེ་དང་ཡང་མཐུན་ལ། དེར་ཡར་མར་གྱི་བཞི་པོ་རེ་རེ་ལ་བཞི་བཞིར་བྱས་པས་ཟླ་བའི་
ཆ་བཅུ་དྲུག་དང༌། ཉིན་མོའི་སྒོ་ནས་རེ་རེ་ལ་གསུམ་གསུམ་དུ་བྱས་ནས་བཅུ་གཉིས་སུ་ཡང་གསུངས་ཏེ། དེ་ཉིད་ལས། རི་བོང་མཚན་མའི་ཆ་འདི་རྣམས། །དགའ་བའི་ཐིག་ལེ་བཅུ་དྲུག་སྟེ། །ཨཱ་ལིའི་ངོ་བོར་ཤེས་པར་བྱ། །འཁོར་ལོ་བཞི་རུ་རིམ་པ་ལས། །
ཇི་སྐད་བཤད་རྣམས་དེ་ལྟ་ནའང༌། །ཉི་མའི་བཅུ་གཉིས་རྣམས་སུ་བཤད། །ཅེས་སོ། །འདི་ནི་བྱང་སེམས་ཡར་མར་དུ་འབབ་པ་ན་ཁྲག་དང་བཅས་པར་འབབ་ལ། དེ་ལ་གནས་བཞི་པོ་རེ་རེ་ལ་ཆ་བཞི་བཞིར་བྱས་པའི་མཚམས་རེ་རེར་བདེ་བ་རེ་མྱོང་བ་
དང༌། གནས་བཞིའི་རེ་རེ་ལ་ཆ་གསུམ་གསུམ་དུ་བྱས་པའི་མཚམས་རེ་རེར་རྡུལ་འབབ་པའི་སྒོ་ནས། བདེ་བ་ཆུང་འབྲིང་ཆེན་པོ་གསུམ་དུ་སོ་སོར་ཕྱེད་པའི་ཉམས་མྱོང་ཅན་གྱིས་ཤེས་དགོས་ཏེ་ཕྲ་བར་སྣང་ངོ༌། །ཡས་བབས་ཀྱི་དགའ་བ་བཞི་ལས་
ནི། མས་བརྟན་གྱི་བཞི་བདེ་བ་ཆེ་བ་ཅིག་འོང་དགོས་སོ། །མས་བརྟན་གྱི་དུས་སུ་ལོག་པ་སྤྱི་བོར་མ་བརྟན་གྱི་བར་དུ་བདེ་བ་མི་བརྟན་ལ། སྦྱི་བོར་བརྟན་ནས་བརྟན་པར་གསུངས་ཏེ། དེ་ཉིད་ལས། དེ་ནས་སྲོག་གི་སྟེང་དུ་ཡིད། །དེ་མི་མཐུན་པས་འབབ་
9-2-29a


པར་འགྱུར། །པད་མའི་ལྟེ་བའི་དབུས་གནས་པ། །གང་དེ་ཕྱི་ནས་བརྟན་གྱུར་པ། །དེ་ཚེ་མགོན་པོ་འགྲོ་མི་འགྱུར། །ཇི་ལྟར་བུ་ག་མེད་སྣང་དུ། །ཆུ་རྣམས་ཟད་པ་མེད་གནས་ལྟར། །དེ་ཚེ་བདེ་བ་བརྟན་པར་འགྱུར། །བརྟན་
པས་ལྷན་ཅིག་སྐྱེས་པའི་དགའ། །དེ་ཕྱིར་སངས་རྒྱས་མི་ཟད་པ། །རྣལ་འབྱོར་པ་ཡིས་ངེས་པར་འཐོབ། །ཅེས་སོ། །ཡིད་ནི་ཁུ་བ་དང༌། མི་མཐུན་པ་ནི་ལུགས་ལྡོག་དང༌། བརྟན་པ་ནི་སྤྱི་བོར་ཡིན་པར་མན་སྙེ་ལས་གསུངས་སོ། །འདིའི་གདམས་ངག་མང་པོ་
ལས། གཏུམ་མོ་བསྒོམས་པས་དྲོད་སྐྱེ། དྲོད་ལ་བརྟེན་ནས་རྩ་ནང་གི་བྱང་སེམས་འཇུ། དེ་ཞུ་བས་བདེ་བ་སྐྱེ། བདེ་བ་ལ་བརྟན་ནས་མི་རྟོག་པ་སྐྱེ་ཟེར་བ་ཙམ་སྣང་ཡང༌། དེ་ཙམ་གྱི་གོ་བས་ནི་ཡས་བབས་དང༌། མས་བརྟན་གྱི་དགའ་བཞི་སྤྱི་དང༌། ཁྱད་པར་
དུ་ལྷན་སྐྱེས་ཀྱི་བདེ་ཆེན་ལེགས་པོར་ངོས་ཟིན་པར་མཐོང་ནས། རྒྱུད་སྡེ་ནས་འབྱུང་བའི་དགའ་བ་བཞི་ཚན་གཉིས། གྲུབ་ཆེན་གྱི་གཞུང་དང་མཐུན་པར་བཤད་དོ། །སྤྱིར་ལམ་བསྒོམས་མ་བསྒོམས་གཉིས་ཀ་ལ། བྱང་སེམས་ཞུ་བ་གསང་
གནས་སུ་བབས་པ་ལས་བྱུང་པའི་དགའ་བ་ཉམས་སུ་མྱོང་བ་ལ་ནི། ངེས་པར་ལྟེ་བ་དང་གསང་གནས་ཀྱི་གཏུམ་མོ་འབར་ནས་ཞུ་བ་ཞིག་འོང་བས། གཏུམ་མོ་འབར་ནས་བྱང་སེམས་འཇུ་བ་ལ། སྲོག་དྷཱུ་ཏཱིར་ཐིམ་པ་སོགས་མི་དགོས་སོ། །དེའི་
ཕྱིར་གང་ཟག་གི་རིགས་ཁ་ཅིག་ལ། སྔར་ལྟར་བསྒོམས་པ་ན་རླུང་དྷཱུ་ཏཱིར་ཐིམ་པ་མེད་ཀྱང༌། བྱང་སེམས་ཞུ་བའི་བདེ་བ་འོང་སྟེ། འདི་ནི་ལུས་ལ་གནད་དུ་བསྣུན་པའི་གདམས་ངག་གཞན་སྒོམ་པ་ལ་ཡང་འདྲའོ། །དེ་འདྲ་བའི་ཐིག་ལེ་ནི་རྡོ་རྗེ་ནོར་བུར་སླེབ་ནས་
9-2-29b


ཤིན་ཏུ་བཟུང་དཀའ་བར་མཐོང་སྟེ། དང་པོར་ཕྱི་ནང་གི་འབེབས་པའི་ཐབས་ཀྱིས་བྱང་སེམས་ཕབ་པ་དེ། ནོར་བུར་མ་སླེབ་པའི་གོང་གི་གནས་རྣམས་ནས་བཙན་ཐབས་ཀྱིས་ལྡོག་པ་དང༌། རྡོ་རྗེར་སླེབ་ན་དེ་མ་ཐག་ཏུ་ལྡོག་པའི་འདྲེན་མང་པོ་དང༌། བཙན་ཐབས་
སུ་ལྡོག་པ་དེ་ཡང་ལུས་ལ་མ་ཁྲེམས་ན་ནད་སྐྱེད་པར་མཐོང་ནས། འགྲེམས་པའི་ཚུལ་སྔ་མ་མང་པོས་བྱེད་མོད་ཀྱང༌། རླུང་དྷཱུ་ཏཱིར་ཐིམ་ནས་བྱང་སེམས་ཞུ་བ་དང༌། དེ་ལྟར་མིན་པར་ཞུ་བའི་ཁྱད་པར་ཕྱེ་ནས། དེ་ལ་བྱང་སེམས་གཟུང་དཀའ་སླ་དང༌། 
དེ་བཙན་ཐབས་སུ་ལྡོག་དགོས་མི་དགོས་དང་ལྡོག་པ་ལུས་ལ་མ་བཀྲམ་ན་ནད་དུ་འགྱུར་མི་འགྱུར་གྱི་ཁྱད་པར་ཕྱེད་པའི་རྣམ་གཞག་མི་སྣང་ངོ༌། །དེ་ལ་ལམ་བསྒོམས་སྟོབས་ཀྱིས་གཏུམ་མོ་འབར་ནས་བྱང་སེམས་བཞུས་པའི་དགོས་པ་ནི། ལྷན་
ཅིག་སྐྱེས་པའི་ཡེ་ཤེས་སྐྱེད་པའི་ཆེད་ཡིན་ལ། དེ་སྐྱེ་བ་ལ་བྱང་སེམས་ཞུ་ནས་བབ་པ་དེ་སྤྱིར་ལྟེ་བ་མན་ཆད་དུ་སླེབ་པ་ཅིག་དང༌། ཁྱད་པར་དུ་ནོར་བུར་སླེབ་ནས་ཕྱིར་མ་འཕོས་པར། རེ་ཞིག་གི་བར་དུ་གནས་པ་ཞིག་མེད་ན་ལྷན་སྐྱེས་མཚན་ཉིད་ཚང་བ་མི་
སྐྱེའོ། །ལྷན་སྐྱེས་རྫོགས་རིམ་པའི་བདེ་ཆེན་དུ་འཇོག་པ་ལ་ནི། རླུང་ཐིམ་པའི་དབང་གིས་གནས་པ་ཅིག་དགོས་སོ། །རླུང་དྷཱུ་ཏཱིར་ཐིམ་པའི་དབང་གིས་བྱང་སེམས་ཞུ་བ་ཞིག་ཡིན་ན་ནོར་བུའི་རྩེར་བཟུང་ཡང་ལྷན་སྐྱེས་མཚན་ཉིད་ཚང་བ་མ་སྐྱེས་བར་དུ་ཕྱིར་
མི་འཕོ་སྟེ། བྱང་སེམས་སྤྱི་བོ་ནས་འབབ་པ་ན་རིམ་གྱི་རིམ་གྱིས་རླུང་གི་གཡོ་བ་ཞན་དུ་སོག་ནས་ནོར་བུར་སླེབས་པ་ན། བྱང་སེམས་ཕྱི་རོལ་ཏུ་སྐྱོད་པར་བྱེད་པའི་རང་གི་འཇུག་པ་ཞི་བར་འགྱུར་པའི་ཕྱིར་རོ། །རླུང་འདུ་སླ་བ་མིན་པར་ཞུ་བ་དེའི་ཉམས་སྐྱེ་
9-2-30a


སླ་བ་འགའ་ཞིག་ལ་འབར་འཛག་བསྒོམས་ན། བྱང་སེམས་ཞུ་བ་མྱུར་དུ་འབབ་པ་འོང་བས། དེ་ལ་ནི་ཞུ་བ་ཤེས་ཆུང་ན་མ་གཏོགས་པ་གནས་མཐོན་པོ་ནས་མ་ལྡོག་ན། དམའ་མོ་ནས་ཤིན་ཏུ་ལྡོག་དཀའ་བ་དང༌། ལྡོག་ས་ཡང་
མཐོ་དགོས་ལ། ལྡོག་ནས་ཀྱང་མ་བཀྲམ་ན་ནད་དུ་འགྱུར་བས་འགྲེམས་དགོས་མོད་ཀྱང༌། སྔར་བཤད་པ་ལྟར་གྱི་རླུང་ཐིམ་པ་ལ་ནི་དེ་རྣམས་ཡེ་མི་དགོས་སོ། །འོ་ན་རླུང་ཐིམ་རིམ་མ་བྱུང་བར་ཞུ་བདེ་ཆེ་བར་བྱུང་ན། ལྡོག་པ་དང་འགྲེམས་པ་ཇི་ལྟར་
བྱ་ཞེ་ན། འདི་ལ་ཞུ་བ་རིམ་ཅན་དུ་དལ་བུས་འོང་བ་ལ་ནི། རྩོལ་བ་ཤུགས་དྲག་པོ་མིན་པར་དམིགས་པས་སྤྱི་གཙུག་ཏུ་ལྡོག་ཅིང༌། དེ་ནས་རྩ་གནས་ཀུན་ཏུ་བཀྲམ་ན་དེ་གོམས་པའི་མཐར། ཞུ་བ་ཆེན་པོ་ཡང་ལྡོག་པ་དང་དགྲམ་པར་ནུས་སོ། །དེ་
ལྟ་མིན་པའི་ཞུ་བ་ཆེས་མྱུར་བར་འབབ་པ་ལ་ནི། རང་ལྷར་གསལ་བའི་ངང་ནས་རྐང་པ་སྐྱིལ་ཀྲུང་དང༌། ལག་པ་གཉིས་བྲང་གི་ཐད་དུ་བསྣོལ། མིག་གཉིས་གྱེན་ལ་དྲག་ཏུ་ལྡོག །རྐང་ལག་གི་སོར་མོ་རྣམས་ལེགས་པར་བསྐུམ། སེམས་སྤྱི་གཙུག་གི་
ཧཾ་ཡིག་མགོ་གྱེན་དུ་བསྟན་པ་ལ་དམིགས། ངག་ཏུ་ཧཱུཾ་རིང་པོ་དྲག་ཏུ་བརྗོད་པ་ཉེར་གཅིག་ཙམ་གྱི་བར་དུ་བརྗོད་ནས། གང་ནས་ལྡོག་པའི་གནས་དེ་ནས་རྒྱབ་གཞུང་ལ་ཉེ་བའི་ངོས་སུ་དྷཱུ་ཏཱིའི་ནང་ནས་སྤྱི་གཙུག་ཏུ་སོང་བར་བསམ། མཐར་འཇམ་རླུང་བུམ་པ་ཅན་
བཟུང་ལ་ལུས་མི་དྲག་པར་སྤྲུག་ཅིང༌། སེམས་ཀྱིས་བྱང་སེམས་རྣམས་རྩ་གནས་ཀུན་ཏུ་གྲམ་པར་བསམ་པ་ལན་མང་དུ་བྱའོ། །གསུམ་པ་ལྷན་ཅིག་སྐྱེས་པའི་ཡེ་ཤེས་སྒོམ་པའི་ཚུལ་ནི། སྔར་བཤད་པ་ལྟར་གྱི་ཡས་བབས་ཀྱི་དུས་སུ། བྱང་སེམས་ཞུ་བ་
9-2-30b


ནོར་བུའི་རྩེ་བར་དུ་སླེབ་ནས། ཕྱིར་མི་འཕོ་བར་གནས་པ་ན། ལྷན་སྐྱེས་ཀྱི་དགའ་བ་སྐྱེ་བས་དེའི་དུས་སུ་སྔར་གཏན་ལ་ཕབ་པའི་ལྟ་བ་དྲན་པར་བྱས་ནས། ལྟ་ཐོག་ཏུ་བཞག་སྟེ། བདེ་སྟོང་དབྱེར་མེད་བསྐྱངས། ལྟ་བའི་གོ་བ་ལེགས་པོ་མེད་ནའང་སེམས་ཀྱི་
སྤྲོ་བསྡུ་རྣམས་དོར་ལ་བདེ་བ་དེ་ཉིད་ལ་ཅི་གནས་གནས་ཀྱི་བར་དུ་བསྐྱང་ངོ༌། །དེ་བཞིན་དུ་བྱང་སེམས་ནོར་བུར་ཟིན་པ། གྱེན་དུ་ལྡོག་པ་ན་སྤྱི་གཙུག་ཏུ་ནམ་སླེབ་པའི་ཚེ། མས་བརྟན་གྱི་ལྷན་ཅིག་སྐྱེས་པའི་ཡེ་ཤེས་སྐྱེ་བས། དེའི་ཚེ་ཡང་དེ་ངོ་ཤེས་པར་
བྱས་ལ་བདེ་སྟོང་དབྱེར་མེད་དམ། བདེ་བརྐྱང་པའི་མི་རྟོག་པ་སྔར་བཤད་པ་བཞིན་ཅི་ཙམ་གནས་ནུས་ནུས་ཀྱི་བར་དུ་བསྐྱང་ངོ༌། །དེ་དག་ནི་མཉམ་གཞག་ཏུ་སྐྱོང་ཚུལ་ལོ། །རྗེས་ཐོབ་ཏུ་སྐྱོང་ཚུལ་ནི། སྤྱིར་ལྷན་སྐྱེས་ཀྱི་དགའ་བ་སྐྱེས་ན། དེ་ལས་ལངས་པའི་
དུས་སུ་རང་ཤུགས་ཀྱིས་ཀྱང་ཡུལ་སྣང་བདེ་བར་འཆར་བ་ཅིག་འོང་མོད་ཀྱང༌། དེ་ཙམ་གྱིས་མི་ཆོག་གི། རྗེས་ཀྱི་སྐབས་སུ་མཉམ་གཞག་གི་བདེ་སྟོང་དྲན་ནས། དེས་ཡུལ་སྣང་གང་ཤར་ཐམས་ཅད་ལ་རྒྱས་བཏབ་ནས་བསྒོམས་ན། བདེ་བ་འབར་བ་ཁྱད་
པར་ཅན་དུ་འགྱུར་བས། དེ་ལྟར་བསྐྱང་བར་བྱ་སྟེ། འདིའ་དིའི་གདམས་ངག་གཞན་རྣམས་ལས་མི་གསལ་ཡང༌། མར་པའི་གདམས་པ་རྡོག་པ་ནས་བརྒྱུད་པ་རྣམས་ལས་མང་དུ་འབྱུང་བ་ཀྱེ་རྡོར་སོགས་རྒྱུད་སྡེ་དུ་མའི་དོན་ཡིན་པས་མ་ཆད་པ་གལ་ཆེའོ། །
དེ་ལྟར་མཉམ་རྗེས་ལ་སྐྱོང་བ་དང༌། སླར་ཡང་གཏུམ་མོའི་དམིགས་པ་དང༌། རླུང་སྦྱོར་བྱས་ཏེ། དགའ་བཞི་འདྲེན་པ་སྤེལ་མར་བྱའོ། །གཉིས་པ་ཕྱིའི་རྐྱེན་ལས་ཀྱི་ཕྱག་རྒྱ་ལ་བརྟེན་ནས་བསྒོམ་པ་ནི། རང་དང་ཕྱག་རྒྱ་གཉིས་ཀ་གང་ཟག་དབང་པོ་རབ་ཏུ་གྱུར་པ། 
9-2-31a


རྣམ་པར་དག་པའི་དབང་བསྐུར་བ་ཐོབ་ནས། རྩ་བ་དང་ཡན་ལག་གི་དམ་ཚིག་ལ་མཁས་ཤིང༌། ཇི་ལྟ་བ་བཞིན་དུ་སྲུང་བ། དཀྱིལ་འཁོར་གྱི་འཁོར་ལོའི་སྒྲུབ་ཐབས་ལ་མཁས་ཤིང༌། ཐུན་བཞིར་བསྒོམས་པས་ལེགས་
པར་བྱང་བ། དགའ་བའི་བསྟན་བཅོས་ནས་འབྱུང་བའི་སྒྱུ་རྩལ་དྲུག་ཅུ་རྩ་བཞི་ལ་མཁས་པ། སྟོང་ཉིད་ཀྱི་ལྟ་བ་ཕུ་ཐག་ཆོད་ཅིང༌། དགའ་བཞིའི་རིམ་པ་དང༌། ཁྱད་པར་དུ་ལྷན་ཅིག་སྐྱེས་པའི་ཡེ་ཤེས་སྐྱེ་བའི་ས་མཚམས་ལ་མཁས་པ་དང༌། 
བྱང་སེམས་ཕྱིར་མི་འཕོ་བར་འཛིན་ནུས་པ་སོགས་རྒྱུད་སྡེ་དང༌། གྲུབ་ཆེན་གྱི་གཞུང་ཁུངས་མ་ནས་བཤད་པའི་མཚན་ཉིད་ཚང་བ་ཞིག་གིས་བྱེད་པ་ཡིན་པ་ལ། དེ་ལྟར་བཤད་པའི་བརྡ་ཆད་རགས་པ་ཙམ་ཡང་མ་ཆགས་པར། ཟབ་མོ་ཡིན་ཟེར་
བའི་མན་ངག་ལྟར་སྣང་རེ་ལ་ངེས་པ་དྲངས་ནས། ལག་ཏུ་ལེན་པ་ནི། ཤིན་ཏུ་མི་བཟད་པའི་ངན་འགྲོའི་སྒོ་འབྱེད་པར་ཤེས་པར་གྱིས་ཤིག །ཧེ་རུ་ཀ་མངོན་འབྱུང་ལས་ཀྱང༌། རྣལ་འབྱོར་མེད་པར་རྣལ་འབྱོར་ཆོས། །ཕྱག་རྒྱ་ལ་ནི་བགྲོད་འགྱུར་དང༌། །
ཡེ་ཤེས་མེད་པར་ཡེ་ཤེས་ཚུལ། །དམྱལ་བར་འགྲོ་བར་ཐེ་ཚོམ་མེད། །ཅེས་གསུངས་ཏེ་ཡུལ་རྟེན་ཀུན་མཚན་ཉིད་མ་ཚང་བར་དེ་ལྟར་བྱེད་པ་ལ། ཉེས་དམིགས་ཤིན་ཏུ་ཆེ་བར་གསུངས་པ་རྣམས་ཤེས་དགོས་སོ། །དེ་ལྟ་བུའི་ལས་ཀྱི་ཕྱག་རྒྱ་ལ་བརྟེན་
པའི་ནུས་པ་མ་ཐོབ་ན་ནི། བདག་མེད་མ་དང༌། རྡོ་རྗེ་རྣལ་འབྱོར་མ་ལ་སོགས་པའི་ཡེ་ཤེས་ཀྱི་ཕྱག་རྒྱ་རིང་དུ་བསྒོམས་པས། སྣང་བ་གསལ་བ་དང་དེ་བརྟན་པ་རྙེད་ན། དེ་དང་སྙོམས་པར་ཞུགས་ནས་དགའ་བཞི་བསྐྱེད་པའི་ལྷན་སྐྱེས་ཀྱི་དུས་སུ། བདེ་སྟོང་
9-2-31b


སྦྱོར་ནུས་ན་ལྟ་བ་དྲན་པར་བྱས་ལ་བདེ་སྟོང་དབྱེར་མེད་དུ་བསྐྱང་། དེ་མི་ནུས་ནའང་བདེ་བ་ལ་བརྟེན་ནས། སེམས་རྩེ་གཅིག་ཏུ་གནས་པའི་ཏིང་ངེ་འཛིན་བསྐྱེད་པར་བྱའོ། །གཉིས་པ་དེ་ལ་བརྟེན་ནས་སྒྱུ་མ་དང་འོད་གསལ་སྒོམ་པའི་ཚུལ་ལ་གཉིས། གཏུམ་མོ་ལ་
བརྟེན་ནས་ལམ་ལྷག་མ་སྒོམ་པའི་སྤྱིའི་རྣམ་གཞག་དང༌། ལམ་སོ་སོའི་སྒོམ་ཚུལ་ལོ། །དང་པོ་ནི། ལུགས་འདི་ལ་གཏུམ་མོ་སྒོམ་ནས་རླུང་དབུ་མར་འཛུད་པ་དགོས་ཞེས་པ་གསལ་བར་སྣང་ཡང༌། སྲོག་དྷཱུ་ཏཱིར་ཚུད་པ་ལ་བརྟེན་ནས་སྒྱུ་ལུས་དང༌། འོད་
གསལ་གཉིས་སྒོམ་ཚུལ་ཤིན་ཏུ་མི་གསལ་ཞིང༌། དེ་རྣམས་ཤིན་ཏུ་རྟོགས་དཀའ་བར་བྱུང་སྣང་མོད་ཀྱང༌། འདིར་མན་ངག་ལ་གོ་བ་ཐུན་མོང་མ་ཡིན་པ་ཆགས་པའི་ཕྱིར་དུ་ཅུང་ཟད་ཅིག་བརྗོད་པར་བྱའོ། །དེ་ཡང་སྔར་བཤད་པ་ལྟར་སྒྱུ་ལུས་དང་འོད་
གསལ་གྱི་སྐོར་རྣམས་གསང་འདུས་ལ་བརྟེན་པ་ཡིན་ཞེས་འབྱུང་ཞིང༌། དེ་ཡང་གསང་འདུས་འཕགས་སྐོར་གྱི་གདམས་ངག་ཏུ་སྣང་ལ། འཕགས་པ་ཡབ་སྲས་ཀྱི་དགོངས་པ་ནི། སྲོག་དབུ་མར་བཙུད་པའི་ཞུགས་གནས་ཐིམ་གསུམ་མ་བྱུང་བར་དུ། སེམས་
དབེན་གྱི་སྣང་མཆེད་ཐོབ་གསུམ་གྱི་ཏིང་ངེ་འཛིན་མི་སྐྱེ་ལ། སེམས་དབེན་གྱི་ཡེ་ཤེས་མཚན་ཉིད་རྫོགས་པ་སྐྱེས་པའི་རླུང་སེམས་ཙམ་ལས། སྒྱུ་ལུས་མཚན་ཉིད་པ་སྒྲུབ་པ་ཡིན་ཞིང༌། མར་ལུགས་ཀྱི་གསང་འདུས་ཀྱི་གདམས་ངག་རྣམས་དང༌། 
མར་ལུགས་ཀྱི་རིམ་ལྔའི་རྩ་ཚིག་རིམ་ལྔ་བསྡུས་པ་གསལ་བ་ལས་ཀྱང༌། མན་ངག་འདི་ལས་གསལ་བར་འབྱུང་ལ། དེ་བཞིན་དུ་འདིར་ཡང་འོང་རྒྱུར་སྣང་བ་མ་བྱུང་བ་ནི། འདུས་པ་འཕགས་སྐོར་ལ་བརྟེན་ནས་ལེགས་པ་ཤེས་དགོས་པར་སྣང་
9-2-32a


ངོ༌། །དེ་ཡང་མར་ལུགས་ཀྱི་རིམ་ལྔའི་རྩ་ཚིག་རིམ་ལྔ་བསྡུས་པ་གསལ་བ་ལས། དང་པོ་སྨིག་རྒྱུ་ལྟ་བུའི་ཉམས། །འོད་ཟེར་ལྔ་དང་བཅས་པ་འཆར། །གཉིས་པ་ཟླ་བ་ལྟ་བུ་དང༌། །གསུམ་པ་ཉི་མའི་འོད་ཀྱིས་འཁྲིགས། །མཚམས་
སྣང་ལས་ནི་ཐོབ་པ་སྟེ། །ཞེས་དང༌། རླུང་སེམས་ཙམ་ལས་བྱུང་བ་ཡི། །སྒྱུ་མའི་ལུས་ནི་སྣང་བར་བཅས། །ཞེས་ནམ་མཁའ་སྤྲིན་མེད་ལ་ཟླ་འོད་ཤར་བ་ལྟ་བུའི་སྣང་བ་དང༌། ནམ་མཁའ་དེ་ལ་ཉི་འོད་ཀྱིས་འཁྲིགས་པ་ལྟ་བུའི་མཆེད་པ་དང༌། ནམ་མཁའ་དེ་
ལ་ཐུན་མཚམས་ཀྱི་སྨག་ནག་པོས་ཁྱབ་པ་ལྟ་བུའི་ཉེར་ཐོབ་གསུམ། སྔོན་དུ་སྐྱེ་བ་དང༌། དེ་ནས་སེམས་དབེན་གྱི་རླུང་སེམས་ཙམ་ལས་སྒྱུ་མའི་ལུས་འོད་ཟེར་དང་བཅས་པ་འབྱུང་བར་བཤད་པ་རྣམས་ཀྱི་རྣམ་གཞག་གང་ཡང༌། འདིའི་སྐོར་
གྱི་མན་ངག་ཏུ་མ་བྱུང་བར། རང་ལུས་ལ་གཟུགས་བརྙན་དཔེར་བྱས་ནས། དགའ་མི་དགའ་ལ་བརྟེན་པའི་ཆགས་སྡང་གི་རྣམ་རྟོག་རགས་པ་འགོག་པ་ལ་མ་དག་པའི་སྒྱུ་ལུས་དང༌། ཡང་རང་ལྷ་སྐུ་སྒྱུ་མ་བཞིན་དུ་བསྒོམས་ནས་དགའ་མི་དགའ་
ལ་རོ་སྙོམས་པར་བྱེད་པ་ཙམ་ལ་དག་པའི་སྒྱུ་ལུས་སུ་འཇོག་པ་འདི་ཙམ་ཞིག་ལས་ཁྱད་པར་དུ་གྱུར་པ་མེད་ན་ནི་རྣལ་འབྱོར་བླ་མེད་པ་དང༌། ལམ་གཞན་ཐུན་མོང་བའི་སྤྱི་དོན་གྱི་སྒྱུ་མ་དང༌། བླ་མེད་ཀྱི་ཐེག་པའི་ལུགས་ཀྱི་རིམ་པ་གསུམ་པའི་སྒྱུ་ལུས་
སྦས་དོན་གྱི་སྒྱུ་མ་དང༌། རིམ་པ་ལྔ་པ་ཟུང་འཇུག་གི་སྒྱུ་མའི་སྐུ་རྣམས་ཀྱི་ཁྱད་པར་རགས་པའང་མ་ཕྱེད་པར་འགྲོ་བར་སྣང་སྟེ། འདིའི་སྒྱུ་ལུས་དངོས་ནི་རྣལ་འབྱོར་བླ་མེད་ཀྱི་རྫོགས་རིམ་ཐུན་མོང་མ་ཡིན་པ་ཡིན་ལ། སྔར་བཤད་པའི་སྒྱུ་ལུས་དང་
9-2-32b


པོར་བཞག་པ་ལ་ནི། སྤྱི་དོན་གྱི་སྒྱུ་མའི་མཚན་ཉིད་ཚང་བའང་མི་སྣང་ལ། གཉིས་པར་འདོད་པ་ནི་རྒྱུ་སྡེ་འོག་མ་གསུམ་ལས་ཀྱང་དུ་མ་ཞིག་འབྱུང་བའི་ཕྱིར་རོ། །ཆགས་སྡང་གི་རྣམ་རྟོག་ཟིལ་གྱིས་མནན་ནས་རོ་སྙོམས་པར་བྱེད་པ་ལ་ནི། དབུ་མའི་ལྟ་
བ་ཕུ་ཐག་ཆོད་པའི་སྟོང་པ་དང༌། ལྷན་སྐྱེས་ཀྱི་བདེ་ཆེན་གཉིས་སྦྱར་ནས། མཉམ་གཞག་ཏུ་སྒོམ་པ་ཉིད་གཙོ་བོ་ཡིན་ཏེ། དེ་ལེགས་པར་ཤེས་ནས་བསྐྱངས་ན། དེ་ལས་ལངས་པའི་རྗེས་ཀྱི་ཚེ། མཉམ་གཞག་གི་ཤུགས་ཀྱིས་གང་སྣང་ཐམས་ཅད་སྒྱུ་
མར་འཆར་བ་དང༌། རིམ་པ་དང་པོའི་དུས་ནས་རྗེས་ཀྱི་སྐབས་སུ། གང་སྣང་ལྷའི་འཁོར་ལོར་འཁྱེར་བའི་ལམ་འཁྱེར་གོམས་པའི་གནད་ཀྱིས། ལྷ་སྐུ་སྣང་ལ་རང་བཞིན་མེད་པ་ཡང་ཟུར་དུ་མ་སྦྱངས་ཀྱང༌། དེར་རང་ཤུགས་ཀྱིས་འཆར་བའི་ཕྱིར་རོ། །མར་
ལུགས་ཀྱི་འདུས་པའི་གདམས་ངག་ཁ་ཅིག་ལས། ལྷའི་བྲིས་སྐུའི་གཟུགས་བརྙན་མདུན་དུ་བཏགས་པའི་མེ་ལོང་གི་ནང་དུ་ཤར་བ་ལ་བལྟས་ནས། རང་ཉིད་གཟུགས་བརྙན་གྱི་ལྷའི་སྐུ་བཞིན་དུ་ཨེ་འཆར་ལྟ་བ་འདི། བསྐྱེད་རིམ་གྱི་སྐབས་སུ་ལྷའི་གསལ་སྣང་
ལ་བོགས་འདོན་པའི་གདམས་པ་ཡིན་ཞེས་ཟེར་བ་དང༌། བླ་མ་ཚུར་གྱི་གདམས་ངག་ལས། དང་པོ་གསང་དབང་གི་དུས་སུ་རྡོ་རྗེ་སེམས་དཔའི་སྐུ་མེ་ལོང་ནང་གི་གཟུགས་བརྙན་སྣང་ལ་རང་བཞིན་མེད་པའི་སྒྱུ་ལུས་སུ་ངོ་སྤྲོད་པ་ཡིན་ཏེ། ཞེས་འབྱུང་བ་དེ་རྣམས་
འདིར་ཁྱེར་འདུག་པ་དང༌། རིམ་ལྔའི་གཞུང་ཞིག་གི་འབྲུ་ཇི་བཞིན་མ་ནོན་པས་འདིར་སྦྱར་བར་སྣང་སྟེ། དེ་རྣམས་ཀྱང་འཕགས་སྐོར་གྱི་གདམས་ངག་ཏུ་རྒྱས་པར་བཤད་ཟིན་ཏོ། །འོན་ཀྱང་མར་ལུགས་ཀྱི་དང་པོའི་གདམས་ངག་ལ་སྒྱུ་ལུས་ཀྱི་གནད་མ་
9-2-33a


ཆད་པའི་ཚུལ་ཡང་དེར་རྒྱས་པར་བཤད་ཟིན་ཏོ། །གཞན་ཡང་འདིའི་མན་ངག་རྣམས་སུ་ཟུང་འཇུག་ལ་སློབ་མི་སློབ་གཉིས་སུ་བྱེད་པ་དང༌། སྣང་མཆེད་ཐོབ་གསུམ་འོད་གསལ་དང་བཞིའི་རྣམ་གཞག་མཛད་པ་སྣང་ཡང༌། ཁྱད་པར་
ཅན་གྱི་རླུང་སེམས་ཙམ་ལས་སྒྱུ་མའི་སྐུ་སྒྲུབ་ལུགས་དང༌། སྐུ་དེ་གྲུབ་པའི་སྟེང་ནས་དོན་གྱི་འོད་གསལ་དུ་འཇུག་པ་ལ། སྣང་མཆེད་ལ་སོགས་པའི་སྟོང་པ་བཞི་འཆར་ཚུལ་དང༌། དོན་གྱི་འོད་གསལ་གྲུབ་ནས་སློབ་པའི་ཟུང་འཇུག་སྒྲུབ་ཚུལ་དང༌། དེ་
ལ་བརྟེན་ནས་མི་སློབ་པའི་ཟུང་འཇུག་སྒྲུབ་ཚུལ་དང༌། གཉིད་ཀྱི་འོད་གསལ་འཛིན་པ་ན། སད་དུས་སུ་སྲོག་དྷཱུ་ཏཱིར་འཛུད་ནུས་པ་ཞིག་ལ་བརྟེན་ནས། སྙིང་ཁའི་དྷཱུ་ཏཱིར་རོ་རྐྱང་གི་རླུང་བསྡུས་ནས་སྟོང་པ་བཞིའི་རིམ་གྱིས་འོད་གསལ་དུ་འཇུག་ཚུལ་དང༌། དེའི་མཐར་
རྨི་ལམ་གྱི་སྒྱུ་ལུས་ཀྱི་ལྷ་སྐུར་ལྡང་ཚུལ་རྣམས་འོང་རྒྱུར་སྣང་ནའང༌། མ་བྱུང་བ་ལ་ཐེ་ཚོམ་ཡང་མི་འཇུག་པར་སྣང་ངོ༌། །དེའི་ཕྱིར་སྲོག་དྷཱུ་ཏཱིར་ཚུད་པའི་རླུང་སྟོབས་ཀྱིས་གཉིད་ཀྱི་འོད་གསལ་འཛིན་པ་དང༌། ཐེག་པ་ཆེ་ཆུང་ཐུན་མོང་པའི་ཏིང་ངེ་འཛིན་
སད་དུས་གནས་ཆ་བརྟན་པོ་ཡོད་པ་ཞིག་གིས། གཉིད་དུ་འགྲོ་ཁ་སྔར་གྱི་ཏིང་ངེ་འཛིན་ལ་བཞག་པ་ན། གཉིད་དུ་གང་སོང་བྱིན་པོའམ། དེའི་སྟོད་ཙམ་ཏིང་ངེ་འཛིན་དུ་མེར་གྱིས་འགྲོ་བའི་ཏིང་ངེ་འཛིན་ལ། གཉིད་ཀྱི་འོད་གསལ་དུ་འཁྲུལ་ས་ཆེ་བ་རྣམས་
ཕྱེད་པའི་རྣམ་གཞག་གསལ་པོ་ཡང་མི་སྣང་ཞིང༌། དེ་བཞིན་དུ་རྨི་ལམ་རླུང་སྟོབས་ཀྱིས་ཟིན་པ་དང་། འདུན་པའི་སྟོབས་ཀྱིས་ཟིན་པ་གཉིས་ཀྱི་ཁྱད་པར་ད་གཟོད་འབྱེད་དགོས་པར་སྣང་ལ། རླུང་སྟོབས་ཀྱིས་འོད་གསལ་ཟིན་པའི་འཆི་བའི་འོད་གསལ་
9-2-33b


དང་བསྲེ་ཚུལ་དང༌། དེ་ལྟ་མིན་པའི་ད་ལྟ་གནས་ཆ་བརྟན་པ་དང་། འདུན་པ་དྲག་ཅིང་གོམས་ཤས་ཆེ་བས་འཆི་བའི་འོད་གསལ་དང་བསྲེ་ཚུལ་དང༌། དེ་བཞིན་དུ་བར་དོ་ལོངས་སྐུར་འཆར་ཚུལ་གྱི་རྣམ་དབྱེ་རྣམས་ཀྱང༌། ད་དུང་ལེགས་པར་འབྱེད་དགོས་པར་སྣང་
སྟེ། དེ་རྣམས་ལེགས་པར་ཤེས་པར་འདོད་ན། འཕགས་སྐོར་གྱི་གདམས་ངག་ཏུ་རྒྱས་པར་བཤད་ཟིན་པ་ལས་ཤེས་པར་བྱའོ། །གཉིད་ཀྱི་འོད་གསལ་དང༌། རྨི་ལམ་གཉིས་ཀ་རླུང་སྟོབས་ཀྱིས་ཟིན་པ་ཡིན་ན་ནི། དེ་གཉིས་ཀྱི་རིམ་པ་ལ་ཐོག་མར་གཉིད་
ཀྱི་འོད་གསལ་བཟུང་ནས། དེ་ནས་རྨི་ལམ་གྱི་དགེ་སྦྱོར་ལ་འཇུག་པ་ཡིན་ལ། དེ་ཡང་འདིའི་ཁྲིད་ཡིག་ཁ་ཅིག་ལ་སྣང་བ་ལྟར་ཡིན་ནོ། །སྲོག་དྷཱུ་ཏཱིར་སྡུད་མི་ནུས་པས་ཉིན་མོ་འདུན་པ་སྦྱངས་ནས། རྨི་ལམ་འདུན་པའི་སྟོབས་ཀྱིས་འཛིན་པ་དང༌། སད་དུས་
གནས་ཆ་བརྟན་པའི་སྟོབས་ཀྱིས་གཉིད་ཏིང་ངེ་འཛིན་དུ་སྐྱེས་ཐུབ་པ་ལ། མིང་གཉིད་ཀྱི་འོད་གསལ་དུ་བཏགས་པ་གཉིས་ཀྱི་གོ་རིམ་ལ་ནི་ངེས་པ་མེད་དེ། གལ་ཏེ་སད་དུས་སུ་ཕྱི་ནང་གི་ཐབས་གཉིས་ལ་བརྟེན་ནས། སྲོག་དབུ་མར་ཞུགས་གནས་ཐིམ་
གསུམ་བྱས་པ་ལས། དགའ་བ་བཞི་དང་སྟོང་པ་བཞིར་གྲགས་པ་བསྐྱེད་ནས། ལྷན་སྐྱེས་ཤར་བའི་དུས་སུ་བདེ་སྟོང་དབྱེར་མེད་དུ་སྒོམ་པ་དང༌། དེའི་མཐར་སྒྱུ་མའི་སྐུར་ལངས་ནས། གང་ཤར་ཐམས་ཅད་ལ་མཉམ་གཞག་གི་བདེ་སྟོང་གིས་རྒྱས་བཏབ་ནས་
དཀྱིལ་འཁོར་པའི་རྣམ་པར་ཤར་བ་ལ་བསླབ་པས་ཆོག་མོད། འཁོར་ལོ་ལྷག་མ་གཉིས་ལ་བརྟེན་ནས་གཉིད་ཀྱི་འོད་གསལ་དང༌། རྨི་ལམ་སྒྱུ་མ་སྦྱང་ཅི་དགོས་སྙམ་ན། གཉིད་དུ་འགྲོ་བའི་དུས་སུ་རང་ཤུགས་ཀྱིས་རླུང་སྙིང་ཁའི་འཁོར་ལོའི་རྩ་འདབ་ཏུ་འདུ་
9-2-34a


བ་ཡིན་ལ། དེ་ལ་སད་དུས་སུ་སྲོག་དྷཱུ་ཏཱིར་སྡུད་ནུས་པ་ཞིག་གིས། སྙིང་ཁའི་དྷཱུ་ཏཱིར་དམིགས་པ་གཏད་པ་ན་རོ་རྐྱང་གི་རླུང་སྙིང་གའི་དབུ་མར་འདུས་ཚབས་ཆེ་བ་ཞིག་འོང་བས། སྤྱིར་སྟོང་པ་བཞི་དང་། ཁྱད་པར་དུ་ཐམས་ཅད་
སྟོང་པ་འོད་གསལ་འཆར་སྟོབས་ཆེ་བ་ཞིག་འོང་ཞིང༌། དེ་ལ་ཅི་ནུས་ནུས་སུ་མཉམ་པར་འཇོག་པའི་འོད་གསལ་སྐྱོང་བ་ཞིག་བྱུང་ན། དེའི་ཤུགས་བརྒྱབ་ནས་སད་དུས་སུ་སྲོག་དྷཱུ་ཏཱིར་སྡུད་པ་ཕུལ་ཆེ་བ་དང༌། བརྟན་པར་འགྲོ་དེས་ཀྱང་གཉིད་
ཀྱི་འོད་གསལ་བརྟན་དུ་འགྲོ་བས། དེ་ཡོད་མེད་ཀྱིས་ལམ་བགྲོད་པ་སྟོབས་ཆེ་ཆུང་ཁྱད་པར་ཤིན་ཏུ་ཆེ་བ་དང༌། ཚེ་འདིར་མཆོག་མ་ཐོབ་པར་འཆི་བའི་དུས་བྱེད་པ་ཡིན་ན། འཆི་བའི་འོད་གསལ་ཟིན་ལུགས་གཞན་དང་མི་འདྲའོ། །དེ་བཞིན་དུ་
གཉིད་ཀྱི་འོད་གསལ་གྱི་མཐར། རྨི་ལམ་གྱི་རྒྱུ་ལུས་ཁྱད་པར་ཅན་དུ་ལྡང་ཤེས་ནས། དེར་ལྡང་བ་གོམས་པས་སད་དུས་ཀྱི་སྒྱུ་ལུས་སྟོབས་ཅན་དུ་འགྲོ་ཞིང༌། དེས་ཀྱང་རྨི་ལམ་གྱི་སྒྱུ་ལུས་ཁྱད་ཞུགས་པར་འགྲོའོ། །ཚེ་འདིར་མཆོག་མ་ཐོབ་
པར་འཆི་བའི་དུས་བྱེད་ན། རླུང་སྟོབས་ཀྱིས་འོད་གསལ་ཟིན་པའི་མཐུས། རྨི་ལམ་གྱི་སྒྱུ་ལུས་ལ་གོམས་པ་ཡོད་པས། བར་དོའི་སྒྱུ་ལུས་ཟིན་པ་འདྲ་བ་གཞན་གང་ལ་ཡང་མི་འབྱུང་བས། འདི་གཉིས་ཀྱི་གདམས་ངག་ཕྱིན་ཅི་མ་ལོག་པ་
ཡོད་པ་ནི། མཆོག་ཏུ་ངོ་མཚར་ཞིང་ཤིན་ཏུ་བསྔགས་པའི་གནས་སོ། །གཉིས་པ་ལམ་སོ་སོའི་བསྒོམ་ཚུལ་ནི། རྒྱུད་ཀྱི་དགོངས་པ་གཙོ་བོའི་དོན་གྱི་སྒྱུ་ལུས་དང༌། འོད་གསལ་གཉིད་སད་པ་དང་ལོག་པའི་དུས་སུ་བསྒོམ་ཚུལ་སྔར་བཤད་
9-2-34b


པ་ལྟར་ཤེས་དགོས་ལ། དེ་ལས་གཞན་པའི་བསྒོམ་ཚུལ་བླ་མ་གོང་མ་རྣམས་ཀྱི་ཁྲིད་ཡིག་ནས་འབྱུང་བ་བཞིན་བཤད་པ་ལ་གཉིས་སྒྱུ་མ་བསྒོམ་ཚུལ་དང༌། འོད་གསལ་བསྒོམ་ཚུལ་ལོ། །དང་པོ་ལ་གསུམ། སྣང་བ་སྒྱུ་མ་བསྒོམ་ཚུལ་དང༌། རྨི་ལམ་གྱི་
སྒྱུ་མ་བསྒོམ་ཚུལ་དང༌། བར་དོ་སྒྱུ་མ་བསྒོམ་ཚུལ་ལོ། །དང་པོ་ནི། སྔར་བཤད་པ་ལྟར་སྟོང་པ་ཕུ་ཐག་ཆོད་པའི་ལྟ་བ་དང༌། ལྷན་སྐྱེས་ཀྱི་བདེ་བ་གཉིས་དབྱེར་མེད་དུ་སྦྱར་ཏེ། མཉམ་གཞག་ཏུ་སྒོམ་པ་གོམས་པ་ལས་ལངས་པའི་ཚེ་ལྟ་བ་དྲན་པ་དང༌། 
སྔར་གང་སྣང་ལྷར་སྒོམ་པ་དྲན་པ་ཙམ་གྱིས་ཡུལ་སྣང་ཀུན་རང་ཤུགས་ཀྱིས་སྒྱུ་མ་དང་རྟེན་བརྟེན་པའི་དཀྱིལ་འཁོར་པའི་རྣམ་པར་འཆར་བས། དེ་ལ་དམིགས་པ་འདི་དག་མ་དགོས་ཀྱང༌། དེ་འདྲ་བ་མིན་པའི་གང་ཟག་མཉམ་གཞག་ཏུ་བདེ་བ་ཙམ་
ལ་གོམས་པ་བྱས་པ་དེས། རྗེས་ཐོབ་ཀྱི་ཚེ་དང་པོར་ཐ་མལ་དུ་སྣང་བའི་སྣོད་བཅུད་རྣམས། རང་བཞིན་མེད་པར་གཏན་ལ་ཕབ་ནས་བསྐྱངས་ན། རང་གི་ལུས་མེ་ལོང་ལ་ཤར་བ་རང་ལ་བསྟམས་ནས། རང་གཟུགས་བརྙན་བཞིན་དུ་གཏན་ལ་
འབེབས་པ་ནི་སྔ་མ་དེའི་ཞོར་ལ་སོང་ཟིན་པས། དེ་ཙམ་ཞིག་ལ་སྐྱོང་བ་དབང་པོ་ཤིན་ཏུ་རྟུལ་བ་ལ། སྟོན་ན་མ་གཏོགས་འགངས་ཆུང༌། དེ་ལྟར་ཐ་མལ་དུ་སྣང་བའི་སྣོད་བཅུད་ཀུན་རང་བཞིན་མེད་བཞིན་དུ་སྣང་བ་སྒྱུ་མ་ལྟ་བུའི་ངེས་པ་བརྟན་ན། 
སྣོད་བཅུད་ཀུན་དག་པ་དཀྱིལ་འཁོར་གཉིས་ཀྱི་རྣམ་པར་བལྟས་ལ། དེ་ཡང་རང་བཞིན་གྱིས་སྟོང་བཞིན་དུ་སྣང་བའི་དག་པའི་སྒྱུ་མར་གཏན་ལ་ཕབ་ནས་བསྐྱངས་ན། ལྷའི་སྐུ་མདུན་གྱི་མེ་ལོང་ལ་ཤར་བ་ལ་བལྟས་ནས་དེ་བློས་བཏོན་ཏེ། 
9-2-35a


རང་ལ་བསྟིམས་ནས་རང་ལྷ་སྐུ་སྒྱུ་མ་བཞིན་དུ་སྒོམ་པ་ནི། སྔ་མའི་ཞར་ལ་གྲུབ་ཟིན་ཅིང༌། སྔ་མ་སྟོབས་ཆེ་བས་ཕྱི་མ་ཆ་ཆུང༌། རིམ་ལྔ་ལས་རྡོར་སེམས་བྲིས་པ་མེ་ལོང་ལ་ཤར་བ་བཞིན་དུ། སྒྱུ་མའི་ལུས་སྟོན་པར་
གསུངས་པའི་དོན། བླ་མས་དེ་གཉིས་དཔེ་དོན་དུ་བསྒྲིགས་ནས། སློབ་མ་ལ་ངག་གིས་སྟོན་པའི་དོན་མ་གོ་བར་མིག་ལ་སྟོན་པའི་དོན་དུ་བཟུང་ཞིང༌། བསྐྱེད་རིམ་གསལ་བར་བྱེད་པ་ལ་ཁང་པ་ཁྱད་པར་ཅན་བསྒྲུབས་པའི་ནང་དུ། རྫས་སྣ་གཞན་
མང་པོ་ཡང་ཚོགས་པར་བྱས་ནས། བྲིས་སྐུ་སོགས་མེ་ལོང་གི་ནང་དུ་ཤར་བ་ལ་བལྟས་ཀྱིན་སྒོམ་པ་ཅིག །མར་འགོས་གཉིས་ཀའི་ལུགས་ལ་འདུག་པ་དང་འདྲེས་པའི་རྣམ་གཞག་ཅིག་བྱུང་འདུག་གོ། ཆོས་ཐམས་ཅད་སྒྱུ་མ་དང་རྨི་ལམ་
བཞིན་དུ་གསུངས་པའི་སྒྱུ་མ་ལྟ་བུའི་དོན་ནི་གཉིས་ཏེ། དོན་དམ་བདེན་པ་སྒྱུ་མ་ལྟ་བུར་གསུངས་པ་ལྟ་བུ་ཡོད་ཙམ་དུ་གྲུབ་ཀྱང་བདེན་པ་ཁེགས་པ་ལ་བྱས་པ་དང༌། སྟོང་བཞིན་དུ་སྣང་བའི་སྣང་བ་སྒྱུ་མ་ལྟ་བུ་གཉིས་ལས། འདིར་ནི་ཕྱི་མའོ། །འདི་ལ་ནི་དེར་སྣང་
བ་དང་སྣང་བ་ལྟར་གྱི་དོན་ཡོད་པས་སྟོང་པ་གཉིས་དགོས་ཀྱི། རི་བོང་གི་རྭ་དང་མོ་གཤམ་གྱི་བུ་ལྟར་སྣང་བ་ཙམ་དུ་གཏན་མེད་པ་དང༌། སྣང་ཡང་སྣང་བ་ལྟར་གྱི་དོན་ཡོད་པས་སྟོང་པར་མི་འཆར་ན་ཡང༌། སྣང་བ་སྒྱུ་མ་ལྟ་བུའི་དོན་བློ་ལ་མི་
འཆར་རོ། །དེས་ན་སྒྱུ་མའི་དཔེ་དང་འདྲ་བར་ཆོས་གཞན་རྣམས་ཤེས་པར་བྱེད་ཚུལ་ནི། དཔེར་ན་སྒྱུ་མ་མཁན་གྱིས་སྤྲུལ་པའི་སྒྱུ་མ་དེ་རྟ་གླང་གིས་གདོད་མ་ནས་སྟོང་ཡང་རྟ་གླང་དུ་སྣང་བ་བསྙོན་མི་ནུས་པར་འཆར་བ་བཞིན་དུ། གང་ཟག་
9-2-35b


ལ་སོགས་པའི་ཆོས་རྣམས་ཀྱང་ཡུལ་སྟེང་ནས། རང་གི་ངོ་བོས་གྲུབ་པའི་རང་བཞིན་གྱིས་གདོད་མ་ནས་སྟོང་ཡང་དེར་གྲུབ་པར་སྣང་བ་ལ་བསྙོན་མི་ནུས་པར་ཤེས་པའོ། །དེ་ལྟར་ལྷ་དང་མི་ལ་སོགས་པར་སྣང་བ་ནི་གང་ཟག་དང༌། གཟུགས་སྒྲ་སོགས་
སུ་སྣང་བ་ནི་ཆོས་སུ་འཇོག་པས། གང་ཟག་དང་ཆོས་རྣམས་རང་གི་ངོ་བོས་གྲུབ་པའི་རང་བཞིན་རྡུལ་ཙམ་ཡང་མེད་ཀྱང༌། ལས་སོགས་པ་པོ་སོགས་དང༌། བལྟ་བ་དང་མཉན་པར་བྱ་བ་སོགས་རྟེན་འབྲེལ་གྱི་བྱ་བྱེད་ཐམས་ཅད་ཀྱང་འཐད་དོ། །བྱ་བྱེད་ཐད་
འཐད་པའི་ཕྱིར་ཆད་སྟོང་མིན་ལ། ཆོས་རྣམས་གདོད་མ་ནས་དེ་ལྟར་སྟོང་པ་ལ་སྟོང་པར་ཤེས་པ་ཙམ་ཡིན་པས། བློས་བྱས་ཀྱི་སྟོང་པའང་མིན་ཞིང༌། ཤེས་བྱ་ཐམས་ཅད་དེ་ལྟར་འདོད་པས་ཉི་ཚེ་བའི་སྟོང་པའང་མིན་པས། དེ་བསྒོམས་པས་བདེན་
འཛིན་གྱི་མངོན་ཞེན་མཐའ་དག་གི་གཉེན་པོར་ཡང་འགྲོའོ། །ཟབ་མོའི་དོན་དེ་བློ་གང་གིས་ཡང་ཡུལ་དུ་མི་རུང་བ་མིན་གྱི། ཡང་དག་པའི་ལྟ་བས་གཏན་ལ་ཕེབས་པ་དང༌། ཡང་དག་པའི་དོན་སྒོམ་པའི་བསྒོམས་པས་ཡུལ་དུ་བྱེད་ནུས་པས། ལམ་དུས་
སུ་ཉམས་སུ་ལེན་མི་ནུས་པ་དང༌། རིག་རྒྱུ་དང་རྟོགས་རྒྱུ་ཅི་ཡང་མེད་པའི་སྟོང་པ་ཡང་མིན་ནོ། །མདོར་ན་ངའོ་སྙམ་དུ་འཛིན་པའི་གཞི་གང་ཟག་ལ། ཕུང་པོ་དང་རང་བཞིན་གཅིག་ཐ་དད་གང་དུ་གྲུབ་སྙམ་དུ་བརྟགས་པའི་སྒོ་ནས། གང་ཟག་ལ་རང་བཞིན་ཅུང་
ཟད་ཀྱང་མེད་དོ་སྙམ་པའི་ངེས་པ་བརྟན་པོ་བྱ་སྟེ། སྟོང་ཕྱོགས་ལ་དེ་འདྲ་བ་མང་དུ་སྦྱར། དེ་ནས་གང་ཟག་གི་ཐ་སྙད་བསྙོན་མི་ནུས་པར་སྣང་བ་རྣམས། བློའི་ཡུལ་དུ་འཆར་དུ་གཞུག་ལ། དེ་ལས་གསོག་པ་པོ་དང་། འབྲས་བུ་མྱོང་བ་པོར་འཇོག་པའི་རྟེན་
9-2-36a


འབྲེལ་གྱི་ཕྱོགས་རྣམས་ཡིད་ལ་བྱ་ཞིང༌། རང་བཞིན་མེད་པ་ལ་རྟེན་འབྲེལ་འཐད་པའི་འཐད་ལུགས་རྣམས་ལ་ངེས་པ་རྙེད་པར་བྱའོ། །དེ་གཉིས་འགལ་བར་སྣང་བའི་ཚེ་ན་གཟུགས་བརྙན་སོགས་དཔེར་བླངས་ནས། མི་འགལ་
བའི་ཚུལ་བསམ་སྟེ། འདི་ལྟར་བྱད་བཞིན་གྱི་གཟུགས་བརྙན་ནི་མིག་སྣ་སོགས་གང་དུ་སྣང་བས་སྟོང་ཡང༌། བྱད་དང་མེ་ལོང་ལ་བརྟེན་ནས་སྐྱེ་བ་དང༌། རྐྱེན་དེ་དག་འགའ་ཞིག་ལོག་པའི་ཚེ་འཇིག་པ་གཉིས་བསྙོན་མི་ནུས་པར་གཞི་མཐུན་དུ་འདུ་བ་བཞིན་
དུ། གང་ཟག་ལ་ཡང་རང་བཞིན་རྡུལ་ཙམ་མེད་ཀྱང༌། ལས་གསོག་པ་པོ་དང་འབྲས་བུ་མྱོང་བ་པོ་དང༌། སྔོན་གྱི་ལས་ཉོན་སོགས་ལ་བརྟེན་ནས་སྐྱེ་བ་ཡང་མི་འགལ་ལོ་སྙམ་དུ་སྦྱང་ངོ༌། །དེ་ལ་ངེས་པ་བརྟན་པ་ན་སྣོད་གཞལ་ཡས་ཁང་དང༌། བཅུད་རྣམས་
ལྷ་དང་ལྷ་མོར་ལྟ་བ་ལ་བསླབ་སྟེ། དེ་ཡང་བདེ་སྟོང་དབྱེར་མེད་ཀྱི་རྣམ་རོལ་དུ་ལྟ་བ་ལ་བསླབ་བོ། །དེ་ལྟར་བྱས་ན་གང་སྣང་ལྷ་སྐུ། ལྷ་སྐུ་སྒྱུ་མ། སྒྱུ་མ་བདེ་བ་ཆེན་པོའི་ངོར་ཤར་བའི་ཤེས་བྱ་སུམ་རིམ་མོ། །སླར་ཡང་མཉམ་གཞག་ཏུ་བདེ་ཆེན་
རྙེད་པ་ན། སྟོང་ཉིད་ལེགས་པར་ངེས་པའི་ལྟ་བ་དྲན་པར་བྱས་ལ། དེའི་སྟེང་དུ་རྩེ་གཅིག་ཏུ་བཞག་སྟེ་མི་རྟོག་པ་བསྐྱེད་དེ། དེ་ལྟར་མཉམ་རྗེས་སྤེལ་མ་བྱའོ། །གཉིས་པ་རྨི་ལམ་སྒྱུ་མ་བསྒོམ་ཚུལ་ལ་བཞི། རྨི་ལམ་གཟུང་བ་དང༌། སྦྱང་ཞིང་སྤེལ་བ་
དང༌། ཡ་རབ་སྤང་ཞིང་སྒྱུ་མར་བསླབ་པ་དང༌། རྨི་ལམ་གྱི་དེ་ཁོ་ན་ཉིད་སྒོམ་པའོ། །དང་པོ་ནི། རྨི་ལམ་འཛིན་པ་འདི་ལ་གཉིས་ལས། རླུང་སྟོབས་ཀྱིས་འཛིན་པ་ནི། སད་དུས་སུ་རླུང་དྷཱུ་ཏཱིར་ཚུད་ནས་ཐིམ་པ་ལས་སྟོང་པ་བཞི་འདྲེན་ནུས་པ་ཞིག་གིས་
9-2-36b


བྱེད་པ་ཡིན་ཏེ། བྱེད་ཚུལ་ནི་གཉིད་ཀྱི་འོད་གསལ་ཐོག་མར་བཟུང་བའི་ཚེ། གཉིད་ཀྱི་སྟོང་པ་བཞི་ལེགས་པར་ངོ་ཤེས་ནས་སྐྱོང་བ་ན། དེའི་ཕྱི་ལོགས་སུ་རྨི་ལམ་འཆར་བ་ངེས་པར་ཤེས་པས། དེ་ལ་ནི་གཉིད་ཀྱི་སྟོང་པ་རྣམས་འཛིན་པའི་ཐབས་ལས་
གཞན་པའི་རྨི་ལམ་འཛིན་ཐབས་མི་དགོས་སོ། །འདུན་པའི་སྟོབས་ཀྱིས་འཛིན་པ་ནི། དེ་འདྲ་བའི་ནུས་པ་མེད་པ་ཞིག་གིས་སད་དུས་སུ་རྨི་ལམ་ཟིན་ཐབས་ཀྱི་འདུན་པ་སྦྱོང་བ་དང༌། མགྲིན་པ་སོགས་སུ་དམིགས་པ་གཏོད་པ་ཡིན་ནོ། །དེ་ལ་སྔགས་ཀྱི་
ཐུན་མོང་མ་ཡིན་པའི་རྨི་ལམ་འཛིན་ལུགས་གཙོ་བོ་ནི་སྔ་མ་ཡིན་ལ། ཕྱི་མ་ནི་ཐུན་མོང་བ་ཕལ་པའོ། འདི་ལ་མ་ཚུར་གྱི་ལུགས་ཀྱིས་སྙིང་གར་དམིགས་པ་གཏད་ནས་རྨི་ལམ་འཛིན་པ་དང༌། མེས་ཚོན་གྱི་ལུགས་ཀྱི་མགྲིན་པར་དམིགས་པ་གཏད་
ནས་རྨི་ལམ་འཛིན་པའི་ཚུལ་གཉིས་བཤད་པ་ལ། ཁ་ཅིག་ན་རེ་སྙིང་གར་དམིགས་པ་གཏོད་པ་འོད་གསལ་དང་འབྲེལ། མགྲིན་པར་གཏོད་པ་རྨི་ལམ་དང་འབྲེལ་ཞེས་ཟེར་མོད་ཀྱང༌། རྨི་ལམ་རླུང་སྟོབས་ཀྱིས་ཟིན་པ་ཞིག་ཡིན་ན། གཉིད་ཀྱི་སྟོང་པ་བཞི་
སྔོན་ལ་བཟུང་ནས་བྱེད་ལ། དེ་ལ་ནི་སྙིང་གར་དམིགས་པ་གཏོད་པ་ཡིན་ནོ། །འདུན་པས་འཛིན་དགོས་པ་ཞིག་ཡིན་ན། རྨི་ལམ་ཟིན་པའི་སྔོན་དུ་གཉིད་ཀྱི་སྟོང་པ་བཞི་མི་ཟིན་པས་མགྲིན་པར་གཏོད་དོ། །འོ་ན་མགྲིན་པར་རྨི་ལམ་འཛིན་པའི་གནད་ཡོད་པར་
བཤད་པ་དེ། འདུན་པས་འཛིན་དགོས་པ་ཁོ་ན་ལ་ཡིན་ནམ་སྙམ་ན། རླུང་སྟོབས་ཀྱིས་འཛིན་ནུས་པས་ཀྱང་། གཉིད་དུ་འགྲོ་ཁར་མགྲིན་པར་དམིགས་པ་གཏད་ན། གནས་དེའི་དྷཱུ་ཏཱིར་རླུང་ཐིམ་ནས་སྟོང་པ་བཞི་སྔོན་དུ་འཆར་བ་ཞིག་ཡོད་མོད་ཀྱང༌། 
9-2-37a


 སྔོན་དུ་སྙིང་གར་རླུང་མ་འདུས་པར་མགྲིན་པར་མི་འདུ་ལ། སྙིང་གར་འདུས་ནས་ཐིམ་པ་ལས་བྱུང་བའི་སྟོང་པ་བཞི་འདྲ་བ་གནས་གཞན་དུ་འཆར་མི་ཐུབ་པས། གཉིད་དུ་འགྲོ་ཁར་སྙིང་གར་དམིགས་པ་གཏོད་དགོས་སོ། །འོན་ཀྱང་
ཉལ་ཁར་མགྲིན་པ་དང་དཔྲལ་བ་སོགས་སུ་དམིགས་པ་གཏད་ན། སྙིང་གར་རླུང་འདུ་ཚབས་ཆུང་བས། གཉིད་བསྲབས་པའི་གནད་ཀྱིས་རིག་པ་གསལ་སླ་བ་དང༌། ཉལ་ཁར་མགྲིན་པར་སེམས་འཛིན་པ་གོམས་པས་ཀྱང༌། ད་གཟོད་རྨི་ལམ་ཤར་
བ་ན་རྨི་ལམ་ཡུན་རིང་ངོ༌། །རྨི་ལམ་ཤར་ཟིན་པའི་འོག་ཏུ་ཡང་གཉིད་དུས་སུ་རྨི་ལམ་ཡུན་རིང་བ་ཞིག་འདོད་ན། སྔོན་ལ་མགྲིན་པར་དམིགས་པ་གཏད་དེ་སེམས་ཡུད་ཅིག་བཟུང་ན་རྨི་ལམ་གྱི་ངང་ནས། དགེ་སྦྱོར་སྐྱོང་བ་རྒྱུན་རིང་བ་ཞིག་འོང་བའི་དབང་
དུ་བྱས་ནས་རྨི་ལམ་གྱི་དགེ་སྦྱོར་གྱི་གནད་མགྲིན་པ་ན་ཡོད་པར་བཤད་དོ། །འདུན་པའི་སྟོབས་ཀྱིས་འཛིན་ཚུལ་བཤད་ན། སྤྱིར་ལམ་སྒོམ་པ་ལ་མི་ལྟོས་པར་གཞི་དུས་ནས་ཀྱང༌། རྨི་ལམ་གསལ་བ་འགའ་ཞིག་ལ། རྨི་ལམ་ཟིན་པ་མང་པོ་འོང་
བས་རྨི་ལམ་ཟིན་པ་ཙམ་ཞིག་ལམ་བསྒོམས་ནས་སྒྲུབ་མི་དགོས་ལ། དེ་བཞིན་དུ་བྱ་བ་འགའ་ཞིག་ལ་སད་དུས་སུ་འདུན་པ་དྲག་པོ་ཡོད་ན། རྨི་ལམ་ན་དེ་འབྱུང་བ་ཡང་མང་བའི་གནད་ཀྱིས། ཉིན་པར་རྨི་ལམ་ཟིན་པའི་དྲན་འདུན་དྲག་པོ་རྒྱུན་ཆགས་
པ་བཏང་ནའང་རྨི་ལམ་ཟིན་པ་འོང་བས། དེ་ཙམ་ཞིག་སྐྱེད་དཀའ་བ་མིན་ནོ། །འདི་ལ་རྨི་ལམ་མ་ཤར་ན་རྨི་ལམ་གྱི་དགེ་སྦྱོར་གྱི་གཞི་སྟོར་བས་འཆར་བ་ཞིག་དགོས་ལ། རྨི་ལམ་བྱུང་ཡང་མི་གསལ་ནི་ཟིན་དཀའ་བས། རྨི་ལམ་གསལ་པོ་འཆར་བ་
9-2-37b


ཞིག་དགོས་ཏེ། རྨི་ལམ་གསལ་བ་ནི་སད་རྗེས་སུ་རྨི་ལམ་ཀུན་བཤད་རྒྱུ་འོང་བའོ། །དེས་ན་དང་པོ་ནས་རྨི་ལམ་གསལ་བ་དང་དེ་མིན་ཀྱང་གནས་དབེན་པ་ལ་སོགས་པ་རིག་པ་དྭངས་པའི་རྒྱུའི་ཁྱད་པར་ཚོགས་པའི་སྐབས་དང༌། མཚན་མོ་གཅིག་
གིའང་ཐོ་རངས་ལྟ་བུ་རིག་པ་གསལ་དུས་སུ། རྨི་ལམ་ཟིན་པར་སླའོ། །དེའི་ཕྱིར་ཉིན་པར་གྱི་དྲན་འདུན་དྲག་པོས་བཞག་པའི་བག་ཆགས་རྨི་ལམ་དུ་སད་ཐུབ་པ་ལ་ནི། རྨི་ལམ་གྱི་ཤེས་པ་ཤིན་ཏུ་གསལ་བ་ཞིག་དགོས་པས། དེའི་ཐབས་ཀྱང་ཉིན་
མོ་བསྒྲུབ་དགོས་སོ། །དེ་ནི་མན་ངག་རྣམས་ལས་འབྱུང་བ་ལྟར་མགྲིན་པ་དང༌། སྨིན་མཚམས་སུ་ཤེས་པ་གཏོད་པ་དང༌། དམིགས་ཡུལ་འཚེར་བའི་རྣམ་པ་ཅན་སྒོམ་པ་དང༌། རླུང་སྦྱོར་བྱས་ནས་རིག་པ་དྭངས་སྙིགས་འབྱེད་པ་སོགས་ཡིན་ནོ། །དེ་
ལྟར་རྨི་ལམ་གྱི་གདམས་ངག་གི་གནད་རྣམས་ལ་གོ་བ་ལེགས་པར་བཙལ་ཏེ་བྱས་ན། རྣམ་པར་དག་པའི་མྱོང་བ་ཅན་མཁས་པར་འགྲོ་ཡི། གཞན་དུ་ན་མྱོང་བ་ཅུང་ཟད་སྐྱེས་ཀྱང་ཐེམ་མེ་བ་ལས་མི་འོང་སྟེ། མན་ངག་གཞན་ལའང་དེ་དང་འདྲའོ། །
རྨི་ལམ་འཛིན་པ་ལའང་རང་ལྷར་སྒོམ་པ་དང༌། བླ་མའི་རྣལ་འབྱོར་བསྒོམས་ཏེ་མཆོད་ལ། རྨི་ལམ་མང་པོ་དང༌། གསལ་པོ་དང༌། བཟང་པོ་རྨི་བ་དང༌། རྨི་ལམ་ཟིན་པ་དང༌། ཟིན་ནས་ཀྱང་རྨི་ལམ་གྱི་དགེ་སྦྱོར་རྣམས་རྒྱུད་ལ་སྐྱེ་བའི་འགལ་རྐྱེན་ཞི་ཞིང༌། 
མཐུན་རྐྱེན་ཚང་བའི་གསོལ་བ་དྲག་པོ་མང་དུ་འདེབས་པ་དང༌། ཡི་དམ་དང་བཀའ་སྡོད་ལ་གཏོར་མ་ཕུལ་ནས། འཕྲིན་ལས་བཅོལ་ཞིང༌། མཚམས་དམ་པར་བྱའོ། །དེ་ནས་ཉིན་མོ་དྲན་པ་རྒྱུ་ཆགས་ཀྱིས་བཟུང་བ་ནི། ད་ལྟར་གྱི་སྣང་བ་འདི་རྣམས་
9-2-38a


རྨི་ལམ་གྱི་སྣང་བར་འདུག་སྙམ་པ་དང༌། ད་རྨི་ལམ་ལ་རྨི་ལམ་དུ་ངོ་ཤེས་པར་བྱ་སྙམ་པའི་འདུན་པ་དྲག་པོ་ཡང་ཡང་སྦྱང༌། གཞན་ཡང་ད་གཟོད་རྨི་ལམ་བྱུང་དུས་སུ། ཅི་ནས་ཀྱང་རྨི་ལམ་དུ་ངོ་ཤེས་པར་བྱས་ལ། རྨི་ལམ་གྱི་དགེ་སྦྱོར་
བསྐྱང་བར་བྱའོ། །སྙམ་པའི་འཕེན་པ་དྲག་པོ་མང་དུ་སྦྱང༌། ཁྱད་པར་དུ་ཉལ་ཁར་རྒྱུན་ལྡན་དུ་སྦྱང་སྟེ་རྨི་ལམ་གསལ་ན། འདི་གཅིག་པུས་ཀྱང་ཟིན་པར་འགྱུར་རོ། །མཚན་མོ་མན་ངག་བཙན་ཐབས་ཀྱིས་བཟུང་བ་ལ་གསུམ་ལས། དང་པོ་མགྲིན་པར་
ཡི་གེ་ལ་དམིགས་པ་གཏོད་པ་ནི། གཉིད་དུ་འགྲོ་ཁར་རང་ཡི་དམ་གྱི་ལྷར་སྒོམ། སྤྱི་བོར་བླ་མ་བསྒོམས་ལ་གསོལ་བ་མང་དུ་གདབ། མགྲིན་པར་པད་མ་དམར་པོ་འདབ་མ་བཞི་པ་ཅིག་གི་ལྟེ་བའི་དྷཱུ་ཏཱིའི་ནང་དུ་ཨའམ། ཨོཾ་དམར་པོ་ཅིག་གསུང་རྡོ་རྗེའི་ངོ་
བོར་བསམ་ཞིང་དེ་ལ་ཤེས་པ་གཏད་དེ་གཞན་དུ་མི་འཕྲོ་བར་བྱས་ལ། སེམས་བཟུང་བའི་ངང་ནས་གཉིད་དུ་འགྲོ་བར་བྱའོ། །འདིའི་གདམས་ངག་འགའ་ཞིག་ལ་ཨོཾ་ཨ་ནུ་ཏེར་ཞེས་པའི་ཡི་གེ་ལྔ་བཀོད་ནས། རིམ་པ་བཞིན་དུ་སེམས་འཛིན་ལ། གདམས་
ངག་གཞན་དག་ལ་དབུས་ཀྱི་ཨ་དམར་པོ་འབའ་ཞིག་ལ་སེམས་གཏོད་པའི་ལུགས་གཉིས་སྣང་བ་ལ། གཉིས་མེད་རྣམ་རྒྱལ་བརྫུས་མ་ལས། འདབ་མ་བཞི་ལ་ཨ་ནུ་ཏར་བཞི་བཀོད་ནས། རིམ་པ་བཞིན་དུ་དམིགས་མོད་ཀྱང༌། དེ་ལ་ནུས་པ་
ལྷག་པོ་མི་སྣང་བས་བྲིས་སོ། །དབུས་ཀྱི་ཡི་གེ་ཨོཾ་དུ་བྱེད་པ་སམྦུ་ཊ་ལ་སོགས་པའི་རྒྱུད་མང་པོ་དང་མཐུན་ནོ། །འོན་ཀྱང་ཨ་དམར་པོ་བྱ་ནའང་མི་རུང་བ་མེད། ཡི་གེ་དབུས་སུ་འགོད་པ་ན་མགྲིན་པའི་དབུ་མའི་ནང་དུ་བཀོད་པ་ལ་སེམས་འཛིན་པ་གནད་
9-2-38b


ཤིན་ཏུ་ཆེའོ། །དེ་ལྟར་དམིགས་པ་བཟུང་བ་དེས་མ་ཟིན་ན། ཡང་སྔར་བཞིན་བསྐྱར་གྱིན་གཟུང༌། དེ་ལྟར་བྱས་ཀྱང་མ་ཟིན་ན། སྨིན་མཚམས་ཀྱི་ཐིག་ལེ་ལ་བརྟེན་ནས་འཛིན་པ་ནི། ཐོ་རངས་ཚུན་ཆོད་གཉིད་འཐུག་པ་ལ་ཟིན་དཀའ་བས། ཐོ་རངས་
ནས་ཉི་མ་རྩེ་ཤར་ཚུན་ལ་གཉིད་བསྲབས་པས། རྨི་ལམ་འཛིན་སླ་བའི་དུས་སུ། བླ་མའི་རྣལ་འབྱོར་བསྒོམས་ནས་གསོལ་བ་འདེབས་པ་དང༌། འདུན་པ་སྦྱོང་བ་རྣམས་སྔར་བཞིན་བྱས་ལ། རང་ལྷར་གསལ་བའི་སྨིན་མཚམས་སུ་ཐིག་ལེ་
དཀར་ལ་འཚེར་བ་སྲན་མ་ཙམ་ཞིག་ལ་ཤེས་པ་གཏད་དེ། རླུང་བུམ་པ་ཅན་བདུན་བྱས་ལ་གཉིད་དུ་འགྲོ་བར་བྱའོ། །ཐིག་ལེ་འཚེར་དྲགས་པའི་སྣང་བ་བྱུང་ནས། གཉིད་མི་ཁུགས་པ་དང་ཅུང་ཟད་བྱུང་ཡང་སད་མགྱོགས་པར་སྣང་ན། ཅུང་མི་གསལ་བར་
བྱའོ། །ཁ་ཅིག་དང་པོར་མགྲིན་པའི་ཡི་གེ་ལ་སེམས་གཏད་ན། གཉིད་མི་འོང་བས་དང་པོར་དཔྲལ་བར་ཐིག་ལེ་དཀར་པོ་ལ་གཏོད་པ་ཡིན་ཟེར་བ་ནི། ཤིན་ཏུ་ཡང་མི་རིགས་ཏེ། དེ་ནི་རྨི་ལམ་གྱི་གནས་སྐབས་སྐྱེད་པའི་སར་དམིགས་པ་གཏད་ན། གཉིད་མི་
འོང་བས་སད་པའི་གནས་སྐབས་སྐྱེད་པའི་སར་སེམས་གཏད་ན་གཉིད་འོང་ངོ༌། །ཞེས་སྨྲ་བའི་ཕྱིར་རོ། །མགྲིན་པར་སྲོད་དམ་ཐོ་རངས་སེམས་གཏད་པ་མང་དུ་བྱས་ཀྱང་མི་ཟིན་ན། གང་ཟག་དེ་གཉིད་འཐུག་པ་ཡིན་པས། དེ་ཅུང་སྲབ་ཏུ་གཏོང་བ་ལ་སྨིན་
མཚམས་སུ་སེམས་གཏོད་པའོ། །དེ་ལྟར་བྱས་པ་དེས་གཉིད་སྲབ་དྲགས་ནས་མ་ཁུགས་པའམ་ཁུགས་ཀྱང་སད་སྐྱེན་པར་བྱུང་ནས་མ་ཟིན་ན། གསང་གནས་ཀྱི་ཐིག་ལེ་ལ་དམིགས་པ་ནི། ཉིན་པར་གྱི་འདུན་པ་སྦྱོང་བ་སོགས་སྔར་བཞིན་བྱ་ལ། ཉལ་
9-2-39a


ཁར་རྡོ་རྗེའི་ནོར་བུའི་དབུས་སུ་ཐིག་ལེ་ནག་པོ་ཅིག་ལ་སེམས་གཏད་དེ། རླུང་ཁ་སྦྱོར་ཉེར་གཅིག་བསྒོམས་ལ། སེམས་མ་ཡེངས་པར་བཟུང་བའི་ངང་ནས་གཉིད་ལོག་པར་བྱའོ། །སྔ་མ་གནས་མ་ཐོས་པ་དང༌། དམིགས་པ་ཅུང་
གསལ་བས་གཉིད་ཧ་ཅང་སྲབ་མོར་སོང་བ་ལ། ནོར་བུར་གཉིད་འཐུག་གི་གནས་སྐབས་སྐྱེད་པའི་ཐིག་ལེ་ཡོད་པས། དེར་སེམས་གཏད་ན་གཉིད་སྲབ་འཐུག་སྙོམས་པར་འགྱུར་རོ། །དེའི་རིགས་པས་སྲོད་དང་། ཐོ་རངས་ཀྱི་དུས་ཀྱི་སྒོ་ནས་ཆ་སྙོམས་
པ་ཡང་ཤེས་པར་བྱའོ། །དེ་ཀྱང་མ་ཟིན་ན་ལོ་དང་ཟླ་བར་ཡང་ཟིན་ཐབས་རྣམས་བསྒོམས་གསུང་མོད་ཀྱང༌། དེ་ལྟར་བྱས་ཀྱང་མི་ཟིན་པ་ནི་གཏུམ་མོའི་སྐབས་སུ། སྲོག་དྷཱུ་ཏཱིར་ཞུགས་གནས་ཐིམ་གསུམ་བྱེད་ནུས་པ་ལས། ལྷན་སྐྱེས་ཀྱི་ཡེ་ཤེས་
མ་སྐྱེས་པས་རླུང་སྟོབས་ཀྱིས་གཉིད་ཀྱི་འོད་གསལ་མ་ཟིན། དེ་མ་ཟིན་པས་རླུང་སྟོབས་ཀྱིས་རྨི་ལམ་འཛིན་མ་ཐུབ་པས་ལན་ཞིང༌། འདུན་པས་འཛིན་པ་ལ་དཀའ་སྤྱད་མང་པོ་བྱས་ནས་མ་ཟིན་ཀྱང༌། འགངས་ཆུང་བས་གཏུམ་མོ་ལམ་གྱི་རྨང་རྡོ་ཡིན་
པ་ལ་ངེས་པ་བསྐྱེད་ནས། སླར་ཡང་དེ་བསྒོམས་ཏེ་སྲོག་དྷཱུ་ཏཱིར་ཆུད་པ་ལ་འབད་པ་རྩ་བ་བོར་ནས་ཡལ་ག་ཚོལ་བ་ལྟར་མི་འགྱུར་བ་ཤེས་པར་གྱིས་ཤིག །གཉིས་པ་སྦྱང་ཞི་སྤེལ་པ་ནི། རྨི་ལམ་སྒྱུ་མའི་རྣམ་ཐར་ལ་སྤྱོད་པ་ལ་གཉིས་ལས། འཇིག་
རྟེན་པའི་རྣམ་ཐར་ལ་སྦྱོང་བ་ནི། སྔར་མེད་པ་གསར་དུ་སྤྲུལ་པ་དང༌། སྔར་ཡོད་རྣམ་པ་གཞན་དུ་བསྒྱུར་པའི་སྤྲུལ་བསྒྱུར་སྣ་ཚོགས་ལ་སློབ་པ་དང༌། ཉི་མ་དང་ཟླ་བའི་འོད་ཟེར་ལ་ཞོན་ནས། སུམ་ཅུ་རྩ་གསུམ་ལ་སོགས་པའི་ལྷ་དང༌། མིའི་ཡུལ་ལ་
9-2-39b


སོགས་པའི་གནས་ལྟ་བའི་འཕེན་པ་བཏང་ནས། དེར་འགྲོ་བ་དང༌། ནམ་མཁའ་ལ་འཕུར་ནས་འགྲོ་བ་སོགས་སྣ་ཚོགས་པའི་རྩལ་སྦྱོང་བའོ། །འཇིག་རྟེན་ལས་འདས་པའི་རྣམ་ཐར་ལ་སྦྱོང་བ་ནི། བདེ་བ་ཅན་དང༌། མངོན་དགའ་དང༌། འོག་མིན་སོགས་
སངས་རྒྱས་ཀྱི་ཞིང་དག་པ་དང་། དེར་བཞུགས་པའི་སངས་རྒྱས་བྱང་སེམས་བལྟ་བ་དང༌། མཆོད་པ་དང་ཆོས་ཉན་པ་སོགས་ཀྱི་འཕེན་པ་བཏང་ནས། དེ་རྣམས་སྒྲུབ་པའོ། །འདི་རྣམས་ལ་རྨི་ལམ་རླུང་སྟོབས་ཀྱིས་ཟིན་པ་ཡིན་ན། རླུང་བྱང་བའི་
གནད་ཀྱིས་འདུན་པ་གང་བཏང་ཕལ་མོ་ཆེ་འདོད་པ་བཞིན་བྱ་བར་སླ་ལ། དེ་འདྲ་བའི་ནུས་པ་མ་ཐོབ་པས་ནི་གོམས་པ་མང་དུ་དགོས་སོ། །དེ་གཉིས་ཀས་དག་པའི་སྣོད་བཅུད་མཐོང་བ་སོགས་ནི། དེ་དག་དང་རྣམ་པ་འདྲ་བ་ཙམ་འགའ་ཞིག་ཤར་བར་ཟད་ཀྱི། 
དངོས་མཐོང་བ་སོགས་སུ་གཞག་དཀའོ། །ལུང་སྟོན་པ་ལ་ཡང་ཕྱི་མའི་ལུང་སྟོན་འགའ་རེ་བདེན་པར་སྣང་ཡང༌། ཕལ་མོ་ཆེ་ངེས་པ་མིན་ལ། སྔ་མ་ཡིན་ན་རྨི་ལམ་གྱི་དགེ་སྦྱོར་གྱི་གནད་གཞན་འགའ་ཞིག་དང༌། རླུང་བྱང་བའི་གནད་འགའ་ཞིག་ལ་བརྟེན་ནས་མི་
འཁྲུལ་བ་བྱ་བའི་ཐབས་ཤིག་ཡོད་པར་སྣང་ངོ༌། །སྤེལ་བ་ནི། མི་དང་དུད་འགྲོ་སོགས་སེམས་ཅན་དང༌། ཀ་བ་དང་བུམ་པ་སོགས་སེམས་ཅན་མ་ཡིན་པ་རྣམས་གཅིག་གཉིས་དང༌། གཉིས་བཞི་ལ་སོགས་པ་ནས། བརྒྱ་དང་སྟོང་ལ་སོགས་པའི་བར་དུ་སྤྲུལ་
པའོ། །གསུམ་པ་ཡ་ང་བ་སྤང་ཞིང་སྒྱུ་མར་བསླབ་པ་ལ་ཡ་ང་བ་སྤང་བ་ནི། རྨི་ལམ་གྱི་དུས་སུ་མེ་དང་ཆུ་ལ་སོགས་པའི་ཡ་ང་བའམ་བག་ཚ་བ་བྱུང་ན། རྨི་ལམ་དུ་ངོ་ཤེས་པར་བྱས་ནས། རྨི་ལམ་གྱི་མེ་དང་ཆུ་ལ་སོགས་པས་གནོད་པར་ག་ལ་འགྱུར་སྙམ་དུ་
9-2-40a


བསམས་ལ། མཆོད་པ་དང༌། བརྒལ་བ་ལ་སོགས་པའི་ཐོགས་བརྫིས་བྱའོ། །སྒྱུ་མར་བསྲབ་པའི་ཚུལ་ནི་རྨི་ལམ་གྱི་བུམ་སྣམ་སོགས་དེ་དག་ཏུ་སྣང་ཡང༌། དེའི་ངོ་བོས་སྟོང་པར་རྟོགས་པ་ནི་རྨི་ལམ་ལ་རྨི་ལམ་དུ་ངོ་ཤེས་པ་ན་འབྱུང་
ཡང༌། དེ་ཙམ་གྱིས་རྨི་ལམ་གྱི་རང་བཞིན་མེད་པར་རྟོགས་པ་མིན་ཏེ། དཔེར་ན་སང་དུས་སུ་མེ་ལོང་ལ་ཤར་བའི་བཞིན་གྱིས་སྟོང་པར་རྟོགས་ཀྱང༌། གཟུགས་བརྙན་གྱི་དེ་བཞིན་ཉིད་རྟོགས་པ་མིན་པ་བཞིན་ནོ། །དེས་ན་རྨི་ལམ་ལ་
རྨི་ལམ་དུ་མ་ཤེས་པར་འཁྲུལ་བ་ནི། བྱིས་པ་ཆུང་དུས་བྱད་བཞིན་གྱི་གཟུགས་བརྙན་ལ་བྱད་བཞིན་དངོས་ཡིན་པར་འཛིན་པ་དང་འདྲ། རྨི་ལམ་ལ་རྨི་ལམ་དུ་ཤེས་པ་ནི་རྒན་པོ་བརྡ་ལ་བྱང་བས། བྱད་བཞིན་དུ་སྣང་ཡང་བྱད་བཞིན་གྱིས་སྟོང་བར་ཤེས་
པ་དང་འདྲ། བྱད་གཞིན་གྱི་གཟུགས་བརྙན་བྱད་བཞིན་གྱིས་སྟོང་པ་དཔེར་བྱས་ནས། ཆོས་གཞན་རྣམས་ཀྱང་དེ་བཞིན་དུ་རང་གི་ངོ་བོས་གྲུབ་པའི་རང་བཞིན་མེད་པར་ཤེས་པར་བྱེད་པ་བཞིན་དུ། རྨི་ལམ་ལ་རྨི་ལམ་དུ་ཤེས་པ་དེ་དཔེ་ལ་བླངས་ནས། 
ཆོས་གཞན་ཐམས་ཅད་ཀྱང་དེ་དང་འདྲ་བར་བདེན་པར་གྲུབ་པ་ཅུང་ཟད་ཀྱང་མེད་དོ་སྙམ་དུ་ངེས་པར་བྱ་སྟེ། བདེ་འཛིན་གྱིས་ཇི་ལྟར་བཟུང་བ་ལེགས་པར་ཤེས་ནས་དེས་བཟུང་བ་ལྟར་མེད་པའི་རྒྱུ་མཚན་ཡང་དག་རྣམས་ཤེས་དགོས་སོ། །དེ་ལྟར་ཤེས་
ནས་རྨི་ལམ་གྱི་སྣོད་བཅུད་ཐམས་ཅད་དཀྱིལ་འཁོར་གཉིས་ཀྱི་རྣམ་པར་འཆར་བ་ལ་བསླབ་ཅིང༌། དེ་ལྟར་ཤར་བ་དེ་དག་ཀྱང་རང་གི་ངོ་བོས་གྲུབ་པས་སྟོང་བཞིན་དུ་དེར་སྣང་བའི་སྒྱུ་མར་འཆར་བ་ལ་བསླབ་སྟེ། དེ་དག་ཐམས་ཅད་ཀྱང་བདེ་སྟོང་གཉིས་ཀྱི་རྣམ་
9-2-40b


རོལ་དུ་བལྟ་བ་སད་དུས་བཞིན་བྱའོ། །བཞི་པ་རྨི་ལམ་གྱི་དེ་ཁོ་ན་ཉིད་བསྒོམ་པ་ནི། འོད་གསལ་དང་གཅིག་ཏུ་བྱེད་པ་ཡིན་ཞིང༌། དེ་ནི་རང་ཡི་དམ་དུ་གསལ་བར་བསྒོམས་ལ། རང་གི་ཐུགས་ཀའི་ཧཱུཾ་ཡིག་ལས་འོད་ཟེར་འཕྲོས་པས། རྨི་ལམ་གྱི་
སྣོད་བཅུད་ཐམས་ཅད་ཧཱུཾ་ཡིག་ལ་བསྡུ། རང་ཡང་ལུས་ཀྱི་སྟོད་སྨད་ནས་རིམ་པ་བཞིན་ཧཱུཾ་ལ་བསྡུ་ཞིང༌། ཧཱུཾ་ཡིག་ཀྱང་མི་དམིགས་པར་འོད་གསལ་དུ་གཞུག་ལ་སེམས་གཡོ་མེད་དུ་བཟུང་ངོ༌། །དེ་ཡང་སད་དུས་ཀྱི་ཡིད་ངོའི་སྣང་བ་དང༌། རྨི་ལམ་གྱི་ཡིད་
ངོའི་སྣང་བ་གཉིས་ཕྱི་མ་སྡུད་པ་ཆེས་སླ་ལ། དེའི་དུས་སུ་རླུང་ཤིན་ཏུ་རགས་པ་འགའ་ཞིག་ཐིམ་ཡོད་པའི་གནད་ཀྱིས། སླར་ཡང་རླུང་སྙིང་གར་འདུ་ཞིང་རྨི་ལམ་གྱི་སྣང་བ་མི་འཆར་བར་གཉིད་དུ་འགྲོའོ། །དེའི་ཚེ་གཉིད་ཀྱི་སྟོང་པ་རྣམས་ཅུང་ཟད་ངེས་ནུས་ལ། 
ལན་འགའ་ཟུང་ལ་ངེས་མ་ཐུབ་ནའང༌། དེ་གོམས་པ་ན་རྣམ་པ་གསལ་པོར་གཉིད་ཀྱི་སྟོང་པ་རྣམས་ངེས་ནུས་པ་ཞིག་འོང་ངོ༌། །དེའི་སྡུད་རིམ་དང་སྟོང་པ་རྣམས་རེ་བརྟན་བྱུང་ན། ཉིན་མོའི་རླུང་སར་བསྒོམ་པ་སོགས་ལའང་བོགས་ཐོན་པར་འགྱུར་ཞིང༌། མཚན་
མོའི་གཉིད་ཀྱི་སྟོང་པ་རྣམས་གཉིད་དུ་ཐོག་མར་འགྲོ་བའི་མཚམས་ནས་མ་ཟིན་ཀྱང༌། རྨི་ལམ་ཟིན་པའི་རྗེས་ནས་སྔར་ལྟར་བྱས་བས་ཁྱད་པར་ཅན་ཟིན་པར་འགྱུར་རོ། །གསུམ་པ་བར་དོ་སྒྱུ་མ་བསྒོམ་ཚུལ་ལ་གཉིས། བར་དོའི་རྣམ་གཞག་སྤྱིར་བསྟན་པ་
དང༌། ཉམས་སུ་ལེན་པའི་རིམ་པ་བསྟན་པའོ། །དང་པོ་ནི། ཤི་བའི་དུས་ཀྱི་འཆི་སྲིད་འགགས་པ་དང༌། བར་དོ་གྲུབ་པ་གཉིས་སྲང་མདའི་མཐོ་དམན་པ་བཞིན་འོང་ངོ༌། །དེ་ཡང་དབང་པོ་ཀུན་ཚང་བ། གང་དུ་སྐྱེ་འགྱུར་གྱི་ལུས་དབྱིབས་ཅན། ལས་ཀྱི་རྫུ་འཕྲུལ་
9-2-41a


གྱི་ཤུགས་དང་ལྡན་པ། སྐྱེ་གནས་མ་གཏོགས་པ་ལ་ཐོགས་པ་མེད་པ། བར་དོའི་ལུས་བླངས་པ་དེའི་ཚེའི་ཚད་ནི། རིང་མཐའ་ཞག་བདུན་ཡིན་ཞིང༌། དེ་ཚུན་ཆད་དུ་ངེས་པ་མེད་ལ། དེ་ལ་སྐྱེ་སྲིད་དུ་སྐྱེ་མ་ཐུབ་ན་སླར་ཡང་
བར་དོར་སྐྱེས་ནས། ཞག་བདུན་གྱི་ཚུལ་གྱིས་སྐྱེ་བའི་རྐྱེན་གྱི་ཚོགས་པ་མ་རྙེད་ན། ཞག་བཞི་བཅུ་ཞེ་དགུ་བར་དུ་གནས་ལ། དེ་ཚུན་ཆད་ཀྱི་ངེས་པར་སྐྱེ་བ་ལེན་ནོ། །བརྫུས་ཏེ་སྐྱེ་ན་གནས་ལ་སྲེད་པ་སྐྱེ། དྲོད་གཤེར་ལས་སྐྱེ་ན་དྲི་རོ་ལ་སྲེད་པ་
སྐྱེ། སྒོ་ང་ལས་སྐྱེ་བ་དང་མངལ་ལས་སྐྱེ་ན། ཕ་མ་ཉལ་པོ་བྱེད་པ་དངོས་སམ་དེར་སྣང་བ་ལ་ཆགས་སྡང་སྐྱེ་སྟེ། མོར་སྐྱེ་ན་ཕ་ལ་ཆགས་མ་ལ་སྡང༌། ཕོར་སྐྱེ་ན་ཕ་ལ་སྡང་མ་ལ་ཆགས་པ་དང༌། གཞན་རྣམས་ཀྱང་སྐྱེ་གནས་ལ་ཞེ་སྡང་སྐྱེས་པས་འཆི་
རྐྱེན་བྱས་ནས་སྐྱེ་བ་ཡིན་ལ། དེ་ཡང་མི་དགེ་བ་བྱེད་པའི་བར་དོར་ཕྱར་བ་ནག་པོ་འམ་མཚན་མོ་མུན་ནག་ལྟ་བུ་དང༌། དགེ་བ་བྱེད་པའི་བར་དོ་ནི་སྣམ་བུ་དཀར་པོའམ་ཟླ་འོད་དང་བཅས་པའི་མཚན་མོའི་སྣང་བ་ལྟ་བུ་འབྱུང་ངོ༌། །དམྱལ་བའི་བར་དོ་ནི་
སྡོང་དུམ་ཚིག་པ་ལྟ་བུ་དང༌། དུད་འགྲོའི་བར་དོ་ནི་དུ་བ་ལྟ་བུ་དང༌། ཡི་དྭགས་ཀྱི་བར་དོ་ནི་ཆུའི་ཁ་དོག་ལྟ་བུ་དང༌། འདོད་ལྷ་དང་མིའི་བར་དོ་ནི་གསེར་ལྟ་བུ་དང༌། གཟུགས་ཁམས་པའི་བར་དོ་ནི་དཀར་པོར་མངལ་འཇུག་ལས་གསུངས་ལ། གཟུགས་
མེད་ནས་ཁམས་འོག་མ་གཉིས་སུ་སྐྱེ་ན་བར་དོ་ཡོད་ལ། དེ་གཉིས་ནས་གཟུགས་མེད་སྐྱེ་ན་གང་དུ་སྐྱེ་བ་དེར་གཟུགས་མེད་ཀྱི་ཕུང་པོ་འགྲུབ་ཀྱི་བར་དོ་མེད་དོ། །ཞེས་གསུངས་པས་ཡར་མར་གྱི་མཚམས་མེད་ལ་བར་དོ་མེད་པར་འདོད་པ་ནི་རྟོགས་
9-2-41b


བཏགས་འབའ་ཞིག་གོ། འདིར་མཛོད་ལས། སྔོན་དུས་སྲིད་འབྱུང་ཤ་ཚུགས་ཅན། །ཞེས་བར་དོ་དེ་སྔོན་འབྱུང་གི་སྲིད་པའི་གཟུགས་བརྙན་ཅན་དུ་གསུངས་པའི་དོན། ད་གཟོད་འབྱུང་འགྱུར་གྱི་འཆི་སྲིད་ཀྱི་སྔོན་དུ་འབྱུང་བའི་སྔོན་དུས་ཀྱི་སྲིད་པ་
ལ་བཤད་པ་མ་གོ་བར། བར་དོ་དེ་སྔར་མ་ཤི་བའི་དུས་ཀྱི་སྲིད་པའི་གཟུགས་ཅན་དུ་གོ་ནས། བར་དོ་ཐམས་ཅད་སྔར་མ་ཤི་བའི་དུས་ཀྱི་གཟུགས་ཅན་དང༌། དེ་དུས་ཀྱི་གྲོགས་ལ་སོགས་པའི་སྣང་བ་ཅན་དུ་ཁ་ཅིག་འདོད་པ་བྱུང་ལ། ཡང་ཁ་ཅིག་ཀུན་
ལས་བཏུས་ལས། གང་དུ་སྐྱེ་བར་འགྱུར་བའི་བྱེད་གཟུགས་སོ། །ཞེས་གསུངས་པ་མཐོང་ནས་ལུས་ཕྱི་མ་ལེན་རྒྱུའི་བྱད་གཟུགས་ཅན་དང༌། དེ་དུས་ཀྱི་གྲོགས་ལ་སོགས་པའི་སྣང་བ་ཅན་དུ་འདོད་པ་བྱུང༌། ཡང་གཞན་དག་སྐྱེ་བ་སྔ་ཕྱི་གཉིས་ཀའི་
གཟུགས་ཅན་དུ་བཤད་འདུག་པས། བར་དོའི་ཞག་བདུན་གྱི་ཕྱེད་ཞག་ཕྱེད་དང་བཞིར་སྐྱེ་བ་སྔ་མའི་ལུས་དབྱིབས་དང༌། དེའི་དུས་ཀྱི་སྣང་བ་འབྱུང༌། ཞག་ཕྱེད་དང་བཞིར་སྐྱེ་བ་ཕྱི་མའི་ལུས་དབྱིབས་དང༌། དེའི་དུས་ཀྱི་སྣང་བ་འབྱུང་བ་དང༌། ཞག་སྔ་མ་ཕྱེད་
དང་བཞི་སོད་བའི་མཚམས་ནས། རང་ཤི་བ་དང་བར་དོར་གནས་པ་ཤེས་པ་ཡིན་ཞེས་ཟེར་མོད་ཀྱང༌། ཁུངས་རྣམ་དག་ཡེ་མི་སྣང་ཞིང༌། སྒྲུབ་བྱེད་རྣམ་དག་གཞན་ཡང་མི་འདུག་པས་རྟོག་བཏགས་སོ། །བར་དོའི་སྒྲ་དོན་ཡང༌། མཛོད་ལས་འདིར་གང་འཆི་
དང་སྐྱེ་བ་ཡི། །སྲིད་པའི་བར་དུ་འབྱུང་དེའོ། །ཞེས་འདི་ནས་ཤི་ནས་ཕ་རོལ་སྐྱེ་སྲིད་དུ་སྐྱེ་བ་མ་བླངས་པའི་བར་གྱི་སྲིད་པ་ལ་གསུངས་པས། སྐྱེ་ཤི་བར་དོ་ལས་གཞན་པའི་སྲིད་པ་བར་དོ་མེད་ཀྱི། དེ་ཉིད་ལ་སྲིད་པ་བར་དོར་གསུངས་སོ། །འོན་ཀྱང་གདམས་
9-2-42a


ངག་འདི་ལས། སྐྱེས་ནས་ད་གཟོད་མ་ཤིའི་བར་གྱི་ད་ལྟར་གྱི་སྐབས་ལ་སྐྱེ་འཆི་བར་དོ་དང༌། ཡང་ད་ལྟ་གཉིད་དུ་སོང་ནས་མ་སད་ཀྱི་བར་གྱི་སྐབས་ལ་རྨི་ལམ་བར་དོ་དང༌། ཡང་ད་གཟོད་ཤི་ནས་སྐྱེ་སྲིད་དུ་སྐྱེ་བ་མ་བླངས་པའི་བར་གྱི་སྐབས་
འདི་ལ། སྲིད་པ་བར་དོ་ཞེས་འཆད་པ་འདི་ཇི་ལྟར་ཡིན་སྙམ་ན། འདི་ལ་གསང་འདུས་འཕགས་སྐོར་དུ་སྟོང་པ་བཞིའི་རིམ་གྱིས་འོད་གསལ་མངོན་དུ་བྱེད་པ་དེ། འཆི་རིམ་བཞིན་དུ་བྱེད། སྒྱུ་མའི་ལོངས་སྐུ་སྒྲུབ་པ་དེ་བར་དོ་ཇི་བཞིན་དུ་བྱེད། ཕྲ་བའི་ལོངས་སྐུས་
རགས་པའི་སྤྲུལ་སྐུའི་ལུས་འཛིན་པ་དེ། སྐྱེ་བ་ལེན་པ་བཞིན་དུ་བྱེད་པས། གདམས་ངག་དང་མི་ལྡན་པ་ལ། ཐ་མལ་པའི་སྐྱེ་ཤི་བར་དོ་གསུམ་དུ་འོང་རྒྱུ་དེ། གདམས་ངག་དང་ལྡན་པའི་རྣལ་འབྱོར་པ་ལ། ཐོག་མར་ལམ་གྱི་སྐུ་གསུམ་དང༌། མཐར་འབྲས་
བུའི་སྐུ་གསུམ་དུ་འཆར་བ་ཞིག་བྱེད་ལ། འདྲ་བ་དང་འབྲེལ་པ་ཁྱད་པར་ཅན་ལ་བརྟེན་ནས། ལམ་དང་འབྲས་བུའི་སྐུ་གསུམ་ལ་གཞིའི་ཆོས་གསུམ་གྱི་མིང་གིས་བཏགས་པ་དང༌། གཞིའི་ཆོས་གསུམ་ལ་སྐུ་གསུམ་གྱི་མིང་གིས་བཏགས་པ་མཛད་དེ། 
ཁུངས་དང་བཅས་པ་གཞན་དུ་རྒྱས་པར་བཤད་ཟིན་ཏོ། །དེ་ལྟར་ན་ད་ལྟ་སད་དུས་སུ་སྒྱུ་ལུས་སྒྲུབ་པ་བར་དོ་བཞིན་དུ་སྒྲུབ་པས། གནས་སྐབས་འདིར་ཡང་བར་དོའི་མིང་གིས་བཏགས་པ་ཞིག་མཛད་དོ། །དེ་བཞིན་དུ་གཉིད་ཀྱི་འོད་གསལ་གྱི་
མཇུག་ཏུ། རྨི་ལམ་གྱི་སྒྱུ་ལུས་བར་དོ་ཇི་བཞིན་དུ་སྒྲུབ་པ་ཞིག་ཡོད་པས། རྨི་ལམ་ལ་ཡང་བར་དོའི་མིང་གིས་བཏགས་ཤིང༌། གང་ཟག་ཁྱད་པར་ཅན་གྱིས་འཆི་བའི་འོད་གསལ་གྱི་མཐར། གཞན་ལ་བར་དོར་འོང་རྒྱུ་དེ་ལོངས་སྐུར་སྐྱེད་པ་ཅིག་
9-2-42b


ཡོད་པས། དེ་ལ་བསམས་ནས་བར་དོར་བཤད་དོ། །དེའི་ཕྱིར་བར་དོ་གསུམ་བཤད་པར་སྣང་ཡང་དེ་རྣམས་གང་གི་ཆེད་དུ་བཤད་པ་གོ་བ་ཤིན་ཏུ་ཉུང་བར་བྱུང་སྣང་སྟེ། གཞིའི་ཆོས་གསུམ་ལམ་གྱི་སྐུ་གསུམ་དུ་འཁྱེར་པའི་རྣམ་གཞག་གང་བྱུང་ཐམས་ཅད་
ད་གཟོད་ཀྱི་མཐར་འོང་བའི་སྐྱེ་ཤི་བར་དོ་གསུམ་དང་བསྲེ་བ་ཁོ་ན་ལ་འཇོག་པར་སྣང་བའི་ཕྱིར་རོ། །དེ་ལྟར་སད་དུས་ཀྱི་སྒྱུ་ལུས་དང༌། རྨི་ལམ་གྱི་སྒྱུ་ལུས་དང༌། བར་དོ་འོང་བའི་དོད་ལ་སྒྲུབ་པའི་སྒྱུ་ལུས་གསུམ། གཞིའི་བར་དོ་ཇི་བཞིན་དུ་སྒྲུབ་ཤེས་ན། སད་
དུས་སུ་གཏུམ་མོ་བསྒོམས་པས་སྲོག་དབུ་མར་ཞུགས་གནས་ཐིམ་གསུམ་བྱུང་བའི་སྟོབས་ཀྱིས། སྟོང་པ་བཞིའམ་དགའ་བ་བཞིའི་རིམ་གྱིས་འོད་གསལ་མངོན་དུ་བྱེད་པ་དེ། འཆི་བའི་དུས་སུ་རླུང་སེམས་རིམ་གྱིས་དབུ་མར་ཞུགས་ནས། འཆི་བའི་
འོད་གསལ་མངོན་དུ་བྱེད་པ་ཇི་བཞིན་དུ། སད་དུས་ཀྱི་འོད་གསལ་དང༌། གཉིད་དུས་ཀྱི་འོད་གསལ་དང༌། འཆི་བའི་འོད་གསལ་བསྒོམ་ཚུལ་གསུམ་ག་ཡང༌། གཞིའི་འཆི་རིམ་ལ་རླུང་སེམས་དབུ་མར་སྡུད་པའི་རིམ་པས། སྟོང་པ་བཞི་འཆར་བ་ཇི་བཞིན་
དུ་བྱ་དགོས་པར་ཤེས་དགོས་སོ། །དེ་འདྲ་བའི་སུམ་ཚན་གསུམ་པོ་དེ་ཤེས་ན། སད་དུས་ཀྱི་ཕྲ་བའི་སྒྱུ་ལུས་ཀྱི་མཐར་རགས་པའི་སྤྲུལ་སྐུའི་ལུས་འཛིན་པ་དང༌། རྨི་ལམ་གྱི་མཐའ་སད་ལ་ཁད་པའི་དུས་སུ། ཕྲ་བའི་ལོངས་སྐུ་དེས་རགས་པའི་སྤྲུལ་
སྐུའི་ལུས་འཛིན་པ་དང༌། ཤི་བའི་འོད་གསལ་གྱི་མཐར་བར་དོའི་དོད་ལ་ལོངས་སྐུར་ལངས་པ་དེས། རགས་པའི་སྤྲུལ་སྐུའི་ལུས་འཛིན་པ་ཞིག་ཀྱང་ཤེས་དགོས་མོད་ཀྱང་དེ་དག་ལ་ཇི་ལྟར་ཡིན་གྱི་ཐེ་ཚོམ་ཡང་སྐྱེ་དཀའ་བར་བྱུང་སྣང་བར་ཤེས་ནས། ལེགས་
9-2-43a


པར་རྩད་གཅད་པར་བྱའོ། །དེ་ལྟར་རྟོགས་ན་འཆི་བ་ཆོས་སྐུ་དང༌། བར་དོ་ལོངས་སྐུ་དང༌། སྐྱེ་བ་སྤྲུལ་སྐུའི་བསྲེ་བ་གསུམ་པོ་རེ་རེ་ལ་བསྲེ་བ་གསུམ་གསུམ་དུ་འགྱུར་བས། བསྡུ་ན་བསྲེ་བ་གསུམ་དང༌། ཕྱེ་ན་དགུར་འགྱུར་བའི་བསྲེ་བའི་
ཚུལ་བླ་ན་མེད་པ་རྣམས་ཤེས་པར་འགྱུར་རོ། །དེ་ལྟ་མིན་པར་ཁ་ཅིག་འདོད་ཆགས་དབང་གསུམ་དང་བསྲེ། གཏི་མུག་འོད་གསལ་དང་བསྲེ། ཞེ་སྡང་སྒྱུ་ལུས་དང་བསྲེ་བའི་བསྲེ་བ་གསུམ་བྱེད་པ་ནི། དབང་གསུམ་པ་དངོས་དབང་དུ་བསྐུར་བ་ལ་
བརྟེན་ནས། འོད་ཆགས་ལམ་དུ་བྱེད་པ་ཞིག་ཡོད་ཀྱང༌། འདིར་སྔོན་དུ་འགྲོ་བའི་དབང་དང༌། དེའི་རྗེས་སུ་ལམ་རིམ་པ་གཉིས་ལས་བསྐྱེད་རིམ་ལ་སློབ་པའི་དུས་ཀྱི། བསྲེ་བ་ངོས་འཛིན་པ་མིན་གྱི། རྫོགས་རིམ་གྱི་སྟེང་ནས་བསྲེ་བ་དུ་བྱེད་སྟོན་པས། 
འདོད་ཆགས་དབང་དང་བསྲེ་བ་འདིར་སྟོན་པ་ནི་སྐབས་དང་མ་འབྲེལ་ལོ། །བར་དོའི་ཕྱོགས་གཅིག་མངལ་དུ་སྐྱེ་བའི་བར་དོས་ལུས་ལེན་པ་ན། འདོད་ཆགས་དང་ཞེ་སྡང་གི་སེམས་གང་རུང་ཞིག་མངོན་དུ་འགྱུར་བར་གསུངས་པའི་གདམས་ངག་
ལ་བསམས་ནས། སྒྱུ་ལུས་ཞེ་སྡང་དང་བསྲེ་ཟེར་བ་མ་གཏོགས་པ་གཞན་མེད་ལ། དེ་ལྟ་ན་ཤིན་ཏུ་གལ་ཆེ་བའི་སད་དུས་ཀྱི་སྒྱུ་ལུས་དང༌། རྨི་ལམ་གྱི་སྒྱུ་ལུས་དང་བསྲེ་བ་བོར་ན། སྒྱུ་ལུས་ཀྱི་བསྲེ་བ་དངོས་སྟོན་ནས་འགྲོ་བ་དང༌། ཡང་གལ་
ཆེ་བ་ཞི་བའི་འོད་གསལ་གྱི་མཐར་བར་དོ་ཇི་བཞིན་དུ་སྒྱུ་ལུས་སྒྲུབ་པའི་བསྲེ་བ་ཡང་སྟོར་བར་འགྱུར་བ་དང༌། མངལ་སྐྱེས་སྐྱེ་བ་ལེན་ཁར་ཡང༌། འདོད་ཆགས་ཀྱི་སེམས་ཀྱིས་ཀྱང་མཚམས་སྦྱོར་བར་གསུངས་པས། སྒྱུ་ལུས་དང་འདོད་
9-2-43b


ཆགས་བསྲེ་ཞེས་ཀྱང་བྱ་དགོས་པར་འགྱུར་པས། རྣམ་གཞག་དེ་རྣམས་མི་ལེགས་སོ། །ཡང་ཁ་ཅིག །སྐྱེ་ཤི་བར་དོ་ལ་འདོད་ཆགས་ཤས་ཆེ་བས་འདོད་ཆགས་དང་བསྲེ་བ་ཡིན། རྨི་ལམ་བར་དོ་ལ་གཏི་མུག་དང་བསྲེ་བ་ཡིན། སྲིད་པ་བར་དོ་
ལ་ཞེ་སྡང་ཤས་ཆེ་བས་ཞེ་སྡང་དང་བསྲེ་བ་ཡིན། ཞེས་ཟེར་བ་ཡང་མི་འཐད་པ་སྔ་མས་རྟོགས་པར་ནུས་ལ། ཁྱད་པར་དུ། གཉིད་དང་རྨི་ལམ་པར་ཤེད་ན། །གཏི་མུག་ཆོས་སྐུའི་ངོ་བོ་ཅན། །ཞེས་གཉིད་དུ་ནི་སོང༌། རྨི་ལམ་མ་ཤར་བའི་བར་དོར། གཉིད་ཀྱི་
འོད་གསལ་འཛིན་པར་བཤད་པའི་ལུང་ཚད་མར་ཁས་བླངས་ནས། ཡང་རྨི་ལམ་གྱི་དུས་སུ་གཏི་མུག་དང་འོད་གསལ་བསྲེ་བར་འདོད་པ་ནང་འགལ་ལོ། །ཡང་མར་པས་མཛད་ཟེར་བ་ཞིག་ཏུ། འདོད་ཆགས་དང་ཟག་མེད་དུ་བསྲེ་བ། ཞེ་སྡང་དང་སྒྱུ་ལུས་སུ་
བསྲེ་བ། གཏི་མུག་དང་འོད་གསལ་དུ་བསྲེ་བ་འབྱུང་ཡང༌། སྔ་མ་གཉིས་ལ་ཡིད་བརྟན་མི་སྣང་ངོ༌། །ཡང་བླ་མ་ཁ་ཅིག་སྐྱེ་ཤི་བར་དོ་ལ་རིམ་གཉིས་སྒོམ་པའི་བསྲེ་བ་སྐོར་གཅིག །དེ་འབྱོངས་པ་དང་རྨི་ལམ་བར་དོ་ལ་གཏི་མུག་དང་འོད་གསལ་བསྲེས་ནས། རིམ་
གཉིས་སྒོམ་པའི་བསྲེ་བ་སྐོར་གཉིས། དེ་འབྱོངས་པ་དང་སྲིད་པ་བར་དོ་ལ་ཞེ་སྡང་དང་ཆོས་ཉིད་དུ་བསྲེས་ནས། རིམ་གཉིས་སྒོམ་པའི་བསྲེ་བ་སྐོར་གསུམ་མོ། །ཞེས་ཟེར་བ་ལ་ཡང་སྙིང་པོ་ཡོད་པར་མ་མཐོང་ངོ་། །འདིར་བར་དོ་གསུམ་གྱི་ལུས་གསུམ་
ལ་སོགས་པའི་བར་དོའི་རྣམ་གཞག་བཅོ་ལྔ་བྱེད་པར་སྣང་ཡང་ཤིན་ཏུ་རྟོགས་སླ་བས་མ་བྲིས་སོ། །གཉིས་པ་ཉམས་སུ་ལེན་པའི་རིམ་པ་ལ་གཉིས། བར་དོ་འཛིན་པ་པོའི་གང་ཟག་གི་དབྱེ་བ་དང༌། དེ་རྣམས་ཀྱིས་ཇི་ལྟར་འཛིན་པའི་ཚུལ། དང་པོ་ནི། 
9-2-44a


བར་དོ་འཛིན་པ་འདི་ལ་གང་ཟག་རྣམ་པ་གསུམ་ཡོད་དེ། རབ་ནི་ཞལ་ལུང་དང་སྤྱོད་བསྡུས་དང་སྒྲོན་གསལ་ལས་གསུངས་པ་ལྟར། འཆི་བའི་མཐའ་བར་དོ་འོང་བའི་དོད་ལ་སྒྱུ་མའི་ལོངས་སྐུ་གྲུབ་ནས། རྟེན་དེ་ལ་
འཚང་རྒྱ་བ་ཅིག་སྟེ། འདི་ལ་བོད་ཀྱི་མཁས་པ་སྔ་མ་རྣམས་ལེ་ལོ་ཅན་བར་དོར་འཚང་རྒྱ་བ་ཞེས་པའི་ཐ་སྙད་མཛད་དེ། ལེ་ལོ་མེད་ཀྱང་ཚེ་འདིར་སྤྱོད་པ་བྱེད་པའི་ཡོ་བྱད་མ་ཚང་བ་བར་དོར་འཚང་རྒྱ་བ་ཞིག་ཀྱང་ཡོད་པས། མིང་དེ་ནི་ཕྱོགས་གཅིག་
གིས་བཏགས་པའོ། །འདི་ལ་ཚེ་འདིར་ལམ་གྱི་རྟོགས་པ་ཇི་ཙམ་ཞིག་ཐོབ་པ་དགོས་སྙམ་ན། རིམ་པ་དང་པོའི་རྟོགས་པ་མཐར་ཕྱུང༌། དེ་ནས་སྲོག་དྷཱུ་ཏཱིར་ཞུགས་གནས་ཐིམ་གསུམ་བྱས་པ་ལ་བརྟེན་ནས་དགའ་བ་བཞི་དང༌། སྟོང་པ་བཞིའི་
ཡེ་ཤེས་རིམ་གྱིས་བསྐྱེད་དེ་སྒྱུ་མའི་སྐུ་དངོས་གྲུབ་པ་ལ་ཉེ་བ་ཞིག་དགོས་སོ། །འབྲིང་ནི་སྲོག་དྷཱུ་ཏཱིར་ཚུད་ནས་ཐིམ་པ་ལས་བྱུང་བའི་སྟོང་པ་བཞི་སྐྱེད་པ་བྱང་བ་ཞིག་ཡིན་ལ། དེ་ལྟར་ནུས་པའི་སྟེང་ནས་གཉིད་ཀྱི་སྟོང་པ་དང་བསྲེ་ནུས་ན་ནི། ཤིན་
ཏུ་བསྔགས་ཏེ། གཉིད་ཀྱི་སྟོང་པ་དང་བསྲེ་བ་ནི། རླུང་སྟོབས་ཀྱིས་འཆི་བའི་སྟོང་པ་དང་བསྲེ་བའི་ཚད་འཛིན་ལྟ་བུ་ཡིན་པའི་ཕྱིར་རོ། །དེ་ལ་ནི་གཉིད་འཐུག་གི་སྐབས་སུ་ཡང་དེའི་སྟོང་པ་དང་བསྲེ་ནུས་ན་ལེགས་པར་མངོན་ནོ། །ཐ་མ་ནི། དབང་རྫོགས་
པར་ཐོབ་ཅིང་དམ་ཚིག་དང་སྡོམ་པ་སྲུང་བ། རིམ་པ་དང་པོའི་རྣལ་འབྱོར་ལ་བརྩོན་ཞིང༌། རྫོགས་རིམ་བསྒོམ་པ་ཞིག་གིས། འཆི་བའི་དུས་སུ་ས་ཆུ་ལ་ཐིམ་པའི་རྟགས་ནས་འཆི་བའི་འོད་གསལ། དངོས་གཞི་འཆར་བའི་རིམ་པ་དང༌། དེ་ལས་
9-2-44b


ལངས་མ་ཐག་ཏུ་བར་དོ་འགྲུབ་པའི་རིམ་པ་ལེགས་པར་ཤེས་ནས། ད་ལྟ་ནས་དེའི་གདམས་ངག་རྣམས་མང་དུ་སྐྱོང་བ་ཡིན་ཏེ། འདི་ནི་རྨི་ལམ་འདུན་པས་འཛིན་པ་དང་འདྲ་སྟེ། འཆི་བའི་འོད་གསལ་རླུང་སྟོབས་ཀྱིས་མི་ཟིན་ཀྱང༌། དེའི་གདམས་ངག་
ལ་གོམས་པའི་སྟོབས་ཀྱིས་འཇུག་པའི་ཕྱིར་རོ། །དེ་རྣམས་མིན་པའི་ཚེ་འདིར་སེམས་གནས་བརྟན་པའི་གོམས་པ་ཆེ་བས་ཀྱང་འཆི་བ་ལ་ཉེ་བའི་ཚེ་ཏིང་ངེ་འཛིན་དེ་ཡིད་ལ་བྱས་ན། དེའི་རྒྱུན་འབྱུང་བར་མངོན་ཏེ། ཚེ་འདིར་གང་ལ་གོམས་ཆ་ཆེ་བའི་
དགེ་བའི་སེམས་དྲན་ན། འཆི་སྲིད་ཀྱི་སྔ་ལོགས་བར་དུ་འཇུག་པར་གསུངས་པའི་ཕྱིར་རོ། །འོན་ཀྱང་འདི་ནི་ཏིང་ངེ་འཛིན་ཐུན་མོང་བ་ཡིན་ནོ། །གཉིས་པ་དེ་རྣམས་ཀྱིས་ཇི་ལྟར་འཛིན་པའི་ཚུལ་ནི། གང་ཟག་རབ་བར་དོར་འཚང་རྒྱ་བ་ཞེས་པ་ནི། ཚེ་འདིར་འཚང་
རྒྱ་མི་ནུས་པ་ཞིག་ཡིན་ནོ། །འདི་ལ་འཆི་བའི་འོད་གསལ་ཟིན་ན་དུས་དེར་འཚང་རྒྱ་བར་འདོད་ཅིང༌། དེ་ཡང་བར་དོ་དང་པོར་སངས་རྒྱས་པ་ཞེས་ཟེར་བ་ནི། ཤིན་ཏུ་མི་རིགས་ཏེ། འཆི་སྲིད་མ་འགགས་པར་བར་དོ་གྲུབ་པ་གཞུང་ཚད་ལྡན་རྣམས་དང་འགལ་བའི་
ཕྱིར་དང༌། འཆི་སྲིད་ཚེ་འདི་དང་བར་དོ་གཉིས་ཀྱི་ནང་ནས། ཚེ་འདི་ཉིད་དུ་གཞག་དགོས་པའི་ཕྱིར་དང༌། དེར་འཆི་བའི་འོད་གསལ་ཟིན་ན་སྐབས་དེར་སངས་རྒྱས་པ་གཞུང་ཚད་ལྡན་གང་ནས་ཀྱང་མ་བཤད་ཅིང༌། མི་འཐད་པའི་ཕྱིར་རོ། །འདི་ལྟར་འབྲས་བུའི་
ཆོས་སྐུ་སྔར་མ་ཐོབ་གསར་དུ་ཐོབ་པའི་དངོས་ཀྱི་རྟེན་ཡིན་ན། རོ་ཐ་མལ་པར་འགྲོ་བ་འགལ་བའི་ཕྱིར་དང་། རྟེན་དེ་ལ་སློབ་མི་སློབ་ཀྱི་མཚན་དཔེ་གང་ཡང་མེད་པའི་ཕྱིར་རོ། །དེས་ན་དེར་འཆི་བ་ཆོས་སྐུ་དང་བསྲེ་ཞེས་པ་ནི། འདྲ་བ་ཙམ་ལ་ཆོས་སྐུར་བཏགས་པ་
9-2-45a


ཡིན་གྱི། ཆོས་སྐུ་དངོས་མ་ཡིན་པའི་ཕྱིར་རོ། །དེ་བཞིན་དུ་ཤི་བའི་འོད་གསལ་གྱི་མཐར་བར་དོ་མཚན་ཉིད་པའི་ལུས་ལེན་དགོས་ན། བར་དོ་ཟིན་ནས་ལམ་སྦྱངས་ཀྱང་རྟེན་དེ་ཉིད་ལ་མཆོག་མི་འགྲུབ་པས། གང་ཟག་དང་པོ་ལ་གཞན་
ལ་བར་དོ་འོང་བའི་དོད་ལ། ཁོང་ལ་རླུང་སེམས་ལས་ལམ་གྱི་ལོངས་སྐུ་འགྲུབ་པ་བཞི་དགོས་པ་ཡིན་ཏེ། འདི་དག་གི་སྒྲུབ་བྱེད་རྣམས་ཀྱང་གཞན་དུ་བཤད་ཟིན་ཏོ། །གང་ཟག་ཕྱི་མ་གཉིས་ཀྱིས་ནི་འཆི་བ་ལ་ཉེ་བའི་སྔོན་རིག་པ་གསལ་བ་ན། ཟང་ཟིང་ཡོངས་
སུ་བཟུང་བ་ཐམས་ཅད་བསོད་ནམས་ཀྱི་ཞིང་གི་ཕྱོགས་སུ་ལྟོས་པ་མེད་པར་བློས་ལིངས་ཀྱིས་བཏང་ལ། ཅི་ལ་ཡང་ཆགས་པ་མེད་པར་བྱ། ཁས་བླངས་པའི་སྡོམ་པ་དང་འགལ་བའི་ཉེས་ལྟུང་རྣམས་ལ་བཤགས་བསྡམས་དང༌། དམ་ཚིག་ཉམས་
ཆགས་སོར་གཞུག་ལ་ད་ནི་ཤི་ནའང་ཤི་མོད་སྙམ་དུ་ཡིད་ལ་གཅགས་པ་མེད་པར་བྱ། འཆི་བ་དང་བར་དོའི་གདམས་ངག་གོམས་པ་རྣམས་ལ། དེ་གཉིས་དགེ་སྦྱོར་གྱི་གསལ་འདེབས་སུ་འགྲོ་བའི་ཚུལ་དྲན་པར་བྱས་ཏེ། འཆི་བ་ལ་བུ་ཕ་ཁྱིམ་དུ་འགྲོ་བ་
ལྟར་དགའ་བར་བྱ། དེ་ནས་རང་ལྷར་གསལ་འདེབས་པ་དང༌། མདུན་དུ་བླ་མ་དང་ཡི་དམ་གྱི་ལྷ་ཚོགས་བསྒོམས་ནས་མཆོད་དེ། འཆི་བ་འོད་གསལ་དང་བསྲེ་ནུས་པ་དང༌། བར་དོ་སྒྱུ་ལུས་དང་བསྲེ་ནུས་པའི་གསོལ་བ་དྲག་པོ་མང་དུ་གདབ་བོ། །གང་ཟག་
གཉིས་པས་ནི་འཆི་བའི་དུས་སུ་འབྱུང་བའི་འཆི་རྟགས་རྣམས་མ་ཤར་བའི་སྔོན་ནས་ཀྱང༌། སྔར་སྲོག་དྷཱུ་ཏཱིར་སྡུད་པའི་ཐབས་གང་གོམས་ཆ་ཆེ་བ་ཞིག་ཡང་དང་ཡང་དུ་སྦྱངས་ལ། སྟོང་པ་བཞི་འདྲེན་པ་དང༌། དེའི་མཐར་ལྷ་སྐུར་ལྡང་ལུགས་ཁྱད་པར་
9-2-45b


ཅན་དང༌། གཉིད་ཀྱི་སྟོང་པ་རྣམས་འཛིན་པ་དང༌། རྨི་ལམ་གྱི་ལུས་སྒྱུ་ལུས་སུ་ལྡང་ལུགས་ཁྱད་པར་ཅན་རྣམས་བྱ་ཞིང༌། སྔར་བཞིན་འཕེན་པ་ཡང་ཡང་བཏང་སྟེ། འདི་ནི་སྔ་མོ་ནས་ཀྱང་མང་དུ་སྦྱང་དགོས་སོ། །དེ་ནས་འཆི་རྟགས་སོགས་བརྟག་
པ་ནི་རིགས་པ་ཉི་ཤུ་འོད་གསལ་དུ་འཇུག་པའི་རྟགས་རྣམས་ནི་རྣམ་གཞག་ལས་འབྱུང་བ་བཞིན་དུ་ཤེས་པར་བྱ། མདོར་བསྡུས་པའི་རྟགས་ནི་ས་ཆུ་ལ་ཐིམ་པ་ན་ཕྱི་རྟགས་ལུས་བསྒུལ་བསྐྱོད་མི་ནུས་ཤིང༌། ཟུངས་མི་ཐུབ་པར་ལྷོད་ལྷོད་པར་འགྲོ། 
ལུས་ས་ལ་བྱིང་བ་སྙམ་བྱེད་ཅིང་ང་ཐེན་ཟེར་བ་འབྱུང༌། ནང་རྟགས་ནི་སྨིག་རྒྱུ་ལྟ་བུའི་ཉམས་འབྱུང༌། ཆུ་མེ་ལ་ཐིམ་པའི་ཕྱི་རྟགས་ནི་ཁ་སྣའི་ཆུ་སྐམས་ཤིང་ལྕེ་ཐུང་དུ་འགྲོ། ནང་རྟགས་དུ་བ་ལྟ་བུ་འབྱུང༌། མེ་རླུང་ལ་ཐིམ་པའི་ཕྱི་རྟགས་ནི་དྲོད་ཆུང་དུ་འགྲོ་ཞིང་། 
ལུས་ཀྱི་དྲོད་མཐའ་ནས་སྡུད། ནང་རྟགས་སྲིན་བུ་མེ་ཁྱེར་ལྟ་བུ་འབྱུང༌། ཀུན་རྟོག་གི་རླུང་སེམས་ལ་ཐིམ་པའི་ཕྱི་རྟགས་ནི། དབུགས་ཕྱིར་རིང་དུ་རྒྱུ་ཞིང་ནང་དུ་སྡུད་མི་ཤེས། ཅུང་ཟད་སྡུད་ཀྱང་ཐུང་ལ་རྩུབ་པར་སྡུད། ནང་རྟགས་མར་མེ་རླུང་གིས་མ་བསྐྱོད་
པ་ལྟ་བུ་འབྱུང༌། དེ་ནས་སྟོང་པ་ཞེས་པ་སྣང་བ་དང་པོ་འཆར་ཏེ། ནམ་མཁའ་སྤྲིན་མེད་པ་ལ་ཟླ་འོད་ཤར་བ་ལྟ་བུ་འབྱུང༌། དེ་ནས་སྣང་བ་དེ་བསྡུས་པའི་རྗེས་སུ་ཤིན་ཏུ་སྟོང་པ་ཞེས་པ་སྣང་བ་མཆེད་པ་འཆར་ཏེ། ནམ་མཁའ་གཡའ་དག་ལ་ཉི་འོད་ཤར་
བ་བཞིན་དུ་དམར་པོའམ་དམར་སེར་གྱི་སྣང་བ་འཆར། དེ་ནས་སྣང་བ་དེ་ཡང་བསྡུས་པའི་རྗེས་སུ་སྟོང་ཆེན་ཞེས་པ་སྣང་བ་ཉེར་ཐོབ་འཆར་ཏེ། ནམ་མཁའ་གཡའ་དག་ལ་མཚམས་ཀྱི་སྨག་གིས་ཁྱབ་པ་བཞིན་དུ། ནག་ལམ་པ་འབྱུང་ཞིང་དྲན་པ་ཡང་ཉམས་
9-2-46a


ནས་འགྲོ། དེ་ནས་ནག་ཐོམ་གྱིས་སོང་བའི་དྲན་མེད་དེ་སངས་པ་ན་ཐམས་ཅད་སྟོང་པ་ཞེས་པ་འོད་གསལ་འཆར་ཏེ། ནམ་མཁའ་སློད་བྱེད་ཀྱི་ཟླ་ཉིའི་འོད་དང༌། ནག་པོའི་རྣམ་པ་ཅན་དང་བྲལ་བའི་ཐོ་རངས་ཀྱི་ནམ་མཁའ་གཡའ་དག་ལྟ་
བུ་ཞིག་འཆར་ཏེ་འོད་གསལ་དངོས་གཞིའོ། །འདིར་སྟོང་པ་གསུམ་དང་འོད་གསལ་ལ་རིམ་པ་བཞིན་དུ། ཕྱི་རྟགས་དུ་བ་དང་སྲིན་བུ་མེ་ཁྱེར་དང་མར་མེ་དང༌། ནམ་མཁའ་སྤྲིན་མེད་དང༌། ནང་རྟགས་དཀར་པོ་དང་དམར་པོ་དང་ནག་པོ་དང་སྐྱ་རེངས་ཤར་བ་ལྟ་
བུ་གཉིས་བྱེད་པ་དང༌། མི་བྱེད་པ་གཉིས་སྣང་ཡང་ཕྱི་མ་ལེགས་ཏེ། དུ་བ་སོགས་ནི་སྟོང་པ་བཞིའི་སྔོན་ཉིད་དུ་འོང་བར་གཞུང་ཁུངས་ཐུབ་དུ་མ་ལས་གསུངས་ཤིང༌། སྟོང་པ་བཞི་ག་ཡང་དཀར་པོ་སོགས་ཀྱི་རྣམ་པ་ཅན་དུ་འཆར་བ་མ་གཏོགས་པ། 
སྤྲིན་མེད་པའི་ནམ་མཁའ་ལྟ་བུར་སྣང་བ་ལ་འདྲ་བ་ཡིན་ནོ། །འཆི་བའི་འོད་གསལ་གྱི་དུས་འདི་ནི། སྣང་བ་གསུམ་རིམ་གྱིས་ཐིམ་ནས་རླུང་རྣམས་སྙིང་ཁའི་མི་ཤིགས་པ་ལ་ཐིམ་པ་དང༌། སྤྱི་བོའི་ཐིག་ལེ་དཀར་པོ་མར་ལ་བབ། ལྟེ་བའི་དམར་པོ་ཡར་
འོངས་ཏེ་སྙིང་ཁར་འདུ་འཕྲོད་བྱས་པའི་སྐབས་ཡིན་ནོ། །ཁམས་དྲུག་ལྡན་མིན་པའི་སེམས་ཅན་གཞན་འཆི་བ་ལ་ཡང༌། སྔར་བཤད་པའི་འོད་གསལ་ཁྱེམས་པ་ཅིག་འཆར་མོད་ཀྱང་ངོས་མི་ཟིན་ནོ། །འབྱུང་བ་ཐིམ་པའི་རྟགས་དེ་རྣམས་ནི་སྔ་
ཚད་ནས་ཀྱང་འོང་བས། ལེགས་པར་ཤེས་པར་བྱས་ལ། རྟགས་དང་པོ་བྱུང་བ་ནས་སྲོག་དྷཱུ་ཏཱིར་སྡུད་པའི་ཐབས་གང་གོམས་ཆ་ཆེ་བ་གཅིག་ལ་སྦྱང་ཞིང༌། རྟགས་བཞི་ཤར་བ་ན་རྟགས་དེ་དང་དེ་ཡིན་ནོ་སྙམ་དུ་ངེས་པར་བྱས་ལ་ལྟ་བ་དྲན་པར་བྱ། 
9-2-46b


ལྷག་མ་རྣམས་ཀྱི་འཆར་རིམ་རྣམས་དགེ་སྦྱོར་དང་བསྲེ་བའི་འཕེན་པ་བཏང༌། དེ་ནས་སྟོང་པ་དང་པོ་ཤར་བ་ན་ངོས་ཟིན་པར་བྱ་ཞིང་ལྟ་ཐོག་ཏུ་བཞག་སྟེ། སྟོང་པ་གཉིས་པ་དང་ཉེར་ཐོབ་དྲན་ཐུབ་པ་རྣམས་ལའང་དེ་ལྟར་བྱ། འོད་གསལ་ཤར་བ་ན་ལྟ་
ཐོག་ཏུ་བཞག་ལ་མཉམ་པར་འཇོག་ཅི་ཐུབ་བྱ། འཆི་བའི་འོད་གསལ་གྱི་དུས་སུ་རླུང་སེམས་དབུ་མར་སྡུད་པས། རླུང་སྙིང་གར་ཐིམ་པ་ན། གཉིས་སྣང་གི་སྤྲོས་པ་རགས་པ་རྣམས་ཞི་བ་ནམ་མཁའ་སྤྲིན་མེད་ལྟ་བུར་འཆར་ཞིང༌། དེ་ངོས་ཟིན་ནས་
དེ་ལ་མཉམ་པར་འཇོག་ཐུབ་ཀྱང༌། སྔོན་དབུ་མའི་ལྟ་བ་གཏན་ལ་ཕབ་ནས་སྒོམ་སྒོམ་པ་ཅིག་གིས། ལྟ་ཐོག་ཏུ་བཞག་ནས་སྐྱོང་རྒྱུ་མེད་ན། གནས་ལུགས་རྟོགས་པར་མི་འགྲོ་བས། སྔར་ཚེ་འདིར་ལྟ་བ་གཏན་ལ་ཕེབ་པ་ཅིག་དང༌། བདེ་སྟོང་སྦྱོར་
གྱིན་བསྒོམས་པའི་བུའི་འོད་གསལ་ལམ་གྱི་འོད་གསལ་ལ་གོམས་པ་དགོས་སོ། །རྗེ་བཙུན་མིད་ལས་ཀྱང༌། འཆི་བའི་འོད་གསལ་ཆོས་ཀྱི་སྐུ་ཡིན་ཏེ། དེ་ཡིན་པ་ལ་ཡིན་པར་ངོ་ཤེས་དགོས། དེ་ངོ་ཤེས་པར་བྱེད་པ་ལ་དེ་ལྟར་བླ་མ་དམ་པས་ངོ་
སྤྲད་པ། གནས་ལུགས་ལྟ་བའི་དོན་གོ་བ་དང༌། མཚོན་བྱེད་ལམ་གྱི་འོད་གསལ་སྦྱང་འཚལ་ལོ། །ཞེས་གསུངས་སོ། །གཞིའི་འཆི་བའི་འོད་གསལ་ནི་མའི་འོད་གསལ་ཡིན་པས་འོད་གསལ་མ་བུ་གཉིས་བསྲེ་ཐུབ་པ་ལ། ད་ལྟ་སད་དུས་སུ་སྲོག་དབུ་མར་ཞུགས་
གནས་ཐིམ་གསུམ་བྱས་པ་ལས། སྟོང་པ་བཞི་དང་ཁྱད་པར་དུ་ཐམས་ཅད་སྟོང་པ་ལ་གོམས་པ་དང༌། གཉིད་དུས་སུ་གཉིད་ཇི་ལྟར་འཐུག་ཀྱང་འོད་གསལ་དང་བསྲེ་ཐུབ་ན། རླུང་སྟོབས་ཀྱིས་ད་གཟོད་འཆི་བའི་འོད་གསལ་མ་བུ་བསྲེ་ནུས། འཆི་བའི་འོད་
9-2-47a


གསལ་ལ་དེར་ངོ་ཤེས་ནས་བསྲེ་ནུས་ན། དེའི་ཕྱི་ལོགས་སུ་བར་དོ་འཆར་བ་ངོ་ཤེས་པས། བར་དོ་ཟིན་པའི་ཐབས་དམ་པ་ནི། འཆི་བའི་འོད་གསལ་ངོས་ཟིན་ནས་བསྲེ་ནུས་པ་ཡིན་གྱི། དེ་ལས་གཞན་མེད་དོ། །དེ་ལས་གཞན་ད་
ལྟ་ང་ཤི་བར་འདུག །སྣང་བ་འདི་བར་དོ་ཡིན་པར་འདུག་སྙམ་པ་སོགས་ལ་རྒྱུན་ལྡན་དུ་སྦྱངས་ན། བར་དོ་ཟིན་པ་ཙམ་སྲིད་དུ་ཆུག་ཀྱང་སྟོབས་ཆུང༌། དེ་བཞིན་དུ་འཆི་རིམ་རྣམས་འབྱུང་འགྱུར་ལའང་དེ་བཞིན་དུ་སྦྱངས་ན། འཆི་རིམ་གྱི་སྟོང་
པའི་སྐབས་སུ་ཏིང་ངེ་འཛིན་རྒྱུན་རིང་བ་ཙམ་བྱུང་ཡང་། ཚེ་འདིར་རླུང་སྟོབས་ཀྱིས་འཆི་བའི་འོད་གསལ་ཟིན་པ་མིན་པས། རྣལ་འབྱོར་བླ་མེད་ཀྱི་ལམ་ཐུན་མོང་མ་ཡིན་པར་བཞག་པར་དཀའོ། །དེས་ན་དེ་དག་ལ་དོན་གཉེར་ཆེན། རྩ་བ་བོར་ནས་
ཡལ་ག་མ་བཙལ་བར། སླར་ཡང་གཏུམ་མོའི་རྣལ་འབྱོར་སྔར་བཤད་པ་སོགས་སྲོག་དྷཱུ་ཏཱིར་འཇུག་པའི་ཐབས་རྣམ་དག་རྣམས་ལ། སྙིང་རུས་བསྐྱེད་ནས་སང་དུས་སུ། སྲོག་དྷཱུ་ཏཱིར་ཞུགས་གནས་ཐིམ་གསུམ་བྱས་པ་ལས་སྟོང་པ་བཞི་སྐྱེད་པ་
དང༌། དེ་རྙེད་ན་གཉིད་ཀྱི་འོད་གསལ་རླུང་སྟོབས་ཀྱིས་ཟིན་པར་བྱ། དེ་ནས་སད་དུས་ཀྱི་འོད་གསལ་གྱི་མཐའ་དང༌། གཉིད་དུས་ཀྱི་འོད་གསལ་གྱི་མཐར་སྒྱུ་ལུས་སུ་ལྡང་ལུགས་ཁྱད་པར་ཅན་ཤེས་པར་བྱས་ནས་ལྡང་བ་བྱུང་ན། ད་གཟོད་འཆི་བའི་འོད་
གསལ་དང་བར་དོ་ཟིན་ལུགས་ལ། སྔོན་མེད་པའི་ངོ་མཚར་བའི་ངེས་པར་རྙེད་པར་འགྱུར་པས། གཏུམ་མོ་ལམ་གྱི་རྨང་རྡོ་ཡིན་ཟེར་བ་དྲན་པར་གྱིས་ཤིག །འཆི་བའི་འོད་གསལ་ཟིན་ནས་བཟུང་བ་དེ་འོད་གསལ་ལས་ལྡང་བར་རྩོམ་པ་ན། སྔར་
9-2-47b


གྱི་གོམས་པ་དང་འཕན་པའི་གནད་ཀྱིས། མོས་པ་ཡིད་བྱེད་ཀྱི་སྒོ་ནས་བར་དོ་སྒྱུ་མ་ལྟ་བུའི་ལྷ་སྐུར་ལྡང་བའི་ཐབས་བྱའོ། །དེ་ལྟར་བར་དོ་ཟིན་བྱུང་ན་བར་དོའི་ལུས་མཚན་ཉིད་པ་ལེན་དགོས་པར་བྱུང་བ་འདིས། རྟེན་དེ་ལ་མཆོག་མི་འགྲུབ་ཀྱང༌། རང་ཉིད་
ཡི་དམ་གྱི་ལྷར་སྒོམ་པ་དང༌། དེ་ཁོ་ན་ཉིད་ཀྱི་ལྟ་བ་སྐྱོང་བ་དང༌། གང་སྣང་གི་སྣོད་བཅུད་ཐམས་ཅད་ལ་སྔར་སྣང་བ་སྒྱུ་མ་དང༌། རྨི་ལམ་སྒྱུ་མར་བཤད་པ་བཞིན་དུ་བསྒོམས་ན་ཁྱད་པར་ཆེ་བས་དེ་རྣམས་ཀྱི་གདམས་ངག་ནས་བར་དོའི་སྐབས་ཡིན་པར་བསམས་
ཀྱིན་བསྒོམ་པར་བྱའོ། །ཚེ་འདིར་ལམ་གོམས་པའི་རྣལ་འབྱོར་པ་དེ་མངལ་དུ་སྐྱེ་བར་མ་ངེས་པས། སྐྱེ་གནས་གཞན་གསུམ་དུ་ཡང་སྐྱེ་བ་འོང་བས། སྔར་བཞིན་གང་སྣང་ལྷ་དང༌། ལྷ་སྐུ་སྒྱུ་མ་དང༌། སྒྱུ་མ་རང་བཞིན་གྱིས་སྟོང་བཞིན་དུ་དེར་སྣང་བའི་
དོན་ལ་ངེས་པ་དྲངས་ནས། ལེགས་པར་བསྐྱངས་ན་ཕ་མ་བླ་མ་ཡབ་ཡུམ་དང༌། ཡི་དམ་ཡབ་ཡུམ་དུ་སྒོམ་པ་སོགས་ཀྱང་སྔ་མའི་ནང་དུ་ལྷག་དང་བཅས་པ་འོང་བར་སྣང་བས་དེ་བཞིན་དུ་བྱའོ། །ཡང་སྐྱེ་གནས་འདམ་པར་བྱ་ཞེས་པའི་སྤྱོད་ལུགས་བཞིན་
དུ། དག་པའི་ཞིང་ཁམས་སུ་སྐྱེ་བའི་འདུན་པ་སྦྱོང་བ་དང་། མར་ལུགས་ཀྱི་གདམས་ངག་གཞན་ནས་བར་དོ་ཟིན་ན། དེས་གནས་མཐོན་པོར་སྐྱེ་བའི་འདུན་པ་གཏད་ནས། འཕོ་བའི་གདམས་ངག་བྱ་བར་བཤད་པ་བཞིན་ཡང་སྦྱའོ། །གཉིས་པ་འོད་གསལ་
བསྒོམས་པའི་ཚུལ་ལ་གཉིས། སད་དུས་སུ་འོད་གསལ་བསྒོམ་ཚུལ་དང༌། གཉིད་དུས་སུ་འོད་གསལ་བསྒོམ་ཚུལ་ལོ། །དང་པོ་ནི། སྦྱོར་བ་འོད་གསལ་འདི་ལ་གཉིས་ལས་ཐུན་མོང་བའི་འོད་གསལ་ནི། གཞིའི་ཆོས་ཉིད་རྟག་ཆད་ཀྱི་མཐའ་དང་བྲལ་བ་ནི་ཡུལ་
9-2-48a


གྱི་འོད་གསལ་དང༌། དོན་དེ་ཇི་ལྟ་བ་བཞིན་དུ་རྟོགས་པ་ནི་ཡུལ་ཅན་གྱི་འོད་གསལ་ལོ། །དེ་ནི་ཐེག་པ་ཆེ་ཆུང་གཉིས་དང༌། སྔགས་དང་ཕར་ཕྱིན་གཉིས་དང༌། རྒྱུད་སྡེ་འོག་མ་གསུམ་དང༌། བླ་མེད་གཉིས་ཀའི་ཐུན་མོང་བ་སྟེ། སྤྱི་དོན་གྱི་འོད་
གསལ་ཞེས་ཀྱང་བྱའོ། །ཐུན་མོང་མ་ཡིན་པ་ནི་ཡུལ་གྱི་འོད་གསལ་དེ་ཁོ་ན་ཉིད་ལ་ཁྱད་པར་མེད་ཀྱང༌། ཡུལ་ཅན་ལྷན་སྐྱེས་ཀྱི་བདེ་བ་ཆེན་པོས་དེ་རྟོགས་པ་ནི། རྣལ་འབྱོར་བླ་མེད་ཉིད་ཀྱི་ཁྱད་ཆོས་ཡིན་པས། ཐུན་མོང་མ་ཡིན་པ་ཞེས་བྱའོ། །འདིའི་ཡང་
གཙོ་བོ་ནི་རླུང་དབུ་མར་ཞུགས་གནས་ཐིམ་གསུམ་བྱས་པ་ལས་འབྱུང་བའི་ལྷན་སྐྱེས་ཀྱི་རྫོགས་རིམ་པའི་བདེ་བ་དགོས་སོ། །དེ་ནས་ཁམས་བྱང་ཆུབ་ཀྱི་སེམས་ཞུ་བ་ལས་བྱུང་བ་མིན་པར་དྲན་ཤེས་ཀྱི་སེམས་བྱིང་རྒོད་དང་བྲལ་བའི་མི་རྟོག་པ་ཙམ་བསྐྱངས་
པས། རླུང་ཅུང་ཟད་ལས་སུ་རུང་བ་ལས་སྐྱེས་པའི་བདེ་གསལ་མི་རྟོག་པ་ཞེས་ཟེར་བའི་བདེ་བ་ཡང་མིན་ལ། ཞུ་བདེ་ཡིན་ཀྱང་བསྐྱེད་རིམ་ལ་སོགས་པའི་སྐབས་སུ་སྲོག་དྷཱུ་ཏཱིར་ཞུགས་པ་སོགས་ལས་མ་སྐྱེས་པའི་ཞུ་བདེ་ཡང་མིན་པས། བདེ་བའི་ཁྱད་པར་རྣམས་
ཞིབ་ཏུ་ཕྱེད་དགོས་སོ། །དེ་ཡང་སྔར་གཏུམ་མོའི་སྐབས་སུ་བཤད་པ་བཞིན་དུ། རྫོགས་རིམ་པའི་ལྷན་སྐྱེས་ཀྱི་བདེ་ཆེན། དེ་ཁོ་ན་ཉིད་ལེགས་པར་གཏན་ལ་ཕེབས་པའི་ལྟ་བ་དང་སྦྱར་བའི། བདེ་སྟོང་དབྱེར་མེད་ཀྱི་ཡེ་ཤེས་ལ་འོད་གསལ་དུ་བཞག་པའི་
ལམ་གྱི་འོད་གསལ་ནི། སྒྱུ་ལུས་ཀྱི་རྫོགས་རིམ་གྱི་སྔོན་དུ་སྐྱེ་དགོས་ཤིང༌། དེ་ལ་གོམས་པ་མང་དུ་བྱས་པ་ལ་བརྟེན་ནས། སྒྱུ་མའི་སྐུ་སྒྲུབ་དགོས་པས། འདིར་འོད་གསལ་སྔ་མ་དེ་ལས་ཁྱད་པར་དུ་གྱུར་པ་ཞིག་སྦྱོང་དགོས་སོ། །དེ་ཡང་སྒྱུ་མའི་ལུས་དངོས་
9-2-48b


སམ་རྗེས་མཐུན་པའི་རྟེན་ཅིག་ལ་བརྟེན་ནས་འོད་གསལ་དུ་འཇུག་པ་ཅིག་ཡིན་ནོ། །འོད་གསལ་དུ་འཇུག་པའི་སྡུད་རིམ་ནི། འདིའི་མན་ངག་ཕལ་ཆེ་བར་མི་གསལ་ཡང༌། གདམས་ངག་ཁ་ཅིག་ལས་འབྱུང་བ་ཤིན་ཏུ་ལེགས་པར་སྣང་ངོ༌། །དེའི་རིམ་པ་ནི། 
རང་ཡི་དམ་ཡབ་ཡུམ་དུ་གསལ་བའི་སྙིང་ཁ་ཆོས་ཀྱི་འཁོར་ལོའི་དབུས་ཀྱི་དྷཱུ་ཏཱིའི་ནང་དུ་ཉི་གདན་ལ་ཧཱུཾ་ཡིག་སྔོན་པོ་ཅིག་བསྒོམས། དེ་ལས་འོད་ཟེར་འཕྲོས་པས་སྣོད་ཐམས་ཅད་སྦྱངས་ཏེ། འོད་གསལ་དུ་བཞུས་པའི་སྣོད་ཁུ་བ་བཅུད་ཀྱི་སེམས་
ཅན་ལ་བསྡུ། དེ་ནས་ཅུང་ཟད་བཞུས་པ་དང་ཡུམ་ནི་རང་ལྷར་གསལ་བ་ལ་བསྡུ། རང་གི་སྤྱི་བོ་ནས་ཡས་ཞུ། རྐང་མཐིལ་ནས་མས་ཞུ་བ་གཉིས་དང་། ཉི་གདན་ནི་སྙིང་ཁའི་ཧུཾ་ཡིག་ལ་བསྡུ། དེ་ནས་ཧཱུཾ་གི་ཞབས་ཀྱུ་ཨུ་ཡིག་ཧ་ལ་བསྡུ། ཧ་རང་གི་མགོ་
བོ་ལ་བསྡུ། དེ་ཟླ་ཕྱེད་ལ་བསྡུ། དེ་ཐིག་ལེ་ལ་བསྡུ། དེ་ནཱ་ད་གྱེན་དུ་འཁྱོག་པ་ལ་བསྡུས་ཏེ། དེ་ཡང་སྙིང་ཁའི་དྷཱུ་ཏཱིའི་ནང་ཉིད་དུ་བསྡུས་པར་མོས་ནས། གནས་དེ་ཉིད་དུ་དམིགས་པ་བརྟན་པར་བཟུང་ནས། རོ་རྐྱང་གི་རླུང་སྙིང་ཁའི་དབུ་མའི་ནང་དུ་ཞུགས་
གནས་ཐིམ་གསུམ་བྱས་པ་ལས། སྟོང་པ་བཞིའི་རིམ་པས་ལམ་གྱི་འོད་གསལ་ཕུལ་དུ་བྱུང་བ་འཆར་ལ། དེ་ཤར་བ་ན་བདེ་བ་ཆེན་པའི་སེམས་དེ་ཉིད་ལྟ་ཐོག་ཏུ་གཡོ་མེད་དུ་གཟུང་བར་བྱའོ། །སྔར་བཤད་པ་བཞིན་སྒྱུ་ལུས་དང་འོད་གསལ་གཉིས་
ཀ་འཕགས་སྐོར་གྱི་གདམས་ངག་དང་སྒྲིག་རྒྱུར་སྣང་ལ། བཤད་མ་ཐག་པའི་འོད་གསལ་དུ་འཇུག་ཚུལ་ནི། གསང་འདུས་རིམ་ལྔའི་རྗེས་གཞིག་གི་བསམ་གཏན་ཁྱད་པར་ཅན་དུ་སྣང་བས། འདུས་པའི་གདམས་ངག་གིས་ཅུང་ཟད་བརྒྱན་ནས་བཤད་དོ། །
9-2-49a


སྔར་གཏུམ་མོ་བསྒོམ་པའི་སྐབས་སུ་རླུང་དབུ་མར་ཐིམ་པའི་ལྷན་སྐྱེས་སྐྱེད་ནུས་པ་ཞིག་ཡིན་ན། སྐབས་འདིར་སྔར་བཤད་པའི་སྡུད་རིམ་དེ་ཉིད་ཀྱིས། སྲོག་དྷཱུ་ཏཱིར་ཞུགས་པའི་ལྷན་སྐྱེས་ཀྱི་འོད་གསལ་བདེ་བླག་ཏུ་སྐྱེད་ནུས་ལ། 
དེ་ལྟ་མིན་ནའང་སྡུད་རིམ་འདི་ཉིད་ལ་གོམས་པར་བྱས་པས་ཀྱང༌། དེ་ལྟར་སྐྱོང་ནུས་པ་ཡིན་ཏེ། གཞན་དུ་རྒྱས་པར་བཤད་ཟིན་ཏོ། །གཉིས་པ་གཉིད་དུས་ཀྱི་འོད་གསལ་བསྒོམ་ཚུལ་ནི། གཉིད་ཀྱི་འོད་གསལ་རླུང་སྟོབས་ཀྱིས་ཟིན་པ་ཞིག་ཡིན་ན། སྔར་
བཤད་པ་ལྟར་རྨི་ལམ་གྱི་དགེ་སྦྱོར་ལ་འཇུག་པའི་སྔོན་དུ་འདི་འཛིན་དགོས་པ་དང༌། དེ་ཉིད་རྨི་ལམ་འཛིན་ཐབས་དམ་པར་འགྲོ་བས། དེ་བཞིན་དུ་བྱེད་རྒྱུ་ཡིན་ནའང༌། བླ་མ་རྣམས་ཀྱིས་སྐབས་འདིར་བཤད་འདུག་པ་དང་མཐུན་པར་བྱས་སོ། །འདི་ལ་སྔོན་
དུ་ཟས་གོས་དྲོད་བཅུད་ནས་མང་དུ་བསྟེན་པ་དང༌། ཞག་གཉིས་གསུམ་གཉིད་གཅོག་པར་བྱེད་པ་དང༌། མི་བྱེད་པའི་ལུགས་གཉིས་འདུག་པ་ལ། དང་པོར་གཉིད་ཀྱི་འོད་གསལ་འཛིན་པ་ལ་ཕལ་ཆེ་བས་གཉིད་འཐུག་དྲགས་ན་ཟིན་དཀའ་ལ། ཅུང་སྲབ་ན་འཛིན་
སླ་བས་དང་པོའི་དུས་སུ་ནི། ཕྱི་མ་ལྟར་བྱ་ལ། གོམས་ནས་བརྟན་པ་ན་སྔ་མ་ལྟར་བྱ་སྟེ། གཉིད་གཙོག་པ་ནི་མི་དགོས་སོ། །འོན་ཀྱང་གཉིད་ཤིན་ཏུ་འཐུག་པ་ལ་ཨེ་ཟིན་ལྟ་འདོད་ན་ནི། དེ་ལྟར་ཡང་བྱའོ། །ཉིན་མོ་ནས་དང་མཚན་མོའི་ཆ་ལ་ཡང་། དཀོན་
མཆོག་ལ་མཆོད་པ་དབུལ། ཆོས་སྐྱོང་ལ་གཏོར་མ་བཏང་ལ། གཉིད་ཀྱི་འོད་གསལ་ཟིན་པ་དང༌། དེའི་འགལ་རྐྱེན་ཞི་བའི་འཕྲིན་ལས་བཅོལ། རང་ལྷར་བསྒོམས་པ་དང་བླ་མའི་རྣལ་འབྱོར་བསྒོམས་ལ་གཉིད་ཀྱི་འོད་གསལ་ཟིན་པའི་གསོལ་བ་དྲག་པོ་
9-2-49b


མང་དུ་གདབ། གཉིད་བྱུང་བ་ན་རྨི་ལམ་དུ་མ་ཤོར་བར་གཉིད་ཀྱི་སྟོང་པ་རྣམས་ཟིན་པར་བྱའོ་སྙམ་དུ་འཕེན་པ་མང་དུ་བཏང་ངོ༌། །དེ་ནས་ཉལ་བ་ན་མགོ་བྱང་རྒྱབ་ཤར་ཁ་ནུབ་རྐང་པ་ལྷོར་ལྟ་བ་དང་རྐང་པ་གཡས་པའི་སྟེང་དུ་གཡོན་པ་བརྩེགས་ཏེ། གཞོགས་
གཡས་པ་འོག་ཏུ་འབེབས་པ་སེང་གེའི་ཉལ་ཐབས་བྱའོ། །རང་ཡི་དམ་དུ་གསལ་བའི་སྙིང་གར་པདྨ་འདབ་མ་བཞི་པ་སྔོན་པོ་ཞིག་བསམ། དེའི་ལྟེ་བ་རྩ་དབུ་མའི་ནང་དུ་ཧཱུཾ་ཡིག་སྔོན་པོ་གཅིག་བསམ། འདིའི་འདབ་མ་ལ་ཨ་ནུ་ཏ་ར་འགོད་པ་དང་མི་འགོད་
པའི་ལུགས་གཉིས་སྣང་བ་ལ། སྔ་མའི་ལུགས་ཀྱིས་ཤར་གྱི་འདབ་མ་ལ་ཨ། ལྷོར་ནུ། ནུབ་ཏུ་ཏ། བྱང་དུ་ར་བཀོད་ནས་གཉིད་དུ་འགྲོ་ལ་ཁད་པ་ན། ཨ་ལ་སེམས་གཏོད། གཉིད་མགོ་རྩོམ་པ་ན་ནུ་ལ་གཏད་པས། སྟོང་པ་དང་པོ་སྣང་བ་འཆར། དེའི་འོག་ཏུ་
ཏ་ལ་གཏད་པས་སྟོང་པ་གཉིས་པ་ཤིན་ཏུ་སྟོང་པ་སྣང་བ་མཆེད་པ་འཆར། དེའི་འོག་ཏུ་ར་ལ་གཏད་པས་སྟོང་པ་གསུམ་པ་ཆེན་པོ་སྟོང་པ་ཉེར་ཐོབ་འཆར། དེ་ནས་དབུས་ཀྱི་ཧཱུཾ་ལ་གཏད་པས་སྟོང་པ་བཞི་པ་ཐམས་ཅད་སྟོང་པ་འཆར་ཟེར་ཞིང༌། ཡི་གེ་
དེ་རྣམས་བསྒོམས་པ་ལ་སྟོང་པ་རྣམས་རིམ་པ་བཞིན་དུ་འཆར་བའི་དགོས་པ་ཡོད་པར་སྨྲའོ། །དེ་ལྟར་སྨྲ་ཡང་ཡི་གེ་དབུས་ཀྱི་དྷཱུ་ཏཱིའི་ནང་དུ་བཀོད་པ་ལ་དམིགས་པས། སྲོག་སྙིང་ཁའི་དྷཱུ་ཏཱིར་བསྡུས་པའི་ཞུགས་གནས་ཐིམ་གསུམ་ལས་སྟོང་པ་
བཞི་འཆར་བའི་མན་ངག་གི་གནད་མ་རྟོགས་པར་སྣང་ལ། དེའི་རྒྱུ་མཚན་གྱིས་དབུས་ཀྱི་ཡི་གེ་ཡང་སྙིང་གར་འགོད་ཟེར་བ་ཙམ་མིན་པ། སྙིང་ཁའི་རྩ་འཁོར་གྱི་དབུས་དྷཱུ་ཏཱིའི་ནང་དུ་འགོད་པ་ཡང་གསལ་བར་མ་བྱུང་ལ། འདབ་མའི་ཡི་གེའི་སྐབས་སུ་
9-2-50a


སྟོང་པ་གསུམ་སྐྱེ་ཟེར་བ་སྣང་བས། འདིའི་མན་ངག་གི་གནད་ཀྱི་གཞི་སྟོར་བ་བཞིན་དུ་འགྲོའོ། །དེས་ན་ཨ་ནུ་ཏ་ར་བཀོད་པ་ལ་འགངས་ཆེ་རྒྱུ་མེད་པས་མེད་ཀྱང་ཆོག །དབུས་ཀྱི་ཡི་གེ་གང་དུ་འགོད་ས་དེ་ལེགས་པར་ཐོན་
དགོས་པར་འདུག །དེ་ལྟར་བྱེད་པའི་གཉིད་ཀྱི་འོད་གསལ་འཛིན་མཁན་འདི་ལ། སྔར་གནས་ཆ་བརྟན་པའི་ཏིང་ངེ་འཛིན་རྙེད་པ་དང་མ་རྙེད་པ་གཉིས་ལས་མ་རྙེད་པ་ཡིན་ན་ནི། ཉལ་ཁ་ཙམ་དུ་སྔར་གྱི་དམིགས་པ་དེ་བསྐྱངས་པས། གཉིད་དུ་སོང་མ་
ཐག་ཏུ་གཉིད་ཏིང་ངེ་འཛིན་དུ་འགྲོ་བ་ཡུན་ཤིན་ཏུ་ཐུང་བ་རེ་དང༌། དེ་གཉིད་ཀྱི་སྐབས་ཡིན་པར་ཤེས་པ་གཅིག་ཚེགས་ཆེན་པོས་འབད་པས་འབྱུང་དུ་ཆུག་ཀྱང༌། དེ་ལ་ལེགས་པར་གནས་པ་མི་ནུས་ལ། རླུང་སྟོབས་ཀྱིས་འོད་གསལ་འཛིན་མི་ནུས་ལ་གཉིད་
དུ་སོང་དུས་སུ། སྣ་བུག་གི་འབྱུང་འཇུག་ཕྲ་མོ་མི་འགག་པའི་གནད་ཀྱིས། སྟོང་པ་བཞི་ག་རྗེས་མཐུན་པ་ཙམ་མིན་པ་མཚན་ཉིད་པ་འཆར་མི་ཐུབ་པས། གཉིད་ཀྱི་འོད་གསལ་ཟིན་པའི་དོན་མེད་དོ། །གནས་ཆ་བརྟན་པོ་རྙེད་པ་ལ་གཉིས་ལས། སད་
དུས་སུ་གཏུམ་མོ་ལ་སོགས་པའི་གནད་ལེགས་པར་ཤེས་ནས་བསྐྱངས་པའི་སྟོབས་ཀྱིས། སྲོག་དྷཱུ་ཏཱིར་ཞུགས་གནས་སོགས་བྱས་པ་ལས་སྟོང་པ་འདྲེན་ནུས་པ་ཞིག་ཡིན་ན། ཉལ་ཁར་སྔར་བཤད་པའི་དམིགས་པ། དྷཱུ་ཏཱིའི་ནང་དུ་ཧཱུཾ་ཡིག་
བསྒོམ་པ་སོགས་ཤེས་ནས་བསྒོམ་པ་ཡིན་ན། ཞག་གཉིས་གསུམ་ཕན་མི་འགྱང་བར་ངེས་པར་གཉིད་ཀྱི་སྟོང་པ་བཞི་རླུང་ཐིམ་པའི་རིམ་པ་ལ་བརྟེན་ནས་འཛིན་ནུས་སོ། །སད་དུས་སུ་དེ་འདྲའི་རླུང་སྟོབས་ཀྱིས་སྟོང་པ་འདྲེན་མི་ནུས་ཀྱང༌། སྤྱིར་ཏིང་
9-2-50b


ངེ་འཛིན་བདེ་གསལ་མི་རྟོག་པ་ཞེས་གྲགས་པ་དེ་བརྟན་པོ་ཡོད་པ་ཞིག་ཡིན་ན། དེས་ཉལ་གར་སྔར་བཤད་པའི་དམིགས་པ་དེ་བཟུང་བའམ། ཡང་ན་དེ་མ་བཟུང་ཡང་སད་དུས་སུ་ཏིང་ངེ་འཛིན་ལ་མཉམ་པར་འཇོག་པ་དེ་བསྐྱངས་ན། དེའི་མཐར་གཉིད་
ཏིང་ངེ་འཛིན་དུ་འགྲོ་བ་ཞིག་འོང་སྟེ། དེ་འདྲ་བ་དེ་འོང་བ་ལ་ཐུན་མོང་བའི་ཏིང་ངེ་འཛིན་བརྟན་པོ་ཡོད་ན། དེས་ཆོག་གི་སྲོག་དྷཱུ་ཏཱིར་ཚུད་པ་མི་དགོས་པས། བླ་མེད་ནས་བཤད་པའི་གཉིད་ཀྱི་འོད་གསལ་མཚན་ཉིད་པ་མིན་ནོ། །འོན་ཀྱང་དེ་འདྲ་བ་དེས་ཀྱང་
སྔར་བཤད་པ་བཞིན་སྙིང་ཁའི་དམིགས་པ་བཟུང་ན། ད་གཟོད་ཀྱི་བག་ཆགས་འཇོག་པའི་གནད་ནི་ཡོད་དོ། །ཏིང་ངེ་འཛིན་ཐུན་མོང་བའི་སྒོ་ནས་གཉིད་ཏིང་ངེ་འཛིན་དུ་སྐྱེས་ནུས་པ་དེས། དེ་ཁོ་ན་ཉིད་ཀྱི་ལྟ་ཐོག་ཏུ་འཇོག་ནུས་པ་ཡིན་ན། ལམ་ཐུན་མོང་བའི་
འོད་གསལ་ཙམ་ཡིན་མོད་ཀྱང༌། སྔགས་བླ་མེད་ཀྱི་འོད་གསལ་གྱི་དོན་མེད་དོ། །ད་ནི་སྔར་བཤད་པ་ལྟར་སྙིང་གར་དམིགས་པ་ལས་རླུང་སྟོབས་ཀྱིས་འཛིན་ནུས་པ་ལ། སྟོང་པ་བཞི་འཆར་ལུགས་བཤད་པར་བྱ་སྟེ། གཞི་དུས་སུ་སྙིང་ཁའི་འཁོར་ལོ་ན་
གཉིད་འཐུག་གི་གནས་སྐབས་སྐྱེད་པའི་ཐིག་ལེ་ཡོད་པའི་གནད་ཀྱིས། དེ་ལམ་དུ་བྱས་པ་ན་མི་རྟོག་པའི་འོད་གསལ་ཕུལ་དུ་བྱུང་བ་འཆར་བ་ཡིན། དེ་ལམ་དུ་མ་བྱས་པའི་ཚེ་ཡང་གཉིད་དུ་འགྲོ་བ་ན། དེར་རླུང་རང་ཤུགས་ཀྱིས་འདུ་བ་ཞིག་ཡོད་དོ། །དེ་ལ་
སད་དུས་སུ་སྲོག་དྷཱུ་ཏཱིར་སྡུད་པ་སོགས་ནུས་པ་ཞིག་གིས། གཉིད་དུ་འགྲོ་ཁར་སྔར་བཤད་པ་ལྟར། སྙིང་ཁའི་དྷཱུ་ཏཱིའི་ནང་དུ་དམིགས་པ་གཏད་ནས་བསྐྱངས་ན། དགེ་སྦྱོར་སྔ་མའི་གནད་ཀྱིས་རླུང་སྙིང་ཁའི་དབུ་མའི་ནང་དུ་འདུ་བར་ཤིན་ཏུ་སླ་བ་ཞིག་འོང་ངོ་། །
9-2-51a


དེ་འོང་བའི་རིམ་པ་ནི་ཐོག་མར་སྨིག་རྒྱུ་ལྟ་བུ་ཆུར་མེར་རེ་སྣང་བ་ཞིག་འབྱུང༌། དེ་ནས་སྣང་བ་དེ་བསྡུས་པ་ན་དུ་བ་ལྟ་བུའི་སྣང་བ་སྔོ་མེར་བ་ཅིག་གིས་ཁེངས་པ་འདྲ་བ་ཞིག་འབྱུང༌། སྣང་བ་དེ་བསྡུས་པའི་རྗེས་ལ་སྲིན་བུ་མེ་ཁྱེར་འདྲ་བ་
དམར་ཕྲ་ཕྲ་བ་མང་པོ་ཞིག་གི་སྣང་བ་འབྱུང༌། སྣང་བ་དེ་བསྡུས་པའི་རྗེས་ལ་མར་མེ་རླུང་གིས་མ་བསྐྱོད་པ་ལྟ་བུའི་སྣང་བ་མང་དུ་འབྱུང༌། སྣང་བ་དེ་བསྡུས་པའི་རྗེས་སུ་ཀོར་ལེ་རེར་ཐིག་ལེ་དཀར་པོའམ། ཟླ་བ་སོགས་འཆར་བའི་དཀར་ལམ་མིན་
པའི་ཡིད་ངོར་གང་སྣང་ཐམས་ཅད་ནམ་མཁའ་གཡའ་དག་འདྲ་བ་ཞིག་ལ། ཟླ་འོད་ཤིན་ཏུ་དྭངས་ཤིང་གསལ་བ་ཤར་བ་འདྲ་བ་ཞིག་གིས་ཐམས་ཅད་དུ་ཁྱད་པ་འོང་སྟེ། སྟོང་པ་དང་སྣང་བ་ཞེས་ཟེར་རོ། །དེ་བསྡུས་པའི་རྗེས་ལ་ཀོར་ལེ་རེར་
དམར་ཁྱིལ་ཁྱིལ་སྣང་བ་མིན་པར། ཡིད་ངོར་གང་སྣང་ཐམས་ཅད་ནམ་མཁའ་གཡའ་དག་འདྲ་བ་ཞིག་ལ། དེ་ལ་ཉི་འོད་ལྟ་བུ་དམར་པོའམ། དམར་སེར་དུ་སྣང་བས་ཐམས་ཅད་དུ་ཁྱབ་པ་འདྲ་བ་ཞིག་འོང་སྟེ། ཤིན་ཏུ་སྟོང་པ་དང་སྣང་བ་མཆེད་པ་ཞེས་
ཟེར་རོ། །སྣང་བ་དེ་བསྡུས་པའི་རྗེས་སུ་ཀོར་ལེ་རེར་ཐིག་ལེ་ནག་པོ་སོགས་སྣང་བ་མིན་པར། ཡིད་ངོར་གང་སྣང་ཐམས་ཅད་ནམ་མཁའ་གཡའ་དག་འདྲ་བ་ལ། དེ་ལ་སྲོད་ཀྱི་སྨག་ནག་པོས་ཐམས་ཅད་དུ་ཁྱབ་པ་འདྲ་བ་ཞིག་འཆར་ཞིང༌། དེའི་སྟོད་ལ་
དྲན་པ་ཉམས་མི་ཐུབ། སྨད་ཀྱི་མཚམས་ཤིག་ནས་དྲན་མེད་དུ་ནག་ཐིམ་གྱིས་འགྲོ་སྟེ་སྐྱོན་མིན། དེ་དུས་དྲན་པ་ཉམས་ཕུལ་ཇི་ལྟར་ཆེ་བ་ཙམ་གྱིས། ཉེར་ཐོབ་ཀྱི་རྟིང་ལ་འཆར་བའི་འོད་གསལ་དེ་ཤིན་ཏུ་བརྟན་ཆ་ཆེ་བ་ཞིག་འབྱུང་ངོ༌། །འདི་ལ་ཆེན་
9-2-51b


པོ་སྟོང་པ་དང་སྣང་བ་ཉེར་ཐོབ་ཅེས་ཟེར་རོ། །དེ་ནས་ཉེར་ཐོབ་ཀྱི་སྣང་བ་དེ་བསྡུས་པའི་རྗེས་སུ། སྔར་གྱི་དྲན་མེད་འཐུག་པོ་དེ་སངས་ནས། ནམ་མཁའི་རང་མདོག་ཇི་བཞིན་དུ་མི་ཐོན་པའི་རྒྱུ། ཉི་ཟླའི་འོད་ཤར་བ་དང་སྨག་འཐུག་པོས་ཁྱབ་པ་གསུམ་དང་
བྲལ་བའི། ཐོ་རེངས་ཀྱི་དུས་ཀྱི་ནམ་མཁའ་གཡའ་དག་འདྲ་བ་ཞིག་འཆར་བ་དེ་ལ། ཐམས་ཅད་སྟོང་པ་འོད་གསལ་ཞེས་ཟེར་བ་ཡིན། དེ་ལ་ཅི་གནས་གནས་ཀྱི་བར་དུ་འཇོག་ཅི་ཐུབ་བྱས་དགོས་ཏེ། དེ་མ་ཐག་ནས་སད་པ་དང༌། མ་སང་ཀྱང་རྨི་ལམ་དུ་ཤོར་
བ་མི་འབྱུང་བའི་ཐབས་ལ་འབད་དེ་མར་ལུགས་ཀྱི་གསང་འདུས་ཀྱི་གདམས་ངག་ཏུ་བཤད་ཟིན་ཏོ། །དེ་འདྲ་བའི་སྟོང་པ་བཞི་པོ་དེ་དགའ་བ་བཞིར་ཡང་འཇོག་ལ། བཞི་ལ་འོད་གསལ་ནི་ལྷན་སྐྱེས་ཀྱི་དགའ་བའི་མཆོག་ཡིན་པས། དེའི་བདེ་བ་དང་སེམས་
མི་རྟོག་པར་འཇོག་པ་ཙམ་བསྐྱངས་པའི་བདེ་བ་གཉིས་བདེ་བའི་མིང་ཙམ་མཚུངས་ཀྱང༌། དོན་ནམ་མཁའ་དང་ལག་མཐིལ་དང་འདྲ་བ་ཡིན་ནོ། །དེ་འདྲ་བའི་བདེ་ཆེན་དེ་སྐྱེས་པ་དང༌། སྔར་གྱི་དེ་ཁོ་ན་ཉིད་ཀྱི་ལྟ་བ་དྲན་པར་བྱས་ནས་སེམས་གཡོ་མེད་དུ་འཛིན་པ་
དེ་ལ། བླ་མེད་ཀྱི་ཐེག་པའི་ལུགས་ཀྱི་བདེ་སྟོང་དབྱེར་མེད་ཅེས་ཡང་ཡང་བསྔགས་པ་དེ་ཡིན་ཏེ། འདི་ལ་འདྲ་ལ་འདྲ་མིན་གྱི་ནོར་ས་མང་པོ་ཞིག་སྣང་བ་ཞིབ་ཏུ་ཕྱེད་པར་བྱའོ། །ལུགས་འདིའི་གདམས་ངག་མང་པོར་སྐབས་འདིར་སྟོང་པ་གསུམ་གྱི་རྣམ་
གཞག་མ་བྱུང་ལ། ཁ་ཅིག་ཏུ་སྟོང་པ་བཞི་གའི་རྣམ་གཞག་བྱུང་ཡང་ངོས་འཛིན་གསལ་པོ་མི་འདུག་གོ། བླ་མ་རྔོག་པའི་གདམས་ངག་ཁ་ཅིག་ཏུ་ངོས་འཛིན་མ་བྱུང་ཡང༌། སྤྱོད་བསྡུས་ཀྱི་གཞུང་ཇི་བཞིན་པ་ཞིག་འབྱུང་ངོ༌། །དེ་ནི་སྤྱོད་བསྡུས་ལས། 
9-2-52a


ཕུང་པོ་ལ་སོགས་པ་ནི་ཁམས་ཕྲ་བ་ལ་གཞུག་གོ། ཁམས་ཕྲ་བ་ནི་སེམས་ལ་གཞུག་གོ། སེམས་ནི་ཡང་སེམས་པ་ལ་གཞུག་གོ། སེམས་པ་ནི་ཡང་མ་རིག་པ་ལ་གཞུག་སྟེ། དེ་ལྟར་སྦྱར་ནས་གཉིད་ལོག་པར་བྱེད་དོ། །དེ་
ལ་དུས་འདིར་ནི་སེམས་དང་སེམས་པ་དང༌། མ་རིག་པ་རབ་ཏུ་ཞུགས་པའི་སྐད་ཅིག་ལ་དྲན་པ་བརྗེད་པའོ། །ཕྱིས་ནི་བརྗེད་པ་ཡང་མེད་པའི་ཡེ་ཤེས་ཀྱི་ངོ་བོ་ཉིད་ནི་འོད་གསལ་བའོ། །ཡང་གྲོལ་བ་ན་རླུང་གིས་རང་བཞིན་རྙེད་དེ། གལ་ཏེ་རྨི་ལམ་གཞན་
དག་འབྱུང་བ་ནི། ཇི་སྲིད་དུ་རྣམ་ཤེས་མི་གཡོ་བ་དེ་སྲིད་དུ་གཉིད་ལོག་ནས་འོད་གསལ་བ་ལ་བལྟ་སྟེ། ཞེས་གསུངས་པ་འདིར་སྣང་ལ། གྲུབ་ཆེན་གྱི་གཞུང་ཁུངས་ཐུབ་ནས་གཉིད་ཀྱི་སྟོང་པ་བཞི་བཤད་ནས་འོད་གསལ་འཛིན་ཚུལ་འདི་འདྲ་བ་
གཞན་གང་ནས་ཀྱང་མི་འབྱུང་བས། འདི་ནས་བཤད་པ་བཞིན་ཤེས་དགོས་སོ། །དེ་ལ་ཕུང་པོ་ལ་སོགས་པ་ནི་ཞེས་པ་ནི། རགས་པའི་ཕུང་སོགས་ཀྱི་སྣང་བ། ཁམས་ཕྲ་བ་ཞེས་པ་རླུང་ལ་ཐིམ་པའི་དུས་ཡིན་ཏེ། ས་ཆུ་མེ་གསུམ་སྔ་མ་ཕྱི་མ་ལ་
ཐིམ་ནས། མེ་རླུང་ལ་ཐིམ་པའི་དུས་སོ། །དེ་ནས་རླུང་སྣང་བ་དང་པོའི་རྣམ་ཤེས་ལ་ཐིམ་པ་ནི། སེམས་ལ་གཞུག་ཅེས་པ་སྟེ། སེམས་ནི་སྟོང་པ་དང་པོའོ། །སེམས་པ་ལ་ཞེས་པ་ནི་སྣང་བ་མཆེད་པ་དང༌། གཞུག་ཅེས་པ་རྣམ་ཤེས་ནི་དེར་ཐིམ་
པའོ། །མ་རིག་པ་ནི་ཉེར་ཐོབ་ཡིན་ལ། དེ་ལྟར་སྦྱར་ནས་ཞེས་པ་ནི་གཉིད་དུས་ཀྱི་སེམས་སྟོང་པ་གསུམ་དང་སྦྱར་བའམ་བསྲེས་པའོ། །དེ་དག་གི་ངོས་འཛིན་ནི། ཡེ་ཤེས་རྡོ་རྗེ་ཀུན་ལས་བཏུས་ནས་གསུངས་པའི་དོན། སྤྱོད་བསྡུས་ནས་
9-2-52b


བཤད་པ་ལྟར་གསལ་བར་བཤད་ཟིན་པ་དེའོ། །དུས་འདིར་ཞེས་པ་ནི་གཉིད་ཀྱི་དུས་སོ། །སེམས་གསུམ་རབ་ཏུ་ཞུགས་པ་ནི་སྔ་མ་ཕྱི་མ་ལ་ཞུགས་པའོ། །དེ་གསུམ་གྱི་གསུམ་པའི་དུས་ནི་དྲན་པ་ཉམས་པའོ། །ཕྱིས་ནི་ཞེས་པ་ནི་ཉེར་ཐོབ་ཀྱི་རྗེས་ཐོགས་
སུའོ། །བརྗེད་པ་ཡང་མེད་པ་ནི་དྲན་མེད་འཐུག་པོ་སངས་པའི་སྐབས། ཐོ་རངས་ཀྱི་ནམ་མཁའི་རང་མདོག་ཐོན་པ་དང་འདྲ་བ་སྟེ། དེ་ལ་ནི་དེ་ཙམ་ཞིག་མ་གཏོགས་པ་སྣང་བ་གཞན་གང་ཡང་མི་འཆར་རོ། །འདིར་ཆག་འགྱུར་ལས། ཡང་གྲོལ་བ་ན་རླུང་གིས་
རང་བཞིན་གཡོས་ཏེ། གལ་ཏེ་རྨི་ལམ་གཞན་དག་མ་བྱུང་ན། ཇི་སྲིད་དུ་ཞེས་སོགས་འབྱུང་བ་ལེགས་ལ། དེའི་དོན་ནི་འོད་གསལ་གྱི་ཏིང་ངེ་འཛིན་དེ་གྲོལ་བ་སྟེ། དེ་ལྷོད་པར་སོང་ནས་ལྡང་བ་ན་རླུང་གིས་རང་བཞིན་གྱི་རྟོག་པ་གཡོས་ཏེ། རྨི་ལམ་འཆར་
བ་ཡིན་པ་ལ། གལ་ཏེ་རྨི་ལམ་འཆར་བ་དེ་མ་བྱུང་ན། ཇི་སྲིད་འོད་གསལ་ལས་མ་གཡོས་པ་དེ་སྲིད་དུ་འོད་གསལ་བསྐྱེད་ཅེས་པའི་དོན་ཏོ། །དེས་ན་འོད་གསལ་རླུང་སྟོབས་ཀྱིས་ཟིན་པ་མིན་པས། གཉིད་ཏིང་ངེ་འཛིན་དུ་སྐྱེད་ནུས་པ་ལ་ནི་གཉིད་ཀྱི་འོད་གསལ་
གྱི་སྔོན་དུ་འཆར་དགོས་པའི་སྟོང་པ་གསུམ་སྔར་བཤད་པ་དེ་མི་འཆར་བས། དེ་གསུམ་སྔོན་དུ་མི་འཆར་བའི་གཉིད་ཀྱི་ཏིང་ངེ་འཛིན་གསལ་དྭངས་བྱུང་ཡང༌། གཉིད་ཀྱི་འོད་གསལ་གྱི་དོན་མེད་དོ། །དེར་མ་ཟད་སྟོང་པ་དང་པོའི་སྔོན་དུ་ཡང་སྨིག་རྒྱུ་དང་དུ་བ་སོགས་
ཀྱང་འདྲ་ལ་འདྲ་མིན་ཙམ་ཞིག་ཨེ་འཆར་མ་གཏོགས་པ། ཁྲིགས་ཆགས་བརྟན་པོར་མི་འཆར་རོ། །དེའི་ཕྱིར་གཉིད་ཀྱི་འོད་གསལ་ལ་ཉམས་དང་རྟོགས་པའི་འོད་གསལ་གཉིས་དང༌། སྲབ་མོ་དང་འཐུག་པོའི་འོད་གསལ་གཉིས་དང༌། རྨི་ལམ་གྱི་དུས་སུ་
9-2-53a


རྟོག་མེད་ཀྱི་ཏིང་ངེ་འཛིན་གསལ་དྭངས་བྱུང་བ་ཡང༌། གཉིད་ཀྱི་འོད་གསལ་དུ་འཇོག་པའི་རྣམ་གཞག་མང་པོ་སྣང་ཡང་སྔར་བཤད་པ་ལྟར་མ་ཕྱེད་པར་གཉིད་ཏིང་ངེ་འཛིན་དུ་སྐྱེད་ནུས་པ་ཙམ་གྱི་སྟེང་ནས་བཤད་པ་མང་དུ་བྱས་པར་
སྣང་བས། ཡིད་བརྟན་ཐུབ་པ་མི་སྣང་ངོ༌། །དེ་ལྟར་སད་དུས་དང་གཉིད་དུས་གཉིས་ཀའི་འོད་གསལ་ཡང་དག་པ་དང་ལྟར་སྣང་བ། འཕགས་པ་ཡབ་སྲས་ཀྱི་གཞུང་ལ་བརྟེན་ནས་ལེགས་པར་ཕྱེ་བ་འདི། ཤིན་ཏུ་གཅེས་པའི་གདམས་ངག་ཏུ་གཟུང་བར་
བྱའོ། །དེ་ལྟར་འོད་གསལ་ལ་འཇོག་ཅི་ནུས་བྱས་ཀྱང༌། རླུང་གཡོས་པའི་དབང་གིས་འཇོག་མ་ནུས་ན། རྨི་ལམ་དུ་ལྡང་ལུགས་ཁྱད་པར་ཅན་ནི། མར་ལུགས་ཀྱི་གསང་འདུས་ཀྱི་གདམས་ངག་ཏུ་བཤད་པ་ལས་ཤེས་པར་བྱའོ། །གཉིས་པ་ལམ་གྱི་
ཡན་ལག་འཕོ་བ་དང་གྲོང་འཇུག་ལ་གཉིས། གོང་དུ་འཕོ་བ་དང༌། གྲོང་དུ་འཇུག་པའོ། །དང་པོ་ནི། རྣམ་ཤེས་གོང་དུ་འཕོ་བའི་གདམས་ངག་འདི་ནི། རྣལ་འབྱོར་བླ་མེད་ཀྱི་རྒྱུད་ཀྱི་ཁྱད་ཆོས་ཆེན་པོ་ཞིག་ཡིན་ལ། འདི་ཡང་བདེ་དགྱེས་གཉིས་ཀའི་ཐུན་
མོང་གི་བཤད་རྒྱུད་སམ་བྷུ་ཊ་དང་། བདེ་མཆོག་གི་ཐུན་མོང་མ་ཡིན་པའི་བཤད་རྒྱུད་རྡོ་རྗེ་མཁའ་འགྲོ་དང༌། བདེ་མཆོག་སྡོམ་འབྱུང་གཉིས་དང༌། རྡོ་རྗེ་གདན་བཞིའི་རྩ་རྒྱུད་དང༌། རྗེ་བཙུན་འཇམ་དཔལ་གྱི་ཞལ་གྱི་ལུང་ལ་སོགས་པ་ནས་གསུངས་
སོ། །དེའི་ཕྱིར་འཕོ་བའི་གདམས་ངག་ལེགས་པར་ཤེས་པར་འདོད་ན། རྒྱུད་དེ་རྣམས་དང་དེ་རྣམས་ཀྱི་འགྲེལ་པ་ཁྱད་པར་ཅན་རྣམས་གུང་ལེགས་པར་བསྒྲིགས་ནས། གནད་རྣམས་ཤེས་དགོས་པར་ཡོད་དོ། །ལམ་འདིའི་ཕན་ཡོན་ནི་རྡོ་རྗེ་མཁའ་
9-2-53b


འགྲོ་ལས། ཉིན་རེ་བྲམ་ཟེ་གསོད་པ་དང༌། །མཚམས་མེད་ལྔ་ནི་བྱེད་པ་དང༌། །རྐུ་འཕྲོག་འདོད་ལ་སྤྱོད་པ་ཡང༌། །ལམ་འདི་ཡིས་ནི་དག་འགྱུར་ཏེ། །སྡིག་པ་གོས་པར་མི་འགྱུར་ཞིང༌། །སྲིད་པའི་སྐྱོན་ལས་རིང་དུ་འགྲོ། །ཞེས་གསུངས་ཏེ། འགྱུར་ཁྱད་འགའ་
ཡར་མ་གཏོགས་པ་ཁ་སྦྱོར་དང༌། གདན་བཞི་ལས་ཀྱང་དེ་བཞིན་དུ་གསུངས་པས། ཤིན་ཏུ་དོན་ཆེ་བས་འདི་ལ་འབད་དགོས་སོ། །ལམ་འདིས་དག་པ་དང་གྲོལ་བར་གསུངས་པ་ནི། ངག་འགྲོ་ལས་གྲོལ་བ་དང་དེར་སྐྱེ་བའི་སྡིག་པ་དག་པ་ཡིན་པར་མན་
སྙེ་སོགས་ལས་བཤད་དོ། །འཕོ་བས་ལས་ལ་སྦྱར་བའི་དུས་ཀྱང་རྡོ་རྗེ་མཁའ་འགྲོ་ལས། དུས་ལ་བབ་ན་འཕོ་བྱ་སྟེ། །དུས་མིན་ལྷ་རྣམས་གསོད་པར་འགྱུར། །ལྷ་རྣམས་བསད་པ་ཙམ་གྱིས་ནི། །དམྱལ་བར་ངེས་པར་སྲེག་པར་འགྱུར། །དེ་བས་འཆི་བའི་
མཚན་མ་ནི། །མཁས་པས་འབད་དེ་ཤེས་པར་བྱ། །ཞེས་དང་། གདན་བཞི་དང་ཁ་སྦྱོར་ལས་ཀྱང་དེ་བཞིན་དུ་གསུངས་པས། དུས་མ་ཡིན་པར་འཕོས་ན། རང་ཉིད་ལྷར་གསུངས་པའི་ལྷ་བསད་པས། སྔགས་སྡོམ་ཡོད་ན་རྩ་ལྟུང་བརྒྱད་པ་འབྱུང་བས། 
དམྱལ་བར་འགྲོ་བའི་ཉེས་དམིགས་ཆེ་བར་གསུངས་པར་དུས་ཤེས་དགོས་སོ། །དུས་ཤེས་པ་ལ་འཆི་ལྟས་ལ་མཁས་པས་འབད་པ་ཆེན་པོས་འཆི་ལྟས་ཤེས་པར་བྱ་བར་གསུངས་པས། རང་ལ་འཆི་ལྟས་མཐོང་བ་དང༌། དེ་ལ་འཆི་བླུ་བྱས་པས་མ་ཟློག་
པའི་རྟགས་མཐོང་ན། འཕོ་བ་བྱ་བའི་དུས་སོ། །དེ་ཡང་གདན་བཞིའི་འགྲེལ་པར་ཟླ་བ་དྲུག་གི་སྔོན་དུ་བྱ་བར་བྷཱ་བ་བྷ་དྲས་བཤད་དེ། འཆི་ལྟས་ཀྱི་དུས་ཚིགས་ལེགས་པར་ངེས་པ་གལ་ཆེའོ། །གཞན་ཡང་གདན་བཞི་ལས། རིམས་ལ་སོགས་པས་མ་ཕོག་པར་
9-2-54a


འཕོ་བ་སྦྱོང་བ་མཆོག་ཡིན་ནོ། །ཞེས་གསུངས་པས། ནད་ཀྱིས་མ་ཕོག་པའི་གོང་དུ་བྱ་དགོས་ཀྱི། ནད་ཀྱིས་བཏབ་ན་ནི་སྔར་ལེགས་པར་སྦྱངས་པ་ཡིན་ཀྱང༌། ཇི་བཞིན་དུ་འཕོ་མི་ནུས་པར་གསུངས་སོ། །ཡང་རྒས་པས་ཤིན་ཏུ་སྡུག་
བསྔལ་བར་མཐོང་བ་དང༌། ནད་དྲག་པོའི་སྡུག་བསྔལ་མ་བཟོད་ནས་འཕོ་བ་བྱེད་ན། སྔར་བཞིན་དུ་བྱ་མི་རུང་བར་གསུངས་པས། འདིའི་གདམས་ངག་ཁ་ཅིག་ཏུ་སྔ་མ་ལ་འཕོ་བ་བྱ། ཞེས་པ་ནི་ཕྱིན་ཅི་ལོག་ཏུ་སྨྲ་བ་ཆེན་པོའོ། །འཕོ་བའི་གདམས་ངག་དངོས་ལ་
གཉིས་ལས་སྦྱང་བ་ནི། རྡོ་རྗེ་མཁའ་འགྲོ་ལས། གནས་ཀྱི་མཐའ་ནི་དག་པར་བྱ། །དག་ནས་སྲིད་པ་འཕོ་བྱ་ཡིས། །གཞན་དུ་ན་ནི་དོན་མེད་འགྱུར། །ཞེས་བདེ་སྡུག་གི་གནས་ལུས་ཀྱི་མཐའ་སྟེ། སྔར་གཏུམ་མོ་བསྒོམས་པས་དག་པར་མ་བྱས་པར་འཕོས་ན། 
ངལ་བ་དོན་མེད་དུ་བྷཱ་བ་བྷ་དྲས་བཤད་པས། སྔར་གྱི་གཏུམ་མོ་སྒོམ་པ་འཕོ་བ་ཁྱད་པར་ཅན་སྒྲུབ་པའི་རྒྱུ་ཅིག་ཡིན་ནོ། །ཡང་རྡོ་རྗེ་མཁའ་འགྲོ་ལས། བུམ་པ་ཅན་གྱིས་སྒོ་བཅིངས་ན། །སྒོ་ཡི་བུ་གུ་དག་པར་འགྱུར། །ཞེས་གསུངས་ཤིང༌། གདན་བཞི་དང་སམ་
བྷུ་ཊ་ལས་ཀྱང་དེ་དང་མཐུན་པར་གསུངས་པས། རླུང་བུམ་པ་ཅན་བསྒོམས་པས་དབང་པོ་ལ་སོགས་པའི་སྒོར་འཇུག་པའི་རླུང་ནང་དུ་ལེགས་པར་སྡུད་ནུས་པ་ཞིག་དགོས་པར་གསུངས་པས། སྔར་བཤད་པའི་བུམ་པ་ཅན་རབ་འབྲིང་ཐ་མ་གསུམ་གྱི་ཐ་མ་ཡོད་
ན་དེས་ཆོག་ཅེས་ཟེར་བ་མང་དུ་སྣང་བ་ནི། རྒྱུད་ཀྱི་དོན་མ་རྟོགས་བཞིན་དུ་སྨྲ་བའོ། །དེས་ན་སྤྱི་གཙུག་གསེར་གྱི་སྒོ་མ་གཏོགས་པའི་སྒོ་བརྒྱད་ནས་རྣམ་ཤེས་འཕོ་བ་བཀག་ནས། སྤྱི་གཙུག་གསེར་གྱི་སྒོ་ནས་འཕོས་ཏེ། སྔགས་སྤྱོད་པའི་རིག་པ་འཛིན་པའི་
9-2-54b


རྟེན་མཆོག་ཏུ་གྱུར་པ་འཐོབ་པའི་འཕོ་བ་ལ། རྒྱུད་ནས་གསུངས་པ་དེ་རྣམས་དགོས་ཤིང༌། རྣམ་ཤེས་ལུས་ལས་འདོན་པའི་དམིགས་པ་རྣམས་ཀྱང༌། རྒྱུད་དེ་རྣམས་ནས་བཤད་པའི་དམིགས་པ་མཚན་ཉིད་རྫོགས་པ་དགོས་སོ། །འདིའི་གདམས་ངག་ཤོག་
དྲིལ་བཞི་པའི་འཕོ་བ་དང༌། རྡོག་ལུགས་ཀྱི་གདམས་ངག་རྣམས་ཀྱི་འཕོ་བའི་དམིགས་པ་དངོས་གཞི་རྣམས་ཅུང་རྒྱས་པར་སྣང་ཡང༌། འདིར་ལུགས་འདིའི་མན་ངག་གཙོ་བོར་མཛད་པའི་བླ་མ་རྣམས་ཀྱི་མན་ངག་ནས་འབྱུང་བ་ཅུང་ཟད་བརྗོད་པར་བྱའོ། །
འདིར་འཕོ་བ་སྦྱོང་བའི་རྟེན་དུ་ལྷ་གང་སྒོམ་སྙམ་ན། བླ་མ་རྣམས་རང་གི་ཡི་དམ་གང་ཡིན་སྒོམ་པར་བཞེད། ཁ་སྦྱོར་དང་གདན་བཞི་ལས་འདི་ལ་སྒོས་ཀྱི་ལྷ་སྒོམ་ཚུལ་ཅིག་གསུངས་པས་གྲུབ་ན་དེ་བཞིན་དུ་བྱེད་རྒྱུ་ཡིན་ཡང༌། འདིར་ཚིག་མངས་སུ་དོགས་
ནས་མ་བྲིས་སོ། །རང་ལྷར་གསལ་བ་དང་རླུང་ཁ་སྦྱོར་གསང་གནས་སམ། ལྟེ་བར་བསྒོམས་པའི་ངང་ནས། ལྟེ་བར་ཨ་དམར་པོ་དང༌། སྙིང་ཁར་ཧཱུཾ་མཐིང་ནག་དང༌། ཚངས་བུག་ཏུ་ཀྵ་དཀར་པོ་རེ་བསམ། དེ་ནས་འོག་རླུང་དྲག་ཏུ་ཐེན་པས་ལྟ་བའི་ཨ་ཡིག་ཕུལ་
བས། ཡར་འོངས་ནས་ཧཱུཾ་ཕུལ། དེ་ནས་ཧཱུཾ་ཡར་འོངས་ཏེ་ཀྵ་ཡིག་ཕུལ་བར་བསམ། ཡང་ཕྱིར་དབབ་ལ་སྙིང་ཁར་ཧཱུཾ་དང༌། ལྟེ་བར་ཨ་གནས་པར་བསམ། ཞེས་འབྱུང་བས། ཡར་རེས་ཨ་ཧཱུཾ་ལ་ཐིམ་པར་བསམ་ཞེས་ཟེར་ཡང་སྔ་མ་ལྟར་བྱས་ན་བདེའོ། །དེ་ལྟར་
རྒྱུན་དུ་རྟགས་མ་བྱུང་གི་བར་དུ་སྦྱང་ངོ༌། །རྟགས་ནི་སྤྱི་གཙུག་ཟ་བ་དང༌། འཕྲིག་པ་སོགས་སོ། །དེ་ནས་ལས་ལ་སྦྱར་བ་ནི། ལུས་གནད་ཙོག་བུར་བྱ། ལག་པ་གཉིས་ཀྱིས་བུས་མོ་གཉིས་ལ་འཁྱུད་ཅིང༌། སྐྱབས་འགྲོ་སེམས་བསྐྱེད་སྔོན་དུ་འགྲོ་བས། རང་ཉིད་
9-2-55a


ཡི་དམ་གྱི་ལྷར་གསལ་བའི་ངང་ནས་སྤྱི་གཙུག་གི་ཐད་ཀའི་མདུན་གྱི་ནམ་མཁར་འདོམ་གང་མ། ཁྲུ་གང་སོགས་གང་བདེ་བའི་སར། བླ་མ་དང་ཡི་དམ་གྱི་ལྷ་དབྱེར་མེད་དུ་དམིགས་ལ། མོས་གུས་ཀྱི་གདུང་བས་གསོལ་བ་དྲག་ཏུ་
གདབ། དེ་ནས་ལྟེ་བའི་ཨ་དང༌། སྙིང་ཁའི་ཧཱུཾ་དང༌། སྤྱི་གཙུག་གི་ཀྵ་གསལ་བཏབ་ནས། འོག་རླུང་དྲག་ཏུ་ཐེན་པས་ཨ་དེ་ཉིད། རྩ་དབུ་མའི་ནང་ནས་ཡར་ལ་ཁྱུ་རུ་རུ་བྱུང་ནས། སྙིང་ཁའི་ཧཱུཾ་ལ་ཐིམ་པར་བསམ་ཞིང༌། ཨ་ཧི་ཀ་ཅི་ཙམ་གྲུབ་པ་ཅིག་
བཟླས་སོ། །ཡང་ཧཱུཾ་དེ་ཉིད་ཀྱང་ཡར་བྱུང་སྟེ། ཨ་ཧི་ཀ་ཉི་ཤུའི་བར་དུ་བརྗོད་པས། མགྲིན་པར་བྱུང་བར་བསམས་ལ། ཚངས་བུག་གི་ཀྵ་ཡིག་བསལ་ནས། ཚངས་བུག་དཀར་ཁུང་བྱེ་བ་ལྟར་དཀར་སང་ངེ་ཡོད་པར་བསམ་ཞིང༌། ཨ་ཧི་ཀ་དྲག་པོ་
ལྔ་བརྗོད་པས། ཧཱུཾ་དེ་ཚངས་བུག་ནས་རྒྱངས་ཀྱིས་འཐོན་ནས། བླ་མ་དང་ཡི་དམ་དབྱེར་མེད་ཀྱི་ཐུགས་ཀར་ཐིམ་པ་ལ་སེམས་གཏད་དེ་མི་རྟོག་པའི་ངང་ལ་བཞག་གོ། ཞེས་བླ་མ་རྣམས་གསུང་ངོ༌། །འདི་གདན་བཞི་ལ་བརྟེན་ནས་འཕོ་བ་བསྡུས་
པ་ཅིག་མཛད་པར་འདུག །དེ་ལ་རྒྱུད་དང་འགྲེལ་པ་ཁུངས་ཐུབ་ནས། བཤད་པའི་ཡི་གེ་གཉིས་ཀྱི་གདན་དང༌། ཡི་གེ་གཉིས་གང་དུ་འགོད་པའི་གནས་དང༌། མགོ་བོ་གྱེན་དང་ཐུར་དུ་ལྟ་བའི་ཚུལ་དང༌། ཡར་འཕུལ་མར་འབེབས་ཀྱི་དུས་གཉིས་སུ་རླུང་
གི་བཟླས་པ་དང༌། སྦྱོང་ཚུལ་ཁྱད་པར་ཅན་སྦྱོང་ལུགས་རྣམས་ད་དུང་ལེགས་པར་ཤེས་པར་བྱས་ནས་བསྐྱངས་ན་ཤིན་ཏུ་ལེགས་པར་རྟོགས་སོ། །སྤྱིར་བདེ་འགྲོའི་གནས་ཙམ་དུ་འཕོ་བའི་གདམས་ངག་ལ་ཡང༌། ཁྱད་པར་ཆེ་མོད་ཀྱང༌། རྒྱུད་སྡེའི་
9-2-55b


དགོངས་པ་ནི་སྔགས་སྤྱོད་པའི་རིག་འཛིན་གྱི་རྟེན་མཆོག་ཏུ་འཕོ་བར་བྱེད་པ་ཡིན་ལ། དེ་ལ་ཐུན་མོང་མ་ཡིན་པའི་ཏིང་ངེ་འཛིན་གྱི་སྟོབས་ཀྱིས་སྒོ་གཞན་བརྒྱད་ནས་རྣམ་ཤེས་འཕོ་བ་འགོག་ནུས་ཤིང༌། གསེར་གྱི་སྒོ་ནས་འཕོ་ནུས་པ་ཞིག་དགོས་སོ། །དེ་ལ་
རྣམ་ཤེས་ཀྱི་བཞོན་པའི་རླུང་སྒོ་གཞན་བརྒྱད་དུ་འགྲོ་བ་འཆིང་ནུས་ན། རླུང་ལ་ཞོན་པའི་རྣམ་ཤེས་ཀྱང་སྒོ་དེ་རྣམས་སུ་འཕོ་བ་འཆིང་ནུས་ལ། དེ་ལ་སྒོ་དེ་རྣམས་སུ་ཡིག་གེ་བཀོད་ནས་སྒོམ་པའི་གནད་ཤེས་ནས་འཆིང་བ་ཞིག་དང༌། སྲོག་རྩོལ་བུམ་པ་ཅན་གྱིས་
དབང་པོའི་སྒོ་རྣམས་ནས་རླུང་འཆིང་ནུས་པ་ཞིག་དགོས་པ་ནི་གནད་དམ་པ་ཡིན་ཏེ། དེ་རྣམས་ཀྱི་གནད་གསལ་པོར་ཟིན་པ་ཡིག་ཆ་རྣམས་ལས་ཀྱང་དཀའ་བར་བྱུང་སྣང་ངོ༌། །དེས་ན་ལྟེ་བའི་ཨ་ཁ་དོག་དམར་པོར་གོང་མ་རྣམས་མཛད་པ་སམ་བྷུ་ཊ་ལས། ས་
བོན་དེ་ཉིད་དམར་པོའོ། །ཞེས་གསུངས་པའི་དོན། མན་སྙེ་ལས་དེ་ཉིད་ཅེས་པ་ངེས་བཟུང་གི་དོན་དུ་བཤད་པས་ཨ་ཁོ་ན་དམར་པོར་བྱ་ཞེས་གསུངས་པ་ལ། ཨ་མིན་པར་ཧཱུཾ་ཡིག་དམར་པོར་བྱེད་པ་དང༌། གདན་བཞི་ལ་སོགས་པའི་རྒྱུད་རྣམས་སུ་སྒོ་དགུར་ཡིག་
འགོད་ལུགས་གསལ་བར་བཤད་པ་བོར་ནས་ཧཱུཾ་བསྒྲིལ་མ་རེ་རེས་འགོག་པ་ཟབ་པར་འདོད་པར་སྣང་སྟེ། རྒྱུད་དོན་མ་གོ་བར་བཤད་པའོ། །གཉིས་པ་རྣམ་ཤེས་གཞན་གྱི་གྲོང་དུ་འཇུག་པ་ནི། མིག་སོགས་ཀྱི་དབང་པོ་ལ་གྲོང་དང༌། དབང་པོའི་རྟེན་ལ་གྲོང་ཁྱེར་གྱི་
སྒྲས་བསྟན་པ་ནི། ཕར་ཕྱིན་ནས་འབྱུང་ལ། གང་ཟག་གཞན་ཤི་བའི་ལུས་མ་ཉམས་པ་ལའང༌། གྲོང་ཁྱེར་གྱི་སྒྲ་འཇུག་པས་རྣམ་ཤེས་དེར་འཇུག་པ་ལ་གྲོང་འཇུག་ཅེས་གསུངས་སོ། །འདིའི་གདམས་ངག་ཀྱང་རྣལ་འབྱོར་བླ་མེད་ཀྱི་ཁྱད་ཆོས་ཡིན་ལ། མ་
9-2-56a


རྒྱུད་མང་པོ་ནས་གསུངས་ཤིང༌། ཕ་རྒྱུད་ཀྱང་རེ་རེ་ཙམ་ནས་གསུངས་སོ། །འོ་ན་གྲོང་འཇུག་འདི་རྟེན་ཇི་འདྲ་ཞིག་གིས་བྱེད། དགོས་པ་ཇི་འདྲ་ཞིག་གི་ཕྱིར་དུ་བྱེད། བྱེད་ལུགས་ཇི་འདྲ་ཞིག་གིས་བྱེད་སྙམ་ན། དེ་ལ་རྟེན་གྱི་གང་ཟག་
ནི་འཕོ་བ་དང༌། གྲོང་འཇུག་སོགས་ལའང་དབང་བསྐུར་ལེགས་པར་ཐོབ་པ་དང༌། དམ་ཚིག་དང་སྡོམ་པ་ཚུལ་བཞིན་དུ་སྲུང་བ་དང༌། བསྐྱེད་པའི་རིམ་པ་ལ་སྦྱངས་པ་དགོས་པ་ནི་འདྲའོ། །རྒྱུད་ནས་འཕོ་བ་ཁྱད་པར་ཅན་དང༌། རང་གི་རྣམ་ཤེས་གཞན་གྱི་
གྲོང་དུ་འཇུག་པ་དང༌། གཞན་གྱི་རྣམ་ཤེས་ལུས་ལས་བཏོན་ནས་རང་གི་ལུས་ལ་འཇུག་པ་གསུམ་ག་ལ། སྒོ་དགུར་ཡི་གེ་བཀོད་ནས་རླུང་འགོག་ནུས་པ་དང༌། བུམ་པ་ཅན་གྱིས་ཀྱང་སྒོ་དེ་རྣམས་སྦྱངས་ནས་སྲོག་དྷཱུ་ཏཱིར་འཛུད་ནུས་པ་དང༌། གཏུམ་མོ་
ལ་བརྟེན་ནས་ལྟེ་བའི་ཨ་ཐུང་གི་དམར་ཆས། སྙིང་ཁའི་སྲོག་རླུང་ཕྲ་བའི་བཞོན་པ་ཅན་གྱི་ཡིད་ཤེས་ཀྱི་ཧཱུཾ་ཡིག་བསྐུལ་ནུས་པ་ཅིག་དགོས་པ་ནི། རྡོ་རྗེ་མཁའ་འགྲོ་དང༌། གདན་བཞི་དང༌། དེ་གཉིས་ཀྱི་འགྲེལ་པ་བྷཱ་བ་བྷ་དྲས་མཛད་པ་དང༌། ཁ་སྦྱོར་དང་
དེའི་འགྲེལ་པ་མན་ངག་སྙེ་མ་རྩ་འགྲེལ་གྱི་དགོངས་པར་སྣང་ངོ༌། །རྣམ་ཤེས་རང་གཞན་ལ་འཇུག་པ་གཉིས་ནུས་པ་ལ་ནི་སྔར་བཤད་པ་དེ་ལས་ཀྱང་རླུང་འབྱོངས་པ་ཅིག་དགོས་པར་སེམས་སོ། །ཞིབ་པར་གཞན་དུ་བཤད་པ་ལས་ཤེས་པར་བྱའོ། །
གྲོང་འཇུག་བྱེད་པའི་དགོས་པ་ནི། རིགས་དམའ་བས་གཞན་དོན་ཆེན་པོ་མི་འགྲུབ་པས་རིགས་མཐོ་བའི་རྟེན་འཛིན་པ་དང༌། ནད་བུ་ཅན་གྱིས་རང་གཞན་གྱི་དོན་མི་འགྲུབ་པར་མཐོང་ནས། ནད་མེད་པའི་ལུས་རྟེན་འཛིན་པ་དང༌། ན་སོ་རྒས་པས་
9-2-56b


གཞོན་པའི་ལུས་རྟེན་འཛིན་པ་སོགས་ཀྱི་དོན་དུ་གྲོང་འཇུག་བྱེད་དོ། །ཇི་ལྟར་བྱེད་པའི་ཚུལ་ལ་འདི་པའི་བླ་མ་རྣམས་གསུམ་དུ་བྱེད་པའི་དང་པོ་སྦྱང་བ་ནི། རླུང་སེམས་གཉིས་ལ་དབང་ཐོབ། ཚེ་འདིར་གཞན་དོན་འགྲུབ་པར་མཐོང་ཞིང༌། སེམས་ཅན་
ལ་སྙིང་རྗེ་ཚད་མེད་དང་ལྡན་པའི་གང་ཟག་གིས་གྲོང་དུ་འཇུག་པའི་མན་ངག་ཉམས་སུ་བླང་བར་བྱ་སྟེ། ཤིན་ཏུ་དབེན་པའི་གནས་སུ་གཡོག་དང་བཅས་ཏེ། བྱ་བྱེད་ཀྱི་གཡེང་བ་སྤངས་ནས་ཡི་དམ་དང་རྟེན་བཀྲམ། མཆོད་པ་བཤམ། མཚམས་དམ་
པར་བཅད་དེ། རང་གི་མདུན་དུ་ཚོན་རྩི་ནག་པོས་བྱུགས་པའི་མཎྜལ་གྱི་སྟེགས་བུ་བྱ། དེའི་དབུས་སུ་ཐོད་པའི་མཐིལ་དུ་རྡོ་རྒྱུས་ཀྱིས་ཡི་གེ་ཧཱུཾ་གསལ་བར་བྲིས་ལ། རང་ཡི་དམ་གྱི་ལྷར་གསལ་བའི་ངང་ནས། ཡན་ལག་བདུན་པ་བྱ། རང་གི་སྙིང་གི་ནང་
དུ་ཡི་གེ་ཧཱུཾ་གསལ་བར་བསྒོམས་ལ། སྣ་བུག་གཡས་ནས་རླུང་རྒྱུ་བའི་དུས་སུ། སྙིང་ཁའི་ཧཱུཾ་དེ་ཉིད་རླུང་ཕྱིར་རྒྱུ་བ་དང་སྡོངས་ནས། སྣ་བུག་གཡས་ནས་འཐོན་ཏེ། ཐོད་པའི་ཧཱུཾ་ལ་ཐིམ་པར་བསམ་ཞིང༌། རླུང་ནང་དུ་མི་རྔུབ་པར་ཕྱིར་གཟུང་ངོ༌། །མ་ཐུབ་པ་
དང་ནང་དུ་དལ་བུས་རྔུབ། ཡང་ཕྱིར་འགྲོ་དུས་སྔ་མ་ལྟར་བྱའོ། །དེ་ལྟར་ཡང་ཡང་བསྒོམས་པས། འབྱོངས་པའི་རྟགས་ཐོད་པ་འགུལ་བ་དང༌། འཚག་པ་དང་འཕར་བ་སོགས་འབྱུང་ངོ༌། །དེ་ནས་བསད་པ་ནི་མི་རོ་གསར་པ་མ་ཉམས་ཤིང༌། རྨ་འབྲས་སོགས་
མེད་པ། རིམས་དང་འབྲུམ་བུ་སོགས་ཀྱིས་ཤི་བ་མིན་པའམ། ཡང་ན་ཕྱུགས་ལ་སོགས་པའི་རོ་གཙང་ཞིང་མ་ཉམས་པ་ཞིག་བཙལ་ལ། ཆུ་གཙང་མས་ཁྲུས་བྱས། ཡིད་དུ་འོང་བའི་རྒྱན་བཏགས་ལ། མདུན་གྱི་མཎྜལ་གྱི་སྟེང་དུ་སྐྱིལ་ཀྲུང་ངམ་ལུས་ལེགས་
9-2-57a


པར་བཅོས་ལ་བཞག །དེ་ནས་རང་དང་རོ་གཉིས་ཀའི་སྙིང་གར་སེམས་ཀྱི་རྟེན་ཡི་གེ་ཧཱུཾ་རེ་བསམས་ལ། རང་གི་སྙིང་ཁའི་ཧཱུཾ་དེ་རླུང་ཕྱིར་འགྲོ་བ་དང་སྡོངས་ནས་སྣ་བུག་གཡས་ནས་འཐོན་ཏེ། རོའི་སྣ་བུག་གཡོན་ནས་ཞུགས་ནས་སྙིང་ཁའི་
ཧཱུཾ་ལ་ཐིམ་པར་བསམ་མོ། །དེ་ལྟར་ཡང་ཡང་བྱས་པས་རོའི་ལུས་ལ་དབུགས་དང༌། དྲི་ལ་སོགས་པ་བྱུང་ན་འབྱོངས་པ་ཡིན་པས་ཉམས་འོག་ཏུ་ཚུད་དོ། །དེ་ནས་ལས་ལ་སྦྱར་བ་ནི་མཚམས་བཀྲོལ་ལ། མི་རོ་གསར་པ་མཚན་ལྡན་སོགས་བཙལ་ལ། སྔར་
གྱི་མཎྜལ་གྱི་སྟེང་དུ་རང་ལ་ཁ་བསྟན་ལ་བཞག །རྒྱན་གདགས་པ་སོགས་བྱས་ལ། རང་ཡི་དམ་གྱི་ལྷར་གསལ་བཏབ་ལ་ཐ་མལ་གྱི་ལུས་ཀྱི་ཞེན་པ་དོར་ནས། སྣང་སྲིད་ཀྱི་ཆོས་ཐམས་ཅད་སྒྱུ་མ་ལྟ་བུར་ཤེས་པར་བྱས་ལ། ཐ་མལ་གྱི་འཁྲུལ་རྟོག་གི་
བག་ཆགས་སྤངས་ནས། བླ་མ་དང་ཆོས་སྐྱོང་ལ་གཏོར་མ་ཕུལ། བར་ཆད་མི་འབྱུང་བའི་གསོལ་བ་གདབ། དེ་ནས་རང་དང་རོ་གཉིས་ཀ་ལྷར་གསལ་བའི་ཐུགས་ཀར་ཡི་གེ་ཧཱུཾ་རེ་གསལ་གདབ། དེ་ནས་རོ་དང་རང་གཉིས་ཁ་སྤྲད་དེ། རང་གི་སྙིང་ཁའི་ཧཱུཾ་དེ་
སྣ་བུག་གཡས་པ་ནས་རླུང་ཕྱིར་འགྲོ་བ་དང་བསྡོངས་ནས། རོའི་སྣ་བུག་གཡོན་ནས་ཞུགས་པར་བསམ་ཞིང༌། རླུང་སེམས་ཧཱུཾ་ལ་དྲག་ཏུ་གཏད་དེ། རླུང་ནང་དུ་མི་རྔུབ་པར་ཕྱིར་དྲག་ཏུ་བཏང་ངོ༌། །དེ་ལྟར་བྱས་པས་རོའི་ལུས་ལ་དབུགས་ལ་སོགས་པ་བྱུང་
ན། ཡིད་དུ་འོང་བའི་གྲོགས་ཀྱིས་འཕྲོད་པའི་ཟས་བྱིན་ནས། ཟླ་བ་ཕྱེད་ཙམ་བར་དུ་སྦ་བར་བྱ་ཞིང༌། བརྟན་པ་ཐོབ་ཀྱི་བར་དུ་ཕུང་པོ་རྙིང་པ་གཞན་དུ་སྦའོ། །དེ་ནས་ཕུང་པོ་རྙིང་པ་ལ་དྲིན་ལན་གླན་པའི་ཕྱིར། སྲེག་པ་དང་ཚ་ཚ་གདབ་པ་སོགས་བྱས་ལ། ལུས་གསར་
9-2-57b


པ་དེ་ཉིད་ཀྱིས་སེམས་ཅན་གྱི་དོན་རྒྱ་ཆེན་པོ་བྱའོ། །ཞེས་བླ་མ་རྣམས་འཆད་དོ། །རྒྱུད་དང་འགྲེལ་པ་ཁུངས་ཐུབ་ཀྱི་ལུགས་ཀྱི་དེ་འདྲ་མི་དགོས་པའི་གྲོང་དུ་འཇུག་ལུགས་བཤད་དོ། །རང་གི་ལུས་ལས་རྣམ་ཤེས་བཏོན་ནས་གཞན་གྱི་གྲོང་དུ་འཇུག་པ་
འདི་ལ། འཕོ་བ་ལ་གསུངས་པ་ལྟར་ལྷ་གསོད་པ་དང༌། མི་གསོད་པར་འགྲོ་བའི་རྣམ་གཞག་མ་གསུངས་ཤིང༌། འདི་དུས་ལ་བབ་ནས་འཆི་བ་ཡང་མིན་ལ། དུས་མིན་དུ་རང་གིས་རང་བསད་པའི་ཉེས་དམིགས་གསུངས་པ་ཡང་འདི་ལ་མི་སྣང་བས་འཆི་སྲིད་
མཚན་ཉིད་པ་མིན་ནོ། །དེ་མིན་པའི་རྒྱུ་མཚན་གྱིས་ཕ་རོལ་གྱི་གྲོང་དུ་འཇུག་པ་དེ་ཡང༌། མངལ་སྐྱེས་སོགས་བཞི་པོ་གང་གིའང་སྐྱེ་བ་འཛིན་ཚུལ་མེད་པས། སྐྱེ་སྲིད་མཚན་ཉིད་པའང་མིན་ནོ། །དེའི་ཕྱིར་འདི་ནས་རྣམ་ཤེས་འཐོན་ནས་ཕ་རོལ་གྱི་གྲོང་དུ་མ་
ཞུགས་པའི་བར་ཡོད་ཀྱང༌། བར་སྲིད་མཚན་ཉིད་པའང་མིན་ནོ། །དེས་ན་ལུས་སྔ་མ་ལ་བརྟེན་པའི་ཆོས་ཀྱི་དྲན་པ་ལ་སོགས་པ་སྔ་མ་དོར་བའི་རྒྱུ་མཚན་གྱིས་ཉམས་པ་ཡང་མེད་དོ། །འདི་འདྲ་བའི་རྣམ་གཞག་རྣམས་ལེགས་པར་ཤེས་པ་ལ་ནི། དཔལ་འདུས་
པའི་སྒྱུ་ལུས་ཀྱི་མན་ངག་རྣམས་ལེགས་པར་ཤེས་དགོས་པར་སྣང་ངོ༌། །རྣམ་ཤེས་རང་གཞན་ལ་འཇུག་པ་གཉིས་གསུངས་ཀྱང༌། གཉིས་པ་བླ་མ་རྣམས་ཀྱིས་མ་བཤད་པར་སྣང་བས་འདིར་མ་བྲིས་སོ། །གཉིས་པ་ལམ་ལ་བོགས་འབྱིན་པའི་ཐབས་སྤྱོད་
པ་ནི། ཚེ་འདིར་མཆོག་འགྲུབ་པ་ལ་སྤྱོད་པ་དགོས་ལ། འདི་ལ་ཡང་བསྐྱེད་རིམ་པའི་སྤྱོད་པ་དང༌། རྫོགས་རིམ་པའི་སྤྱོད་པ་གཉིས་དང༌། དེ་རེ་རེ་ལ་ཡང་སྤྲོས་བཅས་དང༌། སྤྲོས་མེད་དང༌། ཤིན་ཏུ་སྤྲོས་མེད་ཀྱི་སྤྱོད་པ་གསུམ་བྱེད་པར་སྒྲོན་གསལ་ལས་གསུངས་
9-2-58a


སོ། །དེ་ལ་སྤྱོད་པ་ཞེས་པའི་དོན་ནི། རང་བཞིན་ཡོངས་སུ་ཤེས་པའི་སྒོ་ནས་འདོད་ཡོན་སྤྱི་དང༌། ཁྱད་པར་རིག་མའི་འདོད་ཡོན་ལ་ལོངས་སྤྱོད་པས། དེ་ཁོ་ན་ཉིད་ཀྱི་རྟོགས་པ་ཕུལ་དུ་ཕྱིན་པར་འགྲོ་བ་ཅིག་གོ། དེའི་ཕྱིར་ཤིན་ཏུ་
སྤྲོས་མེད་ཀྱི་སྤྱོད་པ་ནི། ཡེ་ཤེས་ཀྱི་ཕྱག་རྒྱའི་རིག་མའི་འདོད་ཡོན་ལ་ལོངས་སྤྱོད་པ་ཡིན་ཞིང༌། སྤྱོད་པ་གཞན་གཉིས་ནི་ལས་ཀྱི་ཕྱག་རྒྱའི་འདོད་ཡོན་ལ་ལོངས་སྤྱོད་པའོ། །དེ་དག་ཀྱང་གླུ་གར་ལ་སོགས་པའི་བྱ་བའི་སྤྲོས་པ་ཤིན་ཏུ་རྒྱས་པ་དང༌། དེ་
བསྡུས་ནས་འབྲིང་དུ་གྱུར་བ་དང༌། ཕྱིའི་བྱ་བའི་སྤྲོས་པ་ཀུན་བཞག་པའི་དབང་གིས་གསུམ་དུ་ཕྱེ་བའོ། །བྱེད་པའི་དུས་ནི་སྒྱུ་ལུས་སྒྲུབ་པའི་མགོ་རྩོམ་པའི་དུས་དང༌། སྒྱུ་ལུས་གྲུབ་ནས་འོད་གསལ་སྦྱོང་བའི་དུས་དང༌། སློབ་པའི་ཟུང་འཇུག་ཐོབ་ནས། མི་སློབ་
པའི་ཟུང་འཇུག་ཐོབ་པའི་ཕྱིར་དུ་བྱེད་པའི་དུས་གསུམ་མོ། །འདི་རྣམས་འདིར་སྨོས་པ་ནི་མན་ངག་གི་གནད་ཚང་བ་ལ་འདི་རྣམས་ཀྱང་དགོས་སོ། །ཞེས་ཁ་བསྐང་བ་དང༌། དེ་དག་གི་བག་ཆགས་གཞག་པའི་ཕྱིར་བྱས་ཀྱི། རྒྱ་ཆེར་ནི་ཚིག་མངས་སུ་དོགས་
པས་མ་བྲིས་ཏེ། ཤེས་པར་འདོད་ན་འདུས་པའི་མན་ངག་ལས་བཙལ་བར་བྱའོ། །གསུམ་པ་འབྲས་བུ་མངོན་དུ་བྱེད་པའི་ཚུལ་ནི། སློབ་པའི་ཟུང་འཇུག་ཐོབ་པ་ན། འོད་གསལ་བསྒོམས་པས་གཉིས་སྣང་འཁྲུལ་བའི་བག་ཆགས་སྦྱངས་ནས།
ཆོས་སྐུ་མཐར་ཐུག་པ་མངོན་དུ་གྱུར་པའི་ཚེ། སློབ་པའི་ཟུང་འཇུག་སྒྱུ་མའི་སྐུ། མི་སློབ་པའི་ཟུང་འཇུག་གི་སྐུར་འགྱུར་ཞིང༌། འཁོར་བ་ཇི་སྲིད་པར་སྐུ་དེ་གཉིས་ལས་མི་གཡོ་བར་བཞུགས་སོ། །དེ་འདྲ་བའི་དག་པ་གཉིས་ལྡན་གྱི་ཡུལ་གྱི་འོད་གསལ་
9-2-58b


ནི། འདུས་མ་བྱས་པའི་ཆོས་ཀྱི་སྐུ་དང༌། ཡུལ་ཅན་གྱི་འོད་གསལ་ནི་ཡེ་ཤེས་ཆོས་ཀྱི་སྐུ་དང༌། བདེ་བ་ཆེན་པོའི་སྐུ་ཞེས་ཀྱང་བྱའོ། །དེའི་རྟེན་གཟུགས་ཀྱི་སྐུ་རླུང་སེམས་ཙམ་ལས་གྲུབ་པ་ནི་ལོངས་སྐུ་ཡིན་ལ། སྐུ་དེ་གཉིས་ངོ་བོ་གཅིག་ལ་
ལྡོག་པ་ཐ་དད་ཙམ་ཡིན་ཞིང༌། གཟུགས་སྐུ་དེ་ལ་གཉིས་སུ་མེད་པའི་ཡེ་ཤེས་ཀྱི་སྐུ་ཞེས་ལན་དུ་མར་གསུངས་པས། གཟུགས་སྐུ་སངས་རྒྱས་ཀྱི་སས་མ་བསྡུས་པར་གདུལ་བྱའི་རྒྱུད་ཀྱིས་བསྡུས་པ་དང༌། ཤེས་པ་ལས་ངོ་བོ་ཐ་དད་པའི་བེམས་
པོར་འདོད་པ་དང༌། འབྲས་བུའི་སྐབས་སུ་ཡེ་ཤེས་མེད་པ་སོགས་སུ་སྨྲས་པ་ནི། ལེགས་པར་སྨྲས་པ་མིན་པར་ཤེས་པར་བྱའོ། །དེ་འདྲ་བའི་ཟུང་འཇུག་གི་སྐུ་དེས་མཆོག་གི་སྤྲུལ་པའི་སྐུ་ལ་སོགས་པའི་སྤྲུལ་པ་དུ་མ་ཞིག་མཛད་དོ། །འདིའི་ཀ་དཔེ་
ཙ་བའི་སྡོམ་སྔ་མ་ཡིན་ཟེར་བ་དང༌། ཀ་དཔེ་ཕྱི་མ་ཡིན་ཟེར་བ་གཉིས་འདུག་པའི་སྔ་མ་ལ། མི་མཐུན་པ་ཆེར་ཡོད་པ་གཉིས་སྣང་ཞིང༌། ཕྱི་མ་ལ་མར་པས་མཛད་པ་ཡིན་ཟེར་བའི་འགྲེལ་པ་ཅིག་ཀྱང་སྣང་མོད་ཀྱང༌། འདུས་པའི་མན་ངག་མར་པས་མཛད་
ཟེར་བ་སོགས་ཁ་གཡར་མང་པོ་སྣང་བས། མཐའ་གཅིག་ཏུ་ཡིད་ཆེས་པ་དཀའ་བར་སྣང་ངོ༌། །ཡང་མར་པས་མཛད་ཟེར་བའི་ཚིགས་བཅད་དང༌། ཚིག་རྐང་གཉིས་གཅིག་ཏུ་བཟུང་བའི་ཚིག་རྐང་བརྒྱད་མ་ཞེས་པ་གཅིག་དང༌། ཆོས་དྲུག་རྡོ་རྗེའི་མགུར་ཞེས་པ་
གཉིས་ལ་ནི། གདམས་ངག་གི་ས་བོན་ཙམ་མ་གཏོགས་པ་ནུས་པ་ལྷག་པོ་བཏོན་པ་མི་འདུག་ལ། ཁྱད་པར་དུ་གཏེར་ནས་བཏོན་པ་ཡིན་ཟེར་བའི་ཆོས་དྲུག་གི་མན་ངག་མང་པོ་འདུག་པ་ལ་ནི་ཡིད་བརྟན་ཡོད་སྙམ་པ་མི་སྣང་ངོ༌། །དེ་ལྟར་ན་རྗེ་མར་པ་ནས་
9-2-59a


རྔོག་སྟོན་དང༌། མཚུར་སྟོན་དང༌། རྗེ་བཙུན་མིད་ལ་ལ་བརྒྱུད་པ་གསུམ་དང༌། མིད་ལ་ནས་ཆོས་རྗེ་སྒམ་པོ་བ་དང༌། རས་ཆུང་པའི་ཕྱོགས་ནས་བརྒྱུད་པ་གཉིས་དང༌། སྒམ་པོ་བ་ནས་བརྒྱུད་པ་སོ་སོར་གྱེས་པ་མང་པོའི་གདམས་པ་ཕལ་
མོ་ཆེའི་རྣམ་གཞག་རྣམས་ཀྱི་མི་འདྲ་བའི་ཁྱད་པར་མང་པོ་སྣང་བ་རྣམས་ཁོང་དུ་ཆུད་པར་བྱས་ཤིང༌། གཏུམ་མོའི་སྐོར་རྣམས་ཏེ་ལོ་པ་ལ་སློབ་དཔོན་ཙརྱ་པ་ཞེས་པ་ནག་པོ་སྤྱོད་པའི་བཀའ་བབས་ཡིན་ཟེར་བ་སྣང་བས། གདམས་ངག་སྔར་ཡོད་ལ་གཞི་བྱས་
ནས་བསྣན་དགོས་པ་དང༌། གསལ་དུ་བཏང་དགོས་པ་རྣམས། སམ་བྷུ་ཊཱའི་དཔྱིད་ཐིག་དང༌། ནག་པོ་སྤྱོད་པའི་དཔྱིད་ཐིག་ལ་བརྟེན་ནས་བཤད། སྒྱུ་ལུས་དང༌། འོད་གསལ་གྱི་སྐོར་རྣམས་འདུས་པའི་མན་ངག་ཡེ་ཤེས་སྙིང་པོས་བསྟན་པ་ལས། རྙེད་པར་འདུག་
པས་གསང་འདུས་ལ་བརྟེན་ནས་བཤད་དགོས་པ་རྣམས། མར་ལུགས་ཀྱི་འདུས་པའི་གདམས་ངག་ལ་གཞི་བྱས་ནས། འཕགས་པ་ཡབ་སྲས་ཀྱི་གཞུང་ལ་བརྟེན་ནས་བཤད། འཕོ་བ་དང་གྲོང་འཇུག་གདན་བཞི་ལ་བརྟེན་ཟེར་བ་ནི། དེ་ཁོ་ནར་མ་ཟད་སམ་
བྷུ་ཊ་དང༌། རྡོ་རྗེ་མཁའ་འགྲོ་སོགས་རྒྱུད་སྡེ་མང་པོ་ལ་བརྟེན་པ་ཡང་གོ་དགོས་པས། དེ་གཉིས་ཀྱི་སྤྱི་པའི་གོ་བསྐྱེད་པའི་ཚུལ་ཡང་བཤད་པས། ཤིན་ཏུ་ཡིད་ཆེས་པར་བྱའོ། །སྨྲ་བ་ཟླ་མེད་ཐུབ་པའི་དབང་པོ་ཡིས། །འགྲོ་བའི་དོན་དུ་གསུངས་པའི་གསུང་རབ་ནི། །
ཀུན་གྱི་མཆོག་ནི་རྣལ་འབྱོར་བླ་མེད་ཀྱི། །རྣལ་འབྱོར་མ་ཡི་རྒྱུད་དང་ཕ་རྒྱུད་ཡིན། །མ་རྒྱུད་ལ་བརྟེན་ཨ་ཐུང་སྲོག་རྩོལ་གྱི། །ཙཎྜ་ལི་ལ་གནད་དུ་བསྣུན་པ་ལས། །གཉུག་མ་ལྷན་སྐྱེས་ཡེ་ཤེས་མཚོན་པའི་ཐབས། །འདི་ཉིད་གཙོ་བོར་རྩལ་དུ་བཏོན་པ་ལས། །
9-2-59b


དཔལ་ལྡན་འདུས་པའི་སྒྱུ་ལུས་འོད་གསལ་དང༌། །རྡོ་རྗེ་གདན་བཞིའི་འཕོ་བ་གྲོང་འཇུག་ཀྱང༌། །དེ་ལ་བརྟེན་ནས་ཇི་བཞིན་སྐྱེད་བྱེད་པ། །གྲུབ་ཆེན་ཏེ་ལོ་ནཱ་རོའི་གདམས་པ་མཆོག །དཔལ་ལྡན་ནཱ་རོ་ཆོས་དྲུག་ཅེས་གྲགས་པ། །གངས་རིའི་ཁྲོད་འདིར་སྐལ་ལྡན་
མཐའ་ཡས་ལ། །ཟབ་མོ་རྡོ་རྗེ་ཐེག་པའི་དགའ་སྟོན་མཆོག །ཀུན་ནས་སྩོལ་བར་མཛད་པའི་གདམས་པ་འདི། །སྔོན་གྱི་བསོད་ནམས་ཆེན་པོའི་མཐུས། །ཡངས་པའི་སྲིད་ལ་དབང་སྒྱུར་ཞིང༌། །སྐྱབས་གསུམ་གཙུག་གི་རྒྱན་འཛིན་པ། །མི་དབང་
གྲགས་པའི་མཚན་ཅན་དང༌། །དེའི་གཅུང་ཡངས་པའི་རྣམ་དཔྱོད་ཀྱིས། །ལུང་གི་བསྟན་པའི་དེ་ཉིད་གཟིགས། །ཟབ་མོའི་མངོན་རྟོགས་ཚོགས་ཀྱིས་འབྱོར། །ཆོས་རྗེ་བསོད་ནམས་མཚན་ཅན་གྱིས། །རིན་ཆེན་ས་ལེ་སྦྲམ་མང་གི། མཎྜལ་བཅས་ཏེ་བསྐུལ་
བ་དང༌། །ད་དུང་ལམ་བཟང་འདི་ལ་ནི། །མོས་པ་ཤིན་ཏུ་མང་བའི་ཕྱིར། །གཞན་ལ་ཕན་པར་འགྱུར་སྙམ་ནས། །བདག་གི་འབད་པས་འདི་བརྩམས་སོ། །དམིགས་པ་སྐྱོང་ཚུལ་གསལ་ལ་འདྲིལ། །སོ་སོའི་གོ་བ་དམིགས་ཕྱེད་ཅིང༌། །དེ་ཡང་ཡིད་ཆེས་གཞུང་
དང་འབྲེལ། །འདི་གསུམ་འདི་ཡི་ཁྱད་པར་རོ། །ཟབ་མོའི་གནས་ནི་མཐོང་བར་དཀའ། །སོ་སོ་སྐྱེ་བོའི་བློ་མིག་ཞན། །དེ་ཕྱིར་ནོངས་པ་གང་མཆིས་པ། །དཔའ་བོ་མཁའ་འགྲོས་བཟོད་པ་མཛོད། །ལེགས་པར་བཤད་པའི་དགེ་བ་ཡིས། །འགྲོ་ཀུན་བླ་མེད་
ཐེག་འཇུག་ཅིང༌། །ལམ་བཟང་འདི་ཡང་རྒྱས་གྱུར་ཅིག །ཅེས་ཟབ་ལམ་ནཱ་རོའི་ཆོས་དྲུག་གི་སྒོ་ནས་འཁྲིད་པའི་རིམ་པ། ཡིད་ཆེས་གསུམ་ལྡན་ཞེས་བྱ་བ་འདི་ནི། མིའི་དབང་པོ་ཆེན་པོ་གྲགས་པ་རྒྱལ་མཚན་པའི་བཀས་སྐུལ་ཞིང༌། ཆོས་ཀྱི་
9-2-60a


རྗེ་བསོད་ནམས་རྒྱལ་མཚན་པའི་གསུང་གིས་ཡང་ཡང་དུ་ནན་ཏན་དུ་མཛད་དེ། གཏུམ་མོ་ལ་སོགས་པའི་གནད་རྣམས་ལེགས་པར་ཐོན་པ་དང༌། ཅུང་ཟད་རྣམ་པར་དབྱེ་དགོས་པ་ཐུན་མོང་བ་དང༌། ཐུན་མོང་མ་
ཡིན་པའི་ཚུལ་རྣམས་སོ་སོར་ཕྱེ་བ་ཅིག་གྱིས་ཞེས་བསྐུལ་བའི་དོན་དུ་དང༌། སྲོལ་འདི་ཕྱོགས་འདིར་འཕྲིན་ལས་ཤིན་ཏུ་ཆེ་བར་བྱུང་འདུག་ནའང༌། ད་ལྟ་དར་རྒྱས་ཆེ་རྒྱུ་མི་འདུག་ཅིང༌། འོན་ཀྱང་ཕྱོགས་མོས་བྱེད་པ་ཤིན་ཏུ་མང་བར་འདུག་
པ་ལ་ཕན་པའི་བསམ་པ་རྣམ་པར་དག་པས་ཀུན་ནས་བསླངས་ནས། མང་དུ་ཐོས་པའི་དགེ་སློང་སྤོང་བ་པ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་བའི་ཡི་གེ་པ་ནི་དཀའ་
བཞི་པ་རིན་ཆེན་དཔལ་ལོ།། དགེ་ལེགས་འཕེལ།།    །།
9-2-60b


empty page
9-3-1a


༄༅། །ནཱ་རོའི་ཆོས་དྲུག་གི་དམིགས་སྐོར་ལག་ཏུ་ལེན་ཚུལ་བསྡུས་པ་རྗེའི་གསུང་བཞིན་སེམས་དཔའ་ཆེན་པོ་ཀུན་བཟང་བས་བཀོད་པ་བཞུགས་སོ། །
9-3-1b


༄༅། །རྗེ་བཙུན་དམ་པ་རྡོ་རྗེ་འཆང་དང་དབྱེར་མ་མཆིས་པ་རྣམས་ཀྱི་ཞབས་ཀྱི་པདྨོ་ལ་གུས་པ་ཆེན་པོས་ཕྱག་འཚལ་ལོ། །འདིར་ཟབ་ལམ་ནཱ་རོའི་ཆོས་དྲུག་ཅེས་གྲགས་པའི་གདམས་
ངག་འཆད་པ་ལ་གཉིས། ཁྱད་པར་གྱི་སྔོན་འགྲོ་དང༌། དེ་ལ་བརྟེན་ནས་ལམ་ཇི་ལྟར་བསྒོམ་པའོ། །དང་པོ་ལ་གཉིས་ཡོད་པའི་རྡོ་རྗེ་སེམས་དཔའི་སྒོམ་བཟླས་ནི། ཐོག་མར་སྐྱབས་འགྲོ་སེམས་བསྐྱེད་རྒྱུད་
དང་འདྲེས་ངེས་ཤིག་བྱ། དེ་ནས་རང་གི་སྤྱི་བོར་པཾ་ལས་པདྨ་དཀར་པོ། ཨ་ལས་ཟླ་བའི་དཀྱིལ་འཁོར་གྱི་སྟེང་དུ། ཧཱུཾ་ལས་རྡོ་རྗེ་རྩེ་ལྔ་པ་དཀར་པོ་ལྟེ་བ་ལ་ཧཱུཾ་གིས་མཚན་པ། དེ་ལས་འོད་ཟེར་འཕྲོས་དོན་གཉིས་
བྱས། ཚུར་འདུས་ཡོངས་སུ་གྱུར་པ་ལས་རྡོ་རྗེ་སེམས་དཔའ་སྐུ་མདོག་དཀར་པོ་གཡས་རྡོ་རྗེ། གཡོན་དྲིལ་བུ་འཛིན་པ། ཡུམ་རྡོ་རྗེ་བསྙེམས་མ་དཀར་མོ་གྲི་གུག་དང་ཐོད་པ་འཛིན་པས་འཁྱུད་པ། རིན་པོ་
ཆེའི་རྒྱན་སྣ་ཚོགས་པས་སྤྲས་པ། མཚན་དང་དཔེ་བྱད་དུ་ལྡན་པ། རྡོ་རྗེའི་སྐྱིལ་དཀྲུང་གིས་བཞུགས་པ། དེའི་ཐུགས་ཀར་ཟླ་བའི་སྟེང་དུ་ཧཱུཾ་དཀར་པོ། དེ་ལས་འོད་ཟེར་འཕྲོས་རང་འདྲའི་ཡེ་ཤེས་པ་སྤྱན་དྲངས་
9-3-2a


པ་ལ་མཆོད་པ་ལྔས་མཆོད་ཛཿཧཱུཾ་བཾ་ཧོཿ དགུག་གཞུག་བཅིང་མཉེས་པར་བྱ། ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་དབང་གི་ལྷ་རྣམས་སྤྱན་དྲངས་པ་ལ་མཆོད་ནས། དེ་
བཞིན་གཤེགས་པ་ཐམས་ཅད་ཀྱིས་མངོན་པར་དབང་བསྐུར་དུ་གསོལ་ཞེས་གསོལ་བ་བཏབ་པས། དེ་བཞིན་གཤེགས་པ་རྣམས་ཀྱིས་དབང་བསྐུར་བའི་དགོངས་པ་མཛད། ཡུམ་རྣམས་ཀྱིས་རིན་པོ་ཆེའི་
བུམ་པ་ཡེ་ཤེས་ཀྱི་བདུད་རྩིས་གང་བ་ཐོགས་ནས། ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །ཨོཾ་སརྦ་ཏ་ཐཱ་ག་
ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་པས་དབང་བསྐུར། ལུས་ཡེ་ཤེས་ཀྱི་བདུད་རྩིས་གང༌། མི་བསྐྱོད་པས་དབུ་བརྒྱན། བཅོམ་ལྡན་འདས་རྡོ་རྗེ་སེམས་དཔའ་བདག་གཞན་ཐམས་ཅད་ཀྱི་སྡིག་སྒྲིབ་དང༌། 
དམ་ཚིག་ཉམས་ཆགས་ཐམས་ཅད་དག་པར་མཛད་དུ་གསོལ་ཞེས་གསོལ་བ་བཏབ་པས། ཐུགས་ཀའི་ཧཱུཾ་ལས་འོད་ཟེར་འཕྲོས་སེམས་ཅན་ཐམས་ཅད་ལ་ཕོག །དེ་དག་གི་སྡིག་སྒྲིབ་ཉེས་ལྟུང་ཐམས་ཅད་
9-3-2b


དག་པར་བྱས། ཕྱོགས་བཅུའི་སངས་རྒྱས་སྲས་བཅས་ཐམས་ཅད་ལ་མཆོད་པ་ཕུལ། དེ་རྣམས་ཀྱི་སྐུ་གསུང་ཐུགས་ཡོན་ཏན་འཕྲིན་ལས་ཐམས་ཅད་འོད་ཟེར་གྱི་རྣམ་པར་བསྡུས་ནས་ཐུགས་ཀའི་ཧཱུཾ་ལ་ཐིམ་པས་གཟི་བརྗིད་དང་མཐུ་སྟོབས་
ཕུན་སུམ་ཚོགས་པར་གྱུར། ཧཱུཾ་གི་མཐར། ཨོཾ་བཛྲ་ཧེ་རུ་ཀ་ས་མ་ཡ། མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་ཏིཥྛ། དྲི་དྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ༌། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲི་
ཡཾ། ཀུ་རུ་ཧཱུཾ་ཧ་ཧ་ཧ་ཧ་ཧོཿ བྷ་ག་ཝན། བཛྲ་ཧེ་རུ་ཀཿ མཱ་མེ་མུཉྩ། ཧེ་རུ་ཀ་བྷ་བ། མ་ཧཱ་ས་མ་ཡ་སཏྭ་ཨཱཿ ཡིག་འབྲུ་ལས་འོད་ཟེར་འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་སྲས་བཅས་ལ་མཆོད་པ་བསམ་
གྱིས་མི་ཁྱབ་པ་ཕུལ། སྐུ་གསུང་ཐུགས་ཀྱི་བྱིན་རླབས་ཐམས་ཅད་བསྡུས་ཏེ་ཡིག་འབྲུ་ལ་ཐིམ། ཡིག་འབྲུ་ལས་བདུད་རྩིའི་ཆུ་རྒྱུན་དཀར་པོ་བྱུང༌། ཡབ་ཡུམ་གྱི་སྦྱོར་མཚམས་ལས་བབས་ནས་རང་གི་སྤྱི་བོ་ཚངས་པའི་བུ་ག་ནས་ཞུགས་ཏེ། སྒོ་
གསུམ་གྱི་སྡིག་སྒྲིབ་ཐམས་ཅད་དབང་པོའི་སྒོ་དང་བ་སྤུའི་བུ་ག་ནས་ནག་ཕུངས་ཀྱིས་འཐོན། སྡིག་སྒྲིབ་སངས་ཀྱིས་དག །ལུས་ཐམས་ཅད་ཡེ་ཤེས་ཀྱི་བདུད་རྩིའི་རྒྱུན་གྱིས་དཀར་མེར་གྱིས་གང༌། རྟོགས་པ་དང་ཡོན་ཏན་བདག་གཞན་ཐམས་
ཅད་ལ་སྐྱེས་པར་བསམ་ཞིང་ཡི་གེ་བརྒྱ་པ་ཅི་མང་བཟླས་པའི་རྗེས་སུ། བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་
9-3-3a


ཉིད་ཅན། །འགྲོ་བའི་གཙོ་བོ་བདག་ལ་སྐྱོབས། །ཞེས་གསོལ་བ་བཏབ་པས། རྡོ་རྗེ་སེམས་དཔའི་ཞལ་ནས་རིགས་ཀྱི་བུ་ཁྱོད་ཀྱི་སྡིག་སྒྲིབ་དང༌། དམ་ཚིག་གི་ཉམས་ཆགས་ཐམས་ཅད་དག་གོ་ཞེས་གསུངས་ནས་རང་
ལ་ཐིམ་པས། རང་གི་སྒོ་གསུམ་དང༌། རྡོ་རྗེ་སེམས་དཔའི་སྐུ་གསུངས་ཐུགས་དབྱེར་མེད་དུ་གྱུར། བླ་མའི་རྣལ་འབྱོར་སྒོམ་པ་ནི། མདུན་གྱི་ནམ་མཁར་རིན་པོ་ཆེའི་ཁྲི་སེང་གེས་བཏེག་པའི་སྟོང་ན་པད་ཉིའི་གདན་ལ། ངོ་བོ་རང་གི་བླ་མ། རྣམ་པ་རྡོ་རྗེ་འཆང་སྐུ་
མདོག་སྔོན་པོ་ཞལ་གཅིག་ཕྱག་གཉིས་པ། གཡས་རྡོ་རྗེ་གཡོན་དྲིལ་བུ་འཛིན་པས་རང་འདྲའི་ཡུམ་ལ་འཁྱུད་པ། ལྷ་རྫས་ཀྱི་གོས་ཀྱི་སྟོད་གཡོགས་དང་སྨད་གཡོགས་ཅན། རིན་པོ་ཆེའི་རྒྱན་གྱིས་བརྒྱན་པ། ཞབས་རྡོ་རྗེའི་སྐྱིལ་ཀྲུང་དུ་བཞུགས་
པ། འོད་ཟེར་རྣམ་པ་ལྔ་རབ་ཏུ་འབར་བའི་སྤྱི་བོར་ཟླ་བ་ལ་ཨོཾ་དཀར་པོ། མགྲིན་པར་པདྨ་ལ་ཨཱཿདམར་པོ། སྙིང་གར་ཉི་མ་ལ་ཧཱུཾ་སྔོན་པོ་འོད་ཟེར་འཕྲོ་བ། ཧཱུཾ་ལས་འོད་ཟེར་འཕྲོས་པས། རྡོ་རྗེ་འཆང་ནས་བཟུང་སྟེ་བླ་མ་བརྒྱུད་པ་རྣམས་དང༌། ཡི་དམ་
གྱི་ལྷ་ཚོགས་རྣམས་སྤྱན་དྲངས་ཏེ་ཐིམ། དེ་ལ་མཆོད་པ་འབུལ་བ་ལ། མཎྜལ་གྱི་མཆོད་པ་ནི། དྲི་བཟང་གིས་བྱུག་ཅིང་ཨོཾ་བཛྲ་བྷཱུ་མི་ཨཱཿཧཱུཾ་དབང་ཆེན་སེར་གྱི་ས་གཞི། ཨོཾ་བཛྲ་རེ་ཁེ་ཨཱཿཧཱུཾ་ལྕགས་རི་མུ་ཁྱུད། དབུས་སུ་རི་རབ། ཤར་
ལུས་འཕགས་པོ། ལྷོ་ཛམྦུ་གླིང༌། ནུབ་བ་ལང་སྤྱོད། བྱང་སྒྲ་མི་སྙན། ལུས་དང་ལུས་འཕགས། རྔ་ཡབ་དང་རྔ་ཡབ་གཞན། གཡོ་ལྡན་དང་ལམ་མཆོག་འགྲོ། སྒྲ་མི་སྙན་དང་སྒྲ་མི་སྙན་གྱི་ཟླ། གླང་པོ་རིན་པོ་ཆེ། ཁྱིམ་བདག་རིན་པོ་ཆེ། རྟ་མཆོག་
9-3-3b


རིན་པོ་ཆེ། བཙུན་མོ་རིན་པོ་ཆེ། དམག་དཔོན་རིན་པོ་ཆེ། འཁོར་ལོ་རིན་པོ་ཆེ། ནོར་བུ་རིན་པོ་ཆེ། གཏེར་ཆེན་པོ། ཉི་མ། ཟླ་བ། རྣམས་སོ་སོའི་རྣམ་པ་བཞིན་གསལ་བཏབ་ལ། བདག་གཞན་ལུས་ངག་ཡིད་གསུམ་དུས་གསུམ་ལོངས་སྤྱོད་དགེ་བའི་ཚོགས།
རིན་ཆེན་མཎྜལ་བཟང་པོ་ཀུན་བཟང་མཆོད་པའི་ཚོགས་བཅས་པ། །བློ་ཡིས་བླངས་ནས་བླ་མ་ཡི་དམ་དཀོན་མཆོག་རྣམས་ལ་འབུལ། །ཐུགས་རྗེའི་དབང་གིས་བཞེས་ལ་བདག་ལ་བྱིན་གྱིས་བརླབ་ཏུ་གསོལ། །ཞེས་དབུལ། གཞན་ཡང་མེ་ཏོག་སོགས་
ཕྱིའི་མཆོད་པ་དང༌། ནང་བདུད་རྩིའི་མཆོད་པ་དང༌། གསང་བའི་མཆོད་པས་ཀྱང་མཆོད་ལ། གང་གི་དྲིན་གྱིས་བདེ་ཆེན་གནས། །སྐད་ཅིག་གིས་ནི་ཐོབ་འགྱུར་བ། །བླ་མ་རིན་ཆེན་ལྟ་བུ་ཡི། །རྡོ་རྗེ་ཅན་ཞབས་པད་ལ་འདུད། །ཅེས་སོགས་ཀྱིས་བསྟོད་དེ། 
དེ་ནས་གུས་པ་ཆེན་པོས་ཐུན་མོང་དང་ཐུན་མོང་མ་ཡིན་པའི་ལམ་རྣམས་མྱུར་དུ་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། དེ་དག་གི་འགལ་རྐྱེན་ཞི་ཞིང་མཐུན་རྐྱེན་ཡིད་བཞིན་དུ་འགྲུབ་པར་བྱིན་གྱིས་བརླབ་ཏུ་གསོལ་ཞེས་གསོལ་བ་བཏབ་པས། དགྱེས་ཏེ་བླ་མའི་
སྤྱི་བོའི་ཨོཾ་དཀར་པོ་ལས་འོད་ཟེར་དཀར་པོ་འཕྲོས། རང་གི་སྤྱི་བོར་ཞུགས་པས་ལུས་ཀྱི་ནང་ཐམས་ཅད་འོད་ཟེར་དཀར་པོས་ཁེངས། ལུས་ཀྱི་དྲི་མ་སྦྱངས། བུམ་པའི་དབང་བསྐུར། སྐུ་རྡོ་རྗེའི་དངོས་གྲུབ་ཐོབ། མགྲིན་པའི་ཨཱཿདམར་པོ་ལས་འོད་ཟེར་དམར་
པོ་འཕྲོས། རང་གི་མགྲིན་པར་ཞུགས་ལུས་ཀྱི་ནང་ཐམས་ཅད་འོད་ཟེར་དམར་པོས་ཁེངས། ངག་གི་དྲི་མ་སྦྱངས། གསང་བའི་དབང་བསྐུར། གསུང་རྡོ་རྗེའི་དངོས་གྲུབ་ཐོབ་ཐུགས་ཀའི་ཧཱུཾ་མཐིང་ག་ལས་འོད་ཟེར་མཐིང་ག་འཕྲོས། རང་གི་སྙིང་གར་ཞུགས། 
9-3-4a


ལུས་ཀྱི་ནང་ཐམས་ཅད་འོད་ཟེར་མཐིང་གས་ཁེངས། ཡིད་ཀྱི་དྲི་མ་སྦྱངས། ཤེས་རབ་ཡེ་ཤེས་ཀྱི་དབང་བསྐུར། ཐུགས་རྡོ་རྗེའི་དངོས་གྲུབ་ཐོབ། སྐུའི་གནས་ཐམས་ཅད་ལས་འོད་ཟེར་སྣ་ཚོགས་འཕྲོས། རང་གི་ལུས་ཀྱི་སྒོ་ཐམས་
ཅད་ནས་ཞུགས། སྒོ་གསུམ་གྱི་སྒྲིབ་པ་ཕྲ་བ་སྦྱངས། དབང་བཞི་པ་བསྐུར། རྡོ་རྗེ་གསུམ་དབྱེར་མི་ཕྱེད་པའི་དངོས་གྲུབ་ཐོབ་པར་གྱུར། མདུན་གྱི་བླ་མ་རང་གི་སྤྱི་བོར་སྦྱན་དྲངས་ཏེ་སྤྱི་བོ་ནས་ཐིམ་པས་རང་གི་ལུས་གང་ཡིད་གསུམ་དང་བླ་མའི་སྐུ་གསུངས་ཐུགས་
དབྱེར་མེད་པར་གྱུར། དེ་ལ་བརྟེན་ནས་ལམ་ཇི་ལྟར་སྒོམ་པ་ལ་གཉིས་ཡོད་པའི་བསྐྱེད་རིམ་བསྒོམ་པ་ནི། ཨོཾ་སྭ་བྷཱ་བ་ཤུངྔྷཿ སརྦ་དྷ་རྨཱཿ སྭ་བྷཱ་བ་ཤུདྔྷོ྅་ཧཾ། སྟོང་པ་ཉིད་དུ་གྱུར། སྟོང་པའི་ངང་ལས་སྣ་ཚོགས་པདྨ་དང་ཉི་མའི་གདན་ལ་རང་ཉིད་སྐད་
ཅིག་གིས་བཅོམ་ལྡན་འདས་ཧེ་རུ་ཀ་སྐུ་མདོག་མཐིང་ག །ཞལ་བཞི་པའི་རྩ་ཞལ་ནག །གཡོན་ཞལ་ལྗང༌། རྒྱབ་ཞལ་དམར། གཡས་ཞལ་སེར་བ། ཞལ་རེ་རེའང་སྤྱན་གསུམ་གསུམ་པ། ཕྱག་བཅུ་གཉིས་པ་དཔྲལ་བར་རྡོ་རྗེ་རྩེ་ལྔ་པའི་ཕྲེང་བ་
འཛིན་པ། ཞབས་གཡས་བརྐྱང་པས་འཇིགས་བྱེད་ནག་པོ་ལག་པ་བཞི་པའི་དང་པོ་གཉིས་ཐལ་མོ་སྦྱར་བ། གཡས་ལྷག་མས་ཌཱ་མ་རུ་དང༌། གཡོན་ལྷག་མས་རལ་གྲི་འཛིན་པའི་མགོ་བོ་མནན་པ། གཡོན་བསྐུམ་པས་དུས་མཚན་མ་དམར་
མོ་ལག་པ་བཞི་པའི་དང་པོ་གཉིས་ཐལ་མོ་སྦྱར་བ། ལྷག་མ་གཉིས་ཐོད་པ་དང་ཁ་ཊྭཱཾ་ག་འཛིན་པའི་ནུ་མ་མནན་པ། གདན་གཉིས་ཀའང་གདོང་གཅིག་པ། མིག་གསུམ་པ། ཕྱག་རྒྱ་ལྔས་བརྒྱན་པའོ། །ཕྱག་དང་པོ་གཉིས་ཀྱིས་རྡོ་རྗེ་
9-3-4b


ཕག་མོ་ལ་འཁྱུད་པའི་གཡས་པས་རྡོ་རྗེ་རྩེ་ལྔ་པ་དང༌། གཡོན་པས་དྲིལ་བུ་བསྣམས་པ། དེའི་འོག་མ་གཉིས་ཀྱིས་གླང་པོ་ཆེའི་པགས་པ་དཀར་པོ་ཁྲག་དང་བཅས་པའི་ན་བཟའ། ཕྱག་གཡས་པས་ལག་པ་གཡོན་པ་དང༌། གཡོན་པས་རྐང་པ་གཡོན་
པའི་པགས་པ་རང་གི་རྒྱབ་ཏུ། སྡིགས་མཛུབ་དང་བཅས་པའི་ཕྱག་གིས་བརྒྱངས་ཏེ་འཛིན་པའི་སྡིགས་མཛུབ་ཀྱི་རྩ་གཉིས་སྨིན་མའི་ཐད་སོར་གནས་པ། གཡས་ཀྱི་གསུམ་པ་ན་ཌཱ་མ་རུ། བཞི་པ་ན་དགྲ་སྟ། ལྔ་པ་ན་གྲི་གུག །དྲུག་པ་ན་མདུང་རྩེ་གསུམ་
པ་བསྒྲེང་བ། གཡོན་པའི་ཕྱག་གསུམ་པ་ན་རྡོ་རྗེས་མཚན་པའི་ཁ་ཊཱཾ་ག །བཞི་པ་ན་ཁྲག་གིས་གང་བའི་ཐོད་པ། ལྔ་པ་ན་རྡོ་རྗེའི་ཞགས་པ་དྲུག་པ་ན་ཚངས་པའི་མགོ་བོ་གདོང་བཞི་པ་བསྣམས་ཤིང༌། སྣ་ཚོགས་རྡོ་རྗེས་མཚན་པའི་རལ་པའི་ཐོར་
ཅོག་ཅན། དབུ་རེ་རེ་ལ་རྡོ་རྗེ་ནག་པོའི་ཕྲེང་བ་སྟོད་སྨད་དུ་གནས་པ་གཉིས་ལ་བརྒྱུས་པའི་ཐོད་པ་སྐམ་པོ་ལྔ་ལྔའི་ཕྲེང་བས་བརྒྱན་པ། དབུའི་གཡོན་དུ་ཅུང་ཟད་ཡོ་བའི་ཟླ་བ་ཕྱེད་པ་འཕྱང་བ། ཞལ་རྣམ་པར་འགྱུར་པ། མཆེ་བ་བཞི་བཞི་གཙིགས་ཤིང་
འཇིགས་སུ་རུང་བ། སྒེག་པ་དཔའ་བ་མི་སྡུག་པ་སྟེ་སྐུའི་ཉམས་གསུམ་དང༌། རྒོད་དང་དྲག་ཤུལ་འཇིགས་སུ་རུང་བ་སྟེ་གསུང་གི་ཉམས་གསུམ་དང༌། སྙིང་རྗེ་དང་རྔམ་པ་དང་ཞི་བ་སྟེ་ཐུགས་ཀྱི་ཉམས་གསུམ་སྟེ། ཉམས་དགུ་དང་ལྡན་པ། སྟག་
གི་པགས་པའི་ཤམ་ཐབས་ཅན། མིའི་རྒྱུ་མ་ལ་བརྒྱུས་པའི་མགོ་བོ་རློན་པ་ལྔ་བཅུའི་ཕྲེང་བ་འཕྱང་བ། ཕྱག་རྒྱ་དྲུག་གིས་རྒྱས་བཏབ་པ། མི་རུས་ཀྱི་ཐལ་བས་ལུས་ཐམས་ཅད་ལ་བྱུགས་པའོ། །བཅོམ་ལྡན་འདས་ལ་མངོན་དུ་ཕྱོགས་པར་
9-3-5a


བཅོམ་ལྡན་འདས་མ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་མ་སྤྱན་གསུམ་པ་གཅེར་མོ་སྐྲ་གྲོལ་བ། ཐོད་པའི་དུམ་བུས་བརྒྱན་པའི་འོག་པག་ཅན། ཕྱག་གཡོན་པས་ཡབ་ཀྱི་མགུལ་པ་ནས་འཁྱུད་
པའི་ཐོད་པ་ན་བདུད་བཞི་ལ་སོགས་པའི་ཁྲག་གིས་གང་བ་བསྣམས་པ། གཡས་པས་ཕྱོགས་བཅུའི་གདུག་པ་ཅན་ཀུན་ལ་གྲི་གུག་དང་བཅས་པའི་སྡིགས་མཛུབ་ཀྱིས་བསྡིགས་པར་མཛད་པ། འཇིག་དུས་ཀྱི་མེ་ལྟར་འབར་བ། བྱིན་པ་གཉིས་
ཀྱིས་ཡབ་ཀྱི་བརླའི་སྟེང་ནས་ལེགས་པར་འཁྲིལ་བ། བདེ་བ་ཆེན་པོའི་རང་བཞིན་གྱི་ཐུགས་རྗེ་ཆེན་པོའི་བདག་ཉིད་ཅན། ཕྱག་རྒྱ་ལྔས་བརྒྱན་པ། མི་མགོ་སྐམ་པོ་ལྔའི་ཐོད་དང༌། མི་མགོ་སྐམ་པོ་ལྔ་བཅུའི་དོ་ཤལ་ཅན་ནོ། །རང་གི་སྤྱི་བོར་ཟླ་བ་
ལ་ཨོཾ་དཀར་པོ། མགྲིན་པར་པདྨ་ལ་ཨཱཿདམར་པོ། ཐུགས་ཀར་ཉི་མ་ལ་ཧཱུཾ་སྔོན་པོ། རང་གི་ཐུགས་ཀའི་ཧཱུཾ་ཡིག་ལས་འོད་ཟེར་འཕྲོས། བསྒོམས་པ་དང་འདྲ་བའི་ཡེ་ཤེས་པ་དང༌། དབང་གི་ལྷ་རྣམས་སྤྱན་དྲངས་པ་ལ། ཨོཾ་ཨརྒྷཾ་པྲ་ཏཱི་ཙྪ་སྭཱ་ཧཱ།
ཛཿཧཱུཾ་བཾ་ཧོཿ མི་བཞེད་པ་མེད་པར་དགྱེས་བཞིན་དུ་བཞུགས་པར་གྱུར། དེ་བཞིན་གཤེགས་པ་རྣམས་ཀྱིས་བདག་ལ་མངོན་པར་དབང་བསྐུར་དུ་གསོལ་ཞེས་གསོལ་བ་བཏབ་པས། ཇི་ལྟར་བལྟམས་པ་ཙམ་གྱིས་སོགས་དང༌། ཨོཾ་སརྦ་ཏ་ཐཱ་ག་ཏ་
སོགས་བརྗོད། སྤྱི་བོ་ནས་དབང་བསྐུར་བས་ལུས་གང་ཆུ་ལྷག་མ་ཡར་ལུད་པ་ལས་གཙོ་བོ་ལ་རྡོ་རྗེ་སེམས་དཔའ། ཕག་མོ་ལ་མི་བསྐྱོད་པས་དབུ་བརྒྱན། དབང་གི་ལྷ་རྣམས་རང་ལ་ཐིམ། བདག་བསྐྱེད་ལ་མཆོད་པ་འབུལ་བ་ནི། ཨོཾ་ཨརྒྷཾ་
9-3-5b


པྲ་ཏཱི་ཙྪ་སྭཱཧཱ། ཨོཾ་པཱ་དྱཾ་པྲ་ཏཱི་ཙྪ་སྭཱཧཱ། ཨོཾ་བཛྲ་པུཥྤེ་ཨཱཿཧཱུཾ་སྭཱཧཱ། ཨོཾ་བཛྲ་དྷཱུ་པེ་ཨཱཿཧཱུཾ་སྭཱཧཱ། ཨོཾ་བཛྲ་དཱི་པེ་ཨཱཿཧཱུཾ་སྭཱཧཱ། ཨོཾ་བཛྲ་གནྡྷེ་ཨཱཿཧཱུཾ་སྭཱཧཱ། ཨོཾ་བཛྲ་ནཻ་ཝི་དྱ་ཨཱཿཧཱུཾ་སྭཱ་ཧཱ། ཨོཾ་བཛྲ་ཤཔྟ་ཨཱཿཧཱུཾ་སྭཱཧཱ། ཨོཾ་ཧྲཱིཿཧ་ཧ་ཧུཾ་ཧཱུཾ་ཕཊ་ཨོཾ་ཨཱཿཧཱུཾ་གིས་ནང་
མཆོད་དབུལ། ཡབ་ཡུམ་སྙོམས་པར་ཞུགས་པས་བདེ་བ་ཆེན་པོ་སྐྱེས་ཏེ་ཉམས་སུ་མྱོང་བར་གྱུར། ཨོཾ་ཧྲཱིཿཧ་ཧ་ཧུཾ་ཧཱུཾ་ཕཊ། ཨོཾ་བཛྲ་བེ་རོ་ཙ་ནཱི་ཡེ་ཧུཾ་ཧཱུ་ཕཊ་ཕཊ་སྭཱ་ཧཱ། ཞེས་པས་བསྟོད་དེ། འཇོག་སྒོམ་ནི་རང་ཉིད་འཁོར་ལོ་བདེ་མཆོག་དངོས་ཡིན་
སྙམ་པའི་ང་རྒྱལ་དང༌། དེ་ལ་ཅི་གནས་བྱའོ། །བཟླས་པ་བྱ་ཚུལ་ནི། རང་གི་ཐུགས་ཀའི་ཧཱུཾ་ཡིག་གི་མཐར། ཨོཾ་ཧྲཱིཿཧ་ཧ་ཧུཾ་ཧཱུཾ་ཕཊ་ཀྱིས་བསྐོར་བ་ལ་བྲིས་པ་ལྟར་འདོན་པའི་དམིགས་པ་བྱ་སྟེ་བཟླའོ། །རྫོགས་རིམ་སྒོམ་པ་ལ་གཉིས་ཡོད་པའི་དང་པོ་
འཁྲུལ་འཁོར་དང་སྟོང་ར་སྒོམ་པ་ནི། རང་ཡི་དམ་ཡབ་ཡུམ་དུ་གསལ་བའི་ངང་ནས། བུམ་པ་ལྟར་དགང་བ་ནི། སྟན་བདེ་བ་ལ་སྐྱིལ་ཀྲུང་གང་བདེ་བྱས་ལ་རྐེད་པ་བསྲང༌། ལག་པ་གཉིས་པུས་མོ་ལ་དག་བ། རླུང་སྣ་བུག་གཡས་ནས་འཐེན་ཏེ་
གཡོན་དུ་བལྟས་ནས་དེ་ངོས་ཀྱི་སྣ་བུག་ནས་དལ་བུས་རིང་བར་ལྷག་མ་མེད་པར་བུད། ཡང་གཡོན་ནས་འཐེན་ནས་གཡས་སུ་བལྟས་ཏེ་དེ་ངོས་ཀྱི་སྣ་བུག་ནས་སྔར་བཞིན་དུ་བུད། དེ་ནས་དབུས་ནས་སྣ་བུག་གཉིས་ཀ་ནས་འཐེན་ཏེ་ཐད་ཀར་ལན་ཅིག་
སྔར་བཞིན་དུ་བུད། དེ་འདྲ་བའི་ཚུལ་གྱིས་སླར་ཡང་སུམ་ཚན་གཉིས་ཏེ་དགུ་ཕྲུགས་སུ་རླུང་རོ་བསལ་ཏེ། དེའང་ཕར་ལ་བུད་པ་དང་ཚུར་འདྲེན་པའི་དུས་གཉིས་ཀར་ཁ་ནས་འགྲོ་འོང་མེད་པར་བྱའོ། །དེ་ནས་ལུས་དྲང་པོར་བསྲང་སྟེ་ལག་པ་
9-3-6a


གཉིས་ཀྱི་མཐེ་བ་ཆེན་ནང་དུ་དགུག །ཐད་ཀ་ནས་རླུང་ཤིན་ཏུ་དལ་ལ་རིང་བར་ནང་དུ་རྔུབས་ཏེ་ལྟེ་འོག་ཙམ་དུ་མཆིལ་མ་སྒྲ་མེད་པར་མིད་ནས་ཆིར་གྱིས་མནན། དེའི་རྗེས་སུ་འོག་རླུང་ལྟེ་འོག་ཏུ་མི་དྲག་པ་ཞིག་
དྲངས་ཏེ་ཁ་སྦྱར་དུ་བཟུང༌། ཤེས་པ་ལྟེ་བའི་རྩ་འཁོར་གྱི་དུས་སུ་གཏད་ལ་ནུས་ཚད་དུ་འཛིན་ཅིང་རླུང་མི་ཐུབ་པ་ན་ཁ་ནས་ཡེ་མ་ཤོར་བར་སྣ་སྒོ་ནས་དལ་བུས་གཏོང་ངོ༌། །འོག་མ་ལྔ་ག་འདིའི་ངང་ནས་བྱེད་པ་ལ་འཁོར་ལོ་ལྟར་བསྐོར་བ་
ནི། རྐང་པ་སྐྱིལ་ཀྲུང་བཅས་པའི་རྐང་པ་གཡས་པའི་མཐེབ་ཆེན་ལག་པ་གཡས་པས་བཟུང༌། རྐང་པ་གཡོན་པའི་མཐེབ་ཆེན་ལག་པ་གཡོན་པས་བཟུང་ཞིང༌། རྐང་པ་དྲང་པོར་བསྲངས་ལ་ཕོ་བ་དང་རྐེང་པ་གཡས་སུ་ལན་གསུམ་
བསྐོར། དེ་བཞིན་དུ་གཡོན་དུའང་བསྐོར། དེ་ནས་གཡོན་ནས་གཡས་སུ་ཀྱོག་པ་དང༌། གཡས་ནས་གཡོན་དུ་ཀྱོག་པ་དང༌། མདུན་ནས་རྒྱབ་ཏུ་འཕུལ་བར་དང༌། རྒྱབ་ནས་མདུན་དུ་འཕུལ་བ་རེ་བྱའོ། །ལྕགས་ཀྱུ་ལྟར་དགུག་པ་ནི། ལག་པ་
གཉིས་རྡོ་རྗེ་ཁུ་ཚུར་བཅངས་ལ་སྙིང་ག་ནས་ཐད་ཀར་མདུན་ངོས་སུ་གཤིབས་ལ་ཤུགས་ཆེ་བར་བརྐྱང༌། དེ་ནས་གཡོན་ངོས་སུ་ལག་པ་གཉིས་བརྐྱང་བའི་གཡས་པ་སྔོན་ལ་དལ་བུས་ཤུགས་ཆེ་བར་གཡས་པའི་དཔུང་མགོ་བར་དུ་
དགུག་ལ་གྲུ་མོས་མཆན་དུ་བརྡབ། དེ་ནས་གཡོན་པའང་སྔ་མ་བཞིན་དུ་དཔུང་མགོ་གཡོན་པ་བར་དུ་དགུག་ལ་བརྡབ། སླར་ཡང་ལག་པ་གཉིས་རྡོ་རྗེ་ཁུ་ཚུར་བཅངས་པ་སྙིང་ག་ནས་ཐད་ཀར་མདུན་ངོས་སུ་ཤུགས་ཆེ་བར་གཤིབས་
9-3-6b


ལ་བརྐྱང༌། དེ་ནས་གཡས་སུ་ལག་པ་གཉིས་བརྐྱང་ནས་སྔ་མ་བཞིན་བཀུག་པ་བརྡབ་བོ། །རྡོ་རྗེ་བསྡམས་པའི་ཕྱག་རྒྱ་གནམ་དུ་འཕང་ཞིང་འོག་ཏུ་བསྐྱུར་བ་ནི། པུས་མོ་གཉིས་བཙུགས་ཏེ་ལུས་བསྲངས་ནས་ལག་པ་གཉིས་ཀྱི་སོར་མོ་རྣམས་ཕྱི་རུ་བསྣོལ་
བའི་ལག་ལྕགས་བཅུག་པ་ཡར་ལ་རིམ་པ་བཞིན་སྤྱི་བོའི་བར་དུ་ཤུགས་ཆེ་བར་བརྡེག །དེ་ནས་ལག་པ་གཉིས་ཁ་སྦུབ་ལ་རིམ་པ་བཞིན་ཤུགས་ཆེ་བར་ས་ལ་དབབ་ལ་བསྐྱུར་རོ། །ཁྱི་མོའི་སྐྱུག་ཚུལ་གྱིས་ལུས་མདའ་ལྟར་བསྲང་བ་
ནི། པུས་མོ་བཙུགས་ལ་ལུས་བསྲང༌། དེ་ནས་ལག་པ་གཉིས་ས་ལ་བཞག་པའི་བར་དུ་མགོ་པའི་བཞག་པ་རིམ་གྱིས་གྱེན་དུ་ཤུགས་ཆེ་བར་བཏེག་ནས་ལུས་དྲང་པོར་བསྲངས་ལ། སླར་ཡང་ལག་པ་གཉིས་རིམ་གྱིས་ཕབ་པའི་བར་དུ་
མགོ་བོ་བཞག་ནས། ཧ་ཞེས་སྐྱུག་སྟངས་བྱས་པའི་མཐར། ལངས་ལ་རྐང་པ་གཉིས་ལན་གསུམ་གསུམ་སྤྲུག་གོ། མགོ་ལུས་སྤྲུག་ཅིང་ཚིགས་པ་བགྲང་བ་ནི། ལག་པས་ཕན་ཚུན་གྱི་སོར་མོའི་ཚིགས་པ་འཐེན་པའི་རྗེས་ལ། མགོ་
དང་ལུས་པོ་སྤྲུག་ཅིང་ལག་པ་གཉིས་ཕན་ཚུན་དུ་གཉེས་ཏེ་བཀྲུ་བའི་ཚུལ་བྱེད་པའོ། །སྟོང་ར་སྒོམ་པ་ནི། རང་ཡི་དམ་དུ་གསལ་བའི་སྤྱི་གཙུག་ནས་རྐང་མཐིལ་གྱི་བར་དུ་ཕྲུ་མ་ཕུས་བཏབ་པ་ལྟར་སྟོང་སང་ངེ་བ་ལ་དམིགས་པ་གཏད་ནས་
དེ་ལ་སེམས་བརྟན་བརྟན་དུ་བསྒོམ་པའོ། །གཉིས་པ་དེའི་རྗེས་སུ་ལམ་དངོས་སྒོམ་པའི་རིམ་པ་ལ་གཉིས། ལམ་དངོས་ཀྱི་དོན་དང༌། ལམ་གྱི་ཡན་ལག་འཕོ་བ་དང་གྲོང་འཇུག་གོ། །དང་པོ་ལ་གཉིས། སྲོག་དབུ་མར་བཙུད་ནས་དགའ་
9-3-7a


བཞི་བསྐྱེད་པ་དང༌། དེ་ལ་བརྟེན་ནས་སྒྱུ་མ་དང་འོད་གསལ་སྒོམ་ཚུལ་ལོ། །དང་པོ་ལ་གཉིས། ནང་གི་རྐྱེན་གཏུམ་མོ་སྒོམ་པ་དང༌། ཕྱིའི་རྐྱེན་ལས་ཀྱི་ཕྱག་རྒྱ་ལ་བརྟེན་པའོ། །དང་པོ་ལ་གཉིས། གཏུམ་མོ་བསྒོམས་ནས་སྲོག་དབུ་
མར་གཞུག་པ་དང༌། བཙུད་པ་ལ་བརྟེན་ནས་དགའ་བཞི་བསྐྱེད་ཚུལ་ལོ། །དང་པོ་ལ་གཉིས། གཏུམ་མོ་སྒོམ་ཚུལ་དང༌། དེ་ལྟར་བསྒོམས་པས་སྲོག་དབུ་མར་ཞུགས་གནས་ཐིམ་གསུམ་བྱེད་ཚུལ་ལོ། །དང་པོ་ལ་གསུམ་ཡོད་པའི་དང་པོ་རྩ་གསལ་
བཏབ་ནས་བསྒོམ་པ་ནི། མདུན་གྱི་ནམ་མཁར་རྩ་བའི་བླ་མ་བརྒྱུད་པའི་བླ་མ་དང་བཅས་པ་དཔའ་བོ་མཁའ་འགྲོའི་ཚོགས་ཀྱིས་བསྐོར་བ་དམིགས་ལ། ལུས་ལོངས་སྤྱོད་བལྟོས་པ་མེད་པར་མཆོད་པར་དབུལ་ཞིང༌། སྤྱིར་གསོལ་བ་མང་དུ་གདབ་ཁྱད་པར་དུ། རླུང་
བདེ་བར་བྱིན་གྱིས་བརླབ་ཏུ་གསོལ། རྩ་འཇམ་པར་བྱིན་གྱིས་བརླབ་ཏུ་གསོལ། བདེ་སྟོང་གི་ཉམས་རྟོགས་ཁྱད་པར་ཅན་མྱུར་དུ་སྐྱེ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་ཏུ་གདབ། དེ་ནས་སེམས་ཅན་ཐམས་ཅད་ཀྱི་དོན་དུ་རྡོ་རྗེ་འཆང་གི་གོ་འཕང་
ཐོབ་པར་བྱ་བའི་ཕྱིར་ཙཎྜ་ལི་ཉམས་སུ་མྱོང་བར་བྱའོ་སྙམ་དུ་བསམ། དེ་ནས་རང་ཡི་དམ་གྱི་ལྷར་གསལ་བའི་ངང་ནས་བསམ་གཏན་གྱི་སྟེགས་བུ་གཞུག །སྒོམ་ཐག་གྱོན། རྐང་པ་རེ་མིག་ཏུ་བསྣོལ། སྒལ་ཚིགས་དྲང་པོར་བསྲང༌། མགྲིན་པ་ཅུང་
ཟད་བཀུག །མིག་སྣ་རྩེར་དབབ། ལྕེ་རྩེ་ཅུང་ཟད་རྐན་ལ་སྦྱར། སོ་དང་མཆུ་རང་ལུགས་པར་བཞག །ལུས་སེམས་ཅུང་ཟད་བསྒྲིམ། རོ་སྟོད་འཕེལ་ཀ་བསྐྱེད། མཉམ་གཞག་གི་ཕྱག་རྒྱ་ལྟེ་འོག་ཏུ་བཅར་བར་བྱས་ལ། རྩ་གསུམ་གསལ་གདབ་པ་
9-3-7b


ནི། ལྟེ་བའི་བུག་པའི་ཐད་ནས་འོག་ཏུ་སོར་བཞི་སོང་བར་ལུས་ཀྱི་ནང་གི་སྒལ་ཚིགས་ངོས་ལ་ཉེ་བར་དབུས་སུ་རྩ་ཨ་བ་དྷཱུ་ཏཱི། གཡས་སུ་རོ་མ། གཡོན་དུ་རྐྱང་མ་གསུམ་སྲོག་ཤིང་གི་ཚུལ་དུ་སྤྱི་གཙུག་བར་དུ་གཤིབས་ནས་གནས་ཤིང༌། ལྟེ་འོག་སོར་
བཞིའི་རྩ་དབུ་མའི་མར་སྣའི་ནང་དུ་རོ་རྐྱང་གི་སྣ་གཉིས་གུག་ནས་ཡོད་པར་བསམ། དེ་ནས་འཁོར་ལོ་བཞི་གསལ་འདེབས་པ་ནི། ལྟེ་བ་སྤྲུལ་པའི་འཁོར་ལོ་ཕྱི་དབྱིབས་ཨེ་གྲུ་གསུམ་གྱི་རྣམ་པ་ཅན་རྩ་འདབ་ཀྱི་གྲངས་རེ་བཞི་པ། ཁ་དོག་དམར་པོ་ཁ་གྱེན་
དུ་ཕྱོགས་པའི་རྣམ་པ་ཅན་དང༌། སྙིང་ག་ཆོས་ཀྱི་འཁོར་ལོ་ཕྱི་དབྱིབས་བཾ་ཡིག་ཟླུམ་པོའི་རྣམ་པ་ཅན། རྩ་འདབ་ཀྱི་གྲངས་བརྒྱད་པ་ཁ་དོག་དཀར་པོ་ཁ་འོག་ཏུ་ཕྱོགས་པ་ཅན་དང༌། མགྲིན་པ་ལོངས་སྤྱོད་ཀྱི་འཁོར་ལོ་ཕྱི་དབྱིབས་བཾ་ཡིག་ཟླུམ་པོའི་རྣམ་
པ་ཅན། རྩ་འདབ་ཀྱི་གྲངས་བཅུ་དྲུག་པ་ཁ་དོག་དམར་པོ་ཁ་གྱེན་དུ་ཕྱོགས་པའི་རྣམ་པ་ཅན་དང༌། སྤྱི་བོ་བདེ་ཆེན་གྱི་འཁོར་ལོ་ཕྱི་དབྱིབས་ཨེ་གྲུ་གསུམ་གྱི་རྣམ་པ་ཅན། རྩ་འདབ་ཀྱི་གྲངས་སོ་གཉིས་པ་ཁ་དོག་སྣ་ཚོགས་པ་ཁ་འོག་ཏུ་ཕྱོགས་པའི་
རྣམ་པ་ཅན་དུ་བསྒོམ། དེའང་ཐོག་མར་རྩ་གསུམ་གསལ་གདབ་ལ་གསུམ་པོ་ཉིད་ལ་སེམས་བཟུང༌། འདི་ལ་སྙིང་ག་ཡན་ཆད་ལ་གསལ་འདེབས་ཐེབས་རེ་དང་སེམས་ཅུང་ཟད་དེ་འཛིན་པ་མ་གཏོགས་ཤས་ཆེར་ལྟེ་བའི་རྩ་གསུམ་འདུས་པའི་
ནང་དང༌། ལྟེ་འོག་སོར་བཞིའི་རྩ་གསུམ་འདུས་པའི་དབུ་མའི་ནང་ཁོ་ནར་སེམས་བཟུང་ངོ༌། །གཉིས་པ་ཡི་གེ་གསལ་བཏབ་ནས་བསྒོམ་པ་ནི། ཡི་གེ་འགོད་པ་རྒྱས་བསྡུས་གཉིས་ཡོད་པའི་རྒྱས་པ་ནི། འཁོར་ལོ་བཞིའི་ལྟེ་བདག་འདབ་མ་གཉིས་ཀ་
9-3-8a


ལ་ཡི་གེ་བཀོད་ནས་བསྒོམ་པ་ཡིན་ཡང་འདིར་བསྡུས་པའི་དབང་དུ་བྱེད་པ་ནི། འཁོར་ལོ་བཞིའི་ལྟེ་བར་ཡི་གེ་བཞི་བསྒོམ་པ་ཡིན་ལ། དེའི་ཚུལ་ནི། ལྟེ་བ་སྤྲུལ་པའི་འཁོར་ལོའི་དབུས་ཀྱི་རྩ་དབུ་མ་སྒལ་པའི་ནང་ངོས་ལ་ཉེ་
བའི་ནང་ཁོ་ནར་ཟླ་གདན་ཆུང་དུ་ཞིག་གི་སྟེང་དུ་ཡི་གེ་ཨ་ཐུང་ཤད་ཀྱི་རྣམ་པ་འདྲ་བ་མདོག་དམར་པོ་ཡུངས་ཀར་གྱི་ཚད་ཙམ་ཞིག་བསྒོམ། སྙིང་ག་ཆོས་ཀྱི་འཁོར་ལོ་འདབ་མ་བརྒྱད་པའི་དབུས་ཀྱི་རྩ་དབུ་མ་ནུ་མ་གཉིས་ཀྱི་དབུས་དྲང་ཐད་ནས་སྐལ་བ་
ལ་ཉེ་བར་ཡོད་པའི་དྷཱུ་ཏཱིའི་ནང་ཁོ་ནར་ཟླ་གདན་ལ་ཧཱུཾ་ཡིག་སྔོན་པོ་མགོ་ཐུར་དུ་བལྟ་བ་བྱང་ཆུབ་ཀྱི་སེམས། ཁ་བ་ལྟ་བུ་འཛག་པ། ཡུངས་ཀར་གྱི་ཚད་ཙམ་ཞིག་བསྒོམ། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག་པའི་དབུས་ཀྱི་རྩ་དབུ་མ་
མགྲིན་པར་དབུས་ནས་ནང་གི་སྒལ་པ་ངོས་ལ་ཉེ་བའི་དྷཱུ་ཏཱིའི་ནང་ཁོ་ནར་ཟླ་གདན་ལ་ཨོཾ་ཡིག་དམར་པོ་མགོ་གྱེན་དུ་བལྟ་བ་ཡུངས་ཀར་གྱི་ཚད་ཙམ་ཞིག་བསྒོམ། སྤྱི་བོ་བདེ་ཆེན་གྱི་འཁོར་ལོ་རྩ་འདབ་སོ་གཉིས་པའི་དབུས་ཀྱི་རྩ་དབུ་མའི་ནང་ཁོ་
ནར་ཟླ་གདན་ལ་ཧཾ་ཡིག་དཀར་པོ་མགོ་ཐུར་དུ་བལྟ་བ་ཡུངས་ཀར་གྱི་ཚད་ཙམ་ཞིག་བསྒོམ། ཡི་གེ་བཞི་གའི་མགོར་ཟླ་ཕྱེད་ཐིག་ལེ་ནཱ་ད་དང་བཅས་པ་དང༌། བྱང་ཆུབ་ཀྱི་སེམས་བ་མོ་འཛག་པ་ལྟ་བུའི་རྣམ་པ་ཅན་དུ་བསྒོམས་ན་བདེ་བ་ཆེ་བའི་གནད་ཡོད་ལ། 
ཤིན་ཏུ་འཚེར་བའི་འོད་ཅན་བསྒོམས་ན་བྱིང་བ་གཅོད་སླ་ཞིང་ཏིང་ངེ་འཛིན་གསལ་ཉམས་ཆེའོ། །ཡི་གེ་དེ་རྣམས་ལ་སེམས་འཛིན་ཚུལ་ནི་ཚུར་ངོས་ནས་ཕར་ལ་བལྟ་བའི་རྣམ་པ་ཅན་མི་བྱ་བར་སེམས་ཡི་གེའི་ནང་དུ་འདྲེས་པ་བཞིན་བྱ་སྟེ་
9-3-8b


བསྐྱང་ལ། སེམས་ཀྱི་འཛིན་སྟངས་ཧ་ཅང་གྲིམས་དྲགས་པ་དང༌། ཧ་ཅང་ལྷོད་དྲགས་པས་བྱིང་རྒོད་བསྐྱེད་པས་དེ་གཉིས་སྤངས་ནས་སེམས་ཀྱི་འཛིན་སྟངས་ཅུང་ཤུགས་ཆེ་བར་གཟུང་བར་བྱའོ། །དེའང་སྙིང་ག་ཡན་ཆད་ཀྱི་ཡི་གེ་གསུམ་ལ་དང་པོ་ཡུན་
ཐུང་བ་རེ་བཟུང་ལ། ཤས་ཆེར་ལྟེ་བའི་ཨ་ཐུང་ལ་སེམས་བཟུང༌། དམིགས་པ་ཕྲ་མོ་ལ་གང་བྱས་ཀྱང་སེམས་འཛིན་པ་དཀའ་བར་སྣང་ན་ཅུང་ཟད་ཆེ་རུ་བཏང་ལ་དེ་ལ་བརྟན་པ་ན་དམིགས་པ་ཕྲ་མོར་བྱས་ལ་སེམས་བཟུང་ངོ༌། །གཉིས་པ་རླུང་བུམ་
པ་ཅན་བསྒོམས་པའི་ཚུལ་ནི། བླ་མ་རྣམས་ཀྱི་མན་ངག་ལས། །རྔུབ་དང་དགང་དང་གཞིལ་བ་དང༌། །མདའ་ལྟར་འཕང་དང་རྣམ་བཞིའོ། །ཞེས་འབྱུང་བ་ལྟར་ནང་དུ་རྔུབ་པ་ན་ཁ་ནས་མི་རྔུབ་པར་སྣ་བུག་ནས་དྲག་པོ་རིང་བར་རྔུབ་
ཅིང༌། ནང་དུ་རྔུབ་པའི་མཚམས་ནས་ཕྱིར་མི་གཏོང་བར་ནང་དུ་མནན་པས་རོ་རྐྱང་གི་རྩ་གཉིས་ནས་རླུང་སིར་རི་རི་སོང་བས་རྒྱུ་མ་ཕུས་བཏབ་པ་བཞིན་རྩ་གཉིས་པོ་ཁྲིག་གིས་གང་བར་བསམ་མོ། །རྩ་གཉིས་ཁེངས་པའི་མཚམས་ནས་
རྩ་གཉིས་ཀྱི་རླུང་ཐམས་ཅད་དབུ་མའི་ནང་དུ་ཕྱུར་གྱིས་ཆུད་པར་བསྒོམས་ལ་མཆིལ་མ་ཞིག་སྒྲ་མེད་དུ་མིད་དེ་སྟེང་རླུང་ཨ་ཐུང་གི་སར་མནན། དེ་ནས་འོག་སྒོ་གཉིས་ནས་འོག་རླུང་འཇམ་པོ་ཞིག་ཨ་ཐུང་གི་སར་འཐེན་ལ། རླུང་གཉིས་ཁ་སྦྱར་
བའི་ཨ་ཐུང་ལ་དམིགས་པ་གཏད་དེ་རླུང་ཇི་ཙམ་ཐུབ་པའི་ཚོད་ཙམ་དུ་བཟུང༌། མི་ཐུབ་བཞིན་དུ་མི་གནོན་པར་རླུང་ཕྱིར་གཏོང་བ་ན། རྩ་དབུ་མའི་ནང་ན་ཡར་བདེ་རིལ་ལི་ལི་འགྲོ་བར་བསམ་གྱི་སྤྱི་གཙུག་ནས་འཐོན་པར་མི་བསམ་ལ། མགྲིན་པ་
9-3-9a


དང་སྙིང་ག་ཡན་ཆད་ཁོངས་པ་ལ་དམིགས་པ་གཏོད་པ་སོགས་མི་བྱའོ། །རླུང་འཁོར་ལོའི་ལྟེ་བར་རང་ཤུགས་ཀྱིས་གནས་པ་བྱུང་བའི་མཚམས་ནས་ཡུན་བསྲིང་པ་དང་ཇེ་དྲག་ཏུ་གནོན་པའང་བྱ་ལ། དེ་གོང་དུ་བར་
མ་ཆད་དུ་ཧ་ཅང་རྒྱུན་རིང་མི་བྱ་བར་སྐབས་སུ་ངལ་བསོ་ཞིང་བསྒོམ་མོ། །དེ་ལྟར་བུམ་པ་ཅན་སྒོམ་པ་བྱང་བའི་མཚམས་སུ་བུམ་པ་ཅན་གྱི་རླུང་སྦྱོར་བསྒོམ་བཞིན་པའི་ངང་ནས་ལྟེ་བ་དང་སྙིང་ག་དང་མགྲིན་པ་དང་སྤྱི་བོའི་རྩ་འཁོར་གྱི་ལྟེ་བར་
སྔར་བཞིན་ཨཾ་ཧཱུཾ་ཨོཾ་ཧཾ་བཞི་གསལ་བཏབ་ལ། དེ་ནས་གསང་གནས་ཀྱི་འཁོར་ལོར་གནས་པའི་རླུང་གིས་མེ་བསྐུལ་བའི་གཏུམ་མོའི་རང་བཞིན་གྱི་ཨཾ་ཡིག་འབར་བའི་མེའི་འོད་ཟེར་དྷཱུ་ཏཱིའི་ནང་ནས་གྱེན་དུ་སོང་བས་ཧཾ་ཨོཾ་ཧཱུཾ་གསུམ་ཞུ་
བ་ལྟེ་བར་ཨཾ་ཡིག་ལ་བབས་ཏེ་དེ་དང་དབྱེར་མེད་དུ་གྱུར་ནས་ལྷན་ཅིག་སྐྱེས་དགའི་རང་བཞིན་གྱི་ཨཾ་ཡིག་ཏུ་བལྟས་ལ་སེམས་བཟུང་ངོ༌། །དེ་ལ་སེམས་ཟིན་པ་ན་ཨཾ་ཐུང་དེ་ལས་གཏུམ་མོའི་མེ་ཕྲ་མོ་མེ་ལྕེ་གཅིག་ཏུ་འབར་བ་ལྟར་གནས་པར་
བསྒོམ་མོ། །དེའི་འོད་ཀྱིས་འཁོར་ལོ་གོང་མའི་གནས་ནས་བྱང་ཆུབ་ཀྱི་སེམས་བཞུ་བའི་བདུད་རྩི་ཟགས་པས་ལྟེ་བའི་ཨཾ་ཡིག་གང་ཞིང་ཨཾ་ཡིག་དེ་ལ་སེམས་རྩེ་གཅིག་པའི་བརྟན་པ་ཐོབ་པའི་མཚན་མ་མཐོང་བ་དེ་སྲིད་དུ་བསྒོམ་མོ། །སེམས་
བརྟན་པ་ན་གཏུམ་མོའི་འོད་ཟེར་གྱིས་ལུས་ཀྱི་ཕྱི་ནང་དང་གནས་ཁང་སོགས་ཐམས་ཅད་ལག་མཐིལ་གྱི་སྐྱུ་རུ་ར་བཞིན་དུ་གསལ་བར་བསྒོམས་ལ། མེ་ཕྲ་ཞིང་མེ་ལྕེ་གཅིག་ཏུ་གྱུར་པ་ལ་སེམས་འཛིན་པ་གལ་ཆེའོ། །དམིགས་པ་དེ་ལྟར་
9-3-9b


བསྒོམས་པས་སྲོག་དབུ་མར་ཞུགས་གནས་ཐིམ་གསུམ་བྱེད་ཚུལ་ནི། ཐུན་འཁྱོངས་པའི་འོག་རང་གི་སྣ་བུག་གང་རུང་རེ་རེ་བར་རྒྱུ་བའི་འཕོས་མ་ཐག་པའི་སྐབས་ངོས་བཟུང་ལ། དེ་ནས་ལུས་གནད་དང་སེམས་ཀྱི་འཛིན་ལུགས་སྔར་བཞིན་བྱས་
པའི་མཐུས། རིང་པོར་མི་ཐོགས་པར་སྣ་སྒོར་བརྟགས་པ་ན་རླུང་མཉམ་རྒྱུར་ཐེངས་པ་དང་དེའང་ལན་རེ་རེ་གཉིས་གཉིས་ཙམ་ལ་ངེས་པ་མེད་ཀྱི་འགལ་རྐྱེན་གཞན་མེད་ན་ངེས་ཅན་དུ་ཐེངས་ཀྱིན་འདུག་པ་དང༌། མཉམ་རྒྱུའང་གང་རུང་ཞིག་དྲག་ལ་
ཅིག་ཤོས་ཞན་པ་མིན་པར་དྲག་ཞན་ཤིང་མཚུངས་སུ་རྒྱ་བ་འོང་བར་སྣང་ན། རྣལ་འབྱོར་དེའི་སྟོབས་ཀྱིས་སྲོག་དབུ་མར་འཛུད་ནུས་པ་ཞིག་ཏུ་འཇོག་ནུས་མོད་ཀྱང༌། ལན་ཅིག་ཚུད་ནས་གཡས་གཡོན་རེ་རེ་བར་མི་འཕོ་བ་ཡིན་ནོ། །དེ་ནི་
སྲོག་དྷཱུ་ཏཱིར་ཞུགས་པ་ཡིན་ལ། སྲོག་དྷཱུ་ཏཱིར་གནས་པའི་མཚམས་འདི་ནས་དྲིལ་ཏེ་བསྒོམ་པ་དང༌། སྣ་བུག་གི་རྒྱུ་བ་ཞན་དུ་སོང་བའི་མཐར་ཞིབ་ཏུ་བརྟགས་པ་ན། རྒྱུ་བ་ཕྲ་མོའང་ལྡོག་པ་ཞིག་འོང་ངོ༌། །དེ་ལ་རླུང་ཐིམ་དཀའ་སླ་གཉིས་ལས། ཐིམ་
དཀའ་ན་ཡུད་ཅིག་ལ་ལྟོ་བ་རླུང་གིས་ཁེངས་པ་འབྱུང་ཞིང༌། དེ་ན་ཞི་བར་འགྱུར་ལ། ཞི་མ་ཐག་ལྟེ་བ་དང་གསང་གནས་མེ་གནས་པའི་ཐད་ནས་དྲོད་ཁྱད་པར་ཅན་སྐྱེ་ཞིང༌། དེ་ནས་རིམ་གྱིས་ཞུ་བདེ་འདྲེན་ནོ། །རྟགས་སྔ་མ་གཉིས་ཀྱིས་ཐིམ་
པའི་རྟགས་འདི་འདྲེན་པ་མ་བྱུང་ན་སྣ་བུག་གི་རྒྱུ་བ་ཕྲ་མོའང་ལོག་པ་འདི་བྱིང་བ་ཕྲ་མོ་ལ་མཆོད་པར་བསགས་པས་བྱིང་བ་ཤས་ཆེ་བ་ཞིག་ལའང་འོང་ལ། རྩ་འཁོར་གྱི་ལྟེ་བར་གནད་དུ་བསྣུན་པ་ལ་མི་མཁས་པར་བུམ་པ་ཅན་མང་དུ་བསྒོམ་
9-3-10a


པར་བྱས་ཤིང༌། སྲོག་དྷཱུ་ཏཱིར་འཆིང་བར་ནི་མ་ནུས་པའི་རླུང་གནས་གཞན་དབྱེར་བ་ལའང༌། རླུང་འབྱུང་འཇུག་ཀྱང་མི་བྱེད་ཅིང༌། ནང་དུ་འཛིན་རྒྱུའང་མེད་པ་ཞིག་འོང་ལ། དེ་ནི་དྷཱུ་ཏཱིར་ཚུད་པ་དང་ཐིམ་པ་གང་ཡང་མིན་
པས་ཁྱད་པར་དེ་རྣམས་ལེགས་པར་ཕྱེད་པར་བྱའོ། །གཉིས་པ་བཙུད་པ་ལ་བརྟེན་ནས་དགའ་བཞི་སྐྱེ་ཚུལ་ལ་གསུམ་ཡོད་པའི་དང་པོ་རྟགས་འཆར་ཚུལ་དང་གཏུམ་མོ་སྦར་ཚུལ་ནི། ལྟེ་བའི་རྩ་འཁོར་གྱི་དབུས་སུ་དམིགས་ནས་རླུང་དབུ་མར་འཇུག་
པ་ལ་རྟགས་ལྔ་འཆར་བ་འོང་སྟེ། དེའང་ས་ཆུ་ལ་ཐིམ་པ་ན་སྨིག་རྒྱུ་ལྟ་བུར་ཆུ་མེར་རེ་སྣང་བ་དང༌། ཆུ་མེ་ལ་ཐིམ་པ་ན་དུ་བ་ལྟ་བུའི་སྣང་བ་སྔོ་མེར་རེ་བ་ཞིག་གིས་ཁེངས་པ་དང༌། མེ་རླུང་ལ་ཐིམ་པ་ན་སྲིན་བུ་མེ་ཁྱེར་འདྲ་བ་དམར་ཁྲ་ཁྲ་བ་མང་པོ་
ཞིག་གི་སྣང་བ་དང༌། ཀུན་རྟོག་གི་བཞོན་པའི་རླུང་སེམས་ལ་ཐིམ་པ་ན། རླུང་མེད་པའི་མར་མེ་འབར་བ་ལྟ་བུའི་སྣང་བ་འབྱུང་བས། སྣང་བ་དེ་བསྡུས་པའི་རྗེས་སུ་ཡིད་ངོར་གང་སྣང་ཐམས་ཅད་ནམ་མཁའ་གཡའ་དག་འདྲ་བ་ཞིག་འཆར་ཞིང༌། 
འདི་ལ་ཞིབ་བརྩིས་བྱས་ན་སྣང་བ་བཞི་འོང་སྟེ་འོད་གསལ་གྱི་སྐབས་སུ་འཆད་དོ། །སྨིག་རྒྱུའི་སྣང་བ་ལ་སོགས་པ་འདི་རྣམས་རླུང་དབུ་མར་སྡུད་པའི་ཐབས་མིན་པའི་སེམས་འཛིན་རྐྱང་པ་ཞིག་ལ་འོང་བར་སྣང་བས་རྟགས་སྔ་མ་རྣམས་
ཁྲིགས་ཆགས་བརྟན་པོར་འཆར་བ་དང་། དེ་ནས་ནམ་མཁའ་གཡའ་དག་གི་སྣང་བ་བར་མ་ཆད་དུ་འབྱུང་བ་དགོས་སོ། །གཏུམ་མོ་འབར་ཚུལ་ལ་དྷཱུ་ཏཱིའི་ནང་གི་གཏུམ་མོ་ཐོག་མར་ལྟེ་བ་དང་གསང་གནས་ནས་འབར་བ་དང༌། དྷཱུ་ཏཱིའི་ཕྱིའི་གཏུམ་
9-3-10b


མོ་ཕལ་པ་འབར་བ་གཉིས་འོང་བའི་ཕྱི་མས་བྱང་སེམས་བཞུ་བ་ལ་འཛག་པ་བསྲུང་བ་འོག་ནས་འཆད་པ་ལྟར་མྱུར་དགོས་ལ། སྔ་མ་ནི་བསྒྲུབ་བྱ་དངོས་ཀྱི་ཡིན་ཏེ། བཤད་རྒྱུད་རྡོ་རྗེ་ཕྲེང་བ་ལས། ཤེས་བྱ་དབུས་སུ་རླུང་རྒྱུ་བ། །མེ་སད་
བྱེད་པར་ཤེས་པར་བྱ། །ཞེས་དང༌། ཁ་སྦྱོར་ལས། ལས་ཀྱི་རླུང་གིས་བསྐུལ་བ་ཡིས། །ལྟེ་བའི་དཀྱིལ་འཁོར་དུ་ནི་འབར། །དཔྱོད་ཐོབ་པ་ཡི་མཆོག་ཤེས་པས། །ཞེས་གསུངས་པའི་ཕྱིར་རོ། །གཉིས་པ་བྱང་སེམས་བཞུ་བ་ལ་བརྟེན་ནས་དགའ་བཞི་
སྐྱེ་ཚུལ་ལ། ཡས་བབས་ཀྱི་དགའ་བ་བཞི་ནི། བྱང་སེམས་ཞུ་བ་སྤྱི་བོ་ནས་མགྲིན་པར་སླེབ་པ་ན་དགའ་བ་དང༌། མགྲིན་པ་ནས་སྙིང་གར་སླེབ་པ་ན་མཆོག་དགའ་དང༌། སྙིང་ག་ནས་ལྟེ་བར་སླེབ་པ་ན་ཁྱད་པར་གྱི་དགའ་བ་དང༌། ལྟེ་བ་ནས་ནོར་བུའི་
རྩེར་སླེབ་པ་ན་ལྷན་སྐྱེས་ཀྱི་དགའ་བ་སྐྱེ་བ་ཡིན་ལ། མས་བརྟན་གྱི་དགའ་བ་བཞི་ནི། བྱང་སེམས་ནོར་བུ་ནས་ལྟེ་བར་སླེབ་པ་ན་དགའ་བ་དང༌། ལྟེ་བ་ནས་སྙིང་གར་སླེབ་པ་ན་མཆོག་དགའ་དང༌། སྙིང་ག་ནས་མགྲིན་པར་སླེབ་པ་ན་ཁྱད་པར་གྱི་དགའ་བ་
དང༌། མགྲིན་པ་ནས་སྤྱི་བོར་སླེབ་པ་ན་ལྷན་སྐྱེས་ཀྱི་དགའ་བ་སྐྱེ་བ་ཡིན་ཏེ། རླུང་དབུ་མར་ཐིམ་པའི་དབང་གིས་བྱང་སེམས་ཞུ་བ་ཡིན་ནོ། །ནོར་བུའི་རྩེར་བཟུང་ཡང་ལྷན་སྐྱེས་ཀྱི་དགའ་བ་མ་རྫོགས་བར་དུ་ཕྱིར་མི་འཕོ་བ་ཡིན་ཏེ། དེའི་བར་དུ་བྱང་
སེམས་ཕྱི་རོལ་ཏུ་སྐྱོད་པར་བྱེད་པའི་རླུང་གི་འཇུག་པ་ཞི་བའི་ཕྱིར་རོ། །ནོར་བུར་ཐིག་ལེ་བཟུང་བའི་ལྷན་སྐྱེས་ཀྱི་བདེ་བ་རྫོགས་ནས་ཐོག་མའི་བར་རེ་ཞིག་ལ་ཐིག་ལེ་དབུ་མའི་ནང་ནས་ཡར་འདྲེན་པའི་དམིགས་པ་བྱའོ། །རླུང་དབུ་མར་ཐིམ་རིམ་མ་
9-3-11a


བྱུང་བར་ཞུ་བ་རིམ་ཅན་དུ་དལ་བུས་འོང་བ་ལ་ནི་རྩོལ་བ་ཤུགས་དྲག་པོ་མིན་པར་དམིགས་པས་སྤྱི་གཙུག་ཏུ་ལོག་པ་དང༌། དེ་ནས་རྩ་གནས་ཀུན་ཏུ་བཀྲམ་པའི་དམིགས་པ་བྱས་ན་དེ་གོམས་པའི་མཐར་ཞུ་བ་
ཆེན་པོའང་ལོག་པ་དང་དགྲམ་པར་ནུས་སོ། །དེ་ལྟ་མིན་པའི་ཞུ་བ་ཆེས་མྱུར་བར་འབབ་པ་ལ་ནི། རང་ལྷར་གསལ་བའི་ངང་ནས་རྐང་པ་སྐྱིལ་ཀྲུང་དང༌། ལག་པ་གཉིས་བྲང་གི་ཐད་དུ་བསྣོལ། མིག་གཉིས་གྱེན་ལ་དྲག་ཏུ་ལྡོག །རྐང་ལག་གི་སོར་
མོ་རྣམས་ལེགས་པར་བསྐུམ། སེམས་སྤྱི་གཙུག་གི་ཧཾ་ཡིག་མགོ་གྱེན་དུ་བསྟན་པ་ལ་དམིགས། ངག་ཏུ་ཧཱུཾ་རིང་པོ་དྲག་ཏུ་བརྗོད་པ་ཉེར་གཅིག་ཙམ་གྱི་བར་དུ་བྱས་ཏེ། གང་ནས་ལོག་པའི་གནས་དེ་ནས་རྒྱབ་གཞུང་ལ་ཉེ་བའི་ངོས་སུ་དབུ་མའི་
ནང་ནས་སྤྱི་གཙུག་ཏུ་སོང་བར་བསམ། མཐར་འཇམ་རླུང་བུམ་པ་ཅན་བཟུང་ལ་ལུས་མི་དྲག་པར་སྤྲུག་ཅིང་སེམས་ཀྱིས་བྱང་སེམས་རྣམས་རྩ་གནས་ཀུན་ཏུ་དགྲམ་པར་བསམ་པ་ལན་མང་དུ་བྱའོ། །གསུམ་པ་ལྷན་ཅིག་སྐྱེས་དགའི་ཡེ་ཤེས་
སྒོམ་ཚུལ་ལ། མཉམ་གཞག་ཏུ་སྐྱོང་ཚུལ་ནི། ཡས་བབས་ཀྱི་ལྷན་སྐྱེས་ཀྱི་དགའ་བ་དང༌། མས་བརྟན་གྱི་ལྷན་སྐྱེས་ཀྱི་དགའ་བ་གང་སྐྱེས་པའི་སྐབས་སུ། ལྟ་བའི་གོ་བ་ཡོད་ན་གང་ཟག་དང་ཆོས་རང་བཞིན་གྱིས་མ་གྲུབ་སྙམ་དུ་མ་ཡེངས་པར་
རྩེ་གཅིག་ཏུ་བཞག་སྟེ་བདེ་སྟོང་དབྱེར་མེད་བསྒོམ། ལྟ་བའི་གོ་བ་མེད་ནའང་བདེ་བ་དེ་ཉིད་ལ་ཅི་གནས་གནས་ཀྱི་བར་དུ་བསྐྱང་ངོ༌། །རྗེས་ཐོབ་ཏུ་སྐྱོང་ཚུལ་ནི། ལྷན་སྐྱེས་ཀྱི་དགའ་བ་ལས་ལངས་པའི་དུས་སུ་མཉམ་གཞག་གི་བདེ་སྟོང་དྲན་པར་
9-3-11b


བྱས་ནས་དེས་ཡུལ་སྣང་གང་ཤར་ཐམས་ཅད་ལ་བདེ་སྟོང་དབྱེར་མེད་ཡིན་སྙམ་དུ་རྒྱས་བཏབ་ནས་བསྒོམ་མོ། །དེ་ལྟར་མཉམ་རྗེས་ལ་སྐྱོད་པ་དང༌། སླར་ཡང་གཏུམ་མོའི་དམིགས་པ་དང་རླུང་སྦྱོར་བྱས་ཏེ། དགའ་བཞི་འདྲེན་པ་སྤེལ་མར་བྱའོ། །གཉིས་པ་
ཕྱིའི་རྐྱེན་ལས་རྒྱ་ལ་བརྟེན་ནས་བསྒོམ་པ་ནི། རྒྱུད་སྡེ་དང་གྲུབ་ཆེན་གྱི་གཞུང་ཁུངས་མ་ནས་བཤད་པའི་མཚན་ཉིད་ཚང་བ་ཞིག་མ་གཏོགས་གཞན་གྱིས་བྱས་ན་ངན་འགྲོའི་སྒོ་འབྱེད་པས་རེ་ཞིག་ལ་བཞག་གོ། །གཉིས་པ་དེ་ལ་བརྟེན་ནས་སྒྱུ་
མ་དང་འོད་གསལ་སྒོམ་ཚུལ་ལ་གཉིས་ཡོད་པའི་དང་པོ་གཏུམ་མོ་ལ་བརྟེན་ནས་ལམ་ལྷག་མ་བསྒོམ་པའི་སྤྱིའི་རྣམ་གཞག་ནི། མར་པའི་ཞལ་ནས། ཕ་རྒྱུད་གསང་བ་འདུས་པ་ཉན། སྒྱུ་ལུས་འོད་གསལ་གྱི་གདམས་ངག་ཐོབ། ཅེས་གསུངས་
པ་ལྟར་སྒྱུ་ལུས་དང་འོད་གསལ་གྱི་སྐོར་རྣམས་གསང་བ་འདུས་པ་ལ་བརྟེན་ཞིང༌། དེའང་འཕགས་པ་ཀླུ་སྒྲུབ་ཡབ་སྲས་ཀྱི་དགོངས་པ་ལྟར། རིམ་ལྔ་བསྡུས་པ་གསང་བ་ལས། རླུང་དབུ་མར་ཐིམ་པའི་དབང་གིས་སྣང་མཆེད་ཐོབ་གསུམ་གྱི་སེམས་
དབེན་རྫོགས་པར་སྐྱེས་པའི་རླུང་སེམས་ཙམ་ལས་སྒྱུ་ལུས་མཚན་ཉིད་པ་སྒྲུབ་པར་གསུངས་པ་བཞིན་དུ་མན་ངག་འདིར་ཡང་འོང་རྒྱུར་སྣང་བ་ནི་འདུས་པ་འཕགས་སྐོར་ལ་བརྟེན་ནས་ཤེས་དགོས་ལ། སྒྱུ་ལུས་མཚན་ཉིད་པའི་གོང་དུ་རྟགས་
ལྔའམ་བརྒྱད་འཆར་ཚུལ་ནི་སྔར་ཅུང་ཟད་བཤད་ལ་རྒྱས་པར་འོག་ཏུ་འཆད། སྒྱུ་ལུས་མཚན་ཉིད་པ་ནི། རིམ་ལྔ་ལས། རླུང་དང་ཡང་དག་ལྡན་པ་ཡི། །རྣམ་ཤེས་གསུམ་པོ་སླར་ཡང་ནི། །རྣལ་འབྱོར་པ་ཡི་ལུས་སུ་འགྱུར། །སྒྱུ་མའི་ལུས་
9-3-12a


ཞེས་དེ་ལ་བཤད། །ཅེས་གསུངས་པ་ལྟར་འབྱུང་བཞི་ཐིམ་པའི་རྟགས་བཞི་སྔོན་དུ་སོང་བའི་རྗེས་སུ་འོད་གསལ་ཉེར་ཐོབ་ཏུ་བསྡུས་པའི་རྣམ་ཤེས་གསུམ་པོའི་མཐའི་འོད་གསལ་གྱིས་ལྷན་ཅིག་བྱེད་རྐྱེན་དང༌། 
དེའི་བཞོན་པའི་སྲོག་འཛིན་གྱི་རླུང་གི་ཉེར་ལེན་ལ་བརྟེན་ནས་གཉུག་མའི་ལུས་དངོས་པོའི་སྟེང་དུ་ལྷའི་སྐུར་འགྱུར་བ་ལ་བྱའོ། །དེ་ཐོབ་ན་ཚེ་དེ་ལ་ངེས་པར་འཚང་རྒྱ་བ་དང༌། ནམ་མཁའ་མཛོད་ལ་མངའ་བརྙེས་པ་དང༌། སྐུའི་ཚད་དཔག་ཚད་བརྒྱའི་ཁྱོན་ལ་སོགས་
པའི་ཡོན་ཏན་དང་ལྡན་པའང་ཡིན་ཏེ། རིམ་ལྔ་ལས། བདག་ལ་བྱིན་རླབས་རིམ་ཐོབ་པའི། །གཙོ་བོ་སངས་རྒྱས་ཀུན་བདག་ཉིད། །ཚེ་འདི་ཉིད་དུ་སངས་རྒྱས་ནི། །ཐེ་ཚོམ་མེད་པར་ཐོབ་པར་འགྱུར། །ཞེས་དང༌། གནས་དང་གོས་དང་ཟས་ལ་སོགས། །
མཁའ་ལ་སྐད་ཅིག་དག་གིས་རྙེད། །ཅེས་དང༌། གསང་འདུས་རྩ་རྒྱུད་ལས། དཔག་ཚད་བརྒྱ་ཡི་ཁྱོན་ཙམ་དུ། །རྡོ་རྗེ་འབར་བའི་འོད་དག་གིས། །རྒྱན་རྣམས་ཀུན་གྱིས་བརྒྱན་པ་ཡིས། །ཞེས་པའི་འགྲེལ་པ་སྒྲོན་གསལ་ལས། དཔག་ཚད་
བརྒྱའི་ཁྱོན་ཙམ་དུ་རྒྱ་ཆེ་བའི་ཚད་དང་གྲངས་མེད་པའི་འཇིག་རྟེན་གྱི་ཁམས་རྡོ་རྗེ་འབར་བ་སྟེ་རང་གི་སྐུའི་འོད་ཀྱིས་སྣང་བར་བྱེད་པ་དང༌། མཚན་སོ་གཉིས་ལ་སོགས་པའི་རྒྱན་གྱིས་བརྒྱན་པར་བཤད་པའི་ཕྱིར་རོ། །སྒྱུ་ལུས་མཚན་ཉིད་པ་མ་
ཐོབ་ཀྱང་གཏུམ་མོ་ལ་སོགས་པའི་དམིགས་པ་ལ་བརྟེན་ནས་རླུང་དབུ་མར་ཐིམ་པའི་ལྷན་ཅིག་སྐྱེས་པའི་དགའ་བ་དང༌། ཐམས་ཅད་སྟོང་པའི་དཔེའི་འོད་གསལ་གྱི་མཐར་འདུན་པ་བཏང་བ་ན་རླུང་གི་སྟོབས་ཀྱིས་ལྷའི་སྐུར་ལྡང་བ་ནི་དཔེའི་སྒྱུ་
9-3-12b


ལུས་དང༌། དེའི་རྒྱུའི་འོད་གསལ་ནི་དཔེའི་འོད་གསལ་དུ་བྱའོ། །དེ་ལ་བརྟེན་ནས་ཆོས་སྐུ་ལོངས་སྐུ་སྤྲུལ་སྐུའི་བསྲེ་བ་སྐོར་གསུམ་བྱེད་ཚུལ་ནི། །རིམ་ལྔ་ལས། ཀུན་རྫོབ་བདེན་པ་སྒྱུ་མ་ཉིད། །ལོངས་སྤྱོད་རྫོགས་པའི་སྐུ་ཡང་དེ། །དེ་ཉིད་དྲི་ཟའི་
སེམས་ཅན་གྱུར། །ཞེས་གསུངས་པས་དེ་ལས་དཔགས་ནས། དོན་དམ་བདེན་པ་འོད་གསལ་ཉིད། །ཆོས་ཀྱི་སྐུ་ཡང་དེ་ལ་བྱ། །དེ་ཉིད་འཆི་བའི་ངོ་བོར་གྱུར། །ཞེས་པ་དང༌། ཕྲ་བའི་ལུས་ཀྱིས་སྣ་ཚོགས་པའི། །ལུས་ལ་འཇུག་པ་སྤྲུལ་པའི་སྐུ། །
དེ་ཉིད་སྐྱེ་བའི་ངོ་བོར་འགྱུར། །ཞེས་པ་གཉིས་ཀྱང་མཚོན་ནུས་ལ། དེ་དག་གི་དོན་རིམ་ལྔ་བསྡུས་པ་གསལ་བ་ལས། བར་དོ་རྣམ་གསུམ་བསྲེ་བར་བྱ། །ཞེས་གསུངས་པས་ཀྱང་། འཆི་བ་རྣམ་གསུམ་བསྲེ་བར་བྱ། །ཞེས་དང༌། སྐྱེ་བ་རྣམ་གསུམ་བསྲེ་
བར་བྱ། །ཞེས་པའང་མཚོན་ནུས་སོ། །དེ་ལ་འཆི་བ་གསུམ་ནི། སད་དུས་སུ་སྟོང་པ་བཞིའི་རིམ་པས་འོད་གསལ་སྒོམ་པ་ནི་ལམ་དུས་ཀྱི་འཆི་བ་དང༌། གཉིད་དུས་སུ་སྟོང་པ་བཞིའི་རིམ་པས་འོད་གསལ་སྒོམ་པ་ནི་གཉིད་དུས་ཀྱི་འཆི་བ་དང༌། 
འཆི་ཁར་སྟོང་པ་བཞིའི་རིམ་པས་འོད་གསལ་སྒོམ་པ་ནི་འཆི་དུས་ཀྱི་འཆི་བའོ། །བར་དོ་གསུམ་ནི། སད་དུས་ཀྱི་སྟོང་པ་བཞིའི་མཐར་རླུང་སྟོབས་ཀྱིས་ལྷའི་སྐུར་ལྡང་བ་ནི་སྒྱུ་མའི་ལོངས་སྐུའི་སད་དུས་ཀྱི་ལམ་གྱི་བར་དོ་དང༌། གཉིད་དུས་
ཀྱི་སྟོང་པ་བཞིའི་མཐར་རླུང་སྟོབས་ཀྱིས་རྨི་ལམ་ལྷའི་སྐུར་ལྡང་བའི་སྒྱུ་མ་ལོངས་སྐུ་ནི་རྨི་ལམ་གྱི་བར་དོ་དང༌། འཆི་བའི་སྟོང་པ་བཞིའི་མཐར་རླུང་སྟོབས་ཀྱིས་བར་དོའི་ལྷའི་སྐུར་ལྡང་བའི་སྒྱུ་མ་ལོངས་སྐུ་ནི་སྲིད་པ་བར་དོའོ། །སྐྱེ་བ་གསུམ་
9-3-13a


ནི། སད་དུས་སུ་རླུང་སྟོབས་ཀྱིས་ཟིན་པའི་ལྷ་སྐུ་ལས་ལངས་ནས་རྣམ་སྨིན་གྱི་ལུས་ལྟར་བསྒོམས་པའི་སྙིང་གར་འཇུག་པའི་སྤྲུལ་སྐུ་ནི་སད་དུས་ཀྱི་ལམ་གྱི་སྐྱེ་བ་དང༌། རྨི་ལམ་གྱི་རླུང་སྟོབས་ཀྱིས་
ཟིན་པའི་ལྷ་སྐུ་ལས་ལངས་ནས་རྣམ་སྨིན་གྱི་ལུས་ལྷར་བསྒོམས་པའི་སྙིང་གར་འཇུག་པའི་སྤྲུལ་སྐུ་ནི་རྨི་ལམ་སད་དུས་ཀྱི་སྐྱེ་བ་དང༌། བར་དོ་རླུང་སྟོབས་ཀྱིས་ཟིན་པའི་ལྷ་སྐུ་ལས་ལངས་ནས་སྐྱེ་གནས་བཞི་པོ་གང་རུང་གི་ལྷར་བསྒོམས་པའི་སྙིང་
གར་འཇུག་པའི་སྤྲུལ་སྐུ་ནི་སྐྱེ་སྲིད་ཀྱི་སྐྱེ་བའོ། །དེ་ལྟ་བུའི་སད་དུས་ཀྱི་འོད་གསལ་དང༌། གཉིད་དུས་ཀྱི་འོད་གསལ་དང༌། འཆི་ཁའི་འོད་གསལ་སྒོམ་པ་གསུམ་གའང་གཞིའི་འཆི་རིམ་གྱི་སྟོང་པ་བཞི་འཆར་བ་ཇི་ལྟ་བ་བཞིན་སྒྲུབ་དགོས་པར་
ཤེས་པའི་ཆེད་དུ་དེ་གསུམ་ལ་འཆི་བའི་མིང་གིས་བཏགས་ཤིང༌། སད་དུས་ཀྱི་སྒྱུ་མ་ལོངས་སྐུ་དང༌། རྨི་ལམ་གྱི་སྒྱུ་མ་ལོངས་སྐུ་དང༌། བར་དོའི་སྒྱུ་མ་ལོངས་སྐུ་སྒོམ་པ་གསུམ་གའང་གཞིའི་བར་དོ་ཇི་ལྟ་བ་བཞིན་བསྒྲུབ་དགོས་པར་
ཤེས་པའི་ཆེད་དུ་དེ་གསུམ་ལ་བར་དོའི་མིང་གིས་བཏགས་ལ། སད་དུས་ཀྱི་སྤྲུལ་སྐུ་དང༌། རྨི་ལམ་སད་མ་ཐག་པའི་སྤྲུལ་སྐུ་དང༌། བར་དོ་སྐྱེ་སྲིད་དུ་འཇུག་པའི་སྤྲུལ་སྐུ་སྒོམ་པ་གསུམ་གའང་སྐྱེ་སྲིད་ལེན་པ་ཇི་ལྟ་བ་བཞིན་བྱ་དགོས་
པར། ཤེས་པའི་ཆེད་དུ་དེ་གསུམ་ལ་སྐྱེ་བའི་མིང་གིས་བཏགས་ནས་བཤད་དོ། །བསྲེ་ཞེས་པའི་དོན་ལ། འོད་གསལ་ཆོས་སྐུ་གསུམ་གྱི་བསྲེ་ཚུལ་ནི། སད་དུས་སུ་ཐམས་ཅད་སྟོང་པ་འོད་གསལ་སྐྱོད་ནུས་པ་ཞིག་གིས་གཉིད་དུ་འགྲོ་
9-3-13b


ཁར་སྙིང་གའི་དབུ་མར་དམིགས་པ་གཏད་པ་ལས་ཐམས་ཅད་སྟོང་པ་འོད་གསལ་ཟིན་ན། དེ་ལ་སད་དུས་བཞིན་རྩེ་གཅིག་ཏུ་འཇོག་པ་དང༌། འཆི་ཁར་སྙིང་གའི་དབུ་མར་དམིགས་པ་གཏད་པ་ལས་ཐམས་ཅད་སྟོང་པ་འོད་གསལ་ཟིན་ན་དེ་ལ་སད་དུས་
བཞིན་རྩེ་གཅིག་ཏུ་འཇོག་པའོ། །དེས་ལོངས་སྐུ་གསུམ་གྱི་བསྲེ་ཚུལ་དང་སྤྲུལ་སྐུ་གསུམ་གྱི་བསྲེ་ཚུལ་ཡང་འགྲེའོ། །སྙིང་ག་དང་མགྲིན་པའི་འཁོར་ལོ་གཉིས་ལ་བརྟེན་ནས་གཉིད་ཀྱི་འོད་གསལ་དང༌། རྨི་ལམ་སྒྱུ་མ་སྦྱོང་བའི་གདམས་
ངག་ཕྱིན་ཅི་མ་ལོག་པ་ཡོད་པ་ནི་ཤིན་ཏུ་བསྔགས་པའི་གནས་ཡིན་ཏེ། སད་དུས་སུ་རླུང་དབུ་མར་སྡུད་ནུས་པ་ཞིག་གིས་གཉིད་དུ་འགྲོ་ཁར་སྙིང་གའི་དབུ་མར་དམིགས་པ་གཏད་པ་ལས་བྱུང་བའི་ཐམས་ཅད་སྟོང་པ་འོད་གསལ་སྐྱོང་བ་ཞིག་ནུས་
ན་དེའི་ཤུགས་བརྒྱབ་ནས་སད་དུས་སུ་རླུང་དབུ་མར་སྡུད་པ་ཕུལ་ཆེ་བ་དང་བརྟན་པར་འགྲོ། །དེས་ཀྱང་གཉིད་ཀྱི་འོད་གསལ་བརྟན་པར་འགྲོ་བས་གཉིས་ཀྱི་འོད་གསལ་སྐྱོང་བ་ཡོད་མེད་ཀྱིས་ལམ་བགྲོད་པ་སྟོབས་ཆེ་ཆུང་ཁྱད་པར་ཤིན་ཏུ་
ཆེ་བ་དང༌། ཚེ་འདིར་མཆོག་མ་ཐོབ་པར་འཆི་བའི་དུས་བྱེད་པ་ཡིན་ན་འཆི་བའི་འོད་གསལ་ཟིན་ལུགས་གཞན་དང་མི་འདྲ་བ་འོང་བ་དང༌། དེ་བཞིན་དུ་གཉིད་ཀྱི་འོད་གསལ་གྱི་མཐར་རྨི་ལམ་གྱི་སྒྱུ་ལུས་ཁྱད་པར་ཅན་དུ་ལྡང་ཤེས་ནས་
དེ་ལྡང་བ་གོམས་པས་སད་དུས་ཀྱི་སྒྱུ་ལུས་སྟོབས་ཅན་དུ་འགྲོ་ཞིང༌། དེས་ཀྱང་རྨི་ལམ་གྱི་སྒྱུ་ལུས་ཁྱད་ཞུགས་པར་འགྲོ་བ་དང༌། ཚེ་འདིར་མཆོག་མ་ཐོབ་པར་འཆི་བའི་དུས་བྱེད་ན་རླུང་སྟོབས་ཀྱིས་འོད་གསལ་ཟིན་པའི་མཐུས་
9-3-14a


རྨི་ལམ་གྱི་སྒྱུ་ལུས་ལ་གོམས་པ་ཡོད་པས་བར་དོའི་སྒྱུ་ལུས་ཟིན་པ་འདྲ་བ་གཞན་གང་ལའང་མི་འབྱུང་བའི་ཕྱིར་རོ། །གཉིས་པ་ལམ་སོ་སོའི་སྒོམ་ཚུལ་ལ། རྒྱུད་ཀྱི་གཙོ་བོའི་དོན་སྒྱུ་ལུས་དང་འོད་གསལ་
གཉིད་སད་པ་དང་ལོག་པའི་དུས་སུ་སྒོམ་ཚུལ་སྔར་བཤད་པ་ལྟར་ཤེས་དགོས་ལ། དེ་ལས་གཞན་པའི་སྒོམ་ཚུལ་བླ་མ་རྣམས་ཀྱི་ཁྲིད་ཡིག་ནས་འབྱུང་བ་ལ་གཉིས། སྒྱུ་མ་སྒོམ་ཚུལ་དང༌། འོད་གསལ་སྒོམ་ཚུལ་ལོ། །དང་པོ་ལ་གསུམ་ཡོད་པའི་སྣང་
བ་སྒྱུ་མ་སྒོམ་ཚུལ་ནི། ངའོ་སྙམ་དུ་འཛིན་པའི་གཞི་གང་ཟག་ལ་ཕུང་པོ་དང་རང་བཞིན་གཅིག་དང་ཐ་དད་གང་དུ་གྲུབ་སྙམ་དུ་བརྟགས་པའི་སྒོ་ནས་གང་ཟག་ལ་རང་བཞིན་གྱིས་གྲུབ་པ་ཅུང་ཟད་མེད་དོ་སྙམ་པའི་ངེས་པ་བརྟན་པོ་བྱ་སྟེ། སྟོང་ཕྱོགས་ལ་དེ་
འདྲ་བ་མང་དུ་སྦྱང༌། དེ་ནས་གང་ཟག་གི་ཐ་སྙད་བསྙོད་མི་ནུས་པར་སྣང་བ་རྣམས་བློའི་ཡུལ་དུ་འཆར་དུ་གཞུག་ལ། དེ་ལས་གསོག་པ་པོ་དང་འབྲས་བུ་མྱོང་བ་པོར་འཇོག་པའི་རྟེན་འབྲེལ་གྱི་ཕྱོགས་རྣམས་ཡིད་ལ་བྱ་ཞིང་༌། རང་བཞིན་མེད་པ་ལ་རྟེན་
འབྲེལ་འཐད་ལུགས་རྣམས་ལ་ངེས་པ་རྙེད་པར་བྱའོ། །དེ་གཉིས་འགལ་བར་སྣང་བའི་ཚེ་ན་གཟུགས་བརྙན་སོགས་དཔེར་བླངས་ནས་མི་འགལ་བའི་ཚུལ་བསམ་སྟེ། འདི་ལྟར་བྱད་བཞིན་གྱི་གཟུགས་བརྙན་ནི་མིག་སྣ་སོགས་གང་དུ་སྣང་
བས་སྟོང་ཡང་བྱད་དང་མེ་ལོང་ལ་བརྟེན་ནས་སྐྱེ་བ་དང༌། རྐྱེན་དེ་དག་འགའ་ཞིག་ལོག་པའི་ཚེ་འཇིག་པ་གཉིས་བསྙོན་མི་ནུས་པར་གཞི་མཐུན་དུ་འདུ་བ་བཞིན་དུ་གང་ཟག་ལའང་རང་བཞིན་རྡུལ་ཙམ་མེད་ཀྱང༌། ལས་གསོག་པ་པོ་དང་འབྲས་བུ་
9-3-14b


མྱོང་བ་པོ་དང༌། སྔོན་གྱི་ལས་ཉོན་སོགས་ལ་བརྟེན་ནས་སྐྱེ་བའང་མི་འགལ་ལོ་སྙམ་དུ་སྦྱང་ངོ༌། །དེ་ལ་ངེས་པ་བརྟན་པ་ན་ཤེས་པའི་ཡུལ་དུ་གང་སྣང་ཐམས་ཅད་ལྷ་སྐུ་དང༌། ལྷ་སྐུ་རང་བཞིན་གྱིས་མ་གྲུབ་པ་བཞིན་དུ་གྲུབ་པར་སྣང་བའི་སྒྱུ་མ་
དང༌། སྒྱུ་མའང་བདེ་བ་ཆེན་པོའི་ངོ་བོ་ཉིད་ཡིན་སྙམ་དུ་བལྟ་བའི་ཤེས་བྱ་སུམ་སྒྲིལ་ལ་བསླབ་པོ། །གཉིས་པ་རྨི་ལམ་སྒྱུ་མ་སྒོམ་ཚུལ་ལ་བཞི་ཡོད་པའི་དང་པོ་རྨི་ལམ་བཟུང་བ་ལ། རྨི་ལམ་རླུང་སྟོབས་ཀྱིས་འཛིན་པ་ནི། སད་དུས་སུ་རླུང་
དྷཱུ་ཏཱིར་ཚུད་ནས་ཐིམ་པ་ལས་སྟོང་པ་བཞི་འདྲེན་ནུས་པ་ཞིག་གིས་བྱེད་པ་ཡིན་ལ། བྱེད་ཚུལ་ནི་གཉིད་ཀྱི་འོད་གསལ་ཐོག་མར་བཟུང་བའི་ཚེ་གཉིད་ཀྱི་འོད་གསལ་སྟོང་པ་པ་བཞི་ངོ་ལེགས་པར་ཤེས་ནས་སྐྱོང་བ་ན་དེའི་ཕྱི་ལོགས་སུ་རྨི་ལམ་
འཆར་བ་ངེས་པར་ཤེས་པས་དེ་ལ་ནི་གཉིད་ཀྱི་སྟོང་པ་རྣམས་འཛིན་པའི་ཐབས་ལས་གཞན་པའི་རྨི་ལམ་འཛིན་ཐབས་མི་དགོས་སོ། །རྨི་ལམ་འདུན་པའི་སྟོབས་ཀྱིས་འཛིན་པ་ནི། དེ་འདྲ་བའི་ནུས་པ་མེད་པ་ཞིག་གིས་འཛིན་པ་ཡིན་པས། 
དེ་ལ་རང་ལྷར་བསྒོམ་པ་དང་བླ་མའི་རྣལ་འབྱོར་བསྒོམས་ཏེ་མཆོད་ལ། རྨི་ལམ་མང་པོ་དང༌། གསལ་པོ་དང༌། བཟང་པོ་རྨི་བ་དང༌། རྨི་ལམ་ཟིན་པ་དང༌། ཟིན་ནས་ཀྱང་རྨི་ལམ་གྱི་དགེ་སྦྱོར་རྣམས་རྒྱུད་ལ་སྐྱེ་བའི་འགལ་རྐྱེན་ཞི་ཞིང་མཐུན་
རྐྱེན་ཚང་བའི་གསོལ་བ་དྲག་པོ་མང་དུ་འདེབས་པ་དང་། ཡི་དམ་དང་བཀའ་སྡོད་ལ་གཏོར་མ་ཕུལ་ནས་ཕྲིན་ལས་བཅོལ་ཞིང་མཚམས་དམ་པར་བྱའོ། །དེ་ནས་ཉིན་མོ་དྲན་པ་རྒྱུན་ཆགས་ཀྱིས་བཟུང་བ་ནི། ད་ལྟར་གྱི་སྣང་བ་འདི་རྣམས་
9-3-15a


རྨི་ལམ་གྱི་སྣང་བར་འདུག་སྙམ་པ་དང༌། ད་རྨི་ལམ་ལ་རྨི་ལམ་དུ་ངོ་ཤེས་པར་བྱའོ་སྙམ་པའི་འདུན་པ་དྲག་པོ་ཡང་ཡང་སྦྱང༌། གཞན་ཡང་ད་གཟོད་རྨི་ལམ་བྱུང་དུས་སུ་ཅི་ནས་ཀྱང་རྨི་ལམ་དུ་
ངོ་ཤེས་པར་བྱས་ལ་རྨི་ལམ་གྱི་དགེ་སྦྱོར་བསྐྱང་བར་བྱའོ་སྙམ་པའི་འཕེན་པ་དྲན་པོ་མང་དུ་སྦྱང༌། ཁྱད་པར་དུ་ཉལ་ཁར་རྒྱུན་ལྡན་དུ་སྦྱང་ངོ༌། །མཚན་མོ་མན་ངག་བཙན་ཐབས་ཀྱིས་བཟུང་བ་ནི། གཉིད་དུ་འགྲོ་ཁར་རང་ཡི་
དམ་གྱི་ལྷར་བསྒོམ། སྤྱི་བོར་བླ་མ་བསྒོམས་ལ་གསོལ་བ་མང་དུ་གདབ། མགྲིན་པར་པདྨ་དམར་པོ་འདབ་མ་བཞི་པ་ཞིག་ག་ལྟེ་བའི་དྷཱུ་ཏཱིའི་ནང་དུ་ཨོཾ་དམར་པོ་ཞིག་གསུང་རྡོ་རྗེའི་ངོ་བོར་བསམ་ཞིང༌། དེ་ལ་ཤེས་པ་གཏད་
དེ་གཞན་དུ་མི་འཕྲོ་བར་བྱས་ལ་སེམས་བཟུང་བའི་ངང་ནས་གཉིད་དུ་འགྲོ་བར་བྱའོ། །དམིགས་པ་བཟུང་བ་དེས་རྨི་ལམ་མ་ཟིན་ནའང་སྔར་བཞིན་བསྐྱང་སྟེ། དེ་ལྟར་བྱས་ཀྱང་མ་ཟིན་ན་ཐོ་རངས་ནས་ཉི་མ་རྩེ་ཤར་ཚུན་ལ་
གཉིད་སྲབ་པས་རྨི་ལམ་འཛིན་སླ་བའི་དུས་སུ་བླ་མའི་རྣལ་འབྱོར་བསྒོམས་ནས་གསོལ་བ་འདེབས་པ་དང༌། འདུན་པ་སྤྱོད་པ་རྣམས་སྔར་བཞིན་བྱས་ལ། རང་ལྷར་གསལ་བའི་སྨིན་མཚམས་སུ་ཐིག་ལེ་དཀར་པོ་འཚེར་
བ་སྲན་མ་ཙམ་ཞིག་ལ་དམིགས་པ་གཏད་དེ་རླུང་བུམ་པ་ཅན་བདུན་བྱས་ལ་གཉིད་དུ་འགྲོ་བར་བྱའོ། །དེ་ལྟར་བྱས་པས་གཉིད་སྲབ་དྲགས་ནས་མ་ཁུགས་པའམ། ཁུགས་ཀྱང་གཉིད་སད་སྐྱེན་པར་བྱུང་ནས་རྨི་ལམ་མ་ཟིན་ན། 
9-3-15b


ཉིན་པར་གྱི་འདུན་པ་སྤྱོང་བ་སོགས་སྔར་བཞིན་བྱས་ལ། ཉལ་ཁར་རྡོ་རྗེ་ནོར་བུའི་དབུས་སུ་ཐིག་ལེ་ནག་པོ་ཞིག་ལ་སེམས་གཏད་དེ། རླུང་ཁ་སྦྱོར་ཉེར་གཅིག་བསྒོམས་ལ་སེམས་མ་ཡེངས་པར་བཟུང་བའི་ངང་ནས་གཉིད་ལོག་པར་བྱའོ། །
གཉིས་པ་སྦྱང་ཞིག་སྤེལ་བ་ལ་འཇིག་རྟེན་པའི་རྣམ་ཐར་ལ་སྦྱང་བ་ནི། སྔར་མེད་གསར་དུ་སྤྲུལ་པ་དང༌། སྔར་ཡོད་རྣམ་པ་གཞན་དུ་བསྒྱུར་བའི་སྤྲུལ་སྒྱུར་སྣ་ཚོགས་ལ་སློབ་པ་དང༌། ཉི་མ་དང་ཟླ་བའི་འོད་ཟེར་ལ་ཞོན་ནས་སུམ་ཅུ་རྩ་
གསུམ་ལ་སོགས་པའི་གནས་བལྟ་བའི་འཕེན་པ་བཏང་ནས་དེར་འགྲོ་བ་དང༌། ནམ་མཁའ་ལ་འཕུར་ནས་འགྲོ་བ་ལ་སོགས་པའི་རྩལ་སྦྱོང་བའོ། །འཇིག་རྟེན་ལས་འདས་པའི་རྣམ་ཐར་ལ་སྦྱོང་བ་ནི། བདེ་བ་ཅན་དང༌། མངོན་དགའ་དང༌། འོག་མིན་སོགས་
སངས་རྒྱས་ཀྱི་ཞིང་དག་པ་དང༌། དེར་བཞུགས་པའི་སངས་རྒྱས་བྱང་སེམས་བལྟ་བ་དང༌། མཆོད་པ་དང་ཆོས་ཉན་པ་སོགས་ཀྱི་འཕེན་པ་བཏང་ནས་དེ་རྣམས་བསྒྲུབ་པའོ། །སྤེལ་བ་ནི། མི་དང་དུད་འགྲོ་ལ་སོགས་ཅན་དང༌། ཀ་བ་དང་བུམ་པ་ལ་
སོགས་པའི་སེམས་ཅན་མ་ཡིན་པ་རྣམས་གཅིག་གཉིས་སུ་སྤྲུལ་པ་དང༌། གཉིས་བཞི་ལ་སོགས་པ་ནས་བརྒྱ་དང་སྟོང་ལ་སེམས་པའི་བར་སྤྲུལ་བའོ། །གསུམ་པ་ཡ་ང་བ་སྤོང་ཞིང་སྒྱུ་མར་སློབ་པ་ལ། ཡ་ང་བ་སྤང་བ་ནི། རྨི་ལམ་གྱི་དུས་སུ་མེ་དང་ཆུ་
ལ་སོགས་པའི་ཡ་ང་བའམ་བག་ཚ་བ་བྱུང་ན། རྨི་ལམ་དུ་ངོ་ཤེས་པར་བྱས་ནས་རྨི་ལམ་གྱི་མེ་དང་ཆུ་ལ་སོགས་པས་གནོད་པར་ག་ལ་འགྱུར་སྙམ་དུ་བསམས་ལ། མཆོང་བ་དང་བརྒལ་བ་ལ་སོགས་པའི་ཐོག་བརྫིས་བྱའོ། །སྒྱུ་མར་བསླབ་ཚུལ་
9-3-16a


ནི། རྨི་ལམ་དུ་མེར་སྣང་ཡང་མེར་མ་གྲུབ་པར་ཤེས་པ་དཔེར་བླངས་ནས། རྨི་ལམ་གྱི་ཆོས་ཐམས་ཅད་ཀྱང་སྣང་བ་ལྟར་གྱི་བདེན་པར་མ་གྲུབ་བོ་སྙམ་དུ་ཤེས་པར་བྱས་ནས་བསྒོམ་མོ། །དེ་ལྟར་ཤེས་ནས་རྨི་
ལམ་གྱི་སྣོད་བཅུད་ཐམས་ཅད་རྟེན་དང་བརྟེན་པའི་དཀྱིལ་འཁོར་གྱི་རྣམ་པར་འཆར་བ་ལ་བསླབ་ཅིང༌། དེ་ལྟར་ཤར་བ་དེ་དག་ཀྱང་རང་གི་ངོ་བོས་གྲུབ་པས་སྟོང་བཞིན་དུ་དེར་སྣང་བའི་སྒྱུ་མར་འཆར་བ་ལ་བསླབ། དེ་དག་ཀྱང་བདེ་སྟོང་གི་ངོ་
བོར་བལྟ་བའི་ཤེས་བྱ་སུམ་སྒྲིལ་ལ་བསླབ་པ་སྣང་བ་སྒྱུ་མའི་སྐབས་བཞིན་བྱའོ། །བཞི་པ་རྨི་ལམ་གྱི་དེ་ཁོ་ན་ཉིད་བསྒོམ་པ་ནི། རྨི་ལམ་ཟིན་པ་བརྟན་པོ་བྱུང་བའི་སྐབས་ནས་རང་ཡི་དམ་དུ་གསལ་བར་བསྒོམས་ལ། རང་གི་ཐུགས་ཀའི་ཧཱུཾ་
ཡིག་ལས་འོད་ཟེར་འཕྲོས་པས་རྨི་ལམ་གྱི་སྣོད་བཅུད་ཐམས་ཅད་རང་ལ་བསྡུ། རང་ཡང་ལུས་ཀྱི་སྟོད་སྨད་ནས་ཐུགས་ཀའི་ཧཱུཾ་ལ་བསྡུ་ཞིང༌། ཧཱུཾ་ཀྱང་མི་དམིགས་པ་འོད་གསལ་དུ་གཞུག་ལ་སེམས་གཡོ་མེད་དུ་བཟུང་ངོ༌། །གསུམ་པ་བར་དོ་
སྒྱུ་མ་བསྒོམ་ཚུལ་ལ་གཉིས་ཡོད་པའི་དང་པོ་བར་དོ་འཛིན་པ་པོའི་གང་ཟག་གི་དབྱེ་བ་ནི། བར་དོ་འཛིན་པ་འདི་ལ་གང་ཟག་རབ་འབྲིང་ཐ་མ་གསུམ་ཡོད་དེ། གང་ཟག་རབ་ནི་སྤྱོད་བསྡུས་ལས་འཆི་བའི་མཐར་བར་དོའི་དོད་ལ་རིམ་པ་གསུམ་པའི་
སྒྱུ་ལུས་འགྲུབ་པ་ལ་བཤད་པའི་ཕྱིར་དང༌། གང་ཟག་གཉིས་པ་ནི། སྤྱོད་བསྡུས་ལས། དེ་ལྟར་སྦྱར་ནས་གཉིད་ལོག་པར་བྱེད་དོ། །དེ་ལ་དུས་འདིར་སེམས་དང་སེམས་པ་དང་མ་རིག་པ་རབ་ཏུ་ཞུགས་པའི་སྐད་ཅིག་ལ་དྲན་པ་བརྗེད་པའོ། །ཕྱིས་
9-3-16b


ནི་བརྗེད་པའང་མེད་པའི་ཡེ་ཤེས་ཀྱི་ངོ་བོ་ཉིད་ནི་འོད་གསལ་བའོ། །ཡང་གྲོལ་བ་ན་རླུང་གི་རང་བཞིན་གཡོས་ཏེ། གལ་ཏེ་རྨི་ལམ་གཞན་དག་ཅེས་གསུངས་པས། གཉིད་ཀྱི་སྟོང་པ་བཞི་ཟིན་པ་དང༌། དེའི་རྗེས་ལ་རྨི་ལམ་རླུང་སྟོབས་ཀྱིས་ཟིན་པ་འཕངས་
ལ། གཉིད་ཀྱི་སྟོང་པ་བཞི་ཟིན་པ་ནི། འཆི་བའི་སྟོང་པ་བཞི་ཟིན་པའི་ཚད་འཛིན་ཡིན་ལ། རྨི་ལམ་རླུང་སྟོབས་ཀྱིས་ཟིན་པ་ནི་འཆི་བའི་སྟོང་པ་ཟིན་པའི་རྗེས་སུ་བར་ངོ་རླུང་སྟོབས་ཀྱིས་ཟིན་པའི་ཚད་འཛིན་ཡིན་པའི་ཕྱིར་དང༌། གང་ཟག་ཐ་མ་ནི་སྔ་མ་
གཉིས་ལྟར་མིན་ཡང་དམ་ཚིག་དག་ཅིང་རིམ་གཉིས་བསྒོམ་པ་ཞིག་གིས་འཆི་བའི་དུས་སུ་ས་ཆུ་ལ་ཐིམ་པའི་རྟགས་ནས་འཆི་བའི་འོད་གསལ་དངོས་གཞི་འཆར་བའི་རིམ་པ་དང༌། དེ་ལས་ལངས་མ་ཐག་བར་དོ་འགྲུབ་པའི་རིམ་པ་རྣམས་ལེགས་
པར་ཤེས་ནས། ད་ལྟ་ནས་དེའི་གདམས་ངག་རྣམས་བྲེང་ཆགས་སུ་མང་དུ་སྦྱངས་ན་འཆི་བའི་འོད་གསལ་དང་བར་དོ་རླུང་སྟོབས་ཀྱིས་མི་ཟིན་ཀྱང་དེའི་གདམས་ངག་ལ་གོམས་པའི་སྟོབས་ཀྱིས་ཟིན་པ་འོང་བའི་ཕྱིར་རོ། །གཉིས་པ་དེ་རྣམས་ཀྱིས་ཇི་
ལྟར་འཛིན་པའི་ཚུལ་ལ། གང་ཟག་དང་པོས་ནི། འཆི་ཁར་རིམ་པ་གསུམ་པའི་སྒྱུ་ལུས་སུ་ལྡང་བའི་འཕེན་པ་བཏང་བས་ཆོག་ལ། གང་ཟག་འབྲིང་གིས་ནི་འཆི་བ་ལ་ཉེ་བའི་སྔོན་རིག་པ་གསལ་བ་ན་ཟང་ཟིང་ཡོངས་སུ་བཟུང་བ་ཐམས་ཅད་བསོད་
ནམས་ཀྱི་ཞིང་གི་ཕྱོགས་སུ་བལྟོས་པ་མེད་པར་གཏོད་པ་དང་ཁས་བླངས་པའི་སྡོམ་པ་དང་འགལ་བའི་ཉེས་ལྟུང་རྣམས་ལ་བཤགས་སྡོམ་དང༌། དམ་ཚིག་ཉམས་ཆགས་གསོར་གཞུག་གོ། དེ་ནས་རང་ལྷར་གསལ་འདེབས་པ་དང་མདུན་དུ་བླ་
9-3-17a


མ་དང་ཡི་དམ་གྱི་ལྷ་ཚོགས་བསྒོམས་ནས་མཆོད་དེ། འཆི་བ་འོད་གསལ་དང་བསྲེ་ནུས་པར་བྱིན་གྱིས་བརླབ་དུ་གསོལ། བར་དོ་སྒྱུ་ལུས་དང་བསྲེ་ནུས་པར་བྱིན་གྱིས་བརླབ་ཏུ་གསོལ་ཞེས་པའི་གསོལ་བ་དྲག་པོ་མང་
དུ་གདབ་བོ། །དེ་ནས་འཆི་རྟགས་སོགས་བརྟག་པ་ནི། ས་ཆུ་ལ་ཐིམ་པ་ན་ལུས་བསྒུལ་སྐྱོད་མི་ནུས་ཤིང་ཟུངས་མི་ཐུབ་པར་ལྷོད་ལྷོད་པོར་འགྲོ། ལུས་ས་ལ་བྱིང་བ་སྙམ་བྱེད་ཅིང་ང་འཐེན་ཟེར་བ་འབྱུང༌། ནང་རྟགས་སྨིག་རྒྱུ་ལྟ་བུ་ཆུ་མེར་རེ་སྣང་བ་ཞིག་འབྱུང༌། 
ཆུ་མེ་ལ་ཐིམ་པའི་ཕྱི་རྟགས་ནི། ཁ་སྣའི་ཆུ་སྐམས་ཤིང་ལྕེ་ཐུང་དུ་འགྲོ། །ནང་དུ་དུ་བ་ལྟ་བུའི་རྣམ་པ་སྔོ་མེར་རེ་བ་ཞིག་གིས་ཁེངས་པ་འདྲ་བ་འབྱུང༌། མེ་རླུང་ལ་ཐིམ་པའི་ཕྱི་རྟགས་ནི། དྲོད་ཆུང་དུ་འགྲོ་ཞིང་ལུས་ཀྱི་དྲོད་མཐའ་ནས་
སྡུད། ནང་རྟགས་སྲིན་བུ་མེ་ཁྱེར་འདྲ་བ་དམར་ཁྲ་ཁྲ་བ་མང་པོ་ཞིག་གི་སྣང་བ་འབྱུང༌། ཀུན་རྟོག་གི་རླུང་སེམས་ལ་ཐིམ་པའི་ཕྱི་རྟགས་ནི། དབུགས་ཕྱིར་རིང་དུ་རྒྱུ་ཞིང་ནང་དུ་སྡུད་མི་ཤེས། ཅུང་ཟད་སྡུད་ཀྱང་ཐུང་ལ་རྩུབ་པར་སྡུད། ནང་རྟགས་
མར་མེ་རླུང་གིས་མ་བསྐྱོད་པ་ལྟ་བུའི་སྣང་བ་མང་དུ་འབྱུང་། དེ་ནས་སྟོང་པ་ཞེས་པ་སྣང་བ་དང་པོ་འཆར་ཏེ། ནམ་མཁའ་སྤྲིན་མེད་པ་ལ་ཟླ་འོད་ཤར་བ་ལྟ་བུ་འབྱུང༌། དེ་ནས་སྣང་བ་དེ་བསྡུས་པའི་རྗེས་སུ་ཤིན་ཏུ་སྟོང་པ་ཞེས་པ་སྣང་བ་མཆེད་པ་
འཆར་ཏེ། ནམ་མཁའ་གཡའ་དག་ལ་ཉི་འོད་ཤར་བ་བཞིན་དུ་དམར་པོའམ་དམར་སེར་གྱི་སྣང་བ་འཆར་དེ་ནས་སྣང་བ་དེའང་བསྡུས་པའི་རྗེས་སུ་སྟོང་ཆེན་ཞེས་པ་ཉེར་ཐོབ་འཆར་ཏེ། ནམ་མཁའ་གཡའ་དག་པ་ལ་མཚམས་ཀྱི་སྨིག་
9-3-17b


གིས་ཁྱབ་པ་བཞིན་དུ་ནག་ལམ་པ་འབྱུང་ཞིང༌། དྲན་པའང་ཉམས་ནས་འགྲོ། །དེ་ནས་ནག་ཐོམ་གྱིས་སོང་བའི་དྲན་མེད་དེ་སངས་པ་དང༌། ཐམས་ཅད་སྟོང་པ་ཞེས་པ་འོད་གསལ་འཆར་ཏེ། ནམ་མཁའ་སློད་བྱེད་ཀྱི་ཟླ་ཉིའི་འོད་དང་ནག་པོའི་རྣམ་
པ་ཅན་དང་བྲལ་བའི་ཐོ་རངས་ཀྱི་ནམ་མཁའ་གཡའ་དག་ཅིག་འཆར་ཏེ། འོད་གསལ་དངོས་གཞིའོ། །འཆི་ཁའི་འབྱུང་བ་ཐིམ་པའི་རྟགས་དེ་རྣམས་སྔ་ཚད་ནས་འོང་བར་སྣང་བས་ལེགས་པར་ངོ་ཤེས་པར་བྱས་ལ། སྨིག་རྒྱུ་ལ་སོགས་
པའི་རྟགས་བཞི་ཤར་བ་ན་དེ་རེ་རེའི་དུས་ནས་གང་ཟག་དང་ཆོས་རང་བཞིན་གྱིས་མ་གྲུབ་སྙམ་དུ་བསྒོམ། དེ་ནས་ནམ་མཁའ་སྤྲིན་མེད་ལ་ཟླ་འོད་ཤར་བ་ལྟ་བུ་ལ་སོགས་པའི་སྟོང་པ་བཞི་ཤར་བ་ནའང་གང་ཟག་དང་ཆོས་རང་བཞིན་གྱིས་མ་གྲུབ་
སྙམ་དུ་བསྒོམས་ལ། ཁྱད་པར་དུ་འཆི་བའི་སྟོང་པ་བཞིན་པའི་དུས་སུ་གཉིས་སྣང་རགས་པ་ཞི་བའི་ནམ་མཁའ་སྤྲིན་མེད་ལྟ་བུ་ཤར་བ་དེ་ངོས་ཟིན་པར་བྱས་ནས་དེ་ལ་མཉམ་པར་འཇོག་ཅི་ཐུབ་བྱའོ། །རྗེ་མིང་ལས་ཀྱང་འཆི་བའི་འོད་གསལ་
ཆོས་ཀྱི་སྐུ་ཡིན་ཏེ། །དེ་ཡིན་པ་ལ་ཡིན་པར་ངོ་ཤེས་དགོས། །དེ་ངོ་ཤེས་པར་བྱེད་པ་ལ་ད་ལྟ་བླ་མ་དམ་པས་ངོ་སྤྲད་པས་གནས་ལུགས་ལྟ་བའི་དོན་གོ་བ་དང༌། མཚོན་བྱེད་ལམ་གྱི་འོད་གསལ་སྦྱང་འཚལ་ལོ། །ཞེས་གསུངས་པའི་མཚོན་བྱེད་
ལམ་གྱི་འོད་གསལ་ནི། སད་དུས་ཀྱི་སྟོང་པ་བཞི་པ་དང༌། གཉིད་དུས་ཀྱི་སྟོང་པ་བཞི་པ་ལ་ཟེར་རོ། །འཆི་བའི་སྟོང་པ་བཞི་པ་ལས་ལྡང་བར་རྩོམ་པ་ན་འཆི་བ་འོད་གསལ་ལས་བར་དོ་སྒྱུ་མ་ལྟ་བུའི་ལྷའི་སྐུར་ལྡང་བར་བྱའོ་སྙམ་
9-3-18a


པའི་འཕེན་པ་དྲག་པོ་བྱས་པས། སྔར་སད་དུས་དང་གཉིད་དུས་ཀྱི་འོད་གསལ་ལས་སྒྱུ་ལུས་ཀྱི་ལྷ་སྐུར་ལྡང་བ་ལ་གོམས་པའི་གནད་ཀྱིས་བར་དོ་ཟིན་པ་འབྱུང་བས། དེ་བྱུང་བ་ན་རང་ཉིད་བར་དོར་གནས་
པས་སྔར་སྣང་བ་སྒྱུ་མ་དང༌། རྨི་ལམ་སྒྱུ་མའི་སྐབས་སུ་བཤད་པ་བཞིན་དུ་བར་དོའི་སྣང་བ་གང་ཤར་ཐམས་ཅད་ལྷའི་རྟེན་དང་བརྟེན་པའི་དཀྱིལ་འཁོར་དུ་གསལ་བཏབ་ནས་བསྒོམ་པ་དང༌། དེའང་རང་བཞིན་གྱིས་མ་གྲུབ་པར་
སྣང་བའི་སྒྱུ་མ་ལྟ་བུ་བསྒོམ་པ་དང༌། སྒྱུ་མའང་བདེ་སྟོང་དབྱེར་མེད་ཀྱི་ངོ་བོར་བསྒོམ་པའི་ཤེས་བྱ་སུམ་སྒྲིལ་བྱ་ཞིང༌། དག་པའི་ཞིང་དུ་སྐྱེ་བར་བྱའོ་སྙམ་པའི་འདུན་པ་དྲག་པོའང་སྦྱང༌། འཕོ་བའི་གདམས་ངག་ཡོད་ན་འཕོ་བ་བྱའོ། །གང་ཟག་ཐ་མས་
ནི་གང་ཟག་འབྲིང་པོའི་སྐབས་སུ་བཀོད་པ་ལྟར། འཆི་བ་ལ་བསྲེ་བའི་སྔར་ཞེས་པ་ནས། གསོལ་བ་དྲག་པོ་མང་དུ་གདབ། ཅེས་པའི་བར་རྣམས་དེ་དུས་སུ་བྱ་བ་དང༌། ད་ལྟ་ནས་ཉི་མ་རེ་རེ་བཞིན་འཆི་བའི་དུས་ཀྱི་རྟགས་བཞི་དང༌། སྟོང་པ་
བཞི་དངོས་ཤར་བྱུང་སྙམ་དུ་བསམས་ལ་རེ་རེའི་དུས་སུ་གང་ཟག་དང་ཆོས་རང་བཞིན་གྱིས་མ་གྲུབ་སྙམ་དུ་བསྒོམ། དེ་ནས་འཆི་བ་འོད་གསལ་འགགས་ནས་བར་དོ་དངོས་གྲུབ་སྙམ་དུ་བསམས་ལ། ཤེས་བྱ་སུམ་སྒྲིལ་བསྒོམ་པ་དང༌། 
དག་པའི་ཞིང་དུ་སྐྱེ་བའི་འདུན་པ་སྦྱང་ངོ༌། །གཉིས་པ་འོད་གསལ་བསྒོམ་པའི་ཚུལ་ལ་གཉིས་ཡོད་པའི་སད་དུས་སུ་འོད་གསལ་སྒོམ་ཚུལ་ནི། སྒྱུ་ལུས་མཚན་ཉིད་པའམ་རྗེས་མཐུན་པ་ཐོབ་པ་ཞིག་གིས་བསྒོམ་པ་ཡིན་ཡང༌། 
9-3-18b


འདིར་སྤྱིར་བཏང་གི་སྒོམ་ཚུལ་ནི། རང་ཡི་དམ་ཡབ་ཡུམ་དུ་གསལ་བའི་སྙིང་ག་ཆོས་ཀྱི་འཁོར་ལོའི་དྷཱུ་ཏཱིའི་ནང་དུ་ཉི་གདན་ལ་ཧཱུཾ་ཡིག་སྔོན་པོ་ཞིག་བསྒོམ། དེ་ལས་འོད་ཟེར་འཕྲོས་པས་སྣོད་ཐམས་ཅད་སྦྱངས་ཏེ། འོད་གསལ་དུ་བཞུ་
བའི་སྣོད་ཞུ་བ་བཅུད་ཀྱི་སེམས་ཅན་ལ་བསྡུ། དེ་ནས་བཅུད་ཞུ་བ་དང་ཡུན་ནི་རང་ལྷར་གསལ་བ་ལ་བསྡུ། རང་གི་སྤྱི་བོ་ནས་ཡས་ཞུ་རྐང་མཐིལ་ནས་མས་ཞུ་བ་གཉིས་དང༌། ཉི་གདན་ནི་སྙིང་གའི་ཧཱུཾ་ཡིག་ལ་བསྡུ། དེ་ནས་ཧཱུཾ་གི་ཞབས་
ཀྱུ་ཧ་ལ་བསྡུ། ཧ་རང་གི་མགོ་བོ་ལ་བསྡུ། དེ་ཟླ་ཕྱེད་ལ་བསྡུ། དེ་ཐིག་ལེ་ལ་བསྡུ། དེ་ནཱ་ད་ལ་བསྡུ། དེའང་སྙིང་གའི་དྷཱུ་ཏཱིའི་ནང་དུ་བསྡུས་པར་མོས་ནས་གནས་དེ་ཉིད་དུ་དམིགས་པ་བརྟན་པར་བཟུང་ངོ༌། །དེ་ཡུན་རིང་དུ་བསྒོམས་པས་
སྟོང་པ་བཞིའི་རིམ་པས་སད་དུས་ཀྱི་ལམ་གྱི་འོད་གསལ་ཤར་བྱུང་ན་ལྟ་ཐོག་ཏུ་བཞག་སྟེ་གཡོ་མེད་དུ་གཟུང་བར་བྱའོ། །འོད་གསལ་དུ་འཇུག་ཚུལ་འདི་ནི་གསང་འདུས་ནས་བཤད་པའི་རྗེས་གཞིག་གི་བསམ་གཏན་ལ་བརྟེན་པའོ། །
གཉིས་པ་གཉིད་དུས་ཀྱི་འོད་གསལ་སྒོམ་ཚུལ་ནི། རྨི་ལམ་རླུང་སྟོབས་ཀྱིས་འཛིན་པའི་ཐབས་དམ་པ་ཡིན་པས་དེའི་སྐབས་སུ་བྱེད་རྒྱུ་ཡིན་ནའང༌། བླ་མ་རྣམས་ཀྱིས་སྐབས་འདིར་བཤད་པ་དང་མཐུན་པར་བསྒོམ་པ་ནི། དཀོན་མཆོག་
ལ་མཆོད་པ་དབུལ། ཆོས་སྐྱོང་ལ་གཏོར་མ་བཏང་ལ། གཉིད་ཀྱི་འོད་གསལ་ཟིན་པ་དང་དེའི་འགལ་རྐྱེན་ཞི་བའི་ཕྲིན་ལས་བཅོལ། རང་ལྷར་བསྒོམ་པ་དང་བླ་མའི་རྣལ་འབྱོར་བསྒོམས་ལ་གཉིད་ཀྱི་འོད་གསལ་ཟིན་པའི་གསོལ་བ་
9-3-19a


དྲག་པོ་མང་དུ་བཏབ། གཉིད་བྱུང་བ་ན་རྨི་ལམ་དུ་མ་ཤོར་བར་གཉིད་ཀྱི་སྟོང་པ་རྣམས་ཟིན་པར་བྱའོ་སྙམ་པའི་འཕེན་པ་མང་དུ་བཏང༌། དེ་ནས་ཉལ་བ་ན་མགོ་བྱང་དུ་བལྟ་བ་དང༌། གཞོགས་གཡས་པ་འོག་ཏུ་འབེབས་
པ་སེང་གེའི་ཉལ་སྟབས་བྱ་སྟེ། རང་ཡི་དམ་དུ་གསལ་བའི་སྙིང་གར་པདྨ་འདབ་མ་བཞི་པ་སྔོན་པོ་ཞིག་བསམ། དེའི་ལྟེ་བ་རྩ་དབུ་མའི་ནང་དུ་ཧཱུཾ་ཡིག་སྔོན་པོ་ཞིག་ལ་རང་གི་ཤེས་པ་འདྲེས་པ་བཞིན་དུ་བསྒོམས་ལ་ཉལ་ལོ། །སང་དུས་སུ་གཏུམ་མོ་བསྒོམ་
པ་སོགས་ཀྱི་མཐུས་རླུང་དབུ་མར་ཐིམ་པའི་སྟོང་པ་འདྲེན་ནུས་པ་ཡིན་ན། ཉལ་ཁར་དམིགས་པ་འདི་བཞིན་བྱས་ནས་བསྒོམས་པས་ཞག་གཉིས་གསུམ་ཕན་མི་འགྱངས་བར་རླུང་དབུ་མར་ཐིམ་པའི་གཉིད་ཀྱི་སྟོང་པ་བཞི་ཟིན་པ་འོང་ལ། སད་དུས་
སུ་རླུང་དབུ་མར་ཐིམ་པའི་སྟོང་པ་འདྲེན་མི་ནུས་ཀྱང༌། སྤྱིར་བྱིང་བ་དང་བྲལ་བའི་གནས་ཆ་བརྟན་པོ་ཡོད་པ་ཞིག་གིས་གཉིད་ཉལ་ཁར་སྔར་བཤད་པའི་དམིགས་པ་དེ་བཟུང་བའམ། ཡང་ན་དེ་མ་བཟུང་ཡང་སད་དུས་ཀྱི་ཏིང་ངེ་འཛིན་དེ་ཉལ་ཁར་བསྐྱངས་
ན་དེའི་མཐར་སྟོང་པ་བཞི་རིམ་ཅན་དུ་མི་འཆར་བའི་ཏིང་ངེ་འཛིན་དུ་འགྲོ་བ་ནི་གཉིད་ཀྱི་འོད་གསལ་མཚན་ཉིད་པ་མིན་ཡང་དེས་དེ་ཁོ་ན་ཉིད་ཀྱི་ལྟ་ཐོག་ཏུ་འཇོག་ནུས་ན་ལམ་ཐུན་མོང་བའི་འོད་གསལ་ཙམ་ཡིན་གྱི་སྔགས་བླ་མེད་ཀྱི་འོད་གསལ་
གྱི་དོན་མེད་དོ། །གཉིད་ཀྱི་འོད་གསལ་འཛིན་པའི་སྤྱོད་བསྡུས་ཀྱི་ལུང་ནི་སྔར་དྲངས་པ་ལྟར་རོ། །གཉིས་པ་ལམ་གྱི་ཡན་ལག་འཕོ་བ་དང་གྲོང་འཇུག་ལ་གཉིས། གོང་དུ་འཕོ་བ་དང༌། གྲོང་དུ་འཇུག་པའོ། །དང་པོ་ལ་གཉིས་ཡོད་པའི་དང་པོ་འཕོ་
9-3-19b


བ་སྦྱང་བ་ནི། ཐོག་མར་བླ་མ་རྣམས་ཀྱི་མན་ངག་ལས་འབྱུང་བ་བཞིན་བརྗོད་ན། རང་ཉིད་རང་གི་ཡི་དམ་གྱི་ལྷ་གང་ཡིན་དུ་གསལ་འདེབས་པ་དང༌། རླུང་ཁ་སྦྱོར་གསང་གནས་སམ་ལྟེ་བར་བསྒོམས་པའི་ངང་ནས་ལྟེ་བར་ཨ་དམར་པོ་དང༌། སྙིང་གར་
ཧཱུཾ་མཐིང་ནག་དང༌། ཚངས་བུག་ཏུ་ཀྵ་དཀར་པོ་རེ་བསམ། དེ་ནས་འོག་རླུང་དྲག་ཏུ་འཐེན་པས་ལྟེ་བའི་ཨ་ཡིག་ཕུལ་བ་ཡར་འོངས་ནས་ཧཱུཾ་ཕུལ། དེ་ནས་ཧཱུཾ་ཡར་འོངས་ནས་ཀྵ་ཡིག་ཕུལ་བར་བསམ་ཞིང༌། ཡང་ཕྱིར་དབབ་པ་ནི། སྙིང་གར་ཧཱུཾ་དང་
ལྟེ་བར་ཨ་གནས་པར་བསམ་མོ། །དེ་ལྟར་རྒྱུན་དུ་རྟགས་མ་བྱུང་གི་བར་དུ་སྦྱང་ངོ༌། །རྟགས་ནི་སྤྱི་གཙུག་ཟ་བ་དང་འཕྲིག་པ་སོགས་སོ། །གཉིས་པ་ལས་ལ་སྦྱར་བ་ནི། ལུས་གནད་ཙོག་བུར་བྱ། ལག་པ་གཉིས་ཀྱིས་པུས་མོ་གཉིས་ལ་
འཁྱུད་ཅིང༌། སྐྱབས་འགྲོ་སེམས་བསྐྱེད་སྔོན་དུ་འགྲོ་བས་རང་ཉིད་ཡི་དམ་གྱི་ལྷར་གསལ་བའི་ངང་ནས། སྦྱི་གཙུག་གི་ཐད་ཀའི་མདུན་གྱི་ནམ་མཁར་འདོམ་གང་ངམ་ཁྲུ་གང་སོགས་གང་བདེ་བའི་སར་བླ་མ་དང་ཡི་དམ་གྱི་ལྷ་དབྱེར་མེད་དུ་
དམིགས་ལ། མོས་གུས་ཀྱི་གདུང་བས་གསོལ་བ་དྲག་ཏུ་གདབ། དེ་ནས་ལྟེ་བའི་ཨ་དང་སྙིང་གའི་ཧཱུཾ་དང་སྤྱི་གཙུག་གི་ཀྵ་གསལ་བཏབ་ནས་འོག་རླུང་དྲག་ཏུ་འཐེན་པས་ཨ་དེ་ཉིད་རྩ་དབུ་མའི་ནང་ནས་ཡར་ལ་ཁྱུར་རུ་རུ་བྱུང་ནས་སྙིང་གའི་
ཧཱུཾ་ལ་ཐིམ་པར་བསམ་ཞིང་ཨ་ཧི་ཀ་ཇི་ཙམ་གྲུབ་པ་ཞིག་བཟླས་སོ། །ཡང་ཧཱུཾ་ཡིག་དེ་ཉིད་ཀྱང་ཡར་བྱུང་སྟེ། ཨ་ཧིཀ་ཉི་ཤུའི་བར་དུ་བརྗོད་པས་མགྲིན་པར་བྱུང་བར་བསམས་ལ། ཚངས་བུག་གི་ཀྵ་ཡིག་བསལ་ནས་ཚངས་བུག་སྐར་ཁུང་བྱེ་བ་
9-3-20a


ལྟར་དཀར་སང་ངེ་ཡོད་པར་བསམ་ཞིང༌། ཨ་ཧིཀ་དྲག་པོ་ལྔ་བརྗོད་པས་ཧཱུཾ་དེ་ཚངས་བུག་ནས་རྒྱངས་ཀྱི་འཐོན་ནས་བླ་མ་དང་ཡི་དམ་དབྱེར་མེད་གྱི་ཐུགས་ཀར་ཐིམ་པ་ལ་སེམས་གཏད་དེ་མི་རྟོག་པའི་ངང་ལ་བཞག་
གོ། ཞེས་བླ་མ་རྣམས་གསུང་ངོ༌། །གཉིས་པ་གྲོང་འཇུག་ནི་རེ་ཞིག་བཞག་གོ། ཐུགས་བཞེད་ཀྱི་འཕོ་བ་དང་གྲོང་འཇུག་གི་དམིགས་པ་ནི་གཞན་དུ་འགོད་དོ། །འདི་དག་ནི་ནཱ་རོ་ཆོས་དྲུག་གི་དམིགས་སྐོར་ལག་ཏུ་ལེན་ཚུལ་བསྡུས་ནས་བཀོད་པའོ། །
འདི་བྲིས་དགེ་བ་རབ་དཀར་བདུད་རྩིའི་འོད། །ཟབ་ལམ་རིམ་གཉིས་སྣང་བའི་བསིལ་ཟེར་གྱིས། །ཀུན་རྨོངས་མུན་པ་མ་ལུས་མཐར་བྱེད་ཅིང༌། །རྣམ་གྲོལ་ཀུ་མུད་བཞག་པའི་དཔལ་གྱུར་ཅིག །དགེའོ།། །།	
9-3-20b


empty page
9-4-1a


 ༄༅། །དཔལ་འཁོར་ལོ་བདེ་མཆོག་ལཱུ་ཨི་པའི་མངོན་རྟོགས་ངག་འདོན་གྱི་ཆོ་གའི་རིམ་པ་བཞུགས་སོ། །
9-4-1b


༄༅། །བླ་མ་དང་བཅོམ་ལྡན་འདས་དཔལ་ཧེ་རུ་ཀ་ཡབ་ཡུམ་ལ་གུས་པས་ཕྱག་འཚལ་ལོ། །དཔལ་འཁོར་ལོ་བདེ་མཆོག་ལཱུ་ཨི་པའི་མངོན་རྟོགས་ངག་འདོན་གྱི་ཆོ་གའི་རིམ་པ་ནི། ནང་
མཆོད་གཏོར་མ་ལྟར་བྱིན་གྱིས་བརླབ་པའམ། ཡང་ན་ ཧ་ཧོ་ཧྲིཿ ཞེས་བརྗོད་པས་རིམ་བཞིན་ཁ་དོག་དྲི་རོ་ནུས་པའི་སྐྱོན་བཅོམ་ཞིང་བདུད་རྩིར་གྱུར། ཨོཾ་ཨཱཿཧཱུཾ། ཞེས་ལན་གསུམ་བརྗོད་པས། རྒྱ་ཆེར་སྤེལ་ཞིང་བྱིན་གྱིས་
བརླབས་པར་གྱུར། པར་བསམ། སྔོན་འགྲོ་གཏོར་མ་མངོན་རྟོགས་ནས་འབྱུང་བ་ལྟར་བྱིན་གྱིས་བརླབས་ནས། ཕྱག་རྒྱ་དང་བཅས་པས་ཕེ་ཞེས་བརྗོད། རང་གི་ཐུགས་ཀར་ཉི་གདན་ལ་གནས་པའི་ཧཱུཾ་ཡིག་ལས་འཕྲོས་པའི་
འོད་ཟེར་གྱིས། དུར་ཁྲོད་བརྒྱད་ན་གནས་པའི་ཕྱོགས་སྐྱོང་དང༌། ཞིང་སྐྱོང་ལ་སོགས་པ་ཐམས་ཅད་སྤྱན་དྲངས་ཏེ། ཕྱོགས་མཚམས་བརྒྱད་དུ་འཁོད་པ་སྐད་ཅི་གིས་འོད་གསལ་དུ་བཅུག་པ་ལས། བདེ་མཆོག་གི་
ལྷ་ཡབ་ཡུམ་གྱི་སྐུར་བཞེངས་པའི་མགྲོན་རྣམས་ཀྱི་ལྗགས་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་རྩེ་གསུམ་པ་དཀར་པོ་ནས་འབྲུ་ཙམ་འཁོད་པའི་རྡོ་རྗེའི་འོད་ཟེར་གྱི་བུ་གུས་དྲངས་ནས་གསོལ་བར་གྱུར། རྡོ་རྗེ་ཐལ་མོ་ཁ་ཕྱེ་བའི་ཕྱག་
9-4-2a


རྒྱ་བཅས་ལ། ཨོཾ་ཁ་ཁ་ཞེས་པ་ནས་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ལན་གཉིས་བརྗོད་ལ། ཕྱོགས་གཡོན་དང་མཚམས་གཡས་བསྐོར་དུ་གནས་པ་ལ་དབུལ་ལོ། །ཨོཾ་ཨརྒྷཾ་པྲ་ཏཱི་ཙྪ་སྭཱཧཱ། དེ་བཞིན་དུ་ཨརྒྷཾ་གྱི་གནས་སུ། པཱ་དྱཾ་གིས་
ཞབས་བསིལ་དང༌། ཨོཾ་བཛྲ་པུཥྤེ་ཨཱཿཧཱུཾ་སྭ་ཧཱ། དེ་བཞིན་དུ་པུཥྤེའི་གནས་སུ། དྷཱུ་པེ། དཱི་པཾ། གནྡྷེ། ནཻ་ཝིདྱ། ཤཔྟ། རྣམས་བཅུག་ལ་ཆུ་གཉིས་ཉེར་སྤྱོད་རོལ་མོ་དང་བཅས་པ་དབུལ། ཕྱོགས་སྐྱོང་དང་ཞིང་སྐྱོང་དང་ཀླུ་ལ་སོགས་པ་རྣམས་ཀྱི་ཞལ་
དུ་ཨོཾ་ཨཱཿཧཱུཾ། ཞེས་པས་ནང་མཆོད་དབུལ་ལ། ལྷ་ཡི་ཚོགས་རྣམས་མ་ལུས་དང༌། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཅེས་དང་ཡི་གེ་བརྒྱ་པ་བརྗོད་ལ་མཐེབ་སྲིན་གྱིས་སེ་གོལ་གཏོགས་ལ། ཨོཾ་བཛྲ་མུཿ འཇིག་རྟེན་པ་རྣམས་
རང་གནས་སུ་གཤེགས་པར་གྱུར། པར་བསམ། མཆོད་པ་བསང་སྦྱང་བྱིན་གྱིས་བརླབ་པ་ནི། སུམྦྷ་ནི། ཞེས་སོགས་ཀྱིས་བགེགས་བསང༌། སྭ་བྷཱ་ཝ། ཞེས་སོགས་ཀྱིས་སྟོང་པར་སྦྱངས། སྟོང་པའི་ངང་ལས་ཀཾ་མམ་ཨ་ལས་བྱུང་བའི་ཐོད་པ་
ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུཾ་ཧཱུཾ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། མར་མེ། དྲི། ཞལ་ཟས། རོལ་མོ་རྣམས་རང་བཞིན་སྟོང་ཉིད། རྣམ་པ་མཆོད་རྫས་སོ་སོའི་
9-4-2b


རྣམ་པ་ཅན། བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་སྟེར་བར་གྱུར། པར་བསམ། ཨོཾ་ཨརྒྷཾ་ཨཱཿཧཱུཾ། དེ་བཞིན་དུ། པཱ་དྱཾ། ཨོཾ་བཛྲ་པུ་ཥྤེ་ཨཱཿཧཱུཾ། ཞེས་པ་ནས། ཤཔྟའི། བར་སྔགས་ཕྱག་རྒྱ་དང་བཅས་པས་བྱིན་གྱིས་བརླབ་བོ། །དེ་
ནས་མཎྜལ་དབུལ་ཞིང༌། གསོལ་བ་གདབ་པ་ནི། ཕྱག་གསུམ་བྱས་ཏེ་སྤྱིར་མཎྜལ་བཤམ། ཕྱག་བྱས་ཏེ་སོ་སོའི་ཕྱག་ཏུ་མེ་ཏོག་དབུལ། ཕྱག་བྱས་ཏེ་མེ་ཏོག་དང་བཅས་པའི་ཐལ་མོ་སྦྱར་ནས། སྙིང་པོ་རྒྱན་ལས། སེམས་ཅན་དོན་དུ་སེམས་དགེ་བས། །རྣལ་འབྱོར་པ་ཡི་ཚོགས་རྣམས་ཀུན། །ཚུལ་
བཞིན་ཆོ་ག་ལྡན་པ་ཡིས། །རྣལ་འབྱོར་ལ་ནི་ཉེར་གནས་མཛོད། །ཅེས་པ་ལན་གསུམ་གྱིས་མེ་ཏོག་གཏོར་ལ་གསོལ་བ་གདབ། ཕྱག་བྱས་ཏེ། བླ་མ་མ་གཏོགས་པའི་མེ་ཏོག་བསྡུ། ཕྱག་བྱས་ཏེ་མཎྜལ་བཤམ། ཕྱག་བྱས་ཏེ་གཞན་རྣམས་ཀྱིས་མེ་ཏོག་བླ་མ་ལ་དབུལ་བའི་ཕྱིར། མཎྜལ་བླ་མ་ལ་དབུལ། 
བླ་མས་ཀྱང་གཞན་རྣམས་ཀྱིས་ཕུལ་བའི་མཎྜལ་དང་རང་གི་མེ་ཏོག་བླ་མ། གོང་མ་རྣམས་ལ་དབུལ་བའི་ཕྱིར་མེ་ཏོག་མཎྜལ་གྱི་དབུས་སུ་སྤུངས་ལ། རྟེན་གྱི་དྲུང་དུ་བཞག །ཕྱག་བྱས་ཏེ་རང་གནས་སུ་འཁོད། ཡང་ན་ཕྱག་གསུམ་བྱས་ཏེ་བླ་མའམ་གཙོ་བོ་ལ་མེ་ཏོག་དབུལ། ཡང་ན་ཕྱག་གསུམ་བྱས་ཏེ་གྲལ་ལ་འཁོད་པ་
རྣམས་ལ་མེ་ཏོག་དགྲམ། དེ་ནས་ཕྱག་གསུམ་འཚལ་གཞན་ལྔ་གསོལ་གདབ་དང་བཅས་པ་སྔ་མ་བཞིན་བྱའོ། །དེ་ནས་བླ་མའམ་གཙོ་བོས། བཤགས་པ་དང་བསྡམ་པ་སྔོན་དུ་འགྲོ་བ་ཅན་གྱི་ལྷའི་རྣལ་འབྱོར་ལ་གནས་པར་ཞུ། ཞེས་བརྗོད་ལ། སངས་རྒྱས་ཆོས་དང་དགེ་འདུན་
ལ། །ཞེས་པ་ནས། གོ་འཕང་མཆོག་ལ་དགོད་པར་བགྱི། །ཞེས་བའི་བར་ལན་གསུམ་གྱིས་སྐྱབས་འགྲོ་སོགས་བྱ། དེ་ནས་ཡི་གེ་བརྒྱ་བའི་བསྒོམ་བཟླས་བྱ་བ་ནི། རང་གི་སྤྱི་བོར་པཾ་ལས་པདྨ། ཨ་ལས་ཟླ་བའི་སྟེང་དུ་ཧཱུཾ་ལས་རྡོ་རྗེ་རྩེ་ལྔ་པ་དཀར་པོ་ལྟེ་བ་ལ་ཧཱུཾ་གིས་
9-4-3a


མཚན་པ་ལས་འོད་འཕྲོས་དོན་གཉིས་བྱས་འདུས་ཡོངས་སུ་གྱུར་པ་ལས། རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ་རྡོ་རྗེའི་སྐྱིལ་ཀྲུང་གིས་བཞུགས་པ་ཡུམ་རྡོ་རྗེ་སྙེམས་
མ་དཀར་མོ་ཞལ་གཅིག་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པས་འཁྱུད་པ། གཉིས་ཀའང་དར་དང་རིན་པོ་ཆེའི་རྒྱན་སྣ་ཚོགས་ཀྱིས་སྤྲས་པ། གཉིས་ཀའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་
པས། རང་འདྲའི་ཡེ་ཤེས་པ་སྤྱན་དྲངས ཛཿཧཱུཾ་བཾ་ཧོཿ གཉིས་སུ་མེད་པར་གྱུར། ཡང་ཧཱུཾ་ལས་འོད་འཕྲོས་པས། དབང་གི་ལྷ་རྣམས་སྤྱན་དྲངས། དེ་བཞིན་གཤེགས་པ་རྣམས་ཀྱིས་མངོན་པར་དབང་བསྐུར་དུ་གསོལ། ཞེས་གསོལ་བ་བཏབ་པས། དེ་
རྣམས་ཀྱིས་ཡེ་ཤེས་ཀྱི་བདུད་རྩིས་གང་བའི་བུམ་པ་ཐོགས་ནས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་ཞེས་དབང་བསྐུར། སྐུ་ཡེ་ཤེས་ཀྱི་བདུད་རྩིས་གང༌། ཆུ་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས། མི་བསྐྱོད་པས་དབུ་བརྒྱན་
པར་གྱུར། པར་བསམ། ཐུགས་ཀར་ཟླ་བའི་སྟེང་དུ་ཧཱུཾ་གི་མཐའ་མར་ཡི་གེ་བརྒྱ་པའི་སྔགས་ཀྱིས་བསྐོར་བར་གྱུར། བར་བསམ་བཅོམ་ལྡན་འདས་རྡོ་རྗེ་སེམས་དཔའ་བདག་གཞན་ཐམས་ཅད་ཀྱི་སྡིག་སྒྲིབ་དང་དམ་ཚིག་ཉམས་ཆགས་ཐམས་ཅད་བྱང་
ཞིང་དག་པར་མཛད་དུ་གསོལ། ཞེས་གསོལ་བ་བཏབ་པས། ཐུགས་ཀའི་སྔགས་ཕྲེང་ཧཱུཾ་དང་བཅས་པ་ལས་འོད་ཟེར་འཕྲོས་པས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་སྲས་བཅས་ལ་མཆོད་པ་ཕུལ། དེ་རྣམས་ཀྱི་སྐུ་གསུང་
9-4-3b


ཐུགས་ཀྱི་ཡོན་ཏན་རྣམས་འོད་ཀྱི་རྣམ་པར་བསྡུས་ནས། སྔགས་ཕྲེང་ཧཱུཾ་དང་བཅས་པ་ལ་ཐིམ་ནས། དེ་ལས་བདུད་རྩིའི་རྒྱུན་དཀར་པོ་བབས་པ་ཡབ་ཡུམ་གྱི་སྦྱོར་མཚམས་ནས་བབས་ནས། རང་གི་ཚངས་བུག་ནས་ཞུགས་ཏེ། ལུས་ཐམས་ཅད་
ཡེ་ཤེས་ཀྱི་འདུད་རྩིའི་རྒྱུན་གྱིས་གང༌། སྒོ་གསུམ་གྱི་སྡིག་སྒྲིབ་ཐམས་ཅད་སངས་ཀྱིས་དག་པར་གྱུར། པར་བསམ་ལ། ཨོཾ་བཛྲ་ཧེ་རུ་ཀ་ས་མ་ཡ། མ་ནུ་པཱ་ལཱ་ཡ། ཧེ་རུ་ཀ་ཏྭེ་ནོ་པ་ཏི་ཥྛ། དྲི་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་
མེ་བྷ་ཝ། སརྦ་སིདྡྷི་མྨེ་པྲ་ཡ་ཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲི་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོཿ བྷ་ག་ཝན། བཛྲ་ཧེ་རུ་ཀ་མ་མེ་མུ་ཉྩ་ཧེ་རུ་ཀ་བྷ་ཝ། མཧཱ་ས་མ་ཡ་སཏྭ་ཨཱཿཧཱུཾ་ཕཊ། ཅེས་མང་དུ་བཟླས་ནས། རྒྱུད་མངོན་བརྗོད་བླ་མ་ལས། བདག་ནི་མི་ཤེས་རྨོངས་པ་
ཡིས། །དམ་ཚིག་ལས་མི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །རྡོ་རྗེ་སེམས་དཔའ་ཡབ་ཡུམ་རང་ལ་ཐིམ་པས་རང་
གི་སྒོ་གསུམ་དང་རྡོ་རྗེ་སེམས་དཔའི་སྐུ་གསུང་ཐུགས་དབྱེར་མེད་དུ་གྱུར། པར་བསམ། ཤྲཱི་ཧེ་རུ་ཀ། ཧེ་ནི་ཀུན་གྱི་འབྱུང་གནས་སུ་གྱུར་པའི་སེམས་ཏེ་ཞེས་པ་ནས་ཨེ་ཝཾ་གྱི་དོན་ནོ། །སྟོང་པའི་ངང་ལས། ཞེས་དང༌། རྡོ་རྗེ་དང་ཐོད་པ་འཛིན་
པས་འཁྱུད་པ། ཤྭཱི་ཧེ་རུ་ཀོ་྅་ཧཾ། ཨོཾ་ཨ་ཨཱ། ཞེས་པ་ནས་ཧཱུཾ་ཧཱུཾ་ཕཊ། རང་གི་ལྟེ་བའི་ཕྱོགས་སུ། ཞེས་དང་ལྟེ་བའི་སྔགས་ཕྲེང་ལ་ཐིམ་པར་གྱུར། སེམས་ཅན་ཐམས་ཅད་སྡུག་བསྔལ་དང་བྲལ་བར་གྱུར་ཅིག །གཞན་གཉིས་ཀྱིའང་ཐོག་མཐར་དེ་
9-4-4a


བཞིན་དུ་སྦྱར་ནས། སེམས་ཅན་ཐམས་ཅད་ཡིད་དེ་བཞིན་ཉིད་ལ་རོ་གཅིག་ཏུ་གནས་པར་གྱུར་ཅིག་དཔྲལ་པའི་དབུས་སུ་བྷཱུཾ་དཀར་པོ་ཡོངས་སུ་གྱུར་པ་ལས། ཞེས་པ་ནས་ལྟེ་བར་ཨཾ་སེར་པོ་ཡོངས་སུ་གྱུར་པ་ལས། རྡོ་རྗེ་ཉི་མ་
སེར་པོ་གཡས་རིན་པོ་ཆེ་འཕྱར་ཞིང༌། གཡོན་འགྱིང་པ་དང་བཅས་པས། དྲིལ་བུ་ཐུགས་ཀར་འཛིན་པ། ཞེས་པ་ནས། ས་གནོན་གྱི་ཕྱག་རྒྱས་རྡོ་རྗེ་འཛིན་ཅིང༌། གཡོན་འགྱིང་བ་དང་བཅས་པས་དྲིལ་བུ་དཀུར་བརྟེན་པ། མིག་གཉིས་སུ་ཨོཾ་དཀར་
པོ་ཡོངས་སུ་གྱུར་པ་ལས། གཏི་མུག་རྡོ་རྗེ་དཀར་པོ་གཡས་འཁོལ་ལོ་འཕྱར་ཞིང༌། གཡོན་འགྱིང་བ་དང་བཅས་པས་དྲིལ་བུ་དཀུར་བརྟེན་པ། རྣམ་པ་གཉིས་སུ། ཞེས་པ་ནས་ཐུགས་ཀར་རྡོ་རྗེ་འཛིན་ཅིང་གཡོན་འགྱིང་བ་དང་བཅས། ཞེས་དང་ 
སེར་སྣ་རྡོ་རྗེ་སེར་པོ་གཡས་རོལ་བ་དང་བཅས་པས་རིན་པོ་ཆེ་འཕྱར་ཞིང༌། གཡོན་རོལ་པ་དང་བཅས་པས་དྲིལ་བུ་ཐུགས་ཀར་འཛིན་པ། ལྕེའི་རྩ་བར། ཞེས་པ་ནས་དྲིལ་བུ་དཀུར་བརྟེན་པ། ཐམས་ཅད་ཀྱང་ཞལ་གཅིག་པ། ཞེས་དང་གཡས་
བརྐྱངས་ཀྱིས་བཞུགས་པ། ལྟེ་བར་ས་ལ་ལཾ་སེར་པོ་ཡོངས་སུ་གྱུར་པ་ལས། ལྟུང་བྱེད་མ་སེར་མོ་ཞལ་གཅིག་ཕྱག་བཞིའི་གཡས་གཉིས་གྲི་གུག་དང་འཁོར་ལོ། གཡོན་གཉིས་ཐོད་པ་དང་ཁ་ཊྭཱཾ་ག་འཛིན་པ། ཞེས་དང་གར་གྱི་དབང་ཕྱུག་
མའི་སྐབས་སུ། གཡོན་གཉིས་ཐོད་པ་དང་ཁ་ཊྭཱཾ་ག་འཛིན་པ། གསང་གནས་ནམ་མཁའི་ཁམས་ལ། ཞེས་པ་ནས། ཕྱག་དྲུག་གི་གཡས་གྲི་གུག །ཅེས་སོགས་དང༌། གཡོན་གཉིས་ཐོད་པ་དང་ཁཊྭཱཾ་ག་འཛིན་པ། ཐམས་ཅད་ཀྱང་ཞལ་རེ་རེ་ལ་
9-4-4b


སྤྱན་གསུམ་གསུམ་པ། གཅེར་བུ་སྐྲ་གྲོལ་པ། ཞེས་དང་གཡས་བརྐྱངས་ཀྱིས་བཞུགས་པ། ཨོཾ་ཞེས་པ་ནས་ཤུདྔྷོ྅་ཧཾ། ཨོཾ་སུམྦྷ་ནི་སུམྦྷ་ཧཾ་ཧཱུཾ་ཕཊ། ཤར་དུ་སྔགས་དེ་ཉིད་ཁ་དོག་ནག་པོ། ཞེས་པ་ནི ཨོཾ་ཨཱ་ན་ཡ་ཧོ། བྷ་ག་ཝན། བཛྲ་ཧུཾ་ཧཱུཾ་
ཕཊ། ལྷོར་སྔགས་དེ་ཉིད། ཁ་དོག་སེར་པོ་རྣམས་འཁོད་པར་གྱུར། སྔགས་དེ་རྣམས་ལས་རང་རང་གི་ཁ་དོག །ཅེས་པ་ནས། འཕྲོས་པས་ཚངས་པའི་འཇིག་རྟེན་ནས། ཞེས་པ་ནས། གཟུགས་ཆེན་པོ་རྣམས་སུ་གྱུར། སྔགས་འོད་ཟེར་དང་བཅས་པ་
ཡོངས་སུ་གྱུར་པ་ལས། ཤར་ནག བྱང་ལྗང༌། ནུབ་དམར། ལྷོ་སེར་བའི་སྣ་ཚོགས་རྡོ་རྗེའི་ར་བ་གྲུ་བཞི་པ། ཚངས་པའི་འཇིག་རྟེན་ནས་ཞེས་པ་ནས་ཁྱབ་པར་གྱུར། ར་བ་གྲུབ་པ་དང་དུས་མཉམ་དུ་ཞེས་དང༌། མཚན་པའི་ཧཱུཾ་གི་འོད་ཟེར་ལས། ཞེས་
པ་དང༌། སྣ་ཚོགས་རྡོ་རྗེའི་རང་བཞིན་དང༌། སྣ་ཚོགས་རྡོ་རྗེའི་ཧཱུཾ་གི་འོད་ཟེར་ལས། ཞེས་དང༌། གཅིག་ཏུ་གྱུར་པའི་ཕྱི་རོལ་ཏུ། ཞེས་པ་ནས་བསྐོར་བར་གྱུར། ཨོཾ་ཞེས་དང༌། ཨོཾ་བཛྲ་ཛྭ་ལ་ཨན་ལཱ་རྐ་ཧུཾ་ཧཱུཾ། ཨོཾ་སུམྦྷ་ནི་སུམྦྷ་ཧུཾ་ཧཱུཾ་ཕཊ། ཅེས་ལན་གཉིས་བརྗོད་
ལ། ཤར་དང་སྟེང་དུ་སྔགས་དེ་ཉིད་ཁ་དོག་ནག་པོ་གཉིས་ཡོངས་སུ་གྱུར་པ་ལས་ཁྭ་གདོང་མ་ནག་མོ་གཉིས། ཨོཾ་གྲྀ་ཧྞ་ཞེས་པ་ནས། ཕཊ། བྱང་དུ་སྔགས་དེ་ཉིད་ཁ་དོག་ལྗང་ཁུ་ཡོངས་སུ་གྱུར་པ་ལས་འུག་གདོང་མ་ལྗང་ཁུ། ཞེས་དང༌། ཨོཾ་གྲྀ་ཧྞ་
པ་ཡ་ཞེས་པ་ནས་ཕཊ་ཀྱི་བར་ལན་གཉིས་བརྗོད་ལ། ནུབ་དང་འོག་ཏུ་སྔགས་དེ་ཉིད་ཁ་དོག་དམར་པོ་གཉིས་ཡོངས་སུ་གྱུར་པ་ལས། ཁྱི་གདོང་མ་དམར་མོ་གཉིས། ཨོཾ་ཨཱ་ན་ཞེས་པ་ནས། ཕཊ། ལྷོར་སྔགས་དེ་ཉིད་ཁ་དོག་སེར་པོ་ཡོངས་སུ་
9-4-5a


གྱུར་པ་ལས། ཕག་གདོང་མ་སེར་མོ། ཨོཾ་སུམྦྷ་ནི་སུམྦྷ་ཧུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ། བྷ་ག་ཝན། བཛྲ་ཧུཾ་ཧཱུཾ་ཕཊ། ཤར་ལྷོར་སྔགས་དེ་ཉིད་ཁ་དོག་ནག་པོ་དང༌། སེར་པོ་འོད་ཟེར་དང་བཅས་པ་གཉིས་འདྲེས་ཏེ་ཡོངས་སུ་
གྱུར་པ་ལས། གཤིན་རྗེ་བརྟན་མ་གཡས་སྔོ། གཡོན་སེར་བ། ཨོཾ་ཨཱ་ན་ཡ་ཧོ། བྷ་ག་ཝན། བཛྲ་ཧུཾ་ཧཱུཾ་ཕཊ། ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧུཾ་ཧཱུཾ་ཕཊ། ལྷོ་ནུབ་ཏུ་སྔགས་དེ་ཉིད་ཁ་དོག་སེར་པོ་དང༌། དམར་པོ་འོད་ཟེར་དང་བཅས་པ་གཉིས་འདྲེས་ཏེ་ཡོངས་
སུ་གྱུར་པ་ལས། གཤིན་རྗེ་ཕོ་ཉ་མོ་གཡས་སེར། གཡོན་དམར་བ། ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧུཾ་ཧཱུཾ་ཕཊ། ཨོཾ་གྲྀཧྞཱ་གྲྀཧྞཱ་ཧུཾ་ཧཱུཾ་ཕཊ། ནུབ་བྱང་དུ་སྔགས་དེ་ཉིད་ཁ་དོག་དམར་པོ་དང་ལྗང་ཁུ་འོད་ཟེར་དང་བཅས་པ་གཉིས་འདྲེས་ཏེ་ཡོངས་སུ་གྱུར་པ་
ལས། གཤིན་རྗེ་མཆེ་བ་མ་གཡས་དམར་གཡོན་ལྗང་བ། ཨོཾ་གྲྀ་ཧྞ་གྲྀ་ཧྞ་ཧུཾ་ཧཱུཾ་ཕཊ། ཨོཾ་སུམྦྷ་ནི་སུམྦྷ་ཧུཾ་ཧཱུཾ་ཕཊ། བྱང་ཤར་དུ་སྔགས་དེ་ཉིད་ཁ་དོག་ལྗག་ཁུ་དང་ནག་པོ་འོད་ཟེར་དང་བཅས་པ་གཉིས་འདྲེས་ཏེ་ཡོངས་སུ་གྱུར་པ་ལས། གཤིན་རྗེ་
འཇོམས་མ་གཡས་ལྗང་གཡོན་སྔོ་བ། ཐམས་ཅད་ཀྱང་ཞལ་གཅིག་པ། ཞེས་པ་ནས། ཕུར་བུ་བསྣམས་པ། དེ་རྣམས་ཀྱིས་རང་འདྲ་དུ་མ་ཕྱོགས་བཅུར་སྤྲོས་ནས། ཞེས་དང༌། རྡོ་རྗེ་ར་བའི་ཕྱི་རོལ་དང་ཉེ་བར་ཧཱུཾ། ཞེས་ངག་ཏུ་བརྗོད་པའི་རྗེས་སུ། ཧཱུཾ་རིང་པོ་ནག་
པོ་བཅུ་ལས་གྲུབ་པའི་ཁྲོན་པ་བཅུར་སོ་སོའི་བགེགས་རྣམས་བཅུག་པར་གྱུར། ཨོཾ་གྷ་གྷ། ཞེས་པ་ནས། བཛྲ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་མུད་གར། བཛྲ་ཀཱི་ལ་ཡ། ཨ་ཀོ་ཊ་ཡ་ཧུཾ་ཧཱུཾ་ཕཊ། ཅེས་ལན་བཅུ་བརྗོད་ལ། ཤར་ནས་ཕྱོགས་གཡོན་སྐོར་དང༌། 
9-4-5b


མེ་ནས་མཚམས་གཡས་སྐོར་དང༌། སྟེང་འོག་ཏུ་བགེགས་རྣམས་ཀྱི་སྤྱི་བོར་ཕུར་བུ་ཟུག །ཁྲོ་མོ་རྣམས་ཀྱི་ཕྱག་གི་ཐོ་བས་བརྡུངས་པས། ཞེས་པ་ནས། རོ་གཅིག་ཏུ་གྱུར། ཁྭ་གདོང་མ་ལ་སོགས་པས། ཞེས་པ་ནས། དུམ་བུ་གཅིག་ཏུ་གྱུར་པའི་ཕྱིར་རོལ་
ཏུ་རྡོ་རྗེའི་མེ་གཡོན་སྐོར་དུ་འཁྱིལ་ཞིང་འབར་བ་སྟེང་དང་ལོགས་ཀུན་ཏུ་ཁྱབ་པས། འགྲོ་བ་ཐམས་ཅད་ཀྱང་རྣམ་པ་ཐམས་ཅད་དུ་བགེགས་དང་བྲལ་བར་གྱུར། བསྲུང་འཁོར་གྱི་དབུས་ན་རང་ཞེས་པ་ནས། པདྨའི་ལྟེ་བར་ཨཾ་ལས་བྱུང་བའི་ཞེས་པ་
ནས་འོད་ཟེར་རང་གི་སྙིང་ཁའི་ཧཱུཾ་ལ་ཐིམ་པར་གྱུར། གང་གི་དྲིན་གྱིས་བདེ་ཆེན་གནས་ཞེས་དང༌། ཀུན་ལ་བདག་ནི་གུས་ཕྱག་འཆལ། །རང་གི་ཐུགས་ཀའི་ཧཱུྃ་ལས་བྱུང་བའི་མཆོད་པའི་ལྷ་མོ་རྣམས་ཀྱིས་མཆོད་པར་གྱུར། ཤྲཱི་ཧེ་རུ་ཀ་ཨརྒྷཾ་
པྲ་ཏཱི་ཙྪ་སྭཱཧཱ། དེ་བཞིན་དུ་སྦྱར་ཏེ། པཱ་དྱཾ་གིས་ཞབས་བསིལ་དང༌། དེ་ནས་ཨོཾ་བཛྲ་པུཥྤེ་ཨཱཿཧཱུཾ་སྭཱཧཱ། ཞེས་པ་ནས་ཤཔྟའི་བར་གྱིས་མཆོད་ཨོཾ་བཛྲ་བཱི་ནི་ཧཱུཾ་ཧཱུཾ་ཕཊ། ཨོཾ་བཛྲ་བཾ་ཤེ་ཧཱུཾ་ཧཱུཾ་ཕཊ། ཅེས་པ་ནས་ཨོཾ་དྷ་རྨ་དྷཱ་ཏུ་བཛྲི་ཧཱུཾ་ཧཱུཾ་ཕཊ། ཅེས་པའི་བར་སྔགས་ཕྱག་རྒྱ་དང་
བཅས་པས། རིག་མ་བཅུ་དྲུག་གི་མཆོད་པའི་རྗེས་སུ། རྐང་བརྒྱད་ཀྱི་སྔགས་ཀྱིས་བསྟོད་པའམ། ཡང་ན། ཨོཾ་བཅོམ་ལྡན་དཔའ་བོའི་དབང་ཕྱུག་ལ་ཕྱག་འཚལ་ཧཱུཾ་ཧཱུཾ་ཕཊ། ཨོཾ་བསྐལ་པ་ཆེན་པོའི་མེ་དང་མཉམ་པའི་འོད་ཧཱུཾ་ཧཱུཾ་ཕཊ། ཨོཾ་རལ་པའི་ཅོད་པན་མི་བཟད་
པ་དང་ལྡན་ཧཱུཾ་ཧཱུཾ་ཕཊ། ཨོཾ་མཆེ་བ་རྣམ་པར་གཙིགས་པ་འཇིགས་པའི་ཞལ་ཧཱུཾ་ཧཱུཾ་ཕཊ། ཨོཾ་སྟོང་ཕྲག་ཕྱག་ནི་འབར་བའི་འོད་ཟེར་ཅན་ཧཱུཾ་ཧཱུཾ་ཕཊ། ཨོཾ་དགྲ་སྟ་ཞགས་གདེངས་མདུང་དང་ཁ་ཊྭཱཾ་འཛིན་ཧཱུཾ་ཧཱུཾ་ཕཊ། ཨོཾ་སྟག་གི་པགས་པའི་ན་བཟའ་
9-4-6a


འཛིན་པ་ཅན་ཧཱུཾ་ཧཱུཾ་ཕཊ། ཨོཾ་སྐུ་ཆེན་དུད་ཁ་བགེགས་མཐར་མཛད་ལ་འདུད་ཧཱུཾ་ཧཱུཾ་ཕཊ། ཅེས་འོད་སྐད་དུ་བསྒྱུར་བས་བསྟོད་ལ། དཀོན་མཆོག་གསུམ་ལ་བདག་སྐྱབས་མཆི། ཞེས་པ་ནས། སངས་རྒྱས་རྣམས་ལ་དབུལ་པར་བགྱི། ཨོཾ་བཛྲ་
ཧེ་རུ་ཀ་ཞེས་དང༌། ཨཱཿཧཱུཾ་ཕཊ། ཚོགས་ཞིང་རྣམས་རང་ལ་ཐིམ་པས་བྱིན་གྱིས་བརླབས་པར་གྱུར། མཆོད་ཡུལ་དང༌། ཞེས་པ་ནས་བཟད་དོ། །རང་གི་སྤྱི་བོར་ཧེ་དཀར་པོ་ཞེས་པ་ནས། ཀ་མཐིང་ཁ། དེ་གསུམ་གྱི་དོན་ཞེས་པ་ནས། མི་གནས་
ཉིད་དོ། །སེམས་ཅན་རྣམས་ཀྱིས། ཞེས་དང༌། ཐར་པར་བྱའོ། །ཨོཾ་སྭ་བྷཱ་ཝ་ཞེས་པ་ནས། ཧཾ། ཁམས་གསུམ་པོ་རང་བཞིན་གྱིས་གྲུབ་པས་སྟོང་པར་གྱུར། ཡི་གེ་གསུམ་པོ་ཡོངས་སུ་གྱུར་པ་ལས། ཞེས་དང༌། ཧཱུཾ་སྔོན་པོར་གྱུར། དེ་གསུམ་ལས་རིམ་
པ་བཞིན་དུ། ཞེས་པ་ནས། སྙོམས་པར་འཇུག་པ་སྔོན་དུ་འགྲོ་བས་སྐུའི་འཁོར་ལོའི་ལྷ་རྣམས་ཞུ་བ་ཨོཾ་དང༌། གསུང་གི་འཁོར་ལོའི་ལྷ་རྣམས་ཞུ་བ་ཨཱཿདང༌། ཐུགས་ཀྱི་འཁོར་ལོའི་ལྷ་རྣམས་ཞུ་བ་ཧཱུྃ་ལ་རིམ་པ་བཞིན་དུ་ཐིམ་ཞིང༌། ཞེས་པ་ནས། 
ཧཱུཾ་གི་ཞབས་ཀྱུ་ནི་ཧ་ལ་ཐིམ། ཧའི་ལུས་ནི་དེའི་མགོ་བོ་ལ། དེ་ཡང་ཟླ་ཆེས་ལ། དེ་ཡང་ཐིག་ལེ་ལ། དེ་ཡང་ནཱ་ད་ལ་ཐིམ་ཞིང༌། ནཱ་ད་ཡང་སྐྲའི་རྩེ་མོ། ཞེས་པ་ནས། གནས་པར་གྱུར། སེམས་ཅན་རྣམས་ཀྱིས་ཞེས་དག །ཐར་པར་བྱའོ། །ཨོཾ་ཤཱུ་
ནྱ་ཏཱ། ཞེས་པ་ནས་ཧཾ་ནཱ་ད་ཡང་མི་དམིགས་པར་གྱུར། དེ་ལྟར་སྣང་བ་ཐམས་ཅད་བསྡུས་པའི་སྟོང་པ་ཉིད་ལས། རང་གི་སེམས་ནཱ་དའི་གཟུགས་གྱེན་དུ་འགྲེང་བ་ཤིན་ཏུ་ཕྲ་བ། དཀར་ལ་དམར་བའི་མདངས་ཆགས་པ་ནམ་མཁར་གནས་པར་
9-4-6b


གྱུར། སྟོང་པའི་ངང་ལས་ཡཾ་སྔོན་པོ་ཡོངས་སུ་གྱུར་པ་ལས། ཞེས་དང༌། གེ་སར་སེར་པ། སྣ་ཚོགས་པདྨ་ཆུང་ངུའི་དབུས་སུ་མཚན་སོ་གཉིས་ཀྱི་ངོ་བོ་ཨ་ཨཱ། ཞེས་པ་ནས། ཨཾ་ཨཿསྟེ་དབྱངས་དཀར་པོ་བཅུ་དྲུག་པ་ཕྲག་གཅིག་གཡས་སྐོར་དང༌། སླར་
ཡང་ཨ་ཨཱ་ཞེས་པ་ནས། ཨཾ་ཨཿསྟེ་དབྱངས་དཀར་པོ། བཅུ་དྲུག་པ་ཕྲག་གཅིག་གཡོན་སྐོར་ཏེ། གཉིས་ཀའང་རིམ་པ་གཅིག་གིས་འཁོད། དེའི་ཕྱི་རོལ་ཏུ་དཔེ་བྱད་བརྒྱད་ཅུའི་ངོ་བོ། ཀ་ཁ་ག་གྷ་ང༌། ཙ་ཚ་ཛ་ཛཱ་ཉ། ཊ་ཋ་ཌ་ཌྷ་ཌྷ་ཎ། ཏ་ཏ་ད་དྷ་དྷ་ན། པ་ས་
ཞེས་དང་ཡ་ཡར་ལ་ལ་ཝ། ཤ་ཥ་ས་ཧ་ཀྵ་སྟེ། གསལ་བྱེད་དམར་པོ་བཞི་བཅུ་པ་ཕྲག་གཅིག་གཡས་སྐོར་དང༌། སླར་ཡང་ཀ་ཁ་ག་ཞེས་པ་ནས་ཀྵ་སྟེ་གསལ་བྱེད་དམར་པོ་བཞི་བཅུ་པ་ཕྲག་གཅིག་གཡོན་སྐོར་དུ་རིམ་པ་གཅིག་གིས་འཁོད། 
དེ་གཉིས་ཞེས་དང་མེ་ལོང་ལྟ་བུའི་ཡེ་ཤེས་ཨ་ལི་དང༌། ཞེས་པ་ནས་མཉམ་པ་ཉིད་ཀྱི་ཡེ་ཤེས་རང་ནམ་མཁའི་ནཱ་དས་ཟླ་བ་དཀར་ལ་དམར་བ་མཐོང་བ་ན། ཞེས་པ་ནས་སེམས་ཅན་གྱི་དོན་བྱའོ་སྙམ་པའི་འཕེན་པ་དང་ལྡན་པས་ཟླ་བའི་དབུས་
སུ་ནཱ་ད་ཞུགས་པ་ལས། ནཱ་ད་ལས་ཐིག་ལེ། དེ་ལས་ཟླ་ཚེས། དེ་ལས་ཧའི་མགོ་བོ། ཞེས་དང་སོ་སོར་རྟོག་པའི་ཡེ་ཤེས་ཧཱུཾ་ལས། ཞེས་དང༌། འགྲོ་བ་རྣམས་འཁོར་ལོ་ལྔའི་ལྷ་ཚོགས་ཀྱི་གོ་འཕང་ལ་བཀོད་པ་དང༌། སྔོན་ཐོག་མ་མེད་པ་ནས། 
ཞེས་དང༌། ནཱ་ད་ལ་ཐིམ་ཞིང༌། ཧཱུཾ་ཡིག་ལྷན་སྐྱེས་ཀྱི་དགའ་བའི་རང་བཞིན་ཅན་དུ་གྱུར་པ་ནི། བྱ་བ་སྒྲུབ་པའི་ཡེ་ཤེས། ཨོཾ་ཨཱཿ་ཧཱུྃ་ཞེས་དང༌། ཤུདྡྷོ་ཉ་ཧཾ། ཟླ་བ་དབྱངས་གསལ་ཧཱུཾ་དང་བཅས་པ་རྣམས་ཡོངས་སུ་གྱུར་པ་ལས། ཞེས་དང༌། 
9-4-7a


དུས་གཅིག་ཏུ་གྲུབ་པ་ནི། ཆོས་ཀྱི་དབྱིངས་ཀྱི་ཡེ་ཤེས་ཏེ། དེ་ཡང་ཁང་པ་བརྩེགས་པའི་གཞལ་ཡས་ཁང་གྲུ་བཞི་པ་སྒོ་བཞི་པ། ཞེས་དང༌། དེ་ན་གནས་པའི་ཤིང་བརྒྱད་ནི། ཤར་དུ་ཤི་ཪྵ། བྱང་དུ་ཨ་ཤྭད་
ཐ། ནུབ་ཏུ་ཀཾ་ཀེ་ལ། ལྷོར་ཙུ་ཏ། དབང་ལྡན་དུ་བྷ་ཏྲ། མེར་ཀ་རཉྫ། བདེན་བྲལ་དུ་པ་ཊ་པརྐ། རླུང་དུ་བརྠི་བ་རྣམས་སོ། །དེ་བཞིན་དུ་ཕྱོགས་དང་མཚམས་རྣམས་ཀྱི་འདོན་ཚུལ་འདི་འོག་མ་ཀུན་ལའང་སྦྱར་རོ། །ཤིང་གི་རྩ་བར། ཅེས་པ་ནས། ཤར་དུ་དབང་པོ་སེར་པོ། 
རབ་བརྟན་དཀར་པོ་ལ་ཞོན་པ་གཡས་འོག་མ་རྡོ་རྗེ། བྱང་དུ་ནོར་སྦྱིན་སེར་པོ་མི་ལ་ཞོན་པ། གཡས་འོག་མ་ནེའུ་ལེ་རིན་པོ་ཆེ་སྐྱུག་པ་འཛིན་པ། ཞེས་པ་ནས། རླུང་དུ་རླུང་ལྷ་དུད་ཁ་ཤ་པ་ལ་ཞོན་པ། གཡས་འོག་མ་བ་དན་སེར་པོ་འཛིན་པ། ཐམས་ཅད་
ཀྱང་ཞལ་གཅིག །ཕྱག་བཞིའི་དང་པོ་གཉིས་ཐལ་མོ་སྦྱར་བ། གཡོན་འོག་མ་ཐོད་པ་འཛིན་པས་ཡུམ་ལ་འཁྱུད་པ། ཤིང་བརྒྱད་ཀྱི་སྟོད་ཀྱི་ཡལ་གའི་གསེབ་ནས། ཞེས་པ་ནས། གླང་པོའི་གདོང་ཅན་དཀར་པོ། ཞེས་དང༌། ཞེས་དང༌། ལྗང་ཁུ་ཐམས་ཅད་ཀྱང༌། 
དྲག་ཅིང་གཏུམ་པ་རྫུ་འཕྲུལ་ཆེན་པོ་པ། ཞལ་གཅིག་པ་ཕྱག་གཉིས་ཀྱིས་གཡས་གཏོར་མ་དང༌། གཡོན་ཐོད་པ་འཛིན་པ། ཐུགས་རྗེའི་ཆུ་བརྒྱད། དེ་ལ་ཞེས་དང༌། དུང་སྐྱོང་སེར་པོ་ཐམས་ཅད་སྟོད་མི་འདྲ་བ། སྨད་སྦྲུལ་མཇུག་ཏུ་འཁྱིལ་ཞིང༌། 
ཕྱག་གཉིས་ཀྱིས་ཐལ་མོ་སྦྱར་ནས་གཙོ་བོ་ལ་འདུད་པ། དེ་དག་གི་སྟེང་གི་ཞེས་དང༌། ལྷོ་སེར། དབུས་སྔོ་བ། འོག་གཞི་དམ་ཚིག་གི་འཁོར་ལོ་ལ། ཞེས་པ་ནས། རིན་པོ་ཆེའི་ཏོག་གིས་སྤྲས་པ། དབུས་ཀྱི་པདྨའི་ལྟེ་བར་ཉི་གདན་ལ། རང་
9-4-7b


ཉིད་བཅོམ་ལྡན་འདས་དཔལ་ཧེ་རུ་ཀ་ཞེས་པ་ནས། གཡོན་ཞལ་ལྗང༌། རྒྱབ་ཞལ་དམར། གཡས་ཞལ་སེར་བ། ཞེས་པ་ནས། མི་རུས་ཀྱི་ཐལ་བས་ལུས་ཐམས་ཅད་ལ་བྱུགས་པ། ཡབ་ཡུམ་ཕན་ཚུན་འཁྱུད་པས་ནི་ཐབས་དང་ཤེས་རབ། ཅེས་པ་ནས། 
ཞི་ལྷག་གི་ཉམས་ཐམས་ཅད་དང་ལྡན་པ། བཅོམ་ལྡན་འདས་ལ་མངོན་དུ་ཕྱོགས་པར་ཅེས་དང༌། ཐུགས་རྗེའི་བདག་ཉིད་ཅན། ཕྱག་རྒྱ་ལྔས་བརྒྱན་པ་ཞེས་དང༌། ལྔ་བཅུའི་དོ་ཤལ་ཅན་ཏེ། ཡབ་ཀྱི་གསང་གནས་མི་དམིགས་པ་ལས། ཧཱུཾ་
དཀར་པོ་ལས་བྱུང་བའི་རྡོ་རྗེ་ནག་པོ་རྩེ་ལྔ་པ། བྱཱ་དམར་པོ་ལས་ཞེས་དང༌། རྩེ་མོར་བྱཱ་སེར་པོས་མཚན་པ། ཡབ་ཀྱི་ལྟེ་བར་ཟླ་གདན་ལ། ཨོཾ་བཛྲ་བཻ་རོ་ཙ་ནཱི་ཡེ་ཧུཾ་ཧཱུཾ་ཕཊ་སྭཱ་ཧཱ། ཐུགས་ཀར་ཟླ་གདན་ལ། ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྣ་ནཱི་ཡེ་
ཧུཾ་ཧཱུཾ་ཕཊ་སྭཱཧཱ། མགྲིན་པར་ཉི་གདན་ལ། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧུཾ་ཧཱུཾ་ཕཊ། ཌཱ་ཀི་ནཱི་ཛཱ་ལ་ཤཾ་བ་རཾ་སྭཱཧཱ། དཔྲལ་བར་ཉྀ་གདན་ལ། ཨོཾ་ཧྲཱིཿཧ་ཧ་ཧུཾ་ཧཱུཾ་ཕཊ་ཀྱི་སྔགས་ཐམས་ཅད་ཁ་དོག་དམར་པོ་འོད་ཟེར་འཕྲོ་བ། གཡོན་བསྐོར་དུ་གནས་བ། ཡུམ་གྱི་ལྟེ་
བར་ཉི་གདན་ལ་ཨོཾ་ཤྲཱི་བཛྲ་ཧེ་ཧེ། ཞེས་པ་ནས། ཛཱ་ལ་ཤཾ་བ་རཾ་སྭཱཧཱ། ཐུགས་ཀར་ཉི་གདན་ལ། ཨོཾ་ཧྲཱིཿཧ་ཧ་ཧུཾ་ཧཱུཾ་ཕཊ། མགྲིན་པར་ཟླ་གདན་ལ། ཨོཾ་བཛྲ་བཻ་རོ་ཙ་ནཱི་ཡེ་ཧུཾ་ཧཱུཾ་ཕཊ་སྭཱ་ཧཱ། དཔྲལ་བར་ཟླ་གདན་ལ། ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝ་རྣ་ནཱི་ཡེ་ཧུཾ་
ཧཱུཾ་ཕཊ་སྭཱཧཱ། སྔགས་ཐམས་ཅད་ཁ་དོག་དམར་པོ་འོད་ཟེར་འཕྲོ་བ། གཡོན་སྐོར་དུ་གནས་པ། སྔགས་རྣམས་ཀྱང་ཕན་ཚུན་དུ་ཞལ་སྦྱོར་ཞིང་འོད་ཟེར་འཁྱུད་པའི་རྣམ་པ་ཅན། ཨོཾ་ཨཱཿཧཱུྃ་སྙོམས་པར་ཞུགས་པས་བྱང་སེམས་ཞུ་བ། ཞེས་དང༌། ལྷན་
9-4-8a


ཅིག་སྐྱེས་དགའི་ཡེ་ཤེས་ཀྱེས་པས་རྟེན་དང་བརྟེན་པའི་དཀྱིལ་འཁོར་གཉིས་ཀྱང་བདེ་སྟོང་དབྱེར་མེད་ཀྱི་ངོ་བོར་གྱུར། པདྨའི་འདབ་མ་ལ་ཤར་དུ། ཞེས་དང༌། གཡས་ལྷག་མ་ཌཱ་མ་རུ་དང༌། གཡོན་ཁ་ཊྭཱཾ་ག་བསྣམས་
པ། གཡས་བརྐྱངས་ཀྱིས་བཞུགས་པ། ཞེས་དང༌། བཀག་པའི་ཐོད་པ་བཞི་སྟེ་བདེ་ཆེན་གྱི་འཁོར་ལོ། ཐུགས་འཁོར་གྱི་ཤར་རྩི་བས། ཞེས་དང༌། བྱང་རྩིབས་ཛཱ། ཞེས་དང༌། ནུབ་རྩིབས་ཨོ། ལྷོ་རྩིབས་ཨརྦུ། ཞེས་དང༌། མེ་ཙིབས་གོ། ཞེས་དང༌། 
བདེན་བྲལ་གྱི་རྩིབས་ར། ཞེས་དང༌། རླུང་གི་རྩིབས་དེ། ཞེས་དང༌། དབང་ལྡན་གྱི་རྩིབས་མཱ། ཞེས་དང༌། ཐུགས་ཀྱི་འཁོར་ལོའི་ལྷ་རྣམས་ནམ་མཁའ་ལ། ཞེས་དང༌། སྐུ་མདོག་སྔོན་པོ། གསུང་གི་འཁོར་ལོའི། ཞེས་པ་ནས། འོག་པག་སིལ་སིལ་གྱི་སྒྲ་སྒྲོགས་
པ། ཤར་སྒོར་ཁྭ་གདོང་མ་ནག་མོ། ཞེས་པ་ནས། བྱང་ཤར་དུ་གཤིན་རྗེ་འཇོམས་མ་གཡས་ལྗང་གཡོན་སྔོ་བ། ཐམས་ཅད་ཀྱང་དྲག་མོ་ཆེན་པོ་སེམས་ཅན་ཀུན་གྱི་དོན་མཛད་པ་ལ་བརྩོན་པ། ཞེས་པའི་རྗེས་སུ་སྙིང་པོའི་རྣལ་འབྱོར་མ་བཞིའི་སྐབས་
བཞིན་དུ། ཞལ་གཅིག་མ། ཞེས་པ་ནས། ཁ་ཊཾ་ག་བསྣམས་པ། རོའི་གདན་ལ་གཡས་བརྐྱངས་ཀྱིས་བཞུགས་པ། ཞེས་དང༌། ཐོད་སྐམ་ལྔ་བཅུའི་དོ་ཤལ་ཅན། འཁོར་གྱི་ལྷ་ཞེས་པ་ནས། ཕྲེང་བ་འཛིན་པ། ཨོཾ་ཨཱཿཧཱུྃ་གནས་བཞི་དག་གསང་
གནས་བྱིན་གྱིས་བརླབས་པའི་ཡབ་ཡུམ་སྙོམས་པར་ཞུགས་པས་བྱང་སེམས་ཞུ་བ་སྤྱི་བོ་ནས། ཞེས་དང༌། ནོར་བུའི་རྩེར་སླེབས་པ་ན་ལྷན་ཅིག་སྐྱེས་དགའི་ཡེ་ཤེས་སྐྱེས་པའི་བདེ་སྟོང་དབྱེར་མེད་དུ་སྦྱར་བ་དེ་ཉིད། བྱང་ཆུབ་ཀྱི་ཕྱོགས་ཀྱི་
9-4-8b


ཆོས་སོ་བདུན་གྱི་ངོ་བོར་གྱུར་པ། ལྷ་སོ་བདུན་དུ་ཤར་བ་ནི། ལུས་རྗེས་སུ་དྲན་པ་ཉེ་བར་བཞག་པ་དང༌། ཞེས་པ་ནས། སེམས་རྗེས་སུ་དྲན་པ་ཉེ་བར་བཞག་པ་བཞི་ནི། རིམ་པ་བཞིན་མཁའ་འགྲོ་མ་དང༌། ལཱ་མ་དང༌། དུམ་སྐྱེས་མ་དང༌། གཟུགས་ཅན་མ། དེ་
བཞིན་དུ་འོག་མ་རྣམས་ལའང་སྦྱར་ལ། གཤིན་རྗེ་འཇོམས་མའོ། །རྐང་པ་གཉིས་བགྲད་པ་གཞུའི་དབྱིབས་སུ། ཞེས་པ་ནས། འཁོར་ལོ་གསུམ་སྙིང་ག་ཆོས་ཀྱི་འཁོར་ལོའི་དབུས་སུ། ཞེས་དང་། བཅོམ་ལྡན་དཔལ་ཧེ་རུ་ཀ་སྐུ་མདོག་མཐིང་ཁ། ཞེས་དང་།
ཞབས་གཡས་བརྐྱངས་གཡོན་བསྐུམས་པས་བཞུགས་པ། ཕྱག་དང་པོ་གཉིས་ཀྱིས་རྡོ་རྗེ་ཕག་མོ་ལ། ཞེས་པ་ནས། མི་རུས་ཀྱི་ཐལ་བས་ལུས་ཐམས་ཅད་ལ་བྱུགས་པ། ལྟེ་བའི་དམར་ཆ་གཏུམ་མོའི་མེའི་གཟུགས་ཀྱིས་ཐིག་ལེ་ཡོངས་སུ་གྱུར་པ་
ལས་བཅོམ་ལྡན་འདས་མ་རྡོ་རྗེ་ཕག་མོ་སྐུ་མདོག་དམར་མོ། ཞེས་དང༌། བསྡིགས་པར་མཛད་པ། བསྐལ་པ་འཇིག་པའི་དུས་ཀྱི་མེ་ལྟ་བུ་ཉི་མའི་འོད་ཅན་གྱི། ཞེས་པ་ནས། ལེགས་པར་འཁྲིལ་བ། ཐུགས་རྗེའི་བདག་ཉིད་ཅན། ཕྱག་རྒྱ་ལྔས་བརྒྱན་
པ། ཞེས་དང༌། ལྔ་བཅུའི་དོ་ཤལ་ཅན་ཏེ། དཔྱིད་དང་ཐིག་ལེའི་ངོ་བོ་གཉིས་ཞེས་པ་ནས། བཞུགས་པ་སྙིང་ཁའི་ཤར། ཞེས་དང༌། འཁོར་ལོ་ཉེར་བཞིའི་རྣམ་པ་ཅན་ཕྱིའི་ཡུལ་ཉེར་བཞིའི་ངོ་བོར་གྱུར། གནས་ཉེར་བཞིའི་རྩ་དང་ཁམས་ངོ་བོ་དབྱེར་མེད་
དུ་གནས་པ་ཡོངས་སུ་གྱུར་པ་ལས། དཔའ་བོ་དང་དཔའ་མོ་ཉེར་བཞིར་གྱུར་པ་ནི། སྐྲ་མཚམས་བཱུ་ལླིར་མཱ་ལ་ཡན་གནས་པའི་རྩ་ནང་གི་ཁམས་ཡོངས་སུ་གྱུར་པ་ལས། ཁཎྜ་ཀ་པཱ་ལ་དང༌། རྩ་ཡོངས་སུ་གྱུར་པ་ལས་རབ་གཏུམ་མ། སྤྱི་གཙུག་
9-4-9a


ཛཱ་ལན་དྷ་རར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས་མཧཱ། ཞེས་དང་དེ་བཞིན་དུ་སྦྱར་ཏེ་མཐར། ཉེ་བའི་དུར་ཁྲོད་དེ། སྐུའི་འཁོར་ལོའི་ལྷ་རྣམས་ས་འོག་ནས་སྤྱོད་པའི་ཚུལ་གྱིས་བཞུགས་པ། ཐམས་
ཅད་ཀྱང་སྐུ་མདོག་དཀར་པོ་སྟེ། དཔའ་བོ་ཉེར་བཞི་པོ་ཐམས་ཅད་ཀྱང་ཞལ་གཅིག་པ། ཞེས་དང༌། འོག་པག་སིལ་སིལ་གྱི་སྒྲ་སྒྲོགས་པ། ལྕེའི་རྩ་བར་གནས་པའི་རྩ་ཡོངས་སུ་གྱུར་པ་ལས་ཁྭ་གདོང་མ་ནག་མོ། ཞེས་དང༌། སྣ་བུག་གཉིས་ན་
གནས་པའི་རྩ་ཡོངས་སུ་གྱུར་པ་ལས། གཤིན་རྗེ་འཇོམས་མ་གཡས་ལྗང་གཡོན་སྔོ་བ། ཐམས་ཅད་ཀྱང་དྲག་མོ་ཆེན་མོ། ཞེས་དང༌། ལྷ་ཐམས་ཅད་ཀྱི་སྐུ་མདོག་ཕྱག་མཚན་རྒྱན་ལ་སོགས་པ་ནི་ཕྱི་དཀྱིལ་གྱི་སྐབས་བཞིན་སྦྱར། སྒོ་མཚམས་མེ་བརྒྱད་ཀྱི་མངོན་རྟོགས་རྫོགས་
པའི་རྗེས་སུ། འཁོར་གྱི་ལྷ་ཐམས་ཅད་ཀྱང་དཔྲལ་བར་རྡོ་རྗེའི་ཕྲེང་བ་འཛིན་པ། རང་གི་སྙིང་ཁར་ཨོཾ་ཧ་དཀར་པོ་ཡོངས་སུ་གྱུར་པ་ལས། རྡོ་རྗེ་སེམས་དཔའ་དཀར་པོ་དཀར་དམར་ནག་པའི་ཞལ་གསུམ་ཕྱག་དྲུག་གི་གཡས་རྡོ་རྗེ་ཌཱ་མར་རུ་མགོ་པོ། །གཡོན་
དྲིལ་བུ་ཐོད་པ་ཁ་ཊྭཱཾ་ག་འཛིན་པ་ཕག་མོ་དང་མཉམ་པར་སྦྱོར་བ། མགོ་བོར་ན་མ་ཧི་སེར་པོ་ཡོངས་སུ་གྱུར་པ་ལས། རྣམ་སྣང་སེར་པོ་ཞལ་གཅིག་ཕྱག་བཞིའི་གཡས་གཉིས་འཁོར་ལོ་དང་ཌཱ་མ་རུ། གཡོན་གཉིས་དྲིལ་བུ་དང་ཐོད་པ་དང་བཅས་
པའི་ཁ་ཊྭཱཾ་ག་འཛིན་པ། གཤིན་རྗེ་མ་དང་མཉམ་པར་སྦྱོར་བ། དེ་བཞིན་དུ་རྟ་མཆོག་གི་ཕྱག་མཚན། ཁ་ཊྭཱཾ་ག་འཛིན་པ། ཞེས་པའི་རྗེས་སུ། ཙཎྜི་ཀ་དང་མཉམ་པར་སྦྱོར་བ། རྡོར་སེམས་ཟླ་གདན་ལ་བཞུགས་ཤིང་ཟླ་བའི་འོད་ཀོར་ཅན། གཞན་ལྡན་ནི་ཉི་གདན་
9-4-9b


ལ་བཞུགས་ཤིང་ཉི་མའི་འོད་ཀོར་ཅན། དཔའ་བོ་དྲུག་པོ་ཐམས་ཅད་ཀྱང་ཕྱག་རྒྱ་དྲུག་གིས་བརྒྱན་ཅིང་ཐོད་སྐམ་ལྔའི་དབུ་རྒྱན་དང་ཐོད་རློན་ལྔ་བཅུའི་དོ་ཤལ་དང༌། སྟག་གི་པགས་པའི་ཤམ་ཐབས་ཅན། སྤྱན་གསུམ་པོ་གཡས་བརྐྱངས་ཀྱིས་
བཞུགས་པ། གཙོ་མོའི་ལྟེ་བར་ཨོཾ་བཾ། ཞེས་དང༌། ཕག་མོའི་སྐབས་སུ། གཡོན་ཐོད་པ་ཁ་ཊྭཱཾ་ག་ཞགས་པ་འཛིན་པ། རྡོར་སེམས་དང་མཉམ་པར་སྦྱོར་བ། དེ་བཞིན་དུ་གཞན་རྣམས་ལའང་སྦྱར་ཏེ་མཐར། ཙཎྜི་ཀ་དུད་ཁ་རྟ་མཆོག་དང་མཉམ་པར་སྦྱོར་བ། ཐམས་
ཅད་ཀྱང་ཞལ་གཅིག་ཕྱག་བཞིའི་གཡས་གཉིས་ཌཱ་མ་རུ་དང་གྲི་གུག །གཡོན་གཉིས་ཐོད་པ་དང་བཅས་པའི་ཁཊྭཱཾ་ག་དང་དྲིལ་བུ་འཛིན་པ། རྨོངས་བྱེད་མ་ཟླ་གདན་ལ་བཞུགས་ཤིང་ཟླ་བའི་འོད་ཀོར་ཅན། གཞན་ལྔ་ནི་ཉི་གནད། ཅེས་དང༌། ཐམས་
ཅད་ཀྱང་སྤྱན་གསུམ་པ། ཞེས་པ་ནས། ཐོད་སྐམ་ལྔའི་དབུ་རྒྱན་དང་ཐོད་སྐམ་ལྔ་བཅུའི་དོ་ཤལ་ཅན། གཡས་བརྐྱངས་ཀྱིས་བཞུགས་པ། ཕྱག་རྒྱ་དང་པོར་གཡོན་དུ་བསྐོར་ཞིང༌། དེ་ནས་གཡས་སུ་བསྐོར་ལ། ཕེཾ། ཞེས་བརྗོད་ལ། ལྷ་ཐམས་ཅད་ཀྱི་ཐུགས་ཀར་
ཉི་གདན་ལ་གནས་པའི་ཧཱུཾ་ཡིག་ལས་འཕྲོས་པའི་འོད་ཟེར་གྱིས། ཕྱོགས་བཅུའི་འཇིག་རྟེན་གྱི་ཁམས་ན། ཞེས་དང༌། ཡེ་ཤེས་པའི་འཁོར་ལོར་གྱུར་པ་དང་དབང་གི་ལྷ་དཀྱིལ་འཁོར་པ་རྣམས་དང་བཅས་པ། མདུན་གྱི་ནམ་མཁར་སྤྱན་དྲངས་
འོད་ཟེར་སྙིང་ཁར་ཐིམ། དབང་གི་ལྷ་མོ་རྣམས་ནི་ཡེ་ཤེས་ཀྱི་བདུད་རྩིས་གང་བའི་ཐོད་པ་དང་ཌཱ་མ་རུ་འཛིན་པ། ཨོཾ་བཛྲ་བཱི་ནི་ཞེས་སོགས་རིག་མ་བཅུ་དྲུག་གིས་མཆོད་ནས། ཨོཾ་བཛྲ་ཨངྐུ་ཤ་ཛཿ བཛྲ་པཱ་ཤ་ཧཱུཾ། བཛྲ་སྥོཊ་བཾ། བཛྲ་གྷ་ཎྜ་ཧོཿ 
9-4-10a


ཞེས་སྔགས་ཕྱག་རྒྱ་དང་བཅས་པས་དགུག་གཞུག་སོགས་བྱས་ལ། ཨོཾ་ཡོ་ག་ཞེས་དང༌། ཤུདྡྷོ་྅་ཧཾ། དམ་ཚིག་པ་དང་ཡེ་ཤེས་པ་གཉིས། ཞེས་དང༌། ཤར་བའི་ཆ་ཤས་སོ། །ཨོཾ་ཨཱཿཧཱུཾ། ཞེས་པ་ནས། བཛྲ་ཤུདྡྷོ྅་
ཧཾ། སྐད་ཅིག་མའི་སྔགས་དང་པོ་གཉིས་པས་པ་དཀོར་དང་པོར་ནུ་མ་གཉིས་ཀྱི་དབུས་དང༌། དེ་ནས་གཡོན་གྱི་ནུ་མའི་སྟེང་དང༌། དེ་ནས་ཡང་དབུས་དང༌། དེ་ནས་གཡས་ཀྱི་ནུ་མའི་སྟེང་དང༌། ཡང་དབུས་སུ་བྱས་ལ་མཐར་འཁྱུད་པའི་ཚུལ་བྱ་ཞིང༌། བཛྲ་ཤུདྡྷོཿ་དང༌། ཡོག་ཤུདྡྷོ་྅་ཧཾ་གཉིས་ལས། དང་པོར་གཡོན་
གྱི་ནུ་མའི་སྟེང་དང༌། དེ་ནས་གཡས་དང༌། དེ་ནས་དབུས་སུ་པད་དཀོར་བྱས་ལ། མཐར་འཁྱུད་པའི་ཚུལ་བྱའོ། །ཨོཾ་བཛྲ་བཱི་ནི། ཞེས་དང༌། དེ་བཞིན་གཤེགས་པ་ཐམས་ཅད་ཀྱིས། ཞེས་པ་ནས། བདག་ཉིད་དུ་གྱུར། སྤྱི་བོ་ནས། ཞེས་དང༌། དོན་གྲུབ་ཀྱིས་དབུ་བརྒྱན་པར་
གྱུར། དེས་བུམ་པའི་དབང་ཐོབ། སྙིང་པོའི་རྣལ་འབྱོར་མ་བཞི། ཞེས་དང༌། དབང་བཞི་པ་ཐོབ། དབང་གི་ལྷ་རྣམས་ཀྱང་རང་ལ་ཐིམ་པར་གྱུར། ཨོཾ་སུམྦྷ། ཞེས་སོགས་ཀྱིས་མཆོད་པ་ཆུ་གཉིས་ཞལ་བསིལ་དང་བཅས་པ་རྣམས་བསངས་སྦྱང་བསྐྱེད་པ་སོགས་
བྱས་ལ། སྔར་བཞིན་ཤྲཱི་ཧེ་རུ་ཀ་ཞེས་སོགས་ཀྱིས་མཆོད་པ་དབུལ་བའམ། ཡང་ན་ཨོཾ་སརྦ་ཏ་ཐཱ་ག་ཏ་ཤྲཱི་ཙཀྲ་སཾ་པར་མཎྜལ་ཙ་ཀྲ་སརྦ་བྲི་ར་ཡོ་གི་ནི་བཛྲ་ཨརྒྷཾ་པྲ་ཏཱི་ཙྪ་ཨཱཿཧཱུཾ། གིས་མཆོད་ཡོན་དང༌། དེ་བཞིན་དུ་ཨརྒྷཾ་གྱི་གནས་སུ། པཱ་དྱཾ་དང༌། ཨཱཉྩ་མ་
ཎཾ། པུཥྤེ་ནས་ཤཔྟའི་བར་རྣམས་བཅུག་ལ་ཆུ་གསུམ་ཉེར་སྤྱོད་ལྔ་རོལ་མོ་དང་བཅས་པ་དབུལ། རིག་མ་བཅུ་དྲུག་གིས་ཀྱང་སྔར་བཞིན་མཆོད། ནང་མཆོད་བྱིན་གྱིས་བརླབས་ནས་དབུལ་བ་ནི། མགྲོན་རྣམས་ཀྱི་ལྗགས་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་རྩེ་གསུམ་པ་
9-4-10b


དཀར་པོ་ནས་འབྲུ་ཙམ་འཁོད། ཨོཾ་ཨ་མྲྀ་ཏ། ཞེས་པ་ནས། ཁཾ་ཧཱུཾ། ཨོཾ་ཨཱཿཧཱུཾ། ལྷ་མོ་རོ་རྡོ་རྗེ་མས། བདུད་རྩི་བསྟབས་པ། རྡོ་རྗེའི་འོད་ཟེར་གྱི་སྦུ་གུས་དྲངས་ནས་གསོལ་བར་གྱུར། བར་བསམས་ལ། གཡོན་པའི་མཐེབ་སྲིན་གྱིས་གཡོན་བསྐོར་དུ་ལན་གསུམ་དཀྲུགས་
ལ། དབུས་སུ་བདུད་རྩིའི་སྙིང་པོ་བྱུང་བར་བསམས་ཏེ། གཡོན་པའི་མཐེབ་སྲིན་སྦྱར་ཏེ། དབུས་ནས་བླངས་ཏེ་སྨིན་མཚམས་ནས་སྟེང་དུ་གཏོར་ཞིང༌། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་མཛད་པ་འཕྲིན་ལས་ཐམས་ཅད་
གཅིག་ཏུ་བསྡུས་པའི་ངོ་བོ། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག་དཔལ་ལྡན་བླ་མ་དམ་པའི་ཞལ་དུ་ཨོཾ་ཨཱཿཧཱུཾ། རྡོ་རྗེ་འཆང་ཆེན་པོའི་ཞལ་དུ་ཨོཾ་ཨཱཿཧཱུཾ། དེ་བཞིན་དུ་
བརྒྱུད་པའི་བླ་མ་རྣམས་ཀྱི་མཚན་གྱི་མཐར། ཨོཾ་ཨཱཿཧཱུཾ། བཏགས་ལ་འབུལ། དེ་ནས། ཨོཾ་ཧྲཱིཿཧ་ཧ་ཧུཾ་ཧཱུཾ་ཕཊ། ཨོཾ་ཨཱཿཧཱུཾ། ཞེས་པ་ནས། ཨོཾ་ཡ་མ་མ་ཐ་ནཱི་ཧུཾ་ཧཱུཾ་ཕཊ། ཨོཾ་ཨཱཿཧཱུཾ། ཞེས་ལྷ་རང་རང་གི་སྔགས་ལ་འབྲུ་གསུམ་བཏགས་ལ་སྙིང་ཁའི་ཐད་ནས་སྔར་ལྟར་ཕུལ་ལ། དེ་ནས་མཐེབ་
སྲིན་གྱིས་ནང་མཆོད་བླངས་ཏེ། ལྕེ་རྩེ་སྨིན་མཚམས་སྤྱི་གཙུག་གསུམ་དུ་ཐིག་ལེ་བྱས་ནས། ཆོས་སྐྱོང་རྣམས་ཀྱི་སྔགས་ལ་འབྲུ་གསུམ་བཏགས་ལ་དབུལ། དེ་ནས། དུར་ཁྲོད་བརྒྱད་ན་གནས་པའི་ཕྱོགས་སྐྱོང་དང་ཞིང་སྐྱོང་དང་ཀླུ་ལ་སོགས་པ་ཐམས་ཅད་ཀྱི་ཞལ་དུ་ཨོཾ་ཨཱཿཧཱུཾ། གཞི་བདག་
དང་སེམས་ཅན་ཐམས་ཅད་ལྷར་གྱུར་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ། ཞེས་ལྟེ་བའི་ཐད་དུ་འཐོར་ཞིང་མཆོད་སྦྱིན་གྱི་ཕྱག་རྒྱས་དབུལ། དེ་ནས་ནང་མཆོད་མཐེབ་སྲིན་གྱིས་རང་གི་ལྕེ་ཐོག་ཏུ་བཞག་ནས། ཨོཾ་ཨ་མྲྀ་ཏ་སྭ་ད་ན་བཛྲ་སྭ་བྷཱ་ཝ་ཨཱདྨ་ཀོ྅་ཧཾ། མགྲོན་ཐམས་ཅད་
9-4-11a


ཡེ་ཤེས་ཀྱི་བདུད་རྩིས་ཚིམ་པར་གྱུར། སྙིང་ཁའི་ཧཱུཾ་ལས་བྱུང་བའི་སྙིང་པོའི་རྣལ་འབྱོར་མ་བཞི་དང༌། སྒོ་མཚམས་མ་བརྒྱད་ཀྱིས་ཐོད་པ་ན་གནས་པའི་བདུད་རྩི་ལྔས་མཆོད། ཨོཾ་སརྦ། ཞེས་པ་ནས། བཛྲ་ནི་
སྭཱཧཱ། ཨོཾ་ཨཱཿཧཱུཾ། གནས་བཞི་དང་གསང་གནས་བྱིན་གྱིས་བརླབས་པའི་ཡབ་ཡུམ་སྙོམས་པར་ཞུགས་པས་བྱང་སེམས་ཞུ་བ། སྤྱི་བོ་ནས་མགྲིན་པར་སླེབས་པ་ན་དགའ་བ། ཞེས་དང༌། ནོར་བུའི་རྩེར་སླེབས་པ་ན་ལྷན་ཅིག་སྐྱེས་དགའི་ཡེ་ཤེས་
སྐྱེས་པས་ལྷ་ཐམས་ཅད་ཀྱིས་ཀྱང་བདེ་བ་ཆེན་པོ་ཉམས་སུ་མྱོང་བར་གྱུར། དཀྱིལ་འཁོར་པའི་ལྷ་རྣམས་ལྷན་སྐྱེས་ཀྱི་བདེ་བ་དང་དེ་ཁོ་ན་ཉིད་དབྱེར་མེད་པའི་ཏིང་ངེ་འཛིན་ལ་སྙོམས་པར་ཞུགས་པས་དེ་ཁོ་ན་ཉིད་ཀྱི་མཆོད་པས་མཉེས་པར་གྱུར། 
དེ་ནས། ལྷ་སོ་སོའི་སྐུ་གསལ་བར་དམིགས་ནས། ལྷ་སོ་སོའི་སྔགས་བརྗོད་ཅིང་རྐང་བརྒྱད་ཀྱི་སྔགས་སམ། ཡང་ན་སྔར་བཞིན་རྐང་བརྒྱད་བོད་སྐད་དུ་བསྒྱུར་བས་བསྟོད་ནས། ཨོཾ་ཀ་ར་ཀ་ར་ཧུཾ་ཧཱུཾ་ཕཊ། ཅེས་པ་ནས། ཨོཾ་དྷི་ལི་དྷི་ལི་ཧུཾ་ཧུཾ་ཕཊ། ཅེས་པའི་བར་དཔའ་བོ་ཉེར་བཞིའི་སྔགས་བརྗོད་ལ། སོ་དང་སེན་མོ་རྐེད་པ་སོགས་
ཁམས་ཉེར་བཞི་དཔའ་བོ་ཉེར་བཞིའི་རང་བཞིན་དུ་གྱུར། ཨོཾ་ཀ་ར་ཀ་ར་ཀུ་རུ་ཀུ་རུ། ཞེས་པ་ནས། དྷི་ལི་དྷི་ལི་ཧུཾ་ཧུཾ་ཕཊ། ཅེས་གཙོ་བོའི་རྩ་སྔགས་དང༌། ཨོཾ་ཧ་ན་མ་ཧི་ཞེས་པ་ནས། ཕཊ་ཧཾ། ཞེས་ཡང་ཀྱི་གོ་ཆ་དྲུག་གི་སྔགས་བརྗོད་ལ། དེ་རྣམས་ལས་བྱུང་བའི་ཕྱག་
རྒྱ་དྲུག་དང༌། ཉེ་བའི་ཕྱག་རྒྱ་རྣམས་དེ་བཞིན་དུ་གཞན་རྣམས་ཀྱིའང་སྔགས་བརྗོད་ལ་མཐར། ཨོཾ་བཛྲ་བཻ་རོ་ཙ་ནཱི་ཡེ་ཧུཾ་ཧཱུཾ་ཕཊ་སྭཱཧཱ། དེ་ལས་བྱུང་བའི་ཐོད་སྐམ་གྱི་དབུ་རྒྱན་རྣམས་ཀྱིས་བརྒྱན་པར་གྱུར། ཁ་ཊྭཱཾ་ག་ནི་ལྷ་ཡི་སྐུ། ཞེས་དང༌། ཀ་ནི་གང་དུའང་མི་
9-4-11b


གནས་པ། ཨ་ཨཱ། ཞེས་པ་ནས། ས་ཧ་ཀྵ་དབྱངས་གསལ་གྱི་ཕྲེང་བ་འོད་ཟེར་ལྔ་ལྡན། ཅེས་དང༌། མདངས་ཅན་དུ་གྱུར། དེའི་དབུས་སུ་སྐད་ཅིག་གིས་ཞེས་དང༌། གཙོ་བོའི་ཞལ་བཞི་ལ་རིམ་པ་བཞིན་ཐིམ། དམ་ཚིག་པ་ཡབ་ཡུམ་ནི། ཞེས་དང༌། བདེ་
བ་ཆེན་པོའི་རང་བཞིན་དུ་གྱུར། ཧཱུཾ་གི་ཞབས་ཀྱུ་ནི་ཧ་ལ། ཞེས་པ་ནས། ནཱ་ད་ཡང་སྐྲའི་རྩེ་མོ་བརྒྱ་སྟོང་གི་ཆའི་ཚད་ཅམ་དུ་གནས་པར་གྱུར། ཅེས་སྔར་སྭ་བྷཱ་ཝས་སྟོང་པར་སྦྱངས་པའི་སྐབས་ལྟར་བརྗོད་པའི་མཐར། ན་ད་ཡང་མི་དམིགས་པར་གྱུར། སྔར་གྱི་
སྐད་ཅིག་མའི་སྔགས་གསུམ་བརྗོད་ལ། སྟོང་པའི་ངང་ལས་རྟེན་དང་བརྟེན་པའི་དཀྱིལ་འཁོར་ཐམས་ཅད་སྐད་ཅིག་གིས་གསལ་ལ་རྫོགས་པར་གྱུར། བར་བསམས་ལ། རང་གི་ལྟེ་བར་ཟླ་བ་ལ་གནས་པའི་ཧཱུཾ་དཀར་དམར་ལྷ་གཞན་རང་རང་གི་ཐུགས་
ཀར་ཉི་གདན་ལ་གནས་པའི་ཏིང་ངེ་འཛིན་སེམས་དཔའ་ཧཱུཾ་ཡིག་ལ་བཟླས་བྱའི་སྔགས་ཀྱིས་བསྐོར་བའི་དབུས་ཀྱི་ཡི་གེ་ལས་འཁོར་ལོ་ལྔའི་ལྷ་ཚོགས་འཕྲོས་ནས་འགྲོ་བའི་དོན་བྱས་སླར་འདུས་ཏེ་དབུས་ཀྱི་ཡི་གེ་ལ་ཐིམ་པ་དང་
སྤྲོ་བ་དང་བསྡུ་བའི་མཛད་པ་ཅན་དུ་གྱུར། ཅེས་ལྷ་ཐམས་ཅད་ཀྱི་ཞལ་ནས་སྔགས་ཀྱི་སྒྲ་བྱུང་བར་བསམས་ལ་སྔགས་བཟླ་བར་བྱའོ། །གཏོར་མའི་སྐབས་སུ། གཞུའི་དབྱིབས་ཅན་གཡས་གཡོན་གཉིས་སུ་རྒྱལ་མཚན་གྱིས་མཚན་པ་ཞེས་དང༌། ཕྱི་དཀར་ལ་ནང་དམར་བའི་
ནང་གི་ཤར་དུ་ཨོཾ་དཀར་པོ་ལས་བྱུང་བའི་དྲི་ཆེན་ཨོཾ་གྱིས་མཚན་པ། ཞེས་དང༌། དེ་བཞིན་དུ་གཞན་རྣམས་ལའང་སོ་སོར་སྦྱར་ཏེ། མཐར་དབུས་སུ་བཾ་དམར་པོ་ལས་བྱུང་བའི་མིའི་ཤ་བཾ་གྱིས་མཚན་པ། རླུང་གཡོས་པ་ལས་མེ། ཞེས་དང༌། དམར་
9-4-12a


སེར་དུ་གྱུར། དེའི་སྟེང་དུ་ཧཱུཾ་དཀར་པོ་ལས་ཞེས་དང༌། བསིལ་བར་གྱུར། ཨོཾ་ཨ་ཨཱ་ཞེས་པ་ནས། དཀྱིལ་འཁོར་མདུན་དུ་སྤྱན་དྲངས། ཤྲཱི་ཧེ་རུ་ཀ་ཞེས་སོགས་ཀྱིས་སྔར་ལྟར་ཆུ་གཉིས་ནས་རོལ་མོའི་བར་གྱིས་མཆོད་ནས། ལག་པ་གཉིས་
ལ་ཨ་ཨཱ་ཞེས་པ་ནས། ཀྵ་ཡོངས་སུ་གྱུར་པ་ལས་ཟླ་བ་དང་ཉི་མའི་རང་བཞིན་དུ་གྱུར་པའི་དབུས་སུ་ཧཱུཾ་ཡིག་ཨོཾ་ཞེས་དང༌། ཨོཾ་ཨཱཿཧཱུཾ་ཟླ་ཉི་ཧཱུཾ་དང༌། ཞེས་པ་ནས། རྡོ་རྗེའི་ཐལ་མོར་གྱུར། ལྷ་མོ་ཚད་མ། ཞེས་དང༌། རྒྱུར་གྱུར་ཅིག་མཆོད་པའི་འཁོར་
གསུམ་ཞེས་པ་ནས། ངོ་བོ་དབྱེར་མེད་དུ་གྱུར། ལྷ་རྣམས་ཀྱི་ལྗགས་ལ། ཞེས་དང༌། ནས་འབྲུ་ཙམ་འཁོད་པའི་རྡོ་རྗེའི་འོད་ཟེར། ཞེས་པ་ནས། གསོལ་བར་གྱུར། ཨོཾ་ཨཱཿ བཛྲ། ཞེས་དང༌། དཀྱིལ་འཁོར་པ་ལ་གཏོར་མ་ཕུལ་ལ། རིག་མ་བཅུ་དྲུག་གིས་མཆོད། རྐང་བརྒྱད་
ཀྱིས་བསྟོད་པའི་རྗེས་སུ། སྲིད་པ་དང་མཉམ་ཞི་བའི་ཆགས་བཅོམ་ཀུན་ཏུ་རྟོག་པ་འཇོམས། ཁྱོད་ནི་དངོས་པོ་མཐའ་དག་མཁའ་ལྟར་གཟིགས་པ་དང་ལྡན་པ། །མགོན་པོ་ཤིན་ཏུ་བརྩེ་བ་ལྕི་བའི་ཆུས་བརླན་ཐུགས་ཀྱི་ཆུས། །མཛོད་ཅིག་ལྷ་མོ་རྣམས་
ཀྱིས་བདག་ལ་ཤིན་ཏུ་རྗེས་བརྩེར་མཛོད། །ཅེས་གསོལ་བ་གདབ། དུར་ཁྲོད་བརྒྱད་ན་གནས་པའི་ཕྱོགས་སྐྱོང་དང༌། ཞེས་པ་ནས། འོད་གསལ་དུ་བཅུག་པ་ལས། བདེ་མཆོག་གི་ལྷ་ཡབ་ཡུམ་གྱི་སྐུར་བཞེངས་པའི་མགྲོན་རྣམས་ཀྱི་
ལྗགས་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་རྩེ་གསུམ་པ་ནས་འབྲུ་ཙམ་བཀོད་པའི་རྡོ་རྗེའི་འོད་ཟེར་གྱི་སྦུ་གུས་དྲངས་ནས་གསོལ་བར་གྱུར། ཨོཾ་ཁ་ཁ་ཞེས་དང༌། ཕཊ་ཕཊ་སྭཱཧཱ། ཨོཾ་བཛྲ་ཏམྦུ་ལ་ཡེ་སྭཱཧཱ། ཞེས་སོ་རྩི་དང་རྐང་བརྒྱད་ཀྱིས་བསྟོད་པའི་རྗེས་
9-4-12b


སུ། ཨོཾ་ཡོ་ག་ཤུདྡྷཱཿསརྦ་ངྷ་རྨཱཿ ཡོ་ག་ཤུདྡྷོ་྅ཧཾ། ལྷའི་ཚོགས་རྣམས། ཞེས་དང༌། ཨོཾ་བཛྲ་མུཿ འཇིག་རྟེན་པ་རྣམས་གཤེགས་ཤིང་དཀྱིལ་འཁོར་གྱི་འཁོར་ལོ་བདག་ཉིད་ལ་ཐིམ་པར་གྱུར། དེ་ནས་ལུས་དཀྱིལ་དང་བཅས་པ་བསྡུ་ཚུལ་ནི། ལྟེ་
བའི་ཡེ་ཤེས་སེམས་དཔའ་ཡབ་ཡུམ་སྙོམས་པར་ཞུགས་པའི་གསང་གནས་གཉིས་བསྐྱོད་པའི་དགའ་བའི་སྒྲས་འགྲོ་བ་རྣམས་བཀུག་སྟེ་དུར་ཁྲོད་ལ་ཐིམ། ཞེས་པ་ནས། ལྷ་མོ་བཞི་ཡང་རང་ངོས་ཀྱི་གཙོ་བོའི་ཞལ་བཞི་ལ་རིམ་པ་བཞིན་
ཐིམ། ཞེས་སྙིང་པོའི་རྣལ་འབྱོར་མ་བཞིའི་བར་སྔར་བཞིན་བསྡུས་པའི་རྗེས་སུ། ལུས་དཀྱིལ་གྱི་སྒོ་མཚམས་མ་བརྒྱད་སྐུ་འཁོར་གྱི་ལྷ་ལ། དེ་གསུང་འཁོར་ལ། དེ་ཐུགས་འཁོར་ལ། དེ་རྣམས་ཀྱང་རྣལ་འབྱོར་མ་བཞི་ཐོད་པ་དང་བཅས་པ་ལ། དེ་བརྒྱད་ཀྱང་
ནང་གི་ཧེ་རུ་ཀ་ཡབ་ཡུམ་ལ། དེ་གཉིས་ཀྱང་སྙིང་ཁར་ཐིམ་ནས་རྩ་དང་ཁམས་ཐམས་ཅད་བྱིན་གྱིས་བརླབས་པར་གྱུར། ཅེས་ལུས་དཀྱིལ་བསྡུས་ནས། དམ་ཚིག་པ་ཡབ་ཡུམ་ནི་ལྟེ་བའི་ཡེ་ཤེས་སེམས་དཔའ་ཡབ་ཡུམ་ལ་ཐིམ། དེ་གཉིས་
ཀྱང་ཞེས་པ་ནས། ནཱ་ད་ཡང་མི་དམིགས་པར་གྱུར། ཅེས་སྔར་བཞིན་བསྡུས་ནས། སྟོང་པའི་ངང་ལས་རང་ཉིད་སྐད་ཅིག་གིས་ཧེ་རུ་ཀ་སྔོན་པོ། ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ་གཡས་བརྐྱངས་ཀྱིས་བཞུགས་པ་ལ། 
ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་ཐོད་པ་འཛིན་པས་འཁྱུད་པར་གྱུར་པར་བསམས་ནས་གོ་ཆའི་བསྲུང་བ་ནི། རང་གི་སྙིང་ཁར་ཟླ་བ་ལ་རྡོ་རྗེ་སེམས་དཔའི་ངོ་བོ་ཨོཾ་ཧ་དཀར་པོ། མགོ་བོར་ཉི་མ་ལ་
9-4-13a


རྣམ་སྣང་གི་ངོ་བོ་ན་མ་ཧི་སེར་པོ། ཞེས་པ་ནས། དཔྲལ་བར་ཉི་མ་ལ་ཡན་ལག་ཐམས་ཅད་ཀྱི་ལུས་དབང་གི་རང་བཞིན་རྟ་མཆོག་གི་ངོ་བོ་ཕཊ་ཧཾ་ལྗང་ཁུ་ཞེས་པའི་བར་ཡབ་ཀྱི་གོ་ཆ་དྲུག་དགོད། གཙོ་མོའི་ལྟེ་བར་ཉི་མ་
ལ་རྡོ་རྗེ་ཕག་མོའི་ངོ་བོ་ཨོཾ་བཾ་དམར་པོ་ཞེས་པ་ནས། དཔྲལ་བར་ཉི་མ་ལ་ཡན་ལག་ཐམས་ཅད་ཀྱི་ལུས་དབང་གི་རང་བཞིན་ཙཎྜི་ཀའི་ངོ་བོ་ཕཊ་ཕཊ་དུད་ཁས་མཚན་པར་གྱུར། ཅེས་དང༌། གོ་ཆ་ཆེན་པོའི་བསྲུང་བ་ནི། སྤྱི་བོ་ལ་སོགས་པའི་
གནས་ཉེར་བཞིར་ཉི་གདན་ལ། པཱུ། ཛཱ། ཨོ། ཨ། གོ། ར། དེ། མཱ། ཀཱ། ཨོ། ཏྲི། ཀོ། ཀ། ལ། ཀླ། ཧི། པྲེ། གྲི། སོོ། སུ། ན། སི། མ། ཀུ་རྣམས་ཐིག་ལེས་བརྒྱན་པར་གྱུར། ཚམ་དམ་སྔགས་ཀྱི་བསྲུང་བ་ནི། གཡོན་པའི་མཐེབ་མཛུབ་ཀྱིས་
སྔགས་བརྗོད་པའི་ཕྱོགས་དེར་སེ་གོལ་གཏོགས་པ་སྔོན་དུ་འགྲོ་བས་ཤར་དུ། ཨོཾ་སུམྦྷ་ནི་སུམྦྷ་ཧུཾ་ཧཱུཾ་ཕཊ། བྱང་དུ། ཨོཾ་གྲྀཧྞ་གྲྀཧྞ་ཧུཾ་ཧཱུཾ་ཕཊ། ནུབ་ཏུ། ཨོཾ་གྲྀ་ཧྞཱ་པ་ཡ་གྲྀ་ཧྞ་པ་ཡ་ཧུཾ་ཧཱུཾ་ཕཊ། ལྷོར། ཨོཾ་ཨཱ་ན་ཡ་ཧོ། བྷ་ག་ཝན་བཛྲ་ཧུཾ་ཧཱུཾ་ཕཊ། ཅེས་བརྗོད་
ནས་བསྲུང་བ་གསུམ་བྱའོ། །ཁ་ཟས་ཀྱི་དུས་སུ་རང་གི་ལུས་དཀྱིལ་སྐད་ཅིག་གིས་གསལ་བར་དམིགས་ནས། ཁ་ཟས་ཀྱི་ཆ་གཅིག །ཨོཾ་ཨཱཿཧཱུཾ། ཞེས་ལན་གསུམ་བརྗོད་པས་བྱིན་གྱིས་བརླབས་ལ། ཨོཾ་ཁ་ཁཱ་ཞེས་པ་ནས། སྭཱཧཱ། ཞེས་པའི་བར་ལན་གསུམ་བརྗོད་དེ་ཕྱོགས་སྐྱོང་ལ་
གཏོར་མ་ཕུལ་ནས་བཟའ་བཏུང་བྱིན་གྱིས་བརླབ་པ་ནི། ལག་པ་གཡས་ལ་རྣམ་སྣང་གི་ངོ་བོ་ཧ་དཀར་པོ་ལས་སྐྱེས་པའི་འཁོར་ལོ་དཀར་པོ་རྩིབས་བརྒྱད་པ་ཧ་ཡིག་གིས་མཚན་པ། བསམ་པའི་སྟེང་དུ་བཟའ་བཏུང་ངམ། བཟའ་བཏུང་དང་བཅས་པའི་
9-4-13b


སྣོད་དངོས་སུ་བཞག་པའམ་བཞག་པར་བསམ་མོ། །ལག་པ་གཡོན་ལ་སྣང་མཐའི་ངོ་བོ་ཧོ་དམར་པོ་ལས་སྐྱེས་པའི་པད་མ་དམར་པོ་འདབ་མ་བརྒྱད་པ་ཧོས་མཚན་པ། བསམས་ལ་ཁ་ཟས་ཀྱི་སྟེང་དུ་ཁ་དགའ་བའམ་བཀག་པར་བསམ་མོ། །ཁ་ཟས་ཀྱི་སྟེང་
དུ་ཉི་གདན་ལ་མི་བསྐྱོད་པའི་ངོ་བོ་ཧྲིཿསྔོན་པོ་བསམས་ལ། ཧ་ཧོ་ཧྲིཿ ཞེས་ལན་གསུམ་བརྗོད་པས་ཁ་དོག་དྲི་ནུས་ཀྱི་སྐྱོན་བཅོམ་ཞིང་བདུད་རྩིར་གྱུར། ཧྲཱིཿ ཡི་གཡས་སུ་ཨོཾ་དཀར་པོ། གཡོན་དུ་ཨཱཿདམར་པོ། མདུན་དུ་ཧཱུཾ་སྔོན་
པོ་གནས་པར་གྱུར། ཨོཾ་ཨཱཿཧཱུཾ། ཞེས་ལན་གསུམ་བརྗོད་པས། རྒྱ་ཆེར་སྤེལ་ཞིང་བྱིན་གྱིས་བརླབས་པར་གྱུར། བར་བསམས་ལ། ཕུད་ཀྱིས་བླ་མ་དང་དབའ་པོ་དང་རྣལ་འབྱོར་མ་མཆོད་ནས། ཆོས་ཐམས་ཅད་རང་བཞིན་གྱིས་གྲུབ་པས་
སྟོང་པར་མཉམ་པ་ཉིད་དོ། །སྙམ་དུ་མོས་ལ། ཨོཾ་ས་མ་ཡ་ཤུད་དྷཱཿ སརྦ་དྷརྨཱཿ ས་མ་ཡ་ཤུ་དྡྷོ྅ཧཾ། ལྕེ་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་རྩེ་གསུམ་པ་དཀར་པོ་ནས་འབྲུ་ཙམ་འཁོད། ཨོཾ་ཨ་མྲྀ་ཏ་ཨུ་ད་ཀ་ཧཱུཾ་ཧཱུཾ་ཋ་ཋ་ཏྲཾ་ཨཾ་ཁཾ་ཧཱུཾ། 
ཨོཾ་ཨཱཿཧཱུཾ། རྡོ་རྗེའི་འོད་ཟེར་གྱི་སྦུ་གུས་དྲངས། པར་བསམས་ནས་ལོངས་སྤྱད་ལ། ལྟེ་བར་ལྷ་ཐམས་ཅད་ཀྱི་ངོ་བོ་ཧཱུཾ་དཀར་དམར་ལ་ཕུལ་བས། ལྷ་ཐམས་ཅད་མཉེས་ཤིང་ཚིམ་པར་གྱུར། པར་བསམ་པར་བྱའོ། །ཐོག་མཐའི་ཚིག་གཞན་རྣམས་མངོན་རྟོགས་བཞིན་
དུ་ཇི་ལྟར་རིགས་པར་སྦྱར་བར་བྱའོ། །རྡོ་རྗེ་ཕག་མོ་སོགས་རྣལ་འབྱོར་མ་སོ་བདུན་གྱི་སྔགས་ཀྱི་ཧཱུཾ་དང་པོ་ཐུང་དུ། གཉིས་པ་རིང་པོ། གཙོ་བོ་ལ་སོགས་པ་དཔའ་བོ་རྣམས་ཀྱི་སྔགས་ཀྱི་ཧཱུཾ་གཉིས་ཀ་ཐུང་ངུར་པཎྜི་ཏ་ཨུ་མ་པ་ཏི་ཏ་ཏྲས་བཤད་དོ། །ཆོས་ཀྱི་རྗེ་ཐམས་ཅད་མཁྱེན་པ་བློ་བཟང་གྲགས་པའི་དཔལ་གྱི་ཞལ་སྔ་ནས་
9-4-14a


ཀྱིས་མཛད་པའི་དཔལ་འཁོར་ལོ་བདེ་མཆོག་ལཱུ་ཨི་པའི་མངོན་རྟོགས་ཀྱི་ངག་ཏུ་འདོན་ཚུལ་ཡི་གེར་བཀོད་པ་འདིས་ཀྱང༌། དཔལ་འཁོར་ལོ་བདེ་མཆོག་གི་བཤད་སྒྲུབ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག
།དགེའོ    །།
ས་ལུགས་ནི། རྒྱལ་བ་རྡོ་རྗེ་འཆང༌། རྒྱལ་སྲས་ཕྱག་ན་རྡོ་རྗེ། དཔལ་ལྡན་ས་ར་ཧ། དཔལ་མགོན་འཕགས་པ་ཀླུ་སྒྲུབ། དཔལ་ལྡན་ཤ་པ་རི་པ། གྲུབ་ཆེན་ལཱུ་ཨི་པ། གྲུབ་ཆེན་དཱ་རི་ཀ་པ། གྲུབ་ཆེན་དྲིལ་བུ་པ། གྲུབ་ཆེན་རུས་སྤལ་ཞབས། གྲུབ་ཆེན་
ཛཱ་ལན་ངྷ་ར་པ། གྲུབ་ཆེན་ནག་པོ་པ། གྲུབ་ཆེན་གུ་ཧྱ་པ། གྲུབ་ཆེན་རྣམ་རྒྱལ་ཞབས། གྲུབ་ཆེན་ཏཻ་ལོ་པ། པཎ་ཆེན་ནཱ་རོ་པ། ཕམ་ཐིང་པ་སྐུ་མཆེད། གློག་སྐྱ་བ་ཤེས་རབ་རྩེགས་པ། མལ་ལོ་ཙྪ་བ་བློ་གྲོས་གྲགས་པ། ས་ཆེན་ཀུན་དགའ་སྙིང་པོ། 
རྗེ་བཙུན་བསོད་ནམས་རྩེ་མོ། རྗེ་བཙུན་གྲགས་པ་རྒྱལ་མཚན། ཆོས་རྗེ་ས་སྐྱ་པཎྜི་ཏ། ཁྲོ་ཕུ་རིན་པོ་ཆེ་བསོད་ནམས་སེངྒེ། སློབ་དཔོན་རིན་པོ་ཆེ་སེར་འབུམ། མཆོག་ལྡན་ལེགས་པའི་བློ་གྲོས། གུ་རུ་དཔལ་ལྡན་སེངྒེ། ཀུན་མཁྱེན་བུ་སྟོན་ཁ་ཆེ། 
བླ་མ་འཇམ་རིན་པ། ཀུན་མཁྱེན་ཤེས་རབ་དཔལ་བཟང་། སྐུ་བཞིའི་བདག་ཉིད་མཁས་གྲུབ་དགེ་ལེགས་དཔའ་བཟང་པོ། ། དགེའོ། །།
9-4-14b


empty page
9-5-1a


༄༅། །བཅོམ་ལྡན་འདས་དཔལ་འཁོར་ལོ་བདེ་མཆོག་གི་མངོན་པར་རྟོགས་པའི་རྒྱ་ཆེར་བཤད་པ་འདོད་པ་འཇོ་བ་ཞེས་བྱ་བ་བཞུགས།།
9-5-1b


༄༅། །རྣལ་འབྱོར་གྱི་དབང་ཕྱུག་ལཱུ་ཨི་པས་མཛད་པའི་བཅོམ་ལྡན་འདས་དཔལ་འཁོར་ལོ་བདེ་མཆོག་གི། མངོན་པར་རྟོགས་པའི་རྒྱ་ཆེར་བཤད་པ་འདོད་པ་འཇོ་བ་ཞེས་བྱ་བ། རྗེ་བཙུན་བླ་མ་དམ་པ་
རྣམས་དང་མགོན་པོ་འཇམ་པའི་དབྱངས་ཀྱི་ཞབས་ཀྱི་པད་མོ་ལ་གུས་པས་ཕྱག་འཚལ་ལོ། །རྒྱ་ཆེན་མཁྱེན་པ་ནམ་མཁའི་རང་བཞིན་ཏེ། །དམིགས་མེད་བརྩེ་བས་འགྲོ་ལ་འཁྱུད་པ་བཞིན། །གང་གི་དྲིན་གྱིས་བློ་
མིག་བསླད་པ་ཀུན། །འཇོམས་མཛད་འཇམ་དབྱངས་བླ་མས་རྗེས་སུ་སྐྱོངས། །བདེ་བའི་མཆོག་གྱུར་ལྷན་སྐྱེས་གཅིག་པུ་ཉིད། །དམ་ཚིག་སྐུ་གསུང་ཐུགས་དང་ཡེ་ཤེས་ཀྱི། །རབ་འབྱམས་འཁོར་ལོ་ལྔ་ཡི་ལྷ་ཚོགས་
སུ། །སྤྲུལ་མཛད་ཧེ་རུ་ཀ་དཔལ་ཞབས་ལ་འདུད། །གདུལ་བྱའི་རྒྱུད་ལ་ལྷན་སྐྱེས་བདེ་བ་ཆེ། །རྒྱས་པར་བྱེད་པའི་ཐབས་ལ་མཁས་པ་ནི། །བསྒྲུབ་ཕྱིར་ཉིད་སྐུ་ཡིད་འཕྲོག་མཛེས་མའི་སྐུར། །སྤྲུལ་པའི་རྗེ་བཙུན་མ་ཡིས་
རྟག་ཏུ་སྐྱོངས། །མཁའ་འགྲོ་བྱེ་བའི་ཐུགས་ཀྱི་གསང་ཆེན་བཅུད། །རྣལ་འབྱོར་མ་ཡི་བརྡ་ཡིས་ལེགས་བཅིངས་པས། །ཆེ་བའི་བློས་ཀྱང་ཤིན་ཏུ་རྒལ་དཀའ་ཞིང༌། །དངོས་གྲུབ་རླབས་ཀྱི་ཕྲེང་བ་འཁྲིགས་གྱུར་པའི། །
9-5-2a


བདེ་མཆོག་རྒྱ་མཚོའི་ཕ་རོལ་སུ་ཡིས་བགྲོད། །འོན་ཀྱང་ཚུལ་འདི་ཉམས་པ་གསོ་ཕྱིར་དང༌། །རང་ཉིད་གོམས་དང་སྐལ་མཉམ་གཞན་གྱི་ཕྱིར། །ལམ་འདི་འགྲེལ་ལ་མི་རིགས་ཅི་ཞིག་ཡོད། །སྐོམ་
པས་གདུངས་པ་ཆུ་ཀླུང་འགྲམ་སོན་པས། །ཆུ་དེ་མ་ལུས་འཐུང་པར་མི་ནུས་ན། །ཕྱོགས་གཅིག་ཙམ་གྱིས་སྐོམ་པ་མི་སེལ་ཞེས། །སྨྲ་བ་ཤེས་ལྡན་རྣམས་ཀྱི་ལུགས་ཡིན་ནམ། །འཕགས་པའི་ཡུལ་གྱི་མཁས་
པའི་སྐྱེ་བོ་ཡིས། །བདེ་མཆོག་དགོངས་འགྲེལ་རྣམས་ཀྱི་རྩ་བ་ནི། །དཔལ་ལྡན་ལཱུ་ཨི་པ་ཡི་ལུགས་སུ་གྲགས། །དེ་ཕྱིར་རྒྱ་གར་འཕགས་པའི་ཡུལ་བགྲོད་པའི། །སྒྲ་བསྒྱུར་དམ་པ་རིན་ཆེན་བཟང་པོ་སོགས། །སྐད་
གཉིས་སྨྲ་བའི་བཤད་སྲོལ་བཅུ་བཞི་ཡིས། །ལུགས་དེ་གངས་རིའི་ཁྲོད་དུ་གསལ་བྱས་ཞེས། །ཕྱོགས་འདིའི་བདེ་མཆོག་མང་དུ་ཐོས་རྣམས་སྨྲ། །དེ་དག་ཀུན་ཀྱང་བསྔགས་པའི་གནས་ཡིན་མོད།། ༈ གྱི་ཇོ་ཟླ་འོད་འགོས་
དང་ཟངས་དཀར་དང༌། །མལ་གྱོ་མར་དོ་ལོ་ཆུང་རྭ་ལོ་དང་། །སྨོན་གྲོའི་མར་ལོ་བྲ་བོ་ལོ་ཙཱ་དང༌། །བ་རི་མང་ནད་རྩ་མི་འཛིམ་ལོའི་ལུགས། །འདི་མཆན་ཡིན། འོན་ཀྱང་ལྭ་བའི་ན་བཟའ་ཅན་དང་ནི། །ནཱ་རོ་ཏ་པའི་ལུགས་འཛིན་མཁས་པ་ནི། །པྲཛྙཱ་རཀྵི་ཏ་དང་ཕམ་
9-5-2b


མཐིང་མཆེད། །སུ་མ་ཏི་དང་ཀ་ཤྲཱི་རྣམས་གཉིས་ལས། །བརྒྱུད་པའི་མལ་གྱོ་མར་དོ་ལོ་ཆུང་སོགས། །ལོ་དྲིལ་ནག་པོའི་ལུགས་ཀྱི་མན་ངག་ལས། །འཁོར་ལོ་སྡོམ་པ་འཆད་པའི་བཤད་སྲོལ་མཆོག །དེ་ཕྱིར་དེ་དག་བཤད་སྲོལ་ལ་བརྟེན་ནས། །རྣལ་འབྱོར་
དབང་ཕྱུག་གཞུང་མཆོག་འདིར་བཤད་བྱ། །རྩ་བཤད་ལེགས་པར་འབྱོར་དང་བསྐྱེད་རིམ་གྱི། །གནད་དོན་ཀུན་གསལ་ཡོངས་སུ་རྫོགས་པ་ནི། །གསལ་བར་འཆད་ཕྱིར་གྲུབ་ཟིན་སྒྲུབ་མིན་པས། །དཔལ་ལྡན་འཁོར་ལོ་སྡོམ་པའི་ལམ་གྱིས་ནི། །བགྲོད་
པར་འདོད་པའི་རྣམ་དཔྱོད་ལྡན་པ་རྣམས། །དགའ་བ་བསྐྱེད་དེ་རྩེ་གཅིག་ཡིད་ཀྱིས་ཉོན། །འདིར་རྣལ་འབྱོར་གྱི་དབང་ཕྱུག་ལཱུ་ཨི་པའི་སྒྲུབ་ཐབས་རྒྱས་པ་ནི། གང་བཤད་པར་བྱ་བ་ཡིན་ལ་དེ་འཆད་པའི་ཚུལ་ལ་གཉིས། བདེ་མཆོག་སྤྱིའི་རྣམ་གཞག་དང༌། སྒྲུབ་
ཐབས་ཀྱི་གཞུང་དངོས་བཤད་པའོ། །དང་པོ་ལ་གསུམ་སྟེ། གཞུང་འདི་གང་ལས་བཏུས་པའི་གཞི་རྩ་བ་དང་བཤད་པའི་རྒྱུད་ཇི་ལྟར་གནས་པ་དང༌། དེ་ལས་བཏུས་པའི་གཞུང་འདིས་རྩ་རྒྱུད་ཀྱི་དོན་ཇི་ལྟར་འཆད་པ་འཕྲོས་དང་བཅས་པ་དང༌། གྲུབ་ཆེན་གསུམ་
གྱི་གཞུང་འགྲེལ་བའི་གཞུང་གཞན་ཇི་ལྟར་བྱུང་བའོ། །དང་པོ་ལ་གཉིས། རྩ་བཤད་ཀྱི་རྒྱུད་ངོས་བཟུང་བ་དང༌། བཤད་རྒྱུད་ཀྱིས་རྩ་རྒྱུད་ཇི་ལྟར་ཤད་པའོ། །དང་པོ་ནི། སྤྱིར་བཅོམ་ལྡན་འདས་ཀྱིས་གསུངས་པ་ཐམས་ཅད་བསྡུ་ན། ཐེག་པ་ཆེ་ཆུང་གཉིས་སུ་
འདུ་བ་དང༌། ཐེག་ཆེན་ནི་རྒྱུ་ལམ་དུ་བྱེད་པ་ཕར་ཕྱིན་གྱི་ཐེག་པ་དང༌། འབྲས་བུ་ལམ་དུ་བྱེད་པ་སྔགས་ཀྱི་ཐེག་ཆེན་གཉིས་སུ་འདུ་བ་དང༌། དེ་དག་གི་ཐུན་མོང་མ་ཡིན་པའི་ཁྱད་པར་དང༌། ཕྱི་མ་ནི་བྱ་བ་དང་སྤྱོད་པ་དང་རྣལ་འབྱོར་དང༌། རྣལ་འབྱོར་བླ་ན་མེད་པའི་
9-5-3a


རྒྱུད་བཞིར་གུར་ནས་གསུངས་པ་ལྟར་ངེས་པ་དང༌། དེ་རྣམས་ཀྱི་ཁྱད་པར་ནི། རྡོ་རྗེ་འཆང་གི་ལམ་གྱི་རིམ་པར་རྒྱས་པར་བཤད་པ་ལས་ཤེས་པར་བྱའོ། །ཤཱནྟི་པ་དང་ཨ་བྷྱ་ཀ་རས། འདུས་པ་སོགས་རྣལ་འབྱོར་བླ་མ་དང༌། རྣལ་
འབྱོར་མའི་རྒྱུད་རྣལ་འབྱོར་བླ་མེད་དུ་བྱས་ཏེ། རྒྱུད་སྡེ་ལྔར་བཤད་པ་ནི་རྣལ་འབྱོར་བླ་མའི་རྒྱུད། བླ་མེད་ཀྱིས་རྒྱུད་དུ་མི་བཞེད་པའི་དོན་དུ་བཟུང་ན། གུར་ལས། རྣལ་འབྱོར་བླ་མེད་དེ་ལྟག་ལའོ། །ཞེས་རྣལ་འབྱོར་གྱི་རྒྱུད་ཀྱི་ལྟག་མ་སྟེ་གོང་མ། རྣལ་འབྱོར་
བླ་མེད་དུ་བཤད་པ་དང༌། དྲི་མེད་འོད་ལས། གསང་འདུས་དང་ཀྱེ་རྡོར་གྱི་རྒྱུད་རྣམས་ཀྱང༌། ངེས་དོན་ལ་གཉིས་མེད་ཀྱི་རྒྱུད་དུ་གསུངས་པ་སོགས་ཀྱི་གནོད་པ་མང་དུ་ཡོད་པས། དེ་ལྟར་མི་བྱའི་དེ་གཉིས་དོན་གཅིག་ལ་མིང་གི་རྣམ་གྲངས་སུ་བྱའོ། །ཕམ་
མཐིང་པ་ནས་བརྒྱུད་པ་ལ། བླ་མ་མལ་གྱོ་ནས་བརྒྱུད་པ་རྣམས་ཕ་བླ་མེད་དང༌། མ་བླ་མེད་དང༌། མའི་ཡང་མ་བླ་མེད་གསུམ་དུ་བྱས་པའི་གཉིས་པ་ནི། ཀྱཻ་རྡོར་སོགས་དང༌། གསུམ་པ་ནི་འཁོར་ལོ་སྡོམ་པར་འཆད་ཅིང༌། དེ་ལྟར་རྒྱུད་སྡེ་དྲུག་
བྱེད་པ་ཡང་ཝ་བ་པའི་དགོངས་པར་འཆད་མོད་ཀྱང༌། དེའི་དགོངས་པར་ཡང་མི་སྣང་ལ། སྔར་བཤད་པ་ལྟར་གྱིས་གནོད་པས་མི་ལེགས་སོ། །རྩ་རྒྱུད་ལས། མདོ་སྡེ་བྱ་བ་སྤྱོད་པ་དང༌། །རྣལ་འབྱོར་གསང་མཐའི་དབྱེ་བ་ཉིད། །ཅེས་པས་བྱ་
སྤྱོད་རྣལ་འབྱོར་གྱི་རྒྱུད་གསུམ་དང༌། གསང་བས་རྣལ་འབྱོར་བླ་མེད་དང༌། གསང་མཐས་མ་བླ་མེད་དང༌། དབྱེ་བས་མའི་ཡང་མ་བླ་མེད་བསྟན་པར་འདོད་པ་ཡང་མི་རིགས་ཏེ། ཐ་མ་ནི་གོང་དུ་སྨོས་པ་དེ་རྣམས་སུ་དབྱེ་ཞེས་པའི་དོན་དུ་གསལ་
9-5-3b


བས། ཐ་མའི་བཤད་པ་གཞུང་ལ་མ་ཞུགས་ལ། གསང་མཐའི་དོན་ནི་གསང་སྔགས་ཀྱི་མཐར་ཐུག་བླ་མེད་སྟོན་པས། རྒྱུད་བཞིར་འབྱེད་པའི་དོན་ཡིན་པའི་ཕྱིར་དང༌། འགྲེལ་པ་སུས་ཀྱང་དེ་ལྟར་བཤད་པ་མེད་པའི་ཕྱིར་རོ། །དེས་ན་མར་དོ་ནས་བརྒྱུད་པ་རྣམས་
ཀྱིས་རྒྱུད་སྡེ་བཞིར་བྱེད་ཅིང༌། རྣལ་འབྱོར་བླ་མེད་ལ་ཕ་མའི་རྒྱུད་གཉིས་སུ་འབྱེད་པ་ལྟར་ལེགས་སོ། །དེ་ཡང་གུར་ལས། རྡོ་རྗེ་མཁའ་འགྲོ་དང༌། ནམ་མཁའ་དང་མཉམ་པ་དང༌། འཁོར་ལོ་བདེ་མཆོག་རྣམས་རྣལ་འབྱོར་མའི་རྒྱུད་དུ་གསལ་བར་བཤད་ཅིང༌། རྣམ་བཞག་
རིམ་པར་ཡང་སྡོམ་འབྱུང་ལ། ཤེས་རབ་ཀྱི་མདོ་ཞེས་གསུངས་ཤིང༌། གསང་བའི་དེ་ཉིད་གསལ་བ་ལས་ཀྱང༌། དེ་ནས་རྣལ་འབྱོར་མ་རྒྱུད་ཀྱི། །རིམ་པ་གཞན་ཡང་བཤད་པར་བྱ། །ཞེས་མཚམས་སྦྱར་ནས། བདེ་མཆོག་གི་དོན་རྣམས་བཤད་པས། བདེ་
མཆོག་གི་རྣལ་འབྱོར་མའི་རྒྱུད་དོ། །ཡང་དེ་ལས། རྒོད་པ་ལ་སོགས་པའི་རྒྱུད་བཞིར་བཤད་པའི་གཉིས་སྤྲོད་དམ་གཉིས་འདུས་ཀྱི་རྒྱུད་ལ། རྣལ་འབྱོར་དང་རྣལ་འབྱོར་མའི་རྒྱུད་གཉིས་སུ་ཕྱེའོ། །སློབ་དཔོན་རྡོ་རྗེའི་འགྲེལ་པ་ལས། རྩ་བའི་རྒྱུད་ལེའུ་འབུམ་པ། 
རྒྱུད་ཕྱི་མ་ནམ་མཁའ་དང་མཉམ་པ་ཤློ་ཀ་འབུམ་པ། ཕྱི་མའི་ཕྱི་མ་ལེའུ་ལྔ་བཅུ་རྩ་གཅིག །ཤློ་ཀ་བདུན་བརྒྱ་བའོ། །ཞེས་བཤད་ལ། བོད་ཀྱི་བླ་མ་ཁ་ཅིག་ཀྱང་དེ་ལྟར་བཞེད་དོ། །མཁའ་འགྲོ་རྒྱ་མཚོ་ལས། དེ་ལྟར་ངེས་བརྗོད་འབུམ་གསུམ་ལས། །ཕྱུང་
བ་བདེ་མཆོག་ཉུང་ངུ་སྟེ། །ཨ་ཡིག་ལ་སོགས་ཀྵ་ཡིག་མཐར། །ལེའུ་རྣམས་ཇི་ལྟའི་རིམ་པ་ཡིས། །དེ་ཁོ་ན་ཉིད་ལྡན་པར་སྦྱར། །ཞེས་ཨཱ་ལི་ཀཱ་ལི་ལྔ་བཅུ་དག་པའི་ལེའུ་ལྔ་བཅུ་པ་ཉུང་ངུའི་རྒྱུད། མངོན་བརྗོད་འབུམ་ཕྲག་གསུམ་པ་ལས་ཕྱུང་བར་བཤད་དོ། །
9-5-4a


ལེའུ་ང་གཅིག་པ་ནི་ཡི་གེ་ལྔ་བཅུ་སྤྱིའི་དེ་ཉིད་དང་ལྡན་པར་སྦྱར་བའི་དོན་དུ་བྱའོ། །ཀུན་སྤྱོད་ལས། འབུམ་དུ་བརྗོད་པའི་རྒྱུད་ལས་ནི། །བདེ་མཆོག་བཏུས་པར་གྱུར་པ་དང༌། །ནམ་མཁའ་དང་ནི་མཉམ་པའི་རྒྱུད། །འབུམ་གཅིག་ནའང་འདི་དག་
བཤད། །ཅེས་ནམ་མཁའ་དང་མཉམ་པའི་རྒྱུད་འབུམ་ཕྲག་གཅིག་ཏུ་བཤད་པ་ནི་སྔ་མ་དང་མཐུན་ལ། འབུམ་ཕྲག་གཅིག་པའི་མངོན་བརྗོད་ལས། བདེ་མཆོག་ཉུང་ངུའི་རྒྱུད་བཏུས་པར་བཤད་དོ། །དེ་ལྟར་བཤད་པ་ནི། ཧེ་རུ་ཀ་མངོན་འབྱུང་ལས། འབུམ་
ཕྲག་འབུམ་ཕྲག་གསུམ་ལས་བཤད། །རྒྱུད་ཀྱི་སྙིང་པོ་བསྡུས་པ་ཡིན། །ཞེས་པའི་འགྲེལ་པ་ལས། མངོན་བརྗོད་རྒྱས་པ་འབུམ་ཕྲག་གསུམ་པ་དང༌། བསྡུས་པ་འབུམ་ཕྲག་གཅིག་པར་བཤད་པས། མི་འགལ་ཞེས་གསུངས་པ་ལྟར་ཡིན་པས། 
དེ་གཉིས་ཀ་ལས་བཏུས་པའོ། །རྩ་རྒྱུད་ལས། རིག་པ་རྒྱ་མཚོ་ལས་ཇི་བཞིན། །དཔའ་བོས་མདོར་བསྡུས་གསུངས་པ་ཡིན། །ཞེས་གསུངས་པའི་རིག་པ་རྒྱ་མཚོ་ནི། རྒྱལ་བ་བཟང་པོ་དང་དཔའ་བོ་རྡོ་རྗེས་རྒྱུད་ཆེན་པོར་བཤད་ལ། བོད་ཁ་ཅིག་རྩ་རྒྱུད་འབུམ་
ཕྲག་གཅིག་པར་འཆད་དོ། །དེ་རྣམས་ལས་ད་ལྟ་ནི། ཕྱོགས་འདིར་ཉུང་ངུའི་རྩ་རྒྱུད་དང་གཅིག་པ་ཁོ་ནའོ། །བཤད་རྒྱུད་མང་པ་ཡང་རང་རང་གི་རྒྱུད་རྒྱས་པ་ལས་བསྡུས་པའི་བསྡུས་རྒྱུད་ཡིན་པས། བསྡུས་རྒྱུད་གང་ཡིན་རྩ་རྒྱུད་མིན་ཡང༌། ང་གཅིག་པ་ལྟ་
བུ་ནི་རྩ་རྒྱུད་དོ། །བཤད་པའི་རྒྱུད་ནི། མི་ཐུབ་ཟླ་བས། མཁའ་འགྲོ་འབྱུང་བ་ཀུན་སྤྱོད་དང༌། །དེ་བཞིན་མཚན་མཆོག་བླ་མའི་རྒྱུད། །ཁ་སྦྱོར་རྒྱུད་དང་བཞི་པོ་ནི། །བཤད་པའི་རྒྱུད་དུ་ཤེས་པར་བྱ། །ཞེས་བཤད་པའི་མཁའ་འགྲོ་ནི་རྡོ་རྗེ་མཁའ་འགྲོ་དང༌། བླ་མ་
9-5-4b


ནི་མངོན་བརྗོད་བླ་མ་དང༌། ཁ་སྦྱོར་ནི་སམ་བྷུ་ཊ་དང༌། འབྱུང་བ་ལ་སྤྱིར་ཧེ་རུ་ཀ་མངོན་འབྱུང་དང༌། ཕག་མ་མངོན་འབྱུང་དང་། སྡོམ་པ་འབྱུང་བ་གསུམ་ཡོད་དོ། །དེ་ལྟར་བྱས་ན་བཤད་རྒྱུད་ལྔ་ཡོད་པས་རྒྱུད་དང་ཞེས་པའི་དང་ནི་སོ་སོར་འབྱེད་པའི་དང་དུ་བྱའོ། 
ཇོ་བོའི་འགྲེལ་པར་བཤད་རྒྱུད་བཞིར་བཤད་པའི་གསུམ་ནི། འབྱུང་བ་དང་མངོན་བརྗོད་དང༌། རྡོ་རྗེ་མཁའ་འགྲོར་བཤད་ལ། བཞི་པ་ནི་ཀུན་སྤྱོད་ལ་བྱེད་པ་དགོངས་པའོ། །མལ་གྱོའི་རྗེས་འབྲང་དག །ཕམ་མཐིང་པ་སོགས་རྒྱལ་དཀའ་ཟླ་བའི་རྗེས་སུ་འབྲངས་
ནས་བཤད་རྒྱུད་ལྔར་བྱེད། པཎྜི་ཏ་ཐད་ཆུ་བའི་བླ་མ། ནཱ་རོ་བའི་སློབ་མ་རྒྱ་གར་དཱ་རི་ཀ་པ་ནི། རྣལ་འབྱོར་མ་བཞི་ཞལ་སྦྱོར་བ་དང་། མཁའ་འགྲོ་རྒྱ་མཚོ་གཉིས་ལྔའི་སྟེང་དུ་བསྣན་ནས། བཤད་རྒྱུད་བདུན་དུ་བྱེད་ཟེར། བོད་ཀྱི་མཁས་པ་དག །སྡོམ་
འབྱུང་འགྲེལ་པར་བསྡུས་རྒྱུད་ཡིན། རྒྱུད་ཕྱི་མའང་ཡིན། བཤད་རྒྱུད་ཀྱང་ཡིན་པར་བཤད་པས་སྡོམ་འབྱུང་དང༌། ཕག་མོ་མངོན་འབྱུང་ནི། རྒྱུ་ཉིད་ལས། བཤད་རྒྱུད་དུ་བཤད་པས་བཤད་རྒྱུད་དགུར་བྱའོ་ཞེས་ཟེར་རོ། །དེ་ལ་བདེ་མཆོག་
གི་རྒྱུད་ལ་ནི་རྩ་བ་དང་བཤད་པའི་རྒྱུད་གཉིས་སུ་མ་ངེས་ཏེ། ཨ་ལང་ཀ་ཀ་ལ་ཤས་བཤད་རྒྱུད་དང་ཡན་ལག་གི་རྒྱུད་གཉིས་སོ་སོར་བགྲངས་ཤིང༌། སངས་རྒྱས་གསང་བས་ཀྱང༌། བཤད་རྒྱུད་དང་ཆ་མཐུན་ཀྱི་རྒྱུད་གཉིས་སོ་སོར་མཛད་པ་ལྟར་
འདིར་ཡང་མི་འགལ་བས། དེ་བཞིན་དུ་བྱའོ། །དེ་ལྟར་བྱས་ན་ཀུན་སྦྱོད་ཁ་སྦྱོར་རྡོ་རྗེ་མཁའ་འགྲོ་གསུམ་ནི་བཤད་པ་ལྟར་ཡིན་ལ། མངོན་བརྗོད་ལ་ནི་འགྲེལ་པར་རེས་བཤད་རྒྱུད་དང༌། རེས་རྩ་རྒྱུད་དུ་བྱས་ཀྱང་བཤད་རྒྱུད་དུ་བྱའོ། །ཕག་མོ་མངོན་འབྱུང་
9-5-5a


ནི་དེ་ཉིད་ལས། བཤད་པའི་རྒྱུད་ཕྱི་མ་ལས་ཕག་མོ་མངོན་པར་འབྱུང་བ་ཞེས་བྱ་བ་ཞེས་གསུངས་ལ། བཤད་པའི་རྒྱུད་ཕྱི་མ་ནི་མངོན་བརྗོད་ལ་བྱ་སྟེ། འདི་མངོན་བརྗོད་ཀྱི་སྟོད་འགའ་ཞིག་མ་གཏོགས་པ་དེའི་ལེའུ་བཅུ་གཉིས་
པ་དང་འདྲ་བར་སྣང་བས་དེ་ལས་ཕྱུང་བའི་དོན་ནོ། །དེའི་ཕྱིར་མངོན་བརྗོད་ལས་ལོགས་པའི་བཤད་རྒྱུད་མིན་ནོ། །མི་ཐུབ་ཟླ་བ་དང་ཇོ་བོས་འབྱུང་བ་ཞེས་པ་མ་གཏོགས་པ་གསལ་ཁ་མེད་ལ། བོད་སྔ་མ་ཁ་ཅིག་ཧེ་རུ་ཀ་མངོན་འབྱུང་དུ་འདོད་ཅིང༌། དེ་ཡང་
དབང་བསྐུར་བའི་བཤད་རྒྱུད་ཡིན་ཟེར་མོད་ཀྱང༌། རྩ་རྒྱུད་ལས་མི་འབྱུང་བའི་དབང་གི་རྣམ་གཞག་ཆེར་མེད་པ་དང༌། གཞན་ཡང་བཤད་རྒྱུད་དུ་འགྲོ་བའི་རྒྱུ་མཚན་གསལ་བར་མི་སྣང་བས་ཕྱོགས་མཐུན་གྱི་རྒྱུད་དུ་བྱའོ། །སྡོམ་པ་འབྱུང་བ་ནི་རྒྱུད་རྒྱས་
པ་འབུམ་ཕྲག་གསུམ་པ་ལས། ལྷན་སྐྱེས་ཀྱི་རྟོག་པ་བཤད་པ་འཆད་པའི་ཤིན་ཏུ་གལ་ཆེ་བ་ཅིག་ཡོད་པས་འགྲེལ་པས་བཤད་རྒྱུད་དུ་མཛད་པ་ལྟར་བྱའོ། །མཁའ་འགྲོ་རྒྱ་མཚོ་ལས་ཚོགས་ཀྱི་བཤད་རྒྱུད་ཡིན་ཟེར་བ་ནི། དེ་ཉིད་ལས། རྡོ་རྗེ་
མཁའ་འགྲོ་སྡོམ་པ་དང༌། །གཞན་ཡང་རྣལ་འབྱོར་རྒྱུད་རྣམས་ནི། །འདུས་པ་ལ་སོགས་དོན་ཆེན་པོ། །དེ་རྣམས་ཀྱིས་ནི་རྒྱུད་འདི་ཡི། །སྣ་ཚོགས་དོན་ནི་མངོན་བརྗོད་པ། །དེ་ཐམས་ཅད་ཀྱི་ལས་ཀྱི་ཚོགས། །ལྡན་པར་རབ་ཏུ་གསལ་བར་བྱེད། །
ཅེས་འཁོར་ལོ་སྡོམ་པའི་ལས་ཚོགས་གསལ་བར་བྱེད་ཅེས་བཤད་མོད་ཀྱང༌། དེ་ཙམ་གྱིས་བཤད་རྒྱུད་དུ་འཇོག་ན། རྡོ་རྗེ་མཁའ་འགྲོ་དང་གསང་འདུས་སོགས་ཀྱིའང་བཤད་རྒྱུད་དུ་འགྱུར་རོ། །དེས་ན་འདི་ཡང་ཕྱོགས་མཐུན་གྱི་རྒྱུད་
9-5-5b


དུ་བྱས་ན་ལེགས་པར་སེམས་སོ། །རྣལ་འབྱོར་མ་བཞི་ཞལ་སྦྱོར་བ་ཡང་དེ་དང་འདྲ་བར་སེམས་སོ། །དེ་ལྟར་ན་བཤད་པའི་རྒྱུད་ཡིན་པར་བཤད་པ་ནི་དྲུག་གོ། བདེ་མཆོག་གི་སྐུ་གསུང་ཐུགས་ཀྱི་འཁོར་ལོའི་བཤད་རྒྱུད་ར་ལི་ཉེར་བཞི་འཕྲོས་
པའི་རྒྱུད་བརྒྱད་དེ་སོ་གཉིས་ལ། བོད་ཀྱི་མཁས་པ་དག་འཕྲོས་པའི་རྒྱུད་ལ། ཁ་ཅིག་རྙོག་པ་མེད་པའི་རྒྱུད་བསྣན་ནས་བརྒྱད་དུ་འདོད་པ་དང༌། ཁ་ཅིག་སྟོབས་ཆེན་ཡེ་ཤེས་རྒྱལ་པོའི་རྒྱུད་གྲངས་སུ་མི་བགྲང་བས་རྙོག་མེད་དང༌། རི་གི་ཨ་ར་ལི་གཉིས་
བསྣན་ནས་བརྒྱད་དུ་བྱེད་པ་ལ། རི་གི་ཨ་ར་ལི་ནི་བདེ་མཆོག་གི་བཤད་རྒྱུད་ཡིན་རྒྱུ་ཡང་མེད་ཅིང༌། དེ་རྣམས་ཀྱི་ཟླ་ལ་སྲེ་བར་ཕངས། རྙོག་མེད་ནི་རྒྱུད་ཡང་དག་ཅིག་ཡིན་པ་འདྲ། འདི་རྣམས་སྔ་ནས་ཀྱང་རྒྱུད་རྩོད་པ་ཅན་དུ་གྲགས་ཤིང༌། རྒྱུད་ཡང་དག་
མིན་པར་ངེས་པ་འགའ་ཞིག་སྣང་ལ། གཞན་རྣམས་ཐེ་ཚོམ་གྱི་གཞིར་སྣང་བས་དཔྱད་པར་བྱའོ། །ཞེས་དང༌། ནམ་མཁའ་དང་མཉམ་པའི་རྒྱུད་ཀྱང་དེ་ཐེ་ཚོམ་ཟ་བ་དང༌། མཁའ་འགྲོ་མ་ཐམས་ཅད་ཀྱི་སྐུ་གསུང་ཐུགས་གཉིས་སུ་མེད་པ། བསམ་གྱིས་མི་
ཁྱབ་པའི་རྡོ་རྗེ་ཕག་མོ་མངོན་པར་འབྱུང་བའི་རྒྱུད་ཀྱི་རྩ་རྒྱུད་ལ་ལེའུ་བཅུ། རྒྱུད་ཕྱི་མ་ལ་ལེའུ་གཉིས་བྱས་པ་དང༌། ཕག་མོ་མངོན་འབྱུང་གི་རྒྱུད་ལེའུ་ཉེར་གཉིས་བྱས་པ་ལོ་ཙཱ་བ་ཡེ་ཤེས་བཟང་པོས་བསྒྱུར་ཟེར་བ་གཉིས། རྒྱུད་རྫུན་མར་སྣང་གསུང་
ཞིང༌། འབུམ་ཕྲག་གསུམ་པ་ལས་ཕྱུང་བའི་སྒྱུ་འཕྲུལ་དྲ་བ་ཆེན་མོ་རལ་པ་གྱེ་དུ་བརྫེས་པའི་རྒྱུད། སྒྱུ་མ་ཆེན་མོ་ཞེས་བྱ་བ་འདི་ནི། མཻ་ཏྲི་མཁའ་སྤྱོད་ཀྱི་རྒྱུད་ཆུང་ངུ་ཞིག་ལོགས་སུ་བཀོལ་བར་སྣང་ཞེས་གསུང་ངོ༌། །བདེ་མཆོག་གི་རྒྱུད་གསུངས་པའི་
9-5-6a


གནས་ལ་མངོན་བརྗོད་ཀྱི་འགྲེལ་པ་ནས། རི་རབ་ཀྱི་རྩེར་གསུངས་པར་བཤད། གདུལ་བྱ་བཏུལ་བའི་གནས་ནི། འཛམ་བུ་གླིང་ཡིན་ཞེས་ཟེར། རྩ་རྒྱུད་ཀྱི་འགྲེལ་པ་ཨིནྡྲ་བྷཱུ་ཏིས་མཛད་ཟེར་བར། དང་པོར་རི་རབ་ཀྱི་རྩེར་
གསུངས་ནས། ཕྱིས་འབྲས་སྤུངས་སུ་གསུངས་པར་བཤད་དོ། །དུས་ནམ་གྱི་ཚེ་གསུངས་པ་ནི། སློབ་དཔོན་རྡོ་རྗེས་མཛད་ཟེར་བའི་འགྲེལ་པར་གཉིས་ལྡན་གྱི་དུས་ཀྱི་དབང་ཕྱུག་བཏུལ་བའི་ཚེ་གསུངས་པར་འདོད་ཀྱང༌། བོད་ཀྱི་བླ་མ་རྣམས་
རྩོད་ལྡན་གྱི་དུས་སུ་གསུངས་པར་བཞེད་པ་ནི། མཁའ་འགྲོ་རྒྱ་མཚོ་ལས། རྩོད་པའི་དུས་ཀྱི་སའི་ནང་དུ། །བཅོམ་ལྡན་མཐའ་ཡས་པས་འདི་གསུངས། །ཤཱཀྱ་སེང་གེས་གསུངས་པའི་རྒྱུད། །ཅེས་གསུངས་ཤིང་འགྲེལ་པར་ཡང་མཁའ་འགྲོ་
རྒྱ་མཚོའི་རྒྱུད་རྒྱས་པ་རྩོད་ལྡན་གྱི་དུས་སུ་ཤཱཀྱ་སེང་གེས་གསུངས་པར་བཤད་ལ། དེས་གཞན་ཡང་མཚོན་ནོ། །རྩ་རྒྱུད་ཀྱི་འགྲེལ་པ་ཁ་ཅིག་ནས་བསྐྱར་ནས་མ་གསུངས་པར་ཡང་བཤད་མོད་ཀྱང༌། སྔ་མ་ལྟར་རིགས་ཏེ། གུར་ལས། སྙིགས་
མའི་དུས་སུ་ཚེ་ཐུང་ཞིང༌། །ཉོན་མོངས་ཤས་ཆེ་བ་རྣམས་ཀྱི་དོན་དུ། རྩ་རྒྱུད་རྒྱས་པ་ལས་བསྡུས་ནས་གསུངས་པར་བཤད་པས་ཤེས་སོ། །སྟོན་པ་པོ་ནི་ཧེ་རུ་ཀས་གསུངས་པར་བདེ་མཆོག་སྟོད་འགྲེལ་དུ་གསུངས་པ་ལྟར། རྩ་རྒྱུད་ལས་ཀྱང༌། 
དཔའ་བོས་བསྡུས་ནས་གསུངས་པ་ཡིན། །ཞེས་གསུངས་སོ། །ཞུ་བ་པོ་ནི་ཕག་མོ་ཡིན་པར་དེ་ཉིད་ལས་བཤད་ལ། ཕྱག་ན་རྡོ་རྗེས་ཞུས་པའི་ཚུལ་ཡང་ཡོད་དོ། །སྡུད་པ་པོ་ནི་མཁའ་འགྲོ་རྒྱ་མཚོ་ལས། བསྡུ་བ་མཛད་པ་སོགས་རྣམས་ཀྱིས། །བདག་
9-5-6b


ལས་བགྲོད་པ་དེ་ཐོབ་པོ། །མ་མོ་ཐམས་ཅད་འདུས་རྣམས་ཀྱིས། །རྡོ་རྗེའི་གནས་རྣམས་སུ་བསྡུས་སོ། །གཅིག་ལ་གཅིག་གིས་བཞེད་པ་ནི། །གསོལ་བ་འདེབས་ཤིང་གསོལ་འདེབས་མཛད། །བཅོམ་ལྡན་འདས་ཀྱིས་གསུངས་པ་ཡི། །ཚིག་འདི་ལ་
ནི་མངོན་པར་དགའ། །ཞེས་རྣལ་འབྱོར་མ་རྣམས་ཀྱིས་རྡོ་རྗེའི་གནས་སུ་བསྡུས་པར་གསུངས་པའི་གནས་ནི། ཨྱོན་དུ་འཆད་དེ། སྡུད་པ་པོ་ལ་ཡང་མི་འདྲ་བ་མང་དུ་གསུངས་སོ། །གཉིས་པ་ནི། རྩ་རྒྱུད་ང་གཅིག་པའི་དོན་གང་བཤད་རྒྱུད་གང་གིས་ཇི་ལྟར་
འཆད་སྙམ་ན། བཤད་བྱ་རྩ་རྒྱུད་ཀྱི་དོན་གྱི་གཙོ་བོ་ནི་བསྡུ་ན་གསུམ་སྟེ། རྒྱུད་སྣོད་རུང་དུ་བྱེད་པ་དབང་གི་སྐོར་དང༌། ལམ་རིམ་གཉིས་བསྒོམ་པ་དང༌། དེ་གཉིས་ཀྱི་འབྲས་བུའོ། །དེ་ཡང་རྩ་རྒྱུད་ལས། སྔགས་པས་དཀྱིལ་འཁོར་མ་མཐོང་བར། །གང་ཞིག་རྣལ་
འབྱོར་པ་ཉིད་འདོད། །མཁའ་ལ་ཁུ་ཚུར་གྱིས་རྡེག་དང༌། །སྨིག་རྒྱུའི་ཆུ་ནི་འཐུང་དང་མཚུངས། །ཞེས་དཀྱིལ་འཁོར་དུ་བཅུག་ནས་ལྷ་ངོ་བསྟན་པ་དང༌། ཞུགས་པ་ལ་དབང་མ་བསྐུར་བར་ལམ་སྒོམ་པའི་རྣལ་འབྱོར་པར་འདོད་པ་ནི། སྨིག་རྒྱུའི་ཆུ་ལ་འཐུང་
བ་དང་འདྲ་བར་འདོད་དོན་གཏན་མི་འགྲུབ་པར་གསུངས་པས། དབང་བསྐུར་བ་གལ་ཆེ་ལ། དེ་ཡང་རྩ་རྒྱུད་ལེའུ་གཉིས་པ་དང༌། གསུམ་པ་དང་བཞི་པ་རྣམས་ཀྱིས་བསྟན་པ་ལ། མ་ཚང་བ་སྐོང་བ་ནི་རྡོ་རྗེ་མཁའ་འགྲོའི་ཞེ་དྲུག་པ་དང༌། སྡོམ་འབྱུང་གི་བཅུ་བདུན་
པ་དང་བཅོ་བརྒྱད་པས་སྟོན་པས། བདེ་མཆོག་གི་དབང་བསྐུར་བའི་ཆོ་གའི་གཞི་ནི་འདི་དག་ལ་བྱ་སྟེ། རྒྱུད་རྡོར་ཕྲེང་ན་ཡང་གནད་ཆེ་བ་མང་དུ་ཡོད་དེ་གོ་སླ་བས་ཞིབ་ཏུ་མ་བྲིས་སོ། །ལོ་ནག་དྲིལ་གསུམ་གྱི་མན་ངག་ལ་བརྟེན་ནས་རྩ་བའི་རྒྱུད་འཆད་པ་
9-5-7a


འདི་ལ། རྩ་རྒྱུད་ཀྱི་གཞུང་གང་གིས་རྫོགས་པའི་རིམ་པ་བསྟན་པ་དང༌། དེ་བཤད་རྒྱུད་གང་གིས་འཆད་པ་དང་། དེ་ཡང་གྲུབ་ཆེན་གསུམ་གྱི་གཞུང་གང་གིས་ཡིན་པ་ལེགས་པར་ཤེས་པ་གལ་ཆེ་བར་སྣང་ནའང༌། ཚུལ་དེ་སྔ་མ་
རྣམས་ཀྱིས་གསོལ་བར་མ་མཛད་འདུག་པ་འདིར་བཤད་ན། རྩ་རྒྱུད་ཀྱི་གཞུང་གང་གིས་རྫོགས་རིམ་སྟོན་པ་ནི། ལོ་དྲིལ་གཉིས་ཀྱི་གཞུང་ན་མི་གསལ་ཞིང༌། ནག་པོ་སྤྱོད་པའི་གཞུང་གསལ་ཏེ། དཔྱིད་ཐིག་ལས། དེ་ནས་དེ་བཞིན་གཤེགས་པ་གང་
ཡང་རུང་བའི་སྐུའི་དཀྱིལ་འཁོར་དང༌། སྦྱིན་སྲེག་དང་མཆོད་སྦྱིན་དང༌། བཟླས་པ་དང་སྒོམ་པ་ལ་སོགས་པའི་ཆོ་གའི་བྱ་བ་ཕྱི་རོལ་དང་མཐུན་པར། ནང་གི་ངོ་བོས་ཡང་དག་པར་རབ་ཏུ་བཤད་པར་བྱའོ། །ཞེས་སོ། །དེ་ལ་དེ་བཞིན་གཤེགས་པའི་སྐུ་
གང་ཡང་རུང་བ་ནི། སྒྲུབ་པ་པོ་གང་ཡང་རུང་བའི་ལུགས་སོ། །དེའི་སྐུའི་དཀྱིལ་འཁོར་ནི་ལུས་ཀྱི་དཀྱིལ་འཁོར་རོ། །དེ་ལྟར་ན་དཀྱིལ་འཁོར་ནས་སྒོམ་པའི་བར་ལ། ཕྱི་བསྐྱེད་རིམ་དང་ནང་རྫོགས་རིམ་གཉིས་གཉིས་ཡོད་ལ་སོགས་ཀྱིས་བསྡུས་པ་
སྔགས་བཏུ་བ་ལ་ཡང་གཉིས་སོ། །དེ་ཡང་རྡོ་རྗེ་མཁའ་འགྲོ་ལས། རྣལ་མའི་སྦྱོར་བ་རྟོགས་བྱའི་ཕྱིར། །བཅོས་མ་ཡི་ནི་བསྒོམས་པ་དང༌། །བཅོས་མ་ཡི་ནི་བཟླས་པ་བྱ། །ཞེས་གསུངས་པ་ལྟར་བསྒོམ་བཟླས་སོགས་ལ་རྣལ་མ་དང་བཅོས་མ་
གཉིས་གཉིས་སུ་བྱ་སྟེ། སྔ་མ་དང་དོན་གཅིག་གོ། དེ་དག་གིས་ནི་རྩ་རྒྱུད་ཀྱི་གཞུང་འདིས་ནང་མ་བཅོས་པའི་རྫོགས་རིམ་འདི་བསྟན་ཟེར་བ་མ་བྱུང་ཡང༌། རྩ་རྒྱུད་ཀྱིས་དཀྱིལ་འཁོར་སོགས་བསྟན་པའི་དོན་ལ་རིམ་པ་གཉིས་ཀའི་བཤད་པ་རེ་དགོས་
9-5-7b


པར་ཤེས་ལ། རྩ་རྒྱུད་ལས། མན་ངག་ཤིན་ཏུ་རྙེད་དཀའ་སྟེ། །དཔའ་བོའི་བརྡ་ཡི་སྐད་དུ་ནི། །ང་ཡིས་རྒྱུད་དུ་སྦས་པ་ཡིན། །ཞེས་དང༌། གང་དུ་སྦས་པའི་རྒྱུད་ཀྱང་རིམ་ལྔ་ལས། འཁོར་ལོ་སྡོམ་པར་སྦས་པ་ཡི། །བྱིན་བརླབས་རིམ་པ་བཤད་པར་
བྱ། །ཞེས་འཁོར་ལོ་སྡོམ་པའི་རྒྱུད་ལ་གསུངས་ཏེ་རྩ་རྒྱུད་དོ། །དཀྱིལ་འཁོར་ལ་གཉིས་ལས། རྟེན་གྱི་དཀྱིལ་འཁོར་རྫོགས་རིམ་གྱི་དབང་དུ་བྱས་ཏེ་འཆད་པ་ནི། སམ་བྷུ་ཊ་ནས་རྒྱས་པར་བསྟན་ལ། དེ་ཡང་དཔྱིད་ཐིག་ལས། བྱང་ཆུབ་ཆེན་པོའི་ཕྱོགས་
ཆོས་ནི། །ཞེས་པ་ནས། འཁོར་ལོའི་དཀྱིལ་འཁོར་དུ་འདོད་དོ། །ཞེས་པའི་བར་གྱིས་ཏོན་ནོ། །འོན་ཀྱང་དེར་དཀྱིལ་འཁོར་བསྐྱེད་པའི་དུས་ཀྱི་དབྱངས་གསལ་འགོད་པའི་གཞིའི་པད་མ་སྤྱི་བོའི་རྩ་འདབ་སོ་གཉིས་དང༌། དབྱངས་གསལ་ནི་རྩ་འདབ་དེ་ནས་
རྒྱུ་བའི་བྱང་སེམས་དཀར་དམར་དང༌། དབྱངས་གསལ་འགྱུར་བའི་ཟླ་བ་ཀླད་པ་ལ་བཤད་པ་ནི། བརྟེན་པའི་དཀྱིལ་འཁོར་གྱི་ཕྱོགས་ཡིན་ལ། མན་སྙེར། ཧཾ་ཡིག་ལུས་ཀྱི་བརྟན་གཡོའི་རྩ་བར་བཤད་པ་ཡང༌། ཟླ་བའི་སྟེང་གི་ཧཱུཾ་ཡིག་ནང་ལ་སྦྱར་བ་
ལ་འཆད་དོ། །དེ་རྣམས་མ་གཏོགས་པ་རྟེན་གྱི་དཀྱིལ་འཁོར་ནང་ལ་སྦྱར་བས་ནི། རྫོགས་རིམ་པའི་ལུས་ལ་གནད་དུ་བསྣུན་པའི་བསྣུན་ས་བསྟན་ནོ། །ཚུལ་འདི་མངོན་བརྗོད་ལས་ཀྱང༌། དེ་ཙམ་དུ་མི་རྒྱས་པ་ཞིག་བསྟན་ཏེ། ལཱུ་ཨི་པ་སོགས་ཀྱི་
རྫོགས་རིམ་ལ་གནད་ཆེ་བ་ཞིག་ཡོད་དོ། །སྦྱིན་སྲེག་ནང་ལ་སྦྱར་བ་ཡང༌། སཾ་བྷུ་ཊ་ནས་འཆད་པ་དཔྱིད་ཐིག་ལས། ཤེས་རབ་མེ་ནི་ཆེར་འབར་བ། །ཞེས་པ་ནས། སྒྲ་ནི་སྔགས་ཞེས་བརྗོད་པ་སྟེ། །ཞེས་པའི་བར་གྱིས་སྟོན་ཏེ། མཆོད་སྦྱིན་ནང་ལ་
9-5-8a


སྦྱར་བ་ཡང་དེར་བསྟན་ནོ། །འདིར་ནི་ལུས་ལ་གནད་དུ་བསྣུན་ས་སྤྱི་དང་བྱེ་བྲག་ཏུ་གཏུམ་མོའི་གནད་སྟོན་པ་ལ་མཁོའི། དེ་ནས་བཟླས་པ་དང་བསྒོམ་པ་ནང་ལ་སྦྱར་བ་ཡང་སཾ་བྷུ་ཊ་ལས་གསུངས་སོ། །དཀྱིལ་འཁོར་སོགས་
རྩ་རྒྱུད་ཀྱི་གཞུང་གང་ནས་བསྟན་པ་ནི་རྟོགས་པར་སླ་བས་མ་བྲིས་སོ། །སཾ་བྷུ་ཊར། གྲུ་གསུམ་དཀྱིལ་འཁོར་ཉམས་དགའ་བར། །རྡོ་རྗེ་ར་ལི་རྣམ་པར་འབྱུང༌། །ཞེས་སོགས་ཀྱི་ལྟེ་བའི་རྩ་འཁོར་གྱི་དབུས་ན་ཨ་ཡིག་དང༌། འདབ་མ་ལ་དབྱངས་གསལ་
སྡེ་ཚན་བརྒྱད་གནས་པར་གསུངས་པ་སོགས་ནི། དཔྱིད་ཐིག་ལས་སྔགས་བཏུ་བར་གསུངས་ཏེ། དེ་ནི་རྫོགས་རིམ་པའི་སྔགས་བཏུའོ། །འདིར་རྩ་རྒྱུད་ལས། ཆོས་འབྱུང་བྲིས་པའི་དབུས་སུ་དབྱངས་གསལ་བཀོད་ནས། བསྐྱེད་རིམ་པའི་སྔགས་
བཏུ་བ་གསུངས་པ་དེ། བཤད་རྒྱུད་ཀྱིས་རྫོགས་རིམ་ལ་སྦྱར་ཏེ་འཆད་པའོ། །དེ་ལྟར་ན་སྔགས་བཏུ་བའི་གཞི་དང༌། བཏུས་པའི་སྔགས་ཟློ་བ་གཉིས་སུ་བྱ་ལ། དང་པོ་ལ་བཏུ་གཞི་དབྱངས་གསལ་འགོད་པའི་གནས་སུ་ཆོས་འབྱུང་བྲིས་པའི་ནང་
བཤད་པ་ནི། ལྟེ་བའི་རྩ་འཁོར་གྱི་ཕྱི་དབྱིབས་ཨེའི་དབྱིབས་ཅན་གྲུ་གསུམ་དུ་རྒྱུད་དེར་བཤད་པའོ། །མན་སྙེར། འདིས་ནི་ལྟེ་བའི་པདྨ་ལ་སོགས་པ་ཡང་གསུངས་སོ། །ཞེས་བཤད་པས་དེས་ལྟེ་བའི་པད་མ་བསྟན་པ་མཚོན་ནས། རྩ་འཁོར་གཞན་
གསུམ་ཡང་བསྟན་པར་གཟུང་ངོ༌། །དེ་ནས་དབྱངས་གསལ་འགོད་པས་ནི་ལྟེ་བའི་རྩ་འཁོར་དུ་མ་ཟད་འཁོར་ལ་གཞན་གྱི་ལྟེ་བ་དང་འདབ་མ་ལ་ཡི་གེ་འགོད་པ་ཡང་བསྟན་པར་ཤེས་པར་བྱའོ། །དེ་ལྟར་བྱས་ནས་གཏུམ་མོ་སྒོམ་པ་རྒྱས་པར་ནི། སཾ་བྷུ་
9-5-8b


ཊའི་བརྟག་པ་དྲུག་པའི་རབ་བྱེད་གསུམ་པ་དང༌། བཞི་པ་དང༌། རྡོ་རྗེ་མཁའ་འགྲོའི་བཅོ་ལྔ་པ་ནས་འཆད་དེ། རོ་རྐྱང་གི་ནང་དུ་དབྱངས་གསལ་འགོད་པ་ཡང་གསུངས་སོ། །མངོན་བརྗོད་ཀྱི་བཅུ་བཞི་པ་ལས་ཀྱང་གསུངས་ཏེ། དེ་ནི་རིམ་པ་བཞི་པར་ཡང་
བཀོད་དོ། །སྡོམ་འབྱུང་གི་སོ་གཅིག་པ་ལས་ཀྱང༌། འཁོར་ལོ་བཞི་ལ་བརྟེན་པའི་གཏུམ་མོ་སྒོམ་པ། གནད་ཤིན་ཏུ་ཟབ་པ་རྣམས་བསྟན་ཡོད་ལ། ཚུལ་དེ་ལོ་དྲིལ་གཉིས་ཀྱིས་གསལ་བར་མ་བཤད་ཀྱང༌། ནག་པོ་སྤྱོད་པའི་གཞུང་དུ་རྩལ་དུ་བཏོན་
ནས་འཆད་དེ། མ་རྒྱུད་སྤྱི་དང་བྱེ་བྲག་ཏུ་བདེ་དགྱེས་ལ་ཤིན་ཏུ་གལ་ཆེའོ། །བཏུས་པའི་སྙིང་པོ་སོགས་ཀྱི་སྔགས་ཟློ་བ་ལ། ལྟེ་བར་སྔགས་ཕྲེང་བཀོད་ནས་ཟློ་བ། ལྭ་བ་པས་བཤད་པ་བཞིན་འགྲེལ་པ་གཞན་གཉིས་ཀྱིས་ཀྱང་བཤད་ནས། དེ་ནང་ལ་
སྦྱར་བའི་ངེས་དོན་གྱི་བཟླས་པ། རྡོ་རྗེ་བཟླས་པ་ལྟེ་བ་ནས་བྱེད་པ་ཡང་འགྲེལ་པ་གསུམ་གྱིས་བཤད་དོ། །བདེ་མཆོག་རིམ་པ་ལྔའི་ལུགས་ནི། སྙིང་ཁ་ནས་རླུང་གི་བཟླས་པ་བྱེད་པ་ཡིན་ཏེ། དེ་ལྟར་བྱས་ན་སྙིང་ཁར་སྔགས་ཕྲེང་བཀོད་ནས་ཟློ་བ་ནང་ལ་སྦྱར་
བའོ། །རྡོར་བཟླས་ཀྱང་བདེ་མཆོག་གི་རྒྱུད་རྣམས་ཀྱི་ནང་ནས། སྡོམ་འབྱུང་གསལ་ཏེ་དེར་རྫོགས་རིམ་མང་དུ་ཡོད་དོ། །བརྟེན་པའི་དཀྱིལ་འཁོར་ལ་གཉིས་ལས། ཕྱི་དཀྱིལ་སྐྱེད་པའི་མངོན་བྱང་དང༌། ཆོས་སོ་བདུན་སྒོམ་པ་སོགས་ཀྱིས་མཚོན་པའི་རྫོགས་
རིམ་ནི། འོག་ནས་ཀྱང་འཆད་པར་འགྱུར་ལ། སྐབས་གཞན་དུ་ཡང་འཆད་པར་འདོད་དོ། །ལུས་དཀྱིལ་སྒོམ་པས་མཚོན་པའི་རྫོགས་རིམ་ཡང་འཆད་པར་འགྱུར་རོ། །རྩ་རྒྱུད་ལས། དཀྱིལ་འཁོར་པའི་ལྷ་རེ་གཉིས་ཀྱི་མིང་ཙམ་ལས་སྐུ་མདོག་ཕྱག་མཚན་
9-5-9a


སོགས་གསལ་བར་མ་བཤད་པ་འཆད་པ་ནི། མངོན་བརྗོད་ལས་ཤིན་ཏུ་རྒྱས་པར་གསུངས་ལ། སྡོམ་འབྱུང་ལ་སོགས་པའི་བཤད་རྒྱུད་གཞན་ལས་ཀྱང་གསུངས་ཤིང༌། བྱེ་བྲག་ཏུ་ལོ་དྲིལ་སོགས་ཀྱི་བསྐྱེད་རིམ་ད་ལྟ་
ལག་ལེན་དུ་ཡོད་པ་རྣམས་ཀྱི་བསྟན་ཚུལ་ནི་འཆད་པར་འགྱུར་རོ། །བསྐྱེད་རིམ་གྱི་འབྲས་བུ་འཇིག་རྟེན་པའི་དངོས་གྲུབ་ཞི་རྒྱས་སོགས་རྩ་རྒྱུད་དུ་བཤད་པ་རྣམས་ཀྱི་དོན་ཡང་རྡོ་རྗེ་མཁའ་འགྲོ་སོགས་ལས་འཆད་དོ། །རིམ་པ་གཉིས་ཀའི་འབྲས་བུ་མཆོག་གི་
དངོས་གྲུབ་ནི་ཕལ་ཆེར་རྫོགས་རིམ་གྱི་ལམ་ཞིབ་ཏུ་བཤད་པ་ན། དེ་ཉིད་གོང་ནས་གོང་དུ་སོང་བའི་རིམ་པས་འཐོབ་པ་རྟོགས་པར་ནུས་ལ། མཆོག་གྲུབ་པའི་ཚེ་ཇི་ལྟར་འོང་བ་སོགས་ནི། ཁ་སྦྱོར་ལས་རྒྱས་པར་གསུངས་སོ། །ལོ་དྲིལ་གྱི་རྫོགས་
རིམ་གྱི་རྣམ་གཞག་གཞན་ནི་གཞན་དུ་འཆད་པར་འགྱུར་རོ། །གཞན་ཡང་མཁའ་འགྲོ་རྒྱ་མཚོ་ལས། སྦྱོར་བ་ཡན་ལག་དྲུག་དང༌། རིམ་པ་ལྔའི་རྫོགས་རིམ་གསུངས་ཤིང༌། སྡོམ་འབྱུང་ལས་རྡོ་རྗེ་བཟླས་པ་དང༌། སྒྱུ་ལུས་དང༌། མངོན་
པར་བྱང་ཆུབ་པ་དང༌། ཟུང་འཇུག་གི་རིམ་པ་རྣམས་གསུངས་པ་ནི་གཞན་དུ་བཤད་པར་བྱའོ། །མངོན་བརྗོད་ཀྱི་འགྲེལ་པ་ལས། རྫོགས་པའི་རིམ་པ་ནི་རྒྱུད་འདི་ནས་རྩ་སྒོམ་པ་དང༌། རླུང་སྒོམ་པ་དང༌། ཐིག་ལེ་སྒོམ་པ་དང༌། དྲོད་སྒོམ་པ་དང༌། བྱང་ཆུབ་ཀྱི་
སེམས་སྒོམ་པ་དང༌། མཚན་བཅས་སྒོམ་པ་ལྔ་ཡིན་ལ། ཡེ་ཤེས་ཀྱི་ཚོགས་དོན་དམ་པའི་བདེན་པ་སྒོམ་པ་ནི། སྒྱུ་མ་ལྟ་བུ་དང་། འོད་གསལ་སྟོང་པ་ཉིད་སྒོམ་པ་དང༌། ཟུང་འཇུག་སྒོམ་པ་དང་གསུམ་སྟེ་སྲོག་ཨ་བ་དྷཱུ་ཏཱིར་འཇུག་པའི་ཐབས། བསམ་
9-5-9b


གཏན་སྒོམ་པ་ནི་ལྔ་ཡིན། ཡེ་ཤེས་ཀྱི་ཚོགས་དོན་དམ་པའི་བདེན་པ་སྒོམ་པ་ནི་གསུམ་ཡིན། ཞེས་རྫོགས་རིམ་ལ་དྷཱུ་ཏཱིར་སྲོག་ཚུད་པའི་ཐབས་ཅིག་དང༌། ཆུད་པ་ལ་བརྟེན་ནས་སྒོམ་པའི་སྐབས་གཉིས་སོ་སོར་བྱས་ཏེ། བདེ་མཆོག་ཏུ་མ་ཟད་
བླ་མེད་ཀྱི་རྫོགས་རིམ་གཞན་སྒོམ་པ་ལ་ཡང་དེ་གཉིས་ཤེས་དགོས་སོ། །རྣལ་འབྱོར་མ་ཀུན་སྤྱོད་ཀྱིས་བསྐྱེད་རིམ་ཇི་ལྟར་བཤད་པ་ནི། སྐབས་སྐབས་སུ་འཆད་པར་འགྱུར་ཞིང༌། ལཱུ་ཨི་པའི་གཞུང་དུ་བཀོད་པའི་རྫོགས་རིམ་ནི་ཀུན་སྤྱོད་ཀྱི་ལེའུ་བཅུ་
གཉིས་པ་ནས་འབྱུང་ལ། འདིའི་རྫོགས་རིམ་གྱི་གཞུང་གིས་རྩ་རྒྱུད་ཀྱི་རྫོགས་རིམ་གང་སྟོན་པ་སོགས་ནི། གཞང་འདིའི་རྫོགས་རིམ་གྱི་བཤད་པར་ཞིབ་ཏུ་འཆད་པར་འགྱུར་ལ། མངོན་བརྗོད་དང་སྡོམ་འབྱུང་སོགས་ཀྱི་རྫོགས་རིམ་གྱིས་རྩ་རྒྱུད་ཀྱི་དོན་གང་སྟོན་པ་
རྒྱས་པར་ནི། དྲིལ་བུ་པའི་རྫོགས་རིམ་གྱི་བཤད་པར་འཆད་པར་འདོད་པས་འདིར་ཞིབ་ཏུ་མ་བྱས་སོ། །དེ་ལྟར་བཤད་པ་ནི་ལུགས་མཆོག་ཏུ་གྱུར་པ། ལོ་དྲིལ་ནག་གསུམ་གྱི་མན་ངག་ལ་བརྟེན་ནས་རྩ་རྒྱུད་ཀྱི་དོན་གྱི་གནད་ཆེ་བ་རྣམས། བཤད་རྒྱུད་ཀྱིས་
ཇི་ལྟར་འགྲེལ་བ་ལ། ཤིན་ཏུ་མཁོ་བོ་རྣམ་དཔྱོད་ཅན་ལ་འདི་ལྟར་ཡོད་དོ་ཞེས་འཕྲིན་བསྐུར་བ་ལ་བརྟེན་ནས། རྩ་བཤད་ཀྱི་རྒྱུད་དོན་རྙེད་པའི་ཐབས་དམ་པར་ཤེས་པར་གྱིས་ཤིག །གཉིས་པ་ནི། རྩ་རྒྱུད་ལས་སྔར་དྲངས་པ་ལྟར་སྟོན་པས། བརྡའི་སྐད་ཀྱིས་
རྒྱུད་དུ་སྦས་པས། མན་ངག་ཤིན་ཏུ་རྙེད་དཀའ་བར་གསུངས་པའི་མཇུག་ཏུ། གོས་དང་ཕྱག་རྒྱ་ལྔ་ལ་སོགས། །ཤེས་རབ་ཡན་ལག་ཕུར་བུ་གུར། །ཨཱ་ལི་ཀཱ་ལི་ཞེས་བརྗོད་ནས། །རྒྱུ་སོགས་སྟོང་པ་སྔོན་འགྲོ་བས། །འཇུག་པ་སྒྲ་ལ་སོགས་པ་ནས། །ཇི་
9-5-10a


སྲིད་བསྡུས་པའི་སྦྱོར་ལྡན་པ། །བདུད་རྩི་ཚིམ་བྱེད་མྱ་ངན་འདས། །ལག་པའི་མཆོད་པ་དབང་བསྐུར་བ། །གོ་ཆ་ཆེན་པོས་ཡང་དག་བསྲུངས། །སྔགས་རྣམས་ཀུན་གྱིས་མཆོད་པར་བྱ། །ད་ལྟར་དེ་ཉིད་བཅུ་བཞི་ནི། །མདོར་བསྡུས་
ནས་ནི་བཤད་པ་ཡིན། །ཞེས་གསུངས་པས་རྩ་རྒྱུད་ཀྱི་དོན་དེ་ཉིད་བཅུ་བཞིར་བསྡུས་པ་འདི་ལ་བརྟེན་ནས། རྒྱུད་ཀྱི་མན་ངག་རྙེད་སླ་བར་སྟོན་པས། ལཱུ་ཨི་པ་ལ་སོགས་པས་ཀྱང་གཞུང་དེ་ལྟར་དྲངས་ཏེ་བཤད་མ་བཤད་གང་ཡིན་ཀྱང༌། དོན་གྱི་
རིམ་པ་དེའི་སྟེང་ནས་བཀྲལ་བ་ཞིག་དགོས་སོ། །རྩ་རྒྱུད་ལེའུ་ང་གཅིག་པའི་དང་པོས་རྒྱུད་དོན་ཐམས་ཅད་མདོར་བསྟན། གཉིས་པ་ནས་ལྔ་བཅུ་པའི་བར་གྱིས་རྒྱས་པར་བཤད། ཐ་མའི་ལེའུ་ང་གཅིག་པས་མདོ་རྒྱས་གཉིས་གཅིག་ཏུ་བསྡུས་ནས་དེ་
ཉིད་བཅུ་བཞིར་བཤད་པ་འདི་བླ་མ་ནཱ་རོ་པའི་མན་ངག་ཡིན་ཏེ། སྡོམ་པའི་རྒྱུད་ཆུང་ངུའི་ལེའུའི་མཚམས་སྦྱོར་ལས། དང་པོར་རེ་ཤིག་བསྐྱེད་པ་དང་རྫོགས་པའི་རིམ་པ་གཉིས་ཀྱིས་བསྡུས་པའི་དོན་ཐམས་ཅད་ལེའུ་དང་པོས་མདོར་བསྟན་ནས། 
གཉིས་པ་ནས་ལེའུ་ལྔ་བཅུ་པའི་བར་གྱིས་རྒྱས་པར་བསྟན་ཏེ། ཀུན་གྱི་ཐ་མའི་ལེའུ་ནི་དེ་རྣམས་གཅིག་ཏུ་མཛད་དེ་བཅོམ་ལྡན་འདས་ཀྱིས་གསུངས་པའོ། ཞེས་རྒྱུད་ཆུང་དུ་འདི་གསུམ་དུ་སྦྱར་བའི་བཤད་པ་འདི་ནི་ནཱ་རོ་པའི་དགོངས་པའོ་ཞེས་སུ་
མ་ཏི་ཀཱིརྟིས་བཤད་པས་ནཱ་རོ་པའི་རྗེས་སུ་འབྲངས་ཏེ་རྩ་རྒྱུད་འཆད་པ་ལ་སྔོན་དུ་ཤེས་དགོས་པའི་གནད་ཅན་ཞིག་གོ། དེ་ཉིད་བཅུ་བཞིའི་གྲངས་འདི་ལྟར་བྱེད་རྩ་རྒྱུད་ཀྱི་འགྲེལ་པ་ཁུངས་མ་རྣམས་ནས་མ་བཤད་ཀྱང་དངོས་སུ་གསུངས་པ་རྣམས་
9-5-10b


དེ་ཉིད་རྣམས་ཀྱི་གྲངས་ཡིན་ནོ། །གོས་ཀྱི་སྐད་དོད་ནི་བ་ས་ན་ཞེས་པ་གནས་དང༌། གོས་གཉིས་ཀ་ལ་འཇུག་པར་མར་དོ་སོགས་བཞེད་དོ། །འགྲེལ་པ་རྣམས་ནས་གོས་ལ་སྟག་ལྤགས་དང༌། གཞལ་ཡས་ཁང་གི་བཤད་པ་གཉིས་བྱུང་བ་ནི་སྐད་དོད་ཀྱི་སྟེང་ནས་ཡིན་ལ།
གནས་ལ་ནི་སྒྲུབ་པ་པོའི་གནས་དང༌། དཀྱིལ་འཁོར་པའི་ལྷའི་གནས་གཉིས་སོ། །དབར་པོ་རྡོ་རྗེས་གོས་ནི་གཅེར་བུའི་གཟུགས་སོ་ཞེས་པ་ནི་དོན་མིན་ནོ། །ཕྱག་རྒྱ་ལ་སོགས་པའི་དེ་ཉིད་ནི་འཁོར་ལོ་སོགས་ཀྱི་ཕྱག་རྒྱ་ལྔ་དང་སོགས་ཀྱིས་ཐལ་བསྡུད་པར་
འགྲེལ་བ་གསུམ་ལས་བཤད་ནག་པོའི་དཀྱིལ་ཆོག་ལས་མགོ་ཕྲེང་དང༌། རལ་པའི་ཅོད་པན་དར་དང་བཅོས་མའི་སྐྲ་ལ་སོགས་པས་བརྒྱན་པར་བཤད་པ་ཡང་བསྡུའོ། །དེ་ནི་གོས་དང་ཕྱག་རྒྱ་སོགས་ཀྱི་དེ་ཉིད་དེ། སྒྲུབ་པའི་གནས་སུ་སྒྲུབ་པ་པོ་ཆས་སུ་
འཇུག་པའི་ཚུལ་ལོ། །ཤེས་རབ་ཡན་ལག་གི་དེ་ཉིད་ནི། འགྲེལ་པ་རྣམས་ལས་ཁ་ཊྭཱཾ་གའམ། ཤེས་རབ་མའི་ཡན་ལག་གིས་འཁྱུད་པ་དང༌། ཕྱི་མ་ཉིད་ལ་བཤད་པ་གཉིས་སོ། །ནག་པོའི་དཀྱིལ་ཆོག་ལས། ཤེས་རབ་ཡན་ལག་སྟན་གྱི་སྟེང༌། །ཞེས་
གསུངས་པ་ལ་མར་ངོས་ཤེས་རབ་ཡན་ལག་ནི་ཕྱག་རྒྱ་དང་ལྷན་ཅིག་ཏུའོ་ཞེས་བཤད༌། ཁ་ཅིག་གིས་དེ་གཉིས་གཞི་མཐུན་དུ་བསྡུས་ནས་རོ་གདན་ལ་འཆད་དོ། །སྒྲུབ་ཐབས་ཞུན་བཞིར་སྒོམ་པའི་སྐབས་སུ་རོ་གདན་ལ་འདུག་པར་བཤད་ཀྱང་འདི་ནི་
བུམ་བཟླས་བྱེད་པའི་སྐབས་ཡིན་པའི་ཕྱིར་མི་འགྲིག་པས་བཤད་པ་སྔ་མ་ལྟར་ཡིན་ནོ། །ཕུར་བུ་དང་གུར་གྱི་དེ་ཉིད་ནི་བསྲུང་འཁོར་སྒོམ་པའོ། །ཨཱ་ལིའི་དེ་ཉིད་དང་ཀཱ་ལིའི་དེ་ཉིད་ཅེས་གཉིས་སུ་བྱའོ། །རྒྱུ་སོགས་སྟོང་པ་སྔོན་འགྲོའི་དེ་ཉིད་དང༌། འཇུག་
9-5-11a


པ་སྒྲ་ལ་སོགས་པའི་དེ་ཉིད་དང༌། བསྡུས་པའི་སྦྱོར་བ་དང་ལྡན་པའི་དེ་ཉིད་ཅེས་གཉིས་སུ་བྱའོ། །བདུད་རྩི་ཚིམ་བྱེད་ཀྱི་དེ་ཉིད་དང༌། མྱ་ངན་ལས་འདས་པའི་དེ་ཉིད་དང༌། ལག་མཆོད་ཀྱི་དེ་ཉིད་དང༌། དབང་བསྐུར་བའི་དེ་ཉིད་དང༌། གོ་ཆ་
ཆེན་པོའི་དེ་ཉིད་དང༌། སྔགས་ཀུན་གྱིས་མཆོད་པའི་དེ་ཉིད་དེ་དེ་ཉིད་བཅུ་བཞིའོ། །འདི་མདོར་བསྟན་དང་རྒྱས་བཤད་གཉིས་ཀའི་རྒྱུད་དོན་བསྡུས་ཏེ་བསྟན་པ་ཡིན་པས། འདི་ལ་རྒྱུད་ཀྱི་དབུ་ཞབས་ཀྱི་དོན་ཀུན་སྡུད་པ་ལ་སྦྱར་བ་ཞིག་དང༌། བསྐྱེད་རིམ་ལ་
སྦྱར་བ་ཞིག་དང༌། རྫོགས་རིམ་ལ་སྦྱར་བ་ཞིག་སྟེ། གསུམ་གྱིས་བཤད་དགོས་ཞེས་བླ་མ་འགའ་ཞིག་གསུང་ངོ༌། །འདི་ལ་མར་དོས་ནི་འཆད་ཚུལ་གཉིས་ལས། ནག་པོ་པའི་སྒྲུབ་ཐབས་ལྟར་བཤད་པ་ནི། བསྐྱེད་རིམ་ཙམ་དང༌། ལཱ་ཨི་པའི་སྒྲུབ་ཐབས་
ལྟར་བཤད་པ་ལ་ནི་མྱང་འདས་པས་རྫོགས་རིམ་སྟོན་ལ། དེ་མ་གཏོགས་པ་ལྷག་མས་བསྐྱེད་རིམ་ཉིད་སྟོན་པ་དང༌། རྫོགས་རིམ་ལ་ཡང་སྟོང་པ་སྔོན་དུ་བཏང་ནས་བདེ་བ་བསྒོམ་པ་དང༌། དེ་ལས་བཟློག་ནས་སྒོམ་པ་གཉིས་བསྟན་པར་བཞེད་དེ། སྔ་
མ་ནི་ལཱུ་ཨི་པ་ལྟར་སྣོད་བཅུད་རིམ་གྱིས་སྡུད་པ་དང༌། གཉིས་པ་ནི་དཔྱིད་ཐིག་གི་རྫོགས་རིམ་ཡིན་ཞེས་ལ་ཡག་པ་ཟེར་རོ། །མལ་གྱི་རྗེས་འབྲང་དག་མྱང་འདས་ཀྱི་དེ་ཉིད་ཀྱིས་ཕྱག་རྒྱ་བཞི་དང༌། རྡོར་སེམས་བསྡུ་བ་ལ་སོགས་པའི་རྫོགས་རིམ་བསྟན་
ཞེས་པ་མ་གཏོགས་པ་འཆད་ཚུལ་གཉིས་ལ་སོགས་པ་སྔར་དང་འདྲའོ། །དེ་ལ་རྩ་རྒྱུད་ལས། དེ་ཉིད་བཅུ་བཞིའི་ཆིངས་བྱས་པའི་སྟེང་ནས་མན་ངག་རྙེད་སླ་པར་སྟོན་པ། དེ་ཡང་རྩ་བཤད་ལེགས་པར་མ་སྦྱར་པ་ལས་རྙེད་པར་མི་སླ་སྟེ། བཤད་
9-5-11b


རྒྱུད་ནི་རྩ་རྒྱུད་ཀྱི་མན་ངག་ལེགས་པར་རྙེད་པའི་ཆེད་ཡིན་པའི་ཕྱིར་རོ། །དེ་སྦྱོར་བ་ཡང་ལོ་དྲིལ་ནག་གསུམ་ལྟ་བུའི་གྲུབ་ཆེན་གྱི་མན་ངག་ཤེས་པའི་བླ་མས་བཤད་པ་ལས་ཡིན་གྱི་དེ་མེད་པར་མིན་ཏེ། སྡོམ་འབྱུང་ལས། ཆོས་ཀྱི་དེ་ཉིད་ལ་འཇུག་ཕྱིར། །
དེ་རྣམས་ལས་ཕྱི་རབ་བསྟན་པ། །བླ་མ་དམ་པའི་གདམས་ངག་ལས། །གསལ་བར་འགྱུར་གྱི་གཞན་དུ་མིན། །ཞེས་གསུངས་པའི་ཕྱིར་རོ། །རྩ་བཤད་སྦྱར་ཏེ་རྩ་རྒྱུད་ཤིན་ཏུ་མི་གསལ་བ་འཆད་པ་ལ་ནི། བཤད་ཐབས་རྒྱལ་བས་གསུངས་པ་
དགོས་ལ། ཕམ་མཐིང་པ་སྐུ་མཆེད་རྣམས་ཀྱིས་འཆད་པ་འདི་ལ་ཡང་བདེ་མཆོག་ལ་ཚོགས་བཤད་དང༌། སློབ་བཤད་ཅེས་པའི་ཚུལ་གཉིས་ཀྱིས་འཆད་དོ། །ཞེས་གྲགས་ཆེའོ། །དེ་ལྟ་ཡིན་ན་ནི་རྡོ་རྗེ་འཛིན་པ་ཉིད་ཀྱིས་ཡེ་ཤེས་རྡོ་རྗེ་ཀུན་ལས་བཏུས་
སུ་བཤད་ཐབས་མཐར་ཐུག་པ་གསུངས་པའི་དོན། སྒྲོན་གསལ་དུ་བསྡུས་པ་ལས། ཇི་བཞིན་སྒྲ་དང་དགོངས་མིན་དང༌། །དྲང་པའི་དོན་དུའང་གང་འགྱུར་དང༌། །ཡི་གེའི་དོན་དང་སྤྱི་ཡི་དོན། །ཚོགས་པ་ལ་བཤད་ཡིན་པར་བརྗོད། །ཇི་བཞིན་མིན་
སྒྲ་ངེས་དོན་དང༌། །དེ་བཞིན་དགོངས་ཏེ་བཤད་པ་དང༌། །སྦས་དང་མཐར་ཐུག་པ་རྣམས་ནི། །སློབ་མ་ལ་ནི་བཤད་པར་འདོད། །ཅེས་གསུངས་པ་ལྟར་ཤེས་དགོས་ཤིང༌། ཚུལ་དེས་བཤད་ན་རྒྱུད་དོན་རྫོགས་པར་རྙེད་པས། དེ་ཉིད་བཅུ་བཞི་བཤད་བྱར་
བཀོད་ནས་དེ་ལྟར་བཤད་ན་ལེགས་པས་སྤྱིར་དེ་ལྟར་ཤེས་དགོས་སོ། །བཤད་པ་སྔ་མ་གཉིས་ཙམ་ལས་མ་ཐོན་ན་ནི་གྲུབ་ཆེན་གསུམ་གྱི་མན་ངག་གིས་འཆད་པའི་ནུས་པ་མི་རྫོགས་པས་ལེགས་པར་བཤད་དགོས་སོ། །དེ་ལ་དབང་བསྐུར་བའི་དེ་
9-5-12a


ཉིད་ཀྱི་བྱེ་བྲག་རྒྱུད་སྣོད་རུང་དུ་བྱེད་པ་ནི་ཐོག་མར་འབྱུང་ངོ༌། །ལག་མཆོད་ཀྱི་དེ་ཉིད་ནི་དབང་གི་དུས་སུ་ཐོབ་པའི་དམ་ཚིག་དང་སྡོམ་པ་སྲུང་བ་ལ་ཐུན་མོང་ཡིན་མིན་གཉིས་ལས་ཕྱི་མ་དང༌། དེའི་ཡང་གཙོ་བོ་གཡོན་པའི་ཀུན་སྤྱོད་སྤྱི་
ལ་སློབ་པ་དང༌། དེའི་ནང་ནས་ཀྱང་གཙོ་བོར་གྱུར་པའི་དམ་ཚིག་ཡིན་ཏེ། འདི་རྩ་རྒྱུད་ལས་གསུངས་པ་བཞིན་དུ་བདེ་མཆོག་གི་རྒྱུད་དུ་མ་ཞིག་ལས་གསུངས་ལ། ཇི་ལྟར་བྱེད་པའི་ཆོ་གའི་རིམ་པ་ནི་སླ་ཡང་འདི་ལྟར་བྱེད་པའི་གནད་རྟོགས་དཀའ་བར་
འདི་པའི་ཁྱད་ཆོས་ཆེན་པོ་ཞིག་གོ། གོས་དང་ཕྱག་རྒྱ་སོགས་ཀྱི་དེ་ཉིད་དང་སྔ་མ་གཉིས་ཏེ་གསུམ། རིམ་པ་གཉིས་ཀའི་ཐུན་མོང་བའོ། །ཤེས་རབ་ཀྱི་ཡན་ལག་གི་དེ་ཉིད་ནི། དབང་དུས་དང༌། རིམ་པ་གཉིས་ཀྱི་དུས་ཏེ་སྐབས་གསུམ་དུ་དགོས། 
ལྷན་སྐྱེས་ཀྱི་བདེ་བ་འདྲེན་པ་ལ་ཕུལ་དུ་བྱུང་བའི་ཕོ་ཉ་མོ་རྣམས་དང༌། འདུ་བའི་ཚུལ་ཤིན་ཏུ་རྒྱས་པར་རྩ་རྒྱུད་ལས་མང་དུ་བཤད། དེའི་གསལ་བྱེད་ཕོ་ཉ་མོ་རྣམས་ལ་བརྟེན་ནས། བདེ་བ་འཕེལ་བའི་ཡན་ལག་སྒྱུ་རྩལ་གྱི་སྦྱོར་བ་དང༌། རྩའི་ཀུན་སྦྱོར་སོགས་
ནི་རྡོ་རྗེ་མཁའ་འགྲོ་ལས་འཆད་ལ། ཕོ་ཉ་མོ་རིགས་བཞི་ལ་ཇི་ལྟར་ལོངས་སྤྱོད་པའི་ཚུལ་ལ་སོགས་པ་རྒྱུད་གཞན་ནས་མི་འབྱུང་བ་རྣམས་ནི་སྡོམ་འབྱུང་ལས་གསལ་བར་གསུངས་སོ། །དེ་ནས་བསྐྱེད་རིམ་ལ་སྦྱར་ཏེ་བཤད་པ་ལ་མངོན་བརྗོད་ནས་འབྱུང་བ་ལྟར་
བསྐྱེད་རིམ་མཐའ་ཡས་པ་ཞིག་བཤད་པ་སོགས་བསྐྱེད་རིམ་ཀུན་ལ་འཇུག་མོད་ཀྱང༌། འདིར་གཙོ་བོར་ཉེ་བར་མཁོ་བའི་ལོ་དྲིལ་ནག་གསུམ་གྱི་གཞུང་ལ་བརྟེན་ནས་བཤད་ན། ཕུར་བུ་དང་གུར་གྱི་དེ་ཉིད་ཀྱིས་ནི་བསྲུང་འཁོར་རྒྱས་འབྲིང་བསྡུས་གསུམ་
9-5-12b


བསྡུས་ལ། དེས་མཚོན་ནས་སྦྱོར་བ་ཚོགས་བསོག་པ་སོགས་སྒྲུབ་ཐབས་དངོས་གཞིའི་སྔོན་དུ་འགྲོ་བ་རྣམས་ཀྱང་ཤེས་དགོས་པ་ནི་མངོན་བརྗོད་སོགས་བཤད་རྒྱུད་ལས་ཤེས་སོ། །རྒྱུ་སོགས་སྟོང་པ་སྔོན་འགྲོའི་དེ་ཉིད་ལ་མར་དོའི་ལུགས་ཀྱིས་སོགས་
ཀྱི་སྐད་དོད་དང་པོ་ལའང་འཇུག་པས། རྒྱུ་བསོད་ནམས་ཀྱི་ཚོགས་དང་པོར་བྱས་ནས་སྟོང་པ་སྒོམ་པ་ཡེ་ཤེས་ཀྱི་ཚོགས་གཉིས་གསོག་པ་ལ་འཆད་ཀྱང༌། འགྲེལ་པ་རྣམས་ལས་སོགས་ཀྱི་སྟེང་ནས་བཤད་ཅིང༌། དཔའ་བོ་རྡོ་རྗེ་དང་གཉིས་ཀའི་བཤད་སྦྱར་ལས། 
ཧེ་ནི་རྒྱུ་སོགས་སྟོང་པ་ཉིད། ཅེས་སོགས་གསུངས་པའི་དོན་དུ་འཆད་པས་རྟེན་སྐྱེད་པའི་སྔོན་གྱི་སྟོང་ཉིད་སྒོམ་པ་ལ་ཡང་སྦྱར་རོ། །དེ་ལྟར་བྱས་ན་རྟེན་དང་བརྟེན་པ་སྐྱེད་པའི་སྔོན་དུ་འགྲོ་བའོ། །དེས་ནི་དེ་ལས་ལངས་ནས་ནམ་མཁར་ནཱ་ད་སོགས་
འཇོག་པ་ནས། གཞལ་ཡས་ཁང་གདན་བཅས་སྐྱེད་པ་ཡང་རྒྱུད་དང་ལོ་ནག་གི་མན་ངག་ལས་ཤེས་པར་བྱའོ། །དེ་ནས་ཨཱ་ལི་དང་ཀཱ་ལིའི་དེ་ཉིད་གཉིས་ནི། དེ་གཉིས་བརྗོད་ནས་ཉི་ཟླའི་གཟུགས་སུ་སྒོམ་པ་ལ་ལྭ་བ་པ་དང་ལྷ་སྦས་སོགས་ཀྱིས་བཤད་
དེ། དབྱངས་གསལ་འགོད་པ་འདི་ལཱུ་ཨི་པ་ལྟ་བུ་རྟེན་བརྟེན་པ་གཉིས་དུས་གཅིག་ཏུ་སྐྱེད་པ་ལྟར་ན་གཞལ་ཡས་ཁང་མ་བསྐྱེད་པའི་སྔོན་དུ་དང༌། རིམ་གྱིས་སྐྱེད་ན་ནི་ཁང་བརྩེགས་སོགས་གདན་བཅས་བསྐྱེད་ཟིན་པའི་སྐབས་སུ་བྱའོ། །ཟླ་ཉི་སོགས་
གང་སྐྱེད་པ་ནི་འཆད་པར་འགྱུར་རོ། །ལྭ་བ་པ་དང་ལྷ་སྦས་ཀྱིས་རྒྱུ་སྟེ་བསྐྱེད་པའི་བྱེད་པ་དང་སོགས་ཀྱིས་བསྡུས་པ་བསྐྱེད་པར་བྱ་བ་སོགས་ཐམས་ཅད་སྟོང་པ་ནི་བྱ་བ་སྒྲུབ་པའི་ཡེ་ཤེས་སུ་འཆད་དེ། སྟོང་པ་ནི་ཟླ་ཉི་དང་ས་བོན་རྣམས་སོ་སོར་
9-5-13a


གནས་པས་སྟོང་པ་གཅིག་ཏུ་འདྲེས་པ་ལ་བསམས་སོ། །དེའི་སྔོན་དུ་འགྲོ་བ་ནི་སོར་རྟོག་ཡེ་ཤེས་ལ་བཤད་དོ། །འཇུག་པ་སྒྲ་ལ་སོགས་པའི་དེ་ཉིད་ལ། ལྷ་སྦས་ཀྱིས་སྒྲ་སྟེ་ཧཱུཾ་ཡིག་དང༌། ལ་སོགས་པས་བསྡུས་པ་ཟླ་ཉི་དང་ཕྱག་མཚན་
རྣམས་རྒྱུ་རྡོ་རྗེ་འཛིན་པ་ཇི་སྲིད་པ། དེ་སྲིད་ཀྱི་བར་དུ་འཇུག་པར་བཤད་དོ། །སྒྲུ་ཐབས་ཀྱི་གླེང་གཞི་ཡང་འགྱུར་ཁྱད་ཙམ་མ་གཏོགས་པ་འདྲའོ། །འགྲེལ་པ་གཞན་ལས་ཀྱང་མི་འདྲ་བ་མང་དུ་བཤད་ཀྱང་སྒྲ་ནི་ནཱ་ད་དང༌། སོགས་ཀྱིས་ནི་བར་སྲིད་མཚོན་པའི་
ཡི་གེ་གཞན་ཡང་སྡུད་ལ། འཇུག་པ་ནི་རྟེན་བརྟེན་པ་དུས་གཅིག་ཏུ་བསྐྱེད་པ་ལ་ནི། ཟླ་བའི་སྟེང་དུ་བབས་པ་དང༌། རྒྱུ་རྡོར་འཛིན་ཡབ་ཡུམ་མཉམ་པར་སྦྱོར་བ་ལ་ནི། ཡབ་ཀྱི་ཞལ་ལམ། སྙིང་ཁ་སོགས་ནས་ཞུགས་ཏེ་ཡུམ་གྱི་པད་མར་འགྲོ་བའོ། །ནས་
ཞེས་པ་ནི་དེ་ནས་བཟུང་སྟེ་ཞེས་པའོ། །བསྡུས་པའི་སྦྱོར་བ་དང་ལྡན་པའི་དེ་ཉིད་ནི། དེ་ནས་བཟུང་སྟེ་ཇི་སྲིད་དམ་ཚིག་པ་དང་ཡེ་ཤེས་པའི་ལྷ་གཉིས་གཅིག་ཏུ་བསྡུས་པའི་སྦྱོར་བ་དང་ལྡན་པ་དེ་སྲིད་དུ་ཞེས་པ་སྟེ། དྲིལ་བུ་པའི་ལུགས་ཀྱང་དེ་དང་འདྲའོ། །
ནག་པོ་པ་ལྟར་ན་སྔར་བཤད་པ་ནས་བཟུང་སྟེ། ལྷ་སོ་བདུན་དང་བྱང་ཕྱོགས་སོ་བདུན་གཅིག་ཏུ་བསྡུས་པའི་སྦྱོར་བའི་བར་ལ་བྱའོ། །རྩ་རྒྱུད་ཀྱི་འགྲེལ་པ་རྣམས་ནས་མངོན་བྱང་གི་སྐབས་ཀྱི་ཟླ་ཉི་མཚན་མ་གསུམ་བསྡུས་པ་དང༌། ཡི་གེ་གསུམ་ལས་
སྤྲོས་པའི་འཁོར་ལོ་གསུམ་གྱི་ལྷ་ཡི་གེ་གསུམ་ལ་སྡུད་པ་དང༌། མཐར་འཁོར་ལོ་གསུམ་གྱི་ལྷ་སྡུད་པ་ལ་འཆད་པ་སོགས་མི་མཐུན་པ་དུ་མ་ཞིག་གོ། དབང་བསྐུར་གྱི་ཕྱོགས་གཅིག་ལྷ་དབང་བསྐུར་ནས་རིགས་བདག་གིས་རྒྱས་གདབ་པ་ཡང་འདིར་
9-5-13b


སྦྱར་རོ། །བདུད་རྩིས་ཚིམ་བྱེད་ཀྱི་དེ་ཉིད་ནི། ནང་མཆོད་དང་གཏོར་མས་མཆོད་པ་དང༌། སྔགས་ཀྱིས་མཆོད་པ་གཞུང་ན་གསལ་ལ། དེ་དག་གིས་མཆོད་པ་གཞན་ཡང་མཚོན་ནོ། །མྱང་འདས་ཀྱི་དེ་ཉིད་ནི། མཐར་ཉེ་བར་སྡུད་པ་ལ་བཤད་པ་མང་ངོ༌། །གོ་ཆའི་དེ་
ཉིད་ནི་དཔའ་བོ་དང་དཔའ་མོའི་གོ་ཆ་གཉིས་དང༌། ལུས་ཀྱི་གནས་རྣམས་སུ་པཱུ་ཛ་སོགས་འགོད་པ་སྟེ་གསུམ་ཡོད་ལ། དེས་ནི་ལུས་དཀྱིལ་སྒོམ་པ་ཡང་མཚོན་ནོ། །དེ་རྣམས་ཀྱང་གཞུང་གསུམ་གའི་ཐུན་མོང་བའོ། །རྫོགས་རིམ་ལ་སྦྱར་ཏེ་བཤད་པ་
གལ་ཆེ་ལ། དེ་ཡང་རྟེན་རྫོགས་རིམ་གྱི་དབང་དུ་བྱས་ཏེ་བཤད་པས་ནི། སྔར་བཤད་པ་ལྟར་ལུས་སྤྱི་དང༌། ཁྱད་པར་དུ་ལུས་ཀྱི་རྩ་འཁོར་བཞི་ལ་སོགས་པའི་སྟོན་ནོ། །སཾ་བྷུ་ཊ་ལས། དབྱངས་གསལ་གང་དུ་བཀོད་པའི་པད་མ་རྫོགས་རིམ་ལ་སྦྱར་བ་ན། 
སྤྱི་བོ་བདེ་ཆེན་གྱི་འཁོར་ལོ་ལ་བཤད་པ་ནི་མཚོན་པ་ཙམ་སྟེ། འཁོར་ལོ་གཞན་ཡང་གཟུང་ངོ༌། །དེར་བཀོད་པའི་དབྱངས་གསལ་སྤྱི་བོའི་རྩ་འདབ་ནས་རྒྱུ་བའི་བྱང་སེམས་ལ་བཤད་པ་ཡང་མཚོན་པ་ཙམ་སྟེ། འཁོར་ལོ་བཞི་ཀར་དབྱངས་
གསལ་བཀོད་ནས་གཏུམ་མོ་སྒོམ་པར་བཤད་པ་བཞིན་ནོ། །པད་མར་བཀོད་པའི་དབྱངས་གསལ་ལམ། དེ་ལས་བྱུང་བའི་ཟླ་ཉིའམ། ཟླ་བ་དཀར་དམར་ཧཱུཾ་ཡིག་དང་བཅས་པ་རྫོགས་རིམ་ལ་བཤད་ན། ལྟེ་བའི་པད་མ་རེ་བཞི་སོགས་ཀྱི་འཁོར་ལོའི་
དབུས་སུ་ཐིག་ལེ་དང་ཡི་གེ་སྒོམ་པ་སོགས་སྲོག་དྷཱུ་ཏཱིར་སྡུད་ཐབས་གྲུབ་ཆེན་གསུམ་གྱི་གཞུང་ལས་འབྱུང་བ་སོགས་མཐའ་ཡས་ཤིག་ལ་ངེས་པ་རྙེད་ནས། བཤད་རྒྱུད་སོ་སོ་ལ་བརྟེན་ནས་རྩ་རྒྱུད་ཀྱི་རྫོགས་རིམ་དུ་མ་ཞིག་རྙེད་དེ་བློ་ཡོངས་སུ་རྒྱས་
9-5-14a


པར་འགྱུར་རོ། །གསུམ་པ་ནི། གསང་བདག་ཕྱག་ན་རྡོ་རྗེས་སུ་བཟུང་བའི་བྲམ་ཟེ་ཆེན་པོ་དཔལ་ས་ར་ཧ་དང༌། བྱང་ཆུབ་སེམས་དཔའ་བློ་གྲོས་རིན་ཆེན་གྱིས་མགོན་པོ་ཀླུ་སྒྲུབ་རྗེས་སུ་བཟུང་ཞིང༌། དེ་དང་དེའི་བླ་མ་བྱང་སེམས་
བློ་གྲོས་རིན་ཆེན་གྱིས་ལྷོ་ཕྱོགས་ལྡོ་བར་གྱི་རྔོན་པ་དཔལ་ཤ་བ་རི་དབང་ཕྱུག་རྗེས་སུ་བཟུང་ངོ༌། །དེ་ནས་ཨྱོན་གྱི་ཡུལ་ན་ཡབ་ཡིག་མཁན་གྱི་རྒྱལ་པོ་ཟླ་བ་རོལ་པ་དང༌། ཡུམ་ཟླ་བའི་དཔལ་ཞེས་པའི་སྲས་སུ་སྐུ་འཁྲུངས་པ། མཚན་ཀུན་ཏུ་དགེ་
བ་ཞེས་པ་གཅིག་རིག་གནས་དུ་མ་ལ་བསླབས་སོ། །དེའི་ཚེ་དཔལ་རི་ཁྲོད་དབང་ཕྱུག་དང་ཞལ་མཇལ་ནས་བསྙེན་བཀུར་དང་མཆོད་པ་དང་གུས་པའི་སྤྱོད་ལམ་གྱིས་མཉེས་པར་བྱས་ནས་རྗེས་སུ་བཟུང་བར་ཞུ་ཞེས་ཞུས་པས་དཔལ་འཁོར་ལོ་སྡོམ་པའི་
དཀྱིལ་འཁོར་དུ་དབང་བསྐུར། རྒྱུད་བཤད་གདམས་པ་གནང་སྟེ། སྒྲུབ་པ་ལ་བརྩོན་པར་བཞུགས་པའི་ཚེ་ཨྱོན་པའི་ཡུལ་ཆོས་ཀྱིས་ཚེས་བཅུ་རྣམ་གཉིས་ལ་དུར་ཁྲོད་དུ་མཆོད་པ་ལ་འགྲོ་བས་དེའི་ཚེ་ཁོང་ཚོའི་རྗེས་ལ་སློབ་དཔོན་གྱིས་ཀྱང་
བྱོན་པས། གཞན་ཚོ་གྱིས་ཚར་བའི་རྗེས་སུ་ཡུལ་ཉེར་བཞིའི་དཔའ་བོ་དང་རྣལ་འབྱོར་མ་རྣམས་ཐ་མལ་པའི་ཆ་ལུགས་བཟུང་ནས་འཚོགས་པའི་དབུས་ན་སྐྱེ་བདུན་གྱི་རོ་གཅིག་བཞག་སྒེག་ཅིང་རོལ་བའི་ཆ་བྱེད་དུ་འདུག་པ་ལ། ཕྱག་དང་མཆོད་པ་
བྱས་པས་མཉེས་ཏེ་དེ་རྣམས་ཀྱི་ཞལ་ནས་དམ་ཚིག་གི་རྫས་དེ་ལ་ཆོད་ལ་ངེད་རྣམས་ལ་དྲོངས་ཟེར་ནས་དྲངས། ཁ་ན་མ་ཐོ་བ་མེད་ཅིང་ཉོན་མོངས་པ་དང་མ་འདྲེས་པའི་ཟས་ཡིན་པས། ཁྱེད་རང་ཡང་ཁམ་གཅིག་ཟོ་གསུང་བས་ཚམ་ཚོམ་མེད་
9-5-14b


པར་ཟོས་པས་དེ་རྣམས་མཉེས་ཏེ་མི་སྣང་བར་གྱུར་པའི་རྗེས་སུ་ནམ་མཁར་དཔལ་འཁོར་ལོ་སྡོམ་པའི་དཀྱིལ་འཁོར་རྫོགས་པར་གྱུར་ནས། དེར་སློབ་དཔོན་བཅུག་དབང་རྫོགས་པར་བསྐུར། རང་བྱིན་གྱིས་རློབ་པའི་ཉམས་མྱོང་གི་བདེ་བའི་མཚོན་
བྱེད་དཔའི་ཡེ་ཤེས་རྒྱུད་ལ་བསྐྱེད་ནས་དེ་ཉིད་བརྟན་ཞིང་བོགས་དབྱུང་བའི་ཕྱིར་གདམས་པ་ཕོག་སྟེ། ཚེ་འདི་ཉིད་ལ་མཆོག་གི་དངོས་གྲུབ་མྱུར་དུ་ཐོབ་པའི་ཕྱིར་བསྐུལ་བའི་ཚིག །རྐང་པ་བརྐྱང་བ་སྤངས་ནས་ནི། །འཁོར་བའི་མདག་གཞུག་དོར་ནས་
སུ། །རྡོ་རྗེ་སེམས་དཔའ་རྒྱལ་པོ་ཆེ། །ཡང་དང་ཡང་དུ་བསྐུལ་བར་བྱ། །ཞེས་གསུངས་ནས་མི་སྣང་བར་གྱུར་ཏོ། །དེའི་དོན་བསམས་པས་སྒྲུབ་པ་ལ་རྩེ་གཅིག་ཏུ་འབད་དགོས་པར་གཟིགས་ནས། འཚོ་བ་གང་ལ་བརྟེན་ནས་བསྒྲུབ་སྙམ་པ་ན་བསོད་
སྙོམས་ལ་སོགས་པ་ཆགས་སྡང་སྐྱེ་ཞིང༌། ཤིང་ཐོག་སོགས་དགུན་དཀོན། ལག་གི་བླ་སོགས་ནི་སྒྲུབ་པའི་བར་ཆད་དུ་འགྱུར་བར་དགོངས་ནས་རིམ་གྱིས་ལྗོངས་དང་དབེན་གནས་ཀུན་ཏུ་རྒྱུ་ཞིང་བྱོན་ཏེ། མཐར་རྒྱ་གར་ཤར་ཕྱོགས་བྷཾ་ག་ལ་རུ་བྱོན་
པས། དེ་དང་ཉེ་བ་ཆུ་བོ་གངྒཱའི་འགྲམ་ན་ཉ་པ་མང་པོས་ཉ་བསད་ནས་ལྡི་ལྡོའི་ཕུང་པོ་ཆེན་པོ་སྤུངས་ནས་དེ་ལ་བྱ་དང༌། ཁྱིས་ཟ་ཞིང་འདུག་པ་མཐོང་སྟེ་བདག་པོ་མེད་ཅིང་རྩོལ་བ་ཆུང་བར་གཟིགས་ཏེ། དེའི་ཕྱོགས་གཅིག་ཏུ་བཞུགས་ནས་འཚོ་བ་ཉ་
རྒྱུ་ལ་མཛད་ཅིང༌། སྒྲུབ་པ་མཛད་པས་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་ཏེ། གསོལ་ཟས་ལ་མཚན་དུ་བཏགས་པ་ལཱུ་ཨི་པ་ཞེས་གྲགས་སོ། །རྡོ་རྗེ་གདན་པས་ཀྱང༌། ཡིག་མཁན་རིགས་ལས་སྐལ་བར་ལྡན། །ཉ་ལྟོས་ཟ་ཞིང་དངོས་གྲུབ་
9-5-15a


བརྙེས། །ལཱུ་ཨི་པ་ཞེས་བྱ་བ་ཡི། །བླ་མ་དེ་ལ་ཕྱག་འཚལ་ལོ། །ཞེས་སོ། །དེ་འདྲ་བའི་གྲུབ་ཆེན་དེ་ལ། རང་གི་སློབ་མ་རྒྱལ་པོ་དཱ་རི་ཀ་པ་དང༌། བློན་པོ་ཌ་གི་པ་ཞེས་པ་གཉིས་ཀྱིས་མངོན་པར་རྟོགས་པ་ཇི་ལྟར་སྒོམ་པ་ཞུས་པའི་དོན་དུ་དཔལ་
འཁོར་ལོ་བདེ་མཆོག་གི་མངོན་པར་རྟོགས་པ་འདི་མཛད་དོ། །འདི་ལ་འགྱུར་གཞན་ལས་མི་འབྱུང་བར། འགོས་དང་ཟངས་དཀར་གྱི་འགྱུར་ལ། དུར་ཁྲོད་བརྒྱད་དང་ཤིང་བརྒྱ་ལ་སོགས་པའི་མིང་མང་པོ་བྱས་པ་ཞིག་ཡོད་པ་ལ་སྔོན་གྱི་བོད་ཁ་ཅིག་ལཱུ་ཨི་
པའི་རྒྱ་དཔེ་གཞན་ལ་མེད། ཁ་ཆེའི་དཔེ་ལས་བསྒྱུར་བ་ལ་བྱུང་བ་ཡིན། དེ་ལ་འོང་བ་ཡང་ཁ་ཅིག་ནཱ་རོ་པས་བཅུག་ཟེར། ཁ་ཅིག་ཁ་ཆེ་བྱང་ཆུབ་བཟང་པོས་བཅུག་ཟེར་རོ། །ཞེས་སྨྲ་སྟེ། སྔ་མ་ནི་མི་བདེན་ལ་གཞན་ཞིག་གིས་བཅུག་པར་མངོན་
ནོ། །ལོ་ཆེན་གྱི་འགྱུར་ལ་འགོས་ཀྱིས་འགྱུར་བཅོས་མཛད་པ་ལ། མར་དོས་འགྱུར་བཅོས་བྱས་པ་ལ་སྔ་མ་ལྟར་བྱུང་ཡང་ཡུལ་དབུས་ཀྱི་དཔེ་ལ་གཏུགས་ནས་བསྒྱུར་བ་ལ་ནི་མ་བྱུང་ངོ༌། །སློབ་དཔོན་འདིས་མཛད་ཟེར་བའི་བདེ་མཆོག་དཔའ་བོ་གཅིག་
པའི་སྒྲུབ་ཐབས་ཆུང་བ་ཞིག་ཀྱང་ཡོད་དེ་བདེ་མཆོག་གི་ཕྱོགས་ལ་གཉིས་སོ། །གཞུང་སྔ་མ་ལ་ལྭ་བའི་ན་བཟའ་ཅན་གྱིས་མཛད་པའི་འགྲེལ་པ་མཆོག་ཏུ་གྱུར་པ་ཞིག་ཡོད་དོ། །དེ་ནས་པྲཛྙཱ་ར་ཀྵི་ཏ་ས་ལཱུ་ཨི་པའི་སྒྲུབ་ཐབས་ཀྱི་དཀའ་འགྲེལ་ཞིག་མཛད་ལ། 
འདི་རྔོག་ལོ་ཙཱ་བ་ཆེན་པོས་བསྒྱུར་བ་ལས། གྲུབ་ཐོབ་ཆེན་པོ་ལྭ་བའི་ན་བཟའ་ཅན་གྱི་རྗེས་སུ་འབྲངས་ནས་སློབ་དཔོན་ཆེན་པོ་པྲཛྙཱ་ར་ཀྵི་ཏས་མཛད་པ། ཞེས་འབྱུང་ལ། དེ་ནི་ལྭ་བ་པའི་འགྲེལ་པ་ཉིད་གཞིར་བཞག་འདུག་པས། སློབ་དཔོན་དེས་ཀྱང་ལྭ་
9-5-15b


བ་པའི་འགྲེལ་པར་བཞེད་དོ། །པྲཛྙཱ་ར་ཀྵི་ཏ་དང་རྟག་པའི་རྡོ་རྗེས་མཛད་པའི་ཕྱི་རོལ་མཆོད་པ་དང༌། ལག་མཆོད་སོགས་ཀྱི་གཞུང་ཆུང་མང་དུ་སྣང་བ་ཡང་ལྭ་བ་པའི་འགྲེལ་པ་ནས་འབྱུང་བ་ཉིད་བཀོད་པར་སྣང་ངོ༌། །སློབ་དཔོན་འདིས་ནཱ་རོ་པའི་སྤྱན་སྔར་ལོ་གཉིས་
བཞུགས་ཏེ་ཚོགས་བཤད་ལས། སློབ་བཤད་མ་ཐོབ་ཅེས་མལ་གྱོའི་རྗེས་འབྲང་འགའ་ཞིག་ཟེར་བ་ནི་ཤིན་ཏུ་མི་རིགས་ཏེ། དེ་ནས་བརྒྱུད་པའི་སློབ་བཤད་ཡོད་པར་འདོད་པ་རྣམས་ལ་ཡོད་ཅིང༌། ཁོང་ལ་མེད་པའི་བཤད་པ་ཁྱད་པར་ཅན་ཅི་ཡང་མི་
འདུག་ལ། དེའི་འགྲེལ་པ་ཡང་ལྭ་བ་པའི་དགོངས་པ་ཇི་བཞིན་པར་སྣང་བའི་ཕྱིར་རོ། །སུ་མ་ཏི་ཀཱི་རྟིའི་སློབ་མ་མཁས་པ་མར་དོ་ཡང་ཤས་ཆེར་སློབ་དཔོན་དེའི་ལུགས་ལ་བརྟེན་པར་སྣང་བས་ལུགས་དེའི་སློབ་བཤད་དེ་ལ་མེད་པ་མིན་ནོ། །དེ་བཞིན་གཤེགས་
པའི་རྡོ་རྗེས་ལཱུ་ཨི་པའི་སྒྲུབ་ཐབས་ཀྱི་འགྲེལ་པ་སྡོམ་པ་འབྱུང་བ་ཞེས་པ་ཚིགས་བཅད་དུ་བསྒྲིགས་པ་ཞིག་མཛད། དེའི་རང་འགྲེལ་ཁྱད་པར་གསལ་བྱེད་ཅེས་པ་རྒྱས་པ་ཞིག་མཛད། དེ་ཡང་ལ་བ་པའི་འགྲེལ་པ་གཞིར་བཞག་པ་ཞིག་སྣང་ངོ༌། །དེ་
བཞིན་གཤེགས་པའི་རྡོ་རྗེ་ནི་བི་བྷཱུ་ཏི་ཙ་ཎྜའི་གསང་མཚན་ནོ། །ཨ་བྷྱ་ཀ་རའི་ལཱུ་ཨི་པའི་སྒྲུབ་ཐབས་འཁྲུལ་སྤོང་ཡང་ལྭ་བ་པའི་འགྲེལ་པ་དང་མཐུན་ཤེས་ཆེ་ལ། ཇོ་བོ་ཆེན་པོ་རྗེས་མཛད་པའི་ལླུ་ཨི་པའི་འགྲེལ་པ་ནི། སྔ་མ་རྣམས་བཞིན་དུ་
མཐུན་ཤས་མི་ཆེ་ཡང་བཤད་པ་མང་པོ་སྣང་ངོ༌། །སློབ་དཔོན་ཀུ་མཱ་ར་བོ་དྷིས་མཛད་པའི་ལཱུ་ཨི་པའི་རྒྱ་ཆེར་འགྲེལ་པ་ཡེ་ཤེས་སྒྲོན་མ་ཞེས་པ་ཞིག་ཀྱང་ཡོད་དེ། ནུས་པ་མི་ཆེ་ཞིང་འགྲེལ་པ་སྔ་མ་རྣམས་དང་མི་མཐུན་པ་ཤིན་ཏུ་མང་ངོ༌། །
9-5-16a


བཱི་ར་བཛྲས་མཛད་ཟེར་བའི་སྒྲུབ་ཐབས་ཀྱི་དཀའ་འགྲེལ་ཞིག་ཀྱང་ཡོད་དེ། དཔའ་བོ་རྡོ་རྗེས་མཛད་ཟེར་བ་འདི་རྣམས་དོ་ཤྲཱད་དྷའི་གསང་མཚན་ཡིན་པས་དེས་མཛད་ཟེར་བ་དང༌། ཁ་ཅིག་ཟངས་དཀར་གྱི་གསང་མཚན་ལ་དེ་སྐད་ཟེར་བས་
དེས་བྱས་ཞེས་པ་དང༌། ལ་ལ་རྩ་རྒྱུད་ཀྱི་འགྲེལ་པ་རྩོམ་མཁན་གྱི་དཔའ་བོ་རྡོ་རྗེ་ལ་ཁ་གཡར་བྱས་ཟེར་བར་སྣང་ལ། སྒྲུབ་ཐབས་ཀྱི་འགྲེལ་པ་ནི་ཁ་གཡར་བྱས་པ་ཞིག་ཏུ་འདུག་གོ། དེ་ལ་སྔོན་གྱི་ལོ་ཙཱ་བ་མར་དོ་དང་། པུ་རངས་པ་སོགས་ཀྱི་ལུགས་
ཀྱི་ལཱུ་ཨི་པའི་སྒྲུབ་ཐབས་ནི་པྲཛྙཱ་ར་ཀྵི་ཏ་དང་མཐུན་ཤས་ཆེ་བས་ལྭ་བ་པའི་འགྲེལ་པ་དང་མཐུན་ཤས་ཆེའོ། །ཕྱིས་ཀྱི་མཁས་པ་བུ་སྟོན་ཐམས་ཅད་མཁྱེན་པ་ཡང་པྲཛྙཱ་ར་ཀྵི་ཏ་དང་དེ་བཞིན་གཤེགས་པའི་རྡོ་རྗེའི་ལུགས་གཞིར་འཇོག་པར་
སྣང་བ་ནི་སྲོལ་ཁྱད་པར་དུ་འཕགས་པར་གོའོ། །ལཱུ་ཨི་པའི་དངོས་སློབ་གྲུབ་ཆེན་དཱ་རི་ཀ་པས་རྗེས་སུ་བཟུང་བའི་རྡོ་རྗེ་དྲིལ་བུ་པ་ཞེས་གྲགས་པ། ཕྱག་རྒྱ་ཆེན་པོ་གྲུབ་པ་དེས་ནི་རྒྱུད་སྣོད་རུང་དུ་བྱེད་པ་ལུས་དཀྱིལ་གྱི་དབང་ཆོག་དང༌། རྒྱུད་སྨིན་བྱེད་ལ་
ཕྱི་དཀྱིལ་ལ་ལྷ་ལྔའི་སྒྲུབ་ཐབས་དང༌། ནང་ལུས་དཀྱིལ་སྒོམ་པ་ལ་གཙོ་བོར་བསྐྱེད་རིམ་དང༌། མཇུག་ཏུ་རྫོགས་རིམ་བསྡུས་པ་ཞིག་ཀྱང་སྟོན་པའི་གཞུང་གཅིག་དང༌། ལུས་དཀྱིལ་གྱི་སྒྲུབ་ཐབས་ཆུང་བ་ཞིག་ཀྱང་ཡོད་དེ། དྲིལ་བུ་པའི་གཞུང་ཆུང་ཞེས་
གྲགས་སོ། །རྡོ་རྗེ་ཕག་མོའི་སྒྲུབ་ཐབས་ཤིག་ཀྱང་མཛད་དེ། མར་དོའི་འགྱུར་ལས་སྐུ་མདོག་ལ་གསལ་ཁ་མེད། འགྱུར་གཞན་ལས་ཕག་མོ་དཀར་མོར་བཤད་དེ། བསྐྱེད་རིམ་གྱི་སྒྲུབ་ཐབས་བཞིའོ། །བདེ་མཆོག་ཞལ་གཅིག་ཕྱག་གཉིས་པ་ཡབ་
9-5-16b


ཡུམ་ལྷན་སྐྱེས་ཀྱི་སྒྲུབ་ཐབས་ཤིག་མཛད་དོ། །འདི་ནི་གཞུང་དེར་ལྷ་སྐྱེད་པའི་རྣལ་འབྱོར་གསུམ་གསུངས་པའི་གཟུགས་རྫོགས་པའི་རྣལ་འབྱོར་ཡིན་ལ། དེ་ནི་རྫོགས་རིམ་པའི་ཡེ་ཤེས་ཀྱི་སྐུ་སྐྱེད་པ་ཡིན་པར་སྒྲོན་གསལ་ལས་ཤེས་ཤིང༌། 
སྒྱུ་འཕྲུལ་དྲ་བའི་རྒྱུད་ཀྱི་དོན་ཀྱང་བསྐྱེད་རིམ་རྣམས་བྱིན་གྱིས་བརླབས་པ་དང༌། ཡོངས་སུ་བརྟགས་པའི་རྣལ་འབྱོར་གྱིས་བསྟན་པ་ཡིན་པའི་ཕྱིར་དང༌། གཞུང་ཉིད་ལས་ཀྱང༌། དབུགས་ཀྱི་རླུང་ནི་མེ་ལོང་ལ། ཞེས་པའི་ཚིགས་བཅད་གཅིག །གསང་
འདུས་རིམ་ལྔ་ཇི་བཞིན་དུ་བཀོད་ནས་འོད་གསལ་དུ་འཇུག་པ་དང༌། བསམ་གྱིས་མི་ཁྱབ་གཟུགས་རྫོགས་པའོ། །ཞེས་གསུངས་པས་བདེ་མཆོག་རིམ་ལྔའི་རིམ་པ་ལྔ་པ་བསམ་མི་ཁྱབ་ཀྱི་རིམ་པར་འོད་རྒྱུ་ཡིན་པས་རྫོགས་རིམ་ཡིན་གྱི་བསྐྱེད་རིམ་
མིན་ནོ། །ལྷན་སྐྱེས་འདི་ལ་འགྱུར་ཆེར་མི་མཐུན་པ་གཉིས་ཡོད་ཅིང༌། འགྱུར་ལ་ཡོད་པ་གཉིས་ལའང་བཟང་ངན་ཅི་རིགས་པ་ཡོད་ཀྱང་གཞུང་ཆུང་བ་དེ་དག་པར་མངོན་ནོ། །བདེ་མཆོག་རིམ་ལྔའི་རྫོགས་རིམ་ཡང་མཛད་དེ། །འདི་ལ་རྔོག་འགྱུར་དང༌། 
འགོས་ཀྱི་འགྱུར་གཉིས་ལ་མང་ཉུང་ཆེན་པོ་སྣང་ངོ༌། །འདིའི་རང་འགྲེལ་ཡིན་ཟེར་བ་ཞིག་སྣང་བ་ལ་ཕྱིས་ཀྱི་བླ་མ་ཁ་ཅིག་དེ་ཡི་རང་འགྲེལ་དུ་བྱེད་པ་ནི་མ་བརྟགས་པ་ཆེན་པོ་སྟེ། དེར་རིམ་ལྔ་རེ་རེ་ལ་སྔོན་དུ་བསྐྱེད་རིམ་རེ་སྒོམ་པར་བཤད་པ་ནི། ལྷར་
སྒོམ་པ་ཐམས་ཅད་བསྐྱེད་རིམ་དུ་བཟུང་ནས་བསྐྱེད་རིམ་པའི་ལྷ་སྐུ་སྔགས་དང༌། རྫོགས་རིམ་དངོས་ཀྱི་ལྷ་སྐུ་ཡེ་ཤེས་ཀྱི་སྐུར་བྱེད་པའི་ཁྱད་པར་མ་ཕྱེད་འདུག་ཅིང༌། སྣ་ཚོགས་རྡོ་རྗེའི་གཞིར་གནས་པའི་རྡོ་རྗེ་དང༌། ཞེས་པའི་ཤློ་ཀའི་དོན་རང་བདེ་
9-5-17a


མཆོག་ཏུ་སྒོམ་པའི་བསྐྱེད་རིམ་ལ་བཤདཔའི་ཕྱིར་དང༌། བསམ་མི་ཁྱབ་ཀྱི་རིམ་པར་བསྐྱེད་རིམ་གྱི་ལྷ་སྐུ་སྔར་བཤད་པ་བཞིན་སྒོམ་པར་བཤད་ཅིང༌། སྔར་ནི་ཧཱུཾ་ཡིག་དང་ཐིག་ལེ་ལས་སྐྱེད་པར་བཤད་པ་ནི། ལྷན་སྐྱེས་
ཀྱི་སྒྲུབ་ཐབས་སུ་བསམ་མི་ཁྱབ་ཀྱི་རིམ་པའི་ལྷའི་གཟུགས་རྫོགས་པར་བྱེད་པ་ལ་ས་བོན་མེད་པར་སྒོམ་པར་གསུངས་པ་དང་འགལ་བའི་ཕྱིར་རོ། །ཡང་དེར་སོ་ཐར་གྱི་སྡོམ་ལྡན་གྱིས་བྱང་ཆུབ་ཏུ་སེམས་བསྐྱེད་པ་ན་སྡོམ་པ་དེ་བྱང་སེམས་
ཀྱི་ཚུལ་ཁྲིམས་སུ་གནས་གྱུར་ཏེ་གནས་པ་དང༌། སྔགས་ཀྱི་དམ་ཚིག་ཉམས་ན་སྡོམ་པ་གསུམ་ག་འཇིག་ཅེས་འདོད་པ་ཡང་མི་འཐད་དེ། སྡོམ་པ་ཕྱི་མ་བླངས་པའི་ཚེ་སྔ་མ་གནས་གྱུར་དགོས་ན་སྡོམ་པ་གསུམ་ཅིག་ཅར་དུ་ལྡན་པ་མི་
སྲིད་པ་དང༌། སྔགས་སྡོམ་བླངས་པ་དེའི་རྟེན་ལ་སྡོམ་པ་གཞན་གཉིས་གནས་གྱུར་པས་ན། སྔགས་ཀྱི་རྩ་ལྟུང་གཞན་གཉིས་ཀྱི་འཇིག་རྒྱུར་འདོད་པ་རང་གི་ཁས་བླངས་དང་འགལ་ཞིང༌། སྡོམ་པ་རྣམས་ཀྱི་ཐོབ་གཏོང་གི་རྒྱུ་སོ་སོ་བ་ཡིན་པའི་
ཕྱིར་རོ། །དེས་ན་དཔེ་ཁ་ཅིག་ལས། འདི་དོན་ཡོད་རྡོ་རྗེ་ཞེས་པ་ཞིག་གིས་བྱས་ཞེས་འབྱུང་བ་དག་གོ། དྲིལ་བུ་ཞབས་ལ་ཁ་གཡར་བྱས་པ་གཞན་ཡང་སྣང་ངོ༌། །བདེ་མཆོག་རིམ་ལྔའི་འགྲེལ་པ་སློབ་མ་ལ་ཕན་པ་ཞེས་པ་ཀུན་མཱ་ར་བོ་དྷིས་བྱས་པ་ནི། སྔར་
བཤད་པའི་ལཱུ་ཨི་པའི་འགྲེལ་པ་རྩོམ་མཁན་དེ་དང་གཅིག་ལ་ནུས་པ་ཆེ་རྒྱུ་མེད་དོ། །དྲིལ་བུ་ཞབས་ཀྱིས་རྗེས་སུ་གཟུང་བའི་རུས་སྦལ་ཞབས་དང༌། ལྭ་བ་པ་གཉིས་ཀའི་སློབ་མ་ཛཱ་ལ་ནྡྷ་རི་པའི་དངོས་སློབ་ནག་པོ་སྤྱོད་པ་ལ་ནི། ཧེ་རུ་ཀས་དངོས་སུ་ཚེ་འདིར་
9-5-17b


མཆོག་མིན་གཞན་དོན་གཞུང་དྲུག་རྩོམས་ཤིག་བར་དོར་སངས་རྒྱས་འགྲུབ། ཅེས་ལུང་བསྟན་པར་གོང་མ་རྣམས་ལ་གྲགས་པའི་གཞུང་ལྔ་ནི་དཀྱིལ་འཁོར་གྱི་ཆོ་ག་དང༌། གཙོ་བོར་བསྐྱེད་རིམ་དང་ཞར་ལ་གཏུམ་མོ་འཁོར་ལོ་བཞི་ལ་བརྟེན་པ་སྒོམ་
པའི་རྫོགས་རིམ་ཡང་སྟོན་པའི་སྒྲུབ་ཐབས་དང༌། རྫོགས་རིམ་ལ་གསང་བའི་དེ་ཉིད་གསལ་བ་དང༌། དཔྱིད་ཀྱི་ཐིག་ལེ་དང་རིམ་པ་བཞི་པ་སྟེ་གསུམ་མོ། །མལ་གྱོ་ནས་བརྒྱུད་པ་རྣམས་སྦྱིན་སྲེག་བསྣན་ནས་གཞུང་དྲུག་ཏུ་བྱེད་ལ། མར་དོས་མཛད་
པའི་སྦྱིན་སྲེག་ལས། སྡོམ་པའི་སྦྱིན་སྲེག་ཆོ་ག་ནི། །སྤྱོད་པ་པ་ཡིས་མཛད་ཅེས་གྲག །དེ་ཡིས་ངེས་པར་མ་མཛད་པར། །ཆོ་ག་དེ་ཉིད་ཀྱིས་རབ་བསྟན། །འཇིག་རྟེན་སོང་བའི་རྗེས་འཇུག་ཅིང༌། །བློ་ཡིས་ངེས་པར་མ་དཔྱད་པར། །བ་ལང་ཁྱུ་བཞིན་འཇུག་
པར་སྣང༌། །དེ་ལྟར་མཁས་པ་འཇུག་པ་མིན། །ཞེས་འབྱུང་ལ། སྦྱིན་སྲེག་གི་གཞུང་དེ་ལ་གཟེ་བ་དོན་གྲུབ་ཡེ་ཤེས་ཀྱི་མཚན་ཡང་ཡོད་པས་གཞུང་དེ་མར་དོས་མཛད་པ་ཡིན་ལ། མར་དོ་ནི་ཕྱོགས་འདི་ལ་རྒྱུས་ཆེ་ཞིང་མཁས་པར་སྣང་བ་དང༌། ནག་
པོ་པས་མཛད་ལ་སྤྱོད་པ་པས་མ་མཛད་པ་ཡང་མང་བས་དཔྱད་པར་བྱའོ། །ཡི་གེ་བདུན་པའི་སྒྲུབ་ཐབས་ནག་པོ་པས་མཛད་པ་ནི་ལོ་ཙཱ་བ་སྔ་མ་ཁ་ཅིག །སྤྱོད་པ་པས་མཛད་པར་བཞེད་པ་ནི་དེ་ལྟར་ཡིན་ནམ་སེམས་སོ། །ཕྱིས་ཀྱི་མཁས་པ་དག །ཁ་ཅིག །
དཔྱིད་ཀྱི་ཐིག་ལེ་རྩ་ཡི་སྡོམ། །གསང་བའི་དེ་ཉིད་ཚིག་གི་སྡོམ། །ཨོ་ལ་པ་ཏི་མངོན་རྟོགས་སྡོམ། །སྙིང་པོ་རྫོགས་པ་དོན་གྱི་སྡོམ། །སྡོམ་པ་བཤད་པ་རྣལ་འབྱོར་སྡོམ། །ཕྱག་ཆེན་ཐིག་ལེ་ཕྱག་ཆེན་སྡོམ། སྟེ་སྡོམ་དྲུག་ཏུ་བྱས་ནས་གཞུང་དགུ་རུ་
9-5-18a


བཞེད་དེ། སྡོམ་པ་བཤད་པ་སོགས་ནག་པོ་སྤྱོད་པས་མཛད་པ་མ་ཡིན་གྱི། པཎྜི་ཏ་ཀྲྀཥྞ་པས་བྱས་པ་ཡིན་པས་ནག་པོ་པའི་མིང་དོན་མི་འདྲ་གསུང་ངོ༌། དེ་ལྟར་བྱས་པས་སྡོམ་གྱི་མིང་ཡང་ལེགས་བར་མི་སྣང་ལ། ཁྱད་པར་དུ་སྡོམ་
པ་བཤད་པར། བརྟུལ་ཞུགས་ཞལ་སྔ་ནས་ཀྱི་གཞུང༌། །ཕྱག་གཉིས་དང་ནི་ཞལ་གཅིག་མ། ཞེས་གསུངས་པས་གཞུང་དེའི་མཛད་བྱང་ལ་སྦྱོད་པ་པས་མཛད་པར་བྱས་ཀྱང་དེས་མཛད་པ་མིན་ནོ། །དེ་ལ་དཔྱིད་ཀྱི་ཐིག་ལེ་ལྭ་ནི་རྒྱ་འགྲེལ་ཞིག་སྔོན་
བྱུང་འདུག་ནའང་ད་ལྟ་མ་རྙེད་པས་བཙལ་བར་བྱ། རིམ་པ་བཞི་པ་ལ་ཤྲཱི་དྷ་རས་བྱས་པའི་འགྲེལ་པ་ཡོད་ལ། དེ་ནི་སྔོན་གྱི་དུས་སུ་བོད་དུ་བྱོན་པ་དེ་ཡིན་གྱི། །གྲུབ་ཐོབ་དཔལ་འཛིན་ནི་མིན་ནོ། །དེ་ལྟར་ན་རི་ཁྲོད་དབང་ཕྱུག་གིས་བདེ་མཆོག་ལ་
གཞུང་ཁ་ཡར་མཛད་ཀྱང་རིམ་གཉིས་མི་རྒྱས་ཤིང༌། གཞན་ཕལ་མོ་ཆེ་ནི་འདི་གསུམ་ལ་ཚད་མར་འཛིན་པར་སྣང་ཡང་འདི་དག་གི་ལུགས་ལ་སྔར་སྨྲོས་པ་རྣམས་མ་གཏོགས་པ་གསལ་ཁ་བཏོད་ནས་རྒྱས་པར་བཤད་པ་ནི་མི་སྣང་ངོ༌། །རྩ་རྒྱུད་
ཀྱི་འགྲེལ་པ་རྣམས་ནས་ཀྱང་ལུགས་འདིའི་གདམས་ངག་གིས་གསལ་ཁ་བཏོན་ནས་རྒྱས་པར་འཆད་པ་མ་བྱས་པར་སྣང་སྟེ། ཕལ་ཆེར་གདམས་ངག་ལོགས་སུ་བྱེད་པར་མངོན་ནོ། ནཱ་རོ་པ་ནས་ཕམ་མཐིང་པ་ལ་བརྒྱུད་དེ་རྩ་བཤད་ཀྱི་རྒྱུད་
འཆད་པའི་བོད་ཀྱི་བཤད་སྲོལ་རྣམས་ལ་ད་ལྟ་འགྱུར་བའི་རྩ་རྒྱུད་ཀྱི་འགྲེལ་བ་འདི་ཡི་སྟེང་ནས། འཆད་ཟེར་རྒྱུ་མི་སྣང་ནའང་སྒྲུབ་ཐབས་ཀྱི་འགྲེལ་པ་ལྭ་པ་པས་མཛད་པའི་བཤད་སྲོལ་ལ་བརྟེན་ཞིང༌། ལོ་དྲིལ་ནག་གསུམ་གྱི་མན་ངག་ལ་བརྟེན་
9-5-18b


ནས་འཆད་པར་སྣང་བ་ནི། བདེ་མཆོག་གི་བཤད་པའི་སྲོལ་མཆོག་ཏུ་གྱུར་པར་སྣང་ངོ༌། །འདི་ལ་ཡང་བསྐྱེད་རིམ་འཆད་པའི་སྐབས་སུ་ལོ་ནག་གི་ལུགས་གཉིས་མང་དུ་འོང་ལ། རྫོགས་རིམ་གྱི་སྐབས་སུ་རིམ་པ་བཞི་པའི་མན་ངག་ཅུང་མང་ཞིང༌། 
ལཱུ་ཨི་པའི་རྫོགས་རིམ་ཡང་ལན་རེ་ཟུང་ཙམ་ལས་མི་འབྱུང་ལ། དྲིལ་བུ་པའི་མན་ངག་གིས་རྩ་རྒྱུད་འཆད་ཚུལ་མ་བྱུང་ཞིང༌། རྩ་རྒྱུད་ཀྱི་རྫོགས་རིམ་འཆད་ཚུལ་ཆ་ཤིན་ཏུ་ཆུང་བ་ཞིག་ལས་མི་སྣང་ཡང༌། སྔར་བཤད་པ་དང་འཆད་འགྱུར་གྱི་
གྲུབ་ཆེན་གསུམ་གྱི་མན་ངག་གིས་རྒྱུད་དོན་གྱི་གནད་ཆེ་བ་ཀུན་རྫོགས་པར་བཤད་པ་ཞིག །བླ་མ་གོང་མ་རྣམས་ཀྱི་བཤད་སྲོལ་ལ་གཞི་བྱས་གྲུབ་ཆེན་གསུམ་གྱི་གཞུང་དང༌། དེ་དང་མཐུན་པར་བཀྲལ་བའི་རྒྱ་གཞུང་ལ་ཞིབ་ཏུ་དཔྱད་ཏེ། རྩ་བཤད་ལེགས་
པར་འབྱོར་བ་ངེས་པར་དགོས་པར་རྣམ་དཔྱོད་ཅན་དོན་གཉེར་ཆེ་བ་རྣམས་ཀྱིས་ཤེས་པར་གྱིས་ཤིག །བདེ་མཆོག་སྟོད་འགྲེལ་གྱིས་ལེགས་པར་བཀྲལ་བའ་ལམ་སྲོལ་ཆེན་པོ་ཞིག་ཀྱང་ཡོད་པ་ནི། རྫོགས་རིམ་གྱི་གནད་རྣམས་རྒྱུད་དེ་ནས་ཇི་ལྟར་
བསྟན་པའི་འཆད་ཚུལ་མ་གཏོགས་པ་རྫོགས་རིམ་གྱི་ངོ་བོ་ནི་དུས་ཀྱི་འཁོར་ལོ་ནས་བཤད་པའི་ཡན་ལག་དྲུག་ཉིད་དུ་ཟད་པས་དེ་རྟོགས་པ་ཉིད་ཀྱིས་དེ་དག་ཀྱང་རྟོགས་པར་འགྱུར་བ་སྟེ། ལུགས་གཉིས་ཀའང་མ་འདྲེས་པར་ལེགས་པར་ཤེས་པར་
བྱ་ལ། འདིར་དེའི་བཤད་པ་ཆེར་མ་བྲིས་པ་ནི་དེ་ནི་ཕྱོགས་གཞན་དུ་རྟོགས་པར་བྱ་བ་ལ་བསམས་སོ། །གཉིས་པ་སྒྲུབ་ཐབས་ཀྱི་གཞུང་དངོས་བཤད་པ་ལ་གསུམ། མཚན་གྱི་དོན། གཞུང་གི་དོན། མཇུག་གི་དོན་ནོ། །དང་པོ་ལ་གཉིས་ལས་
9-5-19a


མཚན་བསྒྱུར་བ་ནི། རྒྱ་གར་གྱི་ཡུལ་ན་སྐད་རིགས་མང་དུ་ཡོད་པ་ལས་ལེགས་པར་སྦྱར་བའི་སྐད་དུ་ནི། སྒྲུབ་ཐབས་འདིའི་མཚན་ནི་ཤྲཱི་ཙ་ཀྲ་སོགས་སོ། །དེ་བོད་ཀྱི་སྐད་དུ་བསྒྱུར་ན། བྷ་ག་བ་ཏེ་ནི་བཅོམ་ལྡན་འདས་སོ། །
ཤྲཱི་ཙ་ཀྲ་སཾ་བ་ར་ནི་དཔལ་འཁོར་ལོ་བདེ་མཆོག་གོ། ཨ་བྷི་ས་མ་ཡ་ནི་མངོན་པར་རྟོགས་པའོ། །མཚན་བཤད་པ་ནི། བྷ་ག་ནི་སྐལ་བ་དང༌། བ་ཏེ་ནི་ལྡན་པ་ཡིན་པས་དབང་ཕྱུག་སོགས་ཀྱི་སྐལ་བ་དྲུག་དང་ལྡན་པའོ། །དེ་ལ་དབང་ཕྱུག་ཕུན་ཚོགས་ནི་
སྒྲིབ་གཉིས་བག་ཆགས་དང་བཅས་པ་སྦངས་ཤིང་གཞན་དབང་དུ་མ་གྱུར་བའོ། །གཟུགས་བཟང་ནི་གོང་ན་མེད་པའི་མཚན་དཔེའོ། །གྲགས་པ་ནི་ཕྱོགས་དུས་ཀུན་ཏུ་སྙན་པས་ཁྱབ་པའོ། །དཔལ་ནི་འཇིག་རྟེན་དང་འཇིག་རྟེན་ལས་འདས་པའི་
ཕུན་ཚོགས་འདོད་པ་ཐམས་ཅད་ཀྱིས་བསྟེན་པར་བྱ་བའོ། །ཡེ་ཤེས་ནི་ཤེས་བྱ་ཐམས་ཅད་ལ་ཆགས་ཐོགས་མེད་པར་འཇུག་པའོ། །བརྩོན་འགྲུས་ནི་ལྷུན་གྱིས་གྲུབ་པ་དང་རྒྱུན་མི་འཆད་པར་གསུང་གིས་འདོམས་པའོ། །ཕུན་ཚོགས་ནི་གཟུགས་
བཟང་སོགས་ལྔ་ལའང་སྦྱར་རོ། །ཡང་བྷ་གྣ་ཞེས་པ་བཅོམ་པ་ལ་ཡང་འཇུག་པས་བདུད་བཞི་དང་སྒྲིབ་གཉིས་ཀྱི་མི་མཐུན་ཕྱོགས་བཅོམ་པ་དང་ལྡན་པས་བཅོམ་ལྡན་ནོ། །སྐལ་ལྡན་དང་བཅོམ་ལྡན་ནི་འཇིག་རྟེན་པའི་ལྷ་ཆེན་པོ་རྣམས་ལའང་འཇུག་པས་
དེ་རྣམས་ལས་ཁྱད་པར་དུ་འཕགས་པར་བསྟན་པའི་ཕྱིར་འདས་ཞེས་བོད་ཀྱི་ལོ་ཙཱ་བ་མཁས་པ་རྣམས་ཀྱིས་བསྣན་བའོ། །དཔལ་ནི་ཚོགས་གཉིས་སམ་གཉིས་སུ་མེད་པའི་ཡེ་ཤེས་ལ་སོགས་པའོ། །སཾ་བར་ནི་བདེ་མཆོག་དང་སྡོམ་པ་གཉིས་
9-5-19b


ཀ་ལ་འཇུག་པས་འགྱུར་ཡང་གཉིས་ཀ་ཡོད་དོ། །སྔ་མ་ལྟར་སཾ་མམ་ཤཾ་ནི་བདེ་བ་དང༌། བར་མཆོག་ཏུ་གསུངས་པ་ལྟར་ཡིན་ལ། དེ་ཡང་སྡོམ་འབྱུང་ལས། བདེ་མཆོག་སངས་རྒྱས་ཐམས་ཅད་ཀྱི། །ཨེ་པཾ་ཡི་གེ་ལ་རབ་གནས། ཞེས་
གསུངས་པ་ལྟར་ཨེ་ས་མཚོན་པའི་དོན་རྣམ་ཐར་གསུམ་གྱི་སྟོང་ཉིད་དང༌། བཾ་གྱིས་མཚོན་པའི་དོན་ལྷན་སྐྱེས་ཀྱི་བདེ་བ་ཆེན་པོ་གཉིས་ཡུལ་དང་ཡུལ་ཅན་དུ་དབྱེར་མེད་པར་སྦྱར་བ་སྟེ། དེ་ཉིད་ཀྱིས་ན་ཐེག་པ་དང་རྒྱུད་སྡེ་གཞན་གྱི་ཚུལ་ལས་
མཆོག་གོ། ཡང་ཧེ་རུ་ཀ་ཞལ་བཞི་ཕྱག་བཅུ་གཉིས་པ་སོགས་རྣམ་པ་ཅན་ལ་ཡང་བདེ་མཆོག་ཅེས་བྱ་སྟེ། དེ་གཉིས་ཀ་ལ་ལམ་དང་འབྲས་བུའི་དུས་ཀྱི་བདེ་མཆོག་གཉིས་གཉིས་སུ་ཡོད་ཅིང༌། འཁོར་ལོ་ནི་དེ་དག་གི་ཚོགས་སོ། །ཕྱི་མ་ལྟར་
ན་སྡོམ་འབྱུང་ལས། སྐུ་གསུང་ཐུགས་ཀྱི་ཡང་དག་ལས། །རྣམ་པ་ཐམས་ཅད་གཅིག་སྡོམ་པ། །སྡོམ་པ་བདེ་མཆོག་བྱང་ཆུབ་སྟེ། །བརྗོད་པར་བྱ་མིན་བསྟན་དུ་མེད། །གསང་བ་སངས་རྒྱས་ཐམས་ཅད་ཀྱི། །འདུས་པ་སྡོམ་པ་དག་གི་མཆོག །
ཅེས་གསུངས་ཏེ། སྡོམ་པ་ནི་འདུས་པ་མཆོག་གོ། སྡོམ་རྒྱུ་ནི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་གསང་བ་གསུམ་གྱི་ལས་སོ། །དེ་ཉིད་ནི་སྐུ་གསུང་ཐུགས་ཀྱི་འཁོར་ལོ་ཡང་ཡིན་ནོ། །སྡོམ་ཚུལ་ནི་སྡོམ་རྒྱུ་དེ་ཐམས་ཅད་དབྱེར་མི་ཕྱེད་
པར་གཅིག་ཏུ་སྡོམ་པ་སྟེ། བདེ་སྟོང་གཅིག་ཏུ་སྡོམ་པ་དང༌། སྐུ་གསུང་ཐུགས་གསུམ་ལྷན་སྐྱེས་ཀྱི་ཧེ་རུ་ཀ་གཅིག་གི་ངོ་བོར་སྡོམ་པའོ། །དེ་ལྟར་ན་སཾ་བ་རའི་དོན་ནི་གཉིས་ཀའི་སྟེང་ནས་ཤེས་དགོས་སོ། །མངོན་པར་ནི་འབྲས་བུའི་བདེ་མཆོག་ལ་
9-5-20a


མངོན་དུ་ཕྱོགས་ཏེ་འགྲོ་བའི་ལམ་མོ། །རྟོགས་པ་ནི་ཡུལ་ཁོང་དུ་ཆུད་པའི་དོན་མིན་གྱི། སྔར་བཤད་པའི་བདེ་མཆོག་གཉིས་ཡན་ལག་དང་བཅས་པའི་དོན་རྒྱུད་ལ་སྐྱེ་བའི་རིམ་པ། ལུང་དང་རྟོགས་པ་ཞེས་གཉིས་
སུ་གྲགས་པའི་རྟོགས་པའི་ཡོན་ཏན་ནོ། །མངོན་རྟོགས་ཀྱི་གཞུང་ལ་ནི་དེ་གཉིས་བརྗོད་བྱའི་སྒོ་ནས་བཏགས་སོ། །ལོ་ཙཱ་བའི་ཕྱག་འཚལ་བའི་དོན་ནི་རྟོགས་པར་སླའོ། །གཉིས་པ་ལ་གཉིས། གཞུང་ནས་དངོས་སུ་འབྱུང་བ་དང༌། མ་ཚང་བ་ཁ་
སྐོང་བའི་ཡན་ལག་གོ། །དང་པོ་ལ་གསུམ། བསྐྱེད་པའི་རིམ་པ་དང༌། རྫོགས་པའི་རིམ་པ་དང༌། མཐོང་ཆོས་ཀྱི་ཕན་ཡོན་ནོ། །དང་པོ་ལ་གསུམ། གང་གིས་སྒོམ་པའི་རྟེན་དང༌། གང་དུ་བསྒོམ་པའི་གནས་དང༌། ཇི་ལྟར་དུ་བསྒོམ་པའི་ཚུལ་ལོ། །དང་
པོ་ནི། སྔགས་དང་ཕ་རོལ་ཏུ་ཕྱིན་པ་ཐུན་མོང་བའི་ལམ་གྱི་རིམ་པ་ལ་སྔོན་དུ་བློ་སྦྱངས་པ་ཞིག་དགོས་ཏེ། སྡོམ་འབྱུང་ལས། བརྟན་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ཞིང་གཡོ་སྒྱུ་མེད། །མི་དགེ་བཅུ་ནི་ཡོངས་སུ་སྤངས། །སེམས་ཅན་
རྣམས་ལ་བྱམས་པ་ལྟ། །འབར་བའི་མེ་དང་དུག་བཞིན་དུ། །གཞན་གྱི་ནོར་ལ་མི་རེག་ཅིང༌། །རྟག་པར་རྒྱུན་དུ་བླ་མ་མཆོད། །དམ་ཆོས་ལྟ་བར་སྤྲོ་བ་དང༌། །རྟག་ཏུ་སྦྱིན་པ་ལ་སོགས་དགའ། །འཇིག་རྟེན་ཕ་རོལ་མངོན་པར་འདོད། །དེ་དག་
སློབ་མར་རབ་བསྔགས་ཏེ། །དཀྱིལ་འཁོར་དགེ་བ་བསྟན་པར་བྱ། །ཞེས་ཐོག་མར་དཀྱིལ་འཁོར་དུ་འཇུག་པ་ལ། མི་དགེ་བཅུ་སྤངས་པ་དང༌། རྟག་ཏུ་བླ་མ་ལ་མཆོད་པ་དང༌། སྤྱོད་པ་སྦྱིན་སོགས་ཕྱིན་དྲུག་སྤྱོད་པ་ལ་དགའ་ཞིང༌། བསམ་པ་འཇིག་
9-5-20b


རྟེན་ཕྱི་མའི་དོན། མཆོག་གི་དངོས་གྲུབ་དོན་དུ་གཉེར་བ་ཞིག་དགོས་པར་བཤད་ལ། དེ་ནི་སྔ་རོལ་ཏུ་བློ་མ་སྦྱངས་པ་ལ་རང་འཁྲུངས་སུ་མི་འབྱུང་བའི་ཕྱིར་དང༌། དེ་འདྲ་བ་ལ་བློ་སྦྱོང་བ་ཉིད་ཐེག་ཆེན་གཉིས་ཐུན་མོང་བའི་ལམ་རིམ་ལ་སྦྱོང་བ་ཡིན་པའི་
ཕྱིར་རོ། །དེས་ན་དེ་འདྲ་བ་དེས་མཚན་ཉིད་དང་ལྡན་པའི་རྡོ་རྗེ་སློབ་དཔོན་ལ་འདིའི་དབང་རྫོགས་པར་ཐོབ་ནས་སྔགས་ཀྱི་ལམ་སྒོམ་པ་ལ་སྣོད་རུང་དུ་བྱས་ཤིང༌། དེའི་དུས་སུ་བླ་མས་ཇི་ལྟར་བསྟན་པ་དེ་བཞིན་དུ་དབང་ཐོབ་པའི་འོག་ཏུ་དམ་ཚིག་དང་སྡོམ་
པ་སྲུང་བ་ལ་བརྩོན་པ་ཞིག་གིས་རྩ་བཤད་ལེགས་པར་སྦྱར་བའི་མན་ངག་ཕུན་ཚོགས་ལ་བརྟེན་ནས་བསྒོམས་ན་འགྲུབ་ཀྱི། དེ་ལས་བཟློག་པས་ནི་མི་འགྲུབ་སྟེ། སྡོམ་འབྱུང་ལས། ཇི་ལྟར་ཉེ་བར་བསྟན་པ་བཞིན། །ཕྱི་ནས་དམ་ཚིག་སྤྱོད་པར་
བརྩོན། །སྣོད་དུ་བྱས་པའི་རྒྱུན་ལས་ནི། །འཁོར་ལོ་ལ་སོགས་སྒོམ་རིམ་གྱིས། །ཡང་དག་མན་ངག་ཕུན་ཚོགས་རྣམས། །འགྲུབ་པར་འགྱུར་རོ་གཞན་དུ་མིན། ཞེས་གསུངས་པས་མཚན་ཉིད་དེ་དག་དང་ལྡན་པ་ལ་འབད་པར་བྱའོ། །གཉིས་པ་
ནི། མངོན་བརྗོད་ལས། རི་སུལ་དང་ནི་རི་རྩེ་དང༌། །ཆུ་བོ་ཆེན་པོའི་ངོགས་དག་དང༌། །རྒྱ་མཚོ་ཆེན་པོའི་འགྲམ་དག་དང༌། །ཤིང་གཅིག་དང་ནི་དགེ་བའི་གནས། །མ་མོའི་ཁྱིམ་མམ་དུར་ཁྲོད་དང༌། །སྣ་ཚོགས་དབེན་པའི་ས་ཕྱོགས་སམ། །ལྷ་ཁང་
དམ་ནི་མཆོད་རྟེན་ནམ། །ཁྱིམ་མམ་བཞི་མདོ་དག་ཏུ་ནི། །སྒྲུབ་པ་པོ་ཡིས་སྦྱོར་བསྒྲུབས་ན། །འདོད་པ་ཀུན་གྱི་འབྲས་བུ་སྟེར། ཞེས་གསུངས་པའི་གནས་གང་རུང་ཡིད་དང་མཐུན་པར་བསྒོམ་མོ། །ཡང་དེ་ཉིད་ལས། ཡེ་ཤེས་ལྔ་ཡི་བདུད་
9-5-21a


རྩིས་ནི། །ས་ནི་བྱུག་པ་བྱས་ནས་ཀྱང༌། །བཟོད་པར་བྱས་པའི་མེ་ཏོག་གིས། །འབད་པ་ཡིས་ནི་གཏོར་བར་བྱ། ཞེས་གསུངས་པ་ལྟར་སྒྲུབ་ཁང་དུ་བདུད་རྩི་ལྔས་བྱུགས་པ་དང༌། མེ་ཏོག་གཅལ་དུ་དགྲམ་མོ། །གཞན་ཡང་བཅོམ་
ལྡན་འདས་ཀྱི་སྐུ་གཟུགས་དང་རྡོར་དྲིལ་སོགས་འཚོགས་པར་བྱའོ། །གསུམ་པ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང༌། ཐུན་སྔ་ཕྱིའི་བར་དུ་ཇི་ལྟར་བྱ་བའོ། །དང་པོ་ལ་གསུམ། ཐུན་གྱི་མགོར་ཇི་ལྟར་བྱ་བ་དང༌། ཐུན་གྱི་དངོས་གཞི་ལ་ཇི་
ལྟར་བྱ་བ་དང༌། ཐུན་གྱི་མཇུག་ཏུ་ཇི་ལྟར་བྱ་བའོ། །དང་པོ་ལ་གསུམ། སྔོན་དུ་བྱ་བའི་རིམ་པ་དང༌། རྣལ་འབྱོར་གྱི་ཡན་ལག་རྣམས་རྒྱུད་ནས་གསུངས་ཚུལ་དང༌། གསུངས་པ་དེ་སྒྲུབ་པའི་ཚུལ་ལོ། །དང་པོ་ནི། ལྭ་བ་པའི་འགྲེལ་པ་དང༌། པྲཛྙཱ་
ར་ཀྵི་ཏ་དང༌། དེ་བཞིན་གཤེགས་པའི་རྡོ་རྗེའི་འགྲེལ་པ་ལས། སྐྲ་གྲོལ་ཞིང་ཁ་ལྷོར་བལྟས་ཏེ། རོའི་སྟེང་དུ་འདུག་ནས་བདུད་རྩི་ལྔའི་རིལ་བུ་ཁར་བཅུག་སྟེ་ཁ་དག་པར་བྱེད་པ་བཤད་ལ། འགྲེལ་པ་གསུམ་པ་ཁྱད་པར་གསལ་བྱེད་ལས། སྔོན་
དུ་གཏོར་མའང་བྱ་བར་བཤད་དོ། །དེ་ལ་རོ་གདན་ནི་དངོས་སམ་བསྒོམས་པ་གང་རུང་དང༌། བདུད་རྩི་རིལ་བུ་དངོས་སུ་མེད་ན་ནང་མཆོད་བསྒྲུབས་པ་ལྕེ་ཐོག་ཏུ་འཇོག་པ་དང༌། སྐྲ་ནི་དངོས་སམ་བཅོམ་མ་གང་རུང་ངོ༌། །སྔོན་འགྲོའི་གཏོར་མ་བཏང་
ནས་སྒྲུབ་པའི་བར་ཆད་ཞི་བའི་འཕྲིན་ལས་བཅོལ་བ་ནི། ཐུན་བཞི་ཀའམ་ཐུན་དང་པོའི་མགོར་བྱའོ། །སྐབས་འདིའི་གཏོར་མ་ནི་ཞིང་སྐྱོང་ལ་སྟེར་བར་མཁའ་འགྲོ་རྒྱ་མཚོ་ལས་གསུངས་པས་འཇིག་རྟེན་པའི་གཏོར་མའོ། །ལུས་གནད་
9-5-21b


ནི་བདེ་བའི་སྟན་ལ་རྡོ་རྗེའི་སྐྱིལ་ཀྲུང་གིས་འདུག་ཅིང༌། ལག་པ་གཉིས་མཉམ་གཞག་བྱ་བར་གུར་འགྲེལ་ལས་གསུངས་ལ། མིག་སྣ་རྩེར་དབབ་ཅིང་སོ་ཅུང་ཟད་མ་འབྱར་བར་ལུས་མི་གཡོ་བར་གནས་པར་བྱ་བར་བྲམ་ཟེ་བྲིཾ་ཀ་རས་བཤད་དོ། །དེ་ནས་
མཆོད་པ་བྱིན་གྱིས་བརླབ་པ་ལ། མཆོད་པའི་རྫས་ནི་སྡོམ་འབྱུང་ལས། བསང་གཏོར་ཞབས་བསིལ་མཆོད་ཡོན་དག །ཅེས་དང༌། མེ་ཏོག་བདུག་པ་མར་མེ་དྲི། །དེ་བཞིན་ཞལ་ཟས་དབུལ་བར་བྱ། ཞེས་དང༌། དེར་ཞལ་བསིལ་ཡང་གསུངས་པས་
ཆུ་བཞི་དང༌། ཉེར་སྤྱོད་སོགས་སོ། །བཤམ་པའི་ཚུལ་ནི་མངོན་བརྗོད་ལས། གཡོན་སྐོར་དུ་ནི་བསྐོར་བ་ཡིས། །མཆོད་པ་དགོད་དང༌། ཞེས་གཡོན་སྐོར་དུ་དགོད་པར་གསུངས་པ་ལྟར་རོ། །མཆོད་པ་བསང་བ་ལ། བིར་ཝ་པས། དེ་རྗེས་ཡིག་
གསུམ་སྔགས་ཀྱིས་ནི། །མངོན་པར་བསྔགས་པའི་དམ་ཚིག་ཆུས། །མཆོད་རྫས་དག་ལ་བསང་གཏོར་བྱ། ཞེས་དང༌། བྷུ་བ་བློ་ལྡན་གྱིས། བི་མུ་མར་འདི་ལེགས་བཀང༌། །བགེགས་ཀུན་རྣམ་པར་སེལ་བར་བྱེད། ཅེས་བཤད་པ་ལྟར། 
བདུད་རྩི་ལྔའི་རིལ་བུ་དང་སྦྱར་བའམ་དེ་མེད་ན་ནང་མཆོད་བསྒྲུབས་པའི་རྫས་དང༌། སུམྦྷ་ནི་ལ་སོགས་པའི་སྔགས་སམ་དུ་མ་སྐྱེས་མའི་སྔགས་ཀྱིས་བསང་གཏོར་བྱས་ལ། མ་དག་པ་དང་བགེགས་བསལ་ལོ། །སྦྱང་བ་ནི་སྭ་བྷཱ་བའི་སྔགས་བརྗོད་
ལ། ཐ་མལ་གྱི་སྣང་བ་འོད་གསལ་དུ་སྡུད་པའི་ཚུལ་གྱིས་བྱའོ། །བསྐྱེད་པ་ནི་ཨ་འམ་ཀཾ་ལས་སྣོད་གང་ཡིན་ཐོད་པའི་སྣོད་དང༌། རྫས་རྣམས་ཧཱུཾ་ལས་རང་བཞིན་སྟོང་ཉིད་རྣམ་པ་མཆོད་རྫས་སོ་སོའི་རྣམ་པ་ཅན་བྱེད་ལས་དབང་པོ་དྲུག་གི་སྤྱོད་
9-5-22a


ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་སྐྱེད་པར་བསམ་སྟེ། བརྟག་གཉིས་ལས། སྣ་ཚོགས་ཧཱུཾ་ལས་རྫོགས་པ་དང༌། །མེ་ཏོག་ལ་སོགས་དབུལ་བར་བྱ། ཞེས་གསུངས་ཤིང༌། དེའི་འགྲེལ་པ་པད་མ་ཅན་ལས་ཀྱང༌། སྣ་
ཚོགས་ཧཱུཾ་ལས་སྐྱེས་པ་ཡི། ཞེས་པ་ནི་སོ་སོར་མེ་ཏོག་ལ་སོགས་པ་ཧཱུཾ་ལས་སྐྱེས་པའོ་ཞེས་གསུངས་སོ། །བྱིན་གྱིས་བརླབ་པ་ནི་སོ་སོའི་སྔགས་དང་ཕྱག་རྒྱས་བྱེད་པར་བླ་མ་རྣམས་བཞེད་དོ། །དེ་ནས་ཡི་གེ་བརྒྱ་པའི་བཟླས་པ་ནི་ཐུན་གྱི་མཐར་
གསུངས་པ་མང་ཡང་བླ་མ་རྣམས་སྐབས་འདིར་མཛད་པ་ཡང་མི་འགལ་ལོ། །དེ་ཡང་སྙིང་པོ་རྒྱན་ལས། སངས་རྒྱས་ཀུན་གྱི་སྐུ་གཅིག་པུ། །པད་དཀར་ཟླ་བའི་དབུས་གནས་ཤིང༌། །རྡོ་རྗེ་དྲིལ་བུ་རྒྱན་སྤྲས་པའི། །རྡོ་རྗེ་སེམས་དཔའ་ལེགས་དམིགས་
ཤིང༌། །ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་ནི་རེ་རེ་བཟླས། །ལྟུང་སོགས་བྱིན་གྱིས་བརླབས་གྱུར་པས། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པས། །ཐུན་མཚམས་སུ་ནི་སྤྱད་པར་བྱ། །འབུམ་ཕྲག་ཏུ་ནི་བཟླས་
གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་ཐུན་མཚམས་སུ་རྡོ་རྗེ་སེམས་དཔའ་བསྒོམས་ནས་ཡིག་བརྒྱ་ཉེར་གཅིག་རེ་མ་ཆག་པར་བཟླས་ན་ལྟུང་བ་མི་འཕེལ་བ་དང༌། འབུམ་ཕྲག་གཅིག་བཟླས་ན་ཉེས་པ་རྣམས་འདག་པར་གྲུབ་པ་
མཆོག་བརྙེས་པ་རྣམས་ཀྱིས་གསུངས་པས་དེ་ལྟར་བྱའོ། ཞེས་གསུངས་པ་བཞིན་དུ་དགོས་པ་དེ་གཉིས་ཀྱི་ཕྱིར་དུ་རྡོར་སེམས་ཀྱི་བསྒོམ་བཟླས་བྱའོ། །འདི་ལ་རང་ཉིད་རྡོར་སེམས་སུ་བསྒོམས་ནས་བྱས་པས་ཆོག་མོད་ཀྱང༌། བླ་མ་རྣམས་
9-5-22b


ཀྱི་ཕྱག་བཞེས་ལ་སྤྱི་བོར་བསྒོམས་ནས་མཛད་དོ། །གཉིས་པ་ནི། ཕུང་སོགས་བྱིན་གྱིས་རློབ་པ་ནས་ཚོགས་ཞིང་གི་མཐར་སྟོང་ཉིད་སྒོམ་པའི་བར་འདི་རྣམས་དང༌། གོ་རིམ་ཀྱང་རྒྱུད་གང་ནས་གསུངས་སྙམ་ན། འདི་ལ་ཉུང་ངུའི་རྩ་རྒྱུད་ལས་ནི་གསལ་
བར་མེད་ལ། བཤད་རྒྱུད་མངོན་བརྗོད་ལས། དང་པོར་ཚོགས་ཞིང་སྤྱན་དྲངས་ཏེ། ཚོགས་གསོག་པ་དང༌། དེ་ནས་ས་བོན་བཅུ་བདུན་ལས་ལྷ་བཅུ་བདུན་སྒོམ་པ་དང༌། དེ་ནས་བསྲུང་འཁོར་རྒྱས་པ་བསྒོམས་པའི་མཐར་རྣམ་ཐར་གསུམ་གྱི་སྔགས་དོན་སྒོམ་པ་
བཤད་ལ། སྡོམ་འབྱུང་ལས། དང་པོར་ཧེ་རུ་ཀ་ཕྱག་གཉིས་པ་སྒོམ་པ་དང༌། དེ་ནས་ཕུང་སོགས་ཀྱི་ང་རྒྱལ་དང༌། དེ་ནས་བསྲུང་འཁོར་དང༌། དེ་ནས་ཚོགས་ཞིང་སྤྱན་དྲངས་ཏེ། ཚོགས་བསགས་པའི་མཐར་སྟོན་ཉིད་སྒོམ་པར་བཤད་དེ། ལཱུ་ཨི་པའི་སྒྲུབ་ཐབས་
ནས་འབྱུང་བའི་རིམ་པ་ནི་རྒྱུད་དེའི་ལུགས་སུ་ཤེས་དགོས་པར་སྣང་ངོ༌། །ཕུང་སོགས་བྱིན་གྱིས་རློབ་པ་གཞུང་འདིར་བཀོད་པ་ནི། ཀུན་སྤྱོད་ཀྱི་རྒྱུད་བཞིན་ཡིན་མོད་ཀྱང༌། རྒྱུད་རང་ན་དེ་རྣམས་སྐབས་འདིར་བྱེད་པ་མི་གསལ་བ། གྲུབ་ཆེན་གྱིས་འདིར་བྱེད་
པར་བཤད་པས། རྒྱུད་དེའི་དགོངས་པ་ཡང་དེ་ལྟར་རོ། །གསུམ་པ་ལ་བཞི། སྒོ་གསུམ་དག་པར་བྱས་ནས་ཚད་མེད་པ་སྒོམ་པ་དང༌། ཕུང་ཁམས་སྐྱེ་མཆེད་བྱིན་གྱིས་བརླབ་པ་དང༌། འགལ་རྐྱེན་འགོག་པའི་བསྲུང་འཁོར་སྒོམ་པ་དང༌། མཐུན་རྐྱེན་བསྟེན་
པའི་ཚོགས་བསགས་པའོ། །དང་པོ་ནི། བསྒོམ་པར་བྱའོ་ཞེས་བཤད་གཞིར་དྲང་ངོ༌། །དུས་ནས་གྱི་ཚེ་ན་ཚད་མེད་སོགས་སྒོམ་པའི་དང་པོར་རོ། །གང་སྒོམ་པ་དང༌། གང་གིས་སྒོམ་ན་སྒོ་གསུམ་དག་པར་བྱེད་པའི་རྣལ་འབྱོར་དང་ལྡན་པའི་རྣལ་འབྱོར་
9-5-23a


གྱི་དབང་ཕྱུག་གིས་བསྒོམ་པར་སྟོན་པས། སྔོན་དུ་རྣལ་འབྱོར་གསུམ་བསྒོམས་ནས། དེ་ནས་ལྷག་མ་རྣམས་སྒྲོམ་བ་རེ་ཤིག་ཅེས་རིམ་པ་སྟོན་པའི་དོན་དུ་བྱའོ། །དེ་ལྟར་ན་སྔོན་དུ་རྣལ་འབྱོར་གསུམ་སྒོམ་དགོས་པ་ལ་ཡིད་དག་
པར་བྱེད་ཚུལ་ནི། ཤྲཱི་ཧེ་རུ་ཀ་ཞེས་པའི་ཡི་གེ་བཞིའི་དོན་མངོན་དུ་བྱེད་པ་ཡིན་ལ། དེ་ཡང་ཀུན་སྤྱོད་ལས། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཡིན། །རུ་ན་བཀོད་དང་བྲལ་བ་སྟེ། །ཀ་ནི་གང་དུའང་མི་གནས་པ། ཞེས་གསུངས་པ་ལྟར་ཡིད་
ལ་བྱེད་པའོ། །དེ་ལྟར་གསུངས་པའི་དོན་ལ་འཆད་ཚུལ་མང་དུ་ཡོད་ཀྱང༌། སྒྲུབ་ཐབས་ཀྱི་མགོར་ཡི་གེ་བཞིའི་ཀུ་དོན་ཡིད་ལ་བྱེད་པ་འདི་མཁའ་འགྲོ་རྒྱ་མཚོར་གསུངས་པས་དེ་ལྟར་བྱས་ནས་ལེགས་སོ། །དེར། ཨེ་བཾ་ལ་སོགས་གཉིས་མེད་པའང་། །ཤྲཱི་ཞེས་བྱ་
བའི་ཡིག་དེས་བརྗོད། །ཧེ་ཡིག་སྙིང་ཁ་ནས་ཀུན་ཏུ། །ཧེ་རུ་ཀ་སོགས་རང་འཁོར་འགྲོ། །སྒོམ་པ་ཀུན་གྱི་འབྱུང་གནས་ལས། །འཛིན་པ་ལ་སོགས་རྣམ་སྐྱེད་འགྱུར། །དེ་ནི་རྒྱུ་སྟོང་བདག་ཉིད་དེ། །རྒྱུའི་བདག་ཉིད་དུ་མི་རྟོག་པའོ། །རང་བཞིན་ཆོས་བདག་མེད་
པ་ཉིད། །དེ་ནི་སྟོང་བའི་རྣལ་འབྱོར་གནས། །བཀོད་པ་གང་ཟག་བདག་མེད་པ། །རྟོག་པའི་དྲ་བ་ཆེན་པོ་ནི། །རུ་ཡིག་རྐྱེན་གྱི་བདག་ཉིད་ཅན། །དེ་ནི་བདག་གི་བཀོད་བྲལ་བའོ། །སླར་བརྗོད་ཀ་ནི་མ་ལུས་པའི། །བདག་གིས་གཉིས་བྱར་མེད་ཤེས་གང༌། གང་
ཕྱིར་ཅི་ལའང་མི་གནས་པ། །དེ་ཕྱིར་ཀ་ཞེས་བྱ་བར་བརྗོད། །ཅེས་གསུངས་སོ། །དེའི་དོན་ནི་ཧེ་ཆོས་ཀྱི་བདག་མེད་དང༌། རུས་གང་ཟག་གི་བདག་མེད་དེ། ཡུལ་བདག་མེད་གཉིས་དང༌། ཀས་ཡུལ་ཅན་གྱི་ཡེ་ཤེས་དང༌། ཤྲཱིས་དེ་གཉིས་དབྱེར་མི་
9-5-23b


ཕྱེད་པ་སྟོན་ནོ། །དེ་ལ་ཧེ་རུ་ཀ་ལ་སོགས་པའི་རང་གི་འཁོར་ལོར་འགྲོ་བ་ནི་སྐྱེད་པའོ། །ཧེ་རུ་ཀ་སོགས་སྒོམ་པ་ཀུན་གྱི་འབྱུང་གནས་སུ་གྱུར་པ་ལས་འཛིན་པ་པོ་ལ་སོགས་པའི་དཀྱིལ་འཁོར་སྐྱེད་པ་ནི། རང་གི་སྙིང་ཁ་ན་རྒྱུན་ཏུ་གནས་པའི་སེམས་ཏེ་
ཧེའོ། །རྒྱུ་དེ་རང་གི་ངོ་བོ་ཉིད་ཀྱིས་གྲུབ་པས་སྟོང་པས་རྒྱུའི་ངོ་བོ་དེར་བརྟག་ཏུ་མེད་པ་ནི། རྒྱུ་སྤངས་པའམ་རྒྱུས་སྟོང་བའི་དོན་ནོ། །སོགས་ཀྱི་སྒྲ་འདིར་མ་བྱུང་ཡང་གཞན་ལས་མང་དུ་འབྱུང་བ་ལྟར་ན། རང་གི་ངོ་བོ་དང་འབྲས་བུ་གཉིས་རང་བཞིན་མེད་པ་
ལ་བྱ་བའམ། ཡང་ན་སོགས་ཀྱི་སྐད་དོད་དང་པོ་ལའང་འཇུག་པས། དང་པོར་སྐྱེ་བའི་རྒྱུས་སྟོང་བའོ། །དང་པོ་ལྟར་ན་ཕུང་པོ་དང་སྐྱེ་མཆེད་ཀྱི་ཆོས་ཀུན་ལ་འགྲོ་ལ། ཕྱི་མ་ལྟར་ན་རྩ་ཤེ་ལས། འདུས་བྱས་རབ་ཏུ་མ་གྲུབ་པས། །འདུས་མ་བྱས་ནི་ཇི་ལྟར་
འགྲུབ། །ཅེས་གསུངས་པའི་རིགས་པས་འདུས་བྱས་མ་བྱས་ཀྱི་ཆོས་ཀུན་རང་བཞིན་མེད་པར་འགྲུབ་བོ། །དམིགས་པ་གང་ཟག་ལ་དམིགས་ནས་བདག་ཏུ་འཛིན་པའི་རྣམ་རྟོག་འཁོར་བར་འཆིང་བྱེད་ཀྱི་དྲ་བ་ཆེན་པོས་བདེན་པར་བཀོད་པ་སྟེ་བཏགས་པའི་
བདག་གི་བཀོད་པ་དང་བྲལ་བ་ནི་རུ་ཡིག་གི་དོན་ནོ། །དེ་འདྲ་བའི་ཡུལ་གྱི་གནས་ཚུལ་དང༌། དེ་ཁོ་ན་ཉིད་ཀྱི་འཛིན་སྟངས་གཉིས་མི་མཐུན་པར་བྱར་མེད་པའི་ཤེས་པ་ནི་ཀའི་དོན་ཏེ། གང་གི་ཕྱིར་ན་དེ་ཁཽ་ན་ཉིད་ལ་འཇུག་པའི་བློ་ནི་བདེན་པའི་དམིགས་གཏད་ཅི་
ལ་ཡང་མི་གནས་པ་དེའི་ཕྱིར་རོ། །དེ་ལྟར་ཡུལ་གང་ལ་ཡང་བདེན་པར་གྲུབ་པ་ཅུང་ཟད་ཀྱང་མེད་པ་དེ་བཞིན་དུ་བློས་ཀྱང་བདེན་འཛིན་གྱི་དམིགས་གཏད་སྤངས་པ་གཉིས་ཆུ་ལ་ཆུ་བཞག་པ་བཞིན་དུ་གཉིས་མེད་ཀྱི་ཡེ་ཤེས་སུ་སོང་བ་ནི། ཤྲཱི་ཡིག་གི་དོན་
9-5-24a


ཏེ། དེ་ནི་ཨེ་བཾ་གྱི་དོན་ཐབས་ཤེས་དབྱེར་མེད་དོ། །དེ་འདྲ་བའི་ཚུལ་གྱིས་ཡི་གེ་བཞིའི་དོན་སྒོམ་པ། རང་ལྷར་སྒོམ་པའི་ལུས་ངག་པའི་སྔོན་དུ་གསུངས་པ་ནི། གཞུང་གཞན་ནས་ཤཱུ་ནྱ་ཏཱ་ཛྙཱ་ན་བཛྲའི་སྔགས་དོན་སྒོམ་པར་གསུངས་
པ་དང་དོན་གཅིག་སྟེ། ཧེ་དང་རུའི་དོན་ནི་ཤཱུ་ནྱ་ཏཱའི་དོན་དང༌། ཀའི་དོན་ནི་ཛྙཱ་ནའི་དོན་དང༌། ཤྲཱིའི་དོན་ནི་བཛྲ་སྟེ་རྡོ་རྗེ་ལྟར་མི་ཕྱེད་པའི་དོན་ཡིན་པའི་ཕྱིར་རོ། །དེའི་ཕྱིར་འཁྲུལ་སྤོང་ལས། ཡི་གེ་བཞིའི་དོན་མངོན་དུ་བྱས་ལ། ཅིག་ཅར་དུ་སྟོང་བའི་དང་ལས་ཐ་མལ་
པའི་ང་རྒྱལ་སྤངས་ལ། ཤེས་རབ་མ་དང་བཅས་པའི་སྡོམ་པ་ཕྱག་གཉིས་པའི་ང་རྒྱལ་གྱིས་ཞེས་བཤད་པ་ལྟར་ལེགས་ཀྱི། ཁ་ཅིག་གིས་ལུས་ངག་པ་སྔོན་དུ་བླངས་ནས། ངག་ཡིད་དག་པ་རྗེས་སུ་བྱེད་པ་ནི་དོན་ལེགས་པར་མ་རྟགས་པ་ཡིན་པས། གོ་རིམ་ནི་
འགྲེལ་པ་གསུམ་དང་འཁྲུལ་སྤོང་ལྟར་བྱའོ། །ཡི་གེ་བཞིའི་དོན་ཡིད་ལ་བྱས་པའི་དགོས་པ་ནི། ཡིད་བདག་གཉིས་སུ་འཛིན་པའི་ཀུན་རྟོག་གི་དྲི་མས་དག་པར་བྱ་བའི་དོན་ཏོ། །དེ་ནས་ལུས་དག་བྱེད་ཀྱི་རྣལ་འབྱོར་ནི། སྟོང་བའི་ངང་ནས་རང་ཉིད་ཧེ་རུ་ཀ་སྐུ་མདོག་
སྔོན་པོ་ཞལ་གཅིག་པ། ཕྱག་གཉིས་ཀྱིས་རྡོར་དྲིལ་འཛིན་པ། གཡས་བརྐྱང་གིས་བཞུགས་པར་བསྐྱེད་ལ། སེམས་ཅན་ཐམས་ཅད་ལ་ཕན་བདེའི་སེམས་ཀྱིས་ཤྲཱི་ཧེ་རུ་ཀོ་ཧཾ་ཞེས་ལན་གསུམ་བརྗོད་དོ། །ལྭ་བ་པའི་འགྲེལ་པར་ཡུམ་བཤད། པྲཛྙཱ་རཀྵི་ཏའི་
འགྲེལ་པར་ཡུམ་དང་བཅས་མ་བཅས་གདམ་ང་ཅན་དུ་བཤད་ལ། འཁྲུལ་སྤོང་དང་ཁྱད་པར་གསལ་བྱེད་དུ་ཡུམ་བཅས་སུ་བཤད་དོ། །བོད་ཀྱི་བླ་མ་ཁ་ཅིག་ཡབ་རྐྱང་དུ་བྱེད་མོད་ཀྱང་ལྭ་བ་པའི་བཞེད་པ་ལ། ཡུམ་ཡོད་པས་ཁ་བསྐངས་པ་ཉིད་ལེགས་པར་རྟོགས་
9-5-24b


སོ། །ཡི་གེ་བཞིའི་མཐར་ཨ་ཧཾ་སྦྱར་བ་ནི། སྟོང་པར་ཞུགས་པའི་ལྷན་སྐྱེས་ཀྱི་སེམས་ཡི་གེ་བཞིའི་དོན་དུ་གནས་པ་དེ་ཉིད་ཕྱག་གཉིས་པའི་སྐུར་ཤར་བ་ཡིན་པས། སྔར་གྱི་དེ་ནི་སྟོང་པའི་ཡེ་ཤེས་ཙམ་ཡིན་ལ། འདིར་ནི་ཧེ་རུ་ཀའི་སྐུར་ཤར་བ་དང་གཉིས་ཚོགས་
སོ། །འགྲེལ་པ་གཞན་གཉིས་ལས་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར། ཡི་གེ་བཞི་དང་བཅས་པའི་ང་རྒྱལ་འཛིན་པར་བཤད་པ་ནི། ཁྱད་པར་གསལ་བྱེད་དུ་སེམས་ཅན་ཐམས་ཅད་ལ་ཕན་པའི་སེམས་ཀྱིས་ང་རྒྱལ་ལན་གསུམ་བྱ་བར་
བཤད་པ་ལྟར་བྱས་ན་བདེའོ། །སྔོན་དུ་ཡི་གེ་བཞིའི་དོན་ཡིད་ལ་བྱེད་པ་ལ། འགྲེལ་པ་རྣམས་ནས་ཐོག་མར་ཨོཾ་དང་མཐར་ཨ་ཧཾ་སྦྱར་བ་མེད་དོ། །ལུས་དག་པར་བྱས་པའི་དགོས་པ་ནི། ལུས་ཀྱི་བྱ་བ་ཐམས་ཅད་དག་པར་བྱེད་པར་གསུངས་པ་ནི། ཐ་མལ་པའི་
ལུས་ཀྱི་བྱ་བ་དག་པར་བྱེད་པའོ། །འགྲོ་བ་ཐམས་ཅད་ཀྱང་ཐོག་མ་མེད་པ་ནས་གྲུབ་ཅིང༌། རང་བཞིན་གྱིས་ཡོངས་སུ་དག་པའི་ཧེ་རུ་ཀའི་གཟུགས་སུ་ཡང་མཚོན་པའོ། །ཞེས་གསུངས་པ་ནི་ཁྱད་པར་གསལ་བྱེད་དུ་ཐོག་མེད་ནས་གྲུབ་པའི་ཞེས་འབྱུང་བ་ལྟར་
ཡིན་ལ། གཟུགས་ནི་འགྲེལ་པ་གཞན་གཉིས་སུ་རང་བཞིན་དང༌། ཚུལ་དུ་བསྒྱུར་རོ། །དོན་ནི་ཧེ་རུ་ཀ་དང་སེམས་ཅན་རྣམས་རང་བཞིན་རྣམ་དག་འདྲ་བར་སྟོན་པའོ། །དེ་ནས་ངག་དག་པར་བྱེད་ཚུལ་ནི། མགོར་ཨོཾ་དང་མཐར་ཧཱུཾ་ཧཱུཾ་ཕཊ་དང་ལྡན་པའི་ཨཱ་ལི་
ཀླ་ལིའི་ཕྲིང་བ་འོད་ཟེར་ལྔ་དང་བཅས་པ་ཡོངས་སུ་བསྐོར་ནས་གནས་པ་ལས། འཁོར་ལོ་གསུམ་གྱི་ལྷ་ཚོགས་སྤྲོས་ཏེ། བགེགས་བརླག་པར་བྱ་བར་ལྭ་པ་པའི་འགྲེལ་པར་བཤད། པྲཛྙཱ་རཀྵི་ཏས། འོད་ཟེར་ལྔ་དང་ལྡན་པ་ལན་གསུམ་དུ་བརྗོད་པས་ཡོངས་
9-5-25a


སུ་བསྐོར་ནས་གནས་པ་ལས་སྔ་མ་བཞིན་སྤྲོས་ཏེ། བགེགས་རྣམས་བསྐྲད་པར་བསམ་ཞེས་བཤད་དེ། སྔ་མའི་དཔེ་ཁ་ཅིག་ལས་ཀྱང་དེ་ལྟར་འབྱུང་ངོ༌། །ཁྱད་པར་གསལ་བྱེད་ལས་གཡོན་སྐོར་གྱིས་ལྟེ་བའི་ཕྱོགས་
སུ་ལན་གསུམ་བསྐོར་ནས་གནས་པ་ལས་སྤྲོ་བར་བཤད་པ་ལྟར། བསྐོར་ས་ནི་ལྟེ་བའི་ཕྱོགས་ཡིན་ལ། དེའི་སྒོམ་ཚུལ་ནི་ཚར་གསུམ་བརྗོད་པའི་རེ་རེའི་དུས་སུ་འཁོར་བར་སེམས་པ་ལ་བྱས་ན་སྔ་མ་དང་མཐུན། ལྷ་རྣམས་ཕྱིར་སྤྲོ་བ་ན་སྣ་བུག་གཡས་
པ་ནས་དང༌། མཐར་གཡོན་པ་ནས་ཞུགས་ཏེ་ཐིམ་པར་བསམ་མོ། །ངག་དག་པར་བྱས་པའི་དགོས་པ་ནི། ཐ་མལ་གྱི་ངག་གི་བྱ་བ་ཐམས་ཅད་དག་པར་འགྱུར་པའོ། །འདིར་ལྭ་བ་པས་སྒོ་གསུམ་དག་པའི་རྣལ་འབྱོར་སྔོན་དུ་བྱས་ནས། དེའི་རྗེས་སུ་ཚད་
མེད་སྒོམ་པར་གང་ལས་ཤེས་ཞེས་པའི་ལན་དུ་བླ་མའི་མན་ངག་དང༌། རྣལ་འབྱོར་གྱི་དབང་ཕྱུག་ཅེས་པའི་ཚིག་ལས་ཀྱང་ངོ༌། ཞེས་གསུངས་པའི་དང་པོ་དོན་ནི། ལཱུ་ཨི་པའི་གཞུང་ན་དངོས་སུ་མི་གསལ་ཡང་བླ་མའི་མན་ངག་གིས་སྦྱོར་ཅེས་
པ་ཡིན་ལ། གཉིས་པའི་དོན་ནི་དང་པོར་རེ་ཤིག་རྣལ་འབྱོར་གྱི་དབང་ཕྱུག་གིས་ཞེས་པའི་ཚིག་གིས་ཀྱང་ཅུང་ཟད་ཙམ་ཟིན་ཏེ། དེའི་དོན་ནི་རེ་ཤིག་དང་པོར་སྒོ་གསུམ་དག་བྱེད་ཀྱི་ནལ་འབྱོར་གྱིས་རྣལ་འབྱོར་གྱི་དབང་ཕྱུག་ཏུ་བྱ་ལ། དེ་ནས་ངེས་ཚད་
མེད་བསྒོམ་པར་བྱའོ་ཞེས་པའི་དོན་དུ་ཡང་བཤད་ནུས་པའི་ཕྱིར་རོ་སྙམ་དུ་དགོངས་སོ། །དེ་རྣམས་ཀྱང་ལཱུ་ཨི་པའི་གཞུང་གི་དབང་དུ་མཛད་པ་ཡིན་གྱི་གཞུང་གཞན་ནས་ཤེས་བྱེད་གསལ་བ་མེད་པ་ནི་མིན་ཏེ། ཡིད་དག་པ་སྔོན་དུ་སྒོམ་པ་ནི། མཁའ་
9-5-25b


འགྲོ་རྒྱ་མཚོ་ལས་བཤད་ལ། ལུས་དག་པ་ནི། སྡོམ་འབྱུང་ལས། ཕྱག་གཉིས་ཧེ་རུ་ཀ་སྦྱོར་ལྡན། །ཞེས་མངོན་རྟོགས་སྒོམ་པའི་ཐོག་མར་ཧེ་རུ་ཀ་ཕྱག་གཉིས་པའི་རྣལ་འབྱོར་དང་ལྡན་པར་བྱ་བར་ཤིན་ཏུ་གསལ་བར་གསུངས་ལ། འགྲེལ་པས་ཀྱང་ཕྱག་
གཉིས་པ་ཡུམ་དང་བཅས་པ་སྒོམ་པར་བཤད་དོ། །ངག་དག་པ་ནི་ཀུན་སྤྱོད་ལས། ཨཱ་ལི་ཀཱ་ལི་བཤད་པའི་སྐབས་སུ། རྣལ་འབྱོར་པ་ཡིས་དང་པོར་བརྗོད། །ཧེ་རུ་ཀ་དཔལ་གཉིས་མེད་འགྱུར། ཞེས་གསུངས་པ་ལས་ཤེས་སོ། །ཁ་ཅིག་ངག་དང་ཡིད་དག་པ་
གཉིས་ཀྱི་ཁུངས་སུ་རྩ་རྒྱུད་ལས། ཨཱ་ལི་ཀཱ་ལི་ཞེས་བརྗོད་ནས། །རྒྱུ་སོགས་སྟོང་པ་སྔོན་འགྲོ་བས། ཞེས་གསུངས་པ་འདྲེན་མོད་ཀྱང་ཤིན་ཏུ་མི་གསལ་བས། འདི་གསུམ་གྱི་ཁུངས་ནི་སྔར་དྲངས་པ་ཉིད་གསལ་ཞིང་སྐབས་དང་འབྱོར་རོ། །དག་པ་གསུམ་པོ་འདི་
ཕམ་འཐིང་པ་སྐུ་མཆེད་ནས་བརྒྱུད་པའི་ལཱུ་ཨི་པའི་སྒྲུབ་ཐབས་ལའང་བྱེད་པ་དང་མི་བྱེད་པ་གཉིས་སུ་སྣང་ཡང༌། སྔོན་གྱི་མཁས་པ་མར་དོ་ལ་སོགས་པ་དང༌། ཕྱིས་ཀྱི་མཁས་པ་ཁ་ཅིག་མཛད་པར་སྣང་བ་ལེགས་སོ། །དག་པ་གསུམ་པོ་འདི་ནི་ལཱུ་ཨི་པའི་སྒྲུབ་
ཐབས་ཁོ་ན་ལ་མིན་གྱི་དྲིལ་བུ་པ་དང་ནག་པོ་པ་སོགས་ཀྱི་སྒྲུབ་ཐབས་སུ་ཡང་ཤེས་པར་བྱ་སྟེ། མན་ཀ་ཤྲཱིས། བདེ་མཆོག་རེ་གཉིས་པའི་ལུས་དཀྱིལ་དང༌། ཀྵ་ནྟི་ཤྲཱིས་སྡོམ་འབྱུང་གི་བཅུ་གསུམ་མ་ལ་ཡང་སྦྱར་བ་བཞིན་ནོ། །དེ་ལྟར་དག་པ་གསུམ་བསྒོམས་ནས་གང་
སྒོམ་སྙམ་ན། ཚངས་པ་སྟེ་ཤིན་ཏུ་དག་པའི་མྱུང་འདས་ཀྱི་གནས་ཏེ་རྒྱུ་བྱམས་སོགས་བཞི་བསྒོམ་མོ། །ལྷ་ཚངས་པར་སྐྱེ་བའི་རྒྱུ་ལའང་བཤད་པ་ཡོད་དེ། ཚངས་པ་ཕལ་པའོ། །དབང་པོ་རྣོན་པོས་བྱམས་སོགས་བསྡུས་ཏེ་བསྒོམ་པ་ནི། བདག་གིས་སེམས་ཅན་
9-5-26a


ཐམས་ཅད་འཁོར་བའི་སྡུག་བསྔལ་ལས་བཏོན་ཏེ། དེ་བཞིན་ཉིད་དང་རོ་གཅིག་པའི་བདེ་བ་ཆེན་པོ་ལ་དགོད་པར་བྱའོ་ཞེས་པ་ཡིན་ལ་སོ་སོར་ཕྱེ་སྟེ་སྒོམ་ན། སེམས་ཅན་ཐམས་ཅད་སྡུག་བསྔལ་ལས་འདོན་པ་དང༌། བདེ་བ་ཆེན་པོ་ལ་
འགོད་པ་དང༌། ཐོབ་ཟིན་གྱི་བདེ་བ་བརྟན་པར་འདོད་པ་ནི་རིམ་པ་བཞིན་དུ་སྙིང་རྗེ་དང༌། བྱམས་པ་དང་དགའ་བའོ། །བཏང་སྙོམས་ནི་དེ་བཞིན་ཉིད་ལ་རོ་གཅིག་ཏུ་གནས་པར་འདོད་པའོ། །འདི་བཞི་སྒོམ་པར་མངོན་བརྗོད་ལས་ཀྱང་བཤད་ལ། སྡོམ་འབྱུང་ལས་
ཀྱང༌། གཞན་ཕན་བསམ་པ་བྱམས་པ་སྟེ། །སྙིང་རྗེ་གཞན་གྱི་སྡུག་བསྔལ་འཇོམས། །གཞན་བདེས་ཚིམ་པ་དགའ་བ་སྟེ། །སེམས་ཅན་གཞན་སྙོམས་བཏང་སྙོམས་སོ། ཞེས་གསུངས་ཏེ་གཞན་ལ་བདེ་བ་བྱུང་བས་རང་ཚིམ་པ་དགའ་བ་དང༌། སེམས་
ཅན་གཞན་རྣམས་སེམས་སྙོམས་པར་འདོད་པ་བཏང་སྙོམས་སུ་བཤད་དོ། །འདི་བཞི་བསྒོམས་པའི་དགོས་པ་ནི་ལྭ་བ་པས། བྱང་ཆུབ་ཏུ་སེམས་བསྐྱེད་པས་ནི་དགེ་བའི་རྩ་བ་ཐམས་ཅད་འཕེལ་བའོ། ཞེས་གསུངས་པས་ཚད་མེད་བཞིའི་སྒོ་ནས་
སེམས་ཅན་ཐམས་ཅད་ལ་ཕན་བདེ་བསྒྲུབ་པར་འདོད་པ་བསྐྱེད་ནས། དེ་ནས་དོན་དེ་སྒྲུབ་པའི་ཕྱིར་དུ་རྫོགས་པའི་བྱང་ཆུབ་ཐོབ་པར་འདོད་པའི་སེམས་བསྐྱེད་དགོས་སོ། །བོད་ཀྱི་བླ་མ་སྔ་མ་མང་པོས་ཚད་མེད་བསྒོམས་པ་རྣལ་འབྱོར་སྲུང་བ་དང༌། ཕུང་སོགས་
བྱིན་གྱིས་རློབ་པ་བདག་སྲུང་དང༌། བསྲུང་འཁོར་སྒོམ་པ་གནས་སྲུང་དུ་བཞེད་པའི་དང་པོ་ནི། ཇོ་བོ་ཆེན་པོའི་འགྲེལ་པ་དང་མཐུན་ནོ། །གཉིས་པ་ནི། ཕུང་ཁམས་སྐྱེ་མཆེད་དག་པར་བྱས་པས་ཀུན་ནས་བསླང་བའི་མཆོད་པ་ལ་སོགས་པ་ནི་མྱུར་དུ་བྱང་
9-5-26b


ཆུབ་འགྲུབ་པར་བྱེད་པས་དེ་ནས་ཞེས་སོ། །འདི་ལ་གཉིས། བྱིན་གྱིས་བརླབ་ཚུལ་སོ་སོར་བཤད་པ་དང༌། ཐུན་མོང་གི་དོན་བསྡུ་བའོ། །དང་པོ་ལ་གསུམ། ཕུང་པོ་བྱིན་གྱིས་བརླབ་པ་དང༌། སྐྱེ་མཆེད་བྱིན་གྱིས་བརླབ་པ་དང༌། ཁམས་བྱིན་གྱིས་བརླབ་པའོ། །དང་པོ་ནི། 
ཚད་མེད་བསྒོམས་པའི་རྗེས་དེ་ནས་ཕུང་པོ་ལྔ་བྱིན་གྱིས་རློབ་པའི་ལྷའི་ང་རྒྱལ་བསྐྱེད་པར་བྱ་སྟེའོ། །གཟུགས་ཀྱི་ཕུང་པོ་ནས་རྣམ་ཤེས་ཀྱི་ཕུང་པོའི་བར་ལྔ་བྱིན་གྱིས་རློབ་པ་ལ་ནི། རིམ་པ་བཞིན་དུ་རྣམ་པར་སྣང་མཛད་ནས་རྡོ་རྗེ་སེམས་དཔའི་བར་ལྔ་དང༌། དེ་བཞིན་
གཤེགས་པ་ཐམས་ཅད་ཀྱིས་ཏ་ཕུང་པོ་ལྔ་ཀའི་དེ་བཞིན་ཉིད་བྱིན་གྱིས་རློབས་པ་ལ་ནི། བཅོམ་ལྡན་འདས་དཔལ་ཧེ་རུ་ཀ་རྡོ་རྗེའོ། །འདི་དྲུག་གི་ཁ་དོག་ནི། མངོན་བརྗོད་ལས། རིམ་པ་བཞིན་དཀར་སེར་དམར་ལྗང་དཀར་ནག་པོར་བཤད་དོ། ས་བོན་དྲུག་གི་ཁ་
དོག་ཀྱང་དེ་བཞིན་དུ་བཤད་དོ། །མངོན་བརྗོད་ལས། བསྲུང་འཁོར་གྱི་སྔོན་དུ་ཕུང་པོ་བྱིན་གྱིས་རློབ་པ་དང༌། དཀྱིལ་འཁོར་གྱི་གཙོ་བོ་ཡབ་ཡུམ་བསྐྱེད་པའི་རྗེས་སུ་ཕུང་པོ་བྱིན་གྱིས་རློབ་པ་དང༌། གོ་ཆའི་ལྷ་རྡོར་སེམས་སོགས་དྲུག་བཤད་པའི་སྐབས་དང༌། ལེའུ་ཉེར་
བཞི་པར་དེ་བཞིན་གཤེགས་པ་རིགས་དྲུག་གི་འཁོར་ལོར་བསྒྱུར་བ་དྲུག་གི་དཀྱིལ་འཁོར་གྱི་གཙོ་བོ་བཤད་པའི་སྐབས་བཞི་ལས། དང་པོ་གཉིས་ཀྱི་སྐབས་དང༌། ཀུན་སྤྱོད་དང༌། ཕག་མོ་མངོན་འབྱུང་དང་སཾ་བུ་ཊར། རིགས་དྲུག་གཟུགས་ཕུང་སོགས་དྲུག་དང་
སྦྱོར་ཚུལ་དང༌། གོ་རིམ་གཞུང་འདི་བཞིན་དུ་བཤད་ལ། ས་བོན་ནི། བཤད་རྒྱུད་གཞན་དང་དེའི་འགྲེལ་པ་གཉིས་སུ་མི་གསལ་ཡང༌། མངོན་བརྗོད་དང་ཕག་མོ་མངོན་འབྱུང་དང༌། ཁྱད་པར་གསལ་བྱེད་ལས་འབྱུང་ངོ༌། །དེ་ཡང་ཁྱུང་པོའི་འགྱུར་ལོ་ཆུང་གིས་
9-5-27a


བཅོས་པའི་མངོན་བརྗོད་ཀྱི་སྐབས་དང་པོར། ཨོཾ་བྲུཾ་ཨཾ་ཧྲི་ཧོ་ཧཱུཾ་ཞེས་འབྱུང༌། མངོན་བརྗོད་རིག་པ་གཞོན་ནུས་བསྒྱུར་བ་འབྲོག་མིས་བཅོས་པའི་སྐབས་དང་པོར། བྲུཾ་ཨཾ་ཧྲིཿཧོ་ཧཱུཾ་ཧི་ཞེས་འབྱུང་ཞིང༌། མངོན་བརྗོད་ཁ་ཅིག་དང༌། ཕག་མོ་
མངོན་འབྱུང་དུ་ཡང་དྲུག་པ་མེད་པར་དང་པོ་ལྔ་དེ་བཞིན་དུ་འབྱུང་ངོ༌། །སྐབས་གཉིས་པར་ནི་འགྱུར་གཉིས་ཀ་ལས། རྣམ་སྣང་གི་ས་བོན་ཨོཾ་དུ་བཤད་པ་མ་གཏོགས་པ་གཞན་ལྔ་འདྲའོ། །སྐབས་གསུམ་པར་ནི། ཨོཾ་ཧ་ལ་སོགས་པ་དྲུག་ཏུ་བཤད་ཅིང༌། 
རྣམ་སྣང་སེར་པོ་དང༌། རྡོ་རྗེ་ཉི་མ་དམར་སེར་དུ་བཤད་པས། ས་བོན་དང་སྐུ་མདོག་ཀྱང་མི་འདྲའོ། །སྐབས་བཞི་པར་ནི་ས་བོན་དྲུག་ཀྱང་ཇི་བཞིན་མི་འདྲ་ལ། གོ་རིམ་ཀྱང་མི་བསྐྱོད་པ་རྣམ་སྣང་རིན་འབྱུང་འོད་དཔག་མེད་རྡོར་སེམས་ཀྱི་རིམ་པས་བཤད་ལ། ཧེ་རུ་ཀ་
ཟུར་པ་མེད་དོ། །དེ་ལྟར་མང་དུ་ཡོད་ཀྱང་སྐབས་འདིའི་རིགས་དྲུག་གི་ས་བོན་ནི། བསྲུང་འཁོར་གྱི་སྔོན་དུ་ཕུང་པོ་བྱིན་གྱིས་རློབ་པའི་ས་བོན་བཤད་པ་ལྟར་བྱེད་རྒྱུ་ཡིན་ལ། དེ་ནི་འབྲོག་མིས་བསྒྱུར་བ་ལྟར་ཁྱད་པར་གསལ་བྱེད་ལས་ཀྱང་འབྱུང་བ་ལེགས་ཀྱི། དྲུག་
ཀ་མ་ཚང་བ་དང༌། ཨོཾ་དང་བྲུཾ་གཉིས་འབྱུང་བ་མ་དག་པར་གསལ་ལོ། །དྲུག་པོ་དེ་ལུས་ཀྱི་གནས་གང་དུ་སྒོམ་པ་ནི། རྒྱུད་དང་འདིའི་འགྲེལ་པ་གཞན་རྣམས་ནས་མི་གསལ་ཡང༌། ཁྱད་པར་གསལ་བྱེད་ལས། རིམ་པས་དཔྲལ་བ་ལྟེ་བ་མགྲིན། །རྐང་པ་སྙིང་དང་
སྤྱི་བོ་རུའོ། །ཞེས་བཤད་ལ། རྣམ་སྣང་སོགས་གནས་དེ་དག་ཏུ་སྒོམ་པའི་རྒྱུ་མཚན་ནི། ཁྱད་པར་གསལ་བྱེད་ལས་གཟུགས་ཕུང་གི་ས་བོན་གྱི་རྟེན་ཡིན་པས། གཟུགས་ཕུང་གི་གནས་ཀྱི་གཙོ་བོ་ནི་མགོ་བོའི་དབུས་སུ་བཤད་དེ། དཔྲལ་བ་ཐིག་ལེའི་གནས་
9-5-27b


སུ་བཤད་པ་ལ་བསམས་སོ། །ཚོར་ཕུང་དྲོད་ལ་བརྟེན་པས་དེའི་གནས་ཀྱི་གཙོ་བོ་ནི་ལྟེ་བ་དང༌། འདུ་ཤེས་ནི་མིག་ལ་སོགས་པའི་རྣམ་ཤེས་དྲུག་དང་མཚུངས་ལྡན་དུ་འབྱུང་ལ། དབང་པོ་རྣམས་ཕལ་ཆེ་བའི་གནས་མགྲིན་པ་ཡིན་པས། འདུ་ཤེས་ཀྱི་གནས་
མགྲིན་པ་དང༌། འདུ་བྱེད་ཀྱི་ཕུང་པོའི་རྩ་ཉོན་དང་ཉེ་ཉོན་སོགས་ཀྱི་སེམས་བྱུང་གི་རྟེན་རླུང་ཡིན་ལ། དེའི་གནས་ནི་རྐང་པ་གཉིས་ཀྱི་ལོང་བུའི་འོག་དང༌། རྣམ་ཤེས་ཀྱི་ཕུང་པོ་སེམས་ཀྱི་རྟེན་སྲོག་འཛིན་གྱི་རླུང་སྙིང་ཁར་གནས་པས། རྣམ་ཤེས་ཀྱི་ཕུང་པོའི་
གནས་སྙིང་ཁར་བཤད་ཅིང༌། ཧི་ཡིག་སྤྱི་གཙུག་ཏུ་འགོད་པར་བཤད་པ་ཙམ་ལས་རྒྱུ་མཚན་མ་བཤད་དོ། །གནས་དེ་དྲུག་ཏུ་ཡི་གེ་དྲུག་བཀོད་ནས་དེ་རྣམས་ཡོངས་སུ་གྱུར་པ་ལས། རྣམ་སྣང་སོགས་དྲུག་ཏུ་གྱུར་པའི་ཐམས་ཅད་ཀྱང་ཞལ་གཅིག་ཕྱག་
གཉིས་པའོ། །ཕྱག་མཚན་ནི་ཁྱད་པར་གསལ་བྱེད་ལས། དང་པོ་གཡས་ན་འཁོར་ལོ་འཕྱར། །གཡོན་པ་དྲིལ་བུ་དཀུར་བརྟེན་པ། །གསུམ་པོ་རིན་ཆེན་པད་མ་དམར། །གཡས་པ་སྣ་ཚོགས་རྡོ་རྗེ་འཕྱར། །གཡོན་རྣམས་དྲིལ་བུ་ཐུགས་ཀར་བསྣམས། །ལྔ་
པ་ཐུགས་ཀར་ཕྱག་གཡས་ན། །རྡོ་རྗེ་གཡོན་པ་དྲིལ་བུ་དཀུར། །བརྟེན་པའོ་དེ་བཞིན་གཡོན་པ་གཞན། །མི་བསྐྱོད་པ་ནི་ཕྱག་གཡས་ཀྱིས། །ས་གནོན་ཕྱག་རྒྱས་རྡོ་རྗེ་འཛིན། ཞེས་གསུངས་པ་ལྟར་ཏེ་ཐ་མའི་གཡོན་པས་ཀྱང་དྲིལ་བུ་དཀུར་བརྟེན་པའོ། །ལྭ་བ་
པ་དང་པྲཛྙཱ་ར་ཀྵཱི་ཏས་དྲིལ་བུ་དཀུར་བརྟེན་པ་གསུམ་ནི་བསྙེམས་པ་དང་བཅས་པར་བཤད་ལ། སྒེག་པ་དང་ཞེས་འབྱུང་བ་རྣམས་ནི་སྔ་མ་དང་དོན་འདྲ་བའི་འགྱུར་ཁྱད་ཙམ་སྟེ། དོན་ནི་འགྱིང་བ་དང་བཅས་པའོ། །རིན་འབྱུང་དང་སྣང་མཐའ་དང་དོན་གྲུབ་
9-5-28a


གསུམ་ནི། ལྭ་བ་པས་གཡས་གསུམ་རོལ་བ་དང་བཅས་པས་འཛིན་ཞིང༌། གཡོན་གསུམ་ལ་ཐུགས་ཀར་འཛིན་པ་ཙམ་ལས་ཁྱད་པར་མ་བཤད་ལ། པྲཛྙཱ་རཀྵི་ཏས་གཡས་གསུམ་གདེངས་པ། གཡོན་གསུམ་རོལ་པ་དང་བཅས་པས་
ཐུགས་ཀར་འཛིན་པར་བཤད་པའི་དང་པོ་ནི། ཕྱག་མཚན་འཕྱར་བ་དང་དོན་གཅིག་ལ། རོལ་པ་ཡང་འགྱིང་བའི་དོན་ནོ། །དེ་གསུམ་གྱི་གཡས་པ་གསུམ་གྱིས་དཀུར་འཛིན་ཅིང༌། གཡོན་གསུམ་ཐུགས་ཀར་ཕྱོགས་པ་དང༌། ཧེ་རུ་ཀའི་གཡོན་ཏིང་
ངེ་འཛིན་གྱི་ཕྱག་རྒྱ་ཅན་དུ་པྲཛྙཱ་རཀྵི་ཏའི་འགྲེལ་པའི་འགྱུར་ཁ་ཅིག་ལས་འབྱུང་བ་མི་ལེགས་ལ། དེའི་འགྲེལ་པ་རྡོག་འགྱུར་ལས། སྔར་བཤད་པ་བཞིན་འབྱུང་བ། ལྭ་བ་པའི་འགྲེལ་པ་དང་མཐུན་པས་ལེགས་སོ། །མངོན་བརྗོད་ཀྱི་སྐབས་བཞི་པར། 
མི་འཁྲུགས་པ་དང་རྟག་པའི་རིགས། །རྡོ་རྗེ་ཉི་མ་དེ་བཞིན་ཏེ། འོད་དཔག་མེད་དང་དོན་ཡོད་གྲུབ། །རྡོ་རྗེ་སེམས་དཔའ་བདེ་བ་ཆེ། ཞེས་དང༌། དྲུག་པ་རྡོ་རྗེ་སེམས་དཔའ་ཡིན། །ལྔ་བོ་ཧེ་རུ་ཀར་ཤེས་བྱ། །རྡོ་རྗེ་དཔའ་བོ་ཡང་དེ་ཉིད། ཅེས་དང་། གདན་
གྱི་རིམ་པ་ཡང་དེ་ཉིད་ལས། གླང་པོ་སེང་གི་རྟ་དང་ནི། །རྨ་བྱ་དང་ནི་མཁའ་ལྡིང་དང༌། །དེ་ཡི་སྟེང་དུ་ཡི་དྭགས་གདན། ཞེས་འབྱུང་སྟེ། གཞུང་ཁ་ཅིག་ལས། རོ་སྟེང་དེ་དག་རིམ་བཞིན་དུ། །རིགས་དྲུག་གཙོ་བོ་བསྒོམ་པར་བྱ། ཞེས་ཀྱང་འབྱུང་བ་དང༌། 
ཡང་དེ་ཉིད་ལས་རྡོ་རྗེ་ལག་གིས་ས་ལ་རེག །རྡོ་རྗེ་དྲིལ་བུ་དཀུར་བརྟེན་ཅིང༌། །ཞལ་གྱི་མཆུ་ནི་རྣམ་པར་བསྒྱུར། །འཁོར་ལོ་དྲིལ་བུ་འགྱིང་དང་བཅས། །རིན་ཆེན་དྲིལ་བུ་དེ་བཞིན་ཏེ། །པད་མ་དྲིལ་བུའི་རིམ་པ་དང༌། །དྲིལ་བུ་སྣ་ཚོགས་རྡོ་རྗེ་ཉིད། །ཐམས་
9-5-28b


ཅད་བསྙེམས་པར་རྣམ་བསྒོམས་ཏེ། །ཞེས་མི་བསྐྱོད་པ་ལ་སོགས་པ་ལྔའི་ཕྱག་མཚན་དང༌། པད་མ་དང་ཟླ་ཉིའི་དབུས་སུ་རྡོ་རྗེ་སྐྱིལ་ཀྲུང་གིས་བཞུགས་པ་དང༌། ཕྱག་རྒྱ་དྲུག་གིས་བརྒྱན་པར་བཤད་དེ། དཀྱིལ་འཁོར་དྲུག་གི་དབུས་སུ་རེ་རེས་གཙོ་བོ་བྱེད་
པའི་སྐབས་སུ་བཤད་དོ། །འདིར་ནི་འགྲེལ་པ་གསུམ་གར་སྤྱན་གསུམ་པ། རལ་པའི་ཅོད་པན་ཅན། ཕྱག་རྒྱ་ལྔས་བརྒྱན་པ། གཡས་བརྐྱང་དུ་བཞུགས་པ་དང༌། ཧེ་རུ་ཀ་མི་བསྐྱོད་པར་བཤད་ཅིང༌། དེའི་ཕྱག་མཚན་འཛིན་ཚུལ་ནི་མངོན་བརྗོད་དང་མཐུན་
ནོ། །འདིར་བོད་ཁ་ཅིག་གིས། ཨོཾ་བྷྱ་ཀ་ར་དང༌། བི་བྷུ་ཏི་ཙ་ནྟྲས་རྡོར་སེམས་དྲུག་པ་དང༌། ཧེ་རུ་ཀ་མི་བསྐྱོད་པར་བཞེད་པ། མངོན་བརྗོད་ལས་རྡོར་སེམས་དྲུག་པར་གསུངས་པ་དང༌། གདན་དྲུག་གི་རིམ་པ་དང༌། ཕྱག་མཚན་སྔར་དྲངས་པ་ལྟར་བཤད་པ་དང༌། རྡོ་
རྗེ་མཁའ་འགྲོར། རྣམ་ཤེས་རྡོ་རྗེ་སེམས་དཔའ་ཉིད། ཅེས་པའི་འགྲེལ་པར། རྡོ་རྗེ་སེམས་དཔའི་ཉིད་ནི་མི་བསྐྱོད་པའོ་ཞེས་དང༌། ལྭ་བ་པས་རྩ་རྒྱུད་ཀྱི་འགྲེལ་པར་རྡོར་སེམས་མི་བསྐྱོད་པ་དང༌། ཧེ་རུ་ཀ་དྲུག་པར་བཤད་པས་སོ། ཞེས་འགོག་པར་བྱེད་
དོ། །དེ་ལ་རྡོར་སེམས་དྲུག་པར་བཤད་པ་ནི། མི་བསྐྱོད་པ་ནས་དོན་གྲུབ་ཀྱི་བར་གྱི་རིགས་ལྔ་ལ་ལྟོས་པའི་དྲུག་པ་རྡོ་རྗེ་འཆང་ཡིན་ལ། དེས་ན་ལུང་དེ་རྡོར་སེམས་དྲུག་པ་ཡིན་པའི་ཤེས་བྱེད་ཡིན་གྱི། གནོད་བྱེད་ག་ལ་ཡིན། གལ་ཏེ་ཤེས་བྱེད་
ཡིན་ཀྱང་རྣམ་ཤེས་ཀྱི་ཕུང་པོ་དང་སྦྱར་བའི་རྡོར་སེམས་དྲུག་པར་འདོད་པ་ལ་གནོད་བྱེད་ཡིན་ཏེ། དེ་ནི་རྣམ་སྣང་ནས་བགྲངས་པའི་ལྔ་པ་ཡིན་པས་སོ་སྙམ་ན། རྣམ་སྣང་ནས་བགྲངས་པའི་ལྔ་པ་དང༌། ཐོག་མ་མི་བསྐྱོད་པ་ལ་བྱས་པའི་དྲུག་པ་གཉིས་
9-5-29a


ལ་འགལ་བ་ཅུང་ཟད་མེད་ལ། མི་བསྐྱོད་པ་དང་རྣམ་ཤེས་ཀྱི་ཕུང་པོ་གཉིས་སྦྱར་བ་གཞན་དུ་མང་དུ་བྱུང་ཡང་བདེ་མཆོག་གི་རྒྱུད་དུ་མ་ཞིག་ཏུ། རྣམ་ཤེས་ཀྱི་ཕུང་པོ་དང་རྡོར་སེམས་སྦྱར་བས་རྡོ་རྗེ་འཆང་ཕུང་པོ་དེ་དང་
སྦྱོར་བ་ལ་ཡང་འགལ་བ་མེད་དེ། དཔེར་ན་གཞུང་མང་པོར་རྣམ་སྣང་དཀར་པོར་བཤད་ཀྱང་གོ་ཆའི་སྐབས་སུ་སེར་པོར་བཤད་པ་བཞིན་ནོ། །གལ་ཏེ་མི་བསྐྱོད་པ་ལ་སོགས་པའི་རིགས་ལྔ་ནི་ཉི་ཚེ་བ་དང༌། རྡོ་རྗེ་འཆང་ནི་ཁྱབ་བདག་གི་རིགས་སུ་བཤད་
ལ། འདིར་ཡང་ཧེ་རུ་ཀ་ཕུང་པོ་ལྔ་ཀ་ཚོགས་པའི་དེ་ཉིད་ལ་བཤད་པས་སྤྱིའི་རྣམ་དག་ཡིན་ལ། ཕུང་པོ་ལྔ་སོ་སོའི་དག་བྱེད་ནི་ཉི་ཚེ་པ་ཡིན་པས། རྡོ་རྗེ་འཆང་ཕུང་པོ་སོ་སོ་བའི་དག་བྱེད་ཀྱི་ནང་དུ་བགྲང་བ་མི་འཐད་པས། རྣམ་ཤེས་ཀྱི་ཕུང་པོ་དང་སྦྱར་བའི་
རྡོར་སེམས་ནི། མིང་ལ་དེ་ལྷར་བྱུང་ཡང་དོན་ནི་མི་བསྐྱོད་པ་དང༌། ཧེ་རུ་ཀ་ནི་རྡོ་རྗེ་འཆང་དུ་རིགས་སོ་སྙམ་ན། འདི་ནི་དེ་ལྟར་འདོད་པ་རྣམས་ཀྱི་སྒྲུབ་བྱེད་དངོས་གཞིར་སྣང་མོད་ཀྱང་རྣམ་སྣང་དང་སྣང་མཐའ་དང་མེ་བསྐྱོད་པ་གསུམ་སྐུ་གསུང་ཐུགས་རྡོ་རྗེ་དགུ་
དུ་བསྡུས་པ་ན། དྲུག་པ་རྡོ་རྗེ་འཆང་མི་བསྐྱོད་པའི་ནང་དུ་བསྡུས་པར་སྤྱོད་བསྡུས་ལས་གསུངས་པ་ཡང་ཡོད་པས། མི་བསྐྱོད་པ་རིགས་ཉི་ཚེ་བར་མ་ངེས་ལ། བདེ་སྟོང་གཉིས་ཕན་ཚུན་རྒྱས་འདེབས་པའི་རྒྱུ་མཚན་གྱིས་རྡོ་རྗེ་འཆང་དང་མི་བསྐྱོད་པ་གཉིས་
ཀྱང་ཕན་ཚུན་དུ་རྒྱས་འདེབས་པའི་ཕྱིར་ཡང་རིགས་ཉི་ཚེ་བར་མ་ངེས་སོ། །སྒྲུབ་ཐབས་ཀྱི་འགྲེལ་པ་ལྭ་བ་པས་མཛད་པ་ལས་ཀྱང༌། སྒྲུབ་ཐབས་འདིར་རྡོ་རྗེ་སེམས་དཔའི་ནི་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ཏེ། མི་
9-5-29b


བསྐྱོད་པ་ནི་ཆོས་ཀྱི་དབྱིངས་ཀྱི་རང་བཞིན་ནོ། ཞེས་གསུངས་པས་རྣམ་ཤེས་ཀྱི་ཕུང་པོ་ལ་རྡོར་སེམས་སུ་བཤད་ནས། ཧེ་རུ་ཀ་ཟུང་དུ་བཤད་པ་སྒྲུབ་ཐབས་འདི་དང་འདི་འདྲ་བ་རྣམས་སུ་ནི། ཡུལ་ཅན་གྱི་ཆོས་དབྱིངས་ཡེ་ཤེས་རྡོ་རྗེ་འཆང་དང༌། ཡུལ་ཆོས་
དབྱིངས་མི་བསྐྱོད་པར་འཆད་པ་ཡིན་ལ། རྣམ་ཤེས་ལ་མི་བསྐྱོད་པར་བཤད་ནས་རྡོར་སེམས་ཟུར་དུ་འཆད་པ་ལྟར་ན་དེ་གཉིས་བཟློག་སྟེ་བྱ་དགོས་པས་ཁྱད་པར་གཉིས་པོ་ལེགས་པར་ཕྱེད་པར་བྱའོ། །ཕྱག་མཚན་ཁུངས་སུ་དྲངས་བ་ལྟར་ན་མི་བསྐྱོད་པའི་
ཕྱག་མཚན་འཛིན་ཚུལ་ཧེ་རུ་ཀའི་ཕྱག་མཚན་འཛིན་ཚུལ་དུ་འོང་བས་དེ་ཡང་གནོད་བྱེད་དུ་མི་འགྲོའོ། །གདན་གྱི་རིམ་པ་ནི་མི་བསྐྱོད་པ་ནས་རྡོར་སེམས་ཀྱི་བར་དྲུག་གི་རིམ་པའི་དབང་དུ་མཛད་ཀྱི་རྡོར་སེམས་ལྔ་པར་བཤད་པའི་རིམ་པ་དང་མི་འགྲིག་ཅིང༌། རྣམ་
ཤེས་ཀྱི་ཕུང་པོ་དང་སྦྱར་བའི་ལྷ་གང་ཡིན་ལ་གླང་པོ་ཆེའི་གདན་དགོས་པར་སྟོན་པ་ཡང་མིན་ལ། ཧེ་རུ་ཀ་ལ་རོ་གདན་སྟོན་པ་ཡང་མིན་ནོ། །རྡོ་རྗེ་མཁའ་འགྲོའི་འགྲེལ་པ་ཨ་བྷྱཱ་སོགས་ལ་གནོད་བྱེད་དུ་འདྲེན་པ་ནི་ལུང་འདྲེན་པའི་ཡུལ་དེས་ལུང་དེ་ཚད་མར་ཁས་བླངས་
དགོས་མི་དགོས་མ་དཔྱད་པའོ། །འཁྲུལ་སྤོང་དང་ཁྱད་པར་གསལ་བྱེད་ལས། མི་བསྐྱོད་པ་རྣམ་ཤེས་ཀྱི་ཕུང་པོ་དང་སྦྱར་ནས། ཕུང་པོ་ལྔའི་དེ་བཞིན་ཉིད་ལ་རྡོར་སེམས་སུ་བྱས་པ་དང༌། ཡང་ན་ཕུང་པོ་ལྔའི་དེ་ཉིད་མི་བསྐྱོད་པ་དང༌། རྡོར་སེམས་རྣམ་ཤེས་ཀྱི་ཕུང་པོ་
དང་སྦྱོར་བའི་གདམ་ང་ཅན་དུ་བྱས་ནས། ཕན་ཚུན་ངོ་བོ་གཅིག་ཏུ་རྟོགས་པའི་ཕྱིར་རྣམ་སྣང་སོགས་ལ་ཡང་མི་བསྐྱོད་པས་རྒྱས་བཏབ་པའོ། ཞེས་འདོད་ཀྱི་ཕྱོགས་གཅིག་ངེས་གཟུང་དུ་མི་འདོད་དོ། །ལྭ་བ་པའི་རྩ་རྒྱུད་ཀྱི་འགྲེལ་པར་ཕུང་པོ་བྱིན་བརླབ་ཀྱི་
9-5-30a


སྐབས་སུ་རྡོར་སེམས་མི་བསྐྱོད་པར་མ་བཤད་ཀྱི་མི་བསྐྱོད་པ་རྣམ་ཤེས་ཀྱི་ཕུང་པོ་དང་སྦྱར་ནས་ཧེ་རུ་ཀ་ཟུར་དུ་འཆད་པ་ལྟར་ན། ཧེ་རུ་ཀ་མི་བསྐྱོད་པར་མི་བྱེད་ཀྱང་ལཱུ་ཨི་པ་ལྟ་བུ་རྣམ་ཤེས་ཀྱི་ཕུང་པོ་ལ་རྡོར་སེམས་སུ་བཤད་ནས། ཧེ་
རུ་ཀ་ཟུར་དུ་འཆད་པ་ལྟར་ན་ཧེ་རུ་ཀ་མི་བསྐྱོད་པ་ལ་འཆད་པ་ལ་འགལ་བ་ཅི་ཡང་མེད་དེ། དེ་གཉིས་རྣམ་གཞག་སོ་སོ་བ་ཡིན་པའི་ཕྱིར་རོ། །པྲཛྙཱ་རཀྵི་ཏས་ཕུང་པ་ལྔ་རིམ་པ་བཞིན་དུ། དབུ་བ་དང༌། ཆུ་བུར་དང༌། སྨིག་རྒྱུ་དང་། ཆུ་ཤིང་དང༌། སྒྱུ་མ་ལྟ་བུ་བཞིན་
དུ་སྒོམ་པའམ། ཡང་ན་དེ་རྣམས་ལས་གཞན་རྣམ་སྣང་ལ་སོགས་པའི་ལྷར་མོས་པ་ཉིད་ཀྱིས་དེ་རྣམས་རྣམ་པར་དག་པའོ། །ཞེས་བཤད་པ་ནི་ལྭ་བ་པས། གལ་ཏེ་ཡང་རྣམ་པར་སྣང་མཛད་ལ་སོགས་པའི་ལྷར་མོས་པ་ཁོ་ན་དེ་རྣམས་རྣམ་པར་དག་པའོ། །
ཞེས་གསུངས་པའི་དོན་ཡིན་ལ། དེ་ནི་སྔར་དབུ་བ་སོགས་དང་འདྲ་བའི་ཕྱིར་རྣམ་སྣང་ལ་སོགས་པའོ། །ཞེས་བཤད་པ་དེ་ལ་ཡང་རྣམ་སྣང་ལ་སོགས་པའི་སྐུར་མོས་པ་དགོས་པར་སྟོན་པའི་དོན་ཡིན་གྱི་ཕུང་པོ་རྣམས་རང་བཞིན་མེད་པར་མོས་པ་དང༌། ལྷར་
སྒོམ་པ་གང་རུང་གི་ཆོག་པར་སྟོན་པ་མིན་ནོ། །གཉིས་པ་ནི། མིག་གཉིས་སུ་ཨོཾ་དཀར་པོ་ལས་གཏི་མུག་ཟད་པར་བྱེད་པའི་རྡོ་རྗེ་དཀར་པོ་དང༌། རྣ་བ་གཉིས་སུ་ཧཱུཾ་ནག་པོ་ལས། ཞེ་སྡང་འཇོམས་པའི་རྡོ་རྗེ་ནག་པོ་དང༌། སྣའི་བུག་པ་གཉིས་སུ་ཏྲཾ་སེར་པོ་ལས། 
སེར་སྣ་ཉམས་པར་བྱེད་པའི་རྡོ་རྗེ་སེར་པོ་སྟེ། མངོན་བརྗོད་ལས། སྣ་གཉིས་ནི་སེར་སྣ་རྡོ་རྗེའོ་ཞེས་དང༌། ལྭ་བ་པས། སེར་སྣ་རྡོ་རྗེ་སྣ་བུག་གཉིས་སུ་འགོད་པར་གསུངས་པ་ལྟར་བྱའོ། །ཀུན་སྤྱོད་ལས། ལྕེ་ལ་ནི་འདོད་ཆགས་རྡོ་རྗེའོ། །ཞེས་དང༌། ལྭ་བ་པས་
9-5-30b


ཀྱང༌། ལྕེའི་རྩ་བར་འགོད་པར་བཤད་པས། ཁ་སྟེ་ལྕེའི་རྩ་བར་ཨཾ་དམར་པོ་ལས་འདོད་ཆགས་ཟད་པར་བྱེད་པའི་རྡོ་རྗེ་དམར་པོ་དང༌། ཁྱད་པར་གསལ་བྱེད་ལས། ཕྲག་དོག་རྡོ་རྗེ་ལུས་དཔྲལ་ལ། ཞེས་པ་ལྟར་རེག་ལ་སྟེ་རེག་བྱེད་ལུས་ཀྱི་དཔྲལ་བར་ཁཾ་ལྗང་
ཁུ་ལས་ཕྲག་དོག་ཟད་པར་བྱེད་པའི་རྡོ་རྗེ་ལྗང་གུའོ། །འདིར་སྒྲུབ་ཐབས་ཀྱི་གཞུང་ལོ་ཆེན་གྱི་འགྱུར་དང་དེ་མར་དོས་བཅོས་པ་ལ་སྣ་ལ་སེར་སྣ་དང༌། རེག་ལ་ཕྲག་དོག་ཅེས་འབྱུང་ཞིང༌། ཇོ་བོའི་འགྲེལ་པ་དང༌། དེ་བཞིན་གཤེགས་པའི་རྡོ་རྗེའི་གཞུང་དུ་ཡང་
དེ་བཞིན་དུ་འབྱུང༌། ཀུན་སྤྱོད་དང་སཾ་བྷུ་ཊ་དང༌། རྡོ་རྗེ་མཁའ་འགྲོར་ཡང་སྣ་ལ་སེར་སྣ་དང༌། ལུས་ལ་ཕྲག་དོག་རྡོ་རྗེ་ཞེས་འབྱུང་ཞིང༌། མངོན་བརྗོད་ཀྱི་སྐབས་འགའ་ཡར་དུ་ཡང་དེ་བཞིན་དུ་འབྱུང་ལ། པྲཛྙཱ་རཀྵི་ཏའི་འགྲེལ་པར་སྣ་ལ་ཕྲ་མ་རྡོ་རྗེ་ཞེས་བཤད་
དོ། །མར་དོ་རྐྱང་པ་དང་ཆག་གི་འགྱུར་དག །ལྭ་བ་བའི་འགྲེལ་པ་དང་། མངོན་བརྗོད་ཀྱི་སྐབས་འགའ་དང༌། ཕག་མོ་མངོན་འབྱུང་དུ་ཡང་སྣ་ལ་ཕྲག་དོག་རྡོ་རྗེ་ཞེས་འབྱུང་ཡང་རྒྱུད་དང་བསྟན་བཅོས་གཞན་ནས་འབྱུང་བ་དང་མཐུན་པས། སྣ་ལ་སེར་སྣ་བ་
ཕྲ་མ་དང་། ལུས་ལ་ཕྲག་དོག་རྡོ་རྗེར་བཤད་པ་བཞིན་བྱས་ན་ལེགས་པར་མངོན་ནོ། །རེག་བྱ་ལ་ཞེས་པ་ནི་འགྱུར་མ་ལེགས་པས། མན་སྙེར་རེག་བྱེད་ལ་ཞེས་བསྒྱུར་བ་ལྟར་བྱ་ལ། རེག་ལ་ཞེས་འབྱུང་བའི་དོན་ཡང་དེའོ། །ཁྱད་པར་གསལ་བྱེད་ལས། 
བྱང་ཆུབ་སེམས་དཔའ་དབང་ཕྱུག་སྦྱིན། །སྐྱེ་མཆེད་རྣམས་ཀྱི་རང་སྙིང་ལའོ། །ཞེས་པ་ལྟར་སྐྱེ་མཆེད་ཐམས་ཅད་ཀྱི་རྗེས་སུ་འགྲོ་བའི་ཕྱིར་སྐྱེ་མཆེད་ཐམས་ཅད་དེ་ཡིད་ཀྱི་སྐྱེ་མཆེད་ལ་སྟེ་དེའི་གནས་སྙིང་ཁར་ཧཾ་དཀར་པོ་ལས་དབང་ཕྱུག་ཐམས་ཅད་སྦྱིན་
9-5-31a


པར་བྱེད་པའི་རྡོ་རྗེ་དཀར་པའོ། །དེ་དག་ནི་རྒྱུད་གཞན་ནས་ས་སྙིང་དང༌། ཕྱག་རྡོར་དང་ནམ་སྙིང་དང༌། འཇིག་རྟེན་དབང་ཕྱུག་དང༌། སྒྲིབ་སེལ་དང༌། ཀུན་བཟང་ཞེས་གསུངས་པ་རྣམས་སོ། །ཐམས་ཅད་ཀྱང་ཞལ་གཅིག་པ་ཕྱག་གཉིས་པ། 
རལ་པའི་ཅོད་པན་ཅན་སྦྱན་གསུམ་པ། ཕྱག་རྒྱ་སྔས་བརྒྱན་པ། གཡས་བརྐྱང་གིས་བཞུགས་པའི་དང་པོའི་གཡས་ཀྱིས་འཁོར་ལོ་འཕྱར་ཞིང༌། གཉིས་པའི་གཡས་ཀྱིས་ཐུགས་ཀར་རྡོ་རྗེ་དང༌། གཡོན་གཉིས་སྒེག་བ་དང་བཅས་པས་དྲིལ་བུ་དཀུར་
བརྟེན་པ་དང༌། དེ་ནས་གསུམ་གྱིས་རིམ་པ་བཞིན་གཡས་ཀྱིས་རིན་པོ་ཆེ་དང༌། པད་མ་དམར་པོ་དང༌། སྣ་ཚོགས་རྡོ་རྗེ་རོལ་པ་དང་བཅས་པས་འཕྱར་ཞིང༌། གཡོན་གསུམ་རོལ་པ་དང་བཅས་པས་དྲིལ་བུ་ཐུགས་ཀར་འཛིན་པ་དང༌། དྲུག་པས་གཡས་རྡོ་རྗེ་ཐུགས་
ཀར་འཛིན་ཞིང༌། གཡོན་སྒེག་པ་དང་བཅས་པས་དྲིལ་བུ་དཀུར་བརྟེན་པའོ། །མིག་ལ་སོགས་པ་ལ་གནས་ཀྱི་སྒོ་ནས་གཉིས་གཉིས་ཡོད་ཀྱང་ལྷ་རང་གི་ངོ་བོའི་སྒོ་ནས་གཅིག་ཏུ་བགྲང་པས་སྐྱོན་མེད་དོ། །འདི་དྲུག་གི་ས་བོན་དྲུག་ནི། འགྲེལ་པ་གསུམ་ནས་མི་
འབྱུང་ཡང་མངོན་བརྗོད་ཀྱི་བསྲུང་འཁོར་གྱི་སྔོན་དུ་བཤད་པའི་སྐབས་སུ་འབྱུང་བ་བཞིན་ཡིན་ནོ། །མངོན་བརྗོད་ལས་དཀྱིལ་འཁོར་གྱི་གཙོ་བོ་ཡབ་ཡུམ་བསྐྱེད་པའི་སྐྱེ་མཆེད་བྱིན་གྱིས་རློབ་པའི་སྐབས་སུ་བྲུཾ་དཀར་པོ། ཧཱུཾ་ནག་པོ། ཁཾ་སེར་པོ། ཨ་
དམར་པོ། ཧཾ་ལྗང་གུ་དང༌། ཧཾ་དཀར་པོ་དྲུག་བཤད་མོད་ཀྱང་སྐབས་འདིར་ནི་སྔ་དྲུག་སྐབས་སུ་བབ་པོ། །གསུམ་པ་ནི། ཁྱད་པར་གསལ་བྱེད་ལས། འདི་རྣམས་རིམ་པས་ལྟེ་བ་སྙིང༌། །མགྲིན་པ་དཔྲལ་བ་གསང་གནས་སུ། །ཞེས་གསུངས་པ་ལྟར་རང་
9-5-31b


ལུས་ཀྱི་སའི་ཁམས་ལ་སྟེ་ལྟེ་བར་ནི་ལཾ་སེར་པོ་ལས་ལྟུང་བྱེད་མ་སེར་མོའོ། །ཆུའི་ཁམས་ལ་སྟེ་སྙིང་ཁ་ལ་ནི་མཱཾ་ནག་པོ་ལས་གསོད་བྱེད་མ་ནག་མོའོ། །མེའི་ཁམས་ལ་སྟེ་མགྲིན་པ་ལ་ནི་པཾ་དམར་པོ་ལས་འགུགས་བྱེད་མ་དམར་མོའོ། །རླུང་གི་ཁམས་
ལ་སྟེ་དཔྲལ་བར་ནི་ཏཱཾ་ལྗང་ཁུ་ལས་གར་གྱི་དབང་ཕྱུག་མ་ལྗང་ཁུའོ། །ནམ་མཁའི་ཁམས་ལ་སྟེ་གསང་གནས་ལ་ནི་ཁཾ་དུད་ཁ་ལས་པད་མའི་དྲ་བ་ཅན་མ་དུད་ཁ་སྟེ། དང་པོ་བཞི་ཞལ་གཅིག་ཕྱག་བཞི་མ། སྤྱན་གསུམ་པ། སྐྲ་གྲོལ་བ་གཅེར་བུ་ཕྱག་རྒྱ་
ལྔས་བརྒྱན་པ། གཡས་བརྐྱང་གིས་བཞུགས་པའི་གཡས་པ་ན་ནི། ཁྱད་པར་གསལ་བྱེད་ལས། འཁོར་ལོ་རྡོ་རྗེ་པད་རལ་གྲི། གཡས་པའི་གཞན་གྲི་གུག་གོ། ཞེས་པ་ལྟར་དང༌། གཡོན་པ་རྣམས་ན་ནི། གཡོན་ན་ཐོད་པ་ཁ་ཊྭཱཾ་ག །ཞེས་པ་ལྟར་དང༌། ལྔ་པ་
ནི་རྩ་ཞལ་དུད་ཁ་གཡས་དཀར་གཡོན་དམར་བའི་ཞལ་གསུམ། ཕྱག་དྲུག་གིས་གཡས་གསུམ་གྱིས་གྲི་གུག །ཚངས་མགོ་ལྕགས་ཀྱུ་དང༌། གཡོན་གསུམ་གྱིས་ཐོད་པ་ཁ་ཊྭཱཾ་ག་ཞགས་པ་འཛིན་པ། ལྷག་མ་ནི་གཞན་བཞི་དང་འདྲའོ། །འདི་རྣམས་རང་རང་གི་
འབྱུང་བའི་དཀྱིལ་འཁོར་ལ་བཞུགས་པར་མངོན་བརྗོད་ལས་སོ། །འདི་ལྔ་ནི་སྤྱན་སོགས་བཞི་དང་། ཆོས་དབྱིངས་རྡོ་རྗེ་མར་འགྲེལ་པ་གཉིས་ནས་བཤད་ལ། མན་སྙེར་ལྔ་པ་རྡོ་རྗེ་སྙེམས་མར་བཤད་དོ། །ས་བོན་ལྔ་པོ་འདི་ཡང་འགྲེལ་པ་གསུམ་ན་མི་གསལ་
ཡང་མངོན་བརྗོད་དང་ཕག་མོ་མངོན་འབྱུང་ལས་བསྲུང་འཁོར་གྱི་སྔོན་དུ་བཤད་པ་བཞིན་ཡིན་ལ། མངོན་བརྗོད་ལས། དཀྱིལ་འཁོར་པའི་གཙོ་བོ་ཡབ་ཡུམ་བསྐྱེད་ནས་ཁམས་བྱིན་གྱིས་རློབ་པའི་སྐབས་སུ། ལཾ་མཱཾ་རཾ་ཡཾ་ཁཾ་སྔ་བཤད་ཀྱང་འདིར་སྔ་མ་
9-5-32a


སྐབས་སུ་བབ་བོ། །དེ་ནས་ཨོཾ་པྲ་ཀྲི་ཏ་པ་རི་ཤུདྡྷ་སརྦ་དྷརྨ་པྲ་ཀྲི་ཏ་པ་རི་ཤུདྡྷོ་྅ཧཾ། ཞེས་བརྗོད་ལ་རང་བཞིན་གྱིས་ཡོངས་སུ་དག་པའི་ཆོས་ཐམས་ཅད་ཀྱི་རང་བཞིན་ཡོངས་སུ་དག་པ་ནི་ངའོ་སྙམ་དུ་སྔགས་དོན་ལྟར་ང་རྒྱལ་
བརྟན་པོ་གཟུང་ངོ༌། །སྔགས་འདི་མངོན་བརྗོད་ཁ་ཅིག་ལས་མི་འབྱུང་ཡང་གཞན་ཁ་ཅིག་དང་ཕག་མོ་མངོན་འབྱུང་ལས་གསུངས་སོ། །འདིར་ཇོ་བོ་ཆེན་པོའི་མན་ངག་བཞིན་ལོ་ཆེན་གྱིས་སྒྲུབ་ཐབས་ཀྱི་དོན་བཤད་པ་ལས། དབང་པོ་ཐམས་ཕུང་སོགས་
ལྷའི་སྐུར་སྒོམ། འབྲིང་གིས་ཡི་གེ་རྣམས་བསྒོམ། དབང་པོ་རབ་ཀྱིས་རྣམ་སྣང་ལ་སོགས་པར་མོས་པ་བྱ་གསུང་སྟེ། ལྷའི་སྐུ་སྒོམ་པ་ལ་མ་བྱང་བའི་དུས་སུ་སྐུ་མདོག་ཕྱག་མཚན་སོགས་རེ་རེ་ནས་སྒོམ་པ་དང༌། དེ་ལ་བྱང་བའི་སྐབས་སུ་ཡི་གེ་ལྷའི་
རང་བཞིན་དུ་ཤེས་ནས་སྒོམ་པ་དང༌། ཆེས་ཤིན་ཏུ་བྱང་བའི་དུས་གསུམ་ལ་དགོངས་པ་འདྲའོ། །རབ་འབྱོར་ཞི་བས་དབང་པོ་རབ་ཀྱིས་ཕུང་པོ་དང༌། འབྲིང་གིས་དེ་དང་སྐྱེ་མཆེད་གཉིས་དང༌། ཐ་མས་དེ་གཉིས་དང་ཁམས་དང་གསུམ་ག་བྱིན་གྱིས་རློབ་པ་བྱ་ཞེས་
ཟེར་རོ། །མར་དོས་ས་བོན་ལ་མི་ལྟོས་པར་བསྐྱེད་གསུང་མོད་ཀྱང་རྒྱུད་ཀྱི་དགོངས་པ་ས་བོན་ལས་སྐྱེད་པ་ཡིན་ནོ། །འདི་རྣམས་སྒོམ་པ་ནི། སྡོམ་འབྱུང་ལས། ཕྱག་གཉིས་ཧེ་རུ་ཀ་སྦྱོར་ལྡན། །ཕུང་པོ་ལ་སོགས་ང་རྒྱལ་བྱ། །ཞེས་ལྷ་བཅུ་གསུམ་མ་ལ་ཡང་གསུངས་
ཤིང༌། མངོན་བརྗོད་ལས་མངོན་དུ་ཕུང་སོགས་བྱིན་གྱིས་རློབ་པ་བཤད་པ་འདི་སྐུ་གསུང་ཐུགས་དམ་ཚིག་ཡེ་ཤེས་ཀྱི་བདེ་མཆོག་རིགས་ལྔའི་ལྷ་ལྔ་མའི་བར་དང༌། དཔའ་བོ་གཅིག་པའི་དཀྱིལ་འཁོར་གྱི་ལུས་དཀྱིལ་ཀུན་གྱི་ཐུན་མོང་བར་མངོན་བརྗོད་ཀྱི་
9-5-32b


འགྲེལ་པར་བཤད་པ་རྒྱུད་ཀྱི་དགོངས་པ་ཡིན་པས་དེ་རྣམས་ཀུན་ལ་ཤེས་པར་བྱོས་ཤིག །གཉིས་པ་ནི། ཕུང་པོ་བྱིན་གྱིས་རློབ་པ་ལ་དྲུག་དང༌། ནང་གི་སྐྱེ་མཆེད་བྱིན་རློབ་ལ་དྲུག་དང༌། ཁམས་བྱིན་གྱིས་རློབ་པ་ལ་ལྷ་ལྔ་སྒོམ་པ་དེ་ལྟར་ན་ཕུང་པོ་དང༌། 
ཁམས་དང་སྐྱེ་མཆེད་ཀྱི་གནས་རྣམས་སུ་དེ་རྣམས་བསྒོམས་ནས་དག་པར་བྱེད་པའི་ལྷ་སོ་སོའི་རྣམ་པར་དག་པ་བཤད་པའོ་ཞེས་དོན་བསྡུས་སོ། །ཀུན་སྤྱོད་ལས། དེ་ལྟར་ཕུང་པོ་དག་སྐྱེ་མཆེད་དང་ཁམས་རྣམས་ལ་ལྷའི་ང་རྒྱལ་བསྐྱེད་པར་བྱའོ། །ཞེས་
གསུངས་པས་ལྷ་བཅུ་བདུན་པོ་རང་གི་ལུས་ལ་བཀོད་པ་ཙམ་མིན་གྱི་ལྷ་རྣམས་སྐྱེད་པ་ན་རང་ཉིད་ལྷ་དེ་དང་དེའོ་སྙམ་དུ་ང་རྒྱལ་བསྐྱེད་དགོས་སོ། །གསུམ་པ་ལ་གཉིས། བདེ་མཆོག་གི་སྐོར་ནས་བསྲུང་འཁོར་གསུངས་ཚུལ་དང༌། སྐབས་སུ་བབ་པའི་གཞུང་
བཤད་པའོ། །དང་པོ་ནི། རྩ་རྒྱུད་ལས་རབ་རྣམས་ནི་ཕྱོགས་སུ་དགོད། །འོག་ཏུ་མཚོན་ཆ་དགོད་པར་བྱ། །འཁོར་ལོ་གནས་པའི་བདག་ཉིད་མཉམ། །སྟེང་དུ་མདའ་ཡི་དྲ་བ་བྱ། །མཁའ་སྤྱོད་དུ་ནི་གུར་བྱ་སྟེ། །དེ་དག་གིས་ནི་གོ་ཆར་འགྱུར། །དེ་ལྟར་གོ་བགོས་སུམ་
ཅུ་ནི། །རྩ་གསུམ་པས་ཀྱང་གཞིག་མི་ནུས། །ཞེས་རྡོ་རྗེའི་ས་གཞི་དང༌། ར་བ་རྣམས་དང་། གུར་དང་མདའ་ཡི་དྲ་བ་བྱ་བར་གསུངས་ཏེ། མཚོན་ཆ་ནི་རྡོ་རྗེའི་ས་གཞིར་བཤད་ལ། མཁའ་སྤྱོད་ནི་སྟེང་གི་ནམ་མཁའོ། །རྐང་པ་གསུམ་པ་ལ། འཁོར་ལོ་བདག་ཉིད་མཚོན་
ཆ་མཉམ། །ཞེས་ཀྱང་འབྱུང་ལ་དེའི་དོན་འཁོར་ལོར་གནས་པ་དང༌། མི་གནས་པའི་རང་ཉིད་གཉིས་མཚོན་ཆའི་དྲ་བས་གོ་བགོ་བ་མཉམ་པར་བྱ་བའི་དོན་དུ་རྒྱལ་བ་བཟང་པོས་བཤད་ལ། གཉིས་ཀའི་བཤད་སྦྱར་དུ། བདག་ཉིད་འཁོར་ལོ་ལ་གནས་པ། །ཞེས་
9-5-33a


འབྱུང་ཞིང༌། དེའི་དོན་བསྲུང་འཁོར་གྱི་ལྟེ་བ་ལ་གནས་པ་ལ་བཤད་དོ། །རྩ་རྒྱུད་ཀྱི་དོན་དེ་བཤད་རྒྱུད་ཀྱིས་འགྲེལ་པ་ལ་ཚུལ་གསུམ་ཡོད་པའི་དང་པོ་མངོན་བརྗོད་ལས་བཤད་ཚུལ་ནི། འོད་ཟེར་ཕྱོགས་བཅུར་སྤྲོས་པ་ལས། རྡོ་རྗེའི་ས་གཞི་
དང་ར་བ་དང་དྲ་བ་དང་། བླ་རེ་དང་མདའི་དྲ་བ་དང༌། རྡོ་རྗེའི་མེ་འབར་བར་བསམས་ནས་མེ་དི་ནི་ལ་སོགས་པའི་སྔགས་དྲུག་བརྗོད། དེ་ནས་ཧེ་རུ་ཀའི་བཀའི་འཁོར་ལོ་རྩིབས་བརྒྱད་པ་འབར་བ་བལྟས་ནས་དེའི་དབུས་སུ་ཉི་མ་ལ་རྡོར་སེམས་དཀར་པོ། རྩ་ཞལ་དཀར་པོ་
ཞི་བ་གཡས་སེར་གཡོན་ལྗང་བ་གཉིས་ཁྲོ་བ། ཕྱག་དྲུག་གི་དང་པོ་གཉིས་ཀྱིས་རྡོར་དྲིལ། བར་པ་གཉིས་ཀྱིས་ཐོད་པ་དང་ཁ་ཊྭཱཾ་ག །ཐ་མ་གཉིས་ཀྱིས་ཞགས་པ་དང་ལྕགས་ཀྱུ་འཛིན་པ། རང་འདྲའི་ཕྱག་རྒྱ་མ་དང་མཉམ་པར་སྦྱོར་བ། སྐྱིལ་ཀྲུང་གིས་བཞུགས་པ། 
ཐོད་ཕྲེང་དང་མི་བསྐྱོད་པའི་དབུ་རྒྱན་ཅན། རྒྱན་ཐམས་ཅད་རྫོགས་པ། མཚན་དཔེ་དག་ལྡན་པ་བསམས་ལ། ཤར་ནས་ཕྱོགས་ལུགས་བཟློག་ཏུ་རྡོ་རྗེ་རྟག་པ་དང༌། རྡོ་རྗེ་ཉི་མ་དང༌། རྡོ་རྗེ་གཙུག་ཏོར་དང༌། རྡོ་རྗེ་ཐབ་སྦྱོར་རིམ་པ་བཞིན་དུ་སྔོ་སེར་དམར་ལྗང་བཞི་དང༌།
ཤར་ལྷོ་ནས་མཚམས་ལུངས་འབྱུང་དུ་རྡོ་རྗེ་གནོད་སྦྱིན་དང༌། རྡོ་རྗེ་དུས་དང༌། རྡོ་རྗེ་སྟོབས་པོ་ཆེ་དང༌། རྡོ་རྗེ་འཇིགས་བྱེད་རིམ་པ་བཞིན། དུད་ཁ། དཀར་པོ། ནག་པོ། སྔོ་དམར་བཞི་སྟེ་ཁྲོ་བོ་བརྒྱད་སྤྲོའོ། །དེ་ཐམས་ཅད་ཞལ་གསུམ་པ། ཕྱག་དྲུག་གི་དང་པོ་གཉིས་
ཀྱི་ཐོད་པ་དང༌། ཁ་ཊྭཱཾ་ག །བར་པ་གཉིས་ཀྱིས་ཞགས་པ་དང་ལྕགས་ཀྱུ། ཐ་མ་གཉིས་ཀྱིས་དྲིལ་བུ་དང་ཅང་ཏེའུ་འཛིན་པ། རང་འདྲའི་ཤེས་རབ་མས་འཁྱུད་པ། སྣ་ཚོགས་པད་མའི་སྟེང་ན་གཡས་བརྐྱང་གི་བཞུགས་པས་རིམ་པ་བཞིན་དུ་ཕྱོགས་སྐྱོང་བརྒྱད་
9-5-33b


མནན་པ། རབ་ཏུ་འཇིགས་པའི་ཐོད་པའི་དབུ་རྒྱན་ཅན། དབུ་སྐྲ་དམར་སེར་གྱེན་དུ་བརྫེས་ཤིང༌། མི་བཟད་པའི་མཆེ་བ་གཙིགས་པ། མིའི་རུས་པའི་རྒྱན་གྱིས་བརྒྱན་ཅིང༌། སྟག་ལྤགས་གོས་སུ་མནབས་པ། སྦྲུལ་རྒྱན་གྱིས་བརྒྱན་པའོ། །དེ་ནས་སྔར་གྱི་རྡོར་
སེམས་ཡོངས་སུ་གྱུར་པ་ལས། རང་ཉིད་ཧཱུཾ་མཛད་སྔོན་པོ་སྔོ་སེར་ལྗང་བའི་ཞལ་གསུམ་པ། ཕྱག་དྲུག་གི་དང་པོ་གཉིས་ཀྱིས་རྡོར་དྲིལ། བར་པ་གཉིས་ཀྱིས་ལྕགས་ཀྱུ་དང་ཞགས་པ། ཐ་མ་གཉིས་ཀྱིས་ཁ་ཊྭཱཾ་ག་དང་ཐོད་པ་འཛིན་པ། འོད་ཟེར་འབར་བའི་ཕྲེང་བ་འཁྲུགས་
པ། མཆེ་བ་གཙིགས་ཤིང་ཤིན་ཏུ་འཇིགས་པ། རྒྱན་ཐམས་ཅད་ཀྱིས་བརྒྱན་པ། མི་མགོ་ལྔ་བཅུའི་དོ་ཤལ་ཅན། ཐོད་ཕྲེང་གི་སྐ་རགས་ཅན། རྡོ་རྗེ་སེམས་དཔས་དབུ་བརྒྱན་པ། རང་འདྲའི་ཤེས་རབ་མ་དང་སྙོམས་པར་འཇུག་པ། གདུག་པ་ཐམས་ཅད་ཀྱི་བདག་
པོ་འཇིགས་བྱེད་དང༌། དུས་མཚན་གཡས་བརྐྱང་གི་སྟབས་ཀྱིས་མནན་པའོ། །དེ་ནས་སྟེང་དུ་གཙུག་ཏོར་དཀར་པོ་དང༌། འོག་ཏུ་རྡོ་རྗེ་ས་འོག་ནག་པོ་ཞལ་གསུམ་པ། ཕྱག་བརྒྱད་ཀྱི་དང་པོ་གཉིས་ཀྱིས་རྡོར་དྲིལ། གཉིས་པ་གཉིས་ཀྱིས་ལྕགས་ཀྱུ་དང་ཞགས་པ། གསུམ་
པ་གཉིས་ཀྱིས་མདུང་རྩེ་གསུམ་དང་འཁོར་ལོ། བཞི་པ་གཉིས་ཀྱིས་ཐོད་པ་དང་ཁ་ཊྭཱཾ་ག་འཛིན་པ། གཡས་བརྐྱང་གིས་བཞུགས་པ་བསྒོམ་མོ། །དེ་ནས་སྟོད་ཁྲོ་བོ་བཅུ་ལ་སྨད་ཕུར་བུའི་རྣམ་པ་ཅན་གྱི་ཕུར་པུ་བཅུ་ཕྱོགས་བཅུར་སྤྲོས་ལ། བགེགས་མེད་པར་
གྱིས་ཤིག་ཅེས་ཁྲོ་བོ་བཅུ་ལ་བཀའ་བསྒོ་སྟེ། ཞལ་བཞི་པའི་སྔགས་བརྗོད་ཅིང༌། མཐེབ་མཛུབ་ཀྱི་སྦྱོར་བས་ཕྱོགས་བཞི་གཡོན་སྐོར་དང༌། མཚམས་བཞི་གཡས་སྐོར་དང༌། སྟེང་འོག་སྟེ་ཕྱོགས་བཅུར་སེ་ཁོལ་བརྡབ་བོ། །དེ་ནས་གཡོན་སྐོར་དང་གཡས་
9-5-34a


སྐོར་གྱིས་ཕུར་བུ་འདེབས་པའི་སྔགས་ཀྱིས་ཕུར་བུ་གདབ། གཡོན་དང་གཡས་སུ་བསྐོར་བས་ཐོ་བས་བརྡུང་བའི་སྔགས་བརྗོད་ལ་བརྡུང་ངོ༌། །དེ་ནས་ཨོཾ་ཁ་བཛྲ་དྷྲིཀ་བཛྲ་ཧཱུཾ་ཀ་ར་བཛྲ་ཧཱུཾ་ཕཊ། ཨོཾ་བཛྲ་ཙནྜ་བཛྲ་ཧཱུཾ་ཕཊ། ཨོཾ་བཛྲ་ཨ་
ན་ལཱ་རྐ་བཛྲ་ཧཱུཾ་ཕཊ། ཨོཾ་བཛྲོཥྞཱི་ཥ་བཛྲ་ཧཱུཾ་ཕཊ། ཨོཾ་བཛྲ་ཡཀྵ་བཛྲ་ཧཱུཾ་ཕཊ། ཨོཾ་བཛྲ་ཀཱ་ལ་བཛྲ་ཧཱུཾ་ཕཊ། ཨོཾ་བཛྲ་མཧཱ་བཱ་ལ་བཛྲ་ཧཱུཾ་ཕཊ། ཨོཾ་བཛྲ་བྷཱི་ཥ་ཎ་བཛྲ་བྷཱུཾ་ཕཊ། ཨོཾ་བཛྲ་ཨུཥྞཱི་ཥ་ཙཀྲ་པར་ཏི་བཛྲ་ཧཱུཾ་ཕཊ། ཨོཾ་བཛྲ་པཱ་ཏ་ལ་བཛྲ་
ཧཱུཾ་ཕཊ། ཅེས་པ་གཙོ་བོ་དང་འཁོར་བཅུའི་བཟླས་པ་བྱ། འཁོར་གྱི་ཁྲོ་བོ་ཞལ་གསུམ་པའི་མདོག་ནི་སེར་པོའི་གཡས་ནག་གཡོན་ལྗང་བ་དང༌། དམར་པོ་དང་དུད་ཁ་དང་དཀར་པོ་གཉིས་ཀྱི་གཡས་སེར་གཡོན་ལྗང་བ་དང༌། ལྷག་མ་ལྔ་ཧཱུཾ་མཛད་དང་འདྲ་བར་
གསུངས་སོ། །མངོན་བརྗོད་ཀྱི་འགྲེལ་པར། དང་པོར་འཁོར་ལོ་རྩིབས་བརྒྱད་པའི་དབུས་སུ་རྡོར་སེམས་ཡབ་ཡུམ་བསྐྱེད་པའི་ཐུགས་ཀ་ནས་ཁྲོ་བོ་བརྒྱད། རྩིབས་བརྒྱད་ཀྱི་སྟེང་དུ་སྤྲོ། དེ་ནས་རྡོར་སེམས་ཧཱུཾ་མཛད་དུ་བསྒྱུར་བའི་ཐུགས་ཀ་ནས་སྟེང་འོག་
གི་ཁྲོ་བོ་གཉིས་སྤྲོ། དེ་ནས་ཧཱུཾ་མཛད་ཀྱི་ཐུགས་ཀ་ནས་ཕུར་བུའི་ཁྲོ་བོ་བཅུ་ཕྱོགས་བཅུར་སྤྲོས་ནས་བགེགས་ལ་ཕུར་བུས་འདེབས། དོ་ནས་ཁྲོ་བོ་བཅུ་ལ་ཕྱོགས་སྐྱོང་སོ་སོའི་བགེགས་མེད་པར་གྱིས་ཤིག་ཅེས་ཞལ་བཞི་པའི་སྔགས་ཀྱིས་བཀའ་བསྒོ། དེ་
ནས་བགེགས་མི་འཇུག་པར་བྱ་ཕྱིར་ཧཱུཾ་མཛད་ཀྱི་ཐུགས་ཀ་ནས་རྡོ་རྗེ་ཕྲ་མོའི་འོད་ཟེར་སྤྲོས་པ་ཡོངས་སུ་གྱུར་པ་ལས། འོག་ཏུ་རྡོ་རྗེའི་ས་གཞི་དང༌། འོག་གི་ས་གཞི་གཉིས་དང༌། ལོགས་སུ་རྡོ་རྗེའི་ར་བ་དང་རྭ་བ་ཉིས་རིམ། སྟེང་དུ་རྡོ་རྗེའི་བླ་རེ་དང་མདའི་བླ་
9-5-34b


རེ་ཉིས་རིམ། ཐམས་ཅད་ཀྱི་ཕྱི་རོལ་ནས་རྡོ་རྗེའི་མེ་འོད་འབར་བ་རྒྱ་ཇི་ཙམ་འདོད་པར་བསྐོར་བར་བསམས་ནས་སྔགས་གཅིག་དང་གཉིས་དང༌། གཉིས་དང་གཅིག་གིས་བྱིན་གྱིས་རློབ་པ་དང་ལྷོའི་ཁྲོ་བོ་ཡང་དབུས་སྔོ་ལ་གཡས་སེར་གཡོན་ལྗང་དང༌། ལྷག་
མ་བཞི་ཧཱུཾ་མཛད་དང་འདྲ་བར་འཆད་དེ། ལྷོའི་ཞལ་མདོག་འདི་ད་ལྟའི་རྒྱུད་ན་མི་སྣང་ངོ༌། །བསྲུང་འཁོར་གྱི་སྐབས་སུ་མངོན་བརྗོད་ལ་འགྱུར་མི་འདྲ་བ་མང་དུ་སྣང་ཡང་འགྱུར་བཟང་བའི་ལུགས་སུ་བྱས་སོ། །འཁོར་ལོ་རྩིབས་བརྒྱད་པར་བཤད་པ་ནི་མཐའི་རྩིབས་
ལ་དགོངས། སྟེང་འོག་གི་རྩིབས་གཉིས་ནི་དབུས་སུ་ཡོད་དེ་བྷྲུཾ་ལས་བསྐྱེད་དོ། །དེ་ཡང་མན་སྙེ་ལས། འཁོར་ལོ་སེར་པོ་རྩིབས་བཅུ་པའི་ལྟེ་བའི་དབུས་ཀྱི་ནང་དུ་ཞེས་གསུངས་ལ། ནང་དུ་ཞེས་པ་ཙམ་གྱིས་ནི་ལྟེ་བ་སྦུབས་ཅན་དུ་མི་འགྲུབ་སྟེ། སྤྱོད་རྒྱུད་
ལས། རྩིབས་ཀྱི་ནང་ནི་ཐམས་ཅད་ན། །བཞུགས་པའི་རྡོ་རྗེ་སེམས་དཔའ་སོགས། །ཞེས་འབྱུང་བ་ལྟར་རོ། །འོན་ཀྱང་འདིར་ནི་དེ་དག་མི་འདྲ་སྟེ། མན་སྙེ་ལས། འཁོར་ལོ་སེར་པོ་གཡས་སྐོར་དུ་འཁོར་བ་རྩིབས་བཅུ་པའི་ལྟེ་བའི་དབུས་ཀྱི་བར་སྐབས་སུ་གནས་
པའི་བདག་ཉིད། ཅེས་ལྟེ་བ་ཁོང་སྟོང་གི་ཕན་ཚུན་གྱི་བར་སྐབས་སུ་རང་ཉིད་ལྷར་སྐྱེད་པར་གསུངས་པས་ལྟེ་བའི་ཁོང་གསེང་གི་ཡར་རྩེ་དང་མར་རྩེ་གཉིས་སྟེང་འོག་གི་རྩིབས་སུ་ཤེས་སོ། །རྩིབས་བརྒྱད་ཀྱི་ནི། རྩིབས་ཀྱི་རྩེ་མོའི་སྟེང་དུ་ཁྲོ་བོ་དགོད་པར་ཡང་
བཤད་དོ། །འཁོར་ལོ་སེར་པོ་རྩིབས་བཅུ་པ་ཇི་ལྟར་སྒོམ་པ་ནི་རྒྱ་གཞུང་རྣམས་ལ་འདི་ཉིད་གསལ་ལོ། །སྣ་ཚོགས་པད་ཉི་ནི་ཀུན་ལ་བྱ་ལ། རྒྱུད་ནས་བཤད་པའི་རིམ་པ་ལ་དེ་ལྟར་བྱུང་ཡང་ཐོག་མར་རྡོར་སེམས་དང་ཧཱུཾ་མཛད་བསྐྱེད་ནས། དེ་ནས་ཁྲོ་བཅུ་
9-5-35a


སྒོམ་པར་གཞན་ནས་བཤད་པ་བཞིན་བྱས་ཀྱང་མི་འགལ་ལ། ར་གུར་སོགས་སྔོན་དུ་བཏང་ནས་ཕྱིས་ཁྲོ་བོ་སྒོམ་པ་ཡང་ཁུངས་ཐུབ་མང་པོས་བཤད་དོ། །བསྲུང་འཁོར་གྱི་གཙོ་བོ་སྐྱེད་ཚུལ་འདི་སྐབས་གཞན་དུ་ཡངམཁོའོ། །འདི་ལ་
མངོན་བརྗོད་ནས་བཤད་པའི་སྔགས་རིངས་བཏོན་ནས་ཀྱང་ཕྱིར་ཟློག་བྱས་པས་ཆོག་པ་དང༌། བདེ་མཆོག་ལ་རྣལ་འབྱོར་བྱེད་པ་རྣམས་ཀྱི་བར་ཆད་ཕྱིར་ཟློག་པ་ལ་མཁོ་བར་སྣང་བས་འདིར་བྲིས་སོ། །དེ་ལྟར་རྡོ་རྗེའི་ར་གུར་སོགས་ཀྱི་བསྲུང་འཁོར་ཐུན་མོང་བ་
དང༌། ཕུར་གདབ་ད་ག ། ཐུན་མོང་མ་ཡི་པ་ཁྲོ་བཅུའི་བསྲུང་འཁོར་དང་བཅས་པ་འདི་ནི་བསྲུང་འཁོར་རྒྱས་པའོ། །ཕག་མོ་མངོན་འབྱུང་ལས། ཉི་མའི་འོད་ཟེར་ལྟ་བུ་སྤྲོས་པ་ལས། རྡོ་རྗེའི་ར་བ་དང་དྲ་བ་དང༌། ས་གཞི་དང༌། བླ་རེ་དང་མདའི་དྲ་བ་དང༌། རྡོ་རྗེའི་མེའི་དྲ་
བ་སྐྱེད་པ་དང༌། དེ་ནས་སྔགས་དྲུག་གིས་བྱིན་གྱིས་རློབ་པ་དང༌། དེ་ནས་ཕྱོགས་བཅུར་མཐེབ་མཛུབ་ཀྱིས་སེ་གོལ་གཏོག་ཅིང༌། ཞལ་བཞི་པའི་སྔགས་ཤར་ནས་གཡོན་སྐོར་དུ་ཕྱོགས་བཞིར་དགོད་པ་དང༌། དེ་ནས་ཕུར་བུ་འདེབས་པ་དང༌། དེ་བརྡུང་བའི་སྔགས་དང་
བཅས་པ་རྣམས་ལུགས་འབྱུང་དང་ལུགས་བཟློག་ཏུ་བྱེད་པར་བཤད་ཅིང༌། ཁྲོ་བཅུ་སྒོམ་པ་མ་བཤད་དེ། མངོན་བརྗོད་ལས་བཤད་པའི་སྟེང་ནས་ཐུན་མོང་མ་ཡིན་པའི་བསྲུང་འཁོར་བཞག་པ་འདི་ནི་བསྲུང་འཁོར་འབྲིང་པོ་སྟེ། འབྲིང་པོ་རྣམས་ཀྱང་འདི་ཁོ་ནར་
མ་ངེས་སོ། །ལོ་ནག་གཉིས་ཀྱི་གཞུང་ནས་འབྱུང་བའི་བསྲུང་འཁོར་ཡང་བསྲུང་འཁོར་འབྲིང་པོའོ། །སྡོམ་འབྱུང་ལས། ཞལ་བཞི་པའི་སྔགས་བརྗོད་པས་ཕྱོགས་ནི་བཅིང་ཞིང་ར་བ་སྟེ། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཤར་དུའོ། །ཨོཾ་གྲི་ཧྞ་གྲི་ཧྞ་ཧཱུཾ་ཧཱུཾ་ཕཊ། བྱང་
9-5-35b


དུའོ། །ཨོཾ་གྲིཧྞཱ་པ་ཡ་གྲིཧྞཱ་པ་ཡ་ཧཱུཾ་ཧཱུཾཾ་ཕཊ། ནུབ་ཏུའོ། །ཨོཾ་ཨཱ་ན་ཡ་ཧོ་བིདྱཱ་རཱ་ཛཱ་ཧཱུཾ་ཧཱུཾ་ཕཊ། ལྷོ་རུའོ། །ཕྱོགས་སུ་སེ་གོལ་བརྡབས་པ་ཡིས། གདུག་པའི་བདུད་རྣམས་བསྐྲད་པར་བྱ། ཞེས་སྔར་གྱི་དེ་དག་གི་སྟེང་ནས་ཁྲོ་བཅུ་དང༌། ཕུར་གདབ་ཀྱི་སྐོར་དང༌། སྔགས་
དྲུག་བཞག་པ་ཞིག་གསུངས་ཏེ་བསྲུང་འཁོར་བསྡུས་པ་ཡང་འདི་ཁོ་ན་ལྟར་མ་ངེས་སོ། །འདི་ལ་གཡོན་གྱི་མཐེབ་མཛུབ་ཀྱིས་ཕྱོགས་རྣམས་སུ་སེ་གོལ་བརྡབས་ནས་སྔགས་བརྗོད་དེ་བགེགས་སྐྲོད་པ་ནི་ཕྱོགས་བཅིང་བ་ཡིན་ལ། སྔགས་བཞི་བརྗོད་ནས་རབ་
བྱ་བར་ཡང་གསུངས་པས། ར་བ་སྐྱེད་པ་ནི་དེ་རྐྱང་པ་མིན་པས་རྡོ་རྗེའི་ས་གཞི་དང་གུར་དང་བླ་རེ་དང་མདའི་དྲ་བ་དང་མེ་དཔུང་ཡང་བསྒོམ་སྟེ། དེའི་ཚུལ་ནི་དེའི་འགྲེལ་པར་གཡོན་གྱི་མཐེབ་མཛུབ་ཀྱིས་སེ་གོལ་བྱས་པ་དང་དུས་མཉམ་པར་ཤར་ལ་སོགས་པའི་ཕྱོགས་
གཡོན་སྐོར་དུ་སྔགས་བཞི་ལས་བྱུང་བའི་སྔོ་ལྗང་དམར་སེར་གྱི་རང་བཞིན་བཞི་དང༌། དེ་དང་དུས་མཚུངས་སུ་འོག་ཏུ་ཧཱུཾ་ལས་སྐྱེས་པའི་སྣ་ཚོགས་རྡོ་རྗེའི་རང་བཞིན་གྱི་ས་གཞི་དང༌། དེ་ནས་དེའི་འོད་ཟེར་ལས་སྟེང་དུ་རྡོ་རྗེའི་མདའི་དྲ་བ་དང༌། རྡོ་རྗེའི་གུར་
དང༌། བླ་རེ་བསམ་པར་བཤད་དེ། རྡོ་རྗེའི་མེས་བསྐོར་བ་ཡང་དགོས་སོ། །འདི་ནི་ལཱུ་ཨི་པའི་མན་ངག་ལས་འོགས་པ་ལྭ་བ་པས་བཤད་པའི་གདམས་པའོ། །འདི་ལ་བལ་པོ་ཀྵནྟ་ཤྲཱིས་གཞན་སྔར་དང་འདྲ་བ་ལ་ར་གུར་སོགས་བསྒོམས་པའི་འོག་ཏུ་སྔགས་
བཞི་པོ་བརྗོད་ཅིང༌། ཕྱོགས་རྣམས་སུ་སེ་གོལ་བརྡབས་པས་གདུག་པ་རྣམས་བསྐྲད་དེ། རྣམ་པ་ཐམས་ཅད་དུ་འགྲོ་བ་བགེགས་དང་བྲལ་པར་མོས་པར་བྱ་བར་བཤད་ཅིང༌། བསྲུང་འཁོར་བསྡུས་པའི་ལུགས་སུ་བཤད་པ་དང༌། འགྲེལ་པའི་ལུགས་
9-5-36a


གཉིས་རྒྱུད་འདིའི་དོན་ཡིན་པས་ལེགས་སོ། །དེ་ལྟར་བསྲུང་འཁོར་གསུམ་བཤད་པའི་དང་པོ་ནི་མངོན་བརྗོད་ཀྱི་འགྲེལ་པར་རྒྱུད་དེ་ནས་བཤད་པའི་བདེ་མཆོག་གི་སྒྲུབ་ཐབས་ང་དྲུག་གི་ཐུན་མོང་དུ་བཤད་ལ། ལྷ་ལྔ་དང་ལུས་
དཀྱིལ་དཔའ་བོ་གཅིག་པ་ལ་ཡང་བྱེད་པ་རྒྱུད་ཀྱི་དགོངས་པར་སྣང་བས་ལྷ་མང་ཉུང་གིས་བསྲུང་འཁོར་རྒྱས་བསྡུས་སུ་འགྲོ་བ་ཡང་མིན་ལ། ལུས་དཀྱིལ་ལ་བསྲུང་འཁོར་བསྒོམ་མི་དགོས་པ་ཡང་མིན་པས། མ་ན་ཀ་ཤྲཱིས་ལྷ་རེ་གཉིས་པའི་ལུས་དཀྱིལ་
ལ་ཡང་བསྲུང་འཁོར་འབྲིང་པོ་བཤད་དོ། །དེས་ན་བསྲུང་འཁོར་གྱི་ཚུལ་གསུམ་པོ་དེ་ལེགས་པར་ཤེས་ན་སྐབས་དང་དགོས་པ་དང་བསྟུན་ནས་རྒྱ་སྐྱེད་ནའང་སྐྱེད་ཤེས་ལ། བསྡུས་ནའང་ངེས་པར་བྱ་དགོས་ཀྱི་ཆོ་ག་མི་འཆད་པ་ཞིག་འོང་བས་འདིར་
བཤད་དོ། །གཉིས་པ་ལ་གཉིས། ར་བ་སོགས་ཀྱི་བསྲུང་བ་བཤད་པ་དང༌། བགེགས་ལ་ཕུར་བུས་གདབ་པ་སོགས་བཤད་པའོ། །དང་པོ་ལ་གཉིས། བསྒོམ་པའི་རིམ་པ་བཤད་པ་དང༌། སྔགས་རྣམས་ཀྱི་དོན་བཤད་པའོ། །དང་པོ་ནི། ལྷ་བཅུ་བདུན་པོ་བསྒོམས་
པས་ཕུང་སོགས་སྦྱངས་པའི་མཇུག་དེ་ནས་རྡོ་རྗེའི་གུར་བསམ་པར་བྱའོ་ཞེས་མདོར་བསྟན་པ་ནི། བསྲུང་འཁོར་ཐུན་མོང་བའི་སྤྱི་མིང་ལ་དེའི་ཕྱོགས་གཅིག་གིས་བཏགས་པ་སྟེ། བརྡ་འདི་ནི་རྣལ་འབྱོར་རྫོགས་ཕྲེང་སོགས་ལས་མང་དུ་འབྱུང་ངོ༌། །ལོ་ཆེན་གྱི་
འགྱུར་དང༌། ཇོ་བོའི་འགྲེལ་པ་ལས། རྡོ་རྗེའི་ར་བ་ཞེས་འབྱུང་བ་ནི་དྲ་བ་ར་བར་སོང་བ་བོད་དཔེ་མ་དག་པའོ། །གུར་དང་དྲ་བ་གཉིས་སྐད་དོད་གཅིག་པས་འགྱུར་གཉིས་བྱུང་ཡང་གུར་དུ་བསྒྱུར་ན་འཁྲུལ་གཞི་ཆུང་ངོ༌། །ལྭ་བ་པ་དང་པྲཛྙ་རཀྵི་ཏའི་འགྲེལ་པ་ལས། 
9-5-36b


ཤར་ལ་སོགས་པའི་ཕྱོགས་སུ་བཞག་པ་སྟེ་དགོས་པར་བྱའོ། ཞེས་པ་ནས་རྡོ་རྗེའི་བླ་རེའི་ཞེས་པའི་བར་གྱི་ཚིག་བདུན་པོ་འདི་རྣམས་མན་ངག་ཇི་སྟ་བ་བཞིན་དགྲོལ་བར་བྱའོ། ཞེས་འབྱུང་བའི་ཚིག་བདུན་ནི། སྔགས་ཚན་རེ་རེ་ཕྱོགས་བཞིར་འགོད་པ་བཞི་དང༌། ལྷག་
མའི་ཚིག་ཚན་པ་གསུམ་མོ། །ལག་པ་གཡོན་པའི་མཐེབ་མཛུབ་ཀྱིས་སེ་གོལ་ཕྱོགས་རེ་རེ་གཏོག་པ་སྔོན་དུ་འགྲོ་བས། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཅེས་པས་ཤར་དང༌། ཨོཾ་གྲིཧྞ་གྲིཧྞ་ཧཱུཾ་ཧཱུཾ་ཕཊ། ཅེས་པས་བྱང་དང༌། ཨོཾ་གྲིཧྞཱ་པ་ཡ་གྲིཧྞཱ་པ་ཡ་ཧཱུཾ་ཧཱུཾ་ཕཊ། ཅེས་པས་
ནུབ་དང༌། ཨོཾ་ཨཱ་ན་ཡ་ཧོ་བྷ་ག་ཝཱ་ན་བཛྲ་རཱ་ཛ་ཧཱུཾ་ཧཱུཾ་ཕཊ། ཅེས་པས་ལྷོའི་ཕྱོགས་སུ་རིམ་པ་བཞིན་དུ་ནག་པོ་དང༌། ལྗང་གུ་དང༌། དམར་པོ་དང༌། སེར་པོའི་མདོག་ཅན་སྟེང་ཚངས་པའི་འཇིག་རྟེན་ནས་འོག་གསེར་གྱི་ས་གཞི་ལ་ཐུག་པར་ཁྱབ་པའི་འབར་བའི་ལུས་ཆེན་
པོ་རྣམས་རིམ་གྱིས་དགོད་པར་བྱའོ། །སོགས་ཀྱི་སྒྲས་ནི་ཕྱོགས་གཞན་གསུམ་གཟུང་ངོ༌། །འགྲེལ་བ་གསུམ་གར་ཕྱོགས་སུ་འགོང་ལུགས་དེ་བཞིན་དུ་བཤད་ལ། ལུས་ཤིན་ཏུ་ཆེ་བ་བཞི་ནི་ལྷ་དང་སྔགས་ཀྱི་ལུས་གང་ཡིན་གསལ་བར་མ་བཤད་ཀྱང་ལྭ་བ་པས་
སྔར་ལྟར་ཕྱོགས་སུ་བཀོད་པའི་མཇུག་ཏུ། སུམྦྷ་ལ་སོགས་པའི་སྔགས་ཀྱི་འོད་ཟེར་ལས། དེའི་ཁ་དོག་ཅན་གྱི་ར་བ་བཞི་དང༌། ཞེས་གསུངས་ཤིང༌། འགྲེལ་པ་གཞན་གཉིས་ཀྱང་དེ་དང་དོན་འདྲ་བར་སྣང་ལ། དེ་ལྟར་ན་སུམྦྷ་ལ་སོགས་པའི་སྔགས་ཀྱི་འོད་ཟེར་ལས་
དེའི་ཁ་དོག་ཅན་གྱི་རེ་བ་བཞི་སྒོམ་པ་ནི། སྔགས་བཀོད་པ་བཞི་པོ་ལས་སྐྱེད་པ་ཡིན་པས་ལུས་ཤིན་ཏུ་ཆེ་བའི་སྔོ་སོགས་བཞི་ནི་སྔགས་འོད་ཟེར་དང་བཅས་པའི་ལུས་ཡིན་ནོ། །དེ་ཡང་ཐོག་མར་སྔགས་བརྗོད་པས་ཕྱོགས་བཞིར་སྔགས་ཁ་དོག་བཞི་འགོད། དེ་ནས་
9-5-37a


དེ་ལས་འོད་ཟེར་སྤྲོས་འོད་ཟེར་གྱི་ལུས་ཆེ་བ་བཞི་དགོད། །དེ་ནས་སྔགས་འདོ་ཟེར་དང་བཅས་པ་ཡོངས་སུ་གྱུར་པ་ལས། ཁ་དོག་བཞི་པའི་རབ་གྲུ་བཞི་པ་བསྒོམ་པར་བྱ་སྟེ། འཁྲུལ་སྤོང་ལས། སྔགས་བཞི་པོ་བརྗོད་པས་ནག་པོ་དང༌། 
ལྗང་གུ་དང༌། དམར་པོ་དང༌། སེར་པོ་ལས་འཕྲོས་པའི་གཟུགས་ཤིན་ཏུ་ཆེ་ཞིང་འོད་འབར་བ། ཚངས་པའི་གནས་ནས་ས་འོག་ཏུ་ཁྱབ་པ། ཤར་དང་བྱང་དང་ནུབ་དང་ལྷོ་ཕྱོགས་སུ་རིམ་པ་ལྟར་བཀོད་པས། དེའི་འོད་ཟེར་གྱིས་དེའི་ཁ་དོག་དང་མཚུངས་པའི་རྡོ་
རྗེའི་ར་བ་གྲུ་བཞི་པ་ཞེས་བཤད་པ་ལྟར་རོ། །བླ་མ་མར་དོས། ཤར་ལ་སོགས་པའི་ཕྱོགས་དང༌། མེ་ལ་སོགས་པའི་མཚམས་སུ་ལུགས་དང་མཐུན་མི་མཐུན་དུ་སེ་གོལ་གཏོག་ཅིང༌། སྔགས་རྐང་རེ་རེ་བརྗོད་པའི་ཚེ་སྔགས་ཁ་དོག་དམར་པོ་འབར་བ་ཡིག་འབྲུ་
ཆེ་བ་ཕྱོགས་དེ་དང་དེར་ཁ་ནས་འཕྲོས་པས་སྔགས་དེ་དང་དེ་ལས་འཕྲོས་པའི་བྱ་རོག་གདོང་ལ་སོགས་པ་དམར་མོ། ཞབས་འོག་གི་ས་ལ་བཞག་ཅིང་དབུ་ཚངས་པའི་གནས་སུ་ཐུག་པ། ཕྱག་གཉིས་ཀྱིས་ཐོ་བ་དང་ཕུར་བུ་བསྣམས་པ་སྤྲོས་ལ། དེ་དག་གིས་
བགེགས་རྣམས་ཐག་ཤིན་ཏུ་རིང་པོར་བསྐྲད་པར་བསམ་མོ། །དེ་ནས་སྔགས་དེ་དག་ཡོངས་སུ་གྱུར་པ་ལས། རྡོ་རྗེའི་ར་བ་ཁ་དོག་དམར་པོ་གྲུ་བཞི་པ་བསྒོམ་ཞེས་བཞེད་པ་ནི་ལྷ་མོའི་སྐུའི་ཚད་དང༌། ར་བ་དམར་པོར་བཤད་པ་མ་གཏོགས་པ་གཞན་རྣམས་
ལྭ་བ་པས་བཅུ་གསུམ་མའི་སྒྲུབ་ཐབས་སུ་བཤད་པ་བཞིན་ཡིན་ནའང་འདིར་སྐབས་སུ་མ་བབ་ལ། དྲིལ་བུ་ཞབས་ཀྱི་ལྷ་ལྔའི་ལུགས་ནི་དེ་བཞིན་དུ་བྱ་རྒྱུར་སྣང་ངོ༌། །ཕྱོས་ཀྱི་བླ་མ་ཁ་ཅིག་སྔགས་བཞི་བརྗོད་པས་ཕྱོགས་བཞིར་ཁྭ་གདོང་མ་ལ་སོགས་པ་
9-5-37b


ལུས་ཤིན་ཏུ་ཆེ་བ་བཞི་བཀོད་ལ། སྔགས་བཞིའི་འོད་ཟེར་དང་དེའི་ཁ་དོག་ལས་གྲུབ་པའི་རྡོ་རྗེ་རྩེ་ལྔ་པའི་ར་བ་གྲུ་བཞི་བསྒོམ་གསུངས་པ་ཡང་སྔ་མ་ཡང་སྔ་མ་ལས་ཅུང་ལེགས་ཀྱང་དོན་དུ་མ་མཐོང་སྟེ། སྡོམ་འབྱུང་ལས། ཞལ་བཞི་པའི་སྔགས་ཀྱིས་ར་བ་བྱ་བར་
གསུངས་པ་ལྟར་སྔགས་ལས་ར་བསྐྱེད་པ་ཡིན་གྱི། སྒོམ་བཞི་ལས་ར་བ་སྐྱེད་པ་གང་ནའང་མི་སྣང་བའི་ཕྱིར་རོ། །མངོན་བརྗོད་ལས་སྔགས་བཞི་ཕྱོགས་བཞིར་བརྗོད་པར་གསུངས་པ་ནི། ར་བ་བྱེད་པའི་དོན་མིན་ཏེ། དེར་ནི་ར་བ་སྔོན་དུ་བསྐྱེད་ཟིན་པའི་
ཕྱིར་རོ། །དེ་ནས་དེ་ནི་དེའི་འགྲེལ་པ་ནས་འཁོར་གྱི་ཁྲོ་བོ་རྣམས་ལ་བཀའ་བསྒོ་བའི་དོན་དུ་བཤད་པ་དང་། བྲམ་ཟེ་རིན་ཆེན་རྡོ་རྗེས་བགེགས་འགུགས་པའི་དོན་དུ་བཤད་པ་ལྟར་ཡིན་ལ། ཕག་མོ་མངོན་འབྱུང་ལས་ཀྱང་ར་བ་སོགས་བསྐྱེད་པ་སྔོན་དུ་སོང་
ཟིན་ཞིང༌། ཁྲོ་བོ་བཅུ་སྒོམ་པ་མེད་པས་སྔགས་བཞི་ཕྱོགས་བཞིར་བརྗོད་པ་ནི་བགེགས་དགུག་པའམ་བསྐྲད་པའི་དོན་དུའོ། །སྡོམ་འབྱུང་ལས་ནི་ཕྱོགས་བཅིང་པ་དང༌། ར་བ་བྱེད་པའི་དོན་དུ་གསུངས་པས་འདིར་ཕྱོགས་བཞིར་སྔགས་བཞི་འགོད་པ་ནི་
རྒྱུད་དེ་དང་མཐུན་ནོ། །ར་བ་གྲུབ་པ་དང་དུས་མཉམ་དུ་ཡི་གེ་ཧཱུཾ་ལས་བྱུང་ཞིང༌། དེ་ཡིས་མཚན་པའི་སྣ་ཚོགས་རྡོ་རྗེའི་ས་བོན་གྱི་འོད་ཟེར་ལས་འོག་གི་ས་གཞི་སྣ་ཚོགས་རྡོ་རྗེའི་རང་བཞིན་དུ་བྱིན་གྱིས་བརླབ་བོ། །ར་བ་འོག་ཏུ་གནས་པའི་གཞི་རྡོ་རྗེའི་
ས་གཞི་ཡིན་ཞིང༌། རྡོ་རྗེའི་ས་སྔོན་དུ་སྐྱེད་པ་ཡང་འདིར་མེད་པས་དུས་མཉམ་དུ་བསྐྱེད་པའོ། །སྣ་ཚོགས་རྡོ་རྗེའི་ས་བོན་གྱི་འོད་ཟེར་གྱི་སྣང་བ་ལས་སྟེང་དུ་རྡོ་རྗེ་རྩེ་ལྔ་པའི་རྣམ་པ་ཅན་གྱི་མདའི་འདྲ་བ་དང༌། དེའི་འོག་ཏུ་རྡོ་རྗེའི་གུར་དང༌། གུར་གྱི་འོག་ར་བའི་
9-5-38a


སྟེང་དུ་རྡོ་རྗེའི་བླ་རེ་རྣམས་བསྒོམ་མོ། །ལོ་ཆེན་དང་མར་དོ་དང་ཆག་འགྱུར་ལས་རྡོ་རྗེའི་ར་བ་དང་བླ་རེའོ་ཞེས་འབྱུང་ལ། ལྭ་བ་པའི་འགྲེལ་པར་རྡོ་རྗེའི་གུར་དང༌། རྡོ་རྗེའི་བླ་རེ་ཡང་ངོ༌། ཞེས་འབྱུང་ཞིང༌། སྔར་གྱི་བ་གྲུ་བཞི་པ་མ་གཏོགས་
པ་དེའི་རྗེས་སུ་ར་བ་བཤད་པ་མེད་ལ། པྲཛྙཱ་ར་ཀྵི་ཏ་དང་སྡོམ་འབྱུང་འགྲེལ་པར་ཡང་ཕྱིས་ར་བ་མ་བཤད་དོ། །འཁྲུལ་སྤོང་དང༌། ཁྱད་པར་གསལ་བྱེད་དང༌། ཀྵཱནྟི་ཤྲཱིས་ཕྱིས་ཀྱང་རྡོ་རྗེ་རྩེ་ལྔ་པའི་ར་བ་བཤད་དོ། །དེ་དག་གི་ལྟར་ན་སྔགས་བཞི་ལས་བསྐྱེད་
པའི་ར་བ་དང༌། སྣ་ཚོགས་རྡོ་རྗེའི་འོད་ཟེར་གྱི་སྣང་བ་ལས་བསྐྱེད་པའི་ར་བ་གཉིས་སྣང་བས་ར་བ་ཉིས་རིམ་བྱེད་པ་འདྲའོ། །ར་བ་ནི་གཞུང་དེ་གསུམ་རྡོ་རྗེ་རྩེ་ལྔ་པའི་ར་བར་བཤད་དོ། །དཀྱིལ་ཆོག་རྡོ་རྗེ་འཕྲེང་བ་ལས། རྩེ་ལྔ་པའམ་རྩེ་གསུམ་པའི་སྣ་
ཚོགས་རྡོ་རྗེའི་ར་བ་གདམ་ང་ཅན་དུ་བཤད་དོ། །སྒྲུབ་ཐབས་གཙུག་ནོར་ལས། ར་བ་བསྐྱེད་པ་དང་དེའི་སྔགས་ཀྱིས་བྱིན་གྱིས་རློབ། དེ་ནས་ར་བ་ལས་རབ་ཏུ་འབར་བའི་འོད་ཟེར་སྤྲོས་པ་ལས། དབུས་སུ་ཧཱུཾ་ལས་གྲུབ་པའི་སྣ་ཚོགས་རྡོ་རྗེ། དེ་ལས་འོག་
གཞི་སྣ་ཚོགས་རྡོ་རྗེར་བྱས་ལ། མེ་དི་ནིའི་སྔགས་ཀྱིས་བྱིན་གྱིས་བརླབ་བོ། །དེ་ནས་ས་དང་ར་བ་ལས་འོད་ཟེར་འཕྲོས་པ་ལས་གུར་དང༌། དེ་ལས་བླ་རེ་དང༌། དེ་ལས་མདའི་དྲ་བ་བསྐྱེད་ཅིང༌། རང་རང་གི་སྔགས་ཀྱིས་བྱིན་གྱིས་རློབ་པར་བཤད་པ་བཞིན། འདི་ལའང་བྱ་
བར་མར་དོ་བཞེང་མོད་ཀྱང་འདིར་ནི་སྒྲུབ་ཐབས་ཀྱི་འགྲེལ་པར། ལྭ་བ་པས་བཤད་པ་བཞིན་བྱ། དྲིལ་བུ་ཞབས་ཀྱི་ལྷ་ལྔའི་སྒྲུབ་ཐབས་ནི། །ལྭ་བ་པའི་དོན་དུ་མཛད་པར་སྔ་མ་རྣམས་གསུང་ཞིང༌། དེ་དང་ལྭ་བ་པའི་བཅུ་གསུམ་མའི་སྒྲུབ་ཐབས་གཉིས་ཐུན་མོང་མ་ཡིན་པ་
9-5-38b


རྣམས་མ་གཏོགས་པ་གཞན་ཐམས་ཅད་ཤིན་ཏུ་མཐུན་པ་སར་བ་སོགས་སྐྱེད་པ་ཡང་དེ་བཞིན་དུ་བྱས་ན་ལེགས་སོ། །ར་བའི་དཔངས་ནི་ཁུངས་སྔ་མ་རྣམས་ལས། སྟེང་ཚངས་པའི་གནས་ནས་འོག་གསེར་གྱི་ས་ལ་ཐུག་གི་བར་དང༌། དཀྱིལ་ཆོག་རྡོ་ཕྲེང་ལས། སྟེང་འོག་
མིན་ནས་རླུང་གི་བར་ལ་བཤད་དོ། །རྒྱར་ནི་ཛ་ཙམ་འདོད་པར་ལྭ་བ་པས་གཞན་དུ་གསུངས་ཤིང༌། ནག་པོའི་དཀྱིལ་ཆོག་ལས། ལྕགས་རིའི་མཐར་ཐུག་པ་ཡི་བར། །རྡོ་རྗེའི་འཕྲེང་བས་མངོན་བསྐོར་ཞིང༌། །ཞེས་ཀྱང་གསུངས་སོ། །ར་བ་དང་གུར་གྱི་མཚམས་སུ་བླ་རེ་
བྱས་ལ་བར་མཚམས་མེད་པར་བྱ། མདའི་དྲ་བ་སྟེང་དུ་བྱེད་པར་འདིའི་འགྲེལ་པ་རྣམས་ལས་བཤད་ལ། ལྭ་བ་པའི་བཅུ་གསུམ་མའི་སྒྲུབ་ཐབས་ལས། ཕྱི་རོལ་དུ་སྟེང་དང་ལོགས་ཀུན་ཏུ་ཁྱབ་པར་བཤད་དོ། །མདའི་དྲ་བ་ཞེས་དམིགས་ཀྱིས་བཀར་ནས་བཤད་པ་མ་
གཏོགས་པར་བ་དང་དྲ་བ་ཞེས་པའི་སྐབས་སུ་ནི་གུར་བྱུང་ན་དྲ་བ་དང༌། དྲ་བ་བྱུང་ན་གུར་ཟུར་དུ་མི་དགོས་སོ། །རྡོ་རྗེ་རྩེ་ལྔ་པའི་མདའི་དྲ་བ་ལ་མཁས་པ་ཁ་ཅིག་དེའི་མདེའུ་ཅན་དུ་བཞེད་དོ། །ཞལ་བཞི་བའི་སྔགས་བཞི་བ་ལ་ལོ་ཆེན་གྱི་འགྱུར་དང༌། ཀུ་མཱར་བོདྷིའི་འགྲེལ་པར། 
བྷ་ག་ཝཱ་ན་བིདྱཱ་རཱ་ཛ་ཞེས་འབྱུང་ལ། མར་དོ་དང་ཆག་འགྱུར་ལས་བཛྲ་རཱ་ཛ་ཞེས་འབྱུང༌། འདིའི་སྐབས་ཀྱི་མངོན་བརྗོད་དང་ཕག་མོ་སྔོན་འབྱུང་ལས། བཛྲ་ཧཱུཾ་ཧཱུཾ་ཕཊ་ཅེས་འབྱུང་ཞིང་ལྷག་མ་རྣམས་འདིར་བཤད་པ་བཞིན་ཡོད་དེ་སྔགས་བཏུ་བ་དང་མཐུན་ནོ། །སྡོམ་
འབྱུང་འགྱུར་གསར་རྙིང་གཉིས་དང༌། ཀྵནྟི་ཤྲཱིའི་སྡོམ་འབྱུང་གི་སྒྲུབ་ཐབས་ལས། སྔགས་དང་པོ་གསུམ་འདྲ་ལ། བཞི་པ་ལ་ཨོཾ་ཨཱ་ན་ཡ་ཧོཿ་བིདྱཱ་རཱ་ཛ་ཧཱུཾ་ཧཱུཾ་ཕཊ་ཅེས་འབྱུང་ངོ༌། །ཞལ་བཞི་པའི་སྔགས་ལ་སྤྱིར་མི་འདྲ་བ་མང་དུ་ཡོད་ཀྱང་འདིར་ནི་སྐབས་འདིར་
9-5-39a


བདེ་མཆོག་གི་རྒྱུད་དང༌། ལཱུ་ཨི་པའི་སྐོར་ནས་ཇི་ལྟར་བྱུང་བའི་ལུགས་སོ། །གཉིས་པ་ནི། དེ་ལ་བཟླས་པའི་སྔགས་རྣམས་རིགས་བཞིར་བསྡུས་ནས། རྡོ་རྗེ་གཙུག་ཏོར་དང་རྒྱུད་རྡོར་ཕྲེང་ལས་གསུངས་པ་ནི། ཐོག་མར་ཨོཾ་ཡིད་
ལ་མཐར་སྭཱ་ཧཱ་མེད་པ་ནི་མཐའ་མེད་པ་ནི་མཐའ་མེད་དང༌། དེ་ལས་བཟློག་ནི་མགོ་མེད་དང༌། གཉིས་ཀ་ཡོད་པ་ནི་སྦྲུལ་དང༌། གཉིས་ཀ་མེད་པ་ནི་བཏུས་པ་ཞེས་བྱ་བ་ལས། འདིར་ནི་སྔགས་རྐང་བཞི་ཆར་མཐའ་མེད་དེ། སྐབས་གཞན་དུ་ཡང་ཤེས་པར་བྱའོ། །སྔགས་
ཀྱི་དོན་ལ། ཨོཾ་ནི་རྩེ་མོ་ལས། ཨོཾ་ནི་ཅི་ཞིག་ཡིན་པར་བཤད། །མཆོག་དང་ནོར་སྟེར་དཔལ་དག་གཡང༌། །སྐལ་བཟང་རྣམ་པ་དང་ལྡན་ཞིང༌། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྙིང་པོ་ཡིན། །ཞེས་མཆོག་ལ་སོགས་པ་བཞི་སྟེར་བ་
དང༌། སྐལ་བ་བཟང་པོ་ཅན་དུ་བྱེད་པ་དང༌། དམ་བཅའ་བ་སྟེ་སྔགས་ཀྱི་མགོ་འདྲེན་པ་དང༌། དེ་སྨོས་པས་ཤིས་པར་འགྱུར་བ་སྟེ་བདུན་བཤད་དེ། རིན་པོ་ཆེ་བཟུང་ནས་གཞན་གྱི་འདོད་དོན་སྐོང་བའི་སྙིང་པོའོ། །དེ་ཡང་ཡི་གེ་དེ་ལ་ཡོན་ཏན་དེ་དག་ངོ་བོ་
ཉིད་ཀྱིས་གནས་བར་ཕྱི་རོལ་པ་འདོད་པ་ལྟར་ནི་མིན་གྱི། སངས་རྒྱས་ལྟ་བུ་ཤེས་མཐུ་དང་ལྡན་པའི་ཁྱད་པར་ཅན་གྱིས་སྦྱར་བའི་སྒོ་ནས་དང༌། ཨོཾ་ཡིག་ལ་ཨ་དང་ཨུ་དང་མ་གསུམ་ཡོད་པ་རང་གི་ལུས་ངག་ཡིད་གསུམ་ཡིན་ལ། དེ་གསུམ་གྱི་སྟོང་
ཉིད་དང་དེའི་ཡུལ་ཅན་གྱི་སྙིང་རྗེ་གཉིས་རོ་གཅིག་པའི་ངོ་བོར་བདག་ཉིད་འཇོག་པར་བཤད་པ་ལྟར་གྱི་དོན་ཡིད་ལ་བྱེད་པ་ལ། ཨོཾ་གྱིས་སྔར་ལྟར་གྱི་བྱ་བ་བྱེད་པ་སྟེ། འདི་ནི་དམིགས་བསལ་མེད་པའི་སྐབས་ཀུན་ཏུ་ཤེས་པར་བྱའོ། །སུམྦྷ་ནི་ངེས་
9-5-39b


པར་འདུལ་བ་སྟེ་འདི་ནི་བོད་པའོ། །ནི་སུམྦྷ་ནི་མ་ལུས་པར་ངེས་པར་འདུལ་བའོ། །ཧཱུཾ་ནི་དོན་དེ་གསལ་བར་བྱེད་པའོ། །གྲིཧྞ་གཉིས་ནི་གནོད་བྱེད་འབྲོས་པ་ལ་ཟུང་ཅིག་པའོ། །གྲིཧྞཱ་པ་ཡ་གཉིས་ནི་འཁོར་རྣམས་ཀྱང་འཛིན་དུ་ཆུ་གཅིག་པའོ། །ཧཱུཾ་ནི་བསྐུལ་བའོ། །
ཧོ་བྷ་ག་ཝཱན་ནི་ཀྱེ་བཅོམ་ལྡན་འདས་ཞེས་བོས་ནས། ཨཱ་ན་ཡ་ནི་ཁུག་གཅིག་པའོ། །བིདྱཱ་ཡ་ནི་ཁུག་ཅིག་པའོ། །བིདྱཱ་རཱ་ཛ་ནི་རིག་པའི་རྒྱལ་པོ་ཞེས་པའོ། །ཧཱུཾ་ཕཊ་ནི་གསོད་པའི་ཕྱིར་བསྐུལ་བ་ཡིན་པར་སྒྲོན་གསལ་ལས་གསུངས་ཏེ། བཛྲ་རཱ་ཛ་ཞེས་པ་ལྟར་ནའང་རྡོ་རྗེ་ཞེས་པ་བཅོམ་
ལྡན་འདས་དང་སྦྱར་རོ། །འདིའི་འགྲེལ་པ་གཞན་རྣམས་ནས་མ་བྱུང་ཡང༌། ཁྱད་པར་གསལ་བྱེད་ལས། རྡོ་རྗེའི་ས་གཞིའི་སྔགས་ལ་སོགས་པ་སྔགས་དྲུག་མངོན་བརྗོད་ནས་འབྱུང་བ་འདིར་སྦྱར་བས་དེ་དག་ཀྱང་བརྗོད་ལ་རྡོ་རྗེའི་ས་གཞི་དང་ར་བ་སོགས་
བསྐྱེད་པ་བྱིན་གྱིས་བརླབ་བོ། །ཨོཾ་མེ་དི་ནཱི་བཛྲ་བྷ་བ་བཛྲ་བནྡྷ་ཧཱུཾ་ཞེས་པ་ནི་ས་གཞི་རྡོ་རྗེའི་རང་བཞིན་དུ་འཆིང་བ་དང༌། ཨོཾ་བཛྲ་པྲ་ཀ་ར་ཧཱུཾ་པཾ་ཧཱུཾ། ཨོཾ་བཛྲ་པ་ཉྩ་ར་ཧཱུཾ་པཾ་ཧཱུཾ། ཨོཾ་བཛྲ་པི་ཏཱ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛཱ་ལ་ཏྲཾ་སཾ་ཏྲཾ། ཨོཾ་བཛྲ་ཛྭ་ལཱ་ན་ལཱརྐ་ཧཱུཾ་ཧཱུཾ་ཧཱུཾ། 
ཞེས་པའི་བར་གྱི་བཛྲ་པྲཱ་ཀ་ར་སོགས་དང་པོ་བཞི་ནི། རྡོ་རྗེའི་ར་བ་དང༌། གུར་དང༌། བླ་རེ་དང༌། མདའི་དྲ་བ་ཡིན་ལ། ཧཱུཾ་གཉིས་ཀྱི་བར་དུ་བཅུག་པའི་པཾ་གཉིས་དང༌། སཾ་ནི་གུར་དང་མདའི་མིང་ཡིག་དང་པོ་དང༌། ར་བའི་མིང་ཡིག་དང་པོར་ཡིག་བཞག་པ་ལ་ཐིག་
ལེས་བརྒྱན་པ་དང༌། དེའི་རིགས་པས་ཁཾ་ཡང་བླ་རེའི་ས་བོན་དུ་མངོན་ཏེ་དཔྱད་པར་བྱའོ། །མངོན་བརྗོད་མང་པོ་ལས་བཛྲ་བྷ་བ་ཞེས་འབྱུང་ལ། གཞུང་ཁ་ཅིག་ལས་བཛྲ་ཞེས་ཀྱང་འབྱུང་ངོ༌། །མངོན་བརྗོད་ལོ་ཆུང་གི་འགྱུར་ལ་ཏྲཾ་སཾ་ཏྲཾ་ལཾ་ཧཱུཾ་ཥ་ཧཱུཾ་ཞེས་འབྱུང་
9-5-40a


ངོ༌། །ཛྭ་ལ་ནི་འབར་བ་དང༌། ཨ་མ་ལ་ནི་མེ་དང༌། ཨརྐ་ནི་ཉི་མའོ། །མེ་རི་བྱེད་པ་གཞུང་ནས་དངོས་སུ་མ་བྱུང་ཡང་དགོས་ལ། བླ་མ་སྔ་མ་རྣམས་ཀྱང་སྔགས་འདི་རྣམས་ཀྱིས་བྱིན་རློབ་པ་མཛད་དོ། །གཉིས་པ་
ལ་གཉིས། ཁྲོ་མོ་བསྐྱེད་ནས་བགེགས་དགུག་པ་དང༌། བཀུག་པའི་བགེགས་པ་ཕུར་བུས་གདབ་པ་སོགས་སོ། །དང་པོ་ནི། དེ་ནས་ཕུར་གདབ་བྱ་བའི་ཕྱིར་སྒོ་མཚམས་མ་རྣམས་སྐྱེད་ཚུལ་ནི། འགྲེལ་པ་གསུམ་ག་དང་འཁྲུལ་སྤོང་ལས། སུཾ་བྷ་ལ་སོགས་པའི་
སྔགས་བཞི་ལས། སྒོམ་བཞི་དང༌། སྔགས་དེ་ཉིད་གཉིས་གཉིས་ཀྱི་འོད་ཟེར་ཡོངས་སུ་གྱུར་པས་ལས། མཚམས་མ་བཞི་བསྐྱེད་པར་བཤད་པའི་དོན་ནི། སྔར་ལྟར་གཡོན་པའི་མཐེབ་མཛུབ་ཀྱིས་སེ་གོལ་གཏོག་ཅིང༌། སྔགས་བཞི་པོ་རེ་རེ་ཤར་ནས་ཕྱོགས་
བཞིར་གཡོན་སྐོར་དུ་བརྗོད་ཅིང་བཀོད་ལ། རེ་རེ་ཡོངས་སུ་གྱུར་པ་ལས་ཕྱོགས་བཞིར་ནག་ལྗང་དམར་སེར་བའི་ཁྭ་གདོད་མ་ལ་སོགས་པ་བཞི་བསྐྱེད། ཡང་སྔར་བཞིན་བྱས་ཏེ་ཤར་ལྷོར་སྔགས་དང་པོ་ནག་པོ་དང༌། བཞི་པ་སེར་པོ་གཉིས་བཀོད་པ་ཡོངས་
སུ་གྱུར་པ་ལས། དེར་གཤིན་རྗེ་བརྟན་མ་གཡས་སྔོ་གཡོན་སེར་བ་བསྐྱེད། རེ་བཞིན་དུ་སྔགས་བཞི་པ་དང་གསུམ་པ་དམར་པོ་ལྷོ་ནུབ་ཏུ་བཀོད་པ་ལས། ཕོ་ཉ་མོ་གཡས་སེར་གཡོན་དམར་བ་དང༌། དེ་ནས་སྔགས་གསུམ་པ་དང་གཉིས་པ་ལྗང་ཁུ་
གཉིས་ནུབ་བྱང་དུ་བཀོད་པ་ལས། དེར་མཆེ་བ་མ་གཡས་དམར་གཡོན་ལྗང་བ་དང༌། དེ་ནས་སྔགས་གཉིས་པ་དང་དང་པོ་གཉིས་བྱང་ཤར་དུ་བཀོད་པ་ལས། གཤིན་རྗེ་འཇོགས་མ་གཡས་ལྗང་གཡོན་སྔོ་བ་བསྐྱེད། ཐམས་ཅད་ཀྱང་ཞལ་གཅིག་
9-5-40b


ཕྱག་གཉིས་པ། ལྟེ་བ་མན་ཆད་ཕུར་བུའི་རྣམ་པ་ཅན། །གཡས་ཀྱིས་རྡོ་རྗེ་ཐོ་བ་དང༌། གཡོན་གྱིས་རང་འདྲའི་ཕུར་བུ་བསྣམས་པའོ། །འདིར་འཕྲོས་པའི་སྦྱོར་བས་སོང་ནས་ཕྱོགས་བཅུའི་བགེགས་འགུགས་པར་ལྭ་པ་པས་གསུངས་པའི་དོན་ནི། 
འཁྲུལ་སྤོང་ལས་དེ་དག་གིས་རང་འདྲ་དུ་མ་སྤྲོས་ནས་འགུགས་པར་བཤད་པ་ལྟར་ཡིན་ལ། བཀུག་པ་རྣམས་རྡོ་རྗེ་ར་བའི་ཕྱི་རོལ་དང་ཉེ་བར་ཧཱུཾ་རིང་པོ་བརྗོད་པ་ལས་གྲུབ་པའི་ཁྲོན་པ་རྣམས་སུ་གཞུག་གོ། སྒྲ་ཙམ་དུ་མ་ཟད་ཧཱུཾ་ནག་པོ་ལས་ཀྱང་སྐྱེད་
པར་ལྭ་བ་པའི་བཅུ་གསུམ་མའི་སྒྲུབ་ཐབས་ལས་འབྱུང་བ་ལྟར་བྱའོ། །འཁྲུལ་སྤོང་དང་དེ་བཞིན་གཤེགས་པའི་རྡོ་རྗེ་དང༌། ལྭ་བ་པའི་སྒྲུབ་ཐབས་ལས་ཁྲོན་པ་བརྒྱན་དུ་བཤད་ཀྱང༌། དཀྱིལ་ཆོག་རྡོར་ཕྲེང་ལས། ཁྲོན་པ་བཅུར་ཡང་བཤད་ཅིང༌། ལྭ་བ་པ་
སོགས་ཀྱིས་ཀྱང་ཕྱོགས་བཅུའི་བགེགས་འགུགས་པར་གསུངས་པས་སྟེང་འོག་གི་བགེགས་འཇུག་བའི་ཁྲོན་པ་ཡང་དགོས་སོ། །དེས་ན་སྟེང་འོག་གི་བགེགས་འགུགས་པ་སོགས་བྱེད་པའི་ལྷ་མོ་རེ་ཡང་དགོས་ལ། དེ་ནི་ཇོ་བོ་ཆེན་པོའི་འགྲེལ་པར། རྡོ་རྗེའི་
ར་བ་དང་མེ་རིའི་བར་དུ་ཕྱོགས་དང་མཚམས་སུ་སྒོ་མཚམས་མ་བརྒྱད་དང༌། སྟེང་དུ་ཁྭ་གདོང་མ་དང༌། འོག་ཏུ་ཁྱི་གདོང་མ་སྒོམ་པར་གསུངས་པ་ལྟར་ལེགས་པས་ཚུལ་འདི་སྐྱིད་པའི་དུས་སུ་ཡང་ཤེས་བར་བྱའོ། །ཁྱད་པར་གསལ་བྱེད་ལས། སྟེང་འོག་གི་
བགེགས་བསྲུང་བ་ཡང་དེ་རྣམས་ཁོ་ནས་བྱེད་ཅེས་སྤྱིར་བཤད་ཀྱང༌། ཁྭ་གདོང་མ་དང་ཁྱི་གདོང་མ་གཉིས་པས་བྱེད་ལ། དེ་ལྟ་ནའང་སྒོ་མཚམས་མ་བརྒྱད་ལས་གཞན་པའི་ལྷ་མོ་མི་དགོས་པ་ལ་བསམས་ནས་དེ་སྐད་བཤད་དོ། །བོད་ཀྱི་བླ་མ་ཁ་ཅིག་རྩ་རྒྱུད་
9-5-41a


ལས། སྐད་ཅིག་གིས་ནི་སྐུ་བརྒྱད་འགྱུར། །དེ་ཡིས་དཀྱིལ་འཁོར་བསྲུང་དོན་དུ། །གདུག་པ་ཐམས་ཅད་ཁྱད་པར་གྱིས། །འདི་ནི་རྙེད་པ་ཙམ་གྱིས་ཀྱང༌། །བརྟག་མི་དགོས་པར་འཆི་པར་འགྱུར། ཞེས་སྔགས་ལན་ཅིག་བརྗོད་པས་
ལྷ་མོ་བརྒྱད་སྤྲོས་ནས། ཁྭ་གདོང་མ་གཅིག་གིས་ཤར་དང་སྟེང༌། ཁྱི་གདོང་མ་གཅིག་གིས་ནུབ་དང་འོག་གི་བགེགས་འཇོགས་པའི་ཕྱིར། ཁྭ་གདོང་མ་དང་ཁྱི་གདོང་མ་གཉིས་གཉིས་བྱས་ནས་ལྷ་མོ་བཅུ་བྱེད་པ་འགོག་པ་མི་འཐད་དེ། ལྷ་མོ་དེ་གཉིས་རེ་རེས་
ཕྱོགས་གཉིས་གཉིས་ཀྱི་བགེགས་འཇོམས་པ་གཞུང་དེའི་དོན་མིན་པས་སྒྲུབ་བྱེད་དུ་མི་རུང་བའི་ཕྱིར་དང༌། ཁྭ་གདོང་མ་དང་ཁྱི་གདོང་མ་གཉིས་གཉིས་བྱུང་བ་དང་། ལྷ་མོ་བརྒྱད་དུ་བཤད་པ་གཉིས་དབྱེ་བསྡུ་ཡིན་པས་མི་འགལ་བའི་ཕྱིར་དང༌། ཞལ་བཞི་
པའི་སྔགས་ལན་ཅིག་བརྗོད་པ་ལས་ལྷ་མོ་བརྒྱད་སྐྱེད་ན་རང་གིས་སྔགས་བཞི་རེ་རེ་ལས་སྒོ་མ་བཞི་སྐྱེད་ཅིང༌། སྔགས་ཀྱི་འོད་ཟེར་གཉིས་གཉིས་འདྲེས་པ་ལས་མཚམས་མ་བཞི་སྐྱེད་པར་བཤད་པ་དང་འགལ་བའི་ཕྱིར་རོ། །མངོན་བརྗོད་ལས། ཁྲོ་བོ་
རྣམས་ཀྱིས་ཕུར་བུས་འདེབས་པར་བཤད་པ་དང༌། འདིར་ཁྭ་གདོང་མ་ལ་སོགས་པས་ཕུར་བུས་འདེབས་པར་བཤད་པ་ནི་མི་འགལ་ཏེ། ཇོ་བོའི་འགྲེལ་པར་དེ་ཡང་ལེའུ་བཅུ་བདུན་པ་ལས། ཁྲོ་བོ་རྣམ་རྒྱལ་ལ་སོགས་པ། །སྒོ་དང་མཐའ་ཡི་མཚམས་
རྣམས་སུ། །སྣ་ཚོགས་འདུལ་བའི་ཐབས་ཅན་གྱིས། །སེམས་ཅན་དོན་ལ་བརྩོན་པར་མཛད། །ཅེས་པས་སྣ་ཚོགས་འདུལ་བའི་ཐབས་ནི་བུད་མེད་ཀྱིས་འདུལ་བ་རྣམས་ལ་བཀའ་བསྒོ་རྣམས་སུ་སྤྲུལ་བའི་ཕྱིར་རོ། །ཞེས་ཀུན་སྤྱོད་ཀྱི་ལུང་དོན་
9-5-41b


བཤད་པ་ལྟར་ཡིན་པའི་ཕྱིར་རོ། །དེས་ན་རྩ་རྒྱུད་ལས། ཞལ་བཞི་པའི་སྔགས་བཏུས་པའི་མཇུག་ཐོགས་ཉིད་དུ། ཁྲོ་བོ་བཞི་དང་ཡང་དག་ལྡན། །སྐད་ཅིག་གིས་ནི་སྐུ་བརྒྱད་འགྱུར། །ཞེས་སོགས་སྔར་དྲངས་པ་ལྟར་གསུངས་པས་ཀྱང་དོན་འདི་བསྟན་
པར་ཤེས་པར་བྱའོ། །གཉིས་པ་ནི། དེ་ནས་ཤར་ནས་ཕྱོགས་གཡོན་སྐོར་དང༌། མེ་ནས་མཚམས་གཡས་སྐོར་དང༌། སྟེང་འོག་ཏུ་དམིགས་ཏེ་ཁྲོ་མོ་རྣམས་ལ་བཀའ་བསྒོ་བའི་ཚུལ་གྱིས། ཨོཾ་གྷ་གྷ་ཞེས་སོགས་ཕུར་བུས་གདབ་པའི་སྔགས་རེ་རེ་
ནས་བརྗོད་པ་སྔོན་དུ་འགྲོ་བས་བགེགས་རྣམས་ཀྱི་སྤྱི་བོར་ཕུར་བུ་གཟུག་སྟེ། མངོན་བརྗོད་ལས། བགེགས་ཀུན་གྱི་ནི་ཀླད་པ་ལ། །རྡོ་རྗེ་ཕུར་བུས་དགོད་ཅིང་མནན། །ལུགས་སུ་འབྱུང་དང་བཟློག་པ་ཡིན། །ཞེས་འབྱུང་ངོ༌། །དེ་ནས་བརྡུང་བའི་རིམ་པ་ཡང་སྔར་
ལྟར་བཤད་པས་རིམ་པ་དེ་བཞིན་དུ། ཨོཾ་བཛྲ་མུངྒར་སོགས་བརྡུང་བའི་སྔགས་རེ་རེ་ནས་བརྗོད་པ་སྔོན་དུ་འགྲོ་བས་གཡས་པའི་ཕྱག་གི་རྡོ་རྗེ་ཐོབས་བརྡུངས་པས་སྤྱི་གཙུགས་ནས་རྐང་མཐིལ་གྱི་བར་དུ་སོན་པར་གདབ་བོ། །ཞེས་བསྒྱུར་བ་ལེགས་སོ། །འདི་རྣམས་
ཀྱི་དུས་སུ་རང་ཉིད་ཧཱུཾ་མཛད་ཀྱི་ང་རྒྱལ་གྱིས་བྱེད་པ་མངོན་བརྗོད་ཀྱི་ལུགས་ཡིན་ལ། ཧེ་རུ་ཀ་ཕྱག་གཉིས་པའི་ང་རྒྱལ་གྱིས་བྱེད་པ་སྡོམ་འབྱུང་དང་དྲིལ་བུ་པའི་དགོངས་པ་ཡིན་ཏེ། འདིའ་གྲེལ་པ་གསུམ་དང་འཁྲུལ་སྤོང་གི་ལུགས་ཀྱང་དེ་དང་མཐུན་ནོ། །ཕུར་
གདབ་ཀྱི་སྔགས་ཀྱི་དོན་ལ། ཨོཾ་ནི་སྔར་དང་འདྲ། གྷ་གྷ་ནི་གྷ་ཏ་གྷ་སྟེ་གསོད་བྱེད་ཅེས་བོད་པའོ། །གྷ་ཏ་ཡ་གཉིས་ནི་ཆོམས་ཤིག་ཅེས་རྦོད་པའོ། །གང་ཞེ་ན། སརྦ་ནི་ཐམས་ཅད་དང༌། དུ་ཥྚཱ་ནི་མ་རུངས་པའོ། །ཕཊ་ནི་དོན་དེ་གསལ་བར་བྱེད་པའི་ས་བོན་ནོ། །ཀཱི་
9-5-42a


ལ་ཡ་གཉིས་ནི་ཕུར་བུས་ཐོབ་ལ་མི་འགུལ་བར་གྱིས་ཤིང་པའོ། །སརྦ་པཱ་པིཾ་ནི་སྡིག་པའི་བསམ་པ་ཅན་ཐམས་ཅད་དོ། །ཕཊ་ནི་དགས་པའོ། །ཧཱུཾ་གསུམ་ནི་དེ་ཁོ་ན་ཉིད་བསྐུལ་བའོ། །བཛྲ་ཀཱི་ལ་ཡ་ནི་རྡོ་རྗེ་ཕུར་བུ་ལ་བོད་པའོ། །བཛྲ་
དྷ་ར་ཨཛྙཱ་པ་ཡ་ནི་རྡོ་རྗེ་འཆང་གི་བཀའ་ཉོན་ཅེས་པ་སྟེ། བདག་ཉིད་རྡོ་རྗེ་འཆང་དུ་བྱིན་གྱིས་བརླབས་ནས་བཀའ་བསྒོ་བའོ། །ཀཱ་ཡ་བཱཀ་ཙིཏྟ་ནི་ལུས་ངག་ཡིད་གསུམ་སྟེ། བགེགས་ལ་བྱའོ། །བཛྲ་ཀཱི་ལ་ཡ་ནི་སྔར་དང་འདྲ༌། ཧཱུཾ་ཕཊ་ནི་སྔར་ཡང་བསྐུལ་བའོ། །འདི་ནི་
སྒྲོན་གསལ་ལས་གསུངས་ཏེ། དཔེ་རྣམས་ལ་མི་འདྲ་བ་ཐན་ཐུན་ཡོད་དོ། །མར་དོ་དང་ཆག་གི་འགྱུར་ལ་སྔགས་དང་པོ་ལ་དུཥྟཱའི་མཇུག་ཏུ་བིགྷ་ནཱན་མེད། སྔགས་གཉིས་པ་ལ་མགོར་ཨོཾ་མེད་ཅིང༌། གཉིས་ཀ་ལ་མཐར་ཧཱུཾ་གཉིས་དང་ཕཊ་ཡོད། སྔགས་
གསུམ་པ་ལ་མགོར་ཧཱུཾ་གསུམ་དང༌། པ་ཡ་ཏིའི་རྗེས་སུ་སརྦ་དུ་ཥྚཱ་བིགྷ་ནཱན་ཡོད་ལ། ལྷག་མ་སྔགས་དོན་བཤད་པའི་སྐབས་དང་འདྲའོ། །འཁྲུལ་སྦོང་དུ། སྔགས་དང་པོ་ལ་བིགྷ་ནཱན་མེད་པར་དུཥྟཱའི་རྗེས་སུ། པྲ་དུ་ཥྚཱ་དང༌། སྔགས་གཉིས་པའི་མགོར་ཨོཾ་
ཡོད། ལྷག་མ་སྔར་དང་འདྲའོ། །འདི་རྣམས་རྒྱུད་གང་ནས་བཏུས་པ་ནི། གཙོ་བོར་མངོན་བརྗོད་ཡིན་ལ། །དེའི་འགྱུར་རྣམས་དང༌། ཕག་མོ་མངོན་འབྱུང་དང༌། སྒྲུབ་ཐབས་ཀྱི་འགྱུར་རྣམས་ལ་འདྲ་མི་འདྲ་དུ་མ་ཞིག་འདུག་གོ། བཛྲ་མུང་ག་ར་ནི་རྡོ་རྗེ་ཐོ་བའོ། །བཛྲ་ཀཱི་ལ་ཡ་
ནི་སྔར་དང་འདྲའོ། །ཨ་ཀོ་ཊ་ཡ་ནི་བརྡུངས་ཤིག་པའོ། །སྔགས་འདིའི་མཐར་མར་དོ་དང་ལོ་ཆེན་དང་ཆག་འགྱུར་ལས་ཧཱུཾ་གཅིག་དང་ཕཊ་གཅིག་འབྱུང་ལ། མངོན་བརྗོད་ཁ་ཅིག་ལས་དེ་གཉིས་གཉིས་གཉིས་འབྱུང་ངོ༌། །དེ་ལྟར་ཕུར་བུ་འདེབས་པ་དང་བརྡུང་བ་བྱས་
9-5-42b


པས་བགེགས་ཐམས་ཅད་བདེ་སྟོང་དབྱེར་མེད་ཀྱི་ངོ་བོར་རོ་གཅིག་ཏུ་གྱུར་པར་བསམ་མོ། །དེ་ནས་ཁྭ་གདོང་མ་ལ་སོགས་པས་བགེགས་རྣམས་རྒྱད་རིང་དུ་བསྐྲད་ནས། རྡོ་རྗེའི་ར་བ་གྲུ་བཞི་པ་ལ་ཐིམ་པའི་དུས་སུ། ཆུ་ལ་ཆུ་བརྡབས་པས་གཟེགས་མ་ཕྱིར་འཐོར་བ་
བཞིན་དུ། རྡོ་རྗེ་དང་པདྨ་དང་འཁོར་ལོའི་ར་བ་ཟླུམ་པོ་གསུམ་མཚམས་བཅིང་བའི་དོན་དུ་བསྒོམ། དེའི་ཕྱི་རོལ་དུ་མེ་རི་འབར་བ་བསམ་ཞིང་སྔར་བཤད་པའི་རྡོ་རྗེའི་ར་བ་ལ་སོགས་པ་ཐམས་ཅད་ཀྱང་བར་མཚམས་མེད་པར་དུམ་བུ་གཅིག་ཏུ་གྱུར་པར་བསྒོམས་
ལ། འགྲོ་བ་ཐམས་ཅད་ཀྱང་རྣམ་པ་ཐམས་ཅད་དུ་བགེགས་དང་བྲལ་བར་མོས་པ་བརྟན་པོ་བྱའོ། །སྒྲུབ་ཐབས་གཙུག་ནོར་ལས། སྒོ་མཚམས་མ་བརྒྱད་ཀྱིས་སྤྲོས་པའི་འོད་ཟེར་འབར་བ་ལྕགས་ཀྱུའི་རྣམ་པ་ཅན་གྱིས། བགེགས་བྲོས་པ་རྣམས་དྲངས་ནས། 
དོང་དུ་བཅུག་པ་དང་། རྡོ་རྗེའི་ལྟ་བས་བལྟས་ཏེ། བྷ་བྷ་ཞེས་སོགས་ཀྱི་སྔགས་བརྗོད་དེ། ཕུར་བུ་ཚུགས་ཤིག་པར་བཀའ་བསྒོས་པས། བགེགས་རྣམས་ཀྱི་སྦྱི་བོར་ཕུར་བུ་བཙུགས་པ་དང༌། བརྡུང་བའི་སྔགས་བརྗོད་ནས་ཐོབས་བརྡུངས་ཏེ། ཕུར་བུ་བཏབ་པས་
བདེ་བ་ཆེན་པོ་ཐོབ་པར་བྱས་ལ། སྒོ་མཚམས་མ་རྣམས་འོད་ཟེར་འབར་བར་གྱུར་ཏེ། མདའི་དྲ་བ་ལ་ཐིམ་མ་ཐིག་ཏུ་ཆུ་ལ་ཆུ་བརྡབས་པའི་ཚུལ་དུ་ཕྱིར་འཕྲོས་པ་ལས་རྡོ་རྗེའི་ར་བ་ཟླུམ་པོ་དང༌། དེ་ལས་འོད་འཕྲོས་པས་པད་ར་དང༌། དེ་ལས་འཁོར་ལོའི་ར་བ་
དང༌། དེ་ལས་རྡོ་རྗེའི་མེ་འབར་བ་སྟེང་དང་ལོགས་ཀུན་ཏུ་ཁྱབ་པ། གཡོན་སྐོར་དུ་འཁྱིལ་ཞིང་འབར་བ་བསམས་ཏེ། སྔགས་བཞིས་བྱིན་གྱིས་རློབ་པར་བཤད་པ་ནི། མར་དོས་ལུགས་འདི་ལའང་མཛད་མོད་ཀྱང༌། འདི་ནི་འགྲེལ་བ་རྣམས་ལས། སྔར་བཞིན་
9-5-43a


བཤད་པ་ལྟར་བྱའོ། །དྲིལ་བུ་པས། ཐོ་བས་བརྡུངས་ཏེ་ཕུར་པ་གདབ། །བགེགས་རྣམས་རྫོགས་པའི་བྱང་ཆུབ་གྱུར། །ལྷ་མོ་འོད་གྱར་འདུས་འཕྲོས་པས། །རྡོ་རྗེ་པདྨ་འཁོར་ལོ་མེ། །ཨོཾ་བཛྲ་པྲཱ་ཀཱ་ར་ཧཱུཾ། ཨོཾ་པདྨ་པྲཱ་ཀཱ་ར་ཧཱུཾ། ཨོཾ་
ཙཀྲ་པྲཱ་ཀཱ་ར་ཧཱུཾ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཧཱུཾ་ཧཱུཾ། ཞེས་གསུངས་པའི་དགོངས་པ་ཡང༌། བཅུ་གསུམ་མའི་སྒྲུབ་ཐབས་ལས་བཤད་པ་ལྟར་ཡིན་པས། དྲིལ་བུ་པའི་ལུས་དཀྱིལ་གྱི་བསྲུང་འཁོར་ནི། བསྲུང་འཁོར་འབྲིང་པོའི་ལུགས་སུ་བྱེད་ན། ལྷ་ལྔ་
བཞིན་བྱ་ལ། བསྡུས་པའི་ལུགས་ཀྱང་རུང་ངོ༌། །རང་དོན་དུ་བསྲུང་བ་ལ་དེ་ལྟར་ཡིན་ལ། སེམས་ཡོད་དང་སེམས་མེད་གཞན་ལ་བགེགས་ཀྱི་གནོད་པ་སྲུང་ན་ནི། དཀྱིལ་ཆོག་རྡོ་རྗེ་འཕྲེང་པར། དཀྱིལ་འཁོར་བྲི་བ་སོགས་ལ་ཆུ་རྡོལ་དང་རླུང་དང༌། སྤྲིན་ལ་
སོགས་པའི་བགེགས་ཀྱི་གནོད་པ་བྱུང་བའི་ཚེ། རྡོ་རྗེའི་ར་གུར་དང་མདའི་དྲ་བ་དང༌། ཟླ་རེའི་ནང་གི་ཁོང་གསེང་ལ་གནས་པའི་རྩིབས་ཀྱི་རྩེ་མོ་ལ་བརྟན་པར་གནས་པའི་ཁྲོ་བོ་བཅུ་ཤིན་ཏུ་འཇིགས་པས་བྱིན་གྱིས་བརླབས་པའི་རྩིབས་བཅུ་པའི་འཁོར་ལོ་སེར་
པོ། གཡས་སྐོར་དུ་འཁོར་བའི་ལྟེ་བའི་དབུས་སུ་བསྲུང་བྱ་བསྒོམས་ནས། རྡོ་རྗེའི་རང་བཞིན་གྱིས་གཞི་ལ་སོགས་པས་བགེགས་ཐམས་ཅད་བཟློག་པར་སྒོམ་པར་བཤད་པ་ལྟར་བྱས་ན། ལེགས་པར་མཐོང་ངོ༌། །བཞི་པ་ལ་གཉིས། བསོད་ནམས་ཀྱི་ཚོགས་
བསག་པ་དང༌། ཡེ་ཤེས་ཀྱི་ཚོགས་བསག་པའོ། །དང་པོ་ལ་གཉིས། ཚོགས་ཞིང་བསྒྲུབ་པ་དང༌། ཞིང་དེ་ལ་ཚོགས་བསག་པའོ། །དང་པོ་ནི། བསྲུང་འཁོར་བསྒོམས་པའི་མཇུག་ཐོགས་དེ་ནས། བསྲུང་འཁོར་གྱི་དབུས་སུ་རང་ཧེ་རུ་ཀར་གནས་པའི་
9-5-43b


སྙིང་ཁར་ཡི་གེ་ཨཾ་ལས་བྱུང་བའི་ཟླ་བའི་དཀྱིལ་འཁོར་རོ། །ཨ་ལི་ཀླད་ཀོར་སྟེར་བར་ལྭ་བ་པ་སོགས་ཀྱིས་བཤད་དོ། །ཟླ་བ་དེའི་སྟེང་དུ་ཧཱུཾ་གྱི་རྣམ་པ་དབུས་སྡོ་ལ། ཕྱི་རོལ་ཏེ་མཐའ་སྐྱ་བ་དངུལ་ཆུའི་ཁ་དོག་ལྟ་བུ་འོད་ཟེར་སྣ་ཚོགས་པ་སྟེ་ཁ་དོག་རྣམ་པ་ལྔ་
འཕྲོ་བ་བསམ་མོ། །ཧཱུཾ་ནི་རྡོ་རྗེ་འཛིན་པའི་རང་བཞིན་དང༌། རྡོ་རྗེ་འཛིན་པ་ནི་ཟླ་བའི་དཀྱིལ་འཁོར་ཅན་དུ་འཐད་པ་ཁོ་ནའོ། ཞེས་ལྭ་བ་པ་དང༌། པྲཛྙཱ་རཀྵི་ཏས་བཤད་དེ། རྡོ་རྗེ་མཁའ་འགྲོ་ལས་ཀྱང༌། ཧཱུཾ་ཡིག་གི་རྟེན་ཟླ་བར་བཤད་དོ། །དེ་ཁོ་ན་ལྟར་ནི་མ་ངེས་
ཏེ། མངོན་བརྗོད་དང་མཁའ་འགྲོ་རྒྱ་མཚོ་ལས། ཉི་མ་ལ་གནས་པར་ཡང་བཤད་པས་སོ། །སྡོམ་འབྱུང་ལས། ཧཱུཾ་ཡིག་སྙིང་ཁའི་ཆུ་སྐྱེས་ལ། འོད་ཟེར་འཕྲེང་བ་སྤྲོ་བར་བྱ། ཞེས་གསུངས་པའི་འགྲེལ་བར་པཾ་སེར་པོ་ལས་སྣ་ཚོགས་པདྨའི་གདན་
བཤད་ལ། མཁའ་འགྲོ་རྒྱ་མཚོ་ལས་ཀྱང་པདྨ་བཤད་པ་ལྟར་བྱའོ། །ཧཱུཾ་ཡིག་ནི་ཡེ་ཤེས་ལྔའི་རང་བཞིན་ཅན་དུ་མངོན་བརྗོད་དང་དྲིལ་བུ་ཞབས་ཀྱིས་གསུངས་ལ། དེ་ལ་ཡེ་ཤེས་ལྔ་འཇོག་ཚུལ་ནི་ཨ་བྷྱ་ཀར་ས། ཨཱུ་ཡིག་དོན་གྲུབ་དང༌། ཧའི་ལུས་སྣང་
མཐའ་དང་དེའི་མགོ་བོ་རིན་འབྱུང་དང༌། ཟླ་ཚེས་རྣམ་སྣང་དང༌། ཐིག་ལེ་ནཱ་ད་དང་བཅས་པ་ནི་མི་བསྐྱོད་པར་བཤད་པའི་སྟེང་ནས་ཤེས་པར་བྱའོ། །ཧཱུཾ་ཡིག་དེའི་སྣང་བ་སྟེ་འོད་ཟེར་གྱིས་རང་གི་བླ་མ་དང་རྫོགས་པའི་སངས་རྒྱས་ཏེ་འཆད་
འགྱུར་གྱི་དཀྱིལ་འཁོར་གྱི་འཁོར་ལོ་མདུན་དུ་ནམ་མཁར་སྦྱན་དྲང་ངོ༌། །བལྟས་པ་ནི་བསམས་པའོ། །དཔའ་གཅིག་ལས། ཧཱུཾ་གི་འོད་ཟེར་གྱིས་རང་གི་སྤྱི་བོ་ནས་རྐང་པའི་བར་གང་སྟེ། ཐོག་མེད་ཀྱི་སྒོ་གསུམ་གྱི་དྲི་མ་སྦྱངས་བས། ལུས་ཤེལ་སྒོང་བཞིན་
9-5-44a


དུ་དག་པར་གྱུར་ཏེ། བ་སྤུའི་བུ་གནས་ཕྱིར་འཕྲོས་པའི་འོད་ཟེར་གྱིས། ཚོགས་ཞིང་སྦྱན་འདྲེན་པར་བཤད་པ་ནི། དྲིལ་བུ་པའི་ལུས་དཀྱིལ་གཉིས་དང༌། གཙུག་ནོར་གྱི་ལུགས་སུའང་སྣང་བས་དེ་བཞིན་དུ་བྱའོ། །ཇོ་བོའི་འགྲེལ་པར་བླ་མ་ནི་
བདེ་མཆོག་གི་དཀྱིལ་འཁོར་དུ་དབང་བཞི་བསྐུར་བ་དང༌། སངས་རྒྱས་ནི་ཧེ་རུ་ཀའི་དཀྱིལ་འཁོར་གྱི་ལྷ་སོ་བདུན་དང༌། སོགས་ཀྱིས་ནི་བླ་མ་གཞན་དང༌། མགྲོན་གྱི་ལྷ་སངས་རྒྱས་དང་བྱང་སེམས་གཞན་སྤྱན་འདྲེན་པ་སྡུད་ཅིང༌། བལྟས་པ་ནི་བླ་མའི་དྲིན་དྲན་
པའི་ཚུལ་གྱིས། བཞུས་ནས་དཀྱིལ་འཁོར་ལ་བསྟིམས་པས་ལྷ་དང་བླ་མ་ཐ་མི་དད་བར་ལྟ་བ་ལ་བཤད་དོ། །བླ་མ་སྦྱན་འདྲེན་པ་ནི་མངོན་བརྗོད་དང་སྡོམ་འབྱུང་ལས་གསུངས་སོ། །འདིར་གཙུག་ནོར་ལས། ཤར་ཕྱོགས་ཀྱི་དུར་ཁྲོད་དབང་པོའི་མདུན་ན། བླ་མ་
སེང་གེའི་ཁྲི་ལ་བཞུགས་པར་བསྒོམ་ཞེས་གསུངས་པ་ལ། །བླ་མ་ཁ་ཅིག་གིས་དེ་ཤིན་ཏུ་མི་རིགས་ཏེ། མངོན་བརྗོད་ལས། བླ་མ་བྱང་སེམས་རྡོ་རྗེ་རིགས་དྲུག་པར་བཤད་པ་དང༌། དཔལ་འཛིན་གྱིས་ཀྱང༌། རྡོ་རྗེ་འཆང་བདག་རྣམ་པ་ཅན། བླ་མ། ཞེས་
བཤད་པ་དང་འགལ་པས། སྔགས་ཀྱི་རྣམ་གཞག་ལས་ཆེས་ཆེར་འཁྱམས་པའོ། །དེས་ན་སྒྲུབ་ཐབས་དེ་བྱེད་པ་པོའང་ལྭ་བ་པ་མ་ཡིན་པར་ངེས་སོ། ཞེས་ཟེར་བ་ནི། མ་ངེས་བཞིན་དུ་བཀག་པས་ཤིན་ཏུ་མི་རིགས་ཏེ། སྒྲུབ་ཐབས་དེ་ལས་ཀྱང༌། བླ་མ་རྡོ་རྗེ་སེམས་
དཔའ་ལྟར་འགྱིང་བག་ཅན་རྒྱན་ཐམས་ཅད་ཀྱིས་བརྒྱན་ནས་བཞུགས་པ་གསལ་བར་བལྟས་ལ། ཞེས་བླ་མ་རྡོ་རྗེ་འཆང་དུ་སྒོམ་པར་བཤད་པའི་ཕྱིར་རོ། །དེ་ན་བླ་མ་རྡོ་རྗེ་འཆང་དུ་བལྟ་བར་གསུངས་པ་རྣམས་ལུགས་དེ་ལ་གནོད་བྱེད་དུ་ཇི་ལྟར་འགྱུར། གལ་ཏེ་རྡོ་རྗེ་
9-5-44b


འཆང་དུ་གསུངས་པས་དུར་ཁྲོད་དུ་བཞུགས་པའི་མི་རིགས་སོ་སྙམ་ན། རྡོ་རྗེ་འཆང་དུ་གསུངས་པ་ནི་སྒོམ་པའི་དབང་དུ་མཛད་ལ། རྡོ་རྗེ་འཆང་ཡིན་དུ་ཆུག་ཀྱང་འགལ་བ་མེད་དེ། མངོན་བརྗོད་ལས། དུར་ཁྲོད་ན་གནས་པ་བཤད་པའི་སྐབས་སུ། 
དཔའ་བོ་འདུས་པོའི་མཆོག་དག་དང༌། །རྣལ་འབྱོར་མ་ནི་མཆོག་སྣ་ཚོགས། ཞེས་དཔའ་བོ་དང་རྣལ་འབྱོར་མ་མཆོག་རྣམས་ཀྱང་དེ་ན་གནས་པར་བཤད་པའི་ཕྱིར་དང༌། སྡོམ་འབྱུང་ལས། གྲུབ་ཆེན་རྫུ་འཕྲུལ་ཡང་དག་ཐོབ་སློབ་དཔོན། །ཚོགས་ནི་དུར་ཁྲོད་
དབུས་སུ་བལྟ་བར་བྱ། ཞེས་གྲུབ་ཆེན་དུ་མ་ཞིག་དེར་གནས་པར་གསུངས་པས། བླ་མ་དེར་བཞུགས་པར་སྒོམ་པ་ལ་འགལ་བ་ཅུང་ཟད་ཀྱང་མ་མཐོང་ངོ༌། །དེའི་ཕྱིར་བླ་མ་མར་ངོས་ཀྱང་སྒྲུབ་ཐབས་དེའི་རྗེས་སུ་འབྲངས་ནས། དེ་བཞིན་དུ་མཛད་པ་ཡང་མི་འཐད་པ་
མིན་ནོ། །བླ་མ་དཀྱིལ་འཁོར་གྱི་གཙོ་བོ་དང༌། རྡོ་རྗེ་འཆང་དང་ཐ་མི་དད་པར་བལྟ་བ་ཡང་མང་དུ་གསུངས་པས། ཚོགས་ཞིང་གི་གཙོ་བོ་དང་དབྱེར་མེད་དུ་སྤྱན་འདྲེན་པ་དང་དེའི་རིགས་བདག་གི་ཚུལ་དང་ལོགས་ཤིག་ཏུ་རྡོ་རྗེ་འཆང་གི་རྣམ་པར་སྤྱན་འདྲེན་པ་གང་
བྱས་ཀྱང་མི་འགལ་ལོ། །གནས་གང་ནས་ལྷ་སྤྱན་འདྲེན་པ་ནི། མངོན་བརྗོད་ལས། མངོན་གྲུབ་པ་ནི་བསྐུལ་ནས་ནི། ཞེས་གསུངས་པ་ལྟར་དྲིལ་བུ་ཞབས་ཀྱིས་ཀྱང་བཤད་པས། སྔར་ཧེ་རུ་ཀའི་དཀྱིལ་འཁོར་དུ་སངས་རྒྱས་པ་གར་བཞུགས་ནས་སྤྱན་འདྲེན་པ་
ནི་སྤྱི་ཡིན་ཞིང༌། མན་སྙེ་དང་གཉིས་མེད་རྡོ་རྗེའི་སྒྲུབ་ཐབས་ལས་འོག་མིན་ནས་སྤྱན་འདྲེན་པ་ནི། གནས་བྱེ་བྲག་པ་ཡིན་ལ། སྤྱན་དྲངས་པ་དང་འོད་ཟེར་སྙིང་ཁར་སྡུད་པར་དེ་གཉིས་དང་ལྭ་བ་པས་བཤད་པ་ལྟར་བྱའོ། །སངས་རྒྱས་དང་བྱང་སེམས་དང་
9-5-45a


བླ་མ་དང༌། ལྷ་དང་ལྷ་མོ་དང༌། ཁྲོ་བོས་ནམ་མཁའི་ཁམས་ཏིལ་གྱི་གང་བུ་ལྟར་གང་བར་བལྟ་བར་མངོན་བརྗོད་ལས་བཤད་དོ། །གཉིས་པ་ནི། དེ་ནས་ཞིང་དེ་རྣམས་ལ། ཡིད་བཞིན་ནོར་བུ་དང་གཙུག་ནོར་ལས་བཤད་པ་ལྟར། རང་
གི་ལུས་དུ་མ་སྣ་ཚོགས་བར་སྤྲུལ་ཏེ། རང་གི་ཐུགས་ཀའི་ས་བོན་ལས་སྤྲུལ་བའི་པི་ཝཾ་མ་ལ་སོགས་པའི་ལྷ་མོ་བཅུ་དྲུག་གིས་ཡང་དག་པར་མཆོད་དེ། ལྷག་མ་རྣམས་བྱའོ། །འདིར་ལྭ་བ་པ་དང་པྲཛྙཱ་རཀྵི་ཏས་རིག་མ་བཅུ་དྲུག་གིས་མཆོད་པ་དང༌། 
དེ་ནས་རྐང་བརྒྱད་ཀྱི་སྔགས་ཀྱིས་བསྟོད་པ་དང༌། དེ་ནས་སེམས་ཅན་རྣམས་འདོན་པར་འདོད་པའི་བསམས་པས་བདག་ཉིད་ཕུལ་ནས། སྡིག་པ་བཤགས་པ་སོགས་ཀྱི་དོན་དུ། དཀོན་མཆོག་གསུམ་ལ་སྐྱབས་སུ་མཆི། ཞེས་སོགས་ལན་གསུམ་བརྗོད་
པར་བྱའོ། །ཞེས་པ་ཙམ་བཤད་ནས། ཕྱག་གང་ལ་བྱེད་པ་དང་བཟོད་གསོལ་གྱི་དོན་མ་བཤད་དོ། །ཁྱད་པར་གསལ་བྱེད་ལས། དང་པོར་ཕྱག་དེ་ནས་རིག་མ་བཅུ་དྲུག་གི་དང༌། སྔགས་ཀྱི་བསྟོད་པ་གཉིས་ཀ་མཆོག་པར་བསྡུས་དང༌། དེ་ནས་སྡིག་
བཤགས་ཡི་རང་སྐྱབས་འགྲོ། ལམ་ལ་བརྟེན་པ་བྱང་ཆུབ་ཏུ་སེམས་བསྐྱེད་པ། ལུས་དབུལ་བ་རྣམས་བྱེད་པར་བཤད་དོ། །གཞུང་འདིའི་ཚོགས་བསག་ནི་སྡོམ་འབྱུང་ལ་བརྟེན་པ་ཡིན་ཏེ། སྡོམ་འབྱུང་ལས། འོད་ཟེར་ཕྲེང་བ་སྤྲོ་བར་བྱ། །དེ་ཡི་སྣང་བ་ལས་
མདུན་དུ། །བླ་མ་སངས་རྒྱས་སོགས་དང་པར། །ཕྱག་འཚལ་མེ་ཏོག་བདུག་སོགས་ཀྱིས། །མཆོད་དེ་བཟོད་གསོལ་བླ་ན་མེད། །དཀོན་མཆོག་གསུམ་ལ་སྐྱབས་འགྲོ་ཞིང༌། ཞེས་གསུངས་པ་དང༌། འདིར་བྱུང་བ་རྣམས་ཚིག་ཚུན་ཆོད་ཀྱང་འདྲ་བའི་ཕྱིར་
9-5-45b


རོ། །རྒྱུད་དེར་དེའི་རྗེས་སུ་བྱང་ཆུབ་ཀྱི་སེམས་སྒོམ་པ་དང༌། ཚད་མེད་བཞི་སྒོམ་པར་གསུངས་པའི་ཕྱི་མ་ནི་སྔར་བསྒོམས་ཟིན་ལ། དང་པོ་ནི་དཀོན་མཆོག་གསུམ་ལ་སྐྱབས་སུ་མཆི་ཞེས་པ་ལ་སོགས་པ་བརྗོད་པར་བྱའོ། །ཞེས་པའི་གསེབ་ནས་འབྱུང་
ངོ༌། །དེ་ལ་ཕྱག་བྱས་ལ་ཞེས་པ་ལ། བླ་མ་ལ་ཕྱག་འཚལ་བ་ནི། གང་གི་དྲིན་གྱིས་བདེ་ཆེན་གནས། །སྐད་ཅིག་གིས་ནི་ཐོབ་འགྱུར་པ། །བླ་མ་རིན་ཆེན་ལྟ་བུ་ཡི། །རྡོ་རྗེ་ཅན་ཞབས་པད་ལ་འདུད། ཅེས་དང༌། གཙོ་བོ་ཡབ་ཡུམ་དང༌། འཁོར་ལ་ཕྱག་འཚལ་
བ་ནི། སྡོམ་འབྱུང་ལས། ཧེ་རུ་ཀ་དཔལ་དཔའ་བོ་ཆེ། །རྣམ་དག་རྡོ་རྗེའི་དབང་ཕྱུག་དང༌། །རྗེས་ཆགས་ཆགས་པ་ཆེ་རྣམས་ཀྱི། །རྡོ་རྗེ་ཕག་མོ་དེ་ལ་འདུད། ཅེས་དང༌། གནས་དང་ཉེ་བའི་གནས་དང་ཞིང༌། །འདུས་དང་དུར་ཁྲོད་གནས་པ་ཡི། །དཔའ་བོ་དཔའ་
མོའི་དབང་ཕྱུག་མ། །ཀུན་ལ་བདག་ནི་གུས་ཕྱག་འཚལ། ཞེས་གསུངས་པ་ལྟར་བྱའོ། །དེ་ནས་མཆོད་པ་ལ་འདིའི་འགྲེལ་པ་རྣམས་ནས་ཆུ་དང་ཉེར་སྤྱོད་ཀྱི་མཆོད་པ་ཟུར་པ་མ་བཤད་ཀྱང༌། བྱེད་ནའང་མི་རུང་བ་མེད་དོ། །སྡོམ་འབྱུང་ལས། མེ་ཏོག་བདུག་
སྤོས་སོགས་ཀྱིས་མཆོད། ཅེས་པ་ཉེར་སྤྱོད་ཟུར་པས་མཆོད་པ་ལ་སྦྱར་ན་ལེགས་པར་སྣང་ཡང༌། འགྲེལ་པ་ལས་རིག་མ་བཅུ་དྲུག་གི་ནང་གི་མེ་ཏོག་མ་ལ་སོགས་པས་མཆོད་པ་ལ་བཤད་དོ། །འཁྲུལ་སྤོང་ལས་ཨརྒྷཾ་ལ་སོགས་པ་སྔོན་དུ་ཕུལ་ནས། རིག་
མ་བཅུ་དྲུག་གིས་མཆོད་པར་བཤད། སྔགས་ནི་ལྭ་བ་པས། ཤྲཱི་ཧེ་རུ་ཀ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་སོགས་ཀྱིས་ཆུ་གསུམ་དབུལ་བ་མཛད་དེ། ཆུ་གཉིས་དབུལ་བ་ཡང་བཤད་དོ། །ལང་ཀས་ཨོཾ་པུཥྤཾ་པྲ་ཏཱི་ཙྪ་སྭཱཧཱ། ཞེས་སོགས་ཀྱིས་ཉེར་སྤྱོད་དབུལ་བར་
9-5-46a


བཤད་པ་ལྟར་རམ། རྣམ་པ་གཞན་ཡང་རུང་ངོ༌། །རིག་མ་བཅུ་དྲུག་གི་པི་ཝཾ་མ་དང་གླིང་བུ་མ་དག་རྡ་ཟླུམ་མ་དང་རྫ་རྔ་མ་ནི། ཞལ་གཅིག་ཕྱག་བཞི་མ་རིམ་པ་བཞིན་སྔོ་སེར་དམར་ལྗང༌། རྩ་ཕྱག་གཉིས་ཀྱིས་རང་རང་གི་རོལ་མོ་སྒྲོག་ཅིང༌། 
ཕྱག་གཞན་གཉིས་ཀྱིས་རྡོར་དྲིལ་འཛིན་པའོ། །བཞད་མ་དང་སྒེག་མོ་དང་གླུ་མ་དང་གར་མ་རྣམས་ནི། ཞལ་གཅིག་ཕྱག་བཞི་མ། རིམ་པ་བཞིན་དུ་དམར་སྔོ་སེར་ལྗང་བ་དང་པོས་ཕྱག་དང་པོ་གཉིས་ཀྱིས་བཞད་པའི་སྟངས་དང༌། གཉིས་པས་བསྙེམས་
པའི་ཚུལ་གྱིས་རྡོར་དྲིལ་བཟུང་ནས་བཀུར་བརྟེན་པ་དང༌། བཞི་པས་པད་ཀོར་མཛད་པའོ། །གསུམ་པས་ནི། ལྭ་བ་པའི་འགྲེལ་པར་ཏིང་ཏིང་ཤགས་བརྡུང་བ་ཞེས་དང༌། པྲཛྙཱ་རཀྵི་དང་འཁྲུལ་སྤོང་ལས་འཁར་བའི་སིལ་ཁྲོལ་འཛིན་པ་དང་བརྡུང་བ། 
ཞེས་དང༌། ཁྱད་པར་གསལ་བྱེད་ལས་ཕེག་རྡོབ་པ་ཞེས་འབྱུང་ཡང་དང་པོ་ལྟར་བྱེད་པའི་དོན་ནོ། །ཕྱག་འོག་མ་གཉིས་ཀྱི་གཡས་ཐོད་པ་དང༌། གཡོན་ཁ་ཊྭཱཾ་ག་འཛིན་པའོ། །མེ་ཏོག་མ་དང་བདུག་སྤོས་མ་དང་མར་མེ་མ་དག་དྲི་ཆབ་མ་ནི། ཞལ་གཅིག་
ཕྱག་བཞི་མ། རིམ་པ་བཞི་དུ་དཀར་པོ། དུད་ཁ། མར་མེའི་རྩེ་མོ་ལྟ་བུ་དང༌། དམར་མོ། གཡས་ཀྱི་དང་པོ་རྣམས་ནི། མེ་ཏོག་གི་སྣོད་དང༌། བདུག་སྤོས་ཀྱིས་སྣོད་དང༌། མར་མེའི་མཆོད་སྡོང་དང༌། དྲིའི་དུང་ཆོས་འཛིན་ཞིང༌། ལྷག་མ་གཞན་གསུམ་ན། ཌཱ་
མ་རུ་དང༌། ཐོད་པ་དང༌། ཁ་ཊྭཱཾ་ག་འཛིན་པའོ། །མེ་ལོང་མའམ་གཟུགས་མ་དང༌། རོ་མ་དང༌། རེག་བྱ་མ་དང་། ཆོས་མ་རྣམས་ནི་རིམ་པ་བཞིན་དུ། དཀར་དམར་ལྗང་དཀར་པོ། གཡས་ཀྱི་དང་པོ་རྣམས་ནི། མེ་ལོང༌། སྤྲང་ཆང་གི་སྣོད། གོས་སྣ་ཚོགས་པ། ཆོས་
9-5-46b


འབྱུང་འཛིན་ཞིང༌། གཡས་ཀྱི་ལྷག་མ་ན་ཌཱ་མ་རུ། གཡོན་གཉིས་ན་ཐོད་པ། ཁ་ཊྭཱཾ་ག་འཛིན་པའོ། །དེ་རྣམས་ནི་འདིའི་འགྲེལ་པ་གསུམ་དང་འཁྲུལ་སྤོང་ལས་བཤད་པའོ། །མངོན་བརྗོད་ལས་མེ་ཏོག་མ་སེར་མོ་དང༌། དྲི་ཆབ་མ་དཀར་མོར་བཤད། གཞན་གྱི་ཁ་
དོག་མཐུན། དང་པོ་བཞི་ལ་པོ་ཝཾ་སོགས་བརྡུང་བའི་སྟངས་སྟངས་ཅན་དུ་བཤད་ནས། ཕྱག་བཞི་པར་མི་གསལ། དེ་ནས་བཞིའི་དང་པོ་ལ་འབྲོག་མི་དང་ལོ་ཆུང་གི་འགྱུར་ལ། ཚམ་དམ་གྱི་ལག་སྟས་ཅན་དུ་བཤད་པ་ནི། འགྱུར་གཞན་ལས་ལག་པ་
གཡོ་བའི་ཚུལ་ཅན་དུ་བཤད་པ་ལྟར་ཡིན་ཏེ། སྔར་བཤད་པ་དང་དོན་འདྲ། གསུམ་པ་ལ་མཁྲིག་མ་མཉམ་པར་བྱས་ནས་ནི། ཞེས་པ་གླུ་མས། རྡོ་རྗེ་ཁུ་ཚུར་གཉིས་སྦྱར་ནས། སྒྲ་འབྱིན་པའི་ཚུལ་བྱེད་པ་ལ་བྱ། བཞི་པ་ལ་པདྨ་སྐོར་བའི་སྟངས་སྟོབས་ཅན་
ཞེས་འབྱུང་ངོ༌། །ཕྱག་བཞི་པར་གསལ་བར་བཤད། ལྷག་མ་འདྲ། དེ་ནས་བཞི་ལ་རང་མིག་གིས་གོ་བའི་ཕྱག་མཚན་མ་གཏོགས་པ་གཞན་གསལ་བར་མ་བཤད། དེ་ནས་བཞི་ལ་ཕྱག་མཚན་ལྷག་མ་སྔར་དང་འདྲ། ཕྱག་མཚན་དང་པོ་མ་བཤད་དེ། མེ་ལོང་མ་
ལ་སོགས་པའི་རང་མིང་གིས་གོ་ནུས་པ་ལ་དགོངས། འདི་རྣམས་ཀྱི་ཕྱག་མཚན་ལྷག་མ་གསུམ་ནི་མེ་ཏོག་མ་སོགས་ལ་ཡང་སྦྱོར་བར་གསལ་ལོ། །དང་པོ་བཞིའི་ཕྱག་མཚན་ལ་རྡོར་དྲིལ་མ་བྱུང་བ་ནི་རྒྱ་དཔེ་ལ་དག་མ་དག་ཡོད་པར་མངོན་ནོ། །ལྷ་མོ་དེ་རྣམས་
ཀྱི་སྐྱེད་ཚུལ་ལ་སྤྱིར་མང་དུ་ཡོད་ཀྱང༌། སྐབས་འདིར་ནི་འགྲེལ་པ་གཞན་གཉིས་དང༌། གཙུག་ནོར་དང༌། འཁྲུལ་སྤོང་དང༌། དེ་བཞིན་གཤེགས་པའི་རྡོ་རྗེས་ཐུགས་ཀའི་ས་བོན་ལས་སྐྱེད་པར་བཤད་པ་ལྟར་བྱེད་རྒྱུ་ཡིན་ཏེ། རིགས་པ་དེ་སྐབས་འདིའི་
9-5-47a


མཆོད་པའི་ལྷ་མོ་གཞན་ལའང་ཤེས་པར་བྱའོ། རིག་མ་བཅུ་དྲུག་གི་མཆོད་སྔགས་ནི། ཨོཾ་བཛྲ་བི་ཎེ་ཧཱུཾ་ཧཱུཾ་ཕཊ། ཨོཾ་བཛྲ་བཾ་ཤེ་ཧཱུཾ་ཧཱུཾ་ཕཊ། ཨོཾ་བཛྲ་མྲྀ་ཏཾ་གེ་ཧཱུཾ་ཧཱུཾ་ཕཊ། ཨོཾ་བཛྲ་མུ་ར་ཛེ་ཧཱུཾ་ཧཱུཾ་ཕཊ། ཨོཾ་བཛྲ་ཧཱ་སྱ་ཧཱུཾ་ཧཱུཾ་ཕཊ། ཨོཾ་བཛྲ་
ལཱ་སྱ་ཧཱུཾ་ཧཱུཾ་ཕཊ། ཨོཾ་བཛྲ་གཱི་ཏི་ཧཱུཾ་ཧཱུཾ་ཕཊ། ཨོཾ་བཛྲ་ནྲྀ་ཏྱ་ཧཱུཾ་ཧཱུཾ་ཕཊ། ཨོཾ་བཛྲ་པུཥྤེ་ཧཱུཾ་ཧཱུཾ་ཕཊ། ཨོཾ་བཛྲ་ངྷཱ་པེ་ཧཱུཾ་ཧཱུཾ་ཕཊ། ཨོཾ་བཛྲ་དཱི་པེ་ཧཱུཾ་ཧཱུཾ་ཕཊ། ཨོཾ་བཛྲ་གནྡྷེ་ཧཱུཾ་ཧཱུཾ་ཕཊ། ཨོཾ་རཱ་པ་བཛྲཱི་ཧཱུཾ་ཧཱུཾ་ཕཊ། ཨོཾ་ར་ས་བཛྲཱི་ཧཱུཾ་ཧཱུཾ་ཕཊ། ཨོཾ་སྤཪྴེ་བཛྲཱི་ཧཱུཾ་ཧཱུཾ་ཕཊ། ཨོཾ་
དྷརྨྨཱ་ངྷཱ་ཏུ་བཛྲཱི་ཧཱུཾ་ཧཱུཾ་ཕཊ། ཅེས་པའོ། །དེ་ནས་ཡབ་ཀྱི་རྐང་བརྒྱད་ཀྱི་བསྟོད་པ་ཡང་བསྟོད་པའི་མཆོད་པ་ཡིན་པས། མཆོད་པར་བསྡུའོ། །བཟོད་པར་གསོལ་ལ་ཞེས་པ་ནི། འདིའི་འགྲེལ་པ་རྣམས་ནས་མ་བཤད་ཀྱང༌། སྡོམ་འབྱུང་འགྲེལ་པ་ལས། བཟོད་
པར་གསོལ་བ་སྟེ། སྡིག་པ་བཤགས་པ་ལ་སོགས་པ་བྱའོ། ཞེས་བཤད་པ་ལྟར་ཡིན་པས་ནོངས་པ་བཟོད་པར་གསོལ་བ་ནི་བཤགས་པའོ། །སྡིག་བཤགས་སོགས་ནི་འདིར་སྐྱབས་སུ་འགྲོ་བས་མཚོན་ནས་བཟུང་ངོ༌། །དཀོན་མཆོག་གསུམ་
ལ་སྐྱབས་སུ་མཆི། ཞེས་སོགས་ཀྱིས་སྡིག་བཤགས་བྱེད་པར་བཤད་པ་ནི། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །
སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་བར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་
9-5-47b


མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ཅེས་པའོ། །བདག་དབུལ་བ་ནི་ཁྱད་པར་གསལ་བྱེད་ལས། བགྲོད་དཀའ་སྲིད་པའི་རྒྱ་མཚོ་ལས། །བདག་གིས་འགྲོ་རྣམས་བསྒྲལ་བའི་ཕྱིར། །
རང་གི་བདག་ཉིད་སྐད་ཅིག་མ། །སངས་རྒྱས་རྣམས་ལ་དབུལ་བར་བགྱི། ཞེས་པས་བྱའོ། །དྲིལ་བུ་བའི་ལུས་དཀྱིལ་ལ་ནི། ཡིད་བཞིན་ནོར་བུ་ལས། ཕྱག་འཚལ་བ། ལུས་དབུལ་བ། ཐུགས་ཀའི་ས་བོན་གྱི་འོད་ཟེར་ལས་བྱུང་བའི་ཡུལ་དྲུག་གི་ལྷ་མོས་ཕྱིའི་
མཆོད་པ་དང༌། ལྷ་མོ་བཞིས་གསང་བ་བདུད་རྩིའི་མཆོད་པ་དང་། ཚོགས་ཞིང་ཡབ་ཡུམ་སྙོམས་པར་ཞུགས་པས། ལྷན་སྐྱེས་ཀྱི་དགའ་བས་ལྷ་རྣམས་དགྱེས་པ་དང༌། སྡིག་བཤགས། ཡི་རང༌། བསྔོ་བ། སྐྱབས་འགྲོ། བསྐུལ་བ་དང༌། གསོལ་བ་གདབ་པ། སྨོན་
འཇུག་གི་སེམས་གཉིས་བསྐྱེད་པ་དང༌། ཚད་མེད་བཞི་བསྒོམ་པར་བཤད་པ་ལྟར་བྱའོ། །དེ་ནས་མར་དོས་རང་ཚོགས་ཞིང་གིས་བྱིན་གྱིས་རློབ་པའི་དོན་དུ་ཡིག་བརྒྱ་བཟླ་པར་བཤད་པ་ནི། གཙུག་ནོར་གྱི་ལུགས་ཡིན་ལ། མངོན་བརྗོད་ལས། སྔོན་གྲུབ་པ་ནི་བསྐུལ་
ནས་ནི། །བྱིན་གྱིས་བརླབ་པའང་བྱེད་པ་ཡིན། ཞེས་གསུངས་པའི་ཡང་དོན་ནོ། །མཇུག་ཏུ་ཚོགས་ཞིང་ཇི་ལྟར་བྱེད་འདིའི་འགྲེལ་པ་རྣམས་ནས་མ་བཤད་ལ། སྒྲུབ་ཐབས་ཁ་ཅིག་ལས་གཤེགས་སུ་གསོལ་བ་དང༌། གཙུག་ནོར་ལས་དེ་ཉིད་དུ་མི་སྣང་བར་གྱུར་བ་
དང༌། འཁྲུལ་སྤོང་གི་དགོངས་པས་སྟོང་པར་སྦྱོང་བའི་སྔགས་ཀྱིས་ཆོས་ཐམས་ཅད་སྟོང་པར་སྦྱོང་བའི་ཞར་ལ་སྟོང་པར་སྦྱོང་བ་བཤད་ཀྱང༌། དཔའ་བོ་གཅིག་པ་དང་ལུས་དཀྱིལ་གྱི་གཞུང་གཉིས་ལས་བཤད་པ་ལྟར་རང་ལ་བསྟིམས་ཏེ་བྱིན་གྱིས་བརླབ་པོ། །གཉིས་
9-5-48a


པ་ལ་བཞི་སྟོང་ཉིད་བསྒོམས་པའི་དགོས་པ་བཤད་པ་དང༌། སྟོང་ཉིད་སྒོམ་པའི་ཚིག་དོན་བཤད་པ། རྩོད་པ་སྤང་ཞིང་ལོག་རྟོག་བསལ་བ། སྟོང་ཉིད་དུ་སྡུད་རིམ་གྱི་གནད་བཤད་པའོ། །དང་པོ་ནི། བསོད་ནམས་ཀྱི་ཚོགས་བསགས་པ་
དེ་ནས། ཡེ་ཤེས་ཀྱི་ཚོགས་བསག་པར་བྱའོ། །འདིའི་དགོས་པ་ནི་ཇོ་བོ་ཆེན་པོའི་འགྲེལ་པར་དྲུག་གསུངས་ཏེ། ཇི་སྐད་དུ། དེ་ལྟར་སྔགས་རྣམ་པ་གཉིས་ལན་གསུམ་དུ་བརྗོད་པ་ནི་སྟོང་པ་ཉིད་རྟོགས་ནུས་པ་དང༌། སྟོང་པ་ཉིད་ཀྱི་དྲན་པ་གསོ་བ་དང༌། གནས་
པ་བརྟན་པ་དང༌། ཡེ་ཤེས་ཀྱི་ཚོགས་རྫོགས་པ་དང༌། ཐ་མལ་པའི་ལུས་ངག་ཡིད་གསུམ་གྱི་རྟོག་པ་སྤོང་བ་དང༌། རྟེན་དང་བརྟེན་པ་ཐམས་ཅད་སྟོང་པའི་རྣམ་འཕྲུལ་དུ་རྟོགས་པའི་ཕྱིར་རོ། ཞེས་སོ། །འདི་ལ་ལོ་ཆེན་རིན་བཟང་གི་འགྲེལ་ཆུང་ནས། དང་པོ་
ནི་སྔགས་ཀྱི་མཐུས་དབང་པོ་རྟུལ་པོས་སྟོང་པ་ཉིད་རྟོགས་ནུས་པ་དང༌། གཉིས་པ་ནི་འབྲིང་པོས་སྟོང་ཉིད་བརྗེད་པའི་དྲན་པ་གསོ་ནུས་པ་དང༌། ལྷག་མ་བཞི་ནི་དབང་པོ་རབ་ཀྱི་དབང་དུ་བྱས་པར་འཆད་དོ། །དེ་ལ་དང་པོ་ནི་སྔགས་དེ་གཉིས་ལ་བརྟེན་ནས་
ཁ་ཅིག་གིས་སྟོང་ཉིད་སྔར་མ་རྟོགས་གསར་དུ་རྟོགས་པར་འགྱུར་པ་དང༌། གཉིས་པ་ནི་ཁ་ཅིག་གིས་སྔར་རྟོགས་ཟིན་དེ་ལ་བརྟེན་ནས་དྲན་པར་བྱེད་པ་གཉིས་སོ། །གསུམ་པ་ནི་སྟོང་ཉིད་རྟོགས་ནས་དེ་ལ་འཇོག་པ་ལ་ཡང་སྔགས་དེ་དག་བརྗོད་པས་རྟོགས་
པ་དེ་བརྟན་པར་འགྱུར་པའོ། །བཞི་པ་ནི་སྤྱིར་འཚང་རྒྱ་བ་དང༌། ཁྱད་པར་དུ་འོག་ནས་འབྱུང་བ་ལྟར་གྱི་ལྷའི་སྐུར་སྐྱེ་བ་ལ། རྒྱུ་ཚོགས་གཉིས་བསག་དགོས་པའི་ཚོགས་དང་པོ་ནི། སྔོན་དུ་སོང་ལ། འདིར་ནི་ཡེ་ཤེས་ཀྱི་ཚོགས་བསག་པས་ལྷའི་སྐུར་འགྱུར་
9-5-48b


པའོ། །ལྔ་པ་ནི་གཞི་གང་ལྷ་དང་གཞལ་ཡས་ཁང་དུ་སྒོམ་པའི་གཞི་དེ། མཆོག་གི་སྣང་བ་ཁྱད་པར་ཅན་དུ་འགྱུར་པ་ནི། གཞི་དེ་ལ་ཐ་མལ་གྱི་སྣང་བ་ལྡོག་དགོས་ཏེ། དེ་གཉིས་གཞི་གཅིག་ལ་བློ་ངོར་མི་འདུ་བའི་ཕྱིར་རོ། །དེས་ན་ཐ་མལ་གྱི་སྣང་བ་དག་པར་སྒོམ་པ་
ལ། ཡང་དེ་བསྒོམ་དགོས་སོ། །དྲུག་པ་ནི་དཔེར་ན་ཟབ་དོན་སྒོམ་པ་སྔོན་དུ་བྱས་ན། དེའི་རྗེས་སུ་རྒྱ་ཆེ་བའི་སྤྱོད་ཕྱོགས་རྣམས་སྒྱུ་མ་བཞིན་དུ་འཆར་བས་ཡོངས་སུ་དག་པར་འགྱུར་བ་བཞིན་དུ། འདིར་ཡང་སྔོན་དུ་སྟོང་ཉིད་ལེགས་པར་གཏན་ལ་ཕབ་ནས་བསྒོམ་
པ་སྔོན་དུ་བཏང་ན། དེ་ཕྱིན་ཆད་ཀྱི་སྣང་ཕྱོགས་ཀྱི་རྟེན་དང་བརྟེན་པ་ཐམས་ཅད་སྒྱུ་མའི་རྣམ་རོལ་དུ་འཆར་བའི་ཆེད་དོ། །དེ་རྣམས་ནི་ཤིན་ཏུ་ལེགས་ལ། དགོས་པ་གཞན་ཡང་བསྲུང་བའི་མཆོག་ཏུ་འགྱུར་པ་དང༌། འོད་གསལ་དུ་ཞུགས་པ་ན་ཆོས་སྐུའི་ང་རྒྱལ་གྱིས་
གནས་ལ། དེ་ལས་ལངས་པ་ན་གཟུགས་སྐུའི་ང་རྒྱལ་གྱིས་བྱེད་པས། ལམ་འདི་འབྲས་བུ་ལམ་བྱེད་དུ་བཤད་པའི་གནད་དང༌། ཡང་སྔགས་བླ་མེད་ཀྱི་རིམ་པ་དང་པོའི་སྐབས་སུ་སྐྱེ་ཤི་བར་དོ་གསུམ་སྐུ་གསུམ་དུ་འཁྱེར་བའི་ལམ་འཁྱེར་དགོས་པ་ལ། འདི་ནི་
འཆི་བ་ཆོས་སྐུར་འཁྱེར་བ་ཡིན་པ་ལ་སོགས་པ་མང་དུ་ཡོད་དོ། །གཉིས་པ་ནི། བསོད་ནམས་ཀྱི་ཚོགས་བསགས་པ་དེ་ནས་ཡེ་ཤེས་ཀྱི་ཚོགས་བསགས་པ་ལ། ཨོཾ་ནི་མཆོད་ཡུལ་དང༌། མཆོད་མཁན་དང༌། མཆོད་རྫས་རྣམས་རྣམ་པར་རིག་པ་ཙམ་དུ་ཉེ་
བར་མཚོན་པའོ། །ཞེས་བཤད་དེ། ཨོཾ་གྱི་ཡི་གེ་གསུམ་གྱི་དོན་གསུམ་པ་དེ་སེམས་ཀྱིས་བཏས་པ་ཙམ་དུ་འཇོག་པའོ། །སརྦ་དྷརྨ་ནི་སྐབས་འདིར་གཟུང་བས་བསྡུས་པའི་ཆོས་ཐམས་ཅད་དོ། །སྭ་བྷཱ་ཝ་ཤུད་ངྷ་ནི་རང་བཞིན་གྱིས་དག་པ་སྟེ་གཟུང་པ་རང་བཞིན་
9-5-49a


མེད་པའོ། །ཨ་ཧཾ་ནི་ང་སྟེ་འཛིན་པ་པོ་ཡང་གཟུང་བ་བཞིན་དུ་རང་བཞིན་མེད་པའི་རྣམ་དག་ཏུ་སྟོན་པ་ནི། སྭ་བྷཱ་ཝ་ཤུད་ངྷ་གཉིས་པའོ། །དེ་ལྟར་གཟུང་འཛིན་གཉིས་ཀྱིས་སྟོང་པའི་སེམས་ནཱ་ད་ཙམ་གྱི་ཚུལ་དུ་ངེས་པར་གནས་པར་བྱས་པའི་
སེམས་ཙམ་ཉིད་ཀྱང༌། སླར་ཡང་སྟོད་པར་རྣམ་པར་བསམ་པ་སྟེ། སེམས་ཙམ་གྱི་རྟོག་པ་དེ་ཡང་དོར་བར་བྱའོ། ཞེས་འགྲེལ་པ་རྣམས་སུ་བཤད་དེ། འདི་ནི་ཤཱུ་ནྱ་ཏཱའི་སྔགས་དོན་སྒོམ་པའི་སྐབས་སུ་ཡིན་ལ། མིག་ཡོར་ཏེ་གྲིབ་མའི་གཟུགས་སྣང་བརྙན་ཙམ་
གྱི་ཤེས་པའི་མཚན་ཉིད་ཀྱི་སྟོང་པ་ཉིད་སྒོམ་པ་ནི། སྭ་བྷཱ་བའི་མཇུག་ཐོགས་སུའོ། ཞེས་འགྲེལ་པ་རྣམས་ནས་བཤད་དེ། གཟུང་འཛིན་བདེན་པས་སྟོང་བཞིན་དུ་དེར་སྣང་བར་སྒོམ་པའི་སྐབས་སོ། །སྡོམ་ཆུང་འགྲེལ་པར་ཡང་སྐབས་འདིར་སྣང་བ་
དང་བཅས་པའི་སྟོང་ཉིད་སྒོམ་པར་བཤད་དོ། །བྱང་ཆུབ་ཀྱི་ཚོགས་ནི་སྙིང་རྗེ་ཆེན་པོ་སྟེ། འདིས་ནི་དེ་དང་བཅས་པའི་སྟོང་ཉིད་བསྒོམ་པ་ཡིས་ཡེ་ཤེས་ཀྱི་ཚོགས་བསགས་པར་བསྟན་ནོ། །དེ་དག་བསྡུ་ན་ཚོགས་ཞིང་ལ་མཆོད་པ་སོགས་བྱས་པའི་རྗེས་ལ། མཆོད་
པའི་འཁོར་གསུམ་རྟེན་འབྲེལ་ཙམ་དུ་མོས་པར་བྱ་ཏེ། རང་གི་མགོ་བོ་དང་མགྲིན་པ་དང་སྙེང་ཁར་ཧེ་རུ་ཀ་ཞེས་པའི་ཡི་གེ་གསུམ་དགོད་དོ། །འདིའི་འགྲེལ་པ་གསུམ་དང་འཁྲུལ་སྤོང་ལས་གནས་གསུམ་དང་ཡི་གེ་གསུམ་གྱི་རིམ་པ་དེ་བཞིན་དུ་
བཤད་པས། ཧེ་སྤྱི་བོ་དང༌། རུ་མགྲིན་པ་དང༌། ཀ་སྙིང་ཁར་དགོད་ཅིང༌། ཁ་དོག་ནི་དཀར་དམར་མཐིང་ཁར་ཁ་ཅིག་བཞེད་དོ། །དེ་གསུམ་གྱི་དོན་ཆོས་ཐམས་ཅད་ནི། རང་བཞིན་གྱིས་གྲུབ་པའི་རྒྱུ་དང་བརྗོད་པ་དང་བྲལ་བ་དང་གང་དུ་ཡང་མི་གནས་པ་ཉིད་
9-5-49b


དོ། ཞེས་སོ་སོར་རྟོག་པས་དཔྱད་དེ། སེམས་ཅན་རྣམས་ཀྱིས་ཆོས་རྣམས་ཀྱི་ཡིན་ཚུལ་འདི་ལྟ་བུ་མ་ཤེས་པར་བདག་གཉིས་སུ་གཟུང་ནས་འཁོར་བར་འཁོར་རོ། །དེས་ན་བདག་གིས་ཧེ་རུ་ཀའི་གོ་འཕང་མངོན་དུ་བྱས་ལ། སེམས་ཅན་རྣམས་ཀྱིས་ཡིན་ཚུལ་འདི་རྟོགས་
པར་བྱའོ་ཞེས་ཆོས་ལ་དམིགས་པའི་སྙིང་རྗེ་བསྐྱེད་ལ། སྭ་བྷཱ་ཝ་ལ་སོགས་པའི་སྔགས་བརྗོད་ཅིང་ཁམས་གསུམ་པོ་རང་བཞིན་གྱིས་གྲུབ་པས་སྟོང་པའི་སྟོང་པ་ཉིད་དུ་བལྟའོ། །དེ་ནས་སྨོན་ལམ་གྱི་དབང་གིས་རང་གི་སེམས་དེ་སྟེང་ནས་སྟེང་དུ་བརྩེགས་
པའི་ཨོཾ་དཀར་པོ་ཨཱཿདམར་པོ་ཧཱུཾ་སྔོན་པོར་བསམ་མོ། །ལང་ཀ་རྒྱལ་བཟང་དང༌། དཔའ་བོ་རྡོ་རྗེས་ཡི་གེ་དེ་གསུམ་རིམ་པ་བཞིན་དུ་སྟེང་དང་བར་དང་འོག་ཏུ་གནས་པར་བཤད་དོ། །བླ་མ་མར་དོས་ཧེ་རུ་ཀའི་ཡི་གེ་གསུམ་པོ་ཡོངས་སུ་གྱུར་པ་ལས། རྡོ་རྗེ་གསུམ་
གྱི་ཡི་གེར་སྐྱེད་པ་ནི། ལང་ཀས་ཧེ་ལ་སོགས་པ་གསུམ་རྡོ་རྗེ་གསུམ་དུ་སྐྱེད་པར་བཤད་པ་དང་མཐུན་ཞིང་ལེགས་སོ། །དེ་ནས་ཨོཾ་ལས་སྐུ་འཁོར་གྱི་ལྷ་རྣམས་སྤྲོས་ཏེ། འགྲོ་བའི་དོན་བྱས་ནས་སྙོམས་པར་འཇུག་པ་སྔོན་དུ་འགྲོ་བས་ཞུ་བ་ཨོཾ་ལ་ཐིམ། དེ་
བཞིན་དུ་སྦྱར་ཏེ་ཨཱཿལས་གསུང་འཁོར་དང༌། ཧཱུཾ་ལས་ཐུགས་འཁོར་གྱི་ལྷ་སྤྲོ་བ་སོགས་བྱས་པའི་མཐར་ཞུ་བ་དེ་གཉིས་ལ་ཐིམ་པར་བསམ་མོ། །མར་དོས་ཡི་གེ་གསུམ་ལས་འོད་ཟེར་འཕྲོས་པས་མཐོ་རིས་དང་མི་ཡུལ་དང༌། ས་འོག་རྣམས་མཁའ་
སྤྱོད་དང༌། ས་སྤྱོད་དང༌། ས་འོག་ན་གནས་པའི་ངོ་བོར་བྱས་ཏེ། དེ་ཐམས་ཅད་ཡི་གེ་གསུམ་ལ་སྡུད་པར་བཤད་པ་ཡང་རྩ་རྒྱུད་ཀྱི་འགྲེལ་པ་དཔའ་བོ་རྡོ་རྗེས་མཛད་པ་དང་མཐུན་ཞིང་ལེགས་སོ། །དེ་ནས་ཨོཾ་ཡང་ཨཱཿལ་དང༌། དེ་ཡང་ཧཱུཾ་ལ་དང༌། ཧཱུཾ་གི་ཞབས་ཀྱུ་
9-5-50a


ནི་ཧ་ལ་དང༌། ཧའི་ལུས་ནི་དེའི་མགོ་བོ་ལ་དང༌། དེ་ཡང་ཟླ་ཚེས་ལ་དང༌། དེ་ཡང་ཐིག་ལེ་ལ་དང༌། དེ་ཡང་ནཱ་ད་ལ་ཐིམ་པར་བསམ་ཞིང༌། ནཱ་ད་ཡང་སྐྲའི་རྩེ་མོ་བརྒྱ་སྟོང་གི་ཆའི་ཚད་ཙམ་དུ་གནས་པར་བསམས་ནས་སེམས་ཅན་རྣམས་ཀྱིས་
ཆོས་ཉིད་མ་རྟོགས་པས་འཁོར་བར་འཁྱམས་ཏེ། དེས་ན་བདག་གིས་ཆོས་ཉིད་མངོན་སུམ་དུ་རྟོགས་པར་བྱས་ལ། སེམས་ཅན་དེ་རྣམས་ཀྱིས་ཀྱང་ཁོང་དུ་ཆུད་པར་བྱའོ་སྙམ་དུ་དམིགས་པ་མེད་པའི་སྙིང་རྗེའི་རྒྱུར་གྱུར་བའི་བསྒོམས་ལ། ཤཱུ་ནྱ་ཏཱའི་སྔགས་
བརྗོད་ཅིང༌། ནཱ་ད་ཙམ་གྱི་རྣམ་རྟོག་ཀྱང་དོར་བར་བྱའོ། །འདིར་ལྭ་བ་པ་དང་པྲཛྙཱ་རཀྵི་ཏས། དམིགས་མེད་ཀྱི་སྙིང་རྗེའི་རྒྱུ་དང་ས་བོན་དུ་གྱུར་བ་ཞེས་བཤད་ལ། ཁྱད་པར་གསལ་བྱེད་ལས། དམིགས་མེད་ཀྱི་སྙིང་རྗེ་ཉིད་དུ་བཤད་པའི་དང་པོ་ནི། དམིགས་མེད་ཀྱི་སྙིང་
རྗེའི་གཙོ་བོ་དེ་ཁོ་ན་ཉིད་མངོན་དུ་གྱུར་ནས་འཐོབ་པ་ལ་དགོངས་ལ། ཕྱི་མ་ནི་དམིགས་མེད་ཀྱི་སྙིང་རྗེ་ཙམ་གྱི་དབང་དུ་བྱས་པའོ། །སྤྱིར་སྙིང་རྗེ་ལ་སྔགས་དང་ཕར་ཕྱིན་ཐུན་མོང་བ་ཞིག་དང༌། བླ་མེད་ཀྱི་ཐུན་མོང་མ་ཡིན་པ་བདེ་ཆེན་ལས་བཤད་པ་གཉིས་ཡོད་
ཀྱང༌། འདིར་ནི་དངོས་སུ་ན་སྤྱོ་དོན་གྱི་སྙིང་རྗེ་ཡིན་ལ། མོས་པ་ཙམ་གྱིས་སྦྱོང་བ་ལ་ནི་སྤས་པ་དང་མཐར་ཐུག་གི་སྙིང་རྗེ་ཡང་ཡོད་དོ། །དེ་ལ་དང་པོའི་དབང་དུ་བྱས་ན་སྙིང་རྗེ་གཉིས་ཀ་ཡང༌། རྣམ་པ་ནི་སྡུག་བསྔལ་མཐའ་དག་དང་བྲལ་བར་འདོད་པའི་རྣམ་
པ་ཅན་དུ་མཚུངས་པས། དམིགས་པས་འབྱེད་དགོས་སོ། །དེ་ཡང་དབུ་མ་ལ་འཇུག་པ་ལས། འགྲོ་བ་གཡོ་བའི་ཆུ་ཡི་ནང་གི་ཟླ་བ་ལྟར། །གཡོ་དང་རང་བཞིན་ཉིད་ཀྱིས་སྟོང་བར་མཐོང་བ་ཡི། །ཞེས་གསུངས་པ་ནི་འགྲོ་ལ་སྙིང་རྗེར་གྱུར་གང༌། ཞེས་པ་དང་
9-5-50b


འབྲེལ་བས། གཞན་གྱིས་བཏགས་པའི་བདག་གིས་དབེན་པའི་མི་རྟག་པའི་ཆོས་ཙམ་གྱི་ངོ་བོར་གྱུར་པའི་སེམས་ཅན་དང༌། རང་བཞིན་གྱིས་གྲུབ་པས་སྟོང་པའི་སེམས་ཅན་ལ་དམིགས་པའི་སྒོ་ནས་བཞག་ལ། འདིར་ནི་གཟུང་འཛིན་རྫས་གཞན་དུ་
བདེན་པས་སྟོང་པའི་སེམས་ཅན་དང༌། རང་བཞིན་གྱིས་གྲུབ་པས་སྟོང་བའི་སེམས་ཅན་ལ་དམིགས་པའི་སྒོ་ནས་དབྱེ་སྟེ། དེ་ཡང་དོན་ལ་དེ་ལྟར་གནས་པ་ཙམ་མིན་གྱི། བློའི་ངོར་ཆོས་དེ་གཉིས་ཀྱིས་ཁྱད་པར་དུ་བྱས་པའི་སེམས་ཅན་ལ་དམིགས་
པའི་ཁྱད་པར་རོ། །ལྟ་བ་རྫོགས་པར་རྟོགས་པས་ཀྱང༌། དམིགས་པ་དེ་གཉིས་གང་རུང་གི་སྒོ་ནས་སྙིང་རྗེ་སྐྱེད་ཀྱི། ཕྱི་མཁོ་ནའི་སྒོ་ནས་སྒོམ་པ་མིན་པས་གང་ཟག་གཅིག་ལ་ཡང་མི་འགལ་ལོ། །དེ་ལ་ཤཱུ་ནྱ་ཏཱ་ནི་སྟོང་པ་ཉིད་དོ། །ཛྙཱ་ན་ནི་དེའི་ཡུལ་ཅན་གྱི་ཤེས་
པའོ། །བཛྲ་ནི་རྡོ་རྗེ་ལྟར་མི་ཕྱེད་པའི་དོན་ཏེ། འདི་ལ་དངོས་སུ་དེ་ལྟར་སོང་བ་དང༌། མོས་ནས་བྱེད་པ་གཉིས་སོ། །སྭ་བྷཱ་བ་ནི་རང་བཞིན་ནོ། །ཨཱདྨ་ཀ་ནི་བདག་ཉིད་དོ། །ཨ་ཧཾ་ནི་ད་སྟེ། ཀོ་ཧཾ་ནི་ཨ་མི་མངོན་པར་བྱས་ཏེ་མཚམས་སྦྱར་བ་ཡིན་ལ། འདི་འདྲའི་སྐབས་ཀུན་
ཏུ་ཤེས་པར་བྱའོ། །སྐབས་འདིར་སྔགས་གཉིས་སྒོམ་པ་ནི་སྡོམ་འབྱུང་ལས་གསུངས་ལ། སེམས་ཙམ་ཉིད་ལ་རྣམ་གནས་ཤིང༌། །བྱང་ཆུབ་ཚོགས་ནི་བསྒོམ་པར་བྱ། ཞེས་ཀྱང་གསུངས་ཏེ། རྩ་རྒྱུད་ལས། རྒྱུ་སོགས་སྟོང་པ་སྔོན་འགྲོ་བས། ཞེས་གསུངས་
པའི་དོན་བཤད་རྒྱུད་རྣམས་ཀྱིས་བཤད་ཚུལ་གྱི་སྔགས་མི་འདྲ་བ་འགའ་ཞིག་ཡོད་དོ། །དེ་ལྟར་ཤཱུ་ནྱ་ཏཱའི་སྔགས་དོན་སྒོམ་པ་ན་དབུ་མའི་ལྟ་བ་ལེགས་པར་དྲན་པ་དང༌། སྣོད་བཅུད་ཀྱི་སྣང་བ་ཐམས་ཅད་འོད་གསལ་དུ་སྡུད་པ་གཉིས་དགོས་ཀྱི་སྔ་མ་མེད་པའི་ཕྱི་མ་
9-5-51a


རྐྱང་པ་བྱེད་པ་ནི་དོན་མིན་ནོ། །གསུམ་པ་ནི། གལ་ཏེ་དེ་ལྟ་ན་སྔར་གྱི་བསྲུང་འཁོར་གྱི་སྣང་བ་ཡང་དག་པར་བྱ་དགོས་ལ། དེ་ལྟར་ན་ནི་མི་རིགས་ཏེ། དེ་ནི་བགེགས་བཟློག་པའི་ཕྱིར་ཡིན་པས་ད་དུང་ཡང་དགོས་པའི་ཕྱིར་རོ་སྙམ་ན། སྐྱོན་མེད་དེ། 
རྒྱུད་འདི་ཤེས་རབ་ཀྱི་དབང་པོ་རྣོན་པོའི་དབང་དུ་བྱས་ལ། དེ་ལ་ནི་སྟོང་པ་ཉིད་སྔར་ལྟར་སྒོམ་པ་ཁོ་ན་བགེགས་ཟློག་ཅིང་སྲུང་བའི་མཆོག་ཡིན་པའི་ཕྱིར་རོ། ཞེས་འགྲེལ་པ་རྣམས་ནས་འཆད་དེ། དོན་དམ་དང་ཀུན་རྫོབ་ཀྱི་བསྲུང་བ་གཉིས་ཀ་དང་ལྡན་པར་བྱ་
དགོས་པའི་དོན་ནོ། །འོན་ཕྱི་རོལ་གྱི་བྲིས་པའི་དཀྱིལ་འཁོར་གྱི་ཕྱིར་རྡོ་རྗེའི་ར་བ་འོང་བ་ཇི་ལྟར་ཡིན་ཞེན། ཞེས་པའི་ལན་དུ་གང་གི་ཚེ་བཅོམ་ལྡན་འདས་ཡོངས་སུ་རྫོགས་པ་དེའི་ཚེ་དམ་ཚིག་གི་འཁོར་ལོ་ཡོངས་སུ་གཅོད་པའི་སྣ་ཚོགས་རྡོ་རྗེའི་ཕྲེང་བ་ཡང༌། 
རྫོགས་པས་སོ། ཞེས་འགྲེལ་པ་གསུམ་ནས་དོན་མཐུན་པར་གསུངས་པ་ནི། བསྲུང་འཁོར་སྒོམ་པ་སོགས་ཀྱི་འོག་ཏུ་དཀྱིལ་འཁོར་སྒྲུབ་ཚུལ་སྒྲུབ་ཐབས་བཞིན་བྱ་དགོས་པ་ལ་བརྩད་པ་ཡིན་ལ། དེའི་ལན་དུ་ཕྱིའི་དོར་ར་ཡང་གསར་དུ་བསྐྱེད་པར་བསྟན་པ་ནི། 
བྲིས་པ་ཁོ་ནར་མ་ཟད་ཐུན་བཞིའི་སྐབས་ཀུན་ཏུ་ཤེས་དགོས་ལ། རྡོ་རྗེའི་ར་བ་སྣ་ཚོགས་རྡོ་རྗེར་བསྟན་ནོ། །རྣལ་འབྱོར་རྫོགས་ཕྲེང་ལ། རྡོ་རྗེའི་ར་བ་ལན་གཉིས་སྐྱེད་པ་གང་ནས་ཀྱང་མ་བཤད་ཅེས་གསུང་པ་ནི། རང་ལུགས་ཀྱིས་ཀྱང༌། ལཱུ་ཨི་པའི་སྒྲུབ་ཐབས་
སུ་རྡོ་རྗེའི་ར་བ་གཉིས་སྐྱེད་པ་མཛད་ཅིང༌། བསྲུང་འཁོར་གྱི་འོག་ཏུ་ནཱ་ད་ཙམ་ཡང་དོར་བའི་སྟོང་ཉིད་སྒོམ་པར་བཤད་ལ། ཕྱིའི་རྟེན་གྱི་དཀྱིལ་འཁོར་གྲུབ་པ་ན་ཡང་ཕྱིའི་རྡོར་ར་དགོས་པས་དེ་ལྟར་མ་ངེས་ལ། ལྭ་བ་པས་ཀྱང༌། ལན་གཉིས་སྐྱེད་པར་བཤད་པས་
9-5-51b


རྒྱུད་ཀྱི་ཁུངས་ཀྱང་ཡོད་པར་གསལ་ལོ། །ལྭ་བའི་ན་བཟའ་ཅན་གྱིས་སྐབས་འདིའི་སྟོང་ཉིད་སྒོམ་པ་དབང་རྣོན་གྱི་བསྲུང་པ་མཆོག་ཏུ་གསུངས་ཤིང༌། རྒྱུད་གཞན་མང་པོ་དང་བསྟན་བཅོས་ཚད་ལྡན་མང་པོས་ཀྱང་སྐབས་འདིའི་སྟོང་ཉིད་ནི་དབུ་མའི་ལྟ་བ་ཇི་བཞིན་
དུ་བཤད་པས། བློ་གྲོས་དམན་པ་མང་པོས་སྐབས་འདིར་སྒོམ་པའི་བསྐྱེད་རིམ་གྱི་སྐབས་ཀྱི་སྟོང་ཉིད་ནི། མོས་མནོ་ཙམ་གྱི་ཆད་སྟོང་ཡིན་ནོ་ཞེས་སྨྲ་བ་ནི་རྣམ་གཞག་མ་ཆགས་པའི་གཏམ་ཆེན་པོའོ། །སྣོད་བཅུད་ཀྱི་སྣང་བ་དོན་ལ་མ་དག་བཞིན་དུ་སྡུད་པ་ཡང་
ཆད་སྟོང་སྒོམ་པ་མིན་ཏེ། རིགས་པའི་དགག་བྱའི་ཚད་མ་ཟིན་པར་རྟེན་འབྲེལ་གྱི་ངེས་པ་དོར་བ་ནི། སྣང་བ་དག་པར་མ་བསྒོམས་ཀྱང་ཆད་སྟོང་གི་ལྟ་བ་ཡིན་ལ། རང་བཞིན་གྱིས་གྲུབ་པས་སྟོང་པ་ལ་བྱ་བྱེད་ཐམས་ཅད་འཐད་པར་རྟོགས་ན་ནི། སྣང་བསྡུད་པ་སྒོམ་པ་
ལ་ཆད་ལྟའི་དོན་མེད་དོ། །དགོས་པའི་དབང་གིས་དེ་ལྟར་བྱེད་པ་ཡིན་གྱི་སྣང་བ་མེད་པར་ཁས་མི་ལེན་པའི་ཕྱིར་དང༌། རིམ་པ་དང་པོ་དང༌། ལུས་དབེན་དང༌། རྡོར་བཟླས་དང༌། སེམས་དབེན་གྱི་རིམ་པ་དང༌། སྒྱུ་ལུས་ཀྱི་རིམ་པ་མཐར་ཕྱུང་བས་ཀྱང་བསམ་གཏན་གཉིས་
ཀྱི་སྒོ་ནས། སྣོད་བཅུད་ཀྱི་སྣང་བ་བསྡུས་ནས་འོད་གསལ་དུ་འཇུག་པར་སྒོམ་པ་འཕགས་པ་ཡབ་སྲས་སོགས་དུ་མ་ཞིག་གིས་བཤད་པའི་ཕྱིར་རོ། །ལྭ་བ་པས་སྔར་བཤད་པའི་དོན་དམ་པའི་དེ་ཁོ་ན་ཉིད་དེ་མ་རྟོགས་པས་སེམས་ཅན་འཁོར་བར་འཁྱམས་པར་
གསུངས་པ་བཞིན་དུ། བླ་མེད་ཀྱི་གཞུང་གཞན་མང་པོ་ནས་ཀྱང་བཤད་པས། འཁོར་བའི་འཆིང་བ་ལས་གྲོལ་བའི་ཐབས་སུ་ཐེག་དམན་གྱིས་ཀྱང་དེ་ཁོ་ན་ཉིད་ཀྱི་དོན་རྟོགས་དགོས་པར་ཁས་བླང་དགོས་པ་དང༌། ཉན་རང་ཁ་ཅིག་གིས་མ་རྟོགས་པ་ལ་དགོངས་
9-5-52a


ནས། ཉན་རང་གིས་དེ་ཁོ་ན་ཉིད་མ་རྟོགས་པར་གསུངས་པ་ཡང་ཡོད་པས་ཚུལ་གཉིས་ཀ་ཤེས་དགོས་སོ། །མདོར་ན་སྐབས་འདིར་དབུ་མའི་ལྟ་བའི་ངེས་པ་ཤུགས་ཅན་བསྐྱེད་ལ། ཡུན་ཧ་ཅང་ཐུང་བ་མིན་པ་ཞིག་བསྒོམ་མོ། །བཞི་
པ་ནི། དེ་ལྟར་རང་གི་གནས་གསུམ་དུ་ཧེ་རུ་ཀ་བཀོད་པ་ཡོངས་སུ་གྱུར་བའི་ཡི་གེ་གསུམ་ལ་སྣོད་བཅུད་གཞན་ཐམས་ཅད་སྡུད་པའི་རིམ་པ་འདི་ནི་འཆི་བའི་ཚེ། སྣོད་བཅུད་གཞན་དུ་སྣང་བའི་རང་གི་ཤེས་པ་རྣམས་རིམ་གྱིས་བསྡུས་ནས། དཀར་དམར་
ནག་པའི་རྣམ་པ་ཅན་གྱི་སྣང་མཆེད་ཐོབ་གསུམ་དུ་སོང་བའི་སྐབས་དང་འདྲའོ། །དེ་ནས་དཀར་པོ་དམར་པོ་ལ་བསྡུས་པ་ནི། སྣང་བ་མཆེད་པ་ལ་ཐིམ་པ་དང་འདྲའོ། །དམར་པོ་ནག་པོ་ལ་བསྡུས་པ་ནི། མཆེད་པ་ཉེར་ཐོབ་ལ་ཐིམ་པ་དང་འདྲའོ། །དེ་
ནས་ཧཱུཾ་ནག་པོ་ཞབས་ཀྱུ་ནས་ནཱ་དའི་བར་དང༌། ནཱ་ད་ཡང་མི་དམིགས་པར་སོང་བ་ནི། ཐོབ་པ་འོད་གསལ་དུ་ཐིམ་པ་དང་འདྲ་སྟེ། འཆི་རིམ་ལ་སྟོང་པ་བཞི་ཡོད་པའི་འཆི་བའི་འོད་གསལ་དངོས་གཞི་དང་འདྲའོ། །ཉེར་ཐོབ་མཚོན་པའི་ཧཱུཾ་ཉིད་ལ་ཐིམ་རིམ་ལྔར་བྱས་
པ་ནི། སྦྱང་གཞི་ལ་ཡང་ཉེར་ཐོབ་ནས་ཇེ་ཕྲ་ཇེ་ཕྲར་སོང་ནས་འོད་གསལ་དུ་འཇུག་པ་མཚོན་པ་ཡིན་ལ། དེས་ནི་རིམ་པ་གཉིས་པའི་སྐབས་སུ་ཉེར་ཐོབ་ནས་འོད་གསལ་དུ་འཇུག་པ་ཡང༌། ཤིན་ཏུ་ཕྲ་བའི་རིམ་པས་རིམ་གྱིས་འཇུག་པར་བསྟན་པའི་ཕྱིར་རོ། །འདི་
ནི་སྙིང་ཁར་གནས་པའི་ཧཱུཾ་ཡིག་གི་སྡུད་རིམ་ཡིན་པས་སྤྲོས་པ་བསྡུས་ནས་འོད་གསལ་འཆར་བའི་གནས་མཐར་ཐུག་པ་ནི་སྙིང་ཁ་ཡིན་པ་དང༌། དེ་ཁོ་ན་ཉིད་མངོན་དུ་གྱུར་པའི་འོད་གསལ་གྱི་ཡེ་ཤེས་ཀྱི་དོན། ནཱ་ད་ཙམ་གྱི་གཉིས་སྣང་ཕྲ་མོ་ཡང་དག་
9-5-52b


པར་སྟོན་པའོ། མངོན་བརྗོད་ལས་བསྲུང་འཁོར་གྱི་འོག་ཏུ་སྟོང་ཉིད་བསྒོམས་པའི་མཇུག་ཐོགས་སུ། དྲིལ་བུ་ཞབས་ཀྱི་རིམ་ལྔའི་རིམ་པ་དང་པོ་བཤད་པའི་གནད་ཀྱང༌། འདི་རྣམས་ཀྱིས་ཤེས་དགོས་ལ། རིམ་པ་དང་པོར་འདི་ལྟར་བྱས་ནས་བསྐྱངས་པའི་མཐུས། 
རྫོགས་རིམ་གྱི་སྐབས་སུ་རྟོགས་པ་བྱེ་བྲག་པ་ཇི་འདྲ་ཞིག་སྐྱེ་བའི་རྒྱུད་སྨིན་བྱེད་དུ་འགྲོ་བ་ཡང་འདི་ལ་བརྟེན་ནས་ཤེས་དགོས་པ་དང༌། དེ་ཁོ་ན་ཉིད་རྟོགས་པའི་ལྟ་བའི་སྟེང་ནས་འོད་གསལ་དུ་འཇུག་པར་ལུགས་འདི་དང༌། རྒྱུད་སྡེ་འོག་མ་གསུམ་དང༌། ཕར་ཕྱིན་གྱི་ཐེག་
པ་རྣམས་འདྲ་ཡང༌། ཐུན་མོང་མ་ཡིན་པའི་འཇུག་རིམ་ལམ་འདི་ལ་ཡོད་པ་ཡང༌། སྟོང་པ་སྒོམ་པ་དང་འཆི་རིམ་གྱི་སྡུད་རིམ་མཐུན་པར་བྱས་པ་འདི་ལ་བརྟེན་ནས་ཤེས་དགོས་པས་གནད་ཆེའོ། །གཉིས་པ་ཐུན་གྱི་དངོས་གཞི་ལ་ཇི་ལྟར་བྱ་བ་ལ་གསུམ། སྟོང་པ་ལས་
ལངས་ནས་ནམ་མཁར་ནཱ་ད་བཞག་པ། གཞལ་ཡས་ཁང་གང་ལ་གནས་པའི་རྟེན་བསྐྱེད་པ། དེ་ནས་རྣལ་འབྱོར་བཞི་སྒོམ་པའོ། །དང་པོ་ནི། དེ་ལྟར་སྣང་བ་ཐམས་ཅད་བསྡུས་པའི་སྟོང་པ་ཉིད་དེ་ལས་ལངས་ཏེ་རང་གི་སེམས་ནཱ་དའི་གཟུགས་སུ་ནམ་མཁའ་ལ་
གཞག་པར་བྱའོ། །དེའི་གཟུགས་ནི་གྱེན་དུ་འགྲེང་བ། ཤིན་ཏུ་ཕྲ་བ། དཀར་ལ་དམར་པའི་མདངས་ཆགས་པའོ། །འདིར་སྟོང་ཉིད་སྒོམ་པ་ལས་ལངས་པའི་ཐོག་མར། རང་གི་སེམས་ནཱ་དའི་གཟུགས་སུ་ནམ་མཁའ་ལ་འཇོག་པར་ལྭ་བ་པས་བཤད་པའི་རྗེས་སུ་
འབྲངས་ནས། པྲཛྙཱ་རཀྵི་ཏ་དང་འཁྲུལ་སྤོང་དང༌། དེ་བཞིན་གཤེགས་པའི་རྡོ་རྗེ་དང༌། སྡོམ་འབྱུང་འགྲེལ་པ་སོགས་ནས་ཀྱང་བཤད་ཀྱང༌། རྒྱུ་མཚན་ནི་གཞུང་དེ་དག་ནས་མ་བཤད་དོ། །དེའི་རྒྱུ་མཚན་ནི་འདིའི་རིམ་པ་དང་པོ་དེ་སྦྱང་གཞི་སྐྱེ་འཆི་བར་དོ་གསུམ་
9-5-53a


གྱི་རིམ་པ་དང་སྦྱར་ནས་སྒོམ་པ་ཤེས་པ་ལ་རག་ལས་ལ། དེ་ཡང་བདེ་མཆོག་སྡོམ་འབྱུང་ཉིད་ལས་གསལ་བར་གསུངས་པ་དང༌། མན་སྙེར་བདེ་མཆོག་རྡོར་སེམས་ཀྱི་སྐབས་ནས་འབྱུང་བ་མ་གཏོགས་པ་འདིའི་སྐོར་གྱི་རྒྱུད་དང༌། 
ཁུངས་ཐུབ་ཀྱི་རྒྱ་གཞུང་གཞན་ནས་མི་གསལ་བ་དང༌། སྟོང་ཉིད་སྒོམ་པ་ལས་ལངས་མ་ཐག་བར་སྲིད་མཚོན་པའི་ཡི་གེ་སོགས་འཇོག་པ་ནི་མང་བས། ཤིན་ཏུ་རྟོགས་དཀའ་བ་ཡིན་ནོ། །སྡོམ་འབྱུང་ལས་ནི་ལེའུ་གཉིས་པ་བསྐྱེད་རིམ་གྱི་ལེའུ་ལས། 
བསྐྱེད་རིམ་དངོས་མ་བཤད་པར་སྦྱང་གཞི་སྐྱེ་འཆི་བར་དོ་གསུམ་གསལ་བར་བཤད་པའི་མཐར། སྲིད་པ་སྐྱེ་བའི་རིམ་ཤེས་པས། །རྫོགས་པའི་སངས་རྒྱས་ཐོབ་བྱའི་ཕྱིར། །འདི་ནི་ཕུང་པོ་ཡོངས་མཁྱེན་པའི། །དེ་ཉིད་གསུངས་པ་རྣམས་ཀྱིས་བཤད། །ཅེས་
གོང་དུ་སྦྱང་གཞི་གསུམ་བཤད་པ་དེ། སྲིད་པ་སྐྱེ་བའི་རིམ་པར་ཤེས་ནས། དེ་དང་མཐུན་པར་སྒོམ་པ་རྣམས་ཀྱིས། སངས་རྒྱས་ཐོབ་པའི་ཕྱིར་དུ་བཤད་པ་ཡིན་ཞེས་གསུངས་ཏེ། བསྐྱེད་རིམ་དངོས་ནི་ལེའུ་བཅུ་གསུམ་པར་འཆད་དོ། །གཞི་ལ་མངལ་དུ་
སྐྱེ་བ་ལེན་པ་ལྟ་བུ་ཞིག་གི་དབང་དུ་བྱས་ན། འཆི་བའི་འོད་གསལ་ལས་ལངས་མ་ཐག །འོད་གསལ་གྱི་རླུང་སེམས་ཙམ་ལས་བར་སྲིད། དབང་པོ་ཀུན་ཚང་ཞིང༌། ཤ་རུས་ལ་སོགས་པས་སྟོང་པའི་ཕྲ་བའི་ལུས་ཅན་ཐོགས་མེད་འགྲུབ་པ་བཞིན་དུ། ལམ་རིམ་
པ་དང་པོ་ལ་ཡང་འཆི་བའི་འོད་གསལ་དང་འདྲ་བའི་བཤད་པའི་སྡུད་རིམ་གྱིས། འོད་གསལ་སྟོང་ཉིད་དུ་ཞུགས་པ་ལས་ལངས་མ་ཐག་བར་དོ་དང་འདྲ་བའི་ནཱ་དའི་ལུས་འགྲུབ་པས། ནཱ་ད་ནམ་མཁར་འཇོག་གོ། འདི་ལ་བར་དོ་མཚོན་བྱེད་དུ་ཤིན་ཏུ་
9-5-53b


གསལ་བ་མངོན་བྱང་ལྔ་ལས་རྡོ་རྗེ་འཆང་སྐྱེད་པ། མདོར་བྱས་སོགས་གསང་འདུས་འཕགས་ལུགས་ནས་གསལ་བར་གསུངས་ཀྱང༌། རྒྱུད་གཞན་བདེ་མཆོག་དང་ཀྱཻ་རྡོར་སོགས་ཀྱི་སྐོར་ནས་བར་དོ་མཚོན་པ་ཅུང་ཟད་མི་གསལ་བ་ཡི་གེས་མཚོན་པར་
བཤད་ལ། དེ་ཡང་མན་ངག་སྙེམ་ལས། སྲིད་པ་བར་དོའི་གནས་སྐབས་དང་འདྲ་བར། ཁ་ཅིག་ཏུ་ཧོཿཡིག་དམར་པོ་གཉིས་ཀྱི་ནང་དུ་ཆུད་པའི་ས་བོན་གྱི་ཡི་གེའི་གནས་སྐབས་སམ། ཡི་གེ་གསུམ་གྱི་གནས་སྐབས་སམ། ཁ་ཅིག་ཏུ་ནཱ་ད་ཙམ་སྟེ། རྣམ་པ་
གསུམ་ག་ཡང་ལུས་དང་ངག་དང་སེམས་རྣམས་སྐྱེད་པའི་ཕྱིར་རོ། །སྟོང་པ་ཉིད་ཀྱི་ཏིང་ངེ་འཛིན་ནི་འཆི་བའི་རྗེས་ཐོགས་སུ་ཡི་གེའི་གཟུགས་དང༌། དེ་བསྡུས་པ་ནཱ་དའི་གཟུགས་དྲི་ཟ་ནི་རྒྱུད་གཞན་རྣམས་སུ་བསྟན་པ་ལས་སོ། །ས་བོན་ལ་སོགས་པའི་ཡི་གེ་
རྣམས་དང་ནཱ་ད་ནི། རྣམ་པ་སྣ་ཚོགས་སུ་སྐྱེད་པར་འགྱུར་བའི་ལྷའི་འབྱུང་གནས་ཉིད་ཀྱི་ཕྱིར་རོ། །གང་གི་ཕྱིར་དྲི་ཟ་རྣམས་ཀྱང་རྣམ་པར་སྣ་ཚོགས་པ་རྣམས་ཏེ་འོང་བར་འགྱུར་བའི་སྲིད་པའི་རྣམ་པ་ཉིད་ཀྱི་ཕྱི་རོ། ཞེས་བར་སྲིད་མཚོན་པའི་ཡི་གེ་ལ་གཞུང་
ཁ་ཅིག་ཏུ། ཧོཿཡིག་གཉིས་ཀྱི་བར་དུ་ཆུད་པའི་ས་བོན་དང༌། ཁ་ཅིག་ཏུ་ཧོཿཡིག་གཉིས་མེད་པར་ཡི་གེ་གསུམ་ཙམ་དང༌། ཁ་ཅིག་ཏུ་ནཱ་ད་ཙམ་དུ་བཤད་དེ། དེ་ནི་ཤིན་ཏུ་བསྡུས་པའི་ལུགས་དང༌། འབྱུང་འགྱུར་གྱི་གཟུགས་ཅན་གྱི་ལུས་དབྱིབས་སྣ་ཚོགས་
པས་དེ་མཚོན་པའི་ཡི་གེ་ཡང་སྣ་ཚོགས་སུ་བཤད་གསུང་ལ་ལྟར་རོ། །དེ་ལ་ཧོཿཡིག་གཉིས་ཀྱི་བར་དུ་ཆུད་པ་ལ་ཡི་གེ་འབྲུ་གསུམ་བཞག་པ་མང་ལ། མངོན་བརྗོད་ལས། སྙིང་ཁར་ཟླ་བའི་དཀྱིལ་འཁོར་ལ། །ས་བོན་གྱི་ནི་ཡི་གེ་མཾ། །ཧོཿ གཉིས་དང་ནི་བཅས་
9-5-54a


པ་རུ། །སྔོན་གྲུབ་པར་ནི་རྗེས་སུ་བསམ། ཞེས་བདེ་མཆོག་འཇམ་རྡོར་གྱི་སྐབས་སུ། ཧོཿ གཉིས་ཀྱི་བར་དུ་མཾ་ཡིག་རྐྱང་པ་བཞག་པའང་གསུངས་ལ། ཧཱུཾ་རྐྱང་བ་བཞག་པའང་མང་སྟེ། སྟོང་ཉིད་ལས་ལངས་མ་ཐག་ཡི་གེ་འདི་
རྣམས་ནམ་མཁར་བཞག་ན། བར་སྲིད་མཚོན་བྱེད་ཀྱི་ཡི་གེ་ཅུང་ངེས་སླ་ཡང༌། དེ་མ་བྱས་པར་ད་གཟོད་ནཱ་ད་ནས་ཧཱུཾ་དུ་རིམ་གྱིས་རྫོགས་པ་དང༌། ཧཱུཾ་ཅིག་ཅར་དུ་རྫོགས་པ་སྒོམ་པ་མང་བ་རྣམས་ལ་ནི། དོན་དེ་ཡོད་ཀྱང་ཤིན་ཏུ་ངེས་དཀའོ། །དེ་ལྟར་
ལམ་བསྐྱེད་རིམ་པ་ལ་འདི་ལྟར་སྦྱངས་པའི་མཐུས། རྫོགས་རིམ་ལ་ཏིང་ངེ་འཛིན་ཁྱད་པར་ཅན་ཇི་འདྲ་ཞིག་སྐྱེ་བའི་རྒྱུད་སྨིན་བྱེད་དུ་འགྲོ་སྙམ་ན། འདི་ནི་རིམ་པ་གཉིས་པར་འོད་གསལ་ལྷན་ཅིག་སྐྱེས་པའི་རླུང་སེམས་ཙམ་ལས། སྒྱུ་མའི་ལོངས་
སྐུར་སྐྱེད་པའི་ཆེད་ཡིན་ལ། དེས་ན་འདི་ལ་བར་དོ་ལོངས་སྐུར་འཁྱེར་བའི་ལམ་ཁྱེར་ཞེས་ཀྱང་བྱའོ། །འདི་ཡང་བསྐྱེད་རིམ་གྱི་སྐབས་སུ་ཅུང་ཟད་སྦྱོར་ཤེས་པ་འགའ་ཞིག་སྣང་ནའང༌། འདི་ལ་བརྟེན་ནས་རིམ་པ་གཉིས་པའི་སྐབས་སུ་
ཇི་ལྟར་བྱེད་ཀྱི་གོ་བ་མ་ཆགས་པས། རྒྱུད་ཀྱི་དོན་མ་རྙེད་པར་སྣང་བས་ལེགས་པར་རྩད་གཅད་པར་བྱའོ། །འདིའི་རིམ་པ་དང་པོར་བར་དོ་དང་མཐུན་པར་སྒོམ་པ་ཞིག་དོགས་པར་ནི། སྡོམ་འབྱུང་གིས་འགྲུབ་ཅིང༌། བདེ་མཆོག་འཇམ་རྡོར་
ལ་སྔར་ལྟར་བཤད་པ་ནི། དེའི་དགོས་ཆོས་མིན་གྱི་གཞན་ལའང་མཚོན་པས། མངོན་བརྗོད་ལས་ཀྱང་འགྲུབ་པོ། །དེ་ལྟ་ནའང་རླུང་ནས་པདྨ་དང་སྣ་ཚོགས་རྡོ་རྗེའི་བར་དུ། སྒོམ་པ་རྣམས་ལ་ནི་བར་དོ་དང་མཐུན་པར་སྒོམ་པ་མེད་ལ། དེ་
9-5-54b


ཕྱིན་ཆད་ལ་བཞག་ཀྱང་དབང་པོ་ཤིན་ཏུ་རྣོ་ན་མ་གཏོགས་རྟོགས་པར་ཤིན་ཏུ་དཀའ་བ་དང༌། འཆི་སྲིད་རྫོགས་མ་ཐག་བར་སྲིད་འགྲུབ་པའི་སྦྱང་གཞི་དང་ཤིན་ཏུ་མཐུན་ལ། རྟོགས་པར་ཡང་ཅུང་སླ་བས། ལྭ་བའི་ན་བཟའ་ཅན་གྱིས་མཛད་པ་ལྟར། 
སྟོང་ཉིད་ལས་ལངས་མ་ཐག་ནཱ་ད་སོགས་ནམ་མཁར་འཇོག་པ་ནི་ཤིན་ཏུ་ལེགས་སོ། །གཉིས་པ་ལ་གཉིས། འབྱུང་བ་རིམ་རྩེག་དང་རི་རབ་བསྐྱེད་པ་དང༌། སྣ་ཚོགས་པདྨ་དང་སྣ་ཚོགས་རྡོ་རྗེ་བསྐྱེད་པའོ། །དང་པོ་ནི། དེ་ནས་འབྱུང་བ་རིམ་རྩེག་དང་རི་རབ་སྒོམ་
པ་ལ། དྲིལ་བུ་པའི་ལྷ་ལྔའི་སྒྲུབ་ཐབས་ཡིད་བཞིན་ནོར་བུ་ལས། བ་ལང་གནས་དང་སྟེང་ལྡིང་དང༌། །ལྷག་མ་སྐམ་པ་རྩ་དེ་ནས། །དུང་ཆེན་པོ་ཡི་རང་བཞིན་བྱ། །ཡང་ན་རུས་སྤལ་དག་གིའོ། །ཡཾ་རཾ་བཾ་ལཾ་སུཾ་རྣམས་ལས། །རླུང་མེ་ཆུས་རི་རབ་ནི། །གྲུ་
བཞི་རིམ་བཞི་རྩེ་མོ་བརྒྱད། །ཀུན་ཀྱང་འོད་ཟེར་འབར་བར་བསྒོམ། ཞེས་འབྱུང་བ་རིམ་རྩེག་སོགས་སྒོམ་པའི་སྐབས་སུ་བཀོད་པ་འདི། རྩ་རྒྱུད་ལས་འབྱུང་ལས། དེ་ནི་རྩ་རྒྱུད་ལས་གསུངས་ཚུལ་ལོ། །དེ་ལ་བ་ལང་གནད་ནི། ཞིབ་མོ་རྣམ་འཐག་
ལས། ངག་ཕྱོགས་ས་དང་འོད་ཟེར་དང༌། །ཕྱུགས་དང་མིང་དང་རྡོ་རྗེ་དང༌། །མཐོ་རིས་ཆུ་དང་དོན་དགུ་ལ། །མཁས་པས་གོ་སྒྲ་དེས་གཟུང་བྱ། ཞེས་གསུངས་པ་ལྟར་ཕྱུགས་ཏེ་བ་ལང་ལའང་འཇུག་པའི་གོ་སྒྲ་ནི་ས་ལའང་འཇུག་པས་འདིར་སའོ། །གང་དུ་
མེ་ཏོག་སོགས་བཞག་ན། སྟེང་དུ་ལྡིང་བ་ནི་ཆུའོ། །གང་གིས་ལྷག་མ་མེད་པར་སྐམ་པར་བྱེད་པ་ནི་མེའོ། །རྩ་ནང་ནས་རྒྱུ་བ་ནི་རླུང་ངོ༌། །སྤྱོད་པ་པས། མི་ཕྱེད་པ་དང་རུས་སྦལ་ལོ། །ཞེས་ཡང་ནའི་གྲ་མེད་པར་ཡང་འདོན་ནོ། །རྩ་རྒྱུད་ཀྱི་འགྲེལ་པ་
9-5-55a


གཉིས་ཀྱི་གཅིག་ལས། ལྕི་བའི་ཐལ་བ་ཉིད་དག་དང༌། །དེ་བཞིན་ལྷག་མ་མགོ་བོ་སྐམ། ཞེས་དང༌། ཡང་གཅིག་ལས། ལྷག་མ་མགོ་སྐམ་མཚོན་ཆེའོ། ཞེས་བཏོན་ནས་ལྕི་བ་ནིས་དང༌། ཐལ་བ་ནི་ཆུ་དང༌། དེ་བཞིན་ནི་རླུང་
དང༌། མགོ་སྐམ་ནི་མེ་དང༌། དུང་ཆེན་པོ་ལས་བྱུང་བས་བྱ། ཞེས་པ་ལ། རི་ཆེན་པོ་ལས་བྱུང་བས་བྱ། ཞེས་ཀྱང་འདོན་པས། དེས་ནི་རི་རབ་དང་། ཡང་ན་ཞེས་པས་ནི། ལྷ་མངལ་སྐྱེས་ཀྱི་རིམ་པ་ལས་གཞན་སྒོང་སྐྱེ་ཀྱི་རིམ་པ་སྟོན་པར་འཆད་དོ། ཡང་
གཅིག་ལས། མཚོན་ཆ་རླུང་ལ་འཆད་དེ་གཞན་འདྲའོ། །ཀོང་ཀ་ན་དང༌། སྐལ་ལྡན་གྲགས་པ་དང་། ལངྐ་དང༌། དཔའ་བོ་རྡོ་རྗེ་རྣམས་ཀྱིས་འབྱུང་བ་རིམ་རྩེག་དང༌། རི་རབ་སྐྱེད་པ་ལ་མི་སྦྱོར་ཞིང༌། དང་པོས་མི་མགོའི་དུམ་བུ་སྐམ་པོ་བླངས་ལ། དུང་ཆེན་
པོ་བྱའོ་ཞེས་དང༌། གཉིས་པས་བ་ལང་དང་མ་ཧེ་སོགས་ཀྱི་རུས་པ་བླངས་ལ། ལས་སོ་སོའི་ཕྲེང་བ་བྱའོ། ཞེས་དང༌། གསུམ་པས་ནི་མགོ་བོ་སྐམ་བོ་ཆག་གྲུགས་མེད་པ་བླངས་ལ། དུང་ཆེན་པོ་བྱ་བའམ། ཡང་ན་རུས་སྦལ་གྱི་ཐོད་པ་ལ་བྱའོ་ཞེས་དང༌། བཞི་
པས་མི་མགོ་སྐམ་པོ་བླངས་ནས། བདེ་བ་ཆེན་པོ་བྱེད་དོ། རུས་སྦལ་ནི་ཐོད་པའོ། །ཞེས་ཟེར་མོད་ཀྱང༌། དྲིལ་བུ་པ་དང༌། སྤྱོད་པ་པའི་དགོངས་པ་འབྱུང་བ་རིམ་རྩེག་སོགས་ལ་སྦྱོར་རྒྱུ་ཡིན་ལ། དུང་ཆེན་པོ་ནི་བདེ་བ་ཆེན་པོར་ཡང་བསྒྱུར་དུ་རུང་བས། 
འབྱུང་བ་རིམ་རྩེག་རྣམས་བདེ་བ་ཆེན་པོའི་ངོ་བོར་མོས་པར་བྱ་བ་དང༌། ཡང་ནའི་དོན་ཡང་ནིའི་དོན་དུ་བཤད་པ་ཡང་ཡོད་པས། སྡ་མར་མ་ཟད། རུས་སྦལ་གྱི་བརྡས་བསྟན་པའི་རི་རབ་ཀྱང་བསྒོམས་ལ། བདེ་བ་ཆེན་པོའི་ངོ་བོར་མོས་པར་བྱ་བའི་དོན་
9-5-55b


དུ་བཤད་པར་བྱ་སྟེ། ནག་དྲིལ་གཉིས་ཀའི་ལུགས་ཀྱིས་རྟེན་སྐྱེད་པའི་སྐབས་ཁོ་ནར་སྦྱོར་བར་འདུག་པས། ལུགས་དེ་ལ་རུས་སྦལ་དག་གིའོ། ཞེས་པ་ལྷའི་སྐྱེད་ཆོག་ལ་མི་འགྲིག་པའི་ཕྱིར་རོ། །རི་རབ་དང་པདྨ་ནི་གསལ་བར་རྩ་རྒྱུད་ལས། རི་སྟེང་སྣ་ཚོགས་
པདྨ་ཡི། །ལྟེ་བར་ཨཱ་ལི་ཀཱ་ལི་བསྐྱེད་ཅེས་གསུགས་སོ། དོན་དེ་བཤད་པའི་རྒྱུད་སྡོམ་འབྱུང་ལས། རྟེན་དང་བརྟེན་པའི་གཟུགས་སུ་ནི། །བྷེ་རཾ་ལ་སོགས་པ་བསམ། ཞེས་བཤད་པ་ནི། འབྱུང་བའི་འཁོར་ལོ་སྔ་མ་རྟེན་དང༌། ཕྱི་མ་བརྟེན་པའི་ཚུལ་བྷེ་རཾ་བྷ་དང༌། 
ལ་སོགས་ཀྱིས་མེ་དང་ཆུ་དང་སའི་དཀྱིལ་འཁོར་རྣམས་གོང་ནས་གོང་དུ་སོན་པར། ཡང་དག་པར་གནས་པར་རྣམ་པར་བསམ་མོ། །ཞེས་མདོར་བསྟན་ནོ། བྷེ་རཾ་ནི་བསྐལ་བ་ཆེན་པོ་འཆགས་བའི་དུས་ཀྱི་རྫི་རླུང་དུ། འཇུག་ཊྭི་ཀ་ཆེན་མོར་བཤད་བཤད་དོ། །རྒྱས་
པར་བཤད་པ་ནི། ས་བོན་གྱི་ཡི་གེ་ནི་ཡཾ་སྔོན་པོ་ཡོངས་སུ་གྱུར་པ་ལས་དཀྱིལ་འཁོར་ནོ། རླུང་གི་དཀྱིལ་འཁོར་དང༌། ཁ་དོག་གི་མདོག་ནི་སྔོན་པོ་དང༌། དབྱིབས་ནི་གཞུ་ལྟ་བུ། མཚན་མ་ནི་རྒྱལ་མཚན་ནམ་བ་དན་གྱིས་མཚན་པའོ། རླུང་དེའི་སྟེང་དུ་
ས་བོན་གྱི་ཡི་གེ་རཾ་དམར་པོ་ཡོངས་སུ་གྱུར་པ་ལས། དཀྱིལ་འཁོར་ནི་མེའི་དཀྱིལ་འཁོར་དང་ཁ་དོག་གི་མདོག་ནི་དམར་པོ་དང༌། དབྱིབས་ནི་ཟུར་གསུམ་པ་དང༌། མཚན་མ་ནི་མེ་འབར་བས་མཚན་པའོ། །མེ་དེའི་སྟེང་དུ་ས་བོན་གྱི་ཡི་གེ་ནི་བ་དཀར་
པོ་ཡོངས་སུ་གྱུར་པ་ལས། དཀྱིལ་འཁོར་ནི་ཆུའི་དཀྱིལ་འཁོར་དང༌། ཁ་དོག་ནི་དཀར་པོ་དང༌། དབྱིབས་ནི་ཟླུམ་པོ་དང༌། མཚན་མ་ནི་བུམ་པས་མཚན་པའོ། ཆུ་དེའི་སྟེང་དུ་ས་བོན་གྱི་ཡི་གེ་ལཾ་སེར་པོ་ཡོངས་སུ་གྱུར་པ་ལས། དཀྱིལ་འཁོར་ནི་
9-5-56a


སའི་དཀྱིལ་འཁོར་དང༌། དབྱིབས་ནི་གྲུབ་བཞི་པ་དང༌། མདོག་ནི་སེར་པོ་དང༌། མཚན་མ་ནི་གྲུ་བཞིར་རྡོ་རྗེ་རྩེ་གསུམ་པས་མཚན་པའོ། སྒྲུབ་ཐམས་ཆག་འགྱུར་ལས། མེ་ལ་རཾ་གྱིས་མཚན་པ་བྱས། ལོ་ཆེན་དང༌། མར་དོའི་
འགྱུར་ལས་འབར་བས་མཚན་པར་བཤད་དེ། སྡོམ་འབྱུང་པ་དང༌། རླུང་དང་ཚུལ་མཚན་མ་མ་བྱུང༌། མེ་ལ་རྡོ་རྗེ་རྩེ་གསུམ་དང༌། ས་ལ་གྲྭ་བཞིར་རྡོ་རྗེ་རྩེ་གསུམ་པས་མཚན་པར་བཤད་ཀྱི། འོད་ཟེར་ཕྲེང་བ་ཟུར་པ་མ་བཤད་ལ། མངོན་བརྗོད་ལས། རླུང་
ལ་རྒྱལ་མཚན་དང༌། མེ་ལ་རྡོ་རྗེ་དང༌། ཆུ་ལ་བུམ་པ་དང༌། ས་ལ་གཞུང་ཁ་ཅིག་ཏུ་སྣ་ཚོགས་རྡོ་རྗེ་དང༌། ཁ་ཅིག་ཏུ་རྡོ་རྗེས་མཚན་པ་དང༌། རིམ་པ་བཞིན་དུ་དྲ་བའི་ཕྲེང་བ་དང༌། འབར་བའི་ཕྲེང་བ་དང༌། འོད་ཟེར་སེར་པོ་
འཁྲིགས་པར་བཤད་དོ། །མངོན་བརྗོད་འགྲེལ་པར་མེའི་གྲྭ་གསུམ་དུ་རྡོ་རྗེས་མཚན་པ་དང༌། སའི་གྲྭ་བཞིར་སྣ་ཚོགས་རྡོ་རྗེ་མཚན་པར་བཤད་ལ། གཞན་འདྲའོ། དེ་རྒྱལ་མཚན་ནི་གཡས་གཡོན་གཉིས་སུ་དང༌། རཾ་དང་མེ་འབར་བས་མཚན་
པ་ནི་གྲྭ་གསུམ་དུ་དང༌། བུམ་པས་ནི་དབུས་མཚན་པར་བྱའོ། །འདི་རྣམས་སྐྱེད་པའི་དུས་སུ་བོད་ཀྱི་བླ་མ་ཁ་གཅིག་གིས། ནམ་མཁའི་ནཱ་ད་ལས་འོད་ཟེར་འཕྲོས་པ་ལས་ཡཾ། དེ་ཡོངས་སུ་གྱུར་པ་ལས། རླུང་སྐྱེད་པ་དང༌། ཁ་ཅིག་གིས་ཡཾ་ནས་དབྱངས་
གསལ་གྱི་བར་ལ་དེ་བཞིན་དུ་བྱེད་པ་ནི། སྤྱོད་པ་བས། སྒྲ་ཡི་གཟུགས་ལ་སོགས་ལས་འབྱུང༌། །རི་ལ་སོགས་པ་ཇི་བཞིན་བསམ། ཞེས་གསུངས་པས་བསྟན་སྙམ་དུ་མི་གཟུང་སྟེ། དེ་ནི་སུཾ་ལ་སོགས་པའི་སྒྲ་སྟེ་ཡི་གེའི་གཟུགས་ལས་བྱུང་བའི་དོན་
9-5-56b


ཡིན་པའི་ཕྱིར་ཏེ། ནམ་མཁར་ནཱ་ད་འཇོག་པ་དེའི་གཞུང་དུ་མ་བཤད་པའི་ཕྱིར་དང༌། དེའི་སྐབས་གཞན་གཉིས་སུ་ཡང༌། སྒྲ་དང་སྒྲ་གཟུགས་སྔོན་དུ་འགྲོ་བར་བཤད་པའི་སྐབས་སུ་ཡང་ནམ་མཁའི་ནཱ་ད་ལས་སྐྱེད་པར་མི་སྣང་བའི་ཕྱིར་དང༌། ཁུངས་ཐུབ་གཞན་གྱི་
ཤེས་བྱེད་ཀྱང་མེད་པས་མི་དགོས་སོ། །ས་དེའི་སྟེང་དུ་ས་བོན་གྱི་ཡི་གེ་སུཾ་ཡོངས་སུ་གྱུར་པ་ལས། རི་རབ་ལྷུན་པོ་དབྱིབས་གྲུ་བཞི་པ། རིན་པོ་ཆེ་སྣ་བཞིའི་རང་བཞིན་ཅན། རྩེ་མོའམ་ལྕོག་བརྒྱད་ཀྱིས་ཉེ་བར་མཛེས་པ་སྟེ། དེ་ནི་སྡོམ་འབྱུང་དང་མངོན་བརྗོད་
ལས་ཀྱང་གསུངས་སོ། །དེ་ལ་རིན་པོ་ཆེ་སྣ་བཞི་ནི་ཤར་ཤེལ། ལྷོ་བེེ་ཌཱུ་རྱ། ནུབ་པདྨ་རཱ་ག །བྱང་གསེར་དང༌། རྩེ་མོ་བརྒྱད་ནི་ཕྱོགས་མཚམས་ཀྱི་རྩེ་མི་མཐོ་བར། མངོན་བརྗོད་འགྲེལ་པར་བཤད་ཅིང༌། ཉིན་མོ་མཛད་ཀྱིས་ལྕོག་བརྒྱད་དུ་བཤད་དོ། བོད་
ཁ་ཅིག་རི་རབ་ཀྱི་ཟུར་བཞི་ལ་ལྕོག་བཞི་ལས་མེད་ཀྱང༌། ཕྱོགས་བཞི་ནས་བལྟས་པ་ན་ཕྱོགས་རེ་རེ་ན་ལྕོག་གཉིས་གཉིས་སུ་མངོན་པས་རྩེ་མོ་བརྒྱད་ཡིན་པར་བླ་མ་ཕམ་མཐིང་བ་སོགས་བཞེད་ཟེར་མོད་ཀྱང་སྔ་མ་ལྟར་བྱ་དགོས་སོ། །གཉིས་པ་ནི། རི་
རབ་ཀྱི་སྟེང་དུ་པཾ་སེར་པོ་ཡོངས་སུ་གྱུར་པ་ལས་སྣ་ཚོགས་པདྨ་དང༌། སྣ་ཚོགས་པདྨ་དེའི་ལྟེ་བའི་སྟེང་དུ་ཧཱུཾ་ལས་བྱུང་བའི་སྣ་ཚོགས་རྡོ་རྗེའོ། ངེས་པར་ཞེས་པ་ནི་སྐབས་འདིའི་སྣ་ཚོགས་རྡོ་རྗེ་ཧཱུཾ་ལས་སྐྱེད་པའི་ས་བོན་ནི་དེར་ངེས་པའོ། །འདིར་མངོན་བརྗོད་
ལས། སྣ་ཚོགས་རྡོ་རྗེ་དང༌། པདྨ་གང་ཡང་མ་བཤད་པར་རི་རབ་ཀྱི་སྟེང་དུ་བྷྲཱུཾ་ལས་རྣམ་སྣང་བསྐྱེད་ནས། དེ་ལས་གཞལ་ཡས་ཁང་སྐྱེད་པར་བཤད། ཀུན་སྤྱོད་ལས་རི་རབ་ཀྱི་སྟེང་དུ་པདྨ་མ་གཏོགས་པ་སྣ་ཚོགས་རྡོ་རྗེ་མ་བཤད། རྩ་རྒྱུད་ལས་ཀྱང༌། རི་
9-5-57a


སྟེང་སྣ་ཚོགས་པདྨ། ཞེས་པ་ཙམ་ལས་སྣ་ཚོགས་རྡོ་རྗེ་གསལ་བར་མ་བཤད་དོ། གཞུང་ནས་སྣ་ཚོགས་རྡོ་རྗེ་སྟེང་དུ་སྣ་ཚོགས་པདྨ་སྒོམ་པར་བཤད་པ་འདི་ནི་སྡོམ་འབྱུང་ལས། རི་རབ་ཀྱི་དེ་མ་ཐག་ཏུ། །དེ་ཡི་སྟེང་དུ་ཧཱུཾ་བྱུང་
བའི། །སྣ་ཚོགས་རྡོ་རྗེ་རྣམ་པར་བསྒོམ། །དེ་ཡི་སྟེང་དུ་པདྨ་ནི། །ལྟེ་བ་གེ་སར་ལྡན་པར་བསྒོམ། ཞེས་གསུངས་པ་དེ་བཞིན་དུ་མཛད་པའོ། འདིར་སྣ་ཚོགས་པདྨ་གཉིས་བྱེད་མི་བྱེད་ལ། ཀུ་མཱ་ར་བོ་དྷི་དང༌། ལོ་ཆེན་གྱི་འགྲེལ་པ་དང༌། མལ་གྱོ་ནས་བརྒྱུད་པའི་
ལུགས་ཀྱིས་སྣ་ཚོགས་པདྨ་གཅིག་ལས་མི་བྱེད་ལ། དེ་ཡང་སྣ་ཚོགས་རྡོ་རྗེའི་སྟེང་དུ་བྱེད་དོ། །འཁྲུལ་སྤོང་དང༌། སྡོམ་འབྱུང་འགྲེལ་པ་དང༌། ཀྵ་ནྟི་ཤྲིའི་སྡོམ་འབྱུང་གི་སྒྲུབ་ཐབས་ལས་ཀྱང༌། འདབ་གྲགས་མ་སྨོས་པར་པདྨ་གཅིག་ཏུ་བཤད་ཅིང༌། དེ་
ཡང་སྣ་ཚོགས་རྡོ་རྗེའི་འོག་ཏུ་བྱེད་དོ། སྡོམ་འབྱུང་འགྲེལ་པར་དེའི་སྟེང་དུ་ཞེས་པ་དེའི་གོང་དུ་ཞེས་པའི་དོན་དུ་བཤད་དོ། །མར་དོས་སྣ་ཚོགས་རྡོ་རྗེའི་སྟེང་གི་པདྨ་སྣ་ཚོགས་པདྨ་ཆུང་ངུར་བཤད་ཅིང༌། དེའི་རྗེས་འབྲང་རྣམས་ཀྱིས་རི་རབ་ཀྱི་སྟེང་དུ་སྣ་ཚོགས་
པདྨ་འདབ་མ་སོ་གཉིས་པ་གཅིག །དེའི་སྟེང་དུ་སྣ་ཚོགས་རྡོ་རྗེ་དང༌། དེའི་སྟེང་དུ་སྣ་ཚོགས་པདྨ་འདབ་མ་བརྒྱད་པ་གཅིག་བཤད་དེ། སྔ་མ་པདྨ་ཆེ་བའོ། མར་དོའི་འགྱུར་ལ་པདྨ་གཅིག་དང་གཉིས་བྱས་པ་སྣང་ཡང་ཕྱི་མ་མཚན་དཀྱུས་ཤོར་གྱི་མ་དག་པ་
ཡིན་ནོ། དེ་བཞིན་གཤེགས་པའི་རྡོ་རྗེས་ཀྱང་རི་རབ་ཀྱི་སྟེང་དུ་པདྨ་འདབ་གྲངས་མ་སྨོས་པ་ཞིག་དང༌། དེའི་སྟེང་དུ་སྣ་ཚོགས་རྡོ་རྗེ་དང༌། དེའི་སྟེང་དུ་སྣ་ཚོགས་པདྨ་འདབ་མ་བརྒྱད་པ་ཞིག་བཤད་དེ། ལཱུ་ཨི་པའི་སྒྲུབ་ཐབས་ལ་བརྟེན་ནས་བྱང་ཆུབ་རྡོ་རྗེས་
9-5-57b


བྱས་པའི་སྒྲུབ་ཐབས་ལས་ཀྱང་དེ་བཞིན་དུ་བཤད་དོ། །དེ་ལྟར་ལུགས་གཉིས་ལས་འདིར་གང་གཟུང་སྙམ་ན། ལྭ་བ་པའི་འགྲེལ་པ་ལས། དེའི་སྟེང་དུ་ཡི་གེ་ཧཱུཾ་ལས་ངེས་པར་བྱུང་བའི་སྣ་ཚོགས་རྡོ་རྗེའོ། །ཞེས་པའི་འདིའི་དོན་ནི། རི་རབ་ཀྱི་སྟེང་དུ་པཾ་ལས་བྱུང་
བའི་སྣ་ཚོགས་པདྨའི་སྟེང་དུ་ཞེས་པའོ། སྣ་ཚོགས་པདྨ་འདབ་མ་བརྒྱད་པ་ལྟེ་བ་དང་གེ་སར་དང་ལྡན་པ་ཞེས་པ་འདིའི་པདྨའི་ཕྱོགས་ལ་སོགས་པའི་ཁ་དོག་རིམ་པས་གསུངས་པ། ཤར་སོགས་ཕྱོགས་གནས་འདབ་མ་ཉི་འོད་འདྲ། །རླུང་དང་མེར་ཕྱོགས་
འདབ་མ་སེར་པོ་ཉིད། །ཡི་དྭགས་བདག་ཕྱོགས་དབང་ལྡན་དུར་བ་ལྟར། །ལྗང་དང་སྤྲིན་ནག་སྣ་ཚོགས་པདྨ་ཉིད། །ཅེས་སོ། །ཞེས་དྲངས་ནས་ཕྱོགས་བཞི་དམར་ཞིང་བདེན་བྲལ་ལྗང་གུ་དང་དབང་ལྡན་ནག་པོར་བཤད་དོ། དེ་དང་མཐུན་པར་པྲ་ཛྙཱ་རཀྵི་ཏའི་
འགྲེལ་པར་ཡང་འབྱུང་བས། འདི་གཉིས་ཀྱིས་སྡོམ་འབྱུང་གི་འགྲེལ་པ་ལྟར། རྡོ་རྗེ་དང༌། པདྨ་གཉིས་ཀྱི་སྟེང་འོག་བཟློག་ནས་པདྨ་འདབ་མ་བརྒྱད་པ་རྡོ་རྗེའི་འོག་ཏུ་བྱེད་པར་བསྟན་པ་འདྲ་མོ་ཞིག་འདུག་ནའང༌། གཞུང་ནས་རྡོ་རྗེའི་སྟེང་དུ་པདྨ་འདབ་བརྒྱད་པ་བཤད་
པ་སྒྲ་སོར་བཞག་ཏུ་བྱས་ནས། རི་རབ་ཀྱི་སྟེང་ཉིད་དུ་སྣ་ཚོགས་རྡོ་རྗེ་སྐྱེད་པ་འདྲ་བ་ཞིག་ཡོད་པ་དེའི་དོན་ནི། བར་དུ་སྣ་ཚོགས་པདྨ་ཡོད་པའི་ཕྱོགས་སུ་འགྲེལ་པ་དེ་བཞིན་གཤེགས་པའི་རྡོ་རྗེ་དང༌། བྱང་ཆུབ་རྡོ་རྗེ་བཤད་པ་ལྟར་བྱས་ན། སྣ་ཚོགས་རྡོ་རྗེ་གནས་
པའི་པད་འདབ་རྣམས་སྣ་ཚོགས་རྡོ་རྗེའི་རྭ་རྩེ་ཟད་མཚམས་ནས། པད་ར་སྐོར་བ་དེར་བྱ་དགོས་ལ། པདྨ་འདབ་བརྒྱད་དུ་བྱས་ན་དེ་དང་མི་འགྲིག་པས་པདྨ་གཉིས་བྱེད་པ་ལེགས་སོ། པདྨ་ཕྱི་མ་ནི་སྣ་ཚོགས་རྡོ་རྗེའི་ལྟེ་བར་ཚུད་པ་བྱས་ན་ལེགས་ཤིང༌། པདྨ་
9-5-58a


དེའི་ལྟེ་བར་དབྱངས་གསལ་འགོད་པ་འོག་ནས་འབྱུང་བ་བཞིན་བྱས་ན་སྡོམ་འབྱུང་དང་ཤིན་ཏུ་མཐུན་ལ། རྩ་རྒྱུད་དང་ཀུན་སྤྱོད་ལས། པདྨའི་ལྟེ་བར་ཨཱ་ལི་ཀཱ་ལི་སྐྱེད་པ་དང་ཡང་མཐུན་ནོ། སྣ་ཚོགས་རྡོ་རྗེ་ནི་རྩེ་མོ་བཅུ་གཉིས་བར་
བཤད་པ་མང་ཡང༌། རྡོ་རྗེ་འཕྲེང་བར་བཤད་པ་ལྟར་ཉི་ཤུ་པའང་ཡོད་ལ། ཁ་དོག་ནི་ཤར་དཀར་ལྷོ་སེར་ནུབ་དམར་བྱང་ལྗང་དབུས་སྔོ་བ་དང༌། དེ་ལས་གཞན་དུ་བྱེད་པའི་ཚུལ་གཉིས་ཡོད་དོ། སྣ་ཚོགས་རྡོ་རྗེ་དེའི་ལྟེ་བའི་སྟེང་དུ་བཾ་ཡོངས་སུ་གྱུར་པ་
ལས་བྱུང་བའི་སྣ་ཚོགས་པདྨ་འདབ་མ་བརྒྱད་པ་ཟེའུ་འབྲུ་དང་གེ་སར་དང་ལྡན་པ་སྒོམ་མོ། །སྣ་ཚོགས་པདྨའི་མདོག་སྔར་གྱི་དེ་བཞིན་དུ་པྲ་ཛྙཱ་ར་ཀྵི་ཏ་དང༌། དེ་བཞིན་གཤེགས་པའི་རྡོ་རྗེས་བཤད་པ་ལ་བོད་ཁ་ཅིག །དེ་ནི་ནོར་བ་ཡིན་ཏེ་རྡོ་རྗེ་མཁའ་
འགྲོ་དང༌། སྡོམ་འབྱུང་ལས། ཤར་དཀར་ལྷོ་སེར་ནུབ་དམར་བྱང་ལྗང་དབུས་ནག་པོར་བཤད་པས་སོ། ཞེས་ཟེར་ཞིང༌། ཡང་པཎྜི་ཏ་བགྲེས་པོ་རྣམས་ནི་ཤར་སྔོ་ལྷོ་སེར་ནུབ་དམར་བྱང་ལྗང་མཚམས་བཞི་གང་མཛེས་སུ་སྒོམ་པར་འདོད་ཅེས་པ་ནི། 
ཁུངས་མ་དག་ཅིང༌། བལ་པོའི་པཎྜ་ཏི་བགྲེས་པོ་རྣམས་ཀྱི་ངག་བགྲོས་ཡིན་དུ་ཆུག་ཀྱང༌། དེས་ལྭ་བ་པ་དང་པྲཛྙཱ་རཀྵི་ཏ་མི་ཁེགས་ལ། ལུང་དེ་དག་ནི་པཎྜི་ཏ་བགྲེས་པོའི་འདོད་པ་ལ་ཡང་གནོད་བྱེད་དུ་སྣང་ངོ༌། །སྤྱིར་ནི་སྣ་ཚོགས་པདྨ་ལ་སྔ་མ་ཁོ་ན་ལྟར་ཡང་
མ་ངེས་སོ། །སྟོང་པ་ལས་ལངས་ཏེ་ནཱ་ད་འཇོག་པ་ནས་པདྨ་ཆུང་ངུའི་བར་སྒོམ་པར་ལཱུ་ཨི་པའི་སྒྲུབ་ཐབས་ལས་གསུངས་ལ། སྒྲུབ་ཐབས་འདི་ཡང་ཕྱི་དཀྱིལ་དང༌། ལུས་དཀྱིལ་ཐུན་མོང་བ་ཡིན་པས་ཚུལ་དེ་ལུས་དཀྱིལ་ལ་ཡང་མི་རུང་བ་མིན་ནོ། །གསུམ་ 
9-5-58b


པ་ལ་གཉིས། སྦྱིའི་དོན་དང༌། ཡན་ལག་གི་དོན་ནོ། །དང་པོ་ལ་གསུམ། རྟེན་དང་བརྟེན་པའི་སྐྱེད་ཚུལ་མི་འདྲ་བ་གསུངས་ཚུལ་དང༌། དེ་ལ་རྒྱུད་དང་འགལ་བ་སྤང་བ་དང༌། མངོན་བྱང་ལྔ་ཇི་ལྟར་བྱེད་ཚུལ་ལོ། །དང་པོ་ནི། སྤྱིར་བདེ་མཆོག་གི་སྐོར་ནས་གཞལ་ཡས་ཁང་དང་
ལྷ་ཅིག་ཅར་དུ་སྐྱེད་པའི་ཚུལ་གཅིག་དང༌། སྔ་ཕྱིར་སྐྱེད་པའི་ཚུལ་གཉིས་གསུངས་སོ། །དེའི་དང་པོ་ནི་སྡོམ་འབྱུང་ལས་གསུངས་ཏེ། དེར་རླུང་གི་དཀྱིལ་འཁོར་ནས་རི་རབ་ཀྱི་བར་དང༌། དེ་ནས་སྣ་ཚོགས་རྡོ་རྗེ་དང༌། དེ་ནས་པདྨ་དང༌། དེའི་དབུས་སུ་དབྱངས་གསལ་སོགས་
ལས་ཧེ་རུ་ཀ་འཁོར་བཅས་སྐྱེད་པར་གསུངས་པའི་སྐབས་སུ། ཤར་སྒོ་སོགས་སུ་ཁྭ་གདོང་མ་ལ་སོགས་པ་འགོད་པར་བཤད་ལ། གཞལ་ཡས་ཁང་སྔོན་དུ་སྒོམ་པ་མ་བཤད་པའི་ཕྱིར་དང༌། དེའི་དཀྱིལ་འཁོར་དུ་དབང་བསྐུར་བ་དང༌། དེའི་ཐིག་གསུངས་པའི་སྐབས་
ལས་ཀྱང་རྟེན་གྱི་དཀྱིལ་འཁོར་གསལ་བར་གསུངས་པའི་ཕྱིར་རོ། །དེས་ན་རི་རབ་ཀྱི་སྟེང་དུ་པདྨ་དང་སྣ་ཚོགས་རྡོ་རྗེ་སྒོམ་པ་རྟེན་དང་བརྟེན་པ་གཉིས་རིམ་པ་བཞིན་དུ་སྐྱེད་པ་ལ་ཡང་ཡོད་མོད་ཀྱང༌། སྣ་ཚོགས་རྡོ་རྗེའི་སྟེང་དུ་པདྨ་བསྐྱེད་པའི་ལྟེ་བར་དབྱངས་གསལ་
འགོད་པ་ནི། རྟེན་དང་བརྟེན་པ་གཉིས་ཅིག་ཅར་དུ་སྐྱེད་པ་ཉིད་ཀྱི་ལུགས་སོ། །ཀུན་སྤྱོད་ཀྱི་དགོངས་པ་ཡང་ཅིག་ཅར་དུ་སྐྱེད་པའི་ཕྱོགས་སུ་ཏ་ཐཱ་ག་ཏ་རཀྵི་ཏས་བཤད་དོ། །གཉིས་པ་ནི་མངོན་བརྗོད་ལས་མང་དུ་གསུངས་ཤིང༌། སཾ་བྷུ་ཊའི་བདེ་མཆོག་རྡོར་སེམས་ཀྱི་
སྐབས་ལས་ཀྱང་གསུང་ཏེ། དེ་གཉིས་ཀའང་རྩ་རྒྱུད་ཀྱི་དོན་དུ་གཟུང་དགོས་པས། རྒྱུད་ཀྱི་རྡོ་རྗེའི་ཚིག་རེ་རེ་ལ་ཡང་དོན་མི་མཐུན་པ་དུ་མ་ཡོད་པར་ཤེས་དགོས་སོ། །དེ་ལཱུ་ཨི་པས་ནི་སྡོམ་འབྱུང་ལས་བརྟན་ནས་དུས་གཅིག་ཏུ་སྐྱེད་པ་མཛད་ལ། ནག་པོ་སྤྱོད་
9-5-59a


པ་སོགས་ཀྱིས་ནི་མངོན་བརྗོད་ལ་བརྟེན་ནས་རིམ་ཅན་དུ་སྐྱེད་པ་མཛད་དོ། །སྡོམ་འབྱུང་ལས་དུས་གཅིག་ཏུ་སྐྱེད་པ་ལྷ་བཅུ་གསུམ་མ་ལ་གསུངས་ཀྱང༌། ལཱུ་ཨི་པས་ལྷ་དྲུག་ཅུ་རྩ་གཉིས་ཀྱི་ཕྱི་དཀྱིལ་དང་ལུས་དཀྱིལ་ཐུན་མོང་དུ་གསུངས་
པས། དུས་གཅིག་ཏུ་སྐྱེད་པ་ཡང་བདེ་མཆོག་གི་དཀྱིལ་འཁོར་མང་པོ་ཞིག་ལ་འཇུག་གོ། རྟེན་སྔ་ལ་བརྟེན་པ་རྗེས་སུ་སྐྱེད་པ་ནི་མངོན་བརྗོད་ཀྱི་འགྲེལ་པར་བཤད་པ་ལྟར། ཕྱི་དཀྱིལ་དང་ལུས་དཀྱིལ་གཉིས་ཀ་དང༌། ལྷ་ལྔ་སོགས་ལའང་གསུངས་ལ། ནག་
པོ་པའི་དགོངས་པ་ཡང་ཕྱི་དཀྱིལ་དང༌། ལུས་དཀྱིལ་གཉིས་ཀའི་ཐུན་མོང་ངོ༌། །དེས་ན་དྲིལ་བུ་ཞབས་ཀྱི་ལུས་དཀྱིལ་གྱི་སྒྲུབ་ཐབས་ལས། རྟེན་བརྟེན་པ་དུས་གཅིག་པ་དང་རིམ་ཅན་པ་གཉིས་མི་གསལ་ཡང༌། དེ་གཉིས་གང་རུང་གཅིག་ནི་དགོས་ལ། དེ་གཉིས་
ཀྱི་ནང་ནས་གཅིག་ངེས་གཟུག་དུ་མི་དགོས་ཀྱང༌། ལཱུ་ཨི་པ་ལ་ཉེ་བར་སྣང་ངོ༌། །རྟེན་བརྟེན་པ་དུས་གཅིག་ཏུ་སྐྱེད་པ་ལ་རྒྱུ་འབྲས་ཀྱི་རྡོ་རྗེ་འཛིན་པ་ཡབ་ཡུམ་གཉིས་གཉིས་སོ་སོར་སྐེད་པ་མི་བྱེད་པར་ངེས་སོ། །རིམ་ཅན་དུ་སྐྱེད་པ་ལ་ནི་མངོན་བརྗོད་ལས་ཡབ་
ཡུམ་ཚན་པ་གཉིས་སོ་སོར་སྐྱེད་པ་མང་དུ་གསུངས་ཀྱང༌། ངེས་པ་ནི་མིན་ཏེ། མངོན་བརྗོད་ལས་གསུངས་པའི་ལས་དཀྱིལ་དང༌། ཕག་མོས་གཙོ་བོ་བྱས་པའི་དཀྱིལ་འཁོར་བཞིན་ནོ། །དེའི་ཕྱིར་དུས་གཅིག་ཏུ་སྐྱེད་པ་རྣམས་ལ་ནི། ཞུ་བ་ལ་གླུས་བསྐུལ་
ཏེ་ལྡང་བ་ཡང་མེད་ལ། རྒྱུད་འབྲས་ཀྱི་རྡོ་རྗེ་འཛིན་པ་གཉིས་ཚན་སོ་སོ་བ་ལ་ནི། ཞུ་བ་ལ་གླུས་བསྐུལ་བ་ཡང་ངེས་པར་གསུངས་སོ། །དུས་གཅིག་ཏུ་སྐྱེད་པ་ལ་རྒྱུ་འབྲས་ཀྱི་ལྷ་ཡབ་ཡུམ་གཉིས་གཉིས་པ་མེད་ཀྱང༌། རྒྱུ་འབྲས་ཀྱི་རྡོ་རྗེ་འཛིན་པ་གཉིས་
9-5-59b


མེད་པ་ནི་མིན་ཏེ། ལྭ་བ་པས་གཞུང་འདི་ལ་རྒྱུ་འབྲས་ཀྱི་རྡོ་རྗེ་འཛིན་པ་གཉིས་བཤད་ལ། མན་སྙེར་ཡང་ཞུ་བ་ལ་གླུས་བསྐུལ་བ་མེད་པའི་བདེ་མཆོག་གི་སྐྱེད་ཆོག་ལ་ཡང་རྒྱུ་འབྲས་ཀྱི་རྡོ་རྗེ་འཛིན་པ་གཉིས་བཤད་ཅིང༌། བདག་མེད་མའི་དཀྱིལ་འཁོར་
ལ་ཡང་རྒྱུ་འབྲས་ཀྱི་རྡོ་རྗེ་འཛིན་པ་གཉིས་བཤད་དོ། །དེ་ནི་འདིར་ཡང་ཡུམ་གྱིས་དཀྱིལ་འཁོར་གྱི་གཙོ་བོ་མཛད་པ་ལ་ཡང་ཤེས་པར་བྱའོ། འདིར་མངོན་བརྗོད་ལས། མངལ་སྐྱེས་གླུ་ཡི་སྦྱོར་བ་ཡིས། །བསྒོམ་པ་རྣམས་ནི་ཡོངས་སུ་བརྟག །
སྒོང་སྐྱེས་གླུ་ནི་མེད་པ་སྟེ། །སྒྲ་དང་སྒྲ་ཉམས་སྤངས་པའོ། ཞེས་ཞུ་བ་ལ་གླུས་བསྐུལ་བའི་ཧེ་རུ་ཀའི་སྐྱེད་ཆོག་མངལ་སྐྱེས་དང༌། གླུས་བསྐུལ་མེད་པའི་མངོན་བྱང་ལྔ་སྐྱེད་ཀྱི་སྐྱེད་ཆོག་སྒོང་སྐྱེས་སུ་གསུངས་སོ། །སྒྲ་ནི་ལེགས་པར་སྦྱར་བའི་སྒྲ་དང༌། 
སྒྲ་ཉམས་ནི་སྒྲ་ངན་པ་སྟེ། དེ་གཉིས་ཀའི་གླུ་སྐད་སྤངས་པའོ། །དེ་ལ་སྔ་མ་རྣམས་ལཱུ་ཨི་པའི་སྒྲུབ་ཐབས་ཀྱི་སྐྱེད་ཆོག་ནི། སྒོང་སྐྱེས་ཡིན་པས་མངལ་སྐྱེས་དང་མི་སྦྱོར་བར་འདོད་དོ། །དེ་ནི་མི་རིགས་ཏེ། དེ་ལྟ་ཡིན་ན་ནི། སྡོམ་འབྱུང་ལེའུ་གཉིས་པ་
བསྐྱེད་རིམ་གྱི་ལེའུ་ལས། མངལ་སྐྱེས་ཀྱི་དབང་དུ་བྱས་ནས་བཤད་པ་དང༌། ལེའུ་བཅུ་སུམ་པར་གླུས་བསྐུལ་མེད་པར་མངོན་བྱང་ལྔ་ལས་སྐྱེད་པ་ལཱུ་ཨི་པ་བཞིན་དུ་བཤད་པ་གཉིས་འགལ་བར་འགྱུར་བའི་ཕྱིར་ཏེ། ལེའུ་ཅུ་གསུམ་པ་ནས་བཤད་
པའི་བསྐྱེད་རིམ་ནི། སྔར་སྦྱངས་གཞི་མངལ་སྐྱེས་ལ་བཤད་པ་དང་སྦྱར་དགོས་པའི་ཕྱིར་རོ། །མངལ་སྐྱེས་བཤད་ཚུལ་ནི། ལེའུ་དེ་ཉིད་ལས། སྒྱུ་མ་ལྟ་བུའི་ཏིང་ངེ་འཛིན། །མི་རྣམས་ཀྱིས་རབ་མི་ཤེས་ཏེ། །ཐོག་མེད་དུས་ཀྱི་ཉོན་མོངས་ཀྱི། །བག་ཆགས་
9-5-60a


རབ་ཏུ་བསགས་བྱ་པ། །དེ་ཕྱིར་ངོན་བྱས་ལས་ཀྱིས་ནི། །སྐྱེ་དང་འཆི་བ་ཡང་དག་འབྱུང༌། །ཚོགས་པ་མ་རྙེད་དེ་སྲིད་དུ། །ཞག་བདུན་བར་དོའི་སྲིད་བར་གནས། །སྲིད་པ་བར་དོའི་སེམས་ཅན་ནི། །འགྲོན་པའི་བགྲོད་པ་ཇི་བཞིན་དུ། །འདི་ལྟར་
ལས་ཀྱི་ཞགས་པ་ཡིས། །འགྲོ་བ་དྲུག་ཏུ་རབ་ཏུ་སྐྱེ། །ཕ་མའི་ཀུན་ཏུ་སྦྱོར་སོགས་ནི། །སྲིད་པའི་སྐྱེ་བོས་མཐོང་གྱུར་ནས། །རྟ་ལ་ཞོན་བཞིན་རྣམ་ཤེས་ནི། །རླུང་གི་བཞོན་པ་ཞོན་ནས་སུ། །སྐད་ཅིག་ཐང་ཅིག་ཉིད་ལ་ནི། །ཤིན་ཏུ་མྱུར་བར་འོངས་གྱུར་ནས། །ཤིན་ཏུ་
དགའ་དང་བཅས་སྟོབས་ཀྱིས། །ཁ་ཡི་ལམ་ནས་འཇུག་པར་འགྱུར། །རྩ་ནི་སྟོང་ཕྲག་བདུན་ཅུ་གཉིས། །རབ་བསྐུལ་དེ་ཡི་སྐད་ཅིག་ལ། །ཨཱ་ལི་ཀཱ་ལི་ཞུ་བྱས་པས། །མཆོག་ཏུ་དགའ་བ་ཡང་དག་འཐོབ། །ཁུ་བ་ཁྲག་དེའི་དབུས་སུ་ནི། །ཐིག་ལེའུ་གཟུགས་ཀྱིས་
ཡང་དག་གནས། ཞེས་སྦྱང་གཞི་ལ་སྐྱེ་ཤི་བར་དོ་གསུམ་བཤད་ནས། བར་དོས་སྐྱེ་བ་ལེན་ཚུལ་སྟོན་པ་ན། དང་པོར་ཕ་མའི་ཀུན་སྦྱོར་མཐོང་བ་དང༌། དེ་ནས་ཕའི་ཁ་ནས་ཞུགས་ཏེ་ཕ་མའི་ཁུ་ཁྲག་གི་དབུས་སུ་ཞུགས་ནས་གནས་པར་བཤད་པའི་ཕྱིར་དང༌། 
སྒོང་སྐྱེས་ལ་དེ་མེད་པའི་ཕྱིར་དང༌། བར་དོ་མཚོན་པའི་ནཱ་ད་བབས་ནས། ཟླ་བ་དཀར་དམར་གྱི་དབུས་སུ་འཇུག་པར་འཆད་པ་ཡང་འདི་དང་སྦྱར་དགོས་པའི་ཕྱིར་རོ། །གཞན་ཡང་སྡོམ་འབྱུང་གི་ལེའུ་གཉིས་པ་ལས། དང་པོར་སྐྱེ་གནས་བཞི་དང༌། དེ་ནས་
གླིང་གསུམ་གྱི་མི་རྣམས་བླུན་རྨོངས་བྱེ་བྲག་མི་ཕྱེད་པ་དང༌། འཛམ་བུ་གླིང་གི་དབུས་སུ་སྐྱེས་པའི་མི་མཆོག་ཏུ་གསུངས་ཤིང༌། དེ་ནས་མིར་འཁྲུངས་པ་དང༌། ཁྱིམ་ནས་རབ་ཏུ་བྱུང་བ་དང༌། རབ་ཏུ་བྱུང་ནས་དགེ་བ་སྒྲུབ་པ་དང༌། རྩེ་གཅིག་པའི་ཏིང་ངེ་འཛིན་
9-5-60b


ཐོབ་པ་སྟེ། སངས་རྒྱས་འདོད་ཁམས་སུ་འཚང་རྒྱ་བའི་ཚུལ་བཞི་གསུངས་ནས། སྒྱུ་མ་ལྟ་བུའི་ཏིང་ངེ་འཛིན་ཞེས་སོགས་སྔར་དྲངས་པ་ལྟར་བཤད་དོ། །དེ་རྣམས་ཀྱི་དོན་ཀླུ་བྱང་གི་དགོངས་པ་ལྟར་བཤད་ན། ལམ་འདིས་ཚེ་གཅིག་ལ་འཚང་རྒྱ་བའི་རྟེན་ངོས་
འཛིན་པ་ཡིན་ལ། དེས་ན་སྐྱེ་གནས་བཞི་བཤད་པ་ནི། ལྷའི་སྐྱེད་ཚོག་བཞི་སྟོན་པ་སྡོམ་འབྱུང་འགྲེལ་པས་བཤད་པ་ལྟར་མིན་གྱི། སྐྱེ་གནས་བཞིའི་ནང་ནས་མི་མངལ་སྐྱེས་ཀྱི་རྟེན་ངོས་འཛིན་པའོ། །དེ་ནས་མི་ལ་གླིང་བཞི་པ་ཡོད་ཀྱང་འཛམ་བུ་གླིང་པའི་རྟེན་
བསྔགས་ཏེ། འོད་ཁམས་སུ་སྤྲུལ་སྐུར་འཚང་རྒྱ་བའི་རྟེན་ལ། འཛམ་བུ་གླིང་བའི་མིར་འཁྲུངས་པ་སོགས་དགོས་པ་དང་མཚུངས་པའི་ཕྱིར་རོ། །དུས་འཁོར་འགྲེལ་ཆེན་སོགས་ལས་ཀྱང༌། སྐྱེ་བ་གཅིག་གིས་འཚང་རྒྱ་བའི་རྟེན་ལ་འཛམ་བུ་གླིང་བའི་མི་
ཁམས་དྲུག་ལྡན་དགོས་པར་གསུངས་པ་དང་འདྲའོ། །རྟེན་དེས་ལམ་འདི་སྒོམ་པ་ན། འདི་ནས་ཤི་ནས་བར་དོ་གྲུབ་སྟེ་མངལ་དུ་སྐྱེ་བ་འཛིན་པ་ཞིག་དང་མཚུངས་པར་སྒོམ་པས་ན། ཆོས་མཐུན་ཁྱད་པར་ཅན་ནི་དེ་ལ་ཡོད་ཀྱི་གཞན་ལ་མེད་པས། དྲིལ་བུ་ཞབས་
ཀྱིས། སེམས་ཅན་བརྫུས་ཏེ་འབྱུང་བ་བཞིན། །ས་བོན་མེད་པར་རྣམ་པར་བསྒོམ། ཞེས་གསུངས་པ་ནི། རྫོགས་རིམ་པའི་ཡེ་ཤེས་ཀྱི་སྐུ་ཡིན་གྱི། བསྐྱེད་རིམ་གྱི་མིན་ལ། བསྐྱེད་རིམ་དཀྲོངས་བསྐྱེད་ལ་དེའི་མིང་འདོགས་ཀྱང༌། ཁྱད་པར་ཅན་གྱི་སྦྱང་གཞི་དང་སྦྱོར་
བའི་མངོན་བྱང་ལྔ་སྐྱེད་ནི། མངལ་སྐྱེས་དང་ངེས་པར་སྦྱར་དགོས་སོ། །མན་སྙེ་ལས་ཀྱང༌། གླུས་བསྐུལ་མེད་པའི་བདེ་མཆོག་གི་མངོན་བྱང་ལྔས་སྐྱེད་མངལ་སྐྱེས་དང་སྦྱར་ནས་བཤད་དོ། །གཉིས་པ་ནི། འོ་ན་མངོན་བརྗོད་ལས་གླུས་བསྐུལ་མེད་པ་ལཱུ་ཨི་བ་ལྟ་བུའི་
9-5-61a


སྐྱེད་ཆོག་རྣམས་སྒོང་སྐྱེས་སུ་བཤད་པ་དང་འགལ་བ་ཇི་ལྟར་སྤང་སྙམ་ན། བཤད་པར་བྱ་སྟེ། མངོན་བརྗོད་ལས་གླུས་བསྐུལ་མེད་པ་རྣམས་མངལ་སྐྱེས་སུ་མ་གསུངས་པ་རྣམས་ནི། མངལ་དུ་ས་བོན་འདེབས་པའི་ཕ་ལྟ་བུའི་ལྷ་ཡབ་དང༌། 
མངལ་དུ་ས་བོན་འཛིན་པའི་མ་ལྟ་བུའི་ལྷ་ཡུམ་མེད་ལ་དགོངས་ལ། དེ་མེད་ཀྱང་ཕ་མའི་ཁུག་གི་དོད་ཟླ་ཉིའམ་ཟླ་བ་དཀར་དམར་ཡོད་ལ། ཕ་མའི་ཁུ་ཁྲག་ལ་འཇུག་པའི་བར་དོའི་དོད་ནཱ་ད་སོགས་ཡོད་པས། མངལ་སྐྱེས་དང་སྦྱོར་བ་ནི་ཤིན་ཏུ་དགོས་སོ། །གཞན་
ཡང་དེ་ལྟར་བསྐྱེད་རིམ་ལ་སྒོམ་པ་ནི། རྫོགས་རིམ་གྱི་སྐབས་སུ་རང་གི་ལུས་ཀྱི་དབང་དུ་བྱས་པ་དང༌། ཡབ་ཡུམ་གཉིས་མཉམ་པར་སྦྱར་བ་ལས་དམར་ཆ་དང་དཀར་ཆ་གཉིས་འདུ་འཕྲོད་ལས། རྫོགས་རིམ་པའི་ལྷན་སྐྱེས་ཀྱི་བདེ་ཆེན་སྐྱེ་བའི་རྒྱུད་སྨིན་བྱེད་
དུ་འགྲོ་བའི་ཆེད་ཡིན་ལ། དེ་ནི་མངལ་སྒོང་གཉིས་ཀྱི་ནང་ནས་མངལ་སྐྱེས་ལ་རྣམ་པ་ཤིན་ཏུ་གསལ་བའི་ཕྱིར་ཡང་མངལ་སྐྱེས་དང་སྦྱར་དགོས་སོ། །དེ་ལྟ་ནའང་སྒོང་སྐྱེས་སུ་གསུངས་པ་ནི། སྔར་བཤད་པ་འདྲ་བའི་མངལ་སྐྱེས་མེད་པ་དང༌། སྒོང་སྐྱེས་
དང་ཆོས་མཐུན་སྦྱར་དུ་ཡོད་པ་ཙམ་ལ་དགོངས་ནས། སྒོང་སྐྱེས་སུ་གསུངས་པས་མི་འགལ་ལོ། །སྒོང་སྐྱེས་དང་འདྲ་ཚུལ་ནི་ཟླ་ཉིའམ་ཟླ་བ་ནི་སྒོང་དང་འདྲ། དེའི་དབུས་ཀྱི་ས་བོན་ནི་བྱིའུ་ཕྲུག་དང་འདྲ། དེ་ལས་ལྷ་སྐུར་གྱུར་པ་ནི་སྒོང་བཅག་ནས་བྱིའུ་
ཕྲུག་ཚར་བ་ལྟ་བུར་མངོན་བརྗོད་འགྲེལ་པར་བཤད་པ་བཞིན་ནོ། །བོད་ཀྱི་བླ་མ་ཁ་ཅིག །མན་སྙེར་བཤད་པའི་བདེ་མཆོག་གི་སྐྱེད་ཆོག་མངལ་སྐྱེས་དང་སྦྱར་བ་དང༌། དེ་ལ་གླུས་བསྐུལ་མེད་པས་རང་གིས་སྒོང་སྐྱེས་སུ་ཁས་བླངས་པ་གཉིས་ཀྱི་
9-5-61b


འགལ་སྤོང་ལ། སྒོང་ལས་སྐྱེས་པ་ལ་དང་པོ་མངལ་ནས་སྐྱེ་དགོས་ཤིང༌། སྒོ་ངའི་ནང་ནའང་ནུར་ནུར་པོ་སོགས་ཡོད་བའི་ཕྱིར་རོ། ཞེས་གསུངས་པ་ནི་མི་རིགས་ཏེ། མན་སྙེར་མངལ་སྐྱེས་དང་སྦྱར་བ་ན། དང་པོར་སྐྱེ་བ་ལེན་པ་ནའང་སྔར་བཤད་པ་ལྟར་
ཕ་མའི་ཁུ་ཁྲག་གི་དབུས་སུ་ཞུགས་ནས་སྐྱེ་བ་ལེན་པ་དང༌། དེ་ནས་མངལ་དུ་ཟླ་བ་བཅུར་གནས་པར་བཤད་པས། མའི་ལྟོ་ནས་སྒོ་ང་བྱུང་བ་ལ་དེའི་མངལ་དང་སྦྱོར་ཚུལ་མི་འགྲིག་པའི་ཕྱིར་དང༌། སྒོ་ངའི་ནང་དུ་ནུར་ནུར་པོ་དང་མེར་མེར་པོ་འདོད་པ་ནི། 
མངལ་སྐྱེས་དང་སྦྱར་བའི་མེར་མེར་པོ་སོགས་དང་དོན་གཏན་མི་འདྲ་བའི་ཕྱིར་ཏེ། གཞན་དུ་ན་ཁུ་བའི་རྫས་སླ་བ་ཐམས་ཅད་ལ་ཧ་ཅང་ཐལ་བར་འགྱུར་བས། ལན་སྔ་མ་ལ་བརྟེན་ན་མཛེས་སོ། །གསུམ་པ་ལ་བཞི། དངོས་ཀྱི་དོན། དེ་ལ་རྩོད་པ་སྤང་
བ། དེ་དག་གི་དོན་བསྡུས་ཏེ་བསྟན་པ། མངོན་བྱང་གི་དབྱངས་གསལ་བྱེ་བྲག་ཏུ་བཤད་པའོ། །དང་པོ་ནི། འདིར་མངོན་བྱང་ལྔས་སྐྱེད་པ་ལ་བླ་མ་མལ་ནས་བརྒྱུད་པ་དང༌། ཀུ་མཱ་ར་བེངྷིའི་འགྲེལ་པ་ནས། ཨཱ་ལི་ལས་ཟླ་བ་དང༌། ཀཱ་ལི་ལས་ཉི་མ་བཤད་དེ། 
ཛོ་བོ་ཆེན་པོའི་འགྲེལ་པ་དང༌། དེ་བཞིན་གཤེགས་པའི་རྡོ་རྗེ་སོགས་མང་པོས་ཀྱང་དེ་གཉིས་དང༌། ས་བོན་ལས་ཕྱག་མཚན་སྐྱེད་པ་བཤད་དོ། །བླ་མ་མར་དོ་རྗེས་འབྲང་དང་བཅས་པས་ཟླ་བ་དམར་པོ་ཞིག་དང༌། ཕྱག་མཚན་མེད་པའི་ས་བོན་ལས་སྐྱེད་
དེ། འཁྲུལ་སྤོང་དང་རྒྱལ་བ་བཟང་པོ་དང༌། དཔའ་བོ་རྡོ་རྗེ་དང་སྡོམ་འབྱུང་འགྲེལ་པ་སོགས་ལས་ཉི་མ་ཡང་མ་བཤད་ལ། ཟླ་བ་གཉིས་པ་ཡང་མ་བཤད་པར། ཟླ་བའི་དཀྱིལ་འཁོར་ཞེས་བཤད་དེ། ཟླ་བ་གཅིག་ཏུ་འདུག་ལ། ཀྵནྟི་ཤྲཱིས་ནི་ཟླ་བ་གཅིག་ཏུ་
9-5-62a


ཚིག་གིས་ཟིན་པར་བཤད་དོ། །འདི་ལ་ཕྱིས་ཀྱི་བླ་མ་ཁ་ཅིག་གིས། ཟླ་བ་གཅིག་བྱེད་པ་ནི་རྒྱུད་དང་རྣལ་འབྱོར་དབང་ཕྱུག་གི་དགོངས་པ་མིན་ཏེ། སཾ་བྷུ་ཊ་ལས། ཟླ་བའི་དཀྱིལ་འཁོར་དབུས་སུ་ནི། །བྱང་ཆུབ་ཟླ་བ་གཉིས་པ་ཅན། །
ཞེས་གསུངས་པའི་ཕྱིར་ཟླ་བ་གཉིས་དགོས་སོ། །ཨཱ་ལི་ཀཱ་ལི་ལས་ཟླ་ཉི་སྐྱེད་པ་ནི་རྒྱུད་གཞན་གྱི་དགོངས་པ་ཡིན་ཞེས་ཟེར་རོ། །དེ་ལ་འདི་གང་ལ་བརྟེན་པའི་སྡོམ་འབྱུང་ལས་ནི། པདྨ་ཆུང་ངུ་བཤད་པའི་དེ་མ་ཐག་ཏུ། དེ་དབུས་རྣལ་འབྱོར་བསྒོམ་པར་
བྱ། །ཨཱ་ལི་ཀཱ་ལིའི་རྣམ་དག་ལས། །དེ་ཡི་དབུས་སུ་ཡི་གེ་ཧཱུཾ། །རྡོ་རྗེ་སེམས་དཔའི་རང་བཞིན་ཅན། ཞེས་འདིར་བཤད་པ་བཞིན་འབྱུང་བ་མ་གཏོགས་པ་ཟླ་ཉི་གང་ཡང་མི་གསལ་ལོ། །མངོན་བརྗོད་ལས་ཀྱང་ཟླ་བའི་དབུས་སུ་ཧཱུཾ་ཡིག་སྒོམ་པ་བཤད་ཀྱང༌། 
དབྱངས་གསལ་ལས་ཟླ་ཉི་གཉིས་སམ། ཟླ་བ་གཉིས་སམ། ཟླ་བ་གཅིག་སྒོམ་པ་གསལ་བར་མི་སྣང་ངོ༌། །སཾ་བྷུ་ཊ་ལས། དབྱངས་ལས་ཟླ་བ་དང་པོ་དང༌། གསལ་བྱེད་ལས་ཟླ་བ་གཉིས་པ་སྐྱེད་པར་བཤད་པ་དེ། བདེ་མཆོག་རྡོར་སེམས་ཀྱི་སྐབས་ཡིན་
ཀྱང༌། ཚུལ་དེ། འདིར་ངེས་པར་སྦྱར་དགོས་པ་ལ་སྒྲུབ་བྱེད་མི་སྣང་ངོ༌། །འདིའི་འགྲེལ་པར་ལྭ་བ་པས་ཨཱ་ལི་ཀཱ་ལིའི་སྦྱོར་བ་ཞེས་པ་ནི། ཨཱ་ལི་དང་ཀཱ་ལིའི་ཕྲེང་བ་གཡོན་སྐོར་དང༌། གཡས་སྐོར་དུ་གནས་པ་ཡོངས་སུ་གྱུར་པ་ལས། དེའི་གཟུགས་
བརྙན་ཅན་གྱི་རྣམ་པ་ཟླ་བའི་དཀྱིལ་འཁོར་གྱི་རྣམ་པར་བསམས་པར་བྱའོ། ཞེས་པ་དང༌། དེའི་དབུས་སུ་ཞེས་པ་ནི། ཟླ་བའི་དབུས་སུའོ། །ཞེས་པ་དང༌། དེ་དག་ཡོངས་སུ་གྱུར་པ་ལས་ཞེས་པ་ནི། ཟླ་བ་དང་ས་བོན་ཡོངས་སུ་གྱུར་པ་ལས་སོ། ཞེས་གསུངས་
9-5-62b


པའི་སྐབས་ཐམས་ཅད་དུ་ཉི་མ་མ་བཤད་ཅིང༌། ཟླ་བ་གཉིས་ཀྱང་ཚིག་གི་ཟུར་ཙམ་ལ་ཡང་མི་འབྱུང་བས་དེའི་དགོངས་པ་ནི་ཟླ་བ་གཅིག་ཡིན་ལ། པྲཛྙཱ་རཀྵི་ཏའི་འགྲེལ་པར་ཡང་དེ་ཇི་བཞིན་བཤད་དོ། །ཟླ་ཉི་གཉིས་སྐྱེད་པའི་པཎྜི་ཏ་ཆེན་པོ་རྣམས་ཀྱི་བཞེད་པ་
ཡང༌། མངོན་བརྗོད་ལ་སོགས་པའི་རྒྱུད་འདི་ཉིད་ཀྱི་དགོངས་པ་འཆད་པ་ཡིན་གྱི། རྒྱུད་གཞན་ནས་འགེབས་པ་མིན་ནོ། །ཟླ་བ་གཉིས་བྱེད་པ་ན་ཀཱ་ལི་ལས་སྐྱེད་པའི་ཟླ་བ་དམར་པོར་མན་སྙེ་ལས་བཤད་ལ། དེ་ལྟར་བཤད་ཀྱང་ལཱུ་ཨི་པའི་ལུགས་ལྟར་དུ་
འཆད་པའི་སྒྲུབ་ཐབས་འཁྲུལ་སྤོང་ལས་ནི། ཨ་བྷྱཱ་ཀ་རས་ཀྱང༌། ཟླ་བ་གཉིས་མ་བཤད་པས་སཾ་བྷུ་ཊའི་ལུགས་དེ་འདིར་ཁས་མ་བླངས་སྣང་ངོ༌། །འོ་ན་ལུགས་སོ་སོ་བ་དེ་རྣམས་ལ་དོན་ལ་འགལ་བ་ཡོད་དམ་མེད་སྙམ་ན། ཟླ་ཉི་གཉིས་དང་ཟླ་བ་དཀར་དམར་
གཉིས་དང༌། ཟླ་བ་གཅིག་བྱེད་ནའང་དཀར་ལ་དམར་པའི་མདངས་ཆགས་པར་དཔའ་བོ་རྡོ་རྗེས་བཤད་པ་ལྟར་བྱེད་ལ། དེ་དག་གི་མཚོན་དོན་ནི་གཞི་ལ་ཕ་མའི་ཁུ་ཁྲག་དཀར་དམར་གྱི་དབུས་སུ་བར་དོ་འཇུག་པ་དང་བསྟུན་པ་ཡིན་ལ། དེ་ལྟར་བྱས་ཏེ་སྒོམ་
པའི་དགོས་པ་གལ་ཆེ་ཤོས་ནི། སྔར་བཤད་པ་ལྟར་རྫོགས་རིམ་གྱི་སྐབས་ཀྱི་བྱང་སེམས་དཀར་དམར་གྱི་འདུ་འཕྲོད་ལས། ངེས་དོན་གྱི་ཧེ་རུ་ཀ་ལྷན་སྐྱེས་ཀྱི་བདེ་ཆེན་འདྲེན་པ་ཡིན་པས། རྟེན་འབྲེལ་ཁྱད་པར་ཅན་དེ་སྒྲིག་པ་ནི་དེ་དག་ཀུན་གྱི་ནུས་པས་འགལ་བ་
ཅུང་ཟད་ཀྱང་མེད་པར་སེམས་ཏེ། འོན་ཀྱང་འདིར་ནི་གཙོ་ཆེར་འདིའི་འགྲེལ་པ་ལྭ་བ་པས་མཛད་པ་ལ་བརྟེན་པའོ། །ཟླ་བ་གཉིས་ལ་སོགས་པའི་མངོན་བྱང་ལྔས་སྐྱེད་པ་ཡང་རྒྱུད་གཞན་རྣལ་འབྱོར་རྒྱུད་ལའང་ཡོད་མོད་ཀྱང་ལྷ་ཡབ་ཡུམ་མཉམ་པར་སྦྱོར་
9-5-63a


བ་མེད་ཅིང༌། སྔར་བཤད་པ་ལྟར་གྱི་ཟླ་ཉི་དང་ཟླ་བ་དཀར་དམར་ལས་བདེ་བ་ཆེན་པོ་མཚོན་པ་མེད་པའི་ཕྱིར། བདེ་ཆེན་མཚོན་པའི་མངོན་བྱང་ནི། རྣལ་འབྱོར་བླ་མེད་ཀྱི་རྒྱུད་གཉིས་ཁོ་ནའི་ཁྱད་ཆོས་ཡིན་ཏེ། མན་སྙེ་ལས། ཤེས་
རབ་དང་ཐབས་ཡང་དག་པར་སྦྱོར་བ་ཉིད་ན་ནི། དེ་ཡོངས་སུ་གསལ་ལོ་ཞེས་བདེ་བ་ཆེན་པོ་འདི་ཉེ་བར་སྟོན་ཏོ། །དེ་ཉིད་ཀྱི་ཕྱིར་ཡང་རྒྱུད་གཞན་རྣམས་སུ་ཟླ་བ་ལ་སོགས་པའི་རིམ་པས་རྣམ་པ་ལྔ་མངོན་པར་བྱང་ཆུབ་པ་གསུངས་ན་ཡང༌། བདེ་བ་ཆེན་
པོའི་ཚུལ་ཉིད་དུ་ཉེ་བར་སྟོན་པ་ནི་མ་ཡིན་ནོ། །རྣམ་པ་འདི་ལྟ་བུའི་རྣལ་འབྱོར་དང་རྣལ་འབྱོར་མའི་རྒྱུད་རྣམས་ཁོ་ནར་ནི་བདེ་བ་ཆེན་པོའི་རང་བཞིན་རྡོ་རྗེ་འཛིན་པའི་ས་ཡོངས་སུ་གསལ་ཞིང༌། དེའི་རྗེས་སུ་འབྲང་བ་ལས་གཞན་དུ་ཡང་རྟོགས་པར་བྱའི། ལྷན་
ཅིག་སྐྱེས་པའི་དབང་མེད་པར་ཉེ་བར་བསྟན་པ་ནི་མ་ཡིན་ཏེ། བཅོམ་ལྡན་འདས་ཀྱི་བཀའ་ཁོ་ནས་སོ། །ལྷན་ཅིག་སྐྱེས་པའི་དབང་ནི་རྣམ་པ་འདི་ལྟ་བུའི་རྒྱུད་རྣམས་ཁོ་ནར་རོ། །ཞེས་གསུངས་པ་ལྟར་ཏེ། ལྷན་སྐྱེས་ཀྱི་སྣོད་རུང་དུ་སྒྲུབ་པའི་དབང་བསྐུར་
མ་ཐོབ་པར། བདེ་ཆེན་དེ་བསྟན་དུ་མི་རུང་ལ། དེ་འདྲ་བའི་དབང་ཡང་རྒྱུད་གཞན་ལ་མེད་པའི་ཕྱིར་ཞེས་པའོ། །ཚུལ་དེ་ནི་རྒྱུད་ཀྱི་དགོངས་པ་དམ་པ་ཡིན་ཏེ། ཀྱཻ་རྡོ་རྗེ་ལས། ཟླ་བའི་སྟེང་དུ་ས་བོན་ཉིད། །ཕྱི་ནས་བདུད་ལས་རྒྱལ་བས་མནན། །གཉིས་འདུས་
པ་ལས་བདེ་ཆེན་པོ། ཞེས་མངོན་བྱང་གི་སྐབས་ཀྱི་ཟླ་ཉི་འདུས་པ་ལས། བདེ་བ་ཆེན་པོ་སྐྱེ་བར་གསུངས་པའི་དོན་ནི་སྔར་ལྟར་ཡིན་ལ། དེ་གཉིས་འདུས་པ་ལས་སྐྱེས་པའི་བདེ་ཆེན་ཡང༌། དེ་དག་གི་དབུས་ཀྱི་ས་བོན་གྱིས་མཚོན་པ་ཡིན་ཏེ། དེ་ཉིད་
9-5-63b


ལས། ཨཱ་ལི་ཟླ་བ་ཀཱ་ལི་ཉི། །ས་བོན་ནང་དུ་སོན་གྱུར་པ། །དེ་ཉིད་སེམས་དཔའ་ཞེས་བྱར་བརྗོད། །མཆོག་ཏུ་དགའ་བའི་རང་བཞིན་ཅན། ཞེས་གསལ་བར་གསུངས་ལ། ལྭ་བ་པས་ཧེ་རུ་ཀ་ཡང་ལྷན་སྐྱེས་ཀྱི་དགའ་བར་གསུངས་སོ། །འདི་ནི་མཚོན་པ་ཙམ་
སྟེ། ཟླ་བ་དཀར་དམར་གཉིས་དང༌། དཀར་ལ་དམར་བའི་མདངས་ཅན་གྱི་ཟླ་བ་གཅིག་ལ་ཡང་དོན་དེ་རྣམས་ཡོད་དོ། །ཤཱནྟི་བས་མངོན་བྱང་གི་སྐབས་ཀྱི་ཐོག་མར་ས་བོན་དང༌། དེ་ནས་དེ་འགྱུར་བའི་ཕྱག་མཚན་དང༌། དེ་ནས་དེ་ལ་མཚན་པའི་ས་བོན་གསུམ་
སྦྱོར་བ་དང༌། དངོས་གཞི་དང་རྗེས་ཀྱི་བདེ་བར་ཡང་བཤད་དོ། །དེས་ན་མན་སྙེ་ལས། འདིར་རྒྱུའི་ཡེ་ཤེས་བཞིའི་རང་བཞིན་ཉིད་ལ་ཡང་བདེ་བ་ཆེན་པོ་མོས་པ་པ་ཡོད་པ་ཁོ་ན་སྟེ། དེ་ཉིད་ཀྱི་ཕྱིར་འདི་རྒྱུ་རྡོ་རྗེ་འཛིན་པར་བརྗོད་པར་བྱའོ། །རྣམ་པ་ལྔ་མངོན་
པར་བྱང་ཆུབ་པ་ལ་ཡང་བདེ་བ་ཆེན་པོར་ལྷག་པར་མོས་པ་བྱ་སྟེ། དེ་ཉིད་ཀྱི་ཕྱིར་ལྷ་མོ་དང་ཡང་དག་པར་སྦྱོར་བ་ཉིད་ཀྱིས། བདེ་བ་ཆེན་པོ་མངོན་པར་བྱང་ཆུབ་པ་ཡོངས་སུ་རྫོགས་པ་ཁོ་ན་ལས་རྡོ་རྗེ་འཛིན་པ་སྐྱེད་པའོ། ཞེས་པས་དེ་ཁོ་ན་དངོས་པོར་ན་
རྣམ་པ་ལྔ་མངོན་པར་བྱང་ཆུབ་པའོ། ཞེས་ཡབ་ཡུམ་མཉམ་པར་སྦྱར་བའམ། དེའི་དོད་ཁམས་དཀར་དམར་མཚོན་པའི་འདུ་འཕྲོད་ལ་བརྟེན་ནས་བདེ་བ་ཆེན་པོ་རྫོགས་པ་ཁོ་ན་ལས། རྡོ་རྗེ་འཛིན་པ་སྐྱེད་པར་བསྟན་པའི་ཚུལ་འདི། ཤེས་རབ་ཅན་གྱིས་
ལེགས་པར་ཤེས་ན། རིམ་པ་དང་པོ་བསྒོམས་པས་རྫོགས་རིམ་གྱི་རྟོགས་པ་སྨིན་བྱེད་དུ་འགྲོ་ཚུལ་རྣམས་ཇི་ལྟ་བ་བཞིན་དུ་ཁོང་དུ་ཆུད་པས། མཆོག་སྒྲུབ་པ་ལ་བསྐྱེད་རིམ་མི་དགོས་སྙམ་པ་དང༌། ཆོས་འདི་པ་དང་གཞན་པའི་ཏིང་ངེ་འཛིན་ཐུན་མོང་བ་
9-5-64a


ཙམ་ལ་བླ་མེད་ཀྱི་རྫོགས་རིམ་དམ་པར་འཛིན་པ་དང༌། ཏིང་ངེ་འཛིན་དེ་འདྲས་དྲངས་པའི་བདེ་བ་ལ་ལྷན་སྐྱེས་ཀྱི་བདེ་ཆེན་དུ་འཛིན་པའི་ལོག་རྟོག་རྣམས་ལྷག་མ་མེད་པར་ལྡོག་གོ། དེ་ལྟར་བཤད་པས་མཚོན་ནས་སྤྱིར་སྟོང་པ་འོད་
གསལ་དུ་ཞུགས་པའི་དང་ནས། ལྷའི་སྐུར་ལྡང་བ་དང་ཁྱད་པར་དུ་བར་དོ་མཚོན་པའི་ཡི་གེ་སོགས་སུ་ལྡང་པ་ཡང༌། ལྷ་དང་སྔགས་དབྱེར་མེད་ཡིན་པས་དེ་རྣམས་སྒོམ་པ་ཡང༌། རྫོགས་རིམ་པའི་སྣང་ཕྱོགས་ཀྱི་ཏིང་ངེ་འཛིན་སྒྱུ་མའི་སྐུའི་རྟོགས་པ་
སྐྱེ་བའི་སྨིན་བྱེད་དུ་ཤེས་པར་བྱའོ། །གཉིས་པ་ནི། གལ་ཏེ་རིམ་པ་དང་པོའི་དཀྱིལ་འཁོར་གྱི་སྐབས་སུ་ཡབ་ཡུམ་མཉམ་པར་སྦྱོར་བ་སྒོམ་པ་དེ། རྫོགས་རིམ་པའི་བདེ་ཆེན་གྱི་རྟོགས་པ་སྐྱེ་བའི་སྨིན་བྱེད་ཡིན་ན། རྗེ་བཙུན་མ་ཕག་མོ་དང་བདག་མེད་མ་
སོགས་ཀྱིས་གཙོ་བོ་བྱས་ནས་སྒོམ་པ་ལ་མཆོག་སྒྲུབ་པའི་བསྐྱེད་རིམ་གྱི་གནད་མ་ཚང་བར་འགྱུར་རོ་སྙམ་ན། དེའི་དོགས་པ་ནི་རྣམ་དཔྱོད་ཅན་ལ་སྐྱེ་བ་བདེན་ཡང་སྐྱོན་དེ་ནི་མེད་དེ། འདིའི་དོགས་གཅོད་བཅོམ་ལྡན་འདས་ཉིད་ཀྱིས་ཤིན་ཏུ་
གསལ་བར་གསུངས་པའི་ཕྱིར་ཏེ། ཀྱཻ་རྡོ་རྗེ་ལས་བདག་མེད་རྣལ་འབྱོར་ལྡན་པ་ཡིས། །ཕྱག་རྒྱ་ཉིད་ཅེས་ཇི་ལྟར་བརྗོད། །ཕྱག་རྒྱ་ཕྱག་རྒྱ་གཉིས་དག་གིས། །ཕྱག་རྒྱའི་དངོས་གྲུབ་ཇི་ལྟར་འགྱུར། ཞེས་ལམ་འདིས་ཕྱག་རྒྱ་མ་ལ་བརྟེན་ནས་དངོས་
གྲུབ་འགྲུབ་པར་བཤད་པ་ལ། དེ་ལྟ་ན་བདག་མེད་མ་གཙོ་བོར་བྱས་པའི་རྣལ་འབྱོར་གྱིས་ཕྱག་རྒྱའི་དངོས་གྲུབ་མི་འཐོབ་སྟེ། རིག་མ་སྒོམ་པ་མེད་པར་ཕྱག་རྒྱའི་དངོས་གྲུབ་མི་འགྲུབ་པའི་ཕྱིར་དང༌། རང་གི་ཕྱག་རྒྱ་མ་གཞན་ཞིག་སྒོམ་ན། ཕྱག་རྒྱ་
9-5-64b


མ་གཉིས་སྦྱར་བར་བདེ་ཆེན་མི་སྐྱེ་བའི་ཕྱིར་རོ། །དེས་ན་དེ་འདྲ་བ་ངེས་ཕྱག་རྒྱའི་དངོས་གྲུབ་ཇི་ལྟར་ཐོབ་པར་འགྱུར། ཞེས་ཞུས་པའི་ལན་དུ། བུད་མེད་གཟུགས་ནི་སྤངས་ནས་གཞན། །བཅོམ་ལྡན་འདས་ཀྱི་གཟུགས་སུ་བྱ། །ནུ་མ་སྤངས་པ་པོ་ལར་
འགྱུར། །ཀཀྐོ་ལ་དབུས་ཡང་དག་གནས། །འགྲམ་གཉིས་དྲིལ་བུ་ཉིད་དུ་འགྱུར། །ཟེའུ་འབྲུ་པོ་ལ་ཅན་དུ་འགྱུར། །ལྷག་མ་བདག་ཉིད་ཆེན་པོ་ཉིད། །དགའ་ཆེན་ཧེ་རུ་ཀ་ཡི་གཟུགས། ཞེས་སོ། །དེ་འདྲ་བ་དེ་ལ་ནི། བུད་མེད་དེ་ལྷ་མོའི་གཟུགས་སུ་སྒོམ་
པ་སྤངས་ནས། དེ་ལས་གཞན་བཅོམ་ལྡན་འདས་ཏེ་ལྷ་ཡབ་ཀྱི་གཟུགས་སུ་བསྒོམ་པར་བྱ་བར་གསུངས་སོ། །དེས་ན་ནུ་མ་སྤངས་ནས་པོ་ལ་དང༌། ཀཀྐོ་ལའི་འགྲམ་གཉིས་དྲིལ་བུ་སྟེ་འབྲས་བུར་འགྱུར་ཞེས་པ་ནི་རྟེན་དེའི་སྟེང་ནས་དོན་ལ་དེ་ལྟར་
གྱུར་བ་མིན་གྱི། །དམིགས་པས་དེ་དག་མི་མངོན་པར་བྱས་ནས་རྡོ་རྗེ་སོགས་སུ་སྐྱེད་པའོ། །འདི་ཡང་མཆོད་པ་སོགས་ཀྱི་སྐབས་སུ་ཡབ་ཡུམ་མཉམ་པར་སྦྱོར་བ་བསྒོམས་ནས་ལྷན་སྐྱེས་འདྲེན་དགོས་པའི་སྐབས་སུ་བྱེད་ཀྱི། དེ་ལས་གཞན་པའི་སྐབས་
སུ་ནི་ལྷ་མོ་ཉིད་དུ་སྒོམ་པ་ཡིན་ནོ། །ཤཱནྟི་པའི་འགྲེལ་པ་ལས། བུད་མེད་ནི་བདག་མེད་མའོ། ཞེས་བུད་མེད་ཀྱི་གཟུགས་སྤངས་པ་བདག་མེད་མར་བསྒོམས་པའི་གཟུགས་ལ་བཤད་པས། རྟེན་བུད་མེད་ཀྱིས་སྒོམ་པའི་དབང་དུ་བྱས་ནས། བུད་མེད་ཀྱི་གཟུགས་
དོན་ལ་སྤངས་པར་ཁ་ཅིག་འཆད་པ་ལྟར་ནི་མིན་ཏེ། ཡིན་ན་ནི་ཧེ་རུ་ཀའི་གཟུགས་སུ་ཡང་དོན་ལ་སོང་ལ་འདོད་དགོས་པས། དེ་ནས་སྤྱོད་པ་བྱེད་པར་འདོད་པ་མི་རིགས་པའི་ཕྱིར་དང༌། སྐྱེས་པས་བདག་མེད་མའི་རྣལ་འབྱོར་སྒོམ་པ་ལ་ཡང་དོགས་པ་དེ་
9-5-65a


གཅད་དགོས་པས་མི་འགྲིག་པའི་ཕྱིར་རོ། །བྷཱ་བ་བྷ་དྲས་ཀྱང༌། བདག་ཉིད་སྐད་ཅིག་ཙམ་གྱིས་འདི་ལྟ་བུའི་སྐྱེས་བུར་བསྒོམས་ནས་སྙོམས་པར་འཇུག་པ་ལས། ལྷན་ཅིག་སྐྱེས་པ་མཚོན་པའམ། ཕྱག་རྒྱ་ཆེན་པོའི་དངོས་
གྲུབ་བསྒྲུབ་པར་བྱ་ཞེས་པའོ། ཞེས་དམིགས་པས་སྒྱུར་བ་གསལ་བར་བཤད་ཅིང༌། ཡང་ན་བདག་མེད་མའི་རྣལ་འབྱོར་པས་སྤྱོད་པ་མ་བྱས་ཀྱང་བདག་མེད་མར་སྒོམ་པ་འབའ་ཞིག་གིས་འགྲུབ། ཅེས་བཤད་ཡམས་གཉིས་བྱས་པའི་ཕྱི་མ་ལྟར་
ན་རྒྱུད་ལས། བུད་མེད་ཀྱི་རྟགས་སྒྱུར་བར་གསུངས་པ་དང་མི་འགྲིག་པས་སྒྱུར་དགོས་ལ། དེ་ཡང་སྤྱོད་པའི་དུས་ཁོ་ན་མིན་གྱི། བསྐྱེད་རིམ་ཐུན་བཞིར་སྒོམ་པའི་དུས་ནས་དགོས་སོ། །ཀྱཻ་རྡོར་གྱི་འགྲེལ་པ་ཁུངས་ཐུབ་རྣམས་ཀྱིས་ཀྱང་དོན་ལ་སྒྱུར་བར་
བཤད་པ་མི་སྣང་ངོ༌། །ནག་པོ་དམ་ཚིག་རྡོ་རྗེས་བྱས་ཟེར་བའི་འགྲེལ་པ་སྤྱོར་ཕྲེང་དུ་ཤཱནྟི་པ་བཞིན་བཤད་ལ། དེས་བྱས་ཟེར་བའི་དྲན་པའི་འབྱུང་གནས་སུ་ནི་གཟུགས་དོན་ལ་བརྗེ་བར་བཤད་མོད་ཀྱང་ཡིད་བརྟན་མི་སྣང་ངོ༌། །མངོན་བརྗོད་ལས། དེ་ཉིད་
པདྨའི་དབུས་དག་ཏུ། །ཧེ་རུ་ཀ་ནི་མཆོག་ཉིད་བསྒོམ། །ཐོད་པ་ལྷན་ཅིག་མཉམ་པར་ནི། །ལྔ་ཡི་དབྱེ་བ་དག་སྦྱོར་ཏེ། །རྣལ་འབྱོར་མ་ཡི་རིམ་པ་བསྒོམ། ཞེས་དང༌། རང་རང་གི་ནི་རྣལ་འབྱོར་མ་སྙིང་དུ་སྤས་པ་རྣམ་པར་བསྒོམ། ཞེས་ཧེ་རུ་ཀ་རིགས་ལྔས་
གཙོ་བོ་བྱེད་པ་བཞིན་དུ། རྣལ་འབྱོར་མ་རིགས་ལྔས་ཀྱང་གཙོ་བོ་བྱེད་པ་དང༌། སྔ་མ་ལྔས་གཙོ་བོ་བྱེད་པ་ན། རང་རང་གི་རིགས་ཀྱི་ཡུམ་རང་གི་སྙིང་ཁར་སྦེད་པར་གསུངས་ལ། འདིའི་འགྲེལ་པ་ལས་ཀྱང༌། ཡབ་ལྔས་ཡུམ་ལྔ་སྙིང་ཁར་སྦེད་པ་བཞིན་དུ། 
9-5-65b


རྣལ་འབྱོར་མ་ལྔས་ཀྱང་རང་གི་སྙིང་ཁར་དཔའ་བོ་ལྔ་སྦོད་པར་བཤད་པ་ལྟར་ན། སྙོམས་འཇུག་དགོས་པའི་དུས་སུ། སྙིང་ཁ་ནས་ཡབ་དང་ཡུམ་བཏོན་ནས། དེ་དང་མཉམ་པར་སྦྱར་བ་ལས་བདེ་ཆེན་འདྲེན་པ་འདྲ་བ་ཞིག་སྣང་ནའང༌། མངོན་བརྗོད་ཁ་ཅིག་ལས། 
རང་རང་གི་ནི་རྣལ་འབྱོར་མ། །སྙིར་ཁར་འཁྱུད་པ་རྣམ་པར་བསྒོམ། ཞེས་ཀྱང་འབྱུང་བས་སྔ་མ་ལ་ངེས་པ་ཐོབ་དཀའ་བར་སྣང་ངོ༌། །དེས་ནས་ཀྱཻ་རྡོར་ནས་བཤད་པའི་རིགས་པ་ཕག་མོས་གཙོ་བོ་བྱས་པ་ལའང་སྦྱར་ན་འཐད་དམ་སྙམ་སྟེ་དཔྱད་དོ། །དེ་ནི་དཀྱིལ་
འཁོར་གྱི་གཙོ་བོའི་ལྷ་ཕོ་ཡུམ་མ་བཤད་པ་རྣམས་ཀྱི་དོགས་གཅོད་ཀྱང་ཤེས་པར་བྱའོ། །གསུམ་པ་ནི། དེ་ལྟར་ན་དོགས་གཅད་སྔར་ལྟར་མཛད་པ་ནི། བསྐྱེད་རིམ་ཐུན་བཞིར་སྒོམ་པ་འདི་ལ། རྫོགས་རིམ་པའི་བེད་ཆེན་སྐྱེ་བའི་སྨིན་བྱེད་ཅིག་གལ་ཆེ་བར་གཟིགས་
ནས་ཡིན་ནོ། །དེའི་ཕྱིར་དཀྱིལ་འཁོར་གྱི་འཁོར་ལོ་སྒོམ་པ་ན། དེ་ཐམས་ཅད་ཀྱང་བདེ་བ་ཆེན་པོའི་རྣམ་རོལ་དུ་ཤར་བར་སྒོམ་པ་གལ་ཚ་བས། དཔལ་ཡན་ལག་མེད་པའི་རྡོ་རྗེས། དཀྱིལ་འཁོར་མ་ལུས་པ་རྣམ་པར་མི་རྟོག་པ་བདེ་པའི་རང་བཞིན་དུ་བལྟ་བར་བྱའོ། 
ཞེས་དང༌། མན་སྙེར་ཡང༌། སེམས་ཀྱི་རྣམ་འཕྲུལ་ལོ་ཞེས་པ་འདིས། འདི་ཐམས་ཅད་བྱང་ཆུབ་ཀྱི་སེམས་ཀྱི་རང་གི་ངོ་བོར་མོས་པ་ཁོ་ནས་བྱའོ། །ཞེས་གསལ་བར་བྱེད་དེ། གང་གི་ཕྱིར་འདི་ཐམས་ཅད་རྣམ་པར་སྣང་མཛད་ལ་སོགས་པ། རིགས་ལྔ་རྣམས་སུ་འདུས་
ཤིང༌། དེ་རྣམས་ཀྱང་རྡོ་རྗེ་འཛིན་པ་བྱང་ཆུབ་སེམས་ཀྱི་བདག་ཉིད་གཅིག་པུ་ཁོ་ནའོ། །ཞེས་ལྷའི་རྣལ་འབྱོར་དང་བཟླས་པ་སོགས་ཀྱི་ཆོ་གའི་རིམ་པ་ཐམས་ཅད། བདེ་སྟོང་དབྱེར་མེད་ཀྱི་བྱང་ཆུབ་ཀྱི་སེམས་ཀྱི་ངོ་བོར་མོས་ནས་ངེས་པར་བྱ་དགོས་པར་གསུངས་པ་
9-5-66a


ལྟར་བྱའོ། །དེ་ཡང་རིམ་པ་དང་པོ་སྒོམ་པའི་སྐབས་མང་པོར་ཡང༌། དང་པོར་ལྟ་བ་དྲན་པར་བྱ། དེ་ནས་ཡེ་ཤེས་ཀྱི་ཕྱག་རྒྱལ་དམིགས་ནས་སྐྱེས་པའི་ཞུ་བདེ་ཆུང་གུ་ཡན་ཆད་དྲན་པར་བྱས་ལ་བདེ་སྟོང་དབྱེར་མེད་དུ་སྦྱར། དེ་ནས་ལྷ་
དང་སྔགས་ལ་སོགས་པ་ཐམས་ཅད་དེའི་རྣམ་འགྱུར་ཡིན་པའི་མོས་པ་བརྟན་པོ་ཡང་ཡང་བསྐྱེད་ལ་བྱ་བ་ནི། རིམ་པ་དང་པོས་རྒྱུད་སྨིན་པའི་ཐབས་དམ་པར་ཟུང་ཤིག །བཞི་པ་ནི། མངོན་བྱང་གི་སྐབས་ཀྱི་དབྱངས་གསལ་ལ་རྒྱ་གཞུང་རྣམས་ལས་ཉིས་
འགྱུར་དུ་མ་བྱས་པ་མེད་ཞིང༌། ཇོ་བོ་ཆེན་པོའི་འགྲེལ་པ་དང༌། དཔའ་བོ་རྡོ་རྗེས་བྱས་ཟེར་བའི་འགྲེལ་པ་ལས་ཀྱང༌། ཨཱ་ལི་བཅུ་དྲུག་དང་ཀཱ་ལི་སོ་བཞིར་བཤད་ལ། འགྲེལ་པ་གཞན་གསུམ་ལས། ཨཱ་ལི་དང་ཀཱ་ལིའི་ཕྲེང་བ་གཡོན་སྐོར་དང་གཡས་སྐོར་དུ་
གནས་པ་ཞེས་པ་ཙམ་ལས། ཉིས་འགྱུར་བྱད་མི་བྱེད་མི་གསལ་ཡང༌། མངོན་བརྗོད་ལས་ཨཱ་ལི་ཀཱ་ལི་ལུགས་འབྱུང་དང༌། ལུགས་བཟློག་གི་ཚུལ་དུ་ཉིས་ལྡབ་ཏུ་བྱས་ལ། ཞེས་གསུངས་པ་ལྟར་སྒྲུབ་ཐབས་གཙུག་ནོར་ལས་ཀྱང་གསུངས་པས། དབྱངས་
གསལ་གཉིས་སོ་སོར་ཉིས་འགྱུར་དུ་བྱའོ། །གསལ་བྱེད་སོ་བཞི་ལ་ཡི་གེ་ལྷག་པོ་དྲུག་སྣོན་ལུགས་མང་དུ་ཡོད་ཀྱང༌། སྒྲུབ་ཐབས་གཙུག་ནོར་ལས། ཌ་ཌྷ་ད་ངྷ་ཡ་ལ་དྲུག་བསྣན་པ་ལྟར་རམ། མན་སྙེ་ལས་ཌ་ཌྷ་ཡ་ར་ལ་ཝ་དྲུག་བསྣན་པ་ལྟར་བྱའོ། །ཀུ་
མཱ་ར་བོ་ངྷིའི་འགྲེལ་པ་ལས། དབྱངས་ཕྲག་གཉིས་ཀ་གཡོན་དང༌། གསལ་བྱེད་ཕྲག་གཉིས་ཀ་གཡས་སྐོར་དུ་བཤད་ཀྱང༌། མངོན་བརྗོད་ཀྱི་དགོངས་པ་ནི་དབྱངས་ཕྲག་གཉིས་ཀྱི་གཅིག་གཡོན་དང༌། གཅིག་གཡས་སྐོར་དུ་བྱེད་པར་མངོན་ཏེ། །གསལ་
9-5-66b


བྱེད་ལ་ཡང་ངོ༌། །འོན་ཀྱང་དེ་གཉིས་ཀའང་སྐོར་ཐེབས་རེ་རེ་བྱའོ། །ཁ་དོག་ནི་མར་ངོས་དབྱངས་དཀར་པོ་དང༌། གསལ་བྱེད་དམར་པོ་དང༌། སྐོར་ལུགས་ནི་དང་པོ་ནང་དང་གཉིས་པ་ཕྱི་ནས་བསྐོར་བར་བཞེད་དེ། དཔལ་འབྲས་རྡོ་རྗེ་དང་མཐུན། སྨན་ཞབས་ཀྱིས་
དབྱངས་འོག་དང་གསལ་བྱེད་སྟེང་དུ་དགོད་པར་བཞེད་དོ། །དབྱངས་གསལ་གྱི་ཚར་རེ་རེ་ལ་ཉིས་འགྱུར་དུ་བྱེད་པའི་རྒྱུ་མཚན་གཞན་གྱིས་གསལ་བར་མ་བཤད་ལ། མན་སྙེར་ནི་ཨཱ་ལིའི་མཚོན་དོན་བྱང་ཆུབ་ཀྱི་སེམས་ཡིན་ལ། དེ་ལ་ལུས་ཀྱི་གནས་
སོ་སོའི་དབྱེ་བས་བཅུ་དྲུག་ཡོད་ལ། དེ་རེ་རེ་ལ་ཐབས་དང་ཤེས་རབ་གཉིས་གཉིས་ཡོད་དེ། ཀྱཻ་རྡོ་རྗེ་ལས། ཁུ་བའི་རྣམ་པ་བཅོམ་ལྡན་འགྱུར། དེ་ཡི་བདེ་བ་འདོད་མར་བཤད། ཅེས་གསུངས་པའི་ཕྱིར་རོ་ཞེས་འཆད་དོ། །ལུས་ཀྱི་གནས་ཀྱི་དབྱེ་བས་འབྱེད་
ཚུལ་ནི་མན་སྙེད་རྒྱུད་གཞན་ཅིག་དྲངས་ལ། བདེ་མཆོག་གི་རྒྱུད་ནས་གསུངས་པ་ནི། སྡོམ་འབྱུང་ལས། དེ་ལས་གཞན་ཡང་ཐིག་ལེའི་གཟུགས། །འཕོ་བ་ཡང་དག་བཤད་པར་བྱ། །དཀར་པོའི་ཚེས་གཅིག་ནས་བརྩམས་ཏེ། །ཇི་སྲིད་ཟླ་བ་རྫོགས་པའི་
བར། །དཀར་པོའི་ཚེས་གཅིག་ལ་ཨ་ཡིག །རྐང་པའི་སོར་མོར་ཡི་གེ་ལ། །གཉིས་པ་བྱིན་བར་ཨཱ་ཡིག་སྟེ། །གསུམ་པར་བརླ་ལ་ཨི་ཡིག་གོ། སྐྱེ་གནས་བཞི་པ་ཨཱི་ཡིག་ཡིན། །ལྟེ་བར་ལྔ་པ་ཨུ་ཡིག་སྟེ། །སྙིང་ཁར་དྲུག་པ་ཨཱུ་ཡིག་གོ། །ནུ་མར་བདུན་
པ་རི་ཡིག་དང༌། །མགྲིན་པར་བརྒྱད་པ་རཱི་ཡིག་སྟེ། །ལག་མཐིལ་དགུ་པར་ལྀ་ཡིག་གོ། མཁུར་ཚོས་བཅུ་པར་ལཱྀ་ཡིག་ཡིན། །མིག་དང་བཅུ་གཅིག་པ་ཨེ་ཡིག ། །རྣ་བར་བཅུ་གཉིས་པ་ཨཻ་ཡིག ། །དཔྲལ་བར་བཅུ་གསུམ་པ་ཨོ་ཡིག །སྤྱི་བོར་བཅུ་
9-5-67a


བཞི་པ་ཨཽ་ཡིག །ཆང་གི་གཡོན་དང་གཡས་སུ་ཉ། །ཨཾ་ཨཿཡི་གེའི་རང་བཞིན་ནོ། །ནག་པོའི་ཚེས་གཅིག་ནས་བརྩམས་ཏེ། །ཇི་སྲིད་གནམ་སྟོང་དེ་སྲིད་ལ། །འཕོ་བ་དེ་ཉིད་བཞིན་དུ་འགྱུར། ཞེས་གསུངས་ལ། སྡོམ་འབྱུང་འགྲེལ་པ་
ལས། གཡོན་པ་ཞེས་པ་དཀར་པོའི་ཕྱོགས་ལ་མཐེ་བོང་ནས་སྤྱི་བོར་ལུས་ཀྱི་གཡོན་ལ་བརྟེན་ནས་འཛེག་པར་བྱེད་ཅིང༌། ནག་པོའི་ཕྱོགས་ལ་ནི་སྤྱི་བོ་ནས་མཐེ་བོང་དུ་ལུས་ཀྱི་གཡས་ལ་བརྟེན་ནས་འབབ་པར་བྱེད་དེ། ཞེས་བཤད་དེ་ཡར་ངོ་ལ་རྐང་
པ་གཡོན་པའི་མཐེ་བོང་ནས་བརྩམས་ཏེ་སྤྱི་གཙུག་གི་བར་དུ་འཇོག་པ་དང༌། མར་ངོ་ལ་སྤྱི་གཙུག་ནས་བརྩམས་ཏེ་རྐང་པ་གཡས་པའི་མཐེ་བོང་གི་བར་དུ་འོག་ཏུ་བྱང་སེམས་འབབ་པའོ། འགྱུར་རྙིང་ལས། ཇི་སྲིད་ཉ་ཡི་བར་དུ་སྟེ། །ཡར་དོ་ཡི་ནི་
ཚེས་གཅིག་ལ། །རྐང་པའི་སོར་མོར་ཡི་གེ་ཨཿ  ཞེས་དང༌། ཉ་ལ་སྤྱི་གཙུག་གཡས་གཡོན་དུ། ཞེས་འབྱུང་ངོ་། །མར་ངོའི་གནམ་གང་གི་གནས་གཉིས་ནི་མཐེ་བོང་གི་ངོས་གཉིས་སུ་བྱེད་དགོས་སམ་བརྟག་གོ། གསལ་བྱེད་བརྒྱད་ཅུར་བྱེད་པའི་རྒྱུ་
མཚན་ཡང་གསུངས་ཏེ། ཀཱ་ལི་རྣམས་ས་ཆུ་མེ་རླུང་ནམ་མཁའི་ཁམས་ལྡར་བསྡུས་ནས། དེ་རེ་རེ་ལ་བཞི་བཞིར་དབྱེ་སྟེ་སྡོམ་འབྱུང་ལས། གང་དུ་གཅིག་ནི་གནས་པ་དེར། །བཞི་པོ་དེ་ཀུན་ཉེ་བར་གནས། ཞེས་གསུངས་པའི་ཕྱིར་དང༌། ཀྱཻ་རྡོར་ལས་དགའ་
པ་ནམ་མཁའི་ཁམས་སུ་བཤད་ལ། །དེ་ལ་དགའ་བ་བཞི་ཡོད་པས་བཞི་ལྔ་ཉི་ཤུའོ། ཁམས་ཉི་ཤུ་པོ་རེ་རེ་ཡང་རཀྟའི་རྡུལ་རེ་དང་ལྡན་པས་དེ་དང་བཅས་པ་བཞི་བཅུའོ། །དེ་ལ་ཤེས་རབ་སྟོང་པ་དང༌། ཐབས་བདེ་བ་གཉིས་གཉིས་སུ་ཕྱེ་བས་བརྒྱད་ཅུ་
9-5-67b


སྟེ། ཀཱ་ལིས་མཚོན་པའི་དོན་རྡུལ་ཡིན་ལ། དེའི་ཁམས་ལྔ་དང་རྡུལ་གྱི་ཆ་སོ་སོར་བརྩིས་ཤིང༌། འབྱུང་བ་དང་རྡུལ་ཡིན་པའི་ཚུལ་གྱིས་དགའ་བ་བཞི་ལ་སོགས་པར་མི་འབྱེད་ཀྱང༌། དེ་དག་དང་བཅས་པའི་དབང་དུ་བྱས་པའོ། གསལ་བྱེད་རྣམས་ཁམས་
ལྔར་སྡུད་ལུགས་ནི། ཀ་ང་ཉ་ཎ་ན་མ་ཧ་ཀྵ་རྣམས་ནམ་མཁའི་གསལ་བྱེད་དོ། །གྷ་ཛྷ་ཌྷ་ཌྷ་ངྷ་བྷ་ཡ་ཡེ་ཤེ་རྣམས་རླུང་གིའོ། ག་ཛ་ཌཌ་ད་པ་ར་ར་ཤ་རྣམས་མེའི་འོ། །ཁ་ཚ་ཋ་ཋ་ཕ་ཝ་ཝ་རྣམས་ཆུའི་འོ། ཚ་ཊ་ཏ་པ་ལ་ལ་ས་རྣམས་སའི་གསལ་བྱེད་ཀྱི་ཡི་
གེ་སྟེ། མན་སྙེའི་ལུགས་སོ། །ཚུལ་འདི་ཟླ་ཉི་གཉིས་དང་ཟླ་པ་དཀར་དམར་གཉིས་བྱེད་པ་ལ་འཆད་པར་མ་ཟད། ཟླ་བ་དཀར་ལ་དམར་པའི་མདངས་ཅན་གཅིག་བྱེད་པ་ལ་ཡང་དེས་མཚོན་པའི་ཁུ་རྡུལ་ཡོད་ཅིང༌། ཡེ་གེ་ཡང་སོ་གཉིས་དང་བརྒྱད་ཅུར་བྱེད་
པས་འདི་ལ་ཡང་ཤེས་པར་བྱའོ། །གཉིས་པ་ལ་བཞི། རྣལ་འབྱོར་དང༌། རྗེས་སུ་རྣལ་འབྱོར་དང༌། ཤིན་ཏུ་རྣལ་འབྱོར་དང༌། རྣལ་འབྱོར་ཆེན་པོའོ། །དང་པོ་ནི། སྣ་ཚོགས་པདྨ་ཆུང་དུ་དེའི་དབུས་སུ་ཨ་ཨཱ་ཨི་ཨཱི་ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿའི་
བར་བཅུ་དྲུག་གཡས་སྐོར་དང༌། སླར་ཡང་བཅུ་དྲུག་གཡོན་སྐོར་དུ་རིམ་པ་གཅིག་གིས་དགོད་དེ་ཁ་དོག་དཀར་པོའོ། དེའི་ཕྱི་རོལ་དུ་ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌ་ཌྷ་ཌྷ་ན། ཏ་ཐ་ད་དྷ་ན། པ་ཕ་བ་གྷ་མ། ཡ་ཡ་ར་ར་ལ་ལ་ཝ་ཝ། ཤ་ཥ་ས་ཧ་ཀྵའི་བར་
བཞི་བཅུ་གཡས་སྐོར་དང༌། སླར་ཡང་བཞི་བཅུ་གཡོན་སྐོར་དུ་རིམ་པ་གཅིག་གིས་དགོད་དེ། ཁ་དོག་དམར་པོའོ། དེ་གཉིས་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ཡོངས་སུ་རྫོགས་པ་དཀར་ལ་དམར་བའི་མདངས་ཅན་ལ། དབྱངས་གསལ་སོ་གཉིས་
9-5-68a


དང་བརྒྱད་ཅུ་གཟུགས་བརྙན་ཤར་བ་བཞིན་དུ་སྣང་པ་བསམ་པ་ནི་སྦྱོར་བ་སྟེ་རྣལ་འབྱོར་རོ། ཡོ་ག་ཞེས་པ་སྦྱོར་བ་ལ་ཡང་འཇུག་མོད་ཀྱང༌། སྐབས་འདིར་ནི་རྣལ་འབྱོར་ལ་བསྒྱུར་ན་ལེགས་ཏེ། རྣལ་འབྱོར་བཞིའི་རྣལ་འབྱོར་དང་པོའི་སྐབས་ཡིན་
པས་སོ། །ལྭ་བ་པས་བཅུ་གསུམ་མའི་སྒྲུབ་ཐབས་ལས། ཀཱ་ལི་ལས་ཉི་མ་སྐྱེད་པ་བཤད་ཀྱང༌། འདིའི་འགྲེལ་བར་དབྱངས་གསལ་གཉིས་ཀས་ཟླ་བ་སྐྱེད་པར་བཤད་པའི་ལུགས་སོ། །དབྱངས་གསལ་ལས་སྐྱེད་པའི་ཟླ་བ་ལ་སླར་ཡང་དབྱངས་གསལ་
གཟུགས་བརྙན་ཤར་བ་བཞིན། འགོད་པ་འགྲེལ་པ་གསུམ་གའི་ལུགས་ཡིན་ལ། ཁ་དོག་ནི་དེ་གསུམ་ལས་གསལ་བར་མ་བཤད་ཅིག་གིས་དཀར་པོ་རྐྱང་པ་དང༌། ཁ་ཅིག་གིས་དམར་པོ་རྐྱང་པར་བཤད་ཀྱང༌། དཔའ་བོ་རྡོ་རྗེས་རྩ་རྒྱུད་ཀྱི་འགྲེལ་
པར་དེ་ལ་བཀོད་པའི་ཨཱ་ལི་ཀཱ་ཀི་ཡོངས་སུ་གྱུར་པ་ལས། དཀར་ཞིང་དམར་བའི་ཟླ་བའི་དཀྱིལ་འཁོར་བསམས་ལ། ཞེས་འབྱུང་བ་ལྟར་དཀར་དམར་གཉིས་ཀ་ཚོགས་པ་དགོས་ཏེ། སྦྱང་གཞི་དང་ལམ་གྱི་གནད་ཀྱིས་སོ། །མངོན་བྱང་ལྔ་ཡེ་ཤེས་ལྔ་དང་སོ་
སོར་སྦྱོར་བ་འདིའི་འགྲེལ་པ་གསུམ་ནས་མི་གསལ་ཡང༌། ཟླ་བའི་ཁ་དོག་དཀར་པའི་ཆ་དང་ཨཱ་ལི་ནི་མེ་ལོང་ལྟ་བུ་དང༌། ཟླ་བའི་ཁ་དོག་དམར་པོའི་ཆ་དང་ཀཱ་ཀི་ནི་མཉམ་པ་ཉིད་ཀྱི་ཡེ་ཤེས་ཏེ། རིམ་པ་བཞིན་མཚན་སོ་གཉིས་དང་དཔེ་བྱད་བརྒྱད་ཅུའི་ངོ་བོར་
མོས་པ་ཡང་གཞུང་གཞན་ནས་བཤད་དོ། །རྣལ་འབྱོར་དུ་གསུངས་པའི་དོན་ལ་མང་དུ་ཡོད་ཀྱང༌། འདིར་ཨཱ་ལི་ཀཱ་ལི་གཉིས་ཟླ་བ་གཅིག་གི་ངོ་བོར་སྦྱོར་བ་དང༌། ཟླ་བ་གཅིག་ཉིད་ཡེ་ཤེས་གཉིས་ཀྱི་ངོ་བོར་སྦྱོར་བའི་དོན་དུ་བྱའོ། །གཉིས་པ་ནི། དེ་ནས་ཟླ་བ་དེའི་
9-5-68b


དབུས་སུ་སྔར་ནམ་མཁར་བཞག་པའི་ནཱ་ད་བབས་པ་ནི་བར་དོ་ཕ་མའི་ཁུ་ཁྲག་གི་དབུས་སུ་འཇུག་པ་དང་བསྟུན་པ་ཡིན་ལ། དེ་ཡང་སྡོམ་འབྱུང་ལས། ཨཱ་ལི་ཀཱ་ལི་ཞུ་བྱས་པའི། །ཁུ་ཁྲག་དེ་དག་གི་དབུས་སུ། །ཐིག་ལེའི་གཟུགས་ཀྱིས་གནས་པར་འགྱུར། ཞེས་
བར་དོ་མངལ་དུ་འཇུག་ཚུལ་དེ་ལྟར་བཤད་ལ། དེ་ནི་འདིར་སླར་ཡང་ཟླ་བ་ལ་ཨཱ་ལི་ཀཱ་ཀིའི་ཕྲེང་བས་བསྐོར་བའི་དབུས་སུ་ནཱ་ད་འཇུག་པ་དང་མཐུན་ཚབས་ཆེ་ཞིང་རྣམ་པ་གསལ་ལོ། ནཱ་ད་ནམ་མཁར་བཞག་པ་ནས་ཟླ་བ་ལ་ཞུགས་པའི་ཐོག་མའི་བར་ནི་བར་
སྲིད་ཀྱི་སྐབས་དང་སྦྱར་རོ། རྒྱུའི་རྡོར་འཛིན་ཡབ་ཡུམ་གྱི་ལྷའི་རྣམ་པར་མི་སྐྱེད་པའི་ཕྱོགས་ལ། བར་དོ་ཁུ་ཁྲག་གི་དབུས་སུ་འཇུག་ཚུལ་དེ་ལྟར་བྱ། ཡང་ཁུངས་ཐུབ་ཀྱི་གཞུང་འགའ་ཞིག་ནས། ནམ་མཁའ་ནས་བབས་པ་མེད་པར་ཟླ་ཉི་གཉིས་དང༌། ཟླ་བ་གཉིས་
ཀྱི་བར་རམ། དེ་གཉིས་ཀྱི་སྟེང་དང༌། ཟླ་བ་གཅིག་གི་སྟེང་དུ་ཧཱུཾ་ཡིག་སྐྱེད་བ་ལྟར་ན། རིམ་གྱིས་རྫོགས་པར་བྱེད་ན་ནཱ་ད་དེའི་དུས་སུ་བར་དོ་ཞུགས་པའི་དོད་དང༌། ཅིག་ཅར་དུ་རྫོགས་པར་བྱེད་ན་ཧཱུཾ་ཡིག་དེར་གྲུབ་བའི་དུས་ཉིད་ན་བར་དོ་ཞུགས་པའི་སྐབས་དང་སྦྱར་
རོ། བར་དོ་མཚོན་པའི་ཡེ་གེ་ཧོཿཡིག་དམར་པོ་གཉིས་ཀྱི་བར་དུ་འཛུད་པ་ནི་བར་དོའི་ཆགས་པ་ཤས་ཆེ་བས་བསྒྲིབས་པ་མཚོན་པའི་དོན་དུ་བཞེད་པ་དང༌། ཕ་མ་ལས་བྱུང་བའི་ཐབས་ཤེས་ཀྱི་རང་བཞིན་གྱི་བདེ་བའི་ཆགས་པ་མཚོན་པའི་དོན་དུ་
བཞེད་པའི་ལུགས་གཉིས་མན་སྙེར་བཀོད་དོ། །རྒྱུ་རྡོ་རྗེ་འཛིན་པའི་ལྷ་ཡབ་ཡུམ་ཡོད་པའི་ཕྱོགས་ལ། ནམ་མཁའ་ནས་བར་སྲིད་མཚོན་པའི་ཡི་གེའི་འཇུག་ཚུལ་ནི། མན་སྙེ་ལས། དེ་ཉིད་ཀྱི་ཕྱིར་འདི་ལ་དགོངས་ནས་ལྷ་འགའ་ཞིག་ལ་གསེར་གྱི་སྒོ་
9-5-69a


ནས་དྲི་ཟའི་སེམས་ཅན་འཇུག་པ་དང༌། འགའ་ཞིག་ལ་ཁ་ནས་དང༌། འགའ་ཞིག་ལ་རྣམ་པ་གཞན་དུའོ། །ཞེས་བཅོམ་ལྡན་འདས་ཀྱི་རྒྱུད་སྡེ་རྣམས་སུ་རྟོགས་པས་མཛད་དོ། །ཞེས་གསུངས་ཏེ། གསེར་གྱི་སྒོ་ནི་སྤྱི་གཙུག་སྟེ་རྣམ་
གཞག་རིམ་པ་ལས་རྣམ་སྣང་གི་སྒོ་ནས་བར་སྲིད་འཇུག་པར་བཤད་པ་དང་དོན་གཅིག་གོ། རྣམ་པ་གཞན་དུའོ་ཞེས་པ་ནི་མངོན་པ་ནས་མངལ་སྒོ་ནས་འཇུག་པའི་བཤད་པ་ཡིན་ཏེ། འཇུག་པའི་སྒོ་གསུམ་མོ། དེ་དག་ནས་འཇུག་པའི་རྒྱུ་ཡང་མཆུའི་སྦྲང་
རྩི་འཇིབ་པར་འདོད་ནས་ཁ་དང༌། སྐྲ་ནས་འཛིན་པ་སོགས་བྱེད་འདོད་ནས་རྣམ་སྣང་གི་སྒོ་ནས་དང་དེ་ཡང་སྐྱེས་པ་ཆགས་ནས་བྱེད་ན་ཕའི་དང༌། བུད་མེད་ལ་ཆགས་ནས་བྱེད་ན་མའི་སྒོ་དེ་དག་ཏུ་འཇུག་པ་དང༌། ཁ་ཅིག་ནི་མའི་ཁོ་ནར་འདོད་པའི་ལུགས་
གཉིས་དང༌། མཐར་སྐྱེ་གནས་ནས་འཇུག་པ་འདྲ་བར། མན་སྙེ་ལས་གསུངས་སོ། །རྒྱུད་རྡོར་ཕྲེང་དང་ཕྱག་ཆེན་ཐིག་ལེ་ལས་ཕའི་ཁ་ནས་འཇུག་པར་བཤད་ཅིང༌། སྡོམ་འབྱུང་གི་དགོངས་པ་ཡང་དེ་ལྟར་བཀྲལ་ལོ། བར་སྲིད་འཇུག་ལུགས་སྣ་ཚོགས་
ཤིག་ཡོད་པས་གཞུང་རྣམས་སུ་སྐྱེད་ཆོག་དུ་མ་ཞིག་གསུངས་སོ། །བར་སྲིད་མཚོན་པའི་ཡི་གེ་འཇུག་པ་ན། ཡི་གེ་དེ་ལ་ངའོ་སྙམ་པའི་ང་རྒྱལ་བསྐྱེད་ལ། དེས་རྒྱུ་རྡོར་འཛིན་ཡབ་ཡུམ་སྙོམས་པར་ཞིགས་ནས་བདེ་བ་ཆེན་པོ་ཉམས་སུ་བསྟར་བ་
མཐོང་བའི་ཚུལ་དུ་བྱ། དེ་ནས་ངས་ཀྱང་ཀུན་ཏུ་བཟང་པོ་ཐོབ་པར་བྱ་བའི་ཕྱིར། ཡུམ་གྱི་པདྨར་འཇུག་པར་བྱའོ་སྙམ་པའི་སེམས་བརྟན་པོར་བྱས་ནས་འཇུག་པར། དཔལ་འབྲས་རྡོ་རྗེས་བཤད་པ་ནི། བར་དོའི་དོད་ཀྱིས་སངས་རྒྱས་ཡབ་ཡུམ་སྦྱོར་
9-5-69b


བའི་ཡུམ་གྱི་མངལ་དུ་སྐྱེ་བ་འཛིན་པའི་འཕེན་པ་གཏོང་ལུགས་ཡིན། དེ་འདྲའི་བསམ་པ་གཅིག་སྐྱེད་པ་ནི་སྐྱེད་ཆོག་སྔ་མ་ལ་ཡང་དགོས་པས། ཟླ་བ་དཀར་དམར་སོགས་མཐོང་བ་ན། ངས་སངས་རྒྱས་ཡབ་ཡུམ་གྱི་བྱང་སེམས་དཀར་དམར་གྱི་ངོ་བོར་
གྱུར་པའི་དབུས་སུ་སྐྱེ་བ་བླངས་ལ་སེམས་ཅན་གྱི་དོན་བྱའོ་སྙམ་དུ་འཕེན་པ་བཏང་ངོ༌། དེ་ལ་སྐྱེད་ཆོག་སྔ་མ་ལྟར་ན་དང་པོར་སྟོང་ཉིད་བསྒོམས་པའི་ངང་ནས། ནཱ་དར་ལངས་པ་ནས་གཟུང་སྟེ་ཟླ་བ་སོགས་ཀྱི་དབུས་སུ་ནཱ་ད་ཞུགས་པའི་ཐོགས་མའི་
མཚམས་ཡན་ཆད་བར་སྲིད་ཀྱི་སྐབས་དང་སྦྱར་དགོས་ཤིང༌། སྐྱེད་ཆོག་ཕྱི་མ་ལྟར་ན། གང་ནས་བརྩམས་པ་སྔར་དང་འདྲ། ཡབ་ལ་སོགས་པའི་ཞལ་ལ་སོགས་པར་ཞུགས་པ་ནས་བཟུང་སྟེ། ཡུམ་གྱི་མངལ་དུ་ཡི་གེ་རྣམས་མ་ཞུ་ཚུན་ཆོད་པར་
དོའི་སྐབས་དང་སྦྱར་ལ། ཡི་གེ་ཞུ་བའི་རྗེས་སུ་ཡབ་ཡུམ་ཞུ་བ་བྱ་སྟེ། ཤཱནྟི་པས། ཧོཿ གཉིས་ཀྱི་ནི་བར་གནས་པའི། །འབར་བའི་ས་བོན་གཉིས་པོ་ནི། །དགའ་ལྡན་དེ་ཡི་ཞལ་ནས་ཞུགས། །པདྨ་དེ་ཡི་མཐའ་རུ་ཞུ། །དེ་ནས་རྡོ་རྗེ་འཆང་ཆེན་ནི། །རིག་མ་
དང་ནི་ལྷན་ཅིག་ཞུ། །ཞེས་གསུངས་པ་ལྟར་རོ། །ཟླ་བའི་དབུས་སུ་ནཱ་ད་བབས་པ་ལས་ཡི་གེ་ཧཱུཾ་རིམ་གྱིས་རྫོགས་པར་བྱ་བར་འགྲེལ་པ་གསུམ་ནས་བཤད་པའི་རིམ་པ་ནི། ནཱ་ད་ལས་ཐིག་ལེ། དེ་ལས་ཟླ་ཕྱེད། དེ་ལས་མགོ་བོ། དེ་ལས་ཧའི་ལུས། དེ་
ལས་ཨཱུ་གྲུབ་པའི་ཚུལ་གྱིས་རྫོགས་པར་བྱེད་པར་རྒྱལ་བ་བཟང་པོས་བཤད་ལྟར་བྱ་དགོས་ཏེ། ཧཱུཾ་ཡིག་གི་སྡུད་རིམ་གྱིས་ཀྱང་ཤེས་སོ། །ཧཱུཾ་གི་ཁ་དོག་ནི་ཚོགས་གསོག་དང༌། གཏོར་མའི་སྐབས་སུ་དངུལ་ཆུའི་ཁ་དོག་ལྟ་བུར་བཤད། 
9-5-70a


དཀྱིལ་འཁོར་སྡུད་པའི་སྐབས་སུ་སིན་དྷུ་རས་བྱུགས་པའི་མུ་ཏིག་ལྟ་བུར་བཤད། བཟླས་པའི་སྐབས་སུ་ལྟེ་བའི་ཧཱུཾ་ཡིག་དཀར་དམར་དུ་བཤད་པའི་ཕྱི་མ་གཉིས་འདིར་སྐབས་སུ་བབ་པས་དཀར་ལ་དམར་བའི་མདངས་ཅན་དུ་བྱའོ། །
ནཱ་ད་ཟླ་བ་ལ་བབས་པའི་དུས་གཉིས་པ་ནས་མངོན་བྱང་བཞི་པའི་བར་ནི་བར་དོ་ཁུ་ཁྲག་གི་དབུས་སུ་ཚེའི་དུས་བྱས་ནས་སྐྱེ་སྲིད་དུ་ཉིད་མཚམས་སྦྱར་ཏེ། མངལ་ན་གནས་པའི་བར་དང་སྦྱར་དགོས་སོ། །སྐྱེད་ཆོག་ཕྱི་མ་ལ་ནི་ཡུམ་གྱི་མངལ་དུ་ཡི་གེ་ཞུ་བ་
ནས་བཟུང་སྟེ། འབྲས་བུའི་ཧེ་རུ་ཀ་མ་རྫོགས་ཚུན་ཆོད་མངལ་གྱི་སྐབས་དང༌། ཧེ་རུ་ཀ་རྫོགས་པ་ནས་ཕྱི་རོལ་དུ་བཙས་པའི་སྐབས་དང་སྦྱོར་བར་བཤད་དོ། མན་སྙེར་ཧཱུཾ་ཡིག་ལས་རྡོ་རྗེ་རྩེ་ལྡ་པ་བྱས་ནས། དེའི་ཕྱོགས་གཅིག་གི་རྩེ་མོ་ལྔ་ནི། རྐང་ལག་
བཞི་དང༌། མགྲིན་པ་ནས་མགོའི་བར་ལྔ་དང༌། ཕྱོགས་གཅིག་གི་རྩེ་ལྔ་ནི་རྐང་ལག་ལ་སོར་མོ་ལྔ་ལྔ་དང༌། མགོ་བོ་ལ་དབང་པོ་ཡོད་པ་ལ་བཤད་དེ། ལྔ་ཚན་གཅིག་ཏུ་བསྡུས་པའོ། འདིར་ནི་ལྭ་བ་པ་དང་པྲཛྙཱ་ར་ཀྵི་ཏས་ཕྱག་མཚན་ལ་མི་ལྟོས་པར་སྐྱེད་པར་
བཤད་པས་ཕྱག་མཚན་མེད་དོ། མངོན་བརྗོད་ལས་ཀྱང་སྒོང་སྐྱེས་ལ་ཕྱག་མཚན་མེད་པར་བཤད་ལ། ས་བོན་ཡང་མེད་པར་བཤད་པ་ནི། ཕྱག་མཚན་སྐྱེད་པ་དང་དེ་ལ་མཚན་པའི་ས་བོན་ལ་དགོངས་ཏེ། སྒོང་སྐྱེས་ཐམས་ཅད་ལ་མིན་ནོ། །ཧཱུཾ་ཡིག་གི་
ཨཱུ་ལ་སོགས་པ་ལྔ་སྔར་རིགས་ལྔར་བཤད་ཟིན་ལ། སྡོམ་འབྱུང་ལས། མི་བསྐྱོད་གཟུགས་ཀྱིས་ནུར་པོ། །མེར་མེར་པོ་ནི་རིན་ཆེན་འབྱུང༌། །དཔག་མེད་མགོན་ཡང་ལྟར་ལྟར་པོ། །དོན་ཡོད་གྲུབ་པ་གོར་གོར་པོ། །འཁྲང་འགྱུར་རྣམ་པར་སྣང་
9-5-70b


མཛད་དེ། །རྣམ་པ་ལྔར་ནི་བསྟན་པ་ཡིན། །དྲི་ཆུ་ཁྲག་ནི་མི་བསྐྱོད་པ། །ཁུ་བའི་གཟུགས་ཅན་འོད་དཔག་མེད། །གོང་བུ་ཙམ་ནི་རིན་ཆེན་འབྱུང༌། །འདྲེས་པ་རྣམ་པར་སྣང་མཛད་གནས། ཞེས་གསུངས་ཏེ་ཕྱི་མ་ལ་མི་བསྐྱོད་པ་ལ་གཉིས་སྦྱར་ནས་དོན་གྲུབ་དང་
མ་སྦྱར་རོ། །ནཱ་ད་མ་གཏོགས་པའི་ཧཱུཾ་ཡིག་གི་ཆ་ཤས་ལྔ་གནས་སྐབས་ལྔ་དང་སྦྱར་ཏེ་མངལ་ན་གནས་པའི་ལུས་སོ། །དོན་འདི་རྣམས་ཀླུ་བྱང་གིས་བཤད་པ་ལྟར་ན། མེར་མེར་པོ་དང༌། ལྟར་ལྟར་པོ་དང༌། གོར་གོར་པོ་དང༌། འཁྲང་འགྱུར་དང༌། རྐང་ལག་འགྱུར་
པའི་གནས་སྐབས་ལྔར་བྱས་ནས། དེ་ལ་ཁུ་བ་ལས་གྱུར་པ་དང༌། ཁྲག་ལས་གྱུར་པའི་གནས་སྐབས་ལྔ་ལྔར་བྱས་ནས། སྔ་མ་ལྔར་མི་བསྐྱོད་པ། རིན་འབྱུང༌། འོད་དཔག་མེད། དོན་གྲུབ། རྣམ་སྣང་ལྔ་དང་ཕྱི་མ་ལྔ་ལ་ཞུ་བ་མི་བསྐྱོད་པ། དམར་པོ་འོད་དཔག་
མེད། གོང་བུ་རིན་འབྱུང༌། འཁྲང་འགྱུར་དོན་གྲུབ། འདྲེས་པ་རྣམ་སྣང་དུ་བཤད་བའི་དང་པོ་གསུམ་མེར་མེར་པོ་སོགས་གསུམ་དང༌། ལྦ་པ་རྐང་ལག་འགྱུས་པའི་སྐབས་སུ་མངོན་ནོ། །རྟིང་ནས་ཀྱང་ནཱ་ད་གནས་པ་ནི་བར་དོའི་མཚོན་བྱེད་མིན་གྱིས་མངལ་ན་
གནས་པའི་སེམས་མཚོན་པར་བྱའོ། །དེ་འདྲ་བའི་ཧཱུཾ་ཡིག་རྫོགས་པ་ནི་སོ་སོར་རྟོག་པའི་ཡེ་ཤེས་སུ་མོས་པར་བྱའོ། ཧཱུཾ་ཡིག་དེ་ལ་རྡོ་རྗེ་སེམས་དཔའི་ངོ་བོ་ཞེས་པ་ནི། རྒྱུ་རྡོ་རྗེ་འཛིན་པའི་རང་བཞིན་ཅན་ནོ། །ཁ་དོག་སྣ་ལྔ་པའི་འོད་ཟེར་སྣ་ཚོགས་འཕྲོ་བའི་རྩེ་མོ་
ལས། འཁོར་ལོ་ལྔའི་ལྷ་ཚོགས་རྣམས་འཐོན་ཏེ། འགྲོ་བ་རྣམས་དེའི་གོ་འཕང་ལ་བཀོད་ནས་སྡུད་པའི་ཚེ་སྔོན་ཐོག་མ་མེད་པ་ནས་གྲུབ་པའི་དཔའ་བོ་དང༌། རྣལ་འབྱོར་མ་ལ་སོགས་པ་ཕྱོགས་བཅུའི་ཞིང་ཁམས་ན་བཞུགས་པ་རྣམས་སྤྱན་དྲངས་པ་དང༌། ལྷན་
9-5-71a


ཅིག་མཉམ་པར་སྦྱར་བ་སྔོན་དུ་འགྲོ་བས། ཞུ་བར་གྱུར་ཏེ། ཧཱུཾ་ཡིག་གི་ནཱ་ད་ལ་ཐིམ་པར་བསམས་ལ། དེའི་ཚེ་མཆོག་ཏུ་དགའ་བ་ལྷན་སྐྱེས་ཀྱི་བདེ་བའི་རང་བཞིན་ཅན། ས་བོན་ཧཱུཾ་ཡིག་དེ་ཡིད་ལ་མངོན་དུ་བྱས་ནས་རྣམ་པར་བསམ་
པར་བྱ་བ་ནི། བྱ་བ་སྒྲུབ་པའི་ཡེ་ཤེས་སོ། །བྱང་སེམས་ཞུ་བའི་ངོ་བོར་གནས་པ་དེས་ན་ཧཱུཾ་ཡིག ། རྒྱུ་རྡོ་རྗེ་འཆང་གི་རང་བཞིན་ཉིད་དོ། བཅོམ་ལྡན་འདས་ནི་བྱང་སེམས་ཞུ་བ་ལས་བྱུང་བའི་ལྷན་ཅིག་སྐྱེས་དགའ་ཡོངས་སུ་རྫོགས་པ་ཡིན་པའི་ཕྱིར་
འབྲས་བུ་རྡོ་རྗེ་འཛིན་པའི་རང་བཞིན་ཡིན་ཏེ། ཡེ་ཤེས་དེ་གཉིས་ནི་རྗེས་སུ་རྣལ་འབྱོར་རོ། །རྗེས་སུའི་དོན་ནི་དུས་ཀྱི་རིམ་པ་ཙམ་མིན་གྱི། དེ་དེའི་རྗེས་སུ་བྱེད་ཅེས་པ་ལྟར་འདྲ་བའི་དོན་དུ་དགྲ་ནག་གི་འགྲེལ་པ་རིན་ཆེན་སྒྲོན་མ་ལས་བཤད་ལ། དེར་འདྲ་
ལུགས་གཞན་ཡོད་ཀྱང༌། འདིར་ནི་རྣལ་འབྱོར་དུ་བཤད་པའི་ཟླ་བ་དཀར་དམར་བདེ་བ་ཆེན་པོའི་རྒྱུར་གནས་པ་བཞིན་དུ། འདིར་ཡང་དཀར་དམར་ཅན་གྱི་ཧཱུཾ་ཡིག་ཀྱང༌། བྱང་ཆུབ་ཀྱི་སེམས་ཞུ་བའི་བདག་ཉིད་དུ་གནས་པས། བདེ་ཆེན་གྱི་རྒྱུད་གནས་པ་
རྗེས་སུ་མཐུན་པའོ། འདིར་སྔགས་གསུམ་བརྗོད་པ་ནི་བཤད་པའི་རིམ་པ་ལ་འགྲེལ་པ་རྣམས་ནས་སྐུ་རྫོགས་པའི་སྐབས་སུ་བརྗོད་པར་བཤད་ཀྱང༌། སྐབས་འདིར་ནི་དཀྱིལ་འཁོར་སྐད་ཅིག་གིས་སྐྱེད་པའི་སྔགས་སུ་བྱ་དགོས་པས། མཚམས་འདིར་
བརྗོད་པར་བྱ་སྟེ། དེའི་དོན་ཡང་འོག་ཏུ་འཆད་པར་འགྱུར་རོ། །གསུམ་པ་ལ་དྲུག །རྟེན་དང་བརྟེན་པ་རྫོགས་ཚུལ་མདོར་བསྟན་དང༌། གསལ་གདབ་པ་རྒྱས་པར་བཤད་པ་དང༌། ཕྱོགས་མཐུན་གྱི་དག་པ་དང་ལུས་དཀྱིལ་སྒོམ་པ་དང༌། གོ་བགོ་ཞིང་ཡེ་ཤེས་པ་
9-5-71b


བཅུག་ནས་དབང་བསྐུར་བ་དང༌། ལྷ་རྣམས་ལ་མཆོད་ཅིང་བསྟོད་པ་དང༌། ལྷའི་འཁོར་ལོ་སྒོམ་ཞིང་དག་པ་དྲན་པའོ། །དང་པོ་ནི། ཟླ་བ་དབྱངས་གསལ་དང་བཅས་པ་དང་ས་བོན་དེ་དག་ཡོངས་སུ་གྱུར་པ་ལས། དཔལ་ཧེ་རུ་ཀ་རྡོ་རྗེ། ཉི་མའི་གདན་ལ་ཡང་དག་
པར་བཞུགས་པའི་གཙོ་བོ་རྟེན་དང་བརྟེན་པའི་དཀྱིལ་འཁོར་གྱི་འཁོར་ལོ་དང་བཅས་པ་དུས་གཅིག་ཏུ་ཡོངས་སུ་གྲུབ་པ་ནི། ཆོས་ཀྱི་དབྱིངས་ཀྱི་ཡེ་ཤེས་ཏེ། དུར་ཁྲོད་ཆེན་པོ་བརྒྱད་ཀྱིས་བརྒྱན་པའོ། །སྐབས་འདིར་སྡོམ་འབྱུང་ལས། ཉི་མའི་
དཀྱིལ་འཁོར་དབུས་བཞུགས་པ། །དཔལ་ཧེ་རུ་ཀ་རྣམ་བསྒོམ་བྱ། །ཞེས་གསུངས་བ་ལྟར་འདིར་ཡང་བཤད་པའི་ཉི་མའི་གདན་ཅན་ནི། ཁྲོ་བོ་ཡིན་པའི་ཕྱིར་ཏེ། ཁྲོ་བོ་རྣམས་ནི་ཉི་མའི་གདན་ཅན་དང་ཉི་མའི་འོད་ཟེར་ཅན་གྱི་ཕྱིར་རོ། །དཀྱིལ་འཁོར་
གཉིས་དུས་གཅིག་ཏུ་རྫོགས་པ་ནི་སངས་རྒྱས་པ་ན་དེའི་ཡོན་ཏན་གྱི་ཆོས་ཐམས་ཅད་དུས་གཅིག་ཏུ་རྫོགས་པ་ལྟར་ཏེ། གཞི་ལ་འཇིག་རྟེན་འཆགས་བའི་ཚེ་དེ་ལྟར་མི་འོང་ཡང་འབྲས་བུ་ལ་འོང་བས། འབྲས་བུ་ལམ་བྱེད་ཀྱི་ཚུལ་གྱིས་སོ། །
དུར་ཁྲོད་བརྒྱད་ནི། འཇིག་རྟེན་གྱི་ཁམས་ཐམས་ཅད་འདུས་པའི་རྣམ་ཤེས་བརྒྱད་བདག་མེད་པར་མཚོན་པར་ལྭ་བ་པས་བཤད་ལ། ཇོ་བོ་ཆེན་པོས་མི་རྟག་པ་དང་སྡུག་བསྔལ་བས་ཡིད་འབྱུང་བ་སྐྱེད་བའི་དོན་དུ་བཞེད་དོ། །རྣམ་ཤེས་བརྒྱད་
ཅེས་འབྱུང་བ་ལ་ཡང་ཚོགས་དྲུག་ལས་ངོ་བོ་ཐ་དད་ཅིང་གཉིས་པ་ཡང་ངོ་བོ་ཐ་དད་དུ་འདོད་པ་དང༌། ཡིད་ཀྱི་རྣམ་ཤེས་ཉིད་ལ་ལྡོག་པའི་དབང་གིས་ཀུན་གཞི་དང་ཉོན་ཡིད་དུ་བཤད་པ་གཉིས་སྣང་བས་ཇི་ལྟར་ཡིན་དཔྱད་དོ། །གཉིས་པ་ལ་
9-5-72a


གཉིས། རྟེན་གསལ་གདབ་པ་དང༌། བརྟེན་པ་ལྷ་གསལ་གང་བ་པའོ། །དང་པོ་ལ་གཉིས། དུར་ཁྲོད་བཤད་པ་དང༌། དེའི་ལྷག་མ་བཤད་པའོ། །དང་པོ་ལ་གཉིས། དུར་ཁྲོད་དངོས་བཤད་པ་དང༌། དེ་ན་གནས་པའི་ཤིང་ལ་སོགས་པ་
བཤད་པའོ། །དང་པོ་ནི། དུར་ཁྲོད་ལ་ནི་ཤྭ་ས་ཏི་ཞེས་འབྱུང་བའི་ཤྭ་ནི་རོ་དང༌། བ་ས་ཏི་ནི་གནས་ཏེ་རོའི་གནས་དང༌། ཡང་ཤྨ་ཤཱན་ཞེས་པ་དུར་ཁྲོད་དེ། ཤ་བ་ནི་བ་ས་ན་ཞེས་པ་ལ། ཤ་བའི་འོག་གི་བ་མར་བྱས་ཏེ་ཤ་ལ་བཏགས་ན་ཤྨ་དང༌། བ་ཕྱི་
མ་ཨར་བསྒྱུར་ཏེ་ས་ལ་བཏགས་པས་སཱ་རིང་བོར་བྱས་པས། ཤ་བ་སོགས་ཤྨ་སཱ་ནར་འགྱུར་བར་མུ་ཏིག་ཕྲེང་བ་ལས་བཤད་དེ། རོ་གནས་པར་བྱེད་པའོ། རོས་གནས་བའི་བྱ་བ་བྱེད་ཚུལ་ནི། རོ་མགོ་མེད་ཀྱིས་འཆག་པ་དང༌། འགགས་ཏེ་དབྱངས་
པས་ལངས་པ་དང༌། འགྱེལ་བས་ནི་ཉལ་བ་དང༌། གསལ་ཤིང་ལ་བསྐྱོན་པས་ནི་བདུག་པའི་བྱ་བ་བྱེད་དོ། །དེས་ན་དུར་གྱི་གནས་ལ་དུར་ཁྲོད་ཅེས་བྱའོ། དུར་ཁྲོད་དེར་ཧེ་རུ་ཀ་རོལ་བར་གསུངས་པའི་དགོངས་པ་ནི། མན་སྙེ་ལས། ཇི་ལྟར་དུར་ཁྲོད་ན་རོ་
རྣམས་བདག་མེད་པ་དེ་ལྟར་ཐམས་ཅད་ལའོ་ཞེས་བས་བདག་མེད་པར་སེམས་ཅན་ཐམས་ཆད་གནས་པ་ནི་དུར་ཁྲོད་དེ། སེམས་ཅན་རྣམས་སེམས་ཅན་གྱི་རང་བཞིན་གྱིས་སྟོང་པ་དང༌། སེམས་ཅན་གྱི་གནས་རྣམས་ཀྱང་སེམས་ཅན་གྱི་གནས་ཀྱི་
རང་བཞིན་གྱིས་སྟོང་བའོ་དུར་ཁྲོད་ཀྱི་དོན་ཏོ། དེས་ན་གནས་དེ་ཁོ་ནར་དམིགས་པ་མེད་པའི་སྙིང་རྗེ་ཆེན་པོ་དང༌། ཤེས་རབ་ཆེན་པོའི་བདག་ཉིད་བྱང་ཆུབ་ཀྱི་སེམས་ཆེན་པོ་ཕྱག་རྒྱ་ཆེན་པོའི་རང་བཞིན་བཅོམ་ལྡན་འདས་རོལ་བར་རིགས་སོ། །ཞེས་
9-5-72b


བཤད་དེ། སྣོད་བཅུད་རང་བཞིན་གྱིས་གྲུབ་པས་སྟོང་བའི་བདག་མེད་ལ་སྙིང་རྗེ་ལྷན་ཅིག་སྐྱེས་པའི་བདེ་ཆེན་རོལ་བ་མཚོན་པའི་དོན་དུ་བཤད་པ་ལེགས་ཤིང༌། རོ་གདན་བཤད་པའི་དེས་དོན་ཡང་དེ་ལྟར་ཡིན་པས། ལམ་འདིར་བདག་མེད་
པའི་དེ་ཁོ་ན་ཉིད་གཏན་ལ་ཕེབས་ནས་སྒོམ་པ་ཅིག་ངེས་བར་དགོས་སོ། དཀྱིལ་འཁོར་གྱི་ཕྱིར་དུར་ཁྲོད་ཅི་ཙམ་ན་གནས་པ་ནི། སྡོམ་འབྱུང་འགྱུར་རྙིང་ལས། རྡོ་རྗེ་ར་བའི་ནང་དུ་ནི། །དུར་ཁྲོད་བརྒྱད་ཀྱིས་བརྒྱད་པའོ། ཞེས་པ་ནི། རྒྱུད་དེར། 
ཐིག་གི་མཚན་མ་དྲུག་ཅུ་བཞི། །ཀུན་ཏུ་འཁོར་ལོའི་མཐར་ཐུག་པར། །ཞེས་ཆ་ཕྲན་དྲུག་ཅུ་རྩ་བཞི་པས་རྡོ་རྗེའི་ར་བ་ལ་ཐུག་པར་བཤད་པའི་ཕྱིར། འགྱུར་ཉེས་པ་ཡིན་པས། འགྲེལ་པ་དང་བསྟུན་ནས་འགྱུར་གསར་ལས། རྡོ་རྗེ་ར་བ་ནང་དུ་སྟེ། །དུར་
ཁྲོད་བརྒྱུད་ཀྱིས་བརྒྱན་པའོ། ཞེས་བསྒྱུར་བ་ལེགས་གསུང་བ་ནི་དེ་ཁོ་ན་ལྟར་ཡིན་ལ། འགྲེལ་བས་མེ་རིའི་ཡང་ཕྱི་རོལ་དུ་བྱས་སོ། རྡོ་རྗེ་མཁའ་འགྲོར། ཚོན་གྱི་ས་ཡི་ཉིས་འགྱུར་དུ། །ཕྱི་རོལ་འོད་ཀྱི་དཀྱིལ་འཁོར་བྱ། །འཁོར་ལོ་དེ་ཡི་ཕྱི་རོལ་དུ། །
ཤིང་ལ་སོགས་པའི་དུར་ཁྲོད་བྱ། ཞེས་གསུངས་ཤིང༌། རྡོ་རྗེ་ཕྲེང་བར་དྲངས་པ་ལས། །འཁོར་ས་དེ་ཡི་ཕྱི་རོལ་དུ། །ཤིང་སོགས་དུར་ཁྲོད་བརྒྱད་པའོ། ཞེས་ཆག་འགྱུར་ལས་འབྱུང་ལ། དབང་འགྱུར་ལས། ཁོར་ཡུག་དེ་ཡི་ཕྱི་རོལ་དུ། །ཁོར་
ཡུག་དེ་ཡི་དབུས་སུ་ནི། །ཤིང་སོགས་དུར་ཁྲོད་བརྒྱད་པའོ། ཞེས་འབྱུག་བས་དུར་ཁྲོད་ནི་མེ་རིའི་ཕྱི་རོལ་དུ་བཤད་དོ། །མན་སྙེ་ལས་ནི། རྡོ་རྗེ་གུར་གྱི་ནང་དུ་དུར་ཁྲོད་ཀྱིས་ཡོངས་སུ་བསྐོར་བའི་ཆོས་འབྱུང་དང༌། ཆུ་སྐྱེས་དང༌། སྣ་ཚོགས་རྡོ་རྗེ་ལ་
9-5-73a


གནས་པའི་ཁང་པ་བརྩེགས་པ། ཞེས་རྡོ་རྗེ་ར་བའི་ནང་དུ་དུར་ཁྲོད་འོང་བ་ཡང་བཤད་དེ། ཤཱནྟི་པས་ཀྱང༌། རྡོ་རྗེ་ར་བའི་ནང་དུ་དུར་ཁྲོད་འོང་བ་བཤད་དོ། །རྡོ་རྗེ་གུར་ཞེས་པ་ནི་བསྲུང་འཁོར་ཐུན་མོང་བའི་སྤྱི་མིང་དུ་ཨ་བྷྱ་ཀ་ར་
བཞེད་དོ། །དུར་ཁྲོད་བརྒྱད་དངོས་ནི་སྡོམ་འབྱུང་ལས། གཏུམ་དྲག་དེ་བཞིན་ཆང་ཚིང་དང༌། །རྡོ་རྗེ་འབར་བ་ཀེང་རུས་ཅན། །དབང་ལྡན་དུ་ནི་མི་བཟད་བཞད། །བྱིན་ཟ་རུ་ནི་བཀྲ་ཤིས་མཆོག །མུན་པ་དྲག་པོ་བདེན་བྲལ་དུ། །རླུང་ཕྱོགས་ཀ་ལི་ཀི་ལའི་སྒྲ། 
ཞེས་གསུངས་པ་བརྒྱད་དོ། །གཉིས་པ་ལ་ཚང་ཚིང་འཁྲིགས་པ་དང༌། ལྔ་པ་ལ་དྲག་ཏུ་རྒོད་པ་དང༌། ཧ་ཧ་རྒོད་པ་དང༌། དྲུག་པ་ལ་བཀྲ་ཤིས་ཚལ་ཞེས་ཀྱང་འབྱུང་ལ། འདི་རྣམས་ལ་མིང་མི་འདྲ་བ་མང་ངོ་། །དེ་རོ་དང་ཀེང་རུས་སོགས་ཀྱི་གནས་སུ་ཡོད་ཚུལ་
ནི། སྡོམ་འབྱུང་ལས། ཀེང་རུས་དད་ནི་མདུང་གིས་ཕུག །འཕྱང་དང་ཕྱེད་ཚིག་པ་དང་མགོ། ཐོད་པ་བྱིན་པ་མགོ་དུམ་དང༌། །གཙིགས་པའི་མགོ་དང་རུས་པ་དང༌། ཞེས་མགོ་བོའི་ཐོད་རུས་དང༌། བྱིན་པའི་རུས་པ་དང༌། དེ་ལས་གཞན་པའི་རུས་པ་འཐོར་བ་དང༌། 
མ་འཐོར་བའི་ཀེང་རུས་དང༌། མདུང་གིས་ཕུག་པའི་རོ་ལ་སོགས་པ་གཅལ་དུ་བཀྲམ་པའོ། །དེ་འདྲ་བའི་གནས་བརྒྱད་ནི་དུར་ཁྲོད་དངོས་ཡིན་ལ། ལྷག་མ་ཤིང་དང་ཕྱོགས་སྐྱོད་སོགས་ནི་དེ་ན་གནས་པ་ཡིན་གྱི་དུར་ཁྲོད་དངོས་མིན་ནོ། །གཉིས་པ་ནི། དེ་
འདྲ་བའི་དུར་ཁྲོད་བརྒྱད་པོ་རེ་རེ་ན། ཤིང་དང་ཕྱོགས་སྐྱོང་དང༌། ཀླུ་དང༌། སྤྲིན་གྱི་བདག་པོ་བརྒྱད་བརྒྱད་ཀྱི་རེ་རེ་སྟེ་བཞི་བཞི་གནས་པར། སྡོམ་འབྱུང་ལས་གསུངས་སོ། ལྭ་བ་པ་དང་པྲཛྙཱ་རཀྵི་ཏའི་འགྲེལ་པ་ནས་འདི་རྣམས་ཀྱི་བཤད་པ་མ་བྱུང་ལ། དེ་
9-5-73b


བཞིན་གཤེགས་པའི་རྡོ་རྗེའི་འགྲེལ་པར་སྔར་བཤད་པའི་སྟེང་དུ། རང་རང་ཕྱོགས་བདག་བཞོན་པའི་གདོང༌། ཞེས་སོགས་ཀྱིས་ཞིང་སྐྱོད་བརྒྱད་དང༌། མཆོད་རྟེན་དཀར་པོ་རི་ལ་གནས། །གྲུབ་ཆེན་བརྒྱད་ཀྱིས་བརྒྱན་པའོ། །ཞེས་མཆོད་རྟེན་དང༌། 
རི་དང༌། གྲུབ་ཆེན་བརྒྱད་བཤད་དེ། སྡོམ་འབྱུང་ལས་ཀྱང་གྲངས་མ་སྨོས་པར་གྲུབ་ཆེན་རྣམས་གནས་པར་གསུངས་སོ། སཾ་བྷུ་ཊར། ཤིང་བརྒྱད་དང༌། དེ་ལ་གནས་པའི་ཕྱོགས་སྐྱོང་བརྒྱད་བཤད་པའི་མན་སྙེར། ཞིང་སྐྱོང་དང་ཀླུ་དང་སྤྲིན་
བརྒྱད་དང་མཆོད་རྟེན་བརྒྱད་ཁ་བཀང་ནས་བཤད་ལ། བྲམ་ཟེ་རིན་ཆེན་རྡོ་རྗེས། ཡེ་ཤེས་ཀྱི་མེ་བརྒྱད་དང༌། ཐུགས་རྗེའི་ཆུ་བརྒྱད་བཤད་ཅིང༌། བསྟོད་པ་གཙུག་ནོར་ལས་ཀྱང༌། དེ་གཉིས་དང་མཆོད་རྟེན་དང༌། གྲུབ་ཆེན་བརྒྱད་དང༌། ཕྲ་མེན་མ་བརྒྱད་
བཤད་དོ། །ཤིང་བརྒྱད་ནི་སྡོམ་འབྱུང་ལས། ཤར་དུ་ཤིར་ཥ་ཨ་ཤྭ་ཤིང༌། །ཀང་ཀེ་ལ་ཁྱད་པར་ཙུ་ཏའི་ཤིང༌། །པ་ཊཱ་དེ་བཞིན་ཀ་ར་ཉྫ། །ལ་ཊ་པརྐ་པར་ཐི་བ། ཞེས་སོ། ཀང་ཀེལ་ཆུ་ཤིང་དང༌། ཙུ་ཏ་ཨ་མྲ་ར་ཁ་ཅིག་ཏུ་བསྒྱུར་ལ། བ་ཊཱ་ལ་ནི་ནྱཱ་གྲོ་
དང༌། པར་ཐི་བ་ལ་ནི་ཨརྫུ་ན་ཞེས་ཀྱང་འབྱུང་སྟེ། འདི་རྣམས་ལ་གཞུང་སོ་སོ་ནས་མིང་སྣ་ཚོགས་ཤིག་སྣང་ངོ༌། །ཤིང་གི་རྩ་བའི་ཕྱོགས་སྐྱོང་བརྒྱད་ནི། དབང་པོ་སེར་པོར་བ་བརྟན་དཀར་པོ་དང༌། ནོར་སྦྱིན་སེར་པོ་མི་དང༌། ཅུ་ལྷ་དཀར་པོ་གདེངས་
ཀ་བདུན་ལྡན་ཆུ་སྲིན་དང༌། གཤིན་རྗེ་སྔོན་པོ་མ་ཧེ་དང༌། དབང་ཕྱུག་ཆེན་པོ་དཀར་པོ་གླང་དང༌། མེ་ལྷ་དམར་པོ་ར་སྐྱེས་དང༌། སྲིན་པོ་སྔོན་པོ་གཅར་བུ་མི་མགོའི་ཕྲེང་བའི་ཅོད་པན་ཅན་རོ་ལངས་དང༌། རླུང་ལྷ་དུང་ཁ་ཤ་བ་ལ་ཞོན་པ། ཞལ་གཅིག་པ། 
9-5-74a


ཕྱག་བཞིའི་དང་པོ་གཉིས་ཀྱིས་ཐལ་མོ་སྦྱར་བ། ལྷག་མ་གཡས་རྣམས་ན་རྡོ་རྗེ་དང༌། ནེའུ་རིན་པོ་ཆེ་སྐྱུག་པ་དང༌། དབྱུག་པ་དང༌། རྩེ་གསུམ་དང༌། ཕྲེང་བ་སྤྱི་བླུགས་དང་བཅས་པ་དང༌། རལ་གྲི་དང༌། 
བ་དན་སེར་པོ་དང༌། གཡོན་རྣམས་ན་ཐོད་པ་འཛིན་པས་ཡུམ་ལ་འཁྱུད་པར་འགྲེལ་པ་སྡོམ་འབྱུང་ལས་བཤད་དོ། ཐམས་ཅད་ཀྱང་རིན་པོ་ཆེའི་རྒྱན་ཅན་དང༌། གཡོན་གྱིས་ཡུམ་ཞལ་ཟས་སྟོབ་པ་ལ་འཁྱུད་ཅེས་ཁ་ཅིག་གིས་སོ། ཤིང་གི་
ཡལ་གའི་གསེབ་ནས་ལུས་ཕྱེད་འཐོན་པའི་ཞིང་སྐྱོང་བརྒྱད་ནི། རང་ཕྱོགས་ཀྱི་ཕྱོགས་སྐྱོང་གི་བཞོན་པའི་གདོང་ཅན་དུ་མན་སྙེ་དང༌། འགྲེལ་པ་སྡོམ་འབྱུང་ལས་བཤད་པ་ལྟ་བུ་རིམ་པ་བཞིན། དཀར་སེར་དཀར་ནག །དཀར་དམར་ནག་ལྗང་བ་ཐམས་ཅད་
ཀྱང་དྲག་ཅིང་གཏུམ་པ་རྫུ་འཕྲུལ་ཆེན་པོ་པའོ། །ཕྱག་གཉིས་ནི་མན་སྙེ་ལས། ལུས་སྟོད་ཕྱེད་མཐོང་ཕྱག་རྣམས་ཀྱིས། །ཐོད་པ་འཛིན་པར་བྱེད་པ་སྟེ། །གཞན་གྱིས་བྱིན་པའི་གཏོར་མ་ལ། །གཡས་པས་འཛིན་པའི་ཚུལ་གྱིས་བྲེལ། ཞེས་བཤད་ཅིང༌། 
ཁ་ཅིག་གྲི་ཐོད་ཅན་དུ་བཞེད་དོ། །རྒྱ་གཞུང་གི་སྒྲུབ་ཐབས་ཀ་ཅིག་ཏུ། འདིར་བཤད་པ་ལས་གཞན་པའི་གདོང་ཅན་དུའང་བཤད་དོ། །ཆུ་བརྒྱད་ལ་གནས་པའི་ནོར་རྒྱས། འཇོག་པོ། ཀརྐོ་ཊ། པདྨ་དང༌། པདྨ་ཆེན་པོ། མཐའ་ཡས། རིགས་ལྡན། དུང་སྐྱོང་
སྟེ་ཀླུ་བརྒྱད་ནི་རིམ་བཞིན་དུ། དཀར། དམར། སྔོན་པོ། དཀར་པོ། དཀར་པོ། རྨ་བྱའི་མགྲིན་པ་བཞིན་དུ་སྣ་ཚོགས་པ། དཀར་པོ། སེར་པོའི་མདོག་ཅན། རིམ་པ་བཞིན་གདེངས་ཀ་ལ་ཨུཏྤ་ལ་སྔོན་པོ་དང༌། དཔལ་བེའུས་མཚན་པ་དང༌། མགྲིན་པར་རི་མོ་
9-5-74b


གསུམ་པ་དང༌། དབུ་ལ་ཐིག་ལེ་མང་པོ་དང༌། གདེངས་ཀ་ལ་རྩེ་གསུམ་གྱིས་མཚན་པ་དང༌། མགོ་ལ་པདྨ་དང༌། གདེངས་ཀ་ལ་ཟླ་ཕྱེད་ཀྱིས་མཚན་པ་དང༌། ཐིག་ལེས་མཚན་པའི། ཐམས་ཅད་ཀྱང་སྟོད་མི་འདྲ་བ། ཕྱག་གཉིས་ཀྱིས་ཐལ་མོ་སྦྱར་ནས་གཙོ་བོ་
ལ་འདུད་པར་འགྲེལ་པ་སྡོམ་འབྱུང་ལས་བཤད་དེ། སྨད་ཐམས་ཅད་སྦྲུལ་འཇུག་ཏུ་འཁྱིལ་བའོ། དེ་དག་གི་སྟེང་གི་ནམ་མཁའ་ལ་ནི་སྤྲིན་བརྒྱད་དེ། སྒྲོགས་པ། ཆེར་སྒྲོགས་པ། དྲག་པོ། གཡོ་བ་དང༌། བརྟན་པ། གང་བ། འབེབས་པ། གཏུམ་པོ་སྟེ། གློག་
ཕྲེང་འཁྱུག་ཅིང་འབྲུག་སྒྲ་སྒྲོགས་པ། འགའ་ཞིག་ཆར་གྱི་རྒྱུན་ཅན་དང་ཁ་དོག་སྣ་ཚོགས་པར་མན་སྙེར་བཤད་དོ། ཁ་ཅིག་གིས་སྟོད་སྦྲུལ་མགོ་གཅིག་པའི་རྣམ་པ། སྨད་སྤྲིན་དུ་འཁྲིགས་པ། ཁ་དོག་ཀླུ་དང་འདྲ་བར་འཆད་དོ། རི་བརྒྱད་ནི་རིན་པོ་ཆེའི་རང་
བཞིན་གྱི་ལྷུན་པོ། མནྡ་ར་ལྗང་གུ། ཀེ་ལ་ཤ་དཀར་པོ༌། མ་ལ་ཡ་སེར་པོ་དང༌། དབང་ཆེན་ནག་པོ་སྤོས་དད་སྡང་སེར་པོ། གངས་ཅན་དཀར་པོ་དཔལ་གྱི་རི་སྔོན་པོ། ཞེས་ཁ་ཅིག་འཆད་ལ། རི་ལ་གནས་པའི་མཆོད་རྟེན་བརྒྱད་ཀ་དཀར་པོར་འགྲེལ་པ་སྡོམ་
འབྱུང་ལས་བཤད་ཅིང༌། ཁ་ཅིག་རྡོ་རྗེ་དཀར་པོ་དཀར་པོ། རྡོ་རྗེ་འདུས་བྱས་སེར་པོ། རྡོ་རྗེ་ཆགས་པ་དཀར་པོ། རྡོ་རྗེ་ནག་པོ་ནག་པོ། ཐུགས་རྡོ་རྗེ་དཀར་པོ། སྐུ་རྡོ་རྗེ་དམར་པོ། རིན་ཆེན་རྡོ་རྗེ་ནག་པོ། ཆོས་རྡོ་རྗེ་ལྗང་གུའོ་ཞེས་ཟེར་རོ། །སྔར་བཤད་པ་རྣམས་ཀྱི་སྡ་མ་
བཞི་བཞི་ནི་ཕྱོགས་སུ་སྟེ། ཤར་ནས་གཡོན་སྐོར་དང༌། ལྷག་མ་བཞི་བཞི་ནི་མཚམས་སུ་སྟེ། དབང་ལྡན་ནས་གཡས་སྐོར་དུ་བྱའོ། །རི་བརྒྱད་ལ་གནས་པའི་གྲུབ་ཆེན་བརྒྱད་ནི། རྟོག་བདུན་ལས། སྒྲུབ་པ་པོ་རྣམས་ཀྱང་བྲི། བཅོམ་ལྡན་འདས་ལ་རྩེ་གཅིག་
9-5-75a


ཏུ་ལྟ་བ། གཅེར་བུ་སྐྲ་བཤིག་པ། ཕྱག་རྒྱ་ལྔས་བརྒྱན་པ། ཅང་ཏེའུ་དང༌། ཐོད་པ་དང་ཁ་ཊྭཱཾ་ག་འཛིན་པ། ཐོད་པ་སྤྱི་བོར་བརྒྱན་པ། རྒོད་ཅིང་དུར་ཁྲོད་དེར་འཇུག་པ་བྲིའོ། །ཞེས་གསུངས་པ་ལྟར་བྱས་ན་ལེགས་སམ་སྙམ་སྟེ་དཔྱད་
དོ། །གཞན་ཡང་མེ་བརྒྱད་དང༌། སྡོམ་འབྱུང་ལས། ཁྭ་དང་འུག་པ་བྱ་རྒོད་དང༌། །ཅེ་སྤྱང་ཅེ་སྤྱང་མོ་དང་ནི། །འོལ་བ་དང་ནི་འོལ་བ་མོ། །སེང་གེ་གདོང་དང་སྟག་གི་གདོང༌། །དྲག་ཅིང་འཇིགས་པའི་གདོང་ཅན་མ། །སྦྲུལ་ནི་བ་ལང་མགོ་ཅན་དང༌། །གདོང་
གཉིས་ལ་སོགས་ཕྱོགས་སུ་རྒྱུ། །ཞེས་དང༌། རིག་འཛིན་གྲུབ་པ་དུ་མ་དང༌། དམ་ཚིག་སྤྱོད་པའི་རྣལ་འབྱོར་པ། །རྣལ་འབྱོར་མ་ཡི་ཚོགས་རྣམས་དང༌། །གནོད་སྦྱིན་རོ་ལངས་སྲིན་པོའི་ཚོགས་རྣམས་ཀྱིས། །ཀི་ལི་ཀི་ལ་ཆེན་པོ་སྒྲོགས་རྣམས་
དང༌། །ཞེས་དེ་རྣམས་དུར་ཁྲོད་ཀྱི་དབུས་སུ་བསྒོམ་པར་གསུངས་པ་ལྟར་བྱའོ། །གཉིས་པ་ལ་གཉིས། འོད་ཕྲེང་ནས་རྟ་བབས་ཀྱི་བར་བཤད་པ་དང༌། གཞལ་ཡས་ཁང་དངོས་གདན་དང་བཅས་པ་བཤད་པའོ། །དང་པོ་ལ་གཉིས། འོད་ཕྲེང་
ནས་སྣ་ཚོགས་རྡོ་རྗེའི་བར་བཤད་པ་དང༌། རྟ་བབས་ཀྱི་དོན་བཤད་པའོ། །དང་པོ་ནི། འོད་ཟེར་གྱི་ཕྲེང་བ་ནི་མེ་ཁ་དོག་སྣ་ལྔ་པ་ཕྱི་རོལ་གྱི་ཕྱོགས་མཚམས་ཀུན་ཏུ་འབར་བ། གདུག་པ་ཅན་རྣམས་ཀྱིས་ལྟ་བར་མི་བཟོད་པ་དང༌། དེའི་ནང་གི་རྡོ་རྗེའི་
ར་བ་ནི་བཤད་ཟིན་ལ། འཁོར་ལོ་དང་པདྨའི་ར་བ་གཉིས་ནི་དང་པོ་ཡོད་ཀྱང༌། དེ་རྣམས་འོད་གསལ་དུ་བསྡུས་ཏེ་གཞལ་ཡས་ཁང་གྲུབ་པའི་དུས་སུ། སླར་ཡང་རྡོ་རྗེའི་ར་བ་གྲུབ་པར་བཤད་ཀྱི་གཞན་གཉིས་མ་བྱུང་བས་མེད་ཀྱང་ཆོག་གོ། ནག་
9-5-75b


པོ་སྤྱོད་པས། འོད་ཀྱི་དཀྱིལ་འཁོར་ནང་དུ་ནི། །རིམ་གཉིས་ཐིག་ནི་གདབ་པར་བྱ། །ཞེས་བྲི་བའི་དཀྱིལ་འཁོར་ལ་རབ་གཞན་གཉིས་བཤད་ལ། རྒྱལ་བ་བཟང་པོས་ལཱུ་ཨི་པ་ལྟར་སྐྱེད་པ་ལ་ཡང༌། བསྲུང་བའི་དོན་དུ་ཕྱི་རོལ་དུ། །ར་བ་གསུམ་གྱིས་བསྐོར་
བ་སྟེ། །རྡོ་རྗེ་པདྨ་འཁོར་ལོ་ནི། །ར་བ་ཞེས་ནི་གྲགས་པའོ། །ཞེས་ཀྱང་འབྱུང་བ་ལྟར་ར་བ་གཞན་གཉིས་བྱེད་ནའང་འགལ་བ་མེད་དོ། །དེའི་པད་ར་ནི་འོག་གནས་སྟེང་གི་བར་དུ་གནས་པ་ཡིན་ལ། སྣ་ཚོགས་རྡོ་རྗེའི་རྭའི་རྩེ་མོར་ཐིག་ལ་འཆར་བའི་པད་ར་ཞེས་
པ་ནི། སྣ་ཚོགས་རྡོ་རྗེའི་རྟེན་གྱི་པད་མ་འཕྲེད་ལ་གནས་པ་ཙམ་ཡིན་པས་མི་གཅིག་གོ། པདྨ་དེའི་ལྟེ་བའི་ཁ་དོག་ནི་ལྗང་གུ་དང༌། དེའི་མཐའ་དང་འདབ་མའི་བར་གྱི་གེ་སར་ནི་སེར་པོ་དང༌། འདབ་མ་རྣམས་ནི་ཁ་དོག་སྣ་ཚོགས་པར་ཕྲེང་བར་བཤད་ལ། པདྨ་དེ་
གནས་པའི་གཞི་ནི། འདིར་ནི་རི་རབ་ཀྱི་སྟེང་གི་གཞི་ཡིན་ལ། ཆོས་འབྱུང་ཡོད་པ་ལ་ནི་དེ་དེའི་གཞི་དང༌། ཁ་དོག་ཀྱང་དམར་སྐྱར་དེ་ཉིད་ལས་བཤད་དོ། །པདྨ་དེའི་ལྟེ་བའི་མཐའ་ནས་མཐའི་བར་དུ། ཕྱོགས་གཅིག་གི་སྣ་ཚོགས་རྡོ་རྗེའི་རྭ་རྩེ་ནས། ཕྱོགས་གཞན་
གྱི་རྭ་རྩེས་ནོན་པའི་ཁ་ད་ཆད་དོ། སྣ་ཚོགས་རྡོ་རྗེའི་རྭའི་གྲངས་ནི་ཕྱོགས་རེར་གསུམ་གསུམ་སྟེ་བཅུ་གཉིས་པ་དང༌། ཕྱོགས་རེར་ལྔ་ལྔ་སྟེ་ཉི་ཤུ་པའི་ཚུལ་གཉིས་སོ། ཁ་དོག་ནི་རྡོར་ཕྲེང་དུ། དེའི་ལྟེ་བ་ནི་ནག་པོའམ། ཡང་ན་དཀྱིལ་འཁོར་དེའི་གཙོ་བོའི་ཁ་
དོག་ཏུ་བྱ་བར་བཤད་པའི་ཕྱི་མ་ནི། རང་གི་རིགས་བདག་གི་ཁ་དོག་དང་གཙོ་བོའི་མདོག་གཉིས་མཐུན་ན། དེས་ཆོག་ལ། གསང་འདུས་འཇམ་རྡོར་ལྟ་བུ་མི་བསྐྱོད་པ་རིགས་བདག་ཡིན་ཀྱང༌། གུར་ཀུམ་མདོག་ཏུ་བཤད་པ་ལྟ་བུ་ལ་ནི་རིགས་བདག་གི་ཁ་དོག་
9-5-76a


དབང་བཙན་པར་བྱའོ། ཕྱོགས་ཀྱི་རྭ་ལ་དབུས་རྭ་ནི་རང་རང་གི་དེ་བཞིན་གཤེགས་པའི་ཁ་དོག་ཏུ་བྱ་བར་བཤད་དེ། འདི་ལ་ཡང་ཕྱོགས་སུ་རྣམ་སྣང་སོགས་ཁ་དོག་གསལ་བར་ཡོད་ན་དེ་བཞིན་དུ་བྱ། དེ་མེད་ན་ལཱུ་ཨི་བའི་བདེ་མཆོག་
ལྟ་བུ་མི་བསྐྱོད་པའི་རིགས་བདག་ཅན་ཡིན་ན། ཕྱོགས་མདོག་དེ་བཞིན་གཤེགས་པ་གཞན་གྱི་ཁ་དོག་ཏུ་བྱེད་པའི་ཚུལ་ལྟར་བྱའོ། །གཡས་གཡོན་གྱི་རྭ་གཉིས་ན་དེའི་ཀློའི་དེ་བཞིན་གཤེགས་པའི་མདོག་ཏུ་བྱ་བར་རྡོར་ཕྲེང་ལས་གསུངས་ཏེ། དཀྱིལ་
འཁོར་འདི་ལྟ་བུ་ལ་ཤར་གྱི་རྭའི་ཁ་ནང་ལྟའི་གཡས་ལྗང་གུ་དང༌། གཡོན་སེར་པོ་ཡིན་ཏེ། དེས་གཞན་གསུམ་ཡང་ཤེས་པར་བྱའོ། རྭ་ལྔ་པ་ལ་ནི་དབུས་རྭ་དང་གཡས་གཡོན་གྱི་རྭ་གཉིས་སྔར་དང་འདྲ་ལ། མདུན་རྒྱབ་ཀྱི་རྭ་གཉིས་ནི་ནུབ་ཀྱི་སའི་ཁ་
དོག་དམར་པོ་དང༌། དབུས་ཀྱི་མདོག་ཏུ་བྱ་བ་དང༌། ཕྱོགས་གཅིག་གི་རྭ་གསུམ་མམ་ལྔ་པོ་ཐམས་ཅད་རང་ཕྱོགས་ཀྱི་དེ་བཞིན་གཤེགས་པའི་མདོག་ཏུ་བྱ་བར་ཁ་ཅིག་ཏུ་བཤད་ཅེས་ཕྲེང་བར་བཤད་དེ། གཙུག་ནོར་ལས་རྭ་བཅུ་གཉིས་པ་ལ་དེ་བཞིན་དུ་
བཤད་དོ། རྭའི་ཕྱོགས་མདོག་གཙོ་བོའི་ཞལ་མདོག་གིས་བྱེད་པའི་ཕྱོགས་ཀྱང་ཡོད་པར་བཤད་དོ། །རྭའི་སྲིད་ཀྱི་ཚད་ལ་ཐིག་སྐུད་ཀྱི་རིང་ཚད་དཀྱིལ་འཁོར་གྱི་ཉིས་འགྱུར་དུ་གསུངས་པ་ལ་གཉིས་ལས། རྩ་ཐིག་ནས་རྩ་ཐིག་གི་བར་ལ་དཀྱིལ་འཁོར་
དུ་བྱས་པའི་ཉིས་འགྱུར་དུ་བྱེད་པ་ལྟར་ན། ཐིག་སྐུད་ཆ་ཆུང་རེ་བཞི་པའི་ཕོགས་རྟ་བབས་དཔངས་སུ་སྒོ་ཚད་གཅིག་མའི་ལུགས་ཡིན་ལ། དེ་ལ་ནི་ཆ་ཆེན་གཉིས་ཡོད་དོ། །མདའ་ཡབ་ནས་མདའ་ཡབ་ཀྱི་བར་དཀྱིལ་འཁོར་དང་བཅས་པ་ལ་དཀྱིལ་འཁོར་
9-5-76b


དུ་བྱས་ནས། དེའི་ཉིས་འགྱུར་ལ་བྱེད་ན་ནི། ཐིག་སྐུད་ཆ་ཆུང་གོ་དྲུག་པའི་ཕྱོགས་རྟ་བབས་དཔངས་སུ་སྒོ་ཚད་གསུམ་མའི་ལུགས་ཡིན་པས། དེ་ལ་ནི་ཆ་ཆེན་བཞི་ཡོད་དོ། །རྭ་ཆ་ཆུང་བཅུ་བཞི་པར་འདོད་པ་ནི་ལུགས་དེ་གཉིས་ཀ་དང་མི་མཐུན་
པའོ་ཞེས་ཕྲེང་བར་བཀག་གོ། བདེ་མཆོག་ལ་རྒྱུད་གཞན་དུ་མི་གསལ་ལ། སྡོམ་འབྱུང་ལས་སྔར་དྲངས་པ་ལྟར་ཟླུམ་པོ་ནང་མའི་མཐའ་ནས་མཐའ་ལ་རེ་བཞིར་བཤད་པའི་ཆ་རེ་ནི། དེའི་འགྲེལ་པར་འབྱུང་བ་ལྟར་ཆ་ཆུང་ཡིན་པས། དབུས་ནས་རྭ་རྩེའི་བར་
ལ་ཆ་ཆེན་བརྒྱད་ལས་མེད་པའི་ཕྱིར། རྟ་བབས་དཔངས་སུ་སྒོ་ཚད་གཅིག་མའི་ལུགས་ཏེ། ཐིག་སྐུད་ཐུང་བའི་ཕྱོགས་སོ། །མཁའ་འགྲོ་རྒྱ་མཚོར། མུན་པའི་སྣམ་བུ་དེ་བཞིན་ནོ། །ཞེས་མུན་སྣམ་ཆ་ཆུང་གཅིག་གཅིག་བཤད་པས་དེར། སྒོ་ལས་སུམ་འགྱུར་
རྟ་བབས་ཏེ། ཞེས་བཤད་པ་ནི་དཔངས་ལ་བྱ་སྟེ། སུམ་འགྱུར་འཕྲེད་ལ་བརྩིས་ན་མུན་སྣམ་མེད་པའི་ཕྱིར་རོ། ཞེས་མཁས་པ་དག་གསུངས་པ་ནི། རང་གིས་གཞན་དུ། མཁའ་འགྲོ་རྒྱ་མཚོ་ལས། མུན་པའི་སྣམ་བུ་དེ་བཞིན་ནོ། །ཀ་བའི་རྩེ་ནས་
འཐོན་རྩེ་མོ། །སྣ་ཚོགས་རྡོ་རྗེ་འོད་ཆེན་པོ། ཞེས་གསུངས་པའི་རྐང་པ་ཕྱི་མ་གཉིས་ལ་བརྟེན་ནས། རྟ་བབས་དཔངས་སུ་སྒོ་ཚད་གཅིག་མར་བསྒྲུབས་པ་དང་འགལ་ལོ། འོན་རྡོ་རྗེ་ཕྲེང་བར། རྟ་བབས་དཔངས་སུ་སྒོ་ཚད་གཅིག་མ་ལ། བྲི་བྱ་ལ་མུན་
སྣམ་མེད་པར་བཤད་པ་སྔ་མ་དང་འགལ་ལོ་ཞེ་ན། མི་འགལ་ཏེ། རྟ་བབས་དཔངས་སུ་སྒོ་ཚད་གཅིག་མ་ལ། མུན་སྣམ་བྱེད་པ་ནི་ལྭ་བ་པས་མཛད་པ་ལྟར། སྣམ་བུ་འོག་མའི་མཐའ་ནས་མཐའ་ལ་སྒོ་ཚད་བཞི་ཡོད་པའི་ལུགས་ཡིན་ལ། དེའི་ཚེ་
9-5-77a


སྒོ་ལས་སུམ་འགྱུར་རྟ་བབས་ཏེ། ཞེས་གསུགས་པ་ནི་ཀ་བའི་ནང་མཐའ་ནས། ནང་མཐའི་བར་ལ། རྟ་བབས་ཀྱི་རྒྱ་ཚད་དུ་བྱས་པ་ལ་དགོངས་པའི་ཕྱིར་དང༌། ཡང་ལང་ཀས། ཆུ་སྲིན་ཁ་ནས་ཆུ་སྲིན་པར། །རྟ་བབས་སྒོ་ལས་
སུམ་འགྱུར་ཏེ། ཞེས་པ་དང༌། ཕྲེང་བ་ནས་བཤད་པ་ནི། ཀ་བའི་ཕྱི་མཐའ་ནས་ཕྱི་མཐའི་བར་ལ། །སྒོའི་སུམ་འགྱུར་བྱེད་པའི་ལུགས་ཡིན་པའི་ཕྱིར་དང༌། དེ་ཡང་ཁུངས་ཐུབ་ཀྱི་གཞུང་ཁ་ཡར་ལས་བྱུང་བས། རྒྱུད་ཀྱི་ཁུངས་ཡོད་པར་གསལ་
ལོ། །ལུགས་དེ་ལ་རཏྣ་རཀྵི་ཏས། སྒོ་ལོགས་ཀྱི་གཡས་གཡོན་དུ་མུན་སྣམ་མེད་ཀྱང༌། སྒོ་སྟེང་དུ་རྩིག་པ་ཆད་པའི་མུན་སྣམ་ཆ་བྲན་གཅིག་འཆད་མོད་ཀྱང་། མི་ལེགས་ཏེ། སློབ་དཔོན་དེ་ནི་ཕྲེང་བའི་རྗེས་འབྲང་དུ་འདུག་ལ། ཕྲེང་བ་ལས། དེ་ལ་བར་སྐབས་ཀྱི་སྣམ་བུ་མེད་པ་ཉིད་དོ། 
ཞེས་སྒོ་ཚད་གཅིག་མ་ལ། སྒོ་དང་རྟ་བབས་ཀྱི་བར་གྱི་སྣམ་བུ་བྲི་བྱ་ལ་མེད་པར་བཤད་པའི་ཕྱིར་དང༌། སྒོ་སྟེང་དུ་བྲི་བྱ་ལ་མུན་སྣམ་བྱས་པ་ནི་དེ་གཉིས་ཀྱི་བར་གྱི་སྣམ་བུ་ཡིན་པའི་ཕྱིར་རོ། །དེས་ན་ལུགས་འདི་ལ་སྒོ་ལོགས་ནང་མའི་ཐིག་གཉིས་ལ། 
ཆ་ཆུང་གསུམ་གསུམ་བྱས་ནས་སྒོ་སྟེང་དུ་རྩིག་རྒྱུན་མཆད་པ་བྱེ་པ་དགོངས་པར་མཐོང་ངོ་། སྣ་ཚོགས་རྡོ་རྗེའི་ལྟེ་བའི་དབྱིབས་ནི་གྲུ་བཞི་པ་ཡིན་ལ། ཤར་ནུབ་དང་ལྷོ་བྱང་དང་ཕྱོགས་རེའི་ཚད་ནི། ཕྲེང་བར། སྣ་ཚོགས་རྡོ་རྗེའི་ལྟེ་བ་ནི་སྒོའི་
ཚད་བཅུ་གཉིས་སོ། །ཞེས་བཤད་པ་ལྟར་ཡིན་ལ། དེ་ལས་ཕྱོགས་ཀྱི་རྭ་འཐོན་མཚམས་ནི། དེའི་སྲིད་སྒོ་ཚད་བཞི་མ་ལྟར་ན་གཡས་གཡོན་དུ་སྒོ་ཚད་བཞི་བཞི་དོར་བའི་མཚམས་ནས་ཡིན་ཏེ། ཕྲེང་བ་ལས། རྟ་བབས་ཀྱི་གློ་རྣམས་སུ་དར་
9-5-77b


དཔྱངས་ཀྱི་སྣམ་བུའི་སྟེང་དུ་ཆུ་སྲིན་གྱི་ཁ་ལས་བྱུང་བའི་སྣ་ཚོགས་རྡོ་རྗེའི་རྭ་རྣམས་ནི། ཅུང་ཟད་ཕྱོགས་སུ་སོང་ནས་ཕྱིར་བྱུང་བ་དབུས་ཀྱི་རྒྱར་ཆ་ཆུང་གསུམ་དང་ལྡན་པ། སྲིད་དུ་ཆ་ཆུང་བཅུ་དྲུག་པའོ། །ཞེས་དར་དཔྱངས་ཀྱི་སྣམ་བུའི་སྟེང་ནས་རྭའི་རྩ་
བའི་ཆུ་སྲིན་གྱི་ཁ་ནས་རྭ་འཐོན་པར་བཤད་ལ། རྭ་ཆ་ཆུང་བཅུ་དྲུག་པ་ལ་དར་དཔྱངས་ནས་དར་དབྱངས་ཀྱི་བར་ལ་སྒོ་ཚད་བཞི་ཡོད་ཅིང༌། ལྟེ་བའི་རྒྱ་ཚད་སྔར་ལྟར་ཡིན་པའི་ཕྱིར་རོ། དབུས་རྭ་ལ་ཆ་ཆུང་བཅུ་དྲུག་ཡོད་པ་བཞིན་དུ། ཕྱོགས་རྭ་ལའང་དེ་
ལྟར་ཡིན་ཀྱང༌། ཆ་ཆུང་གཉིས་གུག་པའི་ཆ་ལ་སོང་བས། དེ་ཙམ་གྱིས་དབུས་རྭ་ཕྱིར་ལྷག་པའོ། །དེའི་ཕྱིར་གཡས་གཡོན་གྱི་རྭ་ཇི་ལྟར་སོང་བ་བཞིན་དུ། ཐག་པ་བཞག་ནས་དེ་ནས་དྲང་པོར་ཐེན་ན་དབུས་རྭ་དང་ཚད་མཉམ་དགོས་ལ། དེ་ཡང་རྭའི་ཕྱི་ཐིག་
དར་དབྱངས་ཀྱི་ཕྱི་ཐིག་ལས་མ་འདས་པའི་ནང་ཐིག་ལ་ཚད་ན་འོང་གི། དེ་ལས་རིང་བ་ནས་རྭ་སྐོར་བ་རྣམས་ཀྱི་ལུགས་ལྟར་ན་མི་འགྲིག་པ་ཤེས་དགོས་ཏེ། འདིའི་རིགས་པ་རྭ་སྒོ་ཚད་གཉིས་མའི་ལུགས་གཉིས་ལ་ཡང་འཁྱེར་དགོས་སོ། །སྔ་མ་ལ་ཕྱོགས་
ཀྱི་རྭ་གསུམ་མ་བྱེད་ན། མདུན་རྒྱབ་ཏུ་མི་དགོས་ཀྱང༌། རྩེ་ལྔ་པ་བྱེད་ན་ནི་མདུན་རྒྱབ་ཏུའང་རྭ་དགོས་ལ། དེ་ནི་དབུས་རྭའི་ནང་གི་དབུས་ནས་གཞལ་བའི་རྩིས་བཏང་ན། གཡས་གཡོན་གཉིས་བཞིན་དུ། སྒོ་ཚད་གཉིས་གཉིས་སོང་བའི་མཚམས་ནས་
རྭའི་ཕྱི་ངོས་ཡོད་དགོས་ཏེ། རིགས་པ་འདི་དག་རྭ་སྒོ་ཚད་གཉིས་མ་ལའང་ཤེས་པར་བྱའོ། །རྡོར་དྲིལ་གྱི་ཆག་ཆད་ཀྱི་རྡོ་རྗེའི་སྐབས་སུ་ཕྱོགས་ཀྱི་རྭའི་སྲིད་དང༌། དེའི་ཕྱོགས་གཅིག་གི་ཟུག་མཚམས་ནས། ཕྱོགས་གཞན་གྱི་ཟུག་མཚམས་ཀྱི་བར་
9-5-78a


མཉམ་གསུམ་དུ་བཤད་པ་དང༌། འདིའི་ལྟེ་བ་དང་རྭའི་ཚད་མ་མཐུན་ཀྱང༌། རྣམ་གཞག་མི་གཅིག་པས་སྐྱོན་མེད་དེ། སྣ་ཚོགས་རྡོ་རྗེའི་འོག་གི་པདྨ་དང་འདྲའོ། །གཉིས་པ་ནི། རྟ་བབས་ཅི་ཙམ་ན་གནས་པ་ནི། ཕྲེང་བར་སྒོ་དང་རྟ་བབས་
ཀྱི་བར་གྱི་སྣམ་བུ་ལ་མུན་སྣམ་དུ་བཤད་ཅིང༌། དེ་ལ་ཆ་ཆུང་གཅིག་བཤད་ལ། རྟ་བབས་ཀྱི་ཀ་བ་རྣམས་ནི། གཞལ་ཡས་ཁང་ལས་ཅུང་ཟད་རིང་བར་གནས་པར་བཤད་དོ། །གསང་ལྡན་ལས་ཀྱང༌། སྒོ་ཡི་མཚམས་དང་ཧ་ར་ན། །ཤིན་ཏུ་གཅིག་
ཉིད་མི་བྱའོ། །ཞེས་སྒོ་དང་རྟ་བབས་ལ་བར་སྟོང་མེད་པ་བཀག་ཅིང༌། ཤྲད་དྷཱས་ཀྱང༌། རྟ་བབས་ཡ་ཕུགས་དག་ལས་ནི། ཆ་གཅིག་དོར་བའི། ཞེས་སྒོའི་ཡ་ཕིབས་ལས་ཆ་ཆུང་གཅིག་དོར་བར་རྟ་བབས་བྱ་བར་བཤད་དོ། །བླ་མ་ཁ་ཅིག་སངས་རྒྱས་གསང་བས། 
སྒོ་ཁང་ཕྱི་ཟུར་བཞི་པོ་ལ། །ཀ་བ་བཞི་བཞིས་གདུང་སྣ་ནི། །བརྒྱད་བརྒྱད་བཏེག་པ་རྟ་བབས་རྨང༌། །ཀ་གདན་ཀ་གཞུ་ཅི་རིགས་པའོ། །ཞེས་ཟེར་ནས། སྒོ་ལོགས་ཀྱི་ཟུར་བཞིར་ཀ་བ་བཞི་བཙུགས་ནས། རྟ་བབས་སྒོ་ཁང་གི་སྟེང་དུ་ཡོད་པར་བཞེད་པ་འདྲ་
ཞིང་དེ་བཞིན་དུ་བོད་ཁ་ཅིག་ཀྱང༌། སྒོ་ཁང་གི་སྟེང་ན་ཡོད་པར་བཞེད་པ་ནི་མི་འཐད་དེ། ཞེས་ཤཱ་ཀྱ་བཤེས་གཉེན་དང་ཚུལ་ཁྲིམས་བསྐྱངས་ཀྱིས། གཞལ་ཡས་ཁང་གི་སྒོ་ཡི་ཕྱི་རོལ་དུ་བྱ་བར་བཤད་པའི་ལུང་གིས་འགོག་ཅིང༌། རྟ་བབས་ཀྱི་ཀ་བ་ལ་
དཔངས་སུ་ཆ་བྲན་ལྔ་ལས་མེད་པའི་ཕྱིར། དེས་བཏེག་པའི་རྟ་བབས་སྒོ་ཁང་གི་སྟེང་དུ་མི་སླེབ་ཅིང་། སླེབ་ན་གཞལ་ཡས་ཁང་གི་དཔངས་ལ་ཆ་ཆུང་ལྡ་ལས་མེད་པར་འགྱུར་ཏེ། གཞལ་ཡས་ཁང་གི་མདའ་ཡབ་ནི་སྒོ་ལོགས་ཀྱི་རྩེ་མོའི་བར་དུ་
9-5-78b


ཡོད་པའི་ཕྱིར་རོ། །ཞེས་གསུང་བའི་དང་པོ་ནི་ཕྱོགས་སྔ་སྨྲ་བ་སངས་རྒྱས་གསང་བ་ཡིན་ན། དེས་དེ་གཉིས་ཀྱི་ལུང་ཚད་མར་འདོད་པར་གྲུབ་མི་ནུས་པས། ལུང་གིས་འགེགས་པ་མི་འཐད་ཀྱང༌། གནོད་པ་ཕྱི་མ་ནི་ལེགས་སོ། །རང་ལུགས་ནི་སྒོ་
སྟེང་དུ་རྟ་བབས་འོང་བར་བཤད་པ་དེ་སངས་རྒྱས་གསང་བའི་ལུགས་ཡིན་ཟེར་ཡང༌། ཐེ་ཚོམ་གྱི་གཞིར་སྣང་ཞིང༌། ཁུངས་ཐུབ་ཀྱི་གཞུང་གཞན་ཡང་མེད་ལ། ལུང་ལ་བརྟེན་པ་ཡང་དགོས་ཏེ། ལུང་ཡང་ཕྱོགས་གཞན་མང་ངོ་། །རྟ་བབས་སྒོ་སྟེངས་
སུ་འོང་ན། དེ་དག་གི་ལུགས་ཀྱིས་ཀྱང་མུན་སྣམ་འདོད་དགོས་པས། དེ་འདི་འདྲ་བ་ཞིག་གི་བར་སྟོང་གི་སྣམ་བུ་ཡིན་ཞེས་སྨྲ་མི་ནུས་སོ། །ཆ་ཕྲན་ལྔ་པའི་ཀ་བ་འོག་གཞི་ནས་འཛུགས་ན་ནི། སྔར་གྱི་རིགས་པས་གནོད་ལ། བྲི་བྱ་ལ་དེ་ལྟར་འོང་ཡང་
གནས་ཚོད་ལ་སྒོ་སྟེངས་ནས་རྟ་བབས་འདེགས་བྱེད་དོ། ཞེས་ཀྱང་སྨྲ་མི་ནུས་ཏེ། འོག་གཞི་ནས་འཛུགས་པ་བྲི་བྱ་ལ་ཡོད་ལ། དེ་ལྟར་ཁས་བླངས་པ་ལ་གནོད་པའང་ཅི་ཡང་སྟོན་རྒྱུ་མེད་པས་སྐྱོན་དེ་ནི་འོང་བ་ཡིན་ནོ། །རྡོ་རྗེ་ཕྲེང་བ་ལས། རྟ་བབས་
དཔངས་སུ་སྒོ་ཚད་གཅིག་མ་ལ་བར་སྐབས་ཀྱི་སྣམ་བུ་མེད་པར་གསུངས་པ་ནི། བྲི་བྱ་ལ་དགོངས་ཀྱི་དོན་ལ་མེད་པ་མིན་ཏེ། དཔངས་སུ་སྒོ་ཚད་གསུམ་མ་ལ་བར་སྐབས་ཀྱི་སྣམ་བུ་ཡོད་པ་དང་ཀུན་ནས་མཚུངས་པའི་ཕྱིར་རོ། །གསང་ལྡན་གྱི་ཐིག་རྩ་སྨྲི་
ཏིས་མཛད་པ་ལས་ཀྱང༌། རྟ་བབས་སྒོ་ཚད་གཅིག་མ་ལ། སྒོ་དང་བར་དུ་ཆ་ཆུང་གཅིག་བྱས་པ་དེ་གསང་ལྡན་གྱི་དགོངས་པ་ཡིན་ལ། ཤྲད་དྷཱས་ཀྱང་དེ་ལྟར་བཤད་པ་ལྟར་བར་སྟོང་དོན་ལ་ཡོད་དོ། །ཤྲད་དྷཱས། རྟ་བབས་ཡ་ཕུ་བས་དག་ལས་ན། ཆ་གཅིག་
9-5-79a


དོར་བའི་ཆ་ཆེན་ཚད། །མཆུར་ནི་ཆ་ཆེན་བཞི་པ་སྟེ། །ཞེས་བཤད་པ་ལྟར་ན། དཔངས་སུ་སྒོ་ཚད་གཅིག་མ་ལའང་མུན་པ་དང་པར་དཔྱངས་ཀྱི་སྣམ་བུ་ཡང་བྱས་ས་ཡོད་ལ། ཕྲེང་བའི་ལུགས་འཆད་པ་ན་བྲི་བྱ་ལ་མུན་སྣམ་
མེད་བར་བཤད་པ་ལྟར་བྱེད་དགོས་སོ། ལཱུ་ཨི་པའི་གཞུང་ནས་རྟ་བབས་དང་གཞལ་ཡང་ཁང་གི་སྐོར་མ་བཤད་ལ་དེའི་དགོངས་པ་བཞིན་འཆད་པའི་རྒྱལ་བ་བཟང་པོས། ཆུ་སྲིན་ཁ་ནས་ཆུ་སྲིན་བར། །རྟ་བབས་སྒོ་ལས་སུམ་འགྱུར་ཏེ། །སྟེགས་
བུ་བུམ་པའི་སྟེང་གནས་པའི། །རྟ་བབས་ཀ་བ་དྲང་པོར་བྱ། ཞེས་བཤད་ཅིང་ཨ་བྷྱ་ཀ་རའི་དགོངས་པ་ནི་ལཱུ་ཨི་པ་ལ་ཡང༌། ཐིག་སྐུད་རིང་ཐུང་གང་བྱས་ཀྱང་འདྲའོ། །དཱ་རི་ཀ་པའི་དཀྱིལ་ཆོག་ལས། དགུ་ཡིས་རྟ་བབས་ཀ་བར་བཅས། ཞེས་པའི་
དོན་ཡང༌། མཁས་པ་དག་ཀ་པ་ལ་ལྔ་དང༌། རྟ་བབས་དངོས་ཀྱི་དཔངས་ལ་བཞི་སྟེ་ཆེ་བྲན་དགུར་འཆད་དོ། །ནག་པོ་སྤྱོད་པའི་དཀྱིལ་ཆོག་ལས། གྲྭ་ནས་ཐིག་གིས་བསྐོར་བ་དག །རྟ་བབས་ཀྱི་ནི་གནས་སུ་བྱ། །ཞེས་མདའ་ཡབ་ཀྱི་ཟུར་ནས་ཟླུམ་
པོར་བསྐོར་བའི་ནང་རྟ་བབས་ཀྱི་གནས་སུ་བཤད་ལ། དེ་ལ་ཆ་ཕྲན་བཅུ་ཡོད་པ་རགས་རྩིས་སུ་བྱས་ནས། དཔངས་སུ་སྒོའི་སུམ་འགྱུར་དུ་བྱས་ན་དགོངས་པར་འགྲོ་གསུང་བ་ལྟར་ཡིན་པས། དེའི་བཞེད་པ་ཐིག་སྐུད་རིང་བའི་ཕྱོགས་སུ་བྱའོ། །
འདི་ནི་རྡུལ་ཚོན་གྱིས་འདྲི་བ་ལ་བདེ་ཡང༌། ཐིག་ཚོན་བྱིན་རླབས་བྱས་ནས་ཐིག་བཤད་ཚོད་བཞིན་བཏབ་སྟེ། ལྷ་རེ་གཉིས་པའི་དཀྱིལ་འཁོར་འདྲི་ན། རས་གཞི་ཤིན་ཏུ་ཆེ་ན་མ་གཏོགས་པ། རྟ་བབས་སྒོ་ཚད་གཅིག་མ་བྱས་ན་བྲི་བ་བདེ་བས། 
9-5-79b


རྣམ་གཞག་གཉིས་ཀ་ཤེས་པར་བྱའོ། །སྣམ་བུ་ལྔ་བ་དང་བདུན་པ་གཉིས་ཆ་ཆུང་ཕྱེད་དང་གཉིས་པ་དང༌། གཞན་དགུ་རེ་རེ་བར་འདྲ་བའི་གཉིས་མཉམ་དགུ་མཉམ་དང༌། སྣམ་བུ་གསུམ་པ་བདུན་པ་དགུ་པ་གསུམ་ཆ་ཆུང་རེ་རེ་དང༌། བཞི་པ་དྲུག་པ་བཅུ་པ་གསུམ་ཆ་ཆུང་ཕྱེད་དུ་དང༌། ལྷག་
མ་ལྡ་ཕྱེད་དང་གཉིས་པར་མཉམ་པའི་ལྡ་མཉམ་གསུམ་གསུམ་མཉམ་སྟེ་གཉིས་དང་དུས་འཁོར་ནས་གསུངས་པའི་རྟ་བབས་དང༌། སྒོ་ཚད་གཅིག་མ་ལྔ་མཉམ་གསུམ་གསུམ་མཉམ་གཅིག་སྟེ། རྟ་བབས་མི་འདྲ་བ་བཞི་བཤད་ལ། སྣམ་བུ་ནི་བཅུ་གཅིག་པར་བཤད་དོ། །རྟ་བབས་
ཀྱི་དཔངས་སུ་སྒོ་ཚད་གཉིས་མ་ཡང༌། རྒྱ་གར་བ་འགའ་ཞིག་གིས་བཤད་ལ། ཤཱ་ནྟི་པས་ཀྱང་དཔངས་སུ་ཇི་ལྟར་མཛེས་པར་བྱ་བར་བཤད་དོ། །རྟ་བབས་ཀྱི་ཀ་བའི་གྲངས་ལ། བོད་སྡ་མ་རྣམས་ཕྱོགས་རེར་བཞི་བཞིར་འདོད་པ་ལ་ཁ་ཅིག་གིས་དེ་མི་འཐད་དེ། རྡོ་རྗེ་འབྱུང་བར། 
རྟ་བབས་བཞི་དང་ཀ་བ་བརྒྱད། ཅེས་དང༌། མན་སྙོ་ལས། འཕགས་པའི་ལམ་ཡན་ལག་བརྒྱད་པ་ནི་རྟ་བབས་ཀྱི་ཀ་བ་བརྒྱད་དོ། །ཞེས་བཤད་པས་སོ། །ཐམས་ཅད་གསང་བའི་རྒྱུད་ལས་ཡང་དག་སྤོང་བ་བཞི་པོ་ནི། རྟ་བབས་རྣམས་དང་ཀ་བར་འབྱུང༌། ཞེས་ཀ་བ་བཞིར་བཤད་པ་དང་མི་འགལ་
ཏེ། དེའི་འགྲེལ་པར་ཤཱནྟི་པས། ཡང་དག་སྤོང་བ་བཞི་པོ་ནི་རྟ་བབས་དང་ཀ་བཟུང་གིའོ། །ཞེས་རྟ་བབས་རེ་རེ་ལ་ཀ་གཉིས་གཉིས་སུ་གསལ་བར་གསུངས་པའི་ཕྱིར་རོ། །ཞེས་གསུག་མོད་ཀྱང༌། མན་སྙེ་ལས་རྫུ་འཕྲུལ་གྱི་རྐང་པ་བཟི་རྣམ་པར་དད་པས། སྒོ་ཁྱུད་རྣམས་སོ་ཞེས་ཀླུའི་བློའི་
ཞབས་སོ། །ཞེས་གསུངས་པ་བཞིན། ཀླུ་བྱང་གི་དཀྱིལ་ཆོག་ལས། ཕྱོགས་རེའི་སྒོ་ཁྱུད་གཉིས་ཕྱོགས་དེའི་སྒོ་ཁྱུད་ཅེས་གཅིག་ཏུ་བགྲངས་པ་ལ་དགོངས་ནས། སྒོ་ཁྱུད་བཞིར་གསུངས་པ་བཞིན། རྟ་བབས་ཀྱི་ཕྱོགས་རེར་ཀ་བ་བཞི་བཞི་ཡོད་ཀྱང༌། གཡས་གཡོན་གྱི་ཀ་བ་གཉིས་སུ་སྡུད་པ་ལ་
9-5-80a


དགོངས་ནས། རྣམ་ཐར་དང་ཡན་ལག་བརྒྱད་ཀྱི་རྣམ་དག་གསུངས་ལ། དེ་དང་ཡང་དག་སྤོང་བའི་རྣམ་དག་གསུངས་པ་ཡང་མི་འགལ་ཏེ། དབྱེ་བསྡུ་ཡིན་པའི་ཕྱིར་དང༌། ཕྱོགས་རེར་ཀ་བ་བཞི་བཞི་མེད་ན་ཀ་བ་གཉིས་ཙམ་
ལ་རྟ་བབས་སྡོད་པ་ཤིན་ཏུ་མི་བདེ་བའི་ཕྱིར་རོ། །ཕྲེང་བར་རྟ་བབས་ཀྱི་གཡས་གཡོན་དུ། ཧ་ཅང་ཐག་མི་རིང་བར་བུམ་པ་བཟང་པོ་ལས་སྐྱེས་པའི་དཔག་བསམ་གྱི་ཤིང་རྣམས་ཏེ། རིན་པོ་ཆེ་སྣ་བདུན་དང་ལྡན་པའོ་ཞེས་བཤད་པའི་འཁོར་
ལོ་ནི་རྩིབས་བརྒྱད་སེར་པོ་དང༌། གླང་པོ་ཆེ་ནི་མཆེ་བ་དྲུག་པ་དཀར་པོ་དང༌། རྟ་ལྗང་གུ་དང༌། བུད་མེད་ལོ་བཅུ་དྲུག་པའི་རྣམ་པ་སྡོ་བསངས་དང༌། ནོར་བུ་རྩེ་དྲུག་པ་སེར་པོ་དང༌། ཁྱིམ་བདག་དམར་པོ་མཛོད་མི་ཟད་པ་དང་ལྡན་པ་དང༌། དམག་དཔོན་
ནག་པོ་གོ་ཆ་དང་བཅས་པ་མདུང་དང་རལ་གྲི་འཛིན་པར་དགོངས་པ་རབ་གསལ་ལས་བཤད་ལ། མདོ་ལས་ནོར་བུ་སྔོན་པོ་ཟུར་བརྒྱད་པར་བཤད་དོ་ཞེས་འཆད་པ་ལྟར་བྱའོ། བར་བར་དུ་གྲུབ་པ་ཐོབ་པ་རྣམས་དང༌། སྤྲིན་གྱི་སྦུབས་ལས་བྱུང་
བའི་ལྷའི་ལུས་ཅན་མེ་ཏོག་གི་ཕྲེང་བ་བཟུང་བ་རྣམས་བྱ་སྟེ། འདི་རྣམས་ནི་བྲིས་སྐུ་དང་ཁང་པ་བསླང་བ་སོགས་ལ་དགོས་པས་བྲིས་སོ། །གཉིས་པ་ལ་གཉིས། མདའ་ཡབ་ནས་རྩིག་པའི་བར་བཤད་པ་དང༌། ནང་གི་འཁོར་ལོ་རྣམས་དང་ཐོག་
བཤད་པའོ། །དང་པོ་ནི། གཞལ་ཡས་ཁང་གི་མཚན་ཉིད་ནི་མངོན་བརྗོད་ལས། ཁང་པ་བརྩེགས་པ་རྣམ་པར་བསམ། །ཟུར་བཞི་པ་ལ་སྒོ་བཞི་པ། །རྟ་བབས་གཞིས་ནི་རྣམ་པར་བརྒྱན། །དྲ་བ་དྲ་ཕྱེད་ཀྱིས་མཛེས་ཤིང༌། །བ་དན་ཕྲེང་བས་རྣམ་
9-5-80b


པར་བརྒྱན། །ཟུར་གྱི་ཆ་ནི་ཐམས་ཅད་དང༌། །སྒོ་དང་སྒོ་ཁྱུད་མཚམས་རྣམས་སུ། །རྡོ་རྗེ་རིན་ཆེན་གྱིས་བརྒྱན་པ། །ཕྱི་མི་དཀྱིལ་འཁོར་ཐིག་གདབ་བོ། །ཞེས་གསུངས་ལ། དེ་དག་གི་ཚད་ནི་རྡོ་རྗེ་མཁའ་འགྲོ་ལས། སྒོ་ནི་དཀྱིལ་འཁོར་བརྒྱད་ཆ་རུ། །མུ་
ཁྱུད་མེད་པར་འདོད་པ་ཡིན། །སྒོ་ཡི་ཚད་ཀྱིས་སྒོ་ཁྱུད་དེ། །དེ་ཡི་ཕྱེད་ཀྱིས་འགྲམ་པ་བྱ། །ཞེས་དང༌། མཁའ་འགྲོ་རྒྱ་མཚོར་ཡང༌། སྒོ་འཁོར་ལོའི་བརྒྱད་ཆར་གསུངས་ཏེ། འདིས་ནི་རྩ་ཐིག་ནས་རྩ་ཐིག་གི་བར་ཆ་ཆེན་བརྒྱད་དུ་ཡང་སྟོན་ནོ། །མུ་ཁྱུད་མེད་
པ་ནི་སྒོའི་ཐད་ཀར་འདོད་སྣམ་མེད་པའོ། མཁའ་འགྲོ་རྒྱ་མཚོ་ལས། སྒོ་ལོགས་དང་འདོད་སྣམ་སྒོ་ཚད་ཕྱེད་དང༌། ཀྲ་མ་ཤིར་ཥ་དེའི་ཡང་ཕྱེད་དུ་བཤད་དེ། དྲ་བ་དྲ་ཕྱེད་ཀྱི་སྣམ་བུ་ཡང་དེ་དང་འདྲ་ལ། རྩིག་པ་དང་ཕ་གུ་དང་ཤར་བུའི་སྣམ་བུ་ནི་ཆ་ཆུང་རེ་རེ་
བར་སྡོམ་འབྱུང་གི་ཐིག་གི་སྐབས་ལས་ཤེས་སོ། །འགྲམ་ལོགས་སྒོ་ཚད་ཕྱེད་དུ་མཉམ་པ་ནི། རྟ་བབས་ཀྱི་དཔངས་སྒོ་ཚད་གསུམ་མ་ལ་བྱ་སྟེ། ཀླུ་བྱང་གིས་གསུམ་ག་ཚད་མཉམ་དུ་ཡང་བཤད་དོ། །དེ་ལ་རྩིག་པའི་ཕྱི་ནང་དུ་ལྔ་སྦྲག་ཏུ་ཡོད་པ་དང༌། 
སྟེང་ནས་སྟེང་དུ་བརྩེགས་པའི་རྣམ་པར་བྱེད་པའི་འདོད་ཚུལ་གཉིས་ལས། དང་པོ་ལྟར་བྱ་སྟེ། བྲི་བྱ་ལ་ཡོད་པ་ལྟར་སྒོམ་དོན་ལ་ཁས་བླངས་བ་ལ་གནོད་པ་མེད་པའི་ཕྱིར་དང༌། ཕྱི་མ་ལྟར་ན་རྩིག་ཞེང་ཧ་ཅང་འཕྲོས་པའི་སྐྱོན་ཡོད་པའི་ཕྱིར་ཏེ། ཞེང་ལ་རྩིག་པའི་ལྔ་
ཆ་གཅིག་ལས་མེད་དགོས་པའི་ཕྱིར་རོ། རྩིག་པ་དེའི་ཞེང་ཚད་ནི། བཞི་བརྒྱ་ལྔ་བཅུ་པ་ལས། སྒོའི་ཉི་ཤུ་ཆར་ཡང་གསུངས་ལ། རི་མོ་ཕན་ཚུན་ནས་གང་གིས། །མ་རེག་པར་ནི་བྲི་བར་བྱ། །ཞེས་བཤད་པ་ལ་བོད་ཁ་ཅིག །རེ་ཁའི་སྦོམས་སུ་སྒོའི་ཉི་
9-5-81a


ཤུ་ཆ་ཡིན་ལ། རྩིག་པ་ལྔ་ག་བསྡོམས་པས་སྒོའི་བཞི་ཆ་ལས་མེད་པས། བར་སྟོང་གཞག་ས་མི་འོང་བའི་ཕྱིར། ནང་འགལ་ལོ་ཞེས་སྨྲ་བ་ནི་ཤིན་ཏུ་མི་རིགས་ཏེ། དེ་ལྟར་ན་སྡོམ་འབྱུང་ལས། རི་མོ་ཕན་ཚུན་དག་གི་བར། །ནས་ཙམ་དུ་ནི་
གདབ་པར་བྱ། །ཞེས་གསུངས་པ་ལ་ཡང་ནང་འགལ་ཡོད་པར་འགྱུར་ཏེ། རྩིག་པ་ལ་སྒོའི་བཞི་ཆ་ལས་མེད་པ་དེའི་ཡང་ལུགས་ཡིན་པས། རྩིག་ཞེང་ལ་ཆ་ལྔར་ཕ་གོས་པ་ན་སྒོའི་ཉི་ཤུ་ཆར་འགྱུར་བའི་ཕྱིར་རོ། །དེས་ན་དེ་གཉིས་ནི་རྩ་ཐིག་ཁྲུ་གང་པའི་དབང་དུ་
མཛད་པ་སྟེ། དེ་ལ་སྒོའི་བཞི་ཆ་གཅིག་ལ་ནས་ལྔ་དང༌། ནས་གཅིག་གི་བཞི་ཆ་ལས་མེད་པས་རི་མོ་རེ་རེའི་ཞེང་གི་ཕ་མཐའ་ནས་ཆུར་མཐའི་བར་ལ། ནས་རེ་རེར་བྱེད་པའི་དོན་ཡིན་གྱི། རོ་མོ་གཉིས་ཀྱི་བར་ན་ནས་རེ་རེ་ཡོད་པར་འདོད་པ་མིན་ནོ། །ནས་གཅིག་
གི་བཞི་ཆ་ཡོད་མོད་ཀྱང་དེ་བཏང་སྙོམས་སུ་བཞག་ནས་རགས་རྩིས་མཛད་པའོ། མ་རེག་པ་ནི་དཱ་རི་ཀ་པས། ནས་གང་གིས་ནི་མ་འདྲེས་པས། རི་མོ་ཀུན་ཏུ་བྲི་བར་བྱ། ཞེས་གསུངས་པ་ལྟར་ཚོན་ཕན་ཚུན་མ་འདྲེས་པའི་དོན་ཡིན་གྱི། མ་རེག་པའི་བར་སྟོང་སྟོན་པ་མིན་
ནོ། །ཤཱནྟི་པས་ནས་གང་གིས་མ་རེག་པ་ཞེས་པ་ནི། འོག་གི་ཆའི་ཚད་དེ་སྟེང་དུ་ཇི་ལྟར་མཛེས་པར་བྱའོ། །ཞེས་པ་ནི་བྲི་བྱ་ལ་རྩིག་པའི་རྩ་བ་སྦོམ་པས། ནས་གང་གི་ཚད་ཡོད་པ་ལྟར་རྩེ་མོ་ལ་མེད་པ་ལ་དགོངས་ཀྱི་སྒོམ་དོན་ལ་མིན་ནོ། །ཕྱི་ནང་གི་ཁ་དོག་ནི། རྡོ་རྗེ་མཁའ་འགྲོ་དང་སྡོམ་འབྱུང་
གཉིས་ཀ་ལས། ཕྱི་ནས་རིམ་པ་བཞིན་དུ་དཀར་སེར་དམར་ལྗང་སྔོ་བར་བཤད་དོ། རིམ་པ་འདི་ཡང་ཕྱོགས་ཀྱི་དེ་བཞིན་གཤེགས་པའི་ཁ་དོག་གསལ་བར་ཡོད་ན་དེའི་ཁ་དོག་དང༌། དེ་མེད་ན་ཕྱོགས་དེའི་ལྷའི་རིགས་བདག་གི་ཁ་དོག་གིས་ཤར་ནར་དབུས་བར་དུ་གཡས་སྐོར་གྱིས་བསྐོར་བ་དང་མཐུན་པར། 
9-5-81b


རྩིག་པའི་ཕྱི་མ་ནས་ནང་མའི་ཁ་དོག་ཏུ་བྱ་བར་ཕྲེང་བར་བཤད་ལ། འདི་ལ་མི་འདྲ་བའི་ཁྱད་པར་གཞན་ཡོད་པ་ནི་འཆད་པར་འགྱུར་རོ། །རྩིག་པ་ལྔ་ནི་ཕྱོགས་མདོག་གིས་མི་འབྱེད་ལ། ལོགས་ཀྱི་རྩིག་པ་ཐད་ཀར་ཇི་ཙམ་དུ་འགྲོ་བ་ནི། འགྲམ་ལོགས་སྒོ་དང་མཉམ་པ་ལྟར་ན་སྣ་ཚོགས་རྡོ་རྗེའི་ལྟེ་བ་
དང་ཁ་ད་ཆང་དུ་འགྲོ་ཞིང༌། རྩིག་གདོང་ལྔ་ཡང་མཉམ་མོད་ཀྱང༌། འགྲམ་ལོགས་སྒོ་དང་མི་མཉམ་པ་ལ་ནི། འོག་གི་རྩིག་གདོང་ནས་སྣ་ཚོགས་རྡོ་རྗེའི་ལྟེ་བའི་ཟད་མཚམས་བར་ལ། ཆ་ཆུང་གཅིག་ཡོད་ཅིང༌། འོག་གི་སྒོ་ལོགས་ཀྱི་གདོང་ངོས་ཀྱི་རྩིག་པ་ལྔ་རིང་ཐུང་དུ་
ཡོད་ལ། དེ་རྣམས་ཅུང་ཟད་རེ་ངོས་སུ་འོང་བ་བྱས་ན་མཛེས་སོ། །རྩིག་པའི་དཔངས་ནི་འཆད་པར་འགྱུར་རོ། །ཁ་ཅིག་ན་རེ། སྒོ་ལོགས་ཀྱི་རྩིག་པ་ནང་མའི་རྩེ་ནས། དེའི་རྩེ་གཞན་གྱི་བར་དང༌། རྩིག་པ་ཕྱི་མའི་རྩེ་ནས་རྩེ་གཞན་གྱི་བར་གྱི་རྩིག་ཞེང་ལ་
ཆ་ཕྲན་གཅིག་བྱུང་བ་དེ་བྲི་བྱ་ལ་ཡིན་གྱི། བསྒོམ་བྱ་ལ་སྒོ་ལོགས་ཀྱི་གདུང་ཆ་ཆུང་བརྒྱད་པའི་སྟེང་དུ་ཡོད་པས། སྒོ་དང་རྟ་བབས་ཀྱི་བར་ན་བར་སྟོང་ཆ་ཆུང་གཉིས་ཡོད་ཅེས་ཟེར་རོ། དེའི་རྒྱུ་མཚན་དུ་ཡ་ཕུབས་འདེགས་པའི་གདུང་སྒོ་སྒོ་ལོགས་ཀྱི་གདོང་དུ་
བྱས་ནས་བྲི་བྱ་ལ་ཡོད་པ་བཞིན་དུ་བཞེངས་པ་ལ་ཡང༌། དེའི་སར་རྩིག་པ་ཡོད་པ་བྱས་ན་གདུང་གིས་ཀ་བའི་རྩེར་མི་སླེབ་པར་འགྱུར་ཏེ། ཕྲེང་བ་དང་སྡོམ་འབྱུང་འགྲེལ་བ་དང༌། བི་བྷུ་ཏིའི་དཀྱིལ་ཆོག་ལས་སྒོ་ལོགས་ནང་མའི་རྩེ་ནས་རྩེ་གཞན་གྱི་བར་ཆ་
ཆུང་བརྒྱད་པའི་ཐིག་ནི་གདུང་མཚོན་པར་བྱེད་པར་བཤད་པའི་ཕྱིར་རོ། །འོ་ན་གདུང་སྒོ་ལོགས་ཀྱི་རྩིག་གདོང་དུ་མ་བྱས་པར་སྒོ་ལོགས་ཀྱི་ནང་གི་ཐད་ཀ་གཉིས་སུ་བཙུགས་པས་ཆོག་གམ་སྙམ་ན། དེ་ལྟར་ན་ཡ་ཕུབས་ཀྱི་རྩིག་པ་ལ་ཆ་
9-5-82a


ཆུང་བཅུ་མེད་པར་འགྱུར་ཏེ། རྩིག་པ་བར་སྣང་ལ་ལིང་དེ་སྡོད་དུ་མི་འདོད་པའི་ཕྱིར་རོ། ཞེས་སྨྲའོ། འདི་ལེགས་པ་མ་ཡིན་ཏེ་གདུང་ཆ་ཆུང་བརྒྱད་པར་ངེས་དང༌། ངོས་སུ་འོང་བའི་རྩིག་པ་ཆ་
ཆུང་བཅུ་པར་རང་ཉིད་ཀྱང་འདོད་བཞིན་དུ། གདུང་མེད་པའི་སར་རྩིག་པ་བར་སྣང་ལ་སྡོད་མི་ཉན་པ་རྒྱུ་མཚན་དུ་བྱས་ནས། སྒོ་ལོགས་ཀྱི་གདོང་ནས་གདོང་གཞན་གྱི་བར་དུ་གདུང་བྱེད་ན་གདུང་ལ་ཆ་བྲན་བརྒྱད་ལས་མེད་པས་དེའི་བར་དུ་དེས་མི་སླེབ་
པ་དང༌། སྒོ་ལོགས་ཀྱི་རྩིག་པ་ནང་མའི་རྩེ་ནས་རྩེ་གཞན་གྱི་བར་དུ་གདུག་ཡོད་པ་བྱེད་ན། རྩིག་པ་ལ་ཆ་ཆུང་བཅུ་ཡོད་པས་གདུང་མེད་པའི་མཐའ་གཉིས་སུ་རྩིག་པ་ཆ་བྲན་རེ་རེ་བར་སྣང་ལ་སྡོད་དགོས་པའི་སློན་རང་ལའང་འཇུག་པའི་ཕྱིར་ཏེ། རང་
ལུགས་ལའང་རྩིག་པ་ལ་ཆ་ཆུང་བཅུ་ཡོད་ཅིང༌། གདུང་ལ་ཆ་ཆུང་བརྒྱད་ལས་མེད་ལ་གདུང་གིས་མ་བཏེག་པའི་རྩིག་པ་ཡང་མེད་པར་འདོད་པའི་ཕྱིར་རོ། །དེས་ན་དེ་ནི་གདུང་ཆ་ཆུང་བརྒྱད་པར་བཤད་པས་འཁྲུལ་གཞི་བྱས་འདུག་པས། དེའི་
དོན་ནི་སྟེང་གི་སྒོ་ལོགས་གཉིས་ཀྱི་རྩིག་པ་ལྔ་པོ་རིང་ཐུང་དུ་ཡོད་པ་བཞིན་དུ་ཞེང་དུ་ཆ་ཆུང་གཅིག་པའི་གདུང་ཡང་བསེགས་ཁར་བྱ་དགོས་ལ། དེའི་ཚེ་གདུང་གི་ནང་གི་མཐའ་ནས་མཐའི་བར་ཆ་ཆུང་བརྒྱད་དང༌། དེའི་ཕྱི་མཐའ་ནས་ཕྱི་མཐའི་བར་
ལ་ཆ་ཆུང་བཅུ་ཅུང་མེད་ཅིག་ཡོད་དེ། དཔེར་ན་ཕྲེང་བར་སྒོ་ལོགས་ཕྱི་མའི་རྩེ་ནས་གཞན་གྱི་རྩེའི་བར་གྱི་ཐིག་ལ་ཆ་ཆུང་བཅུ་ཡོད་པར་བཤད་ཅིང༌། དེ་ཉིད་ཚོན་སྣ་ལྔའི་སར་ཡང་གསུངས་པ་ལ། ཚོན་སྣ་ཕྱི་མ་མ་གཏོགས་པ་ནང་མ་བཞིའི་ས་ལ་
9-5-82b


ཆ་ཆུང་བཅུ་ཡོད་མི་དགོས་པ་བཞིན་དུ་གདུང་ཆ་ཆུང་བརྒྱད་པ་ཡང་ནང་གི་འགྲོ་མཚམས་ཡིན་གྱི་ཕྱི་ལ་ཚད་དེར་ངེས་མི་དགོས་སོ། །སྡོམ་འབྱུང་འགྲེལ་པ་ལས་ཀྱང༌། ཆ་ཆུང་བརྒྱད་པའི་སྟེང་དུ་གདུང༌། ཆ་ཆུང་བཅུ་པར་ཤེས་པར་བྱ། ཞེས་གདུང་
ཆ་ཆུང་བཅུ་པར་བཤད་པ་ཡང་ཡོད་དོ། །སྒོ་ལོགས་ཀྱི་གདུང་གི་འོག་གི་ཀ་བ་གཉིས་གཉིས་ནི་ཐིག་ལ་མ་ཤར་ཡང་དོན་ལ་ཡོད་པར་བཤད་དེ། ཕྲེང་བ་ལས། གདུང་གི་འོག་ཏུ་ཀ་བ་གཉིས་མ་བྲིས་ཀྱང་བསྒོམ་བྱའི་དཀྱིལ་འཁོར་ལ་རིག་པར་བྱ་
སྟེ། གྲུབ་བཞི་པ་ལ་སྒོ་བཞི་པ། །ཀ་བ་བརྒྱད་ཀྱིས་ཉེ་བར་མཛེས། །ཞེས་པའི་ལུང་གིས་སོ། །འདིར་དཀྱིལ་འཁོར་གྱི་ནང་གི་ཀ་བ་བརྒྱད་ནི་མ་གསུངས་ཏེ། དེ་དག་ནི་བདེ་མཆོག་ལ་སོགས་པའི་དཀྱིལ་འཁོར་ལ་མེད་ལ། ཀ་བ་བརྒྱད་ཀྱིས་ཉེ་བར་མཛེས་
ཞེས་པའི་མཚན་ཉིད་འདི་ཡང་དཀྱིལ་འཁོར་ཐམས་ཅད་ཀྱི་ཁྱབ་བྱེད་ཡིན་པས་སོ། །ཞེས་གསུངས་སོ། །འདི་ལ་བོད་ཁ་ཅིག་དཀྱིལ་འཁོར་ཐམས་ཅད་ཀྱི་ཁྱབ་བྱེད་ཡིན་གསུངས་པ་ནི། པནྜི་ཏས་ཐུགས་མཉམ་པར་མ་བཞག་པ་སྟེ། དཀྱིལ་འཁོར་
གྲུ་བཞི་སྒོ་གཅིག་པ་དང་། ཟླུམ་པོ་སྒོ་བཞི་པ་སོགས་བཤད་ཅིང༌། མཁའ་འགྲོ་རྒྱ་མཚོ་ལས། འཁོར་ལོ་གསུམ་ལ་ཀ་བ་སྦྱིན་པ་དང༌། མངོན་བརྗོད་ལས། རེའུ་མིག་དགུ་པའི་བདེ་མཆོག་གི་དཀྱིལ་འཁོར་ཡང་བཤད་བས། བདེ་མཆོག་གི་
དཀྱིལ་འཁོར་འགའ་ཞིག་ལ་ཡང་ནང་དུ་ཀ་བ་འོང་དགོས་པ་ཡོད་པའི་ཕྱིར་རོ། ཞེས་གསུང་པ་ནི་ཕྱོགས་སྔ་མ་ལོན་པར་སྣང་བས་རིགས་པ་མ་མཐོང་ངོ༌། །ཕྲེང་བའི་ལུང་དེས་དཀྱིལ་འཁོར་ཀུན་གྱི་ཁྱབ་བྱེད་དུ་བཤད་པ་ནི། ཀ་བ་བརྒྱད་ཀྱིས་
9-5-83a


མཛེས་པ་གཅིག་པུ་བཤད་ཀྱི། སྒོ་བཞི་དང་གྲུ་བཞི་པ་ཁྱབ་བྱེད་དུ་བསྟན་པའི་ཚིག་ཅུང་ཟད་ཀྱང་མེད་ལ། ཁྱབ་བྱར་བསྟན་པའི་དཀྱིལ་འཁོར་ཀུན་ཞེས་པ་ཡང༌། དཀྱིལ་འཁོར་ཙམ་མིན་གྱི་གྲུ་བཞི་པ་ལ་སྒོ་བཞི་པ། 
ཞེས་བཤད་པའི་གྲུ་བཞི་སྒོ་བཞི་པའི་དཀྱིལ་འཁོར་ཀུན་ལ་བྱེད་པར་ཤིན་ཏུ་གསལ་བས། དཀྱིལ་འཁོར་གྲུ་བཞི་སྒོ་གཅིག་པ་སོགས་རྒྱུད་ལས་བཤད་པས་ཅི་ཡང་མི་གནོད་དོ། །དེ་ལྟ་མ་ཡིན་ན་ཕྲེང་བ་ཉིད་ནས་ཆོས་དབྱིངས་གསུང་དབང་
གི་དཀྱིལ་འཁོར་བཞི་པ་ཟླུམ་པོར་བཤད་པ་ཡང་དེས་མ་དྲན་པར་འགྱུར་རོ། །དཀྱིལ་འཁོར་གྲུ་བཞི་སྒོ་བཞི་པ་ལ་ཀ་བ་བརྒྱད་ཀྱིས་མཛེས་པས་ཁྱབ་ཀྱང༌། དེའི་དོན་ནི་སྒོ་ལོགས་ཀྱི་གདུང་གི་འོག་གི་ཀ་བ་བརྒྱད་ལ་བཤད་མི་དགོས་ཀྱི། 
དཀྱིལ་འཁོར་གྱི་ནང་གི་ཀ་བ་བརྒྱད་ལ་བྱའོ་སྙམ་པ་ལ། དེ་དག་ནི་བདེ་མཆོག་ལ་མེད་པར་གསུངས་པ་ནི། བདེ་མཆོག་གི་དཀྱིལ་འཁོར་ཐམས་ཅད་ཀྱི་ན་བང་ན་ཀ་བ་བརྒྱད་གཏན་མེད་པར་སྨྲ་བ་མིན་གྱི། ལྷ་དྲུག་ཅུ་རེ་གཉིས་པ་ལྟ་བུའི་
དཀྱིལ་འཁོར་ལ་དགོངས་སོ། །དཀྱིལ་འཁོར་དེའི་འཁོར་ལོ་གསུམ་ལ་ཀ་བ་བརྒྱད་ཚན་གསུམ་ཡོད་དུ་ཆུང་ཀྱང༌། དེ་ནི་གཞིའི་དམ་ཚིག་གི་དཀྱིལ་འཁོར་གྲུ་བཞི་པ་སྒོ་བཞི་པ་དེའི་སྒོས་ཀྱི་ཀ་བ་མིན་ལ། གྲུ་བཞི་པ་ལ་སྒོ་བཞི་པ། 
ཞེས་པ་ཁྱབ་བྱར་བྱས་པའི་ཁྱབ་བྱེད་ཀ་བ་བརྒྱད་ཀྱིས་མཛེས་པའི་ཀ་བ་བརྒྱད་ནི། གྲུ་བཞི་སྒོ་བཞི་པ་དེའི་སྒོས་ཀྱི་ཀ་བ་ཡིན་ཏེ། དེ་ལ་རྩོད་པའི་སྐབས་ཡིན་པའི་ཕྱིར་རོ། །བདེ་མཆོག་གི་དཀྱིལ་འཁོར་གྲུ་བཞི་སྒོ་བཞི་པ་གཞན་ལ་དེའི་
9-5-83b


སྒོས་ཀྱི་ཀ་བ་བརྒྱད་བྱུང་བ་དང༌། འཁོར་ལོ་གསུམ་གྱི་ཐོག་བདེ་གསལ་པའི་ཀ་བ་བརྒྱད་བྱུང་ཡང་ཅི་ཡང་མི་གནོད་དོ། །དེས་ན་གྲུ་བཞི་སྒོ་བཞི་པའི་དཀྱིལ་འཁོར་དེའི་སྒོས་ཀྱི་ཐོག་འདེགས་པའི་ནང་གི་ཀ་བ་བརྒྱད་མེད་པ་ཅིག་བྱུང་ན། དེས་ཆོག་པ་
ཡིན་གྱི། བདེ་མཆོག་གི་དཀྱིལ་འཁོར་ཐམས་ཅད་ལ་དེ་མེད་པ་དགོས་པར་མི་འདོད་དོ། །ཀ་བ་བརྒྱད་ཀྱིས་མཛེས་ཞེས་པའི་མཛེས་པ་ནི། དཀྱིལ་འཁོར་གྲུ་བཞི་བ་ཡིན་ལ། རྟ་བབས་ནི་གཞལ་ཡས་ཁང་ལ་མི་གཏོགས་པས། སྒོའི་གཡས་
གཡོན་དུ་ཐིག་ལ་ཤར་བའི་ཀ་བ་བརྒྱད་ལ་ཡང་བཤད་དུ་མི་རུང་སྟེ། དེ་རྣམས་རྟ་བབས་ཀྱི་ཀ་བ་ཡིན་པའི་ཕྱིར་རོ། །དེའི་ཕྱིར་མཐའ་གཞན་ཁེགས་པས། ཀ་བ་བརྒྱད་ཀྱིས་ཉེ་བར་མཛེས་ཞེས་པའི་ཀ་བ་ནི། སྒོ་ལོགས་ཀྱི་གདུང་གི་འོག་གི་ཀ་བ་
ལ་ངེས་པར་བྱ་དགོས་སོ། །སྒོ་ལོགས་ཀྱི་གདུང་ཀ་བ་གཉིས་གཉིས་ཀྱིས་འདེགས་དགོས་པ་རྒྱུ་མཚན་དུ་བྱས་ནས། སྒོ་ཁྱུད་དང་འགྲམ་པ་དང༌། ལོགས་གསུམ་སྟེང་ནས་སྟེང་དུ་ལངས་པར་འདོད་པ་ཕྲེང་བར་བཀག་པ་ནི། འགྲམ་པ་བར་སྣང་
ལ་སྡོད་མི་ཉན་པས། དེའི་སྟེང་དུ་སྒོ་ལོགས་གྱེན་དུ་ལྡང་རྒྱུ་མེད་པས་སྒོ་ལོགས་ཀྱི་གདུང་མེད་དོ། དེ་མེད་པས་གདུང་དེ་འདེགས་པའི་ཀ་བ་མེད་པས་སོ་སྙམ་དུ་དགོངས་སོ། །རྩིག་པའི་ཕྱིར་རོལ་གྱི་འདོད་སྣམ་ནི་རྩིག་པའི་འོག་མཐའ་ནས་
བསྐོར་བའི་ཚུལ་གྱིས་ཡོད་ལ། འོན་ཀྱང་སྒོའི་ཐད་ཀར་ཆད་ནས་མེད་པར་རྡོ་རྗེ་མཁའ་འགྲོར་བཤད་པ་ལྟར་གཞན་ཡང་མང་བས། གཞུང་ཁ་ཅིག་ལས། དྲན་པ་ཉེར་གཞག་བཞི་པོ་ནི། །ཁ་ཁྱེར་བཞིར་ན་ཤེས་པར་བྱ། ཞེས་གསུངས་སོ། །
9-5-84a


ཁ་ཁྱེར་དང་སྟེགས་བུ་དང་གཟུངས་དང༌། འདོད་པའི་སྣམ་བུ་ཞེས་པ་རྣམས་རྣམ་གྲངས་སོ། །ཁ་ཅིག་ཁ་ཁྱེར་ཞེས་པའི་ཚིག་ལ་འཁྲུལ་ནས། རྩིག་པའི་སྟེང་དུ་ཁ་ཁྱེར་གྱི་ཚུལ་དུ་འོང་བ་ཡིན་ཞེས་འདོད་པ་ལ། ཐམས་ཅད་གསང་
བར་མཐའ་མར་ཁྱམས་དང་ལྡན་པ་ཞེས་པའི་འགྲེལ་པར། དེ་བས་ན་དོན་གྱི་ཤུགས་ཀྱིས་ཕྱི་རོལ་གྱི་རིམ་པ་ཡང་མཐར་ཁྱམས་དང་ལྡན་པར་ཤེས་པར་བྱའོ། །ཞེས་ནང་གི་ལྷ་སྣམ་གྱི་ཤུགས་ཀྱིས་དེ་དང་མཉམ་པར་འདོད་ཡོན་གྱི་སྣམ་བུ་ཕྱི་རོལ་
དུ་བྱ་བར་བསྟན་པ་དང༌། རྡོ་རྗེ་རྩེ་མོར། ཀུན་ནས་ཕྱི་རོལ་གནས་དག་ཏུ། །རྡོ་རྗེ་ཁ་ཁྱེར་ཡང་དག་བརྟེན། །ཞེས་གཞལ་ཡས་ཁང་གི་ཕྱིར་འོང་བར་བཤད་པ་དང་འགལ་ཞིང༌། ནང་གི་བསྐལ་བཟང་གིས་གནས་ལྷ་སྣམ་ལའང་ནང་གི་ཁ་ཁྱེར་ཞེས་
བཤད་པས། དེའང་རྩིག་པའི་སྟེང་དུ་འོང་བར་ཐལ་བའི་ཕྱིར་རོ། །ཞེས་པ་ནི་ལེགས་པར་སྨྲས་པའོ། །དེའི་ཁ་དོག་ནི་ཕྲེང་བ་ལས། འདོད་ཡོན་སྣམ་བུ་ཤེལ་དང་གསེར་དང་པདྨ་རཱ་གའམ་རིན་པོ་ཆེ་གཞན་ལས་བྱས་པ་ཞེས་ཁ་དོག་མང་དུ་
གསུངས་སོ། །དེ་ལ་ནི་མཆོད་པའི་ལྷ་མོ་སྐུ་མདོག་སྣ་ཚོགས་པ། རྒྱན་དང་གོས་སྣ་ཚོགས་པ་དང༌། བཞུགས་སྟབས་སྣ་ཚོགས་པ་དང༌། ཕྱག་ན་མཆོད་རྫས་སྣ་ཚོགས་པ་ཐོགས་པ་རྣམས་འཁོད་དེ། གྲངས་ནི་བཅུ་དྲུག་ཏུ་སྡུད་པ་ལྟར་རོ། །སྣམ་བུ་དེ་
ནི་པཕྲང་བར། རྟ་བབས་ཀྱི་ཀ་བ་གནས་པའི་གཞི་དང་མཐོ་དམན་མཉམ་པར་གསུངས་པ་ལྟར་ཡིན་ལ། དེས་ནི་སྣ་ཚོགས་རྡོ་རྗེའི་རྭ་རྣམས་ཀྱང་གསལ་བར་འདོད་པ་ཙམ་དུ་བྱ་བར་ཤེས་སོ། །ཕ་གུ་ནི་གཞི་གོང་མ་རྣམས་སེར་པོར་བཞེད། ཕྲེང་
9-5-84b


བར་རྩིག་པ་ལྔ་སྦྲག་ཏུ་བྱེད་པ་ལྟར་ན་གཞི་དམར་པོ་དང༌། དེ་ལ་རིན་པོ་ཅེའི་སྣམ་བུ་ལ་ནི་ཟུར་གསུམ་དང་ཐིག་ལེ་དང༌། གྲུ་བཞི་དང་ཟླུམ་པོ་རྣམས་གོ་རིམས་བཞིན་དུ་རིན་པོ་ཆེས་སྤྲས་པ་ཞེས་གསུངས་པ་ལྟར་རོ། །དེའི་སྟེང་དུ་དྲ་བ་དྲ་ཕྱེད་ནི། གསེར་གྱི་
སྐ་རགས་བཞིའི་ཕྱི་ངོས་ཆུ་སྲིན་མ་ཀ་རའི་ཁ་ནས་འཕྱང་བ་སྟེ། དེ་ཡང་གཞི་ནག་པོར་བཤད་པས་པར་སྟོང་ལ་བར་སྐབས་སུ་སྐ་རགས་འདེགས་པའི་རིན་པོ་ཆེའི་བྲེ་ཕུལ་བྱ་ཞིང་སྟེང་གི་དཔངས་བྲི་བྱ་བཞིན་ནོ། །དེ་ལ་དོ་ཤལ་ནི་སྐུད་པ་དམར་པོ་
ལ་བརྒྱུས་པའི་མུ་ཏིག་གི་ཕྲེང་བ་གློ་གཉིས་དང་སྟེང་དང་འོག་ཏུ་གསེར་གྱིས་བཅིངས་པའི་ནོར་བུ་དབུས་ན་ཡོད་པའོ། །དོ་ཤལ་ཕྱེད་པ་ནི་དོ་ཤལ་གྱི་གློ་གཉིས་སུ་དོ་ཤལ་ལས་ཅུང་ཟད་ཐུང་བར་འཕྱང་བའི་རིན་པོ་ཆེའི་ཕྲེང་བ་དྲང་པོར་བྱ་བར་
གསུངས་པས། དོ་ཤལ་ན་ཁུག་པར་ཡོད་པས་བསྟན་ནོ། །དོ་ཤལ་ཕྱེད་པའི་རྩེ་མོ་ལ་གསེར་གྱིས་བསྡམས་པའི་ནོར་བུ་སྦོམ་པོ་དང༌། ཁ་ཅིག་ཏུ་རིན་པོ་ཆེའི་ཡུ་བ་ཅན་གྱི་རྡ་ཡབ་དང་དྲིལ་བུའི་མཐར་རྡ་ཡབ་འཕྱང་བའི་ཚུལ་གསུམ་གསུངས་པས་
རེ་རེའི་རྩེ་མོ་ལ་དེ་གསུམ་གང་རུང་རེ་བྱས་ཏེ་སྤེལ་ལོ། །དོ་ཤལ་གྱི་ནང་དུ་ཁ་ཅིག་ཏུ་ནི་པདྨ་ལ་ཟླ་ཚེས་དང༌། དེའི་སྟེང་དུ་ཉི་མ་ལ་རྡོ་རྗེ་ཕྱེད་པས་མཚན་པའོ། །ཁ་ཅིག་ཏུ་ནི་རིན་པོ་ཆེའོ། ཁ་ཅིག་ཏུ་ནི་པདྨ་ལ་གནས་པའི་རྡོ་རྗེ་བྱ་བར་གསུངས་ཏེ། ཕྱི་མ་འདི་རྡོ་རྗེ་རྫོགས་པའོ། །ཤར་
བུའི་སྣམ་བུ་ལ་རིན་པོ་ཆེ་དང་ཤར་བུ་འདྲི་བ་གདམ་ང་ཅན་དུ་བཤད་པའི་སྔ་མ་ནི་ཕ་གུ་དང་འདྲ་བར་མངོན་ལ། ཕྱི་མ་ནི་དཔྱལ་གྱིས་བསྒྱུར་བའི་ཀླུ་བྱང་གི་དཀྱིལ་ཆོག་ལས། ཟ་ར་ཚགས་དང་བྲེ་ཕྲེང་སོགས། ཞེས་ཤར་བུ་ཟ་ར་ཚགས་སུ་བསྒྱུར་བ་
9-5-85a


དང་མཐུན་ནོ། །འདི་བྲི་བྱ་ལ་དྲ་བའི་སྣམ་བུའི་སྟེང་ན་ཡོད་ཀྱང་དོན་ལ་ནི་སྣམ་བུ་དེའི་ཐད་ཀྱི་ཕྱི་ངོས་སུ་བྱ་འདབ་ཀྱི་ལྕམ་སྣེ་ལས་འཕྱང་བའོ། །བྱ་འདབ་ནི་བོད་ཀྱི་བླ་མ་རྣམས་གཞལ་ཡས་ཁང་དངོས་གཞིའི་ཐོག་བཀབ་པའི་ཕྱི་མཚམས་
ནས་གུད་དུ་འདོགས་པ་དང༌། ཞེས་འདོད་རྣམ་གྱི་མཐའ་དང་མཉམ་པ་ཙམ་དུ་བཞེད་པ་ལ། སྒོ་ཁྱུད་དང་སྒོ་འགྲམ་གྱི་ཐད་དུ་ཚད་དེ་བྱས་མི་བདེ་བས་བཞེངས་པ་ལ་གཅིག་ཕག་ཏུ་གཅིག་སོང་བ་ལ་སོགས་པའི་ཐབས་ཀྱིས་ཅི་མཛེས་བྱ་གསུང་ངོ༌། 
མདའ་ཡབ་ནི་རྩི་ཐིག་ནས་ཆ་ཆུང་བརྒྱད་སོང་བའི་ཆ་ཆུང་བརྒྱད་པ་ལ་ཡོད་ན་གཞལ་ཡས་ཁང་མཛེས་ཀྱི། བདུན་པ་ཚུན་ཆད་དུ་བྱས་ན་ཤར་བུ་རྣམས་མགོ་བཅད་པ་ལྟར་འགྱུར་བས་མི་མཛེས་པར་གསུངས་པས། འོག་གི་ཤར་བུ་གང་ན་ཡོད་
པའི་སྟེང་ཉིད་ན་ཡོད་པར་བྱའོ། །འདིའི་སྐད་དོད་ཀྲ་མ་ཤཱིརྵ་ཞེས་བ་དྲང་པོར་བསྒྱུར་ན་མགོ་བོའི་རིམ་པར་འགྱུར་རོ། །འདི་བྲི་བྱ་ལ་དར་དཔྱངས་ཀྱི་ཐིག་གི་བར་ལས་མེད་ཀྱང༌། བསྒོམ་བྱ་ལ་སྒོ་ལོགས་ཀྱི་སྟེང་གི་བར་དུ་ཡོད་པས་གསུངས་བས། དེའི་
འོག་གི་ཤར་བུ་དང་དྲ་བ་དྲ་ཕྱེད་དང་ཕ་གུ་རྣམས་ཀྱང་དེ་ཙམ་དུ་ཡོད་དོ། །མདའ་ཡབ་ཀྱི་དབྱིབས་ནི་པདྨ་འདབ་མ་ཕྱེད་པའི་དབྱིབས་ཅན་དུ་ཕྲེང་བར་གསུངས་ཤིང༌། དེ་ལ་རྒྱལ་མཚན་དང་བ་དན་ནི་ཕྲེང་བ་ལས། ཕྱོགས་རྣམས་སུ་པདྨ་འདབ་མ་ཕྱེད་
པའི་དབྱིབས་ཅན་གྱི་མདའ་ཡབ་རྣམས་ལ་གསེར་གྱི་བུམ་པའམ་རིན་པོ་ཆེའི་བུམ་པ་ལ་གནས་བའི་རྒྱལ་མཚན་ནམ་བདན་བརྒྱད་དེ་ཞེས་གསུངས་པ་ལྟར་གཟུགས། འཛུགས་ས་ནི། ཁ་ཅིག་མདའ་ཡབ་ཀྱི་སྣམ་བུ་ལ་བྱའི། མདའ་
9-5-85b


ཡབ་ཡིན་པའམ་ཡང་ན་མདའ་ཡབ་ཀྱི་དཔུང་པ་ལ་བཞེད་མོད་ཀྱང༌། པདྨ་ཕྱེད་པའི་དབྱིབས་ཅན་གྱི་མདའ་ཡབ་ཅེས་གསལ་བར་གསུངས་པས་མདའ་ཡབ་ཡིན་ཞིང༌། དེའི་ཡང་དཔུང་པ་གཉིས་ཀྱི་དབུས་མ་ལ་བུམ་པ་ཡོད་པའི་ཁར་གཟུག་གོ །
རྒྱལ་མཚན་ནི་ཟླ་ཚེས་དང་རིན་པོ་ཆེ་དང་རྡོ་རྗེ་དང་ལྡན་པའི་རྩེ་མོ་ཅན་གྱི་རིན་པོ་དེའི་དབྱུག་པ་ལ་བཅིངས་ཤིང༌། དྲིལ་བུ་འཁྲོལ་པ་བཅིངས་པའི་དར་ལྕེ་གསུམ་པ་རྩེ་མོ་ལ་རི་དྭགས་ཀྱི་རྒྱལ་པོ་དང༌། དང་པའི་རྒྱལ་པོ་དང༌། ཀླུ་ཟ་བ་དང་ཉ་སྒུ་
རྒྱས་པ་དང༌། ཆུ་སྲིན་གྱིས་མཚན་པ། རླུང་གིས་བསྐྱོད་པས་སུམ་ཁུགས་སུ་འཁྱོག་ཅིང་འགྱིང་བའི་ཆ་བྱད་ཅན་དྲིལ་ཆུང་གི་སྒྲ་སྒྲོགས་པ་ལས་སིལ་སིལ་ཞེས་ཟེར་བ་རྔ་ཡབ་དང་བཅས་པའོ། །སྲོག་ཆགས་ཀྱི་མཚན་མ་བྱེད་པའི་རྩེ་མོ་
ནི་དར་ལྕེའི་རྩེ་མོའི། །བདག་ཡང་སྲོག་ཆགས་ཀྱི་མཚན་མ་མ་གཏོགས་པ་དེ་དང་འདྲའོ། དེ་རྣམས་ནི་ཕྱོགས་རེ་རེར་བཞི་བཞིའོ། །གཉིས་པ་ལ་གཉིས། ནང་གི་འཁོར་ལོ་བཤད་པ་དང༌། ཀ་བ་དང་ཐོག་བཤད་པའོ། །དང་པོ་ལ་གསུམ། ནང་
གི་འཁོར་ལོའི་ཁ་དོག་བཤད་པ་དང༌། འཁོར་ལོའི་རྒྱ་ཚད་བཤད་པ་དང༌། འཁོར་ལོའི་དཔངས་ཚད་བཤད་པའོ། །དང་པོ་ནི། དཀྱིལ་འཁོར་གྱི་ནང་གི་ཁ་དོག་ནི་རྡོ་རྗེ་མཁའ་འགྲོར། ཕྱོ་རོལ་ཤར་ནི་ཤིན་ཏུ་དཀར། །ལྷོ་ནི་སེར་ཞིང་ནུབ་ནི་
དམར། །བྱང་ནི་ལྗང་གུར་གསུངས་པ་སྟེ། དེ་ལྟར་འདི་ཡི་ཆོ་ག་ཡིས། །སངས་རྒྱས་བཞི་ཡི་གདན་དུ་གནས། །ཞེས་གསུངས་ཤིང་རྐང་པ་བཞི་པས་ནི་ཕྱོགས་བཞིའི་ཁ་དོག་བཞི་བཤད་ལ། དེ་ཡང་རྣམ་སྣང་ལ་སོགས་པ་བཞི་
9-5-86a


བཞུགས་པའི་གནས་ཀྱི་སྒོ་ནས་བྱ་བར་གསུངས་ཏེ་ཕྲེང་བ་དང་མཐུན་ནོ། །སྡོམ་འབྱུང་ལས་ཀྱང་ཕྱོགས་བཞིའི་མདོག་དེ་བཞིན་དུ་བཤད་ཅིང༌། དབུས་ཀྱི་ས་གཞི་སྔོན་པོར་བཤད་དེ་དེ་ནི་སྔ་མ་ལ་ཡང་ཤེས་པར་
བྱའོ། །འདི་ལ་རྒྱལ་བ་བཟང་པོས་ནང་གི་ཕྱོགས་བཞིའི་མདོག་གཙོ་བོའི་ཞལ་བཞིའི་ཁ་དོག་གིས་འབྱེད་ལ། དབུས་ཀྱི་ཁ་དོག་ནི། དཀར་སྔོན་དུ་བྱེད་པ་ཡབ་ཀྱི་རིགས་བདག་མི་བསྐྱོད་པ་དང༌། ཡུམ་གྱི་རིགས་བདག་རྣམ་སྣང་ཡིན་པ་ལ་
བསམས་པ་སྟེ། རྡུལ་ཚོན་ཤར་དང་བྱང་དང་ནི། །ནུབ་དང་ལྷོ་ཕྱོགས་ཉིད་དུ་ནི། དེ་ལ་སོགས་པ་ཕྱོགས་ཀྱི་ཆ། །ཞལ་གྱི་མདོག་ཏུ་བྲི་བའོ། །དཀར་པོ་སྔོན་པོ་བསྲེས་པའི་དོག །དབུས་ཀྱི་ཆར་ནི་བྲི་བར་བྱ། ཞེས་བཤད་ཅིང༌། རྩིག་བའི་རིམ་པ་
ཡང་ཕྱི་ནས་སྔོ་སེར་དམར་ལྗང་དཀར་བར་བཤད་དོ། །དབུས་སྔོ་བ་དང་ལྷག་མ་ཕྱོགས་མདོག་ཏུ་བྱེད་པའི་ས་མཚམས་ནི་ནག་པོ་སྤྱོད་པས། ཨིནྡྲ་ནཱི་ལའི་ས་གཞི་ལ། འཁོར་ལོ་གསུམ་གྱི་བདག་ཉིད་བསམ། ཞེས་དང༌། རྩ་ཐིག་ནས་ནང་དུ་
ལྷ་སྣམ་སྒོ་ཚད་ཕྱེད་བྱ་བར་བཤད་པས། ལྷ་སྣམ་རྫོགས་མཚམས་ནས་དབུས་སུ་བྱ་ལ། ལྷ་སྣམ་ཕྱོགས་མདོག་ཏུ་བྱའོ། ལཱུ་ཨི་པ་ལ་ཡང་ལང་ཀས། ཕྱོགས་སུ་སྐུ་འཁོར་གྱི་མུ་ཁྱུད་དང༌། རྩ་ཐིག་གི་བར་ན་ལྷ་སྣམ་མེད་པར་བཤད་ལ། འོན་
ཀྱང་སྔོན་པོ་ལ་སོགས་པའི་ཕྱོགས་མདོག་ཀྱང་བྱ་བར་བཤད་དོ། །ཕྱོགས་མདོག་དང་དབུས་ཀྱི་མཚམས་ནི་ཕྲེང་བ་ལས། སྐུ་འཁོར་གྱི་ཟླུམ་ཐིག་ཕྱི་མ་རྩ་ཐིག་ལ་ཐུག་པར་བསྐོར་བ་ཡང་ཡིན། སྐུ་འཁོར་གྱི་རྩིབས་ཀྱི་བར་རྣམས་ཀྱི་ཁ་དོག་
9-5-86b


ནི་ཤར། དཀར་ལྷོ་སེར་ནུབ་དམར་བྱང་ལྗང་གུར་བྱེད་བ་ལྟར་ན། བདེ་ཆེན་འཁོར་ལོའི་མཚམས་ནས་དབུས་སུ་བྱེད་པར་མངོན་ནོ། ཕྲེང་བར་རྩིག་པ་ཕྱི་ནས་ལྗང་དཀར་དམར་སེར་སྔོ་བར་བཤད་པ་ནི། ཕྱི་ནས་ནང་དུ་དག་ཚིག་སྐུ་གསུང་བདེ་ཆེན་གྱི་
འདབ་མའི་ལྷ་དང༌། དབུས་ཀྱི་གཙོ་བོའི་དབང་དུ་བྱས་ལ། གསུང་གི་རྗེས་ཐོགས་སུ་ཐུགས་ཀྱི་ལྷ་ཡོད་ཀྱང༌། ཐུགས་ཀྱི་རིགས་ཀྱི་གཙོ་བོ་དབུས་ན་ཡོད་པ་དབང་བཙན་པར་བྱས་པའོ། །འོག་གི་ཕྱོགས་མདོག་གཞིན་དུ་སྟེང་གི་ཐོག་གི་མདོག་ཀྱང་བྱ་
བར་བཤད་དོ། དེ་ལ་འཁོར་ལོ་ལྔ་ལས། དབུས་སུ་ཐུགས་འཁོར་གྱི་ལྟེ་བའི་ནང་དུ་བདེ་ཆེན་གྱི་འཁོར་ལོ་ནི། ལཱུ་ཨི་པས་དབུས་སུ་པདྨ་འདབ་མ་བརྒྱད་པར་གསུངས་པའོ། །དེ་ཡང་རྡོ་རྗེ་མཁའ་འགྲོ་ལས། དབུས་སུ་སྣ་ཚོགས་པདྨ་ནི། །གེ་སར་དང་
ནི་ལྡན་པ་ལ། །ཞེས་སྣ་ཚོགས་པདྨར་གསུངས་ཏེ། དེའི་ཁ་དོག་ནི་སྔར་བཤད་ཟིན་ཏོ། དེའི་ལྟེ་བར་ཉི་གདན་དམར་པོ་དང༌། དེའི་སྟེང་དུ་འཇིགས་བྱེད་དང་དུས་མཚན་གྱི་གདན་ཏེ། ཁ་དོག་ནི་འཆད་པར་འགྱུར་རོ། །འདི་ལ་མངོན་བརྗོད་དང་ལཱུ་ཨི་པའི་
གཞུང་འགྲེལ་རྣམས་དང༌། ནག་པོ་སྤྱོད་པ་དང༌། འཁྲུལ་སྤོང་ལས་ཕྲེང་བ་མ་བཤད། མཁའ་འགྲོ་རྒྱ་མཚོ་ལས་གསུངས་པ་ལྟར་རྒྱལ་དཀའ་ཟླ་བ་དང་བྱང་ཆུབ་རྡོ་རྗེའི་སྒྲུབ་ཐབས་སུ། རིན་པོ་ཆེའི་ཕྲེང་བ་བཤད་དེ། སྙིང་པོའི་རྣལ་འབྱོར་མ་བཞི་རིམ་
འབྱུང་གི་རིགས་སུ་འཇོག་པ་ལ་བསམས་པ་འདྲ། དཱ་རི་ཀ་པ་དང་དྲིལ་བུ་པས་གྲི་གུག་གི་ཕྲེང་བས་བསྐོར་བར་བཤད་ཅིང༌། བླ་མ་སྔ་མ་རྣམས་ཀྱང་དེ་བཞིན་དུ་བཞེད་དོ། །དེའི་ཕྱི་རོལ་ཏུ་གསུང་འཁོར་གྱི་ལྟེ་བའི་སྟེང་དུ། འཁོར་ལོ་གསུམ་གྱི་དང་
9-5-87a


པོ་ཐུགས་ཀྱི་འཁོར་ལོ་ནི་རྩིབས་བརྒྱད་པ། ཁ་དོག་སྔོན་པོ་རྡོ་རྗེ་སྔོན་པོའི་ཕྲེང་བའི་མུ་ཁྱུད་ཀྱིས་རྣམ་པར་བརྒྱན་པའོ། །དེའི་རྩིབས་ཀྱི་བར་སྟོང་རྣམས་ནི་དམར་པོ་སྟེ། གསུང་འཁོར་གྱི་ལྟེ་བ་ཡིན་པའི་ཕྱིར་རོ། དེའི་ཕྱི་རོལ་ཏུ་
སྐུ་འཁོར་གྱི་ལྟེ་བའི་སྟེང་དུ། གཉིས་པ་གསུང་གི་འཁོར་ལོ་ནི་རྩིབས་བརྒྱད་པ་དམར་པོ། པདྨ་དམར་པོའི་ཕྲེང་བའི་མུ་ཁྱུད་ཀྱིས་ཡོངས་སུ་བསྐོར་བའོ། །དེའི་བར་སྟོང་རྣམས་ནི་དཀར་པོ་སྟེ་སྐུ་འཁོར་གྱི་ལྟེ་བ་ཡིན་པའི་ཕྱིར་རོ། དེའི་ཕྱི་རོལ་ཏུ་
གསུམ་པ་སྐུའི་འཁོར་ལོ་ནི་རྩིབས་བརྒྱད་པ་དཀར་པོ། འཁོར་ལོ་དཀར་པོའི་ཕྲེང་བའི་མུ་ཁྱུད་ཀྱིས་རྣམ་པར་བརྒྱན་པའོ། དེའི་བར་སྟོང་གི་ཕྱོགས་ཀྱི་ཁ་དོག་ནི། རྣམ་སྣང་ལ་སོགས་པའི་མདོག་ཏུ་ཕྲེང་བར་གསུངས་པ་ལྟར་ན། ཕྱོགས་མདོག་
མཚམས་འདི་བར་དུ་བྱེད་པ་འདྲ་སྟེ་བརྟག་གོ། འཁོར་ལོ་གསུམ་དཀར་དམར་སྔོ་བ་དང༌། ཕྲེང་བ་གསུམ་གྱིས་བསྐོར་བ་ནི་མངོན་བརྗོད་ལས་གསུངས་ལ། བར་སྟོང་གི་ཁ་དོག་དང༌། རང་གི་འཁོར་ལོ་སྔ་མའི་ལྟེ་བར་ཕྱི་མ་རྣམས་གནས་པར་ཕྲེང་བར་
བཤད། རྡོ་རྗེ་མཁའ་འགྲོ་རྩ་འགྲེལ་ལས། མུ་ཁྱུད་གསུམ་གྱིས་བསྐོར་བའི་འཁོར་ལོ་དཀར་དམར་སྔོ་བ་གསུམ། པདྨ་འདབ་བརྒྱད་པར་གསུངས་སོ། །འཁོར་ལོ་ལྔ་པ་དམ་ཚིག་གི་འཁོར་ལོ་ནི་དཀྱིལ་འཁོར་གྱི་ནང་གི་འོག་གཞི་སྟེ། དེ་ལ་
སྣ་ཚོགས་རྡོ་རྗེའི་ཕྲེང་བས་བསྐོར་བར་མངོན་བརྗོད་ལས་གསུངས་པ་བཞིན། རྒྱལ་དཀའ་ཟླ་བ་དང༌། བྱང་ཆུབ་རྡོ་རྗེ་སོགས་ཀྱིས་བཤད་ཀྱང༌། ལོ་ནག་གཉིས་ལ་ནི་དེ་མེད་དོ། །སྒོ་མཚམས་མ་བརྒྱད་ལ་རོ་གདན་བཤད་པའི་ཁ་དོག་ནི་མངོན་བརྗོད་
9-5-87b


ལས། ཕྱི་རོལ་གྱི་དུར་ཁྲོད་དུ་ཡི་དྭགས་ལྔས་བསྐོར་བར་བཤད་པ་ལ། རྒྱལ་དཀའ་ཟླ་བས་ཡི་དྭགས་ཁ་དོག་ལྔ་ཞེས་དང༌། བྱང་ཆུབ་རྡོ་རྗེས་རིགས་ལྔའི་རོས་བསྐོར་བར་བཤད་པ་ལྟར་ན། རོ་གདན་ལ་དབུས་དང་ཕྱོགས་མདོག་ཅན་བྱ་
དགོས་པ་འདྲའོ། །མངོན་བརྗོད་འགྲེལ་པར་ནི་རྩིག་པ་ལྔ་རོའི་གཟུགས་ཅན་གྱིས་བསྐོར་བ་ལ་བཤད་དོ། །ཕྲེང་བར་ཀ་བ་རྣམས་ཕྱོགས་མདོག་དང༌། དཀྱིལ་འཁོར་གྱི་སྟེང་གི་ཐོག་གི་ཕྱོགས་བཞི་དང་དབུས་ཀྱི་ཁ་དོག་ནི། འོག་གི་ཁ་དོག་
བཞིན་བྱ་བར་བཤད་དོ། །གཉིས་པ་ནི། གཞལ་ཡས་ཁང་གི་ནང་གི་འཁོར་ལོ་རྣམས་ལ་རྒྱ་དཔངས་ཀྱི་ཚད་ཇི་ལྟར་ཡིན་སྙམ་ན། འདི་ལ་སྐུ་འཁོར་གྱི་ཟླུམ་ཐིག་ཕྱི་མ་རྩ་ཐིག་ལ་ཐུག་པར་བསྐོར་བ་དང༌། མི་བསྐོར་བའི་ལུགས་གཉིས་
ལས། མངོན་བརྗོད་དུ་མི་གསལ་ལ། མཁའ་འགྲོ་རྒྱ་མཚོར་དཀྱིལ་འཁོར་བཞི་སྦྲག་བཤད་པའི་ནང་མ་ལྷ་རེ་གཉིས་པ་ལ། སྐུ་འཁོར་དང་རྩ་ཐིག་གི་བར་དུ་ལྷ་སྣམ་ངེས་པར་འཇོག་སྟེ། བསྐལ་བཟང་རྣམས་འགོད་པའི་གནད་ཀྱིས་སོ། །འཁོར་ལོ་
ལྔ་ལ་ལྷ་རེ་གཉིས་མིན་པ་མི་འགོད་ཅིང༌། རྒྱལ་བ་བཟང་པོས་སྐུ་འཁོར་གྱི་ཟླུམ་ཐིག་ཕྱི་མ་རྩ་ཐིག་ལ་ཐུག་པར་བསྐོར་ལ། དེ་དང་མཐུན་པར་ཨ་བྷྱ་ཀ་ར་དང༌། དེ་བཞིན་གཤེགས་པའི་རྡོ་རྗེས་ཀྱང་མཛད་དོ། ནག་པོ་སྤྱོད་བའི་དཀྱིལ་ཆོག་ལས། 
རྩ་ཐིག་ནས་ནང་དུ་ལྷ་སྣམ་དོར་ནས་སྐུ་འཁོར་མཛད་པ། དཱ་རི་ཀ་པས་དཀྱིལ་ཆོག་ལས་ནང་དུ་ཆ་ཆེན་གཅིག་གི་ལྔ་ཆ་དོར་བ་ནས་སྐུ་འཁོར་བྱེད་དོ། །བོད་ཀྱི་མཁས་པ་དག་ལྷའི་སྐུ་ཚད་ལ་ཆ་ཆེན་གཅིག་ལས་ལྷག་པར་
9-5-88a


བྱས་ན། པདྨའི་ལྟེ་བ་དང་འཁོར་ལོའི་རྩིབས་ལ་སོགས་པ་ལ། ལྷའི་གཡས་བརྐྱང་གི་སྟབས་མི་ཤོང་བའི་སྐྱོན་དུ་འགྱུར་རོ། །ཞེས་གསུངས་ཤིང༌། སྐུ་ཚད་ཆ་ཆེན་གཅིག་ཏུ་བཞེད་ལ། ནག་པོའི་དཀྱིལ་
ཆོག་ལས། འཁོར་ལོའི་རྩིབས་དང་པད་འདབ་མཉམ་པར་བཤད་ཅིང༌། ཐིག་གཞན་གསལ་བར་མ་གསུངས་པ་ལ། ཆ་བགོ་ལུགས་ནི་བདེ་ཆེན་འཁོར་ལོ་ལ་མུ་ཁྱུད་མེད་པར་བྱེད་ན། ལྷ་སྣམ་ཡན་ཆད་ཀྱི་ཆ་ཆེན་གསུམ་པོ་ཆ་
བདུན་བདུན་དུ་བགོས་ལ། གཉིས་ལ་པད་མའི་ལྟེ་བ། བཞི་ལ་པད་འདབ། འཁོར་ལོ་གསུམ་པོ་ལ་བཞི་བཞི། མུ་ཁྱུད་གསུམ་པོ་ལ་རེ་རེའོ། །བདེ་ཆེན་འཁོར་ལོ་ལ་ཕྲེང་བ་ཡོད་པ་བྱེད་ན། ཆ་ཆེན་གསུམ་པོ་ཆ་མཉམ་ཉེར་གཉིས་སུ་
བགོའོ། །གཉིས་ལ་པད་མའི་ལྟེ་བ། བཞི་ལ་པད་འདབ་གཅིག་ལ་གྲི་གུག་གི་ཕྲེང་བ། འཁོར་ལོ་རྣམས་ལ་བཞི་བཞི། མུ་ཁྱུད་རྣམས་ལ་རེ་རེ་སྔར་དང་འདྲའོ། །ཞེས་གསུང་ངོ་། །འདི་ལ་ལྷའི་གནས་ཀྱི་ཚད་བཤད་པ་ལ་ལྷ་དེའི་
གཡས་བརྐྱང་གི་སྟབས་ཤོང་མི་ཤོང་དཔྱོད་པ་ནི་དཔྱོད་ཚུལ་ལེགས་ཀྱང༌། ལྷའི་གནས་སུ་གཡས་བརྐྱང་མི་ཤོང་བའི་སྐྱོན་ནི། རང་གི་ལུགས་དེ་ལའང་འོད་སྟེ། ལྷའི་སྐུ་ཚད་ཆ་ཆེན་གཅིག་ཏུ་བྱེད་ན། རང་གི་ཁྲུར་ཆ་ཆུང་རེའི་ཚད་དུ་འགྱུར་
རོ། །དེ་ལྟ་ན་ལྭ་བ་པ་དང་པྲཛྙཱ་རཀྵི་ཏའི་འགྲེལ་པ་དང༌། ཕྲེང་བ་སོགས་ལས་ཀྱང༌། གཡས་བརྐྱང་མཐོ་ལྔར་གསུངས་པས། གཅོ་བའི་གནས་ལ་ཆ་ཆུང་ཕྱེད་པ་ལྡ་དགོས་ན། གཙོ་བོའི་གནས་ལ་ནི། ཆ་ཆེན་གཅིག་གི་བདུན་ཆ་བཞི་ལས་མེད་པའི་ཕྱིར་རོ། །ཆ་ཆེན་གསུམ་
9-5-88b


ཆ་མཉམ་ཉེར་གཅིག་ཏུ་བགོས་པའི་ཆ་བཞི་ལ་ཆ་ཆུང་ཕྱེད་པ། ལྔ་མེད་ན། དེ་གསུམ་ཆ་མཉམ་ཉེར་གཉིས་སུ་བགོས་པའི་བཞི་ཆ་ལའང་ཆ་ཆུང་ཕྱེད་པ་ལྔ་མི་འོང་བས་མི་འགྲིག་གོ། འོ་ན་ཇི་ལྟར་བྱ་སྙམ་ན། ནག་པོའི་དཀྱིལ་ཆོག་ལས། སྒོ་ནི་འཁོར་ལོའི་བརྒྱད་
ཆ་སྟེ། །ཁྱམས་ནི་དེ་ཡི་ཕྱེད་དུ་བྱ། སྒོ་ཁྱུད་དག་ནི་སྒོ་ཡི་ཚད། །ལྷ་ཡི་སྣམ་བུ་དེ་བཞིན་ཏེ། །ཞེས་ལྷ་སྣམ་དང་ཁྱམས་སོ་སོར་གསུངས་པས་ཁྱམས་ནི་འདོད་སྣམ་མོ། །དེ་བཞིན་ཞེས་པ་ནི་ཁྱམས་ལ་སྙོག་པ་ཡིན་གྱི། སྒོ་ཚད་ལ་སྙོག་པ་མིན་
ཏེ། དེ་ལ་བྱས་ན་སྐྱོན་སྔར་ལྟར་འོང་བའི་ཕྱིར་རོ། །དེས་ན་ཕྱོགས་གཅིག་གི་ལྟེ་བ་ལ་ཆ་བྲན་གཉིས། འདབ་མ་ལ་ཆ་བྲན་ཕྱེད་དང་གསུམ། འཁོར་ལོ་གསུམ་ལའང་དེ་དང་མཉམ་པར་བྱ། མུ་ཁྱུད་བཞི་ལ་ཆ་བྲན་ཕྱེད་ཕྱེད་བྱས་ན་ལེགས་སོ། །ལྭ་
པ་པའི་རྩ་རྒྱུད་ཀྱི་འགྲེལ་པར། རེའུ་མིག་བདུན་བདུན་ལྡན་པར་ནི། །ཐིག་སྐུད་བསྐོར་བ་མཆོག་ཡིན་ནོ། །འཁོར་ལོ་སྙིང་པོ་དེ་ལས་དྲུག །རྩིབས་ཀྱིས་མཛེས་པ་དེ་ལྟར་བྱ། །ལྟེ་བ་དང་ནི་པདྨ་རྣམས། །རེའུ་མིག་གཞི་དང་གསུམ་དུ་བྱ། །ཚངས་པ་ཡི་
ནི་ངོས་གཉིས་སུ། །རྩིབས་ཀྱི་ནང་དུ་མཛེས་པར་བྱ། གསུམ་པོ་ཉིད་ནི་ཐམས་ཅད་དུ། །རྟག་ཏུ་རྫོགས་པ་ཉིད་དུ་བྱ། །ཞེས་གསུངས་ཤིང༌། དེ་ནས་རྡོ་རྗེ་པདྨ་འཁོར་ལོའི་ཕྲེང་བས་བསྐོར་བ་དང༌། ལྷག་མ་ཅི་མཛེས་སུ་བྱ་བར་བཤད་པའི་དོན་
ནི། ལྷ་སྦས་ཀྱི་འགྲེལ་པ་བཞིན་ཤེས་པར་བྱ་སྟེ། འདི་གཉིས་ཐན་ཐུན་མ་གཏོགས་པ་ཐམས་ཅད་འདྲ་བའི་ཕྱིར་རོ། །དེ་ལྟར་ན་ལྷ་སྦས་ཀྱི་འགྲེལ་པར། ཚངས་ཐིག་གི་ལོགས་རེ་རེར་ཆ་བརྒྱད་བརྒྱད་དུ་བཤད་པ་ནི། ཆ་ཆེན་དུ་སྣང་ལ། དེ་ནས་
9-5-89a


དེ་ལ་ཆ་རེ་བཞིར་བཤད་པ་ནི་ཆ་ཆུང་ངོ༌། །དེ་ནས་བདེ་ཆེན་འཁོར་ལོ་དང༌། །ཐུགས་དང་གསུང་སྐུའི་ཚད་བྱ་བ། །ཆ་བྲན་བདུན་བདུན་དང་མཉམ་ལྡན། །སྐུད་པ་མཆོག་གིས་བསྐོར་བར་བྱ། །འཁོར་ལོའི་རྩིབས་ནང་ཆ་བྲན་དྲུག །དེ་
ཡིས་མཛེས་པར་བརྒྱན་པར་མཐོང༌། །ལྟེ་བའི་ཚད་དང་འདབ་མ་རྣམས། །ཆ་བྲན་བཞི་དང་གསུམ་ཉིད་དུ། །བྱ་བ་འདབ་མ་ཡིས་མཛེས་པའོ། །ཞེས་བཤད་པས་རེའུ་མིག་བདུན་ནི་ཆ་ཆུང་བདུན་ཡིན་གྱི། ཆ་ཆེན་རེ་ལ་ཆ་བརྒྱང་དུ་བྱས་པའི་ཆ་
བདུན་དུ་འཆད་པ་དོན་མིན་ནོ། །ལྟེ་བའི་ཚད་ཆ་ཆུང་བཞིར་བཤད་པ་ནི། ཕྱོགས་གཉིས་ཀ་ལ་བྱའི་ཕྱོགས་གཅིག་མིན་ནོ། །ཆ་ཆུང་གསུམ་གྱི་འདབ་མ་ནི་ཕྱོགས་རེའི་འོ། །རྩིབས་ལ་ཆ་ཆུང་དྲུག་བཤད་པ་ནི་ཕྱོགས་གཉིས་བསྡོམས་པའི་འོ། །ཆ་
ཕྲན་རེ་རེ་ཕྲེང་བའི་གནས། །ཞེས་པ་ནི། འཁོར་ལོ་གསུམ་གྱི་ཕྲེང་བའི་ཚད་ལ་ཆ་བྲན་རྫོགས་པ་རེ་བྱས་ན་མི་འགྲིག་པས། དེས་ན་ལྷག་མ་ཇི་ལྟར་མཛེས་པའི་དོན་ནི། ཆ་ཕྲན་བཅུ་བཞིའི་ལྷག་མ་ཇི་མཛེས་སུ་བྱ་བར་བསྟན་པས། པདྨ་འདབ་བརྒྱད་ལ་མུ་ཁྱུད་མ་
གསུངས་ཀྱང་དགོས་པས། མུ་ཁྱུད་རེ་རེ་ལ་ཆ་ཆུང་ཕྱེད་པ་རེ་བྱའོ། །འོ་ན་དཱ་རི་ཀ་པའི་དཀྱིལ་ཆོག་ལས། ཚངས་པའི་ཐིག་གི་ངོས་རེ་རུ། །རེ་རེ་ལྔར་བྱ་ཉི་ཤུར་གདབ། །ཕོ་བྲང་ལ་གཉིས་གེ་སར་གཅིག །གསུམ་གསུམ་གྱིས་ནི་འཁོར་ལོ་རྣམས། །ཀ་
བ་རྡོ་རྗེ་གྲི་གུག་ཕྲེང༌། །པདྨ་འཁོར་ལོ་རེ་རེ་བྱ། །གཅིག་གིས་ཕྱི་ཡི་ཁྱམས་ཡིན་ཏེ། །ཞེས་བཤད་པ་ལ་དབུས་ཀྱི་གཙོ་བོའི་གནས་ལ་མི་འགྲིག་པ་མེད་ཀྱང་པད་འདབ་སོགས་ལ་ཆ་ཆུང་ཕྱེད་པ་ལྔ་མེད་པས། སྐྱོན་སྔ་མ་བཞིན་དུ་མི་འགྱུར་བ་ཇི་
9-5-89b


ལྟར་བྱ་སྙམ་ན། འདི་ནི་བྲི་བྱ་ལ་སྐུ་མ་བཀོད་ཀྱང༌། ཕྱག་མཚན་དང་ཡི་གེ་བཀོད་པས་ཀྱང་ཆོག་པ་ལ་དགོངས་པ་འདྲ་སྟེ་བརྟག་གོ། མཁའ་འགྲོ་རྒྱ་མཚོར་ངོས་རེར་ཐིག་སོ་གཉིས་སུ་གདབ་པར་གསུངས་པ། རྩ་ཐིག་ཚུན་ཆད་ཀྱི་ཕྱོགས་རེའི་ཆ་ཆེན་
རེ་རེ་བརྒྱད་བརྒྱད་དུ་བགོས་པར་འཆད་པ་དོན་མིན་པ་ནི། དེའི་ལེའུ་བཅུ་པ་དང་ཉེར་བཞི་པ་གཉིས་བསྒྲིགས་ཏེ། ཛ་ཡ་སེ་ནའི་དཀྱིལ་ཆོག་ལ་བལྟས་པས་ཤིན་ཏུ་གསལ་བར་ཤེས་སོ། ལང་ཀ་དང་ཨ་བྷྱ་ཀར་དང༌། གི་བྷུ་ཏིའི་ལུགས་ལྟར་ན་གཙོ་བོའི་
གནས་ལའང་ཆ་ཆུང་ཕྱེད་དང་གསུམ་ཡོད་དོ། །བྲིས་སྐུ་བཞེངས་ནའང་ཐིག་ཚོན་བྱིན་བརླབས་དང༌། ཐིག་བཤད་ཚོད་བཞིན་བཏབ་ན་ཁྱད་ཆེ་ལ། འོན་ཀྱང་ཐིག་འདེབས་པ་རྣམས་ཚོན་གྱི་དཀྱིལ་འཁོར་གཅོ་བོར་མཛད་ནས་གསུངས་སྣང་བས། ཆ་ཆུང་
ཕྱེད་དང་གསུམ་པ་ལའང་ཆུང་སྐྱོན་ཆེ་བར་སྣང་ངོ་། །ལྷ་རྣམས་མེད་པའི་ལུགས་དང༌། མུ་ཁྱུད་ཆུང་ཤོས་ཀྱི་ལུགས་དང༌། གཙོ་བོའི་གནས་ཆེ་བའི་ལུགས་དང༌། དེ་ལ་ཡང་སྣོན་པ་ཇི་ལྟར་རིགས་པར་འདེབས་པ། ཕན་ཚུན་གུང་བསྒྲིགས་ཏེ་བྱས་ན་
ལེགས་སམ་སྙམ་མོ། །གསུམ་པ་ནི། འཁོར་ལོ་ལྔ་གཅིག་སྟེང་དུ་གཅིག་བརྩེགས་པར་འདོད་དགོས་ནའང༌། མཐོ་དམན་ཇི་ཙམ་རེ་ཡོད་པ་ནི། བདེ་མཆོག་གི་སྐར་གྱི་གཞུང་གཞན་ནས་མི་གསལ་ལ། ལང་ཀ་རྒྱལ་བཟང་གི་དཀྱིལ་ཆོག་ལས། རྩིབས་
ནི་བརྒྱད་བརྒྱད་འཁོར་ལོ་ནི། དེ་ནི་འཕར་མ་སུམ་རྩེག་གོ། དཔའ་བོ་མགོན་པོའི་ཞབས་ནས་ནི། །རྐེད་པའི་བར་དུ་གནས་པ་སྟེ། །སྐུ་ཡི་འཁོར་ལོ་འདི་བརྗོད་པ། །སྟོབས་པོ་ཆེ་ལ་སོགས་བརྒྱད་དོ། །རྐེད་པའི་ཕྱོགས་ནས་བརྩམས་ནས་ནི། །ནུ་མ་གཉིས་
9-5-90a


བར་ཡང་དག་གནས། །གསུང་གི་འཁོར་ལོ་ཇི་ལྟ་བར། །མྱུ་གུ་ཅན་ལ་སོགས་བརྒྱད་དོ། །ནུ་མ་ནས་ནི་བརྩམས་ནས་སུ། །མགྲིན་པའི་བར་དུ་གནས་པ་ནི། །ཐུགས་ཀྱི་འཁོར་ལོ་ཇི་ལྟ་བར། །ཐོད་པའི་དུམ་བུ་སོགས་བརྒྱད་དོ། །ཞེས་
གསུངས་སོ། །དེའི་རྐང་པ་དང་པོ་གཉིས་ཀྱིས་འཁོར་ལོ་གསུམ་བརྩེགས་པར་བསྟན་ཏེ། དེའི་ཤུགས་ཀྱི་དམ་ཚིག་གི་འཁོར་ལོའི་སྟེང་དུ་སྐུ་འཁོར་བརྩེགས་པ་དང༌། ཐུགས་འཁོར་གྱི་སྟེང་དུ་བདེ་ཆེན་གྱི་འཁོར་ལོ་བརྩེགས་པར་ཡང་འདོད་དགོས་
སོ། །འདི་ལ་བོད་ཀྱི་མཁས་པ་དག །དཔའ་བོ་ཞེས་པའི་ཤོ་ལོ་ཀ་གཅིག་གིས་སྐུ་འཁོར་གྱི་དཔངས་ཆ་ཆུང་གཉིས་སུ་དང༌། དར་ནས་ཤོ་ལོ་ཀ་གཅིག་གིས་གསུང་འཁོར་གྱི་དཔངས་ཆ་བྲན་གཅིག་ཏུ་དང༌། དེ་ནས་ཤོ་ལོ་ཀ་གཅིག་གིས་ནི་ཐུགས་འཁོར་གྱི་
དཔངས་ཆ་བྲན་ཕྱེད་དུ་བསྟན། དེའི་རྒྱུ་མཚན་ལྷ་རྣམས་ཀྱི་དཔངས་ཚད་ཆ་ཆེན་རེ་ཡིན་ལ། སྐུའི་འཁོར་ལོའི་ལྷ་རྣམས་ཀྱི་མགོ་བོ་དང༌། གཅོ་བོའི་རྐང་པ་མཉམ། གསུང་འཁོར་གྱི་ལྷ་དང་ནུ་མཉམ། ཐུགས་འཁོར་གྱི་ལྷ་དང་མགྲིན་པའི་
བར་མཉམ་པར་དངོས་སུ་བསྟན་པའི་ཤུགས་ལ་དམ་ཚིགས་གི་འཁོར་ལོའི་ལྷ་དང་གཅོ་བོའི་ཞབས་འོག་མན་ཆད་མཉམ་པར་བསྟན་ལ། བདེ་ཆེན་འཁོར་ལོའི་ལྷ་མོ་བཞི་བས་གཙོ་བོའི་ཟེའུ་འབྲུ་ཅུང་ཟད་འཕགས་པ་དང༌། འཇིགས་བྱེད་དུས་མཚན་
དང་གཙུག་ཏོར་གྱི་ཆས་གཙོ་བོ་ཅུང་ཟད་མཐོ་བ་ཙམ་དུ་ཤུགས་ལ་བསྟན་ནོ། །ཞེས་གསུངས་སོ། །ལུང་དེ་དག་གིས་འཁོར་ལོའི་དཔངས་དེ་ལྟར་བསྟན་ཚུལ་ནི། ལང་ཀ་ལྟར་ན་ཆ་ཆུང་ཕྱེད་དང་གསུམ་ལ་མཐོ་ལྔར་བྱ་དགོས་པས། ལྷའི་སྐུ་ཚད་ཆ་ཆེན་
9-5-90b


གཅིག་དང༌། དེ་ཡང་གཙོ་འཁོར་ལ་སྐུ་ཚད་རིང་ཐུང་མེད་པའི་ལུགས་དང༌། ལྷའི་ཞབས་ནས་རྐེད་པའི་བར་ནི་སྐུ་ཚད་ཀྱི་ཕྱེད་ཡིན་ཞིང༌། དེ་ཡང་ཆ་བྲན་གཉིས་ཡིན་པ་དང༌། རྐེད་པ་ཡན་ཆད་ཀྱང་ཆ་བྲན་གཉིས་ཡིན་ལ། རྐེད་པ་ནས་ནུ་མའི་དབུས་ཀྱི་བར་
ནི་གོང་མའི་ཕྱེད་ཡིན་པས་ཆ་ཆུང་གཅིག་དང༌། ནུ་མའི་དབུས་ནས་མགྲིན་པའི་བར་ནི་ཕྱེད་གོང་མའི་བཞི་ཆ་ཡིན་པས་ཆ་ཕྲན་ཕྱེད་དོ། །དེ་ལྟར་བྱས་ན་སྐུ་འཁོར་གྱི་ལྷའི་ཞབས་བཙུགས་ས་ནས། སྟེང་དུ་ཆ་ཕྲན་གཅིག་གིས་མཐོ་བའི་ས་ནས་གསུང་
འཁོར་གྱི་ལྷའི་ཞབས་བཙུགས་པར་གསལ་ཏེ། དེ་གཉིས་སྐུའི་རིང་ཐུང་མཚུངས་ཤིང་གཉིས་ཀ་བཞེངས་པ་ལ། སྟེང་དུ་སྐུ་འཁོར་གྱི་ལྷ་ལས་གསུང་འཁོར་གྱི་ལྷའི་སྐུ་བོང་ཆ་ཆུང་གཅིག་གིས་རིང་བའི་ཕྱིར་རོ། །སྟེང་དུ་གསུང་འཁོར་གྱི་ལྷ་ལས་
ཐུགས་འཁོར་གྱི་ལྷ་ཆ་ཆུང་ཕྱེད་ཀྱིས་རིང་བས་ན། འོག་ཏུ་གསུང་འཁོར་གྱི་ལྷའི་ཞབས་བཞག་ས་ནས་སྟེང་དུ། ཆ་ཆུང་ཕྱེད་ཀྱིས་མཐོ་བ་ནས་ཐུགས་འཁོར་གྱི་ལྷའི་ཞབས་བཙུགས་སོ། །གསུང་འཁོར་གྱི་མཐོ་བའི་ཚད་ཀྱི་ཕྱེད་ཐུགས་འཁོར་གྱི་
མཐོ་ཚད་ལ་ཡོད་པ་བཞིན་དུ། གསུང་འཁོར་གྱི་སྟེང་དུ་འཕགས་པའི་ཚད་ཀྱང་སྐུ་འཁོར་འཕགས་པའི་ཕྱེད་དུ་འགྱུར་བས། སྐུ་འཁོར་འོག་གཞི་ལས་ཆ་ཆུང་གཉིས་ཀྱིས་འཕགས་པ་ཤེས་སོ། །རྒྱུ་མཚན་འདི་རྣམས་ཀྱིས་ནི་ལྷའི་སྐུ་བོང་
གི་ཚད་ཆ་ཆེན་གཅིག་ཏུའང་འགྲུབ་པར་སྣང་ངོ༌། །དེ་ལྟར་འོག་མ་འོག་མ་ལས་གོང་མ་གོང་མ་ཡར་འཕགས་པའང༌། འཁོར་ལོ་བཞི་གང་ལ་གནས་པའི་གཞི་ལ་བྱ་ལ། འཁོར་ལོའི་རྩིབས་རྣམས་དང་། མུ་ཁྱུད་རྣམས་ནི་ཚད་དེ་ལས་མཐོ་བ་
9-5-91a


མིན་པས་ངོ་མཐོང་ཙམ་དུ་བྱའོ། །སློབ་དཔོན་རྒྱལ་བ་བཟང་པོའི་གཞུང་གིས་མཐོ་དམན་དེ་ལྟར་བསྟན་པའི་དགོངས་པ་ཤིན་ཏུ་ལེགས་པར་སྣང་ངོ༌། །གཉིས་པ་ནི། འཁོར་ལོ་ལྔ་པའི་ལུགས་འདི་ལ་མཁའ་འགྲོ་རྒྱ་མཚོར༌། 
ཀ་བ་རྣམས་ནི་ཀུན་ཏུ་སྦྱིན། བརྒྱད་གསུམ་འཁོར་ལོ་རྣམས་སུའོ། །ཞེས་འཁོར་ལོ་གསུམ་པོ་སོ་སོ་ལ་ཀ་བ་ཡོད་པར་གསུངས་ཤིང༌། དེ་ཡང་དཱ་རི་ཀ་པའི་སྒྲུབ་ཐབས་ལས། ཀ་བ་སུམ་ཅུ་རྩ་གཉིས་སམ་བརྒྱད་ཀྱིས་སྤྲས་པ། ཞེས་བཤད་
པའི་ཕྱི་མ་ནི་ལྷ་ལྡ་དང་བཅུ་གསུམ་མ་ལྟ་བུ་ཡིན་ལ། སྔ་མ་ནི་འཁོར་ལོ་གསུམ་རྩེག་ཏུ་ཡོད་པ་ལ་ཡིན་པས། སྐུ་འཁོར་ནས་བདེ་ཆེན་གྱི་འཁོར་ལོའི་བར་ལ་ཀ་བ་བརྒྱད་བརྒྱད་ཡོད་པ་བསྟན་ནོ། །འདི་ལ་ནག་པོ་སྤྱོད་པའི་དཀྱིལ་ཆོག་གི་
འགྱུར་གསར་རྙིང་གཉིས་ལས། རྡོ་རྗེ་དང་པདྨ་དང་འཁོར་ལོའི་ཀ་བ་ཞེས་པ་ནི་འཁོར་ལོ་གསུམ་གྱི་ཡིན་ལ། དེའི་རིགས་པས་བཞི་པ་ལ་ནི་གྲི་གུག་གམ། རིན་པོ་ཆེས་མཚན་པའི་ཀ་བ་བྱ་སྟེ། ཀ་བའི་ཞེང་ནི་དཱ་རི་ཀ་པས་ཆ་ཆེན་རེའི་ལྔ་
ཆར་བཤད་དོ། །དེ་ལྟར་ཀ་བ་བཤད་པ་མང་བའི་རྒྱུ་མཚན་གྱིས་ཐོག་གསལ་བར་མ་གསུངས་ཀྱང་ཡོད་པར་ཤེས་སོ། །འདི་ལ་ཁ་ཅིག་ཀ་བའི་དཔངས་ནི་དབུའི་སྟེང་ནས་ཁྲུ་གང་ཙམ་གྱིས་འཕགས་པའི་ཚད་ཡིན་ཞེས་འདོད་པ་ལ། བླ་
མ་གཞན་ཁ་ཅིག་གིས་ལྷའི་སྐུའི་ཚད་ཆ་ཆེན་གཅིག་ལས་ལྷག་པ་བྱས་ན་ནི། གཡས་བརྐྱང་མི་ཤོང་བའི་སྐྱོན་ཡོད་ལ། ཆ་ཆེན་གཅིག་བྱེད་ན་ནི་ཐོག་དཔངས་དམས་པའི་སྐྱོན་ཡོད་ཅིང༌། དཀྱིལ་འཁོར་གཞན་ནས་ནང་གི་ཀ་བའི་རིང་
9-5-91b


ཐུང་གི་ཚད་རྒྱའི་ཕྱེད་ཚད་དུ་བྱས་པ་དང་འགལ་བར་འགྱུར་རོ་ཞེས་འགོག་ཅིང༌། ཐོག་འབུབས་ལུགས་ལ་ཤེས་བྱེད་གསལ་པོ་མི་སྣང་བས་ཡི་གེར་མ་བཀོད་ཆེས་གསུང་ངོ་། །ལྷ་རེ་གཉིས་པའི་དཀྱིལ་འཁོར་བསླང་བ་འདི་ནི་དཀའ་
བར་སྣང་ནའང་བཤད་པར་བྱ་སྟེ། འདི་ལ་དམ་ཚིག་གི་དཀྱིལ་འཁོར་གྲུ་བཞི་པ་ལ་ནི། ནང་དུ་སྒོས་ཀྱི་ཀ་བ་བརྒྱད་མེད་པར་ངེས་ཏེ། དཀྱིལ་འཁོར་གྲུ་བཞི་པ་གཞན་ལ་འོང་བ་ལྟར་གྱི་ཤར་ནུབ་དང༌། ལྷོ་བྱང་དུ་བསྣོལ་མར་བཏང་བའི་
གདུང་འདེགས་རྒྱུ་ནི་འདི་ལ་མེད་པའི་ཕྱིར་ཏེ། འཁོར་ལོ་གསུམ་གྱིས་བཅད་པས་གསུང་དེ་ལྟར་གཏོང་རྒྱུ་མེད་པའི་ཕྱིར་དང༌། སྐུ་འཁོར་གྱི་ཐོག་གིས་མ་ཁེབས་པའི་ཐོག་ཅུང་ཟད་ཡོད་ཀྱང་དེ་ལ་ཀ་བ་མི་དགོས་པའི་ཕྱིར་རོ། དེས་ན་འཁོར་
ལོ་བཞིའི་ཀ་བས་ཆོག་ལ། དེ་འཛུགས་མཚམས་ནི། འཁོར་ལོའི་རྩིབས་དང་པད་འདབ་གྱི་ཐད་ཀར་བཙུགས་ན་ལྷ་སྒྲིབ་པས། དེ་རྣམས་སུ་མི་བྱ་བར་མཚམས་སུ་བྱའོ། །ཐོག་འབུབས་ལུགས་ནི་ཕལ་ཆེ་བ་ལ། དབུས་སུ་ས་འབུམ་ལྟ་
བུ་ཅིག་བྱས་པ་ལ། ལྕམ་སྔས་གཏད་ནས། བསྐོར་ཁང་འབུབས་པའི་ལུགས་ལྟར་འཁོར་ལོའི་ཐོག་རྣམས་ཡོད་པ་ཅིག་འཆར་མོད་ཀྱང༌། དེ་ནི་མིན་ཏེ་དེ་ལྟར་བྱས་ན་འཁོར་ལོ་སོ་སོར་གོང་མའི་གནས་ནས་འོག་མའི་ལྷ་དང༌། འོག་མ་ནས་ཀྱང་
གོང་མ་མི་མཐོང་བའི་སྐྱོན་དུ་འགྱུར་བའི་ཕྱིར་དང༌། དཀྱིལ་འཁོར་སྒོ་རྐྱང་ཅིག་ལ་དེ་ལྟར་མི་རུང་བའི་ཕྱིར་དང༌། ཐོག་གི་རིམ་པ་ནི་འཁོར་ལོ་བཞི་པོ་ཐམས་ཅད་ཀྱི་ཐོག་གཅིག་ལ་རིམ་པ་བཞི་བྱེད་པ་ལ་གནོད་པ་ཅུང་ཟད་ཀྱང་མེད་པའི་ཕྱིར་རོ། །དེ་ན་ཀ་བའི་
9-5-92a


སྲིད་ཀྱི་ཚད་ལ་སྐུ་འཁོར་གྱི་ཀ་བའི་དཔངས་ལ། གཞིའི་དཀྱིལ་འཁོར་གཞན་གྱི་ཐོག་འདེགས་པའི་ཚད་དང་མཉམ་པར་བྱ་སྟེ། འོག་གཞི་ལས་འཕགས་པའི་ཆ་བྲན་གཉིས་དང་བཅས་པའོ། །འཁོར་ལོ་གཞན་གསུམ་གྱི་
ཀ་བ་ནི་འོག་ཏུ་རང་རང་གི་འཁོར་ལོའི་ས་གཞི་ནས། སྟེང་དུ་སྐུ་འཁོར་གྱི་ཐོག་གི་དཔངས་ལས་ཆ་བྲན་གཅིག་གིས་མཐོ་བ་དང༌། གསུང་འཁོར་གྱི་ཐོག་ལས་ཆ་བྲན་ཕྱེད་ཀྱིས་མཐོ་བ་དང༌། ཐུགས་འཁོར་གྱི་ཐོག་ལས་ཆ་བྲན་གཅིག་གི་བཞི་
ཆས་མཐོ་བའི་དཔངས་ཚད་བྱའོ། །གཞིའི་དཀྱིལ་འཁོར་གཞན་གྱི་ཀ་བའི་སྲིད་ཀྱི་ཚད་ནི་བོད་ཀྱི་མཁས་པ་དག ། ཀ་བ་ནི་རྩ་བ་རྩིག་པ་ནས་རྩེ་མོ་དཀྱིལ་འཁོར་གྱི་དབུས་སུ་སླེབ་པ་ཆ་ཆེན་བཞི་ཡིན་ཏེ། ཀོ་ས་ལར། ཀ་བ་བརྒྱད་ཀྱིས་ཞེས་པ་ལ་
སོགས་པ་ལ། སྒོ་རེ་རེའི་ཐད་ཀར་ཡང་ཀ་བ་གཉིས་གཉིས་ཏེ། མཐའ་གཅིག་ནི་རྡོ་རྗེའི་ཐིག་ལ་བརྟེན་པ། མཐའ་གཅིག་ནི་དཀྱིལ་འཁོར་གྱི་ལྟེ་བ་ལ་བརྟེན་ནོ། དེ་ལྟར་ན་སྒོ་བཞིའི་ཐད་ཀར་ཀ་བ་བརྒྱད་དུ་འགྱུར་རོ། །ཞེས་ཤེས་བྱེད་དུ་དྲངས་ནས་
རྩིག་པའི་དཔངས་ཆ་ཕྲན་བཅུ་གསུམ། ཕ་གུ་ལ་གཅིག །དྲ་ཕྱེད་ལ་གཉིས་ཡོད་པའི་ཚད་དང་མཐུན་པར་ཆ་ཕྲན་བཅུ་དྲུག་པར་བསྒྲུབས་པ་ལྟར་བྱའོ། །འོན་ཀྱང་འདི་ལ་རྡོ་རྗེའི་ཐིག་ཟླུམ་པོ་ནང་མ་ལ་རེག་པ་ཙམ་ཡིན་པས་དེའི་ཞེང་ཚད་ཅུང་
ཟད་ཅིག་མ་གཏོགས་ལ། རྩ་བ་རྩིག་པ་ནས་ཞེས་པ་ནི་ཤཱཀྱ་བཤེས་གཉེན་གྱིས་དཀྱིལ་འཁོར་ནང་མ་ལ་སྒོ་མེད་པར་འདོད་པ་ལ། རྩེ་མོའི་ལུང་གིས་བཀག་པ་དང་འགལ་བར་སྣང་ངོ༌། །དེ་ལྟར་ན་སྟེང་ནས་གདུང་ཟླུམ་འཁོར་མར་བཏང་བ་
9-5-92b


ཀ་བས་བཏེག་པའི་སྐུ་འཁོར་གྱི་ཐོག་གིས་ཅུང་མ་ཁེབས་པའི་གྲྭ་ལ་སོགས་པར་གདུང་ལ་སོགས་པ་འཐུད་ནས་བཏང་སྟེ། དམ་ཚིག་གི་འཁོར་ལོའི་ཐོག་ཅུང་ཟད་འོང་བ་དབུབ། དེ་ནས་འཁོར་ལོ་ལྷག་མ་ལའང་ཆ་ཕྲན་གཅིག་ལ་སོགས་པས་ཐོག་
འོག་མ་ལས་མཐོ་བར་བྱས་པ་ལ། གདུང་ཟླུམ་པོ་བཏང་ལ་དབུབ་སྟེ། ཤིན་ཏུ་མཛེས་པ་དཀར་ཆ་ཆེ་བ་ཅིག་འོང༌། ཞིབ་པར་ནི་མཐོང་བ་དང་བཤད་པ་ལས་ཤེས་པར་བྱའོ། །ཕྱིའི་དབྱིབས་ནི་སངས་རྒྱས་གསང་བས་མཛད་ཟེར་བར། ཕྱི་དབྱིབས་མཆོད་
རྟེན་མཁར་ཐབས་དང༌། །རྒྱལ་ཁབ་རི་བའི་གུར་དུ་འདོད། །ཅེས་མཆོད་རྟེན་དང༌། མཁར་ཐབས་རྫོང་དང༌། རྒྱལ་པོའི་ཁང་བཟང་རྒྱ་ཕིབས་ཅན་དང༌། གུར་གྱི་རྣམ་པ་ཅན་བཞིར་བཤད་དོ། །དེ་རྣམས་གང་བྱེད་ཀྱང་རྩེ་མོར་རྡོ་རྗེ་དང༌། ནོར་བུ་དང༌། རིན་པོ་ཆེའི་ཏོག་
གིས་མཚན་པར་བྱ། ཀོ་ས་ལ་ལས༌། རྡོ་རྗེ་ནི་ནོར་བུ་རྡོ་རྗེའོ། །ནོར་བུ་ནི་ཡིད་བཞིན་གྱི་ནོར་བུའོ། །རིན་པོ་ཆེ་ནི་པདྨ་རཱ་ག་ལ་སོགས་པ་སྟེ། དེ་རྣམས་ཀྱིས་རྩེ་མོ་བརྒྱན་པའི་ཁང་བུ་བརྩེགས་པ། ཞེས་བཤད་དོ། །དེ་ཡང་རྒྱུ་ནོར་བུ་རྡོ་རྗེ་ལས་བྱས་པའི་རྡོ་རྗེ་རྩེ་
ལྔ་པ། དེའི་འོག་ཏུ་ཡིད་བཞིན་གྱི་ནོར་བུ༌། དེའི་འོག་ཏུ་པདྨ་རཱ་ག་སོགས་ཀྱི་རིན་པོ་ཆེས་སྤྲས་པ། དཔངས་ལ་ཆ་ཆེན་གཅིག་ཡོད་པའི་ཏོག་བྱ་བ་དང༌། རྒྱ་ཕུབས་བྱེད་ན་དེའི་ཐོག་དཔངས་ལའང་ཆ་ཆེན་གཅིག་བྱ་ཞེས་ཁ་ཅིག་ཟེར་རོ། །གཉིས་པ་ལ་
གཉིས། གཙོ་བོ་ཡབ་ཡུམ་བཤད་པ་དང༌། འཁོར་གྱི་ལྷ་བཤད་པའོ། །དང་པོ་ལ་གསུམ། ཡབ་ཡུམ་གྱི་སྐུ་མདོག་ཕྱག་མཚན་བཤད་པ་དང༌། དེ་རྒྱུད་གང་ནས་གསུངས་པ་དང་དག་བའི་དོན་བཤད་པ་དང༌། ཡབ་ཡུམ་སྙོམས་བར་ཞུགས་ནས་དགའ་བ་
9-5-93a


རྣམས་སྐྱེད་འཕྲོས་དང་བཅས་ཏེ་བཤད་པའོ། །དང་པོ་ནི། གཙོ་བོ་བཅོམ་ལྡན་འདས་ནི་སྐུ་མདོག་ནག་པོ། སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་དང༌། མངོན་པར་འདུ་བྱེད་པ་མེད་པའི་རྣམ་པར་ཐར་པའི་སྒོ་བཞི་དག་པའི་ཞལ་
བཞི་པ། རྩ་ཞལ་ནག་པོ་དང༌། གཡོན་ལྗང་གུ་དང༌། རྒྱབ་དམར་པོ་དང༌། གཡས་ཞལ་སེར་པོའོ། །དུས་གསུམ་གྱི་རྣམ་པ་ཐམས་ཅད་གཟིགས་པས་སྤྱན་གསུམ་པ། མ་རིག་པ་ལ་སོགས་པའི་རྟེན་འབྲེལ་བཅུ་གཉིས་འགོག་པས་ཕྱག་བཅུ་གཉིས་པ། ཡེ་ཤེས་
ལྔའི་བདག་ཉིད་ཡིན་པས་དཔྲལ་བར་རྡོ་རྗེ་རྩེ་ལྔ་པའི་ཕྲེང་བ་འཛིན་པའོ། ལོ་ཆེན་དང་མར་དོ་དང་ཟངས་དཀར་སོགས་ཀྱི་འགྱུར་ལས། རྡོ་རྗེའི་ཕྲེང་བ་མ་བྱུང་ཡང༌། ཆག་འགྱུར་ལས་འབྱུང་བ་ནི་འགྲེལ་པ་གསུམ་དང་མཐུན་ནོ། །འགྲོ་བ་ཐམས་ཅད་སྟོང་
པ་ཉིད་ཀྱིས་སྡུད་པས། གཡོན་པའི་ཞབས་བསྐུམས་ནས། མཐོ་ལྔར་ཞབས་གཡས་བརྐྱང་པས་བཞུགས་པར་ལྭ་བ་པས་བཤད་པས་སྡུད་པ་ནི། པྲཛྙཱ་རཀྵི་ཏས་འགྲོ་བ་ཐམས་ཅད་སྟོང་པ་ཉིད་ཀྱིས་གནོན་པའི་ཕྱིར། ཞེས་གནོན་པར་བཤད་པ་ཡིན་
ལ། དེ་ཡང་ཞབས་གཉིས་ཀའི་ཐུན་མོང་པ་ཡིན་ཞིང༌། དེས་དེ་ལྟར་མཚོན་ཚུལ་ནི། འདིའི་ཞབས་ཀྱིས་གང་མནན་པ་ནི། དེ་ཟིལ་གྱིས་གནོན་ཞིང་དེ་ལས་མི་འདའ་བ་བཞིན་དུ། སྟོང་ཉིད་རྟོགས་པས་འགྲོ་བ་རྣམས་ཟིལ་གྱིས་གནོན་པ་དང༌། དེ་རྣམས་
སྟོང་ཉིས་ལས་མི་འདའ་བའོ། །མི་གནས་པའི་མྱང་འདས་ཀྱི་ངོ་བོ་ཡིན་པས་རྟག་པའི་རྟོག་པ་སྟེ། རྟག་མཐའ་འཁོར་བ་མཚོན་པའི་འཇིགས་བྱེད་ཆེན་པོ་སྟེ་དབང་ཕྱུག་དང༌། ཆད་པའི་རྟོག་པ་སྟེ་ཆད་མཐའ་ཞི་བ་ཕྱོགས་གཅིག་པའི་མྱང་འདས་མཚོན་
9-5-93b


པའི་དུས་མཚན་མ་སྟེ་ལྷ་མོ་ཨུ་མ་མནན་པའོ། །དབང་ཕྱུག་ནི་ནག་པོ་ལག་པ་བཞི་པའི་དང་པོ་གཉིས་ཐལ་མོ་སྦྱར་བ། ལྷག་མ་གཉིས་ཌཱ་མ་རུ་དང་རལ་གྲི་འཛིན་པ་དང༌། ཨུ་མ་ནི་དམར་མོ་ལག་པ་བཞི་པའི་དང་པོ་གཉིས་ཐལ་མོ་སྦྱར་བ། ལྷག་མ་
གཉིས་ཐོད་པ་དང་ཀ་ཊྭཱཾ་ག་འཛིན་པའོ། །གཉིས་ཀའང་གདོང་གཅིག་པ། མིག་གསུམ་པ། ཕྱག་རྒྱ་ལྔས་བརྒྱན་པར་ཁྱད་པར་གསལ་བྱེད་ལས་བཤད་དོ། །བདེ་མཆོག་ལ་མངོན་བརྗོད་ལས་གཡས་བརྐྱང་དང༌། ཞབས་གཉིས་ཀ་བརྐྱང་པ་དང༌། 
སྐྱིལ་ཀྲུང་ཕྱེད་པ་སོགས་མང་དུ་གསུངས་པ་ལས། ལོ་ནག་དྲིལ་གསུམ་གྱིས་ནི་གཡས་བརྐྱང་གི་ལུགས་སུ་མཛད་དོ། །འཇིགས་བྱེད་དང་དུས་མཚན་གཉིས་ཞབས་གཡས་གཡོན་གང་གི་འོག་ཏུ་འོང་བ་ནི། འདི་དང་ལ་བ་པ་དང༌། པྲཛྙཱ་རཀྵི་ཏ་དང༌། 
ཀུ་མཱ་རའི་འགྲེལ་པ་དང༌། དཔའ་བོ་རྡོ་རྗེས་བྱས་ཟེར་བའི་འགྲེལ་པ་རྣམས་སུ་མི་གསལ་ལ། ཁྱད་པར་གསལ་བྱེད་དང་ལས་དུས་མཚན་གཡས་དང༌། འཇིགས་བྱེད་གཡོན་དུ་བྱས་སོ། །ཇོ་བོ་ཆེན་པོའི་ལྷན་སྐྱེས་ཀྱི་སྒྲུབ་ཐབས་ལས་དེ་ལས་བཟློག་
སྟེ་མཛད་དོ། །རྒྱ་གཞུང་གི་སྒྲུབ་ཐབས་གཞན་དུ་མ་ལས། གཡས་བརྐྱང་གིས་འཇིགས་བྱེད་དང་དུས་མཚན་མནན་ཟེར་བ་ཙམ་ལས་གཞན་གསལ་བར་མི་སྣང་ངོ༌། །བོད་ཀྱི་བླ་མ་རྣམས་ལའང་མི་གསལ་བ་དང༌། གསལ་བའི་ལུགས་ལའང་
ཕྱོགས་གཅིག་པའི་ངེས་པ་མི་སྣང་ངོ༌། །མངོན་བརྗོད་ལས་ཀྱང༌། མི་གསལ་བར་སྔར་བཞིན་བཤད་པ་མང་ངོ༌། །ལེའུ་སོ་གཉིས་པར་གཡས་བརྐྱང་གི་གཡས་ཀྱིས་འཇིགས་བྱེད་དང༌། གཡོན་གྱིས་དུས་མཚན་དང༌། ལེའུ་གཉིས་པར་ཡང་
9-5-94a


གདན་གཉིས་ཀྱི་ཕྱོགས་དེ་བཞིན་དུ་དང་ཞབས་གཉིས་ཀ་བརྐྱང་བས་གནོན་པར་བཤད་དོ། །མི་གསལ་བ་རྣམས་ཀྱིའང་དགོངས་པ་དཔྱད་ན་འཇིགས་བྱེད་གཡས་པས་གནོན་པ་ལ་ཉེ་བར་སྣང་ངོ་། །ཞབས་རེ་རེས་གནོན་ལུགས་
ནི་མངོན་བརྗོད་ཀྱི་སོ་གསུམ་པ་ལས། ལྷ་བཅུ་གསུམ་མའི་གཙོ་བོ་ཞལ་བཞི་ཕྱག་བཅུ་གཉིས་པ་སྐྱིལ་ཀྲུང་ཕྱེད་ཀྱིས་བཞུགས་པས་དུས་མཚན་ཀ་སྦུ་བ་ཏུ་མནན་པ་དང༌། ཉེར་དགུ་པར་ལྷ་དགུ་མའི་གཅོ་བོ་ཞལ་དྲུག་ཕྱག་བཅུ་གཉིས་པས་
གཡས་བརྐྱང་གིས་འཇིགས་བྱེད་དང་ནི་འཇིགས་བྱེད་མོ། །ཁ་སྦུབ་ཞབས་ཀྱིས་མནན་པས་བཞུགས། ཞེས་འགྱུར་མང་པོ་ལས་འབྱུང་བ་དང༌། ཉི་ཤུ་པར་ཞལ་བརྒྱད་ཕྱག་བཅུ་དྲུག་པ་དང༌། ཞལ་བཅུ་གཉིས་ཕྱག་ཉེར་བཞི་པ་དང༌། དེ་ལས་
ཀྱང་མང་བ་དང༌། འཁོར་དང་ཕྱག་གྲངས་མ་ངེས་པའི་ཁ་དོག་དང༌། ཕྱག་མཚན་སྣ་ཚོགས་པ་འཛིན་པའི་གཙོ་བོས་འཇིགས་བྱེད་དང་དུས་མཚན་དང༌། ཚངས་པ་དང་དབང་པོ་སོགས་དུ་མ་ཞིག་ཁ་སྲུབ་ཏུ་གནོན་པར་བཤད་པ་ཡོད་ཀྱང༌། ལེའུ་
དགུ་པར་ཞལ་བཞི་ཕྱག་བཅུ་གཉིས་པ་གཡས་བརྐྱང་ཅན། ཡུམ་དང་ལྡན་པའི་ཡབ་ཀྱི་སྐུ་ལ། ལྷ་དྲུག་ཅུ་བཀོད་པའི་ལྷ་རེ་གཉིས་པའི་སྐབས་སུ་དང༌། ཡང་བཅོ་བརྒྱད་པར་གཙོ་བོ་ཞལ་གསུམ་ཕྱག་དྲུག་པས་ལྷ་རེ་གཉིས་པའི་སྐབས་
སུ་དབང་ཕྱུག་གི་མགོ་བོ་དང༌། དུས་མཚན་གྱི་ནུ་མ་གནོན་པར་གསུངས་ཤིང༌། ལཱུ་ཨི་པའི་འགྲེལ་པ་རྣམས་སུ་མི་གསལ་ཡང༌། མི་ཐུབ་ཟླ་བ་དང༌། བྱང་ཆུབ་རྡོ་རྗེ་སོགས་ཀྱིས་ལྷ་རེ་གཉིས་པའི་གཙོ་བོ་ཞལ་བཞི་ཕྱག་བཅུ་གཉིས་པ་
9-5-94b


གཡས་བརྐྱང་ཅན་གྱི་སྐབས་སུ། མགོ་བོ་དང་ནུ་མ་གནོན་པར་བཤད་པ་ལྟར། ལོ་ནག་དྲིལ་གསུམ་གྱི་རེ་གཉིས་པ་ལའང་བྱ་དགོས་སོ། །དེ་ལྟར་ན་ཨུ་མ་ནི་གན་རྐྱལ་དང༌། མགོ་བོ་གནོན་པ་ཡང་མངོན་བརྗོད་དུ་མང་དུ་བཤད་དོ། །འཇིགས་བྱེད་ཀྱི་
མགོ་གནོན་པར་མང་དུ་བཤད་ཅིང༌། གན་རྐྱལ་དུ་གནོན་པ་རྒྱུད་ནས་མེད་པ། ལཱུ་ཨི་པ་སོགས་ཀྱི་ལུགས་འདི་ལ་ཁ་སྦུབ་ཏུ་གནོན་པ་ཡང་མ་བཤད་པས། གཡས་སུ་འགྱེལ་བའི་རྣ་བ་གཡོན་པ་ནས་གནོན་པར་སྒྲུབ་ཐབས་འགའ་ཞིག་
ལས་བཤད་པ་ལྟར་རོ། །རྒྱ་གཞུང་འགའ་ཞིག་ལས་གནོན་ལུགས་འགའ་རེ་བཤད་ཀྱང་མ་བྲིས་སོ། །བོད་ཁ་ཅིག་རྣལ་འབྱོར་གྱི་རྒྱུད་དེ་ཉིད་བསྡུས་པ་དང༌། རྡོ་རྗེ་རྩེ་མོར་རིམ་པ་བཞིན་དུ་ཞབས་གཡོན་པས་དབང་ཕྱུག་གི་རྣ་བ་གཡོན་པ་དང༌། གཡས་
པས་ཨུ་མའི་ནུ་མའི་བར་དུ་གནོན་པར་བཤད་པ་ལྟར་འདིར་བྱ་དགོས་ལ། ཇོ་བོ་ཆེན་པོས་དབང་ཕྱུག་མ་ཤི་བར་བཞེད་པ། རྩེ་མོར་ཤི་བར་བཤད་པས་འགོག་པ་ནི་ལེགས་པ་མིན་ཏེ། རྒྱུད་སྡེ་གོང་འོག་མི་གཅིག་པ་རྣལ་འབྱོར་བླ་
མེད་ཀྱི་རྒྱུད་ནས། གནོན་པ་པོ་མི་འདྲ་བ་ཕྱག་རྡོར་དང༌། བདེ་མཆོག་གིས། མནན་བྱ་དབང་ཕྱུག་དང་ཨུ་མ་གནོན་པར་བཤད་པ་རྣམས་ཀྱི་ཞབས་ཀྱི་གནོན་ལུགས་མཐུན་དགོས་ན། བདེ་མཆོག་གི་རྒྱུད་གཅིག་ནས་གནོན་པ་པོ་བདེ་མཆོག་ཏུ་
མཚུངས་ཤིང༌། མནན་བྱ་འཇིགས་བྱེད་དང་དུས་མཚན་དུ་མཚུངས་པ་གཉིས་གནོན་ལུགས་ཤིན་ཏུ་མཐུན་དགོས་པ་ལ། མངོན་བརྗོད་ཀྱི་རྒྱུད་གཅིག་པུ་ནས་མི་མཐུན་པ་དུ་མ་ཞིག་གསུངས་པའི་ཕྱིར་རོ། །དེ་ཡང་རྒྱུད་དེའི་ལེའུ་སོ་གསུམ་
9-5-95a


པར་ཞབས་གཉིས་ལས་མེད་པ་ནི་མ་བཤད་ཅིང༌། སྐྱིལ་ཀྲུང་ཕྱེད་པས་བཞུགས་ནས་དུས་མཚན་ཁ་སྦུབ་ཏུ་བྱས་ཏེ། འཇིགས་བྱེད་དང་གཉིས་ཀ་གནོན་པ་བཤད་པའི་དོན། སྒྲུབ་ཐབས་གཙུག་ནོར་ལས། སྐྱིལ་ཀྲུང་ཕྱེད་པས་གཉིས་
ཀ་བརྩེགས་ནས་གནོན་པར་བཤད་དེ། ཞབས་གཅིག་གིས་གཉིས་ཀ་དང༌། རེ་རེས་རེ་རེ་དང༌། གཡས་བརྐྱང་དང་གཉིས་ཀ་བརྐྱང་བས་གནོན་པ་སོགས་དུ་མ་ཞིག་བཤད་དོ། ། ཡང་ལེའུ་ང་བཞི་པ་ལས། འཇིགས་བྱེད་དང་ནི་དུས་མཚན་དག །བརྒྱལ་
ཞིང་རྣམ་པར་མྱོས་པ་ཡི། །ཀླད་པ་ལ་ནི་ཞབས་ཀྱིས་ནི། །གཅེར་བུ་འོ་དོད་འབོད་པ་མནན། །ཞེས་ཀྱང་གསུངས་པས། བདེ་མཆོག་གི་རྒྱུད་ཀྱི་ལུགས་ཀྱིས་འཇིགས་བྱེད་གསོན་པོར་འདོད་པ་ཡོ་གའི་རྒྱུད་ནས་དབང་ཕྱུག་ཤི་བར་བཤད་པས་འགོག་མི་
ནུས་སོ། །མངོན་བརྗོད་ལས་འཇིགས་བྱེད་དང་དུས་མཚན་མནན་པས་ནི་སྲེད་པ་དང་སྡང་བ་དང༌། རྟག་ཆད་ཀྱི་རྣམ་རྟོག་གནོན་པར་གསུངས་པའི་དང་པོ་ནི། གོ་སླའོ། །གཉིས་པ་རྟག་པ་འཁོར་བའི་ཡོད་མཐའ་ནི། འཁོར་བའི་བག་ཆགས་ཀྱི་རྒྱུན་མ་ཆད་
པར་འཇུག་པའི་ཕྱོགས་དང༌། ཆད་པ་མྱང་འདས་ཀྱི་མེད་མཐའ་ནི། ལས་ཉོན་ཙམ་ཞིག་ཆད་པའི་ཞི་བ་ཕྱོགས་གཅིག་པའོ། །ཡུལ་སྟོང་པ་ཉིད་དང་ཡུལ་ཅན་སྙིང་རྗེ་རོ་མཉམ་པས་རྡོ་རྗེ་ཕག་མོ་ལ། ཕྱག་དང་པོ་གཉིས་ཀྱིས་འཁྱུད་པ་དང༌། འཁྱུད་པའི་
ཕྱག་གཉིས་ཀྱི་གཡས་པས་ཡེ་ཤེས་ལྔ་རོ་མཉམ་པའི་རང་བཞིན་ཅན། རྡོ་རྗེ་རྩེ་ལྡ་པ་དང་གཡོན་པས་ཤེར་ཕྱིན་གྱི་རང་བཞིན་དྲིལ་བུ་བསྣམས་པའོ། །མངོན་བརྗོད་ལེའུ་དགུ་པར་དཔའ་བོ་གཅིག་པ་ལ། རྡོ་རྗེ་རྩེ་དགུ་པར་བཤད་ཀྱང༌། འདིར་རྩེ་ལྔ་
9-5-95b


པར་བྱ། འགྲོ་བའི་གཏི་མུག་འཇོམས་པས་ཕྱག་སྔ་མ་ལས་གཞན་པ་སྟེ་དེའི་འོག་མ་གཉིས་ཀྱིས། གླང་པོ་ཆེའི་པགས་པ་དཀར་པོ་ཁྲག་དང་བཅས་པའི་ན་བཟའ་རང་གི་རྒྱབ་ཏུ་མནབས་པ་སྟེ། གླང་པོས་གཏི་མུག་མཚོན་ལ། དེའི་པགས་པ་བཤུས་པས་
ནི་གཏི་མུག་བྲལ་བ་མཚོན་པའོ། དེ་ཡང་ཕྱག་གཡས་པས་ལག་པ་གཡོན་པ་དང༌། གཡོན་པས་རྐང་པ་གཡོན་པའི་པགས་པ་སྡིགས་མཛུབ་དང་བཅས་པའི་ཕྱག་གིས་བརྒྱངས་ཏེ་འཛིན་པའི་སྡིགས་མཛུབ་ཀྱི་རྩེ་གཉིས་སྨིན་མ་དང་མཉམ་པར་
རྩ་རྒྱུད་ཀྱི་འགྲེལ་པར་ཕྱག་ན་རྡོ་རྗེས་བཤད་དོ། ཚོགས་བདག་གླང་པོའི་གཟུགས་སུ་གནས་པའི་པགས་པ་ཡིན་པས། མངོན་བརྗོད་ལས། ཚོགས་བདག་གི་པགས་པ་ཞེས་ཀྱང་གསུངས་སོ། །གཡས་པའི་ཕྱག་གསུམ་པ་ན་མཆོག་ཏུ་དགའ་
བའི་སྒྲས་སངས་རྒྱས་ཐམས་ཅད་བསྐུལ་བའི་ཌཱ་མ་རུ། བཞི་པ་ན་སྒོ་གསུམ་གྱི་སྐྱོན་གཅོད་པའི་དགྲ་སྟ། ལྔ་པ་ན་དངོས་པོ་ཡོད་མེད་ཀྱི་མཐར་འཛིན་པའི་རྣམ་རྟོག་གཅོད་པའི་གྲི་གུག་བསྣམས་ཤིང༌། དྲུག་པ་ན་ཁམས་གསུམ་དུ་སོན་པའི་ཉོན་
མོངས་པ་འབིགས་པའི་མདུང་རྩེ་གསུམ་པ་སྒྲེང་བའོ། །གཡོན་པའི་ཕྱག་གསུམ་པ་ན་བྱང་ཆུབ་ཀྱི་སེམས་ཀྱི་རང་བཞིན་གྱི་ཁ་ཊྭཱཾ་ག་དཀར་པོ་རྡོ་རྗེས་མཚན་པའོ། །ཁ་ཊྭཱཾ་ག་ནི་མངོན་བརྗོད་ལེའུ་དགུ་པར། མཆོད་ཕྱིར་ཐོགས་དང་འབྲེལ་པའི་རྡོ་རྗེ་ཁ་ཊྭཱཾ་ག ། 
སྟེང་དུ་རྡོ་རྗེ་རྩེ་ལྔ་པའི་རྡོ་རྗེ་རབ་ཏུ་འཇིགས་པ། རྡོ་རྗེ་དྲིལ་བུ་རབ་ཏུ་འཕྱང་ཞིང་སྣ་ཚོགས་པའི་བ་དན་རབ་ཏུ་དཔྱངས་པ། དབུས་སུ་སྣ་ཚོགས་རྡོ་རྗེས་མཚན་པ་འོག་ཏུ་རྡོ་རྗེ་རྩེ་གཅིག་པ། ཞེས་གསུངས་སོ། །ཕག་མོ་ཤེས་རབ་སྣང་བའི་སྒྲུབ་ཐབས་
9-5-96a


ལས། ཁ་ཊྭཱཾ་ག་ཡུ་བ་དཀར་པོ། མགོ་རྩེ་གཅིག་པ། སྟེང་ནག་པོ་རྩེ་ལྔ་པ་དང་རྗེས་སུ་འབྲེལ་བའི་མགོ་བོ་སྐམ་པོ་དང༌། རྙིང་པ་དང་རློན་པ་དང༌། སྣ་ཚོགས་རྡོ་རྗེ་དང༌། གསེར་གྱི་བུམ་པའི་རྩ་བ་ལ་བཏགས་པའི་དྲིལ་བུ་སྒྲ་སྒྲོགས་པ་
དང་ལྡན་པའི་སྣ་ཚོགས་པའི་བ་དན་གྱིས་མཛེས་པར་བྱས་པ། ཞེས་བཤད་པའི་ཡུ་བ་ནི་དབྱུག་པ་དང༌། མགོ་རྩེ་གཅིག་པ་ནི་མར་རྩེ་དང༌། སྣ་ཚོགས་རྡོ་རྗེའི་འོག་ཏུ་བུམ་པ་སེར་པོ་བྱའོ། །མགོ་བོ་གསུམ་གྱི་ཁ་དོག་ནི་ཁྱད་པར་གསལ་བྱེད་ལས། སྐུ་
གསུང་ཐུགས་རྣམ་པར་དག་པས། དཀར་པོ་དམར་པོ་ནག་པོའི་མགོ་བོ་གསུམ་དང་ལྡན་པའི་ཁ་ཊྭཱཾ་གའོ། །ཞེས་བཤད་པས་ཡས་རིམ་ནས་སྦྱར་ཏེ་བྱའོ། །བཞི་པ་ན་བདེ་བ་དང་སྙིང་རྗེ་ཆེན་པོའི་རོའི་རང་བཞིན་ཁྲག་གིས་བཀང་བའི་ཐོད་པ་སྟེ། ཁྲག་དང་
ཐོད་པ་ལ་རེ་རེ་སྦྱར་རོ། །ལྔ་པ་ན་ཡང་དག་པའི་ཡེ་ཤེས་ཀྱིས་བཅིངས་པས་རྡོ་རྗེའི་ཞགས་པ། དྲུག་པ་ན་དངོས་པོ་ཡོད་མེད་ཀྱི་རྣམ་རྟོག་ཐམས་ཅད་ཟད་པའི་རང་བཞིན་གྱི་ཐར་པ་ཚངས་པའི་མགོ་བོ་བསྣམས་པ་སྟེ། ཀྱཻ་རྡོར་ལས། ཚངས་པ་སྒྲིབ་བྲལ་སངས་
རྒྱས་ཏེ། ཞེས་གསུངས་པ་བཞིན་ནོ། །རལ་པའི་ཅོད་པན་གྱིས་བརྒྱན་པ་དང༌། སྣ་ཚོགས་རྡོ་རྗེས་མཚན་པའི་དབུ་རྒྱན་ཅན་ཞེས་སོ་སོར་འབྱུང་བའི་དོན་ནི། འཁྲུལ་སྤོང་ལས། སྣ་ཚོགས་རྡོ་རྗེས་མཚན་པའི་རལ་པའི་ཐོར་ཅོག་ཅན་ཞེས་བཤད་པ་ལྟར་
བྱ་ལ། མཚོན་དོན་ནི་དགེ་རྩ་མཐར་གྱིས་འཕེལ་བ་དང༌། འགྲོ་བ་ཀུན་གྱི་དོན་བྱེད་པའོ། །སྣ་ཚོགས་རྡོ་རྗེས་མཚོགས་མ་གནོན་པར་འདོད་པ་ནི་རྒྱུད་ཀྱི་དོན་མིན་ནོ། ཐོད་པ་སྐམ་པོ་ལྔའི་ཕྲེང་བའི་ཐོད་ཅན་ནོ། དེ་ནི་ཤེས་རབ་སྣང་བའི་སྒྲུབ་ཐབས་ལས། 
9-5-96b


རྡོ་རྗེ་ནག་པོའི་ཕྲེང་བ་གཉིས་ཀྱི་དབུས་སུ་ཐོད་པའི་ཕྲེང་བ་བྱེད་པར་བཤད་པས། སྟོད་སྨད་ནས་ཕྲེང་བ་དེ་ལ་བརྒྱུས་པའོ། །དེས་ནི་ཆོས་ཀྱི་དབྱིངས་ལས་བཞེངས་པ་མཚོན་པར་ལྭ་བ་པ་དང༌། པྲ་ཛྙཱ་རཀྵི་ཏའི་འགྲེལ་པར་འབྱུང་བའི་དོན་ནི། ཐོད་སྐམ་གྱིས་
བདག་མེད་པ་དང༌། གྱེན་དུ་འགྲེང་བས་དེ་ལས་བཞེངས་པ་མཚོན་པར་མངོན་ནོ། །དབུ་ལ་ཟླ་བ་ཕྱེད་པ་འཆང་བ་ནི། ཅུང་ཟད་གཡོན་དུ་ཡོ་བར་འཁྲུལ་སྤོང་དང༌། ཁྱད་པར་གསལ་བྱེད་ལས་བཤད་ལ། དེས་བྱང་ཆུབ་ཀྱི་སེམས་འབབ་པ་མཚོན་ནོ། །
མངོན་བརྗོད་ལས་ཀྱང་ལན་དུ་མར་ཟླ་ཕྱེད་དུ་གསུངས་པས། ཚེས་གཅིག་གི་ཟླ་བར་འཆད་པ་དོན་མིན་ནོ། །ལོག་པར་ལྟ་བ་ལས་ལོག་ནས་ཡང་དག་པའི་ལྟ་བ་ཅན་དུ་གྱུར་པས་ཞལ་རྣམ་པར་འགྱུར་བའོ། །བདུད་བཞི་འཇོམས་པས་མཆེ་བ་བཞི་
གཙིགས་ཤིང་འཇིགས་སུ་རུང་བའོ། །རྣམ་སྣང་ལ་སོགས་པའི་རིགས་ལྔ་དང༌། སྤྱན་མ་ལ་སོགས་པའི་ཡུམ་བཞིའི་རང་བཞིན་གྱི་ཞི་གནས་དང༌། ལྷག་མཐོང་གི་ཤིན་ཏུ་དགའ་བའི་ཉམས་དང་ལྡན་པས། སྒེག་པ་དང་ལ་སོགས་པའི་སྒྲས་
བསྡུས་པ་དཔའ་བ་དང༌། མི་སྡུག་པ་གསུམ་སྐུའི་དང༌། རྒོད་པ་དང་དྲག་ཤུལ་དང་འཇིགས་སུ་རུང་བ་གསུམ་གསུང་གི་དང༌། སྙིང་རྗེ་དང་རྔམ་པ་དང་ཞི་བ་གསུམ་ཐུགས་ཀྱི་ཉམས་ཏེ་ཉམས་དགུ་དང་ལྡན་པའོ། །ཆགས་སོགས་ཀྱི་ཉོན་མོངས་སྦྱོང་བས་
སྟག་གི་པགས་པའི་ཤམ་ཐབས་ཅན་ནོ། །དེ་ཡང་མན་སྙེ་ལས། སྟག་གི་པགས་པའི་གོས་ཏེ་དེ་ཡང་ཤེས་རབ་དང་བཅས་པ་ཉིད་ན་རྒྱབ་ཀྱི་ཆ་ཁོ་ནར་རོ། །ཞེས་གསུངས་པ་ལྟར། བླ་མ་ཁ་ཅིག་སྟག་གི་པགས་པའི་ཤམ་ཐབས་རློན་པ་ཁྲག་འཛག་
9-5-97a


བཞིན་པ་མགོ་བོ་གཡས་དང་། འཇུག་པ་གཡོན་དུ་བསྟན་ནས་བགོས་པ་ལས། ཡུམ་དང་སྦྱོར་བའི་དུས་སུ་རྒྱབ་ཀྱི་ཆར་བཤུགས་ནས་མགོ་བོ་གཡན་དང༌། མཇུག་མ་གཡས་སུ་བྱས་ནས་མདུན་གྱི་ཆར་མེད་པའོ། །ཞེས་ཟེར་རོ། །
ཨཱ་ལི་དང་ཀཱ་ལི་ལྔ་བཅུའི་རང་བཞིན་གྱི་མི་མགོ་རློན་པ་ལྔ་བཅུའི་ཕྲེང་བ་འཕྱང་བའོ། ཕྱག་རྒྱ་དྲུག་གིས་བརྒྱན་པ་ཞེས་གསུངས་པའི་ཕྱག་རྒྱ་དྲུག་ནི། མགུལ་རྒྱན་དང༌། གདུ་བུ་དང་། རྣ་ཆ་དང༌། དབུ་སྟེ་སྤྱི་གཙུག་ཏུ་རྣམ་པར་བརྒྱན་པའི་
ནོར་བུ་དང༌། མཆོད་ཕྱིར་ཐོགས་དང༌། ཐལ་བ་ཆེན་པོ་ཞེས་པ་ནི། ཕྱག་རྒྱ་དྲུག་ཏུ་རབ་ཏུ་བརྗོད་དོ། །དེ་ལ་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དྲུག་རྣམ་པར་དག་པའི་ཕྱིར། སྐུ་ལ་ཕྱག་རྒྱ་དྲུག་གིས་རྒྱས་བཏབ་པའོ། །འདི་ནི་
ཀུན་སྤྱོད་དང་མངོན་བརྗོད་ཀྱི་སྐབས་འགའ་ཞིག་དང་མཐུན་ལ། མངོན་བརྗོད་ཀྱི་ལྔ་པ་ལས། སྤྱི་གཙུག་གི་ནོར་བུ་མ་བགྲངས་པར། མགོ་ཕྲེང་བགྲངས་ཤིང་གཞན་སྔར་དང་འདྲའོ། །བླ་མ་ཁ་ཅིག་མགོ་ཕྲེང་གཅིག་ཏུ་བགྲངས་པ་འགྱུར་མ་
དག་པ་ལས། དཔེ་མ་དག་པར་འཆད་མོད་ཀྱང༌། མངོན་བརྗོད་ཀྱི་འགྱུར་ཕལ་ཆེ་བ་ལས་དེ་བཞིན་དུ་འབྱུང་བས་དཔྱད་དོ། །ཕྱིན་དྲུག་དང་སྦྱོར་ཚུལ་ནི་རིམ་པ་ཇི་བཞིན་དུ་བྱའོ། །འཁྲུལ་སྤོང་ལས་སྤྱི་གཙུག་གི་ནོར་བུ་དང་མཆོད་ཕྱིར་ཐོགས་མ་
བགྲངས་པར་འཁོར་ལོ་དང་རྐེད་རྒྱན་བགྲངས་ཏེ་ཀྱཻ་རྡོར་དང་མཐུན། བརྩོན་འགྲུས་དཔལ་བཤེས་གཉེན་གྱིས་འཁོར་ལོ་དང་རྐེད་རྒྱན་སོགས་ཉེ་བའི་ཕྱག་རྒྱར་བཤད་དོ། །བླ་མ་ཁ་ཅིག་རལ་པའི་ཐོར་ཅོག་ལ་སྟེང་དུ་ཡིད་བཞིན་གྱི་ནོར་བུ་དང༌། 
9-5-97b


དེའི་འོག་ཏུ་སྣ་ཚོགས་རྡོ་རྗེ་བྱ་གསུང་ཡང༌། སྤྱི་གཙུག་གི་ནོར་བུས་མཚན་པའི་འཁོར་ལོ་བྱས་ན་རུང་ངམ་སྙམ། དེ་དང་ཐ་མ་གཉིས་མ་གཏོགས་པའི་ལྷག་མའི་རྒྱན་གསུམ་མི་རུས་ལས་བྱས་པ་གཞན་དང་མཐུན་པར་བྱ། འཁྲུལ་སྤོང་ལྷར་རྐེད་
རྒྱན་ཀྱང་བྱའོ། མཆོད་ཕྱིར་ཐོགས་ནི་མི་རུས་ལས་བྱས་པར་འཁྲུལ་སྤོང་དང༌། ཁྱད་པར་གསལ་བྱེད་ལས་བཤད་ལ། མིང་གཉིས་པ་ཚངས་སྐུད་ཅེས་ཀྱང་འབྱུང་སྟེ། སེར་ལ་ཁར་ཐོགས་པའོ། །མི་རུས་ཀྱི་ཐལ་བ་ནི་ལུས་ཐམས་ཅད་ལ་བྱུགས་
པ་སྟེ། དེས་ནི་ལུས་ཐམས་ཅད་ལ་བྱང་ཆུབ་ཀྱི་སེམས་ཀྱིས་ཁྱབ་པ་མཚོན་ནོ། །གཙོ་བོ་དེའི་མདུན་དུ་སྟེ་དེ་ལ་མངོན་དུ་ཕྱོགས་པར་བཅོམ་ལྡན་འདས་མ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་ཕྱག་གཉིས་མ་དབུ་སྐྲ་རྒྱབ་ཏུ་སིལ་བུར་བཤིག་
པ། ཐོད་བའི་དུམ་བུས་བརྒྱན་པའི་འོག་པག་གི་སྐ་རགས་ཅན། ཕྱག་གཡོན་པས་ཡབ་ཀྱི་མགུལ་པ་ནས་འཁྱུད་པའི་ཐོད་པ་ན། གདུག་པའི་བདུད་བཞི་ལ་སོགས་པའི་ཁྲག་དང་རྒྱུ་མས་བཀང་བ་བསྣམས་མ། གཡས་པས་ཕྱོགས་བཅུའི་སྡོང་
བ་སྟེ་གདུག་པ་ཅན་ཀུན་ལ་རྡོ་རྗེ་དང་བཅས་པའི་སྡིགས་མཛུབ་ཀྱིས་སྡིགས་པར་བྱེད་པའོ། །སྟོང་པ་ཉིད་ཀྱི་ཚུལ་གྱིས་འགྲོ་བ་མི་དམིགས་པར་མཉམ་པར་རྟོགས་པས་བསྐལ་པ་འཇིག་པའི་དུས་ཀྱི་མེ་ལྟ་བུར་ཤིན་ཏུ་རྣམ་པར་དག་པའི་ཡེ་ཤེས་
ཀྱི་སྣང་བ་དང་ལྡན་པས་གཟི་བརྗིད་ཆེ་བའོ། དེས་ན་ཉི་མའི་དཀྱིལ་འཁོར་གྱི་འོད་ཅན་ནོ། །ཁྲག་ལ་དགྱེས་ཤིང་ཟླ་མཚན་དང་ལྡན་པས་ཁྲག་པས་ཁྲག་འཛག་པའོ། །བྱིན་པ་གཉིས་ཀྱིས་ཡབ་ཀྱི་བརླའི་སྟེང་དུ་ལེགས་པར་འཁྲིལ་བ། ལྷག་མཐོང་གི་རང་
9-5-98a


བཞིན་གྱི་བདེ་བ་ཆེན་པོར་གནས་ཀྱང་འགྲོ་བའི་དོན་བྱེད་པས་ཐུགས་རྗེའི་བདག་ཉིད་ཅན་ནོ། །ཡུམ་ཡང་ཐལ་པ་མ་གཏོགས་པ་ཕྱག་རྒྱ་ལྔས་བརྒྱན་པ་སྟེ། གདུ་བུ་ལ་རྐང་གདུབ་དང་ལག་གདུབ་གཉིས་དང་དཔུང་རྒྱན་དང་འཁོར་ལོ་
དང༌། མི་མགོ་སྐམ་པོ་ལྔའི་ཐོད་དང༌། སྐམ་པོ་ལྔ་བཅུའི་དོ་ཤལ་སོགས་ཀྱང་ཤེས་པར་བྱའོ། །འདིར་ལྭ་བ་པའི་འགྲེལ་པ་ལས། ཅུང་ཟད་རྒོད་དང་ཡོངས་སུ་འཁྱུད། །གཅེར་བུ་ཉིད་དང་སྐྲ་གྲོལ་བ། །སྤུ་ལྡང་བདེ་བ་སྐྱེད་པ་ཡི། །རྟགས་ལྔ་པོ་ནི་ཕྱི་རོལ་
དུའོ། །རྟགས་གསུམ་དངོས་སུ་གསུངས་པ་ཡིས། །དེས་ན་རྟགས་གཉིས་རྟོགས་བྱས་ཏེ། །འཁོར་ལོ་ལྔར་གནས་ལྷ་མོ་རྣམས། །རྟགས་ལྔ་ཡིས་ནི་ཡང་དག་གནས། །ཞེས་གསུངས་པའི་རྟགས་གསུམ་ནི་གཙོ་མོ་དང་། དཔའ་མོ་ཉེར་བཞི་ལ་
ནི་འཁྱུད་པ་དང༌། གཅེར་བུ་དང་སྐྲ་གྲོལ་བ་ཡིན་ལ། ལྷ་མོ་ལྷག་མ་ལ་ནི་འཁྱུད་པའི་ཚབ་མར་ཅུང་ཟད་རྒོད་པ་དང་གསུམ་སྟེ། འཁྱུད་པ་ནི་ཤུགས་ཀྱིས་ཤེས་པར་བྱའོ། །འདིས་ནི་ལྷ་མོ་བཅུ་གཉིས་ཀྱི་ཕྱག་གྲི་ཐོད་ཐུགས་ཀར་བཟུང་བས་འཁྱུད་
ཚུལ་བྱེད་པ་ཡང་བསྟན་ནོ། །གཉིས་པ་ནི། ཡམ་ཡུམ་འདི་ལྟར་བཤད་པ་འདི་རྒྱུད་གང་ནས་གསུངས་སྙམ་ན། རྩ་བའི་རྒྱུད་དུ་ནི་སྤས་པར་གསུངས་པས་མི་གསལ་ལ། བཤད་པའི་རྒྱུད་ཀུན་སྤྱོད་ལས། ཕྱག་གཉིས་ཡང་དག་འཁྱུད་པ་དང༌། །
གཉིས་ཀྱིས་གླང་པོའི་པགས་པ་འཛིན། །དགྲ་སྟ་མདུང་རྩེ་གསུམ་གྲི་གུག །ཌཱ་མ་རུ་ནི་གཡས་པས་འཕྱར། །ཁ་ཊྭཱཾ་ག་དང་ཐོད་པའི་ཁྲག །ཞགས་པ་མགོ་བོ་འཕྱར་བ་སྟེ། །གཡོན་པ་རུ་ནི་ཡང་དག་བཤད། །ཅེས་ཡབ་ཀྱི་སྐུ་མདོག་དང་ཞལ་གྱི་གྲངས་
9-5-98b


མ་སྨོས་ཤིང༌། ཕྱག་མཚན་རྣམས་རིམ་པ་ཇི་ལྟ་བ་བཞིན་མ་བཤད་ཀྱང༌། ཕྱག་དང་ཕྱག་མཚན་རིམ་པ་ངེས་པ་ཅན་མ་སྨོས་པས་ལཱུ་ཨི་པ་བཞིན་བྱས་པས་ཆོག་གོ། མངོན་བརྗོད་ཀྱི་ལེའུ་བདུན་པ་ལས། ཕྱག་མཚན་གཉིས་དང༌། དམ་ཚིག་གི་རྡོ་
རྗེ་ཕག་མོ་ལ་འཁྱུད་ཅེས་པ་མ་གཏོགས་པ། ཞལ་གྱི་གྲངས་དང༌། དེའི་མདོག་དང༌། སྐུ་མདོག་དང༌། ཕྱག་མཚན་ལྷག་མ་དང༌། རལ་པ་ལ་སོགས་པ་འདི་བཞིན་དུ་བཤད་ལ། གཡས་པའི་དྲུག་པ་ན་རྡོ་རྗེ་མདུང་ཞེས་པ་ཙམ་ལས་རྩེ་གསུམ་པ་མ་བཤད་
དེ་མི་འགལ། གཡོན་པའི་དྲུག་པས་བདུད་བཞིའི་མགོ་བོ་བསྣམས་པར་བཤད་པས་ནི་ཚངས་མགོ་གདོང་བཞི་པར་སྟོན་ནམ་བརྟག་གོ། ཡུམ་ནི་སྡོམ་འབྱུང་དང༌། གཡས་པའི་གྲི་གུག་མ་གཏོགས་པ་ཀུན་སྤྱོད་དང་མཐུན་ལ། ཡུམ་གྱི་གཡས་པས་
རྡོ་རྗེ་འཛིན་པ་ནི། མངོན་བརྗོད་ཀྱི་སྐབས་མང་པོར་གསུངས་སོ། །དེས་ནི་དྲིལ་བུ་པས་ཞལ་བཞི་ཕྱག་བཅུ་གཉིས་པར་བཤད་པ་ཡང་རྒྱུད་གང་ནས་གསུངས་པ་ཤེས་པར་བྱའོ། །ཞལ་བཞི་ལ་སོགས་པ་རྣམ་ཐར་བཞི་ལ་སོགས་པར་བཤད་པ་ནི། ལྭ་བ་
པའི་འགྲེལ་བར། ཐལ་བས་ལུས་ཐམས་ཅད་ལ་བྱུགས་པ་ནི། ལུས་ཐམས་ཅད་ལ་བྱང་ཆུབ་ཀྱི་སེམས་ཀྱིས་ཁྱབ་པ་མཚོན་པར་གསུངས་པས། གཞན་རྣམས་ལའང་སྐུའི་སྣང་བ་དེ་དང་དེས་རྣམ་ཐར་བཞི་ལ་སོགས་པ་མཚོན་པར་བྱའོ། །ཡབ་ཀྱིས་ཡུམ་ལ་དང༌། 
དེས་ཀྱང་ཡབ་ལ་འཁྱུད་པ་ནི་ཐབས་ཤེས་ཕན་ཚུན་དུ་འཁྱུད་པ་ཡིན་ལ། དེའི་མཚོན་དོན་ནི་སྟོང་པ་ཉིད་བདག་མེད་པའི་དོན་རྟོགས་པ་དང༌། སྙིང་རྗེའི་སྐད་དོད་ཀ་རུ་ཎའི་ཀ་ལ་རྗེས་སུ་ང་རོ་བྱིན་པས་ནི་བདེ་བ་དང་རུ་ཎ་བདེ་བ་དང་རུ་ཎ་འགོག་པའི་དོན་དུ་བྱ་སྟེ། འགྱུར་བ་
9-5-99a


འཛག་བདེ་འགོག་པར་བསྟན་པའི་ཤུགས་ཀྱིས་མི་འགྱུར་བ་དང་མི་འཛག་པའི་བདེ་བ་ཆེན་པོ་སྟོན་པར་དུས་འཁོར་གྱི་སྐོར་ནས་གསུངས་པ་ལྟར་རམ། མཚོ་སྐྱེས་ཀྱིས་གསུངས་པ་ལྟར་མ་ཧཱ་ཀཾ་ནི་བདེ་བ་ཆེན་པོ་དང༌། རུ་ཎ་སྡུད་
བ་སྟེ་དེ་ཡང་ལྷན་སྐྱེས་ཀྱི་བདེ་བ་ཡིན་པས། སྙིང་རྗེ་ལ་སྤྱིར་གཉིས་ཡོད་ཀྱང་འདི་འདྲའི་སྐབས་སུ་སེམས་ཅན་སྡུག་བསྔལ་དང་བྲལ་འདོད་ལ་བཤད་པ་ལྟར་མི་བྱའོ། །ལྷན་སྐྱེས་ཀྱི་བདེ་ཆེན་ལ་བྱ་སྟེ། མངོན་བརྗོད་ལས། བདེ་ཆེན་ཐུགས་རྗེའི་བདག་ཉིད་ཅན། 
ཞེས་གསུངས་ཤིང་ལཱུ་ཨི་པས་ཀྱང་དེ་ལྟར་གསུངས་སོ། །དེ་གཉིས་ངོ་བོ་དབྱེར་མེད་དུ་སྦྱོར་བའི་དོན་ནོ། །ཡུལ་སྟོང་ཉིད་དེ་ཡུལ་ཅན་གཞན་གྱིས་བསྒོམས་པ་ལས་ཁྱད་པར་དུ་གྱུར་པའི་ལྷན་སྐྱེས་ཀྱི་བདེ་བས་སྒོམ་དགོས་པར་བསྟན་པའི་ཕྱིར་དུ་
ཡབ་ཡུམ་ཕན་ཚུན་སྦྱོར་བའི་རྣམ་པ་ཅན་དུ་མཛད་པ་ནི་ལམ་འདིའི་གནད་དམ་པ་ཡིན་པས། སྤྱིར་ཐབས་ཤེས་དབྱེར་མེད་དུ་སྦྱོར་བ་མཚོན་ཞེས་པ་ཙམ་མིན་པར་ཁྱད་པར་ཐོན་པ་ཅིག་དགོས་སོ། །མཚོན་དོན་ཁྱད་པར་ཅན་དེའི་སྟོང་ཉིད་རྟོགས་
པ་ལ་བཞིར་ཕྱེ་བ་ནི་རྣམ་ཐར་བཞི་ཡིན་ལ། བདེ་བ་ནི་ཁ་ཊཱཾ་ག་དང་ཐོད་པ་དང༌། གཉིས་ཀ་ཡང་རྡོར་དྲིལ་གྱི་མཚོན་དོན་ནོ། །དེའི་བྱེད་ལས་ནི་གཏི་མུག་མ་ལུས་པར་དྲལ་བ་དང༌། དེས་བསྐྱོད་པའི་སྒྲས་སངས་རྒྱས་ཐམས་ཅད་བསྐུལ་བ་དང༌། གཡས་ཀྱི་
ཕྱག་མཚན་གསུམ་དང༌། གཡོན་ཀྱི་ཕྱག་མཚན་ལྔ་བས་རང་གཞན་གྱི་རྒྱུད་ལ་འཆིང་བ་དང༌། གཡས་བརྐྱང་གི་སྟོབས་ཀྱིས་ཟིལ་གྱིས་གནོན་པ་དང༌། འཁོར་འདས་ཀྱི་མཐའ་གཉིས་གནོན་པའོ། དེ་ལྟར་མཛད་པས་སྐྱོན་ཟད་པའི་སྤངས་པ་ནི་ཚངས་
9-5-99b


མགོ་དང༌། ཡོན་ཏན་གོང་དུ་འཕེལ་ཏེ་མཐར་ཕྱིན་པའི་རྟོགས་པ་ནི་རལ་པ་ཡར་ལ་བསྡུས་པ་དང༌། ཡེ་ཤེས་ལྔའི་ངོ་བོར་གནས་བ་ནི་རྡོ་རྗེ་འཕྲེང་བའི་མཚོན་དོན་ནོ། །ཞི་མཐའ་སྤངས་པའི་འོད་གསལ་ལས་གཟུགས་སྐུར་བཞེངས་པ་ནི་ཐོད་
སྐམ་ལྔ་དང༌། དེ་འདྲ་དེས་འཕྲིན་ལས་བཞིས་སེམས་ཅན་གྱི་དོན་མཛད་པ་ནི་སྣ་ཚོགས་རྡོ་རྗེའི་མཚོན་དོན་ནོ། །སྤངས་རྟོགས་གཉིས་ཀྱི་རྟོགས་པའི་ཁྱད་པར་ཇི་སྙེད་པ་ཐམས་ཅད་གཟིགས་པ་ནི་སྤྱན་གསུམ་དང༌། འཁོར་ལོའི་མཐའ་གནོན་པའི་ཚུལ་
ཕྱག་བཅུ་གཉིས་ཀྱི་མཚོན་དོན་དང༌། ཕྱིན་དྲུག་གི་ལམ་རྫོགས་པར་མཛད་པར་མཛད་པ་ནི་ཕྱག་རྒྱ་དྲུག་གིས་མཚོན་ནོ། །བདེ་ཆེན་འཕེལ་བའི་རྒྱུ་ནི་ཡུམ་དང་སྦྱོར་པ་སོགས་ལུས་ལ་གནད་དུ་བསྣན་པ་ལས་བྱང་སེམས་ཀྱི་ཟླ་བ་ཞུ་བ་ཡིན་ལ། །དེ་མགོ་བོ་ནས་འཇིག་
པ་ནི་ཟླ་ཕྱེད་དང༌། འཛགས་པས་ལུས་ཀུན་ལ་ཁྱབ་པ་ནི་ཐལ་བས་བསྟན་ནོ། །ལྷག་མ་ནི་གོ་སློའོ། །དེ་འདྲ་བའི་མཚོན་དོན་ཁོང་དུ་ཆུད་པས་ནི། ལམ་འདི་ལ་ངེས་པ་ཆེན་པོ་སྟེར་བར་མཐོང་ནས་གོ་བདེ་བར་བཤད་དོ། །གསུམ་པ་ནི། དེ་ནས་རྡོ་རྗེ་དང་པདྨ་
སྦྱར་བ་བརྗོད་པར་བྱ་སྟེ། ཡབ་ཀྱི་གསང་གནས་མི་དམིགས་པ་ལས། ཧཱུཾ་དཀར་པོ་ལས་རྡོ་རྗེ་དང༌། བྱཱ་ཡིག་དམར་པོ་ལས་བྱུང་བའི་ནོར་བུ་དམར་པོ་རྩེ་མོ་ལ་བྱཱ་ཡིག་སེར་པོས་མཚན་པ་དང༌། ཡུམ་གྱི་གསང་གནས་མི་དམིགས་པ་ལས། ཨ་ལས་པདྨ་
དམར་པོ་འདས་མ་གསུམ་པ། དྱཱ་ཡིག་དཀར་པོ་ལས་བྱང་ཆུབ་ཀྱི་སེམས་མཚོན་པའི་ཟེའུ་འབྲུ་སྟེ་ལྟེ་བ་དཀར་པོ། །རྩེ་མོར་དྱཱ་ཡིག་སེར་པོར་མཚན་པར་བསམ། རྡོ་རྗེའི་ཁ་དོག་ལྭ་བ་པས་མ་བཤད་ལ། པྲཛྙཱ་རཀྵི་ཏ་དང་འཁྲུལ་སྤོང་གིས་ནག་པོ་དང༌། 
9-5-100a


ཁྱད་པར་གསལ་བྱེད་ལས་དཀར་པོར་བཤད་དེ་རྩེ་ལྔ་པར་བྱའོ། བྱཱ་ཡིག་དང་པོ་དམར་པོ་དང༌། གཉིས་པ་སེར་པོར་འགྲེལ་པ་གསུམ་དང་འཁྲུལ་སྤོང་ལས་བཤད། དྱཱ་ཡིག་སྔ་མ་དཀར་པོར་འཁྲུལ་སྤོང་ལས་སོ། །དེ་ནས་
ཡབ་ཀྱི་ལྟེ་བ་དང་ཐུགས་ཀར་ཡུམ་གྱི་སྙིང་པོ་དང་ཉེ་སྙིང་དང༌། འགྲིན་པ་དང་དཔྲལ་བར་རང་གི་སྙིང་པོ་དང་ཉེ་སྙིང་འགོད། ཡུམ་གྱི་ལྟེ་བ་དང་ཐུགས་ཀར་ཡབ་ཀྱི་སྙིང་པོ་དང་ཉེ་སྙིང་དང་མགྲིན་པ་དང་དཔྲལ་བར་རང་གི་སྙིང་པོ་དང་ཉེ་སྙིང་དགོད་ལ། 
ཕན་ཚུན་དུ་ཙུ་མྦྷ་ན་བྱ་ཞིང༌། ཡི་གེ་གསུམ་བརྗོད་ལ་དགའ་བ་བརྩམ་པར་བྱ་སྟེ། ཕྱི་རོལ་གྱི་མཛེས་མ་དང་སྦྱོར་བ་ལ་ཡང་ཆོ་ག་འདི་ཉིད་དོ། །མར་དོས་ཡུམ་གྱི་སྔགས་གཉིས་ཟླ་གདན་དང༌། ཡབ་ཀྱི་སྔགས་གཉིས་ནི་གདན་ལ་དང༌། བཞི་ཀའང་ཁ་དོག་དམར་པོ་
དང་གཡོན་སྐོར་གྱིས་འཁོད་ཅིང༌། སྙོམས་འཇུག་གི་ཚེ་དེ་རྣམས་ཀྱི་འོད་ཟེར་འདྲེས་པས་འཁྱུད་པ་དང་འོ་བྱེད་པོ་ལ་སོགས་པའི་བདག་ཉིད་དེ་རྣམ་པ་དེ་ལྟ་བུས་སྙོམས་པར་འཇུག་པར་བྱའོ། །ཞེས་བཤད་དེ། འདིའི་འགྲེལ་པ་གཞན་གཉིས་དང༌། པྲཛྙཱ་རཀྵི་
ཏའི་འགྲེལ་པ་རྡོག་འགྱུར་དུ་ཡབ་ཡུམ་གཉིས་ཀྱིས་ཕན་ཚུན་གྱི་འགྲིན་པ་དང་དཔྲལ་བར་ཙུ་མྦྷ་ན་བྱ་བར་བཤད་པ་དང༌། འཁྲུལ་སྤོང་ལས་སྔགས་བཞི་ཡབ་ཀྱི་གནས་བཞིར་བཀོད་ནས་ཡབ་ཀྱི་ཡུམ་ལ་ཙུ་མྦྷ་ན་དང༌། དེ་བཞིན་དུ་ཡུམ་ལའང་བཀོད་
ནས་ཡུམ་གྱིས་ཡབ་ལ་ཙུ་མྦྷ་ན་བྱ་བར་བཤད་པ་ལྟར། པྲཛྙཱ་རཀྵི་ཏའི་འགྲེལ་པའི་འགྱུར་གཞན་ལས་ཀྱང་འབྱུང་བས་སྔ་ཕྱི་གཉིས་ཀ་དགོས་ཤིང༌། སྔ་མའི་དོན་ནི་མར་དོ་བཞེད་པ་ལྟར་བྱ་དགོས་པ་འདྲའོ། དེ་ལྟར་བྱིན་གྱིས་རློབ་པ་ནི་ཀུན་སྤྱོད་ལ་བརྟེན་པ་
9-5-100b


ཡིན་ཏེ། ཇི་སྐད་དུ། སྔགས་པས་དཔའ་བོ་རྣལ་འབྱོར་མ་བྱིན་བརླབ། །ཡི་གེ་དྱཱ་ནི་སྣ་རྩེར་ཡང་དག་སྦྱར། །བྱཱ་ནི་མཚན་གྱི་ལྟེ་བར་རྣམ་པར་དགོད། ལྟེ་བ་སྙིང་ག་ཁ་དང་དཔྲལ་བ་རུ། །སྔགས་ཀྱི་ཚོགས་དང་བཅས་པས་བྱིན་གྱིས་བརླབ། །ལྟེ་བ་སྙིང་གར་
རྣལ་འབྱོར་མ། །སངས་རྒྱས་མཁའ་འགྲོ་མ་ཡིས་ཏེ། ལྕེ་དང་སྤྱི་བོ་གཉིས་སུ་ནི། །དཔའ་བོས་བྱིན་གྱིས་བརླབ་པར་བྱ། །རྣལ་འབྱོར་མ་དང་དཔའ་གཉིས་མེད། །ཅེས་མར་དོའི་འགྱུར་ལས་གསུངས་སོ། །དེ་ལ་སྣ་རྩེ་ནི་པདྨའི་སྣ་རྩེ་དང༌། མཚན་ནི་རྡོ་རྗེ་དང༌། 
ལྟེ་བ་ནི་དེའི་རྩེ་མོ་དང༌། དེ་ནས་སྐང་པ་གཉིས་ཀྱིས་གཙོ་མིའི་གནས་བཞིར་སྔགས་ཀྱིས་བྱིན་གྱིས་རློབ་པ་དང༌། དེ་ནས་ལྟེ་བ་དང་ཞེས་པ་ནས་བྱིན་གྱིས་བརླབ་པར་བྱ། ཞེས་པའི་བར་གྱིས་ཡབ་ཀྱི་གནས་བཞིར་སྔགས་ཀྱིས་བྱིན་གྱིས་རློབ་པ་སྟེ། དཔའ་བྱིན་
བརླབ་ཅེས་དཔའ་བོ་གཙོ་བོའི་ལྟེ་བ་ལ་སོགས་པ་རྣམས་སུ་བྱའོ་ཞེས་དང༌། ལྕེ་དང་ཨ་བ་དྷཱུ་ཏཱི་གཉིས་ཞེས་འགྲེལ་པར་འདོན་ཞིང་བཤད་དོ། །ལོ་ཆེན་དང་འཆིངས་ཡོན་ཏན་འབར་གྱི་འགྱུར་ལས། ཨ་བ་དྷཱུ་ཏཱི་གཉིས་ཀྱིས་དཔའ་བྱིན་བརླབ་ཅེས་འབྱུང་བ་
ནི་འགྱུར་མི་ལེགས་ལ། ལྕེ་དང་ཨ་བ་དྷཱུ་ཏཱི་ཞེས་པ་ལྟར་ན་ལྕེ་ནི་མགྲིན་པ་སྟེ་ཁ་ཡང་དེ་བཞིན་ནོ། །དྷཱུ་ཏཱི་ནི་དེའི་ཡར་སྣ་སྨིན་མཚམས་སོ། །ཡབ་ཀྱི་ལྟེ་བར་རྣལ་འབྱོར་མ་སྟེ། ཡུམ་གྱི་སྙིང་པོ་དང༌། སྙིང་ཁར་སངས་རྒྱས་མཁའ་འགྲོ་མའི་སྔགས་ཀྱིས་བྱིན་གྱིས་
བརླབ། ལྕེ་དང་སྤྱི་བོ་གཉིས་སུ་ཡབ་ཀྱི་སྙིང་པོ་དང་ཉེ་སྙིང་གིས་བྱིན་གྱིས་རློབ་པ་མར་དོའི་འགྱུར་ལེགས་སོ། །རྐང་པ་ཐ་མ་ནི་ཡབ་ཡུམ་སྙོམས་པར་འཇུག་པའོ། །དེའི་དགོས་པ་ནི་དགའ་བཞི་སྐྱེད་པ་ཡིན་ལ། དེ་ཡང་ལུང་སྡ་མའི་མཇུག་ཉིད་
9-5-101a


ནས། དང་པོ་དགའ་བ་དཔའ་བོ་སྟེ། །མཆོག་ཏུ་དགའ་བ་རྣལ་འབྱོར་མ། །རབ་ཏུ་དགའ་བ་མ་ལུས་ཉིད། །བདེ་དེ་ཐབས་དེ་ཀུན་རིག་པའོ། །ཞེས་གསུངས་སོ། །དེ་ནི་ཡབ་ཡུམ་སྙོམས་པར་ཞུགས་པས་བྱང་སེམས་ཞུ་བ་སྤྱི་བོ་ནས་
མགྲིན་པར་སླེབ་པ་ན་དགའ་བཞིའི་དང་པོ་དགའ་བ་སྐྱེ་སྟེ། འགྲེལ་པར་དཔའ་བོ་ལྟ་བུར་བཤད། མགྲིན་པ་ནས་སྙིང་ཁར་སླེབ་པ་ན་མཆོག་དགའི་ཡེ་ཤེས་སྐྱེ་ཏེ། འགྲེལ་པར་རྣལ་འབྱོར་མ་ལྟ་བུར་བཤད། སྙིང་ཁ་ནས་ལྟེ་བར་སླེབ་པ་ན་མཆོག་
དགའ་ནས་རབ་ཏུ་གྱུར་པའི་ཁྱད་པར་གྱི་དགའ་བ་སྐྱེ་སྟེ། འགྲེལ་པས་ཐབས་ཤེས་གཉིས་ཆར་ལ་བཤད་དོ། །མར་དོས་སྲུབ་པ་ནས་བརྩམས་ཏེ་རྡོ་རྗེར་ཕྱིན་པའི་བདེ་པ་ནི་རྣམ་རྟོག་རགས་པའི་ཕྱིར་ཐབས་ཡིན་པས་དཔའ་བོ་དང༌། ནོར་བུ་དང་ཉེ་བར་
ཕྱིན་པའི་བདེ་བ་ནི་ཕྲ་བས་ན་ཤེས་རབ་ཡིན་པས་རྣལ་འབྱོར་མ་དང༌། ནོར་བུར་ཕྱིན་པའི་བདེ་བ་ནི་དེ་ཡན་ཆད་ཀྱི་གཉིས་ཀ་བསྡུས་བས་ཁྱད་དགའ་དང༌། ནོར་བུའི་རྩེར་སོན་པའི་བདེ་བ་ནི་ལྷན་ཅིག་སྐྱེས་དགར་འཆད་དོ། །མ་ལུས་ཉིད་ནི་དགའ་བ་
གསུམ་ལས་འདས་པ་སྟེ། དེ་གསུངས་པ་ནི་དགའ་པ་གསུམ་པའི་བདེ་བ་གསང་གནས་བསྐྱོད་པའི་ཐབས་ལ་བརྟེན་ནས་ཀུན་རིག་ཅེས་པའི་ཀུན་ནི་ཀུན་རྫོབ་བྱང་ཆུབ་ཀྱི་སེམས་ནོར་བུའི་རྩེར་རྫོགས་ཏེ་གནས་པའོ། རིག་པ་ནི་དེ་ལ་ལོངས་སྤྱོད་
པའི་སྐུའི་བདག་ཉིད་ལྷན་སྐྱེས་སོ། །དེའི་ཆེ་བ་ནི་ཀུན་རིག་པའོ། །ཞེས་པའི་མཇུག་ཐོགས་སུ། མཐོ་རིས་ས་སྟེང་ས་འོག་ཏུ། །སྐད་ཅིག་གིས་ནི་ལུས་གཅིག་འགྱུར། །ཞེས་པས་སྟོན་ནོ། །དེའི་དོན་ནི་སྐད་ཅིག་གིས་ཏེ་ལྷན་སྐྱེས་ཀྱི་དགའ་བའི་སྟོབས་
9-5-101b


ཀྱིས་ས་གསུམ་པོ་རྣམས་ལུས་གཅིག་སྟེ་བདེ་བ་ཆེན་པོའི་རང་བཞིན་དུ་འགྱུར་བར་འགྲེལ་པས་བཤད་དོ། །ལྷན་སྐྱེས་ཀྱི་བདེ་སྟོང་ཁྱད་པར་པ་བསྒོམས་པའི་སྟོབས་ཀྱིས་སྣོད་བཅུད་ཀུན་ལ་རྒྱས་བཏབ་སྟེ་བསྒོམས་པས། རྣལ་འབྱོར་པ་ལ་བདེ་སྟོང་དུ་འཆར་
བའི་དོན་ནོ། །དེ་གོམས་ན་རིམ་པ་དང་པོའི་སྐབས་སུ་ཡང་དེའི་ཉམས་ཤུགས་ཅན་འཆར་རོ། །རིམ་པ་དང་པོར་ཡབ་ཡུམ་སྙོམས་པར་འཇུག་པའི་སྐབས་ཀུན་ཏུ་དགའ་བ་རྩོམ་པའི་དམིགས་པ་རྣམས་དམིགས་ཕྱེད་པ་དང༌། དལ་བུས་བརྟན་པར་བྱས་ལ་མོས་པ་
ཚུན་ཆོད་ཀྱིས་ཀྱང་དགའ་བཞི་བསྐྱེད་པའི་མཐར་བདེ་སྟོང་སྦྱར་ལ་བསྒོམ་ཞིང༌། དཀྱིལ་འཁོར་གཉིས་ཀྱང་དེའི་ངོ་བོར་བསྒོམ། སྐབས་གཞན་དུ་ཡང་དེ་དྲན་པར་བྱས་ལ་བདེ་སྟོང་གི་ངོ་བོར་སྒྲོམ་པ་ཡང་དང་ཡང་དུ་གོམས་པར་བྱ་སྟེ། རྫོགས་རིམ་གྱི་རྒྱུད་སྨིན་
བྱེད་དུ་འགྲོ་བའི་ཐབས་ཀྱི་གཙོ་བོ་ཡིན་པའི་ཕྱིར་རོ། ཚུལ་འདི་ནི་བླ་མེད་ཀྱི་རིམ་པ་དང་པོ་ཐུན་བཞིར་སྒོམ་པ་ཀུན་ལ་ཤེས་དགོས་སོ། འདིར་ལྭ་བ་པ་དང་པྲཛྙཱ་རཀྵི་ཏའི་འགྲེལ་པར་ཡབ་ཡུམ་གསལ་གདབ་པ་རྫོགས་མ་ཐག་སྔར་བཤད་པ་ལྟར་རྡོ་རྗེ་དང་པདྨ་སྦྱོར་བ་སོགས་
བྱས་ནས་དགའ་བ་བསྐྱེད་པའི་འོག་ཏུ་མཁའ་འགྲོ་མ་ལ་སོགས་པའི་འཁོར་གྱི་ལྷ་གསལ་འདེབས་སོ། །འཁྲུལ་སྤོང་དང་ཁྱད་པར་གསལ་བྱེད་ལས། ལྷ་རེ་གཉིས་པོ་ཐམས་ཅད་གསལ་གདབ་པ་རྫོགས་པ་དང༌། ལྷ་ཐམས་ཅད་ཀྱང་ཐུགས་ཀར་ཉི་གདན་ལ་ཏིང་
ངེ་འཛིན་སེམས་དཔའ་ཧཱུཾ་ཡིག་སྔོན་པོ་དང༌། འཆད་པ་ལྟར་ལྟེ་བར་ཡེ་ཤེས་སེམས་དཔའ་ཡབ་ཡུམ་སྒོམ་པའམ། ཡང་ན་སྙིང་གར་ཡེ་ཤེས་སེམས་དབའ་དེའི་ཐུགས་ཀར་ཏིང་དེ་འཛིན་སེམས་དཔའ་སྟེ་སེམས་དཔའ་གསུམ་ལྡན་དུ་བསྒོམ། དེ་ནས་
9-5-102a


སྔགས་གསུམ་བརྗོད་ནས་མིག་ལ་སོགས་པ་དྲུག་ལ་གཏི་མུག་རྡོ་རྗེ་ནས། དབང་ཕྱུག་རྡོ་རྗེའི་བར་དྲུག་བསྐྱེད་དེ། གཟུགས་རྡོ་རྗེ་མ་ནས་ཆོས་དབྱིངས་རྡོ་རྗེ་མའི་བར་གྱི་ལྷ་མོ་དྲུག་བསྐྱེད་པས་འཁྱུད་པ་དང༌། ལྟེ་བ་སོགས་བཞི་དང་
གསང་གནས་སུ་ལྟུང་བྱེད་མ་ལ་སོགས་པ་ལྔ་བསྐྱེད་པ་ལ་རྣམ་སྣང་ནས་རིན་འབྱུང་གི་བར་ལྔ་དང༌། སྤྱི་གཙུག་ཏུ་རྡོར་སེམས་བསྐྱེད་པ་ལ་རང་འོད་ཀྱི་ཡུམ་གྱིས་འཁྱུད་པར་སྐྱེད། དེ་ནས་སྤྱི་བོ་ལ་སོགས་པའི་གནས་གསུམ་དུ་རྣམ་སྣང་འོད་དཔག་
མེད་མི་བསྐྱོད་པ་གསུམ་ཡུམ་དང་བཅས་པ་བསྐྱེད་དེ་བྱིན་གྱིས་རློབ། དེ་ནས་ལྷ་རྣམས་སྙོམས་པར་ཞུགས་ཏེ་ཞུ་ནས། སྐྱེ་མཆེད་དང༌། ཁམས་དང༌། ཕུང་པོ་དང༌། སྐུ་གསུང་ཐུགས་ལ་བསྟིམས་པའི་འོག་ཏུ་སྔར་བཤད་པ་བཞིན་གསང་གནས་བྱིན་གྱིས་
རློབ་པ་སོགས་བྱེད་པར་བཤད་ཅིང༌། ཁྱད་པར་གསལ་བྱེད་ལས་དེ་ལྟར་སྒོམ་པ་དེ་སྒོམ་པ་རབ་ཀྱི་མཐར་ཕྱིན་པའི་དབང་དུ་བྱས་པར་བཤད་དོ། །ཕུང་སོགས་བྱིན་གྱིས་རློབ་པའི་ལྷ་ནི། སྔར་བཤད་པའི་སྐབས་མ་གཏོགས་པ་ཕྱིས་སྒོམ་པ་ལྭ་
བ་པ་དང་པྲཛྙཱ་རཀྵི་ཏའི་འདིའི་འགྲེལ་པར་མ་བཤད་ཅིང་སེམས་དཔའ་གཞན་གཉིས་སྒོམ་པ་ཡང་མ་བཤད་དོ། །བླ་མ་མར་དོས་ལཱུ་ཨི་པའི་ལུགས་ཀྱིས་ནི། གསུང་གནས་བྱིན་རླབས་སོགས་འོག་ཏུ་མཆོད་པའི་སྐབས་སུ་ཚུལ་དེས་དེ་ཁོ་ན་ཉིད་ཀྱི་
མཆོད་པ་བྱེད་པར་བྱང་ཕྱོགས་ཀྱི་སྒོ་གླེགས་པར་གྲངས་པའི་མཁས་པ་ཆེན་པོ་མ་ན་ཀ་ཤྲཱི་ཛཱ་ན་བཞེད། མཁས་པ་ཆེན་པོ་པྲཛྙཱ་རཀྵི་ཏ་ནི་དམ་ཚིག་གི་འཁོར་ལོ་རྫོགས་པར་བསྐྱེད་པའི་དེ་མ་ཐག་ཏུ་བྱེད་པར་བཞེད། མཁས་པ་ཆེན་པོ་ཀ་ན་ཀ་ཤྲཱི་
9-5-102b


ཛྙཱ་ན་ནི་སྔ་མ་གཉིས་ཀའི་ཞལ་སྔར་གསན་མོད་ཀྱང་ལུགས་དང་པོའི་རྗེས་སུ་འབྲང་བ་ཡིན་གསུང་དོ། །འདི་ལ་ཀུན་སྤྱོད་ལེའུ་དྲུག་པར་ལྷ་རེ་གཉིས་སྒོམ་པར་བཤད། བདུན་པར་གོ་ཆ་གཉིས་བགོ་བ་བཤད། བརྒྱད་པར་ཡེ་ཤེས་པ་སྤྱན་དྲངས་
ཏེ་དམ་ཚིག་པ་ལ་བཅུ་པ་རྣམས་བར་མཆད་དུ་བཤད་པའི་འཇུག་ཐོགས་སུ་གསང་གནས་སྦྱོང་བ་སོགས་སྔར་བཞིན་བཤད་པས་དེའི་སྐབས་སུ་བྱེད་པ་དང༌། ནཱ་རོ་པ་བཞེད་གསུངས་པ་ལྟར་མཆོད་པའི་སྐབས་སུ་ཡང་ལཱུ་ཨི་པའི་གཞུང་འགྲེལ་
རྣམས་ནས་མ་བཤད་ཀྱང་ངེས་པར་བྱ་དགོས་སོ། །པྲཛྙཱ་རཀྵི་ཏས་ནི་འགྲེལ་པར་སྐབས་འདི་ཉིད་དུ་བྱ་བར་བཤད་ཅིང༌། ལྭ་བ་པས་ཀྱང་དེ་ལྟར་བཤད་པས་སྐབས་འདིར་ཡང་ངེས་པར་བྱའོ། །འདི་རྣམས་ལ་དགོས་པ་ཁྱད་པར་ཅན་རེ་རེ་ཡོད་
པས་སྐབས་གཅིག་ཏུ་བྱ་བར་བཤད་པས་སྐབས་གཞན་དུ་བྱེད་པ་མི་དགོག་པས། སྐབས་གཅིག་ཁོ་ནར་མི་གཟུང་ངོ༌། །མངོན་བརྗོད་ལས་ཚོགས་ཞིང་གི་གོང་དུ་ལྷ་བཅུ་བདུན་སྒོམ་པར་མ་ཟད་ཕྱིས་དཀྱིལ་འཁོར་སྒོམ་པ་ནའང་ལུས་དཀྱིལ་
དང་ཕྱི་དཀྱིལ་གཉིས་ཀ་ལ་ལྷ་ཉི་ཤུ་བསྒོམས་ཏེ་ཕུང་སོགས་བྱིན་གྱིས་རློབ་པ་མང་དུ་བཤད་དོ། །ལོ་ནག་དྲིལ་གསུམ་གྱིས་མ་བཤད་ཅིང༌། ལཱུ་ཨི་པའི་འགྲེལ་པ་གཞན་གཉིས་ནས་ཀྱང་མི་འབྱུང་ལ། བླ་མ་མལ་དང༌། མར་དོ་དང༌། པུ་རངས་
པ་སོགས་ཕམ་མཐིང་པ་ནས་བརྒྱུད་པ་རྣམས་ཀྱིས་ཀྱང་མི་བྱེད་པར་སྣང་བས། རེ་ཤིག་ལམ་གྲུབ་ཀྱང་ཆོག་པ་ནི་ཁྱད་པར་གསལ་བྱེད་ཀྱི་ལུགས་སོ། །གཉིས་པ་ནི། མཁའ་འགྲོ་མ་ལ་སོགས་པ་སྒྲུབ་པ་པོ་ལ་མཆོག་དང་ཐུན་མོང་གི་དངོས་སྒྲུབ་
9-5-103a


ཐམས་ཅད་རབ་ཏུ་སྟེར་བར་བྱེད་པ་བཞི་ནི་དབུས་ཀྱི་སྣ་ཚོགས་པདྨ་འདབ་མ་བརྒྱད་པའི་ཤར་ལ་སོགས་པའི་ཕྱོགས་ཀྱི་གནས་ཏེ་འདབ་མ་བཞི་ལ་ཤར་ནས་གཡོན་སྐོར་གྱིས་དགོད་པར་བྱའོ། དེ་བཞིན་ཞེས་པ་ནི་མཁའ་
འགྲོ་མ་ཕྱོགས་ཀྱི་འདབ་མ་ལ་དགོད་པ་དེ་བཞིན་དུ་གཞན་དུ་གཞན་གསུམ་ཡང་དེ་ལ་འགོད་པ་སྟེ། ལཱ་མ་ནི་བསྒྱུར་ན་མཛེས་མའོ། །སྐུ་མདོག་ནི་མཁའ་འགྲོ་མ་ནག་མོ། ལཱ་མ་ལྗང་གུ། དུམ་སྐྱེས་མ་དམར་མོ། གཟུགས་ཅན་མ་སེར་མོའོ། །བཞི་ཀའང་
ཞལ་གཅིག་མ་ལ་ཕྱག་བཞི་མ། ཕྱག་གཡོན་གྱི་གཉིས་པ་ན་ཁ་ཊྭཱཾ་ག །དང་པོ་ན་ཐོད་པ་ཁྲག་གིས་བཀང་བ་དང༌། གཡས་ཀྱི་ཕྱག་གཉིས་པ་ན་ཌཱ་མ་རུ་དང༌། དང་པོ་ནི་གྲི་གུག་བསྣམས་པའོ། །སྤྱན་གསུམ་པ། དབུ་སྐྲ་ཐུར་དུ་གྲོལ་བ། གཅེར་བུ་
མི་གཡོན་བསྐུམས་ཤིང་གཡས་བརྐྱང་པས་གདན་ལ་བཞུགས་པ། མཆེ་བ་བཞི་རྣམ་པར་གཙིགས་ནས་ཅུང་ཟད་རྒོད་པའི་ཞལ་ཅན། ཐལ་བ་མ་གཏོགས་པའི་ཕྱག་རྒྱ་ལྔ་ཡིས་རྣམ་པར་བརྒྱན་པ་སྟེ། འཁོར་ལོ་དང་རྐེད་རྒྱན་སོགས་ཀྱང་
དགོས་སོ། །ཕྱག་དང་པོ་གཉིས་ཐུགས་ཀར་འཁྱུད་པའི་ཚུལ་ཅན། དགའ་བས་བ་སྤུ་ལངས་པ་བདེ་བ་ཆེན་པོ་སྐྱེད་པ་མོའོ། །འདི་བཞིའི་སྐུ་མདོག་དང་ཞལ་ཕྱག་གི་གྲངས་དང༌། ཕྱག་མཚན་དང་བཞུགས་ཚུལ་ནི་ཇི་བཞིན་དང༌། སྤྱན་གསུམ་
པ་སོགས་ཕལ་ཆེ་བ་མངོན་བརྗོད་ཀྱི་ལེའུ་བཞི་པ་ལས་གསུངས་སོ། །པད་འདབ་ཀྱི་མཚམས་རྣམས་སུ་ནི་བྱང་ཆུབ་ཀྱི་སེམས་དཀར་པོ་དང༌། ལ་སོགས་པའི་སྒྲས་རཀྟ་དང༌། དྲི་ཆེན་དང༌། དྲི་ཆུ་བ་སྡུ་སྟེ། ལྔ་བ་ནི་འཆད་པར་འགྱུར་རོ། །དེ་ལྔ་ཡིས་
9-5-103b


གང་བའི་ཐོད་པའི་སྣོད་རིམ་པ་བཞིན་དགོད་དོ། །ལོ་ཆེན་དང་ཟངས་དཀར་གྱི་འགྱུར་དང༌། ཀུ་མཱ་རའི་འགྲེལ་བར་འདོད་ཆགས་དང་གཏི་མུག་ལ་སོགས་པ་རྣམ་པར་དག་པས་སེམས་ཚིམ་པར་བྱེད་པའི་མཆོད་པ་སྟེ། བྱང་ཆུབ་ཀྱི་སེམས་ལ་སོགས་པའི་
སྣོད་ཅེས་འབྱུང་ཡང་མར་དོ་དང་ཆག་འགྱུར་ལ་ལྷག་པོ་དེ་རྣམས་མེད་དོ། །སྣོད་བཞི་པོ་དེ་རྣམས་ལ་ལྭ་བ་པ་དང་པྲཛྙཱ་རཀྵི་ཏ་དང༌། ཇོ་བོའི་འགྲེལ་པར་བཤད་པ་མེད་ལ། དེ་བཞིན་གཤེགས་པའི་རྡོ་རྗེས། ཕྱོགས་མཚམས་རྣམས་སུ་བུམ་སྟེང་དུ། །བྱང་ཆུབ་
སེམས་སོགས་སྣོད་རྣམས་སོ། །ཞེས་གསུངས་ཤིང༌། མངོན་བརྗོད་ཀྱི་སྐབས་མང་པོར་བདུད་རྩི་ལྔས་གང་བུམ་པའི་སྟེང་དུ་བྱང་སེམས་དཀར་པོས་གང་བའི་ཐོད་པ་བཞི་འཇོག་པར་བཤད། ཀུན་སྤྱོད་ལས། ཕྱོགས་བྲལ་གྱི་ནི་བཞི་པོ་དག ། །ལྔ་
ཡིས་གང་བའི་ཐོད་པ་ཉིད། །ཅེས་གསུངས་ཤིང༌། སྡོམ་འབྱུང་ལས་ཀྱང་དེ་དང་མཐུན་པར་བདུད་རྩི་ལྔའི་སྣོད་དུ་བཤད་དོ། །དེ་ལྟར་གསུངས་པ་ལས་འདིར་ནི་བཤད་རྒྱུད་ཕྱི་མ་གཉིས་ལྟར་བྱ་རྒྱུ་ཡིན་ནོ། །འཁྲུལ་སྤོང་ལས། ཐོད་པ་དང་པོ་བྱང་སེམས་
དཀར་པོ་དང༌། གཉིས་པ་དམར་པོ་ཉི་མ་དང༌། གསུམ་པ་བདུད་རྩི་ལྔ་དང༌། བཞི་པ་སྒྲོན་མ་སྟེ་ཤ་ལྔས་གང་བ་དང༌། བཞི་ཀའང་བདུད་རྩི་ལྔས་གང་པའི་ཚུལ་གཉིས་བཤད་ཀྱང་ཕྱི་མ་ལྟར་བྱའོ། །མར་དོའི་བརྒྱུད་འཛིན་རྣམས་ཐོད་པ་ལ་ཟླ་གདན་འདོད་
དོ། །ཐོད་པ་ནི་མེ་ནས་བརྩམས་ཏེ་གཡས་སྐོར་གྱིས་དགོད་དོ། །སྔར་བཤད་པའི་ཐུགས་འཁོར་དེའི་ཤར་གྱི་རྩིགས་པུལླི་ར་མ་ལ་ཡར་དཔའ་བོ་ཁཎྜ་ཀ་པཱ་ལ་དང༌། དཔའ་མོ་རབ་གཏུམ་མའོ། །དེ་ལ་ཁཎྜ་ནི་དུམ་བུ་དང༌། ཀ་པཱ་ལ་ནི་ཐོད་པའོ། །གཉིས་
9-5-104a


པ་ནི་པྲ་ཚ་ཎྜི་སྟེ་པྲ་ནི་རབ་དང༌། ཙ་ཎྜི་ནི་གཏུམ་མོའོ། །བྱང་རྩིབས་ཛཱ་ལནྡྷ་རའི་ཛཱ་ལན་ནི་དྲ་བ་དང༌། དྷ་ར་ནི་འཛིན་པ་སྟེ་དེར། མཧཱ་ཀངྐ་ལ་སྟེ་ཀེང་རུས་ཆེན་པོ་དང༌། གཏུམ་མིག་མ་སྟེ་ཙ་ཎྜི་ཨ་ཀྵི་ཞེས་པ་བསྒྱུར་བའོ། །ནུབ་རྩིབས་
ཨོ་ཎྜི་ཡ་ཎའི་སྐད་ཟུར་ཆག་པ་ཨྱོན་དུ་ཀངྐཱ་ལ་སྟེ་ཀེང་རུས་དང༌། འོད་ལྡན་མའོ། །ཕྱི་མ་ལ་པྲ་བྷཱ་བ་ཏཱི་ཞེས་པ་ཡང་དེ་ཉིད་དོ། །ལྷོ་རྩིབས་ཨརྦུ་ཏར་མཆེ་བ་རྣམ་པར་གཙིགས་པ་དང༌། སྣ་ཆེན་མའོ། །དེ་གཉིས་ལ་བི་ཀ་ཊ་དཾ་ཥྟི་ཎ་དང༌། མཧཱ་ན་སེ་ཞེས་
པ་ཡང་དེ་ཉིད་དོ། །མེ་ཕྱོགས་ཀྱི་རྩིབས་ག་དཱ་བ་རི་སྟེ་བའི་མཆོག་སྦྱིན་པར། སུ་ར་ན་ཆང་སྟེ་ལྷའི་མིང་གི་རྣམ་གྲངས་དང༌། བཻ་རི་ཎ་ནི་འཁོར་ནམ་དགྲ་སྟེ་བསྡུ་ན་ཆང་དགྲ་དང༌། དཔའ་བོའི་བློ་ཅན་མའོ། །ཕྱི་མ་ལ་བི་ར་མ་ཏཱི་ཞེས་པའང་དེའོ། །བདེན་བྲལ་
གྱི་རྩིབས་ར་མེ་ཤྭ་རི་དགའ་བའི་དབང་ཕྱུག་ཏུ་འོད་དཔག་མེད་དང་ཁརྦ་རི་སྟེ་མིའུ་ཐུང་མའོ། །སྔ་མ་ནི་ཨ་མི་ཏ་བྷ་བ་ཞེས་སོ། །རླུང་མཚམས་ཀྱི་རྩིབས་དེ་བི་ཀོ་ཊི་སྟེ་ལྷ་མིའི་མཁར་དུ་རྡོ་རྗེའི་འོད་དང༌། ལང་ཀའི་དབང་ཕྱུག་མའོ། །དེ་གཉིས་ལ་བཛྲ་པྲ་བྷ་
བ་དང༌། ལཾ་ཀི་ཤྭ་རཱི་ཞེས་ཀྱང་ངོ༌། །དབང་ལྡན་གྱི་རྩིབས་མཱ་ལ་བ་སྟེ། ཕྲེང་བ་ཅན་མར། རྡོ་རྗེའི་སྐུ་དང་ཤིང་གྲིབ་མའོ། །དེ་གཉིས་ལ་བཛྲ་དེ་ཧ་དང༌། དྲུ་མཚྪ་ཞེས་ཀྱང་ངོ༌། །དཔའ་བོ་བརྒྱད་དང་དཔའ་མོ་བརྒྱད་པོ་འདི་དག་ནི་ཐུགས་ཀྱི་འཁོར་ལོའོ། །གསུང་གི་
འཁོར་ལོ་དེའི་ཤར་གྱི་རྩིབས་ཀ་མ་རཱུ་པ་སྟེ་འདོད་པའི་གཟུགས་སུ། དཔའ་བོ་མྱུ་གུ་ཅན་དང༌། དཔའ་མོ་ས་སྲུངས་མ་སྟེ། ཨ་ངྒུ་རི་དང༌། ཨཻ་ར་བ་ཏཱི་ཞེས་སོ། །བྱང་རྩིབས་ཨོ་ཊེར་རྡོ་རྗེ་རལ་པ་ཅན་དང༌། འཇིགས་བྱེད་ཆེན་མོ་སྟེ། བཛྲ་ཛ་ཊ་ལ་དང༌། མ་ཧཱ་
9-5-104b


བཻ་ར་བཱི་ཞེས་སོ། །ནུབ་རྩིབས་ཏྲི་ནི་གསུམ་དང༌། ཤ་ཀུ་ནེ་ནི་དགེ་མཚན་ཏེ་དེར༌། དཔའ་བོ་ཆེན་པོ་དང༌། རླུང་གི་ཤུགས་ཅན་མ་སྟེ། མཧཱ་བཱི་ར་དང༌། བཱ་ཡུ་བེ་གེ་ཞེས་སོ། །ལྷོ་རྩིབས་ཀོ་ཤལ་སྟེ་དགེ་བ་ཅན་དུ་རྡོ་རྗེ་ཧཱུཾ་མཛད་དང༌། ཆང་འཐུང་མ་སྟེ་བཛྲ་ཧཱུཾ་ཀཱ་
ར་དང༌། སུ་ར་བྷ་ཀྵཱི་ཞེས་སོ། མེ་མཚམས་ཀྱི་རྩིབས་ཀ་ལངྐར། རབ་ཏུ་བཟང་པོ་དང༌། ལྗང་ལྷ་མོ་སྟེ། སུ་བྷ་དྲ་དང་ཤྱཱ་མ་དེ་བཱི་ཞེས་སོ། །བདེན་བྲལ་གྱི་རྩིབས་ལཾ་པ་ཀ་སྟེ་འཕྱང་བ་ཅན་དུ། རྡོ་རྗེ་བཟང་པོ་དང༌། ཤིན་ཏུ་བཟང་མི་སྟེ་བཛྲ་བྷ་དྲ་དང༌། སུ་བྷ་དྲེ་ཞེས་
སོ། །རླུང་མཚམས་ཀྱི་རྩིབས་ག་ཉྩིར་འཇིགས་བྱེད་ཆེན་པོ་དང༌། རྟ་རྣམ་སྟེ་མཧཱ་བཻ་ར་བ་དང༌། ཧ་ཡ་ཀ་ར་ཎཱི་ཞེས་སོ། དབང་ལྡན་གྱི་རྩིབས་ཧི་མ་ལ་ཡ་སྟེ་གངས་ཅན་དུ། མིག་མི་བཟང་དང༌། བྱ་གདོང་མ་སྟེ། བི་རུ་པ་ཨཀྵི་དང༌། ཁ་གཱ་ན་ནེ་ཞེས་སོ། །
ཕྱི་མ་ནི་བྱ་གདོང་མར་བསྒྱུར་རོ། །མྱུ་གུ་ཅན་ལ་སོགས་པ་བཅུ་དྲུག་པོ་དེ་དག་ནི་གསུང་གི་འཁོར་ལོའོ། །སྐུ་འཁོར་དེའི་ཤར་གྱི་རྩིབས་པྲེ་ཏ་པུ་རི་ར་ཏེ་ཡི་དྭགས་ཀྱི་གྲོང་དུ་སྟོབས་པོ་ཆེ་དང༌། འཁོར་ལོའི་ཤུགས་ཅན་མ་སྟེ། མཧཱ་བཱ་ལ་དང༌། ཙཀྲ་བེ་གེ་
ཞེས་སོ། །བྱང་གི་རྩིབས་གྲི་ཧ་དེ་བ་ཏཱ་སྟེ་ཁྱིམ་གྱི་ལྷར། རིན་ཆེན་རྡོ་རྗེ་དང༌། དུམ་སྐྱེས་མ་སྟེ། རཏྣ་བཛྲ་དང༌། ཁ་ཎྜ་རོ་ཧཱི་ཞེས་སོ། །ནུབ་རྩིབས་སཽ་རཱཥྚ་སྟེ་ཡུལ་འཁོར་བཟང་པོར་རྟ་མགྲིན་དང༌། ཆང་འཚོང་མ་སྟེ་ཧཱ་ཡ་གྲི་བ་དང༌། ཤཽ་ཎྜི་ནཱི་ཞེས་སོ། །ལྷོ་
རྩིབས་སུ་བརྞྞ་དྭཱི་པ་སྟེ་གསེར་གླིང་དུ་ནམ་མཁའི་སྙིང་པོ་དང༌། འཁོར་ལོའི་གོ་ཆ་མ་སྟེ་ཨཱ་ཀཱ་ཤ་གརྦྷ་དང༌། ཙཀྲ་བརྨྨི་ཎཱི་ཞེས་སོ། །མེ་མཚམས་ཀྱི་རྩིབས་བས་ན་ག་ར་སྟེ་གྲོང་ཁྱེར་དུ་དཔལ་ཧེ་རུ་ཀ་དང༌། ཤིན་ཏུ་དཔའ་མོ་སྟེ། ཤྲཱི་ཧེ་རུ་ཀ་དང༌། སུ་བཱི་རཱི་ཞེས་དང༌། རྒྱ་དཔེར་
9-5-105a


ན་ག་རའི་བཤད་པར་པ་ཊ་ལི་ཞེས་པ་སྐྱེ་བོ་སྟེ། སྐྱེ་བོའི་བུ་ཡིན་གསུང་སྟེ་གྲོང་ཁྱེར་སྐྱེ་བོའི་བུའོ། །བདེན་བྲལ་གྱི་རྩིབས་སིན་དྷཱུར་པདྨ་གར་གྱི་དབང་ཕྱུག་དང༌། སྟོབས་ཆེན་མ་སྟེ། པདྨ་ནི་ཪྟྱ་ཤྭ་ར་དང༌། མཧཱ་བཱ་ལེ་ཞེས་སོ། །རླུང་
མཚམས་ཀྱི་རྩིབས་མ་རུ་སྟེ་མྱ་ངམ་གྱི་ཡུལ་དུ་རྣམ་པར་སྣང་མཛད་དང་། འཁོར་ལོ་སྒྱུར་མ་སྟེ། བཻ་རོ་རྩ་ན་དང་། ཙ་ཀྲ་བརྟྟི་ནཱི་ཞེས་སོ། །དབང་ལྡན་ཀྱི་རྩིབས་ཀུ་ལུ་ཏཱ་སྟེ་རིགས་ཉིད་ཅེས་པར་རྡོ་རྗེ་སེམས་དཔའ་དང་། བརྩོན་འགྲུས་ཆེན་མོ་སྟེ། བཛྲ་ས་ཏྭ་
དང་མཧཱ་བཱི་རྱ་ཞེས་སོ། །སྟོབས་བོ་ཆེ་ལ་སོགས་པ་བཅུ་དྲུག་པོ་འདི་དག་ནི་སྐུའི་འཁོར་ལོའོ། །ཐོད་པའི་དུམ་བུ་ལ་སོགས་པའི་དཔའ་བོ་ཉེར་བཞི་རྣམས་ནི་ཞལ་གཅིག་པ། སྤྱན་གསུམ་པ། ཕྱག་བཞི་པ། རལ་པ་སྤྱི་བོར་བསྡུས་པའི་ཐོར་ཚུགས་
ཅན། དར་དཔྱངས་ཅན་ནི། ལྭ་བ་པས་དཔའ་བོའི་ཐོད་དང་ལྡན་པ་ཞེས་བཤད་པ་ནི་པྲ་ཛྙཱ་རཀྵི་ཏས་དཔའ་བོའི་དར་ཐོད་ཅན་དུ་བཤད་པ་དེ་ཡིན་ལ། དེ་ཡང་འཁྲུལ་སྤོང་ལས། རྡོ་རྗེའི་ཕྲེང་བས་མཚན་པའི་དཔའ་བོའི་དར་གྱིས་དཔྲལ་བར་བཅིངས་
པ་ལ་བཤད་པ་ལྟར་རོ། །ཡུམ་ལ་འཁྱུད་པའི་ཕྱག་དང་པོ་གཉིས་ཀྱི་གཡས་ན་རྡོ་རྗེ་དང༌། གཡོན་ན་དྲིལ་བུ་དང༌། ཕྱག་འོག་མ་གཉིས་ཀྱི་གཡོན་ན་ཁ་ཊཱཾ་ག་དང༌། གཡས་ན་ཌཱ་མ་རུ་འཛིན་པ། ཕྱག་རྒྱ་ལྔ་དང་ལ་སོགས་པའི་སྒྲས་ཐལ་བ་དང༌། 
འཁོར་ལོ་དང༌། ཐོད་སྐམ་ལྔ་དང༌། ཐོད་རློན་ལྔ་བཅུའི་ཕྲེང་བ་དང་རྐེད་རྒྱན་སོགས་དང་ལྡན་པའི་སྐུ། གཡོན་བསྐུམས་ཤིང་གཡས་བརྐྱང་གིས་གདན་ལ་བཞུགས་པའོ། །ཀུན་སྤྱོད་ལས། དཔའ་བོ་ཉི་ཤུ་རྩ་བཞི་ནི། ཕྱག་རྒྱ་ལྔ་ལ་སོགས་པས་
9-5-105b


བརྒྱན། ཞེས་གསུངས་ཤིང༌། ཧེ་རུ་ཀ་དཔའ་ལ་སོགས་ཀུན། གཡས་བརྐྱང་བ་ཡི་གདན་དང་ལྡན། མགུར་ཆུ་གདུབ་ཀོར་དང༌། ཞེས་སོགས་སྔར་བཞིན་ཕྱག་རྒྱ་དྲུག་གིས་བརྒྱན་པར་ཡང་བཤད་པས། ཕྱག་རྒྱ་ལྔ་ཞེས་འབྱུང་
ཡང་ཐལ་ཆེན་གྱི་རྒྱན་མི་བྱེད་པ་མིན་ནོ། །གཙོ་མོ་ཞལ་གཅིག་ཕྱག་གཉིས་མར་བཤད་པ་དེ་བཞིན་དུ་རབ་གཏུམ་མ་ལ་སོགས་པའི་ལྷ་མོ་ཉེར་བཞི་ཡང་ཞལ་གཅིག་ཕྱག་གཉིས་མ། ཡབ་ལ་འཁྱུད་པའི་ཕྱག་གཡོན་གྱིས་ཐོད་པ་ཁྲག་གིས་བཀང་
བ་དང༌། སྡང་བ་ལ་བསྡིགས་པའི་སྡིགས་མཛུབ་དང་བཅས་པའི་ཕྱག་གཡས་པས་གྲི་གུག་འཛིན་པ་ཅན། སྤྱན་གསུམ་པ། དྲག་པོའི་གཟུགས་ཅན་མ། སྐྲ་གྲོལ་བ་ལ་སྟེ་དབུ་སྐྲ་སིལ་བུར་གྲོལ་བས་ནི་རྣམ་པར་མཛེས་ཤིང་ཡབ་རྣམས་དང་གཉིས་
སུ་མེད་པའི་སྦྱོར་བ་ལ་སྙོམས་པར་ཞུགས་པ་དང༌། ཕྱོགས་ཀྱི་གོ་ས་ནི་འཆང་བའི་མཆོག་ནི་གཅེར་བུ་ལ་ནམ་མཁའི་གོས་ཅན་དང༌། ཕྱོགས་ཀྱི་གོས་ཅན་དུ་གྲགས་པའི་དོན་ནོ། །གཙུག་ཕུད་དེ་གཙུག་རྒྱན་གྱི་ནོར་བུ་དང༌། པྲཛྙཱ་ར་ཀྵི་ཏའི་
འགྲེལ་པར་གདུ་བུར་བསྒྱུར་མོད་ཀྱང༌། ལྭ་བ་པའི་འགྲེལ་པར་ནོར་བུ་ནི་གདུ་པུའི་རྣམ་གྲངས་སོ། །ཞེས་འབྱུང་བ་ལྟར་བྱ་སྟེ་ཆག་འགྱུར་དང་མཐུན་ནོ། །དཔུང་རྒྱན་དང༌། རྣ་ཆ་དང༌། ཚངས་སྐུད་ཀྱི་རྒྱན་ཅན། མགོ་བོ་སྐམ་པོ་ལྔ་བཅུའི་ཕྲེང་བས་མགུལ་པ་
ནས་བརླ་ཕྲ་སྦོམ་གྱི་བར་དུ་བརྒྱན་པ། །འོག་པག་སིལ་སིལ་གྱི་སྒྲ་སྒྲོགས་པའོ། །སྐེ་རགས་ཁྱད་པར་བ་ཟར་བུ་ཅན་རྩེ་ལ་དྲིལ་ཆུང་གི་སྒྲ་སྒྲོགས་པ་ལ་འོག་པག་ཅེས་ཟེར་བས། སྐད་དོང་ཀྱི་སྟེང་ནས་སྐེ་རགས་དང་འོག་པག་གཉིས་ཀ་ལ་བསྒྱུར་དུ་ཡོད་
9-5-106a


ཀྱང༌། འདི་འདྲའི་སྐབས་སུ་མར་དོས་འོག་པག་སིལ་སིལ་ཞེས་བསྒྱུར་བ་ལྟར་འོག་པག་ཏུ་བསྒྱུར་ན་ལེགས་སོ། །འཁོར་ལོ་གསུམ་གྱི་ལྷའི་སྐུ་མདོག་ལ། གཞུང་ནས་འཁོར་ལོ་གསུམ་ལ་སྔོ་དམར་དཀར་བར་བཤད་པ་མ་གཏོགས་
པ་གསལ་བར་མ་བྱུང་ཞིང༌། ཀུན་སྤྱོད་དད༌། འགྲེལ་པ་གསུམ་དང༌། འཁྲུལ་སྤོང་ལས་ཀྱང་མི་གསལ་ལོ། །འོན་ཀྱང་ཇོ་བོ་ཆེན་པོའི་འགྲེལ་པར། འཁོར་ལོ་གསུམ་དང་བཀའ་བསྒོ་རྣམས་ཀྱང་སྐུ་མདོག་ལ་སོགས་པ་སྒྲུབ་ཐབས་ལས་བཤད་པ་ལྟར་
དམིགས་ཏེ། ཞེས་གསུངས་ཤིང༌། གཞུང་ལས་ཐོད་པའི་དུམ་བུ་ལ་སོགས་པའི་ལྷ་རྣམས་ཀྱང་འཁོར་ལོ་གསུམ་དུ་བཤད་པས། འཁོར་ལོ་གསུམ་གྱི་ཁ་དོག་གསུངས་པ་ནི་རྟེན་གྱི་འཁོར་ལོ་ཁོ་ན་ལ་མི་བྱ་བར་བརྟེན་པའི་འཁོར་ལོ་ལ་ཡང་
བྱའོ། །འོ་ན་ལྷ་ཡབ་ཡུམ་ཟུང་བརྒྱད་ཚན་གསུམ། སྔོ་དམར་དཀར་པོ་དང༌། ཞལ་ཕྱག་གི་གྲངས་དང་། ཕྱག་མཚན་འདིར་བཤད་པ་དེ་རྒྱུད་གང་ནས་གསུངས་སྙམ་ན། མངོན་བརྗོད་ལས། སྤྱིར་འཁོར་ལོ་གསུམ་གྱི་ལྷ་རྣམས་ཁ་དོག་སྣ་ཚོགས་
པར་གསུངས་ཤིང༌། ལེའུ་བཅུ་བཞི་བར་ཡང་དེ་བཞིན་དུ་བཤད་པའི་མཇུག་ཏུ། ཡང་ན་སྐུ་གསུང་ཐུགས་ཀྱི་ནི། ཇི་འདོད་མདོག་ནི་དབྱེ་བ་བྱ། །ཞེས་སྐུ་གསུང་ཐུགས་ཀྱི་དབྱེ་བས་ཇི་ལྟར་འདོད་པའི་ཁ་དོག་ཏུ་བྱ་བར་བཤད་པ་ནི། སྐུ་འཁོར་གྱི་ལྷ་
དཀར། གསུང་འཁོར་གྱི་དམར། ཐུགས་འཁོར་གྱི་ལྷ་སྔོན་པོར་བྱ་བའི་དོན་ཏེ། སྔར་འཁོར་ལོ་རེ་རེའི་ལྷ་རྣམས་ཀྱང་ཁ་དོག་མི་འདྲ་བར་བཤད་མ་ཐག་པ་ལྟར་མི་བྱ་བར་ཁ་དོག་ཕྱོགས་གཅིག་ཏུ་བྱེད་པས་ཡང་ན་ཞེས་གསུངས་སོ། །ནག་པོ་སྤྱོད་
9-5-106b


པའི་སྒྲུབ་ཐབས་ལས། འཁོར་ལོ་གསུམ་གྱི་ལྷའི་ཁ་དོག་མི་གསལ་ཡང༌། དེའི་དཀྱིལ་ཆོག་ཏུ། དཀར་མིན་དཀར་དང་དམར་པོ་ཡིས༌། །ཐ་མ་མཆོག་དང་བར་མ་སྟེ། །ཐམས་ཅད་རིམ་བཞིན་དགོད་པ་ནི། །བླ་མའི་རིམ་གྱིས་དྲིན་ཡིན་ནོ། །ཞེས་འཁོར་
ལོ་གསུམ་གྱི་ལྷའི་ཁ་དོག་སྔ་མ་བཞིན་གསུངས་སོ། །དྲིལ་བུ་ཞབས་ཀྱིས་ལྷ་དྲུག་ཅུ་པོ་ཐམས་ཅད་ཞལ་གཅིག་ཕྱག་གཉིས་པ་དང༌། ཕྱག་མཚན་རྡོར་དྲིལ་སོགས་བཤད་པ་ནི། ཀུན་སྤྱོད་ལས་གསུངས་ལ། དེར་མཁའ་འགྲོ་མ་ལ་སོགས་པ་བཞི་སྣ་ཚོགས་པའི་
གཟུགས་ཅན་དང༌། མཚམས་མ་བཞི་གཟུགས་གཉིས་པར་གསུངས་པ་ཙམ་ལས་སོ་སོའི་ཁ་དོག་གསལ་བར་མ་བཤད་པས། ཁ་དོག་ནི་མངོན་བརྗོད་ལ་བརྟེན་པར་བྱས་ན་ལེགས་ལ། ལཱུ་ཨི་པ་ཡང་དེ་བཞིན་ནོ། །མངོན་བརྗོད་ཀྱི་ལེའུ་བཞི་པ་ལས། 
སྟོབས་པོ་ཆེ་ལ་སོགས་པ་བརྒྱད་ཞལ་གཅིག་ཕྱག་བཞི་དང༌། གཡས་བརྐྱང་དང༌། གཡས་ཀྱི་ཕྱག་དང་པོས་འཁོར་ལོ་འཛིན་པར་བཤད་པ་མ་གཏོགས་པ་ཕྱག་མཚན་གསུམ་མཐུན་ནོ། །དེའི་ལེའུ་ལྔ་པ་ལས། མྱུ་གུ་ཅན་ལ་སོགས་པ་བརྒྱད་ཀྱང༌། གཡས་
ཀྱི་ཕྱག་དང་པོས་པདྨ་འཛིན་པ་མ་གཏོགས་པ་ལྷག་མ་རྣམས་སྔར་དང་འདྲའོ། །དེའི་ལེའུ་དྲུག་པ་ལས་ནི། ཐོད་པའི་དུམ་བུ་ལ་སོགས་པ་བརྒྱད། ཞལ་ཕྱག་སོགས་སྔར་བཤད་པ་རྣམས་དང་ཇི་ལྟ་བ་བཞིན་མཐུན་ལ། རྣལ་འབྱོར་མ་ཉེར་བཞི་ཞལ་གཅིག་ཕྱག་
གཉིས་མར་བཤད་ཀྱང་ཕྱག་མཚན་ལ་གྲི་གུག་མེད་དོ། །དེའི་ཕྱིར་རྣལ་འབྱོར་མ་ཉེར་བཞིའི་ཞལ་ཕྱག་གི་གྲངས་དང༌། ཕྱག་མཚན་ཀུན་སྦྱོད་དང་མཐུན་ཞིང༌། དཔའ་བོ་ཉེར་བཞིའི་ཕྱག་གཡས་ཀྱི་དང་པོ་ཐམས་ཅད་ཀྱིས་རྡོ་རྗེ་འཛིན་པའང་ཀུན་སྤྱོད་ལ་བརྟེན་
9-5-107a


པའོ། །འོ་ན་མངོན་བརྗོད་ལས། བདེ་མཆོག་ཞལ་བཞི་ཕྱག་བཅུ་གཉིས་པ་ལ། སྐུ་གསུང་ཐུགས་དམ་ཚིག་ཡེ་ཤེས་ཀྱི་དབྱེ་བས། བདེ་མཆོག་རིགས་ལྔ་ལ་སོགས་པ་མང་དུ་བཤད་པ་ལས། ལོ་དྲིལ་གཉིས་ཀྱི་དཀྱིལ་འཁོར་འདི་
རིགས་ཇི་འདྲ་ཞིག་གི་དབང་དུ་བྱས་སྙམ་ན། ཇོ་བོ་ཆེན་པོའི་འགྲེལ་པར། རྣལ་འབྱོར་དབང་ཕྱུག་ལཱུ་ཨི་པས་རིགས་དྲུག་པ་ཧེ་རུ་ཀའི་སྒྲུབ་ཐབས། རྩ་བའི་དཀྱིལ་འཁོར་ཆེན་པོ་མཛད་པའི་དོན་རྒྱུད་ལྟར་བཀྲོལ་བ། ཞེས་ལཱུ་ཨི་པའི་ལུགས་འདི་རིགས་
ཀྱི་ནང་ནས་དྲུག་པ་དང༌། དཀྱིལ་འཁོར་གྱི་ནང་ནས་རྩ་བའི་དཀྱིལ་འཁོར་ཆེན་པོར་བཞེད་པ་ཤིན་ཏུ་ལེགས་ཏེ། མངོན་བརྗོད་ལས། རིགས་བྱེ་བྲག་པ་བཤད་པའི་སྐབས་སུ་དཔའ་བོ་རྣམས་ལ་འཁོར་ལོ་དང་པདྨ་དང་རྡོ་རྗེ་སོགས་ཀྱི་རང་རང་གི་རིགས་སོ་
སོའི་ཕྱག་མཚན་གསུངས་ལ། འདིར་ནི་དཔའ་བོ་ཉེར་བཞི་པོ་ཐམས་ཅད་ཀྱི་ཕྱག་མཚན་གྱི་གཙོ་བོ་གཡས་ཀྱི་ཕྱག་དང་པོའི་ཕྱག་མཚན་ནི་རྡོ་རྗེ་ཁོ་ནར་བཤད་པའི་ཕྱིར་དང༌། སྐུའི་དཔའ་བོ་རྣམས་དཔྲལ་བར་འཁོར་ལོའི་ཕྲེང་བ་དང༌། གསུང་གི་དཔའ་
བོ་རྣམས་དཔྲལ་བར་པདྨའི་ཕྲེང་བ་ཅན་དུ་བཤད་ཅིང༌། འདིར་ནི། དཔའ་བོ་རྣལ་འབྱོར་མ་ཀུན་གྱི། །དཔྲལ་བར་རྡོ་རྗེའི་ཕྲེང་བའོ། །ཞེས་བཤད་པའི་ཕྱིར་དང༌། དཀྱིལ་འཁོར་གཞན་དུ་མ་ཞིག་གསུངས་པ་ཐམས་ཅད་ཀྱི་ཕལ་ཆེ་བ་དཀྱིལ་འཁོར་འདི་ཉིད་
ལ་སྣོན་འབྲིད་བྱས་པར་སྣང་བའི་ཕྱིར་རོ། །དྲིལ་བུ་ཞབས་ཀྱི་རེ་གཉིས་པ་ཡང་དེ་བཞིན་དུ་ཤེས་པར་གྱིས་ཤིག །དེས་ན་དཀྱིལ་འཁོར་འདི་ནི་བདེ་མཆོག་གི་དཀྱིལ་འཁོར་གྱི་མཆོག་ཡིན་ནོ། །འཁོར་ལོ་གསུམ་གྱི་ལྷ་རྣམས་གསུང་ཐུགས་སུ་
9-5-107b


འཇོག་པ་ནི་རྣམ་སྣང་དང་། སྣང་མཐའ་དང༌། མི་བསྐྱོད་པའི་རིགས་སུ་འཇོག་པ་ལ་དགོངས་ཏེ། དཀྱིལ་འཁོར་འདི་རིགས་བསྡུས་ཡིན་པས་རིགས་སོ་སོ་བ་ཡང་ཡོད་དགོས་མོད་ཀྱང༌། རིགས་མ་བསྡུས་པའི་རིགས་རྐྱང་སོ་སོ་བའི་རིགས་དང་མི་འདྲའོ། །
མངོན་བརྗོད་ལས། ཐུགས་གསུང་སྐུའི་ལྷ་རྣམས་ནམ་མཁའ་ལ་སྤྱོད་པ་དང༌། ས་ལ་སྤྱོད་པ་དང༌། ས་འོག་ན་སྤྱོད་པ་ཞེས་དང༌། ཀུན་སྤྱོད་ལས་དེ་དག་ལ་རྒྱུ་བ་ཞེས་གསུངས་པའི་དོན་ནི། སྔོན་ཐོད་པའི་དུམ་བུ་ལ་སོགས་པའི་མིང་ཅན་གྱི་ལྷ་བཞི་དང༌། དྲི་
ཟ་བཞིན་ནམ་མཁའ་ལ་སྤྱོད་པས་པུ་ལླིར་མ་ལ་ཡ་ལ་སོགས་པའི་ཡུལ་བརྒྱད་བཟུང་བ་དང༌། མྱུ་གུ་ཅན་ལ་སོགས་པའི་མིང་ཅན་གྱི་གནོད་སྦྱིན་བཞི་དང་སྲིན་པོ་བཞི་ས་ལ་སྤྱོད་པས། ཀཱ་མ་རཱུ་པ་ལ་སོགས་པའི་ཡུལ་བརྒྱད་བཟུང་བ་དང༌། སྟོབས་པོ་ཆེ་ལ་
སོགས་པའི་མིང་ཅན་གྱི་ཀླུ་བཞི་དང༌། ལྷ་མ་ཡིན་བཞི་ས་འོག་ན་སྤྱོད་པས། པྲེ་ཏ་པུ་རི་ལ་སོགས་པའི་ཡུལ་བརྒྱད་བཟུང་བ་རྣམས་རིམ་པ་བཞིན་དུ་ཐུགས་གསུང་སྐུའི་ལྷ་ཡབ་ཡུམ་རྣམས་ཀྱིས་བཏུལ་ནས་མིང་དང་ཆ་ལུགས་སོགས་འདྲ་བར་བྱས་ཞེས་ཟངས་
དཀར་གྱི་རྗེས་སུ་འབྲང་བདག་གསུང་བ་ནི་མངོན་བརྗོད་ཀྱི་འགྲེལ་པ་ནའང་དེ་རྣམས་ཅི་རིགས་པ་འདུག་ལ། དེའི་ཕྱིར་འདུལ་བྱེད་རྣམས་ལའང་གནས་དང༌། འདུལ་བྱའི་སྒོ་ནས་མཚན་དེ་ལྟར་དུ་བཏགས་པ་ཡིན་ལ། མིང་དོན་གཞན་ཡང་ཡོད་དོ། །འཁོར་ལོའི་རྩིབས་
ཉེར་བཞི་ཡུལ་ཉེར་བཞིར་མངོན་བརྗོད་ལས་བཤད་ལ། དེའི་དགོས་པ་ནི་ལྷའི་གནས་དེ་རྣམས་ལ་ཕྱིའི་ཡུལ་ཉེར་བཞི་དང༌། དེར་བཀོད་པའི་ལྷ་དང་ལྷ་མོ་ཡང༌། ཡུལ་དེ་ན་བཞུགས་པའི་དཔའ་བོ་དང་དཔའ་མོ་དངོས་ཡིན་པའི་མོས་པ་བརྟན་པོ་བསྐྱེད་ནས་
9-5-108a


བསྒོམས་ན་ཡུལ་དེའི་ལྷ་རྣམས་ཀྱིས་བྱིན་གྱིས་རློབ་པ་མྱུར་བའི་གནད་ཆེན་པོ་ཡོད་པས་དེ་ལྟར་བྱེད་པ་གལ་ཆེའོ། །གཞིའི་དཀྱིལ་འཁོར་གྱི་ཤར་དང་བྱང་དང་ནུབ་དང་ལྷོའི་སྒོ་རྣམས་སུ་ཤར་ནས་བརྩམས་ཏེ་གཡོན་སྐོར་
གྱིས་རིམ་པ་བཞིན་དུ་ཁྭ་གདོང་མ་དང༌། འུག་གདོང་མ་དང༌། ཁྱི་གདོང་མ་དང༌། ཕག་གདོང་མ་རྣམས་དགོད། དཀྱིལ་འཁོར་གྱི་མེ་དང་བདེན་བྲལ་དང་རླུང་དང་དབང་ལྡན་གྱི་མཚམས་རྣམས་སུ། མེ་ནས་བརྩམས་ཏེ་གཡས་སྐོར་གྱི་རིམ་པ་
བཞིན་དུ་ཡ་མ་དཱཾ་ཌྷི་སྟེ་གཤིན་རྗེ་བསྟན་མ་དང༌། གཤིན་རྗེ་ཕ་ཉ་མོ་དང༌། གཤིན་རྗེ་མཆེ་བ་ཅན་མ་དང༌། གཤིན་རྗེ་འཇོམས་པ་རྣམས་དགོད་དོ། །ཞལ་ཕྱག་གི་གྲངས་དང་ཕྱག་མཚན་ལ་སོགས་པ་ནི། ཇི་ལྟར་ཏེ་དཔེར་ན་མཁའ་འགྲོ་མ་ལ་
སོགས་པ་བཞི་པོ་བཞིན་དུ་བྱ་སྟེ། འོན་ཀྱང་བྱ་རོག་གདོང་ལ་སོགས་པའི་གདོང་མ་བརྙན་མི་འདྲ་བ་བཞིའི་དབྱེ་བས་དེ་རྣམས་ལས་དབྱེ་ཞིང་མི་འདྲ་བར་བྱའོ། །བྱ་རོག་གདོང་ལ་སོགས་པ་ནི་དབུ་རིལ་པོ་མིན་གྱི། གདོང་གི་ཕྱོགས་ཙམ་
ཞིག་དེ་རྣམས་ཀྱི་གདོང་ཡིན་ཏེ། དེ་ལྷ་མ་ཡིན་ན་རྣ་རྒྱན་སོགས་གདགས་སུ་མི་རུང་ངོ་ཞེས་བོད་ཀྱི་མཁས་པ་དག་གསུང་ངོ་། །བྱ་རོག་གདོང་མ་ལ་སོགས་པ་བཞི་ནག་ལྗང་དམར་སེར་བའི་མདོག་ཅན་དུ་བཤད་པ་དང༌། མཚམས་མ་བཞི་མི་འདྲ་
བར་སྟོན་པ་ནི། བྱ་རོག་གདོང་མ་སོགས་གདོང་གི་སྒོ་ནས་མཁའ་འགྲོ་མ་ལ་སོགས་པ་དང་མི་འདྲ་བ་དེ་བཞིན་དུ་མེ་ལ་སོགས་པའི་མཚམས་ན་གནས་པའི་ལྷ་མོ་བཞི་ནི་མིའི་བུ་མོ་མཛེས་པ་ལྟར་ཡིད་འཕྲོག་པ། སྐུ་གཟུགས་ཀྱི་ཁ་དོག་ནི་ཕྱག་
9-5-108b


གཟུགས་ཀྱི་ཚུལ་གྱིས་གཉིས་པ་སྟེ། ཕྱེད་གཡས་ནི་གཡས་ཀྱི་སྒོ་མའི་ཁ་དོག་དང༌། ཕྱེད་གཡོན་ནི་གཡོན་གྱི་སྒོ་མའི་ཁ་དོག་ཅན་མའོ། །བརྒྱད་ཆར་ཡང་ཡི་དྭགས་ཏེ་རོའི་སྟན་ལ་གནས་པ། དྲག་མོ་ཆེན་པོ་སེམས་ཅན་ཀུན་གྱི་དོན་མཛད་པ་ལ་
བརྩོན་པ་སྟེ། དུར་ཁྲོད་ན་གནས་པས་རོའི་གདན་ཅན་ནོ། །དཔའ་བོ་དང་རྣལ་འབྱོར་མ་ཀུན་གྱི་ནི་དཔྲལ་བར་རྡོ་རྗེའི་ཕྲེང་བ་འཛིན་པའོ། །འདི་རྣམས་ནི་སྔོན་གྱི་དུས་སུ་མིའམ་ཅི་མོ་བཞི་དང་ཕྲ་ལེན་མ་བཞིས་དུར་ཁྲོད་བརྒྱད་དམ། འཐུད་གཅོད་དང་ཉེ་བའི་
འཐུང་གཅོད་དང༌། གྲོང་མཐའ་དང་ཉེ་བའི་གྲོང་མཐའ་བཟུང་བ་བཏུལ་བའི་ཆེ། ཁྲོ་བོ་འཇིག་རྟེན་གསུམ་རྒྱལ་དང་ལྷ་མོ་གཽ་རིའི་ལ་སོགས་པ་ཡབ་ཡུམ་བརྒྱད་ལ། སྒོ་མ་བཞིས་ཡབ་རྣམས་གདོང་བརྙན་གྱི་ཚུལ་དུ་སྦས། མཚམས་མ་བཞིས་ཡབ་རྣམས་
ཕྱེད་གཟུགས་ཀྱི་ཚུལ་དུ་སྦས་ནས་མ་མོའི་སྐུར་བསྟན་པས་སྔར་བཤད་པ་བརྒྱད་བཏུལ་བ་དང༌། འཛམ་བུ་གླིང་གི་ཡུལ་ཉེར་བཞི་གནས་པའི་འཇིག་རྟེན་པའི་ལྷ་གདུག་པ་ཅན་དེ་རྣམས་ཀྱིས་ནི་དབང་ཕྱུག་མཆོད་པར་བྱེད་ལ། དབང་ཕྱུག་གི་དྲག་པོའི་
སྐུ་འཇིགས་བྱེད་ནག་པོ། ཆུང་མ་དུས་མཚན་དང་བཅས་པ་ནི། འཛམ་བུའི་གླིང་གི་དབུས་མ་ག་དྷ་ན་གནས་པ་འདུལ་བའི་དུས་ལ་བབ་པའི་ཚེ། རྡོ་རྗེ་འཆང་གིས་འཛམ་བུའི་གླིང་དུ་བདེ་མཆོག་ཞལ་བཞི་ཕྱག་བཅུ་གཉིས་པར་སྦྲུལ་ནས། འཇིགས་བྱེད་
ཆུང་མ་དང་བཅས་པ་བཏུལ་ཏེ་ཞབས་འོག་ཏུ་མནན། དྲག་པོའི་ཆུང་མ་བཞི་ནི་མཱ་མ་ཀཱི་ལ་སོགས་པ་སྙིང་པོའི་རྣལ་འབྱོར་མ་བཞིར་སྤྲུལ་བས་བཏུལ་ལོ། །ཞེས་བོད་ཀྱི་བླ་མ་དག་གསུང་སྟེ། མངོན་བརྗོད་ཀྱི་འགྲེལ་པ་ནའང་དེ་རྣམས་ཅི་རིགས་པ་སྣང་ངོ༌། །
9-5-109a


གསུམ་པ་ཕྱོགས་མཐུན་གྱི་དག་པ་དང་ལུས་དཀྱིལ་སྒོམ་པ་ལ་གསུམ། བྱང་ཕྱོགས་སོ་བདུན་ལྷ་དང་སྦྱར་བ་དང་། ལུས་ཀྱི་དཀྱིལ་འཁོར་བཤད་པ་དང་། སྔར་གསུངས་པའི་དོན་བསྡུས་ཏེ་བསྟེན་པའོ། །དང་པོ་ལ་གཉིས། སྤྱིའི་
དོན་དང་། ཡན་ལག་གི་དོན་ནོ། །དང་པོ་ནི། ཕྱོགས་མཐུན་གྱི་དག་པ་སྒོམ་པའི་སྐབས་ནི། མངོན་བརྗོད་ལས། མང་ལ་བར་དུ་ལྷ་སྒོམ་པ་དང་སྔགས་བཟླ་བ་བྱ་བ་དང༌། ངལ་ན་དག་པ་དེ་སྒོམ་པར་བཤད་ལ། ལཱུ་ཨི་པས་སྐབས་འདི་དང་དྲིལ་བུ་པས་ཀྱང་
ལུས་དཀྱིལ་གྱི་ལྷ་སྒོམ་པ་རྫོགས་མ་ཐག་སྒོམ་པར་བཤད། ནག་པོ་པས་ལྷ་རྫོགས་པར་སྒོམ་པ་དང༌། ཡེ་ཤེས་པ་གཞུག་པ་དང་དབང་བསྐུར་ཏེ་མཆོད་པ་བྱས་པའི་འཇུག་ཐོགས་སུ་སྒོམ་པར་བཤད་པས། སྐབས་གཅིག་ཁོ་ནར་མ་ངེས་ལ་སོ་
སོའི་གཞུང་ནས་འབྱུང་བ་བཞིན་བྱའོ། །འདི་སྒོམ་པའི་དགོས་པ་ནི་འགྲེལ་པ་གསུམ་ལས་ལྷའི་རྣམ་པ་ལ་མངོན་པར་ཞེན་པ་དོར་བ་དང༌། ཐམས་ཅད་ཤེས་པ་ཉིད་ཐོབ་པར་བྱ་བའི་ཕྱིར་དུ་སྒོམ་པར་བཤད་པའི་དང་པོ་ནི། འབྲས་བུའི་སྐབས་ན་
གཉིས་མེད་བདེ་ཆེན་གྱི་ཡེ་ཤེས་ཉིད་ལྷར་ཤར་བ་ཡིན་ལ། དེ་དང་རྗེས་སུ་མཐུན་པར་འབྲས་བུ་ལམ་དུ་བྱེད་པའི་དོན་ཡིན་གྱི། སོ་བདུན་པོ་ཐེག་ཆེན་གཞན་དང་ཐུན་མོང་བ་ཉིད་ལྷར་སྟོན་པ་དང༌། ལྷ་སྐུ་ཤ་རུས་ལ་སོགས་པའི་གདོས་བཅས་མིན་
པར་འཇའ་ཚོན་ལྟར་སྒོམ་པ་ཙམ་གྱི་དོན་མིན་ནོ། །གཉིས་པ་ནི། ཕུང་ཁམས་སྐྱེ་མཆེད་ཀྱི་གཞི་ཐམས་ཅད་དང་རང་བཞིན་མེད་པར་ཤེས་པའི་རྟོགས་པ་དམ་པ་རྒྱུད་ལ་བསྐྱེད་པའི་དོན་ནོ། །ཇོ་བོ་ཆེན་པོའི་འགྲེལ་པར་དགོས་པ་བཞི་བཤད་པའི་དང་པོ་ཧེ་རུ་
9-5-109b


ཀའི་ལྷ་ཚོགས་རྣམས་ཆོས་སྐུའི་རང་བཞིན་དུ་བསྟན་པ་ནི། ཡེ་ཤེས་ཆོས་སྐུ་ནི་སྔར་བཤད་པའི་གཉིས་མེད་ཡེ་ཤེས་དེ་ཉིད་ཡུན་པས་དེ་ལྟར་རོ། །ལྷར་ཞེན་པ་བཟློག་པ་ནི་སྔ་མའི་ངོ་བོར་བསྒོམས་པས་དེའི་ངོ་བོར་མ་ཤར་བའི་ལྷའི་སྐུ་ཙམ་ལ་ཞེན་པ་ཟློག་
པའོ། །གསུམ་པ་སྒྱུ་མ་དང་སྟོང་པ་གཉིས་མེད་དུ་མཚོན་པ་ནི་བདེ་སྟོང་གི་ཐུགས་དང་སྒྱུ་མའི་ལྷ་སྐུ་གཉིས་ངོ་བོ་དབྱེར་མེད་དུ་ཤེས་པར་བྱེད་པའོ། །བཞི་པ་ཅིག་ཅར་ལམ་དུ་བྱས་པ་ཐེག་པའི་ཁྱད་པར་ནི་སྔགས་ཀྱི་ཐེག་པའི་ལྷ་སྐུ་དང༌། ཕར་ཕྱིན་གྱི་ཐེག་
པའི་སྟོང་ཉིད་རྟོགས་པ་གཉིས་ཅིག་ཅར་དུ་ལམ་དུ་བྱེད་པའོ། །སྒོམ་ཚུལ་ནི་མན་སྙེ་ལས་གུར་དུ། སྟོང་ཉིད་སྙིང་རྗེ་དབྱེར་མེད་པ། །གང་དུ་སེམས་ནི་རབ་སྒོམ་པ། །དེ་ཉིད་སངས་རྒྱས་ཆོས་དང་ནི། །དགེ་འདུན་གྱི་ཡང་བསྟན་པའོ། །ཞེས་དྲངས་ནས། བསྒོམ་
པར་བྱ་བ་དེ་ཁོ་ན་ལ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ནང་དུ་འདུས་ཀྱི། ལོག་པར་བསྒོམ་པར་བྱ་བ་ནི་མ་ཡིན་ནོ། །ཡང་ན་ཡོངས་སུ་འདྲིས་པའི་དོན་དུ་བྱང་ཆུབ་ཀྱི་ཕྱོགས་ལ་སོགས་པའི་རྣམ་པ་རྣམས་ཀྱིས་ཡོངས་སུ་བསྐོར་བ་དེ་གོམས་པར་བྱ་སྟེ། ཞེས་
གསུངས་པའི་སྔ་མ་ལྟར་བྱེད་ན་བདེ་སྟོང་དབྱེར་མེད་ཀྱི་བྱང་ཆུབ་ཀྱི་སེམས་ཉིད་ལ་དམིགས་པ་དང་བྱེད་ལས་སོགས་ཀྱི་སྒོ་ནས་ལུས་དྲན་པ་ཉེར་གཞག་སོགས་སུ་ཐ་སྙད་བྱེད་པས་བདེ་སྟོང་དབྱེར་མེད་ཀྱི་སེམས་གཅིག་ཉིད་ལ་ལྡོག་པས་ཕྱེ་བའི་ཆོས་སོ་
བདུན་དུ་བྱས་ནས། ལྷ་སོ་བདུན་གྱི་ངོ་བོར་ལྟ་བ་འདི་ནི་གཙོ་བོའི་དོན་ཏེ། དེ་ལ་ནི་སོ་བདུན་པོ་ལ་ཕར་ཕྱིན་གྱི་ཐེག་པ་ནས་བཤད་པ་ལྟར་གྱི་དམིགས་རྣམ་མི་མཐུན་པ་དུ་མ་མི་བྱེད་དོ། །ཡང་ན་ལམ་འདིའི་སྒྲུབ་པ་པོས་ཀྱང་ལམ་ཐུན་མོང་བལ་འདྲིས་པར་བྱ་
9-5-110a


བའི་དོན་དུ་མདོ་སྡེའི་ཕྱོགས་ནས་གསུངས་པའི་དམིགས་རྣམ་ཅན་སོ་བདུན་དང་བཅས་པའི་བྱང་ཆུབ་ཀྱི་སེམས་གོམས་པར་བྱེད་པ་ནི་འདིའི་འགྲེལ་པ་གསུམ་ནས་ཀྱང་བཤད་པ་ལྟར་ཏེ། བདེ་སྟོང་གི་ངོ་བོར་ལྟ་བ་ནི་དེ་གཉིས་ཀ་ལ་ཡང་དགོས་
སོ། །གཞན་ཡང་ལྷ་རྣམས་བདེ་སྟོང་གི་ངོ་བོར་ལྟ་བ་ནི་དབང་རྣོན་དང༌། དེ་ལྟར་མི་ནུས་པས་ནི་ཐུན་མོང་བའི་ཆོས་སོ་བདུན་པོ་རེ་རེ་ནས་ལྷའི་ངོ་བོར་ལྟ་བ་ནི་དབང་པོ་དམན་པའི་དབང་དུ་བྱས་པར་བཤད་དེ། འཁྲུལ་སྤོང་ལས། དེ་ཉིད་ཀྱི་ངང་ནས་སྐད་ཅིག་གིས་
བཞེངས་པའི་གཉིས་སུ་མེད་པའི་དེ་ཁོ་ན་ཉིད་ཀྱི་ཕྱིར། དཀྱིལ་འཁོར་གྱི་འཁོར་ལོའི་ལྷའི་རང་བཞིན་སོ་སོ་ལ་བྱང་ཆུབ་ཀྱི་ཕྱོགས་ཀྱི་ཆོས་སོ་བདུན་སོ་སོར་སྦྱར་བ་ནི་དབང་པོ་དམན་པའི་དོན་དུ་ཡིན་པས་འདིར་མ་བྱས་པས་སྐད་ཅིག་ཉིད་ལ་སྦྱར་བར་བྱ་བ་ཡིན་
ནོ། །ཞེས་སོ། སྐད་ཅིག་ལ་སྦྱར་བས་ཆོག་པ་དེ་ཡང་དང་པོར་ལྡོག་པས་ཕྱེ་བ་ལ་རེ་རེ་ནས་སྦྱོར་བ་མི་བྱེད་པ་ཡང་མིན་ལ། རེ་ཞིག་གི་བར་དུ་ཐུན་མོང་བའི་སོ་བདུན་ལ་འདྲིས་པར་མི་བྱེད་པ་ཡང་མིན་མོད་ཀྱང༌། ཆོས་སོ་བདུན་ལྷ་སོ་བདུན་གྱི་དོ་བོར་ལྟ་བ་ནི་
གཙོ་བོའི་དོན་ལ་བྱེད་དོ། །དྲིལ་བུ་ཞབས་ཀྱིས་ཀྱང་སོ་བདུན་གྱི་དག་པ་བསྡུས་ནས་གསུངས་སོ། །དེ་ལྟར་ན་ཕྱི་དཀྱིལ་གྱི་དམ་ཚིག་པ་རྣམས་རྫོགས་པའི་མཇུག་འདིར་སྔར་ལྟར་གནས་བཞི་བྱིན་གྱིས་བརླབས་པ་སོགས་དྲན་པར་བྱས་ནས། བདེ་བ་བསྐྱེད་པ་
དང་སྟོང་པ་དབྱེར་མེད་དུ་སྦྱར་ནས་དེའི་ངོ་བོར་ལྷ་རྣམས་རེ་རེ་ནས་སམ། སྤྱིར་བསྡུས་ནས་ལྟ་བ་བྱ་སྟེ། ཆོས་སོ་བདུན་གྱི་ངོ་བོར་ལྟ་བའི་གཙོ་བོའི་དོན་དེ་ཡིན་པའི་ཕྱིར་དང༌། ཚུལ་དེས་ཀྱང་རྫོགས་རིམ་གྱི་རྟོགས་པ་སྐྟེ་བའི་རྒྱུད་སྨིན་པར་བྱེད་པའི་ཕྱིར་
9-5-110b


རོ། །གཉིས་པ་ནི། ཕྱི་དཀྱིལ་བསྒོམས་པའི་མཇུག་དེ་ནས་དེ་ལས་གཞན་ཡང་ཟད་པ་དང་མི་སྐྱེ་བ་ཤེས་པའི་བྱང་ཆུབ་ཀྱི་མཐར་ཐུག་པ་འཐོབ་བའི་ཕྱོགས་དང་རྗེས་སུ་མཐུན་པའི་ཆོས་སུམ་ཅུ་རྩ་བདུན་ཧེ་རུ་ཀ་ལ་སོགས་པའི་ལྷ་སོ་བདུན་དང་སྦྱོར་བས་སྦྱར་བར་བྱ་སྟེ། སྦྱོར་ཚུལ་དེ་དག་ཀྱང་
གང་ཞེ་ན། ལུས་དང༌། ཚོར་བ་དང༌། ཆོས་དང༌། སེམས་རྗེས་སུ་དྲན་པ་ཉེ་བར་བཞག་པ་བཞི་ནི། རིམ་པ་བཞིན་གཡས་སྐོར་གྱིས་མཁའ་འགྲོ་མ་ནས་གཟུགས་ཅན་མའི་བར་བཞིར་བལྟའོ། །ཉེར་གཞག་བཞི་ནི། རིམ་པ་བཞིན་གཟུགས་ཕུང་དང་ཚོར་ཕུང་ཤེས་པ་ལ་གཞོལ་བ་དང༌། རྩོམ་པ་དང༌། 
འདུ་ཤེས་དང་འདུ་བྱེད་ཀྱི་ཕུང་པོ་སྒྱུ་མ་ལྟ་བུར་ངེས་པར་འཛིན་པ་དང༌། རྣམ་ཤེས་ཀྱི་ཕུང་པོའི་རང་བཞིན་སོ་སོར་འབྱེད་པར་འགྲེལ་པ་གསུམ་ནས་གསུངས་པའི་དོན་ནི། ཇོ་བོའི་འགྲེལ་པར་ལུས་ཚོར་སེམས་ཆོས་ཀྱི་ཕུང་པོ་བཞི་སྒྱུ་མ་བཞིན་དུ་རང་བཞིན་གྱིས་སྐྱེ་བ་མེད་པར་ཤེས་པའི་ཤེས་
རབ་དང༌། སྙིང་རྗེ་དབྱེར་མེད་པ་ལ་བཤད་དེ་སྔར་ལྟར་བཤད་དོ། །རྗེས་སུ་དྲན་པ་ནི་ཤེས་རབ་ཀྱིས་དེ་ལྟར་གཏན་ལ་ཕབ་པའི་སྟོབས་ཀྱིས་ཡུལ་དེ་ལ་དྲན་པ་བཞག་པས་ན་དྲན་པ་ཉེར་གཞག་གོ། གཞུང་གཞན་ནས་བཤད་པའི་རིམ་པ་ལས། འདིར་ཐ་མ་གཉིས་བཟློག་པ་ནི་ཀུན་སྤྱོད་དང་མངོན་
སྤྱོད་དུ་ཡང་དེ་བཞིན་དུ་འབྱུར་ངོ༌། །འདུན་པའི་དང༌། བརྩོན་འགྲུས་ཀྱི་དང༌། སྤྱོད་པའི་དང༌། སེམས་ཀྱི་རྫུ་འཕྲུལ་གྱི་རྐང་པ་བཞིན་ནི་རིམ་པ་བཞིན་དུ། གཏུམ་མིག་མ་ནས་སྣ་ཆེན་མའི་བར་གྱི་ཐུགས་འཁོར་གྱི་ལྷ་མོ་བཞིར་བལྟའོ། །དེ་ལ་རྫུ་འཕྲུལ་ནི་ནམ་མཁའ་ལ་འགྲོ་བ་ལ་སོགས་པའོ། །རྐང་པ་ནི་དེའི་
གནས་སོ། །འདུན་པ་ནི་ཆོས་ཉན་པ་སོགས་ལ་ཤིན་ཏུ་གུས་པ་དང༌། བརྩོན་འགྲུས་ནི་དེའི་རྒྱུན་ལས་མི་ལྡོག་པར་གོམས་པར་བྱེད་པའོ། །དཔྱོད་པ་ནི་ཆོས་ཀྱི་དོན་ལ་ཤིན་ཏུ་རྣམ་པར་དཔྱོད་པ་དང༌། སེམས་ནི་བྱང་ཆུབ་མངོན་དུ་བྱེད་པའི་བྱ་བ་ལ་མཆོག་ཏུ་གྱུར་པའི་བྱེད་པའོ། །ཕར་ཕྱིན་ཐེག་
9-5-111a


པ་ནས་འདུན་པ་སོགས་བཞི་རྫུ་འཕྲུལ་རྐང་པར་མི་བྱེད་པར་འདུན་སོགས་བཞིའི་ཏིང་ངེ་འཛིན་ལ་བྱེད་ལ། སཾ་བྷུ་ཊ་ལས་ཀྱང་དེ་ལྟར་གསུངས་ཏེ། རྫུ་འཕྲུལ་སྐྱེད་ནུས་པའི་ཏིང་ངེ་འཛིན་འགྲུབ་པ་ལ་སྒོ་བཞི་སྟེ་འདུན་པ་དྲག་པོ་དང༌། 
བརྩོན་འགྲུས་རྒྱུན་རིང་དང༌། དམིགས་པ་རྣམ་པར་འབྱེད་པ་དང༌། སྔོན་གོམས་པའི་ཏིང་ངེ་འཛིན་གྱི་ས་བོན་སེམས་ལ་ཡོད་པ་ལ་བརྟེན་ནས་འཐོབ་པའོ། །ཇོ་བོའི་འགྲེལ་པར་སྔར་དྲན་པ་ཉེར་གཞག་ཏུ་བཤད་པའི་བྱང་ཆུབ་ཀྱི་སེམས་དང༌། ཏིང་ངེ་འཛིན་གྱིས་
གྲོགས་བྱས་པའི་སྒོ་ནས་རབ་གཏུམ་ལ་སོགས་པ་བཞིར་བཞག་པར་བཤད་པའི་ཏིང་ངེ་འཛིན་ནི་འདུན་པ་ལ་སོགས་པའི་ཏིང་ངེ་འཛིན་བཞིའོ། །འདི་ནི་བྱང་ཆུབ་ཀྱི་སེམས་དེ་ཉིད་ལ་གྲོགས་ཀྱི་སྒོ་ནས་རྫུ་འཕྲུལ་གྱི་རྐང་པ་བཞིར་མིང་བཏགས་ཞེས་པའི་
ལུགས་ཏེ། གཞུང་གཞན་ནས་བཤད་པའི་ཐ་མ་གཉིས་ཀྱི་རིམ་པ་ལས་བཟློག་པ་ནི། རྒྱུད་གཉིས་ལས་སྔར་ལྟར་བཤད་པས་འདིར་ཡང་དེ་ལྟར་མཛད་དོ། །དད་པ་ནི་དཀོན་མཆོག་གསུམ་དང་ལས་འབྲས་ལ་ཡིད་ཆེས་པ་དང༌། དབང་པོ་ནི་འདི་ནི་དེའོ་
ཤེས་ངེས་པར་འཛིན་པའོ། བརྩོན་འགྲུས་ཀྱི་དབང་པོ་ནི་ངེས་པར་བྱ་དགོས་པ་ཉིད་ངེས་པར་གཟུང་བའོ། །དྲན་པའི་དབང་པོ་ནི་མི་རྨུགས་པའི་མི་བརྗེད་པས་མ་རིག་པ་སྟེ་རྨུགས་པའི་སྐབས་མི་འབྱེད་པའོ། །ཏིང་ངེ་འཛིན་གྱི་དབང་པོ་ནི་སེམས་རྩེ་
གཅིག་པ་ལ་དབང་བྱེད་པའོ། །ཤེས་རབ་ཀྱི་དབང་པོ་ནི་སྤང་བླང་འབྱེད་པ་ལ་དེ་ཉིད་དུ་ངེས་པར་བཟུང་བའོ། །ཞེས་འགྲེལ་པ་གསུམ་ནས་བཤད་ལ། ཁྱད་པར་གསལ་བྱེད་ལས་འཇིག་རྟེན་པའི་ཡང་དག་པའི་ལྟ་བ་དང་སེམས་དང་བ་ནི་དད་པ་དང༌། 
9-5-111b


བརྩོན་འགྲུས་ནི་སེམས་མངོན་པར་སྤྲོ་བ། དད་པའི་དབང་པོ་ལ་བརྟེན་པའི་ཆོས་རྣམས་གང་གིས་ཉེ་བར་སོས་པ་ནི་བརྩོན་འགྲུས་དང༌། དེའི་དབང་པོ་བསྐྱེད་པའི་དོན་ལ་མི་རྨུགས་པའི་དྲན་པ་དང༌། དེའི་དབང་པོའི་དོན་ལ་མངོན་པར་ཕྱོགས་པར་བྱེད་པའི་ཏིང་ངེ་
འཛིན་དང༌། དེའི་དབང་པོས་རྩེ་གཅིག་ཏུ་བྱས་པའི་དོན་རྣམས་འབྱེད་པའི་ཤེས་རབ་ཀྱི་དབང་པོར་བཤད་དོ། །དབང་པོ་ལྔ་ནི་དབའ་བོའོ་བློ་གྲོས་མ་ནས་ཤིང་གྲིབ་མའི་བར་ཐུགས་ཀྱི་ལྷ་མོ་བཞི་དང༌། གསུང་གི་ལྷ་མོ་ས་སྲུངས་མར་བལྟའོ། །བརྟན་པའི་བློ་
ཅན་མ་ལ་འདིར་དཔའ་བོའི་བློ་གྲོས་མ་ཞེས་འབྱུང་བ་ལྟར་ཀུན་སྤྱོད་དང་མངོན་བརྗོད་ལས་ཀྱང་འབྱུང་ངོ༌། །ཇོ་བོའི་འགྲེལ་པར་སྔར་གྱི་བྱང་ཆུབ་ཀྱི་སེམས་དེ་ཉིད་དབང་པོ་ལྔས་དབང་བྱས་པའི་སྒོ་ནས་ལྷ་མོ་དེ་ལྔར་འཇོག་པར་བཤད་དོ། །དད་པའི་དབང་པོ་ལ་
སོགས་པ་ལྔ་ཕུལ་དུ་བྱུང་བའི་སྐབས་སུ་རང་གི་མི་མཐུན་ཕྱོགས་ཀྱིས་མི་རྫི་བའི་ཕྱིར། དད་པའི་སྟོབས་ནས་ཤེས་རབ་ཀྱི་སྟོབས་ཀྱི་བར་ལྔར་གྱུར་པ་ནི་རིམ་པ་བཞིན་འཇིགས་བྱེད་ཆེན་མོ་ནས་ཤིན་ཏུ་བཟང་མོའི་བར་གྱི་ལྷ་མོ་ལྡར་བལྟའོ། །ཇོ་བོའི་
དགོངས་པ་ལྟར་ན་བྱང་ཆུབ་ཀྱི་སེམས་དེ་ཉིད་དད་སོགས་སྟོབས་སུ་གྱུར་པའི་སྐབས་སུ་དེ་དག་གི་སྒོ་ནས་ལྷ་མོ་ལྔར་འཇོག་པ་སྔ་མའི་རིགས་པས་ཤེས་པར་བྱའོ། །ཏིང་ངེ་འཛིན་དང༌། བརྩོན་འགྲུས་དང༌། དགའ་བ་དང༌། ཤིན་ཏུ་སྦྱངས་པ་དང༌། ཆོས་རབ་ཏུ་
རྣམ་པར་འབྱེད་པ་དང༌། དྲན་པ་དང༌། བཏང་སྙོམས་ཀྱི་མཐར་ཡང་དག་བྱང་ཆུབ་ཀྱི་ཡན་ལག་ཅེས་སྦྱར་བ་ནི་རིམ་པ་བཞིན་དུ་སྟོང་པ་ཉིད་ལ་སེམས་རྩེ་གཅིག་པ་བྱང་ཆུབ་ཀྱི་རྒྱུ་ཉིད་དང༌། ལེ་ལོའི་སྐབས་མེད་པར་སོ་སྐྱེའི་ལས་ངེས་པར་འབྱུང་བ་དང༌། དགེ་
9-5-112a


བའི་ཆོས་ཀུན་ཏུ་འཛིན་ཞིང་དགའ་བའི་མི་མཐུན་ཕྱོགས་བདག་དང་བདག་གིར་འཛིན་པའི་བག་ཆགས་གཅོད་པ་དང༌། དགེ་བ་ལ་སེམས་ཤིན་ཏུ་ལས་སུ་རུང་བ་དང༌། བདག་མེད་པའི་རང་བཞིན་ལ་དེ་ཉིད་དུ་ངེས་པར་འཛིན་པ་དང༌། མི་
བརྗེད་པའི་ངང་ཚུལ་དང༌། ཏིང་ངེ་འཛིན་ལ་བསྒྲིམ་མི་དགོས་པར་ལྷུན་གྱིས་གྲུབ་པ་སྟེ། དེ་བདུན་ནི་རིམ་པ་བཞིན་རྟ་རྣ་མ་ནས་ཤིན་ཏུ་དཔའ་མོའི་བར་གྱི་ལྷ་མོ་བདུན་དུ་བལྟའོ། ཇོ་བོའི་བཞེད་པ་ལྟར་ན་དེ་བདུན་ཁ་ཅིག་བྱང་ཆུབ་ཀྱི་སེམས་ཀྱི་ངོ་བོ་དང༌། ཁ་
ཅིག་བྱེད་ལས་སོགས་ལ་བཤད་དགོས་སོ། །དེ་དག་གི་གོ་རིམ་ཀྱང་གཞུང་ནས་འབྱུང་བ་བཞིན་ཀུན་སྤྱོད་དང་མངོན་བརྗོད་ལས་སོ། །ལྟ་བ་དང༌། རྟོག་པ་དང༌། དག་དང༌། ལས་ཀྱི་མཐའ་དང༌། འཚོ་བ་དང༌། རྩོལ་བ་དང༌། དྲན་པ་དང༌། ཏིང་ངེ་འཛིན་རྣམས་ཀྱི་
མགོར་ཡང་དག་པའི་ཞེས་སྦྱར་བ་རྣམས་ནི་རིམ་པ་བཞིན་དུ་སངས་རྒྱས་ཀྱི་གསུང་ལ་ཤིན་ཏུ་གུས་ཤིང་དེའི་དོན་ཕྱིན་ཅི་མ་ལོག་པར་རྟོགས་པ་དང༌། ལེགས་པའི་བྱ་བ་བརྩམས་པ་མི་འདོར་བ་དང༌། སེམས་ཅན་མི་སླུ་བའི་ཚིག་རྫུན་དང་བྲལ་བ་དང༌། 
གང་བྱེད་ཐམས་ཅད་དགེ་བཅུ་ལས་མི་འདའ་བ་དང༌། སེམས་ཅན་ལ་མི་འཚེ་བའི་ཚུལ་གྱིས་འཚོ་བ་དང༌། ཕྱག་དང་སྐོར་བ་སོགས་ཀྱི་དགེ་བ་སྒྲུབ་པ་དང༌། རྒྱལ་བའི་གསུང་རྗེས་སུ་དྲན་པ་དང༌། ཧེ་རུ་ཀའི་ཚུལ་དུ་དམིགས་པའོ། །དེ་བརྒྱད་ནི་རིམ་པ་
བཞིན་དུ་སྟོབས་ཆེན་མ་དང༌། འཁོར་ལོས་སྒྱུར་མ་དང༌། བརྩོན་ཆེན་མ་གསུམ་དང༌། གཡོན་སྐོར་གྱིས་བྱ་རོག་གདོང་མ་ལ་སོགས་པ་བཞི་དང༌། བཙོ་བོའི་ངོ་བོར་བལྟའོ། །དེ་བརྒྱད་ཀྱི་མཐར་ཡང་དག་འཕགས་པའི་ལམ་ཡན་ལག་ཅེས་པ་མ་བྱུང་
9-5-112b


ཡང༌། ཐེག་པ་ཐུན་མོང་བ་ནས་གསུངས་པ་ལྟར་སྦྱར་རོ། །ཇོ་བོའི་བཞེད་པ་ནི་དེ་རྣམས་བྱང་ཆུབ་ཀྱི་སེམས་ཀྱི་ངོ་བོ་དང་དེའི་ནུས་པ་དང༌། བྱེད་ལས་སོགས་ཀྱི་སྒོ་ནས་མིང་འདོགས་པར་ཤེས་པར་བྱའོ། །དགེ་བའི་ཆོས་མ་སྐྱེས་པ་རྣམས་སྐྱེད་པ་དང༌། སྐྱེས་པ་སྲུང་
བ་དང༌། མི་དགེ་བའི་ཆོས་སྐྱེས་པ་རྣམས་སྤོང་བ་དང༌། མ་སྐྱེས་པ་རྣམས་མི་སྐྱེད་པ་བཞི་ནི་རིམ་པ་བཞིན་དུ་གཡས་སྐོར་གྱིས་ཡ་མ་དཱཾ་ཌྷི་ལ་སོགས་པ་བཞིར་བལྟའོ། །ཇོ་བོའི་འགྲེལ་པར་སྔར་བཤད་པའི་བྱང་ཆུབ་ཀྱི་སེམས་དེ་ཡང་དག་སྤོང་བའི་བརྩོན་
འགྲུས་ཀྱིས་གྲོགས་བྱས་པའི་སྒོ་ནས་མཚམས་མ་བཞིར་འཇོག་པར་བཤད་དོ། །དེ་ལྟར་བྱང་ཕྱོགས་སོ་བདུན་ལྷ་མོ་དང་སྦྱོར་བའི་སྐབས་སུ་ཡང་དག་པའི་ཏིང་ངེ་འཛིན་དཔའ་བོ་དང་དངོས་སུ་སྦྱར་བ་ན་སྔ་མ་ཉེར་བཞི་ཡང་རང་རང་གི་དཔའ་བོ་དང་སྦྱོར་བ་
ཤེས་ནུས་ལ། དེའི་གནད་ཀྱིས་སོ་བདུན་པ་གཙོ་མོ་དང་སྦྱར་དགོས་པའང་ཤེས་པས། དག་བདེ་དག་ནི་དཔའ་བོ་དང་རྣལ་འབྱོར་མ་གཉིས་སུ་མེད་པའི་དག་པའོ། །ཡང་དག་སྤོང་བ་བཞི་མཐར་བཤད་པ་ནི་ཉོན་མོངས་དང་ཉེ་ཉོན་གྱི་སྒྲིབ་པ་རྣམས་སྤངས་ན་
ཡང་དག་པར་སྤོང་བ་དེའི་ཕྱིར་ཞེས་པའམ། ཡང་ན་ཇི་སྲིད་དུ་རྣལ་འབྱོར་པ་ཧེ་རུ་ཀར་གྱུར་བ་དེ་སྲིད་དུ་འདི་རྣམས་ཁོ་ནས་རྟག་ཏུ་སྤྱོད་དོ་ཞེས་ཤེས་པར་བྱ་བའི་ཕྱིར། ཕར་ཕྱིན་གྱི་ཐེག་པ་དང་གོ་རིམ་མི་མཐུན་པར་བཤད་དོ། །ཞེས་ཁྱད་པར་གསལ་བྱེད་
ལས་བཤད་པའི་ཕྱི་མའི་དོན་ནི་ཡང་དག་པའི་ཏིང་ངེ་འཛིན་ཧེ་རུ་ཀར་བཤད་པའི་འོག་ཏུ་གཉེན་པོའི་ཕྱོགས་སྒྲུབ་པ་དང༌། མི་མཐུན་པའི་ཕྱོགས་འགོག་པའི་སྤོང་བ་བཞི་བཤད་པ་ན་བྱང་ཕྱོགས་སྔ་མ་སོ་གཉིས་ཀྱིས་བྱ་བ་དེ་གཉིས་སྒྲུབ་པ་ནི་ཧེ་རུ་ཀ་མ་ཐོབ་
9-5-113a


བར་དུ་བྱ་དགོས་པར་ཤེས་པའི་དོན་ཏེ་འདི་སྔ་མ་ལས་ལེགས་སོ། །མངོན་བརྗོད་དང་ཀུན་སྤྱོད་ལས་གོ་རིམ་དེ་ལྟར་གསུངས་ལ། སཾ་བྷུ་ཊ་ལས་དྲན་པ་ཉེར་གཞག་གི་འོག་ཏུ་ཡང་དག་སྤོང་བ་བཤད་ཅིང་བྱང་ཆུབ་ཡན་ལག་བདུན་ཀྱང་ཕར་ཕྱིན་དང་
གོ་རིམ་མཐུན་པར་བཤད་དོ། །གཉིས་པ་ལ་གཉིས། ལུས་དཀྱིལ་སྤྱིའི་རྣམ་གཞག་དང༌། གཞུང་གི་ཚིག་དོན་བཤད་པའོ། །དང་པོ་ལ་གཉིས། ལུས་ཀྱི་དཀྱིལ་འཁོར་གྱི་རྣམ་དབྱེ་དང་གོ་རིམ། རྟེན་དང་བརྟེན་པའི་ལུས་དཀྱིལ་གྱི་རྣམ་གཞག་གོ། །དང་པོ་ནི། ཉུང་ངུའི་རྩ་རྒྱུད་
ལས། རྣལ་འབྱོར་མ་ཡིས་དང་གནས། །ཧེ་རུ་ཀ་དཔལ་སྐུའི་ཡན་ལག །ཐམས་ཅད་བརྟན་གཡོ་བདག་ཉིད་ཅན། །ཞེས་དང༌། མཐོ་རིས་ས་སྟེང་ས་འོག་ཏུ། །དཔའ་བོའི་ཡན་ལག་བརྟན་གཡོའི་བདག །པཱུ་ལ་སོགས་པ་གང་བསྟན་པ། །ཕྱི་ནང་བདག་ཉིད་ཅན་དུ་གནས། །
ཞེས་འབྱུང་བ་ལྟ་བུ་མ་གཏོགས་པ་ལུས་དཀྱིལ་གསལ་བར་མ་གསུངས་ལ། བཤད་རྒྱུད་མངོན་མརྗོད་ཀྱི་ལེའུ་དགུ་པར། གཞལ་ཡས་ཁང་གི་ལྟེ་བར་བསྐྱེད་པའི་ཧེ་རུ་ཀའི་ལུས་ལ་བཀོད་པའི་ལུས་དཀྱིལ་སྒོམ་པ་དང༌། དེ་ཡང་དཔའ་བོ་གཅིག་པའི་དཀྱིལ་འཁོར་དུ་
བཤད་དེ། རྟེན་གྱི་དཀྱིལ་འཁོར་ལ་འགོད་པའི་དབང་དུ་བྱས་ན་ཡབ་ཡུམ་ཟུང་གཅིག་ལས་མེད་ཅིང༌། དེ་གཉིས་ཀྱང་གདན་གཅིག་ལ་བཞུགས་པ་ལ་དགོངས་སོ། །ལེའུ་དགུ་པ་དེ་ལ་བརྟེན་ནས་སྦྱང་དཀའ་ཟླ་བས་མཛད་པའི་སྒྲུབ་ཐབས་སུ་ཡང་བཅོམ་ལྡན་འདས་ཡབ་
ཡུམ་གཉིས་ལུས་ལ་དགོད་པ་མ་བྱས་ཤིང༌། ལུས་དཀྱིལ་བསྒོམས་ཟིན་པའི་འོག་ཏུ་རྟེན་གྱི་དཀྱིལ་འཁོར་ལ་ལྷ་དྲུག་ཅུ་བཀོད་ནས་སྒོམ་པ་བྱས་པ་ནི་ལུས་དཀྱིལ་སྔ་ལ་ཕྱི་དཀྱིལ་རྗེས་སུ་སྒོམ་པའི་ལུགས་སོ། །ཕྱི་དཀྱིལ་སྔོན་དུ་བསྒོམས་ནས་རྗེས་སུ་ལུས་དཀྱིལ་
9-5-113b


སྒོམ་པ་ནི་ལཱུ་ཨི་པས་གསུངས་ཏེ། འདིའི་རྗེས་སུ་འབྲངས་པའི་རྒྱ་གཞུང་མང་ངོ༌། །ནག་པོ་སྤྱོད་པས། ཕྱི་དཀྱིལ་གྱི་འཁོར་ལོ་གསུམ་གྱི་ལྷ་སྒོམ་པའི་སྐབས་སུ་པུལླི་ར་མ་ལ་མགོ་བོར་ཐོད་པའི་དུམ་བུ་ཅན་དང༌། རབ་གཏུམ་མོ། །ཞེས་སོགས་ཀྱིས་ལུས་ཀྱི་གནས་ཉེར་
བཞིར་སྒོམ་པ་ཡང་བཤད་ལ། བརྒྱད་ཚན་གསུམ་ཀྱི་དང་པོ་བཞི་བཞི་ཤར་ལ་སོགས་པའི་ཕྱོགས་སུ་ལུགས་མི་མཐུན་དང༌། ཕྱི་མ་བཞི་བཞི་དབང་ལྡན་ལ་སོགས་པའི་མཚམས་སུ་ལུགས་མཐུན་དུ་འགོད་པར་གསུངས་པས་ལྷ་ཞེ་བརྒྱད་ཕྱི་དཀྱིལ་དུ་འགོད་པ་
དང༌། ནང་ལུས་ལ་འགོད་པ་གཉིས་དུས་མཉམ་དུ་བཤད་པ་ནི། རྡོ་རྗེ་མཁའ་འགྲོའོ་བཅུ་བཞི་པར། ཕྱི་དང་ནང་དང་ཡང་དག་གནས༌། ཉི་ཤུ་རྩ་བཞིར་ཕྱེ་བ་ཡིས་སྐུ་གསུང་ཐུགས་ཀྱི་འཁོར་ལོ་ཡིན། ཞེས་གསུངས་པའི་རྗེས་སུ་འབྲངས་པའོ། དེ་ལྟར་ཚུལ་གསུམ་
བཤད་པ་ནི་ཕྱི་དཀྱིལ་དང་ལུས་དཀྱིལ་གཉིས་ཀ་སྒོམ་པར་བཤད་པའི་སྟེང་ནས་ཡིན་ཏེ། གཉིས་ཀ་སྒོམ་པ་ནི་ཀུན་སྤྱོད་དང་མངོན་བརྗོད་ཀྱི་བཅུ་བཞི་པའི་ཡང་དགོངས་པར་སྣང་ཞིང༌། ཕྱི་དཀྱིལ་སྔོན་དུ་བསྒོམས་པའི་རྗེས་སུ་ལྷ་ཞེ་བརྒྱད་ཀྱི་ལུས་དཀྱིལ་སྒོམ་པ་ཡང་
དེར་བཤད་དོ། །མངོན་བརྗོད་ཀྱི་དགུ་པ་དང་དྲིལ་བུ་ཞབས་ཀྱིས་ནི་ཕྱི་དཀྱིལ་གྱི་ལྷ་སྒོམ་པ་མ་བཤད་པར་ལུས་དཀྱིལ་གྱི་ལྷ་ཙམ་ཞིག་སྒོམ་པར་བཤད་དོ། །གཉིས་པ་ལ་གཉིས། རྟེན་གྱི་ལུས་དཀྱིལ་གྱི་རྣམ་གཞག་དང༌། བརྟེན་པའི་ལུས་དཀྱིལ་གྱི་རྣམ་གཞག་གོ །
དང་པོ་ནི། མངོན་བརྗོད་ལས། བརྟེན་པའི་ལུས་དཀྱིལ་སྒོམ་པར་བཤད་པ་མ་གཏོགས་པ། རྟེན་གྱི་ལུས་དཀྱིལ་ཐུན་མོང་མ་ཡིན་པ་མ་བཤད་ལ། ལཱུ་ཨི་པའི་རྩ་བ་དང་འགྲེལ་པ་གཞན་ལྔ་དང༌། འཁྲུལ་སྤོང་དང་ནག་པོ་སྤྱོད་པའི་སྒྲུབ་ཐབས་དང༌། སྦྱང་དཀའ་ཟླ་བ་སོགས་
9-5-114a


ཀྱིས་ཀྱང་མ་བཤད་དོ། འགྲེལ་པ་སྡོམ་འབྱུང་ལས་ལུས་དཀྱིལ་གྱི་སྐབས་སུ་ལུས་འབྱུང་བ་རིམ་རྩེགས་སོགས་རྟེན་གྱི་དཀྱིལ་འཁོར་དུ་སྒོམ་ཚུལ་སཾ་བྷུ་ཊར་གསུངས་པ་བཞིན་བཤད་ལ། དེར་བརྟེན་པའི་ལུས་དཀྱིལ་གྱི་རྗེས་སུ་བཤད་པ་ནི་
བཤད་པའི་རིམ་པ་ཙམ་ཡིན་གྱི་ལག་ལེན་གྱི་རིམ་པ་ནི་ཕྱི་དཀྱིལ་དང༌། ཆོས་སོ་བདུན་བསྒོམས་པའི་མཇུག་ཏུ་བྱའོ། །དྲིལ་བུ་ཞབས་ཀྱིས་ཀྱང༌། ལུས་ཀྱི་ཆ་རྣམས་འབྱུང་བ་རིམ་བརྩེགས་དང༌། རི་རབ་དང་གཞལ་ཡས་ཁང་དུ་སྒོམ་པ་ལུས་དཀྱིལ་གྱི་ལྷ་སྒོམ་པའི་སྔོན་དུ་
གསུངས་པ་ནི་བཤད་རྒྱུད་སཾ་བྷུ་ཊའི་ལུགས་སོ། དེས་ན་བརྟེན་པའི་དཀྱིལ་འཁོར་གཉིས་ཀ་སྒོམ་པ་དང༌། བརྟེན་པའི་ལུས་དཀྱིལ་ཙམ་ཞིག་སྒོམ་ནའང་འདྲ་བས་ལུས་རྟེན་གྱི་དཀྱིལ་འཁོར་དུ་སྒོམ་པ་ནི་སྔོན་དུ་གཏང་དགོས་ཏེ། འདི་ནི་དཔལ་འདུས་པའི་ལུགས་ཀྱང་
ཡིན་ནོ། དེ་ཡང་དཀྱིལ་འཁོར་གཉིས་ཀ་སྒོམ་པའི་ནག་ལྟ་བུ་དང༌། ལུས་དཀྱིལ་གཅིག་པུ་སྒོམ་པ་མངོན་བརྗོད་ཀྱི་དགུ་པ་ལྟ་བུ་ཡིན་ན་སྔོན་དུ་རྟེན་གྱི་དཀྱིལ་འཁོར་བསྐྱེད་ཟིན་པ་དེ་ལ་ལུས་རྟེན་གྱི་དཀྱིལ་འཁོར་དུ་སྒོམ་ལུགས་སྔར་བྱས་པ་མེད་པས་ལུས་
དཀྱིལ་སྒོམ་རན་པ་ན་སྔར་བསྐྱེད་པའི་གཞལ་ཡས་ཁང་དེ་ཉིད་ཀྱི་སྟེང་ནས་བྱེད་ཀྱི། སྔ་མ་དེ་བསྡུས་ནས་སྐྱེད་པ་མིན་ཏེ། མདོ་བསྲེ་ལས། བྷཱུཾ་ཡིག་ལས་བསྐྱེད་པའི་གཞལ་ཡས་ཁང་དབུས་སུ་སྦྲུལ་སྐུ་རྡོར་སེམས་སུ་བསྐྱེད་པའི་ལུས་ལ་ལྷ་སོ་གཉིས་ཚང་
བར་སྒོམ་པའི་ལུས་དཀྱིལ་བསྒོམས་ནས་དེ་མ་བསྡུས་པའི་སྐབས་སུ་སྔར་བཤད་པའི་གཞལ་ཡས་ཁང་ན་གནས་པར་བྱའོ་ཞེས་གསུངས་ཤིང༌། གཞལ་ཡས་ཁང་སྡུད་མི་སྡུད་མི་སྡུད་ཀྱང་དེ་དང་འདི་གཉིས་ལ་ཁྱད་པར་མེད་པའི་ཕྱིར་རོ། །སྦྱང་དཀའ་ཟླ་བས་ཀྱང་
9-5-114b


རྣམ་སྣང་ལས་བསྐྱེད་པའི་གཞལ་ཡས་ཁང་གི་དབུས་སུ་ལུས་དཀྱིལ་སྒོམ་པར་བཤད་ལ། དེ་མངོན་བརྗོད་ཀྱི་དགོངས་པར་ཡང་སྣང་བའི་ཕྱིར་རོ། །དེའི་ཕྱིར་ན་སྔར་བསྐྱེད་པའི་གཞལ་ཡས་ཁང་གི་ནང་དུ་གཞལ་ཡས་ཁང་གཉིས་པ་ཅིག་སྐྱེད་པའང་མིན་ལ། 
དེ་ལྟར་བྱེད་པའི་བཤད་པ་ཡང་གཞུང་ཁུངས་ཐུབ་གང་ནས་ཀྱང་མི་འབྱུང་ངོ༌། །འོ་ན་གཞལ་ཡས་ཁང་སྔ་མའི་སྟེང་ནས་ཇི་ལྟར་སྒོམ་སྙམ་ན། འདི་ལ་བོད་ཀྱི་བླ་མ་ཁ་ཅིག་ལུས་ཀྱི་ཆ་དེ་དང་དེ་རྟེན་གྱི་དཀྱིལ་འཁོར་གྱི་ཆ་དེ་དང་དེའི་དོད་དུ་མོས་པ་ཙམ་ཡིན་ཟེར་
བ་དང༌། ཁ་ཅིག་གདོད་མ་ནས་དེར་གྲུབ་པ་གསལ་འདེབས་པ་ཡིན་ཟེར། དེ་ལ་དང་པོ་ནི་རྒྱུད་དང་མཁས་གྲུབ་ཀྱི་བཞེད་པ་མིན་ཏེ། བཤད་རྒྱུད་རྡོ་རྗེ་འཕྲེང་བར། ལུས་རྟེན་གྱི་དཀྱིལ་འཁོར་དུ་སྒོམ་པའི་སྐབས་སུ་ཐོག་མར། ལུས་ནི་གཞལ་ཡས་ཁང་
དུ་གྱུར། །སངས་རྒྱས་ཀུན་གྱི་ཡང་དག་རྟེན། །ཞེས་མདོར་བསྟན་པའི་སྐབས་སུ་ཡང་ལུས་གཞལ་ཡས་ཁང་དུ་གྱུར་པར་སྒོམ་པར་གསུངས་ཤིང༌། བར་དུ་ལུས་ཀྱི་ཆ་འདི་དང་འདི་གཞལ་ཡས་ཁང་གི་ཆ་འདི་དང་འདི་ཞེས་གསུངས་པ་ནི། སྔ་མའི་རྒྱས་
བཤད་ཡིན་པས། དེ་རྣམས་དེ་དག་ཏུ་གྱུར་བར་སྒོམ་པའི་དོན་ཡིན་ལ། མཇུག་ཏུ་དོན་བསྡུས་པར་ཡང༌། དེ་དག་གཞལ་ཡས་ཁང་དུ་བསྒོམ། །ཞེས་གསུངས་ཀྱི་དེའི་དོད་དུ་སྒོམ་པར་བཤད་པ་མེད་པའི་ཕྱིར་དང༌། རྣམ་གཞག་རིམ་པར་ཡང༌། དང་པོ་ཁོ་ནར་
སྐུའི་དཀྱིལ་འཁོར་རྣམ་པར་གཞག་པར་བྱ་སྟེ། ཚངས་པའི་ཐིག་ནས་ཡང་དག་བརྩམས། །གྲུ་བཞི་པ་རུ་རྣམ་པར་དབྱེ། །གཞལ་ཡས་ཁང་ལྟར་སྣང་བ་ཡི། །རྣལ་འབྱོར་པ་ཡི་སྐུ་དཀྱིལ་འཁོར། །ཞེས་གྲུ་བཞི་པའི་གཞལ་ཡས་ཁང་དུ་སྣང་བའི་སྐུའི་
9-5-115a


དཀྱིལ་འཁོར་སྒོམ་པར་གསུངས་པའི་ཕྱིར་རོ། །ལུགས་གཉིས་པ་ཡང་ཤིན་ཏུ་མ་འཐད་ཏེ། རང་གི་ལུག་ཀྱི་ཆ་རྣམས་གདོད་མ་ནས་རྟེན་དང་བརྟེན་པའི་དཀྱིལ་འཁོར་དུ་གྲུབ་ཟིན་ན་ནི་ལུས་ཅན་ཐམས་ཅད་འབད་པ་མེད་པར་གྲོལ་བར་
འགྱུར་ལ། བློས་དེ་ལྟར་མོས་ནས་སྒོམ་དགོས་ན་ཡང་མི་འཐད་དེ། ལུས་གཞལ་ཡས་ཁང་དུ་གྱུར་པར་སྒོམ་པར་གསུངས་པའི་ཕྱིར་དང༌། ལྭ་བ་པའི་འགྲེལ་པ་ལས། གནས་དེ་རྣམས་སུ་གནས་པའི་རྩ་རྣམས་དེ་དང་དེའི་ལྷའི་ངོ་བོར་ཡོངས་སུ་
གྱུར་ཏེ་གནས་པར་བསྒོམ་མོ། །ཞེས་གསུངས་པའི་ཕྱིར་དང༌། པྲ་ཛྙཱོ་རཀྵི་ཏ་དང༌། དེ་བཞིན་གཤེགས་པའི་རྡོ་རྗེའི་འགྲེལ་པར་ཡང་དེ་བཞིན་དུ་བཤད་དོ། །དེ་ལྟ་མ་ཡིན་ན་མངོན་བརྗོད་ལས་ལུས་དཀྱིལ་སྒོམ་པ་ན་གཞིའི་ཧེ་རུ་ཀ་གསར་དུ་སྒོམ་པ་མི་འཐད་པར་འགྱུར་
བ་དང༌། རང་གིས་ཀྱང་དྲིལ་བུ་པའི་ལུགས་ལ་རྟེན་དང་བརྟེན་པའི་དཀྱིལ་འཁོར་ཐམས་ཅད་སྐད་ཅིག་གིས་སྐྱེད་པར་བཤད་པའི་གསར་དུ་བསྐྱེད་པ་དང་འགལ་བར་འགྱུར་རོ། །དྲིལ་བུ་པའི་དབང་ཆོག་ལས། འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་
གཉིས་མེད་པའོ། །ཞེས་གསུངས་པ་ནི་ལུས་དཀྱིལ་གྱི་ལྷའི་དཀྱིལ་འཁོར་གང་ལས་སྒྲུབ་པའི་སྒྲུབ་གཞི་ནི་རྡུལ་ཚོན་དང༌། རས་རིས་ཀྱི་དཀྱིལ་འཁོར་ལ་ལྷ་སྒྲུབ་པའི་སྒྲུབ་གཞི་ཕྱག་མཚན་དང་སྐུ་ལ་སོགས་པ་གསར་དུ་སྒྲུབ་དགོས་པ་བཞིན་དུ་འདྲ་མཁན་གྱིས་
གསར་དུ་སྒྲུབ་མི་དགོས་པར་རྩ་དང་ཁམས་རྣམས་རང་བཞིན་གྱིས་ཏེ་གདོད་མ་ནས་གནས་ལ། དེ་ཡང་དེའི་སྒྲུབ་གཞི་ཡིན་པའི་དོན་ཡིན་གྱི། ལུས་ཀྱི་རྩ་དང་ཁམས་ལ་སོགས་པ་ཧེ་རུ་ཀའི་དཀྱིལ་འཁོར་དུ་གདོད་མ་ནས་གནས་པ་མིན་ཏེ། ཡིན་ན་ནི་དེ་ཉིད་ལས། དེ་ཡི་
9-5-115b


རང་བཞིན་མི་ཤེས་རྣམས། །སྣོད་དུ་བྱ་བར་བཞེད་པ་སྟེ། །ཞེས་གསུངས་པ་དང་ནང་འགལ་བར་འགྱུར་ཏེ། བདེ་མཆོག་གི་དཀྱིལ་འཁོར་གྱི་དེ་ཉིད་མི་ཤེས་པ་འགལ་བའི་ཕྱིར་རོ། །གསང་འདུས་དང་བདེ་མཆོག་གི་ལུས་དཀྱིལ་ཡང་ལུས་གདོད་མ་ནས་ལྷར་གནས་མི་
གནས་མཚུངས་པས། འདུས་པའི་ལུས་དཀྱིལ་ལ་རང་རང་གི་ས་བོན་ལས་སྐྱེད་པར་བཤད་པ་དང་ཡང་འགལ་བར་འགྱུར་རོ། །དྲིལ་བུ་བའི་ལྷ་རྣམས་ཀྱི་ཞལ་ཕྱག་གི་གྲངས་དང་ཕྱག་མཚན་སོགས་ཀྱང་ཀུན་སྤྱོད་ལ་བརྟེན་པར་སྣང་ཞིང༌། ཀུན་སྤྱོད་ཀྱི་ལུགས་ཀྱང་ཏ་ཐཱ་ག་ཏ་རཀྵི་
ཏས་རྟེན་བརྟེན་པ་དུས་གཅིག་ཏུ་སྐྱེད་པ་ལཱུ་ཨི་པ་ལྟར་བཤད་ལ། རྒྱུད་དོན་དུའང་འདུག་པས་དེ་ལྟར་བྱའོ། །འོན་ཀྱང་མངོན་བྱང་ལྔ་ལས་གཞལ་ཡས་ཁང་དང་གཞིའི་ཧེ་རུ་ཀ་ཡབ་ཡུམ་ཙམ་ཞིག་སྐྱེད་ཀྱི། ལུས་ལ་བཀོད་པའི་ལྷ་རྣམས་སྐྱེད་པ་ནི་མིན་ཏེ། དེ་དག་ནི་
ཧེ་རུ་ཀར་བསྐྱེད་ཟིན་པའི་ལུས་ཀྱི་རྩ་དང་ཁམས་ལས་སྐྱེད་དགོས་པའི་ཕྱིར་རོ། །དྲིལ་བུ་པས་ལུས་རྟེན་གྱི་དཀྱིལ་འཁོར་དུ་བསྐྱེད་པའོ་འོག་ཏུ་གཞིའི་ཧེ་རུ་ཀ་ཡབ་ཡུམ་གྱི་སྐུ་མདོག་སོགས་བཤད་པ་དང་མི་འགལ་ཏེ། དེ་ནི་སྔོན་དུ་ལཱུ་ཨི་པ་ལྟར་གཙོ་བོ་བསྐྱེད་ཟིན་པའི་
གསལ་འདེབས་ཡིན་ལ། ལུས་རྟེན་གྱི་དཀྱིལ་འཁོར་དུ་སྒོམ་པ་ཡང་སྔར་བསྐྱེད་ཟིན་པའི་དཀྱིལ་འཁོར་གྱི་སྟེང་ནས་སླར་ཡང་སྒོམ་པ་ཡིན་པའི་ཕྱིར་རོ། །དེས་ན་སྔར་འབྱུང་བ་རིམ་རྩེག་རི་རབ་གཞལ་ཡས་ཁང་དང་བཅས་པ་བསྐྱེད་པ་དེ་ཉིད་ཀྱི་རྒྱུན་ད་གཟོད་གཞལ་
ཡས་ཁང་མ་བསྡུས་བར་དུ་འཇུག་པར་མོས་པའི་ལུགས་ཡིན་པས་ལུས་རྟེན་གྱི་དཀྱིལ་འཁོར་དུ་སྒོམ་པའི་མཚམས་ནས་རང་གི་རིགས་འདྲ་སྔ་མ་དང་ལུས་ཀྱི་ཆར་རེ་ལ་བརྟེན་ནས་རིགས་འདྲ་ཕྱི་མ་སྐྱེས་པར་སྒོམ་པ་ཡིན་ནོ། །དེ་ཡང་རྐང་པ་གཉིས་བགྲད་པ་གཞུའི་
9-5-116a


དབྱིབས་སུ་ཡོད་པ། ཡོངས་སུ་གྱུར་པ་ལས་འབྱུང་བཞིའི་རླུང་གཞུའི་དབྱིབས་ཅན་དང༌། སུམ་མདོ་གྲུ་གསུམ་གྱི་གཟུགས་སུ་ཡོད་པ་ལས་མེ་དཀྱིལ་ཟུར་གསུམ་དང༌། ལྟོ་བ་ཟླུམ་པོའི་དབྱིབས་ཅན་ལས་ཆུ་དཀྱིལ་ཟླུམ་པོ་དང༌། སྙིང་ཀ་གྲུ་བཞི་ལས་ས་དཀྱིལ་གྲུ་
བཞིར་གྱུར་པར་བསམས་ཏེ། སཾ་བྷུ་ཊ་ལས། རྐང་པའི་མཐིལ་དུ་རྩོམ་ཆེན་རླུང༌། །བཞུ་ཡི་དབྱིབས་སུ་རྣམ་པར་གནས། སུམ་མདོ་ཡི་ནི་གནས་སུ་ནི། དེ་བཞིན་གྲུ་གསུམ་འབར་བ་ཉིད། ཟླུམ་པོའི་རྣམ་པའི་གཟུགས་ཀྱིས་ནི། ཆུ་ནི་ལྟོ་བར་རྣམ་པར་
གནས། སྙིང་ཁར་ཡང་ནི་ས་ཉིད་དེ། ཀུན་ནས་གྲུ་བཞི་པ་ཉིད་དོ། །ཞེས་གསུངས་ལ། དེའི་དོན་ལ་རིམ་གཉིས་ཀྱི་དབང་དུ་བྱས་ནས་བཤད་དགོས་པ་གཉིས་ལས། འདིར་ནི་བསྐྱེད་རིམ་པའི་ལུས་དཀྱིལ་གྱི་དབང་དུ་བྱས་པ་བཤད་དེ། དྲིལ་བུ་པས། རྐང་པ་
སུམ་མདོ་ལྟེ་སྙིང་ཁ། །རླུང་དང་མེ་ཆུ་ས་ཡིན་ནོ། །ཞེས་གསུངས་པ་ལྟར་རོ། །འདི་ལ་ནི་སྔར་བསྐྱེད་པ་ད་དུང་གནས་པའི་དཀྱིལ་འཁོར་བཞི། དེ་རྣམས་ཀྱི་དབྱིབས་ཅན་གྱི་ལུས་ཀྱི་ཆ་བཞི་ལས་སྐྱེད་པ་ཡིན་གྱི། རྐང་མཐིལ་གྱི་རླུང་དེར་སྐྱེད་པ་མིན་ནོ། །རྫོགས་
རིམ་གྱི་སྐབས་ཡིན་ན་དཀྱིལ་འཁོར་བཞི་སྐྱེད་པ་མིན་ཏེ། འདི་ནི་འོག་མ་རྣམས་ལའང་ཤེས་པར་བྱས་ནས། རིམ་གཉིས་ཀྱི་དབང་དུ་མཛད་ནས་གསུངས་པ་གཉིས་སོ་སོར་ཕྱེད་པར་བྱའོ། །ཡང་དྲིལ་བུ་པས། སྒལ་ཚིགས་རི་རྒྱལ་དེ་བཞིན་ཏེ། །
ཞེས་གསུངས་པ་ཡང་རྒྱུད་དེའི་དོན་ནོ། །དེ་ནས་གཞལ་ཡས་ཁང་སྐྱེད་པ་ལ་རྡོ་རྗེ་ཕྲེང་བར། ལུས་ཀྱི་ཆ་དུ་མ་ཞིག་གཞལ་ཡས་ཁང་གི་ཆོས་སོ་སོར་སྐྱེད་པར་གསུངས་པ་ནི་རྒྱས་པའི་ལུགས་ཡིན་ལ། འདིར་ནི་དཔེར་ན་བྷྲཱུཾ་ཡིག་གཅིག་པུ་ལས་ཕྱིའི་
9-5-116b


གཞལ་ཡས་ཁང་ཐམས་ཅད་སྐྱེད་པ་བཞིན་དུ་དྲིལ་བུ་པས། ལུས་ནི་མཉམ་པ་གྲུ་བཞི་པ། རྒྱན་རྣམས་རབ་མཛེས་ཧེ་རུ་ཀའི་ལུས་ཀྱི་དཀྱིལ་འཁོར་ཉིད་དུ་འདོད། ཅེས་ལུས་མདོམ་གང་ཡན་མན་དང་ཕན་ཚུན་དུ་མཉམ་པ་ལས་ངོས་བཞི་མཉམ་
པའི་གཞལ་ཡས་ཁང་གྲུ་བཞི་པ་སྐྱེད་པ་དང་། ཕ་གུ་དང་ཕྱེད་སོགས་ཀྱི་རྒྱན་གྱིས་རབ་ཏུ་མཛེས་པའི་ཧེ་རཱ་ཀའི་རྟེན་གྱི་ལུས་དཀྱིལ་སྒོམ་པར་བཤད་པ་ནི་བསྡུས་པའོ། །གཞལ་ཡང་ཁང་སྐྱེད་པ་ནི་སཾ་བྷ་ཌ་ལས། དངོས་པོ་ཀུན་གྱིས་མཉམ་པའི་
ཕྱིར། །གྲུ་བཞི་པར་ནི་རབ་ཏུ་གྲངས། །ཞེས་པའི་དོན་ནོ། །ཡང་དེར། རང་གི་ཡན་ལག་བརྒྱད་བྱུང་ནས། །ཀ་བ་དེ་ཡིས་བསྐོར་ནས་གནས། །ཞེས་གསུངས་པའི་ཡན་ལག་བརྒྱད་ནི། རྡོར་ཕྲེང་ནས། རྐང་བརྒྱད་ལ་གསུངས་པ་ལྟར་བྱ། །མན་སྙེ་ལས། 
མགོ་རྐང་ལག་བཞི་སྙིང་ཁ་ལྟེ་བ་ཁ་བརྒྱད་ལ་བཤད་དོ། །སྐུ་གསུང་ཐུགས་ཀྱི་ངོ་བོ་ཡི། །འཁོར་ལོ་གསུམ་ནི་གཅིག་ཏུ་གསུངས། །ཞེས་པ་ནི་རང་རི་ལུས་ངག་ཡིད་གསུམ་ལས་འཁོར་ལོ་གསུམ་དུ་སྒོམ་པ་ཡིན་ཏེ། འདི་ལོ་ནག་ལྟ་བུ་ལ་དགོས་
ཀྱི། བརྟེན་པ་ལ་ལུས་དཀྱིལ་གཅིག་པུ་སྒོམ་པ་ལ་མི་དགོས་སོ། །ཡང་དེར་རི་རབ་ཀྱི་སྟེང་གི་པད་འདབ་སྤྱི་བོའི་རྩ་སོ་གཉིས་དང༌། པདྨ་བཀོད་པའི་དབྱངས་གསལ་རྣམས་རྩ་འདབ་ནས་རྒྱུ་བའི་བྱང་སེམས་དང༌། དབྱངས་གསལ་ལས་གྱུར་པའི་ཟླ་བའི་
དཀྱིལ་འཁོར་ནི་ཀླད་པ་དང༌། ལུས་ཀྱི་བརྟན་གཡོ་ཀུན་གྱི་རྩ་བ་ཧོཾ་ཡིག་ཏུ་བཤད་པ་ནི། མན་སྙེར་རྒྱུ་རྡོར་འཛིན་ཧཱུཾ་ཡིག་ཏུ་བཤད་པ་རྣམས་ནི། རྫོགས་རིམ་པའི་དབང་དུ་བྱས་པའི་ནང་བཤད་ཡིན་གྱི། བསྐྱེད་རིམ་པའི་རྟེན་གྱི་ལུས་དཀྱིལ་སྒོམ་དུས་མི་དགོས་
9-5-117a


ཏེ། དེའི་ཚེ་ན་དེ་རྣམས་མི་གནས་པའི་ཕྱིར་དང༌། དེ་སྒོམ་པ་ནི་དེ་དུས་ན་གནས་པའི་རྟེན་རྣམས་ཀྱི་དབང་དུ་བྱས་པའི་ཕྱིར་རོ། །དེ་བཞིན་དུ་སྐུ་གསུང་ཐུགས་ཀྱི་སྒོ་བཤད་པ་རྣམས་ནི། ལུས་ཀྱི་ནང་བཤད་ཙམ་ཡིན་གྱི་འདིའི་སྐབས་ལ་མི་
འབྱོར་བས་མི་དགོས་སོ། །བོད་ཁ་ཅིག་མིག་པཉྩ་རེ་ཁའི་རྩིག་པ་ཞེས་སོགས་འདོད་པ་ལ། མཁས་པ་དག་སྡོམ་པ་བཤད་པར། གོ་རིམ་བཞིན་དུ་ལུས་སྐྱེས་ནས། །རྡོ་རྗེ་ཕུར་བུ་ལྷན་ཅིག་སྐྱེས། །བཅིངས་པ་ཐིག་སྐུད་རབ་ཏུ་ལྡན། །ཤིན་ཏུ་མཚམས་མེད་བརྟན་
པར་བཅིངས། །གུར་ནི་རུས་པའི་ཕྲེང་བ་ཉིད། །ཅེས་པ་ཙམ་མ་གཏོགས་པ། གཞན་བདེ་མཆོག་གི་སྐོར་གང་ནའང་འདུག་པ་མ་མཐོང་ངོ༌། །ཞེས་གསུངས་པ་ནི་དེ་བཞིན་དུ་སྣང་སྟེ། བོད་ཀྱི་བཤད་པ་ལ་དེ་འདྲའི་རིགས་ཀྱི་ལུས་དཀྱིལ་སྒོམ་པ་ཀུན་བཏགས་མང་དུ་སྣང་ངོ༌། །
གལ་ཏེ་ལུས་ཀྱི་ཆ་དེ་དག་རྟེན་དུ་བསྒོམས་ན། དེར་མ་འདུས་པའི་ལུས་མེད་པས་ལུས་བརྟེན་པའི་ལྷར་སྒོམ་རྒྱུ་མི་རྙེད་དོ་སྙམ་དུ་མི་གཟུང་སྟེ། དེ་ལྟ་ན་གཟུགས་ཕུང་རྣམ་སྣང་དུ་བསྒོམས་པའི་རྗེས་སུ་འབྱུང་བཞི་སྤྱན་སོགས་བཞི་དང་། དབང་པོ་གཟུགས་ཅན་རྣམས་
ས་སྙིང་སོགས་སུ་དང༌། ཡུལ་ལྔ་གཟུགས་རྡོ་རྗེ་མ་ལ་སོགས་པར་སྒོམ་པ་ཡང་མི་འཐད་དེ། གཟུགས་ཕུང་དུ་མ་འདུས་པའི་འབྱུང་བཞི་སོགས་མེད་པའི་ཕྱིར་རོ། །དེས་ན་དོན་སྟེང་ན་ངོ་བོ་ཐ་དད་པ་མེད་ཀྱང་བློས་ཆ་དུ་མར་དབྱེར་ཡོད་པས་སོ་སོར་ཕྱེ་བ་དེ་རྣམས་རྟེན་
དང་བརྟེན་པར་སྒོམ་པས་མི་འགལ་ལོ། །གཉིས་པ་ལ་གསུམ། ལུས་དཀྱིལ་གྱི་ལྷ་གང་ལ་འགོད་པའི་གཞི་དང་བཞུགས་གནས། གཞི་དེ་ལ་ལྷ་ཅི་ཙམ་ཞིག་འགོད་པ། ལུས་ཀྱི་གནས་གང་དུ་ལྷ་གང་འགོད་པ་དང་སྐྱེད་ཚུལ་ལོ། །དང་པོ་ནི། འདིར་ལུས་ཀྱི་དཀྱིལ་
9-5-117b


འཁོར་གང་ལ་འགོད་པའི་གཞི་ནི། འཁོར་གྱི་ལྷ་ནི་མིན་པར་ངེས་ལ་གཙོ་བོ་ཡབ་ཡུམ་གཉིས་ལ་ནི། མངོན་བརྗོད་ཀྱི་བཅུ་གཉིས་པ་དང༌། ཕག་མོ་མངོན་འབྱུང་དུ། གཙོ་བོ་ཕག་མོས་མཛད་པར་བསྐྱེད་པའི་ལུས་ལ། སྤྱི་བོ་ལ་སོགས་པའི་གནས་ཉེར་བཞི་རབ་གཏུམ་མ་ལ་སོགས་
པ་ཉེར་བཞི་སྒོམ་པ་བཤད་ལ། དེ་ལ་བརྟེན་ནས་ཨུ་མ་པ་ཏི་ཏ་ཏྲས་མཛད་པའི་ཕག་མོའི་སྒྲུབ་ཐབས་སུ་སྙིང་པོའི་རྣལ་འབྱོར་མ་བཞི་དང༌། སྒོ་མཚམས་མ་བརྒྱད་ཀྱང་ལུས་ལ་བཀོད་པའི་ལུས་དཀྱིལ་བཤད་པས། ལུས་དཀྱིལ་འགོད་པའི་གཞི་ཧེ་རུ་ཀ་ཁོ་ནར་མ་ངེས་
སོ། །འདི་ཡང་འབྱུང་བ་རིམ་རྩེག་རི་རབ་དང་བཅས་པ་དང༌། རྣམ་སྣང་ལས་བྱུང་བའི་གཞལ་ཡས་ཁང་གི་དབུས་སུ་ཟླ་བའི་སྟེང་དུ་དབྱངས་གསལ་དང༌། དེའི་དབུས་སུ་པཾ་ཡིག་ལས་ཕག་མོ་སྐྱེད་པ་དང༌། སྔོན་དུ་ཕྱི་དཀྱིལ་དང༌། དེའི་རྗེས་སུ་ལུས་དཀྱིལ་སྒོམ་པར་རྒྱུད་
ལས་བཤད་དོ། །གོ་རིམ་དེ་ནི་སྒྲུབ་ཐབས་ལས་ཀྱང་བཤད་དོ། །ལོ་ནག་དྲིལ་གསུམ་གྱིས་ནི། ཡབ་ཡུམ་གཉིས་ཡོད་ཀྱང་ཡབ་ལ་ལུས་དཀྱིལ་འགོད་ལ། དེ་ཡང་ལཱུ་ཨི་པའི་ལུགས་ཀྱིས་རྟེན་དང་བརྟེན་པ་གཉིས་ཀ་ཐུན་མོང་དུ་སྐྱེད་པའི་མངོན་བྱང་ལྔ་ལས་བསྐྱེད་
པའི་ཧེ་རུ་ཀ་ལ་འགོད་དོ། །ནག་པོ་སྤྱོད་པས་ནི། རྒྱུ་རྡོར་འཛིན་ཡབ་ཡུམ་ཞུ་བའི་ཁུ་བ་ལས་བཞེངས་པའི་འབྲས་བུ་རྡོར་འཛིན་གྱི་ཧེ་རུ་ཀ་ལ་འགོད། དྲིལ་བུ་པའི་གཞུང་དུ་གཞིའི་ཧེ་རུ་ཀ་འདི་ལྟར་སྐྱེད་ཀྱི་གསལ་ཁ་མེད་ལ། གསུམ་གས་ཀྱང་ཧེ་རུ་ཀ་ཞལ་བཞི་
ཕྱག་བཅུ་གཉིས་པར་གསུངས་སོ། །ལོ་དྲིལ་གཉིས་ནི་ཡབ་འདྲ་ལ། ནག་པོ་པ་དང་ཅུང་མི་འདྲའོ། །དྲིལ་བུ་པའི་ལུགས་འདི་ལ་བོད་ཀྱི་བླ་མ་རྣམས། ཚོགས་ཞིང་གི་བཅོམ་ལྡན་འདས་རང་གིས་སྨིན་མཚམས་ནས་ཐིམ་བའི་རྐྱེན་གྱིས་ལུས་དཀྱིལ་གྱི་རྟེན་དང་བརྟེན་
9-5-118a


པའི་དཀྱིལ་འཁོར་ཐམས་ཅད་སྐད་ཅིག་ལ་སྐྱེད་བར་བྱེད་དེ། འབྱུང་བཞི་རི་རབ་རྣམས་རང་རང་གི་ས་བོན་དང༌། བྷྲཱུཾ་ཡིག་སོགས་ལས་གཞལ་ཡས་ཁང་སྐྱེད་པ་དང༌། མངོན་བྱང་ལྡ་ལ་སོགས་པ་ལས་གཞིའི་ཧེ་རུ་ཀ་བསྐྱེད་ན་ལུས་དཀྱིལ་
དུ་མི་རིགས་སྙམ་དུ་བསམས་པ་འདྲ་ཞིང༌། སྒྲུབ་ཐབས་ལས། འོད་ཟེར་འཕྲོས་པས་སྔོན་གྲུབ་པ། །བསྐུལ་ནས་ཕྱག་འཚལ་རང་ལུས་གཞུག །ཅེས་ཚོགས་ཞིང་རང་ལ་གཞུག་པ་བཤད་ནས། སྐྱེད་ཆོག་ཟུར་པ་ཡང་མ་བསྟན་པས་སོ་སྙམ་པ་འདྲའོ། །དེ་ནི་
ལེགས་པར་མ་མཐོང་སྟེ། རྒྱུད་གཉིས་དང་ལོ་ནག་ལ་སོགས་པའི་གཞུང་དུ་མ་ལས་ལུས་དཀྱིལ་བཤད་པ་ལ་ཡང་རྟེན་དང་བརྟེན་པའི་ཧེ་རུ་ཀ་སྔར་བཤད་པ་བཞིན་སྐྱེད་པར་བཤད་ཅིང༌། རང་ཉིད་ཀྱིས་ཀྱང་དེ་ལྟར་བྱས་པའི་ཕྱིར་དང༌། མདོར་བྱས་ལས་ཀྱང༌། 
བྷྲཱུཾ་ཡིག་ལས་གཞལ་ཡས་ཁང་སྐྱེད་པའི་དབུས་སུ་མངོན་བྱང་ལྔ་ལས་བསྐྱེད་པའི་དང་པོའི་མངོན་པོ་སྤྲུལ་སྐུ་རྡོར་སེམས་སུ་བསྒྱུར་བའི་རྟེན་ལ་ལུས་དཀྱིལ་འགོད་པར་གསུངས་པའི་ཕྱིར་རོ། །གལ་ཏེ་དེ་དག་ནི་ཕྱི་དཀྱིལ་དང་ལུས་དཀྱིལ་བསྒོམ་པའི་ལུགས་
ཡིན་ལ། དྲིལ་བུ་པའི་འདི་ནི་ལུས་དཀྱིལ་རྐྱང་པ་སྒོམ་པ་ཡིན་པས་མི་འདྲའོ་སྙམ་ན། དེ་ནི་ཤིན་ཏུ་ཡང་མི་འཐད་དེ། དེ་ལྟ་ཡིན་ན་མངོན་བརྗོད་ཀྱི་དགུ་པ་ལས་ཕྱི་དཀྱིལ་གྱི་ལྷ་སྒོམ་པ་མེད་པར་ལུས་དཀྱིལ་བཤད་པ་ལ་ཡང༌། དབྱངས་གསལ་དང་ཧཱུཾ་ཡིག་གིས་
བྱིན་གྱིས་བརླབས་པའི་རྡོར་སེམས་ལས། གཞིའི་ཧེ་རུ་ཀ་སྐྱེད་པར་བཤད་ལ། སྐྱེད་ཆོག་དེ་ཡང་མངོན་བྱང་ལྔ་སྐྱེད་ལ་བྱ་དགོས་པའི་ཕྱིར་དང༌། དེའི་གཞལ་ཡས་ཁང་ཡང་སྔར་བཤད་བའི་འགྲེལ་པའི་ལུགས་དེ་རྒྱུད་ཀྱིའང་དོན་དུ་སྣང་བའི་
9-5-118b


ཕྱིར་དང༌། ཚོགས་ཞིང་ཐིམ་པ་ལས་རྟེན་དང་བརྟེན་པ་སྐྱེད་པའི་སྐྱེད་ཆོག་བདེ་མཆོག་གི་རྒྱུད་དང༌། དེའི་འགྲེལ་པ་དང་རྒྱ་གཞུང་རྣམ་དག་གང་ནས་ཀྱང་མ་གསུངས་ཤིང༌། དངོས་སུ་མ་ཟིན་ཀྱང་དོན་ལ་ཐོབ་པའི་ཤེས་བྱེད་ཀྱང་ཅི་ཡང་མི་སྣང་བའི་ཕྱིར་རོ། །འོ་ན་དྲིལ་བུ་
པའི་གཞུང་ཆུང་ལས། མཛོད་སྤུའི་གནས་ནས་རང་ལུས་གཞུག །ལུས་ལ་རྟེན་དང་བརྟེན་པ་ཡི། །འཁོར་ལོ་གསལ་གདབ་ཉེ་བར་དམིགས། །ཞེས་གསུངས་པ་ཇི་ལྟར་དྲང་སྙམ་ན། གཞུང་དེས་ཚོགས་ཞིང་རང་ལ་བསྟིམས་པའི་རྗེས་སུ་ལུས་དཀྱིལ་གཉིས་
གསལ་གདབ་པར་བཤད་ཀྱི། སྔ་མ་ཕྱི་མའི་སྐྱེད་ཆོག་ཏུ་མ་བསྟན་ལ། རྟེན་གྱི་དཀྱིལ་འཁོར་གསལ་གདབ་པ་ནི། སྔར་བསྐྱེད་ཟིན་པའི་སྟེང་ནས་སྔར་ལྟར་བྱེད་པ་ཡིན་ལ། བརྟེན་པའི་དཀྱིལ་འཁོར་ནི་འཁོར་ནི་འཁོར་ལོའི་བདག་པོ་གཙོ་བོ་ཡབ་ཡུམ་སྔར་བསྐྱེད་པ་ལ་
ཟེར་བས་མི་གནོད་དོ། །གལ་ཏེ་ཚོངས་ཞིང་བསྟིམས་པ་སྐྱེད་ཆོག་མ་ཡིན་ཀྱང༌། དེའི་འོག་ཏུ་སྐད་ཅིག་གིས་རྟེན་དང་བརྟེན་པ་སྐྱེད་པ་ཡིན་ཏེ། དྲིལ་བུ་བས་ལྷན་སྐྱེས་ལ་བཤད་པ་དང་འདྲའོ་སྙམ་ན། དེ་ནི་བསྐྱེད་རིམ་སྔོན་དུ་བརྟན་པར་བྱས་ནས་རྫོགས་རིམ་
སྒོམ་བའི་སྐབས་སུ་ཡིན་ལ། ལུས་དཀྱིལ་གྱི་བསྐྱེད་རིམ་སྒོམ་པ་འདི་ནི་རྒྱུད་སྨིན་པར་བྱེད་པའི་དོན་དུ་ཡིན་པའི་ཕྱིར་དང༌། སྡོམ་འབྱུང་ལས་དབང་པོ་རྟུལ་འབྲིང་གིས་བསྐྱེད་རིམ་རིམ་གྱིས་དང༌། རྣོན་པོས་སྐད་ཅིག་མ་གཅིག་ལ་བསྒོམ་པར་གསུངས་པའི་
དགོངས་པ་ཡང༌། འགྲེལ་པས་གང་ཟག་གཅིག་ཉིད་ཀྱི་ལམ་གྱི་སྐབས་སྔ་ཕྱི་ལ་དབང་པོའི་རིམ་པས་བཞག་པ་ལ་བཤད་པ་ལྟར་ཡིན་ལ། རྣལ་འབྱོར་རྫོགས་ཕྲེང་ལས་ཀྱང་དེ་ལྟར་བཤད་པའི་ཕྱིར་ན་རྒྱུད་དེའི་དོན་ཡང་མིན་ནོ། །ལུས་དཀྱིལ་གྱི་སྒྲུབ་ཐབས་
9-5-119a


ལས་མ་བཤད་པ་ཁ་མི་སྐོང་ན་ནི། ཁྱེད་རང་གི་ལུགས་དང་ཡང་འགལ་ལ། མངོན་རྟོགས་དང་དབང་ཆོག་གི་སྐབས་སུ་ངེས་པར་བྱ་དགོས་པ་དུ་མ་ཞིག་གཞག་དགོས་པར་འགྱུར་རོ། །མཱ་ན་ཀ་ཤྲཱིའི་དཔའ་བོ་གཅིག་པའི་སྒྲུབ་ཐབས་སུ་
གཞལ་ཡས་ཁང་མེད་པར་དུར་ཁྲོད་བསྲུང་འཁོར་དང་བཅས་པའི་དབུས་སུ་སྣ་ཚོགས་པདྨའི་སྟེང་དུ་མངོན་བྱང་ལྔ་ལས། ཞལ་གཅིག་ཕྱག་གཉིས་པའི་ཡབ་ཡུམ་བསྐྱེད་པའི་ཡབ་ཀྱི་སྐུ་ལ་ལུས་དཀྱིལ་འགོད་པ་ཡང་དྲིལ་བུ་པའི་ལུགས་ལ་བརྟེན་པར་
སྣང་ལ། དེས་ནི་ལུས་འབྱུང་བ་རིམ་རྩེག་རི་རབ་དང་བཅས་པའི་རྟེན་གྱི་དཀྱིལ་འཁོར་དུ་སྒོམ་པ་གསལ་བར་གསུངས་པ་དང༌། གཞིའི་ཧེ་རུ་ཀ་དང་ཡང་མི་མཐུན་བས་བློ་ལེགས་པར་བྱང་བའི་མཚམས་ནས་དེ་ལྟར་བྱེད་ན་མི་རུང་བ་ཆེར་མེད་ཀྱང་ཐོག་མ་ནས་སྒོམ་
པ་ལ་ཅུང་མི་ལེགས་སམ་སྙམ་མོ། །གཉིས་པ་ནི། དེ་དག་གིས་ནི་བརྟེན་པའི་ལུས་དཀྱིལ་གང་ལ་འགོད་པའི་ལྷ་དང༌། དེ་བཞུགས་པའི་གཞི་གཞལ་ཡས་ཁང་དང༌། དེ་དག་གི་སྐྱེད་ཆོག་བསྟན་ནས། ད་ནི་ལུས་ལ་ཅི་ཙམ་འགོད་པ་སོགས་བཤད་པར་བྱ་སྟེ། ལོ་ནག་
དྲིལ་གསུམ་གྱི་ནང་ནས་དྲིལ་བུ་པའི་གཞུང་ལུས་དཀྱིལ་རྒྱས་ལ། དེའི་གཞུང་ཆེ་བར་ཕག་མོ་མ་གཏོགས་པ་དྲུག་ཅུ་རྩ་གཅིག་བཤད་ཅིང༌། གཞུང་ཆུང་དུ་གྲགས་པར་རེ་གཉིས་ཚང་བར་བཤད་དོ། །ལཱུ་ཨི་པས་ལུས་དཀྱིལ་སྒོམ་པའི་སྐབས་སུ་ལུས་ཀྱི་གནས་ཉེར་
བཞིར་རབ་གཏུམ་སོགས་ཉེར་བཞི་སྒོམ་པར་བཤད་ཅིང༌། གཏོར་མ་ཕུལ་བའི་རྗེས་ཀྱི་དག་པ་དྲན་པའི་སྐབས་སུ་སེན་མོ་དང་སོ་དག་ལ་ཁཎྜ་པཱ་ལའོ། །ཞེས་སོགས་ཀྱིས་ལུས་ཀྱི་ཆ་ཉེར་བཞི་དཔའ་བོ་ཉེར་བཞིར་བཤད་ནས་ལྷག་མ་བཅུ་བཞི་ལུས་ལ་དགོད་པ་མ་
9-5-119b


གསུངས་སོ། །ལྭ་བ་པས་ལུས་དཀྱིལ་སྒོམ་པའི་སྐབས་སུ་རྣལ་འབྱོར་མ་གཞན་བཅུ་གཉིས་དང་གཙོ་བོ་ཡབ་ཡུམ་ལུས་ལ་འགོད་པར་བཤད་ཅིང་ཡོངས་སུ་རྫོགས་པའི་ལུས་ཀྱི་དཀྱིལ་འཁོར་དུ་ཡང་དང་ཡང་དུ་མོས་པར་བྱའོ་ཞེས་གསུངས་ཤིང༌། པྲཛྙཱ་རཀྵི་ཏས་ཀྱང་
དེ་བཞིན་དུ་བཤད་ལ། ལུས་དཀྱིལ་ཡོངས་རྫོགས་སྒོམ་པར་བཤད་པས། ཐོད་པའི་དུམ་བུ་སོགས་གསལ་བར་མ་སྨོས་ཀྱང༌། དེ་དག་ཀྱང་འགོད་པ་དགོངས་པ་ཡིན་ནོ། །དེ་བཞིན་གཤེགས་པའི་རྡོ་རྗེས་ཀྱང་ཚང་བའི་ལུས་དཀྱིལ་སྒོམ་པར་བཤད་པས་སྔ་མ་གཉིས་དང་
འདྲའོ། །འཁྲུལ་སྤོང་ལས་བཟླས་པ་ཟིན་པའི་འོག་ཏུ་ལྷ་རེ་གཉིས་ལུས་ལ་མོས་པ་དང༌། དེ་ཡང་ལུས་དཀྱིལ་དུ་བཤད་དོ། །རྣམ་དག་དང་འདྲ་བ་ཅིག་མ་གཏོགས་པ་ལུས་དཀྱིལ་དངོས་སུ་ཅུང་མི་འགྲོ་བ་ཅིག་སྟེ། སྤྱིར་ལུས་དཀྱིལ་དང་རྣམ་དག་ཙམ་དུ་སོང་བ་གཉིས་ཀྱི་
ཁྱད་པར་ལེགས་པར་ཕྱེད་དགོས་སོ། །དེ་ལྟར་བཤད་པ་རྣམས་ལས་ལྭ་བ་པས། རྣལ་འབྱོར་དབང་ཕྱུག་གི་དགོངས་པ་བཤད་པ་ལྟར་བྱ་དགོས་སོ། །ལྭ་བ་པས་ཁ་བསྐངས་ནས་ལུས་དཀྱིལ་རྫོགས་པར་བཤད་པ་འདི་ནི། ཀུན་སྤྱོད་ཀྱི་དགོངས་པར་སྣང་སྟེ། དེའི་ལྔ་པ་ལས། 
ཇི་ལྟར་ནང་གི་བདག་ཉིད་ཤེས། །ཕྱི་ཡི་དཀྱིལ་འཁོར་དམ་པ་ཡིན། །རྣམ་དགོད་ཇི་ལྟར་སྦྱར་བའོ། །སྙིང་བོ་ཐམས་ཅད་བསྡུས་པ་སྟེ། །ཞེས་ཕྱི་དཀྱིལ་ལ་ལྷ་ཇི་ལྟར་བཀོད་པ་དེ་ལྟར་ནང་ལུས་ལ་འགོད་པ་གཉིས་སྦྱར་བ་ནི། བསྐྱེད་རིམ་གྱི་རྣལ་འབྱོར་སྒོམ་པའི་སྙིང་པོ་
བསྡུས་པར་གསུངས་ཤིང༌། དེ་ནས་འབྱུང་བཞི་རི་རབ་དང་བཅས་པ་བསྐྱེད་པའི་མཐར་དབུས་སུ་གཙོ་བོ་དང་བཅས་པའི་བདེ་ཆེན་གྱི་འཁོར་ལོ་དང༌། དེ་ནས་ཡུལ་ཉེར་བཞིར་འཁོར་ལོ་གསུམ་གྱི་ལྷ་ཞེ་བརྒྱད་དང༌། དེ་ནས་ཁྭ་གདོད་མ་སོགས་བཞི་ཕྱོགས་སུ་དང༌། 
9-5-120a


གཤིན་རྗེ་བརྟན་མ་སོགས་བཞི་མཚམས་སུ་དགོད་པར་བཤད་མ་ཐག །དེ་ལྟར་ཕྱི་དང་ནང་གི་བདག་ཉིད་ཇི་སྲིད་དུ་གཉིས་སུ་མེད་པ་མྱ་ངན་ལས་འདས་པའི་སྤྱོད་ཡུལ་དུ་མ་གྱུར་པའི་བར་དུ་དམིགས་པར་བྱའོ། །ཞེས་སྔར་བཤད་པའི་ལྷ་ཕྱི་
ནང་གཉིས་ཀ་བསྒོམ་པར་བྱ། ཞེས་གསུངས་པས་གསལ་བར་བསྟན་ལ། ལཱུ་ཨི་པའི་ལུགས་འདི་ལ་ཡང་ཀུན་སྤྱོད་ལ་བརྟེན་པ་མང་དུ་སྣང་བས་དེ་ལྟར་ཤེས་སོ། །དེས་ན་རྡོ་རྗེ་མཁའ་འགྲོ་དང་མངོན་བརྗོད་ཀྱི་བཅུ་བཞི་པ་གཉིས་སུ་ལུས་དཀྱིལ་གྱི་ལྷ་ཞེ་བརྒྱད་
བཤད་པ་རྣམས་ལ་ཡང་ལྷག་མ་ཁ་སྐོང་བར་རིགས་སོ། །དེའི་ཕྱིར་ནག་པོ་སྤྱོད་པའི་ལུགས་ལ་ཡང༌། ལུས་དཀྱིལ་ལ་དངོས་སུ་སྨོས་པ་ཞེ་བརྒྱད་ལས་མེད་ཀྱང་ལྷ་ལྷག་མ་ཁ་སྐོང་བར་རིགས་སོ། །འོ་ན་བརྟེན་པའི་ལུས་དཀྱིལ་ལ་ལྷ་དུ་ཞིག་སྒོམ་སྙམ་ན། ཕག་
མོ་ལ་ནི་འཁོར་གྱི་ལྷ་སོ་དྲུག་མ་གཏོགས་པ་ཕག་མོ་དགོད་པ་མ་བཤད་ལ། མངོན་བརྗོད་ཀྱི་དགུ་པ་ལས་ཀྱང༌། ཞལ་བཞི་ཕྱག་བཅུ་གཉིས་པ་གཙོ་བོ་ཡབ་ཡུམ་བསྐྱེད་པའི་ཧེ་རུ་ཀ་ལ། འཁོར་གྱི་ལྷ་དྲུག་ཅུ་བཀོད་པ་མ་གཏོགས་པ། ཧེ་རུ་ཀ་ཡབ་ཡུམ་མ་
བཀོད་ཅིང༌། དེ་ལ་བརྟེན་ནས་སྒྲུབ་ཐབས་མཛད་པ་སྦྱང་དཀའ་ཟླ་བས་ཀྱང་དེ་ཁོ་ན་བཞིན་དུ་བྱས་སོ། །འོན་ཀྱང་ལྭ་བ་པས་གཙོ་བོ་ཡབ་ཡུམ་འགོད་པའི་གནས་མན་ངག་ལས་ཤེས་པར་བྱ་བར་གསུངས་ཏེ། གནས་སུ་མ་ཟད་ལྷ་དེ་གཉིས་འགོད་པ་ཡང་མན་ངག་ལ་
བརྟེན་ནས་ཤེས་དགོས་སོ། །གསུམ་པ་ལུས་ཀྱི་གནས་གང་དུ་ལྷ་གང་འགོད་པ་དང་སྐྱེད་ཚུལ་ལ་ལྔ། འཁོར་ལོ་གསུམ་གྱི་ལྷ་ཞེ་བརྒྱད་གང་དུ་འགོད་ཅིང་སྐྱེད་པ་དང༌། སྙིང་པོའི་རྣལ་འབྱོར་མ་བཞི་གང་གུ་འགོད་ཅིང་བསྐྱེད་པ་དང༌། སྒོ་མཚམས་མ་བརྒྱད་གང་
9-5-120b


དུ་འགོད་ཅིང་བསྐྱེད་པ་དང༌། གཙོ་བོ་ཡབ་ཡུམ་གང་དུ་འགོད་ཅིང་བསྐྱེད་པ་དང༌། ལྷ་ཞེ་བརྒྱད་ས་བོན་ལས་སྐྱེད་དགོས་མི་དགོས་དཔྱད་པའོ། །དང་པོ་ནི། འཁོར་ལོ་གསུམ་གྱི་ལྷ་ཞེ་བརྒྱད་ནི་སྤྱི་བོ་ལ་སོགས་པའི་གནས་ཉེར་བཞིར་འགོད་པ་རྒྱུད་ནས་ཡང་ཡང་གསུངས་
པ་ལྟར། ཁུངས་ཐུབ་རྣམས་ཀྱིས་ཀྱང་མང་དུ་བཤད་པར་གོ་སླ་ལ། མ་མོ་བཅུ་གཉིས་གང་དུ་འགོད་པ་ལ། མངོན་བརྗོད་ཀྱི་དགུ་པ་ལས། མཁའ་འགྲོ་མ་ནི་གཡས་ཀྱི་དང་པོའི་རྡོ་རྗེ་དང༌། ལཱ་མ་ནི་གཡོན་གྱི་དྲིལ་བུ་དང༌། དུམ་སྐྱེས་མ་དང་གཟུགས་ཅན་མ་གཉིས་ནི། གླང་
ལྤགས་འཛིན་པའི་ཁུ་ཚུར་གཉིས་དང༌། ཁྭ་གདོང་མ་ལ་སོགས་པ་བཞི་ནི། གཡས་ཀྱི་ཕྱག་མཚན་ལྷག་མ་བཞི་དང༌། གཤིན་རྗེ་བརྟན་མ་སོགས་བཞི་ནི། གཡོན་གྱི་ཕྱག་མཚན་ལྷག་མ་བཞིར་བཤད་དེ། ཕྱག་གང་གིས་ཕྱག་མཚན་གང་འཛིན་པ་སོགས་ལོ་
དྲིལ་དང་མི་མཐུན་པ་ཤས་ཆེའོ། ཡང་དེར་བྱང་ཆུབ་ཀྱི་སེམས་ཀྱི་སྣོད་ནི། ཞལ་བཞིའི་ངོ་བོ་ཞེས་གསུངས་པས། ཐོད་པ་བཞི་ཡང་ལུས་ལ་འགོད་དགོས་ལ། ལུས་དཀྱིལ་དུ་འགྲོ་བ་ལ་ཧེ་རུ་ཀའི་ཞལ་བཞི་སྣོད་བཞིའི་ངོ་བོར་མོས་པ་ཙམ་བྱེད་པ་ལ་བྱས་ན་ཕྱི་
དཀྱིལ་གྱི་ལྷ་རྣམས་ཀྱང་གཙོ་བོ་ཉིད་ཀྱི་ངོ་བོར་མོས་པ་སྔགས་གསུམ་གྱིས་ང་རྒྱལ་འཛིན་པ་སོགས་ཀྱིས་བཤད་པས་དེ་རྣམས་ཀྱང་ལུས་དཀྱིལ་དུ་འགྱུར་རོ། །དེས་ན་ལུས་ཀྱི་ཆ་དེ་དང་དེ་ལས་ལྷ་དེ་དང་དེར་བསྐྱེད་ནས་རང་གི་ལུས་ལ་བཀོད་པ་ཅིག་དགོས་ཀྱི། 
ལུས་ལ་ལྷ་བཀོད་ཙམ་ལ་བྱེད་པ་མིན་ནོ། །དེས་ན་དུམ་སྐྱེས་མ་དང་གཟུགས་ཅན་མ་གཉིས་ཁུ་ཚུར་གཉིས་སུ་བཤད་པ་ནི། ལྷག་མ་བཅུ་ལ་ཡང་མཚུངས་ལ། དེའི་ཚུལ་ཡང་ཕྱག་མཚན་དང་ངོ་བོ་དབྱེར་མེད་པའི་ཕྱག་མགོ་བཅུ་གཉིས་ལས་དེ་རྣམས་བསྐྱེད་
9-5-121a


ནས་གནས་ཀྱང་ཕྱག་མགོའི་ནང་དུ་གཟུགས་བརྙན་ཤར་བ་བཞིན་བྱེད་དེ་དེ་ནི་ཐོད་པ་བཞི་ལ་ཡང་ཤེས་པར་བྱའོ། །ལྷ་ཞེ་བརྒྱད་ནི་གནས་ཉེར་བཞིར་སྒོམ་པ་ཙམ་མ་གཏོགས་པ་རྩ་དང་ཁམས་ལས་སྐྱེད་པ་མངོན་བརྗོད་དུ་མ་
བྱུང་ཞིང༌། དགུ་པའི་ལུས་དཀྱིལ་ཡང་དྲིལ་བུ་ཞབས་དང༌། ལྭ་བ་པ་སོགས་ཀྱིས་བཤད་པ་དང་མི་འདྲ་བར་སྣང་བས། སྔ་མའི་རིགས་པ་སྦྱར་ནས་གནས་ཉེར་བཞིའི་ལུས་ཀྱི་ཆ་རགས་པ་རེ་ཡོངས་སུ་གྱུར་པ་ལས་ལྷ་རྣམས་སུ་སྐྱེད་པ་ཡིན་ནམ་བརྟག་
གོ། སྔར་བཤད་པའི་རྒྱུ་མཚན་དེས་དགུ་པའི་ལུས་དཀྱིལ་གྱི་སྐབས་སུ་སའི་ཁམས་ལྟུང་བྱེད་མ་ཞེས་སོགས་ལུས་ལ་ལྷ་ཉི་ཤུ་འགོད་པར་གསུངས་པ་ནི། ཕུང་སོགས་བྱིན་རློབ་ཀྱི་ལྷ་ཡིན་གྱི་ལུས་དཀྱིལ་མིན་པར་ཤེར་པར་བྱའོ། །མངོན་བརྗོད་དང་ཀུན་
སྤྱོད་སོགས་སུ་རྣལ་འབྱོར་མ་ཉེར་བཞི་རྩར་མ་བཤད་ཀྱང༌། རྡོ་རྗེ་མཁའ་འགྲོར། ཉི་ཤུ་རྩ་བཞིར་ཕྱེ་བ་ཡིས། །སྐུ་གསུང་ཐུགས་ཀྱི་འཁོར་ལོ་ཡིན། །གནས་རྣམས་དག་ནི་ཐམས་ཅད་དུ། །རྩ་རྣམས་ཀུན་ནི་ཡང་དག་བཤད། །ཡུལ་འདི་རྣམས་ཀྱི་བུ་མོ་གང༌། །རྩ་
ཡི་གཟུགས་ཀྱིས་གནས་སོ་ཞེས། །ཞེས་ཡུལ་ཉེར་བཞིའི་རབ་གཏུམ་མ་ལ་སོགས་པའི་བུ་མོ་རྣམས་ནང་གི་ཡུལ་ཉེར་བཞིའི་རྩའི་གཟུགས་ཀྱིས་གནས་པར་བཤད་ལ། དཔའ་བོ་ཉེར་བཞི་རྩ་ནང་གི་ཁམས་སུ་བཤད་པ་མ་བྱུང་ངོ་། མགོ་བོ་པུལླི་ར་མ་ལ་ཡ་
ནས་པུས་མོ་ཀུ་ལུ་ཏ་ཞེས་འོག་ནས་འབྱུང་བའི་གནས་ཉེར་བཞིར་ཀྱཻ་རྡོར་དང་སཾ་བྷུ་ཊ་ནས་འབྱུང་བའི་རྩ་སོ་གཉིས་ལ། རོ་རྐྱང་དྷཱུ་ཏཱི་གསུམ་དང་སུམ་སྐོར་མ་སོགས་ལྔ་སྟེ། བརྒྱད་དོར་བའི་ལྷག་མ་མི་ཕྱེད་མ་ལ་སོགས་པའི་རྩ་གང་ན་གནས་པ་དང༌། དེ་ནས་གང་
9-5-121b


འབབ་པ་ནི་སཾ་བྷུ་ཊ་ལས། པུལླི་རར་ནི་མི་ཕྱེད་མ། །སོ་དང་སེན་མོ་འབབ་པར་བརྗོད། །འབར་བ་འཛིན་པར་ཕྲ་གཟུགས་མ། །དེ་བཞིན་སྐྲ་དང་བ་སྤུ་འབབ། །ཨུ་རྒྱན་གནས་ནི་ཆེན་པོ་ལ། །རྩེ་བ་མ་ནི་རྣམ་པར་གནས། །རྣ་བ་གཡས་པར་གནས་ནས་ནི། །པགས་པ་
དྲི་མ་འབབ་པར་གནས། །ཨར་བུ་ཏར་ནི་གཡོན་པ་མ། །མཁའ་འགྲོ་མ་ནི་ཤ་འབབ་མ། །གང་ཞིག་ཆུ་རྒྱུས་འབབ་པའི་རྩ། །བ་ཡི་མཆོག་སྦྱིན་རྣམ་པར་གནས། །དེ་ནི་སྲ་བའི་ཚུལ་གྱིས་གནས། །ཐུང་དུ་མ་ནི་རྣམ་པར་བཤད། །གང་ཞིག་དགའ་བའི་དབང་ཕྱུག་
གནས། །དེ་བཞིན་རུས་སྦལ་སྐྱེས་མར་གྲགས། །སྲ་བའི་དངོས་པོས་གནས་པའི་ཕྱིར། །རུས་པའི་འཕྲེང་བ་འཁྲུགས་པར་གནས། །ལྷ་མོའི་མཁར་དུ་གང་ཞིག་རྩ། །འཇམ་པོ་སྒོམ་པ་མ་རུ་བརྗོད། །དེ་ནི་རྟག་ཏུ་མཆིན་པ་འབབ། །ཐམས་ཅད་ལུས་ལ་ལྷག་པར་
གནས། །མཱ་ལཱ་ཝར་ནི་དབང་མ་ཉིད། །རྒྱལ་བའི་དབང་ཕྱུག་ཉིད་ལ་གནས། །རྩ་ནི་གང་ཞིག་མི་འབབ་པ། །འདོད་པའི་གཟུགས་སུ་རྣམ་པར་གནས། །གཟུགས་ནི་མཐོང་བར་འདོད་པ་སྟེ། །སྐྱོན་ལྡན་མ་ཞེས་རྣམ་པར་བཤད། །ཨོ་ཏྲེར་མཁྲིས་པ་འབབ་པའི་རྩ། །
གང་ཞིག་འཇུག་མ་མཚན་མོར་བརྗོད། །ཏྲི་ཤ་ཀུ་ནེར་བྱུང་བ་ནི། །མ་མོ་ངེས་པར་གློ་བར་བཅས། །ཀོ་ཤ་ལར་ནི་མཚན་མོ་ཉིད། །རྒྱུ་མའི་ཕྲེད་བཟང་ཁྱབ་ཅིང་འབབ། །ཀ་ལིངྐར་ནི་བསིལ་སྦྱིན་མ། །ངོས་ཀྱི་ཆུ་རྒྱུས་ཡང་དག་བཤད། །ཚ་བ་མ་ནི་ལྟོ་གནས་ངེས། །ལམ་པ་
ཀར་ནི་རབ་ཏུ་གྲགས། །ཆང་མ་ཉིད་ནི་ཀཉྩིར་གནས། །ཐམས་ཅད་དུ་ནི་བཤད་པ་འབབ། །མཚམས་ཀྱི་མཐའ་ཡིན་ནང་དུ་ཡང༌། ཁ་བའི་གནས་སུ་རངས་པའི་གདོང༌། །ཤིན་ཏུ་གཟུགས་ཅན་བད་ཀན་ལྡན། །ཡི་དྭགས་ལྷག་གནས་ཡང་དག་གནས། །གང་ཞིག་
9-5-122a


རྟག་ཏུ་རྣག་འབབ་པ། །ཁྱིམ་གྱི་ལྷར་ནི་ཡང་དག་གནས། །མཁའ་འགྲོ་དམ་པའི་དབང་ཕྱུག་མ། །སྤྱི་མ་ཉིད་དུ་རྣམ་པར་བཤད། །སཽ་ར་ཥྟར་ནི་གང་ཞིག་རྩ། །རྒྱུ་སྦྱིན་མ་དེ་དམར་པོ་འབབ། །རྡུལ་ནི་འབབ་པར་གྱུར་པ་ནི། །གསེར་གླིང་དུ་ནི་ཡང་དག་
བཤད། །ཡན་ལག་གཟི་བརྗིད་ཀུན་ཁྱབ་མ། །སྦྱོར་བྲལ་མར་ནི་རབ་ཏུ་གྲགས། །ན་ག་རར་ནི་སྡུ་གུ་མ། །ཚིལ་ཅན་སྦོམ་ཞིང་མྱོས་བྱེད་འབབ། །སིན་དྷུར་ཤིན་ཏུ་གྲུབ་པ་ཉིད། །མྱ་ངན་མཆི་མ་འབབ་པར་བརྗོད། །མ་རུར་གནས་ནས་ལུང་སྐམ་འབབ། །འཚེད་པ་
མ་ཞེས་རྣམ་པར་བསྟན། །ཀུ་ལུ་ཏར་ནི་ཡིད་བཟང་མ། །བྱིས་པའི་སྣབས་ནི་འབབ་པ་མོ། །ཞེས་གསལ་བར་གསུངས་སོ། །དེ་ཡང་རུས་པའི་ཕྲེང་བ་འཁྲུགས། །ཞེས་པ་ནི་སྡོམ་འབྱུང་ལས། སྨིན་དབུས་ཀྱི་རྩ་ནས་རུས་པ་འབབ་པར་བཤད་པ་ལྟར་རོ། །ཀུན་
སྤྱོད་སོགས་རྒྱུད་བཞི་ལས་མཆིན་པ་ཞེས་པ་ལ། མངོན་བརྗོད་དུ་མཁལ་མ་ཞེས་ཟེར་རོ། །སྙིང་ལ་གནས་ནི་གནས་དེའི་རྩ་ནས་སྙིང་འབབ་པར་སྡོམ་འབྱུང་ལས་གསུངས་པ་ལྟར་རོ། །གློ་བར་བཅས་ཀྱང་སྡོམ་འབྱུང་ལས་གློ་བ་འབབ་བར་བཤད་པ་ལྟར་
རོ། །ངོས་ཀྱི་ཆུ་རྒྱུས་ནི་སྡོམ་འབྱུང་ལས་གཉེ་མ་འབབ་པར་བཤད་དེ། ཀུན་སྤྱོད་དང་མངོན་བརྗོད་ཀྱིའང་དགོངས་པའོ། །རྡོ་རྗེ་མཁའ་འགྲོ་ལས་རྩིབ་ལོགས་ཀྱི་སྣལ་མ་འབབ་པར་བཤད་དོ། །ལྟོ་གནས་ནི་སྡོམ་འབྱུང་ལས་ལྟོ་བ་འབབ་པར་བཤད་དེ། རྒྱུད་
གཞན་གསུམ་དང་ཡང་མཐུན་ནོ། །གྲོད་པ་ཞེས་ཀྱང་འབྱུང་སྟེ་འདྲའོ། །ཚད་མ་ནི་གཞོལ་མ་སྟེ་རྩ་དེ་ནས་བཤད་པ་འབབ་པར་སྡོམ་འབྱུང་ལས་ཀྱང་གསུངས་ལ། ཀུན་སྤྱོད་དང་རྡོ་རྗེ་མཁའ་འགྲོ་དང་ཡང་མཐུན་ནོ། །མངོན་བརྗོད་ལས། ལྒང་བ་ཞེས་དང༌། ལཱུ་
9-5-122b


ཨི་པར་ཆུ་སོ་ཞེས་སོ། །མཚམས་མཐའི་ནང་ཞེས་པ་ནི་སྡོམ་འབྱུང་ལས་མཚོགས་མའི་མཚམས་ནི་འབབ་པའི་རྩ་ཞེས་གསུངས་པ་ལྟར་རོ། །ཆག་གྱུར་སོགས་ལས་འདོམས་པར་ཞེས་འབྱུང་ཡང༌། མར་དོའི་འགྱུར་ལས་མཚམས་མཐའ་ཞེས་འབྱུང་
བ་ལེགས་ཏེ། ཀུན་སྤྱོད་དང་རྡོ་རྗེ་མཁའ་འགྲོ་ལས་མཚོགས་མའི་སྲུབས་དང༌། མངོན་བརྗོད་ལས་སྐྲ་མཐའ་ཞེས་པ་དང་དོན་འདྲ་ཞིང་སྔར་བཤད་པའི་རྒྱུད་གསུམ་གྱིའང་དོན་ནོ། །དམར་པོ་འབབ་པ་ནི་སྡོམ་འབྱུང་ལས་ཁྲག་འབབ་པར་བཤད་པ་ལྟར་ཏེ། ཀུན་
སྤྱོད་དང་མངོན་བརྗོད་དང་རྡོ་རྗེ་མཁའ་འགྲོ་དང་ཡང་མཐུན་ནོ། །མཆི་མ་དང་མཆིལ་མ་ཞེས་སྡོམ་འབྱུང་སོགས་མང་པོ་ལས་གསུངས་པས། ལཱུ་ཨི་པ་ལ་ཡང་མི་མཐུན་པ་སྣང་ཡང་ཆག་འགྱུར་ལས་སྔ་མ་བཞིན་འབྱུང་བ་དག་གོ། ཕྱི་མ་ལ་ལུད་སྐམ་འབབ་
པར་སཾ་བྷུ་ཊ་ལས་སོ། །ཐ་མ་ལ་སྣབས་ཞེས་ཀུན་སྤྱད་དང་མངོན་བརྗོད་ལས་ཀྱང་འབྱུང་ལ། སྡོམ་འབྱུང་ལས་སྣ་ཆུ་འབབ་པར་ཡང་གསུངས་སོ། །བྱིས་པའི་སྣབས་ཞེས་པ་ནི་མཚོན་པ་ཙམ་མོ། །རྣམ་དག་གི་སྐབས་སུ་སོ་དང་སེན་མོ་སོགས་དཔའ་བོར་
བཤད་པ་ལྟར་མི་འགལ་ཡང༌། ལུས་དཀྱིལ་གྱི་སྐབས་སུ་ནི་རྩ་དེ་དག་ནས་སོ་དང་སེན་མོ་སོགས་སྐྱེད་པའི་ཁམས་འབབ་པ་ལས་དཔའ་བོ་རྣམས་བསྐྱེད་པར་བྱ་དགོས་ཏེ། རྩ་ལས་རྣལ་འབྱོར་མ་སྐྱེད་པའི་རགས་པས་སོ། །དེ་གཉིས་ཀྱང་རྣམ་པ་ཐམས་ཅད་དུ་
ངེས་པ་ནི་མིན་ཏེ། མངོན་བརྗོད་ཀྱི་བཅུ་གཉིས་པ་དང་ཕག་མོ་མངོན་འབྱུང་དུ་སོ་དང་སེན་མོ་སོགས་དཔའ་མོ་ཉེར་བཞིར་ཡང་བཤད་པའི་ཕྱིར་རོ། །རྒྱུད་དེ་རྣམས་ཀྱི་དོན་ནི་དྲིལ་བུ་ཞབས་ཀྱིས། འདི་དག་གནས་སུ་རྣལ་འབྱོར་མ། །རྩ་ཡིན་དཔའ་བོ་ཉི་ཤུ་བཞི། ། ལུས་
9-5-123a


ཀྱི་ཁམས་སུ་བརྟག་པར་བྱ། །ཞེས་གསུངས་པའི་དོན་ནོ། །གཉིས་པ་ནི། སྙིང་པོའི་རྣལ་འབྱོར་མ་བཞི་འགོད་པའི་གནས་ལ། ལྭ་བ་པས། སྙིང་ཁར་གནས་པའི་འབྱུང་བ་བཞིའི་རང་བཞིན་གྱི་རྩ་བཞི་མཁའ་འགྲོ་མ་ལ་སོགས་པ་བཞིར་
བཤད་པ་དང༌། སྙིང་ཁ་དང་འགྲིན་པ་དང་ལྟེ་བ་དང་དཔྲལ་བའི་པདྨའི་ལྟེ་བར་དེ་བཞི་འགོད་པའི་ཚུལ་གཉིས་བཤད་པའི་དང་པོ་ནི། སཾ་བྷུ་ཊ་ལས། འདབ་མ་རྣམས་ཀྱི་བཞི་ལ་ཡང༌། །འབྱུང་བ་བཞི་ཡི་རང་བཞིན་རྩ། །མར་མེའི་རང་བཞིན་ལྟ་བུ་ནི། །ཕྱོགས་བཞི་
ལ་ནི་རྣམ་པར་གནས། །ཞེས་སྙིང་ཁ་ཆོས་འཁོར་གྱི་ཕྱོགས་ཀྱི་རྩ་བཞི་འབྱུང་བཞིའི་རྩ་དང༌། སྙིང་ཁའི་དབུས་ཀྱི་ཧཱུཾ་ཡིག་ཧེ་རུ་ཀར་གསུངས་པ་དང༌། མཁའ་འགྲོ་མ་སོགས་བཞི་སྦྱན་སོགས་བཞི་ཡིན་ལ། དེ་ཡང་འབྱུང་བ་བཞིར་བཤད་པ་ལ་བརྟེན་ནས་
མཛད་པའོ། །འདི་ནི་དཔྱིད་ཐིག་ལས། ཕྱོགས་ནི་རྣམ་པ་བཞིར་གནས་པའི། །འདབ་མ་དག་ནི་རྣམ་པ་བཞི། །འབྱུང་བ་ཆེན་པོའི་རྩ་བཞི་སྟེ། སེམས་ཀྱི་རྡོ་རྗེའི་གོ་འཕང་གནས། །མཁའ་འགྲོ་དེ་བཞིན་ལཱ་མ་དང༌། །དུམ་སྐྱེས་མ་དང་གཟུགས་ཅན་མའོ། །
ཞེས་པ་དང་ཡང་མཐུན་ནོ། །ཇོ་བོ་ཆེན་པོ་དང་འཁྲུལ་སྤོང་དང་པྲཛྙཱ་རཀྵི་ཏས་ནི་རྩ་འཁོར་བཞིའི་ལྟེ་བར་རྣལ་འབྱོར་མ་བཞི་དགོད་པ་མཛད་དོ། དྲིལ་བུ་ཞབས་ཀྱི་སྒྲུབ་ཐབས་ལས། །མཆོད་པ་བཞི་ཡི་རང་བཞིན་རྩ། །ཕྱོགས་བྲལ་བདེ་ཆེན་འཁོར་ལོ་
སྟེ། །ལཾ་མཾ་པཾ་ཏཾ་ཞེས་འབྱུང་། གཞུང་ཁ་ཅིག་ལས། །མཆོད་པ་བཞི་ནི་རང་བཞིན་རྩ། །ཞེས་ཀྱང་འབྱུང་ངོ༌། །སཾ་བྷུ་ཊ་ལས། རྩ་རྣམས་བཞི་ཡང་མཚམས་རྣམས་སུ། །རྣམ་པར་གནས་ཤིང་དེར་སོན་པའང༌། །བདུད་རྩི་ལྔ་ནི་འབབ་བ་སྟེ། །དེ་མཆོད་རང་གི་གཟུགས་
9-5-123b


གནས་པས། །དེ་ཡི་དངོས་པོའི་ངོ་བོ་ལས། །མཆོད་པ་བཞི་ནི་རྣམ་པར་བཤད། །ཅེས་སྙིང་ཁའི་མཚམས་ཀྱི་རྩ་བཞི་མཆོད་པ་བཞིའི་རྩར་བཤད་ལ། རྣལ་འབྱོར་མ་བཞི་སྔར་བཤད་པ་ལྟར་ཕྱོགས་ཀྱི་རྩལ་བཤད་རྒྱུ་ཡིན་བ་ལ་དེར་མ་བཤད་པས། འགྱུར་ཅུང་མ་དག་པ་
འདྲའོ། །གཞུང་ཆུང་ལས་ཀྱང༌། ཕྱོགས་འདབ་རིགས་ཀྱི་ས་བོན་ལས། །སྙིང་པོའི་རྣལ་འབྱོར་མ་བཞི་བསྐྱེད། །ཅེས་ཀྱང་བཤད་དོ། །ཡང་ན་མཆོད་པ་བཞི་དང་རང་བཞིན་གྱི་རྩ་བཞིར་བྱས་ནས། ཕྱི་མ་ནི་འབྱུང་བཞིའི་རང་བཞིན་གྱི་རྩར་བྱ་ཞིང༌། ཕྱོགས་བྲལ་ཞེས་པ་ལ་ཕྱོགས་
བཞི་དང་དེ་དང་བྲལ་བ་གཉིས་སུ་བྱའོ། །དེ་ལྟར་ན་ཕྱོགས་ཀྱི་རྩ་བཞི་ལས་ལྷ་མོ་བཞི་དང་མཚམས་ཀྱི་རྩ་བཞི་ལས་བདུད་རྩི་ལྔས་གང་བའི་ཐོད་པའི་སྣོད་བཞི་བསྐྱེད་དོ། །འདི་ལ་ལྭ་བ་པ་སོགས་ཀྱིས་གསལ་བར་མ་བཤད་ཀྱང༌། དྷཱ་རི་ཀ་པས། ལྟེ་བའམ་སྙིང་
ཁའི་རྩ་བཞི་ནི། །འབྱུང་ལྔའི་རླུང་དང་བདུད་རྩི་འབབ། །བདེ་ཆེན་དགུ་ཡི་བདག་ཉིད་བསམ། །ཞེས་བཤད་ལ། བདེ་ཆེན་དགུ་ནི་དེའི་འཁོར་ལོའི་ལྷ་ལྔ་དང༌། ཐོད་པ་བཞི་ལ་བྱ་དགོས་སོ། །སྙིང་ཁར་འབྱུང་བཞིའི་རླུང་འབབ་པ་ནི། དེའི་ཕྱོགས་ཀྱི་རྩ་བཞི་དང༌། ནམ་མཁའི་
རླུང་འབབ་པ་ནི། སྤྱོད་བསྡུས་ལས་ནམ་མཁའི་རླུང་འབྱུང་བཞིའི་རླུང་ལ་ཁྱད་བྱེད་དུ་བཤད་པ་ལྟར་ཏེ། རྩ་བཞི་ཞེས་པ་ལས་སོ། །བདུད་རྩི་འབབ་པ་ནི་མཚམས་ཀྱི་རྩ་བཞིའོ། །ལྟེ་བ་ནི་སྙིང་ཁའི་དབུས་ཀྱི་ཧཱུཾ་ཡིག་ལ་བཤད་རྒྱུར་མངོན་པས་འམ་ཞེས་པ་དག་མ་དག་
བརྟད་པར་བྱའོ། །དྲིལ་བུ་པས་ལཾ་མཾ་པཾ་ཏཾ་གི་ས་བོན་བཞི་གསུངས་པ་ལ། བླ་མ་སྔ་མ་རྣམས་མཁའ་འགྲོ་མ་ནས་བཟུང་སྟེ། གཡས་སྐོར་གྱིས་ལྷ་མོ་བཞིའི་ས་བོན་དུ་བཞེད་པ་ལ་ཕྱིས་ཀྱི་བླ་མ་ཁ་ཅིག་གིས་མཁའ་འགྲོ་མ་གྲལ་མགོར་འདོན་ན་མཾ་ལཾ་པཾ་ཏཾ་དུ་
9-5-124a


བྱ་དགོས་ཏེ། ཀུན་སྤྱོད་དང་ནག་པོ་པའི་དཀྱིལ་ཆོག་ལས། མཁའ་འགྲོ་མ་མཱ་མ་ཀཱིར་བཤད་པའི་ཕྱིར་རོ། །མངོན་བརྗོད་ལས་ལཾ་མཾ་པཾ་ཏཾ་ཞེས་འདོན་པ་ནི། ས་སྤྱན་མ། ཆུ་མཱ་མ་ཀཱི། མེ་གོས་དཀར་མོ། རླུང་སྒྲོལ་མ་ཞེས་པའི་
རིམ་པ་དང་བསྟུན་པ་ཡིན་གསུང་ངོ༌། །ཀུན་སྤྱོད་ལས་ནི། མཁའ་འགྲོ་མ་བཞི་པར་མར་གནས། མཱ་མ་ཀཱི་སོགས་བཟང་མོ་ཡིན། ཞེས་རྣལ་འབྱོར་མ་བཞི་ཀ་ལ་མཁའ་འགྲོ་མ་ཞེས་བཤད་ནས། དེ་བཞི་མཱ་མ་ཀཱི་ལ་སོགས་པ་ཡིན་ཞེས་པ་ཙམ་ལས་རྣལ་
འབྱོར་མ་བཞིའི་དང་པོའི་མཁའ་འགྲོ་མ་མཱ་མ་ཀཱིར་མ་བཤད་པའི་ཕྱིར་དང༌། དེའི་འགྲེལ་པར་ཡང༌། མཱ་མ་ཀཱི་སོགས་བཟང་མོ་ཡིན། །ཞེས་པ་ནི་མཁའ་འགྲོ་མ་ལ་སོགས་པ་བཞི་པོ་འདི་ཉིད་ཇི་ལྟར་རིགས་པར་མཱ་མ་ཀཱི་ལ་སོགས་པའི་རང་བཞིན་ཞེས་པའི་
དོན་ཏོ། །ཞེས་ཇི་ལྟར་རིགས་པར་སྦྱར་བར་བཤད་ཀྱི་རིམ་བཞིན་དུ་སྦྱར་བར་མ་བཤད་པའི་ཕྱིར་ན་མཁའ་འགྲོ་མ་མཱ་མ་ཀཱིར་བྱེད་པ་ཀུན་སྤྱོད་ཀྱི་དོན་མིན་ནོ། །ནག་པོ་སྤྱོད་པའི་དཀྱིལ་ཆོག་ལས། མཁའ་འགྲོ་མ་མཱ་མ་ཀཱི་དང༌། །གཟུགས་ཅན་མ་སྤྱན་མར་
བཤད་ཀྱང་དེའི་སྒྲུབ་ཐབས་སུ་བཤད་པ་དང་དེ་གཉིས་དོན་མི་གཅིག་སྟེ། སྒ་མར་ཞལ་གཅིག་ཕྱག་བཞི་པ་དང༌། ཕྱི་མར་ཞལ་གཅིག་ཕྱག་གཉིས་མར་བཤད་པ་དང༌། སྔ་མར་མཁའ་འགྲོ་མ་སྔོན་མོ་དང༌། ཕྱི་མར་དཀར་སྔོར་བཤད་པ་དང༌། སྔ་
མར་ལྷོར་མཁའ་འགྲོ་མ། བྱང་དུ་དུམ་སྐྱེས་མ། ནུབ་ཏུ་གཟུགས་ཅན་མ་དགོད་པར་བཤད་པས། ཤར་དུ་ལཱ་མ་འགོད་དགོས་པ་དང༌། ཕྱི་མར་མཁའ་འགྲོ་མ་ནས་བཟུང་སྟེ་གཡོན་སྐོར་གྱིས་ཤར་ལ་སོགས་པར་དགོད་པར་བཤད་པའི་ཕྱིར་རོ། །ཡང་སྔ
9-5-124b


མར་ལྷ་མོ་བཞི་ཆུ་དང་མེ་དང་རླུང་དང་སའི་ཁམས་དག་པར་ཡང་བཤད་དོ། །རྡོ་རྗེ་མཁའ་འགྲོར་ནི། དང་པོ་ལྟུང་བྱེད་མ་ཡིན་ཏེ། །གཉིས་པ་དེ་བཞིན་གསོད་བྱེད་མ། །གསུམ་པ་འགུགས་མ་ཞེས་བྱ་སྟེ། བཞི་པ་གར་གྱི་དབང་ཕྱུག་མ། །ཞེས་པ་ནི་སྔར་ཤར་ནས་
བཟུང་སྟེ་མཁའ་འགྲོ་མ་སོགས་བཞི་གཡོན་སྐོར་དུ་བཤད་པའི་རིམ་པ་ལྟར་ཡིན་ལ། འགྲེལ་པར་ཡང་ཤར་ནས་གཡོན་སྐོར་དུ་ལྟུང་བྱེད་མ་སོགས་དང་སྦྱར་བ་དང་། རྒྱུད་དེར་ལྷ་མོ་བཞིའི་ཕྱག་གཡོན་ན་ཐོད་པ་མེད་ཅིང༌། གཡས་ན་གྲི་གུག་མེད་པས་སྒྲུབ་ཐབས་
ཀྱི་ལུགས་ནི་དེ་དང་ཡང་དོན་མི་གཅིག་གོ། ལཱུ་ཨི་པའི་འགྲེལ་པར། ལྭ་བ་པས་སྙིང་པོའི་རྣལ་འབྱོར་མ་བཞི་ཀ་ལ་རིན་འབྱུང་གིས་རྒྱས་གདབ་པ་དང༌། གཡོན་སྐོར་གྱི་མཁའ་འགྲོ་མ་སོགས་བཞི་ལ། རིམ་པ་བཞིན་དུ་རྣམ་སྣང་དོན་གྲུབ་སྣང་མཐའ་རིན་འབྱུང་
གིས་རྒྱས་གདབ་པ་ཡང་གསུངས་པས། ལྷ་མོ་བཞི་སྤྱིར་རིན་འབྱུང་གི་རིགས་ཡིན་ཀྱང༌། དེ་ལ་ནང་ཚན་གྱི་རིགས་ཀྱིས་ཕྱེ་ན་རྣམ་སྣང་ལ་སོགས་པའི་རིགས་བཞིར་འགྱུར་ཞིང༌། མཱ་མ་ཀཱི་ནི་རྡོ་རྗེ་དང་རིན་པོ་ཆེའི་རིགས་གཉིས་ཀ་འཛིན་པར་གསུངས་པས་མཁའ་
འགྲོ་མ་སྤྱན་མའི་ངོ་བོ་དང༌། གཟུགས་ཅན་མ་མཱ་མ་ཀཱིའི་ངོ་བོར་བྱའོ། །དེའི་ཕྱིར་ས་བོན་ཀྱང་ཤར་ནས་གཡས་སྐོར་གྱིས་ལཾ་མཾ་པཾ་ཏཾ་བཞིར་སྔ་མ་རྣམས་བཞེད་པ་ལྟར་ལེགས་ཏེ། ལྟུང་བྱེད་མ་ལ་སོགས་པ་བཞི་སྤྱན་སོགས་བཞིའི་རང་བཞིན་དུ་འགྲེལ་པ་གསུམ་
གར་བཤད་ལ། མངོན་བརྗོད་ལས་ལཾ་ལས་ལྟུང་བྱེད་མ་དང༌། མཾ་ལས་གསོད་བྱེད་མ་སྐྱེད་པར་བཤད་པའི་ཕྱིར་རོ། །དེ་ཡང་སྔོན་དུ་སྙིང་ཁའི་ཕྱོགས་ཀྱི་རྩ་བཞི་དང༌། ཡི་གེ་བཞི་ངོ་བོ་དབྱེར་མེད་དུ་མོས་པར་བྱས་ནས། དེ་ལས་བསྐྱེད་པར་བྱ་ཡི། ཡི་གེ་རྐྱང་པ་ལས་
9-5-125a


མ་ཡིན་ནོ། །སྙིང་ཁའི་ཕྱོགས་ཀྱི་རྩ་བཞི་ནི་ཤར་ནས་གཡས་སྐོར་གྱིས་སུམ་སྐོར་མ་དང༌། འདོད་མ་དང༌། ཁྱིམ་མ་དང༌། གཏུམ་མ་ཡིན་ཏེ། མན་སྙེར། གང་སྤྱན་མ་ལ་སོགས་པ་རྣམས་དང༌། མཁའ་འགྲོ་མ་ལ་སོགས་པ་རྣམས་དང༌། རྡོ་རྗེ་མ་ལ་
སོགས་པ་རྣམས་དང༌། རྡོ་རྗེ་མཁའ་འགྲོ་མ་ལ་སོགས་པ་རྣམས་ཏེ། དེ་རྣམས་ནི་སུམ་སྐོར་མ་ལ་སོགས་པའི་རྩའི་རང་བཞིན་ནོ་ཞེས་བཤད་ཅིང༌། མུ་ཏིག་ཕྲེང་བ་དང༌། བྷ་བ་བྷ་དྲས་ཀྱང༌། སུམ་སྐོར་མ་ལ་སོགས་པ་ལྔ་སྙིང་ཁའི་རྩ་ལྔར་བཤད་ཅིང༌། དང་པོ་བཞི་
འདབ་མ་དང༌། ལྔ་པ་དབུས་སུ་ཡོད་པའི་དོན་ནོ། །བདུད་དྲལ་མ་ནི་ཨ་དྷཱུ་ཏཱི་ལ་བརྟེན་ཏེ། ལྟེ་བ་ནས་ལྕེའི་རྩེ་མོའི་བར་དུ་ལངས་པར་མན་སྙེར་བཤད་པས། སྙིང་ཁའི་འཁོར་ལོའི་རྩ་འདབ་ཡིན་ནོ། །ཤར་གྱི་རྩ་སུམ་སྐོར་མ་ནས་ས་རླུང་དང༌། ལྷོ་ནས་ཆུ། ནུབ་ནས་
མེ། བྱང་ནས་རླུང་གི་རླུང་རྒྱུ་སྟེ། སྡོམ་འབྱུང་འགྲེལ་པ་ལས་ལྔ་པོ་འདི་རྣམས་ནི། ཆོས་ཀྱི་འཁོར་ལོར་རིམ་པས་ས་ལ་སོགས་པའི་ཁམས་ཀྱི་རང་བཞིན་ནོ། །ཞེས་བཤད་ལ། ལྔ་པ་ནི་བདུད་དྲལ་མ་དང་དེ་ཡང་ནམ་མཁའི་ཁམས་པར་བྱའོ། །འདིས་ལྕེའུ་
ཆུང་ནས་བདུད་རྩི་འབབ་པ་འཐུངས་ཤིང༌། དེར་རླུང་བརྒྱུས་པ་རྣམས་འཆི་རླུང་ཡིན་པས། ཀྱཻ་རྡོར་ལས་རྩ་རྣལ་འབྱོར་མའི་ངོ་བོར་སྟོན་པའི་སྐབས་སུ་དེ་སྤངས་ལ། དེའི་དབང་ལས། འཇིག་རྟེན་བདེ་བའི་རང་བཞིན་དུ་སྐྱེས་ཀྱང་བདེ་ཆེན་གྱི་དཀྱིལ་འཁོར་དུ་མི་
མཐོང་ཞིང་འཆིའོ། །འོན་ཀྱང་ལམ་བསྒོམས་པས་སྒྲིབ་བྲལ་དུ་སོང་བ་ན་དེ་ཡང་བྱང་ཆུབ་ཀྱི་སེམས་ཀྱིས་གང་བས། ཀྱཻ་རྡོར་ལས་རྩ་སོ་གཉིས་སུ་བྱང་ཆུབ་ཀྱི་སེམས་འབབ་པར་བཤད་པ་དང་མི་འགལ་བར་མན་སྙེ་ལས་འཆད་དོ། །མན་སྙེར་སུམ་སྐོར་མ་
9-5-125b


ལ་སོགས་པ་བཞི་ནས་རིམ་པ་བཞིན་དུ་གཟུགས་དང་སྒྲ་དང་དྲི་དང་རོ་འབབ་པར་རང་བཤད་ལ། མཚམས་ཀྱི་རྩ་བཞི་ནས་བཤང་གཅི་དང༌། ཁུ་ཁྲག་དང༌། བད་ཀན་ཏེ་བདུད་རྩི་ལྔ་དང༌། སྒྲ་མ་གཏོགས་པའི་ཡུལ་བཞི་འབབ་པར་བཤད་དོ། །བྷ་ཝ་བྷ་དྲས་སུམ་
སྐོར་མ་སོགས་ནས་ཀྱང་བདུད་རྩི་ལྔ་འབབ་པར་བཤད་དེ། སྙིང་ཁའི་ཕྱོགས་ཀྱི་རྩ་རེ་རེ་ལ་གཉིས་གཉིས་སུ་གྱེས་ནས་རྩ་བརྒྱད་བྱུང་བ་ལ་དགོངས་སོ། །གསུམ་པ་ནི། སྒོ་མཚམས་མ་བརྒྱད་གནས་གང་དུ་འགོད་པ་དང༌། གང་ལས་སྐྱེད་པ་ནི་དྲིལ་བུ་པས། ཧཱུཾ་
བརྒྱད་ཀྱང༌། དམ་ཚིག་ཅེས་བྱར་བཤད་པ་ཡིན། །ཞེས་འབྱུང་བས། ཧཱུཾ་བརྒྱད་ལས་སྐྱེད་པ་ཡིན་ཀྱང་གནས་མི་གསལ་བ་ལ། གཞུང་ཆུང་ལས། ཆོས་འཁོར་ཕྱི་ཡི་འདབ་བརྒྱད་ལ། རིང་པོའི་ཧཱུཾ་ལས་ཁྲོ་བོ་བརྒྱད། ཅེས་སྙིང་ཁར་པད་མ་འདབ་བརྒྱད་ཉིས་རིམ་
གཅིག་བྱས་པའི་ཕྱི་མར་ཧཱུཾ་རིང་པོ་བརྒྱད་ལས་བསྐྱེད་པར་བཤད་དོ། །དྷཱ་རི་ཀ་བས། ཕྱག་བརྒྱད་དམ་ནི་སྒོ་བརྒྱད་དུ། །ལས་ཀྱི་རླུང་ངམ་བྱེད་དག་གིས། །ཁྭ་གདོང་གཤིན་རྗེ་མ་སོགས་བརྒྱད། །ཅེས་བཤད་པའི་ཕྱག་བརྒྱད་ནི། །ཉིན་མོ་མཛད་ཀྱིས། ལག་པ་
གཡོན་པའི་རྩེ་མོ་དང༌། མཁྲིག་མ་དང༌། ལག་པ་གཡས་པའི་རྩེ་མོ་དང༌། འཁྲིག་མ་བཞི་ལ་རིམ་པ་བཞིན་དུ་ཁྭ་དང་འུག་གདོང་སོགས་བཞི་དང༌། རྐང་པ་གཡས་གཡོན་གྱི་རྩེ་མོ་གཉིས་དང༌། གཡས་གཡོན་གྱི་ལོང་བུ་གཉིས་ལ་རིམ་པ་བཞིན་གཤིན་རྗེ་བསྟན་
མ་དང་ཕོ་ཉ་མོ་སོགས་བཞི་འགོད་པ་ལྟར་ཡིན་པ་འདྲའོ། །སྒོ་བརྒྱད་ནི་དཔྱིད་ཐིག་ལས། རྩ་ཡི་སྒོར་ནི་ཁྭ་གདོང་མ། ཞེས་པ་ནས། བཞི་པ་ཕག་གི་གདོང་ཅན་ནོ། །ཞེས་པ་ཙམ་ལས་རྩའི་སྒོ་གང་ཡིན་མི་གསལ་ལ། མཚམས་རྣམས་གཤིན་རྗེ་བསྟན་མ་
9-5-126a


དང༌། ཞེས་དེ་ལ་སོགས་པ་བཞི་མཚམས་སུ་བཞུགས་པར་བཤད་དེ། མཚམས་གང་ལ་བྱེད་ཀྱང་མི་གསལ་ལོ། ལྭ་བ་པའི་འགྲེལ་པར་སྐབས་ཤིག་ཏུ། དེ་ལྟར་ཁ་དང་ལྟེ་བ་དང༌། །རྟགས་དང་བཤད་པ་དང༌། སྨིན་
མཚམས་དག་མིག་དང༌། སྣ་རྣམས་ལ་ཡང་གོ་བར་བྱའོ་ཞེས་གསུངས་ཤིང༌། དེ་ལྟར་ཞེས་པ་གོང་དུ་བཤད་པའི་རྣ་བ་ལ་སྙེག་པས་དེ་འདྲ་བའི་སྒོ་བརྒྱད་དོ། །ཡང་དེའི་སྐབས་ཤིག་ཏུ། ཞལ་དང་ལྟེ་བ་དང༌། སྣ་དང་རྟགས་དང་བཤད་བའི་སྒོར་རིམ་
པ་བཞིན་དུ་ཁྭ་གདོང་མ་སོགས་སྒོ་སྐྱོང་མ་རྣམས་སོ། །མཛོད་སྤུ་དང༌། རྣ་བ་དང༌། མིག་དང་སྣའི་སྒོར་གཤིན་རྗེ་བརྟན་མ་ལ་སོགས་པའོ། །ཞེས་སྣ་ལན་གཉིས་བགྲངས་པ་སྔ་མ་དང་མ་མཐུན་ནོ། །དེའི་འགྲེལ་པའི་གཞུང་ཁ་ཅིག་ལས། བཤང་བའི་
སྒོ་དང་སྣ་བུག་གཡས་པའི་ནང་དུ་ཡང་ངོ་། །ཞེས་དང༌། གཤིན་རྗེ་བསྟན་མ་ལ་སོགས་པ་རྣ་བ་དང་མིག་གཡོན་པ་དང༌། གཡས་སུ་ཡང་ངོ་། །ཞེས་ཀྱང་འབྱུང་ངོ༌། །པྲཛྙཱ་རཀྵི་ཏའི་འགྲེལ་པ་རྔོག་འགྱུར་དུ། སྐབས་སྔ་མར་བཤད་པ་སྔར་དང་འདྲ་ཞིང༌། 
སྐབས་འོག་མར་ཁ་དང་སྣ་བུག་གཡོན་པ་དང༌། བཤད་ལམ་དང་སྣ་བུག་གཡས་སུ་ཁྭ་གདོང་མ་སོགས་བཞི་དང༌། རྣ་བ་གཡས་གཡོན་དང་མིག་གཡས་གཡོན་དུ་མཚམས་མ་བཞི་འགོད་པར་བཤད། འཁྲུལ་སྤོང་ལས། ཁ་དང་སྣ་བུག་གཡས་དང༌། 
གཡོན་པ་དང་བཤད་ལམ་དུ་ཁྭ་གདོང་སོགས་བཞི་དང༌། མཚམས་མ་བཞི་འདྲ་བར་འབྱུང་སྟེ། འགྲེལ་པ་སྡོམ་འབྱུང་ལས་ཀྱང་དེ་བཞིན་དུ་བཤད་དོ། །དེ་ཇི་བཞིན་དུ་པྲཛྙཱ་རཀྵི་ཏའི་འགྲེལ་པའི་འགྱུར་གཞན་གཅིག་ལས་ཀྱང་འབྱུང་ངོ༌། །ཇོ་བོའི་
9-5-126b


འགྲེལ་པར་ཡང་དེ་རྣམས་དང་མི་འདྲ་བར་བཤད་དོ། །ཨུ་མ་པ་ཏི་ཏ་ཏྲས་ནི། །ཁྭ་གདོང་མ་ལ་སོགས་པ་རྣམས། །ཁྭ་ལྟེ་མཚན་བཤད་རིམ་པ་ཡིས། །མཛོད་སྤུ་རྣ་བ་མིག་སྣ་ལ། །གཤིན་རྗེ་བརྟན་སོགས་དེ་བཞིན་གནས། །ཞེས་ལྭ་བ་པའི་བཤད་པ་
སྔ་མ་དང་མཐུན་པར་བྱས་སོ། །དེ་ལྟར་འདྲ་མི་འདྲ་དུ་མ་ཞིག་བཤད་པའི་རྩ་བ་ནི་ལྭ་བ་པའི་འགྲེལ་པར་སྣང་ལ། དེའི་རྒྱ་དཔེ་ལ་དག་མ་དག་ཡོད་པར་གསལ་ཞིང༌། བཤད་པ་སྔ་ཕྱི་གཉིས་མི་འདྲ་བར་སྣང་ཡང༌། སྒོམ་བཞིའི་སྐབས་སུ་སྣ་བགྲངས་ན་མི་
འགྲིག་ཅིང༌། མཚམས་མ་བཞིའི་སྐབས་སུ་དེ་མ་བགྲངས་ན་མི་འགྲིག་པར་སྣང་བ་དང༌། སྨིན་མཚམས་ནི་སྐབས་གཉིས་ཀར་བྱུང་བ་དང༌། རྣ་བ་དང་མིག་གཡས་གཡོན་གཉིས་ཀ་ལ་ཡང་ལྷ་མོ་འགོད་དགོས་པས་སྐབས་གོང་མ་བཞིན་དུ་བྱས་ན་ལེགས་
སོ། །དེ་ཡང་དཔྱིད་ཐིག་ལས། སྒོ་མཚམས་མ་བརྒྱད་ལུས་ལ་བཀོད་པའི་མཇུག་ཐོགས་སུ་འདི་དག་རྡོ་རྗེ་མཁའ་འགྲོ་མ། །རྩ་ཡི་གཟུགས་ཀྱིས་ཡང་དག་གནས། །ཞེས་གསུངས་པས། སྒོ་དེ་དང་དེ་དག་གི་རྩ་ལས་བསྐྱེད་པར་བྱ་སྟེ། འཁོར་གྱི་ལྷ་མོ་
གཞན་ཐམས་ཅད་རྩ་ལས་སྐྱེད་པར་བཤད་ཅིང་འདི་བརྒྱད་མི་སྐྱེད་པའི་ཁྱད་པར་མེད་པའི་ཕྱིར་རོ། །དེ་ལྟར་ན་ཁ་སྟེ་ལྕེའི་རྩ་བ་དང༌། ལྟེ་བའི་བུག་པའི་ནང་དང༌། མཚན་མ་དང་བཤད་ལམ་གྱི་སྒོ་བཞིར་ཁྭ་གདོང་མ་དང༌། འུག་གདོང་མ་སོགས་དགོད། 
མཛོད་སྤུ་སྟེ་སྨིན་མཚམས་ཀྱི་བུག་པ་ཞེས་འབྱུང་བས། དེར་གཤིན་རྗེ་བརྟན་མ་དང༌། རྣ་བའི་ཕུག་གཉིས་སུ་ཕ་ཉ་མོ་དང༌། མིག་གཉིས་སུ་མཆེ་བ་མ་དང༌། སྣ་བུག་གཉིས་སུ་འཇོམས་མ་རྣམས་དགོད་དོ། ལྭ་བ་པ་དང་པྲཛྙཱ་རཀྵི་ཏས་རྣ་བའི་
9-5-127a


བུག་པའི་ནང་དུ་དགོད་པར་བཤད་པ་ནི། མཚོན་པ་ཙམ་སྟེ། ལུས་དཀྱིལ་གྱི་ལྷ་ཐམས་ཅད་ཀྱང་ལུས་ཀྱི་ནང་དུ་བསྒོམ་མོ། །མིག་དང་རྣ་བ་དང་སྣ་དང་ལྕེའི་རྩ་རྣམས་ནི། སྙིང་ཁའི་རྩ་གཟུགས་དང་སྒྲ་དང་
དྲི་དང་རོ་འབབ་བ་རྣམས་དང༌། རྩ་རྒྱུད་གཅིག་ལ། སྨིན་མཚམས་དང་ལྟེ་བ་དང་བཤད་གཅིའི་ལམ་གྱི་རྩ་ནི། རེག་བྱ་འབབ་པར་བཤད་པའི་རྩ་དང་རྩ་རྒྱུད་གཅིག་པས། སྙིང་ཁའི་ཕྱི་སྐོར་གྱི་བརྒྱད་ལ་དགོད་པར་བཤད་པ་དང་གནད་
གཅིག་པར་བླ་མ་ཁ་ཅིག་གསུང་སྟེ། དྲིལ་བུ་པའི་ལུགས་ལ་ཡང་དེ་ལྟར་བྱས་པས་ཆོག་པར་མངོན་ནོ། །དེའི་ལུགས་ལ་ཧཱུཾ་རིང་པོ་བརྒྱད་དང་སྒོ་བརྒྱད་ཀྱི་རྩ་བརྒྱད་ངོ་བོ་དབྱེར་མེད་དུ་མོས་ནས་དེ་ལས་བསྐྱེད་པར་བྱའོ། །བཞི་པ་ནི། ལཱུ་ཨི་པ་ལ་
ལྭ་བ་པས། གོ་བོ་ཡབ་ཡུམ་གྱི་གནས་མན་ངག་ལས་ཤེས་པར་བྱ་བར་གསུངས་པ་ལྟར། པྲཛྙཱ་རཀྵི་ཏས་ཀྱང་བཤད་ཅིང༌། དེ་བཞིན་གཤེགས་པའི་རྡོ་རྗེ་དང་ཇོ་བོས་ཀྱང་གསལ་བར་མ་བཤད་དོ། །དེའི་མན་ངག་ནི་བླ་མ་ཁ་ཅིག་སྤྱི་བོའི་ཧཾ་
གི་གནས་སུ་ཧེ་རུ་ཀ་དང༌། གསང་གནས་སུ་ཕག་མོ་སྒོམ་པ་ཡིན་ཞེས་ཟེར་བ་ནི། འཁྲུལ་སྤང་ལས། སྤྱི་བོའི་བྱང་ཆུབ་ཀྱི་སེམས་ཡབ་དང༌། གསར་གནས་ཀྱི་པད་མའི་ཨ་ཐུང་གི་རང་བཞིན་ཕག་མོ་གཉིས་འཁྱུད་པས་བདེ་ཆེན་སྐྱེ་བར་གསུངས་
པ་དང་ཕྱོགས་མཐུན་ཡོད་ཀྱང་བླ་མ་ཁ་ཅིག་དྲིལ་བུ་པས། ཐུགས་ཀར་ཨ་བ་དྷཱུ་ཏཱི་ཧཱུཾ། མ་བཅོས་ནང་གི་བདག་ཉིད་དོ། །ཞེས་གསུངས་པའི་རྗེས་སུ་འབྲངས་ནས། ཧེ་རུ་ཀ་སྙིང་ཁར་སྒོམ་པར་བཞེད་དེ་ལེགས་པ་ཡིན་ནོ། དེའི་རྒྱུ་མཚན་ནི་ལུས་
9-5-127b


རྟེན་གྱི་དཀྱིལ་འཁོར་དུ་སྒོམ་པ་ནི། སཾ་བྷུ་ཊ་བཞིན་འདི་ལའང་བྱ་དགོས་ལ། འཁོར་གྱི་ལྷ་ཞེ་བརྒྱད་གང་ལས་སྐྱེས་པའི་རྩ་དང༌། ཁམས་ཀྱི་རྣམ་དབྱེ་ཡང་དེ་ཉིད་གསལ་བ་དང༌། རྣལ་འབྱོར་མ་གཞན་བཅུ་གཉིས་ཀྱི་རྩ་ཡང་དེ་ལ་བརྟེན་དགོས་པར་སྣང་ལ། 
དེ་ལྟ་ན་སྙིང་ཁའི་དབུས་ཀྱི་ཧཱུཾ་ཡིག་དཔའ་བོ་ཧེ་རུ་ཀར་ཡང་དེ་ལས་བཤད་པ་འདྲ་བ་གཞན་ལས་མི་འབྱུང་ཞིང༌། དེ་དང་མཐུན་པར་དྲིལ་བུ་པས་བཤད་པ་འདིར་ཡང་མི་རུང་བ་མེད་ལ། ཁྱད་པར་དུ་དྷཱ་རི་ཀ་པས་བདེ་ཆེན་གྱི་ལྷ་ལྔ་ཀ་སྙིང་ཁར་སྒོམ་པར་བཤད་
པའི་ཕྱིར་རོ། །སྒོམ་ཚུལ་ཡང་སྙིང་ཁའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་གི་བྱང་སེམས་དང༌། ཧཱུཾ་ཡིག་བ་མོ་ལྟ་བུ་འཛག་པ་གཉིས་ངོ་བོ་དབྱེར་མེད་དུ་བྱས་ལ། དེ་ལས་ཧེ་རུ་ཀ་བསྐྱེད་པར་བྱ་སྟེ། འདི་ནི་ནག་པོ་པ་ལ་ཡང་བྱེད་དགོས་སོ། །འདི་ལ་ཧེ་རུ་ཀ་ཞལ་
བཞི་ཕྱག་བཅུ་གཉིས་པར་སྒོམ་པ་ནི། ཕྱི་དཀྱིལ་ལ་སེམས་འཛིན་པ་ལས་ཕྲ་བས་དཀའ་བར་སྣང་ན། རེ་ཤིག་ཞལ་གཅིག་ཕྱག་གཉིས་པར་བྱས་ཀྱང་ཆོག་གོ། འདིར་གཞུང་ཆུང་ལས། བརྟག་དང་སྤྲོས་ལ་དགའ་གྱུར་ན། །ཆོས་ཀྱི་འཁོར་ལོ་འདབ་
མ་བཞི། །མདོག་གསལ་ཧཱུཾ་ལས་ལྟེ་བ་རུ། །ཐབས་དང་ཤེས་རབ་བདག་ཉིད་གསལ། །ཞེས་ཧཱུཾ་ཡིག་ལས་ཡབ་ཡུམ་གཉིས་ཀ་སྐྱེད་པ་འདྲ་བ་ཅིག་དང༌། ཧཱུཾ་ལ་སོགས་བ་ལས་ལུས་དཀྱིལ་སྒོམ་པ་སྤྲོས་བ་ལ་དགའ་བའི་ངོར་བྱས་པ་འདྲ་བ་ཅིག་བཤད་ཀྱང༌། 
སཾ་བྷུ་ཊར། དཔྱིད་དཔའ་བོ་ཧེ་རུ་ཀ་དང༌། ཐིག་ལེ་བདག་མེད་མར་གསུངས་པ་ལ། དཔྱིད་ཐིག་ལས། དེ་ཡི་དབུས་བཞུགས་དཔའ་བོ་ནི། །ཡུངས་ཀར་སྦོམ་པོའི་ཚད་ཚམ་སྟེ། །ཧཱུཾ་གིས་ས་བོན་མི་ཤིགས་པ། །ཁ་བ་ལྟ་བུ་འབབ་པ་ཡིན། །བ་
9-5-128a


སནྟ་ཞེས་བྱ་བ་སྟེ། །ལུས་ཅན་རྣམས་ཀྱི་སྙིང་དགའ་བྱེད། །རྒོད་མའི་ཁ་ནི་མེ་ཡི་གཟུགས། །ཕག་མོ་ཏི་ལ་ཀ་ཞེས་བརྗོད། །ལས་ཀྱི་རླུང་གིས་བསྐྱོད་ནས་སུ། །ལྟེ་བའི་དཀྱིལ་འཁོར་ནས་ནི་འབར། །བ་སནྟ་དང་ཕྲད་པས་
མཉེས། །སྙོམས་པར་འཇུག་པས་ཡང་དག་བཞུགས། །ཞེས་ཕག་མོ་ལ་འདོན་པ་སྤོས་ཤིང༌། ཏི་ལ་ཀ་ཐིག་ལེ་ནི་ལྟེ་བའི་དམར་ཆ་ལ་བཤད་པས་ལྟེ་བའི་དམར་ཆ་ལས་བསྐྱེད་པར་བྱ་སྟེ། དེ་ལ་ནི་ལྷན་སྐྱེས་ཁྱད་པར་ཅན་སྐྱེ་བའི་རྟེན་འབྲེལ་ཤིན་ཏུ་
ཟབ་པ་ཡོད་པའི་ཕྱིར་རོ། །དྲིལ་བུ་པས་དངོས་སུ་མ་གསུངས་པ་ནི། ཧཱུཾ་ཡིག་བཤད་པའི་ཤུགས་ཀྱིས་ཤེས་པ་ལ་དགོངས་སོ། །འོ་ན་ལྟེ་བའི་དམར་ཆ་ལས་བསྐྱེད་ནས་ལྟེ་བར་གནས་པ་བྱེད་དམ། སྙིང་ཁར་ཡབ་ཡུམ་སྦྱོར་བའི་རྣམ་པ་ཅན་བྱེད་ཅེ་
ན། གསང་འདུས་འཕགས་ལུགས་ཀྱིས་ལུས་དཀྱིལ་ལ་ཡབ་ཡུམ་གནས་སོ་སོར་སྒོམ་པ་ཡང་ཡོད་མོད་ཀྱང༌། འདིར་ནི་སྐྱེད་པ་ལྟེ་བའི་དམར་ཆ་ལས་སྐྱེད་ཀྱང༌། བཞུགས་གནས་སྙིང་ཁར་ཡབ་དང་སྦྱོར་བའི་ཚུལ་དུ་བྱེད་དེ། སྔར་དྲངས་པའི་
རྐང་པ་ཐ་མ་གཉིས་ལ་བརྟེན་ནས་ཀྱང་ཤེས་པར་ནུས་སོ། །དེས་ན་ཉིན་མོ་མཛད་ཀྱིས་ཧེ་རུ་ཀ་སྙིང་ཁ་དང༌། ཕག་མོ་ལྟེ་བར་བྱས་པ་ལྟར་འདིར་མི་བྱེད་དོ། །སྤྲོས་པ་ལ་དགའ་ན་ཞེས་པ་ནི། ཡང་ན་གྲུབ་ཟིན་གསལ་གདབ། སྤྲོས་པ་ལ་དགའ་ན་ཧཱུཾ་ཡིག་
སོགས་ལས་བསྐྱེད་ཅེས་པའི་དོན་མིན་ཏེ། ཡིན་ན་ནི་འདི་བསྐྱེད་རིམ་གྱི་ལུས་དཀྱིལ་མ་ཡིན་པར་འགྱུར་བའི་ཕྱིར་ཏེ། ལྷ་གསར་དུ་སྐྱེད་པ་མེད་པའི་ཕྱིར་རོ། །མི་གསལ་རྩ་མིག་ཐམས་ཅད་ལ། དག་པའི་ལྷ་ཉིད་མོས་ཤིང་དྲན། ཞེས་བཤད་
9-5-128b


པས། འདི་སྒོམ་པ་པོ་དེ་ལྷ་ཐམས་ཅད་སྐད་ཅིག་དྲན་རྫོགས་ལ་གསལ་ནུས་པའང་མིན་པ་དེའི་ལུགས་སུ་སྣང་བའི་ཕྱིར་རོ། །དེས་ན་སྔར་ཕྱི་དཀྱིལ་ལ་གསལ་སྣང་བརྟན་པ་ཡིན་ན་ཡུད་ཙམ་རེས་བསྐྱེད་ལ་སྒོམ། །རིམ་གྱིས་བརྟག་པ་ལ་དགའ་བ་སྟེ་བསམ་
དགོས་པ་ཅིག་ཡིན་ན་རེ་རེ་ནས་རིམ་གྱིས་བསྒོམ་ཞེས་པའི་དོན་ཡིན་ཏེ། ལུས་དཀྱིལ་རྐྱང་པ་སྒོམ་པ་ལ་ནི་ཕྱི་དཀྱིལ་སྒོམ་པ་སྔོན་དུ་འགྲོ་དགོས་པ་རྡོ་རྗེ་མཁའ་འགྲོའི་དགོངས་པ་ཡིན་པའི་ཕྱིར་རོ། །ལྔ་པ་ནི། འོ་ན་གཙོ་བོ་དང་རྣལ་འབྱོར་མ་བཅུ་གཉིས་ས་བོན་
ལས་སྐྱེད་ན། གཞུང་ཆུང་ལས། སྟེང་འོག་ལུས་ཀྱི་ཆ་ཤས་ལ། །པཱུ་ཛ་ལ་སོགས་ཉི་ཤུ་བཞི། །འཁོར་ལོ་གསུམ་གྱི་བདག་ཉིད་དྲན། །ཞེས་བཤད་པས། བཾ་ལས་ཡུམ་དང༌། ལྷ་ཞེ་བརྒྱད་ཡི་གེ་ཉེར་བཞི་ལས་སྐྱེད་པར་རིགས་སོ་སྙམ་ན། ཡི་གེ་ཉེར་བཞི་
ལས་ནི་ཁུངས་ཐུབ་མང་པོས་ལུས་ཀྱི་གནས་ཀྱི་ཆ་ཉེར་བཞི་སྐྱེད་པར་བཤད་ཀྱི། ལྷའི་ས་བོན་དུ་བཤད་པ་མེད་པས་མི་འཐད་དོ། །ལྷ་གཞན་གྱི་རིགས་པ་བཀབ་ནས་ལྷ་ལྷག་མ་ཡི་གེ་ལས་སྐྱེད་ན་ཡང་མི་རུང་བ་ཙམ་མེད་དེ་གསང་འདུས་བཞིན་ནོ། །
གལ་ཏེ་སྐྱེད་ན་ནི་མངོན་བརྗོད་ལས་ཀ་ཅ་ཏ་པའི་སྡེ་ཚན་ལྔའི་ཡི་གེ་རེ་རེའི་མགོ་བོར་ཐིག་ལེས་བརྒྱན་པ་གསུངས་པའི་མཇུག་ཏུ། དེ་ཡིས་ཐོད་པའི་དུམ་སོགས་དང༌། གཏུམ་མིག་མ་ལ་སོགས་ཀུན་གྱི། །སྐུ་གསུང་ཐུགས་ཀྱི་འཁོར་ལོ་སྟེ། །ཞེས་གསུངས་
པ་ལྟར་ཀཾ་ནས་བྷཾ་གྱི་བར་ཉེར་བཞི་ཐོད་པའི་དུམ་བུ་སོགས་དཔའ་བོ་དང་དཔའ་མོ་ཟུང་ཉེར་བཞིའི་ས་བོན་དུ་བྱའོ། །ལེའུ་དེར་མ་ཡིག་སྨོས་པ་ནི་འགྲེལ་པས་ཐིག་ལེའི་དོན་དུ་བཤད་དེ། ལེའུ་ཉེར་དྲུག་པ་ལས་ཀྱང༌། ཀ་ལ་སོགས་པ་ཉི་ཤུ་བཞི། །མགོ་
9-5-129a


ལ་བིན་དུས་མནན་པ་སྟེ། །ཞེས་གསུངས་པ་དང་མཐུན་ལ། དེ་རྣམས་རེ་རེའི་མགོར་ཨོཾ་དང༌། མཐར་ཧཱུཾ་ཧཱུཾ་ཕཊ་སྦྱར་བ་སྔགས་སུ་ཡང་རྩ་འགྲེལ་ལས་གསུངས་ཤིང༌། མ་ནིང་གི་ཡི་གེ་བཞི་ལ་ཐིག་ལེ་སྦྱར་བ་བཞི་སྙིང་པོའི་
རྣལ་འབྱོར་མ་བཞིའི་ས་བོན་དང༌། མཐར་གནས་བཞི་ལ་ཐིག་ལེ་སྦྱར་བ་བཞི་སྒོ་མ་བཞི་དང༌། དྲོ་བ་བཞི་ཐིག་ལེ་སྦྱར་བ་བཞི་མཚམས་མ་བཞིའི་ས་བོན་དང༌། དེ་བརྒྱད་ལ་མགོ་བོ་དང༌། མཐར་ཨོཾ་ལ་སོགས་པ་སྦྱོར་ཚུལ་སྔར་བཞིན་བཤད་དོ། །འོན་
ཀྱང་སོ་སོའི་གཞུང་ནས་བཤད་པ་བཞིན་བྱས་ནའང་ལེགས་སོ། །གཉིས་པ་ལ་གསུམ། ལུས་དཀྱིལ་མཆོག་ཡིན་པའི་རྒྱུ་མཚན་བསྟན་བ་དང༌། གནས་སོགས་བཅུས་བཅུ་དང་སྦྱར་ཏེ་བཤད་པ་དང༌། གནས་རྣམས་སྐྱེད་ཚུལ་དང་དེར་ལྷ་གང་སྒོམ་པའི་
ཚུལ་ལོ། །དང་པོ་ནི། ཕྱོགས་མཐུན་བསྒོམ་པའི་རྗེས་དེ་ནས་དེ་ལས་གཞན་ཡང་ཡང་དག་པར་བཤད་པར་བྱའོ། །གང་ན་སྐུ་སྟེ་ལུས་ཀྱི་དཀྱིལ་འཁོར་རོ། །དེ་ཡང་ལུས་རྟེན་གྱི་དཀྱིལ་འཁོར་དུ་སྒོམ་པ་ནི་སཾ་བྷུ་ཊ་ནས་འབྱུང་བ་བཞིན་དྲིལ་བུ་ཞབས་
ཀྱིས་གསུངས་པས་ཁ་བསྐང་ལ། ལུས་བརྟེན་པའི་དཀྱིལ་འཁོར་དུ་སྒོམ་པ་ལ་བདེ་ཆེན་དང་དམ་ཚིག་གི་འཁོར་ལོའི་འཁོར་གྱི་ལྷ་རྣམས་སྒོམ་པ་ནི་འགྲེལ་པ་རྣམས་ཀྱིས་ཁ་བསྐངས་ཤིང༌། གཙོ་བོ་ཡབ་ཡུམ་ནི་སཾ་བྷུ་ཊ་དང་དཔྱིད་ཐིག་གིས་
ཁ་བསྐངས་ནས་བཤད་དགོས་ཏེ་རྒྱས་པར་བཤད་ཟིན་ལ་ལྷག་མ་ནི་འདིར་འཆད་དོ། །དམ་པ་སྟེ་ཞེས་པ་ནི་དྲིལ་བུ་པས། འོན་ཀྱང་དཀྱིལ་འཁོར་དེའི་རང་བཞིན། །ཅི་ཡིན་ད་ནི་འདི་ལྟར་བཤད། རི་མོར་གནས་པའི་ལས་དང་ནི། །ཐིག་ལས་ཚོན་
9-5-129b


དགྱེའི་རིམ་པས་བསྟན། །འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །བཅོས་མ་གཉིས་ཀྱི་ངོ་བོ་གང༌། །དེ་ནི་གདུལ་བྱའི་དབང་ལས་འདོད། །མཁས་པའི་བསྒྲུབ་བྱ་དེ་མིན་ཏེ། །ཡང་དག་དོན་མཐོང་གྲོལ་ཕྱིར་རོ། །ཞེས་
བྲིས་སྐུ་དང་རྡུལ་ཚོན་ལས་དཀྱིལ་འཁོར་སྒྲུབ་པ་ལས། ལུས་ལས་དཀྱིལ་འཁོར་སྒྲུབ་པ་མཆོག་ཏུ་གསུངས་པ་ལྟར་ཡིན་ལ། བཅོས་པ་ནི་སྒྲུབ་གཞི་ཕྱག་མཚན་སོགས་འདྲི་མཁན་གྱིས་གསར་དུ་སྒྲུབ་དགོས་པའི་དོན་ཏེ། ལུས་ཆགས་དུས་ནས་
མ་གྲུབ་པའོ། །མ་བཅོས་པ་ནི་སྒྲུབ་གཞི་རྩ་དང་ཁམས་རྣམས་ལུས་ཆགས་ཙམ་ནས་གྲུབ་པས་རང་བཞིན་གྱིས་གྲུབ་པ་ཞེས་གསུངས་ཀྱི། མ་བཅོས་པ་རྫོགས་རིམ་ལ་གསུངས་པ་ལྟ་བུར་ནི་མི་བྱའོ། །ལམ་གྱི་སྐབས་སུ་ཡང་དཀྱིལ་འཁོར་གཞན་
གཉིས་ལ་གནད་དུ་བསྣུན་པ་ལས་མི་གྲོལ་གྱི། ལུས་ཀྱི་རྩ་དང་ཁམས་ལ་གནད་དུ་བསྣུན་པ་ལ་ལས་ཡང་དག་པའི་དོན་མཐོང་ནས་གྲོལ་བར་འགྱུར་བའི་ཕྱིར་ལུས་དཀྱིལ་མཆོག་ཡིན་ནོ། །ཞེས་པའི་དོན་ནོ། །དེས་ན་སྤྱིར་ལུས་དཀྱིལ་ཚང་མ་སྒོམ་པ་ནི། 
ཕྱི་དཀྱིལ་ཙམ་སྒོམ་པ་ལས་མཆོག་དང༌། ཁྱད་པར་དུ་སྔར་བཤད་པ་འདྲ་བའི་ལོ་ནག་དྲིལ་གསུམ་གྱི་ལུས་དཀྱིལ་སྒོམ་པ་ནི། རྒྱུད་གཞན་གྱི་ལུས་དཀྱིལ་དང༌། བདེ་མཆོག་གི་ལུས་དཀྱིལ་གཞན་ལས་མཆོག་ཏུ་གྱུར་པའོ། །འོ་ན་ལུས་དཀྱིལ་
ཐུན་མོང་མ་ཡིན་པ་འདི་བསྒོམས་པས་རྫོགས་རིམ་གྱི་རྟོགས་པ་སྐྱེ་བ་ལ་རྒྱུད་སྨིན་བྱེད་ཁྱད་པར་ཅན་དུ་འགྱུར་བ་ཅིག་མེད་ན་དེ་གཞན་ལས་མཆོག་ཏུ་བཤད་པ་ནི། དད་པར་བྱ་བ་ཙམ་དུ་འགྱུར་བས་དེ་སྟོན་ཅིག་ཅེ་ན། དེ་ནི་བདེན་ཏེ་ཤིན་ཏུ་དཀའ་
9-5-130a


བ་འདི་བཤད་པར་བྱའོ། དེ་ཡང་བཤད་རྒྱུད་རྡོ་རྗེ་འཕྲེང་བ་འདི་ཕ་རྒྱུད་མ་རྒྱུད་གཉིས་ཀའི་ཐུན་མོང་གི་བཤད་རྒྱུད་དུ་འགྲེལ་པས་འཆད་པ་ལྟར་ཡིན་ཞིང༌། མ་རྒྱུད་ཀྱང་བདེ་མཆོག་གཙོ་བོར་སྟོན་པ་
ཡིན་ལ། དེར། རིམ་བཞིན་རྒྱ་ཆེན་རྒྱུད་ལས་ནི། །ལུས་ཀྱི་གནས་ཀྱི་དབྱེ་བ་ཡིས། །དེ་ནི་ཉི་ཤུ་རྩ་བཞིར་བརྗོད། །ཐིམ་དང་ལོངས་སྤྱོད་བདག་པོ་ཉིད། །གྲངས་ནི་བདུན་ཅུ་རྩ་གཉིས་བརྗོད། །རེ་རེའང་འཁོར་ནི་སྟོང་སྟོང་ངོ༌། །ཞེས་གསུངས་
པའི་རྒྱ་ཆེན་རྒྱུད་ནི། ནམ་མཁའ་དང་མཉམ་པའི་རྒྱུད་དམ་རྡོར་ཕྲེང་གི་རྒྱུད་རྒྱས་པ་གདམ་ང་ཅན་དུ་འགྲེལ་པར་བཤད་ཀྱང༌། ལེའུ་དེ་ཉིད་ལས། རྣལ་འབྱོར་མ་ཡི་རྒྱུད་ལས་ཤེས། །ཞེས་གསུངས་པས་ནམ་མཁའ་དང་མཉམ་པའི་བདེ་
མཆོག་གི་རྒྱུད་དོ། །རྩ་རྣམས་རིམ་གྱིས་སྤྲོ་ཚུལ་ནི། དེ་ཉིད་ལས། ལ་ལ་ན་དང་ར་ས་ན། །ཨ་བ་དྷཱུ་ཏཱི་ཞེས་བྱའི་མིང༌། །དེ་རྣམས་སྤྲོ་བའི་སྦྱོར་བ་ཡིས། །རིམ་གྱིས་ཐུན་ནི་བརྒྱད་དུ་འགྱུར། །གསུམ་པོ་ཉི་ཤུ་རྩ་བཞིར་འགྲོ། །ཞེས་རྩ་འཆགས་པའི་
དུས་སུ་རྩའི་གཙོ་མོ་གསུམ་ལས་ཐུན་ཚོད་བརྒྱད་ཀྱི་རྩ་ཞེས་པ། སྙིང་ཁའི་རྩ་འདབ་བརྒྱད་དུ་འགྱུར་བར་བཤད། དེ་ཉིད་ལས། དེ་ལས་འཁོར་ལོ་གསུམ་དབྱེ་བས། །རྩ་ནི་བརྒྱད་ཀྱི་དབྱེ་བ་ལས། །སྐུ་གསུང་ཐུགས་ཀྱི་སྔགས་ཀྱིས་ནི། །གསུམ་
ཕྱེ་བདུན་ཅུ་རྩ་གཉིས་གསལ། །དེ་ནི་སྟོང་དུ་རབ་ཕྱེ་བའང༌། །སོ་སོར་འཕྲོས་པའི་བདག་ཉིད་ཅན། །སྟོང་ཕྲག་བདུན་ཅུ་རྩ་གཉིས་ཀྱིས། །རྩ་རྣམས་ཀྱི་ནི་གྲངས་ཤེས་བྱ། །ཞེས་སྙིང་ཁའི་རྩ་བརྒྱད་ལས་འཁོར་ལོ་གསུམ་གྱི་རྩ་གསུམ་གསུམ་དུ་
9-5-130b


ཕྱེ་པས་ཉེར་བཞིར་འགྲོ། དེ་རེ་རེ་ལ་སླར་ཡང་སྐུ་གསུང་ཐུགས་ཀྱི་རྩ་གསུམ་གསུམ་དུ་ཕྱེ་བས། དོན་གཉིས་དང་དེ་རེ་རེ་ལས་སྟོང་ཕྲག་རེ་གྱེས་པས་རྩ་བདུན་ཁྲི་ཉིས་སྟོང་དུ་འགྱུར་བར་གསུངས་སོ། །གསུམ་པོ་ཉེར་བཞིར་འགྲོ་བ་ནི་བརྒྱུད་ནས་ཡིན་
ནོ། །རྒྱུད་དེར་རྩ་སྟོང་ཕྲག་དོན་གཉིས་ལ་སྟོང་ཕྲག་ཉེར་བཞི་པ་ཚན་པ་གསུམ་དུ་བྱས་ནས། །གཅིག་ནས་བྱང་སེམས་དཀར་པོ་དང༌། །གཅིག་ནས་ཁྲག་དང༌། །གཅིག་ནས་རླུང་འབབ་པར་གསུངས་ཤིང༌། །གཙོ་བོ་ཡང་ནི་བསྡུས་པ་ལས། །གནས་རྣམས་
ཀྱི་ནི་གྲངས་སུ་འགྱུར། །ཞེས་དེ་རྣམས་ཀྱི་གཙོ་བོ་བསྡུས་པས། ཡུལ་ཉེར་བཞིའི་རྩར་བཤད་པས། བྱང་སེམས་དཀར་པོ་རྒྱུ་བའི་རྩ་བརྒྱད་ནི། སྐུ་དང༌། ཁྲག་འབབ་པ་བརྒྱད་ནི་གསུང་དང༌། སེམས་བཞོན་པ་རླུང་དང་བཅས་པ་འབབ་པ་
ནི་ཐུགས་ཀྱི་རྩ་ཞེས་བྱ་སྟེ། སཾ་བྷུ་ཊ་ལས་སྙིང་སྟོབས་ལུས་ཏེ་རྡུལ་ནི་ངག །མུན་པ་སེམས་ཀྱི་རང་བཞིན་ལས། །ཞེས་སྙིང་སྟོབས་ཁུ་བ་ལུས་སམ་སྐུ་དང༌། རྡུལ་ཁྲག་ནི་ངག་དང༌། མུན་པ་སེམས་སུ་བཤད་པས། དེ་དག་རྒྱུ་བའི་རྩ་
ལ་ཡང་སྐུ་གསུང་ཐུགས་ཞེས་བྱའོ། །ཡང་དེར་རྩའི་འཁོར་ལོ་སྡོམ་པ་འམ་སྡུད་པ་གསུངས་པ་ནི། རྩ་བདུན་ཁྲི་ཉིས་སྟོང་གནས་ཉེར་བཞིའི་རྩར་སྡུད་པར་གསུངས་ཏེ། འདི་ལ་སྟོང་ཕྲག་རེ་རེ་རང་རང་གི་གྱེས་གཞིའི་རྩ་རེ་རེ་ལ་འདུས་
པ་ན། རྩ་དོན་གཉིས་སུ་འདུས། དེའི་རྩ་གསུམ་གསུམ་རང་རང་གི་གྱེས་གཞིའི་རྩ་རེ་རེ་ལ་འདུས་པ་ན་ཉེར་བཞིར་འདུའོ། །དེ་ནས་སྡོམ་ཚུལ་ཡང་དེ་ཉིད་ལས། སླར་ཡང་བསྡུས་ནས་འགྲོ་བ་ནི། །གསུམ་དང་རྣམ་བརྒྱད་དབྱེ་བ་ཡིས། །
9-5-131a


ཐུན་ཚོད་སྐད་ཅིག་སྦྱོར་བ་ཡིས། །རྩ་རྣམས་གོང་ནས་གོང་དུ་ནི། །ནང་དུ་འགྲོ་བར་ཤེས་པར་བྱ། །ཞེས་ཉེར་བཞི་པོའི་གསུམ་གསུམ་རང་རང་གི་གྱེས་གཞི་ཉིན་མཚན་རེ་རེ་ལ་ཐུན་ཚོད་བཞི་བཞིར་ཕྱེ་བའི་ཐུན་བརྒྱད་
ཀྱི་རྩ་ལ་འདུས། དེ་གཙོ་བོ་གསུམ་ལ་འདུས་བར་གསུངས་ནས། གཙོ་བོ་གསུམ་པོ་སླར་ཡང་ནི། །སྦྱོར་བས་གཅིག་པ་ཉིད་དུ་འགྲོ། ཞེས་རོ་རྐྱང་གཉིས་དྷཱུ་ཏཱི་ལ་སྦྱོར་བས་གཅིག་ཏུ་འགྲོ་བར་བཤད་པ་ནི། རྫོགས་རིམ་བསྒོམས་པའི་སྟོབས་
ཀྱིས་ཐོག་མར་མིག་ལ་སོགས་པའི་སྒོ་དགུ་དང༌། སྨིན་མཚམས་དང་ལྟེ་བ་ནས་རླུང་ནང་དུ་ལྡོག་གོ། དེ་ནས་རྩ་དོན་གཉིས་སུ་འདུས་པ་ནས་མཐར་སྙིང་ཁའི་དྷཱུ་ཏཱིར་རོ་རྐྱང་གི་རླུང་བསྡུས་ནས་ལྷན་སྐྱེས་མཆོག་ཏུ་གྱུར་བ་སྐྱེ་བར་གསུངས་སོ། དེ་ལ་ནི་མིག་ལ་
སོགས་པའི་སྒོར་གནས་པའི་རྩ་རྣམས་སྒོ་མཚམས་མ་བརྒྱད་དུ་བསྐྱེད་པ་དང༌། ཡུལ་ཉེར་བཞིའི་རྩ་དང་དེ་ནས་རྒྱུ་བའི་ཁམས་རྣམས་དཔའ་བོ་དང་དཔའ་མོར་བསྐྱེད་པ་དང༌། སྙིང་ཁའི་འདབ་མའི་རྩ་བརྒྱད་རྣལ་འབྱོར་མ་བཞི་དང༌། ཐོད་པ་བཞིར་བསྐྱེད་ནས་
བསྒོམ་པས། ད་གཟོད་སྔར་བཤད་པ་ལྟར་གྱི་རྫོགས་རིམ་སྐྱེ་བའི་རྒྱུད་སྨིན་བྱེད་དུ་འགྲོའོ། །སྙིང་ཁའི་འཁོར་ལོའི་དབུས་ཀྱི་དྷཱུ་ཏཱིའི་ནང་གི་བྱང་སེམས་མཚོན་པའི་ཧཱུཾ་ཡིག་ལས་གཙོ་བོ་དང༌། ལྟེ་བའི་དམར་ཆ་ལས་གཙོ་མོ་བསྐྱེད་པ་གཉིས་ཞལ་
སྦྱོར་དུ་བསྒོམས་པས་ནི། རོ་རྐྱང་གི་རླུང་དྷཱུ་ཏཱིར་ཚུད་ནས་ལྟེ་བའི་གཏུམ་མོ་འབར་ཏེ་སྙིང་ཁར་སླེབ། དེའི་རྐྱེན་གྱི་སྤྱི་བོའི་བྱང་སེམས་ཞུ་བ་ཡང་སྙིང་ཁར་སླེབ་ནས་དེར་དཔྱིད་དང་ཐིག་ལེ་སྙོམས་པར་ཞུགས་པས། དྲིལ་བུ་ཞབས་ཀྱི་རིམ་པ་དང་
9-5-131b


པོ་ནས་བཤད་པ་ལྟར། །རྨོངས་བའི་རབ་རིབ་རྩ་ནས་གཅོད་པའི་ངེས་དོན་གྱི་ཧེ་རུ་ཀ། ལྷན་ཅིག་སྐྱེས་པའི་ཡེ་ཤེས་འོད་གསལ་མངོན་པར་བྱང་ཆུབ་པའི་རིམ་པ་ལ་སོགས་པ་སྐྱེ་བའི་ཐབས་ཁྱད་པར་ཅན་དུ་འགྱུར་བ་ཡིན་ནོ། །གཙོ་མོ་ཡང་རྩ་ནང་
གི་ཁམས་ལས་སྐྱེད་པ་དང༌། སྔར་བཤད་པ་ལྟར་དཔའ་མོ་ཉེར་བཞི་ཡང་ལུས་ཀྱི་ཁམས་ལ་བཤད་པ་འདི་རྣམས་ལ་བརྟེན་ནས་ལུས་དཀྱིལ་གྱི་ལྷ་གང་བསྐྱེད་ཀྱང་རྩ་དང་ཁམས་གཉིས་ངོ་བོ་དབྱེར་མེད་དུ་བྱས་ནས་སྐྱེད་པ་དང༌། མཐར་ལྷ་སྡུད་
པ་ན་ཕྱི་དཀྱིལ་ལ་བཤད་པའི་རིགས་པ་སྦྱར་ན་ཤིན་ཏུ་ལེགས་པར་མཐོང་ངོ༌། །གཞུང་ཆུང་ལས། ལྷ་རྣམས་རང་གནས་ཐིམ་བྱ་སྟེ། །ཞེས་འབྱུང་བ་ནི་གནས་དེ་དང་དེའི་རྩ་དང་ཁམས་ལ་ཐིམ་ནས་རྩ་དང་ཁམས་ཀྱི་ངོ་བོར་གནས་པར་བསམས་
པས། རྩ་དང་ཁམས་བྱིན་གྱིས་རློབ་པ་ཡིན་ལ། དེ་དང་སྔ་མ་གཉིས་སྦེལ་མར་བྱའོ། །དེ་ལྟར་བྱས་ན་གཞུང་ཆུང་ལས། དཔལ་ལྡན་འཁོར་ལོ་སྡོམ་པ་ཡི། །རྣལ་འབྱོར་ལུས་ཀྱི་དཀྱིལ་འཁོར་ནི། །སེམས་ཅན་རང་བཞིན་ཡོངས་ཤེས་ཤིང༌། 
རྫོགས་པའི་ལམ་ལ་འཇུག་རྣམས་ལའོ། །ཞེས་བཤད་པ་ཡང་ལེགས་པར་དྲངས་པར་འགྱུར་རོ། །འདི་ནི་ལོ་ནག་དྲིལ་གསུམ་གྱི་མན་ངག་བླ་མ་རྣམས་ལས་བརྒྱུད་པ་ལ་གཞི་བྱས་ནས་རྩ་བཤད་ཀྱི་རྒྱུད་དང་ཁུངས་ཐུབ་ཀྱི་གཞུང་
འགྲེལ་རྣམས་ལ་ལེགས་པར་གཏུགས་ཏེ། མཐའ་ཆོད་པར་བཤད་པའི་བདེ་མཆོག་པའི་ཁྱད་ཆོས་ཆེན་མོ་ཞིག་ཡིན་པ་ཤེས་པར་གྱིས་ཤིག །ཐབས་རྒྱུད་རྡོར་ཕྲེང་གིས་མ་རྒྱུད་ཀྱི་གནད་མང་པོ་འཆད་པ་དང༌། ཤེས་རབ་ཀྱི་
9-5-132a


རྒྱུད་དཔའ་སྡོམ་པ་འབྱུང་བ་དང༌། རྡོ་རྗེ་གུར་གྱིས་ཕ་རྒྱུད་ཀྱི་གནད་མང་པོ་འཆད་མོད་ཀྱང༌། དེ་ལ་རྟོག་པ་ཞུགས་པ་ཉུང་བར་སྣང་ངོ༌། །གཞན་ཡང་སྤྱི་བོ་ལ་སོགས་པའི་གནས་ཉེར་བཞི་ཕྱིའི་གནས་ཉེར་བཞིར་
བསྐྱེད་པའི་མོས་པ་བརྟན་པོ་བྱས་ནས། དེར་བསྐྱེད་པའི་ལྷ་ཞེ་བརྒྱད་ལ་ཕྱིའི་ཡུལ་ན་བཞུགས་པའི་དཔའ་བོ་དང༌། དཔའ་མོ་དངོས་ཡིན་བའི་མོས་པ་དྲག་པོ་ཡང་ཡང་སྦྱངས་ཏེ་བསྒོམས་པ་ན་ཡུལ་དེ་དག་ན་བཞུགས་པའི་དཔའ་བོ་དང་
དཔའ་མོས་བྱིན་གྱིས་རློབ་པ་ཆེས་ཤིན་ཏུ་མྱུར་བ་ཡིན་ཏེ། རྩ་བའི་རྒྱུད་ལས། ཛཱ་ལན་དྷ་ར་པུ་ལླི་སོགས། །ཡུལ་འདི་དག་གི་བུ་མོ་གང༌། །དཔའ་བོ་གཉིས་མེད་རྣལ་འབྱོར་མ། །དེ་ཀུན་འདོད་པའི་གཟུགས་ཅན་ཏེ། །ཡིད་ཀྱི་ཤུགས་ཀྱིས་འཇུག་པ་
ཡིན། །ཞེས་ཡིད་ལྟར་མགྱོགས་པའི་ཤུགས་ཀྱིས་གདུལ་བྱ་བྱིན་གྱིས་རློབ་བ་ལ་འཇུག་པར་གསུངས་ལ། དེའི་དོན་ཡང་འདིའི་བཤད་རྒྱུད་རྡོ་རྗེ་མཁའ་འགྲོ་ལས། ཡུལ་འདི་རྣམས་ཀྱི་བུ་མོ་གང༌། རྩ་ཡི་གཟུགས་ཀྱི་གནས་སོ། །ཞེས་
གནས་ཉེར་བཞིར་རྩའི་ངོ་བོར་བསྒོམ་པར་གསུངས་པས་དེ་ལྟར་དུ་སྒོམ་པས་ཡིད་ལ་འཇུག་པ་ཡིན་ནོ། །དེ་རྣམས་ཀྱིས་བྱིན་གྱིས་བརླབས་པ་ན་དེ་དག་གི་རིགས་ཀྱི་ཕོ་ཉ་མོ་ནི། ཡུལ་ཉེར་བཞིར་མ་ཟད་ཡུལ་གཞན་མང་པོར་ཡང་གནས་
པར་གསུངས་པས་སྔགས་སྐྱེས་ཀྱི་རྣལ་འབྱོར་མ་ཁྱད་པར་ཅན་དང་འདུ་བ་དང་པོར་རྙེད་ཅིང༌། །དེ་ནས་སྔགས་སྐྱེས་ཀྱི་མཐུ་ལ་བརྟེན་ནས་ཞིང་སྐྱེས་དང་ཡང་འདུ་བརྙེད་ལ། དེ་ལ་བརྟེན་ནས་ལྷན་སྐྱེས་བསྐུལ་ནུས་པས་དེས་གྲོགས་མཛད་
9-5-132b


པ་དང༌། རྫོགས་རིམ་པའི་སྤྱོད་པ་བྱེད་པ་ན་གྲུབ་པའི་གནས་ཁྱད་པར་ཅན་རྣམས་སུ་བགྲོད་དགོས་ལ། དེར་བགྲོད་པ་དང་བགྲོད་ནས་གྲོགས་ཁྱད་པར་ཅན་དང་འདུ་བའི་རྒྱུར་ཡང༌། དཀྱིལ་འཁོར་གྱི་འཁོར་ལོའི་རྩིབས་ལ་ཡུལ་ཉེར་བཞིར་མོས་ནས་
དེར་ལྷ་སྒོམ་པ་དང༌། ཁྱད་པར་དུ་ལུས་ལ་དེ་ལྟར་སྒོམ་པ་གཞན་ནས་བསྔགས་ཏེ་འདི་རྣམས་ཀྱང་བདེ་མཆོག་པའི་ཁྱད་ཆོས་སུ་ཤེས་པར་བྱའོ། །ཁྱད་ཆོས་ཅིག་བཤད་པར་འདོད་ནས་ལྟར་སྣང་གི་སྒྲུབ་བྱེད་ལ་ནན་ཏན་བསྐྱེད་པར་མི་བྱའོ། །
གཉིས་པ་ནི། དེ་རྣམས་ཀྱིས་ནི་རྣལ་འབྱོར་དབང་ཕྱུག་གིས། སྐུ་ཡི་དཀྱིལ་འཁོར་དམ་པ་སྟེ། །ཞེས་གསུངས་པའི་གསུང་ནུས་པ་ཅན་དུ་བསྟན་ནས། ད་ནི་སྐུའི་དཀྱིལ་འཁོར་འཆད་ཚུལ་སྟོན་པ་ནི། གནས་ཞེས་སོགས་ཏེ་གནས་དང་སོགས་ཀྱིས་
བསྡུས་པ་ཉེ་བའི་གནས་ནས་དུར་ཁྲོད་དང་ཉེ་བའི་དུར་ཁྲོད་ཀྱི་བར་བཅུ་དང༌། རབ་དགའ་སོགས་ཡོངས་སུ་དག་པའི་ས་བཅུ་རིམ་པ་བཞིན་སྦྱོར་བས། དཔའ་མོ་ཉེར་བཞིའི་ལུས་དཀྱིལ་བཤད་པར་བྱའོ། འདིར་གནས་ལ་སོགས་པའི་ཐ་སྙད་
དོན་གང་ལ་སྦྱར་བ་དང༌། དེ་ལྟར་མིང་འདོགས་པའི་རྒྱུ་མཚན་བསྟན་པ་གཉིས་ཀྱི་དང་པོའི་དབང་དུ་བྱས་ནས་ཕྱིའི་ཡུལ་འཛམ་བུའི་གླིང་གི་གྲུབ་པའི་གནས་ཡུལ་ཉེར་བཞི་གནས་ལ་སོགས་པར་གསུངས་པ་དང༌། ནང་ལ་སྦྱར་ན་ཕྱི་དཀྱིལ་གྱི་
འཁོར་ལོའི་རྩིབས་ཉེར་བཞི་དང༌། ནང་གི་ལུས་ཀྱི་ཆ་ཉེར་བཞི་ཡང་གནས་ལ་སོགས་པར་བཤད་པ་ནི་རྟེན་གྱི་དབང་དུ་བྱས་པ་སྟེ་བདེ་མཆོག་གི་སྐོར་ནས་ཤིན་ཏུ་མང་ངོ༌། །བརྟེན་པའི་དབང་དུ་བྱས་ན་ཕྱིའི་ཡུལ་ཉེར་བཞིན་བཞུགས་པའི་ལྷ་
9-5-133a


དང་ལྷ་མོ་ཞེ་བརྒྱད་དང༌། ནང་ལ་སྦྱར་ན་ཕྱི་དགྱིལ་གྱི་ལྷ་ཞེ་བརྒྱད་དང༌། ལུས་དཀྱིལ་གྱི་ལྷ་ཞེ་བརྒྱད་ལ་ཡང་གནས་ལ་སོགས་པར་བཤད་དོ། །ས་ལམ་གྱི་དབང་དུ་བྱས་ན། རྩ་བའི་རྒྱུད་ལས། དེ་ནས་གཞན་ཡང་བཤད་
བྱ་བ། །རྣལ་འབྱོར་མ་ཡི་ས་དང་གནས། །ཞེས་མཚམས་སྦྱར་ནས། །གནས་ནི་རབ་ཏུ་དགའ་བའི་ས། །དེ་བཞིན་ཉེ་གནས་དྲི་མ་མེད། །ཞིང་འདིར་འོད་བྱེད་ཤེས་པར་བྱ། །ཉེ་བའི་ཞིང་ནི་འོད་འཕྲོ་བ། །ཚནྡོ་ཧ་ནི་སྦྱང་དཀའ་བ། །ཉེ་བའི་ཚ་ནྡོ་མངོན་གྱུར་ཉིད། །འདུ་བ་
རིང་དུ་སོང་བ་ཡིན། །ཉེ་བར་འདུ་བ་མི་གཡོ་བ། །དུར་ཁྲོད་ལེགས་པའི་བློ་གྲོས་ཉིད། །ཉེ་བའི་དུར་ཁྲོད་ཆོས་ཀྱི་སྤྲིན། །ཤྲཱི་ཧེ་རུ་ཀ་གཞུང་དུ་སྤྱོད། །འདི་ནི་ནང་གི་བདག་ཅན་ས། །ཕ་རོལ་ཕྱིན་བཅུ་ས་རྣམས་ནི། །རྣལ་འབྱོར་མ་ཡི་བརྡ་ཡི་སྐད། །ཅེས་གསུངས་ལ། 
ས་བཅུ་ལ་གནས་ལ་སོགས་པའི་མིང་བཏགས་པ་ནི། རྣལ་འབྱོར་མའི་བརྡའི་སྐད་ཡིན་པར་བསྟན་ནོ། །དཔའ་བོའི་བརྡའི་སྐད་ཅེས་པ་ཡང་དེ་འདྲ་བའི་ཐ་སྙད་རྣམས་ལ་ཟེར་ལ། ཀླ་ཀློའི་སྐད་ཅེས་པ་ཡང་བརྡའི་སྐད་དུ་མན་སྙེར་བཤད་པས་དེ་རྣམས་དོན་འདྲའོ། 
དོན་ནི་འཇིག་རྟེན་པ་དང་སྒྲ་པ་ངང་བསྟན་བཅོས་གཞན་ལས་དོན་དེ་རྣམས་ལ་བརྡ་དེ་འཇུག་པར་མ་གྲགས་ལ། དེ་བཞིན་གཤེགས་པས་དོན་དེ་རྣམས་དགོངས་གཞིར་བྱས་ནས་བརྡ་མཛད་པ་ལ་ཟེར་རོ། སཾ་བྷུ་ཊ་འབྲོག་འགྱུར་ལས། བདུན་རྟོག་མངོན་
གྱུར་ས་དྲུག་པ་དང༌། ཉེ་བའི་འདུན་རྟོག་ལྔ་པར་བྱས་ཀྱང༌། མན་སྙེ་དབང་འགྱུར་ལས། རྩ་རྒྱུད་དང་མཐུན་པར་བསྒྱུར་བ་ལེགས་ཏེ། །འགྲེལ་པར་ཡང་དེ་བཞིན་དུ་བཤད་པའི་ཕྱིར་རོ། །བར་གྱིས་བཅུ་དངོས་སུ་སྨོས་པས་དེ་རྣམས་ཀྱི་རྒྱུ་མོས་སྤྱོད་
9-5-133b


ཀྱི་ས་དང༌། འབྲས་བུ་ཀུན་ཏུ་འོད་ཀྱི་ས་ཡང་ཤུགས་ཀྱིས་ཤེས་པ་དང༌། རྒྱུད་གཞན་དུ་འཐུང་གཅོད་ཅེས་པས་མོས་སྤྱོད་དང༌། ཉེ་པའི་འཐུང་གཅོད་ཀྱིས་ཀུན་ཏུ་འོད་བསྟན་པར་མན་སྙེ་ལས་གསུངས་ཏེ། ཀྱཻ་རྡོར་ལས་ས་བཅུ་གཉིས་སུ་གསུངས་པའི་
དོན་ཡང་དེར་མུ་ཏིག་འཕྲེང་བར་བཤད་དོ། །མངོན་བརྗོད་ལས་རབ་དགའ་སོགས་བཅུའི་སྟེང་དུ་དཔེ་མེད་དང་ཡེ་ཤེས་ལྡན་ཏེ་བཅུ་གཉིས་དང༌། རྡོ་རྗེའི་ས་བཅུ་གསུམ་པར་གསུངས་པའི་ཆོས་ཀྱི་སྤྲིན་བཅུ་པ་ཙམ་དང༌། དཔེ་མེད་ནི་བཅུ་པའི་ཁྱད་པར་གྱི་ལམ་
དང༌། ཡེ་ཤེས་ལྡན་ནི་བར་ཆད་མེད་ལམ་དུ་བཤད་པས་བཅུ་གསུམ་པོ་ས་བཅུ་གཅིག་ཏུ་འདུས་སོ། །འདིར་མན་སྙེ་ལས། གདུལ་བྱ་ལྔ་ལས་དབང་པོ་རྟུལ་པོའི་དོན་དུ་ཕྱི་རོལ་གྱི་གནས་ལ་སོགས་པར་བསྟན་པའི་ཤེས་བྱེད་དུ་དྲི་མ་མེད་པའི་འོད་
དུ་གསུངས་པ་འདིར་ཐུན་མོང་དུ་བྱིས་པོ་རྣམས་ཡུལ་དུ་འཁྱམས་པའི་དོན་དུ་ཛཱ་ལན་དྷ་ར་ལ་སོགས་པས་གནས་ལ་སོགས་པར་གསུངས་ཤིང་། དེ་ཡང་ཐམས་ཅད་ལ་ཁྱབ་པར་བྱེད་པར་མི་འགྱུར་རོ། །བྲམ་ཟེ་དང་རྒྱལ་རིགས་དང་རྗེ་རིགས་
དང་དམངས་རིགས་མཐའི་རིགས་རྣམས་སུ་སྐྱེས་པའི་རྡོ་རྗེ་རྣལ་འབྱོར་མ་རྣམས་ནི། གྲོང་ཁྱེར་གཅིག་ན་ཡང་གནས་པའི་ཕྱིར་ན་བོད་དང་རྒྱལ་ནག་ལ་སོགས་པའི་ཡུལ་རྣམས་ན་ཡང་གནས་ལ་སོགས་པ་རྣམས་ཡོད་དོ། །དེ་རྣམས་ནི་
བསྡུས་པའི་རྒྱུད་གཞན་དུ་མ་བསྟན་པ་རྣམས་སོ། རྒྱས་པའི་རྒྱུད་གཞན་དུ་ནི་ཡུལ་ཐམས་ཅད་དང༌། གྲོང་ཁྱེར་ཐམས་ཅད་དུ་གནས་ལ་སོགས་པ་རྣམས་གསུངས་སོ། །ཞེས་དྲངས་སོ། །དབང་པོ་འབྲིང་གི་དོན་དུ་དཀྱིལ་འཁོར་གྱི་འཁོར་ལོ་གསུམ་གྱི་རྩིབས་
9-5-134a


ལ་གནས་ལ་སོགས་པར་བཞག་པ་དང༌། གདུལ་བྱ་ཆེན་པོ་ལ་གསུམ་དུ་བྱས་པའི་ཆུང་ངུའི་དོན་དུ་ནང་གི་ལུས་ཀྱི་གནས་ཉེར་བཞི་ལ་གནས་ལ་སོགས་པར་བཞག་པ་དང༌། འབྲིང་གི་དོན་དུ་རྫོགས་རིམ་པས་ས་
བོན་གྱི་ཡི་གེ་སོགས་ལ་མི་ལྟོས་པར་སྤྱི་བོ་སོགས་གནས་ལ་སོགས་བར་དང༌། རྩ་རྣམས་ལྷ་མོར་མོས་པར་བྱེད་པ་དང༌། ཆེན་པོ་རྫོགས་རིམ་ལ་གནས་པའི་དབང་དུ་བྱས་ནས་སྟོང་ཉིད་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་རབ་དགའ་སོགས་ལ་
གནས་ལ་སོགས་པར་བཞག་པ་སྟེ་ལྔ་དང༌། ཐ་མ་ནི་ངེས་པའི་དོན་དང༌། དང་པོ་བཞི་ནི་ལྔ་པ་ལ་ལྟོས་ན་དྲང་བའི་དོན་ཏེ། རབ་དགའ་སོགས་གནས་ལ་སོགས་པར་བཞག་པའི་ས་དེ་དང་དེར་མོས་པ་ལས་འཇིག་རྟེན་ལས་འདས་པའི་ས་རྣམས་
གསལ་བའི་ཆེད་དུ་འབད་པར་གྱུར་ན་ཅི་མ་རུག་སྙམ་དུ་དགོངས་པའོ་ཞེས་འཆད་དོ། །ལྷ་དང་དཀྱིལ་འཁོར་གྱི་ནང་གི་གནས་དང་མགུལ་རྒྱན་ལ་སོགས་པ་རྣམས་ལ་བདེ་སྟོང་དབྱེར་མེད་ཀྱི་བྱང་ཆུབ་ཀྱི་སེམས་ཀྱི་ངོ་བོར་གྱུར་པའི་ཕྱིན་དྲུག་དང༌། ཆོས་སོ་བདུན་དང༌། ས་བཅུའི་ངོ་
བོར་མོས་ནས་དེ་གོམས་སྟོབས་ཀྱིས་ཇི་ལྟར་མོས་པ་བཞིན་དུ་མངོན་དུ་འགྱུར་བར་ཤེལ་སྒོང་རས་སྔོ་སེར་སོགས་ཀྱི་སྟེང་དུ་བཞག་པ་བཞིན་དུ་འགྱུར་བར་གསུངས་ཏེ། ཀུན་སྤྱོད་ལས། དེ་ནས་ཕ་རོལ་ཕྱིན་དྲུག་དང༌། །བྱང་ཆུབ་ཕྱོགས་ནི་སུམ་ཅུ་བདུན། །གནས་
སོགས་ས་ནི་བཅུ་པོ་རྣམས། །ཆེ་མཆོག་ལྷ་ཡི་བདག་ཉིད་ཅན། །བསམ་པ་གང་དང་གང་གིས་ནི། །མི་རྣམས་ཡིད་ནི་ཡང་དག་སྦྱོར། །དེ་དང་དེ་ཡི་དངོས་གྱུར་ཏེ། །སྣ་ཚོགས་གཟུགས་ཅན་ནོར་བུ་འདྲ། །ཞེས་གསུངས་ཏེ་འདི་གལ་ཆེའོ། །དྲང་
9-5-134b


ངེས་ཀྱི་ཚུལ་གོང་ལྟར་ཡིན་པའི་ཤེས་བྱེད་དུ། མངོན་བརྗོད་ལས། མཁའ་འགྲོ་མ་ཀུན་འདི་ཉིད་དུ། །ཐུགས་རྗེ་ལྡན་རྣམས་རྣམ་པར་གནས། །སངས་རྒྱས་བྱང་ཆུབ་སེམས་དཔའ་ཀུན། །འགྲོ་བ་གསུམ་པོའང་འདི་ཉིད་དུ། །ཉི་ཤུ་རྩ་བཞིའི་དབྱེ་བ་ཡིས། །
གནས་སོགས་འདི་ཁོ་ན་ལ་གནས། །དེ་བས་དེ་རུ་སྐོར་བ་ཡིས། །སྐྱོ་བྱ་དེ་ཉིད་ཅན་གྱིས་མིན། །གལ་ཏེ་དེ་ཉིད་མེད་གྱུར་ན། །དེ་རྣམས་བསྐོར་བས་ཅུང་ཟད་མིན། །གལ་ཏེ་དེ་ཉིད་ལྡན་གྱུར་ན། །དེ་རྣམས་བསྐོར་བས་ཅི་ཞིག་དགོས། །ཕྱི་རོལ་རྣལ་འབྱོར་པ་དེ་
རྣམས། །བསྐོར་བས་ཁམས་རྣམས་ཟད་པར་འགྱུར། །དེ་བས་ཕྱི་རོལ་སྤངས་ནས་ནི། །རྣལ་འབྱོར་རོལ་པས་གནས་པར་བྱ། །དཔལ་ལྡན་རྡོ་རྗེ་རྣལ་འབྱོར་མ། །རྣམ་དག་ཡེ་ཤེས་ཅན་རྣམས་ཀྱིས། །རྡོ་རྗེ་རྣལ་འབྱོར་ཅན་རྣམས་གཟིགས། །ཐུགས་
རྗེས་ཁྱད་པའི་ཐུགས་ཀྱིས་ནི། །དེ་རྣམས་དགྱེས་པས་དངོས་གྲུབ་མཆོག །ཇི་ལྟར་འདོད་བཞིན་སྩོལ་བར་མཛད། །ཅེས་དང༌། རང་གི་ལྷག་པའི་ལྷ་དམིགས་ཏེ། །དེ་ཁོ་ན་ཉིད་གཅིག་པུ་བསམ། །ལྐུགས་བའི་དངོས་པོར་རབ་གྱུར་པའི། །ཟླ་དྲུག་ཙམ་
གྱིས་ངེས་པར་ནི། །རྣལ་འབྱོར་མ་ཡིས་ཉེར་བསྟེན་པའི། །རྣལ་འབྱོར་ཆེན་པོ་འདི་གསལ་འགྱུར། །ཡེ་ཤེས་འོད་ཟེར་མཆོག་མཐོང་ནས། །རྣལ་འབྱོར་མ་རྣམས་ལེགས་འདུ་སྟེ། །པད་མའི་འབྱུང་གནས་ཉམས་དགའ་བར། །ངང་པའི་ཚོགས་
འདུ་ཇི་བཞིན་ནོ། །དཔལ་ལྡན་རྡོ་རྗེ་འཛིན་དངོས་སུ། །འགྱུར་བ་འདི་ལ་ཐེ་ཚོམ་མེད། །མིག་འཕྲུལ་མཁན་བཞིན་འཇིག་རྟེན་དུ། །སེམས་ཅན་ཀུན་གྱི་དོན་བྱེད་རྣམས། །སེམས་ནི་དག་པར་གྱིས་ཤིག་ཅེས། །སེམས་ཅན་རྣམས་ལ་བདག་
9-5-135a


གསོལ་འདེབས། །ཞེས་གསུངས་པ་རྣམས་དྲངས་ཏེ། །ལྷན་སྐྱེས་ཀྱི་བདེ་སྟོང་སྦྱོར་བའི་ལམ་ལ་ངེས་པ་ཆེན་པོ་སྟེར་བར་བྱེད་དོ། །མིང་གི་དོན་ལ་སའི་དབང་དུ་བྱས་ན་སྦྱིན་པས་སེམས་ཅན་དཔག་ཏུ་མེད་པ་
ཚིམ་པར་བྱེད་པའི་གནས་དང་། བཟོད་པ་རབ་ཏུ་གྱུར་པས་མངོན་ཤེས་སོགས་ཕུལ་བྱུང་སྐྱེ་བའི་ཞིང་དང༌། ཚནྡོ་ཧའི་ཚནྡོ་འདུན་པ་དང༌། ཨུ་ཡིག་ཕྱུང་བའི་ཨུ་ཧ་རྟོག་པ་སྟེ་འདུན་རྟོག་དང༌། རང་གཞན་གྱི་དོན་ཕུན་སུམ་མཚོགས་པ་
དོན་དུ་གཉེར་བ་ནི། འདུན་པ་དང་འདི་ལྟ་འདི་ལྟར་བདག་གིས་དོན་དེ་བྱའོ་ཞེས་རྟོག་པ་དང༌། ཐབས་ཀྱི་ཕར་ཕྱིན་རབ་ཏུ་གྱུར་པས་ཏིང་ངེ་འཛིན་དང་མངོན་ཤེས་སོགས་མཚན་མ་མེད་པར་རྩོལ་བས་འདུ་བ་དང༌། བདག་མེད་པར་དུར་ཁྲོད་
དང་མཚུངས་པའི་ཆོས་ཀྱི་དབྱིངས་རྟོགས་ནས་སེམས་ཅན་གྱིས་ཀྱང་དེ་རྟོགས་པའི་ཆེད་དུ་ཆོས་སྟོན་པ་སོགས་ལ་འབད་པ་ནི་དུར་ཁྲོད་དང༌། ཉེ་བའི་དོན་ནི་སྔ་མ་ལྔ་དང་ཉེ་བ་ཡིན་ལ། ཉེ་ལུགས་ནི་ཕན་གདགས་བྱ་དང་འདོགས་བྱེད་དུ་འབྲེལ་བ་
དང༌། རང་གི་སྔ་མ་ལས་ཕུལ་དུ་བྱུང་བར་འགྱུར་བ་ཡང་ཉེ་བའི་དོན་དུ་དང༌། ཕྱི་རོལ་གྱི་གནས་དང་ཉེ་བའི་གནས་ལ་སོགས་པའི་ཉེ་བའི་དོན་ལ་སོགས་པ་ལྔ་ཡང་སྔ་མ་ལ་བརྟེན་ནས་དེ་དང་ཆ་མཐུན་པའི་དོན་ཤེས་པར་བྱའོ། །གསུམ་པ་
ནི། པཱུ་ཛ་ལ་སོགས་པའི་ཡི་གེ་ཉེར་བཞི་ནི། པཱུ་ལླི་རེ་ལ་སོགས་པ་ཡུལ་ཉེར་བཞིའི་རྒྱ་སྐད་ཀྱི་མིང་ཡིག་ཐོག་མ་ཡིན་ལ། དེ་ལ་འགྲེལ་པ་གསུམ་དང་འཁྲུལ་སྤོང་སོགས་རྒྱ་གཞུང་དུ་མ་ལས། དེ་རྣམས་ཐིག་ལེས་བརྒྱན་པ་
9-5-135b


གནས་ཉེར་བཞིར་དཀོད་པ་ཡོངས་སུ་གྱུར་པ་ལས་གནས་དེ་རྣམས་རྩིབས་མེད་པའི་འཁོར་ལོའི་རྣམ་པར་སྐང་ཅིག་གིས་བལྟ་བར་བྱའོ། །ཞེས་གསུངས་པའི་དོན་ནི། རྩིབས་མེད་པའི་འཁོར་ལོའི་ལྟེ་བ་རྐྱང་པ་སྒོམ་པར་སྟོན་པ་མིན་ཏེ། འཁོར་ལོ་ཚད་
མ་ལ་ཡང་རྩིབས་ཁོ་ན་ལ་ལྷ་རྣམས་སྒོམ་པའི་ཕྱིར་དང༌། འདི་ཡང་ལྷའི་གནས་ཀྱི་དོན་དུ་ཡིན་པའི་ཕྱིར་རོ། །དེས་ན་འཁོར་ལོའི་རྣམ་པ་ཅན་ནི་རྩིབས་ཀྱི་སྟེང་ནས་ཡིན་པས། རྩིབས་ཀྱིས་སྟོང་པའམ་རྩིབས་མེད་པ་ནི་རྩིབས་ཀྱི་ངོ་བོ་མེད་པ་དང༌། རྩིབས་
ཤུན་གྱི་རྣམ་པ་ཅན་དང༌། ཕྱིའི་ཡུལ་རྣམས་དངོས་ཡིན་པར་བསམ་མོ། །ཡི་གེ་དེ་རྣམས་ལ་ཐིག་ལེས་བརྒྱན་པ་ནི་མན་ངག་གིས་ཡིན་པར་ལྭ་བ་པས་བཤད་དོ། །ཚུལ་དེས་གནས་ཉེར་བཞི་སྐྱེད་པ་ནི་བོད་ཀྱི་བླ་མ་སྔ་མ་གཞན་དག་མི་འདོད་ཀྱང༌། 
མཁས་པ་མར་ངོས་ཡི་གེ་ཉེར་བཞི་ངག་ཏུ་བརྗོད་པས་ལུས་ཀྱི་གནས་རྣམས་སུ་འཁོར་ལོའི་རྩིབས་ཁོང་སྟོང་དམར་པོའི་སྟེང་དུ་ཉི་གདན་ལ་ལྷ་རྣམས་དགོང་པར་བཤད་དེ། གནས་རྣམས་སུ་དགོད་པ་ཡང་ལྭ་བ་པ་སོགས་ཀྱིས་བཤད་པས་
དགོས་ཤིང༌། ཕྱིས་ཀྱི་མཁས་པ་དག་གིས་ཀྱང་འགྲེལ་པ་རྣམས་བཞིན་དུ་མཛད་པ་ལེགས་སོ། །བོད་ཁ་ཅིག་བདེ་མཆོག་ནས་པཱུ་ལླི་ར་མ་ལ་ཡ་ལ་སོགས་པ་དང༌། དགྱེས་རྡོར་ནས་མི་ཕྱེད་མ་ལ་སོགས་པ་གསུངས་པ་རྣམས་མིང་གི་རྣམ་གྲངས་
ཡིན་གསུང་བ་ནི་དོན་མིན་ཏེ། ཕྱིའི་ཡུལ་དང་དཀྱིལ་འཁོར་གྱི་ཤར་རྩིབས་སོགས་ལ་པཱུ་ལླི་ར་ལ་སོགས་པར་བཤད་པ་དང༌། མི་ཕྱེད་མ་ལ་སོགས་པ་མིང་གི་རྣམ་གྲངས་སུ་འོང་དོན་མེད་པ་ནི་གོ་སླ་ལ། ནང་ལུས་ཀྱི་སྤྱི་བོ་ལ་སོགས་པ་ལ་བྱེད་
9-5-136a


ནའང་སྤྱི་བོ་དང་སྤྱི་གཙུག་དང་རྣ་བ་གཡས་གཡོན་སོགས་རྩ་མིན་པས་མི་ཕྱེད་མ་སོགས་མིན་ནོ། །ལྭ་བ་པ་དང༌། པྲཛྙཱ་རཀྵི་ཏའི་འགྲེལ་པ་ལས་ཀྱང་གནས་དེ་ན་གནས་པའི་རྩ་རྣམས་ཞེས་འབྱུང་པས། སྔར་པཱུ་ལླི་ར་ལ་སོགས་
པར་སྐྱེད་པའི་གནས་དེའི་རྩ་རྣམས་ལྷར་སྐྱེད་ཀྱི་གནས་དེ་རྣམས་ལྷར་སྐྱེད་པ་མིན་ནོ། །སྤྱི་བོ་དང་སྤྱི་གཙུག་དང་ལྷག་པའི་གནས་ནི། རྡོ་རྗེ་མཁའ་འགྲོའི་འགྲེལ་པར་སྤྱི་བོ་ཞེས་པ་ནི་སྐྲའི་གནས་སོ། །སྤྱི་གཙུག་ཅེས་པ་ནི་གཙུག་ཕུད་ཀྱི་གནས་སོ། །རྒྱབ་ཀྱི་ཆ་
ཞེས་པ་ནི་རྒྱབ་ཀྱི་དབུས་གཞུངས་པ་གྱེན་དུ་ལངས་པའོ། །ཞེས་བཤད་དེ་དང་པོ་ནི་སྐྲ་མཚམས་སོ། །འདི་དག་ནི་ཞེས་པ་ན་ལྷ་དང་ལྷ་གནས་གཉིས་ཀ་ལ་བྱའོ། །ཁ་ཞེས་འབྱུང་བ་ནི་སྔར་བཤད་པ་བཞིན་ལྕེའི་རྩ་བའོ། །ཧི་མ་ལ་ཡ་ནི་ཆག་གིས་འདོམས་
བར་དང༌། མར་ངོས་ལྒང་པར་བསྒྱུར། རྡོ་རྗེ་མཁའ་འགྲོ་ལས་ཆུ་སོར་བསྒྱུར་ཡང༌། དོན་ནི་མན་སྙེ་ལས། ཆུ་སོ་ནི་ས་བོན་གྱི་སྦུགས་གཉིས་སོ་ཞེས་དང༌། མངོན་བརྗོད་འབྲོག་འགྱུར་ལས་བུལ་བསྒྱུར་བ་ལྟར་བྱའོ། །ན་ག་ར་ལ་འདིར་སོར་མོ་རྣམས་
ཞེས་སྤྱིར་འབྱུང་པ་བཞིན་དུ་རྡོ་རྗེ་མཁའ་འགྲོ་དང་མངོན་བརྗོད་དང་ཀུན་སྤྱོད་དང་སཾ བྷུ་ཊ་ལས་ཀྱང་སྤྱིར་འབྱུང་ངོ༌། །བླ་མ་སྔ་མ་ཁ་ཅིག་མཐེ་བོང་བཞི་མ་གཏོགས་པའི་སོར་མོ་བཅུ་དྲུག་ལ་འདོད་པ་ལ། །བླ་མ་གཞན་དག་སྡོམ་འབྱུང་དང་རྡོ་རྗེ་མཁའ་
འགྲོའི་འགྲེལ་པར་རྐང་སེར་ལ་བཤད་པས་སྔ་མ་མི་འཐད་ཅེས་འགོག་མོད་ཀྱང༌། །མན་སྙེར། སོར་མོ་བཅུ་དྲུག་ན་ག་ར་རུ་སྡུ་གུ་མ་མྱོས་བྱེད་དང༌ཚིལ་བུའོ། །ཞེས་བཤད་ལ། མཐེ་བོང་ནི་རྐང་པ་ལ་སོགས་པའི་མཐེ་བོང་གཉིས་སོ། །ཞེས་
9-5-136b


ཀྱང་བཤད་པས་རྐང་པའི་མཐེ་བོང་དང་སོགས་ཀྱིས་ལག་པའི་མཐེ་བོང་ཡང་གཟུང་དགོས་པས་སྤྱིར་མཐེ་བོང་གཉིས་ཡིན་ཀྱང་ཕྱེ་ན་བཞི་ཡིན་པས་མ་རུ་མཐེ་བོང་བཞི་ལ་འདོད་པ་ཡང་མི་འཐད་པ་མིན་ནོ། །རྐང་པའི་རྒྱབ་ནི་བོལ་ལོ། །སྐུའི་འཁོར་
ལོ་ཡང་སྔར་བཞིན་ཏེ། ལྷག་མ་ནི་འགའ་ཞིང་ནི་བཤད་ཟིན་ལ། མ་བཤད་པ་ཡང་གོ་སླའོ། །ཕྱི་ནང་འདྲ་ཚུལ་ནི་ཕྱི་རོལ་དུ་པཱུ་ལླི་ར་ལ་སོགས་པའི་གནས་རྣམས་ཀྱི་ཆུ་བོ་རྣམས་ཀྱིས་གནས་རྣམས་གསོ་བ་དང༌། ནང་དུ་ནི་སྤྱི་བོ་ལ་སོགས་པའི་གནས་རྣམས་
ཀྱི་རྩ་རྣམས་ཀྱིས་སོ་དང་སེན་མོ་ལ་སོགས་པ་རྒྱས་པར་བྱེད་པ་གཉིས་འདྲ་ལ། ཕྱི་རོལ་དུ་རྡོ་རྗེའི་གདན་ནི་བྱང་ཆུབ་ཆེན་པའི་གནས་དང༌། ཆུ་ཀླུང་ནེ་རཉྫ་ན་ཡིན་པ་བཞིན་དུ་ནང་དུ་རྡོ་རྗེའི་གདན་ནི་བདེ་བ་ཆེན་པོའི་འཁོར་ལོ་དང༌། ནེ་རཉྫ་ན་ནི་
དྷཱུ་ཏཱིའོ། །ཞེས་འཆད་དོ། །གསུམ་པ་ནི། སྔར་རྟེན་དང་བརྟེན་པ་སྐྱེད་པ་སོགས་ཀྱི་དོན་བསྡུ་བ་ནི། འདིར་རྐང་པ་བཞི་པ་ལ་ཆག་འགྱུར་ལས། སྐད་ཅིག་གིས་ནི་སྐུ་གཅིག་འགྱུར། །ཞེས་འབྱུང་བའི་སྐུ་གཅིག་པ་ནི་གཅིག་པའི་སྐུ། །ཞེས་བྱ་ལ་
གཅིག་པ་སྟེ་དབྱེར་མེད་པའི་བཅོམ་ལྡན་འདས་ཀྱི་སྐུར་འགྱུར་བ་སྟེ་བསྐྱེད་ཅེས་པའོ། །དབྱེར་མེད་ལུགས་ཇི་ལྟར་ཞེ་ན། ནང་སྐུ་གསུང་ཐུགས་ཀྱི་དབྱེ་བ་ཡིས་ཕྱེ་བའི་འཁོར་ལོ་གསུམ་དང༌། ཕྱི་མཐོ་རིས་ཏེ་ས་བླ་དང༌། ས་སྟེང་དང༌། ས་འོག་
གསུམ་རང་བཞིན་དབྱེར་མེད་པའི་བདག་ཉིད་གཅིག་ཏུ་གྱུར་པའོ། །ཞེས་པའི་དོན་ཏེ། འགྲེལ་པ་གཞན་གཉིས་ཀྱི་དོན་ཁྱད་པར་གསལ་བྱེད་ཀྱིས་གསལ་དུ་བཏང་བ་ལྟར་རོ། །གང་ལས་བསྐྱེད་སྙམ་ན། ཨོཾ་ཨཱཿཧཱུཾ་གི་ཡི་གེ་གསུམ་གྱི་རང་
9-5-137a


བཞིན་ལས་ཏེ། དེ་ལས་བྱུང་བ་ཞེས་པྲཛྙཱ་རཀྵི་ཏས་བཤད་དེ། དེ་ནི་སྔར་ནམ་མཁར་བཞག་པའི་ནཱ་དའོ། །དེ་ཟླ་བའི་སྟེང་དུ་བབས་ཏེ་ཡོངས་སུ་གྱུར་བའི་སྒོ་ནས་རང་གི་རང་བཞིན་ཧཱུཾ་གི་རྣམ་པར་རིམ་གྱིས་བསྐྱེད་ལ། དེ་
ལས་ལྷན་ཅིག་སྐྱེས་དགའི་རང་བཞིན་ཧེ་རུ་ཀའི་སྐུར་རྫོགས་པར་སྐྱེས་པའོ། །བཤད་པ་དེ་དག་ལྟར་ན་དང་པོར་ནམ་མཁར་ཡི་གེ་གསུམ་བཞག་པ་ལས་བྱུང་བའི་ནཱ་ད་འཇོག་པ་འདྲ་བ་ཅིག་ཡོད་ཀྱང༌། སྟོང་པར་སྒོམ་པའི་དུས་ཀྱི་ཡི་གེ་གསུམ་
རིམ་གྱིས་བསྡུས་པའི་སྟོང་པ་ལས་ནཱ་ད་བྱུང་བར་སྔར་བཤད་པ་ལྟར་ཡིན་ནོ། །ཆག་འགྱུར་ལས་གསུམ་གྱི་རང་བཞིན་ལས་ཞེས་འབྱུང་བ་འགྲེལ་པ་དང་མཐུན་ནོ། །སྐད་ཅིག་ཅེས་པ་ནི་ཕྱག་མཚན་སོགས་ལ་མི་ལྟོས་པར་སྐྱེད་པའོ། །དེ་བཞིན་
གཤེགས་པའི་རྡོ་རྗེས་ཀྱང་དེ་བཞིན་དུ་བཤད་པ་ནི་སྔར་མངོན་བྱང་གི་སྐབས་སུ་ཕྱག་མཚན་ལས་སྐྱེད་པ་དང་འགལ་དོགས་ཡོད་དོ། །རྣལ་འབྱོར་བདག་ནི་བཅོམ་ལྡན་འདས་མ་དང་བཅས་པ་ཉིད་དུ་རྫོགས་པའི་དོན་ནོ། །དེ་ནི་རྣལ་འབྱོར་ཞེས་པའི་
དོན་སྦྱོར་བ་ལ་ཡང་འགྲོ་བས་དེའི་དོན་བཤད་པ་ན་ཡུམ་དང་སྦྱོར་བར་བཤད་པའོ། །ཕྱག་རྒྱ་ཅན་ནི་རང་དང་དུས་མཉམ་པ་ཁོ་ནར་ཤེས་རབ་མ་དང་བཅས་སོ་ཞེས་པའི་དོན་ནོ། །སྐད་ཅིག་རྣམ་པའི་ཞེས་པ་ནི་ཕྱག་མཚན་སོགས་ལ་མི་ལྟོས་པ་
ཡིན་ལ། སྔ་མས་དེ་ལྟར་རྫོགས་ནས་ཡུམ་དང་སྦྱོར་བར་བཤད་པ་དེ་ཡང་རིམ་གྱིས་ཡིན་ནམ་སྙམ་པ་ལ། ཕྱི་མས་དུས་མཉམ་དུ་རྫོགས་པར་སྟོན་པས་སྔ་ཕྱི་གཉིས་མི་ཟློས་སོ། །ཆག་འགྱུར་ལས། ཀུན་ནས་ཐམས་ཅད་སྐད་ཅིག་སྟེ། 
9-5-137b


ཞེས་འབྱུང་པའི་དོན་ནི། ཀུན་ནས་ནི་རྟེན་དང་བརྟེན་པ་ཐམས་ཅད་ཀུན་ཏུ་སྟེ་ལྷན་ཅིག་ཏུ་སྐད་ཅིག་སྟེ་དུས་གཅིག་ཏུ་རྫོགས་ཞེས་པའོ། །འདི་ཡང་རྟེན་བརྟེན་པ་དུས་གཅིག་ཏུ་སྐྱེད་པའི་ཁུངས་སོ། །སྐད་ཅིག་གིས་ནི་གསང་སྔགས་འདོན། ཞེས་
པའི་སྐད་ཅིག་ནི་སྔར་དང་འདྲ་ལ། གིས་ནི་ཞེས་པ་སྐད་ཅིག་གིས་སྐྱེད་པའི་སྔགས་སོ། །ལྭ་པ་པའི་འགྲེལ་པ་དང༌། པྲཛྙཱ་རཀྵི་ཏའི་འགྲེལ་པ་རྡོག་འགྱུར་ལས། རྫོགས་པ་དང་དུས་མཉམ་པ་ཁོ་ནར་སྔགས་གསུམ་འདོད་པར་བཤད་ལ། དེ་བཞིན་
གཤེགས་པའི་རྡོ་རྗེས་སྐྱེ་བ་དང་དུས་མཉམ་པར་ཞེས་བཤད་ཀྱང༌། པྲཛྙཱ་རཀྵི་ཏའི་འགྲེལ་པའི་འགྱུར་ལས། སྐད་ཅིག་གིས་ནི་གསང་སྔགས་བརྗོད། །ཅེས་པ་ནི། གསང་སྔགས་བརྗོད་པ་ལས་དུས་མཉམ་པ་ཉིད་དུ་རྫོགས་པའོ། །ཞེས་
བསྒྱུར་བ་ལེགས་ཏེ། སྔགས་བརྗོད་པ་འདི་ནི་རྟེན་དང་བརྟེན་པ་བསྐྱེད་པའི་དུས་ཀྱི་སྔགས་བརྗོད་ཚུལ་སྟོན་པ་ཡིན་པའི་ཕྱིར་དང༌། དུས་མཉམ་པ་ནི་རྟེན་བརྟེན་པ་གཉིས་དུས་མཉམ་པའི་དོན་ཡིན་པའི་ཕྱིར་རོ། །སྔགས་ཀྱི་ཚིག་གསུངས་པ་ལ་
གསུམ་ཡོད་པའི་དང་པོ་ནི་ཡི་གེ་གསུམ་མོ། །གཉིས་པ་ནི་ཨོཾ་སརྦ་སོགས་སོ། །གསུམ་པ་ནི་ཨོཾ་བཛྲ་སོགས་སོ། །དེ་ལྟར་བཤད་པ་ནི་འགྲེལ་པ་གསུམ་གའི་ལུགས་ཡིན་ལ། དེ་ཡང་ལུས་དཀྱིལ་ལ་མི་སྦྱོར་བར། སྔར་ཕྱི་དཀྱིལ་བཤད་
པའི་དོན་བསྡུར་བཤད་དོ། །ཇོ་བོ་ཆེན་པོས། སྐད་ཅིག་གིས་ནི་སྐུ་གཅིག་འགྱུར་ནི། སྟོང་ཉིད་སྔོན་དུ་སོང་བའི་མངོན་བྱང་ལྡ་ལས། རྟེན་བརྟེན་པ་གཉིས་དུས་གཅིག་ལ་གྲུབ་པ་དང༌། སྐད་ཅིག་ཙམ་གྱིས་རྣལ་འབྱོར་བདག་ནི། ཧེ་
9-5-138a


རུ་ཀ་ཚད་བར་དམིགས་པ་དང༌། སྐད་ཅིག་ཕྱག་རྒྱའི་རྣམ་པ་ཅན་ནི། ཡུམ་གསལ་བར་དམིགས་པ་དང༌། སྐད་ཅིག་གིས་ནི་སྐུ་འཆང་ཞིང༌། ཞེས་པ་ནི་ཡེ་ཤེས་སེམས་དཔའ་དང༌། ཀུན་ནས་ཀུན་ཏུ་སྐད་ཅིག་ནི། ཏིང་
ངེས་འཛིན་སེམས་དཔའ་དང༌། སྐད་ཅིག་གིས་ནི་གསང་སྔགས་འདོན་པ་ནི། སྐུ་གསུང་ཐུགས་ཀྱི་ཡི་གེ་གསུམ་སྐད་ཅིག་ལ་གྲུབ་པ་ལ་བཤད་དེ། སྔར་བཤད་པ་དང་མི་མཐུན་ཀྱང་ལུས་དཀྱིལ་ལ་མི་སྦྱོར་རོ། །ཡེ་ཤེས་སྒྲོན་མ་ལས། སྐུ་གསུང་ཐུགས་
ཀྱི་དབྱེ་བ་ཡིས། ཞེས་པ་ནས། སྐད་ཅིག་སྟེ་ཞེས་པའི་བར་གྱིས། ཨ་ཨུ་མའི་ཡི་གེ་གསུམ་གྱི་རང་བཞིན་ཧཱུཾ་ལས་རྟེན་དང་བརྟེན་པ་ཐམས་ཅད་དུས་གཅིག་ཏུ་རྫོགས་པ་དང༌། ཡབ་ཡུམ་རྫོགས་པའི་དུས་སུ་གནས་གསུམ་དུ་ཡི་གེ་གསུམ་གྱིས་
བྱིན་གྱིས་བརླབས་པ། སྔགས་ལྷག་མ་གཉིས་ཀྱིས་བྱིན་གྱིས་རློབ་པ། སྐད་ཅིག་གིས་སྔགས་འདོན་པའི་དོན་དུ་བྱས་ནས་དེ་དག་ཀྱང་དབང་པོ་འབྲིང་གི་མངོན་རྟོགས་སྒོམ་པའི་དོན་དུ་འདོད་པ་ནི་དོན་མ་རྟོགས་པ་ཆེན་པོའི་བཤད་པའོ། བཱི་ར་
བཛྲས་བྱས་ཟེར་བ་ལས། ཡི་གེ་གསུམ་ཞེས་པ་མངོན་བྱང་ལས་སྐྱེད་པའི་སྐབས་ཀྱི་ཉི་ཟླའི་འོག་ཏུ་ཨོཾ་དང༌། བར་དུ་ཨཱཿ སྟེང་དུ་ཧཱུཾ་བཀོད་པ་དང༌། སྐད་ཅིག་གིས་ཞེས་པ་རྫུས་སྐྱེས་དང༌། སྔགས་འདོན་པ་ནི་ཀུན་ཀྱང་ཧཱུཾ་འདོན་པ་དང༌། ཨོཾ་
ཨཱཿཧཱུཾ སོགས་ནི་སྔར་ཡི་གེ་གསུམ་བཀོད་པ་བྱིན་གྱིས་རློབ་པ་ལ་འཆད་པ་ནི། མངོན་བྱང་ལས་སྐྱེད་པ་དང༌། རྫུས་སྐྱེས་གཉིས་འགལ་བ་སོགས་ཀྱི་སྐྱོན་ཆེར་ཆགས་པའི་བཤད་བའོ། སྡོམ་འབྱུང་ལས། དཀྱིལ་འཁོར་སྐྱེད་པ་འདི་དང་
9-5-138b


ཕལ་ཆེར་འདྲ་གཅིག་བཤད་པ་ནི། ས་བོན་སོགས་ལས་སྐྱེད་པ་ལ་བློ་བྱང་བའི་དབང་རྣོན་གྱིས་སྐད་ཅིག་ཙམ་གྱིས་སྐྱེད་པར་དེའི་འགྲེལ་པར་གསུངས་པ་ལྟར་ཡིན་པས་འདི་དང་སྐབས་མི་གཅིག་གོ། འདིར་མར་དོས་སྐུ་གསུང་ཐུགས་ཞེས་པ་ནས་སྐད་ཅིག་སྟེ་ཞེས་
པའི་བར་ཕྱི་དཀྱིལ་ལ་མི་སྦྱོར་བར་ལུས་དཀྱིལ་ཁོ་ན་ལ་སྦྱར་ཞིང༌། སྐད་ཅིག་གིས་ཞེས་པའི་དོན་རྣམས་དཀྲོངས་བསྐྱེད་ཀྱི་དོན་དུ་བྱས་ནས་བརྟེན་པའི་ལུས་དཀྱིལ་ཐམས་ཅད་སྐད་ཅིག་གིས་དཀྲོངས་བསྐྱེད་དང༌། སྔགས་དང་པོའི་དོན་ནི་ཡུལ་
ཉེར་བཞིའི་དཔའ་བོ་དང་དཔའ་མོའི་རང་བཞིན་ནི། བདག་གི་དམ་ཚིག་པའི་འཁོར་ལོ་གསུམ་གྱི་དཔའ་བོ་དང་དཔའ་མོ་འདི་དག་ཡིན་ཞིང༌། དེས་ཀྱང་རྣལ་འབྱོར་མ་ལྷག་མ་རྣམས་ཀྱང་མཚོན་པ་དང༌། སྔགས་གཉིས་པའི་དོན་ནི་དམ་ཚིག་པའི་ལྷ
་རྣམས་ཀྱི་སྐུ་གསུང་ཐུགས་རྡོ་རྗེའི་རང་བཞིན་གྱི་བདག་ཉིད་ནི། ངའི་ལུས་ཀྱི་དཀྱིལ་འཁོར་གྱི་དཔའ་བོ་དང་རྣལ་འབྱོར་མ་འདི་རྣམས་ཡིན་ནོ། །ཞེས་པ་དང༌། སྔགས་གསུམ་པའི་དོན་ནི་ལུས་དཀྱིལ་གྱི་ལྷ་ཐམས་ཅད་བདེ་ཆེན་གྱི་ངོ་བོ་ཉིད་
དོ་ཞེས་བྱིན་གྱིས་རློབ་པ་ལ་འཆད་དོ། །མལ་གྱོའི་རྗེས་འབྲང་དག་ཀྱང་གཞུང་དེ་རྣམས་ལུས་དཀྱིལ་ཉིད་ལ་སྦྱོར་བ་དང༌། མལ་གྱོའི་བཞེད་པ་བཀོད་པ་ན། རྩ་དང་ནང་གི་ཁམས་རྣམས་དཔའ་བོ་དང་དཔའ་མོར་འོས་པ་ཙམ་བྱེད་པ་དང༌། གཞུང་གི་
དོན་འཆང་པ་ན། སྐད་ཅིག་གིས་སྐྱེད་པ་དང༌། པྲཛྙཱ་རཀྵི་ཏས་རྟེན་དང་བརྟེན་པ་གཉིས་ཀ་ལྷན་ཅིག་ཏུ་སྐྱེད་པར་བཤད་པ་ཡང་རང་ལུགས་ལ་འཇོག་པ་དང༌། ཨོཾ་ཞེས་བརྗོད་པའི་ཚེ་ལུས་དཀྱིལ་དང༌། འཛམ་བུ་གླིང་དང་འོག་མིན་ན་བཞུགས་
9-5-139a


པའི་སྐུའི་འཁོར་ལོ་གསུམ་དྲན་པར་བྱེད། དེ་བཞིན་དུ་ཨཱ་ཞེས་པས་གསུང་གསུམ་དང༌། ཧཱུཾ་ཞེས་པས་ཐུགས་གསུམ་དང༌། ཨོཾ་སརྦ་ནས་ཙིཏྟའི་བར་གྱིས་ལྷ་དེ་གཉིས་པོ་ཐམས་ཅད་དྲན་ཏེ། དེ་མན་ཆད་བརྗོད་པས། ཕྱི་དང་
ལུས་ཀྱི་དཀྱིལ་འཁོར་གྱི་སྐུ་གསུང་ཐུགས་དང༌། ཞིང་སྐྱེས་དང་ལྷན་སྐྱེས་ཀྱི་དཔའ་བོ་དང་རྣལ་འབྱོར་མ་རྣམས་ཀྱི་སྐུ་གསུང་ཐུགས་དབྱེར་མི་ཕྱེད་པའི་རང་བཞིན་ང་ཡིན་ནོ་སྙམ་དུ་བྱས་ནས། སྔགས་གསུམ་པའི་དོན་ནི་སྔ་མར་མ་ཟད་
སྣོད་བཅུད་ཀྱི་དངོས་པོ་ཐམས་ཅད་ཀྱང་འཁོར་ལོ་ལྔའི་ལྷར་མོས་པ་བྱས་ལ། དེ་རྣམས་བདག་གི་ལུས་ཀྱི་ལྷ་དང་ཐ་མི་དད་པར་མོས་པའི་དོན་དུ་འཆད་དོ། །བོད་ཀྱི་བཤད་སྲོལ་དེ་གཉིས་ནི་ལུས་དཀྱིལ་གྱི་འོག་ཏུ་བཤད་པས་འཁྲུལ་
གཞི་བྱས་ནས་ཕྱི་དཀྱིལ་གྱི་སྐྱེད་ཆོག་སྔར་བཤད་པའི་དོན་བསྡུར་མ་དགོངས་འདུག་པ། འགྲེལ་པ་གསུམ་གྱི་བཤད་པ་བཞིན་བྱ་དགོས་ལ། ལུས་དཀྱིལ་དཀྲོངས་བསྐྱེད་བྱེད་པ་མི་འཐད་པར་བསྟན་ཟིན་པ་དང༌། མལ་གྱོའི་བཞེད་པ་རང་
ལུགས་ལ་འཇོག་པ་དང་སྐད་ཅིག་གིས་སྐྱེད་པ་གཉིས་འགལ་ཞིང༌། པྲཛྙཱ་རཀྵི་ཏའི་བཤད་པ་རང་ལུགས་ལ་འགོད་པ་དང༌། ཕྱི་དཀྱིལ་ལ་མི་སྦྱོར་བ་ཡང་འགལ་ལོ། །དེའི་ཕྱིར་སྔགས་དོན་བཤད་པ་རྣམས་ཀྱང་འདིར་གཙོ་བོའི་དོན་སྐྱེད་
སྔགས་སུ་བཤད་པ་མ་ཐོན་པས་མི་ལེགས་ཏེ། མཁའ་འགྲོ་རྒྱ་མཚོ་ལས། གསར་སྔགས་འདི་ནི་འདོན་པ་ན། །སྐད་ཅིག་རྣམ་པའི་རྣལ་འབྱོར་ལྡན། །སྐད་ཅིག་སྔགས་ལས་འབྱུང་བདག་ཉིད། །དཔའ་བོ་ཀུན་དང་རྣལ་འབྱོར་མའོ། །ཞེས་སྐད་
9-5-139b


ཅིག་མའི་སྔགས་བརྗོད་པ་ལས། དཔའ་བོ་དཔའ་མོ་ཀུན་སྐྱེད་པར་གསུངས་པའི་ཕྱིར་དང༌། འགྲེལ་པ་གསུམ་གས་ཀྱང་སྔགས་དེ་སྐྱེད་སྔགས་སུ་གསུངས་པའི་ཕྱིར་རོ། །མཁའ་འགྲོ་རྒྱ་མཚོའི་སྐབས་དེར་བྱུང་བའི་སྔགས་དང༌། འདིའི་སྔགས་གཉིས་ཇི་
བཞིན་དུ་མི་འདྲ་ཡང༌། སྐད་ཅིག་མའི་སྔགས་ལས་ལྷ་རྣམས་འབྱུང་བར་གསུངས་པ་འདྲའོ། །དེས་ན་སྔགས་གསུམ་པོ་འདི་རྟེན་དང་བརྟེན་པ་སྐྱེད་པའི་དོན་དུ་བརྗོད་པའི་ཚེ་ན་འབྱུང་འགྱུར་གྱི་ང་རྒྱལ་བྱེད་པ་ཡིན་ཏེ། འདི་སྐྱེད་སྔགས་སུ་བཤད་པའི་སྐབས་
གཞན་དུ་ཡང་དེ་བཞིན་དུ་ཤེས་པར་བྱའོ། །འོ་ན་ལུས་དཀྱིལ་རྫོགས་པའི་སྐབས་སུ་བཤད་པ་འདི་འདྲའི་སྐབས་སྔོན་དུ་བསྐྱེད་ཟིན་པ་ལ་བྱར་མི་རུང་ངམ་སྙམ་ན། བསྐྱེད་ཟིན་པ་ལ་ཡང་བྱེད་པ་ནི་འཆད་པར་འགྱུར་ལ། དེ་ལ་བྱེད་པའི་སྐབས་ནི་ཡེ་ཤེས་
པ་བཅུག་པའི་རྗེས་སུ་བྱེད་པར་བཤད་པ་ལྟར་བྱ་ཡི། བཤད་པའི་སྐབས་འདིར་བྱེད་པ་ནི་མ་ཡིན་ནོ། །འདི་ནི་དྲིལ་བུ་པ་ལ་ཡང་ཤེས་པར་བྱའོ། །དེ་ལ་ཨོཾ་ཨཱཿཧཱུཾ་ནི་སྐུ་གསུང་ཐུགས་མདོར་བསྟན་པའོ། །སརྦྦ་ནི་ཐམས་ཅད་དོ། །བཱིར་ནི་དཔའ་
བོའོ། །ཡོ་གི་ནཱི་ནི་རྣལ་འབྱོར་མ་སྟེ། ལྷ་རེ་གཉིས་པོ་ཐམས་ཅད་ཡིན་ལ། གཞལ་ཡས་ཁང་དང་བཅས་པ་ལ་ཡང་བྱ་སྟེ། སྐྱེད་པའི་སྐབས་སུ་རྟེན་དང་བརྟེན་པ་གཉིས་ཀའི་སྐྱེད་སྔགས་སུ་འགྲོ་བའི་གནད་ཀྱིས་སོ། །ཀཱ་ཡ་ནི་དེ་ཐམས་ཅད་ཀྱི་
སྐུ་སྟེ། སྔར་གྱི་ཨོཾ་གྱི་དོན་ནོ། །ཝཱ་ཀ་ནི་དེ་ཐམས་ཅད་ཀྱི་གསུང་སྟེ་ཨཱཿའི་དོན་ནོ། །ཙི་ཏྟ་ནི་དེ་ཐམས་ཅད་ཀྱི་ཐུགས་ཏེ་ཧཱུཾ་གི་དོན་བཤད་པའོ། །འོག་མིན་དང་ཡུལ་ཉེར་བཞི་ན་བཞུགས་པའི་ལྷ་ཙམ་དུ་མ་ཟད་ཕྱོགས་དུས་ཀུན་ན་བཞུགས་པའི་
9-5-140a


དཔའ་བོ་དང་རྣལ་འབྱོར་མ་ཀུན་གྱི་སྐུ་གསུང་ཐུགས་ཀུན་ལ་གོ་བར་བྱའོ། །རྡོ་རྗེ་ནི་དེ་གསུམ་ག་ལ་སྦྱར་རོ། །ལྷག་མ་ན་སྔར་བཤད་པ་བཞིན་ནོ། །ང་རྒྱལ་འཛིན་ལུགས་ནི་སྔར་བཤད་པ་ཐམས་ཅད་དང༌། རང་གིས་བསྒོམས་པའི་
ཕྱིར་དང་། ལུས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་རང་དཀྱིལ་འཁོར་གྱི་གཙོ་བོར་བྱས་པ་དེའོ་སྙམ་པ་སྟེ། འདི་ལ་གཟུགས་སྐུའི་རྣམ་པ་ཅན་གྱི་ཧེ་རུ་ཀའི་ངོ་བོར་མོས་པ་དང༌། ལྷན་སྐྱེས་ཀྱི་བདེ་ཆེན་གྱི་ངོ་བོར་མོས་པ་གཉིས་
ཤེས་དགོས་ལ། དེ་ཡང་ལྷན་སྐྱེས་ཀྱི་བདེ་ཆེན་ཧེ་རུ་ཀའི་གཟུགས་ཀྱི་སྐུར་ཤར་བར་མོས་ནས་དེའི་ངོ་བོར་མོས་པ་དྲག་པོ་བསྐྱེད་དོ། །བཛྲ་ནི་རྡོ་རྗེ་དང༌། ཤུདྡྷཿ་ནི་དག་པ་དང༌། སརྦྦ་དྷརྨྨཿ ནི་ཆོས་ཐམས་ཅད་དང༌། ཤུདྡྷ་ཨ་ཧཾ་ནི་དག་པ་དེ་ངའོ་ཞེས་
པ་སྟེ། ཕྱི་མའི་དོན་ནི་ཆོས་ཐམས་ཅད་ཀྱི་རང་བཞིན་སྟོང་ཉིད་ཀྱི་རྡོ་རྗེ་དང་དབྱེར་མེད་པར་ཞུགས་པའི་དག་པ་དེ་ལ་ང་རྒྱལ་འཇོག་པས་སྔར་བཤད་པ་ལས་རྒྱ་ཆེ་ཞིང༌། བཛྲ་དྡྷཿ ནི་དག་པ་དེ་དང༌། རང་ཉིད་དབྱེར་མེད་པར་མོས་པ་དེ་ཡང་རྡོ་རྗེ་ལྟར་
བརྟན་པར་བྱ་བའི་དོན་ནོ། །བཞི་པ་གོ་བགོ་ཞིང་ཡེ་ཤེས་པ་བཅུ་གནས་དབང་བསྐུར་བ་ལ་གཉིས། གོ་ཆ་བྱ་ཞིང་ཡེ་ཤེས་པ་གཞུག་པ་དང༌། དབང་བསྐུར་ནས་རྒྱས་གདབ་པའོ། །དང་པོ་ལ་གཉིས། མདོར་བསྟན་པ་དང༌། རྒྱས་པར་བཤད་པའོ། །
དང་པོ་ནི། ཕྱི་དཀྱིལ་དང་ལུས་དཀྱིལ་བསྐྱེད་པའི་རྗེས་དེ་ནས་ཡབ་དང་ཡུམ་གྱི་གོ་ཆ་གཉིས་བགོ་བའི་ཚུལ་ཤེས་པས་གོ་བགོ་བ་སྔོན་དུ་བཏང་ནས་ཡེ་ཤེས་པའི་དཀྱིལ་འཁོར་གྱིས་འཁོར་ལོ་སྤྱན་འདྲེན་པ་སོགས་རྣམ་པར་བསྒོམ་པར་
9-5-140b


བྱའོ། ཕེཾ་ཞེས་སོགས་ཀྱི་སྔགས་དང་འབར་བའི་ཕྱག་རྒྱའི་སྦྱོར་བ་ཡིས་ཡེ་ཤེས་པ་སྤྱན་དྲངས་ལ། དམ་ཚིག་པའི་དཀྱིལ་འཁོར་གྱི་འཁོར་ལོར་གཞུག་པར་བྱའོ། །མྱུར་ཞེས་པ་ནི་འགྲེལ་པ་གསུམ་ག་ནས་མཆོད་ཡོན་ལ་སོགས་པ་ལ་མི་ལྟོས་པར་
རོ་ཞེས་འབྱུང་ལ། ཡང་འགྲེལ་པ་གསུམ་གར་འོག་ནས་རིག་མ་བཅུ་དྲུག་གིས་ཡེ་ཤེས་པ་ལ་མཆོད་པར་ཡང་བཤད་པ་གཉིས་མི་འགལ་བ་ནི་ལྷ་སྤྱིན་དྲངས་ཟིན་པ་ལ་མཆོད་པའི་དབང་དུ་མ་བྱས་ཀྱི། སྤྱན་འདྲེན་པ་ལ་རྒྱུད་གཞན་ནས་
མཆོད་ཡོན་གྱིས་སྤྱན་འདྲེན་པ་ལྟར་མི་བྱེད་པར་མྱུར་དུ་སྤྱན་དྲང་ཞེས་པའི་དོན་ཡིན་པས་མི་འགལ་ལོ། །འོ་ན་སོགས་ཀྱི་དོན་གང་སྙམ་ན་སྤྱན་འདྲེན་པའི་ལྷ་བཞེངས་བཞུགས་ཀྱི་སྟངས་ཅན་ལ་རང་གིས་ཀྱང་དེ་ལྟར་བྱས་ནས་སྤྱན་འདྲེན་
པར་བཤད་པ་སྡུད་པའམ། ཡང་ན་སོགས་ཀྱི་དོད་ནི་དང་པོ་ལ་ཡང་འཇུག་པས་འདིར་དང་པོའི་དོན་དུ་བྱའོ། །གཉིས་པ་ལ་གཉིས། གོ་ཆ་བཅིང་བ་རྒྱས་པར་བཤད་པ་དང༌། ཡེ་ཤེས་པ་གཞུག་པ་རྒྱས་པར་བཤད་པའོ། །དང་པོ་ལ་གཉིས། 
སྤྱིའི་དོན་དང༌། ཡན་ལག་གི་དོན་ནོ། །དང་པོ་ནི། གོ་ཆ་འདི་རྣམས་དོན་གཉིས་ཤེས་པར་བྱ་བ་ལ། གོ་ཆ་ནི་ལྷ་ཅི་ཙམ་ཞིག་ལ་འགོད་སྙམ་ན། འདི་ལ་ཁ་ཅིག་མངོན་བརྗོད་ལས། གོ་ཆ་གཉིས་པོ་ཉིད་དག་ཀྱང༌། །འཁོར་ལོ་ཀུན་ལ་རྣམ་བསྒོམས་
ནས་ཞེས་གསུངས་པས་ལྷ་ཐམས་ཅད་ལ་གོ་ཆ་བྱེད་པར་བཤད་ཟེར་མོད་ཀྱང༌། དེའི་འགྲེལ་པར། འཁོར་ལོ་ཀུན་ལ་ལུས་ཀྱི་དཀྱིལ་བསམ་པར་བཤད་ཅིང༌། འཁོར་ལོ་ཀུན་ལ་གོ་ཆ་བགོ་བ་མ་བཤད་ལ། མངོན་བརྗོད་ཀྱི་འགྱུར་གཞན་མང་པོ་ལས། 
9-5-141a


གོ་ཆ་གཉིས་པོ་བགོ་བར་བྱ། །འཁོར་ལོ་ཐམས་ཅད་རྣམ་བསྒོམས་ནས། །ཞེས་འབྱུང་བས་གཞུང་དེས་འཁོར་ལོ་ཐམས་ཅད་ལ་གོ་ཆ་སྒོམ་པར་སྟོན་པ་མིན་ནོ། །ཡང་ནག་པོ་པའི་དཀྱིལ་ཆོག་ལས། དཔའ་བོ་ཀུན་དང་
རྣལ་འབྱོར་མ། །གོ་ཆ་གསུམ་གྱིས་བརྒྱན་པ་ཡིན། །ཞེས་པས་ལྷ་ཐམས་ཅད་ལ་གོ་ཆ་བྱེད་པར་བསྟན་ཟེར་བ་ཡང་མར་དོས་བསྒྱུར་བའི་འགྱུར་གཉིས་ཡོད་པའི་གཅིག་ལ། དཔའ་བོ་རྣལ་འབྱོར་མ་ཀུན་གྱི། །གོ་ཆ་གསུམ་གྱིས་ཞེས་འབྱུང་ལ། །གཅིག་
ལས། དཔའ་བོ་ཀུན་དང་རྣལ་འབྱོར་མའི། གོ་ཆ་ཤེས་འབྱུང་བས། བུམ་བཟླས་བྱེད་མཁན་གྱི་སློབ་དཔོན་ལ་དཔའ་བོ་དང་རྣལ་འབྱོར་མའི་གོ་ཆས་བརྒྱན་པའི་དོན་ཡིན་གྱི། དཔའ་བོ་དང་རྣལ་འབྱོར་མ་ཀུན་ལ། གོ་ཆ་གསུམ་གྱིས་བརྒྱན་ཞེས་
པ་མིན་པའི་ཕྱིར་དང༌། དཀྱིལ་ཆོག་གི་འགྲེལ་པར་མར་དོས། སྔར་སྒྲུབ་ཐབས་སྒོམ་དུས་སུ་གོ་ཆ་གསུམ་བྱས་པའམ། ཡང་ན་རང་ལ་གོ་ཆ་ཆེན་པོ་དང༌། དཔའ་བོའི་གོ་ཆ་གཉིས། ཕྱག་རྒྱ་ལ་དཔའ་མོའི་གོ་ཆ་བཀོད་པ་གསུམ་ལ་འཆད་
དོ། །གཞུང་དེ་ནི་རྩ་རྒྱུད་ཀྱི་ལེའུ་ཉེར་བདུན་པ་ན་ཡོད་པ་བཀོད་པར་སྣང་ལ། རྩ་རྒྱུད་ལོ་ཆེན་གྱི་འགྱུར་གྱི་ཇོས་བཅོས་པ་ལ། དཔའ་བོ་ཀུན་དང་རྣལ་འབྱོར་མ། གོ་ཆ་རྣམ་པ་གཉིས་ཀྱིས་བརྒྱན། ཞེས་དཔེ་ཁ་ཅིག་ལས་འབྱུང་བ་ལ་ཡང་། འི་མེད་
པ་མ་དག་སྟེ། དེར་ཡང་སྤྱོད་པ་བྱེད་པའི་གང་ཟག་ཆས་འཇུག་བྱས་པ་ཅིག་གི་སྤྱོད་ལམ་གྱི་སྐབས་སུ་སྣང་བའི་ཕྱིར་རོ། །མལ་གྱི་འགྱུར་ལ་དེ་ཆད་ཀྱང༌། འགྱུར་གྱི་ཕྱི་མོ་མ་དག་པར་གསལ་ལ། མར་དོ་གཅིག་པུས་བསྒྱུར་བའི་འགྱུར་
9-5-141b


གཉིས་སྣང་བ་ལས། དཔའ་བོ་དཔའ་མོ་ཐམས་ཅད་ནི། །གོ་ཆ་གསུམ་གྱིས། ཞེས་འབྱུང་ཡང་སྡ་མ་ལྟར་དག་གོ། ཀུན་སྤྱོད་ལས། དཔའ་མོའི་གོ་ཆ་དྲུག་བཤད་པའི་མཐར། གོ་ཆ་དྲུག་ཉིད་ཕག་མོ་སྟེ། ཞེས་གསུངས་པས་དེའི་ལེའུ་སྔ་མར་ལྷ་ཚང་
བར་བཤད་པའི་མཚམས་ཡིན་ཀྱང༌། ཨོཾ་བཾ་སོགས་ཀྱི་གོ་ཆ་དྲུག་ཕག་མོ་ལ་འགོད་པར་བཤད་པས། ཨོཾ་ཧ་སོ་གས་དྲུག་ཀྱང་གཙོ་བོ་ལ་འགོད་པར་གསལ་ཏེ། སྡོམ་འབྱུང་དང་ཀུན་སྤྱོད་གཉིས་ཀྱང་གོ་ཆ་འདྲ་བར་སྣང་བས། དེའི་དགོངས་པ་ཡང་
དེ་བཞིན་ནོ། །དེའི་ཕྱིར་ལཱུ་ཨི་པའི་གཞུང་ཡང་སྡོམ་འབྱུང་དང་མཐུན་ནོ། །མངོན་བརྗོད་ལས། ལངས་པའི་དུས་སུ་གོ་ཆ་འགོད་པར་བཤད་པ་མང་ལ། དེ་ལྟ་ན་ནི་སྔ་མ་དང་འདྲ་ཞིང༌། གཞན་སྒྲུབ་ཐབས་སྒོམ་པའི་སྐབས་སུ་འགོད་གཞི་གསལ་བར་མི་
སྣང་ངོ༌། ལཱུ་ཨི་པ་དང་དྲིལ་བུ་པའི་ལུས་དཀྱིལ་ལས། གོ་ཆ་བཅུ་གཉིས་འགོད་པར་གསུངས་ཀྱང༌། ལྷ་གང་ལ་འགོད་མི་གསལ་ལ། དྲིལ་བུ་པའི་ལྷ་ལྔར་ནི་གཙོ་བོ་ཡབ་ཡུམ་བསྐྱེད་ཅིང་འཁོར་མ་བསྐྱེད་པའི་བར་དུ་གོ་ཆ་བཀོད་པས་གཙོ་བོ་ཡབ་
ཡུམ་ཉིད་ལ་འགོད་དོ། །ནག་པོ་སྤྱོད་པའི་སྒྲུབ་ཐབས་ལས་ནི། གཙོ་བོ་ཡབ་ཡུམ་གཉིས་ཙམ་ལ་བཀོད་ཀྱི། གཞན་ལ་མ་བཀོད་དོ། །ཡི་གེ་བདུན་པའི་སྒྲུབ་ཐབས་སུ་ཡང་དེ་དང་འདྲའོ། །ལཱུ་ཨི་པའི་འགྲེལ་པར་ལྭ་བ་པས། དཔའ་བོའི་གོ་
ཆ་ཁ་དོག་དྲུག་པའི་ཡི་གེ་དྲུག ། ལྷ་དང་དབྱེར་མེད་དུ་བྱས་ནས་འགོད་པར་བཤད་པའི་མཇུག་ཏུ་དེ་ཁོ་ན་བཞིན་དུ་བཅོམ་ལྡན་འདས་མ་ལ་ཡང་དོ། ཞེས་ལྷ་དང་སྔགས་དྲུག་དབྱེར་མེད་དུ་བྱས་ནས་འགོད་པ་གཙོ་མོ་ལ་ཡང་བྱ་བར་
9-5-142a


བཤད་པས། གོ་ཆ་སྔ་མ་དྲུག་ཡབ་ལ་འགོད་པར་ཤེས་ཏེ། པྲཛྙཱ་རཀྵི་ཏའི་འགྲེལ་པར་ཡང་དེ་བཞིན་དུ་བཤད་ཅིང༌། ཁྱད་པར་དུ་དེ་ལས། དེ་བཞིན་དུ་བཅོམ་ལྡན་འདས་མའི་ཨོཾ་བཾ་ཞེས་བྱ་བ་ལ་སོགས་པའོ། །ཞེས་
བསྒྱུར་བ་ལེགས་སོ། །མན་སྙེ་དང༌། འཁྲུལ་སྤོང་དང༌། རྒྱལ་བ་བཟང་པོ་དང༌། ཛ་ཡ་སེ་ནས་ཀྱང་གཙོ་བོ་ཡབ་ཡུམ་ཉིད་ལ་འགོད་དོ། བྲམ་ཟེ་རིན་ཆེན་རྡོ་རྗེ་དང༌། ཉིན་མོ་མཛད་དང༌། དེ་བཞིན་གཤེགས་པའི་རྡོ་རྗེས་ནི། ལྷ་ཐམས་ཅད་ལ་གོ་ཆ་བྱེད་པར་ཡང་བཤད་དོ། །དེ་ལྟར་
མང་དུ་ཡོད་ཀྱང་ལོ་དྲིལ་ནག་གསུམ་གྱི་སྒྲུབ་ཐབས་ཀྱི་སྐབས་སུ་ནི། གཙོ་བོ་ཡབ་ཡུམ་ཙམ་ཞིང་གོ་ཆ་འགོད་པའི་གཞིར་གཟུང་དོ། །དེ་ཡང་གཞིའི་ཧེ་རུ་ཀ་ཡབ་ཡུམ་སྟེ། ཕག་མོ་མངོན་འབྱུང་ལས་གསུངས་པ་ལྟར་ཡུམ་རྐྱང་
ལ་བཀོད་པ་ཡང་མང་ངོ༌། སྤྱིར་ནི་གོ་ཆའི་ལྷ་རྣམས་ཕྱིའི་དཀྱིལ་འཁོར་ལ་འགོད་པ་དང༌། ལག་པ་ལ་འགོད་པ་སོགས་མང་དུ་ཡོད་དོ། །འོ་ན་དེ་ལ་འགོད་པའི་གོ་ཆ་ཡང་ཇི་ལྟ་བུ་སྙམ་ན། ལྭ་བ་པས། སྔགས་དང་ལྷ་རྣམས་ཐ་དད་མེད་པས་
སྔགས་ཉིད་འགོད་པ་དང༌། ཡང་ན་སྔགས་རྣམས་ལས་བསྐྱེད་པའི་ལྷ་འགོད་པའི་ཚུལ་གཉིས་བཤད་དེ། པྲཛྙཱ་རཀྵི་ཏས་ཀྱང་དེ་བཞིན་དུ་བཤད་དོ། །འདོད་བྱའི་སྔགས་ནི་རྩ་རྒྱུད་ལས། ཡི་གེ་བཾ་དང་ཡོཾ་དད་ནི། །ཡི་གེ་མོཾ་དང་ཧྲིཾ་ཉིད་དང༌། །
ཧཱུཾ་ཕཊ་ཅེས་སྦྱར་བ་ནི། །རྣལ་འབྱོར་མ་ནི་དྲུག་ཏུ་བཤད། །ཅེས་དཔའ་མོ་དྲུག་གི་གོ་ཆའི་སྔགས་གསུངས་ལ། སྦྱར་བའི་དོན་ནི། ཨོཾ་ཧཾ་ཧྲིཾ་ཧྲིཾ་ཧཱུཾ་ཕཊ་དྲུག་གི་སྔོན་དུ་སྦྱོར་བ་ལ། །སྐལ་ལྡན་དང་རྒྱལ་བ་བཟང་པོས་བཤད་དོ། །དཔའ་
9-5-142b


བོ་དྲུག་གི་སྔགས་ཀྱང་དེ་ཉིད་ལས། ཡ་སྡེ་བརྒྱད་པའི་ས་བོན་དང༌། དེ་བཞིན་གུག་བཀྱེད་བཅུ་གཉིས་ཀྱིས། ཡི་གེ་བར་མ་དོར་བྱས་ལ། །ཡན་ལག་དྲུག་ཧེ་རུ་ཀར་བརྗོད། །དཔའ་བོ་དྲུག་དང་མཉམ་སྦྱོར་བ། ཡི་གེ་གཅིག་ཏུ་ཡང་དང་གནས། །ཨོཾ་ན་མ་སྭཱ་ཧཱ་
བཽ་ཥཊ། །ཧཱུཾ་ཧཱུཾ་ཕཊ་དང་ཡང་དག་ལྡན། །ཞེས་གསུངས་སོ། །དེ་ལ་ཡ་ནས་བཟུང་སྟེ། ཧའི་བར་ནི་ཡ་སྡེ་བརྒྱད་དོ། །བརྒྱད་པའི་ས་བོན་ནི་ཧའོ། །ད་ལ་རྀ་ལྀ་བཞི་སྤངས་བའི་གུག་བཀྱེད་དབྱངས་བཅུ་གཉིས་ཀྱིས་མཛེས་པར་བྱས་པས། ཧ་ཧཱ་ནས་
ཧཾ་ཧཿཞེས་པའི་བར་བཅུ་གཉིས་སོ། །དེའི་ཡི་གེ་བར་མ་རིང་བོ་ལྔ་དང་ཐ་མ་དོར་ནས། ཧ་ཧི་ཧུ་ཧ་ཧཾ་ཧོ་སྟེ་ཐུང་དུ་དྲུག་བཞག་གོ། དེ་ནི་ཧེ་རུ་ཀའི་སྙིང་ཁ་ལ་སོགས་པའི་ཡན་ལག་དྲུག་ཏུ་བརྗོད་དེ། དེ་ཡང་རྟེན་དང་བརྟེན་པའི་ཡི་གེ་གཉིས་ངོ་བོ་དབྱེར་
མེད་པའམ། དོན་དམ་པར་ཐ་མི་དད་པའོ། །ཡི་གེ་གཅིག་ཏུ་ཞེས་པ་ལ། ཡི་གེ་རེ་རེ་ཞེས་འབྱུང་བ་དག་པས། ཧ་ཧི་ལ་སོགས་པའི་ཡི་གེ་རེ་རེ་གནས་པ་ནི། ཨོཾ་ནས་ཕཊ་ཀྱི་བར་གྱི་དཔའ་བོ་དྲུག་དང་མཉམ་པར་སྦྱར་བར་བྱ་སྟེ། ཡི་གེ་རེ་
རེ་བ་རྣམས་ཀྱི་སྔོན་དུའོ། །འདི་ནི་སྐལ་ལྡན་གྲགས་པའི་འགྲེལ་པའི་ལུགས་སོ། །རྩ་རྒྱུད་ཀྱི་སྔགས་ཇི་བཞིན་དུ་ཀུན་སྤྱོད་དང་སྡོམ་འབྱུང་ལས་ཀྱང་གསུངས་ལ། ལོ་དྲིལ་གཉིས་ཀྱི་གཞུང་དུ་བཀོད་པ་དེ་རྣམས་དང་མཐུན་ནོ། །ནག་པོ་
པས་བཅུ་གཉིས་པོ་རེ་རེའི་ཐོག་མར་ཨོཾ་ཡིག་སྦྱར་བ་ནི། རྡོ་རྗེ་མཁའ་འགྲོ་ལ་བརྟེན་པའོ། །མངོན་བརྗོད་ལས། སྐུ་གསུང་ཐུགས་དམ་ཚིག་སོགས་ཀྱི་བདེ་མཆོག་རིགས་སོ་སོ་ལ་གོ་ཆ་གཉིས་ཀྱི་སྔགས་རྣམས་རྩ་རྒྱུད་དང་འདྲ་བ་དང་མི་འདྲ་
9-5-143a


བ་དུ་མ་ཞིག་བཤད་དོ། །གོ་ཆའི་ལྷ་ནི་མངོན་བརྗོད་ལས། པདྨ་འདབ་མ་ལྔ་པའི་དབུས་སུ་ཕག་མོ་དང༌། ཤར་ནས་གཡོན་སྐོར་དུ་གཤིན་རྗེ་མ་ནས། ཙ་ཎྜི་ཀའི་བར་ལྔ་བཀོད་ནས། རྡོ་རྗེ་སེམས་དཔའ་སོགས་དྲུག་དང་མཉམ་པར་
སྦྱོར་བ་བཤད་དེ། གནས་ཀྱི་ངོ་བོ་རུ་ཡུམ་བཞུགས་ནས་ཡབ་ཀྱིས་འཁྱུད་པ་དང༌། ཕག་མོ་ནི་ཞལ་གསུམ་ཕྱག་དྲུག་པ་དང༌། ལྷ་མོ་གཞན་ལྔ་ཞལ་གཅིག་ཕྱག་བཞི་པ་དང༌། སྐུ་མདོག་ནི་རིམ་པ་བཞིན་དུ། དམར༌། སྔོ། དཀར། སེར། ལྗང་གུ། དུ་བའི་མདོག་
ཅན་དང༌། རྡོར་སེམས་སོགས་ནི་རིམ་པ་བཞིན་དུ༌། དཀར། སེར། དམར། སྔོ། ལྗང་དང༌། རྡོར་སེམས་ཞལ་གསུམ་ཕྱག་དྲུག་པ། གཞན་ལྔ་ཞལ་གཅིག་ཕྱག་བཞི་པར་བཤད་ཅིང༌། ཡང་ན་སོ་སོར་བསྒོམ་པར་བྱ། ཞེས་ཡབ་ཡུམ་ཕྲན་ནས་སྒོམ་པར་ཡང་
བཤད་ལ། ཡང་ན་ཐམས་ཅད་ཞལ་དྲུག་ཕྱག་བཅུ་གཉིས་པར་སྒོམ་པར་ཡང་བཤད་དོ། །སྒྲུབ་ཐབས་ཀྱི་འགྲེལ་པ་ལྭ་བ་པས་མཛད་པ་དང༌། པྲཛྙཱ་རཀྵི་ཏས་རྡོར་སེམས་ཀྱི་རྩ་ཞལ་དཀར། གཡས་དམར། གཡོན་ནག །ཕྱག་དྲུག་གི་གཡས་གསུམ་ན། རྡོ་རྗེ་དང༌། ཌཱ་མ་རུ་
དང༌། མགོ་བོ། གཡོན་གསུམ་ན། དྲིལ་བུ་དང༌། ཐོད་པ་དང༌། ཁ་ཊྭཱཾ་ག་འཛིན་པར་བཤད་དེ། འཁྲུལ་སྤོང་ལས་ཀྱང་དེ་བཞིན་ནོ། །རྡོ་རྗེ་དྲིལ་ཐོད་ཁ་ཊྭཱཾ་ག །རལ་གྲི་ཅང་ཏེའུ་མགོ་བོ་འཆང༌། །ཞེས་རལ་གྲི་ཞེས་ལྷག་པོ་གཅིག་འཆད་དོ། །གཞན་ལྔ་
པོའི་ཞལ་ཕྱག་གི་གྲངས་དང་ཁ་དོག་སྔ་དང་འདྲ། གཡས་གཉིས་ཀྱི་དང་པོ་ན་རིམ་པ་བཞིན་དུ་འཁོར་ལོ་དང༌། པདྨ་དང༌། རྡོ་རྗེ་དང༌། རིན་པོ་ཆེ་དང༌། རལ་གྲི། འོག་མ་ན་ཌཱ་མ་རུ་དང༌། གཡོན་གཉིས་ན་དྲིལ་བུ་དང༌། ཐོད་པ་དང་བཅས་པའི་ཁ་ཊྭཱཾ་
9-5-143b


ག་འཛིན་པར་བཤད། རྒྱུད་ལས་ཕྱག་བཞིས་ཐོད་པ་དང༌། ཁ་ཊྭཱཾ་ག་དང༌། ཅང་ཏེའུ་དང་དྲིལ་བུ་འཛིན་པར་བཤད་ཀྱང༌། དེའི་འོག་གི་སྐབས་སུ་རང་རྟགས་ཀྱི་ཕྱག་མཚན་འཛིན་པ་ཡང་བཤད་དོ། །དཔའ་མོ་དྲུག་གི་སྐུ་མདོག་དང་ཞལ་ཕག་གི་གྲངས་
ནི་སྔར་དང་འདྲ་ལ། ཕག་མོ་ནི་དམར་སྔོ་ལྗང་བའི་ཞལ་གསུམ། ཕྱག་དྲུག་གི་གཡས་གསུམ་ན་ལྕགས་ཀྱུ་དང༌། ཚངས་མགོ་དང༌། གྲི་གུག་དང༌། གཡོན་གསུམ་ན་ཐོད་པ་དང༌། ཁ་ཊྭཱཾ་ག་དང༌། ཞགས་པ་འཛིན་པ་དང༌། ལྷག་མ་ལྔའི་གཡས་གཉིས་
ན་ཌཱ་མ་རུ་དང་གྲི་གུག །གཡོན་གཉིས་ན་ཐོད་པ་དང་བཅས་པའི་ཁ་ཊྭཱཾ་ག་དང༌། དྲིལ་བུ་འཛིན་པར་བཤད་དེ། རྒྱུད་ནའང་དེ་བཞིན་དུ་ཡོད་དེ། ཡབ་ཡུམ་ཐམས་ཅད་ཀྱང་གཡས་བརྐྱང་གིས་གདན་ལ་བཞུགས་པ། དཀར་པོ་རྣམས་ཟླ་གདན་དང༌། ཟླ་
བའི་འོད་དཀོར་ཅན། གཞན་རྣམས་ཉི་མའི་གདན་དང༌། དེའི་འོད་ཀོར་ཅན་ནོ། །དཔའ་བོ་རྣམས་ཕྱག་རྒྱ་དྲུག་པ་དང༌། ཐོད་པའི་དབུ་རྒྱན་དང༌། མགོ་བོའི་དོ་ཤལ་དང༌། སྤྱན་གསུམ་པ། སྟག་ལྤགས་ཅན་དང༌། དཔའ་མོ་རྣམས་ཕྱག་རྒྱ་ལྔ་པ་དང༌། གཅེར་མོ་
སྐྲ་གྲོལ་བ་དང༌། སྤྱན་གསུམ་པ་དང༌། ཐོད་པའི་དབུ་རྒྱན་དང་མགོ་ཕྲེང་ཅན་ནོ། རྩ་རྒྱུད་ཀྱི་འགྲེལ་པ་རྣམས་སུ་ཚུལ་འདི་ལས་གཞན་དུ་བཤད་པའང་ཡོད་དོ། །སྒྲུབ་ཐབས་ཀྱི་འགྲེལ་པ་གཉིས་ལ་སོགས་པ་མང་པོས་ཡབ་ཀྱི་གོ་ཆ་ལ་ཡུམ་མ་
བཤད། ཡུམ་གྱི་གོ་ཆ་ལ་ཡང་ཡབ་མ་བཤད་ལ། རྩ་རྒྱུད་ཀྱི་འགྲེལ་པ་ཁ་ཅིག་གིས་ཡབ་ཀྱི་གོ་ཆ་ཡུམ་བཅས་དང༌། ཡུམ་གྱི་གོ་ཆ་ལ་ཡབ་མ་བཤད་ལ། ཨ་བྷྱཱ་ཀ་རས་ཡབ་ཀྱི་གོ་ཆ་ཡུམ་བཅས་དང༌། ཡུམ་གྱི་གོ་ཆ་ལ་ཡབ་ཡོད་མེད་
9-5-144a


གཉིས་ཀ་བཤད་དེ༌། མངོན་བརྗོད་ལས་གདམ་ང་ཅན་དུ་གསུངས་པ་ལ་བརྟེན་པའོ། །གང་ལྟར་ཡང་ལྟེ་བར་ཨོཾ་བཾ་ཞེས་སོགས་ཀྱིས་དཔའ་མོའི་གོ་ཆ་འགོད་པ་ནི་ཡུམ་ལ་ཡིན་གྱི། ཡབ་ལ་མི་བྱེད་དོ། །ཨོཾ་ཧ་སོགས་སྙིང་་
ཁ་སོགས་སུ་འགོད་པ་ཡང་ཡུམ་ལ་མི་བྱེད་དོ། །དེ་ལྟར་གཉིས་བཤད་ཀྱང༌། ལོ་དྲིལ་གཉིས་ལ་ནི་འགྲེལ་པ་གཉིས་བཞིན་དུ་བྱའོ། །འོ་ན་གོ་ཆ་དེ་དག་མངོན་རྟོགས་ཀྱི་སྐབས་གང་དུ་བྱེད་སྙམ་ན། ལོ་དྲིལ་གཉིས་ཀྱིས་སྒྲུབ་ཐབས་ཆེ་བ་གཉིས་ལས་དམ་ཚིག་པ་
རྫོགས་ཤིང༌། ཡེ་ཤེས་པ་སྤྱན་མ་དྲངས་པའི་སྐབས་སུ་གོ་ཆ་མཛད་པ་ནི་མངོན་སྤྱོད་དང་སྡོམ་འབྱུང་དང་མཐུན། ཕྱི་མའི་ལུགས་དེ་ལྟར་ཡིན་པར་དེའི་མདོར་བསྟན་གྱི་སྐབས་ལས་ཤེས་སོ། །མངོན་བརྗོད་ལས་དེ་ལྟར་བཤད་པ་དང༌། ཡེ་ཤེས་
པ་སྤྱན་དྲངས་པའི་འོག་དང༌། མཉམ་གཞག་ལས་ལངས་པའི་དུས་སུ་གོ་ཆ་བྱེད་པ་ཡང་བཤད་དོ། །དེ་ལྟར་ཡོད་ཀྱང་སྐབས་གང་གི་གཞུང་ཁུངས་ཐུབ་གང་ཡིན་པ་ནས་བཤད་པ་བཞིན་དུ་མ་འདྲེས་པར་བྱས་ན་ལེགས་སོ། །འོ་ན་གོ་ཆ་དེ་དག་
ཚུལ་ཇི་ལྟར་དགོད་སྙམ་ན། འདི་ནི་ཚིག་དོན་གྱི་སྐབས་སུ་བཤད་པར་བྱའོ། །གོ་ཆའི་དོན་ནི་ལཱུ་ཨི་བའི་དཔའ་བོ་གཅིག་བའི་སྒྲུབ་ཐབས་ལས། གོ་ཆ་གཉིས་ཀྱིས་ལུས་བཅིངས་ན། །མི་ཕྱེད་པ་དང་མི་གཡོ་བར་འགྱུར་རོ། །ཞེས་གསུངས་ཤིང༌། 
དེར་ཡེ་ཤེས་པ་གཞུག་པ་མ་བྱུང་བས། དམ་ཚིག་པ་དང་ཡེ་ཤེས་པ་གཉིས་དབྱེར་མི་ཕྱེད་པར་བྱེད་བ་མིན་པས། གཙོ་བོ་ཡབ་ཡུམ་དུ་བསྐྱེད་པ་ན་ཧེ་རུ་ཀ་དང༌། རྡོ་རྗེ་ཕག་མོར་དངོས་སུ་མོས་བར་བྱས་པ་དེ་ལས་གཞན་དུ་བགེགས་ཀྱིས་མི་
9-5-144b


ཕྱེད་ཅིང་གཡོ་མི་ནུས་པར་བྱེད་པའོ། །ཀུན་སྤྱོད་དང་སྡོམ་འབྱུང་ལས། གོ་ཆ་དྲུག་གིས་བསྲུངས་པར་བཤད་པའི་དོན་ཡང་དེའོ། །གཉིས་པ་ནི། དོན་གཉིས་མདོར་བསྟན་པའི་རྗེས་དེ་ནས་སྔར་གོ་ཆ་གཉིས་ཤེས་པས་ཞེས་གསུངས་པ་རྒྱས་པར་
བཤད་པར་བྱ་སྟེ། ཨོཾ་ཧ་དཀར་པོ་སྙིང་ཁར་དགོད་ལ། རྡོ་རྗེ་སེམས་དཔའ་དང་ངོ་བོ་དབྱེར་མེད་དུ་མོས་པར་བྱ་བའམ། ཡང་ན་སྔགས་དེ་ཡོངས་སུ་གྱུར་པ་ལས། རྡོར་སེམས་སུ་སྡར་བཤད་པ་ལྟར་བསྐྱེད་དེ། ལྷག་མ་ལྔ་ལ་ཡང་དེའི་རིགས་པ་སྦྱར་
རོ། །མགོ་ནི་སྐྲ་མཚམས་སམ་མཚོགས་མའོ། །ཕཊ་ཧཾ་ཡན་ལག་ཐམས་ཅད་ལ་ཞེས་པའི་ཡན་ལག་ཐམས་ཅད་ནི། ལྭ་བ་བས། པགས་པའི་ནང་ན་གནས་པའི་རྡུལ་ཕྲ་རབ་རྣམས་དེའི་རང་བཞིན་དང༌། ཁ་དོག་ཅན་དུའོ་ཞེས་གསུངས་པ་ལྟར་
པྲཛྙཱ་རཀྵི་ཏས་ཀྱང་བཤད་པས། ལུས་དབང་གི་རྡུལ་ཕྲ་རབ་ཐམས་ཅད་རྟ་མགྲིན་གྱི་ངོ་བོའི་ཕཊ་ཧཾ་ལྗང་གུར་མོས་པར་བྱའོ། །སྔགས་འགོད་པའི་གནས་ནི། ལྭ་བ་པས། དབྲལ་བར་འགོད་པར་གསུངས་པ་ལྟར་བྱ་སྟེ། ལྷ་འགོད་ན་ཡང་ལུས་དབང་གི་རྡུལ་
ཐམས་ཅད་དེའི་ངོ་བོར་མོས་པར་བྱའོ། །ཁ་ཅིག་ཡན་ལག་ཐམས་ཅད་ལ་ཞེས་བཤད་པས། དབྲལ་བར་འགོད་པ་འགོག་པ་ནི་མི་འཐད་དེ། དེ་ལྟ་ཡིན་ན་གཟུགས་ཕུང་ལ་རྣམ་སྣང་ཞེས་དང༌། ལུས་ལ་ཕྲག་དོག་རྡོ་རྗེའོ། །ཞེས་སོགས་བཤད་པ་ལ་ལྷ་དེ་
གཉིས་སྤྱི་བོ་དང་དཔྲལ་བར་སྒོམ་པ་ཡང་མི་འཐད་པར་འགྱུར་བ་སོགས་མང་ངོ༌། །པགས་པའི་ནང་དུ་ཞེས་གསུངས་པས་གོ་ཆ་ལྷག་མ་རྣམས་ཀྱང་ལུས་ཀྱི་ནང་དུ་འགོད་དོ། །ལྭ་བ་པས། གཞན་དུ་གོ་ཆའི་ལྷ་བཅུ་གཉིས་པོ་ས་བོན་གྱི་ཡི་གེ་ཧ་དང་བཾ་ལ་
9-5-145a


སོགས་པ་རེ་རེ་ལས་ཀྱང་སྐྱེད་པར་བཤད་དོ། །ཨོཾ་བཾ་ལ་སོགས་པ་ཡང་ཡི་གེ་འགོད་པའམ་ལྷ་འགོད་པ་སོགས་སྔར་དང་འདྲ་ཞིང༌། ཡན་ལག་ཐམས་ཅད་ཀྱང་སྡར་བཞིན་ནོ། །མཚོན་ཆའོ་ཞེས་པ་གཉིས་ནི་སྔར་བཤད་པའི་དྲུག་ཚན་གཉིས་གོ་ཆར་
སྟོན་པའོ། །ལྟེ་བ་ཞེས་སོགས་ནི་ཡུམ་གྱི་གོ་ཆ་དྲུག་གང་དུ་འགོད་པའི་གནས་སོ། །ཁ་ནི་མགྲིན་པར་འགོད་པ་ལ་ཡང་དེ་ལྟར་བཤད་པ་མང་བ་བཞིན། ལྭ་བ་པས། ལྟེ་བ་སྙིང་ཁ་མགྲིན་པ་མགོ། ཞེས་ཀྱང་བཤད་པས་མགྲིན་པར་དགོད་དོ། །སྤྱི་གཙུག་
ནི་སྡར་བཞིན་ནོ། །མཚོན་ན་ཆ་ཉིད་ཅེས་པ་ནི་སྐབས་འདིར་ཡན་ལག་ཐམས་ཅད་ལ་བྱའོ། །མན་སྙེར་དང་པོ་གཉིས་འདྲ་ཞིང༌། ཕྱི་མའི་ཡི་གེ་བཞིའི་སྔོན་དུ་ཧོ་ཧཱི་སྭཱ་ཧཱ། ཞེས་པ་སྦྱར་རོ། རྩ་རྒྱུད་ལས། དག་པོ་གསུམ་དང་ལྔ་པའི་གནས་སྔར་དང་
འདྲ་ཞིང༌། བཞི་པ་གོ་ཆ་ཉིད་དུ་ཡིན་ཞེས་པ་ནི། ཧེ་ཕྲག་པ་གཉིས་སུ་གོ་ཆའི་གཟུགས་ཀྱིས་འགོད་པ་དང༌། དྲུག་པ་མཚོན་ཆ་ཞེས་བྱར་འདོད། ཅེས་པ་ནི་རྟ་མགྲིན་ལུས་ཐམས་ཅད་ལ་འགོད་པ་ལ་སྐལ་ལྡན་གྲགས་པས་བཤད་དོ། །གཉིས་
པ་ནི། སྔར་སྔགས་དང་ཕྱག་རྒྱས་ཡེ་ཤེས་པ་སྤྱན་འདྲེན་པར་བཤད་པ་འཆད་པ་ལ་ཕྱག་རྒྱ་ནི། མཛུབ་མོ་གཉིས་མདུད་པ་སྟེ་ལུ་གུ་རྒྱུད་དུ་བྱ། གུང་མོ་གཉིས་རྩེ་མོ་སྦྱར་བ་དང༌། མཐེ་བོང་གཉིས་རྡོ་རྗེ་སྟེ་མི་ཕྱེད་པར་བརྟན་པོར་རབ་ཏུ་སྦྱར་
ནས་ཐུར་དུ་བསྟན། མིང་མེད་དང་མཐེའུ་ཆུང་རྣམས་བརྐྱང་པ། དཔྲལ་བའི་དབྱེས་ཀྱི་དབུས་ཀྱི་ཐད་བཞག་ནས། །ཀུན་ཏུ་བསྒྱུར་བར་བྱའོ། །ཇི་ལྟར་ན་འགྲེལ་པ་སྡོམ་འབྱུང་ལས། གཡོན་དང་གཡས་སུ་བསྐོར་བར་བྱ། ཞེས་བཤད་པ་ལྟར། རྒྱལ་བ་
9-5-145b


བཟང་པོས་ཀྱང་གཡོན་དང་གཡས་གཉིས་ཀར་བསྐོར་བར་བཤད་པས། དང་པོར་གཡོན་དུ་བསྐོར་ཞིང་དེ་ནས་གཡས་སུ་བསྐོར་བས་སོ། །ཀུན་སྤྱོད་ལས། རྐང་པ་མནན་ཞིང་ཞེས་པ་ཙམ་ལས་མི་འབྱུང་ལ། མངོན་བརྗོད་ལས། རྐང་པ་ཕྱེད་མནན་ཞེས་དང༌། 
རྐང་པ་གཡས་བརྐྱང་གནས་ནས་སུ། །ཞེས་འབྱུང་བའི་དོན་འཁྲུལ་སྤོང་དང༌། འགྲེལ་པ་སྡོམ་འབྱུང་ལས་རྐང་པ་གཡོན་པས་གཡས་པ་མནན་པར་བཤད་ཅིང༌། རྒྱལ་བ་བཟང་པོས། རྡོ་རྗེ་སྐྱིལ་མོ་ཀྲུང་བརྐྱང་ནས་ཞེས་རྡོ་རྗེ་སྐྱིལ་མོ་ཀྲུང་བཤིག་ནས་གཡས་
བརྐྱང་བའོ། །ལངྐའི་སྒྲུབ་ཐབས་སུ་རྐང་པ་གཡས་པའི་མཐེབ་ཆེན་གྱི་སྟེང་དུ་གཡོན་པའི་མཐེབ་ཆེན་གྱིས་མནན་པ་ཞེས་འབྱུང་བས་དེ་ལྟར་བྱའོ། །དེའི་དཀྱིལ་ཆོག་ཏུ་གནོན་ལུགས་བཟློག་སྟེ་འབྱུང་བ་ནི་འགྱུར་སྐྱོན་ཡིན་གསུང་བ་ལྟར་ལེགས་
སོ། །གྱེན་དུ་བལྟ་ཞེས་པ་ནི་སྐོར་བའི་སྔོན་དུ་མིག་ཅུང་ཟད་འོག་ཏུ་དམའ་བར་བྱས་ནས། གཡོན་ནས་གྱེན་དུ་བལྟས་ཏེ་བྱ་བར་འགྲེལ་པ་སྡོམ་འབྱུང་ལས་བཤད་པ་ལྟར་རོ། །གྱེན་དུ་བལྟས་ནས་ཕེཾ་ཞེས་པའི་སྒྲ་སྒྲོགས་པ་ཡིས། ཕྱོགས་བཅུའི་
འཇིག་རྟེན་གྱི་ཁམས་ན་བཞུགས་པའི་དཔའ་བོ་དང་དཔའ་མོའི་དབང་ཕྱུག་མ་རྣམས་དཀྱིལ་འཁོར་གྱི་འཁོར་ལོར་གྱུར་བའི་ཡེ་ཤེས་ཀྱི་འཁོར་ལོ་འགུགས་པར་བྱེད་དོ། །ཀུན་སྤྱོད་ལས་ཕཊ་ཅེས་ཀྱང་འབྱུང་ངོ༌། །ལྭ་བ་པས། སྙིང་ཁའི་འོད་ཟེར་
གྱིས་དྲངས་པ་ཞེས་འབྱུང་བ་ནི། པྲཛྙཱ་རཀྵི་ཏས་སྙིང་ཁའི་ས་བོན་གྱི་འོད་ཟེར་གྱིས་བཀུག་པ་ཞེས་འབྱུང་བ་ལྟར་ཡིན་པས། དེ་ཡང་དགོས་ལ། སྙིང་ཁའི་ས་བོན་ནི་ཨ་བྷྱཱ་ཀ་ར་དང༌། དེ་བཞིན་གཤེགས་པའི་རྡོ་རྗེས་དམ་ཚིག་པ་གསལ་གདབ་པ་རྫོགས་
9-5-146a


པ་དང༌། ལྷ་ཐམས་ཅད་ཀྱི་ཐུགས་ཀར་ཉི་གདན་ལ་ཏིང་ངེ་འཛིན་སེམས་དཔའ་སྒོམ་པར་བཤད་པ་ཡིན་ནོ། ལྭ་བ་དང་པྲཛྙཱ་རཀྵི་ཏའི་འགྲེལ་པ་རྡོག་འགྱུར་ལས། ལྷ་མོ་བཅུ་དྲུག་གིས་མཆོད་བཞིན་པའི་ཡེ་ཤེས་པ་
སྤྱན་འདྲེན་པར་བཤད་པ་ལྟར་ན། སྤྱན་དྲངས་པའི་རྗེས་སུ་མཆོད་པ་མི་བྱེད་པ་འདྲ་བ་ཅིག་ཡོད་ཀྱང་འགྲེལ་པ་ཕྱི་མའི་འགྱུར་གཞན་དང༌། འགྲེལ་པ་སྡོམ་འབྱུང་ལས། སྤྱན་དྲངས་པ་ལ་མཆོད་ནས་རང་ལ་གཞུག་པར་བཤད་པ་བཞིན་བྱེད་དགོས་
སོ། །སྤྱན་འདྲེན་པའི་ཕྱག་རྒྱ་ལ་ལང་ཀས་དམ་ཚིག་གི་ཕྱག་རྒྱ་ཞེས་ཟེར། འགྲེལ་པ་སྡོམ་འབྱུང་ལས། ཕྱག་རྒྱ་དྲ་བ་ཞེས་པ་འདིས། ཞེས་དྲ་བའི་ཕྱག་རྒྱར་བསྒྱུར་བ་ནི། འཁྲུལ་སྤོང་ལས། འབར་བའི་ཕྱག་རྒྱ་ཞེས་བསྒྱུར་བ་ལེགས་ཏེ། 
མེ་འབར་བའི་རྣམ་པ་ཅན་ལས་བཏགས་པའི་ཕྱིར། ཛྭ་ལ་འབར་བ་དང༌། ཛྭ་ལ་དྲ་བ་ལ་ཡང་འཇུག་པའི་ཆ་གཉིས་ཡོད་པར་སྣང་ངོ༌། །སྡོམ་འབྱུང་དང་ཀུན་སྤྱོད་དང༌། འགྲེལ་པ་གཞན་གསུམ་དང༌། འཁྲུལ་སྤོང་ལས། ཡེ་ཤེས་པ་འཇུག་པ་ལ་སྔགས་
མ་གསུངས་ཀྱང་དྲིལ་བུ་པས་གསུངས་པ་བཞིན་དུ་ཇོ་བོ་ཆེན་པོའི་འགྲེལ་པ་ལས། ཛཿཧཱུཾ་བཾ་ཧོཿས་དགུག་གཞུག་བཅིང་མཉེས་བཞི་བྱ་བར་གསུངས་པ་འདིར་ཡང་སྦྱར་ཏེ། མངོན་བརྗོད་ལས། ཛཿཧཱུཾ་བཾ་ཧོཿརྡོ་རྗེ་ལྕགས་ཀྱུ་ལ་
སོགས་པའི་སྦྱོར་བས། དགུག་ཅིང་གཞུག་སྟེ་བཅིངས་ལ་དབང་དུ་བསྡུའོ། །ཞེས་ལུས་དཀྱིལ་རྐྱང་པ་སྒོམ་པ་ལ་གསུངས་པས། དཀྱིལ་འཁོར་དེར་སྒོ་བ་ལྕགས་ཀྱུ་ལ་སོགས་པ་མེད་ཀྱང༌། དེ་དག་གིས་དགུག་པ་སོགས་བྱ་བར་ཤིན་ཏུ་རུང་ངོ༌། །དེ་
9-5-146b


ཡང་བཛྲ་ཨངྐུ་ཤ་ཛཿཞེས་བརྗོད་པས་ཡེ་ཤེས་པ་རྣམས་དམ་ཚིག་པ་རང་རང་གི་སྟེང་དུ་དགུག །བཛྲ་པཱ་ཤ་ཧཱུཾ་ཞེས་པས་སོ་སོལ་གཞུག །བཛྲ་སྤོ་ཌ་བཾ་ཞེས་པས་འོ་ཆུ་འདྲེས་པ་ལྟར་དབྱེར་མེད་དུ་བཅིང༌། བཛྲ་གྷ་ཎྜ་ཧོཿཞེས་པས་མི་བཞེད་པ་མེད་པར་
དགྱེས་བཞིན་དུ་བཞུགས་པས་བསམ་སྟེ། རྟེན་རྣམས་ལ་ཡང་འོད་ཕྲེང་དང་དུར་ཁྲོད་ལ་སོགས་པའི་བར་དུ་ཡང་བསྟིམ་མོ། །དེ་ནི་བདག་དང་ཡེ་ཤེས་པ་ཐ་དད་དུ་རྟོག་པ་འགོག་པ་དང་དབྱེར་མེད་ཀྱི་ང་རྒྱལ་བརྟན་པ་དང༌། བྱིན་གྱིས་རློབ་པའི་དོན་དུ་ཡིན་པར་
ཇོ་བོ་ཆེན་པོས་བཤད་དོ། གོ་ཆ་བགོ་བ་དང༌། ཡེ་ཤེས་པ་སྤྱན་དྲངས་པ་ལ་མཆོད་ནས། དམ་ཚིག་པ་ལ་གཞུག་པ་ནི། སྔར་བཤད་པ་བཞིན་དུ་དྲིལ་བུ་པའི་ལུས་དཀྱིལ་ལ་ཡང་བྱའོ། །དྲིལ་བུ་པའི་ལྷ་ལྔར། ཕྱི་གསང་མཆོད་པའི་ལྷ་མོ་རྣམས། སྤྱན་
དྲངས་བགེགས་བསྐྲད་མཆོད་ཡོན་དབུལ། ཞེས་སྤྱན་དྲངས་པ་ལ་བགེགས་བསྐྲད་པ་དང༌། མཆོད་ཡོན་སྔོན་དུ་འགྲོ་བའི་ཕྱིར་དང་གསང་བའི་མཆོད་པས་མཆོད་པར་བཤད་པ་ནི་དྲིལ་བུ་བའི་ལུས་དཀྱིལ་ལ་ཡང་བྱའོ། །གཞུང་ཆུང་ལས། ཡེ་ཤེས་སྤྱན་
དྲངས་ལེགས་མཆོད་ནས། ཡི་གེ་བཞི་ཡིས་རང་ལུས་གཞུག །གནས་གསུམ་བྱིན་བརླབ་གོ་ཆ་བཅིང༌། །ཞེས་གཤད་པའི་གནས་གསུམ་བྱིན་བརླབ་ནི་ལུས་དཀྱིལ་དང་ལྷ་ལྔ་ལ་ཡང་བྱའོ། །དེ་ནས་གོ་ཆ་བགོ་བ་ནི་སྤྱིར་ཡེ་ཤེས་པ་བཅུག་པའི་
འོག་ཏུ་ཡང་བྱེད་པར་རྒྱུད་ནས་གསུངས་མོད་ཀྱང༌། ལོ་དྲིལ་གྱི་ལུགས་ནི་སྔར་བཤད་པ་ལྟར་བྱེད་པར་སྣང་བས་གཞུང་ཆུང་གིས་བཤད་པའི་རིམ་པ་ལ་དེ་ལྟར་བྱུང་ཡང་གོང་དུ་བླངས་ན་མཐུན་པར་འགྱུར་རོ། །ཡེ་ཤེས་པ་བཅུག་པའི་རྗེས་སུ། ཨོཾ་
9-5-147a


ཡོ་ག་ཤུདྡྷ་ཞེས་པས་ང་རྒྱལ་འཛིན་ཏེ། དེ་ལ་ཡོ་ག་ནི་རྣལ་འབྱོར་དང་སྦྱོར་བ་གཉིས་ལ་འཇུག་ཀྱང༌། འདིར་དམ་ཚིག་པ་དང་ཡེ་ཤེས་པ་གཉིས་རོ་མཉམ་དུ་སྦྱར་བ་ལ་བྱའོ། །འོ་ན་དེ་ཆོས་ཐམས་ཅད་ཀྱི་དག་པར་འོང་
ལུགས་ཇི་ལྟར་ཡིན་སྙམ་ན། ཆོས་ཐམས་ཅད་ཀྱི་དེ་ཁོ་ན་ཉིད་དང༌། བདེ་བ་ཆེན་པོའི་ཡེ་ཤེས་གཉིས་ངོ་བོར་དབྱེར་མེད་ཡིན་ལ། དེ་ཉིད་རྟེན་བརྟེན་པའི་དཀྱིལ་འཁོར་དུ་ཤར་བར་མོས་པ་ཡིན་ཞིང༌། དེ་ཡང་གཙོ་བོ་ཡབ་ཡུམ་དུ་ཤར་བའི་ཆ་ཤས་
སུ་མོས་དགོས་པས་ངའོ་ཞེས་ང་རྒྱལ་འཛིན་ནོ། །སྔགས་ཀྱིས་ང་རྒྱལ་འཛིན་པ་བཤད་པའི་རྗེས་དེ་ནས་སྙིང་པོའི་ཕྱག་རྒྱ་སྦྱིན་པ་བཤད་པར་བྱ་སྟེ་ཞེས་སོ། །འདི་ལ་འགྲེལ་པ་གཉིས་ཀྱི་འགྱུར་དང༌། ཆག་འགྱུར་ལས། སྙིང་ཁའི་ཕྱག་རྒྱ་ཞེས་
འབྱུང་ལ། ལོ་ཆེན་དང་མར་དོའི་འགྱུར་ལས། སྙིང་པོའི་ཕྱག་རྒྱ་ཞེས་འབྱུང་ངོ༌། །སྔགས་གོང་མ་ཕྱག་རྒྱ་དང་བཅས་པ་སྐབས་འདིར་བྱེད་པ་ནི་སྡོམ་འབྱུང་ལས་གསུངས་ཏེ། སྔགས་གོང་མ་བརྗོད་པའི་མཇུག་ཏུ། སྙིང་ཁང་གཡས་གཡོན་ཕྱག་
དག་གིས་བཀོད་དེ་པདྨ་ལྟར་རྒྱས་བྱ། །སྙིང་པོའི་ཕྱག་རྒྱ་སོགས་ལ་བསྐོར། །མཁའ་འགྲོ་མ་ཡི་དྲ་བ་སྡོམ། །ཞེས་འགྱུར་གསར་སྙིང་གཉིས་ཀ་ལས་སྙིང་པོའི་ཕྱག་རྒྱ་ཞེས་འབྱུང་བས་དེ་དག་པར་མངོན་ནོ། །ཕྱག་རྒྱ་ནི། ལག་པ་གཡོན་པ་དང་གཡས་པ་
དག་སྙིང་ཁར་པདྨ་ཁ་བྱེ་བ་ལྟར་གྱི་པད་ཀོར་བྱས་པའི་མཐར། ཕྱག་རྒྱ་སྡུད་པ་ན་འཁྱུད་པའི་ཚུལ་བྱེད་པའོ། །དེ་ལྟར་བསྐོར་བ་དེ་ནི་མཁའ་འགྲོ་མའི་དྲ་བ་སྟེ། ཚོགས་ཀུན་གྱི་བདེ་བ་དམ་པ་སྟེ་མཆོག་སྦྱིན་པར་བྱེད་པའོ། །དེས་ན་མཁའ་འགྲོ་མའི་
9-5-147b


སྙིང་པོ་སྟེ་ཐུགས་མཉེས་པར་བྱེད་པའི་ཕྱག་རྒྱ་སྟེ། སྔགས་སྔ་མ་བརྗོད་ཅིང་བྱེད་དོ། །འདི་ལ་མར་དོས་སྔགས་ལན་རེ་དང་པད་ཀོར་གཡོན་དང་གཡས་དང་དབུས་གསུམ་དུ་བྱས་པའི་མཐར་འཁྱུད་ཚུལ་བྱེད་ལ། མལ་གྱོ་ནས་བརྒྱུད་པ་རྣམས་རྣམ་ལྔ་འདོད་
པའི་ཕྱོགས་སུ་ཞེས་པས་དབུས་སུ་གསུམ་དང༌། གཡས་གཡོན་དུ་རེ་རེ་བྱེད་དོ། །སོགས་ལ་བསྐོར་ཞེས་པ་ནི་སོགས་ཀྱིས་བསྐོར་བའི་དོན་དང༌། སོགས་ཀྱིས་ནི་སྔགས་བརྗོད་པ་བསྡུའོ། །དེ་ནས་འགྲེལ་པ་རྣམས་ནས་སྔར་ལྟར་སྔགས་གསུམ་གྱིས་ང་རྒྱལ་
འཛིན་པར་གསུངས་པའི་དོན་སྔར་ལྟར་རོ། །སྔར་བཤད་པ་ནི་སྔར་གྱི་དཀྱིལ་འཁོར་མངོན་བྱང་ལས་སྐྱེད་པའི་སྐབས་སུ་སྔགས་གསུམ་ལས་སྐྱེད་པའི་དོན་བསྡུ་ཡིན་གྱི། སྐབས་དེར་སྔགས་གསུམ་གྱིས་ང་རྒྱལ་འཛིན་པ་མིན་པ་ནི། རྣལ་འབྱོར་
དབང་ཕྱུག་གི་དགོངས་པར་སྔར་བཤད་པ་ལྟར་ཡིན་པས། དེར་བཤད་པའི་སྐབས་ཙམ་ལ་འཁྲུལ་བར་མི་བྱ་སྟེ། རྒྱ་གར་བ་ཁ་ཅིག་གིས་ཀྱང་དོན་དེ་རྣལ་འབྱོར་དབང་ཕྱུག་གི་དགོངས་པ་ལྟར་མ་ངེས་པར་འདུག་པའི་ཕྱིར་རོ། །གཉིས་པ་ནི། གཞུང་
དུ་དབང་བསྐུར་བའི་ཚིགས་བཅད་དང་སྔགས་སྔགས་མཆོད་ཀྱི་འོག་ཏུ་གསུངས་པ། ལྭ་བ་པས། སྐབས་འདིར་དྲངས་ཏེ་བཤད་པ་ལྟར། དྲིལ་བུ་ཞབས་ཀྱི་གཞུང་གསུམ་དུ་ཡང་ཡེ་ཤེས་པ་བཅུག་པའི་འོག་བདག་བསྐྱེད་ལ་མཆོད་པའི་སྔོན་དུ་བྱ་
བར་གསུངས་ལ། དེ་བཞིན་དུ་ཇོ་བོ་ཆེན་པོ་དང༌། པྲཛྙཱ་རཀྵི་ཏ་དང༌། དེ་བཞིན་གཤེགས་པའི་རྡོ་རྗེས་ཀྱང་བཤད་པས། འདིར་བླང་ངོ༌། །དེ་ལ་དབང་བསྐུར་བའི་ལྷ་ནི་སྔར་ཡེ་ཤེས་པ་སྦྱན་དྲངས་པ་དང་དུས་མཉམ་དུ་སྤྱན་འདྲེན་པ་མན་ངག་ཡིན་པར་ལྭ་བ་
9-5-148a


པས་གསུངས་པ་ལྟར། འགྲེལ་པ་གཞན་གཉིས་ཀྱིས་ཀྱང་བཤད་དོ། །དྲིལ་བུ་པས་ཀྱང༌། སྙིང་ཁའི་ཧཱུཾ་གི་འོད་ཟེར་གྱིས། ཡེ་ཤེས་དཀྱིལ་འཁོར་དབང་བསྐུར་ལྷ། སྤྱན་དྲངས། ཞེས་གསུངས་པ་ཡང་དེ་དང་འདྲའོ། །དབང་
གི་ལྷ་ནི་ཇོ་བོས་ལྷ་སོ་བདུན་ལ་བཤད་པ་ལྟར་བྱ་ལ། དེའི་རྣལ་འབྱོར་མ་རྣམས་ནི། ཡེ་ཤེས་ཀྱི་བདུད་རྩིས་གང་བའི་ཐོད་པ་དང༌། ཌཱ་མ་རུ་འཛིན་པའོ། །དེ་ལྟར་སྤྱན་དྲངས་པ་ལ། རང་གི་སྙིང་ཁའི་ས་བོན་ལས་བྱུང་བའི་རིག་མ་བཅུ་དྲུག་སོགས་
ཀྱིས་མཆོད་ནས། དེ་བཞིན་གཤེགས་པ་ཐམས་ཅད་ཀྱིས་བདག་ལ་དབང་བསྐུར་དུ་གསོལ། ཞེས་ཡིད་ཀྱིས་གསོལ་བ་གདབ་པར་བྱའོ། །དེའི་ཚེ་རྣལ་འབྱོར་མ་རྣམས་ཀྱིས་ཇི་ལྟར་བལྟམས་པ་ཞེས་པ་ནས་ཁྲུས་བྱའོ། །ཞེས་པའི་བར་བརྗོད་ཅིང༌། 
ཕྱག་གཡོན་པའི་ཐོད་པ་ཅུང་ཟད་ཡོ་བར་བྱས་ཏེ། བླུགས་པའི་ཡེ་ཤེས་ཀྱི་བདུད་རྩིའི་རྒྱུན་གྱིས་སྤྱི་བོ་ནས་དབང་བསྐུར་བས་རང་དང་ལྷ་རྣམས་བདེ་བ་ཆེན་པོའི་བདག་ཉིད་དུ་བསམ་མོ། །འགྲེལ་པ་གཉིས་ནས་རིགས་བདག་གིས་རྒྱས་བཏབ་པའི་
འོག་ཏུ་དབང་བསྐུར་གྱི་སྔགས་བརྗོད་པར་གསུངས་ཀྱང༌། དྲིལ་བུ་པས་དབང་བསྐུར་བའི་ཚེ་བརྗོད་པར་གསུངས་པ་ལྟར་བྱའོ། ཚིགས་བཅད་ཀྱི་དོན་ནི་ཇི་ལྟར་ཏེ་དཔེར་ན། བཅོམ་ལྡན་འདས་ཡུམ་ལས་བལྟམས་པ་ཙམ་གྱི་དུས་སུ་དེ་
བཞིན་གཤེགས་པ་ཀུན་གྱིས་ཁྲུས་གསོལ་བ་དེ་བཞིན་དུ་དབང་གི་ལྷ་ཡི་བདུད་རྩིའི་ཆུ་རྣམ་པར་དག་པ་ཡིས། དབང་བསྐུར་བའི་ལྷ་བདག་གིས་དྲི་མ་འཁྲུད་པའི་ཁྲུས་བྱའོ་ཞེས་དང༌། སརྦྦ་ཏ་ཐཱ་ག་ཏ་ནི་དེ་བཞིན་གཤེགས་པ་
9-5-148b


ཐམས་ཅད་དོ། །ཨ་བྷི་ནི་མངོན་པར་རོ། །ཥེ་ཀ་ནི་དབང་བསྐུར་བའོ། །ས་མ་ཡ་ཤྲི་ཡེ་ནི་དམ་ཚིག་གི་དཔལ་ཏེ། དེ་ལྟར་གསུངས་པར་བསམ་པའོ། །མདོ་སྡེའི་ཕྱོགས་རྣམས་ལས་ཡུམ་ལས་བལྟམས་པའི་དུས་སུ་འཇིག་རྟེན་པའི་ལྷས་ཁྲུས་གསོལ་
པར་བཤད་པ་ཙམ་ལས་མ་བྱུང་ཡང་མངོན་བརྗོད་སོགས་ནས་སྔར་བཞིན་གསུངས་སོ། །དབང་བསྐུར་བའི་དུས་སུ་སྒོ་མཚམས་མ་བརྒྱད་ཀྱིས་བགེགས་སྐྲོད་པ་དང༌། དཔའ་བོ་རྣམས་ཀྱིས་བཀྲ་ཤིས་དང༌། དཔའ་མོ་རྣམས་ཀྱིས་གླུ་དང༌། ཡུམ་བཞི་ཕག་མོ་
དང་ལྔས་རིན་པོ་ཆེའི་བུམ་པ་བདུད་རྩིས་དཀང་པ་བསྣམས་ནས་དབང་བསྐུར་བར་ཇོ་བོས་བཤད་དོ། །མངོན་བརྗོད་ལས་འགྲེལ་པ་རྣམས་ནས་འབྱུང་བ་བཞིན་དུ་བདུད་རྩི་ལྔས་གང་བའི་ཐོད་པས་དབང་བསྐུར་བ་དང༌། ཡེ་ཤེས་གྱི་བདུད་རྩིའི་ཆུས་གང་བའི་བུམ་
པས་དབང་བསྐུར་བ་གཉིས་ཀ་བཤད་དོ། །མངོན་རྟོགས་སྒོམ་པའི་སྐབས་ཀྱི་ལྷ་དབང་བསྐུར་བ་ལ་རྒྱུད་དང་རྒྱ་གཞུང་ནས་ཆུ་དབང་ཙམ་ལས་མ་གསུངས་ཀྱང༌། སློབ་དཔོན་ཆེན་པོ་མཚོ་སྐྱེས་ཀྱིས་ཀྱཻ་རྡོར་གྱི་སྒྲུབ་ཐབས་དང༌། དཔའ་ལྡན་ཨ་ཏི་ཤས། 
ལཱུ་ཨི་བའི་སྒྲུབ་ཐབས་ཀྱི་འགྲེལ་པར་དབང་བཞི་བསྐུར་བ་མཛད་དོ། །སྔ་མས་ནི། བདུད་རྩི་ལྔས་ཡོངས་སུ་གང་བའི་བུམ་པས་བདག་ལ་དབང་བསྐུར་བར་བསྒོམ་པར་བྱའོ། །འདི་ལྟར་རྣམ་པ་ཇི་ལྟ་བཞིན་དུ་རྣམ་པ་དུ་མ་དང༌། རྣམ་པར་སྨིན་པ་
དང༌། རྣམ་པར་འཇོམས་པ་དང༌། རྣམ་པའི་མཚན་ཉིད་ཀྱི་སྐད་ཅིག་མ་བཞི་པོ་དག་ལས་དགའ་བ་དང༌། མཆོག་དགའ་དང༌། རྣམ་པའི་དགའ་བ་དང༌། ལྷན་སྐྱེས་ཀྱི་དགའ་བའི་མཚན་ཉིད་མངོན་དུ་གྱུར་བའོ། །རྒོད་པ་དང་ལྟ་བ་དང་འཁྱུད་པ་
9-5-149a


པ་དང༌། འཁྲིག་པ་དང་བཞི་རྣམ་པར་དག་པ་ལས་སློབ་དཔོན་དང༌། གསང་བ་དང༌། ཤེས་རབ་ཡེ་ཤེས་དང༌། མཆོག་ཏུ་དགའ་བ་བདེ་བ་ཆེན་པོའི་དབང་བཞི་པ་བླང་བར་བྱའོ། །ཞེས་གསུངས་སོ། །འདིའི་འགྲེལ་པ་ཛཱ་ལན་དྷ་རི་
པས་མཛད་པ་ལས་ནི། དབང་བཞི་ལེན་ལུགས་གསལ་བར་མ་བཤད་ཅིང༌། འདིའི་འགྲེལ་བ་རྡོ་རྗེ་དྲིལ་བུ་པས་མཛད་ཟེར་བ་ལས་ནི་ལྷ་མོ་ལ་འཁྱུད་པ་ཙམ་དུ་གནས་ཀྱི། བྱང་ཆུབ་ཀྱི་སེམས་ཞེས་ལྟ་བ་ཙམ་ཡང་མི་བྱེད་པའི་ཕྱིར། རྒོད་པ་ཞེས་བྱ་
བ་ནི་སློབ་དཔོན་གྱི་དབང་དང༌། བདེ་ཆེན་གྱི་རོ་མྱོང་བ་མེད་ཀྱང༌། བྱང་ཆུབ་ཀྱི་སེམས་ཞེས་ལྟ་བ་ནི་གསང་དབང་དང༌། ཕྱག་རྒྱ་ལ་འཁྱུད་པ་ནི་ཤེས་རབ་ཡེ་ཤེས་ཀྱི་དབང་དང༌། གཉིས་གཉིས་ཀྱི་བདེ་ཆེན་ཉམས་སུ་མྱོང་བ་ནི་དབང་བཞི་པར་བཤད་ལ། དགའ་
བ་བཞི་དབང་བཞིར་འཇོག་པ་ནི། རྩ་རྒྱུད་ལས། དབང་ནི་བཞི་ཡི་གྲངས་ཀྱིས་ནི། །དགའ་བ་ལ་སོགས་རིམ་ཤེས་བྱ་ཞེས་གསུངས་པའི་དོན་དུ་འདོད་དོ། །བོད་ཀྱི་བླ་མ་ཁ་ཅིག་བུམ་པའི་ཆུ་རྒྱུན་དེས་སྨིན་མཚམས་དང༌། མགྲིན་པ་དང༌། སྙིང་ཁ་དང༌། རྐང་
མཐིལ་ཡན་ཆད་ཁེངས་པས་རིམ་པ་བཞིན་དུ་ལུས་ངག་ཡིད་གསུམ་རེ་རེ་བ་གསུམ་དང༌། སྒོ་གསུམ་བསྡོམས་པའི་དྲི་མ་དག་ནས་དབང་བཞི་རིམ་པ་བཞིན་ཐོབ་པར་འཆད་དོ། །བླ་མ་ཁ་ཅིག་ནི། ཆུ་དབང་བསྐུར་ནས་རིགས་བདག་གིས་རྒྱས་གདབ་པ་
བུམ་དབང་དང༌། དེ་ནས་ནམ་མཁའི་ལྷ་ཚོགས་སྙོམས་འཇུག་བྱས་པས་ཐིག་ལེ་དཀར་དམར་ལྕེ་ཐོག་ཏུ་གནང་བ་ནི། གསང་དབང་དང༌། ནམ་མཁའི་ལྷ་ཚོགས་ཀྱིས་རང་ལ་རེག་བྱ་རྡོ་རྗེ་མ་གཏད་ནས་སྙོམས་པར་ཞུགས་པས་ཉམས་མྱོང་སྐྱེས་པ་ནི་ཤེས་
9-5-149b


རབ་ཡེ་ཤེས་ཀྱི་དབང་ངོ༌། །དེ་ཡང་སྐད་ཅིག་མ་དང་དགའ་བ་བཞི་རིམ་གྱིས་སྐྱེ་བ་དང༌། རྒོད་པ་ལ་སོགས་པའི་འདོད་ཆགས་བཞི་དག་པས། བུམ་པ་ལ་སོགས་པའི་དབང་བཞི་བྱུང་བའོ། །ཞེས་ཟེར་རོ། །དེ་ལྟར་མང་དུ་བཤད་ཀྱང༌། དགོངས་པ་ནི་མན་སྙེ་ལས། དབང་
པོ་རབ་ཀྱི་སེམས་ཅན་ལ་ནི། དགའ་བ་བཞི་པོ་ཁོ་ན་དབང་བསྐུར་བཞི་རྣམས་སོ། །ཞེས་སྟོན་པའི་དོན་དུ་དེ་ཡང་དབང་བསྐུར་རྣམ་པ་བཞི་ཞེས་གསུངས་ཏེ་དེ་ནི་དགའ་བ་ལ་སོགས་པའོ། ཞེས་གསུངས་ལ། དེ་དང་སྔར་དྲངས་པའི་ཀྱཻ་རྡོར་གྱི་ལུང་གིས་དགའ་བ་
བཞི་དབང་བཞིར་བཤད་པ་གཉིས་དོན་གཅིག་ཏུ་བཤད་པ་ལྟར་གྱི། དགའ་བ་བཞི་ལ་དབང་བཞིར་བྱེད་པ་ཡིན་གྱི། ཆུ་དབང་གི་སྟེང་ནས་བྱེད་པ་མིན་ནོ། །དེ་ལྟར་ན་རྒོད་པ་སོགས་བཞི་ནི་དགའ་བཞི་སྐྱེད་པའི་ཐབས་ཡིན་པས་རིག་མ་དང་སྙོམས་པར་ཞུགས་
པས་དགའ་བ་བཞི་སྐྱེད་དགོས་སོ། །དེས་ན་དབང་བཞི་བླང་བར་བྱའོ་ཞེས་གསུངས་པའི་ལེན་ས་ནི་དབང་གི་ལྷ་ཡིན་ལ། དེ་ལས་ལེན་ཚུལ་ནི་ཧེ་རུ་ཀས་ཕྱག་རྒྱ་གཏད་པ་ལས་དབང་བཞིའི་ངོ་བོ་དགའ་བཞི་སྐྱེད་པ་ཡིན་ལ། ཕྱག་རྒྱ་ཡང་སྐབས་འདིར་ཡེ་
ཤེས་ཀྱི་ཕྱག་རྒྱ་ཡིན་ཞིང༌། དེ་ཡང་སྐབས་སྟོབས་ཀྱིས་ཤེས་དགོས་པས་ཀྱཻ་རྡོར་ལ་བདག་མེད་མའོ། །མན་སྙེ་ལས། དབང་བཞིར་བཞག་པའི་དགའ་བ་བཞི་ཀ་ཕྱག་རྒྱ་ལ་བརྟེན་ནས་སྐྱེད་པར་བཤད་པའི་རིམ་པ་ནི། ཡེ་རྒྱལ་ཡང་བྱ་དགོས་སོ། །དེ་ཡང་
སྙོམས་པར་ཞུགས་པ་ལས་བྱང་ཆུབ་ཀྱི་སེམས་ཞུ་བ་རིམ་གྱིས་བབས་པ་ལས་ལུས་ཀྱི་གནས་སོ་སོར་བྱང་སེམས་བབས་པ་སླེབ་པ་ན་སོ་སོར་དགའ་བཞི་སྐྱེས་པ་ངོས་བཟུང་ལ། དབང་བཞི་ཐོབ་པར་བསམ་སྟེ། དམིགས་པ་གསལ་ཞིང་བརྟན་པ་ལ་དངོས་
9-5-150a


སུ་བྱང་སེམས་ཞུ་བ་ཡང་འོང་ལ། དེ་ཙམ་གྱི་ནུས་པ་མེད་པས་ནི་ཡང་ཡང་གོམས་པ་ལས་མཐར་དངོས་སུ་འབྱུང་ངོ༌། །ཇོ་བོའི་བཞེད་པས་ནི་སློབ་དཔོན་གྱི་དབང་གི་ངེས་པ་མི་མཛད་པར་བུམ་དབང་ཙམ་ཞིག་ལེན་པ་ཡིན་ལ། དེ་བདེ་
པ་ལ་ངོ་སྤྲོད་པ་ཡང་མ་མཛད་པས། ཆུ་དབང་སྐུར་ནས་དྲི་མ་བཀྲུས་པ་ལས་བུམ་དབང་དང༌། དེ་ནས་སྙིང་པོའི་རྣལ་འབྱོར་མ་བཞི་ཕག་མོ་ལ་ཐིམ་ནས་དེ་དང་ཧེ་རུ་ཀ་སྙོམས་པར་ཞུགས་པའི་བྱང་སེམས་ལྕེ་ལ་བཞག་པ་མྱངས་པ་ལས། གསང་
དབང་དང༌། དེ་ནས་ཧེ་རུ་ཀས་ཕག་མོ་ཕྱག་རྒྱར་གནང་བ་ལ་སྙོམས་པར་ཞུགས་པས་རླུང་ཐིམ་པས་ལྷན་སྐྱེས་ཀྱི་བདེ་བ་མྱོང་བ་ནི་ཤེས་རབ་ཡེ་ཤེས་དང༌། དེ་ནས་ཧེ་རུ་ཀས་དོན་གྱི་དབང་བཞི་པ་བསྟན་པའི་དོན་གོ་བ་ལས། ཚིག་གི་སྒོ་ནས་དབང་བཞི་པ་ཐོབ་པར་
བསྒོམ་པའོ། །ཚིག་གིས་སྟོན་ལུགས་ནི། རིགས་ཀྱི་བུ་ཁྱོད་ཀྱིས་ཕྱག་རྒྱ་དང་སྦྱར་བ་ལ་བརྟེན་ནས་མྱོང་བའི་སྣང་བ་ཐོབ་པའི་ཡེ་ཤེས་དེ་འོད་གསལ་བར་སྒོམས་ཤིག །འོད་གསལ་དེ་ནི་སྣང་མཆེད་ཐོབ་གསུམ་གྱི་རྣམ་ཤེས་རྣམ་པར་དག་པ་ཤེར་
ཕྱིན་གྱི་ངོ་བོ་ཡིན་ལ། དོན་དམ་པའི་བདེན་པ་དེ་ནི་མཐོང་བ་གཞན་གྱི་ཡུལ་ལས་འདས་པ་སྟེ། ཤེས་རབ་དང་ཡེ་ཤེས་ཀྱི་མིག་གིས་ལྟོས་ཤིག །དེ་ལྟར་གཞན་གང་གི་ཡང་རང་བཞིན་དུ་མ་མཐོང་བ་དེ་འོད་གསལ་མཐོང་བ་ཡིན་ནོ། དེའི་དོན་རྒྱུ་འབྲས་
གང་ཡང་མེད་ཀྱི། འོན་ཀྱང་ཀུན་རྫོབ་ཏུ་རླུང་སེམས་ཙམ་ལས་གྲུབ་པའི་ལྷ་སོ་བདུན་གཟུགས་བརྙན་ལྟར་གསལ་ལ་རྫོགས་པ། འཇའ་ཚོན་ལྟར་ཁ་དོག་མ་འདྲེས་པར་སོ་སོར་སྣང་བ། ཆུ་ཟླ་ལྟར་སྒྲོ་སྐུར་དང་བྲལ་བར་ལྟོས་ཤིག །དེ་འདྲ་བའི་
9-5-150b


ཀུན་རྫོབ་དང་འོད་གསལ་དོན་དམ་གཉིས་དབྱེར་མི་ཕྱེད་པར་ཟུང་དུ་འཇུག་པ་ནི། བྱང་ཆུབ་ཀྱི་སེམས་ཆེན་པོ་སྟེ་དབང་བཞི་པའོ། །ཞེས་བསྟན་པར་བསྟན་པར་བསྒོམ་མོ། །བོད་ཀྱི་མཁས་པ་དག་དབང་བཞི་ཚང་བར་ལེན་པའི་ལུགས་ལ་འདི་ལེགས་ཤིང༌། ཁྱད་པར་དུ་
འཕགས་པ་ཡབ་སྲས་ཀྱི་དགོངས་པ་བཞིན་ལོངས་འདུག་པས་མཆོག་ཏུ་ལེགས་སོ། །ཞེས་གསུང་བ་ལྟར་གཟུང་ངོ༌། །བདེ་འདྲ་བའི་ཟུང་འཇུག་ལ་དབང་བཞི་པའི་ངོ་སྤྲད་པས་སྣོད་རུང་ཁྱད་པར་ཅན་དུ་སྒྲུབ་པའི་དབང་བཞི་པ་ཐོབ་པར་འཇོག་པ་འདི་ནི་སྲིལ་
བུ་ཞབས་ཀྱིའང་བཞེད་པར་སྣང་བས། མ་རྒྱུད་བདེ་མཆོག་ལའང་དེ་ལྟར་བྱེད་པ་གཞན་ནས་བཀབ་པ་མིན་ནོ། །བོད་ན་ཏིང་ངེ་འཛིན་གྱི་དབང་བཞི་མདོར་བསྡུས་ལེན་པ་ལ། ཕལ་ཆེར་ཡི་གེ་གསུམ་གྱི་འོད་ཟེར་སྤྲོ་བསྡུ་ཙམ་ལ་བརྟེན་པ་སོགས་མང་བར་སྣང་
ཡང་མཁས་པ་གཉིས་ཀྱི་བཞེད་པ་སྔར་ལྟར་བཀོད་པའི་རྒྱུད་སྡེའི་དོན་ལ་ལེགས་པར་ཞུགས་པ་ཉུང་བར་སྣང་བས། སྒྲུབ་ཐབས་རྒྱས་བསྡུས་གང་རུང་ལ་བརྟེན་ནས་དབང་བཞི་མདོར་བསྡུས་སྔར་ལྟར་བླངས་ན་ཤིན་ཏུ་གནད་ཆེ་བར་མཐོང་ནས་ཞིབ་ཏུ་བཤད་
དོ། །དེ་ལྟར་བྱེད་པའི་ལུགས་ལ་རིགས་བདག་གིས་རྒྱས་གདབ་པ་ནི། ཇོ་བོས་ཆུ་དབང་གི་རྗེས་སུ་མཛད་ལ། མཚོ་སྐྱེས་ཀྱིས་དབང་བཞི་ཀ་བླངས་ཟིན་པའི་མཇུག་ཏུ་མཛད་དེ་གང་བྱས་ཀྱང་ཆོག་གོ། འགྲེལ་པ་གཉིས་ལས་ཆུའི་ལྷག་མ་ལས་ལྷ་རྣམས་རྫོགས་
པ་དང་སྐྱེས་པར་གསུངས་པ་ནི། སྤྱི་བོ་ནས་སྐུ་ལ་ཞུགས་པའི་ཆུའི་ལྷག་མ་སྤྱི་གཙུག་ཏུ་གནས་པ་ཡོངས་སུ་གྱུར་པ་ལས་ལྷར་སྐྱེད་པའོ། །དེ་ཡང་གཙོ་བོ་ལ་མི་བསྐྱོད་པ་དང༌། ཕག་མོ་ལ་རྣམ་སྣང་དང༌། མཁའ་འགྲོ་མ་སོགས་བཞི་ལ་རིན་འབྱུང་དང༌། 
9-5-151a


ཐུགས་གསུང་སྐུ་དམ་ཚིག་གི་ལྷ་རྣམས་ལ་རིམ་པ་བཞིན་དུ་མི་བསྐྱོད་པ། སྣང་མཐའ། རྣམ་སྣང༌། དོན་གྲུབ་ཀྱིས་རྒྱས་གདབ་སྟེ། གཞུང་ཆུང་ལས་ཀྱང༌། ཕག་མོ་མ་གཏོགས་པ་དེ་བཞིན་དུ་བཤད་དོ། །ལྷ་ལྔར། གཙོ་བོ་ལ་རྡོར་སེམས་
དང༌། ཡུམ་ལ་མི་བསྐྱོད་པ་དང༌། མཁའ་འགྲོ་མ་སོགས་ལ་གཡོན་སྐོར་དུ། རྟག་པ་དོན་གྲུབ་དཔག་མེད་རིན་འབྱུང་གིས་རྒྱས་བཏབ་བོ། །ལྭ་བ་པའི་འགྲེལ་པའི་སྐབས་གཞན་དུ་གཙོ་བོ་ལ་སྔར་དང་འདྲ། ཡུམ་ནག་མོ་ཡིན་ན་མི་བསྐྱོད་པ་དང༌། དམར་མོ་
ཡིན་ན་རྡོར་སེམས་དང༌། རྣལ་འབྱོར་མ་བཞི་ལྷ་ལྔ་བཞིན་དང༌། འཁོར་ལོ་གསུམ་གྱི་ལྷ་སྔར་དང་འདྲ། སྒོ་མཚམས་མ་བརྒྱད་ལ་ཤར་དང་ཤར་ལྷོ་བ་གཉིས་ལ་རྣམ་སྣང་དང༌། ལྷོ་དང་ལྷོ་ནུབ་པ་གཉིས་ལ་རིན་འབྱུང༌། ནུབ་དང་ནུབ་བྱང་བ་གཉིས་ལ་འོད་
དཔག་མེད་དང༌། བྱང་དང་བྱང་ཤར་བ་གཉིས་ལ་དོན་གྲུབ་ཀྱིས་རྒྱས་གདབ་པ་ཡང་མཛད་དོ། །གཞུང་ཆུང་ལས། བདུད་རྩིས་དབང་བསྐུར་ཐམས་ཅད་ལ། །རྡོ་རྗེ་མཚན་མ་འཛིན་པའོ། །ཞེས་དང༌། བསྡུས་ལ་བསྡུས་པའི་དབུ་རྒྱན་ཉིད། །ཅེས་གསུངས་པས། 
དྲིལ་བུ་པའི་ལྷ་རེ་གཉིས་པ་ལྟ་བུ། རིགས་བསྡུས་པའི་ལྷ་ལ་ནི་བསྡུས་པའི་དབུ་རྒྱན་བྱ་སྟེ། དེ་ཡང་རྡོ་རྗེའི་མཚན་མ་འཛིན་པར་བཤད་པའོ། །འདི་ནི་སྤྱི་བོར་རྡོ་རྗེས་མཚན་པ་འདྲ་བ་ཅིག་འདུག་ཀྱང༌། ཐམས་ཅད་ལ་མི་བསྐྱོད་པས་རྒྱས་འདེབས་པ་སྟེ། སྔ་མ་
དང་འདི་གཉིས་རྒྱས་བསྡུས་སོ། །དེ་ལྟ་ནའང་རིགས་ལྔས་རྒྱས་འདེབས་པ་དང་མི་འགལ་ཏེ། རིགས་ལྔ་རེ་རེ་ལ་ཡང་རིགས་ཆུང་ལྔ་ལྔ་ཡོད་པར་གསུངས་པའི་ཕྱིར་རོ། །རྒྱས་འདེབས་དང་པོའི་གཙོ་བོའི་རྒྱས་འདེབས་ནི། རྒྱུ་ལ་འབྲས་བུའི་རྒྱས་གདབ་དང༌། 
9-5-151b


ཡུམ་གྱི་ནི་ཆོས་སྐུ་ལ་གཟུགས་སྐུའི་རྒྱས་གདབ་དང༌། དེ་མན་ཆད་ཀྱི་ནི་སོ་སོའི་རིགས་གེགས་པའི་ཕྱིར་ཡིན་པ་དང༌། རིགས་བདག་གིས་རྒྱས་བཏབ་པའི་འོག་ཏུ་དབང་ལྷ་རང་ལ་བསྟིམ་པ་མངོན་བརྗོད་ཀྱི་དགོངས་པར་ཇོ་བོས་བཤད་དོ། །དེ་ལྟར་དབང་
བསྐུར་བ་ལ་ནི། བགེགས་དང་སྒྲིབ་པ་དང་ཐེག་དམན་སེལ་བ་དང་བཟླས་སྒོམ་གྱི་སྣོད་དུ་རུང་བ་དང༌། ཞི་སོགས་ཀྱི་ལས་སྒྲུབ་པ་ལ་མཐུ་དང་ལྡན་པ་དང༌། བྱང་ཆུབ་ཀྱི་སེམས་ཉམས་པ་སྐོང་བ་དང༌། དམ་ཚིག་དང་སྡོམ་པ་ཉམས་པ་སྐོང་བ་དང༌། མ་འོངས་
པ་ན་སངས་རྒྱས་ཀྱིས་དབང་བསྐུར་བའི་དགོས་པ་བརྒྱད་ཇོ་བོས་བཤད་དོ། །ལྔ་པ་ལྷ་རྣམས་ལ་མཆོད་ཅིང་བསྟོད་པ་ནི། མཆོད་པའི་སྐབས་འདིར་གཞུང་ནས་སྔགས་ཀྱི་མཆོད་པ་ཙམ་ལས་མ་བྱུང་ཡང༌། ལྭ་བ་པས། དེ་ནས་མཆོད་པ་སྔོན་དུ་འགྲོ་
བས། ལྷ་མོ་རོ་མས་དྲངས་པའི་བདུད་རྩི་མྱང་བར་བྱའོ། །སྙིང་པོ་ལ་སོགས་པ་ནས་རྐང་པ་བརྒྱད་པའི་བར་གྱི་སྔགས་ཀྱིས་བསྟོད་པར་བྱའོ། །ཞེས་གསུངས་པ་བཞིན་དུ། པྲཛྙཱ་རཀྵི་ཏས་ཀྱང་བཤད། ཇོ་བོའི་འགྲེལ་པར་བུམ་དབང་དང༌། འབྲེལ་བའི་ཕྱི་དང༌། 
ནག་དང་གསང་བ་དང་དེ་ཁོ་ནའི་མཆོད་པའོ། །གསང་བ་དང་འབྲེལ་པའི་བདུད་རྩི་མྱང་བ་དང༌། ཤེས་རབ་ཡེ་ཤེས་དང་འབྲེལ་བ་དགའ་བ་བརྩམ་པའི་མཆོད་པ་བྱ་བར་བཤད་དོ། །དེའི་དོན་ནི་སྤྱིར་མཆོད་པ་ལ་ཕྱི་མཆོད་ལ་སོགས་པ་བཞིར་བྱ་ལ། དེའི་
དང་པོ་ནི་བུམ་དབང་གི་མཆོད་པ་དང༌། གཉིས་པ་ནང་བདུད་རྩིའི་མཆོད་པ་ནི་གསང་དབང་གི་མཆོད་པ་དང༌། གསུམ་པ་གསང་བ་ནི། ཡབ་ཡུམ་སྙོམས་པར་ཞུགས་ནས་དགའ་བཞི་སྐྱོད་པ་སྟེ། དབང་གསུམ་པའི་མཆོད་པའོ། །དབང་བཞི་པའི་མཆོད་
9-5-152a


པ་ནི་དངོས་སུ་མ་སྨོས་ཀྱང་དེ་ཁོ་ན་ཉིད་ཀྱི་མཆོད་པར་ཤེས་སོ། །དེ་ལ་ཕྱི་མཆོད་ནི་འགྲེལ་པ་དེ་ལས་སྙིང་ཁའི་ས་བོན་ལས་སྤྲུལ་པའི་མེ་ཏོག་མ་སོགས་ལྔ་དང༌། གཟུགས་རྡོ་རྗེ་མ་སོགས་ལྔ་གཟུགས་དང་ལང་ཚོ་དང་རྒྱན་
ཕུན་སུམ་ཚོགས་པ་བུད་མེད་ཀྱི་ཉམས་དང་ལྡན་པས་མཆོད་པ་དང༌། འདོད་ཡོན་ལྔ་དང༌། གདུགས་དང་རྒྱལ་མཚན་དང༌། བ་དན་དང༌། བླ་རེ་དང༌། རིན་ཆེན་སྣ་བདུན་དང༌། རྡོ་རྗེའི་གླུ་དང༌། རོལ་མོའི་སྒྲ་ལ་སོགས་པས་མཆོད་པར་བཤད་པ་རྣམས་
ཡིན་ནོ། །དེ་ཡང་མེ་ཏོག་མ། བདུག་པ་མ། མར་མེ་མ། བྱུག་པ་མ། ཞལ་ཟས་མ་རྣམས་རིམ་པ་བཞིན་དཀར་བ། དུ་བའི་མདོག །དམར་སེར། ལྗང་གུ། སྣ་ཚོགས་མདོག་ཅན། ཕྱག་བཞིའི་དང་པོ་གཉིས་ཀྱིས་རྡོར་དྲིལ་དང༌། ལྷག་མ་གཉིས་ཀྱིས་
རིན་པོ་ཆེའི་སྣོད་རང་རང་གི་མཆོད་སྤྲིན་གྱིས་གང་བ་འཛིན་པ་དང༌། གཟུགས་སྒྲ་དྲི་རོ་རེག་བྱ་རྡོ་རྗེ་མ་རྣམས་རིམ་པ་བཞིན་དུ་དཀར། སྔོ། དཀར། དམར། ལྗང་བ། ཕྱག་བཞིའི་དང་པོ་གཉིས་ཀྱིས་ཁ་ཊྭཱཾ་ག་དང་ཐོད་པ་དང༌། ལྷག་མ་གཉིས་ཀྱིས་མེ་ལོང་
སོགས་རང་རང་གི་མཚན་མ་འཛིན་པ་སྟེ། སྔ་ཕྱི་གཉིས་གའི་ཕྱག་ལྷག་མ་གཉིས་ཀྱིས་ནི་ཕྱག་མཚན་གཅིག་ཐུན་མོང་དུ་འཛིན་པའོ། །སྔགས་ནི་ཨོཾ་བཛྲ་པུཥྤེ་ཨཱཿཧཱུཾ་སྭཱ་ཧཱ་དང༌། བུཥྤེའི་གནས་སུ་དྷཱུ་པེ་དང༌། གནྡྷེ་དང༌། ནཻ་ཝི་དྱ་
བཅུག་ལ་ལྷག་མ་སྔར་བཞིན་དུ་བྱའོ། །འདོད་ཡོན་མན་ཆད་ཀྱིས་མཆོད་པའི་སྔགས་ནི་ཨོཾ་སརྦྦ་བི་ཤྭ་སྠ་པྲ་ས་ར་པཱུ་ཛ་མེ་གྷ་ས་མུ་དྲ་ཨཱཿཧཱུཾ་སྭཱ་ཧཱ༌། ཞེས་པར་ཡང་བཤད་དོ། །དྲིལ་བུ་པས། གཟུགས་མ་སྒྲ་མ་དྲི་རོ་མ། །རེག་མ་ཆོས་མ་ཞི་བ་
9-5-152b


མ། །དཀར་སྔོ་སེར་དམར་ལྗང་དཀར་མོ། །ཞལ་གཅིག་ཕྱག་བཞི་གཡོན་ཐོད་ཊྭཱཾ། །གཡས་རྣམས་མ་ལང་པི་ཝཾ་དང༌། །དྲི་མཆོག་རོ་མཆོག་ན་བཟའ་དང༌། །ཆོས་འབྱུང་དང་ནི་ཌཱ་མ་རུ། །ཨོཾ་ཨཱཿབཛྲ་ཨཱ་དཪྴེ་ཧཱུཾ། ཨོཾ་ཨཱཿ་བཛྲ་བི་ཎི་ཧཱུཾ། ཨོཾ་ཨཱཿབཛྲ་གནྡྷེ་ཧཱུཾ། ཨོཾ་
ཨཱཿ་བཛྲ་ར་སེ་ཧཱུཾ། ཨོཾ་ཨཱཿབཛྲ་སྦ་རེ་ཤ་ཧཱུཾ། ཨོཾ་ཨཱཿབཛྲ་དྷ་རྨེ་ཧཱུཾ། ཞེས་པའི་ཚུལ་གྱིས་མཆོད་པ་ཕྱི་མཆོད་དུ་བཤད་དོ། །སྙིང་ཁའི་ས་བོན་ལས་སྤྲུལ་པའི་རིག་མ་བཅུ་དྲུག་གིས་ཀྱང་སྔར་བཞིན་མཆོད་དེ། མཆོད་པ་བསང་སྦྱངས་སོགས་ནི་བཤད་ཟིན་ཏོ། །དེ་
ནས་ནང་མཆོད་གཏོར་མ་ལྟར་བྱིན་གྱིས་བརླབ། ལཱ་བ་པས། ལྕེ་ཧཱུཾ་ལས་རྡོ་རྗེ་དཀར་པོར་སྐྱེད་པར་གསུངས་པ་ནི། དྲིལ་བུ་པས། བཅོམ་ལྡན་འདས་དང་རྣལ་འབྱོར་མ་རྣམས་ལྕེ། །ཡི་གེ་ཧཱུཾ་བྱུང་རྡོ་རྗེ་རྩེ་གསུམ་པ། དཀར་པོ་ནས་འབྲུ་ཙམ་དཀོད་སྦུ་གུས་
དྲངས། །བདུད་རྩི་གསོལ་བས་ལྷ་ཚོགས་མཆོག་ཚིམ་བལྟ། །ཞེས་གསུངས་པས་གསལ་དུ་བཏང་བས་དེ་ལྟར་བསྐྱེད་པའི་རྗེས་སུ། ཨོཾ་ཨ་མྲི་ཏ་ཨུ་ད་ཀ་ཧཱུཾ་ཧཱུཾ་ཋ་ཋ། ཏྲཾ་ཨཱཿཁཾ་ཧཱུཾ། ཞེས་པ་དང༌། ཡི་གེ་གསུམ་བརྗོད་དེ་བྱིན་གྱིས་བརླབ་བོ། །དེ་ནས་བོད་
ཀྱི་བླ་མའི་ཕྱག་བཞེས་ལ་འབྱུང་བ་ལྟར། དངོས་དང་བརྒྱུད་པའི་བླ་མ་རྣམས་ཀྱི་མཚན་གྱི་མཐར་ཡི་གེ་གསུམ་གཏགས་ལ་དབུལ། དཀྱིལ་འཁོར་པའི་ལྷའི་སྔགས་ཀྱི་མཐར་ཡང་ཡི་གེ་གསུམ་བཏགས་ལ་དབུལ། དེ་ནས་དུར་ཁྲོད་པ་དང་ཕྱོགས་སྐྱོང་
འབྱུང་པོའི་བར་རྣམས་ལའང་དབུལ་ཏེ། དེ་ཡང་སྔར་བཤད་པའི་ལྷ་མོ་རོ་རྡོ་རྗེ་མས་བདུད་རྩི་བསྟབས་པར་བསམས་ལ། ཆང་གིས་མཆོད་དེ་ལྷ་ཐམས་ཅད་ཡེ་ཤེས་ཀྱི་བདུད་རྩིས་ཚིམ་པར་བསམ་ལ། ཨོཾ་ཨ་མྲྀ་ཏ་སྭཱ་ད་ན་སྭ་བྷཱ་བ་ཨཱ་ཏ་མ་ཀོ་ཉ་ཧཾ། 
9-5-153a


ཞེས་བརྗོད་དོ། །སྙིང་ཁའི་ས་བོན་ལས་སྙིང་པོའི་རྣལ་འབྱོར་མ་བཞི་དང་སྒོ་མཚམས་མ་བརྒྱད་དེ། བཅུ་གཉིས་སྤྲོས་ལ་ཐོད་པ་ན་གནས་པའི་བདུད་རྩི་ལྔས་ཀྱང་མཆོད་པར་བྱ་སྟེ་ནང་མཆོད་དོ། །དྲིལ་བུ་པས། སྙིང་པོའི་རྣལ་འབྱོར་
མ་བཞིས་བདུད་རྩི་ལྔས་མཆོད་དུ་བཤད་དོ། །གསང་མཆོད་ནི་སྔར་བཤད་པ་ལྟར་ཡབ་ཡུམ་གསལ་བཏབ་སྟེ། གནས་བཞིར་ཡི་གེ་བཀོད་པ་སོགས་གསལ་གདབ་ལ། སྙོམས་པར་ཞུགས་ཏེ་དགའ་བ་བཞི་བསྐྱེད་པས་ཕྱི་ནང་གི་
ལྷ་ཐམས་ཅད་ཀྱང་བདེ་བ་ཆེན་པོ་ཉམས་སུ་མྱང་བར་བསམ་སྟེ། ལྷ་ཐམས་ཅད་ཧེ་རུ་ཀའི་ཆ་ཤས་ཙམ་དུ་ཟད་པའི་ཕྱིར་རོ། །དྲིལ་བུ་ཞབས་ཀྱིས། མྱུར་དུ་དངོས་གྲུབ་བྱེད་པར་ནི། །ཕྱག་རྒྱའི་མཆོད་འདི་ཐེ་ཚོམ་མེད། །ཅེས་གསུངས་པས་མཆོད་
པའི་གཙོ་བོ་འདི་དང༌། དེ་ཁོ་ན་ཉིད་ཀྱི་མཆོད་པ་གཉིས་ལེགས་པར་དམིགས་ཕྱེད་པ་དང་ཡུན་མི་ཐུང་པར་བྱའོ། །དེ་ཁོ་ན་ཉིད་ཀྱི་མཆོད་པ་ནི། མན་སྙེ་ལས། བླ་ན་མེད་པའི་དེ་ཁོ་ན་ཉིད་ཀྱི་མཆོད་པ་ནི། བྱང་ཆུབ་ཀྱི་སེམས་སྒོམ་པ་ཁོ་ན་སྟེ། གང་
མངོན་པར་བརྗོད་པ་ཕྱི་མར་གསུངས་པ། རང་བཞིན་མེད་པའི་གནས་གོམས་ལས། །ལྷ་ཡི་སྙིང་པོ་སྒོམ་བྱེད་པ། །དེ་ནི་མཆོད་ཆེན་པོར་འདོད། །སངས་རྒྱས་ཐམས་ཅད་རྟོགས་བྱེད་པའོ། །ཞེས་གསུངས་པ་དྲངས་པ་ལྟར་ལྷན་སྐྱེས་ཀྱི་བདེ་
བ་དང༌། དེ་ཁོ་ན་ཉིད་ལྟ་བ་གཉིས་དབྱེར་མེད་པར་སྦྱར་ནས་ཡུན་རིང་དུ་བསྒོམ་མོ། །དེ་ལྟར་ན་མཆོད་པའི་འཁོར་གསུམ་པོ་ཐམས་ཅད་བདེ་སྟོང་དབྱེར་མེད་ཀྱི་ངོ་བོར་མོས་ནས་བྱས་པས། ཚོགས་བདེ་བླག་ཏུ་རྫོགས་པར་འགྱུར་བས་དེ་ལ་
9-5-153b


འབད་དོ། །དེ་ནས་བསྟོད་པ་ནི། ཨོཾ་ཤྲཱི་བཛྲ་ཞེས་སོགས་བཅོམ་ལྡན་འདས་ཀྱི་སྙིང་པོ་དང༌། ཨོཾ་ཧྲཱིཿཧ་ཧ་ཞེས་སོགས་རེའི་ཉེ་བའི་སྙིང་པོའི་སྔགས་དང༌། ཨོཾ་བཛྲ་བཻ་རོ་ཙ་ནཱི་ཞེས་སོགས་བཅོམ་ལྡན་འདས་མའི་སྙིང་པོ་དང༌། ཨོཾ་སརྦྦ་བུདྡྷ་ཞེས་སོགས་
བཅོམ་ལྡན་འདས་མའི་ཉེ་བའི་སྙིང་པོར་བཤད་དོ། །ཇོ་བོ་ཆེན་པོས། སྙིང་རྗེ་དང་ཤེས་རབ་ཀྱི་ཐབས་ཤེས་དབྱེར་མེད་པའི་བྱང་ཆུབ་ཀྱི་སེམས་ནི་ལྷའི་སྙིང་པོ་ཡིན་ལ། སེམས་དེ་སྐུལ་བར་བྱེད་པས་སྙིང་པོ་དང༌། ཉེ་བར་བསྐུལ་བས་ཉེ་སྙིང་དང༌། འཇིག་རྟེན་
པའི་སེམས་ལས་སྐྱོབ་པས་སྔགས་དང༌། ཡང་དང་ཡང་དུ་བསྐུལ་བས་ཤེས་རབ་ཁྱད་པར་ཅན་སྐྱེད་པས་རིག་སྔགས་དང༌། བྱང་ཆུབ་ཀྱི་སེམས་མི་བརྗེད་པའི་དྲན་པ་སྐྱེད་པས་གཟུངས་སྔགས་སོ། །ཞེས་བཤད་དོ། །དེ་ནས་ཡབ་ཀྱི་རྩ་སྔགས་ལ་ཚན་པ་
ཉེར་བཞིར་བྱས་པའི་ཐོག་མར་ཨོཾ་དང༌། མཐར་ཧུཾ་ཧུཾ་ཕཊ་སྦྱར་བ་ཉེར་བཞི་དང༌། དེ་ནས་དཔའ་མོ་ཉེར་བཞི་དང༌། དེ་ནས་སྒོ་མཚམས་མ་བརྒྱད་དང༌། དེ་ནས་སྙིང་པོའི་རྣལ་འབྱོར་མ་བཞིའི་མཚན་སྔགས་དང༌། དེ་ནས་ཡབ་ཀྱི་རྐང་བརྒྱད་དེ། དེ་རྣམས་ཀྱི་ཐོག་མཐའ་
གཉིས་སུ་སྔར་ལྟར་སྦྱར་རོ། །མཆོད་པའི་སྔགས་སོ་ཞེས་བཤད་པ་ནི་འགྲེལ་པ་གཉིས་ནས་བསྟོད་པར་བཤད་དོ། །འཁྲུལ་སྤོང་ལས། རྐང་བརྒྱད་ཀྱི་སྔགས་བསྟོད་པ་དང༌། སྔགས་ལྷག་མ་རྣམས་བཟླས་པའི་སྐབས་ཀྱི་སྔགས་སུ་མཛད། དེ་བཞིན་གཤེགས་པའི་རྡོ་
རྗེས་རོ་མས་བདུད་རྩི་དྲངས་པའི་འོག་ཏུ་རྐང་བརྒྱད་ཀྱིས་བསྟོད་ནས། ལྷ་སོ་སོའི་སྔགས་རྐང་བརྒྱད་དང་བཅས་པས་མཆོད་པར་བཤད་དེ། སྔགས་ཐམས་ཅད་མཆོད་སྔགས་སུ་འདོད་དོ། །སྔགས་འདི་རྣམས་དང་བཟླས་པའི་སྔགས་གཉིས་གཅིག་ཡིན་ཀྱང༌། 
9-5-154a


འདིར་བཤད་པ་ནི་མཆོད་སྔགས་ཡིན་པས་འདིར་ཡང་ཚང་དགོས་སོ། །མཆོད་སྔགས་སུ་འགྲོ་ཚུལ་ནི་ནང་མཆོད་ཀྱི་སྐབས་སུ་སྔགས་འདི་རྣམས་བརྗོད་ནས་དེས་མཆོད་པ་མིན་ཏེ། རོ་མས་དྲངས་པའི་བདུད་རྩི་མྱངས་པའི་
འོག་ཏུ་སྔགས་རྣམས་ཀྱིས་བསྟོད་པར་གསུངས་པས་སོ། །དེ་བཞིན་དུ་མཆོད་རྫས་གཞན་འབུལ་བའི་མཆོད་སྔགས་ཀྱང་མིན་ལ། གཞུང་ལས་མཆོད་སྔགས་སུ་ཡང་བཤད་ཅིང༌། རྩ་རྒྱུད་ལས་ཀྱང༌། སྔགས་རྣམས་ཀུན་གྱིས་ཡང་དག་མཆོད། །ཅེས་
གསུངས་པས་བསྟོད་པའི་མཆོད་པའི་སྔགས་སོ། །དེ་ཐོག་མར་བྱེད་པ་ཡང་མིན་ཏེ། མཆོད་པ་སྔོན་དུ་འགྲོ་བས་ནང་མཆོད་བྱས་པའི་མཇུག་ཏུ་སྔགས་ཀྱིས་བསྟོད་པར་ཡང་གསུངས་པའི་ཕྱིར་རོ། །དེ་གཉིས་ལས་གཞན་པའི་མཆོད་པ་ནི་སྔར་བཤད་
པ་རྣམས་ཏེ། དེ་ལ་སྙོམས་འཇུག་གི་མཆོད་པ་འགྲེལ་པ་གཉིས་ནས་གསལ་བར་མ་བྱུང་ཡང་འདིར་མཆོད་པ་དེ་བྱེད་པ་ནཱ་རོ་པའི་ཕྱག་བཞེས་ཡིན་པར་མར་དོས་བཤད་ཅིང་ཇོ་བོའི་འགྲེལ་པར་ཡང་འབྱུང་ལ། སྤྱི་མིང་གིས་ཀྱང་གོ་ནུས་སོ། །སྔགས་མཆོད་
ཀྱི་བསྟོད་པ་ལ་རྐང་བརྒྱད་ནི། ཐུན་མོང་དང༌། ལྷ་སོ་སོའི་སྔགས་ནི་ཐུན་མོང་མ་ཡིན་པའི་བསྟོད་པར་མར་དོ་བཞེད་དོ། །དྲུག་པ་ལྷའི་འཁོར་ལོ་བསྒོམ་ཞིང་དག་པ་དྲན་པ་ལ་གཉིས། ལྷ་སྒོམ་པ་དང༌། དག་པ་དྲན་པར་བྱ་བའོ། །དང་པོ་ནི། སྐབས་འདིར་འགྲེལ་
པ་གསུམ་ལས། དེ་ནས་དཀྱིལ་འཁོར་ཡེ་ཤེས་ལྔ་དང༌། སྐུ་གསུམ་གྱི་བདག་ཉིད་གཟུགས་བརྙན་ལྟ་བུར་མོས་པར་བྱའོ། །ཞེས་གསུངས་པ་ནི་དཀྱིལ་འཁོར་པའི་ལྷ་སྒོམ་པ་སྟོན་པ་ཡིན་པས་དེ་བཤད་པར་བྱའོ། །དེ་ལ་ལྷ་རྣམས་སྐུ་གསུམ་གྱི་སྒོ་
9-5-154b


ནས་སྒོམ་པ་ནི། ཀུན་སྤྱོད་ལས། ཆོས་དང་ལོངས་སྤྱོད་སྤྲུལ་པ་ཡི། །སྐུ་གསུམ་དག་ནི་རྣམ་སྒོམ་པ། །བྱང་ཆུབ་ཕྱོགས་ནི་སུམ་ཅུ་བདུན། །དེར་ནི་ངེས་པར་འབྱུང་བར་འགྱུར། །ཞེས་གསུངས་པའོ། །འདི་ལ་ཕམ་འཐིང་པ་ནས་བརྒྱུད་པའི་བླ་མ་རྣམས་
ལ་སྐུ་གསུམ་སྒོམ་ལུགས་མི་འདྲ་བ་མང་དུ་སྣང་ཡང༌། དཔའ་དཱ་རི་ཀ་པས། ཕྱི་དཀྱིལ་གྱི་ལྷ་སྒོམ་པ་དང༌། བྱང་ཕྱོགས་སོ་བདུན་སྒོམ་པ་དང༌། ལུས་དཀྱིལ་སྒོམ་པ་ནི་རིམ་པ་བཞིན་དུ་སྤྲུལ་སྐུ་དང༌། ཆོས་སྐུ་དང༌། ལོངས་སྐུའི་སྒྲུབ་ཐབས་སུ་གསུངས་
སོ། །དང་པོ་ནི་གདུལ་བྱ་ཐུན་མོང་བའི་དོན་དུ་གསུངས་པ་ཤིན་ཏུ་རགས་པའི་སྐུའི་རྣམ་པ་ཅན་ཡིན་པས་སྤྲུལ་སྐུ་དང༌། གཉིས་པ་ནི་བདེ་བ་ཆེན་པོའི་ཡེ་ཤེས་ཀྱིས་དེ་ཁོ་ན་ཉིད་ཀྱི་དོན་ལ་ཞུགས་པའི་རྣམ་པ་ཅན་ཡིན་པས་ཆོས་སྐུ་དང༌། གསུམ་པ་ནི་གདུལ་
བྱ་མཆོག་གི་དོན་དུ་གསུངས་པ་ཤིན་ཏུ་ཕྲ་བའི་རྩ་དང༌། ཁམས་ཀྱི་སྒོ་ནས་གཟུགས་ཀྱི་སྐུ་འཛིན་པའི་རྣམ་པ་ཅན་ཡིན་པས་རྩ་དང་ཁམས་བྱིན་གྱིས་བརླབས་པའི་སྒོ་ནས་བདེ་བ་ལ་རྫོགས་པར་ལོངས་སྤྱོད་པ་ལ་ལོངས་སྐུར་བཞག་སྟེ་ལེགས་པ་ཡིན་ནོ། །
ཡེ་ཤེས་ལྔ་ནི་འཁོར་ལོ་ལྔའི་ལྷ་རྣམས་རིགས་ལྔའི་རིགས་ཀྱི་དབང་གིས་འཇོག་པས་རྣམ་སྣང་མེ་ལོང་ལྟ་བུ་དང༌། མི་བསྐྱོད་པ་ཆོས་དབྱིངས་ཡེ་ཤེས་དང༌། རིན་འབྱུང་མཉམ་ཉིད་དང༌། སྣང་མཐའ་སོར་རྟོག་དང༌། དོན་གྲུབ་བྱ་སྒྲུབ་ཡེ་ཤེས་སུ་འཇོག་པའི་
སྒོ་ནས་ཡེ་ཤེས་ལྔར་ཤེས་པར་བྱའོ། །དེ་འདྲ་བའི་ལྷ་རྣམས་ནི་ཇོ་བོའི་འགྲེལ་པ་ལས། ཡང་དང་ཡང་དུ་གུས་པ་དང༌། །རྒྱུན་མི་འཆད་པ་ལ་སོགས་བའི་ཚུལ་གྱིས་རྒྱུན་མ་ཆད་པར་བསྒོམ་པར་བྱའོ། །ཞེས་གསུངས་པ་ལྟར་རྟག་ཏུ་དད་གུས་པར་སྦྱོར་བས་
9-5-155a


བསྒོམ་དགོས་ལ། དེ་ཡང་སྒྲུབ་ཐབས་ཀྱི་ཐོག་མ་ནས་རིམ་པ་བཞིན་དམིགས་པ་དུ་མ་ལ་རྣམ་པ་སྣ་ཚོགས་སུ་སྒོམ་པ་རྐྱང་མིན་གྱི། ལྷར་བསྐྱེད་པའི་དོན་ལ་སེམས་གཞན་དུ་མི་གཡོ་བར་རྩེ་གཅིག་ཏུ་བཞག་སྟེ་སྒོམ་པ་ཡང་བྱ་སྟེ། དེ་ནི་
བསྐྱེད་རིམ་སྒོམ་པའི་གཙོ་བོ་ཡིན་པའི་ཕྱིར་རོ། །འདི་ལ་གཉིས་ལས་ཐ་མལ་པའི་ཞེན་པའི་གཉེན་པོར་ནི་གཞལ་ཡས་ཁང་དང་ལྷ་སྒོམ་པ་ན་སངས་རྒྱས་ཀྱི་ཞིང་དག་པ་དང༌། སངས་རྒྱས་ཀྱི་སྐུ་དེ་དང་དེ་དངོས་ཡིན་སྙམ་པའི་དག་པའི་ང་རྒྱལ་ཤུགས་ཅན་
རེ་སྐྱེད་པ་དང༌། དེ་ལྟར་བསྐྱེད་པའི་དོན་ལ་བློ་དེའི་ཤུགས་མ་ཡལ་བར་དུ་དེའི་རྒྱུན་ཉིད་ལས་གཞན་དུ་མི་གཡེང་བར་འཇོག་པ་ཅིག་དགོས་ཏེ། གཞུང་དུ་མ་ལས་ལྷ་ལ་སོགས་པའི་མཆོག་གི་ང་རྒྱལ་བསྐྱེད་པར་བྱ་བ་དང༌། ཐ་མལ་པའི་ང་རྒྱལ་བསལ་
དགོས་པར་ལན་དུ་མར་གསུངས་པའི་ཕྱིར་རོ། །གཉིས་པ་རྟེན་བརྟེན་པ་ལ་ཐ་མལ་པའི་སྣང་བ་ཉིད་འཆར་བའི་གཉེན་པོར་ནི་ཡོངས་སུ་དག་པའི་རྟེན་དང་བརྟེན་པའི་སྣང་བ་སྒོམ་པ་ན་རིམ་ཅན་དུ་སྒོམ་པའི་ཚེ། སྐབས་གང་ཡིན་གྱི་སྣང་བ་ཁྱད་པར་
ཅན་དུ་རེ་རེ་ནས་གསལ་འདེབས་པ་དང༌། འཇོག་སྒོམ་བྱེད་པའི་ཚེ་སྐབས་ཀྱི་དམིགས་པ་གང་ཡིན་པ་གསལ་བཏབ་པ་ཤར་བ་དེ་ལ་སེམས་རྩེ་གཅིག་ཏུ་འཛིན་པའོ། །ཐ་མལ་བའི་སྣང་བ་ནི་དབང་པོའི་ཤེས་པ་ལ་སྣང་བའི་སྣོད་མིན་གྱི། ཡིད་ཀྱི་
ཤེས་པ་ལ་ཐ་མལ་གྱི་སྣོད་བཅུད་དུ་སྣང་བ་ཡིན་ལ། དེ་དང་ཐ་མལ་བའི་ང་རྒྱལ་གཉིས་བསྐྱེད་རིམ་གྱིས་འགོག་ཚུལ་ནི། འཇིག་རྟེན་ལས་འདས་པའི་ལམ་གྱིས་སྤོང་བ་ལྟར། ས་བོན་སྤོང་བ་སྐབས་འདིར་འོང་དོན་མེད་ལ། འཇིག་རྟེན་པའི་ལམ་
9-5-155b


གྱིས་སྤོང་བ་ལྟར་ས་བོན་ཉམས་སྨད་ནས་མངོན་གྱུར་སྤོང་བ་ཡང་མིན་ནོ། །འོ་ན་ཇི་ལྟར་འགོག་སྙམ་ན། གློ་བུར་བའི་འགལ་རྐྱེན་གཞན་མེད་པ་ན། རྟེན་དང་བརྟེན་པའི་དཀྱིལ་འཁོར་དེ་དག་དེའི་ང་རྒྱལ་བཟུང་བའི་ཚེ། སྔར་བཤད་པ་ལྟར་གྱི་ང་རྒྱལ་དུ་འཕོ་ནུས་པ་
དང༌། དཀྱིལ་འཁོར་གཉིས་གསལ་བཏབ་པའི་ཚེ་གསལ་གང་བཏབ་པ་བཞིན་དུ་ཤིན་ཏུ་གསལ་བར་སྣང་བ་སྐྱེས་ནས་ཡིད་ངོའི་ཐ་མལ་པའི་སྣང་བ་བཟློག་པའི་ཚུལ་དེས་ཐ་མལ་པའི་སྣང་ཞེན་གཉིས་བཟློག་པ་ཡིན་ནོ། །འདི་ཡང་ཅུང་ཟད་དེའི་བར་རུ་ཟློག་ནུས་
པས་མི་ཆོག་གི། ཤིན་ཏུ་བརྟན་པ་ཅིག་དགོས་སོ། །གོམས་པ་ཆེ་བས་ལྷའི་རྣལ་འབྱོར་ལ་མཉམ་པར་བཞག་པ་ན་མིག་ཤེས་སོགས་ཀྱི་སྣང་བ་གཞན་མི་འཆར་བ་ནི། ཡིད་ཀྱི་ཤེས་པ་དོན་དེ་ལ་རྗེས་སུ་ཞུགས་དྲགས་པས་མིག་ལ་སོགས་པའི་ཤེས་
པ་སྐྱེ་བའི་དེ་མ་ཐག་རྐྱེན་གྱི་ནུས་པ་ཉམས་པས། དེ་དག་རེ་ཤིག་མ་སྐྱེས་པས་ཁ་དོག་ལ་སོགས་པའི་སྣང་བ་གཞན་མ་ཤར་བ་ཡིན་གྱི། སྣང་བ་དེ་དག་བསྐྱེད་རིམ་གྱིས་བཀག་པ་མིན་ཏེ། རིགས་པའི་རྒྱལ་པོས། རྣམ་ཤེས་དོན་གཞན་ཆགས་པ་ཡིས། །
ནུས་མེད་དོན་གཞན་མི་འཛིན་ཕྱིར། །ཞེས་གསུངས་པ་བཞིན་ནོ། །དེས་ན་ཁྱད་པར་ཅན་གྱི་སྣང་བས་ཡིད་ཤེས་ཀྱི་ངོར་ཐ་མལ་པའི་སྣང་བ་འགོག་པའི་ནུས་པ་ཐོབ་ནས་དེས་དགོས་པ་འགྲུབ་ལ། དངོས་པོ་ལ་ལྷར་མ་སོང་ཡང་ལྷའི་བཅོས་མིན་གྱི་ང་རྒྱལ་
སྐྱེས་ནའང་དེས་དགོས་པ་འགྲུབ་བོ། །གང་གསལ་བཏབ་པ་དེའི་སྐོར་མིན་པར་དེ་ལས་གཞན་དུ་གང་ཤར་ཡང་དེའི་རྗེས་སུ་མི་འབྲང་བར་རྩ་བའི་དམིགས་པ་ལ་སེམས་བཟུང༌། གསལ་བཏབ་པའི་སྐོར་ནས་ཆ་གཅིག་གསལ་ན་དེ་ལ་བཟུང༌། དེ་མི་གསལ་།
9-5-156a


བར་སོང་བའམ་འགྲོ་བར་སྣང་ན་སྐུའི་སྤྱི་ལ་གཟུང༌། དེ་ལྟར་ང་རྒྱལ་དང་སྣང་བ་གཉིས་སྤེལ་མར་བསྒོམས་པས་ཐ་མལ་པའི་ང་རྒྱལ་ཡོང་ནས་ལྷའི་ང་རྒྱལ་དུ་འཕོས་པ་ནི། དཔེར་ན་ཡེ་ཤེས་ལེགས་པར་ཕེབས་པ་ན་སྔར་གྱི་རང་
ཉིད་གང་ཡིན་པའི་འཛིན་སྟངས་དེ་དོར་ནས་ལྷ་ཡིན་ནོ་སྙམ་པའི་བསམ་པ་འགྱུར་འགྲོ་བ་བཞིན་དུ་མི་བསྐྱོད་པ་དང་རྣམ་སྣང་ལ་སོགས་པའོ་སྙམ་པའི་བསམ་པ་བཅོས་མ་དེ་འགྱུར་ནས་ལྷའི་ང་རྒྱལ་དུ་འཕོས་པ་ལ་བྱའོ། །འདི་ལ་ཁ་ཅིག་ལ་ལྷའི་ང་
རྒྱལ་མ་བཅོས་པ་སྐྱེ་ཡང་རྟེན་བརྟེན་པའི་སྣང་བ་གསལ་པོ་མེད་པ་དང༌། ཁ་ཅིག་ལ་རྟེན་བརྟེན་པའི་སྣང་བ་གསལ་པོ་ཡོད་ཀྱང་བཅོས་མིན་གྱི་ང་རྒྱལ་མེད་པ་དང༌། ཁ་ཅིག་ལ་གཉིས་ཀ་ཡོད་པ་དང༌། གཉིས་ཀ་མེད་པ་སྟེ་མུ་བཞི་འོང་བར་སྣང་ངོ༌། །དེ་ཡང་ཁྱད་
པར་ཅན་གྱི་ང་རྒྱལ་སྒོམ་པ་ནི་གཙོ་བོ་ཡིན་ལ། ཁྱད་པར་བའི་སྣང་བ་སྒོམ་པ་ནི་དེའི་ཡན་ལག་གོ། ཐུན་རེ་རེ་ལ་ང་རྒྱལ་འཕོས་པ་བརྟན་པ་དང༌། ཐུན་རེ་ལ་སྣང་བ་ཁྱད་པར་ཅན་དུ་སོང་ནས། ཡིད་ངོར་ཐ་མལ་པའི་སྣང་བ་ལོག་པ་དང༌། དེ་ལ་སེམས་ཀྱི་
གནས་ཆ་བརྟན་ན་རགས་པ་ལ་ལོབས་པ་ཡིན་ནོ། །ཐོག་མར་ཞལ་གཅིག་ཕྱག་གཉིས་པ་ལྟ་བུ་ལ་ལོབས་པ་ན་ཞལ་ཕྱག་རྫོགས་པ་དང་རྒྱན་དང་ཕྱག་མཚན་སོགས་རྫོགས་པ་དུས་གཅིག་ཏུ་གསལ་གསལ་དུ་བསླབ། དེ་ལ་ལོབས་པ་ན་ལྷ་གཞན་
གཅིག་དང་གཉིས་ལ་སོགས་པ་བསྣན་ཞིང༌། དེ་རྣམས་དུས་གཅིག་ཏུ་གསལ་ནས་གནས་པ་ལ་བསླབ། དེ་ནས་ནང་ལུས་ཀྱི་དཀྱིལ་འཁོར་གྱི་གསལ་སྣང་སོགས་ལ་བསླབ་བོ། །གཟུགས་བརྙན་ལྟར་མོས་པར་བྱ་བར་བཤད་པ་དང༌། ཀྱཻ་རྡོར་
9-5-156b


ལས། བསྐྱེད་པའི་རིམ་པའི་རྣལ་འབྱོར་གྱིས། །བརྟུལ་ཞུགས་ཅན་གྱིས་སྤྲོས་པ་བསྒོམ། །སྤྲོས་པ་རྨི་ལམ་ལྟར་བྱས་ནས། །ཞེས་གསུངས་པའི་སྒོམ་ཚུལ་ནི། གསལ་སྣང་ཐོབ་པ་དང་དམིགས་པ་རྟེན་དང་བརྟེན་པའི་དཀྱིལ་འཁོར་ལ་དམིགས་ནས་
རྣམ་པ་རང་བཞིན་མེད་པར་ངེས་པའི་ངེས་ཤེས་དང་ལྡན་པར་སྐྱོང་བ་སྟེ། བསྐྱེད་རིམ་པའི་ཟབ་གསལ་གཉིས་མེད་ཅེས་ཀྱང་ཟེར་རོ། །ལྷ་ལ་སེམས་འཛིན་པ་སོགས་ཀྱི་ཁྱད་པར་མ་གཏོགས་པ། སེམས་དམིགས་པ་ལ་གཏོད་པའི་དྲན་ཤེས་དང༌། བྱིང་
རྒོད་གཅོད་པ་དང༌། ཞི་གནས་དངོས་དང་རྗེས་མཐུན་པར་སོང་མ་སོང་ནི་ཐེག་པ་ཐུན་མོང་གི་ལམ་རིམ་དུ་རྒྱས་པར་བཤད་ཟིན་པ་ལས་ཤེས་པར་བྱ་ཞིང༌། བསྐྱེད་རིམ་ལ་ལོག་རྟོག་གི་གནས་བསལ་བ་སོགས་ནི་སྔགས་རིམ་ཆེན་མོར་རྒྱས་པར་བཤད་
ཟིན་ཏོ། །གཉིས་པ་ནི། དག་པ་དྲན་པ་ནི་གཞུང་ལས། མཆོད་པའི་རྗེས་སུ་གཏོར་མ་གསུངས་ལ། འགྲེལ་པ་གཉིས་ལས་བཟླས་པའི་རྗེས་ལ་གཏོར་མའི་ཆོ་ག་གསུངས་པ་ནི། ཕྱིས་བརྗོད་པར་བྱའོ་ཞེས་གཏོར་མ་བཟླས་པའི་རྗེས་སུ་བྱ་བར་བཤད། དཀྱིལ་
འཁོར་བསྒོམས་པའི་འོག་བཟླས་པའི་གོང་འདིར་རྣམ་དག་བསྒོམ་པར་བཤད་ཅིང༌། དེ་ལྟར་བདག་ཉིད་རྣམས་བསམས་ནས། ཞེས་པ་ནས། སྤྱོད་པའི་དུས་སུ་གང་བྱ་བ་དེ་བྱ་བར་ལྭ་བ་པས་གསུངས་པའི་སྤྱོད་པ་ནི། པྲཛྙཱ་རཀྵི་ཏས་རྒྱུ་བའི་དུས་སུ་ཞེས་གསུངས་
པ་ཡིན་ལ། གཏོར་མ་ཕུལ་རྗེས་སུ་ལྷའི་གཟུགས་ཀྱིས་གནས་པར་བྱའོ། །ཞེས་དེ་ནས་ཐུན་མཚམས་ཀྱི་བྱ་བ་ལ་འཇུག་པར་བཤད་པས། དག་པ་དྲན་པ་ནི་སྐབས་འདིར་བྱེད་པ་ཡིན་ནོ། །སེན་མོ་དང་སོ་དག་ལ་ཁཎྜ་ཀ་པཱ་ལའོ་ཞེས་པ་ནས། སྣབས་ལ་ནི་རྡོ་རྗེ་
9-5-157a


སེམས་དཔའ་འོ། །དེ་དག་ནི་དཔའ་བོའི་ཡན་ལག་རྣམ་པར་དག་པའོ། །ཞེས་དཔའ་བོ་ཉེར་བཞིའི་རྣམ་དག་བཤད་པ་ནི། སྔར་ལུས་དཀྱིལ་དུ་བཤད་པ་བཞིན་མི་ཕྱེད་མ་ལ་སོགས་པའི་རྩ་ཉེར་བཞི་ནས་འབབ་པ། སོ་དང་སེན་མོ་སོགས་
སྐྱེད་པའི་ལུས་ཀྱི་ཁམས་ཉེར་བཞི་ནི། སྐབས་འདིར་དཔའ་བོ་ཉེར་བཞིའི་ངོ་བོར་མོས་པ་ཙམ་བྱེད་པ་ཡིན་ལ། དེ་དག་གི་དོན་ནི་རྒྱས་པར་བཤད་ཟིན་ཏོ། །དེ་ནས་སྔགས་དང་རྒྱན་ཆའི་དག་པ་དྲན་པར་བྱ་བ་ནི། དཔའ་བོ་སྟེ་གཙོ་བོའི་རྩ་བའི་སྔགས་ནི་ཀ་ར་
ཀ་ར་ལ་སོགས་པའི་འཕྲེང་སྔགས་སོ། །དེ་ཁོ་ན་དང་པོ་སྟེ་མཆོག་གོ་ཞེས་ལྭ་བ་པས་བཤད་དེ། པྲཛྙཱ་རཀྵི་ཏ་ཡང་དེ་དང་འདྲ་བས། དཔའ་བོའི་རྩ་བའི་སྔགས་དང་པོ་ཞེས་པ་དག་ལ། དང་པོ་ནི་གྲངས་ཀྱི་མིན་གྱི་མཆོག་གི་དོན་ནོ། །དེ་ནི་ཚངས་པའི་སྐུད་པ་དང༌། སོགས་
ཀྱིས་ཐལ་བ་དང་སྤྱི་བོའི་འཁོར་ལོར་བརྟག་གོ། དཔའ་བོ་ཉི་ཤུ་རྩ་བཞིའི་སྔགས་ཉེར་བཞི་ཡིས་ནི་ལུས་ཀྱི་ཁམས་སོ་དང་སེན་མོ་སོགས་ཉེར་བཞི་ཡོངས་སུ་དག་པར་བརྟག་པར་བྱའོ། །དཔའ་བོ་སྟེ་ཡབ་ཀྱི་གོ་ཆ་དྲུག་པོ་ཡིས་ཏེ་དེས་བསྐྱེད་པའི་ཕྱག་རྒྱ་དྲུག་
པོ་འདི་ཡིས་ལུས་ཏེ་སྐུ་མཛེས་པའོ། །རྡོ་རྗེ་ཕག་མོའི་རྩ་བའི་སྔགས་གང་ཡིན་པ་ལས་བྱུང་བའི་མགུར་ཆུ་སྟེ་མགུལ་རྒྱན་གྱིས་མགྲིན་པ་བརྒྱན་ནོ། །ལྷ་སྟེ་གཙོ་བོ་ཡི་སྙིང་པོ་ཡི་གེ་ཉེར་གཉིས་པའི་སྔགས་ཀྱིས་ཏེ། དེས་བསྐྱེད་པའི་མགོ་བོའི་ཕྲེང་བ་བརྒྱ་ཡི་
ཕྱེད་ཀྱིས་སྐུ་ལ་བརྒྱན་ནོ། ཉེ་སྙིང་ཡི་གེ་བདུན་པའི་བསང་སྔགས་ཀྱིས་བསྐྱེད་པའི་གདུ་བཀོར་ཏེ་རྣ་རྒྱན་གྱིས་ནི་རྣ་བ་ལ་བརྒྱན་ནོ། །སངས་རྒྱས་ཀུན་གྱི་མཁའ་འགྲོ་མ་ནི། ཡུམ་གྱི་ཉེ་སྙིང་སརྦ་བུདྡྷ་ཞེས་པའི་སྔགས་ཀྱིས་བསྐྱེད་པའི་གླང་ལྤགས་ཀྱི་གོས་ནི་
9-5-157b


འཛིན་པར་བྱེད་པའོ། །རྣལ་འབྱོར་མ་ཕག་མོ་ལ་སོགས་པའི་གོ་ཆའི་གསང་སྔགས་དྲུག་རྣམས་ཀྱིས་བསྐྱེད་པའི་སྐ་རགས་བྱས་པས་ནི་སྐུ་རྣམ་པར་བརྒྱན་པའོ། །མཁའ་འགྲོ་མ་ནས་བཟུང་སྟེ། གཤིན་རྗེ་འཇོམས་མའི་བར་གྱི་འཁོར་ལོ་ལྔ་པོ་ཀུན་གྱི་རྣལ་
འབྱོར་སྔགས་ལས་བྱུང་བའི་ཀ་པཱ་ལ་ནི་བཏུང་བའི་ཐོད་པའོ། །སྔགས་ནི་འདིར་སྙིང་རྗེའོ་ཞེས་འགྲེལ་པ་གཉིས་ལས་བཤད་པ་ནི་སྔགས་ལས་བྱུང་བའི་ཐོད་པའོ། །དེ་ཡང་ལྷན་སྐྱེས་ཀྱི་བདེ་བ་ནི་སྙིང་རྗེ་ཆེན་པོ་ཡིན་ལ། ཀ་པཱ་ལའི་ངེས་དོན་ཡང་བདེ་བ་
སྐྱོང་བ་ཡིན་ཞིང༌། དེ་ཉིད་ནི་ཡིད་སྐྱོབ་པས་སྔགས་ཞེས་བྱའོ། །ཇོ་བོའི་འགྲེལ་པར་རྣལ་འབྱོར་མ་སོ་སོའི་སྔགས་ལས། སོ་སོའི་ཕྱག་གི་ཐོད་པ་སྐྱེད་པར་བཤད་དོ། །བཻ་རོ་ཙ་ནཱི་ཞེས་པའི་སྔགས་ཡུམ་གྱི་སྙིང་པོ་གང་ཡིན་པ་ལས་བྱུང་བའི་ཐོད་པ་ལྔས་དབུ་
ལ་བརྒྱན་པའོ། །སྔགས་དེ་རྣམས་ལས་རྒྱན་ཆ་དེ་རྣམས་སྐྱེད་པར་ཇོ་བོའི་འགྲེལ་པར་བཤད་དེ། དངོས་སུ་ཡོད་ནའང་དེ་ལྟར་བྱས་ལ་གདགས། ཕྱག་རྒྱ་དེ་རྣམས་དངོས་སུ་འཛིན་པ་མེད་ནའང་སྔགས་བརྗོད་པས་སྔ་མ་དང་མཚུངས་པའི་ཕན་ཡོན་འཐོབ་པར་
བཤད་པས་སྔགས་རྣམས་ལས་བསྐྱེད་པའི་རྒྱན་ཆ་རྣམས་ལུས་ལ་བཏགས་པར་མོས་པར་བྱའོ། །འོག་གི་ཁ་ཊྭཱཾ་ག་ནི་ཞེས་པ་ནས། གང་དུའང་མི་གནས་པའོ། །ཞེས་པའི་བར་ནི་འགྲེལ་པ་གསུམ་ལས། ཐོད་པས་དབུ་ལ་བརྒྱན་པའོ། །ཞེས་པའི་མཇུག་ཏུ་སྦྱར་
བར་གསུངས་པས་འདིར་བླང་ངོ༌། །རང་གིས་འཆང་བའི་ཁ་ཊྭཱཾ་ག་ནི་ལྷ་སྟེ་ཧེ་རུ་ཀའི་སྐུའི་རང་བཞིན་དུ་མོས་པའམ། ཡང་ན་རང་གི་རུས་པའི་གཞུང་ཚིགས་ཁ་ཊྭཱཾ་གའི་རང་བཞིན་དུ་བལྟའོ། ཌཱ་མ་རུའི་སྒྲ་ནི་ཤེས་རབ་སྟེ་སྟོང་པ་ཉིད་བྲག་ཆ་ལྟ་བུར་རྟོགས་པར་བྱའོ། །
9-5-158a


དཔའ་བོ་བཅོམ་ལྡན་འདས་ནི་ཐབས་སྣང་ཕྱོགས་ཡིན་པས་དམིགས་པའི་ཕྱིར་ཉིན་མོ་ཞེས་གསུངས་ལ། རྣལ་འབྱོར་མ་བཅོམ་ལྡན་འདས་མ་ནི་སྣང་བསྡུད་པའི་སྟོང་ཕྱོགས་ཡིན་པས་མི་དམིགས་པའི་ཕྱིར་མཚན་མ་ཞེས་པར་བརྗོད་དོ། །
མྱ་ངན་འདས་བྱུང་ཞེས་པ་བཞིའི་དོན་ནི་རྫོགས་རིམ་གྱི་སྐབས་སུ་འཆད་པར་འགྱུར་ལ། སྐབས་འདིར་ནི་དཔའ་བོ་བཅོམ་ལྡན་འདས་ཟུང་འཇུག་གི་སྐུར་མོས་པ་དང༌། ཕག་མོ་ནི་སྟོང་པ་ཉིད་འོད་གསལ་གྱི་ངོ་བོར་མོས་པར་བྱའོ། །ཡི་གེ་བཞིའི་དོན་ཅི་རིགས་པ་
ཅིག་ནི་བཤད་ཟིན་ལ། རྫོགས་རིམ་གྱི་སྒོ་ནས་བཤད་དགོས་པ་ནི་འཆད་པར་འགྱུར་རོ། །བླ་མ་མལ་ནས་བརྒྱུད་པ་ཁ་ཅིག །དག་པ་དྲན་པ་འདི་བླ་མ་ཕམ་མཐིང་པ་ལ་སོགས་པ་རྣམས་མཉམ་གཞག་གི་རྗེས་ལ་བྱེད༌། ནཱ་རོ་པའི་སློབ་མ་རྒྱ་གར་དཱ་རི་ཀ་པ་ནི་
མཉམ་གཞག་རང་དུ་འདོད། མལ་གྱོས་ནི་ཉམས་ལེན་མཛད་པ་ན་བརྗེད་ཀྱིས་དོགས་ནས་བསྐྱེད་རིམ་མཉམ་གཞག་གི་རྗེས་རང་ལ་དག་པ་དྲན་པ་བསྒོམས་ནས། དེ་ནས་མཆོད་པ་ལ་སོགས་པ་མཛད་ཟེར་ལ། མར་དོ་རང་འགྲེལ་པ་རྣམས་ཀྱི་ལུགས་ནི་ལུགས་
གཉིས་པ་ལྟར་བྱེད་པ་ཡིན་ནོ། །འགྲེལ་པ་རྣམས་ནས་ཕྱོགས་མཐུན་སོ་བདུན་དང་སྦྱོར་བས་ཐམས་ཅད་ཤེས་པ་ཉིད་དང༌། ས་བཅུ་རྣམ་པར་དག་པ་གནས་ལ་སོགས་པ་དང་སྦྱོར་བས་ནི་ལམ་ཤེས་པ་ཉིད་དང༌། གོ་ཆ་ནས་རྣམ་དག་གི་བར་གྱིས་ནི་རྣམ་པ་ཐམས་ཅད་
མཁྱེན་པ་ཉིད་གསུངས་པར་འཆད་དོ། །དེ་ནི་སྒྲུབ་ཐབས་འདིར་ཕར་ཕྱིན་པའི་མཁྱེན་གསུམ་གྱི་ལམ་རྣམས་འདུས་པར་བསྟན་པའི་ཕྱིར་ཡིན་ནོ། །དེ་ཡང་བཞི་ཕུང་ཁམས་སྐྱེ་མཆེད་ཐམས་ཅད་ཀྱི་དེ་ཁོ་ན་ཉིད་བདེ་བ་ཆེན་པོའི་ཡེ་ཤེས་ཀྱིས་ཁོང་དུ་ཆུད་པའི་
9-5-158b


ཆོས་སོ་བདུན། ཕྱི་དཀྱིལ་ལྷ་སོ་བདུན་གྱི་ངོ་བོར་གྱུར་པས་ནི་གཞི་ཤེས་བསྡུས་ལ། ལྷན་སྐྱེས་ཀྱི་བདེ་སྟོང་གི་རྟོགས་པ་ལ་ལམ་ཤེས་ས་བཅུར་བཞག་པ་ཉིད་ལ་ལུས་ཀྱི་གནས་དང་ཉེ་བའི་གནས་ལ་སོགས་པར་མོས་པར་བྱས་པ་ལ་ལུས་དཀྱིལ་སྒོམ་པས་
ནི་ལམ་ཤེས་བསྡུས་ཤིང༌། རྣལ་འབྱོར་པ་རང་གི་གཞི་དང་ལམ་ཁྱད་པར་གྱི་བཞིར་བྱས་པའི་སྟེང་ནས་ཁྱད་པར་གྱི་ཆོས་ཀྱི་རྣམ་པ་གོ་ཆ་འཆིང་བ་སོགས་མཁྱེན་པས་ནི་རྣམ་མཁྱེན་གྱི་ལམ་བསྡུས་སོ། །བཞི་པ་ནི། གཞུང་དུ། ཨཱ་ལི་ཀཱ་ལི་མདུན་བསམས་
ནས། །ཞེས་པ་ནས། དེ་ལས་གཟུངས་ནི་ཐོབ་པར་འགྱུར། །ཞེས་འབྱུང་བ་འདིས་རྫོགས་རིམ་སྟོན་པར་འགྲེལ་པ་བཞི་ཀ་ནས་བཤད་ཅིང༌། ཕམ་མཐིང་པ་ནས་བརྒྱུད་པ་རྣམས་ཀྱང་དེ་བཞིན་དུ་བཞེད། དེ་གཞུང་གཞན་ནས་ནི་མཆོད་པ་དང༌། གཏོར་མ་དང༌། 
དག་པ་དྲན་པ་དང༌། མཉམ་ལངས་ཀྱི་བྱ་བ་རྣམས་བཤད་པའི་འོག་ཏུ་འབྱུང་བས། བསྐྱེད་རིམ་སྒོམ་པའི་སྐོར་ཟིན་པའི་འོག་ཏུ་བྱེད་པ་འདྲ་བ་ཅིག་སྣང་ངོ༌། །ཡང་འགྲེལ་པ་གསུམ་ག་ལས། ཨཱ་ལི་ཞེས་སོགས་ཀྱིས་བསྟན་པའི་སྡུད་རིམ་ལས་གཞན་པའི་
སྡུད་རིམ་བྱས་པའི་མཐར། དཀྱིལ་འཁོར་གྱིས་འཁོར་ལོར་ལངས་ནས་བཟླས་པ་དང༌། གཏོར་མ་བྱ་བར་བཤད་དོ། །འགྲེལ་པ་དེ་རྣམས་ལས། ཨཱ་ལི་ཞེས་སོགས་ཀྱིས་བསྟན་པའི་སྡུད་རིམ་ལས་གཞན་པའི་སྡུད་རིམ་མ་བཤད། གཙུག་ནོར་ལས། 
བཟླས་པའི་མཇུག་ཏུ་དཀྱིལ་འཁོར་པ་ནས། ནཱ་ད་སྡུད་པའི་བར་གྱི་སྡུད་རིམ་བསྐྱེད་རིམ་གྱི་ཁོངས་སུ་བསྡུས་ནས་ཨཱ་ལི་ཞེས་སོགས་རྫོགས་རིམ་སྒོམ་པ་ལ་སྦྱར་བས་སྡུད་རིམ་གཉིས་ཡོད་དོ། །མར་དོ་ཡང་དེ་དང་མཐུན་པར་སྡུད་རིམ་གཉིས་བྱེད་ཅིང༌། 
9-5-159a


བསྐྱེད་རིམ་གསལ་ཞིང་ཡུན་རིང་དུ་སེམས་གཏོད་ནུས་པའི་ཚེ་རྫོགས་རིམ་གྱི་སྡུད་རིམ་སྒོམ་ལ། བསྐྱེད་རིམ་བསྡུས་ཏེ་བསྒོམ་པའི་བཟླས་པ་ཅུང་ཟད་ཅིག་བྱས་པའི་འོག་ཏུ་བཙོ་བོར་དེ་བསྒོམ་ཞིང༌། དེ་ལས་ལངས་པ་ན་སྤྱོད་ལམ་གྱི་
རྣལ་འབྱོར་ལ་འཇུག་པར་བཞེད་དོ། །མལ་ནས་བརྒྱད་པ་རྣམས་སྡུད་རིམ་གཉིས་མི་བྱེད་ཅིང༌། བསྐྱེད་རིམ་བསྒོམ་རེས་ཀྱིས་གཏོར་མའི་འཇུག་ཏུ་རྫོགས་རིམ་གྱི་སྡུད་རིམ་བསྒོམས་པའི་མཐར་བཟླས་པ་བྱས་པའི་འོག་ཏུ་རྗེས་སྤྱོད་ལ་འཇུག་པར་འདོད་དོ། །
དེ་ལྟར་མང་དུ་ཡོད་ཀྱང་བཟླས་བའི་སྔོན་དུ་སྡུད་རིམ་བྱེད་པ་འདི་བསྐྱེད་རིམ་བསྒོམ་པ་ལ་ཐུན་མཚམས་བྱ་བར་འདོད་ནས་དཀྱིལ་འཁོར་སྡུད་པ་ནི་མིན་པས་རྫོགས་རིམ་གྱི་ཁོངས་སུ་གཏོགས་ལ། དེ་ཡང་བསྐྱེད་རིམ་གསལ་བ་དང་ཡུན་རིང་དུ་སེམས་གཏོད་
མི་ནུས་བར་དུ་གཙོ་བོར་བསྐྱེད་རིམ་དང༌། ཞར་ལ་རྫོགས་རིམ་གྱི་སྡུད་རིམ་རེ། བསྐྱེད་རིམ་གྱི་བར་སྐབས་སུ་བྱེད་པ་ཡིན་ལ། འདིར་ནི་སྐབས་འདིར་བྱེད་ཅིང༌། བསྐྱེད་རིམ་ཅུང་ཟད་ལས་སུ་རུང་བ་ནས་བསྐྱེད་རིམ་གྱི་ལྷ་ཉུང་དུ་མི་བྱེད་ཀྱང་སྐྱེད་ཆོག་རྣམས་བསྡུས་
ཏེ་གཙོ་བོར་མི་སྒོམ་ལ། རྫོགས་རིམ་གྱི་སྡུད་རིམ་གཙོ་བོར་བྱས་ཏེ་ཡུན་རིང་དུ་སྒོམ་པ་ཡུན་ནོ། །དེའི་ཚེ་ཐུན་གྱི་ངོ་བོའི་བསྐྱེད་རིམ་གྱི་སྐོར་རྣམས་ཟིན་པའི་མཇུག་ཏུ་བསྒོམས་ནས། ལྡང་བ་ན་ཕྱག་གཉིས་པ་ཡབ་ཡུམ་དུ་ལྡང་བར་བྱའོ། །གང་ཟག་རབ་
ལ་བསྐྱེད་རིམ་མཐར་ཕྱིན་ནས། དེ་ནས་རྫོགས་རིམ་སྒོམ་པ་ཡིན་པས། དེའི་དབང་དུ་བྱས་ན་བསྐྱེད་རིམ་བཞག་ནས་རྫོགས་རིམ་སྒོམ་པར་གསུངས་ཏེ། འོན་ཀྱང་ལྷའི་འཁོར་ལོ་མི་སྒོམ་པ་ནི་མིན་ནོ། །དེས་ན་ད་ལྟའི་གང་ཟག་རྣམས་ལ་སྐབས་
9-5-159b


འདིར་རྫོགས་རིམ་སྒོམ་པ་རེ་ཡང་གལ་ཆེ་བས་དེ་བཟླས་པའི་སྔོན་དུ་བྱེད་ན་དབྱངས་གསལ་ངག་ཏུ་བརྗོད་ཅིང༌། དེའི་ཚེ་དབྱངས་གསལ་གྱི་འཕྲེང་བ་འོད་ཟེར་ལྔ་ལྡན་འཁོར་ལོ་གསུམ་གྱི་ལྷ་ཚོགས་འཕྲོ་བ། སྣ་བུག་གཡས་པའི་རླུང་དང་འགྲོགས་ནས་
འཕྲོས་པས་འགྲོ་བ་རྣམས་འཁོར་ལོ་གསུམ་གྱི་ལྷ་ཚོགས་སུ་བྱས། བྱས་པ་དེ་རྣམས་ཐོག་མ་མེད་པ་ནས་གྲུབ་པའི་དཔའ་བོ་དང་རྣལ་འབྱོར་མ་རྣམས་དང་རོ་མཉམ་དུ་གྱུར་ཏེ། སྣ་བུག་གཡོན་ན་ས་ཞུགས་ནས་ལྟེ་བར་གནས་པ་ཡོངས་སུ་གྱུར་པ་
ལས་དབྱངས་གསལ་གྱི་གཟུགས་བརྙན་དང་ལྡན་པའི་ཟླ་བའི་དཀྱིལ་འཁོར་དཀར་ལ་དམར་བའི་མདངས་ཅན་དུ་གྱུར་པར་བསྒོམ། དེའི་དབུས་སུ་སྐད་ཅིག་གིས་ཧཱུཾ་ཡིག་དཀར་དམར་དེ་དང་ཟླ་བ་གཉིས་ཡོངས་སུ་གྱུར་པ་ལས་ཧེ་རུ་ཀ་དཀར་པོ་གཡས་བརྐྱང་གིས་
བཞུགས་པ། ཞལ་གཅིག་ཕྱག་གཉིས་ཀྱིས་རྡོར་དྲིལ་བསྣམས་པ། ནམ་མཁའི་འཇའ་ཚོན་ལྟ་བུ་ཡུམ་རྡོ་རྗེ་ཕག་མོ་ཞལ་གཅིག་མ། ཕྱག་གཉིས་ཀྱིས་རྡོ་རྗེ་དང་ཐོད་པ་འཛིན་པ་དང༌། སྙོམས་པར་ཞུགས་པས་གསང་གནས་གཉིས་བསྐྱོད་པའི་སྒྱུ་མའི་དགའ་བའི་
སྒྲས་འགྲོ་བ་རྣམས་བཀུག་སྟེ། དུར་ཁྲོད་ལ་ཐིམ། དེ་ནི་རྟེན་གྱི་འཁོར་ལོ་ལ། དེ་སྐུ་འཁོར་ལ། དེ་གསང་འཁོར་ལ། དེ་ཐུགས་འཁོར་ལ་ཐིམ། དེའི་ཤར་ནས་གཡོན་སྐོར་གྱིས་ཕྱོགས་ན་གནས་པ་བཞི་ནི་རིམ་པ་བཞིན་དུ་མཁའ་འགྲོ་ནས་བཟུང་སྟེ། 
གཡོན་སྐོར་གྱིས་ལྷ་མོ་བཞི་ལ་དང༌། དེ་ནས་མེ་ནས་བརྩམས་ཏེ་མཚམས་ན་གནས་པ་བཞི་ནི། གཟུགས་ཅན་མ་ནས་བཟུང་སྟེ་གཡས་སྐོར་གྱིས་ལྷ་མོ་བཞི་ལ་ཐིམ། འདིར་ཐོད་པ་བཞི་ཇི་ལྟར་སྡུད་པ་མ་བཤད་ཀྱང༌། གཟུགས་ཅན་མ་ལ་སོགས་པ་བཞི་ལ་
9-5-160a


བསྡུའོ། །ལྷ་མོ་བཞི་ཡང་རང་ངོས་ཀྱི་གཙོ་བོའི་ཞལ་བཞི་ལ་རིམ་པ་བཞིན་བསྡུ། དམ་ཚིག་པ་ཡབ་ཡུམ་ནི་ལྟེ་བའི་ཡེ་ཤེས་སེམས་དཔའ་ཡབ་ཡུམ་ལ་ཐིམ། པཎྜི་ཏ་ཁ་ཅིག་ལུགས་འདི་ལའང་ཡེ་ཤེས་སེམས་དཔའ་ལྟེ་
བ་དང༌། སྙིང་ཁར་སྒོམ་པ་གདམ་ང་ཅན་དུ་བྱེད་དོ། །དེ་གཉིས་ཀྱང་སྙོམས་པར་ཞུགས་པས་ཞུ་བར་གྱུར། ཞུ་བ་དེ་ཡོངས་སུ་གྱུར་པ་ལས། སིནྡྷུ་རས་བྱུགས་པའི་མུ་ཏིག་ལྟ་བུའི་ཧཱུཾ་ཡིག་བདེ་བ་ཆེན་པོའི་རང་བཞིན་དུ་གྱུར། དེའི་ཨཱུ་ནས་ནཱ་དའི་བར་དུ་
སྔ་མ་ཕྱི་མ་ལ་རིམ་གྱིས་བསྡུས་ནས། ནཱ་ད་ཡང་སྐྲའི་རྩེ་མོ་བརྒྱ་སྟོང་གི་ཆ་ཙམ་དུ་བྱས་པ་ལ་སེམས་བཟུང་དེ། རབ་ཀྱིས་ནི་དེ་ཡང་མི་དམིགས་པར་འོད་གསལ་དུ་བསྡུས་པ་ལ་སེམས་ནུས་ཚད་དུ་གཟུང་ངོ༌། །ཡེ་ཤེས་སེམས་དཔའ་བསྐྱེད་པ་ནས་འདིའི་
བར་ནི། འགྲེལ་པ་གསུམ་ག་ལས་རྣལ་འབྱོར་ཆེན་པོར་བཤད་ཅིང༌། འདི་ནས་རྣལ་འབྱོར་ཆེན་པོ་རྫོགས་པར་བཤད་ལ། དེ་ལྟར་བདག་ཉིད་རྣམ་བསམ། ཞེས་པ་སོགས་རྗེས་སྤྱོད་ཀྱི་རྣལ་འབྱོར་རྣམས་ཀྱང་ཤིན་ཏུ་རྣལ་འབྱོར་དུ་བཤད་པས། བཟླས་པ་དང་
གཏོར་མ་སོགས་ཀྱང་ཤིན་ཏུ་རྣལ་འབྱོར་དུ་བསྡུའོ། །སྡུད་རིམ་གྱི་རྫོགས་རིམ་འདི་དང༌། རྡོ་རྗེ་བཟླས་པ་གཉིས་ཀྱི་གནད་ནི་ཤིན་ཏུ་རྟོགས་དཀའ་བར་ཡོད་པ་ལོགས་སུ་བཤད་པར་བྱའོ། །གསུམ་པ་ཐུན་གྱི་མཇུག་ཏུ་ཇི་ལྟར་བྱ་བ་ལ་གཉིས། བཟླས་པ་ཇི་ལྟར་
བྱ་བ་དང༌། གཏོར་མ་ཇི་ལྟར་བྱ་བའོ། །དང་པོ་ནི། དེས་སྐྱོ་བར་གྱུར་ན་རྟེན་བརྟེན་པའི་འཁོར་ལོ་ཐམས་ཅད་སྐད་ཅིག་གིས་དམིགས་པར་བྱས་ལ་བཟླས་པ་བྱ་སྟེ། རྡོ་རྗེ་བཟླས་པ་ནི། རང་གི་ལྟེ་བར་ཟླ་བ་ལ་གནས་པའི་ཧཱུཾ་དཀར་དམར་རམ། ཡང་ན་ནཱ་ད་རྐྱང་
9-5-160b


པ་དཀར་དམར་བལྟས་ལ། དེ་གཉིས་གང་ཡིན་ཀྱང་རླུང་ཕྱིར་འབྱུང་བ་ན་ཧཱུཾ་ཡིག་གི་གདངས་ཀྱིས་ནཱ་ད་ལས་འཁོར་ལོ་ལྔའི་ལྷ་ཚོགས་ཡང་དག་པར་སྤྲོས་ཏེ་འགྲོ་བའི་དོན་བྱས་པར་བསམ། སླར་ཡང་ཕྱིར་འཇུག་པ་ན་འཇུག་པའི་རླུང་ཨོཾ་ཡིག་གི་གདགས་
ཀྱིས་ཕྲེང་བའི་སྐུད་པ་ཚུར་འཐེན་པ་བཞིན་དུ་སྔགས་དང་ལྷ་ལྷན་ཅིག་ཏུ་འོངས་ནས་ལྟེ་བའི་ནཱ་ད་དེ་ཉིད་ལ་ཐིམ་པར་བསམ་མོ། །རྡོར་བཟླས་འདི་ལ་ཡི་གེ་གསུམ་གྱི་རྡོར་བཟླས་བྱེད་པར་འགྲེལ་པ་གསུམ་ག་ལས་བཤད་པས། གནས་པའི་རླུང་ལ་ཇི་ལྟར་
བྱ་བ་མི་གསལ་ཡང༌། ནང་དུ་ཞུགས་ནས་ཐིམ་པའི་འོག་ཏུ་རླུང་ཅུང་ཟད་ནང་དུ་བཟུང་ནས་དེའི་གདངས་ནི་ཨཱཿའི་གདངས་སུ་བཟླའོ། །འགྲེལ་པ་སྡོམ་འབྱུང་ལས། བླ་མ་དམ་པའི་གདངས་པས། ཡང་ནས་ཡང་དུ་རྡོར་བཟླས་བྱ་བར་བཤད་པ་བཞིན་འདིའི་
གནད་ལེགས་པར་བླ་མ་ལས་བཙལ་དགོས་སོ། །དམ་ཚིག་གི་བཟླས་པ་ནི། ནཱ་ད་དེ་ཉིད་ལས་གཙོ་བོའི་སྙིང་པོ་དང༌། ཉེ་སྙིང་གི་སྔགས་བརྗོད་ཅིང་འཁོར་ལོ་སྡོམ་པའི་ལྷ་ཚོགས་སྔར་བཞིན་འགྲོ་བའི་དོན་ལ་སྤྲོ་བ་དང༌། སླར་ཡང་སྡུད་པའི་ཚུལ་གྱིས་སྤྲོས་
པ་དང༌། ལྷ་གཞན་སོ་སོའི་སྔགས་བརྗོད་པ་རྫོགས་པ་ན་རེ་རེ་ཞིང་སྤྲོ་བ་དང༌། སྡུད་པའི་ཚུལ་གྱིས་ཟློ་བའོ། །ལྷ་གཞན་གྱི་སྔགས་ཟློ་ཚུལ་ནི། དེ་རྣམས་ཀྱི་ཐུགས་ཀར་ཉི་གདན་ལ་ཏིང་ངེ་འཛིན་སེམས་དཔའ་ཧཱུཾ་དགོད་པར་བཤད་པས་དེ་ལ་བཟླས་བྱའི་སྔགས་
ཀྱི་ཕྲེང་བས་འཁོར་བར་དམིགས་ནས་བཟླའོ། །དོ་ལིའི་བཟླས་པ་ནི། ཆོས་ཐམས་ཅད་མཉམ་པ་ཉིད་ཀྱི་ང་རྒྱལ་གྱིས་སྔགས་ཕྲེང་རང་གི་ཞལ་ནས་ཞུགས་ནས་རྡོ་རྗེའི་ལམ་ནས་ཡུམ་གྱི་པད་མར་ཞུགས། དེའི་དྷཱུ་ཏཱིའི་ལམ་ནས་སྟེང་དུ་ལངས་ཏེ། གཙོ་མོའི་ཞལ་ནས་
9-5-161a


འཐོན་ནས་རང་གི་ཞལ་དུ་ཞུགས་ཤིང་ནཱ་དར་ཐིམ་པ་དང༌། ཡང་སྔར་བཞིན་འཁོར་བར་བསྒོམས་ནས་ཕྲེང་སྔགས་ཟློ་བའོ། །ལྭ་བ་པའི་འགྲེལ་པར་འགྱུར་ཅུང་འཁྲུགས་ཡོད་ཀྱང༌། པྲཛྙཱ་རཀྵི་ཏ་དང༌། འགྲེལ་པ་སྡོམ་འབྱུང་ལས་འབྱུང་བ་
འདི་ལེགས་སོ། །བཟླས་བྱའི་སྔགས་ལ། ཤྲཱི་བཛྲ་ནི་དཔལ་རྡོ་རྗེ་དང༌། ཧེ་དང་རུ་གཉིས་གཉིས་ཀྱི་རྗེས་སུ་ཀཾ་ན་ཁྲག་འཐུང་གཉིས་བསྟན་ཟེར་མོད་ཀྱང༌། རུ་དྷི་ར་ཁྲག་ལ་འཇུག་པའི་ཟུར་ཙམ་ལ་བརྟེན་ནས་ཁྲག་འཐུང་དུ་སྔ་མ་རྣམས་ཀྱིས་བསྒྱུར་བའི་འགྱུར་
མི་ལེགས་ཞེས་བོད་ཀྱི་མཁས་པ་དག་གསུང་ངོ༌། །ཌཱ་ཀི་ནཱི་ནི་མཁའ་འགྲོ་མའོ། །ཛཱ་ལ་ནི་དྲ་བའམ་ཚོགས་སོ། །སམྦ་རཾ་ནི་སྔར་ལྟར་གཉིས་སོ། །སྭཱ་ཧཱ་ནི་གཞི་ཚུགས་ཤིག་པའོ། །བཛྲ་བཻ་རོ་ཙ་ནཱི་ཡེ་ནི་རྡོ་རྗེ་རྣམ་པར་སྣང་མཛད་མའོ། །སརྦྦ་བུདྡྷ་ཌཱ་ཀི་ནཱི་ཡེ་ནི་
སངས་རྒྱས་ཐམས་ཅད་ཀྱི་མཁའ་འགྲོ་མའོ། །བཛྲ་ཝརྞ་ནཱི་ཡེ་ནི་རྡོ་རྗེ་རབ་བསྔགས་མའོ། །མངོན་སྤྱོད་ལས། གཙོ་བོ་ཡབ་ཡུམ་གྱི་སྙིང་པོ་དང་ཉེ་སྙིང་གཉིས་ལ། སྐུ་གསུང་ཐུགས་ལ་སོགས་པའི་བདེ་མཆོག་གི་རིགས་སོ་སོ་ལ་བརྟེན་པའི་སྔགས་མི་འདྲ་བ་
མང་དུ་གསུངས་པ་ལས། ལཱུ་ཨི་པ་ནས་གསུངས་པ་ལྟར། དྲིལ་བུ་པས་ཀྱང་གསུངས་ཏེ། རྩ་རྒྱུད་དང༌། མངོན་བརྗོད་དག་པ་འགའ་ཞིག་ལས་ཀྱང་དེ་བཞིན་དུ་འབྱུང་ངོ༌། །ལཱུ་ཨི་པ་འགྱུར་བཅོས་མ་བྱས་པའི་མར་དོའི་འགྱུར་དང༌། ལོ་ཆེན་དང་ཆག་དང༌། ཟངས་
དཀར་གྱི་འགྱུར་དང༌། དྲིལ་བུ་པའི་ལུས་དཀྱིལ་ཆེ་བ་རྣམས་ལས། ཡུམ་གྱི་སྙིང་པོ་དང་ཉེ་སྙིང་སྔར་དང་འདྲ། ལོ་ཆེན་གྱི་འགྱུར་མར་དོས་བཅོས་པ་ལས། ཡུམ་གྱི་སྙིང་པོ་དང་ཉེ་སྙིང་གཉིས་སྔར་བཤད་པ་ལས་བཟློག་སྟེ་འབྱུང་ཡང་དཔེ་མ་དག་པར་མངོན། ནག་
9-5-161b


པོ་སྤྱོད་པའི་སྒྲུབ་ཐབས་སུ་དེ་ལྟར་འབྱུང་བ་ནི་མ་དག་པ་མིན་ནོ། །ཡིད་བཞིན་ནོར་བུ་ལས། དང་པོར་སངས་རྒྱས་མཁའ་འགྲོ་མ་དང༌། དེ་ནས་སྣང་མཛད་མའི་སྔགས་བཤད་ནས་ལྷ་མོའི་སྙིང་པོ་དང་ཉེ་སྙིང་དུ་བཤད་ཀྱང་རིམ་པ་བཞིན་གྱི་ཚིག་མེད་པས་ལུས་དཀྱིལ་
བཞིན་བྱས་ན་ལེགས་སོ། །རྩ་རྒྱུད་དང་ཀུན་སྤྱོད་ལས། དཔའ་བོ་དང་དཔའ་མོ་རྣམས་ཀྱི་སྔགས་ལ། ཐོག་མར་ཨོཾ་དང༌། མཐར་ཧུཾ་གཉིས་དང་ཕཊ་སྦྱོར་བར་བཤད་དོ། །དེ་ལ་དཔའ་བོ་ཉེར་བཞིའི་སྔགས་ལ་ནི། རང་རང་གི་མཚན་སྔགས་མེད་པ་དང༌། ཡོད་པ་གཉིས་ལས་དང་
པོ་ནི། གཞུང་འདི་ནས་འབྱུང་བ་ལ་རྩ་སྔགས་ཀ་ར་ཀ་ར་ལ་སོགས་པ་ཚན་པ་ཉེར་བཞིར་བཅད་པའི་ཐོག་མཐར་སྔར་བཞིན་སྦྱར་བའོ། །འདི་ཡང་མངོན་བརྗོད་ལས་འབྱུང་ངོ༌། །མཚན་སྔགས་ཡོད་པ་ལ་རྩ་སྔགས་ཉེར་བཞི་དང་སྤེལ་ལུགས་གསུམ་མངོན་བརྗོད་
ལས་གསུངས་ཏེ། ཨོཾ་ཁཎྜ་པཱ་ལ་ཀ་ར་ཀར་ཧུཾ་ཧུཾ་ཕཊ། ཅེས་པ་ལྟ་བུ། ཨོཾ་དང་མཚན་སྔགས་ཉེར་བཞི་ཐོག་མར་བྱས་ནས། རྩ་སྔགས་ཀྱི་དུམ་བུ་ཉེར་བཞི་འོག་ཏུ་བཏོན་པ་ཅིག་དང༌། ཡང་ཨོཾ་ཀ་ར་ཀ་ར་ཁཎྜ་པཱ་ལ་ཧུཾ་ཧུཾ་ཕཊ། ཅེས་པ་ལྟ་བུ། རྩ་སྔགས་ཀྱི་དུམ་བུ་
སྔར་བྱས། མཚན་སྔགས་འོག་ཏུ་བྱས་པ་ཅིག་དང༌། ཡང་ཨོཾ་ཀ་ར་ཁཎྜ་པཱ་ལ་ཀ་ར་ཧུཾ་ཧུཾ་ཕཊ། ཅེས་རྩ་སྔགས་ཀྱི་དུམ་བུ་ཕྱེད་མར་བཏང་བའི་བར་དུ་མཚན་སྔགས་ཉེར་བཞི་བཅུ་པ་ཅིག་གོ། ཁྱད་པར་གསལ་བྱེད་ལས། ཨོཾ་ཀ་ར་ཀ་ར་ཁཎྜ་པཱ་ལི་ནི། པྲ་ཙཎྜེ་ཧུཾ་
ཧུཾ་ཕཊ། ཅེས་སྦྱར་བ་ཅིག་ཀྱང་ཡོད་དོ། །དཔའ་བོ་རྡོ་རྗེས་དཔའ་བོའི་མཚན་སྔགས་ཉེར་བཞི་བསྒྲིགས་པ་ལ། ཐོག་མར་ཨོཾ་དང་མཐར་ཧུཾ་གཉིས་དང་ཕཊ་སྦྱར་ཏེ། འདོན་པ་ནི་དཔའ་བོའི་སྙིང་པོ་དང་སྙིང་བསྡུས་པའི་ལུགས་དང༌། དཔའ་མོ་ཉེར་བཞི་ལ་ཡང་དེ་
9-5-162a


བཞིན་དུ་བྱས་པ་ནི། དཔའ་མོའི་སྙིང་པོ་དང་ཉེ་སྙིང་བསྡུས་པའི་ལུགས་སུ་བཤད་དོ། །དེ་ལ་ཀ་ར་གཉིས་ནི་གྱིས་གཉིས་དང༌། ཀུ་རུ་གཉིས་ནི་མཛོད་གཉིས་དང༌། པན་དྷ་གཉིས་ནི་ཆིངས་གཉིས་དང༌། ཏྲཱ་ས་ཡ་གཉིས་ནི་སྐྲག་པར་གྱིས་གཉིས་དང༌། 
ཀྵོ་བྷ་ཡ་གཉིས་ནི་བསྐྱོད་པར་གྱིས་གཉིས་དང༌། ད་ཧ་གཉིས་ནི་སྲེགས་གཉིས་དང༌། པ་ཙ་གཉིས་ནི་ཚོགས་གཉིས་དང༌། བྷ་ཀྵ་གཉིས་ནི་ཟོ་གཉིས་དང༌། བས་ནི་ཞག་དང༌། རུ་དྷཾ་རཱ་ནི་ཁྲག་དང༌། ཨནྟྲ་ནི་རྒྱུ་མ་དང༌། མཱ་ལཱ་བ་ནི་ཕྲེང་བ་དང༌། ལམྦི་ནེ་ནི་འཕྱང་བ་དང༌། 
ས་བྟ་ནི་བདུན་དང༌། པཱ་ཏ་ལ་ནི་ས་འོག་དང༌། ག་ཏ་ནི་གནས་པ་དང༌། བྷུ་ཛཾ་གཾ་ནི་ལག་འགྲོ་དང༌། སར་པཾ་བཱ་ནི་སྦྲུལ་རྣམས་ཀྱང་ངོ༌། །ཁ་ཅིག་སརྦ་བཱ་ཞེས་འདོན་ཞིང་ལག་འགྲོ་ཐམས་ཅད་ཅེས་ཟེར་རོ། །ཏ་རྫ་ཡ་གཉིས་ནི་བསྡིགས་གཉིས་དང༌། ཨཱ་ཀཌ་ཌྡྱ་གཉིས་ནི་
ཁུག་གཉིས་སོ། །དེ་ནས་སྒོ་མཚམས་མ་བརྒྱད་དང༌། རྣལ་འབྱོར་མ་བཞིའི་མཚན་སྔགས་ཀྱི་མགོར་ཨོཾ་དང༌། མཐར་ཧུཾ་གཉིས་དང་ཕཊ་སྦྱར་བ་ནི། སོ་སོར་འདོན་པ་དང༌། དང་པོར་རྣལ་འབྱོར་མ་བཞི་དང༌། དེ་ནས་སྒོ་མཚམས་མ་བརྒྱད་ཀྱི་མཚན་སྔགས་བཅུ་གཉིས་
བསྒྲིགས་པ་ལ་ཐོག་མཐར་སྔར་བཞིན་སྦྱར་བ་ནི། དེ་དག་གི་བསྡུས་པའི་ཉེ་སྙིང་དུ་དཔའ་བོ་རྡོ་རྗེས་བཤད་དོ། །ཌཱ་ཀི་ནཱི་ལ་སོགས་པའི་མཚན་ནི་བརྡ་ཕྲད་པར་སླའོ། །ཡབ་ཀྱི་རྐང་བརྒྱད་ཀྱི་དང་པོར་བཅོམ་ལྡན་འདས་དཔའ་བོའི་དབང་ཕྱུག་ལ་ཕྱག་འཚལ་
ལོ། །ཞེས་པ་དང༌། མ་ཧཱ་ཀལྤ་ནི་བསྐལ་པ་ཆེན་པོ་དང༌། ཨ་གྣི་སཾ་ནི་བྷཱ་ཡ་ནི་མེ་དང་མཉམ་པའི་འོད་ཅན་དང༌། ཛ་ཌཱ་ནི་རལ་བ་དང༌། མུ་ཀུ་ཊོ་ཏྐ་ཊཱ་ཡ་ནི་ཅོད་པན་མི་བཟད་པ་ཅན་དང༌། དཾ་ཥྚཱ་ཀ་རཱ་ལོ་གྲ་ནི་མཆེ་བ་རྣམ་པར་གཙིགས་པ་དང༌། བྷཱི་ཥ་ཎ་མུ་ཁཱ་ནི་
9-5-162b


འཇིགས་པའི་ཞལ་ཅན་ནོ། །ཁ་ཅིག་དྲག་ཤུལ་ཅན་འཇོམས་པའི་ཞལ་ཟེར་རོ། །ས་ཧ་སྲ་ནི་སྟོང་དང༌། བྷཱུ་ཛ་ནི་ཕྱག་དང༌། བྷཱ་སུ་རཱ་ཡ་ནི་འབར་བའི་འོག་ཅན་དང༌། པ་ཪྴུ་ནི་དགྲ་སྟ་དང༌། པཱ་ཤོ་དྱ་ཏ་ནི་ཞགས་པ་གདེངས་པ་དང༌། ཁ་ཏྭཱཾ་དྲུག་དང༌། ཨཾ་ག་ཡན་ལག་ཟེར།
གཞན་དག་ཁ་ཊྭཱཾ་ནི་མཁའ་དང༌། ཨ་ག་ཧི་ལུས་ཟེར་རོ། །དྷཱ་རི་ཎེ་ནི་འཛིན་པའོ། །བྱཱ་གྷྲ་ནི་སྟག་དང༌། ཛི་ནཱ་མྦ་ར་དྷ་རཱ་ཡ་ནི་པགས་པའི་ན་བཟའ་ཅན་ནོ། །མ་ཧཱ་དྷཱུ་མྦྲཱ་ནྡྷ་ཀ་ར་ཝ་པུ་ཥ་ཡ་ནི་དུང་ཁ་ཆེན་པོའི་མུན་པ་དང་འདྲ་བའི་སྐུ་ཅན་ཟེར། ཁ་ཅིག་དུད་ཁ་ཆེན་པོ་
དང༌། མུན་པ་ཆེན་པོའི་སྐུ་ཟེར་རོ། །འདི་ལ་ཡང་རྐང་པ་བརྒྱད་ཀའི་མགོར་ཨོཾ་གཅིག་དང༌། མཐར་ཧཱུཾ་གཉིས་ཕཊ་སྦྱར་ཏེ་བསྡུས་པ་གཅིག་དང༌། རྐང་པ་རེ་རེའི་མགོར་ཨོཾ་རེ་དང་མཐར་ཧཱུཾ་གཉིས་དང་ཕཊ་སྦྱར་བ་སོ་སོར་བྱས་པ་གཉིས་བཤད་དོ། །ཕམ་ཐིང་པ་ལ་
བརྒྱད་པ་ལ་གཉིས་ལས། ཁ་ཅིག་ནི་སྙིང་པོའི་ལྷ་མོ་བཞིའི་སྔགས་དང༌། ཞལ་བཞི་པའི་སྔགས་སྦྲེལ་བ་དང༌། སྒོ་མཚམས་མ་བརྒྱད་ཀྱི་སྔགས་དང༌། རྐང་པ་བརྒྱད་པའི་སྔགས་སྦྲེལ་བ་དང༌། འཁོར་གྱི་ལ་དཔའ་བོའི་སྔགས་ལ་ཧུཾ་ཕཊ་བཅད། རྣལ་འབྱོར་མའི་
སྔགས་རྣམས་ལ་ཨོཾ་བཅད་ལ་བཟླའོ། ཞེས་འདོད་ལ། ཁ་ཅིག་ནི་དེ་ལྟ་བུ་མི་བྱེད་པར་གཞུང་ནས་འབྱུང་བ་བཞིན་བྱེད་དོ། །དེ་ལ་ལུགས་དང་པོས་ནི། རྣལ་འབྱོར་མ་ཉེར་བཞིའི་སྔགས་རེ་དང༌། རྩ་སྔགས་ཀྱི་དུམ་དུམ་བུ་རེ་སྤེལ་འདུག་སྙམ་དུ་གོ་ནས། རྣལ་འབྱོར་
མ་ལྷག་མ་བཅུ་གཉིས་ཀྱི་སྔགས་ལའང་སྔགས་གཞན་དང་སྤེལ་དགོས་པར་བཟུང་ནས་དེ་ལྷར་བྱས་པར་སྣང་ངོ༌། །དེ་ནི་མ་ཡིན་ཏེ། རྩ་སྔགས་ལ་ཉེར་བཞིར་བཅད་པ་ནི། དཔའ་བོ་ཉེར་བཞིའི་སྔགས་ཡིན་ལ། དེའི་རེ་རེའི་འོག་ཏུ་དཔའ་མོ་རེའི་མཚན་སྔགས་
9-5-163a


འབྱུང་བ་ནི། དཔའ་བོ་དེའི་ཡུམ་གྱི་སྔགས་ཡིན་གྱི། ལྷ་གཅིག་གི་སྔགས་ལ་སྤེལ་ནས་སྔགས་གཉིས་སུ་བྱས་པ་མིན་པའི་ཕྱིར་ཏེ། དཔེར་ན་ཡབ་ཀྱི་སྙིང་པོ་དང་ཉེ་སྙིང་གི་འོག་ཏུ་ཡུམ་གྱི་སྔགས་དེ་གཉིས་བཤད་པ་ཡིན་ཀྱང༌། ལྷ་
རེ་རེའི་སྔགས་སྤེལ་བ་མིན་པ་དང་འདྲའོ། །དཔའ་བོ་རྡོ་རྗེས་ནི་རྐང་བརྒྱད་བསྐྱར་ནས་དཔའ་བོའི་མཚན་སྔགས་ཉེར་བཞི་དང་སྤེལ་བ་བྱས་ཀྱང༌། སྒོ་མཚམས་མ་དང་མ་སྤེལ་ལ། སྙིང་པོའི་ལྷ་མོའི་སྔགས་ཞལ་བཞི་པའི་སྔགས་དང་སྤེལ་བ་ཡང་མི་སྣང་
ངོ༌། །མངོན་བརྗོད་ལས། རྩ་སྔགས་ལ་དུམ་བུ་ཉེར་བཞིར་བྱས་པ་གཅིག་དང༌། དཔའ་བོ་ཉེར་བཞིའི་མཚན་སྔགས་དང་སྤེལ་ཡང༌། དཔའ་མོ་ཉེར་བཞི་དང་མ་སྤེལ་ལོ། །དཔའ་བོ་དང་དཔའ་མོའི་སྔགས་གཅོད་ཚུལ་དེ། དེ་བཞིན་གཤེགས་པའི་རྡོ་རྗེས་བཤད་པ་
ལྟར། གཉིས་ཀའི་སྔགས་བསྡུས་ཏེ་འདོན་དེ་ལྟར་ཡིན་ཀྱང༌། སྤྱིར་དེ་ལྟར་གཅོད་དགོས་པ་ནི་མིན་ནོ། །དཔའ་བོ་རྡོ་རྗེས་གོ་ཆ་གཉིས་ལའང༌། ཨོཾ་ཧ་སོགས་ཀྱི་མགོར་ཨོཾ་དང༌། མཐར་ཧུཾ་གཉིས་དང་ཕཊ་སྦྱར་བ་གཅིག་དང༌། བཛྲ་སཏྭ་སོགས་མཚན་
སྔགས་བཅུ་གཉིས་ཐོག་མཐར་སྔར་བཞིན་སྦྱར་བ་དང༌། དཔའ་བོའི་གོ་ཆ་དྲུག་ཚན་གཉིས་པོ་དེ་བསྡུས་ནས་ཐོག་མཐར་སྔར་བཞིན་སྦྱར་བ་གཉིས་དང༌། དེ་བཞིན་དུ་དཔའ་མོའི་གོ་ཆ་ལའང་སྦྱར་བ་གཉིས་བཤད་དོ། །གཞན་ལ་དབང་བསྐུར་བ་དང༌། རང་
ཉིད་བདག་འཇུག་བྱེད་པ་དང༌། རབ་གནས་སོགས་ལ་དབང་བ་ལ་སྔོན་དུ་བསྙེན་པ་གལ་ཆེ་ལ། དེ་ཡང་གྲངས་ཇི་ཙམ་ཞིག་གི་བར་དུ་བསྙེན་དགོས་སྙམ་ན། མངོན་བརྗོད་ལས། སྔོན་དུ་བསྙེན་པ་བྱ་བ་ནི། ཆོ་ག་བཞིན་དུ་འབུམ་དུ་བཟླ། འཁོར་ལོའི་གསང་
9-5-163b


སྔགས་འབུམ་བཟླས་ཤིང༌། །རང་གི་ལྷའི་ཡང་འབུམ་དུ་བཟླ། །གཞན་ནི་ཁྲི་རུ་བཟླ་བར་བྱ། །ཞེས་གསུངས་ལ། ལྭ་བ་པས་ཀྱང༌། གཙོ་བོ་ལ་འབུམ་དང༌། འཁོར་ལ་ཁྲི་བཟླ་བར་བཤད་དོ། །སྤྱོད་པ་པས། དཔའ་བོའི་སྙིང་པོའི་གསང་སྔགས་ནི། ཁྲི་ཕྲག་གསུམ་དུ་བཟླ་
བར་བྱ། །དཔའ་བོ་རྣལ་འབྱོར་མ་འཁོར་ལོའི། །ཁྲི་ཕྲག་གཉིས་ནི་བསྙེན་པར་བྱ། །ཀཾ་ཀ་ལ་སོགས་རྣམ་པ་བརྒྱད། །སྙིང་པོའི་རྣལ་འབྱོར་མ་བཞི་ཡི། །སྟོང་ཕྲག་ལྔ་དང་ལྔ་བརྒྱ་ནི། །སྔོན་དུ་བསྙེན་པ་བྱ་བ་སྟེ། །ཞེས་གཅོ་བོ་ལ་ཁྲི་ཕྲག་གསུམ། །འཁོར་ལོ་གསུམ་
གྱི་ལྷ་རེ་རེ་ལ་ཁྲི་ཕྲག་གཉིས་གཉིས། ལྷ་མོ་གཞན་བཅུ་གཉིས་པོ་རེ་རེ་ལ་སྟོང་ཕྲག་ཕྱེད་དྲུག་རེ་བཟླ་བར་བཤད་དེ། གཙོ་མོ་ལའང་ཁྲི་ཕྲག་གསུམ་མོ། །དེ་དང་མཐུན་པར་དཱ་རི་ཀ་པས་ལཱུ་ཨི་པའི་དཀྱིལ་ཆོག་ཏུ་ཡང་གསུངས་པས། ལཱུ་ཨི་པ་དང་དྲིལ་བུ་པའི་ལྷ་རེ་གཉིས་
པ་ལའང་དེ་བཞིན་དུ་བྱ། ཡང་དཱ་རི་ཀ་པས། འབྲིང་ངམ་ཆུང་ངུའི་ཚུལ་གནས་ན། །དཀྱིལ་འཁོར་དབང་པོ་འབུམ་དུ་སྟེ། །དེ་བཞིན་མཁའ་འགྲོ་སྟོང་ཕྲག་བཅུ། །བཟླས་ཏེ་ལྷ་རྣམས་མཉེས་པར་བྱ། །ཡེ་ཤེས་མཆོག་ལ་ཁྲི་ཕྲག་སྟེ། །སྦྱིན་སྲེག་མཆོག་གིས་ཉེ་
བར་མཆོད། །ཅེས་གསུངས་པ་ནི། སྔར་བཤད་པ་བཟླས་པ་རབ་ཡིན་ལ། བཟླས་པ་འབྲིང་དང་ཐ་མ་ནི། གཙོ་བོ་ལ་འབུམ་དང༌། འཁོར་ལ་ཁྲི་ཕྲག་རེ། གཉིས་ཀ་ལ་ཐུན་མོང་དུ་ཡེ་ཤེས་འབེབས་པའི་སྔགས་ལ་ཁྲི་ཕྲག་གཅིག །དེ་རྣམས་ལ་སྤྱིར་བཟླས་
པའི་ཉེས་པ་དག་བྱེད་ལ་ནི། ཇི་ཙམ་འཆམ་པ་གཅིག་གི་སྦྱིན་སྲེག་བྱ། ཡེ་ཤེས་འབེབས་པ་ལ་ནི། གཞན་ནས་བཅུ་ཆའི་སྦྱིན་སྲེག་བྱ་བར་གསུངས་ཏེ། སྔ་མ་ནི་ཞི་བ་དང༌། ཕྱི་མ་ནི་དབང་དང༌། བཟླས་རྒྱུའི་སྔགས་ནི་རྩ་སྔགས་ཡིན་ན་རབ། དེ་མིན་ནའང་སྙིང་པོའི་
9-5-164a


སྔགས་ཞེས་གསུངས་པ་ལྟར་བྱ། འཁོར་གྱི་ནི་བཤད་ཟིན་ཏོ། །བགྲང་ཕྲེང་ནི་མངོན་བརྗོད་ལས། མི་རུས་ཀྱི་ཕྲེང་བ་ལ་བྱ་བར་མང་དུ་བཤད་པ་ལྟར་བྱ། དེ་མ་གྲུབ་ན་གདན་བཞི་ལས། ཞི་རྒྱས་དབང་དང་མངོན་སྤྱོད་ལ། །བོ་དེ་ཅི་ནི་ལས་ཀུན་
བྱེད། །ཅེས་གསུངས་པ་ལྟར་བྱའོ། །ཕྲེང་ཐག་ནི་གཞོན་ནུ་མ་མ་ཉམས་པས་བཀལ་བའི་རས་བལ་གྱི་སྐུད་པ་ལ་བྱ་བར་རྡོ་རྗེ་མཁའ་འགྲོ་ལས་བཤད་དོ། །རབ་གནས་རྒྱས་པ་ནི་ཕྲེང་བ་དང་མན་སྙེ་ལས་བཤད་པ་བཞིན་བྱ། བསྡུས་པ་ནི་ཕྲེང་བ་ལས། ཕྲེང་བ་
ལ་གསུང་རྡོ་རྗེ་བསྒོམས་ཏེ། ཡེ་ཤེས་པ་དང་གཅིག་ཏུ་བྱས་ནས་གཟུགས་དེ་ཡོངས་སུ་གྱུར་པ་ལས་ཕྲེང་བའི་རྣམ་པར་བསམས་ལ་བུམ་པའི་ཆུས་གཏོར་ཏེ། མཆོད་ནས་གསུང་རྡོ་རྗེའི་སྙིང་པོ་བརྒྱ་རྩ་བརྒྱད་བཟླ་བར་གསུངས་པ་བཞིན་བྱའོ། །གསུང་རྡོ་
རྗེ་ནི་འདིར་པདྨ་གར་གྱི་དབང་ཕྱུག་གོ། དེའི་སྙིང་པོ་ནི། ཨོཾ་པདྨ་ནིར་ཏྱ་ཤྭ་ར་ཧུཾ་ཧུཾ་ཕཊ་ཅེས་པའམ། སྭཱ་ཧཱ་ཧུའི་ཐོག་མཐར་སྔར་བཞིན་སྦྱར་བའོ། །སེམས་མ་ཡོངས་པ་ལ་འབད་ནས་བཟླས་པའི་སྐྱོན་ཧ་ཅང་མྱུར་བུལ་དང༌། ཧ་ཅང་སྒྲ་ཆེ་བ་དང༌། རིང་ཐུང་གི་ཚད་
ལས་ཉམས་པ་དང༌། དེ་གཉིས་བཟློག་ནས་འདོན་པ་སོགས་ལ་བཤད་པ་རྣམས་དང་བྲལ་བར་བཟློས་སོ། །འདི་ལ་ཡིད་བཟླས་རྡོ་རྗེ་བཟླས་པ་དང༌། ངག་བཟླས་གཉིས་ཀ་ཡོད་ལ། དེ་ཡང་ཐུན་ངོ་བོ་ལ་མ་ཡེངས་པར་བཟླས་པ་རྣམས་གྲངས་སུ་གཞུག་གི། ཐུན་བར་
དུ་བཟླས་པ་དང༌། སེམས་གཡེངས་ནས་བཟླས་པ་སོགས་ནི་གྲངས་ལ་མི་ཕན་ཡང་བཟླ་བར་ནི་བཤད་དོ། །རྡོ་རྗེ་མཁའ་འགྲོ་ལས། མཐེ་བོང་ལྕགས་ཀྱུར་བྱས་ནས་ནི། །ལྷ་རྣམས་ཐམས་ཅད་འགུགས་པར་བསམ། །ཤིན་ཏུ་མཉམ་གཞག་སྔགས་
9-5-164b


བཟླས་ན། །འགྲུབ་འགྱུར་འདིར་ནི་ཐེ་ཚོམ་མེད། །ཅེས་པ་དང༌། ཁ་སྦྱོར་ལས། དེ་ཉིད་ཡོད་ན་འགྲུབ་ལ་མེད་ན་མི་འགྲུབ་པར་གསུངས་པའི་དོན་ནི། མན་སྙེ་ལས། ལག་པ་གཡས་པའི་སོར་མོ་རྣམས་རྡོ་རྗེ་རྩེ་ལྔ་པ་དང༌། གཡོན་པའི་སོར་མོ་རྣམས་པདྨའི་
འདབ་མའི་རྣམ་པར་སྐད་ཅིག་གིས་བསམས་ལ་དེ་གཉིས་ལ་རིམ་པ་བཞིན་དུ་ཨཱཿལས་སྐྱེས་པའི་ཉི་མ་ཨཱཿས་མཚན་པ་དང༌། ཨ་ལས་སྐྱེས་པའི་ཟླ་བ་ཨས་མཚན་པ་བསྒོམས་པ། སྟོང་པ་དང༌། སྙིང་རྗེ་དབྱེར་མེད་པར་བསྒོམས་ནས་གཡས་པས་བགྲང་
བ་དང༌། ལྷའི་སྐུ་རང་བཞིན་མེད་པར་ཤེས་པའི་དེ་ཉིད་ཡོད་ན་འགྲུབ་ཀྱི། མེད་ན་མི་འགྲུབ་པར་གསུངས་པ་དང༌། ཞལ་དུ་ཡོད་དང་འཁོར་གྱི་ལྷ་དུ་ཡོད་ཀྱིས་འདོན་པར་མོས་པར་དྲིལ་བུ་པ་དང་ལྭ་བ་པས་གསུངས་པ་ལྟར་བཏོན་ན་དེ་དག་གི་གྲངས་ཀྱི་འགྱུར་ཡོད་
པར་གསུངས་སོ། །མངོན་བརྗོད་ལས། དུང་ཆེན་ཕྲེང་བ་བླངས་ནས་སུ། །ལག་གཡོན་མཐེ་བོང་སྲིན་ལག་གིས། །གསང་སྔགས་དག་ནི་བཟླས་པ་བྱ། །ཞེས་གསུངས་སོ། །གཉིས་པ་ནི། གཏོར་མའི་ཆོ་ག་ནི་རྩ་རྒྱུད་ལས་མི་གསལ་ལ། གཞུང་ནས་ཀྱང༌། འཇིག་རྟེན་
ལས་འདས་མ་འདས་ཀྱི་གཏོར་སྔགས་ཙམ་མ་གཏོགས་པ་ཆོ་ག་གཞན་གསལ་བར་མ་གསུངས་སོ། །དེ་ལ་ལྭ་བ་པས། གཏོར་མའི་ཆོ་ག་གསལ་བར་གསུངས་པ་ནི། གཙོ་བོར་སྡོམ་འབྱུང་ལ་བརྟེན་པ་ཡིན་ལ། པྲཛྙཱ་རཀྵི་ཏ་དང་དེ་བཞིན་གཤེགས་པའི་རྡོ་རྗེ་སོགས་
མང་པོས་ཀྱང་ལྭ་བ་པ་ལྟར་བཤད་དོ། །འདིར་སྡོམ་འབྱུང་ལས། མྱོས་བྱེད་གཏོར་མ་མེད་པར་ལས། །མྱུར་དུ་འགྲུབ་པར་མི་འགྱུར་རོ། །དེས་ན་སྔོན་གྱི་སངས་རྒྱས་ཀྱིས། །གཏོར་མའི་རབ་ཏུ་བསྔགས་པ་གསུངས། །ཞེས་གསུངས་ལ། ཀུན་སྤྱོད་ལས། རང་འདོད་
9-5-165a


ལས་ལ་སྦྱིན་བྱ་བ། །ཁྱད་པར་དུ་ཡང་གཏོར་མ་སྦྱིན། །མར་ངོ་ཡི་ནི་ཚེས་བཅུ་དང༌། །ཡར་ངོ་ཡི་ཡང་དེ་གྱུར་ལ། །མྱུར་དུ་འབད་པས་ཆང་དང་ཤ་ཡིས་ཀྱང༌། །རྡོ་རྗེ་ལྷ་མོ་རབ་ཏུ་མཆོད་པར་བྱ། །ཞེས་ཤ་ཡང་དགོས་པར་གསུངས་ཤིང༌། སྤྱིར་ཐུན་
གྱི་ཐོག་མཐའ་དང༌། ཁྱད་པར་དུ་ཚེས་བཅུ་གཉིས་ཀྱི་དུས་སུ་བྱ་བར་བཤད་དོ། །དེ་ལ་གཏོར་མ་སྦྱང་བ་ནི། མདུན་དུ་ཡཾ་ལས་བྱུང་བའི་རླུང་གི་དཀྱིལ་འཁོར་དང༌། དེའི་སྟེང་དུ་རཾ་ལས་བྱུང་བའི་མེའི་དཀྱིལ་འཁོར་རོ། །གཏོར་སྣོད་ནི་ཨོཾ་ཨཱཿཧཱུཾ་གསུམ་ལས་བྱུང་བའི་མི་
མགོ་རློན་པའི་སྒྱེད་བུ་གསུམ་ལ་གནས་པའི་ཨ་དཀར་པོ་ལས་བྱུང་བའི་པདྨའི་སྣོད་དུ་བསྐྱེད་དོ། །དྲིལ་བུ་པས། དེ་སྟེང་ཨ་ལས་པདྨའི་སྣོད། དུམ་བུ་གཅིག་པ་ནང་དམར་པོ། ཞེས་ཐོད་པ་དུམ་བུ་གཅིག་པ་ནང་དམར་པོར་བཤད་དེ། གཙུག་ནོར་ལས་ཀྱང་ངོ༌། །
ཕྱི་ནི་དཀར་པོའོ། །དེའི་ནང་དུ་གཏོར་མའི་རྫས་གང་ཡིན་རྣམས་བདུད་རྩི་ལྔ་དང་སྒྲོན་མ་ལྔར་བསྐྱེད་པ་ནི། ཤར་ནས་བརྩམས་ཏེ་དབུས་ཀྱི་བར་དུ་གཡོན་སྐོར་གྱིས་ཨོཾ་ཁཾ་ཨཾ་ཏྲཾ་ཧཱུཾ་རིམ་པ་བཞིན་དུ་དཀར་ལྗང་དམར་སེར་མཐིང་ཀ་རྣམས་ཡོངས་སུ་གྱུར་པ་ལས། 
རིམ་པ་བཞིན་དུ་གསུང་བའི་སྨན་དྲི་ཆེན་དང༌། ཤ་ཆེན་དང༌། བྱང་སེམས་དཀར་པོ་དང༌། རང་བྱུང་གི་མེ་ཏོག་རཀྟ་དང༌། དྲིའི་ཆུ་རྣམས་ལ་སླར་ཡང་ཡི་གེ་དེ་དག་ཉིད་ཀྱིས་མཚན་པ་དང༌། མེ་ནས་བརྩམས་ཏེ་དབུས་ཀྱི་བར་དུ་གཡས་སྐོར་གྱིས་ལཾ་མཾ་པཾ་ཏཱཾ་བཾ་དཀར་
སྔོ་དམར་ལྗང་ཡོངས་སུ་གྱུར་པ་ལས། བ་ལང་ཁྱི་གླང་པོ་ཆེ་རྟ་ཡི་སྒྲོན་མ་སྟེ་ཤ་རྣམས་ཡི་གེ་དེ་དག་གིས་བྱིན་གྱིས་བརླབས་པའོ། །འགྲེལ་པ་རྣམས་ནས་ས་བོན་ལྔ་ཚན་གཉིས་ལས། བདུད་རྩི་ལྔ་དང་ཤ་ལྔ་སྐྱེད་པར་བཤད་པ་ཙམ་ལས། ས་བོན་གང་ལས་
9-5-165b


དེ་རྣམས་གང་སྐྱེད་མི་གསལ་བས་སྐྱེད་ལུགས་དེ་ནི་ཡིད་བཞིན་ནོར་བུ་དང་གཙུག་ནོར་ལྟར་ཡིན་ནོ། །དེར་ཁཾ་ལས་ཤ་ཆེན་སྐྱེད་པ་ལ་བསམས་ནས་ཤའི་སྐབས་སུ་ཤ་ཆེན་མེད་ཅིང༌། ས་བོན་གྱི་ཡི་གེ་བཾ་མ་བྱུང་བ་ནི་ཤ་ཆེན་དེ་ཤ་དང་བདུད་རྩི་གཉིས་ཀ་ལ་
གཏོགས་པའི་འགྲེལ་པ་རྣམས་ཀྱི་ལུགས་ལྟར་ན། སྡོམ་འབྱུང་ལས། བདུད་རྩི་ལྔ་པ་ལ་ཀླད་པ་དང་རྐང་མར་དང་ཚིལ་གསུམ་གང་རུང་ཅིག་བཤད་པས། ཁཾ་ལས་དེ་གསུམ་གང་རུང་གཅིག་དང༌། དབུས་སུ་བཾ་དམར་པོ་ལས་ཤ་ཆེན་བསྐྱེད་ནས་ལྷག་
མ་སྔར་ལྟར་བྱས་ན་ལེགས་ལ། བདུད་རྩི་ལྔ་གཤེགས་པ་གཤེགས་མར་འཇོག་ཚུལ་དང༌། ཕྱོགས་དང་མཚམས་སུ་འགོད་ཚུལ་རྒྱུད་སོ་སོ་ནས་བཤད་པ་མང་དུ་ཡོད་ཀྱང༌། ཚུལ་འདི་ནི་སྡོམ་འབྱུང་གི་དགོངས་པའོ། །དེ་ནས་རླུང་གཡོས་པས་མེ་
འབར་བའི་དྲོད་ཀྱིས་ས་བོན་གྱི་ཡི་གེ་ལ་སོགས་པ་ཞུ་སྟེ། ཉི་མ་འཆར་ཀའི་མདོག་ལྟར་དམར་པོར་བལྟའོ། །དེའི་སྟེང་དུ་ཧཱུཾ་དཀར་པོ་ལས་བྱུང་བའི་ཁ་ཊྭཱཾ་ག་དཀར་པོ་བྱང་ཆུབ་སེམས་ཀྱི་བདུད་རྩིའི་རང་བཞིན་ཅན་མགོ་ཐུར་དུ་བལྟས་པ་ཐོང་པར་ལྷུང་སྟེ་ཞུ་
བས་བཅུད་དེ་དག་དངུལ་ཆུའི་མདོག་ཅན་བསིལ་བར་གྱུར་པར་བསམ་མོ། །དེ་ནས་དབྱངས་གསལ་གྱི་ཐོག་མར་ཨོཾ་དང༌། མཐར་ཧཱུཾ་ཧཱུཾ་ཕཊ་དང་བཅས་པ་བརྗོད་པས་ཡི་གེ་དེ་ཉིད་ཁ་དོག་སྣ་ཚོགས་པ་བདུད་རྩིའི་སྟེང་དུ་གནས་པར་བལྟས་ལ། དེ་རྣམས་
ཡོངས་སུ་གྱུར་པ་ལས། ཨོཾ་དཀར་པོ། ཨཱཿདམར་པོ། ཧཱུཾ་སྔོན་པོ། སྟེང་ནས་སྟེང་དུ་གནས་པར་བསམ་མོ། །འོད་ཟེར་འཕྲོས་པས་རྒྱ་མཚོ་ལ་སོགས་པ་ན་གནས་པའི་བདུད་རྩི་དང༌། ཕྱོགས་བཅུ་ན་བཞུགས་པའི་དཔའ་བོ་དང་དཔའ་མོའི་དབང་ཕྱུག་མ་ཐམས་ཅད་
9-5-166a


ཀྱི་ཐུགས་ཀའི་ས་བོན་ལས་ཡེ་ཤེས་ཀྱི་བདུད་རྩི་བཀུག་ཅིང༌། འོད་ཟེར་གྱིས་འགྲོ་བ་རྣམས་འཁོར་ལོ་གསུམ་གྱི་ལྷར་བྱས་པའི་དཔའ་བོ་དང༌། དཔའ་མོ་རྣམས་ཀྱང་བཀུག་པ་རྣམས་སྙོམས་པར་འཇུག་པ་སྔོན་དུ་འགྲོ་བས་ཞུ་བ་ཡི་གེ་
གསུམ་ལ་ཐིམ། དེ་གསུམ་ཡང་རིམ་གྱིས་ཞུ་བ་ཐོད་པར་ཐིམ་པར་བསམས་ལ། ཡི་གེ་གསུམ་ལན་གསུམ་བརྗོད་དེ་བྱིན་གྱིས་བརླབ་བོ། །གཏོར་མགྲོན་ནི་སྔར་བཤད་པ་ལྟར་འབར་བའི་ཕྱག་རྒྱ་དང་སྔགས་ཀྱིས་དུར་ཁྲོད་ན་གནས་པའི་ཕྱོགས་སྐྱོང་ལ་
སོགས་པའི་འཁོར་དང་བཅས་པ་རྣམས་ཐམས་ཅད་ཡོངས་སུ་རྫོགས་པའི་དཀྱིལ་འཁོར་སྤྱན་དྲངས་ཏེ་མདུན་དུ་བཞག་ལ། མཆོད་ཡོན་སོགས་སྔོན་དུ་འགྲོ་བས་མཆོད་དོ། །དེ་ནས་ལག་པ་གཉིས་ཨཱ་ལི་ཀཱ་ལི་ཡོངས་སུ་གྱུར་པ་ལས། ཟླ་བ་དང་ཉི་མའི་རང་
བཞིན་དུ་གྱུར་པའི་དབུས་སུ་ཧཱུཾ་ཡིག་བལྟས་ཏེ་ཨོཾ་ཨ་ནྱོ་ནྱ་ཨ་ནུ་ག་ཏ་སརྦྦ་དྷ་རྨྨཿ པ་ར་སྤ་ར། ཨ་ནུ་པྲ་བིཥྚ་སརྦྦ་དྷ་རྨྨཿ ཨ་ཏྱ་ནྟ། ཨ་ནུ་པྲ་བིཥྚ་སརྦྦ་དྷ་རྨྨཿ། ཨོཾ་ཨཱཿཧཱུཾ་ཞེས་བརྗོད་པ་སྔོན་དུ་འགྲོ་བས་ཟླ་ཉི་ཧཱུཾ་དང་བཅས་པ་ཡོངས་སུ་གྱུར་པ་ལས། རྡོ་
རྗེའི་ཐལ་མོར་བྱས་པའི་ལག་མཐིལ་དུ་བདུད་རྩི་གཏོར་མའི་སྣོད་དངོས་སུ་བཞག་པའམ་བཞག་པར་བསམས་ཏེ། དེ་ནས་འགྲོན་གྱིས་གཏོར་མ་བདག་གིར་བཤད་པའི་ཕྱིར་དུ་རང་གི་འདོད་དོན་བརྗོད་དེ། ལྷ་མོ་ཚད་མ་དམ་ཚིག་ཚད་མ་དང༌། །དེ་བརྗོད་གསུང་
ཡང་མཆོག་ཏུ་ཚད་མ་སྟེ། །བདེན་པ་འདི་དག་གིས་ནི་ལྷ་མོ་རྣམས། །བདག་ཅག་རྗེས་སུ་འཛིན་པའི་རྒྱུར་གྱུར་ཅིག །ཅེས་བརྗོད་དོ། །དེ་ནས་མཆོད་པའི་འཁོར་གསུམ་པོ་རྣམས་བདེ་སྟོང་གི་ངོ་བོར་དབྱེར་མེད་པས་བལྟས་ལ། ལྷ་རྣམས་ཀྱི་ལྗགས་ལ་ཧཱུཾ་དཀར་པོ་
9-5-166b


ལས་བྱུང་བའི་རྡོ་རྗེ་རྩེ་གསུམ་པ་དཀར་པོ་ནས་འབྲུ་ཙམ་བཀོད་དེ། འདིར་སྔར་ལྟར་སྔགས་གཉིས་ཀྱི་བྱིན་གྱིས་བརླབ་པ་མ་བཤད་ཀྱང༌། ཁ་ཟས་ཀྱི་དུས་སུ་དེ་བྱ་བར་བཤད་པ་ལྟར་བྱས་ན་ལེགས་སོ། །རྡོ་རྗེའི་འོད་ཟེར་གྱི་སྦུ་གུས་དྲངས་ནས་བདུད་རྩི་གསོལ་བར་
བསམ་ཞིང༌། བདུད་རྩིའི་སྣོད་དེ་ཤར་ནས་བརྩམས་ཏེ་ཕྱོགས་གཡོན་སྐོར་དང༌། མེ་ནས་བརྩམས་ཏེ་མཚམས་གཡས་སྐོར་དུ་བསྐོར་ལ། ཨོཾ་ཀ་ར་ཀ་ར་ནས་ཧུཾ་ཧུཾ་ཕཊ་ཀྱི་བར་ལན་ཅིག་བརྗོད་ལ། འཁོར་ལོ་གསུམ་གྱི་ལྷ་ལ་དབུལ་ལོ། །དེ་ནས་གཙོ་བོ་ཡབ་ཡུམ་
དང༌། ལྷ་མོ་བཞི་དང༌། སྒོ་མཚམས་མ་བརྒྱད་ལ་ཇི་ལྟར་རིགས་པར་བསྐོར་ཏེ། ཨོཾ་ཨཱཿབཛྲ་ཨ་ར་ལི་ཧོཿ ཛཿཧཱུཾ་བཾ་ཧོཿ་བཛྲ་ཌཱ་ཀི་ནྱ་ས་མ་ཡ་སྟྭཾ་ཏྲི་ཤྱ་ཧོཿ། ཞེས་པ་འདི་གཅིག་ནས་ལྔ་བརྗོད་པས་དབུལ་བར་བྱའོ། །ད་ལྟ་འགྱུར་བའི་སྡོམ་འབྱུང་ལས་ཡེ་ཤེས་པ་སྤྱན་
དྲངས་པ་ལ་སྙིང་གའི་ཕྱག་རྒྱ་སྦྱིན་པ་དང༌། ས་མ་ཡ་སྟྭཾ་ལ་སོག་པ་བརྗོད་པ་དང༌། ཕྱོགས་མཚམས་བརྒྱད་དང་སྟེང་འོག་ནས་ཕྱོགས་སྐྱོང་སོ་སོར་འགུགས་པའི་སྔགས་སོ་སོ་དང༌། དེ་ནས་སྔགས་གཞན་ཞིག་མགོ་བོར་བཏགས་པའི་རྩ་སྔགས་ལན་ཅིག་བརྗོད་
ནས་གཙོ་བོ་ཡབ་ཡུམ་ལ་འབུལ་ཞིང༌། སྔགས་འོག་མ་ལན་ཅིག་ནས་ལྔའི་བར་བརྗོད་པས་ལྷ་མོ་བཅུ་གཉིས་ལ་འབུལ་བར་བཤད་དེ། རྒྱུད་དེར་སྒྲུབ་ཐབས་ལ་ལྷ་བཅུ་གསུམ་ལས་མེད་པ་ལ་དགོངས་པར་མངོན་ནོ། །གཞུང་ནས་རྡོ་རྗེ་ཐལ་མོ་ཁ་གྱེན་དུ་ཕྱེ་ལ་
མཚན་ཕྱེད་ན་གཏོར་མ་སྦྱིན་པར་བྱ་སྟེ་ཞེས་གསུངས་ནས། གཏོར་སྔགས་གཉིས་བཀོད་པ་མ་གཏོགས་པ་མགྲོན་གང་ལ་འབུལ་བ་སོགས་མི་གསལ་ལ། སྔགས་གོང་མའི་མཐར་ཞེས་བྱ་བ་འདིས་ལན་ལྔའི་བར་དུ་མངོན་པར་བསྔགས་པར་བྱས་ལ་བསྟབ་པར་
9-5-167a


བྱ་སྟེ། ཞེས་གསུངས་ཏེ། ལན་གཉིས་སོགས་གདམ་ང་ཅན་གྱི་ཚིག་མེད་དོ། །མངོན་བརྗོད་དང་ཀུན་སྤྱོད་ལས། སྐྲ་གྲོལ་ཞིང་གཅེར་བུར་བྱས་ནས་ལྷོར་བལྟས་ཏེ་རྡོ་རྗེ་ཐལ་མོ་ཁ་གྱེན་དུ་ཕྱེ་ནས་མཚན་ཕྱེད་ར་གཏོར་མ་བྱ་
བར་བཤད་ཅིང༌། སྔགས་ལན་གཉིས་སོགས་བརྗོད་པ་ལ་གདམ་ང་ཅན་གྱི་ཚིག་མེད། དེས་ན་ལྭ་བ་པས་གདམ་ང་ཅན་དུ་བཤད་པ་ནི། སྤྱིར་ལན་ལྔ་བརྗོད་དགོས་ཀྱང་ལྷ་སོ་སོ་ལ་ལྟོས་ནས་མ་ངེས་པས་དེ་ལ་དགོངས་ཏེ། གཅིག་གཙོ་བོ་དང༌། དེ་ནས་གཅིག་
བསྣན་ནས་ཡུམ་དང༌། དེ་ནས་གཅིག་བསྣན་ནས་ལྷ་མོ་བཞི་དང༌། དེ་ནས་གཅིག་བསྣན་ནས་སྒོ་མཚམས་མ་ཕྱོགས་ན་གནས་པ་དང༌། དེ་ནས་གཅིག་བསྣན་ནས་མཚམས་ན་གནས་པ་ལ་དབུལ་ལོ། །དེ་ལྟར་ཕུལ་བའི་རྗེས་སུ་ཞལ་བསིལ་དང༌། ལག་
ཕྱིས་དང༌། སོ་རྩི་ལ་སོགས་པ་དབུལ་ཞིང་རིག་མ་བཅུ་དྲུག་གིས་མཆོད་ནས་རྐང་པ་བརྒྱད་པས་བསྟོད་དེ། འདོད་དོན་འགྲུབ་པར་གསོལ་བ་གདབ་པར་བྱ་སྟེ། སྲིད་པ་དང་མཉམ་ཞི་བའི་ཆགས་བཅོམ་ཀུན་ཏུ་རྟོག་པ་འཇོམས། །ཁྱོད་ནི་དངོས་པོ་མཐའ་དག་
མཁའ་ལྟར་གཟིགས་པ་དག་དང་ལྡན། །མགོན་པོ་ཤིན་ཏུ་བརྩེ་བ་ལྕི་བའི་ཆུས་བརླན་ཐུགས་ཀྱི་ཆུས། །མཛོད་ཅིག་ལྷ་མོ་རྣམས་ནི་བདག་ལ་ཤིན་ཏུ་རྗེས་བརྩེར་མཛོད། །ཅེས་བརྗོད་དོ། །དེ་ནས་འཇིག་རྟེན་པའི་གཏོར་མ་ནི་སྡོམ་འབྱུང་དང༌། འགྲེལ་པ་
སོགས་ནས་དཀྱིལ་འཁོར་པའི་ལྷར་བསྒྱུར་བ་མེད་པར་འབུལ། ཕམ་འཐིང་པ་ནས་བརྒྱུད་པ་མང་པོས་ཀྱང་དེ་བཞིན་དུ་མཛད། ཨ་བྷྱ་ཀ་རས་འཇིག་རྟེན་པ་རྣམས་སྐད་ཅིག་གིས་འོད་གསལ་དུ་བཅུག་པའི་རྗེས་ལ། བདེ་མཆོག་གི་ལྷ་ཡུམ་དང་བཅས་པའི་
9-5-167b


སྐུར་བསྒྱུར་ནས་འབུལ་བ་མཛད་དོ། །ཕམ་འཐིང་པ་ནས་བརྒྱུད་པ་ཁ་ཅིག ཐུགས་ཀ་ནས་འོད་ཟེར་འཕྲོས་པ་དུར་ཁྲོད་བརྒྱད་ལ་ཕོག་པས་ཡོངས་སུ་རྫོགས་པའི་དཀྱིལ་འཁོར་པ་བརྒྱད་དུ་གྱུར་བ་ལ་འབུལ་བར་བཞེད་དེ། རྒྱ་གཞུང་གི་ཁུངས་ནི་མ་མཐོང་
ངོ༌། །སྔར་སྤྱན་དྲངས་པའི་དུར་ཁྲོད་ན་གནས་པའི་ཕྱོགས་སྐྱོང་དང་ཞིང་སྐྱོང་དང་ཀླུ་ལ་སོགས་པ་ལ་ཕྱོགས་གཡོན་དང༌། མཚམས་གཡས་སུ་བསྐོར་ཞིང༌། ཨོཾ་ཁ་ཁ། ཁཱ་ཧི་ཁཱ་ཧི། སརྦྦ་ཡ་ཀྵ། རཀྵ་ས། བྷཱུ་ཏ། པྲེ་ཏ། པི་ཤཱ་ཙ། ཨུ་ནྨ་ད། ཨ་པ་སྨཱ་ར། བཛྲ་ཌཱ་ཀ། 
ཌཱ་ཀི་ནྱཱ་ད་ཡ། ཨི་མཾ། པི་ལཾ་གྲི་ཧྞ་ཏུ། ས་མ་ཡ་རཀྵ་ནྟུ་ཕ་མ། སརྦ་སིདྡྷི་མྨེ་པྲ་ཡཙྪ་ནྟུ། ཡ་ཐེ་བཾ་ཡ་ཐེཥྚཾ། བྷུ་ཛ་ཐ། པཱི་པཱ་ཐ། ཛི་གྲ་ཐ། མཱ་ཏི་པྲ་མ་ཐ། མ་མ་སརྦྦཱ་ཀརྟ་ཡ། སད་སུ་ཁཾ་བི་ཤུདྡྷ་ཡེ། ས་ཧེ་ཡི་ཀ་བྷ་ཝ་ནྟུ། ཧཱུཾ་ཧཱུཾ་ཕཊ་སྭཱ་ཧཱ། ཞེས་ལན་གཉིས་བརྗོད་
ནས་ཕྱོགས་དང་མཚམས་ན་གནས་པ་ལ་དབུལ་བར་བྱའོ། །ཕྱོགས་སྐྱོང་ལ་སོགས་པས་བདུད་རྩི་དེ་གསོལ་བས་ལུས་བདེ་བ་ཆེན་པོས་ཚིམ་པར་བསམ་མོ། །དེའི་རྗེས་ལ་མགྲོན་སྤྱི་ལ་སོ་རྩི་ལ་སོགས་པ་དབུལ་ཞིང༌། རིག་མ་བཅུ་དྲུག་གིས་མཆོད། རྐང་བརྒྱད་
ཀྱིས་བསྟོད་ལ། བརྡའི་ལག་པས་བརྡ་བྱས་ཏེ་འདོད་དོན་ལ་གསོལ་བ་གདབ་བོ། བརྡའི་ལག་པས་བརྡ་བྱེད་ཚུལ་ནི། འགྲེལ་པ་རྣམས་དང་རྟག་པའི་རྡོ་རྗེ་གསལ་བར་བཤད། ཁ་ཅིག་གིས་ལག་པ་གཡས་པའི་མཐེབ་ཆེན་གྱི་སྟེང་ན་ཕར་ལ། གཡོན་པའི་
མཐེབ་སྲིན་གྱིས་སེ་གོལ་བྱེད་པ་ཡིན་ཞེས་ཟེར་མོད་ཀྱང༌། འོག་ནས་འཆད་པའི་གཤེགས་གསོལ་གྱི་ཕྱག་རྒྱ་དང་གཅིག་པར་མངོན་ལ། འདིར་ནི་མཉེས་པར་བྱེད་པའི་བརྡ་དང༌། འོག་ཏུ་ནི་གཤེགས་གསོལ་གྱི་བརྡར་བྱའོ། །དེ་ནས་ཆོ་ག་ལྷག་ཆད་ཁ་སྐོང་
9-5-168a


བའི་དོན་དུ་དྲིལ་བུ་དཀྲོལ་བ་སྔོན་དུ་འགྲོ་བས། ཨོཾ་བཛྲ་ཧེ་རུ་ཀ་ས་མ་ཡ། མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་ཏིཥྛ། ཌི་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦྦ་སིདྡྷི་མྨེ་པྲ་ཡཙྪ། སརྦྦ་ཀརྨ་སུ་ཙ་མེ། 
ཙི་ཏྟཾ་ཤྲཱི་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝཱཾ། བཛྲ་ཧེ་རུ་ཀ་མ་མེ་མུ་ཉྩ། ཧེ་རུ་ཀ་བྷ་ཝ། མ་ཧཱ་ས་མ་ཡ་སཏྭ་ཨཱཿཧཱུཾ་ཕཊ། ཅེས་ཡི་གེ་བརྒྱ་པའི་སྔགས་བཟླ་བར་བྱའོ། །འདི་ནི་མངོན་བརྗོད་ལས་གསུངས་སོ། །ཆོ་གའི་ལྷག་ཆད་ཁ་སྐོང་ཚུལ་ནི། སྔགས་དེས་
ལྷག་ཆད་ཀྱི་ཉེས་པ་དག་པར་བྱས་པས་ཆོ་ག་ཚང་བར་འགྱུར་བའི་དོན་ནོ། །དེ་ནས། ཨོཾ་ཡོ་ག་ཤུདྡྷཿསརྦྦ་དྷརྨྨཿ་ཡོ་ག་ཤུདྡྷོ་྅་ཧཾ། ཞེས་བརྗོད་ཅིང༌། སྙིང་ཁར་པད་ཀོར་གྱི་ཕྱག་རྒྱས་མཉེས་པར་བྱས་ལ། ཕྱག་རྒྱ་སྡུད་པ་ནི། ལག་པས་འཁྱུད་པའི་ཚུལ་
བྱ་ཞིང༌། མཐེ་བོང་དང་སྲིན་ལག་གིས་སེ་གོལ་གཏོག་པ་སྔོན་དུ་འགྲོ་བས། ཨོཾ་བཛྲ་མུཿཞེས་བརྗོད་དེ་འཇིག་རྟེན་པ་རྣམས་གཤེགས་སུ་གསོལ་ཞིང༌། དཀྱིལ་འཁོར་གྱི་འཁོར་ལོ་བདག་ཉིད་ལ་གཞུག་པར་བྱའོ། དེ་ནས་སྔར་བཤད་པ་ལྟར་གྱི་སྡུད་རིམ་ནཱ་ད་
ཡང་མི་དམིགས་པའི་བར་དུ་བྱ་ལ། དེ་ལས་ལྡང་བ་ན་ཧེ་རུ་ཀ་ཞལ་གཅིག་ཕྱག་གཉིས་པ་ཡུམ་དང་བཅས་པར་ལྡང་བར་བྱའོ། །ལུས་དཀྱིལ་ཇི་ལྟར་བསྡུ་བ་ནི་བཤད་ཟིན་ཏོ། །གཉིས་པ་ཐུན་སྔ་ཕྱིའི་བར་དུ་ཇི་ལྟར་བྱ་བ་ལ་གཉིས། དངོས་ཀྱི་དོན་དང༌། ཐུན་
གཞན་བྱེད་ལུགས་སོ། །དང་པོ་ནི། སྔར་བཤད་པ་དེ་ལྟར་བདག་ཉིད་གཙོ་བོ་ཡབ་ཡུམ་དུ་ལངས་པ་ལ་རང་ལ་དཔའ་བོའི་གོ་ཆ་དྲུག་དང༌། ཡུམ་ལ་དཔའ་མོའི་གོ་ཆ་དྲུག་པོ་རྣམས་དང༌། རང་གི་གནས་ཉེར་བཞིར་ཉི་གདན་ལ་པུཾ་ལ་སོགས་པའི་ཡི་གེ་ཉེར་
9-5-168b


བཞིའི་གོ་ཆ་ཆེན་པོ་རྣམ་པར་བསམས་ནས། ཚམ་དམ་སྟེ་བགེགས་འཇིགས་པར་བྱེད་པའི་ཞལ་བཞི་པའི་སྔགས་ཀྱིས་ཤིན་ཏུ་སྟེ་ཡང་དང་ཡང་དུ་བརྗོད་པས་བསྲུང་ངོ༌། །དེའི་ཚུལ་ནི། གཡོན་པའི་མཐེབ་མཛུབ་ཀྱིས་ཤར་ནས་གཡོན་སྐོར་དུ་སེ་གོལ་གཏོག་པ་སྔོན་དུ་
འགྲོ་བས་སྔགས་བཞི་བརྗོད་པའོ། །ཚངས་པ་ནི་བདེ་མཆོག་ཡིན་ལ། དེར་སྤྱོད་པ་ནི་སེམས་ཅན་ཐམས་ཅད་འཁོར་ལོ་སྡོམ་པའི་ངོ་བོར་ལྟ་བའོ། །དེ་ནི་རྟག་གྱུར་ནས་ཏེ་རྒྱུན་མི་འཆད་དུ་བྱའོ་ཞེས་པའོ། །དཔའ་བོའི་རྐང་པ་བརྒྱད་པའི་གསང་སྔགས་ཀྱིས་བདག་
ཉིད་ལ་མཆོད་པ་དང༌། བླ་མ་དང༌། སངས་རྒྱས་དང༌། བྱང་སེམས་མཐོང་ནའང་འཁོར་ལོ་སྡོམ་པར་མོས་པས་རྐང་བརྒྱད་ཀྱི་སྔགས་ཀྱིས་བསྟོད་ནས་ཕྱག་ལ་སོགས་པ་བྱའོ། །སངས་རྒྱས་བྱང་སེམས་ནི་དག་གི་སླུ་གཟུགས་ལ་ཡང་གཟུང་ངོ༌། །སྤྱོད་པ་བྱེད་པའི་དུས་སུ་ནི་
བླ་མ་མ་གཏོགས་པ་ཕྱི་རོལ་དུ་ཕྱག་ལ་སོགས་པ་མི་བྱེད་པར་བཤད་དོ། །རྒྱུད་འདི་ནས་བཤད་པ་ལྟར་ལེགས་པར་བསམས་པའི་སྦྱོར་བ་སྟེ། རྣལ་འབྱོར་པ་བདག་ཉིད་གཞན་ལ་བག་ཚ་བ་ལ་སོགས་པའི་སྐྲག་པ་ཐམས་ཅད་རྣམ་པར་སྤངས་ཏེ་བློ་གྲོས་ཆེན་པོ་
དང་ལྡན་པའི་རྣལ་འབྱོར་པས་སྤྱད་པར་བྱའོ། །ཇི་ལྟར་ཞེ་ན། ཁམས་གསུམ་པའི་འཁོར་ལོའི་ཚོགས་བདེ་བའི་མཆོག་ལྷན་སྐྱེས་ཀྱི་བདེ་སྟོང་གི་ངོ་བོར་དབྱེར་མེད་པར་སྡོམ་པ་ལ་གནས་ནས་སོ། །དེ་ལྟ་བུའི་ཚུལ་གྱིས་ཕྱག་རྒྱ་རིགས་ལྔར་ཀུན་ཏུ་སྤྱོད་པ་ནི། 
ལྷན་ཅིག་སྐྱེས་པའི་ཡེ་ཤེས་ཀྱི་རིགས་གཅིག་ཏུ་ནི་བརྟགས་པ་སྟེ་བཞག་པ་ཡིན་ནོ། །ཞེས་ཤེས་པར་བྱའོ། །བདག་གཉིས་ཀྱི་མཚན་མར་རྣམ་པར་མི་རྟོག་པ་སྟེ། དེའི་དམིགས་གཏད་འཇིག་པའི་སེམས་ཀྱི་བདག་ཉིད་ཀྱིས་འདོད་པའི་ཡོན་ཏན་སྤྱི་དང༌། བྱེ་བྲག་
9-5-169a


ཏུ་ཕྱག་རྒྱའི་གཟུགས་ལ་སོགས་པ་ལྔ་ལ་བདེ་སྟོང་གི་ཏིང་ངེ་འཛིན་རྒྱས་པའི་ཕྱིར་དུ་སྤྱོད་པར་བྱེད་དེ། དེ་ལྟར་ལོངས་སྤྱད་པས་ནི་ལུས་རྒྱས་པས་བདེ་བའི་རྟེན་རྒྱས་པར་འགྱུར་ལ། དེ་བས་ནི་བདེ་བ་ཆེན་པོ་དང༌། དེ་ལས་ནི་ཏིང་ངེ་འཛིན་རྒྱས་
པར་འགྱུར་བའི་ཕྱིར་རོ། །དེ་ལྟར་བྱ་མི་རུང་བ་དང༌། དེ་ལྟར་སྤྱད་པའི་འབྲས་བུ་མི་ཟད་པ་འབྱུང་བའི་དོགས་པ་ཐམས་ཅད་རྣམ་པར་སྤངས་ལ། རྣལ་འབྱོར་པ་དཔའ་བོ་སེང་གེ་བཞིན་དུ་ཉམ་ང་བ་མེད་པར་སྤྱོད་དོ། །དེ་ལྟར་དཔལ་ཧེ་རུ་ཀའི་གོ་འཕང་གི་ཏིང་ངེ་འཛིན་
ལ་གནས་པ་ལ་ནི་ལུས་ཀྱི་བསྒུལ་བསྐྱོད་དང༌། ངག་གི་སྨྲ་བརྗོད་བཏང་སྙོམས་པ་རྣམས་ཀྱིས་ཀྱང་ཕྱག་རྒྱ་བཅིངས་པ་དང༌། སྔགས་བཟླས་པ་དང་འདྲ་བའི་ཚོགས་རྫོགས་པར་བྱེད་དེ། ཀུན་སྤྱོད་ལས། ཤྲཱི་ཧེ་རུ་ཀའི་གོ་འཕང་གནས། །ཡན་ལག་གི་ནི་བསྐྱོད་པ་
དང༌། །ཚིག་གི་རབ་འབྱམས་ཇི་སྙེད་པ། །དེ་སྙེད་ཕྱག་རྒྱ་གསང་སྔགས་ཡིན། །ཞེས་ཏེ། རྗེས་སྤྱོད་བྱ་ཚུལ་དེ་རྣམས་ནི་ཀུན་སྤྱོད་དང་མངོན་བརྗོད་ལས་འབྱུང་ངོ༌། །ཁྲུས་བྱེད་པའི་དུས་སུ་ནི་ལྷ་དབང་བསྐུར་བའི་ཆོ་གས་བྱའོ། །ཁ་ཟས་ཀྱི་དུས་སུ་ནི་རང་གི་
ལུས་དཀྱིལ་འཁོར་སྐད་ཅིག་གིས་གསལ་གདབ། གཏོར་མ་སྔར་བཤད་པ་ལྟར་གྱི་ཆོ་གས་སམ། ཡང་ན་ཡི་གེ་གསུམ་གྱིས་བྱིན་གྱིས་བརླབ་ལ། ཨོཾ་ཁ་ཁ་ཞེས་སོགས་ལན་ཅིག་བརྗོད་ལ་ཕྱོགས་སྐྱོང་ལ་གཏོར་མ་འབུལ་བར་འགྲེལ་པ་རྣམས་ནས་
བཤད་དོ། །དེ་ནས་རང་གི་བཟའ་བཏུང་རྣམས་འབར་བ་སོགས་ཀྱི་ཆོ་གས་སྦྱང་བར་འགྲེལ་པ་རྣམས་ནས་བཤད་པ་ནི། སྡོམ་འབྱུང་ལས། བླ་མ་དཔའ་བོ་རྣལ་འབྱོར་མ། །མཆོད་ཅིང་རྗེས་སུ་སྤྱད་པར་བྱ། །ཨོཾ་ཨཱཿཧཱུཾ་ཞེས་པས་སྔགས་ཀྱིས། །རྟག་
9-5-169b


ཏུ་བྱིན་གྱིས་བརླབ་བྱ་ཞིང༌། །ཧ་ཧོ་ཧྲཱིཿཞེས་པས་སྔགས་ཀྱིས། །སྦྱང་བ་དང་ནི་རྟོགས་བྱས་སྟེ། །ཧ་ཡིག་ཁ་དོག་འཕྲོག་པར་བྱེད། །ཧོ་ཡིག་དྲི་རྣམས་འཕྲོག་པར་བྱེད། །ཧྲཱིཿཡིག་ནུས་པ་བཅོམ་པ་དང༌། །བདུད་རྩིའི་རྣམ་པའང་བརྟེན་པར་བྱ། །ལྷ་གསུམ་ལ་
སོགས་དང་བྲལ་བ། །གལ་ཏེ་སྲེད་ལྡན་འཐུངས་གྱུར་ན། །དེ་ནི་དུག་འགྱུར་ཐེ་ཚོམ་མེད། །སྔགས་ཀྱི་དངོས་སྒྲུབ་སྐྱེ་མི་འགྱུར། །ཞེས་གསུངས་པ་ལྟར་བྱ་དགོས་སོ། །དེའི་བྱེད་ཚུལ་ནི། སྡོམ་འབྱུང་འགྲེལ་པ་ལས། ལག་པ་གཡས་ལ་ཧོ་ཡིག་ལས་སྐྱེས་པའི་
འཁོར་ལོ། རྣམ་སྣང་གི་ངོ་བོ་ཧོ་ཡིག་གིས་མཚན་པ་བསམས་ནས་དེའི་སྟེང་དུ་རྫས་ཀྱི་སྣོད་བཞག་ལ། ལག་པ་གཡོན་པ་ལ་ཧ་ལས་སྐྱེས་པའི་སྣང་མཐའི་རང་བཞིན། པདྨ་དམར་པོ་འདབ་མ་བརྒྱད་པ་ཧས་མཚན་པ་བསྒོམས་པ་ཡིས་ཁ་དགེ་བ། རྫས་ཀྱི་སྟེང་དུ་
ཉི་མ་ལ་གནས་པའི་ཧཱུཾ་ཡིག་མི་བསྐྱོད་པའི་རང་བཞིན་ཅན་བལྟས་ལ། སྔགས་དེ་གསུམ་ལན་གསུམ་མམ་ལྔ་འམ་བདུན་བརྗོད་ནས། ཧྲཱིཿའི་གཡས་སུ་ཨོཾ། གཡོན་དུ་ཨཱཿ། མདུན་དུ་ཧཱུཾ་གནས་པར་བསམས་ལ། ཨོཾ་ཨཱཿཧཱུཾ་ཡང་སྔ་མ་ལྟར་བརྗོད་ནས། བླ་མ་
དང༌། དཔའ་བོ་དང༌། རྣལ་འབྱོར་མ་ལ་མཆོད་ནས་རང་གིས་བསྟེན་པར་བྱའོ། །དེ་ལྟར་མ་བྱས་པར་བསྟེན་པའི་ཉེས་པ་ནི་ལྷ་གསུམ་ཞེས་པ་བཞིས་བསྟན་པར་འཆད་དོ། །ཧ་ལ་སོགས་པས་ཁ་དོག་དང་དྲི་ནུས་ཀྱི་སྐྱོན་འཕྲོག་པ་ནི་སྦྱང་བའོ། །སྐྱོན་བསལ་ནས་བདུད་
རྩིར་བྱེད་པ་ནི་རྟོགས་པའོ། །མང་པོར་སྤེལ་བ་ནི་འབར་བར་བྱས་པའོ། །འདི་ནི་བཟའ་བཏུང་ལ་ལོངས་སྤྱོད་རེས་ཀྱིས་བྱ་དགོས་ཏེ། དེ་ལྟར་མ་བྱས་ན་ཉེས་དམིགས་ཆེ་བར་གསུངས་པའི་ཕྱིར་རོ། །དེ་ནས་ཆོས་ཐམས་ཅད་མཉམ་པ་ཉིད་དོ་སྙམ་དུ་མོས་པའི་
9-5-170a


ང་རྒྱལ་སྔོན་དུ་འགྲོ་བས། ཨོཾ་ས་མ་ཡ་ཤུདྡྷ་སརྦ་དྷརྨྨཿ ས་མ་ཡ་ཤུདྡྷོ྅་ཧཾ། ཞེས་བརྗོད། ས་མ་ཡ་ནི་འདིར་མཉམ་པའི་དོན་དང༌། ཤུདྡྷ་ནི་དག་པའོ། །དེ་ནས་ལྕེ་རྡོ་རྗེར་སྐྱེད་པ་དང༌། བྱིན་གྱིས་བརླབ་པ་སྔར་བཞིན་དུ་བྱས་ལ་ལོངས་
སྤྱད་པས་ལྟེ་བར་གནས་བའི་ཧཱུཾ་མཾ། ནཱ་དཀར་དམར་ལྷ་ཐམས་ཅད་ཀྱི་ངོ་བོར་མོས་པ་ལ་ཕུལ་བས་ཚིམ་པར་བསམ་མོ། དེ་འདྲ་བའི་ཚུལ་གྱིས་ཟོས་ན་ཡོན་སྦྱོང་ནུས་པ་ཡིན་ཏེ། གདན་བཞི་ལས། གང་ཞིག་ཅུང་ཟད་བཟའ་བཏུང་རྣམས། །བསྔོ་བ་བྱས་
ནས་བཟའ་བར་བྱ། །འདི་ལྟར་སྤྱོད་པའི་རྣལ་འབྱོར་པ། །བུ་ལོན་དུ་ཡང་མི་འགྱུར་རོ། །ཞེས་ནང་གི་སྦྱིན་སྲེག་གི་ཚུལ་གྱིས་ཟ་བ་ལ་བུ་ལོན་དུ་མི་འགྱུར་བར་གསུངས་ཏེ་ཤིན་ཏུ་གལ་ཆེའོ། །གཉིས་པ་ནི། དེ་ལྟར་ཐུན་དང་པོ་ལ་ཇི་ལྟར་བྱ་བ་བཤད་ནས། 
ཉིན་གྱི་གུང་ཐུན་ལ་ནི་བསམ་གཏན་གྱི་ཁང་པར་ཞུགས་ཏེ། སྔར་བཤད་པའི་སྔགས་གསུམ་བརྗོད་པས་སྐད་ཅིག་གིས་རྟེན་བརྟེན་པའི་འཁོར་ལོ་རྫོགས་པར་མོས་པར་བྱས་ཏེ། སྔར་བཞིན་གསལ་གདབ། གཅོ་བོ་ཡབ་ཡུམ་གསལ་གདབ་ཟིན་པ་
དང༌། གསང་གནས་བྱིན་རླབས་སོགས་བྱས་ལ། བདེ་སྟོང་བསྒོམ། འཁོར་རྣམས་གསལ་བཏབ་ཟིན་པ་དང༌། སྔར་གྱི་བདེ་བ་འདྲ་བར་བྱས་ལ། ཆོས་སོ་བདུན་གྱི་དག་པ་རྒྱས་བསྡུས་གང་རུང་ཞིག་དྲན་པར་བྱ། དེ་ནས་ལུས་དཀྱིལ་བསྒོམ། དེ་ནས་
གོ་བགོ་བ་སོགས་སྔར་བཞིན་བྱའོ། །འགྲེལ་པ་རྣམས་ལས། དག་པ་གསུམ་ནས་སྦྱོར་བ་ཚོགས་བསག་གི་བར་རྣམས་ཐུན་གཞན་གསུམ་ལ་བྱ་བར་མ་བཤད་ཀྱང༌། བསྐྱེད་རིམ་ལ་སེམས་ཅུང་ཟད་ལས་རུང་གི་ཏིང་ངེ་འཛིན་མ་ཐོབ་བར་དུ་མ་ཆག་པ་
9-5-170b


རེ་དང༌། སྟོང་པའི་ངང་ནས་ནཱ་ད་འཇོག་པ་ནས་མངོན་བྱང་སྒོམ་པའི་བར་བྱས་ན་ལེགས་སོ། །ཐུན་དེ་བཏང་ནས་ཕྱི་དྲོའི་ཐུན་ལ་མ་ཞུགས་ཀྱི་བར་དང༌། ཕྱི་དྲོའི་ཐུན་ལའང་དེ་བཞིན་དུ་བྱའོ། །དེ་ནས་ཐུན་བཞི་པ་མཚན་མོའི་ཐུན་ལའང་དེ་བཞིན་དུ་བྱས་ལ། དེའི་མཐར་
ནམ་གྱི་གུང་ལ་ནི། ངག་གི་བྱ་བ་ཐམས་ཅད་ཨཱ་ལི་ཀཱ་ལིའི་བདག་ཉིད་དུ་ཁོང་དུ་ཆུད་པར་བྱས་ལ། ཨོཾ་ཚུར་སྤྱོན་ཚུར་སྤྱོན་དཔའ་བོ་ཆེ། །དག་པའི་ཚིག་ནི་སྟོན་པ་པོ། །སྐྱེ་དང་འཇིག་དང་རང་འབྱུང་བ། །སྟོང་ཉིད་ཡེ་ཤེས་འདི་ཁོ་ནའོ། །ཞེས་བརྗོད་ཅིང༌། མཐར་ཧཱུཾ་
ཧཱུཾ་ཕཊ་སྦྱར་བའི་དབྱངས་གསལ་ཚར་གཅིག་བརྗོད་ལ། འོད་གསལ་ལ་མངོན་དུ་ཕྱོགས་པར་བྱས་ལ། གཉིད་ཀྱང་འོད་གསལ་དུ་མོས་པར་བྱའོ། །ཞེས་བཤད་དོ། །འདི་ནི་གཉིད་ཀྱི་འོད་གསལ་འཛིན་པ་ལ་སློབ་པ་ཡིན་པས་བཟླས་པ་དང་གཏོར་མ་ཟིན་པའི་
འོག་ཏུ་སྡུད་རིམ་སྙིང་ཁར་བྱས་ནས་ནཱ་ད་ཡང་མི་དམིགས་པར་བྱས་པའི་འོག་ཏུ་སེམས་གཡོ་མེད་དུ་གཟུང་ན་གཉིད་ཀྱི་འོད་གསལ་འཛིན་པའི་སྟོབས་ཆེའོ། །ཐུན་བཞི་པོ་ཐམས་ཅད་ཀྱི་མཐར་ཡི་གེ་བརྒྱ་པ་ཅི་མང་དུ་བརྗོད་པར་བྱའོ། །དེ་ནས་ཡང་ཐོ་རངས་ཀྱི་
ཐུན་ལ་འོད་གསལ་ལས་ལངས་ཏེ། ལུས་དཀྱིལ་འཁོར་གྱི་འཁོར་ལོར་མོས་པ་བྱ་སྟེ། ཨོཾ་ཚུར་སྤྱོན་སོགས་བརྗོད་ནས་ཐུན་དང་པོའི་བཤད་པ་ཐམས་ཅད་ལ་རྗེས་སུ་གནས་པར་བྱའོ། །དྲིལ་བུ་པའི་ལུས་དཀྱིལ་ལ་ནི། ལྷ་ལྔ་ལས། ས་བོན་འོད་ཀྱིས་ཤེས་
རབ་བདག་པོ་དང༌། །འཁོར་ལོ་པ་དང་ཁང་པ་བརྩེགས་མ་རྣམས། །སྣང་བར་བྱས་ཏེ་འོད་གྱུར་རིམ་བཞིན་བསྡུ། །ཞེས་གསུངས་པས། སྙིང་ཁའི་ཧེ་རུ་ཀའི་ཐུགས་ཀའི་ཧཱུཾ་ཡིག་ལས། འོད་ཟེར་འཕྲོས་པས་རྟེན་དང་བརྟེན་པ་ཐམས་ཅད་སྣང་བར་བྱས་པའི་
9-5-171a


མཐར་སྣོད་བཅུད་དུར་ཁྲོད་དང༌། དེ་དང་བསྲུང་འཁོར་གཞལ་ཡས་ཁང་དང༌། དེ་ལྷ་ལྔ་ལྟ་བུ་ཡིན་ན་ལྷ་ལ་སྡུད་ཅིང༌། ཡུམ་བཞི་སྔར་བཞིན་སྡུད། ལུས་དཀྱིལ་རྐྱང་པ་ཡིན་ན་ཁང་པ་བཞིའི་ཧེ་རུ་ཀ་ལ་བསྡུ། དེ་ནས་བརྟེན་པའི་ལུས་དཀྱིལ་
རྣམས་སྔར་བཤད་པ་བཞིན་རང་གནས་སུ་ཐིམ་པའམ་རིམ་གྱིས་བསྡུས་ཏེ། སྙིང་ཁའི་ཧེ་རུ་ཀ་ཡབ་ཡུམ་བཞག །དེ་ནས་བཞིའི་གཙོ་བོ་ཡབ་ཡུམ་གཉིས་སྙིང་ཁའི་གཙོ་བོ་ཡབ་ཡུམ་ལ་བསྡུ། དེ་གཉིས་ཀྱང་སྙིང་ཁའི་ཉི་གདན་ཧཱུཾ་དང་བཅས་པ་ལ་བསྡུ། 
ཉི་མ་དང་ཨཱུ་དང་ཧ་ནས་ནཱ་དའི་བར་རྣམས་སྔ་མ་ཕྱི་མ་ལ་རིམ་གྱིས་བསྡུས་ལ། ནཱ་ཡང་མི་དམིགས་པར་བྱས་ཏེ། ཕྱག་གཉིས་པ་ཡབ་ཡུམ་དུ་ལངས་ལ་བསྔོ་བ་དང་སྨོན་ལམ་དང༌། ཡིག་བརྒྱ་ཡང་བརྗོད་གསུང་སྟེ། སྔར་བཤད་པ་རྣམས་ཀྱང་དགོས་
སོ། །ཐུན་གཞན་ལ་འཇུག་པ་ན་གུང་དང་ཕྱི་དྲོའི་ཐུན་མཚམས་སུ། བསམ་གཏན་ཁང་པར་སྟན་བདེར་འདུག །བདག་ཉིད་འོད་ཟེར་དུ་གྱུར་པ། ཧཱུཾ་དུ་གྱུར་ཏེ་ཡོངས་གྱུར་ལས། བཅོམ་ལྡན་འཁོར་ལོ་བདེ་མཆོག་གི། དཀྱིལ་འཁོར་འཁོར་ལོ་ལྷ་ལྔ་ཡི། །ཁང་
བརྩེགས་རིན་ཆེན་ཚོགས་ལས་གྲུབ། །དུར་ཁྲོད་བརྒྱད་བསྐོར་གསལ་དམིགས་ནས། །དབང་བསྐུར་བ་ལ་སོགས་པ་ཆོ་ག་ཐམས་ཅད་བྱའོ། །ཞེས་རང་འོད་དུ་བཞུས་པ་ཡོངས་སུ་གྱུར་པ་ལས་ཧཱུཾ་དུ་གྱུར། དེ་ཡོངས་སུ་གྱུར་པ་ལས་རྟེན་ཐམས་ཅད་དང༌། 
བཞིའི་ཧེ་རུ་ཀ་བསྐྱེད་པའམ། ཡང་ན་སྔར་བཞིན་དག་པ་གསུམ་ནས་ཡེ་ཚོགས་ཀྱི་བར་ཇི་ལྟར་འཚམ་པ་ཅིག་བྱ་ལ། མངོན་བྱང་གི་བར་དུ་བསྒོམས་ནས་སྐད་ཅིག་མའི་སྔགས་བརྗོད་ལ། རྟེན་ཐམས་ཅད་དང་བཞིའི་ཧེ་རུ་ཀ་བསྐྱེད་ལ་གསལ་གདབ། 
9-5-171b


དེ་ནས་ལུས་དཀྱིལ་བསྒོམས་ལ་དབང་བསྐུར་བ་སོགས་བྱའོ། །ཐུན་མཚམས་ཐ་མ་ལ་ནི་སྔར་བསྟན་པའི་ཆོ་ག་ཐམས་ཅད་སྤྱད་ལ། བཟླས་བརྗོད་ཀྱི་རྗེས་ལ་ཧཱུཾ་གི་འོད་ཟེར་གྱིས་ཐམས་ཅད་འོད་དུ་གྱུར་པ་དཀྱིལ་འཁོར་བདག་པོ་ལ་བསྡུས་ལ། དཀྱིལ་འཁོར་
གཙོ་བོ་ཕྱག་རྒྱ་དང་བཅས་པ་ཡང་འོད་དུ་གྱུར་པ། སྙིང་ཁའི་ཤེས་རབ་རབ་གྱུར་ཡབ་ཡུམ་ལ། དེ་ཡང་སྙིང་ཁའི་ཉི་བཅས་ཧཱུཾ། ཧི་མ་ཨུ་ཧའི་མིག་ཟླ་ཚེས། །ཐིག་ལེ་ནཱ་དའི་བར་བསྡུས་ལ། །དེ་ཡང་དམིགས་མེད་གཉིད་ལ་འཇུག །ནང་བར་གྱི་དུས་སུ་རྡོ་རྗེ་རྣལ་
འབྱོར་མའི་གླུས་བསྐུལ་བས་སད་པར་མོས་པ་བྱས་ལ། ཆོ་ག་ཐམས་ཅད་ཉི་མ་སྔ་མ་བཞིན་དུ་བྱའོ། །ཞེས་གསུངས་པ་ལྟར་བྱའོ། །གཉིས་པ་རྫོགས་པའི་རིམ་པ་ནི། ཨཱ་ལི་ཀཱ་ལི་མདུན་བསམས་ནས། །ཞེས་སོགས་ཀྱིས་སྟོན་ཏེ་ཟུར་དུ་བཤད་པར་བྱའོ། 
གསུམ་པ་ཕན་ཡོན་ནི། སེམས་ནི་ངལ་བསོ་སོགས་ནི་འགྲེལ་པ་གསུམ་ག་ནས་ཕན་ཡོན་དུ་འཆང་ལ། དེ་ཡང་བསྐྱེད་རིམ་ཁོ་ནའི་མིན་གྱི། རིམ་པ་གཉིས་ཀའི་ཕན་ཡོན་ནོ། །ཚིགས་བཅད་འདིའི་གོང་དུ་ཕན་ཡོན་གསུངས་པ་ནི། རྩ་རྒྱུད་ལས། མི་མཆོག་
གང་ཞིག་ཀུན་སྤྱོད་པ། །སྡིག་པ་ཐམས་ཅད་རྣམ་དག་པས། །དེ་བཞིན་གཤེགས་པའི་ས་ཐོབ་ཅིང༌། །སྐྱེ་དང་སྐྱེ་བར་བདེར་གཤེགས་ཀྱི། །རིགས་སྐྱེ་རྒྱལ་པོ་ཆོས་ལྡན་འགྱུར། །ཇི་ལྟར་སྔོན་བསགས་སྡིག་པ་ཡི། །མཚན་ཉིད་ཐམས་ཅད་དམན་པ་སྟེ། །གང་
ཞིག་འདི་ནི་རྟག་སྒོམ་པ། །ས་ལ་འདོད་པ་ཀུན་དབང་ཕྱུག །དཔེར་ན་མར་གྱིས་གང་བའི་སྣོད། །མེ་ཡི་དབུས་སུ་བཞག་པ་ནི། །མར་སར་སྟེང་དུ་ཞུ་གྱུར་ཞིང༌། །དེ་བཞིན་ཤྲཱི་ཧེ་རུ་ཀའི། །མཚན་གྱིས་སྡིག་པ་འཇིག་པར་འགྱུར། །བསམ་གཏན་བསམས་པ་ཙམ་
9-5-172a


གྱིས་སམ། །ཀློག་ཅིང་ཁ་ཏོན་བྲིས་པ་ཡིས། །མཐོ་རིས་ལོངས་སྤྱོད་ཐོབ་གྱུར་པ། །ཡང་ན་འཁོར་ལོས་སྒྱུར་བ་འཐོབ། །ཅེས་པའི་འོག་ཏུ་རྣལ་འབྱོར་པ་རྣམས། ཞེས་གསུངས་ཏེ། དེ་བཞིན་གཤེགས་པའི་ས་ཐོབ་པ་ནི་མཐར་ཐུག་གི་ཕན་
ཡོན་དང༌། དེ་ཚེ་འདིར་མ་ཐོབ་ཀྱང་སྐྱེ་བ་བརྒྱུད་ནས་འཐོབ་པ་ཡང་ཐེག་པ་མཆོག་གི་རིགས་སུ་སྐྱེ་བ་དང༌། ཆོས་འདི་སྤྱོད་པའི་ཆོས་ལྡན་གྱི་རྒྱལ་པོར་འགྱུར་བ་དང༌། ལས་ཀྱི་སྒྲིབ་པའི་སྡིག་ཀུན་འདག་པ་དང༌། ལམ་འདི་ལ་བསམ་གཏན་བྱས་པ་ཙམ་དང༌། 
གླེགས་བམ་ལ་ཀློག་པ་དང༌། ཁ་ཏོན་དུ་འདོན་པ་དང༌། རྒྱུད་ཀྱི་གླེགས་བམ་བྲིས་པས་ཀྱང་མཐོ་རིས་ཀྱི་དཔལ་སྤྱི་དང༌། ཁྱད་པར་པ་འཁོར་སྒྱུར་འཐོབ་པར་བསྟན་ནོ། །གལ་ཏེ་གཡེང་བསམ་གྲུབ་ན་འཆི་བའི་ཚེ་ཕན་ཡོན་ནི། ལམ་འདི་ཡི་རྣལ་འབྱོར་པ་རྣམས་
ལ་ནི་མྱང་འདས་ཏེ་འཆི་བ་དོན་དམ་པ་བསྟན་པ་མིན་ནོ། །འོ་ན་ཅི་ཞེ་ན། ཁྱིམ་བཟང་པོ་ནས་ཁྱིམ་བཟང་པོ་གཞན་དུ་འགྲོ་བའི་བར་སྐབས་སུ་ཅུང་ཟད་ངལ་བསོ་བ་དང་འདྲ་བར་ཆོས་སྤྱོད་པའི་གནས་འདི་ནས་གནས་ཁྱད་པར་ཅན་གཞན་དུ་འགྲོ་བའི་བར་
སྐབས་སུ་རྣལ་འབྱོར་པ་སེམས་ངལ་བསོ་བ་ཙམ་ལ་འཆི་བ་ཞེས་བརྗོད་པ་ཙམ་མོ། །དེས་ན་འཆི་བ་དོན་དམ་པ་མ་ཡིན་ཞེས་པ་ནི། འགྱོད་དགོས་པ་དང་ཕྱི་མར་འཇིགས་པའི་འཆི་བ་དེ་མིན་ཞེས་བའི་དོན་ནོ། །དེ་ཉིད་འཆད་པ་ནི། ལམ་འདིའི་རྣལ་
འབྱོར་པ་དང་རྣལ་འབྱོར་མ་རྣམས་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འགྲོ་བའི་ཚེ་ནི་དཔལ་ཁྲག་འཐུང་སྟེ་ཧེ་རུ་ཀ་དང༌། རྗེ་བཙུན་མ་ཕག་མོ་ལ་སོགས་པའི་དཔའ་བོ་དང་རྣལ་འབྱོར་མ་ལག་ན་མེ་ཏོག་དང༌། བདུག་སྤོས་སྣ་ཚོགས་པ་དང༌། 
9-5-172b


རྒྱལ་མཚན་དང་། བ་དན་སྣ་ཚོགས་པ་དང༌། སིལ་སྙན་གྱི་སྒྲ་སྣ་ཚོགས་པ་དང༌། ཡིད་དུ་འོང་བའི་གླུའི་མཆོད་པ་སྣ་ཚོགས་ཀྱིས་མཁའ་སྤྱོད་ཀྱི་གནས་སུ་འཁྲིད་པར་བྱེད་དོ། །འགྲེལ་པ་གསུམ་ནས་མཁའ་སྤྱོད་འོད་གསལ་ལ་བྱས་ནས་འོད་གསལ་གྱི་གོ་འཕང་
ལ་འགོད་པར་བཤད་པ་ནི་ངེས་དོན་གྱི་བཤད་པ་ཡིན་ཏེ། འཆི་བ་འོད་གསལ་དུ་འཆར་དུ་འཇུག་པའོ། །གཉིས་ཀའི་བཤད་སྦྱར་ལས། དོན་དམ་པར་ནི་སྔོན་གྱི་གནས་ཡོངས་སུ་བཏང་སྟེ་ཁྱད་པར་དུ་འཕགས་པའི་གནས་རྣམས་ལ་བརྟེན་ནས་རྣལ་འབྱོར་པ་
འགྲོའོ་ཞེས་སྒྲས་ཟིན་ཚོད་ཀྱི་སྟེང་ནས་བཤད་པ་ནི་དྲང་དོན་གྱི་མཁའ་སྤྱོད་དོ། །དེས་ན་འཆི་བ་ཞེས་པ་འདི་ནི་འཇིག་རྟེན་པའི་རྣམ་པར་རྟོག་པས་བཞག་པ་སྟེ། རྣལ་འབྱོར་པ་ཁྱད་པར་ཅན་རྣམས་ཀྱི་འཆི་བ་ནི་གནས་བཟང་པོ་གཅིག་བཏང་ནས། བཟང་པོ་གཅིག་
ཏུ་འཇུག་པ་ཡིན་ལ། དེ་ལྟ་ན་ཚེ་འདིར་ཁང་བཟང་གཅིག་ནས་གཅིག་ཏུ་བགྲོད་པ་ལ་འཆི་བ་ཞེས་མི་བརྗོད་པ་བཞིན་ནོ། །དེའི་མཇུག་ཏུ། རྩ་རྒྱུད་ལས། དེ་འདྲའི་དཔའ་ཆེན་རྣལ་འབྱོར་མས་སྟེང་ན་ནི་རྙེད་པར་དཀའ། ཞེས་གསུངས་པ་ནི། ཕན་ཡོན་དེ་རྣམས་
མངོན་དུ་བྱེད་ནུས་པའི་ལམ་ལ་སྒྲུབ་པ་བྱེད་པའི་རྣལ་འབྱོར་པ་དང༌། རྣལ་འབྱོར་མ་ནི་སའི་སྟེང་ན་ཤིན་ཏུ་དཀོན་པར་བསྟན་པས། འདི་འདྲ་བའི་རྙེད་དཀའ་བའི་ལམ་ལ་ཉམས་ལེན་བྱས་ཡོད་པའི་དུས་སུ་ནི། ཤིན་ཏུ་རྙེད་དཀའ་བར་ཤེས་པར་གྱིས་ལ། 
ལམ་འདི་ལ་ཐོས་བསམ་སྒོམ་པ་ལ་འབད་པར་བྱོས་ཤིག །ཅེས་སྟོན་པའང་ཡིན་པའི་འདིའི་འོག་ཏུ་མགུལ་རྒྱན་ཞེས་པ་ནས། གོ་འཕང་མཆོག་ནི་བསྒོམ་པར་བྱ། ཞེས་སོགས་ལས་ཤེས་སོ། །དེ་ལྟར་གཉིད་ཀྱི་འོད་གསལ་དང་འཆི་བ་འོད་གསལ་དུ་
9-5-173a


འཆར་བ་གཉིས་ཀྱི་བསྲེ་བ་གསུངས་པ་འདི་ལ་བརྟེན་ནས་འདི་ཡི་གདམས་པ་ཐུན་མོང་མ་ཡིན་པ་ནི། ལུགས་འདིའི་རྫོགས་རིམ་གྱི་སྐབས་སུ་རྩད་བཅད་དགོས་པའང་ཤེས་པར་གྱིས་ཤིག །གཉིས་པ་མ་ཚང་བ་ཁ་སྐོང་བ་ནི། གཞུང་
ནས་མ་ཟིན་ཀྱང༌། ལྭ་བ་པས། འདིར་ཕྱི་རོལ་དང༌། ལག་པ་ལ་མཆོད་པ་གཉིས་གསུངས་པས། སྔ་མ་ནི་ལག་པས་མཆོད་པ་དང༌། ཕྱི་མ་ནི་ལག་པ་ལ་མཆོད་པར་བཤད་དོ། །དེ་ནི་གཡོན་པའི་ཀུན་སྤྱོད་གྱི་ཁྱད་པར་ཅིག་ཡིན་ལ། དེ་ཡང་རྩ་རྒྱུད་ནས། དམ་
ཚིག་བརྒྱད་གསུངས་པ་ཤེས་ནས་སྲུང་བ་གལ་ཆེའོ། །འདི་ལ་གཉིས། དམ་ཚིག་བརྒྱད་སྤྱིར་བཤད་པ་དང༌། ཁྱད་པར་དུ་གཡོན་པའི་དམ་ཚིག་བཤད་པའོ། །དང་པོ་ནི་རྩ་རྒྱུད་ལས། དེ་ནས་རྣལ་འབྱོར་རྒྱུད་དུ་ནི། །རྙེད་དཀའི་དམ་ཚིག་ང་ཡིས་བཤད། །
སྐྱེས་པ་བུད་མེད་གཡོན་ནས་འགྲོ། །འདོད་པའི་འབྲས་བུ་སྟེར་བར་བྱེད། །ཁྱིམ་དང་ཞིང་དུ་རྣམ་གནས་པ། །ཤིན་ཏུ་རིང་ཡང་ཤེས་པར་འགྱུར། །ཤྲཱི་ཧེ་རུ་ཀ་རྣལ་འབྱོར་མཆོག །སློབ་དཔོན་རྣལ་འབྱོར་མ་ཉིད་ཡིན། །རྒྱུད་འདི་རུ་ནི་སྒྲུབ་པ་པོ། །ལེགས་
པར་གྱུར་པ་ཉིད་ཡིན་ཏེ། །བརྙས་མི་བྱ་ཞིང་སྤང་མི་བྱ། །ནུས་པ་ཡིས་ནི་མཆོད་པར་བྱ། །ཀཱ་ཀཱ་གདོང་སོགས་བརྒྱད་པོ་ནི། །གྲོལ་དང་དད་པ་འཕེལ་བྱེད་པ། །རྟག་པར་དངོས་གྲུབ་རྣམས་ཀྱི་རྒྱུ། །དམ་ཚིག་རྣམས་ཀྱང་སྐྱོང་བར་བྱེད། །ལྷ་མོ་གཞན་དང་
ཀུན་སྦྱོར་བའི། །རྣམ་པར་རྨོངས་པས་འདོད་པ་མིན། །གཉིས་སུ་འབྱེད་དང་ཐོགས་མེད་མིན། །དམ་ཚིག་སྤྱོད་པའི་སྤྱད་བྱ་བ། །མི་མོའི་དབང་ཕྱུག་ལེགས་པར་སྦྱོར། །ཚངས་སྤྱོད་དེ་བཞིན་བསམ་གཏན་ཏེ། །ཁྲོ་མེད་བུ་གར་ཀུན་ཏུ་སྤྱོད། །འདི་བརྒྱད་
9-5-173b


དམ་ཚིག་ཀུན་སྤྱོད་ཡིན། །སྒྲུབ་པ་ལ་ནི་གནས་པ་ཡི། །སྒྲུབ་པ་པོས་ནི་རྟག་ཤེས་བྱ། །ཞེས་གསུངས་སོ། །སྐྱེས་པ་བུད་མེད་ཅེས་པའི་རྐང་པ་བཞིའི་དོན་ནི། སྔགས་པས་བུ་མེད་དམ་སྐྱེས་པ་མཐོང་བ་ན་གཡོན་གྱི་ཆ་ནས་འགྲོའོ། །དེ་ལྟར་ན་ཤིན་ཏུ་རིང་
ཡང་ཤེས་པར་འགྱུར་རོ། །ཞེས་དང༌། ལང་ཀས། སྐྱེས་པའམ་བུད་མེད་རྣལ་འབྱོར་མ། ཁྱིམ་མམ་ཤིན་ཏུ་རིང་པོ་ན་གནས་པ་ཡང་ཤེས་པར་བྱས་ལ་གཡོན་ནས་སྤྱད་པར་བྱའོ། །ཞེས་དང༌། དཔའ་བོ་རྡོ་རྗེས། སྐྱེས་པའམ་བུད་མེད་རྣལ་འབྱོར་མ་མཐོང་
ན་གཡོན་གྱི་ཆ་རུ་བྱས་ནས་འགྲོ་བའོ། །རིང་ཡང་ཞེས་པའི་དོན་རིང་ཡང་ཁྱིམ་མམ་ཞིང་དུ་གཡོན་པའི་སྤྱོད་པས་བྱ། ཞེས་དང༌། གཉིས་ཀའི་བཤད་སྦྱར་ལས་ཀྱང་བུད་མེད་ནི་རྣལ་འབྱོར་མ་ལ་བཤད་པས། སྐྱེས་པ་ཡང་རྣལ་འབྱོར་པར་ཤེས་ལ། ཞིང་
ན་གནས་པ་ཞེས་གསུངས་པས། གནས་ཁྱད་པར་ཅན་ན་བཞུགས་པའི་རྣལ་འབྱོར་ཕོ་མོ་ལ་བྱེད་པར་མངོན་ནོ། །གཞན་ཡང༌། བུད་མེད་ཐམས་ཅད་མཐོང་བ་ན། །གཡོན་ནས་ལན་གསུམ་བསྐོར་བྱ་ཞིང༌། །སྤྱི་བོས་ཕྱག་ནི་བྱས་ནས་ཀྱང༌། །ལན་གསུམ་བར་
དུ་གསོལ་བ་གདབ། །ཁྱོད་མ་བདག་ནི་བུ་ཡིན་ཏེ། །ཇི་སྲིད་བྱང་ཆུབ་འབྱུང་བར་དུ། །བྱང་ཆུབ་ཡན་ལག་ནུ་མ་ལས། །བྱུང་བའི་རང་གི་འོ་མས་སྐྱོངས། །ཞེས་ཀྱང་གསུངས་ཏེ། གསོལ་གདབ་ནི། ཁྱོད་མ་ཞེས་སོགས་སོ། །འདི་དངོས་སུ་མ་ནུས་ཀྱང་ཡིད་ཀྱིས་
བྱ་དགོས་པའི་འདི་པའི་དམ་ཚིག་གོ། མལ་ནས་བརྒྱུད་པ་དང༌། མར་ངོས་རྒྱུད་འདིའི་རྣལ་འབྱོར་ཕོ་མོས། འགྲོ་བའི་ཚེ་རྐང་པ་གཡོན་པ་སྔོན་དུ་བཏང་ནས་འགྲོ་བ་དང༌། དེ་ལྟར་བྱས་པས་གནས་ཁྱད་པར་ཅན་ན་བཞུགས་པའི་རྣལ་འབྱོར་མས་རིང་མོ་ནས་ཀྱང་མཁྱེན་
9-5-174a


ནས་འཕྲད་ཅིང་ལུང་སྟོན་པར་འཆད་དོ། །གཞན་ཡང༌། རྩ་རྒྱུད་ལས། རྐང་པ་གཡོན་པ་སྔོན་དུ་འདོར། །ལག་པ་གཡོན་པ་ཡོངས་སུ་སྒྱུར། །གཡོན་གྱི་སྤྱོད་པས་རབ་མཆོད་བྱེད། །གཡོན་པས་འཁྱུད་པ་ཙམ་དང་ནི། །གཡོན་པ་ཡིས་
ནི་མཆོད་ཅིང་ཟ། །ཞེས་པ་ལ་སོགས་པའི་གཡོན་པའི་ཀུན་སྤྱོད་ཐམས་ཅད་དོ། །སློབ་དཔོན་ནི་རྣལ་འབྱོར་རྣམས་ཀྱི་སྐྱེད་བྱེད་ཡིན་པས་རྣལ་འབྱོར་མ་ཉིད་ཡིན། ཞེས་བྱའོ། །བདེ་མཆོག་གི་རྒྱུད་དུ་དབང་བསྐུར་བའི་སྒྲུབ་པ་པོ་དང༌། སློབ་དཔོན་ལ་བརྙས་པར་
མི་བྱ་ཞིང༌། སྤང་བར་མི་བྱ་བར་ཅི་ནུས་པས་མཆོད་དོ། །ཀཱ་ཀཱ་ཞེས་པའི་རྐང་པ་གཉིས་ནི། ལྭ་པ་བ་དང༌། ལྷ་སྤས་ཀྱི་འགྲེལ་པར། དམ་ཚིག་བརྒྱད་བཤད་ཟིན་པའི་འོག་ཏུ་འབྱུང་ཞིང༌། ཕྱི་མར་ཁྭ་སོགས་ཕོ་ཉ་བརྒྱད་པོ་ལ། གྲོལ་དང་དད་པ་འཕེལ་བྱེད་ཅིང༌། །
ཞེས་འདོན་ནོ། །འགྲེལ་པ་གཞན་རྣམས་ནས་སྔར་དྲངས་པའི་སྐབས་སུ་འབྱུང་ཡང་དམ་ཚིག་བརྒྱད་ལ་མི་འདྲེན་ནོ། །གཉིས་ཀའི་བཤད་སྦྱར་ལས། ཁྭ་གདོང་མ་ལ་སོགས་པ་མཆོད་པ་དེ་བཞིན་དུ་སྒྲུབ་པ་པོས་རྣལ་འབྱོར་མ་རྣམས་ཀྱང་མཆོད་པར་བྱ་
བའི་དོན་དུ་འཆད་ལ། མོས་དང་དད་པ་ཞེས་མང་པོ་ལས་འབྱུང་བས་ཁྭ་གདོང་སོགས་ལ་མོས་དང་ཞེས་སྦྱར་རོ། །དངོས་གྲུབ་ཀྱི་རྒྱུའི་དམ་ཚིག་བརྒྱད་ཀྱི་དང་པོ་ནི། སྔར་བཤད་པའི་གཡོན་པའི་ཀུན་སྤྱོད་དང༌། མི་བརྙས་ཤིང་མཆོད་པ་ནི་དམ་ཚིག་དང་པོའོ། །
ལྷ་མོ་ཞེས་པ་གཉིས་ནི་དམ་ཚིག་གཉིས་པ་སྟེ། འདོད་པ་ལ་ཆགས་ཤིང་རྨོངས་པས་ཕོ་ཉ་མོ་གཞན་དང་སྦྱོར་བ་སྤོང་བའོ། །གཉིས་སུ་མེད་ཅེས་པ་ནི་དམ་ཚིག་གསུམ་པ་སྟེ། བདག་དང་གཞན་གྱི་ཆར་འབྱེད་པ་སྤོང་བ་ལ་ལང་ཀ་དང་དཔའ་བོ་རྡོ་རྗེས་བཤད་
9-5-174b


པ་ནི། སྐལ་ལྡན་གྲགས་པས། གཉིས་སུ་མེད་པར་རྟོགས་པ་དང་མ་བྲལ་བ་ལ་བཤད་པས་དེ་ཁོ་ན་ཉིད་ཀྱི་དོན་རྟོགས་པ་སྐྱོང་བ་དང་མ་བྲལ་བར་བྱེད་པའོ། །ཐོགས་མེད་པ་ནི་དམ་ཚིག་བཞི་པ་སྟེ། སྐལ་ལྡན་དང་ལང་ཀས་སྒྲ་སོར་བཞག་ཙམ་ལས་
གཞན་མ་བཤད། དཔའ་བོ་རྡོ་རྗེས། གང་གིས་ཀྱང་གཞོམ་དུ་མི་ནུས་པ་ལ་བཤད་དོ། །བླ་མ་སྔ་མ་རྣམས་ཐོགས་མེད་མིན། ཞེས་བཏོན་ནས་དམ་ཚིག་མེད་པ་སོགས་ལ། ཉོན་མོངས་པའི་འདོད་པའི་དབང་གིས་ཐོགས་པ་མེད་པར་བྱེད་པ་མིན། ཞེས་ཟེར་
མོད་ཀྱང༌། འགྲེལ་པ་རྣམས་ནས། གཉིས་སུ་མེད་དང་ཐོགས་མེད་པ། །ཞེས་བཏོན་ནས་འཆད་པས། དེ་ལྟར་དུ་བྱའོ། །རྩ་རྒྱུད་ལས། ཕོ་ཉ་མ་གཏོགས་གཞན་དག་ལ། །འདོད་ནས་རྨོངས་པས་བགྲོད་མི་བྱ། །ཕོ་ཉ་ལ་རྟག་ཞེན་ཐར་པ། །འདའ་བ་ཡིས་ཀྱང་
ལོངས་སྤྱོད་བྱ། །ཞེས་གསུངས་པ་ལྟར། རང་གི་ཕོ་ཉ་ལ་ཐར་པའི་དོན་དུ་ཞེན་པས། རྟག་ཏུ་སྟེ་རྒྱུན་དུ་བྱ་བ་དེས་འདའ་བའི་ཚུལ་གྱིས་ལོངས་སྤྱད་པར་གསུངས་པ་ལྟར་བྱ་བ་ལ། དེ་འདྲ་བའི་ལམ་ལས་གང་གིས་ཀྱང་བཀྲི་བར་མི་ནུས་པ་ལ་བྱའོ། །དམ་ཚིག་
ཅེས་པ་གཅིག་ནི་དམ་ཚིག་ལྔ་པ་སྟེ། དམ་ཚིག་ནི་ལྷ་མོ་རྣམས་སོ། །སྤྱོད་པ་ནི་འདོད་པ་སྤྱོད་པའོ། །སྤྱད་པ་ནི་དེ་བྱེད་པའོ། །དེའི་ཡུལ་ནི་ལས་དང་ཡེ་ཤེས་ཀྱི་ཕྱག་རྒྱ་གཉིས་སོ། །དེ་ལ་ཡང་གསུམ་པས་ནི་དེ་ལྟར་བྱེད་པ་ན་དེ་ཁོ་ན་ཉིད་ཀྱི་ལྟ་བ་དང་བྲལ་བར་སྤྱོད་
པ་བཀག་ཅིང༌། བཞི་པས་ནི་ལམ་འདི་ལས་ཡིད་གཞན་དུ་མི་འགྱུར་བར་བྱེད་དོ། །མི་ཞེས་པ་གཅིག་ནི་དམ་ཚིག་དྲུག་པ་སྟེ། འདི་ལ་ཀོང་ནས། རྡོ་རྗེ་དང་པདྨ་འདུས་པའི་དུས་སུ་དབང་ཕྱུག་དང་བྲལ་བར་མི་བྱའི། གཞན་དུ་དབང་ཕྱུག་ཉིད་དུ་བྱའོ། །ཞེས་
9-5-175a


བཞེད་ལ། དཔའ་བོ་རྡོ་རྗེས་ཀྱང་དེ་བཞིན་དུ་བཤད། ལང་ཀས། གཞན་འདྲ་བ་ལ་དབང་ཕྱུག་མ་དང་བྲལ་བར་མི་བྱ། ཞེས་བཤད་དོ། །སྐལ་ལྡན་དང་དཔའ་བོའི་འགྲེལ་པར་བུད་མེད་དབང་ཕྱུག་ཤིན་ཏུ་སྦྱོར། ཞེས་འབྱུང་བ་ལྟར་ལེགས་ལ། དེ་ཡང་ལང་
ཀའི་འགྲེལ་པར་ཀུན་ཏུ་སྦྱོར། ཞེས་འབྱུང་བ་གསལ་ཞིང་དོན་ནི་འདོད་པའི་དབང་ཕྱུག་མ་ལ་བརྟེན་ནས་ལྷན་སྐྱེས་ཀྱི་བདེ་བ་འདྲེན་པའི་ནུས་པ་མ་རྫོགས་པ་དེ་སྲིད་དུ་ཞེས་པའོ། །འགྲེལ་པ་གསུམ་ལས། ཚངས་པར་སྤྱོད་པ་དེ་བཞིན་གཞི། །ཞེས་འདོན་པ་ནི། 
དམ་ཚིག་བདུན་པ་སྟེ། སྐལ་ལྡན་གྱིས་གཞིར་གྱུར་པའི་བྱང་སེམས་ལེན་པའི་སྐབས་སུ། ཚངས་པ་ཉིད་དུ་སྤྱོད་པར་བྱའོ། །ཞེས་བཤད་ལ་དཔའ་བོས་ཀྱང་གཞིའི་དོན་ཙམ་མ་གཏོགས་པ་དེ་བཞིན་དུ་མཛད། ལང་ཀ་ཡང་དེ་དག་དང་འདྲ་བ་ལ། བྱང་
ཆུབ་ཀྱི་སེམས་འཛག་པའི་དུས་སུ་ཞེས་བཤད་དེ། དོན་ནི་དྲུག་པ་ལ་མི་འབྲལ་བར་བཤད་པ་དེ་བཞིན་དུ་སྤྱི་བོ་ནས་བྱང་སེམས་འཛག་པའི་དུས་སུ་ཡང་གསག་གནས་ཀྱི་རྩེ་ལས་ཕྱི་རོལ་དུ་མི་འབྲལ་བར་བྱེད་པ་ལ། ཚངས་པར་སྤྱད་ཅེས་བྱས་པའོ། །
སྔ་མ་རྣམས་དྲུག་པ་གསང་གནས་སོགས་བྱིན་གྱིས་རློབ་པ་སོགས་དང༌། བདུན་པ་ནི། དགའ་བ་ལ་སོགས་པ་ལ་དམིགས་ཏེ་མཉམ་པར་འཇོག་པའི་བསམ་གཏན། ཚངས་པ་མི་གནས་པའི་མྱང་འདས་ཀྱི་དོན་དུ་སྤྱོད་པ་ལ་འཆད་མོད་ཀྱང༌། 
འགྲེལ་པ་གསུམ་ལྟར་ལེགས་སོ། །ཁྲོ་མེད་ཅེས་པ་གཅིག་ནི་བརྒྱད་པ་སྟེ། བུ་ཀར་ཀུན་ཏུ་སྤྱོད་པ་སྟེ་ཡུམ་གྱི་པདྨ་ནས་བྱང་སེམས་ལེན་པའི་དུས་སུ་ཁྲོ་བ་མེད་པར་སྤྱོད་པའོ། །ལང་ཀས། བྱང་སེམས་ལེན་པའི་དུས་སུ་སྡང་བར་མི་བྱེད་ཅེས་དང༌། 
9-5-175b


སྐལ་ལྡན་གྱིས་ཁྲོ་ཞིང་སྤང་བར་མི་བྱ་ཞེས་བཤད་པའི་དོན་ནི། དཔའ་བོས། བྱང་སེམས་ལེན་པའི་དུས་སུ་བཙོག་པའི་འདུ་ཤེས་མི་བྱ་བ་ལ་བཤད་པ་ལྟར་ཡིན་ཏེ་བཙོག་ཅིང་སྐྱུག་བྲོ་བའི་བསམ་པ་ནི། ཡུལ་དེ་ལ་རྒྱབ་ཀྱིས་ཕྱོགས་པའི་མི་འདོད་པ་ཡིན་
པས། དེ་འདྲ་བ་དེ་ལ་སྡང་བ་ཞེས་གཞན་དུ་ཡང་འབྱུང་ངོ༌། །འགྲེལ་པ་གསུམ་ནས། ཁྲོ་མེད་རྒྱུན་གྱིས་ཀུན་ཏུ་སྤྱོད། །ཅེས་འབྱུང་ཡང༌། འགྱུར་སྔ་མ་རྣམ་པ་གསལ་ལ། ཀུན་ཏུ་སྤྱོད་པ་ནི་ལྕེས་བླངས་ཏེ་འཐུང་བའོ། །དམ་ཚིག་བརྒྱད་ཀྱི་གྲངས་བྱེད་ལུགས་དང༌། 
ངོས་འཛིན་བྱེད་ལུགས་སྔ་མ་རྣམས་ལ་ཚུལ་གཞན་ཡོད་ཀྱང༌། པཎྜི་ཏ་གསུམ་གྱི་དགོངས་པ་ནི་སྔ་མ་ལྟར་ཡིན་པས་ཡིད་ཆེས་པར་སྣང་ངོ༌། །འདི་རྣམས་བསྲུང་བའི་དམ་ཚིག་གལ་ཅན་ཡིན་ལ། ཡིད་ཆེས་པའི་བཤད་པ་ལ་མ་བརྟེན་ན་བསྲུངས་ཀྱང་འབྲས་
བུ་ཆུང་བས་མཁས་པ་གུང་བསྒྲིགས་ཏེ་ཞིབ་ཏུ་བཤད་དོ། །དམ་ཚིག་འདི་བརྒྱད་གོང་མ་རྣམས་བདེ་མཆོག་གི་དམ་ཚིག་ཐུན་མོང་མ་ཡིན་པར་འཆད་ཀྱང༌། གཡོན་པའི་ཀུན་སྤྱོད་མ་གཏོགས་པ་བླ་མེད་པ་གཞན་དང་ཐུན་མོང་བ་ཡིན་ལ། རྩ་ལྟུང་བཅུ་བཞི་དང་
སྦོམ་པོའི་ལྟུང་བ་བརྒྱད་དང༌། སྡོམ་པ་གཟུང་བསྒྲག་གི་སྐབས་ཀྱི་དམ་ཚིག་གི་ནང་དུ་མ་བྱུང་བ་ཡང་མར་བར་སྣང་བས་བྲིས་སོ། །གཉིས་པ་ལ་གཉིས། གཡོན་པའི་ཀུན་སྤྱོད་ཀྱི་གནད་བཤད་པ་དང༌། ལག་པའི་མཆོད་པ་བཤད་པའོ། །དང་པོ་ནི། ཧེ་རུ་
ཀ་མངོན་འབྱུང་ལས། གཡོན་པའི་ཀུན་སྤྱོད་མང་དུ་གསུངས་པའི་མཐར། །ཅུང་ཟད་གསུངས་དང་མ་གསུངས་པ། དཔལ་ལྡན་ཁྲག་འཐུང་གཡོན་པས་སྤྱོད། སྒྲུབ་པོ་ས་སྟེང་ས་འོག་ན། །བཟླས་དང་བརྟུལ་ཞུགས་བྲལ་བས་ཀྱང༌། །གཡོན་པས་དངོས་
9-5-176a


གྲུབ་འགྱུར་བ་ཡིན། །ཞེས་དངོས་གྲུབ་འགྲུབ་པ་ལ་གཡོན་པའི་ཀུན་སྤྱོད་བསྔགས་པའི་རྒྱུ་མཚན་ཇི་ལྟར་ཡིན་སྙམ་ན། བཤད་པར་བྱ་སྟེ། རྩ་རྒྱུད་དང་མངོན་བརྗོད་སོགས་ལས། སྣོད་བཅུད་ཀུན་གཡོན་ནས་འབྱུང་བར་གསུངས་པ་
འདི་ཉིད་གཡོན་པའི་ཀུན་སྤྱོད་བྱེད་པའི་རྒྱུ་མཚན་ཡིན་པར། རྡོ་རྗེ་མཁའ་འགྲོ་ལས། བརྟན་པ་དང་ནི་གཡོ་བ་ཡི། །འགྲོ་ཀུན་གཡོན་ལས་བྱུང་བས་ན། །གཡོན་གྱིས་བཟའ་ཞིང་གཡོན་མཆོད་བྱ། །ཞེས་གསུངས་སོ། །དེ་ཡང་མངོན་བརྗོད་ལས། གཡོན་པའི་
སྤྱོད་པ་ཤེས་རབ་སྟེ། །གཡས་པ་དེ་བཞིན་ཐབས་ཡིན་ནོ། །ཞེས་གཡས་གཡོན་གཉིས་ལས། གཡོན་པ་ཤེས་རབ་ཏུ་གསུངས་པས་ཤེས་པར་བྱའོ། །དེ་ལ་འདིར་ཤེས་རབ་ནི། ཆོས་ཐམས་ཅད་རང་གི་ངོ་བོ་ཉིད་ཀྱིས་གྲུབ་པས་སྟོང་པའི་དེ་ཁོ་ན་ཉིད་དེ་ཤེས་རབ་ཀྱི་
དམིགས་པ་ལ་དེར་བྱས་པ་དང༌། དོན་དེ་རྟོགས་པའི་ཤེས་རབ་གཉིས་སོ། །དེའི་དང་པོའི་དབང་དུ་བྱས་ན། སྣོད་བཅུད་ཀྱི་བྱ་བྱེད་ཐམས་ཅད་འཇོག་པ་ནི་དེའི་རྒྱུ་མཚན་གྱིས་འཇོག་སྟེ། རང་གི་ངོ་བོ་ཉིད་ཀྱིས་གྲུབ་པ་ལ་ནི། རྩ་ཤེ་ལས། གང་ལ་སྟོང་ཉིད་མི་རུང་བ། །
དེ་ལ་ཐམས་ཅད་མི་རུང་འགྱུར། །ཞེས་གསུངས་པ་བཞིན་དུ། བྱ་བྱེད་གང་ཡང་མི་རུང་པའི་ཕྱིར་དང༌། ཆོས་རྣམས་རང་གི་མཚན་ཉིད་ཀྱིས་གྲུབ་པས་སྟོང་པ་ལ་ནི། གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བར་འགྱུར། །ཞེས་གསུངས་པ་ལྟར། བྱ་བྱེད་
ཐམས་ཅད་རུང་བའི་ཕྱིར་ན། སྣོད་བཅུད་ཐམས་ཅད་གཡོན་ནས་བྱུང་བར་གསུངས་ཀྱི། བུད་མེད་ལའང་གཡོན་པ་ཞེས་གསུངས་པ་ཡོད་པས་དེ་ལས་ཐམས་ཅད་འབྱུང་བ་དང༌། གཡོན་བརྐྱང་མ་ལས་བྱུང་བའི་དཀར་ཆ་ལས། ཐམས་ཅད་འབྱུང་བ་དང༌། ལག་པ་
9-5-176b


གཡོན་པ་ལས་ཐམས་ཅད་འབྱུང་བར་སྟོན་པ་མིན་ཏེ། རྒྱུད་རྣམས་ནས་ཀྱང༌། སྟོང་པ་ལས་ཐམས་ཅད་འབྱུང་བར་བཤད་པ་མང་ངོ༌། །ཡང༌། སྐྱེ་དང་འཇིག་དང་རང་འབྱུང་བ། སྟོང་ཉིད་ཡེ་ཤེས་འདི་ཁོ་ནའོ། །ཞེས་གསུངས་པ་ལྟར་ན་བདེ་སྟོང་དབྱེར་མེད་དུ་བྱས་
པའི་ལྟན་སྐྱེས་ཀྱི་བདེ་ཆེན་ཉིད་སྣོད་བཅུད་ཁྱད་པར་ཅན་དག་པའི་དཀྱིལ་འཁོར་གཉིས་སུ་འབྱིན་པ་དང༌། སྡུད་པར་བྱེད་པ་པོ་ཡིན་པས། བརྟན་གཡོ་ཐམས་ཅད་གཡོན་པ་ལས་འབྱུང་བར་གསུངས་ཏེ་ཚུལ་གཉིས་སུ་ཤེས་པར་བྱའོ། །དེ་ལྟར་བྱས་ན་གཡོན་
པས་མཚོན་པའི་ཤེས་རབ་ནི་དངོས་གྲུབ་ཐམས་ཅད་ཀྱི་སྒྲུབ་བྱེད་ཡིན་པས། ལམ་དེའི་རྟོགས་པ་ཁྱད་པར་ཅན་སྐྱེ་བའི་རྟེན་འབྲེལ་ད་ལྟ་ནས་སྒྲིག་པའི་ཕྱིར་དུ་གཡོན་པའི་ཀུན་སྤྱོད་རྣམས་བྱེད་དོ། །དེ་ཡང་ཤེས་རབ་ཀྱིས་དེ་ཁོ་ན་ཉིད་མཚན་ཉིད་རྫོགས་པར་
རྟོགས་པ་ནི་ཐེག་པ་གཞན་དང་རྒྱུད་སྟེ་གཞན་དང་ཡང་ཐུན་མོང་བ་ཡིན་ལ། ལམ་གཞན་གྱིས་བསྐལ་པ་གྲངས་མེད་པས་སངས་རྒྱས་འཐོབ་དགོས་པ་ལམ་འདིར་སྐྱེ་བ་འདི་ཉིད་ལ་འཐོབ་པ་ནི། ཡུལ་གྱི་དེ་ཁོ་ན་ཉིད་ལ་ཁྱད་པར་མེད་ཀྱང་ཡུལ་ཅན་དམ་པའི་བདེ་བ་སྟེ། བདེ་
བ་མཆོག་ལྷན་སྐྱེས་ཀྱི་བདེ་བས་དེ་ཁོ་ན་ཉིད་བསྒོམས་པ་ལས་ཡིན་ཏེ། སཾ་བྷ་ཊ་ལས། དེ་ཕྱིར་དེ་རྒྱས་ཅི་ཞིག་བྱ། །མདོར་བསྡུས་པས་ནི་སངས་རྒྱས་ཉིད། །བསྐལ་པ་བྱེ་བ་གྲངས་མེད་པས། །ཇི་སྲིད་སངས་རྒྱས་གང་འཐོབ་པ། །གང་གིས་དམ་པའི་བདེ་བས་ཁྱོད། །
སྐྱེ་བ་འདིར་ནི་ཐོབ་པར་འགྱུར། །ཞེས་གསུངས་པས་སོ། །དེ་རྒྱས་ཅི་ཞིག་བྱ་ཞེས་པ་དང༌། མདོར་བསྡུས་པས་ནི། ཞེས་པ་ནི། སྐྱེ་བ་འདིར་བདེ་བས་འཐོབ་པར་འགྱུར། ཞེས་པ་དང་སྦྲེལ་རྒྱུ་ཡིན་པས་ལམ་གཞན་ལྟར་ཤིན་ཏུ་མང་པོ་ལ་བསླབ་མི་དགོས་པར་
9-5-177a


འགྲུབ་པ་ཡང་དེའི་གནད་ཀྱིས་ཡིན་ནོ། །ལྷན་སྐྱེས་ཀྱི་བདེ་ཆེན་འདྲེན་པ་ལ་ཐབས་མང་དུ་ཡོད་ཀྱང༌། ལས་དང་པོ་པའི་སྐབས་སུ་རང་གི་ལུས་ལ་དམིགས་ཏེ་སྒོམ་པ་སོགས་ཀྱིས་ལྷན་སྐྱེས་མཚོན་མི་ནུས་པའི་ཚེ། ཕོ་ཉ་མོ་མཚན་ཉིད་ཐམས་ཅད་
ཚང་བ་ལས་མཚོན་དགོས་ཏེ། གསང་བ་གྲུབ་པ་ལས། ལས་ཀྱི་ཕྱག་རྒྱ་མཉམ་ལྡན་པས། །རྡོ་རྗེ་པད་མ་མཉམ་སྦྱོར་བས། །བདེན་པ་གསུང་བས་མངོན་སུམ་དུ། །འདི་འདྲའི་སྒོམ་པ་གང་གསུངས་པ། །དང་པོའི་ལས་ཅན་སེམས་ཅན་ལ། །ལས་ཀྱི་ཕྱག་རྒྱ་གང་
སྤངས་ནས། །བྱང་ཆུབ་སེམས་ནི་རབ་སྟོན་པ། །གཞན་གྱིས་མཚོན་པས་མི་མཐོང་སྟེ། །དང་པོའི་ལས་པས་རིག་པར་བྱ། །ཐོག་མ་བར་མཐའ་དྲི་མེད་པ། །རིག་སྟེ་གཞན་དུ་ནུས་མ་ཡིན། །ཞེས་གསུངས་པས་སོ། །དེ་ལས་མཚོན་པ་སྔོན་དུ་སོང་ན་རང་ལུས་ལ་
གནད་དུ་བསྣུན་པའི་རྣལ་འབྱོར་བསྒོམས་པས། སྲོག་དྷཱུ་ཏཱིར་ཚུད་པ་ལ་བརྟེན་ནས་ལྷན་སྐྱེས་སྐྱེད་པར་སླ་ཞིང༌། དེ་ལྟར་བྱ་ནུས་པ་ནས་ཀྱང་ཕྱིའི་རྐྱེན་ཕོ་ཉ་མོ་སྔགས་སྐྱེས་མཚན་ཉིད་ཚང་བ་དང༌། ཁྱད་པར་དུ་ཞིང་སྐྱེས་དང་ལྷན་སྐྱེས་ཀྱི་ཕོ་ཉ་མོ་དང་འདུ་བའི་སྐལ་
བར་ལྡན་ན་ལམ་ཆེས་མྱུར་བར་འགྱུར་གྱི། གཞན་དུ་མིན་པས་ཐབས་དེ་གཙོ་བོའོ། །དེ་འདྲ་བའི་རྟེན་འབྲེལ་ཁྱད་པར་ཅན་སྒྲིག་པ་ལ་ཡང་གཡོན་པའི་ཀུན་སྤྱོད་ཀྱི་དམ་ཚིག་རྣམས་གལ་ཆེའོ། །དེ་ལ་དགོངས་ནས་རྩ་རྒྱུད་ལས། ཕྱག་རྒྱ་དང་བྲལ་གསང་སྔགས་
ནི། །ལུས་ཅན་རྣམས་ལ་འགྲུབ་མི་འགྱུར། །ཞེས་དང༌། དེ་བཞིན་ཕོ་ཉ་ལེགས་འགྲོགས་པས། །སྒྲུབ་པ་པོ་ཡིས་དངོས་གྲུབ་འཐོབ། །བཟླས་བརྗོད་བསམ་གཏན་མཆོད་མེད་པར། །མྱུར་བ་ཉིད་དུ་འགྲུབ་པར་འགྱུར། །སྔགས་དང་ཕྱག་རྒྱས་སྒྲུབ་པ་པོས། །
9-5-177b


མཆོད་པ་ཉིད་ལ་རབ་ཏུ་འཇུག །འདི་ལས་གཞན་པའི་མཆོད་མེད་དེ། །དེ་ལྟར་བསྟན་བཅོས་ངེས་པ་ཡིན། །ཕོ་ཉའི་ལམ་ལ་དགའ་རྣམས་ཀྱི། །སྒྲུབ་པ་པོ་ནི་དངོས་གྲུབ་འགྱུར། །ཞེས་གསུངས་ཏེ། བསྟན་བཅོས་ནི། ཕ་རྒྱུད་མ་རྒྱུད་ཀུན་ནོ། །ངེས་པ་ནི་མི་འགྱུར་
ཞེས་པའི་དོན་ནོ། །ཧེ་རུ་ཀ་མངོན་འབྱུང་ལས་ཀྱང༌། དཔའ་བོ་གང་ཞིང་ཕྱག་རྒྱ་དམན། །སྒྲུབ་པོ་མཆོད་པར་བྱེད་པ་ནི། །ཕུབ་མ་རྡུང་དང་མཚུངས་པ་སྟེ། །ཞེས་གསུངས་སོ། །འོན་ཀྱང་རྩ་རྒྱུད་ལས། ཕོ་ཉ་རལ་གྲིའི་སོ་འདྲ་ཞིང༌། །ཞེས་གསུངས་པ་བསྟེན་པར་དཀའ་བའི་དོན་
དུ་ཀོང་ཀ་ན་པ་བཞེད་པ་ནི། ཧེ་རུ་ཀ་མངོན་འབྱུང་ལས། རྣལ་འབྱོར་མེད་པར་རྣལ་འབྱོར་ཆོས། །ཕྱག་རྒྱ་ལ་ནི་བགྲོད་གྱུར་དང༌། །ཡེ་ཤེས་མེད་པར་ཡེ་ཤེས་ཚུལ། །དམྱལ་བར་འགྲོ་བར་ཐེ་ཚོམ་མེད། །ཅེས་གསུངས་ཏེ། ཡུལ་རྟེན་ཀུན་མཚན་ཉིད་མ་ཚང་བར་དེ་ལྟར་བྱེད་པ་ལ། 
ཉེས་དམིགས་ཤིན་ཏུ་ཆེ་བར་གསུངས་པ་རྣམས་ཤེས་དགོས་སོ། །ཡང་དེ་ཉིད་ལས། རྟག་ཏུ་གཡོན་པ་ཡིས་ནི་བྱ། །བུད་མེད་རྣམས་ལ་མཐུན་པར་བྱ། །དེ་ཡིས་ངེས་པར་རྟག་པར་འབྱུང༌། །རྐང་པ་གཡོན་པའི་མཐེ་བོང་གིས། །ས་ཡང་རྐོ་ཞིང་རི་མོ་འདྲི། །ལག་པ་གཡོན་པས་
རང་ཕྱོགས་ཀྱི། །སྤྱི་བོ་ལ་ནི་འཕྲུག་པར་བྱེད། །རང་ཡུལ་ལག་པ་གཡོན་པས་སྟོན། །དེ་ཡིས་རང་གི་རིགས་ནི་དྲན། །སྒྲུབ་པོའི་ལུས་ལ་ཕན་པ་ཡིན། །ཞེས་གསུངས་པ་ལྟར་མཁའ་འགྲོ་མའི་ཕོ་ཉ་མོ་མང་པོ་ཞིག་གཡོན་པའི་ཀུན་སྤྱོད་ལ་དགྱེས་ཤིང་བྱ་བ་དེས་འཇུག་པས་
གཡོན་པའི་ཀུན་སྤྱོད་དེ་རྣམས་དང་མཐུན་པར་སྤྱད་པས་དེ་དག་ཡིད་དགའ་བར་འགྱུར་བ་ཡང་ཡིན་ནོ། །ཁྱད་པར་དུ་ལག་པ་གཡོན་པ་མཆོད་པའི་ཀུན་སྤྱོད་བྱེད་པ་ནི་ཕོ་ཉ་མོ་ཁྱད་པར་ཅན་དང་འདུ་བ་ལ་སྔོན་དུ་བརྡ་བསྟན་དགོས་ལ། བརྡ་ཡང་ལག་པ་གཡོན་པས་བྱེད་དེ། རྩ་
9-5-178a


རྒྱུད་ལས། བརྡ་ནི་ལྔ་པོ་བསྟན་པ་དག །སྒྲུབ་པ་པོ་ཡིས་ལག་གཡོན་གྱིས། །འདི་ནི་དཔའ་བོའི་ཡིན་ཏེ། །བརྡ་རྣམས་ལ་ནི་རབ་འཇུག་པའོ། །ཁམས་གསུམ་རྒྱུ་དང་མི་རྒྱུ་དང༌། །འགྲོ་ཀུན་གཡོན་ལས་འབྱུང་བ་ཡིན། །ཞེས་དང༌། 
སྡོམ་འབྱུང་ལས་ཀྱང༌། དེ་ནས་ལག་གཡོན་གྱི་ནི་བརྡ། །མདོར་བསྡུས་འདི་ལ་བཤད་པར་བྱ། །ཞེས་གསུངས་པས་དེ་འདྲ་བའི་འདུ་བ་བསྒྲུབ་པའི་ཕྱིར་དུ་ད་ལྟ་ནས་ལག་པ་གཡོན་པ་ལ་མཆོད་པར་བྱེད་དེ་དགོས་པ་གཞན་ཡང་ཡོད་དོ། །ལག་པ་གཡོན་པའི་
སྐྱེད་ཆོག་བྱས་ནས་དེས་དཀྱིལ་འཁོར་པ་ལ་མཆོད་སོགས་ནི་དེ་ལྟར་བྱས་ན་ཚོགས་ཁྱད་པར་ཅན་བདེ་སྟོང་སྐྱེ་བའི་ཐབས་ཀྱི་ཚོགས་རྣམས་རྫོགས་པར་སླ་སྟེ། ལག་པ་དེ་ནུས་ལྡན་དུ་སོང་བས་དེས་བྱ་བ་གཞན་བྱེད་པ་ལ་ཡང་ཁྱད་པར་ཅན་དུ་འགྱུར་བའོ། །
ཚུལ་འདི་དག་ལེགས་པར་ཤེས་ན་དཔལ་འཁོར་ལོ་བདེ་མཆོག་རྣལ་འབྱོར་མའི་རྒྱུད་ཀྱི་གཙོ་བོ་ཡིན་པ་ཤེས་པར་འགྱུར་ཏེ། རྩ་རྒྱུད་ཀྱི་བཅོ་ལྔ་པ་ལ་སོགས་པ་ལེའུ་མང་པོ་ཞིག་གིས་ཕོ་ཉ་མོའི་མཚན་ཉིད་དང་བརྡ་ལ་སོགས་པ་རྒྱས་པར་སྟོན་པ་རྣམས་ཀྱི་
གནད་ལའང་ངེས་པ་རྙེད་པར་འགྱུར་རོ། །གཉིས་པ་ལ་གསུམ། ཕྱི་རོལ་མཆོད་པ་དང༌། ལག་པ་ལ་མཆོད་པ་དང༌། ལག་མཆོད་མ་གྲུབ་པའི་ཚེ་ཇི་ལྟར་བྱ་བའོ། །དང་པོ་ནི། ཕྱི་རོལ་མཆོད་པ་འདི་དུས་ནམ་གྱི་ཚེ་བྱ་བ་ནི། ལྭ་བ་པས། སྔ་དྲོ་ལངས་ལ་ཞེས་
གསུངས་པའི་དོན་ལ། རྟག་པའི་རྡོ་རྗེས་ཐོ་རངས་ལངས་པའམ་སྐབས་ཇི་ལྟ་བ་བཞིན་དུ་ཞེས་བཤད་དེ། སྔ་དྲོའི་ཐུན་གྱི་སྔོན་དུ་འམ་ཐུན་གྱི་བར་སྐབས་སུ་ཡང་རུང་ངོ༌། །བདག་བསྐྱེད་ནི་འཁོར་ལོ་སྡོམ་པའི་རྣལ་འབྱོར་དང་ལྡན་པས་ཞེས་གསུངས་པས་ཐུན་
9-5-178b


པར་ཡིན་ན་ཕྱག་གཉིས་པ་ཡུམ་བཅས་ཀྱི་རྣལ་འབྱོར་དེ་ཉིད་གསལ་བཏབ་པས་འགྲུབ་ལ། དེ་འདྲ་མིན་པའི་སྐབས་ཡིན་ན་སྒྲུབ་ཐབས་ལྟར་གྱི་བདག་བསྐྱེད་དམ་དག་པ་གསུམ་གྱི་རྣལ་འབྱོར་གྱིས་ཀྱང་རུང་ངོ༌། །མདུན་བསྐྱེད་སྒྲུབ་ཚུལ་ནི་ས་ཕྱོགས་གཙང་མར་ཞལ་བཞི་པའི་
སྔགས་བརྗོད་ལ་ཞེས་གསུངས་པ་ལ། རྟག་པའི་རྡོ་རྗེས་ས་ཕྱོགས་གཙང་མར་ལག་པ་གཏད་ནས་སྔགས་བཟླ་བར་གསུངས་ཏེ། འདི་ནི་གནས་དེའི་བགེགས་བསལ་བ་ཡིན་པས་དེས་བགེགས་བསྐྲད་པར་བྱའོ། །འདིར་མེ་ཏོག་འབུལ་བའི་སྔོན་དུ་ལག་པ་གཡོན་པ་སྦྱང་
བར་གསུངས་པས་སྔོན་དུ་ལག་པ་ལ་ལྷ་སྐྱེད་པའི་ཆོ་ག་བྱས་ནས་བྱའོ། །བདུད་རྩི་ལྔ་དང་དྲི་བཟང་ལ་སོགས་པའི་གོང་བུ་འམ། དེ་དག་ཚང་བ་མེད་ནའང་དེ་རྣམས་ཀྱི་རྫས་གཞན་གང་རུང་དང་བསྲེས་པའི་བ་ལང་གི་ལྕི་བའི་གོང་བུས་མཎྜལ་གྲུ་བཞི་པ་དེ་ལག་པ་གཡོན་
པས་བྱུག །དེ་ནས་སྐབས་འདིར་མ་བཤད་ཀྱང་ཆོ་ག་འདིའི་མཐར་དེ་ནས་དཀྱིལ་འཁོར་གྱི་རི་མོ་དབྱིའོ། །ཞེས་གསུངས་པས་ལག་པ་གཡོན་པའི་མཐེབ་སྲིན་གྱིས་གཙོ་བོ་ཡབ་ཡུམ་དང་ཡུམ་བཞིའི་གནས་སུ་དྲི་བཟང་པོས་གྲུབ་བཞི་པ་རེ་དང་ལྷ་གནས་གཞན་རྣམས་
སུ་ཟླུམ་པ་རེ་བྱས་ཏེ་མེ་ཏོག་གི་ཚོམ་བུ་རེ་ཡང་དགོད་དོ། །དེ་ནས་དེའི་དཀྱིལ་དུ་ལག་པ་གཡོན་པ་བཞག་ལ། གནས་དེ་ཡུལ་ཉེར་བཞི་གནས་ལ་སོགས་པ་བཅུར་བྱས་པའི་ས་བཅུར་མོས་པ་སྔོན་དུ་གཏང་ནས་པཱུ་ཛཱ་ལ་སོགས་པའི་ཡི་གེ་ཉེར་བཞི་དང༌། ཨོཾ་པཱུ་ཐ། ཨུ་པ་
བཱི་ཐ་ཀྵེ་ཏྲ། ཨུ་པ་ཀྵེ་ཏྲ། ཚྪ་ན་དོ་ཧ། མེ་ལཱ་ཀ། ཨུ་པ་མེ་ལཱ་ཀ། ཤྨ་ཤཱ་ནེ། ཨུ་པ་ཤྨ་ཤཱ་ནེ། ཞེས་པ་བཅུ་བརྗོད་པར་བྱ་སྟེ་འདིའི་དོན་སྔར་བཤད་ཟིན་ཏོ། །དེ་ནས་གནས་དེར་སྐད་ཅིག་གིས་རླུང་མེ་ཆུ་སའི་དཀྱིལ་འཁོར་བཞི་དང༌། སའི་སྟེང་དུ་རི་རབ་
9-5-179a


དང༌། དེའི་སྟེང་དུ་སྣ་ཚོགས་པདྨ་དང་ཟླ་བའི་དཀྱིལ་འཁོར་བསམ་པར་བྱའོ། །ལྭ་བ་པ་དང་དེ་བཞིན་གཤེགས་པའི་རྡོ་རྗེའི་འགྲེལ་པར་ཟླ་བ་མ་བྱུང་ཡང༌། པྲཛྙཱ་རཀྵི་ཏའི་གཞུང་ལས་བྱུང་བས་འགྱུར་གྱི་ཕྱི་མོའམ་བོད་དཔེ་ཅུང་མ་དག་པར་མངོན་ནོ། །
ཟླ་བ་ནི་དཀར་ལ་དམར་བའི་མདངས་ཅན་དབྱངས་གསལ་གྱི་གཟུགས་བརྙན་ཅན་དུ་བལྟ་བ་སྟེ། འདི་རྟེན་དང་བརྟེན་པ་མངོན་བྱང་ལྔས་སྐྱེད་པ་བསྡུས་པའི་ལུགས་ཡིན་པས་སྔར་བཤད་པ་དང་རྒྱས་བསྡུས་སོ། །དེ་ནས་རང་གི་སྙིང་ཁ་ནས་ཡི་གེ་ཧཱུཾ་ཆད་ནས་སྣ་
བུག་གཡས་པ་ནས་བྱུང་སྟེ་ཟླ་བའི་དབུས་སུ་བཞག་སྟེ། ཁ་དོག་ནི་དཀར་ལ་དམར་བའི་མདངས་ཅན་ནོ། །ས་བོན་དེའི་འོད་ཟེར་གྱིས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ཏེ་ཧཱུཾ་ལ་བཅུག་པ་ཡོངས་སུ་གྱུར་པ་ལས། བཅོམ་ལྡན་འདས་འཁོར་དང་བཅས་པ་བལྟ་
བར་བྱའོ། །ཞེས་པ་ཙམ་ལས་མ་གསུངས་ཀྱང་རྟག་པའི་རྡོ་རྗེ་དང་བི་བྷུ་ཏིས། རྣམ་པ་ཐམས་ཅད་རྫོགས་པར་བལྟ་བར་བཤད་པས་རྟེན་དང་བརྟེན་པའི་དཀྱིལ་འཁོར་གཉིས་ཀ་དུས་གཅིག་ཏུ་སྐྱེད་པའི་ལུགས་སོ། །དེ་ལྟར་ན་ཟླ་བའི་ཁ་དོག་གཉིས་དང༌། དབྱངས་
གསལ་གཉིས་ནི་མེ་ལོང་ལྟ་བུ་དང༌། མཉམ་པ་ཉིད་དང༌། ས་བོན་ནི་སོར་རྟོག་དང༌། སྤྲོ་བསྡུ་སོགས་ནི་བྱ་བ་སྒྲུབ་པ་དང༌། ཡོངས་སུ་རྫོགས་པ་ནི་ཆོས་དབྱིངས་ཡེ་ཤེས་ལས་བྱང་ཆུབ་པའོ། །དེ་ནས་དཀྱིལ་འཁོར་གསལ་གདབ། རྒྱ་གཞུང་བཞིར་དེའི་རྗེས་སུ་
གོ་ཆ་དང༌། ཡེ་ཤེས་པ་གཞུག་པ་དང༌། དབང་བསྐུར་བ་མ་བཞད་དེ་བསྡུས་པའི་ལུགས་སོ། །དེ་རྣམས་བྱ་བར་འདོད་ནའང་བྱེད་པ་ལ་མི་རུང་བ་མེད་དོ། །དེ་ནས་མཆོད་པ་ནི། ལྭ་བ་པས། རང་གི་ཐུགས་ཀའི་ས་བོན་ལས་བྱུང་བའི་རིག་མ་བཅུ་དྲུག་དང༌། ས་བོན་ལས་
9-5-179b


བྱུང་བའི་བདུད་རྩི་ལྔ་དང༌། རིན་པོ་ཆེ་སྣ་བདུན་ལ་སོགས་པས་མཆོད་པ་དང༌། དེ་ནས་ལག་པ་གཡོན་པ་ཆོ་ག་ཇི་ལྟ་བ་བཞིན་སྦྱངས་པས་དཀྱིལ་འཁོར་གྱི་དབུས་སུ་ཡི་གེ་གསུམ་གྱིས་ཡབ་ཡུམ་གཉིས་ལ་མེ་ཏོག་དབུལ། སླར་ཡང་དེ་ཉིད་དུ་གཙོ་བོ་ཡབ་ཡུམ་གྱི་
སྙིང་པོ་དང༌། ཉེ་སྙིང་གིས་མེ་ཏོག་དབུལ། དེ་ནས་མཁའ་འགྲོ་མ་ནས་བཟུང་སྟེ། གཤིན་རྗེ་འཇོམས་མའི་བར་ལ་ཕྱོགས་གཡོན་སྐོར་དང༌། མཚམས་གཡས་སྐོར་གྱི་སྦྱོར་བས། གནས་ཇི་ལྟ་བར་དཀྱིལ་འཁོར་དུ་མེ་ཏོག་དབུལ། དེ་ནས་ལག་པ་ལ་བཀོད་པའི་ལྷ་
རྣམས་ལ་གནས་དེ་དང་དེར་ཨོཾ་ཧ་ལ་སོགས་པས་མེ་ཏོག་ཕུལ་ནས་ལག་པ་གཡོན་པ་ན་གནས་པའི་མེ་ཏོག་རྣམས་རྐང་བརྒྱད་ཀྱི་སྔགས་བརྗོད་པ་སྔོན་དུ་འགྲོ་བས་དཀྱིལ་འཁོར་དུ་དོར་ལ། སྤྱི་བོར་ཐལ་མོ་སྦྱར་བ་སྔོན་དུ་འགྲོ་བས་ལག་པའི་ལྷའི་འཁོར་ལོ་དེ་རང་ལ་
གཞུག་གོ། ཞེས་བཤད་ལ། དེ་ནས་སྙིང་པོ་ལ་སོགས་པ་དང༌། རྐང་བརྒྱད་ཀྱི་སྔགས་ཀྱིས་བསྟོད་པ་སྔོན་དུ་འགྲོ་བས་ཇི་ལྟར་གྲགས་པའི་བསྟོད་པ་རྣམས་ཀྱིས་བསྟོད་ལ། ཇི་ལྟར་ནུས་པས་སྡིག་བཤགས་སོགས་དང༌། བསམ་གཏན་དང༌། བཟླས་པ་དང༌། སྨོན་
ལམ་གདབ་པ་སོགས་བྱ་བར་བཤད་པ་ལྟར་བྱའོ། །གཞུང་གཞན་གསུམ་ཡང་ཅུང་ཟད་ཙམ་མ་གཏོགས་པ་འདྲའོ། །བོད་རྣམས་མཆོད་ཡོན་སོགས་སྔོན་དུ་འགྲོ་བའི་ཉེར་སྤྱོད་སྔོན་དུ་བྱེད་དོ། །བདུད་རྩི་ལྔ་དང་རིན་པོ་ཆེ་སྣ་བདུན་སོགས་སྙིང་གའི་ས་བོན་ལས་བྱུང་བར་བཤད་དེ་མཆོད་
རྫས་དེ་དག་ཐོགས་པའི་ལྷ་མོ་སྤྲུལ་བའོ། །སོགས་ཀྱི་སྒྲས་ནི་འདོད་ཡོན་སོགས་གཞན་རྣམས་བསྡུའོ། །བསམ་གཏན་ནི་རང་གི་རྣལ་འབྱོར་སྒོམ་པའམ་མདུན་གྱི་ལྷ་ལ་སེམས་འཛིན་པའོ། །བསམ་གཏན་ཡི་བདག་འཇུག་བྱེད་པ་ལ་ཡང་མདུན་བསྐྱེད་རྒྱས་པ་མ་
9-5-180a


གྲུབ་ན་འདི་ལྟར་བྱས་པས་ཆོག་པར་མངོན་ནོ། །དེ་ནས་ཆད་ལྷག་གི་ཉེས་པ་དག་པའི་ཆེད་དུ་ཡི་གེ་བརྒྱ་པ་བརྗོད་པ་དང༌། སྙིང་གའི་ཕྱག་རྒྱ་སྔགས་དང་བཅས་པ་བྱས་པའི་མཐར་ཕྱག་རྒྱ་སྡུད་པ་ན་འཁྱུད་པའི་ཚུལ་སྔོན་དུ་འགྲོ་བས་སེ་གོལ་
བརྡབ་ཅིང་སྲིན་ལག་གིས་ས་ལ་རེག་ལ། ཨོཾ་བཛྲ་མུཿ ཞེས་བརྗོད་པས་རང་གི་གནས་ནས་གཤེགས་སུ་གསོལ་ཏེ་བདག་ཉིད་ལ་གཞུག་གོ། དེ་ནས་དཀྱིལ་གྱི་རི་མོ་དབྱི་བར་བྱ་བར་ལྭ་བ་པས་བཤད་པ་ལྟར་གཞུང་གཞན་གསུམ་ལས་ཀྱང་འབྱུང་ངོ༌། །
གཉིས་པ་ནི། ལག་པ་ལ་མཆོད་པའི་དུས་ན་ལྭ་བ་པ་སོགས་ཀྱིས་ཚོགས་ཀྱི་དཀྱིལ་འཁོར་སོགས་བྱ་བར་གསུངས་པས། ཚོགས་འཁོར་བྱེད་ན་ལག་པ་ལ་མཆོད་པའི་ཆོ་ག་སྔོན་དུ་བཏང་དགོས་ལ། དེ་མིན་པའི་སྐབས་གཞན་ཚེས་བཅུ་ལ་སོགས་པའི་དུས་
སུ་ཡང་བྱའོ། །རྒྱུན་གྱི་བཟའ་བཏུང་གི་དུས་སུ་བྱེད་པར་ཡང་གསུངས་ཏེ། དྲིལ་བུ་པས། ཟས་ཀྱི་རྡོ་རྗེ་སེམས་སོགས་དང༌། །སྙིང་ཁའི་དཀྱིལ་འཁོར་སྦྱིན་སྲེག་བྱ། །ཞེས་ཟས་ཀྱི་དུས་སུ་རྡོར་སེམས་སོགས་སྐྱེད་པ་བྱ་བར་གསུངས་པའི་ཕྱིར་རོ། །འདིའི་དགོས་པ་
གཞན་ནི། ཀུན་སྤྱོད་ལས། རྣལ་འབྱོར་པ་ཡི་ལག་མཆོད་ཀྱིས། །དབུལ་བ་ཡིས་ནི་འདོད་དོན་འགྱུར། །སེམས་ནི་གཞན་དུ་གྱུར་པ་ཉིད། །བཟའ་བཏུང་གོས་སོགས་ཐོབ་པར་འགྱུར། །རྟག་ཏུ་མཆོད་པ་བྱས་པ་ཡིས། །ཡིད་ལ་བསམས་པ་འགྲུབ་པར་
འགྱུར། །ཞེས་གསུངས་ཏེ་རྐང་པ་གསུམ་པ་ལ་འགྱུར་གཞན་ལས། སེམས་ཀྱི་བསམ་པར་མ་བྱས་ཀྱང༌། །ཞེས་འབྱུང་བ་ལེགས་ཏེ། སྤྱིར་ཅི་བསམས་པ་འགྲུབ་པ་དང༌། ཁྱད་པར་དུ་དབུལ་བ་སེལ་བར་གསུངས་སོ། །འདི་བྱེད་པའི་ཚེ་བདག་ཉིད་ལྷར་སྐྱེད་
9-5-180b


ཚུལ་ནི། སྡོམ་པའི་རྣལ་འབྱོར་དང་ལྡན་པའི་སྔགས་པས་ཞེས་གསུངས་ལ། དེའི་དོན་ཡང་སྔར་བཤད་པ་ལྟར་རོ། །ལག་པ་གཡས་པའི་མཐེབ་སྲིན་གྱིས་ནང་མཆོད་བླངས་ཏེ་ལག་པ་གཡོན་པ་ལ་བསང་གཏོར་བྱ། དེ་ནས་ལག་པ་གཡོན་པའི་སོར་མོ་རྣམས་
བསྡུས་པའི་མཐེ་བོང་ལ་ཟླ་གདན། སོར་མོ་གཞན་བཞི་ལ་ཉི་གདན་རེ། བསྡུས་པའི་སེན་མོ་ལ་ཡང་ཉི་གདན་བསམ་མོ། །མཐེ་བོང་ནས་སེན་མོ་བསྡུས་པའི་བར་དྲུག་ལ་གོ་རིམ་བཞིན་དུ་རྡོར་སེམས་ནས་དོན་གྲུབ་ཀྱི་ངོ་བོར་གྱུར་པའི་ཨོཾ་ཧ་དཀར་པོ་ལ་སོགས་
པའི་ཡི་གེ་དགོད་པར་གཞུང་གསུམ་ལས་བཤད་པས་དེ་ཙམ་ཞིག་གམ། ཡང་ན་དེ་བཞིན་གཤེགས་པའི་རྡོ་རྗེས་ལྷ་དང་ས་བོན་སྒོམ་པ་གདམ་ང་ཅན་དུ་བཤད་ཅིང༌། ཇོ་བོ་མ་ན་ཀ་ཤྲཱི་ཡང་ལྷར་སྒོམ་པར་བཞེད་ཟེར་བ་ལྟར་ཡང་ཆོག་པས་རྡོར་སེམས་སོགས་དྲུག་
དཀྲོངས་བསྐྱེད་དམ། ཡི་གེ་ཙམ་ལས་སམ། ཡི་གེ་འགྱུར་བའི་ཕྱག་མཚན་ལས་ཆོ་ག་གསུམ་གྱིས་སྐྱེད་པ་གང་རུང་བྱའོ། །ཡི་གེ་ནི་ཨོཾ་ཧ་སོགས་སམ། ཡང་ན་ཧ་ཧི་ནས་ཧཾ་གི་བར་དྲུག་ལས་སྐྱེད་པར་ཡང་བཤད་དོ། །ཡབ་ཀྱི་གོ་ཆ་དྲུག་ཡུམ་དང་བཅས་པར་སྐབས་
གཞན་དུ་བཤད་པའི་རིགས་པ་སྦྱོར་ནའང་སྦྱར་བས་ཆོ་ག་སྟེ། ལྷ་རྣམས་ཀྱི་སྐུ་མདོག་དང་ཕྱག་མཚན་སོགས་ནི་སྔར་བཤད་ཟིན་ཏོ། །ལག་པ་གཡོན་པའི་མཐིལ་དུ་ཡང་སྐད་ཅིག་གིས་པདྨ་དམར་པོ་འདབ་མ་ལྔ་པ་གཅིག་བསམ་མོ། །དེའི་ཤར་གྱི་འདབ་མ་ནས་
བཟུང་སྟེ། གཡོན་སྐོར་གྱིས་གོ་རིམ་བཞིན་ཧཾ་ཡཾ་སྔོན་མོ་ནས་ཕཊ་དུད་ཁའི་བར་ལྔ་བཀོད་ལ་རིམ་པ་བཞིན་དུ་གཤིན་རྗེ་མ་ནས་གཏུམ་མོའི་བར་ལྔའི་རང་བཞིན་དུ་བསམ་པ་དང༌། པདྨའི་ལྟེ་བར་ཨོཾ་བཾ་དམར་པོ་དགོང་ལ་རྡོ་རྗེ་ཕག་མོར་བསམ་པར་གཞུང་
9-5-181a


གསུམ་ལས་བཤད་པས་དེ་ཙམ་ཞིག་གམ། ཡང་ན་སྔར་བཤད་པ་ལྟར་ཕག་མོ་སོགས་དྲུག་ཏུ་དཀྲོངས་བསྐྱེད་དམ་ས་བོན་ཙམ་ལས་སམ། ཆོ་ག་གསུམ་ལས་བསྐྱེད་དེ། མངོན་བརྗོད་ལས། དཀྱིལ་འཁོར་གྱི་སྐབས་སུ་པད་
མ་འདབ་མ་ལྔ་པའི་ལྟེ་བ་དང་བཅས་པ་ལ། དཔའ་མོ་དྲུག་བཀོད་ནས། རྡོར་སེམས་སོགས་ཀྱི་ཡབ་ཀྱིས་འཁྱུད་པ་དང༌། ཡབ་མེད་པར་སྒོས་པ་གདམ་ང་ཅན་དུ་གསུངས་པས་དེ། གཉིས་གང་རུང་ངོ༌། །ལག་པའི་རྒྱབ་ཏུ་ཡང་སྔགས་སམ། ལྷ་བཅུ་གཉིས་
ཀྱི་གཟུགས་བརྙན་ཤར་བར་བསམ་པའམ། ཡང་ན་ལག་པའི་རྒྱབ་ཏུ་འཁོར་ལོ་གསུམ་གྱི་ལྷ་ཚོགས་གསལ་བར་བལྟའོ། །ལག་པའི་རྒྱབ་ནི་བོལ་གོང་ངོ༌། །དེ་ནས་ས་དང་ཆུ་དང་མེ་དང་རླུང་དང་ནམ་མཁའི་ཁམས་རྣམས་རིམ་པ་བཞིན་དུ་ལྟུང་བྱེད་མ་ལ་
སོགས་པ་ལྔའི་ངོ་བོར་མོས་པར་བྱའོ། །དེ་ནས་ལག་པ་ལ་གནས་པའི་ས་བོན་གྱི་ཡི་གེ་རྣམས་ལ་ཁུ་བའི་རྫས་ཀྱི་བྱུག་པར་གཞུང་བཞི་ལས་བཤད་པས། བོད་ཀྱི་བླ་མ་སྔ་མ་རྣམས་ཡི་གེ་གསུམ་བརྗོད་ཅིང༌། ལག་པ་གཡས་པས་ཁུ་བའི་རྫས་བླངས་
ནས་ལག་པ་གཡོན་པའི་ཕྱི་ནང་མེད་པར་ལན་གསུམ་དུ་བྱུག་ཅིང༌། ཆང་གིས་ཀྱང་དེ་བཞིན་དུ་བྱེད་དོ། །དེ་ནས་ལག་མཐིལ་དེ་དཔའ་བོ་དང་རྣལ་འབྱོར་མ་ཐམས་ཅད་ཀྱིས་བྱིན་གྱིས་བརླབ་པའི་འཁོར་ལོ་གསུམ་གྱི་ལྷའི་ངོ་བོར་མོས་པར་བྱས་ལ། ཁུ་བའི་
རྫས་ལ་སོགས་པས་མཆོད་པར་བཤད་དེ། ཁུ་བ་ནི་ཐུག་པ་དང་ཞོ་ལ་སོགས་པ་དང་། སོགས་ཀྱིས་ནི་གུང་བུའི་རྫས་ཤ་དང་ཟན་ཀ་སོགས་པས་ཀྱང་མཆོད་དེ་བྱིན་གྱིས་བརླབས་ལ་བྱའོ། །དེ་ཡང་ཡི་གེ་གསུམ་དང་རྐང་བརྒྱད་ཀྱི་སྔགས་བརྗོད་ནས་དབུལ་ལོ། །
9-5-181b


སྔ་མ་རྣམས་ཡབ་ཀྱི་གོ་ཆ་ལ་གཡས་སྐོར་དང༌། ཡུམ་གྱི་གོ་ཆ་ལ་གཡོན་སྐོར་དང༌། འཁོར་ལོའི་ལྷ་ལ་ཕྱོགས་གཡོན་དང༌། མཚམས་གཡས་སྐོར་གྱིས་ལན་གསུམ་གསུམ་དང༌། ཆང་གིས་ཀྱང་གོ་ཆའི་སྔགས་བརྗོད་དེ། དེ་བཞིན་དུ་དང༌། ལྷ་གཞན་རྣམས་ལ་
རང་རང་གི་སྔགས་ཀྱིས་ལན་གསུམ་གསུམ་དབུལ་ཟེར་རོ། །དེ་ནས་ཡང་དག་པར་མཆོད་དེ་ཞེས་པ་ནི། རིག་མ་བཅུ་དྲུག་སོགས་ཀྱིས་མཆོད་པ་ལ་སྔ་མ་རྣམས་འཆད་དོ། །དེ་ནས་ཆད་ལྷག་བསྐང་བའི་དོན་དུ་ཡི་གེ་བརྒྱ་པ་བརྗོད། ཚོགས་འཁོར་བྱེད་པ་ཡིན་ན་དེ་
བྱིན་གྱི་བརླབ་པའི་དོན་དུ་གསོལ་བ་གདབ། སྐབས་གཞན་ཡིན་ན་སྐབས་དང་མཐུན་པར་འདོད་དོན་ལ་གསོལ་བ་གདབ་བོ། །དེ་ནས་ལྭ་བ་པའི་འགྲེལ་པར་གསོལ་བ་བཏབ་ལ། རྫས་དེ་རྫས་གཞན་དུ་ཡང་དུང་སྟེ་བཞག་ནས་ཞེས་འབྱུང་བ་ནི། རྟག་
པའི་རྡོ་རྗེས་རྫས་དེས་གཞན་བྱིན་གྱིས་བརླབ་པའམ་གང་ཡང་རུང་བར་བཞག་ལ། ཞེས་བཤད་པ་ལྟར་ལེགས་ལ། དོན་ནི་ལག་པ་ལ་མཆོད་པའི་རྫས་དེ་རྣམས་ཚོགས་ཀྱི་བཟའ་བཏུང་ངམ། རང་གི་བཟའ་བཏུང་ལ་བསྲེས་ལ་བྱིན་གྱིས་བརླབ་པའམ། ཡང་ན་སྣོད་
ཅིག་གི་ནང་དུ་གཞུག་ལ་བཞག་ཅེས་པའི་དོན་ནོ། །ཕྱི་མ་འདི་ལྟར་བྱས་ནས་བཞག་ན་ལོངས་སྤྱོད་འཕེལ་བའི་རྟེན་འབྲེལ་ཡོད་པར་བླ་མ་ཁ་ཅིག་བཞེད་དོ། །དེ་ནས་ལག་པ་གཡོན་པ་ལ་གོས་པའི་རྫས་གཡོན་པའི་སྲིན་ལག་གིས་བཟུང་སྟེ། སྙིང་ཁ་དང༌། ལྕེ་
དང༌། མགོ་བོར་ཧཱུཾ་ཨཱཿཨོཾ་བརྗོད་པ་སྔོན་དུ་འགྲོ་བས་བྱུག་པར་བྱའོ། །དེ་ཡང་དང་པོ་ལག་པ་གཡས་ལས་གཡོན་པ་ལ་འགོས་པའི་རྫས་རྣམས་བསྡུས་ཏེ། གཡོན་གྱི་ལག་མཐིལ་དུ་བཞག དེ་ནས་དེ་གཡོན་པའི་སྲིན་ལག་གིས་བླངས་ནས་བྱེད་
9-5-182a


པར་སྔ་མ་རྣམས་འཆད་དོ། །དེ་ནས་ལག་པའི་ལྷ་ཚོགས་རྣམས་བདག་ལ་ཞུགས་པར་བསམ་མོ། །འདི་ཡང་ཐོག་མར་པད་ཀོར་བྱས་ཏེ་མགོ་བོར་བཞག་ནས། ཡོ་ག་ཤུདྡྷོ་བརྗོད་པས་ཞུ་ནས། སྤྱི་བོ་ནས་ཞུགས་ཏེ་
གོ་ཆ་ལ་ཐིམ་པས་ཤིན་ཏུ་གསལ་བར་བསམ་ཞེས་སྔ་མ་རྣམས་ཟེར་རོ། །གསུམ་པ་ནི། འདིར་ལྭ་བ་པས། ཡང་ན་ཞེས་ཆོས་འབྱུང་གྲུ་གསུམ་གྱི་དབུས་སུ་དཀྱིལ་འཁོར་པ་མཆོད་པ་ཅིག་བསྟན་པ་ནི། ཚོགས་འཁོར་གྱི་སྔོན་དུ་ལག་མཆོད་མ་གྲུབ་
ན་ཆོ་ག་འདི་བྱས་ནས་ཚོགས་བྱིན་གྱིས་རློབ་པ་ཡིན་ཏེ། ཆོ་ག་འདིའི་མཐར་ཚོགས་ཀྱི་འཁོར་ལོ་བྱིན་གྱིས་བརླབ་པའི་དོན་དུ་གསོལ་བ་བཏབ་སྟེ། ཞེས་གསུངས་པས་སོ། །འོན་ཀྱང་སྐབས་གཞན་དུ་ཡང་ཚུལ་འདིས་དཀྱིལ་འཁོར་མཆོད་པ་ཡང་རུང་ངོ༌། །
དེའི་ཚུལ་ནི་གནས་དང་ཉེ་བའི་གནས་ལ་སོགས་པའི་མིང་བརྗོད་ཅིང༌། ལག་པ་ལྷ་སྐྱེད་པའི་ཆོ་གས་དག་པར་བྱས་པའི་ལག་པ་གཡོན་པའི་མིང་མེད་ཀྱིས་བདུད་རྩིའི་སྐྱེད་ཆོག་གིས་དགབ་པར་བྱས་པའི་མྱོས་བྱེད་ཀྱིས་མདུན་དུ་འཁོར་ལོ་གྲུ་གསུམ་པ་གཉིས་བྱུག་ཅིང༌།
དེའི་དབུས་སུ་དཀྱིལ་འཁོར་ཟླུམ་པོ་གཅིག་བྱ། དེར་རང་གི་སྙིང་ཀའི་ས་བོན་གྱི་འོད་ཟེར་གྱིས་སྤྱན་དྲངས་པའི་འཁོར་ལོ་སྡོམ་པའི་རྟེན་དང་བརྟེན་པའི་དཀྱིལ་འཁོར་བསམ་པར་བྱའོ། །དེ་ལ་གྲུ་གསུམ་བྱེད་ཚུལ་ནི་གྲུ་གསུམ་བསྣོལ་མར་བཏང་བ་ཡིན་ཏེ། 
རྟག་པའི་རྡོ་རྗེས། རྩིབས་དྲུག་འཁོར་ལོ་ལ་གནས་པའི་ཞེས་ཟུར་དྲུག་པར་བཤད་པས་སོ། །དེ་ལ་འཁོར་ལོ་ཞེས་གསུངས་ཀྱང་དོན་ནི་ཆོས་འབྱུང་ངོ༌། །དེ་ནི་ཨེ་ཡིག་གི་དོན་དང༌། དེའི་དབུས་ཀྱི་ཟླུམ་པོ་ནི་བཾ་ཡིག་གི་དོན་དང༌། དང་པོ་ལ་ནི་མཆོད་ཏུ་དགའ་བ་
9-5-182b


ལྷན་སྐྱེས་ཀྱི་བདེ་སྐྱེད་པའི་གཟུགས་ཅན། ཤེས་རབ་མའི་ལུས་ལ་བརྟེན་པའི་སྐྱེ་གནས་ཀྱི་གཟུགས་གྱི་ཆོས་འབྱུང་གཅིག་དང་། དེ་ལ་བརྟེན་ནས་བྱུང་བའི་བདེ་བས་རྣམ་ཐར་གསུམ་གྱི་སྟོང་ཉིད་རྟོགས་པའི་ཡུལ་སྟོང་པ་ཉིད་མཚོན་པའི་ཆོས་འབྱུང་
གྲུག་སུམ་པ་གཅིག་སྟེ་གཉིས་སོ། །དེ་ཡང་གསང་བགྲུབ་པ་ལས། མཆོག་ཏུ་དགའ་བའི་གཟུགས་ཅན་གྱིས། །སེམས་ཅན་ཀུན་གྱི་བདེ་འབྱུང་བྱེད། །རྣམ་དག་ཤེས་རབ་ལུས་ལ་འབྱུང་། །སངས་རྒྱས་ཀུན་གྱི་གནས་ཞི་བ། །ལྷ་རྫས་ཆོས་འབྱུང་མི་འགྱུར་
བ། །སངས་རྒྱས་དེ་ནི་བདག་གིས་བསྟེན། །ཨེ་ཡི་ཆ་བྱད་བཟང་པོ་ལ། །དབུས་སུ་བཾ་གྱིས་རྣམ་པར་བརྒྱན། །བདེ་བ་ཀུན་གྱི་འབྱུང་གནས་པ། །སངས་རྒྱས་རིན་ཆེན་ཟ་མ་ཏོག །རྒྱུད་ཀྱི་དང་པོར་གང་གནས་པ། །དེ་ཕྱིར་དེ་ནི་བཤད་པར་བྱ། །ཞེས་གསུངས་སོ། །དེ་
ལྟར་ན་ཆོས་འབྱུང་གཅིག་གི་གནས་ལ་བརྟེན་ནས་བྱུང་བའི་པཾ་ཟླུམ་པོས་མཚོན་པའི་བདེ་ཆེན་གྱིས་ཆོས་འབྱུང་གཉིས་པའི་དོན་རྟོགས་པ་མཚོན་ལ། དེ་འདྲ་བའི་ཆོས་འབྱུང་དང་། དབུས་ཀྱི་ཟླུམ་པོའི་ནང་དུ་རྟེན་དང་བརྟེན་པའི་དཀྱིལ་འཁོར་ཀུན་ཚུད་པ་ནི། ལམ་
དང་འབྲས་བུའི་ཡོན་ཏན་ཐམས་ཅད་དེས་སྤྲུལ་པའི་རྣམ་འཕྲུལ་ཡིན་པས། ཡོན་ཏན་ཐམས་ཅད་དེའི་ནང་འདུས་པར་གོ་བའི་ཆེད་ཡིན་ཏེ། གསང་བ་གྲུབ་པ་ལས། ཆོས་འབྱུང་མི་འགྱུར་ཞི་བ་ཉིད། །ཤེས་རབ་རང་གི་དངོས་དེ་སྲིད། །ཀུན་ཏུ་ལྷ་རྫས་ཡེ་ཤེས་ཀྱིས། །
སྤྲོས་པ་མེད་ཅིང་དག་པ་ལས། །འདི་དག་ཐམས་ཅད་རྣམ་པར་སྤྲུལ། །མཆོག་ཏུ་ཤེས་ཤིང་རྣམ་དག་གང་། །སངས་རྒྱས་ཀུན་གྱིས་ཕྱག་བྱས་པ། །བརྗོད་མིན་ཀུན་ལ་ཁྱབ་བའི་གནས། །ཐམས་ཅད་དེ་ཡི་རྣམ་འཕྲུལ་ཡིན། །ཞེས་གསུངས་པ་འདིའི་གནད་ཤེས་
9-5-183a


ནས་དཀྱིལ་འཁོར་སྔར་ལྟར་བསྒྲུབས་ནས་མཆོད་པ་ནི། དེ་འདྲ་བའི་གོ་བ་མེད་པར་དཀྱིལ་འཁོར་མཆོད་པ་ལས། ཆེས་མཆོག་ཏུ་གྱུར་པ་ཡིན་པས། ཆོས་འབྱུང་གི་ནང་དུ་དཀྱིལ་འཁོར་སྒོམ་པ་རྣམས་ཀྱི་ངེས་དོན་ཡང་དེ་ལྟར་ཤེས་པར་གྱིས་
ཤིག །དེ་ནས་དཀྱིལ་འཁོར་ལ་མཆོད་པ་ལ་སོགས་པ་ནི། གཏོར་མ་བྱིན་གྱིས་བརླབ་པ་བཞིན་དུ་བདུད་རྩི་ལྔ་ལ་སོགས་པའི་ཚུལ་དུ་རྫོགས་པར་བྱས་པའི་བཟའ་གཏུང་སོགས་ཡི་གེ་གསུམ་དང་རྐང་བརྒྱད་ཀྱི་སྔགས་ཀྱིས་ཕུལ་ནས། ཐོད་པ་ན་གནས་པའི་
མྱོས་བྱེས་བདུད་རྩིར་བྱས་པ་ཡང་མཐེ་བོང་དང༌། སྲིན་ལག་གིས་བླངས་ནས་གཙོ་བོ་ཡབ་ཡུམ་ལ་རང་རང་གི་སྙིང་པོ་དང༌། ཉེ་སྙིང་གིས་དང༌། ལྷ་ལྷག་མ་རྣམས་ལ་རང་རང་གི་སྔགས་ཀྱིས་ཕུལ་ཏེ། མཉེས་པར་བྱ་བར་བཤད་ལ། བོད་ཀྱི་བླ་མ་རྣམས་དངོས་
བརྒྱུད་ཀྱི་བླ་མའི་མཚན་དང༌། ལྷའི་སྔགས་ཀྱི་མཐར་འབྲུ་གསུམ་བཏགས་ནས་འབུལ་བ་དང༌། འཇིག་རྟེན་པ་གཞན་ལའང་འབུལ་བར་འདོད་དོ། །ཕྱི་རོལ་མཆོད་པའི་སྐབས་སུ་བདུད་རྩི་ལྔའི་མཆོད་པ་བྱེད་པར་བཤད་པའི་དུས་སུ་ཡང་མྱོས་བྱེད་ཀྱིས་
ཀྱང་མཆོད་པར་བྱའོ། །དེ་ནས་ཡང་དག་པར་མཆོད་པར་གསུངས་པ་ནི། རིག་མ་བཅུ་དྲུག་སོགས་སྔར་ཕྱི་རོལ་མཆོད་པའི་སྐབས་སུ་བཤད་པ་ལྟར་བྱའོ། །དེ་ནས་ཡི་གེ་བརྒྱ་པ་བརྗོད་པ་ནས་བདག་ཉིད་ལ་ཞུགས་པའི་བར་ནི། ཕྱི་རོལ་མཆོད་པའི་སྐབས་སུ་
བཤད་ཟིན་པ་ལྟར་བྱའོ། །དེ་ནས་ས་དེ་ལ་གནས་པའི་མྱོས་བྱེད་གཡོན་པའི་སྲིན་ལག་གིས་བླངས་ཏེ། ཧཱུཾ་ཨཱཿཨོཾ་ཀྱི་སྔགས་བརྗོད་པ་སྔོན་དུ་འགྲོ་བས། སྙིང་ཁ་དང༌། ལྟེ་བ་དང༌། མགོ་བོ་རྣམས་སུ་བྱུག་པར་བྱའོ། །དེ་ནས་ལག་པ་གཡོན་པ་ལ་གནས་པའི་
9-5-183b


ལྷའི་འཁོར་ལོ་ཡང་བདག་ཉིད་ལ་ཞུགས་པར་བལྟ་བར་བྱའོ། །དེ་ལྟར་དམ་ཚིག་དང་སྡོམ་པ་དག་པར་བྱས་ཏེ། ཐུན་བཞིའི་རྣལ་འབྱོར་ལ་གནས་པའི་སྐབས་ནས་ཐུན་གྱི་བར་དུ་མཆོད་ཚུལ་གསུམ་པོ་དེས་མཆོད་པའི་དུས་ཁྱད་པར་བ་ནི། ཀུན་སྤྱོད་ལས། 
དགུན་འབྲིང་ལ་སོགས་ཟླ་བ་ཡི། །ཚེས་བཅུ་ལ་ནི་གུས་པས་མཆོད། །ཅེས་གསུངས་པ་ལྟར། ཟླ་བ་རེ་རེའི་ཡར་མར་གྱི་ཚེས་བཅུ་གཉིས་དང༌། ཁྱད་པར་དུ་རྒྱལ་གྱི་ཟླ་བའི་ཚེས་བཅུ་གཉིས་ཡིན་པས་དུས་རྒྱུན་པ་དང་ཁྱད་པར་བ་རྣམས་ལ། བཅོམ་ལྡན་འདས་ཧེ་རུ་
ཀའི་དཀྱིལ་འཁོར་པ་མཆོད་པ་ལ་བརྩོན་པར་བྱས་ན་སྐྱེ་བ་ཐམས་ཅད་དུ་དཔལ་ཧེ་རུ་ཀ་དང་རྗེ་བཙུན་མས་རྗེས་སུ་གཟུང་ནས་གནས་སྐབས་དང་མཐར་ཐུག་གི་འདོད་དོན་ཐམས་ཅད་བདེ་བླག་ཏུ་འགྲུབ་པར་འགྱུར་རོ། །གསུམ་པ་མཇུག་གི་དོན་ནི། བཅོམ་ལྡན་
འདས་འཁོར་ལོ་བདེ་མཆོག་གི་མངོན་པར་རྟོགས་པ། ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་པ་དཔལ་ལཱུ་ཨི་པའི་ཞལ་སྔ་ནས་མཛད་པ་རྫོགས་སོ། །ཞེས་པ་ནི་མཛད་པ་དེ་མཐར་ཕྱིན་པའོ། །གཞུང་འདི་གང་གིས་བསྒྱུར་བ་ནི། རྒྱ་གར་གྱི་མཁན་པོ་
དཔལ་སུ་མ་ཏི་ཀཱིརྟི་བློ་བཟང་གྲགས་པའི་ཞལ་སྔ་ནས་དང༌། སྒྲ་བསྒྱུར་གྱི་ལོ་ཙཱ་བ་ཆེན་པོ་མར་པ་ཆོས་ཀྱི་དབང་ཕྱུག །གསང་མཚན་འཇམ་པའི་རྡོ་རྗེ་ཞེས་པའི་ཡུལ་དབུས་མ་ག་དྷའི་དཔེ་དང་སྦྱར་ནས་རྒྱ་སྐད་ལས་བོད་སྐད་དུ་བསྒྱུར་ཞིང༌། ཚིག་དོན་ལ་ཞུས་
དག་བྱས་ཏེ་འཆད་ཉན་གྱིས་གཏན་ལ་ཕབ་པའོ།།    །།རྒྱལ་བའི་གསུང་རབ་ཀུན་གྱི་མཐར་སོན་པ། །རྣལ་འབྱོར་ཆེན་པོ་བླ་ན་མེད་པ་ཡི། །རྣལ་འབྱོར་མ་རྒྱུད་ཀུན་གྱི་གཙོ་བོ་ནི། །འཁོར་ལོ་སྡོམ་པའི་རྒྱུད་ཅེས་བྱ་བར་གྲགས། །ཤིན་ཏུ་རྟོགས་
9-5-184a


དཀའི་རྒྱུད་དེ་ལས་བཏུས་ནས། །སྐལ་བཟང་རྣམས་ཀྱི་འཇུག་ངོགས་མཆོག་མཛད་པ། །གཞུང་ཉུང་དོན་རྒྱས་གནད་ཀུན་ལེགས་འདུས་པ། །རྣལ་འབྱོར་དབང་ཕྱུག་ལཱུ་ཨི་པ་ཡི་གཞུང༌། །འཁོར་ལོ་སྡོམ་པའི་རྩ་བཤད་རྒྱུད་ཀུན་དང༌། །
རྒྱ་གར་མཁས་པས་མཛད་པའི་བདེ་མཆོག་གཞུང༌། །ཀུན་ལ་རིང་དུ་འདྲིས་པར་བྱས་པ་དང༌། །དམ་པ་སྔ་མ་རྣམས་ལས་ལེགས་འོངས་པའི། །བརྒྱུད་པ་སོ་སོའི་མན་ངག་དང་ལྡན་པར། །གོ་སླའི་ངག་གིས་གསལ་བར་བཤད་པ་འདི། །ལམ་འདི་ཆེས་
ཆེར་ཉམས་པ་གསོ་ཕྱིར་དང༌། །བདག་ཀྱང་ཚེ་རབས་ཀུན་ཏུ་འདི་འདྲ་བའི། །ལམ་བཟང་རྣམས་དང་མི་འབྲལ་བྱ་ཕྱིར་དང༌། །ལོག་པར་བཤད་པའི་དྲི་མ་བསལ་བའི་ཆེད། །དེ་ཕྱིར་བདག་ལ་གནས་གསུམ་མཁའ་འགྲོ་མས། །བརྩེ་བ་ཆེན་པོས་བཟོད་པ་
མཛད་དུ་གསོལ། །འདི་ན་ཡང་དག་པ་དང་ལྟར་སྣང་གི། བཤད་པ་ཇི་བཞིན་ཕྱེད་པ་ཆེས་དཀོན་ཞིང༌། །ཁྱད་པར་རྡོ་རྗེ་ཐེག་པའི་གཞུང་ཀུན་ལ། །རྣམ་གཞག་ཆགས་པ་ཤུན་ཏུ་ཉུང་བས་ན། །ལེགས་བཤད་འདི་ལའང་ཆོས་ཀྱི་རྗེས་འབྲངས་ནས། །ངེས་པ་རྙེད་པ་
དཀའ་བར་སྣང་ནའང༌། །མཁས་པ་རིང་དུ་བསྟེན་པའི་དཔྱོད་ལྡན་གྱིས། །ལེགས་པར་བཤད་ན་དགའ་བ་རྒྱས་པར་འགྱུར། །ལུང་དང་མན་ངག་རིགས་ལམ་ཕྲ་མོ་ཡིས། །རྣམ་པར་དཔྱད་ནས་བཞག་པ་ཡིན་མོད་ཀྱང༌། །ཚུ་རོལ་མཐོང་བའི་བྱིས་བློ་མི་གསལ་
བས། །ནོངས་པར་གང་གྱུར་དམ་པའི་སྤྱན་སྔར་བཤགས། །རྣམ་དག་བསམ་པས་འབད་པ་ཆེན་པོ་ཡིས། །ཚུལ་འདི་བསྒྲུབས་པས་བསོད་ནམས་གང་ཐོབ་པ། །དེས་ནི་མར་གྱུར་འགྲོ་བ་མཐའ་དག་རྣམས། །བླ་མེད་ཐེག་པའི་ལམ་འདིར་འཇུག་པར་ཤོག ། 
9-5-184b


འཁོར་བར་འཁོར་བའི་ཚེ་རབས་ཐམས་ཅད་དུ། །དཔལ་ལྡན་ཧེ་རུ་ཀ་དང་རྗེ་བཙུན་མས། །མ་ལྟར་བརྩེ་བ་ཆེན་པོས་རྗེས་གཟུང་ནས། །ཡང་དག་ལམ་འདི་གེགས་མེད་མཐར་ཕྱིན་ཤོག །ཅེས་རྣལ་འབྱོར་གྱི་དབང་ཕྱུག་ལཱུ་ཨི་པས་མཛད་པའི་བཅོམ་ལྡན་འདས་
དཔལ་འཁོར་ལོ་བདེ་མཆོག་གི་མངོན་པར་རྟོགས་པའི་རྒྱ་ཆེར་བཤད་པ་འདོད་པ་འཇོ་བ་ཞེས་བྱ་བ་འདི་ནི། མདོ་དང་སྔགས་ཀྱི་སྡེ་སྣོད་འཛིན་པ། ལམ་འདི་ཉིད་ཉམས་སུ་ལེན་པ་ལ་མོས་པ་མང་པོས་སྒྲུབ་ཐབས་ཀྱི་འགྲེལ་པ་ཤིན་ཏུ་རྒྱས་པ་ཅིག་གྱིས་ཞེས་
ནན་ཏན་གྱིས་བསྐུལ་བའི་དོན་དུ་བདེ་མཆོག་གི་རྩ་བ་དང༌། བཤད་པའི་རྒྱུད་ཀུན་དང༌། དེ་དག་གི་འགྲེལ་པ་རྣམས་དང༌། གཞུང་འདིའི་འགྲེལ་པ་དྲུག་དང༌། སྒྲུབ་ཐབས་ཀྱི་རྒྱ་གཞུང་གཞན་རྣམས་ལའང་རིང་དུ་འདྲིས་པར་བྱས་ཤིང༌། བོད་ཀྱི་བདེ་མཆོག་གི་
བཤད་སྲོལ་སོ་སོ་བ་ཡང་མང་དུ་བལྟས་ནས་མང་དུ་ཐོས་པའི་དགེ་སློང་བློ་བཟང་གྲགས་པའི་དཔལ་གྱིས་འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་དུ་སྦྱར་བའི་ཡི་གེ་པ་ནི་དཀའ་བཞི་པ་རིན་ཆེན་དཔལ་ལོ། །མངྒ་ལཾ། །	
9-6-1a


༄༅། །དཔལ་མངོན་པར་རྟོགས་པའི་འགྲེལ་པ་ཁྱད་པར་གསལ་བྱེད་ལས་ཟུར་དུ་ཕྱུང་བ་བཞུགས་སོ། །
9-6-1b


༄༅། །དེ་ལྟར་མན་ངག་ཇི་ལྟ་བ་བཞིན་དུ། སྒྲུབ་ཐབས་བཤད་ནས་སྒྲུབ་ཐབས་འདི་ཁོ་ན་བསྐྱེད་པ་དང༌། རྫོགས་པའི་རིམ་པས་མན་ངག་ཇི་ལྟ་བ་བཞིན་དུ་རྣམ་པར་འབྱེད་དེ་དེ་ལ་ཤིན་ཏུ་
རྣལ་འབྱོར་གྱི་མཐའི་བར་ནི་བསྐྱེད་པའི་རིམ་པའོ། །རྣལ་འབྱོར་ཆེན་པོ་ནི་རྫོགས་པའི་རིམ་པ་སྟེ། བསྐྱེད་པ་དང་རྫོགས་རིམ་འདི་གཉིས་ནི། རིགས་པས་བསྒྲུབ་པའི་ཡན་ལག་དྲུག་གི་གོ་རིམ་ཁོ་ནས་བསམ་གཏན་བྱའོ། །
གཞན་དུ་ན་ཡང་དག་པའི་སྒྲུབ་པ་ཐོབ་པར་མི་འགྱུར་རོ། །དེ་བཞིན་དུ་གསུངས་པའང་དཔལ་གསང་བ་འདུས་པ་རྒྱུད་ཕྱི་མ་ལས། བསྙེན་དང་ཡན་ལག་དྲུག་སྦྱོར་བས། །གྲུབ་པའི་མཆོག་ནི་བྱས་ནས་སུ། །བསྒྲུབ་
པར་བྱའོ་གཞན་དུ་ན། །གྲུབ་པའི་མཆོག་ནི་མི་ཐོབ་བོ། །ཞེས་སོ། །སོ་སོར་སྡུད་དང་བསམ་གཏན་དང༌། །སྲོག་རྩོལ་དེ་བཞིན་འཛིན་པ་དང༌། །རྗེས་སུ་དྲན་དང་ཏིང་ངེ་འཛིན། །སྦྱོར་བ་ཡན་ལག་དྲུག་ཏུ་འདོད། །ཅེས་
བྱ་བ་དེ་ལ་མིག་ལ་སོགས་པའི་འབྲེལ་པ་ཅན། རྣམ་པར་ཤེས་པ་ལྔ་རྣམས་གཟུགས་ལ་སོགས་པའི་ཡུལ་རྣམས་ལས་སོ་སོར་སྡུད་པ་ནི་བཀུག་ནས་ཡང་དག་པར་དུལ་བར་བྱེད་པ་གང་དེ་སོ་སོར་སྡུད་པའོ། །
9-6-2a


ཡང་ན་ལྷ་ཉིད་ཀྱི་ཚུལ་དུ་ཡུལ་བཟུང་བ་ནི་སོ་སོར་སྡུད་པའོ། །བསམ་གཏན་སོ་སོར་སྡུད་པའི་གོ་རིམ་ཀྱིས་ཡིད་ཀྱི་རྣམ་པར་ཤེས་པ་ལྷ་ཉིད་དུ་སྒོམ་པའོ། །དེའང་རྣམ་པར་རྟོག་
པ་རྣམ་པར་དཔྱོད་པ། དགའ་བ་བདེ་བ་སེམས་རྩེ་གཅིག་པའི་དབྱེ་བས་རྣམ་པ་ལྔའོ། །དེ་ལ་སྣོད་དང་བཅུད་ཀྱི་དཀྱིལ་འཁོར་དང་བཅས་པ། བཅོམ་ལྡན་འདས་དཔལ་སྡོམ་པའི་ཡོངས་སུ་བརྟག་པ་ཉིད་ནི་རྣམ་པར་
རྟོག་པ་སྟེ། དེ་ཁོ་ན་ལ་བརྟན་པ་ཉིད་ཀྱིས་ངེས་པ་ནི་རྣམ་པར་དཔྱོད་པའོ། །རྣམ་པར་དཔྱོད་པས་དེ་དག་དེའི་ལྷ་ཉིད་དུ་དམིགས་པས། ཡིད་བདེ་བ་དེ་ནི་དགའ་བའོ། །དགའ་བས་བསྒོམས་པའི་ལྷ་ལ་སིམ་པ་
དང་བཅས་པའི་སེམས་གང་ཡིན་པ་དེ་ནི་བདེ་བའོ། །བདེ་བ་དང་ལྡན་པའི་སེམས་ཏིང་ངེ་འཛིན་དུ་གྱུར་པའི་ཕྱིར། རྣམ་པ་སྣ་ཚོགས་པ་ལོག་པའི་ཀུན་རྫོབ་ཀྱི་ཡུལ་ཅན་གྱི་མི་ཤེས་པའི་སྐྱེ་བ་ཟད་པས་འདོད་
པའི་ལྷ་ཁོ་ན་ལ་དམིགས་པའི་སེམས་ནི་སེམས་རྩེ་གཅིག་པ་ཉིད་དོ་ཞེས་བྱ་བ་བསམ་གཏན་ཡན་ལག་ལྔའོ། །དེ་ལྟར་སྔ་དྲོའི་ཐུན་མཚམས་ལ་ཇི་ལྟར་གསུངས་པར་གོ་རིམས་ཀྱིས་དཀྱིལ་འཁོར་འཁོར་ལོ་
9-6-2b


བསྒོམས་ནས་ནི་ཉི་མའི་གུང་ཐུན་ལའང་སྐད་ཅིག་ཏུ་དེ་ཁོ་ན་བཞིན་དུ། དཀྱིལ་འཁོར་འཁོར་ལོ་དམིགས་ནས་སོ་སོར་སྡུད་པ་དང་བསམ་གཏན་དག་གི་ཇི་སྲིད་དུ་འདོད་པ་དེ་སྲིད་དུ་མངོན་པར་ཕྱོགས་པར་བྱེད་ཅིང་བསམ་གཏན་བྱའོ། །དེའི་རྗེས་ལ་ཐུན་མཚམས་
ཀྱི་དུས་སུ་དངོས་སུའམ་མོས་པས་ཕྱག་རྒྱ་ལྔ་ལ་སོགས་པས་བརྒྱན་པ། ཐོད་པ་ཁ་ཊྭཱཾ་ག་ཌཱ་མ་རུ་འཛིན་པ། སངས་རྒྱས་ཐོད་པ་ཅན་གྱི་བརྟུལ་ཞུགས་སྒྲུབ་པ་པོས་དཀྱིལ་འཁོར་ཁོ་ན་བསྒོམ་ཞིང་བསྐོར་བ་དང༌། བཟའ་བ་ལ་སོགས་པའི་ལས་བྱའོ། །
ཡང་གསུངས་པ་ཐུན་གསུམ་དུ་བྱིན་གྱིས་བརླབས་པའི་སྒོམ་པ་རྣམ་པར་བསྒོམ་པ་ནས་ལངས་ཏེ་ལྷའི་གཟུགས་སུ་བཞག་གོ། དོན་འདི་ཁོ་ན་ལ་དཔལ་རྡོ་རྗེ་མཁའ་འགྲོའི་རྒྱུད་ཀྱི་ལེའུ་སོ་དགུ་པ་ལས། ཧེ་རུ་ཀ་དཔལ་ཚུལ་གྱིས་ནི། ཁ་ཊྭཱཾ་ག་སོགས་སྒོམ་
རྣམས་ཀྱིས། །ཐོད་པ་གཡོན་པའི་ཕྱག་གིས་ཏེ། །བརྟུལ་ཞུགས་ལྡན་པས་སྤྱོད་པ་སྤྱད། །ཅེས་སོ། ཁྱད་པར་དུ་ལས་ཁ་ཚར་གྱི་དོན་དུ་ཤིང་སྡོང་ལ་སོགས་པ་བཙུགས་པ་ན་ཚུལ་དེ་ཁོ་ནས་གཏོར་མ་སྦྱིན་པ་དང༌། བསྲུང་བ་ཞག་རེ་རེ་ལ་བྱའོ། །ཞེས་
པའི་ངག་གིས་སྒྲུབ་ཐབས་ཀྱི་བང་མཛོད་ཅེས་བྱ་བའི་ཊཱི་ཀྐ་ལས་ཀྱང་གསུངས་པ། ཁ་ཊྭཱཾ་ག་སོགས་སྒོམ་རྣམས་ཀྱིས། །ཞེས་བྱ་བ་ནི། སོགས་པའི་སྒྲས་ཌཱ་མ་རུའོ། །ཆུས་བྲན་པ་ལ་སོགས་པ་ནི་ཉེ་བར་མཚོན་པ་ཙམ་སྟེ། སྐོར་བ་དང་བཟའ་བ་ལ་
སོགས་པའི་ལས་ཐམས་ཅད་ལ་ཚུལ་འདི་ལྟར་བྱའོ། །བྱེ་བྲག་ཏུ་ཕྱག་མཚན་གསུམ་པའི་ནང་ནས་དམ་ཚིག་གི་དབང་གིས་གང་ཉེ་བར་སྦྱོར་བ་དེ་འདོད་པ་ལྟར་གཟུང་བར་བྱའོ། །འགའ་ཞིག་ཏུ་རྡོ་རྗེ་དང་དྲིལ་བུའང་བཟུང་སྟེ་རྟག་ཏུ་འདི་བཟུང་གི་ངེས་
9-6-3a


པར་མི་བྱེད། དེ་ལྟར་སངས་རྒྱས་ཐོད་པའི་བརྟུལ་ཞུགས་འཛིན་པ། ཕྱག་བཅུ་གཉིས་པ་ལ་སོགས་པའི་དཔལ་སྡོམ་པ་ལ་སོགས་པའི་ཏིང་ངེ་འཛིན་དངོས་སུ་བྱ་བའི་གོ་རིམ་གྱིས་འཇིག་རྟེན་གསུམ་གྱི་ཁོངས་སུ་ཆུད་པའི་སྒྲུབ་པ་དང་
ཡོངས་སུ་མཐར་ཐུག་པ་ལ་ཕྱག་རྒྱ་ཆེན་པོའི་སྒྲུབ་པའང་བསྒྲུབ་པར་བྱའོ། །འདིའང་ཐོད་པ་འཆང་བའི་བརྟུལ་ཞུགས་ནི། རྣལ་འབྱོར་མའི་རྒྱུད་དུ་དབང་བསྐུར་བའི་དུས་ཁོ་ནར་སྦྱིན་པར་བྱ་སྟེ། སྒྲུབ་པ་པོས་འདི་ཁོ་ན་མཚན་སུམ་ཅུ་རྩ་གཉིས་པ་ལ་སོགས་
པའི་ཚུལ་གྱིས་སྟོང་པ་ཉིད་ལ་ལྡང་ཞེས་པ་འདི་ལ་ཐེ་ཚོམ་མི་བྱའོ། །འདི་ལའང་སྔ་དྲོའི་ཐུན་ནས་མཚན་མོའི་ཕྱེད་ཀྱི་ཐུན་གྱི་བར་དུ་ལྷ་ཁོ་ན་བསྒོམ་ཞིང་གནས་པར་བྱའོ། །དེ་ནས་སྟོང་པ་ཉིད་བསྒོམ་པར་བྱ་སྟེ། དེ་ལ་གསུང་རབ་ལས་གྲུབ་པའི་
མན་ངག་འདི་ལྟ་སྟེ། ལྟེ་བར་འཁོར་ལོར་ཟླ་བའི་དཀྱིལ་འཁོར་ལ། ཇི་ལྟར་གསུངས་པའི་ཧཱུཾ་ཡིག་དབུས་སུ་གནས་པའི་ཨཱ་ལི་ཀཱ་ལིའི་སྦྱོར་བ་སྐད་ཅིག་ཏུ་མོས་ནས་དེ་དང་དེའི་ཡི་གེ་དང་བཅས་པའི་འོད་ཟེར་རྣམས་སྤྲོ་བར་བྱའོ། །འོད་ཟེར་དེའི་
ངེས་པར་འབྱེད་པས་བཻ་རམ་པ་ལ་སོགས་པ་ཐམས་ཅད་སྣོད་དང་བཅུད་ཀྱི་དཀྱིལ་འཁོར་འོད་ཀྱི་རང་བཞིན་དུ་བྱས་ནས། ཨཱ་ལི་ཀཱ་ལིའི་སྦྱོར་བ་དེ་ཁོ་ན་ལ་རབ་ཏུ་ཞུགས་པར་བྱའོ། །ཡང་དེ་བཞིན་དུ་འོད་ཟེར་རྣམ་པར་སྤྲོས་པས་འོད་ཟེར་དེའི་ངེས་
པར་འབྱེད་པས་བཅོམ་ལྡན་འདས་མ་དང་བཅས་པའི་བཅོམ་ལྡན་འདས་འོད་ཟེར་གྱི་རང་བཞིན་དུ་བྱས་ནས་ཡང་དེ་ཁོ་ན་བཞིན་དུ་རབ་ཏུ་འཇུག་པར་བྱའོ། །དེ་ཁོ་ན་བཞིན་དུ་ཡང་འོད་སེར་རྣམས་སྤྲོས་ནས་དེའི་འོད་ཟེར་གྱི་ངེས་པར་འབྱེད་པས། ཟླ་བའི་དཀྱིལ་འཁོར་
9-6-3b


ཧཱུཾ་ཡིག་དང་ཨཱ་ལི་ཀཱ་ལིའི་སྦྱོར་བ་འོད་ཀྱི་རང་བཞིན་དུ་བྱས་ནས། ཇི་ལྟར་དབུགས་རླུང་མེ་ལོང་ལ། །ཀུན་ནས་སིམ་པར་འགྲོ་བ་ཡི། །དེ་བཞིན་རྣལ་འབྱོར་ཡང་དག་མཐར། །སྐད་ཅིག་རེ་རེར་རབ་ཏུ་འཇུག །ཅེས་འདི་ལྟར་འོད་གསལ་ལ་མངོན་དུ་ཕྱོགས་
པར་བྱས་ནས་གལ་ཏེ་ངལ་བསོ་བའི་བློས་ཉལ་བར་འདོད་ན་དེའི་ཚེའི་དམིགས་པ་ཁོ་ནས་ཉལ་བར་བྱའོ། །དེ་ནས་མ་བཅོས་པའི་རང་བཞིན་ཁོ་ནས་སྒྲུབ་པ་པོས་འོད་གསལ་གྱི་རྣམ་པར་དག་པ་ལས། མཚན་སུམ་ཅུ་རྩ་གཉིས་དང་དཔེ་བྱད་བརྒྱད་
ཅུ་དང་ཕྱག་རྒྱ་ལྔ་ལ་སོགས་པས་བརྒྱན་པར་ཐོད་པ་ཁ་ཊྭཱཾ་ག་ཌཱ་མ་རུ་བསྣམས་པ་ཉིད་ཀྱིས་རྡོ་རྗེ་ཐོད་ལྡན་གྱི་བརྟུལ་ཞུགས་འཆང་བ་ཁོ་ན་ཞལ་གཅིག་ཕྱག་གཉིས་པའི་དཔལ་བདེ་མཆོག་གི་མོས་པ་བསལ་བ་ལས་ལངས་ལ། སྔ་དྲོའི་ཐུན་ལ་སྔར་
བཞིན་དུ་སོ་སོར་སྡུད་པའི་རིམ་པས་སྒྲུབ་ཐབས་ཡན་ལག་དང་བཅས་པ་བསྒོམ་པར་བྱའོ། །དེ་བཞིན་དུ་རིམ་པས་དང་པོ་དང་བཅས་པ། བར་མ་ཆད་པར་ཡུན་རིང་པར་སྒོམ་པ་དང་མ་བྲལ་བའི་སྒྲུབ་པ་པོ་ལ་དཔལ་བདེ་མཆོག་ལ་སོགས་པ་
མཁའ་འགྲོ་དང་མཁའ་འགྲོ་མ་རྣམས་ཀྱིས་རབ་ཏུ་འབད་པས་བདག་ཉིད་ཉེ་བར་སྟོན་པར་བྱེད་དེ། འདིར་ཡང་མངོན་སུམ་དུ་མཐོང་བ་དེ་རྣམས་ཀྱིས་ཀྱང་འདི་ལ་རྗེས་སུ་འཛིན་ཏོ་ཞེས་བྱ་བའི་བསྐྱེད་པའི་རིམ་པའོ། །སྲོག་རྩོལ་བ་ལ་སོགས་པའི་རིམ་
པས་རྫོགས་པའི་རིམ་པ་བསྒོམ་པར་བྱ་སྟེ། དེ་ལ་རིམ་པ་འདི་ལྟ་སྟེ། མེ་ལོང་ལྟ་བུ་མཉམ་པ་ཉིད་སོ་སོར་རྟོག་པ། བྱ་བ་སྒྲུབ་པ། ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཤེས་བྱའི་ཡེ་ཤེས་ལྔའི་རྒྱུ་ཉིད་ཡིན་པས་ཡེ་ཤེས་ལྔའི་རང་བཞིན་
9-6-4a


མེ་རླུང་དབང་ཆེན་ཆུ་ནམ་མཁའི་རང་བཞིན་ཉིད་ཡིན་པས་འབྱུང་བ་ལྔའི་བདག་ཉིད་ཅན། སྲོག་རླུང་ཐུར་དུ་རྒྱུ་བར་བྱས་ནས་ཡུངས་འབྲུའི་ཚད་ཙམ་ཞིག་བྱང་ཆུབ་ཀྱི་སེམས་ཀྱི་ཐིག་ལེ་འགྲེལ་བའི་ཚུལ་གྱིས་རྡོ་རྗེའི་
སྣའི་རྩེ་མོར་ཕབ་ནས་གོང་དུ་གསུངས་པའི་སོ་སོར་སྡུད་པ་དང་ཡན་ལག་ལྔའི་བསམ་གཏན་གྱི་རིམ་པས་བསམ་པར་བྱའོ། །འདིའང་ཐིག་ལེའི་སྦྱོར་བ་སྟེ། སྲོག་རྣམས་ཕྱི་རོལ་ཏུ་འགྲོ་བ་ལྡོག་པའི་དོན་དུ་དེ་བས་ན་དེའི་རྒྱུ་ཉིད་ཀྱིས་གསང་བ་འདུས་
པ་ཕྱི་མའི་རྒྱུད་ལས་སྲོག་རྩོལ་ཞེས་བྱ་བར་བརྗོད་དོ། །འདིའང་ཉེ་བར་མཚོན་པ་ཙམ་སྟེ། ལྟེ་བར་ཕྲ་བའི་ཨཱ་ལི་ཀཱ་ལིའི་སྦྱོར་བའམ་ཐུགས་ལ་སོགས་པ་ལ་ཐིག་ལེ་ལ་སོགས་པའི་སྦྱོར་བའི་བསམ་གཏན་གང་དེའང་སྲོག་འཐོན་པ་ལྡོག་
པའི་དོན་ཉིད་ཀྱིས་སྲོག་རྩོལ་ཞེས་བརྗོད་དོ། །བྱེ་བྲག་ཏུ་བསམ་གཏན་འདི་ལྟ་བུའི་སྟབས་ཀྱིས་རོ་མ་དང་རྐྱང་མ་དག་གི་རྒྱུ་བ་ལས་ལྡོག་ནས་དབུ་མར་སྲོག་རླུང་གི་རྩོལ་བ་ནི་རབ་ཏུ་རྒྱུ་སྟེ། འདིའང་སྲོག་རྩོལ་ཞེས་བརྗོད་དོ། །དེ་ནས་ཐུགས་ཀར་
ཉི་མ་མེད་པའི་ཧཱུཾ་ཡིག་རྐྱང་པ་བསྒོམས་ནས་དེའི་ཐིག་ལེ་ལ་སྲོག་རབ་ཏུ་འཇུག་པའི་སྒོ་ནས་གཟུང་བ་དང་འཛིན་པ་སྲོག་རྩོལ་དང་བཅས་པ་ཉམས་ན་དེ་ཁོ་ནའི་ཕྱིར་སྟོང་པ་ཉིད་ཁོ་ནར་གནས་པ། སངས་རྒྱས་ཐམས་ཅད་ཀྱི་རང་བཞིན་ཞི་བ་སྣང་
དམིགས་ཡོད་པ་ཙམ་པོ་སེམས་རིན་པོ་ཆེ་ནམ་མཁའ་དང་མཉམ་པའི་འོད་གསལ་ཉིད་དུ་གྱུར་པ་ལས་གང་སྲོག་རླུང་བརྟན་པར་གྱུར་པ་དེ་འཛིན་པའོ། །འདིའང་ཉེ་བར་མཚོན་པ་ཙམ་སྟེ། ལྟེ་བའི་རྩ་བར་གནས་པ་ཕྲ་བའི་ཨཱ་ལི་ཀཱ་ལིའི་
9-6-4b


སྦྱོར་བའམ། རྡོ་རྗེའི་སྣའི་རྩེ་མོ་ལ་སྒོམ་པའི་ཐིག་ལེའི་སྦྱོར་བའམ། གཏུམ་མོ་ལ་སོགས་པའི་སྦྱོར་བ་གང་ཡང་རུང་བའམ། གསུངས་མ་ཐག་པའི་རིམ་པས་གང་སྲོག་རླུང་བརྟན་པར་གྱུར་པ་དེའང་འཛིན་པའོ། །འཛིན་པ་འདིའི་མཇུག་ཐོགས་སུ་
བར་མ་ཆད་པར་སྨིག་རྒྱུ་དུ་བ་སྲིན་པོ་མེ་ཁྱེར་མར་མེ་སྤྲིན་མེད་པའི་ནམ་མཁའ་ལྟ་བུའི་རྟགས་ལྔ་མཐོང་བར་འགྱུར་རོ། །དེ་ནས་སྲོག་རྩོལ་དང་ལྷན་ཅིག་ཏུ་འོད་གསལ་བའི་རང་བཞིན་ཉིད་ཀྱིས་གང་གི་ཚེ་སེམས་བརྟན་པར་གྱུར་པ་དེའི་ཚེ་སྨོན་ལམ་
ཀྱིས་རབ་ཏུ་འབྱེད་པའི་མཐུས་དང་པོ་སྒོམ་པའི་ལྷ་ལ་རྗེས་སུ་དྲན་པ་འབྱུང་བ་དེ་ལའང་བསྒོམས་པའི་ཨཱ་ལི་ཀཱ་ལི་ལ་སོགས་པའི་ཕྲ་བའི་སྦྱོར་བ་ལས་སྒོམ་པ་པོས་འོད་ཟེར་སྤྲོ་བར་བྱས་པ་འདི་ནི་རྗེས་སུ་དྲན་པའོ། །འོད་དེ་དང་བཅས་པ་བ་
སྤུའི་བུ་ག་རེ་རེ་རྣམས་ཀྱིས་ཕུང་པོ་ཁམས་དང་སྐྱེ་མཆེད་ལ་སོགས་པ། ལྷའི་རང་བཞིན་སྤྲོས་པ་ནི་རྗེས་སུ་དྲན་པ་ཞེས་བྱ་བ་ནི་དགོངས་པ་ཅན་ཡིན་ནོ། །དེ་བཞིན་དུ་དཔལ་གསང་བ་འདུས་པ་ལས། བརྟན་པས་རིན་ཆེན་སྤྲོ་བར་བྱེད། །མི་
བརྟན་པས་ནི་སྤྲོ་མི་བྱ། །རབ་མཆོག་སྤྲིན་རྣམས་ཀྱིས་སྤྲོ་བྱ། །སངས་རྒྱས་ཡེ་ཤེས་མཉམ་འོད་ཀྱིས་ཞེས་བྱའོ། །དེ་ནས་ཕུང་པོ་ཁམས་དང་སྐྱེ་མཆེད་ལ་སོགས་པ་རང་བཞིན་གྱིས་སྤྲོས་པའི་དངོས་པོ་ཐམས་ཅད་ཀྱི་རང་བཞིན་གྱི་ལྷ་རྣམས་
འོད་ཀྱི་རང་བཞིན་དུ་བྱས་ནས་འོད་ཟེར་རྣམས་ཀྱང༌། གསུངས་པའི་སྦྱོར་བ་རྣམས་ལས་རྒྱུད་ཐ་དད་པའི་ཕྱིར་སྒྲུབ་ཐབས་མི་གཅིག་པས་སྒོམ་པའི་གང་ཡང་རུང་བའི་ཕྲ་བའི་སྦྱོར་བ་ལ་སྟོང་པ་དང༌། སྙིང་རྗེ་དབྱེར་མི་ཕྱེད་པའི་རང་བཞིན་ལ་
9-6-5a


འགྲེལ་བའི་ཚུལ་དུ་བསྡུས་ནས། སྐད་ཅིག་གིས་རང་རིག་པའི་ཡེ་ཤེས་འབྱུང་བ་ནི་ཏིང་ངེ་འཛིན་ཏོ། །འདི་ཁོ་ན་རྒྱུད་གཞན་ནས་འབྱུང་བ་དང༌། བརྒྱུད་པའི་རིམ་པ་ལས་བྱུང་བའི་བཤད་པའོ། །འོད་གསལ་ལས་ཡེ་ཤེས་ཀྱི་རང་བཞིན་གྱི་
སྐུ་ཞེས་པ་དེའང་ཏིང་ངེ་འཛིན་ཅེས་བྱ་བའང་འགའ་ཞིག་ཏུ་བཤད་དོ། །དཔལ་གསང་བ་འདུས་པའི་རྒྱུད་ཕྱི་མར་ཡང་གསུངས་པ། བཅུ་པོ་དབང་པོ་རྣམས་ཀྱི་ནི། །རང་འཇུག་གནས་པ་ཐམས་ཅད་དུ། །སོ་སོར་སྡུད་པ་ཞེས་བརྗོད་དེ། །འདོད་པའི་བསྡུས་པ་
སོ་སོའོ། །འདོད་པ་ལྔ་རྣམས་བསྡུས་པ་ཡིས། །སངས་རྒྱས་ལྔ་ནི་རབ་སྦྱོར་བས། །བརྟགས་པ་བསམ་གཏན་དུ་བརྗོད་དེ། །བསམ་གཏན་རྣམ་པ་ལྔར་འགྱུར་ཏེ། །རྣམ་པར་རྟོག་དང་རྣམ་པར་དཔྱོད། །དགའ་དང་དེ་བཞིན་བདེ་བ་དང༌། །སེམས་ཀྱི་རྩེ་གཅིག་ཉིད་དང་
ནི། །ལྔ་པོ་འདི་རྣམས་བསམ་གཏན་བསྡུས། །གསང་རྒྱུད་སྐུ་རྣམས་ཐམས་ཅད་ལ། །རྣམ་པ་སྣ་ཚོགས་ཡོངས་སུ་གྲགས། །གསང་གསུམ་འབྱུང་བ་རྟོག་པ་ཡིན། །རྣམ་དཔྱོད་ཡོངས་སུ་དེ་ལོངས་སྤྱོད། །གསུམ་པ་ཡིད་བདེ་དགའ་བ་སྟེ། །
བཞི་པ་བདེ་བས་བསྡུས་པའོ། །སེམས་ཀྱི་ཡང་བ་ཤེས་པར་བྱ། །ཤེས་དང་ཤེས་བྱའི་སྐྱེ་བ་ཉམས། །སངས་རྒྱས་ཐམས་ཅད་རང་བཞིན་ཞི། །ཐམས་ཅད་འདོད་པ་སོ་སོར་གནས། །ཡེ་ཤེས་ལྔ་ཡི་རང་བཞིན་དབུགས། །འབྱུང་བ་ལྔ་
ཡི་ངོ་བོ་ཉིད། །འགྲིལ་བའི་ཚུལ་གྱིས་ཕབ་ནས་སུ། །སྣ་ཡི་རྩེ་མོར་རབ་རྟོག་བྱ། །ཁ་དོག་ལྔ་ལྡན་རིན་ཆེན་ཆེ། །སྲོག་རྩོལ་ཞེས་བྱ་དྲན་པ་ཡིན། །རང་སྔགས་སྙིང་ཁར་བསམས་ནས་ནི། །སྲོག་ནི་ཐིག་ལེར་གྱུར་པར་བཞག །རང་དབང་རིན་ཆེན་
9-6-5b


དགག་པ་ཡི། །གཟུང་བ་འཛིན་པ་ཡིན་པར་བཤད། །འགོག་པའི་རྡོ་རྗེར་གནས་སེམས་ལ། །རྟགས་ཀྱི་འབྱུང་བ་རབ་ཏུ་སྐྱེ། །དེ་ཡི་རྟགས་ཀྱང་རྣམ་པ་ལྔ༌། །བྱང་ཆུབ་རྡོ་རྗེ་ལས་བྱུང་བ། །དང་པོ་སྨིག་རྒྱུའི་རྣམ་པ་ཅན། །དུ་བའི་རྣམ་པ་གཉིས་པ་སྟེ། །གསུམ་
པ་སྲིན་བུ་མེ་ཁྱེར་བཞིན། །བཞི་པ་མར་མེས་གསལ་བྱེད་པ། །ལྔ་པ་རྟག་ཏུ་གསལ་བྱེད་དེ། །སྤྲིན་མེད་ནམ་མཁའ་ལྟ་བུའོ། །བརྟན་པ་རྡོ་རྗེའི་ལམ་གྱིས་སུ། །ནམ་མཁའི་ཁམས་ལ་དགྲམ་པར་བྱ། །བསྒོམས་ནས་རྗེས་སུ་དྲན་པ་གང༌། །དེ་ཡི་རྣམ་པ་
ཅན་ཡང་དགྲམ། །རྗེས་སུ་དྲན་ཞེས་ཤེས་པར་བྱ། །དེ་ལ་རབ་ཏུ་གསལ་བར་སྐྱེ། །ཤེས་རབ་ཐབས་དང་སྙོམས་འཇུག་པས། །ཐམས་ཅད་དངོས་པོ་ཐམས་ཅད་དུ། །འགྲིལ་བའི་ཚུལ་དུ་བསྡུས་ནས་ནི། །ཐིག་ལེའི་དབུས་སུ་རྣམ་པར་བསྒོམ། །སྐད་
ཅིག་ཡེ་ཤེས་རྫོགས་པ་ནི། །ཏིང་ངེ་འཛིན་ཅེས་མིང་ཅན་ནོ། །ཚིག་ལེའུར་བྱས་པ་འདི་རྣམས་ལས་རྟོགས་པར་དཀའ་བའི་ཚིགས་རྣམ་པར་བཤད་དེ། བཅུ་པོ་ཞེས་བྱ་བ་ནི་མིག་ལ་སོགས་པའི་དབང་པོ་ལྔ་དང༌། གཟུགས་ལ་སོགས་པའི་ཡུལ་
རྣམས་ཀྱིའོ། །དེའི་ཕྱིར་འདི་ཁོ་ན་གསུངས་ཏེ། དབང་པོ་རྣམས་ཀྱི་རང་འཇུག་གནས་ཞེས་པའོ། །དབང་པོ་རྣམས་ནི་མིག་ལ་སོགས་པའི་དབང་པོ་རྣམས་སོ། །ཡང་རང་འཇུག་པར་གནས་པ་ནི་རང་རང་གི་ཡུལ་ལ་འཇུག་པ་ནི་རབ་ཏུ་འཇུག་པ་སྟེ། རང་
གི་འཇུག་པ་ལ་གནས་པའི་ཕྱིར་རང་འཇུག་གནས་པ་ནི་མིག་ལ་སོགས་པའི་ཤེས་པ་ལྔ་ཞེས་བྱ་བའི་དོན་ཏོ། །འདི་ཡང་བསྡུས་པ་སོ་སོ་ཞེས་པ་ནི། འདོད་པར་བྱེད་པ་ནི་མངོན་པར་ཞེན་པར་བྱེད་པའི་ཕྱིར་འདོད་པའི་གཟུགས་དང་སྒྲུ་ལ་སོགས་པའི་ཡུལ་
9-6-6a


ལྔ་སྟེ། དེ་རྣམས་ལས་གཟུགས་ལ་སོགས་པའི་ཤེས་པ་ལྔ་རིམ་པ་བཞིན་དུ་སྡུད་པ་ནི་འགུགས་པར་བྱེད་པའི་ཕྱིར་སྡུད་པ་སྟེ། ཡུལ་དང་བྲལ་བའི་ཡིད་ནི་འདོད་པའི་བསྡུས་པའོ། །དེ་ལ་སོ་སོ་ཞེས་བྱ་བ་ནི་འདོད་པའི་བསྡུས་པ་
ཐོབ་ནས་ཞེས་བྱ་བའི་དོན་ཏོ། །རང་འཇུག་པའི་གནས་གང་ཤེས་པ་ལྔ་དེ་ཁོ་ན་རིམ་གྱིས་རང་འཇུག་པ་དང་བྲལ་ཞིང་སོ་སོར་སྡུང་པར་བརྗོད་དོ། །འདོད་པ་ལྔ་རྣམས་ནི་ཡུལ་ལྔ་སྟེ། དེ་རྣམས་ལ་ལྷའི་ཚུལ་གྱིས་ཡོངས་སུ་རྟོག་པ་ཞེས་ཉེ་བར་མཚོན་པ་ཙམ་
ཡིན་ཏེ། ཐམས་ཅད་ནང་གི་ཕུང་པོ་དང་ཁམས་དང་སྐྱེ་མཆེད་རྣམས་དཔལ་བདེ་མཆོག་ལ་སོགས་པའི་ལྷ་ཉིད་ཀྱི་རབ་ཏུ་སྦྱོར་བས། ཡོངས་སུ་རྟོག་པའང་བསམ་གཏན་ནོ། །ཡིད་ཀྱི་དབང་པོ་དང་དེའི་རྣམ་པར་ཤེས་པ་དག་ནི། སྐུ་གསུང་ཐུགས་ཀྱི་གསང་
བའི་བདག་ཉིད་ལྷ་རྣམས་གསལ་བའི་ཚུལ་དུ་བྱུང་བ་ནི་གསང་གསུམ་བྱུང་སྟེ། དེ་ཁོ་ན་རྣམ་པར་རྟོག་པའོ། །ཤེས་དང་ཤེས་བྱའི་སྐྱེ་བ་ཉམས་ཞེས་པ་ནི། ལོག་པའི་ཀུན་རྫོབ་ཀྱི་ངང་ཚུལ་ཅན་ཤེས་པ་དང༌། ཤེས་བྱའི་རྣམ་པར་རྟོག་པའི་སྐྱེ་བ་མེད་དོ། །
རིན་ཆེན་ཆེ་བ་ཞེས་བྱ་བ་ནི་འབྲས་བུའི་མཆོག་སྦྱིན་པའི་ཕྱིར་རོ། །འགོག་པའི་རྡོ་རྗེ་ནི་འོད་གསལ་བ་སྟེ། དེ་ན་གནས་པའི་སེམས་ནི་དེའི་རང་བཞིན་དུ་གྱུར་པའོ། །བརྟན་པ་རྡོ་རྗེའི་ལམ་གྱིས་སུ། །ནམ་མཁའི་ཁམས་ལ་དགྲམ་པར་བྱ། །ཞེས་བྱ་བ་ནི། 
བརྟན་ཞིང་རྡོ་རྗེའི་ལམ་གྱིས་རྗེས་སུ་དྲན་པས་ནམ་མཁའི་ཁམས་རྣམས་སུ་དགྲམ་པར་བྱ་སྟེ། ཕུང་པོ་ཁམས་དང་སྐྱེ་མཆེད་ཀྱི་རང་བཞིན་འོད་ཟེར་དང་ལྡན་པའི་ལྷ་ཚོགས་རྣམས་སོ། །ཤེས་རབ་ཐབས་དང་སྙོམས་འཇུག་པས། །ཐམས་ཅད་དངོས་པོ་ཐམས་ཅད་
9-6-6b


དུ། །ཞེས་བྱ་བ་ནི་ཤེས་རབ་དང་ཐབས་སྙོམས་པར་འཇུག་པ་ནི། སྟོང་ཉིད་དང་སྙིང་རྗེ་ཐ་མི་དད་པའི་ཚུལ་གྱིས་སོ། །ཐམས་ཅད་དངོས་པོ་ཞེས་བྱ་བ་ནི་ཕུང་པོ་ཁམས་དང་སྐྱེ་མཆེད་ཀྱི་རང་བཞིན་འོད་ཟེར་དང་བཅས་པའི་ལྷ་ཉིད་ཀྱི་ཚོགས་རྣམས་སོ། །འགྲིལ་བའི་ཚུལ་
གྱིས་ཞེས་པ་ནི་སྟོང་པ་ཉིད་དང་སྙིང་རྗེ་ཐ་མི་དད་པའི་ཚུལ་གྱིས་དེ་རྣམས་རང་གི་ལུགས་ལ་བསྒོམ་པ་གང་ཡང་རུང་བའི་ཐིག་ལེའི་དབུས་སུ་ཉེ་བར་བསྡུས་ནས་ཐིག་ལེ་དེ་ཁོ་ན་བསྒོམ་པར་བྱའོ། །ཐིག་ལེ་ཞེས་བྱ་བ་ཉེ་བར་མཚོན་པ་སྟེ། རིམ་པ་འདི་བཞིན་དུ་ཨཱ་
ལི་ཀཱ་ལིའི་སྦྱོར་བ་ལ་སོགས་པ་ཡང་ངོ༌། །སྐད་ཅིག་ཡེ་ཤེས་རྫོགས་པ་ནི། །ཞེས་བྱ་བ་སྐད་ཅིག་གིས་རང་རིག་སྐྱེ་བས་དེ་ཁོ་ན་ཉིད་མཐོང་བ་ཡང་ངོ་། །བྱེ་བྲག་ཏུ་གང་གི་ཆེའང་འདི་སྨིན་མ་དག་གི་དབུས་སུ་སོ་སོར་སྡུད་པའི་གོ་རིམ་གྱིས་ཐིག་ལེ་སྒོམ་པ་དེའི་ཚེའང་
སྲོག་རྩོལ་དང་འཛིན་པ་དང་རྗེས་སུ་དྲན་པ་དང་ཏིང་ངེ་འཛིན་ཕུན་སུམ་ཚོགས་པ་འབྱུང་ངོ༌། །ཡང་གསུངས་པ་རྩ་བའི་རྒྱུད་ལས། སྨིན་མའི་དབུས་སུ་ཨ་ཝ་དྷཱུ་ཏཱིའི་གནས་བཞག་པར་བྱའོ། །ཞེས་བྱའི་འདི་ཁོ་ན་གསུངས་པ་རི་གི་ཨ་ར་ལིའི་རྒྱུད་ལས་དེ་བཞིན་དུའང༌། ཨ་
ར་ལིས་ཞུས་ལྷ་མོ་ལ། །ཡེ་ཤེས་མཆོག་ཀྱང་ཇི་ལྟ་བུ། །གང་ཞིག་རྣམ་པར་ཤེས་ཙམ་གྱིས། །སྒྲུབ་པ་པོ་ཡིས་དངོས་གྲུབ་འཐོབ། །ལྷ་མོ་རིགས་ཀྱིས་ཡང་དག་གསུངས། །ཡེ་ཤེས་ཆེན་པོ་བདེ་བ་མཆོག །ཀུན་མཁྱེན་ཡེ་ཤེས་ལས་བྱུང་བ། །བསྲུང་བྱ་སྲུབ་
བྱེད་ལས་བྱུང་བ། །བསམ་པ་ཐམས་ཅད་ཡོངས་སྤངས་ཏེ། །དབང་པོ་ཐམས་ཅད་ངེས་བཀག་ནས། །སྐྱེ་འགྲོ་མེད་པའི་དབེན་ཕྱོགས་སུ། །གཉིས་པ་ཐམས་ཅད་དང་བྲལ་བའི། །མིག་གཉིས་མ་ཕྱེ་མ་བཙུམ་པར། །སྨིན་མའི་མཚམས་སུ་སེམས་བསྟད་ན། །མུན་
9-6-7a


པ་མི་བཟང་ཚུལ་ཡང་ནི། །སྒྲུབ་པ་པོ་ཡིས་དང་པོར་མཐོང༌། །དེ་ནས་གཡོན་པའི་རྣ་བ་ནི། །དལ་བུ་དལ་བུས་གཡོ་བར་བྱེད། །ཤེས་རབ་མ་ཡི་བདེ་བ་གང༌། །དེ་བཞིན་ཕྱག་རྒྱ་ཆེན་པོའི་བདེ། །ཉམས་པའི་རང་བཞིན་མི་ཕྱག་
རྒྱ། །དེ་ཕྱིར་ཤེས་པའང་ཉམས་པ་ཡིན། །དེ་ཕྱིར་ཡེ་ཤེས་ཕྱག་རྒྱ་བསྒོམ། །བདེ་བ་ཆེན་པོ་བསྒྲུབ་བྱའི་ཕྱིར། །ཡེ་ཤེས་ཆེན་པོ་འདི་ཁོ་ན། །རང་གིས་རིག་བྱའི་རང་བཞིན་ཏེ། །གཞན་ལ་བསྟན་པར་མི་ནུས་པ། །གཞོན་ནུ་མ་ཡིས་བདེ་མྱོང་བཞིན། །སྦྱོར་བ་འདི་
དང་བཅས་པ་ཡིས། །སེམས་ཅན་མགུ་བྱེད་སེམས་ཀྱིས་སུ། །སྙིང་རྗེས་སེམས་ཅན་ཐམས་ཅད་ལ། །སྦྱོར་བ་འདི་ནི་བདེ་བར་བྱེད། །འདི་ལ་གོམས་པའི་སྦྱོར་བ་ཡིས། །མཁའ་དང་མཉམ་པའི་སེམས་ཀྱིས་སུ། །སྙིང་རྗེ་ཆེན་པོའི་རྫུ་འཕྲུལ་ཅན། །
རྣལ་འབྱོར་གྲུབ་འགྱུར་ཐེ་ཚོམ་མེད། །དང་པོར་མུན་པ་བྱེད་པ་མཐོང༌། །གཉིས་པ་དཀར་པོ་དུ་བ་བཞིན། །གསུམ་པ་སྲིན་བུ་མེ་ཁྱེར་མཚུངས། །བཞི་པ་ཛ་བའི་མེ་ཏོག་ལྟར། །ལྔ་པ་སྤྲིན་མེད་ནམ་མཁའི་སྟེ། །བདག་དང་གཞན་གྱི་ཚོར་བ་བྲལ། །ཐམས་
ཅད་མཁྱེན་པའི་རྒྱུ་དེ་ཡང༌། །སྤྲིན་མེད་ནམ་མཁའི་དཔེ་དང་ལྡན། །རྒྱུན་དུ་གོམས་པའི་སྦྱོར་བ་ཡིས། །རྩེ་གཅིག་སེམས་པ་འདི་ལྟར་བྱོས། །རྟག་ཏུ་ཡེ་ཤེས་བདུད་རྩི་ཡི། །བཏུང་བས་བཀྲེས་པའི་དགག་བྱ་མེད། །རྒ་དང་ནད་ཀྱི་གདུང་བ་མེད། །
ཐབས་ཀྱི་སྦྱོར་བ་འདི་ཡིས་ནི། །རི་གི་ཐམས་ཅད་མཁྱེན་པར་འགྱུར། །ཞེས་སོ།།   །།མངྒ་ལཾ།།
9-6-7b


empty page
9-7-1a


༄༅། །མཁའ་འགྲོ་རྒྱ་མཚོའི་སྐོར་གྱི་ཟིན་བྲིས་རྗེ་ཉིད་ཀྱིས་གནང་བ་བཞུགས་སོ།།
9-7-1b


མཁའ་འགྲོ་རྒྱ་མཚོའི་འགྲེལ་པ་གྲུ་གཟིངས་ཀྱི་ལེའུ་དང་པོར། འདིར་གལ་ཏེ་དེ་སྲིད་དུ་དོན་མེད་པ་ཅན་ཐོག་མ་དང་ཐ་མ་མེད་པ་ཉིད་ཀྱིས་རབ་ཏུ་མི་གནས་པ་དང༌། རབ་ཏུ་གནས་པ་དང་བྲལ་བ་
ཡིན་ན། དེའི་ཚེ་ལུང་ཐམས་ཅད་དོན་མེད་པར་འགྱུར་རོ། །དེ་བཞིན་གཤེགས་པའི་གསུང་ཡང་ཚད་མར་མི་འགྱུར་རོ། །དེ་རྣམས་ཀྱིས་ཀྱང་དམྱལ་བ་ལ་སོགས་པར་འགྲོ་བར་བྱེད་དོ། །ཞེས་གཞན་དག་ཐེ་ཚོམ་ཟ་ན་དེའི་
ཕྱིར་བཅོམ་ལྡན་འདས་ཀྱིས་གསུངས་པའི་ལན་ཚིག་གསུངས་པ། གང་འདྲ་བ་ཞེས་བྱ་བ་ལ་སོགས་པ་སྟེ་དཔེ་གསུངས་པའོ། །གཞན་འདུ་ཤེས་ཞེས་བྱ་བ་ནི་གཞན་དུ་ཕྱི་རོལ་པ་ནམ་མཁའ་ཡོངས་སུ་བརྟགས་པར་གང་
འདྲ་སྟེ། མདོ་སྡེ་པ་རྣམས་ཀྱིས་རྣམ་པ་ཐམས་ཅད་ཀྱི་དངོས་པོར་རོ། །དེ་འདྲ་བ་ནི་བདག་རིག་པ་སྟེ་ཞེས་བྱ་བ་ནི་རབ་ཏུ་གནས་པའི་མྱ་ངན་ལས་འདས་པའི་རང་བཞིན་རྡོ་རྗེ་ཕག་མོས་ཡང་དག་པར་རྟོགས་པའོ། །སྣང་བ་མེད་
ཀྱང་ཡོངས་སུ་གསལ་ཞེས་བྱ་བ་ནི་གཟུང་བ་དང་འཛིན་པའི་རྣམ་པ་དང་བྲལ་བས་སྣང་བ་མེད་པ་དང༌། དེའི་རྣམ་པ་རྣམས་ཀྱིས་སེམས་ཅན་རྣམས་ཀྱི་དགའ་བར་བྱེད་པ་ཉིད་ཀྱི་ཕྱིར་ཡོངས་སུ་གསལ་བར་ཡང་སྟེ། རང་གི་རིག་
9-7-2a


པའི་རང་བཞིན་ཞེས་བྱ་བའི་དོན་ཏོ། །དེ་ལྟར་བཅོམ་ལྡན་འདས་འབྱུང་བ་ཞེས་བྱ་བ་ནི་རྣམ་པ་ཐམས་ཅད་ཀྱི་བདག་ཉིད་འདིར་མེད་པ་སྟེ། གཅིག་དང་དུ་མའི་རང་བཞིན་དག་འདིར་བྲལ་བས་སོ། །
དེར་ཞེས་བྱ་བ་ནི་རྣམ་པ་ཐམས་ཅད་དུ་གོང་བུ་རྡུལ་ཕྲ་རབ་ཀྱི་ཆ་དྲུག་གི་དབྱེ་བ་མེད་དོ། །འོན་ཀྱང་ཐ་སྙད་དུ་འཇིག་རྟེན་པ་གཞན་ལ་ཞེས་བྱ་བ་སྟེ། འཇིག་རྟེན་གྱི་ཐ་སྙད་ཙམ་མོ། །མི་བདེན་པའི་བདེན་པ་ཉིད་དེ་དེ་རྣམས་ཀྱིས་
རྟོགས་པ་སྣ་ཚོགས་རྣམས་ལ་གནོད་པར་འགྱུར་ཏེ་དར་གྱི་སྲིན་བུ་བཞིན་ནོ། །དེའི་ཕྱིར་མ་སྐྱེས་པ་མི་འགག་པ་སྒྱུ་མ་དང་སྨིག་རྒྱུ་དང་མཚུངས་པའོ། །དེར་ནི་མངོན་སུམ་གྱིས་ཀྱང་ནི། །ཡོད་པར་མི་མཐོང་མི་བདེན་པའོ། །དབང་
པོ་རྣམས་ལ་རང་བཞིན་ནི། །མཐོང་ཡང་མེད་པ་བལྟ་བར་བྱོས། །རང་བཞིན་ལ་ཡང་དབང་པོ་མེད། །དེ་རུ་གཟུགས་ནི་ཅི་ཞིག་མཐོང༌། །ཡིད་ཀྱིས་དམིགས་པའི་གཟུགས་ཀྱང་ནི། །ཡིད་ནི་ནམ་མཁའི་མཚན་ཉིད་དོ། །ཐམས་
ཅད་རྒྱུ་རྐྱེན་ཚོགས་ལས་སྐྱེས། །ས་ལུ་ལ་སོགས་མྱུ་གུ་བཞིན། །བེམ་པོའི་དངོས་པོ་ཐམས་ཅད་དུ། །རྣམ་པར་འཕྲོ་བར་མི་འདོད་དོ། །དབང་པོ་གཅིག་སོགས་ཐམས་ཅད་ནི། །ཁུ་བ་དང་ནི་ཁྲག་ལས་བྱུང༌། །ལུས་ཀྱིས་སུ་
9-7-2b


ནི་མི་འདོད་དེ། །སྐད་ཅིག་པས་ནི་སྐྱེ་བར་བྱེད། །ཅེས་སོ། །དཔེ་གསུངས་པ། ནམ་མཁའ་ཞེས་བྱ་བ་ལ་སོགས་པ་སྟེ། ཇི་ལྟར་ནམ་མཁའ་དྲི་མ་མེད་པ་ལས་མེ་སྐྱེས་པ་སྟེ། དེ་བཞིན་འདིར་ཞེས་བྱ་བ་ནི་ཡེ་ཤེས་ཀྱི་ནམ་མཁའ་ལས་བྱུང་བ་ཡེ་ཤེས་ཀྱི་མེའི་རང་བཞིན་
སངས་རྒྱས་ཀྱི་གཟུགས་རང་གི་བག་ཆགས་ཀྱི་སྐྱོན་དང་བྲལ་བ་ཡིས་སེམས་ཅན་རྣམས་ལ་ཡང་དག་པའི་ཡེ་ཤེས་ཀྱི་སྣང་བ་བྱེད་པ་ཞེས་བྱ་བའི་དོན་ཏོ། །ཇི་ལྟར་རོ་བྲོ་བ་ནི་གཅིག་དངོས་ལ་ཞེས་བྱ་བ་ནི་སྐྱུ་རུ་ལ་སོགས་པའི་རྫས་གཅིག་ལ་རོ་བྲོ་བར་འགྱུར་ཏེ། 
དེའི་ནང་ནས་དངོས་པོ་མང་པོ་ཞེས་བྱ་བ་ནི་དེ་བཞིན་དུའང་འཆོས་པ་དང་མྱང་བ་དང༌། ལྕེས་སོ་དེ་བཞིན་དུ་བཟུང་བ་དང༌། བལྡད་པ་དང་མིད་པ་རྣམས་ཀྱིས་ལན་ཚྭ་དང་ཁ་བ་དང་བསྐ་བ་དང་ཚ་བ་དང་མངར་བའི་རིམ་པ་ཇི་ལྟར་གོ་བར་བྱའོ་ཞེས་སོ། །ལྷན་ཅིག་
སྐྱེས་པའི་དགའ་བའི་ཆོས་གང་འདིར་རྣམ་པར་བརྟགས་ན་རྒྱུ་རྐྱེན་གྱི་དབང་གིས་སྐྱེ་བ་སྟེ། དེ་ཉིད་ལ་ཉེ་བར་དམིགས་པ་མེད་ཅེས་བྱའོ། །བསྒྲུབ་པར་བྱ་བ་ཅི་ཞེ་ན། དཔེར་བྱ་མེད་པ་ཡི་ནི་ཆོས། །རྡོ་རྗེ་ལ་ནི་དགའ་བར་གྱིས། །ཞེས་བྱ་བ་སྟེ། མི་ཕྱེད་པའི་རྡོ་
རྗེའི་ཡེ་ཤེས་དབྱེ་བ་མེད་པའི་ཆོས་ཉིད་ཀྱི་ཡེ་ཤེས། ཚད་མེད་པ་དཔེ་དག་བྲལ་བའི་དོན་ཅན་ལ་དགའ་བར་གྱིས་ཞེས་བྱ་བར་དགོངས་སོ། །དེ་ལྟར་ལྷའི་རྣམ་པའི་རྣལ་འབྱོར་བདག་ཅེས་བྱ་བ་ནི་སྦྱོར་བ་འདིས་དཀྱིལ་འཁོར་གྱི་འཁོར་ལོ་བསྒོམ་པའོ། །འཕྲལ་དུ་
ཡིད་ཆེས་བྱེད་པ་ཅན་ཞེས་བྱ་བ་ནི། ཕྱག་རྒྱ་ཆེན་པོའི་འབྲས་བུ་སྟེར་བ་པོ་རང་གི་འདོད་པའི་ལྷ་བསྒོམས་པ་ཙམ་གྱིས་ཞེས་བྱ་བའོ། །དེའི་མི་མཐུན་པའི་ཕྱོགས་བྱིས་པའི་སྐྱེ་བོ་ལ་བརྟེན་པ་གཞན་གྱི་དབང་དུ་བྱས་ནས་གསུངས་པ། ལུགས་མ་ལ་
9-7-3a


སོགས་པ་ཞེས་བྱ་བ་སྟེ། དེ་ལྟར་སྔོན་དུ་བཤད་པའི་རྣལ་འབྱོར་སྤངས་ནས། ལུགས་མ་སྟེ། བཟླས་པ་དང་རི་མོ་ལ་སོགས་པའི་སྦྱོར་བ་ལ་བརྟེན་པའོ། །དེས་རྣམ་པར་བྱས་པའི་དབྱིབས་ཞེས་བྱ་བ་ནི་དམྱལ་བ་ལ་སོགས་པ་སྐྱེས་
བུའི་རྣམ་པར་འགྲོ་བའོ། །ཐར་པ་ལ་གནས་པར་མི་འགྱུར་རོ། །འདིའང༌། ཇི་ལྟར་བྱིས་པས་རྣམ་རྟགས་པའི། །ཕྱི་རོལ་དོན་ནི་ཡོད་མིན་ཏེ། །བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་བ་རབ་ཏུ་སྐྱེ། །ཞེས་སོ། །འོན་ཀྱང་སྔོན་དུ་བཤད་པའི་རྣལ་
འབྱོར་གྱི་ཁྱད་པར་དུ་བྱེད་པ་སྟོང་པ་ཉིད་དང་པོར་དུ་བ་ལ་སོགས་པའི་རྟགས་བཅུས་ཨ་བ་དྷཱུ་ཏྭཱིའི་ནང་དུ་སོན་པ་རབ་ཏུ་བསྒྲུབ་པ་སྟེ། ཡན་ལག་དྲུག་གི་རྣལ་འབྱོར་གྱིས་ཀྱང་མཚོན་པར་བྱའོ། །ཞེས་བྱ་བའོ། །དེའང་སོ་སོར་སྡུད་དང་དེ་བཞིན་དུ། བསམ་གཏན་སྲོག་
རྩོལ་འཛིན་པ་དང༌། །རྗེས་སུ་དྲན་དང་ཏིང་ངེ་འཛིན། །སྦྱོར་བ་ཡན་ལག་དྲུག་ཏུ་འདོད། །ཅེས་སོ། །དེས་སྒོམ་པ་པོ་གནས་པ་པོ་ལ་སོགས་པ་དེས་རང་གི་གཟུགས་མཐོང་བའོ། །རང་བྱིན་བརླབ་པའི་མཚན་ཉིད་དོ། །ཞེས་བྱ་བ་ནི་ཁ་དོག་སྣ་ཚོགས་ཀྱི་རང་
བཞིན་རྣམས་སུ་མཐོང་བའོ། །དེ་ལྟར་ལུགས་མ་ལ་སོགས་པ་ལ་རང་བཞིན་ཐམས་ཅད་བྱིན་གྱིས་བརླབས་པར་བྱའོ། །ཞེས་བྱ་བ་སྟེ་རང་བྱིན་གྱིས་བརླབ་པའི་མཚན་ཉིད་དོ། །རང་བྱིན་གྱིས་བརླབ་པ་ཞེས་བྱ་བ་ལ་སོགས་པ་རྟོགས་པར་སླའོ། །དེའི་ཕྱིར་
ཞེས་བྱ་བ་ལ་སོགས་པས་སྒྱུ་མ་ཞེས་བྱ་བ་ནི་དངོས་པོ་ཐམས་ཅད་ཐོག་མར་དཔེ་བཅུ་གཉིས་རྣམས་ཀྱིས་ཉེ་བར་མཚོན་པར་བྱའོ། །ཞེས་བྱ་བ་སྟེ། །དེ་ལ་སྒྱུ་མ་དང་སྨིག་རྒྱུ་དང་མེ་ལོང་གི་གཟུགས་བརྙན་དང་བརྒྱ་བྱིན་གྱི་གཞུང་དང་སྤྲིན་དང་དྲི་ཟའི་གྲོང་ཁྱེར་
9-7-3b


དང་ཆུའི་ཟླ་བ་དང་ཆུའི་ཆུ་བུར་དང་གསལ་སྣང་དང་སྒྱུ་འཕྲུལ་དྲ་བ་དང༌། རྨི་ལམ་དང༌། བྲག་ཆའོ། །དེ་ལྟར་སྒྱུ་མ་ལ་སོགས་ཀུན། །རྣལ་འབྱོར་རྣམས་ཀྱི་རང་མཚན་ཉིད། །ཕུང་པོ་སྒྱུ་མའི་རང་བཞིན་ཏེ། །རྣམ་ཤེས་བརྒྱད་ནི་སྨིག་རྒྱུའོ། །མེ་ལོང་གི་
ནི་གཟུགས་བརྙན་ཀྱང༌། །དབང་པོ་རྣམས་ཀྱི་རང་བཞིན་ནོ། །ཡུལ་རྣམས་བརྒྱ་བྱིན་གྱི་ནི་གཞུ། །སྐྱེ་མཆེད་སྤྲིན་གྱི་གྲིབ་མའོ། །ཁམས་ནི་དྲི་ཟའི་གྲོང་ཁྱེར་ཏེ། །ལས་ཀྱི་དབང་པོ་ཟླ་བ་གང༌། །ཆུ་བུར་ལས་ཀྱི་བྱ་བ་སྟེ། །དངོས་པོ་རྣམས་ནི་གསལ་སྣང་བཞིན། །སྒྱུ་
འཕྲུལ་དྲ་བ་འཁོར་བ་སྟེ། །རྨི་ལམ་དང་མཉམ་བལྟ་བར་གྱིས། །འདོད་ཆགས་ལ་སོགས་བྲག་ཆར་ནི། །བསྒོམ་པར་བྱ་ཞིང་བཟློག་པར་གྱིས། །དེ་ཕྱིར་འདི་རྣམས་སྒྱུ་མ་ཆེ། །རང་བཞིན་མཐར་ཡི་རྒྱལ་བའོ་ཞེས་བྱ་བའོ། །དེ་ཉིད་ཀྱི་ཕྱིར་བྱང་ཆུབ་བླ་ན་མེད་པ་འཐོབ་ཅེས་བྱ་
སྟེ། བྱང་ཆུབ་ཅེས་བྱ་བ་ནི་བྱང་ཆུབ་ཆེན་པོའི་སྟེ་སྒྱུ་མའི་རྒྱལ་པ་རྣམས་དང་དབྱེར་མེད་པ་ཉིད་ཀྱིས་འོད་གསལ་བར་རང་བཞིན་གྱིས་འབྱུང་ཞེས་པའོ། །ལེའུ་དང་པོར། ཡོངས་སུ་ཤེས་པས་འགྲོལ་པའོ་ཞེས་བྱ་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པ་
རྣམས་འཁྲུལ་པས་དྲི་ཟའི་གྲོང་ཁྱེར་ལྟ་བུར་ཡོངས་སུ་མ་ཤེས་པས་མཆིང་པའོ། །སྐྱེ་བ་དང་འགག་པ་རྣམ་པར་དཔྱད་པས་དངོས་པོ་མེད་པའི་ཕྱིར་དེ་རྣམས་ཀྱིས་ཡོངས་སུ་ཤེས་པ་དང་ལྷན་ཅིག་རྣམ་པར་དཔྱད་པས་མ་འཁྲུལ་བར་རང་བཞིན་གྱི་འོད་གསལ་བའི་རྣམ་
པར་ཡང་འཆད་པར་འགྱུར་བའི་མཆོད་པ་བཞི་ལ་སོགས་པའི་དེ་ཁོ་ན་ཉིད་རྣམས་ཀྱིས་འགྲོལ་བ་སྟེ། སྨོངས་པས་ཡོངས་སུ་ཤེས་པ་སྤངས་པ་ཞེས་བྱ་བའི་དོན་ཏོ། །སེམས་ཉིད་ཅེས་བྱ་བ་ནི་སྣ་ཚོགས་པ་བུམ་པ་དང་སྣམ་བུ་ལ་སོགས་པའི་དངོས་པོ་མེད་པ་
9-7-4a


སྟེ་སྣ་ཚོགས་པ་གཅིག་གི་རྣམ་པ་ཉིད་པས་དངོས་སུ་ཡོད་པའི་མཁས་གསུམ་གནས་པའོ། །ལུས་ལ་སོགས་པའི་ཁམས་སུ་གནས་པར་བཤད་པས་འོད་གསལ་བའི་སེམས་དེ་སྟོན་པའི་དབང་གིས་ཤེས་རབ་ཀྱི་ཕ་རོལ་
ཏུ་ཕྱིན་པའི་རང་གི་མཚན་ཉིད་ཆོས་ཐམས་ཅད་ཡོངས་སུ་ཤེས་པའོ། །དེས་དེ་བཞིན་དུ་འཆད་པར་འགྱུར་རོ། །དེ་ལྟར་ཡང་གསུངས་པ། སྣ་ཚོགས་འོད་གསལ་བ་ནི་མ། དངོས་པོ་ཀུན་གྱི་ཕ་ཡིས་ནི། །སྐྱེད་པར་བྱེད་ཅིང་དེ་བཞིན་དུ། །བསྐྲུན་ཏེ་ཀུན་རྫོབ་ཏུ་ནི་སོན། །འོད་གསལ་དང་བྲལ་
བྱང་ཆུབ་ནི། །བདག་བྱིན་བརླབས་པ་མི་མཐོང་ངོ༌། །དེ་ཡིས་བྱང་ཆུབ་ངེས་ཤེས་པས། །བསྟན་བྱ་སྟོན་པ་དབྱེར་མེད་དེ། །ཀུན་རྫོབ་དང་ནི་དོན་དམ་པ། །གཙོ་བོ་དང་ནི་དཀྱིལ་འཁོར་པ། །རྣམ་པ་གཅིག་ཏུ་རིག་གང་གིས། །དེ་ནི་བསྲུང་བ་ཀུན་ཏུ་སོན། །ཅེས་
སོ། །ལེའུ་གསུམ་པ་ལས། དེའི་ཕྱིར་རྣལ་འབྱོར་གྱི་རྒྱུད་རྣམས་སུ་སེམས་འོད་གསལ་དུ་སོན་པས་དེ་ཁོ་ན་ཉིད་རང་གི་རིག་པ་གཉིས་སུ་མེད་པ་ཡིད་ཆེས་པས་རང་གིས་དངོས་སུ་ཉམས་སུ་མྱོང་བར་འགྱུར་རོ། །གལ་ཏེ་སེམས་དེ་སྲིད་དུ་འོས་བསལ་བར་
སོན་པ་དེའི་ཚེ་དེ་ཁོ་ན་ཉིད་ལ་སོགས་པའི་རྣལ་འབྱོར་གྱི་རྒྱུད་རྣམས་སུ་གང་གིས་ཡིད་ཆེས་པར་འགྱུར་བ་གསུངས་པ། །སློབ་དཔོན་གྱིས་སེམས་རྡོ་རྗེ་ཞེས་བྱ་བ་སྟེ། འདིར་མཁས་པ་རྣམས་ཀྱིས་ཐོག་མར་རྩའི་ཡི་གེས་བྱེ་བྲག་སྨྲ་བ་དང་མདོ་སྡེ་པའི་
ཚུལ་ལ་བརྟེན་པར་བྱའོ། །དེ་ཇི་ལྟར་ཞེ་ན། གསུངས་པ། འདིར་ལུས་ལ་འབྱུང་བ་ཆེན་པོ་ལ་སོགས་པའི་ཁམས་རྣམས་ཆོས་མངོན་པའི་རིགས་པས་དང་བྱེ་བྲག་སྨྲ་བའི་ཆོས་ཀྱིས་རྣལ་འབྱོར་པ་དེས་མི་རྟག་པར་བྱའོ། །དེས་སླར་ཡང་མདོ་སྡེ་པ་རྣམ་
9-7-4b


པ་དང་བཅས་པའི་ལྟ་བ་ལ་སེམས་བརྟན་པ་སྐྱེད་པར་བྱེད་དེ་སྣ་ཚོགས་པའི་སྐྱེས་རབས་ལ་སོགས་པའོ། །དེ་ལྟར་ཡང་མི་བདེན་པར་བྱས་ནས་སེམས་ནམ་མཁའི་ངོ་བོ་ཅན་དུ་རྣལ་འབྱོར་སྤྱོད་པར་གྱུར་པ་མ་རིག་པ་ཡོངས་སུ་སྤོང་བ་ལས་སེམས་རྡོ་རྗེའོ། །དབུ་མ་ནི་རྩ་
བ་སྟེ་དེ་ལྟར་སྤྱོད་ཡུལ་ནི་དངོས་པོ་ཐམས་ཅད་དོ། །དེ་རྣམས་ཀྱི་སྤྱོད་པ་ཉིད་ཀྱི་ཕྱིར་ཡོངས་སུ་ཤེས་པ་དང་རིག་པའོ། །དེ་ལྟར་སེམས་ཀྱི་རྡོ་རྗེའི་ཆོས་ཐམས་ཅད་ཀྱི་སློབ་དཔོན་གྱིས་དེའི་ཚེ་ཁྱད་པར་ཉིད་ཀྱིས་དེའི་ནང་དུ་ཆོས་ཐམས་ཅད་སོན་པའོ། །དེའི་ཕྱིར་རྣལ་འབྱོར་མ་
རྣམས་ཀྱི་ལུས་ཀྱི་དེ་ཁོ་ན་ཉིད་ལ་སོགས་པ་རིག་པ་པོ་ཀུན་རྫོབ་ཀྱི་འོད་གསལ་བར་སོང་བའང་སྒྱུ་མའི་རྣམ་པར་སེམས་རྡོ་རྗེ་སོ་སོར་སྣང་བའི་སྐུའི་རྣམ་པ་ཉིད་ཀྱིས་སོ། །དེ་ན་དམ་པར་ནི་ཐམས་ཅད་དུ་རྒྱན་བཏགས་སྒྲོ་བཏགས་པ་ཐོང་ཞིག །དེ་ཇི་ལྟར་ཞེ་ན། དབུ་མའི་ཚུལ་ཞེས་བྱ་
བ་གསུངས་པ། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་ཅན་མ་ཡིན། །མཐའ་བཞི་ལས་ནི་རྣལ་གྲོལ་བ། །དེ་ཁོ་ན་ཉིད་དབུ་མར་ཤེས་ཞེས་བྱ་བའོ། །དེ་ལྟར་གནས་སྐབས་ཐམས་ཅད་དང་བྲལ་བ་བཞི་པ་ལས་འདས་པའི་ངེས་པར་བཞག་པ་
དེ་ཉིད་ཀྱི་གནས་སྐབས་སློབ་དཔོན་ཞེས་བྱ་བའི་དོན་ཏོ། །དེའི་ཕྱིར་དེ་ཉིད་བརྟན་པ་ཐོབ་བ་ཞེས་བྱ་བ་ནི་བླ་མ་རྡོ་རྗེ་འཆང་ལས་དཔེ་ཡིས་མཚོན་པར་བྱ་བའི་མཐར་དེ་ཁོ་ན་ཉིད་ཐོབ་པའོ། །དེའང་ཇི་ལྟར་ཕ་དང་མ་སྙོམས་པར་འཇུག་པའི་དུས་སུ་དྲི་ཟའི་སེམས་ཅན་
གྱི་བདེ་བ་ཉམས་སུ་མྱོང་སྟེ་འཛག་པའི་དུས་སུ་ནི་དེ་བཞིན་དུ་དེ་ལྟར་ཉེ་བར་སྟོན་པ་ལུས་འཛིན་པའི་དངོས་པོ་མངོན་སུམ་དུ་ཉམས་སུ་མྱོང་ངོ༌། །དེའི་རང་བཞིན་དུ་འགྲོ་བའོ། །ནིའི་སྒྲ་ནི་ངེས་པར་གཟུང་བའོ། །དབུ་མ་ཆེན་པོའི་མཚན་ཉིད་དོ། །ཞེས་བྱ་བའི་
9-7-5a


བདེ་བ་དང་སེམས་གཉིས་ཀྱི་ཀུན་རྫོབ་ཀྱི་གཟུགས་ཐམས་ཅད་བུམ་པ་དང་སྣམ་བུ་དང་ཤིང་རྟ་ལ་སོགས་པ་སྟེ་དེ་ཉིད་དེ་ལྟར་དོན་དམ་པའོ། །འོན་ཀྱང་བྱིས་པའི་རིགས་ཅན་རྣམས་ཀྱིས་ཐ་དད་སོ་སོར་ཡོངས་སུ་བརྟགས་
སོ། །དེ་ལྟར་གང་ཀུན་རྫོབ་དེ་དོན་དམ་པ་སྟེ་གང་ཞིག་དོན་དམ་པ་ནི་ཀུན་རྫོབ་ཏུ་བདེ་བ་དང་སེམས་དག་གིས་ལུས་དང་བདེ་བའོ། །འོ་ན་དེ་ལྟར་བྱེ་བྲག་སྨྲ་བ་ལ་སོགས་པ་གྲུབ་པའི་མཐའ་བཞི་དེ་རྣམས་ཀྱི་སྤྱོད་ཡུལ་བླ་མའི་གདམས་ངག་དེའི་ཚེ་ཐམས་ཅད་ཕྱི་
རོལ་བར་འགྱུར་རོ། །ཕྱི་དང་ནང་གི་བདག་ཉིད་ཀྱི་ཆོས་ལ་དབྱེ་བ་མེད་པར་འགྱུར་ཞེ་ན། དེ་ལ་ཇི་ལྟར་བླ་མའི་གདམས་ངག་ནི་ཅི། །དེ་ལྟར་གལ་ཏེ་མི་འགྱུར་ན་དེའི་ཚེ་གལ་ཏེ་མི་འགྱུར། དེའི་ཚེ་སྐྱོན་དེ་སྔགས་ཀྱི་ཚུལ་གྱི་བསྟན་བཅོས་ཐམས་ཅད་དོན་མེད་པ་
ཉིད་དུ་འགྱུར་རོ། །དེ་བཞིན་གཤེགས་པས་གསུངས་པའི་ཆོས་བརྫུན་དུ་འགྱུར་རོ། །གཅིག་ཏུད་སྔགས་ཀྱི་ཚུལ་གྱི་བསྟན་བཅོས་ཐམས་ཅད་གཅིག་པའི་དངོས་པོ་བས་དུ་མར་མི་འགྱུར་རོ། །བརྫུན་དེས་ཁྱེད་ཀྱིས་ཕྱིན་ཅི་ལོག་བསྟན་པས་དམྱལ་
བ་ལ་སོགས་པར་འགྲོ་བར་འགྱུར་རོ་ཞེ་ན། དེ་བཞིན་དུའང་བཤད་པ། དེ་བཞིན་གཤེགས་པས་ཆོས་བསྟན་གང༌། །བདེན་པ་གཉིས་ཀྱི་བདག་ཉིད་ཅན། །གསང་སྔགས་ཚུལ་ཚོགས་ཐམས་ཅད་ལ། །སུན་འབྱིན་བྱེད་པ་དམྱལ་བར་འགྲོ། །
མ་ཐོས་པའམ་ཐོས་ཆུང་བས། །ཕྱིན་ཅི་ལོག་ཏུ་འཆད་པའོ། །དེ་ལ་གྲུབ་དང་བདེ་མེད་འགྱུར། །མནར་མེད་སོགས་སུ་ངེས་པར་འཚེད། །དེ་ལྟར་ཐེ་ཚོམ་ཐམས་ཅད་སེལ་བར་བྱེད་པའི་བཅོམ་ལྡན་འདས་ཀྱིས་ཚིག་གིས་གསུངས་པ། གྲུབ་
9-7-5b


མཐའ་ཞེས་བྱ་བ་ལ་སོགས་པ་སྟེ། འདི་གང་གསུངས་པ་དེ་བདེན་ནོ། །འོན་ཀྱང་ལྟ་བ་ཐམས་ཅད་ལ་གདམས་ངག་གི་གྲུབ་མཐར་བྲལ་ན་མི་འགྱུར་ཏེ། དེ་ཇི་ལྟར་གསུངས་པ། འདིར་རྨོངས་པ་རྣམས་གདམས་ངག་ལ་འཇུག་པའི་དུས་སུ་སྣ་ཚོགས་
པའི་དཔེ་རྣམས་ཀྱིས་འཇུག་པར་བྱེད་དེ། བསྟན་པའི་གསུང་རབ་ཀྱིས་སོ། །ཇི་ལྟར་དགའ་བ་ལ་སོགས་པ་ཤེས་རབ་དང་མཉམ་པར་སྦྱོར་བའི་དཔེས་མཚོན་པའོ། །དེ་ལྟར་གྲུབ་མཐའ་རྣམས་ཐིག་ལེ་བཞི་དང་དགའ་བ་བཞི་ལ་སོགས་པས་བྱེ་བྲག་སྨྲ་བ་ལ་
སོགས་པར་རིམ་པ་ཇི་ལྟ་བར་ཤེས་པར་བྱའོ། །དེའང༌། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་ཅན་ཀྱང་མིན་ཞེས་བྱ་བ་ལ་སོགས་པའོ། །དཔེ་དང་བྲལ་བའི་ཡེ་ཤེས་ལས་རང་གིས་རིག་པའི་དུས་སུའང་རྣལ་འབྱོར་པ་རྣམས་ཀྱི་དངོས་སུ་
ཡིད་ཆེས་པའི་ཕྱིར་རོ་ཞེས་བྱ་བའི་དོན་ཏོ། །དེ་ལྟར་གདམས་ངག་བླ་མས་ཉེ་བར་བསྟན་པའི་སྤྱོད་ཡུལ་ཅན་གྲུབ་པའི་མཐའི་སྒོ་ནས་རབ་ཏུ་འཇུག་པར་བྱེད་དོ། །བླ་མ་གྲུབ་པའི་མཐའི་སྤྱོད་ཡུལ་ཏེ་གཞན་གྱི་དངོས་པོ་རྣམས་ཀྱི་མ་ཡིན་ནོ། །ཡང་ན་ཉན་ཐོས་
དང་རང་སངས་རྒྱས་དང་ཐེག་པ་ཆེན་པོ་ལ་སོགས་པའི་སྤྱོད་ཡུལ་གདམས་ངག་རང་རང་གི་བསྟན་བཅོས་སུ་བཤད་པའི་རིགས་པས་གདམས་ངག་ལ་འཇུག་པར་བྱེད་དོ། །དེའི་ཕྱིར་གྲུབ་མཐའི་ཡུལ་དང་གདམས་ངག་སྟེ་སྒྲུབ་པོ་དེ་རྣམས་ཀྱི་སྐྱོན་
མེད་དོ། །འོན་ཀྱང་པཎྜི་ཏ་རྣམས་ཀྱི་སྤྱོད་ཡུལ་མིན་ཞེས་བྱ་བ་ནི་རྟོག་གེ་སྐམ་པོ་ལ་དགའ་བ་རྣམས་དང་ལམ་དམ་པ་དང་བྲལ་བ་རྣམས་དང་བྱིས་པའི་པཎྜི་ཏ་རྣམས་ཀྱི་ཡེ་ཤེས་འདི་འདྲ་བའི་སྤྱོད་ཡུལ་མ་ཡིན་ཏེ་ཡང་དག་པར་རྫོགས་པའི་བྱང་ཆུབ་
9-7-6a


སྟེར་བ་པོ་རྙེད་པ་དཀའ་སྟེ་སངས་རྒྱས་ཀྱི་ཡུལ་ལོ། །ཇི་ལྟར་ཞེ་ན། གསུངས་པ། གྲུབ་མཐའ་མངོན་སུམ་ཞེས་བྱ་བ་ལ་སོགས་པ་སྟེ་འདིར་ཆོས་ཐམས་ཅད་ཀྱི་ཤེས་བྱ་དང་ཡེ་ཤེས་ལ་སོགས་པའི་གཟུགས་ཏེ། མངོན་སུམ་
དང་རྗེས་སུ་དཔག་པ་ལས་དམིགས་པའོ། །དེ་རིག་པ་ནི་མཁས་པ་སྟེ་ཤེས་བྱ་དང་ཡེ་ཤེས་ཀྱི་གཟུགས་ཅན་གྱི་བླ་མའོ། །མ་རིག་པ་ནི་མཁས་པ་མ་ཡིན་ཏེ། གྲུབ་པའི་མཐའ་མངོན་སུམ་པ་ཤེས་བྱ་ཙམ་ལ་བརྟེན་པ་དཔྱོད་པ་པ་ལྟ་བུ་སྒྲ་ཙམ་རྗེས་སུ་
རིག་པ་ཙམ་གྱིས་དམ་པའི་ཆོས་ཀྱི་ངེས་པ་མི་ཤེས་སོ། །དམུས་ལོག་ལྟ་བུའི་སྐྱེས་བུས་དཀར་པོ་དང་སེར་པོ་ལ་སོགས་པའི་རྫས་རྣམས་ཀྱི་རྣམ་པར་དབྱེ་བ་དེ་བཞིན་དུ་མི་ཤེས་སོ། །རང་བཞིན་མདོག་ནག་པོ་གཅིག་ཏུ་མཐོང་ངོ༌། །དེའི་ཕྱིར་དེ་ཁོ་
ན་ཉིད་མངོན་སུམ་ལ་བརྟེན་པ་རྣམས་ཀྱི་བུམ་པ་དང་སྣམ་བུ་ལ་སོགས་པ་རྣམས་ཀྱིས་དག་པའི་བདག་ཉིད་འདི་གའོ་ཞེས་བྱ་བའི་དོན་ཏེ་ཞེས་སོ། །མཁའ་འགྲོ་རྒྱ་མཚོའི་འགྲེལ་པ་གྲུ་གཟིངས་ཀྱི་གསང་བའི་ལེའུའི་རབ་ཏུ་བྱེད་པ་བཅུ་པ་ལས་
ཉི་ཤུ་རྩ་གཉིས་དབང་ཕྱུག་སོ་སོར་མངོན་པར་ཤེས་པ་ཡོད་པར་སྨྲ་བ་རྣམས་སེལ་བར་བྱེད་པ་སྟེ། དེ་ལ་རང་གི་སེམས་ཀྱི་གནས་སྐབས་བཅུ་གཅིག་དང༌། དབང་ཕྱུག་སོ་སོར་མངོན་པར་ཤེས་པ་ཡོད་པར་སྨྲ་བའི་བཤད་པ། བྱེད་པ་པོ་དེའོ་ཐམས་ཅད་
ཀྱི། དེ་ནི་ཀུན་ཏུ་བྱེད་པོ་བྱེད། །འཚོ་བར་བཤད་དང་འཚོ་བའི་གཟུགས། །ཐར་པ་འཁོར་བའི་འཁོར་ལོ་སྐྱེས། །ཡེ་ཤེས་དབང་པོ་རིག་པ་དང༌། །རྣལ་འབྱོར་ཡེ་ཤེས་སོགས་དེ་བཞིན། །འཇིག་རྟེན་པ་སོགས་དེ་ཉིད་གང་། །མདོར་བསྡུས་པ་ཡིས་བཅུ་གཅིག་གོ །
9-7-6b


ཞེས་སོ། དེ་ལྟ་བུར་རྣམ་པར་གནས་པ་ལ་དམ་པ་དང་དམ་པ་མ་ཡིན་པར་རྣམ་པར་དཔྱད་པས་མེད་པ་ཉིད་སོ་སོ་མངོན་པར་ཤེས་ཤེ་ན། དེའི་སེལ་བར་བྱེད་པ་རྣམ་པ་བཅུ་གཅིག་གསུངས་པ། ཀུན་གྱི་བྱེད་པ་དེ་མིན་ཏེ། །ལས་རྣམས་ཀྱིས་ནི་འབྱུང་བའོ། །ལས་ཀྱི་རྒྱུ་ཡང་མེད་པ་སྟེ། །འདི་ལ་
འབྱུང་བ་ཡོད་མ་ཡིན། །གང་གི་བྱེད་པ་ཡང་དག་བྱུང༌། །དེ་ལ་བྱ་བའི་དངོས་པོ་མེད། །བྱས་དང་བྱེད་པ་མེད་པའོ། །དངོས་པོ་ཐམས་ཅད་མ་བྱས་པའོ། །བྱ་བ་བྱེད་པོའི་འགྲེལ་པ་ཡིས། །འདིར་ནི་དངོས་པོ་མེད་པར་བཤད། །ལས་དང་བྲལ་བས་བྱེད་པ་མེད། །བྱ་བ་མེད་པས་བྱེད་པོ་མེད། །གལ་ཏེ་འབྱུང་བའི་
བདག་ཡོད་ནའང༌། །འབྱུང་པོ་མེད་པས་མེད་པའོ། །གཅིག་དང་དུ་མར་རྣམ་དཔྱད་པས། །འབྲེལ་པའི་དངོས་པོ་མེད་པར་འདོད། །སུ་ཞིག་བྱེད་པོ་ཅིའི་བྱེད་པོ། །འདི་རྣམས་བྱེད་པ་ཡོད་མ་ཡིན། །གང་གིས་རྟག་ཏུ་འཚོ་བར་འགྱུར། །དངོས་པོའི་གཟུགས་ནི་མི་རིག་
གོ། །ཇི་ལྟར་གཟུགས་ཅན་གང་ཟག་བཤད། །སྨིག་རྒྱུ་དང་ནི་འདྲ་བར་འགྱུར། །འཁྲུལ་པས་འཁྲུལ་པའི་རྣམ་པར་ནི། །ཡོད་པ་སྐད་ཅིག་མར་འགྱུར་རོ། །འཇིག་རྟེན་གྱི་ནི་སྐྱེ་བ་མེད། །རང་ལས་འབྲལ་བུས་བགྲོད་བར་འགྱུར། །ཀུན་ལ་ཐར་པ་ཡོད་པ་མིན། །གང་
ནའང་འཆི་བ་མེད་པའོ། །གལ་ཏེ་ཐར་པ་ཚམ་ཡོད་ཀྱང༌། །རོར་འཛིན་པ་ནི་དེ་ལ་མེད། །དེའི་ཕྱིར་འཇིག་རྟེན་ལས་འབྲས་བུ། །དགེ་དང་མི་དགེས་གང་བྱས་པ། །རྨོངས་པའི་སྐྱེས་བུ་དེ་ཡོད་པར། །འཁོར་བར་ཡང་ནི་འདོད་པའོ། །སྒྱུ་མས་འཁོར་བར་རྨོངས་བདག་
ཉིད། །རྨོངས་པས་བརྟན་པར་འདོད་པའོ། །གཏི་མུག་བདག་ཅན་འཁོར་བ་མེད། །རྡུལ་ཕྲན་ཆ་ཤས་མེད་པས་སོ། །ཡེ་ཤེས་ཞེས་བྱ་འདིར་མེད་དེ། །སེམས་བྱུང་གཟུགས་མེད་པའི་ཕྱིར་རོ། །དབང་པོ་ལ་སོགས་བརྗོད་པ་མེད། །རིག་པ་ཅི་ཞིག་འབྱུང་བ་མེད། །
9-7-7a


མངོན་སུམ་བཞི་ཡིས་དངོས་པོ་རྣམས། །དབང་པོ་ལ་སོགས་དེ་བཞིན་ཏེ། །ཡིད་ཀྱི་མངོན་སུམ་རྣལ་འབྱོར་དང༌། །རང་གིས་རིག་པའི་མངོན་སུམ་མོ། །ཇི་ལྟར་ཡེ་ཤེས་བཞི་དབུས་སུ། །མངོན་སུམ་ཉིད་ཀྱང་མི་རིག་གོ །
འཇིག་རྟེན་འཇིག་རྟེན་ལས་འདས་པའི། །དེར་ནི་དེ་ཉིད་ཡང་དག་བྱུང༌། །མངོན་སུམ་དང་ནི་རྗེས་དཔག་གིས། །དེ་རྣམས་དངོས་པོ་རིག་མ་ཡིན། །ངག་ཙམ་དུ་ནི་བཞག་པ་སྟེ། །འཁྲུལ་པ་ངེས་པ་མེད་པའོ། །དེ་ལྟར་བཤད་པའི་རིམ་ཤེས་བྱ། །རྒྱ་ཆེ་བར་ནི་དུ་མའོ། །
དབང་ཕྱུག་ཐམས་ཅད་དུ་མེད་པས། །སོ་སོར་མངོན་ཤེས་ཀྱི་ལས་འགྱུར། །མཁས་པས་རྣམ་པར་དཔྱད་བྱ་ཡི། །འདི་ལ་སྡང་བར་བྱའོ་ཞེས་སོ། །ལེའུ་གསུམ་པ་ལས་དེ་ཕྱིར་ཐམས་ཅད་བླ་མའི་ཞལ་ལས་ཤེས་པར་བྱའོ་ཐམས་ཅད་ཅན་ཞེས་བྱ་བ་ནི་
མངོན་སུམ་དང་རྗེས་སུ་དཔག་པ་དམ་པའི་དངོས་པོ་ཅན་གྱི་ཆོས་སོ། །དེ་ཞེས་བྱ་བ་ལ་སོགས་པ་རྟོགས་པ་སླའོ། །འདི་གསུངས་སོ་ཞེས་བྱ་བ་ལ་སོགས་པས་སྔོན་བཞིན་དུ་སྡུད་པར་མཛད་པ་པོ་དེས་རང་ཉིད་ཀྱི་སྐྱོན་ཡོངས་སུ་སྤང་བའོ་ཞེས་སོ། །ལེའུ་
བཞི་པ་ལས། རྣལ་འབྱོར་རྣམ་པ་དྲུག་ཅུ་ཞེས་བྱ་བ་ནི་རྣམ་པ་རྣམས་ནི་དྲུག་ཅུར་རིག་པར་བྱ་སྟེ་གང་གིས་སྦྱོར་བའི་ཡན་ལག་དྲུག་བསྒོམ་པ་ལ་དངོས་པོའི་རྣལ་འབྱོར་དེ་དེ་བཞིན་དུ་གསུངས་སོ། །དེའང་དབུ་མའི་ནང་དུ་སོན་པའི་སེམས་ཀྱིས་ཐམས་ཅད་
ནམ་མཁའི་བུ་གར་གནས་པ་ན་དེར་མཐོང་བར་འགྱུར་ཏེ་གཟུགས་བརྙན་བཞིན་དུའོ། །དེ་བཞིན་དུ་རྣམ་པ་དྲུག་ཅུ་རྣམས་བཤད་པར་བྱ་སྟེ། ཡན་ལག་དྲུག་དང་ལྷན་ཅིག་ཏུའོ། །འདིར་ནི། དུ་བ་སྨིག་རྒྱུ་མེ་ཁྱེར་དང༌། །དེ་བཞིན་མར་མེ་རབ་འབར་དང༌། །
9-7-7b


ཟླ་ནི་ཀ་མ་རཱ་ཧཱུ་དང༌། །དུས་ཀྱི་མེ་དང་བཅུ་པོ་ནི། །སོ་སོར་སྡུད་པའི་འོ། །བསམ་གཏན་རྣམ་པ་བཅུ་ནི། དེའང་སྲོག་ལ་སོགས་པ་འཆད་པར་འགྱུར་བའི་རྩ་བཅུ་རྣམས་ཀྱི་སྟེ། དེ་བཞིན་དུའང༌། པད་ཅན་སྣ་ཚོགས་ཅན་ཉིད་དང༌། །གླང་ཆེན་དུང་ཅན་མ་དེ་བཞིན། །ལུག་
དང་སེར་སྐྱ་ཡིད་བཟང་མ། །གླང་པའི་ལྕེ་མ་གཞོན་ནུ་མ། །འཇིགས་པའི་གཟུགས་སུ་ཡང་དག་བཤད། །བཅུ་པོ་རྣམས་ཀྱི་རང་བཞིན་ནོ། །སྒྱུ་མ་སྨིག་རྒྱུ་དྲི་ཟ་དང༌། །བརྒྱ་བྱིན་གཞུ་དང་མེ་ལོང་དང༌། །ཟླ་བའི་གཟུགས་དང་གྲིབ་མ་དང༌། །ཆུ་བུར་དང་ནི་བྲག་ཆ་དང་། །གསལ་
སྣང་བཅུ་པོར་ཤེས་པར་བྱ། །བསམ་གཏན་སྦྱོར་བ་བསྒོམ་པར་འགྱུར། །དེ་བཞིན་དུ་སྲོག་རྩོལ་རྣམས་ཀྱི་བཤད་པ། དེའང་རྣམ་པ་བཅུ་སྟེ། སྲོག་དང་ཐུར་སེལ་མཉམ་གནས་དང་། །བསམ་གཏན་ཁྱབ་གནས་འདི་ལྔའོ། །ཀླུ་དང་རུས་སྦལ་སྡིག་པ་དང༌། །ལྷས་བྱིན་
དང་ནི་ནོར་ལས་རྒྱལ། །དེ་ལྟར་རླུང་ནི་བཅུ་རྣམས་ཀྱིས། །སྲོག་རྩོལ་ཉེ་བར་མཚོན་པར་བྱ། །དེ་བཞིན་དུ་འཛིན་པ་ཡང་གསུངས་པ། དེའང་རྣམ་པ་བཅུ་སྟེ། གཡོན་པ་དང་གཡས་པའི་སྣ་བུག་ནས་རྒྱུ་བའི་དཀྱིལ་འཁོར་བཅུ་རྣམས་ཏེ་དེ་ལྟར་ན། ནམ་མཁའི་དད་རླུང་དང་
མེ་དང་ཆུ་དང་ས་དང་དབང་ཆེན་དང་ཆུ་དང་མེ་དང་རླུང་དང་ནམ་མཁའ་རྣམས་སོ། །དེ་འཛིན་པས་ན་སྐྱེ་བའི་གནས་རྣམས་སུ་ཐིམ་པ་རྣམས་བྱེད་དོ། །འཛིན་པའི་དེ་བཞིན་དུ་རྗེས་སུ་དྲན་པའི་གསུངས་པ། དེའང་བཅུ་སྟེ། འདོད་པའི་གནས་སྐབས་བཅུ། རྣམས་སོ། །དེ་ཉིད་
བཤད་པ། འདར་དང་འཕར་དང་བརྒྱལ་བ་དང༌། །རྒོད་དང་རབ་ཏུ་དགའ་དེ་བཞིན། །ལྐུགས་དང་ངལ་བསོ་གཉིད་དང་ན། །མཆི་མ་ལྷུང་དང་འགྲེལ་བ་སྟེ། །དེ་ནི་རྗེས་དྲན་རྗེས་སུ་དྲན། །ཞེས་སོ། །དེ་བཞིན་དུའང་ཏིང་ངེ་འཛིན་གྱིས་གསུངས་པ། དེའང་
9-7-8a


རྣམ་པ་བཅུ་སྟེ། སྤྱན་མ་དང་མཱ་མ་ཀཱི་དང་དཀར་མོ་དང་སྒྲོལ་མ་དང་གཟུགས་རྡོ་རྗེ་མ་དང་སྒྲ་དང་དྲི་དང་རོ་དང་རེག་དང་ཆོས་ཀྱི་དབྱིངས་ཀྱི་རྡོ་རྗེ་མ་རྣམས་ཀྱི། སྐུ་ཆེན་པོ་ནི་མཐོག་འགྱུར་ཏེ། །དེ་བཞིན་གཤེགས་པས་
འཁྱུད་པའོ། །དེ་ལྟར་ཏིང་འཛིན་འགྲོད་འགྱུར་ཏེ། །སྐྲ་ཙམ་གྱི་ནི་ནང་དུ་གནས། །ཞེས་བྱ་བས་སོ། །དེའི་ཕྱིར་སྡོམ་པ་དངོས་པོ་དམ་པ་ཀུན་ཞེས་བྱ་བ་སྟེ། བཤད་པའི་བཅུ་པོ་རྣམས་ཀྱི་དྲུག་པོ་དེ་རྣམས་ལའང་སྡོམ་པ་དྲུག་སྟེ་རེ་རེ་ལ་རིམ་པ་ཇི་ལྟ་
བས་ཤེས་པར་བྱའོ། །དེ་ལྟར་བཅུ་བསྐྱེད་པར་འགྱུར་བའི་དངོས་པོའི་རྫས་ཀྱི་གཟུགས་ཀྱི་ཡེ་ཤེས་སོ། །ཐམས་ཅད་དམ་པའི་དོན་གྱི་དངོས་ཞེས་བྱ་བ་ནི་རང་བཞིན་གྱི་བདག་ཉིད་ཅན་ཏེ། སླར་ཡང་བདག་གི་རྣལ་འབྱོར་སྡོམ་པ་ཞེས་བྱ་བ་ནི་ཐབས་ཀྱི་
བདག་ཉིད་ཀྱི་རྡོ་རྗེ་འཆང་ཆེན་པོ་སྟེ་སྟོན་པ་པོའི་གཟུགས་ཉིད་ཀྱི་ཕྱིར་ཏེ། སངས་རྒྱས་མི་བསྐྱོད་པའི་གཟུགས་སོ། །མི་གཡོ་ཞིང་མི་འཁྲུག་པས་གང་གི་ཕྱིར་མི་བསྐྱོད་པ་སྟེ། ཇི་ལྟར་ཐུགས་རྡོ་རྗེ་དངོས་པོ་ཐམས་ཅད་ཀྱི་ནང་དུ་ནམ་དུའང་མི་གཡོ་བའོ། །དེ་
ལྟར་འཇིག་རྟེན་གྱི་ཁམས་ཐམས་ཅད་དུ་སངས་རྒྱས་རྣམས་ཀྱི་སྤྲུལ་པའི་སྐུ་སྟོན་པ་ན་ནམ་ཡང་གཡོ་བ་མེད་དེ། རྡོ་རྗེ་ཐེག་པའི་ནང་ལས་སོ། །ཞེས་དང༌། ལེའུ་བཞི་པ་ལས། ནམ་མཁའི་གཟུགས་ཅན་གྱིས་དེའི་ནང་དུ་སོང་བའི་སྲོག་གི་བདག་ཉིད་
ཅན་གྱི་ཡེ་ཤེས་ནི་རྡོ་རྗེ་སྟེ་རྡོ་རྗེ་རྣལ་འབྱོར་མ་སྣ་ཚོགས་པའི་རྣམ་པ་ནི། མཁའ་འགྲོའི་བདག་ཉིད་ཅེས་བྱ་བའི་དོན་ཏོ། །དེ་བཞིན་དུ་རྣལ་འབྱོར་གྱི་མཁའ་འགྲོས་གསུངས་པ། གཏང་མེད་ཅེས་བྱ་བ་ལ་སོགས་པ་སྟེ་འདིར་སྔར་བཤད་པའི་མཁའ་འགྲོའི་
9-7-8b


བདག་ཉིད་ཅན་དང༌། སྟོང་པ་ཉིད་ཀྱི་བདག་ཉིད་ཅན་གྱི་ཡེ་ཤེས་དབུ་མའི་ནང་དུ་གནས་པ་ཉིད་ནི་དེའི་ཚེ་རྒྱུ་མཚན་མེད་པར་བྱུང་བ་སྟེ། ཕུང་པོ་ལྔ་རྣམས་ཀྱི་བདག་མེད་པར་མཐོང་བའི་གཟུགས་སུ་འགྱུར་རོ། །དེ་ཇི་ལྟར་ཞེ་ན། གང་གི་ཚེ་རྣལ་འབྱོར་
གོམས་པར་རང་བཞིན་གྱི་གཟུགས་རྗེས་སུ་དམིགས་པ་མེད་པར་གྱུར་པ་དེའི་ཚེ་ན་ནམ་མཁའ་ལ་རང་གི་གཟུགས་མཐོང་བར་འགྱུར་རོ། །སྒྱུ་མ་ཆེན་པོ་པདྨའི་གཟུགས་ཅན་ཞེས་བྱ་བ་ནི་ཆོས་ཀྱི་འབྱུང་གནས་ཀྱི་ཆུ་སྐྱེས་རྣམས་སུ་རིག་ཐམས་ཅད་
མཆོག་ཏུ་སོན་ནས་རྣལ་འབྱོར་མའི་གཟུགས་ཀྱིས་ཡེ་ཤེས་སྐྱེད་པར་བྱེད་དོ། །དེ་ལྟར་རྣལ་འབྱོར་རང་གི་སེམས་ལ་བསམ་མེད་པའོ། །ཞེས་བྱ་བ་ནི་རང་གི་ཡེ་ཤེས་བསམ་དུ་མེད་པ་ཕ་རོལ་གྱི་ཡེ་ཤེས་སྐྱེད་པར་བྱེད་དེ། རྣལ་འབྱོར་མཁའ་འགྲོའི་
དེ་བཞིན་དུ་བཤད་དོ། །རྣལ་འབྱོར་མ་བསམ་དུ་མེད་པའི་གཟུགས་ཅན་ཞེས་བྱ་བའི་དོན་ཏོ། །ད་ནི་འཁོར་ལོ་མཁའ་འགྲོས་གསུངས་པ། འཁོར་ལོ་ནང་གི་བདག་ཉིད་ཅན་ཞེས་བྱ་བ་ལ་སོགས་པ་སྟེ་འདི་ལྟར་སྔོན་དུ་བཤད་པའི་རྩའི་འཁོར་ལོ་རྣམས་
སུ་སྦྱོར་བ་ལ་གོམས་པས་ཐམས་ཅད་ཀྱིའང་ཐབས་དང་ཤེས་རབ་ཀྱི་བདག་ཉིད་ཀྱིས་ཐིག་ལེའི་གཟུགས་ཡེ་ཤེས་སུ་འགྱུར་རོ། །དེ་ལྟར་ཐམས་ཅད་དུ་སྦྱར་བའི་རྩ་སྟོང་ཕྲག་བདུན་ཅུ་རྩ་གཉིས་རྣམས་སུ་སྦྱར་བར་བྱའོ། །ཞེས་སོ། །ལེའུ་བཅོ་
ལྔ་པ་ལས། དེ་ལྟར་གཉིས་པོ་བདག་མེད་པར་གྲུབ་སྟེ་གང་གི་ཚེའང་རྒྱུ་དང་འབྲས་བུའི་ངེས་པར་དཔྱད་པ་མེད་དོ། །འབྲས་བུའི་དངོས་པོ་ལ་རྒྱུ་ཅི་ཡོད་ས་ལུ་ལ་སོགས་པའི་ས་བོན་ཀྱང་ངོ༌། །དེ་ལྟར་གལ་ཏེ་རྒྱུ་མེད་ན་འབྲས་བུ་ཇི་ལྟར་ཞེ་ན་དེ་ལ་
9-7-9a


སོགས་པ་རྒྱུའི་དངོས་པོ་ལ་རྣམ་པར་དཔྱོད་པ་མེད་དོ། །གལ་ཏེ་ཡང་རིགས་ལས་བྱུང་བ་ལ་རིགས་བསྟེན་པ་དེའི་ཚེ་ཇི་ལྟར་བཤད་པ་བཞིན་ནོ། །དེ་ལྟར་གང་གི་ཕྱིར་ཀའི་ཡི་གེ་གསུངས་པ་སྟེ་སངས་རྒྱས་དང་སངས་རྒྱས་ཀྱི་
ཡེ་ཤེས་ཀྱང་གང་ནའང་གནས་པ་མེད་དོ། །དེ་ཇི་ལྟར་བྱང་ཆུབ་ཅེ་ན་ཐམས་ཅད་མི་བདེན་པའི་སྐུ་ཐམས་ཅད་ཀྱི་མཚན་ཉིད་ཀྱི་ཕྱིར་བྱང་ཆུབ་ཅེས་བྱའོ། །དེའང་སྒོམ་པ་དང་ཡིད་ཀྱིས་གཟུང་བའི་དངོས་པོའང་མི་བདེན་པའོ། །དེའི་དངོས་བོའང་སྟོང་པ་
སྟེ་གོང་བུ་རྡུལ་ཕྲ་རབ་ཀྱི་དབྱེ་བས་རྣམ་པར་དཔྱད་པར་གྱུར་པས་བུམ་པ་དང་སྣམ་བུ་ལ་སོགས་པ་ཆོས་ཀྱི་སྐུའི་གཟུགས་སོ། །དེའང་བསྟན་པའི་རབ་ཏུ་བཅིངས་པས་ཆོས་ཀྱི་སྐུ་མངོན་པར་བརྗོད་པའི་འདུ་ཤེས་ཙམ་མོ། །དེ་ལྟར་དངོས་མེད་མངོན་སུམ་སྟོང་
པ་ཉིད་ཅེས་བྱ་བ་ནི་འདི་ནི་སྒྱུ་མ་དང་རྨི་ལམ་དང་དབང་པོའི་དྲ་བའི་རང་བཞིན་ཁམས་གསུམ་གྱི་དངོས་པོ་རབ་ཏུ་གསལ་བ་ཙམ་སྟོང་པ་མ་ཡིན་པ་གཟུང་བ་མེད་པས་དངོས་པོ་ཙམ་གྱི་རང་བཞིན་ཅན་ནོ། །ཞེས་སོ། །ལེའུ་ཉི་ཤུ་ལས། བདུན་ཅུ་རྩ་གཉིས་
ཞེས་བྱ་བ་ལ་སོགས་པ་སྟེ། ཀུན་ཏུ་བསྐྱོད་མའི་ལས་ཞེས་བྱ་བ་ནི་རྣམ་པ་སྣ་ཚོགས་པར་རང་གི་སེམས་གཡོ་བའི་ཕྱིར་དེའི་མི་གཡོ་བ་ཉིད་ཀྱིས་ངང་ལས་རྣམས་སུ་ལུང་གི་སྒོར་བསྟན་པ་ཉིད་ནི་ཀུན་བསྐྱོད་མ་ལྟ་བུའོ། །དེ་ཉིད་གསུངས་པ། ལྔ་
ཞེས་བྱ་བ་ལ་སོགས་པ་སྟེ། དང་པོ་ས་ནས་ནམ་མཁའི་མཐའ་ཟད་པ་རྣམ་པ་ལྔ་ནི་གང་ཉན་ཐོས་རྣམས་ཀྱི་ལྟ་བའོ། །དེ་བཞིན་དུ་འདུལ་བ་དང༌། ཆོས་མངོན་པ་དང༌། མདོ་སྡེ་དང་རྣམ་པ་གསུམ་སྟེ། གང་ཟག་གིའང་ལྔ་པའོ། །རང་སངས་རྒྱས་
9-7-9b


ཀྱི་ལྟ་བ་གཉིས་ཞེས་བྱ་བ་ནི་བསེ་རུའི་སྤྱོད་པ་དང༌། སྡེ་ན་སྤྱོད་པའོ། །རྣལ་འབྱོར་སྤྱོད་པའི་བདུན་ཞེས་བྱ་བ་ནི་བརྟགས་པ་དང༌། གཞན་གྱི་དབང་དང་ཡོངས་སུ་གྲུབ་པ་སྟེ། དེ་ལྟར་ཡང་རེ་རེ་ལ་རྣམ་པ་གཉིས་རབ་ཏུ་གསུངས་ཏེ། བདུན་པ་ནི་འདི་རྣམས་ཀྱི་བྱེད་
པས་ཏེ་བརྟགས་པ་ནི། མིག་དང་རྣ་བ་དག་གོ། གཞན་གྱི་དབང་ནི་སྣ་དང་ལྕེའོ། །ཡོངས་སུ་གྲུབ་པ་ནི་ལུས་དང་ཡིད་དག་སྟེ། ཚོར་བ་དང་ཉོན་མོངས་པ་ཅན་དེ་བཞིན་ནོ། །སྔོན་པོ་སེར་པོ་སོགས་སྣང་བ། །བཏགས་པའི་མིང་དུ་བརྗོད་པའོ། །དེ་ནི་རྒྱུན་དུ་
མ་མཐོང་སེམས། །འཁྲུལ་པ་དེ་ནི་དབང་པོ་རུ། །སྒྲ་ཡི་ཡུལ་དུ་གང་ཤེས་པ། །རྟོག་པ་ཡིས་ནི་བཏགས་པའོ། །དེ་ཀུན་སོང་བའི་བདག་ཉིད་དུ། །སེམས་ནི་ཀུན་ཏུ་འགྲོ་བའོ། །ཐམས་ཅན་རང་བཞིན་བདག་མེད་པར། །དྲི་ནི་ས་ལ་སོགས་དེ་བཞིན། །སྣོམ་
པར་གྱུར་བ་མ་བྱུང་བའི། །བདག་ཉིད་སེམས་ནི་གཞན་དབང་ངོ༌། །ཁམས་གསུམ་རོ་ནི་མྱང་བ་སྟེ། །ཆོས་སྐུ་བདག་ཉིད་ཆེན་པོ་འཛིན། །ལྕེ་ནི་ཀུན་གྱི་རང་བཞིན་ཁམས། །སེམས་ནི་ཡེ་ཤེས་དབང་ཅན་ནོ། །བདེ་བ་སྣ་ཚོགས་རབ་ཏུ་བཤད། །
རོ་མཉམ་ལྷ་རྫོགས་གཉིས་སུ་མེད། །ལུས་ཀྱི་དངོས་པོ་ཡང་དག་འཐོབ། །ཡོངས་གྲུབ་རྒྱུད་དུ་སྨྲ་བའོ། །ཡིད་ཅེས་བྱ་བ་ཐམས་ཅན་དུ། །འགྲོ་བའོ་གང་དུ་དེར་འགྲོ་བའོ། རྟོག་མེད་བདག་ཉིད་དེ་ཡང་ནི། །ཤེས་བྱའི་མཚོན་བྱ་སོགས་པས་མཚོན། །དེ་རྣམས་
སུ་ནི་འབྱིན་བྱེད་ཙམ། །ཉོན་མོངས་ཀྱང་ནི་ཀུན་ཕུན་ཚོགས། །ཆོས་དབྱིངས་ལ་སོགས་བདག་བདག་ཏུ། །རྟོག་པས་ཡིད་ཀྱི་བདག་ཉིད་དོ། །དེ་ལྟར་སེམས་རིག་པ་ཐམས་ཅད། །དེ་ནི་དངོས་མེད་བསམ་མིན་པའོ། །གཞི་ནི་ཀུན་གྱི་བདག་ཉིད་དེ། །བདུན་གྱིས་
9-7-10a


བདུན་རྣམས་ནུས་པའོ། །ཞེས་བྱ་བ་ནི་མདོར་བསྡུས་པའོ། །རྒྱ་ཆེན་བ་ནི་སྣ་ཚོགས་པའི་བསྟན་བཅོས་སུ་གོ་བར་བྱའོ། །བདག་གིས་ནི་གཞུང་རྒྱ་ཆེ་བའི་འཇིགས་པས་མ་བཤད་དོ། །དབུ་མཆོག་རྣམས་ཀྱིས་ནི་བརྒྱད་ཅེས་
བྱ་བ་ནི་བྱེ་བྲག་སྨྲ་བ་དང་རྣལ་འབྱོར་སྤྱོད་པ་པ་དང༌། མདོ་སྡེ་པ་དང༌། རྩ་བའི་དབུ་མ་པ་དང༌། ཕ་རོལ་ཏུ་ཕྱིན་པའི་ཐེག་པ་དང༌། དབུ་མ་ཆེན་པོ་དང༌། ལྟ་བ་ཐམས་ཅད་ཀྱི་བདག་ཉིད་དེ། ཕ་རོལ་ཏུ་ཕྱིན་པ་རྣམས་ཀྱི་བཅུ་དྲུག་ཅེས་བྱ་བ་ནི། སྟོང་པ་ཉིད་
བཅུ་དྲུག་གི་དབྱེ་བས་སོ། །གསང་སྔགས་ཐེག་པའི་སུམ་ཅུ་དྲུག་ཅེས་བྱ་བ་ནི་ཁམས་སུམ་ཅུ་རྩ་དྲུག་བྱང་ཆུབ་ཀྱི་ཕྱོགས་རྣམས་ཀྱིས་ཕྱེ་བས་སོ། །གཉིས་ཀྱི་བདུན་དང་བརྒྱད་དང་རྣམས་ཀྱི་ཞེས་བྱ་བ་ནི་རྣལ་འབྱོར་སྤྱོད་པ་རྣམས་ཀྱི་དད་དབུ་མ་རྣམས་ཀྱི་བདུན་དང་བརྒྱད་པོ་རྣམས་
ཀྱི་དེའི་ཚེ་ནང་དུ་སོན་པས་སོ། །དེ་ལྟར་ཐམས་ཅད་སྔགས་ཀྱི་ཐེག་པའོ་ཞེས་བྱ་བ་ནི་ལྟ་བ་བདུན་ཅུ་རྩ་གཉིས་པོ་རྣམས་ཏེ་དེ་དེ་བཞིན་དུ་གསུངས་ཏེ། རྣལ་འབྱོར་མ་དང་རྣལ་འབྱོར་གྱི་རྒྱུད་ཀྱི་དབྱེ་བ་རྣམས་སུའོ། །དེའི་ཕྱིར་དེ་ལྟར་བླ་མའི་དྲིན་གྱིས་ཤེས་
པར་བྱའོ། །འདིས་ཀྱང་སངས་རྒྱས་ཀྱི་བསྟན་པ་རིན་པོ་ཆེ་སྒོ་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག།    །།མངྒ་ལཾ།།
9-7-10b


empty page
9-8-1a


༄༅། །རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་ཀྱི་བཅོམ་ལྡན་འདས་འཁོར་ལོ་སྡོམ་པའི་སྒྲུབ་པའི་ཐབས་བདེ་ཆེན་གསལ་བ་ཞེས་བྱ་བ་བཞུགས་སོ།།
9-8-1b


༄༅། །རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་ཀྱི་བཅོམ་ལྡན་འདས་འཁོར་ལོ་སྡོམ་པའི་སྒྲུབ་པའི་ཐབས་བདེ་ཆེན་གསལ་བ་ཞེས་བྱ་བ། བླ་མ་དང་རྗེ་བཙུན་འཇམ་པའི་དབྱངས་ཀྱི་ཞབས་
ལ་གུས་པས་ཕྱག་འཚལ་ལོ། །དམ་ཚིག་རྡོ་རྗེ་གསུམ་དང་ཡེ་ཤེས་ཀྱི། །རིགས་མཆོག་ལྔ་ཡི་འཁོར་ལོའི་དཀྱིལ་འཁོར་བ། །བདེ་ཆེན་ལྷན་སྐྱེས་གཅིག་པུར་སྡོམ་མཛད་པ། །ཧེ་རུ་ཀ་དཔལ་ཡབ་ཡུམ་ལ་ཕྱག་འཚལ། །
ལམ་འདིར་བདེ་མཆོག་གིས་བགྲོད་དགོས་ཕྱིར། །རབ་མཛེས་ཨིནྡྲ་ནཱི་ལའི་རི་བོ་ལ། །ཡིད་འཛིན་མཚམས་སྤྲིན་གཞོན་ནུས་འཁྱུད་པ་བཞིན། །གཉིས་མེད་སྦྱར་བའི་དགའ་བས་རྣལ་རོལ་བ། །དཔལ་ལྡན་བླ་མ་བདེ་
མཆོག་ལ་བཏུད་ནས། །གྲུབ་པའི་དབང་ཕྱུག་ལཱུ་ཨི་བ་ཡི་ལུགས། །ལྭ་པའི་ན་བཟའ་ཅན་གྱིས་བཀྲལ་བ་བཞིན། །མ་ནོར་མ་འདྲེས་གསལ་བར་བཤད་པར་བྱ། །འདིར་རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་
ཀྱི་འཁོར་ལོ་བདེ་མཆོག་གི་སྒྲུབ་ཐབས་སྒོམ་པ་ལ་གཉིས། ལམ་སྒོམ་པའི་རིམ་པ་དངོས་དང༌། དེ་ལྟར་བསྒོམས་པའི་ཕན་ཡོན་ནོ། །དང་པོ་ལ་གསུམ། གང་གིས་སྒོམ་པའི་རྟེན། གང་དུ་སྒོམ་པའི་གནས། ཇི་
9-8-2a


ལྟར་དུ་སྒོམ་པའི་ཚུལ་ལོ། །དང་པོ་ནི། སྔགས་དང་ཕར་ཕྱིན་གྱི་ཐེག་པ་གཉིས་ཐུན་མོང་བའི་ལམ་གྱི་རིམ་པས་རྒྱུད་སྦྱངས་ཤིང༌། འདིའི་དཀྱིལ་འཁོར་དུ་དབང་བསྐུར་བ་ལེགས་པར་ཐོབ་
ལ། དེའི་དུས་སུ་ཁས་བླངས་པའི་དམ་ཚིག་དང་སྡོམ་པ་ཚུལ་བཞིན་དུ་བསྲུང་བ་ལ་བརྩོན་པའི་མཚན་ཉིད་དང་ལྡན་པས་བསྒོམ་པར་བྱའོ། །གཉིས་པ་ནི། རང་གི་ཁྱིམ་མ་མ་རི་སུལ་ལ་སོགས་པའི་གནས་ཡིད་དུ་འོང་
བ། རྣལ་འབྱོར་དང་རྗེས་སུ་མཐུན་པའི་གནས་ཀྱི་སྒྲུབ་ཁང་བདུད་རྩི་ལྔས་བྱུགས་ཤིང༌། མེ་ཏོག་གཅལ་དུ་བཀྲམ་པར་བཅོམ་ལྡན་འདས་ཀྱི་དྲིས་སྐུ་དགྲམ་པ་དང༌། རྡོར་དྲིལ་ལ་སོགས་པ་ཚོགས་པའི་གནས་སུ་
བསྒོམ་མོ། །གསུམ་པ་ལ་གཉིས། ཐུན་གྱི་ངོ་བོ་ལ་ཇི་ལྟར་བྱ་བ་དང༌། ཐུན་སྔ་ཕྱིའི་བར་དང་ཐུན་གཞན་ཇི་ལྟར་བྱ་བའོ། །དང་པོ་ལ་གསུམ། ཐུན་གྱི་འགོར་ཇི་ལྟར་བྱ་བ་དང༌། ཐུན་གྱི་དངོས་གཞི་ལ་ཇི་ལྟར་བྱ་
བ་དང༌། ཐུན་གྱི་མཇུག་ཏུ་ཇི་ལྟར་བྱ་བའོ། །དང་པོ་ལ་གཉིས་སྔོན་དུ་བྱ་བའི་རིམ་པ་དང༌། རྣལ་འབྱོར་གྱི་ཡན་ལག་རྣམས་སྒྲུབ་ཚུལ་ལོ། །དང་པོ་ནི། སྐྲ་བཅིངས་པ་ཅན་ཡིན་ན་སྐྲ་གྲོལ་ཞིང་ཁ་ལྷོར་བལྟས་ཏེ། 
9-8-2b


རོའི་གདན་དངོས་སམ། དེ་ལ་འདུག་པར་མོས་ནས། སྟན་བདེ་བ་ལ་རྡོ་རྗེའི་སྐྱིལ་ཀྲུང་གིས་འདུག་ཅིར། ལག་པ་གཉིས་མཉམ་གཞག་གི་ཕྱག་རྒྱ་དང༌། མིག་སྣ་རྩེར་དབབ་ཅིང༌། སོ་ཅུང་ཟད་མ་འབྱར་བ་དང༌། ལུས་མི་གཡོ་བར་གནས་པར་བྱས་ལ། བདུད་
རྩི་རིལ་བུ་ཁར་གཞུག་པའམ། དེ་མེད་ན་ནང་མཆོད་ལྕེ་ཐོག་ཏུ་བཞག་སྟེ་ཁ་དག་པར་བྱའོ། །དེ་ནས་འཇིག་རྟེན་པའི་གཏོར་མ་སྔོན་དུ་བྱས་ལ། སྒྲུབ་པའི་བར་ཆད་ཞི་བའི་འཕྲིན་ལས་བཅོལ། ཆུ་དང་ཉེར་སྤྱོད་སོགས་ཀྱི་མཆོད་རྫས་གཡོན་སྐོར་གྱི་
བཀོད་པ་རྣམས། བསང་བ་དང༌། སྦྱང་བ་དང༌། བསྐྱེད་པ་དང༌། བྱིན་གྱིས་བརླབས་ལ། སྐྱབས་འགྲོ་འདི་རྡོ་རྗེ་མཁའ་འགྲོ་དང༌། གདན་བཞི་གཉིས་ཀར་བྱུང་ཡང་གདན་བཞིའི་འགྱུར་བདེ་བ་ལྟར་ཡིན་ནོ། །སངས་རྒྱས་ཆོས་དང་དགེ་འདུན་ལ། །རྟག་ཏུ་བདག་ནི་སྐྱབས་སུ་མཆི། །ཐེག་པ་
གསུམ་པོ་ཐམས་ཅད་དང༌། །རྣལ་འབྱོར་གསང་སྔགས་མཁའ་འགྲོ་མ། །དཔའ་བོ་དཔའ་མོ་དབང་ལྷ་མོ། །བྱང་ཆུབ་སེམས་དཔའ་བདག་ཉིད་ཆེ། །ཁྱད་པར་དུ་ཡང་སློབ་དཔོན་ལ། །རྟག་ཏུ་སྐྱབས་སུ་མཆི་བར་བགྱི། །སེམས་བསྐྱེད་འདི་མངོན་བརྗོད་འགྱུར་སྙིང་ཁ་ཅིག་ལས་
འབྱུང༌། སེམས་ཅན་ཀུན་གྱི་དོན་གྱི་ཕྱིར། །བདག་ནི་ཧེ་རུ་ཀར་གྱུར་ནས། །སེམས་ཅན་ཐམས་ཅད་ཧེ་རུ་ཀའི། །གོ་འཕང་མཆོག་ལ་དགོད་པར་བགྱི། །ཞེས་སྐྱབས་སུ་འགྲོ་ཞིང་སེམས་བསྐྱེད་དོ། །གཉིས་པ་ལ་བཞི། སྒོ་གསུམ་དག་པར་བྱས་ནས་
ཚད་མེད་སྒོམ་པ་དང༌། ཕུང་ཁམས་སྐྱེ་མཆེད་བྱིན་གྱིས་བརླབ་པ་དང༌། འགལ་རྐྱེན་འགོག་པའི་སྲུང་འཁོར་བསྒོམ་པ་དང༌། མཐུན་རྐྱེན་བསྟེན་པའི་ཚོགས་བསག་པའོ། །དང་པོ་ནི། གང་ཏུ་ཤྲཱི་ཧེ་རུ་ཀ་ཞེས་བརྗོད་ལ། དེའི་དོན་ཡིད་ལ་བྱ་སྟེ། ཧེ་ནི་ཀུན་
9-8-3a


གྱི་འབྱུང་གནས་སུ་གྱུར་པའི་སེམས་ཏེ་རྒྱུའི་བདག་ཉིད་དུ་བརྟག་པར་བྱ་བས་སྟོང་པའི་ཆོས་ཀྱི་བདག་མེད་པ་དང༌། རུ་ནི་གང་ཟག་གི་བདག་ཏུ་འཛིན་པའི་རྣམ་རྟོག་གི་དྲ་བས་བཀོད་པའི་བདག་དང་བྲལ་བའི་གང་ཟག་གི་བདག་
མེད་པ་དང༌། ཀ་ནི་དེ་ཁོ་ན་ཉིད་ཀྱི་ཡུལ་ཡུལ་ཅན་གཉིས་མི་མཐུན་པར་སོ་སོར་གཉིས་སུ་མི་གནས་པ་དང༌། ཤྲཱི་ནི་ཡུལ་སྟོང་པ་ཉིད་ཇི་འདྲ་བ་དེ་བཞིན་དུ་རྗེས་སུ་ཞུགས་པའི་གཉིས་སུ་མེད་པའི་ཡེ་ཤེས་ཨེ་བཾ་གྱི་དོན་ནོ་སྙམ་དུ་བསམ་པ་ནི་ཡིད་དག་
པར་བྱེད་པའོ། །སྟོང་པའི་ངང་ལས་སྐད་ཅིག་གིས་རང་ཉིད་ཧེ་རུ་ཀ་སྔོན་པོ། ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིན་བུ་འཛིན་པ། གཡས་བརྐྱང་གིས་བཞུགས་པ་ལ། ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་ཀྱིས་རྡོ་རྗེས་དང་ཐོད་པ་
འཛིན་པས་འཁྱུད་པར་བསྐྱེད་ལ་སེམས་ཅན་ཐམས་ཅན་ལ་ཕན་བདེའི་སེམས་ཀྱི། ཤྲཱི་ཧེ་རུ་ཀོ་྅ཧཾ་ཞེས་ལན་གསུམ་བརྗོད་དེ། སྐུའི་ང་རྒྱལ་བ་ནི་ལུས་དག་པར་བྱེད་པའོ། །དེ་ནས་མགོ་བོར་ཨོཾ་དང་མཐར་ཧཱུཾ་ཧཱུཾ་ཕཊ་དང་ལྡན་པའི་ཨཱ་ལི། ཨོཾ་ཨ་
ཨཱ། ཨི་ཨཱི། ཨུ་ཨཱུ། རྀ་རྀ། ལྀ་ལཱྀ། ཨེ་ཨཻ། ཨོ་ཨཽ༌། ཨཾ་ཨཿ ཀཱ་ལིའི་ཕྲེང་བ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ་ཧཱུཾ་ཧཱུཾ་ཕཊ། ལན་གསུམ་བརྗོད་པས། རང་གི་ལྟེ་བའི་ཕྱོགས་སུ་སྔགས་ཕྲེང་འོད་ཟེར་ལྔ་དང་
བཅས་པ་གཡོན་སྐོར་གྱི་ལན་གསུམ་དུ་བསྐོར་ནས་གནས་པ་ལས། འཁོར་ལོ་གསུམ་གྱི་ལྷ་ཚོགས་འཕྲོས་པ་སྣ་བུག་གཡས་ནས་འཐོན་ཏེ། ཕྱིར་འཕྲོས་པས་བགེགས་ཐམས་ཅད་བསྐྲད་དེ། སླར་བྱོན་རང་གི་སྣ་བུག་གཡོན་པ་ནས་ཞུགས་ཏེ། 
9-8-3b


ལྟེ་བའི་སྔགས་ཕྲེང་ལ་ཐིམ་པར་བསམ་པ་ནི་ངག་དག་པར་བྱེད་པའོ། །བྱང་ཆུབ་ཏུ་སེམས་བསྐྱེད་པ་ནི་དགེ་རྩ་ཐམས་ཅད་འཕེལ་བར་བྱེད་པས། དེ་ཚད་མེད་ཀྱི་སྒོ་ནས་སྒོམ་པར་བྱེད་པ་ལ་གཉིས་ལས། དབང་པོ་རྣོན་པོས་བྱམས་སོགས་བསྡུས་ཏེ་སྒོམ་པ་
ནི། བདག་གིས་སེམས་ཅན་ཐམས་ཅད་འཁོར་བའི་སྡུག་བསྔལ་ལས་བཏོན་ཏེ། དེ་བཞིན་ཉིད་དང་རོ་གཅིག་པའི་བདེ་བ་ཆེན་པོ་ལ་དགོད་པར་བྱའོ། །ཞེས་པའམ། སོ་སོར་ཕྱེ་སྟེ་སྒོམ་ན། སེམས་ཅན་ཐམས་ཅད་སྡུག་བསྔལ་ཐམས་ཅད་དང་
བྲལ་བ་དང༌། བདེ་བ་ཐམས་ཅད་དང་ལྡན་པ་དང༌། ཐོབ་ཟིན་པའི་བདེ་བ་བརྟན་པ་དང༌། དེ་བཞིན་ཉིད་ལ་རོ་གཅིག་ཏུ་གནས་པར་གྱུར་ཅིག་སྙམ་དུ་བསྒོམ་མོ། །གཉིས་པ་ནི། ཕུང་ཁམས་སྐྱེ་མཆེད་དག་པར་བྱས་པས་ཀུན་ནས་བསླང་པའི་མཆོད་པ་ལ་སོགས་པ་ནི་
མྱུར་དུ་བྱང་ཆུབ་འགྲུབ་པར་བྱེད་པས་འདི་རྣམས་བསྒོམ་པར་ལཱུ་ཨི་པའི་འགྲེལ་པ་རྣམས་ནས་བཤད། གཟུགས་ཕུང་གི་གཙོ་བོའི་གནས་དཔྲལ་བའི་དབུས་སུ། བྲུཾ་དཀར་པོ་ཡོངས་སུ་གྱུར་པ་ལས་རྣམ་སྣང་དཀར་པོ་ཕྱག་གཡས་འཁོར་ལོ་འཕྱར་ཞིང༌། གཡོན་
འགྱིང་བ་དང་བཅས་པས་དྲིལ་བུ་དཀུར་བརྟེན་པ། ཚོར་ཕུང་གི་གནས་ལྟེ་བར་ཨཾ་སེར་པོ་ལས་རྡོ་རྗེ་ཉི་མ་སེར་པོ་གཡས་རིན་པོ་ཆེ། འདུ་ཤེས་ཀྱི་ཕུང་པོའི་གནས་མགྲིན་པར་ཧྲཱིཿ དམར་པོ་ལས་པདྨ་གར་གྱི་དབང་ཕྱུག་དམར་པོ་གཡས་
པདྨ་དམར་པོ། འདུ་བྱེད་ཀྱི་ཕུང་པོའི་གནས་རྐང་པ་གཉིས་ཀྱི་ལོང་བུའི་འོག་ཏུ་ཧོ་ལྗང་གུ་ལས་རྡོ་རྗེ་རྒྱལ་པོ་ལྗང་གུ་གཡས་སྣ་ཚོགས་རྡོ་རྗེ། དེ་གསུམ་འཕྱར་ནས་འཛིན་པ། གཡོན་གསུམ་འགྱིང་བ་དང་བཅས་པས་དྲིལ་བུ་ཐུགས་ཀར་
9-8-4a


འཛིན་པའོ། །པྲཛྙཱ་རཀྵི་ཏའི་འགྲེལ་བའི་འགྱུར་གཅིག་ལས། རིན་འབྱུང་སྣང་མཐར་དོན་འགྲུབ་གསུམ་གྱི་གཡས་གསུམ་གྱིས་ཕྱག་མཚན་དཀུར་འཛིན་ཅིང༌། གཡོན་གསུམ་ཐུགས་ཀར་ཕྱགས་པ་དང༌། ཧེ་རུ་ཀའི་གཡོན་ཏིང་འཛིན་གྱི་ཕྱག་རྒྱ་ཅན་དུ་བཤད་པ་ནི། དེའི་འགྲེལ་པ་བརྔོག་གིས་
བསྒྱུར་བ་དང༌། སྒྲུབ་ཐབས་ཀྱི་འགྲེལ་པ་ལྭ་བ་པས་མཛད་པ་དང༌། ཁྱད་པར་གསལ་བྱེད་སོགས་དང༌། བཤད་རྒྱུད་གང་དང་ཡང་མི་མཐུན་པས་མི་ལེགས་པའོ། །རྣམ་ཤེས་ཀྱི་ཕུང་པོའི་གནས་སྙིང་ཁར་ཧཱུཾ་དཀར་པོ་ལས། རྡོ་རྗེ་སེམས་དཔའ་དཀར་པོ། གཡས་ཐུགས་རྡོ་རྗེ། སྤྱི་
གཙུག་ཏུ་ཧི་ནག་པོ་ལས་ཧེ་རུ་ཀ་ནག་པོ་གཡས་ས་གནོན་གྱི་ཕྱག་རྒྱས་རྡོ་རྗེ་འཛིན་ཞིང༌། གཡོན་གཉིས་འགྱིང་བ་དང་བཅས་པས་དྲིལ་བུ་དཀུར་བརྟེན་པའོ། །དེ་དྲུག་ནི་ཕུང་པོ་ལྔ་དང༌། དེ་ལྔ་གའི་དེ་བཞིན་ཉིད་བྱིན་གྱིས་རློབ་པའོ། །ཐམས་ཅད་
ཀྱང་ཞལ་གཅིག་པ་ཕྱག་གཉིས་པ་སྤྱན་གསུམ་པ་རལ་པའི་ཅོད་པན་ཅན། ཕྱག་རྒྱ་ལྔས་བརྒྱན་པ། གཡས་བརྐྱང་གིས་བཞུགས་པའོ། །མངོན་བརྗོད་ལས། དཀྱིལ་འཁོར་དྲུག་གི་དབུས་སུ། འདི་དྲུག་རེ་རེས་གཙོ་བོ་བྱེད་པའི་སྐབས་སུ་པདྨ་དང༌། ཟླ་ཉིའི་དབུས་སུ་རྡོ་རྗེའི་སྐྱིལ་མོ་
ཀྲུང་གིས་བཞུགས་པ་དང༌། ཕྱག་རྒྱ་དྲུག་གིས་བརྒྱན་པར་བཤད་ཀྱང་འདིར་ནི་འགྲེལ་པ་གསུམ་ནས་འབྱུང་བ་བཞིན་བཀོད་དོ། །མིག་གཉིས་སུ་ཨོཾ་དཀར་པོ་ཡོངས་སུ་གྱུར་པ་ལས་གཏི་མུག་རྡོ་རྗེ་དཀར་པོ་གཡས་ཀྱིས་འཁོར་ལོ་འཕྱར་བ། རྣ་བ་གཉིས་སུ་ཧཱུཾ་ནག་པོ་ལས་ཞེ་
སྡང་རྡོ་རྗེ་ནག་པོ། གཡས་ཀྱིས་ཐུགས་ཀར་རྡོ་རྗེ་དང༌། གཡོན་གཉིས་ཀྱིས་འགྱིང་བ་དང་བཅས་པས་དྲིལ་བུ་དཀུར་བརྟེན་པའོ། །སྣ་བུག་གཉིས་སུ་ཏྲཱཾ་སེར་པོ་ལས་སེར་སྣ་རྡོ་རྗེ་སེར་པོ་གཡས་རིན་པོ་ཆེ། ཁ་སྟེ་ལྕེའི་རྩ་བར་ཨཾ་དམར་པོ་ལས་འདོད་
9-8-4b


ཆགས་རྡོ་རྗེ་དམར་པོ་གཡས་པདྨ་དམར་པོ། རེག་བྱེད་ལུས་ཀྱི་དཔྲལ་བར་ཁཾ་ལྗང་གུ་ལས་ཕྲག་དོག་རྡོ་རྗེ་ལྗང་གུ། གཡས་སྣ་ཚོགས་རྡོ་རྗེ། དེ་གསུམ་རོལ་པ་དང་བཅས་པས་འཕྱར་ནས་འཛིན་པ། གཡོན་གསུམ་རོལ་པ་དང་བཅས་པས་དྲིལ་བུ་ཐུགས་
ཀར་འཛིན་པའོ། །སྐྱེ་མཆེད་ཐམས་ཅད་ཀྱི་རྗེས་སུ་འགྲོ་བའི་ཡིད་ཀྱི་སྐྱེ་མཆེད་ཀྱི་གནས་སྙིང་ཁར་ཧཾ་དཀར་པོ་ལས། དབང་ཕྱུག་རྡོ་རྗེ་དཀར་པོ་གཡས་རྡོ་རྗེ་ཐུགས་ཀར་འཛིན་ཅིང༌། གཡོན་འགྱིང་བ་དང་བཅས་པས་དྲིལ་བུ་དཀུར་བརྟེན་པའོ། །ཐམས་
ཅད་ཀྱང་ཞལ་གཅིག་པ་ཕྱག་གཉིས་པ་སྤྱན་གསུམ་པ། རལ་པའི་ཅོད་པན་ཅན། ཕྱག་རྒྱ་ལྔས་བརྒྱན་པ། གཡས་བརྐྱང་གིས་བཞུགས་པའོ། །ཕུང་པོ་དང་སྐྱེ་མཆེད་ཀྱི་ལྷ་ཁ་ཅིག་ལ་རེ་རེ་ལ་གནས་ཀྱི་སྒོ་ནས་གཉིས་གཉིས་བྱུང་ཡང་ངོ་བོའི་སྒོ་
ནས་གཅིག་ཏུ་བགྲང་བས་མང་བའི་སྐྱོན་མེད་དོ། །དེ་དྲུག་ནི་སྐྱེ་མཆེད་དྲུག་བྱིན་གྱིས་རློབ་པའོ། །ལྟེ་བ་ས་ལ་ལཾ་སེར་བོ་ལས་ལྟུང་བྱེད་མ་སེར་མོ། །སྙིང་ཁ་ཆུ་ལ་མཾ་ནག་པོ་ལས་གསོད་བྱེད་མ་ནག་མོ། མགྲིན་པ་མེ་ལ་བཾ་དམར་པོ་ལས་འགུགས་བྱེད་
མ་དམར་མོ། དཔྲལ་བ་རླུང་ལ་ཏཾ་ལྗང་གུ་ལས་གར་གྱི་དབང་ཕྱུག་མ་ལྗང་གུ། དེ་བཞི་ཞལ་གཅིག་ཕྱག་བཞི་མ། གཡས་ཀྱི་དང་པོ་བཞིན་གྲི་གུག་རེ་དང༌། གཉིས་པ་བཞིན་རིམ་པ་བཞིན་དུ་འཁོར་ལོ་རྡོ་རྗེ་པདྨ་རལ་གྲི། གཡོན་གྱི་དང་པོ་བཞིན་
ཐོད་པ་རེ་དང༌། གཉིས་པ་བཞིན་ཁ་ཊྭཱཾ་ག་རེ་འཛིན་པ། སྤྱན་གསུམ་པ་སྐྲ་གྲོལ་བ། གཅེར་བུ་ཕྱག་རྒྱ་ལྔས་བརྒྱན་པ། གཡས་བརྐྱང་གིས་བཞུགས་པའོ། །གསང་གནས་ནམ་མཁའི་ཁམས་ལ་ཁཾ་དུད་ཀ་ལས་པདྨའི་དྲ་བ་ཅན་དུད་ཀ། རྩ་ཞལ་
9-8-5a


དུད་ཀ། གཡས་དཀར་གཡོན་དམར་བའི་ཞལ་གསུམ་ཕྱག་དྲུག་གི་གཡས་གསུམ་གྱིས་གྲི་གུག །ཚངས་མགོ། ལྕགས་ཀྱུ། གཡོན་གསུམ་གྱིས་ཐོད་པ། ཁ་ཊྭཱཾ་ག ། ཞགས་པ་འཛིན་པའོ། །ཁྱད་པར་ལྷག་
མ་སྔ་མ་རྣམས་དང་འདྲ་བ་སྟེ། འདི་ལྔ་ཁམས་ལྔ་བྱིན་གྱིས་རློབ་པའོ། །ཀུན་སྤྱོད་ལས་ལྷ་འདི་རྣམས་ལ་ང་རྒྱལ་བྱ་བར་གསུངས་པས། ལྷ་འདི་རྣམས་སྒོམ་པ་ན་སྒྲུབ་པ་པོས་ལྷ་དེ་དང་དེའི་ང་རྒྱལ་རེ་བྱ་དགོས་ཀྱི། ལུས་ཀྱི་གནས་རྣམས་སུ་བཀོད་
པ་ཙམ་གྱིས་མི་ཆོག་གོ། དེ་ལྟར་ལྷ་བཅུ་བདུན་པོ་བསྐྱེད་པའི་མཐར། ཨོཾ་པྲ་ཀྲྀ་ཏ་པར་རི་ཤུདྡྷཿ སརྦ་དྷརྨྨཱཿ པྲ་ཀྲྀ་ཏ་པ་རི་ཤུདྡྷོ་྅ཧཾ། ཞེས་བརྗོད་ལ་རང་བཞིན་གྱིས་ཡོངས་སུ་དག་པའི་ཆོས་ཐམས་ཅད་ཀྱི་རང་བཞིན་དག་པ་ནི་ངའོ་སྙམ་དུ་ང་རྒྱལ་བརྟན་
པར་བཟུང་ངོ༌། །གསུམ་པ་ལ་གཉིས། ར་བ་སོགས་ཀྱིས་བསྲུང་བ་དང༌། བགེགས་ལ་ཕུར་བུས་གདབ་པ་སོགས་སོ། །དང་པོ་ནི། རང་ལྷ་བཅུ་བདུན་ལུས་ལ་གནས་པའི་ཧེ་རུ་ཀའི་ང་རྒྱལ་གྱིས། ལག་པ་གཡོན་པའི་མཐེབ་མཛུབ་ཀྱིས་ཕྱོགས་རེར་
སེ་གོལ་གཏོག་པ་སྔོན་དུ་འགྲོ་བས། ཤར་དུ། ཨོཾ་སུཾ་བྷ་ནི་སུམ་བྷ་ཧུཾ་ཧཱུཾ་ཕཊ། ཅེས་བརྗོད་པས་དེར་སྔགས་དེ་ནག་པོ་དང༌། བྱང་དུ་ཨོཾ་གྲྀ་ཧྞ་ཧུཾ་ཧཱུཾ་ཕཊ་ཅེས་པས་དེར་སྔགས་དེ་ལྗང་གུ་དང༌། ནུབ་ཏུ་ཨོཾ་གྲྀཧྞཱ་པ་ཡ་ཧུཾ་ཧཱུཾ་ཕཊ། ཅེས་
པས་དེར་སྔགས་དེ་དམར་པོ་དང༌། ལྷོར་ཨོཾ་ཨཱ་ན་ཡ་ཧོ་བྷ་ག་ཝན་བཛྲ་ཧུཾ་ཧཱུཾ་ཕཊ་ཅེས་པས་དེར་སྔགས་དེ་ཁ་དོག་སེར་པོ་རྣམས་དགོད། དེ་ནས་སྔགས་དེ་བཞི་ལས་རང་རང་གི་ཁ་དོག་ཅན་གྱི་འོད་ཟེར་འཕྲོས་པས། སྟེང་ཚངས་པའི་འཇིག་རྟེན་ནས་
9-8-5b


འོག་གསེར་གྱིས་གཞི་ལ་ཐུག་པར་ཁྱབ་པའི་འོད་ཟེར་འབར་བའི་གཟུགས་ཆེན་པོ་རྣམས་ཕྱོགས་བཞིར་དགོད་དོ། །དེ་ནས་སྔགས་འོད་ཟེར་དང་བཅས་པ་ཡོངས་སུ་གྱུར་པ་ལས། རང་ཕྱོགས་ཀྱི་ཁ་དོག་ཅན་གྱི་སྣ་ཚོགས་རྡོ་རྗེའི་ར་བ་གྲུ་བཞི་པ། རྒྱར་ཇི་
ཙམ་འདོད་པ་དང༌། མཐོ་ཁྱད་ཚངས་པའི་འཇིག་རྟེན་ནས་གསེར་གྱི་ས་གཞི་ལ་ཐུག་པའི་བར་དུ་ཁྱད་པར་བསྒོམ་མོ། །ར་བ་གྲུབ་པ་དང་དུས་མཉམ་དུ་ཧཱུཾ་ལས་བྱུང་བའི་སྣ་ཚོགས་རྡོ་རྗེ་ཧཱུཾ་གིས་མཚན་པའི་ས་བོན་གྱིས་འོད་ཟེར་ལས། གསེར་གྱི་
ས་གཞི་ལ་ཐུག་པའི་འོག་གི་ས་གཞི་སྣ་ཚོགས་རྡོ་རྗེའི་རང་བཞིན་དུ་བསམ་མོ། །སྣ་ཚོགས་རྡོ་རྗེའི་ས་བོན་གྱི་འོད་ཟེར་ལས་ཕྱི་རོལ་ཏུ་སྟེང་དང་ལོགས་ཀུན་ཏུ་ཁྱད་པར་རྡོ་རྗེ་རྩེ་ལྔ་བའི་རྣམ་པ་ཅན་གྱི་མདའི་དྲ་བ་དང༌། དེའི་འོག་ཏུ་རྡོ་རྗེའི་གུར་དང༌། གུར་གྱི་
འོག་ར་བའི་སྟེང་དུ་རྡོ་རྗེའི་བླ་བྲེ་རྣམས་བར་མཚམས་མེད་པར་དུམ་བུ་གཅིག་ཏུ་གྱུར་པ་དང༌། དེའི་ཕྱིར་རོལ་ཏུ་རྡོ་རྗེའི་མ་འཇིག་དུས་ཀྱི་མེ་ལྟ་བུས་བསྐོར་བསམས་ལ། ཨོཾ་མེ་དི་ནི་བཛྲ་བྷ་བ་བཛྲ་བནྡྷ་ཧཱུཾ། ཨོཾ་བཛྲ་པྲ་ཀཱ་ར་ཧཱུཾ་བཾ་ཧཱུཾ། ཨོཾ་བཛྲ་པ་ཉྩ་ར་ཧཱུཾ་པཾ་
ཧཱུཾ། ཨོཾ་བཛྲ་བི་ཏཱ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛཱ་ལ་ཏྲཱཾ་ཤཾ་ཏྲཱཾ། ཨོཾ་བཛྲ་ཛྭཱ་ལ་ཨ་ན་ལཱ་རྐ་ཧཱུཾ་ཧཱུཾ་ཧཱུཾ་ཞེས་པས་འོག་གཞི་ནས་མེ་དཔུང་གི་བར་རྣམས་རིམ་པ་བཞིན་དུ་བྱིན་གྱིས་བརླབ་བོ། །གཉིས་པ་ལ་གཉིས། ཁྲོ་མོ་བསྐྱེད་ནས་བགགས་དགུ་པ་དང༌། བཀུག་
པའི་བགེགས་ལ་ཕུར་བུས་གདབ་པ་སོགས་སོ། །དང་པོ་ནི། གཡོན་པའི་མཐེབ་མཛུབ་ཀྱིས་སེ་གོལ་གཏོག་ཅིང༌། སྔར་བཞིན་སྔགས་དང་པོ་བརྗོད་དེ་ཤར་དང་སྟེང་དུ་བཀོད་པ་ཡོངས་སུ་གྱུར་པ་ལས། ཤར་དང་སྟེང་དུ་ཁྭ་གདོང་མ་ནག་མོ་གཉིས་བསྐྱེད། 
9-8-6a


དེ་བཞིན་དུ་སྦྱར་ཏེ་སྔགས་གཉིས་པ་ལས་བྱང་དུ་འུག་གདོང་མ་ལྗང་གུ། སྔགས་གསུམ་པ་ལས་ནུབ་དང་འོག་ཏུ་ཁྱི་གདོང་མ་དམར་མོ་གཉིས་དང༌། སྔགས་བཞི་པ་ལས་ལྷོར་ཕག་གདོང་མ་སེར་མོ་བསྐྱེད། དེ་ནས་སེ་གོལ་སྔར་བཞིན་
གཏོག་ཅིང༌། སྔགས་དང་པོ་ནག་པོ་དང༌། བཞི་པ་སེར་པོ་གཉིས་ཤར་ལྷོར་བཀོད་པའི་སྔགས་འོད་ཟེར་དང་བཅས་པ་གཉིས་འདྲེས་དེ་ཡོངས་སུ་གྱུར་པ་ལས། གཤིན་རྗེ་བརྟན་མ་གཡས་སྔོ་གཡོན་སེར་བ་དང༌། དེ་བཞིན་དུ་སྔགས་བཞི་པ་དང་གསུམ་པ་དམར་པོ་
ལྷོ་ནུབ་ཏུ་དཀོད་པ་ལས། གཤིན་རྗེ་ཕོ་ཉ་མོ་གཡས་སེར་གཡོན་དམར་བ་དང༌། སྔགས་གསུམ་པ་དང་གཉིས་པ་ལྗང་གུ་གཉིས་ནུབ་བྱང་དུ་བཀོད་པ་ལས། གཤིན་རྗེ་མཆེ་བ་མ་གཡས་དམར་གཡོན་ལྗང་བ་དང༌། དེ་ནས་སྔགས་གཉིས་པ་དང་དང་པོ་གཉིས་
བྱང་ཤར་དུ་བཀོད་པ་ལས། གཤིན་རྗེ་འཇོམས་མ་གཡས་ལྗང་གཡོན་སྔོ་བ་བསྐྱེད་དེ། ཐམས་ཅད་ཀྱང་ཞལ་གཅིག་པ་ཕྱག་གཉིས་པ། ལྟེ་བ་མན་ཆད་ཕུར་བུའི་རྣམ་པ་ཅན། གཡས་ཀྱིས་རྡོ་རྗེ་ཐོ་བ་དང༌། གཡོན་གྱིས་རང་འདྲའི་ཕུར་བུ་བསྣམས་པའོ། །དེ་
ནས་དེ་རྣམས་ཀྱིས་རང་འདྲ་དུ་མ་ཕྱོགས་བཅུར་སྤྲོས་ནས། ཕྱོགས་བཅུའི་བགེགས་བཀུག་སྟེ། རྡོ་རྗེ་ར་བའི་ཕྱི་རོལ་དང་ཉེ་བར་ཧཱུཾ་རིང་པོ་བརྗོད་པ་དང༌། ཧཱུཾ་རིང་པོ་ནག་པོ་ལས་གྲུབ་པའི་ཁྲོན་པ་བཅུར། སོ་སོའི་བགེགས་རྣམས་བཅུག་པར་བསམ་མོ། །གཉིས་པ་
ནི། དེ་ནས་ཧེ་རུ་ཀ་ཕྱག་གཉིས་པའི་ང་རྒྱལ་གྱིས། ཁྲོ་མོ་རྣམས་ལ་ཕུར་བུ་ཚུགས་ཤིག་པར་བཀའ་བསྒོ་བའི་ཚུལ་གྱིས། ཤར་ནས་ཕྱོགས་གཡོན་སྐོར་དང༌། མེ་ནས་མཚམས་གཡས་སྐོར་དང༌། སྟེང་འོག་ཏུ་དམིགས་ཏེ། ཨོཾ་གྷ་གྷ། གྷ་ཏ་ཡ་གྷ་ཏ་ཡ། 
9-8-6b


སརྦ་དུ་ཥྚཱ་ན་ཧཱུཾ་ཧཱུཾ་ཕཊ། ཀཱི་ལཱ་ཡ་ཀཱི་ལཱ་ཡ། སརྦ་པཱ་པཾ་ཧཱུཾ་ཧཱུཾ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལཱ་ཡ། བཛྲ་དྷ་ར་ཨཱ་ཛྙ་པ་ཡི་ཏི། སརྦ་དཀུ་དྷཱི། ཥཱ་ན་བི་གྷ་ན་ཀཱ་ཡ་ཝཱ་ཀ་ཙི་ཏྟ་བཛྲ་ཀཱི་ལཱ་ཡ་ཧཱུཾ་ཕཊ། ཅེས་རེ་རེ་ནས་བརྗོད་ལ། བགེགས་རྣམས་ཀྱི་སྤྱི་བོར་ཕུར་བུ་གཟུག །དེ་ནས་ཨོཾ་
བཛྲ་མུདྒ་ར་བཛྲ་ཀཱི་ལཱ་ཡ་ཨ་ཀོ་ཊཱ་ཡ་ཧཱུཾ་ཧཱུཾ་ཕཊ་ཕཊ། ཅེས་བརྡུང་པའི་སྔགས་ཀྱང་རིམ་པ་སྔར་བཞིན་དུ་རེ་རེ་ནས་བརྗོད་པས། ཁྲོ་མོ་རྣམས་ཀྱིས་ཕྱག་གཡས་ཀྱི་ཐོ་བས་བརྡུངས་པས། སྤྱི་གཙུག་ནས་རྐང་མཐིལ་གྱི་བར་དུ་སོན་པར་ཕུར་བུས་བཏབ་པས། 
བགེགས་ཐམས་ཅད་བདེ་སྟོང་དབྱེར་མེད་ཀྱི་ངོ་བོར་རོ་གཅིག་ཏུ་གྱུར་པར་བསམ་མོ། །དེ་ནས་ཁྭ་གདོང་མ་ལ་སོགས་པས་བགེགས་ལྷག་མ་རྣམས་རྒྱང་རིང་དུ་བསྐྲད་ནས། རྡོ་རྗེའི་ར་བ་གྲུ་བཞི་པ་ལ་ཐིམ་པས། ཆུ་ལ་ཆུ་བརྡབས་པས་གཟེགས་མ་ཕྱིར་འཐོར་བ་
བཞིན་དུ། འོད་ཟེར་ཕྱིར་འཕྲོས་པ་ལས་རྡོ་རྗེ་དང་པདྨ་དང་འཁོར་ལོའི་ར་བ་ཟླུམ་པོ་གསུམ་བར་མཚམས་མེད་པར་དུམ་བུ་གཅིག་ཏུ་གྱུར་པར་བསྒོམས་ལ། མཚམས་བཅིངས༌། དེའི་ཕྱི་རོལ་ཏུ་རྡོ་རྗེའི་མེ་གཡོན་སྐོར་དུ་འཁྱིལ་ཞིང་འབར་བས། སྟེང་དང་ལོགས་ཀུན་
ཏུ་ཁྱད་པར་བསམས་ལ། འགྲོ་བ་ཐམས་ཅད་ཀྱང་རྣམ་པ་ཐམས་ཅད་དུ་བགེགས་དང་བྲལ་བར་མོས་པ་བརྟན་པོ་བྱའོ། །བཞི་པ་ལ་གཉིས། བསོད་ནམས་ཀྱི་ཚོགས་བསག་པ་དང༌། ཡེ་ཤེས་ཀྱི་ཚོགས་བསག་པའོ། །དང་པོ་ལ་གཉིས། ཚོགས་ཀྱི་ཞིང་
སྒྲུབ་པ་དང༌། ཞིང་དེ་ལ་ཚོགས་བསག་པའོ། །དང་པོ་ནི། སྲུང་འཁོར་གྱི་དབུས་ན་རང་ཧེ་རུ་ཀར་གནས་པའི་ཐུགས་ཀར་པཾ་སེར་པོ་ལས། སྣ་ཚོགས་པདྨ་ཨཾ་ལས་བྱུང་བའི་ཟླ་བའི་དཀྱིལ་འཁོར་ལ་གནས་པའི་ཧཱུཾ་ཡིག་རྡོ་རྗེ་འཛིན་པའི་རང་བཞིན་དབུས་སྔོ་ལ་མཐའ་
9-8-7a


སྐྱ་བ། ཡེ་ཤེས་ལྔར་འཇོག་ཚུལ་ནི་ཨ་བྷྱཱ་ཀ་རས། ཨཱུ་དོན་གྲུབ་དང༌། ཧའི་ལུས་སྣང་མཐའ་དང༌། དེའི་མགོ་བོ་རིན་འབྱུང་དང༌། ཟླ་ཚེས་རྣམ་སྣང་དང༌། ཐིག་ལེ་ནཱ་ད་དང་བཅས་པ་མི་བསྐྱོད་པར་བཤད་པས་ཧཱུཾ་གི་ཆ་ལྔ་རིམ་པ་བཞིན་དུ་བྱ་སྒྲུབ་སོར་རྟོག་མཉམ་ཉིད་མེ་
ལོང་ལྟ་བུ་ཆོས་དབྱིངས་ཡེ་ཤེས་སུ་བྱའོ། །ཡེ་ཤེས་ལྔའི་རང་བཞིན་ཅན་གྱི་འོད་ཟེར་གྱིས་རང་གི་སྤྱི་བོ་ནས་རྐང་པའི་བར་གང་སྟེ། ཐོག་མ་མེད་པ་ནས་ཀྱི་སྒོ་གསུམ་གྱི་དྲི་མ་རྣམས་སྦྱངས་པས། ལུས་ཤེལ་གོང་བཞིན་དུ་དག་པར་གྱུར་ཏེ་བ་སྤུའི་
སྒོ་ནས་ཕྱིར་འཕྲོས་པའི་འོད་ཟེར་གྱིས། འོག་མིན་ནས་བླ་མ་རྡོ་རྗེ་འཆང་གི་རྣམ་པ་ཅན་དང༌། འཁོར་ལོ་སྡོམ་པའི་དཀྱིལ་འཁོར་གྱི་ལྷ་ཚོགས་དང༌། གཞན་ཡང་སངས་རྒྱས་དང་བྱང་ཆུབ་སེམས་དཔའ་དང༌། ལྷ་དང་ལྷ་མོ་དང་ཁྲོ་བོས་
ནམ་མཁའི་ཁམས་ཏིལ་གྱི་གང་བུ་ལྟར་གང་བ་མདུན་དུ་སྤྱན་དྲངས་ཏེ། འོད་ཟེར་རང་གི་སྙིང་ཁའི་ས་བོན་ལ་འདུས་པར་བསམ་མོ། །གཉིས་པ་ནི། དེ་ནས་ཐལ་མོ་སྦྱར་ཏེ། ཀུན་སྤྱོད་འགའ་ཞིང་ལས་འབྱུང༌། གང་གི་དྲིན་གྱིས་བདེ་ཆེན་གནས། །སྐད་ཅིག་
གིས་ནི་འཐོབ་འགྱུར་བ། །བླ་མ་རིན་ཆེན་ལྟ་བུ་ཡི། །རྡོ་རྗེ་ཅན་ཞབས་པད་ལ་འདུད། །ཅེས་པས་བླ་མ་དང༌། ཧེ་རུ་ཀ་དཔལ་དཔའ་བོ་ཆེ། །སྡོམ་འབྱུང་ལས་གསུངས། རྣམ་དག་རྡོ་རྗེའི་དབང་ཕྱུག་དང༌། །རྣམ་རྟོག་ཅེས་ཀྱང་ཟེར། རྗེས་ཆགས་ཆགས་པ་ཆེ་རྣམས་ཀྱི། །
རྡོ་རྗེ་ཕག་མོ་དེ་ལ་འདུད། །གནས་དང་ཉེ་བའི་གནས་དང་ཞིང༌། །འདུས་དང་དུར་ཁྲོད་གནས་པ་ཡི། །དཔའ་བོ་དཔའ་མོའི་དབང་ཕྱུག་མ། །ཀུན་ལ་བདག་ནི་གུས་ཕྱག་འཚལ། །ཞེས་པས་ལྷའི་ཚོགས་ལ་ཕྱག་བྱ། དེ་ནས་ཤཱི་ཧེ་རུ་ཀ་ཨརྒྷཾ་པྲ་ཏཱི་ཙྪ་ཧཱུཾ་སྭཱ་ཧཱ༌། 
9-8-7b


ཞེས་ཆུའི་སྔགས་སྦྱོར་ལུགས་འདི་ལྭ་པ་པའི་འགྲེལ་པ་ནས་བཤད་དོ། །པས་མཆོད་ཡོན་དང༌། ཨརྒྷཾ་གྱི་གནས་སུ་པཱ་དྱཾ་བཅུག་ལ་ཞབས་བསིལ་གྱིས་མཆོད། རང་གི་ཐུགས་ཀའི་ས་བོན་ལས་སྤྲུལ་པའི་མེ་ཏོག་མ་དཀར་མོ། བདུག་པ་མ་དུ་བའི་
མདོག །མར་མེ་མ་དམར་སེར། བྱུག་པ་མ་ལྗང་གུ། ཞལ་ཟས་མ་སྣ་ཚོགས་མདོག་ཅན་དུ་མས་མཆོད་པར་བསམས་ལ། ཨོཾ་བཛྲ་བུ་ཥྤེ་ཨཱཿཧཱུཾ་སྭཱ་ཧཱ་དང༌། པུཥྤེའི་གནས་སུ་དྷཱུ་པེ་དང༌། དཱེ་པེ་དང་། གནྡྷེ་དང༌། ནཻ་ཝི་དྱེ་བཅུག་ལ་མཆོད། ལྷ་མོ་དེ་
ལྔའི་མདོག་དང་ཕྱག་བཞིའི་དང་པོ་གཉིས་ཀྱིས་རྡོར་དྲིལ་དང༌། ལྷག་མ་གཉིས་ཀྱིས་རིན་པོ་ཆེའི་སྣོད་རང་རང་གི་མཆོད་སྤྲིན་གྱིས་གང་བ་འཛིན་པ་དང༌། མཆོད་སྔགས་ནི་ཇོ་བོའི་འགྲེལ་པར་བཤད། བོད་ཀྱི་བླ་མ་ཁ་ཅིག ། ཨོཾ་སརྦ་ཏ་ཐཱ་ག་ཏ་ཤྲཱི་ཙ་ཀྲ་སཾ་བར་མཎྜ་ལ་ཙ་ཀྲ་སརྦ་བཱི་ར་ཡོ་གཱི་མཱི་བཛྲ་ཨརྒྷཾ་པྲ་ཏཱི་ཙྪ་ཨཱཿ ཧཱུཾ་གིས་མཆོད་
ཡོན་དང༌། ཨརྒྷཾ་གྱི་གནས་སུ་པཱ་དྱཾ་དང་བཛྲ་པུཥྤེ་སོགས་བཅུག་ནས་ཞབས་བསིལ་དང༌། མེ་ཏོག་སོགས་ཀྱིས་ནི་མཆོད་པར་བྱེད་པ་ལ་ཁུངས་གསལ་བར་མི་སྣང་ཡང་མི་རུང་བའང་མེད་དོ། །དེ་ནས་རང་གི་སྙིང་ཁའི་ས་བོན་ལས་རིག་མ་བཅུ་དྲུག་སྤྲུལ་ཏེ། ཨོཾ་བཛྲ་བཱི་ཎེ་ཧུཾ་ཧཱུཾ་ཕཊ་ཀྱིས་པི་ཝཾ་མ་
སྔོན་མོ། ཨོཾ་བཛྲ་བཾ་ཤེ་ཧུཾ་ཧཱུཾ་ཕཊ་ཀྱིས་གླིང་བུ་མ་སེར་མོ། ཨོཾ་བཛྲ་མྲྀ་ཏཾ་གེ་ཧུཾ་ཧཱུཾ་ཕཊ་ཀྱིས་རྔ་ཟླུམ་མ་དམར་མོ། ཨོཾ་བཛྲ་མུ་ར་ཛེ་ཧུཾ་ཧཱུཾ་ཕཊ་ཀྱིས་རྫ་རྔ་མ་ལྗང་གུ། དེ་བཞི་ནི་ཕྱག་བཞི་མ་དང་པོ་གཉིས་ཀྱིས་རང་རང་གི་ཀི་རོལ་མོ་སྒྲོག་ཅིང་གཞན་གཉིས་ཀྱིས་རྡོར་དྲིལ་འཛིན་པའོ། །
ཨོཾ་བཛྲ་ཧཱ་སྱ་ཧུཾ་ཧཱུཾ་ཕཊ་ཀྱིས་བཞད་མ་དམར་མོ། ཨོཾ་བཛྲ་ལཱ་སྱ་ཧུཾ་ཧཱུཾ་ཕཊ་ཀྱིས་སྒེག་མོ་སྔོན་མོ། ཨོཾ་བཛྲ་གཱི་ཏི་ཧུཾ་ཧཱུཾ་ཕཊ་ཀྱིས་གླུ་མ་སེར་མོ། ཨོཾ་བཛྲ་ནྲྀ་ཏྱ་ཧུཾ་ཧཱུཾ་ཕཊ་ཀྱིས་གར་མ་ལྗང་གུ། བཞི་ནི་ཕྱག་བཞི་མ་དང་པོའི་ཕྱག་དང་པོ་གཉིས་ཀྱིས་བཞད་པའི་སྟངས་
9-8-8a


དང༌། གཉིས་པའི་དང་པོ་གཉིས་ཀྱིས་བསྙེམས་པའི་ཚུལ་གྱིས་རྡོར་དྲིལ་བཟུང་ནས་དཀུར་བརྟེན་པ་དང༌། གསུམ་པའི་དང་པོ་གཉིས་ཀྱིས་ཏིང་ཤག་བརྡུང་བ་དང༌། བཞི་པའི་དང་པོ་གཉིས་ཀྱིས་པད་ཀོར་མཛད་ཅིང༌། བཞི་གའི་ཕྱག་འོག་མ་གཉིས་ཀྱིས་གཡས་ཐོད་པ་དང༌། གཡོན་ཁ་ཊྭཱཾ་ག་འཛིན་པའོ། །ཨོཾ་བཛྲ་པུཥྤེ་ཧུཾ་ཧཱུཾ་ཕཊ་ཀྱིས་
མེ་ཏོག་མ་དཀར་མོ། ཨོཾ་བཛྲ་དྷཱུ་པེ་ཧུཾ་ཧཱུཾ་ཕཊ་ཀྱིས་བདུག་སྤོས་མ་དུད་ཀ། ཨོཾ་བཛྲ་དཱི་པེ་ཧུཾ་ཧཱུཾ་ཕཊ་ཀྱིས་མར་མེ་མ་དམར་སེར། ཨོཾ་བཛྲ་གནྡྷེ་ཧུཾ་ཧཱུཾ་ཕཊ་ཀྱིས་དྲི་ཆབ་མ་དམར་མོ། བཞི་ནི་ཕྱག་བཞིའི་གཡས་ཀྱི་དང་པོ་བཞིན་རིམ་པ་བཞིན་དུ་མེ་ཏོག་གི་སྣོད་དང༌། བདུག་སྤོས་ཀྱི་
སྣོད་དང༌། མར་མེའི་མཆོད་སྡོང་དང༌། དྲིའི་དུང་ཆོས་དང༌། གཡས་ལྷག་མ་བཞིས་ཌཱ་མ་རུ་དང༌། གཡོན་གཉིས་ན་ཐོད་པ་དང་ཁ་ཊྭཱཾ་ག་འཛིན་པའོ། །ཨོཾ་རཱུ་པ་བཛྲཱི་ཧུཾ་ཧཱུཾ་ཕཊ་ཀྱིས་གཟུགས་མ་དཀར་མོ། ཨོཾ་ར་ས་བཛྲཱི་ཧུཾ་ཧཱུཾ་ཕཊ་ཀྱིས་རོ་མ་དམར་མོ། ཨོཾ་སྤ་ཪྴེ་བཛྲཱི་ཧུཾ་ཧཱུཾ་ཕཊ་ཀྱིས་རེག་བྱ་མ་ལྗང་སེར། 
ཨོཾ་དྷརྨ་དྷཱ་ཏུ་བཛྲཱི་ཧུཾ་ཧཱུཾ་ཕཊ་ཀྱིས་ཆོས་དབྱིངས་རྡོ་རྗེ་མ་དཀར་མོ། བཞི་ནི་ཕྱག་བཞིའི་གཡས་ཀྱི་དང་པོ་བཞིན་རིམ་པ་བཞིན་མེ་ལོང་དང༌། སྦྲང་ཆང་གི་སྣོད་དང༌། གོས་སྣ་ཚོགས་པ་དང༌། ཆོས་འབྱུང་འཛིན་ཞིང༌། ལྷག་མ་གསུམ་ནི་སྔ་མ་དང་འདྲ་བ་སྟེ། དེ་དག་ནི་འགྲེལ་པ་གསུམ་ནས་བཤད་དོ། །དེ་རྣམས་ཐམས་ཅད་
ཞལ་གཅིག་པ་སྤྱན་གསུམ་པ་གཅེར་མོ་སྐྲ་གྲོལ་བ་རུས་པའི་རྒྱན་ཅན་ཞབས་གཉིས་གར་སྟབས་ཅན་ནོ། །རྣམས་ཀྱི་མཆོད་ལ། རྐང་པ་བརྒྱད་པའི་སྔགས་ཀྱིས་བསྟོད་དེ་མཆོད་པའོ། །དེ་ནས། དཀོན་མཆོག་གསུམ་ལ་བདག་སྐྱབས་མཆི། །གུར་ལས་གསུངས། སྡིག་པ་ཐམས་ཅད་
སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་བཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །
9-8-8b


བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོངས་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་བར་ཤོག །བགྲོད་དཀའ་སྲིད་པའི་རྒྱ་མཚོ་
ལས། །ཁྱད་པར་གསལ་བྱེད་ནས་བཤད། བདག་གིས་འགྲོ་རྣམས་བསྒྲལ་བའི་ཕྱིར། །རང་གིས་བདག་ཉིད་སྐད་ཅིག་མ། །སངས་རྒྱས་རྣམས་ལ་དབུལ་བར་བགྱི། །ཞེས་སྡིག་བཤགས་ཡི་རང་སྐྱབས་འགྲོ། ལམ་ལ་བརྟེན་པ། བྱང་ཆུབ་ཏུ་སེམས་བསྐྱེད་
པ། ལུས་དབུལ་བ་རྣམས་བྱའོ། །དེ་ནས་ཚོགས་ཞིང་རྣམས་ཀྱིས་བྱིན་གྱིས་རློབ་པར་བསམས་ལ། ཨོཾ་བཛྲ་ཧེ་རུ་ཀ་ས་མ་ཡ། མ་ནུ་པཱ་ལ་ཡ། ཧེ་རུ་ཀ་ཏྭེ་ནི་པ་ཏིཥྛ། དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་
སིདྡྷི་མྨེ་པྲ་ཡཙྪ༌། སརྦ་ཀརྨ་སུ་ཙ་མེ། ཙིཏྟཾ་ཤྲི་ཡཾཿ ཀུ་རུ་ཧཱུཾ། ཧ་ཧ་ཧ་ཧ་ཧོཿ བྷ་ག་ཝཾ། བཛྲ་ཧེ་རུ་ཀ། མཱ་མེ་མུ་ཉྩ། ཧེ་རུ་ཀ་བྷ་ཝ། མ་ཧཱ་ས་མ་ཡ་སཏྭ་ཨཱཿཧཱུཾ་ཕཊ། ཅེས་བཟླས་ལ་ཚོགས་ཞིང་རྣམས་རང་ལ་ཐིམ་པས་བྱིན་གྱིས་བརླབས་
པར་བསམ་མོ། །གཉིས་པ་ནི། དེ་ནས་མཆོད་ཡུལ་དང༌། མཆོད་མཁན་དང༌། མཆོད་རྫས་རྣམས་རྣམ་པར་རིག་པའི་སེམས་ཀྱིས་བཏགས་པ་ཙམ་དུ་ཟད་དོ་སྙམ་དུ་བསམས་ནས། རང་གི་སྤྱི་བོར་ཧེ་རུ་དཀར་པོ། མགྲིན་པར་རུ་དམར་པོ། 
སྙིང་ཁར་ཀ་མཐིང་ག་བཀོད། དེ་གསུམ་གྱི་དོན་རང་བཞིན་གྱིས་གྲུབ་པའི་རྒྱུ་དང༌། བརྗོད་པ་དང་བྲལ་བ་དང༌། གང་དུའང་མི་གནས་པ་ཉིད་དོ་སྙམ་དུ་ཡིད་ལ་བྱས་ལ། སེམས་ཅན་རྣམས་ཀྱིས་ཆོས་རྣམས་ཀྱི་ཡིན་ཚུལ་འདི་ལྟ་བུ་མ་
9-8-9a


ཤེས་པས་འཁོར་བར་འཁྱམས་པས་ན། བདག་གིས་ཧེ་རུ་ཀའི་གོ་འཕང་མངོན་དུ་བྱས་ལ། གཟུང་འཛིན་བདེན་པས་སྟོང་པའི་སེམས་ཅན་གྱི་ཡིན་ཚུལ་འདི་རྟོགས་པར་བྱས་ཏེ། འཁོར་བའི་སྡུག་བསྔལ་ལས་
ཐར་བར་བྱའོ་སྙམ་དུ་ཆོས་ལ་དམིགས་པའི་སྙིང་རྗེ་བསྐྱེད་ལ། ཨོཾ་སྭ་བྷཱ་ཝ་ཤུདྡྷཱཿསརྦ་དྷ་རྨཱཿ སྭ་བྷཱ་བ་ཤུདྡྷོ྅ཧཾ། ཞེས་བརྗོད་ལ་ཁམས་གསུམ་པོ་རང་བཞིན་གྱིས་གྲུབ་པས་སྟོང་པར་བལྟའོ། །དེ་ནས་ཡི་གེ་གསུམ་པོ་ཡོངས་སུ་གྱུར་པ་ལས། སྨོན་
ལམ་གྱི་དབང་གིས་རང་གི་སེམས་དེ་སྟེང་ནས་སྟེང་དུ་བརྩེགས་པའི་ཨོཾ་དཀར་པོ། ཨཱཿདམར་པོ། ཧཱུཾ་སྔོན་པོར་གྱུར་པར་བསམ་མོ། །དེ་ནས་དེ་གསུམ་ལས་རིམ་པ་བཞིན་དུ་སྐུ་གསུང་ཐུགས་ཀྱི་ལྷ་རྣམས་སྤྲོས་ཏེ། ས་འོག་དང༌། མི་ཡུལ་དང༌། མཐོ་
རིས་རྣམས་འཁོར་ལོ་གསུམ་གྱི་ངོ་བོར་བསམ། སྙོམས་པར་འཇུག་པ་སྔོན་དུ་འགྲོ་བས་ཞུ་བ་གསུམ་ཡི་གེ་གསུམ་པ་བཞིན་དུ་ཐིམ་ཞིང་། ཨོཾ་ཡང་ཨཱཿ ལ་དང༌། ཨཱཿ ཡང་ཧཱུཾ་ལ་རིམ་པ་བཞིན་ཐིམ་པས། ཧཱུཾ་གི་ཞབས་ཀྱུ་ཨཱུ་ནི་ཧ་ལ་
དང༌། ཧའི་ལུས་ནི་དེའི་མགོ་བོ་དང༌། དེའང་ཟླ་ཚེས་ལ་དང༌། ཟླ་ཚེས་ཀྱང་ཐིག་ལེ་ལ་དང༌། དེའང་ནཱ་ད་ལ་ཐིམ་ཞིང༌། ནཱ་དའང་སྐྲའི་རྩེ་མོ་བརྒྱ་སྟོང་གི་ཆའི་ཚད་ཙམ་དུ་གནས་པར་བསམས་ནས། སེམས་ཅན་རྣམས་ཀྱིས་ཆོས་ཉིད་མ་རྟོགས་པས་འཁོར་
བར་འཁྱམས་པས། བདག་གིས་ཆོས་ཉིད་མངོན་སུམ་དུ་རྟོགས་པར་བྱས་ལ། རང་བཞིན་གྱིས་གྲུབ་པས་སྟོང་པའི་སེམས་ཅན་རྣམས་ཀྱིས་ཀྱང་ཆོས་ཉིད་ཁོང་དུ་ཆུད་པར་བྱས་ཏེ། འཁོར་བའི་སྡུག་བསྔལ་ལས་ཐར་བར་བྱའོ་སྙམ་དུ་དམིགས་པ་མེད་
9-8-9b


པའི་སྙིང་རྗེ་བསྒོམས་ལ། ཨོཾ་ཤཱུ་ནྱ་ཏཱ་ཛྙཱན་བཛྲ་སྭ་བྷཱ་ཝ་ཨཱ་ཏྨ་ཀོ྅ཧཾ། ཞེས་བརྗོད་ཅིང་ནཱ་ད་ཙམ་གྱི་རྣམ་རྟོག་ཀྱང་དོར་བར་བྱས་ཏེ་སྣང་བ་མེད་པ་ལ་བཞག་གོ། དེ་ལྟར་གནས་གསུམ་དུ་ཧེ་རུ་ཀ་བཀོད་པ་ཡོངས་སུ་གྱུར་པའི་ཡི་གེ་གསུམ་ལ་སྣོད་བཅུད་གཞན་ཐམས་ཅད་བསྡུས་པའི་རིམ་པ་འདི་ནི་འཆི་བའི་ཚེ་སྣོད་བཅུད་གཞན་
དུ་སྣང་བའི་རང་གི་ཤེས་པ་རྣམས་རིམ་གྱིས་བསྡུས་ནས། དཀར་དམར་ནག་པའི་རྣམ་པ་ཅན་སྣང་མཆེད་ཐོབ་གསུམ་དུ་སོང་བའི་སྐབས་དང་འདྲའོ། །དེ་ནས་དཀར་པོ་དམར་པོ་ལ་བསྡུས་པ་ནི་སྣང་བ་སྣང་བ་མཆེད་པ་ལ་ཐིམ་པ་དང་འདྲའོ། །དམར་པོ་ནག་པོ་
ལ་བསྡུས་པ་ནི། མཆེད་པ་ཉེར་ཐོབ་ལ་ཐིམ་པ་དང་འདྲའོ། །དེ་ནས་ཧཱུཾ་ནག་པོ་ཞབས་ཀྱུ་ནས་ནཱ་དའི་བར་དང་། ནཱ་ད་ཡང་མི་དམིགས་པར་སོང་བ་ནི། ཐོབ་པ་འོད་གསལ་དུ་ཐིམ་པ་དེང་འདྲ་སྟེ། འཆི་རིམ་ལ་སྟོང་པ་བཞི་ཡོད་པའི་འཆི་བའི་འོད་གསལ་
དངོས་གཞི་དང་འདྲའོ། །ཉེར་ཐོབ་མཚོན་པའི་ཧཱུཾ་ཉིད་ལ་ཐིམ་རིམ་ལྔར་བྱས་པ་ནི་སྦྱང་གཞི་ལའང་ཉེར་ཐོབ་ནས་ཇེ་ཕྲ་ཇེ་ཕྲར་སོང་ནས་འོད་གསལ་དུ་འཇུག་པ་མཚོན་པ་ཡིན་ལ། དེས་ནི་རིམ་པ་གཉིས་པའི་སྐབས་སུ་ཉེར་ཐོབ་ནས་འོད་
གསལ་དུ་འཇུག་པའང་། ཤིན་ཏུ་ཕྲ་བའི་རིམ་པས་རིམ་གྱིས་འཇུག་པར་བསྟན་པའི་ཕྱིར་རོ། །འདི་ནི་སྙིང་ཁར་གནས་པའི་ཧཱུཾ་ཡིག་གི་སྡུད་རིམ་ཡིན་པས། སྤྲོས་པ་བསྡུས་ནས་འོད་གསལ་འཆར་བའི་གནས་མཐར་ཐུག་པ་ནི་སྙིང་ཁ་ཡིན་པ་
དང་། དེ་ཁོ་ན་ཉིད་མངོན་དུ་གྱུར་པའི་འོད་གསལ་གྱི་ཡེ་ཤེས་ཀྱི་དོན། ནཱ་ད་ཙམ་གྱི་གཉིས་སྣང་ཕྲ་མོ་ཡང་དག་པར་སྟོན་པའོ། །མངོན་བརྗོད་ལས་སྲུང་འཁོར་གྱི་འོག་ཏུ་སྟོང་ཉིད་སྒོམ་པའི་མཇུག་ཐོགས་སུ། དྲིལ་བུ་ཞབས་ཀྱི་རིམ་ལྔའི་རིམ་པ་དང་
9-8-10a


འོར་བཤད་པའི་གནད་ཀྱང་། འདི་རྣམས་ཀྱིས་ཤེས་དགོས་ལ། རིམ་པ་དང་པོར་འདི་ལྟར་བྱས་ནས་བསྐྱངས་པའི་མཐུས་རྫོགས་རིམ་གྱི་སྐབས་སུ་རྟོགས་པ་བྱེ་བྲག་པ་ཇི་འདྲ་ཞིག་སྐྱེ་བའི་རྒྱུད་སྨིན་བྱེད་དུ་འགྲོ་བའང་འདི་ལ་བརྟེན་ནས་ཤེས་
དགོས་པ་དང་། དེ་ཁོ་ན་ཉིད་རྟོགས་པའི་ལྟ་བའི་སྟེང་ནས་འོད་གསལ་དུ་འཇུག་པར་ལུགས་འདི་དང་། རྒྱུད་སྡེ་འོག་མ་གསུམ་དང་ཕར་ཕྱིན་གྱི་ཐེག་པ་རྣམས་འདྲའང་། ཐུན་མོངས་མ་ཡིན་པའི་འཇུག་རིམ་ལ་འདི་ལ་ཡོད་པའང་། སྟོང་པ་སྒོམ་པ་དང་འཆི་རིམ་གྱི་
སྡུད་རིམ་མཐུན་པར་བྱས་པ་འདི་ལ་བརྟེན་ནས་ཤེས་དགོས་པས་གནད་ཆེའོ། །དེའི་ཕྱིར་འདི་འདྲ་བ་འདི་ལ་འཆི་བ་ཆོས་སྐུར་འཁྱེར་བའི་ལམ་འཁྱེར་ཞེས་ཀྱང་བྱའོ། །གཉིས་པ་ཐུན་གྱི་དངོས་གཞི་ལ་ཇི་ལྟར་བྱ་བ་ལ་གསུམ། སྟོང་པ་ལས་ལངས་ནས་ནམ་ཁར་ནཱ་
ད་བཞག་པ། གཞལ་ཡས་ཁང་གང་ལ་གནས་པའི་རྟེན་བསྐྱེད་པ། དེ་ནས་རྣལ་འབྱོར་བཞི་སྒོམ་པའོ། །དང་པོ་ནི། དེ་ལྟར་སྣང་བ་ཐམས་ཅད་བསྡུས་པའི་སྟོང་པ་ཉིད་ལས་ལངས་ཏེ། རང་གི་སེམས་ནཱ་དའི་གཟུགས་གྱེན་དུ་འགྲེང་བ་ཤིན་ཏུ་ཕྲ་བ་དཀར་ལ་
དམར་བའི་མདངས་ཆགས་པ་ནམ་ཁར་བཞག་གོ། །དེའི་རྒྱུ་མཚན་ནི། གཞི་ལ་མངལ་དུ་སྐྱེ་བ་ལེན་པ་ལྟ་བུ་ཞིག་གི་དཔང་དུ་བྱས་ན། འཆི་བའི་འོད་གསལ་ལས་ལངས་མ་ཐག །འོད་གསལ་གྱི་རླུང་སེམས་ཙམ་ལས་བར་སྲིད་དབང་པོ་ཀུན་ཚང་ཞིང་
ཤ་རུས་ལ་སོགས་པས་སྟོང་པའི་ཕྲ་བའི་ལུས་ཅན་ཐོགས་མེད་འགྲུབ་པ་བཞིན་དུ། ལམ་རིམ་པ་དང་པོ་ལའང་འཆི་བའི་འོད་གསལ་དང་འདྲ་བའི་སྔར་བཤད་པའི་སྡུད་རིམ་གྱིས་འོད་གསལ་སྟོང་ཉིད་དུ་ཞུགས་པ་ལས་ལངས་མ་ཐག །བར་
9-8-10b


དོ་དང་འདྲ་བའི་ནཱ་དའི་ལུས་འགྲུབ་པས་ནཱ་ད་ནམ་ཁར་འཇོག་གོ། །ལམ་བསྐྱེད་རིམ་ལ་འདི་ལྟར་སྦྱངས་པའི་མཐུས། རིམ་པ་གཉིས་པར་འོད་གསལ་ལྷན་ཅིག་སྐྱེས་པའི་རླུང་སེམས་ཙམ་ལས་སྒྱུ་མའི་ལོངས་སྐུར་བསྐྱེད་པའི་ཆེད་ཡིན་ལ། དེས་ན་འདི་
ལ་བར་དོ་ལོངས་སྐུར་འཁྱེར་བའི་ལམ་ཁྱེར་ཞེས་ཀྱང་བྱ་སྟེ། འདི་ནི་ལུགས་འདིའི་རྫོགས་རིམ་གྱི་གནད་རྟོགས་པ་ལ་གནད་ཤིན་ཏུ་ཆེའོ། །གཉིས་པ་ནི། སྟོང་པའི་ངང་ལས་ཡཾ་སྔོན་པོ་ལས་རླུང་གི་དཀྱིལ་འཁོར་ཁ་དོག་སྔོན་པོ་དབྱིབས་གཞུ་ལྟ་བུ་གཡས་
གཡོན་གཉིས་སུ་རྒྱལ་མཚན་གྱིས་མཚན་པ། དེའི་སྟེང་དུ་རཾ་དམར་པོ་ལས་དེའི་དཀྱིལ་འཁོར་ཁ་དོག་དམར་པོ། དབྱིབས་གྲུ་གསུམ་པ་གྲྭ་གསུམ་དུ་རཾ་གྱིས་མཚན་པ། དེའི་སྟེང་དུ་བཾ་དཀར་པོ་ལས་ཆུའི་དཀྱིལ་འཁོར་ཁ་དོག་དཀར་པོ། དབྱིབས་ཟླུམ་
པོ་དབུས་སུ་བུམ་པས་མཚན་པ། དེའི་སྟེང་དུ་ལཾ་སེར་པོ་ལས་སའི་དཀྱིལ་འཁོར་ཁ་དོག་སེར་པོ། དབྱིབས་གྲུ་བཞི་པ། གྲྭ་བཞིར་རྡོ་རྗེ་རྩེ་གསུམ་པས་མཚན་པ། དེའི་སྟེང་དུ་སུཾ་ལས་རི་རབ་ལྷུན་པོ་གྲུ་བཞི་པ། རིན་པོ་ཆེ་སྣ༌། ཤར་ཤེལ། ལྷོ་བཻ་ཌཱུ་རྱ། ནུབ་པདྨ་རཱ་ག ། བྱང་གསེར་
རོ། །བཞིའི་རང་བཞིན་ཅན། སྟེང་གི་ཕྱོགས་མཚམས་སུ་རྩེ་མོའམ་ལྕོག་བརྒྱད་ཀྱིས་ཉེ་བར་མཛེས་པ། དེའི་སྟེང་དུ་པཾ་སེར་པོ་ལས་སྣ་ཚོགས་པདྨ། དེའི་ལྟ་བར་ཧཱུཾ་ལས་སྣ་ཚོགས་རྡོ་རྗེ། དེའི་སྟེང་གི་ལྟེ་བར་པཾ་ལས་ལྟེ་བ་དང་ཚད་མཉམ་པའི་སྣ་
ཚོགས་པདྨ་འདབ་མ་བརྒྱད་པ། ལྟེ་བ་དང་གེ་སར་དང་ལྡན་པ། ཕྱོགས་བཞིའི་འདབ་མ་དམར། མེ་རླུང་གཉིས་སེར། བདེན་བྲལ་ལྗང༌། དབང་ལྡན་ནག ། ལྟེ་བ་ལྗང༌། གེ་སར་སེར་བ་བསམ་མོ། །གསུམ་པ་ལ་བཞི། རྣལ་འབྱོར་དང༌། རྗེས་སུ་རྣལ་
9-8-11a


འབྱོར་དང༌། ཤིན་ཏུ་རྣལ་འབྱོར་དང༌། རྣལ་འབྱོར་ཆེན་པོའོ། །དང་པོ་ནི། སྣ་ཚོགས་པདྨ་ཆུང་ངུའི་དབུས་སུ་མཚན་སོ་གཉིས་ཀྱི་ངོ་བོ་དབྱངས་ཡིག་དཀར་པོ་བཅུ་དྲུག་པ་ཕྲག་གཅིག་གཡས་སྐོར་དང༌། སླར་ཡང་དབྱངས་
ཡིག་བཅུ་དྲུག་པ་ཕྲག་གཉིས་པ་གཡོན་སྐོར་དུ་རིམ་པ་གཅིག་གིས་འཁོར། དེའི་ཕྱི་རོལ་ཏུ་དཔེ་བྱད་བརྒྱད་ཅུའི་ངོ་བོ་གསལ་བྱེད་སོ་བཞི་ལ། ཌ་ཌྷ་ད་དྷ་ཡ་ལ་དྲུག་བསྣན་པའི་གསལ་བྱེད་དམར་པོ་བཞི་བཅུ་པ་ཕྲག་གཅིག་གཡས་སྐོར་དང༌། སླར་ཡང་
གསལ་བྱེད་བཞི་བཅུ་པ་ཕྲག་གཉིས་པ་གཡོན་སྐོར་དུ་རིམ་པ་གཅིག་གིས་འཁོད། །དེ་གཉིས་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ཡོངས་སུ་རྫོགས་པ་དཀར་ལ་དམར་བའི་མདངས་ཅན་ལ། དབྱངས་སོ་གཉིས་དང་གསལ་བྱེད་བརྒྱད་ཅུ་གཟུགས་
བརྙན་ཤར་བ་བཞིན་དུ་སྣང་བའི་ཨཱ་ལི་དང་ཟླ་བའི་ཁ་དོག་དཀར་བའི་ཆ་ནི་མེ་ལོང་ལྟ་བུ་དང༌། ཀཱ་ལི་དང་ཟླ་བའི་ཁ་དོག་དམར་བའི་ཆ་ནི་མཉམ་པ་ཉིད་ཀྱི་ཡེ་ཤེས་ཏེ། ཡེ་ཤེས་དེ་གཉིས་ནི་རྣལ་འབྱོར་རོ། །གཉིས་པ་ནི། དེ་ནས་རང་ནམ་མཁའི་ནཱ་
དའི་ང་རྒྱལ་གྱིས། ཟླ་བ་དཀར་ལ་དམར་བ་མཐོང་བ་ན། བདག་གིས་སངས་རྒྱས་ཡབ་ཡུམ་གྱི་བྱང་སེམས་དཀར་དམར་གྱི་ངོ་བོར་གྱུར་པའི་དབུས་སུ་སྐྱེ་བ་བླངས་ལ་སེམས་ཅན་གྱི་དོན་བྱའོ་སྙམ་དུ་འཕེན་པ་བཏང་ནས་ཟླ་བའི་དབུས་སུ་ནཱ་ད་ཞུགས་
པ་ལས་རིམ་གྱིས་ནཱ་ད་ལས་ཐིག་ལེ། ཐིག་ལེ་ལས་ཟླ་ཕྱེད། དེ་ལས་མགོ་བོ། དེ་ལས་ཧའི་ལུས། དེ་ལས་ཨཱུ་གྲུབ་པའི་ཚུལ་གྱིས། དཀར་ལ་དམར་བའི་མདངས་ཅན་གྱི་ཧཱུཾ་ཡིག་རྒྱུ་རྡོ་རྗེ་འཛིན་པའི་རང་བཞིན་ཅན་དུ་རྫོགས་པར་གྱུར་
9-8-11b


པ་ནི་སོ་སོར་རྟོག་པའི་ཡེ་ཤེས་སོ། །ཧཱུཾ་ལས་ཁ་དོག་སྣ་ལྔ་པའི་འོད་ཟེར་འཕྲོ་བའི་རྩེ་མོ་ལས། འཁོར་ལོ་ལྔའི་ལྷ་ཚོགས་རྣམས་འཐོན་ཏེ། འགྲོ་བ་རྣམས་དེའི་གོ་འཕང་ལ་བཀོད་པ་དང༌། སྡུད་པའི་ཚེ་སྔོན་ཐོག་མ་མེད་པ་ནས་གྲུབ་པའི་དཔའ་བོ་དང་རྣལ་འབྱོར་མ་
ལ་སོགས་པ་ཕྱོགས་བཅུའི་ཞིང་ཁམས་ན་བཞུགས་པ་རྣམས་ལྷན་ཅིག་སྤྱན་དྲངས་ཏེ། མཉམ་པར་སྦྱར་བ་སྔོན་དུ་འགྲོ་བས་ཞུ་བར་གྱུར་ཏེ། ཧཱུཾ་ཡིག་ནཱ་ད་ལ་ཐིམ་པར་བསམས་ལ། ཧཱུཾ་ཡིག་ལྷན་སྐྱེས་ཀྱི་དགའ་བའི་རང་བཞིན་ཅན་དུ་བསམ་པ་ནི་བྱ་
སྒྲུབ་པའི་ཡེ་ཤེས་སོ། །བྱང་སེམས་ཞུ་བའི་ངོ་བོར་གནས་པས་ཧཱུཾ་ཡིག་རྒྱུ་རྡོ་རྗེ་འཛིན་པའི་རང་བཞིན་ཉིད་དོ། །བཅོམ་ལྡན་འདས་ནི་བྱང་སེམས་ཞུ་བ་ལས་བྱུང་བའི་ལྷན་སྐྱེས་ཡོངས་སུ་རྫོགས་པ་ཡིན་པས་འབྲས་བུ་རྡོ་རྗེ་འཛིན་པའི་རང་བཞིན་ཏེ། 
ཡེ་ཤེས་དེ་གཉིས་ནི་རྗེས་སུ་རྣལ་འབྱོར་རོ། །དེ་ནས། ཨོཾ་ཨཱཿཧཱུཾ། ནི་སྔགས་དང་པོ་སྟེ་སྐུ་གསུང་ཐུགས་གསུམ་མདོར་བསྟན་པའོ། །དེ་ཉིད་གསལ་བར་བྱེད་པ་ནི། ཨོཾ་ནས་ཀོ་ཉ་ཧཾ་ཀི་བར་སྔགས་གཉིས་པས་ཏེ་དཔའ་བོ་དང་རྣལ་འབྱོར་མ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་གྱི་བདག་ཉིད་ནི་ངའོ་
ཞེས་ལྷན་སྐྱེས་ཀྱི་བདེ་ཆེན་ཧེ་རུ་ཀའི་སྐུར་ཤར་བའི་ངོ་བོར་འདིའི་ལྷ་གང་ཡིན་ཐམས་ཅད་སྡོམ་པ་ཡིན་པས། འོག་མིན་དང་ཛམྦུའི་གླིང་སོགས་ཀྱི་ལྷ་ཕྱོགས་རེ་བ་ལ་མི་བྱའོ། །ཨོཾ་བཛྲ་སོགས་ནི་སྔགས་གསུམ་པ་སྟེ་ཆོས་ཐམས་ཅད་ཀྱི་རང་བཞིན་དང་བདེ་བ་ཆེན་པོ་གཉིས་དབྱེར་མེད་དུ་མོས་ལ་དེའང་རྡོ་རྗེ་ལྟར་མི་ཕྱེད་པར་
བརྟན་པར་བྱེད་པའོ། །ཨོཾ་སརྦ་བཱི་ར་ཡོ་གི་ནཱི་ཀཱ་ཡ་ཝཱ་ཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ་྅ཧཾ། ཨོཾ་བཛྲ་ཤུདྡྷ་སརྦ་དྷརྨཱཿབཛྲ་ཤུདྡྷོ྅ཧཾ། ཞེས་སྐད་ཅིག་གིས་བསྐྱེད་པའི་སྔགས་གསུམ་བརྗོད་དོ། །གསུམ་པ་ལ་དྲུག །རྟེན་དང་བརྟེན་པ་རྫོགས་ཚུལ་
9-8-12a


མདོར་བསྟན་པ་དང༌། གསལ་བཏབ་པ་རྒྱས་པར་བཤད་པ་དང༌། ཕྱོགས་མཐུན་གྱི་དག་པ་དང་ལུས་དཀྱིལ་བསྒོམ་པ་དང༌། གོ་བ་གོ་ཞིང་ཡེ་ཤེས་པ་བཅུག་ནས་དབང་བསྐུར་བ་དང༌། ལྷ་རྣམས་ལ་མཆོད་ཅིང་བསྟོད་
པ་དང༌། ལྷའི་འཁོར་ལོ་བསྒོམ་ཞིང་དག་པ་དྲན་པའོ། །དང་པོ་ནི། ཟླ་བ་དབྱངས་གསལ་ས་བོན་དང་བཅས་པ་རྣམས་ཡོངས་སུ་གྱུར་པ་ལས་རྟེན་དང་བརྟེན་པའི་དཀྱིལ་འཁོར་ཐམས་ཅད་དུས་གཅིག་ཏུ་གྲུབ་པར་བསམ་པ་ནི་ཆོས་དབྱིངས་ཡེ་ཤེས་
སོ། །གཞི་ལ་ཕ་མའི་ཁུ་ཁྲག་དཀར་དམར་གྱི་དབུས་སུ་བར་སྲིད་ཞུགས་ནས་སྐྱེ་བ་ལེན་པ་བཞིན་དུ། རིམ་པ་དང་པོར་ཡང་བར་སྲིད་མཚོན་པའི་ནམ་མཁའི་ནཱ་ད་ཟླ་བའི་དབུས་སུ་ཞུགས་ནས་ཧཱུཾ་ཡིག་ཏུ་གྲུབ་ནས་དཀྱིལ་འཁོར་པ་རྫོ་གས་པ་ནི་མངལ་
དུ་སྐྱེ་བ་བླངས་པ་དང་མངལ་རྫོགས་པའི་སྐབས་དང་འདྲ་སྟེ། འདི་ལ་སྐྱེ་བ་སྤྲུལ་སྐུར་འཁྱེར་བའི་ལམ་ཁྱེར་ཞེས་ཀྱང་བྱའོ། །དེ་ལྟར་བསྒོམས་པས་ནི། རིམ་པ་གཉིས་པར་སྒྱུ་མའི་སྐུས་ལུས་རགས་པའི་སྤྲུལ་སྐུ་འཛིན་ནུས་པ་དང༌། ལུས་ཀྱི་ཁམས་དཀར་
དམར་གྱི་འདུ་འཕྲོད་ཁྱད་པར་བ་ལ་བརྟེན་ནས་ངེས་དོན་གྱི་ཧེ་རུ་ཀ་ལྷན་སྐྱེས་ཀྱི་བདེ་ཆེན་འདྲེན་པའི་རྒྱུད་སྨིན་བྱེད་དུ་འགྲོའོ། །ཚུལ་དེ་ལེགས་པར་ཤེས་ན་མཆོག་སྒྲུབ་པ་ལ། བསྐྱེད་རིམ་སྒོམ་མི་དགོས་སྙམ་པ་དང༌། ཆོས་འདི་པ་དང་གཞན་པའི་
ཏིང་ངེ་འཛིན་ཐུན་མོང་བ་ཙམ་ལ་བླ་མེད་ཀྱི་རྫོགས་རིམ་དམ་པར་འཛིན་པ་དང༌། ཏིང་ངེ་འཛིན་དེས་དྲངས་པའི་བདེ་བ་ལ་ལྷན་སྐྱེས་ཀྱི་བདེ་ཆེན་དུ་འཛིན་པ་སོགས་ཀྱི་ལོག་རྟོག་རྣམས་ལྡོག་པས་རྣམ་པར་དག་པའི་གོ་བ་ཆགས་པར་བྱས་ནས་
9-8-12b


བསྒོམ་པར་བྱའོ། །གཉིས་པ་ལ་གཉིས། རྟེན་གསལ་གདབ་པ་དང༌། བརྟེན་པ་ལྷ་གསལ་གདབ་པའོ། །དང་པོ་ནི། དེ་ལྟར་དུས་གཅིག་ཏུ་གྲུབ་པའི་རྟེན་རིམ་གྱིས་གསལ་གདབ་པ་ནི། ཁང་པ་བརྩེགས་པའི་གཞལ་ཡས་ཁང་གྲུ་བཞི་སྒོ་བཞི་པ། ཕྱི་ནས་རིམ་
པ་བཞིན་དཀར་སེར་དམར་ལྗང་སྔོ་བའི་རིམ་པ་ལྔ་དང་ལྡན་པའི་རིན་པོ་ཆེའི་རྩིག་པས་བསྐོར་བའི་སྟེང་ན། རིན་པོ་ཆེའི་ཕ་གུ་གཞི་དམར་པོ་ལ་རིན་པོ་ཆེ་ཟུར་གསུམ་དང་གྲུ་བཞི་ལ་སོགས་པས་སྤྲས་པ། དེའི་སྟེང་ན་གནས་པའི་གསེར་གྱི་སྐ་རགས་
བཞིའི་ཕྱི་ངོས་སུ་ཆུ་སྲིན་གྱི་ཁ་ནས་མུ་ཏིག་གི་དོ་ཤལ་དང་དོ་ཤལ་ཕྱེད་པ་འཕྱང་བ། དེའི་ཕྱི་ངོས་སུ་བྱ་འདབ་ལས་འཕྱང་བའི་རིན་པོ་ཆེའི་ཤར་བུ། དེའི་སྟེང་ན་པདྨ་འདབ་མ་ཕྱེད་པའི་དབྱིབས་ཅན་གྱི་མདའ་ཡབ་ལ་གནས་པའི་གསེར་གྱི་བུམ་པ་ནས་
འཐོན་པའི་རྒྱལ་མཚན་དང་བ་དན་བརྒྱད་བརྒྱད་ཀྱིས་མཛེས་པར་བྱས་པ། ཕྱིའི་སྟེང་གི་ཟུར་བཞི་ལ་གདུགས་བཞིས་བརྒྱན་པ། རྩིག་པའི་འགྲམ་ནས་འདོད་ཡོན་གྱི་སྣམ་བུ་དམར་པོས་བསྐོར་བ་ལ་བཞུགས་སྟབས་དང་ཁ་དོག་སྣ་ཚོགས་པའི་ལྷ་
མོ་རྣམས་ཀྱིས་མཆོད་པ་བྱེད་བཞིན་པ། སྒོ་དང་སྒོ་ཁྱུད་ཀྱི་ཕྱིའི་མཚམས་དང་རྩིག་པའི་ཕྱི་ནང་གི་ཟུར་བཞིར། ཟླ་ཕྱེད་ལ་གནས་པའི་རིན་པོ་ཆེ་དམར་པོའི་སྟེང་དུ་རྡོ་རྗེས་བརྒྱན་པ། སྒོ་བཞི་སོ་སོའི་མདུན་དུ་སྟེགས་བུ་གྲུ་བཞི་པའི་སྟེང་དུ། བུམ་པ་
ལ་གནས་པའི་ཀ་བ་བཞི་བཞིས་བཏེག་པའི་རྟ་བབས་སྣམ་བུ་བཅུ་གཅིག་དང་ལྡན་པའི་རྩེ་མོར་ཆོས་ཀྱི་འཁོར་ལོའི་གཡས་གཡོན་དུ་རི་དྭགས་ཕོ་མོ་དང་བཅས་པ། རྟ་བབས་ཀྱི་གཡས་གཡོན་དུ་བུམ་པ་བཟང་པོ་ལས་སྐྱེས་པའི་དཔག་བསམ་
9-8-13a


གྱི་ཤིང་ལ། རྒྱལ་སྲིད་རིན་པོ་ཆེ་སྣ་བདུན་དང༌། བར་བར་དུ་གྲུབ་པ་ཐོབ་པ་དང༌། སྤྲིན་གྱི་གསེབ་ནས་བྱུང་བའི་ལྷ་མེ་ཏོག་གི་ཕྲེང་བ་བཟུང་བ་རྣམས་ཀྱིས་ཀུན་ནས་མཛེས་པར་བྱས་པའོ། །དེའི་ཕྱི་རོལ་ཏུ་སྣ་ཚོགས་རྡོ་
རྗེའི་ར་བས་བསྐོར་བ་ལ་སོགས་པའི་སྲུང་འཁོར། དེའི་ཕྱི་རོལ་ཏུ་བསྐལ་པ་འཇིག་པའི་དུས་ཀྱི་མེ་ལྟ་བུ་རྡོ་རྗེའི་མེ་ཁ་དོག་སྣ་ལྔ་པས་སྟེང་དང་ལོགས་ཀུན་ཏུ་ཁྱབ་པར་གཡོན་སྐོར་དུ་འཁྱིལ་ཞིང་འབར་བ། དེའི་ཕྱི་རོལ་ན་གནས་པའི་དུར་ཁྲོད་བརྒྱད་ནི། 
ཤར་དུ་གཏུམ་དྲག །བྱང་དུ་ཚང་ཚིང་འཁྲིགས་པ། ནུབ་ཏུ་རྡོ་རྗེ་འབར་བ། ལྷོར་ཀེང་རུས་ཅན། དབང་ལྡན་དུ་དྲག་ཏུ་རྒོད་པ། མར་བཀྲ་ཤིས་ཚལ། བདེན་བྲལ་དུ་མུན་པ་དྲག་པོ། རླུང་དུ་ཀི་ལི་ཀི་ལིའི་སྒྲ་སྒྲོགས་པ་སྟེ། རོ་མགོ་མེད་པ་དང༌། འགགས་ཏེ་ཤིང་
ལ་དཔྱངས་པ་དང༌། ས་ལ་འགྱེལ་བ་དང༌། གསལ་ཤིང་ལ་བསྐྱོན་པ་དང༌། མདུང་གིས་ཕུག་པ་དང༌། ཕྱེད་ཚིག་པ་དང༌། མགོ་ཐོད་དང༌། བྱིན་པའི་རུས་པ་དང༌། གཙིགས་པའི་མགོ་དང༌། དེ་ལས་གཞན་པའི་རུས་པ་མཐོར་བ་དང༌། མ་འཐོར་
བའི་ཀེང་རུས་རྣམས་གཅལ་དུ་བཀྲམ་པའི་གནས་སུ་གྱུར་པས་དུར་ཁྲོད་དོ། །དེ་ན་གནས་པའི་ཤིང་བརྒྱད་ནི། ཤར་ནས་ཕྱོགས་གཡོན་སྐོར་དུ་ཤིར་ཥ། ཨ་ཤྭད་ཐ། ཀཾ་ཀེ་ལ། ཙུ་ཏ། དབང་ལྡན་ནས་མཚམས་གཡས་སྐོར་དུ་བ་ཊ། ཀ་ར་ཉྫ། 
པཊ་པརྐ། པར་ཐི་བ་རྣམས་སོ། །ཤིང་གི་རྩ་བར་གནས་པའི་ཕྱོགས་སྐྱོང་བརྒྱད་ནི། ཤར་ནས་ཕྱོགས་གཡོན་སྐོར་དུ། དབང་པོ་སེར་པོ་རབ་བརྟན་དཀར་པོ་དང༌། ནོར་སྦྱིན་སེར་པོ་མི་དང༌། ཆུ་ལྷ་དཀར་པོ་གདེངས་ཀ་བདུན་བདུན་ལྡན་ཆུ་སྲིན་དང༌། གཤིན་
9-8-13b


རྗེ་སྔོན་པོ་མ་ཧེ་དང༌། དབང་ལྡན་ནས་མཚམས་གཡས་སྐོར་དུ། དབང་ཕྱུག་ཆེན་པོ་དཀར་པོ་གླང་དང༌། མེ་ལྷ་དམར་པོར་སྐྱེས་དང༌། སྲིན་པོ་སྔོན་པོ་གཅེར་བུ་མི་མགོའི་འཕྲེང་བའི་ཅོད་པན་ཅན་རོ་ལངས་དང༌། རླུང་ལྷ་དུད་ཀ་ཤ་བ་ལ་ཞོན་
པའོ། །ཐམས་ཅད་ཀྱང་ཞལ་གཅིག་ཕྱག་བཞིའི་དང་པོ་གཉིས་ཐལ་མོ་སྦྱར་བ། ལྷག་མ་གཡས་རྣམས་ན་རིམ་པ་བཞིན་རྡོ་རྗེ་དང༌། ནེའུ་ལེ་རིན་པོ་ཆེ་སྐྱུག་པ་དང༌། སྦྲུལ་ཞགས། དབྱུག་པ། རྩེ་གསུམ། ཕྲེང་བ། སྤྱི་བླུགས་དང་བཅས་པ། རལ་གྲི། བ་དན་སེར་པོ། གཡོན་རྣམས་ན་ཐོད་པ་
འཛིན་པས་ཡུམ་ལ་འཁྱུད་པར་འགྲེལ་པ་སྡོམ་འབྱུང་ལས་བཤད། ཤིང་བརྒྱད་ཀྱི་སྟོད་ཀྱི་ཡལ་གའི་གསེབ་ནས་ལུས་ཕྱེད་འཐོན་པའི་ཞིང་སྐྱོང་བརྒྱད་ནི། ཤར་ནས་ཕྱོགས་གཡོན་སྐོར་དུ་རིམ་པ་བཞིན། གླང་པོ་དང༌། མི་དང༌། ཆུ་སྲིན་དང༌། མ་
ཧེའི་གདོང་ཅན། དཀར་པོ། སེར་པོ། དཀར་པོ། ནག་པོ་དང༌། དབང་ལྡན་ནས་མཚམས་གཡས་སྐོར་དུ། གླང་དང༌། ར་དང༌། རོ་ལངས་དང༌། རི་དྭགས་ཀྱི་གདོང་པ་ཅན་དཀར་པོ། དམར་པོ། ནག་པོ། ལྗང་གུའོ། །ཐམས་ཅད་ཀྱང་དྲག་ཅིང་
གཏུམ་ལ་རྫུ་འཕྲུལ་ཆེན་པོ་པ་ཞལ་གཅིག་པ་ཕྱག་གཉིས་ཀྱི་གཡས་གཏོར་མ་དང༌། གཡོན་ཐོད་པ་འཛིན་པའོ། །ཐུགས་རྗེའི་ཆུ་བརྒྱད་དང༌། དེ་ལ་གནས་པའི་ཀླུ་བརྒྱད་ནི། ཤར་ནས་ཕྱོགས་གཡོན་སྐོར་དུ། ནོར་རྒྱས་དཀར་པོ། འཇོག་པོ་དམར་པོ། ཀ་རྐོ་
ཊ་སྔོན་པོ། པདྨ་དཀར་པོ། དབང་ལྡན་ནས་མཚམས་གཡས་སྐོར་དུ། པདྨ་ཆེན་པོ་དཀར་པོ། མཐའ་ཡས་སྣ་ཚོགས་མདོག །གས་ལྡན་དཀར་པོ། དུང་སྐྱོང་སེར་པོའོ། །ཐམས་ཅད་ཀྱང་སྟོད་མི་འདྲ་བ། སྨད་སྦྲུལ་འཇུག་ཏུ་འཁྱིལ་ཞིང༌། ཕྱག་
9-8-14a


གཉིས་ཀྱིས་ཐལ་མོ་སྦྱར་ནས་གཙོ་བོ་ལ་འདུད་པར་འགྲེལ་བ་སྡོམ་འབྱུང་ལས་བཤད། དེ་དག་གི་སྟེང་གི་ནམ་མཁའ་ལ་གནས་པའི་སྤྲིན་བརྒྱད་ནི། ཤར་ནས་ཕྱོགས་གཡོན་སྐོར་དུ། སྒྲོག་པ། ཆེར་སྒྲོག་པ། དྲག་པོ། གཡོ་བ། དབང་
ལྡན་ནས་མཚམས་གཡས་སྐོར་དུ། བརྟན་དང༌། གང་བ། གཏུམ་པོའོ། །ཐམས་ཅད་ཀྱང་གློག་འཕྲེང་འཁྱུག་ཅིང་འབྲུག་སྒྲ་སྒྲོག་པ། འགའ་ཞིག་ཆར་གྱི་རྒྱུན་ཅན་ཁ་དོག་སྣ་ཚོགས་པའོ། །སྤྲིན་རྣམས་འདི་ལྟར་བཤད་པ་ནི་མན་སྙེ་ལས་སོ། །
དེ་ན་གནས་པའི་རི་བརྒྱད་ནི། ཤར་ནས་ཕྱོགས་གཡོན་སྐོར་དུ། རིན་པོ་ཆེའི་རང་བཞིན་གྱི་ལྷུན་པོ། མཎྜར་ལྗང་གུ། ཀཻ་ལ་ཤ་དཀར་པོ། མ་ལ་ཡ་སེར་པོ། དབང་ལྡན་ནས་གཡས་སྐོར་དུ། དབང་ཆེན་ནག་པོ། སྤོས་དང་ལྡང་སེར་པོ། གངས་
ཅན་དཀར་པོ། དཔལ་གྱི་རི་སྔོན་པོའོ། །རི་དེ་རྣམས་ལ་གནས་པའི་མཆོད་རྟེན་དཀར་པོ་བརྒྱད་དང༌། གྲུབ་ཆེན་བརྒྱད་དོ། །གཞན་ཡང་ཡེ་ཤེས་ཀྱི་མེ་བརྒྱད་དང༌། ཁ་དང༌། འུག་པ་དང༌། བྱ་རྒོད་དང༌། ཅེ་སྤྱང་དང༌། འོལ་བ་ཕོ་མོ་དང༌། སྦྲུལ་བ་གླང་གི་མགོ་ཅན་
ལ་སོགས་པ་ཕྱོགས་སུ་བརྒྱུ་ཞིང༌། གནོད་སྦྱིན་དང༌། རོ་ལངས་དང༌། སྲིན་པོ་རྣམས་ཀྱིས་ཀི་ལི་ཀི་ལིའི་སྒྲ་ཆེན་པོ་སྒྲོག་པ་དང༌། གྲུབ་པ་ཐོབ་པ་དང༌། རིག་པ་འཛིན་པ་དང༌། དམ་ཚིག་སྤྱོད་པའི་རྣལ་འབྱོར་པ་དང༌། རྣལ་འབྱོར་མ་བཅོམ་ལྡན་
འདས་ལ་རྩེ་གཅིག་ཏུ་བལྟ་བ། གཅེར་བུ་སྐྲ་བཤིག་པ། ཕྱག་རྒྱ་ལྔས་བརྒྱན་པ། ཅང་ཏེ་འུ་དང༌། ཐོད་པ་དང༌། ཁ་ཊཱཾ་ག་འཛིན་པ། ཐོད་པས་སྤྱི་བོར་བརྒྱན་པ། རྒོད་ཅིང་དུར་ཁྲོད་དུ་འཇུག་པ་རྣམས་ཀྱིས་ངོ་མཚར་བར་བྱེད་པའོ། །གཞལ་ཡས་
9-8-14b


ཁང་གི་ནང་གི་སྟེང་འོག་རྣམས་ཤར་དཀར། བྱང་ལྗང་། ནུབ་དམར། ལྷོ་སེར་བ། འོག་གཞི་དམ་ཚིག་གི་འཁོར་ལོ་ལ་གནས་པའི་སྐུའི་འཁོར་ལོ་དཀར་པོ་རྩིབས་བརྒྱད་པའི་མུ་ཁྱུད་ལ་འཁོར་ལོའི་ཕྲེང་བ་དང༌། དེའི་ལྟེ་བར་གསུང་གི་
འཁོར་ལོ་དམར་པོ་རྩིབས་བརྒྱད་པའི་མུ་ཁྱུད་ལ་པདྨའི་ཕྲེང་བ་དང༌། དེའི་ལྟེ་བར་ཐུགས་ཀྱི་འཁོར་ལོ་སྔོན་པོ་རྩིབས་བརྒྱད་པའི་མུ་ཁྱུད་ལ་རྡོ་རྗེའི་ཕྲེང་བ་དང༌། དེའི་ལྟེ་བར་བདེ་ཆེན་གྱི་འཁོར་ལོ་སྣ་ཚོགས་པདྨ་འདབ་མ་བརྒྱད་པའི་མུ་ཁྱུད་ལ་
གྲི་གུག་གི་ཕྲེང་བས་བསྐོར་བ། འཁོར་ལོ་བཞི་པོ་རེ་རེ་ལ་མཚམས་རྣམས་ན་གནས་པའི་ཀ་བ་བརྒྱད་བརྒྱད་ཀྱིས་བཏེག་པའི་གདུང་ཟླུམ་རིམ་པ་བཞིའི་ཐོག་གིས་ཇེ་མཐོ་ཇེ་མཐོར་གྱུར་པའི་རྩེ་མོར་རྡོ་རྗེ་ནོར་བུ་རིན་པོ་ཆེའི་ཏོག་གིས་སྤྲས་པའོ། །
གཉིས་པ་ལ་གཉིས། གཙོ་བོ་ཡབ་ཡུམ་གསལ་གདབ་པ་དང༌། འཁོར་གྱི་ལྷ་རྣམས་གསལ་གདབ་པའོ། །དང་པོ་ནི། དབུས་ཀྱི་པདྨའི་ལྟེ་བར་ཉི་མའི་གདན་ལ། བཅོམ་ལྡན་འདས་དཔལ་ཧེ་རུ་ཀ་སྐུ་མདོག་མཐིང་ག །ཞལ་བཞི་པའི་རྩ་ཞལ་
ནག །གཡོན་ལྗང༌། རྒྱབ་དམར། གཡས་སེར་བ། ཞལ་རེ་རེའང་སྤྱན་གསུམ་པ། ཕྱག་བཅུ་གཉིས་པ། དཔྲལ་བར་རྡོ་རྗེ་རྩེ་ལྔ་པའི་ཕྲེང་བ་འཛིན་པ། ཞབས་གཡས་བརྐྱང་པས་འཇིགས་བྱེད་ནག་པོ་ལག་པ་བཞི་པའི་དང་པོ་གཉིས་ཐལ་
མོ་སྦྱར་བ། ལྷག་མ་གཡས་ཌཱ་མ་རུ་དང༌། གཡོན་རལ་གྲི་འཛིན་པའི་མགོ་བོ་མནན་པ། གཡོན་བསྐུམ་པས་དུས་མཚན་མ་དམར་མོ། ལག་པ་བཞི་པའི་དང་པོ་གཉིས་ཐལ་མོ་སྦྱར་བ། ལྷག་མ་གཉིས་ཐོད་པ་དང་ཁ་ཊྭཱཾ་ག་འཛིན་པའི་ནུ་མ་
9-8-15a


མནན་པ། ཇོ་བོ་ཆེན་པོས་གཡས་ཀྱིས་འཇིགས་བྱེད་དང༌། གཡོན་གྱིས་དུས་མཚན་མ་གནོན་པར་བཤད་པ་ལྟར། མངོན་བརྗོད་ཀྱི་ལེའུ་སོ་གཉིས་པ་དང༌། ང་གཉིས་པར་ཡང་དེ་བཞིན་དུ་བཤད་ལ། སྒྲུབ་ཐབས་ཀྱི་རྒྱ་གཞུང་མང་པོ་ལས་ཀྱང་གཡས་བརྐྱང་གིས་འཇིགས་བྱེད་དང༌། གཡོན་གྱིས་དུས་
མཚན་མ་མནན་ཞེས་རིམ་པ་དེ་ལྟར་འབྱུང་བ་དང་བསྟུན་ནོ། །གདན་གཉིས་ཀའང་གདོང་གཅིག་པ། མིག་གསུམ་པ། ཕྱག་རྒྱ་ལྔས་བརྒྱན་པའོ། །ཕྱག་དང་པོ་གཉིས་ཀྱིས་རྡོ་རྗེ་ཕག་མོ་ལ་འཁྱུད་པའི་གཡས་པས་རྡོ་རྗེ་རྩེ་ལྔ་པ་དང༌། གཡོན་པས་དྲིལ་བུ་བསྣམས་པ། དེའི་འོག་
མ་གཉིས་ཀྱིས་གླང་པོ་ཆེའི་པགས་པ་དཀར་པོ་ཁྲག་དང་བཅས་པའི་ན་བཟའ་ཕྱག་གཡས་པས་ལག་པ་གཡོན་པ་དང༌། གཡོན་པས་རྐང་པ་གཡོན་པའི་པགས་པ་རང་གི་རྒྱབ་ཏུ་སྡིགས་མཛུབ་དང་བཅས་པའི་ཕྱག་གིས་བརྒྱངས་ཏེ་འཛིན་པའི་སྡིགས་
མཛུབ་ཀྱི་རྩེ་གཉིས་སྨིན་མའི་ཐད་སོར་གནས་པ། གཡས་གསུམ་པ་ན་ཌཱ་མ་རུ། བཞི་པ་ན་དགྲ་སྟེ། ལྔ་པ་ན་གྲི་གུག དྲུག་པ་ན་མདུང་རྩེ་གསུམ་པ་བསྒྲེང་བ། གཡོན་པའི་ཕྱག་གསུམ་པ་ན་རྡོ་རྗེས་མཚན་པའི། བྱང་ཆུབ་ཀྱི་སེམས་ཀྱི་རང་བཞིན་གྱི། ཁ་ཊྭཱཾ་ག་ནི་
ཡུ་བ་དཀར་པོ་ཡར་རྩེ་རྡོ་རྗེ་ནག་པོ་རྩེ་ལྔ་པ་དེའི་འོག་ཏུ་རིམ་པ་བཞིན་བསྒྲིགས་པའི་མི་མགོ་སྐམ་པོ་དཀར་པོ། རྙིང་པ་དམར་པོ། རློན་པ་ནག་པོ་གསུམ། ཡུ་བའི་དབུས་སུ་སྣ་ཚོགས་རྡོ་རྗེ། དེའི་འོག་ཏུ་བུམ་པ་སེར་པོ། མར་རྩེ་ནི་རྩེ་གཅིག་པ་མཆོད་ཕྱིར་ཐོགས་དང་འབྲེལ་པ་ཡིན་ཏེ། མངོན་བརྗོད་དང༌། ཕག་མོ་ཤེས་རབ་སྣང་བའི་སྒྲུབ་ཐབས་དང༌། 
ཁྱད་པར་གསལ་བྱེད་རྣམས་ཀྱི་གདོངས་པ་གཅིག་ཏུ་བསྡུས་པའོ། །བཞི་པ་ནི་ཁྲག་གིས་གང་བའི། བདེ་བ་ཆེན་པོའི་རོའི་རང་བཞིན་གྱི། ཐོད་པ། ལྔ་པ་ན་རྡོ་རྗེ་ཞགས་པ། དྲུག་པ་ན་ཚངས་པའི་མགོ་བོ་གདོང་བཞི་པ་བསྣམས་ཤིང༌། སྣ་ཚོགས་རྡོ་རྗེས་མཚན་པའི་རལ་
9-8-15b


པའི་ཐོར་ཅོག་ཅན། དབུ་རེ་རེ་ལ་རྡོ་རྗེ་ནག་པོའི་ཕྲེང་བ་སྟོད་སྨད་དུ་གནས་པ་གཉིས་ལ་བརྒྱུས་པའི་ཐོད་པ་སྐམ་པོ་ལྔ་ལྔའི་ཕྲེང་བས་བརྒྱན་པ། དབུའི་གཡོན་དུ་ཅུང་ཟད་གཡོ་བའི་ཟླ་བ་ཕྱེད་པ་འཕྱང་བ། ཞལ་རྣམ་པར་འགྱུར་བ། མཆེ་བ་བཞི་བཞི་གཙིགས་ཤིང་
འཇིགས་སུ་རུང་བ། སྒེག་པ་དཔའ་བ་མི་སྡུག་པ་སྟེ་སྐུའི་ཉམས་གསུམ་དང༌། རྒོད་དང༌། དྲག་ཤུལ་འཇིགས་སུ་རུང་བ་སྟེ་གསུང་གི་ཉམས་གསུམ་དང༌། སྙིང་རྗེ་དང་རྔམ་པ་དང་ཞི་བ་སྟེ་ཐུགས་ཀྱི་ཉམས་གསུམ་སྟེ་ཉམས་དགུ་དང་ལྡན་པ། སྟག་གི་པགས་པའི་ཤམ་
ཐབས་ཅན། མིའི་རྒྱུ་མ་ལ་བརྒྱུས་པའི་མི་མགོ་རློན་པ་ལྔ་བཅུའི་འཕྲེང་བ། མགྲིན་པ་ནས་བརླ་ཕྲ་སྦོམ་གྱི་བར་དུ་འཕྱང་བ། ཕྱག་རྒྱ་དྲུག་གིས་རྒྱས་བཏབ་པ། ནི་སྤྱི་གཙུག་གི་ནོར་བུ་དང༌། ན་གུལ་རྒྱན་དང༌། གདུ་བུ་དང༌། རྣ་ཆ་དང༌། མཆོད་ཕྱིར་ཐོགས་དང༌། ཐལ་ཆེན་ནོ། །བར་པ་བཞིའི་མི་རུས་ལས་
བྱས་པར་བཤད་ལ། བརྩོན་འགྲུས་དཔལ་གྱི་བཤེས་གཉེན་གྱིས་འཁོར་ལོ་དང༌། རྐེད་རྒྱན་སོགས་ཉེ་བའི་ཕྱག་རྒྱར་བཤད་པས་ཀྱང་བརྒྱན་པའོ། །མི་རུས་ཀྱི་ཐལ་བས་ལུས་ཐམས་ཅད་ལ་བྱུགས་པའོ། །ཧེ་རུ་ཀའི་ཕྱག་མཚན་དང་རྒྱན་ཆ་སོགས་ཀྱི་དག་པ་འགྲེལ་པར་གསུངས་པ་རྣམས་ཀྱི་དོན་
ཕྱོགས་གཅིག་ཏུ་ཡིད་ལ་བྱེད་ཚུལ་ནི། ཡབ་ཡུམ་ཕན་ཚུན་དུ་འཁྱུད་པས་ནི་ཐབས་དང་ཤེས་རབ་ཕན་ཚུན་དུ་འཁྱུད་པ་མཚོན་ཞིང༌། དེའང་ཡུམ་དང་སྦྱོར་བ་སོགས་ཀྱི་ལུས་ལ་གནད་དུ་བསྣུན་པའི་ཐབས་ཁྱད་པར་ཅན་ལས། མགོ་བོ་ནས་བྱང་སེམས་ཀྱི་ཟླ་བ་ཞུ་
བ་དང༌། དེས་ལུས་ཀུན་ལ་ཁྱད་པ་ལས་བྱུང་བའི་ཐབས་བདེ་བ་ཆེན་པོས་ཤེས་རབ་སྟོང་པ་ཉིད་རྣམ་མཐར་བཞིའི་དོན་བསྒོམ་དགོས་པར་མཚོན་པ་དང༌། དེའི་བདེ་བ་ནི་ཁ་ཊྭཱཾ་ག་དང་ཐོད་པས་མཚོན་པའི་དོན་དང༌། དེ་གཉིས་ཀྱང་རྡོ་རྗེ་དང་དྲིལ་བུས་མཚོན་པའི་ཡེ་
9-8-16a


ཤེས་ལྔ་དང༌། ཤེར་ཕྱིན་གྱི་དོན་དང་ཨཱ་ལི་ཀཱི་ལིའི་ཐབས་ཤེས་སོ། །དེའི་བྱེད་ལས་ནི་ཆགས་སོགས་སྦྱོང་བ་དང༌། གཏི་མུག་བྲལ་བ་དང༌། སངས་རྒྱས་ཐམས་ཅད་བསྐུལ་ཞིང་སྒོ་གསུམ་གྱི་སྐྱོན་དང་མཐར་འཛིན་གྱི་རྣམ་
རྟོག་གཅོད་པ་དང༌། ཉོན་མོངས་པ་རྣམས་འབིགས་ཤིང་ཡང་དག་པའི་ཡེ་ཤེས་ཀྱི་འཆིང་བ་དང༌། རྟག་པ་འཁོར་བའི་ཡོད་མཐའ་དང༌། ཆད་པ་མྱང་འདས་ཀྱི་མེད་མཐའ་གཉིས་གནོན་ཞིང༌། སྟོང་ཉིད་རྟོགས་པས་འགྲོ་བ་ཀུན་ཟིལ་གྱིས་གནོན་པའོ། །དེ་ལྟར་
མཛད་པའི་འབྲས་བུ་ལ་སྐྱོན་ཟད་པའི་སྤངས་པ་ནི། ཚངས་མགོ་དང༌། ཞི་མཐའ་སྤངས་པའི་འོད་གསལ་ལས་གཟུགས་སྐུར་བཞེངས་པ་ནི་ཐོད་སྐམ་དང༌། རྟེན་འབྲེལ་བཅུ་གཉིས་ཀྱི་སྒྲིབ་པ་ཐམས་ཅད་སྦྱངས་པ་ནི་ཕྱག་བཅུ་གཉིས་དང༌། ལོག་ལྟ་ཀུན་ལས་
ལོག་པའི་ཞལ་འགྱུར་བ་དང༌། བདུད་བཞི་འཇོམས་པའི་མཆེ་བ་གཙིགས་པ་དང༌། ཡོན་ཏན་གོང་ནས་གོང་དུ་འཕེལ་པའི་རྟོགས་པ་ནི་རལ་པ་གྱེན་དུ་བསྡུས་པ་དང༌། དེ་མཐར་ཕྱིན་ནས་ཡེ་ཤེས་ལྔར་གནས་པ་རྡོ་རྗེའི་ཕྲེང་བ་དང༌། ཡེ་ཤེས་དེས་ཇི་
སྙེད་པ་ཐམས་ཅད་གཟིགས་པ་ནི་སྤྱན་གསུམ་དང༌། འཕྲིན་ལས་བཞིས་སེམས་ཅན་ཐམས་ཅད་ཀྱི་དོན་མཛད་པ་ནི་སྣ་ཚོགས་རྡོ་རྗེ་དང༌། ཕྱིན་དྲུག་གི་ལམ་ཐམས་ཅད་རྫོགས་པར་མཛད་པ་ནི། ཕྱག་རྒྱ་དྲུག་གི་མཚོན་པའི་དོན་དང༌། གཤེགས་
པ་ལྔ་དང་གཤེགས་མ་བཞིས་བསྡུས་པའི་ཞི་ལྷག་གི་ཉམས་ཐམས་ཅད་དང་ལྡན་པའོ། །བཅོམ་ལྡན་འདས་ལ་མངོན་དུ་ཕྱོགས་པར་བཅོམ་ལྡན་འདས་མ་རྡོ་རྗེ་ཕག་མོ་སྐུ་མདོག་དམར་མོ། ཞལ་གཅིག་པ་ཕྱག་གཉིས་པ། སྤྱན་གསུམ་པ། 
9-8-16b


གཅེར་མོ་སྐྲ་གྲོལ་པ། ཐོད་པའི་དུམ་བུས་བརྒྱན་པའི་འོག་བག་ཅན། ཕྱག་གཡོན་པས་ཡབ་ཀྱི་མགུལ་ནས་འཁྱུད་པའི་ཐོད་པ་ན་བདུད་བཞི་ལ་སོགས་པའི་ཁྲག་གིས་གང་བ་བསྣམས་ནས་ཡབ་ཀྱི་ཞལ་དུ་སྟོབ་པ། གཡས་པས་ཕྱོགས་བཅུའི་གདུག་པ་
ཅན་ཀུན་ལ་རྡོ་རྗེ་དང་བཅས་པའི་སྡིགས་མཛུབ་ཀྱིས་བསྡིགས་པར་མཛད་པ། འགྲོ་བ་སྟོང་པ་ཉིད་དུ་མཉམ་པར་རྟོགས་པས་བསྐལ་པ་འཇིག་པའི་དུས་ཀྱི་མེ་ལྟ་བུ། ཤིན་ཏུ་དག་པའི་ཡེ་ཤེས་ཀྱི་སྣང་བ་དང་ལྡན་པས། ཉི་མའི་འོད་ཅན་གྱི་གཟི་བརྗིད་
ཆེ་བ། ཁྲག་ལ་དགྱེས་ཤིང་ཁྲག་འཛག་པ། བྱིན་པ་གཉིས་ཀྱིས་ཡབ་ཀྱི་བརླའི་སྟེང་ན་ལེགས་པར་འཁྲིལ་བ། ལྷག་མཐོང་གི་རང་བཞིན་གྱི་བདེ་བ་ཆེན་པོར་གནས་ཀྱང་འགྲོ་བའི་དོན་བྱེད་པས་ཐུགས་རྗེའི་བདག་ཉིད་ཅན། ཐལ་བ་མ་གཏོགས་
པའི་ཕྱག་རྒྱ་ལྔས་བརྒྱན་པ། མི་མགོ་སྐམ་པོ་ལྔའི་ཐོད་དང༌། མི་མགོ་སྐམ་པོ་ལྔ་བཅུའི་དོ་ཤལ་ཅན་དུ་བསྒོམ་མོ། །དེ་ནས་རྡོ་རྗེ་དང་པདྨ་སྦྱངས་ཏེ་ཡབ་ཀྱི་གསང་གནས་མི་དམིགས་པ་ལས། ཧཱུཾ་དཀར་པོ་ལས་རྡོ་རྗེ་དཀར་པོའམ། ནག་པོ་
རྩེ་ལྔ་པ་དང༌། བྱཱ་དམར་པོ་ལས་བྱུང་བའི་ནོར་བུ་དམར་པོ་རྩེ་མོ་ལ་བྱཱ་སེར་པོས་མཚན་པ། ཡུམ་གྱི་གསང་གནས་མི་དམིགས་པ་ལས་ཨ་ལས་པདྨ་དམར་པོ་འདབ་མ་གསུམ་པ། དྱཱ་དཀར་པོ་ལས་བྱང་ཆུབ་ཀྱི་སེམས་མཚོན་པའི་ལྟེ་བ་
དཀར་པོ། རྩེ་མོ་དྱཱ་སེར་པོས་མཚན་པ་བསམ། ཡབ་ཀྱི་ལྟེ་བ་དང་ཐུགས་ཀར་ཟླ་གདན་ལ། ཡུམ་ཀྱི་སྙིང་པོ་དང་ཉེ་སྙིང༌། མགྲིན་པ་དང་དཔྲལ་བར་ཉི་གདན་ལ་རང་གི་སྙིང་པོ་དང་ཉེ་སྙིང་དགོད། ཡུམ་གྱི་ལྟེ་བ་དང་ཐུགས་ཀར་ཉི་གདན་ལ། 
9-8-17a


ཡབ་ཀྱི་སྙིང་པོ་དང་ཉེ་སྙིང་དང༌། མགྲིན་པ་དང་དཔྲལ་བར་ཟླ་གདན་ལ་རང་གི་སྙིང་པོ་དང་ཉེ་སྙིང་དགོད་དེ། སྔགས་ཐམས་ཅད་ཁ་དོག་དམར་པོ་འོད་ཟེར་འཕྲོ་བ་གཡོན་སྐོར་དུ་དགོད་དོ། །ཡབ་ཡུམ་ཕན་ཚུན་དུ་ཙུ་མྦྷ་ན་བྱ་ཞིང༌། 
སྔགས་རྣམས་ཀྱང་ཕན་ཚུན་དུ་ཞལ་སྦྱོར་བ་དང༌། འོད་ཟེར་འཁྱུད་པར་བསམས་ལ། ཡི་གེ་གསུམ་བརྗོད་ནས་སྙོམས་པར་འཇུག་པར་བྱ་སྟེ། དེའི་ཕྱི་རོལ་གྱི་ཕྱག་རྒྱ་ལའང་ཆོ་ག་འདི་ཉིད་དོ། །སྙོམས་པར་ཞུགས་པས་བྱང་སེམས་ཞུ་བ་སྤྱི་བོ་ནས་
མགྲིན་པར་སླེབ་པ་ན་དགའ་བ་དང༌། མགྲིན་པ་ནས་སྙིང་ཁར་སླེབ་པ་ན་མཆོག་དགའ་དང༌། སྙིང་ཁ་ནས་ལྟེ་བར་སླེབ་པ་ན་ཁྱད་པར་གྱི་དགའ་བ་དང༌། ལྟེ་བ་ནས་ནོར་བུའི་རྩེར་སླེབ་པ་ན་ལྷན་ཅིག་སྐྱེས་དགའི་ཡེ་ཤེས་སྐྱེས་པར་བསམས་ལ། སྟོང་པ་
ཉིད་ཀྱི་ལྟ་བ་དྲན་པར་བྱས་ཏེ་བདེ་སྟོང་དབྱེར་མེད་དུ་སྦྱར་ལ་བསྐྱེད། དེ་ནས་རྟེན་བརྟེན་པའི་དཀྱིལ་འཁོར་གཉིས་ཀྱང་བདེ་སྟོང་དབྱེར་མེད་ཀྱི་ངོ་བོར་ལྟ་བའི་མོས་པ་ཤུགས་ཅན་བསྐྱེད་དོ། །འདི་གོམས་ན་རིམ་པ་དང་པོའི་སྐབས་སུའང་དེའི་ཉམས་ཤུགས་
ཅན་འཆད་པས་ཡབ་ཡུམ་སྙོམས་པར་འཇུག་པའི་སྐབས་ཀུན་ཏུ་དགའ་བ་རྩོམ་པའི་དམིགས་པ་རྣམས་དམིགས་ཕྱེད་པ་དང༌། དལ་བུས་བརྟན་པར་བྱས་ལ་མོས་པ་ཚུན་ཆོད་ཀྱིས་ཀྱང་དགའ་བཞི་བསྐྱེད་པའི་མཐར་བདེ་སྟོང་སྦྱར་ལ་བསྒོམ་ཞིང༌། 
བསྒོམས་པའི་དཀྱིལ་འཁོར་དང་བཟླས་པ་སོགས་ཀྱི་ཆོ་ག་ཐམས་ཅད་བྱང་ཆུབ་སེམས་ཀྱི་ངོ་བོར་མོས་ནས་ངེས་པར་བྱ་དགོས་པར་གསུངས་པ་ལྟར་བྱེད་པ་ནི་རིམ་པ་དང་པོ་བསྒོམས་པས་རྫོགས་རིམ་གྱི་རྟོགས་པ་སྐྱེ་བའི་རྒྱུད་སྨིན་པའི་ཐབས་དམ་
9-8-17b


པར་ཟུང་ཞིག །གཉིས་པ་ནི། པདྨའི་འདབ་མ་ལ་ཤར་དུ་མཁའ་འགྲོ་མ་ནག་མོ། བྱང་དུ་ལཱ་མ་ལྗང་གུ། ནུབ་ཏུ་ཀཎྜ་རོ་ཧི་དམར་མོ། ལྷོར་གཟུགས་ཅན་མ་སེར་མོ། ཐམས་ཅད་ཀྱང་ཞལ་གཅིག་མ། སྤྱན་གསུམ་མ། མཆེ་བ་རྣམ་པར་གཙིགས་པའི་ཞལ་
ཅན། གཅེར་བུ་སྐྲ་གྲོལ་བ། ཕྱག་བཞིའི་གཡས་དང་པོས་གྲི་གུག་དང༌། གཡོན་དང་པོས་ཐོད་པ་བཟུང་ནས་ཐུགས་ཀར་འཁྱུད་པའི་ཚུལ་མཛད་ཅིང༌། གཡས་འོག་མས་ཌཱ་མ་རུ་དང༌། གཡོན་འོག་མས་ཁ་ཊྭཱཾ་ག་བསྣམས་པ། ཅུང་ཟད་བཞད་པ། ཞབས་
གཡས་བརྐྱང་པས་བཞུགས་པ། ཕྱག་རྒྱ་ལྔས་བརྒྱན་པ། ཐོད་སྐམ་ལྔའི་དབུ་རྒྱན་དང༌། ཐོད་སྐམ་ལྔ་བཅུའི་དོ་ཤལ་ཅན་ནོ། །མཚམས་བཞིར་ཟླ་གདན་ལ་བདུད་རྩི་ལྔས་གང་བའི་ཐོད་པ་བཞི་བསམ་མོ། །དེ་ནས་འཁོར་ལོ་གསུམ་གྱི་རྩིབས་ཉེར་
བཞི་ཡུལ་ཉེར་བཞིའི་ངོ་བོ་དང་རྩིབས་ལ་བཀོད་པའི་ལྷ་ཡབ་ཡུམ་རྣམས་ཡུལ་དེ་ན་གནས་པའི་དཔའ་བོ་དང་དཔའ་མོར་དངོས་སུ་མོས་པ་བྱས་ལ། ཐུགས་འཁོར་གྱི་ཤར་རྩིབས་པུལླི་ར་མ་ལ་ཡར་ཁཎྜ་ཀ་པཱ་ལ་དང་རབ་གཏུམ་མ། དེ་བཞིན་དུ་
སྦྱར་ཏེ། བྱང་ཛཱ་ལནྡྷ་རར་མཧཱ་ཀཾ་ཀ་ལ་དང་གཏུམ་མིག་མ། ནུབ་ཨཽ་ཌྜི་ཡ་ནར་ཀཾ་ཀ་ལ་དང་འོད་ལྡན་མ། ལྷོ་ཨརྦུ་ཏར་མཆེ་བ་རྣམ་པར་གཙིགས་པ་དང་སྣ་ཆེན་མ། མེ་གོ་དཱ་བ་རིར་སུ་ར་བེ་རི་ཎཱ་དང་དཔའ་བོའི་བློ་ཅན་མ། བདེན་བྲལ་རཱ་མེ་ཤྭ་རིར་
འོད་དཔག་མེད་དང་ཁརྦ་རི། རླུང་དེ་བཱི་ཀོ་ཊིར་རྡོ་རྗེའི་འོད་དང་ལངྐའི་དབང་ཕྱུག་མ། དབང་ལྡན་མཱ་ཝ་བར་རྡོ་རྗེའི་སྐུ་དང་ཤིང་གྲིབ་མ་སྟེ་ཐུགས་ཀྱི་འཁོར་ལོ་ནམ་མཁའ་ལ་སྤྱོད་པའི་ཚུལ་གྱིས་བཞུགས་པ་ཐམས་ཅད་ཀྱང་སྐུ་མདོག་སྔོན་པོའོ། །
9-8-18a


གསུང་གི་འཁོར་ལོའི་ཤར་རྩིབས་ཀཱ་མ་རཱུ་པར་མྱུ་གུ་ཅན་དང་ས་སྲུངས་མ། བྱང་ཨོ་ཊེར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ། ནུབ་ཏྲི་ཤ་ཀུ་ནེར་དཔའ་བོ་ཆེན་པོ་དང་རླུང་གི་ཤུགས་ཅན་མ། ལྷོ་ཀོ་ས་ལར་རྡོ་རྗེ་ཧཱུཾ་
མཛད་དང་ཆང་མཐུང་མ། མེ་ཀ་ལིང་ཀར་རབ་ཏུ་བཟང་པོ་དང་སྔོ་བསངས་ལྷ་མོ། བདེན་བྲལ་ལམ་པ་ཀར་རྡོ་རྗེ་བཟང་པོ་དང་ཤིན་ཏུ་བཟང་མོ། རླུང་ཀཉྩིར་འཇིགས་བྱེད་ཆེན་པོ་དང་རྟ་རྣ་མ། དབང་ལྡན་ཧི་མཱ་ལ་ཡར་མིག་མི་བཟང་དང་བྱ་གདོང་མ་སྟེ་
གསུང་གི་འཁོར་ལོ་ས་ལ་སྤྱོད་པའི་ཚུལ་གྱིས་བཞུགས་པ་ཐམས་ཅད་ཀྱང་སྐུ་མདོག་དམར་པོའོ། །སྐུའི་འཁོར་ལོའི་ཤར་རྩིབས་པྲ་ཏེ་པུ་རིར་སྟོབས་པོ་ཆེ་དང་འཁོར་ལོའི་ཤུགས་ཅན་མ། བྱང་གྲི་ཧ་དེ་བ་ཏར་རིན་ཆེན་རྡོ་རྗེ་དང་དུམ་སྐྱེས་མ། ནུབ་སཽ་ར་ཥྜ་ར་
རྟ་མགྲིན་དང་ཆང་འཚོང་མ། ལྷོ་སུ་པརྞ་དཱི་བར་ནམ་མཁའི་སྙིང་པོ་དང་འཁོར་ལོའི་གོ་ཆ་མ། མེ་ནཱ་ག་རར་དཔལ་ཧེ་རུ་ཀ་དང་ཤིན་ཏུ་དཔའ་མོ། བདེན་བྲལ་སིནྡྷུ་ར་པདྨ་གར་གྱི་དབང་ཕྱུག་དང་སྟོབས་ཆེན་མོ། རླུང་མ་རུར་རྣམ་པར་སྣང་མཛད་དང་འཁོར་ལོ་སྒྱུར་
མ། དབང་ལྡན་ཀུ་ལུ་ཏར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ། སྐུའི་འཁོར་ལོ་ས་འོག་ན་སྤྱོད་པའི་ཚུལ་གྱིས་གཞུགས་པ་ཐམས་ཅད་ཀྱང་སྐུ་མདོག་དཀར་པོ་སྟེ། དཔའ་བོ་ཉེར་བཞི་པོ་ཐམས་ཅད་ཞལ་གཅིག་པ། སྤྱན་གསུམ་པ། རལ་
པའི་ཐོར་ཚུགས་ཅན། དཔའ་བོའི་དང་ཐོད་དཔྲལ་བར་བཅིངས་པ། ཕྱག་བཞིའི་དང་པོ་གཉིས་ཀྱིས་རྡོར་དྲིལ་བཟུང་ནས་ཡུམ་ལ་འཁྱུད་པ། ལྷག་མ་གཡས་ཌཱ་མ་རུ་དང་གཡོན་ཁ་ཊྭཱཾ་ག་འཛིན་པ། ཕྱག་རྒྱ་དྲུག་གིས་བརྒྱན་པ། ཐོད་སྐམ་ལྔའི་དབུ་རྒྱན་
9-8-18b


དང༌། ཐོད་རློན་ལྔ་བཅུའི་དོ་ཤལ་ཅན། གཡས་བརྐྱང་གིས་བཞུགས་པའོ། །དཔའ་མོ་ཉེར་བཞི་པོ་ཐམས་ཅད་ཀྱང་ཞལ་གཅིག་ཕྱག་གཉིས་མ། སྤྱན་གསུམ་མ། ཡབ་ལ་འཁྱུད་པའི་ཕྱག་གཉིས་ཀྱི་གཡས་པས་གདུག་པ་ལ་བསྡིགས་པའི་སྡིགས་མཛུབ་
དང་བཅས་པས་གྲི་གུག་འཛིན་ཅིང༌། གཡོན་པས་ཁྲག་གིས་གང་བའི་ཐོད་པ་འཛིན་ཅིང་སྟོབ་པ། དྲག་མོའི་གཟུགས་ཅན་གཅེར་མོ་སྐྲ་གྲོལ་བར་རྣམ་པར་མཛེས་ཤིང༌། ཕྱག་རྒྱ་ལྔས་བརྒྱན་པ། ཐོད་སྐམ་ལྔའི་དབུ་བརྒྱན་དང་། ཐོད་སྐམ་ལྔ་བཅུའི་དོ་ཤལ་
ཅན། འོག་པག་སིལ་སིལ་གྱི་སྒྲ་སྒྲོག་པའོ། །ཤར་སྒོར་ཁྭ་གདོང་མ། བྱང་སྒོར་འུག་གདོང་མ། ནུབ་སྒོར་ཁྱི་གདོང་མ། ལྷོ་སྒོར་ཕག་གདོང་མ། ཤར་ལྷོར་གཤིན་རྗེ་བརྟན་མ། ལྷོ་ནུབ་ཏུ་གཤིན་རྗེ་ཕོ་ཉ་མོ། ནུབ་བྱང་དུ་གཤིན་རྗེ་མཆེ་བ་མ། 
བྱང་ཤར་དུ་གཤིན་རྗེ་འཇོམས་མ་སྟེ། སྐུ་མདོག་ནི་བཤད་ཟིན་ལ། དྲག་མོ་ཆེན་མོ། སེམས་ཅན་ཀུན་གྱི་དོན་མཛད་པ་ལ་བརྩོན་པ། རོའི་གདན་ཅན། ཞལ་ཕྱག་གི་གྲངས་དང༌། ཕྱག་མཚན་ལ་སོགས་པ་ནི་མཁའ་འགྲོ་མ་ལ་སོགས་པ་དང་
འདྲའོ། །འཁོར་གྱི་ལྷ་ཐམས་ཅད་ཀྱང་དཔྲལ་བར་རྡོ་རྗེའི་ཕྲེང་བ་འཛིན་པའོ། །གསུམ་པ་ལ་གཉིས། བྱང་ཕྱོགས་སོ་བདུན་ལྷ་དང་སྦྱར་བ་དང༌། ལུས་ཀྱི་དཀྱིལ་འཁོར་བསྒོམ་པའོ། །དང་པོ་ནི། སྔར་གསང་གནས་གཉིས་སྦྱངས་པ་དང༌། གནས་
བཞི་སྔགས་ཀྱིས་བྱིན་གྱིས་བརླབ་པ་སོགས་གསལ་གདབ་ལ་སྙོམས་པར་ཞུགས་ཏེ་དགའ་བ་བསྐྱེད་ལ་ལྟ་བ་དྲན་པར་བྱས་ནས། བདེ་སྟོང་དབྱེར་མེད་དུ་སྦྱར་བ་དེ་ཉིད་རང་གི་ངོ་བོ་དང་གྲོགས་དང་བྱེད་ལས་སོགས་ཀྱི་སྒོ་ནས་བྱང་ཆུབ་ཀྱི་ཕྱོགས་ཀྱི་
9-8-19a


ཆོས་སོ་བདུན་དུ་པར་བྱས་ལ། དེ་ཉིད་ལྷ་སོ་བདུན་དུ་ཤར་བའོ་སྙམ་དུ་མདོར་བསྡུས་ཏེ་སྦྱར་བ་དང༌། རྒྱས་པར་སྦྱར་བ་གཉིས་སྐབས་དང་སྦྱར་ལ་བྱའོ། །འདི་བསྒོམ་པའི་དགོས་པ་ནི་འགྲེལ་པ་གསུམ་ལས། ལྷའི་རྣམ་པ་ལ་མངོན་ཞེན་
འདོར་བ་དང༌། ཐམས་ཅད་ཤེས་པ་ཉིད་ཐོབ་པར་བྱ་བའི་ཕྱིར་དུ་བསྒོམ་པར་བཤད་པའི་དང་པོ་ནི་འབྲས་བུའི་སྐབས་ན་གཉིས་མེད་བདེ་ཆེན་གྱི་ཡེ་ཤེས་ཉིད་ལྷར་ཤར་བ་ཡིན་ལ། དེ་དང་རྗེས་སུ་མཐུན་པར་འབྲས་བུ་ལམ་དུ་བྱེད་པའི་དོན་ཡིན་པས་བདེ་སྟོང་གི་ཡེ་ཤེས་ལྷར་ཤར་བ་མིན་པའི་ལྷ་སྐུ་ལ་ཞེན་པ་འགོག་པའི་དོན་ཡིན་གྱི། ལྷ་སྐུ་
འཇའ་ཚོན་ལྟ་བུ་ཞིག་བསྒོམས་ནས། ལྷ་སྐུ་ལ་གདོས་བཅས་སུ་འཛིན་པ་བཟློག་པ་ཙམ་ཡང་མིན་ལ། སོ་བདུན་པོ་ཐེག་ཆེན་གཞན་དང་ཐུན་མོང་པ་ཉིད་ལྟར་སྔོན་པའང་མིན་ནོ། །གཉིས་པའི་དོན་ནི་འཆད་པར་འགྱུར་རོ། །རྒྱས་པ་ནི་ལུས་དང༌། ཚོར་བ་དང༌། ཆོས་དང༌། སེམས་རྗེས་སུ་དྲན་པ་ཉེ་བར་བཞག་
པ་བཞི་ནི། རིམ་པ་བཞིན་གཡོན་སྐོར་གྱིས་མཁའ་འགྲོ་མ་སོགས་བཞི་དང༌། འདུན་པའི་དང༌། བརྩོན་འགྲུས་ཀྱི་དང༌། དཔྱོད་པའི་དང༌། སེམས་ཀྱི་རྫུ་འཕྲུལ་གྱི་རྐང་པ་བཞི་ནི། རིམ་པ་བཞིན་རབ་གཏུམ་མ་དང༌། གཏུམ་མིག་མ་དང༌། འོད་ལྡན་
མ་དང༌། སྣ་ཆེན་མ་བཞི་དང༌། དད་པའི་དང༌། བརྩོན་འགྲུས་ཀྱི་དང༌། དྲན་པའི་དང༌། ཏིང་ངེ་འཛིན་གྱི་དབང་པོ་བཞི་ནི་རིམ་པ་བཞིན། དཔའ་བོའི་བློ་ཅན་མ་དང༌། མིའུ་ཐུང་མ་དང༌། ལངྐའི་དབང་ཕྱུག་མ་དང༌། ཤིང་གྲིབ་མ་བཞི་དང༌། ཤེས་རབ་ཀྱི་དབང་པོ་དང༌། དད་
པའི་དང༌། བརྩོན་འགྲུས་ཀྱི་དང༌། དྲན་པའི་སྟོབས་བཞི་ནི་རིམ་པ་བཞིན། ས་སྲུངས་མ་དང༌། འཇིགས་བྱེད་ཆེན་མོ་དང་། རླུང་ཤུགས་མ་དང༌། ཆང་མཐུང་མ་བཞི་དང༌། ཏིང་ངེ་འཛིན་གྱི་སྟོབས་དང༌། ཤེས་རབ་ཀྱི་སྟོབས་དང༌། ཏིང་ངེ་འཛིན་དང༌། བརྩོན་
9-8-19b


འགྲུས་ཡང་དག་བྱང་ཆུབ་ཀྱི་ཡན་ལག་བཞི་ནི་རིམ་པ་བཞིན། སྔོ་བསངས་ལྷ་མོ་དང༌། ཤིན་ཏུ་བཟང་མོ་དང༌། རྟ་རྣ་མ་དང༌། བྱ་གདོང་མ་བཞི་དང༌། དགའ་བ་དང༌། ཤིན་ཏུ་སྦྱངས་པ་དང༌། ཆོས་རབ་ཏུ་རྣམ་འབྱེད་དང༌། དྲན་པ་ཡང་དག་བྱང་ཆུབ་ཀྱི་ཡན་ལག་བཞི་ནི་
རིམ་པ་བཞིན། འཁོར་ལོའི་ཤུགས་ཅན་མ་དང༌། དུམ་སྐྱེས་མ་དང༌། ཆང་འཚོར་མ་དང༌། འཁོར་ལོའི་གོ་ཆ་མ་བཞི་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་དང༌། ཡང་དག་པའི་ལྟ་བ་དང༌། རྟོག་པ་དང༌། ངག་བཞི་ནི། རིམ་པ་བཞིན། ཤིན་ཏུ་
དཔའ་མོ་དང༌། སྟོབས་ཆེན་མ་དང༌། འཁོར་ལོ་སྒྱུར་མ་དང༌། བརྩོན་འགྲུས་ཆེན་མོ་བཞི་དང༌། ཡང་དག་པའི་ལས་ཀྱི་འཐའ་དང༌། འཚོ་བ་དང༌། རྩོལ་བ་དང༌། དྲན་པ་བཞི་ནི། རིམ་པ་བཞིན་ཁྭ་གདོང་མ་དང༌། འུག་གདོང་མ་དང༌། ཁྱི་གདོང་མ་དང༌། ཕག་
གདོང་མ་བཞི་དང༌། ཡང་དག་བའི་ཏིང་ངེ་འཛིན་ནི་དཔལ་ཧེ་རུ་ཀའོ། །བྱང་ཕྱོགས་སོ་འདུན་ལྷ་མོ་དང་སྦྱོར་བའི་སྐབས་སུ་ཡང་དག་བའི་ཏིང་ངེ་འཛིན་ནི་ཧེ་རུ་ཀ་དང་དངོས་སུ་སྦྱོར་བ་ན་ཆས་སྔ་མ་ཉེར་བཞི་ཡང་རང་རང་གི་དཔའ་བོ་དང་སྦྱོར་བ་ཤེས་ནུས་ལ། དེའི་རིགས་པས་ཡང་དག་པའི་ཏིང་ངེ་འཛིན་ནི་གཙོ་མོ་དང་སྦྱོར་བ་ཡང་ཤེས་
ནུས་པས། དག་པ་དེ་རྣམས་ནི་དཔའ་བོ་དང་རྣལ་འབྱོར་མ་གཉིས་སུ་མེད་པའི་དག་པའོ། དགེ་བའི་ཆོས་མ་སྐྱེས་པ་བསྐྱེད་པ་དང༌། སྐྱེས་པ་རྣམས་བསྲུང་བ་དང༌། མི་དགེ་བའི་ཆོས་སྐྱེས་པ་རྣམས་སྤོང་བ་དང༌། མ་སྐྱེས་པ་རྣམས་ནི་བསྐྱེད་པའི་ཡང་དག་སྤོང་བ་བཞི་ནི་རིམ་པ་བཞིན། 
གཤིན་རྗེ་བརྟན་མ་དང༌། ཕོ་ཉ་མོ་དང༌། མཆེ་བ་མ་དང༌། འཇོམས་མ་བཞིའོ། །ཡང་དག་པའི་ཏིང་ངེ་འཛིན་ནི་ཧེ་རུ་ཀའི་བཤད་པའི་འོག་ཏུ་གཉེན་པོའི་ཕྱོགས་སྒྲུབ་དང༌། མི་མཐུན་ཕྱོགས་འགོག་པའི་སྤོང་བ་བཞི་བཤད་པ་ནི། བྱང་ཕྱོགས་སྔ་མ་སོ་གསུམ་གྱི་བྱ་བ་དེ་གཉིས་སྒྲུབ་པ་ནི། ཧེ་རུ་ཀ་མ་ཐོབ་བར་དུ་བྱ་དགོས་པར་
9-8-20a


ཤེས་པའི་དོན་དུ་ཁྱད་པར་གསལ་བྱེད་ལས་བཤད། གཉིས་པ་ནི། རང་གི་ལུས་ཀྱི་ཆར་རགས་པ་དང་ཕྲ་བ་རྩ་དང་ཁམས་རྣམས་རྟེན་བརྟེན་པའི་ལུས་དཀྱིལ་དུ་བསྒོམས་པས། རིམ་པ་གཉིས་པའི་སྐབས་སུ་ལུས་ལ་གནད་དུ་བསྣུན་པ་ལས་རྫོགས་
རིམ་གྱི་རྟོགས་པ་ཁྱད་པར་ཅན་སྐྱེ་བའི་རྒྱུད་སྨིན་པར་དཔའ་བོ་དང་རྣལ་འབྱོར་མ་རྣམས་ཀྱིས་བྱིན་གྱིས་རློབ་པའི་ཕྱིར་དུ་གཉིས་པ་ལུས་དཀྱིལ་སྒོམ་པ་ལ་གཉིས། ལུས་རགས་པ་རྟེན་གྱི་དཀྱིལ་འཁོར་དུ་སྒོམ་པ་དང༌། ལུས་ཕྲ་བ་བརྟེན་པའི་དཀྱིལ་འཁོར་
དུ་སྒོམ་པའོ། །དང་པོ་ནི། འདིའི་སྒོམ་ཆུལ་ནི་སྔར་འབྱུང་བ་རིམ་བརྩེགས་རི་རབ་གཞལ་ཡས་ཁང་དང་བཅས་པ་བསྐྱེད་པ་དེ་ཉིད་ཀྱི་རྒྱུན། ད་གཟོད་གཞལ་ཡས་ཁང་མ་བསྡུས་བར་དུ་འཇུག་པར་མོས་པའི་ལུགས་ཡིན་པས། རང་གི་རིགས་འདྲ་སྔ་མ་དང༌། 
ལུས་ཀྱི་ཆ་རེ་ལ་བརྟེན་ནས་རིགས་འདྲ་ཕྱི་མ་སྐྱེས་པར་སྒོམ་པ་ཡིན་ནོ། །དེའང་རྐང་པ་གཉིས་བགྲད་པ་གཞུའི་དབྱིབས་སུ་ཡོད་པ་ཡོངས་སུ་གྱུར་པ་ལས། འབྱུང་བ་རིམ་བརྩེགས་ཀྱི་རླུང་གཞུའི་དབྱིབས་ཅན་དང༌། སུམ་མདོ་གྲུ་གསུམ་གྱི་གཟུགས་སུ་
ཡོད་པ་ལས་མེ་དཀྱིལ་ཟུར་གསུམ་དང༌། ལྟོ་བ་ཟླུམ་པོའི་དབྱིབས་ཅན་ལས་ཆུ་དཀྱིལ་ཟླུམ་པོ་དང༌། སྙིང་ཁ་གྲུ་བཞི་པ་ལས་ས་དཀྱིལ་གྲུ་བཞི་དང༌། སྒལ་ཚིགས་ལས་རི་རབ། སྤྱི་བོའི་རྩ་སོ་གཉིས་ལས་པདྨ༌། ལུས་འདོམ་གང་ཡན་མན་དང་ཕན་
ཚུན་དུ་མཉམ་པ་ལས་ངོས་བཞི་མཉམ་པའི་གཞལ་ཡས་ཁང་གྲུ་བཞི་པ། ཕ་གུ་དང་དྲ་ཕྱེད་སོགས་ཀྱི་རྒྱན་གྱིས་རབ་ཏུ་མཛེས་པའི་ཧེ་རུ་ཀའི་དཀྱིལ་འཁོར། རྐང་བརྒྱད་ལས་ཀ་བ་བརྒྱད། རང་གི་ལུས་ངག་ཡིད་གསུམ་ལས་འཁོར་ལོ་གསུམ་
9-8-20b


དུ་བསམ་མོ། །གཉིས་པ་ནི། སྙིང་ཁ་ཆོས་ཀྱི་འཁོར་ལོའི་དབུས་ཀྱི་དྷཱུ་ཏཱིའི་ནང་གི་བྱང་སེམས་པ་མ་ལྟ་བུ་འཛག་པ། ཡུངས་ཀར་སྦོམ་པོའི་ཚད་ཀྱི་དཔྱིད་ཧཱུཾ་ཡིག་ཡོངས་སུ་གྱུར་པ་ལས་བཅོམ་ལྡན་འདས་ཧེ་རུ་ཀ། ལྟེ་བའི་དམར་ཆ་གཏུམ་མོ་མེའི་
གཟུགས་ཀྱི་ཐིག་ལེ་ཡོངས་སུ་གྱུར་པ་ལས་བཅོམ་ལྡན་འདས་མ་རྡོ་རྗེ་ཕག་མོ་སྟེ། དཔྱིད་དང་ཐིག་ལེའི་ངོ་བོ་གཉིས་སྙིང་ཁར་ཕྲད་ནས་སྙོམས་པར་འཇུག་པས་བཞུགས་པའོ། །སྙིང་ཁའི་ཤར་ལ་སོགས་པའི་འབྱུང་བ་བཞིའི་རླུང་རྒྱུ་བའི་རྩ་
འདབ། སུམ་སྐོར་མ། འདོད་མ། ཁྱམ་མ། གཏུམ་མ། བཞི་ལས། ཤར་དུ་མཁའ་འགྲོ་མ། བྱང་དུ་ལཱ་མ། ནུབ་ཏུ་ཁཎྜ་རོ་ཧི། ལྷོར་གཟུགས་ཅན་མ། ཤར་ལྷོ་ལ་སོགས་པའི་མཆོད་པ་བཞིའི་རྩ་འདབ་ལས་བདུད་རྩི་ལྔས་གང་བའི་ཐོད་པ་བཞིའོ། །སྤྱི་བོ་
ལ་སོགས་པའི་གནས་ཉེར་བཞིར། པཱུ། ཛཱ། ཨོ། ཨ། གོ། རཱ། དེ། མཱ། ཀཱ། ཨོ། ཏྲྀ། ཀོ། ཀ། ལ། ཀཱ། ཧི། པྲེ། གྲི། སཽ། སུ། ན། སི། མ། ཀུ། རྣམས་ཐིག་ལེས་བརྒྱན་པ་ཡོངས་སུ་གྱུར་པ་ལས། རྩིབས་ཁོང་སྟོང་རྩིབས་ཤུན་
གྱི་རྣམ་པ་དང་ལྡན་པའི་འཁོར་ལོ་ཉེར་བཞིའི་རྣམ་པར་བསྐྱེད་ལ་ཕྱིའི་ཡུལ་ཉེར་བཞི་དངོས་ཡིན་པར་མོས་པ་བྱའོ། །གནས་ཉེར་བཞིའི་རྩ་ཉེར་བཞི་དང་དེའི་ནང་གི་ཁམས་ཉེར་བཞི་ངོ་བོ་དབྱེར་མེད་དུ་མོས་ལ། རྩ་དང་ཁམས་ཡོངས་
སུ་གྱུར་པ་ལས་དཔའ་མོ་ཉེར་བཞི་དང་དཔའ་བོ་ཉེར་བཞིར་གྱུར་པར་བསམ་མོ། །སྤྱི་བོ་སྟེ་སྐྲ་མཚམས་པཱུ་ལླི་ར་མ་ལ་ཡ་ན་གནས་པའི་རྩ། མི་ཕྱེད་མ་སོ་དང་སེན་མོ་འབབ་བ། རང་གི་ཁམས་དང་རྩ་གཉིས་ཡོངས་སུ་གྱུར་པ་ལས། ཁཎྜ་ཀ་པཱ་
9-8-21a


ལ་དང་རབ་གཏུམ་མ། དེ་བཞིན་དུ་སྦྱར་ཏེ། སྤྱི་གཙུག་ཛཱ་ལནྡྷ་རར་ཁམས་དང་རྩ། ཕྲ་གཟུགས་མ་སྐྲ་དང་བ་སྤུ་འབབ་མ། ལས། མཧཱ་ཀཾ་ཀ་ལ་དང་གཏུམ་མིག་མ། རྣ་བ་གཡས་པ་ཨཽ་ཌྜི་ཡ་ནར་ཁམས་དང་རྩ། རྩེབ་མ་
པགས་པ་དང་དྲི་མ་འབབ་མ། ལས། ཀཾ་ཀ་ལ་དང་འོད་ལྡན་མ། ལྟག་པ་ཨརྦུ་ཏར་ཁམས་དང་རྩ། གཡོན་པ་མ་ཤ་འབབ་པ། ལས། མཆེ་བ་རྣམ་པར་གཙིགས་པ་དང་སྣ་ཆེན་མ་སྟེ་གནས་སོ། །རྣ་བ་གཡོན་པ་གོ་དཱ་བ་རིར་ཁམས་དང་རྩ། ཐུང་དུས་རྒྱུས་པ་འབབ་པ། 
ལས། སུ་ར་བཻ་རི་ཎ་དང་དཔའ་བོའི་བློ་ཅན་མ། སྨིན་མཚམས་ར་མེ་ཤཱ་རིར་ཁམས་དང་རྩ། རུས་སྦལ་སྐྱེས་མ་རུས་བ་འབབ་པ། ལས། འོད་དཔག་མེད་དང་ཁརྦ་རི། མིག་གཉིས་དེ་བཱི་ཀོ་ཊིར་ཁམས་དང་རྩ། སྒོམ་པ་མ་མཆིན་པ་འབབ་པ། ལས། རྡོ་རྗེ་འོད་དང་ལཾ་
ཀའི་དབང་ཕྱུག་མ། ཕྲག་པ་གཉིས་མཱ་ལ་བར་ཁམས་དང་རྩ། དབང་མ་སྙིང་འབབ་པ། ལས། རྡོ་རྗེའི་སྐུ་དང་ཤིང་གྲིབ་མ་སྟེ། ཉེ་བའི་གནས་ཏེ་ཐུགས་འཁོར་རོ། །མཚན་ཁུང་གཉིས་ཀཱ་མ་རཱུ་པར་ཁམས་དང་རྩ། སྐྱོན་ལྡན་མ་མིག་འབབ་པ། ལས། མྱུ་གུ་ཅན་དང་
ས་སྲུངས་མ། ནུ་མ་གཉིས་ཨོ་ཊེར་ཁམས་དང་རྩ། མཇུག་མ་འཁྲིས་པ་འབབ་པ། ལས། རྡོ་རྗེ་རལ་པ་ཅན་དང་འཇིགས་བྱེད་ཆེན་མོ་སྟེ་ཞིང་ངོ༌། །ལྟེ་བ་ཏྲི་ཤ་ཀུ་ནེར་ཁམས་དང་རྩ། མ་མོ་གློ་བ་འབབ་པ། ལས། དཔའ་བོ་ཆེན་པོ་དང་རླུང་གི་ཤུགས་ཅན་མ། སྣ་རྩེ་ཀོ་
ས་ལར་ཁམས་དང་རྩ། མཆེན་མ་རྒྱུ་མ་འབབ་པ། ལས། རྡོ་རྗེ་ཧཱུཾ་མཛད་དང་ཆང་འཐུང་མ་སྟེ་ཉེ་བའི་ཞིང་ངོ༌། །ཁ་ཀ་ལིཾ་ཀར་ཁམས་དང་རྩ། བསིལ་སྦྱིན་མ་རོས་ཀྱི་རྒྱུས་པ་འབབ་པ། ལས། རབ་ཏུ་བཟང་པོ་དང་སྔོ་བསངས་ལྷ་མོ། མགྲིན་པ་ལཾ་པ་ཀར་ཁམས་དང་རྩ། ཚ་བ་
9-8-21b


མ་ལྟོ་བ་འབབ་པ། ལས། རྡོ་རྗེ་བཟང་པོ་དང་ཤིན་ཏུ་བཟང་མོ་སྟེ་ཚ་ནྡྷོ་ཧའོ། །སྙིང་ཀཉྩིར་ཁམས་དང་རྩ། གཞོལ་མ་བཤད་པ་འབབ་བ། ལས། འཇིགས་བྱེད་ཆེན་མོ་དང་རྟ་རྣ་མ། འབྲས་བུ་གཉིས་ཧི་མ་ལ་ཡར་ཁམས་དང་རྩ། རངས་མ་མཆོགས་མའི་མཚམས་སམ་མཐའ་འབབ་པ། 
ལས། མིག་མི་བཟང་དང་བྱ་གདོང་མ་སྟེ་ཉེ་བའི་ཚ་ནྡྷོ་ཧ་སྟེ་གསུང་འཁོར་རོ། །མཚན་མ་པྲེ་ཏ་པུ་རིར་ཁམས་དང་རྩ། ཤིན་ཏུ་གཟུགས་ཅན་མ་བད་ཀན་འབབ་པ། ལས། སྟོབས་པོ་ཆེ་དང་འཁོར་ལོའི་ཤུགས་ཅན་མ། བཤད་ལམ་གྲི་ཧ་དེ་བ་ཏར་ཁམས་དང་རྩ། སྤྱི་མ་རྣག་
འབབ་པ། ལས། རིན་ཆེན་རྡོ་རྗེ་དང་དུམ་སྐྱེས་མ་སྟེ་འདུས་པའོ། །བརླ་གཉིས་སཽ་རཥྟར་ཁམས་དང་རྩ། རྒྱུ་སྦྱིན་མ་ཁྲག་འབབ་པ། ལས། རྟ་མགྲིན་དང་འཆང་འཚོང་མ། བྱིན་པ་གཉིས་སུ་བརྞ་དཱི་པར་ཁམས་དང་རྩ། སྦྱོར་བྲལ་མ་རྡུལ་འབབ་པ། ལས། ནམ་མཁའི་སྙིང་པོ་དང་
འཁོར་ལོའི་གོ་ཆ་མ་སྟེ་ཉེ་བའི་འདུས་པའོ། །སོར་མོ་བཅུ་དྲུག་ནག་རར་ཁམས་དང་རྩ། སྡུ་གུ་མཆིལ་འབབ་པ། ལས། ཧེ་རུ་ཀ་དང་ཤིན་ཏུ་དཔའ་མོ། བོལ་གོང་གཉིས་སིནྡྷུ་ར་ཁམས་དང་རྩ། གྲུབ་མ་མཆི་མ་འབབ་པ། ལས། པདྨ་གར་གྱི་དབང་ཕྱུག་དང་སྟོབས་
ཆེན་མ་སྟེ་དུར་ཁྲོད་དོ། །མཐེ་བོང་བཞི་མ་རུར་ཁམས་དང་རྩ། འཚེད་པ་མ་མཆིལ་མ་འབབ་པ། ལས། རྣམ་པར་སྣང་མཛད་དང་འཁོར་ལོ་སྒྱུར་མ། པུས་མོ་གཉིས་ཀུ་ལུ་ཏར་ཁམས་དང་རྩ། ཡི་བཟང་མ་སྣབས་འབབ་པ། ལས། རྡོ་རྗེ་སེམས་དཔའ་དང་བརྩོན་འགྲུས་
ཆེན་མོ་སྟེ། ཉེ་བའི་དུར་ཁྲོད་དེ་སྐུ་འཁོར་རོ། །ལུས་ལ་བཀོད་པའི་ལྷ་ཞེ་བརྒྱད་པོ་དེ་ནི་ཕྱིའི་ཡུལ་ཉེར་བཞི་ན་བཞུགས་པའི་དཔའ་བོ་དང་དཔའ་མོ་དངོས་ཡིན་པར་མོས་པ་བྱའོ། །ཁ་སྟེ་ལྕེའི་རྩ་བར་གནས་པའི་རྩ་ཡོངས་སུ་གྱུར་པ་ལས། ཁྭ་གདོང་
9-8-22a


མ་དང༌། དེ་བཞིན་དུ་སྦྱར་ཏེ། ལྟེ་བའི་བུག་པའི་ནང་དང༌། རྟགས་དང༌། བཤང་ལམ་གྱི་སྒོར་གནས་པའི་རྩ་ལས་རིམ་པ་བཞིན་དུ་འུག་གདོང་མ་དང༌། ཁྱི་གདོང་མ་དང༌། ཕག་གདོང་མར་བསྒོམ། མཛོད་སྤུའི་བུག་པ་དང༌། རྣ་
བུག་གཉིས་དང༌། མིག་གཉིས་དང༌། སྣ་བུག་གཉིས་ན་གནས་པའི་རྩ་རྣམས་ཡོངས་སུ་གྱུར་པ་ལས། རིམ་པ་བཞིན་དུ། གཤིན་རྗེ་བརྟན་མ་དང༌། ཕོ་ཉ་མོ་དང༌། མཆེ་བ་མ་དང༌། འཇོམས་མ་རྣམས་བསྒོམ། ལུས་ཀྱི་ལྟ་རེ་གཉིས་པོ་ཐམས་ཅད་ཀྱི་སྐུ་
མདོག་ཕྱག་མཚན་རྒྱན་ལ་སོགས་པ་ནི་སྔར་བཤད་པ་བཞིན་ནོ། །ཕྱི་དཀྱིལ་ནས་འདིའི་བར་བསྒོམས་བསྐུ་གསུམ་སྒོམ་པར་འཇོག་ཚུལ་མི་འདྲ་བ་མང་ཡང༌། དཔལ་རཱ་རི་ཀ་པས། ཕྱི་དཀྱིལ་གྱི་ལྷ་སྒོམ་པ་སྤྲུལ་སྐུ་དང༌། བྱང་ཕྱོགས་སོ་བདུན་སྒོམ་པ་ཆོས་སྐུ་དང༌། ལུས་དཀྱིལ་སྒོམ་པ་སངས་སྐུའི་སྒྲུབ་
ཐབས་སུ་གསུངས་སོ། །དགོངས་པ་ནི་གདུལ་བྱ་ཐུན་མོང་བའི་དོན་དུ་གསུངས་པ་ཤིན་ཏུ་རགས་པའི་སྐུའི་རྣམ་པ་ཅན་ཡིན་པས་སྤྲུལ་སྐུ་དང༌། བདེ་བ་ཆེན་པོའི་ཡེ་ཤེས་ཀྱི་དེ་ཁོ་ན་ཉིད་ཀྱི་དོན་ལ་ཐུགས་པའི་རྣམ་པ་ཅན་ཡིན་པས་ཆོས་སྐུ་དང༌། གདུལ་བྱ་མཆོག་གི་དོན་དུ་གསུངས་པ་ཤིན་ཏུ་ཕྲ་བའི་རྩ་དང་ཁམས་ཀྱི་སྒོ་ནས་གཟུགས་
སྐུ་འཛིན་པའི་རྣམ་པ་ཅན་ཡིན་ཞིང༌། རྩ་དེའི་ཁམས་བྱིན་གྱིས་བརླབ་པའི་སྒོམ་པ་བདེ་བ་རྫོགས་པར་ལོངས་སྤྱོད་པས་ལོངས་སྐུ་བཞག་སྟེ་ལེགས་པ་ཡིན་ནོ། །བཞི་པ་ལ་གཉིས། གོ་ཆ་བྱ་ཞིང་ཡེ་ཤེས་པ་གཞུག་པ། དབང་བསྐུར་ནས་རྒྱས་གདབ་པའོ། །དང་པོ་ལ་གཉིས། གོ་ཆ་
བཅིང་བ་དང་། ཡེ་ཤེས་པ་གཞུག་པའོ། །དང་པོ་ནི། གོ་ཆ་དགོད་པ་ལ་གཉིས་ལས། རྒྱས་པ་ནི། རང་གི་སྙིང་ཁར་ཨོཾ་ཧ་དཀར་པོ་ཡོངས་སུ་གྱུར་པ་ལས། ཟླ་གདན་ལ་རྡོར་སེམས་དཀར་པོ་རྩ་ཞལ་དཀར། གཡས་དམར། གཡོན་ནག་པའི་ཞལ་
9-8-22b


གསུམ། ཕྱག་དྲུག་གི་གཡས་གསུམ་ན་རྡོ་རྗེ་དང་ཌཱ་མ་རུ་དང་མགོ་བོ། གཡོན་གསུམ་ན། དྲིལ་བུ་དང་ཐོད་པ་དང་ཁ་ཊྭཱཾ་ག་འཛིན་པ། ཟླ་བའི་འོད་དཀོར་ཅན། ཕག་མོ་དང་མཉམ་པར་སྦྱོར་བ། མགོ་བོར་ན་མ་ཧི་སེར་པོ་ལས་རྣམ་སྣང་སེར་པོ། གཡས་
དང་པོ་འཁོར་ལོ། སྤྱི་བཙུག་ཏུ་སྭ་ཧ་ཧུ་དམར་པོ་ལས་པདྨ་གར་གྱི་དབང་ཕྱུག་དམར་པོ། གཡས་དང་པོ་པདྨ། ཕྲག་པ་གཉིས་ལ་བཽ་ཁ་ཊ་ཧེ་ནག་པོ་ལས་དཔལ་ཧེ་རུ་ཀ་ནག་པོ། གཡས་དང་པོ་རྡོ་རྗེ། མིག་ལ་ཧཱུཾ་ཧཱུཾ་ཧོ་དམར་སེར་ལས་རྡོ་རྗེ་ཉི་མ་དམར་
སེར་གཡས་དང་པོ་རིན་པོ་ཆེ། དཔྲལ་བར་ཡན་ལག་ཐམས་ཅད་ཀྱི་ལུས་དབང་གི་ངོ་བོ་ཕཊ་ཧཾ་ལྗང་གུ་ལས། རྟ་མཆོག་ལྗང་གུ་གཡས་དང་པོ་རལ་གྲི། གཡས་འོག་མ་རྣམས་ཀྱིས་ཌཱ་མ་རུ། གཡོན་དང་པོ་རྣམས་ཀྱིས་དྲིལ་བུ་དང༌། གཡོན་འོག་མ་
རྣམས་ཀྱིས་ཐོད་པ་དང་བཅས་པའི་ཁ་ཊྭཱཾ་ག་འཛིན་པ། ཉི་གདན་ལ་བཞུགས་ཤིང་ཉི་མའི་འོད་ཀོར་ཅན། རང་རང་གི་ཡུམ་གཤིན་རྗེ་མ་སོགས་དང་མཉམ་པར་སྦྱོར་བ། དཔའ་བོ་དྲུག་པོ་ཐམས་ཅད་ཕྱག་རྒྱ་དྲུག་གིས་བརྒྱན་ཅིང་ཐོད་པའི་དབུ་རྒྱན་དང༌། 
མགོ་བོའི་དོ་ཤལ་དང་སྟག་གི་པགས་པའི་ཤམ་ཐབས་ཅན། སྤྱན་གསུམ་པ་གཡས་བརྐྱང་གིས་བཞུགས་པའོ། །བསྡུས་པ་བྱེད་ན་གནས་དྲུག་ཏུ་ཡི་གེ་ཚན་པ་དྲུག་བཀོད་ལ་ལྷ་དང་དེའི་ངོ་བོར་མོས་པ་བྱའོ། །གཙོ་མོའི་ལྟེ་བར་ཨོཾ་བཾ་དམར་
པོ་ཡོངས་སུ་གྱུར་པ་ལས། རྡོ་རྗེ་ཕག་མོ་དམར་མོ། དམར་སྔོ་ལྗང་བའི་ཞལ་གསུམ་ཕྱག་དྲུག་གི་གཡས་གསུམ་ན་གྲི་གུག །ཚངས་མགོ། ལྕགས་ཀྱུ། གཡོན་གསུམ་ན་ཐོད་པ། ཁ་ཊྭཱཾ་ག །ཞགས་པ་འཛིན་པ། སྙིང་ཁར་ཧཾ་ཡཾ་སྔོན་
9-8-23a


པོ་ལས་གཤིན་རྗེ་མ་སྔོན་མོ། ཁ་སྟེ་མགྲིན་པར་ཧྲི་མོཾ་དཀར་པོ་ལས་རྨོངས་བྱེད་མ་དཀར་མོ་ཟླ་གདན་དང་ཟླ་བའི་འོད་ཀོར་ཅན། མགོ་བོར་ཧྲིཾ་ཧྲི་སེར་པོ་ལས་སྐྱོད་བྱེད་མ་སེར་མོ། སྤྱི་གཙུག་ཏུ་ཧཱུཾ་ཧཱུཾ་ལྗང་གུ་ལས་སྐྲག་
བྱེད་མ་ལྗང་གུ། དཔྲལ་བར་ཡན་ལག་ཐམས་ཅད་ཀྱི་ལུས་དབང་གི་ངོ་བོ་ཕཊ་ཕཊ་དུད་ཀ་ལས་ཙ་ཎྜི་ཀ་དུད་ཀ་སྟེ་ལྷག་མ་ལྔ་ཉི་གདན་དང་ཉི་མའི་འོད་ཀོར་ཅན། ཞལ་གཅིག་ཕྱག་བཞིའི་གཡས་གཉིས་ན་ཌཱ་མ་རུ་དང་གྲི་གུག །གཡོན་གཉིས་ན་
ཐོད་པ་དང་བཅས་པའི་ཁཊྭཱཾ་ག་དང་དྲིལ་བུ་འཛིན་པ། ཐམས་ཅད་ཀྱང་སྤྱན་གསུམ་པ། གཅེར་མོ་སྐྲ་གྲོལ་ཞིང་ཕྱག་རྒྱ་ལྔས་བརྒྱན་པ། ཐོད་པའི་དབུ་རྒྱན་དང་མགོ་ཅན། གཡས་བརྐྱང་གིས་ཞུགས་ཤིང༌། རང་རང་གི་ཡབ་རྡོར་སེམས་སོགས་
དང་མཉམ་པར་སྦྱོར་བའམ། ཡུམ་རྐྱང་སྒོམ་པ་གང་མོས་བྱའོ། །བསྡུས་པ་བྱེད་ན། ལྟེ་བ་ལ་སོགས་པའི་གནས་དྲུག་ཏུ་ཡི་གེ་ཚན་པ་དྲུག་བཀོད་ལ་ལྷ་མོ་དེ་དང་དེའི་ངོ་བོར་མོས་པ་བྱའོ། །གཉིས་པ་ནི། ལྷ་ཐམས་ཅད་ཀྱི་ཐུགས་ཀར་ཉི་གདན་ལ་
གནས་པའི་ཧཱུཾ་ཡིག་ལས་འཕྲོས་པའི་འོད་ཟེར་དང༌། རྐང་པ་གཉིས་རྡོ་རྗེ་སྐྱིལ་ཀྲུང་དུ་གནས་པ་བཤིག་ལ། གཡས་པ་བརྐྱང་བའི་མཐེབ་ཆེན་གྱི་སྟེང་དུ། རྐང་པ་གཡོན་པའི་མཐེབ་ཆེན་གྱིས་མནན། ལག་པ་གཉིས་ཀྱི་མཛུབ་མོ་གཉིས་མདུད་གུང་
མོ་གཉིས་རྩེ་སྤྲད་ལ་བརྐྱང༌། མཐེ་བོང་གཉིས་བརྟན་པོར་སྦྱར་བ་ཐུར་དུ་བསྟན། མིང་མེད་དང་མཐེའུ་ཆུང་རྣམས་བརྐྱང་བ་འབར་བའི་ཕྱག་རྒྱ་དཔྲལ་བའི་དབུས་སུ་བཞག །མིག་ཅུང་ཟད་འོག་ཏུ་དམའ་བར་བྱས་ལ། གཡོན་ནས་གྱེན་དུ་བལྟས་
9-8-23b


ཏེ། དང་པོར་གཡོན་དང༌། དེ་ནས་གཡས་སུ་བསྐོར་ལ། ངག་ཏུ་ཕཻ་ཞེས་པའི་སྒྲ་བསྒྲགས་པས་ཕྱོགས་བཅུའི་འཇིག་རྟེན་གྱི་ཁམས་ན་བཞུགས་པའི་དཔའ་བོ་དང་དཔའ་མོའི་དབང་ཕྱུག་མ་ཡེ་ཤེས་པའི་འཁོར་ལོར་གྱུར་པ་མདུན་གྱི་ནམ་མཁར་སྤྱན་དྲངས་ལ་འོད་
ཟེར་སྙིང་ཁར་བསྡུ། དེ་དང་དུས་མཉམ་དུ་དབང་གི་ལྷ་དཀྱིལ་འཁོར་པ་རྣམས་ཀྱང་སྤྱན་འདྲེན་པ་མན་ངག་ཡིན་པར་བཤད་དོ། །དེའི་ལྷ་མོ་རྣམས་ནི་ཡེ་ཤེས་ཀྱི་བདུད་རྩིས་གང་བའི་ཐོད་པ་དང་ཌཱ་མ་རུ་འཛིན་པའོ། །དེ་ལྟར་སྤྱན་དྲངས་པ་ལ་སྔར་ལྟར་རིག་མ་བཅུ་དྲུག་
གིས་མཆོད་ལ། བཛྲ་ཨངྐུ་ཤ་ཛཿ་ཞེས་བརྗོད་པས་ཡེ་ཤེས་པ་རྣམས་དམ་ཚིག་པ་རང་རང་གི་སྟེང་དུ་དགུག །བཛྲ་པཱ་ཤ་ཧཱུཾ་ཤེས་པས་སོ་སོ་ལ་གཞུག །བཛྲ་སྥོ་ཊ་བཾ་ཞེས་པས་འོ་ཆུ་འདྲེན་པ་ལྟར་དབྱེར་མེད་དུ་བཅིང༌། བཛྲ་གྷ་ཎྜ་ཧོཿཞེས་པས་མི་བཞད་པ་མེད་
པར་དགྱེས་བཞིན་དུ་བཞུགས་པར་བསམས་ཏེ། རྟེན་རྣམས་ལའང་འོད་ཕྲེང་དང་དུར་ཁྲོད་ལ་སོགས་པའི་བར་དུའང་བསྟིམ་མོ། དེ་ནས་ཨོཾ་ཡོ་ག་ཤུད་དྷ་སརྦ་དྷ་རྨཿ། ཡོ་ག་ཤུདྡྷོ྅ཧཾ། ཞེས་བརྗོད་དེ། དམ་ཚིག་པ་དང་ཡེ་ཤེས་པ་གཉིས་རོ་མཉམ་དུ་སྦྱར་བ་ནི། 
ཆོས་ཐམས་ཅད་ཀྱི་དེ་ཁོ་ན་ཉིད་དང༌། བདེ་བ་ཆེན་པོའི་ཡེ་ཤེས་གཉིས་ངོ་བོ་དབྱེར་མེད་ཡིན་ལ། དེ་ཉིད་རྟེན་བརྟེན་པའི་དཀྱིལ་འཁོར་དུ་ཤར་བ་ཡིན་ཞིང༌། དེའང་གཙོ་བོ་ཡབ་ཡུམ་དུ་ཤར་བའི་ཆ་ཤས་སུ་མོས་པའི་སྒོ་ནས་ང་རྒྱལ་བཟུང་ལ། ལག་པ་
གཉིས་ཀྱིས་སྙིང་ཁར་པད་མར་དེས་སྔགས་ལན་རེ་དང་པད་ཀོར་གཡོན་དང༌། གཡས་དང༌། དབུས་གསུམ་དུ་བྱེད། མར་པ་ནས་བརྒྱུད་པ་རྣམས་དབུས་སུ་གསུམ་དང༌། གཡས་གཡོན་དུ་རེ་རེ་བྱེད་དེ་རྣམ་ལྔ་འདོད་པའི་ཕྱོགས་སུ་བསྐོར་བ་ཞེས་ཟེར། ཀོར་བྱས་པའི་མཐར། ཕྱག་རྒྱ་སྡུད་པ་ན་འཁྱུད་པའི་ཚུལ་བྱེད་
9-8-24a


པའི་སྙིང་པོའི་ཕྱག་རྒྱ་སྦྱིན་པར་བྱ་ཞིང༌། སྔར་གྱི་སྐད་ཅིག་མའི་སྔགས་བརྗོད་ལ་སྔགས་དོན་པར་ང་རྒྱལ་བཟུང་ངོ༌། །གཉིས་པ་ནི། དེ་ནས་དབང་གི་ལྷ་ལ་སྔར་བཞིན་རིག་མ་བཅུ་དྲུག་གིས་མཆོད་ལ། དེ་བཞིན་
གཤེགས་པ་ཐམས་ཅད་ཀྱི་བདག་ལ་མངོན་པར་དབང་བསྐུར་དུ་གསོལ་ཞེས་གསོལ་བ་བཏབ་པས། སྒོ་མཚམས་མ་བརྒྱད་ཀྱིས་བགེགས་བསྐྲད། དཔའ་བོ་རྣམས་ཀྱིས་ཤིས་པ་བརྗོད། དཔའ་མོ་རྣམས་ཀྱིས་རྡོ་རྗེའི་གླུ་ལེན། གཙོ་བོས་དབང་བསྐུར་བའི་
དགོངས་པ་མཛད། ཡུམ་བཞི་ཕག་མོ་དང་ལྔས་ཕྱག་གཡོན་པའི་ཐོད་པ་ཅུང་ཟད་ཡོལ་བར་བྱས་ཏེ། ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བགྱིའོ། །
ཨོཾ་སརྦ་ཏ་ཐཱ་ག་ཏ་ཨ་བྷི་ཥ་ཀ་ཏ་ས་མ་ཡི་ཤྲི་ཡེ་ཧཱུཾ། ཞེས་གསུང་ཞིང་བདུད་རྩིའི་ཆུ་རྒྱུན་གྱིས་སྤྱི་བོ་ནས་དབང་བསྐུར་བས། རང་དང་ལྷ་རྣམས་བདེ་བ་ཆེན་པོའི་བདག་ཉིད་དུ་གྱུར་པར་བསམ་ཞིང༌། སྤྱོ་བོ་ནས་སྐུ་ལ་ཞུགས་པའི་ཆུའི་ལྷག་མ་སྤྱི་
གཙུག་ཏུ་གནས་པ་ཡོངས་སུ་གྱུར་པ་ལས། གཙོ་བོ་ལ་མི་བསྐྱོད་པ། ཕག་མོ་ལ་རྣམ་སྣང༌། མཁའ་འགྲོ་ལ་སོགས་བཞི་ལ་རིན་འབྱུང༌། ཐུགས་འཁོར་གྱི་ལྷ་རྣམས་ལ་མི་བསྐྱོད་པ། གསུང་འཁོར་ལ་སྣང་མཐའ། སྐུ་འཁོར་ལ་རྣམ་སྣང༌། 
དམ་ཚིག་འཁོར་ལོའི་ལྷ་རྣམས་ལ་དོན་གྲུབ་ཀྱིས་དབུ་བརྒྱན་པར་བསམ་མོ། དེས་བུམ་པའི་དབང་ཐོབ། དེ་ནས་སྙིང་པོའི་རྣལ་འབྱོར་མ་བཞི་ཕག་མོ་ལ་ཐིམ་ནས་དེ་དང་ཧེ་རུ་ཀ་སྙོམས་པར་ཞུགས་པའི་བྱང་སེམས་ལྕེ་ལ་བཞག་པ་མྱངས་པ་
9-8-24b


ལས་གསང་དབང་ཐོབ། དེ་ནས་ཧེ་རུ་ཀས་ཕག་མོ་ཕྱག་རྒྱར་གནས་པ་ལ་སྙོམས་པར་ཞུགས་པས་རླུང་ཐིམ་པ་ལས་ལྷན་སྐྱེས་ཀྱི་བདེ་བ་མྱོང་བ་ལས་ཤེས་རབ་ཡེ་ཤེས་ཀྱི་དབང་ཐོབ། དེ་ནས་ཧེ་རུ་ཀས་རིགས་ཀྱི་བུ་ཁྱོད་ཀྱིས་ཕྱག་རྒྱ་དང་སྦྱར་བ་ལ་བརྟེན་
ནས་ཐོབ་པའི་སྣང་བ་ཐོབ་པའི་ཡེ་ཤེས་དེ་འོད་གསལ་བར་སྒོམས་ཤིག །འོད་གསལ་དེ་ནི་སྣང་མཆེད་ཐོབ་གསུམ་གྱི་རྣམ་ཤེས་རྣམ་པར་དག་པ་ཤེར་ཕྱིན་གྱི་ངོ་བོ་ཡིན་ལ། དོན་དམ་པའི་བདེན་པ་དེ་ནི་མཐོང་བ་གཞན་གྱི་ཡུལ་ལས་འདས་
པ་སྟེ། ཤེས་རབ་དང་ཡེ་ཤེས་ཀྱི་མིག་གིས་ལྟོས་ཤིག །དེ་ལྟར་གཞན་གང་གིའང་རང་བཞིན་དུ་མ་མཐོང་བ་དེ་འོད་གསལ་མཐོང་བ་ཡིན་ནོ། །དེའི་དོན་རྒྱུ་འབྲས་གང་ཡང་མེད་མོད་ཀྱི། འོན་ཀྱང་ཀུན་རྫོབ་ཏུ་རླུང་སེམས་ཙམ་ལས་གྲུབ་པའི་ལྷ་སོ་
བདུན། གཟུགས་བརྙན་ལྟར་གསལ་ལ་རྫོགས་པ། འཇའ་ཚོན་ལྟར་ཁ་དོག་མ་འདྲེས་པར་སོ་སོར་སྣང་བ། ཆུ་ཟླ་ལྟར་སྒྲོ་སྐུར་དང་བྲལ་བར་ལྟོས་ཤིག །དེ་འདྲ་བའི་ཀུན་རྫོབ་དང་དོན་དམ་འོད་གསལ་གཉིས་དབྱེར་མི་ཕྱེད་པར་ཟུང་དུ་འཇུག་པ་ནི་
བྱང་ཆུབ་ཀྱི་སེམས་ཆེན་པོ་སྟེ་དབང་བཞི་པའོ། །ཞེས་དོན་གྱི་དབང་བཞི་པ་བསྟན་པའི་དོན་གོ་བ་ལས་ཚིག་གི་སྒོ་ནས་དབང་བཞི་པ་ཐོབ། དེ་ནས་དབང་གི་ལྷ་རྣམས་རང་ལ་ཐིམ་པར་བསམ་མོ། །ལྔ་པ་ལ་གཉིས། མཆོད་པ་དང༌། བསྟོད་པའོ། །
དང་པོ་ནི། ལག་པ་གཡོན་པའི་མཐེབ་སྲིན་གྱི་ནང་མཆོད་བླངས་ལ་མཆོད་རྫས་རྣམས་ལ་གཏོར་ཏེ་ཞལ་བཞི་པའི་སྔགས་བརྗོད་དེ་བསངས། སྭ་བྷཱ་བས་སྟོང་པར་སྦྱངས། སྟོང་པའི་ངང་ལས་ཨའཾ་ཀཾ་ལས་ཐོད་པའི་སྣོད་རྣམས་ཀྱི་ནང་དུ་ཧཱུཾ་ལས་
9-8-25a


མཆོད་པ་རྣམས་རང་བཞིན་སྟོང་ཉིད། རྣམ་པ་མཆོད་རྫས་སོ་སོའི་རྣམ་པ་ཅན། བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་སྟེར་བར་བསྐྱེད། སོ་སོའི་སྔགས་ཀྱིས་བྱིན་གྱིས་བརླབ། དེ་
ནས་ཆུ་གཉིས་ལམ་གསུམ་སྔོན་དུ་འགྲོ་བའི་ཉེར་སྤྱོད་དང༌། རིག་མ་བཅུ་དྲུག་གིས་སྔར་བཞིན་མཆོད་པ་ནི་ཕྱི་མཆོད་དོ། །དེ་ནས་ནང་མཆོད་གཏོར་མ་ལྟར་བྱིན་གྱིས་བརླབས་ལ། མགྲོན་རྣམས་ཀྱི་ལྗགས་ལ་ཧཱུཾ་ལས་རྡོ་རྗེ་དཀར་པོ་རྩེ་གསུམ་པ་
ནས་ཙམ་པ་བཀོད་ལ། ཨོཾ་ཨ་མྲྀ་ཏ་ཨུ་ད་ཀ་ཧཱུཾ་ཧཱུཾ་ཋ་ཋ། ཏྲཾ་ཨཱཿ་ཁཾ་ཧཱུཾ་ཞེས་པ་དང་ཡི་གེ་གསུམ་བརྗོད་དེ་བྱིན་གྱིས་བརླབ། ལྷ་མོ་རོ་རྡོ་རྗེ་མས་བདུད་རྩི་སྟོབ་པ་རྡོ་རྗེའི་སྦུ་གུས་དྲངས་ནས་གསོལ་བར་བསམ་ཞིང༌། བླ་མ་རྣམས་ཀྱི་མཚན་གྱི་
མཐར་ཡི་གེ་གསུམ་བཏགས་ལ་དབུལ། དེ་ནས་དཀྱིལ་འཁོར་པའི་ལྷ་རྣམས་ཀྱི་སྔགས་རྒྱས་བསྡུས་གང་རུང་གི་མཐར་ཡང་དེ་བཞིན་དུ་བཏགས་ལ་དབུལ། དེ་ནས་ཕྱོགས་སྐྱོང་དང་འབྱུང་པོའི་བར་རྣམས་ལའང་དབུལ་ཞིང་། རང་གི་ལྕེ་ལ་བཞག་
ལ། ཨོཾ་ཨ་མྲྀ་ཏ་སྭ་དཱ་ན་སྭ་བྷཱ་ཝ་ཨཱ་ཏྨ་ཀོ྅ཧཾ། ཞེས་བརྗོད་དེ་མགྲོན་ཐམས་ཅད་ཡེ་ཤེས་ཀྱི་བདུད་རྩིས་ཚིམ་པར་བསམ། སྙིང་ཁའི་ས་བོན་ལས་སྙིང་པོའི་རྣལ་འབྱོར་མ་བཞི་དང་སྒོ་མཚམས་མ་བརྒྱད་སྤྲོས་ལ། ཐོད་པ་ན་གནས་པའི་བདུད་
རྩི་ལྔས་ཀྱང་མཆོད་ལ་ཨོཾ་སརྦ་བྷ་ཀྵཾ་ཤོ་དྷ་ཡ་གུ་ཧྱ་བཛྲ་ཎི་སྭཱ་ཧཱ། ཞེས་བརྗོད་དེ་ནང་མཆོད་དོ། །དེ་ནས་ཡབ་ཡུམ་གྱི་གསང་གནས་སྦྱང་བ་སོགས་དྲན་པར་བྱས་ལ། སྔར་བཞིན་སྙོམས་པར་ཞུགས་པས་དགའ་བཞི་བསྐྱེད་
9-8-25b


དེ། ཕྱི་ནང་གི་ལྷ་ཐམས་ཅད་ཀྱིས་ཀྱང་བདེ་བ་ཆེན་པོ་ཉམས་སུ་མྱོང་བར་བསམས་ཏེ། ལྷ་ཐམས་ཅད་ཧེ་རུ་ཀའི་ཆ་ཤས་ཙམ་དུ་ཟད་པའི་ཕྱིར་རོ། །དེ་ནི་གསང་པའི་མཆོད་པའོ། །དེ་ནས་ལྷན་སྐྱེས་ཀྱི་བདེ་བ་དང༌། དེ་ཁོ་ན་ཉིད་ཀྱི་ལྟ་བ་
གཉིས་སྦྱར་ནས་ཡུན་རིང་དུ་སྒོམ་པ་ནི་དེ་ཁོ་ན་ཉིད་ཀྱི་མཆོད་པའོ། །གཉིས་པ་ནི། དེ་ནས་སོ་སོའི་སྔགས་བརྗོད་པ་ན། སོ་སོའི་ལྷ་སྐུ་གསལ་བར་དམིགས་ནས་ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧུཾ་ཧཱུཾ་ཕཊ། ཌཱ་ཀི་ནཱི་ཛཱ་ལ་ཤཾ་བར་སྭཱ་ཧཱ། གཙོ་བོའི་
སྙིང་པོའོ། །ཨོཾ་ཧྲཱིཿཧ་ཧ་ཧུཾ་ཧཱུཾ་ཕཊ། བཙོ་བོའི་ཉེ་སྙིང་ངོ༌། །ཨོཾ་བཛྲ་བཻ་རོ་ཙ་ནཱི་ཡེ་ཧུཾ་ཧཱུཾ་ཕཊ་སྭཱ་ཧཱ། ཡུམ་གྱི་སྙིང་པོའོ། །ཨོཾ་སརྦྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞ་ནཱི་ཡེ་ཧུཾ་ཧཱུཾ་ཕཊ་སྭཱ་ཧཱ། ཡུམ་གྱི་ཉེ་སྙིང་ངོ༌། །ཨོཾ་ཌཱ་ཀི་ནཱི་ཡེ་ཧུཾ་ཧཱུཾ་ཕཊ། ཨོཾ་ལཱ་མཱེ་ཡཻ་ཧུཾ་ཧཱུཾ་ཕཊ། 
ཨོཾ་ཥཎྜ་རོ་ཧི་ཧུཾ་ཧཱུཾ་ཕཊ། ཨོཾ་རཱུ་པི་ཎཱི་ཡེ་ཧུཾ་ཧཱུཾ་ཕཊ། སྙིང་པོའི་རྣལ་འབྱོར་མ་བཞིའི་སྔགས་སོ། །ཨོཾ་ཀ་ར་ཀ་ར་ཧུཾ་ཧཱུཾ་ཕཊ། ཨོཾ་པྲ་ཙཎྜེ་ཧུཾ་ཧཱུཾ་ཕཊ། ཨོཾ་ཀུ་རུ་ཀུ་རུ་ཧུཾ་ཧཱུཾ་ཕཊ། ཨོཾ་ཙཎྜཱ་ཀྵཱི་ཡེ་ཧུཾ་ཧཱུཾ་ཕཊ། ཨོཾ་བནྡྷ་བནྡྷ་ཧུཾ་ཧཱུཾ་ཕཊ། ཨོཾ་པྲ་བྷཱ་བ་ཏཱི་ཡེ་
ཧུཾ་ཧཱུཾ་ཕཊ། ཨོཾ་ཏྲཱ་ས་ཡ་ཏྲཱ་ས་ཡ་ཧུཾ་ཧཱུཾ་ཕཊ། ཨོཾ་མཧཱ་ནཱ་སེ་ཧུཾ་ཧཱུཾ་ཕཊ། ཨོཾ་ཀྵོ་བྷ་ཡ་ཀྵོ་བྷ་ཡ་ཧུཾ་ཧཱུཾ་ཕཊ། ཨོཾ་བཱི་ར་མ་ཏཱི་ཡེ་ཧུཾ་ཧཱུཾ་ཕཊ། ཨོཾ་ཧྲཽཾ་ཧྲཽཾ་ཧུཾ་ཧཱུཾ་ཕཊ། ཨོཾ་ཁརྦ་རཱི་ཡེ་ཧུཾ་ཧཱུཾ་ཕཊ། ཨོཾ་ཧྲཿཧྲཿ་ཧུཾ་ཧཱུཾ་ཕཊ། ཨོཾ་ལཾ་ཀེ་ཤྭ་རཱི་ཡེ་ཧུཾ་ཧཱུཾ་ཕཊ། ཨོཾ་
ཕཻཾ་ཕཻཾ་ཧུཾ་ཧཱུཾ་ཕཊ། ཨོཾ་དྲུ་མཙྪཱ་ཡེ་ཧུཾ་ཧཱུཾ་ཕཊ། ཨོཾ་ཕཊ་ཕཊ་ཧུཾ་ཧཱུཾ་ཕཊ། ཨོཾ་ཨེ་ར་བ་ཏཱི་ཡེ་ཧུཾ་ཧཱུཾ་ཕཊ། ཨོཾ་ད་ཧ་ད་ཧ་ཧུཾ་ཧཱུཾ་ཕཊ། ཨོཾ་མཧཱ་བྷཻ་ར་བཱ་ཡཻ་ཧུཾ་ཧཱུཾ་ཕཊ། ཨོཾ་པ་ཙ་པ་ཙ་ཧུཾ་ཧཱུཾ་ཕཊ། ཨོཾ་བཱ་ཡུ་བེ་གེ་ཧུཾ་ཧཱུཾ་ཕཊ། ཨོཾ་བྷ་ཀྵ་བྷ་ཀྵ་བ་ས་རུ་དྷི་རཱནྟྲ་མཱ་ལཱ་
9-8-26a


བ་ལཾ་བི་ནེ་ཧུཾ་ཧཱུཾ་ཕཊ། ཨོཾ་སུ་རཱ་བྷ་ཀྵཱི་ཡེ་ཧུཾ་ཧཱུཾ་ཕཊ། ཨོཾ་གྲིཧྞ་གྲྀ་སཔྟ་པཱ་ཏཱ་ལ་ག་ཏ་བྷུ་ཛི་གཱཾ་སརྦཾ་བཱ་ཏ་རྫ་ཡ་ཏ་རྫ་ཡ་ཧུཾ་ཧཱུཾ་ཕཊ། ཨོཾ་ཤྱཱ་མ་དེ་བཱི་ཡ་ཧུཾ་ཧཱུཾ་ཕཊ། ཨོཾ་ཨཱ་ཀཌྜྷ་ཨཱ་ཀཌྜྷ་ཧུཾ་ཧཱུཾ་ཕཊ། ཨོཾ་སུ་བྷ་དྲཱི་ཡེ་ཧུཾ་ཧཱུཾ་ཕཊ། 
ཨོཾ་ཧྲཱི་ཧྲཱིཾ་ཧུཾ་ཧཱུཾ་ཕཊ། ཨོཾ་ཧ་ཡ་ཀ་རྞེ་ཧུཾ་ཧཱུཾ་ཕཊ། ཨོཾ་ཛྞཽ་ཛྞཽ་ཧུཾ་ཧཱུཾ་ཕཊ། ཨོཾ་ཁ་གཱ་ན་ནེ་ཧུཾ་ཧཱུཾ་ཕཊ། ཨོཾ་ཀྵྨཱཾ་ཀྵྨཱཾ་ཧུཾ་ཧཱུཾ་ཕཊ། ཨོཾ་ཙཀྲ་བེ་གེ་ཧུཾ་ཧཱུཾ་ཕཊ། ཨོཾ་ཧཱཾ་ཧཱཾ་ཧུཾ་ཧཱུཾ་ཕཊ། ཨོཾ་ཁཎྜ་རོ་ཧི་ཧུཾ་ཧཱུཾ་ཕཊ། ཨོཾ་ཧཱིཾ་ཧཱིཾ་ཧུཾ་ཧཱུཾ་ཕཊ། ཨོཾ་ཧཱུཾ་ཧཱུཾ་ཧུཾ་ཧཱུཾ་ཕཊ། 
ཨོཾ་ཙ་ཀྲ་བ་རྨྨི་ཎཱི་ཡེ་ཧུཾ་ཧཱུཾ་ཕཊ། ཨོཾ་ཀི་ལི་ཀི་ལི་ཧུཾ་ཧཱུཾ་ཕཊ། ཨོཾ་སུ་བཱི་རཱི་ཡ་ཧུཾ་ཧཱུཾ་ཕཊ། ཨོཾ་སི་ལི་སི་ལི་ཧུཾ་ཧཱུཾ་ཕཊ། ཨོཾ་མཧཱ་བ་ལ་ཧུཾ་ཧཱུཾ་ཕཊ། ཨོཾ་ཧི་ལི་ཧི་ལི་ཧུཾ་ཧཱུཾ་ཕཊ། ཨོཾ་ཙ་ཀྲ་བརྟི་ནཱི་ཡེ་ཧུཾ་ཧཱུཾ་ཕཊ། ཨོཾ་དྷི་ལི་དྷི་ལི་ཧུཾ་ཧཱུཾ་ཕཊ། ཨོཾ་མཧཱ་བཱི་རྦེ་ཧུཾ་ཧཱུཾ་
ཕཊ། དང་པོ་ཉེར་བཞི་དཔའ་བོ་ཉེར་བཞི་དང༌། གཉིས་པ་ཉེར་བཞི་དཔའ་མོ་ཉེར་བཞིའི་སྔགས་སོ། །ཨོཾ་ཀཱ་ཀཱ་སྱེ་ཧུཾ་ཧཱུཾ་ཕཊ། ཨོཾ་ཨུ་ལཱུ་ཀཱ་སྱེ་ཧུཾ་ཧཱུཾ་ཕཊ། ཨོཾ་ཤྭཱ་ནཱ་སྱེ་ཧུཾ་ཧཱུཾ་ཕཊ། ཨོཾ་ཤཱུ་ཀ་རཱ་སྱེ་ཧུཾ་ཧཱུཾ་ཕཊ། སྒོ་མ་བཞིའི་སྔགས་སོ། །ཨོཾ་ཡ་མ་དཱ་ཌྷཱི་
ཡེ་ཧུཾ་ཧཱུཾ་ཕཊ། ཨོཾ་ཡ་མ་དཱུ་ཏཱི་ཡ་ཧུཾ་ཧཱུཾ་ཕཊ། ཨོཾ་ཡ་མ་དཾ་ཥྟི་ཎཱི་ཡེ་ཧུཾ་ཧཱུཾ་ཕཊ། ཨོཾ་ཡ་མ་མ་ཐ་ནཱི་ཡེ་ཧུཾ་ཧཱུཾ་ཕཊ། ཅེས་པ་ནི་མཚམས་མ་བཞིའི་སྔགས་སོ། །ཨོཾ་ན་མོ་བྷ་ག་ཝ་ཏེ་ཝཱི་རེ་ཤཱ་ཡ་ཧུཾ་ཧཱུཾ་ཕཊ། ཨོཾ་མ་ཧཱ་ཀལྤ་གྣི་སཾ་ནི་བྷཱ་ཡ་ཧུཾ་ཧཱུཾ་ཕཊ། 
ཨོཾ་ཛ་ཊཱ་མུ་ཀུ་ཊོ་ཏྐ་ཊཱ་ཡ་ཧུཾ་ཧཱུཾ་ཕཊ། ཨོཾ་དཾ་ཥྚཱ་ཀ་རཱ་ལོ་གྲ་བྷཱི་ཥ་ཎ་མུ་ཁཱ་ཡ་ཧུཾ་ཧཱུཾ་ཕཊ། ཨོཾ་ས་ཧ་སྲ་བྷུ་ཛ་བྷཱ་སུ་རཱ་ཡ་ཧུཾ་ཧཱུཾ་ཕཊ། ཨོཾ་པར་ཤུ་པཱ་ཤ་དྱ་ཏ་ཤཱུ་ལ་ཁ་ཊྭཱཾ་ག་དྷཱ་རི་ཎེ་ཧུཾ་ཧཱུཾ་ཕཊ། ཨོཾ་བྱཱ་གྷཱ་ཛི་ནཱ་མྦ་ར་དྷ་རཱ་ཡ་ཧུཾ་ཧཱུཾ་ཕཊ། ཨོཾ་མཧཱ་དྷཱུ་མྲཱནྡྷ་
9-8-26b


ཀཱ་ར་ཝ་པུ་ཥཱ་ཡ་ཧུཾ་ཧཱུཾ་ཕཊ། ཅེས་རྐང་པ་བརྒྱད་པའི་སྔགས་ཀྱིས་བསྟོད་དེ་སྔགས་ཀྱི་མཆོད་པའང་ཡིན་ནོ། །དྲུག་པ་ལ་གཉིས། ལྷ་སྒོམ་པ་དང༌། དག་པ་དྲན་པའོ། །དང་པོ་ནི། འདི་ལ་སློབ་ཚུལ་གཉིས་ལས། རྒྱ་ཆེ་བ་གསལ་བ་ལ་དང་པོར་རྣམ་པ་དུ་མར་དཔྱད་
ནས་སྐྱོང་བ་ནི། སྒྲུབ་ཐབས་ཀྱི་ཐོག་མ་ནས་འདིའི་བར་གྱི་དམིགས་པ་རྣམས་ལ། སྐབས་གང་ཡིན་གྱི་དམིགས་པ་དེ་ལས་གཞན་དུ་གཡེང་བ་བཀག་ནས་བྱིང་རྒོད་དང་བྲལ་བར་རིམ་པ་བཞིན་བྲེང་ཆགས་སུ་བསྒོམ། ཐ་མལ་པའི་ཞེན་པའི་གཉེན་པོར་ནི། 
གཞལ་ཡས་ཁང་དང་ལྷ་སྒོམ་པ་ན། སངས་རྒྱས་སྐྱེ་ཞིང་དག་པ་དང༌། སངས་རྒྱས་ཀྱི་སྐུ་དེ་དང་དེ་དངོས་ཡིན་སྙམ་པའི་དག་པའི་ང་རྒྱལ་ཤུགས་ཅན་རེ་བསྐྱེད་ལ་བསྒོམ། རྟེན་བརྟེན་པ་ལ་ཐ་མལ་པའི་སྣང་བ་འཆར་བའི་གཉེན་པོར་ནི། ཡོངས་སུ་
དག་པའི་རྟེན་བརྟེན་པའི་སྣང་བ་སྒོམ་པ་ན། རིམ་ཅན་དུ་སྒོམ་པའི་ཚེ། སྐབས་གང་ཡིན་གྱི་སྣང་བ་ཁྱད་པར་ཅན་དུ་རེ་རེ་ནས་གསལ་འདེབས་ཏེ། སྔ་མ་མ་གསལ་བར་དུ་ཕྱི་མ་མི་སྒོམ་པ་དང༌། ཕྱི་མ་སྒོམ་པའི་ཚེ་སྔ་མ་མ་བརྗེད་ཙམ་བྱའོ། །
དམིགས་པར་དུ་མ་ལ་རྣམ་པ་དུ་མར་མི་དཔྱོད་པར་རྩེ་གཅིག་ཏུ་འཇོག་སྒོམ་བྱེད་པ་བསྐྱེད་རིམ་སྒོམ་པའི་གཙོ་བོ་ཡིན་པས། དེ་སྒོམ་པ་ན་དང་པོར་ཡབ་རྐྱང་ཞལ་གཅིག་ཕྱག་གཉིས་པ་གསལ་གདབ་ལ་དེ་ལ་སེམས་བཟུང་སྟེ། གང་གསོལ་བཏབ་པ་
དེའི་སྐོར་མིན་པར་དེ་ལས་གཞན་དུ་གང་ཤར་ཡང་དེའི་རྗེས་སུ་མི་འབྲང་བར་རྩ་བའི་དམིགས་པ་ལ་སེམས་བཟུང་། གསལ་བཏབ་པའི་སྐོར་ནས་ཆ་གཅིག་གསལ་ན་དེ་ལ་བཟུང༌། དེ་མི་གསལ་དུ་སོང་བའམ་འགྲོ་བར་སྣང་ན་སྐུའི་སྤྱི་ལ་བཟུང༌། དེ་འདྲ་
9-8-27a


བའི་སྣང་བ་སྒོམ་པ་དང༌། རང་ལྷ་དེའོ་སྙམ་པའི་ང་རྒྱལ་ཤུགས་ཅན་རེ་བསྐྱེད་ནས། དེ་གའི་ངང་ལ་རྩེ་གཅིག་ཏུ་སྒོམ་པའི་ང་རྒྱལ་སྒོམ་པ་སྤེལ་མར་བྱ། འདི་ལ་ཁ་ཅིག་ལ་ལྷའི་ང་རྒྱལ་མ་བཅོས་པ་སྐྱེའང་། 
རྟེན་བརྟེན་པའི་སྣང་བ་གསལ་པོ་མེད་པ་དང༌། ཁ་ཅིག་ལ་རྟེན་བརྟེན་པའི་སྣང་བ་གསལ་པོ་ཡོད་ཀྱང༌། བཅོས་མིན་གྱི་ང་རྒྱལ་མེད་པ་དང༌། ཁ་ཅིག་ལ་གཉིས་ཀ་ཡོད་པ་དང༌། གཉིས་ཀ་མེད་པ་སྟེ་མུ་བཞི་འོང་བར་སྣང་ངོ༌། །དེའང་ཁྱད་པར་
ཅན་གྱི་ང་རྒྱལ་སྒོམ་པ་ནི་གཙོ་བོ་ནི་ཡིན་ལ། ཁྱད་པར་བའི་སྣང་བ་སྒོམ་པ་ནི་དེའི་ཡན་ལག་གོ། ཞལ་གཅིག་ཕྱག་གཉིས་པ་ལྟ་བུ་ལ་ལོབས་པ་ན། ཞལ་ཕྱག་རྫོགས་པ་དང༌། རྒྱན་དང་ཕྱག་མཚན་སོགས་རྫོགས་པ་དུས་གཅིག་ཏུ་གསལ་
གསལ་དུ་བསླབ། དེ་ལ་ལོབས་པ་ན་ལྷ་གཞན་གཅིག་དང་གཉིས་ལ་སོགས་པ་བསྣན་ཞིང༌། དེ་རྣམས་དུས་གཅིག་ཏུ་གསལ་ནས་གནས་པ་ལ་བསླབ། དེ་ནས་ནང་ལུས་ཀྱི་དཀྱིལ་འཁོར་དང༌། གོ་ཆ་གཉིས་དང༌། གཞལ་ཡས་ཁང་ལ་
སོགས་པའི་གསལ་སྣང་ལ་བསླབ་བོ། །ཐུན་རེ་རེ་ལ་ང་རྒྱལ་འཕོས་པ་བརྟེན་པ་དང༌། སྣང་བ་ཁྱད་པར་ཅན་དུ་སོང་ནས་ཡིད་ངོར་ཐ་མལ་པའི་སྣང་བ་ལོག་པ་དང༌། དེ་ལ་སེམས་ཀྱི་གནས་ཆ་བརྟན་ན་རགས་པ་ལ་ལོབས་པ་ཡིན་ནོ། །ཟབ་པ་དང་
རྒྱ་ཆེ་བ་གཉིས་སུ་མེད་པ་ལ་སློབ་པ་ནི། གསལ་སྣང་ཐོབ་པ་དང༌། དམིགས་པ་རྟེན་དང་བརྟེན་པའི་དཀྱིལ་འཁོར་ལ་དམིགས་ནས། རྣམ་པ་རང་བཞིན་མེད་པར་ངེས་པའི་ཤེས་དང་ལྡན་པར་སྐྱོང་བ་སྟེ། བསྐྱེད་རིམ་པའི་ཟབ་གསལ་
9-8-27b


གཉིས་མེད་ཅེས་ཀྱང་ཟེར་རོ། །ལྷ་ལ་སེམས་འཛིན་པ་སོགས་ཀྱི་ཁྱད་པར་མ་གཏོགས་པ། སེམས་དམིགས་པ་ལ་གཏོང་པའི་དྲན་ཤེས་བསྟེན་པ་དང༌། བྱིང་རྒོད་གཅོད་པ་དང༌། ཞི་གནས་དངོས་དང་རྗེས་མཐུན་པར་སོང་མ་སོང་ནི་ཐེག་པ་ཐུན་མོང་
གི་ལམ་རིམ་དུ་རྒྱས་པར་བཤད་ཟིན་པ་ལས་ཤེས་པར་བྱའོ། །གཉིས་པ་ནི། དཔའ་བོ་ཉེར་བཞིའི་སྔགས་བརྗོད་དེ། སོ་དང་སེན་མོ་བསྐྱེད་པ་སོགས་ཀྱི་ལུས་ཀྱི་ཁམས་ཉེར་བཞི་དཔའ་བོ་ཉེར་བཞིའི་རང་བཞིན་དུ་དག་པར་མོས་པ་བྱ། གཙོ་བོའི་
རྩ་སྔགས་དང་ཡབ་ཀྱི་གོ་ཆ་དྲུག་གི་སྔགས་བརྗོད་ལ། དེ་ལས་བྱུང་བའི་ཕྱག་རྒྱ་དྲུག་དང༌། ཉེ་བའི་ཕྱག་རྒྱ་རྣམས་དང༌། གཙོ་མོའི་ཕྲེང་སྔགས་བརྗོད་ལ་དེ་ལས་བྱུང་བའི་མགུལ་རྒྱན་དང༌། ཡབ་ཀྱི་སྙིང་པོ་བརྗོད་ལ་དེ་ལས་བྱུང་བའི་ཐོད་པའི་
དོ་ཤལ་དང༌། ཡབ་ཀྱི་ཉེ་སྙིང་བརྗོད་ལ་དེ་ལས་བྱུང་བའི་རྣ་རྒྱན་དང༌། ཡུམ་གྱི་ཉེ་སྙིང་བརྗོད་ལ་དེ་ལས་བྱུང་བའི་གླང་ལྤགས་དང༌། ཡུམ་གྱི་གོ་ཆ་དྲུག་གི་སྔགས་བརྗོད་ལ་དེ་ལས་བྱུང་བའི་སྐེ་རགས་དང༌། རྣལ་འབྱོར་མ་སོ་དྲུག་གི་
སྔགས་བརྗོད་ལ་དེ་ལས་བྱུང་བའི་ཐོད་པ་དང༌། ཡུམ་གྱི་སྙིང་པོ་བརྗོད་ལ་དེ་ལས་བྱུང་བའི་ཐོད་སྐམ་གྱི་དབུ་རྒྱན་དངོས་སུ་ཡོད་ན་དེ་རྣམས་ཀྱིས་ལུས་དངོས་སུ་བརྒྱན། མེད་ན་དེ་དག་ལས་བྱུང་བའི་རྒྱན་རྣམས་བཏགས་པར་མོས་
ཅེས་བྱ་ཞིང༌། རང་གི་འཆང་བའི། ཀ་ཊྭཱཾ་ག་ནི་ལྷ་ཡི་སྐུ། ཧེ་རུ་ཀའི་སྐུའི་རང་བཞིན་དུ་མོས་པའམ་ཡང་ན་རང་གི་རུས་པའི་གཞུང་ཚིགས་ཀ་ཊྭཱཾ་གའི་རང་བཞིན་དུ་བལྟའོ། །ཤེས་རབ་ཌཱ་མ་རུ་ཡི་སྒྲ། ཤེས་རབ་ནི་སྟོང་པ་ཉིད་བྲག་ཆ་ལྟ་བུར་རྟོགས་པར་བྱའོ། །ཉིན་མོ་བཅོམ་ལྡན་
9-8-28a


དཔའ་བོ་སྟེ། བཅོམ་ལྡན་འདས་ནི་ཐབས་སྣང་ཕྱོགས་ཡིན་པས་དམིགས་པའི་ཕྱིར་ཉིན་མོ་ཞེས་གསུངས་སོ། །རྣལ་འབྱོར་མ་ནི་བཅོམ་ལྡན་འདས་མ་ནི་སྣང་བ་སྡུད་པའི་སྟོང་པའི་ཕྱོགས་ཡིན་པས་མི་དམིགས་པའི་ཕྱིར། མཚན་མོར་བརྗོད། མྱ་ངན་ལས་འདས་པ་འོད་
གསལ་ལས་བྱུང་བའི་དཔའ་བོ་ནི། སྐབས་འདིར་ཟུང་འཇུག་གི་སྐུར་མོས་པ་དང༌། དྲུག་པ་སེམས་ཀྱི་སྤྲུལ་པ་སྟེ། །དག་པ་ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བསྟན་པ་ཡིན། །ནི་སྟོང་པ་ཉིད་འདི་གསལ་གྱི་ངོ་བོར་མོས་པ་བྱའོ། །ཡི་གེ་བཞིའི་དོན་ནི་བཤད་ཟིན་ནོ། །ཤྲཱི་ནི་གཉིས་
མེད་ཡེ་ཤེས་ཏེ། ཧེ་ནི་རྒྱུ་སོགས་སྟོང་པ་ཡིན། །རུ་ནི་བཀོད་དང་བྲལ་བ་སྟེ། །ཀ་ནི་གང་དུའང་མི་གནས་པ། །ཞེས་བརྗོད་ལ་དོན་དྲན་པར་བྱས་ཏེ་ཤིན་ཏུ་རྣལ་འབྱོར་རོ། །ལཱུ་ཨི་པའི་འགྲེལ་པ་རྣམས་ནས་ཕྱོགས་མཐུན་སོ་བདུན་དང་སྦྱོར་བས་
ཐམས་ཅད་ཤེས་པ་ཉིད་དང༌། ས་བཅུ་རྣམ་པར་དག་པ་གནས་ལ་སོགས་པ་དང་སྦྱོར་བས་ནི་ལམ་ཤེས་པ་ཉིད་དང༌། གོ་ཆ་ནས་རྣམ་དག་གི་བར་གྱིས་ནི་རྣམ་པ་ཐམས་ཅད་མཁྱེན་པ་ཉིད་གསུངས་པར་འཆད་དོ། །དེ་ནི་སྒྲུབ་ཐབས་འདིར་
ཕར་ཕྱིན་པའི་མཁྱེན་གསུམ་གྱི་ལམ་རྣམས་འདུས་པར་བསྟན་པའི་ཕྱིར་ཡིན་ནོ། །འདུས་ཚུལ་ནི་ཞི་ཕུང་ཁམས་སྐྱེ་མཆེད་ཐམས་ཅད་ཀྱི་དེ་ཁོ་ན་ཉིད་བདེ་བ་ཆེན་པོའི་ཡེ་ཤེས་ཀྱི་ཁོང་དུ་ཆུད་པའི་ཆོས་སོ་བདུན་ཕྱི་དཀྱིལ་ལྷ་སོ་བདུན་གྱི་ངོ་བོར་གྱུར་བས་ནི་གཞི་ཤེས་བསྡུས། ལྷན་སྐྱེས་ཀྱི་བདེ་
སྟོང་གི་རྟོགས་པ་ལ་ལམ་ཤེས་ས་བཅུར་བཞག་པ་ཉིད་ལ་ལུས་ཀྱི་གནས་དང་ཉེ་བའི་གནས་སོགས་སུ་མོས་པར་བྱས་པ་ལ་ལུས་དཀྱིལ་བསྒོམས་པས་ནི་ལམ་ཤེས་བསྡུས། རྣལ་འབྱོར་པ་རང་གི་གཞི་དང་ལམ་ཁྱད་གཞིར་བྱ་པའི་སྟེང་ནས་ཁྱད་པར་གྱི་ཆོས་ཀྱི་རྣམ་པ་གོ་ཆ་འཆིང་བ་སོགས་མཁྱེན་པས་ནི་
9-8-28b


རྣམ་མཁྱེན་གྱི་ལམ་བསྡུས་སོ། །བཞི་པ་ནི། དབྱངས་གསལ་ངག་ཏུ་བརྗོད་ཅིང༌། དེའི་ཚེ་དབྱངས་གསལ་གྱི་ཕྲེང་བ་འོད་ཟེར་ལྔ་ལྡན་འཁོར་ལོ་གསུམ་གྱ་ལྷ་ཚོགས་འཕྲོ་བ། སྣ་བུག་གཡས་པའི་རླུང་དང་འགྲོགས་ནས་འཕྲོས་པས། འགྲོ་བ་རྣམས་འཁོར་
ལོ་གསུམ་གྱི། ལྷ་ཚོགས་སུ་བྱས། བྱས་པ་དེ་རྣམས་ཐོག་མ་མེད་པ་ནས་གྲུབ་པའི་དཔའ་བོ་དང༌། རྣལ་འབྱོར་མ་རྣམས་དང་རོ་མཉམ་དུ་གྱུར་ཏེ། སྣ་བུག་གཡོན་ནས་ཞུགས་ལྟེ་བར་གནས་པ་ཡོངས་སུ་གྱུར་པ་ལས། དབྱངས་གསལ་གྱི་
གཟུགས་བརྙན་དང་ལྡན་པའི་ཟླ་བའི་དཀྱིལ་འཁོར་དཀར་ལ་དམར་བའི་མདངས་ཅན་དུ་གྱུར་པར་བསྒོམ། དེའི་དབུས་སུ་སྐད་ཅིག་གིས་ཧཱུཾ་ཡིག་དཀར་དམར། དེ་དང་ཟླ་བ་གཉིས་ཡོངས་སུ་གྱུར་པ་ལས། ཧེ་རུ་ཀ་དཀར་པོ་གཡས་བརྐྱང་གིས་བཞུགས་པ། 
ཞལ་གཅིག་ཕྱག་གཉིས་ཀྱི་རྡོར་དྲིལ་བསྣམས་པ། ནམ་མཁའི་འཇའ་ཚོན་ལྟ་བུ། ཡུམ་རྡོ་རྗེ་ཕག་མོ་ཞལ་གཅིག་མ་ཕྱག་གཉིས་ཀྱིས་རྡོ་རྗེ་དང་ཐོད་པ་འཛིན་པ་དང་སྙོམས་པར་ཞུགས་པས། གསང་གནས་གཉིས་བསྐྱོད་པའི་སྒྱུ་མའི་དགའ་བའི་
སྒྲས་འགྲོ་བ་རྣམས་བཀུག་སྟེ་དུར་ཁྲོད་ལ་ཐིམ། དེ་ནི་རྟེན་གྱི་འཁོར་ལོ་ལ། རྟེན་གྱི་འཁོར་ལོ་སྒོ་མཚམས་མ་བརྒྱད་དང་བཅས་པ་སྐུ་འཁོར་ལ། དེ་གསུང་འཁོར་ལ། དེ་ཐུགས་འཁོར་ལ་ཐིམ། དེའི་ཤར་ནས་གཡོན་སྐོར་གྱིས་ཕྱོགས་ན་གནས་
པ་བཞི་ནི་རིམ་པ་བཞིན་དུ། མཁའ་འགྲོ་མ་ནས་བཟུང་སྟེ། གཡོན་སྐོར་གྱིས་ལྷ་མོ་བཞི་ལ་དང་། དེ་ནས་མེ་ནས་བརྩམས་ཏེ་མཚམས་ན་གནས་པ་བཞི་ནི། གཟུགས་ཅན་མ་ནས་བཟུང་སྟེ་གཡས་སྐོར་གྱི་ལྷ་མོ་བཞི་ལ་ཐིམ། ཐོད་པ་
9-8-29a


བཞིའང་གཟུགས་ཅན་མ་ལ་སོགས་པ་བཞི་ལ་བསྡུ། ལྷ་མོ་བཞིའང་རང་ངོས་ཀྱི་གཙོ་བོའི་ཞལ་བཞི་ལ་རིམ་པ་བཞིན་བསྡུ། དམ་ཚིག་པ་ཡབ་ཡུམ་ནི། ལྟེ་བའི་ཡེ་ཤེས་སེམས་དཔའ་ཡབ་ཡུམ་ལ་ཐིམ། དེ་གཉིས་
ཀྱང་སྙོམས་པར་ཞུགས་པས་ཞུ་བར་གྱུར༌། ཞུ་བ་དེ་ཡོངས་སུ་གྱུར་པ་ལས་སིནྡྷུ་རས་བྱུགས་པའི་མུ་ཏིག་ལྟ་བུའི་ཧཱུཾ་ཡིག་བདེ་བ་ཆེན་པོའི་རང་བཞིན་དུ་གྱུར། དེའི་ཨཱུ་ནས་ནཱ་དའི་བར་དུ་སྔ་མ་ཕྱི་མ་ལ་རིམ་གྱིས་བསྡུས་ནས། ནཱ་དའང་སྐྲའི་རྩེ་མོ་བརྒྱ་
སྟོང་གི་ཆ་ཙམ་དུ་བྱས་པ་ལ་སེམས་གཟུང་ངོ་། །རབ་ཀྱིས་ནི་དེའང་མི་དམིགས་པར་འོད་གསལ་དུ་བསྡུས་པ་ལ། སེམས་ནུས་ཚད་དུ་གཟུང་སྟེ་རྣལ་འབྱོར་ཆེན་པོའོ། །འདི་བསྐྱེད་རིམ་སྒོམ་རེས་ཀྱི་སྐབས་འདིར་མ་ཆག་པར་བསྒོམ། རྫོགས་རིམ་
འདིའི་གནད་རྟོགས་པ་གལ་ཆེ་བར་ཡོད་པས་ལོགས་ཤིག་ཏུ་འདྲི་བར་འགྱུར་བ་ལས་ཤེས་པར་བྱའོ། །གསུམ་པ་ཐུན་གྱི་འཇུག་ཏུ་ཇི་ལྟར་བྱ་བ་ལ་གཉིས། བཟླས་པ་ཇི་ལྟར་བྱ་བ་དང་། གཏོར་མ་ཇི་ལྟར་བྱ་བའོ། །དང་པོ་ནི། དེ་ལྟར་བསྒོམ་པ་
དེས་སྐྱོ་བར་གྱུར་ན། སྟོང་པའི་ངང་ལས་རྟེན་དང་བརྟེན་པ་ཐམས་ཅད་སྐད་ཅིག་གིས་གསལ་བར་དམིགས་ལ་བཟླས་པ་བྱའོ། རྡོ་བཟླས་སྐབས་འདིར་གསུངས་པ་ནི་འདིའི་རྫོགས་རིམ་དུ་འཆད་པ་ལས་ཤེས་པར་བྱའོ། །བཟླས་བྱའི་སྔགས་
ནི་རྩ་རྒྱུད་ལས། ས་སྟེང་ན་ནི་རིན་ཆེན་བཞི། །ཕྲེང་བའི་སྔགས་ནི་དམ་པ་ཡིན། །ཞེས་ཡབ་ཡུམ་གྱི་རྩ་སྔགས་དང༌། སྙིང་པོ་དང༌། ཉེ་སྙིང་དང༌། གོ་ཆའི་སྔགས་ཏེ་རིན་ཆེན་བཞིའི་སྔགས་དང་ཕྲེང་སྔགས་མཆོག་ཏུ་གསུངས་སོ། །དེ་ལ་རྩ་
9-8-29b


སྔགས་སམ། ཕྲེང་སྔགས་ལ་གཉིས་ཡོད་པའི་ཡབ་ཀྱི་ཕྲེང་སྔགས་ནི། ཀ་ར་ཀ་ར་སོགས་ལ་སྔགས་ཚན་པ་ཉེར་བཞིར་མ་བཅད་པར་ཕྱོགས་གཅིག་ཏུ་སྦྲེལ་ཏེ། འགོ་བོར་ཨོཾ་དང༌། མཐར་ཧུཾ་ཧཱུཾ་ཕཊ་སྦྱར་བའོ། །ཡབ་ཀྱི་རྩ་སྔགས་ལའང་ཀ་ར་ཀ་ར་ལ་སོགས་
པའི་འགོ་བོར་ཡབ་ཀྱི་རྐང་བརྒྱད་སྦྱར་བའང་ཡོད་ཅིང༌། ཡང་ཀ་ར་ཀ་རའི་འགོར་ཡབ་ཀྱི་སྙིང་པོའི་ཕྱེད་དང་མཇུག་ཏུ་ཕྱེད་སྦྱར་བའང་ཡོད་དོ། །ཡུམ་གྱི་ཕྲེང་སྔགས་ལ་མི་འདྲ་བ་མང་དུ་ཡོད་ཀྱང༌། འཁྲུལ་སྤོང་སོགས་རྒྱ་གཞུང་འགའ་ཞིག་ལས་ནི། མངོན་བརྗོད་དང་ཕག་མོ་མངོན་འབྱུང་གཉིས་
ཀར་རྐང་པ་རེ་རེའི་འགོར་ཨོཾ་དང་མཐར་ཧུཾ་ཧཱུཾ་ཕཊ་སྦྱར་ཞིང་ཕཊ་མོ་མངོན་འབྱུང་ལས་དང་པོ་མ་གཏོགས་པ་རྐང་བརྒྱད་རེ་རེའི་འགོར་ན་མོ་མེད་ལ། མངོན་བརྗོད་ལས་ནི་རེ་རེའི་འགོར་ན་མོ་འང་སྦྱོར་བར་བཤད་དོ། །ཨོཾ་ན་མོ་བྷ་ག་ཝ་ཏཱི་བཛྲ་པཱ་རཱ་ཧི་བཾ། ཨཱ་རྱ་ཨ་པ་རཱ་ཛི་ཏེ་ཏྲཻ་ལོཀྱ་མཱ་ཏེ་མ་ཧཱ་བི་དྱ་ཤྭ་རི། 
སརྦ་བྷཱུ་ཏ་བྷ་ཡཱ་བ་ཧེ་མ་ཧཱ་བཛྲ། བཛྲཱ་སི་ཨ་ཛི་ཏེ་ཨ་པ་རཱ་ཛི་ཏེ་བ་ཤཾ་ཀ་རི་ནེ་ཏྲ་བྷྲ་མ་ཎི། ཤོ་ཥ་ཎི་རོ་ཥ་ཎི་ཀྲོ་དྷ་ནི་ཀ་རཱ་ལི་ནི། ནི་ཡང་ལ་སྦྱར་བ་དང་མར་ལ་སྦྱར་བ་གཉིས་ཀ་ཡོད་དོ། །ཏྲཱ་ས་ནི་མཱ་ར་ཎི་སུ་པྲ་བྷེ་ད་ནི་ཨ་པ་རཱ་ཛ་ཡི། བི་ཛ་ཡེ་ཛཾ་བྷ་ནི་སྟམྦྷ་ནི་མོ་ཧ་
ནི། བཛྲ་བཱ་རཱཾ་ཧི་མཧཱ་ཡོ་གི་ནི་ཀཱེ་མེ་ཤྭ་རི་ཁ་གེ། ཏདྱ་ཐཱ། པྲོ་ཏངྒེ་པྲོ་ཏངྒེ། ཧ་ན་ཧ་ན་པྲཱ་ཎཱི། ཀིཾ་ཀི་ནི་ཁིཾ་ཁི་ནི། དྷུ་ན་དྷུ་ན་བཛྲ་ཧ་སྟེ། ཤོ་ཥ་ཡ་ཤོ་ཥ་ཡ། བཛྲ་ཁ་ཊྭཱཾ་ག་ཀ་པཱ་ལ་དྷཱ་རི་ནི། མཧཱ་པི་ཤི་ཏ་མཱཾ་སཱ་ས་ནི། མ་ནུ་ཥྱཱ་ནྟྲ་པྲ་བྲྀ་ཏྟེ་སནྣི་དྷྱི་ན་
ར་སི་རོ་མཱ་ལཱ་གྲཾ་ཐི་ཏ་དྷཱ་རི་ནི། སུམྦྷ་ནི་སུམྦྷ། ཧ་ན་ཧ་ན། པྲཱ་ཎཱཾ་སརྦ་པཱ་པ་སཏྭཱ་ནཱཾ་སརྦ་པ་ཤུ་ནཱཾ། མཧཱ་མནྶ་ཙྪེ་ད་ནི་ཀྲོ་དྷ་མཱུ་རྟི་དཾ་ཥྟྲཱ་ཀ་རཱ་ལི་ནི་མཧཱ་མུ་དྲེ། ཤྲཱི་ཧེ་རུ་ཀ་དེ་བ་སྱཱ་གྲ་མ་ཧི་ཥི་ས་ཧ་སྲ་ཤི་རེ། ས་ཧ་སྲ་བཱ་ཧ་པེ། ཤ་ཏ་ས་ཧ་སྲ་
9-8-30a


ཨཱ་ན་ནེ། ཛྲཱ་ལི་ཏ་ཏེ་ཛ་སེ། ཛྭ་ལ་མུ་ཁེ། པིཾ་ག་ལ་ལོ་ཙ་ནེ། བཛྲ་ཤྭ་རཱི་རེ་བཛྲཱས་ནི༌། མི་ལི་ཏེ་ནི་མི་ལི་ཏེ། ཧེ་ཧེ་ཧཱུཾ་ཧཱུཾ། ཁ་ཁ། དྷུ་དྷུ། རུ་རུ་དྷུ་དྷུ་རུ། མུ་རུ་མུ་རུ། ཨ་དྭཻ་ཏེ། མཧཱ་ཡོ་གི་ནཱི། པ་ཐི་ཏ་སིདྡྷེ། དྲཻཾ་བྷཾ་དྲཻཾ་དྷཾ། གྲཾ་གྲཾ། ཧེ་
ཧེ། ཧ་ཧ། བྷཱི་མེ་ཧ་ས་ཧ་ས་བཱི་རེ། ཧཱ་ཧཱ། ཧོ་ཧོ། ཧཱུཾ་ཧཱུཾ། ཏྲཻ་ལོ་ཀྱ་བི་ནཱ་ཤ་ནི་ཤ་ཏ་ས་ཧ་སྲ་གོ་ཊི། ཏ་ཐཱ་ག་ཏ་པར་བཱ་རེ་ཏེ་ཧཱུཾ་ཧཱུཾ་ཕཊ། སིཾ་ཧ་རུ་པེ་ཁ། ག་ཙ་རཱུ་པེ་ག་ཏྲཻ་ལོ་ཀྱ་ཨུ་དྷ་རེ་ས་མུ་དྲ་མེ་ཁ་ལེ། གྲ་ས་གྲ་ས་ཧུཾ་ཧཱུཾ་ཕཊ། བཱི་རཱ་དྭེ་ཏེ་ཧཱུཾ་ཧཱུཾ། ཧ་ཧ་མ་ཧཱ་བ་ཤུ་མོ་
ཧེ་ནི་ཡོ་གཱི་ཤྭ་རི་ཏྭ། ཌཱ་ཀི་ནཱི་སརྦ་ལོ་ཀཱ་ནཱཾ་བནྡྷ་ནི་སདྱ་པྲ་དྱ་ཡ་ཀཱ་རི་ཎི་ཧུཾ་ཧཱུཾ་ཕཊ། བྷཱ་ཏ་ཏྲཱ་ས་ནཱི་མ་ཧཱ་བཱི་རེ་པ་ར་མ་སིདྡྷེ་ཡོ་གཱི་ཤྭའི་ཕཊ། ཧཱུཾ་ཧཱུཾ་ཕཊ། ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། སྔགས་འདི་རྣམས་ལ་གཞུང་རྣམས་ལས་འདྲ་མིན་ནང་དུ་འབྱུང༌། ཞེས་སྟོང་དུ་ཡུམ་གྱི་རྐང་བརྒྱད་
དང་བཅས་པ་གཅིག་བཤད། མངོན་བརྗོད་ཀྱི་ཉི་ཤུ་པ་དང༌། ཕག་མོ་མངོན་འབྱུང་ལས། རྐང་བརྒྱད་དང་ཏ་དྱ་ཐཱ་མེད་པར། ཨོཾ་བཛྲ་བཱ་རཱ་ཧཱི་པྲོ་ཏདྒ་ནས། ཡོ་གི་ཤྭ་རི་ཕཊ་ཀྱི་བར་ལ་འགའ་ཡར་མ་གཏོགས་པ་སྔར་དང་འདྲ་ལ། མཐར་ཧཱུཾ་ཧཱུཾ་ཕཊ་
སྭཱ་ཧཱ། ཞེས་འབྱུང་བས། རྐང་བརྒྱད་ཡོད་མེད་གཉིས་ཡོད་དོ། །སྙིང་པོ་གཉིས་དང་ཉེ་སྙིང་གཉིས་ནི་བཤད་ཟིན་ནོ། །གོ་ཆ་ལ་ཨོཾ་ཧཱ་སོགས་དྲུག་གི་ཐོག་མར་ཨོཾ་དང༌། མཐར་ཧཱུཾ་ཧཱུཾ་ཕཊ་སྦྱར་བ་དང༌། བཛྲ་ས་ཏྭ་སོགས་མཚན་སྔགས་དྲུག་ལ་སྔར་བཞིན་
སྦྱར་བ་གཉིས། རྩ་རྒྱུད་བར་དཔའ་བོ་རྡོ་རྗེས་བཤད་ལ། ཡང་དེས་དཔའ་བོའི་གོ་ཆ་དྲུག་པོ་སྦྲེལ་ནས་ཐོག་མཐར་སྔར་བཞིན་སྦྱར་བ་དང༌། དེ་བཞིན་དུ་དཔའ་མོའི་གོ་ཆ་ལ་ཡང་སྦྱར་བར། བཤད་དོ། །དཔའ་བོ་ཉེར་བཞིའི་སྔགས་ལ་རང་རང་གི་མཚན་སྔགས་མེད་པ་དང༌། མཚན་སྔགས་ཡོད་
9-8-30b


པ་གཉིས་ཀྱི་དང་པོ་ནི། ལཱུ་ཨི་པས་མཛད་པ་སྔར་བཤད་པ་ལྟ་བུའོ། །མཚན་སྔགས་ཡོད་པ་ལ་མཚན་སྔགས་རྐྱང་པའི་ཐོག་མཐར་སྔར་བཞིན་སྦྱར་བ་དང༌། ཨོཾ་ཁཎྜ་ཀ་པཱ་ལ་ཧཱུཾ་ཧཱུཾ་ཕཊ་ཅེས་པ་ལྟ་བུའོ། །རྩ་སྔགས་ཉེར་བཞིར་བཅད་པ་དང་སྤེལ་བ་གཉིས་
ཀྱི་ཕྱི་མ་ལ་ཐོག་མཐའ་བར་དུ་སྤེལ་ཚུལ་གསུམ་གསུངས་སོ། །ཨོཾ་ཁཎྜ་ཀ་པཱ་ལ་ཀར་ཀར་ཧུཾ་ཧཱུཾ་ཕཊ་ཅེས་པ་ལྟ་བུ་ཐོག་མ་དང༌། ཨོཾ་ཀར་ཀར་ཁཎྜ་ཀ་པཱ་ལ་ཧཱུཾ་ཧཱུཾ་ཕཊ་ཅེས་པ་ལྟ་བུ་ཐ་མ་དང༌། ཨོཾ་ཀར་ཁཎྜ་ཀ་པཱ་ལ་ཀ་ར་ཧཱུཾ་ཧཱུཾ་ཕཊ་ཅེས་པ་ལྟ་བུ་བར་དུ་སྤེལ་པའོ། །དཔའ་
བོ་དང་དཔའ་མོ་གཉིས་ཀའི་མཚན་སྔགས་སྦྲེལ་བའང་བཤད་ལ། དཔའ་བོ་རྡོ་རྗེས་དཔའ་བོའི་མཚན་སྔགས་ཉེར་བཞི་བསྒྲིགས་པ་ལ་ཐོག་མར་ཨོཾ་དང༌། མཐར་ཧཱུཾ་གཉིས་དང་ཕཊ་སྦྱར་བ་ནི་དཔའ་བོའི་སྙིང་པོ་དང་ཉེ་སྙིང་བསྡུས་པ་དང༌། དཔའ་མོ་ཉེར་བཞི་ལའང་དེ་བཞིན་དུ་བྱས་པ་ནི་དཔའ་མོའི་སྙིང་པོ་དང་ཉེ་སྙིང་བསྡུས་
པའི་ལུགས་སུ་བཤད་དོ། །ཁྱད་པར་གསལ་བྱེད་ལས། ཨོཾ་ཀར་ཀར་ཁཎྜ་ཀ་པཱ་ལི། པྲ་ཙ་ཎྜེ་ཧུཾ་ཧཱུཾ་ཕཊ་ཅེས་སྦྱར་བ་ཞིག་ཀྱང་ཡོད་དོ། །ལྷ་མོ་གཞན་བཅུ་གཉིས་ཀྱི་སྔགས་ཀྱི་སྔགས་ནི་སྔར་ལྟར་རོ། །གཞན་ཡང་ལྷ་དྲུག་ཅུའི་སྔགས་ཤིན་ཏུ་བསྡུས་པ་བྱེད་ན། རྀ་ལྀ་བཞི་དང༌། མ་ཡིག་དོར་བའི་
ཀ་ཙ་ཊ་ཏ་པའི་སྡེ་ཚན་གྱི་ཡི་གེ་ཉེར་བཞི་དང༌། ཡ་ར་ཝ་ལ་བཞི་དང༌། ཤ་ཥ་ས་ཧ་བཞིའི་འགོར་ཐིག་ལེ་བྱིན་ནས། ཐོག་མར་ཨོཾ་དང་མཐར་ཧཱུཾ་ཧཱུཾ་ཕཊ་སྦྱར་བ་རྣམས་རིམ་པ་བཞིན་དུ་སྙིང་པོའི་རྣལ་འབྱོར་མ་བཞི་དང་འཁོར་ལོ་གསུམ་གྱི་
ལྷ་ཟུང་ཉེར་བཞི་དང༌། སྒོ་མ་བཞི་དང་མཚམས་མ་བཞིའི་སྔགས་སུ། རྀ་རཱྀ་ལྀ་སོགས་པའི་ཡི་གེ་སོ་དྲུག་ལྷ་དེ་རྣམས་ཀྱི་ས་བོན་དུའང་། མངོན་བརྗོད་ལས་བཤད་དེ། ས་བོན་སོ་དྲུག་སྦྲེལ་ནས་ཐོག་མཐར་སྔར་བཞིན་སྦྱར་ཡང་ཆོག་གོ། །མི་རུས་ཀྱི་ཕྲེང་བའམ་
9-8-31a


བོ་དེ་ཙེ་ལ་སོགས་པ་ཕྲེང་ཐག་གཞོན་ནུ་མ་མ་ཉམས་པས་བཀལ་བའི་རས་བལ་གྱི་སྐུད་པ་ལས་བྱས་པ། བསང་སྦྱང་བྱས་ཏེ་ཕྲེང་བའི་བསྐྱེད་ཆོག་རྒྱས་པའམ། དེ་མ་གྲུབ་ན་སྐད་ཅིག་གིས་གསུང་རྡོ་རྗེ་པདྨ་གར་དབང་དུ་
བསྐྱེད། རང་འདྲའི་ཡེ་ཤེས་པ་དང་གཅིག་ཏུ་བྱ། བུམ་ཆུས་གཏོར་ལ་མཆོད་ནས། ཨོཾ་པདྨ་ནྲི་ཏྱེ་ཤྭ་རི་ཧཱུཾ་ཧཱུཾ་ཕཊ་ཅེས་པའམ། སྭཱ་ཧཱ་ཧཱུའི་ཐོག་མཐར་སྔར་བཞིན་སྦྱར་ལ་བརྒྱ་རྩ་བརྒྱད་བཟླས་ཏེ་གསུང་རྡོ་རྗེ་ཡོངས་སུ་གྱུར་པ་ལས་ཕྲེང་བའི་རྣམ་པར་བསམས་
ལ། ལག་པ་གཡོན་པའི་མཐེབ་སྲིན་གྱིས་བཟུང་སྟེ་གཙོ་བོའི་སྙིང་པོ་དང་ཉེ་སྙིང་བཟླ་ན། རང་གི་ལྟེ་བར་ཟླ་བ་ལ་གནས་པའི་ཧཱུཾ་དཀར་དམར་བལྟས་ལ། དེ་ལ་བཟླ་བྱའི་སྔགས་ཀྱིས་འཁོར་བར་དམིགས་ཏེ། དབུས་ཀྱི་
ཡི་གེ་ལས་འཁོར་ལོ་ལྔའི་ལྷ་ཚོགས་སྤྲོས་ནས་འགྲོ་བའི་དོན་བྱས། སླར་སྡུད་པའི་ཚེ་དབུས་ཀྱི་ཡི་གེ་ལ་སྡུད་པའི་ཚུལ་གྱི་བཟླ་ལ། ཡུམ་གྱི་སྙིང་པོ་དང་ཉེ་སྙིང་དང་ལྷ་གཞན། རྣམས་ཀྱི་སྔགས་བཟླ་ན་རང་རང་གི་ཐུགས་ཀར་ཉི་གདན་ལ་ཏིང་ངེ་འཛིན་
སེམས་དཔའ་ཧཱུཾ་ཡིག་དགོད་ལ་དེ་ལ་བཟླ་བྱའི་སྔགས་ཀྱིས་འཁོར་བར་དམིགས་ནས། སྔར་བཞིན་སྤྲོ་བསྡུའི་ཚུལ་གྱིས་བཟླ་སྟེ་དམ་ཚིག་གི་བཟླས་པའོ། །ཡབ་ཡུམ་གྱི་ཕྲེང་སྔགས་བཟླ་ན། ཆོས་ཐམས་ཅད་མཉམ་པ་ཉིད་ཀྱི་ང་རྒྱལ་གྱིས། 
སྔགས་ཕྲེང་རང་བཞིན་ཞལ་ནས་ཞུགས་ཏེ། རྡོ་རྗེ་ལམ་ནས་ཡུམ་གྱི་པདྨར་ཞུགས་དེའི་དྷཱུ་ཏཱིའི་ལམ་ནས་སྟེང་དུ་བྱུང་སྟེ། གཙོ་མོའི་ཞལ་ནས་ཐོན། རང་གི་ཞལ་དུ་ཞུགས་ཤིང་ནཱ་དར་ཐིམ་པ་དང༌། ཡང་སྔར་བཞིན་འཁོར་བར་བསྒོམས་ནས་
9-8-31b


བཟླ་སྟེ་དོ་ལིའི་བཟླས་པའོ། །སེམས་མ་ཡེངས་པ་ལ་འབད་ནས་བཟླ་བའི་སྐྱོན་ཧ་ཅང་མྱུར་བུལ་དང་ཧ་ཅང༌། སྒྲ་ཆེ་བ་དང་རིང་ཐུང་གི་ཚད་ལས་ཉམས་པ་དང༌། དེ་གཉིས་ལྡོག་ནས་འདོན་པ་སོགས་དང་བྲལ་བར་བྱ་ཞིང༌། མཐེ་བོང་ལྕགས་ཀྱུར་བྱས་
ལ། ལྷ་རྣམས་འགུགས་པའི་ཚུལ་གྱིས་བཟླའོ། །འདི་ལ་ཡིད་བཟླས་རྡོ་རྗེའི་བཟླས་པ་དང་ངག་བཟླས་གཉིས་ཀ་ཡོད་ལ། དེའང་ཐུན་གྱི་ངོ་བོ་ལ་མ་ཡེངས་པར་བཟླས་པ་རྣམས་གྲངས་སུ་གཞུག་གི་ཐུན་བར་དུ་བཟླས་པ་དང༌། སེམས་གཡེངས་
ནས་བཟླས་པ་སོགས་ནི་གྲངས་ལ་མི་ཕན་ཡང་བཟླ་བར་ནི་བཤད་དོ། །གཞན་ལ་དབང་བསྐུར་བ་དང༌། རང་ཉིད་བདག་འཇུག་བྱེད་པ་དང༌། རབ་གནས་སོགས་ལ་དབང་བ་ལ། སྔོན་དུ་བསྙེན་པ་གལ་ཆེ་ལ་དེ་ལ་གཉིས་ལས། རྒྱས་པ་ནི། གཙོ་བོ་
ཡབ་ཡུམ་ལ་ཁྲི་ཕྲག་གསུམ་གསུམ། འཁོར་ལོ་གསུམ་གྱི་ལྷ་རེ་རེ་ལ་ཁྲི་ཕྲག་གཉིས་གཉིས། ལྷ་མོ་གཞན་བཅུ་གཉིས་པོ་རེ་རེ་ལ་སྟོང་ཕྲག་ཕྱེད་དྲུག་རེ་བཟླ་བར་བཤད་དོ། །འབྲིང་དང་བསྡུས་པ་ནི་གཙོ་བོ་ལ་འབུམ་དང་། འཁོར་ལོ་ཁྲི་
ཕྲག་རེ། རྒྱས་བསྡུས་གཉིས་ཀ་ལ་ཐུན་མོང་དུ་ཡེ་ཤེས་འབེབས་པའི་སྔགས་ཁྲི་ཕྲག་གཅིག་བཟླ་སྟེ། གཙོ་བོའི་སྔགས་ནི་སྙིང་པོའི་སྔགས་སུ་གསུངས་ཏེ་དེས་གཞན་ཡང་མཚོན་ནོ། །གཉིས་པ་ནི། འཇིག་རྟེན་པ་དང་འཇིག་རྟེན་ལས་འདས་
པའི་གཏོར་མ་ཤ་དང་ཆང་ལ་སོགས་པ་དང་ལྡན་པ་བཤམས་ལ་ཞལ་བཞི་པའམ་དུམ་སྐྱེས་མའི་སྔགས་ཀྱིས་བསངས། སྭ་བྷཱ་བས་སྟོང་པར་སྦྱངས། སྟོང་པའི་ངང་ལས་ཡཾ་ལས་བྱུང་བའི་རླུང་གི་དཀྱིལ་འཁོར་སྔོན་པོ་གཞུའི་དབྱིབས་
9-8-32a


ཅན་རྒྱལ་མཚན་གྱིས་མཚན་པ་དང༌། དེའི་སྟེང་དུ་རཾ་ལས་བྱུང་བའི་མེའི་དཀྱིལ་འཁོར་གྲུབ་གསུམ་པ། གྲྭ་གསུམ་དུ་རཾ་མམ་མེ་འབར་བས་མཚན་པའི་སྟེང་དུ་ཨོཾ་ཨཱཿཧཱུཾ་གསུམ་ལས་བྱུང་བའི་མི་མགོ་རློན་
པའི་སྒྱེད་བུ་གསུམ་ལ་གནས་པའི་ཨ་དཀར་པོ་ལས་བྱུང་བའི་ཐོད་པ་དུམ་དུ་གཅིག་པ་ཕྱི་དཀར་ལ་ནང་དམར་བ། དེའི་ནང་དུ་གཏོར་མའི་རྫས་རྣམས་ཤར་དུ་ཨོཾ་དཀར་པོ་ལས་གསང་བའི་སྨན་དྲི་ཆེན། བྱང་དུ་ཁཾ་ལྗང་གུ་ལས་ཀླད་པ། ནུབ་
ཏུ་ཨཾ་དམར་པོ་ལས་བྱང་སེམས་དཀར་པོ། ལྷོར་ཏྲཾ་སེར་པོ་ལས་རཀྟ། དབུས་སུ་ཧཱུཾ་མཐིང་ག་ལས་དྲི་ཆུ་རྣམས་པ་སླར་ཡང་ཡི་གེ་དེ་དག་གིས་མཚན་པ། མེ་ནས་བརྩམས་ཏེ་མཚམས་བཞི་དང༌། དབུས་ཀྱི་བར་དུ་གཡས་སྐོར་གྱིས་
ལཱཾ་མཱཾ་པཱཾ་ཏཱཾ་བཱཾ་དཀར་སྔོ་དམར་ལྗང་དམར་པོ་ལས། རིམ་པ་བཞིན་དུ། བ་ལང༌། ཁྱི། གླང་པོ་ཆེ། རྟ། མིའི་ཤ་ལྔ་ལ་སླར་ཡང་ཡི་གེ་དེ་དག་གིས་མཚན་པར་བསམ་མོ། དེ་ནས་རླུང་གཡོས་པ་ལས་མེ་འབར་བའི་དྲོད་ཀྱི་
རྫས་རྣམས་ཡི་གེ་དང་བཅས་པ་ཞུ་ནས། ཉི་མ་འཆར་ཀའི་མདོག་ལྟར་དམར་སེར་དུ་བལྟའོ། །དེའི་སྟེང་དུ་ཧཱུཾ་དཀར་པོ་ལས་བྱུང་བའི་ཁ་ཊྭཱཾ་ག་དཀར་པོ་བྱང་ཆུབ་སེམས་ཀྱི་བདུད་རྩིའི་རང་བཞིན་ཅན་མགོ་ཐུར་དུ་བལྟ་བ་ཐོད་པར་ལྷུངས་ཏེ་
ཞུ་བས། བཅུད་དེ་དག་དངུལ་ཆུའི་མདོག་ཅན་བསིལ་བར་གྱུར་བར་བསམ་མོ། །དེ་ནས་དབྱངས་གསལ་གྱི་ཐོག་མར་ཨོཾ་དང༌། མཐར་ཧཱུཾ་ཧཱུཾ་ཕཊ་དང་བཅས་པ་བརྗོད་པས། ཡི་གེ་དེ་ཉིད་ཁ་དོག་སྣ་ཚོགས་པ་བདུད་རྩིའི་སྟེང་དུ་གནས་
9-8-32b


པར་བལྟས་ལ། དེ་རྣམས་ཡོངས་སུ་གྱུར་པ་ལས། ཨོཾ་དཀར་པོ་ཨཱཿདམར་པོ་ཧཱུཾ་སྔོན་པོ་སྟེང་ནས་སྟེང་དུ་གནས་པ་ལས་འོད་ཟེར་འཕྲོས་པས་རྒྱ་མཚོ་ལ་སོགས་པ་ན་གནས་པའི་བདུད་རྩི་དང༌། ཕྱོགས་བཅུ་ན་བཞུགས་པའི་དཔའ་བོ་དང༌། 
དཔའ་མོའི་དབང་ཕྱུག་མ་ཐམས་ཅད་ཀྱི་ཐུགས་ཀའི་ས་བོན་ལས། ཡེ་ཤེས་ཀྱི་བདུད་རྩི་བཀུག་ཅིང༌། འོད་ཟེར་གྱིས་འགྲོ་བ་རྣམས་འཁོར་ལོ་གསུམ་གྱི་ལྷར་བྱས་པའི་དཔའ་བོ་དང༌། དཔའ་མོ་བཀུག་པ་རྣམས་ཀྱང་སྙོམས་པར་འཇུག་པ་སྔོན་དུ་འགྲོ་བས་
ཞུ་བ་ཡི་གེ་གསུམ་ལ་ཐིམ། དེ་གསུམ་ཡང་རིམ་གྱིས་ཞུ་བ་ཐོད་པར་ཐིམ་པར་བསམས་ལ། ཡི་གེ་གསུམ་ལན་གསུམ་བརྗོད་དེ་བྱིན་གྱིས་བརླབ་བོ། །གཏོར་མགྲོན་ནི་སྔར་བཤད་པ་ལྟར་གྱི་འབར་བའི་ཕྱག་རྒྱ་དང་སྔགས་ཀྱིས། དུར་ཁྲོད་ན་གནས་པའི་ཕྱོགས་
སྐྱོང་སོགས་འཁོར་དང་བཅས་པ་ཐམས་ཅད་ཡོངས་སུ་རྫོགས་པའི་དཀྱིལ་འཁོར་སྤྱན་དྲངས་ཏེ་མདུན་དུ་བཞག་ལ། མཆོད་ཡོན་སོགས་སྔོན་དུ་འགྲོ་བས་མཆོད་དོ། །དེ་ནས་ལག་པ་གཉིས་ཨཱ་ལི་ཀཱ་ལི་ཡོངས་སུ་གྱུར་པ་ལས། ཟླ་བ་དང་ཉི་མའི་རང་བཞིན་དུ་
གྱུར་པའི་དབུས་སུ་ཧཱུཾ་ཡིག་བལྟས་ཏེ། ཨོཾ་ཨ་ནྱོ་ནྱ་ཨ་ནུ་ག་ཏཱཿ སརྦྦ་དྷ་རྨཱཿ བ་ར་སྥར་ཨ་ནུ་པྲ་བིཥྚ་སརྦ་དྷ་རྨཱཿ ཨ་ཏྱནྟ་ཨ་ནུ་པྲ་བིཥྚ་སརྦྦ་དྷ་རྨྨཱཿ ཨོཾ་ཨཱཿ་ཧཱུཾ་ཞེས་བརྗོད་པ་སྔོན་དུ་འགྲོ་བས། ཟླ་ཉི་ཧཱུཾ་དང་བཅས་པ་ཡོངས་སུ་གྱུར་པ་ལས། རྡོ་རྗེ་ཐལ་མོར་བྱས་
པའི་ལག་མཐིལ་དུ། བདུད་རྩི་གཏོར་མའི་སྣོད་དངོས་སུ་བཞག་པའམ་བཞག་པར་མོས་ཏེ། དེ་ནས་མགྲོན་གྱིས་གཏོར་མ་བདག་གིར་མཛད་པའི་ཕྱིར་དུ་རང་གི་འདོད་དོན་བརྗོད་དེ། ལྷ་མོ་ཚད་མ་དམ་ཚིག་ཚད་མ་དང༌། །དེས་བརྗོད་གསུང་ཡང་མཆོག་ཏུ་ཚད་
9-8-33a


མ་སྟེ། །བདེན་པ་འདི་དག་གིས་ནི་ལྷ་མོ་རྣམས། །བདག་ཅན་རྗེས་སུ་འཛིན་པའི་རྒྱུར་གྱུར་ཅིག །ཅེས་བརྗོད་དོ། །དེ་ནས་མཆོད་པའི་འཁོར་གསུམ་པོ་རྣམས་བདེ་སྟོང་གི་ངོ་བོར་དབྱེར་མེད་པར་བལྟས་ལ། ལྷ་རྣམས་ཀྱི་ལྗགས་
ལ་ཧཱུཾ་དཀར་པོ་ལས་བྱུང་བའི་རྡོ་རྗེ་རྩེ་གསུམ་པ་དཀར་པོ་ནས་འབྲུ་ཙམ་བཀོད་དེ་སྔར་ལྟར་བྱིན་གྱིས་བརླབས། རྡོ་རྗེའི་འོད་ཟེར་གྱི་སྦུ་གུས་དྲངས་ནས་གསོལ་བར་བསམ་ཞིང༌། ཨོཾ་ཨཱཿབཛྲ་ཨཱ་ར་ལི་ཧོ། ཛཿཧཱུཾ་བཾ་ཧོཿབཛྲ་ཌཱ་ཀི་ནཱི་ས་མ་ཡ་སྟྲཾ་ཌཾ་ཤྱ་ཧོཿ 
ལན་ཅིག་བརྗོད་པས་གཙོ་བོ་དང་ལན་གཉིས་པས་གཙོ་མོ་དང༌། ཤར་ནས་གཡོན་དུ་བསྐོར་ཏེ་ལན་གསུམ་མཁའ་འགྲོ་མ་སོགས་བཞི་དང༌། ཡང་གཏོར་སྣོད་ཤར་ནས་ཕྱོགས་བཞི་གཡོན་སྐོར་དང༌། མེ་ནས་མཚམས་བཞི་གཡས་སུ་བསྐོར་ཏེ། རྩ་
སྔགས་ལན་ཅིག་བརྗོད་དེ་འཁོར་ལོ་གསུམ་གྱི་ལྷ་རྣམས་དང༌། ཤར་ནས་ཕྱོགས་གཡོན་དུ་བསྐོར་ཏེ། སྔགས་སྔ་མ་ལན་ཅིག་གིས་སྒོམ་བཞི་དང༌། མེ་ནས་མཚམས་གཡས་སུ་བསྐོར་ཏེ། སྔགས་དེ་ལན་ཅིག་གིས་མཚམས་མ་བཞི་ལ་དབུལ་ཞིང་
རིག་མ་བཅུ་དྲུག་གིས་མཆོད་དེ་རྐང་བརྒྱད་ཀྱིས་བསྟོད་ལ་འདོད་དོན་ལ་གསོལ་བ་གདབ་བོ། །དེ་ནས་སྔར་སྤྱན་དྲངས་པའི་དུར་ཁྲོད་ན་གནས་པའི་ཕྱོགས་སྐྱོང་དང་ཞིང་སྐྱོང་དང་ཀླུ་ལ་སོགས་པ་སྐད་ཅིག་གིས་འོད་གསལ་དུ་བཅུག་པའི་རྗེས་ལ། བདེ་མཆོག་གི་ལྷ་ཡབ་
ཡུམ་གྱི་སྐུར་བཞེངས་པར་བསམས་ལ། ཕྱོགས་གཡོན་དང་མཚམས་གཡས་སུ་བསྐོར་ཏེ། ཨོཾ་ཁ་ཁ། ཁཱ་ཧི་ཁཱ་ཧི། སརྦ་ཡཀྵ། རཱ་ཀྵ་ས། བྷཱུ་ཏ། པྲེ་ཏ། པི་ཤཱ་ཙ། ཨུ་པསྨཱ་ར། བཛྲ་ཌཱ་ཀ། ཌཱ་ཀི་ནྱཱ་ད་ཡ། ཨི་མཾ་བ་ལི་གྲྀ་ཧྞ་ནྷུ༌། ས་མ་ཡ་ར་ཀྵ་ནྟུ། མ་
9-8-33b


མ་སརྦ་སིདྡྷི་མྨེ་པྲ་ཡཙྪ་ནྟུ། ཡ་ཐཻ་བཾ། ཡ་ཐེ་ཥྚཾ། བྷུ་ཉྫ་ཐ། བི་པ་ཐ། ཛི་གྷྲ་ཐ། མཱ་ཏི་ཀྲ་མ་ཐ། མ་མ་སརྦྦ་ཀ་ཪྻཾ། སད་སུ་ཁཾ་བི་ཤུདྡྷ་ཡེ། ས་ཧཾ་ཡི་ཀ་བྷ་ཝ་ནྟུ། ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་ལན་གཉིས་བརྗོད་དེ་ཕྱོགས་དང་མཚམས་ན་གནས་པ་ལ་དབུལ་ལོ། །ཕྱོགས་
སྐྱོང་ལ་སོགས་པས་བདུད་རྩི་དེ་གསོལ་བས་ལུས་བདེ་བ་ཆེན་པོས་ཚིམ་པར་བསམ་མོ། །དེའི་རྗེས་ལ་མགྲོན་དེ་རྣམས་སྤྱི་ལ་སོ་རྩི་ལ་སོགས་པ་དབུལ་ཞིང༌། རིག་མ་བཅུ་དྲུག་གིས་མཆོད། རྐང་བརྒྱད་ཀྱིས་བསྟོད་ལ། མཉེས་པའི་དོན་དུ་འཆད་པ་ལྟར་ལག་
པས་བརྡ་བྱ། ལྷ་ཡི་ཚོགས་རྣམས་མ་ལུས་དང༌། །ཀླུ་ཡི་ཚོགས་རྣམས་མ་ལུས་དང༌། །གནོད་སྦྱིན་ཚོགས་རྣམས་མ་ལུས་དང༌། །སྲིན་པོའི་ཚོགས་རྣམས་མ་ལུས་དང༌། །འབྱུང་པོའི་ཚོགས་རྣམས་མ་ལུས་དང༌། །ཡི་དྭགས་ཚོགས་རྣམས་མ་ལུས་དང༌། །
ཤ་ཟའི་ཚོགས་རྣམས་མ་ལུས་དང༌། །སྨྱོ་བྱེད་ཚོགས་རྣམས་མ་ལུས་དང༌། །བརྗེད་བྱེད་ཚོགས་རྣམས་མ་ལུས་དང༌། །མཁའ་འགྲོའི་ཚོགས་རྣམས་མ་ལུས་དང༌། །མ་མོའི་ཚོགས་རྣམས་མ་ལུས་དང༌། །མ་ལུས་པ་ནི་ཐམས་ཅད་དག །འདིར་གཤེགས་བདག་ལ་
དགོངས་སུ་གསོལ། །བསྟན་པ་བསྲུང་དང་འགྲོ་བའི་དོན་མཛད་ཕྱིར། །ཐུགས་དམ་བཅས་ཤིང་ཞལ་གྱིས་མཆེས་པ་རྣམས། །དཔལ་ཆེན་དཀའ་སྡོད་ཡིད་ལྟར་མགྱོགས་པ་ཡི། །འཇིགས་པའི་གཟུགས་ཅན་དྲག་གཏུམ་མི་བཟད་པ། །གདུག་པ་
འདུལ་མཛད་ནག་པོའི་ཕྱོགས་རྣམས་འཇོམས། །རྣལ་འབྱོར་ལས་ལ་འབྲས་བུ་སྟེར་མཛད་ཅིང༌། །མཐུ་སྟོབས་བྱིན་རླབས་བསམ་གྱིས་མི་ཁྱབ་པའི། །གནོད་སྦྱིན་ཚོགས་སོགས་བརྒྱད་ལ་ཕྱག་འཚལ་ལོ། །སྡེ་བརྒྱད་བཙུན་མོ་སྲས་དང་
9-8-34a


གཡོག་བཅས་པས། །དངོས་གྲུབ་ཀུན་གྱི་དཀའ་དྲིན་བདག་ལ་སྩོལ། །རྣལ་འབྱོར་འདི་ཞེས་བྱ་བ་འཁོར་བཅས་ལ། ནད་མེད་ཚེ་དང་དབང་ཕྱུག་དང༌། །དཔལ་དང་གྲགས་དང་སྐལ་བ་བཟང༌། །ལོངས་སྤྱོད་རྒྱ་ཆེན་ཀུན་ཐོབ་
ཅིང༌། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་སྩོལ། །སྲུང་མས་རྟག་ཏུ་གྲོགས་མཛོད་ཅིག །དུས་མིན་འཆི་དང་ནད་རྣམས་དང༌། །གདོན་དང་བགེགས་རྣམས་ཞི་བ་དང༌། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་
མཛོད། །འཇིག་རྟེན་བདེ་ཞིང་ལོ་ལེགས་དང༌། །འབྲུ་རྣམས་རྒྱས་ཤིང་ཆོས་འཕེལ་དང༌། །བདེ་ལེགས་ཐམས་ཅད་འབྱུང་བ་དང༌། །ཡིད་ལ་འདོད་པ་ཀུན་གྲུབ་ཤོག །ཅེས་འདོད་དོན་ལ་གསོལ་བ་གདབ་བོ། །དེ་ནས་ཆོ་ག་ལྷག་ཆད་ཁ་སྐོང་བའི་དོན་
དུ་དྲིལ་བུ་དཀྲོལ་བ་སྔོན་དུ་འགྲོ་བས། ཡིག་བརྒྱ་བཟླས་པའི་འོག་ཏུ། ཨོཾ་ཡོ་ག་ཤུདྡྷཿ སརྦ་དྷརྨྨཿཡོ་ག་ཤུདྡྷོ྅ཧཾ། ཞེས་བརྗོད་ཅིང༌། སྙིང་ཁར་པད་ཀོར་གྱི་ཕྱག་རྒྱས་མཉེས་པར་བྱས་ལ། ཕྱག་རྒྱ་སྡུད་པ་ན་ལག་པས་འཁྱུད་པའི་ཚུལ་བྱ་ཞིང༌། 
མཐེ་བོང་དང་སྲིན་ལག་གིས་སེ་གོལ་གཏོག་པ་སྔོན་དུ་འགྲོ་བས། ཨོཾ་བཛྲ་མུཿཞེས་བརྗོད་དེ། འཇིག་རྟེན་པ་རྣམས་གཤེགས་སུ་གསོལ་ཞིང༌། དཀྱིལ་འཁོར་གྱི་འཁོར་ལོ་བདག་ཉིད་ལ་གཞུག་པར་བྱའོ། །དེ་ལྟར་བདག་ཉིད་རྣམས་བསམ་ཞེས་སོགས་ཉེར་སྤྱོད་
ཀྱི་རྣལ་འབྱོར་རྣམས་ཀྱང་ཤིན་ཏུ་རྣལ་འབྱོར་དུ་བཤད་པས་བཟླས་པ་དང་གཏོར་མ་སོགས་ཀྱང་ཤིན་ཏུ་རྣལ་འབྱོར་དུ་བསྡུའོ། །དེ་ནས་ཕྱི་དཀྱིལ་གྱི་ལྷ་རྣམས་སྔར་བཞིན་བསྡུས་པའི་འོག་ཏུ། ལུས་དཀྱིལ་གྱི་སྒོ་མཚམས་མ་བརྒྱད་སྐུ་འཁོར་དང༌། དེ་གསུང་འཁོར་དང༌། དེ་ཐུགས་འཁོར་གྱི་
9-8-34b


ལྷ་དང༌། དེ་རྣམས་ཀྱང་རྣལ་འབྱོར་མ་བཞི་ཐོད་པ་དང་བཅས་པ་ལ་བསྡུ་ཞིང༌། དེ་བརྒྱད་ཀྱང་ནང་གི་ཧེ་རུ་ཀ་ཡབ་ཡུམ་དང༌། དེ་གཉིས་ཀྱང་གནས་དེར་ཐིམ་ནས། རྩ་དང་ཁམས་ཅད་བྱིན་གྱིས་བརླབས་པར་བསམས་ལ། ལྷག་མ་སྔར་བཞིན་བསྡུས་
ཏེ། ལྡང་བ་ན་ཧེ་རུ་ཀ་ཕྱག་གཉིས་པ་ཡབ་ཡུམ་དུ་ལངས་ལ། སྲིད་པ་གསུམ་འབར་སྐུ་ནི་རྗེས་ཆགས་དུལ་བར་ལྡན། །འོད་ཟེར་སྔོན་པོ་སྟོང་ལྡན་ཉི་མ་བརྒྱ་སྟོང་ལྡན། །རྣམ་མང་སྐུ་དང་ཆ་ལུགས་རྗེས་ཆགས་སེམས་པར་ལྡན། །ཧེ་རུ་ཀ་དཔལ་དེ་དང་ལྷན་
ཅིག་གར་བྱེད་ཤོག །ཅེས་དང༌། ལྷ་མོ་ཚད་མ་ཞེས་སོགས་དང༌། སྔར་གྱི་སེམས་བསྐྱེད་སྨོན་ལམ་དུ་བསྒྱུར་ལ་བསགས་པའི་དགེ་བ་བསྔོ་བར་བྱའོ། །གཉིས་པ་ཐུན་སྔ་ཕྱིའི་བར་དང་ཐུན་གཞན་ལ་ཇི་ལྟར་བྱ་བ་ལ་གཉིས། ཐུན་སྔ་ཕྱིའི་བར་ལ་ཇི་ལྟར་བྱ་བ་
དང༌། ཐུན་གཞན་ལ་ཇི་ལྟར་བྱ་བའོ། །དང་པོ་ནི། རང་ཕྱག་གཉིས་པ་ཡུམ་བཅས་སུ་ལངས་པ་ལ་གོ་ཆ་གཉིས་བགོ། སྤྱི་བོ་ལ་སོགས་པའི་གནས་ཉེར་བཞིར་ཉི་གདན་ལ་པཱུ་ཛ་སོགས་ཡི་གེ་ཉེར་བཞི་མགོ་བོར་ཐིག་ལེས་བརྒྱན་པ་བཀོད་པའི་གོ་ཆ་ཆེན་པོས་
ཀྱང་བསྲུང༌། གཡོན་པའི་མཐེབ་མཛུབ་ཀྱིས་ཤར་ནས་གཡོན་སྐོར་དུ་སེ་གོལ་གཏོག་ཅིང༌། ཞལ་བཞི་པའི་སྔགས་བརྗོད་པའི་ཚམ་ངམ་སྔགས་ཀྱིས་བསྲུང་བའང་བྱ། མཐོང་ཐོས་ལ་སོགས་པའི་སེམས་ཅན་ཐམས་ཅད་འཁོར་ལོ་བདེ་མཆོག་ཏུ་བལྟ་བའི་
ཚངས་སྤྱོད་ལ་རྟག་ཏུ་གནས་པ་དང༌། བླ་མ་དང་སངས་རྒྱས་དང་བྱང་སེམས་ཀྱི་སྐུ་མཐོང་བའི་ཚེ་བདེ་མཆོག་ཏུ་མོས་ནས་རྐང་བརྒྱད་ཀྱིས་བསྟོད་ཅིང༌། རང་ཉིད་ལའང་དེས་མཆོད་པར་བྱའོ། །ཁམས་གསུམ་གྱི་འཁོར་ལོ་ཐམས་ཅད་བདེ་བའི་མཆོག་
9-8-35a


ལྷན་སྐྱེས་ཀྱི་བདེ་སྟོང་དབྱེར་མེད་པར་སྡོམ་པ་ལ་གནས་ནས། བདེ་སྟོང་གི་ཏིང་ངེ་འཛིན་རྒྱས་པའི་ཕྱིར་དུ། འདོད་ཡོན་སྤྱི་དང་བྱེ་བྲག་ལ་སེང་གེ་བཞིན་དུ་མི་འཇིགས་པར་ལོངས་སྤྱད། ཧེ་རུ་ཀའི་རྒྱལ་གྱི་ངང་ནས་
ལུས་ཀྱི་བསྒུལ་བསྐྱོད་དང༌། ངག་གི་སྨྲ་བརྗོད་བཏང་སྙོམས་པ་རྣམས་ཀྱིས་ཀྱང་ཕྱག་རྒྱ་བཅིང་བ་དང༌། སྔགས་བཟླ་བ་དང་འདྲ་བའི་ཚོགས་སྡུད་པར་གསུངས་པས་སྤྱོད་ལམ་ཀུན་ཏུ་དེའི་རྒྱལ་རྒྱུན་ལྡན་བྱ། ཁྲུས་བྱེད་ན་ཆུ་དབང་བསྐུར་བའི་སྐབས་ལྟར་བྱའོ། །
ཁ་ཟས་ཀྱི་དུས་སུ་ནི་རང་གི་ལུས་དཀྱིལ་སྐད་ཅིག་གིས་གསལ་གདབ། ཁ་ཟས་ཀྱི་ཆ་ཤས་ཤིག་གཏོར་མའི་བསྐྱེད་ཆོག་ལྟར་རམ་ཡང་ན་ཡི་གེ་གསུམ་གྱིས་བྱིན་གྱིས་བརླབས་ལ། ཨོཾ་ཁ་ཁ་ཞེས་སོགས་ལན་ཅིག་བརྗོད་དོ། །ཕྱོགས་སྐྱོང་ལ་གཏོར་མ་དབུལ། 
དེ་ནས་རང་གི་བཟའ་བཏུང་རྣམས་བྱིན་གྱིས་རློབ་པ་ནི། ལག་པ་གཡས་ལ་ཧོ་དཀར་པོ་ལས་སྐྱེས་པའི་འཁོར་ལོ་རྣམ་སྣང་གི་ངོ་བོ་ཧོ་ཡིག་གིས་མཚན་པ་བསམས་པ་ལ། བཟའ་བཏུང་གི་སྣོད་དངོས་སུ་བཞག་པའམ་བཞག་པར་མོས་པ་བྱ། ལེག་པ་
གཡོན་པ་ལ་ཧ་དམར་པོ་ལས་སྐྱེས་པའི་སྣང་མཐའི་རང་བཞིན་པདྨ་དམར་པོ་འདབ་མ་བརྒྱད་པ་ཧས་མཚན་པས་ཁ་དགབ། རྫས་ཀྱི་སྟེང་དུ་ཉི་མ་ལ་གནས་པའི་ཧྲཱིཿ སྔོན་པོ་མི་བསྐྱོད་པའི་རང་བཞིན་ཅན་བལྟས་ལ། སྔགས་དེ་གསུམ་
ལན་གསུམ་མམ་ལྔའམ་བདུན་བརྗོད་པས། ཧས་ཁ་དོག་དང༌། ཧོས་དྲི་དང༌། ཧྲཱིཿས་ནུས་པའི་སྐྱོན་རྣམས་བཅོམས་ཤིང་བདུད་རྩིར་བསྒྱུར་བར་བསམ། ཧྲཱིཿའི་གཡས་སུ་ཨོཾ་དཀར་པོ། གཡོན་དུ་ཨཱཿདམར་པོ། མདུན་དུ་ཧཱུཾ་སྔོན་པོ་གནས་པར་
9-8-35b


བསམས་ལ། ཡི་གེ་གསུམ་མམ་ལྔའམ་བདུན་བརྗོད་ལ་རྒྱ་ཆེར་སྤེལ་ཞིང་བྱིན་གྱིས་བརླབ། ཕུད་ཀྱིས་བླ་མ་དང༌། དཔའ་བོ་དང་རྣལ་འབྱོར་མ་མཆོད་ནས། ཆོས་ཐམས་ཅད་རང་བཞིན་གྱིས་གྲུབ་པས་སྟོང་པར་མཉམ་པར་ཉིད་དོ་སྙམ་དུ་མོས་པའི་ང་
རྒྱལ་སྔོན་དུ་འགྲོ་བས། ཨོཾ་ས་མ་ཡ་ཤུདྡྷཿ སརྦ་དྷ་རྨཱཿ ས་མ་ཡ་ཤུདྡྷོ྅ཧཾ། ཞེས་བརྗོད༌། ལྕེ་རྡོ་རྗེར་བསྐྱེད་པའམ་ལྕེ་ལ་རྡོ་རྗེ་བསྐྱེད་ནས་སྔར་བཞིན་བྱིན་གྱིས་བརླབ་སྟེ། ལོངས་སྤྱད་ནས་ལྟེ་བར་གནས་པའི་ཧཱུཾ་ངམ། ནཱ་དཀར་དམར་ལྷ་ཐམས་
ཅད་ཀྱི་ངོ་བོར་མོས་ཏེ་ཕུལ་བས་ལྷ་རྣམས་ཚིམ་པར་བསམ་མོ། །གཉིས་པ་ནི། དེ་ལྟར་ཐུན་དང་པོ་ལ་ཇི་ལྟར་བྱ་བ་བཤད་ནས། གུང་ཐུན་ལ་ནི་བསམ་གཏན་གྱི་ཁང་པར་ཞུགས་ཏེ། སྐད་ཅིག་མའི་སྔགས་གསུམ་བརྗོད་པས། སྐད་ཅིག་གིས་རྟེན་བརྟེན་
པའི་འཁོར་ལོ་རྫོགས་པར་མོས་པ་བྱ་སྟེ། སྔར་བཞིན་གསལ་གདབ། གཙོ་བོ་ཡབ་ཡུམ་གསལ་གདབ་ཟིན་པ་དང༌། གསང་གནས་བྱིན་རླབས་སོགས་བྱས་ལ་བདེ་སྟོང་བསྒོམ། འཁོར་རྣམས་གསལ་བཏབ་ཟིན་པ་ནའང༌། སྔར་ལྟར་སྙོམས་འཇུག་བྱས་
ལ། ཆོས་སོ་བདུན་གྱི་དག་པ་རྒྱས་བསྡུས་གང་རུང་ཞིག་དྲན་པར་བྱ། དེ་ནས་ལུས་དཀྱིལ་བསྒོམ། དེ་ནས་གོ་བགོ་བ་སོགས་སྔར་བཞིན་བྱའོ། །འགྲེལ་པ་རྣམས་ལས། དག་པ་གསུམ་ནས་སྦྱོར་བ་ཚོགས་གསོག་གི་བར་རྣམས་ཐུན་གཞན་གསུམ་
ལ་བྱ་བར་མ་བཤད་ཀྱང༌། བསྐྱེད་རིམ་ལ་སེམས་ཅུང་ཟད་ལས་རུང་གི་ཏིང་ངེ་འཛིན་མ་ཐོབ་བར་དུ་མ་ཆག་པ་རེ་དང༌། སྟོང་པའི་ངང་ནས་ནཱ་ད་འཇོག་པ་ནས་མངོན་བྱང་བསྒོམ་པའི་བར་བྱས་ན་ལེགས་སོ། །ཐུན་དེ་བཏང་ནས་ཕྱི་དྲོའི་ཐུན་ལ་མ་
9-8-36a


ཞུགས་ཀྱི་བར་དང༌། ཕྱི་དྲོའི་ཐུན་ལའང་དེ་བཞིན་དུ་བྱའོ། །དེ་ནས་ཐུན་བཞི་པ་མཚན་མོའི་ཐུན་ལའང་དེ་བཞིན་དུ་བྱས་ལ། དེའི་མཐར་ནམ་གྱི་གུང་ལ་ནི། ངག་གི་བྱ་བ་ཐམས་ཅད་ཨཱ་ལི་ཀཱ་ལིའི་བདག་ཉིད་དུ་ཁོང་དུ་ཆུད་
པར་བྱས་ལ། ཨོཾ་ཚུར་སྤྱོན་ཚུར་སྤྱོན་དཔའ་བོ་ཆེ། །ངག་པའི་ཚིག་ནི་སྟོན་པ་པོ། །སྐྱེ་དང་འཇིག་དང་རག་བྱུང་བ། །སྟོང་ཉིད་ཡེ་ཤེས་འདི་ཁོ་ནའོ། །ཞེས་བརྗོད་ཅིང༌། འགོ་བོར་ཨོཾ་དང༌། མཐར་ཧཱུཾ་ཧཱུཾ་ཕཊ་སྦྱར་བའི་དབྱངས་གསལ་ཚར་གཅིག་བརྗོད་ལ། 
སྡུད་རིམ་སྙིང་ཁར་བྱས་ནས་ནཱ་ད་དེའང་མི་དམིགས་པར་བྱས་པའི་འོག་ཏུ། སེམས་གཡོ་མེད་དུ་གཟུང་ན། གཉིད་ཀྱི་འོད་གསལ་འཛིན་པའི་སྟོབས་ཆེའོ། །ཐུན་བཞི་པོ་ཐམས་ཅད་ཀྱི་མཐར་ཡིག་བརྒྱ་ཅི་མང་དུ་བརྗོད་དོ། །དེ་ནས་ཡང་ཐོ་རངས་
ཀྱི་ཐུན་ལ་འོད་གསལ་ལས་ལངས་ཏེ། ལུས་དཀྱིལ་འཁོར་གྱི་འཁོར་ལོར་མོས་པ་བྱས་ལ། ཨོཾ་ཚུར་སྤྱོན་སོགས་བརྗོད་ནས་ཐུན་དང་པོ་ལ་བཤད་པ་ཐམས་ཅད་ལ་རྗེས་སུ་གནས་པར་བྱའོ། །གཉིས་པ་དེ་ལྟར་བསྒོམས་པའི་ཕན་ཡོན་
ནི། དེ་ལྟར་ཐུན་བཞིར་བསྐྱེད་རིམ་རྣལ་འབྱོར་གསུམ་དང༌། རྫོགས་རིམ་རྣལ་འབྱོར་ཆེན་པོ་བསྒོམས་པས། རྫོགས་རིམ་གྱི་རྟོགས་པ་ཡོངས་རྫོགས་སྐྱེ་བའི་རྒྱུད་སྨིན་ཞིང༌། རྫོགས་རིམ་ཡང་མཚན་ཉིད་ཚང་བར་སྐྱེས་ཏེ་ཚེ་འདིར་དེ་བཞིན་གཤེགས་
པའི་ས་འཐོབ་པ་དང༌། ཚེ་འདིར་དེ་མ་ཐོབ་ཀྱང་སྐྱེ་བ་བརྒྱུད་ནས་ཐོབ་སྟེ། དེའང་ཐེག་པ་མཆོག་གི་རིགས་སུ་སྐྱེ་བ་དང༌། ཆོས་འདི་སྤྱོད་པའི་ཆོས་ལྡན་གྱི་རྒྱལ་པོར་འགྱུར་བ་དང༌། ལས་ཀྱི་སྒྲིབ་པའི་སྡིག་ཀུན་འདག་པ་དང༌། ལམ་འདི་ལ་བསམ་
9-8-36b


གཏན་བྱས་པ་ཙམ་དང༌། གླེགས་བམ་ཀློག་པ་དང༌། ཁ་ཏོན་དུ་འདོན་པ་དང༌། རྒྱུད་ཀྱི་གླེགས་བམ་བྲིས་པས་ཀྱང་མཐོ་རིས་ཀྱི་དཔལ་སྤྱི་དང་ཁྱད་པར་བ་འཁོར་སྒྱུར་འཐོབ་པར་གསུངས་སོ། །གལ་ཏེ་གཡེང་བས་མ་གྲུབ་ན། ལམ་འདིའི་རྣལ་འབྱོར་པ་དང་རྣལ་འབྱོར་མ་རྣམས་འཇིག་
རྟེན་འདི་ནས་འཇིག་རྟེན་ཕ་རོལ་ཏུ་འཕོ་བའི་ཚེ། དཔལ་ཧེ་རུ་ཀ་དང་རྗེ་བཙུན་མ་ཕག་མོ་ལ་སོགས་པའི་དཔའ་བོ་དང་རྣལ་འབྱོར་མ། ལག་ན་མེ་ཏོག་དང་། བདུག་སྤོས་དང༌། རྒྱལ་མཚན་དང༌། བ་དན་དང༌། སིལ་སྙན་སྣ་ཚོགས་པ་ཐོགས་པས་ཡིད་དུ་འོང་བའི་གླུའི་
མཆོད་པ་སྣ་ཚོགས་པས་བསུས་ནས་ཕྱིའི་མཁའ་སྤྱོད་ཀྱི་གནས་སུ་འཁྲིད་ཅིང་ནང་གི་མཁའ་སྤྱོད་འཆི་བ་འོད་གསལ་དུ་འཇུག་པར་བྱེད་དོ། །ཕན་ཡོན་དེ་རྣམས་མངོན་དུ་བྱེད་ནུས་པའི་ལམ་ལ་སྒྲུབ་པ་བྱེད་པའི་རྣལ་འབྱོར་པ་དང༌། རྣལ་འབྱོར་མ་ནི་ས་སྟེང་
ན་ཤིན་ཏུ་དཀོན་པར་གསུངས་པས། འདི་འདྲ་བའི་རྙེད་དཀའ་བའི་ལམ་ལ་ཉམས་ལེན་བྱ་ས་ཡོད་པའི་དུས་སུ་ནི། ཤིན་ཏུ་རྙེད་དཀའ་བར་ཤེས་པར་གྱིས་ལ། ལམ་འདི་ལ་ཐོས་བསམ་སྒོམ་པ་ལ་འབད་པར་བྱོས་ཤིག །མངོན་རྟོགས་ཀྱི་རྣམ་
གཞག་རྣམས་ཞིབ་ཏུ་ཤེས་པར་འདོད་ན། བདེ་མཆོག་གི་རྩ་བཤད་ཀྱི་རྒྱུད་དང༌། སྤྱི་སྒོས་ཀྱི་འགྲེལ་པ་རྣམས་དང༌། འདི་དང་རྗེས་སུ་མཐུན་པའི་བདེ་མཆོག་གི་རྒྱ་གཞུང་རྣམས་དང༌། བོད་ཀྱི་བརྒྱུད་པ་སོ་སོའི་ལུགས་ལས་འབྱུང་བ་རྣམས་ལེགས་པར་
བསྒྲིགས་ཏེ། ཕྲ་རགས་རྣམས་མཐའ་དག་པར་ལཱུ་ཨི་པའི་སྒྲུབ་ཐབས་ཀྱི་རྒྱ་ཆེར་འགྲེལ་པ་འདོད་འཇོར་བྲིས་པ་ལས་ཤེས་པར་བྱའོ། །རྒྱལ་བའི་བསྟན་པ་མདོ་སྔགས་གནད་ཀྱི་དོན། །ཇི་བཞིན་འགྲེལ་ལ་ལེགས་པར་དབང་འབྱོར་པའི། །ཀླུ་སྒྲུབ་
9-8-37a


ཤ་བ་རི་ལས་ལེགས་བརྒྱུད་པ། །དཔལ་ལྡན་ལཱུ་ཨི་པ་ཡི་ལུགས་མཆོག་འདི། །ལམ་འདི་ཤེས་ནས་དད་པ་རྙེད་པ་ཡི། །ཚུལ་བཞིན་སྒྲུབ་པ་སྙིང་པོར་བྱེད་འདོད་པ། །སྐལ་ལྡན་མང་པོས་རིང་ནས་བསྐུལ་བའི་ངོར། །གསོལ་
བ་རིང་དུ་བཏབ་ནས་ལེགས་པར་སྦྱར། །རྒྱུ་སྐར་དབུས་ན་ཉ་རྒྱས་ཟླ་བ་བཞིན། །ཕྱོགས་འདིའི་སྒྲུབ་ཐབས་དབང་པོ་འདི་སྦྱར་ལས། །རྣམ་དཀར་བསོད་ནམས་འདི་ཡིས་སྐྱེ་བོ་ཀུན། །དཔལ་ལྡན་ཧེ་རུ་ཀ་ཡི་ཞབས་བརྟན་ཤོག །དུས་ཀྱི་དབང་གིས་
ཤིན་ཏུ་ཉམས་གྱུར་པ། །དཔལ་ལྡན་འཁོར་ལོ་བདེ་མཆོག་ལམ་བཟང་པོ། །མི་ནུབ་བསྟན་པའི་རྒྱལ་མཚན་ལེགས་འཛིན་པའི། །དཔྱོད་ལྡན་དུ་མས་ཕྱོགས་ཀུན་གང་བར་ཤོག །ཅེས་རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་ཀྱི་བཅོམ་
ལྡན་འདས་འཁོར་ལོ་བདེ་མཆོག་གི་སྒྲུབ་ཐབས་བདེ་ཆེན་གསལ་བ་ཞེས་བྱ་བ་འདི་ནི། ལམ་འདི་ཤེས་ནས་ཚུལ་བཞིན་དུ་སྒྲུབ་འདོད་པའི་དགེ་བའི་བཤེས་གཉེན་མང་པོ་ཞིག་གིས་རིང་མོ་ཞིང་ནས་བསྐུལ་བའི་དོན་དུ། མང་དུ་ཐོས་
པའི་དགེ་སློང་དཔལ་འཁོར་ལོ་སྡོམ་པའི་རྣལ་འབྱོར་པ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་བའི་ཡི་གེ་པ་ནི་དཀའ་བཞི་པ་རིན་ཆེན་དཔལ་ལོ། །འདིས་ཀྱང་བསྟན་པ་
རིན་པོ་ཆེ་ཕྱོགས་ཀུན་ཏུ་རྒྱས་པར་བྱེད་ནུས་པར་གྱུར་ཅིག།    །།མངྒ་ལཾ།།
9-8-37b


empty page
9-9-1a


༄༅། །དྲིལ་བུ་ལུས་དཀྱིལ་གྱི་ལྷན་ཐབས་བཞུགས་སོ། །
9-9-1b


༄༅། །བླ་མ་དང་བཅོམ་ལྡན་འདས་དཔལ་ཧེ་རུ་ཀ་ཡབ་ཡུམ་ལ་གུས་པས་ཕྱག་འཚལ་ལོ། དཔལ་འཁོར་ལོ་བདེ་མཆོག་དྲིལ་བུ་པའི་མངོན་རྟོགས་ངག་འདོན་གྱི་ཆོ་གའི་རིམ་པ་ནི། ནང་
མཆོད་གཏོར་མ་ལྟར་བྱིན་གྱིས་བརླབ་པའམ། ཡང་ན། ཧ་ཧོ་ཧྲཱིཿ། ཁ་དོག་དྲི་རོ་ནུས་པའི་སྐྱོན་བཅོམས་ཤིང་བདུད་རྩིར་གྱུར། ཨོཾ་ཨཱཿཧཱུཾ། ཞེས་ལན་གསུམ་བརྗོད་པས། རྒྱ་ཆེར་སྤེལ་ཞིང་བྱིན་གྱིས་བརླབས་པར་གྱུར། སྔོན་འགྲོ་གཏོར་མ་མངོན་རྟོགས་ནས་
འབྱུང་བ་ལྟར་བྱིན་གྱིས་བརླབས་ནས། ཕྱག་རྒྱ་བཅིངས་པའི། ཕཻཾ་ཞེས་བརྗོད་ནས། རང་གི་ཐུགས་ཀར་ཉི་གདན་ལ་གནས་པའི་ཧཱུཾ་ཡིག་ལས་འོད་ཟེར་འཕྲོས་པས་འོད་ཟེར་གྱིས་དུར་ཁྲོད་བརྒྱད་ན་གནས་པའི་ཕྱོགས་སྐྱོང་དང་ཞིང་
སྐྱོང་ལ་སོགས་པ་ཐམས་ཅད་སྤྱན་དྲངས་ཏེ། ཕྱོགས་མཚམས་བརྒྱད་དུ་འཁོད་པ་སྐད་ཅིག་གིས་འོད་གསལ་དུ་བཅུག་པ་ལས། བདེ་མཆོག་གི་ལྷ་ཡབ་ཡུམ་གྱི་སྐུར་བཞེངས་པའི་མགྲོན་རྣམས་ཀྱི་ལྗགས་ལ་
ཧཱུཾ་དཀར་པོ་ལས་བྱུང་བའི་རྡོ་རྗེ་དཀར་པོ་རྩེ་གསུམ་པ་ནས་འབྲུ་ཙམ་འཁོད་པའི་རྡོ་རྗེའི་འོད་ཟེར་གྱི་སྦུ་གུས་དྲངས་ནས་གསོལ་བར་གྱུར། རྡོ་རྗེ་ཐལ་མོ་ཁ་ཕྱེ་བའི་ཕྱག་རྒྱ་བྱས་ལ། ཨོཾ་ཁ་ཁ། ཞེས་པ་ནས། ཧཱུཾ་ཧཱུཾ་ཕཊ་སྭཱ་ཧཱ། ཞེས་
9-9-2a


ལན་གསུམ་བརྗོད། ཕྱོགས་གཡོན་དང་མཚམས་གཡས་སྐོར་དུ་གནས་པ་ལ་འབུལ་ལོ། ཨོཾ་ཨརྒྷཾ་པྲ་ཏཱི་ཙྪ་སྭཱ་ཧཱ། དེ་བཞིན་དུ་ཨརྒྷཾ་གྱི་གནས་སུ། པཱ་དྱཾ། གྱིས་ཞབས་བསིལ་དང༌། ཨོཾ་བཛྲ་པུཥྤེ་ཨཱཿཧཱུཾ། 
དེ་བཞིན་དུ་པུཥྤེའི་གནས་སུ། དྷཱུ་པེ། དཱི་པེ། གནྡྷེ། ནཻ་ཝི་དྱེ། ཤཔྟ། རྣམས་བཅུག་ལ་དབུལ། ཕྱོགས་སྐྱོང་དང་ཞིང་སྐྱོང་ལ་སོགས་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ། ཞེས་ནང་མཆོད་དབུལ། ལྷ་ཡི་ཚོགས་རྣམས་མ་ལུས་
དང༌། །ཞེས་པ་ནས། ཡིད་ལ་འདོད་པ་ཀུན་གྲུབ་ཤོག །ཅེས་དང་ཡིག་བརྒྱ་བརྗོད། ཨོཾ་བཛྲ་མུཿ འཇིག་རྟེན་པ་རྣམས་རང་གནས་སུ་གཤེགས་པར་གྱུར༌། མཆོད་པ་བསང་སྦྱང་བྱིན་གྱིས་བརླབ་པ་ནི། སུཾ་བྷ། ཞེས་སོགས་ཀྱིས་བགེགས་
བསངས། སྭ་བྷཱ་ཝ་ཞེས་སོགས་ཀྱིས་སྟོང་པར་སྦྱངས། སྟོང་པའི་ངང་ལས་ཀཾ་དམ་ཨ་ལས་བྱུང་བའི་ཐོད་པ་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུཾ་ཧཱུཾ་ལས་བྱུང་བའི་མཆོད་ཡོན། ཞབས་བསིལ། མེ་ཏོག །བདུག་སྤོས། 
མར་མེ། དྲི་ཆབ། ཞལ་ཟས། རོལ་མོ་ལ་སོགས་པ་རང་བཞིན་སྟོང་ཉིད་རྣམ་པ་མཆོད་རྫས་སོ་སོའི་རྣམ་པ་ཅན། བྱེས་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་ཁྱད་པར་ཅན་སྟེར་བར་གྱུར། ཨོཾ་
9-9-2b


ཨརྒྷཾ་ཨཱཿཧཱུཾ། དེ་བཞིན་དུ། པཱ་དྱཾ། ཨོཾ་བཛྲ་པུཥྤེ་ཨཱཿཧཱུཾ། ཞེས་པ་ནས། ཤཔྟའི་བར་སྔགས་ཕྱག་རྒྱ་དང་བཅས་པས་བྱིན་གྱིས་བརླབས། དེ་ནས་མཎྜལ་དབུལ་ཞིང་གསོལ་བ་གདབ་པ་ནི། ཕྱག་གསུམ་བྱས་ཏེ་སྤྱིར་མཎྜལ་བཤམས། ཕྱག་གསུམ་བྱས་ཏེ་སོ་སོའི་ཕྱག་ཏུ་མེ་ཏོག་
འབུལ། ཕྱག་བྱས་ཏེ་མེ་ཏོག་དང་བཅས་པའི་ཐལ་མོ་སྦྱར་ནས་སྙིང་པོ་རྒྱན་ལས། སེམས་ཅན་དོན་དུ་སེམས་དགེ་བ། །རྣལ་འབྱོར་པ་ཡི་ཚོགས་རྣམས་ཀུན། །ཚུལ་བཞིན་ཆོ་ག་ལྡན་པ་ཡི། །རྣལ་འབྱོར་ལ་ནི་ཉེར་གནས་མཛོད། །ཅེས་པ་གསུམ་གྱིས་
མེ་ཏོག་གཏོར་ལ་གསོལ་བ་བཏབ། ཕྱག་བྱས་ཏེ་བླ་མ་མ་གཏོགས་པའི་མེ་ཏོག་བསྡུ། ཕྱག་བྱས་ཏེ་མཎྜལ་བཤམས། ཕྱག་བྱས་ཏེ་གཞན་རྣམས་ཀྱི་མེ་ཏོག་བླ་མ་ལ་འབུལ་བའི་ཕྱིར་མཎྜལ་བླ་མ་ལ་འབུལ། བླ་མས་ཀྱང་གཞན་རྣམས་ཀྱིས་ཕུལ་བའི་མཎྜལ་དང༌། རང་གི་མེ་ཏོག་བླ་མ་
གོང་མ་ལ་འབུལ་བའི་ཕྱིར་མེ་ཏོག་མཎྜལ་གྱི་དབུས་སུ་སྤུངས་ལ་རྟེན་གྱི་དྲུང་དུ་བཞག་ཕྱག་བྱས་ཏེ༌། རང་གནས་སུ་འཁོད། ཡང་ན་ཕྱག་གསུམ་བྱས་ཏེ་བླ་མའམ། གཙོ་བོ་ལ་མེ་ཏོག་དབུལ། ཡང་ཕྱག་གསུམ་བྱས་ཏེ། གྲལ་ལ་འཁོད་པ་རྣམས་ལ་མེ་ཏོག་བཀྲམ། དེ་ནས་ཕྱག་སུམ་
ཚན་གཞན་ལྔ། གསོལ་གདབ་དང་བཅས་པ་སྔ་མ་བཞིན་བྱའོ། །དེ་ནས་བླ་མའམ་གཙོ་བོས། བཤགས་པ་དང་བསྡམ་པ་སྔོན་དུ་འགྲོ་བ་ཅན་གྱི་ལྷའི་རྣལ་འབྱོར་ལ་གནས་པར་ཞུ། ཞེས་བརྗོད༌། སངས་རྒྱས་ཆོས་དང་དགེ་འདུན་ལ། །ཞེས་པ་ནས། གོ་
འཕང་མཆོག་ལ་འགོད་པར་བགྱི། །ཞེས་པའི་བར་གསུམ་གྱིས་སྐྱབས་འགྲོ་སོགས་བྱ། དེ་ནས་ཡི་གེ་བརྒྱ་པའི་བཟླས་པ་ནི། རང་གི་སྤྱི་བོར་བཾ་ལས་པདྨ་ཨ་ལས་ཟླ་བའི་གདན་གྱི་སྟེང་དུ་ཧཱུཾ་ལས་རྡོ་རྗེ་རྩེ་ལྔ་པ་ལྟེ་བ་ཧཱུཾ་གིས་མཚན་པ་ལས་འོད་འཕྲོས་དོན་
9-9-3a


གཉིས་བྱས་ཚུར་འདུས་ཡོངས་སུ་གྱུར་པ་ལས་རྡོ་རྗེ་སེམས་དཔའ་དཀར་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ་རྡོ་རྗེའི་སྐྱིལ་ཀྲུང་གིས་བཞུགས་པ། ཡུམ་རྡོ་རྗེ་སྙེམས་མ་དཀར་མོ་ཞལ་གཅིག་ཕྱག་
གཉིས་གྲི་གུག་དང་ཐོད་པ་འཛིན་པས་འཁྱུད་པ། གཉིས་ཀའང་དར་དང་རིན་པོ་ཆེའི་རྒྱན་སྣ་ཚོགས་ཀྱིས་སྤྲས་པ། གཉིས་ཀའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་འདྲའི་ཡེ་
ཤེས་པ་སྤྱན་དྲངས༌། ཛཿཧཱུཾ་བཾ་ཧོཿ གཉིས་སུ་མེད་པར་གྱུར། ཡང་ཧཱུཾ་ལས་འོད་ཟེར་འཕྲོས་པས་དབང་གི་ལྷ་སྤྱན་དྲངས་པ་རྣམས་ལ་མངོན་པར་དབང་བསྐུར་དུ་གསོལ་ཞེས་གསོལ་བ་བཏབ་པས། དེ་རྣམས་ཀྱིས་ཡེ་ཤེས་ཀྱི་བདུད་རྩིས་གང་
བའི་བུམ་པ་ཐོགས་ནས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་ཞེས་དབང་བསྐུར། ལུས་ཡེ་ཤེས་ཀྱི་བདུད་རྩིས་གང༌། མི་བསྐྱོད་པས་དབུ་བརྒྱན་པར་གྱུར། ཐུགས་ཀར་ཟླ་བའི་སྟེང་དུ་ཧཱུཾ་གི་ཐ་མར་ཡི་གེ་བརྒྱ་བའི་སྔགས་ཀྱི་
བསྐོར་བར་གྱུར། བཅོམ་ལྡན་འདས་རྡོ་རྗེ་སེམས་དཔའ་བདག་ཅག་ཐམས་ཅད་ཀྱི་སྡིག་སྒྲིབ་དང་དམ་ཚིག་ཉམས་ཆགས་ཐམས་ཅད་དག་པར་མཛད་དུ་གསོལ་ཞེས་གསོལ་བ་བཏབ་པས། ཐུགས་གའི་སྔགས་ཕྲེང་ཧཱུཾ་དང་བཅས་པ་ལས་འོད་ཟེར་
འཕྲོས། སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། སངས་རྒྱས་སྲས་བཅས་ལ་མཆོད་པ་ཕུལ། དེ་རྣམས་ཀྱི་སྐུ་གསུང་ཐུགས་ཀྱི་ཡོན་ཏན་རྣམས་འོད་ཀྱི་རྣམ་པར་བསྡུས་ནས་སྔགས་ཕྲེང་ཧཱུཾ་དང་བཅས་པ་ལ་ཐིམ་པས། དེ་ལས་བདུད་
9-9-3b


རྩིའི་རྒྱུན་དཀར་པོར་བབས་པ་ཡབ་ཡུམ་གྱི་སྦྱོར་མཚམས་ནས་ཐོན། རང་གི་ཚངས་བུག་ནས་ཞུགས་ཏེ། ལུས་ཐམས་ཅད་ཡེ་ཤེས་ཀྱི་བདུད་རྩིའི་རྒྱུན་གྱིས་གང༌། སྒོ་གསུམ་གྱི་སྡིག་སྒྲིབ་ཐམས་ཅད་སངས་ཀྱི་དག་པར་གྱུར། ཨོཾ་བཛྲ་ཧེ་རུ་ཀ་
ས་མ་ཡ་མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་པ་ཏིཥྛ། ཌྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོ་ཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡ་ཙྪ། སརྦ་ཀརྨ་སུ་ཙ་མེ། ཙི་ཏྟཾ་ཤྲི་ཡཾ་ཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་ཝན། བཛྲ་ཧེ་རུ་ཀ་མཱ་མེ་མུ་ཉྩ། 
ཧེ་རུ་ཀ་བྷ་ཝ། མ་ཧཱ་ས་མ་ཡ་སཏྭ་ཨཱཿཧཱུཾ་ཕཊ། ཅེས་བཟླས་ནས་རྒྱུད་མངོན་བརྗོད་བླ་མ་ལས། བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོའི་
བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །རྡོ་རྗེ་སེམས་དཔའ་ཡབ་ཡུམ་རང་ལ་ཐིམ་པས། རང་གི་སྒོ་གསུམ་དང་རྡོ་རྗེ་སེམས་དཔའི་སྐུ་གསུང་ཐུགས་དབྱེར་མེད་དུ་གྱུར་པར་བསམ། ཤྲཱི་ཧེ་རུ་ཀ། ཧེ་ནི་ཀུན་གྱི་འབྱུང་གནས་སུ་
གྱུར་པའི་སེམས་ཏེ་ཞེས་དང༌། ཨེ་བཾ་གྱི་དོན་ནོ། །སྟོང་པའི་ངང་ལས་སྐད་ཅིག་གིས་ཞེས་དང་ཕག་མོ་དམར་མོ་ཞལ་གཅིག་ཕྱག་གཉིས་རྡོ་རྗེ་དང་ཐོད་པ་འཛིན་པས་འཁྱུད་པ། ཡང་ན་གྲི་གུག་དང་ཐོད་པ་འཛིན་པ་སྦྱོར། ཤྲཱི་ཧེ་རུ་ཀ྅ཧཾ། ཞེས་
ལན་གསུམ་བརྗོད། ཨོཾ་ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿཀ་ཁ་ག་གྷ་ང་། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས། ཧཀྵ་ཧཱུཾ་ཧཱུཾ་ཕཊ། ཅེས་ལན་གསུམ་བརྗོད། རང་
9-9-4a


གི་ལྟེ་བའི་ཕྱོགས་སུ ཞེས་དང་ལྟེ་བའི་སྔགས་ཕྲེང་ལ་ཐིམ་པར་གྱུར། རང་ཧེ་རུ་ཀར་གསལ་བའི་ཐུགས་ཀར་པཾ་ལས་སྣ་ཚོགས་པདྨའི་ལྟེ་བར་ཨཾ་ལས་ཞེས་དང༌། འོད་ཟེར་རང་གི་སྙིང་གའི་ཧཱུཾ་ལ་ཐིམ་པར་གྱུར། 
གང་གི་དྲིན་ཞེས་པ་ནས། པད་ལ་འདུད། །ཧེ་རུ། དཔལ་ཞེས་པ་ནས། གུས་ཕྱག་འཚལ་། རང་གི་ཐུགས་ཀའི་ཧཱུཾ་ལས་བྱུང་བའི་མཆོད་པའི་ལྷ་མོ་རྣམས་ཀྱིས་མཆོད་པར་གྱུར། ཨོཾ་ཨརྒྷ་པྲ་ཏཱི་ཙྪ་སྭཱ་ཧཱ། དེ་བཞིན་དུ། པཱ་དྱཾ། གྱིས་ཞབས་བསིལ་དང༌། ཨོཾ་
བཛྲ་པུཥྤེ་ཨཱཿཧཱུཾ་སྭཱ་ཧཱ། དེ་བཞིན་དུ་དྷུ་པེ། དཱི་པེ། གནྡྷེ། ཨོཾ་བཛྲ་ནཻ་ཝི་དྱེ་ཨཱཿཧཱུཾ་སྭཱ་ཧཱ། ཨོཾ་ཨཱཿབཛྲ་ཨཱ་ད་ཪྴེ་ཧཱུཾ། ཞེས་པ་ནས། དྷརྨེ་ཧཱུཾ། ཐུགས་ཀའི་ཧཱུཾ་ལས་བྱུང་བའི་སྙིང་པོའི་ཞེས་དང༌། མཆོད་པར་གྱུར། ཨོཾ་སརྦྦ་བཛྲ་ཞེས་དང༌། སྭཱ་ཧཱ། 
ཡབ་ཡུམ་སྙོམས་པར་ཞུགས་ཏེ་ཞེས་དང་ཉམས་སུ་མྱོང་བར་གྱུར། དེ་དཀོན་མཆོག་གསུམ་ལ་ཞེས་དང༌། འགྲུབ་པར་ཤོག །སེམས་ཅན་ཐམས་ཅད་ཀྱི་སྒྲིབ་པ་ཞེས་དང་། འདེབས་སོ། །བགྲོད་དཀའ་ཞེས་དང༌། དབུལ་བར་བགྱི། སེམས་ཅན་
ཐམས་ཅད་ཁྱད་པར་དུ་འཕགས་པའི་བདེ་བ་དང་ལྡན་པར་གྱུར་ཅིག །དེ་བཞིན་དུ་བར་པ་གཉིས་ལའང་ཐོག་མར་སྦྱར་ལ། སེམས་ཅན་ཐམས་ཅད་ཀྱི་ཉོན་མོངས་པ་དང་ཞེས་པ་ནས་བྲལ་བར་གྱུར་ཅིག །བཅོམ་ལྡན་འདས་འཁོར་ལོ་སྡོམ་པའི་ཞེས་
དང༌། བརླབ་ཏུ་གསོལ། ཨོཾ་བཛྲ་ཧེ་རུ་ཀ་ཞེས་པ་ནས། ཧཱུཾ་ཕཊ། ཚོགས་ཞིང་རྣམས་ཞེས་དང༌། བྱིན་གྱིས་བརླབ་པར་གྱུར། ཆོས་ཐམས་ཅད་ཅེས་པ་དང༌། སྒྱུ་མ་ལྟ་བུར་གྱུར། ཨོཾ་ཞེས་པ་དང༌། ཧཾ་ཐུགས་ཀའི་ཧཱུཾ་གི་འོད་ཀྱིས། ཞེས་པ་དང༌། རང་
9-9-4b


ལ་ཐིམ་ཞིང་རང་ཡང་སྟོད་སྨད་ནས་རིམ་གྱིས་ཐུགས་ཀའི་ཧཱུཾ་ལ་ཐིམ། ཧཱུཾ་གི་ཞབས་ཀྱུ་ཨཱུ་ནི་ཧ་ལ། ཧའི་ལུས་ནི་མགོ་བོ་ལ་དེའང་ཟླ་ཚེས་ལ། དེའང་ཐིག་ལེ་ལ། དེའང་ནཱ་ད་ལ་ཐིམ་ཞིང༌། ནཱ་དའང་མི་དམིགས་པར་གྱུར། ཨོཾ་ཤུ་ཞེས་པ་དང༌། 
ཧཾ་ཆོས་ཐམས་ཅད་རབ་ཏུ་ཞེས་པ་ནས། འོད་གསལ་དུ་གྱུར། དེ་ལྟར་སྣང་བ་ཐམས་ཅད་བསྡུས་པའི་སྟོང་པ་ཉིད་ལས་རང་གི་སེམས་ཞེས་པ་དང༌། མདངས་ཆགས་པ་ནམ་མཁའ་གནས་པར་གྱུར། ཨོཾ་སུཾ་བྷ་ཞེས་པ་ནས། ཕཊ་ཤར་དུ་སྔགས་དེ་ཉིད་
ཁ་དོག་ནག་པོ། ཨོཾ་གྲི་ཧྞ་ཞེས་པ་ནས་ཕཊ། བྱང་དུ་སྔགས་དེ་ཉིད་ཁ་དོག་ལྗང་གུ། ཨོཾ་གྲྀ་ཧྞཱ་པ་ཡ་ཞེས་པ་ནས་ཕཊ། ནུབ་ཏུ་སྔགས་དེ་ཉིད་ཁ་དོག་དམར་པོ། ཨོཾ་ཨཱ་ཞེས་པ་ནས་ཕཊ། ལྷོར་སྔགས་དེ་ཉིད་ཁ་དོག་སེར་པོ་རྣམས་འཁོད་
པར་གྱུར། སྔགས་དེ་རྣམས་ལས་རང་རང་གི་ཞེས་པ་དང༌། འཕྲོས་པས་ཚངས་པའི་འཇིག་རྟེན་ནས། ཞེས་དང་། གཟུགས་ཆེན་པོ་རྣམས་སུ་གྱུར། སྔགས་འོད་ཟེར་དང་བཅས་པ་ཡོངས་སུ་གྱུར་པ་ལས། ཤར་ནག །བྱང་ལྗང༌། ནུབ་དམར། ལྷོ་
སེར་བའི་སྣ་ཚོགས་རྡོ་རྗེའི་ར་བ་གྲུ་བཞི་པ་ཚངས་པའི་འཇིག་རྟེན་ནས་ཞེས་དང༌། ཁྱབ་པར་གྱུར། ར་བ་གྲུབ་པ་དང་དུས་མཉམ་དུ་ཞེས་དང་མཚན་པའི་ཧཱུཾ་གི་འོད་ཟེར་ལས། གསེར་གྱི་ས་གཞི་ལ་ཞེས་དང༌། སྣ་ཚོགས་རྡོ་རྗེའི་རང་བཞིན་དུ་གྱུར། 
སྣ་ཚོགས་རྡོ་རྗེའི་ཧཱུཾ་གི་འོད་ཟེར་ལས་ཕྱི་རོལ་ཏུ་ཞེས་དང༌། གཅིག་ཏུ་གྱུར་བའི་ཕྱི་རོལ་ཏུ་ཞེས་དང༌། བསྐོར་བར་གྱུར། ཨོཾ་མེ་དི་ནི་ཞེས་པ་ནས་ཧཱུཾ་ཧཱུཾ་ཧཱུཾ། དེ་ནས་གཡོན་པའི་མཐེབ་མཛུབ་ཀྱིས་གོལ་ཤར་ནས་གཡོན་སྐོར་དུ་ཕྱོགས་བཞིར་གཏོག་པ་སྔར་ལྟར་བྱ། ཤར་ལྷོ་ནས་རིམ་པ་བཞིན་
9-9-5a


གཡས་སྐོར་དུ་མཚམས་བཞིར། ཨོཾ་སུཾ་བྷ་ཞེས་པ་ནས་བིདྱཱ་རཱ་ཛ་ཧུཾ་ཧཱུཾ་ཕཊ། ཅེས་པའི་བར་བཞི་བརྗོད། རྣམ་པ་ཐམས་ཅད་དུ་འགྲོ་བ་རྣམས་བགེགས་དང་བྲལ་བར་གྱུར། སྲུང་འཁོར་གྱི་དབུས་སུ་ཡཾ་སྔོན་པོ་ཡོངས་སུ་གྱུར་པ་ལས། རླུང་
གི་ཞེས་དང་གེ་སར་སེར་བའི་སྣ་ཚོགས་པདྨ་ཆུང་ངུའི་དབུས་སུ་ཞེས་པ་ནས། ཨཾ་ཨཿདབྱངས་དཀར་པོ་བཅུ་དྲུག་པ་ཕྲག་གཅིག་གཡས་སྐོར་དང༌། སླར་ཡང༌། ཨ་ཨཱ་ཞེས་པ་ནས་ཨཾ་ཨཿསྟེ་དབྱངས་དཀར་པོ་བཅུ་དྲུག་པ་ཕྲག་གཅིག་གཡོན་སྐོར་དུ་རིམ་པ་
གཅིག་གིས་འཁོད། དེའི་ཕྱི་རོལ་ཏུ་དཔེ་བྱད་ཅེས་དང་ཀྵ་སྟེ་གསལ་བྱེད་དམར་པོ་བཞི་བཅུ་པ་ཕྲག་གཅིག་གཡས་སྐོར་དང༌། སླར་ཡང་ཀ་ཁ་ཞེས་པ་ནས། ཀྵ་སྟེ་གསལ་བྱེད་དམར་པོ་བཞི་བཅུ་པ་ཕྲག་གཅིག་གཡོན་སྐོར་དུ་རིམ་པ་གཅིག་གིས་འཁོད། དེ་
གཉིས་ཡོངས་སུ་གྱུར་པ་ལས། ཞེས་དང་། མཉམ་པ་ཉིད་ཀྱི་ཡེ་ཤེས་རང་ནམ་མཁའི་ནཱ་དས་ཟླ་བ་དཀར་ལ་ཞེས་དང༌། སེམས་ཅན་གྱི་དོན་བྱའོ་སྙམ་པའི་འཕེན་པ་དང་ལྡན་པས། ཟླ་བའི་དབུས་སུ་ནཱ་ད་ཞུགས་པ་ལས། ནཱ་ད་ལས་ཐིག་ལེ། དེ་ལས་ཟླ་ཕྱེད། དེ་ལས་ཧའི་
མགོ་བོ། དེ་ལས་ཧའི་ལུས། དེ་ལས་ཨཱུ་གྲུབ་པའི་ཞེས་དང་སོ་སོར་རྟོག་པའི་ཡེ་ཤེས། ཧཱུཾ་ལས་ཁ་དོག་ཅེས་དང༌། འགྲོ་བ་རྣམས་འཁོར་ལོ་ལྔའི་ལྷ་ཚོགས་ཀྱི་གོ་འཕང་ལ་བཀོད་པ་དང༌། སྔོན་ཐོག་མ་མེད་པ་ནས་ཞེས་དང་། ནཱ་ད་ལ་ཐིམ་
ཞིང་། ཧཱུཾ་ཡིག་ལྷན་སྐྱེས་ཀྱི་དགའ་བའི་རང་བཞིན་ཅན་དུ་གྱུར་པ་ནི་བྱ་བ་སྒྲུབ་པའི་ཡེ་ཤེས། ཨོཾ་ཨཱ་ཧཱུཾ་ཞེས་པ་ནས། ཤུདྡྷོཉ་ཧཾ་ཟླ་བ་དབྱངས་གསལ་ཧཱུཾ་དང་བཅས་པ་རྣམས་ཡོངས་སུ་གྱུར་པ་ལས་ཞེས་པ་ནས། དུས་གཅིག་ཏུ་གྲུབ་པ་ནི་ཆོས་
9-9-5b


ཀྱི་དབྱིངས་ཀྱི་ཡེ་ཤེས་ཏེ། དེའང་ཁང་པ་བརྩེགས་པའི་གཞལ་ཡས་ཁང་གྲུ་བཞི་སྒོ་བཞི་པ་ཞེས་དང་ལྷོ་སེར། དབུས་སྔོ་བ། དེའི་དབུས་སུ་སྣ་ཚོགས་པདྨ་དང་ཉི་མའི་དཀྱིལ་འཁོར༌། དབུས་ཀྱི་པདྨའི་ལྟེ་བར་ཉི་མའི་གདན་ལ་རང་ཉིད་བཅོམ་ལྡན་འདས་ཞེས་དང༌། 
གཡོན་ཞལ་ལྗང༌། རྒྱབ་ཞལ་དམར། གཡས་ཞལ་སེར་བ། ཞལ་རེ་རེའང་ཞེས་དང་། ཐུགས་རྗེ་ཆེན་པོའི་བདག་ཉིད་ཅན་ཕྱག་རྒྱ་ལྔས་བརྒྱན་པ། ཞེས་དང༌། དོ་ཤལ་ཅན་རྐང་པ་གཉིས་བགྲད་པ་གཞུའི་དབྱིབས་སུ་ཡོད་པ་ཡོངས་སུ་གྱུར་པ་ལས་འབྱུང་བ་
རིམ་རྩེགས་ཀྱི་ཞེས་དང་གཞལ་ཡས་ཁང་གྲུ་བཞི་པ། རྐང་བརྒྱད་ཡོངས་སུ་གྱུར་པ་ལས་ཀ་བ་བརྒྱད༌། ཕ་གུ་དང་ཞེས་པ་ནས་དཀྱིལ་འཁོར༌། སྙིང་གའི་ཆོས་ཀྱི་འཁོར་ལོའི་དབུས་ཀྱི་ཞེས་དང༌། བཅོམ་ལྡན་འདས་ཧེ་རུ་ཀ་སྐུ་མདོག་མཐིང་ག་ཞལ་
བཞི་པའི་ཞེས་དང༌། མི་རུས་ཀྱི་ཐལ་བས་ལུས་ཐམས་ཅད་ལ་བྱུགས་པ། ལྟེ་བའི་དམར་ཆ་གཏུམ་མོ་མེའི་གཟུགས་ཀྱི་ཐིག་ལེ་ཡོངས་སུ་གྱུར་པ་ལས། བཅོམ་ལྡན་འདས་མ་རྡོ་རྗེ་ཕག་མོ་སྐུ་མདོག་དམར་མོ་ཞལ་གཅིག་པ་ཞེས་པ་ནས་མི་མགོ་སྐམ་པོ་ལྔ་
བཅུའི་དོ་ཤལ་ཅན་ཏེ། དཔྱིད་དང་ཐིག་ལེའི་ངོ་བོ་གཉིས་སྙིང་གར་ཕྲད་ནས་སྙོམས་པར་འཇུག་པས་བཞུགས་པ། སྙིང་གའི་ཤར་ལ་སོགས་པའི་ཞེས་དང་ཀ་ཊྭཱཾ་ག་བསྣམས་པ། གཡས་བརྐྱང་གིས་བཞུགས་པ། ཕྱག་རྒྱ་ལྔས་བརྒྱན་པ་ཐོད་སྐམ་ལྔའི་དབུ་རྒྱན་དང་། 
ཐོད་སྐམ་ལྔ་བཅུའི་ཤལ་ཅན། ཤར་ལྷོ་ལ་སོགས་པའི་ཞེས་དང༌། འཁོར་ལོ་ཉེར་བཞིའི་རྣམ་པ་ཅན། ཕྱིའི་ཡུལ་ཉེར་བཞིའི་ངོ་བོར་གྱུར། གནས་ཉེར་བཞིའི་རྩ་དང་ཁམས་དང་ངོ་བོ་དབྱེར་མེད་དུ་གནས་པ་ཡོངས་སུ་གྱུར་པ་ལས་དཔའ་མོ་དང་
9-9-6a


དཔའ་བོ་ཉེར་བཞིར་གྱུར་པ་ནི། སྐྲ་མཚམས་པཱུ་ལླི་ར་མ་ལ་ཡན་གནས་པའི་རྩ་ནང་གི་ཁམས་ཡོངས་སུ་གྱུར་པ་ལས་ཁཎྜ་ཀ་པ་ལི་དང༌། རྩ་ཡོངས་སུ་གྱུར་པ་ལས་རབ་གཏུམ་མ། སྤྱི་གཅུག་ཛཱ་ལན་དྷ་རར་གནས་པའི་
རྩ་ནང་གི་ཁམས་ཡོངས་སུ་གྱུར་པ་ལས་མ་ཧ་ཀཾ་ཀ་ལ་དང་གཏུམ་མིག་གམ་དེ་བཞིན་དུ་སྦྱར་མཐར་པུས་མོ་གཉིས་ཀུ་ལུ་ཏར་གནས་པའི་རྩ་ནང་གི་ཁམས་དང་རྩ་གཉིས་ཡོངས་སུ་གྱུར་པ་ལས། རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་ཉེ་བའི་དུར་ཁྲོད་
དེ་སྐུའི་འཁོར་ལོའི་ལྷ་རྣམས་སྐུ་མདོག་དཀར་པོས་འོག་ན་སྤྱོད་པའི་ཚུལ་གྱིས་བཞུགས་པ། ཁཎྜ་ཀ་པ་ལ་ལ་སོགས་པའི་དཔའ་བོ་ཉེར་བཞི་པོ་ཐམས་ཅད་ཀྱང་ཞལ་གཅིག་ཕྱག་གཉིས་ཀྱིས་གཡས་རྡོ་རྗེ་དང་གཡོན་དྲིལ་བུ་བསྣམས་ནས་ཡུམ་ལ་འཁྱུད་པ། དབུ་
སྐྲ་རལ་པའི་ཐོར་ཚུགས་ཅན། སྤྱི་བོར་ཞེས་པ་ནས་དཔྲལ་བར་རྡོ་རྗེའི་ཕྲེང་བ། ཕྱག་རྒྱ་དྲུག་གིས་བརྒྱན་པ། ཐོད་སྐམ་ལྔའི་དབུ་རྒྱན་དང༌། ཐོད་རློན་ལྔ་བཅུའི་དོ་ཤལ་དང་སྟག་གི་པགས་པའི་ཤམ་ཐབས་ཅན་གཡས་བརྐྱང་གིས་བཞུགས་པ། རབ་གཏུམ་མ་ལ་
སོགས་པའི་དཔའ་མོ་ཉེར་བཞི་པོ་ཐམས་ཅད་ཀྱང་ཞལ་གཅིག་ཅེས་པ་ནས་ཐོད་སྐམ་ལྔའི་དབུ་རྒྱན་དང༌། ཐོད་སྐམ་ལྔ་བཅུའི་དོ་ཤལ་ཅན། ལྕེའི་རྩ་བར་གནས་པའི་རྩ་ཧཱུཾ་རིང་པོ་དང་ངོ་བོ་དབྱེར་མེད་དུ་གནས་པ་ཡོངས་སུ་གྱུར་པ་ལས་ཁྭ་གདོང་མ་ནག་མོ་
དེ་བཞིན་དུ་སྦྱར་ཏེ། མཛོད་སྤུའི་བུག་པར་གནས་པའི་རྩ་ཧཱུཾ་རིང་པོ་དང་ངོ་བོ་དབྱེར་མེད་དུ་གནས་པ་ཡོངས་སུ་གྱུར་པ་ལས་གཤིན་རྗེ་བརྟན་མ་གཡས་སྔོ་གཡོན་སེར་བ། དེ་བཞིན་དུ་སྦྱར་ཏེ། སྣ་བུག་གཉིས་གནས་པའི་རྩ་ཧཱུཾ་རིང་པོ་དང་ངོ་བོ་དབྱེར་མེད་དུ་
9-9-6b


གནས་པ་ཡོངས་སུ་གྱུར་པ་ལས་གཤིན་རྗེ་འཇོམས་མ་གཡས་ལྗང་གཡོན་སྔོ་བ། ཐམས་ཅད་ཀྱང་ཞལ་གཅིག་མ། ཞེས་པ་ནས། ཁ་ཊྭཱཾ་ག་བསྣམས་པ་ཞེས་པའི་བར་སྙིང་པོའི་རྣལ་འབྱོར་མ་བཞིའི་སྐབས་བཞིན་སྦྱར་ལ། རོའི་གདན་ལ་གཡས་བརྐྱང་གིས་བཞུགས་པ། ཕྱག་རྒྱ་ལྔས་
བརྒྱན་པ། ཐོད་སྐམ་ལྔའི་དབུ་རྒྱན་དང༌། ཐོད་སྐམ་ལྔ་བཅུའི་དོ་ཤལ་ཅན། ཡབ་ཀྱི་གསང་གནས་མི་དམིགས་པ་ལས་ཧཱུཾ་དཀར་པོ་ལས་བྱུང་རྡོ་རྗེ་དཀར་པོ་ཞེས་པ། རྩེ་མོར་བྱ་སེར་པོར་མཚན་པ། ཡབ་ཀྱི་ལྟེ་བར་ཟླ་གདན་ལ། ཨོཾ་བཛྲ་བཻ་རོ་ཙ་ནཱི་ཡེ་ཧུཾ་ཧཱུཾ་
ཕཊ་སྭཱ་ཧཱ། ཐུགས་ཀར་ཟླ་གདན་ལ་ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་བརྞ་ནཱི་ཡེ་ཧུཾ་ཧཱུཾ་ཕཊ་སྭཱ་ཧཱ། མགྲིན་པར་ཉི་གདན་ལ་ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧུཾ་ཧཱུཾ་ཕཊ་ཌཱ་ཀི་ནཱི་ཛྲ་ལ་སམྦ་རི་སྭཱ་ཧཱ། དཔྲལ་བར་ཉི་གདན་ལ། ཨོཾ་ཧྲཱིཿཧ་ཧ་ཧུཾ་ཧཱུཾ་ཕཊ་ཀྱི་སྔགས་ཐམས་ཅད་ཁ་དོག་དམར་
པོ་འོད་ཟེར་འཕྲོ་བ་གཡོན་སྐོར་དུ་གནས་པ། ཡུམ་གྱི་ལྟེ་བར་ཉི་གདན་ལ། ཨོཾ་ཤྲཱི་བཛྲ་ཧེ་ཧེ་ཞེས་པ་ནས་ཛྭ་ལ་སམྦ་རི་སྭཱ་ཧཱ། ཐུགས་ཀར་ཉི་གདན་ལ། ཨོཾ་ཧྲཱིཿ་ཧ་ཧ་ཧུཾ་ཧཱུཾ་ཕཊ། མགྲིན་པར་ཟླ་གདན་ལ། ཨོཾ་བཛྲ་བཻ་རོ་ཙ་ནཱི་ཡེ་ཧུཾ་ཧཱུཾ་ཕཊ་སྭཱ་ཧཱ། དཔྲལ་བར་ཟླ་གདན་
ལ། ཨོཾ་སརྦ་བུདྡྷ་ཌཱ་ཀི་ནཱི་ཞེས་པ་ནས། སྭཱ་ཧཱའི་སྔགས་ཐམས་ཅད་ཁ་དོག་དམར་པོ་འོད་ཟེར་འཕྲོ་བ་གཡོན་སྐོར་དུ་གནས་པ། སྔགས་རྣམས་ཀྱང་ཕན་ཚུན་ཞལ་སྦྱོར་ཞིང་འོད་ཟེར་འཁྱུད་པའི་རྣམ་པ་ཨོཾ་ཤྲཱི་ཞེས་པ་ནས་ཕཊ་སྭཱ་ཧཱ། སྙོམས་པར་ཞུགས་པས་
བྱང་སེམས་ཞུ་བ་ཞེས་དང༌། ལྷན་སྐྱེས་ཀྱི་ཡེ་ཤེས་སྐྱེས་པས་རྟེན་དང་བརྟེན་པའི་དཀྱིལ་འཁོར་གཉིས་ཀྱང་བདེ་སྟོང་དབྱེར་མེད་ཀྱི་ངོ་བོར་གྱུར་ཅིང༌། དེ་ལྟར་བདེ་སྟོང་དབྱེར་མེད་དུ་སྦྱར་བ་དེ་ཉིད་ནི་བྱང་ཆུབ་ཀྱི་ཕྱོགས་ཀྱི་ཆོས་སོ་བདུན་གྱི་ངོ་བོར་གྱུར་པ་
9-9-7a


ལྷ་སོ་བདུན་དུ་ཤར་བ་ཡིན་ཞིང་ལྷ་རྣམས་སྣང་ལ་རང་བཞིན་མེད་པ་མེ་ལོང་གི་གཟུགས་བརྙན་ལྟ་བུར་གྱུར། རང་གི་སྙིང་གར་ཨོཾ་ཧ་དཀར་པོ་ཡོངས་སུ་གྱུར་པ་ལས་རྡོ་རྗེ་སེམས་དཔའ་དཀར་པོ་དཀར་དམར་ནག་པའི་ཞལ་
གསུམ་ཕྱག་དྲུག་གི་གཡས་རྡོ་རྗེ་དང་ཌཱ་མ་རུ་དང་མགོ་བོ། གཡོན་དྲིལ་བུ་དང་ཐོད་པ་དང་ཁ་ཊྭཱཾ་ག་འཛིན་པ། ཕག་མོ་དང་མཉམ་པར་སྦྱོར་བ། མགོ་བོར་ན་མ་ཧི་སེར་པོ་ཡོངས་སུ་གྱུར་པ་ལས་རྣམ་སྣང་སེར་པོ་ཞལ་ཕྱག་བཞིའི་གཡས་གཉིས་འཁོར་ལོ་དང་ཌཱ་
མ་རུ་གཡོན་གཉིས་དྲིལ་བུ་དང་ཐོད་པ་དང་བཅས་པའི་ཁ་ཊྭཱཾ་ག་འཛིན་པ། གཤིན་རྗེ་མ་དང་མཉམ་པར་སྦྱོར་བ། དེ་བཞིན་དུ་རྟ་མཆོག་གི་ཕྱག་མཚན། ཁ་ཊྭཱཾ་ག་འཛིན་པ། ཞེས་པའི་རྗེས་སུ་ཙཎྜི་ཀ་དང་མཉམ་པར་སྦྱོར་བ། རྡོར་སེམས་ཟླ་གདན་ལ་
བཞུགས་ཤིང་ཟླ་བའི་འོད་ཀོར་ཅན། གཞན་ལྔ་ཉི་གདན་ལ་གཞུགས་ཤིང་ཉི་མའི་འོད་ཀོར་ཅན། དཔའ་བོ་དྲུག་པོ་ཐམས་ཅད་ཀྱང་ཕྱག་རྒྱ་དྲུག་གིས་བརྒྱན་ཅིང་ཐོད་སྐམ་ལྔའི་དབུ་རྒྱན་དང༌། ཐོད་རློན་ལྔ་བཅུའི་དོ་ཤལ་ཅན༌། སྤྱན་གསུམ་པ་
གཡས་བརྐྱང་གིས་བཞུགས་པ་གཅེར་མོའི་ལྟེ་བར་ཨོཾ་བཾ་ཞེས་དང་ཕག་མོའི་སྐབས་སུ། གཡོན་ཐོད་པ་དང་ཁ་ཊྭཱཾ་ག་ཞགས་པ་འཛིན་པ། རྡོ་རྗེ་སེམས་དཔའ་དང་མཉམ་པར་སྦྱོར་བ། དེ་བཞིན་དུ་གཞན་རྣམས་ལའང་སྦྱར་མཐར། ཙཎྜི་ཀ་དུད་ཀ་རྟ་མཆོད་
དང་མཉམ་པར་སྦྱོར་བ་ཐམས་ཅད་ཀྱང་ཞལ་གཅིག་ཕྱག་བཞི་གཡས་གཉིས་ཌཱ་མ་རུ་དང་གྲི་གུག །གཡོན་གཉིས་ཐོད་པ་དང་བཅས་པའི་ཁ་ཊྭཱཾ་ག་དང་དྲིལ་བུ་འཛིན་པ། རྨོངས་བྱེད་མ་ཟླ་གདན་ལ་བཞུགས་ཤིང་ཟླ་བའི་འོད་ཀོར་ཅན། གཞན་
9-9-7b


ལྔ་ཉི་གདན་ལ་བཞུགས་ཤིང་ཉི་མའི་འོད་ཀོར་ཅན་ཐམས་ཅད་ཀྱང་སྤྱན་གསུམ་པ། ཞེས་པ་ནས། ཐོད་སྐམ་ལྔའི་དབུ་རྒྱན་དང༌། ཐོད་སྐམ་ལྔ་བཅུའི་དོ་ཤལ་ཅན། གཡས་བརྐྱང་གིས་བཞུགས་པ། ཕྱག་རྒྱ་དང་པོར་གཡོན་དུ་བསྐོར་ཞིང་དེ་ནས་གཡས་སུ་བསྐོར་ལ་ཕཻཾ་ཞེས་
བརྗོད་ལ། ལྷ་ཐམས་ཅད་ཀྱི་ཐུགས་ཀར་ཉི་གདན་ལ་གནས་པའི་ཧཱུཾ་ཡིག་ལས་འཕྲོས་བའི་འོད་ཟེར་གྱིས་ཕྱོགས་བཅུའི་འཇིག་རྟེན་གྱི་ཁམས་ན། ཞེས་དང༌། ཡེ་ཤེས་པའི་འཁོར་ལོ་དབང་གི་ལྷ་དང་མཆོད་པའི་ལྷ་མོ་དང་བཅས་པ་མདུན་གྱི་ནམ་མཁར་སྤྱན་དྲངས། 
འོད་ཟེར་སྙིང་གར་ཐིམ། ཧཱུཾ་ཞེས་བགེགས་བསྐྲད། ཨོཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་མཆོད་ཡོན་ཕུལ། ཨོཾ་བཛྲ་ཨཾ་ཀུ་ཤ་ཛཿབཛྲ་པཱ་ཤ་ཧཱུཾ། བཛྲ་སྥོ་ཊ་བཾ། བཛྲ་གཎྜེ་ཧོཿ། ཞེས་སྔགས་ཕྱག་རྒྱ་དང་བཅས་པས་དགུག་བཞུགས་སོགས་བྱས་ལ། ལྷ་ཐམས་ཅད་ཀྱི་སྤྱི་བོར་ཟླ་བ་ལ། 
ཞེས་དང༌། ཧཱུཾ་སྔོན་པོ། ཨོཾ་ཡོ་ག་ཞེས་པ་ནས། ཧཾ། དམ་ཚིག་པ་དང་ཡེ་ཤེས་པ་གཉིས་ཞེས་དང་། ཤར་བའི་ཆ་ཤས་སོ། །ཨོཾ་ཨཱཿཧཱུཾ༌། ཞེས་པ་ནས། བཛྲ་ཤུདྡྷོ྅ཧཾ། སྐད་ཅིག་མའི་སྔགས་དང་པོ་གཉིས་ལ་པད་ཀོར་དང་པོར་ནུ་མ་གཉིས་ཀྱི་དབུས་དང༌། དེ་ནས་
གཡོན་གྱི་ནུ་མའི་སྟེང་དང༌། དེ་ནས་ཡང་དབུས་དང་དེ་ནས་གཡས་ཀྱི་ནུ་མའི་སྟེང་དང༌། ཡང་དབུས་སུ་བྱས་ལ། མཐར་འཁྱུད་པའི་ཚུལ་བྱ་ཞིང་བཛྲ་ཤུདྡྷ་ལ་དང་པོར་གཡོན་གྱི་ནུ་མའི་སྟེང་དང༌། དེ་ནས་གཡས་དང་དེ་ནས་དབུས་སུ་པད་ཀོར་བྱས་ལ། མཐར་འཁྱུད་པའི་ཚུལ་བྱའོ། །ཨོཾ་ཨརྒྷཾ་
པྲ་ཏཱི་ཙྪ་སྭཱ་ཧཱ། ཞེས་སྔར་བཞིན་མཆོད་ནས། དེ་བཞིན་གཤེགས་པ་ཐམས་ཅད་ཀྱིས། ཞེས་པ་ནས། བདག་ཉིད་དུ་གྱུར། སྤྱི་བོ་ནས། ཞེས་དང༌། དབང་གི་ལྷ་རྣམས་རང་ལ་ཐིམ་པར་གྱུར། ཨོཾ་སུམྦྷ། ཞེས་སོགས་ཀྱིས་མཆོད་པ་ཆུ་གཉིས་ཞལ་
9-9-8a


བསིལ་དང་བཅས་པའི་མཆོད་རྫས་རྣམས་བསང་སྦྱང་བསྐྱེད་པ་སོགས་སྔར་ལྟར་བྱས་ལ། ཨོཾ་ཨརྒྷཾ། ཞེས་སོགས་ཀྱིས་སྔར་ལྟར་མཆོད་ཡོན་དབུལ་པའམ། ཡང་ན། སརྦ་ཏ་ཐཱ་ག་ཏ་ཤྲཱི་ཙཀྲ་སཾ་བྷ་ར་མཎྜ་ལ་ཙཀྲ་པཱི་ར་ཡོ་གི་ནཱི་
བཛྲ་ཨརྒྷཾ་པྲ་ཏཱི་ཙྪ་ཨཱཿཧཱུཾ། གིས་མཆོད་ཡོན་དང༌། དེ་བཞིན་དུ་ཨརྒྷཾ་གྱི་གནས་སུ་པཱ་དྱཾ་དང༌། ཨཉྩ་མཱ་ཎཾ་དང༌། པུཥྤེ་ནས། ཤཔྟའི་བར་རྣམས་བཅུག་ལ། ཆུ་གཉིས་ཉེར་སྤྱོད་རོལ་མོ་དང་བཅས་པ་དབུལ། ཨོཾ་ཨཱཿབཛྲ་ཨཱ་ད་ཪྴི་ཧཱུཾ། ཞེས་སོགས་རིག་མ་
བཅུ་དྲུག་གིས་ཀྱང་སྔར་ལྟར་མཆོད། ནང་མཆོད་གཏོར་མ་ལྟར་བྱིན་གྱིས་བརླབས་ལ་འབུལ་བ་ནི། མགྲོན་རྣམས་ཀྱི་ལྗགས་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་དཀར་པོ་རྩེ་གསུམ་པ་ནས་འབྲུ་ཙམ་འཁོད་པའི་རྡོ་རྗེའི་འོད་ཟེར་གྱི་སྦུ་གུས་དྲངས་
ནས་གསོལ་བར་གྱུར་བར་བསམས་ལ། གཡོན་པའི་མཐེབ་སྲིན་གྱིས་གཡོན་སྐོར་དུ་ལན་གསུམ་དཀྲུགས་ལ། དབུས་སུ་བདུད་རྩིའི་སྙིང་པོ་བྱུང་བར་བསམས་ཏེ། གཡོན་པའི་མཐེབ་སྲིན་སྦྱར། དབུས་ནས་བླངས་ཏེ། སྨིན་མཚམས་སུ་སྟེང་དུ་གཏོར་ཞིང༌། ཕྱོགས་བཅུ་དུས་
གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ཀྱི་ངོ་བོ་ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་འབྱུང་གནས་འཕགས་པའི་དགེ་འདུན་ཐམས་ཅད་ཀྱི་མངའ་
བདག་དཔལ་ལྡན་བླ་མ་དམ་པའི་ཞལ་དུ་ཨོཾ་ཨཱཿཧཱུཾ། རྡོ་རྗེ་འཆང་ཆེན་པོའི་ཞལ་དུ་ཨོཾ་ཨཱཿཧཱུཾ། དེ་བཞིན་དུ་བརྒྱུད་པའི་བླ་མ་ཐམས་ཅད་ཀྱི་མཚན་གྱི་མཐར། འབྲུ་གསུམ་བཏགས་ལ་དབུལ། ཨོཾ་ཧྲཱི་ཧ་ཧ་ཧུཾ་ཧཱུཾ་ཕཊ། ཨོཾ་ཨཱཿཧཱུཾ། ཞེས་པ་ནས། ཨོཾ་ཡ་
9-9-8b


མ་མ་ཐ་ནཱི་ཧུཾ་ཧཱུཾ་ཕཊ། ཨོཾ་ཨཱཿཧཱུཾ། ཞེས་ལྷ་རང་གི་སྔགས་ལ་འབྲུ་གསུམ་བཏགས་པ་སྙིང་གའི་ཐད་ནས་སྔར་ལྟར་ཕུལ་ལ། དེ་ནས་མཐེབ་སྲིན་གྱིས་ནང་མཆོད་བླངས་ཏེ་ལྕེ་རྩེ་སྨིན་མཚམས་སྤྱི་གཙུག་གསུམ་དུ་ཐིག་ལེ་བྱས་ལ། ཆོས་སྐྱོང་རྣམས་ཀྱི་སྔགས་ལ་འབྲུ་གསུམ་བཏགས་ནས་
ཕུལ། དུར་ཁྲོད་བརྒྱད་ན་གནས་པའི་ཕྱོགས་སྐྱོང་ཞིང་སྐྱོང་ཀླུ་ལ་སོགས་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ། གཞི་བདག་དང་སེམས་ཅན་ཐམས་ཅད་ལྷར་གྱུར་པ་རྣམས་ཀྱི་ཞལ་དུ་ཨོཾ་ཨཱཿཧཱུཾ། ཞེས་ལྟེ་བའི་ཐད་ནས་གཏོར་ཞིང་མཆོག་སྦྱིན་གྱི་ཕྱག་རྒྱས་
དབུལ། དེ་ནས་ནང་མཆོད་མཐེབ་སྲིན་གྱིས་རང་གི་ལྕེ་རྩེ་ལ་བཞག་ནས། ཨོཾ་ཨ་མྲྀ་ཏ། ཞེས་པ་ནས། གོ་ཉ་ཧཾ་མགྲོན་ཐམས་ཅད་ཡེ་ཤེས་ཀྱི་བདུད་རྩིས་ཚིགས་པར་གྱུར། ཨོཾ་སརྦ་བཛྲ་ཀ་མི་ནི། ཞེས་སོགས་ཀྱིས་སྔར་ལྟར་སྙིང་པོའི་རྣལ་འབྱོར་མ་བཞིས་བདུད་རྩིས་གང་བར་བསམ། ཨོཾ་ཤྲཱི་མ་ཧཱ་
སུ་ཁ་ཞེས་པ་ནས། ཕཊ་སྭཱ་ཧཱ། གནས་བཞི་དང་གསང་གནས་བྱིན་གྱིས་བརླབས་པས་ཡབ་ཡུམ་སྙོམས་པར་ཞུགས་བྱང་སེམས་ཞུ་བ་སྤྱི་བོ་ནས་མགྲིན་པར་སླེབས་པ་ན་དགའ་བ། ཞེས་དང༌། ལྷན་སྐྱེས་ཀྱི་ཡེ་ཤེས་སྐྱེས་པས་ལྷ་ཐམས་ཅད་
ཀྱི་ཀྱང་བདེ་བ་ཆེན་པོ་ཉམས་སུ་མྱོང་བར་གྱུར། དཀྱིལ་འཁོར་པའི་ལྷ་རྣམས་ལྷན་སྐྱེས་ཀྱི་བདེ་བ་དང་དེ་ཁོ་ན་ཉིད་དབྱེར་མེད་པའི་ཏིང་ངེ་འཛིན་ལ་སྙོམས་པར་ཞུགས་པས་དེ་ཁོ་ན་ཉིད་ཀྱི་མཆོད་པས་མཉེས་པར་གྱུར། དེ་ནས་ལྷ་སོ་སོའི་སྐུ་
གསལ་བར་དམིགས་ནས་འོག་ནས་འབྱུང་བའི་ལྷ་སོ་སོའི་སྔགས་བརྗོད། ཨོཾ་བཅོམ་ལྡན་དཔའ་བོའི་དབང་ཕྱུག་ལ་ཕྱག་འཚལ་ཧུཾ་ཧཱུཾ་ཕཊ། ཨོཾ་བསྐལ་པ་ཆེན་པོའི་མེ་དང་མཉམ་པའི་འོད་ཧུཾ་ཧཱུཾ་ཕཊ། ཨོཾ་རལ་པའི་ཅོད་པན་མི་ཟད་པ་དང་ལྡན་ཧུཾ་
9-9-9a


ཧཱུཾ་ཕཊ། ཨོཾ་མཆེ་བ་རྣམ་པར་གཙིགས་པ་འཇིགས་པའི་ཞལ་ཧུཾ་ཧཱུཾ་ཕཊ། ཨོཾ་སྟོང་ཕྲག་ཕྱག་ནི་འབར་བའི་འོད་ཟེར་ཅན་ཧུཾ་ཧཱུཾ་ཕཊ། ཨོཾ་དགྲ་སྟ་ཞགས་གདེངས་མདུང་དང་ཁ་ཊྭཱཾ་འཛིན་ཧུཾ་ཧཱུཾ་ཕཊ། ཨོཾ་སྟག་གི་པགས་
པའི་ན་བཟའ་འཛིན་པ་ཅན་ཧུཾ་ཧཱུཾ་ཕཊ། ཨོཾ་སྐུ་ཆེན་དུད་ཀ་བགེགས་མཐར་མཛད་ལ་འདུད་ཧུཾ་ཧཱུཾ་ཕཊ། ཅེས་ཡབ་ཀྱི་རྐང་བརྒྱད་བོད་སྐད་དུ་བསྒྱུར་བའམ། ཡང་ན་འོག་ནས་འབྱུང་བའི་ཡབ་ཀྱི་རྐང་བརྒྱད་ཀྱི་སྔགས་དང༌། ཡུམ་གྱི་རྐང་བརྒྱད་དང་བཅས་པས་བསྟོད་དོ། །བཟླས་པའི་སྐབས་སུ་གཙོ་བོའི་བཟླས་པ་བྱ་
ཚུལ་ནི། བཟླས་པའི་སྔགས་རང་གི་ཐུགས་ཀའི་ཧཱུཾ་ལས་འཐོན་ནས་ཞེས་པ་ནས། འབྱུང་འཇུག་བྱེད་ཅིང་ཞལ་ཐམས་ཅད་དང་འཁོར་གྱི་ལྷ་ཐམས་ཅད་ཀྱི་ཞལ་ནས་སྔགས་ཀྱི་སྒྲ་འབྱུང་བར་གྱུར། བར་བསམ་ཞིང་ཡབ་ཀྱི་སྔགས་བཟླའོ། །འཁོར་གྱི་ལྷ་རྣམས་ཀྱི་སྔགས་
བཟླ་བའི་ཚེ། ལྷ་རང་རང་གི་ཐུགས་ཀར་ཉི་གདན་ལ་གནས་པའི་ཧཱུཾ་ཡིག་ལ་བཟླ་བྱའི་སྔགས་ཀྱིས་བསྐོར་བའི་དབུས་ཀྱི་ཡི་གེ་ལས། ཞེས་དང༌། འགྲོ་བའི་དོན་བྱས། སླར་འདུས་ཏེ་དབུས་ཀྱི་ཡི་གེ་ལ་ཐིམ་པའི་སྤྲོ་བ་དང་བསྡུ་བའི་མཛད་པ་ཅན་དུ་
གྱུར། པར་བསམ་ཞིང་བཟླའོ། །གཏོར་མའི་སྐབས་སུ། སྟོང་པའི་ངང་ལས་ཞེས་དང༌། གཞུའི་དབྱིབས་ཅན་གཡས་གཡོན་གཉིས་སུ་རྒྱལ་མཚན་གྱིས་མཚན་པ་ཞེས་དང༌། ཕྱི་དཀར་ལ་ནང་དམར་བའི་ནང་གི་ཤར་དུ་ཨོཾ་དཀར་པོ་ལས་བྱུང་བའི་དྲི་ཆེན་
ཨོཾ་གྱིས་མཚན་པ་ཞེས་དང༌། དེ་བཞིན་དུ་གཞན་རྣམས་ལའང་སྦྱར་མཐར། དབང་ལྡན་དུ་ཧཾ་ལྗང་གུ་ལས་བྱུང་བའི་རྟའི་ཤ་ཧཾ་གིས་མཚན་པ། རླུང་གཡོས་པ་ལས་མེ་ཞེས་དང༌། དམར་སེར་དུ་གྱུར། དེའི་སྟེང་དུ་ཧཱུཾ་དཀར་པོ་ལས་ཞེས་དང༌།  བསིལ་བར་
9-9-9b


གྱུར། ཨོཾ་ཨ་ཨཱཿཧུཾ་ཧཱུཾ་ཕཊ། ཡི་གེ་དེ་ཉིད་ཅེས་པ་ནས་བདུད་རྩིའི་སྟེང་དུ་གནས་པ་རྣམས་ཡོངས་སུ་གྱུར་པ་ལས། ཞེས་དང་། བཀུག་པ་ཨོཾ་ཨཱཿཧཱུཾ་གསུམ་ལ་ཐིམ་ཞིང་དེ་གསུམ་ཡང་རིམ་གྱིས་ཞུ་བ་ཐོད་པར་ཐིམ་པར་གྱུར། ཨོཾ་ཨཱཿཧཱུཾ། སྔར་སྤྱན་དྲངས་
པའི་ཕྱག་རྒྱ་བྱས་ལ་ཕཻཾ་ཞེས་བརྗོད། དུར་ཁྲོད་ལ་གནས་པའི་ཕྱོགས་སྐྱོང་ལ་སོགས་པ་འཁོར་དང་བཅས་པ་ཡོངས་སུ་རྫོགས་པའི་དཀྱིལ་འཁོར་མདུན་དུ་སྤྱན་དྲངས། ཨོཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་སྔར་བཞིན་ཆུ་གཉིས་ནས། རོལ་མོའི་བར་གྱིས་མཆོད་ནས། 
ལག་པ་གཉིས་རྡོ་རྗེའི་ཐལ་མོ་དང་མཆོད་པའི་འཁོར་གསུམ་པོ་རྣམས་བདེ་སྟོང་གི་ངོ་བོ་དབྱེར་མེད་དུ་གྱུར་ཅིང་ལྷ་རྣམས་ཀྱི་ལྗགས་ལ་ཞེས་པ་ནས། སྦུ་གུས་དྲངས་ནས་གསོལ་བར་གྱུར་ཨོཾ་བཛྲ་ཨ་ར་ལི་ཧོཿ། ཞེས་དང༌། ཨོཾ་ཀ་ར་ཀ་ར། ཞེས་
པ་ནས། དྷི་ལི་དྷི་ལི་ཧུཾ་ཧཱུཾ་ཕཊ། ཅེས་འཁོར་ལོ་གསུམ་དང༌། ཨོཾ་བཛྲ་ཨ་ར་ལི་ཞེས་སོགས་ཀྱིས་གཏོར་མ་འབུལ། མཆོད་ཙང་བསྟོད་ནས། སྲིད་པ་དང་མཉམ་ཞི་བ་ཆགས་བཅོམས་ཀུན་ཏུ་རྟོག་པ་འཇོམས། །ཁྱོད་ནི་དངོས་པོ་མཐའ་དག་མཁའ་ལྟར་གཟིགས་པ་དང་ལྡན་པ། །
མགོན་པོ་ཤིན་ཏུ་བརྩེ་བ་ལྕི་བའི་ཆུས་བརླན་ཐུགས་ཀྱི་ཆུས། །མཛོད་ཅིག་ལྷ་མོ་རྣམས་ཀྱིས་བདག་ལ་ཤིན་ཏུ་རྗེས་བརྩེར་མཛོད། །ཅེས་གསོལ་བ་གདབ། དུར་ཁྲོད་ན་གནས་པའི་ཕྱོགས་སྐྱོང་དང༌། ཞེས་པ་ནས། འོད་གསལ་དུ་བཅུག་པ་ལས་བདེ་མཆོག་གི་ལྷ་ཡབ་ཡུམ་
གྱི་སྐུར་བཞེངས་པའི་མགྲོན་རྣམས་ཀྱི་ལྗགས་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་རྩེ་གསུམ་པ་ནས་འབྲུ་ཙམ་འཁོད་པའི་རྡོ་རྗེའི་འོད་ཟེར་གྱི་སྦུ་གུས་དྲངས་ནས་གསོལ་བར་གྱུར། ཨོཾ་ཁ་ཁ་ཞེས་པ་ནས། ཕཊ་ཕཊ་སྭཱ་ཧཱ། ཨོཾ་ཨརྒྷཾ་པྲ་ཏཱི་ཙྪ་སྭཱ་ཧཱ། ཞེས་སྔར་བཞིན་ཆུ་གཉིས་
9-9-10a


རོལ་མོ་དང་བཅས་པའི་བར་གྱིས་མཆོད་ལ། རྐང་བརྒྱད་ཀྱིས་བསྟོད། ལྷ་ཡི་ཚོགས་རྣམས་མ་ལུས་དང༌། །ཞེས་པ་ནས། ཡིད་ལ་འདོད་པ་ཀུན་འགྲུབ་ཤོག །ཨོཾ་བཛྲ་ཧེ་རུ་ཀ་ཞེས་དང༌། ཨོཾ་ཡོ་ག་ཞེས་པ་ནས། ཧཾ། ཨོཾ་བཛྲ་མུཿ འཇིག་རྟེན་པ་རྣམས་རང་གནས་
སུ་གཤེགས་ཤིང་། དཀྱིལ་འཁོར་གྱི་འཁོར་ལོ་བདག་ཉིད་ལ་ཐིམ་པར་གྱུར། དེ་ནས་སྐུ་དཀྱིལ་དང་བཅས་པ་བསྡུ་ཚུལ་ནི་རང་གི་ཐུགས་ཀའི་ཧཱུཾ་ལས་ཞེས་པ་ནས་དེ་རྣམས་སྙིང་གའི་ཡབ་ཡུམ་ལ། དེ་གཉིས་སྙིང་གར་ཐིམ་པར་གྱུར། པར་བསམ་གཞལ་ཡས་ཁང་གཙོ་བོ་ཡབ་
ཡུམ་ལ་ཐིམ། ཞེས་པའི་རྗེས་སུ་ལྷ་རྣམས་རང་གནས་སུ་ཐིམ་པ་ལས། རྩ་དང་ཁམས་རྣམས་བྱིན་གྱིས་བརླབས་པར་གྱུར་པར་བསམ་འགྱུར། པར་བསམ་གཞིའི་ཧེ་རུ་ཀ་ཞེས་པ་ནས། ཐུགས་ཀའི་ཧཱུཾ་ཡིག་ལ་ཐིམ། ཧཱུཾ་ཡོངས་སུ་གྱུར་པ་ལས་བཅོམ་ལྡན་འདས་ཧེ་རུ་ཀ་སྔོན་པོ་
ཞལ་གཅིག་ཕྱག་གཉིས་ཀྱི་རྡོ་རྗེ་དང་དྲིལ་བུ་འཛིན་པ་ཡུམ་དང་བཅས་པར་གྱུར། ཞེས་དང་སྤྱོད་ལམ་པ་འཇུག་པའི་ཚེ་རང་ཉིད་ཧེ་རུ་ཀ་སྔོན་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ་གཡས་བརྐྱང་གིས་བཞུགས་པ་ལ། ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་
གཉིས་ཀྱི་གྲི་གུག་དང་ཐོད་པ་འཛིན་པས་འཁྱུད་པར་གྱུར་པར་བསམ། གོ་ཆའི་སྲུང་བ་ནི། རང་གི་སྙིང་གར་ཟླ་བ་ལ་རྡོ་རྗེ་སེམས་དཔའི་ངོ་བོ་ཨོཾ་ཧ་དཀར་པོ། མགོ་བོར་ཉི་མ་ལ་རྣམ་སྣང་གི་ངོ་བོ་ན་མ་ཧི་སེར་པོ། ཞེས་པ་ནས། དཔྲལ་བར་ཉི་མ་ལ་ཡན་ལག་ཐམས་ཅད་ཀྱི་ལུས་དབང་
གི་རང་བཞིན་རྟ་མཆོག་གི་ངོ་བོ་ཕཊ་ཧཾ་ལྗང་གུ་ཞེས་པའི་བར་གྱིས་གོ་ཆ་དྲུག་དགོད། གཙོ་མོའི་ལྟེ་བར་ཉི་མ་ལ་རྡོ་རྗེ་ཕག་མོའི་ངོ་བོ་ཨོཾ་བཾ་དམར་པོ་ཞེས་པ་ནས་དཔྲལ་བར་ཉི་མ་ལ་ཡན་ལག་ཐམས་ཅད་ཀྱི་ལུས་དབང་གི་རང་བཞིན་ཙཎྜི་ཀའི་ངོ་བོ་ཕཊ་ཕཊ་དུད་ཀས་མཚན་པར་གྱུར། 
9-9-10b


ཞེས་དང་གོ་ཆ་ཆེན་པོས་བསྲུང་བ་ནི། སྤྱི་བོ་ལ་སོགས་པའི་གནས་ཉེས་བཞིར་ཉི་གདན་ལ་པུ་ཛཱ། ཨོཾ། ཨ། གོ་རཱ། དེ་མ། ཀ་ཨོ། ཏྲི། ཀ། ཀ། ལ། ཀཱ། ཧི། པྲེ། གྲི། སཽ། སུ། ན། སི། མ། ཀུ་རྣམས་ཐིག་ལེས་བརྒྱན་པར་གྱུར། ཚམ་དམ་སྔགས་ཀྱིས་བསྲུང་བ་ནི། གཡོན་པའི་མཐེབ་
མཛུབ་ཀྱིས་སྔགས་བརྗོད་པའི་ཕྱོགས་དེར་སེར་གོལ་གཏོག་པ་སྔོན་དུ་བཏང་ནས་ཤར་དུ། ཨོཾ་སུམྦྷ་ནི་སུམྦྷ་ཧུཾ་ཧཱུཾ་ཕཊ། བྱང་དུ། ཨོཾ་གྲྀ་ཧྞ་གྲྀ་ཧྞ་ཧུཾ་ཧཱུཾ་ཕཊ། ནུབ་ཏུ། ཨོཾ་གྲྀ་ཧྞ་པ་ཡ་གྲྀ་ཧྞཱ་པ་ཡ་ཧུཾ་ཧཱུཾ་ཕཊ་ལྷོར། ཨོཾ་ཨཱ་ན་ཡ་ཧོ་བྷ་ག་ཝཱ་ན་བཛྲ་ཧུཾ་ཧཱུཾ། ཞེས་བརྗོད་ནས་བསྲུང་བར་བྱའོ། །ཁ་ཟས་ཀྱི་དུས་སུ་རང་གི་ལུས་དཀྱིལ་གྱི་ལྷ་སྐད་ཅིག་གསལ་བར་དམིགས་
ནས། ཁ་ཟས་ཀྱི་ཆ་ཨོཾ་ཨཱཿཧཱུཾ། ཞེས་ལན་གསུམ་བརྗོད་པས་བྱིན་གྱིས་བརླབས་ལ། ཨོཾ་ཁ་ཁ་ཞེས་པ་ནས། སྭཱ་ཧཱ། ཞེས་པའི་བར་ལན་ཅིག་བརྗོད་དེ། ཕྱོགས་སྐྱོང་ལ་གཏོར་མ་ཕུལ། བཟའ་བཏུང་བྱིན་གྱིས་བརླབས་ནི། ལག་པ་གཡས་པ་ལ་རྣམ་སྣང་གི་ངོ་བོ་ཧོ་དཀར་པོ་ལས་སྐྱེས་པའི་འཁོར་ལོ་དཀར་པོ་རྩིབས་བརྒྱད་པ་ཧོ་
ཡིག་གིས་མཚན་པ། བསམས་པའི་སྟེང་དུ་བཟའ་བཏུང་ངམ་བཟའ་བཏུང་དང་བཅས་པའི་སྣོད་དངོས་སུ་བཞག་པའམ་དེར་མོས། ལག་པ་གཡོན་པ་ལ་སྣང་མཐའི་ངོ་བོ་ཧ་དམར་པོ་ལས་སྐྱེས་པའི་པདྨ་དམར་པོ་འདབ་མ་བརྒྱད་པ་ཧས་མཚན་པ། བསམས་ལ་ཀ་ཟས་ཀྱི་ཁ་དགབ་པའམ་དགབ་པར་མོས་
ལ། ཁ་ཟས་ཀྱི་སྟེང་དུ་ཉི་གདན་ལ་མི་བསྐྱོད་པའི་ངོ་བོ་ཧྲཱིཿ སྔོན་པོ་བསམས་ལ་ཧ་ཧོ་ཧྲཱིཿཞེས་ལན་གསུམ་བརྗོད་པས་རབ་པ་ལྟར། ཁ་དོག་དྲི་ནུས་ཀྱི་སྐྱོན་བཅོམས་ཤིང་བདུད་རྩིར་གྱུར། ཧྲཱིཿའི་གཡས་སུ་ཨོཾ་དཀར་པོ་གཡོན་དུ་ཨཱཿདམར་པོ་བདུན་དུ་ཧཱུཾ་སྔོན་པོ་གནས་པར་
གྱུར། ཨོཾ་ཨཱཿཧཱུཾ། ཞེས་ལན་གསུམ་བརྗོད་པས། རྒྱ་ཆེར་སྤེལ་ཞིང་བྱིན་གྱིས་བརླབས་པར་གྱུར་པར་བསམས་ལ་སྐབས་འདི་དང་གཞན་དུ་བཟའ་བཏུང་ལ་སོགས་པའི་དུས་སུ་ལག་མཆོད་བྱ་ཚུལ་ནི་ལག་པ་གཡས་པའི་མཐེབ་སྲིན་གྱིས་ནང་མཆོད། ཨོཾ་ཨཱཿཧཱུཾ། ཞེས་བརྗོད་ཅིང་གཡོན་པ་ལ་བསང་གཏོར་བྱས་ལ་ལག་པ་མ་ཏེ་
9-9-11a


བར་བྱའོ། །དེ་ནས་གཡོན་པའི་སོར་མོ་ལྔ་ལ་མེ་ཏོག་རེ་རེ་བཞག་པའམ། ཡང་ན་ནང་མཆོད་ཀྱི་ཐིག་ལེ་རེ་བྱས་ཏེ། གཡོན་བའི་སོར་མོ་རྣམས་བསྡུས་པའི་མཐེ་བོང་ལ་ཟླ་གདན་དང༌། གཞན་བཞི་དང་སོར་མོ་ལྔ་བསྡུས་པའི་སེར་མོ་རྣམས་ལ་ཉི་གདན་རེ་རེ། གདན་
དེ་རྣམས་ཀྱི་སྟེང་དུ་མཐེ་བོང་ལ་རྡོར་སེམས་ཀྱི་ངོ་བོ་ཧ་དཀར་པོ། མཛུབ་མོ་ལ་རྣམ་སྣང་གི་ངོ་བོ་ན་མ་ཧི་སེར་པོ་གུང་མོ་ལ་པདྨ་གར་དབང་གི་ངོ་བོ་སྭཱ་ཧཱ་ཧུ་དམར་པོ། སྲིན་ལག་ལ་དཔལ་ཧེ་རུ་ཀའི་ངོ་བོ་བཽ་ཥ་ཊ་ཧེ་ནག་པོ། མཐེའུ་ཆུང་ལ་རྡོ་རྗེ་ཉི་མའི་ངོ་བོ་ཧཱུཾ་ཧཱུཾ་
ཧོ་དམར་སེར། སེན་མོ་རྣམས་རྟ་མཆོག་གི་ངོ་བོ་ཕཊ་ཧཾ་ལྗང་གུ། རྣམས་བསམས་ལ། གཡོན་པའི་མཐིལ་དུ་པདྨ་དམར་པོ་འདབ་མ་ལྔ་པའི་ཉི་མ་ལ་རྡོ་རྗེ་ཕག་མོའི་ངོ་བོ་ཨོཾ་བཾ་དམར་པོ། ཤར་གྱི་འདབ་མར་ཉི་མ་ལ་གཤིན་རྗེ་མའི་ངོ་བོ་ཧཾ་ཡོཾ་སྔོན་པོ། དབང་
ལྡན་དུ་ཟླ་བ་ལ་རྨོངས་བྱེད་མའི་ངོ་བོ་ཧྲིཾ་མོཾ་དཀར་པོ། བྱང་དུ་ཉི་མའི་ངོ་བོ་ཧྲིཾ་ཧྲིཾ་སེར་པོ། ནུབ་ཏུ་ཉི་མ་ལ་སྐྲག་བྱེད་མའི་ངོ་བོ་ཧཱུཾ་ཧཱུཾ་ལྗང་གུ། ལྷོའི་འདབ་མར་ཉི་མ་ལ་གཏུམ་བྱེད་མའི་ངོ་བོ་ཕཊ་ཕཊ་དུད་ཀ་རྣམས་ཀྱིས་མཚན་པར་གྱུར་པར་བསམས་པའམ། ཡང་ན་གོ་ཆའི་
སྐབས་བཞིན་སྔགས་དེ་དག་ལས་ལྷ་སོ་སོར་བསྐྱེད༌། ལག་པའི་རྒྱབ་ཀྱི་བོལ་ལ་མེ་ལོང་ལ་གཟུགས་བརྙན་ཤར་བ་ལྟར། གོ་ཆའི་སྔགས་བཅུ་གཉིས་གསལ་བར་གྱུར་པར་བསམ། ལྷར་བསྐྱེད་ན་ལྷ་བཅུ་གཉིས་སམ། ཡང་ན་བོལ་ལ་འཁོར་ལོ་གསུམ་ལ་སོགས་པ་བསམ། ལག་པའི་སའི་ཁམས་ནི་ལྟུང་བྱེད་མ། ཆུའི་
ཁམས་ནི་གསོད་བྱེད་མ། མེའི་ཁམས་ནི་འགུགས་བྱེད་མ། རླུང་གི་ཁམས་ནི་གར་གྱི་དབང་ཕྱུག་མ། ནམ་མཁའི་ཁམས་ནི་པདྨའི་དྲ་བ་ཅན་གྱི་ངོ་བོར་གྱུར་པར་བསམས་ནས། ཨོཾ་ཧ་ཞེས་པ་ནས། ཕཊ་ཕཊ། ཅེས་པའི་བར་གྱི་སྔགས་བརྗོད་ཅིང༌། གཡས་པས་ཁུ་བའི་རྫས་བྱིན་
9-9-11b


གྱིས་བརླབ་བའམ། ནང་མཆོད་གྱིས་གཡོན་པའི་ཕྱི་ནང་ཀུན་ཏུ་བྱུག །ལག་པ་དཔའ་བོ་རྣལ་འབྱོར་མ་རྣམས་ཀྱིས་བྱིན་གྱིས་བརླབས་པའི་འཁོར་ལོ་གསུམ་གྱི་ལྷའི་ངོ་བོར་གྱུར་པར་བསམ། དེ་ནས། མཆོད་པ་ནི། ཨོཾ་ཨཱཿཧཱུཾ། ཞེས་དང་རྐང་བརྒྱད་ཀྱི་སྔགས་བརྗོད་ཅིང༌། ཁུ་བའི་རྫས་ཐུག་པ་དང་།
ཞོ་ལ་སོགས་པ་ལག་པ་གཡས་པས་གཡོན་པའི་སྟེང་དུ་བཞག་ལ་དབུལ། དེ་བཞིན་དུ་ཤ་དང་ཟན་ལ་སོགས་པ་གོང་བུའི་རྫས་རྣམས་ཀྱང་ལག་བའི་ལྷ་ལ་དབུལ། དེ་ནས། ཨོཾ་ཧ་ཨོཾ་ཨཱཿཧཱུཾ། ཞེས་སོགས་གོ་ཆའི་སྔགས་ལ་འབྲུ་གསུམ་བཏགས་པས་མཆོད་ལ་ནང་མཆོད་ཀྱིས་ཀྱང་མཆོད། དེའང་ཡབ་ཀྱི་གོ་ཆ་ལ་གཡས་སྐོར་དང༌། 
ཡུམ་གྱི་གོ་ཆ་ལ་གཡོན་སྐོར། འཁོར་ལོའི་ལྷ་ཚོགས་ལ་ཕྱོགས་གཡོན་སྐོར་དང༌། མཚམས་གཡས་སྐོར་དུ་ཕུལ་ནས། ཨོཾ་ཨརྒྷཾ་པྲ་ཏཱི་ཙྪ། ཞེས་སོགས་ཆུ་གཉིས་ཉེར་སྤྱོད་རོལ་མོ་དང་བཅས་པས་སྔར་བཞིན་མཆོད། རྐང་བརྒྱད་གྱི་སྔགས་ཀྱིས་བརྟོད་ནས། ལྷག་ཆད་ཀྱི་ཉེས་པ་ཞི་བའི་དོན་དུ། ཨོཾ་བཛྲ་ཧེ་རུ་ཀ། ཞེས་སོགས་ཧེ་རུ་ཀའི་
ཡིག་བརྒྱ་བརྗོད་འདོད་དོན་ལ་གསོལ་བ་གདབ། དེ་ནས་ལག་པ་གཡོན་པ་ལ་གོས་པའི་རྫས་རྣམས་གཡས་པས་བསྡུས་ཏེ་གཡོན་པའི་ལག་མཐིལ་དུ་བཞག །དེ་ནས་གཡོན་པའི་མཐེབ་སྲིན་གྱིས་བཟུང་སྟེ། ཨོཾ་ཨཱཿཧཱུཾ། ཞེས་རིམ་བཞིན་སྙིང་གདང་། ལྟེ་དང༌། མགོ་བོར་བྱུགས་ཏེ། པད་ཀོར་བྱས་ནས་མགོ་བོར་བཞག་ལ། ལྷག་པའི་ལྷ་རྣམས་སྤྱི་བོ་
ནས་ཞུགས་ཏེ། རང་ལ་ཐིམ་པར་བསམ། ལག་པ་གཡོན་པའི་རྫས་ཕྱེད་རང་གི་བཟའ་བཏུང་དང་བསྲེ་ཞིང༌། ཕྱེད་སྣོད་གཞན་ཞིག་ཏུ་བཅུག་ལ་གཞག་པར་བྱའོ། །ཕྱི་མ་འདི་ལྟར་བྱས་ན། ལོངས་སྤྱོད་འཕེལ་བའི་རྟེན་འབྲེལ་ཡོད་པར་བླ་མ་ཁ་ཅིག་བཞེད་དོ། །ལག་པ་ལ་གོས་པའི་རྫས་ལྷག་མ་རྣམས་ལག་པ་ཕན་ཚུན་མཉེས་ནས་གདང་དང་ཡན་ལག་རྣམས་ལ་
བྱུགས་ན་སྲུང་པའི་མཆོག་ཏུ་འགྱུར། ཞེས་གསུངས་སོ། །ཕུད་ཀྱིས་བླ་མ་དང་དཔའ་བོ་རྣལ་འབྱོར་མ་རྣམས་མཆོད་ནས། ཆོས་ཐམས་ཅད་རང་བཞིན་གྱིས་གྲུབ་པས་སྟོང་པ་མཉམ་པ་ཉིད་དོ། །སྙམ་དུ་མོས། ཨོཾ་ས་མ་ཡ་ཤུདྡྷ་སརྦ་དྷརྨཱཿ ས་མ་ཤུདྡྷོ྅ཧཾ་ལྕེ་ལ་ཧཱུཾ་དཀར་པོ་ལས་བྱུང་བའི་རྡོ་རྗེ་རྩེ་
9-9-12a


གསུམ་པ་ནས་འབྲུ་ཙམ་འཁོད་པའི་འོད་ཟེར་གྱི་སྦུ་གུས་དྲངས་པར་བསམས་ནས་ལོངས་སྤྱོད་པས། སྙིང་གའི་བདེ་ཆེན་གྱི་འཁོར་ལོའི་ལྷ་རྣམས་ལ་ཕུལ་བས་ལྷ་རྣམས་མཉེས་ཤིང་ཚིམ་པར་གྱུར་པར་བསམ་པར་བྱའོ། །ཐོག་མཐའི་གཞན་རྣམས་
མངོན་རྟོགས་བཞིན་དུ་ཅི་རིགས་པར་སྦྱོར། རྡོ་རྗེ་ཕག་མོ་སོགས་རྣལ་འབྱོར་མ་སོ་བདུན་གྱི་སྔགས་རྣམས་ཀྱི། ཧཱུཾ་དང་པོ་ཐུང་ངུ་དང༌། གཉིས་པ་རིང་པོ་དང༌། གཙོ་བོ་ལ་སོགས་པ་དཔའ་བོ་རྣམས་ཀྱི་ཧཱུཾ་གཉིས་ཀ་ཐུང་ངུར། པཎྜི་ཏ་མཁས་པའི་སྒྱུར་བཤད་དོ། །ཆོས་ཀྱི་རྗེ་ཐམས་ཅད་མཁྱེན་པ་བློ་བཟང་གྲགས་པའི་དཔལ་གྱི་ཞལ་སྔ་ནས་མཛད་པའི་
དཔལ་འཁོར་ལོ་བདེ་མཆོག་དྲིལ་བུ་པའི་མངོན་རྟོགས་ངག་ཏུ་འདོན་ཚུལ་ཡི་གེར་བཀོད་པ་འདིས་ཀྱང་དཔལ་འཁོར་ལོ་བདེ་མཆོག་གི་བཤད་སྒྲུབ་ཕྱོགས་ཐམས་ཅད་དུ་རང་ཞིང་རྒྱས་པར་གྱུར་ཅིག། ༈ །།འདིའི་བརྒྱུད་པ་ནི། རྡོ་རྗེ་འཆང་། ཡེ་ཤེས་ཀྱི་མཁའ་འགྲོ་མ། 
དྲིལ་བུ་པ། རུས་སྦལ་ཞབས། འབར་བ་འཛིན། ཀརྞ་པ། གུ་ཧྱ་པ། རྣམ་རྒྱལ་ཞབས། ཏཻ་ལོ་པ། ནཱ་རོ་པ། ཕམ་མཐིང་པ་སྐུ་མཆེད། ཀློག་སྐྱ་ཤེས་རབ་བརྩེགས། མལ་གྱོ་ལོ་ཙྪ་བ། ས་ཆེན། སློབ་དཔོན་རིན་པོ་ཆེ། རྗེ་བཙུན་རིན་པོ་ཆེ། ས་པན། བོ་དོང་རིན་ཆེན། ཁྲོ་ཕུ་བ། རིན་པོ་ཆེ་བསོད་ནམས་སེང་གེ། བུ་སྟོན་རིན་པོ་ཆེ། ཐུགས་སྲས་ལོ་ཙྪ་བ། ཡང་ས་པཎ། བླ་མ་
འཕགས་པ། ཞང་དཀོན་མཆོག་དཔལ། ན་བཟའ་བྲག་ཕུག་པ། བླ་མ་དམ་པ། རྗེ་རིན་པོ་ཆེ་ཐམས་ཅད་མཁྱེན་པ།།      །།
9-9-12b


empty page
9-10-1a


༄༅། །རྣལ་འབྱོར་དབང་ཕྱུག་ལཱུ་ཨི་པའི་ལུགས་ཀྱི་བདེ་མཆོག་རྫོགས་རིམ་གྱི་རྣམ་བཤད་དངོས་གྲུབ་སྙེ་མ་བཞུགས་སོ།།
9-10-1b


༄༅༅། །རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་ཀྱི་དཔལ་འཁོར་ལོ་བདེ་མཆོག་གི་རྫོགས་རིམ་རྣལ་འབྱོར་ཆེན་པོའི་རྣམ་བཤད་དངོས་གྲུབ་ཀྱི་སྙེ་མ་ཞེས་བྱ་བ། བླ་མ་དང་རྗེ་
བཙུན་འཇམ་པའི་དབྱངས་ཀྱི་ཞབས་ཀྱི་པདྨོ་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །དཔའ་བོ་དཔའ་མོའི་དབང་ཕྱུག་མ། །བྱེ་བའི་དབུས་ན་ལྷུན་པོ་ལྟར། །རབ་བརྗིད་ཧེ་རུ་ཀ་དཔལ་དང་། །
རྗེ་བཙུན་རྡོ་རྗེ་ཕག་མོ་ཡི། །ཞབས་ལ་སྙིང་ནས་ཕྱག་འཚལ་ཏེ། །གྲུབ་ཐོབ་ཆེན་པོའི་རྫོགས་པའི་རིམ། །ཤིན་ཏུ་རྟོགས་པར་དཀའ་བའི་གཞུང་། །སྔོན་ཆད་ཕྱོགས་འདིར་རྩ་བཤད་ཀྱི། །
རྒྱུད་སྡེས་ལེགས་པར་མ་བཀྲལ་བ། །བདག་གིས་བརྩོན་པ་ཆེན་པོ་ཡིས། །རིང་དུ་འབད་ལས་རྙེད་གྱུར་པ། །དེ་འདིར་བཤད་པར་བྱ་ཡིས་ཉོན། །ལཱུ་ཨི་པའི་ལུགས་ཀྱི་རྫོགས་རིམ་རྣལ་འབྱོར་ཆེན་པོའི་གཞུང་
སྒྲུབ་ཐབས་སུ་བཀོད་པ་ལ་ཚིག་དོན་ཙམ་གྱི་སྟེང་ནས་དམིགས་སྐོར་སྐྱོང་རྒྱུད་ད་ལྟའི་བར་དུ་འདུག་ནའང་། རྫོགས་རིམ་འདི་བདེ་མཆོག་གི་རྩ་བ་དང་ཡན་ལག་གི་རྒྱུད་གང་གིས་ཇི་ལྟར་བསྟན་པ་སོགས་ཀྱི་སྒོ་ནས་ཡིད་
9-10-2a


ཆེས་པའི་ཁུངས་ལ་བརྟེན་ཏེ་མཐའ་དག་པར་བཤད་པའི་གོ་བ་ལེགས་པར་ཆགས་པའི་བཤད་པ་མི་འདུག་གོ། དེ་ལྟ་ནའང་རྣམ་དཔྱོད་དང་དོན་གཉེར་ཆེ་ཞིང་གྲུབ་ཆེན་གྱི་ལམ་སྲོལ་ཇི་འདྲ་བ་
ཅིག་ཡིན་པ་མཐོང་ན་ཅི་མ་རུང་སྙམ་པའི་བསམ་པ་ཅན་རྣམས་ཀྱིས་ལེགས་པར་རྩད་བཅད་པར་རིགས་ཏེ། ལཱུ་ཨི་པའི་ལུགས་འདི་འཕགས་ཡུལ་དུ་བདེ་མཆོག་གི་རྩ་བ་རུ་གྲགས་ཤིང་། རྗེས་འབྲང་གི་གྲུབ་ཆེན་ཀྱང་
དུ་མ་འདུག་པས་ཤིན་ཏུ་འགངས་ཆེ་བའི་ཕྱིར་རོ། །དེ་ལྟར་ན་དེ་འདྲ་བའི་རྫོགས་རིམ་རྣལ་འབྱོར་ཆེན་པོ་འཆད་པ་ལ་ལྔ། རྫོགས་རིམ་འདི་རྩ་བཤད་ཀྱི་རྒྱུད་ཀྱི་གཞུང་གང་གིས་བསྟན་པ་དང་། གཞུང་དེ་རྣམས་ཀྱིས་
དོན་དེ་ཇི་ལྟར་བསྟན་པའི་ཚུལ་དང་། བསྟན་པའི་དོན་དེ་ཉམས་སུ་ལེན་པའི་རིམ་པ་དང་། ཉམས་སུ་བླངས་པས་རྒྱུད་ལ་མངོན་རྟོགས་སྐྱེ་བའི་རིམ་པ་དང་། རིམ་པ་དེ་ལ་བརྟེན་ནས་འབྲས་བུ་འགྲུབ་པའི་ཚུལ་ལོ། །
དང་པོ་ལ་གཉིས་ཀུན་སྤྱོད་ནས་འབྱུང་བ་དང་། མངོན་བརྗོད་སོགས་ནས་འབྱུང་བའོ། །དང་པོ་ནི། སྒྲུབ་ཐབས་ཀྱི་གཞུང་ལས། ཨཱ་ལི་ཀཱ་ལི་མདུན་བསམས་ནས། །རྣལ་འབྱོར་ཆེན་པོ་ངལ་བསོ་བྱ། །ཟླ་བའི་
9-10-2b


དཀྱིལ་འཁོར་རྫོགས་པ་ནི། །ལྟེ་བའི་རྩ་བར་གནས་པར་བསྒོམ། །ཡི་གེ་མཆོག་གི་གནས་གྱུར་པ། །དེ་ཡི་དབུས་སུ་གནས་པར་བསམ། །སྐུ་གསུང་ཐུགས་ཀྱི་རྡོ་རྗེ་ཅན། །ལྷ་ཡི་གཟུགས་ནི་བསྒོམ་པར་བྱ། །གོང་བུ་ལས་འདས་གྱུར་པ་དེ། །སེམས་ཉིད་དུ་ཡང་
བསྒོམ་མི་བྱ། །དེ་ཡང་བསམ་གྱིས་མི་ཁྱབ་བསམ། །སེམས་པ་ཉིད་དུ་མཚོན་པ་མིན། །བསམ་གྱིས་མི་ཁྱབ་དེ་བསམས་ན། །དེ་ལས་གཟུངས་ནི་ཐོབ་པར་འགྱུར། ཞེས་གསུངས་པ་འདི་འདིའི་རྫོགས་རིམ་གྱི་གཞུང་ཡིན་ལ། དེ་ནི་ཀུན་སྤྱོད་ཀྱི་ལེའུ་བཅུ་གཉིས་
པར་གསུངས་པ་བཀོད་པའོ། །གཉིས་པ་ནི། ཀུན་སྤྱོད་ཀྱི་བཅུ་གཉིས་པར་གཞུང་སྔར་དྲངས་པ་དེའི་འཕྲོས་འགའ་ཞིག་འབྱུང་བ་ལྷག་དང་བཅས་པ་དང་། སྔར་དྲངས་པ་ཡང་རྐང་པ་འགའ་ཞིག་མཚང་བ་དང་བཅས་པ་རྣམས་པར་མངོན་བརྗོད་ཀྱི་ང་དྲུག་པ་
ལས། ཐམས་ཅད་བདག་ཉིད་རྟག་བཞུགས་པར། །གང་ཞིག་སྔར་ནི་བཤད་པ་ཉིད། །དཀྱིལ་འཁོར་ལུས་ནི་ཡིན་པར་བཤད། །དེ་ནི་སྒོ་དགུ་དག་ཏུ་འགྱུར། །དེ་ལ་ལྟེ་བའི་འཁོར་ལོ་ཆེ། །ཐམས་ཅད་མཁྱེན་པ་ཞེས་བྱར་བཤད། །རྡོ་རྗེ་ཅན་ནི་དེར་བཞུགས་
པ། །ཆ་མེད་ཆ་ནི་རྣམ་སྤངས་པ། །ལུས་ཅན་རྣམས་ཀྱི་ནང་ན་རོལ། །ལུས་ལས་འདས་ཤིང་གོས་པ་མེད། །ལ་ལར་གཟུགས་ཅན་ངག་ཏུ་བཞུགས། །ལ་ལར་སྣ་དང་ངག་དག་དང་། །ལ་ལར་རྣ་བ་སྒྲ་དག་དང་། །ལ་ལར་རྡོ་རྗེ་དྲི་ཆེན་ཆུ། །ལ་ལར་ཚོར་བར་
བཅས་པའི་སེམས། །ལ་ལར་སྐོམ་དང་ལ་ལར་བཀྲེས། །ལ་ལར་ཁྲོ་དང་ལ་ལར་ཞི། ཞེས་པ་ནས། ལ་ལར་ཁྲག་དང་པགས་པར་འགྱུར། །ལ་ལར་མྱ་ངན་གདུང་བ་དང་། །ལ་ལར་བསྲེག་པའི་མེ་དག་ཡིན། །ལ་ལར་མཐོ་རིས་སྐྱེ་བ་སྟེ། །རྣམ་པར་འཕྲུལ་
9-10-3a


པ་འདི་ལྟ་བུ། །ཐམས་ཅད་བདག་ཉིད་བཞུགས་འདི་ལ། །ལྷ་གང་ཆ་ནི་རྣམ་སྦངས་པ། །དེ་ཡི་སྒྱུ་མ་སྣ་ཚོགས་འདི། །ཞེས་པའི་བར་དུ་གསུངས་ལ། །དེ་ནས། བརྟག་པ་མིན་པ་རྡོ་རྗེ་ཅན། །གཟུགས་མེད་པར་ནི་བྷ་གའི་ནང་། །ལྟེ་
བའི་ནང་ན་པདྨ་ཆེ། །བཅུ་དྲུག་ཐིག་ནི་གདབ་པར་བྱ། །ཡི་གེ་དང་ཡང་མཉམ་སྦྱོར་བས། །ཁ་སྦྱོར་བྱ་བ་བྱས་པ་ཡིན། །དེ་དབུས་རྟག་ཏུ་གསང་བ་ནི། །འབྱིན་དང་སྡུད་པར་བྱེད་པའོ། །དེ་ཉིད་རང་ཉིད་རྡོ་རྗེ་ཅན། །གཅིག་པུ་རང་འབྱུང་ཆེ་བའི་ལྷ། །དེ་ནི་སངས་
རྒྱས་ཀུན་དངོས་ཞེས། །མཚན་ནི་རབ་ཏུ་བཤད་པ་ཡིན། །གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཐམས་ཅད་མཁྱེན་པས་འདི་བཤད་པའམ། །ཡང་ན་མི་ཤིགས་ཀུན་མཁྱེན་པ། །སྐྲ་ཡི་ཉག་མ་བརྒྱ་ཡི་ཆ། །མཆོག་
གི་གཟུགས་ཅན་བསམ་པ་སྟེ། །སྟོང་པ་མ་ཡིན་དམིགས་སུ་མེད། །ཡི་གེ་མེད་ཅིང་སྟོང་པའང་མིན། །གོས་པ་མེད་ཅིང་ས་བོན་མེད། །གཟུགས་མེད་མཚན་མའང་མེད་པ་སྟེ། །རྣམ་ཤེས་རང་གི་དངོས་པོ་ནི། །རྣམ་ཤེས་ཡེ་ཤེས་དག་ཏུ་གཟུང་། ཞེས་གསུངས་
ཤིང་། དེ་ནས་རྣལ་འབྱོར་ཉམས་སུ་བླངས་པའི་མཚན་མ་བརྒྱད་གསུངས་པའི་འོག་ཏུ། བལྟས་པ་དགོད་པ་ལག་བཅངས་དང་། །འཁྱུད་དང་གཉིས་གཉིས་ལ་སོགས་པ། །དེ་བཞིན་གཤེགས་པས་དབུགས་འབྱིན་གསུངས། །དགུ་པ་བླ་མའི་བླ་མ་སྟེ། །
ཐམས་ཅད་འདིར་ནི་བསྟན་པ་ཡིན། །རྣམ་པ་གཞན་དག་རྩ་དང་འདྲ། །དེ་ཉིད་སྲོག་ཆགས་རྣམས་ཀྱི་སྲོག །དེ་ཉིད་མི་འགྱུར་དམ་པ་ཡིན། །དེ་ཉིད་ཐམས་ཅད་ཁྱབ་བྱེད་དེ། །ལུས་ཀུན་ལ་ནི་རྣམ་པར་གནས། །དེ་ཉིད་སངས་རྒྱས་ཡེ་ཤེས་ཏེ། །ཧེ་རུ་ཀ་
9-10-3b


དཔལ་ཡིན་པར་བཤད། །སྐྱེས་པ་མ་ནིང་ལ་སོགས་ཉིད། །ཕྲ་བའི་སྙིང་པོའང་འཛིན་པ་ཡིན། །ཡེ་ཤེས་དག་ཏུ་འབྱུང་དེ་ལ། །གང་ཞིག་ས་ལ་གནས་རྣམས་དང་། །བསྟན་བཅོས་དག་ནི་མ་ལུས་དང་། །རིག་བྱེད་གྲུབ་མཐའ་གནས་པ་རྣམས། །འཇིག་
རྟེན་འདི་དང་གཞན་དག་ཏུ། །དེ་མེད་པར་ནི་འགྲུབ་མི་འགྱུར། །རིག་བྱེད་གྲུབ་པའི་མཐའ་རྣམས་ལ། །འདི་ནི་སྙིང་པོར་རབ་ཏུ་བཤད། ཅེས་གསུངས་ལ། དེ་ནས་ཨཱ་ལི་ཀཱ་ལིའི་བསྔགས་པ་སོགས་གསུངས་པའི་འོག་ཏུ། ཨཱ་ལི་ཀཱ་ལི་མདུན་
བསམས་ནས། །རྣལ་འབྱོར་ཆེན་པོས་ངལ་བསོ་སྟེ། །བསམ་གྱིས་མི་ཁྱབ་སེམས་ཉིད་དེ། །སེམས་ཀྱང་བརྟག་པར་མི་བྱའོ། །སེམས་ཙམ་ཉིད་ཀྱང་མི་བསམ་སྟེ། །དེས་ནི་འཛིན་པ་ཐོབ་པར་འགྱུར། །གང་གིས་རྒྱུད་ཀུན་ལས་གསང་བ། །ཁྱོད་
ལ་ཡང་ནི་བཤད་པ་ཡིན། །འདི་ནི་འབད་པས་སྦ་བྱ་སྟེ། །གཉིས་མེད་གཉིས་སུ་མེད་པར་སྡོམ། །རྣལ་འབྱོར་མ་སོགས་ཐམས་ཅད་དང་། དཔའ་བོའི་ཡན་ལག་ཐམས་ཅད་ཀྱི། །རྣལ་འབྱོར་པ་ཡིས་འབྲས་བུ་འཐོབ། །ཅེས་གསུངས་ལ། ཧེ་རུ་
ཀ་མངོན་འབྱུང་ལས་ཀྱང་། །གང་གི་ཇི་ལྟར་སྔོན་དུ་གསུངས། །ཐམས་ཅད་བདག་ཉིད་རྟག་ཏུ་གནས། ལུས་ཀྱི་དཀྱིལ་འཁོར་ཞེས་སུ་བརྗོད། །སྒོ་དགུ་རུ་ནི་གྱུར་པ་སྟེ། །ལྟེ་བའི་དབུས་ན་པདྨ་ཆེ། །ཐམས་ཅད་མཁྱེན་པའི་ཡེ་ཤེས་གྲགས། །དེ་ཡི་
གནས་ན་དཔའ་བོ་བཞུགས། །ཆ་མེད་ཆ་ནི་རྣམ་པར་སྤངས། །ལུས་རྣམས་ཀུན་གྱིས་རྣམ་པར་རྩེ། །ལུས་བྲལ་དྲི་མ་མེད་པ་སྟེ། །ལ་ལར་གཟུགས་ཀྱི་གནས་ན་བཞུགས། །ལ་ལར་སྣ་ཡི་གནས་ན་བཞུགས། །ཞེས་པ་ནས། ཇི་ལྟར་ཀུན་ཏུ་རྣམ་
9-10-4a


པར་དབྱེ། །ལྷ་ཡིས་ཇི་སྲིད་གསུངས་པ་ཀུན། །གང་དེ་ཐམས་ཅད་བདག་ཉིད་གནས། ཞེས་པའི་བར་དང་། ལྟེ་བའི་རྩ་བར་པདྨ་གནས། །གེ་སར་བཅས་ཤིང་འོད་དང་ལྡན། །རང་བཞིན་ཀུན་ནི་ཤེལ་དག་ལྟར། །བཅུ་དྲུག་
ལ་སོགས་ཀྱིས་ནི་བསྐོར། །ཡི་གེ་མཉམ་པར་སྦྱོར་བ་སྟེ། །ནམ་མཁའ་སྦྱར་བའི་བདག་ཉིད་དོ། །དེ་ཡི་དབུས་སུ་སྟོང་པ་ཆེ། །སྤྲོ་དང་བསྡུ་བར་བྱེད་པ་ཡིན། །གང་གི་མིང་ནི་ཀུན་རང་བཞིན། །གང་གིས་ཡོངས་སུ་གྲགས་པའོ། །ཉི་མ་ཟླ་བ་རྣམ་དག་
སྟེ། །འཆར་དང་ནུབ་པར་བསྟན་པ་ཡིན། །སྡིག་པ་ཀུན་ལས་རྣམ་པར་གྲོལ། །བསོད་ནམས་ཐམས་ཅད་རྣམ་པར་འཕེལ། །པདྨའི་སྣ་རྩེར་ཡུངས་ཀར་ཙམ། །རྒྱུ་དང་མི་རྒྱུའི་རང་བཞིན་ཀུན། །ཡིད་ཀྱིས་འདས་པར་ཡང་དག་ལྡན། །ཕྱི་ཡི་དབྱངས་
ནི་རྣམ་པར་སྤངས། །དེ་ཡིས་ཡེ་ཤེས་སངས་རྒྱས་ཏེ། །གཞན་གྱིས་སངས་རྒྱས་མི་འགྱུར་རོ། །ཞེས་དང་། རྣལ་འབྱོར་ཉམས་སུ་བླངས་པའི་མཚན་མ་བརྒྱད་གསུངས་སོ། །མངོན་བརྗོད་ལས། ཐམས་ཅད་བདག་ཉིད་རྟག་བཞུགས་པར། །གང་ཞིག་
སྔར་ནི་བཤད་པ་ཉིད། ཅེས་གསུངས་པའི་སྔར་བཤད་པ་ནི་རྒྱུད་དེའི་ལེའུ་དང་པོ་ལ་ཡང་བསྙེག་ཏུ་ཡོད་མོད་ཀྱང་། དེ་ཁོ་ནར་མི་བྱ་བར་རྩ་རྒྱུད་ལས། གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །མཁའ་འགྲོ་ཀུན་
དངོས་སེམས་པ་ནི། །རྡོ་རྗེ་སེམས་དཔའ་བདེ་བའི་མཆོག །འདི་ནི་རང་བྱུང་བཅོམ་ལྡན་དཔའ། །མཁའ་འགྲོ་དྲ་བའི་སྡོམ་པ་ཡིན། ཞེས་གསུངས་པ་ལ་ཡང་བསྙེག་དགོས་ཏེ། རྡོ་རྗེ་མཁའ་འགྲོ་ལས། ཁྱོད་ཀྱིས་སྔར་བཤད་གསང་བ་
9-10-4b


དང་། །ཐམས་ཅད་བདག་ཉིད་རྟག་ཏུ་བཞུགས། །ཡི་གེ་བཅུ་དྲུག་རིག་པ་ཆེ། །བདེ་མཆོག་བླ་མར་བཤད་པ་དང་། ཞེས་གསང་བ་མཆོག་གིས་དགྱེས་པ་ན་ཞེས་སོགས་རྒྱུད་དེར་བཤད་པ་དང་། བདེ་མཆོག་རྩ་རྒྱུད་གཉིས་ཀ་ལའང་བསྙེག་པ་
བཞིན་ནོ། །དེ་ལྟར་ན་ལྟེ་བར་ཟླ་བའི་དཀྱིལ་འཁོར་བསྒོམ་པ་སོགས་ཀྱི་རྫོགས་རིམ་རྣལ་འབྱོར་ཆེན་པོ་ནི་རྩ་རྒྱུད་ཀྱི་གང་གིས་གསུངས་པ་ཀུན་སྤྱོད་ན་མི་གསལ་ཡང་མངོན་བརྗོད་ལས་གསལ་བར་བཤད་ལ། ཐམས་ཅད་བདག་ཉིད་རྟག་ཏུ་བཞུགས། 
ཞེས་སོགས་ཀྱིས་ལྟེ་བའི་རྩ་འཁོར་ལ་བརྟེན་ནས། རྫོགས་རིམ་བསྒོམ་པ་དང་། དེ་ཡང་ཀུན་སྤྱོད་དང་མཐུན་པ་ནི། མངོན་བརྗོད་ལས་གསུངས་ཤིང་ཧེ་རུ་ཀ་མངོན་འབྱུང་ཡང་མངོན་བརྗོད་དང་བསྟུན་དགོས་པར་སྔར་དྲངས་པ་རྣམས་ཀྱིས་ཤེས་
པས་རྩ་རྒྱུད་དང་མངོན་བརྗོད་དང་ཧེ་རུ་ཀ་མངོན་འབྱུང་གསུམ་བསྒྲིགས་ཏེ་འདིའི་རྫོགས་རིམ་ཤེས་དགོས་ལ། བདེ་མཆོག་གི་གཞུང་གཞན་ལ་བརྟེན་ནས་ཀྱང་ཤེས་དགོས་པ་ནི་འཆད་པར་འགྱུར་རོ། །གཉིས་པ་ལ་གཉིས། ལམ་གྱི་སྙིང་པོ་ཇི་
ལྟར་བསྟན་པ་དང་། དེ་བསྐྱེད་པའི་ཐབས་ཇི་ལྟར་བསྟན་པའོ། །དང་པོ་ལ་གཉིས། སྤྱིར་བསྟན་པ་དང་། སོ་སོར་ཕྱེ་སྟེ་བསྟན་པའོ། །དང་པོ་ནི། བལྟས་དང་ཞེས་སོགས་གསུམ་གྱི་མཇུག་ཏུ་ཀུན་སྤྱོད་ལས། གོང་མའི་གོང་མ་མེད་པ་ཉིད། །
འདི་ཉིད་དུ་ནི་ཡང་དག་བསྟན། །མེས་ཏེ་གཞན་དག་རྩྭ་དང་འདྲ། །ཞེས་མར་དོའི་འགྱུར་ལས་འབྱུང་སྟེ། བལྟས་པ་སོགས་བཞི་ནི་རྒྱུད་སྡེ་བཞི་ཡིན་ལ། དེའི་དང་པོ་གསུམ་ནི་གོང་མ་དང་བཅས་པ་དང་། བདེ་མཆོག་ལྟ་བུ་བཞི་པ་ནི་གོང་ན་
9-10-5a


མེད་པའོ། །དགུ་པ་ནི་མཚན་མ་བརྒྱད་ལ་ལྟོས་ནས་ཡིན་ཏེ་འཆད་པར་འགྱུར་རོ། །དེར་བཤད་པའི་ཐབས་ཤེས་གཉིས་མེད་ཀྱི་ལམ་ནི་མེ་དང་འདྲ་ལ། བྱ་རྒྱུད་སོགས་ནས་བཤད་པ་ནི་དེ་ལ་ལྟོས་ཏེ་སྙིང་པོ་མེད་པ་རྩྭ་དང་
འདྲ། ཞེས་པ་དང་། དེ་ཉིད་ཅེས་སོགས་ཀྱིས་དེའི་བསྔགས་པ་བསྟན་ཏེ། རྐང་པ་བརྒྱད་ཀྱི་དོན་ནི་འཆད་པར་འགྱུར་རོ། །ཡེ་ཤེས་དག་ཏུ་འབྱུང་དེ་ལ། ཞེས་པ་ལ་ནི་མངོན་བརྗོད་དང་ཀུན་སྤྱོད་ཀྱི་གཞུང་རྣམས་ལ་མི་འདྲ་བ་མང་དུ་སྣང་ནའང་། 
དོན་ནི་ཀུན་སྤྱོད་མར་ངོས་བསྒྱུར་བ་ལས། གང་ཞིག་ཅེས་པའི་རྐང་པ་གསུམ་གྱི་མཐར་ཡེ་ཤེས་དེ་ལས་ཡང་དག་འབྱུང་། །ཞེས་པ་ལྟར་ཡིན་ཏེ། ཀུན་སྤྱོད་ཀྱི་འགྲེལ་པར་རིག་བྱེད་དང་གྲུབ་མཐའ་སོགས་ཡེ་ཤེས་ལ་གནས་པ་ནི་ཡེ་ཤེས་
དེ་ལས་དེ་རྣམས་འབྱུང་བའི་དོན་དུ་བཤད་ཅིང་། མངོན་བརྗོད་འགྲེལ་པ་ལས། དངོས་གྲུབ་ཐམས་ཅད་སྲོག་དྷཱུ་ཏཱིར་བཙུད་པ་ལས་བྱུང་བའི་ཡེ་ཤེས་ལ་བརྟེན་ནས་འབྱུང་བའི་དོན་དུ་བཤད་པའི་ཕྱིར་རོ། །ས་ལ་གནས་པ་ནི་ས་བཅུ་ལ་
གནས་པ་དང་། བསྟན་བཅོས་ནི་རྒྱུད་སྡེ་རྣམས་དང་། རིག་བྱེད་ནི་ཕྱི་བའི་བསྟན་བཅོས་དང་། གྲུབ་མཐའ་ནི་ཉན་ཐོས་པའི་སྡེ་སྣོད་ལ་སོགས་པའི་གྲུབ་མཐའ་ལ་ཏ་ཐཱ་ག་ཏ་ར་ཀྵི་ཏས་བཤད་དེ། ཕྱི་ནང་གི་གཞུང་ལས་བཤད་པའི་
དངོས་གྲུབ་ཐམས་ཅད་ལམ་མདོར་བསྡུས་པ་འདི་ཉིད་ཀྱིས་འགྲུབ་པའི་དོན་ནོ། །དེ་ཉིད་སྲོག་ཆགས་རྣམས་ཀྱི་སྲོག །ཅེས་པ་ནས། སྙིང་པོའང་འཛིན་པ་ཡིན། ཞེས་པའི་བར་ནི་ཀུན་སྤྱོད་ལས་ཀྱང་འབྱུང་ལ། ཐ་མ་གཉིས་མ་
9-10-5b


གཏོགས་པ་ས་མྤུ་ཊ་དང་། དང་པོ་བཞི་བརྟག་གཉིས་ལས་ཀྱང་གསུངས་སོ། །དེ་ཉིད་ཅེས་པ་ནི། ཀྱེེ་རྡོ་རྗེ་དང་མྤུ་ཊ་ལས། བསྟེན་པས་ཡང་དག་གང་འབྱུང་བ། །སློབ་མའི་ཁར་ནི་ཏུང་བར་བྱ། །རོ་མཉམ་སློབ་མའི་སྤྱོད་ཡུལ་ཉིད། །དེ་ཉིད་ལ་ཡང་བྱ་བར་
བྱ། །རང་རིག་ཡེ་ཤེས་ཉིད་དུ་འགྱུར། །རང་གཞན་ཡང་དག་རིག་པ་སྤངས། །མཁའ་མཉམ་རྡུལ་བྲལ་སྟོང་པ་ཉིད། །དངོས་དང་དངོས་མེད་བདག་ཉིད་མཆོག །ཐབས་དང་ཤེས་རབ་ཤིན་ཏུ་འདྲེས། །ཆགས་དང་ཆགས་བྲལ་རྣམ་པར་འདྲེས། །དེ་ཉིད་སྲོག་ཆགས་
རྣམས་ཀྱི་སྲོག །ཅེས་གསུངས་པས་དབང་གསུམ་པ་བསྐུར་བ་ལས་མཚོན་པའི་དོན་ཉམས་སུ་བླངས་པ་ལས་བྱུང་བའི་ལྷན་སྐྱེས་ཀྱི་ཡེ་ཤེས་སོ། །དེ་སྲོག་ཆགས་རྣམས་ཀྱི་སྲོག་ཏུ་འགྱུར་ཚུལ་ནི། ཤིན་ཏུ་གཅེས་པས་སྲོག་དང་འདྲ་བས་སམ། དེའི་རང་
བཞིན་སྟོང་པ་ཉིད་སེམས་ཅན་རྣམས་ཀྱི་སྲོག་གི་ངོ་བོ་ཉིད་ཡིན་པའི་དོན་ནོ། །དེ་དང་བྲལ་ན་མི་འཚོ་བས་སྲོག་གོ་ཞེས་ཀྱང་འགའ་ཞིག་བཞེད་དོ། །དེ་ཉིད་མི་འགྱུར་བ་ནི་ཐོག་མར་སྐྱེ་བ་དང་མཐར་འཇིག་པ་མེད་པའོ། །འདི་ལ་བརྟག་གཉིས་དང་སམྦུ་ཊར་ཡི་གེ་ཞེས་
བསྒྱུར་བ་ནི་ཨ་ཀྵ་ར་སྤྱིར་ཡི་གེ་ལའང་འགྲོ་མོད་ཀྱང་འདིར་ནི་མི་འགྱུར་ཞེས་བསྒྱུར་བ་ལྟར་ལེགས་སོ། །དེ་ཉིད་ཐམས་ཅད་ཅེས་པས་སྣོད་ཀྱི་ངོ་བོ་ཉིད་དང་། ལུས་ཀུན་ཞེས་པས་བཅུད་ཀྱི་ངོ་བོར་བསྟན་པར་ཀུན་སྤྱོད་འགྲེལ་པར་བཤད་པ་ཡང་ལྷན་སྐྱེས་ཀྱི་དེ་
ཁོ་ན་ཉིད་རང་བཞིན་རྣམ་དག་ལ་གོ་བར་བྱའོ། །དེ་ཉིད་སངས་རྒྱས་ཡེ་ཤེས་ནི་འབྲས་བུའི་ལྷན་སྐྱེས་ནི་དངོས་ཡིན་ལ། ལམ་གྱི་ལྷན་སྐྱེས་ནི། འཇུག་པ་ལས། ཇི་ལྟར་དེ་ཉིད་རྟོགས་ལ་སངས་རྒྱས་བསྙད། ཅེས་བུད་དྷའི་དོན་དེ་ཁོ་ན་ཉིད་ཁོང་དུ་ཆུད་པ་
9-10-6a


ལ་བཤད་པ་ལྟར་རོ། །ཧེ་རུ་ཀ་དཔལ་ཡིན་པར་བཤད་པ་ནི། ཤྲཱི་ཧེ་རུ་ཀའི་ཡི་གེ་བཞིའི་དོན། ཤྲཱི་ནི་གཉིས་མེད་ཡེ་ཤེས་ཏེ་ཞེས་སོགས་ལྟར་ཚང་བའོ། །སྐྱེས་པ་དང་མ་ནིང་དང་སོགས་པས་བུད་མེད་སོགས་ཀྱི་ཕྲ་བ་དང་རགས་པའི་
སྙིང་པོ་སྟེ་ངོ་བོ་འཛིན་པ་སྟེ་འཇིག་རྟེན་པས་ངེས་པ་ཡང་ལྷན་སྐྱེས་ཀྱི་དེ་ཁོ་ན་ཉིད་དེར་ཤར་བ་སྟེ། དེའི་རང་བཞིན་རྣམ་དག་གིས་ཆོས་ཐམས་ཅད་ལ་ཁྱབ་ཅིང་རང་བཞིན་དེ་ཡང་ཆོས་ཐམས་ཅད་ཀྱི་རྣམ་རོལ་ཏུ་ཤར་བ་སྟེ། ངེས་དོན་གྱི་ལྷན་སྐྱེས་ཕྱོགས་ལ་
སོགས་པའི་ཆ་སྤངས་པ་དེའི་སྒྱུ་མ་སྟེ་རོལ་པ་སྣ་ཚོགས་པར་ཤར་བས་ཐམས་ཅད་ཀྱི་བདག་ཉིད་དུ་བཞུགས་པར་སྔར་དྲངས་པའི་ལུང་། ལ་ལར་གཟུགས་ཅན་དག་ཏུ་བཞུགས། ཞེས་སོགས་རྒྱུད་གཉིས་ལས་གསུངས་པ་རྣམས་ཀྱི་དོན་ནོ། །འདི་ཡང་བརྟག་
གཉིས་ལས། དངོས་པོ་ཀུན་གྱི་རང་བཞིན་འདི། །སྒྱུ་མའི་གཟུགས་ཀྱིས་ཡང་དག་གནས། ཞེས་ཐམས་ཅད་རང་བཞིན་སྟོང་པ་ཉིད་ཀྱི་རྣམ་རོལ་ཏུ་གསུངས་ཤིང་། གསུམ་པོ་སྤངས་པ་ཉིད་ཀྱི་ཕྱིར། །ལྷན་ཅིག་སྐྱེས་པ་བྱང་ཆུབ་བརྗོད། །ཡང་ན་དེ་ཉིད་
ཐམས་ཅད་བདག །ཡང་ན་ཀུན་གྱིས་རྣམ་པར་སྤངས། ཞེས་གསུངས་པའི་དོན་མུ་ཏིག་ཕྲེང་བར། ཡང་ན་ཞེས་པ་དང་གང་ཡང་ཞེས་པ་རྣམས་གྲངས་སོ། །དེ་ཉིད་ཀུན་བདག་ཉིད་ཅེས་པ་ནི་ལྷན་ཅིག་སྐྱེས་པ་དེ་ཐམས་ཅད་ཀྱི་བདག་ཉིད་ཡིན་པས་དགའ་བ་
གསུམ་གྱི་རྗེས་སུ་འགྲོ་བ་ཉིད་དེ། ཐུན་མོང་གི་བདེ་བ་གཉིས་པོ་སྟོང་པ་ཉིད་གང་ཡིན་པ་ཐུན་མོང་བ་ཞེས་བྱ་བའི་དོན་ཏོ། །ཡང་ན་ཞེས་པ་རྣམ་གྲངས་གཞན་གྱིས་ཐམས་ཅད་ཀྱིས་སྤངས་པ་ནི་དགའ་བ་གསུམ་དང་བྲལ་བ་སྟེ་རང་རིག་པའི་ཁྱད་པར་གྱི་
9-10-6b


མཚན་ཉིད་ཀྱིས་དེ་རྣམས་ཀྱི་རྗེས་སུ་འགྲོ་བ་མེད་པ་ཡིན་ནོ། །འདི་དག་ཉིད་ཁྱད་པར་གྱི་མཚན་ཉིད་འདི་དག་དང་བྲལ་བ་ལ་བརྟེན་ནས་འདི་ཡིས་གསུམ་པོ་སྤངས་པ་ཞེས་སོ། །ཞེས་ལྷན་སྐྱེས་ཀྱི་སྟེང་གི་ཐུན་མོང་བ་སྤྱིའི་མཚན་ཉིད་གཟུང་འཛིན་གཉིས་པོ་བདེན་
པས་སྟོང་པ་དགའ་བ་གསུམ་ལ་རྗེས་སུ་འགྲོ་བས་ཐམས་ཅད་ཀྱི་བདག་ཉིད་དུ་གསུངས་ལ། ཐུན་མོང་མ་ཡིན་པ་ཁྱད་པར་གྱི་མཚན་ཉིད་ཉམས་སུ་མྱོང་བའི་ལྷན་སྐྱེས་ཀྱི་བདེ་བ་དང་བྲལ་བས་དགའ་བ་གསུམ་གྱིས་དེ་སྤངས་པར་བཤད་པ་ལྟར་ཏེ། རེས་འགའ་
ལྷན་སྐྱེས་ཀྱི་ཡེ་ཤེས་ཀྱིས་ཐམས་ཅད་ལ་ཁྱབ་པ་དང་། རེས་འགའ་དགའ་བ་གསུམ་ལ་སོགས་པ་ལ་དེ་མེད་པར་བཤད་པ་རྣམས་ནི་ལྷན་སྐྱེས་ཀྱི་བདེ་སྟོང་གི་རང་བཞིན་རྣམ་དག་སྤྱིའི་མཚན་ཉིད་ཀྱིས་ཀུན་ལ་ཁྱབ་པ་དང་། ལམ་གྱི་དྲི་མ་སྤངས་པ་ལ་སོགས་
པ་ཁྱད་པར་ཐུན་མོང་མ་ཡིན་པའི་མཚན་ཉིད་གཞན་ལ་མེད་པར་གསུངས་པའི་སྟེང་ནས་ཤེས་པར་བྱའོ། །གཞན་ཡང་རང་བཞིན་གྱིས་འོད་གསལ་བའི་རང་བཞིན་རྣམ་དག་ཆོས་གཞན་རྣམས་ལ་ཁྱབ་པར་བྱེད་པ་ནི་བདེ་བ་ཆེན་པོའི་ཡང་རང་བཞིན་ཡིན་ལ། 
རང་བཞིན་དང་རང་བཞིན་ཅན་ལ་ནི་བདག་གཅིག་པའི་འབྲེལ་པ་ཡོད་པས་བདེ་བ་ཆེན་པོ་དང་ངོ་བོ་གཅིག་པའི་རང་བཞིན་གྱིས་སྣོད་བཅུད་ཀུན་ལ་ཁྱབ་པ་ན་བདེ་བ་ཆེན་པོས་ཀྱང་དེ་རྣམས་ལ་ཁྱབ་པར་ཐ་སྙད་མཛད་པ་ཡིན་ཏེ། ལྷན་སྐྱེས་ཀྱི་རྣལ་འབྱོར་དམ་
པའི་འགྲེལ་པ་སྙིང་པོ་གསལ་བ་ལས། ཆོས་ཉིད་ནི་ཁྱབ་པར་བྱེད་པ་སྟེ་དེ་ཉིད་ཆོས་ཀྱི་སྐུ་རང་བཞིན་གྱིས་འོད་གསལ་བ་བདེ་བ་ཆེན་པོའི་རང་བཞིན་ནོ། །བདེ་བ་ཆེན་པོ་དེ་ཉིད་ཀྱིས་ཆོས་ཐམས་ཅད་ཁྱབ་པ་སྟེ་ཆོས་རྣམས་དང་ཆོས་ཉིད་ལ་དེའི་བདག་
9-10-7a


ཉིད་ཀྱི་འབྲེལ་པ་ཡོད་པས་རྒྱུ་བ་དང་མི་རྒྱུ་བའི་དངོས་པོ་ཐམས་ཅད་བདེ་བ་ཆེན་པོའི་རང་བཞིན་དུ་གྲུབ་པ་ཁོ་ན་ཡིན་ནོ། །ཇི་སྐད་དུ་ཆོས་ལས་ཆོས་ཉིད་ཐ་མི་དད་པ་ཡིན་ནོ་ཞེས་གསུང་སོ། །ཞེས་འབྱུང་བ་ལྟར་རོ། །བདེ་བ་
ཆེན་པོས་ལུས་ཅན་ཀུན་ལ་ཁྱབ་པར་གསུངས་པའི་དོན་གཞན་ཡང་ཐབས་དང་ལྡན་ན་ལུས་དེ་ལས་དེ་འབྱུང་དུ་རུང་བ་ལ་དགོངས་ནས་ཀྱང་ཡིན་ཏེ། མན་ངག་སྙེ་མ་ལས། འོ་ན་དེ་ཁོ་ན་ཉིད་མ་རྟོགས་པའི་གནས་སྐབས་སུ་བདེ་བ་ཆེན་པོ་ཉམས་སུ་མ་
མྱོང་བ་མ་ཡིན་ནམ། ཇི་ལྟར་སེམས་ཅན་ཀུན་གྱི་སེམས་ཀྱི་བདག་ཉིད་དུ་བརྗོད་ཅེ་ན། བདེ་བ་ཆེན་པོ་ཉམས་སུ་མྱོང་བར་རུང་བ་ཉིད་ཀྱིས་སོ་ཞེས་བཤད་དོ། །དེ་ལྟར་བཤད་པ་ནི་གསང་བ་གྲུབ་པ་ལས། རང་གིས་རིག་པའི་ལྷ་རྫས་དེ། །ཕྱག་རྒྱ་ཆེན་
པོ་མཆོག་ཏུ་དགེ། ཐ་མ་ལུས་ལ་བརྟེན་ནས་གནས། །ཤེས་རབ་ཆུང་བས་མཐོང་མི་འགྱུར། །མི་འགྱུར་བ་ཡི་རང་ལུས་དེ། །ཕྱོགས་གཅིག་གིས་ནི་ཤེས་པར་བྱ། །བླ་མའི་བཀའ་དྲིན་གནས་པ་ལས། །ཇི་ལྟ་བ་བཞིན་རྣམ་པར་གནས། །རྩྭ་ཤིང་
འཁྲིལ་ཤིང་ལ་སོགས་པ། །ཀུན་ཏུ་གནས་པར་གྱུར་ན་ཡང་། །མི་ནི་ཐབས་དང་བྲལ་བ་ཡིས། །མི་ནི་མཐོང་བར་འགྱུར་མ་ཡིན། །ཐབས་དང་བྲལ་ན་ནམ་དུ་ཡང་། །ལྷ་རྫས་ཡོན་ཏན་ཀུན་འབྱུང་བ། །གཉུག་མའི་ལུས་ལ་གནས་ན་ཡང་། །
ཤེས་རབ་ཞན་པས་མཐོང་མི་འགྱུར། །ཇི་ལྟར་བུར་ཤིང་ཁུ་བ་དང་། །ཏིལ་ལ་ཏིལ་མར་ཇི་ལྟར་མར། །དེ་བཞིན་ལུས་ལ་ཐམས་ཅད་དུ། །ཤེས་རབ་ཕ་རོལ་ཕྱིན་པ་གནས། ཞེས་རྣལ་འབྱོར་པ་རང་གིས་རིག་པའི་བདེ་བ་ཆེན་པོའི་ལྷ་རྫས་ཕྱག་རྒྱ་
9-10-7b


ཆེན་པོ་ལྷན་ཅིག་སྐྱེས་པའི་ཡེ་ཤེས་རང་གི་ལུས་ལ་གནས་པའི་དོན་ནི། །ཤིང་ལ་མེ་དང་། འོ་མ་ལ་མར་གནས་པ་སོགས་དང་འདྲ་བར་གསུངས་ལ། ཐབས་དང་བཅས་ན་རང་ལུས་ལས་འབྱུང་དུ་རུང་བ་ལ་ཤིན་ཏུ་གསལ་བར་གསུངས་པ་དང་མཐུན་
ནོ། །གཞན་ཡང་དོན་གྱི་ལྷན་སྐྱེས་ཀྱི་ཡེ་ཤེས་དང་། ཡུལ་གྱི་དེ་ཁོ་ན་ཉིད་གཉིས་ཕན་ཚུན་དུ་འདྲ་བར་རོ་མཉམ་དུ་ཞུགས་ཤིང་། ཡུལ་དེ་ཡང་བརྟན་གཡོ་ཀུན་ལ་ཁྱབ་པ་ལ་དགོངས་ནས་ཀྱང་དེ་ལྟར་གསུངས་ཏེ། ཧེ་རུ་ཀ་མངོན་འབྱུང་ལས། གང་
དེ་ཐམས་ཅད་བདག་ཉིད་གནས། །དཔའ་བོ་འདི་རྣམས་གསང་ཆེན་པོ། །ཕྱི་དང་ནང་དུ་ཡང་དག་གནས། ཀུན་ལ་ཁྱབ་ཅིང་རྟག་ཏུ་སྟོང་། ཞེས་པ་དང་། གཉིས་མེད་ཡེ་ཤེས་ཉིད་དང་ཡང་། །དེ་དང་འདྲ་བར་སྟོང་བར་འགྱུར། ཞེས་གསུངས་ཤིང་། དེ་དག་
གི་དོན་གསལ་བར་མན་སྙེ་ལས་ཀྱང་། སྟོང་པ་ཉིད་དང་རོ་གཅིག་པ་ཉིད་ཀྱི་ཕྱིར་སྟོང་པ་ཉིད་ཀྱི་ཡེ་ཤེས་ཀྱང་སྟོང་པ་ཉིད་བཞིན་དུ་དེ་ཁོ་ན་ཉིད་དུ་བརྗོད་ཅིང་དེ་ཁོ་ན་ཡང་བྱང་ཆུབ་ཀྱི་སེམས་ཏེ་དེའི་ཕྱིར་དེ་ཡང་ཁྱབ་པར་བྱེད་པ་ཁོ་ནའོ་ཞེས་པའོ་ཞེས་
གསུངས་སོ། །དེ་ལྟར་ལྷན་སྐྱེས་ཀྱི་བདེ་བའི་སྟེང་ནས་ཆ་སོ་སོར་ཕྱེ་ནས་སྐབས་སུ་གང་བབ་པའི་ཁྱབ་པའི་ཚུལ་རྣམས་ཤེས་པར་བྱའི། །ཆོས་འདི་ལས་ཕྱི་རོལ་དུ་གྱུར་པ་རྣམས་ཀྱིས་རྟག་པ་དང་ཁྱབ་པ་ཁས་བླངས་པ་ལྟ་བུ་དོན་འདྲ་བ་ལ་མིང་བཟང་
པོར་བསྒྱུར་བའི་ཚུལ་ཁས་བླང་བར་མི་བྱའོ། །གལ་ཏེ་དེ་ཁོ་ན་ཉིད་ལ་བསམས་ནས་ཀུན་ལ་ཁྱབ་པར་བཤད་ན། ལྷན་སྐྱེས་ཀྱི་དེ་ཁོ་ན་ཉིད་ཅེས་ལྷན་སྐྱེས་ཀྱི་བདེ་བ་ལ་དམིགས་ཀྱིས་བཀར་ཅི་དགོས་ཏེ། ཆོས་ཅན་གཞན་གང་རུང་གཅིག་གི་སྟེང་
9-10-8a


ནས་ཀྱང་བཤད་པས་ཆོག་པའི་ཕྱིར་རོ་སྙམ་ན། དགོས་པ་དེ་ཙམ་ཞིག་ཡིན་ན་བདེན་མོད་ཀྱང་དེ་ལྟར་འཆད་པ་ནི་རང་རྒྱུད་ལ་ལྷན་སྐྱེས་ཀྱི་བདེ་བ་བསྐྱེད་དེ་མཉམ་གཞག་ཏུ་བསྐྱངས་པའི་འོག་ཏུ་སྣོད་བཅུད་གཞན་དང་ལྷན་སྐྱེས་ཀྱི་བདེ་བའི་
དེ་ཁོ་ན་ཉིད་རང་བཞིན་སྟོང་པ་གཉིས་མཚུངས་པའི་ཚུལ་དང་། ཆོས་ཐམས་ཅད་རང་རང་གི་སྟོང་པ་ཉིད་དེར་སྣང་བ་ཡིན་པས་དེའི་རྣམ་འགྱུར་ཡིན་པ་དང་། དེ་ལྟ་ན་དེ་དག་གི་སྟོང་པ་ཉིད་ལ་རྗེས་སུ་ཞུགས་པའི་ལྷན་སྐྱེས་ཀྱིའང་རྣམ་རོལ་ཏུ་ཤར་
བར་མོས་ནས། རྗེས་ཀྱི་ཚེ་བསྐྱངས་པས་ཡུལ་སྣང་ཐམས་ཅད་བདེ་བར་འཆར་བའི་གྲོགས་སུ་འཁྱེར་བའི་ཆེད་ཡིན་ཅིང་། མཉམ་རྗེས་གཉིས་ཀར་བདེ་སྟོང་སྦྱར་ཏེ་བསྒོམས་པས་ནི་མྱུར་དུ་འགྲུབ་པར་འགྱུར་ཏེ། ལྷན་ཅིག་སྐྱེས་པའི་རྣལ་འབྱོར་དམ་པ་
ལས། སྣང་བ་མེད་ཅིང་གསལ་བ་ཙམ། །བདེ་བ་ཆེན་པོ་མཐའ་ཡས་པ། །ཇི་སྲིད་ནུས་པ་དེ་སྲིད་དུ། །རྒྱུན་མ་ཆད་པར་བལྟ་བར་བྱ། །ལངས་པ་དང་དངོས་པོ་ཐམས་ཅད་བདེ་བ་ཆེན་པོའི་ངོ་བོ་ཡིན་པས་རྣལ་འབྱོར་མའི་འཁོར་ལོའི་བདག་ཉིད་ཅན་དུ་མོས་པར་
བྱའོ། །ཡང་དང་ཡང་དུ་བསོད་ནམས་དང་ཡེ་ཤེས་ཀྱི་ཚོགས་བསག་པར་བྱ་བའི་ཕྱིར་རང་རིག་པའི་བདེ་བ་ཆེན་པོ་དེ་ཉིད་ཀྱིས་མཆོད་པར་བྱའོ། །ཚོགས་བསགས་པའི་བསྒོམ་པའི་ཁྱད་པར་གྱིས་ཡུན་རིང་མ་ཡིན་པར་འདོད་པའི་དངོས་གྲུབ་ཏུ་འགྱུར་
རོ། །སྲོག་ཆགས་ཐམས་ཅད་བདག་ལས་བྱུང་། །ཁམས་གསུམ་ཡང་ནི་བདག་ལས་བྱུང་། །འདི་དག་ཐམས་ཅད་བདག་གིས་ཁྱབ། །འགྲོ་གཞན་རང་བཞིན་མི་སྣང་ངོ་། །དེ་ལྟར་ཤེས་ནས་རྣལ་འབྱོར་པ། །མཉམ་པར་བཞག་པས་གང་སློབ་
9-10-8b


པ། །མི་དེ་བསོད་ནམས་དམན་པ་ཡང་། །འགྲུབ་པར་འགྱུར་ཏེ་ཐེ་ཚོམ་མེད། ཅེས་གསུངས་ཏེ། ཚུལ་འདི་ནི་བརྟག་གཉིས་ཀྱི་ལེའུ་བརྒྱད་པ་སོགས་ནས་བདེ་བས་ཀུན་ལ་ཁྱབ་པར་བཤད་པ་རྣམས་ཀྱི་གནད་དམ་པའོ། །མན་སྙེ་ལས་ཀྱང་དེ་ལྟར་དུ་
གསུངས་པས། བརྟན་སོགས་གཡོ་བ་དང་བཅས་པའི། །འགྲོ་ཀུན་ཁྱབ་པས་ཁྱབ་པའོ། །ཞེས་སོ། །འདི་ཡང་བདེ་བ་ཆེན་པོའི་ངོ་བོ་ཁོ་ནར་བསྒོམ་པར་བྱ་བཞིན་པས་ནི་འབྲས་བུ་བདེ་བ་ཆེན་པོའི་རང་བཞིན་གྱི་ཐར་པ་སྐྱེད་པར་བྱེད་དེ། ཉེ་བར་ལེན་
པ་དང་ཉེ་བར་བླང་བྱ་དག་རིགས་མཚུངས་པ་ཁོ་ནའོ་ཞེས་བཤད་དོ། །བརྟག་པ་མིན་པ་རྡོ་རྗེ་ཅན། །གཟུགས་མེད་པར་ནི་བྷ་གའི་ནང་། །ཞེས་པའི་རྟོག་པས་བརྟག་པར་བྱ་བ་མིན་པ་ནི་དེས་མ་བསླད་པའོ། །རྡོ་རྗེ་ཅན་ནི་ལྷན་སྐྱེས་སོ། །གཟུགས་མེད་པར་
ཏེ་གཟུགས་སུ་མེད་པའོ། །བྷ་ག་ནི་ཆོས་འབྱུང་འོད་གསལ་ལོ། །དེའི་ནང་ནི་དེར་ཡེ་ཤེས་དེ་རོ་གཅིག་ཏུ་ཞུགས་པའོ། །གསང་བ་ནི་སྟོང་པ་ཉིད་ཡིན་ལ་དེར་བཞུགས་པ་ནི་ལྷན་སྐྱེས་ཀྱི་ཡེ་ཤེས་སོ། །གསང་བ་དེ་ཡང་ཡེ་ཤེས་མཆོག་སྟེ་དམ་པའི་ཡུལ་
དང་། དེ་ཡུལ་དུ་བྱས་ནས་དགྱེས་པ་སྟེ་བདེ་བ་ཆེན་པོ་བསྐྱེད་པ་དང་། གསང་བ་དེ་ཡང་ཐམས་ཅད་ལ་ཁྱབ་པའི་བདག་ཉིད་དང་། དེར་རྟག་ཏུ་བཞུགས་པ་ནི་དེ་དོར་ནས་གང་དུ་ཡང་མ་བཞུད་པའོ། །འདི་ལ་བཤད་ཚུལ་མང་ཡང་འདིར་ལྷན་སྐྱེས་ཀྱི་ངེས་དོན་
གྱི་བཤད་པ་སྐབས་སུ་བབ་པ་ལྟར་རོ། །ཌཱ་ཎི་ཌ་ཞེས་པ་ནི་ནམ་མཁའ་སྟེ་སྐད་ཀྱི་བྱིངས་ལ་བསྒྱུར་བའོ། །ཨ་ཀི་ནི་གྱ་གྱུར་འགྲོ་བ་སྟེ་ནམ་མཁའ་ལ་ཁྱབ་པར་འགྲོ་བས་ཌཱ་ཀི་ནི་སྟེ་མཁའ་འགྲོ་མ་བཞིའོ། །དེའི་ངེས་དོན་ནི་ནམ་མཁའ་ཤེས་རབ་སྟོང་པ་ཉིད་
9-10-9a


ལ་ཁྱབ་པར་འགྲོ་བའི་ལྷན་སྐྱེས་སོ། །དེའི་དངོས་པོ་ནི་རང་གི་ངོ་བོ་ཡིན་ཏེ། དེ་ཁོ་ན་ཉིད་གསལ་བ་ལས། ཌེ་ནི་ནམ་མཁར་འགྲོ་བ་ཞེས། །སྐད་ཀྱི་བྱིངས་ལས་རྣམ་པར་བརྟགས། །ནམ་མཁའ་ཀུན་ཏུ་རྒྱུ་བས་ན། །མཁའ་འགྲོ་
མ་ཞེས་བྱ་བར་བརྗོད། །མཁའ་འགྲོ་མ་ནི་ཐམས་ཅད་ཀྱི། །རང་བཞིན་ཉིད་ཕྱིར་དེ་ཡི་དངོས། ཞེས་སོ། །དེས་སངས་རྒྱས་ཀུན་དངོས་ཞེས་བྱ་བའི་དོན་ཡང་གོ་བར་བྱའོ། །སེམས་དཔའ་ནི་འཁོར་བ་སྟེ་ཐབས་མཆོག་ཏུ་དགའ་བའི་ངོ་བོ་སྟེ། 
རྡོ་རྗེ་སེམས་དཔའི་སེམས་དཔའི་དོན་ཡང་དེའོ། །རྡོ་རྗེ་ནི་བྱང་ཆུབ་ཀྱི་སེམས་དེ་ཉིད་སྟོང་པ་དང་དབྱེར་མི་ཕྱེད་པའོ། །རྒྱུ་མཚན་དེས་ན་རྩ་བའི་རྒྱུད་ལས། རྡོར་སེམས་ཞེས་པའི་འོག་ཏུ་བདེ་བའི་མཆོག་ཅེས་གསུངས་ཏེ། བདེ་བ་ཆེན་པོ་ནམ་མཁའི་
ཁམས་སྟོང་པ་ཉིད་ཀྱི་ཡུལ་ཅན་དུ་གནས་པ་ནི་བདེ་བ་གཞན་ལས་མཆོག་ཡིན་པའི་ཕྱིར་ཏེ། དེ་ཉིད་གསལ་བ་ལས་སེམས་དཔའ་ཞེས་པའང་འཁོར་བ་ནི། མཆོག་ཏུ་དགའ་བའི་ངོ་བོ་ཡིན། །བྱང་ཆུབ་སེམས་ནི་མི་ཕྱེད་ཕྱིར། །འདི་ལ་རྡོ་རྗེ་སེམས་
དཔར་བརྗོད། །དེ་ཡི་ཕྱིར་ན་དེ་འོག་ཏུ། །བདེ་བའི་མཆོག་ཅེས་རྒྱུད་ལས་གསུངས། །ནམ་མཁའི་ཁམས་སུ་གནས་པས་ཀྱང་། །དེ་ནི་བདེ་བའི་མཆོག་ཏུ་བརྗོད། །ཅེས་གསུངས་ཏེ་རྡོ་རྗེ་མཁའ་འགྲོར་བཤད་པ་གཞན་མཛད་པའང་ཡོད་པས་སྒོ་
གཅིག་ཏུ་མ་ངེས་སོ། །མཆོག་ཏུ་དགའ་བ་འདི་ནི་གདུལ་བྱ་རང་རང་གི་ངོར་རྣམ་སྣང་ལ་སོགས་པའི་སྐུར་འབྱུང་བས་རང་འབྱུང་ངམ་དེ་ཁོ་ན་ཉིད་ཇི་བཞིན་དུ་རྗེས་སུ་ཞུགས་པས་རང་འབྱུང་དང་། སྐལ་བ་ཕུན་ཚོགས་དང་ལྡན་པས་བཅོམ་ལྡན་
9-10-9b


འདས་དང་། མི་མཐུན་ཕྱོགས་རྩད་ནས་འབྱིན་པས་དཔའ་བོ་དང་། དེ་ཁོ་ན་ཉིད་དང་རོ་གཅིག་པས་གཅིག་པུ་དང་། ལུས་ལ་ལྷག་པར་བྱིན་གྱིས་རློབ་ཅིང་གསལ་ཞིང་རིག་པ་དང་སྤྲུལ་པ་རྒྱས་པར་བྱེད་པས་ན་ལྷ་སྟེ་ཆེ་བའི་ལྷ་ཞེས་ཀྱང་བྱའོ། །མཁའ་འགྲོ་མའི་
དྲ་བ་ནི་རྩ་སོ་དྲུག་གི་ཚོགས་ཡིན་ལ། དེས་བསྐུལ་བའི་ཡེ་ཤེས་ནི་སྡོམ་པ་ཞེས་པ་སམ་བྷ་ར་སྟེ་བདེ་བ་མཆོག་གོ། དེ་འདྲ་བའི་ལྷན་སྐྱེས་ནི་དོན་དམ་པར་སྟོང་པ་མ་ཡིན་པ་ལ་མི་དམིགས་ཤིང་ཐ་སྙད་དུ་སྟོང་པ་སྟེ་མེད་པ་ལ་ཡང་དམིགས་པ་
མིན་ནོ། །ཧཱུཾ་ལ་སོགས་པའི་ཡི་གེ་དང་ས་བོན་ནཱ་ད་ཙམ་དུ་ཡང་མི་དམིགས་པ་དང་། དྲི་མས་གོས་པ་སྟེ་བསླད་པ་མེད་ཅིང་། གཟུགས་སུའང་མེད་ཅིང་གཉིས་སྣང་གི་མཚན་མ་ཡང་མེད་པའོ། །མཚན་མ་དང་བཅས་པའི་རྣམ་ཤེས་རང་གི་སེམས་
མཚན་མར་སྣང་བ་མེད་པའི་ཡེ་ཤེས་སུ་བསྐྱེད་པའི་ཚུལ་གྱིས་གཟུང་ངོ་། །ལྟེ་བའི་གནས་སུ་རྡོ་རྗེ་ཅན་སོགས་བཞུགས་ཞེས་པའི་དོན་ནི་བཤད་ཟིན་ལ། རྣམ་པར་རྩེ་བས་ནི་རོལ་པ་དང་། ལུས་རྣམས་ཀུན་ནི་ལུས་ཅན་རྣམས་ཀྱི་ནང་ན་ཞེས་པའི་དོན་
ནོ། །ལྟེ་བའི་དབུས་ན་གནས་པའི་གསང་བ་ནི་སྟོང་པ་ཆེ་ཞེས་པ་ཡིན་ལ། སྤྲོ་བའམ་འབྱིན་པར་བྱེད་པ་ནི་དེའི་བདག་ཉིད་ཀྱི་ལས་ལས་ཀུན་འབྱུང་བ་དང་། མཐར་སྡུད་ས་ཡང་དེར་བྱེད་པའོ། །འཇིག་རྟེན་འདིར་དེ་མེད་པས་མི་འགྲུབ་པ་ནི། ཚེ་འདིར་མཆོག་
ཐོབ་པ་ནི་ལྷན་སྐྱེས་ཀྱི་བདེ་ཆེན་དང་སྟོང་པ་སྦྱར་བའི་མཐུ་ཉིད་དུ་ཟད་པའོ། །འཇིག་རྟེན་གཞན་དུའང་དེ་མེད་པར་མི་འགྲུབ་པ་ནི་སྐྱེ་བ་དུ་མར་བརྒྱུད་ནས་འཚང་རྒྱ་བ་ལ་ཡང་དེ་མེད་པར་མི་འཐོབ་པའོ། །རིག་བྱེད་ཀྱིས་མཚོན་པའི་ཕྱི་རོལ་པའི་གཞུང་དང་རང་
9-10-10a


གི་གྲུབ་པའི་མཐའི་གཞུང་རྣམས་སུ་སྙིང་པོའི་དོན་འཚོལ་བའི་བཙལ་བྱའི་སྙིང་པོའི་དོན་ནི་ཐབས་ཤེས་དབྱེར་མེད་ཀྱི་ལམ་འདི་ཉིད་ཡིན་པར་རྣལ་འབྱོར་བླ་མེད་ཀྱི་གཞུང་རྣམས་ལས་བཤད་དོ། །ཞེས་ངེས་པའི་དོན་མཐར་ཐུག་པའི་
ལམ་དུ་གསུངས་སོ། །སྙིང་པོའི་ཐབས་ཤེས་དབྱེར་མེད་དེ་ཡང་གསལ་བར་དཔལ་བདེ་མཆོག་འབྱུང་བ་ལས་གསུངས་ཏེ། དངོས་པོ་མེད་པའི་ཆོས་རྣམས་ལ། །བླང་དང་དོར་བ་ག་ལ་ཞིག །བླང་བྱ་དང་ནི་དོར་བྱ་ཡི། །ཆོས་ཀུན་རྨི་ལམ་ཇི་བཞིན་ནོ། །དགའ་བ་
ཡོངས་སུ་ཤེས་པ་ཡིས། །ཤེས་རབ་ཕ་རོལ་ཕྱིན་པ་མཆོག །དགའ་བའི་འབྲས་བུ་ལ་གནས་པ། །འདི་ནི་དངོས་མེད་བྱང་ཆུབ་པོ། །གཉིས་པོ་རོ་གཅིག་དབྱེར་མེད་པར། །དགའ་བའི་བདེ་བ་ཆེན་པོ་ཉིད། །ཤེས་རབ་སྙིང་རྗེའི་དབྱེ་བ་ནི། །སྒྲོན་མེ་དང་ནི་འོད་ཟེར་
བཞིན། །འདི་གཉིས་མི་ཕྱེད་བདག་ཉིད་དོ། །རོ་གཅིག་དངོས་པོའི་སེམས་ཡིན་ནོ། །ཤེས་རབ་ཐབས་ནི་མཉམ་སྦྱོར་བས། །རྫོགས་པའི་བྱང་ཆུབ་སྒྲུབ་བྱེད་པ། །དེ་ཉིད་ལ་ནི་བླ་མེད་པའི། །སངས་རྒྱས་ཀུན་རྣམས་རབ་ཏུ་གཞུག །དབྱེར་མེད་རྣམ་པར་
ཡང་དག་རིག །གང་ཞིག་གནས་ན་རྡོ་རྗེ་སེམས། །ཇི་སྲིད་རྫོགས་བྱང་ཆུབ་པར་འགྱུར། །བདེ་བས་སྡོམ་པར་བྱས་ནས་ནི། །སྒྲུབ་པོ་བདེ་མཆོག་རྫོགས་པར་དུ། །དེ་སྲིད་དེ་ནི་མྱོང་བར་འགྱུར། །ཞེས་གསུངས་སོ། །རང་བཞིན་གྱིས་གྲུབ་པ་མེད་པའི་ཆོས་
རྣམས་བླང་དོར་གྱི་རང་བཞིན་གྱིས་སྟོང་ཡང་དེར་སྣང་བ་རྨི་ལམ་གྱི་བླང་དོར་བཞིན་དུ་ཡོངས་སུ་ཤེས་པའི་དགའ་བ་སྟེ་བདེ་བ་ཆེན་པོ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །མཆོག་ནི་ཡུལ་ཅན་བདེ་བ་ཆེན་པོས་མ་བྱས་པའི་སྟོང་ཉིད་རྟོགས་པ་ལས་ཁྱད་
9-10-10b


པར་འཕགས་པའོ། །དགའ་བ་བདེ་ཆེན་གང་གི་དོན་དུ་བསྐྱེད་པའི་འབྲས་བུ་སྟེ་དགོས་པ་ནི་བདག་མེད་པའི་དེ་ཉིད་བསྒོམ་པའི་ཕྱིར་ཡིན་པས་བདེ་ཆེན་བསྐྱེད་ནས་དེ་ཁོ་ན་ཉིད་ཀྱི་དོན་ལ་རྩེ་གཅིག་ཏུ་གནས་པའི་རྟོགས་པ་ནི་རང་བཞིན་མེད་པའི་དོན་བསྒོམ་
པའོ། །འགྱུར་གསར་ལས། དགའ་བའི་འབྲས་བུ་ལ་གནས་པ། །རྟོག་པ་དེ་དག་རང་བཞིན་བྲལ། ཞེས་འབྱུང་ངོ་། །རང་བཞིན་མེད་པའི་སྟོང་པ་དང་བདེ་བ་ཆེན་པོ་གཉིས་རོ་གཅིག་པ་དབྱེར་མེད་པའི་ཤེས་རབ་དང་སྙིང་རྗེའོ། །དེ་གཉིས་ཀྱི་དབྱེ་བ་ནི་སྒྲོན་
མེ་དང་དེའི་སྣང་བ་བཞིན་ངོ་བོ་གཅིག་ལ་ལྡོག་པ་ཐ་དད་པ་ཙམ་སྟེ་སྙིང་རྗེ་བདེ་ཆེན་དང་ཤེས་རབ་སྟོང་ཉིད་རྟོགས་པ་གཉིས་སེམས་གཅིག་གི་དངོས་པོར་སྦྱོར་རོ། །དེ་འདྲ་བའི་ཐབས་ཤེས་དབྱེར་མེད་དུ་སྦྱར་ནས་རྫོགས་པའི་བྱང་ཆུང་སྒྲུབ་པ་ནི་སངས་རྒྱས་
མཐའ་དག་གང་ལ་གནས་ནས་བྱང་ཆུབ་སྒྲུབ་པའི་ལམ་གང་ན་མེད་པ་ཞེས་བྱ་སྟེ། འགྱུར་གསར་ལས། དེ་ཉིད་སངས་རྒྱས་མཐའ་དག་གི། །རབ་ཏུ་གནས་པ་བླ་ན་མེད། །ཅེས་འབྱུང་ངོ་། །དེ་ལ་རྡོ་རྗེ་དང་སེམས་དཔའི་དོན་ཚང་བ་ནི་སྔར་བཤད་པ་ལྟར་རོ། །
དེ་འདྲ་བའི་ལམ་གྱིས་ཆོས་ཐམས་ཅད་ལྷན་སྐྱེས་ཀྱི་ངོ་བོར་བསྡོམས་ནས་བགྲད་པ་ནི་དཔལ་བདེ་མཆོག་མ་ཐོབ་ཀྱི་བར་དུ་བྱེད་དོ། །ཞེས་ལམ་འདི་ཉིད་བགྲོད་པ་གཅིག་པར་སྟོན་པའོ། །འདི་བདེ་བར་གཤིགས་པའི་ལམ་མཆོག་ལ་ཕྱག་འཚལ་བའི་སྐབས་
སུ་གསུངས་པས་སྔར་བཤད་པའི་ལམ་གྱི་སྙིང་པོ་ནི་འདི་ཉིད་དུ་ཡིད་ཆེས་པར་བྱའོ། །ལམ་གྱི་སྙིང་པོ་ལ་སྣང་ཕྱོགས་སྒྱུ་མའི་ལུས་ཀྱི་རྫོགས་རིམ་གྱི་ཏིང་ངེ་འཛིན་ཡང་དགོས་མོད་ཀྱང་། རྣལ་འབྱོར་མའི་རྒྱུད་རྣམས་སུ་སྟོང་ཕྱོགས་བདེ་སྟོང་སྦྱོར་བའི་
9-10-11a


ལམ་ཉིད་རྩལ་དུ་བཏོན་ནས་གཙོ་བོར་འཆད་པ་ལྟར་ཏེ་འོན་ཀྱང་དེ་ནི་འཆད་པར་འགྱུར་རོ། །གཞན་ཡང་དེ་སྲིད་དེ་ནི་མྱོང་བར་འགྱུར། ཞེས་པའི་མཇུག་ཐོགས་སུ་སླར་ཡང་བདེ་སྟོང་གི་ཐབས་ཤེས་གསུངས་པ་ནི། སྒྱུ་མའི་རྫུ་
འཕྲུལ་ཚོགས་པ་རྣམས་ལ་དེ་ཤེས་ཇི་བཞིན་ཉིད། །སྐྱེ་དང་དགའ་བ་མཐའ་དག་མཉམ་པ་ཉིད་དུ་རབ་སྤྱོད་ཅིང་། །འཇིགས་དང་འཇིགས་པར་བྱེད་མེད་བདེ་བ་འབྱུང་བའང་ཡོད་མ་ཡིན། །དེ་ལྟར་རྣལ་འབྱོར་པ་ནི་རང་བཞིན་དེ་བཞིན་ཉིད་རྗེས་འགྲོ། ཞེས་
བདེ་བ་དང་དེ་སྐྱེད་བྱེད་དང་འཇིགས་པ་དང་དེ་བསྐྱེད་པའི་བྱ་བྱེད་ཐམས་ཅད་སྒྱུ་མ་ཤེས་པའི་སྒྱུ་མ་མཁན་ལ་སྒྱུ་མར་སྣང་བ་ལྟར། རང་བཞིན་གྱིས་གྲུབ་པ་མེད་བཞིན་དུ་དེར་སྣང་བར་ཤེས་པར་བྱས་ནས་རྣལ་འབྱོར་པ་དེ་བཞིན་ཉིད་ཀྱི་རང་བཞིན་ཇི་ལྟར་
གནས་པ་དེའི་རྗེས་སུ་འགྲོ་བར་སློབ་པའི་ཤེས་རབ་དང་། ཡང་དེའི་མཇུག་ཏུ། ཨེ་མའོ་བདེ་ཆེན་འདོད་པ་ཡིས། །ས་གསུམ་པོ་ནི་གང་བ་སྟེ། །ཨེ་མའོ་ཞི་བའི་བདེ་བ་འབབ། །སྣ་ཚོགས་ཁོང་དུ་ཆུད་ཅིང་རྒྱས། །ཨེ་མའོ་བདེ་བ་བདེ་ཆེན་པོ། །
ཨེ་མའོ་ཇི་ལྟར་ཇི་ལྟར་བཟའ། །ཨེ་མའོ་ལྷན་སྐྱེས་བདག་ཉིད་ཆེ། །ཆོས་རྣམས་ཀུན་གྱི་རང་བཞིན་ཉིད། ཅེས་རྐང་པ་གཉིས་གཉིས་ཀྱི་དགའ་བ་རེ་རེ་སྟོན་ཞིང་། དེ་ལའང་ཨེ་མའོ་ཞེས་ཤིན་ཏུ་ངོ་མཚར་བར་གསུངས་པ་ནི་སྔར་བཤད་པའི་
སྟོང་པ་དང་འདི་གཉིས་སྦྱར་ཏེ་བསྒོམས་པས་རྣལ་འབྱོར་པའི་ཡིད་འཕྲོག་པར་སྟོན་པའང་ཡིན་པས་ལམ་འདི་འདྲ་བ་ལ་ཤིན་ཏུ་ངོ་མཚར་བ་བསྐྱེད་པར་བྱའོ། །གཉིས་པ་སོ་སོར་ཕྱེ་སྟེ་བཤད་པ་ལ་གསུམ། ཤེས་རབ་སྟོང་པའི་ཕྱོགས་བཤད་པ་
9-10-11b


དང་། ཐབས་བདེ་བའི་ཕྱོགས་བཤད་པ་དང་། ཐབས་ཤེས་གཉིས་མཉམ་པར་སྦྱོར་བའི་ཚུལ་བཤད་པའོ། །དང་པོ་ནི། རྩ་རྒྱུད་ལས་རྒྱུད་ཀྱི་དོན་གྱི་གཙོ་བོ་རྣམས་དེ་ཉིད་བཅུ་བཞིར་བསྡུས་པའི་སྐབས་སུ། རྒྱུ་སོགས་སྟོང་པ་སྔོན་འགྲོ་བས། ཞེས་
གསུངས་པ་ནི་ཀུན་སྤྱོད་ལས། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཡིན། །རུ་ནི་བཀོད་དང་བྲལ་བ་སྟེ། །ཀ་ནི་གང་དུའང་མི་གནས་པ། ཞེས་གསུངས་པ་དེ་ཡིན་ལ། དེའི་དོན་ནི་མཁའ་འགྲོ་རྒྱ་མཚོ་ལས། ཨེ་ཝཾ་ལ་སོགས་གཉིས་
མེད་པའང་། །ཤྲཱི་ཞེས་བྱ་བའི་ཡིག་ངེས་བརྗོད། །ཧེ་ཡིག་སྙིང་ཁ་ནས་ཀུན་ཏུ། །ཧེ་རུ་ཀ་སོགས་རབ་འཁོར་འགྲོ། སྒོམ་པ་ཀུན་གྱི་འབྱུང་གནས་ལས། །འཛིན་པ་ལ་སོགས་རྣམས་བསྐྱེད་འགྱུར། །དེ་ནི་རྒྱུ་སྟོང་བདག་ཉིད་དེ། །རྒྱུའི་བདག་ཉིད་དུ་མི་རྟོག་
པའོ། །རང་བཞིན་ཆོས་བདག་མེད་པ་ཉིད། །དེ་ནི་སྟོང་པའི་རྣལ་འབྱོར་གནས། །བཀོད་པ་གང་དག་བདག་མེད་པ། །རྟོག་པའི་དྲ་བ་ཆེན་པོ་ནི། །རུ་ཡིག་རྐྱེན་གྱི་བདག་ཉིད་ཅན། །དེ་ནི་བདག་གི་བཀོད་བྲལ་བའོ། །སླར་བརྗོད་ཀ་ནི་མ་ལུས་པའི། །བདག་གིས་
གཉིས་བྱར་མེད་ཤེས་གང་། །གང་ཕྱིར་ཅི་ལའང་མི་གནས་པ། །དེ་ཕྱིར་ཀ་ཞེས་བྱ་བར་བརྗོད། ཅེས་ཧེས་ཆོས་ཀྱི་བདག་མེད་དང་། །རུས་གང་ཟག་གི་བདག་མེད་དེ་ཡུལ་བདག་མེད་གཉིས་དང་། ཀས་ཡུལ་ཅན་གྱི་ཡེ་ཤེས་དང་། ཤྲཱིས་དེ་གཉིས་
དབྱེར་མི་ཕྱེད་པར་སྟོན་ཏེ། མདོར་ན་བདག་མེད་གཉིས་རྟོགས་པའི་ཤེས་རབ་བོ། །བདེ་མཆོག་འབྱུང་བ་ལས་ཀྱང་། འགྲོ་བ་ཆུ་ཡི་ཟླ་བ་དེ་བཞིན་མཐོང་འགྱུར་ཞིང་། །ཐོས་པ་དང་ནི་བྲག་ཆ་གཅིག་ཏུ་ཡང་དག་འཇུག །སེམས་ཀྱང་མྱ་ངམ་སྨིག་
9-10-12a


རྒྱུ་ལྟ་བུར་བལྟ་བྱ་ཞིང་། །བཟའ་དང་བཏུང་བ་ནམ་མཁའ་ལྟ་བུར་གང་གི་ཚེ། །བསྣམ་པ་དག་ནི་ནམ་མཁའི་མེ་ཏོག་དྲི་ལྟ་བུ། །ཟླ་བ་ཉི་མ་ཇི་བཞིན་སྐོར་བར་བྱེད་པའི་ཡིད། །ཡང་དག་གནས་པ་རྣམས་ཀྱང་རི་རབ་དེ་མཚུངས་
ཏེ། །དམིགས་པ་གཞོན་ནུ་མ་ཡི་རྨི་ལམ་ཇི་བཞིན་ནོ། །ཐ་སྙད་དག་ནི་སྒྱུ་མ་མིག་འཕྲུལ་ལྟ་བུར་གནས། །དེ་ལྟར་ཇི་བཞིན་ལྷན་སྐྱེས་བདེ་འབྱུང་དེ་བཞིན་དུ། །དངོས་པོའི་རང་བཞིན་དང་བྲལ་བསམ་གྱིས་མི་ཁྱབ་ཚུལ། །རྟག་ཏུ་འཆར་བ་བདེ་
གཤེགས་ལམ་མཆོག་ཕྱག་འཚལ་བསྟོད། །ཅེས་མཐོང་བའི་གཟུགས་རྣམས་ཆུ་ཟླ་དང་། ཐོས་པའི་སྒྲ་རྣམས་བྲག་ཆ་དང་། བསྣམས་པའི་དྲི་རྣམས་ནམ་མཁའི་མེ་ཏོག་གི་དྲི་དང་། བཟའ་བཏུང་གི་རོ་རྣམས་ནམ་མཁའ་དང་། རེག་བྱ་རྣམས་
གཞོན་ནུ་མས་རྨི་ལམ་དུ་རྨིས་པའི་རེག་བྱ་བཞིན་དང་། དྲུག་པ་ཡིད་ཀྱི་སེམས་ཀྱི་ཡུལ་རྣམས་སྨིག་རྒྱུའི་ཆུ་དང་མཚུངས་པར་ལེགས་པར་ཤེས་ནས། ཉི་ཟླ་བཞིན་དུ་ཅུང་ཟད་ཀྱང་མི་སྡོད་པར་ཡུལ་ལ་རྒྱུག་པའི་ཡིད་ནི། །རང་བཞིན་མེད་
པའི་དོན་གཏན་ལ་ཕབ་པའི་ལྟ་ཐོག་ཏུ་རི་རབ་དང་འདྲ་བར་མི་གཡོ་བར་ཡང་དག་པར་གནས་པར་བྱས་ནས་མཉམ་གཞག་ཏུ་བསྐྱངས་པའི་མཐུས་རྗེས་ཐོབ་ཏུ་ཐ་སྙད་གང་འདོགས་ཐམས་ཅད་སྒྱུ་མ་དང་མིག་འཕྲུལ་བཞིན་དང་། ཡུལ་
སྣང་གང་ཤར་ཐམས་ཅད་གཞོན་ནུ་མས་རྨི་ལམ་དུ་བདེ་བ་མྱོང་བ་བཞིན་དུ་བདེ་བ་ཆེན་པོའི་ངོ་བོར་འཆར་བར་བྱ་བ་དང་། སྔར་བཤད་པ་དེ་ལྟར་དཔེ་དེ་རྣམས་བཞིན་དུ་དངོས་པོ་རྣམས་རང་བཞིན་གྱིས་གྲུབ་པ་དང་བྲལ་བའི་ཡུལ་གྱི་
9-10-12b


གནས་ཚུལ་ཇི་འདྲ་བ་དེ་བཞིན་དུ་ལྷན་སྐྱེས་ཀྱི་བདེ་བ་འབྱུང་བ་ཡང་དེ་ཁོ་ན་ཉིད་ལ་རྗེས་སུ་ཞུགས་པར་རྟག་ཏུ་འཆར་བའི་བདེ་བར་གཤེགས་པའི་སར་བགྲོད་པའི་ལམ་རྣམས་ཀྱི་ནང་ནས་མཆོག་ཏུ་གྱུར་པ་དེ་ལ་ཕྱག་འཚལ་ལོ་ཞེས་སྔར་བཤད་
པའི་ཐབས་ཤེས་རྒྱས་བཤད་ཀྱི་སྐབས་སུ་གསུངས་སོ། །རྡོ་རྗེ་མཁའ་འགྲོ་ལས་ཀྱང་། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ནི་མཚན་ཉིད་མེད། །ཁམས་གསུམ་པ་ནི་མ་ལུས་པའི། །འགྲོ་ཀུན་སྒྱུ་མ་ལྟ་བུ་ཡིན། །བརྟན་
པ་དང་ནི་གཡོ་བ་ཡི། །འགྲོ་བ་དམིགས་སུ་མེད་པ་སྟེ། །མཐོང་བ་དང་ནི་རེག་པའི་དངོས། །ཐམས་ཅད་སྒྱུ་མ་ཇི་བཞིན་ནོ། །གང་གིས་བླུན་པོ་འཆིང་གྱུར་པ། །འདིར་དེས་མཁས་རྣམས་རྣམ་པར་རོལ། །ཕྱག་རྒྱའི་སྦྱོར་བ་འདི་ཡིས་ནི། །ས་གསུམ་མ་ལུས་
བཟའ་བར་བྱ། །གཞན་དུ་གལ་ཏེ་སྦྱོར་བ་ནི། །མ་ཚང་མར་མེ་ལྟ་བུར་འདའ། །ཞེས་དང་། གང་ཚེ་འདུས་བྱས་ཚུལ་རྣམས་ནི། །རྣམ་པར་མི་རྟོག་སེམས་ཀྱིས་སུ། །མེ་ལོང་ལྟ་བུར་རབ་ཤེས་པ། །དེ་ནི་ཤེས་རབ་བརྟན་པ་ཡིན། །གློག་དང་ཆུ་བུར་ལྟར་
སྨིན་པ། །གང་ཚེ་འདུས་བྱས་ཚུལ་རྣམས་ནི། །གང་གིས་ཇི་ལྟར་མཐོང་གྱུར་པ། །དེ་ནི་ཤེས་རབ་བརྟན་པ་ཡིན། །མེ་ལོང་ནང་གི་གཟུགས་བརྙན་དང་། །རྨི་ལམ་སྒྱུ་མ་དྲི་ཟའི་གྲོང་། །མིག་འཕྲུལ་མཚུངས་པར་གང་གིས་མཐོང་། །དེ་ནི་གཙོ་བོ་ཡིན་
པར་བརྗོད། ཅེས་གསུངས་སོ། །དེ་ལ་ནམ་མཁའ་ནི་ཐོགས་པའི་རེག་བྱ་བཀག་ཙམ་གྱི་མིང་ཙམ་ཡིན་པས་མཚན་ཉིད་གཞན་མེད་པ་བཞིན་དུ་ཕུང་པོ་ལ་སོགས་པའི་ཆོས་ཐམས་ཅད་ཀྱང་ནམ་མཁའི་མཚན་ཉིད་དེ་མིང་ཙམ་པ་ཡིན་ནོ། །འོན་ཀྱང་
9-10-13a


ནམ་མཁའ་ནི་དོན་བྱེད་པའི་ནུས་པས་སྟོང་པ་དང་མི་འདྲ་བས་ཁམས་གསུམ་མ་ལུས་པའི་འགྲོ་བ་ཀུན་ནི་རྫུན་པ་ཡིན་ཀྱང་དོན་བྱེད་པའི་ནུས་པ་དང་ལྡན་པའི་སྒྱུ་མ་ལྟ་བུ་ཡིན་ཏེ། སྣོད་བཅུད་ཀྱི་འགྲོ་བ་རྣམས་ལ་དེ་ཁོ་ན་
ཉིད་ལ་དཔྱོད་པའི་རིགས་པས་དཔྱད་ན་འགའ་ཡང་དམིགས་སུ་མེད་ལ། འོན་ཀྱང་རང་རང་གི་བྱ་བ་བྱེད་པ་ལ་མི་བསླུ་བས་མཐོང་བ་མྱོང་བ་དང་། རེག་པ་སྣང་བ་ཐམས་ཅད་ནི་སྒྱུ་མ་ཇི་ལྟ་བ་བཞིན་དུ་ཤེས་པར་བྱའོ། །གཡོ་བའི་འགྲོ་བ་རང་བཞིན་
མེད་པ་ནི་གང་ཟག་གི་བདག་མེད་དང་། བརྟན་པའི་འགྲོ་བ་དང་ནང་གི་ཕུང་སོགས་ཀྱི་ཆོས་རང་བཞིན་མེད་པ་ནི་ཆོས་ཀྱི་བདག་མེད་དེ། འདི་ལ་འགྲོ་བ་ཞེས་པ་ནི་སྐད་ཅིག་གིས་མི་སྡོད་པར་འགྲོ་བ་ལ་དགོངས་ནས་སོ། །འདོད་ཡོན་ལ་ཆགས་པ་
གང་གིས་བླུན་པོ་འཁོར་བར་འཆིང་བ་དེས་ཐེག་པ་བླ་ན་མེད་པ་འདིར་དེ་ཁོ་ན་ཉིད་ལ་མཁས་པ་རྣམས་ཕྱག་རྒྱ་ལ་སོགས་པའི་ཡུལ་ལ་རྣམ་པར་རོལ་བར་བྱེད་དོ། །དེ་ལྟར་ཕྱག་རྒྱ་མ་དང་མཉམ་པར་སྦྱར་བ་ལ་བརྟེན་ནས་བདག་མེད་པའི་
དོན་བསྒོམ་པ་འདི་ཡིས་ནི་ས་གསུམ་པོ་མ་ལུས་པ་བཟའ་བ་སྟེ་འོད་གསལ་དུ་བཅུག་སྟེ་མི་སྣང་བར་བྱའོ། །འོ་ན་ཕྱག་རྒྱའི་སྦྱོར་བ་དང་བྲལ་བའི་སྟོང་ཉིད་ཀྱི་རྣལ་འབྱོར་གྱིས་སྣང་བ་ཐམས་ཅད་འོད་གསལ་དུ་སྡུད་པ་ལའང་འདི་དང་འདྲ་འམ་ཞེ་ན། 
གལ་ཏེ་ཕྱག་རྒྱ་དང་སྦྱོར་བ་ལས་གཞན་དུ་སྟོང་པ་ཉིད་ཀྱི་སྦྱོར་བ་སྟེ་རྣལ་འབྱོར་ཉིད་ལ་འདྲིས་པར་བྱེད་ན། མར་མེ་ཤི་བ་ལྟར་ཉོན་མོངས་ཙམ་ཟད་པའི་མྱ་ངན་ལས་འདས་པའི་མཐར་ལྷུང་གི་སངས་རྒྱས་མི་འཐོབ་བོ། །ཕར་ཕྱིན་གྱི་ཐེག་ཆེན་དུ་
9-10-13b


ཕྱག་རྒྱའི་སྦྱོར་བ་ལ་བརྟེན་ནས་མི་བསྒོམ་ཡང་སྟོང་ཉིད་བསྒོམས་པས་ཞི་མཐར་མི་ལྟུང་བ་ནི་བསོད་ནམས་ཀྱི་ཚོགས་ཀྱི་དབྱེ་བ་མཐའ་ཡས་པའི་རྒྱ་ཆེན་པོ་ལ་བསླབས་པའི་དབང་གིས་ཡིན་ལ། དེ་ལྟར་སློབ་ནའང་ཟབ་པ་དང་རྒྱ་ཆེ་བ་གཉིས་
ཀྱི་ནང་ནས་སྔ་མ་ལ་གཙོ་བོར་མི་སློབ་ཀྱི་ཕྱི་མ་གཙོ་བོར་སློབ་པ་ཡང་ཞི་བའི་མཐར་ལྟུང་བ་འགོག་པའི་ཕྱིར་ཡིན་ནོ། །ཐེག་པ་དེར་སྟོང་པ་ཉིད་ཀྱི་ལྟ་བ་མཚན་ཉིད་རྫོགས་པར་ཡོད་ཅིང་། གང་ཟག་གི་ཁྱད་པར་འགའ་ཞིག་ལ་ཤེས་རབ་མའི་
འདོད་ཡོན་ལ་སྤྱོད་པ་གནང་བ་ཡོད་ཀྱང་། བདེ་སྟོང་སྦྱོར་འདོད་ནས་བྱེད་པ་གཏན་མིན་པ་དང་དབང་དང་དམ་ཚིག་ཐུན་མོང་མ་ཡིན་པས་སྣོད་རུང་དུ་བསྒྲུབ་པ་དང་། ཡུལ་རྟེན་གཉིས་སྔགས་དང་ལྷའི་རྣལ་འབྱོར་ལ་སོགས་པས་སྦྱངས་པའི་ཐབས་
མཁས་ཀྱང་མེད་པས། ལམ་དེར་ཕྱག་རྒྱའི་སྦྱོར་བས་ས་གསུམ་བཟའ་བར་བྱ་ཞེས་མི་གསུང་ངོ་། །ཉན་རང་གི་ལམ་དུ་ནི་རྒྱ་ཆེ་བའི་ཐབས་ལ་སློབ་པ་ཡང་མེད་ལ། ལྷན་སྐྱེས་ཀྱི་བདེ་བས་སྟོང་ཉིད་བསྒོམ་པའི་སྐོར་ཡང་མེད་པས་སྟོང་པ་ཉིད་
ཀྱི་རྣལ་འབྱོར་ལ་གཙོ་བོར་འདྲིས་པར་བྱེད་ན། མ་ཚང་མར་མེ་ལྟ་བུར་འདའ། ཞེས་གསུངས་སོ། །དཔལ་རྡོ་རྗེ་མཁའ་འགྲོའི་གཞུང་དེ་རྣམས་ལ་རྣམ་དཔྱོད་ཅན་གྱིས་བརྟགས་ན་ཐེག་པ་ཆེ་ཆུང་གཉིས་ཀྱི་འབྱེད་བྱེད་ཀྱི་གཙོ་བོ་ནི་སྟོང་ཉིད་
རྟོགས་པའི་ཤེས་རབ་ཀྱིས་མི་བྱེད་ཀྱི་ཐབས་ཀྱིས་བྱེད་པ་དང་། དེ་ཡང་ཕར་ཕྱིན་གྱི་ཐེག་པར་ནི་ཚོགས་ཀྱི་གསལ་བའི་དབྱེ་བ་མཐའ་ཡས་པའི་རྒྱ་ཆེ་བའི་ཐབས་ཀྱིས་ཁྱད་པར་དུ་འཕགས་པ་དང་། དེ་དང་ཐེག་པ་བླ་ན་མེད་པ་གཉིས་ཀྱང་ཤེས་རབ་
9-10-14a


སྟོང་པ་ལ་མཆོག་དམན་འབྱུང་བ་མིན་གྱི་གཏན་ལ་ཕབ་པའི་སྟོང་ཉིད་ཡུལ་ཅན་བདེ་བ་ཆེན་པོས་བསྒོམ་པའི་ཐབས་མཁས་ཀྱིས་ཁྱད་པར་དུ་འཕགས་པ་དང་། རྒྱུ་ཆེ་བའི་སློབ་ཚུལ་སྔར་ལྟར་མ་བྱས་ཀྱང་བདེ་ཆེན་གྱིས་སྟོང་ཉིད་
བསྒོམས་པས་ཞི་བའི་མཐར་ལྟུང་བ་འགོག་པས་ཡུལ་ཅན་ཁྱད་པར་ཅན་གྱིས་སྟོང་ཉིད་བསྒོམས་ན་དེ་ཉིད་ལ་གཙོ་བོར་བསྐྱངས་པས་ཆོག་པ་དང་། དེ་བསྒོམས་པས་ཉོན་སྒྲིབ་ཏུ་མ་ཟད་ཤེས་སྒྲིབ་སྤངས་པའི་མཆོག་གི་དངོས་གྲུབ་ཀྱང་ཚེ་འདིར་འགྲུབ་
པར་གོ་ནུས་པས་ལམ་གྱི་གནད་རྣམས་ལ་རྐང་ཚུགས་པའི་ངེས་པ་རྙེད་པར་འགྱུར་རོ། །བྷ་ཝ་བྷ་དྲས། ཕྱག་རྒྱའི་སྦྱོར་བ་འདི་ཡིས་ནི། །ཞེས་པ་དང་། གཞན་དུ་མ་ཚང་ཞེས་པའི་གང་མ་ཚང་བ་ལྷའི་རྣལ་འབྱོར་ལ་བཤད་པ་ཡང་སྔར་བཤད་
པའི་དོན་གྱི་ཕྱོགས་གཅིག་ཡིན་ལ། གཙོ་བོའི་དོན་སྔར་བཤད་པ་ལྟར་བྱ་དགོས་པ་ནི་གང་གིས་ཞེས་པའི་རྐང་པ་གཉིས་དང་སྦྱར་བ་ལས་ཤིན་ཏུ་གསལ་ལོ། །ཤེས་རབ་སྟོང་པའི་ཕྱོགས་བཤད་པའི་སྐབས་འདིར་ཐབས་བདེ་བའི་ཕྱོགས་བཤད་པའི་སྐབས་སུ་
བཤད་རྒྱུ་འགའ་ཞིག་བཤད་པ་ནི་དོན་གྱི་ཕྱོགས་གཅིག་ཡིན་ལ། རྒྱུད་ཀྱི་ལུང་འདྲེན་སོ་སོར་མ་ཕྲལ་བར་དྲངས་ན་གོ་བ་ཆེ་བའི་གནད་ཀྱིས་ཡིན་ནོ། །གང་གི་ཚེ་འདུས་བྱས་རྣམས་མེ་ལོང་གི་གཟུགས་བརྙན་ལྟར་རབ་ཏུ་ཤེས་པ་དེའི་ཚེ་ཤེས་རབ་བརྟན་པ་
ཡིན་ཞེས་པ་ནི། དེའི་གོང་དུ། གང་ཡང་ལས་རྣམས་ཐམས་ཅད་ལ། །ཤེས་རབ་དང་ནི་སྦྱར་བྱ་སྟེ། །དེ་ཡང་སྟོང་པའི་གནས་སུ་སྦྱར། །དེ་འདིར་བདག་ཆེན་དཀའ་ཐུབ་ཡིན། །ཞེས་ལས་གང་བྱེད་པ་ལ་དུས་ཀུན་ཏུ་སྟོང་ཉིད་རྟོགས་པའི་ཤེས་རབ་ཀྱིས་ཟིན་
9-10-14b


པར་བྱ། ཞེས་པ་དང་། ཤེས་རབ་ཐབས་ནི་མ་གཏོགས་པར། །གང་ཚེ་སེམས་གཞན་མི་གཡོ་ན། །དེ་ཚེ་བྱང་ཆུབ་ཆེན་པོ་ནི། །ངེས་པར་སྟེར་བ་ཉིད་དུ་བཤད། །ཅེས་ཐབས་ཤེས་མཉམ་པར་སྦྱོར་བ་དང་མ་བྲལ་ན་ངེས་པར་སངས་རྒྱས་སྟེར་ཞེས་གསུངས་པའི་
ཤེས་རབ་དང་སྦྱོར་བ་དང་། ཤེས་རབ་སྟོང་པ་དེ་ཇི་འདྲ་ཞིག་ལ་བྱེད་སྙམ་པ་ལ་དེ་ལྟར་གསུངས་པའོ། །ཆུ་བུར་ལྟ་བུར་སྨིན་པ་ནི། །རྒྱུ་རྐྱེན་གྱིས་དེ་དང་འདྲ་བར་བསྐྱེད་པའོ། །འདུས་བྱས་ནི་གཟུགས་བརྙན་སོགས་དང་འདྲ་བར་རྟོགས་པར་བྱ་རྒྱུ་དང་། རྟོགས་
པའི་ཐབས་གཉིས་སུ་བྱ་སྟེ་དང་པོ་ནི་སྣོད་བཅུད་རྣམས་སོ། །གཉིས་པ་ནི། རང་རང་གི་རྒྱུ་རྐྱེན་འདུས་ནས་བྱས་པའི་ཕྱིར་རང་བཞིན་གྱིས་གྲུབ་པ་མེད་དེ། གཟུགས་བརྙན་ལ་སོགས་པ་བཞིན་ནོ་ཞེས་པ་སྟེ་རྟེན་འབྲེལ་གྱི་རིགས་པའོ། །དངོས་པོ་རྣམས་
བདེན་པར་མ་གྲུབ་པ་གཟུགས་བརྙན་དང་སྒྱུ་མ་ལ་སོགས་པ་དང་འདྲའོ་སྙམ་པ་ཙམ་མ་གཏོགས་པ་སྒྲུབ་བྱེད་ཀྱི་རིགས་པ་མེད་ན་ཚིག་ཙམ་དུ་ཟད་པས་ཡང་དག་པའི་ལྟ་བ་མི་རྙེད་པས་སྒྲུབ་བྱེད་ཀྱི་རིགས་པས་ལུང་གི་དོན་གཏན་ལ་ཕབ་པའི་ངེས་པ་བསྐྱེད་
དགོས་སོ། །དེ་ཡང་རྡོ་རྗེ་མཁའ་འགྲོའི་འགྲེལ་པར། གཅིག་དང་དུ་བྲལ་གྱི་རིགས་པས་རྒྱས་པར་གཏན་ལ་ཕབ་པས་གཅིག་དང་དུ་བྲལ་ལམ་རྟེན་འབྲེལ་ལ་སོགས་པའི་རིགས་པས་གཏན་ལ་ཕབ་པ་སྟེ་གཞན་དུ་རྒྱས་པར་བཤད་ཟིན་ཏོ། །མེ་ལོང་ནང་
གི་གཟུགས་བརྙན་དང་། ཞེས་སོགས་ཀྱི་རྐང་པ་བཞི་ནི་རིམ་ལྔའི་བདག་བྱིན་རླབས་ཀྱི་རིམ་པར་ཡང་འབྱུང་བས་སྒྱུ་མ་ལྟ་བུར་ཤེས་པར་བྱ་བར་ཐེག་པ་འདིར་གསུངས་ལ། སྣང་ལ་རང་བཞིན་མེད་པའི་སྒྱུ་མ་ལྟ་བུ་རྣལ་འབྱོར་བླ་ན་མེད་པ་དང་ཕར་ཕྱིན་
9-10-15a


གྱི་ཐེག་པ་གཉིས་ཐུན་མོང་བ་སྤྱི་དོན་གྱི་སྒྱུ་མ་ལྟ་བུ་དང་འཕགས་པ་ཡབ་སྲས་ཀྱིས་གསུངས་པའི་བདག་བྱིན་རླབས་སྒྱུ་ལུས་ལྟ་བུ་སྦས་དོན་གྱི་སྒྱུ་མ་ལྟ་བུ་གཉིས་ཡོད་པ་སོ་སོར་ཕྱེད་པ་གལ་ཆེའོ། །དེ་ནི་གཙོ་བོ་ཡིན་ཞེས་
པ་ནི་སྒྱུ་མ་ལྟ་བུ་སྔ་མ་མ་རྟོགས་ན་ཐམས་ཅད་མཁྱེན་པ་ལྟ་ཞོག་འཁོར་བ་ལས་ཐར་བ་ཡང་མི་འཐོབ་པས་ལམ་གྱི་སྲོག་ཡིན་ཏེ། རིམ་ལྔ་ལས། ཉོན་མོངས་ལས་ནི་ལམ་གྱི་ལུས། །བྱེད་པ་པོ་དང་འབྲས་བུ་ནི། །སྨིག་རྒྱུ་རྨི་ལམ་ལྟ་བུ་དང་། །དྲི་ཟའི་
གྲོང་ཁྱེར་ངེས་པར་མཚུངས། །ཏིང་ངེ་འཛིན་འདི་ནི་མ་ཤེས་པས། །ཀུན་རྫོབ་ལ་ནི་ཉེར་དམིགས་ནས། །རྣམ་པ་སྣ་ཚོགས་ནད་རྣམས་སྐྱེ། །དེ་རྣམས་སྒྱུ་མའི་སྨན་གྱིས་འཚོ། །ཞེས་གསུངས་སོ། །སྦས་དོན་གྱི་སྒྱུ་ལུས་བདག་བྱིན་རླབས་ནི། མཁའ་
འགྲོ་རྒྱ་མཚོ་ལས། ལྷ་ཡི་རྣམ་པའི་རྣལ་འབྱོར་བདག །སྐད་ཅིག་མངོན་སུམ་བྱེད་པ་པོ། །ལུགས་མ་སོགས་ལ་རྣལ་འབྱོར་གྱིས། །རྣམ་པར་བྱས་པའི་དབྱིབས་སུ་འགྱུར། །སྟོང་ཉིད་རྣལ་འབྱོར་རང་བཞིན་གཟུགས། །བདག་བྱིན་རླབས་པའི་མཚན་ཉིད་
དོ། །བདག་བྱིན་རླབས་བྲལ་རྣལ་འབྱོར་པ། །སྦུན་ལྐོགས་དུམ་བུ་བཞིན་ཤེས་བྱ། །འདི་འདྲའི་མཚན་ཉིད་མཆོག་གྱུར་པ། །སྐྱེ་བོ་ཕྱུགས་རྣམས་ཀྱིས་མི་ཤེས། །དེ་ཕྱིར་སྒྱུ་འཕྲུལ་འདི་བསྒོམས་ན། །བླ་ན་མེད་པའི་བྱང་ཆུབ་འཐོབ། །ཅེས་གསུངས་
ལ། རིམ་ལྔ་ལས་ཀྱང་། རང་བྱིན་རླབས་པའི་རིམ་པ་ནི། །གང་གིས་བླ་མ་ལས་མ་བསྒྲུབས། །མདོ་སྡེ་རྒྱུད་དང་རྟོག་པ་ལ། །དེ་ཡི་ངལ་བ་དོན་མེད་འགྱུར། ཞེས་གསུངས་པས་ཆེས་གཙོ་བོར་གྱུར་པ་ཡིན་ལ། ཁྱད་པར་དུ་སྐད་ཅིག་ཙམ་གྱིས་
9-10-15b


མངོན་སུམ་དུ་བྱེད་པའི་ལྷའི་རྣལ་འབྱོར་བདག་བྱིན་རླབས་དང་བྲལ་ན་སྦུན་ལྐོགས་བཞིན་དུ་སྙིང་པོ་མེད་པར་གསུངས་པས་རྣལ་འབྱོར་མའི་རྒྱུད་དཔལ་བདེ་མཆོག་ལ་ཡང་སྒྱུ་ལུས་ཀྱི་རྫོགས་རིམ་མེད་མི་རུང་དུ་ཤེས་པར་གྱིས་ཤིག །མངོན་བརྗོད་བླ་མ་ལས་
ཀྱང་། རང་བཞིན་མེད་པའི་གནས་གོམས་ལས། །ལྷ་ཡི་སྙིང་པོ་སྒོམ་བྱེད་དང་། །དེ་ནི་མཆོད་པ་ཆེན་པོར་འདོད། །སངས་རྒྱས་ཐམས་ཅད་རྟོགས་བྱེད་པའོ། །ཞེས་རང་བཞིན་མེད་པའི་དོན་བསྒོམ་པ་ནི་སངས་རྒྱས་ཐམས་ཅད་རྟོགས་པ་སྟེ་སྒྲུབ་པར་བྱེད་པའི་མཆོད་
པ་ཆེན་པོ་དང་། རང་བཞིན་བདག་མེད་ཆོས་རྣམས་ནི། །ནམ་མཁའ་ལྟ་བུར་དྲི་མ་མེད། །སྟོང་ཉིད་ཡེ་ཤེས་རྡོ་རྗེ་ཡིས། །སྟོང་ཉིད་རྟག་ཏུ་བསྒོམ་པར་བྱ། ཞེས་གསུངས་སོ། །དེ་ལྟར་ན་བདེ་མཆོག་གི་རྩ་བ་དང་བཤད་པའི་རྒྱུད་ཀུན་ལས། རང་བཞིན་མེད་པ་བདག་མེད་
པའི་སྟོང་པ་ཉིད་བསྒོམ་དགོས་པར་གསུངས་པས་བདེ་སྟོང་སྦྱར་བའི་ལམ་བསྒོམ་པར་འདོད་པས་བདག་མེད་པའི་ལྟ་བ་ཕུ་ཐག་ཆོད་པར་བཙལ་བར་བྱའོ། །བླ་མེད་ཀྱི་ཐེག་པ་འདིར་དེ་འདྲ་བའི་ལྟ་བའི་གོ་བ་བཙལ་མི་དགོས་སམ་སྙམ་པའི་ལོག་རྟོག་སྔགས་ཀྱི་གཞུང་
ལ་བརྟེན་ནས་འགོག་པ་རྒྱས་པར་ནི་གཞན་དུ་བཤད་ཟིན་པ་ལས་ཤེས་པར་བྱའོ། །གཉིས་པ་ནི། འོ་ན་བདེ་སྟོང་སྦྱོར་བའི་བདེ་བ་དེ་ཇི་འདྲ་བ་ཡིན་ཞེ་ན། འདི་ལ་སེམས་རྩེ་གཅིག་པའི་ཏིང་ངེ་འཛིན་ཙམ་ཞིག་བསྒོམས་པས་སེམས་ཤིན་སྦྱངས་སྐྱེས་པ་ན་དེའི་མཐུས་
ལུས་ཀྱི་རླུང་རྣམས་ལས་རུང་དུ་སོང་ནས་ནང་དུ་ཕན་འདོགས་པའི་རྣམ་པ་ཅན་གྱི་ལུས་ཤིན་སྦྱངས་སྐྱེ་ལ། དེ་ལ་བརྟེན་ནས་ལུས་ལ་བདེ་བ་དང་སེམས་ལ་དགའ་བ་ཆེན་པོ་སྐྱེ་བར་རྣལ་འབྱོར་སྤྱོད་པའི་ས་ལས་གསུངས་པ་ནི། ཕྱི་ནང་གཉིས་ཀ་དང་། ཐིག་
9-10-16a


པ་ཆེ་ཆུང་གཉིས་ཀ་དང་། མདོ་སྔགས་གཉིས་ཀའི་ཐུན་མོང་བ་སེམས་མི་རྟོག་པར་འཇོག་པ་རིང་དུ་བསྐྱངས་པ་ཐམས་ཅད་ལ་འབྱུང་སྟེ། དེའི་ཚུལ་ནི་ཤེས་བྱེད་ཀྱི་ལུང་དང་བཅས་པ་བྱང་ཆུབ་ལམ་གྱི་རིམ་པར་བཤད་ཟིན་ཏོ། །དེའི་ཕྱིར་
དེ་འདྲ་བའི་བདེ་བ་ཡང་འདིའི་བདེ་བ་མིན་ནོ། །གཞན་ཡང་མཚན་ཉིད་ཀྱི་ཐེག་པར་བཤད་པའི་རླུང་འབྱུང་རྔུབ་བསྒོམ་པ་དང་། བྱ་རྒྱུད་བསམ་གཏན་ཕྱི་མ་དང་། སྤྱོད་རྒྱུད་རྣམ་སྣང་མངོན་བྱང་དུ་གསུངས་པའི་རླུང་ཕྱིར་རྒྱུ་བ་བཀག་ནས་ནང་དུ་གཟུང་སྟེ་ལྷའི་རྣལ་
འབྱོར་བསྒོམ་པའི་སྲོག་རྩོལ་ཞེས་གསུངས་པ་དེ་བསྒོམས་པ་ལ་བརྟེན་ནས་ཀྱང་ལུས་སེམས་ལ་བདེ་ཆེན་སྐྱེ་བའི་ཏིང་ངེ་འཛིན་སྐྱེ་མོད་ཀྱང་། ནང་ལུས་ཀྱི་རྩ་འཁོར་གྱི་གནས་རྣམས་སུ་གནད་དུ་བསྣུན་པའི་རླུང་གི་རྣལ་འབྱོར་མིན་པས། དེའི་བདེ་བ་ཡང་བླ་
མེད་ཀྱི་ཐེག་པར་བདེ་སྟོང་སྦྱོར་བར་བཤད་པའི་བདེ་བ་མིན་པས། རླུང་རྡོ་རྗེའི་བཟླས་པ་དང་། བུམ་པ་ཅན་གྱི་སྲོག་རྩོལ་རྣམས་དང་མཚུངས་པ་མ་ཡིན་ནོ། །སློབ་དཔོན་སངས་རྒྱས་གསང་བས་རླུང་ཕྱིར་འགྲོ་བ་བཀག་ནས་ནང་དུ་གཟུང་སྟེ་ལྷ་བསྒོམ་པ་
རྣལ་འབྱོར་རྒྱུད་ལའང་སྦྱོར་བར་བཤད་དོ། །མདོར་ན་རྣལ་འབྱོར་རྒྱུད་མན་ཆད་ཀྱི་རྒྱུད་སྡེ་གསུམ་དང་། མཚན་ཉིད་ཀྱི་ཐེག་པར་སྟོང་ཉིད་ཀྱི་དོན་ཕྱིན་ཅི་མ་ལོག་པར་བསྒོམ་པའི་འཇིག་རྟེན་ལས་འདས་པའི་ཟག་མེད་ཀྱི་བདེ་བ་མང་པོ་བཤད་མོད་ཀྱང་། 
ལུས་ཀྱི་རྩ་འཁོར་གྱི་གནས་རྣམས་སུ་གནད་དུ་བསྣུན་པ་ལས་རླུང་དབུ་མར་བཙུད་པའི་དབང་གིས་གཏུམ་མོ་འབར་ནས་བྱང་སེམས་ཞུ་བའི་བདེ་བ་མ་བཤད་པས་བདེ་སྟོང་སྦྱོར་བར་གསུངས་པའི་བདེ་བའི་དོན་མེད་དོ། །མན་ངག་སྙེ་མ་ལས་ཀྱང་། འོ་
9-10-16b


ན་བསམ་གཏན་དང་པོ་ཐོབ་པ་རྣམས་ཀྱང་། འཁོར་ལོས་སྒྱུར་བ་རྣམས་བཞིན་དུ། །བདེ་བར་ཉེ་བར་བསྟན་ན། བདག་མེད་པ་ཉིད་གཉིས་ཀ་རབ་ཏུ་རྟོགས་པ་ན་ལྟ་ཅི་སྨོས། དེ་ལྟར་ན་རབ་ཏུ་དགའ་བ་ལྷག་པ་ཉིད་ལས་ས་དང་པོ་རབ་ཏུ་དགའ་བའོ་ཞེས་
བརྗོད་པར་བྱ་བས་སོ་ཞེ་ན། བདེན་ཏེ་འདི་ལྷན་ཅིག་སྐྱེས་པའི་བདེ་བ་ནི་མ་ཡིན་ཏེ། དེ་ཉིད་ཀྱི་ཕྱིར་བདེ་བ་ཆེན་པོ་མ་ཡིན་ཞིང་། ལས་དང་པོ་པའི་གནས་སྐབས་སུ་ཐབས་སུ་གྱུར་པ་ཡང་མ་ཡིན་ཏེ། ཁབ་ཀྱི་བུ་ག་ནི་ནམ་མཁའི་བུ་གའོ་ཞེས་པ་ཁོ་ནས་
ནམ་མཁའ་དང་ཡང་མཉམ་པར་འགྱུར་བ་མ་ཡིན་པས་སོ་ཞེས་བདག་མེད་གཏན་མ་རྟོགས་པའི་བསམ་གཏན་དང་པོ་ཐོབ་པ་ལ་ཡང་བདེ་བ་རྒྱ་ཆེན་སྐྱེ་བར་གསུངས་ན། བདག་མེད་གཉིས་ཕྱིན་ཅི་མ་ལོག་པར་རྟོགས་ནས་ཡུན་དུ་མའི་བར་དུ་བསྒོམ་
པའི་ཕར་ཕྱིན་གྱི་ཐེག་པ་ལ་སྟོང་ཉིད་བསྒོམས་པའི་བདེ་བ་ཆེན་པོ་སྐྱེ་བ་ལྟ་ཅི་སྨོས། ས་དང་པོ་རབ་ཏུ་དགའ་བ་ཞེས་པ་ཡང་ས་དེར་བདེ་བ་ཤིན་ཏུ་ལྷག་པས་དེ་ལྟར་བཏགས་པས་ན་བླ་མེད་ཀྱི་ཐེག་པ་བདེ་བའི་སྒོ་ནས་ཕར་ཕྱིན་གྱི་ཐེག་པ་ལས་ཁྱད་པར་
དུ་འཕགས་པ་མ་ཡིན་ནོ་སྙམ་པའི་རྩོད་པ་བཀོད་པའི་ལན་དུ་སྟོང་ཉིད་བསྒོམས་པའི་བདེ་བ་ཆེན་པོ་ཡོད་པ་བདེན་ཡང་དེ་ལྷན་སྐྱེས་ཀྱི་བདེ་བ་མིན་པས་བླ་མེད་དུ་གསུངས་པའི་བདེ་བ་ཆེན་པོ་མིན་ལ། ཕར་ཕྱིན་ཐེག་པར་ལས་དང་པོ་པའི་སྐབས་སུ་
ལྷན་སྐྱེས་ཀྱི་བདེ་བ་དངོས་སུ་འདྲེན་པའི་ཐབས་ཀྱང་མ་གསུངས་པས་བདེ་བ་ཆེན་པོའི་སྒོ་ནས་མཆོག་ཏུ་མ་གྱུར་པ་མིན་པར་གསུངས་སོ། །ཡང་དེ་ཉིད་ལས། འོ་ན་ཤེས་རབ་ཀྱི་ཕ་རོལ་ཏུ་ཕྱིན་པར་གང་ཡང་བླ་ན་མེད་པ་ཡང་དག་པར་རྫོགས་པའི་
9-10-17a


བྱང་ཆུབ་ཀྱི་བདེ་བ་ཞེས་གསུངས་སོ་ཞེ་ན། འདི་གསུངས་མོད་འདིའི་ཐབས་བསྟན་པ་ནི་མ་ཡིན་ཏེ། ཐབས་སུ་གྱུར་པ་ལྷན་ཅིག་སྐྱེས་པའི་བདེ་བ་ཆེན་པོ་ཉེ་བར་མ་བསྟན་པའི་ཕྱིར་རོ། །དེའི་ཕྱིར་དེ་ཡང་རིམ་པ་འདི་ཁོ་ནས་
རྟོགས་པར་བྱའོ་ཞེས་ཕར་ཕྱིན་གྱི་ཐེག་པར་འབྲས་བུ་བྱང་ཆུབ་ཀྱི་བདེ་བའི་རྒྱུ་ལམ་གྱི་བདེ་བ་ཆེན་པོ་མ་བསྟན་པས་འབྲས་བུའི་སྐབས་སུ་བདེ་བ་ཆེན་པོ་བཤད་དུ་ཆུག་ཀྱང་ཐེག་པ་གཉིས་ཁྱད་པར་ཆེ་བར་གསུངས་སོ། །གསང་བ་གྲུབ་པ་
ལས་ཀྱང་། དེ་ཉིད་དེ་ཡང་རྒྱུད་གནས་པར། །དཔལ་ལྡན་གསང་བ་འདུས་པར་གསལ། །སྤྲོས་པ་དུ་མ་རྒྱས་གྱུར་བ། །གཞན་དུ་སྦས་ནས་བསྟན་པ་ཡིན། །བྱ་བ་སྤྱོད་པའི་དབྱེ་བ་ཡང་། །མདོ་སྡེའི་སྡེ་སྣོད་ལ་སོགས་སུ། །མཆོག་ཏུ་དགའ་བ་གཅིག་
པུ་ཉིད། །རྣམ་པ་དུ་མར་རྣམ་པར་གནས། །ཕུང་པོ་རིན་ཆེན་སྣོད་ཉིད་དུ། །སེམས་ཅན་བསམ་པའི་བྱེ་བྲག་གིས། །དེ་ཉིད་འབད་པས་སྦས་མཛད་ནས། །སངས་རྒྱས་མགོན་པོས་རྣམ་པར་བཞག །ཅེས་ལྷན་ཅིག་སྐྱེས་དགའི་དེ་ཉིད་དེ་རྒྱུད་སྡེ་འོག་མ་
དང་མདོ་སྡེ་རྣམས་སུ་མ་བསྟན་པར་སྦས་པར་གསུངས་སོ། །དེས་ན་མཆོག་ཏུ་དགའ་བ་གཅིག་པུ་ཉིད་དེ་རྣམས་སུ་རྣམ་པ་དུ་མར་གནས་པར་གསུངས་པ་ནི་མཆོག་ཏུ་དགའ་བ་དེ་ཉིད་ལ་རིམ་གྱིས་བཀྲི་བར་བཞེད་ནས། རྣམ་པ་མི་འདྲ་བ་དུ་མར་
གསུངས་ཞེས་པའི་དོན་ཡིན་གྱི་དེ་ཉིད་དེ་རྣམས་སུ་སྟོན་པ་མིན་ཏེ། གཞན་དུ་ན་དེ་རྣམས་སུ་དབང་གོང་མ་རྣམས་ཀྱང་གསུང་དགོས་ཏེ། གསང་བ་ལ་སོགས་པའི་དབང་མ་བསྐུར་བ་ལ་བདེ་བ་ཆེན་པོའི་དེ་ཉིད་སྟོན་པ་བཀག་པའི་ཕྱིར་རོ། །དེ་ལྟར་ན་
9-10-17b


སྟོང་པ་ཉིད་ཕྱིན་ཅི་མ་ལོག་པར་དེས་ནས་བསྒོམ་པའི་ཟག་མེད་ཀྱི་བདེ་བ་ཡིན་ཀྱང་ལྷན་སྐྱེས་ཀྱི་བདེ་བ་མིན་པ་དུ་མ་ཞིག་ཡོད་པ་ནི་ཚུལ་འདིར་སྦྱངས་པ་གཅིག་ཡིན་ན། ཕར་ཕྱིན་གྱི་ཐེག་པ་ལ་གོ་བ་རགས་པ་ཆགས་ནས་ཤེས་ལ། ཡང་དེ་འདྲ་བ་དེ་ལྷའི་
རྣལ་འབྱོར་ཤིན་ཏུ་བརྟན་པོ་དང་འབྲེལ་བར་འཇུག་པ་ཡིན་ཀྱང་བླ་མེད་ཀྱི་རྫོགས་རིམ་གྱི་དོན་མེད་པ་ནི། རྒྱུད་སྡེ་འོག་མའི་གཞུང་ལ་གོ་བ་རགས་པ་ཆགས་ནའང་ཤེས་པར་ནུས་མོད་ཀྱང་། བློ་གྲོས་ཀྱི་ནུས་པ་ཤིན་ཏུ་ཞན་པའི་སྐབས་སུ་འདུག་པས་སྔར་
བཤད་པའི་བདེ་བ་དང་པོ་ཙམ་ལའང་བླ་མེད་ཀྱི་བདེ་སྟོང་སྦྱོར་བའི་བདེ་ཆེན་དུ་འཛིན་པ་ཤིན་ཏུ་མང་བར་སྣང་ངོ་། །དེ་ལྟར་ན་བདེ་སྟོང་སྦྱོར་བར་གསུངས་པའི་བདེ་བ་ནི་ལྷན་སྐྱེས་ཀྱི་དགའ་བ་ཡིན་ལ། རྫོགས་རིམ་པའི་དགའ་བ་དེ་ཐོག་མར་སྐྱེ་བ་ནི། རོ་
རྐྱང་གི་རླུང་ཨ་ཝ་དྷཱུ་ཏཱིར་བཙུད་པའི་དབང་གིས་གཏུམ་མོ་སྦར་བས་བྱང་སེམས་བཞུས་པ་ལས་སྐྱེ་ལ། དེའི་བདེ་བ་དང་སྔར་བཤད་པའི་བདེ་བ་རྣམས་བདེ་བ་ཙམ་དུ་མཚུངས་ཀྱང་དོན་ཤིན་ཏུ་ཁྱད་ཆེ་བས་མ་འཁྲུལ་བར་སོ་སོར་ཕྱེད་པར་བྱའོ། །དེ་ལ་ནི་ཐེག་
པ་འདིར་དམིགས་པ་མེད་པའི་སྙིང་རྗེ་ཞེས་ཀྱང་གསུངས་ཏེ། མན་ངག་སྙེ་མ་ལས། ཐབས་ནི་དམིགས་པ་མེད་པའི་སྙིང་རྗེ་ཆེན་པོ་འགྲོ་བའི་དོན་བྱེད་པ་ལྷན་ཅིག་སྐྱེས་པའི་བདེ་བ་ཆེན་པོའི་རང་བཞིན་ནོ། །ཞེས་གསུངས་ཏེ་དེ་ལྟར་གསུངས་པ་མང་ངོ་། །
ལྷན་སྐྱེས་ཀྱི་བདེ་བ་དེས་སྟོང་ཉིད་བསྒོམས་ན་སྔར་བཤད་པ་ལྟར་གྱི་རྒྱ་ཆེ་བའི་སློབ་ཚུལ་གྱི་ལམ་རྒྱས་པ་མེད་ཀྱང་མདོར་བསྡུས་པས་འགྲུབ་པ་དང་། ལམ་གཞན་དུ་བསྐལ་པ་གྲངས་མེད་པ་དུ་མར་བསླབ་དགོས་པ་ཡང་ལམ་འདིས་ཚེ་གཅིག་ལ་
9-10-18a


འགྲུབ་པར་གསུངས་ཏེ། ས་མྦུ་ཊ་ལས། དེ་ཕྱིར་དེ་རྒྱས་ཅི་ཞིག་བྱ། །མདོར་བསྡུས་པས་ནི་སངས་རྒྱས་ཉིད། །བསྐལ་པ་བྱེ་བ་གྲངས་མེད་པས། །ཇི་སྲིད་སངས་རྒྱས་གང་འཐོབ་པ། །གང་གིས་དམ་པའི་བདེ་བས་ཁྱོད། །སྐྱེ་བ་
འདིར་ནི་ཐོབ་པར་འགྱུར། །ཞེས་གསུངས་ཏེ། དམ་པ་སྟེ་མཆོག་གི་བདེ་བ་ནི་ལྷན་སྐྱེས་ཀྱི་བདེ་ཆེན་ནོ། །གསང་བ་གྲུབ་པ་ལས་ཀྱང་འབྱུང་སྟེ། སྒྲུབ་པོ་དེ་ཉིད་ལ་གཏད་པས། །བརྟུལ་ཞུགས་མེད་ཀྱང་འགྲུབ་པར་འགྱུར། །བརྟུལ་ཞུགས་བརྒྱ་ཕྲག་སྤྱད་
བྱས་ཀྱང་། །དེ་ཉིད་དམན་ན་འགྲུབ་མི་འགྱུར། ཞེས་དང་། མཚམས་མེད་ལྔ་པོ་བྱེད་པ་དང་། །སྲིད་པར་དལ་བར་བྱས་པས་ཀྱང་། །དེ་ཉིད་ལྡན་ན་འགྲུབ་འགྱུར་ཏེ། །ཞེས་གསུངས་ཏེ། དེ་ཉིད་ཅེས་པ་ནི་ལྷན་སྐྱེས་ཀྱི་བདེ་ཆེན་གྱིས་བདག་མེད་པའི་
དོན་ལེགས་པར་གཏན་ལ་ཕབ་པ་བསྒོམ་པ་ལ་བྱ་ཡི་སྟོད་རྐྱང་བསྒོམ་པ་མིན་ནོ། །ཀུན་སྤྱོད་ལས། དེ་ནས་བསྲུང་ཆ་མེད་ཅིང་བཟའ་བ་མེད། །དཀྱིལ་འཁོར་པ་ཡང་མེད་ཅིང་དཀྱིལ་འཁོར་མེད། །སྔགས་བཟླས་མེད་ཅིང་དཀའ་ཐུབ་སྦྱིན་
སྲེག་མེད། །མདོར་ན་སེམས་དེ་འདུས་པའི་ཚུལ་ཅན་ཡིན། ཞེས་བདེ་སྟོང་དབྱེར་མེད་ཀྱི་ཐབས་ཤེས་དེར་ལམ་ཀུན་འདུས་པའི་ཚུལ་ཏེ་ངོ་བོ་ཅན་དུ་གསུངས་ཏེ། མངོན་བརྗོད་ལས་ཀྱང་དེ་བཞིན་དུ་གསུངས་སོ། །དོན་དེ་ནི་བརྟག་གཉིས་
ལས་གསལ་བར་བཤད་དེ། སྟོང་པ་སྙིང་རྗེ་དབྱེར་མེད་པ། །བྱང་ཆུབ་སེམས་ཞེས་རབ་ཏུ་བརྗོད། །སྔགས་ཀྱི་བཟླས་མེད་དཀའ་ཐུབ་མེད་དང་སྦྱིན་སྲེག་མེད། དཀྱིལ་འཁོར་ཅན་ཡང་མེད་ཅིང་དཀྱིལ་འཁོར་ཡང་ནི་མེད། །དེ་ནི་སྔགས་
9-10-18b


བཟླས་དེ་དཀའ་ཐུབ་དང་དེ་སྦྱིན་སྲེག །དེ་ནི་དཀྱིལ་འཁོར་ཅན་དང་དེ་ནི་དཀྱིལ་འཁོར་ཉིད། །མདོར་བསྡུས་ན་ནི་སེམས་དེ་འདུས་པའི་གཟུགས་ཅན་ནོ། །ཞེས་གསུངས་སོ། །སྟོང་པ་དང་སྙིང་རྗེ་ནི་སྔར་བཤད་ལ་དེ་གཉིས་དབྱེར་མེད་དུ་སྦྱོར་བ་ལ་བྱང་ཆུབ་ཀྱི་
སེམས་ཞེས་གསུངས་ཤིང་། དེ་ལ་སྔགས་བཟླས་ནས་དཀྱིལ་འཁོར་གྱི་བར་མེད་པར་གསུངས་པ་ནི་ཕྱིའི་སྔགས་བཟླས་སོགས་སོ། །འོན་ཀྱང་ནང་ངེས་དོན་གྱི་སྔགས་བཟླས་སོགས་དེ་ལ་ཚང་བར་སྟོན་པ་ནི་དེ་ནི་སྔགས་བཟླས་ཞེས་སོགས་སོ། །
བྱང་ཆུབ་ཀྱི་སེམས་དེ་ཁོ་ན་ཉིད་ཤེས་པ་དང་། འགྲོ་བ་སྐྱོབ་པས་སྔགས་དང་། ཡང་དང་ཡང་དུ་བྱེད་པས་བཟླས་པ་དང་། ཁ་ན་མ་ཐོ་བ་ཐམས་ཅད་འགོག་པས་དཀའ་ཐུབ་སྟེ་བརྟུལ་ཞུགས་དང་། ཉོན་མོངས་དང་ཕུང་པོའི་སྲེག་རྫས་འཇོམས་པས་སྦྱིན་
སྲེག་དང་། ངེས་དོན་གྱི་རྡོ་རྗེ་རྣལ་འབྱོར་མ་དང་ཧེ་རུ་ཀ་འདུས་པས་དཀྱིལ་འཁོར་པ་དང་། ཆོས་ཐམས་ཅད་ཀྱི་སྙིང་པོ་ཡིན་པས་དཀྱིལ་འཁོར་རོ། །མང་དུ་སྨྲས་པས་ཅི་ཞིག་བྱ་སྟེ་མདོར་བསྡུས་ན་དེ་ཉིད་ཆོས་ཐམས་ཅད་འདུས་པའི་ཚུལ་ཅན་ཏེ་ཆོས་ཐམས་
ཅད་ཀྱི་བདག་ཉིད་ཅན་ཏེ་དེའི་ཕྱིར་དེ་ཉིད་བསྐྱེད་པར་བྱ་སྟེ་དེ་ཉིད་ཀྱིས་འདོད་དོན་ཐམས་ཅད་འགྲུབ་པར་འགྱུར་རོ་ཞེས་པདྨ་ཅན་ལས་བཤད་དོ། །གཟུགས་ཅན་ཞེས་པ་ལས་ཚུལ་ཅན་ཞེས་པ་འགྱུར་ལེགས་ལ། འདུས་པའི་ཚུལ་ཅན་གྱི་དོན་ནི་ཆོས་ཐམས་
ཅད་ཀྱི་རང་བཞིན་སྟོང་པ་ཉིད་ཀྱི་བདག་ཉིད་ཅན་ཁོ་ན་ལ་མི་གཟུང་བར་དེ་ཉིད་སྔགས་བཟླས་ནས་དཀྱིལ་འཁོར་དེ་ཉིད་དོ་ཞེས་གསུངས་པས་ལམ་གཞན་རྣམས་འདིར་འདུས་པར་བཤད་དགོས་སོ། །དེ་ནི་ལམ་གཞན་གྱི་གནས་སྐབས་དང་མཐར་ཐུག་
9-10-19a


གི་དོན་གང་འགྲུབ་ཐམས་ཅད་ལམ་འདིར་མ་ཚང་བ་མེད་པ་དང་། རིང་པོར་མི་ཐོགས་པ་དང་། ལམ་བདེ་བས་འགྲུབ་པའི་ཚུལ་བྱེད་ལས་ཀྱི་སྒོ་ནས་འདིར་འདུ་བའོ། །དེ་ལྟར་ལམ་ཤིན་ཏུ་རྒྱ་ཆེ་བ་མང་པོ་ལ་བསླབ་མི་དགོས་
པའི་ལམ་མདོར་བསྡུས་དང་། དུས་ཚེ་གཅིག་ལ་འགྲུབ་པ་དང་། དེ་ཡང་འཇུག་པ་ཤིན་ཏུ་བདེ་བ་དང་། ཚེ་འདིར་སྡིག་ཤིན་ཏུ་ཆེ་བས་ཀྱང་འགྲུབ་ཅེས་པ་དང་། སྐྱེ་བ་སྔ་མར་ཚོགས་ཀྱི་བསགས་རྒྱབ་ཤིན་ཏུ་མི་ཆེ་བའི་བསོད་ནམས་དམན་པས་ཀྱང་འགྲུབ་པར་
གསུངས་པ་ནི་ལམ་གྱི་ཡོན་ཏན་ཡིན་ལ། དེ་ཡང་བདག་མེད་པའི་དོན་ཕུ་ཐག་ཆོད་པར་བྱས་པའི་དེ་ཁོ་ན་ཉིད་ལྷན་སྐྱེས་ཀྱི་བདེ་བས་བསྒོམས་པ་ལས་ཡིན་པས་ཡུལ་ཅན་ཁྱད་པར་ཅན་བདེ་བ་ཆེན་པོའི་གནད་ལ་མཁས་པར་བྱའོ། །འདི་ཡང་ལམ་
ཐུན་མོང་བས་རྒྱུད་སྦྱངས་ཤིང་རྣམ་པར་དག་པའི་དབང་གིས་རྒྱུད་སྣོད་རུང་དུ་བྱས། དེའི་དུས་སུ་ཁས་བླངས་པའི་དམ་ཚིག་དང་སྡོམ་པ་ཚུལ་བཞིན་དུ་བསྲུངས་ནས་བསྐྱེད་རིམ་ལ་གོམས་པར་བྱས་པ་ལས་རྫོགས་རིམ་གྱི་རྟོགས་པ་སྐྱེ་བའི་རྒྱུད་སྨིན་
ནས་ལྷན་སྐྱེས་ཀྱི་བདེ་སྟོང་མཚན་ཉིད་ཚང་བར་སྦྱོར་ནུས་པའི་སྐབས་ནས་ལམ་བསྡུས་པའི་སྙིང་པོ་ཉིད་གཙོ་བོར་བསྐྱངས་པས་འགྲུབ་པ་ཡིན་གྱི་དང་པོ་ནས་མིན་ནོ། །གསུམ་པ་ནི། སྤྱིར་བླ་མེད་ཀྱི་རྒྱུད་ཀྱི་དོན་གྱི་གནད་ཐམས་ཅད་ཨེ་ཝཾ་སོགས་
ཡི་གེ་བཞི་བཅུའི་གླེང་གཞིའི་དོན་དུ་འདུས་ལ། དེའི་དོན་གྱི་གཙོ་བོ་ཡང་ཐོག་མའི་ཡི་གེ་ཨེ་ཝཾ་གཉིས་ཀྱི་དོན་དུ་འདུའོ། །དེ་ལ་ཐོབ་བྱ་འབྲས་བུའི་ཨེ་ཝཾ་དང་། ཐོབ་བྱེད་ལམ་གྱི་ཨེ་ཝཾ་དང་། དེ་འདྲེན་བྱེད་རྟགས་ཀྱི་ཨེ་ཝཾ་གསུམ་ཡོད་པའི་དང་པོ་དང་
9-10-19b


གསུམ་པ་ནི་འཆད་པར་འགྱུར་རོ། །ལམ་གྱི་ཨེ་ཝཾ་ལ་ཨེ་ཡིག་དང་ཆོས་འབྱུང་གི་དབྱིབས་གྲུ་གསུམ་དུ་ཡོད་པས་བདག་མེད་པའི་དེ་བཞིན་ཉིད་མཚོན་པར་བྱེད་ལ། དེའི་ཚེ་གྲུ་གསུམ་གྱིས་ནི་རྣམ་པར་ཐར་པའི་སྒོ་གསུམ་ཡང་མཚོན་པར་བྱེད་པས་ཆོས་
རྣམས་ཀྱི་ངོ་བོ་དང་རྒྱུ་དང་འབྲས་བུ་གསུམ་རང་བཞིན་གྱིས་གྲུབ་པས་སྟོང་པའི་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པའི་དོན་ཨེ་ཡིག་གི་མཚོན་དོན་ཡིན་པའི་ཕྱིར་སྟོང་པ་ཉིད་ཀྱི་ལྟ་བ་ཕུ་ཐག་ཆོད་པ་གཅིག་མེད་ན་ཨེ་ཡིག་གི་དོན་མ་ཚང་ངོ་། །
དེ་ཡོད་ཀྱང་ཕྱི་ནང་གི་ལུས་ལ་གནད་དུ་བསྣུན་པ་ལས་བྱུང་བའི་བདེ་བ་ཆེན་པོ་གཅིག་མེད་ན་ཝ་ཡིག་གི་དོན་མ་ཚང་ངོ་། །དེ་གཉིས་ཡོད་ཀྱང་སྟོང་ཉིད་ཀྱི་ལྟ་བ་ཞུ་བདེའི་ངོ་བོར་བསྐྱེད་པ་དང་། སྟོང་ཉིད་ཡུལ་དང་བདེ་ཆེན་ཡུལ་ཅན་དུ་བྱས་ནས་དེས་དེ་ཕྱིན་
ཅི་མ་ལོག་པར་ངེས་པའི་བདེ་སྟོང་སྦྱོར་མི་ཤེས་ན་ཐིག་ལེའི་དོན་མ་ཚང་བས་ཨེ་ཝཾ་གྱི་དོན་ཐབས་ཤེས་གཉིས་སྦྱོར་བ་དགོས་ཤིང་དེ་ཉིད་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་ཁྱབ་པའི་དོན་གྱི་གཙོ་བོ་མདོར་བསྡུས་པའི་ཆོས་ཀྱི་རྒྱལ་པོ་ཆེན་པོའི་རྒྱས་
འདེབས་ཀྱི་ཕྱག་རྒྱར་གསུངས་ཏེ། རྡོ་རྗེ་འཕྲེང་བ་ལས། ཨེ་ནི་སྟོང་པ་ཉིད་དུ་གསུངས། །དེ་བཞིན་ཝ་ནི་ཐུགས་རྗེ་དང་། །ཐིག་ལེ་དེ་གཉིས་སྦྱོར་ལས་བྱུང་། །དེ་སྦྱོར་བ་ཡི་རྨད་མཆོག་གོ། ཆོས་ཕུང་བརྒྱད་ཁྲི་བཞི་སྟོང་ཁྱབ། །མདོར་བསྡུས་ཆོས་ཀྱི་
ཕྱག་རྒྱའོ། །རྒྱལ་པོ་ཆེན་པོའི་ཕྱག་རྒྱ་ཉིད། །རྒྱུད་རྣམས་སུ་ནི་ཐོག་མར་གསུངས། ཞེས་སོ། །དེ་འདྲ་བའི་གཉིས་སུ་མེད་པ་ཡེ་ཤེས་དེ་རྒྱུད་གང་ལས་བརྗོད་པ་དེ་ལ་ནི་དེ་ཉིད་མཆོག་ཡོད་ལ་དེ་མི་སྟོན་ན་མེད་པ་ཡིན་ཏེ། རྒྱུད་ཀུན་གྱི་ནི་དོན་
9-10-20a


བསྡུས་པ། །སྟོང་ཉིད་སྙིང་རྗེ་མི་ཕྱེད་པ། །གང་ལ་དེ་ཉིད་མངོན་པར་བརྗོད། །དེ་ནི་དེ་བཞིན་གཤེགས་པའི་རྒྱ་། །ཨེ་ཝཾ་ཞེས་བྱའི་ཡི་གེ་གཉིས། །གང་ལ་འདི་གཉིས་མེད་པ་ནི། །དེ་ལ་དེ་ཁོ་ན་ཉིད་མེད། ཅེས་གསུངས་སོ། །དོན་
འདི་བདེ་མཆོག་འབྱུང་བ་ལས་ཀྱང་། བདེ་མཆོག་སངས་རྒྱས་ཐམས་ཅད་ཀྱི། །ཨེ་ཝཾ་ཡི་གེ་ལ་རབ་གནས། །སྐུ་གསུང་ཐུགས་ཀྱི་ཡང་དག་ལས། །རྣམ་པ་ཐམས་ཅད་གཅིག་བསྡོམས་པ། །སྡོམ་པ་བདེ་མཆོག་བྱང་ཆུབ་སྟེ། །བརྗོད་པར་བྱ་མིན་
བསྟན་དུ་མེད། །གསང་བ་སངས་རྒྱས་ཐམས་ཅད་ཀྱི། །འདུས་པ་སྡོམ་པ་དག་གི་མཆོག །ཅེས་སོ། །འོ་ན་དམིགས་མེད་ཀྱི་སྙིང་རྗེའི་བདེ་བ་དང་སྟོང་པ་གཉིས་དབྱེར་མེད་དུ་སྦྱོར་ཚུལ་ཇི་ལྟར་ཡིན་སྙམ་ན། །སམྦུ་ཊ་ལས། ཆུ་དང་འོ་མ་འདྲེས་པ་
བཞིན། །གཉིས་མེད་རྣམ་པའི་སྦྱོར་བ་ཡིས། །གཉིས་པོ་འདུས་པ་གང་ཡིན་པ། །ཤེས་རབ་ཐབས་ཤེས་བྱ་བར་གྲགས། །ཞེས་ཆུ་དང་འོ་མ་འདྲས་པ་བཞིན་དུ་སྦྱོར་བར་གསུངས་པ་ལྟར་བྱེད་པའོ། །དེ་ཡང་བདེ་བ་དང་དེའི་ཆོས་ཉིད་ངོ་བོ་དབྱེར་མེད་ནི། །
ཆོས་ཅན་གྲུབ་ཙམ་ནས་རང་གི་སྟོང་ཉིད་དང་ངོ་བོ་དབྱེར་མེད་དུ་གྲུབ་ཟིན་པས་དེ་རྣལ་འབྱོར་པས་དབྱེར་མེད་དུ་བྱ་མི་དགོས་ལ། དེ་བཞིན་དུ་སྟོང་ཉིད་རྟོགས་པའི་བློ་གཞན་ཞིག་ལ་བདེ་བས་རྒྱས་འདེབས་པ་དང་། བདེ་བ་བསྐྱེད་པའི་འོག་ཏུ་སྟོང་ཉིད་
ཀྱི་ལྟ་བ་གཞན་ཞིག་གིས་རྒྱས་འདེབས་པ་ཡང་མིན་ཏེ། དེ་ལ་ནི་དཔེར་ན་སྦྱིན་སོགས་བདག་མེད་པའི་ལྟ་བས་ཟིན་ཡང་སྦྱིན་སོགས་དེ་ཉིད་ལྟ་བ་དེའི་ངོ་བོར་མི་སྐྱེ་བ་ལྟར་སྟོང་ཉིད་རྟོགས་པ་དང་བདེ་བ་གཉིས་ཕན་ཚུན་གཅིག་གཅིག་གི་ངོ་བོར་མ་
9-10-20b


སོང་བའི་ཕྱིར་རོ། །འོ་ན་ཇི་ལྟར་བྱེད་སྙམ་ན། ཡུལ་ཅན་ཤེས་པ་ལྷན་སྐྱེས་ཀྱི་བདེ་བའི་ངོ་བོར་སྐྱེས་པ་དེས་ཡུལ་སྟོང་ཉིད་ཀྱི་དོན་ཕྱིན་ཅི་མ་ལོག་པར་རྟོགས་པའི་ཡུལ་ཡུལ་ཅན་དུ་སྦྱོར་བ་ཉིད་བདེ་སྟོང་དབྱེར་མེད་དུ་སྦྱོར་བའོ། །དེ་ཡང་དོན་གྱི་ལྷན་སྐྱེས་
ཀྱི་དུས་སུ་ཡུལ་ཡུལ་ཅན་གཉིས་འོ་མ་ཆུ་ལ་ཞུགས་པ་བཞིན་དུ་རོ་གཅིག་ཏུ་གྱུར་ནས་གཉིས་སྣང་ཕྲ་མོ་ཡང་དག་པ་ཡིན་ལ། དོན་གྱི་ལྷན་སྐྱེས་མ་སྐྱེས་པའི་གོང་དུ་ནི་དེ་ཁོ་ན་ཉིད་མངོན་སུམ་དུ་མ་རྟོགས་པས་དེ་ཁོ་ན་ཉིད་ལ་མོས་པ་ཡིད་བྱེད་ཀྱིས་
འཇུག་པ་ཙམ་མོ། །ཡུལ་སྟོང་པ་ཉིད་དང་གཉིས་མེད་དུ་སྦྱོར་ཚུལ་དེ་ལྟར་ཡིན་ལ་སྟོང་ཉིད་རྟོགས་པའི་བློ་དང་བདེ་བ་གཉིས་ངོ་བོ་དབྱེར་མེད་དུ་སྦྱོར་ཚུལ་ནི། བློ་གཉིས་ངོ་བོ་ཐ་མི་དད་ཀྱི་གྲུབ་བདེ་གཅིག་ཏུ་བསྐྱེད་པའོ། །སྟོང་ཉིད་ཀྱི་གོ་བའི་ཕུ་ཐག་གཅོད་
ལུགས་དབུ་མ་ལས་འབྱུང་བ་ལས་ལྷག་པོ་མེད་པས་ཐེག་པ་འདི་དང་ཕར་ཕྱིན་གྱི་ཐེག་པ་གཉིས་སྟོང་ཉིད་ཀྱི་ལྟ་བ་ལ་མཆོག་དམན་མེད་དོ། །ངེས་རྒྱུའི་དོན་གཅིག་ཡིན་ཀྱང་དེས་བྱེད་ཀྱི་བློ་ལ་ལྷན་སྐྱེས་ཀྱི་བདེ་བས་སྟོང་ཉིད་ངེས་པའི་སྟོབས་འདྲ་བ་ཡུལ་
ཅན་གཞན་གང་གིས་ངེས་པ་ལ་མེད་པས། སྟོང་པ་ལ་ཁྱད་མེད་ཀྱང་ཐབས་བདེ་བས་ཁྱད་པར་དུ་འཕགས་པར་གསུངས་སོ། །བདག་མེད་པའི་སྟོང་ཉིད་ཕུ་ཐག་ཆོད་པ་མ་ངེས་ན་འཁོར་བ་ལས་མི་གྲོལ་ལ། ངེས་བྱེད་ལྷན་སྐྱེས་ཀྱི་བདེ་བ་མ་སྐྱེས་ན་
སྔགས་ཀྱི་ལམ་མཆོག་གི་གནད་མེད་པས་རེ་རེས་མི་ཆོག་གི་གཉིས་ཀ་དགོས་པར་གསུངས་ཏེ། ས་ར་ཧས། སྙིང་རྗེ་དང་བྲལ་སྟོང་པ་ཉིད་ཞུགས་པས། །དེས་ནི་ལམ་མཆོག་རྙེད་པ་མ་ཡིན་ནོ། །འོན་ཏེ་སྙིང་རྗེ་
9-10-21a


འབའ་ཞིག་བསྒོམས་ན་ཡང་། །འཁོར་བ་འདིར་གནས་ཐར་པ་ཐོབ་མི་འགྱུར། །གང་ཡང་གཉིས་པོ་སྦྱོར་བར་ནུས་པ་དེ། །འཁོར་བར་མི་གནས་མྱ་ངན་འདས་མི་གནས། ཞེས་གསུངས་ཏེ། དྷོ་ཧ་ལས་ནི་ལྷན་སྐྱེས་ཀྱི་ཡེ་ཤེས་
ཉིད་ལམ་གྱི་སྙིང་པོར་འཆད་པས་འདིའི་སྙིང་རྗེ་ཡང་ལྷན་སྐྱེས་ཀྱི་བདེ་བ་ཡིན་ནོ། །སྔར་བཤད་པ་ལྟར་གྱི་ལྷན་སྐྱེས་ཀྱི་བདེ་བ་སྐྱེས་པ་ན་རྣམ་རྟོག་རགས་པ་རྣམས་ལོག་ནས་སེམས་གཡོ་མེད་དུ་གནས་པ་རང་གིས་འབྱུང་བས་བདེ་བ་ཉིད་ཡུལ་
གང་ལ་ཡང་མི་འཕྲོ་བར་མི་རྟོག་པ་བསྒོམ་པ་ཙམ་སྟོང་པ་བསྒོམ་པའི་དོན་ཡིན་ན། བདེ་བ་འབའ་ཞིག་བསྒོམ་ན་འཁོར་བ་ལས་མི་གྲོལ་བར་འཆད་པར་མི་རིགས་པས་བདག་མེད་པའི་དོན་ལེགས་པར་གཏན་ལ་ཕབ་པའི་ངེས་ཤེས་སྐྱོང་དགོས་སོ། །
བླ་མེད་ཀྱི་རྒྱུད་དང་དེའི་དགོངས་འགྲེལ་ཚད་ལྡན་རྣམས་ཀྱིས་ཁ་ཅིག་ཏུ་བདེ་བའི་ཕྱོགས་གསལ་ཞིང་སྟོང་ཉིད་རྟོགས་ཚུལ་དེ་ཙམ་དུ་མི་གསལ་བ་དང་། ཁ་ཅིག་ཏུ་སྟོང་ཉིད་རྟོགས་ཚུལ་གསལ་ལ་བདེ་བའི་ཕྱོགས་དེ་ཙམ་དུ་མི་གསལ་བ་རྣམས་སུ་
ཡང་བདེ་སྟོང་གཉིས་ཀ་སྦྱོར་བ་དོན་དུ་གཟུང་གི་རེ་རེ་བ་ལ་འཁྲུལ་བར་མི་བྱའོ། །བདེ་སྟོང་དབྱེར་མེད་ཀྱི་གཏམ་ནི་རླུང་ལྟར་རབ་ཏུ་གྲགས་ཀྱང་བདེ་བ་རྣམས་ཀྱི་ཁྱད་པར་ཕྱེད་པའི་བདེ་ཆེན་དང་། །སྟོང་པ་རྣམས་ཀྱི་ཁྱད་པར་ཕྱེད་པའི་སྟོང་པའི་མཐར་
ཐུག་དང་སྦྱོར་ཚུལ་ཤེས་པ་ཤིན་ཏུ་དཀོན་པ་ལ་དགོངས་ནས། ས་ར་ཧས། ཁྱིམ་དང་ཁྱིམ་ན་དེ་ཡི་གཏམ་སྨྲ་ཡང་། །བདེ་ཆེན་གནས་ནི་ཡོངས་སུ་ཤེས་པ་མེད། ཅེས་གསུངས་པས་ཅུང་ཟད་རེས་ཚིམ་སླ་བར་མི་བྱ་བར་གསང་བ་ལས་ཀྱང་
9-10-21b


ཆེས་གསང་བའི་དོན་འདི་རྟོགས་པ་ལ་ཡུན་རིང་དུ་འབད་པར་བྱའོ། །སྔར་བཤད་པའི་བདེ་སྟོང་དབྱེར་མེད་དེ་ཉིད་ལ་རྣལ་འབྱོར་མའི་རྒྱུད་ཀྱི་བཤད་པ་མཛད་པ་མང་པོས་བདེ་སྟོང་ཟུང་འཇུག་དང་། བདེན་གཉིས་ཟུང་འཇུག་ཅེས་བཤད་ཅིང་། འཕགས་ལུགས་
ཀྱི་ཟུང་འཇུག་གི་དོན་ཡང་དེ་ལ་འཆད་པ་ཡོད་མོད་ཀྱང་། མགོན་པོ་ཀླུ་སྒྲུབ་ཀྱི་ལུགས་ཀྱིས་ནི་སྔར་བཤད་པའི་དོན་གྱི་ལྷན་སྐྱེས་ཀྱི་བདེ་སྟོང་དབྱེར་མེད་དེ་ཙམ་ལ་ཟུང་འཇུག་ཏུ་མི་བྱེད་དོ། །འོ་ན་ཇི་ལྟར་བྱེད་ཅེ་ན། བྱང་ཆུབ་ཀྱི་སེམས་ལ་འོད་གསལ་
གྱི་བྱང་ཆུབ་ཀྱི་སེམས་དང་ཟུང་འཇུག་གི་སེམས་གཉིས་གསུངས་པའི་ཕྱི་མ་ཡིན་ལ་དེ་ནི་སྦྱོར་བ་ཡན་ལག་དྲུག་གི་དྲུག་པའི་སྐབས་སུ་ཐབས་ཤེས་སྙོམས་པར་འཇུག་པར་གསུངས་པའི་དོན་སྒྲོན་གསལ་ལས། ཐབས་ཀུན་རྫོབ་ཀྱི་བདེན་པ་དང་། 
ཤེས་རབ་དོན་དམ་པའི་བདེན་པ་གཉིས་སྦྱོར་བ་ཟུང་འཇུག་ཏུ་གསུངས་པ་ལྟར་ཡིན་ནོ། །དེ་ལ་དོན་དམ་པའི་བདེན་པ་དངོས་ནི་ཆོས་རྣམས་ཀྱི་ཆོས་ཉིད་འདུས་མ་བྱས་ཡིན་མོད་ཀྱང་། འདིར་དེ་དང་བདེ་བ་ཆེན་པོ་གཉིས་རོ་གཅིག་ཏུ་ཞུགས་པའི་འོད་
གསལ་གྱི་ཡེ་ཤེས་ལ་ཡང་དོན་དམ་པའི་བདེན་པ་ཞེས་ཡུལ་ཡུལ་ཅན་སོ་སོར་མ་ཕྱེ་བར་མང་དུ་གསུངས་སོ། །དེ་འདྲ་བའི་དོན་གྱི་ལྷན་སྐྱེས་ཀྱི་ཡེ་ཤེས་འདི་ལ་ཡང་དོན་གྱི་འོད་གསལ་རྐྱང་པའི་སྐབས་གཅིག་དང་། ཟུང་འཇུག་གི་སྐབས་ཀྱི་འོད་
གསལ་གཉིས་ལས་དང་པོ་ནི་རིམ་ལྔའི་རིམ་པ་བཞི་པར་བཤད་པའི་མངོན་པར་བྱང་ཆུབ་པའི་རིམ་པའམ་འོད་གསལ་གྱི་རིམ་པ་དང་། གཉིས་པ་ནི་རིམ་པ་ལྔ་པ་ཟུང་འཇུག་གི་རིམ་པའི་ཡ་གཅིག་ཡིན་པས་གཞུང་གཞན་ནས་བཤད་པའི་
9-10-22a


བདེ་སྟོང་དབྱེར་མེད་ཀྱི་དོན་གྱི་ལྷན་སྐྱེས་ཙམ་ཞིག་ནི་ཚུལ་བཞིའི་མཐའ་དྲུག་གི་བཤད་པ་ལ་གཉིས་ཡོད་པའི་འོད་གསལ་གྱི་མཐར་ཐུག་ཡིན་ཀྱང་། དེའི་གོང་ན་ཟུང་འཇུག་གི་མཐར་ཐུག་ཡོད་པས་ད་དུང་དེར་མ་སླེབ་བོ། །ཀུན་
རྫོབ་བདེན་པ་ནི་གཞུང་གཞན་ནས་ཀུན་རྫོབ་བདེན་པ་བཤད་པ་དང་འདི་མི་འདྲ་བས་འདིར་ནི་སྟོང་པའི་ཡེ་ཤེས་དང་ངོ་བོ་གཅིག་ཏུ་འཇུག་པའི་བཞོན་པར་གྱུར་བའི་ཡེ་ཤེས་ཀྱི་རླུང་འོད་ཟེར་ལྔ་པའི་ཉེར་ལེན་ལས་གྲུབ་པའི་མཚན་དཔེས་བརྒྱན་པའི་ཡོངས་
སུ་དག་པའི་སྒྱུ་མའི་སྐུ་ལ་ཀུན་རྫོབ་བདེན་པར་བཤད་པ་དེའོ། །འདི་འདྲ་བའི་འོད་གསལ་གྱི་ཡེ་ཤེས་ནི་ཨེ་དང་། ཡོངས་སུ་དག་པའི་སྒྱུ་མའི་སྐུ་ནི་ཝ་ཡིག་གི་དོན་ཏེ་དབྱེར་མེད་དུ་སྦྱོར་རྒྱུའོ། །སྦྱོར་ཚུལ་ནི་སྔ་མ་ཐུགས་དང་ཕྱི་མ་སྐུར་ངོ་བོ་གཅིག་ཏུ་སྦྱོར་
བ་སྟེ་ཐིག་ལེའི་དོན་ནོ། །བདེ་མཆོག་འབྱུང་བ་ལས་ཀྱང་། དེ་བཞིན་ཉིད་རྒྱས་བཏབ་འཁོར་ལོ། །མཁའ་བཞིན་སྟོང་ཉིད་དེ་བཞིན་ནོ། །བདག་མེད་དང་ནི་དེ་བཞིན་ཉིད། །སྣ་ཚོགས་ཐབས་དང་སྙིང་རྗེ་སྟོབས། །ཟུང་འཇུག་གཉིས་མེད་ལྷུན་གྱིས་གྲུབ། །དཀྱིལ་
འཁོར་སྙིང་པོ་མཆོག་ཡིན་ནོ། །ཞེས་གསུངས་སོ། །དེ་བཞིན་ཉིད་དང་སྟོང་ཉིད་བདག་མེད་ཅེས་གསུངས་པ་ནི། དེ་དང་རོ་གཅིག་པའི་ལྷན་སྐྱེས་ཀྱི་ཡེ་ཤེས་ཡིན་ལ། ཐབས་དང་སྙིང་རྗེའི་སྟོབས་ནི་དཀྱིལ་འཁོར་གྱི་འཁོར་ལོ་ཧེ་རུ་ཀ་ཡབ་ཡུམ་དུ་ཤར་
བའི་སྒྱུ་མའི་སྐུ་ཡིན་ཏེ། དེ་ཉིད་ལས། ལྷ་མོ་ཧེ་རུ་ཀ་ཡེ་ཤེས། །དེ་ཡི་དབྱེ་བ་བརྟག་མི་བྱ། །དེ་བཞིན་ཉིད་རྒྱས་བཏབ་འཁོར་ལོ། །ཞེས་གསུངས་པའི་ཕྱིར་རོ། །རྒྱས་བཏབ་པ་ནི་སྔར་བཤད་པ་གཉིས་སྐུ་དང་ཐུགས་སུ་དབྱེར་མི་ཕྱེད་པར་སྦྱོར་བའི་དོན་
9-10-22b


ནོ། །ཤྲཱི་ནི་གཉིས་མེད་ཡེ་ཤེས་ཏེ། ཞེས་གསུངས་པའི་གཉིས་མེད་ཡེ་ཤེས་ལའང་ཇོ་བོ་ཆེན་པོས་སྔར་བཤད་པའི་ཟུང་འཇུག་ལ་བཤད་པ་ལྟར་བདེན་གཉིས་དབྱེར་མེད་ཀྱི་གཉིས་མེད་ཡེ་ཤེས་གཅིག་དང་། སྔར་ཧེ་རུ་ཀ་དཔལ་ཡིན་པར་བཤད་ཅེས་པའི་
སྐབས་སུ་གསུངས་པ་ལྟར་བདེ་སྟོང་དབྱེར་མེད་ཀྱི་གཉིས་མེད་ཀྱི་ཡེ་ཤེས་གཉིས་ཡོད་པས་ཤྲཱི་ཧེ་རུ་ཀ་ཞེས་པའི་དོན་ལ་ཡང་། སྣང་ཕྱོགས་སྒྱུ་ལུས་ཀྱི་ཧེ་རུ་ཀ་དང་། སྟོང་ཕྱོགས་བདེ་སྟོང་གི་ཧེ་རུ་ཀ་གཉིས་ཡོད་པ་ཤེས་པར་བྱའོ། །གཉིས་པ་དེ་བསྐྱེད་པའི་
ཐབས་ཇི་ལྟར་བསྟན་པ་ལ་གཉིས། ཐབས་ངོས་གཟུང་བ་དང་། དེ་ཇི་ལྟར་བསྟན་པའོ། །དང་པོ་ནི། བདེ་སྟོང་གི་ལྷན་སྐྱེས་ལ་སྟོང་པ་ཉིད་བདག་མེད་པའི་དེ་ཁོ་ན་ཉིད་རྟོགས་པ་ཇི་ལྟར་བསྐྱེད་པ་ལ་ཐོག་མར་དེའི་གོ་བ་བསྐྱེད་ཚུལ་ནི། དབུ་མའི་གཞུང་རྣམས་
ནས་གསུངས་པ་ལྟར་ལུང་དང་རིགས་པ་ལ་བརྟེན་ནས་ངེས་དགོས་སོ། །ལྷན་སྐྱེས་ཀྱི་བདེ་བའི་ཆ་བསྐྱེད་པ་ནི་བདེ་བ་གཞན་གྱིས་མི་ཆོག་པས་དེ་འདྲེན་བྱེད་རྟགས་ཀྱི་ཨེ་ཝཾ་དགོས་སོ། །དེ་ལ་ཨེའི་དོན་ནི་ཡུམ་གྱི་བྷ་ག་རྟེན་དང་། ཝའི་དོན་ནི་དེ་ལ་བརྟེན་པའི་ཡབ་
ཀྱི་རྡོ་རྗེ་དང་། བརྟེན་པ་རྡོ་རྗེ་ལ་གནས་པའི་ཐིག་ལེ་ནི་སྣ་ཚོགས་པའི་སྤྲུལ་པ་སྟོན་པར་བྱེད་པའི་རྡོ་རྗེ་སེམས་དཔའི་བདེ་བ་ཆེན་པོ་ལ་སོགས་པའི་བདེ་བ་ཀུན་གྱི་གཞི་ཡིན་ཏེ། རྡོ་རྗེ་ཕྲེང་བ་ལས། ཨེ་ནི་བྷ་གའི་མཚན་ཉིད་དེ། །པདྨ་རྟེན་དུ་ཤེས་པར་བྱ། །བརྟེན་
པ་རྡོ་རྗེ་ཞེས་ནི་གསུངས། །བརྟེན་པ་རྡོ་རྗེ་འཆང་བ་ཡིས། །དེ་ལ་གནས་པ་ཐིག་ལེའི་གཟུགས། །སྣ་ཚོགས་སྤྲུལ་པ་སྟོན་པར་བྱེད། །བདེ་བ་ཀུན་གྱི་གཞི་ཡི་གནས། །རྡོ་རྗེ་སེམས་དཔའ་བདེ་བ་ཆེ། ཞེས་སོ། །དེས་ནི་ཡབ་ཡུམ་གྱི་རྟགས་ཀྱི་ཨེ་ཝཾ་གཉིས་སྦྱར་བ་ལས་ལམ་
9-10-23a


གྱི་ཨེ་ཝཾ་འདྲེན་པའི་ཐབས་བསྟན་ཏོ། །འདིས་ནི་ཡེ་ཤེས་ཀྱི་ཕྱག་རྒྱ་ལ་བརྟེན་ནས་བསྐྱེད་པའང་ཤེས་པར་བྱའོ། །ནང་གི་རང་གི་ལུས་ལ་གནད་དུ་བསྣུན་པ་ལས་ལམ་གྱི་ཨེ་ཝཾ་འདྲེན་པའི་ཐབས་ལུས་ཀྱི་གནད་ཀྱི་རྟགས་ཀྱི་ཨེ་ཝཾ་ཡང་ས་མྦུ་ཊ་
ལས་གསུངས་ཏེ། སྤྱི་བོ་ལྟེ་བར་སོན་འཁོར་ལོ། །ཨེ་ཡིག་རྣམ་པར་ཡང་དག་གནས། །སྙིང་ཁ་མགྲིན་པར་ཡང་དག་གནས། །ཝཾ་གྱི་ཡི་གེ་འདྲ་བར་འདོད། །ཅེས་སྤྱི་བོ་དང་ལྟེ་བའི་རྩ་འཁོར་གྱི་དབྱིབས་ཨེ་གྲུ་གསུམ་གྱི་དབྱིབས་དང་། སྙིང་ཁ་དང་
མགྲིན་པའི་རྩ་འཁོར་གྱི་དབྱིབས་ཝཾ་ཡིག་ཟླུམ་པོའི་དབྱིབས་སུ་གནས་པ་ཨེ་ཝཾ་གྱི་དོན་དུ་བཤད་དོ། །དེ་ཡང་སྡོམ་འབྱུང་འགྲེལ་པ་ལས། ཡང་ན་ཨེ་ཡིག་ཤེས་རབ་ཀྱི་བདག་ཉིད་སྤྲུལ་པ་དང་ལོངས་སྤྱོད་རྫོགས་པའི་འཁོར་ལོའི་རང་བཞིན། ལྟེ་
བ་དང་མགྲིན་པ་ལ་ཝཾ་ཡིག་ཐབས་ཀྱི་བདག་ཉིད་ཆོས་དང་བདེ་བ་ཆེན་པོའི་འཁོར་ལོའི་རང་བཞིན་ཉིད་སྙིང་ཁ་དང་སྤྱི་བོའི་གནས་ཀྱི་ཁ་སྦྱར་བ་བསྒོམས་ནས་ལྷན་ཅིག་སྐྱེས་པའི་དགའ་བ་འབྱུང་བར་འགྱུར་རོ། །ཞེས་རྩ་འཁོར་རྣམས་ཀྱི་ལྟེ་བར་སེམས་
གཟུང་བས་ལྷན་སྐྱེས་འདྲེན་པར་བཤད་པའི་དོན་ཏོ། །རྩ་འཁོར་བཞི་ཨེ་ཝཾ་དུ་འཇོག་ཚུལ་ནི་སྔ་མ་དང་མི་མཐུན་པས་ཅུང་མ་དག་པའོ། །ལྷན་སྐྱེས་འདྲེན་པའི་ཐབས་རང་གི་ལུས་ལ་གནད་དུ་བསྣུན་སའི་གཙོ་བོ་ཡང་རྩ་ཨ་ཝ་དྷཱུ་ཏཱི་ཡིན་ཏེ། སྡོམ་
འབྱུང་ལས། རྐྱང་མ་རོ་མ་ལོགས་གཉིས་སུ། །ཨཱ་ལི་ཀཱ་ལིའི་རང་བཞིན་ཅན། འབྲས་བུ་རྒྱ་ཡི་རང་བཞིན་གྱིས། །དགའ་བ་བཞི་ཡི་གཟུགས་ཅན་མ། །ལྷན་སྐྱེས་དགའ་བའི་རང་བཞིན་དང་། །གཉིས་མེད་མཆོག་གི་དབང་ཕྱུག་མ། །ཀུན་རྫོབ་ཀུནྟ་
9-10-23b


ལྟ་བུ་སྟེ། །སྒྲིབ་མེད་བདེ་བའི་གཟུགས་ཅན་མ། །ཞེས་ཨཱ་ལིའི་ངོ་བོ་རྒྱས་པ་དང་། ཀཱ་ལིའི་ངོ་བོ་རོ་མ་གཉིས་ལོགས་གཡས་གཡོན་གཉིས་ན་གནས་པའི་མཆོག་གི་དབང་ཕྱུག་མ་དྷཱུ་ཏཱི་ལྷན་སྐྱེས་ཀྱི་དགའ་བའི་རང་བཞིན་དུ་བཤད་ལ། སྭ་བྷཱ་ཝ་ནི་རང་
བཞིན་དང་འབྱུང་བ་གཉིས་ཀ་ལ་འཇུག་པས་འདིར་ནི་དགའ་བདེ་འབྱུང་བའི་དོན་ཡིན་པའི་ཕྱིར་རོ། །དགའ་བཞི་སྔ་མ་སྔ་མ་རྒྱུ་དང་ཕྱི་མ་ཕྱི་མ་འབྲས་བུའི་ངོ་བོ་དང་། དྷཱུ་ཏཱི་ནས་ཀུནྟ་ལྟ་བུ་བབས་པ་ལ་སྒྲིབ་མེད་དེ་དོན་དམ་བདེ་བའི་གཟུགས་ཅན་མ་སྟེ་ཚུལ་
ཅན་སྐྱེ་བར་གསུངས་སོ། །ཡང་དེ་ཉིད་ལས། ཤེས་རབ་གཟུགས་ཀྱིས་ལ་ལ་ནི། །རོ་མ་ཐབས་ཀྱིས་ཡང་དག་གནས། །དེ་དག་དབུས་སུ་གནས་ལྷ་མོ། །ཨཾ་ཡིག་སྣ་ཚོགས་གཟུགས་ཅན་མ། །ལྷ་མོ་སྐུ་བཞིའི་བདག་ཉིད་ཅན། །དངོས་གྲུབ་ཐམས་ཅད་
རབ་སྩོལ་མ། །བདེ་ཆེན་རབ་སྦྱིན་ཐམས་ཅད་ལ། །རྟག་ཏུ་ཡང་དག་བདག་ཕྱག་འཚལ། ཞེས་ལྟེ་བར་རོ་རྐྱང་གི་དབུས་ཀྱི་དྷཱུ་ཏཱིར་གཏུམ་མོའི་ངོ་བོ་ཨཾ་ཡིག་བསྒོམས་པས་བདེ་ཆེན་སྦྱིན་པར་གསུངས་ཏེ། འདི་ནི་མཚོན་པ་ཙམ་སྟེ་རྩ་འཁོར་གང་ན་ཡོད་
པའི་ལྟེ་བའི་དྷཱུ་ཏཱི་དང་དྷཱུ་ཏཱིའི་ཡར་སྣ་མར་སྣ་རྣམས་སུ་ཡི་གེ་དང་ཐིག་ལེ་སོགས་ལ་དམིགས་པ་གཏད་ནས་བསྒོམས་པས་སྲོག་དྷཱུ་ཏཱིར་ཚུད་པའི་གནས་ཟབ་མོ་རེ་ཡོད་པ་ཀུན་ལ་ཤེས་པར་བྱའོ། །ཕྱག་འཚལ་ཞེས་པའི་མཇུག་ཐོགས་སུ། །གང་གང་གིས་
ནི་བསྒོམས་པ་ཡིས། །མི་རྣམས་ཀྱི་ཡིད་ཡང་དག་སྦྱོར། །དེས་དེའི་རང་བཞིན་འགྱུར་ལྷ་མོ། །སྣ་ཚོགས་གཟུགས་ཅན་ནོར་བུ་བཞིན། །ཞེས་གསུངས་ཏེ་འདིའི་དོན་ཤེས་པ་གལ་ཆེའོ། །གཞུང་འདི་གུར་དང་ཀུན་སྤྱོད་སོགས་རྒྱུད་མང་པོར་འབྱུང་
9-10-24a


ཞིང་གཞུང་གཅིག་ཡིན་ཀྱང་སྐབས་སྟོབས་ཀྱིས་དོན་སོ་སོ་བ་མང་པོ་ལ་བཤད་དགོས་པ་ཡོད་པ་ལས་འདིར་ནི་སྲོག་དྷཱུ་ཏཱིར་བསྡུས་པ་ལ་བརྟེན་ནས་ལྷན་སྐྱེས་ཀྱི་བདེ་བ་བསྐྱེད་པའི་ཆེད་དུ་སྒྲུབ་པ་པོ་གང་དང་གང་གིས་དྷཱུ་ཏཱིའི་
གནད་ཆེ་བ་གང་དང་གང་དུ་ཡང་དག་པ་སྟེ་ཕྱིན་ཅི་མ་ལོག་པར་ཡིད་སྦྱར་བ་སྟེ་གཏད་ནས་བསྒོམས་ན་ལྟེ་བའི་དྷཱུ་ཏཱིར་བདེ་ཆེན་སྟེར་བའི་ལྷ་མོ་ཕག་མོའི་ངོ་བོ་ཨཾ་ཡིག་བསྒོམས་པ་དེས་རྩ་གནས་དེར་རོ་རྐྱང་ལ་རྒྱུ་བའི་རླུང་སྡུད་ནུས་པ་དེའི་རང་བཞིན་
དུ་འགྱུར་ཏེ། དཔེར་ན་ནོར་བུ་ཤེལ་སྒོང་རས་དཀར་དམར་སོགས་ཀྱི་སྟོང་དུ་བཞག་པ་ན་དེ་དང་དེའི་གཟུགས་ཅན་དུ་འགྱུར་བ་བཞིན་ནོ། །ཞེས་པའི་དོན་ཏེ་ལུས་ཀྱི་གནད་ཆེ་སར་དམིགས་པ་གཏད་ནས་བསྒོམས་པས་གདམས་ངག་གིས་མཐུས་གནས་
དེར་རླུང་བསྡུ་བར་འདོད་པ་ཇི་ལྟ་བ་བཞིན་དུ་སྡུད་ནུས་པར་འགྱུར་བའི་ཁུངས་མཆོག་ཏུ་གྱུར་པའོ། །གཉིས་པ་ལ་གཉིས། ཕྱག་རྒྱ་ལ་བརྟེན་ནས་བདེ་ཆེན་འདྲེན་པ་ཇི་ལྟར་བསྟན་པ་དང་། རང་གི་ལུས་ཀྱི་གནད་རྣམས་ལ་བརྟེན་ནས་བདེ་ཆེན་འདྲེན་
པ་ཇི་ལྟར་བསྟན་པའོ། །དང་པོ་ནི། ཉུང་ངུའི་རྩ་རྒྱུད་ལས། ཕྱག་རྒྱ་དང་བྲལ་གསང་སྔགས་ནི། །ལུས་ཅན་རྣམས་ལ་འགྲུབ་མི་འགྱུར། །ཞེས་ཤེས་རབ་མའི་ཕྱག་རྒྱ་ལ་བརྟེན་པ་དང་བྲལ་ན་ལམ་གཞན་གྱིས་མི་འགྲུབ་པར་གསུངས་ཤིང་། 
ཡང་དེ་ཉིད་ལས། དེ་བཞིན་ཕོ་ཉ་ལེགས་འགྲོགས་པས། །སྒྲུབ་པ་པོ་ཡིས་དངོས་གྲུབ་འཐོབ། །བཟླས་བརྗོད་བསམ་གཏན་མཆོད་མེད་པར། །མྱུར་བ་ཉིད་དུ་འགྲུབ་པར་འགྱུར། །སྔགས་དང་ཕྱག་རྒྱས་སྒྲུབ་པ་པོས། །མཆོད་པ་ཉིད་ལ་
9-10-24b


རབ་ཏུ་འཇུག །འདི་ལས་གཞན་པའི་མཆོད་མེད་དེ། །དེ་ལྟར་བསྟན་བཅོས་ངེས་པ་ཡིན། །ཕོ་ཉའི་ལམ་ལ་དགའ་རྣམས་ཀྱི། །སྒྲུབ་པ་པོ་ནི་དངོས་གྲུབ་འགྱུར། །ཞེས་རྐང་པ་དང་པོ་གཉིས་དང་གསུམ་པས་ཕོ་ཉའི་ལམ་གྱིས་ཕྱིའི་བཟླས་བརྗོད་སོགས་
དང་བྲལ་ཡང་འགྲུབ་པ་དང་། མྱུང་བར་འགྲུབ་པ་ཡང་དེའི་མཐུས་ཡིན་པར་གསུངས་ཏེ། རིམ་པ་དང་པོའི་སྐབས་སུ་བཟླས་བརྗོད་སོགས་བྱེད་པ་སྔོན་དུ་གཏོང་བ་འགོག་པ་མིན་ནོ། །ཕོ་ཉའི་ལམ་ལ་བསྔགས་པ་ནི། བདག་མེད་པའི་དེ་ཁོ་ན་ཉིད་ལྷན་སྐྱེས་
ཀྱི་བདེ་ཆེན་གྱིས་བསྒོམ་དགོས་པའི་གནད་ཀྱིས་ཡིན་ནོ། །ཆུ་ལ་དེ་ཡང་ཕ་རྒྱུད་དང་མ་རྒྱུད་གཉིས་ཀའི་ལུགས་ངེས་པ་ཅན་ཡིན་པ་ནི་རྐང་པ་བརྒྱད་པས་སྟོན་པར་བཤད་དོ། །དོན་གྱི་དབང་འདི་གཟིགས་ནས་རྩ་རྒྱུད་ཀྱི་ལེའུ་བཅོ་ལྔ་པ་ནས་ཉེར་བཞི་པའི་
བར་གྱིས་ཕོ་ཉ་མོ་ཁྱད་པར་ཅན་དང་འདུ་བའི་སྐོར་ཉིད་བཤད་ཅིང་གཞན་ཡང་ལེའུ་མང་པོ་ནས་ཡང་དང་ཡང་དུ་གསུངས་སོ། །དེས་ན་ལྷན་སྐྱེས་ཀྱི་བདེ་ཆེན་འདྲེན་པ་ལ་ཐབས་མང་དུ་ཡོད་ཀྱང་ལས་དང་པོ་པའི་སྐབས་སུ་རང་གི་ལུས་ལ་དམིགས་ཏེ་བསྒོམ་
པ་སོགས་ཀྱིས་ལྷན་སྐྱེས་མཚོན་མི་ནུས་པའི་ཚེ་ཕོ་ཉ་མོ་མཚན་ཉིད་ཐམས་ཅད་ཚང་བ་ལས་མཚོན་དགོས་ཏེ། གསང་བ་གྲུབ་པ་ལས། ལས་ཀྱི་ཕྱག་རྒྱ་མཉམ་ལྡན་པས། །རྡོ་རྗེ་པདྨ་མཉམ་སྦྱོར་བས། །བདེན་པ་གསུང་བས་མངོན་སུམ་དུ། །
འདི་འདྲའི་བསྒོམ་པ་གང་གསུངས་པ། །དང་པོའི་ལས་ཅན་སེམས་ཅན་ལ། །ལས་ཀྱི་ཕྱག་རྒྱ་གང་སྤངས་ནས། །བྱང་ཆུབ་སེམས་ནི་རབ་སྟོན་པ། །གཞན་གྱིས་མཚོན་པས་མི་མཐོང་སྟེ། །དང་པོའི་ལས་པས་རིག་པར་བྱ། །ཐོག་མ་བར་མཐའ་དྲི་མེད་
9-10-25a


པ། །རིག་སྟེ་གཞན་དུ་ནུས་མ་ཡིན། །ཞེས་གསུངས་པས་སོ། །དེ་ལས་མཚོན་པ་སྔོན་དུ་སོང་ན། རང་གི་ལུས་ལ་གནད་དུ་བསྣུན་པའི་རྣལ་འབྱོར་བསྒོམས་པས་སྲོག་དྷཱུ་ཏཱིར་ཚུད་པ་ལ་བརྟེན་ནས་ལྷན་སྐྱེས་བསྐྱེད་སླ་ཞིང་། དེ་ལྟར་བྱ་
ནུས་པ་ནས་ཀྱང་ཕྱིའི་རྐྱེན་ཕོ་ཉ་མོ་མཚན་ཉིད་ཚང་བ་ལ་བརྟེན་ན་ལམ་ཆེས་མྱུར་བར་འགྱུར་གྱི། གཞན་དུ་མིན་པས་ཐབས་དེ་གཙོ་བོ་ཡིན་ཏེ། ཧེ་རུ་ཀ་མངོན་འབྱུང་ལས་ཀྱང་། དཔའ་བོ་གང་ཞིག་ཕྱག་རྒྱ་དམན། །སྒྲུབ་པོ་མཆོད་པར་བྱེད་པ་ནི། །
ཕུབ་མ་བརྡུང་དང་མཚུངས་པ་སྟེ། །ཞེས་གསུངས་སོ། །འོན་ཀྱང་རྩ་རྒྱུད་ལས། ཕོ་ཉ་རལ་གྲིའི་སོ་འདྲ་ཞིང་། ཞེས་གསུངས་པས་བརྟེན་པར་དཀའ་བའི་དོན་དུ་ཀོང་ཀ་ན་པ་བཞེད་པ་ནི། ཧེ་རུ་ཀ་མངོན་འབྱུང་ལས་ཀྱང་། རྣལ་འབྱོར་མེད་པར་རྣལ་འབྱོར་
ཆོས། །ཕྱག་རྒྱ་ལ་ནི་བགྲོད་གྱུར་དང་། །ཡེ་ཤེས་མེད་པར་ཡེ་ཤེས་ཚུལ། །དམྱལ་བར་འགྲོ་བར་ཐེ་ཚོམ་མེད། །ཅེས་གསུངས་ཏེ། ཡུལ་རྟེན་ཀུན་མཚན་ཉིད་མ་ཚང་བར་དེ་ལྟར་བྱེད་པ་ལ་ཉེས་དམིགས་ཤིན་ཏུ་ཆེ་བར་གསུངས་པ་རྣམས་ཤེས་དགོས་
སོ། །ཕྱག་རྒྱ་ལ་བརྟེན་པ་དང་བྲལ་ན་མི་འགྲུབ་པར་རྩ་རྒྱུད་ལས་གསུངས་པ་དེ་ཉིད་བཤད་རྒྱུད་ས་མྦུ་ཊ་ལས་ཀྱང་གསལ་བར་གསུངས་ཏེ། ཐབས་དང་ཤེས་རབ་མ་གཏོགས་པར་སངས་རྒྱས་ཉིད་མངོན་དུ་ཐོབ་པར་མི་འགྱུར་རོ། །དེའི་ཕྱིར་ཤེས་རབ་མ་
དངོས་སུ་ཡང་དག་པར་རྫོགས་པའི་བྱང་ཆུབ་སྦྱིན་པར་བྱེད་པ་བཟང་མོ་སྤང་བར་མི་བྱ་སྟེ། ཕྱག་རྒྱ་རེ་རེ་དང་ལྡན་པ་འདི་མ་གཏོགས་པར་དངོས་གྲུབ་སྟེར་བར་མི་འགྱུར་རོ་ཞེས་སོ། །ཕྱག་རྒྱ་བཟང་མོ་ནི་པདྨ་ཅན་ལ་སོགས་པ་ཡིན་ལ། དེ་དག་ལ་བརྟེན་
9-10-25b


པ་ན་བྱང་ཆུབ་ཀྱི་སེམས་ཀྱི་བཅུད་ཕྱག་རྒྱའི་སྟོབས་ཀྱིས་ཀྱང་འཆིང་བར་ནུས་པ་ཡིན་ཏེ། རྡོ་རྗེ་མཁའ་འགྲོ་ལས། རྩུབ་ཅེས་བྱ་བ་ནི་བ་གླང་གི་ལྕེ་ལྟར་རྩུབ་པའོ། །འཇམ་པ་ནི་པདྨ་ཅན་ཞེས་བྱ་བའོ། །འཁྲང་བ་ནི་ཁུ་བ་སྲ་བ་སྟེ་གང་གི་ཁུ་བ་འཐས་པར་
གྱུར་བའོ། །མཛེར་པ་ཅན་ནི་དུང་ཅན་མ་སྟེ་པདྨ་ལ་ཤ་མཛེར་ཡོད་པའོ། །བུད་མེད་འདི་དག་ནི་བཅུད་འཆིང་བ་ལ་དབང་དུ་གྱུར་བ་ཡིན་ནོ་ཞེས་གསུངས་སོ། །དེའི་དང་པོ་ནི་གླང་པོ་ཅན་དང་། གསུམ་པ་ནི་རི་མོ་ཅན་མ་ཡིན་ལ། རྩུབ་པ་དང་འཇམ་པ་ནི་
པདྨ་འོ། །ཕྱག་རྒྱ་དེ་དག་ལ་བརྟེན་པའི་ཚེ་ཁམས་ཀྱི་བཅུད་འཆིང་བ་ནི་གཡས་གཡོན་གྱི་རླུང་དྷཱུ་ཏཱིར་ཚུད་ནས་འགྲོ་བ་ཕྱིའི་ཕྱག་རྒྱ་སྲོག་རྩོལ་དུ་འགྲོ་བའི་གནད་ཤེས་པ་ལ་རག་ལས་ཏེ། མཁའ་འགྲོ་རྒྱ་མཚོར། དེ་ནས་རྡོ་རྗེ་པདྨ་འདུ་བྱ་བ། །ཇི་བཞིན་
བཤད་ཀྱིས་མཉན་པར་གྱིས། །རིན་ཆེན་རྡོ་རྗེའི་རབ་སྦྱོར་བས། །ཨ་ཝ་དྷཱུ་ཏཱི་ཅན་དངོས་གྲུབ། །རྣལ་འབྱོར་མ་ལ་ཡང་དག་རོལ། །དོན་དམ་པ་ཡི་ཉམས་ལ་གནས། །དེ་ཡི་སྦྱོར་བས་རོལ་བར་ནི། །གཉིས་མེད་རྒྱུད་རྣམས་ཀྱིས་འགྱུར་རོ། །ལུས་ཀྱི་
ཉམས་སུ་མྱོང་བཞིན་པ། །བྱིས་པ་རྣམས་ཀྱི་བྱང་ཆུབ་འོང་། །ཧ་ཡིག་དྲུག་པ་དང་ལྡན་པའི། །ས་བོན་རྡོ་རྗེའི་ནོར་བུ་དགོད། །ཨ་ཝ་དྷཱུ་ཏཱིའི་རྩེར་འབབ་སྟེ། །སྟེང་དུ་ཁ་བལྟས་དཔྲལ་བར་སོན། །བསྲུང་བའི་དུས་སུ་བློ་ལྡན་ཀྱིས། །རང་གི་ལག་པས་རྡོ་རྗེ་
གཟུང་། ཞེས་སོ། །རིན་ཆེན་ནི་དགའ་བ་རྒྱས་པར་བྱེད་པས་པདྨ་འོ། །ཨ་ཝ་དྷཱུ་ཏཱི་ཅན་ནི་གཟུང་འཛིན་གཉིས་ཀྱི་རྣམ་རྟོག་ཅི་རིགས་པ་སྤངས་པའི་རྣལ་འབྱོར་བའོ། །བྱིས་པ་རྣམས་ཀྱི་བྱང་ཆུབ་ནི་བརྡའི་བྱང་ཆུབ་ཀྱི་སེམས་ཀུནྟ་ལྟ་བུའོ། །དྲུག་པ་ནི་
9-10-26a


དབྱངས་ཀྱི་དྲུག་པ་ཨཱུ་རིང་པོ་སྟེ་དེ་ཧ་དང་སྦྱར་བས་ཧཱུཾ་ཡིན་ལ། ས་བོན་རྡོ་རྗེའི་བུ་གར་བཀོད་པས་ནི་ཁམས་མི་འཕོ་བར་བྱེད་དོ། །དྷཱུ་ཏཱིའི་རྩར་བྱང་སེམས་འབབ་པའི་རྒྱུ་ནི་ཕྱག་རྒྱ་དང་མཉམ་པར་སྦྱོར་བའི་རྩའི་གནད་ཀྱིས་ཡིན་ཏེ་
འདིའི་གནད་གཞན་དུ་ཤེས་པར་བྱའོ། །དྷཱུ་ཏཱིའི་རྩ་ནས་ནོར་བུའི་རྩེའི་བར་དུ་བབ་པ་ན་ཡས་བབས་ཀྱི་དགའ་བཞི་དང་། སྟེང་དུ་ཁ་བལྟས་པ་སྟེ་གྱེན་དུ་ལོག་ནས་དབྲལ་བ་བར་དུ་སོན་པ་ན་མས་བརྟན་གྱི་དགའ་བཞི་སྐྱེའོ། །ལྷག་མ་རྣམས་གོ་སླའོ། །
མན་སྙེ་ལས། ཤེས་རབ་དང་བཅས་པའི་ཐབས་དག་སྙོམས་པར་འཇུག་པས་ལ་ལ་ན་དང་ར་ས་ནའི་རླུང་དག་ཨ་ཝ་དྷཱུ་ཏཱིར་འཇུག་པ་ན་གཏུམ་མོ་འབར་རོ། །དེ་ཡང་ཕུང་པོ་ལ་སོགས་པ་བསྲེག་ཅིང་ཟླ་བ་འཇུ་པར་བྱེད་དོ་ཞེས་ལས་རྒྱ་དང་མཉམ་
པར་སྦྱར་བས་གཡས་གཡོན་གྱི་རླུང་དྷཱུ་ཏཱིར་ཞུགས་ནས་གཏུམ་མོ་སྦར་བས་བྱང་སེམས་འཇུ་བར་བཤད་ལ། དེ་བཞིན་གཤེགས་པའི་རྡོ་རྗེས། དེའི་ཚེ་སྣ་བུག་གཉིས་ཀྱི་རྒྱུ་བ་ལྡོག་པར་བཤད་པས། རླུང་གཉིས་དྷཱུ་ཏཱིར་ཐིམ་པ་ཡིན་ཏེ། 
ཐབས་དེ་ནི་ཕྱིའི་སྲོག་རྩོལ་ལོ། །བླ་མེད་ཀྱི་རྒྱུད་སྡེ་ནས་སྲོག་རྩོལ་གྱི་ལམ་འདི་མ་བཤད་པ་ཡང་མེད་ཅིང་བཤད་པ་ཡང་མེད་པ་ལ་ཐབས་འདིས་རླུང་དྷཱུ་ཏཱིར་སྡུད་པའི་རྒྱུ་མཚན་གྱི་གནད་ཤིན་ཏུ་རྟོགས་དཀའ་བར་སྣང་ནའང་གོ་བ་རགས་པ་
ཆགས་ན་རྒྱུད་དོན་མང་པོ་ཞིག་གོ་བ་ལ་ཁྱད་ཆེ་བར་སྣང་ངོ་། །ལས་རྒྱ་ལ་བརྟེན་ནས་ཇི་ལྟར་འབྱུང་བའི་གཟུགས་བརྙན་ཕལ་མོ་ཆེ། ཡེ་ཤེས་ཀྱི་ཕྱག་རྒྱ་ཤིན་ཏུ་གསལ་ཞིང་བརྟན་ན་དེ་ལ་བརྟེན་ནས་ཀྱང་འབྱུང་བས་ཡེ་རྒྱ་ལ་བརྟེན་ནས་
9-10-26b


ཀྱང་གཡས་གཡོན་གྱི་རླུང་དྷཱུ་ཏཱིར་ཚུད་པའི་སྐབས་ཡོད་དོ། །གཉིས་པ་ནི། འདིའི་བསྐྱེད་རིམ་དུ་བཤད་པའི་རླུང་མེ་ཆུ་ས་རི་རབ་དང་བཅས་པ་ལྔ་རྫོགས་རིམ་ལ་སྦྱར་ཏེ་བཤད་པ་ན། རྐང་པ་ནས་མགོ་བོའི་བར་དུ་རང་གི་ལུས་ལ་བྱ་སྟེ། དེ་ཉིད་གསལ་བ་
ལས། རྐང་མཐིལ་གཞུ་ཡི་རྣམ་པ་ཡི། །རླུང་གི་དཀྱིལ་འཁོར་ཡང་དག་གནས། །ལྟེ་བའི་ཕྱོགས་འདིར་མེ་ཉིད་ནི། །གྲུ་གསུམ་རྣམ་པར་འབར་བའོ། །ལྟོ་བར་ཆུ་ཞེས་གྲགས་པ་ཡི། །དཀྱིལ་འཁོར་ཟླུམ་པོའི་རྣམ་པའོ། །སྙིང་ཁ་རུ་ནི་ས་ཉིད་དེ། །ཀུན་ནས་
གྲུ་བཞི་པ་ཡིན་ནོ། །དེ་སྟེང་མགྲིན་པའི་ཕྱོགས་སུ་ནི། །རི་ཡི་རྒྱལ་བོ་རི་རབ་དང་། ཞེས་དང་། དེ་ཡི་རྩེ་མོ་མགོར་གསུངས་ཏེ། ཞེས་དབྱིབས་མཐུན་པའི་སྒོ་ནས་བཤད་པའོ། །དེ་ཡང་སམྦུ་ཊ་ནས་འབྱུང་བའི་དོན་ཡིན་ལ། དེ་ཉིད་ལས། རི་ནི་མགོ་
བོའི་ཟེ་འབྲུ་སྟེ། །ཇི་ལྟར་རྩོམ་ཆེན་ལ་སོགས་རིམ། །བླ་མའི་དུས་ཐབས་རིམ་ཉིད་ཀྱིས། །དེ་ནི་རྫོགས་པའི་དཀྱིལ་འཁོར་གནས། །ཞེས་རྐང་པའི་མཐིལ་རྩོམ་ཆེན་གྱི་རླུང་ལ་སོགས་པར་བཤད་པ་ནི་བླ་མའི་མན་ངག་གིས་དཀྱིལ་འཁོར་རྫོགས་
རིམ་དང་སྦྱར་བའི་ལུགས་སུ་གསུངས་པས་ཀྱང་ཤེས་སོ། །འདི་ཡང་རྩ་རྒྱུད་ལས་ཇི་ལྟར་བསྟན་པ་ནི། མངོན་བརྗོད་ལས། ཐམས་ཅད་བདག་ཉིད་རྟག་བཞུགས་པར། །གང་ཞིག་སྔར་ནི་བཤད་པ་ཉིད། །དཀྱིལ་འཁོར་ལུས་ནི་ཡིན་པར་བཤད། །
དེ་ནི་སྒོ་དགུ་དག་ཏུ་འགྱུར། ཞེས་གསུངས་པ་ལས་ཤེས་པར་བྱའོ། །དེ་ཡང་གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་པའི་གསང་བ་ནི་ས་དང་། མཆོག་ནི་ཆུ་དང་། དགྱེས་པ་ནི་མེ་དང་། ཐམས་ཅད་
9-10-27a


བདག་ཉིད་ནི་རླུང་དང་། རྟག་ཏུ་བཞུགས་པ་ནི་ནམ་མཁའི་ཁམས་བདེ་བ་ཆེན་པོར་དེ་ཉིད་གསལ་བ་སོགས་ལས་གསུངས་ཏེ་སམྦུ་ཊའི་དགོངས་པའོ། །དེ་ལྟར་ན་གསང་བ་སོགས་ཕྱི་བསྐྱེད་རིམ་ལ་སྦྱར་ན་འབྱུང་བཞི་རིམ་
བརྩེག་དང་། ནང་རྫོགས་རིམ་ལ་སྦྱར་ན་རྡོ་རྗེའི་ལུས་སྟོན་ཏེ། དེའི་ཤུགས་ཀྱིས་རི་རབ་ཀྱི་སྦྱོང་ལུགས་གཉིས་ཀྱང་ཤེས་པར་བྱའོ། །མངོན་བྱང་གི་ཨཱ་ལི་ཀཱ་ལའི་འགོད་པའི་གཞི་པདྨ་ནང་ལ་སྦྱར་བ་ན། སྤྱི་བོའི་རྩ་འདབ་སོ་གཉིས་སུ་སམྦུ་ཊ་ལས་
གསུངས་པ་ནི་མཚོན་པ་ཙམ་སྟེ། མགྲིན་པ་དང་སྙིང་ཁ་དང་ལྟེ་བ་ལ་སོགས་པའི་རྩ་འཁོར་སོགས་ལུས་ལ་གནད་དུ་བསྣུན་ནས་ཀུན་གཟུང་བར་བྱའོ། །དེ་ལྟར་བྱར་རུང་བ་ཡང་རྩ་རྒྱུད་ལས། ཆེས་འབྱུང་བྲིས་པའི་དབུས་སུ་དབྱངས་གསལ་བཀོད་
ནས་བསྐྱེད་རིམ་པའི་སྔགས་བཏུ་བ་གསུངས་པ་དེ་ལ་བཤད་རྒྱུད་སམྦུ་ཊ་ནས་བཤད་མཛད་པ་ན། ལྟེ་བའི་རྩ་འཁོར་ལ་གསུངས་པའི་དོན་མན་སྙ་ལས། འདིས་ནི་ལྟེ་བའི་པདྨ་ལ་སོགས་པ་ཡང་གསུངས་སོ་ཞེས་རྩ་འཁོར་གཞན་ལ་ཡང་
བཤད་པ་དང་འདྲའོ། །དེ་ལྟར་ན་བསྐྱེད་རིམ་ལ་ཧེ་རུ་ཀ་བསྐྱེད་པའི་གཞི་འབྱུང་བ་རིམ་བརྩེགས་རི་རབ་པདྨ་དང་བཅས་པ་བཤད་པ་དེ་ནང་རྫོགས་རིམ་ལ་བཤད་པ་ན། གང་ལ་གནད་དུ་བསྣུན་པས་ལྷན་སྐྱེས་ཀྱི་ཧེ་རུ་ཀ་འཆར་བའི་གཞི། 
བུག་པའི་སྒོ་དགུ་པ་ཅན་གྱི་རྡོ་རྗེའི་ལུས་སྤྱི་དང་བྱེ་བྲག་གི་གནད་རྣམས་སྟོན་པར་ཤེས་པར་བྱའོ། །འདི་ནི་ལཱུ་ཨི་པ་ལྟ་བུ་མངོན་བྱང་ལྔ་ལས་རྟེན་དང་བརྟེན་པ་གཉིས་ཀ་བསྐྱེད་པ་ལྟ་བུ་ལ་སྦྱར་གྱི། རྟེན་གཞལ་ཡས་ཁང་སྔོན་དུ་བསྐྱེད་
9-10-27b


ནས་དེའི་དབུས་སུ་མངོན་བྱང་ལས་ཧེ་རུ་ཀ་བསྐྱེད་པ་ལྟ་བུ་ཡིན་ན། ལུས་འདོམ་གང་གྲུ་བཞི་གཞལ་ཡས་ཁང་གྲུ་བཞིར་སམྦུ་ཊར་བཤད་པས། རླུང་ནས་གཞལ་ཡས་ཁང་གི་བར་དང་། དབྱངས་གསལ་འགོད་པའི་གཞི་པདྨ་ཚུན་ཆོད་གང་ལ་
གནད་དུ་བསྣུན་པའི་གཞི་དང་སྦྱར་ལ་བཤད་དོ། །རྟག་ཏུ་བཞུགས་པའི་དོན་ནམ་མཁའི་ཁམས་བདེ་ཆེན་དུ་བཤད་པ་བསྐྱེད་རིམ་ལ་སྦྱོར་ན། བདེ་ཆེན་འདྲེན་བྱེད་མཚོན་པའི་དབྱངས་གསལ་ཟླ་བ་ཧཱུཾ་བཅས་དང་། བདེ་ཆེན་མཚོན་པའི་ཧེ་རུ་ཀ་ལ་
བྱ་ཞིང་། རྫོགས་རིམ་ལ་སྦྱར་ན། གང་དུ་ལུས་ལ་གནད་དུ་བསྣུན་སའི་བྱང་སེམས་དཀར་དམར་སེམས་དང་བཅས་པ་ལ་སྦྱར་བ་དང་། དེས་དྲངས་པའི་བདེ་ཆེན་གྱི་ཧེ་རུ་ཀ་ལ་ཡང་སྦྱར་རོ། །སྣང་ཕྱོགས་ཀྱི་ཧེ་རུ་ཀ་ཡང་ཤེས་པར་བྱ་སྟེ། 
སྟོང་པའི་ངང་ལས་ནཱ་དར་ལངས་པའི་ངེས་དོན་གྱི་བཤད་པ་ལས་ཤེས་སོ། །སམྦུ་ཊར་མངོན་བྱང་གི་དབྱངས་གསལ་རྣམས་སྤྱི་བོའི་རྩ་འདབ་སོ་གཉིས་ནས་རྒྱུ་བའི་བྱང་སེམས་ལ་བཤད་པ་ཡང་མཚོན་པ་ཙམ་སྟེ། ལུས་ཀྱི་གནད་གཞན་དུ་
ཡང་ཤེས་པར་བྱའོ། །སམྦུ་ཊར་དབྱངས་གསལ་གྱིས་བསྐྱེད་པའི་ཟླ་བ་ནང་ལ་སྦྱར་བ་ན་ཀླད་པ་དང་། ཧཱུཾ་ཡིག་ནང་ལ་སྦྱོར་བའི་སྐབས་སུ་ཧཾ་ཡིག་ལ་བཤད་པ་ཡང་མཚོན་པ་ཙམ་ཡིན་གྱི། དེ་ཁོ་ནར་མ་ངེས་ཏེ། དེ་ཉིད་གསལ་བ་ལས། དེ་ཡི་
རྩེ་མོ་མགོར་གསུངས་ཏེ། །འདམ་སྐྱེས་འདབ་མ་སུམ་ཅུ་གཉིས། །དེ་ཡི་དབུས་སུ་ཧཾ་ཡིན་ཏེ། །ཨཱ་ལི་ཀཱ་ལི་ལས་སྤྲུལ་པ། །མི་ཤིགས་གོ་འཕང་ཉམས་དགའ་བ། །བདེ་བ་ཆེན་པོ་ཞེས་བྱར་བརྗོད། ཅེས་ཨཱ་ལི་ཀཱ་ལིས་བསྐྱེད་པའི་ཟླ་བ་བདེ་བ་
9-10-28a


ཆེན་པོར་ཡང་གསུངས་པའི་ཕྱིར་རོ། །དེ་ལྟར་ངེས་དོན་གྱི་ཧེ་རུ་ཀ་བསྐྱེད་པའི་གཞི་ནི་ལུས་ཀྱི་དཀྱིལ་འཁོར་ལ་བཤད་པ་ལ་འཁོར་ལོ་བཞི་ལ་སོགས་པའི་དབུས་ཀྱི་དབུ་མ་དང་དེའི་ཡར་སྣ་མར་སྣ་སོགས་གནད་དུ་བསྣུན་
ས་མང་ཡང་། ལཱུ་ཨི་པའི་ལུགས་འདི་ནི་ཀུན་སྤྱོད་ལས། ཟླ་བའི་དཀྱིལ་འཁོར་རྫོགས་པ་ནི། །ལྟེ་བའི་རྩ་བར་གནས་པར་བསྒོམ། ཞེས་གསུངས་པས་ལྟེ་བ་སྤྲུལ་པའི་འཁོར་ལོ་ལ་གནད་དུ་བསྣུན་པ་ཡིན་ལ། དེ་དང་མཐུན་པར་མངོན་བརྗོད་
ལས་ཀྱང་། དཀྱིལ་འཁོར་ལུས་ནི་ཡིན་པར་བཤད། །དེ་ནི་སྒོ་དགུ་དག་ཏུ་འགྱུར། །དེ་ལ་ལྟེ་བའི་འཁོར་ལོ་ཆེ། །ཐམས་ཅད་མཁྱེན་པ་ཞེས་བྱར་བཤད། རྡོ་རྗེ་ཅན་ནི་དེར་བཞུགས་པ། །ཞེས་ཐམས་ཅད་མཁྱེན་པ་ཞེས་གྲགས་པའི་རྡོ་རྗེ་ཅན་ངེས་དོན་ལྷན་སྐྱེས་
ཀྱི་ཧེ་རུ་ཀ་ལྟེ་བར་བཞུགས་པར་བཤད་དེ། དེ་ལ་བཞུགས་པ་ནི་སྔར་བཤད་པ་ལྟར་ཤིང་ལ་མེ་གནས། ཞེས་པ་ལྟར་དེར་གནད་དུ་བསྣུན་པ་ལས་ལྷན་སྐྱེས་འབྱུང་བ་སྟེ། ཧེ་རུ་ཀ་མངོན་འབྱུང་ལས། དེ་ལྟར་གསུངས་པའི་དོན་ཡང་དེ་བཞིན་ནོ། །ཡང་
མངོན་བརྗོད་ལས། ལྟེ་བའི་ནང་ན་པདྨ་ཆེ། །བཅུ་དྲུག་ཐིག་ནི་གདབ་པར་བྱ། ཡི་གེ་དང་ཡང་མཉམ་པར་སྦྱོར། །ཁ་སྦྱོར་བྱ་བ་བྱས་པ་ཡིན། །ཞེས་གསུངས་པའི་རྐང་པ་དང་པོ་གཉིས་ཀྱི་དོན་ནི་ལྟེ་བ་སྤྲུལ་པའི་འཁོར་ལོ་ལ་རྩ་འདབ་རིམ་པ་བཞི་ཡོད་པའི་
དང་པོ་ལ་རྩ་འདབ་བཞི། གཉིས་པ་ལ་བརྒྱད། གསུམ་པ་ལ་རྩ་འདབ་བཅུ་དྲུག་ཡོད་པའི་དོན་དུ་བཤད་ཅིང་། བཞི་པ་ལ་དྲུག་ཅུ་རྩ་བཞི་ཡོད་པར་བཤད་དོ། །རྩ་འདབ་ཀྱི་རིམ་པ་གཞན་གསུམ་ནི་ཧེ་རུ་ཀ་མངོན་འབྱུང་ལས། བཅུ་དྲུག་ལ་སོགས་ཀྱིས་ནི་
9-10-28b


བསྐོར། ཞེས་པའི་སོགས་ཀྱིས་བསྡུས་སོ། །ཡི་གེ་དང་མཉམ་པར་སྦྱོར་བ་ནི་ཡི་གེ་རྐྱང་པ་བསྒོམ་པ་མིན་པར་ལྟེ་བའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་འོག་ནས་འཆད་པ་ལྟར་ཡི་གེ་བསྒོམ་པའོ། །དེ་འདྲ་བའི་རྩ་དང་ཡི་གེ་གཉིས་མཉམ་པར་སྦྱོར་བ་བསྒོམས་པས་བྱ་
བ་བྱས་ཚུལ་ནི། ཧེ་རུ་ཀ་མངོན་འབྱུང་ཁ་ཅིག་ལས། །ཁ་སྦྱོར་འབྱེད་པའི་བདག་ཉིད་དོ། །ཞེས་འབྱུང་བ་ལྟར་དྷཱུ་ཏཱིའི་ཁ་འབྱར་བ་འབྱེད་པར་བྱེད་པ་ཡིན་ལ། དབུ་མའི་ཁ་བྱེ་ན་རོ་རྐྱང་གི་ཁ་ཟུམ་པ་དང་། རོ་རྐྱང་གི་ཁ་བྱེ་ན་དབུ་མ་ཁ་ཟུམ་པ་ནི་ངེས་པ་ཡིན་པས་དབུ་མའི་
ཁ་འབྱེད་པའི་རྣལ་འབྱོར་གྱིས་རོ་རྐྱང་ལ་རླུང་རྒྱུ་བ་འགོག་པ་ཡིན་ནོ། །ནམ་མཁའ་སྦྱོར་བའི་བདག་ཉིད་དེ། ཞེས་པ་ལྟར་ནའང་དྷཱུ་ཏཱིའི་ཁོང་སྟོང་གི་ནམ་མཁའ་འབྱེད་པ་ལ་སྦྱོར་བའི་དོན་ནོ། །ཉི་མ་ཟླ་བ་རྣམ་དག་སྟེ། །འཆར་དང་ནུབ་པར་བསྟན་པ་ཡིན། །ཞེས་པ་ནི་
ཡི་གེ་དང་མཉམ་པར་སྦྱོང་བའི་ཐབས་དེས་ཉི་མ་རོ་མ་ཟླ་བ་རྐྱང་མའི་རླུང་དག་པར་བྱས་ཏེ་ལྷན་སྐྱེས་ཀྱི་ཡེ་ཤེས་འཆར་བ་དང་། ཀུན་རྟོག་ཐམས་ཅད་ནུབ་པར་བྱེད་པར་བསྟན་པ་ཡིན་ཞེས་པའོ། །པདྨའི་སྣ་རྩེར་ཡུངས་ཀར་ཙམ། །ཞེས་པ་ནི་པདྨ་ནི་རྩ་འཁོར་
ཡིན་ཏེ། རྡོ་རྗེ་ཕྲེང་བ་ལས། པདྨའི་མིང་ཅན་འཁོར་ལོ་རྣམས། ཞེས་གསུངས་པ་ལྟར་རོ། །དེའི་སྣ་རྩེ་ནི། དེ་ཉིད་ལས། དེའི་ཡང་ལྟེ་བ་སྣ་རུ་བཤད། ཅེས་གསུངས་པ་ལྟར་རྩ་འཁོར་གྱི་ལྟེ་བ་ཡིན་ལ། དེ་ཡང་འཁོར་ལོའི་དབུས་ཀྱི་དྷཱུ་ཏཱིའི་ནང་ངོ་། །ཡུངས་
ཀར་ལ་བཤད་པ་མང་དུ་ཡོད་ཀྱང་འདིར་ནི་ཧཱུཾ་ཡིག་དང་རླུང་ལ་བྱའོ། །རྒྱུ་དང་མི་རྒྱུའི་རང་བཞིན་ཀུན་ནི་སྣོད་བཅུད་ཀུན་གྱི་རང་བཞིན་ཏེ་རྩ་བ་རླུང་དང་སེམས་མཚོན་པའི་ཧཱུཾ་ངོ་། །ཡིད་ཀྱི་བཟླས་པར་ཡང་དག་ལྡན། །ཕྱི་ཡི་དབྱངས་ནི་རྣམ་པར་སྤངས་
9-10-29a


ཞེས་པ་ནི་ཕྱིའི་ངག་གི་བཟླས་པ་སྤངས་པའི་ཡིད་ཀྱི་བཟླས་པ་རྡོ་རྗེའི་བཟླས་པའོ། །དེ་ནི་བསྐྱེད་རིམ་པའི་ཡིད་བཟླས་མིན་གྱི་རྫོགས་རིམ་པའི་རླུང་ལྡང་འཇུག་གནས་གསུམ་ཡི་གེ་གསུམ་དང་སྦྱར་བ་ལ་དམིགས་པའི་རྡོར་བཟླས་
སོ། །ལཱུ་ཨི་པའི་འགྲེལ་པར་ལྭ་བ་པས་ལྟེ་བར་རླུང་རྡོ་རྗེའི་བཟླས་པ་བཤད་པ་བཞིན་འགྲེལ་པ་གཞན་གཉིས་ཀྱིས་ཀྱང་བཤད་པ་ནི་ཀུན་སྤྱོད་ལས་མི་གསལ་ཡང་ཧེ་རུ་ཀ་མངོན་འབྱུང་དང་མཐུན་ཏེ་ངག་བཟླས་ཀྱི་ངེས་དོན་བཤད་ན་དེ་ལྟར་འགྱུར་རོ། །
དེ་ཡི་ཡེ་ཤེས་སངས་རྒྱས་ཏེ། །གཞན་གྱིས་སངས་རྒྱས་མི་འགྱུར་རོ། །ཞེས་པ་ནི་དྷཱུ་ཏཱི་ལ་གནད་དུ་བསྣུན་པའི་རྣལ་འབྱོར་གྱིས་དྲངས་པ་དེའི་ཡེ་ཤེས་ཏེ་ལྷན་སྐྱེས་ཀྱི་ཡེ་ཤེས་ཀྱིས་སངས་རྒྱས་སུ་འགྱུར་གྱི་གཞན་ཏེ་དེ་དང་བྲལ་བས་སངས་རྒྱས་ཐོབ་
པར་མི་འགྱུར་པའི་དོན་ནོ། །དེ་ལྟར་ན་ལུས་ཀྱི་གནད་ལྟེ་བ་སྤྲུལ་པའི་འཁོར་ལོར་རྗེས་གཞིག་གི་སྡུད་རིམ་གྱིས་བསྡུས་ཏེ་ཧཱུཾ་ཡིག་དང་ནཱ་ད་གཉིས་དྷཱུ་ཏཱི་དང་མཉམ་པར་སྦྱོར་བ་དང་། དེ་ཡང་མི་དམིགས་པར་སྦྱོར་བ་དང་། ལྟེ་བར་ཧཱུཾ་ཡིག་གམ་ནཱ་ད་དཀར་
དམར་ལས་ལྡང་འཇུག་གནས་གསུམ་གྱི་རྡོར་བཟླས་ཀྱི་རྣལ་འབྱོར་གྱིས་རླུང་དྷཱུ་ཏཱིར་བཙུད་པ་ལས་ལྷན་སྐྱེས་དང་། སྒྱུ་མའི་སྐུ་བསྐྱེད་པ་ལཱུ་ཨི་བའི་རྫོགས་རིམ་དུ་བཤད་པ་ནི་རྩ་རྒྱུད་དང་རྣལ་འབྱོར་མ་ཀུན་སྤྱོད་དང་། མཁོན་བརྗོད་དང་ཧེ་རུ་ཀ་
མངོན་འབྱུང་གསུམ་བསྒྲིགས་ཏེ་བཤད་པ་ལས་ཤེས་པར་བྱའོ། །གསུམ་པ་བསྟན་པའི་དོན་དེ་ཉམས་སུ་ལེན་པའི་རིམ་པ་ལ་གཉིས། ཉམས་སུ་བླང་བྱའི་གདམས་ངག་གི་རྣམ་གཞག་དང་། ཇི་ལྟར་ཉམས་སུ་ལེན་པའི་ཚུལ་དངོས་སོ། །དང་
9-10-29b


པོ་ནི། བདེ་མཆོག་ལ་ཡང་སྦྱོར་བ་ཡན་ལག་དྲུག་དང་། རིམ་པ་ལྔའི་རྣམ་གཞག་གཉིས་གསུངས་ཏེ། མཁའ་འགྲོ་རྒྱ་མཚོ་ལས། སོ་སོར་སྡུད་དང་དེ་བཞིན་དུ། །བསམ་གཏན་སྲོག་རྩོལ་འཛིན་པ་དང་། །རྗེས་སུ་དྲན་དང་ཏིང་ངེ་འཛིན་ཏེ། །སྦྱོར་བའི་མཚན་
ཉིད་རྣམ་དྲུག་གོ། ཞེས་དང་། རང་གི་སྐུ་ནི་སྒྱུ་མ་མཉམ། །བདག་བྱིན་བརླབ་འདི་ཕྲ་མོ་དང་། །རྡོ་རྗེ་བཟླས་རང་མཚན་ཉིད་དོ། །རྫོགས་པའི་བྱང་ཆུབ་སེམས་ཀྱི་གཏེར། །དེ་ལས་ལྷག་མ་ཟུང་འཇུག་གོ། ཞེས་སོ། །དེ་ལ་རང་གི་སྐུ་སྒྱུ་མ་དང་མཉམ་པ་
སྟེ་མཚུངས་པའི་བདག་བྱིན་བརླབས་ཤིན་ཏུ་རྟོགས་དཀའ་བས་ཕྲ་མོར་གྱུར་པ་ནི་རིམ་པ་གསུམ་པ་བདག་བྱིན་བརླབས་ཀྱི་རིམ་པ་སྒྱུ་ལུས་སོ། །རྡོ་རྗེ་བཟླས་པའི་རང་གི་མཚན་ཉིད་ནི་རྡོ་རྗེ་བཟླས་པའི་རིམ་པ་སྟེ་རིམ་པ་དང་པོའོ། །མངོན་པར་རྫོགས་
པར་བྱང་ཆུབ་པའི་རིམ་པ་ནི་རིམ་པ་བཞི་པ་སྟེ་མིང་གཞན་འོད་གསལ་གྱི་རིམ་པའོ། །སེམས་ཀྱི་གཏེར་ནི་སེམས་དབེན་ནམ་སེམས་དམིགས་ཀྱི་རིམ་པ་སྟེ་རིམ་པ་གཉིས་པའོ། །སྔར་བཤད་པ་བཞི་ལས་ལྷག་མ་ནི་ཟུང་འཇུག་གི་རིམ་པ་སྟེ་རིམ་པ་
ལྔ་པའོ། །བདེ་མཆོག་འབྱུང་བ་ལས་ཀྱང་། པདྨ་མགོན་པོ་སོགས་མགོན་པོ་ལྔའི་རླུང་བཤད་པ་ལྟར། རླུང་གི་དེ་ཉིད་སྔོན་འགྲོ་བས། །སྔགས་ཀྱི་དེ་ཉིད་བསྒྲུབ་པར་བྱ། །སེམས་ཅན་རྣམས་ཀྱི་སྲོག་འགྱུར་ཞིང་། །ལས་ཀུན་བྱེད་པས་རླུང་དུ་བརྗོད། །
རྣམ་ཤེས་བཞོན་པ་ཉིད་ཀྱང་སྟེ། །སངས་རྒྱས་གོ་འཕང་དེ་ཉིད་འཐོབ། །རྒྱུད་རྣམས་ཀུན་གྱི་གསང་བ་ཡི། །ཐབས་དང་བྱང་ཆུབ་རྒྱུ་ཡིན་ནོ། །ཞེས་རླུང་དང་སྔགས་ཀྱི་དེ་ཉིད་སྦྱོར་བར་བཤད་ཅིང་། རྟག་ཏུ་ཐོ་རངས་ལངས་ནས་རླུང་། །སྟོང་ཕྲག་
9-10-30a


གཅིག་ནི་བགྲང་བྱ་སྟེ། །དེ་ཕྱིར་རླུང་གི་རྣལ་འབྱོར་གྱིས། །རྟག་ཏུ་མཉམ་གཞག་གནས་པར་བྱ། ཞེས་རྡོ་རྗེའི་བཟླས་པ་གསུངས་ལ། ཀུན་རྫོབ་སྐྱེ་བ་འབྱུང་བ་ལས། །དངོས་མེད་ཀྱང་མིན་ཆ་མེད་ཕྱིར། །ལྷན་སྐྱེས་ཆོས་རྣམས་
ཐམས་ཅད་ཀྱི། །ལྷན་སྐྱེས་དགའ་བའི་རང་བཞིན་དང་། །རང་བྱིན་བརླབས་དང་རང་འབྱུང་སྟེ། ཞེས་དང་། བདེ་ཆེན་མངོན་པར་རྫོགས་བྱང་ཆུབ། །དེ་བཞིན་ཕྱག་རྒྱ་ཆེན་པོ་མཆོག །ཅེས་སྡོམ་འབྱུང་ལས་སྔར་དྲངས་པའི་ཟུང་འཇུག་བཤད་པའི་འཕྲོ་ལ་
གསུངས་ཏེ། ཀུན་རྫོབ་པའི་སྐྱེ་བ་ནི་སྒྱུ་ལུས་བདག་བྱིན་བརླབས་དང་། མངོན་པར་བྱང་ཆུབ་པ་འོད་གསལ་བ་ནི་ལྷན་སྐྱེས་ཀྱི་བདེ་བ་ཆེན་པོར་གསུངས་པས་དེ་དག་གི་ཤུགས་ཀྱིས་སེམས་དབེན་ཡང་རྟོགས་པར་འགྱུར་རོ། །སྦྱོར་བ་ཡན་ལག་དྲུག་ནི་
མཁའ་འགྲོ་རྒྱ་མཚོ་ལས། སོ་སོར་སྡུད་པ་ཁྭ་གདོང་མ། །འུག་གདོང་མ་ནི་བསམ་གཏན་འདོད། །སྲོག་རྩོལ་དུ་ནི་གནས་པ་ཁྱི། །འཛིན་པ་ལ་ནི་ཕག་མོའོ། །རྗེས་དྲན་གནས་པ་ཕོ་ཉ་མོ། །ཏིང་ངེ་འཛིན་ནི་བརྟན་མར་འདོད། །མཆི་བ་མ་ནི་རྒྱས་བརྟན་
ཐོབ། །འཇོམས་མ་འབྲས་བུ་ཀུན་བདག་སྐྱེས། །འཁོར་བ་ལས་ནི་གྲོལ་གྱུར་པ། ཞེས་ཕག་གདོང་མ་མ་གཏོགས་པའི་སྒོ་མ་གསུམ་ཕག་མོ་དང་བཞི། གཤིན་རྗེ་ཕོ་ཉ་མོ་དང་བརྟན་མ་སྟེ་མཚམས་མ་གཉིས་དང་དྲུག་སྦྱོར་བ་ཡན་ལག་དྲུག་ཏུ་
རིམ་པ་བཞིན་བཤད་ལ། འགྲེལ་པ་ལས་དེ་རྣམས་རྟོགས་སླ་བ་དང་བླ་མའི་ཞལ་ལས་ཤེས་པར་བྱ་བར་བཤད་དེ། ཡན་ལག་དྲུག་བདེ་མཆོག་སྟོད་འགྲེལ་ལས་གསུངས་པ་བཞིན་དུ་མི་གསལ་ལོ། །ལཱུ་ཨི་པའི་འགྲེལ་པ་ཁྱད་པར་
9-10-30b


གསལ་བྱེད་ལས། ཤིན་ཏུ་རྣལ་འབྱོར་གྱི་བར་གྱིས་བསྐྱེད་རིམ་དང་། རྣལ་འབྱོར་ཆེན་པོའི་རྫོགས་རིམ་གྱི་རིམ་པ་གཉིས་ནི། རིགས་པས་གྲུབ་པའི་ཡན་ལག་དྲུག་པའི་གོ་རིམས་ཁོ་ནས་བསྒོམ་པར་བྱའི་གཞན་དུ་ན་དངོས་གྲུབ་མི་འགྲུབ་སྟེ། འདུས་པ་
ཕྱི་མ་ལས། བསྙེན་པ་ཡན་ལག་དྲུག་སྦྱོར་བས། །སྒྲུབ་པའི་མཆོག་ནི་བྱས་ནས་སུ། །བསྒྲུབ་པར་བྱ་ཡི་གཞན་དུ་ན། །གྲུབ་པ་མཆོག་ནི་མི་འཐོབ་བོ། །ཞེས་དྲངས་ནས་མཆོག་འགྲུབ་པ་ལ་སྦྱོར་བ་ཡན་ལག་དྲུག་གི་རིམ་པ་སྒྲུབ་དགོས་ཞེས་བསྒྲུབས་ནས་
ལཱུ་ཨི་པའི་ལུགས་འདི་ལ་ཡང་ཡན་ལག་དྲུག་སྦྱོར་བར་བྱེད་དོ། །སྦྱོར་ཚུལ་ནི། །མིག་ལ་སོགས་པའི་ཤེས་པ་ལྔ་གཟུགས་ལ་སོགས་པའི་ཡུལ་ལྔ་ལ་འཇུག་པ་སོ་སོར་སྡུད་པ་སྟེ་འགུགས་པར་བྱེད་པ་ནི་སོར་སྡུད་དང་། དེ་ལྟར་བསྡུས་ནས་ནང་
གི་ཕུང་ཁམས་སྐྱེ་མཆེད་རྣམས་བདེ་མཆོག་ལ་སོགས་པའི་ལྷར་སྦྱོར་བ་ནི་བསམ་གཏན་ཡིན་ལ། རྟེན་དང་བརྟེན་པའི་དཀྱིལ་འཁོར་པའི་ངོ་བོ་ཙམ་དུ་རྟོགས་པ་ནི་རྟོག་པ་དང་། དམིགས་པ་དེ་ལ་བརྟེན་པའི་སེམས་ཀྱིས་ངེས་པ་ནི་དཔྱོད་པ་དང་། དེ་
ལྟར་ལྷ་ལ་དམིགས་པས་ཡིད་བདེ་བ་ནི་དགའ་བ་དང་། དགའ་བས་བསྒོམས་པའི་ལྷ་ལ་སིམ་པ་དང་བཅས་པའི་སེམས་ནི་བདེ་བ་དང་། བདེ་བ་དང་ལྡན་པའི་སེམས་ཏིང་ངེ་འཛིན་དུ་འགྱུར་བས་རྣམ་པ་སྣ་ཚོགས་པའི་ཐ་མལ་གྱི་ཀུན་རྫོབ་ཀྱི་
ཡུལ་ཅན་གྱི་རྟོག་པ་ལོག་པས་ལྷ་ཁོ་ན་ལ་དམིགས་པའི་སེམས་ནི་སེམས་རྩེ་གཅིག་པ་བསམ་གཏན་གྱི་ཡན་ལག་ལྔའོ། །སྲོག་རྩོལ་ལ་སོགས་པའི་ཡན་ལག་ཕྱི་མ་བཞི་རྫོགས་རིམ་དུ་བཤད་ཅིང་། འདི་ཁོ་ན་རྒྱུད་དང་བརྒྱུད་པའི་རིམ་པ་
9-10-31a


ལས་འབྱུང་བའི་བཤད་པའོ། །ཞེས་བཤད་པ་དེ་ཧེ་རུ་ཀ་ནས་དཔེ་མེད་མཚོ་ལས་བརྒྱུད་པའི་རིམ་པ་ལས་ཀྱང་འབྱུང་ཞིང་རྒྱུད་ལས་ཀྱང་བཤད་ཅེས་འཆད་དོ། །དེ་ནི་འཇམ་དཔལ་གྱི་ཞལ་གྱི་ལུང་དང་མཐུན་ཞིང་། 
རྒྱུད་ཀྱི་རྡོ་རྗེའི་ཚིག་རེ་རེ་ཡང་དོན་མི་འདྲ་བ་དུ་མ་ལ་ཚད་ལྡན་གྱིས་བཤད་པ་ཡོད་པས་བཤད་པ་ཕྱོགས་གཅིག་པ་རེ་རེ་ལ་ཞེན་ནས་གཞན་སྤང་བར་མི་བྱའོ། །སྲོག་རྩོལ་ལ་སོགས་པ་ནི་འཆད་པར་འགྱུར་རོ། །མངོན་བརྗོད་ཀྱི་འགྲེལ་པ་ལས་
ཀྱང་། རྫོགས་པའི་རིམ་པ་ནི་རྒྱུད་འདི་ནས་རྩ་བསྒོམ་པ་དང་རླུང་བསྒོམ་པ་དང་ཐིག་ལེ་བསྒོམ་པ་དང་དྲོད་བསྒོམ་པ་དང་བྱང་ཆུབ་ཀྱི་སེམས་བསྒོམ་པ་དང་མཚན་བཅས་བསྒོམ་པ་ལྔ་ཡིན་ལ། ཡེ་ཤེས་ཀྱི་ཚོགས་དོན་དམ་པའི་བདེན་པ་བསྒོམ་
པ་ནི་སྒྱུ་མ་ལྟ་བུ་དང་འོད་གསལ་སྟོང་པ་ཉིད་བསྒོམ་པ་དང་ཟུང་འཇུག་བསྒོམ་པ་དང་གསུམ་སྟེ། སྲོག་ཨ་ཝ་དྷཱུ་ཏཱིར་འཇུག་པའི་ཐབས་བསམ་གཏན་བསྒོམ་པ་ནི་ལྔ་ཡིན། ཡེ་ཤེས་ཀྱི་ཚོགས་དོན་དམ་པའི་བདེན་པ་བསྒོམ་པ་ནི་གསུམ་ཡིན། 
ཞེས་བདེ་མཆོག་གི་རྫོགས་རིམ་ལ་འདུས་པའི་རྫོགས་རིམ་གྱི་ཐ་སྙད་བྱས་པ་མང་དུ་བཤད་ཅིང་། རྫོགས་རིམ་ལ་རླུང་དྷཱུ་ཏཱིར་ཚུད་པའི་ཐབས་གཅིག་དང་ཚུད་པ་ལ་བརྟེན་ནས་བསྒོམ་པའི་སྐབས་གཉིས་སོ་སོར་བྱས་ཏེ། བདེ་མཆོག་ཏུ་མ་
ཟད་བླ་མེད་ཀྱི་རྫོགས་རིམ་གཞན་བསྒོམ་པ་ལ་ཡང་དེ་གཉིས་ཤེས་དགོས་སོ། །དེ་ལ་ཁྱད་པར་གསལ་བྱེད་ལས། སྦྱོར་དྲུག་གི་ཡན་ལག་ཕྱི་མ་བཞི་བཤད་པ་ནི། ལཱུ་ཨི་པའི་ལུགས་འདི་ལ་ཡང་ཤིན་ཏུ་འབྱོར་ལ་རྡོ་རྗེ་བཟླས་པ་ལ་སོགས་
9-10-31b


པའི་རིམ་པ་ལྔ་ཡང་འདི་ལ་སྦྱོར་བར་ཤིན་ཏུ་རུང་སྟེ་འཆད་པར་འགྱུར་རོ། །ཁྱད་པར་གསལ་བྱེད་ལས། ནག་པོ་སྤྱོད་པའི་གཞུང་ལྟར་རིམ་པ་བཞིའི་གདམས་ངག་བཤད་པ་ནི། དེར་རྫོགས་རིམ་གྱི་རྣམ་གྲངས་བཀོད་པ་ཙམ་ཡིན་གྱི་ལུགས་
འདིའི་རྫོགས་རིམ་ལ་དེ་ལྟར་སྦྱོར་བ་མིན་ནོ། །དེ་ལྟར་ན་བདེ་མཆོག་གི་རྫོགས་རིམ་ལ་ལུགས་མི་འདྲ་བ་ཆེ་བ་ནི་བདེ་མཆོག་སྟོད་འགྲེལ་ནས་དུས་འཁོར་ལྟར་དུ་བཤད་པའི་སྦྱོར་བ་ཡན་ལག་དྲུག་དང་། དཔེ་མེད་མཚོ་ནས་བརྒྱུད་པའི་སྦྱོར་
དྲུག་ལུགས་གཉིས་ཀྱི་གཅིག་དང་། འདུས་པ་ནས་འབྱུང་བ་ལྟར་གྱི་རིམ་ལྔའི་ཐ་སྙད་མཛད་པ་གཅིག་དང་། དྲིལ་བུ་པའི་རིམ་ལྔ་དང་། རིམ་པ་བཞི་པ་དང་། རྣལ་འབྱོར་ཆེན་པོའི་རྫོགས་རིམ་གཅིག་སྟེ་དྲུག་ཡོད་ལ། བདེ་མཆོག་གི་ཡུམ་
སྐོར་དང་ཡབ་སྐོར་ནས་ཀྱང་རྫོགས་རིམ་ཆུང་བ་འགའ་རེ་ཡོད་དོ། །གཉིས་པ་ནི། རྫོགས་རིམ་ཉམས་སུ་ལེན་པའི་དུས་ནི་སྔར་བསྐྱེད་རིམ་གྱི་སྐབས་སུ་བཤད་པ་ལྟར་དག་པ་དྲན་པའི་འོག་བཟླས་པའི་གོང་དུ་ཐུན་ཇི་ལྟར་འཚམ་པ་རེ་
བསྒོམ་ཞིང་། གཙོ་ཆེར་བསྐྱེད་རིམ་ལ་བསླབས་པས་བསྐྱེད་རིམ་ལ་སེམས་བརྟན་པ་ནས་གཙོ་ཆེར་རྫོགས་རིམ་བསྒོམ་པར་བྱ་སྟེ། དྲིལ་བུ་པ་དང་ལྭ་བ་པས་དེ་ལྟར་གུས་པ་དང་བཅས་པས་རྒྱུན་མི་འཆད་པར་བསྒོམ་པས་སེམས་
བརྟན་པར་གྱུར་པ་དང་རྫོགས་པའི་རིམ་པའི་ཏིང་ངེ་འཛིན་བསྒོམ་པར་བྱའོ། །ཞེས་གསུངས་སོ། །བསྒོམ་པའི་རིམ་པ་ནི། བསྐྱེད་རིམ་ལ་སེམས་བརྟན་པོ་རྙེད་ན་མཚམས་འདི་ནས་བསྐྱེད་རིམ་ཞར་བྱུང་དུ་དང་གཙོ་བོར་རྫོགས་
9-10-32a


རིམ་བསྒོམ། དེ་ལྟ་མིན་པའི་བསྐྱེད་རིམ་ལ་མང་དུ་སློབ་པ་སྔར་སོང་བ་ཡིན་ན། ཐུན་དང་པོ་ལ་བསྐྱེད་རིམ་རྒྱས་པ་ལན་ཅིག་དང་། ཐུན་གཞན་གསུམ་གྱི་དུས་སུ་བསྡུས་ནས་བསྒོམ་པའི་ཚུལ་གཉིས་བྱས་ཏེ་ལྷའི་རྣལ་འབྱོར་
ཐུན་འཚམ་པ་རེ་བསྒོམ་པ་སྔོན་དུ་བཏང་ནས་ཐུན་གྱི་མཐར་ལྷ་བསྡུས་པའི་འོག་ཏུ་ཧེ་རུ་ཀ་ཡབ་ཡུམ་དུ་ལངས་པའི་ལྷའི་རྣལ་འབྱོར་གསལ་གདབ་པར་བྱས་ལ་བསྒོམ་མོ།།      །།དེ་ནས་སྔར་དྲངས་པའི་སྒྲུབ་ཐབས་ཀྱི་གཞུང་ལྟར་བསྒོམ་པ་ལ། 
ཨཱ་ལི་ཀཱ་ལི་མདུན་བསམས་ནས། ཞེས་སོགས་འདི་སྒྲུབ་ཐབས་གཙུག་ནོར་དང་། ཡི་གེ་བདུན་པ་དང་བདུད་རྩི་འཛག་པའི་སྒྲུབ་ཐབས་སུ་རྫོགས་རིམ་བསྒོམ་པའི་སྐབས་སུ་དྲངས་མོད་ཀྱང་། བཤད་པ་མ་མཛད། ཀུན་སྤྱོད་འགྲེལ་པར་ཡང་། སྒྲུབ་
ཐབས་ཀྱི་འགྲེལ་པར་ཁ་འཕངས་པ་མིན་པ་མ་བཤད་དོ། །ལཱུ་ཨི་པའི་སྒྲུབ་ཐབས་ཀྱི་འགྲེལ་པར་ལྭ་བ་པས་བཀྲལ་བའི་རྗེས་སུ་འབྲངས་ནས་ཤེས་རབ་བསྲུང་བ་དང་དེ་བཞིན་གཤེགས་པའི་རྡོ་རྗེའི་འགྲེལ་པར་ཡང་དེ་བཞིན་དུ་བཤད། ཡང་སྒྲུབ་ཐབས་
ཀྱི་འགྲེལ་པ་གཞན་གསུམ་ནས་གཞུང་གི་ཚིག་དོན་སྔ་མ་གསུམ་དང་མི་མཐུན་པར་བཤད་པ་ཡོད་ཀྱང་། འདིར་འགྲེལ་པ་སྔ་མ་གསུམ་གྱི་རྗེས་སུ་འབྲང་། ཕམ་འཐིང་པ་ནས་བརྒྱུད་པ་ལ་ཡང་འགྲེལ་པ་སྔ་མ་གསུམ་དང་མཐུན་མི་མཐུན་གཉིས་འདུག་
པ་ལས་འདིར་སྔ་མའི་ལུགས་ལྟར་རོ། །དེ་ལ་རྣལ་འབྱོར་ཆེན་པོས་ངལ་བསོ་བར་བྱའོ་ཞེས་སྔོན་དུ་བླང་ངོ་། །རྣལ་འབྱོར་ནི་སྔར་བཤད་པའི་རྫོགས་རིམ་པའི་ཐབས་ཤེས་དབྱེར་མེད་དུ་སྦྱར་བའོ། །ཆེན་པོ་ནི་འདིའི་བསྐྱེད་རིམ་ལ་རྣལ་འབྱོར་གསུམ་བཤད་
9-10-32b


པ་ལ་ལྟོས་ཏེ་བཏགས་པ་ཙམ་མིན་གྱི། བསྐྱེད་རིམ་གྱི་རྣལ་འབྱོར་རྣམས་ལས་མཆོག་ཏུ་གྱུར་པའི་དོན་ཏེ། སྒྲོན་གསལ་དུ་དྲངས་པ་ལས། ཆེན་པོ་མཆོག་དང་ཚད་མེད་དང་། །མཁས་བརྩོན་སྤྲོ་བའི་ལས་བདག་ཉིད། །ཤིན་ཏུ་རྨད་བྱུང་བྱེད་པ་པོ། །ཆེན་
པོ་ཞེས་ནི་བཤད་པ་ཡིན། །ཞེས་ཆེན་པོའི་སྒྲ་དོན་བདུན་ལ་འཇུག་པར་བཤད་པའི་དང་པོ་ལྟར་རོ། །རྣལ་འབྱོར་ཆེན་པོ་དེས་ངལ་བསོ་ལུགས་ནི། བྲམ་ཟེ་ཆེན་པོས་འདི་ནི་ཡིད་འདུས་པ་ལ་རླུང་གིས་རླབས། །གཡོ་ཞིང་འཕྱར་ལ་ཤིན་ཏུ་མི་བསྲུན་འགྱུར། 
ཞེས་གསུངས་པ་ལྟར་ཤིན་ཏུ་འཕྱར་ཞིང་གཡོ་བའི་རླུང་གི་བཞོན་པས་ཉིན་མཚན་ཀུན་ཏུ་སེམས་འཁོར་ལོ་བཞིན་དུ་བསྐོར་བས་ཤིན་ཏུ་དལ་བར་གྱུར་པ་དེ་འཆད་པ་ལྟར་གྱི་ལུས་ལ་གནད་དུ་བསྣུན་པའི་གདམས་པ་བསྒོམ་པས་མི་བསྲུན་པའི་རླུང་ཐིམ་པ་
དེའི་ཚེ་ལྷན་སྐྱེས་ཀྱི་ཡེ་ཤེས་ཀྱིས་སེམས་དལ་བསོས་པའི་ཚིམ་པ་སྐྱེ་བ་སྟེ། དེ་ཁོ་ན་ཉིད་གྲུབ་པ་ལས། ལྷན་ཅིག་སྐྱེས་པའི་རླུང་རང་གི་གནས་སུ་གནས་པས་རྟོག་པའི་ཚོགས་ལས་གྲོལ་ཞིང་སྟོང་པ་ཉིད་ཀྱི་རང་བཞིན་གྱིས་ཐུགས་ཚིམ་པར་བྱེད་པ་ཅི་
ཞིག་ལྟར་སྐྱེས་ཏེ་ཞེས་གསུངས་པ་ལྟར་རོ། །དེ་ཉིད་ལ་མ་བཅོས་པ་དང་རྣལ་མའི་སེམས་ཞེས་ཀྱང་གསུངས་པས་བཙས་མ་བཅོས་ཀྱི་མཚམས་ཀྱང་ལེགས་པར་ཤེས་པར་བྱའོ། །མདུན་ཞེས་པ་སྔོན་དུ་ཡང་བསྒྱུར་བས་དང་པོའི་དོན་ཏེ། དང་པོར་ཟླ་བ་
གནས་པར་བསྒོམ་ཞེས་པའོ། །གང་དུ་ན་རང་དམ་ཚིག་སེམས་དཔའི་ལྟེ་བའི་རྩ་བ་སྟེ་ནང་གི་དབུས་སུའོ། །ཟླ་བ་བསྒོམ་ཚུལ་ནི། ཨཱ་ལི་ཀཱ་ལིའི་ཕྲེང་བ་འོད་ཟེར་ལྔ་ལྡན་ལས་འཁོར་ལོ་གསུམ་གྱི་ལྷ་ཚོགས་འཕྲོ་བ་ཅན་དག་ཏུ་བརྗོད་པས་སྣ་བུག་གཡས་པའི་
9-10-33a


རླུང་དང་འགྲོགས་ནས་ཕྱིར་འཕྲོས་པས་འགྲོ་བ་རྣམས་འཁོར་ལོ་གསུམ་གྱི་ལྷའི་བདག་ཉིད་དུ་བྱས་ཏེ། ཐོག་མ་མེད་པ་ནས་གྲུབ་པའི་དཔའ་བོ་དང་རྣལ་འབྱོར་མ་རྣམས་དང་རོ་མཉམ་པར་གྱུར་ཏེ། སྣ་བུག་གཡོན་པ་ནས་ཞུགས་
ནས་ལྟེ་བར་གནས་པར་བསམས་ནས། དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རྫོགས་པ་དཀར་ལ་དམར་བའི་མདངས་ཅན་དབྱངས་གསལ་གཟུགས་བརྙན་བཞིན་དུ་ཤར་བ་བསམ་མོ། །ཟླ་བ་དེ་ཡི་དབུས་སུ་ཧཱུཾ་གི་ཡི་གེ་མཆོག་རྡོ་རྗེ་འཆང་གི་
གནས་དེ་ས་བོན་དུ་གྱུར་པ་དཀར་ལ་དམར་པའི་མདངས་ཅན་གནས་པར་བསམས་ལ། ཟླ་བ་དང་ས་བོན་ཡོངས་སུ་གྱུར་པ་ལས་རང་ཉིད་བཅོམ་ལྡན་འདས་སྐུ་གསུང་ཐུགས་ཀྱི་རྡོ་རྗེ་ཅན་ཏེ། རྡོ་རྗེ་གསུམ་མི་ཕྱེད་པའི་རྡོ་རྗེ་འཛིན་པ་སྐུ་མདོག་དཀར་པོ་
གཡས་བརྐྱང་གིས་བཞུགས་པ། ནམ་མཁའི་འཇའ་ཚོན་ལྟ་བུ། ཞལ་གཅིག་ཕྱག་གཉིས་ཀྱིས་རྡོར་དྲིལ་བཟུང་ནས་ཡུམ་ལ་འཁྱུད་པའི་ལྷ་ཡི་གཟུགས་ནི་བསྒོམ་པར་བྱ་ཞིང་ཡུམ་རྡོ་རྗེ་ཕག་མོ་དམར་མོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་
ཐོད་པ་འཛིན་པས་འཁྱུད་པ་དང་སྙོམས་པར་འཇུག་པར་བསམ་མོ། །གོང་བུ་ལས་འདས་གྱུར་པ་དེ། །ཞེས་པ་ནི་དེ་ནི་གཟུགས་ལས་འདས་པ་སྟེ། ཞེས་བསྒྱུར་བ་ལེགས་སོ། །བཅོམ་ལྡན་འདས་དེ་ནི་རིམ་གྱིས་ཞུ་ཞིང་ཐིམ་པ་ལས་ནཱ་དའི་གཟུགས་
ཉིད་དུ་བསྒོམ་པར་བྱའོ། །དེ་ཡང་སྔོན་དུ་སྣོད་བཅུད་ནས་རིམ་གྱིས་སྡུད་པ་ཡིན་ལ། སྡུད་ཚུལ་ལ། ལྭ་བ་པས་སྒྱུ་མའི་དགའ་བའི་སྒྲས་ཡང་དག་པར་བཀུག་པའི་ཁམས་གསུམ་པའི་བདག་ཉིད་ཀྱི་འཁོར་ལོ་ནི་བདག་ཉིད་ལ་རིམ་པས་ཐིམ་
9-10-33b


པར་བསྒོམ་མོ། །ཞེས་གསུངས་པའི་སྒྱུ་མའི་སྐད་དོད་རོལ་པ་ལ་ཡང་འཇུག་པས་ཡབ་ཀྱིས་ཡུམ་ལ་རོལ་པའོ། །དེས་ན་འགྲེལ་པ་གཞན་གཉིས་སུ་སྒྱུ་མ་ལྟ་བུ་ཞེས་བསྒྱུར་བ་མི་ལེགས། དགའ་བའི་སྒྲ་ནི་གསང་གནས་གཉིས་སྲུབ་པའི་སྒྲའོ། །དེས་བཀུག་
ཅེས་པ་ཙམ་ལས་འགུགས་ཚུལ་གཞན་འགྲེལ་པ་གཉིས་ཀར་མི་གསལ་ལ། མར་དོས་འཁྱུད་པ་དང་འོ་བྱ་བ་ལ་སོགས་པའི་རྩེད་འཇོས་གནས་པས། ཕྱི་རོལ་གྱི་ཕྱག་རྒྱ་དང་སྦྱར་བ་ལྟ་བུར་རྡོ་རྗེ་ནོར་བུར་བདེ་བ་མྱོང་བའི་ཚེ། དཀྱིལ་འཁོར་པ་ཐམས་
ཅད་བདེ་བའི་ངོ་བོར་གནས་པར་བསམ། དེ་ནས་དེ་ཉིད་ལས་བདེ་བའི་རང་བཞིན་གྱི་འོད་ཟེར་དམར་པོ་འཕྲོས་པས་དཀྱིལ་འཁོར་པ་ཐམས་ཅད་ལ་ཁྱབ་པས་བདེ་བའི་རང་བཞིན་དུ་གྱུར་པར་བསམ་ཞིང་། བསྡུ་བྱ་རྣམས་འོད་ཀྱི་རྣམ་པར་གྱུར་པར་བསམས་
ནས་སྡུད་པར་བཞེད་དེ། མན་ངག་དེ་སྦྱར་བས་ཆོག་གོ། ཇོ་བོའི་འགྲེལ་པར་ཡང་། ཏིང་ངེ་འཛིན་སེམས་དཔའ་ལས་འོད་ཟེར་ལྔ་འཕྲོས་པས་འདུས་བྱས་ཀྱི་དངོས་པོ་ཐམས་ཅད་ལ་འོད་ཟེར་ལྔར་བཞུས་ཏེ་སྡུད་པར་གསུངས་སོ། །དེ་ཡང་བཀུག་པའི་སྣོད་
བཅུད་རྣམས་དུར་ཁྲོད་ལ་ཐིམ། དེ་ནི་རྟེན་གྱི་འཁོར་ལོ་ལ། རྟེན་གྱི་འཁོར་ལོ་སྒོ་མཚམས་མ་བརྒྱད་དང་བཅས་པ་སྐུ་འཁོར་ལ། དེ་གསུང་འཁོར་ལ། དེ་ཐུགས་འཁོར་ལ། དེའི་ཤར་ནས་གཡོན་སྐོར་གྱིས་ཕྱོགས་ན་གནས་པ་བཞི་ནི་རིམ་པ་བཞིན། 
མཁའ་འགྲོ་མ་ནས་བཟུང་སྟེ་གཡོན་སྐོར་གྱིས་ལྷ་མོ་བཞི་ལ་ཐིམ། དེ་ནས་མེ་ནས་བརྩམས་ཏེ་མཚམས་ན་གནས་པ་བཞི་ནི། གཟུགས་ཅན་མ་ནས་བཟུང་སྟེ་གཡས་སྐོར་གྱིས་ལྷ་མོ་བཞི་ལ་ཐིམ། ཐོད་པ་བཞི་ཡང་གཟུགས་ཅན་མ་སོགས་
9-10-34a


བཞི་ལ་བསྡུ། ལྷ་མོ་བཞི་ཡང་རང་ངོས་ཀྱི་གཙོ་བོའི་ཞལ་བཞི་ལ་རིམ་པ་བཞིན་བསྡུ། དམ་ཚིག་སེམས་དཔའ་ཡབ་ཡུམ་རྐྱང་པ་བསྒོམས་པ་ཡིན་ན། སྣོད་བཅུད་རྣམས་དམ་ཚིག་པ་ཡབ་ཡུམ་ལ་བསྡུ། དམ་ཚིག་པ་ཡབ་
ཡུམ་ནི་ལྟེ་བའི་ཡེ་ཤེས་སེམས་དཔའ་ཡབ་ཡུམ་ལ་ཐིམ། དེ་གཉིས་ཀྱང་སྙོམས་པར་ཞུགས་པས་ཞུ་སྟེ། ཞུ་བ་དེ་ཡོངས་སུ་གྱུར་པ་ལས། སིན་དྷུ་རས་བྱུགས་པའི་མུ་ཏིག་ལྟ་བུའི་ཧཱུཾ་ཡིག་བདེ་བ་ཆེན་པོའི་རང་བཞིན་དུ་གྱུར། དེའི་ཨུ་ནས་ནཱ་
དའི་བར་དུ་སྔ་མ་ཕྱི་མ་ལ་རིམ་གྱིས་བསྡུས་ནས། ནཱ་ད་ཡང་སྐྲའི་རྩེ་མོ་བརྒྱ་སྟོང་གི་ཆ་ཙམ་དུ་བྱས་པ་ལ་སེམས་གཟུང་ངོ་། །རབ་ཀྱིས་ནི་དེ་ཡང་མི་དམིགས་པར་བྱ་བར་འགྲེལ་པ་གསུམ་ག་ལས་བཤད་དོ། །སྔ་མ་རྣམས་དམ་ཚིག་སེམས་
དཔའ་ཡེ་ཤེས་སེམས་དཔའ་ལ་བསྡུས་པ་ཡིན་ལ། དམ་ཚིག་སེམས་དཔའི་གཟུགས་འདས་དང་ཡེ་ཤེས་སེམས་དཔའ་ཞུ་བ་ཡན་ལ་ཡེ་ཤེས་སེམས་དཔའི་གཟུགས་འདས་དང་ཐིག་ལེ་ནཱ་ད་ལ་ཞུགས་པའི་བར་ལ་ཏིང་ངེ་འཛིན་སེམས་
དཔའི་གཟུགས་འདས་ཞེས་ཟེར་རོ། །འདི་ལ་ཧཱུཾ་ཡིག་བསྒོམ་པ་ན་ལྟེ་བའི་རྒྱ་བ་གཞུང་ལ་ཉེ་བའི་ནང་ངོས་སྤྲུལ་པའི་འཁོར་ལོའི་དཔུས་དྲང་པོའི་དྷཱུ་ཏཱིའི་ནང་དུ་ཧཱུཾ་ཡིག་གསལ་གདབ་ལ། དེའི་ཐིག་ལེའི་ནང་དུ་སེམས་ཞུགས་པ་ལྟ་བུར་བྱས་ལ། སེམས་
བྱིང་རྒོད་དང་བྲལ་བར་གཟུང་། དེ་ལ་སེམས་བརྟན་ན། ནཱ་ད་དེ་ཡང་སྐྲའི་རྩེ་མོ་བརྒྱ་སྟོང་གི་ཆ་ཙམ་ཞེས་པ་ནི་ཤིན་ཏུ་ཕྲ་བར་བྱེད་པའི་དཔེ་ཙམ་སྟེ། སེམས་ཀྱིས་གསལ་གང་བཏབ་འཆར་བ་དང་། དེ་ལ་ཅི་ཙམ་འདོད་ཀྱི་བར་དུ་བཞག་
9-10-34b


པས་ཚོག་པ་ན། དམིགས་པ་ཤིན་ཏུ་ཆེས་ཕྲ་བ་ལ་ཡང་སེམས་འཛིན་ནུས་ལ། དེ་ལྟར་བྱེད་པ་ཡང་སྲོག་དྷཱུ་ཏཱིར་འཛུད་པ་དང་། ཞུགས་ནས་གནས་པ་དང་། དེར་ཐིམ་པ་བྱེད་པ་ལ་བསྔགས་པ་ཡིན་ནོ། །མངོན་བརྗོད་སྔར་དྲངས་པ་ལས། ཐམས་ཅད་
མཁྱེན་པས་འདི་བཤད་པའམ། །ཡང་ན་མི་ཤིགས་ཀུན་མཁྱེན་པ། །སྐྲ་ཡི་ཉག་མ་བརྒྱ་ཡི་ཆ། །མཆོག་གི་གཟུགས་ཅན་བསྒོམ་པ་སྟེ། །ཞེས་གསུངས་པའི་རྐང་པ་གཉིས་པ་ནི་མངོན་བརྗོད་གཞན་མང་པོ་ལས། མི་འགྱུར་བ་ཡི་ལམ་བཤད་པ། 
ཞེས་འབྱུང་བ་ལྟར་ལེགས་ལ། དོན་ནི་ཐམས་ཅད་མཁྱེན་པས་གསང་བ་མཆོག་གི་དགྱེས་པ་སོགས་ཀྱི་དོན་ལྷན་སྐྱེས་ལ་སྔར་བཤད་པ་ལྟར་རམ། ཡང་ན་དེ་དག་གི་དོན་ལྷན་སྐྱེས་བསྐྱེད་པའི་ལམ་ལྟེ་བའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་མི་
འགྱུར་བ་སྟེ་མི་ཤིགས་པའི་ཐིག་ལེ་ཧཱུཾ་ཡིག་སོགས་བསྒོམ་པར་བཤད་པ་བསྒོམ་པ་ན། ནཱ་ད་སྐྲའི་རྩེ་མོ་བརྒྱར་གཤགས་པའི་ཆའི་གཟུགས་བསྒོམ་པའི་དོན་ནོ། །དེ་ལ་མཆོག་ཏུ་གྱུར་པའི་གཟུགས་ཞེས་པ་ནི། གཟུགས་དེ་བསྒོམས་པས་
སྲོག་དྷཱུ་ཏཱིར་ཞུགས་པ་ལས་ལྷན་སྐྱེས་བསྐྱེད་པའི་དོན་ཏེ། རབ་ཀྱིས་ནི་ནཱ་ད་ལ་དམིགས་པ་ཡང་འདོར་ཞེས་པའི་རབ་ནི་ནཱ་ད་ཤིན་ཏུ་ཕྲ་བ་ལ་སེམས་བརྟན་ནས་དེ་དམིགས་རྟེན་དུ་མ་བཞག་ཀྱང་དེར་དམིགས་རྟེན་གཞན་མེད་པར་སེམས་གཟུང་བས་
སྲོག་དྷཱུ་ཏཱིར་སྡུད་ནུས་པའོ། །དེས་ན་ནཱ་ད་ཤིན་ཏུ་ཕྲ་བ་ལ་སེམས་བརྟེན་པ་ན་དེ་ལ་དམིགས་པ་ཡང་དོར་ནས་སེམས་འཛིན་པའི་ཚེ་ཡིད་ངོར་རྩ་ལ་སོགས་པའི་གཟུགས་སྣང་ཀུན་སྡུད་ནུས་པ་ཡིན་ན་གང་དུ་དམིགས་པ་གཏོད་པའི་ཐད་སོ་དེ་
9-10-35a


ལྟེ་བའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་གི་ཐད་སོ་དེར་མོས་ནས་ངེས་པར་བྱ་དགོས་སོ། །དེ་ལྟར་རྫོགས་རིམ་གྱི་སྐབས་སུ་ལུས་ཀྱི་གནད་རྣམས་སུ་ཧཱུཾ་ཡིག་ལ་སོགས་པ་བསྒོམ་པ་ནི་ལྷན་སྐྱེས་འདྲེན་པའི་ཆེད་དང་དེ་
འདྲེན་པ་ལ་སྲོག་དྷཱུ་ཏཱིར་གཞུག་དགོས་པས་དེའི་ཕྱིར་དུ་དེ་རྣམས་བསྒོམ་པ་ཡིན་པ་དང་། དེ་ཡང་དྷཱུ་ཏཱི་ནང་དུ་སེམས་འཛིན་དགོས་པའི་གནད་ཤེས་པ་ལ་རག་ལས་པས། དེ་མེད་ན་ཧཱུཾ་ཡིག་སོགས་བསྒོམས་པས་སེམས་བདེ་གསལ་མི་རྟོག་པ་
ཅི་འདྲ་ཞིག་རྙེད་ཀྱང་། སྲོག་དྷཱུ་ཏཱིར་ཚུད་ནས་ལྷན་སྐྱེས་འདྲེན་པ་མི་སྲིད་པས་གོང་གི་གནད་རྣམས་ཤེས་དགོས་ནའང་ཇི་བཞིན་དུ་གསལ་བར་ཐོན་པའི་བཤད་པ་བྲིས་པ་མི་སྣང་བས་ཤིན་ཏུ་རྟོགས་དཀའ་ཞིང་འདི་དང་འདི་འདྲའི་རིགས་གཞན་
རྣམས་ལ་ཡང་གལ་ཤིན་ཏུ་ཆེའོ། །འདི་ཁྱད་པར་གསལ་བྱེད་ལས། ཡང་ན་ལྟེ་བའི་པདྨ་ལ་གནས་པའི་ཉི་མ་དང་ཟླ་བ་སྦྱོར་བའི་ནང་ན་ཡོད་པའི་ས་བོན་ཧཱུཾ་ལས་བྱུང་བའི་པདྨའི་རྩ་བ་ལྟར་འོད་ཟེར་གྱི་རི་མོ་སེམས་བརྟན་པར་བྱེད་པའི་སྒོ་ནས་
རྩེ་གཉིས་ལ་སྲོག་གི་རླུང་རྒྱུ་བ་སྤངས་ནས་དབུ་མ་ལ་རབ་ཏུ་འཇུག་པས་གཏུམ་མོ་སྦར་བ་ལས་སྤྱི་བོའི་ཟླ་བ་ཞུ་ནས་འཁོར་ལོ་ཁྱབ་པའི་རིམ་པས་དགའ་བ་ལ་སོགས་པའི་དབྱེ་བའི་ཁྱད་པར་གྱིས་ལྷན་ཅིག་སྐྱེས་པའི་དགའ་བ་བྱུང་ནས་རྣམ་པར་
རྟོག་པ་ཐམས་ཅད་སྤངས་པས་དུས་གཅིག་ཏུ་དཀྱིལ་འཁོར་མི་དམིགས་པར་བསམ། རིམ་པས་སྟོང་པ་ཉིད་དུ་བསྡུ་བར་བྱའོ། །རིམ་པ་ཡང་སྔར་གྱི་ཁོ་ནའོ་ཞེས་བཤད་ཅིང་། ཡང་ན་ཞེས་པ་ནི་ཡེ་ཤེས་སེམས་དཔའ་བསྒོམས་ནས་སྡུད་རིམ་
9-10-35b


བྱེད་པ་སོགས་བཞག་ནས་དང་པོ་ནས་ཧཱུཾ་ཡིག་ཉིད་ལ་སེམས་འཛིན་པའོ། །རླུང་དྷཱུ་ཏཱིར་ཞུགས་པ་ལས་ལྷན་སྐྱེས་ཤར་བའི་ཚེ་ནི་དམིགས་པས་མ་བསྡུས་ཀྱང་རླུང་ཐིམ་པའི་གནད་ཀྱིས་དུས་གཅིག་ཏུ་དཀྱིལ་འཁོར་མི་དམིགས་པར་འགྱུར་རོ། །ལྟེ་བའི་
པདྨ་ལ་ཞེས་སོགས་ནི། ལྟེ་བའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་ཉི་ཟླ་ཁ་སྦྱོར་གྱི་ཐིག་ལེའི་ནང་དུ་ཧཱུཾ་ཡིག་བསྒོམ་པ་ཡིན་ལ། པདྨའི་རྩ་བ་ལྟ་བུའི་འོད་ཟེར་གྱི་རི་མོ་ནི་ཅུང་ཟད་རིང་པའི་སྲད་བུ་ལྟ་བུའི་འོད་ཟེར་ཏེ། དེ་ལ་སེམས་གཟུང་ནས་བརྟན་པར་
བྱེད་པའོ། །ཡང་འགྲེལ་པ་དེར་གསུང་རབ་ལས་གྲུབ་པའི་མན་ངག་ནི་འདི་ཡིན་ཏེ། ཞེས་ལྟེ་བའི་རྩ་འཁོར་གྱི་དབུས་སུ་ཟླ་བ་ལ་གནས་པའི་ཤིན་ཏུ་ཕྲ་བའི་དབྱངས་གསལ་མཉམ་པར་སྦྱོར་བའི་དབུས་སུ་ཧཱུཾ་ཡིག་བསམས་ནས་དེ་ནས་ཡི་གེ་
དང་བཅས་པ་ལས་འོད་ཟེར་འཕྲོས་པས་སྣོད་བཅུད་ཐམས་ཅད་འོད་དུ་བཞུས་ནས་དབྱངས་གསལ་སྦྱོར་བ་ལ་གཞུག །ཡང་འོད་ཟེར་འཕྲོས་པས་གཙོ་བོ་ཡབ་ཡུམ་འོད་དུ་བཞུས་ནས་སྔ་མ་བཞིན་གཞུག །ཡང་འོད་ཟེར་འཕྲོས་པས་
ཟླ་བ་དབྱངས་གསལ་ཧཱུཾ་དང་བཅས་པ་འོད་དུ་བཞུས་ནས་འོད་གསལ་དུ་འཇུག་པར་བཤད་དེ། དང་པོར་ཧཱུཾ་ཡིག་ལ་སེམས་བརྟན་དུ་བཅུག་ནས། དེ་ནས་སྡུད་རིམ་དེ་ལྟར་བྱའོ། །འདི་ལ་དང་པོར་དམིགས་པ་བསྡུས་པའི་ཚེ་མོས་པ་ཙམ་མིན་
པ་ཡིད་ངོར་ཇི་ལྟ་བ་བཞིན་སྡུད་མི་ནུས་པའི་དུས་སུ་ནི་ལྟེ་བའི་རྩ་འཁོར་གྱི་དབུས་སུ་སྔར་ལྟར་བསྒོམ་པ་བྱས་པས་ཆོག་ལ། ཡིད་ངོར་ཇི་བཞིན་དུ་སྡུད་ནུས་པའི་ཚེ་ན་རྩ་འཁོར་གྱི་དྷཱུ་ཏཱིའི་ནང་གི་ཐད་སོར་མོས་ནས་བསྒོམ་མོ། །དེ་ལྟར་སྡུད་
9-10-36a


རིམ་ལ་དམིགས་པ་མི་འདྲ་བ་གསུམ་བཤད་ཀྱང་། སྔར་བཤད་པའི་རྒྱས་པ་དེ་ག་ལ་ཅུང་ཟད་འདོར་ལེན་བྱས་པའོ། །སེམས་ཉིད་དུ་ཡང་བསྒོམ་མི་བྱ། ཞེས་པའི་དོན་ནཱ་ད་ཕྲ་རགས་གཉིས་གང་དུ་ཡང་མི་སེམས་
པ་ཡིན་ལ། དེ་ཡང་དང་པོར་རླུང་བསྡུས་པའི་སྐབས་དང་། རླུང་ཐིམ་པའི་སྐབས་གཉིས་ལས་འདིར་དང་པོའོ། །ཕམ་འཐིང་པ་ནས་བརྒྱུད་པ་ལ་ལུགས་འདི་ལ་རྡོར་བཟླས་བྱེད་པ་དང་མི་བྱེད་པ་གཉིས་སྣང་ཡང་བྱེད་པ་ལཱུ་ཨི་པའི་འགྲེལ་པ་རྣམས་
ཀྱི་ལུགས་ཡིན་ལ། བྱེད་ཚུལ་ནི་རིམ་པ་བཞིན་དུ་བསྡུས་པ་ལ་སེམས་རིང་དུ་གཟུང་བའི་མཐར་ཧེ་རུ་ཀ་ཡབ་ཡུམ་དུ་ལངས་པའི་དུས་སུ། ལྟེ་བའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་ཟླ་བ་དཀར་དམར་གྱི་སྟེང་དུ་ཧཱུཾ་ཡིག་གམ་ནཱ་ད་དཀར་དམར་
བསམས་ལ། རླུང་ནང་དུ་འཇུག་པའི་དུས་སུ་དྷཱུ་ཏཱིའི་ནང་ནས་རླུང་གི་གདངས་ཨོཾ་ཡིག་གི་གདངས་སུ་འཇུག་པར་བསམས་ལ། ཧཱུཾ་ཡིག་གམ་ནཱ་ད་ལ་གཞུག །དེ་ནས་ལྡང་འཇུག་གང་རུང་ཞིག་གི་ཡུན་ཚད་ཙམ་ཞིག་ཞུགས་པ་དེར་བཟུང་ནས་དེའི་
རང་གདངས་ཨཱཿཡིག་གི་གདངས་སུ་བསམ། དེ་ནས་དྷཱུ་ཏཱིའི་ནང་གི་ཧཱུཾ་ངམ་ནཱ་ད་ལས་ཕྱིར་འགྲོ་བའི་ཚེ་ཡང་དྷཱུ་ཏཱིའི་ནང་ནས་ཕྱིར་འགྲོ་བ་བསམ་ཞིང་དེའི་ཚེ་རླུང་གི་རང་གདངས་ཧཱུཾ་གི་གདངས་སུ་འབྱུང་བར་བསམས་ལ་མ་ཡེངས་པར་རྡོ་རྗེའི་བཟླས་
པ་བྱའོ། །འགྲེལ་པ་གསུམ་གར་ཡི་གེ་གསུམ་བརྗོད་ནས་རླུང་གི་རྡོར་བཟླས་བྱ་བར་གསུངས་པས། ལྡང་འཇུག་གནས་གསུམ་གྱི་གདངས་ཡི་གེ་གསུམ་གྱི་གདངས་དང་དབྱེར་མེད་དུ་སྦྱོར་བའི་རླུང་སྔགས་གཉིས་སྦྱོར་བ་དགོས་སོ། །དེ་ནི་ཁྱད་པར་
9-10-36b


གསལ་བྱེད་ལས། གདམས་ངག་ཇི་ལྟ་བ་བཞིན་དུ་བྱ་བར་བཤད་པ་ཅིག་ཡིན་ལ། ལྡང་འཇུག་གནས་གསུམ་རྩ་དབུ་མའི་ནང་ནས་མ་བྱས་པར་སྤྱིར་ཁོང་པའི་ནང་ནས་འགྲོ་འོང་སོགས་བྱེད་པའི་རྡོར་བཟླས་ལ་ཅི་ཙམ་འབད་ཀྱང་སྲོག་དབུ་མར་བཙུད་པའི་ཞུགས་གནས་
ཐིམ་གསུམ་ལས་ལྷན་སྐྱེས་དངོས་སུ་བསྐྱེད་ནུས་པ་མི་སྲིད་པས་རྡོར་བཟླས་ཀྱི་གནད་ཡེ་མ་རྟོགས་པ་ཡིན་ལ། རྩ་དབུ་མ་ནས་རྡོར་བཟླས་བྱེད་པ་ནི་གདམས་ངག་ཇི་ལྟ་བ་བཞིན་བྱེད་པའི་གདམས་ངག་གི་དམ་པའོ། །རླུང་ཕྱིར་ལྡང་བའི་ཚེ་འཁོར་ལོ་ལྔའི་ལྷ་ཚོགས་
འཕྲོས་ནས་འགྲོ་བའི་དོན་བྱེད་པ་དང་། འཇུག་པ་ན་ལྷ་རྣམས་རླུང་སྔགས་དབྱེར་མེད་དང་ལྷན་ཅིག་ནང་དུ་ཞུགས་ནས་ཐིམ་པར་བསམ་པར་འགྲེལ་པ་རྣམས་ནས་བཤད་དོ། །དེ་ལྟར་ན་ལྟེ་བའི་རྩ་འཁོར་གྱི་དབུས་ཀྱི་དྷཱུ་ཏཱིའི་ནང་དུ་ཡི་གེ་སོགས་ལ་སེམས་
འཛིན་པ་དང་། འཁོར་ལོ་དེའི་དབུས་ཀྱི་དབུ་མའི་ནང་ནས་རྡོར་བཟླས་བྱེད་པ་གཉིས་པོ་དེ་ནི་ཡན་ལག་དྲུག་གི་སྲོག་རྩོལ་གྱི་ཡན་ལག་གཅིག་སྟེ་དེར་འགྱུར་ཚུལ་ནི་འཆད་པར་འགྱུར་རོ། །ཇོ་བོ་ཆེན་པོའི་འགྲེལ་པར་རྐང་པ་དང་པོ་དང་གཉིས་པ་དང་བཞི་པ་
དང་དྲུག་པ་ལ་བཤད་པ་མ་མཛད་ལ། ཟླ་བ་ནི་ཡེ་ཤེས་སེམས་དཔའི་གདན་དང་། སྐུ་གསུང་ཐུགས་ཀྱི་རྡོ་རྗེ་ཅན་ནི་ཡེ་ཤེས་སེམས་དཔའ་དང་། ཡི་གེ་མཆོག་ནི་ཏིང་ངེ་འཛིན་སེམས་དཔའ་དང་། དེ་ལས་འོད་ཟེར་སྤྲོས་ནས་ཏིང་ངེ་འཛིན་སེམས་
དཔའི་བར་དུ་སྡུད་ཅིང་། དེ་ཡང་རིམ་གྱིས་ཇེ་ཕྲར་བཏང་བ་ལ་སེམས་བསྒྲིམས་ཏེ་གཏད་ནས་བསྒོམ་པ་ནི་རྫོགས་རིམ་ལ་གཉིས་ཡོད་པའི་ཕོ་ཉའི་ལམ་ལས་གཞན་པ་དང་། གཉིས་པ་ཕོ་ཉའི་ལམ་ནི་བླ་མ་ལས་ཤེས་པར་བྱ་བར་གསུངས་སོ། །འགྲེལ་པ་
9-10-37a


ཡེ་ཤེས་སྒྲོན་མ་ལས། ཨཱ་ལི་ཀཱ་ལི་ཞེས་སོགས་ཀྱི་གཞུང་དབང་པོ་རབ་འབྲིང་ཐ་གསུམ་གྱི་དབང་དུ་བྱས་པའི་སྒྲུབ་ཐབས་གསུམ་དུ་བཤད་པ་དང༌། དཔའ་བོ་རྡོ་རྗེ་བྱས་ཟེར་བའི་དཀའ་འགྲེལ་དུ་ཆགས་གྲོལ་གྱི་ལམ་གཉིས་
ཀྱི་དབང་དུ་བྱས་ཏེ་བཤད་པ་དང་། བོད་ཁ་ཅིག་ཡི་གེ་དང་ཐིག་ལེ་བསྡུ་བའི་རྫོགས་རིམ་ལ་སྦྱར་ཏེ་འཆད་མོད་ཀྱང་ཡིད་ཆེས་མི་སྐྱེ་བར་སྣང་བས་མ་བཀོད་དོ། །བཞི་པ་ཉམས་སུ་བླངས་པས་མངོན་པར་རྟོགས་པ་སྐྱེ་བའི་རིམ་པ་ལ་གསུམ། སྔར་བཤད་
པའི་རྣལ་འབྱོར་རྣམས་ཀྱིས་སྲོག་དྷཱུ་ཏཱིར་སྡུད་ཐུབ་ལུགས་དང་། རྣལ་འབྱོར་དེ་བསྒོམས་པ་ལས་སྲོག་དབུ་མར་ཞུགས་གནས་ཐིམ་གསུམ་བྱེད་ཚུལ་དང་། དེ་ལ་བརྟེན་ནས་སྟོང་ཕྱོགས་དང་སྣང་ཕྱོགས་ཀྱི་རྫོགས་རིམ་བསྐྱེད་ཚུལ་ལོ། །དང་པོ་ནི། སྔར་
བཤད་པའི་ལྟེ་བའི་རྩ་འཁོར་གྱི་ལྟེ་བའི་དབུས་ཀྱི་དབུ་མའི་ནང་དུ་ཧཱུཾ་ཡིག་ལ་སོགས་པ་ལ་དམིགས་ནས་བསྒོམས་པས་ནི། རོ་རྐྱང་ནས་རླུང་བརྒྱུས་ཏེ་ཕྱིར་ཐོན་པ་བཟློག་ནས། དབུ་མར་རྒྱུ་བར་བྱེད་པས་སྲོག་རྩོལ་ཞེས་བྱ་སྟེ། སྲོག་ནི་རོ་རྐྱང་ལ་རྒྱུ་བའི་
རླུང་ཡིན་ལ། རྩོལ་བའི་སྐད་དོད་ཀྱི་སྟེང་ནས་འགོག་པའི་དོན་ལ་བཤད་དུ་ཡོད་པའི་ཕྱིར་རོ། །དེ་ལྟར་ཡང་ཁྱད་པར་གསལ་བྱེད་ལས། འདི་ཡང་ཉེ་བར་མཚོན་པ་ཙམ་སྟེ། ལྟེ་བར་ཕྲ་བའི་ཨཱ་ལི་ཀཱ་ལིའི་སྦྱོར་བའམ། ཐུགས་ལ་སོགས་པ་ལ་ཐིག་
ལེ་ལ་སོགས་པའི་སྦྱོར་བའི་བསམ་གཏན་གང་དེ་ཡང་སྲོག་འཐོན་པ་བཟློག་པའི་དོན་ཉིད་ཀྱིས་སྲོག་རྩོལ་ཞེས་བརྗོད་དོ། །བྱེ་བྲག་ཏུ་བསམ་གཏན་འདི་ལྟ་བུའི་སྟོབས་ཀྱིས་རོ་མ་དང་རྐྱང་མ་དག་གི་རྒྱུ་བ་ལས་བཟློག་ནས་དབུ་མར་སྲོག་རླུང་གི་རྩོལ་བ་ནི་
9-10-37b


རབ་ཏུ་རྒྱུ་སྟེ་འདི་ཡང་སྲོག་རྩོལ་ཞེས་བརྗོད་དོ། །ཞེས་གསུངས་ཏེ། འོག་སྒོའི་ཕྲ་མོ་བསྒོམས་པས་རོ་རྐྱང་ནས་སྣ་བུག་ཏུ་རྒྱུ་བའི་རླུང་འབྱུང་འཇུག་བཀག་ནས་དབུ་མར་འཛུད་པས་རྒྱུད་ཕྱི་མར་དེ་སྲོག་རྩོལ་དུ་གསུངས་པ་དང་། དེ་ཡང་ཕྱོགས་ཙམ་མཚོན་
པ་སྟེ། ལྟེ་བ་དང་སྙིང་ཁ་སོགས་སུ་ཐིག་ལེ་དང་ཡི་གེ་སོགས་ལ་དམིགས་ནས་བསྒོམས་པས་ཀྱང་བྱེད་ལས་དེ་བྱེད་པའི་སྲོག་རྩོལ་དུ་ཤིན་ཏུ་གསལ་བར་བཤད་པ་འདི་རྩ་འཁོར་ཡོངས་རྣམས་སུ་ཡི་གེ་སོགས་འགོད་པའི་རྫོགས་རིམ་བསྒོམ་པར་
གསུངས་པ་ཐམས་ཅད་ལ་ཡང་ཤེས་དགོས་སོ། །འདི་ནི་ཞལ་ལུང་གི་དགོངས་པ་ཡིན་ཏེ། ཞལ་ལུང་ལས། འདུས་པ་ཕྱི་མ་ནས་གསང་བའི་སྣ་རྩེར་རྫས་ཀྱི་ཐིག་ལེ་བསྒོམ་པ་སྲོག་རྩོལ་དུ་གསུངས་པ་བཤད་པའི་དོན་བསྡུས་པ་ན། དབུགས་དགག་
སྟོང་བའི་ཡན་ལག་གོ་ཞེས་སྣ་བུག་ཏུ་རླུང་འབྱུང་འཇུག་གི་སྤྲོ་བསྡུ་བྱེད་པ་འགོག་ཅིང་། དེས་སྟོང་པར་བྱེད་པའི་ཡན་ལག་ཏུ་གསུངས་ཏེ་དེས་ནི་སྲོག་རྩོལ་གྱི་ཡན་ལག་དང་། དབུགས་འགོག་པའི་ཡན་ལག་གཉིས་དོན་གཅིག་ཏུ་བསྟན་ལ། ཐབས་དེ་རོ་
རྐྱང་ལ་རླུང་རྒྱུ་བ་འགོག་པའི་སྲོག་རྩོལ་དུ་འགྱུར་བ་དང་། ལྟེ་བར་གནད་དུ་བསྣུན་པ་གཉིས་ཀྱང་ཚུལ་ཀུན་ནས་མཚུངས་པའི་ཕྱིར་རོ། །དཔལ་ཤ་བ་རི་པས་ཀྱང་། དེ་ནས་ལྟེ་བར་ཆོས་འབྱུང་ནང་དུ་ཡེ་ཤེས་ཀྱི་རང་བཞིན་ནཱ་ད་རིམ་གྱིས་བརྒྱ་དང་སྟོང་གི་ཆ་
རུ་དམིགས་ཏེ། རྣལ་འབྱོར་རླུང་གིས་བཅུ་གཉིས་འགག །དོན་ཆེན་འགྲུབ་པར་ཐེ་ཚོམ་མེད། ཅེས་ལྟེ་བར་ནཱ་ད་ལ་དམིགས་ནས་བསྒོམས་པས་རླུང་བཅུ་གཉིས་འགོག་པར་གསུངས་པ་དང་། དེ་ཁོ་ན་ཉིད་ཡེ་ཤེས་ཡང་དག་པར་གྲུབ་པའི་རྒྱ་ཆེར་
9-10-38a


འགྲེལ་དེ་ཁོ་ན་ཉིད་བཤད་པ་ལས་ཀྱང་། འདི་ལ་ཨཾ་གི་རྣམ་པའི་གཟུགས་ཀྱི་ལྷ་མོ་དང་། ཨུའི་རྣམ་པའི་དོན་ཡོད་གྲུབ་པའི་གཟུགས་ནི་རླུང་ངོ་། །དེ་གཉིས་ལྷན་ཅིག་འདྲེས་པ་ལས་རྫོགས་པ་ནི་བཾ་གྱི་ཡི་གེ་གཟུགས་སུ་སྤྲུལ་
ནས་ལྟེ་བའི་འཁོར་ལོ་ལའོ། །འདི་ནི་ནན་ཏན་དུ་བྱས་ནས་གཡོ་བ་མེད་པའི་སེམས་ཀྱིས་རླུང་གཉིས་འགོག་པར་བྱས་པས་ཐོབ་པར་བྱེད་པའོ། །ཞེས་དང་། རྡོ་རྗེ་རྣལ་འབྱོར་མའི་སྒྲུབ་ཐབས་མངོན་པར་རྟོགས་པའི་སྙེ་མ་ལས་ཀྱང་། གལ་ཏེ་དེ་ཙམ་གྱི་
དཀྱིལ་འཁོར་གྱི་འཁོར་ལོ་ཆེན་པོ་ལ་ཡུན་རིང་པོར་བརྟན་པར་བྱེད་མི་ནུས་ན་དེའི་རྩེ་ལྟེ་བའི་པདྨར་གནས་པ་ཉི་མ་དང་ཟླ་བ་ཁ་སྦྱོར་གྱི་དབུས་སུ་བཾ་ཡིག་གི་ས་བོན་ལས་བྱུང་བའི་འོད་ཟེར་རིང་པོ་པདྨའི་སྲད་བུ་ལྟ་བུ་ལ་སེམས་བརྟན་པར་བྱས་པའི་སྒོ་
ནས་རྩ་གཉིས་ལ་སྲོག་རླུང་གི་རྒྱུ་བ་ཡོངས་སུ་ཐལ་བས་དབུས་སུ་ཞུགས་ནས་གཏུམ་མོ་འབར་བས་སྤྱི་བོའི་ཟླ་བ་ཞུ་བ་ལས་རིམ་གྱིས་འཁོར་ལོས་ཁྱབ་པས་དགའ་བ་ལ་སོགས་པ་རྣམས་ཀྱི་དབྱེ་བས་ལྷན་ཅིག་སྐྱེས་པའི་དགའ་བ་བྱུང་ནས་རྣམ་
པར་རྟོག་པ་ཐམས་ཅད་བྲལ་བས་ཅིག་ཅར་དཀྱིལ་འཁོར་གྱི་འཁོར་ལོ་སྟོང་པར་བསྡུས་ཏེ་མི་དམིགས་པར་བསམ་མོ་ཞེས་ལྟེ་བར་བཾ་ཡིག་དང་། དེའི་འོད་ཟེར་ལ་སེམས་གཟུང་བས་རོ་རྐྱང་གི་རླུང་གཉིས་འགོག་པར་བཤད་དེ། ལྟེ་བའི་རྩ་འཁོར་ཀྱི་
དབུས་ཀྱི་དྷཱུ་ཏཱིའི་ནང་དུ་སེམས་གཟུང་བའི་གདམས་ངག་གི་ཁྱད་ཆོས་སོ། །འདིའི་ཁུངས་སྡོམ་འབྱུང་ལས་གསུངས་པ་ནི་དྲངས་ཟིན་ལ། སམྦུ་ཊ་ལས་ཀྱང་། དོགས་གཅོད་དང་བཅས་པ་གསུངས་ཏེ། སྟོང་པ་མཚོན་དུ་མེད་པ་ལ། །ཡི་གེ་རྣལ་
9-10-38b


འབྱོར་ལ་སོགས་ཅི། །བཅོམ་ལྡན་འདས་ཀྱིས་བཀའ་སྩལ་པ། །དེ་ཉིད་ཇི་ལྟར་རྡོ་རྗེ་ཉོན། །མཚན་གཞི་མཚན་ཉིད་སྟོང་པ་ཉིད། །སྙིང་པོ་མེད་པའི་ཆུ་ཤིང་ལས། །སྙིང་པོ་བདུད་རྩི་འབྲས་བུ་ལྟར། །འབྲས་བུ་རྣམ་ཤེས་ཡེ་ཤེས་ནི། ཞེས་པ་ནས། ཇི་ལྟར་
མཚན་ཉིད་ཤེས་ནས་ནི། །མཉམ་ཉིད་ཡེ་ཤེས་སེམས་ཀྱིས་ནི། །དེ་ཡི་རྫོགས་པའི་བྱང་ཆུབ་ལམ། །མྱུར་བ་ཉིད་དུ་མཐོང་བར་འགྱུར། ཞེས་གསུངས་སོ། །དེའི་དོན་ནི་སྟོང་པ་དེ་ཁོ་ན་ཉིད་ཡི་གེ་ལ་སོགས་པས་མཚོན་དུ་མེད་པ་ཡིན་པ་ལ། དེ་བསྒོམ་
པའི་རྫོགས་རིམ་གྱི་སྐབས་སུ་ལུས་ཀྱི་གནད་རྣམས་སུ་ཡི་གེ་བཀོད་པ་ལ་དམིགས་པ་རྣལ་འབྱོར་དང་། སོགས་ཀྱིས་བསྡུས་པ་རྩ་དང་ཐིག་ལེའི་རྣལ་འབྱོར་ལ་སོགས་པ་བསྒོམ་པ་ལ་འཇུག་པ་མི་འཐད་དེ། བློས་བཏགས་ནས་བསྒོམ་པ་དེ་དེ་ཁོ་ན་
ཉིད་ཀྱི་དོན་བསྒོམ་པ་མིན་པའི་ཕྱིར་རོ་སྙམ་ན། ཆུ་ཤིང་སྙིང་པོ་མེད་པ་ཡིན་ཀྱང་བདུད་རྩི་དང་འདྲ་བའི་འབྲས་བུ་མངར་པོའི་སྙིང་པོ་བསྐྱེད་པ་ལྟར། བློས་བཏགས་ནས་ཡི་གེ་སོགས་བསྒོམ་པ་ཉིད་དེ་ཁོ་ན་ཉིད་བསྒོམ་པ་མ་ཡིན་ཞིང་། སྙིང་པོ་མེད་པའི་
ཆུ་ཤིང་ལྟ་བུ་ཡིན་ཀྱང་དེ་བསྒོམ་པ་ལས་འོག་ནས་འཆད་པ་ལྟར་འབྲས་བུ་མངར་པོ་དང་འདྲ་བའི་ལྷན་སྐྱེས་ཀྱི་ཡེ་ཤེས་ཀྱི་འབྲས་བུ་བསྐྱེད་པ་ལ་མི་འགལ་ཞེས་པའི་དོན་ནོ། །རྣམ་ཤེས་ནི་རྣམ་པར་ཤེས་པར་བྱ་བ་སྟོང་པ་ཉིད་དེ་མཚན་གཞི་གཟུགས་སོགས་
ཕུང་པོ་ལྔ་དང་དེ་རྣམས་མཚོན་པའི་མཚན་ཉིད་གཟུགས་སུ་རུང་བ་སོགས་རང་བཞིན་གྱིས་གྲུབ་པས་སྟོང་པའོ། །ཡེ་ཤེས་ནི་འདིས་ཤེས་པར་བྱེད་པ་སྟོང་པ་དེ་རྟོགས་པའི་ལྷན་སྐྱེས་ཀྱི་བདེ་བའོ། །དེ་འདྲ་བའི་བདེ་སྟོང་མཉམ་པར་སྦྱོར་བའི་ཚུལ་དང་
9-10-39a


དེ་ཇི་ལྟར་བསྐྱེད་པའི་མཚན་ཉིད་རྣལ་འབྱོར་པས་ཤེས་པར་བྱས་ནས་བསྒོམས་པས་བདེ་སྟོང་མཉམ་པ་ཉིད་དུ་སྦྱོར་བའི་ཡེ་ཤེས་ཀྱི་ལམ་མྱུར་དུ་སྐྱེ་བར་འགྱུར་རོ། །མན་སྙེར། རྣལ་འབྱོར་སྦྱོར་བ་དང་། སོགས་
ཀྱི་སྐད་དོད་དང་པོར་བྱས་ནས། དང་པོ་སྦྱོར་བས་དཀྱིལ་འཁོར་རྒྱལ་མཆོག་སོགས་མཚོན་པར་བྱས་ནས། དེའི་སྐབས་སུ་ཡི་གེ་ལ་སོགས་པ་བཀོད་ནས་བསྐྱེད་རིམ་བསྒོམ་པ་ལ་དོགས་གཅོད་དུ་མཛད་པ་ནི་གཞུང་དེའི་གོང་ཉིད་དུ་
བསྐྱེད་རིམ་པའི་ལྷའི་ས་བོན་གྱི་ཡི་གེ་སོགས་བཀོད་པ་ལ་དགོངས་ལ། འོན་ཀྱང་འདིའི་མཇུག་ཐོགས་སུ་སྙིང་ཁའི་པདྨའི་དབུས་སུ་ཡི་གེ་བཀོད་ནས་བསྒོམས་པ་ལས་དེ་ཁོ་ན་ཉིད་མཚོན་པར་གསུངས་པ་དང་ཡང་འབྲེལ་ཏེ། དོགས་
གཅོད་ཀྱི་གཙོ་བོ་ནི་ཕྱི་མའོ། །རྫོགས་རིམ་བསྒོམ་པའི་སྐབས་སུ་ལུས་ཀྱི་གནད་རྣམས་སུ་ཡི་གེ་དང་ཐིག་ལེ་སོགས་བཀོད་ནས་བསྒོམ་པ་འདི་ནི་འདུས་པ་ལུགས་གཉིས་དང་ལོ་ནག་དྲིལ་གསུམ་སོགས་ཀྱི་ལུགས་མང་པོ་ནས་འབྱུང་བ་
ལ། ཐབས་འདིས་སྲོག་དྷཱུ་ཏཱིར་བསྡུས་ནས་ལྷན་སྐྱེས་བསྐྱེད་པ་ཇི་བཞིན་དུ་མ་རྟོགས་པས་འདི་རྣམས་ལ་རྩིས་ཆེ་བའི་བོད་ཀྱི་བཤད་པ་རྣམས་ལ་ཡང་ཇི་བཞིན་དུ་ཤོད་པའི་བཤད་པ་མི་སྣང་ལ། ཁ་ཅིག་ནི་དེ་འདྲ་བསྒོམ་པ་དེ་དེ་ཁོ་ན་
ཉིད་བསྒོམ་པར་འདོད་པ་བཀག་པ་རྣམས་དྲངས་ནས་ཆོས་སྤོང་བར་སྣང་བས་རྣམ་དཔྱོད་དང་ལྡན་པ་རྣམས་ཀྱིས་ལེགས་པར་རྩད་གཅད་པར་བྱའོ། །རླུང་ལ་རྡོར་བཟླས་བྱེད་ལུགས་ནི། བདེ་མཆོག་སྟོད་འགྲེལ་ལས། དེ་ནས་སྲོག་
9-10-39b


རྩོལ་ཞེས་བྱ་བ་ནི་ལ་ལ་ན་དང་ར་ས་ན་གཡོན་པ་དང་གཡས་པའི་ལམ་འགོག་པ་ལས་སྲོག་གི་རླུང་རྟག་ཏུ་དབུ་མ་ཨ་ཝ་དྷཱུ་ཏཱིའི་ལམ་དུ་རབ་ཏུ་འཇུག་པ་སྟེ། ཨ་ཝ་དྷཱུ་ཏཱིར་དགང་བ་དང་། བུམ་པ་ཅན་དང་། དབྱུང་བའི་སྦྱོར་བས་ཨོཾ་ཡིག་
གིས་འཇུག་པ་དང་། ཧཱུཾ་ཡིག་གིས་འགོག་པ་དང་། ཨཱཿཡིག་གིས་དབྱུང་བ་ཟླ་བ་དང་། སྒྲ་གཅན་དང་ཉི་མའི་རང་བཞིན་གྱིས་རྣལ་འབྱོར་པས་བྱེད་པ་ནི་སྲོག་རྩོལ་གྱི་ཡན་ལག་གོ་ཞེས་གསུངས་ལ། ཅོག་རོ་ཏིང་ངེ་འཛིན་བཟང་པོའི་འགྱུར་ལས། 
རྔུབ་པ་དང་གནས་པ་དང་དབྱུང་བའི་སྦྱོར་བས་ཞེས་བཤད་པ་ལྟར་དགང་བ་ནི། ནང་དུ་རྔུབ་པ་དང་། བུམ་པ་ཅན་ནི་ནང་དུ་གནས་པ་ལ་བྱ་སྟེ། ཡི་གེ་གསུམ་དང་སྦྱར་བའི་ལྡང་འཇུག་གནས་གསུམ་ག་དྷཱུ་ཏཱི་ནས་བྱེད་པར་བསྒོམ་དགོས་སོ། །རྒྱུད་རྣམས་
ལས་རླུང་གསུམ་དང་ཡི་གེ་གསུམ་སྦྱོར་ཚུལ་འདྲ་མི་འདྲ་འགའ་རེ་ཡོད་ཀྱང་གཅིག་ངེས་གཟུང་དུ་བཟུང་མི་དགོས་ཀྱི་ལུགས་དེ་དག་གང་ཡང་རུང་བས་འགྲུབ་བོ། །དུས་འཁོར་གྱི་སྐོར་ནས་སྲོག་རྩོལ་བུམ་པ་ཅན་ལ་བཤད་པ་མང་ཡང་དེ་ཁོ་ན་མིན་གྱི་
སྟོད་འགྲེལ་ལས་གསུངས་པ་ལྟར། རྡོར་བཟླས་ཀྱང་རོ་རྐྱང་ལ་རླུང་རྒྱུ་བ་བཟློག་ནས་དྷཱི་ཏཱིར་འཇུག་པའི་སྲོག་རྩོལ་དུ་ཤེས་དགོས་པས་རྡོར་བཟླས་སྲོག་རྩོལ་གྱི་སྔོན་འགྲོ་དང་གེགས་སེལ་ཙམ་དུ་འདོད་པ་ནི་རྒྱུད་ཀྱི་དོན་ལེགས་པར་མ་རྟོགས་པའོ། །དྲི་
མེད་འོད་ལས་ཀྱང་འདིར་ངེས་པའི་དོན་ནི། དུས་ཐམས་ཅད་དུ་བརྟན་པར་གྱུར་པ་དང་། བུམ་པ་ཅན་གྱི་གནས་སྐབས་སུ་གྱུར་པ་ཇི་སྲིད་བར་དུས་ཐམས་ཅད་དུ་རྣལ་འབྱོར་པས་འཇུག་པ་དང་འབྱུང་བ་ཉིད་ཀྱིས་སྲོག་དབུ་མར་བསྒོམ་པར་བྱའོ། །དེ་
9-10-40a


ནས་རྣལ་འབྱོར་པས་མངོན་པར་ཤེས་པ་ལྔ་ཐོབ་པར་འགྱུར་ཏེ། སྲོག་གི་བཟླས་པ་ལས་སོ། །ཞེས་པ་ནི་བཅོམ་ལྡན་འདས་ཀྱི་ངེས་པའོ། །དེ་ལྟར་མི་ཕྱེད་པའི་ཡན་ལག་སྲོག་དང་ལྡན་པའི་ཡིད་ཀྱིས་སྔགས་བཟླས་
པར་བྱའོ། །ཞེས་པ་ནི་རྒྱུད་ཐམས་ཅད་ལས་རྡོ་རྗེའི་ཚིག་སྟེ་སྔར་བརྗོད་ཟིན་ཏོ། །ཞེས་རྡོར་བཟླས་བྱེད་པའི་དུས་ཀུན་ཏུ་རྣལ་འབྱོར་པས་དབུ་མ་ནས་རླུང་འབྱུང་འཇུག་བྱེད་པར་བསྒོམ་དགོས་པར་གསུངས་ཤིང་། ཚུལ་དེའང་རླུང་གི་རྡོར་བཟླས་བྱ་བར་
གསུངས་པའི་རྒྱུད་ཐམས་ཅད་ཀྱི་དབང་དུ་མཛད་པར་གསུངས་སོ། །བུམ་པ་ཅན་གྱི་གནས་སྐབས་སུ་གྱུར་པ་ཇི་སྲིད་པར་ཞེས་པ་ནི་བུམ་པ་ཅན་དང་འདྲ་བར་རླུང་འབྱུང་འཇུག་མི་བྱེད་པར་ནང་དུ་གནས་པ་བརྟན་པོ་བྱུང་བྱུང་གི་བར་དུ་རྡོར་བཟླས་
བྱ་ཞེས་པའི་དོན་ཏེ། རྡོར་བཟླས་ཀྱིས་སྲོག་དྷཱུ་ཏཱིར་ཞུགས་པ་དང་གནས་པ་བརྟན་པོ་བྱེད་པའི་དོན་ནོ། །རྡོ་རྗེ་སྙིང་འགྲེལ་ལས་ཀྱང་། མ་ནིང་དག་གི་གནས་ཞུགས་པ། །སྔགས་ཀྱི་ཡན་ལག་མ་ཉམས་བཟླས། །སྤྱི་གཙུག་དབུ་མའི་གནས་
ཚུད་པར། །སྲོག་གི་རྒྱུན་མི་འཆད་པར་བཟླས། ཞེས་དབུ་མའི་གནས་སུ་ཆུད་པར་རྡོར་བཟླས་བྱ་བར་གསུངས་སོ། །འོ་ན་དྲི་མེད་འོད་ལས། གཡོན་དང་གཡས་དང་དབུ་མའི་སྲོག་ཡང་དག་པར་རྒྱུ་བའི་རྡོ་རྗེ་བཟླས་པའི་རིམ་པ་དང་། མ་ནིང་
གི་བཟླས་པའི་རིམ་པའོ། །ཞེས་རྩ་གཡས་གཡོན་ནས་སྲོག་རྒྱུ་བའི་དོན་རྡོར་བཟླས་སུ་གསུངས་པ་ཇི་ལྟར་ཡིན་སྙམ་ན། དེ་དང་འགལ་བའི་སྐྱོན་མེད་དེ། དེའི་དོན་ནི་རྩ་གསུམ་ནས་སྲོག་རྒྱུ་བའི་རླུང་ལ་རྡོར་བཟླས་བྱེད་པའི་དོན་ཡིན་ལ། 
9-10-40b


རྩ་གཡས་གཡོན་ལ་རླུང་རྒྱུ་བའི་ཚེ་རྡོར་བཟླས་བྱེད་པ་ནའང་དངོས་སུ་རོ་རྐྱང་ལ་རྒྱུ་བ་ཡིན་ཀྱང་། དེ་དངོས་སུ་མི་འགོག་པར་དབུ་མ་ནས་འབྱུང་འཇུག་བྱེད་པར་མོས་ནས་བྱེད་པ་ལ་འགལ་བ་ཅི་ཡང་མེད་པའི་ཕྱིར། དེས་ན་རྡོར་བཟླས་བྱེད་པ་ན་
གཡས་རོ་མ་དང་གཡོན་རྐྱང་མའི་རྡོར་བཟླས་བྱེད་པ་ཡིན་ཟེར་ནས་རྩ་དེ་གཉིས་ནས་རླུང་འབྱུང་འཇུག་བྱེད་པར་མོས་པའི་རྡོར་བཟླས་བྱེད་པ་མང་དུ་སྣང་བ་ནི་ཡང་དག་པའི་རྡོར་བཟླས་ཀྱི་གོ་ལ་ས་ཆེ་ཤོས་ལ་གནས་པར་ཤེས་པར་གྱིས་ཤིག །
གཞན་ཡང་དྲི་མེད་འོད་ལས་དབུགས་འཇུག་པ་དང་འབྱུང་བ་དག་དང་ལྷན་ཅིག་སྔགས་ཀྱི་ཡི་གེ་རྣམས་རབ་ཏུ་འཇུག་པ་དང་། འབྱུང་བ་མེ་ཏོག་གི་ཕྲེང་བ་བཞིན་དུ་ཟླ་བ་དང་ཉི་མའི་རང་བཞིན་ལུགས་དང་མཐུན་པ་དང་མི་མཐུན་པ་བལྟ་བར་བྱའོ། །
ཞེས་གསུངས་པ་དང་ཡང་མི་འགལ་ཏེ། སྟོང་འགྲེལ་ལས། དབུ་མའི་ནང་ནས་རླུང་འབྱུང་ལྡང་བྱེད་པ་ཡང་ཟླ་ཉིར་བཤད་པ་བཞིན་ཡིན་པའི་ཕྱིར་རོ། །མེ་ཏོག་གི་ཕྲེང་བ་བཞིན་ཞེས་པའི་དོན་ནི། རླུང་ཕྲེང་ཐག་ལྟ་བུ་དང་། རླུང་གི་གདངས་རྐང་པ་དོན་
གཉིས་པ་ལྟ་བུའི་སྔགས་ཀྱི་ཡི་གེའི་གདངས་སུ་ཤར་བ་མེ་ཏོག་རེ་རེ་བ་ལྟ་བུ་སྟོན་པ་ཡིན་གྱི། ཡིག་འབྲུའི་ཁ་དོག་དང་དབྱིབས་ཀྱི་གཟུགས་ཅན་དུ་སྟོན་པ་མིན་ནོ། །རྒྱུད་རྡོ་རྗེ་ཕྲེང་བ་ལས། སྒྲ་དང་ཐིག་ལེའི་མིང་དུ་བྱས། །རླུང་གཉིས་ཀྱི་ནི་ཕྱི་
ནས་ནི། །མ་རིག་མདུད་པ་འབྱེད་པར་བྱེད། ཅེས་རླུང་འབྱུང་འཇུག་གཉིས་ལ་རྡོར་བཟླས་བྱས་པས་སྙིང་ཁའི་དྷཱུ་ཏཱི་ལ་རོ་རྐྱང་གིས་དཀྲིས་པའི་མ་རིག་པའི་མདུད་པ་འབྱེད་པར་གསུངས་ཏེ། དཔེར་ན་སྨྱུག་མའི་སྦུབས་འགགས་པ་ལ་ཐུར་མ་རིང་
9-10-41a


པོས་དེའི་ནང་དུ་འབྱུང་འཇུག་བྱས་པས་ཕྱེད་པ་བཞིན་དུ་རླུང་འབྱུང་འཇུག་གིས་ཀྱང་དེ་བཞིན་དུ་འབྱེད་དོ། །རྒྱུ་དེར་སྔགས་ཀྱི་དེ་ཉིད་རྡོར་བཟླས་ཀྱིས་དྷཱུ་ཏཱི་འབྱེད་པ་མང་དུ་གསུངས་སོ། །དེ་ལྟར་ཁུངས་ཐུབ་ཀྱི་གཞུང་མང་པོ་
ལས་གསལ་བར་གསུངས་ཀྱང་། བོད་ཀྱི་གདམས་ངག་ལས་འདིའི་གནད་ཐོན་པ་ཡང་ཤིན་ཏུ་དཀའ་བར་བྱུང་འདུག་པས་ལེགས་པར་རྩད་གཅད་པར་བྱའོ། །གཉིས་པ་ནི། ཡེ་ཤེས་སེམས་དཔའ་ཡབ་ཡུམ་སྙོམས་འཇུག་བྱས་པའི་ཐབས་ཀྱིས་
སྡུད་རིམ་བྱེད་པ་ནི། སྔར་རྣལ་འབྱོར་གྱི་སྟོབས་ཀྱིས་སྲོག་དབུ་མར་ཞུགས་གནས་ཐིམ་གསུམ་བྱས་པའི་མྱོང་བ་ཅན་གཅིག་ཡིན་ན། ཐབས་དེས་ཀྱང་སྲོག་དབུ་མར་སྡུད་ནུས་པར་འོང་ལ། དེ་ལྟ་མིན་ན་ཐབས་དེས་སྡུད་པ་སྔོན་དུ་བཏང་ནས། ལྟེ་བའི་
རྩ་འཁོར་གྱི་དབུས་ཀྱི་དབུ་མ་ཡོད་པའི་ཐད་དུ་དབུ་མའི་ནང་དུ་ཡི་གེ་སོགས་ལ་སེམས་གཟུང་བ་བརྟན་པ་ན་སྲོག་དབུ་མར་སྡུད་ནུས་པར་འགྱུར་དེ་ཡང་སྡུད་རིམ་སྔོན་དུ་མ་བཏང་ཡང་སེམས་སྔར་ལྟར་ཟིན་པ་གོམས་པ་ལས་རླུང་དབུ་མར་སྡུད་
ནུས་པ་འོང་མོད་ཀྱང་། སྡུད་རིམ་རེ་དང་སྦྲགས་ནས་བྱས་ན་རླུང་སྡུད་པར་སླ་བའི་དགོས་པ་ཡོད་པས་དེ་ལྟར་བྱེད་པ་ཡིན། དེ་ལྟར་སེམས་འཛིན་པ་ན་བྱིང་བ་ཕྲ་མོ་ནས་མ་ཆོད་ན་རླུང་འདུ་བ་ཤིན་ཏུ་དཀའ་བས་བྱིང་བ་ཕྲ་རགས་ཀུན་ཆོད་
པར་བྱ། དེ་ཡང་སེམས་ལ་ངར་ཐོན་པ་མེད་ན་སེམས་གསལ་དྭངས་ཀྱི་རྟོག་མེད་དུ་གནས་པ་ཡོད་ཀྱང་བྱིང་བ་ཕྲ་མོ་མི་ཁེགས་པས་དམིགས་པ་ལ་སེམས་ནང་དུ་ཞུགས་པ་ལྟར་འཛིན་པའི་གྲིམས་ཆ་བསྐྱེད། དེ་བསྐྱེད་དྲགས་ན་སེམས་
9-10-41b


གནས་སུ་མི་ཉན་པས་ཚོད་ཟིན་པ་རང་གི་ཉམས་སྟེང་ནས་ཤེས་པར་བྱས་ཏེ། བྱིང་རྒོད་དང་བྲལ་བར་བསྐྱངས་པས་འགལ་རྐྱེན་གློ་བུར་བ་གཞན་མེད་ན་ཉིན་ཞག་གཅིག་གི་དྲུག་ཆ་ལ་ཐུན་རེར་བྱས་པའི་ཐུན་འཁྱོངས་པ་བརྟན་པོ་རྙེད་རྙེད་དུ་བསྒོམ། 
དེ་ལྟར་བསྒོམས་པས་རླུང་སེམས་འཇུག་པ་གཅིག་པའི་གནད་ཀྱིས་དབུ་མའི་ནང་དུ་སེམས་ཟིན་པ་ན་རླུང་ཡང་ཟིན་པར་འགྱུར་བས་སྲོག་དྷཱུ་ཏཱིར་འཛུད་ནུས་པ་ཡིན་ནོ། །འོ་ན་དེ་ལྟར་བསྒོམས་པས་སྲོག་དབུ་མར་ཚུད་པའི་རྟགས་ངེས་པ་ཅན་
མྱོང་བས་གྲུབ་པ་ཅི་འདྲ་ཡོད་སྙམ་ན། འདི་ལ་བོད་ཀྱི་བླ་མ་འགའ་ཞིག་གི་ལུགས་ཀྱིས་རླུང་དབུ་མར་ཚུད་པའི་ཉམས་རྟོགས་ལྔ་ལས་ལུས་ཀྱི་རྟགས་ནི་སྨིན་མཚམས་སུ་རླུང་འདུས་ཤིང་གཙུག་ཏོར་དུ་ཟ་བ་དང་། འཁྲིག་པ་སོགས་དང་། རླུང་
གི་རྟགས་ནི་དབུགས་རྒྱུ་བ་མི་ཚོར་ཞིང་བརྟགས་ན་སྣ་སྒོ་གཉིས་ཀ་ནས་ཤིན་ཏུ་དལ་བར་རྒྱུ་བ་དང་། སེམས་ཀྱི་རྟགས་ནི་ཤེས་པ་གསལ་སྟོང་རྟོག་མེད་དུ་གནས་པ་དང་། མཐོང་རྟགས་ནི་དུ་བ་ལྟ་བུ་སོགས་གསལ་ལ་བརྟན་པར་སྣང་བ་དང་། 
རྨི་ལམ་གྱི་རྟགས་ནི་འཕུར་བ་དང་རྟ་རྒྱུག་པ་སོགས་རྨི་བ་འབྱུང་ངོ་ཞེས་ཟེར་རོ། །དེའི་རྟགས་དང་པོ་ནི་ཐེག་པ་གཉིས་ཀའི་སེམས་འཛིན་ཕལ་མོ་ཆེ་ལ་འབྱུང་ཞིང་ལུས་ལ་གནད་དུ་བསྣུན་པ་བསྒོམ་པ་ལ་ཡང་རླུང་དྷཱུ་ཏཱིར་མ་ཞུགས་པའི་གོང་
སྔ་མོ་ནས་ཀྱང་འབྱུང་བ་དུ་མ་འོང་བས་རྟགས་འཁྲུལ་བ་ཅན་ནོ། །རྟགས་གསུམ་པ་ནི་ཐེག་པ་ཆེ་ཆུང་སོགས་ཀྱི་སེམས་གནས་བསྐྱངས་པ་ཐམས་ཅད་ལ་འོང་ཞིང་། དེ་ལ་ལུས་ལ་གནད་དུ་བསྣུན་ཐབས་བྱ་མི་དགོས་ལ། རྣལ་འབྱོར་
9-10-42a


གྱི་སྟོབས་ཀྱིས་སྲོག་དབུ་མར་བཅུག་པ་ནི་རྣལ་འབྱོར་བླ་མེད་ཀྱི་གཞུང་ནས་འབྱུང་བའི་ལུས་ལ་གནད་དུ་བསྣུན་ཐབས་བྱས་པ་ཁོ་ནའི་ཁྱད་ཆོས་ཡིན་པས་ཆེས་ཤིན་ཏུ་མ་ངེས་པའི་རྟགས་སོ། །རྟགས་བཞི་པ་ལ་ནི་སྲོག་དྷཱུ་
ཏཱིར་བཅུད་པ་ལ་དེ་ལྟར་འཆར་བ་གཅིག་དང་། སེམས་གནས་སྤྱི་ཙམ་པ་ལ་འཆར་བ་གཉིས་ཡོད་པས་ཆེས་མ་ངེས་པའི་རྟགས་སོ། །རྟགས་ལྔ་པ་ནི་ཏིང་ངེ་འཛིན་ཅུང་ཟད་ཀྱང་མ་བསྒོམས་པ་ལ་ཡང་དུ་མ་ཞིག་འབྱུང་བས་ཤིན་ཏུ་འཁྲུལ་བའི་རྟགས་
སོ། །རྟགས་གཉིས་པ་རླུང་གི་རྟགས་བཤད་པ་ལ་ནི་གཞི་ཅུང་ཟད་ཅིག་སྣང་ངོ་། །དེས་ན་མི་འཁྲུལ་བའི་རྟགས་ངེས་པ་ཅན་ནི་འདི་ལྟར་ཤེས་པར་བྱ་སྟེ། རྣལ་འབྱོར་བླ་མེད་ཀྱི་གཞུང་ཁུངས་ཐུབ་ནས་འབྱུང་བའི་ལུས་ལ། གནད་དུ་བསྣུན་ཐབས་སྔར་བཤད་
པ་འདྲ་བ་ཞིག་བྱས་པ་གཞིར་བཞག་ལ། དེས་ཐུན་འཁྱོངས་པ་མ་བྱུང་བར་དུ་སྲོག་དྷཱུ་ཏཱིར་ཚུད་པ་དཀའ་བས་ཐུན་འཁྱོངས་པ་ན་རང་གི་སྣ་བུག་གཉིས་གང་རུང་རེ་རེ་བར་རྒྱུ་བའི་འཕོས་མ་ཐག་པའི་སྐབས་ངོས་གཟུང་ལ། དེ་ནས་ལུས་གནད་དང་སེམས་
ཀྱི་འཛིན་ལུགས་སྔར་བཞིན་བྱས་པའི་མཐུས་རིང་པོ་མི་ཐོགས་པར་སྣ་སྒོར་བརྟགས་པ་ན་རླུང་མཉམ་རྒྱུར་ཐེངས་པ་དང་། དེ་ཡང་ལན་རེ་རེ་གཉིས་གཉིས་ཙམ་ལ་ངེས་པ་མེད་ཀྱི་འགལ་རྐྱེན་གཞན་མེད་ན་ངེས་ཅན་དུ་ཐེངས་ཀྱིན་འདུག་པ་དང་། མཉམ་
རྒྱུ་ཡང་གང་རུང་གཅིག་དྲག་ལ་ཅིག་ཤོས་ཞན་པ་མིན་པར་དྲག་ཞན་ཤེད་མཚུངས་སུ་རྒྱུ་བ་འོང་བར་སྣང་ན། རྣལ་འབྱོར་དེའི་སྟོབས་ཀྱིས་རླུང་དབུ་མར་འཛུད་ནུས་པ་ཙམ་དུ་འཇོག་ནུས་མོད་ཀྱང་ལན་ཅིག་ཚུད་ཕྱིན་ཆད་ནས་གཡས་གཡོན་རེ་རེ་བར་མི་འཕོ་བ་
9-10-42b


མིན་ནོ། །དེ་ནི་སྲོག་དྷཱུ་ཏཱིར་ཞུགས་པ་ཡིན་ལ། དྷཱུ་ཏཱིར་གནས་པ་ནི་མཚམས་འདི་ནས་དྲིལ་ཏེ་བསྒོམས་པས་སྣ་བུག་གི་རྒྱུ་བ་ཞན་དུ་སོང་བའི་མཐར་ཞིབ་ཏུ་བརྟགས་པ་ན་རྒྱུ་བ་ཕྲ་མོ་ཡང་ལྡོག་པ་གཅིག་འོང་། །རྟོག་ཚུལ་དེ་ངེས་དཀའ་བར་བྱུང་ན། ལུས་དྲང་པོར་
གཡོ་འགུལ་མེད་པར་བདེ་མོར་གནས་པའི་དུས་སུ་ལྟོ་བ་འགུལ་མི་འགུལ་བརྟག །ཅུང་ཟད་འགུལ་བར་སྣང་ན་མ་ལོག་པའི་རྟགས་ཡིན། བརྟག་པ་འདི་ཁྱད་པར་དུ་ལྟེ་བ་མན་ཆད་ཀྱི་ཐུར་སེལ་འོག་གི་སྣ་སྦོར་འབྱུང་འཇུག་བྱེད་མི་བྱེད་རྟོག་པ་ལ་གལ་ཆེ་
བ་ཡིན། སྣ་བུག་གི་རྒྱུ་བ་ཕྲ་མོ་ཡང་ལོག་པ་ལ་ཐིམ་དཀའ་སླ་གཉིས་ལས། ཐིམ་དཀའ་ན་ཡུད་གཅིག་ལ་ལྟོ་བ་རླུང་གིས་ཁེངས་པ་འབྱུང་ཞིང་དེ་ནས་ཞི་བར་འགྱུར་ལ། ཞི་མ་ཐག་ལྟེ་བ་དང་གསང་གནས་ཀྱི་མ་གནས་པའི་ཐད་ནས་དྲོད་ཁྱད་པར་
ཅན་སྐྱེ། དེ་ནས་རིམ་གྱིས་ཞུ་བ་དེ་འདྲེན་ནོ། །སྣ་བུག་གི་རྒྱུ་བ་ཕྲ་མོ་ཡང་ལོག་པ་འདི་བྱིང་བ་ཕྲ་མོ་མ་ཆོད་པར་བསགས་པས་བྱིང་བ་ཤས་ཆེ་བ་གཅིག་ལ་ཡང་འོང་སྟེ། དེ་ནི་རླུང་དྷཱུ་ཏཱིར་ཚུད་པ་དང་ཐིམ་པ་གང་ཡང་མིན་པས་ཁྱད་པར་ཕྱེད་པར་
བྱའོ། །དྷཱུ་ཏཱིར་ཐིམ་པ་བྱུང་ཡང་སླར་རླུང་ལངས་ནས་རྩ་གཉིས་ལ་རྒྱུ་བ་ནི་དུ་མ་ཞིག་འོང་ངོ་། །རྡོར་བཟླས་ཀྱི་མྱོང་བ་སྐྱེ་ཚུལ་ནི། རེ་ཞིག་རླུང་གི་གདངས་ལ་སྔགས་སུ་མོས་པ་ཙམ་ལས་མི་འོང་ཡང་། གོམས་པའི་མཐར་ཕར་ལ་མོས་པ་བྱས་
པ་ཙམ་མིན་པར་ཚུར་ལ་རང་གི་གདངས་ཡི་གེ་གསུམ་གྱི་གདངས་སུ་འཆར་བའི་གསུང་གི་ང་རྒྱལ་འཕོས་པ་འབྱུང་སྟེ་བསྐྱེད་རིམ་དང་འདྲའོ། །དེ་ཡང་དང་པོར་དྷཱུ་ཏཱིའི་ནང་ནས་འབྱུང་འཇུག་བྱེད་པར་མོས་པ་ཙམ་ཡིན་ཀྱང་། གདམས་ངག་གིས་གནད་
9-10-43a


ལེགས་པར་ཤེས་ནས་གོམས་པ་བསྲིངས་ན་རླུང་སེམས་འཇུག་པ་གཅིག་པའི་གནད་ཀྱིས་དྷཱུ་ཏཱིའི་ནང་ནས་དངོས་སུ་འབྱུང་འཇུག་བྱེད་པ་འོང་ངོ་། །འདི་ལ་ཡང་སྔར་བཤད་པ་བཞིན་དང་པོར་སྣ་བུག་རེ་རེ་བར་རྒྱུ་བཞིན་པ་ན་རྡོར་
བཟླས་བྱས་པའི་མཐུས་མྱུར་པོར་མཉམ་རྒྱུར་ངེས་ཅན་དུ་ཐེངས་ཀྱིན་འདུག་ན་རྡོར་བཟླས་ཀྱིས་རླུང་དྷཱུ་ཏཱིར་ཚུད་པ་ཡིན་ནོ། །དེ་ནས་སྲོག་དབུ་མར་གནས་པ་འོང་ལུགས་ནི། འབྱུང་འཇུག་གང་རུང་རེའི་ཡུན་ཚད་ཀྱིས་གནས་པ་ནི་དང་པོར་ཆེད་
དུ་བྱ་དགོས་ལ། དེ་གོམས་པ་ཡུན་བསྲིངས་པ་ན་མཚམས་གཅིག་ནས་ཆེད་དུ་བྱ་མི་དགོས་པར་རང་གི་ངང་གིས་གནས་པ་གཅིག་འོང་ངོ་། །དེ་བྱུང་བ་ན་སླར་ཡང་གོམས་པ་བསྲིངས་པས་གནས་པ་ཇེ་རིང་ཇེ་རིང་དུ་འགྲོ། དེའི་གནད་ཀྱིས་
ལྡང་འཇུག་གཉིས་ཇེ་ཐུང་དུ་སོང་ནས་མཐར་རླུང་འབྱུང་འཇུག་གི་རྒྱུ་བ་ཕྲ་མོ་ཡང་ལོག་ནས་གནས་པ་འབའ་ཞིག་པར་འགྲོའོ། །འདི་ཡང་དྲི་མེད་འོད་ལས། དེ་ལྟར་ཉིན་ཞག་སྟོང་ལྔ་བརྒྱ་རྣམས་ཀྱིས་དབུགས་གཡོ་བ་མེད་པར་འགྱུར་ཏེ་སྲོག་
གི་བུམ་པ་ཅན་གྱི་གནས་སྐབས་འཐོབ་པར་འགྱུར་རོ། །ཞེས་རྡོར་བཟླས་བྱས་པས་རླུང་ཕྱི་ནང་དུ་འབྱུང་འཇུག་གི་གཡོ་བ་མེད་པའི་གནས་སྐབས་འཐོབ་པར་གསུངས་སོ། །རྡོར་བཟླས་ལ་ཡང་རིག་པ་ལ་དར་ཐོན་པ་རྒྱུན་ལྡན་པ་མེད་ན་བྱིང་བ་
འཕེལ་བར་འགྱུར་ལ། དེར་སོང་ན་སྣ་སྒོའི་རླུང་འབྱུང་འཇུག་མི་བྱེད་པ་བྱུང་ན་ཡང་སྐྱོན་བསྐྱེད་པ་མིན་པ་ཡོན་ཏན་མི་སྐྱེ་བས་བྱིང་བ་གཅོད་པ་གལ་ཆེའོ། །སྲོག་དབུ་མར་གནས་པ་རྙེད་པའི་ཚེ། ལྟེ་བའི་དྷཱུ་ཏཱིའི་ནང་གི་ཡི་གེ་སོགས་ལ་དམིགས་
9-10-43b


པ་གཏད་ནས་སེམས་གཟུང་བར་བྱས་པས་མྱུར་པོར་རླུང་དྷཱུ་ཏཱིར་ཐིམ་པར་འགྱུར་རོ། །དེ་ལྟར་ན་རྣལ་འབྱོར་བླ་མེད་ཀྱི་ལམ་འདིར་ལྷན་ཅིག་སྐྱེས་པའི་ཡེ་ཤེས་བསྐྱེད་དེ། དེ་བསྒོམས་པས་མཆོག་འགྲུབ་པ་ལ་སྲོག་དྷཱུ་ཏཱིར་སྡུད་པ་གཅིག་མེད་མི་རུང་
ཡིན་ཏེ། མཁའ་འགྲོ་རྒྱ་མཚོ་ལས། ཨ་ཝ་དྷཱུ་ཏཱིའི་སྲོག་གི་རླུང་། །བརྟན་པ་ཕག་སོགས་རྣལ་འབྱོར་མ། །མ་བརྟན་སྲོག་གི་རླུང་རྣམས་ཀྱིས། །དངོས་གྲུབ་གསལ་བར་མི་འགྱུར་རོ། །ཞེས་སོ། །ཁྱད་པར་གསལ་བྱེད་ལས་འདུས་པ་ཕྱི་མ་དྲངས་
པ་ནས་ཡན་ལག་དྲུག་དང་བྲལ་ན་མཆོག་མི་འགྲུབ་པར་གསུངས་པའི་སྲོག་རྩོལ་འཆད་པ་ན། གསང་གནས་དང་ལྟེ་བ་དང་སྙིང་ཁ་དང་སྨིན་མཚམས་ལ་སོགས་པ་གང་ཡང་རུང་བར་ཐིག་ལེ་དང་ཡི་གེ་སོགས་ལ་དམིགས་པའི་ཐབས་གང་
ཡང་རུང་བས་སྲོག་དྷཱུ་ཏཱིར་སྡུད་པ་ཐམས་ཅད་སྲོག་རྩོལ་ཡིན་པས། གཞུང་རྣམས་ལས་ལྟེ་བ་ལ་སོགས་པའི་རྩ་འཁོར་གྱི་གནས་ཕྱོགས་རེའི་སྲོག་རྩོལ་བཤད་པ་ནི། མཚོན་པ་ཙམ་ཞེས་བཤད་ཅིང་། ཡེ་ཤེས་ཞབས་ལུགས་ཀྱི་སྦྱོར་དྲུག་
གི་རྒྱ་གཞུང་གཅིག་ལས་ཀྱང་། དེ་དང་མཐུན་པར་བཤད་པ་ལྟར་སྲོག་རྩོལ་རྒྱ་ཆེར་བཏང་ན་རྒྱུད་ནས་གསུངས་པ་ལྟར་ཡིན་གྱི། དེ་ལྟ་མིན་པས་རྒྱུད་གཅིག་ནས་སྲོག་རྩོལ་དུ་བཤད་པ་ཇི་མ་ཇི་བཞིན་དུ་མ་བྱུང་ན་ལམ་དེས་འཚང་མི་རྒྱ་བར་
འཛིན་ན་ནི་ཆོས་སྤོང་བའི་སྒོ་ཆེན་པོ་ལ་གནས་པར་འགྱུར་རོ། །དེ་ལྟར་སྲོག་རྩོལ་གྱི་སྒོ་མི་འདྲ་བ་མང་པོ་ཡོད་པ་བཞིན་དུ་སྒོ་དེ་དག་གི་རླུང་དབུ་མར་བཙུད་ནས་གཡོ་མེད་དུ་གནས་པ་ཡང་དེ་ཙམ་གཅིག་འོང་ངོ་། །དེའི་ཕྱིར་བདེ་མཆོག་སྟོད་འགྲེལ་
9-10-44a


ལས། དེ་ནས་འཛིན་པ་ཞེས་བྱ་བ་ནི་སྲོག་གི་རླུང་ལྟེ་བ་དང་སྙིང་ཁ་དང་ལྐོག་མ་དང་དཔྲལ་བ་དང་དབང་ཆེན་དང་ཆུ་དང་མེ་དང་རླུང་གི་དཀྱིལ་འཁོར་རྣམས་སུ་འཇུག་པས་ཐིག་ལེ་ལ་སྲོག་གནས་ཤིང་ཕྱིར་མི་འབྱུང་བ་
ནི་འཛིན་པའི་ཡན་ལག་ཏུ་བསྟན་ཏོ། །ཞེས་རླུང་དབུ་མར་འབྱུང་འཇུག་མི་བྱེད་པར་གནས་པ་ལ་འཛིན་པའི་ཡན་ལག་ཏུ་གསུངས་པ་ཡང་དུ་མ་ཞིག་འོང་ཞིང་དེ་མེད་པར་ཚེ་གཅིག་ལ་མཆོག་འགྲུབ་པའང་མི་སྲིད་དོ། །བྲམ་ཟེ་ཆེན་པོས་ཀྱང་། ཟ་
ཞིང་འཐུང་ལ་གཉིས་སྤྲོད་ཀྱིས་དགའ་ཞིང་། །རྟག་ཏུ་ཡང་དང་ཡང་དུ་འཁོར་ལོ་འགེངས། །ཆོས་འདི་ལྟ་བུས་འཇིག་རྟེན་ཕ་རོལ་འགྲུབ་འགྱུར་ཏེ། །རྨོངས་པའི་འཇིག་རྟེན་མགོན་པོར་རྡོག་པས་མནན་ནས་སོང་། །གང་དུ་རླུང་དང་སེམས་ནི་མི་རྒྱུ་ཞིང་། །ཉི་མ་
ཟླ་བ་འཇུག་པ་མེད་གྱུར་པ། །མི་ཤེས་པ་དག་གནས་དེར་སེམས་ནི་དབུགས་ཕྱུང་ཞིག །མདའ་བསྣུན་གྱིས་ནི་མན་ངག་ཐམས་ཅད་བསྟན་ནས་སོང་། ཞེས་ཕྱི་ནང་གི་ལུས་ལ་གནད་དུ་བསྣུན་པའི་ཐབས་ཀྱིས་ཉི་ཟླའི་རླུང་དྷཱུ་ཏཱིར་བཙུད་ཅིང་། བཙུད་
པ་དེའི་འབྱུང་འཇུག་གི་རྒྱུ་བ་བཅད་པ་ལ་བརྟེན་ནས་གཏུམ་མོ་འབར་བས་བཞུས་པའི་བྱང་སེམས་ཀྱིས་ལུས་བཀོད་པའི་བདེ་སྟོང་སྦྱར་ནས་རྨོངས་པ་རྩད་ནས་གཅོད་པ་གདམས་ངག་ཐམས་ཅད་ཀྱི་གནད་བསྡུས་པར་གསུངས་སོ། །རླུང་དབུ་མར་འབྱུང་
འཇུག་མི་བྱེད་པར་གནས་པ་ཙམ་གྱིས་མི་ཆོག་གི་ངོར་ཐིམ་པ་ཡང་དགོས་ཏེ། བྲམ་ཟེ་ཆེན་པོས། རླུང་དང་མེ་དང་ཆུ་དང་དབང་ཆེན་འགག་པ་ན། །བདུད་རྩི་རྒྱུ་བའི་དུས་སུ་རླུང་ནི་སེམས་ལ་འཇུག །ནམ་ཞིག་སྦྱོར་བཞི་གནས་གཅིག་ལ་ནི་ཞུགས་
9-10-44b


པ་ན། །བདེ་ཆེན་མཆོག་ནི་ནམ་མཁའི་ཁམས་སུ་མི་ཤོང་ངོ་། །ཞེས་སོ། །དེ་ལ་སྦྱོར་བཞི་ནི། དགོངས་པ་ལུང་སྟོན་ལས། སྦྱོར་བཞིས་བསྡུས་པ་བརྒྱ་ཕྲག་དགུ། ཞེས་ས་ཆུ་མེ་རླུང་གི་སྦྱོར་བཞིས་རླུང་རེ་རེ་ཡང་དགུ་བརྒྱ་རེ་རྒྱུ་བར་བཤད་པས་འབྱུང་བཞིའི་རླུང་
ངོ་། །གནས་གཅིག་ནི་དབུ་མ་སྟེ་དེར་ཞུགས་པའོ། །དེ་བཞི་སྔ་མ་ཕྱི་མ་ལ་ཐིམ་པ་ནི། མེ་དང་ཆུ་དང་དབང་ཆེན་སའི་རླུང་འགགས་པའོ། །རླུང་གི་རླུང་སེམས་སྣང་བ་དང་པོ་ལ་ཐིམ་པ་ནི་རླུང་ནི་སེམས་ལ་འཇུག་པའོ། །བདེ་ཆེན་སྐྱེ་བའི་དུས་སུ་ནི་བདུད་རྩི་སྟེ་
བྱང་སེམས་རྒྱུ་བ་སྟེ་འཛག་པའི་དུས་ཏེ་གཏུམ་མོ་འབར་བའི་མཐུས་སོ། །ཡང་དོ་ཧ་ལས། མིག་ནི་མི་འཛུམ་སེམས་འགོག་དང་། །རླུང་འགག་པ་ནི་དཔལ་ལྡན་བླ་མས་རྟོགས། །གང་ཚེ་རླུང་རྒྱུ་དེ་ནི་མི་གཡོ་སྟེ། །འཆི་བའི་ཚེ་ན་རྣལ་འབྱོར་མས་ཅི་བྱ། ཞེས་གདམས་
ངག་གི་གནད་རྟོགས་པའི་བླ་མས་བསྟན་པ་ལས་མུ་སྟེགས་ལྟར་མིག་བཙུམས་ཏེ་མི་བསྒོམ་པར་མིག་མི་འཛུམ་པའི་ལྟ་སྟངས་ལ་གནས་ཏེ། སྲོག་དྷཱུ་ཏཱིར་སྡུད་པའི་ཐབས་ལ་སེམས་གཞན་དུ་འགྲོ་བ་བཀག་ནས་སེམས་བཟུང་བས་རླུང་དབུ་མར་ཚུད་ནས་རླུང་
རྒྱུ་བ་འགགས་པ་སྟེ་ཐིམ་ནས་མི་གཡོ་བར་གནས་ཏེ། འཆི་བའི་རིམ་པ་བཞིན་འབྱུང་བའི་ཚེ་ན་སྟེ། དེའི་དུས་སུ་འོད་གསལ་འཆར་བའི་གྲོགས་སུ་རྣལ་འབྱོར་མའི་ཕྱག་རྒྱས་ཅི་ཞིག་བྱ་སྟེ་མི་དགོས་སོ། །ཞེས་པའི་དོན་ནོ། །འདིས་ནི་དེའི་དུས་སུ་མི་དགོས་
པར་སྟོན་གྱི་སྔ་རོལ་དུ་ཕྱག་རྒྱ་ལ་ལྟོས་པ་མི་འགོག་གོ། རླུང་ཐིམ་པ་དགོས་པ་འདི་དེ་ཁོ་ན་ཉིད་གྲུབ་པ་ལས་ཀྱང་གསལ་བར་གསུངས་ཏེ། ཇི་སྐད་དུ་དཔེར་ན་ནམ་མཁའི་ངོས་སུ་ཁྱབ་པའི་ཆུ་འཛིན་གྱི་ཚོགས་སྟུག་པོ་དངོས་པར་གྱུར་པ་ན་གང་དུ་སོང་བ་
9-10-45a


མི་ཤེས་པ་དེ་བཞིན་དུ་རླུང་འདི་ཡང་སྔར་རྒྱུན་མི་འཆད་པར་འབྱུང་བ་ལས་དེ་ལྟར་ཐིམ་པར་གྱུར་པ་ན། མཆོག་ཏུ་ལྡོག་ཅིང་ཚིམ་པ་ཐོབ་པས་གང་དུ་ཡང་འགྲོ་བར་མི་འགྱུར་རོ། །ལྷན་ཅིག་སྐྱེས་པའི་རླུང་རང་གི་གནས་སུ་
གནས་པས་རྟོག་པའི་ཚོགས་ལས་གྲོལ་ཞིང་སྟོང་པ་ཉིད་ཀྱི་རང་བཞིན་གྱིས་ཐུགས་ཚིམ་པར་བྱེད་པ་ཅི་ཞིག་ལྟར་སྐྱེས་ཏེ། ཞེས་གསུངས་ཏེ། ཀུན་རྟོག་གི་བཞོན་པའི་རླུང་དང་སེམས་སྣང་མ་ཆེད་ཐོབ་གསུམ་གྱི་རླུང་ཐིམ་ནས་སྟོང་པ་བཞི་པ་འོད་
གསལ་ལྷན་སྐྱེས་ཀྱི་རླུང་རང་གནས་སུ་གནས་པའི་དུས་སུ་ལྷན་སྐྱེས་འཆར་བར་གསུངས་སོ། །རྟགས་འཆར་ཚུལ་ནི། སྒྲུབ་ཐབས་གཙུག་ནོར་ལས། དེ་ལས་གཟུངས་ནི་ཐོབ་པར་འགྱུར། ཞེས་པའི་མཇུག་ཏུ། དང་པོ་རི་དྭགས་སྲེད་བཞིན་སྣང་བ་
སྟེ། །མཚན་མ་གཉིས་པ་དུད་ཁའི་རྣམ་པ་ཅན། །གསུམ་པ་སྲིན་བུ་མེ་ཁྱེར་དང་འདྲ་བ། །བཞི་པ་སྒྲོན་མེ་འདར་བ་ལྟ་བུར་གསལ། །མཚན་མ་ལྔ་པ་རྣམ་པར་མ་བརྟགས་པར། །སྤྲིན་བྲལ་ནམ་མཁའ་ལྟ་བུར་སྣང་བ་ཡིན། །དེ་ལྟ་བུ་ཡི་མཚན་མ་ཐོབ་
ནས་ནི། །ཕྱག་རྒྱ་ཆེན་པོ་ཐོབ་པར་འགྱུར་བ་ཡིན། །ཞེས་གསུངས་ཏེ། འདི་ནི་ལྟེ་བར་སྔར་ལྟར་སེམས་བཟུང་བ་ལས་རྟགས་རྣམས་འཆར་བའི་སྐབས་ཏེ། སྲོག་དྷཱུ་ཏཱིར་སྡུད་པའི་ཐབས་ཐམས་ཅད་ལ་རྟགས་འདི་རྣམས་འཆར་རོ། །རི་དྭགས་སྲེད་
ནི་མིག་རྒྱུའོ། །རྟགས་བཞི་པོ་འདི་སྔ་མ་ལས་ཕྱི་མ་གསལ་དུ་སོང་བ་ལ་མིག་རྒྱུ་སོགས་དང་འདྲ་བར་གསུངས་ཀྱི་དེ་རྣམས་དང་འདྲ་བའི་སྣང་བ་འཆར་བ་མིན་ཞེས་པ་དང་། ཁ་ཅིག་རྟགས་ཅན་གྱི་ཤེས་པ་བརྟན་གཡོའི་ཚད་ཡིན་ཞེས་པ་དང་། ཁ་ཅིག་
9-10-45b


དུ་བ་སོགས་དང་འདྲ་བའི་སྣང་བ་འཆར་བ་ལ་བཞེད་པ་གསུམ་བྱུང་བ་ནི་ཕྱི་མ་ཉིད་ལེགས་པ་ཡིན་ན། རླུང་འདུ་ཕུལ་ཆེ་ཆུང་ལ་སོགས་པའི་གནད་ཀྱིས་རྒྱ་ཆེ་ཆུང་དང་བརྟན་མི་བརྟན་སོགས་སྣ་ཚོགས་ཤིག་འཆར་བས་མཐའ་གཅིག་ཏུ་མ་ངེས་སོ། །དུ་བ་
ལ་སོགས་པ་འདི་རྣམས་སྲོག་དབུ་མར་སྡུད་པའི་ཐབས་ཁྱད་པར་ཅན་གྱི་སེམས་འཛིན་དང་། དེ་ལྟ་བུ་མིན་པའི་སེམས་མི་རྟོག་པར་འཇོག་པ་བསྐྱངས་པ་རྣམས་ལའང་འབྱུང་བ་གཉིས་ཡོད་པ་ཁྱད་པར་ལེགས་པར་ཕྱེད་དགོས་སོ། །ཐབས་སྔ་མ་ལ་འབྱུང་
བ་ལ་ཡང་ཕྱིན་ཅི་ལོག་གི་སའི་རླུང་ལ་སོགས་པ་རྣམས་ལྡོག་རུང་དུ་སོང་བ་དང་། ཅུང་ཟད་ལོག་པ་དང་། བརྟན་ནས་ལོག་པའི་རྟགས་གསུམ་ཡོད་པར་སྨན་ཞབས་ཀྱིས་བཤད་པ་ལྟར་དབང་པོའི་སྒོ་རྣམས་ནས་ཕྱིར་ཧ་ཅང་གཡོ་བའི་རླུང་ཅུང་ཟད་ནང་དུ་
ལྡོག་པར་རྩོམ་པ་དང་། ཅུང་ཟད་ལོག་པ་དང་། དབུ་མར་ཅུང་ཟད་ཚུད་པ་ལ་སོགས་པའི་རྟགས་ནས་བཟུང་སྟེ། ལམ་མཐོན་པོར་སོང་བའི་སྐབས་ཀྱི་ལྡོག་པ་དང་། ལོག་རྟགས་ཁྱད་པར་ཅན་དུ་གྱུར་པའི་རིམ་པ་དུ་མ་ཞིག་ཡོད་པ་ལས། འདིར་ནི་སྲོག་
དབུ་མར་ཐིམ་པར་རྩོམ་པའི་ཐིམ་རིམ་གྱི་སྐབས་ཡིན་ཏེ། སྨིག་རྒྱུ་ནས་ནམ་མཁའ་སྤྲིན་མེད་ཀྱི་བར་རྣམས་བར་མ་ཆད་དུ་འབྱུང་བའི་སྐབས་སོ། །མཚན་མ་བརྒྱད་ནི། མངོན་བརྗོད་ལས། ཐམས་ཅད་གསལ་བྱེད་སྒྲོན་མ་ནི། །དང་པོའི་མཚན་
མ་དག་ཏུ་བལྟ། །གསལ་བྱེད་གློག་གི་ཆ་ཙམ་སྟེ། །མཚན་མ་གཉིས་པ་དག་ཏུ་བརྟག །དཀར་པོའི་འོད་ཀྱི་ཚུལ་ཅན་ནི། །ཕྱོགས་བཅུ་ངག་ཏུ་བལྟ་བྱ་སྟེ། ཉོན་མོངས་འབྱིན་པ་གསུམ་པ་ཡིན། །རྣལ་འབྱོར་པ་ཡིས་རྣམ་པར་བརྟག །འདོད་པའི་ལྷ་ཡི་
9-10-46a


ལོངས་སྤྱོད་ནི། །བཞི་པ་རྣམ་ཤེས་དག་ཏུ་བསྟན། །གཟུགས་དང་རེག་སོགས་ལྷ་མོ་ནི། །ཕྱོགས་ཀྱི་ཡེ་ཤེས་ལྔ་པ་ཡིན། །དྲུག་པ་གཟུགས་མེད་ཡེ་ཤེས་ཏེ། །བདུན་པ་དག་ནི་ཆོས་ཀྱི་དབྱིངས། །བརྒྱད་པ་རང་ཉིད་འདོད་
བཞིན་དུ། །སངས་རྒྱས་འབྲས་བུ་དག་ཡིན་ནོ། །ཞེས་གསུངས་སོ། །གཉིས་པ་ལ་སྲིན་བུ་མེ་ཁྱེར་དུ་མངོན་བརྗོད་ཁ་ཅིག་ལས་གསུངས་ཏེ། ཧེ་རུ་ཀ་མངོན་འབྱུང་དང་། སམྦུ་ཊ་དང་མཐུན་ནོ། །གསུམ་པ་ལ་མངོན་འབྱུང་ལས། རྡུལ་ཕྲན་དཀར་
པོའི་རྣམ་པར་སྣང་། ཞེས་དང་། སམྦུ་ཊར། ཙ་ན་ཀའི་དབྱིབས་སུ་བཤད་དོ། །བཞི་པ་ལ་མངོན་བརྗོད་འགྲེལ་པར། འདོད་ལྷའི་ལོངས་སྤྱོད་སྣང་བ་ཞེས་འབྱུང་སྟེ། འདོད་ལྷའི་ཁམས་ཟས་ཀྱི་ལོངས་སྤྱོད་ནི་བདུད་རྩི་ཡིན་ལ། འདིར་ནང་གི་བདུད་
རྩི་དཀར་པོ་རྩ་སྟོང་ཕྲག་དོན་གཉིས་ནས་འབབ་པ་མཐོང་བའོ། །ལྔ་པ་ལ་མངོན་བརྗོད་མང་པོ་ལས། གཟུགས་དང་རེག་སོགས་ཀྱི་ལྷ་མོ། །ཞེས་འབྱུང་བ་ལྟར་ན། ཡུལ་ལྔའི་ལྷ་མོའི་སྣང་བ་བྱུང་ནས་ཡེ་ཤེས་བསྐྱེད་པའི། །མངོན་བརྗོད་ཁ་ཅིག་
དང་། རྒྱུད་གཞན་ནས་གཟུགས་ཀྱི་ལྷ་མཐོང་བར་བཤད་པ་དང་། མངོན་བརྗོད་འགྲེལ་པར་གཟུགས་ཀྱི་ལྷའི་བདེ་བར་སྣང་བ་ཞེས་པ་ལྟར་ན་གཟུགས་ཁམས་པའི་ལྟ་རྣམས་ཕྱིའི་འདོད་ཡོན་ལ་ཆགས་པ་དང་བྲལ་ནས་ཁ་ནང་དུ་བལྟས་པའི་ཏིང་
ངེ་འཛིན་གྱི་བདེ་བ་ལ་གནས་པ་བཞིན་དུ། ཡུལ་ལྔ་ལ་ཁ་ཕྱིར་བལྟས་པའི་དབང་ཤེས་རྣམས་ཐིམ་པའི་སྐབས་སོ། །གཟུགས་མེད་པའི་ཡེ་ཤེས་ནི་ཀུན་རྟོག་གཡོ་བའི་རླུང་ཐིམ་པས་ཡིད་ཤེས་ཀྱི་ངོ་བོར་གཟུགས་སྒྲ་སོགས་སུ་སྣང་བའི་
9-10-46b


གཟུགས་སྣང་རགས་པ་ཐིམ་པའི་སྐབས་སོ། །འདི་ལ་མངོན་འབྱུང་ཁ་ཅིག་ལས། སྲེད་མེད་ཀྱི་ལོངས་སྤྱོད་དང་། ཁ་ཅིག་ལས་འཇིགས་པའི་ལོངས་སྤྱོད་ཅེས་ཀྱང་འབྱུང་ངོ་། །བདུན་པ་ཆོས་ཀྱི་དབྱིངས་ནི་དེ་ནས་སྟོང་པ་བཞི་ཤར་བའོ། །བརྒྱད་པ་
རང་གི་འདོད་པ་བཞིན་དུ་སངས་རྒྱས་ཀྱི་འབྲས་བུ་ཐོབ་པ་ནི་སྟོང་པ་བཞི་པ་འོད་གསལ་ལ་སྔར་ཇི་ལྟར་འཕེན་པ་བཏང་པ་བཞིན་དུ་ཟུང་འཇུག་གི་སངས་རྒྱས་ཀྱི་སྐུར་ལངས་པ་སྟེ་སློབ་པའི་ཟུང་འཇུག་གོ། དགུ་པ་བླ་མའི་བླ་མ་ནི་མི་སློབ་པའི་ཟུང་
འཇུག་སྟེ། འོད་གསལ་གྱི་བླ་མ་སྟེ་གོང་མ་སློབ་པའི་ཟུང་འཇུག་ལས་བླ་མ་སྟེ་གོང་མར་གྱུར་པའོ། །གསུམ་པ་དེ་ལ་བརྟེན་ནས་སྟོང་ཕྱོགས་དང་སྣང་ཕྱོགས་ཀྱི་རྫོགས་རིམ་སྐྱེ་ཚུལ་ལ་གཉིས། སྟོང་ཕྱོགས་ཀྱི་རྫོགས་རིམ་སྐྱེ་ཚུལ་དང་། སྣང་ཕྱོགས་
ཀྱི་རྫོགས་རིམ་སྐྱེ་ཚུལ་ལོ། །དང་པོ་ནི། ལཱུ་ཨི་པའི་འགྲེལ་པ་ཇོ་བོས་མཛད་པ་ལས། སེམས་སྣང་བ་གསུམ་རིམ་གྱིས་ཐིམ་པར་བསམ་མོ། །དེ་ཡི་མཚན་ཉིད་བསྟན་པའི་ཕྱིར། །དངོས་པོ་མེད་པའི་སེམས་ཉིད་ཡིན། །ཞེས་བྱའོ། །དེ་ཡང་བསམ་
གྱིས་མི་ཁྱབ་བསམ་ནི་འོད་གསལ་དུ་བསྒོམ་པའོ། །ཞེས་གསུངས་ཏེ། སེམས་ཉིད་དུ་ཡང་བསྒོམ་མི་བྱ། ཞེས་པ་དང་། དངོས་པོ་མེད་པའི་སེམས་ཉིད་ཡིན། ཞེས་པ་ནི་འགྱུར་ཁྱད་ཙམ་ཡིན་ལ། དེས་སེམས་སྣང་བ་དང་། སྣང་བ་མཆེད་པ་
དང་། སྣང་བ་ཉེ་བར་ཐོབ་པ་གསུམ་བསྟན་ནོ། །དེ་ཡང་ས་ཆུ་ལ་ཐིམ་པ་དང་། ཆུ་མེ་ལ་ཐིམ་པ་དང་། མེ་རླུང་ལ་ཐིམ་པའི་སྐབས་གསུམ་དུ་སྨིག་རྒྱུ་དང་དུ་བ་དང་མེ་ཁྱེར་དུ་སྣང་བ་གསུམ་དང་། ཀུན་རྟོག་གི་བཞོན་པའི་རླུང་སེམས་ལ་
9-10-47a


ཐིམ་པའི་དུས་སུ་རླུང་མེད་པའི་མར་མེ་འབར་བ་ལྟ་བུར་སྣང་བ་འབྱུང་། དེའི་རྗེས་སུ་མཚན་མ་ལྔ་པ་རྣམ་པར་མ་བརྟགས་པར་སྤྲིན་བྲལ་ནམ་མཁའ་ལྟ་བུར་སྣང་བ་ཡིན། ཞེས་སྔར་དྲངས་པའི་དོན་ནོ། །སྤྲིན་
མེད་པའི་ནམ་མཁའ་གཡའ་དག་པ་ལྟར་སྣང་བ་ཡིན་ཞེས་པ་འདིའི་གཙོ་བོ་འོད་གསལ་ཡིན་མོད་ཀྱང་། སྟོང་པ་གཞན་གསུམ་ཡང་འདིས་སྟོན་ནོ། །དེ་ཡང་དཔེར་ན་སྟོན་གྱི་ནམ་མཁའ་གཡའ་དག་པ་ལ་ཉི་འོད་དམར་སེར་གྱིས་ཁྱབ་
པ་དང་། སྲོད་ཀྱི་སྨག་ནག་པོའི་མུན་པས་ཁྱབ་པ་དང་། དེ་སངས་ནས་ཟླ་བའི་འོད་ཀྱིས་ཁྱབ་པའི་སྐབས་གསུམ་དང་། ནམ་མཁའི་རང་མདོག་ཇི་བཞིན་དུ་ཐོན་པའི་སློད་བྱེད་གསུམ་པོ་དེ་དང་བྲལ་བའི་ཐོ་རངས་ཀྱི་དུས་ཀྱི་ནམ་མཁའ་སྟེ་བཞི་ཡོད་དོ། །
དཔེ་དེ་བཞིན་དུ་ཡིད་ངོར་ཕྱོགས་མཚམས་རྒྱ་ཆད་པ་མེད་པར་སྟོང་སང་ངེ་བ་ལ་འོད་ཟེར་དཀར་པོ་ཤར་བའི་རྣམ་པ་ཅན། ཡུལ་སྣང་གཞན་མི་འཆར་བ་ནི་སེམས་སྣང་བ། དང་པོ་སྟེ་སྟོང་པ་ཞེས་ཀྱང་ཟེར་རོ། །དེ་ནས་སྣང་བ་དེ་ཡང་རིམ་གྱིས་
བསྡུས་ནས་ཡུལ་སྣང་གཞན་གང་ཡང་མེད་པར་སྟོང་སང་ངེ་བ་ལ་འོད་དམར་པོ་འམ་དམར་སེར་ཤར་བའི་རྣམ་པ་ཅན་ནི་སྣང་བ་མཆེད་པ་སྟེ་ཤིན་ཏུ་སྟོང་པ་ཞེས་ཀྱང་ཟེར་རོ། །དེ་ནས་སྣང་བ་དེ་ཡང་རིམ་གྱིས་བསྡུས་ནས་ཡུལ་སྣང་གཞན་མེད་
པར་སྟོང་སང་ངེ་བ་ལ་འོད་ནག་པོས་ཁྱབ་པ་འདྲ་བ་གཅིག་འཆར་བ་ནི་ཉེར་ཐོབ་ཡིན་ཏེ། སྟོང་པ་ཆེན་པོ་ཞེས་ཀྱང་ཟེར་ཏེ་དེ་གཉིས་ཀྱང་ཕྱོགས་མཚམས་རྒྱ་མ་ཆད་པར་སྣང་བའོ། །དེའི་དུས་སུ་སྟོད་ལ་དྲན་པ་མཉམས་ཀྱང་མཚམས་གཅིག་
9-10-47b


ནས་རླུང་ཐིམ་ཕུལ་ཆེ་བས་དྲན་མེད་དུ་ཐམ་གྱིས་འགྲོ་སྟེ། དེ་ཐམས་ཅད་ཀྱང་བདེ་བ་ཆེན་པོའི་ངོ་བོར་སྐྱེའོ། །དེ་ནས་མུན་ནག་ལྟར་སྣང་བ་དང་དྲན་མེད་དེ་སངས་པ་ན་ཐོ་རངས་ཀྱི་ནམ་མཁའ་གཡའ་དག་པ་ཁ་དོག་སློད་བྱེད་ཀྱི་སྐྱོན་དང་བྲལ་བ་བཞིན་དུ་
འོད་གསལ་མཐའ་དབུས་མེད་པའི་ཏིང་ངེ་འཛིན་སྐྱེ་སྟེ། ཐམས་ཅད་སྟོང་པ་ཞེས་ཀྱང་ཟེར་རོ། །སྟོང་པ་བཞི་གའི་དུས་སུ་དེ་ཁོ་ན་ཉིད་ཀྱི་ལྟ་བ་དྲན་པར་བྱས་ནས་བདེ་སྟོང་སྦྱོར་བ་ཡིན་མོད་ཀྱང་གཙོ་བོ་ནི་འོད་གསལ་གྱི་དུས་སོ། །བསམ་གྱིས་མི་ཁྱབ་པ་
ནི། དྲིལ་བུ་པས། ཕྱི་དང་ནང་གི་རང་བཞིན་ཉིད། །ཆོས་རྣམས་ཀུན་གྱི་ངོ་བོ་སྟེ། བསམ་གྱིས་མི་ཁྱབ་ཅེས་བཤད་དོ། །ཞེས་གསུངས་པས་ཆོས་རྣམས་ཀྱི་ཡན་ལུགས་སྟོང་པ་ཉིད་དེ། དེ་ནི་ཐ་སྙད་པའི་ཤེས་པ་རྣམས་དང་མཐར་འཛིན་གྱི་བློའི་ཡུལ་
ལས་འདས་པས་ན་དེ་རྣམས་ལ་ལྟོས་ཏེ་བསམ་མི་ཁྱབ་ཡིན་གྱི་བློ་གང་གིས་ཀྱང་བསམ་པར་མི་ནུས་པ་མིན་པས་བསམ་གྱིས་མི་ཁྱབ་པ་དེ་ཡང་བསམ་པར་བྱ་བར་གསུངས་སོ། །དེ་ལྟར་བྱས་ན་སྡོམ་འབྱུང་ལས། གང་གི་ཚེ་ནི་དེ་ཉིད་རིག །བསམ་པ་ཐམས་
ཅད་བསམ་དུ་མེད། །གང་དུ་བསམ་དུ་མེད་སེམས་པ། དེ་ཚེ་བསམ་མི་ཁྱབ་པར་འགྱུར། །ཞེས་དེ་ཁོ་ན་ཉིད་རིག་པའི་དོན་དེ་སེམས་པར་ཡང་གསུངས་ཤིང་། བསམ་པ་ཐམས་ཅད་ཀྱིས་བསམ་དུ་མེད་པར་ཡང་གསུངས་པ་གཉིས་མི་འགལ་བར་འགྱུར་ལ། 
སེམས་གང་གིས་ཀྱང་རིག་པ་དང་སེམས་པར་བྱར་མེད་ན་འགལ་བར་འགྱུར་རོ། །ཡང་དེ་ཉིད་ལས། ཡིད་མེད་ཡིད་ནི་བྱས་ནས་སུ། །ཅུང་ཟད་ཙམ་ཡང་བསམ་མི་བྱ། །སྟན་ལ་གནས་བྱས་བླ་མ་ཡི། །དྲིན་གྱིས་ཡང་དག་སྦྱར་བར་བྱ། །མཁའ་དང་ནམ་
9-10-48a


མཁའ་མཉམ་དེ་བཞིན། །སེམས་ནི་ར་མཉམ་བསྒོམ་བྱ་སྟེ། ཞེས་ཡུལ་དེ་ཁོ་ན་ཉིད་མཐར་འཛིན་གྱི་ཡུལ་ལས་འདས་པ་དེ་ཁོ་ན་བཞིན་དུ་མཐར་འཛིན་གྱི་དམིགས་གཏད་མ་ལུས་པར་བཤིག་པའི་ཡུལ་ཅན་ཡང་དེ་དང་
མཐུན་པར་ཞུགས་པའི་རོ་མཉམ་བསྒོམ་པར་གསུངས་ལ། ཅུང་ཟད་ཀྱང་མི་བསམ་པར་གསུངས་པ་གཉིས་མི་འགལ་བ་ཡང་ཤེས་པར་བྱའོ། །སེམས་དཔའ་ཉིད་དུ་མཚོན་པ་མིན། ཞེས་པ་ནི་བསམ་གྱིས་མི་ཁྱབ་པ་སྙམ་དུ་སེམས་དཔའི་ཚུལ་
གྱིས་མཚོན་པ་སྟེ་བརྟག་པ་མིན་ཞེས་པའི་དོན་དུ་བཤད་དོ། །དེས་ན་མངོན་བརྗོད་ལས། སེམས་ཅན་ཉིད་ཀྱང་མི་བསམ་སྟེ། ཞེས་པའི་སཏྭ་སེམས་དཔའ་ལ་བསྒྱུར་རྒྱུ། པ་དང་ཅན་ནི་དོན་གཅིག་ཏུ་བསམས་ནས་སེམས་ཅན་དུ་བསྒྱུར་ཏེ་མི་ལེགས་
སོ། །ཁྱད་པར་གསལ་བྱེད་ལས། སེམས་རིན་པོ་ཆེ་ནམ་མཁའ་དང་མཉམ་པ་འདི་འོད་གསལ་ཉིད་དུ་གྱུར་པ་ལས་གང་སྲོག་རླུང་གིས་བརྟན་པར་གྱུར་པ་དེར་འཛིན་པའོ། །ཞེས་རགས་པའི་སྲོག་རླུང་ཐིམ་ནས་ཕྲ་བའི་སྲོག་རླུང་བརྟན་པས་སེམས་
འོད་གསལ་དུ་ཞུགས་པ་སྦྱར་བ་ཡན་ལག་དྲུག་གི་འཛིན་པའི་ཡན་ལག་ཏུ་བཤད་པ་ནི། འདུས་པ་ཕྱི་མ་ལས། རང་དབང་རིན་ཆེན་དགག་པ་ཡི། །གཟུང་བ་འཛིན་པ་ཡིན་པར་བཤད། །སེམས་ནི་འགོག་པའི་རྡོ་རྗེར་འགྱུར། །ཞེས་གསུངས་པའི་དོན་
དུ་འདོད་དེ། །སྒྲོན་གསལ་ལས། རང་བཞིན་གཟུགས་ལ་སོགས་པའི་ཡུལ་དང་། དབང་པོ་ནི་མིག་ལ་སོགས་པ་སྟེ། དེ་གཉིས་དགག་པ་སྟེ་ཐིམ་ནས་དེའི་འོག་ཏུ་རིན་ཆེན་ཏེ་སེམས་སྲོག་རླུང་དང་བཅས་པ་བཀག་ཅིང་ནུབ་པར་གྱུར་པའི་གཟུང་བ་ནི་
9-10-48b


འཛིན་པ་སྟེ། ཡང་དག་པའི་མཐའ་འོད་གསལ་དུ་བཤད་པ་དང་མཐུན་ནོ། །སེམས་རླུང་དང་བཅས་པ་ཐིམ་པ་ནི་སེམས་གསུམ་རིམ་གྱིས་ཐིམ་པའོ། །སྙིང་ཁ་དང་ལྟེ་བ་དང་གསང་གནས་ཀྱི་སྣ་རྩེར་སེམས་གཟུང་བ་ལས་སྔར་བཤད་པ་ལྟ་བུའི་སེམས་
འོད་གསལ་དུ་ཞུགས་པ་ཐམས་ཅད་འཛིན་པའི་ཡན་ལག་ཏུ་ཁྱད་པར་གསལ་བྱེད་ལས་བཤད་དོ། །རླུང་དབུ་མར་ཞུགས་གནས་ཐིམ་གསུམ་བྱས་པ་ལས་བྱུང་བའི་དགའ་བ་བཞི་ནི། ཕྱག་ཆེན་ཐིག་ལེ་ལས། གང་ཕྱིར་དགའ་བ་དེ་སྣང་བ། །སྣང་བ་
མཆེད་པ་མཆོག་ཏུ་བཤད། །ཁྱད་དགའ་ཉེ་བར་ཐོབ་པར་ཤེས། །ལྷན་ཅིག་སྐྱེས་ཏེ་འོད་གསལ་བའོ། །ཞེས་དགའ་བ་བཞི་སྣང་མཆེད་ཐོབ་གསུམ་འོད་གསལ་དང་བཞིར་གསུངས་སོ། །དེ་ཡང་མངོན་བརྗོད་ལས། དགའ་བ་དང་པོ་ཡེ་ཤེས་ཏེ། །མཆོག་
ཏུ་དགའ་བ་མཉམ་པར་སྦྱོར། །སྦྱོར་བ་ཆེ་དང་ཡེ་ཤེས་སྦྱོར། །དེ་དག་ཆོ་གའི་རིམ་པའོ། །ཐིག་ལེ་གཞུང་གི་སྦྱོར་ཤེས་ན། །ཕྲ་བའི་སྦྱོར་བས་བལྟ་བར་བྱ། །ཞེས་གསུངས་པའི་དགའ་བཞིའི་རིམ་པ་ནི་ཡས་བབས་ཀྱི་རིམ་པ་ཡིན་ལ། རྐང་པ་ཐ་མ་
གཉིས་ཀྱི་དོན་ནི། ཐིག་ལེའི་རྣལ་འབྱོར་བསྒོམ་པའི་གཞུང་གི་དོན་ཤེས་ནས་ཡི་གེ་དང་ཐིག་ལེ་ཕྲ་མོའི་སྦྱོར་བ་སྟེ་རྣལ་འབྱོར་བསྒོམས་ནས་དགའ་བཞི་ཇི་ལྟར་སྐྱེ་བ་བལྟ་བར་བྱའོ་ཞེས་པའོ། །འགྲེལ་པར་རྣལ་འབྱོར་དང་རྗེས་སུ་རྣལ་འབྱོར་དང་
ཤིན་ཏུ་རྣལ་འབྱོར་དང་རྣལ་འབྱོར་ཆེན་པོའི་ཡེ་ཤེས་ཀྱི་ཆོ་གའི་རིམ་པའོ། །ཞེས་འཆད་དེ་དགའ་བ་བཞི་དང་རིམ་པ་བཞིན་དུ་སྦྱར་རོ། །ཡང་མངོན་བརྗོད་ལས། ལྟེ་བ་སྙིང་པད་ནུ་མའི་དབུས། །ལྕེ་ཡི་རྩ་དང་མགོ་སྟེང་དུ། །དགའ་བ་དང་ནི་མཆོག་དགའ་
9-10-49a


ཉིད། །དམ་པར་དགའ་དང་ལྷན་ཅིག་སྐྱེས། དང་པོ་འདབ་མ་དྲུག་ཅུ་བཞི། །གཉིས་པ་བརྒྱད་པ་མཆོག་ཡིན་ཏེ། །གསུམ་པ་འདབ་མ་བཅུ་དྲུག་པ། །བཞི་པ་སུམ་ཅུ་རྩ་གཉིས་འདབ། །ཕག་མོ་ལྟེ་བའི་རྩར་གནས་པ། །ལྷན་ཅིག་སྐྱེས་དགའ་
ཁྲག་འཐུང་མཆོག །ཅེས་ལྟེ་བར་དགའ་བ་དང་། སྙིང་ཁར་མཆོག་དགའ་དང་། ལྕེའི་རྩ་བ་སྟེ་མགྲིན་པར་དམ་པ་སྟེ་ཁྱད་པར་གྱི་དགའ་བ་དང་། མགོ་བོའི་སྟེང་སྟེ་སྤྱི་བོར་ལྷན་སྐྱེས་ཀྱི་དགའ་བ་སྐྱེ་བར་བཤད་པ་ནི་མས་བརྟན་གྱི་དགའ་བཞིའི་རིམ་པའོ། །སྙིང་
པད་ནི་སྙིང་ཁའི་རྩ་འཁོར་ཏེ་གཞན་གསུམ་ལའང་སྦྱར་རོ། །ལྟེ་བའི་རྩ་བར་ཕག་མོ་ནི་གཏུམ་མོ་ཨ་ཐུང་དང་། ལྷན་སྐྱེས་ཁྲག་འཐུང་དུ་བཤད་པ་ནི་མས་བརྟན་གྱི་ལྷན་སྐྱེས་བྱང་སེམས་གྱེན་དུ་ལོག་པ་སྤྱི་གཙུག་ཏུ་ཕྱིན་པ་ན་སྐྱེ་བས་སྤྱི་གཙུག་གི་ཧཾ་
ཡིག་ཧེ་རུ་ཀར་བསྟན་པའོ། །བྱང་སེམས་ཞུ་བས་གནས་གང་དུ་སླེབ་པ་ན་ཡས་བབས་ཀྱི་དགའ་བཞི་སྐྱེ་ཚུལ་ནི། རྒྱུད་རྡོ་རྗེ་ཕྲེང་བ་ལས། དེ་རྗེས་ལུགས་འབྱུང་བཤད་བྱ་སྟེ། །བདེ་ཆེན་འཁོར་ལོ་སྤྱི་བོ་ལ། །དེ་ནི་དགའ་བར་བཤད་པ་ཡིན། །
ལོངས་སྤྱོད་འཁོར་ལོ་མཆོག་དགའ་དང་། །བྲལ་དགའ་ཆོས་ཀྱི་འཁོར་ལོར་གནས། །སྤྲུལ་པའི་འཁོར་ལོར་ལྷན་ཅིག་སྐྱེས། །དགའ་བ་ཉམས་སུ་མྱོང་བར་བྱེད། །ཅེས་གསུངས་ཏེ། སྤྱི་བོ་ནས་མགྲིན་པའི་བར་དུ་སླེབས་པ་ན་དགའ་བ་སྐྱེ་ལ། 
དེས་གཞན་གསུམ་ལའང་ཤེས་པར་བྱའོ། །ཕྱག་ཆེན་ཐིག་ལེ་ལས་དེ་བཞི་སྦྱོར་བ་བཞིར་བཤད་དེ། མས་བརྟན་གྱི་གནས་ཀྱང་བྱང་སེམས་ནོར་བུ་ནས་བརྩམས་ཏེ་ལྟེ་བའི་འཁོར་ལོའི་བར་དུ་ལོག་པ་ན་དགའ་བ་སྐྱེ་སྟེ། དེའི་རིགས་པ་གཞན་
9-10-49b


གསུམ་ལའང་སྦྱར་རོ། །མན་ངག་སྙེ་མར་མས་བརྟན་གྱི་བཞི་ག་ལྷན་སྐྱེས་ལ་ཆུང་ངུ་དང་བར་མ་དང་ཆེན་པོ་དང་ཆེན་པོའི་ཆེན་པོར་ཕྱེ་བར་བཤད་དེ། ཡས་བབས་ཀྱི་བདེ་བ་བཞི་ལས་ནི་མས་བརྟན་གྱི་བཞི་བདེ་བ་ཆེ་བ་གཅིག་འོང་དགོས་སོ། །དེ་
ལྟར་བྱས་ན་ལུགས་ལྡོག་གི་སྣང་མཆེད་ཐོབ་གསུམ་འོད་གསལ་གྱི་ཡེ་ཤེས་སུ་མི་རུང་ཡང་ལུགས་ལྡོག་གི་དགའ་བ་གཞན་གསུམ་ལྷན་སྐྱེས་སུ་འཇོག་པ་གཅིག་བཤད་ལ། དེ་བཞིན་དུ་ལུགས་མཐུན་གྱི་སྣང་མཆེད་ཐོབ་གསུམ་དང་། དེ་གསུམ་
དགའ་བ་གསུམ་དུ་བཞག་པ་ལྷན་སྐྱེས་ཀྱི་དགའ་བར་མི་འཇོག་ཀྱང་ལུགས་མཐུན་ཡས་བབས་ཀྱི་དགའ་བ་གསུམ་ལྷན་སྐྱེས་ཀྱི་དགའ་བར་འཇོག་པའི་སྐབས་གཅིག་ཀྱང་ཡོད་པར་མངོན་ནོ། །འོན་ཀྱང་རླུང་དབུ་མར་ཞུགས་གནས་ཐིམ་གསུམ་བྱས་
པ་ལས་བྱུང་བ་མིན་པའི་དགའ་བ་གསུམ་ནི་ལྷན་སྐྱེས་མཚན་ཉིད་པར་འཇོག་ཏུ་མི་དུང་ངོ་། །དོན་གྱི་དབང་འདི་གཟིགས་ནས་བརྟག་གཉིས་ལས། རྫོགས་པའི་རིམ་པའི་ཕྱོགས་ལ་ནི། །འདི་ལྟར་ལྷན་ཅིག་སྐྱེས་རྣམ་བཞི། ཞེས་བསྐྱེད་རིམ་གྱི་
ཕྱོགས་ལ་ལྷན་སྐྱེས་ཀྱི་དགའ་བ་ལ་དགའ་བཞིར་འབྱེད་པ་མེད་ཀྱང་རྫོགས་རིམ་ལ་དེ་ཡོད་པར་བཤད་དོ། །འོན་ཀྱང་རྫོགས་རིམ་གྱི་དགའ་བ་གསུམ་པོ་གང་ཡིན་ཐམས་ཅད་ལྷན་སྐྱེས་སུ་འཇོག་པ་མིན་ནོ། །ཡང་ཀྱེེ་རྡོར་ལས། ཡང་ན་ཐམས་
ཅད་བདག་ཉིད་དེ། །ཡང་ན་ཀུན་གྱིས་རྣམ་པར་སྤངས། ཞེས་པའི་དོན་ལ་སྔར་བཤད་པ་ལྟ་བུ་གཅིག་དང་། བསྐྱེད་རིམ་པའི་ཕྱོགས་ལ་དགའ་བ་གསུམ་གྱིས་ལྷན་སྐྱེས་སྤོངས་པ་དང་། རྫོགས་རིམ་པའི་ཕྱོགས་ལ་ལྷན་སྐྱེས་དགའ་
9-10-50a


བ་གསུམ་གྱི་བདག་ཉིད་དུ་ཡང་འགྱུར་བ་དང་གཉིས་སུ་བཤད་པར་བྱའོ། །འདི་ནི་ཤིན་ཏུ་རྟོགས་པར་དཀའ་ལ་གནད་ཆེ་བ་གཅིག་ཡོད་པས་ཁོ་བོས་ཕྱོགས་ཙམ་བསྟན་པ་ཡིན་པས་ད་དུང་ཞིབ་ཏུ་ཤེས་དགོས་སོ། །མས་
བརྟན་གྱི་དུས་སུ་བྱང་སེམས་གྱེན་དུ་ལོག་པ་སྤྱི་བོར་མ་བརྟན་བར་དུ་བདེ་བ་མི་བརྟན་ལ། སྤྱི་བོར་བརྟན་ནས་བདེ་བ་བརྟན་པར་གསུངས་ཏེ། ཕྱག་ཆེན་ཐིག་ལེ་ལས། དེ་ནས་སྲོག་གི་སྟེང་དུ་ཡིད། །དེ་མི་མཐུན་པས་འབབ་པར་འགྱུར། །པདྨའི་ལྟེ་བའི་
དབུས་གནས་པ། །གང་དེ་ཕྱི་ནས་བརྟན་གྱུར་པ། །དེ་ཆེ་མགོན་པོ་འགྲོ་མི་འགྱུར། །ཇི་ལྟར་བུ་ག་མེད་སྣོད་དུ། །ཆུ་རྣམས་ཟད་པ་མི་གནས་ལྟར། །དེ་ཚེ་བདེ་བ་བརྟན་པར་འགྱུར། །བརྟན་པས་ལྷན་ཅིག་སྐྱེས་པའི་དགའ། །དེ་ཕྱིར་སངས་རྒྱས་མི་ཟད་པ། །
རྣལ་འབྱོར་པ་ཡིས་ངེས་པར་འཐོབ། ཅེས་སོ། །ཡིད་ནི་ཁུ་བ་དང་མི་མཐུན་པ་ནི་ལུགས་ལྡོག་དང་། བརྟན་པ་ནི་སྤྱི་བོར་ཡིན་པར་མན་སྙེ་ལས་གསུངས་སོ། །འདིར་བདེ་བ་ཆེན་པོ་ནི་ལམ་གྱི་སྲོག་ཡིན་ལ། དེ་བརྟན་པ་ནི་མས་བརྟན་གྱི་བདེ་བ་
ལ་རག་ལས་པས་ན་དེ་བསྐྱེད་ཚུལ་གལ་ཆེའོ། །དེ་ཡང་མན་སྙེ་ལས། དེའི་འཆར་བ་ནི་ནོར་བུ་ནས་བརྩམས་ནས་ལྟེ་བ་ཇི་སྲིད་པ་སྟེ་མ་འཕོས་པའི་བྱང་ཆུབ་ཀྱི་སེམས་འཕེལ་བཞིན་པས་སྟེང་དུ་ཉེ་བར་འགྲོ། ཞེས་གསུངས་པའི་ཚིག་ཟིན་ལྟར་ན་
ནོར་བུ་ནས་ཕྱིར་མ་འཕོས་ན་རང་ལོག་བྱེད་པ་འདྲ་བ་ཞིག་འདུག་ཀྱང་དེ་མིན་ཏེ། མ་འཕོས་ཀྱང་སྔར་གྱི་ལམ་དེ་ཉིད་ནས་མར་འོང་བ་ལྟར་མི་བྱེད་པར་གར་སོང་ཆ་མེད་དུ་འགྲོ་བ་དང་། ཕྱིར་ལོག་ཀྱང་སྤྱི་བོ་བར་དུ་ཐལ་གྱིས་འགྲོ་བའི་ངེས་པ་མེད་
9-10-50b


པར་གནས་དམའ་མོ་ནས་གྲམ་ནས་འགྲོ་བའང་འོང་བས་དེས་ན་ཡར་ལ་འགྲིལ་ནས་སྤྱི་གཙུག་བར་དུ་འགྲོ་བ་གཅིག་དགོས་པ་ནི་རྣལ་འབྱོར་པས་ཆེད་དུ་བྱ་དགོས་ཏེ། རྒྱུད་རྡོ་རྗེ་ཕྲེང་བ་ལས། རླུང་གི་དེ་ཉིད་སྔོན་སོང་ནས། །དེ་ཉིད་སྟེང་དུ་རྒྱུ་བར་ནི། །
རྣལ་འབྱོར་བས་ནི་སྒྲུབ་པར་བྱེད། །དེ་ལས་སྤྲུལ་པའི་འཁོར་ལོ་ནི། །དགའ་བ་ཞེས་བྱར་རྣམ་པར་ཤེས། །ཞེས་གསུངས་ཤིང་། དེ་ནས་ཆོས་འཁོར་གྱི་སྟེང་དང་། དེ་ནས་ལོངས་སྤྱོད་ཀྱི་འཁོར་ལོའི་སྟེང་དུ་འགྲོ་བ་རྣལ་འབྱོར་པས་བྱེད་པར་གསུངས་
སོ། །ཀུན་སྤྱོད་ལས། ཡེ་ཤེས་ཀྱི་ཕྱག་རྒྱ་དང་སྦྱར་བ་ལས་ཀྱང་དགའ་བཞི་སྐྱེ་བར་གསུངས་ཏེ། དང་པོ་དགའ་བ་དཔའ་བོ་སྟེ། །མཆོག་ཏུ་དགའ་བ་རྣལ་འབྱོར་མ། །རབ་ཏུ་དགའ་བ་མ་ལུས་ཉིད། །བདེ་དེ་ཐབས་དེ་ཀུན་རིག་པའོ། །ཞེས་གསུངས་ཏེ། ལས་
ཀྱི་ཕྱག་རྒྱ་ལ་ཡང་འདྲའོ། །དེའི་དོན་ནི་འགྲེལ་པར་དགའ་བ་གསུམ་སྐྱེ་བའི་གནས་བཤད་པ་ནི། སྔར་བཤད་པ་དང་འདྲ་ཞིང་། དང་པོ་དཔའ་བོ་ལྟ་བུ་དང་། གཉིས་པ་རྣལ་འབྱོར་མ་ལྟ་བུ་དང་། གསུམ་པ་ཐབས་ཤེས་གཉིས་ཆར་ལ་བཤད་དེ། རབ་ཏུ་
དགའ་བ་ནི་ཁྱད་དགའ་འོ། །མ་ལུས་ཉིད་ནི་དགའ་བ་གསུམ་པོ་སྤངས་པའོ། །དེ་ནི་བདེ་དེ་ཞེས་པ་རབ་ཏུ་དགའ་བའི་དགའ་བ་དེའོ། །གསང་གནས་བསྐྱོད་པའི་ཐབས་དེ་ལ་བརྟེན་ནས་ཀུན་ནི་ཀུན་རྫོབ་བྱང་ཆུབ་ཀྱི་སེམས་རྡོ་རྗེ་ནོར་བུའི་རྩེར་རྫོགས་པའོ། །
རིག་པ་ནི་དེ་ལ་ལོངས་སྤྱོད་རྫོགས་པའི་སྐུའི་བདག་ཉིད་ལྷན་སྐྱེས་སོ། །དེའི་ཆེ་བ་ནི། མཐོ་རིས་ས་སྟེང་ས་འོག་ཏུ། །སྐད་ཅིག་གིས་ནི་ལུས་གཅིག་འགྱུར། ཞེས་པས་སྟོན་ནོ། །དེའི་དོན་ནི་སྐད་ཅིག་གིས་ཏེ་ལྷན་སྐྱེས་ཀྱི་དགའ་བའི་སྟོབས་ཀྱིས་ས་
9-10-51a


གསུམ་པོ་ལུས་གཅིག་སྟེ་བདེ་བ་ཆེན་པོའི་རང་བཞིན་དུ་འགྱུར་བར་འགྲེལ་པས་བཤད་དོ། །ལྷན་སྐྱེས་ཀྱི་བདེ་སྟོང་ཁྱད་པར་བ་བསྒོམས་པའི་སྟོབས་ཀྱིས་སྣོད་བཅུད་ཀུན་ལ་རྒྱས་བཏབ་སྟེ་བསྒོམས་པས་རྣལ་འབྱོར་པ་ལ་
བདེ་སྟོང་དུ་འཆར་བའི་དོན་ཏོ། །མར་དོས་སྲུབ་པ་ནས་བརྩམས་ཏེ་རྡོ་རྗེར་ཕྱིན་པའི་བདེ་བ་ནི་རྣམ་རྟོག་རགས་པའི་ཕྱིར་ཐབས་ཡིན་པས་དཔའ་བོ་དང་། ནོར་བུ་དང་ཉེ་བར་ཕྱིན་པའི་བདེ་བ་ནི་ཕྲ་བས་ན་ཤེས་རབ་ཡིན་པས་རྣལ་འབྱོར་མ་དང་། ནོར་བུར་
ཕྱིན་པའི་བདེ་བ་ནི་དེ་ཡན་ཆད་ཀྱི་གཉིས་ཀ་བསྡུས་པས་ཁྱད་དགའ་དང་། ནོར་བུའི་རྩེར་སོན་པའི་བདེ་བ་ནི་ལྷན་ཅིག་སྐྱེས་དགར་འཆད་དེ། བྱང་སེམས་ཞུ་བ་རྡོ་རྗེའི་རྩ་བར་སླེབ་པ་ན་དགའ་བ་དང་། རྡོ་རྗེའི་མགྲིན་པར་སླེབས་པ་ན་མཆོག་དགའ་
དང་། ནོར་བུར་ཕྱིན་པ་ན་ཁྱད་དགའ་དང་། ནོར་བུའི་རྩེ་མོར་སོན་པ་ན་ལྷན་སྐྱེས་སྐྱེ་བར་རྒྱ་གཞུང་གཞན་ལས་ཀྱང་བཤད་པ་དང་མཐུན་ནོ། །ཕྱག་རྒྱ་གཉིས་གང་རུང་ལ་བརྟེན་པ་དང་ནང་གི་ལུས་ཀྱི་གནད་དུ་བསྣུན་པའི་དམིགས་པ་བསྐྱངས་
པ་ལས་དགའ་བཞི་སྐྱེས་པ་ན་མཉམ་གཞག་ལ་བདེ་སྟོང་སྦྱར་ཏེ་བསྒོམ། དེ་ལས་ལངས་པ་ན་སྔར་བཤད་པ་ལྟར་བདེ་ཆེན་གྱིས་རྒྱས་བཏབ་ནས་བསྒོམས་ན་དེ་གོམས་པ་ལ་བརྟེན་ནས་ཡུལ་སྣང་གང་ཤར་ཐམས་ཅད་བདེ་བ་འབར་བའི་གྲོགས་
སུ་འགྲོ་སྟེ། མཁའ་འགྲོ་རྒྱ་མཚོ་ལས། ལས་ཀྱི་ཕྱག་རྒྱ་རབ་སྦྱོར་བས། །ཉི་མ་རེ་རེ་བསྒྲུབ་པར་བྱ། །དེ་ཡི་དུས་སུ་གང་མཐོང་བ། །དངོས་པོ་ཀུན་ལ་བཏུང་བར་བྱ། །འདོད་ཆགས་ཆེན་པོའི་ཚུལ་བདག་ཉིད། །རྟག་ཏུ་བདག་ཉིད་ལ་འབྱུང་འགྱུར། 
9-10-51b


ཞེས་གསལ་བར་གསུངས་ཏེ། འདོད་ཆགས་ཆེན་པོའི་ཚུལ་ནི་བདེ་བ་ཆེན་པོའོ། །རྗེས་ཐོབ་ལ་དེ་ལྟར་བསྐྱངས་པའི་འོག་ཏུ་སླར་ཡང་ཕྱི་ནང་གི་ཐབས་གཉིས་གང་རུང་ལ་བརྟེན་ནས་དགའ་བཞི་ཚན་པ་གཉིས་བསྐྱེད་ལ་མཉམ་པར་བཞག །དེ་ལྟར་མཉམ་
རྗེས་སྤེལ་བ་རྒྱུན་ལྡན་དུ་བྱའོ། །གཉིས་པ་སྣང་ཕྱོགས་ཀྱི་རྫོགས་པའི་རིམ་པ་ནི། སྟོང་པ་བཞིའི་སྒོ་ནས་ལུགས་མཐུན་དུ་ཞུགས་ཏེ་འོད་གསལ་དུ་གནས་ནས་མཉམ་པར་བཞག་པའི་མཐར་ལྡང་བ་ན་འོད་གསལ་གྱི་རླུང་སེམས་ཙམ་ལས་སྒྱུ་མའི་
སྐུར་ལྡང་ཞིང་ལངས་པ་དེ་བསྒོམ་པའོ། །དེ་ཡང་བསམ་གྱིས་ཞེས་པའི་རྐང་པ་གཉིས་ཀྱིས་སྟོན་ཏེ། བསམ་གྱིས་མི་ཁྱབ་པ་ནི་འོད་གསལ་ལོ། །དེ་བསམ་པ་ནི་སེམས་གསུམ་རིམ་གྱིས་ཐིམ་ནས་འོད་གསལ་དུ་ཞུགས་པ་དེ་བསྒོམ་པའོ། །
དེ་བསམས་ན་སྟེ་བསྒོམས་པ་དེ་ལས་གཟུངས་འཐོབ་པ་ནི་སྒྱུ་མའི་སྐུ་འཐོབ་པའོ། །ཇོ་བོའི་འགྲེལ་པ་ལས་ཀྱང་། བསམ་གྱིས་མི་ཁྱབ་དེ་བསམས་ན། ཞེས་བྱ་བ་ལ་སོགས་པ་ལ་བསམ་གྱིས་མི་ཁྱབ་པ་ནི་འོད་གསལ་ལོ། །འོད་གསལ་བའི་ངང་ལས་
སྔར་གྱི་སྒྱུ་མ་ལྟ་བུའི་ལྷའི་སྐུར་དྲན་པ་ཐོབ་པ་ལ་གཟུངས་ཞེས་བྱའོ། །གཟུངས་ཐོབ་པ་ནི་སྒྱུ་མ་ལྟ་བུའི་སྐུར་ལངས་པའོ། །ཞེས་གསུངས་ཏེ། སྔར་འོད་གསལ་གྱི་ངང་ནས་ལྷའི་སྐུ་སྒྱུ་མ་ལྟ་བུར་ལངས་པར་བྱའོ། །སྙམ་པའི་འཕེན་པ་དྲན་ནས་ལྷའི་སྐུ་དེ་
ཐོབ་པ་ལ་གཟུངས་ཞེས་བྱ་སྟེ། གཟུངས་དྲན་པར་བཤད་པ་ལ་དགོངས་སོ། །ལཱུ་ཨི་པའི་འགྲེལ་པ་གསུམ་ལས་ཀྱང་། ཡང་སྔ་དྲོའི་ཐུན་ལ་འོད་གསལ་ལས་ལངས་ཏེ་དཀྱིལ་འཁོར་གྱི་འཁོར་ལོར་མོས་པ་བྱས་ཏེ་ཞེས་འབྱུང་ལ། དེ་ནི་བསྐྱེད་
9-10-52a


རིམ་གྱི་སྐབས་སུ་མོས་པ་ཡིད་བྱེད་ཙམ་ཡིན་ཀྱང་དེ་ལྟར་སྦྱངས་པས་རྫོགས་རིམ་གྱི་སྐབས་སུ་དངོས་སུ་ནུས་པ་སྔ་མ་དང་མཐུན་ནོ། །འགྲེལ་པ་གཉིས་ལས་གཟུངས་ཕྱག་ཆེན་གྱི་དངོས་གྲུབ་ལ་བཤད་པའི་ཕྱག་ཆེན་ནི་སྒྱུ་
ལུས་རྡོ་རྗེ་འཆང་གི་སྐུ་འགྲུབ་པའོ། །དེ་ཡང་མངོན་བརྗོད་ལས། དེས་ནི་འཛིན་པ་ཐོབ་པར་འགྱུར། ཞེས་བསྒྱུར་ཏེ། དྷ་ར་ནི་འཛིན་པ་ལའང་བསྒྱུར་དུ་རུང་བའོ། །དེའི་ལྟར་ན་རྡོ་རྗེ་འཛིན་པ་ཞེས་པ་རྡོ་རྗེ་འཆང་གི་མཚན་གྱི་ཕྱོགས་གཅིག་སྨོས་པའོ། །
འོད་གསལ་ལས་ལངས་པ་ན་དང་པོ་ཉེར་ཐོབ་དང་། དེ་ནས་མཆེད་པ་དང་། དེ་ནས་སྣང་བ་སྐྱེ་ལ། དེ་ནས་མར་མེ་ལྟར་འབར་ནས་སྨིག་རྒྱུའི་བར་བཞི་ལུགས་ལྡོག་ཏུ་འབྱུང་ངོ་། །སེམས་ལ་ཉེར་ཐོབ་སོགས་ཀྱི་རིམ་པ་གསུམ་འབྱུང་ཡང་ལུས་སྒྱུ་མའི་
སྐུར་ལྡང་བ་ནི་འོད་གསལ་ལས་ལངས་པ་དང་དུས་མཉམ་དུ་འབྱུང་ངོ་། །ལུགས་འདིའི་རྫོགས་རིམ་གྱི་རྗེས་གཞིག་གི་སྡུད་རིམ་ལ་ནུས་པ་ཐོན་པའི་མཚམས་ནས་ལུས་དབེན་གྱི་སྐོར་ཅི་རིགས་པ་འབྱུང་ལ། རྡོ་རྗེ་བཟླས་པའི་རིམ་པ་ནི་ཤིན་ཏུ་
གསལ། དེ་གཉིས་ཀྱིས་རླུང་ལ་ནུས་པ་ཐོན་ནས་ལྟེ་བའི་དབུ་མའི་མདུད་པ་ལེགས་པར་གྲོལ་བའི་དབུས་སུ་རླུང་བསྡུས་ཏེ་ཐིམ་པར་མི་ནུས་པ་ཚུན་ཆད་ནི་རྡོར་བཟླས་ཀྱི་རིམ་པར་འདུ་ཞིང་། རྩ་མདུད་ལེགས་པར་གྲོལ་ནས་སྒྱུ་ལུས་དངོས་སུ་བསྐྱེད་
མི་ནུས་ཚུན་ཆད་ནི་སེམས་དབེན་དུ་བསྡུའོ། །སྒྱུ་ལུས་དངོས་སུ་བསྐྱེད་ནུས་པ་ནས་དེ་ལ་བྱང་བའི་བར་ནི་བདག་བྱིན་བརླབ་ཀྱི་རིམ་པའོ། །དེ་ནས་དེ་ཁོ་ན་ཉིད་ཀྱི་དོན་མངོན་དུ་གྱུར་པ་དང་། དེའི་ཐབས་ཉེ་བའི་རྒྱུ་རྣམས་ལ་ནི་འོད་གསལ་དང་
9-10-52b


མངོན་པར་བྱང་ཆུབ་པའི་རིམ་པ་ཞེས་བྱའོ། །དེ་ཡང་དྷོ་ཧ་ལས། དེ་ཉིད་བསམས་ནས་རྣམ་རྟོག་རང་བཞིན་འགག་པར་འགྱུར། །གལ་ཏེ་སེམས་ཀྱིས་སེམས་ནི་མཚོན་དུ་འགྲོ། རྣམ་རྟོག་དང་ནི་ཡིད་ནི་མི་གཡོ་བརྟན་པར་གནས། །ཇི་ལྟར་ལན་ཚྭ་ཆུ་
ལ་ཐིམ་པ་ལྟར། །དེ་ལྟར་སེམས་ནི་རང་བཞིན་ལ་ཐིམ་འགྱུར། །ཞེས་གསུངས་པས་དེ་ཁོ་ན་ཉིད་ཀྱི་དོན་བསྒོམས་པས་རང་བཞིན་གྱི་རྟོག་པ་རྣམས་ཐིམ་སྟེ་ལྷན་ཅིག་སྐྱེས་པའི་བདེ་ཆེན་གྱི་སེམས་ཆོས་རྣམས་ཀྱི་རང་བཞིན་ཡིན་ལུགས་ལ་
ཞུགས་ཏེ། ལན་ཚྭ་ཆུ་ལ་ཐིམ་པ་ལྟར་གྱུར་པ་མཚོན་བྱ་དོན་གྱི་འོད་གསལ་གྱི་ཡེ་ཤེས་སོ། །དེས་ན་འོད་གསལ་ལས་སྒྱུ་མའི་སྐུར་ལྡང་བར་བཤད་པའི་འོད་གསལ་ལ་གཉིས་སུ་ཕྱེ་ནས་དོན་གྱི་འོད་གསལ་ལས་ལངས་པའི་མཚམས་སུ་
ནི་སློབ་པའི་ཟུང་འཇུག་སྒྱུ་མའི་སྐུ་འགྲུབ་ལ། མཚོན་བྱེད་དཔེའི་འོད་གསལ་ལས་ལངས་པའི་མཚམས་སུ་ནི་སྒྱུ་ལུས་དངོས་དང་རྗེས་མཐུན་པ་གཉིས་ཀྱི་ལྡང་ཚུལ་ཡོད་དོ། །རྗེས་དྲན་གྱི་ཡན་ལག་ནི། འདུས་པ་ཕྱི་མ་ལས། རྗེས་དྲན་གང་ཞིག་
རྣམས་བསྒོམ་པ། །དེ་དང་འདྲ་བར་སྤྲོ་བར་བྱ། །རྗེས་སུ་དྲན་པ་ཞེས་བཤད་དོ། །ཞེས་གསུངས་པའི་དོན་སྒྲོན་གསལ་ལས། སྔར་ལུགས་མཐུན་དུ་འཇུག་པའི་དུས་སུ་སྨིག་རྒྱུ་ནས་འོད་གསལ་གྱི་བར་དུ་ཐོབ་པ་དེ་དང་འདྲ་བར་ཕྱིས་ལུགས་ལྡོག་
ཏུ་ལངས་པའི་ཚེ་འོད་གསལ་ལས་ཉེར་ཐོབ་ནས་སྨིག་རྒྱུའི་བར་དུ་བྱུང་བ་ལ་བཤད་པ་བཞིན་དུ་བྱའོ། །ཁྱད་པར་གསལ་བྱེད་ལས། འཛིན་པའི་མཇུག་ཐོགས་སུ་སྔར་བསྒོམས་པའི་ལྷ་ལ་རྗེས་སུ་དྲན་པ་འབྱུང་སྟེ། དེ་ཡང་བ་སྤུའི་བུ་ག་རེ་རེ་
9-10-53a


ནས་ཕུང་པོ་དང་ཁམས་དང་སྐྱེ་མཆེད་ཀྱི་ལྷ་འོད་ཟེར་གྱི་རྣམ་པར་སྤྲོ་བ་ལ་རྗེས་དྲན་དུ་བཤད་དོ། །ཏིང་འཛིན་གྱི་ཡན་ལག་ནི་འདུས་པ་ཕྱི་མ་ལས། ཐབས་དང་ཤེས་རབ་སྙོམས་འཇུག་པས། །དངོས་པོ་ཐམས་ཅད་མདོར་
བསྡུས་པ། །གོང་བུའི་ཚུལ་གྱིས་བསྡུས་ནས་ནི། །དབུས་སུ་གཟུགས་ནི་རྣམ་པར་བསྒོམ། །ཡུད་ཀྱི་ཡེ་ཤེས་རྫོགས་བྱེད་པ། །ཏིང་ངེ་འཛིན་ཞེས་བཏགས་པ་ཡིན། ཞེས་གསུངས་པས་སྟོན་ལ། དེའི་དོན་ནི། ཐབས་ནི་ཀུན་རྫོབ་ཀྱི་བདེན་
པ་དག་པའི་སྒྱུ་མའི་སྐུའོ། །ཤེས་རབ་ནི་དོན་དམ་པའི་བདེན་པ་ལ་གསུངས་ཀྱང་དེ་དང་རོ་གཅིག་པའི་འོད་གསལ་གྱི་ཡེ་ཤེས་སོ། །སྙོམས་པར་འཇུག་པ་ནི་ངོ་བོ་དབྱེར་མེད་དུ་སྦྱོར་བའོ། །དངོས་པོ་ཐམས་ཅད་ནི་བརྟན་པ་དང་གཡོ་བའོ། །
དེ་མདོར་བསྡུས་པ་གོང་བུའི་ཚུལ་གྱིས་ཏེ་ལྷའི་སྐུ་ཕྱག་ཆེན་པོའི་གཟུགས་ཀྱིས་གཅིག་ཏུ་བྱས་ནས་སྣོད་བཅུད་དེའི་དབུས་སུ་ཟུང་འཇུག་རྡོ་རྗེ་འཆང་གི་གཟུགས་སུ་བསྒོམ་པར་བྱའོ། །རིམ་པ་འདི་ཉིད་ཀྱིས་སྐད་ཅིག་ཙམ་གྱིས་ཡེ་
ཤེས་ཀྱི་སྐུ་རྫོགས་པར་བྱེད་པ་ནི་ཏིང་ངེ་འཛིན་གྱི་ཡན་ལག་དྲུག་པར་བཤད་དེ། སྒྲོན་གསལ་གྱི་དགོངས་པའོ། །སྣོད་བཅུད་ཐམས་ཅད་མདོར་བསྡུས་ཏེ་ཟུང་འཇུག་གི་སྐུར་གཅིག་ཏུ་བྱེད་ཚུལ་ནི་བརྟན་གཡོ་ཐམས་ཅད་ཀྱི་རྩ་བ་ནི་
རླུང་དང་སེམས་ཙམ་དུ་ཟད་ཅིང་དེ་ཡང་ཟུང་འཇུག་གི་སྐུར་གཅིག་ཏུ་བསྐྱེད་པའོ། །རིམ་པ་འདི་ཉིད་ཅེས་པ་ནི། འོད་གསལ་ལས་ཆུ་ལས་ཉ་ལྡང་གི་ཚུལ་དུ་བཞེངས་པའོ། །སྐད་ཅིག་ཙམ་ཞེས་པའི་ཙམ་གྱི་སྒྲས་ནི་འོད་གསལ་
9-10-53b


ལས་གཞན་གྱིས་བར་ཆོད་པ་གཅོད་དོ། །སྐབས་འདིར་སྒྲོན་གསལ་ལས། སྒྱུ་འཕྲུལ་དྲ་བ་ལས་བྱིན་གྱིས་བརླབ་པ་དང་། ཡོངས་སུ་བརྟགས་པ་དང་། གཟུགས་ཡོངས་སུ་རྫོགས་པའི་ལྷའི་རྣལ་འབྱོར་གསུམ་གསུངས་པ་ཁུངས་སུ་དྲངས་པའི་དང་པོ་
གཉིས་ནི་ལྷའི་སྐུར་དཀྲོངས་བསྐྱེད་བྱེད་པ་དང་། ས་བོན་ལ་སོགས་པ་ལས་རིམ་གྱིས་བསྐྱེད་པ་དང་། ཟུང་འཇུག་གི་སྐུ་བསྐྱེད་པའི་ཡེ་ཤེས་ཀྱི་སྐུ་གསུམ་ཡིན་ལ། དེའི་དང་པོ་གཉིས་ནི་མོས་པ་ཡིད་བྱེད་ཙམ་གྱིས་ལྷའི་སྐུར་བསྐྱེད་པ་ཡིན་གྱི་སྒྱུ་ལུས་
གཉིས་ལྟར་ལྷའི་སྐུར་སྐྱེས་པ་མིན་ནོ། །སྒྲོན་གསལ་དང་མཐུན་པར་ཀླུ་བྱང་གིས་ཀྱང་། རྣམ་པར་རྟོག་མེད་ཟབ་པ་སྟེ། རྒྱ་ཆེ་སངས་རྒྱས་རྣམས་ཀྱི་སྐུ། །འདི་ནི་བདེན་པ་གཉིས་སུ་བཤད། །ཀུན་རྫོབ་དང་ནི་དམ་པའི་དོན། །ཕྱེ་སྟེ་སོ་སོར་ཤེས་ནས་སུ། །
དེ་ནས་གཅིག་ཏུ་འདྲས་བྱས་པའི། །ཟད་མེད་གོ་འཕང་སྒོམ་པར་བྱེད། །ཅེས་གསུངས་སོ། །ཁྱད་པར་གསལ་བྱེད་ལས། འོད་གསལ་ཡེ་ཤེས་ཀྱི་རང་བཞིན་གྱི་སྐུར་བཞེངས་པ་དེ་ཡང་ཏིང་ངེ་འཛིན་ཞེས་བཤད་དོ། །ཞེས་བཤད་པ་ནི་སྒྲོན་གསལ་ལས་
བཤད་པ་གཞིན་ནོ། །དྲིལ་བུ་པས་ཀྱང་། རྣལ་འབྱོར་རྣམ་གསུམ་ཤེས་བྱ་སྟེ། །བྱིན་གྱིས་བརླབས་དང་རང་རྟགས་དང་། །བསམ་གྱིས་མི་ཁྱབ་གཟུགས་རྫོགས་པའི། །རྣལ་འབྱོར་སངས་རྒྱས་རྣམས་ཀྱིས་བསྔགས། །གང་ཡང་སྐད་ཅིག་སྦྱོར་བ་
ཡིས། །རང་ཉིད་རྡོ་རྗེ་མཁའ་འགྲོར་འགྱུར། །རྫས་ཏེ་སྐྱེས་པའི་སེམས་ཅན་བཞིན། །ས་བོན་མེད་པར་བསྒོམ་བྱ་སྟེ། །ཞེས་ལྷའི་རྣལ་འབྱོར་གསུམ་བཤད་པ་ནི་སྒྱུ་འཕྲུལ་དྲ་བ་དང་འདྲ་ཞིང་། གང་ཡང་ཞེས་པ་བཞིས་ནི་རྣལ་འབྱོར་གསུམ་པའི་ལྷའི་
9-10-54a


སྐུ་སྟོན་ལ། སྐད་ཅིག་སྦྱོར་བ་ཡིས་ཞེས་པ་ནི། ཡུད་ཀྱི་ཡེ་ཤེས་རྫོགས་བྱེད་པ། ཞེས་པ་དང་དོན་འདྲ་བས་རྫོགས་རིམ་པའི་ཡེ་ཤེས་ཀྱི་སྐུ་དང་སྒྱུ་མའི་སྐུ་སྟོན་པ་ཡིན་པས་བསྐྱེད་རིམ་པའི་ལྷ་དཀྲོངས་བསྐྱེད་ལ་སྦྱོར་བ་ནི་འདི་
དག་གི་རྣམ་གཞག་གཏན་མ་རྟོགས་པའོ། །འདི་བདག་བྱིན་བརླབས་སུ་བཤད་ཅིང་འོད་གསལ་དུ་སྡུད་པ་ཡང་བཤད་པས་རིམ་པ་གསུམ་པའི་སྒྱུ་མའི་སྐུ་ལ་ཤས་ཆེར་སྦྱོར་དགོས་མོད་ཀྱང་རིམ་པ་ལྔ་པའི་སྒྱུ་མའི་སྐུ་མེད་པ་ཡང་མིན་ནོ། །དེ་ལྟར་
ན། དེ་ལས་འཛིན་པ་ཐོབ་པར་འགྱུར། ཞེས་པའི་རྡོ་རྗེ་འཛིན་པ་རྡོ་རྗེ་འཆང་ལ་རིམ་པ་གསུམ་པའི་སྒྱུ་ལུས་རྡོ་རྗེ་འཆང་གཅིག་དང་ཟུང་འཇུག་གི་རྡོ་རྗེ་འཆང་གཉིས་ཡོད་དོ། །ཁ་ཊྭཱཾ་ག་ནི་ལྷ་ཡི་སྐུ། །ཤེས་རབ་ཌཱ་མ་རུ་ཡི་སྒྲ། །ཉིན་མོ་བཅོམ་ལྡན་རྡོ་རྗེ་
ཅན། །རྣལ་འབྱོར་མ་ནི་མཚན་མོར་བརྗོད་ཅེས་པའི་རྐང་པ་བཞིའི་ངེས་དོན་བཤད་ན། ཁ་ཊྭཱཾ་གས་ནི་སྒྱུ་མའི་ལྷ་སྐུ་སྟོན་ལ། ཌཱ་མ་རུའི་སྒྲས་ནི་ཤེས་རབ་འོད་གསལ་སྟོན་ནོ། །དེའི་སྔ་མ་ནི་བཅོམ་ལྡན་འདས་རྡོ་རྗེ་ཅན་ཏེ་མཚན་དཔེའི་ངོ་བོར་དམིགས་
པས་ཉིན་མོ་སྟེ་ཐབས་སོ། །ཕྱི་མ་ནི་རྣལ་འབྱོར་མ་སྟེ་སྣང་བའི་སྤྲོས་པ་བསྡུས་པས་མཚན་མོ་སྟེ་ཤེས་རབ་བོ། །མྱ་ངན་འདས་བྱུང་དཔའ་བོ་ནི། །དྲུག་པ་སེམས་ཀྱི་སྤྲུལ་པ་སྟེ། ཞེས་པ་ལྭ་བ་པ་དང་། ཤེས་རབ་བསྲུང་བའི་འགྲེལ་བར། མྱང་ངན་
ལས་འདས་པ་འཆི་བ་དང་། དེ་ལས་བྱུང་བ་ནི་དྲི་ཟའི་སེམས་ཅན་བར་དོ་སྟེ། དེ་ཡང་མངོན་ཤེས་ལྔ་དང་མཚན་གྱིས་བརྒྱན་པའི་ལུས་རྣམ་པར་ཤེས་པ་ཙམ་གྱི་གཟུགས་ཅན་ནོ། །དེས་ན་དྲུག་པ་སེམས་ཀྱི་སྤྲུལ་པ་ཞེས་བྱའོ། །དཔའ་བོ་ནི་བཅོམ་
9-10-54b


ལྡན་འདས་ཏེ་དེའི་གཟུགས་སུ་བསྒོམ་པར་བྱའོ། །ཡང་ན་མྱ་ངན་ལས་འདས་པ་ནི་ཉོན་མོངས་ཞི་བའི་ཆོས་དབྱིངས་སོ། །དེ་ལས་བྱུང་བ་ནི་སེམས་ཅན་གྱི་དོན་མཛད་པའི་ཡེ་ཤེས་ཀྱི་སྐུའོ། །དྲུག་པ་ནི་ཆོས་ཀྱི་དབྱིངས་དང་། སེམས་ཀྱི་སྤྲུལ་པ་ནི་གདུལ་
བྱའི་སེམས་སམ་སེམས་ཅན་ལ་ལྟོས་ནས་སོ་སོར་སྣང་བའོ། །ཞེས་བཤད་དོ། །འཆི་བའི་འོད་གསལ་གྱི་རླུང་སེམས་ཙམ་ལས་བར་དོ་གྲུབ་པ་བཞིན་དུ་ལམ་གྱི་འོད་གསལ་གྱི་རླུང་སེམས་ཙམ་ལས་ཧེ་རུ་ཀའི་སྒྱུ་མའི་ལུས་ཡེ་ཤེས་ཀྱི་སྐུར་
བཞེངས་ཏེ། སེམས་ཅན་གྱི་དོན་དུ་སྤྲུལ་པ་འགྱེད་པའོ། །བཤད་པ་སྔ་མའི་དྲུག་པ་ནི། རྣམ་ཤེས་ཚོགས་དྲུག་གི་དྲུག་པ་དང་། ཕྱི་མའི་དྲུག་པ་ནི་ཡུལ་དྲུག་གི་དྲུག་པ་ཆོས་ཀྱི་དབྱིངས་ཏེ་མྱ་ངན་ལས་འདས་པ་ཞེས་པའོ། །ངོ་བོ་ཆེན་པོའི་འགྲེལ་པ་ལས། 
མྱ་ངན་ལས་འདས་པ་འོད་གསལ་བ་དང་། དེ་ལས་བྱུང་བ་ལྷ་རེ་གཉིས་སོ། །དེ་གང་ལ་བརྟེན་ནས་བྱུང་ན་སེམས་གསུམ་རླུང་དང་བཅས་པ་ལས་སྤྲུལ་པའོ། །ཞེས་སྣང་མཆེད་ཐོབ་གསུམ་གྱི་སེམས་གསུམ་རླུང་དང་བཅས་པ་ལས་སྒྱུ་མའི་སྐུར་
ལངས་པར་བཤད་དེ་སྟོང་པ་བཞི་ལས་དངོས་བརྒྱུད་ཅི་རིགས་པར་བྱུང་བའོ། །ཚིག་གི་དོན་ཅུང་ཟད་མི་འདྲ་ཙམ་བཤད་པ་སྔ་མར་བྱུང་ཡང་དོན་ནི་ཕྱི་མ་ལྟར་ཤེས་པར་བྱའོ། །བསྐྱེད་རིམ་གྱི་སྐབས་སུ་སྟོང་པར་སྦྱངས་པའི་ངང་ནས་བར་དོ་
མཚོན་པའི་ནཱ་དར་ལངས་པའི་གནད་ཀྱང་ཚུལ་དེ་དག་གིས་ཤེས་དགོས་ཏེ། སྒྱུ་མའི་སྐུར་ལྡང་ཚུལ་མཐའ་དག་པ་ནི་ཤིན་ཏུ་རྟོགས་དཀའ་བར་ཡོད་པས་འཕགས་སྐོར་དུ་རྒྱས་པར་གཏན་ལ་ཕབ་པ་ལས་ཤེས་པར་བྱའོ། །དག་པ་ཆོས་ཀྱི་སྤྲུལ་
9-10-55a


པ་ནི། །ཕག་མོའི་གཟུགས་སུ་བསྟན་པ་ཡིན། ཞེས་པའི་དོན་འགྲེལ་པར། དག་པའི་ཆོས་སྟོང་པ་ཉིད་ཀྱི་ངོ་བོ་ནི་ཕག་མོའོ་ཞེས་བཤད་དེ། ཕག་མོས་ནི་འོད་གསལ་མཚོན་པས་དེའི་སྤྲུལ་པར་བཤད་དེ། འོད་གསལ་གྱི་ཡེ་ཤེས་
ཉིད་ཧེ་རུ་ཀ་ཡབ་ཡུམ་དུ་ཤར་བའོ། །ཤྲཱི་ནི་ཞེས་པ་བཞིའི་རྐང་པ་དང་པོའི་དོན་ནི། མཁའ་འགྲོ་རྒྱ་མཚོ་ལས། ཨེ་ཝཾ་ལ་སོགས་གཉིས་མེད་པའང་། །ཤྲཱི་ཞེས་བྱ་བའི་ཡིག་ངེས་བརྗོད། ཅེས་གསུངས་ཏེ། ཤྲཱི་ཞེས་བྱ་བའི་ཡི་གེ་དེས་ནི་བརྗོད་པའི་
གཉིས་སུ་མེད་པའི་ཡེ་ཤེས་ནི་མཚོན་པ་ཙམ་སྟེ། དེར་མ་ཟད་ཨེ་ཝཾ་ལ་སོགས་པའང་ཡི་གེ་དེས་བརྗོད་པའི་དོན་ནོ། །དེ་ལྟར་ན་ཨེ་ཝཾ་ལ་གཉིས་ཏེ་བདེ་སྟོང་དབྱེར་མེད་ཀྱི་ཨེ་ཝཾ་དང་། བདེན་གཉིས་དབྱེར་མེད་ཀྱི་ཨེ་ཝཾ་གཉིས་ལས་དང་པོ་ནི་
བཤད་ཟིན་ལ། གཉིས་པ་ནི། ཨེ་ཡིག་གི་དོན་ཤེས་རབ་དོན་དམ་འོད་གསལ་ལྷན་ཅིག་སྐྱེས་པའི་ཡེ་ཤེས་དང་། ཝཾ་ཡིག་གི་དོན་ཐབས་ཀུན་རྫོབ་སྒྱུ་མའི་སྐུ་དང་། ཐིག་ལེའི་དོན་སྔ་མ་ཐུགས་དང་ཕྱི་མ་སྐུར་ངོ་བོ་དབྱེར་མེད་དུ་སྦྱོར་བའོ། །དེ་
ཡང་ཇོ་བོ་ཆེན་པོའི་འགྲེལ་པར། ཤྲཱི་ནི་གཉིས་མེད་ཡེ་ཤེས་ཏེ། ཞེས་པའི་དོན་ཟུང་འཇུག་ཕྱག་རྒྱ་ཆེན་པོ་ལ་བཤད་པ་གཙོ་བོ་ཡིན་མོད་ཀྱང་རིམ་པ་གསུམ་པའི་སྒྱུ་མའི་སྐུ་ཡང་བཟུང་ངོ་། །ཧེའི་དོན་ནི་མཁའ་འགྲོ་རྒྱ་མཚོ་ལས། ཧེ་ནི་རྒྱུ་སྟོང་
བདག་ཉིད་དེ། །རྒྱུའི་བདག་ཉིད་དུ་མི་རྟོག་པའོ། །རང་བཞིན་ཆོས་བདག་མེད་པ་ཉིད། །དེ་ནི་སྟོང་པའི་རྣལ་འབྱོར་གནས། །ཞེས་རྒྱུའི་རང་གི་ངོ་བོ་ཉིད་ཀྱིས་གྲུབ་པས་སྟོང་པའི་ཆོས་བདག་མེད་ལ་བཤད་ཅིང་། རུའི་དོན་ཡང་དེ་ཉིད་ལས། བཀོད་པ་གང་
9-10-55b


དག་བདག་མེད་པ། །རྟོག་པའི་དྲ་བ་ཆེན་པོ་ནི། །རུ་ཡིག་རྐྱེན་གྱི་བདུད་རྩི་ཅན། །དེ་ནི་བདག་གི་བཀོད་བྲལ་བའོ། །ཞེས་གང་ཟག་གི་བདག་ཏུ་འཛིན་པའི་རྟོག་པ་ལུས་ཅན་སྲིད་པར་འཆིང་བའི་རྐྱེན་གྱི་བདག་ཉིད་ཅན་ཏེ། དེས་བཀོད་པ་སྟེ་སྒྲོ་བཏགས་པའི་
གང་ཟག་གི་བདག་མེད་པ་ལ་བཤད་དེ། རུ་ཡིག་བཀོད་པ་དང་བྲལ་བ། ཞེས་འབྱུང་བ་ལྟར་བཀོད་པའོ། །རུ་ནི་ཚོགས་དང་བྲལ་བ་སྟེ། ཞེས་པ་ལྟར་ན་ལཱུ་ཨི་པའི་འགྲེལ་པ་རྣམས་སུ་རུའི་དོན་བརྗོད་པ་དང་བྲལ་བ་ལ་བཤད་པ་ལྟར་བྱས་ཀྱང་
ཆོག་གོ། ཡང་དེ་ཉིད་ལས། སླར་བརྗོད་ཀ་ནི་མ་ལུས་པའི། །བདག་གི་གཉིས་སྦྱར་མེད་ཤེས་གང་། །གང་ཕྱིར་ཅི་ལའང་མི་གནས་པ། །དེ་ཕྱིར་ཀ་ཞེས་བྱ་བར་བརྗོད། །ཅེས་གསུངས་ཏེ། རུའི་རྗེས་སུ་སླར་ཡང་བརྗོད་པའི་ཀའི་དོན་ནི། ཤེས་བྱ་
མ་ལུས་པའི་ཆོས་རྣམས་ཀྱི་ཡུལ་གྱི་དེ་ཁོ་ན་ཉིད་དང་དེའི་ཡུལ་ཅན་གྱི་ཡེ་ཤེས་གཉིས་རྣམ་པ་མི་མཐུན་པར་བྱར་མེད་པར་སྟོན་པས་མཁྱེན་པ་སྟེ། གང་གི་ཕྱིར་ན། དེ་ཁོ་ན་ཉིད་ལ་འཇུག་པའི་བློ་ནི་བདེན་པའི་དམིགས་གཏད་ཅི་ལའང་མི་གནས་
པ་དེའི་ཕྱིར་ཞེས་པའི་དོན་ནོ། །དེ་ལྟར་ན་ཧེ་དང་རུས་ཡུལ་བདག་མེད་གཉིས་དང་། ཀ་ཡུལ་ཅན་གྱི་ཡེ་ཤེས་དང་། ཤྲཱིས་དེ་གཉིས་དབྱེར་མི་ཕྱེད་པ་སྟོན་ཏེ། གཉིས་མེད་ཡེ་ཤེས་ཀྱི་ཕྱོགས་གཅིག་གོ། སྤྱིར་དེ་ཁོ་ན་ཉིད་ཀྱི་ཡུལ་ཅན་གྱི་གཉིས་
མེད་ཀྱི་ཡེ་ཤེས་ལ་ལམ་གྱི་ལྷན་ཅིག་སྐྱེས་པའི་བདེ་ཆེན་གྱི་ཡེ་ཤེས་ཀྱིས་ཡུལ་ཅན་བྱས་མ་བྱས་གཉིས་ཡོད་པའི་ཕྱི་མ་ནི་ཐེག་པ་གཞན་དང་རྒྱུད་སྡེ་འོག་མའི་ལམ་དང་ཡང་ཐུན་མོང་བ་ཡིན་ལ། དང་པོ་ལ་རླུང་དྷཱུ་ཏཱིར་ཞུགས་གནས་ཐིམ་
9-10-56a


པ་ལས་བྱུང་བ་མིན་ཀྱང་། བྱང་སེམས་སྤྱི་བོ་ནས་གསང་གནས་ཀྱི་རྩེ་བར་དུ་ཕབ་ནས་ཕཊ་ཡིག་བསྒོམ་པ་ལ་སོགས་པའི་ཐབས་ཀྱིས་བཀག་པ་ལས་བྱུང་བ་བསྐྱེད་རིམ་པའི་ལམ་གཅིག་དང་། སྲོག་དྷཱུ་ཏཱིར་ཐིམ་པ་ལས་
བྱུང་བའི་རྫོགས་རིམ་པའི་ལྷན་སྐྱེས་གཅིག་སྟེ་གཉིས་ཡོད་དོ། །དེའི་སྔ་མ་གཉིས་ནི་སྤྱི་དོན་གྱི་གཉིས་མེད་ཡེ་ཤེས་ཡིན་ལ། གསུམ་པ་ལ་ནི་སྦས་དོན་དང་། མཐར་ཐུག་གི་དོན་གྱི་གཉིས་མེད་ཡེ་ཤེས་གཉིས་ཡོད་པ་རྣམས་ལེགས་པར་དམིགས་
ཕྱེད་པ་ཤིན་ཏུ་གལ་ཆེའོ། །ཁཊྭཱཾ་ག་ནི། ཞེས་པ་ནས། གང་དུའང་མི་གནས་པའོ། །ཞེས་པའི་བར་རྣམས་ལཱུ་ཨི་པའི་འགྲེལ་པ་གསུམ་དུ་བསྐྱེད་རིམ་གྱི་དག་པ་དྲན་པའི་སྐབས་སུ་སྦྱར་མོད་ཀྱང་། རྫོགས་རིམ་གྱི་ཆ་ལ་བཤད་དུ་མེད་པ་ནི་མིན་ཏེ། 
ཇོ་བོའི་འགྲེལ་པར་བཤད་པ་བཞིན་ནོ། །ཁ་ཊྭཱཾ་ག་ནི་ལྷ་ཡི་སྐུ། ཞེས་པ་ནས། ཀ་ནི་གང་དུའང་མི་གནས་པའོ། །ཞེས་པའི་བར་ལཱུ་ཨི་པས་སྒྲུབ་ཐབས་སུ་བཀོད་པ་ནི་ཀུན་སྤྱོད་ན་ཚང་བར་ཡོད་ཀྱང་། མྱ་ངན་འདས་བྱུང་ཞེས་པའི་རྐང་པ་གཉིས་
ལ་འགྱུར་མི་འདྲ་པ་མང་དུ་སྣང་། དེ་གཉིས་མ་གཏོགས་པ་མངོན་བརྗོད་ལས་ཀྱང་གསུངས་སོ། །ལྔ་པ་དེ་ལ་བརྟེན་ནས་འབྲས་བུ་མངོན་དུ་བྱེད་པའི་ཚུལ་ནི། སྔར་བཤད་པའི་སློབ་པའི་ཟུང་འཇུག་གི་ཏིང་ངེ་འཛིན་དང་རྫོགས་རིམ་པའི་
སྤྱོད་པ་རྣམས་ལ་གོམས་པར་བྱས་པས་མི་སློབ་པའི་ཟུང་འཇུག་གི་མཆོག་གི་དངོས་གྲུབ་འགྲུབ་ལ། དེ་ཡང་མཐར་ཐུག་འགྲུབ་པར་ཉེ་བ་ན་ཇི་ལྟར་འོང་བའི་ཚུལ་ནི། རྡོ་རྗེ་གུར་ལས། ཉི་མ་གཅིག་གིས་འགྲུབ་འགྱུར་རམ། །ཆོ་གས་ཉི་མ་
9-10-56b


གཉིས་ནའམ། །ཉིན་གསུམ་རབ་ཏུ་སྦྱར་བས་སམ། །དེ་བཞིན་ཉི་མ་བཞི་ཡིས་སམ། །ཉིན་ལྔར་རབ་ཏུ་སྦྱར་བ་ཡིས། །འགྲུབ་འགྱུར་འདི་ལ་ཐེ་ཚོམ་མེད། །མེ་ཏོག་སོགས་པས་མཆོད་བྱས་ནས། བསམ་གཏན་གནས་སུ་རབ་འདུག་སྟེ། །ཕྱག་རྒྱར་ལྷན་
ཅིག་རབ་ཁྲུགས་ནས། །རྡོ་རྗེ་སྦྱོར་བ་ཡང་དག་བརྩམ། །རྡོ་རྗེ་ཉི་མ་ནུབ་ནས་ནི། །སྦྱོར་བ་འདི་ནི་རབ་བརྩམས་ན། །སྐྱ་རེངས་འཆར་བའི་དུས་སུ་ནི། །འགྲུབ་འགྱུར་འདི་ལ་ཐེ་ཚོམ་མེད། །ཅེས་པ་འདིས་སྟོན་ལ། ལུང་དེའི་དོན་མན་སྙེར། ཟླ་བ་དྲུག་ཏུ་
རིག་མའི་བརྟུལ་ཞུགས་སྤྱད་ནས་ཉི་མ་བདུན་རང་གི་ལྷ་བལྟ་བར་བྱས་ཏེ། སྦྱོར་བ་རབ་ཏུ་གྱུར་པར་ཤེས་ཤིང་གང་གི་ཚེ་ཉིན་མཚན་དུ་མར་མེའི་འོད་ཀྱི་རྒྱུན་བཞིན་དུ་རྟག་ཏུ་དེ་ཁོ་ན་ཉིད་ཀྱི་རྣལ་འབྱོར་ལ་མངོན་དུ་ཕྱོགས་པར་ནུས་པ་དེའི་ཚེ་ལྷན་ཅིག་སྤྱོད་
པའི་ཕྱག་རྒྱ་དང་ལྷན་ཅིག་རྡོ་རྗེ་སེམས་དཔའ་ལ་སོགས་པ་རྣམས་ལས་གང་ཡང་རུང་བའི་རྣལ་འབྱོར་མངོན་དུ་བྱས་ཏེ། ཐོ་རངས་ཀྱི་ཐུན་ནས་བརྩམས་ལ་རྫོགས་པའི་རིམ་པའི་རྣལ་འབྱོར་ཁམས་གསུམ་པ་ཐམས་ཅད་གཅིག་པའི་རང་བཞིན་
མཉམ་པར་བཞག་པ་དང་མཉམ་པར་མ་བཞག་པ་གཅིག་པའི་ངོ་བོར་ལྷག་པར་མོས་ནས་རྡོ་རྗེས་རྒྱས་བཏབ་པའི་ཕྱག་རྒྱ་དང་རོ་མཉམ་པ་ཉམས་སུ་མྱོང་ཞིང་། མར་མེའི་འོད་ཀྱི་རྒྱུན་ལྟ་བུར་རྟག་པར་ཉིན་མཚན་ཐོག་ཐག་གནས་པར་བྱའོ། །
དེ་ནས་རབ་ཀྱི་མཐར་ཐུག་པར་སོན་པའི་དགའ་བ་བཞིའི་དེ་ཁོ་ན་ཉིད་མངོན་དུ་བྱས་པ་ལས། སྐྱ་རེངས་འཆར་བའི་དུས་སུ་འགྲུབ་སྟེ། སྒྲུབ་ཐབས་མཆོག་རྣམས་ཀྱིས་ཞེས་བཤད་པའི་ཕྱིར། མན་ངག་ཇི་ལྟ་བར་ཕྱག་རྒྱ་ཆེན་པོ་འགྲུབ་པའི་ཉེ་
9-10-57a


བའི་ཉིན་ཞག་ལ་སྟེ། བྱང་ཆུབ་ཀྱི་སེམས་ཟླ་བའི་ཆ་མཐའ་དག་ཡོངས་སུ་རྫོགས་པའི་ཕྱིར། སྐྱ་རེངས་ཤར་བའི་དུས་སུ་ཤིན་ཏུ་ཡོངས་སུ་དག་པའི་ཡེ་ཤེས་ཀྱི་བདུད་རྩི་ཡོངས་སུ་རྟོགས་པའི་ཕྱག་རྒྱ་ཆེན་པོ་གྲུབ་པ་རྡོ་རྗེ་
འཛིན་པའོ་ཞེས་བཤད་དོ། །རྡོ་རྗེ་ཉི་མ་ཞེས་པ་བཞི་འདུས་པ་ལས་ཀྱང་འབྱུང་ལ། དེའི་དོན་ནི་སྒྲོན་གསལ་ལས། ཕྱི་ནང་གི་བྱང་ཆུབ་པའི་རིམ་པ་གཉིས་ལ་བཤད་པའི་དང་པོ་ནི། རྡོ་རྗེ་ཉི་མ་ནི་ཡོངས་སུ་གྲགས་པའི་ཉི་མ་ཉིད་དོ། །དེ་ནུབ་པ་ནི་
དམར་ཐག་ཆད་པའི་མཚམས་སུ་ཡོ་བྱད་ཅི་རྙེད་པས་བླ་མ་མཉེས་པར་བྱ་བར་གསུངས་ཏེ་ཚོགས་པའོ། །དེ་ནས་བླ་མའི་དྲིན་གྱིས་མཚན་ཕྱེད་ན། ཕྱག་རྒྱ་ལ་བརྟེན་ནས་དབང་བསྐུར་བ་ཐོབ་ནས་སྐྱ་རེངས་འཆར་ཀའི་དུས་སུ་འོད་གསལ་གྱི་
རིམ་པའི་ལུང་ཕོག་པས་ཀྱང་མཆོག་འགྲུབ་བོ། །ནང་གི་མངོན་བྱང་གི་རིམ་པ་ལྟར་བཤད་ན། རྡོ་རྗེ་ཉི་མ་ནི་ཐབས་ཀྱི་ཡེ་ཤེས་སྙོམས་པར་འཇུག་པའི་མཚན་ཉིད་ཅན་དུ་བྱུང་བའོ། །ནུབ་པ་ནི་དེ་འགགས་པ་ལ་བཤད་དེ། ཐབས་ཀྱི་ཡེ་ཤེས་ནི་
སྟོན་དུས་ཀྱི་སྤྲིན་མེད་པའི་ནམ་མཁའ་གཡའ་དག་པ་ལ་ཉི་མའི་འོད་ཤར་བ་ལྟ་བུའི་སྣང་བ་མཆེད་པའོ། །དེས་མཚོན་ནས་ཤེས་རབ་ཀྱི་ངོ་བོ་ཉིད་ཀྱི་སྣང་བའི་ཡེ་ཤེས་ཀྱང་ནུབ་ཅིང་འགགས་པ་དང་། འོད་གསལ་གྱི་སྔོན་དུ་འགྲོ་བས་དེ་བསྒྲུབ་
པའི་སྣང་བ་ཉེར་ཐོབ་ཀྱི་སྦྱོར་བ་འདི་ནི་བརྩམ་པ་སྟེ་འབྱུང་བའོ། །སྐྱ་རེངས་འཆར་བ་ནི་མ་རིག་པ་ཉེར་ཐོབ་སྟེ། དེ་འདས་བའི་དུས་སུ་སྒྲུབ་པ་པོས་སྟོང་པ་བཞི་རིམ་གྱིས་མངོན་དུ་བྱེད་པས་ཕྱག་ཆེན་གྱི་དངོས་གྲུབ་འགྲུབ་པར་གསུངས་ཏེ། དེའི་
9-10-57b


ཚེ་འོད་གསལ་བ་བསྒོམས་པས་གཉིས་སྣང་འཁྲུལ་བའི་བག་ཆགས་སྦྱངས་ནས་ཐོ་རངས་ཆོས་ཀྱི་སྐུ་མཐར་ཐུག་པ་མངོན་དུ་གྱུར་པའི་ཚེ་སློབ་པའི་ཟུང་འཇུག་སྒྱུ་མའི་སྐུ་མི་སློབ་པའི་ཟུང་འཇུག་སྒྱུ་མའི་སྐུར་འགྱུར་ཞིང་འཁོར་བ་ཇི་སྲིད་པར་སྐུ་དེ་གཉིས་
ལས་མི་གཡོ་བར་བཞུགས་སོ། །དེ་འདྲ་བའི་དག་པ་གཉིས་ལྡན་གྱི་ཡུལ་གྱི་འོད་གསལ་ནི་འདུས་མ་བྱས་པའི་ཆོས་ཀྱི་སྐུ་དང་། ཡུལ་ཅན་གྱི་འོད་གསལ་ནི་ཡེ་ཤེས་ཆོས་ཀྱི་སྐུ་དང་། བདེ་བ་ཆེན་པོའི་སྐུ་ཞེས་ཀྱང་བྱའོ། །དེའི་རྟེན་གཟུགས་ཀྱི་སྐུ་རླུང་
སེམས་ཙམ་ལས་གྲུབ་པ་ནི་ལོངས་སྐུ་ཡིན་ལ། སྐུ་དེ་གཉིས་ངོ་བོ་གཅིག་ལ་ལྡོག་པ་ཐ་དད་པ་ཙམ་ཡིན་པས་གཟུགས་སྐུ་དེ་ལ་གཉིས་སུ་མེད་པའི་ཡེ་ཤེས་ཀྱི་སྐུ་ཞེས་ལན་དུ་མར་གསུངས་པས། གཟུགས་སྐུ་སངས་རྒྱས་ཀྱི་སས་མ་བསྡུས་
པར་གདུལ་བྱའི་རྒྱུད་ཀྱིས་བསྡུས་པ་དང་། ཤེས་པ་ལས་ངོ་བོ་ཐ་དད་པའི་བེམ་པོར་འདོད་པ་དང་། འབྲས་བུའི་སྐབས་སུ་ཡེ་ཤེས་མེད་པ་སོགས་འཕགས་པ་ཡབ་སྲས་ཀྱི་བཞེད་པར་སྨྲ་བ་ནི་ལེགས་པར་སྨྲ་བ་མིན་པར་ཤེས་པར་བྱའོ། །དེ་འདྲ་
བའི་ཟུང་འཇུག་གི་སྐུ་དེས་མཆོག་གི་སྤྲུལ་པའི་སྐུ་ལ་སོགས་པའི་སྤྲུལ་པ་དུ་མ་ཞིག་མཛད་དོ། །སྔགས་ཀྱི་གཞུང་གཞན་ནས་ཡེ་ཤེས་ཀྱི་རྟེན་གྱི་གཟུགས་སྐུ་སྤྲུལ་སྐུ་དང་ཐུགས་ཆོས་སྐུ་དང་། གསུང་ལོངས་སྐུར་མང་དུ་བཤད་པའི་ལུགས་
ལ་ཡང་སྤྲུལ་པ་ལ་འདིས་སྤྲུལ་པ་དང་། འདི་སྤྲུལ་པའི་བྱེད་པ་པོ་དང་ལས་གཉིས་སུ་ཡོད་ལ། བྱེད་པ་པོའི་སྐུ་འདིས་ཆོས་ལ་རྫོགས་པར་ལོངས་སྤྱོད་པའི་བྱེད་པ་པོའི་ལོངས་སྐུ་དང་། བྱ་བའི་ཐབས་འདིས་ལོངས་སྤྱོད་པའི་གསུང་ལ་ལོངས་
9-10-58a


སྐུར་བཤད་པ་གཉིས་ཡོད་པར་ཤེས་པར་བྱའོ། །དྲིལ་བུ་ཞབས་ཀྱིས། འདི་ནི་ངོ་བོ་ཉིད་སྐུ་སྟེ། །སྟོང་ཉིད་སྙིང་རྗེ་གཉིས་མེད་པ། །མ་ནིང་ཞེས་བྱར་བརྗོད་པ་སྟེ། །ཁ་ཅིག་ཟུང་འཇུག་ཅེས་བྱར་བརྗོད། །སྒྲིབ་པ་དང་བྲལ་ཆོས་
སྐུ་འདིར། །ཞེས་གསུངས་པའི་སྟོང་པ་དང་སྙིང་རྗེ་ནི། དེ་ཉིད་ཀྱིས། དེ་བཞིན་ཡང་དག་མཐའ་ལ་ཡང་། །རྣལ་འབྱོར་པ་ནི་ཡང་དག་འཇུག །ཀུན་ཀྱང་སྣང་བ་མེད་པའི་ཚེ། །སྙིང་རྗེ་དང་ནི་རོ་གཅིག་ཡིད། །འདི་ནི་སྐད་ཅིག་གིས་འཁྱུད་ཅིང་། །
སྟོང་པ་ཉིད་བཞིན་འཇུག་པར་བྱེད། ཅེས་དང་། མི་འགྱུར་བདེ་ཆེན་ཡེ་ཤེས་ནི། །ཐབས་ཏེ་ཐུགས་རྗེའི་བདག་ཉིད་ཅན། ཞེས་གསུངས་པས་གཉིས་སྣང་མེད་པར་ཡང་དག་པའི་འོད་གསལ་སྟོང་པ་ཉིད་ཇི་འདྲ་པ་དེ་བཞིན་དུ་བཞུགས་པའི་སྙིང་རྗེ་
བདེ་ཆེན་གྱི་ཡེ་ཤེས་ལ་ངོ་བོ་ཉིད་ཀྱི་སྐུར་བཤད་དེ། ཕར་ཕྱིན་གྱི་ཐེག་པ་ནས་དྲི་བྲལ་གྱི་དེ་བཞིན་ཉིད་ལ་ངོ་བོ་ཉིད་སྐུར་བཤད་པ་ལ་ནི་ཆོས་སྐུ་ཞེས་གསུངས་སོ། །ལམ་འདིར་མཆོག་གི་དངོས་གྲུབ་ཐོག་མར་མངོན་དུ་བྱས་པའི་ཚེ་ལྟས་
ཇི་ལྟར་འོང་བ་ནི། འདིའི་བཤད་རྒྱུད་སམྦུ་ཊ་ལས། དེ་ནས་གང་དུ་རིག་མའི་སྐྱེས་བུ་གྲུབ་པ་དེར་འདི་ལྟ་བུའི་ཕུན་སུམ་ཚོགས་པ་འབྱུང་སྟེ། ས་འདི་དགའ་ཞིང་མགུ་ལ་རངས་པས་རྣམ་པ་དྲུག་ཏུ་གཡོས་ནས། བདུད་ཀྱི་གནས་སུ་ཆ་ལང་ལྟ་
བུའི་སྒྲ་གྲགས་པ་དང་། ཕྱོགས་བཅུར་བསྐལ་པའི་མེ་ལྟ་བུའི་སྐར་མདའ་ལྟུང་བ་དང་། རྒྱ་མཚོ་ཆེན་པོ་འཁྲུགས་པའི་སྒྲ་དང་། ཐམས་ཅད་དུ་གནམ་རྡོ་ལྟུང་བ་དང་། དེ་ཉིད་དུ་བསྐལ་པའི་མེའི་གཟུགས་ལྟ་བུའི་ཡེ་ཤེས་ཀྱི་སྣང་བ་འབར་
9-10-58b


བ་དང་། ཕྱག་རྒྱའི་སྐྱེ་གནས་ཀྱི་སྙིང་པོར་ཁམས་གསུམ་ཐམས་ཅད་སྣང་བ་དང་། ཚངས་པ་དང་ཁྱབ་འཇུག་དང་ཆུ་བདག་དང་བརྒྱ་བྱིན་དང་། དྲག་པོ་དང་མེ་དང་སྟོབས་བཟང་པོ་དང་ཉི་མ་དང་ཟླ་བ་དང་གནོད་སྦྱིན་དང་གྲུབ་པ་དང་དྲི་ཟ་དང་མིའམ་
ཅི་དང་ལྟོ་འཕྱེ་དང་ལྷའི་མཆོག་དང་རིག་པ་འཛིན་པ་དང་ཆུས་བྱུང་ལ་སོགས་པ་གང་ཞིག་གཞན་ཡང་སུམ་ཅུ་རྩ་གསུམ་དུ་གནས་པའི་ལྷ་རྣམས་དེར་འོངས་ནས་ཡང་དག་པར་དགའ་བས་མེ་ཏོག་གིས་མཆོད་པར་བྱེད་དོ། །པི་ཝཾ་དང་། གླིང་བུ་དང་། ཀུ་
མུན་དྷ་དང་། ཏ་མྦུ་ར་དང་། དུང་དང་། ཟངས་དུང་གི་སྒྲ་དང་། ནན་ཏི་དང་། པ་ཊ་ཧ་དང་། རྫ་རྔས་ནམ་མཁར་གནས་ཏེ་དེས་རྟག་ཏུ་མཆོད་པར་བྱེད་དོ། །ལྷའི་བུ་མོ་དང་རིག་པ་འཛིན་པའི་རྒྱལ་པོའི་བུ་མོ་ཐམས་ཅད་ཀྱིས་གར་བྱེད་པ་དང་། སིལ་སྙན་དུ་
མ་བྱེད་པ་དང་། མིའམ་ཅི་དང་། གནོད་སྦྱིན་གྱིས་གླུ་ལེན་པར་བྱེད་ཅིང་གར་བྱེད་པ་དང་། དེ་ལ་དགའ་བ་དང་བཅས་པས་རྒྱལ་བ་རྒྱལ་བ་ཞེས་རྟག་ཏུ་རོལ་བར་བྱེད་པ་དང་། གང་ཞིག་གྲུབ་པ་ནམ་མཁར་གནས་པའི་ལྷ་རྣམས་ཀྱིས་ནི་ལེགས་
སོའི་རྣམ་པ་རབ་ཏུ་གསོལ་བར་མཛད་དོ། །གང་ཞིག་དགའ་ལྡན་དུ་གནས་པའི་ལྷ་རབ་མཆོག་དང་། གང་ཞིག་ལྷའི་བུ་མོ་དང་། རིག་པ་འཛིན་པ་དང་། འོག་མིན་གྱི་བར་དུ་འོངས་ནས་ཕྱག་འཚལ་ཞིང་མེ་ཏོག་སྣ་ཚོགས་ཀྱི་རྣམ་པའི་དྲི་སྣ་ཚོགས་
ཀྱི་དྲིའི་ཆར་དང་། བདུག་པ་སྣ་ཚོགས་ཀྱི་ཁྱད་པར་གྱིས་གུས་པའི་ཚུལ་གྱིས་མཆོད་པར་བྱེད་དོ། །གཞན་ཡང་ཁྱོད་ལ་རྒྱས་པར་བཤད་པའི་ཚུལ་གྱི་ཅི་ཞིག་དགོས་ཏེ། བསྒྲུབ་པར་བྱ་བའི་བསོད་ནམས་ཀྱིས་ཁམས་གསུམ་དུ་སྐྱེས་པའི་མཆོད་
9-10-59a


པ་དེ་རྣམས་ཀྱིས་མཆོད་པར་བྱེད་དོ། །ཞེས་གསུངས་པ་ལྟར་ཤེས་པར་བྱའོ། །འདི་ལ་ཁ་སྦྱོར་གྱི་འགྲེལ་པ་རིན་ཆེན་འཕྲེང་བར། འཇིག་རྟེན་པའི་དངོས་གྲུབ་གྲུབ་པའི་མཚན་མར་བཤད་ཀྱང་། འགྲེལ་པ་དྲན་པའི་སྣང་
བ་དང་མན་སྙེར། མཆོག་གྲུབ་པའི་མཚན་མར་བཤད་པ་ལེགས་སོ། །ཁ་སྦྱོར་འགོས་འགྱུར་དང་། འགྲེལ་པ་གཞན་གཉིས་སུ་རིག་པའི་སྐྱེས་བུ་ཞེས་འབྱུང་ལ། མན་སྙེ་དང་འབྲོག་འགྱུར་དུ་རིག་མའི་སྐྱེས་བུ་ཞེས་འབྱུང་བ་ནི་སྐད་དོད་ཀྱི་
སྟེང་ནས་དེ་གཉིས་ཀ་ལ་བསྒྱུར་དུ་རུང་བའོ། །ཕྱི་མའི་དོན་ནི་འཚང་རྒྱ་བའི་རིག་མ་དང་ལྷན་ཅིག་པའི་སྐྱེས་བུ་ལ་བཤད་དོ། །འོན་ཀྱང་སྒྲོན་གསལ་ལས། རེག་པ་ཆེན་པོ་ནི་དོན་དམ་པའི་བདེན་པའོ། །སྐྱེས་བུ་ནི། ཀུན་རྫོབ་ཀྱི་བདེན་
པའོ། །དེ་དག་ལས་བསྐྱེད་པ་རྣམ་པ་ཐམས་ཅད་ཀྱི་མཆོག་དང་ལྡན་པ་ལ་སོགས་པ་དང་བཅས་པའི་སྐྱེས་བུ་ལྟ་བུའི་ལྷའི་སྐུ་ནི་རིག་པ་ཆེན་པོའི་སྐྱེས་བུའི་གཟུགས་ཏེ་རྡོ་རྗེ་འཆང་ཆེན་པོའོ། །ཞེས་བཤད་པ་ལྟར་བྱའོ། །འགོས་འགྱུར་
ལས། ས་ཆེན་པོ་འདི་རྣམ་པ་དྲུག་ཏུ་གཡོས་པར་འགྱུར་ཞིང་ཡིད་དུ་འོང་བའི་སྒྲ་བསྒྲགས་ལ་ཞེས་འབྱུང་བ་ལྟར་དགའ་མགུ་སོགས་ནི་དགའ་བའི་སྒྲ་བསྒྲགས་པ་ལ་བྱའོ། །གནམ་རྡོ་ལྟུང་བ་ནི། བདུད་ཀྱི་གནས་ཀུན་ཏུ་རྡོ་ཆར་འབབ་པའོ། །
འགོས་འགྱུར་ལས། ཕྱག་རྒྱའི་སྙིང་པོ་ཅན་གྱི་ཡེ་ཤེས་ཀྱི་མེ་འབར་བ་བསྒྱིངས་ཤིང་ཁམས་གསུམ་པོ་སྣང་བར་མཛད་དེ་ཞེས་འབྱུང་ལ། མན་སྙེར་ཕྱག་རྒྱའི་སྙིང་པོ་ནི་ཕྱག་རྒྱ་དང་ལྡན་པ་ལ་བཤད་པའི་གྲུབ་པའི་སྐྱེས་བུ་ལས་ཡེ་
9-10-59b


ཤེས་ཀྱི་མེ་འཕྲོས་པའོ། །ཆུས་བྱུང་ནི། འགོས་ཀྱིས་མཚོ་སྨན་དུ་བསྒྱུར་རོ། །འགོས་འགྱུར་ལས། འོག་མིན་གྱིས་མཐར་ཐུག་པའི་ལྷ་རྣམས་ཀྱང་འོངས་ནས། ཞེས་འབྱུང་ལ། དེ་རྣམས་མཆོག་གྲུབ་པའི་དྲུང་དུ་འོངས་པའི་གནས་ནི་སངས་
རྒྱས་པ་དེ་འདོད་པའི་མིའི་རྟེན་ལ་སྔགས་ཀྱི་ལམ་གྱིས་ཚེ་གཅིག་ལ་སངས་རྒྱས་པ་ལ་དགོངས་པས་འདོད་ཁམས་སུ་འོངས་པའོ། །འགོས་འགྱུར་ལས། སྒྲུབ་པ་པོའི་བསོད་ནམས་ཀྱིས་ཞེས་འབྱུང་བ་ནི་མན་སྙེར་བསྒྲུབ་བྱའི་བསོད་ནམས་
ཀྱིས་ཞེས་པ་ལ་བསྒྲུབ་བྱ་ནི་རྡོ་རྗེ་སེམས་དཔའོ་ཞེས་བསྒྲུབ་བྱ་ལ་བཤད་པ་དང་གནད་གཅིག་སྟེ། སྒྲུབ་པ་པོས་རྡོར་སེམས་ཐོབ་པའི་བསོད་ནམས་སོ། །འགོས་འགྱུར་ལས། ཁམས་གསུམ་ན་ཡོད་པའི་མཆོད་པ་ཐམས་ཅད་ཀྱིས་ཞེས་
འབྱུང་བ་བདེ་ལ་གཟུགས་མེད་ཁམས་པས་མཆོད་ཚུལ་ནི། མན་སྙེ་ལས། ཁམས་དེ་ལ་གཟུགས་མེད་ཅེས་པ་ནི། གཟུགས་ཆུང་བ་ལ་གཟུགས་མེད་ཅེས་དགག་སྒྲ་བྱས་པའོ། །ཞེས་འདོད་པ་དང་། ཁམས་གོང་མ་གཉིས་ཀྱི་སེམས་
ཅན་རྣམས་དགོས་པའི་དབང་གིས་འདོད་ཁམས་སུ་འོངས་པ་ནི། ཐོག་མ་མེད་པའི་བག་ཆགས་སད་ནས་བུད་མེད་དང་སྐྱེས་པའི་དབང་པོ་ཅན་དུ་འགྱུར་ཏེ་ཚངས་མ་དང་ཚངས་པ་བཞིན་ནོ། །འདོད་པ་འདི་མང་པོ་རིག་པ་རྣམས་གསུང་ངོ་ཞེས་
ལུགས་དེ་རྒྱ་གར་བའི་མང་པོ་མཁྱེན་པ་རྣམས་གསུང་བར་བཤད་དོ། །ཚངས་མ་བཞིན་ཞེས་པ་ནི་སྔགས་ཀྱི་གཞུང་མང་པོ་ལས་ཚངས་པ་ལ་ཕོ་མོ་གཉིས་བཤད་ལ། དེ་གཉིས་གཟུགས་ཁམས་པ་ཡིན་པས་སོ་སྙམ་པའོ། །མངོན་པའི་
9-10-60a


ཕྱོགས་ཀྱི་གཞུང་དུ་ཡང་གཟུགས་མེད་ཁམས་ཞེས་པ་སྒྲ་ཇི་བཞིན་དུ་འདོད་པ་དང་། བུ་མོ་རྐེད་པ་ཕྲ་བ་ལ་རྐེད་མེད་མ་ཞེས་པ་ལྟར་ཆུང་བ་ལ་དགག་སྒྲ་སྦྱར་བ་ཡིན། ཞེས་འདོད་པ་གཉིས་བཤད་དོ། །ལམ་གཞན་གྱི་
མཐར་བླ་མེད་ཀྱི་ལམ་འགའ་ཞིག་བསྣན་ནས་འོག་མིན་དུ་འཚང་རྒྱ་བ་སོགས་ཀྱི་བཤད་པ་ནི་གཞན་དུ་རྒྱས་པར་བཤད་པ་ལས་ཤེས་པར་བྱའོ། །དེ་ལྟར་ན་ཧེ་རུ་ཀ་མངོན་འབྱུང་ལས། མི་སྨྲ་ཆུ་ཡི་བྱ་བ་མེད། །དུས་དང་ཚོད་ལས་རྣམ་པར་
གྲོལ། །གཙང་སྤྲའི་སྤྱོད་པ་རྣམ་པར་སྤངས། །དེ་ཡིས་གྲོང་པའི་ཆོས་སྤྱོད་དེ། །རྩོད་ལྡན་དུས་སུ་དངོས་གྲུབ་འགྱུར། །ཞེས་དང་། རྩོད་ལྡན་ཡོན་ཏན་བཞི་ཉིད་དེ། །དངོས་གྲུབ་ཉིད་དུ་ཐེ་ཚོམ་མེད། །ཅེས་ལམ་འདིས་དངོས་གྲུབ་འགྲུབ་པ་ལ་རྫོགས་
ལྡན་ལ་སོགས་པའི་དུས་གཞན་གསུམ་ལས་རྩོད་ལྡན་གྱི་དུས་ཉིད་བསྔགས་ལ། དེས་ན་ས་མྤུ་ཊ་ལས། དེ་ལྟར་དཀའ་བ་མེད་པའི་ཐབས། །ཀུན་མཁྱེན་ཐུགས་རྗེ་བཅས་པས་བསྔགས། །ཤིན་ཏུ་བདེ་བའི་སྒྲུབ་པའི་ཐབས། །བརྟུལ་ཞུགས་
སྤྱོད་པ་དཀའ་ཐུབ་སྤངས། །དེ་ལྟར་བདུད་རྩིའི་རོ་རྙེད་ནས། །ཉོན་མོངས་གཞོམ་ཕྱིར་མི་བརྩོན་གང་། །ཇི་ལྟར་དཀའ་ཐུབ་བརྟུལ་ཞུགས་དེས། །སངས་རྒྱས་ཉིད་དུ་བྱ་བར་ནུས། །རང་གི་བདེ་བའི་ཐབས་རྙེད་ནས། །གང་ཞིག་བདག་དོན་མི་བྱེད་པ། །
རྨོངས་པའི་བདག་ཉིད་དེ་ཡི་ནི། །སངས་རྒྱས་ཉིད་དུ་གང་དུ་འགྱུར། །ཡང་ནི་དེ་ནི་ཤེས་མི་འགྱུར། །འདིས་ནི་སངས་རྒྱས་ཐམས་ཅད་དུ། །སྐྱེ་བོ་དམ་པས་མཐོང་བ་ཉིད། །ལས་ཀུན་རྨི་ལམ་སྒྱུ་མ་ལྟར། སངས་རྒྱས་ཆོས་ལ་མི་ཤེས་
9-10-60b


པས། །འཁོར་བའི་རྒྱ་མཚོའི་ཕ་རོལ་ཏུ། །ཇི་སྲིད་མི་ཕྱིན་བར་དུ་བྱ། །ཞེས་འབྲོག་འགྱུར་དུ་འབྱུང་བའི་ཡང་ནི་ཞེས་པ་མན་ཆད་ལ། འགོས་འགྱུར་ལས། དེ་ནི་སླར་ཡང་གར་འགྲོ་བ། །དེ་ཡིས་ཤེས་པར་མི་འགྱུར་རོ། །དེས་ན་བདེ་བ་སྒྲུབ་པའི་ཐབས། །
ཚེགས་མེད་པར་ནི་རྙེད་པ་ཡི། །སྐྱེ་བོ་མཛེས་པ་ངེས་པར་འདིར། །ཐམས་ཅད་སྒྱུ་མ་རྨི་ལམ་བཞིན། །སངས་རྒྱས་ཉིད་དུ་བལྟས་ནས་ནི། །འཁོར་བའི་རྒྱ་མཚོའི་འཇིགས་པ་ལས། །ཇི་སྲིད་མ་རྒྱལ་བར་དུ་ནི། །སངས་རྒྱས་བཀའ་ཡི་ཆོས་སྤྱད་བྱ། །ཞེས་
འབྱུང་ངོ་། །དེ་རྣམས་ཀྱི་དོན་ནི་བྱ་དཀའ་བས་ཡིད་གདུང་བའི་དཀའ་སྤྱོད་ཀྱི་བརྟུལ་ཞུགས་རྣམས་དོར་ནས་འདོད་ཡོན་ལ་རང་བཞིན་ཤེས་པའི་སྒོ་ནས་ལོངས་སྤྱོད་པའི་ཤིན་ཏུ་བདེ་བས་བྱང་ཆུབ་སྒྲུབ་པའི་ལམ་འདི་འདྲ་བ་རྙེད་པའི་དུས་སུ་དེ་ལ་བརྩོན་
པར་མི་བྱེད་ན་བདག་ལས་རྨོངས་པ་སུ་ཞིག་ཡོད་སྙམ་པ་དང་། ད་རེས་འདི་ལ་མ་འབད་ན་དེ་ནས་བདག་ངན་འགྲོ་ལ་སོགས་པ་གར་འགྲོ་བ་མི་ཤེས་སོ་སྙམ་དུ་བསམས་ལ། བདེ་བ་ཁྱད་པར་ཅན་སྒོ་དུ་མས་བསྐྱེད་དེ་བདག་མེད་པའི་དེ་ཁོ་ན་
ཉིད་བསྒོམ་པའི་ཚུལ་དང་། བརྟན་གཡོ་ཐམས་ཅད་ཀྱི་རྩ་བ་རླུང་སེམས་ཙམ་ལས་སྒྱུ་མའི་སྐུར་བསྐྱེད་པའི་སྒོ་ནས་ཐམས་ཅད་ཧེ་རུ་ཀའི་རང་བཞིན་དུ་བལྟ་བ་ལ་འབད་དེ་འཁོར་བའི་བག་ཆགས་འཁྲུལ་བ་ཐམས་ཅད་སྦྱོང་བའི་ཁུར་གྱིས་མི་ངལ་
བར་བྱའོ། །དེའི་ཕྱིར་ལམ་ཐུན་མོང་བས་ལེགས་པར་རྒྱུད་སྦྱངས་པ་དང་། རྣམ་པར་དག་པའི་དབང་བསྐུར་བའི་དུས་སུ་ཁས་བླངས་པའི་དམ་ཚིག་དང་སྡོམ་པ་བསྲུང་བ་གཞིར་བྱས་ལ། ལམ་རིམ་པ་དང་པོ་ཐུན་སོ་སོ་ལ་བསྐྱངས་པའི་མཐར་
9-10-61a


ཕྱི་དང་ནང་གི་བདེ་བ་བསྐྱེད་ཐབས་ཀྱི་སྒོ་ནས་བདེ་བ་ཆེན་པོ་བསྐྱེད་ནས་བདེ་སྟོང་བསྒོམ་པ་དང་། དེའི་མཐར་སྒྱུ་མའི་སྐུར་ལྡང་བ་སོགས་མོས་པ་ཡིད་བྱེད་ཚུན་ཆད་ཀྱིས་ཀྱང་སྦྱང་ངོ་། །འབྲས་བུའི་བར་དུ་ཡང་དེ་བཞིན་དུ་བྱས་
ཏེ་ལམ་འདིའི་བག་ཆགས་བརྟན་པར་བྱས་ན་རྙེད་དཀའ་ལ་འཇིག་སླ་བའི་དལ་འབྱོར་གྱི་ལུས་ལ་སྙིང་པོ་ལོན་པ་ཡིན་ནོ། །འགྲོ་བའི་འདྲེན་མཆོག་རྡོ་རྗེ་སེམས་དཔའ་དེ། །དམིགས་མེད་བརྩེ་བས་ཀུན་ནས་བསྐྱོད་པ་ཡིས། །
གདུལ་བྱའི་དབང་པོའི་རིམ་པ་ཇི་བཞིན་དུ། །མདོ་དང་བྱ་བ་སྤྱོད་པ་རྣལ་འབྱོར་དང་། །གསང་མཐའ་རྣལ་འབྱོར་བླ་མེད་རྒྱུད་རྣམས་གསུངས། །ཁྱད་པར་ཟབ་མོ་རྣལ་འབྱོར་མ་ཡི་རྒྱུད། །དུང་ཕྱུར་གཅིག་དང་བྱེ་བ་ཕྲག་དྲུག་གསུངས། །དེ་ཡི་ནང་
ནས་རྒྱལ་མཚན་ཏོག་ལྟ་བུ། །དཔལ་ལྡན་འཁོར་ལོ་སྡོམ་པའི་རྩ་བའི་རྒྱུད། །བཤད་རྒྱུད་བཟང་ལ་མང་བས་གསལ་བྱས་པའི། །རྫོགས་པའི་རིམ་པ་རྣལ་འབྱོར་ཆེན་པོའི་གཞུང་། །ལམ་འདིས་མཆོག་བརྙེས་ལཱུ་ཨི་པ་ཡི་ལུགས། །གསལ་
མཛད་ལྭ་བའི་ན་བཟའ་ཅན་དང་ནི། །ཨ་ཏི་ཤ་དང་ཤེས་རབ་བསྲུང་བ་དང་། །རྣམ་གྲོལ་ཟླ་བ་ཀུ་མཱ་ར་སོགས་ཀྱི། །འགྲེལ་པ་དྲུག་དང་བོད་ཀྱི་བཤད་པ་དང་། རྒྱ་གར་མཁས་པའི་བདེ་མཆོག་གཞུང་མང་ལ། །བརྟེན་ནས་རྩ་བཤད་ཆ་མཐུན་
རྒྱུད་རྣམས་ནི། །ལེགས་པར་སྦྱར་ནས་བདེ་མཆོག་རྫོགས་རིམ་ནི། །ཀུན་གྱི་གནད་དོན་གསལ་བྱེད་འདི་བརྩམས་སོ། །རང་ཡུལ་དམན་ལ་ཆགས་པ་རིང་དུ་དོར། །གཞན་ཡུལ་དུ་ཡང་རྣམ་གཡེངས་བསྐྱུངས་ནས་ནི། །མདོ་སྔགས་
9-10-61b


གཞུང་ལ་ཕྱོགས་རེས་མ་ཚིམ་པར། །ཐོས་བསམ་བསྒོམ་པའི་ངལ་བ་མང་བསྟེན་པས། །མང་ཐོས་སྒྲུབ་ལ་བརྩོན་པའི་བློ་ཆེན་ནི། །དུ་མས་རིང་དུ་འབད་ཀྱང་རྟོགས་དཀའ་བའི། །མདོ་སྔགས་ལམ་གྱི་གནད་ལ་ངེས་རྙེད་ནས། །ལྟར་སྣང་ལམ་གྱིས་བཀྲི་བར་མི་ནུས་
ཐབས། །རྒྱལ་བ་དགྱེས་པའི་ལམ་མང་ཕྱེ་བ་ལ། །ནོངས་པར་གྱུར་ན་བསམ་པ་ཐག་པས་འཆགས། །རྣམ་དཀར་དགེ་བའི་ཕུང་པོ་ཅི་ཡོད་པ། །མར་གྱུར་འགྲོ་ཀུན་ཀུན་མཁྱེན་ཐོབ་ཕྱིར་བསྔོ། །ཟབ་ལམ་འདི་དང་ནམ་ཡང་མི་འབྲལ་ཞིང་། །ཐོས་བསམ་
བསྒོམ་པའི་བར་ཆད་ཞི་བ་དང་། །ཞིང་སྐྱེས་ལྷན་སྐྱེས་སྔགས་སྐྱེས་རྣལ་འབྱོར་མའི། །གྲོགས་ལས་ལྷན་སྐྱེས་བདེ་ཆེན་རྫོགས་པར་ཤོག །ཅེས་རྣལ་འབྱོར་གྱི་དབང་ཕྱུག་ལཱུ་ཨི་པའི་ལུགས་ཀྱི་རྫོགས་རིམ་རྣལ་འབྱོར་ཆེན་པོའི་གཞུང་གི་རྣམ་
བཤད་དངོས་གྲུབ་ཀྱི་སྙེ་མ་ཞེས་བྱ་བ་འདི་ནི། ལམ་འདིའི་བསྐྱེད་རྫོགས་གཉིས་ཀ་སྦྲེལ་ནས་ཉམས་སུ་ལེན་འདོད་པའི་བཤེས་གཉེན་མང་པོས་བསྐུལ་བ་དང་། ལཱུ་ནག་དྲིལ་གསུམ་གྱི་གཞུང་གི་རྩ་བ་ལཱུ་ཨི་པའི་ལུགས་སུ་སྣང་ཞིང་དེ་ལ་ཕྱོགས་
འདིར་བཤད་པ་མཐའ་ཆོད་པ་མི་སྣང་བར་མཐོང་ནས། རྫོགས་རིམ་ལུགས་གཞན་གཉིས་ཀྱི་གཞུང་གི་ཚིག་གི་དོན་དང་། དམིགས་པ་སྐྱོང་ལུགས་ཀྱི་རིམ་པ་འགའ་ཞིག་མ་གཏོགས་པ་ལུགས་གསུམ་གའི་རྫོགས་རིམ་གྱི་མཐའ་གཅོད་རྣམས་
མཐའ་ཆོད་པར་ཤཱཀྱའི་དགེ་སློང་དཔལ་འཁོར་ལོ་སྡོམ་པའི་རྣལ་འབྱོར་པ་ཤར་ཙོང་ཁ་པ་བློ་བཟང་གྲགས་པའི་དཔལ་གྱིས། འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་བའི་ཡི་གེ་པ་ནི་དཀའ་བཞི་པ་རིན་ཆེན་དཔལ་ལོ། །འདིས་
9-10-62a


ཀྱང་བསྟན་པ་རིན་པོ་ཆེ་སྤྱི་དང་། ཁྱད་པར་དུ་དཔལ་འཁོར་ལོ་བདེ་མཆོག་གི་རིམ་པ་གཉིས་ཀྱི་བསྟན་པ་རྣམས་ཕྱོགས་དུས་ཀུན་ཏུ་རྒྱས་པར་བྱེད་ནུས་པར་གྱུར་ཅིག། སརྦ་མངྒ་ལཾ།།       །།
9-10-62b


empty page