6-1-1a


༄༅། །རྗེ་ཐམས་ཅད་མཁྱེན་པ་ཙོང་ཁ་པ་ཆེན་པོ་བློ་བཟང་གྲགས་པའི་དཔལ་གྱི་བཀའ་འབུམ་ཆ་པའི་དཀར་ཆག་བཞུགས་སོ། །
6-1-1b


༄༅༅། །སྭསྟི། མ་སྨད་སྙིང་སྟོབས་ལྷོ་ལམ་ལས་འོངས་པའི། །དཔྱད་བཟོད་གཏམ་གྱི་དྲི་བསུང་ཡོངས་རྫོགས་བ། །ལུང་རིགས་མགྱོགས་འགྲོའི་ཤུགས་ཀྱིས་འཛམ་གླིང་ཁྱོན། །ཀུན་
ཁྱབ་འཇམ་མགོན་ཡབ་སྲས་ཞིང་འདིའི་དཔལ། །གང་དོའི་བཞེད་སྲོལ་འཛམ་བུའི་གསེར་བཞུན་རྒྱུན། །དབྱིག་ལྡན་སྒོག་མོའི་ལྟོ་བོར་ཡུན་འཁྱིལ་སླད། །དགའ་ལྡན་༸སྐུ་བཅར་དར་ཧན་མཁོན་པོ་ཡིས། །
འཛད་མེད་པར་གྱི་ཆོས་སྦྱིན་སྤེལ་བ་ལས། །སྔོན་རབས་མཁས་སྙེམས་མེས་རྒན་རྣམ་དཔྱོད་ཀྱིས། །མ་ལྕིགས་ཁུངས་ལྡན་མདོ་རྒྱུད་དཀའ་གནད་གཟུགས། །རྫོགས་བའི་ལེགས་བཤད་མཐོང་པུསྟ་
ཀ ཿ  ཆ་པའི་ཆོས་ཚན་གྲངས་རིམ་འདི་ན་བསྟར། ། ༼ཆ༽ བར་རྣམ་གཞག་རིམ་པའི་རྣམ་བཤད་དཔལ་གསང་བ་འདུས་པའི་གནད་དོན་གསལ་བ་ལ། 			༨༡ བཤད་རྒྱུད་རྡོ་རྗེ་འཕྲེང་བའི་ཟིན་བྲིས་ལ། 			༦
རྡོ་རྗེ་བཟླས་པའི་ཟིན་བྲིས་ལ། 			༨༤ དགོངས་པ་བླ་ན་མེད་པའི་རིམ་པའི་ཟིན་བྲིས་ལ། 			༣༧ མན་ངག་མཐར་ཐུག་བདག་བྱིན་རླབས་ལ། 			༡༠ མན་ངག་མཐར་ཐུག་གི་མངོན་པར་བྱང་ཆུབ་བའི་རིམ་པའི་བཤད་
པ་ལ། 			༡༣ རིམ་ལྔ་བསྡུས་པའི་ཟིན་བྲིས་ལ། 			༢༣ རྣལ་འབྱོར་བཞི་རིམ་ལ། 			༡༤ རྣལ་འབྱོར་བཞི་རིམ་ཊཀྐི་ལ། 			༤ འདུས་པའི་དཀའ་གནད་གསུང་བཞིན་ཟིན་བྲིས་ལ། 			༢ རྒྱལ་བས་བྱིན་གྱིས་མཛད་
6-1-2a


པའི་གསང་འདུས་ལེའུ་དང་པོའི་འགྲེལ་པའི་ཟིན་བྲིས་ལ། 			༧ ཁྲོ་བཅུའི་ཟིན་བྲིས་ལ། 			༤ ལྷག་པ་ཡི་ནི་ལྷ་གཅིག་ལ། 			༢ དཔལ་གསང་བ་འདུས་པའི་དཀྱིལ་འཁོར་གྱི་ཆོ་གའི་ངག་འདོན་
ལྷན་ཐབས་ལ། 			༡༧ དཔལ་གསང་བ་འདུས་པའི་ཡིག་ཆུང་ཉེར་གཅིག་སོགས། 			༨༠ དཀར་ཆག་ལ་  ༢  ཁྱོན་   ༣༧༦  བཞུགས། །
6-1-2b


empty page
6-2-1a


། རྣམ་གཞག་རིམ་པའི་རྣམ་བཤད་དཔལ་གསང་བ་འདུས་པའི་གནད་ཀྱི་དོན་གསལ་བ་ཞེས་བྱ་བ་ཆོས་ཀྱི་རྒྱལ་པོ་ཙོང་ཁ་པས་མཛད་པ་བཞུགས་སོ།། །།
6-2-1b


༄༅༅། །རྣམ་གཞག་རིམ་པའི་རྣམ་བཤད་དཔལ་གསང་བ་འདུས་པའི་གནད་ཀྱི་དོན་གསལ་བ་ཞེས་བྱ་བ། རྗེ་བཙུན་དམ་པ་ཐུགས་རྗེ་ཅན་རྣམས་ཀྱི་ཞབས་ལ་གུས་པས་
ཕྱག་འཚལ་ལོ། །གང་གི་དྲིན་གྱིས་རྡོ་རྗེ་ཐེག་པའི་གནད། །ཇི་བཞིན་རྟོགས་པས་དྲངས་པའི་དགའ་བདེའི་རོས། །ཡིད་ཀྱི་སྐྱེས་བུ་ཀུན་ནས་ཚིམ་མཛད་པ། །འཇམ་དབྱངས་བླ་མའི་ཞབས་ལ་གུས་
ཕྱག་འཚལ། །འོད་གསལ་ལྷ་ཡི་ལམ་ལས་འཁྲུངས། །ཟུང་འཇུག་དབང་པོའི་གཞུ་ལྟ་བུ། །དཔལ་ལྡན་དབང་པོའི་མགོན་དེ་ཡི། །མཛད་པས་ཁྱེད་རྣམས་སྐྱོང་གྱུར་ཅིག །གར་མཁན་མཆོག་
དེས་འགྲོ་བ་འདུལ་བའི་ཕྱིར། །སྣ་ཚོགས་རོལ་པའི་ཉམས་ཀྱིས་གར་མཛད་པས། །ཉིད་སྐུའི་ཆ་ཤས་གཉིས་ལྷག་སུམ་ཅུ་ཡི། །འཁོར་ལོ་མཆོག་ཏུ་སྤྲུལ་ལ་བདག་ཕྱག་འཚལ། །གང་ཞིག་
རྟོགས་ན་སྐྱེ་ཤི་བར་དོ་གསུམ། །སྐུ་གསུམ་ཉིད་དུ་བསྒྱུར་བའི་ཐབས་མཁས་མཆོག །དཔལ་ལྡན་འདུས་པའི་རྒྱུད་དུ་རྒྱས་བཏབ་པ། །རབ་གསལ་བཤད་པའི་རྒྱུད་ཀྱི་རྗེས་འབྲངས་ནས། །ཇི་
6-2-2a


བཞིན་བཀྲོལ་བས་སྐལ་བཟང་རྣམས་ལ་ནི། །དངོས་གྲུབ་མཆོག་གི་དགའ་སྟོན་སྩོལ་བ་ཡི། །རྒྱུད་རྒྱལ་འདུས་པའི་གནད་དོན་གསལ་མཛད་པ། །འཕགས་པ་ཡབ་
སྲས་ཞབས་ལ་གུས་བཏུད་ནས། །ཀླུ་སྒྲུབ་སྲས་མཆོག་ཀླུ་ཡི་བྱང་ཆུབ་ཀྱིས། །འཕགས་པའི་དགོངས་པ་གསལ་ཕྱིར་མཛད་པ་ཡི། །རྣམ་གཞག་རིམ་པའི་རྣམ་བཤད་སྔོན་མེད་པ། །འདུས་པའི་དོན་
གསལ་བདག་གིས་བཤད་ཀྱིས་ཉོན། །འདིར་བདག་ཅག་གི་སྟོན་པ་འཇིག་རྟེན་ཐམས་ཅད་ཀྱི་མིག་གཅིག་པུར་གྱུར་པ་དཔེ་ཟླ་མེད་པའི་མཁྱེན་པ་དང་བརྩེ་བ་དང་དེ་དག་གི་མཐུ་ཕུལ་དུ་བྱུང་བ་མངའ་བ་དེས། འདོད་
ཆགས་དང་བྲལ་བའི་སྐུར་སྤྲུལ་ནས་དམན་པ་ལ་མོས་པ་རྣམས་ལ་འདོད་ཆགས་དང་བྲལ་བའི་སྤྱོད་པ་དང་། རྒྱ་ཆེན་པོ་ལ་མོས་པ་རྣམས་ལ་ས་དང་ཕ་རོལ་ཏུ་ཕྱིན་པའི་སྤྱོད་པ་དང་། འཁོར་ལོས་སྒྱུར་བའི་
གཟུགས་སུ་སྤྲུལ་ནས་ཟབ་མོ་ལ་ལྷག་པར་མོས་པ་རྣམས་ལ་འདོད་ཆགས་ཀྱི་སྤྱོད་པ་སྟེ། སྤྱོད་པ་གསུམ་སྟོན་པའི་ཐེག་པ་དམན་པ་དང་། ཕ་རོལ་ཏུ་ཕྱིན་པའི་ཐེག་པ་ཆེན་པོ་དང་། རྡོ་རྗེ་ཐེག་པའི་
6-2-2b


གསུང་རབ་མཐའ་ཡས་པ་ཞིག་གསུངས་པ་རྣམས་ལས། གོང་ནས་གོང་དུ་ཇེ་མཐོ་ཇེ་མཐོར་སོང་བའི་མཐར་ཐུག་པའི་རྩེ་མོ་ནི་དཔལ་གསང་བ་འདུས་པ་ཡིན་པར་གསུངས་ཏེ། དགྲ་ནག་གི་རྒྱུད་ལས། རྒྱུད་ཀྱི་མཐར་ཐུག་འདུས་པ་སྟེ། །མ་བྱུང་འབྱུང་བར་མི་འགྱུར་
རོ། །ཞེས་དང་། འཇམ་དཔལ་གྱི་ཞལ་གྱི་ལུང་ལས་ཀྱང་། སངས་རྒྱས་ཀུན་གྱི་འདུས་པའི་རྒྱུད། །གསང་ཆེན་གསང་བ་ཆེས་གསང་བ། །གོང་ན་མེད་པའི་ལུང་ཆེན་པོ། །ཞེས་གསུངས་ཤིང་། སྒྲོན་གསལ་ལས་ཀྱང་། གསལ་བྱེད་ཀྱི་ཡི་གེའི་མཐའ་ཅན་
གྱི་རྒྱུད་སྡེ་ཇི་སྙེད་གསུངས་པ་ཐམས་ཅད་ཀྱི་རྩ་བ་ངས་མ་ཛའི་ཡི་གེས་བསྟན་པའི་འདུས་པ་ཡིན་ལ་མདོ་སྡེ་ཐམས་ཅད་ཀྱིའང་སྣོད་དུ་གྱུར་བས་ན་གསུང་རབ་ཀུན་གྱི་རྩེ་མོར་གསུངས་ཏེ་ཇི་སྐད་དུ། ཇི་སྲིད་ཡ་ར་ལ་ཧའི་བར། །ཀ་ཁ་གྷ་མཐའ་ཎ་ཛའི་
མཐའ། །ད་ངྷའི་མཐའ་དང་མ་མཐར་བཅས། །དེ་དེའི་རྩ་བ་ཡི་གེ་གསུམ། །ཐུབ་པ་ཆེན་པོས་ཆོས་ཕུང་པོ། །བརྒྱད་ཁྲི་བཞི་སྟོང་གསུངས་པ་ཡི། །དཔལ་ལྡན་འདུས་འདི་སྣོད་ཡིན་ཏེ། །དེ་བས་དེ་ནི་རྒྱུད་ཀྱི་རྩེ། །ཞེས་སོ། །དེའི་ཕྱིར་ཚུལ་བཞིན་དུ་དཔྱོད་
པའི་ཤེས་རབ་དང་། བཟློག་ཏུ་མེད་པའི་དད་པ་དང་། རྒྱུན་ཆད་པ་མེད་པའི་བརྩོན་འགྲུས་ལ་སོགས་པའི་འཕགས་པའི་ནོར་གྱི་འབྱོར་པ་དང་ལྡན་པའི་སྐལ་བ་དང་ལྡན་པ་དག་གིས་ནི། རྣལ་འབྱོར་གྱི་དབང་ཕྱུག་ཨིནྡྲ་བོ་ངྷི་དང་མགོན་པོ་ཀླུ་སྒྲུབ་ལ་སོགས་པ་
བགྲང་ལས་འདས་པའི་དཔའ་བོ་དང་རྣལ་འབྱོར་མ་ཡོན་ཏན་གྱི་ཕུང་པོ་ཆེན་པོ་རྣམས་ཀྱིས་གཤེགས་ཤིང་སླར་ཡང་གཤེགས་པར་འགྱུར་བའི་བགྲོད་པ་གཅིག་པའི་ལམ་དཔལ་གསང་བ་འདུས་པ་ནས་གསུངས་པའི་རྡོ་རྗེ་འཆང་ཆེན་པོའི་ལམ་གྱི་རིམ་པ་ལ་
6-2-3a


འབད་པ་དྲག་པོས་འཇུག་པར་རིགས་ཤིང་། དེ་འདྲ་བའི་ཡོན་ཏན་མེད་པས་ཀྱང་ཐ་ན་སྨོན་ལམ་གྱི་ཡུལ་དུ་བྱས་ནས་ཀྱང་བསྒྲུབ་པར་བྱ་སྟེ། ཞལ་ལུང་ལས། དེ་བས་རབ་ཏུ་འབད་པ་ཡིས། །མཆོག་གི་དེ་ཉིད་རབ་གསང་གསང་། །
སྨོན་ལམ་གྱིས་ཀྱང་ཐ་ན་བསྒྲུབ། །བསྒྲུབ་པ་ལ་ནི་ཤིན་ཏུ་འབད། །ཅེས་གསུངས་སོ། །དེ་ལ་འཇུག་པའི་རིམ་པ་ཡང་ཕྱིའི་རྐྱེན་བཤེས་གཉེན་དམ་པ་ཆེས་རྙེད་དཀའ་བ་དང་ནང་གི་རྐྱེན་དལ་འབྱོར་བཟང་པོ་རྙེད་དཀའ་ཞིང་རྙེད་པ་ཡང་རླུང་ནང་གི་མར་མེ་ལྟར་སྐད་
ཅིག་ཀྱང་མི་སྡོད་པར་ཤིན་ཏུ་གཡོ་བའི་ཚུལ་རྣམས་ལེགས་པར་བསམ་པ་དང་། བྱམས་པ་དང་སྙིང་རྗེའི་རྩ་བ་ཅན་གྱི་བྱང་ཆུབ་ཀྱི་སེམས་བརྟན་པར་བསྐྱེད་ཅིང་སྦྱིན་པ་ལ་སོགས་པའི་བྱང་སེམས་ཀྱི་སྤྱོད་པ་ལ་བསླབས་ཏེ་ཟབ་མོ་རྡོ་རྗེ་ཐེག་པ་ལ་མོས་
པ་བརྟན་པ་ན། གསང་བ་འདུས་པ་ལ་སོགས་པའི་དཀྱིལ་འཁོར་དུ་དབང་བསྐུར་ནས་དམ་ཚིག་དང་སྡོམ་པ་ལེགས་པར་མནོས་པ་དེ་ཚུལ་བཞིན་དུ་བསྲུང་བ་ཅིག་གཞིར་བྱས་ནས་སྔགས་ཀྱི་ལམ་སྒོམ་པ་ནི་སྔགས་ལ་མཁས་པའི་ཤིང་རྟ་ཆེན་པོ་རྣམས་ཀྱི་
ལུགས་ཡིན་ཏེ་སྒྲུབ་ཐབས་ཀུན་བཟང་ལས། དལ་འབྱོར་འདི་ནི་ཤིན་ཏུ་གཡོ་བ་དང་། །འཇིག་རྟེན་སྐྱེ་བོ་དམ་པ་ཕྲང་རྙེད་དཀའ། །དེ་བས་ཤེས་རབ་ཐབས་ལ་གཞོལ་བ་ཡི། །ཡིད་ལ་བྱེད་པའི་མཆོག་དེ་བསྒྲུབ་པར་བྱ། །དེ་ལ་སྔགས་པས་སྙིང་རྗེའི་སྟོབས་
ཀྱིས་ནི། །བྱང་ཆུབ་མཆོག་ཏུ་སེམས་ནི་བསྐྱེད་པ་དང་། །གཏོང་བ་ལ་སོགས་ཡོན་ཏན་རྣམས་ཀྱིས་བརྒྱན། །ཟབ་མོའི་ཚུལ་དག་ལ་ནི་ལྷག་པར་མོས། །དཔལ་ལྡན་འདུས་པའི་དཀྱིལ་འཁོར་ཆོ་ག་ཡིས། །རང་གིས་དབང་བསྐུར་ཕུན་སུམ་ཚོགས་
6-2-3b


ལྡན་ཞིང་། །ཆོ་ག་བཞིན་དུ་རྗེས་གནང་ཐོབ་པ་ཡིས། །བློ་དང་ལྡན་པས་རང་སྔགས་མཉེས་པར་བྱ། །ཞེས་དང་། ཞལ་ལུང་ལས་ཀྱང་། དེ་བས་ཆུ་འཁོར་དྲག་པོའི་ཁར་ལྷུང་ལྟར། །ལུས་དང་ངག་དང་སེམས་ཀྱིས་བརྩོན་འགྲུས་བསྐྱེད། །རིམ་པར་སྔོན་
བཞིན་རབ་ཏུ་བསྒྲུབ་པར་བྱ། །དལ་འབྱོར་འདི་ནི་ཤིན་ཏུ་གཡོ་སླ་བས། །ཇི་ལྟར་རླུང་གིས་མར་མེ་གསོད་པ་ལྟར། །སྐད་ཅིག་ཙམ་དུ་མི་སྡོད་དུས་འདའ་བྱེད། །དེ་བས་འདི་ནི་ཆུད་གསན་མི་བྱ་སྟེ། །དངོས་ཀུན་དེ་ཉིད་མཆོག་ཆེན་རབ་བརྩོན་བྱ། །ཞེས་
གསུངས་པ་ལྟར་རོ། །ལམ་གྱི་རིམ་པ་དེ་དག་ནི་གསུང་རབ་སྦྱི་ལ་ངེས་པ་སྟེར་བའི་གལ་པོ་ཆེ་ཡིན་པས་སྔར་ཡང་བྱང་ཆུབ་ལམ་གྱི་རིམ་པར་རྒྱས་པར་བཤད་ཅིང་སླར་ཡང་སྔགས་དང་བསྟུན་ནས་གཞུང་གཞན་གྱི་འགྲེལ་པར་འཆད་པར་འདོད་པས་འདིར་
དེ་ཙམ་ལས་མི་བཤད་དོ། །འོ་ན་སྔར་བཤད་པའི་རྟེན་དེས་སྔགས་ཀྱི་ལམ་ཇི་འདྲ་བ་ཞིག་བསྒོམ་པར་བྱ་སྙམ་ན། འདུས་པའི་རྒྱུད་ཕྱི་མ་ལས། སངས་རྒྱས་རྣམས་ཀྱིས་ཆོས་བསྟན་པ། །རིམ་པ་གཉིས་ལ་ཡང་དག་གནས། །བསྐྱེད་པ་ཡི་ནི་རིམ་
པ་དང་། །རྫོགས་པ་ཡི་ནི་རིམ་ཉིད་དོ། །ཞེས་གསུངས་པ་འདི་རྩ་རྒྱུད་ལེའུ་བཅུ་འདུན་པོ་ཐམས་ཅད་ཀྱི་དོན་རིམ་པ་གཉིས་སུ་འདུ་བའི་ཁུངས་སུ་སྒྲོན་གསལ་ལས་དྲངས་པས་ན། བསྒོམ་པར་བྱ་བའི་ལམ་ནི་རིམ་པ་གཉིས་ཡིན་ནོ། །འདིར་མ་ཟད་
རྣལ་འབྱོར་ཆེན་པོའི་རྒྱུད་ཐམས་ཅད་ཀྱི་ལམ་ཡང་རིམ་པ་གཉིས་སུ་འདུ་བས་ན་སྔགས་པས་གང་ཞིག་རྟོགས་ན་སྔགས་ཀྱི་ལམ་ཐམས་ཅད་ཀྱི་གནད་ཁྲོལ་བ་ལམ་རིམ་པ་གཉིས་ལ་མཁས་པར་བྱའོ། །དེས་ན་རྒྱུད་སྡེ་རིན་པོ་ཆེའི་དོན་རྣམས་
6-2-4a


ཤིང་རྟ་ཆེན་པོ་དག་གིས་ལེགས་པར་བཀྲལ་བའི་རིམ་པ་གཉིས་ཀྱི་རྣམ་གཞག་བྱས་པ་དང་མི་མཐུན་པའི་ཟབ་པར་འདོད་པའི་གདམས་པ་ལ་རིང་དུ་འབད་ཀྱང་ས་བཅས་པ་ཅི་ཡང་མི་འབྱུང་བས། ཤེས་རབ་ཅན་རྣམས་
ཀྱིས་རྒྱུད་སྡེ་དང་དེའི་དགོངས་འགྲེལ་གྱི་གཞུང་ཆེན་མོ་རྣམས་གདམས་ངག་ཏུ་འཆར་བའི་ཐབས་ལ་འབད་པར་རིགས་སོ། །རིམ་པ་གཉིས་ལ་སློབ་པ་ཡང་ཐོག་མར་སྐས་ཀྱི་གདང་བུ་འོག་མ་དང་འདྲ་བའི་བསྐྱེད་རིམ་ལ་སློབ་པ་ཡིན་ཏེ་རིམ་
ལྔ་ལས། བསྐྱེད་པའི་རིམ་ལ་ལེགས་གནས་ཤིང་། །རྫོགས་པའི་རིམ་པ་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟ་བུར་གསུངས། །ཞེས་སོ། །འདི་ལ་འདུས་པའི་སྒྲུབ་ཐབས་རིམ་པ་དང་པོ་
དངོས་ནི་མདོར་བྱས་ནས་གསུངས་པའི་ཏིང་ངེ་འཛིན་གསུམ་ཡན་ལག་དང་བཅས་པ་ཡིན་ལ། མངོན་རྟོགས་དེ་རྩ་རྒྱུད་ཀྱི་གཞུང་གང་གིས་བསྟན་པའི་ཚུལ་གྱིས་ལུང་གིས་སྒྲུབ་པ་ནི་མདོ་དང་བསྲེས་པའོ། །མངོན་རྟོགས་ཀྱི་ལམ་དེ་དག་དེ་ལྟར་
སྒོམ་པའི་རྒྱུ་མཚན་གྱི་གནད་ལ་ངེས་པ་སྟེར་ཞིང་མངོན་རྟོགས་པ་ཐེ་ཚོམ་གྱི་གནས་གཞན་ཡང་མང་དུ་བཅད་ནས་བསྐྱེད་རིམ་གཙོ་བོར་སྟོན་ཞེས་རྫོགས་རིམ་གྱི་གནད་འགའ་ཞིག་ཀྱང་སྟོན་པ་ནི་རྣམ་གཞག་རིམ་པ་སྟེ་དེ་ནི་འདིར་གང་བཤད་པར་
བྱ་བའོ། །འདི་ལ་གསུམ་བཤད་པ་ལ་འཇུག་པའི་བྱ་བ། བཤད་པ་ཉིད་ཉེ་བར་དགོད་པ། བཤད་པ་མཐར་ཕྱིན་པའི་བྱ་བའོ། །དང་པོ་ལ་གཉིས་ལས་མཆོད་པར་བརྗོད་པ་ནི། ཕྱག་ནི་འདུད་པ་སྟེ་དེ་བྱས་ཞེས་དྲང་ངོ་། །ཡུལ་གང་ལན་རྡོ་རྗེ་
6-2-4b


འཆང་ལའོ། །དེ་ནི་སྐུ་དང་གསུང་དང་ཐུགས་རྡོ་རྗེ་གསུམ་གང་ལ་དབྱེར་མི་ཕྱེད་པར་ལྡན་པའི་སྐུའོ། །གང་གིས་ན་སློབ་དཔོན་ཀླུའི་བློས་སོ། །དུས་ནམ་གྱི་ཚེ་ན་རྣམ་གཞག་རིམ་པ་རྩོམ་པའི་དང་པོར་རོ། །དགོས་པ་ནི་རང་དམ་པར་རྟོགས་པ་དང་གཞན་དང་
བ་བསྐྱེད་པ་དང་རྩོམ་པའི་བར་ཆད་ཟློག་པའི་དོན་དུའོ། །ཏེ་ཞེས་པ་ཁྲུས་བྱས་ཏེ་ཟས་ཟ་ཞེས་པ་ལྟར་བྱ་བ་ལ་འཇུག་པའི་རིམ་པ་སྟོན་པས་ཕྱག་བྱས་ནས་བསྟན་བཅོས་རྩོམ་ཞེས་སྟོན་པའོ། །བརྩམ་པར་དམ་བཅའ་བ་ནི། བཤད་པར་བྱ་ཞེས་དྲང་
ངོ་། །གང་ན། འདུས་པ་ནི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཀྱི་གསང་བ་གསུམ་ཚོགས་པའམ་དབྱེར་མི་ཕྱེད་པ་རྡོ་རྗེ་འཆང་སྟེ་རྒྱུད་ཕྱི་མ་ལས། །སྐུ་གསུང་ཐུགས་ནི་རྣམ་པ་གསུམ། །གསང་བ་ཞེས་ནི་བསྟན་པ་ཡིན། །སངས་རྒྱས་
ཐམས་ཅད་ཅེས་བྱ་བ། །ཚོགས་པ་འདུས་པ་ཡིན་པར་བཤད། །ཅེས་སོ། །དེ་སྒྲུབ་པའི་ཐབས་ནི་མདོར་བྱས་ནས་འབྱུང་བའི་ཏིང་ངེ་འཛིན་གསུམ་འཁོར་དང་བཅས་པའོ། །དེའི་ཡན་ལག་ནི་འདི་སྒྲུབ་ཐབས་དེའི་ཆ་ཤས་སུ་གྱུར་པ་ཡིན་གྱི་རང་དབང་
དུ་མི་གནས་པའོ། །རྣམ་པར་བཞག་པའི་རིམ་པ་ནི་རྣམ་པར་དགོད་པ་ལ་སོགས་པ་བཞི་སྟེ་དེ་བཞི་སྟེ་དེ་བཤད་བྱར་བཀོད་པའོ། །དེའི་དགོས་པ་ནི་ཤེས་རབ་སྡོང་བུ་ལས། དམ་པ་མང་པོ་ཁས་འཆེ་མི་བྱེད་ལ། །གལ་ཏེ་དཀའ་བས་ཁས་ནི་བླངས་གྱུར་ན། །
རྡོལ་རི་མོ་བྲིས་པ་ལྟ་བུར་ནི། །ཤི་ཡང་གཞན་དུ་བྱེད་པར་མི་འགྱུར་རོ། །ཞེས་གསུངས་པ་ལྟར་རྩོམ་པ་མཐར་ཕྱིན་པའི་ཆེད་དུའོ། །གཉིས་པ་ལ་གཉིས། རྣམ་གཞག་མདོར་བསྟན་པ། རྒྱས་པར་བཤད་པའོ། །དང་པོ་ནི། འདུས་པའི་སྒྲུབ་ཐབས་
6-2-5a


ཀྱི་རྣམ་གཞག་རིམ་པ་རྩོམ་པར་དམ་བཅས་པ་དེ་ལ་ཐོག་མར་གང་གི་རྣམ་གཞག་འཆད་པའི་སྒྲུབ་ཐབས་མདོ་ཙམ་དུ་བསྟན་ན་རྟེན་དང་བརྟེན་པ་བསྐྱེད་པ་གཉིས་ཀྱི་རྟེན་བསྐྱེད་པའི་དང་པོར་དངོས་པོ་མེད་པ་ཞེས་བྱ་བ་ལ་སོགས་
པའི་ཚིགས་སུ་བཅད་པ་བརྗོད་ལ་སྣོད་དང་སོགས་པའི་སྒྲས་བསྡུས་པ་བཅུད་ཀྱི་དངོས་པོ་རྣམས་སྟོང་པོ་ཉིད་དུ་གཞུག་པ་སྟེ་བསྒོམ་པར་བྱའོ། །རེ་ཞིག་ནི་སྔོན་ལ་འདི་བྱ་ལ། དེ་ནས་འདི་བྱའོ་ཞེས་རིམ་པ་སྟོན་པའོ། །དེའི་རྗེས་ནས་ནམ་མཁའི་དབྱིངས་
ཞེས་བྱ་བ་ལ་སོགས་པས་སའི་ཆ་བསྐྱེད་པའི་སྟེང་དུ་བྷྲུཾ་ལས་གཞལ་ཡས་ཁང་བསྐྱེད་པ་དེར་མི་བསྐྱོད་པ་ལ་སོགས་པའི་ལྷ་སོ་གཉིས་ཀྱི་འཁོར་ལོ་ཐམས་ཅད་ལྷག་པར་མོས་པ་ཙམ་གྱིས་རང་རང་གི་གདན་ལ་དགོད་པར་བྱའོ། །འདི་ལ་བོད་ཀྱི་བླ་མ་ཁ་
ཅིག་རིགས་སུའི་ཟློས་པ་པོ་ཡིན་ཡང་ལྷག་མོས་ཀྱི་གཙོ་བོ་རྡོ་རྗེ་འཆང་གིས་བྱེད་པ་ལ་འདིར་མི་བསྐྱེད་པ་སྨོས་པ་ནི་དེའི་རིགས་ཀྱི་ཟློས་པ་པོ་ལ་དགོངས་པ་ཡིན་གསུངས་པ་ནི་མི་འཐད་དེ། འདིར་མི་བསྐྱོད་པ་དཀྱིལ་འཁོར་ལ་དགོད་བྱར་གསུངས་ཀྱི་
དགོད་པ་པོར་མ་བཤད་པས་ཡི་གེའི་དོན་དུ་མི་སྣང་བའི་ཕྱིར་རོ། །བླ་མ་གཞན་གྱིས་ནི་སྒྲོན་མ་རབ་གསལ་དང་འགྲེལ་པ་རིན་ཆེན་ཕྲེང་བར་མི་བསྐྱོད་པ་ཞེ་སྡང་རྡོ་རྗེ་ལྷག་མོས་ཀྱི་གཙོ་བོར་ཤད་པ། མདོར་བྱས་དང་མོད་བསྲེ་དང་ཟླ་བ་གྲགས་པས་
རྡོ་རྗེའི་འཆང་དུ་གསུངས་པའི་ལུང་གིས་བཀག་ནས་མི་བསྐྱོད་པ་གཙོ་བོ་མ་ཡིན་པར་འཆད་དོ། །གལ་ཏེ་སློབ་དཔོན་གྱིས་ལྷག་མོས་ཀྱི་གཙོ་བོ་རྡོ་རྗེ་འཆང་དུ་གསུངས་ན་འདིར་མི་བསྐྱོད་པར་བཤད་པ་ཇི་ལྟར་ཡིན་སྙམ་ན། འཕགས་པའི་གཞུང་
6-2-5b


གཉིས་དང་སྒྲོན་གསལ་ལ་སོགས་པའི་ཟླ་གྲགས་ཀྱི་གཞུང་རྣམས་སུ་ཡང་རྡོ་རྗེ་འཆང་དུ་གསལ་བར་གསུངས་ཤིང་ཁྱད་པར་དུ་མདོ་བསྲེ་ལས། གནས་བསྐྱེད་པ་སྔོན་དུ་འགྲོ་བས་རྡོ་རྗེ་གསུམ་བསྐྱེད་པ་བསྒོམ་པར་བྱའོ་ཞེས་གསུངས་པས་
ལྷག་པར་མོས་པ་ཅན་གྱི་སེམས་ཀྱིས་བདག་ཉིད་རྡོ་རྗེ་འཆང་ཆེན་པོ་ཉིད་དུ་གྱུར་ནས། །ཞེས་གསུངས་པ་དང་། འདིར་ཡང་། དེ་ནས་རྣམ་པར་ཤེས་པའི་བདག་པོ་རྡོ་རྗེ་འཆང་ཆེན་པོ་སེམས་ཅན་བསྐྱེད་པར་མཛད་པ་པོས་སྣོད་ཀྱི་འཇིག་རྟེན་བསྐྱེད་
པའི་འོག་ཏུ་སེམས་ཅན་གྱི་ཁམས་ངེས་པར་སྤྲུལ་པར་མཛད་དེ། གནས་ནི་སྒྲུབ་པ་སྔོན་འགྲོ་བས། །རྡོ་རྗེ་གསུམ་བསྐྱེད་བསྒོམ་པར་བྱ། །ཞེས་གསུངས་པའི་ཕྱིར་རོ། །ཞེས་གསུངས་པ་གཉིས་དོན་གཅིག་ཏུ་སྣང་བས་སློབ་དཔོན་འདིས་ཀྱང་
རྡོ་རྗེ་འཆང་དུ་བཞེད་མོད་ཀྱང་མི་བསྐྱོད་པར་གསུངས་པ་ནི། ལེའུ་བཅུ་གཅིག་པའི་སྒྲོན་གསལ་ལས། བཅོམ་ལྡན་འདས་རྡོ་རྗེ་མི་བསྐྱེད་པ་སྟེ་རྡོ་རྗེ་མི་བསྐྱོད་པ་སྟེ་རྡོ་རྗེ་འཆང་ཆེན་པོས་དེ་སྐད་ཅེས་བཀའ་སྩལ་ཏོ། །ཞེས་གསུངས་ཤིང་རྡོ་རྗེ་འཆང་ལ་དེ་བཞིན་གཤེགས་
པ་གཞན་གྱི་མིང་གིས་བཏགས་པའི་བཤད་པ་ཡང་མང་བས་མི་འགལ་ལོ། །ལྷ་མོས་བསྒོམས་པ་དེའི་འོག་ཏུ་རྣལ་འབྱོར་དང་རྗེས་སུ་རྣལ་འབྱོར་གྱི་རིམ་པས་ལོངས་སྐུ་རྡོ་རྗེ་འཆང་དང་། ཤིན་ཏུ་རྣལ་འབྱོར་དང་རྣལ་འབྱོར་ཆེན་པོའི་རིམ་
པས་སྤྲུལ་སྐུ་རྡོ་རྗེ་འཆང་ཆེན་པོའི་བདག་ཉིད་དུ་བསྐྱེད་དེ། དེ་ནས་ཕྱག་རྒྱ་འདུ་བྱ་བ་སྔོན་དུ་འགྲོ་བས་ཡབ་ཡུམ་གྱི་དབང་པོ་གཉིས་མཉམ་པར་སྦྱར་བ་ལས་ལྷ་སོ་གཉིས་ཀྱི་དཀྱིལ་འཁོར་གྱི་ལྷ་རྣམས་ཕྱུང་སྟེ། དཀྱིལ་འཁོར་རྒྱལ་མཆོག་
6-2-6a


བྱའོ། །དེ་ནས་ལྷ་དེ་རྣམས་དང་ཕྲ་མོའི་རྣལ་འབྱོར་བསྒོམ་པ་དང་ལྷ་རྣམས་ཀྱི་ཐུགས་བསྐུལ་པའི་བཟླས་པ་བྱས་ནས་གཙོ་བོ་ཞུ་བ་དང་དེ་ལ་གླུས་བསྐུལ་བ་དང་དེའི་ངོར་བཞེངས་པ་ལ་བསྟོད་ཅིང་མཆོད་པ་བྱས་པའི་མཐར་
གཤེགས་སུ་གསོལ་བ་སྟེ་འཁོར་གྱི་ལྷ་རྣམས་གཙོ་བོ་ལ་བསྡུ་བ་དང་། དེས་མཚོན་ནས་སེམས་ཅན་རྣམས་ལྷར་བྱས་པ་ཡང་རང་ལ་སྡུད་པ་འདི་ནི་མངོན་རྟོགས་སྒོམ་པའི་རིམ་པ་མདོར་བསྡུད་ཏེ་བསྟན་པའོ། །གཉིས་པ་ལ་བཞི། རྣམ་པར་
དགོད་པའི་རྣམ་གཞག་རིམ་པ། སྐུའི་དཀྱིལ་འཁོར་གྱི་རྣམ་གཞག་རིམ་པ། ཕྱུང་བའི་དཀྱིལ་འཁོར་གྱི་རྣམ་གཞག་རིམ་པ། དོན་དམ་པའི་དཀྱིལ་འཁོར་གྱི་རྣམ་གཞག་རིམ་པའོ། །དང་པོ་ནི། ད་ནི་རྣམ་པར་བཞག་པ་བཞིའི་དང་པོ་སྔར་ཉེ་
བར་བསྡུས་ནས་མདོར་བསྟན་པ་རྒྱས་པར་བརྗོད་པར་བྱ་སྟེ་དེ་ནི་སྣོད་བཅུད་ཀྱི་སྲིད་པའི་རིམ་པ་དང་རྟེན་དང་བརྟེན་པའི་རྣལ་འབྱོར་གཉིས་དཔེ་དོན་དུ་རྣམ་པར་བཀོད་ནས་བསྒོམ་པའི་ཚུལ་སྟོན་པས་རྣམ་པར་དགོད་པའི་རིམ་པའོ། །འདི་ལ་གསུམ་སྣོད་ཀྱི་
སྲིད་པའི་རིམ་པ་དང་མཐུན་པར་བསྒོམ་པ། བཅུད་ཀྱི་སྲིད་པའི་རིམ་པ་དང་མཐུན་པར་བསྒོམ་པ། དེ་དག་དང་བསྟུན་ནས་བསྒོམ་པར་གསུངས་པའི་དགོངས་པ་གཏན་ལ་དབབ་པའོ། །དང་པོ་ལ་གཉིས། སྣོད་ཞིག་ཅིང་སྟོངས་པ་དང་མཐུན་པར་བསྒོམ་
པ། སྣོད་ཆགས་པའི་རིམ་པ་དང་མཐུན་པར་བསྒོམ་པའོ། །དང་པོ་ནི། མདོར་བྱས་ལས། དམ་པའི་དོན་དུ་དངོས་པོ་རྣམས། །ཞེས་པ་ནས་ཡེ་ཤེས་ས་གཞི་བྱིན་གྱིས་བརླབ། །ཅེས་བའི་བར་གྱི་གཞུང་གིས་རྟེན་བསྐྱེད་པའི་ཐོག་མར་སྣོད་བཅུད་
6-2-6b


རྣམས་སྟོང་པ་ཉིད་དུ་སྒོམ་པར་གསུངས་ན་དེ་ལྟར་སྒོམ་པའི་རྒྱུ་མཚན་ཅི་ཡིན་སྙམ་ན། ལེའུ་དྲུག་པའི་སྒྲོན་གསལ་ལས། འདི་ནི་སྲིད་པ་སྐྱེ་བའི་རིམ་པ་ལྟར་སྒོམ་པ་རྣམས་ལ་དེ་བཞིན་གཤེགས་པ་རྣམས་ཀྱི་ཡུངས་ཀར་གྱི་སྒྲས་མཚོན་པར་མཛད་དེ། 
ཞེས་གསུངས་པ་ལྟར་རྣལ་འབྱོར་ཆེན་པོའི་རྒྱུད་ཀྱི་རྟེན་དང་བརྟེན་པའི་བསྐྱེད་རིམ་བསྒོམ་པ་ནི་སྲིད་པ་སྐྱེ་བའི་རིམ་པ་ལྟར་སྒོམ་པ་ཡིན་ལ། དེ་ལ་ཡང་ཐོག་མར་སྣོད་ཀྱི་སྲིད་པ་སྟོངས་པ་དང་མཐུན་པར་སྒོམ་དགོས་པས་སྣོད་ལ་སོགས་པ་སྟོང་པ་ཉིད་དུ་
སྒོམ་པ་གསུངས་སོ། །འདི་ལ་གཉིས། མཐུན་ཡུལ་སྣོད་འཇིག་པའི་རིམ་པ། དེ་དང་རྗེས་སུ་མཐུན་པར་བསྒོམ་པའོ། །དང་པོ་ལ་གཉིས། སྣོད་འཇིག་པའི་སྔོན་དུ་བཅུད་འཇིག་ཚུལ། དེའི་འོག་ཏུ་སྣོད་འཇིག་ཚུལ་དངོས་སོ། །དང་པོ་ནི། གང་གི་ཚེ་
སྟོང་གསུམ་འདིར་འཇིག་རྟེན་དུ་འཇིག་པ་ཐོབ་པ་ནི་འཇིག་རྟེན་ཆགས་ནས་བར་བསྐལ་ཉི་ཤུར་གནས་པ་དེ་ལས་ནི་བྱུང་ལ་བར་བསྐལ་ཉི་ཤུར་འཇིག་རྟེན་འཇིག་པར་འགྱུར་བ་དེ་ལ་ཞུགས་ཤིང་དེའི་འགོ་བརྩམས་པ་སྟེ་དེ་ནས་བཟུང་སྟེ་ས་འོག་ས་སྟེང
ས་བླའི་ཁམས་གསུམ་པའི་སེམས་ཅན་གཅིག་ཀྱང་མ་ལུས་པར་གྱུར་པ་ན་བཅུད་ཞིག་པ་ཡིན་ནོ། །ས་བླའི་ཡ་མཐའ་ནི་མེས་འཇིག་གི་དབང་དུ་བྱས་ན་བསམ་གཏན་དང་པོ་མན་ཆད་དོ། །དེ་ཡང་ཐོག་མར་དམྱལ་བ་ནས་འཇིག་པས་སྟོང་གསུམ་འདིའི་
དམྱལ་བར་སེམས་ཅན་གསར་དུ་མི་སྐྱེ་ཞིང་སྔར་སྐྱེས་པ་རྣམས་ཀྱང་ཤི་འཕོས་ནས་དམྱལ་བ་སྟོངས་པར་འགྱུར་རོ། །དེ་ནས་དུད་འགྲོ་དང་དེ་ནས་ཡི་དྭགས་ཀྱི་གནས་སྟོངས་པར་འགྱུར་ཏེ། དེ་ཡང་ངན་འགྲོ་དེ་དག་ད་དུང་མྱོང་ངེས་ཀྱི་ལས་ཡོད་
6-2-7a


པ་རྣམས་འཇིག་རྟེན་གཞན་གྱི་དམྱལ་བ་ལ་སོགས་པར་སྐྱེའོ། །དུད་འགྲོ་ནི་རྒྱ་མཚོ་ཆེན་པོ་ན་གནས་པ་རྣམས་སྔར་འཇིག་ལ་མི་དང་ལྷན་ཅིག་འཁོད་པ་རྣམས་དེ་དག་དང་ལྷན་ཅིག་ཏུ་འཇིག་པར་མཛོད་འགྲེལ་ལས་
བཤད་དེ་འདོད་ལྷའི་གནས་ཀྱི་དུད་འགྲོ་ལ་ཡང་འདྲ་བར་མངོན་ནོ། །དེ་ནས་འཛམ་བུ་གླིང་པའི་མི་གཅིག་གིས་སློབ་དཔོན་མེད་པར་ཆོས་ཉིད་ཀྱིས་ཐོབ་པའི་བསམ་གཏན་དང་པོ་ལ་སྙོམས་པར་འཇུག་ལ་དེས་དེ་ལས་ལངས་ནས་ཀྱེ་མ་དབེན་པ་ལས་
སྐྱེས་པའི་དགའ་བ་དེ་ནི་བདེ་བ་དང་ཞི་བ་ཡིན་ནོ་ཞེས་སྨྲའོ། །སྒྲ་དེ་ཐོས་ནས་མི་གཞན་དག་ཀྱང་སྙོམས་པར་འཇུག་ཅིང་དེ་དག་ཤི་ནས་ཚངས་པའི་འཇིག་རྟེན་དུ་སྐྱེ་སྟེ་འཛམ་བུ་གླིང་པ་རྣམས་སྟོངས་པར་འགྱུར་རོ། །དེ་ནས་ཤར་ལུས་འཕགས་པོ་
དང་དེ་ནས་ནུབ་བ་གླང་སྤྱོད་པའི་མི་རྣམས་ཤི་ནས་ཚངས་པའི་འཇིག་རྟེན་དུ་སྐྱེ་ལ་དེ་དག་སྟོངས་པར་འགྱུར་བ་ནི་འཛམ་བུ་གླིང་པ་བཞིན་ནོ། །དེ་ནས་བྱང་སྒྲ་མི་སྙན་པ་རྣམས་འཇིག་སྟེ་དེ་ལ་འདོད་པ་ལ་ཆགས་པ་དང་འབྲལ་བ་མེད་པས་སྔ་མ་
གསུམ་བཞིན་དུ་བསམ་གཏན་དང་པོར་མི་སྐྱེའི་ཤི་ནས་འདོད་ལྷའི་ནང་དུ་སྐྱེའོ། །དེ་ནས་འདོད་ལྷ་དྲུག་རིམ་གྱིས་འཇིག་སྟེ་བསམ་གཏན་དང་པོ་ཐོབ་པའི་འོག་ཏུ་ཤི་ནས་ཚངས་པའི་འཇིག་རྟེན་དུ་སྐྱེའོ། །དེ་ནས་བསམ་གཏན་དང་པོའི་ལྷག་ཅིག་
གིས་ཆོས་ཉིད་ཀྱིས་ཐོབ་པའི་བསམ་གཏན་གཉིས་པ་ལ་སྙོམས་པར་ཞུགས་ཏེ་དེ་ལས་ལངས་ནས། ཀྱེ་མ་ཏིང་ངེ་འཛིན་ལས་སྐྱེས་པའི་དགའ་བ་དེ་ནི་བདེ་བ་དང་ཞི་བ་ཡིན་ནོ་ཞེས་སྨྲའོ། །སྒྲ་དེ་ཐོས་ནས་ལྷ་གཞན་དག་ཀྱང་དེ་ལ་སྙོམས་པར་
6-2-7b


འཇུག་ཅིང་དེ་དག་ཤི་འཕོས་ནས་འོད་གསལ་གྱི་ལྷའི་ནང་དུ་སྐྱེས་པས་བསམ་གཏན་དང་པོ་སྟོངས་སོ། །དེ་ལྟར་དམྱལ་བ་བསམ་གཏན་དང་པོའི་བར་གྱི་སེམས་ཅན་གཅིག་ཀྱང་མ་ལུས་པ་ན་བཅུད་ཞིག་པ་ཡིན་ཏེ་དེ་ལ་ནི་བར་བསྐལ་བཅུ་དགུའི་
ཡུན་ཡོད་དོ། །གཉིས་པ་ནི། གང་གི་ཚེ་བཅུད་ཞིག་ནས་སྣོད་ཀྱི་འཇིག་རྟེན་འབའ་ཞིག་ལུས་པ་དེའི་ཚེ་ཁམས་གསུམ་པ་སྟེ་ས་གསུམ་པོའི་སྣོད་ཐམས་ཅད་བསྲེགས་ཏེ་ནམཁའ་སྟོང་པའི་རང་བཞིན་དུ་བྱེད་དོ། །ཇི་ལྟར་དུ་སྲེག་ཅེན། ཉི་མ་བདུན་གྱི་
འོད་ཟེར་རྣམས་ཀླགས་པ་སྟེ་འཕེལ་བས་སྲེག་གོ། །འཕེལ་ཚུལ་ནི་ཉི་མ་སྔ་མ་སྔ་མ་ལས་ཕྱི་མ་ཕྱི་མ་རིམ་གྱིས་རིམ་གྱིས་ཀླགས་པས་སོ། །འདི་མཛོད་འགྲེལ་དང་རྒྱལ་པོ་སྲས་ཀྱིས་ཞིབ་པར་མ་བཤད་ལ་ས་ཡི་དངོས་གཞི་ལས། སེམས་
ཅན་མེད་པས་ཡོ་བྱད་མི་འབྱུང་ལ་དེ་མེད་པས་ཆར་མི་འབབ་བོ། །དེ་མ་བབ་པས་རྩྭ་དང་སྨན་དང་ཤིང་ཐམས་ཅད་སྐམས་སོ། །ཐན་པ་བྱུང་བས་ཉི་མ་འདི་ཉིད་ཀྱིས་ཤས་ཆེར་སྲེག་གོ། །དེ་ནས་སེམས་ཅན་རྣམས་ཀྱི་འཇིག་པར་འགྱུར་པའི་
ལས་ཀྱི་དབང་གིས་ཉི་མ་གཞན་དྲུག་འབྱུང་སྟེ་ཉི་མ་འདི་ལས་བཞི་འགྱུར་བཞི་འགྱུར་གྱི་མཐུས་སྲེག་པའོ། །ཉི་མ་གཉིས་པས་ལྟེང་ཀ་ཆེ་ཆུང་དང་གསུམ་པས་ཆུ་ཀླུང་ཆེ་ཆུང་དང་བཞི་པས་མཚོ་མ་དྲོས་པ་དང་། ལྔ་པ་དང་དྲུག་པའི་ཕྱོགས་
གཅིག་གིས་རྒྱ་མཚོ་ཆེན་པོ་སྐེམས་པར་བྱེད་དོ། །དྲུག་པའི་ཕྱོགས་གཅིག་ནི་ཤར་མ་ཐག་པ་ལ་ཁ་ཅིག་འདོད་དོ། །དེ་ནས་དྲུག་པ་དང་བདུན་པས་རི་རབ་དང་ས་ཆེན་པོ་བསྲེགས་པའི་མེ་ལྕེ་དེ་རླུང་གིས་ཁྱེར་བས་ཚངས་པའི་གཞལ་མེད་ཁང་མན་
6-2-8a


ཆད་སྲེག་པར་གསུངས་སོ། །སྣོད་འཇིག་པ་དེ་ལ་བར་བསྐལ་གཅིག་དགོས་པས་དེ་ལྟར་དམྱལ་བར་སེམས་ཅན་གསར་དུ་མི་སྐྱེ་ཞིང་འཆི་འཕོ་བ་ནས་སྣོད་ཞིག་པའི་བར་དེ་ནི་འཇིག་པའི་བསྐལ་པ་སྟེ་མཛོད་ལས། 
འཇིག་པའི་བསྐལ་པ་དམྱལ་བ་ཡི། །སྲིད་པ་མེད་ནས་སྣོད་ཟད་པ། །ཞེས་སོ། །གཉིས་པ་ནི། བསྒོམ་པར་བྱའོ། །ཞེས་དྲང་ངོ་། །གང་གིས་ན་བསྐྱེད་པའི་རིམ་པ་སྒོམ་པ་པོས་སོ། །གང་བསྒོམ་ན། དངོས་པོ་མེད་པ་ཞེས་བྱ་བ་ལ་སོགས་
པའི་ཚིགས་སུ་བཅད་པའི་དོན་ཏེ་དེ་ཡང་ཚིག་དེ་ངག་ཏུ་བརྗོད་ཅིང་སྟེ་བརྗོད་ལ་དེའི་དོན་ཡིད་ལ་དྲན་པར་བྱའོ། །ཚུལ་ཇི་ལྟར་སྒོམ་ན། སྣོད་ཞིག་ནས་ནམ་མཁའི་རང་བཞིན་དུ་གནས་པའི་དོན་དེ་ལྟར་རམ་དེ་བཞིན་དུའོ། །དེས་ན་སྐབས་ཀྱི་དོན་སྣོད་ཞིག་
པ་ཤེས་པར་བྱས་ནས་དེ་དང་ཆོས་མཐུན་པར་སྟོང་ཉིད་སྒོམ་པ་ཡིན་པ་ལ་བཅུད་འཇིག་པའི་རིམ་པ་བསྟན་པ་ནི། སྣོད་འཇིག་པའི་རིམ་པ་སྟོན་པའི་ཡན་ལག་ཏུ་བཤད་པ་ཙམ་ཡིན་ཏེ་སེམས་ཅན་ཤི་བ་དང་ཆོས་མཐུན་པར་སྒོམ་པ་ནི་ལྷག་
མོས་འོད་གསལ་དུ་སྡུད་པའི་སྐབས་ཡིན་པས་འདི་དང་སྐབས་མི་གཅིག་པའི་ཕྱིར་རོ། །སྒོམ་པའི་དུས་སུ་མདོར་བྱས་ལས། ཚིགས་བཅད་འདི་ཡིས་རྒྱུ་མི་རྒྱུའི། །བདག་ཉིད་ཅན་རྣམས་སྟོང་བར་སྒོམ། །ཞེས་གསུངས་པ་ལྟར་སྣོད་བཅུད་
ཐམས་ཅད་མི་དམིགས་པར་སྒོམ་དགོས་ཀྱང་དེ་གང་དང་ཆོས་མཐུན་པར་སྒོམ་པའི་མཐུན་ཡུལ་ནི་སྣོད་ཞིག་པ་ལ་བྱའི་བཅུད་ཞིག་པ་ལ་མི་གཟུང་ངོ་། །ལུགས་གཞན་ལ་འདིའི་སྐབས་ཀྱི་སྟོང་པ་སྒོམ་པ་འཆི་བ་དང་ཆོས་མཐུན་པར་བཤད་
6-2-8b


པ་ཡང་སྣང་མོད་ཀྱང་དེ་དག་དང་འདི་རྣམ་གཞག་མི་གཅིག་གོ། །སྐབས་གཞན་དུ་སྭ་བྷ་བ་དང་ཤཱུ་ནྱ་ཏཱ་ལ་སོགས་པའི་སྔགས་ངག་ཏུ་བརྗོད་ནས་སྔགས་དོན་ཡིད་ལ་སེམས་པ་དང་འདྲ་བར་འདིར་ཡང་ཚིགས་བཅད་དེ་དག་ཏུ་བརྗོད་ནས་དེའི་དོན་སྒོམ་
པ་ཡིན་པས་བརྗོད་པ་དང་སྒོམ་པ་གཉིས་ཀ་བྱའོ། །འོ་ན་སྣོད་ཞིག་པའི་ནམ་མཁའ་དང་ཆོས་མཐུན་པར་སྒོམ་པའི་སྟོང་པ་འདི་སྟོང་ཉིད་ཀྱི་ལྟ་བ་མ་རྙེད་ཀྱང་སྣོད་བཅུད་ཀྱི་སྣང་བ་རྣམས་ཉེ་བར་བསྡུས་པ་ཙམ་ཡིད་ལ་བྱེད་པས་ཆོག་གམ་ལྟ་བ་རྙེད་པའི་
དོན་སྐབས་དེར་དྲན་པ་དགོས་ཤེ་ན། འདི་ལ་ནི་ཕྱི་མ་ངེས་པར་དགོས་ཏེ་མདོ་བསྲེ་ལས། དངོས་པོ་མེད་པར་སྒོམ་པའི་དངོས། །ཞེས་བྱ་བ་ལ་སོགས་པ་གསུངས་པའི་ཚིགས་སུ་བཅད་པའི་དོན་གྱིས་སྟོང་པ་ཉིད་ཀྱི་རང་བཞིན་དུ་སྒོམ་མོ། །ཞེས་གསུངས་
ལ་ཚིགས་བཅད་དེའི་དོན་ནི་སྒྲོན་གསལ་ལས་ཚུལ་བཞིར་བཤད་པའི་ཡིག་དོན་དང་སྤྱི་དོན་གཉིས་འདིར་སྐབས་སུ་བབ་ཅིང་དེ་གཉིས་ཀྱང་བསྒོམ་པར་བྱ་བ་དང་བསྒོམ་པ་ལ་རང་བཞིན་མེད་པའི་འཁོར་གསུམ་མི་དམིགས་པ་དང་སྟོང་པ་
ཉིད་དང་མཚན་མ་མེད་པ་དང་སྨོན་པ་མེད་པའི་སྒོ་གསུམ་ལ་གསུངས་པའི་ཕྱིར་རོ། །འདི་ཡང་འཁོར་གསུམ་དང་ངོ་བོ་རྒྱུ་འབྲས་གསུམ་ལ་རང་གི་མཚན་ཉིད་ཀྱིས་གྲུབ་པའི་རང་བཞིན་མེད་པ་ལ་ངེས་བ་རྙེད་པ་དགོས་ཀྱི་གསུམ་ཚན་དེ་དག་གི་སྣང་
བ་ཞི་བ་ཙམ་ཡིད་ལ་བྱས་པས་འཁོར་གསུམ་མི་དམིགས་པ་དང་རྣམ་ཐར་སྒོ་གསུམ་གྱི་ཏིང་ངེ་འཛིན་དུ་འགྱུར་ན་ཧ་ཅང་ཐལ་ལོ། །དེས་ན་སྲིད་གསུམ་སོགས་ལ་དོན་དམ་པར་རམ་བདེན་པར་ཡོད་པར་འཛིན་པ་འཁོར་བའི་རྩ་བ་ཡིན་པས་དེའི་
6-2-9a


གཉེན་པོར་དོན་དམ་པར་མ་གྲུབ་པར་གསུངས་ཏེ་མདོར་བྱས་ལས། དམ་པའི་དོན་དུ་དངོས་པོ་རྣམས། །སྲིད་གསུམ་དངོས་པོ་མེད་པར་བསྒོམ། །ཞེས་སྐབས་འདིར་གསུངས་པས་ན་སྟོང་པ་ཉིད་ཀྱི་ལྟ་བ་ངེས་པར་དགོས་སོ། །
དེ་ལྟར་ཆོས་རྣམས་དོན་དམ་པར་ཅིར་ཡང་མ་གྲུབ་པར་ངེས་པའི་རིགས་པའི་ཤེས་པའི་དོན་གང་དུ་མ་གྲུབ་པའི་ཡིན་ལུགས་ལ་དེར་སྣང་བ་ཙམ་ཡང་ལྡོག་པས་ན་སྣོད་ལ་སོགས་པའི་སྣང་བ་ཐམས་ཅད་ཉེ་བར་ཞི་བ་ཡང་མི་སྒོམ་པ་མིན་ནོ། །
གཞུང་གཞན་གྱི་སྐབས་སུ་ཡང་སྭ་བྷཱ་བ་ལ་སོགས་པའི་སྔགས་དོན་སྒོམ་པ་ལ་ལྟ་བ་རྙེད་དགོས་པ་ནི་འདི་དང་འདྲ་བ་ཡིན་ཏེ་དཔལ་སམྤུ་ཊའི་རབ་བྱེད་དང་པོ་ལས། དང་པོ་སྟོང་ཉིད་རྣམས་བསམ་པས། །ལུས་ཅན་རྣམས་ཀྱི་དྲི་མ་བཀྲུ། །གཟུགས་
ཁམས་ཞེས་བྱ་སྟོང་པ་སྟེ། །དེ་བཞིན་དུ་ནི་སྒྲ་ཡང་བྱ། །ཞེས་སོགས་ཀྱིས་ཁམས་བཅོ་བརྒྱད་སྟོང་པར་གཏན་ལ་ཕབ་ནས་བསྒོམ་པར་གསུངས་ཤིང་། རྡོ་རྗེ་གདན་བཞིའི་ལེའུ་གསུམ་པར་ཡང་དེ་བཞིན་དུ་གསུངས་ལ། །སམྦུ་ཊའི་བརྟག་པ་
གསུམ་པའི་རབ་བྱེད་བཞི་པ་ལས་ཀྱང་། དེ་ནས་བསམ་གཏན་གྱི་ཁྱད་པར་གནས་ནས་ཆོས་ཐམས་ཅད་བདག་མེད་པ་ཉིད་དུ་བལྟ་བར་བྱ་སྟེ་ཕྱི་དང་ནང་གི་དངོས་པོ་འདི་དག་སེམས་ཉིད་ཀྱིས་བཞག་པ་སྟེ་སེམས་མ་གཏོགས་པ་གཞན་ན་མེད་
པས་ཆོས་ཐམས་ཅད་གདོད་མ་ནས་སྐྱེ་བ་མེད་པའི་ཕྱིར་རང་བཞིན་གྱིས་རྣམ་པར་དག་པའོ་ཞེས་ཡིད་ལ་བརྗོད་ལ། །ཞེས་གསལ་བར་གསུངས་སོ། །བཅུད་རྣམས་དམྱལ་བ་ནས་རིམ་པ་བཞིན་དུ་འཇིག་པ་དང་སྣོད་རྣམས་ཉི་མ་བདུད་གྱིས་འཇིག་
6-2-9b


པའི་རིམ་པ་ལ་ནི་ཆོས་མཐུན་སྦྱོར་མི་དགོས་པས་མ་གསུངས་སོ། །གཉིས་པ་ལ་གཉིས། འོག་གཞིའི་སྣོད་འཆགས་པའི་རིམ་པ་དང་མཐུན་པར་བསྒོམ་པ། སྟེང་གི་རི་གླིང་སོགས་ཀྱི་སྣོད་འཆགས་པའི་རིམ་པ་དང་མཐུན་པར་བསྒོམ་པའོ། །དང་པོ་
ནི། མདོར་བྱས་ནས་ནམ་མཁའི་དབྱིངས་ཀྱི་དབུས་གནས་པར་ཞེས་སོགས་ཀྱིས་དཀྱིལ་འཁོར་བཞི་སྐྱེད་པར་གསུངས་པ་ནི་སྣོད་འཆགས་པའི་དུས་ཀྱི་རླུང་ལ་སོགས་པ་དང་མཐུན་པར་བསྒོམ་པ་ཡིན་པས་འདི་ལ་གཉིས། མཐུན་ཡུལ་བཤད་པ། 
དེ་དང་མཐུན་པར་སྒོམ་ཚུལ་ལོ། །དང་པོ་ནི། འཇིག་རྟེན་ཞིག་ནས་བར་བསྐལ་ཉི་ཤུར་སྟོངས་ཏེ་གནས་པ་དེ་ནས་འཆགས་པའི་འགོ་རྩོམ་མོ། །འདིར་ས་དང་མ་འབྲེལ་བའི་སྣོད་རྣམས་ཡས་རིམ་ནས་འཆགས་ཤིང་ས་དང་འབྲེལ་བ་རྣམས་
མས་རིམ་ནས་འཆགས་ལ། དེ་ཡང་སྔོན་དུ་ཚངས་པའི་གཞལ་མེད་ཁང་དང་དེ་ནས་གཞན་འཕྲུལ་དབང་བྱེད་དང་དེ་ནས་འཕྲུལ་དགའ་དང་དེ་ནས་དགའ་ལྡན་དང་དེ་ནས་འཐབ་བྲལ་བའི་གཞལ་མེད་ཁང་རྣམས་འཆགས་སོ། །དེ་ནས་ཐོག་མར་རྟེན་
ཅིང་འབྲེལ་བར་འབྱུང་བ་སྟེ་སེམས་ཅན་གྱི་ལས་ཀྱི་སྟོབས་ལས་ནམ་མཁའ་ལ་སྣོད་ཀྱི་སྔ་ལྟས་སུ་གྱུར་པའི་རླུང་འཇམ་པོ་དག་ཁད་ཀྱི་ཁད་ཀྱིས་གཡོ་བའམ་ལྡང་སྟེ། དེ་ནས་རླུང་དེ་རྣམས་འཕེལ་བར་གྱུར་པ་ནི་རླུང་གི་དཀྱིལ་འཁོར་དུ་གྱུར་ཏེ་ནམ་
མཁའི་སྟེང་དུ་འཆགས་པར་འགྱུར་རོ། །རླུང་དེའི་མཐོ་དམན་གྱི་རྔམས་ཀྱི་ཚད་ནི་དཔག་ཚད་འབུམ་ཕྲག་བཅུ་དྲུག་དང་། རྒྱུར་ནི་དཔག་ཚད་གྲངས་མེད་པ་གཅིག་སྟེ་ཚན་པོ་ཆེ་ཆེན་པོའི་རྡོ་རྗེ་ཀྱང་གཞིག་མི་ནུས་པར་སྲ་བ་ཡིན་ནོ། །རླུང་འདི་ཡི་
6-2-10a


དང་པོའི་རྒྱུ་ནི་གཟུགས་ཁམས་ཀྱི་རླུང་ཡིན་ནོ། །དེའི་སྟེང་དུ་ཆུའི་དཀྱིལ་འཁོར་འཆགས་ཏེ། རླུང་གི་དཀྱིལ་འཁོར་དེ་ལས་སྤྲིན་གསེར་གྱི་སྙིང་པོ་ཅན་བྱུང་བས་ཤིང་རྟའི་འཕང་ལོ་ཙམ་གྱི་ཆར་གྱི་རྒྱུན་བབ་པར་གྱུར་ཏེ་དེ་ལས་
ཆུའི་དཀྱིལ་འཁོར་དུ་གྱུར་ཏོ། །ཆུ་དེ་ཐད་ཀར་མི་འབོ་བ་ནི་ལས་ཀྱི་དབང་གིས་ཡིན་པ་དང་རླུང་གིས་བདེ་བ་བཞིན་དུ་ཆུ་འཛིན་པའི་ལུགས་གཉིས་མཛོད་འགྲེལ་ལས་གསུངས་པའི་ཕྱི་མ་ནི་ས་ཡི་དངོས་གཞི་དང་མཐུན་ནོ། །ཆུ་དེ་ཡི་རྔམས་ཀྱི་ཚད་ནི་དཔག་ཚད་
འབུམ་ཕྲག་བཅུ་གཅིག་དང་སྟོང་ཕྲག་ཉི་ཤུའོ། །སླར་ཡང་སེམས་ཅན་རྣམས་ཀྱི་མཐུ་ལས་བྱུང་བའི་རླུང་གིས་ཆུ་དེ་ཀུན་ཏུ་བསྲུབས་པ་ལས་འོ་མ་བསྐོལ་བའི་སྤྲིས་མ་ཆགས་པའི་ཚུལ་དུ་ཆུ་དེའི་སྟེང་རྣམས་གསེར་གྱི་རང་བཞིན་གྱིས་གཞིར་གྱུར་ཏེ་
ཆུའི་སྟེང་དུ་འཆགས་སོ། །དེ་ཆགས་པ་དང་ཆུ་དེའི་རྔམས་ཀྱི་ཚད་འབུམ་ཕྲག་བརྒྱད་ཡིན་ཏེ་ཆུའི་སྟེང་རིམ་སུམ་འབུམ་ཉི་ཁྲི་གསེར་དུ་སོང་བའི་ཕྱིར་ཏེ་མཛོད་ལས། ཕྱིས་ནི་རྔམས་སུ་འབུམ་ཕྲག་བརྒྱད། །ལྷག་མ་དག་ནི་གསེར་དུ་འགྱུར། །ཞེས་སོ། །ཆུ་
གསེར་གཉིས་ཀྱི་རྒྱ་དང་ཁོར་ཡུག་གི་ཚད་ཀྱང་དེ་ཉིད་ལས། ཆུ་དང་གསེར་གྱི་དཀྱིལ་འཁོར་གྱི། །ཐད་ཀར་འབུམ་ཕྲག་བཅུ་གཉིས་དང་། །སྟོང་ཕྲག་གསུམ་དག་བརྒྱ་ཕྲག་ནི། །ཕྱེ་དང་ལྔ་རྣམས་ཁོ་ནའོ། །ཁོར་ཡུག་ཏུ་ནི་སུམ་འགྱུར་རོ། །ཞེས་སོ། །
དེ་ལྟར་འོག་གཞི་ལ་དཀྱིལ་འཁོར་གསུམ་ལས་མེད་ན་མེའི་དཀྱིལ་འཁོར་སྒོམ་པའི་ཆོས་མཐུན་མེད་པར་མི་འགྱུར་རམ་སྙམ་ན། མེའི་དཀྱིལ་འཁོར་ཡང་སྔ་མ་གསུམ་བཞིན་དུ་ལོགས་པ་མེད་ཀྱང་རླུང་ལ་སོགས་པ། དེ་རྣམས་ཀྱི་ནང་ཉིད་དུ་
6-2-10b


གནས་པས་ན་ཆོས་མཐུན་སྒོམ་དུ་རུང་སྟེ་མཛོད་ལས། འདོད་ན་དབང་པོ་མེད་པ་དང་། །སྒྲ་མེད་ཕྲ་རབ་རྡུལ་རྫས་བརྒྱད། །ཅེས་འདོད་ཁམས་ན་དབང་པོ་དང་སྒྲ་མེད་པའི་གོང་བུ་རྣམས་ལ་མེ་ལ་སོགས་པའི་རྫས་བརྒྱད་ཡོད་པར་གསུངས་པའི་ཕྱིར་རོ། །དེ་
ལྟར་ན་ཆགས་པའི་བསྐལ་བ་ནི་མཛོད་ལས། ཆགས་པ་དང་པོའོ་རླུང་ནས་ནི། །དམྱལ་བའི་སྲིད་པའི་བར་དུའོ། །ཞེས་གསུངས་པ་ལྟར་ཡིན་ལ་སྣོད་ཆགས་པ་ལ་བར་བསྐལ་གཅིག་དང་བཅུད་བསམ་གཏན་དར་བོ་ནས་རིམ་པ་བཞིན་དུ་འཆགས་ནས་
དམྱལ་བར་སེམས་ཅན་གཅིག་སྐྱེས་པའི་བར་ལ་བར་བསྐལ་བཅུ་དགུ་ཡོད་དོ། །གཉིས་པ་ནི། བསྐྱེད་པར་བྱའོ་ཞེས་དྲང་ངོ་། །གང་གིས་བསྐྱེད་ན་རྟེན་དང་བརྟེན་པའི་རྣམ་པ་ཁྱད་པར་ཅན་ཡང་དག་པར་སྒྲུབ་ཅིང་བསྐྱེད་པའི་རྣལ་འབྱོར་པས་སོ། །གང་
བསྐྱེད་པར་བྱ་ན་མདོར་བྱས་ལས། དཀྱིལ་འཁོར་བཞི་པོ་ཡང་དག་བསྡུས། །རྡོ་རྗེའི་ས་གཞི་དཀྱིལ་འཁོར་ལ། །ཞེས་གསུངས་པ་ལྟར་དཀྱིལ་འཁོར་བཞི་གཅིག་ཏུ་བསྡུས་པའི་རྡོ་རྗེའི་སའི་ཆའོ། །དེ་ཡང་རླུང་ལ་སོགས་པའི་དཀྱིལ་འཁོར་བཞི་སྔ་མ་སྔ་
མ་བསྐྱེད་པའི་སྟེང་དུ་ཕྱི་མ་ཕྱི་མ་བསྐྱེད་པའི་རིམ་པས་མཐར་དེ་དག་གཅིག་ཏུ་བྱའོ། །གཞུང་གང་གིས་བསྟན་པ་བཞིན་དུ་བྱ་ན་མདོར་བྱས་ལས། ནམ་མཁའི་དབྱིངས་ཀྱི་དབུས་གནས་པར། །ཧཱུཾ་གཉིས་ས་བོན་ཡཾ་ལས་བྱུང་། །རྡོ་རྗེ་གཉིས་དང་ཡང་དག་ལྡན། །
རླུང་གི་དཀྱིལ་འཁོར་བསྒོམ་པར་བྱ། །ཞེས་བྱ་བ་ནས་སོགས་ཀྱི་སྒྲས་བསྡུས་པ། ས་ཡི་དཀྱིལ་འཁོར་ཉིད་ཀྱང་ནི། །དེ་ཡི་སྟེང་དུ་རྣམ་པར་བསམ། །ཞེས་པའི་བར་གྱི་གཞུང་གིས་བསྟན་པ་ལྟར་རོ། །དཔེ་ཇི་དང་འདྲ་བར་བསྒོམ་ན་འོག་གཞིའི་སྣོད་འཆགས་
6-2-11a


པའི་རིམ་པ་དེ་ལྟར་རམ་དེ་བཞིན་དུའོ། །འདིར་རླུང་ལ་སོགས་པ་བཞི་ལ་ཆོས་མཐུན་གསུངས་ཀྱི་གཅིག་ཏུ་འདྲེས་པའི་ས་ཡི་ཆ་ལ་མ་གསུངས་སོ། །གཉིས་པ་ནི། མདོར་བྱས་ལས། དེར་ནི་བྷྲུཾ་ལས་བྱུང་བ་ཡི། །གཞལ་ཡས་
ཁང་པ་རྣམ་པར་བསྒོམ། །ཞེས་པ་ལ་སོགས་པས་གཞལ་ཡས་ཁང་བསྐྱེད་པར་གསུངས་པ་ནི་སྣོད་འཆགས་པའི་དུས་ཀྱི་སྟེང་གི་རི་གླིང་སོགས་དང་མཐུན་པར་སྒོམ་པ་ཡིན་པས་འདི་ལ་གཉིས། མཐུན་ཡུལ་བཤད་པ་དང་། དེ་དང་མཐུན་པར་སྒོམ་ཚུལ་
ལོ། །དང་པོ་ནི། སྔར་གསེར་འཆགས་པའི་དུས་སུ་བཤད་པ་དེ་ལྟར་སེམས་ཅན་རྣམས་ཀྱི་ལས་ཀྱི་དབང་གིས་ཁམས་སྣ་ཚོགས་ཀྱི་སྙིང་པོའི་སྤྲིན་བྱུང་སྟེ་དེ་ལས་བབ་པའི་ཆར་གྱི་ཆུ་རྣམས་གསེར་གྱིས་གཞིའི་སྟེང་དུ་གནས་སོ། །དེ་སེམས་ཅན་རྣམས་
ཀྱི་ལས་ཀྱི་དབང་གིས་བྱུང་བའི་རླུང་གིས་བསྲུབས་ཤིང་འཐས་པར་བྱས་པས་རི་རབ་ལ་སོགས་པའི་རི་བརྒྱད་དང་། སུམ་ཅུ་རྩ་གསུམ་པ་མན་ཆད་ཀྱི་ལྷའི་གཞལ་མེད་ཁང་དང་གླིང་བཞི་གླིང་ཕྲན་བརྒྱད་དང་མཐའ་ལྕགས་རིས་བསྐོར་བའི་ཁོར་ཡུག་གི་
རི་ཚུན་ཆད་དུ་ཤིང་དང་ལྗོན་ཤིང་དང་ལྕུག་མ་ལ་སོགས་པ་བྱུང་བར་གྱུར་ཏོ། །རི་རབ་ལ་སོགས་པ་དེ་དག་ཀྱང་རླུང་གིས་ཆར་གྱི་ཆུ་བསྲུབས་པ་ན་གསེར་ལ་སོགས་པའི་ཚོགས་བྱུང་བ་རྣམས་ལས་ཀྱི་མཐུས་བསྐྱེད་པའི་རླུང་གིས་བསྡུས་ནས། ཕུང་པར་
བྱས་པ་རྣམས་རི་དང་གླིང་དུ་འགྱུར་བར་མཛོད་འགྲེལ་ལས་གསུངས་ལ། ཁམས་དེ་དག་མཆོག་ལས་རི་རབ་དང་འབྲིང་ལས་གསེར་གྱི་རི་བདུན་དང་ཐ་མ་ལས་གླིང་བཞི་གླིང་ཕྲན་བརྒྱད་ཁོར་ཡུག་གི་རི་རྣམས་བྱུང་བར་ས་ཡི་དངོས་གཞི་ལས་བཤད་དོ། །
6-2-11b


གཉིས་པ་ནི། བསྐྱེད་རིམ་སྒོམ་པར་བྱེད་པ་རྣམས་ཀྱིས་དེར་ནི་བྷྲུཾ་ལས་བྱུང་བ་ཡི། །ཞེས་བྱ་བ་ལ་སོགས་པའི་གཞུང་གིས་གཞལ་ཡས་ཁང་བསྐྱེད་པར་བྱའོ་ཞེས་བསྟན་པར་འགྱུར་རོ། །གཞལ་ཡས་ཁང་བསྐྱེད་པའི་སྔོན་དུ་ཇི་ལྟར་བྱ་བ་སྔར་བཤད་བ
སླར་འདིར་དྲན་པར་བྱེད་པ་ནི། ནམ་མཁའི་དབྱིངས་ཀྱི་དབུས་གནས་པར། །ཞེས་པ་ལ་སོགས་པའི་གཞུང་སྔར་བཤད་པ་འདིས་སྟོང་པ་ཉིད་ལ་དམིགས་པ་ཡེ་ཤེས་ཀྱི་ས་བསྐྱེད་པ་སྔོན་དུ་སོང་བས། རླུང་ལ་སོགས་པའི་དཀྱིལ་འཁོར་བཞིའི་རིམ་པས་རྡོ་
རྗེའི་ས་བསྐྱེད་ལ་དེའི་སྟེང་དུ་བསྐྱེད་དོ་ཞེས་བསྟན་པའོ། །དཔེ་ཅི་དང་འདྲ་བར་བསྐྱེད་པར་བསྟན་ན། སྟེང་གི་སྣོད་ཀྱི་སྲིད་པ་སྐྱེ་བ་སྟེ་འཆགས་པའི་རིམ་པ་བསྟན་པ་དེ་ལྟར་དུ་བསྒོམ་པའམ་བསྐྱེད་པར་བྱའོ་ཞེས་བསྟན་པར་འགྱུར་རོ། །གཞུང་གཞན་ལས་འོག་
ཏུ་རི་རབ་བསྐྱེད་ནས་དེའི་སྟེང་དུ་གཞལ་ཡས་ཁང་སྒོམ་པར་གསུངས་མོད་ཀྱང་འདིར་ནི་གཞལ་ཡས་ཁང་བསྐྱེད་པ་དང་རི་རབ་གཉིས་ཆོས་མཐུན་དུ་མཛད་ཀྱི་དེའི་འོག་གཞི་དང་ཆོས་མཐུན་པར་མ་མཛད་དོ། །དེས་ན་རི་རབ་དང་སྣ་ཚོགས་རྡོ་རྗེ་དང་པདྨ་དང་
གཞལ་ཡས་ཁང་རྣམས་རིམ་པ་བཞིན་དུ་སྟེང་ནས་སྟེང་དུ་བསྒོམ་པར་མདོར་བྱས་ཀྱི་འགྲེལ་པ་རིན་ཆེན་ཕྲེང་བར་བཤད་པ་དང་། རི་རབ་ཞུ་བ་ལས་གཞལ་ཡས་ཁང་བསྐྱེད་པར་རབ་ཏུ་སྒྲོན་གསལ་ལས་གསུངས་པ་རྣམས་འཐད་པ་མ་ཡིན་ནོ། །དེ་ལྟར་
སྟེང་གི་རི་གླིང་སོགས་ཀྱི་སྣོད་འཆགས་པ་སྤྱི་ཙམ་དང་མཐུན་པར་གཞལ་ཡས་ཁང་བསྐྱེད་པ་གསུངས་ཀྱི་རི་གླིང་སོགས་ཀྱི་ཁྱད་པར་དང་འདྲ་ཆོས་སྦྱོར་བ་དང་། གཞལ་ཡས་ཁང་གིའང་གྲུ་བཞི་དང་སྒོ་བཞི་དང་རྩིག་པ་རིམ་པ་ལྔ་ལ་སོགས་པའི་སྒོ་ནས་
6-2-12a


ཆོས་མཐུན་སྦྱོར་བ་འདིར་མི་དགོས་པས་མ་གསུངས་སོ། །གཉིས་པ་ལ་གཉིས། མདོར་བསྟན་པ་དང་རྒྱས་པར་བཤད་པའོ། །དང་པོ་ནི། མཐུན་ཡུལ་ལ་སྣོད་ཆགས་པ་དང་བསྐྱེད་རིམ་ལ་གཞལ་ཡས་ཁང་ཆགས་པ་དེ་ནས་
མཐུན་ཡུལ་ལ་མ་དག་པའི་སེམས་ཅན་གྱི་ཁམས་དང་བསྐྱེད་རིམ་ལ་དག་པའི་སེམས་ཅན་གྱི་ཁམས་ལྷའི་ཚོགས་ངེས་པར་སྤྲུལ་པ་སྟེ་བསྐྱེད་པར་མཛད་པ་ཡིན་ཏེ། གནས་གཞལ་ཡས་ཁང་ནི་སྒྲུབ་པ་སྔོན་དུ་འགྲོ་བས་རྡོ་རྗེ་གསུམ་བསྐྱེད་པ་བསྒོམ་
པར་བྱའོ་ཞེས་གསུངས་པའི་ཕྱིར་དང་རིམ་པ་དེ་སྣོད་བཅུད་ཀྱི་འཆགས་ཚུལ་དང་མཐུན་པར་བསྒོམ་པ་ཡིན་པའི་ཕྱིར་རོ། །ལུང་འདི་ལེའུ་བཅུ་གཅིག་པ་ལས། ཡི་གེ་བྷྲུཾ་གྱི་གནས་བསྒོམས་ཏེ། །རྡོ་རྗེ་གསུམ་འབྱུང་བསྒོམ་པར་བྱ། །ཞེས་གསུངས་
པ་དེ་ཡིན་ལ་སྒྲོན་གསལ་ལས་སྔོན་དུ་གཞལ་ཡས་ཁང་བསྒོམས་ནས་དེའི་འོག་ཏུ་ཟླ་བ་ལས་བྱང་ཆུབ་པའི་སྐབས་ཀྱི་ཉི་མ་སོགས་ཀྱི་མཚན་མ་གསུམ་བསྒོམ་དགོས་པའི་དོན་དུ་བཤད་དོ། །འདི་དང་མདོ་བསྲེ་གཉིས་ཀྱིས་གཞལ་ཡས་ཁང་བསྐྱེད་
པའི་འོག་ཏུ་ལྷ་བསྐྱེད་པའི་ཁུངས་སུ་མཛད་ལ་ཁྱད་པར་དུ་རྡོ་རྗེ་གསུམ་བསྐྱེད་པའམ་རྡོ་རྗེ་གསུམ་འབྱུང་བ་བསྒོམ་པ་ནི་རྡོ་རྗེ་འཆང་བསྐྱེད་པ་ལ་བཞེད་དེ། རྒྱུད་ཀྱི་རྡོ་རྗེའི་ཚིག་རེ་རེ་ལ་དོན་མི་འདྲ་བ་མང་པོ་བཤད་པ་ཡབ་སྲས་ཀྱི་གཞུང་ན་སྣང་བས་འགལ་བར་མི་བསམ་མོ། །སེམས་
ཅན་གྱི་ཁམས་སྤྲུལ་པ་པོ་ནི་རྣམ་པར་ཤེས་པ་ཡང་ཡིན་ལ་བདག་པོ་ཡང་ཡིན་པ་ནི་སེམས་ཅན་རྣམས་ཀྱི་སེམས་ཏེ་མ་དག་པའི་སེམས་ཅན་སྐྱེད་པར་བྱེད་པ་པོའོ། །འདིས་ཐུན་མོང་གི་ལས་བསགས་ནས་སྣོད་དང་ཐུན་མོང་མ་ཡིན་པའི་ལས་
6-2-12b


བསགས་ནས་བཅུད་ཀྱི་འཇིག་རྟེན་བསྐྱེད་པ་ལ་དབང་བྱེད་པས་ན་བདག་པོའམ་བྱེད་པ་པོའོ། །དེ་ལྟར་ཡང་དབུ་མ་ལ་འཇུག་པ་ལས། ཇི་བཞིན་རང་གི་བསྟན་བཅོས་དེ་དེ་ལས། །མུ་སྟེགས་རྣམས་ཀྱིས་གང་ཟག་སོགས་དེ་དག །སྨྲས་པ་དེ་དག་བྱེད་པོར་མ་
གཟིགས་ནས། །རྒྱལ་བས་སེམས་ཙམ་འཇིག་རྟེན་བྱེད་པོར་གསུངས། །ཞེས་དང་། སེམས་ཉིད་ཀྱིས་ནི་སེམས་ཅན་འཇིག་རྟེན་དང་། །སྣོད་ཀྱི་འཇིག་རྟེན་ཤིན་ཏུ་སྣ་ཚོགས་འགོད། །འགྲོ་བ་མ་ལུས་ལས་ལས་སྐྱེས་པར་གསུངས། །སེམས་
སྤངས་ནས་ནི་ལས་ཀྱང་ཡོད་མ་ཡིན། །ཞེས་སོ། །རྡོ་རྗེ་འཆང་ཆེན་པོ་ནི་དག་པའི་སེམས་ཅན་ལྷའི་འཁོར་ལོ་བསྐྱེད་པར་མཛད་པ་པོ་ཡིན་ཏེ། རྟེན་དང་བརྟེན་པའི་འཁོར་ལོ་ཐམས་ཅད་དེ་ཉིད་ཀྱི་སྐུའི་ཆ་ཤས་རྣམས་དེར་སྤྲུལ་པར་གསུངས་པའི་ཕྱིར་
རོ། །འོག་ནས་བར་དོའི་སེམས་ལ་ཡང་རྣམ་པར་ཤེས་པའི་བདག་པོ་ཐུགས་རྡོ་རྗེ་ཞེས་གསུངས་པས་རྣམ་ཤེས་ཀྱི་བདག་པོ་དང་རྡོ་རྗེ་འཆང་གཉིས་གཅིག་ཏུ་འཆད་པ་མི་འཐད་ལ་རྡོ་རྗེ་འཆང་གིས་འཁོར་བའི་སེམས་ཅན་བསྐྱེད་པར་འཆད་པ་ཡང་དོན་
མིན་ནོ། །རྡོ་རྗེ་འཆང་ནི་འདིར་ལྷག་མོས་ཀྱི་གཙོ་བོ་ལ་གཟུང་ངོ་། །སེམས་ཅན་གྱི་ཁམས་གཉིས་སྤྲུལ་བའི་དུས་ནི་དག་མ་དག་གི་སྣོད་ཀྱི་འཇིག་རྟེན་གཉིས་བསྐྱེད་པའི་འོག་ཏུའོ། །གཉིས་པ་ལ་གསུམ། བཅུད་ཀྱི་སྲིད་པ་སྐྱེ་བའི་རིམ་པ་སྤྱིར་བསྟན་
པ། མི་ཡི་སྲིད་པ་སྐྱེ་བའི་རིམ་པ་ཉིད་དང་མཐུན་པར་བསྒོམ་པའི་རྒྱུ་མཚན། དེ་དང་མཐུན་པར་སྒོམ་པའི་རིམ་པ་ཉིད་བཤད་པའོ། །དང་པོ་ནི། བཅུད་ཀྱི་སེམས་ཅན་ཐམས་ཅད་སྐྱེ་གནས་བཞིར་ངེས་ལ་བཞི་པོ་ནི་འདི་ལྟ་སྟེ་སྒོང་སྐྱེས་ནི་མ་
6-2-13a


ལས་སྒོང་སྐྱེ་ཞིང་དེ་བརྟོལ་ནས་སྐྱེ་བ་དང་མངལ་ནི་མའི་ལྟོར་ཤ་མས་དཀྲིས་ནས་འདུག་པ་ཡིན་ལ་དེ་བརྟོལ་ནས་སྐྱེ་བ་དང་ས་ལ་སོགས་པ་འབྱུང་བའི་དྲོད་དང་གཤེར་ལས་སྐྱེས་པ་དང་ཁུ་ཁྲག་སོགས་རྒྱུར་མ་བྱས་པར་
ཡན་ལག་དང་དབང་པོ་སོགས་ཅིག་དར་དུ་སྐྱེ་བའི་བརྫུས་ཏེ་སྐྱེས་པའོ། །སྐྱེ་གནས་ནི་འདིར་སེམས་ཅན་རྣམས་སྐྱེ་བ་ཐུན་མོང་བར་འགྱུར་བའོ། །གཞན་རྣམས་གོ་སླ་ལ་དབང་པོ་མ་ཚང་བ་མེད་པ་ནི་མིག་ལ་སོགས་པ་ཚང་བའོ། །མ་རྫོགས་བ་
མེད་པ་ནི་མཛོད་འགྲེལ་ལས་དམན་པ་མ་ཡིན་པ་ཞེས་འབྱུང་ལ་དེའི་དོན་ནི་ཞར་བ་དང་ལོང་བ་སོགས་མེད་པ་ལ་རྒྱལ་པོ་སྲས་ཀྱིས་བཤད་དོ། །ཡན་ལག་ནི་ལག་པ་དང་རྐང་པ་སོགས་སོ། །ཉིང་ལག་ནི་སོར་མོ་སོགས་སོ། །དེ་དག་ནི་མཛོད་
འགྲེལ་དང་སྡོམ་འབྱུང་གི་ལེའུ་གཉིས་པ་ནས་གསུངས་པ་རྣམས་དང་རེ་རེ་ཙམ་མ་གཏོགས་པ་འདྲ་བར་སྣང་ངོ་། །བཅུད་ཀྱི་སེམས་ཅན་འགྲོ་བ་ལྔའི་སྒོ་ནས་མ་གསུངས་པར་སྐྱེ་གནས་བཞིའི་སྒོ་ནས་གསུངས་པ་ནི། སྐྱེ་གནས་བཞིར་སེམས་ཅན་
ཐམས་ཅད་འདུ་ཡི་འགྲོ་བ་ལྔར་མི་འདུ་བ་ལ་དགོངས་པ་སྟེ། མཛོད་ལས། སེམས་ཅན་ཞེས་བྱ་བར་སྲིད་མིན། །ཞེས་པའི་རང་འགྲེལ་ལས། སེམས་ཅན་ཞེས་བྱ་བ་ཁོ་ན་ཡིན་ཡང་སྲིད་པ་བར་མའི་རང་བཞིན་དག་ནི་མ་ཡིན་ནོ། །གདགས་
པ་དག་ལས་ཀྱང་སྐྱེ་གནས་བཞིས་ནི་འགྲོ་བ་ལྔ་བསྡུས་ཀྱི་འགྲོ་བ་ལྔས་ནི་སྐྱེ་གནས་བཞི་མ་བསྡུས་ཏེ་གང་ཞིག་མ་བསྡུས་ཤེ་ན་སྲིད་པ་བར་མའོ་ཞེས་གསུངས་སོ། །ཞེས་བར་དོ་སེམས་ཅན་ཡིན་ཀྱང་འགྲོ་བ་མིན་པར་གསུངས་སོ། །
6-2-13b


གཉིས་པ་ནི། མཐུན་ཡུལ་ལ་སྣོད་ཆགས་པའི་འོག་ཏུ་བཅུད་འཆགས་པ་ལྟར་བསྐྱེད་རིམ་ལ་གཞལ་ཡས་ཁང་བསྐྱེད་པའི་འོག་ཏུ་བརྟེན་པ་ལྷ་བསྐྱེད་པ་ནི། བཅུད་ཀྱི་སེམས་ཅན་དང་ཆོས་མཐུན་པར་སྒོམ་པ་ཡིན་པ་ལ་འདིར་སྐྱེ་གནས་གཞན་དང་
འགྲོ་བ་གཞན་དང་ཆོས་མཐུན་པར་མི་བྱེད་པར་བསྐལ་པ་དང་པོའི་འཛམ་བུ་གླིང་པའི་མི་རིམ་གྱིས་ཐ་མལ་བར་སོང་བ་ཞིག་ཤི་བ་དང་། དེ་ནས་བར་དོ་འགྲུབ་པ་དང་དེས་འཛམ་བུ་གླིང་པའི་མི་མོ་ཞིག་གི་མངལ་དུ་སྐྱེ་བ་ལེན་པའི་ཚུལ་ཉིད་དང་ཆོས་མཐུན་
པར་འོག་ཏུ་འཆད་དོ། །དེ་ལ་སྔོན་དུ་འཛམ་བུ་གླིང་པའི་མིའི་སྲིད་པ་འགྲུབ་པའི་རིམ་པ་ཉིད་དང་བསྟུན་ནས་སྒོམ་པའི་རྒྱུ་མཚན་བསྟན་པའི་ཕྱིར་དུ། དགའ་ལྡན་གྱི་བྱང་སེམས་སྐྱེ་བ་གཅིག་གིས་ཐོགས་པ་གླིང་གཞན་དུ་མི་འཇུག་པར་འཛམ་བུ་གླིང་པའི་
མིར་སྐྱེ་བ་ལ་སོགས་པའི་རྣམ་གཞག་འཆད་པ་ཡིན་ཏེ། གཞུང་དེ་དག་གིས་བསྒྲུབས་པའི་འབྲས་བུ་སྟོན་པ་ན། རྒྱུ་དེས་ན་མིའི་སྲིད་པ་སྐྱེ་བའི་རིམ་པ་བསྟན་ཏོ་ཞེས་གསུངས་པའི་ཕྱིར་དང་། དེ་ལྟར་མ་བྱས་ན་བཅུད་འཆགས་པ་དང་ཆོས་མཐུན་པར་
སྒོམ་པ་སྟོན་པའི་སྐབས་སུ་དགའ་ལྡན་གྱི་བྱང་སེམས་འཛམ་བུ་གླིང་པའི་རྟེན་ལ་འཚང་རྒྱ་བར་བསྒྲུབས་པ་མ་འབྲེལ་བར་འགྱུར་བའི་ཕྱིར་རོ། །དེས་ན་སྔར་བཤད་པའི་སྐྱེ་གནས་བཞིའི་ནང་ནས་ལྷག་མོས་དང་རྣལ་འབྱོར་བཞིས་ལྷ་བསྐྱེད་པ་འཛམ་བུ་
གླིང་པའི་མིའི་སྲིད་པ་འགྲུབ་པའི་རིམ་པ་དང་བསྟུན་ནས་འཆད་པ་མ་གོ་བར་སྐྱེ་གནས་བཞི་བཤད་པས་དེ་དག་དང་འདྲ་བའི་བསྐྱེད་ཆོག་མི་འདྲ་བ་བཞིའི་ལྷའི་རྣལ་འབྱོར་གྱིས་སྐྱེ་གནས་བཞི་སྦྱོང་བར་བཟུང་ན་སྐབས་ཀྱི་དོན་ལས་ཉམས་པར་འགྱུར་རོ། །
6-2-14a


འདི་ལ་བཞི། སློབ་མའི་དྲི་བ་དགོད་པ། སློབ་དཔོན་གྱིས་ལན་གདབ་པ། དེ་ལ་ཤེས་བྱེད་དགོད་པ། དེ་དག་གིས་གྲུབ་པའི་དོན་ནོ། །དང་པོ་ནི། བཅུད་འཆགས་པ་དང་མཐུན་པར་ལྷ་སྒོམ་པ་འཆད་པའི་སྐབས་འདིར་རྡོ་རྗེ་སློབ་
མས་གསོལ་པ། འཛམ་བུ་གླིང་ན་མི་ཡོད་པར་མ་ཟད་ལུས་འཕགས་པོ་ལ་སོགས་པའི་གླིང་གསུམ་པའི་མི་རྣམས་ཀྱང་གླིང་སོ་སོར་གནས་པ་མ་ལགས་སམ་སྟེ་གནས་ལགས་ན། ཅིའི་སླད་དུ་འཚང་རྒྱ་བ་ལ་སྐྱེ་བ་གཅིག་གིས་ཐོགས་པའི་བྱང་
སེམས་ཆེན་པོ་དགའ་ལྡན་གྱི་གནས་མཆོག་ནས་གླིང་གསུམ་པོ་དེར་འཇུག་པར་མི་མཛད་པའི་རྒྱུ་མཚན་བཤད་དུ་གསོལ། བྱང་སེམས་དེ་འཚང་རྒྱ་བའི་སྐབས་འདིར་ངེས་པ་ཁོ་ནར་འཛམ་བུ་གླིང་དུ་འཇུག་པ་སྟེ་དེའི་མིར་སྐུ་འཁྲུངས་ནས་
མི་རྣམས་ལ་ཆོས་སྟོན་པའི་རྒྱུ་མཚན་ཉིད་བཅོམ་ལྡན་འདས་རྡོ་རྗེ་སློབ་དཔོན་སྟོན་པས་བཤད་དུ་གསོལ་ཞེས་ཞུས་པ་སྟེ། མདོར་ན་མིའི་རྟེན་ལ་འཚང་རྒྱ་བའི་བྱང་སེམས་དེ་མིར་ཁྱད་པར་མེད་པ་ལ་འཛམ་བུ་གླིང་པའི་མི་ཁོ་ནར་འཁྲུངས་
ནས་འཚང་རྒྱ་བའི་རྒྱུ་མཚན་གང་ཡིན་ཞེས་པའོ། །གཉིས་པ་ནི། རྡོ་རྗེ་སློབ་དཔོན་གྱིས་ལན་སྨྲས་པ་ཤར་གྱི་ལུས་འཕགས་ལ་སོགས་པའི་གླིང་གསུམ་གྱི་མི་རྣམས་ལོངས་སྤྱོད་ཀྱི་འབྱོར་པ་ཆེན་པོ་དང་ལྡན་པས་ལོངས་སྤྱོད་ཀྱི་ས་པ་ཡིན་ཏེ་
ལོངས་སྤྱོད་ཆེ་བ་དེ་ལྟ་མོད་ཀྱི་སྟེ་དེ་ལྟ་ནའང་དབང་པོ་བླུན་པས་སོ་སོར་རྟོག་པའི་ཤེས་རབ་ཆེན་པོ་མི་དཔྱོད་ཅིང་རྨོངས་པས་ཞིབ་བའི་ཤེས་རབ་ཀྱིས་མི་འབྱེད་པ་སྟེ་དཔྱོད་མི་ནུས་སོ། །དེས་ན་རྟེན་དེ་ལ་འཚང་རྒྱ་བར་མི་འགྱུར་རོ། །སྡོམ་འབྱུང་
6-2-14b


གི་ལེའུ་གཉིས་པ་ལས་ཀྱང་། ཤར་གྱི་ལུས་འཕགས་བ་གླང་སྤྱོད། །དེ་བཞིན་བྱང་གི་སྒྲ་མི་སྙན། །གླིང་གསུམ་པོ་ཡི་མི་རྣམས་ནི། །ལོངས་སྤྱོད་ཆེན་པོས་ཡང་དག་འཚོ། །རྣམ་རྟོག་མེད་ཅིང་རྣམ་དཔྱོད་མེད། །བླུན་རྨོངས་བྱེ་བྲག་མི་ཕྱེད་པའོ། །ཞེས་
གསུངས་སོ། །བླུན་པ་ནི་རང་ཉིད་ཀྱིས་འདོད་དོན་སྒྲུབ་པ་དང་མི་འདོད་པ་སེལ་བ་ལ་རྨོངས་པ་དང་། རྨོངས་པ་ནི་གཞན་གྱིས་བསྟན་པའི་དོན་འཛིན་མི་ནུས་པ་དང་དེ་ཉིད་ནི་བྱེ་བྲག་མི་ཕྱེད་པའོ། །ཞེས་འགྲེལ་པར་བཤད་དོ། །འཛམ་བུ་གླིང་པ་འདི་ནི་ལས་ཀྱི་ས་
པ་ཡིན་ཏེ་དེས་ན་ལས་ཀྱི་འབྲས་བུ་རྣམ་པར་སྨིན་པ་འདིར་སྣང་བར་འགྱུར་རོ། །སྨིན་ཚུལ་ནི་མཆོག་དང་འབྲིང་དང་ཐ་མའི་སེམས་ཅན་རྣམས་སུ་རྣམ་པར་སྨིན་པ་སྟེ་ཚེ་རིང་ཐུང་དང་འབྱོར་དབུལ་ལ་སོགས་པའི་མཆོག་དམན་གྱི་ཁྱད་པར་ཆེན་པོ་ཅན་ནོ། །
དེ་ཡང་ཚེ་རབས་སྔ་མར་ལེགས་པར་སྤྱད་པ་དགེ་བ་དང་ཉེས་པར་སྤྱད་པ་མི་དགེ་བ་བསགས་པའི་མཐུས་སོ། །དེས་ན་གླིང་གཞན་གྱི་མི་རྣམས་ནི་སྔོན་གྱི་ལས་ཀྱི་མཐུས་འདི་འདྲ་བའི་མཆོག་དམན་གྱི་ཁྱད་པར་ཆེན་པོ་ཅན་མ་ཡིན་པས་གླིང་འདི་ལ་
ལས་ཀྱི་ས་པར་གསུངས་སོ། །བྷ་བ་བྷ་དྲས་ནི། འདི་ལྟར་འཛམ་བུ་གླིང་ཉིད་ཀྱི་ཡུལ་དང་གནས་དེ་དག་ན་རྣལ་འབྱོར་མ་རྣམས་བཞུགས་ཏེ། གླིང་འདི་ཉིད་ལས་ཀྱི་ས་པ་ཡིན་པས་ལས་རྣམས་འགྲུབ་པར་འགྱུར་གྱི་གླིང་གཞན་རྣམས་ན་ནི་དེ་ཉིད་
ཀྱི་ལས་ཀྱི་ས་དེར་འབྲས་བུ་སྨིན་པར་མི་འགྱུར་ཏེ། གཞན་གྱི་འབྲས་བུ་ཡིན་པའི་ཕྱིར་དེ་དག་ཏུ་ལས་མི་འགྲུབ་པས་རྣལ་འབྱོར་མ་རྣམས་གླིང་གཞན་དུ་མི་གཤེགས་སོ། །ཞེས་ཚེ་དེ་ལ་བསགས་པའི་ལས་ཀྱིས་ཚེ་དེ་ཉིད་ལ་འབྲས་བུ་
6-2-15a


འགྲུབ་ལ་ལས་ཀྱི་ས་པ་ཡིན་མིན་དུ་འཇོག་ཅིང་གླིང་གཞན་པ་རྣམས་ལས་ཀྱི་ས་པ་མིན་པས་ཡུལ་ཉེར་བཞིའི་རྣལ་འབྱོར་མ་རྣམས་གླིང་གཞན་དུ་མི་གཤེགས་པར་རྡོ་རྗེ་མཁའ་འགྲོའི་ལེའུ་བཅུ་བཞི་པའི་
འགྲེལ་པར་གསུངས་སོ། །ཉེས་སྤྱོད་དེའི་འབྲས་བུ་སྨིན་ཚུལ་གཞན་ཡང་འདི་ལྟ་སྟེ་འཛམ་བུ་གླིང་གི་མི་རྣམས་རྙེད་བཀུར་ལ་ཆགས་པའི་དབང་གིས་བྱུང་ཞིང་འདོད་ཆགས་དང་གཏི་མུག་གང་རུང་གི་ཆར་གཏོགས་པ་ཡོན་ཏན་མེད་བཞིན་དུ་ཡོད་པ་ལྟར་
སྟོན་པའི་གཡོ་དང་། ངོ་བོ་དེ་དང་འདྲ་བ་ལ་རང་གི་སྐྱོན་ཐབས་ཀྱིས་མི་མངོན་པར་བྱེད་པའི་སྒྱུ་དང་། རིགས་ལ་སོགས་པའི་རང་གི་ཆོས་ལ་ཆགས་པའི་དབང་གིས་སེམས་ཡོངས་སུ་གཏུགས་པའི་དྲེགས་པའམ་རྒྱགས་པ་དང་ཞེ་སྡང་གི་ཆར་གཏོགས་
ཤིང་གཞན་གྱི་ཕུན་ཚོགས་ལ་སེམས་ཁོང་ནས་འཁྲུག་པའི་ཕྲག་དོག་དང་། གཞན་ལ་གནོད་པ་བྱ་བར་སེམས་པའི་གདུག་པའི་བསམ་པ་ལ་སོགས་པའི་ཉོན་མོངས་མང་པོ་དང་ལྡན་པས་རིམས་ནད་ལ་སོགས་པའི་ནད་མང་པོ་དང་རྒ་བ་ལ་སོགས་
པའི་སྡུག་བསྔལ་དྲག་པོ་མང་པོས་ཡོངས་སུ་གཟིར་པར་འགྱུར་རོ། །སྡོམ་འབྱུང་ལས་ཀྱང་། འཛམ་བུ་གླིང་རྣམས་ལེགས་སྐྱེས་པའི། །ལས་ཀྱི་ས་པར་རབ་ཏུ་གྲགས། །ལེགས་བྱས་དང་ནི་ཉེས་བྱས་ལས། །མཆོག་དང་འབྲིང་དང་ཐ་མ་ཡི། །
སྐྱེ་བ་སྔ་མའི་རྣམ་སྨིན་འདིར། །སྐྱེ་བོ་ཀུན་ལ་མཐོང་བར་འགྱུར། །རྒྱགས་པ་སེར་སྣ་གདུག་སེམས་དང་། །གཡོ་སྒྱུ་མངོན་པའི་ང་རྒྱལ་དང་། །ཆགས་སྡང་གཏི་མུག་སོགས་རྣམས་དང་། །རྒ་དང་ནད་ཀྱིས་རབ་ཏུ་གཟིར། །ཞེས་སོ། །དེ་ལྟར་སྐྱོན་
6-2-15b


མང་པོ་ཅན་ཡིན་ན་དེའི་རྟེན་ལ་འཚང་རྒྱ་བར་འགལ་ལམ་སྙམ་ན་སྐྱོན་དེ་དག་ཡོད་པ་འོན་ཀྱང་ཚིག་གི་མགོ་སྨོས་པས་དོན་རྫོགས་པར་གོ་བ་དང་དད་པ་ལ་སོགས་པའི་དབང་པོ་རྣམས་ཤིན་ཏུ་རྣོ་བ་དང་སྒྲིན་ཞིང་རྟུལ་ཕོད་པ་སྟེ། དེས་ན་བྱང་སེམས་སྐྱེ་བ་
གཅིག་གིས་ཐོགས་པ་དགའ་ལྡན་ན་བཞུགས་པ་རྣམས་འཛམ་བུ་གླིང་གི་སྐྱེ་བོའི་གནས་རྣམས་ཀྱི་དབུས་སུ་སྐུ་འཁྲུངས་ཤིང་རྟེན་དེ་ལ་སངས་རྒྱས་ནས་མི་རྣམས་ལ་ཆོས་སྟོན་པར་འགྱུར་རོ། །ནད་ལ་སོགས་པའི་སྡུག་བསྔལ་ཡོད་པ་རྣམས་
སངས་རྒྱས་འཛམ་བུ་གླིང་དུ་འབྱོན་པའི་རྒྱུ་མཚན་དུ་འཆང་པ་ནི་འོན་ཀྱང་ཞེས་པ་དང་འགལ་བས་མི་འཐད་དོ། །སྡོམ་འབྱུང་ལས་ཀྱང་། འཛམ་བུ་གླིང་བའི་མཆོག་གཙོ་བོ། །དབུས་ཀྱི་ཡུལ་དུ་སྐྱེས་པ་དེ། །དབང་པོ་རྟུལ་འབྲིང་རྣོན་པོ་རྣམས། །སྐྱེ་བ་
སྔ་མའི་དགེ་བ་ལྟོས། །ཞེས་གསུངས་ཏེ་དབང་པོ་གསུམ་ཡོད་པ་ནི་སྔོན་གྱི་དགེ་བའི་ལས་ལ་ལྟོས་པ་འགྲེལ་པས་བཤད་དོ། །ལན་གྱི་གཞུང་དེ་དག་གིས་ནི་མིར་མཚུངས་ཀྱང་དབང་པོ་ཤིན་ཏུ་རྣོ་བ་ཡིན་མིན་གྱི་ཁྱད་པར་གྱིས་གླིང་གཞན་དུ་
སངས་རྒྱས་འཚང་མི་རྒྱ་ལ་འཛམ་བུ་གླིང་དུ་འཚང་རྒྱ་བ་དང་དེ་ཡང་འཛམ་བུ་གླིང་པའི་མཆོག་ཡུལ་དབུས་སུ་འབྱོར་པར་གསུངས་སོ། །གསུམ་པ་ནི། འཛམ་བུ་གླིང་པའི་རྟེན་ལ་བྱང་སེམས་འཚང་རྒྱ་བ་དེའི་ཕྱིར་རྒྱུད་དུ་ཡང་སྔར་བཤད་པ་དང་
མཐུན་པར་གསུངས་པ། འཚང་རྒྱ་བའི་ཚུལ་བཞི་ལས་འཛམ་བུའི་གླིང་དུ་མི་ཁོམ་པ་བརྒྱད་ལས་གྲོལ་བའི་མི་རུ་འཁྲུངས་པ་ནི་ངེས་ཚུལ་དང་པོའོ། །ཁྱིམ་ནས་ངེས་པར་བྱུང་ནས་རབ་ཏུ་བྱུང་བ་ནི་ཚུལ་གཉིས་པ་ཡིན་ནོ། །རབ་ཏུ་བྱུང་ནས་
6-2-16a


འདུལ་བ་ནས་བསྟན་པའི་བསླབ་པ་བསྲུང་བ་ནི་ཚུལ་ཆེན་གསུམ་པའོ། །དེ་ལྟར་ཚུལ་ཁྲིམས་ལ་བརྟེན་ནས་ཏིང་ངེ་འཛིན་བརྙེས་པ་ནི་ཚུལ་རྣམས་ཀྱི་མཆོག་ཏུ་གྱུར་པ་བཞི་པ་ཡིན་ནོ་ཞེས་ཐུན་མོང་མ་ཡིན་པའི་གསང་བ་ཞེས་
བྱ་བ་རྣལ་འབྱོར་ཆེན་པོའི་རྒྱུད་ལས་གསུངས་སོ། །སྡོམ་འབྱུང་ལས་ཀྱང་། མི་རུ་སྐྱེས་པ་འབྲས་བུའི་དམ་པ་དང་པོ་སྟེ། །རང་གི་ཁྱིམ་ནས་ངེས་འབྱུང་རྙེད་པ་གཉིས་པ་ཡིན། །རབ་ཏུ་བྱུང་ནས་དགེ་བ་སྒྲུབ་པ་གསུམ་པ་སྟེ། །རྩེ་གཅིག་ཡིད་ནི་རྙེད་པ་
བཞི་པ་དག་ཏུ་གསུངས། །ཞེས་གསུངས་སོ། །སྡོམ་འབྱུང་འགྲེལ་པར་ཁྱིམ་ནས་བྱུང་བ་གཉིས་པ་དང་རབ་ཏུ་བྱུང་བ་གསུམ་པར་མཛད་མོད་ཀྱང་རབ་ཏུ་བྱུང་ནས་དགེ་བ་སྒྲུབ་པ་གསུམ་པར་བྱ་སྟེ་ཐུན་མོང་མ་ཡིན་པའི་གསང་བ་དང་
སྒྲོན་གསལ་གཉིས་ཀྱི་དགོངས་པ་དང་མཐུན་པའི་ཕྱིར་རོ། །འདི་ནི་སངས་རྒྱས་འཚང་རྒྱ་བ་ལ་ཆགས་བྲལ་དང་ཆགས་ཅན་གྱི་ཆོས་ཀྱིས་འཚང་རྒྱ་ཚུལ་བཞི་ཡོད་པའི་དང་པོ་ཡིན་ཏེ་སྒྲོན་གསལ་ལས། མི་ཡི་སྐྱེ་བར་འཁྲུངས་པ་ནི། །རྒྱུད་ཅེས་བྱ་བ་ཡིན་
པར་བཤད། །བཙུན་མོའི་འཁོར་གྱི་ནང་ནས་ནི། །ངེས་པར་འབྱུང་བ་གླེང་གཞི་ཡིན། །འདུལ་ལས་སྡོམ་པ་བསྟན་པ་ནི། །ངེས་པའི་ཚིག་ནི་ཡིན་ཞེས་བཤད། །འབྲས་བུ་འདོད་པས་ཆོས་སྤྱོད་པ། །དེ་ནི་རྒྱུ་ཞེས་བརྗོད་བྱ་སྟེ། །འདི་ནི་འདོད་ཆགས་བྲལ་
ཆོས་ཀྱི། །རིགས་པ་རྣམ་པ་བཞིར་འདོད་དོ། །ཞེས་སོ། །བཞི་པ་ནི། སྔར་བཤད་པ་དེ་ལྟར་གསུངས་པས་ན་འདས་པ་དང་མ་འོངས་པ་དང་ད་ལྟར་བྱུང་བའི་སངས་རྒྱས་ཐམས་ཅད་མི་ཡི་བདག་ཉིད་ཀྱི་སྲིད་པར་ཞུགས་པ་སྟེ་སྐུ་འཁྲུངས་ཏེ་ཐམས་
6-2-16b


ཅད་མཁྱེན་པའི་དངོས་གྲུབ་ཀྱི་གོ་འཕང་བརྙེས་པ་དང་ལྡན་པར་འགྱུར་རོ། །རྒྱུ་མཚན་དེས་ན་འཛམ་བུ་གླིང་པའི་མིའི་སྲིད་པ་སྐྱེ་བའི་རིམ་པ་དང་མཐུན་པར་བརྟེན་པ་ལྷ་བསྐྱེད་པའི་རིམ་པ་འདིར་བསྟན་ཏོ། །གལ་ཏེ་འོག་མིན་གྱི་རྟེན་ལའང་སངས་རྒྱས་འཚང་རྒྱ་བ་ཡིན་
པའི་ཕྱིར་དུས་གསུམ་གྱི་སངས་རྒྱས་ཐམས་ཅད་མིའི་རྟེན་ལ་འཚང་རྒྱ་བའི་གཏན་ཚིགས་འདི་མ་གྲུབ་ལ་གྲུབ་ཏུ་ཆུག་ཀྱང་སྒྲུབ་བྱེད་དུ་མི་རུང་སྟེ། འདི་ལྟར་དམ་པ་ཏོག་དཀར་པོ་ལྟ་བུའི་བྱང་སེམས་དེ་འཛམ་བུ་གླིང་པའི་རྟེན་ལ་འཚང་རྒྱ་བའི་རྒྱུ་མཚན་གྱིས་ལྷག་
མོས་དང་རྣལ་འབྱོར་བཞིའི་ཏིང་ངེ་འཛིན་གྱིས་བརྟེན་པ་ལྷ་བསྐྱེད་པ་ན་འཛམ་བུ་གླིང་པའི་མིའི་སྲིད་པ་སྐྱེ་བའི་རིམ་པ་དང་མཐུན་པར་སྒོམ་དགོས་པ་ལ་ཅི་ཡང་མི་ཕན་པའི་ཕྱིར་རོ་ཞེ་ན། །དེའི་སྐྱོན་མེད་དེ་དུས་གསུམ་གྱི་སངས་རྒྱས་རྣམས་མིའི་རྟེན་ལ་འཚང་རྒྱ་
བར་གསུངས་པ་ནི་སངས་རྒྱས་སྤྱིའི་དབང་དུ་མཛད་པ་མིན་བྱི་འདོད་པའི་ཁམས་སུ་འཚང་རྒྱ་བ་རྣམས་ཀྱི་དབང་དུ་མཛད་པ་ཡིན་པའི་ཕྱིར་དང་། བརྟེན་པ་ལྷ་བསྐྱེད་པ་ཡང་འདིར་སྔགས་ཀྱི་ལམ་སྒོམ་པ་སྤྱིའི་དབང་དུ་མ་བྱས་ཀྱི་རྣལ་འབྱོར་ཆེན་པོའི་རྒྱུད་ཀྱི་
གདུལ་བྱའི་གཙོ་བོ་རིན་པོ་ཆེ་ལྟ་བུའི་གང་ཟག་ཚེ་དེ་ལ་ལམ་རིམ་པ་གཉིས་བསྒོམས་ནས་སྔགས་ནས་འབྱུང་བ་བཞིན་འཆང་རྒྱ་བའི་དབང་དུ་མཛད་པ་ཡིན་པའི་ཕྱིར་དང་། རྟེན་དེ་ཡང་འདོད་པའི་རྟེན་ཅན་པར་ངེས་པའི་ཕྱིར་རོ། །འདོད་པའི་རྟེན་ཅན་པ་ཡིན་
པར་ཅིས་ཤེས་སྙམ་ན། རྡོ་རྗེ་སྙིང་པོ་རྒྱན་གྱི་རྒྱུད་ལས་རྣལ་འབྱོར་ཆེན་པོའི་རྒྱུད་ཀྱི་གྲངས་མང་དུ་གསུངས་པའི་མཐར། འདི་ནི་གཉིས་པོ་འཁྱུད་པ་ཡིས། །རྒྱུད་ཀྱི་དབྱེ་བ་བསྟན་པའོ། །དེ་བཞིན་དུ་ནི་ལག་བཅངས་དང་། །རྒོད་དང་བལྟས་པས་ཤེས་པར་
6-2-17a


བྱ། །ཞེས་དང་། དཔལ་སཾ་བྷུ་ཊའི་བརྟག་པ་དྲུག་པ་ལས། རྒོད་དང་བལྟས་དང་ལག་བཅངས་དང་། །གཉིས་གཉིས་འཁྱུད་དང་རྣམ་པ་བཞི། །སྲིན་བུའི་ཚུལ་གྱིས་རྒྱུད་བཞིར་གནས། །ཞེས་རྒོད་པ་ལ་སོགས་པའི་འདོད་
ཆགས་རིགས་བཞི་ལམ་དུ་བྱེད་པ་ལ་རྒྱུད་སྡེ་བཞིར་གསུངས་ཤིང་འདོད་ཆགས་དེ་དག་ཀྱང་མཛོད་ལས། གཉིས་གཉིས་འཁྱུད་དང་ལག་བཅངས་དང་། །རྒོད་དང་བལྟས་པས་འཁྲིག་པ་ཡིན། །ཞེས་འཁྲིག་པའི་འདོད་ཆགས་སུ་གསུངས་པས་
རྒྱུད་སྡེ་བཞི་གང་གི་ཡང་གདུལ་བྱའི་གཙོ་བོ་འདོད་ཁམས་པར་ཁ་ཅིག་འཆད་ཀྱང་། འདིར་ནི་གཞན་གསུམ་རེ་ཤིག་བཞག་ལ་རྣལ་འབྱོར་ཆེན་པོའི་རྒྱུད་ཀྱི་གདུལ་བྱ་བཤད་དེ། དེ་ཡང་ལམ་དེ་ལ་མོས་བ་དང་ཉམས་སུ་ལེན་པ་ཙམ་ལ་ངེས་པ་
མེད་ཀྱི་གང་གི་དབང་དུ་མཛད་ནས་རྒྱུད་དེ་གསུངས་པའི་གདུལ་བྱའི་གཙོ་བོའོ། །དེ་ནི་དབང་པོ་གཉིས་སྦྱོར་གྱི་ཆགས་པའི་སྒོ་ནས་འདོད་ཡོན་ལམ་དུ་བྱེད་ནུས་པའི་འདོད་ཁམས་པ་ཡིན་ཏེ་དཔལ་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས། སྔགས་
དང་ཕྱག་རྒྱས་སྔོན་དུ་མངོན་པར་འདུས་བྱས་པའི་རྡོ་རྗེ་དང་པདྨ་མཉམ་པར་སྦྱོར་བ་མེད་པར་རྣམ་པར་ཤེས་པ་གསུམ་ཉེ་བར་མཚོན་པར་མི་ནུས་སོ། །བྷ་ག་དང་ལིང་ག་ཡང་དག་པར་སྦྱོར་མི་ནུས་པ་དེས་ནི་བདེ་བ་ཆེན་པོའི་ཏིང་ངེ་འཛིན་མི་རྙེད་དོ། །
ཞེས་དང་། གང་རྡོ་རྗེ་དང་པདྨ་མཉམ་པར་སྦྱོར་བའི་བདེ་བས་རང་བཞིན་སྣང་བ་ཡང་དག་པར་ཉེ་བར་མཚོན་པར་བྱེད་པ་དེ་ནི་བདེ་བ་ཆེན་པོའི་གོ་འཕང་ལ་གནས་པར་འགྱུར་རོ། །ཞེས་དང་། འདུས་པའི་རྩ་རྒྱུད་སྟོན་པའི་ཚེ་སྟོན་པས་འདོད་
6-2-17b


ཆགས་ཆེན་པོའི་ཚུལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བསྟན་པའི་དོན་ལ་མདོ་བསྲེ་ལས། ཇི་ལྟར་བཅོམ་ལྡན་འདས་ཀྱིས་བྱང་ཆུབ་ཀྱི་གོ་འཕང་ནི་འདོད་ཆགས་ལས་སྐྱེ་བར་འགྱུར་བར་རབ་ཏུ་བསྟན་པར་བྱ་བའི་ཕྱིར་ལེའུ་དང་པོར་
འདོད་ཆགས་ཆེན་པོའི་ཚུལ་གྱིས་ཞེས་བྱ་བའི་ཏིང་ངེ་འཛིན་ལ་སྙོམས་པར་འཇུག་པར་མཛད་པ་དེ་བཞིན་དུ། སྐྱེ་བཞིན་པ་ལ་གནས་པས་དང་པོ་སྦྱོར་བ་བྱ་སྟེ་འདོད་ཆགས་ལ་སྤྱོད་པའི་སེམས་ཅན་རྣམས་ཀྱི་འདོད་པས་ཐར་པ་རབ་ཏུ་བསྟན་པར་བྱ་བའི་
ཕྱིར། །ཞེས་དང་། སྒྲོན་གསལ་ལས་ཀྱང་། ད་ནི་འདོད་པའི་ཁམས་ན་གནས་པའི་ཡུལ་ལ་ཆགས་པའི་སེམས་ཅན་རྣམས་ཀྱི་འདོད་པའི་ཡོན་ཏན་ལྔའི་སྒོ་ནས་གྲོལ་བ་རབ་ཏུ་བསྟན་པའི་ཕྱིར། །ཞེས་དང་། གང་གི་དོན་དུ་འདི་ཉིད་མཛད་ཅེས་བའི་ལན་དུ། སྐྱེ་བོ་
འདོད་ཆགས་ཅན་དོན་དུ། །ཞེས་གསུངས་པའི་ཕྱིར་རོ། །དབང་པོ་གཉིས་སྦྱོར་ཡང་ངན་འགྲོ་གཉིས་དང་འདོད་ལྷ་འོག་མ་གཉིས་དང་མི་རྣམས་ལ་ཡོད་ཀྱི་དེ་དག་ལས་གཞན་ན་མེད་ལ་ངན་འགྲོ་ནི་སྔགས་ཀྱི་ལམ་གྱི་རྟེན་རྣམ་དག་ཏུ་མི་རུང་ཞིང་འདོད་ལྷ་ལ་ཡང་བདེ་
བ་ཆེན་པོའི་རྟེན་བྱང་སེམས་ཀུན་དེ་ལྟ་བུ་མེད་པས་དེ་ལ་བརྟེན་ནས་དགའ་བཞི་ལ་སོགས་པའི་ཏིང་ངེ་འཛིན་མཚོན་དུ་མེད་པས་བླ་མེད་ཀྱི་གདུལ་བྱའི་གཙོ་བོར་མི་རུང་ངོ་། །དབང་པོ་གཉིས་སྦྱོར་གང་ན་ཡོད་པ་དང་བྱང་སེམས་ཀུན་ད་ལྟ་བུ་ཡོད་མེད་ཀྱི་ཚུལ་ནི་
ས་ཡི་དངོས་གཞི་ལས། དུད་འགྲོ་རྣམས་དང་ཡི་དྭགས་རྣམས་དང་མི་རྣམས་ལ་ནི་ལུས་ཀྱི་བདེ་བ་དང་སྡུག་བསྔལ་འདྲེས་པར་ཡོད་པས་འཁྲིག་པའི་སྦྱོར་བ་ཡོད་དེ། སྐྱེས་པ་དང་བུད་མེད་དེ་རྣམས་ཕན་ཚུན་གཉིས་ཀྱིས་གཉིས་སྤྲོད་པ་བྱེད་དེ་ཁུ་བ་
6-2-18a


ཡང་འབྱུང་ངོ་། །འདོད་པ་ན་སྤྱོད་པའི་ལྷ་རྣམས་ལ་ཡང་འཁྲིག་པའི་སྦྱོར་བ་ནི་ཡོད་ལ་ཁུ་བ་འབྱུང་བ་ནི་མེད་དེ་དེ་དག་གི་ནི་འབྱུང་བའི་ཚེ་མཚོན་གྱི་སྒོ་ནས་རླུང་ཉི་ཚེ་འབྱུང་ངོ་། །ཞེས་གསུངས་ཤིང་སློབ་དཔོན་དབྱིག་གཉེན་
གྱིས་ཀྱང་དེ་བཞིན་དུ་གསུངས་སོ། །ཡང་དེ་ཉིད་ལས། དེ་དག་ནི་ལུས་ཀྱི་ཕྱི་ནང་གཙང་ཞིང་དྲི་ང་བ་མེད་དོ། །དེ་དག་ལ་ནི་འདི་ལྟ་སྟེ་མི་གཙང་བའི་རྫས་འདི་ལྟ་སྟེ་རྡུལ་དང་དྲི་མ་དང་རུས་པ་དང་རྒྱུས་པ་དང་རྩ་དང་མཁལ་མ་དང་སྙིང་ལ་སོགས་པ་གང་ཡིན་པ་
དེ་དག་མེད་དོ། །ཞེས་རྩ་དང་ནང་ཁྲོལ་རྣམས་མེད་པར་གསུངས་པས་འདོད་ལྷ་རྣམས་ལ་ཀུན་ད་ལྟ་བུའི་རྟེན་རྩའི་འཁོར་ལོ་རྣམས་ཀྱང་མེད་དོ། །དེ་དག་གིས་བདུད་རྩི་ལ་སོགས་པའི་ཁམ་ཟས་ཟོས་པ་རྣམས་ཀྱང་དེ་མ་ཐག་ཏུ་ལུས་ཀྱི་ཆ་ཐམས་ཅད་དུ་སོང་
ནས་ཞུ་སྟེ་བཤད་གཅིར་འགྱུར་བ་མེད་པར་ས་ཡི་དངོས་གཞི་ལས་གསུངས་སོ། །མིའི་གླིང་གཞན་རྣམས་ཀྱང་སྔར་བཤད་པ་ལྟར་དབང་པོ་ཤིན་ཏུ་རྣོ་བ་མ་ཡིན་ལ་སྔགས་ནས་བཤད་པའི་ཚེ་གཅིག་གིས་སངས་རྒྱས་འགྲུབ་པ་ལ་ནི་དབང་པོ་མཆོག་
ཏུ་རྣོ་བ་ཞིག་དགོས་པས་འཛམ་བུ་གླིང་པ་དགོས་སོ། །འདི་ཡང་སྒྲོན་གསལ་ལས། ཨུཏྤལ་དེ་བཞིན་པད་དཀར་དང་། །པདྨ་ཙནྡན་ཉིད་དག་སྟེ། །གང་ཟག་བཞི་པོ་འདི་དག་ནི། །ཚོགས་པ་ལ་བཤད་གང་ཟག་གོ། །རྫོགས་པའི་རིམ་གྱི་སྐལ་ལྡན་ཞིང་། །
རྟག་ཏུ་སྤྱོད་པས་རྣམ་བརྒྱན་པ། །འདི་ནི་རིན་ཆེན་གང་ཟག་སྟེ། །སློབ་མ་ལ་བཤད་སྣོད་ཡིན་ནོ། །ཞེས་གསུངས་པ་ལྟར་ཚོགས་བཤད་ཀྱི་སྣོད་ཀྱི་གང་ཟག་བཞི་དང་སློབ་བཤད་ཀྱི་སྣོད་གཅིག་སྟེ་ལྔ་ཡོད་ཀྱང་གདུལ་བྱའི་གཙོ་བོ་ནི་རིན་པོ་ཆེ་ལྟ་བུའོ། །
6-2-18b


དེ་ལ་ཡང་རྒྱུད་དང་སྒྲུབ་ཐབས་ཀྱི་རྒྱ་གཞུང་ཕལ་མོ་ཆེར་སྐྱེས་པའི་དབང་དུ་བྱས་ནས་བསྟན་པ་མང་བར་སྣང་ན་ཡང་བུད་མེད་རྟེན་དུ་མི་རུང་བ་ནི་མ་ཡིན་ཏེ་རྒྱུད་ཀྱི་ལེའུ་བཅུ་གསུམ་པ་ལས། རིག་པ་ཆེན་མོ་སྤྱན་ལ་སོགས། །རྟག་ཏུ་འདོད་པའི་དོན་བརྩོན་པ། །
འདོད་པའི་ལོངས་སྤྱོད་དག་གིས་ནི། །ཇི་ལྟར་འདོད་པ་བསྟེན་ན་འགྲུབ། །ཅེས་གསུངས་ཤིང་དེའི་འགྲེལ་པ་སྒྲོན་གསལ་ལས་ཀྱང་། འདོད་ཆགས་ལས་སྐྱེས་པའི་བྱང་ཆུབ་ནི་སྐྱེས་པ་འབའ་ཞིག་གིས་བསྒྲུབ་པར་མ་ཟད་ཀྱི་བུད་མེད་ཀྱིས་ཀྱང་སྒྲུབ་པར་བྱེད་དོ་ཞེས་
བསྟན་པར་བྱ་བའི་ཕྱིར་རིག་པ་ཆེན་མོ་ཞེས་བྱ་བ་ལ་སོགས་པ་གསུངས་ཏེ་ཞེས་གསུངས་པས་སོ། །དེ་ལ་རིག་པ་ཆེན་མོ་ནི་ལེགས་པར་བསླབས་པའི་ཕྱག་རྒྱའོ། །སྤྱན་ལ་སོགས་པ་ནི་པདྨ་ཅན་ལ་སོགས་པའི་བུད་མེད་བཞིའོ། །འདོད་པ་ནི་ཡུལ་ལྔ་དང་དེའི་
དོན་ནི་དེ་རྣམ་པར་དག་པ་སྟེ་དེ་ལ་རྟག་ཏུ་སྒོམ་པ་ལྷུར་ལེན་པ་ལ་བརྩོན་པས་ཇི་ལྟར་བདེ་བར་འདོད་པའི་ཡུལ་ལ་བསླབས་ན་རྡོ་རྗེ་འཆང་གི་གོ་འཕང་འགྲུབ་པར་འགྲེལ་བར་བཤད་པས་ཐོབ་བྱ་འདྲ་ལ། རྟེན་ནི་སྡོམ་འབྱུང་དང་གདན་བཞི་དང་ཞལ་ལུང་ལ་
སོགས་པར་གསུངས་པའི་མཚན་ཉིད་དེ་རྣམས་ཚང་བའི་བུད་མེད་དགོས་པར་གསལ་ལོ། །འདི་ཡི་གྲོལ་ལུགས་ཀྱི་ཁྱད་པར་ནི་རྡོ་རྗེ་མཁའ་འགྲོའི་ལེའུ་དང་པོའི་འགྲེལ་པར་ཡང་བཤད་དོ། །དེ་ལྟར་ན་འདོད་པའི་རྟེན་ལ་འཚང་རྒྱ་བ་ཐམས་ཅད་འཛམ་བུ་གླིང་
པའི་རྟེན་ཅན་དུ་བསྒྲུབས་པས་ནི་སྔགས་ཀྱི་ལམ་གྱིས་ཚེ་དེ་ལ་འཚང་རྒྱ་བ་རྣམས་ཀྱང་འདོད་པའི་རྟེན་ལ་འཚང་རྒྱ་བ་ཡིན་པས་འཛམ་བུ་གླིང་པའི་རྟེན་ཅན་དུ་འགྲུབ་ལ། དེའི་རྒྱུ་མཚན་གྱིས་རྟེན་དེས་བཅུད་ཆགས་པ་དང་ཆོས་མཐུན་པར་བསྒོམ་པར་བྱ་
6-2-19a


བའི་མཐུན་ཡུལ་ཡང་འཛམ་བུ་གླིང་པའི་མིའི་སྲིད་པ་འགྲུབ་པའི་རིམ་པ་དང་མཐུན་པར་སྒོམ་པ་འགྲུབ་པ་ཡིན་ནོ། །སྡོམ་འབྱུང་གི་ལེའུ་གཉིས་པ་བསྐྱེད་རིམ་སྟོན་པའི་ལེའུ་ལས་སྔར་བཤད་པ་བཞིན་སྐྱེ་གནས་བཞི་བཤད་པའི་
འོག་ཏུ་གླིང་བཞིན་ལ་ལོངས་སྤྱོད་དང་ལས་ཀྱི་ས་གཉིས་དང་འཚང་རྒྱ་བའི་ཚུལ་བཞི་གསུངས་པའི་དོན་རྣམས་ནི་འགྲེལ་པས་འདི་དང་མི་མཐུན་པར་བཀྲལ་མོད་ཀྱང་སློབ་དཔོན་འདིས་བཀྲོལ་བའི་དོན་ཇི་ལྟ་བ་བཞིན་དུ་སྣང་བས་རྒྱུད་དེའི་དོན་ཡང་འདི་དང་མཐུན་
པར་བྱའོ། །འདིར་ཆོས་མཐུན་སྒོམ་པ་པོ་དེ་འཛམ་བུ་གླིང་པའི་མི་ཡིན་དུ་ཆུག་ཀྱང་ཆོས་མཐུན་པའི་མཐུན་ཡུལ་ལ་འཛམ་བུ་གླིང་པའི་མིའི་སྐྱེ་ཤི་བར་དོ་གསུམ་དགོས་པའི་རྒྱུ་མཚན་ཅི་ཡིན་སྙན་ན། སྤྱིར་ཆོས་མཐུན་སྒོམ་པ་དང་ཁྱད་པར་དུ་འཛམ་བུ་
གླིང་པའི་མི་དང་མཐུན་པར་སྒོམ་པ་རྣམས་ཀྱི་གནད་ཀྱི་དོན་དང་རིམ་པ་གཉིས་ཀྱི་སྦྱང་བར་བྱ་བའི་གཞིར་གང་འགྱུར་པ་རྣམས་ནི་འཆད་པར་འགྱུར་རོ། །སྔགས་ཀྱི་ལམ་གྱིས་ཚེ་གཅིག་ལ་བསྒྲུབ་པར་བྱ་བའི་སངས་རྒྱས་དེ་མིའི་རྟེན་ལ་སྒྲུབ་ན་འོག་མིན་
གྱི་རྟེན་ཅན་གྱིས་རྟེན་དེ་ལ་ཐོབ་པའི་སངས་རྒྱས་སྔགས་ཀྱི་ལུགས་ཀྱིས་འདོད་མི་འདོད་དང་འོག་མིན་གྱི་ལྷ་དང་འདོད་བའི་མིའི་རྟེན་ལ་གསར་དུ་འཚང་རྒྱ་བའི་ཆོས་དང་གཟུགས་ཀྱི་སྐུ་འགྲུབ་པའི་ཁྱད་པར་དང་། མིའི་རྟེན་ལ་འཚང་རྒྱ་བར་བཤད་པ་དང་། རྫོགས་
རིམ་ཐོབ་ནས་སྤྱོད་པ་བྱེད་པ་མ་བྱུང་བར་ཚེའི་དུས་བྱས་པ་དེ་འགྲོ་བ་གཞན་དུ་སྐྱེ་བ་མ་བླངས་པར་འཚང་རྒྱ་བར་སྤྱོད་བསྡུས་ལས་གསུངས་པ་གཉིས་མི་འགལ་བའི་ཚུལ་དང་། ཚེ་གཅིག་ལ་འཚང་རྒྱ་བའི་རྟེན་དེས་ཀྱང་ལུས་བརྗེས་ནས་འཚང་རྒྱ་བར་སྤྱོད་བསྡུས་
6-2-19b


དང་སྒྲོན་གསལ་ལས་གསུངས་པས་དེ་ལྟ་ཡིན་ན་དང་པོར་མིའི་རྟེན་ལ་ལམ་སྒྲུབ་པ་ཡིན་ཀྱང་མཐར་འབྲས་བུ་འཐོབ་པ་ན་ལུས་རྟེན་དེ་བརྗེ་ཚུལ་ཇི་ལྟར་བྱེད་པ་སོགས་ནི། རྫོགས་རིམ་གྱི་གཞུང་འཆད་པའི་སྐབས་སུ་བབ་པར་སྣང་བས་དེར་བཤད་པར་བྱའོ། །
གསུམ་པ་ལ་གསུམ། བསྐལ་པ་དང་པོའི་མི་དང་མཐུན་པར་བསྒོམ་པ། དེ་འཆི་འཕོ་ཞིང་བར་སྲིད་གྲུབ་པ་དང་མཐུན་པར་བསྒོམ་པ། དེས་སྐྱེ་སྲིད་གྲུབ་པ་དང་མཐུན་པར་བསྒོམ་པའོ། །དང་པོ་ནི། གཞལ་ཡས་ཁང་བསྐྱེད་ནས་ལྷ་བསྐྱེད་པའི་ཐོག་
མར་ལྷག་མོས་ཀྱི་དཀྱིལ་འཁོར་བསྐྱེད་པར་མདོར་བྱས་སུ་གསུངས་པ་ནི་བསྐལ་པ་དང་པོའི་མི་དང་ཆོས་མཐུན་པར་བསྒོམ་པ་ཡིན་ནོ། །འདི་ལ་གཉིས། དངོས་སུ་བསྟན་པའི་མཐུན་ཡུལ། ཤུགས་ཀྱིས་ཐོབ་པའི་ལྷག་མོས་བསྒོམ་པའོ། །དང་པོ་ནི། 
སྤྱིར་བཅུད་འཆགས་པའི་རིམ་པ་ནི་འོད་གསལ་ནས་ལྷ་གཅིག་ཚེ་འཕོས་ནས་ཚངས་པ་ཆེན་པོར་སྐྱེ་ལ་དེ་ནས་ཚངས་པའི་མདུན་ན་འདོན་དང་དེ་ནས་ཚངས་རིས་དང་དེ་ནས་འདོད་ལྷ་དྲུག་ཡས་རིམ་ནས་དང་དེ་ནས་སྒྲ་མི་སྙན་དང་བ་གླང་སྤྱོད་དང་ལུས་འཕགས་
པོ་དང་འཛམ་བུ་གླིང་པའི་མི་རྣམས་རིམ་བཞིན་དུ་འཆགས་སོ། །དེ་ནས་ཡི་དྭགས་དང་དུད་འགྲོ་དང་དམྱལ་བར་སྐྱེ་སྟེ་གང་མཇུག་ཏུ་འཇིག་པ་དེ་དང་པོར་འཆགས་པ་ཆོས་ཉིད་དོ། །དེ་ལྟར་ཡོད་ཀྱང་འདིར་ནི་ལྷ་དང་མིའི་གླིང་གཞན་གསུམ་དང་ངན་འགྲོའི་
བཅུད་འཆགས་པ་དང་མི་བསྟུན་གྱི་འཛམ་བུ་གླིང་པའི་མི་དང་བསྟུན་ནས་འཆད་དོ། །དེ་ཡང་འོད་གསལ་གྱི་ལྷའི་རིས་ནས་སེམས་ཅན་རྣམས་ཤི་འཕོས་ནས་འཛམ་བུ་གླིང་པའི་མིར་སྐྱེ་སྟེ་བསྐལ་པ་དང་པོའི་མི་རྣམས་ནི། མཚན་དཔེའི་ཡོན་ཏན་
6-2-20a


རྗེས་མཐུན་པ་ཡོད་པས་སངས་རྒྱས་ཀྱི་ཡོན་ཏན་ཐམས་ཅད་ཀྱིས་བརྒྱན་ཅིང་། ཡིད་ཀྱི་རང་བཞིན་གྱི་གཟུགས་ཅན་ནི་མཛོད་འགྲེལ་དུ་མདོ་དྲངས་པ་དང་ལུང་རྣམ་འབྱེད་གཉིས་ཀར་གཟུགས་ཅན་དང་ཡིད་ལས་བྱུང་བ་གཉིས་སོ་
སོར་གསུངས་ལ་དེའི་དོན་ནི་རྒྱལ་པོ་སྲས་ཀྱིས་གཟུགས་ལྟར་རུང་བ་དང་བརྫུས་ཏེ་སྐྱེས་པ་ལ་བཤད་དོ། །ལག་པ་དང་རྐང་པ་ལ་སོགས་པའི་ཡན་ལག་དང་སོར་མོ་ལ་སོགས་པའི་ཉིང་ལག་ཐམས་ཅད་ཀྱིས་མཚན་པ་སྟེ་དེ་དག་དང་ལྡན་པ། དབང་པོ་
ཚོགས་པས་མ་ཚང་བ་མེད་པ། མ་རྫོགས་པ་མེད་པ་ལ་མཛོད་འགྲེལ་དུ་མདོ་དྲངས་པ་ལས་ངན་པ་མ་ཡིན་པ་ཞེས་འབྱུང་བའི་དོན་ཞར་བ་དང་ལོང་བ་མེད་པ་ལ་རྒྱལ་པོ་སྲས་ཀྱིས་བཤད་དེ་རྣམ་འབྱེད་ལས་དབང་པོ་མ་ཉམས་པ་ཞེས་པ་དང་མཐུན་ནོ། །
ཁ་དོག་གསལ་བའི་ལུས་ཅན་ལ་མཛོད་འགྲེལ་ལས། མཛེས་པ་ཁ་དོག་ལ་གནས་པ་རང་གི་འོད་ཅན་ཞེས་དྲངས་པ་དང་། རྣམ་འབྱེད་གཉིས་དོན་འདྲ་བར་ཡོད་ལ་དེའི་དོན་ནི་དབྱིབས་དང་ཁ་དོག་བལྟ་ན་སྡུག་པ་དང་ཉི་མ་ལ་སོགས་པའི་འོད་ལ་མི་
ལྟོས་པ་ལ་རྒྱལ་པོ་སྲས་ཀྱིས་བཤད་དོ། །རང་གི་ལས་ཀྱི་རྫུ་འཕྲུལ་གྱི་མཐུས་ནམཁའ་ལ་འགྲོ་བ་ལོ་གྲངས་ཀྱིས་དཔག་ཏུ་མེད་པའི་ཚེ་ཐུབ་པས་རིང་ཞིང་ཁམ་ཟས་ལ་མི་ལྟོས་པས་དགའ་བ་ལ་སྤྱོད་པ་སྟེ་དགའ་བའི་ཟས་ཅན་ནོ། །སངས་རྒྱས་ཀྱི་
ཡོན་ཏན་གྱིས་བརྒྱན་པ་ཞེས་པ་མངོན་པ་དང་རྣམ་འབྱེད་ལས་མ་བྱུང་ངོ་། །དེ་ལྟར་ཡེ་ཤེས་ཀྱི་ལུས་ཅན་ཏེ་འབྱུང་བའི་ལུས་རགས་པ་དང་བྲལ་བའི་གཟུགས་ཁམས་པའི་ལྷའི་ལུས་དང་འདྲ་བའི་ལུས་ཁྱད་པར་ཅན་ཐོབ་པ་ཡིན་ཡང་རང་གི་སེམས་
6-2-20b


ལས་བྱུང་བའི་ལས་དང་ཉོན་མོངས་པ་ཐམས་ཅད་ཀྱིས་མངོན་པར་ཟིལ་གྱིས་གནོན་པ་སྟེ་དེ་གཉིས་ཀྱི་དབང་དུ་འགྱུར་རོ། །རྒྱུ་གང་གི་དབང་གིས་དེ་ལྟར་འགྱུར་བ་ནི། ཐོག་མ་མེད་པའི་དུས་ནས་བྱུང་བའི་དེ་ཁོ་ན་ཉིད་ཀྱི་དོན་ལ་རྨོངས་པའི་མི་ཤེས་པ་གཅིག་
ནས་གཅིག་ཏུ་བརྒྱུད་པའི་བག་ཆགས་ཀྱི་སྟོབས་ལས་ལས་ཉོན་གྱི་དབང་དུ་འགྱུར་རོ། །འདི་ལ་སྒྱུ་ལུས་དང་ཆ་འདྲ་བའི་ལུས་ཡོད་ཀྱང་སྒྱུ་མ་ལྟ་བུའི་ཏིང་ངེ་འཛིན་ཐོས་བསམ་གྱིས་མི་ཤེས་ཤིང་བསྒོམས་པས་ཁོང་དུ་མ་ཆུད་དེ་དེས་ན་སྲིད་པར་འཁྱམ་པ་ཡིན་
ཏེ་སྡོམ་འབྱུང་ལས། སྒྱུ་མ་ལྟ་བུའི་ཏིང་ངེ་འཛིན། །རབ་ཏུ་མི་ཤེས་མི་རྣམས་ནི། །ཐོག་མེད་དུས་ཅན་ཉོན་མོངས་ཀྱི། །བག་ཆགས་རབ་ཏུ་བསགས་བྱས་ལ། །དེ་ནས་སྔོན་བྱས་ལས་ཀྱིས་ནི། །སྐྱེ་དང་འཆི་བ་ཡང་དག་འབྱུང་ཞེས་སོ། །དེ་འདྲ་བའི་ལུས་
གྲུབ་པ་དེ་ནས་དེ་དག་གིས་རིམ་གྱིས་བརྒྱུད་ནས་འཆད་པར་འགྱུར་བ་ལྟར་རང་གི་འོད་ནུབ་པ་ལ་སོགས་པའི་སྒོ་ནས་ཡིད་ཀྱི་རང་བཞིན་གྱི་ལུས་སྔར་བཤད་པའི་ཡོན་ཏན་ཅན་དེ་སྤངས་ཏེ་ཉོན་མོངས་པའི་རྒྱུད་ཀྱིས་རིམ་གྱིས་ཐ་མལ་པའི་མིའི་བདག་ཉིད་ཀྱི་
དངོས་པོ་ཕོ་མོའི་མཚན་མ་ཅན་རགས་པའི་ལུས་ཡོངས་སུ་འཛིན་ཏོ། །གཉིས་པ་ནི། དེ་ལྟར་བསྐལ་པ་དང་པོའི་མི་ཐ་མལ་པའི་ལུས་ཅན་དུ་གྱུར་ནས་ཕོ་མོའི་སྒོ་ནས་ཐབས་ཤེས་ཀྱི་རྣམ་པ་གྲུབ་པའི་བཅུད་ཀྱི་སྲིད་པའི་རིམ་པ་གྲུབ་པ་དེ་དང་མཐུན་པར་
ལྷག་མོས་ཀྱི་ལྷ་ཕོ་མོའི་རྣམ་པ་ཅན་དུ་སྒོམ་པ་ཡིན་ནོ། །འདིར་ལྷག་མོས་ཀྱི་ལྷ་རྣམས་བསྐལ་པ་དང་པོའི་མི་དང་ཆོས་མཐུན་པར་མཛད་པའི་རྒྱུ་མཚན་ནི། སྲིད་པ་སྐྱེ་བ་ལ་སྣོད་འཆགས་པའི་འོག་ཏུ་བཅུད་འཆགས་བ་དང་འདྲ་བར། བསྐྱེད་རིམ་ལ་རྟེན་
6-2-21a


གཞལ་ཡས་ཁང་གི་སྣོད་ཆགས་པའི་འོག་ཏུ་བཅུད་ཐོག་མར་ཆགས་པ་ལྷག་མོས་ཀྱི་ལྷ་ཡིན་པའི་ཕྱིར་དང་། འཛམ་བུ་གླིང་པའི་མི་འཆགས་པའི་བཅུད་ཉིད་དང་ཆོས་མཐུན་པར་སྒོམ་དགོས་པའི་ཕྱིར་རོ། །འོ་ན་སྐབས་འདིར་
ལྷག་མོས་བསྒོམ་པ་དང་ཆོས་མཐུན་སྦྱོར་བ་མ་མཛད་པ་ཅི་ཡིན་ཞེ་ན། རྟེན་བསྐྱེད་པའི་འོག་ཏུ་བརྟེན་པ་ཐོག་མར་བསྐྱེད་པ་ན། དེར་མི་བསྐྱེད་པ་ལ་སོགས་པ་ལྷའི་འཁོར་ལོ་ཐམས་ཅད་ལྷག་པར་མོས་པས་དགོད་པར་བྱའོ། །ཞེས་པ་དང་། གནས་
ནི་སྒྲུབ་པ་སྔོན་འགྲོ་བས། །རྡོ་རྗེ་གསུམ་བསྐྱེད་བསྒོམ་པར་བྱ། །ཞེས་གསུངས་ཟིན་ལ་བརྟེན་པ་ལྷ་བསྐྱེད་པའི་མཐུན་ཡུལ་ཡང་སྔར་བཤད་ཟིན་པས་དེ་དང་ལྷག་མོས་གཉིས་སྦྱོར་བ་གོ་སླ་བ་ལ་དགོངས་ནས་མ་གསུངས་སོ། །དེའི་ཕྱིར་མན་ངག་སྙེ་མའི་
སྙེ་མ་བཅུ་གཉིས་པར་ལྷག་མོས་དང་བར་སྲིད་གཉིས་ཆོས་མཐུན་པར་སྦྱོར་བ་ནི་མི་འཐད་ཅིང་། བར་སྲིད་དང་དང་པོའི་མགོན་པོ་གཉིས་ཆོས་མཐུན་པར་སྦྱོར་བ་འོག་ནས་སྟོན་པ་དང་འགལ་བའི་ཕྱིར་རོ། །དེས་ན་ལྷག་མོས་ཀྱི་ལྷ་རྣམས་དཀྲོངས་སྐྱེད་
བྱེད་པ་ཡང་བསྐལ་པ་དང་པོའི་མི་བརྫུས་སྐྱེས་དང་བསྟུན་པ་ཡིན་གྱི་བར་སྲིད་ཀྱི་སྐྱེ་ཚུལ་དང་བསྟུན་པ་མིན་ནོ། །འདིར་ལྷག་མོས་ཀྱི་མཛད་པ་དང་ལྷག་མོས་ལུས་ལ་བསྡུ་བ་སོགས་ལ་ཆོས་མཐུན་སྦྱོར་བའི་ཕྲ་མོའི་ཆོས་མཐུན་མི་དགོས་ཀྱི་རིགས་
པའི་ཆོས་མཐུན་གྱིས་ཆོག་སྟེ་སྐབས་གཞན་དུ་བཤད་པ་བཞིན་ནོ། །གཉིས་པ་ལ་གཉིས། མཐུན་ཡུལ་བཤད་པ། དེ་དང་མཐུན་པར་སྒོམ་ཚུལ་ལོ། །དང་པོ་ལ་གཉིས། འཆི་འཕོ་བ་དང་། ཤི་ནས་བར་དོ་འགྲུབ་པའི་ཚུལ་ལོ། །དང་པོ་ནི།
6-2-21b


སྔར་བསྟན་པ་དེ་ལྟ་བུའི་བསྐལ་པ་དང་པོའི་མིའི་སེམས་ཐུགས་རྡོ་རྗེ་ཞེས་ཐ་སྙད་བྱ་བའི་གཞི་དེས་སེམས་རང་ཉིད་ཀྱི་རང་བཞིན་གྱི་སྣང་བ་རླུང་གི་བཞོན་པའི་རང་བཞིན་ཅན་ཡོངས་སུ་མ་ཤེས་པས་སེམས་ཅན་གྱི་རིས་ནས་འཇིག་རྟེན་གཞན་དུ་འཆི་
འཕོའོ། །སེམས་ཀྱི་རང་བཞིན་མི་ཤེས་པའི་རྒྱུ་ནི་ལམ་ཕྱིན་ཅི་མ་ལོག་པ་སྟོན་པའི་དགེ་བའི་བཤེས་གཉེན་དང་བྲལ་བས་ཡིན་ནོ། །སྤྱོད་བསྡུས་ལས་ཀྱང་། དེ་ལྟར་འདི་དག་ནི་ལུས་དང་ངག་དང་ཡིད་ཀྱི་ཉེས་པར་སྤྱོད་པའོ་ཞེས་མི་ཤེས་ཤིང་རང་ཉིད་
ཀྱི་རང་བཞིན་གྱི་སྣང་བ་རླུང་གི་བཞོན་པའི་རང་བཞིན་ཅན་མ་ཤེས་ནས་ངའི་ལུས་དང་ངའི་ངག་དང་ངའི་སེམས་ཡིན་ནོ་ཞེས་རློམ་པ་དང་ངར་སེམས་པས་ལས་དགེ་བ་དང་མི་དགེ་བ་རྣམས་བྱས་ནས་བདེ་འགྲོ་དང་ངན་འགྲོར་མཆོག་ཏུ་གཞོལ་བར་འགྱུར་རོ། །ཞེས་
སེམས་ཀྱི་བདག་མེད་པའི་དེ་ཁོ་ན་ཉིད་མ་ཤེས་པར་བདག་དང་བདག་གི་བར་བཟུང་བའི་ཉོན་མོངས་ཀྱི་དབང་གིས་ལས་བསགས་ནས་འཁོར་བར་འཁྱམ་པར་གསུངས་པ་འདི་སྔགས་དང་མཚན་ཉིད་གཉིས་ཀའི་ལུགས་ཀྱིས་འཁོར་བའི་འཇུག་རིམ་ཡིན་ནོ། །དེས་
ན་སྲིད་པར་འཁྱམ་པའི་རྩ་བ་བདག་འཛིན་གཅོད་བྱེད་ཀྱི་བདག་མེད་པའི་ལྟ་བ་ནི་ལམ་གཉིས་ཀ་ལ་འདྲ་བས་སྔགས་ཀྱི་ལམ་ལ་ཡང་བསྟན་པའི་སྙིང་པོ་བདག་མེད་པའི་དེ་ཁོ་ན་ཉིད་གཏན་ལ་ཕེབས་པའི་ཤེས་རབ་དང་མ་བྲལ་བ་སྙིང་པོའི་དོན་དུ་གཟུང་བར་བྱའོ། །
གཉིས་པ་ལ་གཉིས། བར་དོར་གནས་པའི་དུས། བར་དོའི་མཚན་ཉིད་བསྟན་པའོ། །དང་པོ་ནི། ཤི་འཕོས་པ་དེ་བར་དོར་ཡུན་ཇི་ཙམ་ཞིག་གནས་སྙམ་ན། ཇི་སྲིད་དུ་སྐྱེ་གནས་ཕྱི་མར་སྐྱེ་བའི་རྒྱུ་རྐྱེན་གྱི་ཚོགས་པ་མ་རྙེད་པ་དེ་སྲིད་དུ་སྲིད་པ་བར་མ་དོ་ན་གནས་སོ་
6-2-22a


ཞེས་གསུངས་པ་ནི་ངེས་པར་བཤད་པ་ཡིན་པས་དེ་ནི་བར་དོ་ཐམས་ཅད་ལ་འདྲ་བ་ཡིན་ནོ། །དུས་དེ་ཡང་ཇི་ཙམ་སྙམ་ན་ཞག་བདུན་དུ་ཞེས་པ་ནི་བར་དོའི་ཚེ་གཅིག་གི་དབང་དུ་མཛད་ཀྱི་སྤྱིར་ནི་གང་དུ་སྐྱེ་བའི་རྒྱུ་རྐྱེན་མ་ཚོགས་ན་བར་དོ་དེ་ཤི་
ནས་བར་དོར་ཞག་བདུན་ཕྲག་བདུན་གནས་ལ་དེ་ཚུན་ཆད་ཀྱིས་སྐྱེ་བའི་ཚོགས་པ་རྙེད་པར་འགྱུར་རོ། །སྡོམ་འབྱུང་ལས་ཀྱང་། ཚོགས་པ་མ་རྙེད་དེ་སྲིད་དུ། །ཞག་བདུན་བར་དོའི་སྲིད་པར་གནས། །སྲིད་པ་བར་དོའི་སེམས་ཅན་ནི། །འགྲོན་པོ་རྣམས་ཀྱི་བགྲོད་
པ་བཞིན། །འདི་ལྟར་ལས་ཀྱི་སྲས་བུ་ཡིས། །འགྲོ་བ་དྲུག་ཏུ་རབ་ཏུ་རྒྱུ། །ཞེས་གསུངས་སོ། །བར་དོའི་གནས་ཚད་ནི་ས་ཡི་དངོས་གཞི་ལས་བར་མ་དོའི་སྲིད་པ་དེ་ཡང་སྐྱེ་བའི་རྐྱེན་མ་རྙེད་ཀྱི་བར་དུ་རེ་ལྟར་ཐོགས་ན་ཞག་བདུན་གནས་པར་ཟད་དོ། །རྐྱེན་རྙེད་ན་ནི་
ངེས་པ་མེད་དོ། །ཡང་མ་རྙེད་ན་ནི་ལུས་བརྗེས་ནས་ཡང་ཞག་བདུན་དུ་གནས་སོ། །རྐྱེན་མ་རྙེད་ན་ཞག་བདུན་ཕྲག་བདུན་གྱི་བར་དུ་ཡང་གནས་སོ། །དེ་ལས་འདས་ཕན་ཆད་ནི་གདོན་མི་ཟ་བར་སྐྱེ་བའི་རྐྱེན་རྙེད་པར་འགྱུར་རོ། །ཞེས་གསལ་བར་གསུངས་ཏེ། རེ་ལྟར་
ཐོགས་ན་ཞེས་དང་ངེས་པ་མེད་དོ་ཞེས་གསུངས་པས་ཞག་བདུན་ནི་ཚེ་གཅིག་གི་རིང་མཐའོ། །གཉིས་པ་ལ་གཉིས། དྲི་བ་དང་། ལན་ནོ། །དང་པོ་ནི། སྲིད་པ་བར་མ་དོའི་སྒྲ་དོན་དང་ལུས་ཀྱི་རང་བཞིན་ཇི་ལྟར་ལགས་ཞེས་ཞུས་པའོ། །གཉིས་པ་ལ་གསུམ། 
བར་དོའི་རང་བཞིན་སྤྱིར་བསྟན་པ། བྱང་སེམས་ཀྱི་བར་དོ་བྱེ་བྲག་ཏུ་བཤད་པ། སྤྱིའི་མཚན་ཉིད་བསྟན་པའོ། །དང་པོ་ནི། དྲི་བའི་ལན་སྨྲས་པ། ཚེ་སྔ་མའི་འཆི་སྲིད་དང་ཚེ་ཕྱི་མའི་སྐྱེ་བའི་སྲིད་པའི་བར་ན་བདག་གི་ངོ་བོ་མངོན་པར་གྲུབ་ཅིང་ད་
6-2-22b


གཟོད་ཡུལ་གཞན་དུ་སྐྱེ་བ་འགྲུབ་པ་དེ་ལ་སྲིད་པ་བར་མ་ཞེས་གསུང་རབ་ལས་བཤད་དེ་སྐྱེ་འཆི་གཉིས་ཀྱི་བར་ན་གནས་པའི་སྲིད་པ་ཡིན་པའི་ཕྱིར་རོ། །དེའི་མིང་གི་རྣམ་གྲངས་གཞན་ནི་དྲིའི་ཕྱིར་འགྲོ་ཞིང་དྲིས་བརྟས་པར་འགྱུར་བས་དྲི་ཟ་དང་དེ་ལ་བརྟེན་ནས་ཡིད་
སྐྱེ་གནས་སུ་འགྲོ་བའམ་ཁུ་ཁྲག་སོགས་ཀྱི་རྒྱུ་ལ་མ་ལྟོས་པར་ཡིད་ལས་སྐྱེས་པས་ཡིད་ལས་བྱུང་བ་དང་སྐྱེ་བ་འགྲུབ་པ་ལ་ཕྱོགས་པས་ན་མངོན་པར་འགྲུབ་པ་དང་སྲིད་པ་ཚོལ་བའི་ངང་ཚུལ་ཅན་ཡིན་པས་ན་སྲིད་པ་ཚོལ་བ་ཞེས་གསུངས་སོ། །བར་དོ་དེ་ཡང་
ན་ཚོད་གཞོན་ཞིང་དབང་པོ་རྣོ་བར་འགྱུར་ཏེ། མཛོད་འགྲེལ་ལས། བོངས་ཚོད་ནི་བྱིས་པ་ལོ་ལྔའམ་ལ་དྲུག་ལོན་པ་ལྟ་བུ་སྟེ་དེ་ཡང་དབང་པོ་གསལ་བ་ཡིན་ནོ། །ཞེས་གསུངས་པ་བཞིན་ནོ། །གཉིས་པ་ནི། ཇི་ལྟར་ཏེ་དཔེར་ན་དགའ་ལྡན་གྱི་སྐྱེ་བ་གཅིག་གིས་
ཐོགས་པའི་བྱང་ཆུབ་སེམས་དཔའ་མཚན་དང་དཔེ་བྱད་ཐམས་ཅད་དང་ལང་ཚོ་ཡོངས་སུ་རྫོགས་པ་ཡང་ཡིན་པ་དེ་བཞིན་དུ་མའི་རུམ་དུ་སྟེ་ཡུམ་གྱི་ལྷུམས་སུ་རབ་ཏུ་འཇུག་པའི་བྱང་ཆུབ་སེམས་དཔའི་སྲིད་པ་བར་མ་དོ་ན་གནས་པ་ཡང་མཚན་དང་དཔེ་བྱད་དང་
ལྡན་ཞིང་ལང་ཚོ་ཡོངས་སུ་རྫོགས་པ་ཡིན་ནོ། །དེའི་ཕྱིར་གླིང་བཞི་པོ་བྱེ་བ་ཕྲག་བརྒྱར་ཡང་བྱང་སེམས་བར་དོ་ན་གནས་པ་འདིའི་འོད་ཀྱི་སྣང་བས་གསལ་བར་བྱེད་དོ། །བར་དོ་མངལ་དུ་འཇུག་ཚུལ་འོག་ཏུ་སྟོན་ཞིང་འདིར་བར་དོའི་མཚན་ཉིད་སྟོན་པས་ན་འདི་
བྱང་སེམས་ཀྱི་བར་དོ་སྟོན་པ་ཡིན་གྱི་བར་དོས་སྐྱེ་བ་ལེན་ཚུལ་སྟོན་པ་མིན་ནོ། །མཛོད་འགྲེལ་ལས་ཀྱང་། བྱང་ཆུབ་སེམས་དཔའ་ནི་དཔེར་ན་གཞོན་ནུ་ཐོར་བུ་ལྟ་བུ་མཚན་དང་དཔེ་བྱད་དང་བཅས་པ་ཡིན་ནོ། །དེ་ཉིད་ཀྱི་ཕྱིར་སྲིད་པ་བར་མ་ལ་གནས་པ་
6-2-23a


ཡུལ་གྱི་ལྷུམས་སུ་འཇུག་པས་གླིང་བཞི་བྱེ་བ་ཕྲག་བརྒྱ་སྣང་བར་མཛད་དོ། །ཞེས་བྱང་སེམས་དགའ་ལྡན་ནས་འཕོ་བའི་བར་དོ་ངོས་བཟུང་བ་དང་འདི་གཉིས་དོན་གཅིག་ཡིན་པས་སྔར་བཤད་པ་བཞིན་དུ་ཤེས་པར་བྱའོ། །
འདིར་མཛོད་འགྲེལ་ལས་ཡུམ་གྱི་རྨི་ལམ་ན་གླང་པོ་ཆེའི་ཕྲུག་གུ་དཀར་པོ་ཞུགས་པར་གཟིགས་པ་དང་ཆོས་ལྡན་རབ་འབྱོར་གྱིས་གླང་ཆེན་དཀར་པོ་མཆེ་བ་དྲུག་དང་ལྡན་པ་ཞིག་ཡུམ་གྱི་ལྷུམས་སུ་ཞུགས་པར་བཤད་པ་དང་སྔར་གྱི་བྱང་སེམས་ཀྱི་
བར་སྲིད་ཀྱི་རྣམ་པ་མི་འདྲ་བའི་རྩོད་སྤོང་ལ། དུད་འགྲོའི་སྐྱེ་གནས་བཟློག་ནས་ཡུན་རིང་དུ་ལོན་པའི་ཕྱིར་མཚན་མ་ཙམ་དུ་ཟད་དེ་དཔེར་ན་རྒྱལ་པོ་ཀྲི་ཀྲིའི་རྨི་ལྟས་བཞིན་ནོ། །ཞེས་སྔ་མའི་ལན་དུ་གསུངས་ལ། ཆོས་ལྡན་རབ་འབྱོར་གྱི་ཚིག་ནི་སྡེ་སྣོད་གསུམ་
གང་ཡང་མིན་པས་ངེས་པར་དྲང་མི་དགོས་ལ་གལ་ཏེ་འདྲེན་ནའང་ཡུལ་གྱི་རྨི་ལམ་དང་མཐུན་པར་ཚིགས་བཅད་བྱས་སོ་ཞེས་དྲང་བར་གསུངས་ཤིང་། ལྷའི་སྲིད་པ་བར་མ་བོངས་ཚོད་རྫོགས་པར་གསུངས་པས་བྱིས་པ་ལོ་ལྔའམ་དྲུག་ལོན་པ་
ལྟ་བུ་ནི་མི་ལ་སོགས་པའི་བར་སྲིད་ལ་དགོངས་སོ། །གསུམ་པ་ལ་གཉིས། མདོ་ནས་བཤད་པའི་མཚན་ཉིད་དང་། མངོན་པའི་བསྟན་བཅོས་ནས་བཤད་པའི་མཚན་ཉིད་དོ། །དང་པོ་ནི། བར་དོའི་མཚན་ཉིད་གཞན་ནི་བཟང་སྐྱོང་གིས་ཞུས་པའི་
མདོ་ལས་ཇི་སྐད་དུ་གསུངས་པ་བཞིན་ཏེ་བར་དོ་དེ་ཡང་རགས་པའི་འབྱུང་བ་ཆེན་པོ་རྣམས་རབ་ཏུ་སྤངས་པའི་ཕྲ་བའི་ལུས་ཅན་ཏེ་རྣམ་འགྲེལ་ལས། ལུས་ཅན་ཡིན་ཡང་ཕྲ་བའི་ཕྱིར། །འགའ་ཞིག་ལ་ལར་ཐོགས་མེད་དེ། །ཆུ་བཞིན་གསེར་ལ་དངུལ་
6-2-23b


ཆུ་བཞིན། །ཞེས་གསུངས་པ་ལྟར་རོ། །ལྷའི་དྲན་པ་རབ་ཏུ་གསལ་བ་ཐོབ་པ་ནི་ས་ཡི་དངོས་གཞི་ལས། སྐྱེ་བའི་གནས་མ་བླངས་ཀྱི་བར་དུ་དེའི་མིག་ལྷའི་མིག་ལྟ་བུར་ཐོགས་པ་མེད་དོ། །ཞེས་གསུངས་པ་ལྟར་ལྷའི་དྲན་པ་སྟེ་ལྷའི་མིག་གི་ཤེས་
པ་དང་འདྲ་བའི་མིག་རབ་ཏུ་གསལ་བ་ཐོབ་པའོ། །མིག་དེས་འདོད་པ་དྲུག་ལ་སྤྱོད་པའི་ལྷ་དང་དམྱལ་བ་བཅུ་དྲུག་མཐོང་བ་ནི་འདོད་པའི་བར་དོའི་དབང་དུ་མཛད་ལ་དེ་ཡང་འདོད་པའི་འགྲོ་བ་རྣམས་ཀྱི་ཡ་མཐའ་དང་མ་མཐའ་བཟུང་བས་བར་གྱི་མི་དང་ངན་འགྲོ་
གཞན་གཉིས་མཐོང་བ་ཡང་མཚོན་ནོ། །མཐོང་ཚུལ་ནི་ས་ཡི་དངོས་གཞིར་བར་དོ་དེས་རང་དང་རིགས་མཐུན་པའི་བར་དོ་དང་རང་དང་དེ་དག་གང་དུ་སྐྱེ་བའི་སྐྱེ་གནས་མཐོང་བར་གསུངས་པས་ལྷ་ལ་སོགས་པ་རྣམས་མཐོང་ངོ་། །བར་དོ་དེ་ཡང་ལག་པ་སོཊ་
ཡན་ལག་དང་ཉིང་ལག་ཐམས་ཅད་མ་ཚང་བ་མེད་པའི་རང་གི་ངོ་བོ་སྟེ་ལུས་སྣང་བ་སྟེ་སྐྱེ་བར་འགྱུར་རོ། །དེས་ན་ཕྱིས་སྐྱེ་གནས་སུ་སྐྱེ་བ་བླངས་པའི་འོག་ཏུ་མིག་ལ་སོགས་པ་མ་ཚང་བ་འབྱུང་གི་བར་དོར་མི་འབྱུང་བར་གསུངས་སོ། །འདི་ལྟར་བདག་
གི་སྔོན་གྱི་ལུས་དེ་དང་དེ་ནི་འདི་དང་འདི་ཡིན་ནོ་ཞེས་རབ་ཏུ་ཤེས་སོ། །འོན་ཀྱང་རྣམ་ཤེས་མི་གནས་པས་སྔོན་གྱི་ལུས་ལ་འདོད་པ་མི་འབྱུང་གི་ཡུལ་ལ་འདོད་པ་འབྱུང་བར་ས་ཡི་དངོས་གཞི་ལས་གསུངས་སོ། །གཉིས་པ་ནི། བར་དོ་དེའི་མཚན་
ཉིད་གཞན་ཡང་མངོན་པ་མཛོད་ཀྱི་ཚིག་ལེའུར་བྱས་པ་ལས་ཇི་སྐད་གསུངས་པ་ལྟར་ཡིན་ཏེ། བར་དོ་ནི། ད་གཟོད་སྐྱེ་བ་བླངས་པའི་སྐད་ཅིག་དང་པོ་དོར་བའི་སྐད་ཅིག་གཉིས་པ་ནས་འཆི་བའི་སྐད་ཅིག་ཐ་མ་དོར་བའི་གོང་ཡན་ཆད་ནི་སྔོན་དུས་ཀྱི་
6-2-24a


སྲིད་པ་ཡིན་ལ་དེའི་ཤ་ཚུགས་ཅན་ནི་དེའི་ལུས་དབྱིབས་ཀྱི་རྣམ་པ་ཅན་ཏེ་མཛོད་ལས། དེ་ནི་འཆི་བའི་སྔོན་རོལ་ཏེ། །སྐྱེ་བའི་སྐད་ཅིག་ཕན་ཆད་དོ། །ཞེས་གསུངས་པས་སྔོན་དུས་ཀྱི་སྲིད་པ་ནི་ཚེ་ཕྱི་མའི་འཆི་སྲིད་ལ་
ལྟོས་པའི་སྔོན་ཡིན་གྱི་བར་དོ་ལ་ལྟོས་ནས་སྔོན་དུ་འཇོག་པ་མིན་ནོ། །དེས་ན་མངོན་པ་གོང་མར་གང་དུ་སྐྱེ་འགྱུར་གྱི་དབྱིབས་ཅན་དུ་གསུངས་པ་དང་སྔོན་དུས་ཀྱི་སྲིད་པའི་དབྱིབས་ཅན་གཉིས་དོན་འདྲ་བ་ཡིན་ནོ། །གང་དང་གང་གི་བར་སྲིད་གྲུབ་
ན་འགྲོ་བ་དེ་དང་དེར་སྐྱེ་བ་མི་ཟློག་པར་མངོན་པ་འོག་མར་བཤད་ལ་ངེས་པ་མེད་པར་འཕགས་པ་ཐོགས་མེད་ཀྱིས་བཤད་དོ། །གཉིས་ཀའི་ལུགས་ལའང་བར་དོར་འདའ་བ་འདོད་པས་བར་དོ་ཐམས་ཅད་ཀྱིས་སྐྱེ་སྲིད་ལེན་པའི་ངེས་པ་མེད་དོ། །
ངན་འགྲོའི་བར་སྲིད་ནི་ཕྱར་བ་ནག་པོའམ་མཚན་མོ་མུན་ནག་གི་སྣང་བ་ལྟ་བུ་དང་བདེ་འགྲོའི་བར་སྲིད་ནི་སྣམ་བུ་དཀར་པོའམ་མཚན་མོའི་སྣང་བ་ཟླ་འོད་དང་བཅས་པ་ལྟ་བུར་འཕགས་པ་ཐོགས་མེད་ཀྱིས་གསུངས་ལ། དམྱལ་བ་དང་དུད་
འགྲོ་དང་ཡི་དྭགས་དང་འདོད་པའི་ལྷ་མི་གཉིས་དང་གཟུགས་ཀྱི་བར་སྲིད་རྣམས་ནི་རིམ་པ་བཞིན་དུ་སྡོང་པོ་ཚིག་པ་དང་དུ་བ་དང་ཆུ་དང་གསེར་ལྟ་བུ་དང་དཀར་པོར་མངལ་འཇུག་ལས་བཤད་དོ། །འགྲོ་ཚུལ་ནི་ལྷ་དང་མི་དང་ངན་འགྲོའི་བར་སྲིད་
རྣམས་ནི་རིམ་པ་བཞིན་གྱེན་དུ་དང་ཐད་ཀར་དང་སྤྱིའུ་ཚུགས་སུ་འགྲོ་བར་ས་ཡི་དངོས་གཞི་ལས་བཤད་དོ། །མིག་ལ་སོགས་པའི་དབང་པོ་ཀུན་ཚང་ཞིང་རྡོ་རྗེ་ལ་སོགས་པས་ཀྱང་མི་བཟློག་པས་ཐོགས་རྡུགས་མེད་པ་སྟེ་ལྕགས་ཀྱི་ཐུ་ལུམ་
6-2-24b


འབར་བ་གཤགས་པའི་ནང་ནས་སྲིན་བུ་བྱུང་ངོ་ཞེས་གྲག་གོ། །ལས་ཀྱི་རྫུ་འཕྲུལ་གྱི་ཤུགས་ཏེ་མགྱོགས་པ་དང་ལྡན་པས་སངས་རྒྱས་ཀྱིས་ཀྱང་དགག་པར་མི་ནུས་ཏེ་ལས་སྟོབས་དང་ལྡན་པའི་ཕྱིར་རོ། །བར་དོ་རིགས་མཐུན་རྣམས་དང་ལྷའི་མིག་གི་མངོན་ཤེས་
ཀྱིས་མཐོང་གི་སྐྱེས་ཐོབ་ཀྱི་ལྷའི་མིག་གིས་མི་མཐོང་ངོ་། །ལྷ་ལ་སོགས་པའི་བར་སྲིད་གོང་མ་གོང་མས་འོག་མ་འོག་མ་ཐམས་ཅད་མཐོང་བའི་ལུགས་ཀྱང་མཛོད་འགྲེལ་ལས་བཤད་དོ། །ཞེས་གསུངས་སོ། །ཞེས་སྔ་མ་དང་སྦྱར་ལ་གསུངས་པས་
སོ་ཞེས་པ་ནི་ཕྱི་མའི་རྒྱུ་མཚན་དུ་སྦྱར་རོ། །གཉིས་པ་ནི། སྲིད་པ་སྐྱེ་བའི་རིམ་པ་ལ་དེ་ལྟར་གསུངས་པས་དེ་དང་མཐུན་པར་ལྷའི་རྣལ་འབྱོར་སྒོམ་དགོས་པས་བསྟན་ཏོ་ཞེས་དྲང་ངོ་། །གང་གིས་ན་མདོར་བྱས་ལས། དེ་ལྟར་སྦྱོར་བ་དམིགས་ནས་ནི། །
རྗེས་སུ་སྦྱོར་བ་བརྩམ་པར་བྱ། །ཞེས་སོགས་རྣལ་འབྱོར་དང་རྗེས་སུ་རྣལ་འབྱོར་སྟོན་པའི་གཞུང་འདིས་སོ། །འདི་མདོར་བྱས་ཀྱི་རྣམ་གཞག་ཡིན་པས་འདི་ཞེས་ཉེ་བའི་ཚིག་གིས་བསྟན་པ་ཡིན་ཏེ། དཔེར་ན་མངོན་རྟོགས་རྒྱན་ལས། སྟོན་པས་
འདི་ལས་བཤད་པ་གང་། །ཞེས་ཡུམ་གྱི་མདོའི་དོན་འགྲེལ་པས་ཡུམ་གྱི་མདོ་ལ་ཉེ་བའི་ཚིག་གིས་སྨོས་པ་བཞིན་ནོ། །གང་བསྟན་ན་ལྷའི་སྐུ་དང་པོའི་མགོན་པོ་བསྐྱེད་པའོ། །གང་གིས་བསྐྱེད་ན་བསྐྱེད་པའི་རིམ་པ་སྒོམ་པར་བྱེད་པ་པོ་རྣམས་ཀྱིས་
སོ། །རིམ་པ་ཅི་འདྲ་བས་བསྐྱེད་ན་སྔོན་དུ་རྣལ་འབྱོར་དང་དེའི་འོག་ཏུ་རྗེས་སུ་རྣལ་འབྱོར་བསྒོམ་པའི་རིམ་པས་སོ། །གང་དང་འདྲ་བར་བསྐྱེད་ན། ཀྱང་ཞེས་པ་སྲིད་པ་སྐྱེ་བའི་རིམ་པ་ལ་དེ་ལྟར་སྐྱེ་བར་མ་ཟད་རྣལ་འབྱོར་པས་ཀྱང་དེ་ལྟར་བསྐྱེད་དོ་ཞེས་
6-2-25a


པའི་དོན་ཡིན་ལ་དེ་ཡང་སྐབས་འདིར་ནི་སྔར་བཤད་པའི་བསྐལ་པ་དང་པོའི་མི་ཤི་བ་དང་དེ་ནས་བར་དོ་གྲུབ་པ་གཉིས་དང་མཐུན་པར་རོ། །འདིར་བླ་མ་ཁ་ཅིག་གིས་གཞུང་འདིས་བར་སྲིད་དང་མཐུན་པར་ལྷ་བསྐྱེད་ལ་
སྟོན་པ་བློ་ལ་མ་བདེ་བས་འོག་གི་རྐང་ལག་འགྱུ་སྟེ་གནས་སྐབས་ལྔ་གསལ་བར་འགྱུར་རོ་ཞེས་པའི་འོག་ཏུ་དྲངས་ནས་དང་པོའི་མགོན་པོ་བསྐྱེད་པ་མངལ་གྱི་གནས་སྐབས་དང་སྦྱར་ནས་འཆད་པ་ནི། མཁས་པའི་གཞུང་རྣམ་པ་གཞན་དུ་སྐྱོགས་ཏེ་འཆད་
པའི་བཤད་པ་ཆེར་མི་འཚམ་པའོ། །སློབ་དཔོན་འདིས་གཞུང་འདིའི་འོག་ཏུ་བར་དོས་མངལ་དུ་སྐྱེ་བ་ལེན་ཚུལ་དེ་ན་མངལ་དུ་འཕེལ་ནས་བཙས་པའི་བར་གྱི་ཆོས་མཐུན་པའི་ཡུལ་བཤད་ནས་དེ་དང་མཐུན་པར་བསྒོམ་ཚུལ་གསུངས་ལ། སྐབས་འདིར་
ནི་བསྐལ་པ་དང་པོའི་མི་ཤི་བ་དང་དེ་ནས་བར་སྲིད་གྲུབ་པ་དང་མཐུན་པར་རྣལ་འབྱོར་གཉིས་ཀྱིས་ལྷའི་སྐུ་བསྐྱེད་པ་གསལ་བར་བསྟན་པས་ན་དེ་དག་གི་སྐབས་རྣམས་ནི་སོ་སོར་བཤད་དགོས་སོ། །དེས་ན་རྣལ་འབྱོར་ལ་བྱང་ཆུབ་པ་གཉིས་ཡོད་པའི་དེ་
བཞིན་ཉིད་ལས་བྱང་ཆུབ་པ་ལྷག་མོས་འོད་གསལ་དུ་སྡུད་པ་ནི་བསྐལ་པ་དང་པོའི་མིས་འཆི་བའི་འོད་གསལ་ཉམས་སུ་མྱོངས་པ་དང་འདྲ་སྟེ་མདོར་བྱས་ལས་ཆོས་སྐུར་གསུངས་པས་འཆི་བ་སྦྱོང་བྱེད་ཆོས་སྐུ་བསྒོམ་པའོ། །དེ་ནས་བྱང་ཆུབ་ལྷག་
མ་བཞིས་དང་པོའི་མགོན་པོ་བསྐྱེད་པ་ནི་ཤི་བའི་འོད་གསལ་ལས་ལངས་པའི་མཐར་བར་དོ་འགྲུབ་པ་དང་འདྲ་སྟེ་རྡོ་རྗེ་སེམས་དཔའི་སྒྲུབ་ཐབས་ལས། དེ་ལྟར་རྣལ་འབྱོར་དང་རྗེས་སུ་རྣལ་འབྱོར་གྱི་རིམ་པས་བདག་ཉིད་ལོངས་སྤྱོད་རྫོགས་པའི་སྐུར་
6-2-25b


བསྐྱེད་ནས། །ཞེས་གསུངས་པས་བར་དོ་སྦྱོང་བྱེད་ལོངས་སྐུ་བསྒོམ་པའོ། །དེ་ནས་ལོངས་སྐུ་སྤྲུལ་སྐུར་བསྒྱུར་བ་སོགས་རྣལ་འབྱོར་ལྷག་མ་གཉིས་བསྒོམ་པ་ནི་བར་དོས་མངལ་དུ་སྐྱེ་བ་བླངས་པ་དང་འདྲ་སྟེ་འདི་སྤྲུལ་སྐུར་བསྒྱུར་བ་ཡིན་པས་སྐྱེ་བ་སྦྱོང་བྱེད་
སྤྲུལ་སྐུ་བསྒོམ་པའོ། །འོག་ཏུ་ལོངས་སྐུས་མི་རྣམས་ཀྱི་དོན་མཛད་པར་མི་ནུས་པས་སྤྲུལ་པའི་སྐུ་གཟུང་བའི་དོན་དུ་མའི་མངལ་དུ་འཇུག་པའི་སྤྲུལ་པ་བསྟན་པ་དང་འདྲ་བར་བར་དོ་ཐ་མལ་པའི་མིག་གི་ཡུལ་དུ་མི་རུང་བ་དེས་མངལ་དུ་སྐྱེ་བ་བླངས་པ་རྫོགས་པ་
ནས་ཐ་མལ་པས་མཐོང་དུ་རུང་བ་དང་འདྲ་བར་རྣལ་འབྱོར་ལྷག་མ་རྣམས་བསྒོམ་པར་གསུངས་པས་ཀྱང་དང་པོའི་མགོན་པོ་བསྐྱེད་པ་འབྲས་བུའི་སྐབས་ཀྱི་ལོངས་སྐུ་དང་གཞིའི་སྐབས་ཀྱི་བར་དོ་དང་འདྲ་བ་དང་། དེ་སྤྲུལ་སྐུར་བསྒྱུར་བ་འབྲས་བུའི་སྐབས་ཀྱི་སྤྲུལ་
སྐུ་དང་གཞིའི་སྐབས་ཀྱི་མངལ་དུ་སྐྱེ་བ་བཟུང་བ་དང་འདྲ་བ་ཤིན་ཏུ་གསལ་བ་ཡིན་ནོ། །མདོ་བསྲེ་ལས་ཀྱང་། རྡོ་རྗེ་འཆང་ཆེན་པོའི་བདག་ཉིད་ཇི་ལྟ་བ་བཞིན་དུ་བསྒོམ་པ་ནི་རྗེས་སུ་རྣལ་འབྱོར་རོ། །དེ་ནས་ལེའུ་དང་པོ་ལས་གསུངས་པའི་རིག་པའི་སྐྱེས་བུའི་
གཟུགས་ཅན་དུ་བསྟན་པའི་ཡེ་ཤེས་ཀྱི་རང་བཞིན་གྱི་ལུས་ཀྱིས་སེམས་ཅན་གྱི་དོན་བྱ་བར་མི་ནུས་པས་ན། །ཞེས་དང་པོའི་མགོན་པོ་སྤྲུལ་སྐུར་བསྒྱུར་པའི་སྐབས་སུ་དེའི་རྒྱུ་མཚན་དུ་གསུངས་པ་འདི་དང་གཞུང་འདི་གཉིས་ཀྱང་དོན་འདྲ་བར་སྣང་ངོ་། །ལེའུ་
དང་པོའི་སྒྲོན་གསལ་ལས་ཀྱང་། དེ་ནས་དེ་བཞིན་གཤེགས་པ་མི་བསྐྱོད་པ་དང་ཞེས་བྱ་བ་ལ་སོགས་པས་ནི་སེམས་ཅན་གྱི་དོན་བྱ་བའི་ཕྱིར་ཕུང་པོ་ལ་སོགས་པར་རྗེས་སུ་ཞུགས་པས་སྤྲུལ་པའི་སྐུ་འཛིན་པར་མཛད་པ་བསྟན་པ་ཡིན་ཏེ། །ཞེས་སྐྱེ་བ་
6-2-26a


བཟང་པའི་དོད་དང་སྤྲུལ་སྐུ་གཉིས་གཅིག་ཏུ་གསུངས་པས་དང་པོའི་མགོན་པོ་སྤྲུལ་སྐུར་བསྒྱུར་དགོས་པ་ཡང་འདོད་ལ་མངལ་དུ་སྐྱེ་བ་བཟུང་བའི་དོད་དུ་ཡང་འདོད་པ་ནི་འགལ་བའོ། །རིམ་ལྔ་ལས་ཀྱང་། ཀུན་རྫོབ་བདེན་
པ་སྒྱུ་མ་ཉིད། །ལོངས་སྤྱོད་རྫོགས་པའི་སྐུ་ཡང་དེ། །དེ་ཉིད་དྲི་ཟའི་སེམས་ཅན་ཡིན། །ཞེས་ལོངས་སྐུ་བར་དོའི་དོད་དུ་གསུངས་པས་དང་པོའི་མགོན་པོ་བསྐྱེད་པ་ནི་བར་དོ་དང་ཆོས་མཐུན་པར་གདོན་མི་ཟ་བར་བྱ་དགོས་སོ། །དེ་ལྟར་ན་སྲིད་པ་སྐྱེ་
བ་དང་ཆོས་མཐུན་སྦྱོར་བ་རྣམས་ཀྱི་སྙིང་པོ་ནི་སྐྱེ་ཤི་བར་དོ་གསུམ་དང་མཐུན་པར་ལམ་གྱི་སྐུ་གསུམ་བསྒོམས་པས་འབྲས་བུའི་སྐུ་གསུམ་དང་ཡང་མཐུན་པར་འབྲས་བུའི་རྣམ་པ་ལམ་དུ་བྱེད་པ་འདི་ཡིན་ལ། རིམ་པ་གཉིས་ཀ་ལ་སྦྱོང་
བྱེད་སྐུ་གསུམ་བསྒོམ་ལུགས་ཀྱི་ཁྱད་པར་འགའ་ཞིག་མ་གཏོགས་པ་སྤྱིར་གཞི་འབྲས་ཀྱི་ཆོས་གསུམ་དང་མཐུན་པར་སྐུ་གསུམ་བསྒོམ་པ་ཙམ་ནི་འདྲ་བ་ཡིན་ནོ། །དེའི་ཕྱིར་རིམ་པ་དང་པོའི་སྐབས་སུ་སྐྱེ་ཤི་བར་དོ་གསུམ་གྱི་སོ་སོའི་
ཆོས་མཐུན་ངོས་མ་ཟིན་པར་འཕྱུགས་ན་རྒྱུད་འགྲེལ་དུ་སེམས་དབེན་དང་འོད་གསལ་གྱི་མཐར་སྒྱུ་མ་དང་ཟུང་འཇུག་གི་སྐུར་བཞེངས་པ་ལོངས་སྐུ་དང་དེ་སྤྲུལ་སྐུར་བསྒྱུར་བའི་རྣམ་གཞག་ཡང་ཡང་གསུངས་པ་རྣམས་ཀྱི་གནད་ཟིན་པ་
ཡང་ངེས་པར་འཕྱུག་པ་ཡིན་པས་འདི་གལ་ཆེའོ། །དེས་ན་སྔོན་དུས་ཀྱི་བཤེས་གཉེན་ཁ་ཅིག་ཉི་མ་དང་པདྨ་དང་དེའི་སྟེང་གི་ཡི་གེ་གསུམ་དང་འདྲེས་ནས་ཟླ་བ་གཅིག་ཏུ་སོང་བའི་སྦྱང་གཞི་ནི་རིམ་པ་ལྟར་ཕ་དང་མ་དང་བར་དོ་དང་ཕ་
6-2-26b


མ་བར་དོ་དང་བཅས་པ་གསུམ་བདེ་བས་བརྒྱལ་བ་ཡིན་ལ། རང་བཞིན་གྱི་རིགས་ཡོད་པས་མེར་མེར་པོ་ལ་ཨོཾ་ལྟར་ལྟར་པོ་ལ་ཨཱཿགོར་གོར་པོ་ལ་ཧཱུཾ་གི་དབྱིབས་རང་ཆས་སུ་ཡོད་པ་དང་འཁྲང་འགྱུར་དང་རྐང་ལག་འགྱུས་པའི་སྐབས་ལྔ་ནི་ས་བོན་དང་ཕྱག་མཚན་
དང་སྐུ་རྫོགས་པའི་སྦྱང་གཞིར་བཞེད་པ་དང་། སྔོན་གྱི་ཁ་ཅིག་ནི་ཕའི་རྡོ་རྗེ་རྒྱས་པ་ཉི་མ་ཕ་མ་གཉིས་ཕན་ཚུན་ཆགས་པ་ཟླ་བ་མ་ཡི་པདྨ་རྒྱས་པ་པདྨ་དེའི་སྟེང་གི་ཡི་གེ་གསུམ་པར་སྲིད་ཀྱི་ལུས་ངག་ཡིད་གསུམ། འདྲེས་པ་ནི་བར་དོ་དང་ཁུ་ཁྲག་གསུམ་
འདྲེས་ནས་ཡེ་ཤེས་ཀྱིས་ཐོབ་པ་དང་ཆོས་མཐུན་ལ་གནས་སྐབས་དང་པོ་གཉིས་ཀྱི་ཚེ་འབྲུ་གསུམ་གྱི་དབྱིབས་དང་བར་པ་གཉིས་ཀྱི་ཚེ་སངས་རྒྱས་ཀྱི་སྙིང་པོ་ཅན་ཡིན་པས་ཕྱག་མཚན་གྱི་དབྱིབས་སུ་ཡོད་ལ་ལྔ་ག་ནི་སྔར་དང་འདྲ་བར་འཆད་པ་ཡང་རྣར་མི་
འོང་སྟེ། དཔལ་ཀླུའི་བྱང་ཆུབ་ལ་སོགས་པའི་ཆེན་པོ་དག་གིས་བར་དོ་དང་ལོངས་སྐུ་ཆོས་མཐུན་སྦྱར་བའི་ཆོས་མཐུན་ཁྱད་པར་ཅན་དོར་ནས་སྣང་རུང་མ་དམིགས་པས་ཁེགས་པའི་ཨོཾ་ལ་སོགས་པའི་དབྱིབས་སྒྲུབ་བྱེད་ལྟར་སྣང་ལ་བརྟེན་ནས་ནན་ཏན་གྱིས་
བསྒྲུབ་པའི་ཕྱིར་རོ། །དེ་བཞིན་དུ་མན་ངག་སྙེ་མའི་སྙེ་མ་བཅུ་གཉིས་པར་ཡང་མངོན་བྱང་ལྔས་དང་པོའི་མགོན་པོ་བསྐྱེད་པ་མངལ་དུ་སྐྱེ་བ་བླངས་པ་དང་ཆོས་མཐུན་སྦྱར་བ་ཡང་ཆེན་པོ་དག་གི་གཞུང་དང་འགལ་བས་ཡིད་བརྟན་པའི་གནས་སུ་མི་རུང་ངོ་། །
ཕྱིས་ཀྱི་བླ་མ་ཁ་ཅིག་གིས་ནི་ལུགས་དེ་རྣམས་བཀག་ནས་རང་གི་ལུགས་འདི་ལྟར་འཇོག་སྟེ། ཟླ་ཉི་པདྨ་གསུམ་ནི་ལུགས་བཟློག་གི་སྣང་བ་གསུམ་དེ་དག་བསྐྱེད་པའི་ཡི་གེ་གསུམ་ནི་སེམས་ཀྱི་བཞོན་པའི་རླུང་། པདྨའི་སྟེང་གི་ཡི་གེ་གསུམ་ནི་བར་
6-2-27a


དོའི་ལུས་ངག་ཡིད་གསུམ་འདྲེས་པ་ནི། བར་དོར་སྐྱེ་བ་བླངས་པ་སྤྲོ་བསྡུས་ཟླ་བ་རྫོགས་པ་ནི་རྣམ་ཤེས་རླུང་གི་བཞོན་པ་ཅན་ལ་བརྟེན་ནས་བར་དོའི་ཕུང་པོ་རྫོགས་པ་དང་ཆོས་མཐུན་ནོ། །ལུགས་བཟློག་གི་སྣང་བ་ལས་བར་དོ་འགྲུབ་
ལུགས་ལ། སྙེ་མ་ཉེར་གཅིག་པར་ཐམས་ཅད་སྟོང་པ་ཤི་བའི་འོད་གསལ་ལས་བྱུང་བའི་སྣང་བ་ཉེར་ཐོབ་ཀྱི་ཚེ་བར་སྲིད་གྲུབ་ལ་སྣང་བ་མཆེད་པ་ནི་བར་དོས་འདོད་པ་ལེན་པའི་སེམས་དང་སྣང་བ་ནི་སྐྱེ་བ་གཟུང་བའི་སེམས་སུ་བཤད་པ་སུན་འབྱིན་ཏེ། ཉེར་
ཐོབ་ཀྱི་ཆེ་བར་སྲིད་གྲུབ་པ་མི་འཐད་དེ་བར་དོ་འགྲུབ་པ་ལ་སྣང་བ་གསུམ་ག་དགོས་པའི་ཕྱིར་ཏེ། རྒྱུད་རྡོ་རྗེ་འཕྲེང་བ་ལས། སྣང་བ་གསུམ་གྱི་མཚན་ཉིད་ཅན། །གང་འདི་རྣམ་ཤེས་གསུམ་ཐོབ་པ། །སེམས་ཅན་ཁམས་ནི་མ་ལུས་པའི། །རང་བཞིན་རྩ་
བ་འདི་ཡིན་ནོ། །ཞེས་སོ། །དེས་ན་འོད་གསལ་ལས་ལྡང་བ་དང་བར་དོར་སྐྱེ་བ་སྲང་མདའི་མཐོ་དམན་ལྟར་འབྱུང་བས་འོད་གསལ་ལས་ལྡང་བར་རྩོམ་འདོད་པའི་ལྡང་སེམས་ལ་གཉིས་ལས་མི་གསལ་བ་ནི་ཉེར་ཐོབ་ཡིན་ལ་གསལ་བ་ནི་སྣང་བ་མཆེད་
པའོ། །འོད་གསལ་ལས་ལངས་པ་དང་དུས་མཉམ་པའི་བར་དོའི་སེམས་གསལ་བ་ནི་སྣང་བའོ། །སྐྱེ་བ་གཟུང་བའི་སེམས་སྣང་བར་བྱེད་པ་ཡང་མི་འཐད་དེ་བར་དོ་ཤི་ནས་སྐྱེ་བ་ལེན་པ་ལ་ལུགས་མཐུན་གྱི་སྣང་བ་གསུམ་རིམ་གྱིས་བྱུང་ནས་མཐར་
འཆི་བའི་འོད་གསལ་དུ་འགྲོ་དགོས་པས་སྣང་བ་ཙམ་ནས་འོད་གསལ་དུ་མི་འགྲོ་བའི་ཕྱིར་རོ། །དེས་ན་ལུགས་བཟློག་གི་ཐ་མར་འབྱུང་བའི་སྣང་བ་ལས་སྣང་བ་མཆེད་པར་འགྲོ་བ་ནི་སྐྱེ་བ་ལེན་པའི་དོན་དུ་འགྲོ་བ་སོགས་ཀྱི་སྐབས་སོ། །དེ་ཉེར་ཐོབ་ཏུ་
6-2-27b


ཐིམ་པ་ནི་སྐྱེ་སྲིད་ལ་གཞོལ་བའི་བར་དོ་འགག་པ་ལ་ཕྱོགས་པའི་སེམས་ཏེ་དེ་འོད་གསལ་དུ་ཐིམ་ནས་སྐྱེ་བ་ལེན་ནོ། །སྣང་བ་དེ་གསུམ་སྦྱོང་བ་ལ་ཟླ་བ་ལས་བྱང་ཆུབ་པ་དང་། ས་བོན་དང་ཕྱག་མཚན་ལས་བྱང་ཆུབ་པ་དང་། སྐུ་རྫོགས་པ་ལས་བྱང་ཆུབ་པ་གསུམ་
ཡིན་ཏེ། རིམ་ལྔ་ལས། ཤེས་རབ་ངོ་བོ་ཉིད་འདི་ན། །ཟླ་བའི་དཀྱིལ་འཁོར་དག་ཏུ་བརྟག །སེམས་ཉིད་རང་གིས་མཐོང་འགྱུར་ཏེ། །རང་ཉིད་ཟླ་བའི་གཟུགས་བཞིན་ནོ། །དེ་ནས་ཟླ་བ་ལ་དམིགས་པ། །རྡོ་རྗེ་མཚན་མར་རབ་ཏུ་བརྟག །འདི་ནི་རྡོ་རྗེ་ལས་བྱུང་
བའི། །རྣལ་འབྱོར་པ་ཡི་ཐབས་སུ་བཤད། །ཟླ་བ་རྡོ་རྗེ་སོགས་མཉམ་སྦྱོར། །སེམས་དང་སེམས་བྱུང་འདུས་པ་སྟེ། །ཤེས་རབ་ཐབས་སུ་འདུས་པ་ལས། །ལྷ་ཡི་གཟུགས་ནི་འབྱུང་བར་འགྱུར། །ཕྱག་རྒྱ་བཞིས་ནི་རྒྱས་བཏབ་ཅིང་། །ལྷ་ཡི་ང་རྒྱལ་འཆང་བྱེད་
དེ། །བསྐྱེད་པའི་རིམ་དང་ལྡན་པར་ནི། །སྔགས་པས་རྟག་ཏུ་སྤྱོད་པར་འགྱུར། །ཞེས་པ་དྲངས་ནས་དེ་ལྟར་འཆད་དོ། །འདི་ལ་ཅུང་ཟད་དཔྱད་ནས་ཡི་དངོས་གཞི་ལས། བར་མ་དོའི་སྲིད་པ་ཕྱོགས་དེ་ནས་བར་ཆད་མེད་པར་དུས་གཅིག་ཏུ་འགག་པ་དང་སྐྱེ་བའི་ཚུལ་
གྱིས་སྲང་གི་ཐོར་ཏོ་མཐོ་དམན་དུ་འགྱུར་བ་བཞིན་དུ་འབྱུང་བར་འགྱུར་རོ། །ཞེས་འཆི་སྲིད་འགགས་པ་དང་བར་སྲིད་གྲུབ་པ་གཉིས་བར་དུ་གཞན་གྱིས་མ་ཆོད་པར་དུས་མཉམ་པར་གསུངས་ལ་དེ་ལྟར་དུ་རང་ཡང་བཞེད་ཅིང་བར་སྲིད་རྫུས་ཏེ་སྐྱེ་བའི་ཡན་ལག་དང་ཉིང་
ལག་ལ་སོགས་པ་རྣམས་དུས་གཅིག་ཏུ་འགྲུབ་པར་གསུངས་པའི་ཕྱིར། ཤི་བའི་འོད་གསལ་ལས་ལུགས་བཟློག་ཏུ་ཤར་བའི་ཉེར་ཐོབ་ཀྱི་ཚེ་བར་དོར་སྐྱེས་པ་དགོས་པས་དེ་འགོག་པ་མི་འཐད་དོ། །ལྡང་སེམས་གཉིས་པོ་འཆི་སྲིད་ཀྱི་སྐབས་ལ་འཇོག་
6-2-28a


ན་ཐམས་ཅད་སྟོང་པ་ཡིན་གྱི་ཉེར་ཐོབ་དང་མཆེད་པར་མི་རུང་ལ་དེ་གཉིས་བར་དོ་གྲུབ་པའི་སྐབས་ལ་འཇོག་ན་རང་གི་ཁས་བླངས་པ་དང་ཡང་འགལ་ཞིང་སྐབས་དེ་གཉིས་སུ་མི་འཇོག་ན་སྲིད་པ་གཉིས་ཀྱི་བར་དུ་བཞག་དགོས་པས་
ལུང་དང་ཁས་བླངས་པ་གཉིས་ཆར་དང་འགལ་བར་སྣང་ངོ་། །སེམས་ཅན་ཁམས་ནི་མ་ལུས་པའི། །རང་བཞིན་རྩ་བ་འདི་ཡིན་ནོ། །ཞེས་པའི་ལུང་གིས་ནི་སེམས་ཅན་ཐམས་ཅད་ཀྱི་རང་བཞིན་བརྒྱད་ཅུའི་རྟོག་པའི་རྩ་བར་སྣང་བ་གསུམ་དགོས་པར་བསྟན་གྱི་
སེམས་ཅན་དུ་གང་སྐྱེ་བ་ཐམས་ཅད་ལ་སྔར་གྱི་ཤི་བའི་འོག་ཏུ་སྣང་བ་གསུམ་སྟོན་པར་མི་སྣང་ངོ་། །རིམ་པ་གཉིས་པའི་ལུང་དོན་ཡང་གཞིའི་སྣང་བ་གསུམ་ལས་བར་དོ་འགྲུབ་པ་དང་ཆོས་མཐུན་པར་ཟླ་བ་རྡོ་རྗེ་སོགས་ལས་ལྷ་བསྐྱེད་པའི་རིམ་པ་སྟོན་
པ་མིན་གྱི། རྫོགས་རིམ་པས་ཡེ་ཤེས་གསུམ་ལས་ལྷ་བསྐྱེད་པའི་དོད་བསྐྱེད་རིམ་པས་ཟླ་བ་དང་རྡོ་རྗེ་སོགས་ལས་ལྷའི་སྐུ་བསྐྱེད་དོ་ཞེས་སྟོན་པའི་དོན་ཡིན་ཏེ་སྔར་དྲངས་པ་ལྟར་བསྐྱེད་རིམ་པའི་སྔགས་པས་དེ་ལྟར་སྤྱོད་པར་གསུངས་པའི་འོག་ཏུ། 
ད་ནི་ཡོངས་རྫོགས་རྣལ་འབྱོར་གྱི། །མཚོན་པར་བྱེད་པ་དག་ནི་བྱ། །ཞེས་སོགས་ཀྱིས་འོད་གསལ་ལས་ལངས་པའི་ཡེ་ཤེས་གསུམ་ལས་མཚན་དཔེས་སྤྲས་པའི་སྐུ་འབྱུང་བར་གསུངས་པའི་ཕྱིར་རོ། །བསྐྱེད་རིམ་ལ་ལུགས་འབྱུང་གི་སྣང་བ་གསུམ་
གྱི་རིམ་པ་བཤད་ལ་རྫོགས་རིམ་ལ་ལུགས་བཟློག་གི་སྣང་བའི་རིམ་པ་བཤད་ཀྱང་དེ་གཉིས་ཀྱི་གོ་རིམ་རིམ་གཉིས་ལ་འདྲ་བ་མི་དགོས་ཀྱི་སྤྱིར་སྣང་བ་གསུམ་ལས་ལྷའི་སྐུ་འབྱུང་བ་ཙམ་དུ་འདྲ་བས་ཆོག་གོ། །གཞན་ཡང་ལུང་དེས་ཟླ་བ་དང་རྡོ་རྗེ་
6-2-28b


སོགས་འདྲེས་པ་ལས་ལྷ་བསྐྱེད་པར་བསྟན་ལ་འདིར་ནི་ཟླ་བ་གདན་དུ་བྱས་པའི་སྟེང་དུ་བསྐྱེད་དེ་སྟོན་པ་དང་གནས་ཕུན་ཚོགས་ཡིག་དོན་དུ་བཤད་པའི་སྐབས་བཞིན་ནོ། །ལུགས་བཟློག་གི་སྣང་བ་གསུམ་པ་སྐྱེ་བ་གཟུང་སེམས་སུ་བཤད་པ་ལ་ཡང་སྐྱོན་མེད་དེ་
བར་དོ་སྲིད་པ་ཚོལ་བའི་དང་ཚུལ་ཅན་ཡིན་པས་ཐོག་མ་ནས་སྐྱེ་བ་འཚོལ་བའི་སེམས་འབྱུང་གི་བར་དོ་འགག་ཁ་མའི་ཆེ་ཁོ་ན་མི་དགོས་པས་སོ། །དེས་ན་བར་དོ་ནི་ཤི་བའི་འོད་གསལ་ལས་ལུགས་བཟློག་ཏུ་ལངས་པའི་རླུང་སེམས་ཙམ་ལས་གྲུབ་པ་འབྱུང་
བའི་ལུས་རགས་པ་སྤངས་པའི་ཤིན་ཏུ་ཕྲ་བའི་ལུས་ཅན་ཡིན་པས་ཡིད་ལུས་དང་ཡེ་ཤེས་ཀྱི་ལུས་ཅན་ཞེས་གསུངས་སོ། །དེ་དང་མཐུན་པར་ལྷ་བསྐྱེད་པ་ལ་ཤི་བའི་འོད་གསལ་དང་འདྲ་བ་ནི་དེ་བཞིན་ཉིད་ལས་བྱང་ཆུབ་པའོ། །དེའི་ངང་ནས་ལངས་པ་ལ་
ལྷ་བསྐྱེད་པའི་རྒྱུར་སྔོན་དུ་ཟླ་བ་ལས་བྱང་ཆུབ་པ་སྟོན་པ་ནི་རླུང་གི་བཞོན་པ་ཅན་གྱི་རྣམ་ཤེས་རྣམ་པ་ཟླ་བ་ཡོངས་སུ་རྫོགས་པར་སྣང་བ་ཙམ་ལས་བསྐྱེད་པའི་ལྷའི་སྐུ་ནི་ཡེ་ཤེས་ཀྱི་ལུས་ཅན་དུ་བསྟན་པའི་ཕྱིར་རོ། །དེ་ལ་སྟོང་ཉིད་ཀྱི་ངང་ནས་ལྡང་བའི་
ཟླ་ཉི་པད་གསུམ་ནི་གཞིའི་ལུགས་བཟློག་གི་སྣང་བ་གསུམ་དང་འདྲ། ཡི་གེ་གསུམ་སྔ་རྟིང་རྣམས་ནི་གཞིའི་རྣམ་ཤེས་ཀྱི་བཞོན་པའི་རླུང་དང་འདྲ། དེ་རྣམས་འདྲེས་པས་ནི་གཞིའི་སྐབས་ཀྱི་རླུང་སེམས་དབྱེར་མི་ཕྱེད་པ་མཚོན། སྤྲོ་བསྡུས་ཟླ་བ་རྫོགས་
པ་ནི་རྒྱུད་རྡོར་འཕྲེང་ལས། སྐྱེ་དང་གནས་དང་འཇིག་པ་དང་། །སྲིད་པ་བར་མར་གནས་པ་སྟེ། །ཇི་སྙེད་འཇིག་རྟེན་གྱིས་བརྟགས་པ། །སེམས་ཀྱི་རླུང་གི་རྣམ་འཕྲུལ་ལོ། །ཞེས་གསུངས་པ་ལྟར་རླུང་གི་བཞོན་པ་ཅན་གྱི་རྣམ་པར་ཤེས་པ་ནི་སྣོད་
6-2-29a


བཅུད་ཀྱི་རྩ་བ་ཅན་དུ་མཚོན་པར་བྱེད་པའོ། །དེ་ནས་ངོ་བོ་རྣམ་པར་ཤེས་པ་ཙམ་ཞིག་རྣམ་པ་ཟླ་བའི་རྣམ་པར་སྣང་བ་ལས་ཆུ་ལས་ཆུ་བུར་སྐྱེ་བ་བཞིན་དུ་ས་བོན་སྐྱེས་ནས་དེས་ཕྱག་མཚན་དང་དེས་ལྷའི་སྐུ་རྫོགས་པར་བསྐྱེད་
པ་ནི་རླུང་སེམས་ཙམ་ལས་གྲུབ་པའི་བར་དོའི་ལུས་ངག་ཡིད་གསུམ་བྱ་བ་དང་བཅས་པ་བཞི་དང་འདྲ་བར། གསུང་ཆོས་ཀྱི་ཕྱག་རྒྱ་དང་ཐུགས་དམ་ཚིག་གི་ཕྱག་རྒྱ་དང་སྐུ་ཕྱག་རྒྱ་ཆེན་པོ་དང་འཕྲིན་ལས་ལས་ཀྱི་ཕྱག་རྒྱ་བཞི་ལས་མི་འདའ་བའི་ཚུལ་
གྱིས་རྒྱས་བཏབ་ནས་ལྷའི་སྐུ་བསྒོམས་པས་ཐ་མལ་པའི་སྒོ་གསུམ་བྱ་བ་དང་བཅས་པ་སྦྱོང་བའོ། །འཕྲིན་ལས་ནི་ས་བོན་སོགས་ལས་སྤྲོ་བསྡུ་བྱེད་པ་ལ་བྱའོ། །འདི་དག་ཀྱང་སྤྱིར་ཆོས་མཐུན་སྦྱོར་བ་ཡིན་གྱི་སྔ་རྟིང་གི་རིམ་པ་ལ་སོགས་པའི་ཕྲ་མོ་འགའ་
ཞིག་ཇི་ལྟ་བ་བཞིན་སྦྱར་རྒྱུ་མ་བྱུང་ཡང་སྐྱོན་མེད་དེ་སྐབས་གཞན་དུ་བསྟན་པ་དང་འདྲའོ། །གསུམ་པ་ནི། མདོར་བྱས་ལས། དང་པོ་མགོན་པོ་བསམས་ནས་ཀྱང་། །ཤིན་ཏུ་སྦྱོར་བ་ཡང་དག་བརྩམ། །ཞེས་པ་ནས་ཏིང་ངེ་འཛིན་སེམས་དཔའ་ཞེས་བྱ་བ། །
ཡི་གེ་ཧཱུཾ་ནི་དེ་རུ་དགོད། །ཅེས་པའི་བར་གྱིས་ལོངས་སྐུ་སྤྲུལ་སྐུར་བསྒྱུར་བ་ནས་སེམས་དཔའ་གསུམ་རྩེག་ཏུ་བྱ་བའི་བར་ནི་བར་དོ་མངལ་དུ་སྐྱེ་བ་བླངས་པ་དང་མཐུན་པར་བསྒོམ་པ་ཡིན་པས་འདི་ལ་གཉིས། མཐུན་ཡུལ་བཤད་པ། དེ་དང་རྗེས་སུ་མཐུན་
པར་སྒོམ་ཚུལ་ལོ། །དང་པོ་ལ་གཉིས། སྐྱེ་བ་ལེན་ཚུལ་མདོར་བསྟན་པ། རྒྱས་པར་བཤད་པའོ། །དང་པོ་ནི། ཇི་ལྟར་ཏེ་དཔེར་ན་མའི་མངལ་དུ་འཇུག་པ་ཉེ་བར་བསྟན་ཏོ་ཞེས་དྲང་ངོ་། །གང་ན་སྐྱེ་བ་གཅིག་གིས་ཐོགས་པའི་བྱང་སེམས་ཆེན་པོ་དགའ་
6-2-29b


ལྡན་བཞུགས་པས་སོ། །གང་གི་དོན་དུ་མཆོག་གི་སྤྲུལ་པའི་སྐུར་སྐྱེ་བ་འཛིན་པའི་དོན་དུའོ། །དེར་སྐྱེ་བ་གཟུང་དགོས་པའི་རྒྱུ་མཚན་ནི་བྱང་སེམས་དེས་མི་ལ་སོགས་པའི་གདུལ་བྱ་ཐ་མལ་པའི་ཡང་དོན་མཛད་དགོས་ལ། སྔར་ལོངས་སྐུར་སངས་
རྒྱས་པའི་སྐུ་དེ་དེ་རྣམས་ཀྱིས་མཐོང་དུ་མི་རུང་བས་དེའི་སྒོ་ནས་མི་དང་དེས་མཚོན་པའི་གདུལ་བྱ་ཐ་མལ་པ་རྣམས་ཀྱི་དོན་མཛད་པར་མི་སྤྱོད་པས་སོ། །འདིས་ནི་ལོངས་སྐུས་མི་ལ་སོགས་པའི་དོན་མཛད་པའི་ཕྱིར་དུ་སྐྱེ་བ་གཅིག་གིས་ཐོགས་
པའི་བྱང་སེམས་སུ་སྤྲུལ་ནས་འཛམ་བུ་གླིང་དུ་སྤྲུལ་སྐུར་སངས་རྒྱས་བར་བསྟན་པས་བདག་ཅག་གི་སྟོན་པ་ལྟ་བུ་ནི་སྔོན་སངས་རྒྱས་ཟིན་ནས་འདོད་ཁམས་སུ་མཛད་པ་བསྟན་པར་བཞེད་དོ། །སྐྱེ་བ་འཛིན་ཚུལ་ནི་སྔར་བཤད་པ་ལྟར་གྱི་བྱང་སེམས་ཀྱི་
བར་དོ་དེ་ཡུམ་གྱི་ལྷུམས་སུ་མི་ཡི་ཕུང་པོ་དང་ཁམས་དང་སྐྱེ་མཆེད་ཀྱི་རྗེས་སུ་ཞུགས་པའི་སྒོ་ནས་སོ། །དཔེ་དེ་བཞིན་དུ་སྐྱེ་བ་ལེན་ཏོ་ཞེས་དྲང་ངོ་། །གང་གིས་ན་བྱང་སེམས་དེར་མ་ཟད་སྔར་བཤད་པའི་བསྐལ་པ་དང་པོའི་མི་ཤི་བའི་འོག་ཏུ་སྲིད་པ་
བར་མ་ན་གནས་པའི་བར་དོ་དེ་ཡང་ངོ་། །སྐྱེ་བ་ལེན་པའི་དུས་ནི་ཉིན་ཞག་བདུན་པ་སྔར་བཤད་པ་ལྟར་དོར་ཏེའོ། །གང་གི་མཐུས་སྐྱེ་ན་འཁོར་བ་ཐོག་མ་མེད་པའི་རང་གི་བདག་གཉིས་སུ་རྣམ་པར་རྟོག་པའི་བག་ཆགས་ལས་བྱུང་བའི་ལས་ཀྱིས་ཡང་དག་
པར་བསྐུལ་ཏེའོ། །བར་སྲིད་སྐྱེ་སྲིད་དུ་འཇུག་པའི་ཚུལ་ནི་འོག་ནས་འཆད་པའི་རིམ་པ་འདིས་སོ། །གལ་ཏེ་སྐབས་འདི་རྣམས་གཞིའི་སྲིད་པ་སྐྱེ་བའི་རིམ་པ་དང་བསྐྱེད་རིམ་སྒོམ་པ་ཆོས་མཐུན་པར་སྟོན་པའི་སྐབས་མ་ཡིན་ནམ། ཅིའི་ཕྱིར་སྐབས་
6-2-30a


འདིར་འབྲས་བུའི་སྤྲུལ་སྐུ་འགྲུབ་པ་དང་གཞིའི་བར་དོས་སྐྱེ་བ་ལེན་ཚུལ་ཆོས་མཐུན་པར་སྟོན་སྙམ་ན། དེ་ལ་སྔོན་གྱི་བླ་མ་ཁ་ཅིག་ལྷ་བསྐྱེད་པ་ལ་ཚུལ་གཉིས་ལས་སངས་རྒྱས་འཚང་རྒྱ་བའི་རིམ་པ་དང་མཐུན་པར་བསྐྱེད་པ་ནི་
དེ་ཉིད་བསྡུས་པ་སོགས་ནས་བསྟན་པ་རྣམས་ཡིན་ལ། སེམས་ཅན་སྲིད་པར་སྐྱེ་བ་དང་མཐུན་པར་བསྐྱེད་པ་ནི་རྣལ་འབྱོར་ཆེན་པོ་ནས་བསྟན་པ་འདིའོ་ཞེས་དེ་གཉིས་མི་མཐུན་པར་འཆད་མོད་ཀྱང་། གཞིའི་སྐྱེ་ཤི་བར་དོ་གསུམ་དང་མཐུན་པར་སྒོམ་
པ་ན་ཆོས་ལོངས་སྤྲུལ་གསུམ་དང་མཐུན་པར་སྒོམ་དགོས་པས་གཞི་དང་མཐུན་པར་སྒོམ་པ་འབྲས་བུ་དང་མཐུན་པར་སྒོམ་པ་ལ་འགལ་བ་མ་མཐོང་ངོ་། །དེས་ན་འཆི་བ་ཆོས་སྐུ་དང་འདྲ་བ་ནི་རྣམ་གཞག་བཞི་པ་ནས་འཆད་པར་འགྱུར་ལ་བར་དོ་
དང་སྐྱེ་བ་གཉིས་ལོངས་སྤྲུལ་དང་འདྲ་བར་འདིར་བསྟན་པ་ན་ཆོས་མཐུན་སྦྱོར་བའི་གཙོ་བོའི་དོན་མི་འཕྱུག་ལ། དེ་ལ་བརྟེན་ནས་འཆད་པར་འགྱུར་བ་ལྟར་སྐུ་གསུམ་པོ་གང་བསྒོམས་པས་སྦྱང་གཞི་གང་སྦྱོང་བའི་ཚུལ་མི་འཆུག་པ་དང་མངོན་རྟོགས་ཀྱི་
འདིའི་རྗེས་སུ་འདི་སྒོམ་དང་འདི་ལྟར་སྒོམ་པའི་རྒྱུ་མཚན་རྣམས་ཀྱང་བདེ་བླང་ཏུ་ངེས་པར་འགྱུར་པས་དེའི་ཕྱིར་གཞི་དང་འབྲས་བུའི་ཆོས་མཐུན་གསུངས་སོ། །ད་ནི་དཔེར་ན་འབྲས་བུའི་སྐབས་སུ་ལོངས་སྐུས་སྤྲུལ་པའི་སྐྱེ་བ་འཛིན་པའི་རྒྱུ་མཚན་འདིར་
གསུངས་པས་དང་པོའི་མགོན་པོ་སྤྲུལ་སྐུར་སྒྱུར་དགོས་པའི་རྒྱུ་མཚན་ཤེས་པ་ལྟ་བུའོ། །གཞན་ཡང་ལོངས་སྐུས་འགྲོ་བ་གང་གི་ཕུང་པོ་སོགས་ལ་ལྷུམས་སུ་ཞུགས་པས་དེའི་རྟེན་ལ་འཚང་རྒྱ་བའི་སྤྲུལ་པ་སྟོན་པའི་རྟེན་དེ་ནི་སྤྱིར་མིའི་འགྲོ་བ་དང་
6-2-30b


དེའི་ནང་ནས་ཀྱང་འཛམ་བུ་གླིང་པའི་རྟེན་ཁྱད་པར་ཅན་ཡིན་པ་དེ་བཞིན་དུ། སྔགས་པས་གང་དང་མཐུན་པར་བསྒོམས་པས་དེའི་དོད་ལ་སྤྲུལ་པའི་སྐུ་འགྲུབ་པའི་སྐྱེ་བ་དང་དེ་འཛིན་པའི་བར་དོ་རྣམས་ཀྱང་འཛམ་བུ་གླིང་པའི་དབང་དུ་བྱས་པ་དགོས་པར་བསྟན་པའི་
ཕྱིར་དུ། བྱང་སེམས་ཡུམ་གྱི་ལྷུམས་སུ་འཇུག་པ་དང་འདྲ་བའི་མའི་མངལ་དུ་སྐྱེ་བའི་བར་དོ་བསྟན་གྱི་བར་དོ་མངལ་དུ་སྐྱེ་བ་འཛིན་པ་ཐམས་ཅད་ཀྱི་དབང་དུ་མ་བྱས་ཏེ་འོག་ནས་འཆད་པ་བཞིན་ནོ། །གཉིས་པ་ལ་གསུམ། བར་དོ་མ་ཡི་མངལ་དུ་འཇུག་པའི་
རིམ་པ། ཞུགས་ནས་མངལ་དུ་འཕེལ་བའི་རིམ་པ། མངལ་ནས་ཕྱིར་འཐེན་པའི་རིམ་པའོ། །དང་པོ་ལ་གཉིས། མངལ་འཛིནཔའི་མ་ལ་སོགས་པ་རྣམས་ཇི་ལྟར་བྱུང་བ། དེ་ནས་བར་དོ་ཇི་ལྟར་ཞུགས་པའོ། །དང་པོ་ལ་གཉིས། བསྐལ་པ་དང་པོའི་
མི་རྣམས་ཐ་མལ་པའི་མིར་གྱུར་པའི་རིམ་པ། ཕོ་མོ་བྱུང་ནས་གྲོང་པའི་ཆོས་བསྟེན་ཚུལ་ལོ། །དང་པོ་ནི། བར་དོས་སྐྱེ་བ་ལེན་པ་དེ་ལ་ལེན་པའི་རིམ་པ་ནི་འོག་ནས་འབྱུང་བ་འདི་ཡིན་ཏེ། བསྐལ་པ་དང་པོའི་མི་རྣམས་སྔར་ཐ་མལ་པའི་མིར་རིམ་
གྱིས་འགྱུར་བར་བསྟན་པའི་འགྱུར་ཚུལ་ནི་བདུད་རྩི་སྟེ་སའི་བཅུད་ཟ་བ་ནས་བཟུང་སྟེ་ཇི་སྲིད་དུ་འབྲས་ཆེན་ཟ་བ་ཡན་ཆད་ཀྱིས་ཐ་མལ་པའི་ལུས་སུ་འགྱུར་རོ། །འཇིག་རྟེན་འཆགས་པའི་དུས་ནས་ཆེན་པོ་འདི་རྒྱ་མཚོ་འབའ་ཞིག་ཏུ་གྱུར་པའི་སྟེང་ནའམ་
བསྐོལ་བ་གྲངས་པའི་སྤྲིས་མ་ཆགས་པ་བཞིན་དུ་ཆགས་པའི་ས་ཡི་བཅུད་ཁ་དོག་དྲི་རོ་ཕུན་སུམ་ཚོགས་པའི་ཁ་དོག་ནི་མར་གསར་ལྟ་བུ་རོ་ནི་སྦྲང་རྩི་མ་བསྐོལ་བ་ལྟ་བུ་ཡོད་པ་དེ། སྔར་བཤད་པའི་བསྐལ་པ་དང་པོའི་མི་བརྐམ་ཆགས་ཅན་
6-2-31a


ཞིག་གིས་སོར་མོའི་རྩེ་མོས་བླངས་ཏེ་མྱང་བར་བྱེད་ཅིང་དེ་ལ་འདོད་པར་བྱེད་དོ། །དེ་བཞིན་དུ་སེམས་ཅན་གཞན་གྱིས་ཀྱང་བྱེད་དེ་ཁམ་ཟས་ཟོས་པ་དེས་དེ་དག་གི་ལུས་ལ་སྲ་བ་དང་ལྕི་བ་ཉིད་ཀྱིས་ནོན་ཏེ་ལུས་ཀྱི་ཁ་དོག་གསལ་
བའི་འོད་མི་སྣང་བར་གྱུར་ཏེ། །དེའི་འོག་ཏུ་མུན་པ་སྐྱེས་པས་ཉི་མ་དང་ཟླ་བ་དག་འཇིག་རྟེན་དུ་བྱུང་ལ་རྒྱུ་སྐར་དང་ཉིན་མཚན་དང་ཟླ་བ་དང་ཟླ་བ་ཕྱེད་དང་། དུས་ཚིགས་དང་ལོ་དག་ཀྱང་བྱུང་ངོ་། །ས་ཡི་བཅུད་ཟོས་པའི་དབང་གིས་འོད་ནུབ་ནས་ཉི་ཟླ་བྱུང་བར་
ལུང་རྣམ་འབྱེད་ལས་གསུངས་པ་ལྟར་མཛོད་འགྲེལ་ལས་ཀྱང་འབྱུང་བས་འབྲས་ཆན་ཟོས་པའི་འོག་ཏུ་ཉི་ཟླ་བྱུང་བ་མིན་ནོ། །ཟས་དེ་ཉུང་དུ་ཟོས་པ་རྣམས་ཁ་དོག་བཟང་ལམ་དུ་ཟོས་པ་རྣམས་ཁ་དོག་ངན་པར་གྱུར་པ་ན་ད་ནི་ཁ་དོག་བཟང་ལ་ཁྱོད་ནི་ངན་
ནོ་ཞེས་ཁྱད་དུ་བསད་པའི་དབང་གིས་ས་ཡི་བཅུད་དེ་མེད་པར་གྱུར་ཏོ། །དེ་དག་འདུས་ནས་དེ་ལ་མྱ་ངན་བྱེད་པ་ནས་ཞག་ཁ་དོག་དོང་ཀའི་མེ་ཏོག་ལྟ་བུ་རོ་སྔར་དང་འདྲ་བ་ཞིག་བྱུང་བ་ནས་ཁྱད་དུ་བསད་པའི་བར་སྔར་བཞིན་བྱས་པས་དེ་ཡང་མེད་པར་གྱུར་ཏོ། །
དེ་ནས་ཡང་སྔར་བཞིན་མྱ་ངན་བྱེད་པ་ན་མྱུ་གུའི་ཚལ་ཕུན་སུམ་ཚོགས་པ་ཁ་དོག་ནི་ཀ་ཏམ་པུ་ཀའི་མེ་ཏོག་ལྟ་བུ་རོ་སྔར་དང་འདྲ་བ་ཞིག་བྱུང་བ་ནས་ནུབ་པའི་བར་ཡང་སྔར་བཞིན་ནོ། །དེ་ནས་ཡང་མ་རྨོས་མ་བཏབ་པའི་འབྲས་ས་ལུ་ཤུན་པ་དང་ཕུབ་མ་
མེད་པ་རྩ་བ་སོར་བཞི་པ་ནང་བརྔས་ན་ནུབ་སྐྱེ་ཞིང་ནུབ་བརྔས་ན་ནང་སྐྱེ་བ་བརྔས་པར་མི་མངོན་པར་ཞིག་བྱུང་བ་ཟ་བར་བྱེད་དོ། །གཉིས་པ་ནི། འབྲས་དེ་ཟོས་པ་དང་ཟས་དེ་ཆེས་རགས་པས་དེ་ནས་ཐབས་དང་ཤེས་རབ་ཀྱི་རྣམ་པར་དབྱེ་བ་བསྟན་པའི་ཆེད་དུ་
6-2-31b


བཤད་གཅི་འབྱུང་བའི་ལམ་ཕོ་མོའི་དབང་པོ་དང་བཅས་པ་དེད་ཅིང་ཕོ་མོའི་དབྱིབས་ཀྱང་ཐ་དད་པར་གྱུར་ཏེ། །དེ་ནས་སྔོན་ཐོག་མ་མེད་པ་ནས་ཚུལ་མིན་ཡིད་བྱེད་ལ་གོམས་པའི་དབང་གིས་ཕོ་མོ་གཅིག་ལ་གཅིག་ལྟ་ཞིང་ཕན་ཚུན་ཆགས་པའི་སེམས་སྐྱེའོ། །
གང་གི་ཕྱིར་ཏེ་གང་ཚུན་ཆད་ཕན་ཚུན་ལོག་པར་ཞུགས་པ་དེ་ནས་བརྩམས་ཏེ་ཕོ་དང་མོ་ཞེས་པའི་མིང་འཇིག་རྟེན་དུ་གྲགས་སོ། །དེ་ཡང་ལོག་པར་ཞུགས་པ་མཐོང་ནས་ས་ལ་སོགས་པ་འཐོར་བ་སོགས་བྱེད་ཅིང་སེམས་ཅན་ངན་པ་ཞེས་སྨྲས་པ་ན་བྱ་བ་
མ་ཡིན་པ་བྱེད་པའི་དོན་དུ་ཁྱིམ་བརྩིགས་ཏེ་འདོད་པ་བསྟེན་པ་དང་ཁྱིམ་གྱི་དང་པོའོ། །དེ་ནས་འབྲས་ས་ལུ་དེ་ནང་ཟ་བ་ན་ནང་ལེན་ནུབ་ཟ་བ་ནུབ་ལེན་པ་ལ་སེམས་ཅན་ལེ་ལོ་ཅན་ཞིག་གིས་ནང་དགོང་གཉིས་ཀའི་ས་ལུ་དུས་གཅིག་ཏུ་བླངས་སོ། །དེ་ནས་
སེམས་ཅན་གཞན་ཞིག་གིས་ཀྱང་ཉི་མ་གཉིས་དང་གསུམ་དང་བདུན་གྱི་བར་གྱི་ས་ལུ་དུས་གཅིག་ཏུ་བླངས་སོ། །དེ་མཐོང་ནས་གཞན་དག་གིས་ཀྱང་ཟླ་བ་ཕྱེད་དང་ཟླ་བ་གཅིག་གིས་ལུ་དུས་གཅིག་ཏུ་བླངས་པས་བརྔས་པ་རྣམས་སླར་མི་སྐྱེ་ཞིང་སོ་བ་དང་ཤུན་པ་
དང་ལྡན་པར་གྱུར་ཏོ། །ལུང་རྣམ་འབྱེད་ལས་སྔར་བཤད་པའི་ལུས་ཁྱད་པར་ཅན་ཐོབ་པ་དེ་རྣམས་ཉིད་འདིའི་བར་དུ་གྱུར་པར་གསུངས་པས་ལྷག་མོས་དང་ཆོས་མཐུན་སྦྱར་བའི་མི་ནི་བསྐལ་པ་དང་པོའི་རྫུས་སྐྱེས་ཡིན་ལ་མཚམས་འདི་ནས་རྒྱལ་པོ་
མང་པོས་བཀུར་བ་བསྐོས་པར་གསུངས་ཤིང་དེའི་གདུང་རབས་ལས་ཤཱཀྱ་རྣམས་བྱུང་བ་ཡིན་པས་དེ་དག་ནི་གླིང་འདིའི་དབང་དུ་བྱས་པའོ། །ལྷག་མ་རྣམས་ནི་ཚིགས་མངས་སུ་དོགས་ནས་མ་བྲིས་ཏེ་རྒྱས་པར་ཤེས་པར་འདོད་ན་འདུལ་བ་ལུང་བལྟ་བར་
6-2-32a


བྱའོ། །གཉིས་པ་ལ་གསུམ། མངལ་དུ་སྐྱེ་བ་འཛིན་པའི་རྒྱུ་བསྟན་པ། དེ་ལ་བརྟེན་ནས་སྐྱེ་གནས་སུ་འཇུག་ཚུལ། དེའི་རིམ་པ་རྩ་རྒྱུད་དང་མ་རྒྱུད་ནས་ཇི་ལྟར་བསྟན་པའོ། །དང་པོ་ནི། སྔར་བཤད་པའི་བསྐལ་པ་དང་པོའི་
མི་ཐ་མལ་བར་གྱུར་པ་ཤི་བའི་རྗེས་སུ་བར་སྲིད་གྲུབ་པ་དང་བསྐལ་པ་དང་པོའི་མི་ཕོ་མོ་ལོག་པར་འཇུག་པའི་སྐབས་དེ་ནས་གནས་སྐབས་གསུམ་ཉེ་བ་སྟེ་ཚོགས་པར་གྱུར་པས་མའི་རུམ་དུ་བར་དོ་དེ་མངལ་དུ་འཇུག་པར་འགྱུར་ཏེ། མ་ནད་མེད་པར་
ཉམས་བདེ་ཞིང་ཟླ་མཚན་གྱི་ཁྲག་དང་ལྡན་པའི་སྐབས་དང་ཕ་དང་མ་ཕན་ཚུན་རྗེས་སུ་ཆགས་པར་གྱུར་ཅིང་ཕྲད་པ་དང་དྲི་ཟའི་སེམས་ཅན་ཉེ་བར་འཁོར་བ་སྟེ་དེར་ཉེ་བར་གནས་ཤིང་འཇུག་འདོད་པའོ། །མངལ་དུ་འཇུག་པ་ལས་ཕ་མ་ཆགས་པར་གྱུར་
ཅིང་ཕྲད་པ་དང་མ་ཡང་རུང་བར་གྱུར་ཅིང་ཟླ་མཚན་དང་ལྡན་པ་དང་དྲི་ཟ་ཡང་ཉེ་བར་གནས་པར་གྱུར་ཅིང་འཇུག་པར་འདོད་ནི་སྟེ་དགའ་པ་དྲི་ཟ་ཞེས་བྱ་བ་ནི་སྲིད་པ་བར་མའི་སེམས་ཅན་གྱི་ཚིག་བླ་དགས་ཡིན་ནོ། །ཞེས་གསུངས་པ་ལྟར་བཤད་དགོས་པས་
གཞུང་འདིར་ནད་མེད་པ་དང་ཁྲག་དང་ལྡན་པ་སོ་སོར་ཕྲལ་ཞིང་དྲི་ཟ་ཉེ་བ་གནས་སྐབས་གསུམ་གྱི་སྐབས་སུ་མ་བྱུང་བ་ནི་འགྱུར་གྱིས་མ་ཐོན་པའོ། །དེ་ཡང་རླུང་མཁྲིས་བད་ཀན་གྱིས་བསྒགས་པ་དང་དབུས་ནས་འདྲ་བ་དང་གྲོག་མའི་རྐེད་པ་འདྲ་བ་ལ་
སོགས་པའི་མངལ་གྱི་ཉེས་པ་དང་ཕ་མ་གཉིས་ཀ་ལས་མ་བྱུང་བ་དང་བྱུང་ཡང་དག་རུང་གཅིག་རུལ་བ་ས་བོན་གྱི་ཉེས་པ་དང་། ཕ་མས་བུ་རྙེད་པ་དང་བུས་ཀྱང་ཕ་མར་འགྱུར་བའི་ལས་མ་བསགས་པ་ལས་ཀྱི་ཉེས་པ་གསུམ་གང་རུང་དང་
6-2-32b


ལྡན་ན་མངལ་དུ་བུ་མི་འཆགས་བར་མངལ་འཇུག་ལས་གསུངས་པས་དེ་དག་དང་ཡང་བྲལ་བ་དགོས་སོ། །གཉིས་པ་ནི། དེ་དག་ཚོགས་པ་དེ་ནས་ཕོ་མོ་དེ་དག་ཕན་ཚུན་རྗེས་སུ་ཆགས་པས་རྡོ་རྗེ་དང་པདྨ་བྱིན་གྱིས་བརླབས་པ་སྟེ་རྒྱས་པར་བྱས་པས་འཁྱུད་
པ་དང་འོ་བྱ་བ་ལ་སོགས་པའི་འཁྲིག་པའི་བྱ་བས་ཕོ་མོའི་དབང་པོ་གཉིས་མཉམ་པར་སྦྱོར་བ་བར་དོ་དེས་མཐོང་ངོ་། །དེ་ནི་ས་ཡི་དངོས་གཞི་ལས་ཕ་མ་ལས་བྱུང་བའི་ཁུ་ཁྲག་ལ་ཕ་མ་ཉལ་པོ་བྱེད་པ་མེད་བཞིན་དུ་མཐོང་བའི་ཕྱིན་ཅི་ལོག་གི་བློ་ཡིན་པར་
གསུངས་སོ། །དེ་མཐོང་བས་འདོད་པའི་ཡུལ་ཉེ་བར་ལེན་པའི་ཕྱིར་དུ་སྲིད་པ་བར་མ་སྤོང་སྟེ་སྐྱེ་བ་ལེན་ནོ། །དེ་ཡང་མི་རྟ་ལ་ཞོན་པ་བཞིན་དུ་རྣམ་པར་ཤེས་པའི་བདག་པོ་ཐུགས་རྡོ་རྗེ་བར་དོའི་སེམས་ཤིན་ཏུ་ཕྲ་བའི་ལུས་དང་བཅས་པ་དེ་རླུང་གི་བཞོན་པ་
ལ་ཡང་དག་པར་ཞོན་ནས་ཤིན་ཏུ་མྱུར་བར་འོང་ཞིང་སྐད་ཅིག་ཐང་ཅིག་གམ་ཡུད་ཙམ་གྱིས་ཕྱོགས་དེར་ཕྱིན་ནས་རྣམ་པར་སྣང་མཛད་ཀྱི་སྒོ་ནས་འཇུག་གོ། །འདི་ལ་སྔོན་གྱི་བླ་མ་དག་བཤད་པ་ལ་རྣམ་སྣང་དུ་གསུངས་པ་ལ་བརྟེན་ནས་བཤད་ལམ་རྣམ་
སྣང་གི་སྒོར་འཆད་པ་མི་འཐད་དེ་ཡེ་ཤེས་སེམས་དཔའ་ལྟར་ཞེས་དམ་ཚིག་པ་ལ་ཡེ་ཤེས་པ་འཇུག་པའི་སྒོར་གསུངས་པས་སོ། །དེས་ན་ཡེ་ཤེས་སེམས་དཔའ་སྤྱི་བོ་ནས་འཇུག་པ་ལྟར་རྣམ་སྣང་སྐུ་རྡོ་རྗེ་གང་དུ་འགོད་པའི་སྒོ་སྤྱི་བོ་ནས་འཇུག་གོ། །སྡོམ་
འབྱུང་ལས་ནི། དང་པོ་ཕ་མའི་ཀུན་སྦྱོར་ལས། །སྲིད་པའི་སྐྱེ་བོ་ཅན་དུ་མཐོང་། །ཤིན་ཏུ་ངེས་པར་ཀུན་དགའི་སྟོབས། །ཁ་ཡི་ལམ་ལ་རབ་ཏུ་འཇུག །ཅེས་ཁ་ནས་འཇུག་པར་ཡང་བཤད་ལ་དེ་ཡང་ཕའི་ཁ་ཡིན་པར་རྒྱུད་རྡོར་འཕྲེང་ལས། སྔོན་
6-2-33a


ལས་རླུག་གི་རྣམ་ཤེས་ནི། །བརྒྱ་ལ་གང་ཚེ་འགྲོ་འགྱུར་ན། །ཕ་ཡི་ཁ་ལ་མཚུངས་པར་ལྡན། །དེ་ཚེ་ཆགས་པའི་དབང་དུ་འགྱུར། །གསང་གནས་ཟླ་མཚན་ལྡན་པའི་རྩ། །མེ་དང་ཉི་མ་འཆར་བ་ན། །དེ་ཚེ་ལྷག་པར་ཆགས་པས་ནོན། །
ཆགས་པ་མཆོག་ཏུ་འདོད་པར་འགྱུར། །རྡོ་རྗེ་པདྨ་འདྲེས་པའི་གདོང་། །འཇུག་པ་རྩ་ཡི་ཁ་ཡི་རླུང་། །དེ་ཚེ་ས་བོན་དུ་ནི་འགྱུར། །ས་བོན་ལས་ནི་སེམས་ཅན་འབྱུང་། །ཞེས་ལེའུ་བཅུ་བདུན་པ་ལས་གསུངས་སོ། །མཛོད་འགྲེལ་ལས་སྲིད་པ་བར་མ་ནི་ལྟོ་
བརྟོལ་ཏེ་འཇུག་པ་མ་ཡིན་གྱི་སྐྱེ་གནས་ཀྱི་སྒོ་ནས་འཇུག་སྟེ་དེ་ཉིད་ཀྱི་ཕྱིར་མཚེ་མ་ལས་གང་ཕྱིས་བྱུང་བ་དེ་ནི་ཕུ་བོ་ཞེས་བྱའོ། །གང་སྔར་བྱུང་བ་དེ་ནི་ནུ་བོ་ཞེས་བྱའོ། །ཞེས་ཀྱང་བཤད་པས་མཐའ་གཅིག་ཏུ་མ་ངེས་སོ། །དང་པོ་གང་ནས་འཇུག་ཀྱང་མཐར་
མངལ་གྱི་སྐྱེ་གནས་སུ་འཇུག་པར་ནི་ཐམས་ཅད་འདའོ། །བར་སྲིད་ཐོགས་མེད་ཡིན་པས་འཇུག་པའི་སྒོ་ལ་བུ་ག་ནམ་མཁའི་སྒོ་མི་དགོས་ཏེ་ལྕགས་ཀྱི་ཐུ་ལུམ་བཤགས་པའི་ནང་ནས་སྲིན་བུ་བྱུང་བར་གྲག་གོ ཞེས་མཛོད་འགྲེལ་ལས་བཤད་པ་ལྟར་
རོ། །ཡེ་ཤེས་ཀྱི་ས་དངོས་ནི་སྤྲོས་པའི་མཚན་མ་མི་དམིགས་པའི་སྟོང་པ་ཉིད་ཀྱི་ཤེས་པ་ཡིན་མོད་ཀྱང་བར་དོ་ཤི་བ་ལ་དེར་བཏགས་པ་ནི་རྣམ་རྟོག་རགས་པ་འགགས་པའི་ཆ་ནས་ཡིན་ལ་དེ་ཐོབ་པ་ནི་ཤི་བའི་འོད་གསལ་མྱོང་བའོ། །འདིར་ས་ཡི་
དངོས་གཞི་ལས་ཉལ་པོ་བྱེད་པ་དེ་མཐོང་བ་ན་གཅིག་ལ་ཆགས་ཤིང་ཅིག་ཤོས་ལ་འབྲལ་འདོད་སྐྱེ་སྟེ། ཕོར་སྐྱེ་ན་བུད་མེད་ལ་ཆགས་ཤིང་སྐྱེས་པ་ལ་འབྲལ་བར་འདོད་ལ་མོར་སྐྱེ་ན་དེ་ལས་བཟློག་སྟེ་འབྱུང་བ་དང་། དེ་ནས་སྐྱེས་པའམ་བུད་
6-2-33b


མེད་གང་རུང་གཅིག་ཁོ་ན་མཐོང་ལ་ཇི་ལྟར་ཕྱོགས་དེར་ཉེ་བར་སྦྱོར་བ་དེ་ལྟར་ཡན་ལག་གཞན་མི་སྣང་བར་ཕོ་མོའི་མཚན་མ་ཙམ་ཞིག་མཐོང་བ་ན་ཁོང་ཁྲོ་སྐྱེས་ནས་འཆི་བར་བཤད་དོ། །བར་དོ་ཤི་ནས་ཉིད་མཚམས་སྦྱོར་བ་ནི་སྲང་མདའི་མཐོ་དམན་ལྟར་
འབྱུང་བས་དེའི་ཚུལ་ནི་ཐབས་ཀྱི་ཡེ་ཤེས་ཐིག་ལེ་དང་གཉིས་སུ་མེད་པར་གྱུར་ཏེ་གང་ལ་བརྟེན་ནས་ཤིན་ཏུ་དགའ་བ་སྐྱེ་བའི་གནས་ཁུ་ཁྲག་གི་དབུས་དེར་བར་དོ་ཤི་བའི་སེམས་ཆུད་པ་ཡང་ཡིན་ལ་དེ་དག་གི་སྙིང་པོར་གྱུར་པ་ཡང་ཡིན་པས་ཆུད་པའི་སྙིང་པོ་
ཡིན་ནོ། །འདིར་ཕ་མ་གཉིས་ཆགས་པ་དྲག་པོའི་སྐབས་སུ་བབ་པ་ན་འཇུག་ཏུ་ཁུ་བ་བསྐབ་འབྱུང་ལ་དེའི་རྗེས་སུ་དེ་གཉིས་ཀ་ལས་ཁུ་ཁྲག་གི་ཐིགས་པ་གཉིས་ངེས་པར་བྱུང་བ་དེ་མའི་སྐྱེ་གནས་སུ་འདྲེས་ནས་འོ་མ་བསྐོལ་བའི་སྤྲིས་མ་ཆགས་པ་ལྟར་
འདུག་པའི་དབུས་སུ་ཀུན་གཞི་རྣམ་ཤེས་འཇུག་པར་ས་ཡི་དངོས་གཞི་ལས་གསུངས་སོ། །ཀུན་གཞི་ཁས་མི་ལེན་པ་རྣམས་ནི་དེ་ཡིད་ཀྱི་ཤེས་པར་འདོད་དོ། །གསུམ་པ་ནི། དེ་ལྟར་བར་དོས་གང་དུ་སྐྱེ་བ་ལེན་པའི་ཕ་མའི་ཐིག་ལེ་ཇི་ལྟར་འབྱུང་བའི་
ཚུལ་འདུས་པའི་རྩ་བའི་རྒྱུད་ལས་དེ་བཞིན་གཤེགས་པ་ཐམས་ཅད་ཟིལ་གྱིས་གནོན་པའི་ཏིང་ངེ་འཛིན་གསུངས་པའི་རིམ་པ་དང་སྦྱར་ན་ལེའུ་དང་པོ་ལས། དེ་ནས་ནམ་མཁའི་དབྱིངས་འདི་ཐམས་ཅད་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་
ངོ་བོ་གནས་པར་གྱུར་ཏོ། །དེ་ནས་ནམ་མཁའི་དབྱིངས་ཐམས་ཅད་ན་གནས་པའི་སེམས་ཅན་ཇི་སྙེད་པ་དེ་དག་ཐམས་ཅད་རྡོ་རྗེ་སེམས་དཔའི་བྱིན་གྱིས་བརླབས་ཀྱིས་དེ་བཞིན་གཤེགས་པ་ཐམས་ཅད་ཀྱི་བདེ་བ་དང་ཡིད་བདེ་བ་ཐོབ་པར་གྱུར་ཏོ། །
6-2-34a


ཞེས་རྡོ་རྗེ་འཆང་ཟིལ་གནོན་རྡོ་རྗེའི་ཏིང་ངེ་འཛིན་ལ་ཞུགས་མ་ཐག་ཏུ་དེ་ལྟར་གྱུར་པར་གསུངས་ལ། དེའི་འགྲེལ་པ་སྒྲོན་གསལ་དུ་ནམ་མཁའི་དབྱིངས་ནི་རྩ་བདུན་ཁྲི་ཉིས་སྟོང་གི་ཁོང་སྟོང་དང་རྡོ་རྗེ་ནི་ཐབས་ཀྱི་ཡེ་ཤེས་དང་
གནས་པ་ནི་བྱུང་བར་གྱུར་པ་དང་སེམས་ཅན་ཐམས་ཅད་ནི་ཕུང་པོ་ལ་སོགས་པ་དང་རྡོར་སེམས་ཀྱི་བྱིན་རླབས་ནི་ཐབས་ཀྱི་ཡེ་ཤེས་ཤར་བ་དང་། བདེ་བ་དང་ཡིད་བདེ་བ་ཐོབ་པ་ནི་དབང་པོ་གཉིས་སྦྱར་བ་ལས་ཆགས་པ་ཆེན་པོའི་མེས་ཞུ་ནས་མཆོག་
ཏུ་དགའ་བ་མྱོང་བ་ལ་བཤད་དོ། །དེ་ལྟར་ན་ཕ་མ་གཉིས་སྙོམས་པར་ཞུགས་པ་ན་ཆགས་པའི་མེས་རྩ་གནས་ཐམས་ཅད་ནས་བྱང་ཆུབ་ཀྱི་སེམས་ཞུ་ནས་འབབ་པར་གསུངས་པའི་ཐིག་ལེའི་དབུས་སུ་བར་དོའི་ཤེས་པ་འཇུག་པའོ། །སྒྲོན་གསལ་
ལས་འདི་འདོད་ཆགས་ཆོས་ཀྱི་སྦས་དོན་དུ་བཤད་པས་ལམ་སྒོམ་པའི་རྣལ་འབྱོར་ཕོ་མོ་སྙོམས་པར་ཞུགས་པའི་སྐབས་ཡིན་མོད་ཀྱང་མཚན་ཉིད་ལ་དཔྱད་ན་གཞིའི་སྐབས་དང་འདྲ་བས་འདིར་ཡང་སྦྱར་དུ་རུང་ངོ་། །རྣལ་འབྱོར་རྒྱུད་ལས་དེ་ལྟར་
གསུངས་པར་མ་ཟད་ཀྱི་ཤེས་རབ་ཀྱི་མདོ་སྟེ་རྣལ་འབྱོར་མའི་རྒྱུད་སྡོམ་འབྱུང་ལས་ཀྱང་གསུངས་ཏེ་རྩ་སྟོང་ཕྲག་བདུན་ཅུ་རྩ་གཉིས་ཡང་དག་པར་བསྐུལ་བ་སྟེ་དེ་དག་ནས་ཁམས་བཞུས་ཏེ་ཕོ་མོ་གཉིས་ཀ་ཡང་ཁམས་ཞུ་བ་ལས་བྱུང་བའི་མཆོག་ཏུ་
དགའ་བའི་བདེ་བས་ཚིམ་པར་བྱའོ་སྟེ་བྱེད་དོ། །རྩ་གནས་ནས་ཁམས་འཇུ་བའི་རྐྱེན་ནི་ཤེས་རབ་སྟེ་བུད་མེད་དང་ཡེ་ཤེས་ཏེ་སྐྱེས་པ་གཉིས་ཀྱི་གཏུམ་མོའི་མེའི་འོད་ཟེར་ཤར་བ་སྟེ་འབར་བས་རེ་རེར་མ་ཟད་ཕོ་མོ་གཉིས་ཀའི་ཐིག་ལེ་ཡང་ཞུ་བར་
6-2-34b


གྱུར་ཏོ། །ཁུ་ཁྲག་ཡང་དག་པར་འདྲེས་ནས་བུད་མེད་ཀྱི་སྐྱེ་གནས་ཀྱི་དབུས་སུ་ཐིག་ལེའི་གཟུགས་སུ་བབས་ནས་གནས་སོ། །མེ་དེ་གང་གིས་སྤོར་བ་དང་སྤར་བའི་མེས་རྩ་སད་པར་བྱེད་ཚུལ་ནི་རྒྱུད་རྡོ་རྗེ་ཕྲེང་བའི་ལེའུ་བཞི་པ་ལས། དཔའ་བོ་རྣལ་འབྱོར་མ་
སྦྱོར་བ། །གང་ཚེ་གསང་བའི་རྩ་གཉིས་ནི། །ཡང་དག་སྦྱོར་བས་རེག་གྱུར་པ། །དེ་ཚེ་ནམ་མཁར་རྣམ་རྒྱས་ཉིད། །ནམ་མཁའ་ལས་ནི་སྐྱེས་པའི་རླུང་། །དེ་ཡིས་མེ་ནི་རབ་ཏུ་འབར། །རྩ་ནི་སྟོང་ཕྲག་བདུན་ཅུ་གཉིས། །རྩ་རྣམས་རབ་སད་མེ་དེ་ཡིས། །
བདེ་བ་ཀུན་གྱི་གོ་འཕང་མཆོག །བདེ་བ་ཆེན་པོ་བྱང་ཆུབ་སེམས། །རྣམ་པར་ཞུ་ནས་རྩར་གནས་པ། །ཞེས་གསུངས་སོ། །དེ་ལྟར་ཁུ་ཁྲག་གཉིས་རྩ་གནས་རྣམས་ནས་སྐྱེ་གནས་སུ་འོང་བའི་ཚུལ་ནི་ཨཱ་ལི་སྟེ། ཁུ་བ་རྩའི་གནས་སོ་སོ་ནས་ཞུ་བ་
རྣམས་མཐར་རྩའི་ལམ་གཅིག་ཏུ་འདྲེས་པ་དང་དེ་བཞིན་དུ་ཀཱ་ལི་སྟེ་ཁྲག་རྣམས་ཀྱང་གཅིག་ཏུ་འདྲེས་པར་གྱུར་ཏེ་ཁམས་ཕྲ་བ་རླུང་ལ་ཞུགས་པས་རླུང་གིས་བསྐྱོད་ནས་ཐུར་དུ་དྲངས་པས་སྐྱེ་གནས་སུ་འདྲེས་པ་ཡིན་ཏེ་སྤྱོད་བསྡུས་ལས། དེ་ཉིད་ཨཱ་
ལི་ཀཱ་ལི་རྣམས་དང་ལྷན་ཅིག་དབང་པོ་གཉིས་མཉམ་པར་སྦྱོར་བའི་དུས་སུ་ཁ་ཐུར་དུ་བལྟས་པར་འགྱུར་བས་གསང་བའི་སྣའི་བུ་ག་ནས་ས་བོན་གྱི་གཟུགས་ཀྱིས་ཕྱུང་ནས་སེམས་ཅན་གྱི་ཁམས་རྣམས་སྐྱེད་པར་བྱེད་དོ། །ཞེས་གསུངས་ཏེ་དེ་ཉིད་
ནི་འབྲུ་གསུམ་ཡིན་ལ་དེ་ཡང་རླུང་འཇུག་གནས་ལྡང་གསུམ་གྱི་རང་བཞིན་ལ་མཛད་དོ། །དཔལ་སྡོམ་པ་འབྱུང་བ་ལས། རྟ་ཞོན་པ་ཡི་རྣམ་ཤེས་ནི། །རླུང་གི་བཞོན་པ་ཞོན་པ་བཞིན། །ཤིན་ཏུ་མྱུར་བར་འོངས་གྱུར་ཏེ། །སྐད་ཅིག་ཐང་ཅིག་
6-2-35a


ཙམ་ལ་ནི། །གཉིས་དང་སྟོང་ཕྲག་བདུན་ཅུའི་རྩ། །རབ་བསྐུལ་དེ་ཡི་སྐད་ཅིག་ལ། །མཆོག་ཏུ་དགའ་བ་ཡང་དག་ཐོབ། །ཨཱ་ལི་ཀཱ་ལི་ཞུ་བྱས་པའི། །ཁུ་ཁྲག་དེ་དག་གི་དབུས་སུ། །ཐིག་ལེའི་གཟུགས་ཀྱིས་གནས་པར་འགྱུར། །
ཞེས་གསུངས་སོ། །ཁུ་ཁྲག་འདྲེས་པའི་ཐིག་ལེ་སྐྱེ་གནས་ཀྱི་དབུས་སུ་གནས་པ་འདིའི་དོན་གསལ་བར་གསུངས་པ་ནི་འདུས་པའི་རྩ་བའི་རྒྱུད་ལས། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་ལ་བཞུགས་
སོ། །ཞེས་གསུངས་སོ། །འདིས་བསྟན་ཚུལ་ནི་བཤད་རྒྱུད་སྒྲོན་གསལ་དུ་དྲངས་པ་ལས། འདི་ན་ཕུང་པོ་ལྔ་རྒྱལ་བ། །དེ་བཞིན་གཤེགས་པ་ཐམས་ཅད་ཡིན། །དེ་ཡི་བདག་ཉིད་སྐུ་གསུང་ཐུགས། །རྡོ་རྗེ་ཐུགས་འདིར་བདེ་ཆེན་པོ། །བཙུན་མོ་ལེགས་
སྦྱངས་ཕྱག་རྒྱ་ཡིན། །ལེགས་སྦྱངས་པདྨ་བྷ་ག་ཡིན། །བཞུགས་པ་རྡོ་རྗེ་འཛིན་པ་དེར། །ཐིག་ལེའི་གཟུགས་ཀྱིས་གནས་པའོ། །ཞེས་གསུངས་པ་ལྟར་རོ། །བར་དོའི་ཤེས་པ་ཁུ་ཁྲག་འདྲེས་པའི་དབུས་སུ་ཞུགས་པ་སྐྱེ་གནས་སུ་གནས་པར་གསུངས་
པའི་སྐྱེ་གནས་ནི་མའི་ཕོ་བའི་འོག་ལོང་གའི་སྟེང་གི་བར་ཡིན་པར་མངལ་འཇུག་ནས་གསུངས་པས་འདིར་པདྨ་ལ་གནས་པར་གསུངས་པ་དང་པོ་དེར་ཐིག་ལེ་ཞུགས་པ་ལ་བྱའི་མེར་མེར་པོ་གནས་པའི་སྐྱེ་གནས་ནི་མིན་ནོ། །སྒྲོན་གསལ་ལས་ཐིག་ལིའི་
གཟུགས་ཀྱིས་གནས་པ་ལྷ་མོ་བཞིས་ཞུས་ཀྱི་ལུང་དྲངས་ནས་ལྷའི་རྣམ་པ་ཅན་གྱི་སྐབས་སུ་བཤད་མོད་ཀྱང་གཞིའི་སྐབས་ཀྱི་ཐིག་ལེ་དངོས་ལ་ཡང་བཤད་དུ་རུང་བས་སློབ་དཔོན་འདིས་སྔར་ལྟར་བཤད་དོ། །གཉིས་པ་ལ་གསུམ། འཕེལ་རིམ་
6-2-35b


དངོས། གནས་སྐབས་ལྔ་རིགས་ལྔ་དང་སྦྱར་བ། ཁུ་རྡུལ་གྱི་རྟེན་རྩའི་གཙོ་བོ་བསྟན་པའོ། །དང་པོ་ནི། །མངལ་དུ་སྐྱེ་བ་བླངས་པ་དེའི་འོག་ཏུ་ལུས་རིམ་གྱིས་འཕེལ་ཏེ་དང་པོ་ནི་མེར་མེར་པོ་སྟེ་ཕྱི་སྤྲིས་མ་ལྟ་བུས་གཡོགས་ལ་ནང་ཤིན་ཏུ་སླ་བར་འདུག་པའོ། །
འདིར་དང་པོ་ཕྱོགས་གང་དུ་རྣམ་ཤེས་ཞུགས་པའི་ཕྱོགས་དེ་ནི་སྙིང་ག་སྟེ་ཐ་མ་གང་ནས་རྣམ་ཤེས་འཕོ་བའི་ཕྱོགས་དེར་དང་པོར་འཇུག་པར་ས་ཡི་དངོས་གཞི་ལས་གསུངས་སོ། །འདི་ལ་མཛོད་འགྲེལ་དང་ལུང་གི་མངལ་འཇུག་ལས། ནུར་ནུར་པོ་དང་གནས་
སྐབས་གཉིས་པ་ལ་མེར་མེར་པོ་ཞེས་གསུངས་ལ་ས་ཡི་དངོས་གཞི་ལས་བཟློག་སྟེ་གསུངས་ཀྱང་དོན་གྱི་རིམ་པ་འདྲའོ། །མེར་མེར་པོ་སྨིན་པ་ལས་ལྟར་ལྟར་པོ་སྟེ་ཕྱི་ནང་གཉིས་ཀ་སྤྲིས་མ་ལྟར་གྱུར་ཏེ་ཞོ་ལྟར་འདུག་ལ་ཤར་ནི་མ་གྱུར་པའོ། །ལྟར་ལྟར་
པོ་སྨིན་པ་ལས་གོར་གོར་པོར་འགྱུར་ཏེ་ཤར་ནི་གྱུར་ལ་མནན་མི་བཟོད་པའི་སླ་བའོ། །འདི་ལ་ས་ཡི་དངོས་གཞི་ལས་ལྟར་ལྟར་པོ་དང་། མངལ་འཇུག་ལས་ཟངས་ཀྱི་ཐུར་མ་དང་འདྲ་བས་ནར་ནར་པོ་ཞེས་གསུངས་སོ། །གོར་གོར་པོ་སྨིན་པ་ལས་འཁྲང་
འགྱུར་ཏེ་བསྐ་ཞིང་མནན་བཟོད་པའོ། །མངལ་འཇུག་ལས་གདར་དང་འདྲ་བས་གོར་གོར་པོ་ཞེས་གསུངས་སོ། །འཁྲང་འགྱུར་རླུང་གིས་བསྐུལ་ཏེ་སྨིན་པར་བྱས་པ་ལས་རྐང་ལག་འགྱུ་བ་སྟེ་དཔུང་པ་གཉིས་དང་བརླ་གཉིས་དང་མགོ་པོའི་མཚན་མ་ལྔ་འབྱུང་ངོ་། །
ཡང་ཞེས་པ་ནི་གནས་སྐབས་སྔ་མ་རྣམས་སུ་ཡང་རླུག་གིས་བསྐུལ་བར་མ་ཟད་པའོ། །དེ་ལྟར་ན་མེར་མེར་པོ་ལ་སོགས་པའི་མངལ་གྱི་གནས་སྐབས་ལྔ་གསལ་བར་འགྱུར་རོ། །དེའི་འོག་ཏུ་སྐྲ་དང་སེན་མོ་དང་བ་སྤུ་ལ་སོགས་པ་དང་མིག་ལ་སོགས་པའི་
6-2-36a


དབང་པོ་གཟུགས་ཅན་རྣམས་ཞེས་སྦྱར་ཏེ་མཛོད་འགྲེལ་དུ་མདོ་དྲངས་པ་ལས། སྐྲ་སྤུ་སེན་མོ་ལ་སོགས་དང་། །དབང་པོ་གཟུགས་ཅན་རྣམས་དང་ནི། །མཚན་རྣམས་རིམ་གྱིས་སྐྱེ་བར་འགྱུར། །ཞེས་གསུངས་སོ། །མཚན་མ་ནི་
ཕོ་མོའི་རྟགས་ཏེ་དེ་རྣམས་རིམ་གྱིས་སྐྱེའོ། །རྒྱལ་པོ་སྲས་ཀྱིས་མིག་ལ་སོགས་པའི་དབང་རྟེན་ལ་མཚན་མར་འཆད་དོ། །སྡོམ་འབྱུང་ལས་ཀྱང་། དང་པོར་ནུར་ནུར་པོའི་རྣམ་པ། །མེར་མེར་པོ་ནི་གཉིས་པ་ཡིན། །ལྟར་ལྟར་པོ་སྐྱེས་གསུམ་པ་སྟེ། །བཞི་པ་
གོར་གོར་པོ་ཉིད་དོ། །རླུང་རྣམས་ཀྱིས་ནི་བསྐུལ་བས་ན། །ཉ་ཡི་རྣམ་པ་ལྟ་བུར་འགྱུར། །ཟླ་བ་ལྟར་གྱུར་ས་བོན་ལས། །ཡན་ལག་ལྔ་ནི་རབ་ཏུ་སྐྱེ། །སྐྲ་སྤུ་སེན་མོ་རྣམས་དང་རྟགས། །ཟླ་བ་བདུན་གྱིས་སྐྱེ་བར་འགྱུར། །དབང་པོ་རྣམས་དང་གཟུགས་རྣམས་ནི། །
ཟླ་བ་བརྒྱད་ལ་སྐྱེ་བར་འགྱུར། །ཟླ་བ་དགུ་ཡིས་ཡང་དག་རྫོགས། །ཟླ་བ་བཅུ་ལ་སེམས་དང་ལྡན། །ཞེས་ཟླ་བ་དགུས་ལུས་རྫོགས་ནས་ཟླ་བ་བཅུ་པ་ལ་ཕྱིར་འབྱུང་བའི་སེམས་དང་ལྡན་པར་གསུངས་སོ། །མངལ་འཇུག་ལས་ཞག་བདུན་ཕྲག་སོ་བརྒྱད་རྫོགས་
ནས་བཙའ་བར་གསུངས་ལ་ས་ཡི་དངོས་གཞི་ལས་དེ་ནས་ཞག་བཞི་ལོན་ནས་བཙའ་བར་གསུངས་པས་རིལ་པོ་དགུ་དང་ངོ་བཅུར་བྱས་ན་འདི་དང་མཐུན་པར་སྣང་ངོ་། །མངལ་ན་གནས་པ་ཞག་བདུན་ཕྲག་རེ་རེ་ལ་རླུང་གིས་སྨིན་པར་བྱེད་ཚུལ་རྒྱས་པར་ལུང་
གི་མངལ་འཇུག་ལས་ཤེས་པར་བྱ་སྟེ་འདིར་ཚིག་མངས་སུ་དོགས་ནས་མ་བྲིས་སོ། །གཉིས་པ་ནི། མངལ་གྱི་གནས་སྐབས་དེ་ལ་ཡང་ས་བོན་གྱི་སྟེ་ཁུ་བའི་གནས་སྐབས་དེ་ནི་གནས་སྐབས་ལྔར་ངེས་པར་སྐྱེ་བ་དེ་བཞིན་གཤེགས་པ་ལྔས་བྱིན་གྱིས་
6-2-36b


བརླབས་པ་སྟེ་དེར་ང་རྒྱལ་བྱ་བ་ལས། དེ་ལ་མེར་མེར་པོའི་ནི་མི་བསྐྱོད་པས་བྱིན་གྱིས་བརླབས་པ་སྟེ་དེ་བཞིན་དུ་ལྷག་མ་བཞི་ལ་ཡང་སྦྱར་རོ། །ཁུ་བར་མ་ཟད་ཁྲག་གི་ཡང་གནས་སྐབས་ལྔ་བསྟན་པར་བྱའོ། །ལྔ་པོ་དེ་ལ་ཁྲག་གི་ཞུ་བའི་གནས་སྐབས་
ནི་མི་བསྐྱོད་པའིའོ། །དེའི་དམར་པོ་ནི་འོད་དཔག་མེད་ཀྱིའོ། །གོང་བུ་སྟེ་གོར་གོར་པོའི་སྐབས་ནི་རིན་ཆེན་འབྱུང་ལྡན་གྱིའོ། །དེའི་འཁྲང་འགྱུར་གྱི་སྐབས་ནི་དོན་ཡོད་གྲུབ་པའིའོ། །གནས་སྐབས་དེ་བཞི་སྔ་མ་སྔ་མ་ལས་ཕྱི་མ་ཕྱི་མར་སྨིན་ནས་གནས་སྐབས་ལྔ་
པར་སོན་པ་ནི་ཡང་དག་པར་འདྲེས་པ་སྟེ་རྐང་ལག་འགྱུ་བའི་སྐབས་སོ། །དེ་ནི་རྣམ་སྣང་གིས་བྱིན་གྱིས་བརླབས་པའོ། །མདོར་ན་མངལ་གྱི་གནས་སྐབས་ལྔ་པོ་དེའི་དང་པོ་མེར་མེར་པོ་ནི་ཁུ་ཁྲག་གཉིས་འདྲེས་པའི་སྐབས་ཙམ་ཡིན་ལ་དེ་རིམ་གྱིས་འཕེལ་ནས་
གནས་སྐབས་ཕྱི་མ་བཞིར་འགྱུར་བས་ན་དེ་དག་ལ་ཁུ་བ་དང་ཁྲག་གི་གནས་སྐབས་ལྔ་ལྔར་བྱས་ནས་དེ་དག་རིགས་ལྔ་དང་སྦྱར་བའོ། །སྡོམ་འབྱུང་ལས་ཅུང་མི་འདྲ་ཙམ་དུ་གསུངས་ཏེ། མི་བསྐྱེད་གཟུགས་ཀྱི་ནུར་ནུར་པོ། །མེར་མེར་པོ་ནི་རིན་ཆེན་འབྱུང་། །
དཔག་མེད་མགོན་ཡང་ལྟར་ལྟར་པོ། །དོན་ཡོད་གྲུབ་པ་གོར་གོར་པོ། །འཁྲང་འགྱུར་རྣམ་པར་སྣང་མཛད་དེ། །རྣམ་པ་ལྔར་ནི་བསྟན་པ་ཡིན། །དྲི་ཆུ་ཁྲག་ནི་མི་བསྐྱོད་པ། །ཁུ་བའི་གཟུགས་ཅན་འོད་དཔག་མེད། །གོང་བུ་ཙམ་ནི་རིན་ཆེན་འབྱུང་། །འདྲེས་
པ་རྣམ་པར་སྣང་མཛད་ནས། །ཞེས་ཏེ་ཕྱི་མ་ལ་མི་བསྐྱོད་པ་ལ་གཉིས་སྦྱར་ནས་དོན་གྲུབ་དང་མ་སྦྱར་རོ། །འགྲེལ་པས་གོང་བུ་རོ་ལ་སོགས་པ་འདུས་པ་དང་འདྲེས་པ་དྲི་ཆེན་ལ་འཆད་དོ། །གལ་ཏེ་སྐབས་འདིར་མཐུན་ཡུལ་གྱི་སྲིད་པ་འཆད་ན་རིགས་ལྔ་
6-2-37a


དང་སྦྱོར་མི་དགོས་ལ་དེ་དང་ཆོས་མཐུན་གྱི་ལམ་འཆད་ན་ལུས་དཀྱིལ་སྒོམ་པའི་རིགས་ལྔ་དང་སྦྱར་དགོས་པ་ལ་དེ་དང་མི་མཐུན་ཞིང་སྐབས་ཀྱང་མིན་ནོ་ཞེ་ན། སྐྱོན་མེད་དེ་མངལ་དུ་སྐྱེ་བ་བཟུང་བའི་ལུས་ཀྱི་གནས་སྐབས་བསྐྱེད་
པ་ལ་ཕ་མ་ལས་ཐོབ་པའི་དཀར་དམར་གྱི་ཆ་གཉིས་ཀྱི་གནས་སྐབས་སྨིན་པ་ལས་མི་འདའ་ལ་དེ་དག་ཀྱང་རིགས་ལྔ་ལས་མི་འདའ་བར་བསྟན་པས། བར་སྲིད་དང་འདྲ་བའི་དང་པོའི་མགོན་པོས་སྐྱེ་སྲིད་དང་འདྲ་བའི་སྤྲུལ་སྐུའི་ལུས་བླངས་པ་ལ་དགོད་
པར་བྱ་བའི་ལུས་དཀྱིལ་གྱི་ལྷ་རྣམས་ཀྱང་རིགས་ལྔ་དང་དེའི་རིགས་ཅན་ལས་མི་འདའ་བར་བསྟན་པའི་ཕྱིར་དང་། བར་སྲིད་གང་དུ་སྐྱེ་བ་ལེན་པའི་གནས་མེར་མེར་པོ་མི་བསྐྱོད་པར་གསུངས་པས་དང་པོའི་མགོན་པོ་མི་བསྐྱོད་པ་ལ་རྗེས་སུ་ཞུགས་པས་
སྤྲུལ་སྐུར་འགྱུར་བའི་རྒྱུ་མཚན་ཤེས་པར་བྱ་བའི་ཕྱིར་རོ། །གསུམ་པ་ནི། སྔར་བཤད་པའི་ཕ་མ་ལས་ཐོབ་པའི་ཐིག་ལེ་དཀར་དམར་ལུས་བསྐྱེད་པ་ལ་རྒྱུར་གྱུར་པ་དེའི་རྟེན་བསྟན་པར་བྱ་བའི་ཕྱིར་སྐྱེ་གནས་སོགས་གསུངས་པས། སྐྱེ་གནས་ནི་
འདིར་མངལ་ན་གནས་པའི་ལྟེ་བ་ལ་བྱ་ཡི་མ་ཡི་སྐྱེ་གནས་མིན་ཏེ་བརྟག་པ་ཕྱི་མའི་ལེའུ་བཞི་པ་ལས། སྐྱེ་གནས་འཁོར་ལོའི་རྣམ་པ་ཨ། །བདེ་ཆེན་གྱིའང་རྣམ་པ་ཧྃ། །ཞེས་སྐྱེ་གནས་ཀྱི་འཁོར་ལོ་ལྟེ་བའི་འཁོར་ལོ་ལ་བཤད་པ་བཞིན་ནོ། །
ལྟེ་བའི་འཁོར་ལོའི་དབུས་སུ་རྩ་གཉིས་ནི་གཡས་སུ་རོ་མ་དང་དེ་བཞིན་དུ་གཡོན་དུ་རྐྱང་མ་གནས་སོ། །གཡོན་གྱི་རྩ་དེ་ན་ནི་ཁུ་བ་གནས་པར་ཤེས་པར་བྱ་བ་ལ་གཡས་པའི་རྩ་ན་ནི་ཁྲག་རྒྱུ་བ་ཉིད་དོ། །རྩ་དེ་དག་གཉིས་གཅིག་ཏུ་འདྲེས་པ་སྟེ་གང་ལ་
6-2-37b


འདུས་ཤིང་འཁྱུད་པ་ཉིད་ནི་ཆོས་ཀྱི་དབྱིངས་ཏེ་རྩ་ཨ་བ་དྷཱུ་ཏཱིར་བསྡུས་པ་སྟེ་དེར་འཁྱུད་པའོ། །ཞེས་གསུངས་སོ། །དེ་ལྟར་ན་གཡོན་ནས་སྙིང་སྟོབས་ཁུ་བ་འབབ་པ་ནི་སྐུ་དང་གཡས་ནས་རྡུལ་ཁྲག་འབབ་པ་ནི་གསུང་དང་དབུས་ནས་མུན་པ་སེམས་གནས་
པ་ནི་ཐུགས་ཏེ་སཾ་བྷུ་ཊའི་བརྟག་པ་དྲུག་པའི་རབ་བྱེད་དང་པོ་ལས། སྐྱེ་གནས་དབུས་ན་རྩ་གཉིས་ཏེ། །གཡོན་དང་དེ་བཞིན་གཡས་ནའོ། །གཡོན་ན་ཁུ་བ་ཞེས་བྱ་སྟེ། །གཡས་ན་དེ་བཞིན་ཁྲག་ཉིད་དོ། །དེ་དག་ཕན་ཚུན་འདུས་པ་ནི། །ཆོས་ཀྱི་དབྱིངས་སུ་
འདུས་པ་ཡིན། །སྙིང་སྟོབས་ལུས་ཏེ་རྡུལ་ནི་ངག །མུན་པ་སེམས་ཀྱི་རང་བཞིན་ཏེ། །སྙིང་སྟོབས་ཁུ་བ་རྡུལ་ཁྲག་སྟེ། །དེ་ལས་སྐྱེས་པ་མུན་པ་ཡིན། །ཞེས་སོ། །ཚིགས་བཅད་སྔ་མ་འདི་ལྷ་མོ་བཞིས་ཞུས་དང་སྡོམ་འབྱུང་ལས་ཀྱང་འབྱུང་ཞིང་། 
སྡོམ་འབྱུང་འགྲེལ་པས་ཀྱང་སྐྱེ་གནས་ལྟེ་འོག་དང་ཆོས་ཀྱི་དབྱིངས་ཀྱི་རང་བཞིན་རྩ་ཨ་བ་དྷཱུ་ཏཱི་ལ་བཤད་དོ། །རྩ་བདུན་ཁྲི་ཉིས་སྟོང་གི་གཙོ་བོ་བརྒྱ་ཉི་ཤུ་དེའི་གཙོ་བོ་སོ་གཉིས་དེའི་གཙོ་བོ་གསུམ་དུ་སྔགས་ནས་བཤད་ལ། དགའ་བོ་མངལ་འཇུག་ལས་
ཞག་བདུན་ཕྲག་བཅོ་ལྔ་པ་ལ་ལུས་ཀྱི་མདུན་རྒྱབ་དང་གཡས་གཡོན་བཞིར་རྩ་ལྔ་ལྔ་སྟེ་ཉི་ཤུ་སྐྱེ་ལ་དེ་རེ་རེ་ལ་རྩའི་འཁོར་བཞི་བཅུ་རེ་ཡོད་པས་བརྒྱད་བརྒྱ་སྟེ་སྔར་གྱི་གནས་བཞིར་ཉིས་བརྒྱ་རེའོ། །དེ་རེ་རེ་ལ་ཡང་རྩའི་འཁོར་བརྒྱ་བརྒྱ་ཡོད་པས་བརྒྱད་
ཁྲི་སྟེ་མདུན་ལ་སོགས་པ་བཞིར་ཉི་ཁྲི་རེ་འཆགས་ཤིང་ཁ་དོག་ནི་སྔོན་པོ་ལ་སོགས་པ་སྣ་ཚོགས་དང་མིང་ཡང་སྣ་ཚོགས་ཡོད་ཅིང་ཁ་ཅིག་ལ་བུ་གུ་གཅིག་པ་དང་ཁ་ཅིག་ལ་གཉིས་པ་ནས་བདུན་པའི་བར་ཡོད་གསུངས་སོ། །གསུམ་པ་ལ་གསུམ།
6-2-38a


མངལ་དུ་སྨིན་པའི་མཐར་ཆོས་འབྱུང་གི་སྒོར་ཕྱོགས་པར་བྱེད་ཚུལ། དེའི་སྔོན་དུ་མངལ་ནི་ཇི་ལྟར་གནས་པ། ཟླ་བ་བཅུའི་མཐར་མངལ་སྒོར་འཐོན་པའི་ཚུལ་ལོ། །དང་པོ་ནི། སྔར་བཤད་པའི་རིམ་པ་དེ་ལྟར་མེར་མེར་པོ་ལ་
སོགས་པའི་རིམ་པས་ས་བོན་ལས་མྱུ་གུ་དང་དེ་ལས་སྡོང་བུ་ལ་སོགས་པའི་རིམ་གྱིས་འཕེལ་བ་དེ་བཞིན་དུ་རིམ་གྱིས་མངལ་ཡོངས་སུ་སྨིན་པ་ཐོབ་སྟེ་མངལ་གྱི་སྣོད་སྐྱེ་གནས་ཀྱི་ནང་དུ་ཞག་བདུན་ཕྲག་སོ་བརྒྱད་པ་ལ་སྔོན་གྱི་ལས་ཀྱི་རྣམ་པར་སྨིན་པ་
ལས་སྐྱེས་པའི་རླུང་ཡན་ལག་ཅེས་བྱ་བ་ལ་ལངས་ནས་རྒྱུ་བ་གང་དག་གིས་མངལ་གྱི་སྣོད་དུ་གནས་པའི་སེམས་ཅན་དེ་ཡོངས་སུ་བསྒྱུར་ནས་ལག་པ་གཉིས་བཅུ་མ་སྟེ་མའི་རུམ་ནས་ཆོས་ཀྱི་འབྱུང་གནས་ཀྱི་སྒོར་མངོན་པར་ཕྱོགས་པར་བྱེད་ཅིང་གནས་
པར་འགྱུར་རོ། །དེ་ནས་སྔོན་གྱི་ལས་ཀྱིས་རླུང་ཐུར་དུ་ལྟ་བ་ཞེས་པ་ལངས་ནས་དེའི་རྐང་པ་གྱེན་དུ་དང་མགོ་ཐུར་དུ་བསྟན་ནས་མའི་གཅི་བའི་ལམ་དུ་འཕུལ་བར་མངལ་འཇུག་ལས་གསུངས་ཤིང་ཞག་བདུན་ཕྲག་སོ་དྲུག་པ་ལ་མངལ་ན་གནས་པར་
མི་དགའ་ཞིང་འབྱུང་འདོད་ལ། སོ་བདུན་པ་ལ་མི་གཙང་བ་དང་དྲི་ང་བའི་འདུ་ཤེས་སྐྱེ་བར་བཤད་དོ། །གཉིས་པ་ནི། །འོ་ན་དེ་མངལ་ན་གནས་པའི་ཚེ་ཁ་གང་དུ་ཕྱོགས་ཏེ་གནས་སྙམ་ན། དེ་ཡང་ཕོ་ཞིག་ཡིན་ན་མའི་རུམ་གྱི་གཞོགས་གཡས་སུ་བརྟེན་
ཅིང་ཁ་རྒྱབ་ཏུ་མངོན་པར་ཕྱོགས་ཏེ་ཙོག་ཙོག་པུར་གནས་སོ། །གལ་ཏེ་མོ་ཞིག་ཡིན་ན་མ་དེའི་མངལ་གྱི་གཞོགས་གཡོན་དུ་བརྟེན་ཏེ་ཁ་ལྟོ་བར་མངོན་པར་བལྟས་ཏེ་གནས་སོ། །མ་ནིང་ཡིན་ན་ནི་ཕོ་མོའི་ཆགས་པ་གཉིས་གང་དང་ལྡན་པ་དེ་བཞིན་དུ་
6-2-38b


གནས་པར་མཛོད་འགྲེལ་ལས་གསུངས་ལ་ཁའི་ལྟ་ཕྱོགས་དེ་ལྟར་འོང་བ་ནི་རང་ཉིད་འཁྲིག་པ་བྱེད་པའི་མངོན་པའི་ང་རྒྱལ་དང་ལྡན་པ་ཡིན་པར་རྒྱལ་པོ་སྲས་ཀྱིས་བཤད་དེ་བར་སྲིད་ཀྱི་སྐབས་ཀྱི་བསམ་པའི་དབང་གིས་དེ་ལྟར་ཡིན་པར་སྡོམ་འབྱུང་འགྲེལ་བར་གསུངས་
སོ། །རླུང་གིས་ཆོས་འབྱུང་གི་སྒོར་ཕྱོགས་པར་བྱེད་པ་དང་མའི་ལྟོ་ན་ཇི་ལྟར་གནས་པ་འདིར་བཤད་པ་བཞིན་སྡོམ་འབྱུང་ལས་ཀྱང་གསུངས་ཤིང་། ཁྱད་པར་དུ་ཕའི་ས་བོན་ལྷུང་བའི་དུས་སུ་རླུང་གང་ནས་རྒྱུ་བའི་རྟགས་ལས་སྐྱེས་པ་སོགས་སུ་འགྱུར་བ་ནི། ས་བོན་
ལྷུང་དུས་ཡུད་ཙམ་ལ། །རིམ་པ་མཚོན་བྱ་ལེགས་པའི་གློ། །གཡས་པར་རྒྱུ་བའི་རླུང་དག་ལ། །ཐམས་ཅད་ཚེ་ནི་སྐྱེས་པར་འགྱུར། །གལ་ཏེ་གཡོན་ལ་རླུང་རྒྱུན། །དེས་པར་བུད་མེད་དག་ཏུ་འགྱུར། །གཉིས་ཀའི་དབུས་རྒྱུའི་རླུང་དག་ལ། །རྟག་ཏུ་མ་ནིང་དག་ཏུ་འགྱུར། །
ཞེས་སོ། །གསུམ་པ་ནི། སྔར་བཤད་པ་ལྟར་རླུང་གིས་མངལ་གྱི་སྒོར་ཕུལ་བ་དེའི་འོག་ཏུ་མའི་མངལ་གྱི་སྒོ་ནས་ཕྱིར་འཐོན་པར་འགྱུར་རོ། །དུས་ཅི་ཙམ་ཞིག་སོང་བའི་ཚེ་སྙམ་ན། ཟླ་བ་རིལ་པོ་དགུ་དང་ངོ་བཅུ་མཐོང་བའི་མཐར་ཏེ་མཚམས་དེ་ནས་འཐོན་ནོ། །འཐོན་
པའི་ཚུལ་ནི་རྩ་བའི་རྒྱུད་ཀྱི་ལེའུ་དང་པོ་ལས་གསུངས་པའི་རིམ་པས་ཏེ་དེ་ཡང་དེར་དམ་ཚིག་འབྱུང་བ་རྡོ་རྗེའི་ཏིང་ངེ་འཛིན་ཡང་དག་པར་བསྟན་པའི་རིམ་པ་ལྟར་རོ། །མངལ་ནས་ཕྱི་རོལ་ཏུ་བཙས་པ་དེའི་ཕྱིར་དྲི་ཟ་ཉེ་བར་འཁོར་བའི་སེམས་ཅན་བར་དོ་དེ་སྔར་བར་དོའི་དུས་
ནས་ཤའི་མིག་གི་ཡུལ་དུ་མི་རུང་ཡང་དེ་ནས་ཤའི་མིག་གི་ཡུལ་དུ་གྱུར་ཏོ། །གཉིས་པ་ལ་གཉིས། རྩ་རྒྱུད་དང་བཤད་རྒྱུད་ཀྱིས་ཇི་ལྟར་བཤད་པ་དང་། མདོར་བྱས་ཀྱི་གཞུང་གིས་ཇི་ལྟར་བསྟན་པའི་ཚུལ་ལོ། །དང་པོ་ནི། འདུས་པའི་རྩ་བའི་རྒྱུད་ལས་གསུངས་
6-2-39a


ཏེ་ཞེས་དྲང་ངོ་། །ཚིག་ཅི་འདྲ་ཞིག་གསུངས་ན། དེ་ནས་བཅོམ་ལྡན་འདས་དེ་བཞིན་གཤེགས་པ་བྱང་ཆུབ་ཀྱི་སེམས་རྡོ་རྗེ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་དམ་ཚིག་འབྱུང་བའི་རྡོ་རྗེ་ཞེས་བྱ་བའི་
ཏིང་ངེ་འཛིན་ལ་སྙོམས་པ་ཞུགས་ནས། རིག་པ་ཆེན་པོའི་སྐྱེས་བུའི་གཟུགས་འདི་དེ་བཞིན་གཤེགས་པ་ཐམས་ཅད་ཀྱི་སྔགས་ཀྱི་བྱིན་གྱིས་བརླབས་ཀྱིས་བྱིན་གྱིས་བརླབས་སོ། །བྱིན་གྱིས་བརླབས་མ་ཐག་ཏུ་བཅོམ་ལྡན་འདས་བྱང་ཆུབ་ཀྱི་སེམས་རྡོ་རྗེ་དེ་
བཞིན་གཤེགས་པ་དེ་ཉིད་ཞལ་གསུམ་པ་ལྟ་བུར་དེ་བཞིན་གཤེགས་པ་ཐམས་ཅད་ཀྱིས་གཟིགས་པར་གྱུར་ཏོ། །ཞེས་གསུངས་སོ། །ཇི་ལྟར་དུ་གསུངས་ན། བར་དོས་མངལ་དུ་སྐྱེ་བ་བླངས་པ་དང་དེ་ནས་རིམ་གྱིས་ལུས་རྫོགས་ནས་བཙས་པ་དེ་ལྟར་ཏེ་
དེ་དང་མཐུན་པར་ལྷ་བསྐྱེད་པའི་རིམ་པ་གསུངས་སོ། །ཆོས་མཐུན་སྦྱོར་ཚུལ་ནི། སློབ་དཔོན་འདིས་གཞུང་དེས་སྲིད་པ་སྐྱེ་བའི་རིམ་པ་དང་དེ་ལྟར་དུ་ལྷའི་སྐུ་བསྐྱེད་པ་གཉིས་ཀ་བསྟན་པར་བཞེད་ལ་སྒྲོན་གསལ་དུ་ལྷའི་སྐུ་བསྐྱེད་ཚུལ་དྲང་ངེས་གཉིས་སུ་
བཀྲལ་བའི་དང་པོ་འདིར་སྐབས་སུ་བབ་པས་དེ་དག་བསྒྲིགས་ནས་བཤད་དགོས་སོ། །དེ་ལ་དེ་བཞིན་གཤེགས་པའི་སྐུ་གསུམ་ཐུགས་རྡོ་རྗེ་གསུམ་ན་ཡི་གེ་གསུམ་མོ། །དེ་ཉིད་ལྷ་སྒོམ་པའི་རྣལ་འབྱོར་པས་འདའ་བར་མི་བྱ་བས་ན་དམ་ཚིག་ཡིན་ལ་
དེ་ལས་བྱུང་བ་ནི་སྐྱེས་པ་སྟེ་ཕྱག་མཚན་དང་སྐུ་རྫོགས་པ་ལས་བྱང་ཆུབ་པ་ལ་བྱ་དགོས་སོ། །དེ་ནི་གཞན་གྱིས་མི་ཕྱེད་པས་ན་རྡོ་རྗེ་སྟེ་དེ་བསྐྱེད་པའི་ཏིང་ངེ་འཛིན་ལ་རྡོ་རྗེ་འཆང་སྙོམས་པར་ཞུགས་པའོ། །རིག་པ་ཆེན་པོ་ནི་སྔགས་ཀྱི་ཡི་གེ་གསུམ་སྟེ་
6-2-39b


དེས་བསྐྱེད་པའི་སྐྱེས་བུའི་གཟུགས་ནི་སྐྱེ་བ་ལེན་པའི་བར་དོ་ལྟ་བུ་དང་པོའི་མགོན་པོ་ཡིན་ལ་དེ་ཉིད་ནི་འདིར་བྱང་ཆུབ་ཀྱི་སེམས་རྡོ་རྗེ་སྟེ་ལོངས་སྐུ་རྡོ་རྗེ་འཆད་དོ། །དྲི་ཟའི་སེམས་ཅན་སྐྱེ་བ་བླངས་ནས་བཙས་པའི་ཚེ་ཤའི་མིག་གིས་མཐོང་བ་དད་འདྲ་བར་ལོངས་
སྐུ་དེ་ཡང་སྐབས་གཞན་དུ་གྱུར་པ་ན་དེ་བཞིན་གཤེགས་པ་སྟེ་གདུལ་བྱ་རྣམས་ཀྱིས་ཞལ་གསུམ་པར་གཟིགས་པར་གྱུར་ཏོ། །དུས་ནམ་གྱི་ཚེ་ན་གཟིགས་སྙམ་ན་བྱིན་གྱིས་བརླབས་མ་ཐག་ཏུའོ། །དེ་ཡང་རྣམ་སྣང་གི་ས་བོན་ཨོཾ་ལ་སོགས་པ་
ལུས་ལ་དགོད་རྒྱུའི་སྔགས་སུམ་ཅུ་སོ་གཉིས་ཀྱིས་བྱིན་གྱིས་བརླབས་པ་སྟེ་དེ་རྣམས་ལུས་ལ་བཀོད་པའི་མཇུག་ཐོགས་སུའོ། །སྔགས་འགོད་པའི་ལུས་ནི་བར་དོས་མངལ་དུ་སྐྱེ་བ་བླངས་པའི་རྟེན་དེ་ལ་ཕུང་པོ་དང་ཁམས་དང་སྐྱེ་མཆེད་དང་ཡན་
ལག་རྣམས་ཡོངས་སུ་རྫོགས་པར་འགྱུར་བ་དེ་བཞིན་དུ་དང་པོའི་མགོན་པོ་སྤྲུལ་སྐུར་བསྒྱུར་བ་ལོངས་སྐུས་སྤྲུལ་སྐུའི་སྐྱེ་བ་བཟུང་བའི་ལུས་དེ་ཡིན་ནོ། །རིག་པ་ཆེན་པོའི་སྐྱེས་བུའི་གཟུགས་འདི་ཞེས་སྐུ་དེ་ལུས་དཀྱིལ་དགོད་པའི་རྟེན་ལྟ་བུར་
གསུངས་ཀྱང་དེ་སྤྲུལ་སྐུར་བསྒྱུར་བ་ལ་བྱ་སྟེ་སྔར་མདོ་བསྲེ་དྲངས་པ་ལྟར་སྐུ་དེ་དང་པོའི་མགོན་པོའི་སྐུར་གསུངས་ལ་སྒྲོན་གསལ་ལས་ཀྱང་སྐུ་དེ་ཡི་གེ་གསུམ་གྱིས་བསྐྱེད་པའི་སྐུར་གསུངས་པས་སོ། །དང་པོའི་མགོན་པོ་སྤྲུལ་སྐུར་བསྒྱུར་
ལུགས་ལ། །མདོ་བསྲེ་ན་མི་གསལ་ཞིང་མདོར་བྱས་ལས་མི་བསྐྱོད་པ་རྗེས་སུ་ཞུགས་པས་བསྒྱུར་བ་ཙམ་ལས་མ་གསུངས་ལ། རབ་ཏུ་སྒྲོན་གསལ་དང་འགྲེལ་པ་རིན་འཕྲེང་དང་དམ་ཚིག་རྡོ་རྗེ་རང་གི་ཐུགས་ཀ་ནས་མི་བསྐྱོད་པ་སྤྲོས་ནས་སེམས་
6-2-40a


ཅན་གྱི་དོན་བྱས་ཚུར་འདུས་ནས་རང་ལ་ཐིམ་པས་སྤྲུལ་སྐུར་བསྒྱུར་བར་འདོད་དོ། །ཕྱིས་ཀྱི་མཁས་པ་དག་ལུགས་དེ་དག་བཀག་ནས་སློབ་དཔོན་འདིས་ཟིལ་གནོན་རྡོ་རྗེའི་ཏིང་ངེ་འཛིན་ལྟར་བསྐྱེད་པར་གསུངས་པས་
རང་བཞིན་གྱི་གནས་ནས་དེ་བཞིན་གཤེགས་པའི་སྤྲུལ་སྐུས་སེམས་ཅན་འདུལ་བའི་ཏིང་ངེ་འཛིན་ལ་ཞུགས་པ་ནི་ཕ་མ་སྙོམས་པར་ཞུགས་པ་དང་འདྲ། དེས་མི་བསྐྱོད་པ་སྤྲུལ་ཏེ་ནམ་མཁའ་ཁྱབ་པར་བྱས་པའི་ནམ་མཁའ་ནི་རྩ་བདུན་ཁྲི་ཉིས་
སྟོང་དང་འདྲ་མི་བསྐྱོད་པ་ནི་བྱང་ཆུབ་ཀྱི་སེམས་ཐབས་ཀྱི་ཡེ་ཤེས་ཤར་བ་དང་འདྲ། སེམས་ཅན་ཐམས་ཅད་ལ་དེས་བྱིན་གྱིས་བརླབས་པས་ཟག་མེད་ཀྱི་དགའ་བདེ་ཐོབ་པ་ནི་དབང་པོ་སྦྱར་པའི་བདེ་བ་མྱོང་བ་དང་འདྲ་རང་ཉིད་དེ་ལ་ཞུགས་པ་
ནི་སྐྱེ་བ་བཟུང་བ་དང་འདྲ་བར་འཆད་དོ། །སློབ་དཔོན་འདིས་ཟིལ་གནོན་རྡོ་རྗེ་སྲིད་པ་སྐྱེ་བའི་རིམ་པ་ལ་སྦྱར་བ་མ་གཏོགས་པ་དེ་དང་མཐུན་པར་ལྷ་བསྐྱེད་པ་ལ་སྦྱོར་བའི་གསལ་ཁ་མེད་ཀྱང་དམ་ཚིག་འབྱུང་བ་རྡོ་རྗེའི་ཏིང་ངེ་འཛིན་སྲིད་པ་སྐྱེ་བ་
དང་ལྷ་བསྐྱེད་པ་གཉིས་ཀ་ལ་བཤད་པ་ལྟར་དེ་ལའང་ཤིན་ཏུ་རུང་ཞིང་། དེ་ལྟར་བཤད་པ་དེའི་ཡིག་དོན་དུའང་སྣང་ལ་དེ་དང་སྦས་བཤད་ཀྱི་སྐབས་གཉིས་ཀྱི་ཆོས་མཐུན་ཡང་ཤིན་ཏུ་ལེགས་པས་ལེགས་པར་བཤད་པ་ཡིན་ནོ། །
འོ་ན་སྤྲུལ་སྐུར་བསྒྱུར་བ་ནས་སེམས་དཔའ་གསུམ་བརྩེག་གི་བར་རྣམས་མངལ་དང་བཙས་པའི་སྐབས་གཉིས་ལ་སྦྱོར་ཚུལ་ཇི་ལྟར་ཡིན་སྙམ་ན། འདི་ལ་སྔོན་གྱི་མཁས་པ་དག་གནས་གསུམ་བྱིན་གྱིས་བརླབ་པ་ཚུན་ཆད་མངལ་ན་གནས་པ་དང་སྦྱོར་ལ་
6-2-40b


སེམས་དཔའ་གསུམ་བརྩེག་ནི་མངལ་ནས་འཐོན་པའི་ལུས་དང་། དེ་ལ་གནས་པའི་རླུང་དང་ཨ་ཐུང་དང་སྦྱོར་རོ། །ཕྱིས་ཀྱི་བླ་མ་དག་ལུས་དཀྱིལ་དགོད་པ་མངལ་དང་སྦྱོར་ལ་གནས་གསུམ་བྱིན་བརླབ་སེམས་དཔའ་གསུམ་བརྩེག་བཙས་པའི་སྐབས་དང་སྦྱོར་བར་བྱེད་
དོ། །སློབ་དཔོན་འདིས་བཙས་མ་ཐག་པ་དང་ཞལ་གསུམ་པ་ལྟ་བུར་མཐོང་བ་གཉིས་སྦྱར་ལ། རྒྱུད་ལས་དེའི་གོང་དུ་སྔགས་ཀྱིས་བྱིན་གྱིས་བརླབ་པར་གསུངས་པའི་དོན་སྒྲོན་གསལ་ལས། འདི་སྐད་སྟོན་པར་འགྱུར་ཏེ་བསྒྲུབ་པའི་ཐབས་ཀྱི་ཚུལ་དུ་རྣལ་འབྱོར་བཞིའི་
རིམ་གྱིས་སེམས་དཔའ་གསུམ་གྱི་མཐར་ཐུག་པའི་བར་གྱིས། ཇི་སྲིད་སྔགས་ཐམས་ཅད་ཀྱི་གཟུགས་ཀྱི་སྐུ་རྡོ་རྗེ་འཆང་ཆེན་པོའི་བདག་ཉིད་དུ་བྱིན་གྱིས་བརླབས་པར་གྱུར་པའོ། །ཞེས་སེམས་དཔའ་གསུམ་བརྩེག་ཡན་ཆད་ཀྱིས་སྔགས་ཐམས་ཅད་ཀྱིས་བྱིན་
གྱིས་བརླབས་པའི་སྐུ་བསྐྱེད་པ་གསལ་བར་གསུངས་པས་སེམས་དཔའ་གསུམ་བརྩེག་ཡན་ཆད་ཐམས་ཅད་མངལ་གྱི་སྒོར་ཕྱོགས་པ་ཡན་ཆད་དང་སྦྱར་བར་བྱའོ། །མངལ་དུ་ངག་སྨྲ་བ་མེད་ཀྱང་ངག་གི་གནས་ལྕེ་ཡོད་པས་ངག་བྱིན་གྱིས་རློབ་པ་དང་ཆོས་མཐུན་པ་
སྦྱོར་བ་མི་འགལ་ལོ། །དེ་ལྟར་ན་མངལ་དུ་ཕུང་པོ་ཁམས་སྐྱེ་མཆེད་ཕྱི་ནང་ཡན་ལག་དང་ཉིང་ལག་རྣམས་ཡོངས་སུ་རྫོགས་པ་ན་དེ་མ་ཐག་བཙས་ནས་སྐྱེ་བ་ཡོངས་སུ་རྫོགས་པ་དེ་བཞིན་དུ་སྤྲུལ་སྐུར་བསྒྱུར་བའི་སྐུའི་དཀྱིལ་འཁོར་རྫོགས་པ་ནའང་སྤྲུལ་པའི་སྐུ་
ཡོངས་སུ་རྫོགས་པ་ཡིན་ཏེ་གནས་གསུམ་བྱིན་བརླབས་དང་སེམས་དཔའ་གསུམ་བརྩེག་ཀྱང་དེའི་སྐབས་ཀྱི་ལུས་ངག་ཡིད་གསུམ་ལ་འཇོག་པའི་ཕྱིར་རོ། །ལུས་ལྷའི་དཀྱིལ་འཁོར་བར་བསྒོམ་པ་བཤད་པའི་རྒྱུད་ལས་ཀྱང་གསུངས་པ་ནི། ཆུའི་ཁམས་ཏེ་ཁུ་
6-2-41a


བ་ནི། ཕ་ལས་སྐྱེས་པ་ཡིན་ཏེ་མེའི་ཁམས་ཏེ་ཁྲག་ནི་མ་ལས་སྐྱེས་ཞེས་བྱའོ། །ལྷ་མོ་བཞིས་ཞུས་ཀྱི་རྒྱུད་དང་སྡོམ་འབྱུང་དུ་ཁམས་དེ་གཉིས་ཕ་མ་ལས་སྐྱེས་པར་བསྒྱུར་བའི་འགྱུར་ལེགས་སོ། །པགས་པ་སོགས་གསུམ་
ནི་མ་ལས་སྐྱེས་སུ་སྟེ་སྐྱེས་ཞེས་བསྟན་པ་ཡིན་ལ་རུས་པ་སོགས་གསུམ་ནི་ཕ་ལས་སྐྱེས་སུ་བསྟན་པའོ། །སྡོམ་འབྱུང་ལས་རྒྱུས་པ་རྐང་དང་ཁུ་བ་ཡང་། །ཞེས་འབྱུང་ལ་དེ་ལྟའི་ལྷ་མོ་བཞིས་ཞུས་ལས། ཚིལ་དང་རྐང་དང་ཁུ་བ་ཡང་། །ཞེས་འབྱུང་ཞིང་
སམ་བྷུ་ཊའི་བརྟག་པ་དྲུག་པའི་རབ་བྱེད་དང་པོ་ནས་འབྱུང་བ་དང་གཞུང་འདི་མཐུན་ནོ། །ལུས་ཀྱི་གོང་བུ་ནི་མདོར་བསྡུས་ན་དྲུག་པོ་དེ་ཙམ་ཞིག་ཏུ་བསྟན་པའོ། །འདི་ལ་ཁ་ཅིག་གཙོ་བོའི་གཡས་ཞལ་གྱིས་ཕ་ལས་ཐོབ་པའི་དཀར་ཆ་དང་གཡོན་ཞལ་གྱིས་མ་ལས་
ཐོབ་པའི་དམར་ཆ་དང་རྩ་ཞལ་སྔོན་པོས་རྣམ་ཤེས་མཚོན་ལ་ཡང་ཕ་ལས་སྐྱེས་པ་གསུམ་གྱིས་གཡས་ཀྱི་ཕྱག་གསུམ་དང་མ་ལས་སྐྱེས་པ་གསུམ་གྱིས་གཡོན་གྱི་ཕྱག་གསུམ་མམ་ཕྱག་མཚན་བསྟན་པར་འཆད་དོ། །འདིར་ནི་ལུས་ལ་ཕ་མ་ལས་ཐོབ་པའི་
ཆ་གཉིས་སུ་བསྟན་པས་ལུས་དཀྱིལ་དགོད་པའི་ལྷ་རྣམས་ལ་ཕོ་མོ་གཉིས་སུ་འོང་བའི་ཁུངས་སུ་བྱ་དགོས་པ་འདྲའོ། །གཟུགས་ལ་སོགས་པ་སྔ་སངས་རྒྱས་ལྔའི་རང་བཞིན་དུ་བསྟན་པས་ནི་དེ་དག་གི་རིགས་ཅན་གྱི་ལྷ་གཞན་ཡང་མཚོན་པས་ལུས་དཀྱིལ་
དགོད་པའི་ཁུངས་སོ། །སྡོམ་འབྱུང་དང་ད་ལྟའི་ལྷ་མོ་བཞིས་ཞུས་ལ་སོགས་ཀྱི་སྒྲ་མ་བྱུང་ལ་ཕུང་པོ་ལ་སོགས་ཞེས་འདིར་བྱུང་བ་ལྟར་ན་ལྷག་མ་ཁམས་བཞི་ལ་སོགས་པ་རྣམས་བསྡུའོ། །ཞེས་བཅོམ་ལྡན་འདས་ཀྱིས་ལྷ་མོ་བཞིས་ཞུས་པ་ཞེས་བྱ་བ་
6-2-41b


རྣལ་འབྱོར་ཆེན་པོའི་རྒྱུད་ཀྱི་ལེའུ་གསུམ་པ་གོས་དཀར་མོས་ཞུས་པ་ལས་གསུངས་སོ། །གཉིས་པ་ནི། དེ་ལྟར་རྩ་རྒྱུད་དང་བཤད་རྒྱུད་ནས་ཇི་ལྟར་བསྟན་པ་གསུངས་ནས་སྐབས་ཀྱི་གཞུང་མདོར་བྱས་ཀྱིས་ཇི་ལྟར་བསྟན་པ་ནི་བསྟན་ཏོ་ཞེས་དྲང་ངོ་། །གང་གིས་ན་
སྔར་དྲངས་པའི་ཐོག་མཐའ་སྨོས་པའི་མདོར་བྱས་ཀྱི་གཞུང་འདིས་སོ། །ཅི་བསྟན་ན་ང་རྒྱལ་བསྐྱེད་པར་བྱའོ་ཞེས་བསྟན་ནོ། །སུས་བསྐྱེད་ན་བསྐྱེད་པའི་རིམ་པ་སྒོམ་པའི་སྔགས་པས་སོ། །ཇི་ལྟར་བསྐྱེད་ན་དེ་ནི་བདག་ཡིན་ནོ་ཞེས་སེམས་པའོ། །སུ་ཞིག་ཅེ་ན་རྣལ་
འབྱོར་བཞི་ལས་བསྒྲུབས་པའི་རྡོ་རྗེ་འཆང་དེ་ནིའོ། །བསྐྱེད་རིམ་སྒོམ་པ་ལ་ལྷའི་སྐུ་མདོག་སོགས་ཀྱི་སྣང་བ་གསལ་ཞིང་བརྟན་པ་སྒྲུབ་པ་དང་རང་ཉིད་ལྷ་དེ་ཡིན་ནོ་སྙམ་པའི་ང་རྒྱལ་བརྟན་པར་བསྒྲུབ་པ་གཉིས་ཡོད་མོད་ཀྱང་གཙོ་བོ་ནི་རང་ལྷ་དེའོ་སྙམ་དུ་བསམས་
པ་ན་བཅོས་ནས་བྱས་པ་མིན་པར་འཛིན་སྟངས་བཅོས་མ་མིན་པར་འགྱུར་ཐུབ་པའི་ང་རྒྱལ་བསྐྱེད་པ་འདི་ཡིན་པས་འདིར་ཡང་ང་རྒྱལ་བསྐྱེད་པ་ཉིད་གསུངས་སོ། །དེ་ལྟར་སྒོམ་པ་དེ་སྲིད་པ་སྐྱེ་བའི་རིམ་པ་གང་དང་བསྟུན་ནས་སྒོམ་པ་གཞུང་འོག་མ་འདིས་མ་
གསུངས་པ་ནི་སྔར་དམ་ཚིག་འབྱུང་བ་རྡོ་རྗེའི་ཏིང་ངེ་འཛིན་གྱི་རིམ་པ་དང་བསྟུན་ནས་གསུངས་ཟིན་པས་འདིར་རྣལ་འབྱོར་བ་ཞིས་བསྒྲུབས་ཟིན་པའི་མཐར་རྡོ་རྗེ་འཆང་ལ་ང་རྒྱལ་འཇོག་ཚུལ་ཙམ་ཞིག་གསུངས་པའོ། །འོ་ན་བར་དོས་མངལ་དུ་སྐྱེ་བ་བླངས་
པ་མན་ཆད་ཤིན་ཏུ་རྣལ་འབྱོར་དང་རྣལ་འབྱོར་ཆེན་པོ་གཉིས་དང་མཐུན་པར་སྒོམ་པ་མ་ཡིན་ནམ་རྣལ་འབྱོར་བཞི་ཞེས་གསུངས་པ་ཇི་ལྟར་ཡིན་སྙམ་ན། སྐྱེ་བ་བཟུང་ཕྱིན་ཆད་དང་མཐུན་པར་སྒོམ་པའི་སྐབས་སུ་རྣལ་འབྱོར་དང་པོ་གཉིས་མི་སྒོམ་
6-2-42a


ཡང་རྣལ་འབྱོར་བཞི་ལས་བསྒྲུབས་པའི་རྡོ་རྗེ་འཆང་ལ་ང་རྒྱལ་འཇོག་པ་ལ་འགལ་བ་ཅུང་ཟད་ཀྱང་མེད་དེ་དཔེར་ན་མངོན་བྱང་ཐ་མའི་སྐབས་སུ་མངོན་བྱང་དང་པོ་རྣམས་མི་སྒོམ་ཡང་དེ་དག་གིས་བསྐྱེད་པའི་ལྷ་སྐུ་སྒོམ་པ་མི་འགལ་
བ་བཞིན་ནོ། །དེས་ན་གཞུང་ལས་རྣལ་འབྱོར་བཞི་ལས་བསྒྲུབས་པ་ནི་ཞེས་གསུངས་ཀྱི་རྣལ་འབྱོར་བཞི་སྒོམ་པར་མ་གསུངས་སོ། །གསུམ་པ་ལ་གཉིས། སྲིད་པའི་རིམ་པ་དང་བསྟུན་ནས་གསུངས་པ་རྣམས་ཀྱི་དོན་བསྟན་པ་དང་། མངོན་རྟོགས་
ལྷག་མ་རྣམས་ལ་དེ་ལྟར་མ་གསུངས་པའི་རྒྱུ་མཚན་བསྟན་པའོ། །དང་པོ་ལ་གཉིས། རྟོགས་ལྡན་ལ་སྐྱེ་བའི་དོགས་པའི་གནས་དགོད་པ་དང་། དོགས་པ་དེ་གཅོད་པའི་ལན་ནོ། །དང་པོ་ནི། གལ་ཏེ་སྔར་བཤད་པ་ལྟར་སྣོད་བཅུད་ཀྱི་སྲིད་པ་དང་རྟེན་
དང་བརྟེན་པའི་ལྷ་སྒོམ་པའི་རིམ་པ་གཉིས་ལ་དངོས་པོ་ལ་འདྲ་བ་ཡོད་དུ་ཆུག་ཀྱང་དེ་རྟོགས་པས་ཅི་ཞིག་བྱ་སྟེ། འདྲ་བར་མ་ཤེས་ཀྱང་མངོན་རྟོགས་བསྒོམས་པས་འདོད་པའི་དོན་འགྲུབ་པ་ལ་ཅུང་ཟད་ཀྱང་མི་སྒྲིབ་པའི་ཕྱིར་ཏེ། སྒྲིབ་ན་ནི་ཐམས་ཅད་འདྲ་
བ་ནི་གང་ནའང་མེད་ལ་ཕྱོགས་རེ་ཙམ་མི་འདྲ་བ་ཡང་མེད་པས་སྔར་གྱི་དེ་མིན་པའི་འདྲ་ཡུལ་རྣམས་དང་འདྲ་བར་རྟོགས་དགོས་པས་ཧ་ཅང་ཐལ་བར་འགྱུར་རོ། །ཅི་སྟེ་ཐམས་ཅད་དང་འདྲ་བ་ཤེས་མི་དགོས་ཀྱི་སྔར་བཤད་པའི་ཆོས་མཐུན་ཤེས་ནས་དེ་
དག་དང་ཆོས་མཐུན་པར་བསྒོམས་པས་ཐ་མལ་པའི་ལུས་དང་གནས་སུ་སྣང་བ་ལོག་ནས་སྣང་བ་དེ་གཉིས་ཁྱད་པར་ཅན་བསྐྱེད་པའི་ཕྱིར་དུ་སྒོམ་པ་ལ་དེ་ཤེས་དགོས་སོ་སྙམ་ན། དེ་ལྟ་ན་དགོས་པ་དེ་འགྲུབ་པ་ལ་འདྲ་བར་ཤེས་མ་དགོས་ཏེ་རང་ཉིད་
6-2-42b


ལྷ་དང་དེའི་གནས་གཞལ་ཡས་ཁང་དུ་བསྒོམ་པ་གོམས་པ་ཙམ་གྱིས་རང་དང་གནས་ལ་ཁྱད་པར་ཅན་གྱི་སྣང་བ་སྐྱེ་བ་མྱོང་བས་གྲུབ་པའི་ཕྱིར་རོ། །འོན་ཏེ་ཆོས་མཐུན་སྦྱོར་བ་ནི་སྲིད་པའི་སྣོད་བཅུད་འདི་དང་འདི་རྟེན་དང་བརྟེན་པའི་རྣལ་འབྱོར་འདི་དང་འདིས་སྦྱོང་བ་
ཡིན་ནོ་ཞེས་སྦྱང་གཞི་དང་སྦྱོང་བྱེད་སོ་སོར་ངོ་འཕྲོད་པའི་དོན་དུ་ཡིན་ནོ་སྙམ་ན། བསྐལ་པ་དང་པོར་བྱུང་ཟིན་པའི་སྣོད་དང་བཅུད་ཀྱི་སྐྱེ་ཤི་བར་དོ་རྣམས་ད་ལྟ་ལམ་སྒོམ་པའི་བྱེད་པས་སྦྱོང་བར་འདོད་པ་ནི་ན་ནིང་བུད་ཤིང་ཞིག་པ་ད་ལོའི་མེས་སྲེག་པར་འདོད་པ་དང་
འདྲ་བས་སྙིང་པོ་མེད་པའི་གཏམ་མོ། །དེས་ན་སྲིད་པ་སྐྱེ་བ་ལྟར་སྒོམ་པའི་ཆོས་མཐུན་སྦྱོར་བ་ལ་དགོས་མེད་དོ་སྙམ་ན། གཉིས་པ་ལ་གཉིས། ཆོས་མཐུན་སྦྱར་བའི་རྒྱུ་མཚན་བསྟན་པ་དང་། །རིམ་པ་གཉིས་ཀྱི་སྦྱང་གཞི་ངོས་གཟུང་བའོ། །དང་པོ་ནི། སྣོད་
བཅུད་ཀྱི་འཇིག་ཆགས་དང་སྔགས་ཀྱི་ལམ་སྒོམ་པ་གཉིས་ལ་ཆོས་མཐུན་པའི་འདྲ་ཆོས་གཅིག་དངོས་པོ་ལ་ཡོད་པ་དེ་ངོས་ཟིན་པ་ཙམ་གྱི་ཕྱིར་དུ་འདྲ་ཆོས་སྒྲིག་པ་ཙམ་བྱེད་པ་མིན་པས་ཧ་ཅང་ཐལ་པའི་ཉེས་པ་མེད་ལ། རང་གི་ལུས་དང་གནས་ལ་ཁྱད་པར་
ཅན་གྱི་སྣང་བ་བསྐྱེད་པ་ལ་སྔོན་དུ་སྲིད་པའི་རིམ་པ་དང་འདྲ་བར་ཤེས་དགོས་པ་ཡང་མིན་པས་སྐྱོན་གཉིས་པ་ཡང་མེད་དོ། །བསྐལ་པ་དང་པོ་དུས་ཀྱི་སྣོད་བཅུད་ཀྱི་རིམ་པ་རྣམས་ད་ལྟ་ལམ་སྒོམ་པའི་སྦྱང་གཞིར་བོད་ཀྱི་འདུས་པ་ལ་སྦྱངས་པ་རྣམས་འཆད་མོད་
ཀྱང་ཁོ་བོ་ནི་ཆོས་མཐུན་གྱི་ཡུལ་དང་སྦྱང་གཞི་གཉིས་མ་ཕྱེད་པའི་གཏམ་ད་མི་སྨྲ་སྟེ་རིགས་པའི་རྒྱལ་པོས། སྐྱེ་འདོད་ཉེས་པ་བཅོམ་པའི་ཕྱིར། །གང་ཡང་སྐྱོན་རྣམས་འགོག་བྱེད་པ། །དེ་བསྐྱེད་ལས་ལ་ནུས་འགྱུར་གྱི། །ཇི་ལྟར་བྱས་པ་ཉམས་
6-2-43a


པར་འགྱུར། །ཞེས་གསུངས་པ་ལྟར་འབྱུང་འགྱུར་ནི་རྒྱུའི་ནུས་པ་བཀག་པའི་སྒོ་ནས་དགག་ནུས་ལ་འབྲས་བུ་ཕྱུང་ཟིན་ཞིག་པ་ལ་འགོག་པའི་བྱེད་པ་མི་འཇུག་པའི་ཕྱིར་རོ། །འོ་ན་གང་ཞིག་ཡིན་ཞེ་ན། བཤད་པར་བྱ་སྟེ་
སྤྱིར་འཕགས་པ་ཡབ་སྲས་ཀྱི་བཞེད་པས་སྔགས་ཀྱི་ལམ་གྱིས་སྙིགས་དུས་ཀྱི་མིའི་ཚེ་གཅིག་ལ་བསྒྲུབ་པར་བྱ་བའི་འབྲས་བུ་ཐུན་མོང་མ་ཡིན་པ་ནི་གཞི་ལ་ཆོས་གསུམ་གནས་པ་ཇི་འདྲ་བ་དེ་འདྲ་བའི་སྐུ་གསུམ་གྱི་གོ་འཕང་ཞིག་ཡིན་ནོ། །སྐུ་
གསུམ་གྱི་གོ་འཕང་མཐར་ཕྱིན་པ་མི་སློབ་པའི་ཟུང་འཇུག་གི་སྐབས་ལ་བཞག་དགོས་མོད་ཀྱང་ལམ་ལའང་བཤད་པ་ནི་ཡབ་སྲས་ཀྱི་གཞུང་ནས་མང་དུ་འབྱུང་བས་འདིར་ནི་རགས་པའི་དབང་དུ་བྱས་ཀྱི། ཞིབ་ཏུ་ནི་རྫོགས་རིམ་གྱི་སྐབས་སུ་བཤད་
པར་བྱའོ། །འདི་ལྟར་འཆི་བ་ནི་ཕུང་སོགས་ཐིམ་ནས་སྤྲོས་པ་རགས་པ་ཐམས་ཅད་ཞི་བར་འགྱུར་བས་ཆོས་ཀྱི་སྐུ་དང་རྗེས་སུ་མཐུན་ཞིང་བར་དོ་ནི་རླུང་སེམས་ཙམ་ལས་གྲུབ་ཅིང་འཇའ་ལུས་ལྟར་ཤིན་ཏུ་ཕྲ་བའི་ལུས་ཅན་ཡིན་པས་ལོངས་སྐུ་
དང་རྗེས་སུ་མཐུན་ལ། དེས་ཤའི་མིག་གི་ཡུལ་དུ་གྱུར་ནས་དེ་དག་གི་བྱ་བ་སྒྲུབ་ནུས་པའི་སྐྱེ་བ་ལེན་པ་ནི་ལོངས་སྐུས་སྐྱེ་བ་ལེན་པའི་སྤྲུལ་པ་ཐ་མལ་པའི་མཐོང་བའི་ལམ་དུ་བསྟན་ནས་དེ་དག་གི་དོན་སྒྲུབ་པ་དང་འདྲའོ། །དེས་ན་དེ་གསུམ་
དང་རིགས་འདྲ་བའི་ལམ་གསུམ་བསྒོམས་པའི་མཐར་ཐ་མལ་པ་ལ་འཆི་བ་འོད་བའི་དོད་ལ་རྣལ་འབྱོར་པ་ལ་དོན་དམ་པའི་བདེན་པ་མངོན་དུ་བྱས་པའི་ཆོས་སྐུ་འོང་ཞིང་། ཐ་མལ་པ་ལ་བར་དོ་འོང་བའི་དོད་ལ་འོད་གསལ་ལས་ལུགས་བཟློག་ཏུ་ཤར་བའི་
6-2-43b


རླུང་སེམས་ཙམ་ལས་གྲུབ་པའི་ལོངས་སྐུ་འོང་ལ་ཐ་མལ་པ་ལ་འཁོར་བའི་སྐྱེ་བ་འོང་བའི་དོད་ལ་རྣལ་འབྱོར་པ་ལ་འགྲོ་བའི་དོན་དུ་དགའ་མགུར་སྐྱེ་བ་ལེན་པའི་སྤྲུལ་སྐུ་འོང་བ་ཡིན་ནོ། །འདི་ནི་གཞུང་གཞན་ནས་བཤད་པའི་སྐུ་གསུམ་དང་མི་འདྲ་ཡི་འདི་ཉིད་ཀྱི་
ཁྱད་ཆོས་མཆོག་ཏུ་གྱུར་པའོ། །དེ་ལྟར་ན་ཐབས་མཁས་དང་བྲལ་ན་འཁོར་བའི་རྒྱུར་གྱུར་བའི་སྐྱེ་འཆི་བར་དོ་གསུམ་དུ་འོང་རྒྱུ་དེ་ཐབས་མཁས་ཀྱི་མཐུས་དེ་གསུམ་ཇི་འདྲ་བའི་དེ་འདྲ་བའི་སྐུ་གསུམ་དུ་བསྒྱུར་བ་ཡིན་ཏེ་སྤྱོད་བསྡུས་ལས། དེ་ལྟར་བྱིས་པ་སོ་སོའི་སྐྱེ་
བོ་སྲིད་པ་བར་མ་ཞེས་བྱ་བ་ནི་འཁོར་བའི་རྒྱུར་འགྱུར་རོ། །དེ་ཉིད་བླ་མ་བརྒྱུད་པའི་རིམ་གྱིས་དེ་བཞིན་གཤེགས་པ་ཐམས་ཅད་ཀྱི་མན་ངག་ཐོབ་པ་རྣམས་ནི་བདག་ལ་བྱིན་གྱིས་བརླབས་པ་ཞེས་བྱ་བ་འདི་ལྟར་རྩིག་པའམ་རས་རིས་མེ་ལོང་གི་ནང་དུ་ཉེ་བར་སྣང་བ་དེ་
བཞིན་དུ་རྡོ་རྗེའི་སྐུའི་ངོ་བོ་ཉིད་ཀྱིས་བདག་ཉིད་སྤྲུལ་ཏེ་རྣམ་པ་ཐམས་ཅད་ཀྱི་མཆོག་དང་ལྡན་པ་སྐུ་ལྟ་བས་ཆོག་མི་ཤེས་པ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ལ་སོགས་པས་ལུས་ལ་བརྒྱན་པ་སྟེ་མདོར་ན་སངས་རྒྱས་ཀྱི་ཡོན་ཏན་ཐམས་ཅད་ཀྱིས་བརྒྱན་
པ་ཞེས་བྱ་བའི་བར་དུའོ། །ཇི་སྐད་དུ་བཅོམ་ལྡན་འདས་ཀྱིས་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་ལས། འཇའ་ཚོན་ལྟ་བུའི་ལུས་དག་ནི། །དེ་ཉིད་བསྒོམས་པས་ཐོབ་པར་འགྱུར། །ཞེས་གསུངས་སོ། །ཞེས་བྱིས་པ་ལ་འཁོར་བའི་རྒྱུར་འགྱུར་བའི་
བར་དོ་དེ་མན་ངག་དང་ལྡན་པ་ལ་འཇའ་ལུས་རྡོ་རྗེ་སེམས་དཔར་འགྱུར་བར་གསུངས་ཏེ་བར་དོ་འོང་བའི་དོད་ལ་ལོངས་སྐུ་བྱུང་བའོ། །དེ་བཞིན་དུ་འཆི་བའི་དོད་ལ་དོན་དམ་ཆོས་སྐུ་དང་སྐྱེ་བའི་དོད་ལ་ཀུན་རྫོབ་གཟུགས་ཀྱི་སྐུ་འོང་བར་ཡང་དེ་ཉིད་ལས། དེ་བསན་དེ་
6-2-44a


ཁོ་ན་ཉིད་ཤེས་པ་ནི་རྐྱེན་མ་ཚང་བས་ཇི་སྐད་དུ་བཤད་པའི་སྤྱོད་པ་གལ་ཏེ་མ་སྤྱད་དུ་ཟིན་ཀྱང་། ལྟ་བ་ཐམས་ཅད་རྣམ་པར་སྤངས་ནས་འཆི་བར་འགྱུར་བ་ནི། དོན་དམ་པའི་བདེན་པ་ཡིན་ལ་སྐྱེ་བ་ནི་ཀུན་རྫོབ་ཀྱི་བདེན་པའོ་ཞེས་ཡང་
དག་པར་མངོན་པར་རྟོགས་ནས་བརྒྱ་ལམ་ན་འོད་གསལ་བར་ཞུགས་ནས་ཐ་མལ་པའི་ཕུང་པོ་བོར་ནས་བདག་ལ་བྱིན་གྱིས་བརླབས་པའི་རིམ་གྱིས་ལྡང་བར་བྱའོ་ཞེས་བརྟན་པའི་སེམས་བསྐྱེད་དེ། དེ་ཡིད་ལ་བྱེད་པས་གནས་པར་བྱེད་ན་དེ་སྐྱེ་བ་གཞན་དུ་
ཡིད་ལ་བྱེད་པ་དེ་འདོར་བར་མི་འགྱུར་ཏེ་དེ་བསན་ཐམས་ཅད་མཁྱེན་པར་འགྱུར་རོ། །ཞེས་གསུངས་སོ། །འདི་རིམ་པ་དང་པོ་མཐར་ཕྱིན་ནས་རྫོགས་རིམ་ཐོབ་པ་གཅིག་སྤྱོད་པ་བྱེད་པ་མ་བྱུང་བར་འཆི་བའི་དབང་དུ་བྱས་ནས་གསུངས་པ་ཡིན་ཀྱང་སྤྱིར་འཆི་
བ་ཆོས་སྐུ་དང་སྐྱེ་བ་གཟུགས་སྐུར་འཆར་བ་ཞེས་པའི་དོན་ལ་ནི་འདྲ་བ་ཡིན་ནོ། །རིམ་ལྔ་ལས་ཀྱང་། ཀུན་རྫོབ་བདེན་པ་སྒྱུ་མ་ཉིད། །ལོངས་སྤྱོད་རྫོགས་པའི་སྐུ་ཡང་དེ། །དེ་ཉིད་དྲི་ཟའི་སེམས་ཅན་ཡིན། །རྡོ་རྗེའི་སྐུ་ཡང་དེ་ཉིད་གང་། །རྡོ་རྗེ་སེམས་
དཔའ་རང་ཉིད་དེ། །དེ་བས་རང་ཉིད་མཆོད་ལ་འཇུག །ཅེས་གསུངས་ཏེ་སྔར་ཡང་མང་དུ་བཤད་དོ། །དེས་ན་གཞིའི་སྐྱེ་འཆི་བར་དོ་གསུམ་དང་རིགས་མཐུན་པའི་སྐུ་གསུམ་བསྒྲུབ་བྱར་བྱེད་པའི་གནས་ཀྱིས་ལམ་དུ་ཡང་དེ་གསུམ་དང་རྗེས་སུ་མཐུན་
པའི་སྒོམ་པའི་རིམ་པ་སྟོན་པས། སྣོད་བཅུད་ཀྱི་སྲིད་པའི་རིམ་པ་རེ་དང་བསྟུན་ནས་དེའི་དོད་ལ་ལམ་འདི་འདྲ་ཞིག་སྒོམ་ཞེས་གསུངས་ཏེ་དཔེར་ན་རས་རིས་ལ་དོན་མེད་པའི་གཟུགས་བརྙན་མང་པོ་འདྲི་བ་ཞིག་གིས་དེའི་དོད་ལ་སངས་
6-2-44b


རྒྱས་ཀྱི་སྐུ་འདི་བྲིས་ཤིག་ཅེས་སྨྲ་བ་བཞིན་དུ་འཁོར་བ་པ་ལ་སྣོད་བཅུད་འདི་ལྟར་འབྱུང་བའི་དོད་དེ་ལ་གཞལ་ཡས་ཁང་དང་སྐུ་གསུམ་འདི་འདྲ་བ་ཞིག་འོང་བ་གྱིས་ཞེས་གསུངས་པ་ཡིན་ཏེ། དེ་དག་སྒོམ་པ་ན་ཇི་ལྟར་སྒོམ་པ་དེ་དང་དེར་གྲུབ་པའི་རྣམ་པར་སྒོམ་
པས་སོ། །དེ་ལྟར་ན་སྔར་བཤད་པ་ལྟར་ཆོས་མཐུན་སྒོམ་པ་པོ་འཛམ་བུ་གླིང་པའི་མི་ཡིན་པར་གྲུབ་པ་ན་དེས་གང་དང་མཐུན་པར་སྒོམ་པའི་སྐྱེ་ཤི་བར་དོའི་རིམ་པ་ཡང་འཛམ་བུ་གླིང་པའི་མིའི་དབང་དུ་བྱས་པ་ཞིག་དགོས་པ་ཡིན་ཏེ། སྐྱེ་ཤི་བར་དོ་གསུམ་
ལམ་སྒོམ་པའི་མཐུན་ཡུལ་དུ་བཀོད་པ་ནི་འདྲ་སྒྲིག་པ་ཙམ་མ་ཡིན་གྱི་དེ་དང་རིགས་གཅིག་པའི་སྐྱེ་ཤི་བར་དོ་གསུམ་དུ་འོང་རྒྱུ་དེ་སྐུ་གསུམ་དུ་བསྒྱུར་བའི་ཆེད་ཡིན་པའི་ཕྱིར་དང་། དེ་ཡང་འཛམ་བུ་གླིང་པའི་ཆོས་དེ་གསུམ་ཁོ་ན་ལ་ཡོད་པས་དེ་དང་རིགས་
གཅིག་པའི་མཐུན་ཡུལ་ཡང་འཛམ་བུ་གླིང་པའི་དབང་དུ་བྱས་པ་ཡིན་ནོ། །དེ་ལྟར་ན་འཆི་བ་ལ་འཛམ་བུ་གླིང་པའི་དབང་དུ་བྱས་པ་དགོས་སུ་ཆུག་ཀྱང་སྐྱེ་བ་ལ་འཛམ་བུ་གླིང་གི་མི་དང་དེར་སྐྱེ་བའི་བར་དོ་མི་དགོས་ཀྱི་འཛམ་བུ་གླིང་པའི་མི་ཤི་བའི་འོག་གི་
བར་དོ་དང་སྐྱེ་བ་ཙམ་དང་ཆོས་མཐུན་སྦྱར་བས་ཆོག་གི་སྙམ་ན། སྐྱོན་མེད་དེ་འཛམ་བུ་གླིང་པའི་མིའི་སྐྱེ་བ་དང་དེར་སྐྱེ་བའི་བར་དོའི་དོད་ལ་ལོངས་སྤྲུལ་གྱི་སྐུ་སྒྲུབ་ནུས་ན་རང་ཉིད་ལས་ཀྱི་དབང་གིས་འཇུག་པའི་བར་དོ་དང་སྐྱེ་བ་ལེན་པ་ཐམས་ཅད་སྤྱོད་ནུས་
པའི་ཕྱིར་དང་། འཛམ་བུ་གླིང་པའི་མིའི་སྐྱེ་བ་དང་དེར་སྐྱེ་བའི་བར་དོ་དང་སྦྱོར་བ་ལ་ཁྱད་པར་ཅན་གྱི་ཆོས་མཐུན་ཡོད་པའི་ཕྱིར་རོ། །དེ་ཇི་ལྟར་ཡིན་ཞེ་ན་སྲིད་པ་སྐྱེ་བའི་རིམ་པ་དང་ཆོས་མཐུན་སྦྱོར་བ་རྣམས་ལ་མར་ལ་གཞིའི་སྐབས་དང་ཡར་ལ་
6-2-45a


འབྲས་བུའི་སྐབས་གཉིས་ཀ་དང་རྣམ་པ་རྗེས་སུ་མཐུན་པའི་ཆོས་མཐུན་ཁྱད་པར་ཅན་ཡོད་པས་དེ་དག་ལ་འབྲས་བུ་ལམ་དུ་བྱེད་པ་ཡོད་པ་ཡིན་ནོ། །དེས་ན་ཡུམ་ཡི་ལྷུམས་སུ་སྐྱེ་བ་བཟུང་ནས་མཆོག་གི་སྤྲུལ་སྐུར་འཚང་
རྒྱ་བའི་རྟེན་དེ་འཛམ་བུ་གླིང་པའི་མིའི་སྐྱེ་བ་ཡིན་པས་འབྲས་བུའི་རྣམ་པ་དེ་ལམ་དུ་བྱེད་པའི་སྤྲུལ་པའི་སྐུ་སྒོམ་པའི་ཆོས་མཐུན་གྱི་ཡུལ་ཡང་འཛམ་བུ་གླིང་པའི་མི་ལ་མཛད་དོ། །དེའི་ཕྱིར་བར་དོ་ཡང་སྐྱེ་བ་དེ་ལེན་པའི་བར་དོ་བྱེ་བྲག་པ་ལ་མཛད་དེ་
མཆོག་གི་སྤྲུལ་སྐུའི་སྐྱེ་བ་འཛིན་པའི་ལོངས་སྐུའི་དོད་ཡིན་པའི་ཕྱིར་ཏེ་སྔར་བཤད་པ་ལྟར་རོ། །འོ་ན་ལམ་སྒོམ་པ་པོ་དེའི་འབྱུང་འགྱུར་གྱི་སྐྱེ་འཆི་བར་དོ་གསུམ་མཐུན་ཡུལ་དུ་བྱ་བར་རིགས་པས་བསྐལ་པ་དང་པོའི་སྐབས་དང་བསྟུན་པར་མི་རིགས་
སོ་ཞེ་ན། སྐྱོན་མེད་དེ་གཞིའི་ཆོས་གསུམ་དང་འདྲ་བའི་སྐུ་གསུམ་སྒོམ་པ་ལ་སྔོན་དུ་རྟེན་བསྐྱེད་དགོས་ཤིང་དེ་ནི་སྣོད་ཆགས་པ་དང་ཆོས་མཐུན་པར་བྱ་དགོས་ལ་དེ་ལྟ་ན་དེར་བཅུད་ཀྱི་ལྷ་ཆགས་པ་དང་དེ་འོད་གསལ་དུ་སྡུད་པ་སོགས་ཀྱང་
བསྐལ་པ་དང་པོའི་བཅུད་ཀྱི་སེམས་ཅན་ཆགས་པ་དང་དེ་ཤི་བ་སོགས་དང་ཆོས་མཐུན་པར་སྦྱར་དགོས་པའི་ཕྱིར་རོ། །བསྐལ་པ་དང་པོའི་དུས་ཀྱི་སྣོད་བཅུད་ཀྱི་སྲིད་པའི་རིམ་པ་རྣམས་ཆོས་མཐུན་གྱི་ཡུལ་ཡིན་ཡང་ད་ལྟ་ལམ་སྒོམ་པའི་བྱེད་
པས་དེ་མི་སྦྱོང་བས་ལམ་བསྒོམས་པས་ནི་འབྱུང་འགྱུར་གྱི་སྲིད་པའི་རིམ་པ་སྦྱོང་བ་ཡིན་ནོ། །གཉིས་པ་ནི། གལ་ཏེ་རིམ་པ་དང་པོའི་སྦྱང་གཞི་ལ་སྐྱེ་འཆི་བར་དོ་གསུམ་ག་འཇོག་ན་རྫོགས་རིམ་གྱི་སྦྱང་གཞི་མེད་པར་འགྱུར་ལ་དེ་གསུམ་ལམ་
6-2-45b


གཉིས་ཀའི་སྦྱང་གཞིར་འཇོག་ན་སྦྱང་བྱ་གཅིག་ལ་སྦྱོང་བྱེད་གཉིས་དོན་མེད་དོ། །སྦྱོད་བསྡུས་ལས་ཀྱང་། སྐྱེ་བ་ཀུན་རྫོབ་བདེན་པ་ཞེས་བྱ་སྟེ། །འཆི་བའི་མིང་ཡང་དོན་དམ་བདེན་པ་ཡིན། །རིམ་གཉིས་དེ་དག་བླ་མའི་དྲིན་གྱིས་ནི། །རྙེད་པ་འདི་ནི་མ་འོངས་
སངས་རྒྱས་ཡིན། །ཞེས་སྐྱེ་འཆི་སྦྱོང་བྱེད་ཀྱི་བདེན་པ་གཉིས་ལ་རིམ་པ་གཉིས་སུ་གསུངས་པ་དང་འགལ་ལོ་ཞེས་ཟེར་ན། འདི་ལ་སྔོན་གྱི་བླ་མ་དག་རིམ་གཉིས་ཀྱི་སྦྱང་གཞི་འགལ་བར་བཟུང་ནས་སྐྱེ་བ་བསྐྱེད་རིམ་གྱི་སྦྱང་གཞིར་འདོད་ཅིང་། འཆི་བ་
ལ་བསྐལ་པ་དང་པོའི་མི་འཆི་བ་ནི་ལྷག་མོས་འོད་གསལ་དུ་སྡུད་པ་དང་མངལ་ཁ་བརྒྱུད་པའི་མི་འཆི་བའི་ཕུང་སོགས་རགས་པ་འགགས་པ་ནི་ལུས་དབེན་དང་རླུང་རྣམས་འགགས་པ་ངག་དབེན་དང་སེམས་གསུམ་འགགས་པ་སེམས་དབེན་གྱི་སྦྱང་
གཞིར་འདོད་དོ། །སྒྱུ་མའི་སྦྱང་གཞི་ལ་རྒྱལ་པོ་སྤྲིན་ཤུགས་ཅན་བར་དོ་ལ་འདོད་པ་དང་བཙུན་མོ་ཅན་རྨི་ལམ་ལ་འདོད་པ་དང་མངོན་ཤེས་ཅན་བར་དོས་ལུས་ལེན་ཁའི་སྒྲོ་འདོགས་ཤེས་པ་ལ་འདོད་པ་དང་ཁ་ཅིག་བར་དོའི་སེམས་ཟུང་འཇུག་གི་
སྦྱང་གཞི་ཡིན་པས་ལུས་ཡིན་ཞེས་འདོད་པ་རྣམས་བཀག་ནས། སྒྱུ་མ་དང་ཟུང་འཇུག་གཉིས་སྦྱང་གཞི་ལ་ཁྱད་མེད་ཀྱང་དང་པོ་གཉིས་པའི་ཉེར་ལེན་གྱི་རྒྱུ་ལ་དགོས་པས་དེ་གཉིས་ཀའི་སྦྱང་གཞི་བར་དོ་ལ་བྱེད་པ་ནག་པོ་པའི་ལུགས་ལེགས་པར་
སྨྲ་ཞིང་འཆི་བའི་ཤེར་ཕྱིན་འོད་གསལ་གྱི་སྦྱང་གཞིར་བྱེད་ལ། སྦྱང་གཞི་སྦྱོང་བ་དང་སྤང་བྱ་སྤོང་བའི་ཁྱད་པར་ནི་གནས་ལུས་ལོངས་སྤྱོད་ལ་ཐ་མལ་པར་ཞེན་པ་ནི་མི་སྤོང་བར་གཞལ་ཡས་ཁང་དང་ལྷ་སོ་གཉིས་སུ་བསྒོམས་ཏེ་སྣང་བ་
6-2-46a


བསྒྱུར་བ་ཙམ་ཡིན་ལ་རང་གི་སེམས་རྒྱུན་ལ་ཞེན་པའི་ས་བོན་གཅོད་པ་ནི་སྤོང་བ་ཡིན་ཞེས་འཆད་དོ། །བླ་མ་རྔོག་པ་ནི་བསྐྱེད་རིམ་གྱི་སྦྱང་གཞི་ཕུང་པོ་ཁམས་སྐྱེ་མཆེད་ཡུལ་ཡེ་ཤེས་རྣམས་ལ་སྤྱོད་བསྡུས་ནས་གསུངས་པ་
ལྟར་བརྒྱར་ཕྱེ་བ་དང་ལུས་ཀྱི་ཁོང་སྟོང་ལས་རླུང་ཉི་ཁྲི་གཅིག་སྟོང་དྲུག་བརྒྱ་ཡི་གེ་གསུམ་གྱི་སྒྲར་གྲག་ཅིང་རྒྱུ་བ་དང་། སེམས་གསུམ་རང་བཞིན་དང་བཅས་པ་དང་། དབང་པོ་གཉིས་སྦྱོར་གྱི་ཚེ་རང་རིག་བདེ་བ་ཉམས་སུ་མྱོང་བ་དང་། རྨི་ལམ་གྱི་དུས་སུ་
རླུང་སེམས་ཙམ་ལས་ཡིད་ལུས་མངོན་ཞེན་དང་བཅས་པ་བྱུང་ནས་ཕྱོགས་བཅུར་འདོད་པ་ལ་སྦྱོང་པར་སྣང་བ་དང་། འཆི་བའི་འོད་གསལ་དང་། དེ་ལས་གྲུབ་པའི་བར་དོ་རྣམས་ལུས་དབེན་ནས་ཟུང་འཇུག་གི་བར་གྱི་སྦྱང་གཞིར་འདོད་ཅིང་འཆི་བ་དང་བར་དོ་
རིམ་པ་གཉིས་ཀའི་སྦྱང་གཞིར་བཤད་པ་ནི་འཆི་བའི་སྟོང་ཉིད་ཇི་ལྟ་བ་བཞིན་མ་རྟོགས་པ་དང་རྟོགས་པ་དང་མངལ་དུ་འཇུག་པའི་དུས་ཀྱི་བར་དོ་དང་བར་དོའི་དུས་ཀྱི་མཚན་ཉིད་ཇི་ལྟ་བ་བཞིན་གྱི་ཁྱད་པར་རམ་ཡང་ན་ལུས་འདིའི་སྔོན་རོལ་དང་ལུས་འདི་མཐར་
འགག་པའི་འཆི་བ་དང་བར་དོའི་ཁྱད་པར་དུ་འཆད་དོ། །དེ་ལ་འཕགས་པ་ཡབ་སྲས་ཀྱིས་ནི་འདི་དག་ལ་སྦྱང་གཞི་དང་སྦྱོང་བྱེད་ཀྱི་ཐ་སྙད་གསལ་བར་མ་མཛད་ལ་སྤྱི་ཙམ་ནས། སྒྱུ་མ་ལྟ་བུའི་ཏིང་ངེ་འཛིན། །ཡང་དག་མཐས་ནི་རྣམ་པར་སྦྱང་། །ཞེས་རིམ་
ལྔ་ལས་གསུངས་པ་ལྟར་གཉེན་པོ་ཡང་སྦྱང་བྱར་གསུངས་པ་ཡོད་མེད་ཀྱང་འདིར་ནི་མདོར་བྱས་ལས། རྣམ་རྟོག་བག་ཆགས་ཉེས་པ་ཡིས། །འགྲོ་བ་གསུམ་པོ་རྣམ་རྨོངས་ལ། །བློ་དང་ལྡན་པས་ལེགས་བལྟས་ཏེ། །རྣལ་འབྱོར་རྒྱུད་ཀྱིས་སྦྱང་
6-2-46b


བར་བྱ། །ཞེས་གསུངས་པ་ལྟར་དྲི་མ་སེལ་བ་ལ་སྦྱོར་བར་བྱའོ། །འདི་ལ་གུར་གྱི་ལེའུ་དང་པོ་ལས། ཐུགས་ཀྱི་རྡོ་རྗེ་ལས་བྱུང་བའི། །སེམས་ཅན་སྣ་ཚོགས་རང་བཞིན་ཅན། །སེམས་ནི་རང་གི་རྣམ་རྟོག་གི ། དྲི་མས་སྐྱེ་བོ་སྤགས་པར་བྱས། །དེ་ཕྱིར་ཀུན་ཏུ་
རབ་འབད་པས། །ཐུགས་ཀྱི་རྡོ་རྗེ་རྣམ་པར་སྦྱང་། །སེམས་དག་པས་ནི་བདེ་བ་ཡིན། །ཉོན་མོངས་དུག་ནི་ཐམས་ཅད་འཇོམས། །ཞེས་གསུངས་པ་ལྟར་དྲི་མས་བསླད་པའི་སེམས་སྦྱོང་བ་ནི་སེམས་ཀྱི་རིགས་འདྲ་རྒྱུན་གཅོད་པ་སྦྱོང་བའི་དོན་མ་ཡིན་གྱི་སེམས་
ཀྱི་རིགས་འདྲ་ཕྱི་མ་དྲི་མ་དང་བྲལ་བར་བསྐྱེད་པ་སྦྱོང་བའི་དོན་ཡིན་ལ། བདག་ཏུ་འཛིན་པ་སྦྱོང་བར་གསུངས་པ་ལྟ་བུ་ནི་རིགས་འདྲ་གཅོད་པ་སྦྱོང་པའི་དོན་དང་དེ་བཞིན་དུ་སེམས་ཀྱི་ཆོས་ཉིད་མངོན་དུ་འགྱུར་པ་ལ་སྒྲིབ་པའི་དྲི་མ་སེལ་བ་ལ་ཆོས་ཉིད་དེ་སྦྱོང་
བར་གསུངས་པ་ཡང་ཡོད་པས་སྦྱོང་ཚུལ་གསུམ་སྔགས་དང་མཚན་ཉིད་ཀྱི་ཐེག་པ་གཉིས་ཀ་ནས་གསུངས་སོ། །འདིར་ནི་སྦྱང་གཞི་ཁྱད་པར་བ་ཞིག་སྟོན་པ་ཡིན་ཏེ་དེ་ལ་ཡང་སྣོད་བཅུད་གཉིས་སུ་དབྱེར་ཡོད་མོད་ཀྱང་གཙོ་བོའི་དོན་འོས་བཟུང་ན་
གཞིའི་སྐྱེ་འཆི་བར་དོ་གསུམ་ཡིན་ལ། དེ་སྦྱོང་ཚུལ་ནི་དེ་གསུམ་གྱི་རིགས་འདྲ་ཕྱི་མ་གསུམ་དྲི་བྲལ་དུ་བསྐྱེད་པ་མ་ཡིན་ཏེ་དེ་ལ་དྲི་མ་ཟད་པ་མེད་པའི་ཕྱིར་རོ། །དེ་གསུམ་མངོན་དུ་གྱུར་པ་ལ་སྒྲིབ་པའི་གྲིབ་མ་སེལ་བ་ཡང་མ་ཡིན་ཏེ་སེམས་
ཅན་རྣམས་ལ་དེ་དག་མངོན་དུ་གྱུར་ཟིན་པས་དེའི་དོན་དུ་འབད་མི་དགོས་པའི་ཕྱིར་རོ། །བདག་མེད་པ་རྟོགས་པའི་ཤེས་རབ་ཀྱིས་བདག་འཛིན་འགོག་པ་ལྟ་བུ་ཡང་མིན་ཏེ་དེ་ལ་དག་བྱ་དང་རྗེས་སུ་མཐུན་པའི་ལམ་སྒོམ་མི་དགོས་ལ་འདི་ལ་
6-2-47a


དེ་དགོས་པའི་ཕྱིར་རོ། །དེས་ན་འདིར་ནི་ཐ་མལ་པ་འཆི་བའི་ཚེ་འབྱུང་བ་ཐིམ་པའི་རིམ་པ་ཅན་གྱི་ཉམས་ཇི་ལྟར་སྐྱེ་བ་དེ་འདྲ་བའི་རྫོགས་རིམ་སྐྱེད་པར་གསུངས་པ་ལྟར་གཞིའི་ཆོས་གསུམ་ཇི་འདྲ་བ་དེ་འདྲ་བའི་ལམ་བསྒོམས་
ནས་ཐ་མལ་པའི་སྐྱེ་ཤི་བར་དོ་གསུམ་དག་པར་བྱེད་པ་སྦྱོང་བའི་གནད་ཀྱི་དོན་དུ་མཐོང་ངོ་། །ཚུལ་དེས་ལམ་སྒོམ་པ་པོ་རང་གི་སྐྱེ་འཆི་བར་དོ་གསུམ་སྦྱོང་བ་ལ་ལམ་རིམ་པ་གཉིས་གསུངས་ཤིང་། དེ་ཡང་དཔེར་ན་ཉོན་མོངས་བདག་འཛིན་ལྟ་བུ་ཅིག་སྦྱོང་
བ་ལ་སློབ་པའི་ལམ་བཞི་སྒོམ་པ་མི་འགལ་བ་ལྟར་སྦྱང་གཞིའི་ཆོས་གསུམ་གཅིག་ཡིན་ཡང་དེ་སྦྱོང་བའི་ལམ་རིམ་པ་གཉིས་རིམ་གྱིས་སྐྱེ་བ་ཅི་ཞིག་འགལ། རིམ་པ་རེ་རེས་རྫོགས་པར་སྦྱོང་ནུས་ན་སྦྱང་གཞི་གཅིག་ལ་སྦྱོང་བྱེད་གཉིས་མི་དགོས་ཀྱང་
དེ་ཁས་མི་ལེན་པས་རྩོད་པའི་གནས་མེད་དོ། །དེ་ལྟ་མ་ཡིན་པར་སྦྱང་གཞི་སོ་སོ་བར་ངེས་ན་ནི་རིམ་པ་རེ་རེས་ཀྱང་སྐྱེ་བ་སྦྱངས་པའི་སྤྲུལ་སྐུ་དང་འཆི་བ་དང་བར་དོ་སྦྱངས་པའི་ཆོས་སྐུ་དང་ལོངས་སྐུ་ཐོབ་པར་ནུས་པ་ཡང་འདོད་པར་གྱིས་ཤིག །གལ་ཏེ་
སོ་སོའི་སྦྱང་གཞི་རྫོགས་པར་སྦྱོང་ནུས་པའི་དབང་དུ་མི་བྱེད་ཀྱི་སྦྱང་གཞི་དང་རྣམ་པ་རྗེས་སུ་མཐུན་པར་སྒོམ་པ་གང་ལ་ཡོད་པའི་དབང་དུ་བྱས་ནས་སྦྱང་གཞི་སོ་སོར་བྱེད་དོ་སྙམ་ན། དེ་ལྟ་ན་རིམ་པ་དང་པོ་ལ་ཡང་གཞིའི་ཆོས་གསུམ་དང་མཐུན་པར་
སྒོམ་པ་གསུམ་གསུངས་པས་སྐྱེ་བ་གཅིག་པུ་སྦྱོང་བྱེད་དུ་འགལ་ལ་གསུམ་ག་སྦྱོང་ན་ནི་སྦྱང་གཞི་གཅིག་ཏུ་འགྱུར་ཏེ། བསྐལ་པ་དང་པོའི་མི་རྫུས་སྐྱེས་དང་མངལ་སྐྱེས་སམ་ལམ་སྒོམ་པ་པོའི་ཚེ་སྔ་ཕྱིའི་ཆོས་གསུམ་སོ་སོར་ཕྱེ་ནས་རིམ་པ་གཉིས་
6-2-47b


ཀྱི་སྦྱང་གཞི་སོ་སོར་འདོད་པ་བཀག་ཟིན་པའི་ཕྱིར་རོ། །དེ་བཞིན་དུ་རྫོགས་རིམ་ལ་ཡང་འཆི་བ་དང་རྗེས་སུ་མཐུན་པའི་སྟོང་ཉིད་སྒོམ་པ་དང་བར་དོ་དང་རྗེས་སུ་མཐུན་པའི་སྒྱུ་ལུས་དང་སྐྱེ་བ་ལེན་པ་དང་རྗེས་སུ་མཐུན་པའི་སྤྲུལ་སྐུར་བསྒྱུར་བ་སོགས་ཡོད་པས་འཆི་
བ་དང་བར་དོ་ཁོ་ན་སྦྱོང་བྱེད་དུ་འགལ་ལོ། །སྤྱོད་བསྡུས་ལས་སྐྱེ་འཆི་གཉིས་བདེན་པ་གཉིས་སུ་གསུངས་པ་ནི་སྔར་དྲངས་པའི་རྫོགས་རིམ་ཐོབ་ལ་སྤྱོད་པ་བྱེད་རྒྱུ་མ་བྱུང་བ་དེའི་སྐྱེ་འཆི་གཉིས་ལ་གསུངས་པ་དེ་ནི་ཤིན་ཏུ་གསལ་བས་དེས་འཆི་བའི་དུས་སུ་དོན་དམ་
མངོན་དུ་བྱས་ནས་སྐྱེ་བའི་དུས་སུ་སྒྱུ་མའི་སྐུ་འགྲུབ་པའི་དོན་ཡིན་གྱི་གཞིའི་སྐབས་ཀྱི་སྐྱེ་འཆི་གཉིས་རིམ་གཉིས་ཀྱི་སྦྱང་གཞིར་སྟོན་པ་གཏན་མིན་ནོ། །འོ་ན་རིམ་གཉིས་དེ་དག་ཅེས་གསུངས་པའི་དོན་གང་ཡིན་སྙམ་ན། འཆི་བའི་ཚེ་འོད་གསལ་མངོན་དུ་བྱེད་
པར་གསུངས་པའི་ལུང་སྔར་དྲངས་པ་དེའི་མཇུག་ཏུ་དེའི་དོན་བསྡུས་པ་ན། འདིར་བཤད་པ་གང་ཞིག་སྐྱེ་བ་ཞེས་སོགས་གསུངས་ཤིང་སྔར་རྫོགས་རིམ་ལ་གནས་པར་བཤད་པས་རིམ་པ་གཉིས་ཐོབ་པར་བསྟན་པ་དེ་ལ་སྙེག་པའི་ཚིག་ཡིན་གྱི་སྐྱེ་བ་ཀུན་རྫོབ་
དང་འཆི་བ་དོན་དམ་ལ་སྙེག་པ་མིན་ཏེ་དེ་གཉིས་ནི་གང་ཟག་དེའི་ཕྱིས་ཀྱི་ཐོབ་བྱ་ཡིན་པས་ད་དུང་མ་རྙེད་པའི་ཕྱིར་རོ། །དེ་ལྟར་བྱས་ན་ལྷག་མོས་འོད་གསལ་དུ་སྡུད་པ་དང་སེམས་དབེན་དང་། འོད་གསལ་ནི་འཆི་བ་དང་རྣམ་པ་རྗེས་སུ་མཐུན་པར་སྒོམ་པ་འཆི་བ་
སྦྱོང་བྱེད་ཡིན་ལ། དང་པོའི་མགོན་པོ་དང་སྒྱུ་ལུས་དང་ཟུང་འཇུག་ནི་བར་དོ་དང་རྣམ་པ་རྗེས་སུ་མཐུན་པར་སྒོམ་པ་བར་དོ་སྦྱོང་བྱེད་དང་དེ་གསུམ་རང་རང་གི་སྐབས་ཀྱི་སྤྲུལ་སྐུར་སྒྱུར་བ་ནི་སྐྱེ་བ་ལེན་པ་དང་རྣམ་པ་རྗེས་སུ་མཐུན་པར་སྒོམ་པ་སྐྱེ་བ་སྦྱོང་བྱེད་
6-2-48a


ཡིན་ཏེ་དེ་ཡང་སྦྱང་གཞི་གཅིག་སྦྱོང་བ་ལ་རབ་འབྲིང་ཐ་གསུམ་གྱི་རྟོགས་པ་ཐོག་མཐའ་བར་གསུམ་དུ་སྐྱེ་བ་སྐས་ཀྱི་གདང་བུའི་རིམ་པ་དང་འདྲ་བའོ། །དེས་ན་རིམ་པ་དང་པོར་དེ་བཞིན་ཉིད་ལས་བྱང་ཆུབ་པ་མངོན་དུ་བྱེད་པའི་
རྟེན་ལ་ལྷག་མོས་གསུངས་པ་དང་འདྲ་བར་ལུས་དབེན་ནི་སེམས་དབེན་གྱི་སྟོང་པ་གསུམ་མངོན་དུ་བྱེད་པའི་རྟེན་ཡིན་ལ་ངག་དབེན་ནི་སེམས་ཀྱི་བཞོན་པའི་རླུང་དབང་དུ་བྱེད་པས་སེམས་དབེན་གྱི་ལྷན་ཅིག་བྱེད་རྐྱེན་ཡིན་པས་དེ་གཉིས་ལ་སྲིད་པ་སྐྱེ་རིམ་གྱི་
དབང་དུ་བྱས་པའི་སྦྱང་གཞི་ཟུར་པ་མི་དགོས་ཏེ། རིམ་པ་དང་པོའི་སྐབས་སུ་སྤྱིར་ལམ་དེས་སྦྱོང་བ་ལ་དུ་མ་ཞིག་ཡོད་ཀྱང་དེ་དག་ཐམས་ཅད་སྦྱང་གཞིར་མི་འཆད་པར་སྐྱེ་འཆི་བར་དོ་གསུམ་བསྟན་པ་དང་འདྲ་བར་རིམ་པ་གཉིས་པའི་སྐབས་སུ་ཡང་སྦྱང་
གཞིའི་གནད་བསྡུས་པ་ནི་གསུམ་པོ་དེ་ཙམ་ལ་བྱའོ། །ཁྱད་པར་དུ་སྤྱོད་བསྡུས་ལས་བདག་བྱིན་གྱིས་བརླབ་པ་ངེས་པའི་ཡན་ལག་ཏུ་རྨི་ལམ་ལ་དྲིས་ལན་མཛད་པའི་སྐབས་ཀྱི་ཚིག་ཙམ་ལ་འཁྲུལ་ནས་རྨི་ལམ་སྒྱུ་ལུས་ཀྱི་སྦྱང་གཞིར་འཆད་པ་ནི། 
འདྲ་ཆོས་སྒྲིག་པ་ཙམ་ལ་སྦྱང་གཞི་དང་སྦྱོང་བྱེད་གོ་བར་འདོད་པའི་ལུགས་སུ་སྣང་བས་སྦྱང་གཞིའི་གནད་མ་ཟིན་པའོ། །སྦྱང་གཞི་གསུམ་པོ་སྦྱོང་བ་ན་དེ་དང་རིགས་མཐུན་གྱི་རྟོགས་པ་བསྐྱེད་ནས་སྦྱོང་དགོས་པ་ལ་མཚན་ཉིད་ཇི་ལྟ་བ་བཞིན་མཐུན་
པའི་རྟོགས་པ་རྫོགས་རིམ་གྱི་སྐབས་མིན་པར་མི་སྐྱེ་ཞིང་། དེ་སྐྱེ་བ་ལ་ཡང་དང་པོ་ཕྱོགས་མཐུན་ཙམ་གྱི་ལམ་རིམ་པ་དང་པོས་རྒྱུད་སྨིན་པར་བྱ་དགོས་ཏེ་དེས་སྨིན་པར་མ་བྱས་ན་དགེ་རྩ་མི་སྨིན་པས་རྫོགས་པའི་རིམ་པ་མི་སྐྱེ་བའི་ཕྱིར་ཏེ་ལེའུ་བཅུ་
6-2-48b


གཅིག་པའི་སྒྲོན་གསལ་ལས། དེ་ལྟར་བརྟགས་པའི་ཡིད་ཀྱིས་ཐུན་བཞིར་བསླབ་པར་བྱས་ན་དེ་དགེ་བའི་རྩ་བ་ཡོངས་སུ་སྨིན་པས་རྡོ་རྗེ་ལྟ་བུའི་ཏིང་ངེ་འཛིན་མངོན་པར་རྟོགས་ནས་ཚེ་འདི་ཉིད་ལ་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། །ཞེས་གསུངས་
ཤིང་རིམ་ལྔ་དང་སྦྱོད་བསྡུས་ལས་ཀྱང་སྐས་ཀྱི་རིམ་པ་དང་འདྲ་བར་གསུངས་པའི་ཕྱིར་རོ། །དེ་ལ་རིམ་པ་དང་པོས་དགེ་རྩ་སྨིན་པར་བྱས་པས་སྦྱང་གཞི་གསུམ་ཅི་ཙམ་ཞིག་སྦྱོང་བ་དང་དེས་སྦྱོང་མ་ནུས་པའི་ལྷག་མ་གཉིས་པར་ཅི་ཙམ་རེ་སྦྱོང་བ་རྣམས་ཀྱི་ཁྱད་པར་
ལེགས་པར་ཕྱེད་ན་སྦྱོད་བསྡུས་ནས་གསུངས་པ་ལྟར་གྱི་གོ་རིམས་རྣམས་ལ་ངེས་པ་བརྟན་པོ་རྙེད་ནས་ཉམས་ལེན་མི་འཕྱུག་ལ། དེ་ལྟ་མ་ཡིན་ན་འཕགས་པའི་གདམས་པ་དམ་པ་མདོར་བྱས་ནས་འབྱུང་བའི་ཏིང་ངེ་འཛིན་གསུམ་ལ་སོགས་པ་གཙིས་མེད་དུ་
བཞག་ནས་རྒྱུད་ཀྱི་དོན་ཡབ་སྲས་ཀྱིས་གཏན་ལ་ཕབ་པའི་དོན་གཞུང་འདིས་བསྟན་ཟེར་རྒྱུ་མེད་པའི་མན་ངག་ཕྲ་མོ་འགའ་ཞིག་གིས་དུས་འདས་ནས་ལམ་གྱི་ལུས་མི་རྙེད་པས་བསྐྱེད་རྫོགས་གཉིས་ཀའི་ཆོས་སྐད་རྣམས་སྦྱང་གཞིའི་གནད་གཅིག་ལ་བསྐོར་ནས་
ལམ་ལྟར་ལྟར་སྣང་བས་བཀྲི་བར་མི་ནུས་པའི་ངེས་པ་བརྟན་པོ་བླ་མ་ལས་བཙལ་བར་བྱ་སྟེ་འདི་དག་ཀྱང་གཞན་དུ་བཤད་པར་བྱའོ། །རྣལ་འབྱོར་ཆེན་པོའི་རྒྱུད་སྡེ་དག་ནས་རྟེན་དང་བརྟེན་པའི་རྣལ་འབྱོར་རྣམས་སྲིད་པ་སྐྱེ་བའི་རིམ་པ་དང་མཐུན་པར་སྒོམ་པར་གསུངས་
པ་རྣམས་ལ། འཕགས་པ་ཡབ་སྲས་ཀྱི་དགོངས་པ་འདི་འདྲ་བའི་འགྲེལ་ལུགས་ཤིག་མེད་ན་གང་མཐུན་མཐུན་བསྒྲིགས་པའི་འདྲ་སྒྲིག་པ་ཙམ་རེའི་བཤད་པ་ལས་ནུས་པ་གཞན་མི་ཐོན་པས་བློ་གྲོས་ཆེན་པོ་དག་ཚིམ་པར་ག་ལ་འགྱུར། དེའི་ཕྱིར་རྣལ་
6-2-49a


འབྱོར་ཆེན་པོའི་ལམ་རིམ་པ་གཉིས་བསྒོམས་ནས་ཚེ་དེ་ལ་འཚང་རྒྱ་བར་སྔགས་ནས་གསུངས་པའི་རིན་པོ་ཆེ་ལྟ་བུའི་རྟེན་གྱི་གང་ཟག་དེ་འཛམ་བུ་གླིང་པའི་རྟེན་ཅན་དུ་བྱས་ནས། དེས་འཛམ་བུ་གླིང་པའི་མིའི་སྐྱེ་ཤི་བར་དོ་
གསུམ་དང་མཐུན་པར་སྔགས་ཀྱི་ལམ་སྒོམ་པའི་ཚུལ་འཕགས་སྐོར་གཞན་དུ་མི་གསལ་བ་སློབ་དཔོན་འདིས་གསལ་བར་མཛད་པ་འདི་ནི། བླ་མེད་སྤྱི་དང་ཁྱད་པར་དུ་དཔལ་གསང་བ་འདུས་པའི་དོན་འཕགས་པ་ཡབ་སྲས་ཀྱིས་བཀྲལ་བ་ལ་མེད་དུ་མི་
རུང་བའི་གནད་ཆེན་པོར་མཐོང་བས་ཤེས་རབ་ཅན་རྣམས་ཀྱིས་འདིའི་དོན་ལེགས་པར་ཁོང་དུ་ཚུད་པར་བྱེད་པ་འགག་གི་དོན་དུ་བཟུང་ཞིག །གཉིས་པ་ནི། འོ་ན་བསྲུང་འཁོར་དང་རིག་མ་འདུ་བྱ་བ་ཕྱིན་ཆད་ལ་ཆོས་མཐུན་མ་སྦྱར་བ་ཅི་ཡིན་སྙམ་ན། 
འདི་ལ་བླ་མ་བཙུན་མོ་ཅན་ཕྱིའི་ལྕགས་རི་དང་བསྲུང་འཁོར་གཉིས་ཆེས་མཐུན་སྦྱོར་བ་ནི་འཐད་པ་མ་ཡིན་ཏེ། གང་དང་ཆོས་མཐུན་སྦྱོར་བའི་ཡུལ་སྲིད་པ་ལ་སྣོད་བཅུད་གཉིས་ལས་མེད་ལ་དེའི་ཐོག་མ་ཡང་སྣོད་ནས་སྦྱོར་བ་ཡིན་ན་སྣོད་ཞིག་པ་དང་
དེ་ནས་ཆགས་པ་མན་ཆད་ཡེ་ཤེས་ཀྱི་ས་སྒོམ་པ་མན་ལ་སྦྱོར་བའི་ཕྱིར་དང་། ལྕགས་རི་ནི་གཞལ་ཡས་ཁང་དང་ཆོས་མཐུན་པར་དངོས་སུ་སྦྱར་བའི་ཕྱིར་རོ། །ཕྱིས་ཀྱི་བླ་མ་ཁ་ཅིག་ལྷག་མོས་བསྐལ་པ་དང་པོའི་མི་དང་ཆོས་མཐུན་སྦྱར་བ་ལ་
བསམས་ནས་བསྲུང་འཁོར་ཡན་ཆད་དུ་བསྐལ་པ་དང་པོའི་མིར་སྐྱེ་བའི་རྒྱུ་སོག་པ་དང་འདྲ་བར་ལྷག་མོས་ཀྱིས་ལྷར་སྐྱེད་པའི་རྒྱུ་སོག་པ་ལ་སྦྱོར་ཏེ། སྦྱོར་བ་ཚོགས་སོག་ནི་བསྐལ་པ་དང་པོའི་མིར་སྐྱེ་བ་ལན་གྲངས་གཞན་ལ་མྱོང་འགྱུར་གྱི་ལས་
6-2-49b


དང་འདྲ། དེ་ནས་སྟོང་ཉིད་སྒོམ་པ་ནི་རྟེན་དེ་ནས་ཤི་བ་དང་འདྲ། དེ་ལས་དང་པོའི་མགོན་པོར་སྐྱེད་པ་ནི་བར་དོ་དང་འདྲ། དེ་ཞེ་སྡང་རྡོ་རྗེར་བསྒྱུར་བ་ནི་སྐྱེ་བ་བླངས་པ་དང་འདྲ། ར་བ་དང་དྲ་བ་དང་ཕུར་བུ་ནི་གདན་བཞིར་སྦྱིན་པ་ཚུལ་ཁྲིམས་བཟོད་པ་གསུམ་ལ་གསུངས་
པས་དེ་གསུམ་གྱིས་བསྡུས་པའི་དགེ་བ་བསགས་པ་ནི་བསྐལ་པ་དང་པོའི་མིར་སྐྱེ་བའི་སྐྱེས་ནས་མྱོང་འགྱུར་གྱི་ལས་དང་འདྲ། དེ་ནས་ཡེ་ཤེས་ཀྱི་ས་སྒོམ་པ་ནི་ཤི་བ་དང་འདྲ་ལ་ལྷག་མོས་སྒོམ་པ་ནི་བསྐལ་པ་དང་པོའི་མིར་སྐྱེས་པ་ལྟ་བུའི་གསུང་ཡང་མི་འཐད་
དེ། ཁས་བླངས་དང་འགལ། གཞུང་དང་འགལ། ཐུག་པ་མེད་པའི་སྐྱོན། སྐབས་ཀྱི་དོན་མ་རྟོགས་པའི་སྐྱོན་བཞི་སྣང་བའི་ཕྱིར་རོ། །དང་པོ་ནི། དམ་ཚིག་རྡོ་རྗེ་སོགས་ཀྱིས་དང་པོའི་མགོན་པོས་རང་གིས་ཐུགས་ཀ་ནས་མི་བསྐྱོད་པ་སྤྲོས་ཏེ་རང་ལ་
ཐིམ་པས་སྤྲུལ་སྐུར་བསྒྱུར་བ་འགོག་པ་ན་བར་དོ་རང་གི་ཁུ་བས་རང་གི་ལུས་སྐྱེད་པ་མེད་པས་སྦྱང་གཞི་དང་མི་མཐུན་ནོ་ཞེས་སྨྲས་ནས་བསྲུང་འཁོར་གྱི་སྐབས་སུ་དང་པོའི་མགོན་པོ་ཡབ་ཡུམ་མཉམ་པར་སྦྱར་བའི་ཁུ་བ་ལས་མི་བསྐྱོད་པ་བསྐྱེད་ནས་རང་ལ་
བཅུག་པས་ཞེ་སྡང་རྡོ་རྗེ་བསྒྱུར་བར་འདོད་པ་ནི་རང་གི་ཚིག་ལ་ཅོ་འདྲི་བའོ། །གཉིས་པ་ནི། བསྲུང་འཁོར་བསྒོམས་པའི་འོག་ཏུ་སྣོད་བཅུད་འོད་གསལ་དུ་སྡུད་པ་ནི་སྣོད་ཞིག་པ་དང་སྦྱོར་བ་གསལ་བར་གསུངས་པས་བསྐལ་པ་དང་པོའི་མིར་སྐྱེ་རྒྱུ་ཤི་བ་དང་
སྦྱོར་བ་ནི་འབྲེལ་མེད་དོ། །གསུམ་པ་ནི། དེ་ལྟ་ཡིན་ན་བསྐལ་པ་དང་པོའི་མིར་སྐྱེ་རྒྱུའི་སེམས་ཅན་དེར་སྐྱེ་བའི་རྒྱུ་ལ་སོགས་པ་དང་ཡང་སྦྱར་དགོས་པར་འགྱུར་བས་ཐུག་པ་མེད་ལ་ཡེ་ཤེས་ཀྱི་ས་བསྒོམས་པ་དར་ལྷག་མོས་ཀྱི་བར་དུ་ཡང་བར་སྲིད་
6-2-50a


དང་སྦྱོར་དགོས་པར་འགྱུར་རོ། །བཞི་པ་ནི། ཆོས་མཐུན་སྦྱོར་བའི་ཡུལ་སྲིད་པ་འཇིག་ཆགས་ནི་སྣོད་བཅུད་འཇིག་ཆགས་གཉིས་སུ་ངེས་ཤིང་། དེའི་ཐོག་མ་སྣོད་འཇིག་པ་ནས་ཡེ་ཤེས་ཀྱི་ས་སྒོམ་པ་མན་ཆད་ལ་སྦྱར་
བས་ན་དེའི་གོང་དུ་སྦྱོར་མི་དགོས་པར་ཤིན་ཏུ་གསལ་བར་རྟོགས་ན་བསྲུང་འཁོར་དང་སྲིད་པ་ཆོས་མཐུན་སྦྱོར་བའི་ཚེགས་ཀྱིས་ཅི་ཞིག་བྱ། དེས་ན་སྒྲོན་གསལ་ལས། བསམ་གཏན་ཞེས་བྱ་བ་ལ་སོགས་པས་ནི་ལས་དང་པོ་པའི་དགེ་བའི་བྱ་བའི་ཡན་ལག་
ཏུ་གྱུར་པའི་བསྲུང་བའི་ཆོ་ག་གསུངས་པ་ཡིན་ཏེ། །ཞེས་གསུངས་པ་ལྟར་བསྲུང་འཁོར་ནི་སྲིད་པ་སྐྱེ་བའི་རིམ་པ་ལྟར་བསྒོམ་པའི་བསྐྱེད་རིམ་དངོས་གཞིའི་ཡན་ལག་གམ་སྔོན་འགྲོ་ཙམ་ཡིན་པས་དེ་དག་ལ་སྲིད་པའི་རིམ་པ་དང་ཆོས་མཐུན་སྦྱར་མི་དགོས་
སོ། །ཡང་བོད་ཀྱི་བླ་མ་དག་ཕྱག་རྒྱ་སྒྲུབ་པ་དང་། རྡོ་རྗེ་དང་པདྨ་བྱིན་གྱིས་བརླབས་ཏེ་རྗེས་སུ་ཆགས་པ་དང་། ལས་ལ་གནས་ཏེ་མཆོད་པ་བྱེད་པ་དང་། དཀྱིལ་འཁོར་རྒྱལ་མཆོག་སྐྱེད་པ་དང་། མཆོད་པ་ལ་སོགས་པའི་རིམ་གྱིས་དཀྱིལ་འཁོར་རྒྱལ་
མཆོག་སྒོམ་པ་དང་། སེམས་སྦྱང་བའི་ཕྱིར་ཕྲ་མོ་བསྒོམས་པས་དངོས་གྲུབ་འབྱུང་བ་རྣམས་ནི། རིམ་པ་བཞིན་རིགས་གཞན་གྱི་བུད་མེད་ལེན་པ་དང་། ཕོ་མོའི་དབང་པོ་སད་ནས་རྗེས་སུ་ཆགས་པ་དང་། ལས་ལ་གནས་ཏེ་སྒོ་གསུམ་ཚིམ་པ་
དང་། བུ་དང་བུ་མོ་སྐྱེད་པ་དང་། བུ་ཚ་གསོ་བ་དང་སྲུང་བའི་རིམ་གྱིས་ལུས་ཡོངས་སུ་རྫོགས་པ་དང་། བུ་དང་ཚ་བོ་དེ་དག་རང་གི་སེམས་སྦྱང་ཞིང་ཤེས་རབ་སྐྱེད་པའི་ཕྱིར་རིག་པའི་གནས་ལ་བསླབས་ནས་རང་གཞན་གྱི་དོན་གྲུབ་པ་དང་ཆོས་མཐུན་
6-2-50b


ལ། ཡང་འགའ་ཞིག་གིས་རྒྱལ་པོ་ལ་སོགས་པ་མཉེས་པར་བྱས་པས་འདོད་པའི་དོན་སྟེར་བ་ནི། སྔགས་ལ་གཞོལ་བས་སྔགས་འབུམ་ཕྲག་དང་སྦྱིན་སྲེག་གིས་ལྷ་མ་ཉེས་པར་བྱས་པས་དངོས་གྲུབ་འབྱུང་བ་དང་ཆོས་མཐུན་པར་འཆད་དོ། །སྤྱིར་མངོན་རྟོགས་
དངོས་གཞིའི་དོན་ནི་འདི་ཡིན་ཏེ་གང་དུ་འཚང་རྒྱ་བའི་གནས་དང་དེར་འཚང་རྒྱ་བའི་རྟེན་དང་གང་གི་ངོ་བོར་འཚང་རྒྱ་བའི་རིམ་པ་དང་སངས་རྒྱས་ནས་མཛད་པ་ཅི་མཛད་པ་སྟེ་བཞིའོ། །དེ་ལ་དང་པོ་ནི་ཡེ་ཤེས་ཀྱི་ས་དང་རྡོ་རྗེའི་ས་སྔོན་དུ་འགྲོ་བའི་གཞལ་ཡས་ཁང་ངོ་། །
གཉིས་པ་ནི་ལྷག་མོས་ཀྱི་ལྷའོ། །གསུམ་པ་ནི། ལྷག་མོས་འོད་གསལ་དུ་སྡུད་པའི་ཆོས་སྐུ་དང་དང་པོའི་མགོན་པོར་སྐྱེད་པའི་ལོངས་སྐུ་དང་དེ་རྡོར་སེམས་སྔོན་པོར་བསྒྱུར་བའི་སྤྲུལ་སྐུ་སྟེ་སྐུ་གསུམ་གྱི་ངོ་བོར་འཚང་རྒྱ་བ་ཡིན་ནོ། །དེ་ཡང་བསྐྱེད་རིམ་གྱི་སྐབས་
སུ་དངོས་པོ་ལ་དེ་ལྟར་མི་གནས་ཀྱང་དེ་དང་དེའི་ང་རྒྱལ་བྱེད་པས་ན་འདི་ཡན་ཆད་ཀྱིས་ཞིང་དག་ཅིང་སྐྱེ་འཆི་བར་དོ་གསུམ་སྦྱངས་པའི་སྐུ་གསུམ་ཐོབ་པའི་ལུགས་སུ་བྱེད་པས་སྣོད་དང་བཅུད་ཀྱི་སྐྱེ་འཆི་བར་དོ་གསུམ་དུ་མ་འདུས་པའི་སྦྱང་རྒྱུ་ཟུར་པ་མེད་པས་རིག་མ་
འདུ་བྱ་བ་མན་ཆད་ལ་ཆོས་མཐུན་སྦྱོར་བ་མ་མཛད་དོ། །ལེའུ་བརྒྱད་པའི་སྒྲོན་གསལ་ལས་ཕྱག་རྒྱ་འདུ་བྱས་པ་དང་སྙོམས་པར་ཞུགས་ནས་ལྷ་བསྐྱེད་པ་སྲིད་པ་སྐྱེད་པའི་རིམ་པར་གསུངས་པ་ནི་ཕ་མས་བུ་བསྐྱེད་པ་དང་འདྲ་བ་ཙམ་ཡིན་གྱི་སྦྱང་གཞི་དང་
འདྲ་བ་གཉིས་ཀ་ཚོགས་པའི་མཐུན་ཡུལ་སྟོན་པ་མིན་ནོ། །དེའི་ཕྱིར་རིག་མ་འདུ་བྱ་བ་མན་ཆད་རྣམས་ནི་སངས་རྒྱས་པའི་སྐབས་ཀྱི་མཛད་པ་དང་སྦྱར་གྱི་སྲིད་པའི་རིམ་པ་དང་མི་སྦྱར་ཏེ། སྔར་དྲངས་པའི་མདོ་བསྲེ་ནས་སྟོན་པས་འདོད་ཆགས་ཆེན་པོའི་ཚུལ་
6-2-51a


ལ་སྙོམས་པར་ཞུགས་པ་དེ་བཞིན་དུ་སྐྱེ་བཞིན་པ་ལ་གནས་པས་དང་པོའི་སྦྱོར་བ་བྱ་ཞེས་འབྲས་བུའི་སྐབས་ཀྱི་མཛད་པ་དང་ཆོས་མཐུན་སྦྱར་ལ་དེ་དང་མཐུན་པར་རྡོ་རྗེ་སེམས་དཔའི་སྒྲུབ་ཐབས་ལས་ཀྱང་འབྲས་བུའི་སྐབས་དང་སྦྱར་
གྱི་སྲིད་པའི་རིམ་པ་དང་མ་སྦྱར་བ་ལྟར་རོ། །དེ་ཡང་སྒྲུབ་ཐབས་དེ་དང་སྤྱོད་བསྡུས་ནས་གསུངས་པ་ལྟར་སྟོན་པས་དགའ་ལྡན་ནས་བབས་ཏེ། སྤྲུལ་སྐུའི་སྒོ་ནས་ཆགས་བྲལ་གྱི་སྤྱོད་པ་དང་ཕར་ཕྱིན་གྱི་སྤྱོད་པ་དང་འདོད་ཆགས་ཀྱི་སྤྱོད་པ་གསུམ་བསྟན་པའི་
སྤྱོད་པ་ཕྱི་མས་འདུལ་བའི་གདུལ་བྱའི་ཕྱིར་དུ་གཟུངས་དཀྱིལ་སྤྲུལ་ཞིང་དེ་རྣམས་ལ་དབང་བསྐུར་བའི་ཕྱིར་དུ་ལྷ་བཅུ་གསུམ་སྤྲུལ་བ་དེ་བཞིན་དུ། རྣལ་འབྱོར་པས་ཀྱང་སྤྲུལ་སྐུར་བསྒྱུར་བའི་དགོས་པ་སྒྲུབ་པ་ནས་མཛད་པ་གསུམ་པས་བྱེད་ལ་དེ་ཡང་རིག་མ་
འདུ་བྱ་བ་སོགས་སྔོན་དུ་བཏང་སྟེ་ལས་ལ་གནས་པར་བྱས་ནས་བྱང་ཆུབ་ཀྱི་སེམས་ལས་ལྷ་རྣམས་བསྐྱེད་ནས་སེམས་ཅན་གྱི་དོན་བྱེད་དེ་ལྷའི་སྐུ་སྤྲོ་ནས་དོན་མཛད་པ་སྐུའི་མཛད་པ་དང་འདྲའོ། །སེམས་བརྟན་པར་བྱ་བའི་ཕྱིར་ཕྲ་མོ་གཉིས་སྒོམ་པ་
དང་ལྷ་རྣམས་ཀྱི་ཐུགས་སྐུལ་བའི་ཕྱིར་དུ་སྔགས་བཟླས་པ་ནི་ཐུགས་ཀྱི་མཛད་པ་ནང་དུ་ཡང་དག་པར་འཇོག་པ་དང་གསུང་གི་མཛད་པ་ཆོས་སྟོན་པ་དང་འདྲའོ། །དངོས་ཀྱི་མཛད་པས་འདུལ་བ་མེད་པ་ན་མྱ་ངན་ལས་འདའ་ཚུལ་སྟོན་ཞིང་ཡོད་པ་ན་ཚང་མེད་
བཞིས་བསྐུལ་ནས་དེ་རྣམས་ལ་གཟུགས་ཀྱི་སྐུར་སྣང་ནས་དེ་དག་གི་ཡོན་གནས་མཛད་པ་བཞིན་དུ་དཀྱིལ་འཁོར་རྒྱལ་མཆོག་གི་གཙོ་བོ་ཡབ་ཡུམ་ཡང་བསྒོམ་བཟླས་སོགས་ཀྱི་བྱ་བ་མཛད་པའི་མཐར་ཞུ་བ་དང་དེ་ལ་ཚད་མེད་བཞིའི་ལྷ་མོའི་གླུས་
6-2-51b


བསྐུལ་བ་དང་དེའི་ངོར་བཞེངས་ནས་མཆོད་བསྟོད་བདག་གིར་མཛད་དོ། །འདི་ཁ་ཅིག་གིས་འབྲས་བུ་དང་གཞིའི་སྐབས་གཉིས་ལ་སྦྱར་བའི་སྔ་མ་ལེགས་མོད་ནའང་སྔར་བཤད་པ་ལྟར་བུ་ཚ་བོ་ལ་སོགས་པ་བསྐྱེད་ཅིང་རང་གཞན་གྱི་བྱ་བ་བྱས་པའི་མཐར་དུས་བྱས་
ནས་གཉེན་འབྲེལ་རྣམས་དུ་བ་དང་དེ་དག་ལ་ཆགས་པ་དང་ལས་ཀྱི་དབང་གིས་སྐྱེས་ནས་འདོད་ཡོན་ལོངས་སྤྱོད་པ་དང་སྦྱོར་བ་ནི་མི་འཐད་དེ། སྔར་བཤད་པའི་སྐྱེ་འཆི་བར་དོ་གསུམ་དང་སྦྱར་ནས་བསྒོམས་པས་སྦྱང་གཞི་སྦྱོང་བའི་རིགས་དེར་དེའི་སྦྱང་གཞི་
ཐམས་ཅད་འདུ་བས་དེ་ཙམ་གྱིས་ཆོག་པའི་ཕྱིར་ཏེ་གཞན་དུ་ན་སྦྱང་གཞི་དང་སྦྱོར་ཚུལ་ཐུག་པ་མེད་པ་བྱ་དགོས་པར་འགྱུར་རོ། །སྤྲུལ་པ་སླར་རང་ལ་སྡུད་པ་ནི་འབྲས་བུའི་སྐབས་སུ་མྱ་ངན་ལས་འདས་པའི་སྔོན་དུ་འོང་ཡང་འདིར་རྗེས་འཇུག་གི་དབང་དུ་
བྱས་པའོ། །རྣམ་པར་དགོད་པའི་རྣམ་པར་བཞག་པ་རིམ་པར་ཕྱེ་བ་སྟེ་ལེའུ་དང་པོའི་རྣམ་པར་བཤད་པའོ།། །།གཉིས་པ་སྐུའི་དཀྱིལ་འཁོར་གྱི་རྣམ་གཞག་རིམ་པ་ལ་གཉིས། ལུས་རྟེན་གྱི་དཀྱིལ་འཁོར་དུ་བསྒོམ་པ་དང་། བརྟེན་
པའི་དཀྱིལ་འཁོར་དུ་སྒོམ་པའི་རྒྱུ་འབྲས་བསྟན་པའོ། །དང་པོ་ནི། ད་ནི་རྣམ་གཞག་རིམ་པ་གཉིས་པ་རྒྱས་པར་ཉེ་བར་བསྟན་པར་བྱ་བའི་ཕྱིར་སྐུའི་དཀྱིལ་འཁོར་རྣམ་པར་གཞག་པར་བྱ་སྟེ་དེ་ལ་ཡང་གཉིས་ཡོད་པའི་དང་པོ་ཁོ་ནར་རྟེན་གྱི་སྐུ་དཀྱིལ་
བཤད་པར་བྱའོ། །དེ་ལ་ཕྱིའི་དཀྱིལ་འཁོར་ནི་ཤར་ནུབ་ཏུ་འདེབས་པའི་ཚངས་པའི་ཐིག་དང་པོ་ནས་བརྩམས་པ་སྟེ་དེ་ནས་བཟུང་སྟེ་གྲུ་བཞི་པ་དང་སྒོ་བཞི་པ་རུ་དཀྱིལ་འཁོར་གྱི་ཆ་རྣམས་རྣམ་པར་དབྱེ་བ་སྟེ་སོ་སོར་བགོས་པའི་གཞལ་ཡས་ཁང་ངོ་། །རྣལ་
6-2-52a


འབྱོར་པའི་ལུས་དེ་ལྟ་བུར་སྣང་བའི་སྐུའི་དཀྱིལ་འཁོར་རོ། །དེ་ལ་ཁུངས་དགོད་པ་ནི་དེ་སྐད་དུ་ཞེས་སོགས་ཏེ་རྒྱུད་ཕྱི་མ་ལས་དཀྱིལ་འཁོར་གསུམ་གསུངས་པའི་གསུམ་པའོ། །དེ་གསུམ་ནི་སྒྲོན་གསལ་ལས། དོན་དམ་
པའི་དཀྱིལ་འཁོར་དང་སྐུའི་དཀྱིལ་འཁོར་དང་ཕྱུང་བའི་དཀྱིལ་འཁོར་གྱི་ངོ་བོ་ཉིད་ཡིན་པས་ན་དཀྱིལ་འཁོར་གསུམ་སྟེ། །ཞེས་གསུངས་པ་ལྟར་རམ་ཡང་ན་བྷ་ག་ཉིད་དེའི་དཀྱིལ་འཁོར་དང་བྱང་ཆུབ་ཀྱི་སེམས་དཀྱིལ་འཁོར་ལ་ཀུན་རྫོབ་དང་དོན་དམ་པ་གཉིས་
སུ་བྱའོ། །རྒྱལ་བས་བྱིན་གྱིས་བྷ་ག་པདྨ་ཡིན་ལ་དེ་ཡང་སོ་སོར་རྟོག་པའི་ཡེ་ཤེས་ལོངས་སྐུ་དང་བྱང་ཆུབ་ཀྱི་བདག་ཉིད་ཅན་གྱི་སེམས་ཆོས་སྐུ་དང་འགྲོ་བའི་དོན་སྒྲུབ་པའི་སྤྲུལ་སྐུ་གསུམ་གྱི་སྙིང་པོ་ལེན་ཅིང་འཛིན་པ་ལ་དཀྱིལ་འཁོར་གསུམ་དུ་བཤད་ལ། ཐ་
ག་ནས་ཆོས་འབྱུང་གི་དང་པདྨ་ལ་གནས་པའི་བྱང་ཆུབ་ཀྱི་སེམས་ཡོངས་སུ་གྱུར་པའི་དང་ལུས་ལ་ཕྱག་རྒྱ་བཞིའི་དཀྱིལ་འཁོར་ཞེས་འཆད་དོ། །ལུས་རྟེན་གྱི་དཀྱིལ་འཁོར་དུ་སྒོམ་པ་མདོར་བྱས་སུ་མ་གསུངས་པས་འདི་ནི་དེའི་དགོངས་པ་ཁ་སྐོང་བའོ། །དེ་ཡང་རྡོ་
རྗེ་འཕྲེང་བའི་ལེའུ་རེ་བདུན་པ་ལས། ཟུར་བཞི་པ་ནི་མདུན་རྒྱབ་དང་། །གཡས་དང་གཡོན་གྱི་དབྱེ་བས་སོ། །ཞེས་སོགས་ཀྱིས་ལུས་ཀྱི་ཆ་གང་གཞལ་ཡང་ཁང་གི་ཆ་གང་དུ་སྒོམ་པ་རྣམས་རྒྱས་པར་གསུངས་པ་ལྟར་བྱའོ། །གཉིས་པ་ལ་ལྔ། ཕུང་པོ་ལ་
རིགས་ལྔ་དགོས་པའི་རྒྱུ་འབྲས་བསྟན་པ། ཁམས་ལ་ཡུམ་བཞི་དགོད་པའི་རྒྱུ་འབྲས་བསྟན་པ། དབང་པོ་དང་ཚིགས་དང་རྒྱུས་པ་ལ་སེམས་དཔའ་བརྒྱད་དགོད་པའི་རྒྱུ་འབྲས་བསྟན་པ། ཡུལ་ལ་སེམས་མ་ལྔ་དགོད་པའི་རྒྱུ་འབྲས་བསྟན་པ། ཡན་
6-2-52b


ལག་རྣམས་ལ་ཁྲོ་བོ་བཅུ་དགོད་པའི་རྒྱུ་འབྲས་བསྟན་པའོ། །དང་པོ་ནི། དགོད་པའི་གཞི་སྔར་བཤད་པ་དེ་ལྟར་གྱུར་པའི་རང་གི་ལུས་ཀྱི་དཀྱིལ་འཁོར་ལ་དགོད་ཚུལ་ཕུང་ཁམས་སྐྱེ་མཆེད་ཀྱི་རང་བཞིན་གྱི་དགོད་བྱ་ལྷ་རྣམས་དགོད་པའི་རྒྱུ་དང་འབྲས་བུ་གསུངས་པ་དེ་ལ་
ཞེས་སོགས་སོ། །རྒྱུ་ནི་སྐུའི་དཀྱིལ་འཁོར་སྒོམ་པ་ཡིན་ལ་དེའི་འབྲས་བུ་ནི་སྐབས་སོ་སོ་ནས་འབྱུང་བ་རྣམས་སོ། །དེ་ལ་གཟུགས་ཕུང་ནི་རྣམ་སྣང་ངོ་ཞེས་པ་ནས། སངས་རྒྱས་ལྔར་ནི་རབ་ཏུ་བསྒྲགས། །ཞེས་པའི་བར་གྱིས་ནི་ཕུང་པོ་ལྔ་ལ་རིགས་ལྔ་དགོད་
པའི་རྒྱུ་དང་། དེ་ལྟར་ཞེས་པ་ནས། འདོད་དང་ཐར་པ་རབ་སྒྲུབ་བྱེད། །ཅེས་པའི་བར་གྱིས་ནི་ཕུང་སོགས་ཀྱི་མཚན་ཉིད་ཤེས་ནས་ལྷ་དགོད་པའི་འབྲས་བུ་བསྟན་ནོ། །གཏི་མུག་ནས་དམ་ཚིག་གི་བར་ནི་རིམ་པ་བཞིན་རྣམ་སྣང་མི་བསྐྱོད་པ་འོད་དཔག་མེད་རིན་འབྱུང་
དོན་གྲུབ་སྟེ་ཕུང་པོ་ལྔའི་ངོ་བོར་གྱུར་པའི་རིགས་ལྔ་ཡིན་ལ་དེ་དག་བསྒོམས་པས་གདུལ་བྱ་རྣམས་ཀྱི་ཐར་པའི་མངོན་པར་འདོད་པ་དང་ཟག་མེད་ཀྱི་བདེ་བའི་ཐར་པ་རབ་ཏུ་སྒྲུབ་པར་བྱེད་དོ། །འདི་ཡང་བསྒོམས་པའི་ལམ་གྱི་འབྲས་བུར་མ་ཟད་ཀྱི་སྒོམ་པ་པོའི་ཕུང་པོ་དང་
ཁམས་རྣམས་ཀྱང་བྱང་ཆུབ་ཀྱི་རྒྱུར་འགྱུར་བར་གསུངས་པ་ལྟར་གཞན་ལ་ཡང་ཤེས་པར་བྱ་སྟེ་སྐུ་དཀྱིལ་བསྒོམས་པ་ཕྱིན་ཆད་ནས་དེའི་མཐུས་དེ་ལྟར་འགྱུར་བའོ། །གཉིས་པ་ནི། ལྷ་མོ་རྣམས་ཞེས་སོགས་ཀྱིས་མཚམས་སྦྱར་ནས་གཏི་མུག་དགའམ་ཞེས་པ་
ནས་རླུང་ནི་སྒྲོལ་མར་རབ་ཏུ་གྲགས། །ཞེས་པའི་བར་གྱིས་རྒྱུ་དང་། དེ་ལྟར་ཞེས་པ་ནས་རྩོལ་བར་འགྱུར་རོ་ཞེས་པའི་བར་གྱིས་འབྲས་བུ་བསྟན་ནོ། །གསུམ་པ་ནི། མིག་ཅེས་པ་ནས་གསུངས་པ་ཞེས་པའི་བར་གྱིས་མཚམས་སྦྱར་ནས། བཅོམ་ལྡན་འདས་ཞེས་
6-2-53a


པ་ནས་བཀོད་ཅེས་པའི་བར་གྱིས་རྒྱུ་དང་གཟུགས་ཞེས་པ་ནས་རྩལ་བར་འགྱུར་རོ་ཞེས་པའི་བར་གྱིས་འབྲས་བུ་བསྟན་ནོ། །ཐུགས་རྡོ་རྗེ་ནི་འདིར་རྡོ་རྗེ་འཆང་སྟེ་ས་སྙིང་ལ་སོགས་པ་རྣམས་དེ་ཉིད་ཀྱི་རྣམ་འཕྲུལ་ཡིན་པས་དེ་ཉིད་
མིག་ལ་བཀོད་པ་སྟེ་སྡོམ་འབྱུང་གི་ལེའུ་བཞི་པ་ལས། མིག་སོགས་རྣམས་ལ་བསྒོམ་བྱ་སྟེ། །མིག་གི་དབང་པོའི་རྣམ་ཤེས་ནི། །ཐུགས་ཀྱི་རྡོ་རྗེའི་རྣམ་འཕྲུལ་ཡིན། །གསུམ་གྱི་རང་བཞིན་རྣམ་དག་དོན། །འོད་གསལ་གྱི་ནི་གོ་འཕང་འགྱུར། །ཞེས་སོ། །
གཟུགས་གསུམ་ནི་རབ་འབྲིང་ཐ་མ་སྟེ་དེ་དག་ལ་ཆགས་ཐོགས་མེད་པར་འཇུག་པའི་རྡོ་རྗེའི་མིག་སྟེར་བ་ནི་རྣལ་འབྱོར་བའི་མིག་འོད་གསལ་བས་སྦྱངས་པ་ལས་ཡིན་ལ་མིག་ལ་ས་སྙིང་བསྒོམས་པས་ནི་མིག་འོད་གསལ་དུ་འཇུག་པར་འགྱུར་རོ། །དབང་པོ་ལྷག་
མ་རྣམས་ལ་ཡང་དེ་བཞིན་དུ་སྦྱར་རོ། །དེ་བཞིན་དུ་ཞེས་པ་སྔ་མ་ནི་ཐུགས་རྡོ་རྗེ་ཉིད་མིག་ལ་བཀོད་པ་ལྟར་རྣ་བ་ལ་ཡང་འགོད་པའི་དོན་ཡིན་ལ་དེ་བཞིན་དུ་ཞེས་པ་གཉིས་པ་ནི་འོད་གསལ་གྱིས་སྦྱངས་པ་གོ་བར་བྱེད་པའོ། །འཇུག་ཤེས་དྲུག་ནི་རྣམ་ཤེས་
ཚོགས་དྲུག་གོ། །ཡེ་ཤེས་གསུམ་ནི་སེམས་ཅན་རྣམས་ཀྱི་སྣང་མཆེད་ཐོབ་གསུམ་གྱི་ཤེས་པའོ། །ནང་གི་ཁམས་རྣམས་ནི་ཟིན་པའི་ས་ཆུ་མེ་རླུང་རྣམ་ཤེས་ཀྱི་ཁམས་ལྔ་ཡིན་ལ་གཅིག་ལ་གཅིག་བསྡུས་པ་ནི་སྔ་མ་རྣམས་ཕྱི་མ་ལ་ཐིམ་པའི་
མཐར་འོད་གསལ་དུ་ཞུགས་ཏེ་དེ་ལས་ལངས་པའི་མཐར་ལུགས་བཟློག་གི་སྣང་བ་གསུམ་རླུང་དང་བཅས་པ་སྐྱེ་བ་ལ་རབ་ཏུ་འཇུག་པ་སྟེ་ཞུགས་ནས་རྡོ་རྗེའི་སྐུ་སྒྲུབ་པར་འགྱུར་རོ། །སྒྲིབ་པ་མེད་པ་ནི་ཐགས་ཐོགས་མེད་པར་ཁམས་རྣམས་འོད་གསལ་
6-2-53b


དུ་འཇུག་པའོ། །འོད་གསལ་དུ་ཐམས་ཅད་བརྟན་པར་བྱ་བ་ནི་ཚིགས་ཐམས་ཅད་དེར་འཇུག་པའི་རྣམ་གྲངས་སོ། །བཞི་པ་ནི། བཅོམ་ལྡན་འདས་རྡོ་རྗེ་འཆང་དེ་ཉིད་གཟུགས་གསུམ་གྱི་རྣམ་པས་ཕྱི་རོལ་གྱི་ཡུལ་ལྟ་བུར་སྣང་བས་མིག་གི་དབང་པོ་ས་སྙིང་
ལ་བདེ་བ་སྩོལ་བའི་ལྷ་མོ་གཟུགས་རྡོ་རྗེའོ། །དེ་ལྟར་དུ་སྒྲ་རྡོ་རྗེ་སོགས་ཀྱང་ཁོང་དུ་ཆུད་པར་བྱ་སྟེ་དེ་ཉིད་སྒྲ་གསུམ་གྱི་རྣམ་པས་ཕྱི་རོལ་ལྟ་བུར་སྣང་བས་རྣ་བའི་དབང་པོ་ལ་བདེ་བ་སྩོལ་བའི་སྒྲ་རྡོ་རྗེའོ་ཞེས་སོགས་སུ་སྦྱར་རོ། །དབང་པོ་ལ་བཀོད་པའི་ས་སྙིང་
སོགས་དང་ལུས་ལ་བཀོད་པའི་ལྷ་མོ་རྣམས་ཐུགས་རྡོ་རྗེ་ཉིད་ཀྱི་རྣམ་འཕྲུལ་ཡིན་པར་སྒྲུབ་པའི་ཤེས་བྱེད་ནི་ཇི་སྐད་དུ་ཞེས་སོགས་ཏེ། ལོངས་སྤྱོད་པ་པོའི་སེམས་ཅན་ལྷར་བསྐྱེད་པར་བྱ་བའི་ལྷའི་རྣལ་འབྱོར་ཐམས་ཅད་དེ་བཞིན་གཤེགས་པ་དྲུག་པ་
རྡོ་རྗེ་སེམས་དཔའི་རྣལ་འབྱོར་ལས་གཞན་ན་མེད་པས་ན་ཁམས་གསུམ་པའི་ལོངས་སྤྱོད་ལྷའི་ལོངས་སྤྱོད་དུ་བསྐྱེད་པར་བྱ་བ་མ་ལུས་ཀུན་ཀྱང་རྡོ་རྗེ་སེམས་དཔའ་དེའི་ལོངས་སྤྱོད་ལས་གཞན་དུ་མེད་དེ་ཞེས་སངས་རྒྱས་ཐམས་ཅད་དང་མཉམ་པར་
སྦྱོར་བ་མཁའ་འགྲོ་མ་སྒྱུ་མ་བདེ་མཆོག་ལས་གསུངས་སོ། །དེས་ན་ལྷ་གཞན་ལ་ཡང་དེ་ལྟར་དེ་ལྟར་ཤེས་པར་བྱའོ། །ཡུལ་ལྔ་ལ་རྡོ་རྗེ་མ་ལྔ་དགོད་པའི་ཚུལ་འདིས་ལྷ་མོ་རྣམས་དགོད་པའི་རང་བཞིན་ཤེས་པས་དེ་ལྟར་སྒོམ་པ་ནི་རྒྱུ་ཡིན་ལ་དེ་ལ་བརྟེན་
ནས་ཡུལ་རྣམ་པར་དག་པར་བསྒྲུབས་པར་འགྱུར་བ་ནི་ཡུལ་རྣམས་འོད་གསལ་དུ་འཇུག་པར་འགྱུར་བ་སྟེ་འབྲས་བུའོ། །དབང་པོ་ལ་སེམས་དཔའ་དང་ཡུལ་ལ་སེམས་མ་དགོད་པའི་དོན་དེ་ཉིད་རྩ་རྒྱུད་དང་སྦྱོར་བ་ནི་ཚིག་རྐང་གཉིས་གཉིས་སོ། །སྔ་མ་
6-2-54a


རྣམས་མདོར་བྱས་དང་རྡོ་རྗེ་འཕྲེང་བའི་སྐུ་དཀྱིལ་གྱི་སྐབས་སུ་རྡོ་རྗེ་མ་ལྔ་དངོས་སུ་མ་བསྟན་པ་ལ་བརྟེན་ནས་ཡབ་ཀྱི་སྐུ་དཀྱིལ་ལ་དེ་རྣམས་མི་འགོད་པ་ཕྱིས་ཀྱི་མཁས་པ་དག་གིས་གཞུང་འདི་དང་སྒྲོན་གསལ་གྱི་
ལུང་གིས་འགོག་པ་ནི་ཤིན་ཏུ་ལེགས་སོ། །དེས་ན་འདིར་རྡོ་རྗེ་མ་ལྔ་འགོད་པར་གསུངས་པ་ནི་མདོར་བྱས་ཀྱི་མ་ཚང་བ་ཁ་སྐོང་བའི་རྣམ་གཞག་གོ། །མདོར་ན་ཞེས་སོགས་ཀྱི་རྩ་རྒྱུད་ཀྱི་ལུང་དེ་རྣམས་སྤྱོད་བསྡུས་སུ་ལུས་དབེན་གྱི་སྐབས་སུ་སྦྱར་ཏེ་
ལེའུ་བཅུ་བདུན་པའི་སྒྲོན་གསལ་ལས་ཀྱང་རྡོ་རྗེ་མ་ལྔ་མ་གཏོགས་པ་དེ་དང་འདྲ་བར་བཤད་དོ། །ལེའུ་དང་པོའི་སྒྲོན་གསལ་ལས་མདོར་ན་ཞེས་པའི་རྐང་པ་གཉིས་དང་རྡོ་རྗེའི་སྐྱེ་མཆེད་ཅེས་པའི་རྐང་པ་གཉིས་ནི་གླེང་གཞིའི་སྐབས་ཀྱི་འཁོར་དང་ཞིང་རྣམས་
རྡོ་རྗེ་འཆང་གི་སྐུའི་ཆ་ཤས་ཡིན་པའི་ཁུངས་སུ་མཛད་ལ་སློབ་དཔོན་འདིས་ལུས་དཀྱིལ་སྒོམ་པའི་ཁུངས་སུ་མཛད་དེ་དེ་རྣམས་ཀྱི་སོ་སོར་སྦྱོར་ཚུལ་དང་། ཁྱད་པར་དུ་ལུས་རྟེན་དང་བརྟེན་པའི་དཀྱིལ་འཁོར་དུ་སྒོམ་པའི་བློ་རྩེ་གཏོད་ལུགས་རྣམས་
ལེགས་པར་གཏན་ལ་དབབ་དགོས་པར་སྣང་ནའང་མངོན་རྟོགས་སྒོམ་པའི་སྒོམ་རིམ་ཉིད་བཤད་པའི་སྐབས་སུ་བབ་པར་སྣང་བས་དེར་བཤད་པར་བྱའོ། །ལྔ་པ་ནི། ཡན་ལག་ཅེས་པ་ནས་གསུངས་པ་ཞེས་པའི་བར་གྱིས་མཚམས་སྦྱར་ནས་ལག་
པ་གཡས་ལ་གཤིན་རྗེ་གཤེད། །ཅེས་པ་ནས་གནོད་མཛེས་རྒྱལ་པོ་རྣམ་པར་བསམ། །ཞེས་པའི་བར་གྱི་མདོར་བྱས་ཀྱི་གཞུང་དྲངས་པས་ནི་རྒྱུ་བསྟན་ལ། སྒྲུབ་པ་པོ་ཞེས་པ་ནས་བསྡིགས་པར་མཛད་དོ། །ཞེས་པའི་བར་གྱིས་ནི་འབྲས་བུ་
6-2-54b


བསྟན་ཏེ། དོན་ནི་ཡན་ལག་གི་གནས་བཅུར་ཁྲོ་བོ་བཅུ་བཀོད་ནས་བསྒོམས་པས་འབད་པ་སྟེ་ཐོགས་པ་མེད་པར་རང་གི་ལུས་ལས་དེ་འདྲ་བའི་ཁྲོ་བོ་བྱུང་ནས་རང་ལ་གནོད་པའི་བགེགས་ཕྱོགས་བཅུར་གནས་པ་རྣམས་འཇོམས་པའོ། །སྔར་བཤད་པ་འདིས་
བསྟན་པ་ནི་རྩ་རྒྱུད་ལས་གསུངས་ཏེ་ཁྲོ་བོ་ནི་གཤིན་རྗེ་གཤེད་ལ་སོགས་པའོ། །ཞེ་སྡང་ནི་མི་བསྐྱོད་པ་ཡིན་ལ་གནས་ནི་དེ་སྐྱེད་པའི་རྒྱུ་ཡི་གེ་ཧཱུཾ་སྟེ་དེ་ལས་ཁྲོ་བོ་རྣམས་སྐྱེས་པའོ། །གསོང་ལ་བརྩོན་པ་ནི་གདུག་པ་འདུལ་བའི་ལས་ཅན་ནོ། །སྒྲུབ་པ་མཆོག་གི་
ཆོས་ཅན་ནི་ཤིན་ཏུ་རྟུལ་ཞུགས་ཅན་གྱི་སྒྲུབ་པ་པོའོ། །གསོད་པའི་དོན་ནི་དྲག་ལས་ཏེ་ངེས་འདོད་པའི་དོན་སྒྲུབ་པར་བྱེད་པའོ། །སྐུ་དཀྱིལ་གྱི་ལྷ་རྣམས་ལུས་ཀྱི་ཆ་གང་ལ་དགོད་པ་ནི་རྣམ་གཞག་དང་པོའི་ཤིན་ཏུ་རྣལ་འབྱོར་གྱི་སྐབས་སུ་བབ་པ་ཡིན་མོད་ཀྱང་དེ་
ལྟར་བཀོད་པའི་འབྲས་བུ་སྐབས་འདིར་སྟོན་པ་ན་དེའི་ཡན་ལག་ཏུ་བསྟན་པ་ཙམ་མོ། །སྐྱེ་མཆེད་ལ་ས་སྙིང་སོགས་བཀོད་པ་ལ་བརྟེན་ནས་དེ་དག་མཐར་འོད་གསལ་དུ་འཇུག་པའི་འབྲས་བུ་གསུངས་པ་ནི་ཕུང་པོ་ལ་སོགས་པ་གཞན་ལ་ཡང་འདྲ་བས་ལུས་
དཀྱིལ་གྱི་ལྷ་རྣམས་ཀྱིས་ཕུང་སོགས་སྦྱོང་བར་གསུངས་པའི་དོན་ཡང་དེ་བཞིན་དུ་ཤེས་པར་བྱའོ། །དེའི་ཕྱིར་དེ་བཞིན་ཉིད་ལས་བྱང་ཆུབ་པ་བསྒོམ་པ་ན་སྔོན་དུ་ལྷ་རྣམས་ལུས་ལ་བཀོད་ནས་དེ་ནས་རྟེན་དེ་འོད་གསལ་དུ་འཇུག་པར་གསུངས་ཏེ་གཞིའི་
སྐབས་སུ་ཕུང་སོགས་མཐར་འཆི་བའི་འོད་གསལ་དུ་འཇུག་པ་ལམ་དུ་སློང་བའོ། །གཞིའི་སྐབས་སུ་ཕུང་སོགས་ཐིམ་པའི་རིམ་པ་ཇི་བཞིན་པའི་ལམ་ནི་རིམ་པ་གཉིས་པའི་སྐབས་མིན་པར་མི་སྐྱེ་ཡང་དེ་སྐྱེ་བ་ནི་སྔོན་དུ་རིམ་པ་དང་པོས་འདི་ལྟར་སྦྱངས་
6-2-55a


པ་ལ་ལྟོས་པས་ན་ལས་དང་པོ་ལ་རིམ་པ་དང་པོ་གལ་ཆེའོ། །མདོར་བྱས་ལས་སྐུའི་དཀྱིལ་འཁོར་གསུངས་པ་སྲིད་པ་སྐྱེ་རིམ་དང་སྦྱོར་བའི་རྣམ་གཞག་ནི་རྣམ་གཞག་དང་པོར་བསྟན་ཟིན་པས་ལེའུ་འདི་ནི་དེའི་སྐབས་ཀྱི་དཀྱུས་ཀྱི་
རྣལ་འབྱོར་འགའ་ཞིག་ཁ་སྐོང་བ་དང་དེ་ལྟར་སྒོམ་པའི་དགོས་པ་མཐའ་གཅོད་པའི་རྣམ་གཞག་གོ། །སྐུའི་དཀྱིལ་འཁོར་གྱི་རྣམ་གཞག་རིམ་པར་ཕྱེ་བ་སྟེ་ལེའུ་གཉིས་པའི་རྣམ་བཤད་དོ།། །།གསུམ་པ་ཕྱུང་བའི་དཀྱིལ་འཁོར་གྱི་རྣམ་
གཞག་རིམ་པ་ལ་གསུམ། ཕྱུང་བའི་དཀྱིལ་འཁོར་དངོས། ཕྱུང་བའི་རྟེན་གྱི་དཀྱིལ་འཁོར་ལུང་གིས་བསྒྲུབ་པ། དྲིས་ལན་གྱིས་དོགས་པ་བཅད་པའོ། །དང་པོ་ལ་བཞི། སྐུའི་དཀྱིལ་འཁོར་ལས་ཕྱུང་བའི་དཀྱིལ་འཁོར་བསྐྱེད་ཚུལ། འབྱིན་པའི་སྔགས་
ཀྱི་དོན་བཤད་པ། ཕྱུང་བའི་ལྷས་འཕྲིན་ལས་མཛད་ནས་རང་གནས་སུ་འཁོད་པ། དེ་དག་གི་ཕྱག་མཚན་དང་སྐུ་མདོག་ལ་སོགས་པ་བསྟན་པའོ། །དང་པོ་ནི། དེ་ལྟར་སྐུའི་དཀྱིལ་འཁོར་ལ་ལྷ་རྣམས་དགོད་པའི་རྒྱུ་དང་འབྲས་བུ་ཤེས་པའི་སྔགས་པས་
སྤྲུལ་པར་བྱ་སྟེ་ཞེས་སྦྱར་རོ། །གང་ན་ཕྱུང་བའི་རྟེན་དང་བརྟེན་པའི་དཀྱིལ་འཁོར་རོ། །གང་ལས་ཕྱུང་ན་པདྨར་བསྐྱེད་པ་རྣམས་ཐུགས་ཀར་དྲངས་ཏེ་དེ་ནས་ཕྱིར་འབྱིན་པ་དང་ལུས་ལ་བཀོད་པའི་ལྷ་རྣམས་ཐིག་ལེར་ཞུ་བ་རྡོ་རྗེའི་ལམ་ནས་པདྨར་ཕྱུང་ནས་
བསྐྱེད་པ་གཉིས་ཀ་སྐུའི་དཀྱིལ་འཁོར་ལས་ཕྱུང་བའོ། །ཚུལ་ཇི་ལྟར་སྤྲུལ་ན་འོག་ནས་འཆད་པའི་རིམ་པ་འདིས་སོ། །ཅི་ཞིག་གི་ཆེད་དུ་སྤྲུལ་ན་སྔར་བཤད་པ་ལྟར་རང་དོན་སྐུ་གསུམ་ཐོབ་པ་དེས་གཞན་སེམས་ཅན་གྱི་དོན་བསྒྲུབ་པའི་ཕྱིར་དུའོ། །སྒྲོན་
6-2-55b


གསལ་ལས་ཀྱང་། ལྷག་མ་དཀྱིལ་འཁོར་གྱི་མཆོག་དང་ལས་ཀྱི་མཆོག་གི་མཐར་ཐུག་པ་ནི་གཞན་གྱི་དོན་ཆེན་པོ་སྒྲུབ་པས་ན་སྒྲུབ་པ་ཆེན་པོ་སྟེ། །ཞེས་གསུངས་སོ། །འོ་ན་མདོ་བསྲེ་ལས་མཆོད་པ་ཡན་ཆད་རང་དོན་ཕུན་ཚོགས་ལ་སྦྱར་ཞིང་མི་བསྐྱོད་པ་
འབྱིན་པ་མན་ཆད་གཞན་དོན་ཕུན་ཚོགས་ལ་སྦྱར་བ་ཅི་ཡིན་སྙམ་ན་མདོ་བསྲེ་ལས་འདོད་ཆགས་ལ་སྤྱོད་པའི་སེམས་ཅན་རྣམས་ཀྱི་འདོད་པས་ཐར་པ་རབ་ཏུ་བསྟན་པར་བྱ་བའི་ཕྱིར་ཞེས་སོགས་སྔར་དྲངས་པ་ལྟར། སྔོན་བྱུང་ལ་སྟོན་པ་འདོད་ཆགས་
ཆེན་པོའི་ཚུལ་གྱི་ཏིང་ངེ་འཛིན་ལ་ཞུགས་པ་བཞིན་དུ་རྗེས་འཇུག་གིས་རིག་མ་ལ་སྙོམས་པར་ཞུགས་པ་ལ་བརྟེན་ནས་ཆགས་པ་ལམ་དུ་བྱས་ཏེ་རང་གི་དོན་སྒྲུབ་པ་ལ་དགོངས་ནས་རང་དོན་དུ་གསུངས་ལ། སྙོམས་པར་ཞུགས་པ་དེ་ཉིད་དཀྱིལ་འཁོར་
རྒྱལ་མཆོག་སྤྲུལ་པའི་ཡན་ལག་ཏུ་འགྱུར་བ་ལ་དགོངས་ནས་གཞན་དོན་སྒྲུབ་བྱེད་དུ་གསུངས་པས་མི་འགལ་ལོ། །དེ་ལྟར་ན་གཟུངས་དཀྱིལ་སྤྲུལ་པ་སྔ་མ་རྣམས་ཀྱིས་སྤྱོད་པའི་སྐབས་ལ་སྦྱར་བ་ཡང་རུང་མོད་ཀྱང་མདོ་བསྲེ་དང་རྡོ་རྗེ་སེམས་དཔའི་
སྒྲུབ་ཐབས་གཉིས་ཀ་ནས་དངོས་སུ་སྐབས་འདིར་སྦྱར་བ་ལྟར་སྦྱར་དགོས་ཤིང་། ཏིང་ངེ་འཛིན་དེ་ལ་དྲང་ངེས་གཉིས་ཀྱི་བཤད་པ་སྒྲོན་གསལ་ལས་མཛད་པའི་དྲང་དོན་གྱི་ཚུལ་འདིར་སྦྱར་ནས་དེ་ལས་ཏིང་ངེ་འཛིན་ཅི་སྐྱེད་པ་སོགས་ཤེས་པར་བྱའོ། །
དཀྱིལ་འཁོར་སྤྲུལ་པ་དེ་ལ་རིམ་པ་ནི་འདི་ཡིན་ཏེ་མི་བསྐྱོད་པའི་སྒྲུབ་པ་པོ་ཡིན་ན་སྨེ་ཤ་ཅན་གྱི་བུ་མོ་རིག་མར་བྱ་དགོས་པ་ལྟ་བུ་སྒྲུབ་པ་པོ་རང་རང་གི་རིགས་ཀྱི་བུ་མོ་སེམས་ལས་སྤྲོ་བ་སྟེ་ཡིད་ཀྱིས་སྤྲུལ་པའམ་ཡང་ན་རིགས་དེ་དང་དེའི་ཕྱི་རོལ་གྱི་
6-2-56a


བུ་མོ་བླངས་ལ་སྤྲུལ་པར་བྱའོ། །མདོར་བྱས་ལས་ཕྱི་རོལ་གྱི་བུ་མོ་ཙམ་ལས་མ་གསུངས་ཀྱང་མདོ་བསྲེ་དང་གཞུང་འདིར་ཡེ་ཤེས་ཀྱི་ཕྱག་རྒྱ་དང་གདམ་ང་ཅན་དུ་གསུངས་ཤིང་རང་གི་རིགས་ཀྱི་བུ་མོ་འབྱིན་པར་གསུངས་
པས་ཐོག་མར་རིག་མ་རང་དགའ་བའི་རྣམ་པ་ཅན་ཅིག་ཕྱུང་ནས་དེ་ནས་རེ་ག་རྡོ་རྗེ་མ་སོགས་ཀྱི་ལྷ་མོར་བསྐྱེད་དགོས་ཏེ་འབྱིན་པའི་གནས་ནི་སྙིང་ག་ནས་བྱ་བར་མདོ་བསྲེ་ལས་གསུངས་སོ། །དེ་ནས་སྒྲུབ་ཐབས་མདོར་བྱས་ལས་གསུངས་པའི་རིག་མ་འདུ་
བྱ་བ་དང་རྡོ་རྗེ་དང་པདྨ་འདུ་བྱ་བའི་རིམ་པས་ཡབ་ཡུམ་གྱི་དབང་པོ་གཉིས་མཉམ་པར་སྦྱོར་བར་བྱ་སྟེ་ལྷ་སོ་གཉིས་པོ་ཐམས་ཅད་ཀྱི་འཁོར་ལོ་བསྐྱེད་ནས་སྤྲོ་བར་བྱའོ། །དེ་ལ་སྔོན་དུ་གཞལ་ཡས་ཁང་བསྒྲུབས་ལ་དེ་ནས་ལྷ་བསྐྱེད་དེ་སྒྲུབ་པའི་ཚུལ་
ནི་མདོར་བྱས་ལས་གསུངས་པའི་རིམ་པས་བྱའོ། །དེ་ཡང་སའི་ཆ་གཉིས་བསྐྱེད་མི་དགོས་ཀྱི་ཐིག་ལེ་ལས་བྷྲུཾ་ཡིག་དང་དེ་ལས་གཞལ་ཡས་ཁང་གི་མཚན་ཉིད་རྫོགས་པར་བསྐྱེད་པའོ། །མདོ་བསྲེ་ལས། འབྱིན་པའི་སྐབས་སུ་ཕཊ་ཅེས་བརྗོད་
ལ་བྱང་ཆུབ་ཀྱི་སེམས་ཀྱི་རྡུལ་ཕྲ་རབ་དེ་བཞིན་གཤེགས་པ་ཐམས་ཅད་ལ་སོགས་པའི་འབྱུང་གནས་སུ་བསྒོམས་ལ་སྔར་བཤད་པའི་གཞལ་ཡས་ཁང་གི་དབུས་ན་གནས་པར་བྱའོ་ཞེས་གསུངས་པ་ནི། ཐིག་ལེ་རྡོ་རྗེ་ནས་ཕྱིར་འབྱིན་པའི་
ནུས་སུ་དེ་ལྟར་བྱས་ནས་དེ་ནས་དོན་གྲུབ་ཀྱི་ང་རྒྱལ་གྱིས་སྔགས་བརྗོད་པར་གསུངས་པས་དཀྱིལ་འཁོར་རྒྱལ་མཆོག་གི་ལྷ་རྣམས་གཞལ་ཡས་ཁང་དུ་གནས་ཚུལ་སྟོན་པ་མིན་པས་ལུང་དེས་གཞལ་ཡས་ཁང་སྐབས་འདིར་བསྐྱེད་མི་དགོས་
6-2-56b


པར་སྟོན་པ་མིན་ནོ། །དེས་ན་མདོར་བྱས་དང་མདོ་བསྲེ་ལས་གསར་དུ་གཞལ་ཡས་ཁང་བསྐྱེད་པ་མ་གསུངས་ཀྱང་གཞུང་འདིར་གསལ་བར་གསུངས་པས་དགོས་སོ། །ལྷ་བསྐྱེད་ཚུལ་ནི་ཐིག་ལེ་རྡོ་རྗེའི་ལམ་ནས་ཡུམ་གྱི་པདྨར་ཞུགས་པའི་བྱང་ཆུབ་ཀྱི་སེམས་
དང་འོག་ནས་འབྱུང་བ་ལྟར་སྔགས་ཀྱི་ཡིག་འབྲུའི་གཟུགས་ལས་བསྐྱེད་ཅིང་ཞེས་པའོ། །དེ་ནས་སྤྲུལ་ཚུལ་ནི་ཡུལ་གྱི་མཁའ་ནས་ཡབ་ཀྱི་ཐུགས་ཀར་དྲངས་ལ་བཛྲ་དྷྲི་ཀ་ལ་སོགས་པ་སོ་སོའི་འབྱིན་སྔགས་བརྗོད་དེ་ཐུགས་ཀ་ནས་ཕྱིར་སྤྲོ་བར་བྱའོ། །གཉིས་པ་ནི། 
ཕྱུང་བའི་དཀྱིལ་འཁོར་པའི་ལྷ་རྣམས་ཀྱི་འབྱིན་སྔགས་ཀྱི་དོན་བསྟན་པར་བྱ་སྟེ། དེ་བཞིན་ཉིད་ལས་བྱང་ཆུབ་པ་ལ་སོགས་པ་མངོན་བྱང་ལྔ་སྟོན་པ་སྟེ་མཚོན་པར་བྱེད་པའི་རྡོ་རྗེ་གཡས་ཀྱི་ཕྱག་དང་པོ་ན་བསྣམས་པས་ན་བཛྲ་དྷྲི་ཀ་སྟེ་རྡོ་རྗེ་འཆང་ངོ་། །རྡོ་རྗེ་འཆང་འདིས་
སེམས་ཅན་རྣམས་ཀྱི་ཉོན་མོངས་པ་ཞེ་སྡང་རྣམ་པར་སྦྱངས་ནས་སླར་བྱོན་ཏེ་སྔར་གྱི་རྡོ་རྗེ་འཆང་ཆེན་པོ་དང་ལྷན་ཅིག་གཉིས་སུ་མེད་པར་འདྲེས་པར་གྱུར་ཏེ་མི་བསྐྱོད་པ་དྲག་པོ་ཞེ་སྡང་རྡོ་རྗེའི་གཟུགས་ཀྱིས་དཀྱིལ་འཁོར་གྱི་དབུས་ན་བཞུགས་སོ། །ཁ་སྦྱར་སྦྱོར་བ་ནི་
ཕྱུང་བའི་མི་བསྐྱོད་པ་རྡོ་རྗེ་འཆང་དང་དབྱེར་མེད་དུ་འདྲེས་པ་བཤད་ཟིན་པས་རེག་རྡོ་རྗེ་མ་དང་ཞལ་སྦྱར་བའི་སྦྱོར་བས་བཞུགས་པ་ལ་བྱའོ། །བཛྲ་དྷྲི་ཀ་གི་སྔགས་ཀྱིས་ཕྱུང་བ་ནི་མི་བསྐྱོད་པ་ཡིན་ན་དེ་རྡོ་རྗེ་འཆང་དུ་ཇི་ལྟར་རིགས་སྙམ་ན། སྐྱོན་མེད་དེ་བཛྲ་ནི་རྡོ་རྗེ་ཡིན་
ལ་དྷྲི་ཀ་ནི་འཛིན་པའམ་འཆང་བ་ཡིན་པས་སྔགས་དེའི་སྒྲ་བཤད་རྒྱུ་མཚན་ཡོད་པའི་དབང་དུ་བྱས་ནས་རྡོ་རྗེ་འཆང་དུ་གསུངས་པ་ཡིན་གྱི་རིགས་དྲུག་པ་རྡོ་རྗེ་འཆང་ནི་མ་ཡིན་ནོ། །དེས་ན་གཞུང་ལས་རྡོ་རྗེ་འཆང་ཆེན་པོ་ཞེས་གསུངས་པ་ནི་དྲུག་པ་ཡིན་
6-2-57a


ལ་སྒྲ་བཤད་པའི་རྒྱུ་མཚན་ཡོད་པ་ནི་མི་བསྐྱོད་པ་སྟེ་དཔེར་ན་མཚོའི་ནང་གི་སྦལ་པ་ལ་མཚོ་སྐྱེས་ཀྱི་སྒྲ་བཤད་པའི་རྒྱུ་མཚན་ཡོད་ཀྱང་མཚོ་སྐྱེས་མིན་པ་བཞིན་ནོ། །དེ་བཞིན་དུ་ཞེས་པ་ནི་སེམས་ཅན་གྱི་ཉོན་མོངས་སྦྱངས་ནས་
སླར་བྱོན་ཏེ་རང་གི་གནས་སུ་བཞུགས་པ་སྔར་ལྟར་སྦྱོར་བའི་དོན་ནོ། །རྩིབས་བཅུ་གཉིས་པའི་ཆོས་ཀྱི་འཁོར་ལོས་ལྷའི་བུ་དང་ཕུང་པོ་དང་ཉོན་མོངས་པ་དང་འཆི་བདག་གི་བདུད་ལས་རྒྱལ་བས་ན་ཛི་ན་ཛིཀ་སྟེ་རྒྱལ་བ་རྒྱལ་ལོ། །རད་ན་ནི་སེམས་ཅན་གྱི་བསམ་
པ་ཐམས་ཅད་རྫོགས་པར་བྱེད་པའི་རིན་པོ་ཆེ་ཆ་དགུ་པའོ། །དྷྲི་ཀ་ནི་དེ་འཛིན་པས་ན་རིན་ཆེན་འཆང་ངོ་། །ཨཱ་ནི་མ་ལུས་པ་དང་རོ་ནི་འཁོར་བ་དང་ལི་ཀ་ནི་དེ་ལས་འདས་ཤིང་འགྲོ་བས་ན་འཁོར་བ་འདས་སོ། །ཆོས་རབ་ཏུ་རྣམ་པར་འབྱེད་པའི་མཚན་ཉིད་ནི་པྲཛྙཱ་
ཞེས་པ་ཤེས་རབ་སྟེ་དྷྲི་ཀ་ནི། དེ་འཛིན་པས་ན་ཤེས་རབ་འཆང་ངོ་། །མོ་ཧ་ར་ཏི་དག་དྭེ་ཥ་ར་ཏི་དང་རཱ་ག་ར་ཏི་དང་བཛྲ་ར་ཏི་བཞི་ནི་གཏི་མུག་དགའ་མ་ནས་རྡོ་རྗེ་དགའ་མ་ཞེས་པ་ཡིན་ལ་གཏི་མུག་ལ་སོགས་བཞི་ནི་རྣམ་སྣང་ནས་དོན་གྲུབ་ཀྱི་བར་ཡིན་ཞིང་དེ་དག་ལ་
དགའ་བས་ན་དེ་སྐད་དུ་བཏགས་སོ། །ཀྵི་ཏི་ནི་ས་སྟེ་ས་ལྟར་མི་གཡོ་བའི་ཏིང་ངེ་འཛིན་དེ་ཉིད་གརྦྷ་ནི་སྙིང་པོ་སྟེ་ནང་གི་བདག་ཉིད་གང་ལ་ཡོད་པ་དེ་ནི་ས་སྙིང་ངོ་། །བཛྲ་ནི་མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་རང་བཞིན་གྱི་རྡོ་རྗེ་སྟེ་དེ་ཕྱག་ན་འཆང་བར་
མཛད་པས་ན་བཛྲ་པཱ་ནི་སྟེ་ཕྱག་རྡོར་རོ། །ནམ་མཁའ་ནི་སྒྲིབ་པ་དང་བྲལ་བའི་ཡེ་ཤེས་ཏེ་དེ་ཉིད་སྙིང་པོ་ཡིན་པས་ན་ཁ་གརྦྷ་སྟེ་ནམ་སྙིང་ངོ་། །ལོ་ཀི་ཤྭ་ར་དང་མཉྫུ་ཤྲཱི་དང་སརྦ་ནི་ཝར་ན་བི་སྐཾ་བི་ནི་དང་ས་མནྟ་བྷ་དྲ་དག་མཻ་ཏྲི་ནི་འཇིག་རྟེན་དབང་ཕྱུག་ནས་བྱམས་
6-2-57b


པའི་བར་གྱི་འབྱིན་སྔགས་ཡིན་ལ་སྔགས་དེ་དག་གི་དོན་གཞན་ནི་གོ་སླ་ཞིང་སྐུའི་འོད་གསལ་ཞིང་ཡིད་དུ་འོང་བ་ནི་འཇམ་པའི་དོན། །བསྐུལ་བ་ནི་གཞན་གྱི་ཡིད་དོ། །རཱུ་པ་དག་ཤཔྟ་དང་གནྡྷ་དང་ར་ས་དང་སྤར་ཤ་རྣམས་ལ་བཛྲ་ཞེས་སྦྱར་བ་ནི་རྡོ་རྗེ་མ་
ལྔའི་འབྱིན་སྔགས་སོ། །རཱུ་པ་སོགས་ལྡ་ནི་བལྟ་བར་བྱ་བས་ན་གཟུགས་ཞེས་སོགས་ཡུལ་ལྔ་ཡིན་ལ་རྡོ་རྗེའི་སྒྲས་ནི་ཡུལ་དེ་དག་གི་ལྷ་མོའི་རང་བཞིན་གྱིས་གཟུགས་སོགས་དག་པར་བྱེད་པ་བསྟན་ནོ། །ཡ་མཱ་ན་ཏ་ཀྲྀད་དང་པྲ་ཛྙཱ་ན་ཏ་ཀྲྀད་དང་པདྨཱནྟཱ་
ཀྲྀད་དང་བིགྷྣན་ཏ་ཀྲྀད་ནི་ཤར་ལ་སོགས་པ་བཞིའི་ཁྲོ་བོ་རྣམས་ཀྱི་འབྱིན་སྔགས་སོ། །ཡ་མ་ནི་གཤིན་རྗེ་སྟེ་དམྱལ་བའོ། །ཁྲོ་བོའི་ཏིང་ངེ་འཛིན་ནི་གཤིན་རྗེ་གཤེད་ཀྱིའོ། །ཏ་ཀྲྀད་ནི་མཐར་བྱེད་པ་སྟེ་འཇིག་ཅིང་འཇོམས་པར་མཛད་པའོ། །འཆིང་བ་ནི་
ཉོན་མོངས་པའོ། །པདྨ་ལྟར་ནི་དེ་ཆུས་མ་གོས་པ་བཞིན་དུ་ཆགས་སོགས་ཀྱིས་མ་གོས་པའོ། །ཨ་ཙ་ལ་དང་ཊཀྐི་རཱ་ཛཱ་དང་ནཱི་ལ་དནྜ་དང་མ་ཧཱ་བཱ་ལ་ནི་མཚམས་ཀྱི་ཁྲོ་བོ་བཞིའི་འབྱིན་སྔགས་སོ། །འཇིག་རྟེན་གྱི་ཆོས་བརྒྱད་ནི་རྙེད་པ་དང་ལྐོག་ཏུ་
སྙན་པར་སྨྲ་བ་དང་བདེ་བ་དང་དངོས་སུ་བསྟོད་པ་བཞི་ལ་དམིགས་ནས་ཡིད་བདེ་བ་དང་། དེ་ལས་བཟློག་པ་བཞི་ལ་དམིགས་ནས་ཡིད་མི་བདེ་བ་སྐྱེ་བ་ཡིན་གྱི་རྙེད་པ་ལ་སོགས་པ་ནི་མ་ཡིན་ནོ། །དེ་དག་གིས་སེམས་བསྐྱོད་པ་ནི་ཙ་ལ་སྟེ་གཡོ་བ་ཡིན་
ལ་དེ་རྣམས་བཅོམ་པས་ན་ཨ་ཙ་ལ་སྟེ་མི་གཡོ་བའོ། །ཊཀྐི་ནི་འདོད་པ་སྟེ་འདིར་འདོ་པ་ལ་ཆགས་པའོ། །དེ་བསལ་ཞིང་དག་པར་བྱེད་བས་ན་རཱ་ཛཱ་སྟེ་རྒྱལ་པོའོ། །ནཱི་ལ་ནི་སྔོན་པོ་སྟེ་སྡིག་པའི་ལས་སོ། །དཎྜ་ནི་དབྱིག་པ་སྟེ་དེ་ཆད་པས་ཚར་
6-2-58a


གཅོད་པའོ། །དོན་དམ་པའི་སྟོབས་ཀྱིས་སེམས་ཅན་གྱི་ཉོན་མོངས་པ་འཇོམས་པས་ན་བཱ་ལ་ནི་སྟོབས་དང་མ་ཧཱ་ནི་ཆེན་པོ་སྟེ་སྟོབས་པོ་ཆེའོ། །ཨུཥྞཱི་ཥ་ཙཀྲ་ཝརྟི་དང་སུཾ་བྷ་རཱ་ཛཱ་ནི་སྟེང་འོག་གི་ཁྲོ་བོ་གཉིས་ཀྱི་འབྱིན་སྔགས་སོ། །
སེམས་ཅན་རྣམས་ལ་ཁམས་གསུམ་ལས་གྲོལ་བའི་ཡེ་ཤེས་སྩོལ་བས་ན་ཨུཥྞཱི་ཥ་སྟེ་གཙུག་ཏོར་དང་ཙཀྲ་ཝརྟི་ནི་འཁོར་ལོས་སྒྱུར་བའོ། །ཕྱོགས་བཅུའི་བགེགས་བཀུག་ནས་ཕུར་བུས་འདེབས་བས་ན་སུཾ་བྷ་རཱ་ཛཱ་སྟེ་གནོད་མཛེས་རྒྱལ་པོའོ། །གསུམ་
པ་ནི། ལྷ་ཞེས་པ་ནས་གྱུར་ཏོ། །ཞེས་པའི་བར་གྱིས་ནི་འབྱིན་སྔགས་དེ་དག་གིས་ཕྱུང་བའི་ལྷ་དང་དེའི་མཛད་པ་སོགས་སྟོན་ཏེ། ལྷ་གྲངས་ནི་སོ་གཉིས། །ངོ་བོ་ནི་སྤྲུལ་པའི་སྐུ་ཞལ་ཕྱག་ནི་གསུམ་དང་དྲུག་པ་མཚན་མའི་ཕྱག་རྒྱ་སྟེ་རྡོ་རྗེ་སོགས་ཀྱི་ཕྱག་
མཚན་ཕྱག་ན་བསྣམས་པ་སྤྲུལ་ལོ་ཞེས་སྦྱར་རོ། །གང་ལས་སྤྲུལ་པ་ནི་བྱང་ཆུབ་ནས་གཟུགས་ཀྱིས་ཞེས་པའི་བར་རོ། །སྐུ་དཀྱིལ་ལས་བྱུང་བ་ནི་ཐུགས་ཀ་ནས་ཕྱིར་འཐོན་པའོ། །འབད་པ་མེད་པ་ནི་ཐོགས་པ་མེད་བའོ། །ལྷ་དེ་དང་དེའི་ཏིང་ངེ་འཛིན་གྱིས་
སེམས་ཅན་གྱི་ཉོན་མོངས་སྦྱོང་བ་ལ་དུག་གསུམ་སྨོས་པ་ནི་གཙོ་བོ་བརྗོད་པའོ། །དེ་ལྟར་མཛད་པའི་དགོས་པ་ནི་རང་གི་བསོད་ནམས་ཀྱི་ཚོགས་འཕེལ་བའི་དོན་དུ་སྟེ་སེམས་ཅན་གྱི་ཁམས་མཐའ་མེད་པ་ལ་དམིགས་ནས་ལྷའི་སྐུ་དེ་སྙེད་སྤྲོས་ཏེ་སྦྱངས་པས་
བསོད་ནམས་ཀྱང་དེ་སྙེད་འཐོབ་པའོ། །འདིར་མདོ་བསྲེ་ལས། དེ་བཞིན་དུ་རྣམ་པར་སྣང་མཛད་ལ་སོགས་པའི་དཀྱིལ་འཁོར་གི་ལྷ་རྣམས་ཕྱུང་ནས་དེ་རྣམས་ཀྱིས་གཏི་མུག་ལ་སོགས་པ་ལ་རྗེས་སུ་དགའ་བའི་སེམས་ཅན་རྣམས་ཡང་དག་པར་སྦྱངས་
6-2-58b


ནས་བསྡུས་ཏེ་ཡེ་ཤེས་ཀྱི་འཁོར་ལོ་བཅུག་ལ་སླར་བཀུག་སྟེ། གནས་ཇི་ལྟ་བ་བཞིན་དུ་གནས་པར་བྱས་ལ་ཕྱག་རྒྱ་བཞིས་རྒྱས་བཏབ་པ་འདི་ནི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་ཏེ་གཉིས་པོའོ། །ཞེས་ལྷ་རྣམས་ལ་ཕྱག་རྒྱ་བཞིས་རྒྱས་གདབ་
པར་གསུངས་སོ། །བཞི་པ་ནི། རྡོ་རྗེ་ནས་དྲིལ་བུའི་བར་དྲུག་ནི་གྲངས་བཞིན་དུ་མི་བསྐྱོད་པ་རྣམས་སྣང་རིན་འབྱུང་འོད་དཔག་མེད་དོན་ཡོད་གྲུབ་པ་རྡོ་རྗེ་འཆང་སྟེ་དེ་བཞིན་གཤེགས་པ་དྲུག་གི་མཚན་མར་གསུངས་ཏེ་དེ་ཉིད་མཚོན་ཆ་ལྟ་བུར་ཕྱག་ན་བསྣམས་སོ། །རྡོ་
རྗེ་ནི་ཐུགས་མཚོན་པའི་མཚན་མ་ཡིན་པས་མི་བསྐྱོད་པའི་མཚན་མ་ཡིན་ལ་དྲིལ་བུ་ནི་ཆོས་ཕུང་བརྒྱད་ཁྲི་བཞི་སྟོང་གི་སྒྲ་འབྱུང་བ་མཚོན་པས་སྟོན་པའི་གཙོ་བོ་རྡོ་རྗེ་འཆང་གི་མཚན་མའོ། །ལྷ་རྣམས་ཀྱི་སྐུ་མདོག་ནི་དང་པོ་ལྷའི་རྣལ་འབྱོར་ལ་སློབ་པའི་དུས་སུ་མདོར་
བྱས་ནས་གསུངས་པ་ལྟར་སྔོ་སེར་ལ་སོགས་པ་སྣ་ཚོགས་ཡིན་ལ། ཕྱིས་ནུས་པ་རྙེད་ནས་ལས་སྒྲུབ་པའི་སྐབས་སུ་ནི་ཞི་བ་ལ་ཐམས་ཅད་དཀར་པོ་དང་རྒྱས་པ་ལས་སེར་པོ་དང་སོགས་ཀྱིས་བསྡུས་པ་དབང་ལ་དམར་པོ་དང་དྲག་པོ་ལ་ནག་པོ་སྟེ་ལས་ཀྱི་དབྱེ་བ་ཡིས་ཁ་
དོག་སོ་སོར་དབྱེ་བར་བྱའོ། །མདོག་ཨི་ནྡྲ་ནཱི་ལ་ལྟ་བུའོ་ཞེས་པ་ནི་གཙོ་བོའི་ཁ་དོག་ལ་དོགས་པ་གཅོད་པ་སྟེ་དེ་ཡང་མདོར་བྱས་ལས། ཞེ་སྔར་རྡོ་རྗེའི་གནས་ལ་བཞུགས། ཨི་ནྡྲ་ནཱི་ལའི་འོད་འབར་བ། །ཞེས་མཐིང་ནག་གི་འོད་འབར་བར་གསུངས་པ་ནི་སྐུ་ལས་འཕྲོས་
པའི་འོད་ཀྱི་ཁ་དོག་སྟོན་པ་ཡིན་ནམ་སྙམ་ན། སྐུ་མདོག་མཐིང་གར་སྟོན་པ་ཡན་གྱི་འཕྲོས་པའི་འོད་ཀྱི་ཁ་དོག་མིན་ཏེ་སྐུ་ལ་རིན་པོ་ཆེ་ཁ་དོག་ཐམས་ཅད་ཀྱི་རྒྱན་དང་ལྡན་པའི་ཕྱིར་སྔོ་སེར་ལ་སོགས་པའི་འོད་སྣ་ཚོགས་འཕྲོ་བས་སོ། །གཉིས་པ་ནི། ཕྱུང་བའི་
6-2-59a


དཀྱིལ་འཁོར་འདི་ཉིད་བཤད་པའི་ཕྱིར་དུ་འདུས་པའི་རྩ་བའི་རྒྱུད་ལས་དེ་ནས་ཞེས་པ་ནས་གསུངས་སོ་ཞེས་པའི་བར་རོ། །སྔོན་བྱུང་ལ་མི་བསྐྱོད་པ་བྷ་ག་ལ་དཀྱིལ་འཁོར་སྤྲུལ་པ་ཡིན་པ་དེ་རྗེས་འཇུག་གི་ཉམས་ལེན་ལ་སྦྱར་
ན་མི་བསྐྱོད་པ་ནི་རྣལ་འབྱོར་བཞིས་བསྒྲུབས་པའི་རྡོ་རྗེ་འཆང་གི་ང་རྒྱལ་འཛིན་པའི་སྒྲུབ་པ་པོའོ། །བཙུན་མོ་ནི་འདུ་བྱས་པའི་རིག་མ་ཡིན་པ་བྷ་ག་ནི་དེའི་པདྨ་སྟེ། བཙུན་མོ་ལེགས་སྦྱངས་ཕྱག་རྒྱ་སྟེ། །ལེགས་སྦྱངས་པདྨ་བྷ་ག་ཡིན། །ཞེས་སྟོན་པ་དང་གནས་
ཕུན་ཚོགས་སྤྱི་དོན་དུ་བཤད་པའི་སྐབས་སུ་སྒྲོན་གསལ་དུ་དྲངས་པ་དང་འདྲའོ། །དཀྱིལ་འཁོར་རྡུལ་དང་བྲལ་བ་བྱིན་གྱིས་བརླབས་པ་ནི་ཡུམ་གྱི་པདྨའི་ནང་དུ་དྲི་མ་མེད་པའི་དཀྱིལ་འཁོར་གྲུ་བཞི་སྒོ་བཞི་ལ་སོགས་པ་སྤྲུལ་པའོ། །དེ་སུའི་དཀྱིལ་འཁོར་
ཡིན་ན་དམ་ཚིག་ཆེན་པོའི་ཡིན་ལ། དེ་ཡང་སྒྲོན་གསལ་ལས་རྡོ་རྗེ་འཆང་ཆེན་པོ་ལ་བཤད་པ་ནི་ལྷག་མོས་ཀྱི་དཀྱིལ་འཁོར་ལ་དགོངས་པ་འདིར་ནི་གཙོ་བོ་འཕོ་བའི་དབང་གིས་མ་ངེས་པས་མི་བསྐྱོད་པ་ལ་སོགས་པ་གང་བབ་པའི་གཙོ་བོ་ལ་བྱའོ། །དེའི་
མཚན་ཉིད་ནི་ཤེལ་གྱི་ནང་གི་གཟུགས་བཞིན་དུ་གསལ་བ་སྟེ་ཕྱི་ནས་ཀྱང་ལྷ་རྣམས་མཐོང་བའོ། །ཨིནྡྲ་ནཱི་ལ་ལ་སོགས་པ་ཁ་དོག་སྣ་ཚོགས་པའི་གཟུགས་ཀྱིས་ཀུན་ཏུ་རྒྱས་པ་སྟེ་ཁྱད་པར་དང་ལྡན་པ་དང་སངས་རྒྱས་སྤྲིན་གྱིས་ཁྱབ་པ་ནི་ཕྱུང་བའི་དཀྱིལ་
འཁོར་གྱི་ལྷ་རྣམས་ཀྱིས་ཁྱབ་པ་ལ་སྒྲོན་གསལ་ལས་གསུངས་ཤིང་སྤྲོས་པའི་དཀྱིལ་འཁོར་གྱི་ལྷ་ཞེས་ཏ་ཐཱ་ག་ཏ་རཀྵི་ཏས་བཤད་དོ། །སྒྲོན་གསལ་དུ་ལྷག་མོས་ཀྱི་དཀྱིལ་འཁོར་ལ་གསུངས་པ་དང་། གཞུང་འདིར་པདྨར་དཀྱིལ་འཁོར་སྐྱེད་པའི་ཁུངས་
6-2-59b


སུ་མཛད་པ་གཉིས་ཀ་དོན་གྱི་ཕྱོགས་རེ་ལ་དགོངས་པར་བྱས་ན་དགོངས་པ་མཐུན་ནོ། །གཞལ་ཡས་ཁང་གི་ཕྱོགས་བཅུར་གནས་པའི་ཁྲོ་བོའི་འོད་ཟེར་གྱི་ཚོགས་མང་པོ་འཕྲོ་ཞིང་འཁྲུགས་པ་དང་གསལ་བའི་དཀྱིལ་འཁོར་ཏེ་ཟླ་བའི་གདན་ལ་སོགས་པ་རྣམས་
དང་ལྡན་པ་ནི་དེ་བཞིན་གཤེགས་པ་ཀུན་གྱི་གནས་དཀྱིལ་འཁོར་རོ། །ཚིགས་སུ་བཅད་དེ་དག་ནི་སྒྲོན་གསལ་ནས་བཀྲལ་བ་ལྟར་འདིར་ཡང་བཤད་པས་ཆོག་པར་སྣང་བས་བཤད་པ་ཡིན་ནོ། །མདོར་བྱས་དང་མདོ་བསྲེ་ལས་ཡུམ་གྱི་པདྨར་རྟེན་གྱི་དཀྱིལ་འཁོར་
སྐྱེད་པ་མ་བཤད་པས་སློབ་དཔོན་འདིས་བཤད་པ་ལ་ཁུངས་ཅི་ཞིག་ཡོད་སྙམ་པའི་དོགས་པ་བསལ་བའི་ཕྱིར་དུ། བཙུན་མོའི་བྷ་ག་ལ་རྟེན་གྱི་དཀྱིལ་འཁོར་སྐྱེད་པ་རྩ་རྒྱུད་ལས་གསལ་བར་གསུངས་པ་དྲངས་པ་ཡིན་པས་ཕྱུང་བའི་རྟེན་གྱི་དཀྱིལ་འཁོར་གྱི་
ཁུངས་སུ་ཤེས་པར་བྱའོ། །ཕྱུང་བའི་བརྟེན་པའི་དཀྱིལ་འཁོར་གྱི་ལྷ་གྲངས་སོ་གཉིས་ཡིན་པར་སྒྲུབ་པ་ནི་འོག་ནས་སྟོན་ལ་འབྱིན་སྔགས་ཀྱིས་ཕྱུང་ནས་མཛད་པ་མཛད་དེ་སླར་གནས་སུ་འཁོད་པ་ལ་ཁུངས་འགོད་ན་ནི་ལེའུ་དང་པོའི་ལྷ་བཅུ་གསུམ་གྱི་དཀྱིལ་
འཁོར་གསལ་བར་གསུངས་པས་སྒྲུབ་པར་རིགས་ཀྱི་བརྟེན་པའི་ལྷའི་རྣམ་གཞག་ཤིན་ཏུ་མི་གསལ་བའི་བསྡུས་པའི་དཀྱིལ་འཁོར་གྱི་གཞུང་གིས་སྒྲུབ་པར་མི་རིགས་སོ། །དེས་ན་བླ་མ་ཁ་ཅིག་གིས་རྟེན་དང་བརྟེན་པའི་དཀྱིལ་འཁོར་གཉིས་བྱས་ནས་ལུང་
སྒྲུབ་པ་མི་རིགས་ཤིང་ཁྱད་པར་དུ་རྟེན་གྱི་དཀྱིལ་འཁོར་ལྷག་མོས་ཀྱི་སྔོན་དུ་སྐྱེད་པ་ལ་བྱེད་པ་ནི་དོན་མིན་ཏེ་དེ་ལུང་གིས་བསྒྲུབས་པས་ཕྱུང་བའི་དཀྱིལ་འཁོར་སྐྱེད་པ་ལ་ཅི་ཡང་མི་ཕན་པའི་ཕྱིར་རོ། །འདི་ཡན་ཆད་རིག་མ་འདུ་བྱ་བ་མན་ཆད་ནི་
6-2-60a


མདོར་བྱས་ལས། ཆོ་གའི་སྦྱོར་བ་འདི་ཡིས་ནི། །ཕྱག་རྒྱ་བསྒྲུབ་པ་བརྩམ་པར་བྱ། །ཞེས་པ་ནས་ས་ཡི་འོག་ཏུ་དེ་བཞུགས་སོ། །ཞེས་པའི་བར་གྱི་རྣམ་གཞག་གོ། །གསུམ་པ་ལ་བཞི། ཕྱག་རྒྱ་བཞིས་ལྷའི་སྐུ་རྒྱས་གདབ་བ་ལ་དྲིས་
ལན་གྱིས་དོགས་པ་བཅད་པ། །འདུས་པའི་ལྷ་རྣམས་ཞལ་གསུམ་པར་བཤད་པ་ལ་དྲིས་ལན་གྱིས་དོགས་པ་བཅད་པ། དཀྱིལ་འཁོར་གྱི་ལྷ་གྲངས་མི་མཐུན་པ་དྲིས་ལན་གྱིས་དོགས་པ་བཅད་པ། སྒྲུབ་པ་པོའི་ལུས་ལ་ལྷ་བཀོད་པ་ལ་དྲིས་ལན་གྱིས་དོགས་
པ་བཅད་པའོ། །དང་པོ་ལ་གཉིས། དྲི་བ་དང་། ལན་ནོ། །དང་པོ་ནི། སློབ་མས་གསོལ་པ། གལ་ཏེ་འདུས་པའི་རྒྱུད་འདི་ལ་ལག་པའི་ཕྱག་རྒྱ་འཆིང་བ་མེད་ན་ཇི་ལྟར་ན་ཕྱག་རྒྱ་བཞེས་རྒྱས་བཏབ་པའི་ལྷའི་སྐུ་སྐྱེད་པར་འགྱུར་ཏེ་མི་འགྱུར་རོ། །ཞེས་དྲིས་པ་སྟེ། དཀྱིལ་
འཁོར་རྒྱལ་མཆོག་གི་ལྷ་རྣམས་བསྐྱེད་པ་ན་ཕྱག་རྒྱ་བཞིས་རྒྱས་འདེབས་པར་བཤད་པ་དང་ལག་པའི་ཕྱག་རྒྱ་མེད་པ་གཉིས་འགལ་ཏེ། དམ་རྒྱ་དང་ལས་རྒྱ་དང་ཕྱག་ཆེན་ལ་ལག་བའི་ཕྱག་རྒྱ་འཆིང་དགོས་པས་སོ་སྙམ་དུ་བསམས་པའོ། །གཉིས་པ་ནི། དེའི་
ལན་སློབ་དབོན་གྱི་བཀའ་སྩལ་པ། །མཚན་ལ་སོགས་པའི་སངས་རྒྱས་ཀྱི་ཡོན་ཏན་མ་ལུས་པས་བརྒྱན་པའི་གཞིར་གྱུར་པའི་ལྷའི་སྐུ་ནི་ཕྱག་རྒྱ་ཆེན་པོའོ། །བཙུན་མོ་ནི་དམ་ཆིག་གི་ཕྱག་རྒྱའོ། །ཧཱུཾ་ལ་སོགས་པའི་སྔགས་ཀྱི་ཡི་གེ་རྣམས་ནི་ཆོས་ཀྱི་
ཕྱག་རྒྱའོ། །ལྷ་རྣམས་ཀྱི་གཟུགས་སྣ་ཚོགས་ཀྱིས་སེམས་ཅན་ཐམས་ཅད་ཀྱི་དོན་བྱེད་ཅིང་སྒྲུབ་པའི་འཕྲིན་ལས་ནི་ལས་ཀྱི་ཕྱག་རྒྱའོ། །གལ་ཏེ་བཙུན་མོ་དམ་ཚིག་གི་ཕྱག་རྒྱ་ཡིན་ན་རིགས་ལྔ་དང་ས་སྙིང་སོགས་ལྔ་ལ་ཕྱག་རྒྱ་བཞིས་རྒྱས་གདབ་པ་ཡོད་དུ་
6-2-60b


ཆུག་ཀྱང་ལྷ་ཕོ་གཞན་རྣམས་དང་ལྷ་མོ་དགུ་ལ་ཕྱག་རྒྱ་བཞིས་རྒྱས་གདབ་པ་མེད་པར་འགྱུར་བས་ལྷ་སོ་གཉིས་པོ་ཐམས་ཅད་ལ་ཕྱག་རྒྱ་བཞིས་རྒྱས་འདེབས་པ་མི་འཐད་ལ་གཞན་ཡང་ཕྱག་རྒྱ་བཞིས་རྒྱས་འདེབས་པ་ནི་ལྷ་སྐྱེད་པའི་རིམ་པ་དེ་བཞི་ལས་མི་འདའ་
བའི་ཚུལ་གྱིས་སྐྱེད་པ་ཡིན་ན་ལྷ་མོ་རྣམས་ལྷ་དེ་དང་དེ་སྐྱེད་པའི་ཐབས་སུ་ཇི་ལྟར་འགྱུར་ཞེ་ན། དེ་ལྟར་ཡིན་ན་བདེན་མོད་ཀྱང་སྐྱོན་མེད་དེ་བཙུན་མོ་ནི་ལྷ་མོ་ལ་མི་བྱེད་ཀྱི་མཚན་མའི་ཕྱག་རྒྱ་ཕྱག་མཚན་ལ་བྱེད་པའི་ཕྱིར་རོ། །དེ་ལྟར་ཡང་དེ་ནས་ལས་ཀྱི་ཆོ་ག་ནི། །
མཐོང་བས་ཕྱག་རྒྱ་དགོད་པར་བྱ། །ཞེས་པའི་ལེའུ་བཞི་པའི་སྒྲོན་གསལ་ལས། ཕྱག་རྒྱ་ནི་ཆོས་ཀྱི་ཕྱག་རྒྱ་དང་མཚན་མའི་ཕྱག་རྒྱ་དང་ཕྱག་རྒྱ་ཆེན་པོ་དག་གསུམ་སྟེ་ཡི་གེ་ཧཱུཾ་ལ་སོགས་པ་ནི་ཆོས་ཀྱི་ཕྱག་རྒྱའོ། །རྡོ་རྗེ་ལ་སོགས་པ་ནི་མཚན་མའི་ཕྱག་རྒྱའོ། །
མི་བསྐྱོད་པ་ལ་སོགས་པའི་ལྷའི་འཁོར་ལོ་ནི་ཕྱག་རྒྱ་ཆེན་པོའོ། །ཞེས་གསུངས་པ་བཞིན་ནོ། །སྐུ་དང་གསུང་དང་འཕྲིན་ལས་གསུམ་ཕྱག་རྒྱ་གཞན་གསུམ་དུ་བཤད་པའི་བླའི་ཤུགས་ཀྱིས་ཀྱང་ཐུགས་མཚོན་པའི་ཕྱག་མཚན་དམ་རྒྱར་ངེས་པར་བྱ་དགོས་
སོ། །འོ་ན་ཕྱག་མཚན་མི་སྨོས་པར་བཙུན་མོའི་མིང་གིས་སྟོན་པ་ཅི་ཡིན་སྙམ་ན། སྒྲོན་གསལ་ལས། རྡོ་རྗེ་བཙུན་མོ་ནི་ཤེས་རབ་སྟེ། །ཞེས་སྟོང་པ་ཉིད་དང་དབྱེར་མེད་པའི་ཤེས་རབ་ལ་བཙུན་མོར་གསུངས་ཤིང་དམ་རྒྱ་ནི་ཐུགས་ཀྱི་གསང་བ་ཡིན་
པས་དེ་མཚོན་བྱེད་ཕྱག་མཚན་ལ་ཡང་བཙུན་མོའི་སྒྲས་བསྟན་ནོ། །མཁས་པ་ཁ་ཅིག་རྒྱུད་གཞན་ལས་བཙུན་མོ་ཕྱག་མཚན་གྱི་ཚུལ་དུ་སྦས་པར་གསུངས་པ་ལྟར་ཕྱག་མཚན་དམ་རྒྱར་འཆད་དོ། །དེ་ལྟར་ན་ལྷ་སོ་གཉིས་རེ་རེ་ཡང་ཡིག་འབྲུ་
6-2-61a


ལས་ཕྱག་མཚན་དང་དེ་ལས་སྐུ་རྫོགས་ཏེ་འགྲོ་བའི་དོན་མཛད་པའི་འཕྲིན་ལས་དང་བཞིའི་རིམ་པ་ལས་མ་འདས་པར་སྐྱེད་ཅིང་དེ་ཉིད་ཀྱང་ཕྱག་རྒྱ་བཞིས་རྒྱས་འདེབས་པའི་དོན་ཡིན་པས་ན་ཕྱག་རྒྱ་བཞིས་རྒྱས་བཏབ་ནས་ལྷའི་སྐུ་སྐྱེད་པ་
དང་། ལག་པའི་ཕྱག་རྒྱ་འཆིང་བ་མེད་པ་གཉིས་ལ་འགལ་བ་ག་ལ་ཡོད། དེ་ལྟ་བུའི་ཕྱག་རྒྱ་བཞིའི་རྒྱས་འདེབས་ནི་ཕྱག་རྒྱ་བཞིའི་རྒྱས་བཏབ་པའི་ལྷའི་སྐུ་ཇི་ལྟར་སྐྱེད་ཅེས་ལྷ་སྐྱེད་པའི་རིམ་པ་ལ་ཕྱག་རྒྱ་བཞི་འོང་ཚུལ་དྲིས་པའི་ལན་ཡིན་ལ། སྤྱིར་ནི་ལྷ་སྐྱེད་པ་
གང་ལ་སྐུ་དང་ཕྱག་དང་ཕྱག་མཚན་དང་སྐུ་ལ་འགོད་པའི་ཡིག་འབྲུ་དང༌དེ་རྣམས་ཀྱི་མཛད་པ་བཞི་སྣང་བ་ཐམས་ཅད་ལ་ཕྱག་རྒྱ་བཞིས་རྒྱས་བཏབ་པའི་དོན་ཚང་བར་བྱ་དགོས་པ་འདྲའོ། །འདི་ནི་གཙོ་ཆེར་དཀྱིལ་འཁོར་རྒྱལ་མཆོག་ལ་རྩོད་པ་སྤོང་བ་ཡིན་ལ་མངོན་རྟོགས་ཀྱི་
སྐབས་གཞན་འགའ་ཞིག་གིའང་རྩོད་སྤོང་དུ་འགྲོའོ། །གཉིས་པ་ལ་གཉིས། །དྲི་བ་དང་ལན་ནོ། །དང་པོ་ནི། སློབ་མས་གསོལ་པ། རྩ་བའི་རྒྱུད་དེ་ཁོ་ན་ཉིད་བསྡུས་པ་དང་སོགས་ཀྱི་སྒྲས་བསྡུས་པ་བཤད་པའི་རྒྱུད་རྡོ་རྗེ་རྩེ་མོ་དང་དཔལ་མཆོག་ལ་སོགས་པའི་
རྣལ་འབྱོར་ཀྱི་རྒྱུད་དང་གཉིས་ཀའི་རྒྱུད་རྣམ་སྣང་མངོན་བྱང་སོགས་ལས་ནི་ལྷ་རྣམས་ཞལ་གཅིག་པར་རབ་ཏུ་གྲགས་པ་སྟེ་བཤད་ན། གསང་བ་འདུས་པ་འདིར་ཅིའི་ཕྱིར་ལྷ་ཐམས་ཅད་ཞལ་གསུམ་པ་ལྟ་བུར་སྣང་བར་འགྱུར་ཞེས་པ་སྟེ་རྒྱུད་གཞན་གཉིས་
ལས་དཀྱིལ་འཁོར་པའི་ལྷ་རྣམས་ཞལ་གཅིག་པ་དང་རྒྱུད་འདི་ལས་དཀྱིལ་འཁོར་པའི་ལྷ་ཐམས་ཅད་ཞལ་གསུམ་པར་བཤད་པའི་ཞལ་གྱི་གྲངས་མི་འདྲ་བའི་རྒྱུ་ཅི་ཡིན་ཞེས་འདྲི་བའོ། །ཞལ་གཅིག་པ་ནི་ཕལ་ཆེ་བའི་དབང་དུ་བྱས་ཀྱི་མ་ངེས་ཏེ་དུམ་བུ་དང་
6-2-61b


པོར་གཙོ་བོ་ཞལ་བཞི་པར་གསུངས་པ་ལྟ་བུའོ། །གཉིས་པ་ནི། སློབ་དཔོན་གྱིས་ལན་བཀའ་སྩལ་པ། འདུས་པའི་ལྷ་ཞལ་གསུམ་པར་བཤད་པ་འདིའི་དོན་འདུས་པའི་བཤད་རྒྱུད་དགོངས་པ་ལུང་སྟོན་ཞེས་བྱ་བའི་རྒྱུད་ཀྱི་ལེའུ་བཅུ་གཉིས་པ་ལས་རྡོ་རྗེ་ཐལ་མོའི་ངེས་
དོན་བཤད་པའི་སྐབས་ལས་གསུངས་སོ་ཞེས་སྦྱར་རོ། །ཇི་ལྟར་གསུངས་སྙམ་ན། གང་ཞིག་ཅེས་སོགས་ཏེ། ད་ལྟ་འགྱུར་བའི་རྒྱུད་ན་ལག་པ་གཡོན་པ་ཞེས་སོགས་རྐང་པ་བརྒྱད་ཆད་ནས་མི་སྣང་ལ་རྐང་པ་དང་པོ་བཞི་ཡང་གསལ་བར་མི་སྣང་ངོ་། །ལྷག་མ་རྣམས་
ནི་རིམ་པ་འདི་ཇི་ལྟ་བ་བཞིན་མི་སྣང་ཡང་སྟོད་སྨད་ཀུན་བསྒྲིགས་ན་ཚང་ཙམ་སྣང་ངོ་། །དེ་ལ་ལྷ་དེ་རྣམས་ལ་མཆོག་དམན་མེད་ཀྱང་རྒྱུད་དེ་དག་ཏུ་ཐབས་དང་ཤེས་རབ་དང་དེ་གཉིས་དབྱེར་མེད་པ་སྒྲུབ་པའི་ལམ་ཡོངས་སུ་རྫོགས་པ་སྟོན་མི་སྟོན་གྱི་སྒོ་ནས་དཀྱིལ་འཁོར་
པའི་ལྷ་རྣམས་ཞལ་གསུམ་རྫོགས་མ་རྫོགས་སུ་བཤད་དོ། །དེ་འཆད་པ་ན་མདོར་བསྟན་པ་ནི། གང་ཞིག་ཕྱིའི་བདག་ཉིད་ཀྱི་རྟོག་པ་དང་ནང་གི་བདག་ཉིད་ཀྱི་རྟོག་པ་དང་ཕྱི་ནང་དེ་ཉིད་གཉིས་ཀའི་རྟོག་པ་རྣམས་འོད་གསལ་དུ་དག་ནས་རོ་གཅིག་ཏུ་སོང་བ་ནི་གཟུང་
འཛིན་གཉིས་སུ་མེད་པར་བཤད་པ་སྟེ་དེ་ནི་གསུམ་པོ་དེའི་དེ་ཉིད་ཆེན་པོ་ཡིན་ནོ། །དེ་རྒྱས་པར་འཆད་པ་ན་ཕྱིའི་དེ་ཉིད་སྟོན་པ་ནི། ལག་པ་གཡོན་པའི་མཐེའུ་ཆུང་དང་ཐ་མ་དེའི་ལྟག་སྟེ་གོང་མ་སྲིན་ལག་ནས་མཐེ་བོང་གི་བར་ནི་རིམ་པ་བཞིན་དུ་གཟུགས་ནས་རེག་བྱའི་
བར་ཡིན་པར་གཟུང་ངོ་། །ཡུལ་དེ་རྣམས་དངོས་པོ་མེད་པ་འོད་གསལ་དུ་སྦྱོར་བས་དེ་ཁོ་ནའི་དོན་རྣམ་པར་འབྱེད་པའི་མཚན་ཉིད་ཅན་གྱི་ཤེས་རབ་ནི་ཆོས་ཀྱི་སྐུ་དང་དེ་བཞིན་ཉིད་དང་གཉིས་སུ་མེད་པ་ཞེས་པའི་མིང་གིས་བཤད་དོ། །ནང་གི་དེ་ཉིད་སྟོན་པ་ནི་མི་བསྐྱོད་
6-2-62a


པ་ནས་རྣམ་སྣང་གི་བར་གྱི་སྒྲས་མཚོན་པའི་མིག་ལ་སོགས་པའི་དབང་པོ་ལྔ་ནི་རིམ་པ་བཞིན་དུ་ལག་པ་གཡས་པའི་མཐེའུ་ཆུང་ནས་མཐེ་བོང་གི་བར་ཡིན་པར་གཟུང་ངོ་། །དེ་རྣམས་དངོས་པོ་མེད་སྦྱོར་ཞེས་སོགས་ནི་འདིར་ཡང་སྦྱར་
ཏེ་འདྲ་བའི་ཕྱིར་རོ། །འོ་ན་ཡུལ་དང་དབང་པོའི་སྒྲས་ཐད་ཀར་བཤད་པས་ཆོག་མོད་ལག་པ་གཡས་གཡོན་གྱི་སོར་མོ་དང་རིགས་ལྔའི་སྒྲས་བསྟན་ནས་ཅི་བྱ་སྙམ་ན། དགོངས་པ་ལུང་སྟོན་ལས། རྡོ་རྗེ་ཐལ་མོའི་དེ་ཉིད་འདི། །ལུང་བསྟན་བྱ་ཡིས་དེ་ཉོན་ཅིག །ཅེས་
གསུངས་པའི་རྡོ་རྗེ་ཐལ་མོའི་ངེས་དོན་གཞུང་འདི་རྣམས་ཀྱིས་འཆད་པ་ཡིན་ལ་དེ་ལྟ་ན་གཡོན་པ་ཤེས་རབ་ཀྱི་ཕྱོགས་ཡིན་པས་རྡོ་རྗེ་མ་ལྔའི་ངོ་བོའི་གཟུགས་སོགས་དང་གཡས་པ་ཐབས་ཀྱི་ཕྱོགས་ཡིན་པས་རིགས་ལྔའི་ངོ་བོའི་དབང་པོ་ལ་བཤད་དོ། །གཉིས་
ཀའི་དེ་ཉིད་སྟོན་པ་ནི། གཉིས་ཀ་ཞེས་པ་ནི་ལག་པའི་དབང་དུ་བྱས་ན་གཡས་གཡོན་གྱི་སོར་མོ་གཉིས་ཀ་ཡིན་ལ་དེའི་མཚོན་དོན་གྱི་དབང་དུ་བྱས་ན་ཡུལ་དང་དབང་པོ་གཉིས་ཀ་ལ་བརྟེན་ནས་འབྱུང་བའི་རྣམ་པར་ཤེས་པའོ། །གཅིག་ཏུ་སྦྱར་བ་ཡང་ལག་པའི་
དབང་དུ་བྱས་ན་གཡས་གཡོན་གྱི་སོར་མོ་ཕན་ཚུན་བསྣོལ་བ་རྒྱུད་གཞན་ལས་རྡོ་རྗེ་ཐལ་མོར་གསུངས་པ་དེ་ཡིན་པ་དེའི་མཚོན་དོན་གྱི་དབང་དུ་བྱས་ན་ཡུལ་དབང་རྣམ་ཤེས་གསུམ་འོད་གསལ་དུ་རོ་གཅིག་པར་སྦྱར་བའོ། །དེ་ལྟར་བྱས་ན་ལག་པའི་སོར་མོ་
གཡས་གཡོན་རེ་རེ་བ་དང་གཉིས་ཀས་ནི་འོད་གསལ་དུ་གཞུག་རྒྱུ་གསུམ་མཚོན་ལ། སོར་མོ་རྣམས་གཤིབས་ཏེ་ཕན་ཚུན་བསྣོལ་བས་ནི་དེ་གསུམ་འོད་གསལ་དུ་བཅུག་པ་མཚོན་ཏེ་ངེས་དོན་གྱི་རྡོ་རྗེ་ཐལ་མོའོ། །དེ་ལྟ་བུའི་ཐལ་མོ་འདི་ན་ཡུལ་ཡུལ་
6-2-62b


ཅན་རོ་གཅིག་ཏུ་འདྲེས་པ་གཅིག་ཡིན་ཀྱང་དེ་ཉིད་གསུམ་དང་སྐབས་གསུམ་དུ་བརྟགས་པ་སྟེ་དེ་དག་ཏུ་རྣམ་གཞག་བྱས་པ་ཡིན་ནོ། །འདི་ནི་འོད་གསལ་གྱི་དབང་དུ་བྱས་པའི་རྡོ་རྗེ་ཐལ་མོའོ། །ད་ནི་ཟུང་འཇུག་གི་རྡོ་རྗེ་ཐལ་མོ་བཤད་པར་བྱ་སྟེ། ཡང་རྡོ་རྗེ་ཐལ་མོ་ནི་རྡོ་རྗེ་
སེམས་དཔའ་རིགས་དྲུག་པའི་གོ་འཕང་མཆོག་ཡིན་ནོ། །ཇི་ལྟར་ཞེ་ན་ཤེས་རབ་དོན་དམ་འོད་གསལ་དང་ཐབས་ཀུན་རྫོབ་སྒྱུ་མའི་སྐུ་གཉིས་ཕན་ཚུན་དུ་དབྱེར་མི་ཕྱེད་པར་སྦྱོར་བས་ན་བདེན་གཉིས་ཟུང་འཇུག་སྟེ་སྒྲོན་གསལ་ལས་ཡན་ལག་དྲུག་པ་ཏིང་ངེ་འཛིན་གྱི་
ཡན་ལག་ཟུང་འཇུག་ལ་བཤད་པའི་སྐབས་སུ་ཐབས་ཤེས་སྦྱོར་བ་བདེན་གཉིས་སྦྱོར་བའི་ཟུང་འཇུག་ལ་བཤད་པ་ལྟར་རོ། །དེ་འདྲ་བའི་བདེན་གཉིས་ཟུང་འཇུག་གི་ཐལ་མོ་སྦྱར་བ་ཙམ་གྱིས་ནི་སངས་རྒྱས་ཐམས་ཅད་དེ་དེ་བཞིན་གཤེགས་པ་ཀུན་གྱི་བདག་ཉིད་
རྡོ་རྗེ་འཆང་ཡང་དག་པར་འགུགས་པ་སྟེ་ཐོབ་པར་བྱེད་དོ། །དགོངས་པ་ལུང་སྟོན་ལས། ཐལ་མོ་བཅིངས་པ་ཙམ་གྱིས་ཀྱང་། །སངས་རྒྱས་ཐམས་ཅད་ཉིད་ཐོབ་འགྱུར། །ཞེས་སོ། །དེ་ལྟར་ན་ལག་པ་གཡས་པའི་སོར་མོ་ནི་ཀུན་རྫོབ་བདེན་པ་ཐབས། གཡོན་པའི་
སོར་མོ་ནི་དོན་དམ་བདེན་པ་ཤེས་རབ། དེ་གཉིས་གཤིབས་ཏེ་ཕན་ཚུན་བསྣོལ་བ་ཡི་བདེན་གཉིས་ཟུང་དུ་འཇུག་པ་ཡིན་པས་རྡོ་རྗེ་ཐལ་མོའི་ངེས་དོན་སྔ་མ་ནི་ལམ་གྱི་སྐབས་ཡིན་ལ་འདི་འབྲས་བུའི་སྐབས་ཡིན་པས་ཐལ་མོ་མཐར་ཐུག་གོ། །སྔ་མའི་སྐབས་
སུ་སོར་མོ་གཡས་གཡོན་རེ་རེ་བ་དང་གཉིས་ཀ་ནི་གཉེན་པོས་དག་པར་བྱ་བའི་སྤང་བྱ་ཡིན་པ་འདིར་ནི་དེ་རྣམས་ཐོབ་བྱའི་དོན་ལ་བྱ་དགོས་པས་ཁྱད་པར་ཤིན་ཏུ་ཆེའོ། །ཐལ་མོ་དེ་ལ་གསུམ་ཚན་རྣམས་གནས་པར་སྟོན་པ་ནི། །སྐྱབས་གསུམ་ནས་སངས་
6-2-63a


རྒྱས་མཉེས་པའི་བར་ཏེ་དེ་ཉིད་འདིར་ནི་ཐལ་མོར་གནས། །ཞེས་པ་ནི་རེ་རེའི་མཐར་སྦྱར་རོ། །སྐྱབས་གསུམ་ནི། རྒྱུད་རྡོར་ཕྲེང་ལས། སངས་རྒྱས་ལོངས་སྤྱོད་རྫོགས་པའི་སྐུ། །དམ་པའི་ཆོས་ནི་ཆོས་ཀྱི་སྐུ། །དགེ་འདུན་སྤྲུལ་པའི་
སྐུར་ནི་འགྱུར། །དེ་ནི་སྐུ་གསུམ་བདག་ཉིད་ཅན། །ཞེས་གསུངས་པ་ལྟར་རོ། །དེ་ཉིད་གསུམ་ནི་སྔར་བཤད་པ་ལྟར་རམ་ཐབས་དང་ཤེས་རབ་དང་གཉིས་ཀའི་དེ་ཉིད་དོ། །སྡོམ་འབྱུང་འགྲེལ་པར་སྐུ་གསུང་ཐུགས་ཀྱི་དེ་ཉིད་གསུམ་ལ་བཤད་དོ། །སྐུ་གསུམ་
ནི་དགོངས་པ་ལུང་སྟོན་ལས། དངོས་པོ་མེད་པའི་དེ་ཉིད་འདི། །རྟེན་འབྱུང་ཆོས་ཞེས་བྱ་བ་ཡིན། ལོངས་སྤྱོད་རྫོགས་པ་བསྡུས་ཏེ་གྱུར། །སྤྲུལ་པ་བསམ་མི་ཁྱབ་ཆོས་ཅན། །ཞེས་གསུངས་པ་དོམ་དམ་ཆོས་སྐུ་ཀུན་རྫོབ་སྤྲུལ་སྐུ་དབྱེར་མེད་ལོངས་སྐུའོ། །
རྣམ་ཐར་གསུམ་ནི་སྟོང་པ་ཉིད་མཚན་མ་མེད་པ་སྨོན་པ་མེད་པའི་སྒོ་གསུམ་མོ། །ཞལ་གསུམ་ནི་འདིར་སྐབས་ཀྱི་དོན་ཡིན་ཏེ་དེ་ཡང་གཡས་ཞལ་ཐབས་ཡིན་པས་ཀུན་རྫོབ། གཡོན་ཞལ་ཤེས་རབ་ཡིན་པས་དོན་དམ་དེ་གཉིས་གང་ལ་སྦྱར་བའི་རྩ་
ཞལ་ནི་བདེན་གཉིས་དབྱེར་མི་ཕྱེད་པའོ། །དེས་ན་འདུས་པ་ལས་ཟུང་འཇུག་གི་སྐུ་སྒྲུབ་པའི་ལམ་རིམ་པ་དང་པོ་དང་རིམ་པ་གཉིས་པའི་དབེན་གསུམ་དང་སྒྱུ་མ་དག་འོད་གསལ་རྣམས་ཡོངས་སུ་རྫོགས་པར་སྟོན་པས་དེའི་ལྷ་རྣམས་ཞལ་གསུམ་པར་བཤད་
དོ། །ཞལ་གསུམ་དུ་འོང་བའི་རྒྱུ་མཚན་འདི་ནི་འདུས་པ་ལ་ངེས་པ་སྟེར་བའི་གནད་ཆེན་པོར་སྣང་ངོ་། །མདོག་གསུམ་ནི་ནག་དཀར་དམར་བ་དང་སེར་ནག་དཀར་བ་དང་ལྗང་ནག་དཀར་བའི་ལྷའི་སྐུ་མདོག་ཐམས་ཅད་ལ་བྱའོ། །སྦྱོར་བ་གསུམ་ནི་དང་པོ་
6-2-63b


སྦྱོར་བ་སོགས་གསུམ་དང་དམ་ཚིག་གསུམ་ནི་ལྷ་དང་སྔགས་དང་ཕྱག་རྒྱའམ་རྡོ་རྗེ་དང་དྲིལ་བུ་དང་ལྷའམ་སྡོམ་པའི་ཚུལ་ཁྲིམས་ལ་སོགས་པ་གསུམ་ལ་སྡོམ་འབྱུང་འགྲེལ་པར་བཤད་དེ་རྡོ་རྗེ་ཐུགས་ཀྱི་དང་དྲིལ་བུ་གསུང་གི་དང་ལུས་ལྷར་གནས་ལ་ཕྱག་རྒྱའི་
དམ་ཚིག་གསུམ་ལ་བཤད་པ་འཐད་དམ་སྙམ་མོ། །འདི་བོད་ཀྱི་བླ་མ་རྣམས་སྦྱོར་བ་གསུམ་ནི་རིང་རྒྱུ་དབེན་པ་གསུམ། དམ་ཚིག་ནི་འོད་གསལ་དང་གསུམ་ནི་ཉེ་རྒྱུ་ལུགས་བཟློག་གི་སྣང་བ་གསུམ་ལ་བྱས་ནས་ཁ་དོག་གསུམ་དུ་འོང་བའི་རྒྱུ་མཚན་དུ་སྦྱོར་
བ་ནི་དོན་མིན་ཏེ་གསུམ་ཚན་འདི་རྣམས་ཐམས་ཅད་ཟུང་འཇུག་གི་ཐལ་མོ་ལ་ཚང་བར་སྟོན་པའི་སྐབས་ཡིན་པས་སོ། །སྣང་མཆེད་ཐོབ་གསུམ་གྱི་ཚེ་ཟླ་ཉི་མུན་པ་གསུམ་གྱི་འོད་དང་ཁ་དོག་འདྲ་བ་འབྱུང་བར་གསུངས་པ་ལ་ཡང་འཁྲུལ་བར་མི་བྱ་སྟེ་དེ་ལྟར་ན་ནག་
དཀར་དམར་བའི་ཁ་དོག་གསུམ་ལ་རྒྱུ་མཚན་བསྟན་པར་འགྲོའི་འདུས་པའི་ལྷའི་ཁ་དོག་ཐམས་ཅད་ལ་རྒྱུ་མཚན་མ་བསྟན་པར་འགྱུར་བའི་ཕྱིར་རོ། །དེས་ན་ཐར་གསུམ་གྱིས་ཞེས་པ་དང་གསུམ་སྦྱོར་བས་ཞེས་བྱེད་ཚིག་གསུངས་པ་ནི་དེ་ཉིད་འདིར་ནི་ཐལ་མོར་གནས་ཞེས་
པའི་རྒྱུ་མཚན་དུ་བྱའོ། །ཁམས་གསུམ་ནི་སྤྱོད་བསྡུས་སུ་ཟུང་འཇུག་གི་མིང་གི་རྣམ་གྲངས་སུ་འཇིག་རྟེན་གསུམ་གྱི་བདག་ཉིད་ཅན་ཞེས་གསུངས་པ་ལྟར་རོ། །ལྷ་གསུམ་ནི་སྡོམ་འབྱུང་འགྲེལ་པར་སྐུ་རྡོ་རྗེ་སོགས་གསུམ་ལ་བཤད་ཀྱང་དགོངས་པ་ལུང་སྟོན་ལས། ལག་
པ་གཡོན་ནི་དྲག་པོར་འགྱུར། །གཡས་པ་དེ་བཞིན་ཁྱབ་འཇུག་སྟེ། གཉིས་པོ་སྦྱོར་བ་ཚངས་པ་ཡིན། །ཞེས་གསུངས་པ་ལྟར་དབང་ཕྱུག་ཤེས་རབ་ཁྱབ་འཇུག་ཐབས་ཚངས་པ་བདེན་གཉིས་དབྱེར་མི་ཕྱེད་པ་ལ་བྱའོ། །དཀྱིལ་འཁོར་གསུམ་ནི་སྤྱོད་བསྡུས་ལས་
6-2-64a


ཀྱང་ཟུང་འཇུག་གི་མིང་གི་རྣམ་གྲངས་སུ་གསུངས་པ་དེའི་དོན་ནི་དོན་དམ་པའི་དང་སྐུའི་དང་ཕྱུང་བའི་དཀྱིལ་འཁོར་ལ་སྒྲོན་གསལ་དུ་གསུངས་པ་ལ་བྱའོ། །དུས་གསུམ་ནི་སྡོམ་འབྱུང་ལས་དགེ་བ་གསུམ་གསུངས་པའི་དོན་འགྲེལ་པས་ཐོག་
མཐའ་བར་གསུམ་ཐམས་ཅད་དུ་དགེ་བ་ལ་བཤད་པ་ལྟར་རམ་ཡང་ན་དུས་གསུམ་གྲགས་པ་ལ་བྱའོ། །ལམ་གསུམ་ནི་སྤྱོད་བསྡུས་ལས། ཐེག་པ་གསུམ་གྱི་བདག་ཉིད་ཅན་ཞེས་གསུངས་པ་ལྟར་རོ། །མཆོག་གསུམ་ནི་དགོངས་པ་ལུང་སྟོན་ལས། དུས་
གསུམ་དམ་ཚིག་མཆོག་གསུམ་དང་ཞེས་དམ་ཚིག་གསུམ་ལ་བཤད་པ་ལྟར་རམ་ཡང་ན་རྡོ་རྗེ་གསུམ་ལ་བྱའོ། །རྟོགས་པས་བསྐུལ་བ་ནི་དགོངས་པ་ལུང་སྟོན་ལས། ཇི་སྲིད་རྟོག་པས་བརྗོད་པ་རྣམས། །དེ་ནི་ཐལ་མོར་སྦྱོར་འདི་ཡིན། །ཞེས་བསྒྱུར་བ་ལྟར་
བདེ་བས་སྔར་བཤད་པ་དེ་ལྟ་བུའི་གསུམ་ཚན་སྒྲ་དང་རྟོག་པས་བརྗོད་པ་རྣམས་ཐལ་མོའི་དོན་ལ་གནས་ཞེས་པའོ། །གསོལ་པ་ཞེས་སོགས་ལ་དགོངས་པ་ལུང་སྟོན་ལས། གསོལ་བ་འདེབས་དང་ཕྱག་འཚལ་དང་། འཇིག་རྟེན་རྣམས་ལ་གསོལ་བྱ་བ། །
རྫོགས་སངས་རྒྱས་རྣམས་མཉེས་བྱེད་དེ། །ཁྱེད་ཀྱི་ཐལ་མོར་གནས་པ་ཡིན། །ཞེས་འབྱུང་བ་ལྟར་གསོལ་བ་འདེབས་པ་དང་ཕྱག་འཚལ་བ་དང་། སེམས་ཅན་གྱི་དོན་བྱ་བ་དང་སངས་རྒྱས་མཉེས་པར་བྱེད་པ་ཐམས་ཅད་ཀྱང་ཐལ་མོ་ལ་ཚང་བའི་དོན་ནོ། །སངས་
རྒྱས་ནི་སྔར་བཤད་པའི་ཟུང་འཇུག་གི་ཐལ་མོའོ། །དེ་ལ་ཐམས་ཅད་རྣམ་པར་བཞུགས་པའི་དོན་ཚང་བའི་ཚུལ་གྱིས་གནས་པའོ། །གང་ན་སེམས་ཅན་གང་ཡིན་པ་དང་སངས་རྒྱས་སུ་གྱུར་པ་གང་ཡིན་པ་དང་དེའི་ཆོས་དེ་བཞིན་ཉིད་དང་གཉིས་སུ་མེད་པ་ལ་སོཊ་
6-2-64b


པ་རྣམས་སོ། །གནས་ཚུལ་ནི་གནས་པ་མེད་པའི་ཚུལ་གྱི་གནས་པའི་སྦྱོར་བའམ་རྣལ་འབྱོར་གྱིས་ཏེ་དེ་ཐམས་ཅད་ཀྱི་དེ་ཁོ་ན་ཉིད་རྣམས་དེར་མཐར་ཐུག་པའོ། །དེ་ལྟར་ན་གསུམ་ཚན་རྣམས་ནི་ཀུན་རྫོབ་དོན་དམ་གཉིས་དང་དེ་གཉིས་དབྱེར་མི་ཕྱེད་པ་གསུམ་གྱི་མཚོན་
བྱེད་ཡིན་པས་མཐར་གཏུགས་པ་ན་ཟུང་དུ་འཇུག་རྒྱུ་གཉིས་དང་དེ་གཉིས་མི་འབྲལ་བར་འཇུག་པ་སྟེ་གསུམ་ཚོགས་པའི་ཟུང་འཇུག་གི་གོ་འཕང་དུ་འགྱུར་ཞིང་། དེའི་གནད་ཀྱི་ཞལ་གསུམ་དུ་བཤད་ལ་རྒྱུད་གང་ལས་ལམ་རིམ་པ་གཉིས་ཀྱི་སྐབས་ཀྱི་དཀྱིལ་འཁོར་པའི་ལྷ་
ཐམས་ཅད་ཞལ་གསུམ་པར་བསྟན་པ་དེ་ལས་ནི་རྒྱུད་དེས་ཟུང་འཇུག་གི་གོ་འཕང་བསྒྲུབ་པའི་ལམ་ཡོངས་སུ་རྫོགས་པ་བསྟན་པ་ཡིན་པར་དཔོག་པར་ནུས་པ་འདི་བསྟན་པ་ཡིན་ནོ། །དེའི་ཕྱིར་གང་དག་རྐང་པ་དང་པོ་བཞིས་ཞལ་གསུམ་དུ་འོང་བའི་རྒྱུ་མཚན་འདུས་པས་ནི་
དེ་ཁོ་ན་ཉིད་གསུམ་མ་ལུས་པ་སྟོན་ལ་དེ་ཉིད་བསྡུས་པ་སོགས་ནི་དེ་ཁོ་ན་ཉིད་ཀྱི་ལམ་སྦྱོང་བ་ཙམ་ཡིན་པའི་ཕྱིར་ཞེས་སྨྲ་ཞིང་། རྒྱུད་འདི་ལ་ལག་པའི་ཕྱག་རྒྱ་མེད་པས་སངས་རྒྱས་རྣམས་སྤྱན་འདྲེན་པའི་རྡོ་རྗེ་བསྡུ་བའི་ཕྱག་རྒྱ་ཡང་མེད་པའི་ཕྱིར་སངས་རྒྱས་རྣམས་སྤྱན་
འདྲེན་པ་མི་རུང་ངོ་ཞེས་པའི་ལན་དུ་ལག་པ་གཡོན་པ་ཞེས་པ་ནས་སངས་རྒྱས་ཐམས་ཅད་ཡང་དག་འགུགས། །ཞེས་པའི་བར་གྱི་ཡུལ་དབང་རྣམ་ཤེས་གསུམ་སྟོང་ཉིད་དུ་རྟོགས་པ་ནི་རྡོ་རྗེ་བསྡུ་བའི་ཕྱག་རྒྱ་ཡིན་ལ་དེས་སངས་རྒྱས་རྣམས་འགུགས་པས་སྐྱོན་མེད་
ཅེས་འཆད་པ་དང་། ཞལ་གསུམ་ལ་མདོག་གསུམ་འོང་བའི་རྒྱུ་མཚན་དྲིས་པའི་ལན་དུ་རྐང་པ་གཅིག་གཏོང་བ་དང་ལྷ་དེ་རྣམས་ལ་དགོས་པ་ཅི་ཞིག་ཡོད་ཅེས་པའི་ལན་དུ་ཁམས་གསུམ་དུ་ནི་ཞེས་སོགས་འཆད་པ་ནི་སྐབས་ཀྱི་དོན་མ་རྙེད་པའི་བཤད་པར་རིག་པར་
6-2-65a


བྱའོ། །ཞལ་གྱི་གྲངས་ལ་དྲིས་ལན་མཛད་པ་འདི་ནི་རིམ་པ་གཉིས་ཀའི་སྐབས་ཀྱི་ལྷའི་ཞལ་གྱི་གྲངས་ཀྱི་རྣམ་གཞག་གོ། །གསུམ་པ་ལ་གཉིས། དྲི་བ་དང་། ལན་ནོ། །དང་པོ་ནི། སློབ་མས་གསོལ་པ། ཕྱུང་བའི་དཀྱིལ་འཁོར་གྱི་སྐབས་འདིར་
གསང་བ་འདུས་པའི་དཀྱིལ་འཁོར་ལ་ལྷ་རྣམས་དགོད་པ་ལ་འདུས་པའི་དོན་སྨྲ་བའི་སློབ་དཔོན་རྣམས་ཀྱི་སྣ་ཚོགས་པའི་གཞུང་འཇིག་རྟེན་དུ་རབ་ཏུ་འཇུག་པར་འགྱུར་བ་སྟེ་ལུགས་མི་མཐུན་པ་དུ་མ་སྣང་ན། །སྒྲུབ་བ་པོ་རྣམས་ལྷ་གྲངས་ལ་གྲངས་འདི་ཙམ་ཞིག་
ཡིན་ནོ་ཞེས་ངེས་པ་ཐོབ་ནས་སོམ་ཉི་སྟེ་ཐེ་ཚོམ་མ་མཆིས་པར་ཇི་ལྟར་འགྱུར་ཏེ་མི་འགྱུར་རོ་སྙམ་པའོ། །ལུགས་མི་མཐུན་པ་ནི་རྡོ་རྗེ་སེམས་དཔའི་སྒྲུབ་ཐབས་ལས་བཅུ་གསུམ་དང་བཅུ་དགུ་དང་ཉེར་ལྔར་འདོད་པ་ཡོད་པར་གསུངས་པའི་དོན་ལ་དང་པོ་ནི་སྙིང་
པོའི་དཀྱིལ་འཁོར་གི་རིགས་ལྔ་དང་ཡུལ་བཞིའི་སྟེང་དུ་གཤིན་རྗེ་མཐར་བྱེད་ལ་སོགས་པའི་སྒོ་བཞིའི་ཁྲོ་བོ་བཞི་བསྣན་པའོ། །གཉིས་པ་ནི། དཔལ་སྒྱུ་འཕྲུལ་དྲ་བ་ལས་འབྱུང་བ་ལ་སོགས་པའི་རིམ་པས་སོ། །གསུམ་པ་ནི། སྔར་བཤད་པ་ལྟར་སྙིང་པོའི་
དཀྱིལ་འཁོར་གྱི་ལྷ་དགུ་དང་དེའི་ཕྱི་རོལ་ཏུ་གཟུགས་རྡོ་རྗེ་མ་ནས་ཆོས་དབྱིངས་རྡོ་རྗེ་མའི་བར་རྣལ་འབྱོར་མ་དྲུག་དང་དེའི་ཕྱི་རོལ་ཏུ་ཁྲོ་བོ་བཅུའོ་ཞེས་ཏ་ཐཱ་ག་ཏ་རཀྵི་ཏས་བཤད་ཅིང་དཔོན་འདིས་འདོད་པའི་གསལ་ཁ་མི་སྣང་ངོ་། །བླ་མ་སྔ་མ་རྣམས་ཨིནྡྲ་བོ་
ངྷི་ཕྱི་མ་དང་ཡེ་ཤེས་ཞབས་དང་མགྲིན་པ་གསུམ་པའི་འདོད་པར་འཆད་དེ་ཡེ་ཤེས་ཞབས་སློབ་དཔོན་འདི་དང་ཟླ་བ་གྲགས་པ་ལས་འཕྱི་ཡང་ཁོང་གི་སྔོན་ནས་རིགས་ལྔ་དང་ཡུམ་བཞི་དང་རྡོ་རྗེ་མ་དྲུག་དང་སྒོ་བཞིའི་ཁྲོ་བོ་སྟེ་ལྷ་བཅུ་དགུ་འདོད་པ་བྱུང་ན་དོན་
6-2-65b


འདྲའོ། །གཉིས་པ་ནི། སློབ་དཔོན་གྱི་ལན་བཀའ་སྩལ་པ། སེམས་དཔའ་ཆེན་པོ་ཞེས་སློབ་མ་ལ་བོས་ནས་ལེགས་སོ་གཉིས་གསུངས་པ་ནི་ངོ་མཚར་བ་ལ་ཚིག་གཅིག་ལན་གཉིས་བརྗོད་པར་གསུངས་པ་ལྟར་རོ། །དྲི་བ་དེའི་ལན་ནི་ལུང་དང་རིགས་པས་སོ་སོར་ཏེ་
རེ་རེ་ནས་བཤད་པར་བྱའོ་ཞེས་གསུངས་ཏེ་འདི་ནི་ཆེས་ཆེ་བའི་མཁས་པ་དག་གི་མི་མཐུན་པའི་གནས་ཡིན་པས་ཤིན་ཏུ་དཀའ་ལ་དེས་ན་དྲི་བའི་སྐབས་སུ་བྱུང་བ་ལྟར་ཐེ་ཚོམ་ཆོད་པའི་སྒྲུབ་བྱེད་ཀྱང་ཤིན་ཏུ་དཀའ་བས་འཕགས་པ་ཡབ་སྲས་ཀྱི་བཞེད་པ་འདི་ལེགས་
པར་གཏན་ལ་དབབ་དགོས་སོ། །འདིར་སྒྲུབ་བྱེད་གཉིས་གསུངས་པའི་རིགས་པས་བསྒྲུབ་པ་ནི་མངོན་སུམ་གྱིས་མི་འགྲུབ་པས་རྗེས་དཔག་གིས་བསྒྲུབ་དགོས་ལ་དེ་ལ་ནི་རྟགས་སྐྱོན་མེད་ཀྱི་སྦྱོར་བ་དགོད་དགོས་པས་ཆོས་ཅན་ལ་སོགས་པ་ངོས་གཟུང་བར་བྱའོ། །དེ་ལ་
ཆོས་ཅན་ནི་ཕྱུང་བའི་དཀྱིལ་འཁོར་ཞེས་པ་སྟེ་འདུས་པའི་ལྷ་དགོད་པའི་གནས་ཕྱུང་བའི་རྟེན་གྱི་དཀྱིལ་འཁོར་རོ། །དམ་བཅའ་ནི་ལྷ་རྣམས་དོད་པར་འགྱུར་རོ་ཞེས་པ་སྟེ་ལྷ་སོ་གཉིས་དགོད་པར་བྱ་བ་ཡིན་ཏེ་ཞེས་པའི་དོན་ནོ། །རྟགས་ནི་ཤུགས་ཀྱིས་ཤེས་ཏེ་འདུས་པའི་
དཀྱིལ་འཁོར་ལ་དགོད་དགོས་པའི་ལྷའི་འཁོར་ལོ་རྣམས་རྫོགས་པར་དགོད་པའི་གཞི་ཡིན་པའི་ཕྱིར་ཞེས་པའོ། །དཔེ་ནི་ཇི་ལྟར་ནས་དེ་བཞིན་ཞེས་པའི་བར་ཏེ་སྐུའི་དཀྱིལ་འཁོར་བཞིན་ཞེས་པའི་དོན་ནོ། །སྒྲོན་གསལ་ལས་ཀྱང་། ཇི་ལྟར་སྐུའི་དཀྱིལ་འཁོར་ལ་ལྷ་
སུམ་ཅུ་རྩ་གཉིས་དགོད་པར་བྱུང་བ་ཇི་ལྟ་བ་དེ་བཞིན་དུ་ཕྱུང་བའི་དཀྱིལ་འཁོར་ལ་ཡང་སྐུའི་དཀྱིལ་འཁོར་དང་འདྲ་སྟེ་འདི་ལྟར་རེ་ཤིག་ལྷ་སུམ་ཅུ་རྩ་གཉིས་དགོད་པར་ཤེས་པར་བྱའོ། །ཞེས་གསལ་བར་གསུངས་པས་སློབ་དཔོན་གཉིས་ཀའི་བཞེད་པས་སྦྱོར་བའི་
6-2-66a


འགོད་ཚུལ་ནི་གདོན་མི་ཟ་བར་དེ་ལྟར་བྱའི་སྐུ་དཀྱིལ་ལ་ལྷ་སོ་གཉིས་ཡོད་པ་རྟགས་སུ་བཀོད་ནས་ཕྱུང་བའི་དཀྱིལ་འཁོར་ལ་ལྷ་སོ་གཉིས་ཡོད་པར་བསྒྲུབ་པ་རྒྱུ་ཚོགས་པའི་རྟགས་ཀྱིས་འབྲས་བུ་འབྱུང་རུང་བསྒྲུབ་པའི་རང་བཞིན་གྱི་རྟགས་
སུ་སྔ་མ་རྣམས་འཆད་པ་ནི་གཞུང་གི་དོན་གཏན་མ་ཡིན་ནོ། །སྦྱོར་བ་དེ་ལ་རྟགས་མ་གྲུབ་པའི་ཉེས་པ་མེད་པ་ནི་ཤིན་ཏུ་སླ་ལ་འགལ་བའི་སྐྱོན་ཡང་མེད་དེ་རྟགས་མཐུན་ཕྱོགས་པ་ཡོད་པའི་ཕྱིར་ཏེ་འདི་ལུང་གིས་བསྒྲུབ་པར་འགྱུར་རོ། །གལ་ཏེ་འདུས་པའི་ལྷའི་འཁོར་
ལོ་རྫོགས་པར་དགོད་པའི་གཞི་ཡང་ཡིན་ལ་ལྷ་སོ་གཉིས་མི་དགོད་པ་ཡང་ཡིན་ན་གནོད་པ་ཅི་ཡོད་སྙམ་ན། ལུས་ཀྱི་དཀྱིལ་འཁོར་ལ་ལྷ་སོ་གཉིས་དགོད་པར་བྱ་བ་ནི་བཤད་རྒྱུད་ཀྱིས་བསྒྲུབ་པར་འགྱུར་བས་ལུང་གིས་འགྲུབ་ལ་དེ་ལྟ་ན་སྤྱིར་དཀྱིལ་འཁོར་ལ་དགོད་
པར་བྱ་བའི་ལྷ་གྲངས་སོ་གཉིས་སུ་གྲུབ་པ་ཡིན་ཏེ་སྐུའི་དཀྱིལ་འཁོར་ལ་དགོད་པར་བྱ་བའི་ལྷ་ལ་སོ་གཉིས་ཡོད་པའི་ཕྱིར་རོ། །དེས་ན་དགོད་བྱའི་ལྷ་རྫོགས་པར་དགོད་པའི་གཞི་དང་ལྷ་སོ་གཉིས་མི་འགོད་པ་གཉིས་འགལ་བ་ཡིན་ནོ། །ཚུལ་གསུམ་པའི་རྟགས་དེ་ལས་
ནི་གཞལ་ཡས་ཁང་ལ་ལྷ་སོ་གཉིས་འགོད་པ་འགྲུབ་པས་དཔལ་གསང་བ་འདུས་པའི་རྟེན་གྱི་དཀྱིལ་འཁོར་ལ་འགོད་པའི་ལྷའི་གྲངས་ལ་སྒྲུབ་པ་པོ་རྣམས་ཀྱི་ཐེ་ཚོམ་ནི་དེ་ལྟར་གཅོད་པ་ཡིན་ནོ། །འོ་ན་རྩ་རྒྱུད་ཀྱི་ལེའུ་དང་པོའི་དཀྱིལ་འཁོར་རྒྱལ་མཆོག་གི་སྐབས་དང་ལེའུ་
བཞི་པའི་མཚན་མ་འགོད་པའི་སྐབས་སུ་སྔར་བཤད་པའི་ལྷ་བཅུ་གསུམ་དང་དེའི་མཚན་མ་བཅུ་གསུམ་ཙམ༌ཞིག་གཞལ་ཡས་ཁང་ལ་བཀོད་ནས་ལྷག་མ་མ་བཀོད་པ་ཅི་ཡིན་སྙམ་ན། ལྷ་སོ་གཉིས་འགོད་པར་བྱ་བ་དེ་ལྟ་མོད་ཀྱི་སྟེ་དེ་ལྟ་ནའང་རྩ་རྒྱུད་ལས་ལྷ་
6-2-66b


རྣམས་འགོད་པ་རྫོགས་པར་མ་བསྟན་པའི་རྒྱུ་མཚན་ནི། འདི་ལྟར་སློབ་དཔོན་མེད་པར་ཏེ་དེ་ལ་རག་མ་ལས་པར་རྒྱུད་ལ་འཇུག་པར་མ་གྱུར་ཅིག་སྙམ་དུ་སྟོན་པས་དགོངས་སོ་ཞེས་ཏེ་སློབ་དཔོན་ལ་ལྟོས་པར་བྱ་བའི་ཕྱིར་དུ་རྫོགས་པར་མ་གསུངས་པའོ། །གལ་ཏེ་རྩ་རྒྱུད་ལས་
ལྷ་གྲངས་བཅུ་གསུམ་དུ་གསུངས་དེ་ལྷག་མ་དང་བཅས་པ་ཡིན་ན་དེ་ལྟར་རྫོགས་པར་མ་མཛད་པའི་རྒྱུ་མཚན་བཙལ་བར་རིགས་ན་མ་རྫོགས་པ་ཉིད་དུ་ཅིས་འགྲུབ་སྙམ་ན། དཀྱིལ་འཁོར་ཀྱི་ལྷ་དགོད་པ་ཡང་རྒྱུན་གཅིག་ཏུ་གྲངས་ཡོངས་སུ་རྫོགས་པར་བཅོམ་ལྡན་འདས་
ཀྱིས་འདུས་པའི་བཤད་རྒྱུད་དཔལ་རྡོ་རྗེ་ཕྲེང་བའི་ལེའུ་རེ་གསུམ་པ་ལས་སྐུ་གསུང་ཐུགས་ཀྱི་དཀྱིལ་འཁོར་གསུམ་གསུངས་པའི་སྐུ་དཀྱིལ་གྱི་སྐབས་དེ་ལས་ཤེས་ཏེ་རྒྱུ་དེ་ལ་འཇུག་པར་བྱའོ། །སེམས་ཀྱིས་ཞེས་པའི་རྐང་པ་གཉིས་ནི་ཉན་པར་བསྐུལ་བའོ། །དེ་ནས་རྐང་
པ་གཉིས་ནི་མདོར་བསྟན་པའོ། །རྡོ་རྗེ་སློབ་དཔོན་ནི་ཤིན་ཏུ་རྣལ་འབྱོར་གྱི་སྐབས་ཀྱི་སྒྲུབ་པ་པོ་རྡོ་རྗེ་འཆང་དུ་བསྐྱེད་པ་སྟེ་གང་དུ་བསྐྱེད་པའི་རྡོ་རྗེ་འཆང་དེ་རྒྱུད་ཀྱི་སྟོན་པ་པོ་ཡིན་པས་རྡོ་རྗེ་སློབ་དཔོན་དུ་གསུངས་སོ། །དེའི་ལུས་ནི་ལྷ་དགོད་པའི་གཞིའོ། །དང་པོ་ཞེས་པ་
ནས་གནོད་མཛེས་ཏེ་ཞེས་པའི་བར་གྱིས་ནི་སྐུ་དཀྱིལ་རྒྱས་པར་བཤད་དེ་སླའོ། །སྐུ་རྡོ་རྗེ་ནས་ཐུགས་རྡོ་རྗེའི་བར་ལྔ་ནི་རིགས་ལྔའོ། །དེའི་གཉིས་པ་དང་བཞི་པ་ལ་ད་ལྟ་འགྱུར་བའི་ཕྲེང་བ་ལས་ནམ་མཁའ་རྡོ་རྗེ་དང་ལས་ཀྱི་རྡོ་རྗེ་ཞེས་འབྱུང་ངོ་། །ལུས་ནི་འདི་ཉིད་ཀུན་ལ་
འདིར། །དེ་བཞིན་གཤེགས་པ་ཐམས་ཅན་བཞུགས། །སྐུ་ཡི་དཀྱིལ་འཁོར་ཞེས་བརྗོད་པ། །རྡོ་རྗེ་སློབ་དཔོན་ཉིད་ཀྱི་ལུས། །ཞེས་སོགས་རྐང་པ་དྲུག་ནི་དོན་བསྡུ་བའོ། །དེ་ནས་རྐང་པ་བཞིས་ཕན་ཡོན་སྟོན་ཏེ་རྐང་པ་དང་པོ་ལ་ད་ལྟ་འགྱུར་བའི་ཕྲེང་བ་ལས། སྐྱེ་བ་
6-2-67a


འདི་ལ་རྣལ་འབྱོར་པ། །ཞེས་འབྱུང་ངོ་། །རྡོ་རྗེ་ལེགས་བྱས་བསྟན་པ་ནི། །ཞེས་པ་ལྟར་ན་རྡོ་རྗེ་འཆང་གི་སྐུར་ལེགས་པར་བྱས་ནས་བསྟན་པའི་ལུས་དཀྱིལ་སྒོམ་པའོ། །མྱང་འདས་ནི་མི་གནས་པའི་མྱང་འདས་ཟུང་འཇུག་གོ། །མྱང་འདས་དེ་
མྱུར་དུ་སྟེ་ཚེ་འདི་ལ་འཐོབ་བའི་རྒྱུ་ཁྱོད་ཀྱི་དགེ་བ་ཡོངས་སུ་སྨིན་ཞེས་པ་ནི་རིམ་པ་དང་པོ་བསྒོམས་པས་དེ་ལྟར་འགྱུར་བའོ། །དེ་ནི་ཞེས་པ་སྒྲོན་གསལ་དང་རྒྱུད་གཉིས་ཀར་དེས་ན་ཞེས་བསྒྱུར་བ་བདེ་བས་སྐུ་དཀྱིལ་བསྒོམས་པས་རྒྱུད་སྨིན་པར་བྱེད་པ་དེ་བས་ན་ཉོན་
ཅིག་མཐོང་ན་དོན་ཡོད་པ་ཀྱེ་ཞེས་བོས་ནས་ཕྱི་མའི་དུས་ན་སེམས་དཔའ་ལས་དང་པོ་པ་རྣམས་ཀྱིས་རབ་ཏུ་འབད་དེ་བླ་མ་སྟེན་ཅིག །བླ་མ་ཇི་ལྟ་བུ་ཞེ་ན། རྡོ་རྗེ་སློབ་དཔོན་ཏེ་རྡོ་རྗེ་འཆང་དུ་བསྒོམས་པའི་ལུས་ལ་རྒྱལ་བ་སོ་གཉིས་ཐམས་ཅད་བཞུགས་པའི་
ལམ་སྟོན་པ་པོའོ། །དེ་ཚེ་ཞེས་པའི་རྐང་པ་བཞི་ནི་གོ་སླའོ། །གལ་ཏེ་ལུང་དེ་དག་གིས་དཀྱིལ་འཁོར་རྫོགས་པར་བསྟན་ཞེས་པ་མི་འཐད་དེ་གཟུགས་རྡོ་རྗེ་མ་ལ་སོགས་པ་ལྔ་མ་བསྟན་པའི་ཕྱིར་རོ་ཞེ་ན། སྐྱོན་མེད་དེ་མིག་ལ་སོགས་པའི་དབང་པོ་གྲུབ་ན་དེ་དག་གི་
ལོངས་སྤྱོད་བྱའི་ཡུལ་ལྔ་དེའི་དབང་གིས་འགྲུབ་པ་ལྟར་མིག་སོགས་ལྔའི་རང་བཞིན་ས་སྙིང་སོགས་ཡབ་ལྔར་དངོས་སུ་བསྟན་པའི་ཤུགས་ཀྱིས་ལོངས་སྤྱད་བྱའི་ཡུལ་ལྔ་གོ་བར་ནུས་པའི་ཕྱིར་རོ། །གཞུང་འདི་དང་སྒྲོན་གསལ་གཉིས་ཀར་རྡོ་རྗེ་ཕྲེང་བའི་ལུང་དེ་དག་ལྷ་
སོ་གཉིས་ཕྱོགས་གཅིག་ཏུ་རྫོགས་པར་སྟོན་པའི་ཁུངས་སུ་དྲངས་པས་ན་དེ་དག་གིས་རྡོ་རྗེ་མ་ལྔ་མ་བསྟན་པར་འདོད་པ་ནི་གཞུང་གཉིས་དང་འགའ་བ་སྨྲ་བའོ། །འདིར་སྔ་ཕྱིར་བྱོན་པའི་བོད་ཀྱི་འདུས་པ་སྨྲ་བ་རྣམས་ནི། ཕྱུང་བའི་དཀྱིལ་འཁོར་ཞེས་པའི་ཕྱུང་བའི་
6-2-67b


ཚིག་ཙམ་ལ་འཚལ་ནས་སྐུའི་དཀྱིལ་འཁོར་ལ་སོ་གཉིས་ཡོད་ན་ཕྱུང་བའི་དཀྱིལ་འཁོར་ལ་ཡང་སོ་གཉིས་ཡོད་དེ་དེ་དག་ནི་དེ་ལས་ཕྱུང་བའི་ཕྱིར་རོ་སྙམ་དུ་སེམས་སོ། །དེ་ལས་ཀྱང་སྔར་བྱོན་པ་རྣམས་ནི་འདི་སྐད་སྨྲ་སྟེ་རྒྱུ་ཙམ་རྟགས་སུ་བཀོད་ནས་འབྲས་བུ་དཔོག་ན་མ་ངེས་
པས་རྒྱུ་ནུས་པ་ཐོགས་པ་མེད་པ་ལས་འབྲས་བུ་དཔོག་པའི་རང་བཞིན་གྱི་རྟགས་ཏེ་དཔལ་ལྡན་ཆོས་གྲགས་ཀྱིས། རྒྱུ་ཚོགས་པ་ལས་འབྲས་སྐྱེ་བར། །རྗེས་སུ་དཔོག་པ་གང་ཡིན་པ། །དོན་གཞན་ལ་ནི་མི་ལྟོས་ཕྱིར། །དེ་ནི་རང་བཞིན་ཡིན་པར་བརྗོད། །ཅེས་གསུངས་པས་
སོ། །གལ་ཏེ་ཡབ་ཀྱི་སྐུ་དཀྱིལ་ལ་ཡོད་པ་འགོད་ན་རྡོ་རྗེ་མ་ལྔ་མེད་པས་ཉེར་བདུན་ལས་མེད་པའི་ཕྱིར་མངས་སོ། །ཡུམ་གྱི་སྐུ་དཀྱིལ་ལ་ཡོད་པ་འགོད་ནའང་རིགས་ལྔ་དང་ཡུལ་བཞི་དང་རྡོ་རྗེ་མ་ལྔ་དང་ཁྲོ་མོ་བཅུ་སྟེ་ཉེར་བཞི་ལས་མེད་པས་མངས་ལ། གཉིས་ཀའི་སྐུ་
དཀྱིལ་ལ་ཡོད་པ་འགོད་ན་ང་གཅིག་ཡོད་པས་ཉུངས་སོ། །དེས་ན་རྟགས་མ་གྲུབ་བོ་ཞེ་ན། དཔེར་ན་བུ་བསྐྱེད་པ་ལ་ཕ་མ་གཉིས་ཆར་དགོས་པ་ལྟར་འདིར་ལྷ་མངལ་བསྐྱེད་ཡིན་པས་དང་པོ་གཉིས་མི་འདོད་ཀྱི་གསུམ་པ་ལྟར་འདོད་ལ་མངས་པའི་སྐྱོན་མེད་དེ་ཡབ་ཡུམ་
གྱི་རིགས་ལྔ་ཚན་ལ་གཉིས་ཡུམ་བཞི་ཚན་པ་གཉིས་ནི་རྣམ་དག་གཅིག་ཡིན་ལ། ཡབ་ཀྱི་ཁྲོ་བོ་བཅུ་དག་ཡུམ་གྱི་ཁྲོ་མོ་བཅུ་ཡང་རྣམ་དག་གཅིག་པས་སོ་སོར་བགྲང་དུ་མེད་པས་བཅུ་དགུ་ཡིན་པའི་ཕྱིར་དང་། ཡབ་ཀྱི་སེམས་དཔའ་བརྒྱད་དང་ཡུམ་གྱི་སེམས་
མ་ལྔ་སོ་སོར་བགྲངས་པས་བཅུ་གསུམ་ཡོད་པའི་ཕྱིར་རོ། །ཡབ་ཡུམ་གྱི་ཁྲོ་བོ་ཡབ་ཡུམ་རྣམས་བཅུར་བགྲང་ན་ཡབ་ཡུམ་གྱི་སེམས་དཔའ་ཡབ་ཡུམ་བཅུ་ཡང་ལྔར་བགྲང་དགོས་པ་མི་མཚུངས་ཏེ་ཁྲོ་བོ་ཕོ་མོ་གཉིས་ཀ་ལ་ཡན་ལག་གི་རྣམ་དག་གཅིག་ལས་
6-2-68a


མེད་ལ་སེམས་དཔའ་ཕོ་མོ་ལ་དབང་པོ་དང་ཡུལ་གྱི་རྣམ་དག་སོ་སོར་ཡོད་པའི་ཕྱིར་རོ། །དེས་ན་སོ་གཉིས་ལས་མེད་ལ་སོ་གཉིས་ཡོད་པའི་རྟགས་ནི་ལུང་གིས་གྲུབ་ཅིང་ཁྱབ་པ་ནི་དངོས་སྟོབས་ཀྱི་ཚད་མས་གྲུབ་བོ་ཞེས་འཆད་པ་ནི། 
རིགས་པའི་བསྟན་བཅོས་ལས་རྒྱུ་ཚོགས་གྲངས་ཚང་གིས་འབྲས་བུ་འབྱུང་ངེས་དཔོག་མི་ནུས་པས་འབྱུང་རུང་ཙམ་དཔོག་པར་བཤད་པ་དང་མི་མཐུན་ཞིང་དངོས་དང་བརྒྱུད་པ་གང་གི་སྐབས་སུ་ཡང་རྒྱུའི་གྲངས་ཀྱིས་འབྲས་བུའི་གྲངས་དཔོག་པ་འཁྲུལ་བས་
ཁྱབ་པ་མི་འགྲུབ་ལ། སྐུ་དཀྱིལ་བསྒོམས་པའི་དེ་མ་ཐག་ཏུ་ཕྱུང་བའི་དཀྱིལ་འཁོར་མི་སྒོམ་པ་སྲིད་པ་ལ་གནོད་པ་ཅན་གྱི་ཚད་མ་ཅི་ཡང་མེད་པས་ནུས་པ་ཐོགས་མེད་ཀྱི་གཏན་ཚིགས་ཀྱང་མི་འགྲུབ་བོ། །རྒྱུ་ནུས་པ་ཐོགས་མེད་ཙམ་བཀོད་ན་ནི་མ་ངེས་ལ་ཕྱུང་
བའི་ལྷ་སོ་གཉིས་ཀྱི་རྒྱུ་འགོད་ན་ནི་རྟགས་དང་བསྒྲུབ་བྱ་གཉིས་དེས་དཀའ་སླ་མེད་པར་འགྱུར་རོ། །དཀྱིལ་འཁོར་གྱི་ལྷ་གྲངས་ལ་དྲིས་ལན་མཛད་པ་འདི་ནི་རིམ་པ་གཉིས་ཀའི་སྐུ་དཀྱིལ་དང་གཞལ་ཡས་ཁང་ལ་ལྷ་འགོད་པའི་རྣམ་གཞག་གོ། །བཞི་པ་ལ་གཉིས། 
དྲི་བ་དང་། ལན་ནོ། །དང་པོ་ནི། སློབ་མ་གསོལ་པ། ལས་དང་པོ་པས་ལྷ་སྒོམ་པའི་སྐབས་འདིར་ཐ་མལ་པའི་ལུས་ལ་རྣམ་སྣང་ལ་སོགས་པའི་སངས་རྒྱས་དང་ས་སྙིང་ལ་སོགས་པའི་བྱང་སེམས་རྣམས་འགོད་པ་མི་འགལ་ལགས་སམ་ཞེས་འདྲིའོ། །
སངས་རྒྱས་བྱང་སེམས་རྣམས་ཅི་འདྲ་ཞེ་ན་སྤང་བྱ་ཉོན་མོངས་ཐམས་ཅད་སྤངས་ལ་ཐོབ་བྱ་སྟོབས་དང་མི་འཇིགས་པ་ལ་སོགསཔའི་སངས་རྒྱས་ཀྱི་ཡོན་ཏན་བརྙེས་པ་རྣམས་སོ། །དོན་ནི་ལྷ་སྒོམ་པ་པོ་དེ་སྔར་བཤད་པའི་སྤང་བྱ་མ་སྤངས་ཤིང་
6-2-68b


ཐོབ་བྱ་མ་ཐོབ་པའི་ཐ་མལ་པ་ཡིན་པས་ན་དེས་སངས་རྒྱས་བྱང་སེམས་དེ་དག་ཏུ་སྒོམ་པ་འགལ་ཏེ་སོལ་བ་ལ་དུང་དུ་སྒོམ་པ་བཞིན་སྙམ་པའོ། །ལུས་ལ་ལྷ་དགོད་པ་ཞེས་པའི་ལུས་ནི་ལྷ་སྒོམ་པ་པོ་དང་ལྷ་དགོད་པ་ནི་ལྷ་དེར་སྒོམ་པ་ལ་བསམས་ནས་རྩོད་པ་ཡིན་གྱི་རང་
ལྷར་སྒོམ་པ་ལ་མི་རྩོད་པར་ལུས་ལ་ལྷ་བཀོད་པ་ཙམ་ལ་རྩོད་པ་མིན་ནོ། །འགལ་ཞེས་པའི་དོན་ནི་རང་ཉིད་ལྷ་མིན་པ་དང་དེར་སྒོམ་པ་གཉིས་ལ་གཞི་མཐུན་མི་སྲིད་སྙམ་དུ་རྩོད་པ་མིན་ཏེ་སྒོམ་པ་པོ་དེ་ལྷ་དེ་དག་མིན་བཞིན་དུ་དེ་དག་ཏུ་སྒོམ་པ་མཐོང་ནས་རྩོད་པས་སོ། །
དེས་ན་རང་ཐ་མལ་པ་ཡིན་ན་ལྷར་སྒོམ་དུ་མི་རིགས་སོ་སྙམ་དུ་རྩོད་པའོ། །གཉིས་པ་ནི། དྲི་བ་དེའི་ལན་སློབ་དཔོན་གྱིས་བཀའ་སྩལ་པ། རང་ཉིད་སངས་རྒྱས་མ་ཡིན་ཀྱང་སངས་རྒྱས་ཡིན་པར་སྒོམ་པ་ལ་མི་རིགས་པ་མེད་དེ་དེ་ལྟར་བསྒོམས་པས་དེའི་ཕུང་སོགས་
སངས་རྒྱས་ཀྱི་རྒྱུར་འགྱུར་བའི་དགོས་པ་ཡོད་པའི་ཕྱིར་རོ། །གལ་ཏེ་ཐ་མལ་པའི་ལུས་དེ་སྔར་བྱང་ཆུབ་ཀྱི་རྒྱུར་མ་གྱུར་པ་ཕྱིས་ལྷར་བསྒོམས་པ་ན་བྱང་ཆུབ་ཀྱི་རྒྱུར་བསྒྱུར་བ་འགལ་ཏེ་ཐ་མལ་པའི་གནས་སྐབས་སུ་མཚུངས་པའི་ཕྱིར་རོ་སྙམ་ན། གནས་སྐབས་ཅན་
གཅིག་ལ་གནས་སྐབས་མི་འདྲ་བ་གཉིས་མི་འགལ་བ་དཔེ་བཀོད་ནས་བསྒྲུབ་སྟེ་དཔེར་ན་ཟངས་ལྟ་བུ་གཅིག་མགར་བས་བཀྲུ་བཤལ་གྱི་སྣོད་དུ་བྱས་པ་དེ་ཇི་སྲིད་དུ་དེའི་གནས་སྐབས་ཡིན་པ་དེ་སྲིད་དུ་ནི་མཆིལ་མ་འདོར་གྱི་འོག་མ་གཉིས་མི་བྱེད་ལ་ཡང་གཞོང་པར་
བྱས་པ་ན་དེའི་གནས་སྐབས་སུ་ནི་འཇིག་རྟེན་རྣམས་ཟས་ཟའི་སྔ་ཕྱི་གཉིས་མི་བྱེད་དོ། །ཡང་དེ་ཉིད་གཟུགས་བརྙན་ཏེ་སངས་རྒྱས་ཀྱི་སྐུ་འདྲ་རུ་བྱས་པ་ན་དེའི་གནས་སྐབས་སུ་ནི་ཕྱག་དང་མཆོད་པའི་གནས་སུ་བྱེད་དེ་སྔ་མ་གཉིས་མི་བྱེད་པ་དེ་བཞིན་དུ། སྒྲུབ་པ་
6-2-69a


པོའི་ཐ་མལ་པའི་ལུས་ཀྱང་སྔོན་གྱི་གནས་སྐབས་སུ་འཁོར་བའི་རྒྱུ་ཡིན་ལ་སྟེ་ཡིན་པ་དང་། ཕྱིས་ཀྱི་སྐབས་སུ་ཐམས་ཅད་མཁྱེན་པ་འགྲུབ་པའི་རྒྱུར་འགྱུར་བ་ལ་འགལ་བའི་སྐྱོན་མེད་དོ། །སྔོན་གྱི་སྐབས་ཇི་ལྟ་བུ་ཞིག་སྙམ་ན། ལྷར་
སྒོམ་པ་སོགས་ཀྱི་ཐབས་དང་མི་ལྡན་ཞིང་ལུས་ལ་འདོད་ཆགས་སོགས་ཀྱིས་བརླན་པ་སྟེ་སྦགས་པའི་རང་དགའ་བའི་དུས་སོ། །ཕྱིས་ཀྱི་སྐབས་ནི། ཕུང་པོའི་རང་བཞིན་སྟོང་པ་ཉིད་དུ་ཡོངས་སུ་ཤེས་ཤིང་ལྷར་བསྒོམས་པས་ཡོངས་སུ་དག་པར་བྱས་པའི་
སྐབས་སོ། །རྒྱུད་གཞན་གྱི་ལམ་གྱིས་གཞན་གྲོལ་བར་མི་འགྱུར་གྱི་རང་གི་རྒྱུད་གྲོལ་བར་འགྱུར་བས་སྣོད་བཅུད་ཐམས་ཅད་འོད་གསལ་དུ་བསྡུས་ནས་དེ་རྣམས་ལྷ་དང་གཞལ་ཡས་ཁང་དུ་བསྒོམས་པ་ལ་ཐལ་ཆེས་བར་མི་འགྱུར་རོ། །འདིར་ཐ་མལ་པས་ལྷར་
བསྒོམ་པ་འགལ་མི་འགལ་དྲིས་པའི་ལན་དུ་མི་འགལ་བར་གསུངས་པ་ཡིན་པས་ལྷར་བསྒོམ་པའི་དུས་སུ་སྒོམ་མཁན་ཐ་མལ་པ་ཡིན་མོད་ཀྱང་། ལྷར་སྒོམ་པའི་ཏིང་ངེ་འཛིན་དེའི་དོན་ཐ་མལ་པར་སྣང་བ་ལྡོག་དགོས་པར་བདག་བསྒྲུབ་པའི་ཐབས་ལས་
གསུངས་པ་ལྟར་ཤེས་དགོས་སོ། །ཐབས་ཀྱིས་ཟིན་པའི་ཐ་མལ་པའི་ཕུང་པོ་བྱང་ཆུབ་ཀྱི་རྒྱུར་འགྱུར་བ་དེ་ཡང་གསུངས་པ། ཤིན་ཏུ་ཞེས་སོགས་ཏེ་འདི་སྤྱོད་འཇུག་ལས། གསེར་འགྱུར་རྩི་ཡི་རྣམ་པ་མཆོག་ལྟ་བུ། །མི་གཙང་ལུས་འདི་བླངས་ནས་རྒྱལ་
བའི་སྐུ། །རིན་ཆེན་རིན་ཐང་མེད་པར་བསྒྱུར་བས་ན། བྱང་ཆུབ་སེམས་ཞེས་བྱ་བ་རབ་བརྟན་གཟུང་། །ཞེས་པ་དང་འགྱུར་ཁྱད་ཙམ་མ་གཏོགས་པ་འདྲ་བར་སྣང་ངོ་། །ལུང་དེས་བསྟན་པ་དེ་བཞིན་དུ་ཡང་དཀོན་བརྩེགས་ཀྱི་འོད་སྲུངས་ལེའུ་ལས། འོད་སྲུངས་ཞེས་
6-2-69b


སོགས་ཏེ་ཐབས་ཀྱིས་ཟིན་པའི་བྱང་སེམས་ཀྱི་ཉོན་མོངས་ཀྱང་བྱང་ཆུབ་ཀྱི་རྒྱུར་འགྱུར་བའོ། །དགོངས་པ་ལུང་སྟོན་ཞེས་བྱ་བའི་བཤད་རྒྱུད་ཀྱི་ལེའུ་གསུམ་པ་ལས་གསུངས་པའི་ཤེས་བྱེད་དགོད་པ་ནི། ཕྱག་ན་རྡོ་རྗེས་ཕྲ་མོའི་རྣལ་འབྱོར་གྱི་དོན་ཞུས་པའི་ལན་དུ། ཕྱག་
ན་རྡོ་རྗེ་གྲགས་པ་ཆེན་པོ་དང་ལྡན་པ་ཞེས་བོས་ནས་དགོངས་པས་གསུངས་སོ་ཞེས་དྲང་ངོ་། །གང་ན་ཕྲ་མོའི་རྣལ་འབྱོར་གྱི་དེ་ཉིད་དོ། །དེའི་དོན་དེ་ཇི་འདྲ་བ་ཞིག་ཏུ་གསུངས་ན་ཕྲ་མོར་སྦྱོར་བའི་དོན་ནི་དེ་བཞིན་ཉིད་ཇི་ལྟ་བ་དེ་བཞིན་དུ་གཤེགས་པ་སྟེ་དེ་དང་གཉིས་སུ་མེད་
པར་འགྱུར་བའོ། །གང་དང་གཉིས་སུ་མེད་པ་ནི། འགྲོ་བ་སེམས་ཅན་རྣམས་དེ་བཞིན་ཉིད་དང་གཉིས་སུ་མེད་པར་སྦྱོར་བ་ཡིས་ཕྲ་མོའི་རྣལ་འབྱོར་ཏེ་ཕྲ་མོ་ནི་འདིར་དེ་བཞིན་ཉིད་དང་རྣལ་འབྱོར་ནི་དེ་དང་འགྲོ་བ་དབྱེར་མེད་དུ་སྦྱོར་བའོ། །དེ་ལྟར་སྦྱར་བའི་དེ་བཞིན་ཉིད་
ལས་བྱང་ཆུབ་པ་ལ་སོགས་པ་མངོན་བྱང་ལྔའི་སྒོ་ནས་ལྷར་བསྐྱེད་པ་འདི་ནི་མ་འོངས་པའི་སྐྱེ་བོ་སངས་རྒྱས་ཀྱི་རྒྱུར་བྱེད་པ་ཅན་ཡིན་ནོ། །གང་གི་ཆོས་རྣམས་ཡང་དག་པར་བརྗོད་པའི་སངས་རྒྱས་ཀྱི་སྐུ་གདུལ་བྱའི་བསམ་པ་ཇི་ལྟ་ཇི་ལྟར་ཡིན་པ་དེ་ལྟ་དེ་ལྟར་
སྟོན་པར་གསུངས་པའི་སངས་རྒྱས་རིགས་ལྔ་ནི་ཕུང་པོ་འདི་དག་སྟེ་དེར་བསྒོམས་པས་ཕུང་པོ་རྫོགས་པའི་བྱང་ཆུབ་ཀྱི་རྟེན་དུ་འགྱུར་རོ། །ཕུང་པོ་དེ་དག་དེ་བཞིན་ཉིད་དང་གཉིས་སུ་མེད་པར་འཇུག་པ་སྟེ་སྦྱར་ནས་ལྷར་བསྐྱེད་པས་དེ་ཡང་དེ་གཞིན་གཤེགས་ཞེས་
གསུངས་སོ། །དེ་ལྟར་ན་ལུང་འདིས་རང་བཞིན་ཤེས་པའི་སྒོ་ནས་ལྷར་བྱས་པས་ཕུང་པོ་བྱང་ཆུབ་ཀྱི་རྒྱུར་འགྱུར་བར་བསྟན་ལ། ལུང་སྔ་མ་གཉིས་ཀྱིས་ནི་ཐབས་ཀྱིས་ཟིན་ན་ཉོན་མོངས་དང་མི་གཙང་བའི་ལུས་ཀྱང་བྱང་ཆུབ་ཀྱི་རྒྱུར་འགྱུར་བར་བསྟན་ནོ། །སྒྲུབ་པ་
6-2-70a


པོས་སངས་རྒྱས་སུ་སྒོམ་དུ་རིགས་མི་རིགས་ལ་དྲིས་ལན་མཛད་པ་འདི་ནི་རིམ་པ་དང་པོའི་སྐབས་གཙོ་ཆེ་མོད་ཀྱང་རིམ་པ་གཉིས་པའི་སྐབས་ཀྱི་ལྷ་སྒོམ་པའི་ཡང་རྣམ་གཞག་ཏུ་འགྲོའོ། །ཕྱུང་བའི་དཀྱིལ་འཁོར་གྱི་རྣམ་པར་བཞག་པའི་
རིམ་པར་ཕྱེ་བ་སྟེ་ལེའུ་གསུམ་པའི་རྣམ་བཤད་དོ།། །།བཞི་པ་དོན་དམ་པའི་དཀྱིལ་འཁོར་གྱི་རྣམ་གཞག་རིམ་པ་ལ་གསུམ། ཕུང་སོགས་འོད་གསལ་དུ་གཞུག་པ། ཕུང་སོགས་དང་པོ་བཞི་འོད་གསལ་དུ་ཞུགས་པའི་རྟགས། །ལྷག་མ་
འོད་གསལ་དུ་འཇུག་པའི་རིམ་པའོ། །དང་པོ་ལ་གཉིས། རྩ་རྒྱུད་ཀྱིས་མདོར་བསྟན་པ། བཤད་རྒྱུད་ཀྱིས་རྒྱས་པར་བཤད་པའོ། །དང་པོ་ནི། ད་ནི་དོན་དམ་པའི་དཀྱིལ་འཁོར་གྱི་རྣམ་གཞག་རིམ་པ་བསྟན་པའི་ཕྱིར་དུ་ཐོག་མར་མདོར་བསྟན་པའི་ཚིག་རྩ་བའི་
རྒྱུད་ལས་གསུངས་པ་ལ་འཇུག་པར་བྱ་སྟེ་ཞེས་མཚམས་སྦྱར་བའོ། །དོན་དམ་པའི་དཀྱིལ་འཁོར་འདི་སྐབས་གང་དུ་འབྲེལ་སྙམ་ན། མདོར་བྱས་དང་མདོ་བསྲེར་ལྷག་མོས་འོད་གསལ་དུ་སྡུད་པའི་སྐབས་སུ་ལེའུ་བདུན་པ་དང་རྡོ་རྗེ་ཕྲེང་བའི་ལུང་འདི་རྣམས་
དྲངས་ནས་དོན་དམ་པའི་དཀྱིལ་འཁོར་བཤད་པ་འདིར་འཆད་པས་ན་རིམ་པ་དང་པོའི་སྐབས་སུ་འབྲེལ་ལ་འཆད་པར་འགྱུར་བ་ལྟར་རྫོགས་རིམ་གྱི་སྐབས་ཀྱང་སྟོན་པས། གཙོ་བོར་ནི་རིམ་པ་གཉིས་ཀྱི་ལམ་གྱི་སྐབས་ཀྱི་དོན་དམ་པའི་དཀྱིལ་འཁོར་
སྟོན་མོད་ཀྱང་ཞོར་ལ་ཆོས་མཐུན་སྦྱོར་བའི་ཡུལ་གཞིའི་སྐབས་ཀྱི་འཆི་བའི་འོད་གསལ་གྱི་དོན་དམ་པའི་དཀྱིལ་འཁོར་ཡང་སྟོན་ནོ། །དེ་ལ་དམ་ཚིག་ནི་ཐབས་ཤེས་སྦྱོར་བ་སྟེ་དེས་ཁུ་བ་སྟེ་ས་བོན་ཕྱུང་བ་སྟེ་བཏོན་ནས་མེར་མེར་པོ་ལ་སོགས་པའི་རིམ་
6-2-70b


གྱིས་མངོན་པར་འཕེལ་བ་དེ་ཉིད་ས་བོན་ལས་མྱུ་གུ་འཕེལ་བ་དང་འདྲ་བར་བྱིས་པ་དང་གཞོན་ནུ་དང་བར་མའི་གནས་སྐབས་གསུམ་རིམ་གྱི་ཐོབ་པས་མ་ཚང་བ་མེད་པར་གནས་ནས་འདོད་ཡོན་ལྔ་རྗེས་སུ་མྱོང་བར་འགྱུར་རོ། །མ་ཚང་བ་མེད་པ་ནི་རྣམ་སྣང་ལ་སོགས་
པའི་སྐུའི་དཀྱིལ་འཁོར་ཏེ་ཕུང་པོ་ཁམས་སྐྱེ་མཆེད་ཡུལ་ཡན་ལག་རྣམས་ཡོངས་སུ་རྫོགས་པའོ། །དེ་ནས་ཅི་ཞིག་བྱ་ཞེ་ན། རྡོར་ཕྲེང་གིས་འཆད་པར་འགྱུར་བ་ལྟར་དོན་དམ་པའི་དཀྱིལ་འཁོར་ལ་འཇུག་པའི་ཆོ་ག་བཞིན་དུ་ཕུང་པོ་ལ་སོགས་པ་བཏུང་བ་སྟེ་དོན་དམ་བདེན་
པར་གཞུག་པར་བྱའོ། །ཆོ་ག་བཞིན་དུ་འཐུང་བ་ཡང་རང་བཞིན་ལྔ་རིམ་གྱིས་འོད་གསལ་དུ་ཞུགས་པ་ལ་བྱའོ། །རང་བཞིན་ལྔ་ནི་ཕུང་པོ་ཁམས་དབང་པོ་ཡུལ་ཡེ་ཤེས་རྣམས་སོ། །ཅིའི་ཕྱིར་འཐུང་ན་འབྲས་བུ་སྟེ་འོད་གསལ་བས་དག་པའི་རྡོ་རྗེ་སེམས་དཔའི་སྐུ་འདོད་ཅིང་དོན་
དུ་གཉེར་བས་དེའི་ཕྱིར་དུའོ། །དོན་དམ་པར་སོང་བ་བཞིན་དུ་སླར་ཡང་འོང་བས་ན་དེ་བཞིན་གཤེགས་པ་སྟེ། རྣམ་སྣང་ལ་སོགས་པར་བརྟགས་པའི་གཟུགས་ཕུང་སོགས་ཀྱི་ཚོགས་སོ། །དེ་བསད་པ་ནི་སྲོག་རྩོལ་ལ་གནས་པ་བཅད་ནས་དོན་དམ་བདེན་པ་ལ་འཇུག་པའོ། །དེས་ཅིར་
འགྱུར་བ་རབ་ཏུ་སྟེ་ཤིན་ཏུ་མཆོག་ཏུ་གྱུར་པའི་ཕྱག་ཆེན་གྱི་དངོས་གྲུབ་ཐོབ་པར་འགྱུར་རོ། །ཞེས་སྒྲོན་གསལ་ལས་བཤད་དོ། །འདིར་སྔ་ཕྱིའི་བོད་ཀྱི་བླ་མ་དག་སྒྲོན་གསལ་ལས་ལུང་འདིས་རྫོགས་རིམ་ཐོབ་ལ། སྤྱོད་པ་བྱེད་རྒྱུ་མ་བྱུང་བ་དུས་བྱས་ནས་སྒྱུ་མ་ལྟ་བུའི་ཏིང་
ངེ་འཛིན་མངོན་དུ་བྱེད་པ་སྟོན་པར་གསུངས་པ་ལ་བརྟེན་ནས། དམ་ཚིག་ཁུ་ཕྱུང་གི་དོན་ནི་གང་ཟག་དེ་མངལ་ནས་རིམ་གྱི་སྐྱེས་པ་ཁོ་ན་ལ་འཆད་ཅིང་དེ་བཞིན་གཤེགས་ཚོགས་བསད་པ་ཡང་གང་ཟག་དེས་ཕུང་སོགས་འོད་གསལ་དུ་བཅུག་པ་ཁོ་ན་ལ་འཆད་པར་བྱེད་དོ། །
6-2-71a


དེ་ནི་འཐད་པར་མ་མཐོང་སྟེ་སྒྲོན་གསལ་ལས། ད་ནི་རྣལ་འབྱོར་པ་ཐམས་ཅད་ཀྱི་ཐུན་མོང་གི་དོན་དམ་པའི་དཀྱིལ་འཁོར་གྱི་རིམ་གྱིས་ཡང་དག་པའི་མཐའ་ལ་འཇུག་པ་བསྟན་པའི་ཕྱིར། །ཞེས་གཞུང་དེའི་མཚམས་སྦྱོར་དུ་གསུངས་པས་
རིམ་པ་གཉིས་ཀའི་སྐབས་ལ་སྦྱར་དགོས་པའི་ཕྱིར་དང་། མདོ་བསྲེ་ལས་ཀྱང་ཁུ་བ་ཕྱུང་སྟེ་ཆོ་ག་བཞིན། འབྲས་བུ་འདོད་པས་བཏུང་བར་བྱ། །ཞེས་པའི་ལུང་ལྷག་མོས་འོད་གསལ་དུ་སྡུད་པའི་སྐབས་སུ་དྲངས་པའི་ཕྱིར་དང་། འཕགས་པ་ཡབ་སྲས་གསུམ་གྱིས་རྩ་རྒྱུད་
ཀྱི་དོན་དེ་ཉིད་རྡོར་ཕྲེང་གི་ལུང་གིས་འཆད་པར་བཤད་པས་རྡོར་ཕྲེང་གི་ལུང་དོན་ཡང་ལེ་ལོ་ཅན་འཚང་རྒྱར་ཁོ་ན་ལ་བཤད་དགོས་པར་འགྱུར་བའི་ཕྱིར་རོ། །འཕགས་པ་ལྷས་ཀྱང་སློབ་དཔོན་འདིས་གསུངས་པ་ལྟར་དེ་བཞིན་གཤེགས་པའི་ཚོགས་བསད་ན། དངོས་
གྲུབ་མཆོག་ཐོབ་པར་འགྱུར་བའི་རྒྱུད་ཀྱི་དོན་དགོས་པ་ལུང་སྟོན་གྱིས་བཤད་པ་རྣམས་ཤིན་ཏུ་སྤྲོས་མེད་ཀྱི་སྤྱོད་པའི་སྐབས་སུ་གསུངས་པ་དང་ཡང་འགལ་བར་སྣང་ངོ་། །དེས་ན་ལེ་ལོ་ཅན་འཚང་རྒྱ་བ་བསྟན་པར་གསུངས་པ་ནི་དོན་གྱི་ཕྱོགས་གཅིག་ཏུ་རིག་པར་
བྱའོ། །འོ་ན་དམ་ཚིག་ཁུ་ཕྱུང་གི་དོན་བསྐྱེད་རིམ་དང་རྫོགས་རིམ་གཞན་གྱི་སྐབས་སུ་ཇི་ལྟར་བཤད་སྙམ་ན། འདིར་འཐུང་རྒྱུ་ནི་ཁུ་བ་ཞེས་པའི་ཚིག་གིས་སྟོན་པས་སྔོན་དུ་དེ་ཕྱུང་ནས་དེ་ནས་བཏུང་བར་བྱའོ་ཞེས་པའི་རིམ་པ་སྟོན་པ་ཡིན་ཏེ། སྒྲོན་གསལ་ལས། 
དེ་ནས་ཅི་ཞིག་བྱ་ཞེ་ན། ཆོ་ག་བཞིན་འབྲས་བུ་འདོད་པས་བཏུང་བར་བྱ། །ཞེས་གསུངས་ཏེ་འོན་ཀྱང་འབྱིན་པ་དང་འཐུང་བ་པོ་གཉིས་ནི་མི་གཅིག་གོ། །དེའི་བཤད་རྒྱུད་ལེའུ་བདུན་པ་ལས་ཀྱང་། དམ་ཚིག་རྗེས་དྲན་རྣམས་ཀྱིས་ནི། །དེ་བས་ཚངས་པ་ཤིན་ཏུ་དབྱུང་། །
6-2-71b


དངོས་མེད་གཅིག་ཏུ་སྦྱོར་བ་ཡིས། །མཁས་པས་ཆོ་ག་བཞིན་དུ་བཏུང་། །ཞེས་འཐུང་བའི་སྔོན་དུ་དབྱུང་བར་གསུངས་ཏེ་ཚངས་པ་ནི་ཁུ་བའོ། །བཏུང་རྒྱུ་ལ་ཁུ་བ་ཞེས་འབྱུང་ཡང་འགྲེལ་པར་ཕུང་པོ་ལ་སོགས་པ་བཏུང་བ་སྟེ་ཞེས་གསུངས་པས་འབྲས་བུ་ཟུང་འཇུག་འདོད་པའི་
སྒྲུབ་པ་པོའི་ཕུང་སོགས་ནི་འོད་གསལ་དུ་གཞུག་རྒྱུའི་བཏུང་བ་ཡིན་ལ་དེ་དང་དེ་བཞིན་གཤེགས་པའི་ཚོགས་བསད་ན། །ཞེས་གསུངས་པའི་བསད་རྒྱུའི་དེ་བཞིན་གཤེགས་པ་གཉིས་དོན་གཅིག་གོ། །འོ་ན་སྒྲུབ་པ་པོའི་ཕུང་སོགས་ལ་ཁུ་བའི་སྒྲས་སྟོན་པ་ཅི་ཡིན་སྙམ་ན། 
དམ་ཚིག་གི་དོན་ཕ་མ་གཉིས་ཐབས་ཤེས་སུ་སྦྱར་བ་ལས་བྱུང་བའི་ཁུ་བ་ལས་རིམ་གྱིས་རྫོགས་པ་ནི་སྒྲུབ་པ་པོའི་ཕུང་སོགས་ཡིན་པས་ཁུ་བ་ལས་བསྐྱེད་པ་འཐུང་བ་ལ་ཁུ་བ་འཐུང་བའི་སྒྲས་བཏགས་པའོ། །དེས་ན་གཟུགས་སོགས་ནང་གི་ཆོས་དང་མི་བསྐྱོད་ལ་སོགས་
སུ་བཏགས་པ་ཞེས་དགོངས་པ་ལུང་སྟོན་ལས་གསུངས་པ་དང་། གཟུགས་ཕུང་ཞེས་སོགས་རྡོར་ཕྲེང་ནས་གསུངས་པ་དང་ཁུ་བ་ལས་བསྐྱེད་པའི་ཕུང་པོ་སོགས་དོན་གཅིག་ཡིན་པས་རྩ་རྒྱུད་དང་བཤད་རྒྱུད་དེ་གཉིས་མདོར་བསྟན་དང་རྒྱས་བཤད་དུ་གསུངས་སོ། །དེའི་
ཕྱིར་ལྷག་མོས་འོད་གསལ་དུ་སྡུད་པ་དང་ཚེ་འདི་ལ་འཚང་རྒྱ་བའི་རྫོགས་རིམ་གྱི་སྐབས་སུ་ཡང་དམ་ཚིག་ཁུ་ཕྱུང་འཐུང་བ་དང་དེ་བཞིན་གཤེགས་པའི་ཚོགས་བསད་པ་ཞེས་པའི་ལུང་དོན་མི་འགལ་བ་ཡིན་ནོ། །གཉིས་པ་ལ་གཉིས། དགོངས་པ་ལུང་སྟོན་དང་། རྡོ་རྗེ་
ཕྲེང་བས་བཤད་པའོ། །དང་པོ་ནི། ལེའུ་བདུན་པའི་རྩ་རྒྱུད་འདི་ཡི་དོན་བཤད་པ་ནི་དགོངས་པ་ལུང་སྟོན་ཞེས་བྱ་བའི་བཤད་རྒྱུད་ཀྱི་ལེའུ་གསུམ་པ་ལས་གསུངས་ཏེ་ཞེས་མཚམས་སྦྱོར་བའོ། །ལྷག་མཐོང་ཞེས་བྱ་བར་བཤད་དེ་ཞེས་དྲང་ངོ་། །གང་ན་སྒྲུབ་པ་པོའི་
6-2-72a


སེམས་རྒྱུད་ཀྱིས་ཟིན་པའི་ནང་གི་ཆོས་གཟུགས་ལ་སོགས་པ་མཐོང་བ་ནིའོ། །མཐོང་ཚུལ་ནི་རིམ་པ་དང་པོའི་ལྷག་མོས་ལུས་ལ་བསྡུས་པའི་སྐབས་སུ་ཕུང་སོགས་ཀྱི་ངོ་བོར་ལྷ་རྣམས་མཐོང་བ་ཡིན་ལ་རིམ་པ་གཉིས་པའི་སྐབས་
སུ་རླུང་སེམས་ཙམ་ལས་ལྷའི་སྐུར་བསྐྱེད་པའོ། །ཞི་གནས་སུ་བྱ་བ་སྟེ་ཞི་བར་བྱའོ་ཞེས་དྲང་ངོ་། །གང་ན་རྣམ་ཤེས་ལ་སོགས་པ་མི་བསྐྱོད་པ་ལ་སོགས་པར་གྲངས་བཞིན་དུ་བརྟགས་པ་སྟེ་བསྐྱེད་པ་དག་ནིའོ། །དེ་དག་ཞི་གནས་སུ་བྱེད་ཚུལ་ནི་མི་བསྐྱོད་པ་ལ་
སོགས་པར་བརྟགས་པ་འདི་དག་དངོས་པོ་མེད་པར་གྱུར་པའི་དེ་བཞིན་ཉིད་དུ་ཞུགས་པ་ནི་ཞི་གནས་ཞེས་པའི་མིང་ཅན་ཏེ་མིང་དེའི་དོན་ནོ། །ད་ལྟ་འགྱུར་བའི་རྒྱུད་ལ་འདི་གཉིས་དངོས་པོ་མེད་པའི་བདག །དེ་བཞིན་ཉིད་ནི་ཞི་ཞེས་བྱ། །ཞེས་བསྒྱུར་མོད་ཀྱང་མི་
བསྐྱོད་པ་ལ་སོགས་པ་ཞི་གནས་སུ་བྱེད་ཚུལ་སྟོན་པས་གཞུང་འདི་དང་སྤྱོད་བསྡུས་སུ་བསྒྱུར་བ་ལྟར་ལེགས་སོ། །འདི་ཡང་རིམ་པ་དང་པོའི་སྐབས་སུ་ནི་མཚན་ཉིད་ལ་ལྷག་པར་མོས་པ་ཙམ་ཡིན་ལ་རིམ་པ་གཉིས་པར་ནི་སྤྲོས་པའི་སྣང་བ་རྣམས་སྣང་མེད་
དུ་སྡུད་ནུས་པ་ཡང་ཡིན་ནོ། །འདི་ནི་གཞུང་གཞན་ནས་བཤད་པའི་ཞི་ལྷག་གཉིས་དང་མི་འདྲའོ། །དེ་བཞིན་ཉིད་འོད་གསལ་གྱི་དཀྱིལ་འཁོར་དུ་སངས་རྒྱས་ཏེ་ཕུང་པོ་རྣམས་རྣལ་འབྱོར་པ་ཡི་གཞུག་གོ། །འབྲས་བུ་འདོད་པས་ཞེས་དང་རྣལ་འབྱོར་པ་ཡིས་ཞེས་
དང་དངོས་གྲུབ་རབ་མཆོག་ཐོབ་པར་འགྱུར་ཞེས་གསུངས་པས་གཞུང་དེ་དག་གིས་ནི་ལམ་གྱི་སྐབས་ཀྱི་འོད་གསལ་དུ་འཇུག་ཚུལ་སྟོན་གྱི་གཞིའི་སྐབས་མིན་ནོ། །སྒྲོན་གསལ་དུ་དགོངས་པ་ལུང་སྟོན་གྱི་ལེའུ་བདུན་པའི་བཤད་རྒྱུད་དྲངས་ལ་འདིར་མ་དྲངས་ཀྱང་
6-2-72b


དོན་འདྲའོ། །གཉིས་པ་ནི་རྩ་རྒྱུད་ཀྱི་དོན་འདི་སླར་ཡང་ཞིབ་ཏུ་བཤད་པ་རྡོ་རྗེ་ཕྲེང་བ་ཞེས་བྱ་བའི་རྣལ་འབྱོར་ཆེན་པོའི་རྒྱུད་ལས་གསུངས་ཏེ་དེ་ལ་འཇུག་པར་བྱའོ་ཞེས་མཚམས་སྦྱོར་བའོ། །གཟུགས་ཕུང་གཏོགས་པ་ནི་རྣམ་པར་སྣང་མཛད་ཀྱི་རིགས་ཅན་རྣམས་ཞེས་
འབྱུང་བ་ལྟར་འདི་རྣམས་རྣམ་སྣང་གི་རིགས་ཅན་ཡིན་པའི་དོན་ཏེ་གཞན་ལ་ཡང་ཚོར་ཕུང་གཏོགས་ཞེས་སོགས་ཀྱི་དོན་སྦྱར་རོ། །མེ་ལོང་ཡེ་ཤེས་ནི་མེ་ལོང་ལ་གཟུགས་བརྙན་སྣང་བ་བཞིན་དུ་ཡུལ་རྣམས་ཅིག་ཅར་སྣང་བ་ལ་སྤྱོད་བསྡུས་ལས་གསུངས་སོ། །
གཟུགས་ནི་ཁ་དོག་དང་དབྱིབས་ཀྱི་གཟུགས་སོ། །རྣམ་པ་ལྔ་ནི་ཕུང་པོ་དང་ཁམས་དང་དབང་པོ་དང་ཡུལ་དང་ཡེ་ཤེས་རེ་རེ་བགྲངས་པ་སྟེ་ཐམས་ཅད་ལ་དེ་བཞིན་དུ་སྦྱར་རོ། །དེ་ཙམ་དུ་ཟད་དམ་སྙམ་ན་ལག་པ་དང་དཔུང་པ་གཡས་པ་ལ་བཀོད་པའི་ཁྲོ་བོ་
གཉིས་དང་ཡང་དག་པར་ལྡན་པ་སྟེ་དེ་དག་དང་བཅས་པ་ནི་རྣམ་སྣང་གི་རིགས་ཅན་ནོ། །དེ་བཞིན་དུ་འོག་ཏུ་ཡང་ཤེས་པར་བྱའོ། །མདོར་བྱས་ལས། ཁྱོ་བོ་བྱམས་པར་ཡང་དག་ལྡན། །ཞེས་འབྱུང་ངོ་། །མཉམ་པ་ཉིད་ཀྱི་ཡེ་ཤེས་ནི་རྐང་མེད་རྐང་གཉིས་ལ་
སོགས་པའི་སེམས་ཅན་རྣམས་སེམས་ཙམ་མོ་ཞེས་རྣམ་པ་གཅིག་ཏུ་རྟོགས་པ་ལ་སྤྱོད་བསྡུས་ལས་གསུངས་སོ། །ཁྲོ་བོ་གཉིས་ནི་གཡོན་པའི་ལག་པ་དང་དབུང་པ་ལ་བཀོད་པའི་ཁྲོ་བོའོ། །དེ་གཉིས་དང་ལྡན་པའི་བཤད་པ་ནི་སྔར་བཞིན་ཐམས་ཅད་ལ་ཤེས་
པར་བྱའོ། །སོ་སོར་རྟོག་པ་ནི་ཆོས་རྣམས་ཀྱི་ཆ་ཤས་ནི་འདི་དག་གོ་ཞེས་སོ་སོར་རྟོག་པ་ལ་སྤྱོད་བསྡུས་ལས་གསུངས་སོ། །བྱིན་ཟ་ནི་མེའི་མིང་གི་རྣམ་གྲངས་སོ། །ཁྲོ་བོ་གཉིས་ནི་ཁ་དང་པུས་མོ་གཡས་ལ་བཀོད་པ་གཉིས་སོ། །བྱ་བ་བསྒྲུབ་པ་ནི་རང་གཞན་
6-2-73a


གྱི་སྒོ་གསུམ་གྱི་བྱ་བ་རྫོགས་པར་སྒྲུབ་པ་ལ་སྤྱོད་བསྡུས་ལས་གསུངས་སོ། །ཁྲོ་བོ་གཉིས་ནི་གསང་གནས་དང་པུས་མོ་གཡོན་ལ་བཀོད་པ་གཉིས་སོ། །སྟེང་འོག་གི་ཁྲོ་བོ་ནི་སྤྱི་གཙུག་དང་རྐང་མཐིལ་ལ་བཀོད་པ་གཉིས་ཏེ་ཤིན་ཏུ་
དང་བཅས་པ་གཉིས་ནི་སྐབས་གཞན་དུ་ཡང་དག་པ་དང་ལྡན་པར་གསུངས་པ་དང་དོན་འདྲ་བ་ཡིན་གྱི་བཅས་པའི་སྒྲས་རེག་རྡོ་རྗེ་མ་སྟོན་པ་མིན་ནོ། །རང་བཞིན་གྱི་ནི་སྣང་བ་ཉིད་ཅེས་པ་ནི་རྟོག་པ་རང་བཞིན་བརྒྱད་ཅུ་དང་རྟོག་མེད་ཀུན་ཏུ་སྣང་བ་གསུམ་མོ། །
རྣམ་ཤེས་ཕུང་པོར་ཞུགས་པ་ནི་རང་བཞིན་སྣང་བ་ལ་ཐིམ་ཞིང་སྣང་བ་གསུམ་ཡང་རིམ་པ་བཞིན་སྔ་མ་ཕྱི་མ་ལ་ཐིམ་པའོ། །དེར་མ་ཟད་རྣམ་ཤེས་ཉེར་ཐོབ་ཀྱང་འོད་གསལ་བར་འཇུག་གོ། །དེའི་མིང་གི་རྣམ་གྲངས་སྟོན་པ་ནི་མྱ་ངན་ལས་འདས་པ་དང་ཀུན་ཏེ་
ཐམས་ཅད་སྟོང་པ་དང་ཆོས་ཀྱི་སྐུར་ཡང་རྒྱུད་ལས་བཤད་པ་ཡིན་ནོ། །བཅས་པའི་སྒྲས་ནི་ཐམས་ཅད་སྟོང་པ་ཙམ་གྱི་སྒྲ་འཇུག་པ་མ་ཡིན་པར་སྟོན་པའོ། །འོ་ན་རྣམ་ཤེས་ཀྱི་སྐབས་སུ་སྐབས་གཞན་བཞིན་དུ་ཕུང་པོ་ལ་སོགས་པ་ལྔ་མི་སྟོན་པ་ཅི་ཞེ་ན། 
ནམ་མཁའ་ལ་གཉིས་ལས་བུ་ག་ནམ་མཁའ་ནི་གཟུགས་ཀྱི་སྐྱེ་མཆེད་ཡིན་པས་ལྔ་ཚན་དང་པོའི་སྐབས་ཡིན་ལ་འདུས་མ་བྱས་ཀྱི་ནམ་མཁའ་ནི་ཐིམ་ནས་འགྲོ་རྒྱུའི་ཁོངས་སུ་མི་གཏོགས་པས་འདིར་མ་བཤད་དོ། །ཆོས་ཀྱི་སྐྱེ་མཆེད་ཀྱི་ཕུང་པོ་བར་པ་
གསུམ་ནི་སྐབས་གོང་མར་བཤད་ཟིན་ལ་ནམ་མཁའ་ལ་སོགས་པའི་འདུས་མ་བྱས་ནི་སྔར་བཤད་པ་ལྟར་ཡིན་པས་ཆོས་ཀྱི་ཁམས་ནི་འོད་གསལ་དུ་ཐིམ་པར་འགྱུར་བའི་ཁོངས་སུ་མ་བགྲངས་སོ། །ཆོས་ཀྱི་དབྱིངས་ཀྱི་ཡེ་ཤེས་ནི་སྒོ་གསུམ་གྱི་སྒྲིབ་
6-2-73b


པ་དག་ཅིང་ལས་ཉོན་ལས་གྲོལ་ཏེ་དགེ་མི་དགེའི་རྣམ་རྟོག་གི་བག་ཆགས་སྦྱངས་པ་ལ་སྤྱོད་བསྡུས་སུ་གསུངས་པ་ཚང་བ་སྐབས་འདིར་མེད་ཀྱང་ལས་དང་ཉོན་མོངས་ཡོངས་སུ་སྦྱོང་བའི་རྣམ་ཤེས་ཡོད་པས་ཚང་ལ་ཡིད་ཀྱི་དབང་པོ་ནི་སྣང་བ་གསུམ་པོ་ཡིན་ཏེ་
སྤྱོད་བསྡུས་ལས། འཇམ་དཔལ་གྱི་ཏིང་ངེ་འཛིན་གྱི་དབང་དུ་བྱས་ཏེ་བཤད་པ་ལུས་ཀྱི་ནང་ན་སྣང་བའི་རྣམ་པར་ཤེས་པ་གསུམ་པོ་དེ་ནི་ཡིད་ཀྱི་དབང་པོ་སྟེ་ཞེས་གསུངས་པས་སོ། །དེ་ལྟར་ན་སྟེང་འོག་གི་ཁྲོ་བོ་གཉིས་དང་འཇམ་དཔལ་དང་མི་བསྐྱོད་པ་རྣམས་ནི་རྣམ་
ཤེས་ཀྱི་ཕུང་པོའི་སྐབས་ཀྱི་འོད་གསལ་དུ་འཇུག་རྒྱུའོ། །འོ་ན་འདིར་མིག་ལ་སོགས་པའི་སྦྱང་གཞི་ཉིད་འོད་གསལ་དུ་འཇུག་རྒྱུར་བཤད་པ་དང་ཁྲོ་བོ་རྣམས་བཤད་པ་ལྟར་ལྷ་འོད་གསལ་དུ་འཇུག་རྒྱུར་བཤད་པ་གཉིས་ཀ་སྣང་ན་དེ་དག་ཇི་ལྟར་ཡིན་སྙམ་ན། དེ་ལ་ཐ་
མལ་པའི་ཕུང་སོགས་འཆི་བའི་འོད་གསལ་དུ་འཇུག་པ་ནི་ཐབས་ལ་མཁས་པ་དང་བྲལ་བའི་འཇུག་ཚུལ་ཡིན་པས་རྣམ་སྣང་ལ་སོགས་པའི་ལྷ་འོད་གསལ་དུ་འཇུག་རྒྱུ་མེད་དོ། །དེའི་ཕྱིར་འཁོར་བ་པ་རང་དགའ་བའི་སྐྱེ་འཆི་བརྒྱུད་མའོ། །འདིར་ནི་གཙོ་བོར་རྣལ་འབྱོར་
པའི་ཕུང་སོགས་འོད་གསལ་དུ་འཇུག་ཚུལ་སྟོན་ལ་དེ་ཡང་སྦྱང་གཞི་སོ་གཉིས་ཀྱི་རང་བཞིན་ལྷ་སོ་གཉིས་སུ་བསྒོམས་པའི་མཐུས་འོད་གསལ་དུ་འཇུག་པས་ན་ཕུང་སོགས་དང་ལྷ་གཉིས་ཀ་འོད་གསལ་དུ་འཇུག་རྒྱུར་གཟུང་ངོ་། །རྒྱས་པར་ཕྱེ་ན་དེ་ལྟར་ཡིན་ཡང་
བསྡུ་ན་སྤྱོད་བསྡུས་ལས་རྣམ་སྣང་དང་རིན་འབྱུང་དང་འོད་དཔག་མེད་དང་དོན་ཡོད་གྲུབ་པ་དང་མི་བསྐྱོད་པའི་རིགས་སུ་གཏོགས་པའི་བསྒོམ་རྒྱུ་རྣམས་རིམ་པ་བཞིན་དུ་ས་དང་ཆུ་དང་མེ་དང་རླུང་དང་རྣམ་ཤེས་ཀྱི་ཁམས་ལྔར་འདུས་པར་གསུངས་པས་ཕུང་སོགས་ལྷ་
6-2-74a


སོ་གཉིས་སུ་བསྒོམས་པས་ནི་ཁམས་ལྔ་སྦྱངས་ན་དེ་དག་འོད་གསལ་དུ་རིམ་གྱིས་འཇུག་པར་བྱེད་པ་ཡིན་པར་ཤེས་པར་གྱིས་ཤིག །དེ་ལྟར་འོད་གསལ་དུ་འཇུག་པ་དེ་བརྟན་པར་བྱ་བའི་དོན་དུ་གསང་སྔགས་འདི་ནི་བརྗོད་པར་བྱའོ། །སྔགས་
ནི་ཨོཾ་ཞེས་སོགས་སོ། །འདི་རིམ་པ་དང་པོའི་སྐབས་སུ་ངག་ཏུ་བརྗོད་ནས་དེའི་དོན་ལ་མོས་པ་ཙམ་བྱ་དགོས་པ་རིམ་པ་གཉིས་པའི་སྐབས་སུ་ནི་མངོན་སུམ་དུ་འགྱུར་རོ། །གཉིས་པ་ནི། ཉེ་བར་བཤད་པར་བྱ་སྟེ་ཤེས་མཚམས་སྦྱོར་རོ། །གང་ན་རྫོགས་པ་ལ་གནས་
པ་ནི་རྫོགས་པའི་རིམ་པ་སྟེ་དེའོ། །དེ་ནི་རྣམ་གཞག་བཞི་པ་འདི་ལ་བསྐྱེད་རྫོགས་གཉིས་ཀའི་ཆ་ཡོད་པའི་ནང་ནས་འདི་ཉིད་ཀྱི་རྫོགས་རིམ་གྱི་ཆའོ། །དེ་ལ་སྤྱིར་འཁོར་བ་ཐོག་མ་མེད་པ་ནས་ཞེས་གསུངས་པ་ལྟར་ཐིམ་པའི་རིམ་པ་འདི་སེམས་ཅན་ཐ་མལ་པ་འཆི་བ་
ལ་ཡང་ཡོད་མོད་ཀྱང་རྣལ་འབྱོར་གྱི་སྟོབས་ཀྱིས་དེ་ལྟ་བུའི་ཐིམ་རིམ་འབྱུང་བ་ནི་རྫོགས་རིམ་པ་མིན་པ་ལ་མེད་དོ། །དེ་ལ་ནས་ཤེས་པར་བྱ་སྟེ་ཤེས་པའི་བར་ནི་མཚམས་སྦྱོར་བ་སྟེ་གཟུགས་ཀྱི་ཕུང་པོ་ཞེས་འབྱུང་ཡང་རྣམ་སྣང་གི་རིགས་རྣམས་འོད་
གསལ་དུ་ཞུགས་པའི་མཚན་མ་ལ་བྱ་དགོས་ཏེ་འོག་མ་གསུམ་གྱི་འགྲོས་ཀྱིས་ཤེས་སོ། །གཟུགས་ཕུང་ཐིམ་པའི་མཚན་མ་ནི། ཡན་ལག་ཐམས་ཅད་སྔར་ལས་ཕྲ་རུ་སོང་བ་དང་ལུས་ཉམས་ཆུང་བ་དང་ནུས་པ་མེད་པར་འགྱུར་རོ། །མཚན་མ་ནི་ཞེས་ཀུན་ལ་
སྦྱར་རོ། །མེ་ལོང་ལྟ་བུའི་ཡེ་ཤེས་ཐིམ་པ་ན་མི་གསལ་བར་རབ་རིབ་ཏུ་འགྱུར་རོ། །ས་ཁམས་འགགས་པ་ན་ལུས་ཐམས་ཅད་བསྐམས་པར་འགྱུར་རོ། །ས་ཆུ་ལ་ཐིམ་པ་ན་སྨིག་རྒྱུ་ལྟ་བུ་འབྱུང་བར་གསུངས་པ་སོགས་ནི་ཡིད་ངོའི་ཉམས་འཆར་ཚུལ་ཡིན་ལ་
6-2-74b


འདིར་ནི་འབྱུང་བ་བཞི་ཐིམ་པ་ན་ལུས་ལ་ཇི་ལྟར་འགྱུར་བ་སོགས་སྟོན་པས་མི་འདྲའོ། །མིག་མི་འགྱུར་བ་ནི་འབྱེད་འཛུམས་མི་ཤེས་པའོ། །ཡུལ་གཟུགས་ནི་རྒྱུད་ཀྱིས་མ་ཟིན་པའི་ཕྱི་རོལ་གྱི་གཟུགས་མིན་གྱི་རང་གི་ལུས་ཀྱི་གཟུགས་ཡིན་པས་དེ་ཐིམ་པ་ན་ལུས་ཀྱི་མདངས་
ཡལ་བ་དང་ཉམས་སྟོབས་ཟད་པར་འགྱུར་རོ་དེ་ལྟར་ཞེས་སོགས་ནི་དོན་སྡུད་པ་སྟེ་འཇུག་གོ་ཞེས་དྲང་ངོ་། །གང་ན་འཁོར་བ་ནས་སེམས་ཅན་རྣམས་ཞེས་པའི་བར་ཏེ་མཚན་མ་སྟོན་པའི་གཞུང་འདི་དག་གིས་སེམས་ཅན་དང་དགའ་བ་དང་རྣལ་འབྱོར་པ་ལ་འབྱུང་ཚུལ་ཐུན་མོང་དུ་
སྟོན་ནོ། །གང་དུ་ན་དོན་དམ་པའི་དཀྱིལ་འཁོར་དུའོ། །སེམས་ཅན་དེའི་ཆོས་གང་དེར་འཇུག་ན། རྣམ་སྣང་གི་རིགས་ཅན་ཏེ་དེའི་རིགས་སུ་བསྒོམ་རྒྱུའི་སྐུའི་དཀྱིལ་འཁོར་ལ་གནས་པ་རྣམས་སོ། །རིམ་པ་ནི་སྐད་ཅིག་པ་སྟེ་མྱུར་བའི་རིམ་གྱིས་སོ། །དེ་དག་གི་མཚན་མ་ནི་སྔར་བཤད་
པ་དེ་ལྟར་རོ། །འོ་ན་རྡོར་ཕྲེང་དུ་རྣམ་སྣང་ལ་སོགས་པའི་རིགས་ཅན་འགའ་ཞིག་གི་སྐབས་སུ་དེའི་རིགས་རྣམས་ཚང་བར་མ་བསྟན་པ་དེ་དག་དོམ་དམ་དུ་མི་འཇུག་གམ་སྙམ་ན། བྱམས་པ་ལ་སོགས་པ་གང་དག་རྣམ་སྣང་ལ་སོགས་པའི་རིགས་ཀྱི་ཆ་ཤས་ལ་གནས་པ་དེ་དག་གི་འོད་
གསལ་དུ་འཇུག་པ་ནི་རྡོ་རྗེ་ཕྲེང་བ་འདིར་རྣམ་པར་བཞག་པ་མེད་མོད་ཀྱི་སྟེ་མེད་ནའང་འོན་ཀྱང་རྣམ་སྣང་ལ་སོགས་པའི་རིགས་རྣམས་བསྟན་པའི་ཟླ་སྟོབས་ཀྱི་དེ་དག་ཀྱང་དོན་དམ་བདེན་པར་རབ་ཏུ་འཇུག་པར་ཤེས་པར་བྱའོ། །ཡང་ན་རྣམ་གཞག་ཏུ་ལྔ་ཚན་དེ་ལས་མ་གཏོགས་པ་
གཞན་འོད་གསལ་དུ་འཇུག་པར་མ་བཤད་པའི་དོགས་གཅོད་དུ་སྦྱར་ཏེ་དེ་ལྟ་ན་ཡང་ལྷག་མ་མ་བསྟན་པ་རྣམས་གོ་དགོས་པ་ལ་འདྲ་བ་ཡིན་ནོ། །མདོར་བྱས་ཀྱི་འགྱུར་ལྟར་ཡིན་ན་ནི་བྱམས་པ་སྒྲས་ཟིན་པས་རྣམ་སྣང་གི་རིགས་རྣམས་ཚང་བར་སྣང་ངོ་། །གཉིས་པ་ནས་
6-2-75a


ཤེས་པར་བྱ་སྟེ་ཞེས་པར་བྱ་སྟེ་ཤེས་པ་ནི་མཚམས་སྦྱོར་བའོ། །ལྷ་རྣམས་ཞེས་པ་ནི་ལྷ་དང་དེར་སྒོམ་རྒྱུ་གཉིས་ཆར་ལ་བྱ་སྟེ་གཞན་དུ་ཡང་ཤེས་པར་བྱའོ། །དེ་བཞིན་དུ་ཞེས་པ་ནི་དངོས་སུ་མ་བཤད་པ་རྣམས་བཤད་པའི་ཟླ་སྟོབས་ཀྱིས་གོ་བར་བྱ་དགོས་
པ་གཞན་ལ་ཡང་འདྲ་བར་སྟོན་པའོ། །ལུས་ཅན་རྣམས་ཀྱི་ཚོར་བ་ནི་དབང་ཤེས་ཀྱི་ཚོར་བའོ། །ཡིད་ཅན་གྱི་ཚོར་བ་ནི་ཡིད་ཤེས་ཀྱི་ཚོར་བའོ། །རང་གི་ལུས་ཀྱི་སྒྲ་ནི་རྣ་བའི་ནང་གི་འུར་སྒྲ་ཡིན་ནམ་བརྟག་གོ། །གསུམ་པ་ནས་ཞེས་པར་བྱ་སྟེ་ཞེས་པའི་བར་ནི་མཚམས་
སྦྱོར་རོ། །རྐང་གཉིས་ལ་སོགས་པའི་སེམས་ཅན་གྱི་དོན་རྣམས་སོ་སོར་གཅོད་པ་ལ་སྤྱོད་བསྡུས་ལས་འདུ་ཤེས་སུ་གསུངས་པས་དེ་ཐིམ་པ་ན་སེམས་ཅན་དེ་རྣམས་དྲན་པར་མི་འགྱུར་རོ། །སོར་རྟོག་ཀྱང་མིང་ལ་སོ་སོར་རྟོག་པ་སོགས་ལ་བྱེད་པས་དེ་ཐིམ་པ་ན་མིང་
མི་དྲན་ནོ། །ལུས་ཀྱི་མེ་ཐིམ་པ་ན་བཟའ་བཏུང་འཇུ་བའི་ནུས་པ་ཉམས་སོ། །སྟེང་གི་རླུང་ནི་སྣ་སྒོའི་ཡིན་ལ་རྩེག་ཅིང་རྩེག་ཅིང་འགྲོ་བ་ནི་ནང་དུ་སྡུད་པ་ཞན་ཅིང་ཕྱིར་དྲག་ལ་རིང་བར་འགྲོ་བའོ། །དྲི་ཐིམ་པ་ན་རང་གིས་ལུས་ལ་དྲི་མི་བྲོ་བ་ནི་མི་ཚོར་བའོ། །འདིར་འོད་དཔག་
མེད་ཀྱི་རིགས་ཀྱི་སྤྱན་རས་གཟིགས་དང་འཇམ་དབྱངས་གཉིས་ཆད་ལ་སྣ་ནམ་སྙིང་རིན་འབྱུང་གི་རིགས་ལྷག་གོ་སྙམ་ན། གཟུགས་ནས་རྣམ་ཤེས་ཀྱི་ཕུང་པོའི་བར་ནི་གཙོ་བོ་ཡིན་ལ་དེ་དག་ཀྱང་སྔ་མ་སྔ་མ་རགས་ཤིང་ཕྱི་མ་ཕྱི་མ་ཕྲ་བས་རགས་རིམ་ནས་
འགག་གོ། །དེས་ན་ཕུང་པོ་རེ་རེ་ཐིམ་པ་ན་ཁམས་དང་དབང་པོ་དང་ཡུལ་གང་ཐིམ་པར་འགྱུར་བ་རྣམས་ཕྱོགས་གཅིག་ཏུ་མཛད་པས་ན་ཚོར་བ་ཐིམ་པ་ན་སྣ་དབང་མི་ཐིམ་ཞིང་འདུ་ཤེས་ཐིམ་པ་ན་དེ་ཐིམ་པར་འགྱུར་བས་ནམ་སྙིང་རིན་འབྱུང་གི་རིགས་ཡིན་
6-2-75b


ཡང་ཐིམ་རིམ་གྱི་དབང་དུ་མཛད་ནས་པདྨའི་རིགས་སུ་གསུངས་ཏེ་གཞན་རྣམས་ལ་ཡང་དེ་ལྟར་རོ། །བཞི་པ་ནས་ཤེས་པར་བྱ་སྟེ་ཞེས་མཚམས་སྦྱར་ནས་ལུས་ཀྱི་བྱ་བ་ནི་བསྒུལ་བསྐྱོད་དོ། །རླུང་བཅུ་ནི་སྲོག་འཛིན་དང་ཐུར་སེལ་དང་མེ་མཉམ་དང་གྱེན་རྒྱུ་དང་ཁྱབ་
བྱེད་ནི་རྩ་བའི་རླུང་ལྔ་སྟེ་སྙིང་ག་གསང་གནས་ལྟེ་བ་མགྲིན་པ་ཚིགས་རྣམས་ལ་གནས་སོ། །རྒྱུ་བ་དང་རྣམ་པར་རྒྱུ་བ་དང་ཡང་དག་པར་རྒྱུ་བ་དང་རབ་ཏུ་རྒྱུ་བ་དང་ངེས་པར་རྒྱུ་བ་ནི་ཡན་ལག་གི་རླུང་ལྔ་སྟེ་མིག་ལ་སོགས་པའི་དབང་པོ་ལ་གནས་སོ། །འདིར་ལུས་དབང་
ཐིམ་དགོས་ཤིང་རེག་བྱའི་བྱ་བ་བྱེད་པའི་ངེས་པར་རྒྱུ་བའི་རླུང་ཐིམ་པར་གསུངས་པས་མིག་ལ་སོགས་པ་བཞི་ཐིམ་པའི་དུས་དེར་ཡུལ་བཞི་ཐིམ་པར་གསུངས་པ་ལྟར་རེག་བྱ་ཡང་ཐིམ་དགོས་སོ། །དེ་ཡན་ཆད་ཀྱིས་ནི་ཕུང་པོ་བཞི་དང་ཁམས་བཞི་ཐིམ་པ་བསྟན་ལ་རྣམ་
ཤེས་ཐིམ་པ་ནི་འདི་མན་ཆད་ཀྱིས་སྟོན་ཏེ་དེ་ལ་རྟགས་དངོས་སུ་མ་གསུངས་སོ། །སྤྱོད་བསྡུས་ལས་ཀྱང་རིམ་པ་འདིས་དོན་དམ་པའི་བདེན་པ་ལ་དམིགས་པར་བྱའོ། །དེའི་རིམ་པ་ནི་འདི་ཡིན་ཏེ་ཕུང་པོ་ལ་སོགས་པ་ནི་ཁམས་ཕྲ་བ་ལ་གཞུག་གོ། །ཁམས་ཕྲ་བ་ནི་སེམས་
ལ་གཞུག་གོ། །སེམས་ནི་ཡང་སེམས་པ་ལ་གཞུག་གོ། །སེམས་པ་ནི་ཡང་མ་རིག་པ་ལ་གཞུག་སྟེ་དེ་ལྟར་སྦྱར་ནས་གཉིད་ལོག་པར་བྱེད་དོ། །ཞེས་གསུངས་པའི་མཐར་རིམ་པ་འདིས་ལུས་ཀྱི་དཀྱིལ་འཁོར་ལ་གནས་པའི་དེ་བཞིན་གཤེགས་པའི་ཚོགས་བསད་ན་
དངོས་གྲུབ་ཐོབ་པའི་ཤེས་བྱེད་དུ་སྔར་གྱི་དགོངས་པ་ལུང་སྟོན་གྱི་ལུང་དྲངས་ནས་འོད་གསལ་མངོན་སུམ་དུ་བྱེད་ཚུལ་ཕུང་སོགས་ཐིམ་པའི་རིམ་པ་ཅན་གྱི་སྒོ་ནས་གསུངས་སོ། །རྒྱུད་ཕྱི་མར་རང་དབང་རིན་ཆེན་དགག་པ་ཡི། །གཟུང་བ་འཛིན་པ་ཡིན་པར་བཤད། །
6-2-76a


ཅེས་འཛིན་པའི་ཡན་ལག་འོད་གསལ་ལ་བཤད་པའི་དོན་ལ་རང་ནི་གཟུགས་ལ་སོགས་པ་དང་དབང་པོ་ནི་མིག་སོགས་དང་རིན་ཆེན་ནི་སེམས་དང་རླུང་སྟེ་དེ་དག་ཐིམ་ནས་འོད་གསལ་དུ་འཇུག་པ་དང་སྨིག་རྒྱུ་ལ་སོགས་པའི་མཚན་མ་ལྔ་
ཡང་ས་ཆུ་ལ་ཐིམ་པ་སོགས་ཀྱི་ཚེ་འབྱུང་བར་སྒྲོན་གསལ་ལས་གསུང་སོ། །དེས་ན་རྫོགས་རིམ་གྱི་སྐབས་སུ་འོད་གསལ་མངོན་དུ་བྱེད་ཚུལ་ནི་གཞུང་གཞན་ནས་བཤད་པ་དང་མི་འདྲ་ཡི་སེམས་ཅན་ཐ་མལ་པས་འཆི་བའི་འོད་གསལ་མངོན་དུ་བྱེད་པའི་སྐབས་
ཀྱི་འཆི་རིམ་ཇི་འདྲ་དེ་འདྲ་བ་གཅིག་རྣལ་འབྱོར་གྱི་སྟོབས་ཀྱིས་མངོན་དུ་བྱས་པའི་སྐབས་སུ་འོད་གསལ་མངོན་དུ་བྱེད་པ་འདི་འཕགས་པ་ཡབ་སྲས་ཀྱི་ཆོས་སྐད་ཐུན་མོང་མ་ཡིན་པར་སྣང་ངོ་། །དེའི་གནད་ཀྱིས་ཟུང་འཇུག་གི་གོ་འཕང་ཡང་སྒྲུབ་ཚུལ་ཐུན་མོང་མ་ཡིན་
པ་གཅིག་སྣང་སྟེ་རྫོགས་རིམ་གྱི་སྐབས་སུ་བཤད་པར་བྱའོ། །འདིའི་གནད་མ་ཟིན་པའི་རྒྱུ་མཚན་གྱིས་ཁ་ཅིག་གིས་འདིར་བཤད་པའི་འོད་གསལ་དུ་འཇུག་པའི་རྟགས་རྣམས་གཞིའི་སྐབས་ཁོ་ན་ལ་སྦྱོར་བ་དང་། གཞན་དག་གིས་འདི་དང་སྒྲོན་གསལ་ལས་གསུངས་
པའི་འོད་གསལ་མངོན་དུ་བྱེད་པར་འགྱུར་བའི་མཚན་མ་རྣམས་ལེ་ལོ་ཅན་འཚང་རྒྱ་བའི་འོད་གསལ་མངོན་དུ་བྱེད་ཚུལ་ཁོ་ན་ལ་སྦྱོར་བ་སྣང་སྟེ་དེ་ལྟར་བྱས་ན་འཕགས་པ་ཡབ་སྲས་ཀྱི་ཆོས་སྐད་ཀྱི་རྐང་སྟོར་ནས་འགྲོ་བར་སེམས་སོ། །སྔར་བཤད་པའི་བསྐལ་པ་
དང་པོའི་མི་ཤི་བ་ནི་རྫུས་སྐྱེས་དབང་སོགས་ཅིག་ཅར་དུ་འགགས་ནས་འཆི་བ་ཡིན་པས་འདིར་བཤད་པ་ལྟར་དབང་སོགས་རིམ་གྱིས་ཐིམ་པ་མེད་ཀྱང་ཤི་བའི་འོད་གསལ་ཉམས་སུ་མྱོང་བ་ཙམ་ཡོད་པས་དེ་ཆོས་མཐུན་གྱི་ཡུལ་ཡིན་ནོ། །གསུམ་པ་ལ་གཉིས།
6-2-76b


རང་བཞིན་སྣང་བ་ལ་ཐིམ་པ་རྒྱུ་དང་བཅས་པ་དང་། བསམ་གཏན་གཉིས་ཀྱིས་སྔགས་དོན་མངོན་དུ་བྱེད་ཚུལ་ལོ། །དང་པོ་ནི། ཤེས་པར་བྱ་སྟེ་ཞེས་དྲང་ངོ་། གང་ན་ལྷག་མ་ནི་ཕུང་པོ་བཞིའི་ལྷག་མ་ཡིན་ལ་དེས་ན་རིགས་བཞིའི་ལྷག་མ་རྡོ་རྗེའི་རིགས་སུ་དོན་གྱི་གོའོ། དེ་ནི་རང་
བཞིན་གྱི་རྟོག་པ་བརྒྱད་ཅུ་སྣང་བ་གསུམ་དུ་ཐིམ་པའི་འཇམ་དཔལ་གྱི་ཡེ་ཤེས་སོ། །འཇམ་དཔལ་ནི་ཡིད་སྦྱོང་བ་ཡིན་པས་མི་བསྐྱོད་པ་དང་སྦྱང་གཞི་གཅིག་གོ། །མདོར་བྱས་ནས་གསུང་པ་ལྟར་རྡོ་རྗེ་ཕྲེང་བའི་ལུང་འདི་རྣམས་ལྷག་མོས་འོད་གསལ་དུ་སྡུད་པའི་སྐབས་སུ་
ཡང་བཤད་དགོས་ན་ལྷག་མོས་ཀྱི་སྐབས་སུ་ནི་མི་བསྐྱོད་པ་གཙོ་འཁོར་གང་དུ་ཡང་མེད་པར་རྡོ་རྗེའི་རིགས་ཇི་ལྟར་བྱ་སྙམ་ན། ལྷ་དེ་མེད་ཀྱང་དེའི་སྦྱང་གཞི་ཡོད་པས་མི་འགལ་ཏེ་དཔེར་ན་འཁོར་བ་ཐོག་མ་མེད་པ་ནས་སེམས་ཅན་གྱི་གཟུགས་ཕུང་གི་སྐོར་འོད་གསལ་དུ་
འཇུག་པ་ལ་རྣམ་སྣང་གི་རིགས་ཀྱི་ལྷ་རྣམས་མེད་ཀྱང་དེའི་རིགས་ཅན་དུ་སྔར་གསུངས་པ་བཞིན་ནོ། །ཡེ་ཤེས་དེ་ནི་རྡོར་བཟླས་ལ་རིམ་པ་དང་པོར་བྱས་པའི་རིམ་པ་གཉིས་པ་སེམས་དབེན་ཏེ་དེ་ཡང་བསམ་གཏན་གཉིས་ཀྱིས་རྣམ་ཤེས་འོད་གསལ་དུ་འཇུག་པའི་སྔ་རོལ་དུ་
རང་བཞིན་སོ་གསུམ་དང་བཞི་བཅུ་དང་བདུན་འགགས་པ་ཡེ་ཤེས་སོ། །འོ་ན་རང་བཞིན་ཐིམ་པའི་སེམས་དམིགས་ཀྱི་རིམ་པ་ཤེས་པར་བྱེད་པ་དེ་གང་ལ་བརྟེན་ནས་ཡིན་སྙམ་ན། སེམས་དམིགས་ཀྱི་རིམ་པ་དེ་ཡང་རྡོ་རྗེ་བཟླས་པའི་རིམ་པས་སམ་རིམ་པ་ལ་གནས་ཏེ་
བསྒྲུབ་དགོས་ཏེ་རི་མ་ལྔ་ལས། རྡོ་རྗེ་བཟླས་གནས་རྣལ་འབྱོར་པས། །སེམས་པ་དམིགས་པ་ཐོབ་པར་འགྱུར། །ཞེས་གསུངས་པས་སོ། །ཡི་གེ་གསུམ་ཙམ་ཟློས་པའི་རྡོར་བཟླས་ཡིན་ནམ་སྙམ་ན། སྲོག་ནི་འཚོ་བའོ། །རྩོལ་བ་ནི་རིང་དུ་སྤྲོ་བའོ། །དེ་དང་བཅས་པར་ཏེ་
6-2-77a


རླུང་སྔགས་གཉིས་སྦྱར་ནས་ཟློས་པའོ། །འདི་སྐབས་འདིར་བཤད་པའི་རྒྱུ་མཚན་ནི་སྟོན་པར་འགྱུར་རོ། །གཉིས་པ་ལ་གཉིས། དངོས་ཀྱི་དོན་དང་། སྔགས་དོན་ལུང་གིས་བཤད་པའོ། །དང་པོ་ནི་མངོན་སུམ་དུ་བྱས་ཞེས་དྲང་ངོ་། །གདན་སྙིང་གི་
དབུས་ན་མི་ཤིགས་པ། །གསལ་ཞིང་མར་མེ་དག་དང་མཚུངས། །མི་འགྱུར་མཆོག་ཏུ་ཕྲ་བ་སྟེ། །ཨ་ནི་གཙོ་བོ་དམ་པའོ། །ཞེས་རྡོ་རྗེ་དཀྱིལ་འཁོར་རྒྱན་གྱི་རྒྱུད་སྤྱོད་བསྡུས་སུ་དྲངས་ནས་བཤད་པ་མཛད་པ་ལ་རང་བཞིན་གྱིས་གྲུབ་པའི་ཨ་ཐུར་དང་དེས་མཚོན་པའི་
སྐྱེ་མེད་ཀྱི་དོན་གཉིས་ཡོད་པའི་ཕྱི་མ་ནི་འདིར་མི་ཤིགས་པ་སྟེ་འོད་གསལ་ལོ། །ཐབས་གང་གིས་ན་ཅིག་ཅར་དུ་འོད་གསལ་དུ་སྡུད་པའི་རིལ་གྱིས་སྡུད་པའི་རྗེས་སུ་གཞིག་པའི་རིམ་པ་སྟེ་བསམ་གཏན་གཉིས་ཀྱི་ཏེ། རིམ་ལྔ་ལས། 
མགོ་བོ་ནས་ནི་རྐང་པའི་བར། །ཇི་སྲིད་སྙིང་གར་ཕྱིན་གྱི་བར། །རྣལ་འབྱོར་ཡང་དག་མཐའ་ལ་འཇུག །རིལ་པོར་འཛིན་པ་ཞེས་བཤད་དོ། །རྒྱུ་བ་དང་ནི་མི་རྒྱུ་ཉིད། །དང་པོ་འོད་གསལ་བར་བྱས་ཏེ། །ཕྱི་ནས་དེ་བཞིན་བདག་ཉིད་བྱེད། །རྗེས་སུ་གཞིག་པའི་རིམ་པ་
ཡིན། །ཞེས་སོ། །དེ་ལྟར་བྱས་ཏེ་སྔགས་ཀྱི་དོན་མངོན་སུམ་དུ་བྱེད་པར་འགྱུར་རོ། །གང་གི་ཚེ་སྙམ་ན་མི་ཤིགས་པ་མངོན་སུམ་དུ་བྱས་པ་དེའི་ཚེ་སྟེ་དུས་དེར་རོ། །དེས་ན་རླུང་ཐིམ་པའི་ཚེ་མི་ཤིགས་པ་མངོན་དུ་བྱས་ལ་ཉེར་ཐོབ་ཐིམ་པའི་དུས་སུ་འོད་གསལ་མངོན་
དུ་བྱས་པར་འཆད་པ་དོན་མིན་ནོ། །སྔགས་ནི་ཨོཾ་ནས་ཨ་ཧཾ་ཞེས་བྱ་བའི་བར་རོ། །འོད་གསལ་མངོན་དུ་བྱས་ཚུལ་ནི་འཛིན་པ་སྟེ་རྣམ་ཤེས་ཉེ་བར་བསྡུས་ནས་བྱེད་དེ་ཡུལ་དོན་དམ་དང་ཡུལ་ཅན་རིག་པ་གཉིས་ཀྱིས་གཉིས་སྣང་ཕྲ་མོ་ཡང་དག་ནས་ཆུ་ལ་ཆུ་བཞག་པ་
6-2-77b


ལྟར་དབྱེར་མི་ཕྱེད་པར་ཞུགས་པའོ། །སྔགས་དོན་ཡང་དེ་ཡིན་ཏེ་ཤཱུ་ནྱ་ཏཱ་ནི་སྟོང་ཉིད་དང་ཛྙཱ་ན་ནི་ཡེ་ཤེས་དང་བཛྲ་ནི་རྡོ་རྗེ་དང་སྭ་བྷཱ་བ་ནི་རང་བཞིན་དང་། ཨཱ་ཏ་མ་ཀོ་ནི་བདག་ཉིད་དང་ཨ་ཧཾ་ནི་ངའོ་ཞེས་པའི་དོན་ཡིན་པས་སྟོང་པ་ཉིད་ཀྱི་ཡེ་ཤེས་ཀྱི་རྡོ་རྗེའི་རང་བཞིན་གྱི་
བདག་ཉིད་ནི་ངའོ་ཞེས་པ་སྟེ་རྣལ་འབྱོར་པ་དེའི་བདག་ཏུ་ཐ་སྙད་གདགས་པའི་གཞིའི་གཙོ་བོ་སེམས་དེ་བཞིན་ཉིད་དང་དབྱེར་མེད་པར་སོང་བའི་ཕྱིར་རོ། །འདི་ན་དབུ་མའི་གཟུང་ནས་བཤད་བ་ལྟར་གྱི་རང་བཞིན་མེད་པའི་དོན་ལ་ཕུ་ཐག་ཆོད་པའི་གོ་བ་རྙེད་ནས་དེ་ནས་
རིམ་པ་དང་པོ་ནས་བསྒོམས་པའི་མཐར་རྫོགས་རིམ་གྱི་སྐབས་སུ་དེ་ལྟར་བྱུང་བ་ཡིན་གྱི། །ངེས་དོན་གྱི་ལྟ་བ་ཐོས་བསམ་གྱིས་གཏན་ལ་ཕབ་ནས་ལེགས་པར་མ་སྙེད་པའམ་རྙེད་ཀྱང་སྔགས་ཀྱི་ལམ་གྱི་སྐབས་སུ་དེ་ལ་དམིགས་ནས་མ་བསྒོམས་པར་ལྷ་སྐུ་དང་རླུང་
ངམ་ཐིག་ལེ་སོགས་ཀྱི་ལམ་བསྒོམས་པས་གཉིས་སྣང་རགས་པ་ལོག་པའི་ཏིང་ངེ་འཛིན་སྐྱེས་པ་དང་མི་གཅིག་གོ། །དབུ་མ་ནས་བཤད་པའི་སྟོང་ཉིད་སྒོམ་པར་འདྲ་ཡང་ས་ལ་སོགས་པ་ཐིམ་པའི་རིམ་པ་ཅན་གྱི་རྟོགས་པ་བསྐྱེད་ནས་འོད་གསལ་མངོན་དུ་བྱེད་པ་
ནི་འདི་དག་གི་ཁྱད་ཆོས་སོ། །རིམ་པ་དང་པོའི་དེ་བཞིན་ཉིད་ལས་བྱང་ཆུབ་པའི་སྐབས་སུ་མོས་པ་ཙམ་གྱིས་སྒོམ་པའི་སྔགས་དེའི་དོན་རྫོགས་རིམ་གྱི་སྐབས་སུ་འཆི་བའི་རིམ་པ་བཞིན་དུ་ཕུང་སོགས་ཐིམ་པའི་མཐར། །ཆོས་ཀྱི་སྐུར་ཡང་བཤད་པ་ཡིན་ཞེས་
གསུངས་པ་ལྟར་ཆོས་སྐུ་འོད་གསལ་མངོན་དུ་བྱེད་པར་གསུངས་པ་འདིས་རིམ་པ་དང་པོར་དང་པོའི་མགོན་པོ་བསྐྱེད་པ་དང་དེ་སྤྲུལ་སྐུར་བསྒྱུར་བ་སོགས་གསུངས་པ་ཡང་རྫོགས་རིམ་གྱི་སྐབས་སུ་ཇི་ལྟར་འགྱུར་བ་ཤེས་པར་བྱ་དགོས་སོ། །དེ་ལྟར་འོད་གསལ་
6-2-78a


དུ་འཇུག་རྒྱུ་ཚན་པ་ལྔར་བཅད་ནས་དང་པོ་བཞི་ཞུགས་པའི་རྟགས་དང་ཐ་མ་ཞུགས་པའི་ཚེ་ཤཱུ་མྱ་ཏཱའི་སྔགས་དོན་མངོན་དུ་བྱས་པར་བཤད་པ་འདིས་ནི་རྡོར་ཕྲེང་གི་དགོངས་པ་ལེགས་པར་བཤད་དེ། །གཉིས་པ་ལ་གཉིས། དྲི་བ་དང་ལན་
ནོ། །དང་པོ་ནི། སློབ་མས་གསོལ་པ། ཨོཾ་ཤཱུ་ནྱ་ཏཱ་ལ་སོགས་པའི་སྔགས་འདིའི་དོན་བཅོམ་ལྔན་འདས་རྡོ་རྗེ་སློབ་དཔོན་སྟོན་པས་བཤད་དུ་གསོལ་ཞེས་འདྲི་བ་སྟེ་བཤད་ཟིན་པ་དེ་ཉིད་ལུང་གཞན་གྱི་ཀྱང་བཤད་པ་དང་སྔགས་དོན་གཞན་ཡང་བསྟན་པར་བཞེད་
པའོ། །གཉིས་པ་ནི། སློབ་དཔོན་གྱི་ལན་གསུངས་པ། སྔགས་ཀྱི་དོན་ནི་བཅོམ་ལྡན་འདས་ཀྱིས་བཞད་པའི་རྒྱུད་དགོངས་བ་ལུང་སྟོན་ལས་གསུངས་ཏེ་དེ་འདིར་དྲངས་ཏེ་བཤད་པར་བྱའོ། །ཕྱག་རྡོར་ལ་ལེའུ་གསུམ་པ་ཉན་པར་བསྐུལ་བའི་རྗེས་དེ་ནས་དེ་བཞིན་
གཤེགས་པ་ཀུན་ཕྲ་མོའི་སྦྱོར་བ་སྟེ་རྣལ་འབྱོར་ལ་རྣམ་པར་བཞུགས་སོ། །ཕྲ་མོ་ནི་འདིར་རླུང་དང་འོད་གསལ་བ་གཉིས་ཆར་ལ་བྱའོ། །ཨོཾ་ཞེས་པ་ནི་གཅིག་དང་ལྡན། །ཞེས་པ་ནས་དྲུག་པ་ཨ་ཧཾ་ཤེས་སུ་བརྗོད། །ཅེས་པའི་བར་རྐང་པ་དྲུག་གིས་ནི་སྔགས་དེ་ཚན་པ་དྲུག་
ཏུ་བཅད་ལ་དེ་ལྟར་དེ་བཞིན་གཤེགས་པ་དྲུག །སྐྱེ་བོ་མཆོག་ལ་བསྟན་པ་ཡིན། །ཞེས་པས་ནི་དྲུག་པོ་དེ་རིགས་དྲུག་ཡིན་པར་བསྟན་ཞིང་དེ་ཡང་གདུལ་བྱ་མཆོག་ཏུ་གྱུར་པ་རིན་པོ་ཆེ་ལྟ་བུ་ལ་བསྟན་པར་གསུངས་སོ། །དེ་ལ་དེ་བཞིན་གཤེགས་པ་དྲུག་ལ་སྦྱོར་
ལུགས་དུ་མ་ཞིག་ཡོད་ཀྱང་ཐོག་མར་སྔར་བཤད་པའི་སྔགས་དོན་མངོན་སུམ་དུ་བྱས་པ་དེའི་དོན་བསྟན་དགོས་པས་སྔགས་དོན་དེ་ནི་རྣམ་སྣང་དང་རིན་འབྱུང་དང་འོད་དཔག་མེད་དང་དོན་གྲུབ་དང་མི་བསྐྱོད་པའི་རིགས་ལྔ་འོད་གསལ་དུ་ཞུགས་པ་ཡིན་ལ། །དེ་ལྔ་འོད་
6-2-78b


གསལ་དུ་ཞུགས་པའི་དབྱེར་མི་ཕྱེད་པ་ནི་སྔར་བཤད་པ་ལྟར་ངའོ་ཞེས་པའི་དོན་ཡིན་པས་རྡོ་རྗེ་འཆང་ངོ་། །དེ་ལྟར་ན་རྣམ་སྣང་གི་རིགས་འོད་གསལ་དུ་ཞུགས་པ་ནི། ཨོཾ་གྱི་དོན་ཡིན་ཏེ་གཞན་བཞི་ལ་ཡང་དེ་ལྟར་སྦྱར་རོ། །སྔགས་དོན་གྱི་དེ་བཞིན་གཤེགས་པ་དྲུག་ནི་
ངེས་དོན་གྱི་རིགས་དྲུག་སྟེ་ངོ་བོ་གཅིག་ལ་ལྡོག་པས་ཕྱེ་བའོ། །ཨོཾ་ཤཱུ་ནྱ་ཏཱ་ཟུང་དང་པོ། །ཞེས་པ་ནས་སྭ་བྷཱ་བ་ཨཱཏ་མ་ཀོ་ཧཾ་གསུམ་པ་ཡིན། །ཞེས་པའི་བར་གྱིས་སྔགས་དེ་ཚན་ལ་གསུམ་དུ་བཅད་ལ་དེ་ཉིད་གསུམ་དུ་འདི་རུ་བསྟན། །དེ་ཉིད་གསུམ་ནི་གཅིག་ཏུ་འགྱུར། །
གསལ་དང་མི་གསལ་མིང་ཅན་ཏེ། །ཞེས་པས་ཚན་པ་གསུམ་དུ་བྱས་པའི་སྔགས་དོན་ནི་དེ་ཉིད་གསུམ་ཡིན་པར་བསྟན་ཞིང་དེ་ཡང་དེ་ཉིད་གཅིག་ཏུ་གྱུར་བ་ནི་གསལ་དང་མི་གསལ་གྱི་མིང་གིས་བསྟན་པའི་མིང་ཅན་གྱི་དོན་དུ་གསུངས་སོ། །འདི་རྩ་རྒྱུད་ཀྱི་ལེའུ་གསུམ་པའི་
སྔགས་དོན་བཤད་རྒྱུད་ཀྱིའང་ལེའུ་གསུམ་པར་གསུངས་པ་ཡིན་ལ་འོག་མ་རྣམས་ལེའུ་བཅུ་གཅིག་པ་ནས་གསུངས་པ་འདིར་སྦྱར་བའོ། །འདི་ལ་ཁ་ཅིག་སྔར་བཤད་པའི་སྔགས་དོན་དང་པོ་གཉིས་སྦྱར་བ་ནི་སྐུ་རྡོ་རྗེ་བར་པ་གཉིས་སྦྱར་བ་གསུང་རྡོ་རྗེ་ཐ་མ་གཉིས་སྦྱར་བ་
ཐུགས་རྡོ་རྗེ་བྱས་ནས་དེ་ཉིད་གསུམ་དུ་འཆད་མོད་ཀྱང་འཐད་པར་མ་མཐོང་སྟེ། དེ་ལྟར་ན་དེ་ཉིད་གསུམ་ནི་འོད་གསལ་དུ་ཞུགས་པའི་དོན་ཙམ་དུ་འགྱུར་བས་འོག་ནས་འཆད་པའི་རླུང་ལྡང་འཇུག་གནས་གསུམ་ལ་བསད་དུ་མི་རུང་བར་འགྱུར་རོ། །དེ་འདོད་ན་ལུང་འོག་
མས་ཤཱུ་ནྱ་ཏཱའི་སྔགས་དོན་མ་བཤད་པར་འགྱུར་བས་དེ་འདིར་དྲངས་པ་མ་འབྲེལ་བར་འགྱུར་རོ། །དེས་ན་དུམ་བུ་གསུམ་དུ་བཅད་པ་ནི་ཤཱུ་ནྱ་ཏཱའི་སྔགས་དོན་ཡིན་མོད་ཀྱང་སྔར་འོད་གསལ་དུ་ཞུགས་པ་ལ་བཤད་པའི་སྔགས་དོན་དང་མི་གཅིག་གོ། །ཕྱག་ན་རྡོ་རྗེས་
6-2-79a


སྔགས་དང་ཕྱག་རྒྱ་སྦྱར་བ་གཅིག་པུས་མི་འགྲུབ་ཅེས་ཁྱེད་ཀྱིས་བསྟན་པ་ལ་འདུས་པ་འདིས་སྔགས་ཀྱི་སྦྱོར་བ་མ་གཏོགས་པ་ཕྱག་རྒྱ་མ་བསྟན་ན་དེ་གཅིག་པུས་ཇི་ལྟར་འགྲུབ་ཅེས་པ་དང་སྤྱན་དྲངས་པ་དང་གཤེགས་སུ་གསོལ། འདིར་ནི་
ལེགས་པར་ཇི་ལྟར་བརྗོད། །ཅེས་ཞུས་པའི་ལན་དུ་འོག་མ་འདི་རྣམས་གསུངས་སོ། །གཞན་ཡང་ཞེས་པ་ནི་སྔར་དྲུག་ཏུ་བཤད་པ་ལས་གཞན་གསུམ་དུ་བསྟན་པ་འཆད་པ་ལ་བྱའོ། །ད་ལྟ་འགྱུར་པའི་རྒྱུད་ལ་འོན་ཏེ་རྡོ་རྗེ་འཛིན་གང་ཞིག །ཅེས་འབྱུང་ལ་དེའི་རྗེས་
སུ་འབྱུང་བའི་ལུང་རྣམས་རྫོགས་པའི་འོག་ཏུ་ཚིགས་བཅད་འདི་འབྱུང་ངོ་། །རྡོ་རྗེ་འཛིན་པ་སྟེ་སྔགས་ཀྱི་སྒྲུབ་པ་པོ་གང་ཞིག་སྤྱན་དྲངས་པ་སོགས་གསུམ་གྱི་བརྡ་དང་ལྡ་པ་སྟེ་དེ་གསུམ་གྱི་དོན་ཤེས་པས་སྤྱན་དྲངས་པ་སོགས་བྱའོ། །ད་ལྟ་འགྱུར་བའི་རྒྱུད་དང་རིམ་
ལྔར་སྦྱོར་བ་གསུམ་དང་ལྡན་པའི་མི། །ཞེས་ཡོད་ལ་དེའི་དོན་རིམ་ལྔའི་འགྲེལ་པ་ཀ་ཅིག་ལས་འཇུག་ལྡང་སོགས་ལ་བཤད་དོ། །ཇི་ལྟར་བྱེད་ན། རླུང་ནང་དུ་འཇུག་པ་ཡིས་ནི་སྤྱན་དྲངས་ཏེ་མྱུར་བ་ཕྱིར་རྒྱུ་བ་ཡིས་ནི་གཤེགས་སུ་གསོལ་བ་དང་དལ་བ་སྟེ་རླུང་ནང་དུ་
གནས་པ་ཡིས་ནི་སངས་རྒྱས་སྤྱན་དྲངས་པ་དེ་བཞུགས་པར་འགྱུར་རོ། །དེ་ལྟར་གསུམ་པོ་དེ་དག་པ་སྟེ་སྦྱངས་པ་ལས་ནི་དངོས་གྲུབ་མཆོག་འགྲུབ་བོ། །རྒྱུད་ན་ཡིད་རྟོན་དངོས་གྲུབ་དམ་པ་ཡིན། །ཞེས་ཡོད་དེ་ཡིད་དེ་ལ་ལྷུར་ལེན་པའོ། །སྐྱེས་བུ་ཞེས་པའི་རྐང་པ་གཉིས་
ནི་རྒྱུད་ལས་དེ་ནི་སྐྱེས་བུའི་སྦྱོར་བ་ཡིས། །ཕྱག་རྒྱ་ཆེ་དང་གཅིག་བསྒྲུབ་ལས། །ཞེས་པའི་འགྱུར་བདེ་བས་དངོས་གྲུབ་མཆོག་དེ་ནི་ལམ་སྒོམ་པའི་སྐྱེས་བུའི་སྦྱོར་བས་ཕྱག་རྒྱ་དང་སྔགས་གཅིག་ཏུ་སྦྱར་བ་ལས་འགྲུབ་བོ། །ཕྱག་རྒྱ་གང་ཡིན་སྙམ་ན་རྒྱུད་ལས།
6-2-79b


མྱུར་བ་ལ་སོགས་གསུམ་ལྡན་པ། །དེ་ནི་ཕྱག་རྒྱ་ཡིན་པར་བཤད། །ཅེས་བསྒྱུར་བ་བདེ་བས་རླུང་ལྡང་འཇུག་གནས་གསུམ་བགྲང་བ་དང་ལྡན་པ་དེ་ནི་འདིར་ཕྱག་རྒྱའོ། །ཕྱག་རྒྱ་དང་སྔགས་གཉིས་གཅིག་ཏུ་སྦྱོར་ཚུལ་ནི་རྣམ་སྡུད་ནི་རླུང་ནང་དུ་འཇུག་པ་སྟེ་དེ་གསུམ་སྔགས་
སུ་སྟེ་ཡི་གེ་གསུམ་དུ་དབྱེར་མེད་པར་ངེས་པར་སྦྱོར་བ་ནི་སློབ་དཔོན་གྱིས་བརྗོད་ཅེས་སྦྱར་རོ། །གང་ལན་རྣ་དྲུང་དུ་སྟེ་གསངས་ནས་སློབ་མ་ལ་གོ་བར་བྱ་བའི་དོན་ནོ། །དེ་ཡང་སློབ་དཔོན་གྱིས་སྣོད་དང་ལྡན་པའི་སློབ་མ་ལ་འབད་པ་ཡིས་བྱའོ། །རིམ་ལྔའི་འགྲེལ་
བ་ཁ་ཅིག་ལས་སློབ་མས་གསོལ་བ་བཏབ་པ་ལ་འཆད་དོ། །སྒྲོན་གསལ་དུ་སྔགས་ཚན་དྲུག་དང་གསུམ་དུ་བཅད་པ་རྣམས་རླུང་སྟོན་པའི་བཤད་པར་དྲངས་མོད་ཀྱང་སྔར་བཤད་པ་ལྟར་འོད་གསལ་ཞུགས་པ་སྟོན་པ་ཡང་མི་བཞེད་པ་མིན་ནོ། །དེ་ལྟར་ན་དེ་
ཉིད་གསུམ་ནི་རླུང་ལྡང་འཇུག་གནས་གསུམ་ལ་བྱ་ལ་དེ་གསུམ་གཅིག་ཏུ་གྱུར་པ་ནི་སྔགས་དང་དེ་གསུམ་དབྱེར་མེད་དུ་སྦྱོར་བའོ། །གསལ་དང་མི་གསལ་ནི་དེ་དག་གི་རྒྱུ་ཚུལ་དང་ནང་ཚན་གྱི་ཁྱད་པར་རྣམས་ཤིན་ཏུ་ཕྲ་བས་རྣལ་འབྱོར་པ་ལ་གསལ་ཞིང་དེ་ལས་
གཞན་པ་ལ་མི་གསལ་བ་ལ་བྱ་སྟེ་དགོངས་པ་ལུང་སྟོན་གྱི་ལེའུ་གཉིས་པ་ལས། །རླུང་ཞེས་བྱ་བ་བྱང་ཆུབ་སེམས། །དབང་པོ་ཀུན་གྱི་གཙོ་འདི་ཡིན། །འདི་ལྟར་མི་མངོན་ཕྲ་བ་ལས། །རྟག་ཏུ་གསལ་བར་བརྗོད་པ་ཡིན། །ཞེས་སོ། །དེ་ལྟར་ཤཱུ་ནྱ་ཏཱའི་སྔགས་ཚན་པ་
གསུམ་གྱི་དོན་སྟོན་པ་ན་རླུང་གསུམ་སྔགས་དང་དབྱེར་མེད་པར་སྟོན་པས་རྡོ་རྗེ་བཟླས་པའི་རིམ་པ་སྐབས་འདིར་བསྟན་ཏེ་ཤཱུ་ནྱ་ཏཱའི་སྔགས་དོན་ལ་འོད་གསལ་དུ་ཞུགས་པ་དང་རླུང་ལ་བཤད་པ་གཉིས་ཡོད་ལ་གཉིས་ཀ་སྔགས་དེའི་དོན་འཆད་པའི་སྐབས་འདིར་
6-2-80a


དྲངས་པའོ། །དེས་ན་སྐབས་འདིར་རྡོར་བཟླས་གསུངས་བ་རྫོགས་རིམ་ཐོབ་ནས་སྤྱོད་པ་བྱེད་པ་མ་བྱུང་བར་འཆི་བ་དེས་འཆི་བའི་དུས་ན་ཁྱབ་བྱེད་ཀྱི་རླུང་རྒྱུ་བའི་ཚེ་རྡོར་བཟླས་བྱེད་པ་ལ་སྦྱོར་བ་ནི་ཡབ་སྲས་ཀྱི་བཞེད་པར་མི་སྣང་ངོ་། །དཔལ་གསང་
བ་འདུས་པའི་དོན་འཕགས་པ་ཡབ་སྲས་ཀྱིས་བཀྲལ་བ་འདི་ལ་རྫོགས་རིམ་གྱི་གནད་རྣམས་གོ་བ་བསྐྱེད་རིམ་ལེགས་པར་གོ་བ་ལ་ལྟོས་ལ། བསྐྱེད་རིམ་གྱི་དཔྱད་གཞི་ཤིན་ཏུ་ཆེ་བའི་གནས་རྣམས་མདོར་བྱས་དང་གཞུང་གཞན་ན་མི་གསལ་ཞིང་གཞུང་འདི་
གསལ་བར་མཐོང་ནས་རྣམ་གཞག་བཞི་རྒྱས་པར་གཏན་ལ་ཕབ་པ་ཡིན་ནོ། །དེས་ན་འདི་དང་མདོར་བྱས་ཀྱི་མངོན་རྟོགས་ཀྱི་རིམ་པ་རྣམས་ཀྱི་བསྐྱེད་ཚུལ་ལེགས་པར་ཤེས་ན་རིམ་པ་དང་པོ་ཕྱིན་ཅི་མ་ལོག་པར་ཤེས་ནས་རྒྱུད་སྨིན་པར་བྱེད་ནུས་པ་ཡིན་ནོ། །
དཔལ་གསང་བ་འདུས་པ་ཞེས་བྱ་བའི་རྣལ་འབྱོར་ཆེན་པོའི་རྒྱུད་ཀྱི་སྒྲུབ་ཐབས་རྣམ་པར་བཞག་པའི་རིམ་པ་ལས་དོན་དམ་པའི་དཀྱིལ་འཁོར་ཀྱི་རྣམ་པར་བཞག་པའི་ལེའུ་སྟེ་རྣམ་གཞག་བཞི་པའི་རྣམ་བཤད་དོ།། །།གསུམ་པ་ནི། རྡོ་རྗེ་སློབ་
དཔོན་མཁས་ལ་གྲུབ་པ་བརྙེས་པ་དཔལ་ཀླུའི་བྱང་ཆུབ་ཀྱི་ཞལ་སྔ་ནས་ཀྱིས་མཛད་པའི་རྣམ་པར་བཞག་པའི་རིམ་པ་རྫོགས་སོ་ཞེས་བྱ་བ་ནི་ཡང་དག་པར་གྲུབ་བའོ། །རྒྱུ་གར་ཀྱི་མཁན་པོ་དྷརྨ་ཤྲཱི་བྷ་དྲ་ཆོས་དཔལ་བཟང་པོ་དང་། བོད་ཀྱི་ཞུ་ཆེན་གྱི་
ལོ་ཙྪ་བ་ཆེན་པོ་སྐྱེས་མཆོག་དགེ་སློང་རིན་ཆེན་བཟང་པོས་རྒྱ་སྐད་ལས་བོད་སྐད་དུ་བསྒྱུར་ཅིང་ཚིག་དོན་ལ་ཞུ་ཆེན་བྱས་ཏེ་འཆད་ཉན་གྱིས་གཏན་ལ་ཕབ་པའོ། །ཞིང་འདིར་ལྷར་བཅས་འགྲོ་བའི་མིག་གཅིག་པུ། །ཐུབ་དབང་ཆོས་ཀྱི་དབྱིངས་སུ་ཞུགས་རྗེས་
6-2-80b


སུ། །དེ་ཡི་རབ་ཟབ་དགོངས་པའི་གསང་འབྱེད་པ། །ལུང་བསྟན་བརྙེས་པ་དཔལ་ལྡན་ཀླུ་སྒྲུབ་ཞབས། །མགོན་དེའི་ཐུགས་ལས་སྐྱེས་པའི་གྲུབ་པ་མཆོག །ད་དུང་ཡིད་འཛིན་དཔལ་གྱི་རིང་བཞུགས་ནས། །རྡོ་རྗེ་ཐེག་པའི་དགའ་སྟོན་འགྱེད་མཛད་པ། །རྣལ་
འབྱོར་དབང་ཕྱུག་ཀླུ་ཡི་བྱང་ཆུབ་ཀྱི། །གཞུང་མཆོག་སྒྲུབ་ཐབས་རྣམ་གཞག་རིམ་པའི་དོན། །ཡོངས་རྫོགས་བདག་འདྲའི་བློ་ཡི་ཡུལ་མིན་ཡང་། །འདུས་པའི་ལམ་བཟང་འདི་ལ་ཆེར་མོས་པས། །རྣམ་བཤད་འདི་ལ་བདག་གིས་འབད་པ་བྱས། །དེ་ནི་རང་བློ་
གོམས་པ་བསྐྱེད་ཕྱིར་དང་། །གསང་སྔགས་ལམ་གྱི་མཐར་ཐུག་འཕགས་པའི་ལུགས། །ཆེས་ཆེར་ཉམས་པར་གྱུར་པ་མ་བཟོད་ནས། བསྟན་པའི་མཐར་ཐུག་རྒྱས་པའི་དོན་དུའོ། །དེང་དུས་གཞུང་ལུགས་གདམས་པའི་མཆོག་ཡིན་པར། །ངེས་པ་རྙེད་
ནས་སྒྲུབ་པ་ཤིན་ཏུ་ཉུང་། །དེས་ན་ཕྲན་ཚེགས་ལམ་གྱིས་མཆི་མ་བར། །འདི་འདྲའི་གཞུང་ལ་རྟོན་པའང་སྐལ་བ་བཟང་། །ཁྱབ་བདག་རྡོ་རྗེ་འཛིན་པས་གསུངས་པའི་རྒྱུད། །ལུང་བསྟན་བརྙེས་པས་ལེགས་པར་བཀྲལ་བའི་ལམ། །དྲི་མེད་རིགས་པའི་ལམ་
ནས་དྲགས་ནས་ནི། །དབེན་པར་གྲུབ་པ་དེ་ལ་གློ་བ་དགའ། །རྒྱུད་དང་བསྟུན་ཚེ་དེ་དང་མི་མཐུན་ཞིང་། །དབང་གྱུར་སྐྱེ་བོས་ལེགས་པར་མ་བཀྲལ་དང་། །དྲི་མེད་རིགས་པའི་དཔྱད་ལ་འདོར་དགོསཔའི། །ལམ་དེས་བློ་གྲོས་ཆེ་ན་ཚིམ་མི་འགྱུར། །འདི་ནི་གང་
ནོངས་བདག་གི་ཉེས་པ་སྟེ། ལེགས་པར་གང་བཤད་རྗེ་བཙུན་བླ་མའི་དྲིན། །ནོངས་དེའི་རྩ་བ་མ་རིག་དང་བཅས་པ། །བརྩེ་ལྡན་རྣམས་ཀྱི་མྱུར་དུ་བཟློག་ཏུ་གསོལ། །བསྟན་པའི་མཐར་ཐུག་རྒྱས་པར་བྱ་སླད་དུ། །བདག་གིས་འབད་ལས་བསོད་ནམས་གང་
6-2-81a


བསགས་པ། །དེས་ནི་འགྲོ་ཀུན་ཐེག་པ་མཆོག་གི་གྲུས། །རྒལ་དཀའ་འཁོར་བའི་མཚོ་ལས་སྒྲོལ་བར་ཤོག །འགྲོ་བའི་ཕན་བདེ་རབ་འབྱམས་མ་ལུས་པ། །རྒྱལ་པའི་བསྟན་ལས་འབྱུང་བར་ཡིད་ཆེས་ནས། །ཚེ་རབས་ཀུན་ཏུ་རྒྱལ་བའི་ཆོས་
ཚུལ་ཀུན། །འཛིན་པར་བྱེད་ལས་ལྡོག་པར་མ་གྱུར་ཅིག །དེ་ཚེ་དམ་ཆོས་འཛིན་པའི་མཐུན་རྐྱེན་ཀུན། །བསམས་བ་ཙམ་གྱིས་བདེ་བླག་ཉིད་འགྲུབ་ཅིང་། །དེ་ཡི་བར་ཆོད་འགལ་བའི་རྐྱེན་རྣམས་ཀྱི། །མཚན་མ་ཙམ་ཡང་འབྱུང་བར་མ་གྱུར་ཅིག །རྣམ་བཤད་
འདིས་ཀྱང་འགྲོ་བློའི་མུན་བསལ་ཏེ། །དཔལ་ལྡན་འདུས་པའི་གནད་དོན་གསལ་བྱས་ནས། །ཐེག་མཆོག་ལམ་གྱིས་འགྲོ་བ་རྣམས་ལ་ནི། །དངོས་གྲུབ་གཉིས་ཀྱི་དབའ་སྟོན་རྒྱས་བྱེད་ཤོག །ཆེས་རྣམ་གཞག་རིམ་པའི་རྣམ་བཤད་དཔའ་གསང་བ་འདུས་བའི་
གནད་ཀྱི་དོན་གསལ་བ་ཞེས་བྱ་བ་འདི་ནི། དཔལ་གསང་བ་འདུས་པའི་རྣལ་འབྱོར་བ་ཤཱཀྱའི་དགེ་སློང་ཤར་ཙོ་ཁ་པ་བློ་བཟང་གྲགས་པའི་དཔལ་གྱི་གངས་རིའི་དབང་པོ་འོ་དེ་གུང་རྒྱལ་གྱི་ལྷ་ཞོལ་བྱམས་པ་གླིང་མིང་གཞན་གསང་སྔགས་ནང་ཞེས་བྱ་བའི་
རི་ཁྲོད་དུ་སྦྱར་བའི་ཡི་གེ་བ་ནི་དཀའ་བཞི་འཛིན་པ་གཡས་སྡེ་པ་བསོད་ནམས་དཔལ་བཟང་ངོ་། །འདི་ལ་བརྟེན་ནས་ཀྱང་བསྟན་པ་རིན་པོ་ཆེ་ཕྱོགས་ཀུན་ཏུ་རྒྱས་པར་གྱུར་ཅིག། །།མངྒ་ལཾ ། །
6-2-81b


empty page
6-3-1a


༄༅། །བཤད་རྒྱུད་རྡོ་རྗེ་ཕྲེང་བའི་ཟིན་བྲིས་རྗེ་ཉིད་ཀྱི་གནང་བ་བཞུགས་སོ། །
6-3-1b


དཔལ་གསང་བ་འདུས་པའི་བཤད་རྒྱུད་རྡོ་རྗེ་ཕྲེང་བ་བཤད་པ་ལ་བཞི། མཚན་གྱི་དོན། འགྱུར་གྱི་ཕྲག གཞུང་གི་དོན། ཇི་ལྟར་འགྱུར་བའི་ཚུལ་ལོ། །དང་པོ་ནི་ཞི་བ་འོང་ཀྱི་འགྱུར་
ལ་རྒྱ་སྐད་ཀྱི་མཚན་དོན་ལ་ནཱ་མ་ཨི་ཏི་ཤེས་པ་འབྱུང་ལ། རྭ་དང་དར་མ་བརྩོན་འགྲུས་ཀྱི་འགྱུར་ལ་ནཱ་མ་མེད་དེ། གང་རུང་གཅིག་གིས་ཆོག་པར་སྣང་ངོ་། །ཨ་བྷི་ས་མ་ཡ་བསྒྱུར་བ་ལ་འགྱུར་གསུམ་ག་
ལ་མངོན་པར་བརྗོད་པ་ཞེས་འབྱུང་སྟེ། འོག་ནས་མངོན་པར་རྟོགས་པ་ཞེས་ཀྱང་མང་དུ་འབྱུང་ངོ་། །གཞུང་གི་དོན་ལ་དང་བོར་གླེང་གཞིའི་ལེའུས་གླེང་གཞི་དངོས་དང་། སྟོན་པས་འཁོར་སྣོད་རུང་དུ་མཛད་པ་
དང་། འཁོར་གྱིས་བསྟོད་ཅིག་གསོལ་བ་བཏབ་ནས་དྲིས་པ་སྟོན་ནོ། །དེ་ནས་ལེའུ་གཉིས་པས་དྲིས་པའི་དོན་རྣམས་ཉན་པ་ལ་སྔོན་དུ་དབང་བསྐུར་དགོས་པར་བསྟན་ནོ། །དེ་ནས་དྲི་བ་དང་པོའི་ལན་སྟོན་པའི་
ལེའུ་གསུམ་པ་ནས་ལེའུ་རེ་བརྒྱད་པའི་གླེང་གཞིའི་ལེའུའི། སྔོན་བཞིན་རྡོ་རྗེ་བཟླས་པ་སོགས། །རིམ་གྱི་དེ་ཡི་དབྱེ་བར་འགྱུར། །ཞེས་པའི་བར་གྱིས་དྲི་བ་རྣམས་ཀྱི་ལན་རྒྱས་པར་བཤད་པའོ། །དེའི་
6-3-2a


འོག་ཏུ། དེ་ནས་སེམས་དཔའ་ཆེན་པོ་ཀུན། །ཞེས་པ་ནས། མཁའ་དང་མཉམ་པའི་ཐུགས་མངའ་བ། །དམིགས་མེད་ཁྱོད་ལ་ཕྱག་འཚལ་ལོ། །ཞེས་པའི་བར་གྱིས་རྒྱུད་རྫོགས་
པ་ལ་ངོ་མཚར་ནས་བསྟོད་པས་བསྟོད་དོ། །དེའི་འོག་ཏུ། དེ་ནས་བཅོམ་ལྡན་འདས་ཀྱི་སྐུ། །ཞེས་པ་ནས། ཉིན་དང་མཚན་དུ་བཞུགས་པར་འགྱུར། །ཞེས་པའི་བར་གྱིས་ཁྲོ་བོ་བཅུ་བཀུག་ནས་རྡོ་རྗེ་ཕྲེང་བ་རིང་དུ་
གནས་པའི་ཐབས་གསུངས་སོ། །དེ་ལ་གླེང་གཞི་དངོས་ལ་གཉིས་ལས། སྟོན་པ་དང་གནད་དང་དུས་ཕུན་སུམ་ཚོགས་པ་སྟོན་པ་ནི། འདི་སྐད་ནས་བཞུགས་ཏེ་ཞེས་པའི་བར་རོ། །འདི་ལ་སློབ་དཔོན་ཨ་ལཾ་ཀ་ཀ་ལ་
ཤའི་འགྲེལ་པར་རྣམས་པ་གསུམ་གྱི་སྟོན་ཏེ། དགོས་པའི་དོན་ནི་ཉན་པ་པོའི་དབུགས་དབྱུང་བ་དང་། སངས་རྒྱས་ཀྱི་བཀའ་བསྐྱང་བ་དང་། ཡིད་ཆེས་པའི་གདམས་ངག་ཐོབ་པས་རང་ཉིད་ཉན་པ་པོ་ཁྱད་དུ་
འཕགས་པར་བསྟན་པ་གསུམ་མོ། །བསྡུས་པའི་དོན་ནི། འདི་སྐད་ཀྱི་ཆོས་བསྟན་པའི་བྱ་བ་དང་། བདག་གིས་ཐོས་ཞེས་པས་འཁོར་དང་། དུས་གཅིག་ན་ཞེས་པས་དུས་དང་། བཅོམ་ལྡན་འདས་ཞེས་
6-3-2b


པས་སྟོན་པ་དང་། དེ་བཞིན་གཤེགས་པ་ཞེས་སོགས་ལྷག་མས་གནས་ཕུན་སུམ་ཚོགས་པ་བསྟན་ཞིང་། སྡུད་པ་པོ་ནི་གསང་བདག་གམ་འཇམ་དབྱངས་ཡིན་ཞེས་ཟེར་རོ། །ཡན་ལག་གི་དོན་ལ་འདུས་པའི་དབང་དུ་བྱས་ནས་བཤད་ན་སྒྲོན་གསལ་ལས་
ཇི་ལྟར་བཤད་པ་བཞིན་དུ་ཡིག་དོན་དང་སྤྱི་དོན་དང་། སྦས་པ་དང་མཐར་ཐུག་དང་བཞིས་འཆད་ལ། རྒྱུད་འདི་རྒྱུད་གཉིས་ཀྱི་ཐུན་མོང་གི་བཤད་རྒྱུད་ཡིན་པས་ཕ་རྒྱུད་དང་མ་རྒྱུད་གཉིས་ཀའི་དབང་དུ་བྱས་ནས་འཆད་ན། ཕྱི་དང་ནང་གི་བཤད་པ་གཉིས་སུ་
འཆད་དེ་དྲང་ངེས་ཀྱི་བཤད་པའོ། །དང་པོ་ནི། འདི་སྐད་ནི་བསྡུ་བར་བྱ་བའི་རྒྱུད་མ་ལུས་པ་སྟོན་པའི་ཚིག་གི་ཕྲད་དོ། །བདག་གིས་ནི་སྡུད་པ་པོ་ཕྱག་རྡོར་བདག་ཉིད་ཀྱིས་སྟོན་པ་ལ་མངོན་སུམ་དུ་ཐོས་ཀྱི་གཞན་ལས་གཅིག་ནས་གཅིག་ཏུ་བརྒྱུད་པ་མིན་པ་དང་། 
ཐོས་པས་ནི་རྟོགས་པ་མིན་པར་བསྟན་ཏོ། །དུས་གཅིག་གི་ཚེ་ན། འདི་ཐོས་ཞེས་སྦྱར་ན་གཞན་དུ་ནི་མ་ཐོས་པ་དང་། ཡང་ན་དུས་གཞན་གྱི་ཚེ་གཞན་ཐོས་པ་དང་། ཡང་ན་དུས་སྐད་ཅིག་མ་གཅིག་ལ་ཐོས་ཞེས་པས། རིམ་པ་བཞིན་རང་ཉིད་ཐོས་པ་མང་བ་
དང་། རྒྱུད་རྙེད་པར་དཀའ་བ་དང་། །ཞེས་རབ་ཕུལ་དུ་བྱུང་བར་བསྟོན་ཏོ། །དེ་ལྟར་ཐོས་ན་གང་ལས་གང་དུ་གང་དང་ལྷན་ཅིག་ཏུ་ཐོས་ཞེས་གླེང་གཞི་བསྟན་པའི་ཕྱིར། བཅོམ་ལྡན་འདས་ཀྱིས་སྟོན་པ་ཕུན་སུམ་ཚོགས་པ་བསྟན་ཏེ། དབང་ཀུང་ལ་སོགས་པའི་སྐལ་
བ་ཕུལ་སུམ་ཚོགས་པ་དང་ལྡན་པ་དང་། བདུད་བཞི་ལ་སོགས་པའི་མི་མཐུན་ཕྱོགས་མ་ལུས་པར་བཅོམ་པ་དང་ལྡན་པའོ། །དེ་བཞིན་སོགས་ཀྱིས་གང་དུ་ཐོས་པའི་གནས་སྟོན་ཏེ། དེ་བཞིན་ཉིད་དུ་གཤེགས་པས་ན་དེ་བཞིན་གཤེགས་པའོ། །དེ་དང་ཐམས་
6-3-3a


ཅད་ནི་གཞི་མཐུན་པ་སྟེ། སྟོན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་བདག་ཉིད་ཡིན་པའི་ཕྱིར་རོ། །དེ་ན་དེ་བཞིན་གཤེགས་པ་ཐམས་ཅད་དང་སྐུ་གསུངས་ཐུགས་ཀྱི་སྙིང་པོ་གཞི་མཐུན་པ་སྟེ་རྡོ་རྗེ་འཆང་ཆེན་
པོའོ། །དེའི་རྡོ་རྗེ་བཙུན་མོ་ནི་དེ་ཁོ་ན་ཉིད་རྟོགས་པའི་ཤེས་རབ་སྟེ། དེ་ནི་ཉོན་མོངས་པ་རྣམས་འཇོམས་པ་ན་བྷ་གའོ། །དེ་མཚོན་པའི་ཆོས་འབྱུང་བྷ་ག་ལ་བཞུགས་པ་ནི་དེའི་ནང་གི་གཞལ་ཡས་ཁང་ན་གནས་པ་སྟེ། དཔེར་ན་གྲོང་གི་དབུས་ཀྱི་
ཁང་བཟང་ན་བཞུགས་པ་ལ་གྲོང་ན་བཞུགས་ཟེར་བ་བཞིན་ནོ། །འདིའི་དཔེ་ཁ་ཅིག་ལ་རྩ་རྒྱུད་བཞིན་སྙིང་པོ་རྡོ་རྗེ་ཞེས་དང་། ཁ་ཅིག་ལ་རྡོ་རྗེ་སྙིང་པོ་ཡོད་ཀྱང་སྔ་མ་དག་སྟེ། སྒྲོན་གསལ་དང་དེའི་འགྲེལ་པ་ལས་ཀྱང་སྔ་མ་བཞིན་བཤད་དོ། །འགྲེལ་
པ་ལས་རྡོ་རྗེ་བཙུན་མོ་སྤྱན་མ་སོགས་དང་། དེའི་བྷ་ག་ཆོས་འབྱུང་ལ་བཤད་ཅིང་། བཞུགས་སོ་ཞེས་འདོན་ལ། འགྱུར་རྣམས་ལས་བཞུགས་ཏེ་ཞེས་སོ། །གཉིས་པ་ནང་ངེས་དོན་གྱི་བཤད་པ་ནི། །འདི་སྐད་ཀྱི་སྐད་དོད་ཨེ་ཝཾ་གྱི་ཨེའི་དོན་ནི་ཤེས་
རབ་དང་། དེའི་མཚན་མ་དང་། དེའི་རྩ་དང་། དེའི་རིག་པའོ། །ཝ་ནི་ཐབས་དང་དེའི་རྒྱལ་མཚན་དང་། དེའི་རྩ་དང་། དེའི་རིག་པའོ། །ཝའི་ཐིག་ལེ་ནི་དེ་གཉིས་སྦྱར་བས་ཐིག་ལེའི་ངོ་བོ་བདེ་ཆེན་ཉམས་སུ་མྱོང་བ་སྔོན་དུ་འགྲོ་བས་ཆོས་སྐུ་མཚོན་པའོ། །
བདག་གི་སྐད་དོད་ཨ་ཧཾ་གིས་རྒྱུད་རིམ་དང་ཡེ་ཤེས་ཀྱི་རིམ་པའི་ངོ་བོའི་ཐིག་ལེ་བཞིས་འཁོར་ལོ་བཞི་ལ་རྫོགས་པར་ལོངས་སྤྱོད་པའི་སྐུ་མཚན་པའོ། །ཤུ་ཏྲས་ནི་འཛག་པའི་དོན་གྱི་སྤྲུལ་སྐུ་མཚོན་པའོ། །དུས་གཅིག་ནི་བཟང་ངན་བསམ་མི་
6-3-3b


ཁྱབ་ཀྱི་དུས་གསུམ་ལས་བསམ་མི་ཁྱབ་ཀྱི་དུས་འབྱུང་རྡུབ་ཀྱི་སྲོག་རྩོལ་འགགས་པའི་དུས་སོ། །བཅོམ་ལྡ་འདས་ནི་དགའ་གསུམ་འཇོམས་པའི་ལྷན་སྐྱེས་སོ། །དེ་བཞིན་གཤེགས་པ་ཐམས་ཅད་ནི་རྩ་བདུན་ཁྲི་ཉིས་སྟོང་སྡུད་པའི་འཁོར་
ལོ་བཞིའམ་དྲུག་སྟེ། དེ་ནི་དེ་བཞིན་གཤེགས་པ་ཐམས་ཅད་ཀྱི་རང་བཞིན་ཡིན་པའི་ཕྱིར་རོ། །དེ་རྣམས་ཀྱི་སྐུ་གསུང་ཐུགས་གསུམ་ནི་རྩའི་གཙོ་མོ་གསུམ་མོ། །དེ་ཉིད་ནི་སྙིང་པོ་སྟེ་དེའི་དབང་གིས་རྩ་གཞན་རྣམས་བསྐྱེད་པའོ། །དེའི་ངོ་བོའི་རྡོ་རྗེ་བཙུན་
མོ་ནི་ལས་དང་དམ་ཚིག་དང་ཡེ་ཤེས་ཀྱི་རྒྱའོ། །དེ་རྣམས་ཀྱི་བྷ་ག་རྣམས་ནི་ཆོས་འབྱུང་གི་ལྟ་བ་ལ་འགྲེལ་བས་བཤད་དོ། །རྩ་རྒྱུད་ལ་མཐའ་དྲུག་དག་ཚུལ་བཞིས་འཆད་པ་ལྟར་དེའི་བཤད་རྒྱུད་ལ་བཤད་མི་དགོས་ན་རྒྱུད་འདིའི་གླེང་གཞི་ལ་སྔར་
ལྟར་འཆད་པ་མི་རིགས་ལ། དགོས་ན་རྩ་རྒྱུད་དུ་སྦས་པ་བཤད་རྒྱུད་དུ་གསལ་བར་སྟོན་པ་དང་འགལ་ལོ་སྙམ་ན། འདི་ལ་འདུས་པ་ཕྱི་མའི་འགྲེལ་པར་ནཱ་རོ་པས་ཚུལ་བཞི་དང་དྲང་ངེས་ཀྱི་བཤད་པ་མང་དུ་མཛད་ལ། མན་ངག་སྙེ་མ་སོགས་སུ་
ཡང་བཤད་རྒྱུད་ལ་དྲང་ངེས་ཀྱི་བཤད་པ་ཡོད་པས། བཤད་རྒྱུད་ལ་མ་སྦས་པར་གསལ་པོར་བཤད་པ་ཤིན་ཏུ་མང་མོད་ཀྱང་། གཞུང་ཁ་ཅིག་ལ་རྩ་རྒྱུད་བཞིན་དུ་བཤད་དགོས་པ་ཡང་ཡོད་དོ། །དེ་ལྟ་ནའང་འགལ་བ་ནི་མེད་དེ། དགོངས་པ་ལུང་
སྟོན་ལས་རྩ་རྒྱུད་ཀྱི་ལེའུ་བཅུ་གཉིས་ཀྱི་གཞུང་རྣམས་ཚང་བར་སོར་གཞག་མཛད་ལ། དེ་ལ་མཐའ་དྲུག་དག་ཚུལ་བཞིས་བཤད་དགོས་པ་མང་དུ་ཡོད་པ་བཞིན་དུ། །བཤང་རྒྱུད་གཞན་ལ་ཡང་མ་སྦས་པར་གསལ་པོར་བཤད་པ་ཤིན་ཏུ་མང་
6-3-4a


ཡང་། རྩ་རྒྱུད་ལྟར་སྦས་པ་འགའ་ཞིག་བཀོད་པ་ཡང་ཡོད་པས་སོ། །དེས་ན་རྒྱུད་འདི་རྩ་རྒྱུད་ཀྱི་གླེང་གཞིའི་ཡི་གེ་བཞི་བཅུ་ཚིགས་བཅད་བཞི་བཅུ་བཅུས་བཤད་པ་ལྟར་རྒྱུད་འདིའི་གླེང་གཞི་ཡང་དེ་ལྟར་བཤད་པར་མི་འགལ་ལོ། །གླེང་གཞི་
ལ་དྲང་ངེས་གཉིས་སུ་བཤད་པའི་ངེས་དོན་གྱི་བཤད་པ་རྫོགས་པར་བྱས་ན་སྦས་པ་དང་། མཐར་ཐུག་གཉིས་ཀྱང་རྒྱས་པར་བཤད་དུ་ཡོད་པས། དྲང་ངེས་གཉིས་ཀྱི་བཤད་པ་དང་མཐར་ཐུག་གི་བཤད་པ་མི་འགལ་ལོ། །དྲང་དོན་འཆད་ན་དེ་ལ་སྔོན་
བྱུང་དང་རྗེས་འཇུག་གི་དབང་དུ་བྱས་པ་གཉིས་སུ་བཤད་ལ། ངེས་དོན་འཆད་པ་ལ་རྒྱུད་གང་གི་རྗེས་སུ་འབྲེངས་ཏེ་འཆད་པའི་ཚུལ་ནི། གཙོ་བོར་ཕ་རྒྱུད་ཀྱི་དབང་དུ་བྱས་ནས་འཆད་ན་རྒྱུད་འདི་དང་དགོངས་པ་ལུང་སྟོན་བཞིན་བཤད། ཕ་རྒྱུད་མ་རྒྱུད་
གཉིས་ཀའི་དབང་དུ་བྱས་ན་སཾ་བྷུ་ཊ་ལྟར་བཤད་དོ། །གྲུབ་ཆེན་གྱི་གཞུང་གང་གི་རྗེས་སུ་འབྲངས་ནས་འཆད་ན། འདུས་པའི་གླེང་གཞི་གསང་བ་གྲུབ་པ་ལྟར་བཤད་པ་དང་། འདུས་པས་ཐོག་དྲངས་པའི་ཕ་རྒྱུད་ཀྱི་གླེང་གཞི་དེ་ཁོ་ན་ཉིད་གསལ་བའི་སྒྲོན་
མེ་ལྟར་བཤད་དགོས་ཏེ། འདི་སཾ་བྷུ་ཊ་དང་མཐུན་ཤས་ཆེའོ། །ལེའུ་བཅུ་གསུམ་པ་ལ་གསུམ་ལས་མཉན་པར་བསྐུལ་བ་ནི་དེ་ནས་ཤེས་པ་གཉིས་ཏེ་དུས་དང་བཤད་བྱ་དང་། སྟོན་པར་བསྐུལ་བ་དངོས་སོ། །ལེའུའི་དོན་བཤད་པ་ལ་གཉིས་ལས། 
མདོར་བསྟན་ནི་བདེ་ཆེན་ཅི་ཞེས་དྲིས་པའི་ལན་དུ། །རྡོར་སེམས་ཞེས་སོགས་རྐང་བཅུས་བདེ་ཆེན་མདོར་བསྟན་ཏེ། རྡོ་རྗེ་དང་། སེམས་དཔའ་དང་། རང་རིག་པ་དང་། མཆོག་གི་མཆོག་དང་། ཀུན་རྟོག་གིས་སྟོད་པ་དང་། ལྷན་སྐྱེས་ཀྱི་བདེ་ཆེན་གྱི་
6-3-4b


དུས་སུ་གཟུང་འཛིན་དང་བྲལ་བ་དང་། བདེ་སྡུག་དང་བྲལ་བ་དང་། ཞི་བ་དང་གཉིས་མེད་དང་བྲལ་བ་དང་། དངོས་པོ་ཀུན་གྱི་རང་བཞིན་དུ་གྱུར་པ་ལ་བདེ་བ་ཆེན་པོ་ཞེས་རྒྱུད་འདིར་བརྗོད་དོ། །རྒྱས་བཤད་པ་དང་པོ་རྡོ་རྗེའི་དོན་བཤད་པ་ནི། རྡོ་རྗེ་ཡེ་ཤེས་ནས་རྡོ་རྗེ་ཞེས་ནི་
བརྗོད་ཀྱི་བར་རོ། །རྡོ་རྗེ་གོ་འཕང་གསལ་ཞེས་འགྲེལ་བར་འདོན་ཏེ། རྡོ་རྗེའི་དོན་ནི་ཡེ་ཤེས་ལྔའི་དངོས་ཏེ་ངོ་བོ་དང་། སངས་རྒྱས་ལྔའི་རང་བཞིན་ཅན་ནམ། རྡོ་རྗེའི་གོ་འཕང་སྟེ་གནས་གསལ་བའོ། །རྩ་ལྔ་ལས་འབབ་པའི་རྒྱུན་ཞེས་པས་ནི་རྟགས་ཀྱི་རྡོ་རྗེ་རྩེ་
ལྔ་བའི་རྣམས་གསང་གནས་ཀྱི་རྡོ་རྗེ་ལ་རྩ་ལྔ་གནས་པ་བསྟན་ནོ། །རྡོ་རྗེའི་དོན་ལྔ་མ་ནི་སྟོང་ཉིད་རྟོགས་པའོ། །རང་བཞིན་ཞེས་པ་ནས་ཐམས་ཅད་གསོལ་ཞེས་པའི་བར་གྱི་སྟོང་ཉིད་རྟོགས་པའི་རྡོ་རྗེའི་རྣམ་པ་སྟོན་ཏེ། འགྲེལ་པར་ཐམས་ཅད་གསལ་ཞེས་
འབྱུང་ངོ་། །ཉོན་མོངས་ཞེས་པས་ཀུན་རྟོག་གཅོད་པ་དང་། བདེ་བ་ཞེས་པས་ལུང་བཀག་པའི་དབང་གིས་བདེ་བ་རྫོགས་པར་བསྐྱེད་པ་བསྟན་ནོ། །སྟོང་པ་དེ་ལ་བཞིར་ཕྱེ་ནས་སྟོན་པ་ནི་སྟོང་པ་ཞེས་གསུམ་མོ། །ནམ་མཁའ་ཞེས་པ་ནི་ནམ་མཁའ་ལྔ་ནི་ཕུང་སོགས་འོད་
གསལ་དུ་ཞུགས་པའི་ཆ་ནས་སོ། །མི་ཆོད་ཅེས་པ་གཉིས་ཀྱིས་རྡོ་རྗེའི་སྒྲའི་དོན་བཤད་དོ། །ཡེ་ཤེས་ཞེས་པ་གཉིས་དོན་བསྡུས་སོ། །སྙིང་རྗེ་ཞེས་པ་ནས་རྣམ་པར་འཕེལ་གྱི་བར་གྱིས་སྙིང་རྗེའི་དོན་བཤད་ནས། རྡོ་རྗེའི་རྩེ་མོར་ཞེས་པ་བཞིས་སེམས་
དཔའི་དོན་བཤད་པར་འགྲེལ་པ་ལས་འཆད་ཀྱང་། རྡོ་རྗེའི་སྟོང་ཉིད་རྟོགས་པ་དང་། སེམས་དཔའི་དོན་སྙིང་རྗེར་འཆད་པ་ལེགས་སོ། །འདི་ནི་རྡོ་རྗེ་སེམས་དཔར་བརྗོད་ཅེས་པ་ནི་རྫོ་རྗེ་དང་སེམས་དཔའ་གཉིས་ཀའི་དོན་བསྡུར་བྱ་སྟེ། རྡོ་རྗེའི་རྩེ་མོ་ལྔ་
6-3-5a


དང་འདྲ་བའི་གསང་གནས་ཀྱི་རྡོ་རྗེའི་རྩའི་ཁོང་སྟོང་གི་ནམ་མཁའ་ལྔའི་ལམ་བྱང་སེམས་ཀྱིས་གང་བ་རྡོ་རྗེ་དང་ཨོཾ་ཡིག་གིས་ཕྱིར་མི་འཕོ་བར་འཛིན་པ་སེམས་དཔའི་དོན་ཏོ། །རྡོ་རྗེ་རྒྱས་པའི་རྩེ་མོར་འཛིན་པ་ལ་སེམས་དཔའོ། །སེམས་
དཔའི་དོན་ཀྱང་དེ་དང་ལྷན་སྐྱེས་གཉིས་སུ་བཤད་དོ། །བདེ་ཆེན་འཆད་པ་ནི་དེ་ཉིད་ཅེས་པ་དྲུག་གོ། །དང་པོས་གང་བདེ་ཆེན་དུ་འཇོག་པ་དང་། གཉིས་པ་དང་གསུམ་པས་དེར་འཇོག་པའི་རྒྱུ་མཚན་བསྟན་ཏེ། ལྷན་སྐྱེས་ཀྱི་བདེ་བས་ཀུན་ལ་ཁྱབ་པ་མཚོན་
པ་དང་། དེའི་རྟེན་ཀུན་ཏེ་ལྟ་བུས་རྩ་ཀུན་ལ་ཁྱབ་པ་མཚོན་པའོ། །དེ་གང་གིས་སྐྱེད་བ་ནི་དབང་བོ་ཞེས་གཅིག་གོ། །མི་ཕྱེད་ཅེས་པ་གཉིས་ཀྱི་མི་ཕྱེད་གོ་འཕང་ཞེས་པ་འཆད་དོ། །རང་རིག་འཆད་པ་ནི་རང་རིག་ཅེས་པ་དྲུག་གོ། །དེའི་དང་པོ་གཉིས་
ཀྱིས་རང་རིག་གི་དོན་དང་། དཔེ་བྲལ་གྱིས་རྣལ་འབྱོར་མ་སྦྱོར་ལས་གཞན་པའི་དཔེ་མེད་པ་དང་། མཚོན་པར་དཀས་ནི་བླ་མའི་མན་ངག་དང་མི་ལྡན་ན་མཚོན་མི་ནུས་པར་བསྟོན་ནོ། །རང་གི་ཞེས་པ་གཅིག་གིས་རང་ལ་གནས་པ་དང་། གཞོན་ནུ་མ་
ཞེས་པ་གཅིག་གིས་ཉམས་སུ་མྱོང་བ་ལས་གཞན་གྱིས་དེ་མི་ཤེས་པ་དང་། ཇི་ལྟ་བ་བཞིན་སྨྲར་མེད་པ་སྟོན་ལ། རང་རིག་པ་ཞེས་པ་ནི་མཐར་སྦྱར་རོ། །མཆོག་ཏུ་ཞེས་པ་གཅིག་ནི་འགྲེལ་པས་ཕྱིར་ལ་སྦྱོར་ཡང་སྔ་མ་ལ་སྦྱར་ན་ལེགས་སོ། །
མཆོག་འཆད་པ་ནི་དེ་ཉིད་ཅེས་པ་ལྔའོ་ཀུན་རྟོག་གིས་སྟོང་པ་འཆད་པ་ནི་དངོས་དང་ཞེས་པ་བཅུའོ། །གཟུང་འཛིན་སྤངས་པ་འཆད་པ་ནི་གཟུང་དང་ཞེས་པ་བརྒྱད་དོ། །བདེ་སྡུག་ལས་གྲོལ་བ་འཆད་པ་ནི་བདེ་བ་ཞེས་པ་བརྒྱད་དོ། ཞི་བ་དང་གཉིས་
6-3-5b


མེད་དང་བྲལ་བ་འཆད་བ་ནི་ཉན་ཐོས་ཞེས་པ་བཅུའོ། །དངོས་པོ་ཀུན་གྱི་རང་བཞིན་འཆད་པ་ནི་དངོས་པོ་ཞེས་པ་དྲུག་གོ། །དོན་བསྡུ་པ་ནི་རྣལ་འབྱོར་ཞེས་པ་བཅུའོ། །འགྲེལ་པས་མདོར་བསྟན་དང་རྒྱས་བཤད་ཀྱི་སྐབས་གཉིས་ཀ། རྒྱུད་གཉིས་སོ་
སོ་བ་དང་ཐུན་མོང་གི་ཡུལ་གཉིས་སུ་འཆད་དོ། །སྟོང་ཉིད་ཀྱི་རྡོ་རྗེ་ལ་བདེ་བས་སེམས་པ་དང་། གསང་གནས་ཀྱི་རྡོ་རྗེའི་རྩེར་གང་བ་ལ་སེམས་པའི་རྡོ་རྗེ་སེམས་དཔའ་གཉིས་བཤད་པའི་དང་པོས་བདེ་སྟོང་སྦྱོར་བ་རྟོགས་པ་དང་། གཉིས་པས་བདེ་བའི་
རྟེན་ནོར་བུའི་རྩེའི་བར་དུ་བབ་ནས་མི་འཕོ་བར་གཟུང་བ་དང་། དེ་ཡང་རིག་མ་དང་སྦྱོར་བའི་སྐབས་དང་། ཐབས་ཀྱང་ཡི་གེ་ནི་ཨོཾ་ཡིག་དང་དེའི་མཚོན་དོན་རླུང་ནང་དུ་འཇུག་པ་ཡིན་ལ། དེ་ཡང་སྐབས་ཀྱིས་ཐུར་སེལ་ལྟེ་བར་ནང་དུ་འཇུག་པའི་གནད་
ཀྱིས་བྱ་དགོས་པར་བསྟན་ནོ། །དེའི་ཁྱད་པར་ནི་བདེ་ཆེན་སོགས་ཀྱིས་སྟོན་པ་ལ་བདེ་ཆེན་གྱིས་དགའ་བ་བཞི་ཀ་ལ་ཁྱབ་དགོས་པར་བསྟན་པས་ནི་མས་བརྟན་སྟོན་ལ། རྩ་ཀུན་ལ་ཁྱབ་པ་ནི་དེའི་མཐུས་བདེ་བ་བརྟན་པའོ། །རང་རིག་གིས་ནི་ཉམས་
སུ་མྱོང་བ་འདྲ་བ་གཞན་གྱིས་བསྟན་དུ་མེད་པས་ཉམས་སུ་མྱོང་དགོས་པ་དང་། དེའི་ཐབས་གཞན་གྱི་མི་ནུས་པ་དག་ཐབས་དེ་ཡང་བླ་མའི་མན་ངག་ཉིད་ལ་རག་ལས་པར་བསྟན་ནོ། །མཆོག་གིས་ནི་ཀུན་རྟོག་གཅོད་པ་ལ་ཕུལ་དུ་བྱུང་བ་སྟེ་རྩོད་
དུས་སུ་དེ་ལ་བསྔགས་སོ། །གཟུང་འཛིན་སྤངས་པས་ནི་དེ་ཁོ་ན་ཉིད་མངོན་དུ་བྱས་པའི་ངོར་གཉིས་སྣང་ལྡོག་པས། སྒྲུབ་པ་དང་མ་ཡིན་དགག་གི་རྣམ་པར་མཐོང་བ་དེ་ཉིད་མཐོང་བ་མིན་པར་སྟོན་ནོ། །བདེ་སྡུག་བྲལ་གྱིས་ནི་སྲིད་ཞིའི་མཐའ་གཉིས་
6-3-6a


གནོན་པའི་ཚུལ་ཐུན་མོང་མ་ཡིན་པར་སྟོན་ནོ། །ཞི་བ་དང་གཉིས་མེད་སྤངས་ཀྱིས་ནི་ཐེག་ཆེན་གྱི་ཡེ་ཤེས་དགོས་པ་དང་། དེའང་ཐེག་པ་འདིའི་ལམ་དགོས་པར་སྟོན་ནོ། ཀུན་གྱི་རང་བཞིན་ནི་གོ་སླའོ། །རྣལ་འབྱོར་ཞེས་པ་ཕྱེད་དང་
གཉིས་ཀྱི་ལྷན་སྐྱེས་གཅིག་པུས་འགྲུབ་པ་དང་། དེ་ལས་གཞན་པའི་བཅོས་མའི་རྣལ་འབྱོར་མི་དགོས་པར་སྟོན་ཞིང་། ཅུང་ཟད་ཅེས་སོགས་ཀྱི་དབང་གིས་མཚོན་ནས་བསྒོམ་དགོས་པ་རྣལ་འབྱོར་མའི་རྒྱུད་དམ་དེའི་དྲིན་གྱིས་རྟོགས་པར་བྱ་བར་
བསྟན་ནོ། །འདི་ནི་རྗེ་ཐམས་ཅད་མཁྱེན་པ་རང་ཉིད་ཀྱིས་མཛད་པའི་ཟིན་བྲིས་སོ། །འདིས་ཀྱང་སངས་རྒྱས་ཀྱི་བསྟན་པ་རིན་པོ་ཆེ་སྒོ་ཐམས་ཅད་ནས་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག །མངྒ་ལཾ།། །།
6-3-6b


empty page
6-4-1a


༄༅། །རྡོ་རྗེ་བཟླས་བའི་རིམ་པའི་ཟིན་བྲིས་བཞུགས་སོ། །
6-4-1b


རྗེ་བཙུན་དམ་པ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་རྣམས་ཀྱི་ཞབས་ལ་དུས་ཐམས་ཅད་དུ་གུས་པས་ཕྱག་འཚལ་ལོ། །རྒྱལ་བ་ཐབས་ཅད་ཀྱི་མཁྱེན་པའི་ཡེ་ཤེས་ཐམས་
ཅད་གཅིག་ཏུ་བསྡུས་པའི་ངོ་བོ་བཅོམ་ལྡན་འདས་འཇམ་པའི་དབྱངས་དང་། དབང་ཕྱུག་བརྒྱད་དང་ལྡན་པའི་རྡོ་རྗེ་འཆང་ཆེན་པོ་མགོན་པོ་ཀླུ་སྒྲུབ་ཡབ་སྲས་ཀྱི་ཞབས་ལ་གུས་པ་ཆེན་པོས་སྐྱབས་སུ་མཆིའོ། །གདམས་
པའི་མཐར་ཐུག་རྡོ་རྗེ་བཟླས་པའི་རིམ་པའི་མན་ངག་ལ་གསུམ། མཚན་གྱི་དོན། གཞུང་གི་དོན། མཇུག་གི་དོན་ནོ། །དང་པོ་ནི། བཛྲ་ཛ་པ་ཀྲ་མ་ཞེས་པ་སྟེ། བཛྲ་ནི་རྡོ་རྗེ་དང་། ཛ་པ་ནི་བཟླས་པ་དང་། ཀྲ་མ་ནི་
རིམ་པ་སྟེ་མཚན་བསྒྱུར་པའོ། །རྗེ་བཙུན་འཛམ་དཔལ་ལ་ཕྱག་འཚལ་བ་ནི་སྐྱེས་མཆོག་རིན་ཆེན་བཟང་པོས་རང་གི་ལྷག་པའི་ལྷ་ལ་བར་ཆད་ཞི་བའི་དོན་དུ་ཕྱག་མཛད་པའོ། །གཉིས་པ་ལ་བཞི། རྩོམ་པ་ལ་
འཇུག་པའི་ཡན་ལག །ཡན་ལག་ཅན་གྱི་གདམས་པ་དངོས། གདམས་པ་བཤད་པའི་སྣོད་ཀྱི་ཁྱད་པར། གདམས་པ་རྙེད་པའི་ཕན་ཡོན་ནོ། །དང་པོ་ལ་གཉིས། མཆོད་པར་བརྗོད་པ་དང་། བརྩམ་པར་དམ་
6-4-2a


བཅའ་བའོ། །དང་པོ་ནི། བཏུད་ཅེས་དྲང་སྟེ་ཕྱག་འཚལ་བའི་དོན་ཏོ། །གང་ལ་ན། ཚོགས་གཉིས་ཡོངས་སུ་རྫོགས་པའི་དཔལ་དང་ལྡན་ཞིང་། བདག་མེད་པའི་དེ་ཁོ་ན་ཉིད་མཐར་ཐུག་པ་
ལ་མར་ལ་མར་བཞག་པ་བཞིན་དུ་རྫས་སུ་ཞུགས་པའི་ལྷན་ཅིག་སྐྱེས་པའི་བདེ་བ། འཁོར་བ་ཇི་སྲིད་བར་རང་གིས་ངང་གིས་འཇུག་པས་དུས་ནམ་ཡང་ཆོས་ཀྱི་སྐུ་ལ་གཡོ་བ་མེད་པས་ཆེན་པོ་སྟེ་མཆོག་
ཏུ་གྱུར་པ་དེ་ལའོ། །དེའང་རྣམ་སྣང་ལ་སོགས་པའི་སངས་རྒྱས་ཀུན་གྱི་བདག་ཉིད་ཁྱབ་བདག་ཏུ་གྱུར་བའི་མགོན་པོ་དྲུག་པ་རྡོ་རྗེ་འཆང་ངོ་། །གང་གིས་ན་འཕགས་པས་སོ། །ཅིའི་དོན་དུ་ན། རང་ཉིད་དམ་པར་
བསྟན་པ་དང་། གཞན་དག་དང་བ་སྐྱེས་ནས་བསྟན་བཅོས་ལ་འཇུག་པའི་དོན་དུའོ། །གཉིས་པ་ནི། ཏེ་ཞེས་པ་སྨྲ་སྒོ་ལས། ཏེ་ནི་ལྷག་མ་ཅན་ཡིན་ཏེ། །མཚམས་སྦྱར་བ་དང་དམ་བཅའ་དང་། །གཞན་
འདྲེན་པ་དང་གསུམ་དུ་འདོད། །ཅེས་བཤད་པ་ལྟར་གསུམ་ཡོད་ཀྱང་འདིར་ནི་བཏུད་ནས་བཤད་པར་བྱའོ་ཞེས་ལྷག་མ་འདྲེན་པའོ། །གང་ན། རྡོ་རྗེ་བཟླས་པའི་རིམ་པ་སྟེ་དེའི་དོན་ནི་འཆད་པར་འགྱུར་
6-4-2b


རོ། །རྒྱུད་གང་ལ་བརྟེན་ནས་ཤེ་ན། རྣལ་འབྱོར་ཆེན་པོའི་རྒུད་ཅེས་བར་གྱི་ཚིག་མི་མངོན་པར་བྱས་པ་སྟེ་རྩ་རྒྱུད་གསང་བ་འདུས་པ་དང་དེའི་བཤད་རྒྱུད་རྣམས་ཀྱི་རྗེས་སུ་འབྲངས་ནས་སོ། །དེ་ལ་རྣམ་འབྱོར་ནི་འདུས་པ་ཕྱི་མ་ལས། རྣལ་འབྱོར་གྱི་
རྒྱུད་ཅེས་གསུངས་པའི་རྣལ་འབྱོར་གྱི་དོན་དྲིས་པའི་ལན་དུ། ཐབས་དང་ཤེས་རབ་སྙོམས་འཇུག་པ། །རྣལ་འབྱོར་ཞེས་ནི་བཤད་པ་ཡིན། །གང་ཞིག་དངོས་མེད་ཤེས་རབ་སྟེ། །ཐབས་ནི་དངོས་པོའི་མཚན་ཉིད་དོ། །ཞེས་གསུངས་ཏེ། རྣལ་འབྱོར་
གྱི་སྐད་དོང་ཡོ་གཞེས་པ་རྣལ་འབྱོར་དང་སྦྱོར་བ་གཉིས་ཀ་ལ་འགྲོ་བས་སྦྱོར་བའི་དོན་ནོ། །སུ་ཞིག་སྦྱོར་ན་ཐབས་ཤེས་གཉིས་སྦྱོར་ལ། ཐབས་ཤེས་ནི་དངོས་པོ་དང་དངོས་མེད་དོ་ཞེས་པ་ཙམ་ལས་མ་གསུངས་པའི་ཐབས་ཤེས་སྦྱོར་བ་འདི་ལ་ཚུལ་བཞིའི་
དབང་དུ་བྱས་པའི་སྦྱོར་ཚུལ་བཞི་ཡོད་མོད་ཀྱང་གཙོ་བོའི་དོན་ནི་མཐར་ཐུག་གི་ཐབས་ཤེས་སྦྱོར་བའོ། །དེ་ལའང་འོད་གསལ་གྱི་མཐར་ཐུག་དང་ཟུང་འཇུག་གི་མཐར་ཐུག་གཉིས་ཡོད་ཀྱང་ཟུང་འཇུག་གི་མཐར་ཐུག་ལ་བལྟོས་ཏེ་འོད་གསལ་ཡན་གར་བའི་ཐབས་
ཤེས་སྦྱོར་བ་ནི་ཕྱོགས་གཅིག་པ་ཡིན་པས་འདིར་ནི་ཟུང་འཇུག་གི་ཐབས་ཤེས་ལ་བྱ་ལ། དེའང་རྒྱུད་ཕྱི་མ་ར་ཏིང་ངེ་འཛིན་གྱི་ཡན་ལག་ཐབས་ཤེས་སྙོམས་པར་འཇུག་པའི་ཡེ་ཤེས་ཀྱི་སྐུར་བཤད་པའི་དོན་སྒྲོན་གསལ་ལས། ཐབས་ཀུན་རྫོབ་བདེན་
པ་དང་ཤེས་རབ་དོན་དམ་གཉིས་སྦྱོར་བ་ལ་བཤད་པས་ཀུན་རྫོབ་སྒྱུ་མའི་སྐུ་དང་དོན་དམ་འོད་གསལ་གཉིས་སྐུ་དང་ཐུགས་སུ་དབྱེར་མི་ཕྱེད་པར་སྦྱོར་བའི་ཚུལ་བླ་ན་མེད་པ་ལ་བྱ་སྟེ་འདི་གསལ་བར་རིམ་པ་ཕྱི་མ་གསུམ་གྱི་སྐབས་སུ་བཤད་པར་བྱའོ། །
6-4-3a


དེ་འདྲ་བའི་ཟུང་འཇུག་གི་ཐབས་ཤེས་སྦྱོར་བ་གཙོ་བོར་སྟོན་པ་ནི་འདུས་པ་རྩ་བཤད་རྣམས་ཡིན་ཏེ། དེས་ནི་དེ་ཉིད་བསྡུས་པ་ལ་སོགས་པའི་རྣལ་འབྱོར་གྱི་རྒྱུད་རྣམས་དང་མི་འདྲ་བའི་ཁྱད་པར་ཆེས་ཤིན་ཏུ་ཆེ་བར་བསྟན་ཏོ། །དཔལ་
ཀླུའི་བྱང་ཆུབ་ཀྱིས་དེ་ཉིད་བསྡུས་པ་ལ་སོགས་པ་ནས། དཀྱིལ་འཁོར་བའི་ལྷ་རྣམས་ཕལ་ཆེར་ཞལ་གཅིག་པར་གསུངས་ལ། འདུས་པར་དཀྱིལ་འཁོར་བའི་ལྷ་ཐམས་ཅད་ཞལ་གསུམ་པར་གསུངས་པའི་རྒྱུ་མཚན་དྲིས་པའི་ལན་དུ། དགོངས་པ་ལུང་
སྟོན་གྱི་རྡོ་རྗེ་ཐལ་མོ་ངེས་དོན་དུ་བཤད་པའི་སྐབས་རྣམས་དྲངས་ནས། གཡས་ཞལ་ཐབས་ཡིན་པས་ཀུན་རྫོབ་སྒྱུ་མ་དང་། གཡོན་ཞལ་ཤེས་རབ་ཡིན་པས་དོན་དམ་འོད་གསལ་མཚོན་ལ། དེ་གཉིས་གང་ལ་སྦྱོར་བའི་རྩ་ཞལ་ནི་བདེན་གཉིས་དབྱེར་
མེད་དུ་སྦྱོར་བའི་ཟུང་འཇུག་མཚོན་བྱེད་ཡིན་པས་ཐམས་ཅད་ཞལ་གསུམ་པར་བཤད་དོ་ཞེས་གསུངས་པས། འདུས་པ་ལས་ཟུང་འཇུག་གི་སྐུ་དང་དེའི་ཐབས་རྫོགས་པར་སྟོན་པས་དཀྱིལ་འཁོར་པའི་ལྷ་ཐམས་ཅད་ཞལ་གསུམ་པར་གསུངས་པར་
བཞེད་དོ། །འདི་ནི་རྣམ་འབྱོར་གྱི་དོན་ཐབས་ཤེས་དབྱེར་མེད་དུ་སྦྱོར་བའི་གནད་རྫོགས་པར་སྟོན་པ་དང་དོན་གཅིག་གོ། །དེས་ན་ཡུལ་སྟོང་ཉིད་དང་ཡུལ་ཅན་ཡེ་ཤེས་གཉིས་རོ་མཉམ་དུ་སྦྱར་བ་ཙམ་ནི་རྣལ་འབྱོར་རྒྱུད་མན་ཆད་ལའང་ཡོད་ལ། ཡུལ་
སྟོང་ཉིད་དང་ཡུལ་ཅན་ལྷན་ཅིག་སྐྱེས་པའི་བདེ་བ་གཉིས་དབྱེར་མེད་དུ་བྱེད་པ་ཙམ་ནི་འདིའི་ལུགས་ཀྱི་འོད་གསལ་མན་ཆད་ཀྱི་ཐབས་ཤེས་དབྱེར་མེད་དུ་སྦྱོར་ལུགས་ཡིན་གྱི་ཟུང་འཇུག་གི་སྦྱོར་ལུགས་མིན་ནོ། །རྒྱུད་ནི་འདུས་པའི་ཕྱི་མ་ལས། རྒྱུད་ནི་
6-4-3b


རྒྱུན་ཞེས་བྱ་བར་གྲགས། །རྒྱུད་དེ་རྣམ་པ་གསུམ་དུ་འགྱུར། །ཞེས་གསུངས་པ་ལྟར་རྒྱུན་ཆགས་པ་སྟེ། དེ་ལ་རྒྱུ་རྒྱུད་ཐབས་རྒྱུད་འབྲས་རྒྱུད་གསུམ་དུ་བཤད་པ་ནི་བརྗོད་བྱ་དོན་གྱི་རྒྱུད་ཀྱི་དབང་དུ་མཛད་ལ། འདིར་ནི་རྗོད་བྱེད་གཞུང་གི་ཚིག་རྒྱུན་ཆགས་པ་ལ་བྱའོ། །
གང་ཟག་གང་གིས་བཤད་ན་འཕགས་པས་སོ། །དེ་ལྟར་བཤད་པའམ་བརྩམ་པར་དམ་བཅས་པའི་དགོས་པ་ནི་དམ་པ་རྣམས་ཁས་བླངས་པའི་ཁུར་མི་འདོར་བས་རྩོམ་པ་མཐར་དབྱུང་བའི་དོན་དུའོ། །གཉིས་པ་ལ་གཉིས། ལམ་གྱི་རིམ་པ་སྦྱིའི་རྣམ་པར་བཞག་པ་
དང་། རྡོར་བཟླས་ཀྱི་རིམ་པ་བྱེད་བྲག་ཏུ་བཤད་པའོ། །དང་པོ་ལ་བཞི། རིམ་གཉིས་སྤྱིའི་གོ་རིམ་དང་། རྫོགས་རིམ་ལྔའི་གོ་རིམ་དང་། དེ་རྣམས་རྒྱུད་གང་ལ་གནས་པ་དང་། ཇི་ལྟར་བྱ་བ་བཞིན་རྟོགས་པའི་ཐབས་བསྟན་པའོ། །དང་པོ་ནི། རིམ་ལྔ་ལ་ཚིག་འགྲེལ་མང་དུ་
ཡོད་ཀྱང་དོན་གྱི་འགྲེལ་པ་ཚད་མར་གྱུར་པ་ནི་སྤྱོད་བསྡུས་ཏེ། འདིས་རིམ་པ་ལྔར་བཤད་པ་རྣམས་ཀྱི་མ་ཚང་བ་ཁ་སྐོང་། རྟོགས་དཀའ་བའི་གནས་གསལ་བར་སྟོན། མདོར་བསྡུས་པ་རྣམས་རྒྱས་པར་འཆད་པས། རིམ་ལྔའི་གཞུང་བཤད་པའི་སྐབས་སུ་གང་
སྐབས་ལ་བབ་པ་རྣམས་བླང་པར་བྱའོ། །གསུངས་སོ་ཞེས་དྲང་ངོ་། །གང་གིས་ན་ཡང་དག་བར་རྫོགས་པའི་སངས་རྒྱས་རྣམས་ཀྱིས་སོ། །གང་ན་རྡོ་རྗེ་འཆང་གི་གོ་འཕང་བདེ་བླག་ཏུ་བསྒྲུབ་པའི་ཐབས་བསྐྱེས་རྫོགས་གཉིས་ཀྱི་རིམ་པ་འདིའོ། །གདུལ་བྱ་གང་ལ་ན། 
རྫོགས་པའི་རིམ་པ་ལ་འཇུག་པར་འདོད་པ་རྣམས་ལའོ། །ཇི་ལྟར་དུ་ན། དཔེར་ན་སྐས་ཀྱི་གདང་བུ་གོང་མར་འཛེག་པ་ལ་དེའི་སྔོན་དུ་གདང་བུ་འོག་མར་འཇོག་པའི་རིམ་པ་ལྟ་བུར་རོ། །དེའང་དང་པོར་སྐས་ཀྱི་རིམ་པ་འོག་མ་ལྟ་བུའི་བསྐྱེས་པའི་རིམ་པ་ལ་
6-4-4a


ལགས་པར་གནས་ཤིང་སྟེ་གནས་ནས་དེའི་འོག་ཏུ་རྫོགས་རིམ་དོན་དུ་གཉེར་བ་ལ་སྐས་ཀྱི་རིམ་པ་གོང་མ་ལྟ་བུའི་རྫོགས་རིམ་སྟོན་ནོ། །ལམ་གྱི་རིམ་པ་འདི་ལྟར་མཛད་པའི་འཇུག་རིམ་ནི་གཙོ་བོར་རིན་པོ་ཆེ་ལྟ་བུའི་གང་ཟག་
ཚེ་གཅིག་ལ་འཚང་རྒྱ་བའི་དབང་དུ་མཛད་པ་ཡིན་ཏེ། རིམ་པ་འདིས་སྒྱུ་ལུས་ཐོབ་ན་ཚེ་འདི་ལ་འཚང་རྒྱ་བར་གསུངས་པའི་ཕྱིར་དང་། དེའི་ལམ་གྱི་རིམ་བ་གཞན་ཅིག་ཡོད་ན་དེ་གཙོ་བོའི་དོན་ཡིན་པས་ལོགས་སུ་སྟོན་དགོས་པ་ལས་མ་བསྟན་པའི་ཕྱིར་
དང་། སྤྱོད་བསྡུས་སུ་རྫོགས་རིམ་ལ་བསླ་པ་ནི་བླ་མའི་མན་གང་ཙམ་གྱིས་ཅིག་ཅར་དུ་བསླབ་བམ་རིམ་གྱིས་བསླབ་ཅེས་དྲིས་པའི་ལན་དུ། རིམ་གྱིས་བསླབ་དགོས་པར་ཤེས་བྱེད་དུ་མས་བསྒྲུབས་ཤིང་། དེའི་མཐར། སེམས་ཅན་དང་པོའི་ལས་
ཅན་རྣམས། །དམ་པའི་དོན་ལ་འཇུག་པ་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟར་བུར་གསུངས། །ཞེས་གསུངས་པའི་ཕྱིར་རོ། །རིན་པོ་ཆེ་ལྟ་བུའི་གང་ཟག་ལའང་ལས་དང་པོ་པའི་སྐབས་ཤིག་མེད་པ་ནི་མི་སྲིད་ལ། ཡོད་ན་ནི་
དེའི་འཇུག་རིམ་ལ་བསྐྱེད་རིམ་མི་དགོས་པར་འདོད་པ་ནི་རྒྱུད་དང་བསྟན་བཅོས་དུ་མ་དང་ཡང་འགལ་བས་བསྐྱེད་རིམ་ནས་སློབ་དགོས་སོ། །དེའང་སྤྱོད་བསྡུས་ལས་དང་པོར་སངས་རྒྱས་ཀྱི་ཐེག་པའི་བསམ་པ་ལ་བསླབ་པར་གསུངས་པ་ནི་སྨོན་འཇུག་གཉིས་
ཕར་ཕྱིན་བཞིན་དུ་བསྐྱེད་པའོ། །དེ་ནས་སྒྲོན་གསལ་ལས་གསུངས་པ་བཞིན་དུ་དབང་བསྐུར་བ་བླངས་ནས་རྒྱུད་ཉན་ཏེ་རིམ་གཉིས་ཤེས་པར་བྱའོ། །དེ་ནས་དྲན་པ་གཅིག་པའི་ཏིང་ངེ་འཛིན་རྒྱས་བསྡུས་གཉིས་གང་རུང་ལ་བསླབ་བོ། །དེ་ནས་རྟོག་པའི་རྣལ་
6-4-4b


འབྱོར་སྟེང་འོག་གི་སྒོའི་ཕྲ་མོ་གཉིས་ལ་བསླབ་བོ། །དེ་ལ་ལོངས་པ་ན་ལས་དང་པོའི་ཏིང་ངེ་འཛིན་ལ་གནས་པར་འགྱུར་ཏེ་བསྐྱེད་རིམ་མཐར་ཕྱིན་པའོ། །དེ་ནས་དབེན་གསུམ་དང་བདེན་གཉིས་དང་ཟུང་འཇུག་ལ་རིམ་ཅན་དུ་བསླབ་པར་གསུངས་ཏེ། བསྐྱེད་རིམ་གྱི་སྔ་ཕྱི་
དང་རྫོགས་རིམ་གྱི་སྔ་ཕྱི་ལ་རིམ་ཅན་དུ་བསླབ་པའང་སྐས་ཀྱི་རིམ་པ་ལྟ་བུར་གསུངས། །ཞེས་པའི་དོན་དུ་སྦྱར་ཏེ། རྡོ་རྗེ་བཟླས་ལ་ལེགས་གནས་ཤིང་། །སེམས་དབེན་རིམ་པ་འདོད་རྣམས་ལ། །ཞེས་པ་ལྟ་བུར་སྦྱར་རོ། །དེ་ལྟ་ནའང་འོག་མ་དང་མི་ཟློས་ཏེ། སྐབས་
འདིར་རིམ་གཉིས་ཀྱི་སྔ་ཕྱི་རྣམས་སྐས་ཀྱི་རིམ་པ་ལྟ་བུར་གསུངས་ཞེས་སྤྱིར་བསྟན་པ་ཙམ་ཡིན་ལ། འོག་ནས་སོ་སོའི་མིང་སྨོས་ནས་སྔ་ཕྱིའི་རིམ་པ་བསྟན་པའི་ཕྱིར་རོ། །འོ་ན་རིམ་པ་དེ་ལྟར་བྱ་དགོས་པར་རྒྱུད་གང་དུ་གསུངས་ཤེ་ན། བཤད་པའི་རྒྱུད་རྡོར་ཕྲེང་ལས་
གསལ་བར་གསུངས་ཏེ། ཇི་སྐད་དུ། རྣམ་རྟོག་རླུང་ནི་རྣམ་གཅོད་པ། །ཉིན་དང་མཚན་དུ་ངེས་པར་ནི། །བརྒྱ་དང་བརྒྱད་ཀྱིས་ལྷག་པར་རྒྱུ། །རླུང་རྣམས་དེ་རྣམས་རྣམ་རྟོག་ནི། །གང་ཕྱིར་རྣམ་པར་གཅོད་པ་སྐྱེ། །རྣལ་འབྱོར་དེ་ནི་མཆོག་ཏུ་ཞི། །ཐམས་ཅད་སྟོང་
པའི་ངོ་བོར་བྱེད། །ཐོག་མར་རྣལ་འབྱོར་སྦྱོར་བ་དྲུག །རྣམ་འབྱོར་རིག་པས་མཆོག་ཏུ་བསྒྲུབ། །དེ་ནས་དབྱངས་མེད་ཡི་གེ་ཧ། །ཤིན་ཏུ་རྒྱ་ཆེར་བཟླ་བར་བྱ། །གང་ཕྱིར་མདུད་པ་འཇོམས་བྱེད་ན། །ཤེས་ན་བདེ་བ་སྟེར་བར་བྱེད། །དེ་ཡིས་རྣམ་རྟོག་ཐམས་ཅད་ནི། །
སྐད་ཅིག་གིས་ནི་གཅོད་པར་བྱེད། །རྣལ་འབྱོར་རྗེས་སུ་རྣལ་འབྱོར་དང་། །ཤིན་ཏུ་རྣལ་འབྱོར་རྣལ་འབྱོར་ཆེ། །དེ་ཉིད་དབྱེ་བ་བཅོ་ལྔ་ཡིན། །དང་པོ་སྦྱོར་པ་བསྒོམ་པར་བྱ། །དེ་ནས་དཀྱིལ་འཁོར་རྒྱལ་མཆོག་ནི། །རྣལ་འབྱོར་མཆོག་ལ་དབྱེ་བ་ལྔ། །དེ་ལས་ཀྱང་ནི་
6-4-5a


ལས་རྒྱལ་མཆོག །རྣལ་འབྱོར་དབྱེ་བ་བཅུ་གཉིས་སོ། །དེ་ཉིད་དབྱེ་བ་སུམ་ཅུ་བརྒྱད། །བསྐྱེད་པའི་རིམ་པ་བསྡུས་པ་ཡི། །མངོན་སུམ་བྱེད་པའི་རྣལ་འབྱོར་པ། །དེ་ནས་རྡོ་རྗེ་བཟླས་རིམ་མཆོག །ཅེས་གསུངས་སོ། །དེའི་དོན་ནི། གང་གི་ཕྱིར་ཏེ་རྣལ་
འབྱོར་གང་ལས་རྣམ་རྟོག་དང་རླུང་བརྒྱ་རྩ་བརྒྱད་པ་གཉིས་རྣམ་པར་གཅོད་པ་སྐྱེ་བའི་རིམ་གཉིས་ཀྱི་རྣལ་འབྱོར་དེ་ནི་བསྒོམས་པའི་སྟོབས་ཀྱིས་ཐམས་ཅད་སྟོང་པ་འོད་གསལ་གྱི་ངོ་བོར་བྱེད་དོ། །དེའང་སོ་སྐྱེའི་རྣམ་རྟོག་ཞི་བས་མཆོག་སྟེ་འཇིག་རྟེན་ལས་འདས་
པའོ། །ཐོག་མར་ནི་དབང་ཐོབ་ནས་རྒྱུད་ཐོས་བསམ་གྱིས་ངེས་པའི་རྗེས་ལའོ། །རྣལ་འབྱོར་རིག་པ་ནི་བསྐྱེད་རིམ་ཤེས་པའོ། །མཆོག་ནི་ལུས་དབེན་གྱི་རྒྱུར་གྱུར་བའོ། །བསྐྱེད་རིམ་བསྒོམས་པའི་རྗེས་དེ་ནས་དབྱངས་མེད་པའི་ཡི་གེ་ཧ་ནི་གཞོམ་དུ་མེད་
པ་ལ་བཤད་དེ་མི་ཤིགས་པའི་རླུང་ངོ་། །བཟླ་བ་ནི་འཇུག་པ་སོགས་གསུམ་ཡི་གེ་གསུམ་གྱི་ངོ་བོར་ཟློ་བའོ། །སྐད་ཅིག་ནི་མདུད་པ་འཇོམས་པའི་སྐད་ཅིག་ལའོ་ཞེས་འགྲེལ་པས་བཤད་དོ། །འགྲེལ་པའི་འགྱུར་ལ། བཅུ་བདུན་རྗེས་སུ་རྣལ་འབྱོར་སོགས། 
ཞེས་དང་། དེ་ཉིད་དབྱེ་བ་བཞི་བཅུ་དགུ ། བསྐྱེད་པའི་རིམ་པ་བསྡུས་པའོ། །ཞེས་འབྱུང་ངོ་། །ཁ་ཆེན་ལཀྵྨིའི་རིམ་ལྔའི་འགྲེལ་བར་དེ་ཉིད་སོ་བརྒྱད་དུ་བཤད་པས་རྒྱ་དཔེ་ལ་མི་མཐུན་པ་གཉིས་ཡོད་པར་གསལ་ཏེ། དེའི་དབང་གིས་རྒྱུད་ལའང་དེ་ཉིད་སོ་
བརྒྱད་དང་ཞེ་དགུར་བཤད་པའི་འགྱུར་གཉིས་འབྱུང་ངོ་། །ཡང་རྒྱུད་དེ་ཉིད་ལས། ཐོག་མར་རྣལ་འབྱོར་པ་ཆེན་པོ། །བློ་བཟང་གིས་ནི་ཞི་གནས་བསྒོམ། །བསྐྱེད་པའི་རིམ་པའི་སྦྱོར་བ་ཡིས། །ཁྲོ་བོའི་ཕྱག་རྒྱ་བྱས་ནས་ཀྱང་། །དབང་པོ་ཡི་ནི་སྒོ་དགུ་
6-4-5b


ལ། །ཐམས་ཅད་དུ་ནི་ཀུན་སྡོམ་པ། །ཧཱུཾ་བཟླས་པ་ནི་མཚུངས་མེད་བྱ། །ཞེས་གསུངས་སོ། །དེ་ལ་ཕྱག་རྒྱ་བྱས་པ་ནི་ལྷའི་རྣམ་པར་བསྐྱེད་པའོ། །ཁྲོ་བོ་ཞེས་པ་ལ་འགྲེལ་པའི་འགྱུར་ལས། འབར་བའི་ཞེས་འབྱུང་ཞིང་། དེ་ནི་མེ་ལྟར་རྣམ་རྟོག་བསྲེག་པ་ལ་
བཤད་དེ། བསྐྱེད་རིམ་གྱི་ཞི་གནས་ཀྱིས་ཐ་མལ་པའི་རྣམ་རྟོག་བསྲེག་པའོ། །ཧཱུཾ་བཟླས་ཞེས་པའི་དོན་འཇུག་ལྡང་གནས་གསུམ་གསུམ་ག་ལ་ཧཱུཾ་བཟླས་ཞེས་འགྲེལ་པས་བཤད་དོ། །འོན་ཀྱང་སྡར་ཧཱུཾ་ཧོཿ གཉིས་དང་ཡི་གེ་གསུམ་ལ་བཤད་པའི་ཕྱོགས་
གཅིག་མཚོན་པར་བྱས་ན་བདེའོ། །རྫོགས་རིམ་སྔ་ཕྱིའི་རིམ་པ་སྐས་ཀྱི་རིམ་པ་ལྟར་གསུངས་པའང་རྒྱུད་དེ་ཉིད་ལས། །རྡོ་རྗེ་བཟླས་པར་རབ་སྦྱོར་བས། །རླུང་གི་མཚན་ཉིད་ཤེས་ནས་ནི། །རྣམ་རྟོག་རླུང་རྣམས་རྣམ་པར་གཅོད། །སེམས་ལ་དམིགས་
པ་ཐོབ་པར་འགྱུར། །བདག་ལ་བྱིན་རླབས་རིམ་པས་ཀྱང་། །དངོས་གྲུབ་བརྒྱད་ནི་འགྲུབ་པར་འགྱུར། །སྣང་བ་ལ་སོགས་དབྱེ་བ་ཤེས། །མངོན་པར་བྱང་ཆུབ་པ་ནི་ཐོབ། །ཟུང་འཇུག་རིམ་པ་ལ་གནས་པ། །དངོས་གྲུབ་ཐམས་ཅད་བསྡུས་པ་ནི། །ཚེ་འདི་ཉིད་ལ་
འགྲུབ་འགྱུར་བར། །རྣལ་འབྱོར་པ་ཡིས་ཐེ་ཚོམ་མེད། །ཕྱག་རྒྱ་ཆེན་པོའི་དངོས་གྲུབ་ཆེ། །ཟུང་དུ་འཇུག་པའི་ཏིང་འཛིན་གྱིས། །རྣམ་རྟོག་མེད་པར་ཞུགས་ནས་ནི། །ཐོབ་པ་འདི་ལ་ཐེ་ཚོམ་མེད། །ཅེས་ཤིན་ཏུ་གསལ་བར་གསུངས་སོ། །དེ་ལྟར་དྲངས་པའི་
ལེའུ་དེ་ནས་རིམ་ལྔ་དང་མཐུན་པའི་ཚིག་མང་དུ་བྱུང་བ་ལ། ཁ་ཅིག་ན་རེ། དེ་དག་ནི་རིམ་ལྔའི་ཚིག་གཞན་གྱིས་བཅུག་པའོ་ཞེས་ཟེར་པ་ནི་མ་བརྟགས་པར་སྨྲ་བ་ཡིན་ཏེ། སྔར་དྲི་བའི་སྐབས་སུ། རྣལ་འབྱོར་རྣམས་ཀྱིས་དེ་ཉིད་མཐོང་། །སྐད་ཅིག་
6-4-6a


གཅིག་ལ་མངོན་བྱང་ཆུབ། །ཅེས་སྐད་ཅིག་གཅིག་ལ་མངོན་བྱང་ཆུབ་པའི་དེ་ཁོ་ན་ཉིད་ཇི་ལྟར་མཐོང་ཞེས་དྲིས་པའི་ལན་ལེའུ་འདིས་སྟོན་པ་ན། བཞི་པ་ཡིས་ནི་དབང་བསྐུར་བས། །བློ་ལྡན་དེ་ཉིད་མཐོང་བར་འགྱུར། །ཞེས་དབང་བཞི་
པའི་སྒོ་ནས་སྐད་ཅིག་གཅིག་ལ་བྱང་ཆུབ་པ་མཐོང་བར་བཤད་དོ། །དེ་ནས་སྐད་ཅིག་མ་གཅིག་ལ་བྱང་ཆུབ་པ་བསྟན་པའི་ཕྱིར་དུ་སྣང་བ་མཚན་མོའི་ཆ་རུ་འགྱུར་ཞེས་ཚིགས་བཅད་ཕྱེད་དང་དྲུག་གསུངས་པས་དྲི་བའི་ལན་དུ་ཤིན་ཏུ་འབྲེལ་བ་ཡིན་ནོ། །
ཡང་དྲི་བའི་སྐབས་སུ། རྡོ་རྗེའི་ཕྱག་རྒྱ་དངོས་གྲུབ་ཆེ། །འགྲོ་བའི་བླ་མ་ཇི་ལྟར་འཐོབ། །ཅེས་དྲིས་པའི་ལན་ལེའུ་འདིས་སྟོན་པ་ན། རྡོ་རྗེའི་ཕྱག་རྒྱ་དངོས་གྲུབ་ཆེ། །ཟུང་དུ་འཇུག་པ་ཐོབ་པར་འགྱུར། །ཞེས་གསུངས་ལ། ཐོབ་བྱེད་ཀྱི་ཟུང་འཇུག་ནི། བསྐྱེད་རྫོགས་
གཉིས་དང་འཁོར་འདས་གཉིས་དང་ཀུན་རྫོབ་དང་དོན་དམ་གཉིས་ཀྱི་རྟོག་པ་གཉིས་སྤངས་ནས་འདྲེས་པ་ལ་བཤད་ཅིང་། དེ་ནས། རྡོ་རྗེ་བཟླས་པར་རབ་སྦྱོར་བས་ཞེས་སོགས་ཀྱིས་རིམ་པ་ལྔ་གོ་རིམ་བཞིན་བསྐྱེད་ནས་ཟུང་འཇུག་གིས་ཕྱག་རྒྱ་ཆེན་
པོ་འདིའི་དངོས་གྲུབ་བསྒྲུབ་པ་ཤིན་ཏུ་གསལ་བར་བཤད་པས་སྔར་གྱི་དྲི་བའི་ལན་དུ་ཤིན་ཏུའང་གསལ་ལོ། །དེས་ན་རིམ་ལྔར་འདི་བཏུས་པ་ཡིན་གྱི་འདི་རིམ་ལྔ་ནས་བཏུས་པ་མ་ཡིན་ནོ། །གཞན་ཡང་རིམ་གཉིས་སྤྱི་དང་སོ་སོའི་གོ་རིམ་སྐས་ཀྱི་རིམ་
པ་ལྟར་གསུངས་པར་བཤད་པ་དེ། །འདུས་པའི་རྒྱུད་དུ་ནི་རྒྱས་བཏབ་པར་གསུངས་པས་མི་གསལ་ལ། རྡོ་རྗེ་འཕྲེང་བའི་སྐབས་འདིར་མ་གསུངས་ན་རྒྱུད་གང་དུ་གསུངས་སོམས་ཤིག །གཉིས་པ་ལ་གཉིས། གང་ལ་གནད་དུ་བསྣུན་པ་རྡོ་རྗེ་ལུས་ཀྱི་
6-4-6b


མཚན་ཉིད་བཤད་པ་དང་། དེར་གནད་དུ་བསྣུན་པའི་རྫོགས་རིམ་རྣམས་ཀྱི་རིམ་པ་བཤད་པའོ། །དང་པོ་ནི། ཐབས་དང་ཤེས་རབ་ཀྱི་རྒྱུད་གཉིས་དང་དེའི་དགོངས་པ་འགྲེལ་བའི་ཚད་ལྡན་གྱི་གཞུང་ཀུན་མཐུན་པར། ཐོག་མར་ལུས་ལ་གནད་དུ་བསྣུན་པའི་
སྒོ་ནས་རྫོགས་རིམ་གྱི་རྟོགས་པ་བསྐྱེད་པ་ཡིན་ནོ། །དེ་ལ་རྡོ་རྗེ་ལུས་ཀྱི་མཚན་ཉིད་མི་ཤེས་ན་ལུས་ཀྱི་གནད་འདིར་དམིགས་པ་གཏད་ནས་བསྒོམས་པས་འདི་ལྟ་བུའི་རྟོགས་པ་སྐྱེ་བའི་རྒྱུ་མཚན་ལེགས་པར་མི་ཤེས་པས་ལུས་ཀྱི་རྩ་དང༌རླུང་ལ་སོགས་
པའི་མཚན་ཉིད་ལ་མཁས་པར་བྱེད་པ་ནི་གནད་དུ་ཆེ་སྟེ། རྒྱུད་རྡོར་ཕྲེང་ལས། རླུང་གི་མཚན་ཉིད་མི་ཤེས་པས། །འཇིག་རྟེན་གསུམ་ནི་རྣམ་པར་འཁོར། །ཞེས་དང་། རྩ་ཡི་རིམ་མེད་ངེས་པར་ནི། །ཕུང་པོ་ལ་སོགས་མི་འབྱུང་ཞིང་། །ཕུང་པོ་མེད་ན་ཡེ་ཤེས་
ཆེ། །རྣལ་འབྱོར་བ་ཡིས་ཐོབ་མི་འགྱུར། །ཕུང་པོ་ལྔ་ནི་བདག་ཉིད་ལུས། །མཁའ་འགྲོ་ལྔར་ནི་རབ་ཏུ་གྲགས། །དེ་ཉིད་འབྱུང་བ་ལྔ་ཡིས་ནི། །ཡེ་ཤེས་ལྔར་ནི་རྣམ་པར་གནས། །དེ་ཕྱིར་འབད་པ་ཐམས་ཅད་ཀྱིས། །རྩ་ཡི་འཁོར་ལོ་ཤེས་པར་བྱ། །ཞེས་གསུངས་
ཏེ། རྩ་ལ་གནས་པའི་ཁམས་གཉིས་ཀྱང་དེ་དང་གཉིས་དང་འདྲའོ། །དེས་ན་སྐབས་འདིར་སེམས་ཅན་ཀུན་གྱི་ཞེས་པས་རླུང་གི་རྣམ་གཞག་མདོར་བསྡུས་ཤིག་ལས་མ་གསུངས་ཀྱང་། །རྡོ་རྗེ་ལུས་ཀྱི་མཚན་ཉིད་བསྟན་པར་བྱའོ། །འདི་ལ་གསུམ། དང་པོར་སྐྱེ་
གནས་སུ་ཉིང་མཚམས་སྦྱོར་ཚུལ། དེ་ནས་ལུས་ཆགས་པ་དང་འཇིག་པའི་རིམ་པ། དེ་ལ་བརྟེན་ནས་ལུས་ལ་གནད་དུ་བསྣུན་ལུགས་སོ། །དང་པོ་ནི། སྤྱིར་སྐྱེ་གནས་བཞིར་ཉིང་མཚམས་སྦྱོར་བ་ཡོད་མོད་ཀྱང་སྔགས་ཀྱི་གཞུང་རྣམས་ནས། ཕལ་ཆེར་
6-4-7a


མི་མངལ་སྐྱེས་ཤིག་གི་དབང་དུ་མཛད་ནས་གསུངས་ཏེ། ལམ་ཐོག་མར་བསྒོམ་བའི་རྟེན་གྱི་གཙོ་བོ་ལ་དགོངས་སོ། །དེ་ལ་མང་དུ་སྐྱེ་བ་ལེན་པ་རྣམ་གཞག་རིམ་པར་མདོ་སྡེ་རྣམས་ལས་གསུངས་པ་བཞིན་དུ་རྒྱུ་རྐྱེན་གསུམ་
བཤད་དམ་ནད་མེད་ཅིང་ཟླ་མཚན་དང་ལྡན་པ་དང་། ཕམ་ཆགས་པར་གྱུར་ཅིང་ཕྲད་པ་དང་། དྲི་ཟའང་ཉི་བར་གནས་པའོ། །དེའི་རྒྱུད་རྡོར་ཕྲེང་ལས། སྔོན་ལས་རླུང་གི་རྣམ་ཤེས་ནི། །བརྒྱ་ལམ་གང་ཚེ་འཁོར་གྱུར་ན། །ཕ་ཡི་ཁ་ལ་མཚུངས་པར་གནས། །དེ་ཚེ་
ཆགས་པའི་དབང་དུ་འགྱུར། །གསང་གནས་ཟླ་མཚན་ལྡན་པའི་ཚེ། །མེ་དང་ཉི་མ་འཆར་བ་ན། །དེ་ཚེ་ལྷག་པར་ཆགས་པས་ནོན། །ཆགས་པ་མཆོག་ཏུ་འདོད་པར་འགྱུར། །རྡོ་རྗེ་པདྨ་འདྲེས་པའི་གདོང་། །འཇུག་པ་ཕ་ཡི་ཁ་ཡི་རླུང་། །དེ་ཚེ་ས་བོན་དུ་ནི་འགྱུར། །
ས་བོན་ལས་ནི་སེམས་ཅན་འབྱུང་། །ཞེས་གསུངས་པ་འདིས་བར་དོའི་འཇུག་ཚུལ་སྟོན་ནོ། །དེ་དག་གི་དོན་ནི་སྔོན་གྱི་ལས་ཀྱི་དབང་གིས་ཏེ་རླུང་དང་བཅས་པའི་བར་དོའི་རྣམ་ཤེས་བརྒྱལ་མོ་རྟེ་རྒྱུ་རྐྱེན་གཞན་མེད་པར་འཁོར་ཞིང་འགྲོ་བའི་ཚེ། ཕ་མ་འདུས་
པ་མཐོང་སྟེ་ཕ་རོལ་བར་བྱེད་པ་མ་བཟློག་ན་མ་ལ་རོལ་བར་བྱེད་མི་ནུས་སོ་སྙམ་ནས། ཕ་རོལ་བར་བྱེད་པ་བཟློག་བའི་བློས་ཕའི་ཁ་ལ་མངོན་པར་ཕྱོགས་ཏེ་གནས་ལ། དེའི་ཚེ་བར་དོ་དེ་མ་ལ་འཁྲིག་པར་འདོད་པའི་འདོད་ཆགས་ཀྱི་དབང་དུ་འགྱུར་རོ་
ཞེས་འགྲེལ་པ་ལས་འཆད་དོ། །སྡོམ་འབྱུང་ལས། ཁ་ཡི་ལམ་ལ་རབ་ཏུ་འཇུག །ཅེས་བར་དོ་ཁའི་ལམ་ནས་འཇུག་པར་བཤད་པ་དང་འདི་གཉིས་འདྲ་བས་ཕའི་ཁ་ནས་འཇུག་པ་ཡིན་ལ། ཆགས་པའི་དབང་དུ་འགྱུར་བའང་ཕོར་སྐྱེ་ན་མ་ལ་
6-4-7b


འཁྲིག་བསམ་གྱིས་ཆགས་མོད་ཀྱང་མོར་སྐྱེན་ཕ་ལ་འཁྲིག་བསམ་གྱིས་ཆགས་པར་གསུངས་པས་དེ་གཉིས་ཀ་དང་སྦྱར་རོ། །གསང་གནས་ཀྱི་ཟླ་མཚན་འབབ་པའི་རྩ་ལས་མེ་འཆར་བ་ནི་དབུས་མ་ལས་འབབ་པའོ། །ཉི་མ་འཆར་བ་ནི་ཁྲག་འབབ་
པ་སྟེ་མ་ཡིའོ། །དུས་དེའི་ཚེ་མ་དེ་ལྷག་པར་ཆགས་པའི་དབང་དུ་འགྱུར་ལ། གཅིག་ཏུ་ཆགས་པ་ནི་ས་བོན་གཏོང་འདོད་པ་དང་མཆོག་ཏུ་ནི་སེམས་ཅན་སྐྱེ་བའི་རྒྱུ་ལ་འགྲེལ་པས་འཆད་ཀྱང་ཤིན་ཏུ་འདོད་ཆགས་པའི་ཆགས་པ་དྲག་པོར་གྱུར་པའི་སྐབས་སུ་མཇུག་
ཏུ་ཁུ་བ་བསྐ་བ་འབྱུང་ལ། དེའི་རྗེས་སུ་གཉིས་ཀ་ལས་ཁུ་ཁྲག་གི་ཐི་ལེ་གཉིས་ངེས་པར་འབྱུང་ལ། མའི་སྐྱེ་གནས་སུ་འདྲེས་པས་འོ་མ་བསྐོལ་བའི་སྤྲིས་མ་ཆགས་པ་ལྟར་འདུག་པའི་དབུས་སུ་རྣམ་ཤེས་འཇུག་པར་ས་ཡི་དངོས་གཞི་ལས་གསུངས་པ་
ལྟར་རོ། །ཕའི་ཁ་ལ་མངོན་པར་ཕྱོགས་པའི་ལས་ཀྱི་རླུང་གིས་བསྐུལ་བའི་བར་དོ་སྐྱེ་གནས་སུ་རབ་ཏུ་འཇུག་ཅིང་། དེའི་དུས་སུ་ཕའི་ཁུ་ཁྲག་གི་ཐིགས་པ་ལ་བར་དོ་ཞུགས་པ་ས་བོན་དུ་འགྱུར་རོ། །ཞེས་འགྲེལ་པས་འཆད་ཀྱང་། ཕའི་ཁ་ནས་འཇུག་པའི་རླུང་
སྟེ་བར་དོ་སྐྱེ་འགྱུར་གྱི་སེམས་ཅན་དེའི་ས་བོན་དུ་འགྱུར་བས་ས་བོན་དེ་ལས་སྐྱེ་སྲིད་ཀྱི་སེམས་ཅན་འབྱུང་བ་སྟེ་སྐྱེ་ཞེས་པའོ། །ཀླུ་བྱང་གིས་ཡེ་ཤེས་སེམས་དཔའ་ལྟར་རྣམ་སྣང་གི་སྒོ་ནས་འཇུག་པར་གསུངས་པས་ནི་རྣམ་སྣང་སྐུ་རྡོ་རྗེ་འགོད་པའི་
གནས་སྤྱི་པོ་ནས་འཇུག་པ་ཡིན་ལ། མཛོད་ཀྱི་རང་འགྲེལ་ནས་མངལ་གྱི་སྒོ་ནས་འཇུག་པར་ཡང་བཤད་པས་མཐར་མངལ་དུ་འཇུག་པར་འདྲའང་ཏོག་མར་འཇུག་པའི་སྒོ་གསུམ་གསུངས་སོ། །དེ་ཡང་ཁ་ལ་འོ་བྱ་བའི་བསམ་པས་ཁ་ནས་འཇུག་པ་དང་།
6-4-8a


སྐྲ་ལ་རེག་པའི་བསམ་པས་སྤྱི་བོ་ནས་འཇུག་པར་མན་སྙེ་ལས་བཤད་པས་མཐའ་གཅིག་ཏུ་མ་ངེས་སོ། །བར་སྲིད་གང་དུ་འཇུག་པའི་མངལ་གྱི་གནས་ནི་རྒྱུད་རྡོར་ཕྲེང་ལས། མི་དབང་དཀྱིལ་འཁོར་དབུས་སུ་ཡང་། །གང་གིས་སྲད་བུའི་
རྣམ་པར་གནས། །རྒྱུ་གཅིག་ཏུ་ཡང་ཤེས་ནས་ནི། །དེ་ཉིད་འབྲས་བུ་རྣམ་པ་གཉིས། །ཞེས་བཤད་དེ། །འགྲེལ་བའི་འགྱུར་ལས། སྐྱེ་གནས་འཁོར་ལོའི་དབུས་སུ་ཡང་། །རྩ་གཉིས་སྲད་བུའི་རྣམ་པར་གནས། །ཞེས་བསྒྱུར་བ་ལེགས་སོ། །དེ་ལ་
སྐྱེ་གནས་ཀྱི་འཁོར་ལོ་ནི་མའི་པདྨའི་དབུས་ལ་འགྲེལ་པས་བཤད་པ་ནི་མི་འཐད་དེ། དེ་ཁོ་ན་ཉིད་གྲུབ་པ་ལས། སྐྱེ་འགྲོའི་གཙོ་བོ་གང་ཡིན་པ་དེ་རླུང་དང་བཅས་པའི་ཁུ་བའི་ཐིགས་པ་རྣམས་དང་ལྷན་ཅིག་བཙུན་མོའི་ཚིགས་ལོ་བབ་པ་རྙེད་པ་ན། ལྟེ་
བའི་འོག་ཏུ་ཁ་ཐུར་དུ་བསྟན་པའི་པདྨ་དམར་པོ་འདབ་མ་བརྒྱད་པའི་ནང་དུ་ཁྲག་འཛག་པའི་ལྷག་མ་ཀུན་ཏུ་བཟང་སྟེ། དོའི་རྗེས་ལ་པདྨའི་ཁ་ཟུམ་པར་འགྱུར་རོ། །དེར་ཡང་ཁྲག་དང་ཁུ་བ་གཉིས་ཀའང་ཆུ་དང་འོ་མ་འདྲེས་པ་བཞིན་དུ་གྱུར་ནས་གོང་བུ་
གཅིག་ཏུ་གྱུར་ཏེ་རང་གི་རང་བཞིན་རྩོམ་པར་བྱེད་དོ། །དེ་ནས་རྗེས་སུ་འགྲོ་བའི་རིམ་གྱིས་ནུར་ནུར་པོ་ལ་སོགས་པར་ཡོངས་སུ་གྱུར་པའི་རིམ་གྱིས་སྐྱེ་སྟེ། །ཞེས་ལྟེ་བའི་འོག་ཙམ་ན་སྐྱེ་གནས་ཀྱི་འཁོར་ལོ་གནས་པ་དེར་བར་དོ་འཇུག་པར་གསུངས་
པའི་ཕྱིར་རོ། །དགའ་བོ་མངའ་འཇུག་ལས་ཀྱང་ཕོ་བའི་འོག་ལོང་གའི་གོང་གི་བར་ན་མངལ་གྱི་གནས་ཡོད་པར་གསུངས་པའི་ཕྱིར་རོ། །རྒྱུད་རྡོར་ཕྲེང་ལས་ཀྱང་། བཤང་སྒོ་གསང་བའི་དབུས་སུ་གནས། །མིང་ནི་མ་སྐྱེས་ཆ་ཆེན་པོ། །དེ་ཡང་རྣམ་
6-4-8b


ཤེས་དང་བྲལ་བ། །ཡེ་ཤེས་ལུས་ནི་བདག་མེད་པ། །དེར་ནི་སྐྱེ་བ་སྲོག་གི་མཆོག །སྲོག་ཆགས་རྣམས་ཀྱི་མཆོག་ཏུ་བརྗོད། །རྣམ་པར་ཤེས་བའི་ངོ་བོ་རྟེན། །ཐོག་མར་འབྱུང་བ་བཞི་པོ་ལ། །དྲོང་སྐྱེད་པ་ཡི་ངོ་བོར་བྱེད། །དེ་ཚེ་རང་གི་གནས་སུ་ཐིམ། །ཞེས་
བཤད་སྒོ་གསང་བའི་དབུས་ན་མ་སྐྱེས་པའི་ཆ་ཆེན་པོ་ཞེས་པའི་རྩ་གནས་པའི་གནས་དེར་བར་སྲིད་ཐིམ་པ་སྟེ་བརྒྱལ་བར་གསུངས་པའི་ཕྱིར་རོ། །འདིར་ཡང་འགྲེལ་བས་བཤད་སྒོ་གསང་བའི་དབུས་མའི་ཆོས་འབྱུང་གི་དབུས་ལ་བཤད་པ་མི་
འཐད་པས་གསང་བའི་དབུས་འདི་སྔར་བཤད་པའི་གསང་གནས་ཀྱི་འཁོར་ལོའི་དབུས་སོ། །བཤད་སྒོ་ཞེས་པ་ནི་མ་སྐྱེས་པའི་ཆ་ཞེས་པའི་རྩ་དེ་གསང་གནས་ཀྱི་འཁོར་ལོའི་དབུས་ནས་བཤང་བའི་སྒོའི་བར་དུ་གནས་པའོ་དོན་ཡིན་གྱི། སེམས་ཅན་
སྐྱེ་བའི་གནས་དེར་སྟོན་པའམ། དེ་དང་གསང་གནས་གཉིས་ཀྱི་བར་ན་སེམས་ཅན་སྐྱེ་བའི་གནས་ཡོད་པར་སྟོན་པ་མིན་ཏེ། དེ་ནི་གསང་གནས་ཀྱི་དབུས་སོ། །དེའང་ཞེས་པས་ནི་རྩ་དེ་བེམས་པོར་སྟོན་པའོ། །དེར་ནི་ཞེས་པ་གསང་གནས་ཀྱི་དབུས་སོ། །
སྐྱེ་ཞེས་པ་ནི་སེམས་ཅན་ཉིད་མཚམས་སྦྱོར་བའོ། །སུ་ཞིག་ཅེ་ན། ཡེ་ཤེས་སུ་ས་ནི་ཞེས་པ་ཡེ་ཤེས་ཀྱི་ལུས་ཅན་བར་དོ་ལ་བཤད་པ་ལེགས་སོ། །བདག་མེད་ཅེས་པ་ནི་ལེན་པ་པོ་ལ་སོགས་པའི་བདག་མེད་པའོ། །སྲོག་གི་མཆོག་ནི་རླུང་རྣམས་
ཀྱི་མཆོག་སྲོག་གི་རླུང་སྟེ་དེའི་བཞོན་པ་ཅན་གྱི་རྣམ་ཤེས་ནི་བར་དོའི་རྣམ་ཤེས་ཀྱི་ངོ་བོ་ལ་བསྟེན་ནས་རང་གི་སྐྱེ་གནས་སུ་དང་པོར་མེར་མེར་པོས་བསྡུས་པའི་འབྱུང་བ་བཞི་ལ་ཐིམ་མོ། །དྲོད་བསྐྱེད་པ་ཡི་ངོ་བོར་བྱེད། །ཅེས་པ་ལ་འགྲེལ་པར། བསྐྱེད་
6-4-9a


པ་ཡི་ནི་ངོ་བོར་བྱེད། །ཅེས་འབྱུང་སྟེ། རང་གི་ངོ་བོ་སྔོན་ལས་ཀྱིས་བསྐྱེད་ནས་ཞེས་པའོ། །སེམས་ཅན་རྣམས་ཞེས་པ་ནི་སྲོག་རླུང་དེ་སེམས་ཅན་རྣམས་ཀྱི་རླུང་གི་མཆོག་གོ། །དེ་ལྟར་མངལ་དུ་འཇུག་པའི་རྣམ་ཤེས་ཚོགས་བརྒྱད་ལས་
གང་ཡིན་སྙམ་ན། རྒྱུད་རྡོར་ཕྲེང་ལས། བག་ཆགས་ཉོན་མོངས་ཅན་གྱི་ཡིད། །རླུང་གི་ངོ་བོས་གཟུགས་གཞན་བྱེད། །དོན་ནི་ངེས་པར་མི་ཤེས་ཤིང་། །རླུང་ཙམ་ལ་ཡིན་པས་རྨོངས་ཡིན། །ཀུན་གཞི་རྣམ་ཤེས་བཀུག་ནས་ནི། །བག་ཆགས་ནང་དུ་རྣམ་
པར་སྤྱོད། །བག་ཆགས་དང་ནི་རྣམ་ཤེས་ཟུང་། །བག་ཆགས་དག་འདྲེས་རིམ་པ་ལས། །རང་གི་བག་ཆགས་བསྒོས་པ་ཡིས། །དེ་རྣམས་ཟླ་མཚན་དུས་སུ་ནི། །མངལ་གྱི་རྩ་ལ་འཇུག་པས་ན། །དེ་རྗེས་ཁུ་ཁྲག་ཞུ་ཐིག་ལེ། །འདྲེས་པ་རུ་ནི་གྱུར་པ་དང་། ཇི་ལྟར་
ཆང་རོས་མྱོས་པ་བཞིན། །ཀུན་གཞི་རྣམ་ཤེས་བག་ཆགས་ལས། །རྣམ་པར་ཤེས་པ་སྐྱེ་བར་འགྱུར། །ཉོན་མོངས་ཅན་ཡིད་སྲོག་རླུང་ཉིད། །རྟག་ཏུ་ཡང་དག་འགྲོ་བར་འགྱུར། །ཞེས་གསུངས་སོ། །དེ་དག་གི་དོན་ནི་བག་ཆགས་ཀྱི་སྒྲས་ཀུན་གཞི་དང་
ཉོན་ཡིད་གཉིས་ཀ་བསྟན་ལ། དེ་གཉིས་སྲོག་ཐུར་གྱི་རླུང་དང་བཅས་པས་བར་དོའི་གཟུགས་གཞན་བྱེད་དེ་དབང་པོ་ཀུན་ཚང་བའི་ཕྱིར་རོ། །སྔོན་པོ་ལ་སོགས་པའི་དོན་ནི་ཡོད་པར་ངེས་མི་ཤེས་ཏེ་མྱ་ངན་ལ་སོགས་པས་བསྒྲིབས་པའི་ཕྱིར་དང་། གྲིབ་
མ་ལྟ་བུའི་ལུས་ཅན་ཉིད་གྱིས་གཟུགས་མཚན་ཉིད་པ་དང་བྲལ་བའི་ཕྱིར་རོ། །སྔོན་ལས་ཀྱི་དབང་གིས་ཀུན་གཞི་བཀུག་ནས་བག་ཆགས་སྣ་ཚོགས་བའི་ནང་དུ་རྒྱུ་ཞིང་སྲོག་རླུང་དང་ཀུན་གཞི་གཉིས་དུས་མཉམ་དུ་སྔོན་གྱི་བག་ཆགས་དང་འདྲེས་
6-4-9b


པ་སྟེ་དེའི་དབང་གིས་འཆི་སྲིད་འགག་པའི་རིམ་བ་ལས་སྐྱེས་ཏེ། དེ་གཉིས་མངལ་གྱི་རྩ་མ་སྐྱེས་པའི་ཆལ་ཞུགས་པ་ནི་ཆང་རོས་མྱོས་པ་བཞིན་དུ་བརྒྱལ་ལོ། །དེ་ལས་རྣམ་ཤེས་སྐྱེ་བ་ནི་ཉོན་ཡིད་དེ་རྣམ་ཤེས་ཀྱིས་ནི་བག་ཆགས་འཛིན་ནོ། །ཞེས་འགྲེལ་
པས་འཆད་དོ། །རྒྱུད་ཀྱི་དགོངས་པ་ནི་ཉོན་ཡིད་ཉོན་མོངས་ཀྱི་བག་ཆགས་ལ་བྱེད་དེ་སྐབས་འདིར་དེ་ལྟར་བསྟན་ཞིང་། །སྐབས་གཞན་དུ་ཚོགས་བརྒྱད་བྱང་སེམས་བརྒྱད་དང་སྦྱར་བའི་ཚེ་བྱམས་བ་དང་བག་ཆགས་སྦྱར་བས་ཀྱང་ཤེས་སོ། །དེ་གང་གི་བག་
ཆགས་ཡིན་པའི་ཕྱིར་ནི་ཀུན་གཞིར་འཆད་དེ། གཙོ་བོར་ནི་ཡིད་ཀྱི་རྣམ་ཤེས་སོ། །བྱང་སེམས་བརྒྱད་དང་རྣམ་ཤེས་ཚོགས་བརྒྱད་སྦྱར་བས་ཚོགས་དྲུག་དུ་མི་འདུ་བའི་ཀུན་གཞི་དང་ཉོན་ཡིད་འདོད་མི་དགོས་ཏེ། གཟུགས་ཕུང་རྣམ་སྣང་དང་སྦྱར་ཞིང་། 
མིག་སོགས་ལྔ་ས་སྙིང་སོགས་དང་འབྱུང་བ་བཞི་སྤྱན་མ་སོགས་བཞི་དང་སྦྱར་བས་གཟུགས་ཕུང་དུ་མི་འདུ་བའི་འབྱུང་བཞི་དང་མིག་སོགས་ལྔ་འདོད་མི་དགོས་པ་བཞིན་ནོ། །ལུགས་འདི་གཞི་དུས་ཀྱི་འཆི་བའི་འོད་གསལ་ཉམས་སུ་མྱོང་བའི་ཤེས་པ་
དེ་ཉིད་ཀྱི་རིགས་ཀྱིས་ལམ་དུས་སུ་འོད་གསལ་མངོན་དུ་བྱེད་ལ། དེ་ནི་ཡིད་ཀྱི་ཤེས་པ་ཡིན་པའི་ཕྱིར། འཆི་སེམས་ནི་ཀུན་གཞི་མ་ཡིན་ནོ། །དེས་ན་ཀུན་གཞི་དང་ཉོན་ཡིད་ནི་མིང་ཙམ་གཞན་དང་འདྲའང་དོན་ནི་གཏན་མི་འདྲའོ། །རྣམ་གཞག་རིམ་པ་
ལས་བར་དོ་མངལ་དུ་ཞུགས་པའི་དུས་སུ་ཡེ་ཤེས་ཀྱི་ས་ཐོབ་པར་བཤད་པས་བར་དོས་འཆི་བའི་འོད་གསལ་ཉམས་སུ་མྱོང་བ་ནི་བར་དོ་ཤི་བ་ཡིན་ལ། དེའི་རིགས་འདྲ་གཉིས་པ་རྣམས་སྐྱེས་པ་ནི་ཉིང་མཚམས་སྦྱར་བ་ཡིན་ནོ། །དེ་རྣམས་ཀྱི་དོན་
6-4-10a


བསྡུ་ན་གང་དུ་སྐྱེ་བའི་སྐྱེ་གནས་ཀྱི་འཁོར་ལོ་ངོས་བཟུང་བ་དང་། དེར་བར་དོ་འཇོག་པའི་ཚུལ་དང་། ཞུགས་ནས་ཉིང་མཚམས་སྦྱར་བའི་ཤེས་པ་གང་ཡིན་ངོས་བཟུང་བ་དང་གསུམ་དུ་འགྱུར་རོ། །དང་པོར་ཉིང་མཚམས་སྦྱོར་བའི་ཚུལ་
བཤད་ཟིན་ཏོ། །གཉིས་པ་ལ་གཉིས། ལུས་འཆགས་པའི་རིམ་པ་དང་། ལུས་འཇིག་པའི་རིམ་པ་བཤད་པའོ། །དང་པོ་ལ་གཉིས། ལུས་འཆགས་པའི་རིམ་པ་དངོས་དང་། ཆགས་པའི་འོག་ཏུ་གནས་པའི་ཚུལ་ལོ། །དང་པོ་ལ་གཉིས། ཆགས་པའི་རིམ་
པ་སྤྱིར་བསྟན་པ་དང་། ཆགས་པའི་རིམ་པ་སོ་སོར་བསྟན་པའོ། །དང་པོ་ནི། རྒྱུད་རྡོར་ཕྲེང་ལས། དེ་ཚེ་རང་གི་གནས་སུ་ཐིམ། །ཞེས་པའི་རྗེས་སུ། །རྣམ་ཤེས་ལས་ནི་སྐྱེས་པའི་རླུང་། །དེ་ལ་མེ་ནི་སྐྱེ་བར་འགྱུར། །མེ་ལས་ཆུ་ནི་འབྱུང་བར་འགྱུར། །དེ་ལས་
ས་ནི་ཡང་དག་སྐྱེ། །དེ་དག་རྣམས་ལས་ཕུང་པོ་འབྱུང་། །དེ་ཕྱིར་སྐྱེ་མཆེད་རྣམས་དང་ནི། །དེ་ལས་རྣམ་ཤེས་རང་བཞིན་བྱེད། །བརྒྱ་དང་བརྒྱད་ཀྱིས་ལྷག་པའི་རིམ། །ཞེས་གསུངས་ལ། ཡེ་ཤེས་རྡོ་རྗེ་ཀུན་ལས་བཏུས་ལས་ཀྱང་། གང་འོད་གསལ་བ་
ལས་བྱུང་བའི་རྣལ་པར་ཤེས་པ་དེ་ཉིད་སེམས་དང་ཡིད་ཅེས་བྱ་སྟེ། དེ་ནི་ཀུན་ནས་ཉོན་མོངས་པ་དང་རྣམ་པར་བྱེད་བའི་བདག་ཉིད་ཅན་གྱི་ཆོས་ཐམས་ཅད་ཀྱི་རྩ་པ་ཡིན་ནོ། །དེ་ལས་བདག་དང་གཞན་དུ་རྟོག་པ་རྣམས་གཉིས་འབྱུང་བར་འགྱུར་རོ། །
རྣམ་པར་ཤེས་པ་དེ་རླུང་ལ་ཞོན་ཏེ། རླུང་ལས་མེའོ། །མེ་ལས་ཆུའོ། །ཆུ་ལས་སའོ། །དེ་རྣམས་ཕུང་པོ་ལྔ་དང་། སྐྱེ་མཆེད་དྲུག་དང་། ཡུལ་ལྔ་རྣམས་ཏེ་དེ་དག་ཐམས་ཅད་ནི་རླུང་དང་རྣམ་པར་ཤེས་པ་ཡང་དག་པར་འདྲེས་པའོ། །དེ་ནས་རྣམ་པར་ཤེས་
6-4-10b


པ་གསུམ་གྱི་རང་བཞིན་དང་སྣང་བ་རབ་ཏུ་སྤྱོད་པ་གསལ་བར་ཉམས་སུ་མྱོང་བར་འགྱུར་ཞིང་། སྣང་བའི་རྒྱུས་རང་བཞིན་རྣམས་འབྱུང་བར་འགྱུར་རོ། །ཞེས་གསུངས་སོ། །དེ་ལ་འོད་གསལ་ལས་རྣམ་ཤས་འབྱུང་བར་གསུངས་པ་འདི་བར་སྲིད་ཀྱི་སྔ་
རོལ་གྱི་ཤི་བའི་འོད་གསལ་ལས་བར་དོའི་རྣམ་ཤེས་འབྱུང་བ་དང་། བར་དོ་ཤི་བའི་འོད་གསལ་ལས་ཚེ་འདིའི་རྣམ་ཤེས་འབྱུང་བ་གང་ཡིན་སྙམ་ན། འདི་ལ་རྒྱ་གར་བ་ཁ་ཅིག་སྔ་མར་བཞེད་ཀྱང་ཕྱི་མར་བྱ་དགོས་ཏེ། བཤད་རྒྱུད་ལས། དེ་ཚོ་རང་
གི་གནས་སུ་ཐིམ། །ཞེས་པ་ནི་སྔར་བཤད་པ་ལྟར་བར་དོ་ཐིམ་པ་ཡིན་ལ། དེ་ལས་རྣམ་ཤེས་སོགས་སྐྱེ་བར་གསུངས་པའི་ཕྱིར་རོ། །བར་དོ་ཤི་བའི་འོད་གསལ་ལས་རྣམ་ཤེས་སྐྱེ་ཞེས་རགས་པར་གསུངས་ཀྱང་ཞིབ་ཏུ་བྱས་ན། དེ་ལས་ཉེར་ཐོབ། དེ་
ལས་སྣང་མཆེད། དེ་ལས་སྣང་བའི་རྣམ་ཤེས་གསུམ་རིམ་གྱིས་སྐྱེ་བར་བྱ་དགོས་ཏེ། དང་པོར་སྐྱེ་བའི་རིམ་པ་དེ་ལྟར་ཐིམ་པར་གསུངས་ལ། ཐིམ་རིམ་གྱི་སྐབས་སུ་རླུང་སེམས་དང་། དེ་སེམས་བྱུང་དང་། དེ་མ་རིག་པ་ལ་ཐིམ་པར་གསུངས་པའི་ཕྱིར་
རོ། །དེས་ན་སེམས་དང་ཡིད་དང་རྣམ་པར་ཤེས་པ་གསུམ་གསུངས་སོ། །སྣང་མཆེད་ཐོབ་གསུམ་ནི་ཀུན་བྱང་གི་ཆོས་ཐམས་ཅད་ཀྱི་རྩ་བར་གྱུར་བའི་སེམས་ཡིད་རྣམ་ཤེས་གསུམ་དུ་གསུངས་ལ། དེའང་ཡིད་ཤེས་ཡིན་པས་ཀུན་གཞི་མི་
བཞེད་པར་གསལ་ལོ། །རྣམ་ཤེས་ལས་རླུང་འབྱུང་བའི་དོན་ནི་རྣམ་ཤེས་དེ་རླུང་ལ་ཞོན་ཏེ་ཞེས་གསུངས་པ་ཡིན་ལ། སྣང་བ་གསུམ་ནམ་ཡོད་དུས་སུ་དེ་དང་འདྲེས་པའི་རླུང་རེའང་ངེས་པར་ཡོད་པས་དེ་ལས་གཞན་པའི་རླུང་ཞིག་གོ། །
6-4-11a


དེའང་ཨ་ལཾ་ཀས་རྩ་བའི་རླུང་ལྔ་ལ་བཤད་ཀྱང་། འཕོ་བ་དང་པོ་ལ་སྲོག་འཛིན་གྱི་རླུང་མིན་པ་གཞན་མ་སྐྱེས་པར་གསུངས་པས་མི་འཐད་དོ། །འོ་ན་གང་སྙམ་ན། རང་བཞིན་གཡོ་ནུས་པའི་རྣམ་ཤེས་ཀྱི་བཞོན་པ་ཞོག་གོ། །དེ་ལས་མེ་
ཞེས་སོགས་ཀྱིས་འབྱུང་བ་གསུམ་རྟིང་ནས་སྐྱེ་བར་བསྟན་པ་མི་འཐད་དེ། དང་པོ་མེར་མེར་པོའི་དུས་སུའང་སྲབ་དང་དྲོ་བ་དང་གཤེར་བ་དང་གཡོ་བའི་ཆ་བཞི་བར་སྲིད་ཞུགས་དུས་ནས་ཡོད་པས་སོ་སྙམ་ན། བདེན་མོད་འོན་ཀྱང་རྣམ་ཤེས་ཀྱི་རྟེན་བྱེད་པའི་
ནུས་པ་ཁྱད་པར་ཅན་གྱི་རླུང་མེ་ཆུ་སའི་སྐྱེ་རིམ་ཡིན་གྱི་འབྱུང་བཞི་ཙམ་མིན་པས་སྐྱོན་མེད་དོ། །ཐིམ་རིམ་གྱི་སྐབས་སུ་ས་ཆུ་ལ་ཐིམ་པ་སོགས་བཤད་པའི་གནད་ཀྱིས་ཤེས་ལ་ལུང་གཞན་ལས་ཀྱང་རྣམ་པར་ཤེས་པའི་རྐྱེན་གྱིས་མིང་དང་གཟུགས་
བསྐྱེད་པར་བཤད་ལ་མིང་གཟུགས་ནི་མདུང་ཁྱིམ་ལྟར་ཕན་ཚུན་གཅིག་གཅིག་གི་རྟེན་དུ་གསུངས་པས་སོ། །རྒྱུད་རྡོར་ཕྲེང་ལས་ཀྱང་། སྲ་བའི་ཁམས་དང་ཆུ་ཉིད་དང་། །དེ་བཞིན་མེ་དང་རླུང་དག་ནི། །རྣམ་པར་ཤེས་པས་བླངས་ནས་ནི། །སྲིད་གསུམ་
གནས་སུ་སྐྱེ་བར་འགྱུར། །ཞེས་གསུངས་ཏེ་རྣམ་ཤེས་ཀྱིས་བླངས་པའི་དོན་ནི་དེའི་རྟེན་དུ་བླངས་པའོ། །དེ་ལྟར་ན་རླུང་གི་སེམས་རྟེན་བྱེད་པའི་ནུས་པ་ཁྱད་པར་བ་ཐོབ་པ་ལས་ཆུས་སེམས་རྟེན་བྱེད་པའི་ནུས་པ་ཁྱད་པར་བ་འབྱུང་བ་སོགས་སུ་སྦྱར་
རོ། །དེ་ལྟར་འབྱུང་བ་བཞིའི་སེམས་རྟེན་བྱེད་པའི་ནུས་པ་ཁྱད་པར་ཅན་དུ་སྐྱེས་པ་དེ་ལས་ཕན་ཚུན་རྟེན་དང་བརྟེན་པར་གྱུར་བའི་ཕུང་པོ་ལྔའི་གནས་སྐབས་སུ་གྱུར་པ་ནི། དེ་རྣམས་ཞེས་མང་ཚིག་ཏུ་བསྟན་པ་ལས་ཕུང་པོ་ལྔ་འབྱུང་བའོ། །དེ་
6-4-11b


ཕྱིར་ཞེས་པ་འགྲེལ་པས་དེ་ལས་ཀྱི་དོན་དུ་བཤད་ལ། ཕྱག་ཆེན་ཐིག་ལེ་ལས་ཀྱང་ཡེ་ཤེས་རྡོ་རྗེ་ལྟར་དེ་ལས་ཞེས་འབྱུང་ངོ་། །དེ་ལས་ནང་གི་སྐྱེ་མཆེད་དྲུག་འབྱུང་བ་ནི་མིང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་འབྱུང་བར་གསུངས་པ་དང་འདྲའོ། །
ཡུལ་ལྔ་འབྱུང་པར་གསུངས་པ་ནི་སེམས་ཅན་དེའི་རྒྱུད་ཀྱིས་བསྡུས་པ་ལ་བྱའོ། །དེ་ཐམས་ཅད་རླུང་སེམས་འདྲེས་པར་གསུངས་བ་ནི། ཤེས་རྒྱུད་ཀྱིས་བསྡུས་པའི་ཕུང་སོགས་རྣམས་ཁ་ཅིག་རླུང་སེམས་འདྲེས་པ་དང་ཁ་ཅིག་རླུང་སེམས་འདྲེས་
པའི་རྣམ་འགྱུར་ཡིན་པ་ལ་དགོངས་སོ། །སྣང་བ་རླུང་གི་བཞོན་པས་གཡོས་པ་ལ་བརྟེན་ནས་རང་བཞིན་གྱི་རྟོག་པ་རྣམས་འབྱུང་ལ། བརྒྱ་རྩ་བརྒྱད་དུ་རྒྱུད་འདི་དང་ཕྱག་ཆེན་ཐིག་ལེ་གཉིས་ཀར་བཤད་ལ། དེའང་རྡོར་ཕྲེང་གི་ལེའུ་གསུམ་པར་
བཤད་པ་རྣམས་ཡིན་པས། མན་ངག་སྙེ་མར། དྲུག་ཅུ་ལྷག་པའི་བརྒྱ་རིམ་པས་ཞེས་བསྒྱུར་བ་ནི་རྒྱ་དཔེ་མ་དག་པའི་སྐྱོན་ནོ། །རིམ་པས་ཞེས་པ་མཚོན་པ་ཙམ་སྟེ། འགའ་ཞིག་གི་ཚེ་ཅིག་ཅར་དུའང་འབྱུང་ཞེས་འགྲེལ་པས་སོ། །ནང་གི་སྐྱེ་
མཆེད་དྲུག་གྲུབ་པ་ལས་རང་བཞིན་བརྒྱ་རྩ་བརྒྱད་ཀྱི་རྟོག་པ་སྐྱེ་ཚུལ་ནི། རྒྱུད་རྡོར་ཕྲེང་ལས། ཡུལ་དང་དབང་པོ་ཡང་དག་སྦྱོར། །རྩ་རྣམས་ཀྱང་ནི་འཆར་བར་འགྱུར། །ཤར་ནས་སྔོན་བཞིན་སོང་ནས་ནི། །སྐྱེ་བའི་རིམ་པ་བླ་ན་མེད། །ཀུན་རྟོག་
སྐྱེ་བ་དེ་ཡི་ཕྱིར། །བརྒྱ་དང་བརྒྱད་ཀྱིས་ལྷག་པའི་རིམ། །དེ་ལས་སྐྱེ་དང་རྒ་དང་ན། །འཆི་ཞིང་སླར་ཡང་ལྡོག་པར་འགྱུར། །ཞེས་བདག་རྐྱེན་དང་དམིགས་རྐྱེན་དང་འབྲེལ་ཞིང་ཡིད་བྱེད་དང་རླུང་དང་སྦྱོར་བ་ལས་རྩ་རྣམས་སད་དེ་ཀུན་རྟོག་སྐྱེ་ཞིང་།
6-4-12a


དེ་ལས་བྱུང་བའི་ལས་ཀྱིས་འཁོར་བར་སྐྱེ་རྒ་སོགས་བྱེད་ཅིང་སླར་ཡང་ལྡོག་པ་སྟེ་སྐྱེ་བ་གཞན་དུ་སྲིད་པ་འཛིན་པར་གསུངས་སོ། །རིམ་ལྔར་ཡང་། སེམས་ནི་རྣམ་པ་གསུམ་ཞེས་བཤད། །དེ་ཡི་སྒྲུབ་པ་བཤད་པར་བྱ། །རླུང་རྣམས་ཕྲ་བའི་གཟུགས་
ཀྱིས་ནི། །ཤེས་དང་ཡང་དག་འདྲེས་གྱུར་ནས། །དབང་བའི་ལམ་ནས་བྱུང་ནས་ནི། །ཡུལ་རྣམས་ལ་ནི་དམིགས་པར་འགྱུར། །གང་ཚེ་སྣང་བ་དང་ལྡན་པའི། །རླུང་གི་བཞོན་པ་ཉིད་གྱུར་པ། །དེ་ཚེ་རང་བཞིན་དེ་ཐམས་ཅད། །མ་ལུས་ལུས་པ་མེད་པར་འབྱུང་། །གང་དང་
གང་དུ་རླུང་གནས་པ། །དེ་དེ་རང་བཞིན་གསལ་བར་རྒྱུ། །ཞེས་གསུངས་སོ། །སེམས་གསུམ་པོ་དེའི་སྒོ་ནས་རང་བཞིན་སྒྲུབ་པ་སྟེ་བསྐྱེད་པ་བཤད་པར་བྱ་སྟེ། རླུང་རྣམས་ཞེས་སོགས་ཀྱིས་ནི་རླུང་དང་སེམས་གཉིས་འདྲེས་པ་དམིག་ལ་སོགས་པའི་དབང་པོའི་
སྒོར་བྱུང་ནས། །གཟུགས་སྒྲ་ལ་སོགས་པའི་ཡུལ་རྣམས་ལ་དམིགས་པ་བྱོད་དོ། །དེ་ཉིད་སྣང་བ་རླུང་གི་བཞོན་པས་བསྐྱོད་པའི་རང་བཞིན་འབྱུང་བའི་དོན་ཡིན་པས་གཡོ་བྱེད་ཀྱི་རླུང་གང་ན་ཡོད་པ་དེའི་རྗེས་སུ་རང་བཞིན་རྒྱུའོ། །དེས་ན་དབང་ཤེས་དང་རང་
བཞིན་གྱི་རྟོག་པ་གཉིས་འགལ་བར་འདོད་པ་མི་རིགས་སོ། །དེ་ཁོ་ན་ཉིད་གྲུབ་པ་ལས་ཀྱང་། འདི་ལྟར་ཉིན་གཅིག་གཡོ་བ་དང་ལྡན་པ་ལས། དབང་པོར་མངོན་པར་འགྲོ་བས་དབང་པོ་དང་དོན་ཕྲད་པར་འགྱུར་ལ། དབང་པོ་དང་དོན་ཕྲད་པས་དངོས་པོར་དམིགས་
པས། འདོད་པ་དང་མི་འདོད་པ་ལ་སོགས་པ་མངོན་པར་ཞེན་པ་ཤིན་ཏུ་མང་བའི་གདོན་གྱིས་ཟིན་པས། ཤིན་ཏུ་བརྒལ་དཀའ་བའི་འཁོར་བར་འཁོར་རོ། །ཞེས་གཡོ་བྱེད་ཀྱི་རླུང་དབང་པོའི་སྒོ་རྣམས་སུ་ཕྱིན་པ་ན་དབང་པོ་ཡུལ་ལ་ཕྱོགས་པར་འགྱུར་
6-4-12b


བས་དབང་པོ་དང་ཡུལ་ཕྲད་པར་འགྱུར་ལ། དེ་ནས་རླུང་དང་འདྲེས་པའི་ཤེས་པས་ཡུལ་རྣམས་ལ་ཞུགས་པ་ལས་རྣམ་རྟོག་རྣམས་སྐྱེ་བར་གསུངས་སོ། །དབང་ཤེས་ཡུལ་ལ་ཞུགས་པ་ལས་རང་བཞིན་གྱི་རྟོག་པ་སྐྱེ་བར་གསུངས་པ་ནི་རང་བཞིན་གྱི་རྟོག་པ་ཤིན་
ཏུ་རགས་པའི་དབང་དུ་བྱས་ཀྱི། རང་བཞིན་གྱི་རྟོག་པ་ཙམ་མ་ཡིན་ནོ། །སྤྱོད་བསྡུས་ལས། ཤེས་རབ་གྱི་ཡེ་ཤེས་ནི་ཟླ་བའི་སྣང་བ་ལྟ་བུ་སྟོང་པ་ཙམ་མོ། །ཐབས་ཀྱི་ཡེ་ཤེས་ཀྱང་ཉི་མའི་སྣང་བ་ལྟ་བུ་ཤིན་ཏུ་སྟོང་བ་ཙམ་མོ། །དེ་བཞིན་དུ་སྣང་བ་ཉེ་བར་ཐོབ་
པའི་ཡེ་ཤེས་ནི་མཚམས་ཀྱི་མུན་པ་ལྟ་བུ་སྟེ་སྟོང་པ་ཆེན་པོའི་མཚན་ཉིད་དོ། །རྣམ་པར་ཤེས་པ་གསུམ་པོ་དེ་དག་ནམ་མཁའི་མཚན་ཉིད་ཅན་རྣམ་པ་མེད་པའི་ངོ་བོ་ཁྱབ་པ། འགྲོ་བ་དང་འོང་བ་དང་བྲལ་བའོ་ཞེས་བཅོམ་ལྡན་འདས་ཀྱིས་གསུངས་ན། ཇི་ལྟར་ན་
ཉིན་དང་མཚན་དུ་རང་གི་ལུས་ལ་སྤྲོ་ཞིང་སྡུད་པར་བྱེད། གང་ཞིག་འདིར་མེལ་ཚེ་བྱེད། གང་སེམས་མེད་པར་བྱེད། འདོད་ཆགས་དང་འདོད་ཆགས་དང་བྲལ་བ་དང་འདོད་ཆགས་བར་མ་ལ་སོགས་པ་རང་བཞིན་བརྒྱ་དྲུག་ཅུ་གང་ལས་བྱུང་ནས་ཉམས་སུ་མྱོང་བར་
འགྱུར་བའི་རྒྱུ་འདིར་བཅོམ་ལྡན་འདས་རྡོ་རྗེ་བླ་མ་སྟོན་པས་བཤད་དུ་གསོལ། རྡོ་རྗེ་བླ་མས་སྨྲས་པ། རྣམ་པར་ཤེས་པ་གསུམ་པོ་འདི་ནི་རྩ་བ་མེད་པ་གནས་པ་མེད་པ་གཞི་མེད་པ་རྟགས་མེད་པ་ཁ་དོག་མེད་པ་དབྱིབས་མེད་པ། དབང་པོ་ལས་འདས་པ་ཡིན་པར་
ནི་བདེན་ཏེ། དེ་ལྟ་མོད་ཀྱི་སྣང་བ་དང་བཅས་པ་ཡིན་ལ། དེས་ན་རླུང་གི་ཁམས་དང་ལྷན་ཅིག་མེལ་ཚེ་བྱེད་དེ། གང་གི་ཕྱིར་རླུང་གི་ཁམས་ནི་གཟུགས་མེད་ཀྱང་གཡོ་ཞིང་བསྐྱོད་པ་ལ་སོགས་པའི་བྱ་བ་སྟོན་པས་རྗེས་སུ་དཔག་པ་ལས་ཤེས་པར་བྱའོ། །དེ་
6-4-13a


བཞིན་དུ་རྣམ་པར་ཤེས་པ་སྣང་བ་ཡང་གཟུགས་མེད་ལ་འདོད་ཆགས་དང་འདོང་ཆགས་དང་བྲལ་བ་དང་འདོད་ཆགས་བར་མ་ལ་སོགས་པའི་རང་བཞིན་རྣམས་ཀྱིས་རྗེས་སུ་དཔག་པར་བྱ་བ་ཡིན་བའི་ཕྱིར། རྗེས་སུ་དཔག་པས་རྟོགས་
པར་བྱའོ། །ཞེས་གསུངས་པ་འདིས་རང་བཞིན་དང་སྣང་བ་གསུམ་གྱི་མཚན་ཉིད་ཤེས་པར་བྱའོ། །དེ་ལ་སྣང་བ་དང་པོ་གཉིས་ལ་ཙམ་སྦྱར་བ་ནི་དེའི་དུས་ན་རང་བཞིན་ཡོད་པ་གཅོད་པ་སྟེ་གསུམ་པ་ལའང་དེ་བཞིན་དུ་ཞེས་གསུངས་པས་སྔ་མ་དང་འདྲའོ། །ནམ་
མཁའི་མཚན་ཉིད་ཅན་ནི་ནམ་མཁའ་ལ་ཟླ་བ་དང་ཉི་མའི་འོད་དང་མཚམས་ཀྱི་སྨག་གིས་ཁྱབ་པ་ལྟ་བུར་སྣང་བའོ། །རྣམ་པ་མེད་པ་ནི་དེ་དག་ལས་གཞན་པའི་ཡུལ་གྱི་རྣམ་པ་མི་སྣང་བའོ། །ཁྱབ་པ་ནི་ཕྱོགས་ཀུན་ཏུ་ཁྱབ་པར་སྣང་བའོ། །འགྲོ་འོང་དང་བྲལ་བ་
ནི་རྣམ་རྟོག་རགས་པའི་རྒྱུ་འགྲུལ་མེད་པའོ། །དེ་ལྟར་སྟོན་པས་གསུང་པ་ནི་གཞི་དུས་ཀྱི་སྣང་བ་ལའང་བྱའི་ཡེ་ཤེས་ཞེས་གསུངས་པས་མངོན་པར་རྟོགས་པའི་སྣང་བ་གསུམ་ཁོ་ན་ལ་མི་བཟུང་སྟེ། གཞིའི་སྐབས་སུའང་དེ་ལྟར་མང་དུ་གསུངས་
པའི་ཕྱིར་ཏེ་འོད་གསལ་བཞིན་ནོ། །དེ་ལྟར་སྣང་བ་གསུམ་གྱི་རང་བཞིན་གྱི་རྟོག་པ་རྣམས་ཡུལ་ལ་ཕར་སྤྲོ་བ་དང་ཚུར་ལ་སྡུད་པ་མི་འཐད་པས་སེམས་གཞི་གཅིག་ཏུ་མི་གནས་པར་སྤྲོ་བ་དང་སྡུད་པའི་མེལ་ཚེ་གང་གིས་བྱེད་ཅེས་པ་ནི་བྱེད་པ་པོ་ལ་
དྲིས་པའོ། །གང་སེམས་པ་མེད་པར་བྱེད་ཅེས་པ་ནི་ལས་སུ་བྱ་བ་ལ་དྲིས་པ་སྟེ་གང་ཞིག་སེམས་པ་མེད་པར་བྱེད་པའི་བྱ་རྒྱུ་དེའང་མེད་དེ་རང་བཞིན་རྣམས་ཀྱིས་ནི་དེ་བྱེད་མི་ནུས་ལ་སྣང་བ་གསུམ་གྱི་སྐབས་སུ་བྱ་བྱེད་མེད་པའི་ཕྱིར་རོ་སྙམ་པའོ། །
6-4-13b


དེ་ལྟར་རང་བཞིན་གྱི་རྟོག་པ་རྣམས་ཀྱི་སྤྲོ་བསྡུ་བྱེད་པ་པོ་མེད་ན་རྟོག་པ་དེ་རྣམས་གང་ལས་བྱུང་ནས་ཉམས་སུ་མྱོང་བའི་རྒྱུ་མེད་པར་འགྱུར་སྙམ་པ་ནི་དྲི་བ་པོའི་བསམ་པའོ། །དྲི་བ་དང་པོ་གཉིས་ཀྱི་ལན་དུ་རྩ་བ་མེད་པས་གསུངས་པ་ནི་སྔར་གྱི་དྲི་བའི་དོན་དུ་བྱ་སྟེ་དེ་
ལྟ་མིན་པར་བྱས་ན་སྣང་བ་གསུམ་དུ་མ་ཟད་རང་བཞིན་གྱི་རྟོག་པ་རྣམས་ལའང་དོགས་པ་དེ་ལྟར་སྐྱེ་བར་འགྱུར་ཏེ། ཁ་དོག་དང་དབྱིབས་མེད་པ་དང་དབང་པོ་གཟུགས་ཅན་པའི་ཡུལ་ལས་འདས་པ་སོགས་དེའང་ཡོད་པའི་ཕྱིར་རོ། །དེས་ན་དེ་ལྟ་མོད་ཀྱི་ཞེས་པ་ནི་
སྟོན་པས་གསུངས་ན་ཞེས་པ་དེ་ལྟར་ཡིན་ནའང་སེམས་གསུམ་གཉིས་སྣང་གི་སྣང་བ་དང་བཅས་པ་ཡིན་པས་རླུང་གི་ཁམས་ཡོད་ལ། དེའི་དབང་གི་རྣམ་རྟོག་སྤྲོ་བསྡུའི་མེལ་ཚེ་བྱེད་པ་མི་འགལ་ལོ། །འོ་ན་ཉེར་ཐོབ་དང་མཆེད་པས་རང་རང་གི་འོག་མའི་སྣང་བ་མ་
བསྐྱེད་པར་རྣམ་རྟོག་བདུན་དང་བཞི་བཅུ་སྐྱེད་དམ་ཡེ་ཤེས་འོག་མ་བསྐྱེད་ནས་བསྐྱེད། །དང་པོ་ལྟར་ན་ཡེ་ཤེས་གསུམ་གྱི་གོ་རིམ་མ་ངེས་པས་འོད་གསལ་ལས་སྣང་བ་གཞན་གཉིས་ཀྱང་ཐོག་མར་སྐྱེ་བ་དང་། དང་པོ་ཉེར་ཐོབ་བསྐྱེད་པའི་འོག་ཏུ་སྣང་བ་སོགས་
སྐྱེ་བར་ཡང་འགྱུར་རོ། །གཉིས་པ་ལྟར་ན་སྣང་བ་གསུམ་ལ་འབྲས་བུ་རྟོག་པ་བདུན་དང་། བཞི་བཅུ་དང་། སོ་གསུམ་སོ་སོར་བཞག་པ་མི་འཐད་དེ། སྣང་བ་ཐ་མ་གཉིས་ཀྱི་དངོས་ཀྱི་འབྲས་བུ་ལ་རྟོག་པ་དེ་དག་གང་ཡང་མེད་ལ་བརྒྱུད་པའི་འབྲས་བུར་དེ་ཐམས་ཅད་
འོང་བའི་ཕྱིར་རོ། །གཞན་ཡང་རྟོག་པ་ཚན་པ་གསུམ་པོ་དེ་དག་སྣང་བ་གསུམ་གྱི་རང་བཞིན་དུ་གསུངས་པས་འབྲས་བུར་ཡང་འགལ་ལོ། །ཡེ་ཤེས་གསུམ་རེ་རེ་སྐྱེས་པའི་མཐར་རྟོག་པ་ཚན་པ་རེ་རེ་འགག་པའང་མི་འཐད་དོ་སྙམ་ན། ཡེ་ཤེས་གསུམ་ལ་ངོ་
6-4-14a


བོ་ཉིད་གསུམ་དང་སེམས་ཡིད་རྣམ་ཤེས་གསུམ་ལ་སོགས་པའི་མིང་གིས་བཏགས་པ་ནི། སྒྲ་དེ་དག་འཇུག་ཏུ་པའི་རྒྱུ་མཚན་རེ་ཡོད་པ་ལ་དགོངས་ཀྱི་དེ་ཐམས་ཅད་ཡེ་ཤེས་གསུམ་དུ་སྟོན་པ་ནི་མིན་ནོ ། དེས་ན་ཡེ་ཤེས་གསུམ་དང་
སྣང་མཆེད་ཐོབ་གསུམ་ཞེས་པ་ནི་སྔར་བསྟན་པ་ལྟར་གྱི་མཚན་ཉིད་དང་ལྡན་པར་གཞི་དུས་སུའང་འབྱུང་བས། དེ་དག་གི་རང་དུས་ན་རང་བཞིན་བརྒྱད་ཅུའི་རྟོག་པ་མེད་ཅིང་། གོ་རིམ་ཀྱང་བཤད་པའི་རིམ་པ་བཞིན་དུ་སྐྱེ་བས་བར་བར་དུ་རྟོག་པ་བདུན་ལ་སོགས་
པ་མི་སྐྱེའོ། །དེ་ལྟ་ནའང་རྟོག་པ་ཚན་པ་གསུམ་དུ་བྱས་ནས་སྣང་བ་གསུམ་སོ་སོའི་འབྲས་བུར་བཤད་པ་མི་འགལ་ཏེ། རྟོག་པ་ཚན་པ་གསུམ་དུ་བཅད་པ་ནི་ཡུལ་དང་འཛིན་སྟངས་མི་འདྲ་བའི་སྒོ་ནས་མིན་གྱི། རླུང་གི་མཐུས་ཀུན་རྟོག་ཡུལ་ལ་གཡོ་བའི་བྱ་བ་ཤས་
ཆེ་ཆུང་འབྲིང་གསུམ་གྱི་སྒོ་ནས་ཡིན་ལ། དེའང་སྣང་བ་གསུམ་གྱི་དབང་གིས་འབྱུང་བའི་ཕྱིར་རོ། །འདི་ལྟར་འོད་གསལ་གྱི་ཐོག་མར་རླུང་གིས་མི་བསྐྱོད་པ་ཡིན་ནོ། །དེའི་མཐར་རླུང་གིས་ཅུང་ཟད་གཡོས་པས་ཉེར་ཐོབ་བྱུང་ལ། དེ་རླུང་གིས་ཆེར་གཡོས་པས་
མཆེད་པ་དང་། དེ་ཆེས་ཆེར་གཡོས་པས་སྣང་བ་འབྱུང་ཞིང་། དེའི་མཐར་རང་བཞིན་གྱི་རྟོག་པ་སྐྱེ་བ་ན་སོ་གསུམ་པོ་གང་རུང་ཞིག་བྱུང་ན་སྣང་བའི་ལག་རྗེས་དང་། བཞི་བཅུ་གང་རུང་ཞིག་བྱུང་ན་མཆེད་པའི་ལག་རྗེས་དང་། བདུན་པོ་གང་རུང་ཞིག་བྱུང་ན་ཉེར་ཐོབ་
ཀྱི་ལག་རྗེས་ཡིན་ནོ། །རང་བཞིན་གྱི་རྟོག་པ་རྣམ་སྣང་བ་རྣམས་ཀྱི་འབྲས་བུར་གསུངས་ཤིང་། སྤྱོད་བསྡུས་སུ་སྣང་བ་གསུམ་གྱི་མཚན་ཉིད་ལ་རང་བཞིན་དུ་བཤད་དེ། །དེའི་དོན་ནི་སྣང་བ་གསུམ་མཚོན་པར་བྱེད་པ་ལ་བྱའོ། །མཚོན་ཚུལ་ནི་
6-4-14b


རང་བཞིན་གྱི་སྒོ་ནས་སྣང་བ་གསུམ་རྗེས་སུ་དཔག་པར་བྱ་བར་གསུངས་པ་ཡིན་ལ། དཔོག་ལུགས་ནི་རང་བཞིན་རྟོག་པ་ལ་ཡུལ་ལ་གཡོ་བ་ཆུང་འབྲིང་ཆེ་གསུམ་འདུག་པའི་རྟགས་ཀྱིས་དེའི་རྒྱུ་སྣང་བ་ལའང་རླུང་གིས་གཡོ་བ་ཆུང་འབྲིང་ཆེ་གསུམ་ཡོད་པར་དཔོག་
པའོ། །སྣང་བའམ་སྟོང་པ་གསུམ་ནི་གཉིད་དང་བརྒྱལ་བ་དང་འཁྲིག་དུས་དང་ཆི་བའི་དུས་དང་ཏིང་ངེ་འཛིན་མཐུ་ལྡན་གྱིས་སྤྲོས་པ་ཐིམ་པར་བྱས་པའི་སྐབས་མ་གཏོགས་པ་རྣམས་སུ་མངོན་དུ་མི་འགྱུར་ལ། སྔ་མ་བཞིའི་སྐབས་སུའང་སྐད་ཅིག་ཙམ་རེ་མྱོང་
བར་གསུངས་པས་ཕལ་མོ་ཆེས་ངེས་པར་མི་ནུས་སོ། །དེའི་ཕྱིར་རྗེས་སུ་དཔག་པར་བྱ་བར་གསུངས་པས་དེ་ལྟར་གྱི་ཤེས་པ་ཐམས་ཅད་ལ་སྣང་མཆེད་ཐོབ་གསུམ་བརྩི་བ་ནི་མི་རིགས་སོ། །རང་བཞིན་གྱི་རྟོག་པ་ལ་དགེ་མི་དགེ་ལུང་མ་བསྟན་གསུམ་ག་ཡོད་
ལ་སྒྲ་རྟོག་མེད་པའང་མང་བ་དང་། །རང་བཞིན་གྱི་རྟོག་པ་རླུང་གིས་གཡོས་ནས་ཚུར་ལ་མ་ཐིམ་པའི་བར་དུ་རླུང་གིས་ཡུལ་ལ་ཧ་ཅང་གཡོ་བའི་བློ་ཐམས་ཅད་རང་བཞིན་གྱི་རྟོག་པ་ཡིན་པས། ད་ལྟའི་དབང་ཤེས་རྣམས་ཀྱང་རང་བཞིན་གྱི་རྟོགས་པར་བྱའོ། །མདོར་
ན་རླུང་གིས་རང་བཞིན་གྱི་རྟོག་པ་དངོས་སུ་གཡོས་མ་གཡོས་གཉིས་སུ་ངེས་ལ། མ་གཡོ་ཚུན་ཆད་ནི་སྟོང་པ་བཞིའི་སྐབས་ཡིན་ལ། གཡོས་ནས་ནི་རང་བཞིན་གྱི་སྐབས་སོ། །དེ་ལྟར་ན་རང་བཞིན་གྱི་རྟོག་པ་རྣམས་སེམས་གསུམ་དང་རོ་གཅིག་ཏུ་སྐྱེ་བར་འདོད་
པ་དང་། སེམས་གསུམ་གྱི་འཁོར་དུ་སྐྱེ་བར་འདོད་པ་ནི་འཐད་པ་མ་ཡིན་ནོ། །གང་སེམས་པ་མེད་པར་བྱེད་ཅེས་པའི་དྲི་བ་གཉིས་པའི་ལན་དུ། མ་རིག་པའོ་ཞེས་གསུངས་ཏེ། མ་རིག་པ་ནི་དྲན་པ་བརྗེད་པའི་ངོ་བོར་གསུངས་པ་སེམས་པ་མེད་པར་བྱེད་པ་
6-4-15a


སྟེ་བྱས་པ་ནི་དེའོ། །དེའང་རང་བཞིན་སྣང་བ་ལ་ཐིམ་པའི་དབང་གིས་འབྱུང་ངོ་། །དེ་ལྟར་ན་སྔ་མ་རྣམས་ཀྱིས་སྤྲོ་བར་བྱེད་ཚུལ་དང་འདིས་སྡུད་པར་བྱེད་པའི་ཚེ་སེམས་པ་མེད་པར་སོང་བ་དེ་གང་ཡིན་པ་བསྟན་ནོ། །དོན་བསྡུན། རང་བཞིན་རྣམས་
གང་ལས་བྱུང་བ་དང་གང་དུ་ཐིམ་པ་གཉིས་ཀ་སྣང་བ་རྣམས་ཡིན་པར་བསྟན་ནོ། །ལུས་འཆགས་པའི་རིམ་པ་སྤྱིར་བསྟན་པ་བཤད་ཟིན་ཏོ། །གཉིས་པ་ལ་གསུམ། གཙོ་བོར་རླུང་གིས་རིམ་གྱིས་བསྐྱེད་ཚུལ་དང་། རྩ་འཆགས་པའི་རིམ་པ་དང་། བྱང་ཆུབ་ཀྱི་
སེམས་འཆགས་པའི་རིམ་པའོ། །དང་པོ་ནི། དེ་ལྟར་མངལ་དུ་ཉིད་མཚམས་སྦྱར་ནས་འཕོ་བའི་ཟླ་བ་དང་པོ་ལ་ཁུ་ཁྲག་གི་འབྱུང་བ་བཞི་རིམ་གྱིས་སྨིན་པས་དབྱིབས་ཉའི་རྣམ་པ་ལྟ་བུར་འགྱུར་ལ། དེའི་ཚེ་སྲོག་འཛིན་གྱི་རླུང་ཆགས་པ་ཡིན་ཏེ། རྒྱུད་རྡོར་ཕྲེང་
ལས། ཉོན་མོངས་ཅན་ཡིད་སྲོག་རླུང་ཉིད། །རྟག་ཏུ་ཡང་དག་འགྲོ་བར་འགྱུར། །ཐོག་མར་འཕོ་བའི་དུས་སུ་ནི། །ཉ་ཡི་རྣམ་པ་ལྟ་བུར་འགྱུར། །ཞེས་སོ། །ཡང་རྒྱུད་དེ་ཉིད་ལས། སྲོག་གི་རླུང་ནི་སྙིང་གར་གནས། །ཞེས་གསུངས་པས་སྲོག་འཛིན་དང་པོ་ཆགས་
པའི་གནས་ནི་སྙིང་ག་ཡིན་ལ། རྩ་དང་པོ་ཆགས་པའི་གནས་ཀྱང་སྙིང་ག་ཡིན་པར་འཆད་པར་འགྱུར་རོ། །དེ་ལྟ་ན་སའི་དངོས་གཞིར་དང་པོ་ཁུ་ཁྲག་གི་དབུས་སུ་རྣམ་ཤེས་ཞུགས་པ་དེ་སྙིང་ག་དང་དེ་ནས་ལུས་ཡིས་མས་སུ་འཆགས་པར་གསུངས་པས་
རྩ་རླུང་ཐིག་ལེ་གསུམ་ག་ཐོག་མར་སྙིང་གནས་འཆགས་པ་ཡིན་ནོ། དེ་ནས་འཕོ་བ་གཉིས་ཀ་ལ་སྙིང་གའི་སྟེང་དང་འོག་གི་དབྱེ་བས་སྲོག་རླུང་དེ་གཉིས་སུ་གྱུར་ནས་གཅིག་སྟེང་དུ་འགྲོ་གཉིས་པ་ལས་ཐུར་སེལ་སྐྱེས་ཏེ་འོག་ཏུ་འགྲོ་ལ། ཉའི་
6-4-15b


རྣམ་པ་དེ་སླར་ཡང་མའི་རང་བྱུང་གི་ཁྲག་དང་ཐུར་སེལ་དང་འདྲེས་ཏེ་སྨིན་པ་ལས་རུས་སྦལ་གྱི་རྣམ་པར་འགྱུར་ཏུ། དེ་ཉིད་ལས། འཕོ་བ་གཉིས་པའི་དུས་སུ་ནི། །སླར་ཡང་ཁྲག་དང་འདྲེས་ནས་ནི། །སྟེང་དང་འོག་གི་དབྱེ་བ་ཡིས། །རླུང་གིས་སྲོག་རླུང་གཉིས་སུ་འགྲོ། །ཐུར་
སེལ་རླུང་དང་འདྲེས་པ་ཡིས། །རུས་སྤལ་རྣམ་པ་འཛིན་པར་འགྱུར། །ཞེས་སོ། །དེའི་གནས་ཀྱང་དེ་ཉིད་ལས། འདོམས་ན་གནས་པའི་ཐུར་སེལ་ནི། །ཞེས་གསུངས་ལ། འོན་ཀྱང་སྟེང་འོག་གི་གསང་གནས་ནས་བཟུང་སྟེ་བཤད་སྒོ་བར་དུ་གནས་པར་དེ་ཉིད་ལས་
བཤད་དོ། །དེ་ལྟར་ཁུ་ཁྲག་གི་གཟུགས་ཅན་དེ་རིམ་གྱིས་འཕེལ་བས་འཕོ་བ་གསུམ་པ་ལ་ཐུར་སེལ་གྱིས་རུས་སྤལ་གྱི་སྐབས་དེ་བསྐམས་པར་བྱས་ནས། མཉམ་གནས་ཀྱི་རླུང་བསྐྱེད་དེ་སྟེང་དུ་ཁ་བལྟས་པའི་ཕག་རྒོད་ཀྱི་ལུས་འདྲ་བར་འགྱུར་ཏེ། དེ་ཉིད་ལས། དེ་ནས་
འཕོ་བ་གསུམ་པ་ལ། །ཁྲག་དང་ཁུ་བའི་གཟུགས་སུ་ནི། །ཐུར་སེལ་བ་ཡི་རླུང་གི་ཚོགས། །བསྐམས་ནས་མཉམ་པའི་རླུང་ནི་འབྱུང་། །སྟེང་དུ་ཁ་བལྟས་ནས་ནི་གནས། །ཕག་རྒོད་འདྲ་བའི་ལུས་འཆང་འགྱུར། །ཞེས་སོ། །དེའི་གནས་ཀྱང་། དེ་ཉིད་ལས། མཉམ་
གནས་ལྟེ་བའི་པདྨར་གནས། །ཞེས་སོ། །དེ་ནས་ཁུ་ཁྲག་གིས་བསྒོས་པའི་ཕུང་པོ་མཉམ་གནས་ཀྱི་རླུང་གིས་བཀུག་པ་སྟེ་སྨིན་པར་བྱས་ནས། འཕོ་བ་བཞི་པ་ལ། གདོང་སྟེང་དུ་བལྟས་པ་དོར་ནས་འོག་ཏུ་ཁ་བལྟས་ནས་མིའི་སེང་གའི་རྣམ་པ་ཅིན་དུ་འགྱུར་རོ། །
མཉམ་གནས་ཀྱིས་སྨིན་པར་བྱས་པ་ལས་ནི་གྱེན་རྒྱུའི་རླུང་བསྐྱེད་དེ། སླར་ཡང་འཕོ་བ་བཞི་པ་ལ། །ཁྲག་དང་ཁུ་བ་བསྒྲོས་པ་ནི། །མཉམ་རྒྱུ་བ་ཡི་རླུང་བཀུག་ནས། །འོག་ཏུ་ཁ་བལྟས་ནས་ནི་འགྲོ། །སེང་གེའི་རྣམ་པ་ཡིས་ཀྱང་ནི། །གྱེན་རྒྱུའི་རླུང་ནི་སྤྲོ་བར་བྱེད།
6-4-16a


ཅེས་གསུངས་ལ། དེའི་གནས་ཀྱང་། སྟོད་དུ་རྒྱུ་བ་ལྐོག་མར་གནས། །ཞེས་སོ། །དེ་ནས་ཁུ་ཁྲག་གི་འབྱུང་བ་རྣམས་འཕེལ་ཞིང་གྱེན་རྒྱུའི་རླུང་གིས་དབང་དུ་བྱས་བས་འཕོ་བ་ལྔ་པ་ལ། མིང་གཟུགས་ཅན་མ་ཡིན་པའི་ཕུང་པོ་བཞི་དང་གཟུགས་
ཀྱི་ཕུང་པོའི་ངོ་བོ་ཉིད་རིམ་གྱིས་རྒྱས་ཏེ་འགྲོ་བའམ། ཡང་ན་མིའི་ཐུང་གི་རྣམ་པ་ཅན་དུ་འགྱུར་བ་དང་། གྱེན་རྒྱུས་ཁྱབ་བྱེད་ཀྱི་རླུང་བསྐྱེད་དོ། །དེའི་ལས་ནི། ལུས་འགུལ་བ་དང་གཡོ་བར་བྱེད་དེ། དེ་ནས་འཕོ་བ་ལྔ་པ་ལ། །ཁྲག་དང་ཁུ་བ་འཕེལ་ནས་ནི། །གྱེན་
རྒྱུའི་རླུང་གིས་བཀུག་ནས་ནི། །མིང་ནི་གཟུགས་ངེར་རིམ་བཞིན་འགྲོ ། གྱེན་རྒྱུའི་རླུང་གིས་ཁྱབ་བྱེད་སྤྲོ། །གང་གིས་འགུལ་དང་གཡོ་བར་བྱེད། །ཅེས་གསུངས་ལ། མིའི་ཐུང་གི་རྣམ་པས་འགྲོ། །ཞེས་ཀྱང་འབྱུང་ཞེས་འགྲེལ་པས་སོ། །ཐུར་སེལ་ལ་ནི་
རྒྱགས་པ་བསྐྱེད་པའི་རླུང་ཆེན་པོ་ཞེས་པ་དང་རྒྱགས་པ་མྱོས་པའི་རླུང་ཞེས་ཀྱང་གསུངས་ཏེ། ཤ་དང་ཁྲག་འཕེལ་བར་བྱེད་དོ། །མཉམ་གནས་ལ་ནི་རྒྱགས་པའི་ཆུའི་རླུང་དང་། མྱོས་པའི་ཆུའི་རླུང་ཞེས་ཀྱང་ཟེར་ཏེ་ཁུ་བ་དང་ཚིལ་འཕེལ་བར་བྱེད་དོ། །
གྱེན་རྒྱུ་ལ་ནི་སྟོད་དུ་རྒྱུ་བ་དང་རྒྱགས་པའི་ཆ་དང་མྱོས་པའི་རུས་ཞེས་ཀྱང་ཟེར་ཏེ། མེ་དང་རླུང་འཕེལ་བར་བྱེད་དོ། །སྲོག་འཛིན་ལ་ནི་བཏང་བཟུང་ཞེས་ཀྱང་གསུངས་སོ། །ཇི་སྐད་དུ། ཉ་དང་རུས་སྦལ་ཕག་པ་དང་། །མི་ཡི་སང་གེ་མིའུ་ཐུང་དང་། །རཱ་མ་གཉིས་
དང་ནག་པ་དང་། །སངས་རྒྱས་ཀ་མ་ཀི་ཞེས་པ་བཅུ། །ཞེས་ཁྱབ་འཇུག་གི་འཇུག་པ་བཅུ་གཞན་དག་འདོད་པ་དེ་དང་མཐུན་པར་མངལ་གྱི་གནས་སྐབས་ལྔ་ལ་སྦྱར་ནས་ལྟག་མ་མ་སྦྱར་རོ། །དུས་འཁོར་ལས་ནི་འཇུག་པ་བཅུ་ཀ་དང་སྦྱར་རོ། །དེ་ལྟར་ཕུང་པོ་
6-4-16b


ལྔའི་རླུང་ཆགས་པའི་འོག་ཏུ་འཕོ་བ་དྲུག་པ་ནས་བཅུ་པའི་བར་རེ་རེ་ལ་ས་ལ་སོགས་པའི་ཁམས་ལྔ་བོ་རེ་རེ་དང་། མིག་ནས་ལུས་དབང་གི་བར་ལྔ་པོ་རེ་རེ་དང་། ཁྱབ་བྱེད་ནས་བརྩམས་ཏེ་གཞུ་ལས་རྒྱལ་གྱི་རླུང་སྔ་མ་ལས་ཕྱི་མ་སྐྱེ་ཚུལ་ཡང་རྒྱུད་དེ་ཉིད་ལས། 
ཕུང་པོ་ལྔ་ནི་རྫོགས་པ་ན། །དེ་ལྟར་གསུངས་པ་དེ་ལས་སླར། །འཕོ་བ་དྲུག་པའི་དུས་ཚོད་ལ། །ས་ཡི་ཁམས་དང་མིག་གཉིས་དང་། །ཁྱབ་བྱེད་རླུང་གིས་ཀླུ་རླུང་སྤྲོ། །རླུང་གིས་དངོས་པོ་འཕེལ་བར་བྱ། །དེ་ནས་འཕོ་བ་བདུན་པ་ལ། །ཆུ་ཡི་ཁམས་དང་སྣ་བུག་དོད། །
ཀླུ་ཡི་རླུང་གིས་རུས་སྦལ་རླུང་། །སྤྲོས་ནས་གཉིས་སུ་མེད་པར་སྤྱོད། །དེ་ནས་འཕོ་བ་བརྒྱད་པ་ལ། མེ་དང་སྣ་ཡི་བུ་ག་འབྱེད། །རུས་སྦལ་རླུང་གིས་རྩངས་རླུང་སྤྲོ། །རང་གི་རང་བཞིན་ཤེས་པར་བྱེད། །དེ་ནས་འཕོ་བ་དགུ་པ་ལ། །རླུང་གི་ཁམས་དང་རོ་ནི་ཚོར། །ཀོ་ཀེ་ལ་
ཞེས་བྱའི་རླུང་ཆེན་པོས། །ལྟ་སྤྱིན་རླུང་ནི་སྤྲོ་བར་བྱེད། །དེ་རྗེས་འཕོ་བ་བཅུ་པ་ལ། །ལྟ་སྤྱིན་རླུང་གིས་གཞུ་རྒྱལ་སྤྲོ། །རླུང་ཀུན་སྡུད་པའི་མཚན་ཉིད་ཅན། །དགུ་ཡི་དབུས་ནས་ཁྱབ་པའི་ཁམས། །ཕྲ་ཞིང་ཐོགས་མེད་མཚན་ཉིད་ཅན། །རྩ་དང་རྒྱུ་མ་རྒྱུས་པའི་
སྦུབས། །སྒོ་ནི་དགུ་པོ་རྒྱས་པར་བྱེད། །ལུས་ཀྱི་མཆོག་ཏུ་ཚོར་བ་དང་། །གཅིག་བུ་རེག་བྱའི་མཚན་ཉིད་འཛིན། །རབ་སད་མཆོག་གི་ནམ་མཁའ་ལ། །འོད་གསལ་བཟང་པོ་ཡང་དག་གནས། །ཞེས་གསུངས་སོ། །སའི་ཁམས་ཞེས་པ་ནི་དེས་མིག་གཉིས་བསྐྱེད་ཅིང་དེས་
ཀྱང་གཟུགས་མཐོང་བ་ཡིན་ཏེ། རླུང་གི་ཁམས་ཀྱི་བར་ལའང་དེ་བཞིན་དུ་སྦྱར་རོ། །དངོས་པོ་ནི་གཟུགས་ལ་སོགས་པའོ། །འཕེལ་བར་བྱེད་པ་ནི་ཡུལ་ལ་དམིགས་པའི་ཤེས་པ་རྒྱས་པར་བྱེད་པའོ། །ཀླུའི་རླུང་ལ་གྱེན་རྒྱུའི་རླུང་ཞེས་འགྲེལ་པས་འཆད་དེ་ཐ་སྙད་
6-4-17a


མི་ལེགས་སོ། །གཉིས་སུ་མེད་པར་བསྐྱེད་པ་ནི་རླུང་དང་ཤེས་པ་གཉིས་འདྲེས་ནས་བསྐྱེད་པའོ། །རང་གིས་ནི་རྩངས་རླུང་ངོ་། །རང་བཞིན་ནི་དྲིའོ། །རླུང་དེ་ལ་མཉམ་གནས་ཞེས་ཟེར་བའང་མི་ལེགས་སོ། །ཀོ་ཀེ་ལ་ནི་རྩངས་པའི་རླུང་ངོ་། །གཞུ་རྒྱལ་ལ་ནི་ནོར་
ལས་རྒྱལ་ཞེས་ཀྱང་གསུངས་སོ། །དགུ་ནི་རྩ་བའི་རླུང་ལྔ་དང་ཡན་ལག་གི་རླུང་བཞིའོ། །དེ་རྣམས་ཀྱི་དབུས་སུ་སོན་པས་དབུས་ན་གནས་པའོ། །ཕྲ་བ་ནི་སོ་སྐྱེའི་ཡུལ་མིན་པ་ལ་འགྲེལ་བས་འཆད་དོ། །རྩ་དང་ཞེས་པ་གཉིས་ཀྱིས་ནི་དེས་བུ་ག་ནམ་མཁའི་ཁམས་སྒྲུབ་པར་
བྱེད་པར་བསྟན་ནོ། །ལུས་ཀྱི་སྒོ་ནི་ཚོར་བ་ཞེས་པ་ནི་ལུས་དབང་སད་པར་བྱེད་པའོ། །གཅིག་ཏུ་རེག་པའི་མཚན་ཉིད་འཛིན། །ཞེས་འགྲེལ་པ་ལས་འབྱུང་ངོ་། །རབ་སད་ནི་རླུང་ལྔ་པོ་རྣམས་དབང་པོའི་ལམ་ནས་འབྱུང་བའོ། འོད་གསལ་བཟང་པོ་ནི་འོད་ཟེར་ཤིན་ཏུ་
གསལ་བའི་རླུང་ངོ་། །མཆོག་གི་ནམ་མཁའ་ལ་གནས་པ་ནི་དོན་དམ་པར་སྟོང་པ་ཉིད་ཀྱིས་གནས་པ་ལ་འཆད་ཀྱང་རྩ་བའི་ཁོང་སྟོང་གི་ནམ་མཁའ་ལ་གནས་པའོ། །ཀླུ་དང་ཞེས་པ་ལྔ་ནི་རྒྱུ་བ་ནས་ངེས་པར་རྒྱུ་བའི་བར་ལྔའི་མིང་ངོ་། །གཞུང་གཞན་ནས་ལུས་དབང་
ཆགས་པའི་འོག་ཏུ་མིག་སོགས་བཞི་ཆགས་པར་བཤད་ལ། རྒྱུད་འདིར་དེ་ལས་ལྡོག་སྟེ་གསུངས་པ་ནི་ལུས་དབང་གི་ཕྱོགས་རེ་དང་ཆ་ཀུན་སྐྱེ་བའི་དབང་དུ་མཛད་པའོ། །གཉིས་པ་ནི། དགའ་བོ་མངལ་འཇུག་གི་མདོ་ལས་མངལ་དུ་ཞུགས་ནས་ཞག་བདུན་
ཕྲག་སོ་ལྔ་པ་ལ་རྩ་འཆགས་པར་བཤད། །དུས་འཁོར་ནས་ཟླ་བ་གཅིག་སོང་བའམ་ཟླ་བ་གཉིས་པ་ལ་རྩ་འཆགས་པར་བཤད་དོ། །དེ་ལ་ཁ་ཅིག་དང་པོར་ལྟེ་བའི་རྩ་འདབ་བརྒྱད་འཆགས། །དེ་ནས་སྙིང་གའི་བརྒྱད། དེ་ནས་མགྲིན་པའི་བརྒྱད། །
6-4-17b


དེ་ནས་སྤྱི་བོའི་བརྒྱད་ཆགས་ལ། དེ་དག་ཀྱང་མི་ཕྱེད་མ་ལ་སོགས་པའི་རྩ་སོ་གཉིས་སོ། །ལྟེ་བ་ལ་རྩ་འདབ་རེ་བཞི་དང་། མགྲིན་པ་ལ་བཅུ་དྲུག་དང་། སྤྱི་བོ་ལ་སོ་གཉིས་བཤད་པ་ནི་ལྟེ་བའི་རྩ་འདབ་རེ་རེ་ལ་ཀྱོག་བརྒྱད་བརྒྱད་དང་། མགྲིན་པའི་རེ་རེ་ལ་ཀྱོག་གཉིས་གཉིས་
དང་། །སྤྱི་བོའི་རེ་རེ་ལ་ཀྱོག་བཞི་བཞི་ཡོད་པ་ལ་དགོངས་སོ་ཞེས་སྨྲའོ། །དེ་ནི་མི་རིགས་ཏེ་རྩ་སོ་གཉིས་ཀྱི་གྲངས་ལ་རོ་རྐྱང་ཨ་པ་དྷཱུ་ཏཱི་ཡང་གཏོགས་པས་དེ་གསུམ་འཁོར་ལོ་རྣམས་ཀྱི་གཞུང་ཤིང་གི་ཚུལ་དུ་གནས་ཀྱི་འདབ་མ་མིན་པའི་ཕྱིར་དང་། མི་ཕྱེད་མ་ལ་སོགས་
པ་བརྒྱད་སྤྱི་བོ་སྤྱི་གཙུག་རྣ་པ་གཡས་གཡོན་ལྟག་པ་སྨིན་མཚམས་མིག་ཕྲག་པ་གཉིས་ཀྱི་རྩར་གསུངས་པས་ལྟེ་བའི་རྩ་འདབ་བརྒྱད་མིན་ནོ། །དེས་བརྒྱད་ཚན་གཞན་རྣམས་འཁོར་ལོ་ལྷག་མ་གསུམ་གྱི་རྩ་འདབ་ཏུ་འདོད་པ་མི་འཐད་པའང་ཤེས་པར་བྱའོ། །དེས་
ན་དང་པོར་སྙིང་གའི་རྩ་བརྒྱད་ཆགས་པ་ཡིན་ནོ། །རྒྱུད་རྡོར་ཕྲེང་ལས། ལ་ལ་ན་དང་ར་སན། ཨ་བ་དྷཱུ་ཏཱི་ཞེས་བྱའི་མིང་། །དེ་རྣམས་སྤྲོ་བའི་སྦྱོར་བ་ཡིས། །རིམ་གྱིས་ཐུན་ནི་བརྒྱད་དུ་འགྱུར། །གསུམ་པོ་ཉི་ཤུ་རྩ་བཞིར་འགྲོ། ཐིམ་དང་ལོངས་སྤྱོད་བདག་པོའི་
ཕྱིར། །རིམ་གྱིས་གྲངས་ནི་བདུན་ཅུ་གཉིས། །སླར་ཡང་དེ་སྤྲོ་སྦྱོར་བ་ཡིས། །རེ་རེ་སྟོང་སྟོང་དབྱེ་བ་ཡིས། །རྟག་ཏུ་གྲངས་ཉིད་འགྱུར་བ་ནི། །སྟོང་ཕྲག་བདུན་ཅུ་རྩ་གཉིས་སོ། །ཞེས་རྩ་བདུན་ཁྲི་ཉིས་སྟོང་གྱེས་པའི་དང་པོའི་གཞི་ནི་རྩ་གསུམ་དང་། དེ་གསུམ་
ལས་ཐུན་ཚེད་བརྒྱད་ཀྱི་རྩ་གྱེས་པར་བཤད་ལ། དེ་ནི་སྙིང་གའི་རྩ་འདབ་ཡིན་པའི་ཕྱིར་དང་། དེ་བརྒྱད་གང་ལས་ཕྱེས་ནས་འདབ་མར་སོང་བའི་དབུས་ཀྱི་རྩ་ནི་སྙིང་གའི་རྩ་གསུམ་ཡིན་པའི་ཕྱིར་རོ། །དེ་བརྒྱད་ལས་ཉི་ཤུ་རྩ་བཞིར་གྱེས་ཚུལ་ནི་སྐུ་
6-4-18a


གསུང་ཐུགས་ཀྱི་འཁོར་ལོ་གསུམ་གྱི་རྩ་གསུམ་པོའི་སྒོ་ནས་ཕྱེ་བས་ཡིན་ཏེ། །གསུམ་པོ་ཞེས་པ་འགྲེལ་པ་ལས་ཀྱང་བརྒྱད་ལ་གསུམ་གྱིས་བསྒྱུར་བས་ཉེར་བཞིར་འགྲོ་བར་བཤད་དོ། །རྒྱུད་དེ་ཉིད་ལས། དེ་ལས་འཁོར་ལོ་གསུམ་ཕྱེ་པས། །
རྩ་ནི་བརྒྱད་ཀྱི་དབྱེ་བ་ལས། །སྐུ་གསུང་ཐུགས་ཀྱི་སྔགས་ཀྱིས་ནི། །གསུམ་ཕྱེ་བདུན་ཅུ་རྩ་གཉིས་གསལ། །ཞེས་བརྒྱ་རྩ་བརྒྱད་པོ་དེ་ལ་སྐུ་གསུང་ཐུགས་ཀྱི་རྩ་གསུམ་གསུམ་དུ་འབྱེད་པར་གསུངས་སོ། །དེ་ས་ལ་ཞེས་པ་ནི་དེའི་གོང་དུ་ཨ་ཀ་ཙ་ཊ་ཏ་པ་ཡ་ཤའི་
སྡེ་ཚན་བརྒྱད་བཤད་པ་དེ་རྣམས་རྣམ་པར་དག་པའི་རྩ་བརྒྱད་དུ་དབྱེ་བའི་དོན་ནོ། །འཁོར་ལོ་གསུམ་གྱི་དབྱེ་བ་ནི་སྐུ་གསུང་ཐུགས་ཀྱི་སྔགས་ཀྱིས་ནི་ཞེས་པས་བཤད་པ་ལྟར་ཡིན་གྱི། །འགྲེལ་པས་སྤྱི་བོའི་འཁོར་ལོ་དོར་བའི་འཁོར་ལོ་ལྷག་མ་གསུམ་ལ་
འཆད་པ་མིན་ནོ། །སྔགས་ཞེས་པ་ནི་ལྷ་དང་སྔགས་དབྱེར་མེད་པས་རྣལ་འབྱོར་མ་ཉེར་བཞི་ལ་བྱ་བའམ། ཡང་ན་པུ་ཛ་ལ་སོགས་པའི་ཡི་གེ་ཉེར་བཞིས་སྐུ་གསུང་ཐུགས་ཀྱི་འཁོར་ལོ་གསུམ་གྱི་ལྷའི་གནས་ཉེར་བཞི་བསྟན་པ་ལ་བྱ་སྟེ། །རྒྱུད་དེ་ཉིད་
ལས། ལུས་ཀྱི་གནས་ཀྱི་དབྱེ་བ་ཡིས། །དེ་ཉིད་ཉི་ཤུ་རྩ་བཞིར་བརྗོད། །ཐིམ་དང་ལོངས་སྤྱོད་བདག་པོ་ཉིད། །གྲངས་ནི་བདུན་ཅུ་རྩ་གཉིས་བརྗོད། །རེ་རེའང་འཁོར་ནི་སྟོང་སྟོང་ངོ་། །ཐིམ་པ་ལོངས་སྤྱོད་བདག་པོ་འདོད། །གཙོ་བོ་ཡང་ནི་བསྡུས་པ་ལས། །
གནས་རྣམས་ཀྱི་ནི་གྲགས་སུ་འགྱུར། །ཞེས་གསུངས་པའི་ཕྱིར་རོ། །བདུན་ཅུ་རྩ་གཉིས་སུ་འབྱེད་པའི་གཞི་ནི་ཉེར་བཞི་ཡིན་ལ། འབྱེད་པའི་རྒྱུ་མཚན་ནི་ཐིམ་པ་དང་ལོངས་སྤྱོད་པ་དང་བདག་པོ་གསུམ་དུ་ཕྱེ་བས་འབྱེད་པར་གསུངས་པས། སྐུ་གསུང་
6-4-18b


ཐུགས་ཀྱི་སྔགས་ཀྱིས་ནི། །གསུམ་ཕྱེ་ཞེས་པ་བརྒྱད་ལ་ཉེར་བཞིར་འབྱེད་པའི་རྒྱུ་མཚན་ཡིན་གྱི་ཉེར་བཞི་ལ་དོན་གཉིས་སུ་འབྱེད་པའི་རྒྱུ་མཚན་མིན་ནོ། །གཙོ་བོ་དོན་གཉིས་པོ་རེ་རེ་ལ་འཁོར་སྟོང་ཕྲག་རེ་རེར་གྱེས་པ་རྣམས་སྟོང་ཕྲག་ཉེར་བཞི་པ་ཚན་པ་གསུམ་
དུ་འདུ་ལ། དེའང་ཁྲག་འབབ་པ་ཉེར་བཞི་རླུང་འབབ་པ་ཉེར་བཞིར་གསུངས་ཏེ། དེ་ཉིད་ལས། སྟོང་ཕྲག་ཉི་རྩ་བཞི་ནི། །རྩ་ནི་རྟག་ཏུ་རྨད་བྱུང་བ། །བྱང་ཆུབ་སེམས་ནི་འབབ་པར་ཤེས། །བདེ་བ་ཐམས་ཅད་རབ་ཏུ་འཕེལ། །རྟག་ཏུ་རྨད་དུ་བྱུང་བའི་རྩ། །སྟོང་ཕྲག་
ཉི་ཤུ་རྩ་བཞི་ནི། །ཁྲག་འབབ་པར་ནི་ཤེས་པར་བྱ། །ཉི་མ་འཕྲོ་བའི་བདག་ཉིད་ཅན། །རྟག་ཏུ་རྨད་དུ་བྱུང་བའི་རྩ། །སྟོང་ཕྲག་ཉི་ཤུ་རྩ་བཞི་ནི། །རླུང་རྒྱུ་བར་ནི་ཤེས་པར་བྱ། །ཞེས་གསུངས་ཤིང་། རླུང་དང་མཁྲིས་པ་བད་ཀན་འབབ་པའི་དབྱེ་བས་ཀྱང་དེ་ལྟར་
གསུངས་སོ། །སཾ་བྷུ་ཊ་ལས། སྙིང་སྟོབས་སྐུ་དེ་རྡུལ་བཅས་ངག །མུན་པ་སེམས་ཀྱི་རང་བཞིན་ལས། །སྙིང་སྟོབས་ཁུ་བ་རིན་ཆེན་རྡུལ། །མུན་པ་སྐྱེད་པར་བྱེད་པ་ཉིད། །ཅེས་རྩ་གསུམ་ནས་འབབ་པའི་ཁུ་བ་སྐུ་དང་རྡུལ་གསུང་དང་མུན་པ་སེམས་
སུ་གསུངས་ཤིང་འདིར་རླུང་འབབ་པར་གསུངས་པའང་གཙོ་བོ་སེམས་བསྐྱེད་པ་ཡིན་པས། རྩ་བརྒྱད་པོ་རེ་རེ་ལ་ལུས་ངག་ཡིད་གསུམ་གྱིས་འབྱེད་པའི་རྒྱུ་མཚན་ནི་དེ་ལྟར་རོ། །ཐིམ་པ་ནི་བྱུང་ཆུབ་ཀྱི་སེམས་སམ་རླུང་གཉིས་དེར་ད་གཟོད་འཇུག་པར་
འགྱུར་བའོ། །ལོངས་སྤྱོད་པ་ནི་དེ་གཉིས་རྩ་དེར་ལྟ་སྤྱོད་བཞིན་པའོ། །བདག་པོའམ་དབང་བྱེད་པ་ནི་རྩ་དེར་དེ་གཉིས་ལ་སྔར་དབང་བྱས་ཟིན་པའོ། །རྒྱུད་དེ་ལས། ལུས་ཀྱི་སྙིང་གི་ནང་དུ་ནི། །རྩ་རྣམས་ལྔ་ནི་རྣམ་པར་གནས། །སྐུ་གསུང་ཐུགས་ཀྱི་
6-4-19a


དབྱེ་བ་ཡིས། །ཉི་ཤུ་རྩ་བཞིར་ཉེ་བར་བརྗོད། །ཅེས་གསུངས་ཤིང་། དེའི་འགྲེལ་པ་མན་སྙེ་ལས། ཨ་བ་དྷཱུ་ཏཱི་དང་ལྷན་ཅིག་རྩ་ལྔ་རྣམས་དང་པོ་སྟེ། དེའི་རྗེས་སུ་གསུམ་དང་། དེ་ནས་ཉི་ཤུ་རྩ་བཞི་ཞེས་པའོ་ཞེས་དང་། །མངལ་གྱི་གནས་
སྐབས་སུ་དང་པོར་སྙིང་གི་རྩ་ལྔ་རྣམས་སྐྱེའོ། །དེའི་རྗེས་སུ་སྐྱེས་པ་གསུམ་རྣམས་སོ་ཞེས་པ་བརྒྱད་རྣམས་སོ་ཞེས་མངལ་དུ་དང་པོར་སྙིང་གའི་རྩ་ལྔ་དུས་གཅིག་ཏུ་སྐྱེ་ཞིང་། དེ་ནས་གསུམ་སྐྱེས་པས་རྩ་བརྒྱད་འཆགས་ལ། དེ་ནས་རྩ་ཉེར་བཞི་འཆགས་པར་
བཤད་དོ། །དེའི་དོན་ལ་མཁས་པ་ཁ་ཅིག་དང་པོར་མངལ་དུ་རྩ་དབུ་མ་དང་སུམ་སྐོར་མ་ལ་སོགས་པ་ལྔ་སྟེ་དྲུག་དུས་མཉམ་དུ་འཆགས་པར་འདོད་པ་ནི་མི་འཐད་དེ། ཨ་བ་དྷཱུ་ཏཱི་དང་ལྷན་ཅིག་རྩ་ལྔ་དང་པོར་སྐྱེ་བར་བཤད་པ་ནི་རྩ་དབུ་མ་དང་བཅས་པའི་ལྔར་
བཤད་ཀྱི་དེ་དང་བཅས་པའི་དྲུག་ཏུ་མ་བཤད་པའི་ཕྱིར་དང་། དང་པོར་སྙིང་གའི་རྩ་ལྔ་སྐྱེའོ་ཞེས་བཤད་པའི་ཕྱིར་རོ། །གཞན་ཡང་དེའི་རྗེས་སུ་གསུམ་བྱུང་བས་བརྒྱད་དུ་འཇོག་པར་ཡང་མི་རིགས་ཏེ། རྩ་བརྒྱད་ལ་དྲུག་ཆགས་པའི་རྗེས་སུ་གཉིས་ལས་
མེད་པའི་ཕྱིར་དང་། རོ་རྐྱང་དབུ་མ་རྩ་གཞན་ཐམས་ཅད་ཀྱི་རྟེན་དུ་སྡོམ་འབྱུང་ལས་གསུངས་པས་རོ་རྐྱང་རྗེས་སུ་སྐྱེ་བར་མི་འཐད་དོ། །རྒྱུད་རྡོར་ཕྲེང་ལས་ཀྱང་། དེ་གསུམ་སྤྲོ་བའི་སྦྱོར་བ་ཡིས། །རིམ་གྱིས་ཐུན་ནི་བརྒྱད་དུ་འགྱུར། །ཞེས་སྙིང་གའི་རྩ་འདབ་
བརྒྱད་ཀ་རྩ་གསུམ་ལས་གྱེས་པར་གསུངས་པས་ཀྱང་སུམ་སྐོར་མ་དང་འདོད་མ་དང་ཁྱིམ་མ་དང་གཏུམ་མོ་དང་བདུད་བྲལ་མ་ལྔ་ཆགས་པའི་རྗེས་སུ་རོ་རྐྱང་ཆགས་པར་སྨྲ་བ་མི་རིགས་སོ། །དེས་ལན་རོ་རྐྱང་དབུ་མ་གསུམ་དང་སུམ་སྐོར་མ་དང་འདོད་མ་ལྔ་དུས་
6-4-19b


མཉམ་དུ་ཆགས་པའི་རྗེས་སུ་ཁྱིམ་མ་ལ་སོགས་པ་གསུམ་ཆགས་པ་ནི་མན་སྙེའི་ལུགས་སོ། །དེ་ལྟར་སྙིང་གའི་ཕྱོགས་ཀྱི་རྩ་སུམ་སྐོར་མ་ལ་སོགས་པ་བཞི་ཆགས་པའི་རྗེས་སུ་དེ་རྣམས་རེ་རེ་ལ་མཚམས་ཀྱི་རྩའང་བ་རེ་གྱེས་པས་ཐུན་ཆོད་བརྒྱད་ཀྱི་རྩར་འགྱུར་ཏེ། རིམ་
གྱིས་ཐུན་ནི་བརྒྱད་དུ་འགྱུར། །ཞེས་གསུངས་པ་ལྟར་རོ། །སུམ་སྐོར་མ་དང་འདོད་མ་གཉིས་རྩ་གསུམ་དང་མཉམ་དུ་ཆགས་ཀྱང་དེ་གསུམ་ལས་གྱེས་པ་མི་འགལ་ལོ། །བདུད་བྲལ་མ་ནི་ལྟེ་བ་ནས་ལངས་ཏེ་ལྕེའི་རྩེ་མོའི་བར་དུ་གནས་ལ། དེ་ལའང་ཨ་བ་དྷཱུ་ཏཱི་ལ་བརྟེན་
ནས་གནས་པར་མན་སྙེ་དང་སྡོམ་འབྱུང་འགྲེལ་པར་བཤད་དེ། མགྲིན་པ་ནས་དབུ་མ་དང་བྲལ་བར་གསལ་ལོ། །སྙིང་གནས་རྩ་བརྒྱད་ཆགས་པར་བཤད་བ་ནི་རོ་རྐྱང་དབུ་མ་གསུམ་འདབ་མའི་སུམ་སྐོར་མ་ལ་སོགས་པ་བཞི་བདུད་བྲལ་མ་དང་བརྒྱད་བརྒྱད་ཡིན་ལ། 
སྙིང་གར་ཐུན་བརྒྱད་ཀྱི་རྩ་བཤད་པ་ནི་སྙིང་གའི་ཕྱོགས་མཚམས་ཀྱི་འདབ་མའི་རྩ་བརྒྱད་ཡིན་པས་མི་གཅིག་གོ། །རྩའི་གཙོ་མོ་གསུམ་ནི་ལུས་ཀྱི་དབུས་ནས་སྟེང་དང་འོག་ཏུ་ཁྱབ་ཅིང་། རོ་རྐྱང་གི་རྩ་གཉིས་ཀྱིས་དབུ་མ་ལ་འཁོར་ལོ་སོ་སོའི་ལྟེ་བར་ལུ་གུ་རྒྱུད་ཀྱི་
ཚུལ་དུ་དཀྲིས་ནས་གནས་ཏེ། རྒྱུད་རྡོར་འཕྲེང་ལས། ལ་ལ་ན་དང་ར་ས་ན། །ཨ་བ་དྷཱུ་ཏཱི་ཞེས་བྱའི་མིང་། །སྐུ་གསུང་ཐུགས་ཀྱི་རང་བཞིན་དང་། །དེ་ཉིད་དུ་ནི་ཡོངས་སུ་གྲགས། །སྟེང་དང་འོག་ཏུ་ཁྱབ་པ་ཉིད། །སོ་སོར་ལུ་གུ་རྒྱུད་ཚུལ་དུ། །རྩ་རྣམས་ཀུན་ལ་ཁྱབ་
ནས་ནི། །ཡང་དག་མན་ངག་རིམ་པར་གནས། །ཞེས་སོ། །འཁོར་ལོ་ནི་དྲུག་སྟེ། ལྟེ་བ་སྤྲུལ་བའི་འཁོར་ལོ་ནི་རྩ་འདབ་རེ་བཞི་དང་། སྙིང་ག་ཆོས་ཀྱི་འཁོར་ལོ་ནི་རྩ་འདབ་བརྒྱད་དང་། དེའི་གོང་མགྲིན་པའི་འོག་ཏུ་མེའི་འཁོར་ལ་ནི་རྩ་འདབ་གསུམ་དང་། མགྲིན་པ་
6-4-20a


ལོངས་སྤྱོད་ཀྱི་འཁོར་ལོ་ནི་རྩ་འདབ་བཅུ་དྲུག་དང་། སྨིན་མའི་དབུས་རླུང་གི་འཁོར་ལོ་ནི་རྩ་འདབ་དྲུག་དང་། སྤྱི་བོ་བདེ་ཆེན་གྱི་འཁོར་ལོ་ནི་རྩ་འདབ་སོ་གཉིས་པོ་སྟེ་བསྡོམས་ན་བརྒྱ་དང་ཉེར་དགུའོ། །དེའང་རྒྱུད་རྡོར་ཕྲེང་ལས། རླུང་གི་འཁོར་ལོར་
གནས་པའི་རྩ། །འདབ་དྲག་རླུང་གི་མཁའ་ལ་སྤྱོད། །འདབ་གསུམ་མེ་ཡི་འཁོར་ལོར་བཤད། །རྩ་གསུམ་གནས་ནི་རིམ་བཞིན་འཆར། །དེ་བཞིན་ལོངས་སྤྱོད་འཁོར་ལོ་ཡང་། །རྩ་ནི་བཅུ་དྲུག་ཏུ་ནི་བརྗོད། །ཆོས་ཀྱི་འཁོར་ལོ་གནས་པའི་རྩ། །བརྒྱད་ནི་ཀུན་ལ་
ཁྱབ་པ་པོ། །དེ་བཞིན་སྤྲུལ་པའི་འཁོར་ལོ་ཡང་། །དྲུག་ཅུ་རྩ་བཞིར་འཆར་བར་བཤད། །བདེ་བ་ཆེན་པོའི་འཁོར་ལོ་ཆེར། །རྩ་ནི་སུམ་ཅུ་གཉིས་སུ་བཤད། །དེ་ལྟར་མདོར་བསྡུས་རིམ་པ་ཡང་། །བརྒྱ་དང་ཉི་ཤུ་རྩ་དགུའོ། །ཞེས་དང་། སྨིན་མའི་དབུས་གནས་རླུང་
འཁོར་ལོ། །ཞེས་དང་། རྩ་གསུམ་གྲུ་གསུམ་མེ་དཀྱིལ་འཁོར། །མགྲིན་པའི་འོག་ཏུ་བཤད་པ་ཡིན། །ཞེས་སོ། །རྩ་དབུ་མ་ནི་གཙུག་ཏོར་ནས་ནོར་བུའི་མཐའ་དང་རྐང་བའི་མཐའི་བར་དུ་གནས་པར་མིན་སྙེ་ལས་བཤད་དེ། བུད་མེད་རྣམས་ལ་རྡོར་དབྱིངས་དབང་
ཕྱུག་མའི་རྩ་པདྨའི་དབུས་སུ་གནས་པར་བཤད་ལ། དེ་ཉིད་དབུ་མ་དང་རྣམ་གྲངས་སུ་གསུངས་པས། སྐྱེས་པ་ལའང་ནོར་བུའི་བར་དུ་གནས་པ་འཐད་དོ། །གཙུག་ཏོར་ནས་ཞེས་བཤད་ཀྱང་བྷ་བ་བྷ་དྲས་སྨིན་དབུས་པར་དུ་བཤད་པ་ལྟར་ལེགས་སོ། །རོ་རྐྱང་
གཉིས་ཀྱང་ཡ་མཐའ་དེ་དང་འདྲ་ལ། མ་མཐའང་དབུ་མ་དང་འདྲའོ། །རྐྱང་མ་ལྟེ་བར་ངལ་བསོ་བ་དང་། རོ་མ་མགྲིན་པར་ངལ་བསོ་བར་གསུངས་པ་ནི། དེ་གཉིས་ནས་ཁུ་ཁྲག་འཕེན་འཛིན་བྱེད་པས་དེ་སྟོན་གྱི་དེ་ཕན་ཆད་དུ་མི་འགྲོ་བ་མིན་པར་བཤད་དོ། །མན་
6-4-20b


སྙེ་ལས་གཙུག་ཏོར་དུ་རྩ་འཁོར་འདབ་མ་བཞི་བ་དང་། གསང་གནས་སུ་འདབ་མ་སོ་གཉིས་དང་། ནོར་བུར་འདབ་མ་བརྒྱད་པ་གསུམ་དང་གཞན་བཞི་སྟེ་འཁོར་ལོ་བདུན་བཤད་ལ། ཕྱག་ཆེན་ཐིག་ལེར་མདུད་པ་སོ་གཉིས་པར་ཡང་གསུངས་ཏེ་གཡས་གཡོན་
ལ་དགོངས་པས་བསྡོམས་ན་བཅུ་དྲུག་གོ། །དེ་ལྟར་དབུ་མའི་རྩ་མདུད་རྣམས་ཀྱི་ནང་ནས་ཤིན་ཏུ་དཀའ་བ་ནི་སྙིང་གའི་རྩ་མདུད་ཡིན་ཏེ། རྒྱུད་རྡོར་ཕྲེང་ལས། སྙིང་གི་པདྨའི་སྦུབས་མཁའ་ལ། །ཡེ་ཤེས་རྡོ་རྗེ་རྟག་ཏུ་བཞུགས། །སྟེང་འོག་ཡང་དག་བརྟེན་ནས་
ནི། །སྲོག་དང་ཐུར་སེལ་རྒྱུ་བར་བྱེད། །དེ་ལའང་དབྱེ་བར་དཀའ་བ་ཡི། །དབུས་སུ་མདུད་པ་གསུམ་གྱིས་དཀྲིས། །དེ་ཡིས་ཐུར་སེལ་བཅོམ་བྱས་པས། །སྟེང་དུ་འགྲོ་བ་ཐོབ་མི་སྲིད། །ཅེས་དང་། སྟེང་མ་རྣམས་ཀྱང་ཐུར་དུ་འགྲེ། །སྲོག་གིས་རབ་ཏུ་བཅོམ་ན་ཡང་། །
དེ་དག་རྣམས་ཀྱང་སྲོག་རྩའི་ནང་། །ཞུགས་ནས་ཐུར་དུ་ཁ་བལྟས་པ། །དེ་དག་ཐུར་དུ་མི་འགྲོ་སྟེ། །མ་རིག་མདུད་པས་བཅིངས་པ་ན། །ཞེས་གསུངས་སོ། །དེ་ལ་རྐང་པ་དང་པོ་གཉིས་ཀྱི་དོན་ནི་འཆར་པར་འགྱུར་ལ། སྟེང་འོག་གི་སྙིང་གའི་འཁོར་ལོའི་སྟེང་
ལ་བརྟེན་ནས་སྲོག་འཛིན་དང་། འོག་གི་རྩ་ལ་བརྟེན་ནས་ཐུར་སེལ་རྒྱུའོ། །སྙིང་གའི་པདྨ་དེ་ལའང་འཁོར་ལོ་དེའི་དབུས་སུ་རྩ་དབུས་སུ་རྩ་དབུ་མ་ལ་རོ་རྐྱང་གཉིས་ཀྱིས་གཡས་གཡོན་ནས་མདུད་པ་གསུམ་གྱིས་དཀྲིས་ནས་གནས་སོ། །མདུད་པ་དེ་ནི་ཤིན་ཏུ་དབྱེ་བར་
དཀའོ། །མདུད་པ་དམ་པོ་དེ་ཡིས་འོག་ནས་ཐུར་སེལ་སྙིང་གའི་དབུ་མའི་ནང་ནས་སྟེང་དུ་འགྲོ་བའི་བྱ་བ་བཅོམ་བས་ཏེ་བཀག་པས། རླུང་དེ་ལམ་དེ་ནས་སྟེང་དུ་འགྲོ་མི་ནུས་སོ། །དེ་བཞིན་དུ་སྲོག་འཛིན་ལ་སོགས་པའི་སྟེང་གི་རླུང་རྣམས་ཀྱང་སྲོག་རྩའི་
6-4-21a


ནང་དུ་ཞུགས་ཏེ་ཁ་ཐུར་དུ་བལྟས་ཏེ་འགྲོ་མོད་ཀྱང་། སྔར་བཤད་པའི་ལམ་དེ་ནས་ཞུགས་ནས་ཐུར་དུ་འགྲོ་མི་ནུས་ཏེ། དེ་ནས་སྲོག་གིས་ཏེ་སྲོག་རླུང་འོག་ཏུ་འགྲོ་བའི་བྱ་བ་བཅོམ་བའི་ཕྱིར་ཏེ། རོ་རྐྱང་གི་མདུད་པས་དམ་པར་བཅིངས་པའི་ཕྱིར་
རོ། །སྤྱོད་བསྡུས་ལས། །དཀྱིལ་འཁོར་བཞིའི་རླུང་རྣམས་འོག་གི་རྡོ་རྗེ་དང་པདྨའི་སྣ་རྩེ་ནས་སྟེང་གི་སྣའི་སྒོར་རྒྱུ་པར་བཤད་ལ། ཁྱད་པར་དུ་ཐུར་སེལ་སྣ་གཡོན་ལ་རྒྱུ་བར་བཤད་པས། སྤྱིར་འོག་གནས་པའི་རླུང་རྣམས་སྟེང་གི་སྣ་སྒོང་མི་འགྲོ་བ་
དང་། སྟེང་ན་གནས་པའི་རླུང་རྣམས་འོག་གི་སྒོར་མི་འགྲོ་བ་མིན་གྱི། སྙིང་གའི་དབུ་མ་ནས་ཡར་མར་དུ་འགྲོ་མི་ནུས་པའི་དོན་ནོ། །དེས་ན་རྒྱུད་དེ་ཉིད་ལས། བདག་ཅེས་བྱ་བའི་སྒྲ་ཡི་རྟེན། །གང་གིས་ཡང་དག་ཤེས་པ་ཡིས། །སྲིད་པར་འཆིང་བའི་མཚན་ཉིད་ནི། །
ཨ་ཧཾ་འཁོར་བའི་འཆིང་བ་ཡི། །དེ་ནི་ཡོངས་ཟད་གྲོལ་བའོ། །ཞེས་ཨ་ཧཾ་ཞེས་པ་ངའམ་བདག་གོ་ཞེས་པའི་སྒྲའི་དོན་ཡོངས་སུ་ཤེས་ན་འཁོར་བའི་འཆིང་བ་གཅོད་པར་བཤད་ལ། ཡང་དེ་ཉིད་ལས། ཨ་ཧཾ་དང་བྲལ་སྐྱེས་བུ་ནི། །རྩ་བ་ཆད་པའི་ཤིང་བཞིན་ནོ། །ཞེས་
དེའི་དོན་ཤེས་པ་དང་བྲལ་བའི་སྐྱེས་བུ་ནི་རྩ་བ་རུལ་བའི་ཤིང༌ལྟར་གསུངས་ནས། ཨ་ནི་སྲོག་གི་རླུང་དུ་བཤད། །དེ་བཞིན་ཐུར་སེལ་ཧཾ་དུ་བརྗོད། །དེ་གཉིས་གཅིག་ཏུ་གྱུར་པ་ན། །དེ་ནི་ཨ་ཧཾ་ཞེས་བྱར་གྲགས། །ཞེས་སྲོག་ཐུར་གཉིས་གཅིག་ཏུ་བསྲེ་བར་
གྱུར་པ་ནི་འདིའི་ལུགས་ཀྱིས་སྙིང་གའི་རྩ་མདུད་གྲོལ་བའི་གནས་དེར་བསྲེ་བ་ཡིན་པས་སྙིང་གའི་མདུད་པ་དབྱེ་དཀའ་བས་སྲོག་ཐུར་འདྲེར་མ་བཅུག་པ་དང་། འདྲེས་ན་འདྲེས་ལུགས་རྗེ་ལྟར་འོང་དང་། མདུད་པ་དེ་འབྱེད་པའི་གདམས་པའི་གནད་རྣམས་ཤེས་
6-4-21b


པ་ནི་ཤིན་ཏུ་གལ་ཆེའོ། །དེ་ལ་ལྟེ་བ་དང་མགྲིན་པའི་འཁོར་ལོ་ནི་ཨེ་ཡིག་འབྲུག་གསུམ་གྱི་དབྱིབས་ཤེས་རབ་དང་། སྙིང་ག་དང་སྤྱི་བོའི་འཁོར་ལོ་ནི་ཝཾ་ཡིག་ཟླུམ་པོའི་དབྱིབས་ཐབས་ཡིན་ལ། སྔ་མ་གཉིས་ཁ་གྱེན་དུ་བལྟ་ཞིང་ཕྱི་མ་གཉིས་ཐུར་དུ་བལྟ་སྟེ། སཾ་བྷུ་
ཊ་ལས། སྤྱི་པོ་ལྟེར་སོན་འཁོར་ལོ་ནི། །ཨེ་ཡི་དབྱིབས་དུ་ཡང་དག་གནས། །སྙིང་དང་མགྲིན་པར་ཡང་དག་གནས། །ཝཾ་གི་རྣམ་པ་ལྟ་བུར་བརྗོད། །ཅེས་དང་། ཐབས་དང་ཤེས་རབ་རང་བཞིན་གྱིས། །སྟེང་དང་འོག་ཏུ་སྙོམས་པར་འཇུག །ཨེ་ཡིག་དང་ནི་ཝཾ་
ཡིག་ནི། །གཉིས་གཉིས་སུ་ནི་བརྗོད་པ་ཉིད། །ཅེས་གསུངས་ཏེ། རྐང་པ་བཞི་པོ་དེའི་དོན་མན་སྙེ་ལས་ལྔར་ལྟར་བཤད་དོ། །གསུམ་པ་ནི། རླུང་དང་བྱང་ཆུབ་ཀྱི་སེམས་དཀར་དམར་ནི་རྩའི་སྔོན་ནས་ཀྱང་ཆགས་ལ། དེའང་ཕ་མ་ལས་བྱུང་བའི་བྱང་ཆུབ་ཀྱི་
སེམས་དཀར་དམར་གྱི་དབུས་སུ་བར་དོའི་རྣམ་ཤེས་ཞུགས་པ་ནི་སྙིང་ག་དང་། དེ་ནས་ལུས་ཡན་མན་དུ་འཆགས་པ་སའི་དངོས་གཞིར་གསུངས་པས། ཐིག་ལེ་དཀར་གྱི་དང་པོའི་གནས་ནི་སྙིང་ག་ཡིན་ནོ། །ཕྱིས་རྩ་རྣམས་ཆགས་པའི་རྗེས་སུ་ནི་སྦྱི་
བོའི་འཁོར་ལོར་བྱང་སེམས་དཀར་པོ་དང་། ལྟེ་བར་དམར་པོ་གནས་ཏེ། མན་ངག་སྙེམས་ལས། ཐུགས་རྡོ་རྗེ་ནི་དྲི་ཟའི་སེམས་ཅན་གྱི་གནས་སྐབས་དོར་ནས་ཕ་མའི་ཁུ་བ་དང་རྡུལ་ལྷན་ཅིག་ཏུ་གྱུར་བ་ཕན་ཚུན་ཕན་གདགས་བྱ་དང་ཕན་འདོགས་པ་པོ་ཉིད་
ཀྱིས། དེ་ལྟ་དེ་ལྟར་གནས་སྐབས་ཡོངས་སུ་འགྱུར་བ་བརྒྱུད་པའི་ངོ་བོའི་ཕུང་པོ་ལྔ་རྣམས་ཉེ་བར་བསྐྱེད་དེ། སྐྱེ་བ་ལ་སོགས་པའི་གནས་སྐབས་རྣམས་སུའོ། །འོན་ཀྱང་གནས་སྐབས་སུ་མགོ་བོའི་མཚོ་སྐྱེས་སུ་ཁུ་བ་ཤས་ཆེ་རྡུལ་ཤས་ཆུང་བ་སྟེ།
6-4-22a


གསང་བའི་ཆུ་སྐྱེས་སུ་ལྡོག་པའོ། །ཞེས་གསུངས་སོ། །གསང་བའི་ཆུ་སྐྱེས་ཀྱི་སྒྲས་ནི་ལྟེ་བའང་གཟུང་ལ། སྦྱི་བོར་ནི་དཀར་པོ་ཤས་ཆེ་བ་དང་རྟག་ཏུ་གནས་པས་དེའི་གནས་སུ་བཤད་ཀྱི། དེར་དམར་པོ་མེད་པ་དང་གནས་གཞན་དུ་དཀར་
པོ་མི་གནས་པ་མིན་ནོ། །དེ་བཞིན་དུ་ལྟེ་བར་ཡང་དཀར་པོ་ཡོད་མོད་ཀྱང་ཤས་དམར་པོ་ཆེ་ཞིང་། གཏན་དུ་བའི་གནས་ཡིན་པས་དམར་པོའི་གནས་སུ་བཞག་གོ། །འོ་ན་སཾ་བྷུ་ཊ་ལས། །དེ་ནང་ཧཾ་གི་རྣམ་པ་ནི། །ཐིག་ལེའི་གཟུགས་ཅན་མི་ཤིགས་པ། །འཇིག་རྟེན་
ཀུན་གྱི་རྩ་བ་དེ། །བརྟན་པའི་བདག་ཉིད་གཡོ་བའི་བདག །གསལ་དང་མི་གསལ་གཟུགས་ལས་ནི། །ས་བོན་གཟུགས་ཀྱིས་ཡང་དག་གནས། །ལུས་ཅན་རྣམས་ནི་ཀུན་གྱི་གཟུགས། །དེ་ཕྱིར་གདོད་ནས་རྫོགས་པ་ཉིད། །ཅེས་ཀླད་པའི་ནང་གི་བྱང་སེམས་དཀར་པོ་
ལུས་ཀུན་གྱི་རྩ་བར་བཤད་པ་ཅི་ཡིན་སྙམ་ན། འཇིག་རྟེན་ཀུན་ནི་ཕུང་པོ་ལྔའི་འཇིག་རྟེན་དང་བརྟན་པ་ནི་མིག་སོགས་དང་གཡོ་བ་ནི་སེམས་སེམས་བྱུང་ཡིན་ལ་དེ་དག་གི་རྩ་བར་གསུངས་པ་ནི། མན་སྙེ་ལས་བར་སྐབས་སུ་ཞེས་བསད་པ་ལྟར་སྤྱི་པོའི་འཁོར་
ལོར་བྱང་སེམས་དཀར་པོ་ཆགས་རྗེས་སུ་དེས་ལུས་ཀྱི་འཇིག་རྟེན་རྒྱས་པར་བྱེད་བ་ལ་དགོངས་སོ། །རྐང་པ་ཐ་མ་ལ་དཔྱིད་ཐིག་ཏུ་དེ་ལས་དང་པོ་ནས་བསྐྱེད་པའོ་ཞེས་བསྒྱུར་བའང་དེ་དང་འདྲ་སྟེ། དེ་ལྟ་མ་ཡིན་ན་སྦྱི་བོའི་འཁོར་ལོར་གནས་པས་དེ་ལྟར་བསྐྱེད་པར་
བཤད་པ་དང་འགལ་ཏེ། རྩ་མ་ཆགས་པའི་གོང་དུ་སྤྱི་བོའི་འཁོར་ལོ་མེད་པའི་ཕྱིར་རོ། །དེས་ན་སེམས་རྟེན་གྱི་ཐིག་ལེ་ནི་རྣམ་ཤེས་ཞུགས་པའི་ཁུ་ཁྲག་དང་དེའི་རྒྱུན་ཡིན་ལ། དེའང་སྙིང་གའི་གནས་ན་གནས་པས། ཐུགས་ཀྱི་ས་བོན་སྙིང་ག་རུ་འགོད་
6-4-22b


པར་ལན་དུ་མ་ཞིག་ཏུ་གསུངས་སོ། །ལུས་ལ་གནས་པའི་ཁམས་བཅུ་དྲུག་གི་གཙོ་བོ་ཁུ་ཁྲག་གཉིས་ཡིན་པར་གསུངས་ལ། དེ་གཉིས་ཀྱིས་སེམས་རྟེན་བྱེད་པའི་གནས་ནི་སྙིང་ག་དང་། འབར་པ་དང་འཛག་པའི་ཁུ་ཁྲག་གི་གནས་ནི་སྦྱི་བོ་དང་ལྟེ་བའོ། །གཞན་
ཡང་རྒྱས་པར་བྱེད་ན་སྔར་བཤད་པ་ལྟར་རྩ་བདུན་ཁྲི་ཉིས་སྟོན་ལ་ཚན་པ་གསུམ་དུ་བྱས་ནས་གཅིག་ནས་ཁུ་བ་དང་གཅིག་ནས་ཁྲག་དང་གཅིག་ནས་རླུང་འབབ་པར་གསུངས་ཏེ་ཤས་ཆེ་བའོ། །དེ་ལས་བསྡུས་ན། ཁུ་ཁྲག་རླུང་གསུམ་འབབ་པའི་རྩ་དོན་གཉིས། 
དེ་ལས་བསྡུས་ན་དེ་གསུམ་འབབ་པའི་རྩ་ཉེར་བཞི། དེ་ལས་བསྡུས་ན་དེ་གསུམ་འབབ་པའི་སྙིང་གའི་རྩ་བརྒྱད། དེ་ལས་བསྡུས་ན་རོ་མ་ལས་ཁྲག་དང་། རྐྱང་མ་ལས་ཁུ་བ་དང་དབུ་མ་ལས་རླུང་འབབ་པར་གསུངས་ཏེ། རྒྱུད་རྡོར་ཕྲེང་ལས། གཡོན་པ་ཟླ་བ་
བྱང་ཆུབ་འབབ། །གཡས་པ་ཁྲག་དང་ཉི་མ་འབབ། །ཤེས་བྱ་དབུས་སུ་རླུང་རྒྱུ་བ། །མེ་སད་བྱེད་པར་ཤེས་པར་བྱ། །ཞེས་གསུངས་ལ། གཞན་རྣམས་ཀྱི་ཁུངས་ནི་བཤད་ཟིན་ཏོ། །རྒྱུད་འདིར་དབུ་མ་ལ་མེ་རྒྱུ་བའི་རྩར་ཡང་བཤད་ལ། དེའི་དོན་དུས་མེ་རྒྱུ་བ་ལ་
འགྲེལ་པས་འཆད་དོ། །འོན་ཀྱང་དབུ་མ་ནས་རྒྱུ་བའི་རླུང་དེ་གཏུམ་མོའི་མེས་སད་བྱེད་དུ་གསུངས་ཏེ་འདི་ནི་འཆད་པར་འགྱུར་རོ། །གཉིས་པ་ནི། དེ་ལྟར་ཕུང་པོ་དང་ཁམས་དང་སྐྱེ་མཆེད་ཀྱི་ལུས་སྤྱི་དང་། བྱེ་བྲག་ཏུ་རླུང་དང་རྩ་དང་བྱང་ཆུབ་ཀྱི་སེམས་རིམ་གྱིས་
ཆགས་ཏེ་མངལ་དུ་སྐྱེ་བ་རྫོགས་ནས། བཙས་པའི་འོག་ཏུ་ཇི་ལྟར་གནས་སྙམ་ན། མངལ་དུ་སྣ་བུག་ནས་རླུང་འབྱུང་འཇུག་གང་ཡང་མི་བྱེད་པར་གནས་ནའང་། མངལ་སྒོར་བཙས་མ་ཐག་ནས་རླུང་གཉིས་ཀྱང་འབྱུང་འཇུག་བྱེད་ལ། བཟའ་བཏུང་
6-4-23a


ལོངས་སྤྱོད་པ་རྣམས་ཀྱང་ལྟེ་བར་གསན་པའི་གཏུམ་མོའི་མེད་བཞུས་ནས་ཚིགས་མ་རྒྱུ་མཐུན་དུ་འགྱུར་ཞིང་། དྭངས་མ་ལུས་ཀྱི་གནས་རྣམས་སུ་རོ་རྐྱང་གཉིས་ཀྱིས་འབེབས་པས་ལུས་འཕེལ་བ་དང་གནས་པའི་རྒྱུར་འགྱུར་རོ། །ཞག་
རེ་ལ་རླུང་ཉི་ཁྲི་ཅིག་སྟོང་དྲུག་བརྒྱ་རྒྱུ་ཞིང་། འོག་གི་སྒོར་སྐྱེས་པ་དང་བུད་མེད་ལ་ཁུ་ཁྲག་འབྱུང་བ་ནི་ལོ་བཅུ་གཉིས་དང་བཅུ་དྲུག་གི་མཚམས་ནས་ཡིན་པར་བཤད་དོ། །དམར་ཆའི་མེས་དཀར་ཆ་བཞུས་ནས་འོག་སྒོར་འབེབས་པའི་དམར་ཆ་ནི། སྤྱིར་ཁྲག་མེའི་ཁམས་
ཀྱི་ངོ་བོ་ཡིན་པས་ལུས་ཀྱི་རྩ་ནང་ནས་རྒྱུ་བའི་ཁྲག་གི་ཁམས་ཐམས་ཅད་དང་། བྱེད་བྲ་ཏུ་རོ་མ་ནས་རྒྱུ་བའི་ཁྲ་གི་ཁམས་དྲོད་ཀྱི་ངོ་བོར་འབར་བ་ཡོད་ཀྱང་། གཏུམ་མོའི་གཙོ་བོ་ནི་དབུ་མ་ན་གནས་པའི་ཁྲག་ཡིན་ཏེ། གཏུམ་མོའི་མེ་སད་པར་བྱེད་པའི་རླུང་དབུ་མ་ནས་རྒྱུ་
བ་ལ་བཤད་ལ། དེའི་གནད་ཀྱིས་དེས་སྦར་བར་བྱ་བའི་མེའང་རྩ་གཞན་གྱི་ནང་གི་མེ་མིན་ནོ། །དེའང་གཙོ་བོར་ལྟེ་བ་དང་དེའི་འོག་སུམ་མདོར་གནས་པའི་ཁྲག་ནི་ཁམས་ཡིན་ཏེ། ལྟེ་བར་གནས་པ་ནི་མང་དུ་བཤད་ལ། སཾ་བྷུ་ཊ་ལས། ཚངས་པའི་མེ་ནི་སུམ་མདོར་
གནས། །ཞེས་ཀྱང་གསུངས་ཏེ། སྔ་མ་ནི་ཨ་ཡིག་ཏུ་བཤད་ལ་ཕྱི་མ་ནི་ཀྵ་ཡིག་ཏུ་གསུངས་སོ། །ལྟེ་བའོ་ཨ་ཐུང་དེའི་འཁོར་ལོའི་དབུས་སུ་གནས་པར་ལན་མང་དུ་གསུངས་ཤིང་། འགྲེལ་པ་རྣམས་ལས་ཀྱང་ཨ་བ་དྷཱུ་ཏཱིའི་ནང་དུ་འགོད་པར་གསུངས་པས་དབུ་མའི་
ནང་གི་རྡུལ་གྱི་ངོ་བོ་ཡིན་ནོ། །དེའི་ཕྱིར་མེ་དེས་བཞུ་པར་སྦྱི་བོའི་ཧཾ་ཡིག་ཀྱང་སྤྱི་བོའི་འཁོར་ལོའི་དབུས་ཨ་བ་དྷཱུ་ཏཱི་ནང་ན་གནས་པའོ། །ལྟེ་བར་གཏུམ་མོའི་མེ་འབར་བ་དེའི་དབུ་མའི་ནང་དུ་ཞུགས་པ་འཁོར་ལོ་སོ་སོའི་འདབ་མར་ཞུགས་ནས་འགྲོ་བས་
6-4-23b


ལུས་ཀུན་ལ་གཏུམ་མི་འབར་བའང་འོང་ལ། དེས་རྩ་གནས་དེ་ཐམས་ཅད་ནས་བྱང་སེམས་རེ་ཞུ་བར་ཡང་བྱེད་དོ། །རོ་མར་རླུང་དང་ཁུ་བའང་འབབ་ཀྱང་ཁྲག་ཤས་ཆེ་བས་རྩ་དེར་ཁྲག་འབབ་པར་གསུངས་ལ། དེ་བཞིན་དུ་རྐྱང་མར་ཡང་དེ་གསུམ་ག་འབབ་ཀྱང་རོ་མ་ལ་
བལྟོས་ཏེ་ཁུ་བ་ཤས་ཆེ་བས་དེས་འབབ་པའི་རྩར་གསུངས་སོ། །དབུ་མར་ཡང་དེ་གསུམ་ག་འབབ་ཀྱང་སེམས་ཀྱི་བཞོན་པའི་རླུང་མེ་སད་བྱེད་དེར་འབབ་པ་ཤས་ཆེ་བས་རླུང་འབབ་པ་དང་སེམས་འབབ་པ་ཞེས་གསུངས་ལ། རོ་རྐྱང་གཉིས་ལ་བལྟོས་ཏེ་ཁུ་བའང་དེར་
འབབ་པ་ཤས་ཆེ་བས་ཤེས་རབ་ཟླ་བ་འབབ་པར་བཤད་པ། དེ་ནི་ཀུན་འདར་མར་རབ་གྲགས། །ཞེས་གསུངས་སོ། །དེ་ལྟར་ན་གང་ཞུ་བར་བྱ་བ་ནི་ཁུ་བ་དང་། དེ་ཞུ་བར་བྱེད་པ་ནི་ཁྲག་དང་། ཁྲག་འབར་བྱེད་ནི་རླུང་ཡིན་ལ། དེ་གསུམ་གའི་གཙོ་བོ་ཡང་ཨ་བ་དྷཱུ་ཏཱི་ན་གནས་
པ་ཡིན་ནོ། །རྒྱུད་རྡོ་རྗེ་ཕྲེང་བར་སྙིང་ག་དང་ལྟེ་པའི་འཁོར་ལོའི་དབུས་ན་མི་ཤིགས་པ་རེ་གནས་པར་བཤད་པ་ནི་ནཱ་ད་ལ་བཤད་དེ། བསྒྱུར་ན་སྒྲའམ་སྒྲ་ཙམ་ཞེས་པའོ། །སྤྱི་བོའི་ཧཾ་ཡིག་ལ་མི་ཤིགས་པར་སཾ་བྷུ་ཊ་ལས་བཤད་བས་མགྲིན་པའི་དབུས་སུའང་མི་ཤིགས་
པའི་ནཱ་ད་ཤེས་པར་བྱའོ། །དེའང་རྒྱུད་རྡོར་ཕྲེང་ལས། མི་ཤིགས་ནཱ་དའི་གོ་འཕང་ཅན། །རྣམ་རྟོག་ཐམས་ཅད་རྣམ་པར་སྤངས། །སྤྲུལ་གྱི་ལྕེ་ལྟར་གཡོ་བ་དང་། །ཚངས་ལ་སོགས་པའི་ཕ་མ་དང་། །ཟད་པ་མ་ཡིན་གཡོ་བ་ཡིན། །འབྱུང་བའི་ཚོགས་ནི་རྣམ་པར་
སྤངས། །གྲངས་བྲལ་ཟད་མེད་སྐྱེ་བ་མེད། །ལྟེ་བ་སྤྲུལ་བའི་འཁོར་ལོར་གནས། །ཞེས་གསུངས་པ་ནི་ཨ་ཐུང་ཞེས་གྲགས་པའི་གཏུམ་མོ་ཡིན་ཏེ། རྒྱུད་དེ་ཉིད་ལས། གང་ཕྱིར་མཁའ་འགྲོ་རྣམས་སྡུད་པ། །དེ་ཕྱིར་བསྡུས་པའི་མཁའ་འགྲོར་བརྗོད། །ལྟེ་བའི་དབུས་ན་
6-4-24a


རྟག་བཞུགས་པ། །ཉི་མ་སྟོང་དང་མཚུངས་པའི་འོད། །ཅེས་གསུངས་པའི་ཕྱིར་རོ། །འདི་ཉིད་སཾ་བྷུ་ཊར་བདག་མེད་མ་དང་། །དཔྱིད་ཐིག་ཏུ་རྡོ་རྗེ་ཕག་མོར་ཡང་བཤད་པས་མཁའ་འགྲོ་མ་རྣམས་བསྡུས་པའི་ངོ་བོའོ། །ཡང་དེ་ཉིད་ལས། ཆོས་ཀྱི་འཁོར་
ལོའི་པད་དབུས་ན། །སྒྲ་ཙམ་ཡང་དག་གནས་པ་ནི། །རྟོག་མེད་སྣང་བ་མེད་པ་དང་། །གཉིས་སུ་མེད་ཅིང་དྲི་མ་མེད། །དཔེ་བྲལ་བྱ་བ་མེད་པ་དང་། །གཞི་མེད་བླ་གབ་མེད་བ་དང་། །ཡེ་ཤེས་དབང་ཕྱུག་མཆོག་ཏུའོ། །འབྱུང་དང་རྡུབ་པ་རྣམ་པར་སྤངས། །ཞེས་གསུངས་སོ། །
སྙིང་གའི་མི་ཤིགས་པ་འདས་མཚོན་པའི་དོན་ན་དུ་མ་ཞིག་ཡོད་ཀྱང་ཀུན་རྫོབ་ཏུ་གནས་ཚུལ་ནི། ཡིད་ཀྱི་ཤེས་པའི་སེམས་དང་། སེམས་དེའི་རྟེན་ཐིག་ལེ་དཀར་དམར་གཉིས་དང་། རླུང་འོད་ཟེར་ལྔ་པ་འོད་གསལ་གྱི་རླུང་ཞེས་འགྲེལ་པ་ལས་བཤད། ལྷན་ཅིག་སྐྱེས་པའི་
རླུང་ནི་ཞེས་དེ་ཁོ་ན་ཉིད་གྲུབ་པ་ལས་འབྱུང་བའོ། །དེ་ལ་སྙིང་གི་པདྨའི་སྦུབས་ཀྱི་མཁའ་ལ་བཞུགས་པའི་ཡེ་ཤེས་རྡོ་རྗེ་ཞེས་ཀྱང་ཟེར་རོ། །རྒྱུད་དེ་ཉིད་ལས། གཙོ་བོ་ཆེན་པོ་མི་བསྐྱོད་བའི། །འཇིག་རྟེན་ཁམས་ནི་དེ་ཉིད་དོ། །དེར་ནི་རྟག་ཏུ་བཞུགས་པའི་ས། །སྲོག་གི་ཡེ་ཤེས་
མིང་ཅན་ཏེ། །ཞེས་སྲོག་འཛིན་གྱི་རླུང་ལ་གསུངས་ལ། འདི་སྣ་སྒོར་འབྱུང་འཇུག་མི་བྱེད་པར་གསུངས་པས་སྣ་བུག་གཉིས་ཀ་ནས་རྒྱུ་བའི་ཆུ་རླུང་ལ་སྲོག་འཛིན་དུ་བཤད་པ་དེ་མིན་གྱི། སྲོག་འཛིན་ཤིན་ཏུ་ཕྲ་བ་ས་ཆུ་ལ་ཐིམ་བ་ལ་སོགས་པའི་མཐར་རླུང་རགས་པ་རང་
བཞིན་ལ་ཐིམ་ནས་ཕྱིའི་སྣ་བུག་གི་རྒྱུ་བ་ཆད་ནས་སྟོང་པ་གསུམ་གྱི་དུས་དང་ཤི་བའི་འོད་གསལ་གྱི་དུས་སུའང་གནས་པའི་རླུང་དེ་ཡིན་ནོ། །འདི་ཉིད་ཡི་གེ་རུ་བཀོད་པ་ན་རྒྱུད་འདི་ལས་ཧཱུཾ་ཡིག་དང་ཨ་ཡིག་ཏུ་བཤད་པ་གཉིས་བྱུང་། སཾ་བྷུ་ཊ་ལས་སོགས་པ་ནས་ཧཱུཾ་ཡིག་
6-4-24b


ཏུ་བཤད་པ་ཤིན་ཏུ་མང་། སྤྱོད་བསྡུས་སུ་རྒྱུད་ཀྱི་ལུང་དྲངས་ནས་ཨ་ཡིག་ཏུ་བཤད་དོ། །འཁོར་ལོ་བཞིའི་ལྟེ་བར་བཀོད་པའི་ཡི་གེ་འདི་རྣམས་ལ་རྒྱ་གར་བ་དང་བོད་མང་པོས་གནས་དེ་ན་རྩ་ཡི་གེའི་རྣམ་པ་ཅན་རེ་ཡོད་པ་ཡིན་ཞེས་འདོད་དེ། དེ་ལྟན་ཡི་གེ་མཐུན
པ་མང་པོ་བཤད་པ་དང་འགལ་བས་མི་འཐད་དོ། །དེས་ན་མན་ངག་སྙེ་མ་ལས་ངོ་བོ་ནི་སྔར་བཤད་པའི་གཏུམ་མོའི་རྡུལ་ལ་སོགས་པ་ཡིན་ལ། དེ་ཨ་ཐུང་དང་ཧཱུཾ་རིང་པོ་དང་ཨོཾ་ཤིན་ཏུ་རིང་པོར་བཤད་པ་ནི་གནས་དེ་དག་ན་རླུང་དང་རྩ་ཕྲད་པས་དེ་དག་གི་གདངས་ཀྱི་རྣམ་
པ་ཅན་འབྱུང་བ་ཡིན་ལ། དབྱིབས་ཨ་ལ་སོགས་པ་བཤད་པ་ནི་བློས་བཏགས་བསྒོམ་པ་ལ་བཤད་དེ་ལེགས་པ་ཡིན་ནོ། །སྤྱོད་བསྡུས་སུ་མི་ཤིགས་པ་ལས་རླུང་འཇུག་གནས་ལྡང་གསུམ་གྱི་ངོ་བོར་གྱུར་པའི་ཡི་གེ་གསུམ་གྱི་གདངས་འབྱུང་བར་གསུངས་པ་ནི་
སྙིང་གའི་མི་ཤིགས་པ་དེ་རྣམས་ཀྱི་རྟེན་ཡིན་པ་ལ་དགོངས་ཀྱི་ད་ལྟ་དེ་ནས་ལྡང་འཇུག་བྱེད་པར་སྟོན་པ་མིན་ནོ། །སྙིང་གའི་རྩ་མདུད་གྲོལ་བའི་གནས་དེར་རླུང་སེམས་ཐིམ་པ་ནི་རྣམ་རྟོག་བརྒྱ་རྩ་དང་བརྒྱད་ཅུ་འགོག་པའི་གནས་དམ་པ་ཡིན་པས། རྣམ་རྟོག་གིས་མི་བསྐྱོད་
པས་མི་བསྐྱོད་པའི་ཞིང་དུ་བཤད་དེ་མི་བསྐྱོད་པ་ཐུགས་ཀར་འགོད་པའི་དགོས་པའང་དེས་ཤེས་པར་བྱའོ། །གནས་དེ་བདེ་བ་ཅན་གྱི་ཞིང་དུའང་བརྗོད་དེ་བདེ་བ་ཆེན་པོ་སྐྱེ་བའི་གནས་ཀྱི་མཆོག་དང་། བྱང་ཆུབ་ཀྱི་སེམས་ནི་འཆི་བ་འགོག་པས་ཚེ་དཔག་མེད་ཡིན་ལ། 
དེ་ལས་བྱུང་བའི་ཤེས་རབ་ཀྱི་འོད་མཐའ་ཡས་པའི་ཕྱིར་རོ། །འོད་དཔག་མེད་ཀྱི་ཞིང་དུའང་གསུངས་སོ། །མགྲིན་པའི་ནཱ་ད་ནི་ཨོཾ་ཡིག་གིས་མཚོན་པའི་ཁྲག་དང་བྱེ་བྲག་ཏུ་ནི་རླུང་ངོ་། །ནཱ་ད་དེ་དག་གིས་མཚོན་པའི་དོན་ནི་སྟོང་པ་དང་བདེ་སྟོང་དབྱེར་མེད་པ་ལ་སོགས་པ་
6-4-25a


མང་ངོ་། །ལུས་ཆགས་གནས་པའི་ཚུལ་བཤད་ཟིན་ཏེ། །གཉིས་པ་ནི། དེ་ལྟར་ལུས་ཆགས་ནས་གནས་པ་དེ་མཐར་འཆི་བའི་ཚེ་སྡུད་པ་དང་ནུབ་པ་དང་ཐིམ་པའི་རིམ་པ་ལ་རྩ་སྡུད་པའི་རིམ་པ་ནི། རྒྱུད་རྡོར་ཕྲེང་ལས། གྲངས་ནི་བདུན་ཅུ་རྩ་
གཉིས་བརྗོད། །རེ་རེའང་འཁོར་ནི་སྟོང་སྟོང་ངོ་། །ཐིམ་པ་ལོངས་སྤྱོད་བདག་པོར་འདོད། །གཙོ་བོ་ཡང་ནི་བསྡུས་པ་ལས། །གནས་རྣམས་ཀྱི་ནི་གྲངས་སུ་འགྱུར། །སླར་ཡང་བསྡུད་ནས་འགྲོ་བ་ནི། །གསུམ་དང་རྣམ་བརྒྱད་དབྱེ་བ་ཡིས། །ཉིན་དང་མཚན་མོའི་དབྱེ་བ་ཡིས། །
ཐུན་ཚོད་སྐད་ཅིག་སྦྱོར་བ་ཡིས། །རྩ་རྣམས་གོང་ནས་གོང་དུ་ནི། །ནང་དུ་འགྲོ་བར་ཤེས་པར་བྱ། །ཞེས་གསུངས་སོ། །དོན་གཉིས་རེ་རེ་ལ་སྟོང་དུ་འབྱེད་ཚུལ་ནི། གནས་ནས་ཉེ་བའི་དུར་ཁྲོད་ཀྱི་བར་བཅུ་ལ་རིགས་བརྒྱའི་དབྱེ་བས་འབྱེད་པ་དང་། སླར་ཡང་བསྡུས་ནས་འགྲོ་བ་
ནི་དོན་གཉིས་པོ་ཉེར་བཞིའི་ཁོངས་སུ་འགྲོ་བ་སྟེ་གཙོ་བོ་ཡང་ནི་ཞེས་པ་དང་འབྲེལ་ལོ། །གསུམ་དང་རྣམ་བརྒྱད་དབྱེ་བ་ནི་བརྒྱད་ལ་གསུམ་གྱིས་བསྒྱུར་ན་ཉེར་བཞིར་འགྲོ་བའོ། །ཉིན་མཚན་གྱི་དབྱེ་བ་ནི་ཆུ་ཚོད་ས་གཉིས་ཏེ་དེར་ཉེར་བཞི་སྡུད་དོ། །ཐུམ་ཚོད་ནི་རྩ་བརྒྱད་དེ་སོ་གཉིས་
ཀྱང་དེར་སྡུད་དོ། །བརྒྱད་ནི་སྐད་ཅིག་མ་གཅིག་ལ་སྡུད་པར་འགྲེལ་པས་བཤད་དོ། །གཙོ་བོ་ཡང་ནི་བསྡུས་ཞེས་སྔར་བཤད་པས་སླར་ཡང་བསྡུས་ཞེས་པ་ནི་ཉེར་བཞིའི་ཉིན་མཚན་ལ་ཐུན་བརྒྱད་དུ་ཕྱེ་བའི་རྩ་བརྒྱད་ལ་སྡུད་ཅིང་། བརྒྱད་པོའང་རྩ་གསུམ་ལ་སྡུད་
དོ། །སྐད་ཅིག་གི་དབྱེ་བ་ནི་སྔ་མ་ནས་ཕྱི་མར་སྡུད་པ་མྱུར་དུ་སྡུད་པའི་དོན་དུ་བྱས་ན་འཐད་པར་སེམས་སོ། །ཡང་དེ་ཉིད་ལས། གཙོ་བོ་གསུམ་པོ་སླར་ཡང་ནི། །སྦྱོར་བས་གཅིག་པ་ཉིད་དུ་འགྲོ། །ཞེས་པས་ནི་རོ་རྐྱང་གཉིས་ཀྱང་དབུ་མ་གཅིག་པུར་འགྲོ་བའོ། །
6-4-25b


དེ་ལྟར་སྡུད་པ་ནི་རྩ་ནང་ནས་རླུང་སྡུད་ཚུལ་ལ་འགྲེལ་པས་འཆད་དོ། །དང་པོ་ལས་ཀྱི་རྣལ་འབྱོར་པས། །ཕྲ་བ་དེ་ནི་ཤེས་པར་དཀའ། །བསམ་གྱིས་མི་ཁྱབ་མཆོག་ཏུ་ཕྲ། །ཐིག་ལེ་ནཱ་ད་རྣམ་པར་སྤངས། །བདེ་བ་ཀུན་གྱི་གཞི་གསང་བ། །སྲོག་གི་རྟེན་གྱི་མཚན་ཉིད་
དང་། །རྡོ་རྗེ་དབྱིངས་ཀྱི་དབང་ཕྱུག་དང་། །དུས་ཀྱི་རྩར་ནི་རྣམ་པར་བཤད། །རོ་གཅིག་གོ་འཕང་བདག་ཉིད་ཅན། །རྣལ་འབྱོར་མ་ཡི་རྒྱུད་ལས་ཤེས། །ཞེས་རྩ་རྣམས་ཀྱིས་རྣམ་རྟོག་བསྐྱེད་པའི་ནུས་པ་རིམ་གྱིས་བསྡུས་ནས་དབུ་མར་ཐིམ་པ་དེ་རིམ་པ་དང་པོའི་རྣལ་འབྱོར་
པས་རྟོགས་དཀའ་བར་གསུངས་པས་རྫོགས་རིམ་གྱི་རྣལ་འབྱོར་བའི་ཡུལ་དུ་བསྟན་ནོ། །དེའི་ཕྱིར་སྡུད་རིམ་འདི་རྫོགས་རིམ་བསྒོམས་པའི་སྟོབས་ཀྱིས་བསྡུས་པ་ཡིན་མོད་ཀྱང་འཆི་བའི་དུས་ལ་སྦྱོར་བ་མི་འགལ་ཏེ་ལམ་གྱིས་ཀྱང་འཆི་རིམ་བཞིན་དུ་སྡུད་པའི་
ཕྱིར་རོ། །སྲོག་གི་རྟེན་གྱི་མཚན་ཉིད་ཅེས་པས་ནི་དབུ་མ་གཞན་གྱིས་ནང་མིན་གྱི་སྲོག་རླུང་གི་རྟེན་སྙིང་གའི་རྩ་མདུད་ཀྱི་ནང་དུ་བསྟན་ཏོ། །འགྲེལ་བར། རྣལ་འབྱོར་མ་ཡི་ཞལ་ལས་ཤེས། །ཞེས་བཏོན་ནས་ཡེ་ཤེས་ཀྱི་མཁའ་འགྲོ་མའི་གདམས་ངག་ལས་རྟོགས་
པར་བྱ་བར་འཆད་དོ། །རླུང་སྡུད་པའི་རིམ་པ་ནི། རྒྱུད་དེ་ཉིད་ལས། ཇི་ལྟར་ཟླ་བ་གཟས་བཟུང་ལྟར། །རླུང་རྣམས་རིམ་གྱིས་ཉམས་འགྱུར་པ། །སྔ་མ་བཞིན་དུ་གོང་ནས་གོང་། །རང་གི་བདག་ཉིད་ཐིམ་པར་འགྱུར། །བཏང་བཟུང་སླར་ལ་འགྲོ་བར་བྱེད། །ཇི་ལྟར་
མེས་བསྲེགས་དངོས་པོ་མེད། །རྒྱུ་མེད་པར་ནི་ཐིམ་ནས་འགྲོ ། །ཞེས་གསུངས་ཏེ། བཏང་བཟུང་ནི་སྲོག་འཛིན་གྱི་རླུང་སྟེ་མཐར་དེ་ལ་ཐིམ་ནས་འགྲོ་བ་ནི་མེ་ཤི་བ་བཞིན་ནོ། །དེ་ལྟར་ན་རྩ་དང་རླུང་སྡུད་པའི་རིམ་པ་གཉིས་ཀྱིས་སྙིང་གར་སྡུད་པར་བཤད་ལ། དེའི་
6-4-26a


རྒྱུ་མཚན་གྱིས་བྱང་ཆུབ་ཀྱི་སེམས་དཀར་དམར་སྡུད་དགོས་པ་རྣམས་ཀྱང་སྙིང་གའི་སེམས་རྟེན་གྱི་ཐིག་ལེ་གཉིས་ཨ་ལ་སྡུད་ཅིང་། དེ་ནས་དེ་གཉིས་བྲལ་ནས་འཆིའོ། །སྔར་འོད་གསལ་ལས་རྣམ་ཤེས་དང་དེ་ལས་རླུང་སྐྱེ་བ་སོགས་
བཤད་པའི་འོག་ཏུ། ཇི་ལྟར་སྐྱེ་བ་དེ་ལྟའི་གནས། །ཐིམ་ནས་འགྲོ་བའི་རང་བཞིན་ཉིད། །ཅེས་སྔར་ཇི་ལྟར་སྐྱེས་པའི་རིམ་པ་བཞིན་དུ་སྡུད་པར་གསུངས་ལ། དང་པོར་སྙིང་ག་ནས་ཆགས་པ་བཞིན་དུ་མཐར་ཡང་དེར་སྡུད་པ་ཡིན་ནོ། །འོ་ན་དབང་པོ་ལྔ་དང་དེ་ལ་
བརྟེན་པའི་ཡན་ལག་གི་རླུང་ལྔའི་སྡུད་རིམ་དང་། རྣམ་གཞག་རིམ་པར་མིག་ནས་ལུས་དབང་གི་བར་སྔ་ཕྱིར་ཐིམ་པར་བཤད་པ་དང་འགལ་ཞིང་། རྩ་བའི་རླུང་ལྔའི་ཐོག་མར་ཁྱབ་བྱེད་ཀྱི་རླུང་ཐིམ་དགོས་ན་དེའང་མི་འཐད་དེ། རྒྱུད་འདི་ཉིད་ལས། འཆི་བའི་མཐར་ནི་
འབྱུང་བར་འགྱུར། །ཞེས་གསུངས་པས་སོ་སྙམ་ན། དེ་ལ་ཁམས་བཞི་ཆགས་པ་དང་ཕུང་པོ་རྣམས་དང་དེ་ལས་སྐྱེ་མཆེད་ཆགས་པར་བཤད་པའི་ཐིམ་རིམ་ནི་ཡན་ལག་གི་རླུང་ལྔ་ཐིམ་པ་དང་དབང་པོ་ལྔ་ཐིམ་པ་ནི་གནས་གཅིག་ལ། དེ་ཉིད་སྐྱེ་མཆེད་ཐིམ་པའང་
ཡིན་ནོ། །དེའི་རྗེས་སུ་རྩ་བའི་རླུང་ལྔ་རིམ་གྱིས་སྡུད་པ་ནི་ཕུང་པོ་ཐིམ་པའི་དོན་ནོ། །དེ་ལྟར་ན་དང་པོར་ཡན་ལག་གི་རླུང་ཐིམ་པའི་རིམ་པ་བྱུང་ན། ཆགས་པའི་དུས་ཀྱི་རིམ་པ་ཅི་འདྲ་བ་རང་མ་བྱུང་ཡང་སྐྱོན་མེད་དོ། །དེ་ལྟ་མ་ཡིན་ན་ཆགས་པའི་ཚེ་མཐར་
རང་བཞིན་གྱི་རྟོག་པ་རྣམས་འབྱུང་བར་བཤད་ལ། ཐིམ་པའི་ཚེ་ས་ནས་རིམ་གྱིས་ཐིམ་བའི་འོག་ཏུ་རང་བཞིན་ཐིམ་པར་གསུངས་པར་དང་འགལ་བར་འགྱུར་རོ། །ཁྱབ་བྱེད་འཆི་བའི་དུས་མིན་པ་སྣ་བུག་ནས་མི་རྒྱུ་བར་གསུངས་པས་དཀྱིལ་འཁོར་
6-4-26b


གཞན་བཞི་སྣ་བུག་ནས་རྒྱུ་བ་ཆད་པའི་འོག་ཏུ་ཁྱབ་བྱེད་རྒྱུད་བར་མངོན་ནོ། །དེའི་རྒྱུ་བ་ལོག་པའི་ཚེ་རླུང་རང་བཞིན་ལ་ཐིམ་ཞེས་པའི་སྐབས་སོ། །དེ་ནས་སྣང་བ་གཉིས་རིམ་གྱིས་ཐིམ་པའི་མཐར་འཆི་བའི་འོད་གསལ་འཆར་ལ། དེ་དུས་སུ་སྲོག་རླུང་ཕྲ་མོ་ཡོང་ལ་དེའི་དུས་
གཉིས་པ་ནས་རྣམ་ཤེས་འཕོ་བའི་ཚེ་སྙིང་གའི་སེམས་རྟེན་གྱི་རླུང་དང་ཐིག་ལེའང་གནས་ནས་འཕོའོ། །དེ་མ་ཐག་སྲོག་རླུང་ཤར་ཏེ་བར་དོ་གྲུབ་ནས་འཁོར་ལོ་བསྐོར་བ་བཞིན་དུ་འཁོར་ཏེ། རྒྱུད་རྡོར་ཕྲེང་ལས། སླར་ཡང་སྲོག་གི་རླུང་ཤར་ན། །ལས་ཀྱི་རླུང་ནི་སྣ་
ཚོགས་པ། །དེས་ནི་ལྷན་ཅིག་རྣམ་ཤེས་དང་། །སླར་ཡང་འཇིག་རྟེན་གསུམ་དུ་གནས། །དེ་ལས་ལས་དང་དེ་ལས་སྐྱེ། །དེ་ལས་ཆགས་སོགས་བག་ཆགས་དང་། །དེ་ལས་སླར་ཡང་འཆི་དང་སྐྱེ། །དེ་ལྟར་འཁོར་ལོ་བསྐོར་བ་འདྲ། །ཞེས་གསུངས་སོ། །འཆི་བའི་
དུས་སུའང་རྩ་དང་རླུང་ལ་སོགས་པ་མཐར་སྙིང་གའི་རྩ་མདུད་གྲོལ་བའི་གནས་སུ་སྡུད་པའི་དབང་གིས་སྡུད་རིམ་དེ་ལྟར་འོང་ངོ་། །རྡོར་ཕྲེང་གི་ལེའུ་གསུམ་པ་ལས། འཁོར་ལོ་གསུམ་ལ་ཁྱབ་པའི་རླུང་། །ཆོས་ཀྱི་འཁོར་ལོར་རྟག་ཏུ་གནས། །སྲོག་ཅེས་བྱ་བས་
འགྲོ་ལ་ཁྱབ། །རྣམ་རྟོག་མེད་པ་མཚན་ཕྱེད་ན། །ནམ་མཁའ་མཆོག་ལས་ཤར་ནས་ནི། །རླུང་གི་རང་བཞིན་འབྱེད་པར་བྱེད། །རླུང་དེ་དགུ་ཡི་རྣམ་པས་བརྒྱུད། །ཆོས་ཀྱི་འཁོར་ལོའི་རྣམ་ཐར་གནས། །མཚན་ཕྱེད་དུས་ནས་བརྩམས་ནས་ནི། །འཁོར་ལོ་
དྲུག་ལ་དགུ་བདག་ཉིད། །ཉི་མ་ཕྱེད་ཀྱི་མཐའ་རུ་ནི། །རླུང་རྣམས་ཀྱང་ནི་ལྡང་བར་བྱེད། །ཉི་མ་ཕྱེད་ནས་བརྩམས་ནས་ནི། །འཁོར་ལོ་དྲུག་ལ་དགུ་བདག་ཉིད། །མཚན་ཕྱེད་ཀྱི་ནི་དུས་ཀྱི་མཐར། །རླུང་རྣམས་གསལ་བར་རྒྱུ་བ་ན། །དེ་གཉིས་གནས་ཀྱི་
6-4-27a


དབྱེ་བ་ཡིས། །སྣ་ཚོགས་པ་ཡི་རྟོགས་པར་འགྲོ། །ཞེས་རླུང་བརྒྱ་རྩ་བརྒྱད་རྒྱུ་ཚུལ་གསུངས་སོ། །དེའང་ཁྱབ་བྱེད་ད་ལྟ་སྣ་བུག་ནས་རྒྱུ་བའི་བྱ་བ་མི་བྱེད་པས་དེ་དོར་བའི་ལྷག་མ་དགུ་འཁོར་ལོ་དྲུག་ལ་རྒྱུ་བའི་དབྱེ་བས་བརྒྱ་རྩ་བརྒྱད་དུ་བྱེད་པ་
རྣལ་འབྱོར་རྒྱུད་ཀྱི་ལུགས་དང་། སྤྲུལ་པའི་འཁོར་ལོ་ལ་སོགས་པའི་འཁོར་ལོ་བཞི་ལ་དགུ་བཞི་སོ་དྲུག་རྒྱུ་བ་ལ་འཇུག་གནས་ལྡང་གསུམ་གྱིས་བསྒྱུར་བས་བརྒྱ་རྩ་བརྒྱད་དུ་བྱེད་པ་རྣམས་མའི་རྒྱུད་ཀྱི་ལུགས་སུ་འགྲེལ་པས་འཆད་དོ། །འགྲེལ་པའི་
གཞུང་ལ་ཉི་མ་ཕྱེད་ཅེས་པ་ནས། རླུང་རྣམས་གསལ་བར་རྒྱུ་བ་ན། །ཞེས་པའི་བར་མེད་ལ། ཐུན་ཕྱེད་དུས་ནས་བརྩམས་ནས་ནི། །འཁོར་ལོ་དྲུག་ལ་དགུ་བདག་ཉིད། །ཐུན་ཕྱེད་ཀྱི་ནི་མཐའ་ཉིད་དུ། །ཞེས་བཏོན་ནས། ཐུན་ཕྱེད་ནི་བསྟན་བཅོས་ལས་
ཆུ་ཚོད་བཞིར་གྲགས་ལ་འཇིག་རྟེན་པ་ལ་དབྱུ་གུ་བརྒྱད་དུ་གྲགས་པར་འཆད་དོ། །ལེའུ་བཅུ་དྲུག་པ་ནས་ཉིན་ཞག་གཅིག་ལ་ཆུ་ཚོད་དྲུག་ཅུར་གསུངས་ལ། དབྱུ་གུ་ཡང་དེ་བཞིན་དུ་གསུངས་པ་ནི་འོད་གསལ་གྱི་ཆུ་ཚོད་བཞི་ཕྲི་བ་ཡིན་ཞེས་འཆད་དོ། །དེ་
ལྟ་ན་ཉིན་ཞག་གཅིག་ལ་ཐུན་ཕྱེད་པ་བརྒྱད་དུ་བྱེད་ན་ཆུ་ཚོད་སོ་གཉིས་ལས་མེད་པས་ཉུངས་ལ། ཐུན་ཕྱེད་ཉེར་བཞིར་བྱེད་ན་ནི་མངས་ཤིང་། ཐུན་ཕྱེད་བཅུ་དྲུག་ཏུ་བྱེད་ནའང་ཆུ་ཚོད་རེ་བཞིར་འགྱུར་བ་དང་། འཁོར་ལོ་རེ་རེ་རླུང་རེ་རེ་ཐུན་ཕྱེད་དུ་བྱེད་
ནའང་མི་འགྲིག་གོ། །དེས་ན་མཚན་ཕྱེད་དང་ཉིན་ཕྱེད་ཅེས་པའི་འགྱུར་ལེགས་པས། མཚན་ཕྱེད་ནས་ཉིན་ཕྱེད་ཀྱི་བར་ལ་ཆུ་ཚོད་སུམ་ཅུ་ཡོད་པ་དེ་ལ་དྲུག་གིས་འགོས་པས་ཆུ་ཚོས་ལྔ་ལྔ་ཐོབ་པས་དེའི་རིག་ལ་འཁོར་ལོ་རེ་ནས་རླུང་དགུ་དགུ་རྒྱུའོ། །
6-4-27b


དེའི་མགོ་ནི་ལྟེ་བ་ནས་འཛུགས་པར་བཤད་ཅིང་ནམ་མཁའ་མཆོག་ཀྱང་ལྟེ་བའི་དབུས་ལ་འཆད་མོད་ཀྱང་ཆོས་ཀྱི་འཁོར་ལོར་གནས་པའི་སྲོག་གི་རླུང་ནམ་མཁའི་ལ་ཤར་ནས་རྒྱུ་བར་གསུངས་པས་སྙིང་གནས་མགོ་འཛུགས་པར་གསལ་ལོ། །རྣམ་རྟོག་མེད་པ་ནི་སྲོག་
རླུང་བ་མས་པ་ལ་བྱེད་པ་དང་། འབྱེད་པར་བྱེད་པ་ལ་འཇོམས་པར་བྱེད་ཅེས་འཆད་དོ། །འོན་ཀྱང་ཤར་ནས་ནི་འབྱེད་ཅེས་བཤད་དགོས་པས་རྒྱུ་བ་ལ་བྱའོ། །འགྲེལ་པར། ཆོས་ཀྱི་འཁོར་ལོའི་རྩ་དབྱེ་བ། །ཞེས་བསྒྱུར་བ་ལྟར་ལེགས་པར། རླུང་དེ་དགུའི་གྲངས་ཀྱིས་
རྒྱུ་བའི་རྒྱུ་མཚན་ཆོས་འཁོར་ལ་རྩ་འདབ་བརྒྱད་ལྟེ་བ་དང་དགུའི་དབྱེ་བས་ཡིན་པར་འཆད་དེ་ལེགས་སོ། །དེའང་འཁོར་ལོ་དྲུག་གི་དབུས་ནས་སྲོག་རླུང་དང་། མེ་རླུང་གི་འཁོར་ལོ་གཉིས་མ་གཏོགས་པ་བཞི་ལ་རྩ་བའི་ལྷག་མ་གསུམ་དང་། ཡན་ལག་གི་རླུང་ལྔ་
རང་རང་གི་རྩ་འདབ་བརྒྱད་བརྒྱད་ལ་རྒྱུ་བ་དང་། མེའི་འཁོར་ལོའི་འདབ་མ་གསུམ་ལ་རྩ་དབུ་མ་ལ་བརྟེན་པའི་མདུད་པ་གསུམ་དང་འདབ་མ་གསུམ་སྟེ་དྲུག་དབུས་དང་བདུན་ནུ་མ་གཡས་གཡོན་གཉིས་ཀྱི་རྩ་གཉིས་ཏེ་དགུ་དང་། རླུང་གི་འཁོར་ལོ་ལ་འདབ་མ་དྲུག་
དབུས་ཏེ་བདུན། སྨིན་མ་གཡས་གཡོན་གྱི་མཚམས་ཀྱི་རྩ་གཉིས་ཏེ་དགུ་ལ་བརྟེན་ནས་རླུང་དགུ་དགུ་རྒྱུའོ། །དཀྱིལ་འཁོར་བཞིའི་རླུང་རྒྱུ་ཚུལ་གཞན་དང་འདྲ་ལ། ཡན་ལག་གི་རླུང་ལྔ་ནི་སྲོག་རླུང་གི་ངོ་བོར་གསུངས་པས་སྣ་གཉིས་ཀ་ནས་རྒྱུ་བའམ། ཡང་
ན་ཆ་མཉམ་དུ་བྱའོ། །རིམ་པ་ནི་འགྲེལ་པ་བལྟར་ན་ལྟེ་བའི་རྗེས་སུ་སྙིང་ག་དེ་ནས་མེ་འཁོར་དེ་ནས་ལོངས་སྤྱོད་ཀྱི་འཁོར་ལོ། དེ་ནས་རླུང་འཁོར་དེ་ནས་བདེ་ཆེན་གྱི་འཁོར་ལོ་དེ་ནས་ཡང་ལྟེ་བ་ནས་རྒྱུའོ། །ཡང་ན་སྙིང་གའི་རྗེས་ལ་མེ་འཁོར་ནས་རིམ་པ་
6-4-28a


བཞིན་ལྟེ་བའི་བར་དུ་བྱའོ། །རླུང་དེ་རྣམས་གནས་རྣམས་སུ་རྒྱུ་བ་ན་དུག་གསུམ་ལ་སོགས་པའི་རྣམ་རྟོག་བརྒྱ་རྩ་བརྒྱད་བསྐྱེད་པར་གསུངས་སོ། །དེ་ལྟར་ན་ཉིན་ཞག་གཅིག་གི་རླུང་ཡང་དང་པོ་སྙིང་ག་ནས་ཤར་ནས་མཐར་དེ་རུ་སྡུད་པ་ཡིན་
ནོ། །ད་ནི་དེ་རྣམས་འཕགས་པ་ཡབ་སྲས་ཀྱི་གཞུང་དང་སྦྱར་བར་བྱ་སྟེ། སེམས་ཅན་ཀུན་གྱི་སྲོག་ཏུ་གྱུར་པའི་རླུང་འདི་ནི་རྣམ་ཤེས་ཀྱི་བཞོན་པ་སྟེ་དེ་ནི་རླུང་གི་ངོ་བོའོ། །དེ་ལ་དབྱེ་ན་སྲོག་འཛིན་ལ་སོགས་པའི་རླུང་ལྔའི་བདག་ཉིད་དེ་ལྔར་ཡོད་ལ། དེ་ཙམ་
དུ་མ་ཟད་རྒྱུ་བ་ལ་སོགས་པ་ཡན་ལག་གི་རླུང་ལྔར་ཡང་དབྱེར་ཡོད་བས་བཅུའང་ཡིན་ནོ། །བྱེད་ལས་ནི་ལས་ཀུན་བྱེད་པ་ཞིག་སྟེ་གཞུང་འདི་ནི་དགོངས་པ་ལུང་སྟོན་དང་སྡོམ་འབྱུང་ལས་ཅི་རིགས་སུ་འབྱུང་ངོ་། །དེ་ལ་ཐ་མལ་པ་དང་རྣལ་འབྱོར་པའི་རྒྱུད་ལ་རླུང་
དང་ཡི་གེ་གསུམ་གྱིས་ལས་ཇི་ལྟར་བྱེད་པ་ནི། སྤྱོད་བསྡུས་སུ་རྒྱས་པར་གསུངས་ཏེ་རིམ་ལྔར་མི་གསལ་བ་གསལ་བར་བྱེད་པའོ། །སྤྱོད་བསྡུས་སུ་རླུང་བཅུས་ཐ་མལ་པ་དང་རྣལ་འབྱོར་བའི་རྒྱུད་ལ་ལུས་གནས་པའི་ཚེ་བྱ་བ་བྱེད་ཚུལ་མང་དུ་གསུངས་
ནས། མཐར་མི་ཤིགས་པ་ཐོབ་ནས་དངོས་པོ་མེད་པར་འགྱུར་རོ། །ཞེས་གསུངས་པའི་མི་ཤིགས་པ་ནི་སྔར་བཤད་པ་ལྟར་ཡིན་ལ། ད་ཐོབ་པ་ནི་སྡུད་པའི་རིམ་གྱིས་དེར་ཐིམ་པའོ། །ཡི་གེ་གསུམ་གྱི་བྱ་བ་སྟོན་པའི་སྐབས་སུའང་དེ་ལྟར་ལུས་ལ་གནས་
པའི་སྐབས་སུ་ཐམས་ཅད་བྱས་ཏེ་མཐར་མི་ཤིགས་པར་ཞུགས་ནས་ཡང་ཐ་མལ་པའི་ལུས་ལ་བརྟེན་ཏེ་དེ་བཞིན་དུ་ཐམས་ཅད་བྱེད་དོ། །ཞེས་གསུངས་པའང་དེ་ཉིད་དོ། །རིམ་ལྔར་ཡང་། སོ་སོར་བརྗོད་པའི་སྔགས་འདི་དག །དངོས་མེད་ངོ་བོ་ལས་བྱུང་བའོ།
6-4-28b


ཞེས་པས་འོད་གསལ་གྱི་རླུང་སེམས་ལ་ལྡང་འཇུག་གནས་གསུམ་འབྱུང་བར་བསྟན་ཞིང་། རང་སྔགས་སྙིང་གར་བསམས་ནས་ནི། །སྲོག་ནི་ཐིག་ལེར་གྱུར་པར་གཞག །ཅེས་པས་རླུང་རྣམས་མཐར་སྙིང་གའི་མི་ཤིགས་པའི་ཐིག་ལེ་ལ་སྡུད་པར་བཤད་དོ། །དང་པོ་
གཅིག་ནི་དགུ་དགུས་ན། །ཞེས་པའི་ཚིགས་བཅད་གཉིས་དང་། ཐུང་ངུ་མ་ལུས་དག་ཏུ་འགྱུར། །ཞེས་པས་ཀྱང་དོན་དེ་ཉིད་སྟོན་ཏེ། དེའང་རྟོགས་དཀའ་བས་སྤྱོད་བསྡུས་སུ་གསལ་བར་མཛད་དེ། ཨ་ཐུང་ངག་ཚིག་ཐམས་ཅད་ཀྱི་སྲོག་ཏུ་ཞུགས་ནས་འཇིག་རྟེན་དང་འཇིག་
རྟེན་ལས་འདས་པའི་བསྟན་བཅོས་ཀྱི་བར་གྱི་ངག་ཐམས་ཅད་འགྲུབ་པའི་སྒོ་ནས་ཐུང་དུ་ནི་ངག་མ་ལུས་པར་འགྱུར། །ཞེས་པ་སྐྲ་པས་ཤེས་ཀྱང་དེའི་དེ་ཁོ་ན་ཉིད་མི་ཤེས་པ་དང་། དེའང་ཨ་ནི་ཡིག་འབྲུ་ཀུན་གྱི་མཆོག །ཅེས་སོགས་དང་། བསམ་གཏན་ཐམས་
ཅད་ཀྱི་སྒོར་གསུངས་པས་སྐྱེ་བ་མེད་པའི་དོན་ནི་དེའི་དེ་ཁོ་ན་དང་། ཁྱད་པར་དུ་སྙིང་གི་དབུས་ན་གནས་པའི་ལྷན་ཅིག་སྐྱེས་པའི་ཨ་ཡིག་ཏུ་གསུངས་ཏེ། དེ་དག་གི་དོན་སྔར་བཤད་དོ། །དེས་ན་དགོངས་པ་ལུང་སྟོན་གྱིས་ཨ་ཐུང་དག་ཀུན་གྱི་རྒྱུ་དང་ཁྱབ་བྱེད་དུ་གསུངས་
པ་ནི་ངག་ཚིག་གི་སྲོག་ཏུ་ཞུགས་པ་ཙམ་མིན་གྱི། དེས་མཚོན་པའི་དོན་ལྷན་སྐྱེས་ཀྱི་རླུང་སེམས་སྙིང་ག་ན་གནས་པ་དེ་ཉིད་འཁོར་འདས་ཀུན་གྱི་རྩ་བ་དང་། དེར་རླུང་སེམས་འདུ་བ་ཤེས་པའི་དོན་ཡིན་ཏེ། རྒྱུད་དེ་ལས་སྔགས་གསུམ་བཏུས་པ་ནི་ཕྱིའི་སྔགས་
ལ་མི་བྱེད་པར་ནང་གི་སྔགས་རླུང་འཇུག་གནས་ལ་གསུངས་པའི་ཕྱིར་རོ། །དེའི་ཕྱིར་དེའི་རྩ་བར་བཤད་པའི་ཨ་ཐུང་ནི་མི་ཤིགས་པའི་ཐིག་ལེ་ཡིན་པར་ཤེས་སོ། །སྤྱོད་བསྡུས་སུ་རིམ་ལྔར་མ་དྲངས་པའི་དགོངས་པ་ལུང་སྟོན་གྱི་གཞུང་། ཇི་སྲིད་འཇིག་
6-4-29a


རྟེན་བརྟགས་པ་དང་། །ཞེས་པ་ནས། ས་བོན་ལྟ་བུར་བཤད་པ་ཡིན། །ཞེས་པའི་བར་གྱིས་རླུང་གིས་ཐམས་ཅད་བསྐྱེད་པར་བསྟན་ནོ། །གསུམ་པ་ནི། དེ་ལྟར་སྐྱེ་ཤིའི་རིམ་པ་བཤད་པ་དེ་རྟོགས་པ་ལ་བརྟེན་ནས་ལུས་ལ་གནད་དུ་བསྣུན་པའི་
ལམ་བསྐྱེད་ལུགས་ཇི་ལྟར་ཤེས་ཤེ་ན། རིམ་ལྟར། ཇི་ལྟར་ཆུ་འཛིན་དུ་མ་ནི། །དབྱིབས་དང་མདོག་ནི་སྣ་ཆོགས་རྣམས། །ནམ་མཁའི་དབྱིངས་སུ་བྱུང་ནས་ནི། །དེ་ཉིད་དུ་ནི་ཐིམ་པར་འགྱུར། །དེ་བཞིན་རང་བཞིན་ཐམས་ཅད་ནི། །སྣང་བ་གསུམ་གྱི་རྒྱུ་ཅན་ཏེ། །
མ་ལུས་ཡུལ་ལ་ཞུགས་ནས་ནི། །འོད་གསལ་བར་ནི་འཇུག་པར་འགྱུར། །དེ་འདྲའི་རང་བཞིན་མ་ཤེས་པས། །མི་ཤེས་མུན་པས་ཁེབས་པ་རྣམས། །དགེ་དང་མི་དགེའི་ལས་བྱས་ནས། །འགྲོ་བ་ལྔར་ནི་འཁོར་བར་འགྱུར། །ཞེས་སྔར་བཤད་པ་ལྟར་གྱི་
འཁོར་བའི་རིམ་པ་མི་ཤེས་པས་འཁོར་བར་འབྱུང་བ་དང་། ཡང་དེ་ཉིད་ལས། རང་བཞིན་སྣང་བའི་སྦྱོར་བ་ནི། །གང་གི་སྐྱེ་བོ་ཉོན་མོངས་པས། །དེ་ཉིད་ཤེས་ནས་ཡེ་ཤེས་ཅན། །སྲིད་པའི་གཟེབ་ལས་གྲོལ་བར་འགྱུར། །ཞེས་རང་བཞིན་དང་སྣང་བ་
གཉིས་རྒྱུ་འབྲས་སུ་སྦྱོར་བ་གང་གིས་སེམས་ཅན་ཉོམ་མོངས་པར་བྱས་པ་དེ་ཤེས་པའི་ཡེ་ཤེས་ཅན་ནི་གྲོལ་བར་གསུངས་ལ། སྦྱོད་བསྡུས་ལས་ཀྱང་། དེ་ལྟར་བཤད་པའི་རྒྱུད་ལ་བརྟེན་ནས་རང་བཞིན་སྣང་བའི་རྗེས་སུ་འབྲངས་ནས། རང་གི་སེམས་ཡང་དག་
པ་ཇི་ལྟ་བ་བཞིན་དུ་མ་རྟོགས་པར་ལས་སུ་སྨྲ་བའི་སེམས་ཅན་རྣམས་འཁོར་བ་ཐོག་མ་མེད་པའི་རང་གི་རྣམ་པར་རྟོགས་པ་ལས་བྱུང་བའི་ཉོན་མོངས་པ་དང་ལས་ཀྱི་འཆིང་བས་དར་གྱི་སྲིན་བུ་བཞིན་དུ་རང་བཞིན་དུ་རང་ཉིད་ཀྱིས་སྡུག་བསྔལ་གྱི་ཕུང་པོ་མངོན་
6-4-29b


པར་འདུ་བྱས་ནས། སྐྱེ་བ་གཅིག་ནས་གཅིག་ཏུ་ཉེ་བར་བསགས་པའི་དགེ་བ་དང་མི་དགེ་བའི་ལས་རྣམས་ཀྱི་འབྲས་བུ་རྣམ་པར་སྨིན་པ་སྨྱོང་ནས་ཡང་དོན་དམ་པའི་དཀྱིལ་འཁོར་ལ་འཇུག་པའི་རིམ་པས་ཕུག་པོ་ཡོངས་སུ་སྤངས་ཏེ། རླུང་གི་ཁམས་ཀྱིས་བླངས་
ནས་ཚོར་བ་དང་ལྡན་ཞིང་སྲིད་བས་རྗེས་སུ་བཅིངས་ལ་ཆོས་ཀྱི་དབྱིངས་ཀྱི་རྒྱུ་མཐུན་པ་ལས་བྱུང་བའི་དྲན་པས་ཡོངས་སུ་བཟུང་བ། དགེ་བ་དང་མི་དགེ་བའི་རྣམ་བའི་ཡིད་དང་ལྡན་པ། བྱིས་པ་ལོ་ལྔ་པ་དང་དྲུག་པ་ལྟ་བུ་ཐམས་ཅད་མཐོང་བ། དབང་པོ་ཐམས་ཅད་
ཚང་བ། དྲིའི་ཟས་ལ་སྤྱོད་པ། རྡོ་རྗེ་ལ་སོགས་པས་ཀྱང་མི་ཟློག་པ། མཚན་ཉིད་ཐམས་ཅད་དང་ལྡན་པ། ལས་ཀྱི་རྫུ་འཕྲུལ་གྱི་ཤུགས་དང་ལྡན་པ། ཞག་བདུན་ནོ་འགྲོ་བའི་བར་དུ་གནས་ནས་རང་གི་རྣམ་པར་རྟོག་པ་ལས་བྱུང་བའི་ལས་དགེ་བ་དང་མི་དགེ་བས་བསྐུལ་བར་
གྱུར་པས་རྒྱུ་དང་རྐྱེན་ཐོབ་ནས། འགྲོ་བ་ལྔ་རྣམས་སུ་ཟོ་ཆུན་འཁྲུལ་འཁོར་གྱི་ཚུལ་གྱིས་ཡང་དང་ཡང་དུ་ཉིང་མཚམས་སྦྱོར་བ་ལེན་པར་བྱེད་ཅིང་འཁོར་བའི་སྡུག་བསྔལ་རྗེས་སུ་མྱོང་བར་འགྱུར་རོ། །ཞེས་གསུངས་སོ། །དོན་དམ་པའི་དཀྱིལ་འཁོར་ལ་
འཇུག་པའི་རིམ་པ་ནི་ཕུང་སོགས་རིམ་གྱིས་ཐིམ་ནས། ས་ཆུ་ལ་ཐིམ། ཆུ་མེ་ལ་ཐིམ། མེ་རླུང་ལ་ཐིམ། རླུང་རགས་པ་རང་བཞིན་ལ་ཐིམ། རང་བཞིན་སྣང་བ་ལ་ཐིམ། སྣང་བའང་མཆེད་པ་ལ་ཐིམ། མཆེད་པ་ཉེར་ཐོབ་ལ་ཐིམ་ཉེར་ཐོབ་འོད་གསལ་ལ་ཐིམ་པ་
ཡིན་ཏེ། དེའང་སྔར་བཤད་པ་ལྟར་རྩ་དང་རླུང་དང་ཁམས་སྡུད་དགོས་པ་རྣམས་རིམ་གྱིས་དབུ་མར་ཞུགས་ཏེ། སྙིང་གའི་དབུ་མའི་རྩ་མདུད་གྲོལ་བའི་གནས་སུ་མི་ཤིགས་པ་ལ་ཐིམ་པའོ། །ཆོས་ཀྱི་དབྱིངས་ཀྱི་རྒྱུ་མཐུན་ལས་བྱུང་བ་ནི་བར་དོ་དེ་ཤི་བའི་འོད་
6-4-30a


གསལ་ལས་བྱུང་བའོ། །དེ་ལྟར་ན་སྔགས་དང་མཚན་ཉིད་གཉིས་ཀའི་ལུགས་ཀྱིས་འཁོར་བར་འཇུག་རིམ་ཐུན་མོང་བ། སེམས་ཀྱི་དེ་ཁོ་ན་ཉིད་བདག་མེད་པའི་དོན་མ་རྟོགས་པར་བདག་ཏུ་བཟུང་བའི་དབང་གིས་ཉོན་མོངས་གཞན་རྣམས་
བསྐྱེད་ཅིང་། དེས་ལས་བསགས་ཏེ་འཁོར་བ་དང་། བླ་མེད་ཀྱི་གཞུང་ནས་བཤད་པའི་ཐུན་མོང་མ་ཡིན་པའི་འཁོར་ཚུལ་སྙིང་གའི་མི་ཤིགས་པའི་ཐིག་ལེ་ལས་བྱུང་བའི་རླུང་གིས་རྣམ་རྟོག་བསྐྱེད་ནས་ལས་བསགས་ཏེ། སྐྱེ་བ་ལེན་པ་དང་མཐར་ཡང་དེ་ཉིད་དུ་རིམ་གྱིས་
ཐིམ་པའི་ཚུལ་མ་ཤེས་ན་འཁོར་བར་འཆིང་ལ། དེ་གཉིས་ལེགས་པར་ཤེས་ནས་འཁོར་བ་ལས་གྲོལ་བར་གསུངས་སོ། །དེ་ལ་ཐུན་མོང་བའི་སྐྱེ་འཆིའི་རིམ་པ་ཤེས་ན་དེ་ལྡོག་པ་ལ་བདག་མེད་པའི་ལྟ་བ་དབུ་མ་ནས་བཤད་པ་བཞིན་དུ་འཚོལ་དགོས་པར་ཤེས་ནས་བདག་
མེད་པའི་ལྟ་བ་ཕུ་ཐག་ཆོད་པར་བྱེད་དོ། །ཐུན་མོང་མ་ཡིན་པའི་སྐྱེ་འཆིའི་རིམ་པ་ཤེས་པ་ལ་བརྟེན་ནས་ནི། སྐྱེ་འཆི་ཟློག་པ་ལ་རྣམ་རྟོག་བསྐྱེད་པའི་ལས་ཀྱི་རླུང་བཟློག་པའི་ཐབས་ཁྱད་པར་ཅན་ཞིག་ཤེས་དགོས་པར་མཐོང་ངོ་། །དེའང་འཁོར་བ་ལས་གྲོལ་བ་ཙམ་ལ་དེ་དགོས་
པ་མ་ཡིན་ཏེ། ཉན་ཐོས་དང་རང་རྒྱལ་བས་ཀྱང་སྔགས་ཀྱི་ཐབས་ཁྱད་པར་ཅན་ལ་མ་བརྟེན་ཀྱང་འཁོར་བ་ལས་གྲོལ་བ་ཐོབ་པའི་ཕྱིར་རོ། །དེས་ན་འཁོར་བར་འཁོར་བའི་རྒྱུ་ཉོན་མོངས་ཟད་པ་ཙམ་དུ་མ་ཟད་དེའི་བག་ཆགས་ཐམས་ཅད་ཀྱང་སྦྱོང་བར་འདོད་པ་ཡིན་ལ། དེའང་
ཕ་རོལ་ཏུ་ཕྱིན་པ་ལྟར་བསྐལ་པ་མང་པོས་བསྒྲུབ་པ་མ་ཡིན་གྱི་མྱུར་དུ་འཚང་རྒྱ་བར་འདོད་པའོ། །འདོད་ཆགས་དང་ཞེ་སྡང་ལ་སོགས་པའི་རྣམ་རྟོག་འཁོར་བར་འཆིང་བྱེད་རྣམས། བདག་འཛིན་ལས་སྐྱེ་བར་ཕར་ཕྱིན་གྱི་ཐེག་པར་གསུངས་པ་དེ་བཀག་ནས། དེ་རྣམས་
6-4-30b


ལས་ཀྱི་རླུང་ལས་སྐྱེ་བར་སྟོན་པ་མ་ཡིན་གྱི་བདག་ཏུ་འཛིན་པས་ཉེར་ལེན་གྱི་རྒྱུ་བྱས་ནས་དེ་དག་བསྐྱེད་པའི་ཚེ། ལས་ཀྱི་རླུང་གིས་དེའི་ལྷན་ཅིག་བྱེད་རྐྱེན་བྱེད་བས་དེའི་ནུས་པ་འགོག་པ་ཡིན་ནོ། །དེས་ན་བདག་ཏུ་འཛིན་པས་འཁོར་བ་བསྐྱེད་པའི་ཉེར་ལེན་གྱི་ཕུང་པོ་འགོག་པའི་
ཐབས་དམ་པ་བདག་མེད་རྟོགས་པའི་ཤེས་རབ་དང་བྲལ་ན། ལས་རླུང་གིས་ལྷན་ཅིག་བྱེད་རྐྱེན་བྱེད་པའི་ནུས་བ་རགས་པ་རེ་ཞིག་ལོག་ཀྱང་། སྲིད་པ་ལས་གྲོལ་མི་ནུས་པས་གཉིས་ཀ་དགོས་སོ། །དེ་ལྟ་བུའི་ལམ་སྔ་མ་ལ་ནི་རྩད་ནས་འབྱིན་པའི་ནུས་པ་ཡོད་ལ། དེ་ལམ་ཕྱི་མ་
དང་བསྡོམས་པ་ན་མྱུར་དུ་རྩད་ནས་འབྱིན་ནུས་པས་ལམ་མྱུར་བ་ཡིན་ནོ། །དེ་ལ་བླ་མེད་ཀྱི་རྒྱུད་གཉིས་དང་དེའི་དགོངས་འགྲེལ་ཁུངས་ཐུབ་ཀྱི་གཞུང་ནས་དངོས་སུ་བཤད་པ་གསལ་མི་གསལ་ཅི་ཡོད་ཀྱང་། རྫོགས་རིམ་གྱི་དུས་སུ་ལས་ཀྱི་རླུང་རྩ་གཡས་གཡོན་ལ་རྒྱུ་བ་བཀག་ནས་དབུ་མར་
བཅུག་སྟེ་ཞི་བར་བྱེད་པ་ལ་ཁྱད་པར་མེད་པར་མཐུན་ན། །རྣལ་འབྱོར་མའི་རྒྱུད་རྣམས་ལས་ནི་དེ་མང་དུ་གསལ་བར་གསུངས་ལ། རྣལ་འབྱོར་གྱི་རྒྱུད་གསང་བ་འདུས་པ་ལས་དངོས་སུ་མི་གསལ་ཡང་། བཤད་པའི་རྒྱུད་རྡོ་རྗེ་ཕྲེང་བས་ཡང་དང་ཡང་དུ་གསལ་བར་འཆད་པའི་ཕྱིར་རོ། །དེས་
ན་རྫོགས་རིམ་གྱིས་འོད་གསལ་སྟོང་པ་ཉིད་ལ་འཇུག་པའི་རིམ་པ་ནི་འཆི་རིམ་བཞིན་དུ་འོང་སྟེ། སྔར་བཤད་པ་ལྟར་འཆི་བའི་དུས་སུའང་རླུང་ལ་སོགས་པ་དབུ་མར་སྡུད་པའི་རྒྱུ་མཚན་གྱིས་ཐིམ་རིམ་དེ་ལྟར་འབྱུང་བའི་ཕྱིར་རོ། །དངོས་པོ་ལ་དེ་ལྟར་གནས་ཀྱང་རྒྱུད་དང་དེའི་དགོངས་
འགྲེལ་གྱི་བཤད་ཚུལ་ལ་ནི་གསང་འདུས་ཀྱི་སྐོར་མ་གཏོགས་པ་གཞན་དུ་གཞི་དུས་སུ་ཐིམ་རིམ་དང་། ལམ་དུས་ཀྱི་ཐིམ་རིམ་གྱིས་སྟོང་པ་བཞི་སྐྱེ་བ་མི་རྒྱས་སོ། །སྤྱོད་བསྡུས་ལས། ངག་དབེན་གྱི་སྐབས་སུ་རླུང་རྣམས་མཐར་མི་ཤིགས་པར་ཞུགས་ནས་འོད་གསལ་
6-4-31a


དངོས་པོ་མེད་པར་འཇུག་པ་དང་། སེམས་དབེན་གྱི་སྐབས་སུ་སྔར་དྲངས་བ་ལྟར་ཡེ་ཤེས་རྡོ་རྗེ་ཀུན་ལས་བཏུས་པའི་ལུང་དྲངས་ནས། ཤི་བའི་འོད་གསལ་ལས་སྐྱེ་བའི་རིམ་པ་དང་། དེ་དག་ལས་དོན་དམ་པའི་དཀྱིལ་འཁོར་འོད་གསལ་དུ་འཇུག་པར་བསྟན་པས་
གཞི་དུས་ཀྱི་ཐིམ་རིམ་དང་། མངོན་པར་བྱང་ཆུབ་པའི་སྐབས་སུ་ནང་གི་མངོན་བྱང་འཆད་པའི་སྐབས་དང་། ཤིན་ཏུ་སྤྲོས་མེད་ཀྱི་སྤྱོད་པའི་སྐབས་སུ་ལམ་དུས་ཀྱི་ཐིམ་རིམ་གྱི་སྒོ་ནས་གསལ་དུ་འཇུག་ཚུལ་བསྟན་ནོ། །དཔལ་ཀླུའི་བྱང་ཆུབ་ཀྱིས་ལས་མཐའ་རྣམ་འབྱེད་དུ་ས་
ཆུ་ལ་ཐིམ་པ་སོགས་གསལ་བར་བསྟན་ཞིང་། རྣམ་གཞག་རིམ་པའི་དོན་དམ་པའི་དཀྱིལ་འཁོར་གྱི་སྐབས་སུ། གཞི་དུས་ཀྱི་དོན་དམ་པའི་དཀྱིལ་འཁོར་ལ་འཇུག་ཚུལ་དང་། དེར་བཤད་པའི་རྡོ་རྗེ་ཕྲེང་བའི་དོན་དམ་པའི་དཀྱིལ་འཁོར་ལ་འཇུག་ཚུལ་བཤད་པ་ནི། མདོར་
བྱས་སུ་ལྷག་མོས་འོད་གསལ་དུ་སྡུད་པ་ལ་གསུངས་པས་བསྐྱེད་རིམ་གྱི་ཐིམ་རིམ་དང་། ཡང་བསམ་གཏན་གཉིས་ཀྱིས་འོད་གསལ་དུ་འཇུག་ཚུལ་ལའང་བཤད་པས་རྫོགས་རིམ་གྱི་ཐིམ་རིམ་དང་གསུམ་ལ་བཤད་དོ། །སྒྲོན་གསལ་དུ་ཡན་ལག་དྲུག་གི་བཤད་པའི་སྐབས་
སུ་ས་ཆུ་ལ་ཐིམ་པ་སོགས་ཀྱི་སྒོ་ནས་རྫོགས་རིམ་གྱི་ཐིམ་རིམ་འཆི་རིམ་བཞིན་དུ་གསུངས་སོ། །འདི་ལ་བརྩོན་འགྲུས་ཅན་ཚེ་འདི་ལ་འཚང་རྒྱ་བས་ཀྱང་། ལས་རླུང་གིས་དབུ་མར་བསྡུས་ཏེ་སྤྲོས་པ་བཅད་པའི་ཐིམ་རིམ་གྱི་སྒོ་ནས་འོད་གསལ་དུ་འཇུག་པ་མ་གོ་བས། 
འཆི་རིམ་བཞིན་དུ་བཤད་པའི་ལམ་རྣམས་ལེ་ལོ་ཅན་བར་དོར་འཚང་རྒྱ་བའི་ལམ་ཁོ་ན་ལ་སྔོན་གྱི་འདུས་པ་བ་ཁ་ཅིག་གིས་སྦྱོར་ཏེ། རྫོགས་རིམ་གྱི་གནད་མ་རྟོགས་པའོ། །དེ་ལྟར་འོད་གསལ་དུ་འཇུག་པ་འཆི་རིམ་གྱི་ཐིམ་རིམ་བཞིན་དུ་བྱེད་པ་ལ་ནི། འཆི་བ་ཆོས་
6-4-31b


སྐུར་བྱེད་པའི་ལམ་ཞེས་ཟེར་ལ། དེ་ལྟ་ན་དེའི་མཐར་འོད་གསལ་གྱི་ངང་ནས་ཆུ་ལས་ཉ་འཕང་བའི་ཚུལ་དུ། རླུང་སེམས་ཀྱི་སྐུར་བཞེངས་པ་ལ་བར་དོ་ལོངས་སྐུར་འཁྱེར་བ་དང་། དེས་གདུལ་བྱའི་དོན་དུ་སྤྲུལ་པའི་སྐུ་བཟུང་བ་ལ་སྐྱེ་བ་སྤྲུལ་སྐུར་འཁྱེར་བཞེས་པའང་གདོན་མི་ཟ་བར་
བྱ་དགོས་མོད་ཀྱང་། ཚུལ་དེའང་རྒྱུད་དང་དགོངས་འགྲེལ་གཞན་ནས་གསང་འདུས་ཀྱི་སྐོར་ལྟར་ཅུང་མི་གསལ་ལོ། །སྐྱེ་ཤི་བར་དོ་གསུམ་ཇི་འདྲ་བ་དེ་འདྲ་བའི་རིམ་པ་གཉིས་ཀྱི་ལམ་རྒྱུད་ལ་བསྐྱེད་པ་ལ། སྐྱེ་ཤི་བར་དོ་གསུམ་སྐུ་གསུམ་དུ་འཁྱེར་པའི་ལམ་ཞེས་ཐ་སྙད་བྱེད་པས་
བསྐྱེད་རིམ་གྱིས་འཆི་བ་ཆོས་སྐུར་འཁྱེར་བ་ནི་ལྷག་མོས་འོད་གསལ་དུ་སྡུད་པའི་རིམ་པ་རྣམས་སོ། །བར་དོ་ལོངས་སྐུར་འཁྱེར་བ་ནི་མངོན་བྱང་ལྔ་ལས་དང་པོའི་མགོན་པོ་བསྐྱེད་པའི་རིམ་པ་རྣམས་སོ། །སྐྱེ་བ་སྤྲུལ་སྐུར་འཁྱེར་བ་ནི་དང་པོའི་མགོན་པོ་སྤྲུལ་སྐུར་བསྒྱུར་བ་ནས་སེམས་
དཔའ་སུམ་བརྩེགས་ཀྱི་བར་ཡིན་ལ། དེ་མན་ཆད་ནི་སངས་རྒྱས་ཀྱི་མཛད་པ་དང་སྦྱོར་བ་ཡིན་ཏེ། རིམ་པ་དང་པོ་དང་གཞི་དུས་ཀྱི་སྐྱེ་འཆི་བར་དོ་རྣམས་ཆོས་མཐུན་སྦྱར་ནས་སྦྱར་གཞི་སྦྱོང་བྱེད་ངོ་འཕྲོད་པར་བྱེད་འདོད་ན་ལུགས་འདི་ལ་བརྟེན་ནས་གཞན་དག་ཀྱང་ཤེས་
པར་བྱའོ། །འདི་རྣམས་རྒྱས་པར་རྣམ་གཞག་རིམ་པའི་འགྲེལ་པར་བཤད་ཟིན་པས་འདིར་མ་སྤྲོས་སོ། །དེ་ལ་རླུང་གནས་གཞན་དུ་རྒྱུ་བ་དབུ་མར་འཇུག་པའི་སྒོ་ནི་རྩ་བའི་འཁོར་ལོ་གར་ཡོད་པ་དེ་ན་རེ་རེ་ཡོད་དེ། དབུ་མ་ལས་གྱེས་པའི་རྩ་འདབ་རྣམས་ནི་དེ་དང་ཁག་འབྲེལ་
དུ་ཡོད་པས་དབུ་མ་ནས་འདབ་མར་རླུང་ཐིག་ལེ་འཕོ་བ་དང་། འདབ་མ་ནས་དབུ་མར་དེ་གཉིས་ཚུར་ལ་འདུ་བའི་ཕྱིར་རོ། །འཁོར་ལོ་བཞི་ལ་དགའ་བ་རེ་རེ་འཇོག་པའང་དེ་དག་ཏུ་རྩ་འདབ་ནས་བྱང་ཆུབ་ཀྱི་སེམས་འདུ་ཐེབས་རེ་ཡོད་པའི་ཕྱིར་ཏེ། དཔེར་ན་དང་པོ་སྤྱི་བོར་འདུས་
6-4-32a


ནས་དེ་ནས་རྩ་འདབ་སོ་སོ་ལ་བབ་པ་རྣམས་སླར་ཡང་མགྲིན་པར་གནས་གཅིག་ཏུ་འདུ་བ་ལྟ་བུའོ། །དེས་ན་ཁུངས་ཐུབ་ཀྱིས་རླུང་སེམས་དབུ་མར་འཛུད་པའི་སྒོ་ཐ་དད་དུ་གསུངས་ཏེ། འདི་ལྟར་དུས་འཁོར་གྱི་སྐོར་རྣམས་སུ་ཐོག་མར་ལྟེ་བའི་གནས་སུ་བུམ་པ་
ཅན་གྱི་རླུང་སྦྱོར་གྱིས་སྲོག་དབུ་མར་འཇུག་པར་གསུངས་ལ། བདེ་མཆོག་རིམ་ལྔར་ཐོག་མར་སྙིང་གར་ཐིག་ལེ་ལས་སེམས་བཟུང་ནས་དབང་པོའི་ཤེས་པ་རླུང་དང་བཅས་པ་སྡུད་པར་བཤད། འཇམ་དཔལ་ཞལ་ལུང་ལས་ཐོག་མར་སྙིང་གའི་ཐིག་ལེ་ལ་སེམས་འཛིན་ཞིང་དེ་
ནས་ནོར་བུར་ཐིག་ལེ་ལ་སེམས་འཛིན་པར་གསུངས་པ་དང་། ནག་པོ་སྤྱོད་པ་དད་ཌོ་བི་པས་ཐོག་མར་ལྟེ་བར་གཏུམ་མོ་ལ་སེམས་གཏད་ནས་རླུང་སེམས་སྡུད་པར་བཤད་པ་ལྟ་བུ་རྣམས་ཡིན་ནོ། །འཕགས་པ་ཡབ་སྲས་ཀྱི་བཞེད་པས་བསྐྱེད་རིམ་གྱི་ཕྲ་ཐིག་བརྟན་པའི་འོག་ཏུ་ལུས་
དབེན་གྱི་ངོ་བོ་སོར་སྡུད་བསམ་གཏན་སྔོན་དུ་བཏང་ནས་ཐོག་མར་སྲོག་རྩོལ་རྡོ་རྗེའི་བཟླས་པའི་སྒོ་ནས་རླུང་སེམས་དབུ་མར་འཇུག་པ་ཡིན་ནོ། །དོན་དེ་ལྟར་གནས་ཀྱང་དེ་ལྟར་ཡིན་པར་འཕགས་པ་དང་ཤཱཀྱ་བཤེས་གཉེན་དང་ཀླུ་བྱང་དང་ཟླ་བ་གྲགས་པའི་གཞུང་རྣམས་སུ་
གསལ་པོར་མ་བཤད་ཅིང་། འདུས་པའི་རྩ་རྒྱུད་དང་དེའི་རྒྱུད་ཕྱིར་མ་དང་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ཆུང་བ་དང་། ལྷ་མོ་བཞིས་ཞུས་པའི་རྒྱུད་རྣམས་སུའང་གསལ་བར་མ་བྱུང་ངོ་། །འོན་ཀྱང་བཤད་རྒྱུད་རྡོ་རྗེ་ཕྲེང་བས་ཤིན་ཏུ་གསལ་བར་བཤད་ལ། 
འཕགས་པ་ལྷས་སྤྱོད་བསྡུས་སུ་དགོངས་པ་ལུང་སྟོན་དྲངས་པའི་སྐབས་ཤིག་ལས་ཀྱང་ཅུང་ཟད་བཤད་པ་ཞིག་ཡོད་དོ། །རིམ་ལྔར། རྗེ་རྡོ་བཟླས་གནས་རྣལ་འབྱོར་བ། །སེམས་ལ་དམིགས་པ་ཐོབ་པར་འགྱུར། །ཞེས་རྡོར་བཟླས་ཀྱིས་སེམས་དབེན་གྱི་ཡེ་ཤེས་
6-4-32b


གསུམ་བསྐྱེད་པར་གསུངས་ལ། ཡང་རིམ་ལྔར། སྣང་བ་རླུང་གི་བཞོན་པས་ཆེས་ཆེར་ན་གཡོས་དེ་མ་ཐག་རང་བཞིན་གྱི་རྟོག་པ་རྣམས་སྐྱེ་བར་གསུངས་པས། སྣང་བ་རྟོག་མེད་བསྐྱེད་པ་ལ་རང་བཞིན་གྱི་རྟོག་པ་རྣམས་བཅད་དགོས་པ་དང་། དེ་གཅོད་པ་ལ་རང་བཞིན་གཡོ་བྱེད་ཀྱི་རླུང་
བཅད་དགོས་པར་ཤེས་སོ། །དེ་ཤེས་ན་ཡེ་ཤེས་ཀྱི་སྐྱེད་བྱེད་རྡོར་བཟླས་ཀྱིས་ལས་རླུང་དང་རྣམ་རྟོག་འགོག་དགོས་པར་ཤེས་ཏེ། རྒྱུས་འབྲས་བུ་བསྐྱེད་པ་ལ་འབྲས་བུ་དེ་མངོན་དུ་འགྱུར་བའི་གེགས་བས་ལ་དགོས་པ་ནི་སྤྱིའི་ལུགས་ཡིན་པའི་ཕྱིར་རོ། །དོན་འདི་དཔལ་རྡོ་རྗེ་ཕྲེང་བར་
གསལ་བར་གསུངས་ཏེ། རྣམ་རྟོག་རླུང་ནི་རྣམ་གཅོད་པ། །ཞེས་པ་ནས། དེ་ནས་རྡོ་རྗེ་འདས་རིམ་མཆོག །ཅེས་པའི་བར་སྔར་དྲངས་པ་དང་། དེའི་འཕྲོ་ནས། རྫོགས་རིམ་རྣལ་འབྱོར་ཡན་ལག་ནི། །རྣམ་པར་རྟོག་པ་འཇོམས་བྱེད་པ། །ཕྲ་བའི་དེ་ཉིད་བླ་ན་མེད། །ཆོ་ག་བཞིན་
བསྒོམས་རྣལ་འབྱོར་པ། །བློ་དང་ལྡན་པས་སྔོན་བཞིན་བསྒོམ། །སྲིད་པའི་འཆིང་བ་གཅོད་པར་བྱེད། །རྣལ་འབྱོར་ཆེན་པོ་ཡེ་ཤེས་ཆེ། །དེ་ཉིད་ཆེན་པོ་རྨད་བྱུང་ཆེ། །ངེས་པར་བསྒོམས་པས་ཡང་དག་ནི། །རྣམ་རྟོག་རླུང་ནི་གཅོད་པར་བྱེད། །ཅེས་སོ། །དེའང་རྣམ་རྟོག་སྐྱེད་པའི་རླུང་གི་
གཙོ་བོ་སྲོག་ཐུར་གཉིས་ཡིན་ཞིང་དེ་གཉིས་སྐུའི་རྩ་རྐྱང་མ་དང་གསུང་གི་རྩ་རོ་མ་གཉིས་ནས་རྒྱུ་ལ། དབུ་མར་རླུང་རྒྱུ་བ་རྣམ་རྟོག་མེད་པའི་རླུང་ཡིན་པས། རྩ་དབུ་མ་དེ་གཉིས་ལས་མཆོག་ཡིན་པ་དང་། རྣལ་འབྱོར་པས་རྣལ་འབྱོར་གྱི་སྟོབས་ཀྱིས་དབུ་མར་རླུང་བཅུག་པ་
གང་ཐོབ་པ་དེ་ནི་སེམས་ཅན་གྱི་དོན་བྱེད་ནུས་པ་དང་། དེར་རླུང་བཅུག་པ་དེར་གནས་པ་ནི་རླུང་བརྒྱ་རྩ་བརྒྱད་ལས་རྒྱལ་བ་ཡིན་ཏེ། བྱིས་པའི་རྣལ་འབྱོར་པ་བསྐྱེད་རིམ་པས་དེ་མི་ཤེས་པ་དང་། སྐད་ཅིག་གིས་མངོན་པར་བྱང་ཆུབ་པའི་འོད་གསལ་ནི་རླུང་དབུ་མར་
6-4-33a


བཅུག་པ་དེ་ཡིས་ཐོབ་པར་རྒྱུད་འདིར་གསུངས་སོ་ཞེས་གསུངས་ཏེ། སྟེང་འོག་ཡང་དག་བརྟེན་ནས་ནི། །སྲོག་དང་ཐུར་སེལ་རྒྱུ་བར་བྱེད། །དེ་གཉིས་ཁོ་ན་རྟོགས་བཅས་ནས། །རླུང་གཉིས་སུ་ནི་གསལ་བར་གསུངས། །སྐུ་དང་གསུང་གི་སྙིང་པོ་གཉིས། །ལ་ལ་ན་དང་
ར་ས་ན། །ཨ་བ་དྷཱུ་ཏཱི་མཆོག་གི་རྩ། །དེ་གཉིས་དབུས་མ་མཆོག་གི་མཆོག །རྣམ་རྟོག་མེད་པའི་རླུང་གང་ཡིན། །རྟག་ཏུ་རྒྱུ་ཞིང་ཀུན་ལ་ཁྱབ། །རྣལ་འབྱོར་གང་ཐོབ་རྟག་ཏུ་ནི། །སེམས་ཅན་དོན་བྱེད་ནུས་པར་འགྱུར། །རླུང་གི་རང་བཞིན་བྱེ་བྲག་ནི། །བརྒྱུ་དང་བརྒྱད་ལས་གང་རྒྱལ་བ། །
དུས་ཀུན་ཏུ་ནི་རྒྱལ་ནས་གནས། །རྣལ་འབྱོར་བྱིས་པས་མི་ཤེས་པ། །སྐད་ཅིག་གཅིག་མངོན་རྫོགས་བྱང་ཆུབ། །དེ་ཡིས་ཐོབ་པར་རྒྱུད་འདིར་གསུངས། །དེ་ནི་གང་ཚེ་སྐད་ཅིག་ཐོབ། །དེ་ནི་སྐད་ཅིག་མཆོག་ཏུ་གསུངས། །ཞེས་གསུངས་ཤིང་། རླུང་དབུ་མར་བཅུག་པ་དེ་ལ་ཇི་ལྟར་ཐོབ་
པའི་རིགས་པ་སྟེ་སྦྱོར་བ་ནི་དང་པོར་བསྐྱེད་རིམ་མཐར་ཕྱུང་ནས། དེ་ནས་རྡོར་བཟླས་ཟླ་བ་དྲུག་ཏུ་བྱེད་པའོ། །ཞེས་གསུངས་ཏེ། དེ་ཡང་ཇི་ལྟར་ཐོབ་པར་བྱེད། །དེ་ལ་རིགས་པ་རུ་ནི་བརྗོད། །ཐོག་མ་རྣལ་འབྱོར་པ་ཆེན་པོ། །ཞེས་པ་ནས། ཧཱུཾ་བཟླས་པ་ནི་ཚུངས་མེད་བྱ། །ཞེས་
པའི་བར་སྔར་དྲངས་བ་ལྟར་འབྱུང་ཞིང་། དེའི་འཕྲོ་ནས། མཆོག་ཏུ་རྒྱུན་མི་འཆད་པར་ནི། །ཟླ་བ་དྲུག་ཏུ་བྱས་ནས་ཀྱང་། །དེ་རྗེས་སྐད་ཅིག་དེ་ལ་འཐོབ། །ཅེས་གསུངས་ཏེ། སྐབས་གཞན་མང་པོར་ཡང་རྡོར་བཟླས་ཟླ་བ་དྲུག་ཏུ་བྱས་པས་འགྲུབ་པར་གསུངས་སོ། །དགོངས་པ་ལུང་སྟོན་
པ་ལས་ཀྱང་། ཉི་ཟླ་རབ་ཏུ་སྦྱོར་བ་ལས། །དབུགས་ནི་འགྲོ་བ་ལ་ཁྱབ་པ། །བྱང་ཆུབ་སེམས་ནི་རླུང་གཅིག་པུ། །དགེ་དང་མི་དགེའི་འབྲས་སྤངས་ནས། །ནམ་མཁའ་འདྲ་བར་འགྱུར་བ་ཡིན། །ཞེས་གསུངས་ཏེ། ཟླ་ཉི་ནི་རོ་རྐྱང་ངོ་། །དེ་གཉིས་རབ་ཏུ་སྦྱོར་བ་ནི་དབུ་མར་དེ་གཉིས་ཀྱི་
6-4-33b


རླུང་གཅིག་ཏུ་བྱས་པ་སྟེ། འདིས་མི་གསལ་ཡང་འདུས་པའི་བཤད་རྒྱུད་རྡོར་ཕྲེང་ལས། ཟླ་བ་དང་ཉི་མ་རྒྱུ་བའི་རྩ་རོ་རྐྱང་གཉིས་ལ་བཤད་པས་སོ། །འགྲོ་བ་ལ་ཁྱབ་པའི་དབུགས་བྱང་ཆུབ་ཀྱི་སེམས་རླུང་ཞེས་གྲགས་པ་གཅིག་པུ་ལ་རྡོར་བཟླས་བྱས་པས། ལས་གཉིས་ཀྱི་དབང་གིས་
འབྲས་བུ་འཁོར་བར་འཁྱམས་པ་སྤངས་ནས་ནམ་མཁའ་སྟེ་འོད་གསལ་ཇི་འདྲ་བར་འགྱུར་བ་སྟེ་དེར་འཇུག་པའོ། །འགྱུར་རྙིང་ལས། དངོས་པོ་མེད་པས་འགྲོ་ཁྱབ་པ། །ཞེས་ཀྱང་འབྱུང་ངོ་། །རྡོ་རྗེ་བཟླས་པས་སྲོག་དབུ་མར་འཇུག་པ་ནི་བདེ་མཆོག་རིམ་ལྔར་ཡང་གསུངས་ཏེ། 
ཉི་མ་དང་ཟླ་བའི་བདག་ཉིད་ཅན་གྱི་ལམ་སྟོང་པ་ཉིད་ཀྱི་རང་བཞིན་ནམ་མཁའ་སྟོང་པ་ཉིད་ཀྱི་ངོ་བོ། གང་ནས་བར་ཆད་མེད་པར་རླུང་འཇུག་པ་དང་འབྱུང་བར་འགྱུར་བའི་རླུང་ལྷན་ཅིག་སྦྱར་ཏེ། གཅིག་ཏུ་བྱས་པའི་སེམས་གསུང་བར་བྱའོ། །སེམས་ཀྱི་བཞོན་པར་གྱུར་པའི་རླུང་
དེས་ཀྱང་བློའི་གཞི་རང་ཁྱིམ་དུ་འཁྱེར་རོ། །ཤེས་རབ་བློ་ཐབས་སེམས་དང་གཅིག་ཏུ་འགྱུར་ཏེ་གཉིས་སུ་མེད་པའི་རང་བཞིན་དུ་སོན་པ་ནི་སངས་རྒྱས་ཐམས་ཅད་སྐྱེད་བྱེད་ཀྱི་རང་བཞིན་རྡོ་རྗེ་འཆང་ཉིད་སྒྲུབ་པར་བྱེད་པ་ཡིན་ནོ། །ཞེས་གསུངས་སོ། །དེ་ལ་ཟླ་ཉི་ནི་རོ་རྐྱང་ངོ་། །དེའི་བདག་
ཉིད་ཅན་ནི་གང་ལ་དེ་གཉིས་འདུས་བ་དབུ་མའོ། །དེའི་ལམ་ནི་རྩ་དེའི་ཁོང་སྟོང་སྟེ་དེ་ཉིད་ནས་ངོ་བོའོ། །རྩའི་ལམ་གང་ནས་ཏེ་དེ་ནས་རྒྱུན་ལྡན་དུ་རླུང་འབྱུང་འཇུག་བྱེད་པའི་ལམ་དེ་དང་རླུང་གཉིས་གཅིག་ཏུ་སྦྱོར་བ་ནི་དབུ་མ་ནས་རྒྱུན་དུ་འཇུག་པར་བྱེད་པའོ། །དེ་ནས་རྒྱུ་བ་ལ་སེམས་
གཏོད་པ་ནི་སེམས་འཛིན་པའོ། །དེ་ལྟར་བྱས་པའི་འབྲས་བུ་ནི་རླུང་དབུ་མ་ནས་རྒྱུ་བ་དེས་ཀྱང་རང་གི་ཁྱིམ་སྙིང་གའི་དབུས་སུ་འཁྱེར་རོ། །རང་གི་ཁྱིམ་ཇི་འདྲ་སྙམ་ན་བློ་སྟེ་རྣམ་པར་རྟོག་པ་དང་རླུང་སེམས་ཀྱི་དང་པོའི་གཞིའོ། །ཡང་ན་བློ་ནི་སེམས་སོ། །དེའི་གཞི་ནི་དེའི་བཞོན་
6-4-34a


པའི་རླུང་སྟེ་དེ་རྣམས་རང་གི་ཁྱིམ་དུ་འཁྱེར་བའོ། །འདིས་དབུ་མ་ཉིད་ནས་བཟླ་དགོས་པར་བསྟན་ན། །རྡོ་རྗེའི་བཟླས་པ་ཉིད་ཀྱིས་ལྷན་ཅིག་སྐྱེས་པའི་རླུང་རང་གནས་སུ་གནས་པར་བྱས་ནས། ལས་རླུང་དང་རྣམ་རྟོག་ཐམས་ཅད་འགོག་པར་དེ་ཁོ་
ན་ཉིད་གྲུབ་པ་ལས་ཀྱང་གསུངས་ཏེ། ཇི་སྐད་དུ། དེ་ཡོངས་སུ་མཉེས་པ་ལས་དེའི་བཀའ་ལུང་གིས་དེ་ལྟ་བུའི་རླུང་དབང་པོ་རྣམས་ལས་བཀུག་སྟེ། རྒྱུན་དུ་འཇུག་པ་དང་འབྱུང་པའི་བྱ་བ་བྱེད་པའི་ལམ་རྣམ་མ་ཉིད་དུ་གནས་པར་བྱེད་དོ། །དེས་ནི་ཡང་དག་པ་མ་ཡིན་པའི་
རྟོག་པའི་ཚོགས་མཐའ་དག་འོབས་ཀྱིས་བསྐོར་བའི་ནང་དུ་དྲི་མ་དང་བཅས་པའི་སྲེད་པའི་ཆུའི་ཚོགས་ཀྱིས་བཀང་སྟེ། སྲིད་པའི་ཤིང་སྦངས་ཏེ་ཆུས་གཏོར་བས་བསྐྱེད་དེ། ཤིན་ཏུ་རིང་བ་སྐྱེས་པས་འདོད་པའི་འབྲས་བུ་མིག་དགའ་བ་སྐྱེད་པ་དང་། རྣ་བ་བདེ་བར་བྱེད་པ་
དང་། དྲི་ཞིམ་པ་དང་། རོ་ཞིམ་པ་དང་། མཁྲང་ཞིང་སྦོམ་ལ་སྣ་ཚོགས་པ་མང་པོ་ཉམས་སུ་མྱོང་བར་བྱེད་པའི་རྒྱུ་གསར་དུ་སྐྱེ་བའི་སྲིད་པ་ལོག་པར་འགྱུར་རོ། །དེའང་ལྷན་ཅིག་སྐྱེས་པའི་རྗེས་སུ་ཚོལ་ཏེ། དེར་གནས་ནས་ཕྱི་རོལ་གྱི་བྱ་བ་ཐམས་ཅད་སྤོང་མོད་ཀྱི། 
དེར་ཡང་ལྷན་ཅིག་སྐྱེས་པའི་བྱ་བ་ཡོད་དོ། །དེ་ཉིད་ཀྱིས་འབྲེལ་ཞིང་ཉམས་སུ་མྱོང་བ་གཡོ་བའི་བདག་ཉིད་དུ་རྣམ་པར་གནས་སོ། །དེར་ཡང་ཁྱད་པར་མ་དམིགས་པས་ཉམས་སུ་མྱོང་པའི་དངོས་པོ་ལ་སླར་ཡང་ཉམས་སུ་མྱོང་བའི་རྗེས་སུ་ཆགས་པའི་འཇུག་པ་
ལྡོག་པར་བྱེད་དོ། །མང་པོས་ཅི་ཞིག་བྱ་སྟེ། གང་གི་ཚེ་ཕྱི་རོལ་ཏུ་གྱུར་བའི་བརྟགས་པའི་རང་བཞིན་རྣམ་པར་བཅད་པ་དེའི་ཚེ་འདི་རང་གི་ངོ་བོ་ལ་གནས་པར་འགྱུར་རོ། །དེར་ཡང་གཉུག་མའི་ཡུལ་ཕྲ་མོ་ལ་འཇུག་པ་ལས་རྗེས་སུ་ཆགས་པ་ཟད་པས་འབད་པ་བཅོམ་
6-4-34b


ནས། བདག་ཉིད་ཀྱི་གནས་ལ་མངོན་པར་ཕྱོགས་པར་འགྱུར་རོ། །དེས་ནི་ཡོན་ཏན་མཐའ་དག་དང་ལྡན་པར་འགྱུར་བས་བརྟན་པའི་ཡོན་ཏན་དང་ལྡན་པར་འགྱུར་ཏེ། བརྟན་པས་ན་གཞན་གྱི་དོན་གྱི་ཡོན་ཏན་དང་ལྡན་པར་འགྱུར་རོ། །དཔེར་ན་ནམ་མཁའི་ངོས་སུ་ཁྱབ་པའི་ཆུ་འཛིན་གྱི་ཚོགས་
སྟུག་པོ་དེངས་པར་གྱུར་བ་ན། གང་དུ་སོང་བ་མི་ཤེས་པ་དེ་བཞིན་དུ་རླུང་འདིའང་སྔར་རྒྱུན་མི་འཆད་བར་འབྱུང་བ་ལ། དེ་ལྟར་ཐིམ་པར་གྱུར་པ་ན་མཆོག་ཏུ་ལྡོག་ཅིང་ཚིམ་པ་ཐོབ་པས་གང་དུའང་འགྲོ་བར་མི་འགྱུར་རོ། །ལྷན་ཅིག་སྐྱེས་པའི་རླུང་རང་གི་གནས་སུ་གནས་པས་
རྟོགས་པར་འགྱུར་རོ། །ལྷན་ཅིག་སྐྱེས་པའི་རླུང་རང་གི་གནས་སུ་གནས་པས་རྟོག་པའི་ཚོགས་ལས་གྲོལ་ཞིང་སྟོང་བ་ཉིད་ཀྱི་རང་བཞིན་གྱིས་ཐུགས་ཚེམ་པར་བྱེད་ཅི་ཞིག་ལྟར་སྐྱེ་སྟེ། འདི་ལས་འཁོར་བ་འདིར་ཐབས་ཐུགས་རྗེ་ཆེན་པོ་མང་དུ་རྒྱུན་མི་འཆད་པར་གོམས་
བར་བྱས་པས། མཐའ་ཡས་པའི་སེམས་ཅན་རྣམས་ཀྱི་དོན་མཛད་པའི་རྒྱུ་ཐོབ་པ་ཡིན་ནོ། །ཞེས་སོ། །རླུང་དབང་པོའི་སྒོར་རྒྱུ་བ་བཀུག་ནས་འཇུག་གི་ལམ་ཉིད་དུ་གནས་པར་རམ་འཇོག་པར་བྱེད་དོ། །ལམ་ཇི་འདྲ་སྙམ་ན་རྣལ་མ་སྟེ་ཨ་བ་དྷཱུ་ཏཱིའི་ལམ་དུའོ། །ཇི་ལྟར་
འཇོག་ན་རྒྱུན་དུའོ། །དེ་ལྟར་བཞག་པའི་རླུང་གི་རྣལ་འབྱོར་དེས་ནི་སྲིད་པ་ལོག་པར་འགྱུར་རོ་ཞེས་སྦྱར་རོ། །ལྡོག་ལུགས་དེ་ཡང་རྡོར་བཟླས་བྱས་པས་རླུང་དང་སེམས་རྣམས་ལྟན་ཅིག་སྐྱེས་པའི་རླུང་མི་ཤིགས་པའི་ཐིག་ལེའི་རྗེས་སུ་ཚོལ་བ་སྟེ་དེར་འགྲོ་ཞིང་རྗེས་སུ་འཇུག་
གོ། །རླུང་སེམས་རྣམས་ལྷན་སྐྱེས་ཀྱི་རླུང་གི་གནས་དེར་གནས་པ་སྟེ་ཐིམ་ནས་ཕྱི་རོལ་གྱི་ཡུལ་ལ་འཇུག་པའི་བྱ་བ་ཐམས་ཅད་སྤོང་དེ། །དེ་ལྟ་ནའང་རླུང་གི་བྱ་བ་ཐམས་ཅད་མེད་པ་ནི་མ་ཡིན་ཏེ། རླུང་ཐིམ་པའི་གནས་དེར་ཡང་ལྷན་སྐྱེས་ཀྱི་རླུང་གི་བྱ་བ་ནི་ཡོད་དོ། །
6-4-35a


མདོར་ན་རྡོར་བཟླས་ཀྱིས་རླུང་སེམས་དབུ་མར་བསྡུས་ནས་ཕྱི་རོལ་གྱི་ཡུལ་ལ་མངོན་པར་ཞེན་པ་བཅས་པ་དེའི་ཚེ་ལྷན་སྐྱེས་ཀྱི་འདི་ལས་རླུང་གི་གཞི་མི་བྱེད་པར་རང་གི་ངོ་བོ་ལ་གནས་པར་འགྱུར་ལ། དེའི་ཚེ་མ་བཅོས་གཉུག་མའི་དོན་ཤིན་ཏུ་ཕྲ་བའི་དེ་ཁོ་ན་ཉིད་ལ་
ཞུགས་པའི་དབང་ལས། རང་གི་གནས་ལ་མངོན་དུ་ཕྱོགས་ཏེ་འཇུག་པས་ཡོན་ཏན་ཐམས་ཅད་བསྐྱེད་དོ། །ལྷན་སྐྱེས་ཀྱི་རླུང་རང་གི་གནས་ལ་གནས་ཞེས་པའི་རང་གནས་ནི་བདེ་མཆོག་རིམ་ལྔ་དང་འདྲ་སྟེ། སྙིང་གའི་དབུས་ཀྱི་མི་ཤིགས་པའི་ཐིག་ལེའི་གནས་སོ། །
འདིས་ནི་ནམ་མཁར་ནམ་མཁའ་སྤྱོང་བ་བཞིན་དུ་སེམས་དང་འོད་གསལ་གཉིས་འཁྱུད་པའི་ཕྱག་རྒྱ་ཆེན་པོ་ནི། རྡོར་བཟླས་ཀྱི་རླུང་སྙིང་ག་རུ་ཐིམ་པར་བྱས་པའི་མཐུ་ལས་འབྱུང་བར་བཤད་དེ། བདེ་མཆོག་རིམ་ལྔའི་དོན་ཀྱང་དེ་ཡིན་ལ། འཕགས་བ་ཡབ་སྲས་ཀྱི་བཞེད་པའི་
གནད་ཀྱང་དེ་ཡིན་ནོ། །ཚུལ་འདིའང་རྣལ་འབྱོར་མའི་ཞལ་གྱི་གདམས་པ་ལས་ཤེས་པར་བྱ་བར་བཤད་རྒྱུད་རྡོ་རྗེ་ཕྲེང་བ་ལས་གསུངས་ལ། བདེ་མཆོག་རིམ་ལྔའི་རྣལ་འབྱོར་མ་ཡིས་སྦས་བརྙེད་པའི་གདམས་ངག་ཏུ་གསུངས་ཤིང་། ལྷན་ཅིག་སྐྱེས་བའི་རྣལ་འབྱོར་
མ་རྣམས་དབུ་རྒྱན་འདུས་པའི་ཞལ་ལས་བྱུང་བའི་གདམས་ངག་ནི་དེ་ཁོ་ན་ཉིད་གྲུབ་པ་ཡིན་ལ། དེ་གཉིས་ནས་འོད་གསལ་ཕྱག་རྒྱ་ཆེན་པོའི་གོ་འཕང་རྡོར་བཟླས་ཀྱིས་འགྲུབ་པའི་རྡོར་བཟླས་ནི་དབུ་མ་ཉིད་ནས་བྱ་བར་གསུངས་པ་འདི་འཕགས་པ་ཡབ་སྲས་ཀྱི་རྡོར་བཟླས་
ཀྱི་མན་ངག་ཏུ་ཤེས་པར་གྱིས་ཤིག །དེ་ལྟར་བྱས་ན་དབང་པོའི་སྒོ་ནས་ཡན་ལག་གི་རླུང་ལ་རྡོར་བཟླས་བྱེད་པ་དང་། དབུ་མ་ལ་དམིགས་པར་རང་ག་བའི་རྡོར་བཟླས་བྱེད་པ་དང་། རྡོར་བཟླས་རླུང་དབུ་མར་འཇུག་པའི་རྩ་ལས་སྤྱོང་བ་ཙམ་དུ་འདོད་པ་རྣམས་ནི་རྡོར་བཟླས་ཀྱི་གནད་མ་
6-4-35b


རྟོགས་པར་སྨྲ་བའོ། །བདེ་མཆོག་རིམ་ལྔ་ལས། མགལ་མེ་བསྐྱོད་པའི་རྣམ་པ་ཅན། །སེམས་ནི་ཡུལ་ལ་རབ་ཏུ་འཇུག །དེ་ནི་དེ་ལས་རྣམ་བཟློག་ནས། །མཚོན་དུ་མེད་པ་མཚོན་པར་བྱ། །ཞེས་མགལ་མའི་འཁོར་ལོ་ལྟར་ཤིན་ཏུ་གཡོ་ཞིང་གཟུང་དཀའ་བའི་སེམས་ཡུལ་ལ་བརྒྱུག་པ་
རབ་ཏུ་བཟློག་ནས། ཐབས་གཞན་གྱིས་མཚོན་མི་ནུས་བའི་ལྷན་སྐྱེས་ཕྱག་རྒྱ་ཆེན་པོ་མཚོན་པར་བྱའོ་ཞེས་གསུངས་ནས། དེ་ཐབས་གང་གིས་མཚོན་དེ་ཉིད་ལས། སྒྲ་དང་ཐིག་ལེ་ལྡན་པའི་སེམས། །སྙིང་གར་གཞག་བྱ་དེ་ནས་འདིའི། །རྨོངས་པའི་རབ་རིབ་འཇོམས་ནི། །
མདའ་བདག་བཅོམ་ལྡན་འབྱུང་འགྱུར་ཏེ། །ཞེས་གསུངས་ཏེ། སྙིང་གར་ཡིད་ཀྱི་ངོ་བོ་ཐིག་ལེ་སྒྲ་སྟེ་ནཱ་ད་དང་ལྡན་པ་ཞིག་བཞག་ནས། དེ་ལ་སེམས་གཡོ་མེད་དུ་བཞག་པས་ལྷན་སྐྱེས་འཆར་བར་གསུངས་སོ། །འདི་འདྲ་བའི་གནད་རྣམས་ནི་སྔར་བཤད་པ་ལྟར་སྙིང་གའི་
གནད་ཤེས་པ་ལ་རག་ལས་སོ། །དེའང་གཞུང་དེར་ཀུན་གཞིའི་ངོ་བོ་སྙིང་གའི་ཐིག་ལེ་ལ་དབང་པོའི་ཤེས་པ་ལྔ་བཞག་ནས་སེམས་མི་གཡོ་བར་བྱེད་པར་གསུངས་ཏེ། དབང་པོའི་ཤེས་བ་ལྔ་ནི་སྔར་དབང་པོ་ལས་རླུང་བཀུག་པའོ། །རྣམ་ཤེས་དྲུག་པ་མ་སྨོས་པས་ཀུན་གཞི་
ནི་དྲུག་པའི་ཡིད་ཡིན་གྱི་གཞན་དག་འདོད་པ་ལྟར་མིན་ནོ། །བདེ་མཆོག་རིམ་ལྔའི་རིམ་པ་ཐམ་ལས་ཀྱང་། གཟུགས་སོགས་ཡུལ་རྣམས་ཀྱིས་དྲངས་ནས་ངོ་བོ་ཉིད་ཀྱིས་གཡོ་བའི་སེམས་སྙིང་གར་བརྟན་པར་བྱས་ན་ནམ་མཁའ་དང་འདྲ་བར་འགྱུར་བར་གསུངས་ཏེ། 
སེམས་མི་གཡོ་བར་གནས་པའི་སེམས་འཛིན་ཙམ་མིན་གྱི་སྙིང་གར་རླུང་སྡུད་པའི་ཐིམ་རིམ་ཤེས་པ་ཡིན་པས་སྙིང་གའི་གནད་ཤིན་ཏུ་གལ་ཆེ་ལ་རྟོགས་དཀའ་བ་ཡིན་ནོ། །དེ་ལ་རྣམ་ཤེས་དྲུག་ཡུལ་དྲུག་ལ་གཡོ་བ་ནི་རླུང་གི་བྱེད་པ་ཡིན་ལ། དེའང་སྙིང་ག་ན་
6-4-36a


ཡུལ་ཅན་དྲུག་ཡུལ་དྲུག་གཡོ་བྱེད་ཀྱི་རླུང་དྲུག་ཡོད་བ་དེ། དབང་པོ་དྲུག་ལ་བརྟེན་ནས་འཇུག་ལ། སྙིང་ག་ན་ཡུལ་དྲུག་གསལ་བར་བྱེད་པའི་རླུང་དྲུག་ཡོད་པ་དེས་ཀྱང་གཟུགས་སྒྲ་སོགས་གསལ་བར་བྱེད་དོ། །དེ་འཆར་བ་ན་རང་བཞིན་གྱི་རྟོག་པ་རྣམས་འཆར་
བཤད་རྣམས་རང་གནས་སུ་ནུབ་པ་ན་རྟོག་པ་དེ་རྣམས་ནུབ་པ་ཡིན་ཏེ། རྒྱུད་རྡོར་ཕྲེང་ལས། སྙིང་གི་དབུས་གནས་བདེ་བའི་དངོས། །སངས་རྒྱས་ཉི་མ་གསལ་བའི་འོད། །གཟུང་དང་འཛིན་པའི་གཟུགས་ཀྱིས་ཀྱང་དེ་ནི་འོད་ཟེར་བཅུ་གཉིས་སོ། །འོད་འཕེལ་འོད་ཟེར་གཟི་བརྗིད་
མ། །གསལ་བ་འབར་མ་འོད་དམར་མ། །མིག་ལ་སོགས་པ་ལ་བརྟེན་ནས། །ཕྱི་རོལ་གཟུགས་སོགས་འཛིན་པ་པོ། །འོད་ཟེར་འོད་མ་སྣང་བ་མ། །གསལ་མཛེས་གསལ་འོད་ཉི་མ་གསལ། །ཕྱི་རོལ་གཟུགས་སོགས་རྣམ་བའོ། །དྲུག་པོ་འདི་དག་འོད་དུ་འདོད། །ལྷ་མོ་
རྣམས་ནི་གང་ཤར་བ། །ཡེ་ཤེས་ཉི་མ་འཆར་བ་ཡིན། །དེ་དག་ཡང་དག་ནུབ་པ་ནི། །དེའི་ཡང་མཆོག་ཏུ་ནུབ་པའོ། །འཆར་བ་ནུབ་པ་རྣམ་ཆད་པ། །གོ་འཕང་མཆོག་ཏུ་ཤེས་པར་བྱ། །རྣལ་འབྱོར་ཆེན་པོ་ལེགས་པར་སད། །སངས་རྒྱས་ཉི་མའི་སྡོམ་པའོ། །ཞེས་སོ། །སྙིང་གི་
དབུས་གནས་མི་ཤིགས་བའོ། །བདེ་བའི་དངོས་ནི་བདེ་བའི་རང་བཞིན་ནོ། །སངས་རྒྱས་ནི་རང་བཞིན་རྣམ་དག་གིའོ། །ཉི་མ་གསལ་བའི་འོད་ནི་འོད་གསལ་གྱི་རླུང་ངོ་། །འོད་དུ་འདོད་ཅེས་པ་ནི་དྲུག་ཚན་སྔ་མ་ཡང་ངོ་། །ལྷ་མོ་ནི་རླུང་དེ་དག་གོ། །ཡེ་ཤེས་ནི་སངས་རྒྱ་ཉི་མའོ། །རླུང་
བཅུ་གཉིས་པོ་དེ་དག་ཕྱིན་ཅི་མ་ལོག་པར་ནུབ་པ་ནི་སངས་རྒྱས་ཉི་མ་དེའིའང་ནུབ་པ་སྟེ་གོ་འཕང་མཆོག་གི་རྒྱུའོ། །འཆར་ནུབ་ཟད་ནས་གནས་པ་ནི་བྱང་ཆུབ་ཀྱི་གོ་འཕང་ངོ་། །སངས་རྒྱས་ཉི་མའི་སྡོམ་པ་ནི་རླུང་བཅུ་གཉིས་སྙིང་གར་ནུབ་པའོ། །རླུང་འདི་རྣམས་ཕལ་ཆེར་སྲོག་
6-4-36b


གི་རྣམ་འགྱུར་ཡིན་ལ། དེའང་སྙིང་གའི་རྩ་འདབ་རྣམས་ཡུལ་ལྔ་འབབ་པའི་རྩར་བཤད་པས་དེ་དག་ནས་རྒྱུ་བའི་རླུང་དབང་པོའི་སྒོར་ཕྱིན་པ་ལས་གཟུང་འཛིན་དུ་འགྱུར་བའོ། །རྡོར་ཕྲེང་གི་སྐབས་གཞན་དུའང་དབང་ཤེས་རླུང་དང་འདྲེས་པ་བག་ཆགས་ཀྱིས་བསླད་པས་འཁོར་བར་
འཁྱམས་པས་དེ་བཟློག་པའི་དོན་དུ་རྡོར་བཟླས་བྱ་བར་གསུངས་པས། རྡོར་བཟླས་ཀྱིས་དེ་རྣམས་སྙིང་གའི་དབུ་མའི་ནང་དུ་སྡུད་པའོ། །དེ་བཞིན་དུ། །མི་ཕྱེད་རྡོ་རྗེ་ཞེས་ནི་བརྗོད། །དེ་ནི་རླུང་དུ་ཡོངས་སུ་གྲགས། །ཡི་གེ་ཨ་ནི་ཕྱེ་བ་ཡིས། །རྣལ་འབྱོར་མཆོག་གིས་རྟག་ཏུ་རྟོགས། །དེའི་
རྟེན་སྙིང་གའི་པདྨ་ཡི། །འདབ་མ་བརྒྱད་ཀྱིས་རྣམ་པར་བརྒྱན། །ཆོས་ཀྱི་འཁོར་ལོ་སྐལ་བ་བཟང་། ཐམས་ཅ་བདག་ཉིད་རྟག་ཏུ་བཞུགས། །དེ་ཡི་འདབ་མ་ལས་སྐྱེས་པ། །རྣམ་ཤེས་བརྒྱད་ནི་ཀུན་རྫོབ་བོ། །མིག་ལ་སོགས་པ་ཡང་དག་བརྟེན་ན། །འགྲོ་བ་གསུམ་དུ་རྣམ་པར་སྤྱོད། །དེ་དག་
འཇོམས་པ་རླུང་རྡོ་རྗེ། །བགེགས་མཐར་བྱེད་པ་ཞེས་ནི་བརྗོད། །ཅེས་སྙིང་གའི་ཨ་ཡིག་སྲོག་རླུང་རྡོ་རྗེ་དང་དེའི་རྟེན་གྱི་པད་འདབ་ལ་གནས་པའི་རྣམ་པའི་རྣམ་ཤེས་བརྒྱད་པདྨ་ཡིན་ལ། དེ་གཉིས་ཨ་ཡིག་གིས་མདུད་པ་ཕྱེ་བའི་གནས་སུ་སྦྱོར་བ་ནི་རྡོ་རྗེ་པདྨ་གཉིས་མཉམ་པར་སྦྱོར་བར་བཤད་
དོ། །དེ་ལྟར་ན་དཔལ་འདུས་པ་རྩ་བཤད་ཀྱི་ལུགས་ཀྱིས་རྣམ་ཤེས་དང་རླུང་གཉིས་མར་ལ་མར་བཞག་པ་བཞིན་དུ་འདྲེས་ནས་འཁོར་བར་འཁོར་བའི་བྱ་བ་བྱེད་དོ། །དེ་འགོག་པ་ལ་ལས་འགོག་དགོས་དེ་འགོག་པ་ལ་ཉོན་མོངས་པ་འགོག་དགོས། དེ་འགོག་པ་ལ་རང་བཞིན་གྱི་རྟོག་པ་རྣམས་
དགག་དགོས། དེ་འགོག་པ་ལ་རང་བཞིན་གཡོ་བྱེད་ཀྱི་རླུང་དགག་དགོས། དེ་འགོག་པ་ལ་རྡོར་བཟླས་ཀྱིས་རླུང་རྣམས་དབུ་མར་བསྡུས་ནས་ས་ཆུ་ལ་ཐིམ་པ་ལ་སོགས་པའི་རིམ་གྱིས་ཐིམ་རིམ་རྣམས་བསྐྱེད་དགོས། དེའང་རླུང་རང་བཞིན་ལ་ཐིམ་པ་ནི་སྣ་བུག་དང་པོའི་སྒོར་རྒྱུ་བའི་རླུང་
6-4-37a


རགས་པ་ཐིམ་པ་ཡིན་ལ་དེ་ནས་རང་བཞིན་སྣང་བ་ལ་ཐིམ་པའི་དུས་སུ་རང་བཞིན་གཡོ་བའི་རླུང་ཡང་ཐིམ་པ་ཡིན་ཏེ་རང་བཞིན་གཡོ་བའི་རླུང་ཕྲ་བའོ། །དེ་ནས་སྟོང་པ་བཞིའི་སྔ་མ་རྣམས་ཕྱི་མ་ལ་ཐིམ་ནས་འོད་གསལ་མངོན་དུ་བྱེད་དོ། །འོ་ན་རྣལ་འབྱོར་
མའི་རྒྱུད་ནས་ཕྱིའི་རྐྱེན་ལས་རྒྱ་དང་ནང་གི་རྐྱེན་རླུང་དང་གཏུམ་མོ་ལ་སོགས་པ་ལ་བརྟེན་ནས། དགའ་བ་བཞི་བསྐྱེད་པའི་མཐར་སྐྱེས་པའི་ལྷན་སྐྱེས་ཉིད་ཕྱག་རྒྱ་ཆེན་པོ་བསྒོམ་པར་བྱས་ནས་བདེ་བས་ལམ་འགྲོད་པ་གཙོ་བོར་འཆད་ཀྱི། ས་ཚུལ་ཐིམ་པ་སོགས་
ཀྱི་རིམ་པས་འོད་གསལ་ཕྱག་རྒྱ་ཆེན་བོ་བསྒོམ་པ་གཙོ་བོར་མི་འཆད་པ་དང་། རྣལ་འབྱོར་གྱི་རྒྱུད་ཀྱི་སྐོར་ནས་ས་ཆུ་ལ་ཐིམ་པ་སོགས་ཀྱི་ཐིམ་རིམ་གྱི་སྒོ་ནས་འོད་གསལ་ལྷན་ཅིག་སྐྱེས་པའི་ཡེ་ཤེས་བསྒོམ་པ་གཙོ་བོར་འཆད་ཀྱི། ལྟེ་བའི་གཏུམ་མོའི་མེ་འབར་བས་སྤྱི་
བོའི་བྱང་སེམས་བཞུས་པའི་འབར་འཛག་གིས་བསྐྱེད་པའི་བདེ་བས་ལམ་བགྲོད་པ་གཙོ་བོར་མི་འཆད་པ་ཅི་ཡིན་སྙམ་ན། འདི་ལ་ཁ་ཅིག་ཕ་རྒྱུད་པ་གཙོ་བོར་སྤྲོས་པ་ཐིམ་པའི་སྟོང་པ་ལམ་དུ་བྱེད་ལ། མ་རྒྱུད་པ་གཙོ་བོར་བདེ་བ་ལམ་དུ་བྱེད་པས། རྒྱུད་དེ་གཉིས་སུ་སྟོང་པ་
བཞི་དང་དགའ་བ་བཞིའི་སྒོ་ནས་སོ་སོར་འཆད་པས་བདེ་བ་ཆེན་པོའི་ལམ་ནི་མ་རྒྱུད་ཀྱི་ཁྱད་ཆོས་ཡིན་པས་ཕ་རྒྱུད་རྣམས་རྣལ་འབྱོར་བླ་བའི་རྒྱུད་ཡིན་ཀྱང་བླ་མེད་མིན་ལ། མ་རྒྱུད་རྣམས་རྣལ་འབྱོར་བླ་མེད་ཀྱི་རྒྱུད་དུ་འདོད་དོ། །གཞན་དག་ནི་ཕྱག་ཆེན་ཐིག་ལེ་ལས་སྣང་
མཆེད་ཐོབ་གསུམ་དང་འོད་གསལ་བཞི་དགའ་བ་བཞིར་བཤད་པས། དགག་ཕྱོགས་རང་བཞིན་བརྒྱད་ཅུའི་སྤྲོས་པས་སྟོང་པའི་སྒོ་ནས་སྟོང་པ་བཞི་དང་། སྒྲུབ་ཕྱོགས་བདེ་བ་བཞི་སྐྱེ་བའི་ངོས་ནས་དགའ་བ་བཞི་བཤད་པར་འདོད་དོ། །ལ་ལ་ནི་མ་རྒྱུད་ལ་སེམས་
6-4-37b


དབེན་མན་ཆད་ཀྱི་ལམ་ལས་མེད་པས་དབང་པོ་བརྟུལ་པོ་བདེ་པའི་སྒོ་ནས་ཞི་གནས་དོན་དུ་གཉེར་བ་ལ་གསུངས་ལ། ཕ་རྒྱུད་ནི་ལྷག་མཐོང་དོན་དུ་གཉེར་བ་ལ་གསུངས་ཏེ། ཕྱི་གཟུང་བ་དང་ནང་འཛིན་པ་ལ་ཞེན་པ་དང་བདེན་གཉིས་ཐ་དད་དུ་འཛིན་པ་ནི། སྒྱུ་མ་དག་འོད་གསལ་
དང་ཟུང་འཇུག་གིས་འགོག་ལ་དེ་ཕ་རྒྱུད་ནས་གསུངས་པའི་ཕྱིར་རོ་ཞེས་ཟེར་རོ། །ཕལ་མོ་ཆེས་ཕ་རྒྱུ་དང་མ་རྒྱུད་དང་གཉིས་མེད་ཀྱི་རྒྱུད་གསུམ་དུ་བྱས་ནས། རང་གང་ལ་ཞེན་ཆེ་བའི་རྒྱུད་གཉིས་མེད་ཀྱི་རྒྱུད་དུ་ནན་གྱིས་བསྒྲུབ་ལ། དེ་དག་གི་དོན་ཤེས་རབ་ཀྱི་ཆ་གཙོ་བོར་
བསྟན་པ་དང་ཐབས་ཀྱི་ཆ་གཙོ་བོར་སྟོན་པ་ནི་མ་དང་ཕའི་རྒྱུད་ཡིན་པས་རྒྱུད་དམན་པར་འདོད་ལ། ཐབས་ཤེས་གཉིས་ཀ་ཆ་མཉམ་དུ་སྟོན་པ་ནི་གཉིས་མེད་ཀྱི་དོན་ཡིན་པས་བཟང་བར་འདོད་དོ། །དེ་ལ་བདེ་སྟོང་ལ་ཐབས་ཤེས་སུ་བྱས་པའི་ཐབས་ཤེས་ལ་ནི་རྒྱུད་གཉིས་
ཀ་འདྲ་བར་ནག་པོ་སྤྱོད་པས་བཤད་དེ་དུས་འཁོར་གྱི་ལུགས་ཀྱང་ཡིན་ནོ། །དེའི་ཕྱིར་དེ་གཉིས་ལ་བལྟོས་ནས་ཐབས་ཤེས་ཀྱི་རྒྱུད་སོ་སོར་འཇོག་པ་མིན་པས་ལུགས་དང་པོ་དང་གསུམ་པ་རྣམས་མི་འཐད་དོ། །བཞི་བ་ལའང་བརྗོད་པར་བྱ་སྟེ། བདེ་སྟོང་ལ་ཐབས་སུ་ཤེས་སུ་
བྱས་པའི་ཐབས་ཤེས་རེ་རེ་གཙོ་བོར་སྟོན་པ་ལ་བྱེད་ན་ནི། གཙོ་བོའི་དོན་གསལ་བ་དང་རྒྱས་པ་ལ་བྱེད་ན་བཟློག་ནས་སྨྲས་ན་ལན་ཅི་ཡོད། །གཙོ་བོའི་དོན་ལམ་གྱི་སྲོག་ཡིན་པ་ལ་བྱེད་ན། གཉིས་ཀས་ཀྱང་བདེ་སྟོང་དབྱེར་མེད་ལམ་གྱི་རྐང་དུ་འདོད་པས་མི་རིགས་སོ། །དགུག་
གཞུག་ལ་སོགས་པའི་བྱ་བ་ལ་ལྷ་ཕོ་འགྲོ་བ་དང་མོ་འགྲོ་བའི་ཐབས་ཤེས་ལ་བྱེད་ན་ནི། །ལྷ་ཕོ་མོ་གཉིས་ཀས་དགུས་གཞུག་ལ་སོགས་པའི་བྱ་བ་བྱེད་པ་བསྟན་པས། རྒྱུད་མཆོག་ཏུ་གྱུར་པ་ལ་ཁྱད་ཆོས་ཅི་ཞིག་ཡོད། ཁམས་དག་པའི་ལྷ་མོ་དང་ཕུང་པོ་དག་པའི་ལྷ་
6-4-38a


ཕོ་གཉིས་དཀྱིལ་འཁོར་ལ་གཙོ་བོར་བྱེད་མི་བྱེད་ཀྱི་ཐབས་ཤེས་ལ་བྱེད་ནའང་། དཀྱིལ་འཁོར་ལ་རིགས་ལྔ་འགོད་པའི་གནས་སུ་ལྷ་མོ་རྣམས་འགོད་པ་ལྟ་བུ་ལ་བྱ་དགོས་པས་དེ་ལྟ་ནའང་སྔ་མ་ལྟར་དེ་ཁྱད་ཆོས་སུ་ཅིས་འགྱུར། གཞན་ཡང་བདེ་བ་ཆེན་པོའི་ལ་
གཙོ་བོར་སྟོན་པ་ན་རྣལ་འབྱོར་གྱི་རྒྱུད་གསང་བ་འདུས་པའི་དོན་ཡིན་པར་གསང་བ་གྲུབ་པ་ལས་རྒྱས་པར་བཤད་པ་དང་ཡང་འགལ་ལོ། །འོ་ན་གང་ཡིན་སྙམ་ན། སངས་རྒྱས་སྒྲུབ་བྱེད་ཀྱི་ལམ་གྱི་གཙོ་བོ་ནི་རྫོགས་རིམ་ཡིན་ལ། དེ་ལའང་ཐབས་དང་ཐབས་བྱུང་གཉིས་ཀྱི་ཕྱི་མ་དོན་
བོ་ཡིན་ནོ། །དེ་ནི་ཆོས་གཟུགས་ཀྱི་སྐུ་གཉིས་ཀྱི་རྒྱུ་ཐབས་ཤེས་གཉིས་བདེ་སྟོང་དབྱེར་མེད་ཀྱི་སྟེང་ནས་སྟོན་པ་ལ་འདྲ་མོད་ཀྱང་། གཞན་ལུས་ཤེས་རབ་མའི་མཚན་ཉིད་དང་དབྱེ་བ་དང་བརྟག་པའི་ཐབས་དང་བསྟེན་པའི་ཚུལ་དང་། དེ་ལ་བརྟེན་ནས་བྱུང་བའི་དགའ་བ་
བཞིས་ལམ་བགྲོད་ལུགས་གཙོ་བོར་སྟོན་པ་ནི་ཤེས་རབ་ཀྱི་རྒྱུད་དང་། རང་ལུས་ཐབས་ལྡན་གྱི་དབང་དུ་བྱས་ནས། དང་པོར་ཤི་བའི་འོད་གསལ་ལས་སྐྱེས་པའི་རིམ་པ་དང་། དེ་ནས་སྡུད་པའི་འཆི་རིམ་བསྟན་ནས་དེ་ཇི་བཞིན་དུ་སྟོང་པ་བཞིས་ལམ་བགྲོད་ཚུལ་གཙོ་བོར་སྟོན་
པ་ནི་ཐབས་ཀྱི་རྒྱུད་དོ། །ཆགས་ལམ་གྱིས་ཆགས་པ་ལམ་དུ་བྱ་བའི་ཕྱིར་དུ་གསུངས་པའི་ལམ་ནི། གཉིས་ཀ་ལ་འདྲ་མོད་ཀྱང་ཆགས་པ་ལམ་དུ་བྱས་པ་ལ་བརྟེན་ནས་བདེ་བ་ཆེན་པོ་སྐྱེ་ལུགས་དང་། དེ་ཉིད་ཀྱིས་མཆོག་འགྲུབ་ལུགས་གཙོ་བོར་བཤད་པ་ན། ཚུལ་དེ་ཐེག་
པ་གཞན་དང་རྒྱུད་སྡེ་འོག་མ་ལ་མེད་པའི་ཁྱད་ཆོས་སུ་མཐོང་ཞིང་། དེའང་ལམ་ཤིན་ཏུ་འཇུག་པ་བདེ་ལ་མྱུར་བར་མཐོང་ནས་ལམ་འདི་ལ་མཆོག་ཏུ་གུས་པ་སྐྱེ་ཞིང་བརྩོན་འགྲུས་ཀྱང་འབར་བར་འགྱུར་རོ། །དེ་ནས་ལམ་དེས་འབྲས་བུ་འགྲུབ་པ་མྱུར་བ་དང་བདེ་བཙམ་དུ་མ་
6-4-38b


ཟད་འགྲུབ་པའི་རིམ་པ་ལའང་ཐུན་མོང་མ་ཡིན་པའི་ཁྱད་པར་འདི་ལྟར་ཡོད་ཅེས་སྟོན་པ་ན་ཐབས་རྒྱུད་ལྟར་བསྟན་དགོས་སོ། །འདི་ལྟར་བསྟན་པ་ན་དང་པོའི་ཐབས་ལ་བརྟེན་པའི་ལམ་བདེ་བ་དང་མྱུར་བར་མ་ཟད་ས་ལ་སོགས་པ་རིམ་གྱིས་ཐིམ་པའི་ཡང་ཉེ་རྒྱུ་རུ་མཐོང་ངོ་། །དེའི་ཚེ་དེ་ཐོག་
མར་བསྐྱེད་དེ་དེས་རྒྱུད་སྨིན་པར་བྱ་པས་ནི་སྤྲོས་པ་སྡུད་པའི་རྫོགས་རིམ་གྱི་རྒྱུའི་གཙོ་བོ་ཡིན་པས། བསྐྱེད་རིམ་གྱིས་རྒྱུད་སྨིན་པར་བྱེད་པ་དེ་ལ་རག་ལས་པའི་ཕྱིར་རོ། །གསང་བགྲུབ་པ་ལས་འདུས་པའི་གླེང་གཞིའི་དོན་རྣལ་འབྱོར་མའི་རྒྱུད་དང་ཁྱད་པར་མེད་པར་བསྟན་ཞིང་། དེ་
གོམས་པས་སྒྱུ་མའི་སྐུ་འགྲུབ་པར་གསུངས་པས་ལམ་ལོགས་པའང་མིན་ནོ། །དེ་ལྟར་ན་རྒྱུད་གཉིས་ལ་འཇུག་པའི་རིམ་པ་ནི་དང་པོར་མའི་རྒྱུད་དང་དེ་རྗེས་རྣལ་འབྱོར་གྱི་རྒྱུད་ལ་འཇུག་པར་བྱའོ། །རྡོར་བཟླས་གོམས་པས་ཙཎྜ་ལི་འབར་ནས་དགའ་བ་བཞི་བསྐྱེད་པར་གསུངས་
པའི་ཕྱིར། རྡོར་བཟླས་ཀྱི་དུས་སུའང་དགའ་བཞི་བསྒོམ་པ་ནི་ཡོད་དོ། །གཉིས་པ་ལ་གཉིས། དངོས་ཀྱི་དོན་དང་། རིམ་པ་ལྔ་པའི་མཚན་ཉིད་དོ། །དང་པོ་ནི། རླུང་གི་དེ་ཉིད་ནི་སྤྱོད་བསྡུས་ལས། སྲོག་དང་རྩོལ་བའི་བརྟག་པའོ། །ཞེས་གསུངས་ཏེ། སྲོག་རྩོལ་ནི་རླུང་ཙམ་མོ། །བརྟག་
པ་ནི་གཏན་ལ་འབེབས་པ་སྟེ། ངོ་བོ་དང་དབྱེ་བ་དང་རྒྱུ་ཚུལ་ལ་སོགས་པ་ཤེས་པར་བྱེད་པའོ། །དེའི་གཙོ་བོ་ནི་སྔར་བཤད་པའི་མི་ཤིགས་པ་ལས་སྤྲོ་བསྡུ་བྱེད་ཚུལ་ལོ། །རིམ་གྱིས་ནི་ཞེས་པ་དེ་སྔོན་དུ་བཏང་ནས་ཞེས་པའོ་དོན་ཏོ། །སྔགས་ཀྱི་དེ་ཉིད་ནི་བརྡ་ལ་སོགས་པ་འོག་ནས་
འཆད་པ་རྣམས་སོ། །སྤྱོ་བསྡུས་ལས། སྔགས་ནི་དབྱངས་གསལ་གྱི་རྒྱུ་ལས་བྱུང་བའི་སྦྲུལ་ལ་སོགས་པ་དང་། དེའི་དེ་ཉིད་མི་ཤིགས་པ་ལས་བྱུང་བའི་ཡི་གེ་གསུམ་ལ་འཆད་དེ། མི་ཤིགས་པ་ལས་བྱུང་བ་དང་དེར་སྡུད་པ་གཙོ་བོའི་དོན་ནོ། །ཡང་མགོ་འཇུག་ནི་སྔ་མ་ཤེས་
6-4-39a


པའི་རྗེས་སུ་ཕྱི་མ་ཤེས་པར་བྱེད་པའོ། །སྔགས་ཀྱི་བསྐྱེད་པ་ནི་སྔགས་ཐམས་ཅད་སྐྱེས་པ་དང་བུད་མེད་དང་མ་ནིང་གི་ངོ་བོ་ཉིད་ཡི་གེ་གསུམ་ལ་འཇུག་པའོ་ཞེས་གསུངས་པ་ལྟར་རོ། །དེ་རྟོགས་ནས་རླུང་སྔགས་དབྱེར་མི་ཕྱེད་པར་ཟློ་བའི་རྡོ་རྗེའི་བཟླས་པ་ལ་ནི་སློབ་
བོ། །འོག་ནས་འཆད་པ་ལྟར་རྡོ་རྗེ་བཟླས་པ་མཐར་ཕྱིན་པ་ལ་གནས་པའི་རྣལ་འབྱོར་པ་ནི། སེམས་ལ་དམིགས་པའི་སྟོང་པ་གསུམ་གྱི་ཡེ་ཤེས་ཐོབ་པར་འགྱུར་ཏེ་འཆད་པར་འགྱུར་རོ། །སེམས་དམིགས་ལ་ཆོས་ཅན་གྱི་སེམས་ལ་དམིགས་པ་དང་སེམས་ཀྱི་ཆོས་
ཉིད་ལ་དམིགས་པ་གཉིས་བྱས་ནས་སེམས་དབེན་གྱི་ཡེ་ཤེས་ནི་སྔ་མ་ཡིན་གྱི་ཕྱི་མ་མིན་ཏེ། ཡིན་ན་འོད་གསལ་དང་ཁྱད་པར་མེད་པར་འགྱུར་རོ་ཞེས་གསུང་མོད་ཀྱང་མི་འཐད་དེ། འོད་གསལ་གྱི་སྐབས་སུ་ནི་མངོན་སུམ་དུ་རྟོགས་པ་ཡིན་པས་སྐྱོན་མེད་པའི་ཕྱིར་རོ། །
སྐབས་འདིར། སེམས་ལ་དམིགས་པའི་རྣལ་འབྱོར་པས། །སྒྱུ་མའི་ལུས་ནི་ཐོབ་པར་འགྱུར། །ཞེས་སྔ་མའི་འགྲོས་ཀྱིས་ཁ་བསྐང་ངོ་། །ཐོབ་ལུགས་ནི་འཆད་པར་འགྱུར་རོ། །དེ་ནས་སྒྱུ་མ་ལྟ་བུའི་ཏིང་ངེ་འཛིན་དེ་ཡང་དག་པའི་མཐའ་འོད་གསལ་གྱིས་ནི་རྣམ་པར་སྦྱང་བར་བྱ་
སྟེ། སྒྱུ་མ་འོད་གསལ་དུ་བཅུག་པའི་སྒོ་ནས་སྒྱུ་ལུས་ཀྱི་འོད་གསལ་ཐོབ་པར་བྱ་བའོ། །དེ་སྐད་དུའང་། རང་བྱིན་བརླབ་པའི་རིམ་པ་ཡིས། །གང་ཕྱིར་འོད་གསལ་ཐོབ་འགྱུར་བ། །ཞེས་འཆད་པར་འགྱུར་རོ། །འོད་གསལ་བ་ཡང་དག་མཐའ་ལས་ལུགས་བཟློག་ཏུ་ལངས་ནས་
ནི། གཉིས་སུ་མེད་པའི་ཡེ་ཤེས་ཟུང་འཇུག་གི་གོ་འཕང་ཐོབ་པར་འགྱུར་རོ། །སྤྱོད་བསྡུས་སུ་ལུས་དབེན་ལ་བསླབས་ནས་རྡོ་རྗེ་བཟླས་པ་ལ་སློབ་པའི་རིམ་པའང་གསུངས་པའི་ལུས་དབེན་ནི། ལུས་དག་ངང་ངག་ཡིད་རྣམ་པར་དབེན་པའི་ཐོས་པ་འཛིན་པ་ཞེས་འོག་ནས་
6-4-39b


གསུངས་པས། འཕགས་པས་ཀྱང་མིང་ཙམ་གསུངས་སོ། །རིམ་ལྔར་འདིའི་མི་གསལ་བ་གསལ་བར་སྤྱོད་བསྡུས་སུ་གསུངས་སོ། །རྒྱུ་གར་བ་མང་པོས་ལུས་དབེན་བསྐྱེད་རིམ་དུ་བསྡུས། ཁ་ཅིག་གིས་རིགས་བརྒྱ་ནས་རིགས་གསུམ་གྱི་བར་རྣམས་བསྐྱེད་རིམ་དང་། རིགས་གཅིག་པ་
རྫོགས་རིམ་དུ་སྡུད་དེ། སྤྱོད་བསྡུས་ལས། ཕུང་པོ་དང་ཁམས་དང་སྐྱེ་མཆེད་ལ་སོགས་པ་བཤད་མ་ཐག་པ་ནི་ལུས་རྣམ་པར་དབེན་པ་སྟེ། དེ་ལ་ལྷ་རྣམ་པར་དགོད་པ་ནི་ཐམས་ཅད་ཀྱི་ཐུན་མོང་སྟེ། རགས་པའི་རྣལ་འབྱོར་ཡིན་པའི་ཕྱིར་རོ། །ཞེས་གསུངས་སོ། །ཐམས་ཅད་ཀྱི་ཞེས་པ་ནི་རིམ་
པ་གཉིས་ཀ་ལ་བྱ་དགོས་ཏེ་དེའི་འོག་ཏུ་ངག་དབེན་ཤིན་ཏུ་ཕྲ་བས་བསྐྱེད་རིམ་པའི་ཡུལ་མིན་པར་བསྟན་པས་ཤེས་སོ། །དེས་ན་ལུས་དབེན་ནི་བསྐྱེད་རྫོགས་གཉིས་ཀའི་ཡིན་ནོ་ཞེས་ཟེར་རོ། །དེས་ན་ལུས་དེ་ལ་ལྷ་དགོད་པ་རིམ་པ་གཉིས་ཀའི་ཐུན་མོང་ཡིན་པར་སྟོན་གྱི་ལུས་
དབེན་ཐུན་མོང་བར་བཞེད་པ་མིན་ཏེ། ལས་དང་པོ་བའི་ཏིང་ངེ་འཛིན་ལ་གནས་པའི་འོག་ཏུ་ལུས་དབེན་ལ་འཇུག་པར་གསུངས་པའི་ཕྱིར་དང་། བདག་བྱིན་བརླབས་ཀྱི་སྐབས་ནས། བསྐྱེད་པའི་རིམ་པ་ནས་བརྩམས་ཏེ་ལུས་དབེན་པའི་མཐར་ཐུག་པའི་བར་དུ་
ཞེས་ཏེ་གཉིས་སོ་སོར་བཤད་པའི་ཕྱིར་རོ། །དས་ན་ལུས་དབེན་ནི་ལྷན་ཅིག་སྐྱེས་པའི་ཡེ་ཤེས་གཅིག་ཉིད་རིགས་བརྒྱ་དང་རིགས་ལྔ་དང་རིགས་གསུམ་དང་རིགས་གཅིག་ཏུ་ལྟ་བ་ཡིན་ཏེ། མཉམ་སྦྱོར་དང་ནམ་མཁའ་དང་མཉམ་པའི་ལུང་དྲངས་པས་ཤེས་སོ། །དེས་ན་ཕུང་
པོ་ལྔ་ཁམས་ལྔ་དབང་པོ་ལྔ་ཡུལ་ལྔ་ནི་དབེན་གཞིའི་ལུས་ཡིན་ལ། དེ་ཉིད་ལྷན་ཅིག་སྐྱེས་པའི་རྣམ་འཕྲུལ་དུ་ལྟ་ཞིང་། དེའང་རིགས་ལྔའི་ངོ་བོར་བལྟ་བ་ནི་དབེན་སྐུ་རྡོ་རྗེའི་ཏིང་ངེ་འཛིན་ཏོ། །འདིའང་ཕྲ་མོའི་རྣལ་འབྱོར་མཐར་ཕྱིན་ནས་བསྒོམ་ལ། དེའི་ཚེ་འོག་སྒོའི་
6-4-40a


ཕྲ་མོ་ལ་བརྟེན་ནས་དགའ་བ་བཞི་བསྐྱེད་ནུས་བས། དེར་སྐྱེས་པའི་ལྷན་སྐྱེས་ཀྱི་ངོ་བོར་བལྟ་བའི་ཆ་ནས་རྫོགས་རིམ་དང་། སྤྱིར་ཕུང་པོ་སོགས་ལྷར་ལྟ་བའི་ཆ་ནས་བསྐྱེད་རིམ་དང་བྱེད་དོ། །ཕྱི་མ་འདིའང་ལུས་དབེན་དུ་བྱས་ནས་བསྐྱེད་རིམ་དུ་སྡུད་ནའང་
སྐྱོན་ཆུང་བར་སྣང་ངོ་། །དེ་འདྲ་བའི་རྫོགས་རིམ་གྱི་ལུས་དབེན་དེ་ལ་སོར་སྡུད་དང་བསམ་གཏན་གཉིས་སུ་བྱེད་པས། སྲོག་རྩོལ་གྱི་སྔོན་དུ་སོར་བསམ་འགྲོ་བར་གསུངས་པ་དང་། སྲོག་རྩོལ་གྱི་སྔོན་དུ་ལུས་དབེན་འགྲོ་བར་གསུངས་པ་གཉིས་དོན་གཅིག་གོ། །གཉིས་པ་ནི། ཟུང་འཇུག་
གི་ཏིང་ངེ་འཛིན་ལ་གནས་པ་ནི་སླར་ཞིང་སྟེ་སླར་ཡང་ལམ་གང་ལའང་མི་སློབ་བོ། །འོ་ན་འདིའི་ཟུང་འཇུག་རྫོགས་པའི་སངས་རྒྱས་ཀྱི་ཟུང་འཇུག་ཡིན་ནམ་སྙམ་ན། འོད་གསལ་ཐོག་མར་ཐོབ་པའི་རྗེས་ཀྱི་ཟུང་འཇུག་ནི་སློབ་པའི་ཟུང་འཇུག་ཡིན་པ་འདིའང་སློབ་
པའི་ཟུང་འཇུག་གོ། །སློབ་མི་སློབ་ཀྱི་ཟུང་འཇུག་གཉིས་ཡོད་པར་ནི་འོག་ནས་གསུངས་ལ། རྡོ་རྗེ་ཕྲེང་བ་ལས་ཀྱང་ཕྱག་རྒྱ་ཆེན་པོའི་དངོས་གྲུབ་ཇི་ལྟར་ཐོབ་ཅེས་ཞུས་པའི་ལན་དུ་ཟུང་འཇུག་གིས་ཐོབ་པར་གསུངས་པས་ཟུང་འཇུག་ལ་གཉིས་ཡོད་དོ། །ཡང་དག་མཐའ་
ལས་ལངས་ནས་ཟུང་འཇུག་ཐོབ་པར་གསུངས་པ་ཡང་སློབ་པའི་ཟུང་འཇུག་གི་སྐབས་ཡིན་ལ། མི་སློབ་པའི་སྐབས་སུ་ནི་ཡང་དག་མཐའ་ལ་མཉམ་པར་བཞག་བཞིན་དུ་ཟུང་འཇུག་གི་སྐུ་འགྲུབ་བོ། །དེས་ན་གང་ལའང་མི་སློབ་པ་ནི་ཟུང་འཇུག་མན་ཆད་ཀྱི་ལམ་ལ་ལེགས་
པར་བསླབས་ཟིན་པའི་ཕྱིར་དང་། ཟུང་འཇུག་ཉིད་གོམས་པར་བྱས་པས་སངས་རྒྱས་འགྲུབ་པའི་ཕྱིར་གསར་དུ་མི་སློབ་བོ། །གཞུང་འདི་རྣམས་ཀྱིས་སློབ་ཀྱི་ཟུང་འཇུག་འདྲེས་མར་འཆད་པས་གཉིས་ཀ་དང་སྦྱར་རོ། །ཟུང་འཇུག་གི་གོ་འཕང་ཐོབ་པ་འདི་ནི་
6-4-40b


ཡོངས་སུ་རྫོགས་པའི་རྣལ་འབྱོར་པ་ཡིན་ལ། རྡོ་རྗེ་འཛིན་པ་ཆེན་པོའང་དེ་ཡིན་ནོ། །ལཀྵྨཱི་ས་ཟུང་འཇུག་རྫོགས་རིམ་དངོས་ཡིན་ལ་གཞན་རྣམས་རྒྱུ་ལ་འབྲས་བུའི་མིང་གིས་བཏགས་པའི་རྫོགས་རིམ་ཞེས་འཆད་དོ ། རྣམ་པ་ཀུན་གྱི་ཞེས་པ་གཉིས་སློབ་པའི་ཟུང་འཇུག་
ལ་སྦྱར་ན། མཚན་དཔེས་སྤྲས་པའི་ཟུང་འཇུག་གི་སྐུ་འོད་གསལ་ཐོབ་པའི་དེ་མ་ཐག་ནས་འབྱུང་ཞེས་སྦྱར་ལ། མི་སློབ་པའི་ཟུང་འཇུག་ལ་སྦྱར་ན། འོད་གསལ་མཐར་ཐུག་པ་ཐོབ་པ་དེ་ནས་མཚན་དཔེ་མཐར་ཐུག་པའི་རྣམ་པ་ཐམས་ཅད་ཀྱི་མཆོག་དང་ལྡན་པའི་
ཐམས་ཅད་མཁྱེན་པར་འགྱུར་རོ། །འདས་དང་ཞེས་པ་བཞིའང་འོད་གསལ་ཐོབ་པ་ལ་བལྟོས་ཏེ་རིམ་གྱིས་དང་ཅིག་ཅར་དུ་དུས་གསུམ་མཐོང་བ་སློབ་མི་སློབ་གཉིས་ལ་ཇི་རིགས་པར་སྦྱར་རོ། །གསུམ་པ་ནི། འོ་ན་རླུང་གི་དེ་ཉིད་ལ་སོགས་པ་འདི་དག་རྒྱུད་གང་ན་ཡོད་པ་
ཡིན་ཞེ་ན། ཕུན་སུམ་ཚོགས་པའི་དཔལ་དང་ལྡན་ཞིང་སྐུ་གསུང་ཐུགས་ཀྱི་གསང་བ་གསུམ་འདུས་པའི་རྩ་པའི་རྒྱུད་དུ་ནི་རླུང་གི་དེ་ཉིད་ལ་སོགས་པ་འདི་དག་གནས་པས་འདུས་པ་ལས་ཤེས་པར་བྱའོ། །རྒྱུད་དེ་ནས་གསལ་པོར་བཤད་ཡོད་དམ་སྙམ་ན། རྒྱས་
བཏབ་པ་སྟེ་སྦས་པའི་ཚུལ་གྱིས་གནས་པས་གསལ་པོར་མེད་དོ། །འདིས་ནི་མཐར་ཐུག་པའི་གདམས་ངག་རིམ་པ་ལྔའམ་ཡན་ལག་དྲུག་གི་རྣལ་འབྱོར་གྱི་ཡོད་པ་ནི་འདུས་པའི་རྩ་རྒྱུད་ཡིན་པར་བསྟན་ཏོ། །བཞི་པ་ནི། འོ་ན་འདུས་པའི་རྩ་རྒྱུད་ན་ཡོད་དུ་ཆུག་
ཀྱང་། རྒྱས་བཏབ་ནས་ཤིན་ཏུ་མི་གསལ་ན། དེ་ཐབས་གང་ལས་རྟོགས་པར་བྱ་ཞེ་ན། བླ་མ་མཚན་ཉིད་དང་ལྡན་པའི་ཞལ་ལས་ཤེས་པར་བྱའོ། །ཞལ་ལས་ཤེས་ལུགས་ནི། རྡོ་རྗེ་ཕྲེང་བ་ལ་སོགས་པ་བཤད་པའི་རྒྱུད་བཞིའི་རྗེས་སུ་འབྲངས་ནས། བླ་མས་
6-4-41a


བསྟན་པ་ལས་ཤེས་པར་བྱེད་པའོ། འདིས་ནི་མན་ངག་མཐར་ཐུག་པ་རྣམས་རྒྱུད་ན་མ་བྲིས་པར་བླ་མའི་ཞལ་ཤེས་སུ་བཞག་ཅེས་སྟོན་པ་མིན་ཏེ། དེ་རྣམས་རྩ་རྒྱུད་ན་མི་གསལ་བར་བཞུགས་པ་དེ་བཤད་རྒྱུད་ཀྱིས་གསལ་བར་སྟན་པར་
གསུངས་པས། ཡོད་པ་ནི་རྒྱུད་སྡེ་གཉིས་པོ་དེ་ཉིད་ཡིན་པར་བསྟན་ཅིང་། དེ་ལྟར་ཡོད་ཀྱང་རྩ་བཤད་ཀྱི་རྒྱུད་སྦྱར་ནས་ཕྱིན་ཅི་མ་ལོག་པར་འཆད་ཤེས་པའི་བླ་མ་མེད་ན་རྟོགས་མི་ནུས་པས་བླ་མས་བཤད་དགོས་ཞེས་པའི་དོན་ནོ། །དེས་ན་རྒྱུད་ཡོངས་སུ་
རྫོགས་པར་བཤད་པར་ཡང་བྱེད་ལ། དེ་ཙམ་གྱིས་ད་དུང་མན་ངག་གི་གནད་མཐར་ཐུག་པ་མི་ཤེས་པར་ཟུར་དུ་བཙལ་དགོས་ཞེས་སྨྲ་པ་ནི་ཕན་ཚུན་འགལ་བའི་ཁུར་ཡིན་པས་རྒྱུད་ཀྱི་གཞུང་བཤད་རྫོགས་པར་ཤེས་ཀྱང་མན་ངག་མཐར་ཐུག་ཟུར་ནས་བཙལ་
དགོས་ན། མན་ངག་དེ་ཡོད་པ་རྒྱུད་དེ་མིན་བར་སོང་ལ། དེ་མི་འདོད་ནི་རྒྱུད་ཀྱི་གཞུང་བཤད་ད་དུང་མ་རྫོགས་ཞེས་སྨྲ་བར་མི་རིགས་སོ། །དེའི་ཕྱིར་གདམས་ངག་གི་གནད་མཐར་ཐུག་པ་རྣམས་ཀྱང་གདམས་ངག་གི་ལུས་རྣམས་རྒྱུད་སྡེ་ལ་སོགས་པའི་གཞུང་
ཆེ་བ་ནི་ཡོད་པའི་ཟུར་སྒྲོན་དགོས་པ་རྣམས་བླ་མའི་མན་ངག་གིས་སྒྲོན་ན་ལེགས་པ་ཡིན་ནོ། །བཤད་རྒྱུད་རྡོ་རྗེ་ཕྲེང་བར་ཕྱག་ན་རྡོ་རྗེ་འཆང་ལ་དྲི་བ་བརྒྱད་ཅུ་གྱ་གཉིས་དྲིས་པ་རྣམས་ཀྱང་གཙོ་བོར་གསང་འདུས་སུ་བརྡ་ཙམ་གྱིས་མི་གསལ་བར་གསུང་བ་ལ་
ཐེ་ཚོམ་གཅོད་པ་ཡིན་ཏེ། དེ་ཉིད་ལས། རྡོ་རྗེ་ཕྲེང་བ་མངོན་རྟོགས་པ། །དེ་ཉིད་ཅུང་ཟད་འདྲི་འཚལ་གྱིས། །རྫོགས་པའི་རིམ་པའི་རྣལ་འབྱོར་གྱིས། །ཁྱོད་ཀྱིས་བདག་ལ་བསྟན་དུ་གསོལ། །དཔལ་ལྡན་འདུས་པར་བརྡ་ཙམ་གྱིས། །རྣལ་འབྱོར་བླ་ན་མེད་རྒྱུད་དུ། །
6-4-41b


ཐུབ་པ་ཆེན་པོས་ཆོས་ཕུང་པོ། །བརྒྱད་ཁྲི་དང་ནི་བཞི་སྟོང་ངོ་། །དེ་སྐད་སྨྲས་ནས་མདུན་འདུག་སྟེ། །ཞེས་སོ། །འགྲེལ་བས་ཆོས་ཕུང་བརྒྱད་ཁྲི་བཞི་སྟོང་བསྡུས་པའི་ངོ་བོ་རྣལ་འབྱོར་བླ་ན་མེད་པའི་དཔལ་གསང་བ་འདུས་པ་ལ་རྡོ་རྗེ་ཕྲེང་བ་འདྲི་པར་འཚལ་ཞེས་འཆད་དོ། །བཤད་
རྒྱུད་ཤིན་ཏུ་གསལ་བས་འདི་རྣམས་ནི་བཅོམ་ལྡན་འདས་ཉིད་ཀྱིས་རྩ་རྒྱུས་ཀྱི་རང་འགྲེལ་མཛད་པ་ཡིན་པས་འགྲེལ་པའི་མཆོག་ཏུ་ཤེས་པར་གྱིས་ཤིག །སྒྲོན་གསལ་ལས་ཀྱང་། དཔལ་ལྡན་རྒྱུད་རྒྱལ་རྣལ་འབྱོར་རྒྱུད་ཀྱིས་ཤིན་ཏུ་གསལ་བར་རྣམ་ཕྱེ་
ལེགས་བཤད་པ། །མཐའ་དྲུག་གི་ནི་འཆིང་བས་བཅིངས་བས་རྒྱལ་སྲས་ཡུལ་གྱུར་རྒྱལ་བའི་འདུས་གང་ཡིན། །སངས་རྒྱས་ཀུན་གྱིས་རིམ་གཉིས་གནས་ཀྱིས་རྒྱས་བཏབ་དེ་ནི་ཀླུ་སྒྲུབ་ལས་རྙེད་པ། །ཞེས་གསུངས་ཏེ། རྒྱལ་བས་བཤད་རྒྱུད་ཀྱིས་གསལ་བར་
ཕྱེ་བར་མ་ཟད། མགོན་པོ་ཀླུ་སྒྲུབ་ལྟ་བུས་རྩ་བཤད་གཉིས་ཤན་སྦྱར་ནས་ཀྱང་ལེགས་པར་བཤད་པའི་གདམས་ངག་རིམ་ལྔ་ལྟ་བུ་ནས་མ་ཟིན་པའི་གདམས་ངག་མཐར་ཐུག་པ་ལོགས་སུ་རྩད་གཅོད་པ་ནི་རང་ཉིད་བློ་གྲོས་ཆུང་བར་སྟོན་པ་ཙམ་དུ་ཟད་པས། བླ་མ་དམ་པ་
ལ་བརྟེན་ནས་ཡུན་རིང་དུ་གཞུང་དེ་དག་གི་དོན་རྟོགས་ན་ཅི་མ་རུང་སྙམ་དུ་བསམས་ནས། བསག་སྦྱང་གི་སྒོ་རྒྱ་ཆེན་པོའི་ལྷན་ཅིག་བྱེད་རྐྱེན་ཅན་གྱི་ཐོས་པ་དང་བསམ་པ་དང་སྒོམ་པ་ལ་འབད་ནས་རྒྱུད་ཤིང་རྟ་ཆེན་པོའི་དགོངས་འགྲེལ་གྱི་གཞུང་རྣམས་གདམས་ངག་
གི་མཆོག་ཏུ་འཆར་བའི་བས་པ་ཅི་སྐྱེ་བྱའོ། །གཉིས་པ་ལ་གཉིས། རླུང་གི་དེ་ཁོ་ན་ཉིད་དང་། སྔགས་ཀྱི་དེ་ཁོ་ན་ཉིད་དོ། །དང་པོ་ལ་གཉིས། རྩ་རྒྱུད་ལས་གསུངས་ཚུལ་དང་། དེ་བཤད་རྒྱུད་ཀྱིས་བསྟན་ཚུལ་ལོ། །དང་པོ་ནི། རིམ་པ་ལྔ་བསྟན་པར་བྱ་བ་དེ་ལ་སྟེ་དེའི་ནང་
6-4-41c


ནས་རིམ་ལྔའི་དང་པོ་ཁོ་ནར་དེ་ཉིད་དུ་རླུང་གི་དེ་ཁོ་ན་ཉིད་མདོར་བསྡུས་ནས་མི་གསལ་བའི་ཚུལ་གྱིས་སྟོན་པའི་ཚིག་རྩ་བའི་རྒྱུད་ལ་འཇུག་པར་བྱ་སྟེ། །ཞེས་གསུངས་སོ། །ཡང་ན་རླུང་གི་དེ་ཉིད་སྟོན་པའི་ཁུངས་གཉིས་ལས་དང་པོ་ཉིད་དུ་རྩ་རྒྱུད་ལ་འཇུག་པར་
བྱ་སྟེ། དེ་ནི་མདོར་བསྟན་པ་ཡིན་ལ། བཤད་རྒྱུད་ནི་དེ་འཆད་བྱེད་འགྲེལ་པ་ལྟ་བུ་ཡིན་པའི་ཕྱིར་རོ། །ཁུངས་དགོད་པ་ནི། སྣ་ཡི་རྩེ་མོར་ཡུངས་ཀར་བསམ། །ཞེས་པའི་རྐང་པ་བཞི་ནི་རྩ་རྒྱུད་ཀྱི་ལེའུ་དྲུག་པ་དང་། རིན་ཆེན་ཆེན་པོ་ཁ་དོག་ལྔ་ཞེས་པ་བཞི་ནི་ལེའུ་གསུམ་པ་
ལས་གསུངས་སོ། །འདི་ནི་དགོངས་པས་བཤད་པའོ། །ཞེས་ཚིགས་བཅད་འདི་གཉིས་མཐའ་དྲུག་གི་ནང་ནས་དགོངས་བཤད་དུ་གསུངས་ལ། སྤྱོད་བསྡུས་སུ་ཚིགས་བཅད་ཕྱི་མ་འདི་ལ་མཐའ་དྲུག་གི་ནང་ནས་དྲང་དོན་དང་དེས་དོན་གྱི་བཤད་མཛད་ཅིང་། སྒྲོན་གསལ་ལས་
དང་པོ་ལ་དྲང་ངེས་དང་གཉིས་པ་ལ་ཚུལ་བཞིའི་བཤད་པ་མཛད་དོ། །དེ་ལྟ་ནའང་འགལ་བ་མེད་དེ། འདི་ལྟར་འཇིག་རྟེན་གྱི་ཐ་སྙད་ལ་རླུང་ལ་ཡུངས་ཀར་གྱི་སྒྲ་འགལ་བའི་ཆ་ནས་དགོངས་བཤད་དུ་གསུངས་ཤིང་། ཡང་དག་པའི་དོན་རྫོགས་རིམ་པའི་ཕྲ་མོའི་རྣལ་འབྱོར་
མི་མངོན་པར་ཁོང་དུ་སྦས་ནས། དངོས་སུ་བསྐྱེད་རིམ་པའི་ཕྲ་མོའི་རྣལ་འབྱོར་བསྟན་པས་དྲང་ངེས་སུ་བཤད་པས་ཀྱང་ཆོག་གོ། །ངག་དོན་ཞིབ་ཏུ་ཕྱེ་ན་ཚུལ་བཞིའི་བཤད་པ་འཇུག་ཀྱང་བསྡུ་ན་བསྐྱེད་རྫོགས་གཉིས་སུ་འདུ་བས་དྲང་ངེས་སུ་བཤད་པས་ཆོག་པའི་
ཕྱིར་རོ། །དེ་ལྟར་འཕགས་པས་རྩ་རྒྱུད་ཀྱི་སྐབས་གཉིས་དྲངས་ལ། འཕགས་པ་ལྷས་ལེའུ་གསུམ་པའི་གཞུང་ཙམ་ལས་མ་དྲངས་ཀྱང་རྩ་རྒྱུད་རླུང་གི་དེ་ཉིད་སྟོན་པའི་ཚིག་གཞན་མེད་པ་ནི་མ་ཡིན་ཏེ། ལེའུ་དང་པོར་གཟུངས་དཀྱིལ་གྱི་ལྷ་མོ་དགུ་སྤྲུལ་པ་དགོངས་
6-4-41d


པ་ལུང་སྟོན་དུ། དེ་ནས་དེ་བཞིན་གཤེགས་ཀུན་དང་། །དེ་བཞིན་བྱང་ཆུབ་སེམས་དཔའ་རྣམས། །དེ་བཞིན་གཤེགས་པ་བདག་པོ་དང་། །མཉེས་པའི་ཕྱིར་ནི་ཞུགས་པར་གྱུར། །སྲོག་དང་ཐུར་སེལ་གྱེན་རྒྱུ་དང་། །ཁྱབ་དང་མཉམ་གནས་དེ་བཤད་དང་། །ཀླུ་དང་རུས་སྦལ་རྩངས་པ་དང་། །
ལྷས་བྱིན་དང་ནི་གཞུ་ལས་རྒྱལ། །དེ་དག་བདག་གཟུགས་བུད་མེད་དུ། །སླར་ཡང་སྤྲུལ་བར་མཛད་པ་ཡིན། །ཞེས་གསུངས་པའི་ཕྱིར་རོ། །འོ་ན་ལྷ་མོ་དགུ་ལས་མེད་པ་དང་རླུང་བཅུ་གཉིས་གྲངས་མ་མཐུན་ནོ་སྙམ་ན། རྒྱུད་ཕྱི་མ་ལས། ལྷ་མོ་དགུ་དང་ནམ་མཁའི་ཁམས། །མ་
ཏོག་ཅེས་ནི་བཤད་པ་ཡིན། །སྐུ་གསུང་ཐུགས་ཀྱི་དབྱེ་བ་ཡིས། །རིགས་ཀྱི་རིམ་གྱིས་དགོད་པར་བྱ། །ཞེས་གསུངས་པའི་ལྷ་མོ་དགུ་ནི། །ཁྱབ་བྱེད་མ་གཏོགས་པའི་རླུང་དགུ་དང་ནམ་མཁའི་ཁམས་ནི་ཁྱབ་བྱེད་ཀྱི་རླུང་དུ་འགྲེལ་པས་བཤད་ནས་བཅུར་བྱས་པ་ལྟར། ཁྱབ་བྱེད་ནམ་
མཁའི་ཁམས་ཀྱི་ཁམས་བཞི་ཆར་ལ་ཁྱབ་པ་བགྲངས་པས་བཅུར་འགྱུར་རོ། །སྐུ་གསུངས་ཐུགས་ནི་ལྡང་འཇུག་གནས་གསུམ་དང་། རིགས་ཀྱི་རིམ་པ་ནི་ཡི་གེ་གསུམ་དུ་ཤེས་པར་བྱ་བར་འགྲེལ་པས་བཤད་དེ། དེ་ལྟར་ན་རླུང་བཅུ་ཡང་རྩ་རྒྱུད་ཀྱིས་གསུངས་སོ། །སྔོན་བྱུང་ལ་
རྣམ་སྣང་ལ་སོགས་པ་རྣམས་རྡོ་རྗེ་འཆང་གི་སྐུ་ལ་ཞུགས་པའི་འོག་ཏུ་བུད་མེད་དུ་སྤྲུལ་པ་རྡོ་རྗེ་འཆད་ལ་དགྱེས་པ་བསྐྱེད་པའི་ཕྱིར་ཡིན་པར་གསུངས་ལ། དེ་ཉིད་མ་འོང་པའི་སྒྲུབ་པ་པོས་ཆགས་པ་ལམ་དུ་བྱས་ན་བྱང་ཆུབ་སྒྲུབ་བའི་དོན་དུ་མདོ་བསྲེ་ལས་གསུངས་ཏེ། 
དགའ་བ་བཞིའི་སྒོ་ནས་དགྱེས་པ་བསྐྱེད་པའོ། །དེ་དག་བསྐྱེད་བའི་དུས་ཀྱི་འདོད་ཆགས་ཆེན་པོའི་ཚུལ་དྲང་ངེས་ཀྱི་བཤད་པ་གཉིས་བྱས་པའི་ངེས་དོན་གྱི་སྐབས་སུ་སྟོང་པ་གསུམ་བསྐྱེད་པར་སྒྲོན་གསལ་ལས་གསུངས་སོ། །དེ་ལྟར་ན་ཕྱིའི་རིག་མ་ལ་བརྟེན་ནས་ཡེ་ཤེས་
6-4-42a


གསུམ་བསྐྱེད་པ་ལྟར་ནང་གི་རྡོར་བཟླས་ཀྱི་རླུང་གིས་ཀྱང་བསྐྱེད་པས་བུད་མེད་དང་རླུང་གཉིས་ཀ་ལ་བཤད་དོ། །གཉིས་པ་ལ་གསུམ། ལྷ་མོ་བཞིས་ཞུས་ཀྱིས་ངེས་པར་བསྟན་པ། རྒྱུད་ཕྱི་མས་གསལ་བར་གསུངས་པ། རྡོ་རྗེ་ཕྲེང་བས་སོ་སོར་ངེས་པར་
བསྟན་པའོ། །དང་པོ་ནི། སྔར་དྲངས་པའི་རྩ་རྒྱུད་ཀྱི་ལུང་རྡོ་རྗེ་ལྟར་དབྱེ་དཀའ་བའི་རྡོ་རྗེའི་ཚིག་འདིའི་ངེས་པར་བསྟན་པ་ནི། ལྷ་མོ་བཞིས་ཞུས་པ་ཞེས་པ་འདུས་པའི་བཤད་པའི་རྒྱུད་དུ་གསུངས་སོ། །འདི་ལ་ལཀྵྨཱིས། གང་དེ་སྟེ་གང་གི་ཕྱིར་ལྷ་མོ་ཁྱོད་ཀྱིས་བདག་ལ་རླུང་གི་དེ་ཁོ་ན་ཉིད་
དྲིས་པ་དེའི་ཕྱིར་ཁྱོད་ལ་གསང་བ་དེ་བདག་གིས་བཤད་པར་བྱའོ། །དེ་ཇི་ལྟ་བུ་སྙམ་ན། སྙིང་པོ་ནི་བསྐྱེད་རིམ་མོ། །དེ་ལས་ཀྱང་སྙིང་པོ་ནི་རྫོགས་རིམ་མོ། །མཆོག་ནི་རླུང་གི་དེ་ཁོ་ན་ཉིད་དེ། ཁྱད་པར་དང་ལྡན་པའི་ཕྱིར་དང་། དེ་མེད་ན་དེ་ལ་འཇུག་པར་མི་འགྱུར་བའི་ཕྱིར་དང་། 
ཕྲ་མོ་ཡིན་པའི་ཕྱིར་རོ། །རྟོག་པའི་རྣལ་འབྱོར་པ་ལ་སྦས་པས་གསང་བའོ། །སངས་རྒྱས་ཏེ་ཕུང་པོ་ལྔ་པོ་ཀུན་གྱི་བདག་ཉིད་ལ་ཁྱབ་བྱེད་དུ་གནས་པའོ་ཞེས་འཆད་དོ། །སངས་རྒྱས་ཀུན་གྱི་སྣོད་མིན་ལ་གསང་བའི་ལམ་དེ་ནི་ངས་རབ་ཏུ་བཤད་པར་བྱའོ། །ལྷ་མོ་ཞེས་པ་ནི་འབོད་
པའོ། །དེ་ཇི་འདྲ་བ་ཞིག་སྙམ་ན། སྙིང་པོ་ནི་ལྷན་ཅིག་སྐྱེས་པ་འོད་གསལ་དུ་འཇུག་པའི་ཐབས་རྣམས་སོ། །དེ་ལས་ཀྱང་སྙིང་པོར་གྱུར་པ་མཆོག་ནི་རླུང་འགྲོ་འོང་གི་བཟླས་པའོ། །དེ་འདྲ་བའི་བཟླས་པ་གང་ཡིན་པ་དེ་ནི། ལུས་ཅན་ཐམས་ཅད་ལ་བདག་ཉིད་དེ་རང་བཞིན་
གྱིས་གནས་པ་སྟེ། རྡོར་ཕྲེང་ལས། གང་ཡང་ཁམས་གསུམ་སེམས་ཅན་རྣམས། །སྲོག་དང་རྩོལ་བ་ལ་བརྟེན་པ། །གསང་སྔགས་རྒྱལ་པོ་ཟློས་བཞིན་དུ། །མི་ཤེས་བསམ་གཏན་ཀློག་པ་སྤང་། །ཞེས་པ་ལྟར་རོ། །ཡུངས་ཀར་གྱི་ནི་འབྲུ་ཚོད་ཙམ། །ཞེས་པ་ནི་
6-4-42b


རྩ་རྒྱུད་དུ་ཡུངས་ཀར་གྱི་སྒྲས་བསྟན་པ་དེ་འཆད་པར་བཞེས་ནས་བཤད་བྱར་བཀོད་པའོ། །འབྲུ་ཚོད་ཙམ་དེ་ཉིད་ནི་ཡེ་ཤེས་ལྔའི་དངོས་པོ་སྟེ་ངོ་བོའི་ཞེས་བཤད་དོ། །འོ་ན་ཡུགས་ཀར་གྱི་དོན་ཡེ་ཤེས་ལྔའི་ངོ་བོར་གསུངས་པས་རླུང་ལ་ཇི་ལྟར་དུ་གོ་སྙམ་ན། རིན་པོ་ཆེ་ཁ་དོག་
སྣ་ལྔ་པ་བསྒོམ་པར་གསུངས་པ་དེ་སྙིང་པོ་མཆོག་ཏུ་གསུངས་པས་རྫོགས་རིམ་ཡིན་པར་ཤེས་ལ། རིམ་ཆེན་ཁ་དོག་སྣ་ལྔ་པ་ཞེས་པ་ཡེ་ཤེས་ལྔའི་ངོ་བོར་གོ་ཞིང་། དེའང་རང་བཞིན་གྱིས་ཀུན་ལ་གནས་པ་དང་། གནས་དེ་སྣའི་རྩེ་མོར་བསྒོམ་བར་གསུངས་
པས་རླུང་འོད་ཟེར་ལྔའི་འབྱུང་འཇུག་བསྒོམ་པ་ཡུགས་ཀར་གྱི་དོན་དུ་ཤེས་སོ། །རླུང་འོད་ཟེར་ལྔ་པོ་ཡེ་ཤེས་ལྔར་བཤད་པ་ནི་རིགས་ལྔར་གོ་ལ། རིགས་ལྔ་པོ་དེའི་དབུས་ན་གནས་པའི་ལྷ་ནི་སྙིང་གའི་མི་བསྐྱོད་པར་གོ་བས་དེའི་ངོ་བོའི་སྲོག་རླུང་ངོ་། །དེ་གསལ་བ་ནི་རིགས་པའི་སྲོག་
རླུང་ཀུན་ལ་དབང་བྱེད་པའོ། །མི་གསལ་བ་ནི་ཕྲ་བའི་སྲོག་རླུང་མི་ཤིགས་པའི་ཐིག་ལེའོ། །རྒྱུད་དེས་ནི་རླུང་འགྲོ་འོང་གི་བཟླས་པ་དེ་འོད་གསལ་ལྷན་ཅིག་སྐྱེས་པའི་ཡེ་ཤེས་བསྐྱེད་པའི་ཐབས་རྣམས་ཀྱི་མཆོག་དང་། རླུང་གི་གཙོ་བོ་སྲོག་རླུང་ནི་མི་ཤིགས་པའི་ཐིག་ལེ་ཡིན་པར་
གསུངས་པས། །ལུས་ལ་གནད་དུ་བསྣུན་པའི་རྩ་རླུང་ཐིག་ལེའི་གདམས་པ་རྣམས་ཀྱི་སྙིང་པོ་ལས་ཀྱང་ཡང་སྙིང་མཆོག་ནི་རྡོར་བཟླས་ཡིན་པ་ལ་ངེས་པ་དྲང་དགོས་ཤིང་། དེའི་གནད་མཐར་ཐུག་པ་ཡང་སྙིང་ག་ན་ཡོད་པར་ངེས་པར་གྱིས་ཤིག །གཉིས་པ་ནི། འདུས་པའི་
རྒྱུད་ཕྱི་མའི་ལེའུ་བཅོ་བརྒྱད་པར་ཡང་རྩ་རྒྱུད་ཀྱིས་རིན་ཆེན་ཁ་དོག་སྣ་ལྔ་པ་ཡུངས་ཀར་གྱི་ཚད་ཙམ་སྒོམ་པར་གསུངས་པའི་དོན་རླུང་འགྲོ་འོང་གི་རྡོར་བཟླས་ཡིན་པའི་དོན་འདི་ཉིད་གསལ་བར་གསུངས་ཏེ་ཞེས་མཚམས་སྦྱོར་བའོ། །ཡང་གི་སྒྲས་ནི་སྔ་མས་རྩ་རྒྱུད་
6-4-43a


ཀྱི་དོན་གཏན་ལ་ཕབ་པར་མ་ཟད་པའོ། །རིན་ཆེན་ཁ་དོག་སྣ་ལྔ་པ། །ཞེས་པ་ནི་རྩ་རྒྱུད་དུ་གསུངས་པ་བཤད་བྱར་བཀོད་པ་ཡིན་པས། དེའི་དོན་ནི་སྲོག་དང་རྩོལ་བ་ཞེས་བྱ་བ་ཡིན་པར་རྒྱུད་ཕྱི་མ་འདིར་བཤད་དོ། འདིས་ནི་སྟེང་གི་སྒོར་གྱེན་དུ་འགྲོ་བའི་ཁ་
དོག་སྣ་ལྔ་པ་བསྟན་ཏེ་དེ་བཞིན་གཤེགས་པ་ལྔའི་བདག་ཉིད་དོ། དེ་ཉིད་མེ་ལོང་ལྟ་བུ་ལ་སོགས་པ་ཡེ་ཤེས་ལྔའི་རང་བཞིན་གྱི་དབུགས་ཏེ་སྣ་སྒོ་གཡས་པར་མེ་དང་གཡོན་པར་རླུང་དང་གཉིས་ཀ་ནས་ས་དང་ཆུའི་རླུང་དང་། ཁྱབ་བྱེད་ན་མཁའི་རླུང་ངུ་འགྱུར་བས་འབྱུང་བ་
ལྔའི་ངོ་བོ་ཉིད་དོ། དེ་ཉིད་རང་གི་རྡོ་རྗེའི་བུ་ག་ལས་ཕྱུང་ནས་རིག་མའི་བདྨའི་སྣ་རྩེར་གོང་བུ་སྟེ་ཐིག་ལེའི་གཟུགས་ཀྱིས་བརྟག་པ་སྟེ་བསྒོམ་པར་བྱའོ། རང་གི་སྙིང་གའི་པདྨ་ལ་ཨ་ཐུང་བསམས་ནས་ནི་མི་ཤིགས་པའི་ཐིག་ལེ་དེར་སོག་སྟེ་རླུང་རྣམས་ཕྱིར་མི་རྒྱུ་བར་གྱུར་པར་
བཞག་གོ། །རང་སྔགས་ནི་འཇུག་ལྡང་གནས་གསུམ་གྱི་ངོ་བོར་ཟློས་པའོ། །རྒྱུད་འདིས་རྩ་རྒྱུད་ཀྱི་སྣ་རྩེ་ཞེས་པ་དེ་ལ་གདོང་གི་སྣ་རྩེ་དང་གསང་བའི་སྣ་རྩེ་དང་སྙིང་གའི་སྣ་རྩེ་གསུམ་དུ་བྱས་ནས། སྟེང་གི་སྒོར་རྡོ་རྗེའི་བཟླས་པ་དང་། འོག་གི་སྒོར་ཐིག་ལེའི་རྣལ་འབྱོར་དང་། 
སྙིང་གར་མི་ཤིགས་པའི་ཐིག་ལེ་ལ་རླུང་སྡུད་པའི་ཚུལ་གྱིས་སྲོག་རྩོལ་གསུམ་བཤད་དེ་སྣ་རྩེ་གསུམ་དང་ཡུངས་ཀར་གྱི་འབྲུ་ཚོད་ཙམ་གྱི་ཐིག་ལེ་གསུམ་དུ་འགྱུར་རོ། །རྒྱུད་རྡོ་རྗེ་ཕྲེང་བར། ཆགས་ཅན་གྱིས་གསང་བའི་སྣ་རྩེར་རྫས་ཀྱི་ཐིག་ལེ་དང་ཞེ་སྡང་ཅན་གྱིས་སྙིང་
གར་སྔགས་ཀྱི་ཐིག་ལེ་དང་། གཏི་མུག་ཅན་གྱིས་སྟེང་སྒོར་འོད་ཀྱི་ཐིག་ལེ་བསྒོམ་པར་གསུངས་ཏེ། གང་ཟག་གསུམ་སོ་སོ་བའི་ལམ་དུ་བཤད་དོ། །འཇམ་དཔལ་ཞལ་ལུང་གི་དགོངས་པ་ནི། དང་བོར་སྙིང་གར་སྔགས་ཀྱི་ཐིག་ལེ་བསྒོམ་སྟེ་རང་སྔགས་ཞེས་པ་གཉིས་
6-4-43b


ཀྱི་དོན་དང་། དེ་ནས་ནོར་བུའི་སྣ་རྩེར་གསང་བའི་ཐིག་ལེ་བསྒོམ། དེ་ནས་སྟེང་སྒོར་སྤྲུལ་པའི་ཐིག་ལེ་ཞེས་པ་རླུང་ལ་རྡོར་བཟླས་བྱེད་པར་བཤད་པས་གང་ཟག་གཅིག་གིས་རིམ་ཅན་དུ་གསུམ་ག་བསྒོམ་པའོ། །སྒྲོན་གསལ་དང་དེའི་རྗེས་འབྲང་ནཱ་རོ་པས་སྔར་བཤད་པ་བཞིན་
དུ་བཤད་ལ། སྤྱོད་བསྡུས་ལས། དཀྱིལ་འཁོར་བཞིའི་རླུང་ལྡང་འཇུག་གནས་གསུམ་ཡི་གེ་གསུམ་དང་སྦྱར་ནས་ཟློ་བའི་དོན་འདི་ཉིད། རང་སྔགས་ཞེས་པའི་རྐང་པ་གཉིས་མ་གཏོགས་པ་རྐང་པ་དྲུག་གི་དོན་དུ་བཤད་དོ། །དེའི་ཕྱིར་ཡེ་ཤེས་ལྔ་ཞེས་པའི་ཚིགས་བཅད་ཀྱི་
དོན་ནི་སྟེང་སྒོར་རྡོར་བཟླས་བྱེད་པ་ལའང་སྦྱར་དགོས་པས་གཉིས་སུ་དྲང་ངོ་། །རང་ལྷ་ཡབ་ཡུམ་དུ་བསྒོམས་པའི་རིག་མའི་པདྨར་རྫས་ཀྱི་ཐིག་ལེ་བསྒོམ་པ་འདི། རིམ་པ་དང་པོའི་སྐབས་སུ་འོག་སྒོར་ཐིག་ལེ་ཕྲ་མོའི་རྣལ་འབྱོར་བསྒོམ་པར་བཤད་པ་དང་མི་གཅིག་སྟེ་དེ་ནི་
ཐིག་ལེའི་ནང་དུ་རྟེན་དང་བརྟེན་པའི་དཀྱིལ་འཁོར་བསྒོམ་པ་ཡིན་ལ། འདིར་ནི་ཐིག་ལེ་ཙམ་ཞིག་བསྒོམ་པ་ཡིན་ནོ། །དེ་བསྒོམས་པས་ས་ཆུ་ལ་ཐིམ་པ་ལ་སོགསཔའི་རྟགས་རྣམས་འཆར་བར་ཞལ་ལུང་ལས་གསུངས་ཏེ་འདིས་ཀྱང་སྲོག་དབུ་མར་སྡུད་པ་ཡིན་ནོ། །
ལཀྵིས་རྣལ་འབྱོར་པ་ཕོ་མོ་གཉིས་ཀྱིས་རང་རང་གསང་བའི་སྣ་རྩེར་ཐིག་ལེ་སོ་སོར་བསྒོམ་པ་ཡེ་ཤེས་ལྔ་ཞེས་པའི་རྐང་པ་བཞིའི་དོན་དུ་བྱས་ཏེ་ཆགས་ཅན་གྱི་ཕྲ་མོའི་རྣལ་འབྱོར་དང་། རིན་ཆེན་ཞེས་པ་རྐང་པ་བཞིས་སྙིང་གར་ཧཱུཾ་ཡིག་བསྒོམ་པ་ཞེ་སྡང་ཅན་གྱི་
དེའི་དབང་དུ་བྱས་པར་བཤད་ནས་རྒྱུད་ཕྱི་མའི་ལུང་དེ་དག་སྟེང་གི་སྣ་སྒོང་རླུང་བསྒོམ་པ་ལ་མ་སྦྱར་བ་ནི། སྤྱོད་བསྡུས་དང་སྒྲོན་གསལ་དང་འགལ་བར་སྣང་ངོ་། །འོ་ན་རྡོ་རྗེ་ཕྲེང་བར་སྣ་རྩེ་གསུམ་དུ་ཐིག་ལེ་གསུམ་བསྒོམ་པ་དེ་གང་ཟག་སོ་སོའི་ལམ་དུ་བཤད་པ་ཇི་ལྟར་
6-4-44a


ཡིན་ཞེ་ན། སྣ་རྩེ་གསུམ་དུ་ཐིག་ལེ་གསུམ་བསྒོམ་པར་གསུངས་པ་དེ་དུག་གསུམ་ཤས་ཆེ་བའི་གང་ཟག་གིས་གཙོ་བོར་བསྒོམས་ན་ཡོན་ཏན་སྐྱེ་མྱུར་བས་གཙོ་བོར་གང་བསྒོམས་པ་ལ་དགོངས་སོ། །འཆད་པར་འགྱུར་བ་ལྟར་རྡོར་བཟླས་ཀྱི་སྲོག་དབུ་
མར་བཅུག་པའི་རྗེས་སུ་སྙིང་གར་བསམས་ནས་ནི། སྲོག་ནི་ཐིག་ལེར་གྱུར་པར་བཞག །ཅེས་གསུངས་པ་བཞིན་དུ་མི་ཤིགས་པའི་ཐིག་ལེ་ཨ་ཐུང་ལ་སྡུད་པའི་གདམས་ངག་ཤེས་དགོས་སོ། །རྡོ་རྗེ་ཕྲེང་བའི་འགྲེལ་པ་ལས་ཀྱང་། འདིར་ཡང་གདམས་ངག་སྟེ། དང་
པོ་ཉིད་རིམ་པ་ལྔ་ལ་བརྟེན་ནས་གྲངས་ལ་སོགས་པའི་རིམ་པ་རླུང་གི་དེ་ཁོ་ན་ཉིད་དང་། སྔགས་ཀྱི་དེ་ཁོ་ནི་ཉིད་དག་ནི་ཐུན་ཕྱེད་ཕྱེད་ཀྱི་བར་དུ་རྣལ་འབྱོར་རྣམ་པ་གསུམ་ལ་བལྟོས་ནས་ཐིག་ལེ་གསུམ་པོ་རིམ་པ་བཞིན་དུ་ཉེ་བར་མཚོན་པར་བྱས་ནས། ཕྱེ་ནས་འཇུག་པ
དང་ལྡང་བ་དག་ལ་རིམ་པ་དེ་ཉིད་ཀྱི་ཨ་ཡིག་གི་རྣམ་པས་གནས་པའི་རླུང་ལ་ངེས་པར་སྦྱར་ནས་དེ་ཉིད་དུ་ཐིག་ལེའི་ངོ་བོ་བསྒོམས་པས། རླུང་ཕྲ་མོས་ཉེ་བར་མཚོན་ནས་དེ་ཉིད་དུ་བསྐལ་པའམ་བསྐལ་པ་སྟོང་གི་བར་དུ་གནས་བར་བྱ་ཞེས་བཤད་དོ། །སྦྱོར་བ་ཡན་ལག་དྲུག་གི་
སྲོག་རྩོལ་རྒྱུད་ཕྱི་མར་གསུངས་པའི་རླུང་གི་རྣལ་འབྱོར་གྱིས་སྲོག་དབུ་མར་འཇུག་ལུགས་ནི། འཕགས་པ་ཡབ་སྲས་རྣམས་རྡོར་བཟླས་ཉིད་ལ་མཛད་བས། རྒྱུད་ཕྱི་མས་ཀྱང་རྩ་བའི་རྒྱུད་ཀྱི་དོན་དེ་ལྟར་དུ་བཀྲལ་ཏེ་འདིས་རླུང་རྣམས་མི་ཤིགས་པའི་ཐིག་ལེ་ལ་སྡུད་བར་
བཤད་པ་འདི་ནི་རླུང་གི་དེ་ཁོ་ན་ཉིད་མཐར་ཐུག་པར་ཤེས་པར་བྱའོ། །གསུམ་པ་ནི། རླུང་འགྲོ་འོང་གི་བཟླས་པ་འདི་ཉིད་དཀྱིལ་འཁོར་རྣམས་ཀྱི་སོ་སོར་ངེས་པར་བསྟན་པ་ནི། རྡོ་རྗེ་ཕྲེང་བ་ཞེས་བྱ་བ་བཤད་པའི་རྒྱུད་དུ་གསུངས་སོ་ཞེས་སྦྱར་རོ། །ཡང་ན་སྔ་མ་གཉིས་
6-4-44b


ཀྱིས་སྟེང་སྒོའི་རླུང་སྤྱི་ལ་བཤད་པ་ཙམ་དུ་མ་ཟད་པའོ། །འདི་ལ་བཞི། མདོར་བསྟན་པ། རྒྱས་པར་བཤད་པ། དོན་བསྡུ་བ། དེ་རྟོགས་དཀའ་བར་བསྟན་པའོ། །དང་པོ་ནི། རྩ་བའི་རྒྱུད་ལས། སྣ་ཡི་རྩེ་མོར་ཡུངས་ཀར་བསམ། །ཞེས་བྱ་བ་འདི་ནི་སྲོག་སྟེ་དབུགས་རྩོལ་བ་སྟེ་རིང་
དུ་སྤྲོ་བའི་བརྟག་པ་སྟེ་མཚོན་བྱེད་ཡིན་ནོ། །སྲོག་གི་རྩོལ་བའམ་སྲོག་དང་རྩོལ་བ་དེ་ཉིད་ལ་སངས་རྒྱས་ལྔའི་རང་བཞིན་འོད་ཟེར་ལྔ་རྣམ་པར་གནས་སོ། །འོད་ལྔ་སངས་རྒྱས་ངོ་བོར་བསྒོམ། །ཞེས་འདོན་པ་ལྟར་ན་རླུང་འོད་ཟེར་ལྔ་སངས་རྒྱས་ལྔར་ཤེས་པར་བྱ་བའི་དོན་ནོ། །
རྡོ་རྗེ་ཕྲེང་བ་ལས། སྣ་ཡི་རྩེ་མོ་དེ་ཉིད་མཆོག །རླུང་ལྔ་ཡི་ནི་རང་ངོ་བོ། །རླུང་གི་ཐིག་ལེ་ཞེས་ནི་བཤད། །ཡང་དག་དེ་ཉིད་གསལ་བ་ཡང་། །སྣ་རྩེར་ཡུངས་ཀར་དེ་ཡང་ནི། །རྒྱུད་གཞན་རྣམས་སུ་གསུངས་པ་ནི། །སྣ་རྩེར་ཡུངས་ཀར་ཞེས་པ་ནི། །སྲོག་དང་རྩོལ་བའི་བརྟག་
པ་སྟེ། །ཞེས་དང་པོ་བཞིས་འོད་ཀྱི་ཐིག་ལེ་བསྒོམ་པའི་གནས་དང་། དེ་ནས་བཞིས་འདུས་པ་ལ་སོགས་པའི་རྒྱུད་གཞན་དུ་གསུངས་པའི་དགོངས་པ་བཤད་དོ། །སྣ་རྩེར་ཞེས་པ་དེ་སྣ་རྩེ་གསུམ་ལས་གང་ཡིན་སྙམ་ན། སྟེང་གི་སྣ་ལས་ངེས་པར་འབྱུང་བ་ཡིན་ལ། འབྱུང་
ཚུལ་ནི་རྣམ་པ་བཞིར་འགྱུར་རོ་ཞེས་སྦྱར་རོ། །ཇི་ལྟར་ཞེ་ན། སྣ་བུག་གཡོན་པ་དང་གཡས་པ་རེ་རེ་བ་གཉིས་དང་བུག་གཉིས་ཀ་ནས་དུས་མཉམ་དུ་རྒྱུ་བ་དང་དལ་བར་རྒྱུ་བ་བཞིའོ། །འདི་རྒྱུ་བའི་ལམ་ལ་བྱེད་ན་གསུམ་ལས་མེད་ལ། རྒྱུ་ཚུལ་གྱིས་བྱེད་ན་སྔ་མ་
གསུམ་ལ་རྒྱུ་ཚུལ་མ་བཤད་པས་བཞིར་བྱེད་པ་ཇི་ལྟར་ཡིན་སྙམ་ན། གཡས་གཡོན་རེས་འཇོག་ཏུ་རྒྱུ་བ་གཉིས་དང་གཉིས་ཀ་ནས་དུས་མཉམ་དུ་རྒྱུ་བ་གཉིས་སུ་ཕྱེ་ནས་བཞིར་བྱེད་ལ། གཉིས་ཀ་ནས་རྒྱུ་བ་ལ་ནི་དྲག་ཞན་དུ་རྒྱུ་བ་གཉིས་ཡོད་པས། དལ་བ་ཞེས་
6-4-45a


གསུངས་པས་སྔ་མ་དེ་ལས་དྲག་པར་རྒྱུ་བ་གོ་བར་ནུས་སོ། །དེས་ན་གཉིས་ཀ་དང་ཞེས་པ་སོ་སོར་གཅོད་པ་མིན་གྱི་དེ་ནས་རྒྱུ་བ་ལ་དྲག་ཞན་གཉིས་སུ་འབྱེད་བའོ། །རྒྱུ་ཚུལ་བཞི་པོ་དེ་ནང་གི་དུས་ནི་ཡིན་པར་རྒྱུད་འདིར་བཤད་ཅེས་གསུངས་པ་ནི། ཉིན་
ཞག་གཅིག་གི་དུས་ངོས་འཛིན་པ་ལ་ཕྱིའི་ཆུ་ཚོད་ལ་སོགས་པས་འཛིན་པའི་དོད་ནང་དུ་དབུགས་རྒྱུ་བའི་གྲངས་ཀྱིས་འཛིན་པར་ནུས་པའོ། །འོ་ན་སྣ་བུ་ནས་འགྲོ་འོང་བྱེད་པའི་རླུང་བཞི་པོ་དེ་གནས་ཇི་འདྲ་ཞིག་ནས་འགྲོ་འོང་བྱེད་པ་ཡིན་ཞེ་ན། སྣ་བུག་གཡས་ནས་རྒྱུ་བ་ནི་
ལྐོག་མ་སྟེ་མགྲིན་པའི་པདྨ་ནས་འགྲོ་འོང་སྟོན་པ་སྟེ་བྱེད་ལ། དེ་བཞིན་དུ་སྣ་བུག་གཉིས་ཀ་ནས་དལ་བར་རྒྱུ་བ་ནི་སྙིང་གའི་པདྨ་དང་། སྣ་བུག་གཡོན་ནས་རྒྱུ་བ་ནི་ལྟེ་བའི་པདྨ་དག་སྣ་བུག་གཉིས་ཀ་ནས་དྲག་པར་རྒྱུ་བ་ནི་གསང་བའི་པདྨ་ནས་འགྲོ་འོང་བྱེད་དོ་ཞེས་གསུངས་
པས་རླུང་དེ་བཞིའི་གནས་ཀྱང་དེ་དག་ཏུ་བསྟན་ནོ། །འདིས་ནི་སྣ་སྒོར་རྒྱུ་བའི་རླུང་བཞི་པོ་དེ་ནང་ནས་འོང་བའི་ཚེ་གནས་དེ་དག་ནས་འོང་བ་དང་ནང་དུ་ལྡོག་བའི་ཚེ་གནས་དེ་དག་ཏུ་ཞུགས་ནས། གནས་དེ་དག་མན་ཆད་ནས་འོང་བ་དང་མན་ཆད་དུ་འགྲོ་བ་འགོག་བ་མིན་ཏེ། སྤྱོད་
བསྡུད་ལས། སྟེང་དུ་འགྲོ་བའི་རླུང་དེ་རྣམས་འོག་གི་སྣ་སྒོ་གཉིས་ནས་བྱུང་ནས་འགྲོ་བར་གསུངས་པའི་ཕྱིར་རོ། །དེས་ན་གནས་དེ་རྣམས་རླུང་དེ་དག་གི་སྡོད་པའི་གནས་སུ་སྟོན་པ་ཙམ་སྟེ། དཔེར་ན་མེ་རླུང་སྣ་བུག་གཡས་ནས་མི་རྒྱུ་བའི་དུས་སུ་མགྲིན་པར་གནས་
པ་བཞིན་ནོ། །རླུང་བཞི་རྒྱུ་བའི་གོ་རིམ་འོག་ནས་འཆད་པའི་རིམ་པ་ཇི་བཞིན་དུ་རྒྱུ་བའི་ཆེ་རླུང་བཞི་པོ་རེ་རེ་ཡུན་ཇི་ཙམ་ཞིག་དུ་གནས་སྙམ་ན། ཐུན་ཕྱེད་ཕྱེད་ཀྱི་དུས་སུ་གནས་ནས་རྒྱུའོ། །འདི་ལ་འགྱུར་ནི། །ཐུན་ཕྱེད་ཀྱི་ནི་དུས་དག་ཏུ། །གོ་རིམ་ཇི་བཞིན་གནས་
6-4-45b


པར་བསྟན། །ཞེས་རྒྱུད་ལས་གསུངས་ལ། མན་སྙེར། ཐུན་ཕྱེད་དུས་སུ་རིམ་འོངས་པས། །གོ་རིམ་ཇི་བཞིན་གནས་པར་བྱེད། །ཅེས་བསྒྱུར་བ་ལེགས་སོ། ལཀྵྨཱི་དང་ཨ་ལམ་ཀ་ཀ་ལ་ཤས་ནི། ཉིན་མོའི་ཐུན་བཞིའི་དང་པོ་མེ་དང་གཉིས་པ་ལ་རླུང་དང་ཉིན་གུང་ནས་བརྩམས་པའི་
གསུམ་པ་ལ་ས་དང་བཞི་པ་ལ་ཆུ་སྟེ་བཞི་དང་མཚན་མོ་ལའང་དེ་ལྟར་བཞི་སྟེ་བརྒྱད་དོ། །དེའང་ཐུན་རེ་ལ་ཆུ་ཚོད་བརྒྱད་ཡོད་པའི་ཐུན་ཚོད་རེ་རེ་ལ་ལྡང་འཇུག་གནས་གསུམ་དང་བྲལ་བའི་འོད་གསལ་གྱི་ཆུ་ཚོད་ཕྱེད་ཕྱེད་འཆར་བས་ཆུ་ཚོད་ཕྱེད་དང་བརྒྱད་དུ་འགྱུར་ལ། 
ཐུན་ཕྱེད་ནི་རགས་པར་ན་བརྒྱད་དང་ཞིབ་ཏུ་ན་དེའི་ཕྱེད་དུ་འཆད་དེ། རྒྱུད་འདིར་ཞག་གཅིག་ལ་ཆུ་ཚོད་དང་དབྱུ་གུ་དྲུག་ཅུ་ལས་མ་བཤད་བས་དེའི་དབང་དུ་བྱས་ནས་རེ་བཞིར་བཤད་པ་དང་འགལ་བ་སྤངས་པའོ། །རྒྱུད་འདི་དང་གདན་བཞི་དང་རྡེ་རྗེ་མཁའ་འགྲོར་ཉིན་ཞག་གཅིག་ལ་
ཆུ་ཚོད་དྲུག་ཅུར་བཤད་དེ་དབྱུ་གུ་ཡང་དེ་དང་འདྲ་བར་འདིར་བཤད་དོ། །ཀྱེ་རྡོ་རྗེ་དང་སྡོམ་འབྱུང་ལས། ཞག་གཅིག་ལ་ཆུ་ཚོད་སོ་གཉིས་དང་དབྱུ་གུ་རེ་བཞི་དང་འཕོ་བ་ཅུ་དྲུག་ཏུ་བཤད་དོ། །འདི་དང་གཉིས་མེད་རྣམ་རྒྱལ་དུ་དཀྱིལ་འཁོར་རེ་རྒྱུ་བའི་ཡུན་ཐུན་ཕྱེད་དུ་བཤད་ལས། དགོངས་
པ་ལུང་སྟོན་དུ་དཀྱིལ་འཁོར་བཞི་པོ་རེ་རེ་རྒྱུ་བའི་ཡུན་ཚད་རླུང་འབྱུང་འཇུག་དགུ་བརྒྱར་བྱས་ནས་ཞག་གཅིག་ལ་དགུ་བརྒྱ་པོ་ཚན་པ་ཉེར་བཞིར་བཤད་ལ། དེ་རྣམས་ཕྱོགས་གཅིག་ཏུ་རིམ་ལྔ་དྲངས་པ་རྣམས་བསྟུན་དགོས་པས། དཀྱིལ་འཁོར་རེ་རེ་ཐུན་ཕྱེད་ཕྱེད་དུ་གནས་པར་
གསུངས་པའི་ཐུན་ཕྱེད་ནི་རླུང་དགུ་བརྒྱ་པ་རེ་རེ་ལ་བྱའོ། །འོ་ན་རྡོར་ཕྲེང་ལས་ཉིན་ཞག་གཅིག་ལ་ཐུན་བརྒྱད་དུ་བཤད་པ་འགལ་ལོ་ཞེ་ན། དེ་ནི་ཕྱིའི་ཐུན་ཚོད་བརྒྱད་དང་ནང་གི་སྙིང་གའི་རྩ་བརྒྱད་སྦྱར་བའི་དབང་དུ་བྱས་ལ། ཐུན་ཕྱེད་ཉེར་བཞིར་བྱེད་པ་ནི་ནང་གི་དཀྱིལ་
6-4-46a


འཁོར་རེ་རེའི་རླུང་རྒྱུ་བའི་ཡུན་ཚད་ཀྱི་དབང་དུ་བྱས་པའོ། །དེས་ན་ཉིན་མོའི་ཐུན་བཞི་ལ་དཀྱིལ་འཁོར་ཆེ་བ་བཅུ་གཉིས་ཡོད་པས་དཀྱིལ་འཁོར་བཞིས་ཉིན་མོའི་ཐུན་རྫོགས་པ་མི་འཐད་དེ་མཚན་མོ་ལའང་ངོ་། འོ་ན་རླུང་དགུ་བརྒྱ་པ་ཕྲག་རེས་ཐུན་
ཕྱེད་དུ་གནས་པར་གསུངས་པ་དེ་འཕོ་བའི་ཚད་དུ་ནི་བྱ་དགོས་ལ། དེ་ལྟ་ན་སྣ་བུག་གཅིག་ནས་གཅིག་ཏུ་འཕོ་བ་ལ་བྱེད་ན། ཞག་གཅིག་ལ་སྣ་བུག་གི་འཕོ་བ་ཉེར་བཞི་ཡོད་པར་འགྱུར་ལ། དཀྱིལ་འཁོར་གཅིག་ནས་གཅིག་ཏུ་འཕོ་བ་བྱེད་ནའང་མི་འཐད་དེ། གྱེན་རྒྱུ་དང་མཉམ་
གནས་ཀྱི་རླུང་ལ་ནི་སྣ་བུག་མ་འཕོས་ན་དཀྱིལ་འཁོར་འཕོ་བ་མེད་ལ་འཕོ་བ་འདིའང་རླུང་སྤྱིའི་དབང་དུ་མཛད་པའི་ཕྱིར་རོ་ཞེ་ན། འདི་ལ་མན་སྙེར་ཐུན་ཚོད་ཕྱེད་ལ་ས་ཆུ་མེ་རླུང་གི་དཀྱིལ་འཁོར་བཞི་པོ་རེ་རེ་ལ་ཉིས་བརྒྱ་ཉི་ཤུ་རྩ་ལྔའི་བདག་ཉིད་ཅན་རྣམས་འབབ་ཅིང་སླར་
ཡང་ཐུན་ཚོད་ཕྱེད་ལ་བཞི་པོ་སྔར་ལྟར་སྣ་བུག་གཅིག་ཏུ་བབས་ནས་དེའི་རྗེས་སུ་བུ་ག་གཞན་དུ་འབབ་བོ་ཞེས་བཤད་དོ། །དེའི་ལྟར་ན་སྣ་བུག་གཡས་སུ་མེ་རླུང་དགུ་བརྒྱ་པ་ཕྲག་གཅིག་བརྒྱུས་པའི་རྗེས་སུ་དཀྱིལ་འཁོར་གཞན་གྱི་དགུ་བརྒྱ་པ་ཕྲག་གཅིག་རྒྱུ་ན་གཞུང་དང་
འགལ་ལ། དེ་ཉིད་བསྐྱར་ནས་རྒྱུ་ན་དགུ་བརྒྱ་པ་ཕྲག་གཉིས་སུ་གཅོད་པའི་རྒྱུ་མཚན་གང་ཡིན། མེའི་མེ་གོས་དཀར་མོ་རྒྱུ་བ་ནས་མེའི་ཆུ་མཱ་མ་ཀཱི་རྒྱུ་བའི་བར་གྱི་དཀྱིལ་འཁོར་ཆུང་བ་བཞི་བརྒྱུས་ཟིན་པའི་འོག་ཏུ་སླར་ཡང་མེའི་མེ་གོས་དཀར་མོ་རྒྱུ་བ་སོགས་རྟོགས་
པའི་ཕྱིར་ཡིན་ནོ་ཞེ་ན། དཀྱིལ་འཁོར་ཆེ་བ་རེ་རེ་རྒྱུ་བའི་ཡུན་ཚད་མ་བསྟན་པར་འགྱུར་བས་མེ་འཐད་དོ། །གཞན་ཡང་རླུང་སྟོང་ཕྲག་བརྒྱད་བརྒྱ་རེས་སྣ་བུག་གཡས་གཡོན་དུ་འཕོ་བའི་འཕོ་བ་བཅུ་གཉིས་བྱེད་ན། རླུང་བཞི་པོ་རེ་རེ་ལ་འཕོ་ཆེན་གསུམ་གསུམ་བྱེད་
6-4-46b


དགོས་ལ། དེའི་ཚེ་སྲོག་ཐུར་གྱི་སྟོང་བརྒྱད་བརྒྱ་པ་ཚན་པ་དྲུག་པོ་དེ་མཉམ་རྒྱུ་བྱ་རུ་དགོས་པས། ཞག་གཅིག་སྣ་བུག་གི་འཕོ་བ་དྲུག་ཏུ་འགྱུར་རོ། །དེས་ན་སྤྱིར་རླུང་གི་འཕོ་བ་འདི་ལ་རྩ་འདབ་གཅིག་ནས་གཅིག་ཏུ་འཕོ་བ་དང་། རླུང་གཅིག་ཏུ་འཕོ་བ་དང་། སྣ་བུག་གཅིག་ནས་
གཅིག་ཏུ་འཕོ་བ་སྟེ་གསུམ་སྣང་ངོ་། །དང་པོ་ནི་ཞག་གཅིག་ལ་རླུང་ཉི་ཁྲི་ཆིག་སྟོང་དྲུག་བརྒྱ་རྒྱུ་བ་ལ། ལྟེ་བའི་རྩ་འདབ་རེ་བཞི་ནས་ཅི་ཙམ་རེ་རྒྱུ་བའི་དབང་དུ་བྱས་ན་དབུགས་སུམ་བརྒྱ་དང་སུམ་ཅུ་སོ་ཕྱེད་དང་བརྒྱད་རྩ་འདབ་གཅིག་ལ་བརྒྱུས་ཟིན་པའི་འོག་ཏུ་གཉིས་པ་སོགས་སུ་
འཕོས་ནས་དེ་བཞིན་དུ་རྒྱུའོ། །དེའི་ཚེ་ལྟ་བའི་རྩ་འདབ་གཅིག་ལ་རྒྱུ་བ་དེ་ཉིས་འགྱུར་ཞིག་སྤྱི་བོའི་རྩ་འདབ་གཅིག་ལ་རྒྱུ། དེ་གཅིག་ལ་རྒྱུ་བའི་ཉིས་འགྱུར་མགྲིན་པའི་རྩ་འདབ་གཅིག་ལ་རྒྱུ། དེ་གཅིག་ལ་རྒྱུ་བའི་ཉིས་འགྱུར་སྙིང་གའི་རྩ་འདབ་གཅིག་ལ་རྒྱུ་བར་བཤད་དོ། །
དེ་ལྟ་བུའི་རྩ་འདབ་གཅིག་ནས་གཅིག་ཏུ་འཕོས་ཀྱང་རླུང་གི་དཀྱིལ་འཁོར་ཆེ་ཆུང་བཞི་དང་སྣ་བུག་གཡས་གཡོན་གཅིག་ནས་གཅིག་ཏུ་འཕོས་པའི་ངེས་པ་མེད་དོ། །ལྟེ་བའི་འཁོར་ལོ་རིམ་པ་གསུམ་པ་ལ་རྩ་འདབ་བཅུ་གཉིས་ཡོད་པའི་རེ་རེ་ནས་འཕོས་ན་སྣ་སྒོ་གཡས་
གཡོན་དུ་འཕོ་བ་དུས་འཁོར་ལས་གསུངས་སོ། །གཉིས་པ་ནི་དཔེར་ན་སྣ་བུག་གཡས་ནས་མེ་རླུང་རྒྱུ་བའི་ཚེ་ཐོག་མར་ཉིས་བརྒྱ་ཉེར་ལྔ་རྒྱུ་བ་ནི་མེའི་མེ་ཡིན་ལ། དེ་རྫོགས་པ་ན་མེའི་རླུང་དུ་འཕོ་སྟེ་གྲངས་སྔར་བཞིན་ནོ། །དེ་བཞིན་དུ་མེའི་ས་དང་། དེ་ནས་མེའི་ཆུ་ལའང་གྲངས་
དེ་ཙམ་རེ་རྒྱུ་བ་ནི། འབྱུང་བ་ཆུང་བའི་དཀྱིལ་འཁོར་གཅིག་ནས་གཅིག་ཏུ་འཕོས་པ་ཡིན་ལ། མེ་རླུང་དགུ་བརྒྱ་པ་ཕྲག་གཅིག་རྫོགས་པ་ན་སྣ་བུག་གཡོན་པའི་རླུང་གི་དཀྱིལ་འཁོར་རྒྱུ་བ་ནི། འབྱུང་བ་ཆེ་བའི་དཀྱིལ་འཁོར་གཅིག་ནས་གཅིག་ཏུ་འཕོས་པ་སྟེ། འདི་ལ་དཀྱིལ་
6-4-47a


འཁོར་དང་སྣ་སྒོ་འཕོས་པ་དུས་མཉམ་དུ་འབྱུང་ངོ་། །འདིའི་འབྱུང་བ་ཆུང་བ་འཕོ་མཚམས་ནི་རླུང་ཞེས་སོགས་སུ་སྦྱར་ཏེ་སྔར་དང་འདྲའོ། །དེ་ནས་སྣ་བུག་གཉིས་ཀ་ནས་ཐད་སོར་དྲག་ཏུ་རྒྱུ་བའི་རླུང་དགུ་བརྒྱ་པ་ཕྲག་གཅིག་རྒྱུ་བའི་དུས་སུ་སའི་ས་སྤྱན་མའི་རླུང་
ཉིས་བརྒྱ་ཉིར་ལྔ་ཐོག་མར་རྒྱུ་བ་སོགས་ཀྱི་སྒོ་ནས་འབྱུང་ཆུང་གི་དཀྱིལ་འཁོར་འཕོ་མཚམས་སྔར་དང་འདྲ་ལ། དཀྱིལ་འཁོར་ཆེ་བ་དེ་རྫོགས་མ་ཐག་སྣ་གཉིས་ཀ་ནས་ཆུ་རླུང་དགུ་བརྒྱ་པ་ཕྲག་གཅིག་རྒྱུ་སྟེ་དཀྱིལ་འཁོར་ཆེ་བ་གཅིག་ནས་གཅིག་ཏུ་འཕོ་པའོ། །འདི་ལ་སྣ་བུག་
འཕོ་བ་མེད་དེ་སྔ་མ་བཞིན་སྣ་བུག་གཉིས་ཀ་ནས་རྒྱུ་བའི་ཕྱིར་རོ། །འདུས་པའི་བཤད་རྒྱུད་རྣམས་ཀྱིས་དཀྱིལ་འཁོར་བཞི་པོ་འདི་རྒྱུན་གཅིག་ལ་རྒྱུ་བའི་ཡུན་ཚད་ཐུན་ཕྱེད་པར་འདྲ་བ་དང་། དེ་ཡང་རླུང་འབྱུང་འཇུག་བརྒྱ་པ་རེར་འདྲ་བ་དང་། དེ་འདྲ་བ་ཚན་པ་ཉེར་བཞིར་གསུངས་
པས། རླུང་བཞི་པོ་རེ་རེ་ལ་དཀྱིལ་འཁོར་ཆེ་བ་དྲུག་དྲུག་ཆུང་བ་ཉེར་བཞི་རེ་ཡོད་དོ། །དེ་ལ་ནི་སྣ་བུག་གཡས་གཡོན་རེས་འཇོག་ཏུ་འཕོ་བ་བཅུ་གཉིས། གཉིས་ཀ་ནས་མཉམ་དུ་རྒྱུ་བ་བཅུ་གཉིས་སུ་འགྱུར་རོ། །འདི་ལ་འཕོ་བ་ཉེར་བཞི་ཞེས་པའི་ཐ་སྙད་བྱེད་ནའང་སྣ་བུག་
གཡས་གཡོན་དང་དཀྱིལ་འཁོར་གྱི་འཕོ་བ་གཉིས་ཀའི་དབང་དུ་བྱའོ། །གསུམ་པ་ནི། རྒྱུད་རྡོར་ཕྲེང་དང་དགོངས་པ་ལུང་སྟོན་དང་གཉིས་མེད་རྣམ་རྒྱལ་གྱི་ལུགས་ཀྱིས། །རླུང་སྣ་བུག་གཡས་གཡོན་དུ་འཕོ་བ་བཅུ་གཉིས་ཡིན་ཏེ་གྱེན་རྒྱུ་དང་མཉམ་གནས་ཁོ་ནའི་དབང་
དུ་བྱས་ནས་རླུང་དགུ་བརྒྱ་རེ་བྱེད་དོ། །དུས་འཁོར་ལས། ལྟེ་བའི་ཁྱིམ་བཅུ་གཉིས་ཀྱི་གཡས་ཀྱི་རྩ་འདབ་དྲུག་ལ་ས་ཆུ་མེ་རླུང་ནམ་མཁའ་ཡེ་ཤེས་ཀྱི་ཁམས་དྲུག་སྡུད་རིམ་གྱི་སྒོ་ནས་འཕོ་ཆེན་དྲུག །གཡོན་གྱི་རྩ་འདབ་དྲུག་ལ་ནམ་མཁའ་རླུང་མེ་ཆུ་ས་ཡེ་ཤེས་ཀྱི་ཁམས་དྲུག་
6-4-47b


བསྐྱེད་རིམ་གྱི་སྒོ་ནས་འཕོ་ཆེན་དྲུག་སྟེ་སྣ་སྒོ་གཡས་གཡོན་དུ་འཕོ་བ་བཅུ་གཉིས་སོ། །དེ་རྣམས་རེ་རེ་ལའང་འབྱུང་བ་ཆུང་བའི་དབང་དུ་བྱས་པའི་འཕོ་ཆུང་རྣམས་ཀྱང་ཡོད་དེ་རླུང་གཅིག་ནས་གཅིག་ཏུ་འཕོ་བ་ཙམ་མོ། །དེའི་འཕོ་མཚམས་སུ་བཅུ་གཅིག་བཞི་ཆ་རེ་ཡོད་པ་བསྡོམས་
པས་འཕོ་ཆེན་གྱི་མཚམས་སུ་ང་དྲུག་དང་བཞི་ཆ་རེ་ཡོད་ལ། དེ་བསྡོམས་པས་ཉིན་ཞག་གཅིག་ལ་དྲུག་བརྒྱ་དང་དོན་ལྔ་དབུ་མ་ནས་རྒྱུ་སྟེ་མཉམ་རྒྱུའོ། །འདི་ལ་མན་སྙེར། རྡོར་ཕྲེང་དང་དགོངས་པ་ལུང་སྟོན་དང་གཉིས་མེད་རྣམ་རྒྱལ་རྣམས་ཀྱིས་ཁམས་ཀྱི་དཀྱིལ་འཁོར་སོ་སོར་
རྒྱུ་བ་ལས་ཆུ་མེ་རླུང་གི་དཀྱིལ་འཁོར་མ་གཏོགས་པ་ནམ་མཁའི་རླུང་སོགས་སུ་རྒྱུ་བར་བཤད་ཅིང་། ནམ་མཁའི་རླུང་ཁྱབ་བྱེད་དེ་བཞི་ལ་ཁྱབ་པའི་ཚུལ་གྱིས་རྒྱུ་བ་ཙམ་ཡིན་པས། ནམ་མཁའི་རླུང་ལོགས་སུ་རྒྱུ་བར་གསུངས་པ་ནི་ཉི་མའི་ཤིང་རྟ་ལ་སོགས་པའི་མུ་སྟེགས་
ངེས་དོན་ལ་གཞུག་པའི་ཐབས་སུ་ལྡེམ་པོའི་ངག་གིས་གསུང་བར་འཆད་ཅིང་། དབུ་མ་ནས་རྒྱུ་བའི་རླུང་ཡང་དཀྱིལ་འཁོར་བཞི་ལས་ལོགས་པ་མེད་པར་འཆད་དོ། །འདུས་པའི་བཤད་རྒྱུད་གཉིས་སུ་གསུངས་པ་ནི་སྒྲ་ཇི་བཞིན་པའི་དོན་དུ་འཕགས་པ་ཡབ་སྲས་ཀྱིས་
བཤད་ཅིང་། དེའི་སྒྲ་ཇི་བཞིན་པ་དང་དུས་འཁོར་ནས་བཤད་པ་གཉིས་ཁུངས་ཅུང་མི་མཐུན་པར་ནི་སྣང་ངོ་། །དེར་མ་ཟད་དེ་གཉིས་ཀ་ཀྱེ་རྡོར་དང་སྡོམ་འབྱུང་ལས་འཕོ་བ་བཅུ་དྲུག་ཏུ་བཤད་པའང་མི་མཐུན་པར་སྣང་སྟེ། དེའི་དོན་ནི་རྩ་འདབ་དང་རླུང་གི་འཕོ་བའང་མིན་པས་
སྣ་སྒོའི་འཕོ་བ་ལ་བྱ་དགོས་པར་འདྲའོ། །གཉིས་པ་ནི། སྣ་གཡས་པ་ནས་རྒྱུ་བའི་རླུང་གི་ཁམས་ནི་པདྨའི་རིགས་ཀྱི་གཙོ་བོར་གྱུར་པའི་མགོན་པོ་འོད་དཔག་མེད་དེ་མེའི་དཀྱིལ་འཁོར་ཁ་དོག་དམར་ཞིང་གསལ་བའི་ངོ་བོ་ཉིད་དོ། །རླུང་གི་རླུང་དོན་གྲུབ་ཀྱི་ངོ་བོ་ནས་སྔོན་ལ་
6-4-48a


བཤད་པར་བྱ་བ་ཡིན་ཀྱང་འོད་དཔག་མེད་གསུང་རྡོ་རྗེ་ཡིན་ལ་རླུང་ཡང་ངག་ཡིན་པས་དེ་ནས་ཐོག་མར་བཤད་དེ་དེའང་དང་པོར་སྒོམ་པའི་དུས་སུ་དེ་ནས་བསྒོམ་པར་བྱ་བ་ཤེས་པའི་ཕྱིར་ཡིན་པར་རཏྣ་རཀྵི་ཏས་སོ། །འོན་ཀྱང་རྡོ་རྗེ་ཕྲེང་བའི་སྐབས་གཉིས་སུ་
གཡོན་པ་དང་པོར་བཤད་ལ། དེ་འཆད་པའི་སྐབས་གཉིས་སུ་གཡས་པ་སྔོན་ལ་བཤད་ཅིང་། སྤྱོད་བསྡུས་ལས་གཡོན་པ་ཐོག་མར་བཤད་པས་མ་ངེས་སོ། འོན་ཀྱང་དགོངས་པ་ལུང་སྟོན་དུའང་མེ་རླུང་སྔོན་དུ་བཤད་ནས་དེ་འདྲ་བ་ཉེར་བཞི་རིམ་གྱིས་བྱུང་བས་ཉི་ཁྲི་
ཆིག་སྟོང་དྲུག་བརྒྱ་རྒྱུ་བར་བཤད་པས་ཉིན་ཞག་གཅིག་གི་ཐོག་མ་མེ་རླུང་ནས་རྒྱུ་ཞིང་། ཐ་མ་ཆུ་རླུང་གིས་སྡུད་པ་ཡིན་ནོ། སྣ་གཡོན་པ་ནས་འབྱུང་བའི་རླུང་གི་ཁམས་ནི་ལས་ཀྱི་རིགས་ཀྱི་མགོན་པོ་སྟེ་གཙོ་བོ་དོན་ཡོད་གྲུབ་པའི་རྒྱུ་བ་ཡིན་ཏེ། མིང་རླུང་གི་དཀྱིལ་འཁོར་
ཞེས་བྱ་བ་མདོག་ལྗང་སེར་དུ་སྣང་བའི་ངོ་བོ་ཉིད་འོད་ཟེར་ནག་པོ་ཅན་ནོ། །རྡོ་རྗེ་ཕྲེང་བའི་འགྲེལ་པར་ཁམས་ཞེས་པ་རྣམས་ལ་འོད་ཅེས་འབྱུང་ལ། སྔ་མ་མཉམ་གནས་དང་གཉིས་པ་གྱེན་རྒྱུར་འཆད་པ་ནི། རྒྱུད་དེ་ཉིད་ལས། སྟོད་དུ་རྒྱུ་བ་ལྐོག་མར་གནས། །འོད་དཔག་
མེད་ཀྱི་རང་བཞིན་ནོ། །མཉམ་གནས་ལྟེ་བའི་པདྨར་གནས། །འོད་དཔག་མེད་ཀྱི་རང་བཞིན་ནོ། །ཞེས་གསུངས་པ་དང་། སྤྱོད་བསྡུས་ལས་ཀྱང་དེ་བཞིན་དུ་བཤད་པ་དང་འགལ་ལོ། །སྣའི་བུ་ག་གཉིས་ཀ་ནས་འབྱུང་བའི་རླུང་གི་ཁམས་ནི་རིན་ཆེན་གྱི་རིགས་ཀྱི་མགོན་པོ་རིན་
ཆེན་འབྱུང་ལྡན་གྱི་རྒྱུ་བ་ཡིན་ཏེ། དབང་ཆེན་གྱི་སྟེ་སའི་དཀྱིལ་མཁོར་གསེར་གྱི་མདོག་ཏུ་སྣང་བའི་འོད་ཟེར་སེར་པོའི་ངོ་བོ་ཉིད་དོ། །དལ་ཞིང་རྒྱུ་བ་མེད་པ་སྟེ་རྒྱུ་བ་བུལ་བའི་རླུང་གི་ཁམས་ནི་རྡོ་རྗེའི་རིགས་ཀྱི་མགོན་པོ་མི་བསྐྱོད་པའི་རྒྱུ་བ་སྟེ་གསལ་བའི་རང་བཞིན་ཆུའི་དཀྱིལ་
6-4-48b


འཁོར་པའི་ཤེལ་ལྟར་སྣང་བའི་འོད་ཟེར་དཀར་པོའི་ངོ་བོ་ཉིད་དོ། །སྤྱོད་བསྡུས་ལས། སྐད་ཅིག་ཆུ་བོའི་དཀྱིལ་འཁོར་ཏེ། །ཞེས་བསྒྱུར་བ་ནི་དེའི་བཤད་པ་ལྟར་ན་གསལ་བཞེས་པར་འོང་རྒྱུ་ཡིན་གྱི་སྐད་ཅིག་གི་དོན་མེད་དོ། །མན་སྙེར་བསྒྱུར་བ་ལ་དང་པོ་གསུམ་གྱི་ཁམས་
ཞེས་པ་ལ་འོད་ཅེས་འབྱུང་ལ། བཞི་པ་ལ། དལ་ཞིང་དམན་པར་རབ་རྒྱུ་བ། །ཞེས་བསྒྱུར་ཏེ་ལེགས་སོ། །རིམ་ལྔ་དང་སྤྱོད་བསྡུས་ལས། དལ་ཞིང་རྒྱུ་བ་མེད་པའི་ཁམས། །ཞེས་དང་། རྒྱུད་ཉིད་ལས། དལ་ཞིང་རྒྱུ་བ་ཆུ་ཡི་ཁམས། །ཞེས་བསྒྱུར་བ་དང་། ཆག་གིས། དྲང་ཞིང་དལ་བར་རྒྱུ་
བའི་ཁམས། །ཞེས་བསྒྱུར་བ་རྣམས་མི་ལེགས་སོ། །མན་སྙེར་གཉིས་པ་ལ། ལྗང་སྔོན་དུ་ནི་རབ་སྣང་བ། །ཞེས་བསྒྱུར་བ་ཡང་ལེགས་སོ། །ལཀྵྨཱིས་སྲོག་རླུང་ནག་པོར་བཤད་པ་ནི་རྒྱུད་འདི་དང་མི་མཐུན་ནོ། །ལུས་ཀུན་ལ་གནས་པའི་དོན་ལཀྵྨཱིས་ལུས་ཀྱི་རྩའི་ཚོགས་ཕྲ་མོ་
ཀུན་ལ་གནས་པ་ལ་བཤད། རྡོར་ཕྲེང་འགྲེལ་པར་ལུས་ཀྱི་ཕྲ་བའི་རྒྱུས་པའི་ཚོགས་ལ་གནས་པ་ལ་བཤད་ཀྱང་། སྤྱོད་བསྡུས་སུ་ལུས་ཀྱི་ཚིགས་ཀུན་ལ་གནས་པ་ལ་བཤད་པ་ཉིད་རྒྱུད་དེ་ལས་ཀྱང་གསུངས་སོ། །རླུང་དེ་ནི་ཁྱབ་བྱེད་ཡིན་ལ་བྱ་བ་ཀུན་ལ་འཇུག་པ་སོགས་ནི་
ལཀྵྨཱིས་རླུང་གཞན་ཐམས་ཅད་ཀྱི་འཇུག་ལྡང་གནས་པ་ལ་སོགས་པའི་འཇུག་པ་ལ་གཞིར་གྱུར་པ། བཅུད་ཀྱི་སྤྱོད་ལམ་བཞི་ལ་སྣོད་ཀྱི་འཇིག་རྟེན་ལྟ་བུའོ། །དེའི་ཕྱིར་སའི་ཁམས་གཟུགས་ཕུང་གི་རྣམ་པར་དག་པ་རྣམ་སྣང་གི་ངོ་བོར་གསུངས་ཏེ། གཟུགས་ཕུང་གི་ཚོར་བ་ལ་
སོགས་པའི་གཞིར་གྱུར་པའི་ཕྱིར་རོ། །རླུང་དེ་ལ་རྟག་ཏུ་བྱ་བ་མེད་པས་འཆི་བའི་ལུས་ལས་འབྱུང་བ་ཁོ་ན་ལས་ཡིན་ནོ་ཞེས་འཆད་དོ། །བྱ་བ་ཀུན་ལ་འཇུག་པ་ནི་སྔར་ལྟར་རམ་ཡང་ན་སྤྱོད་ལམ་གནས་པ་སོགས་ལ་འཇུག་པ་མ་གཏོགས་རྡོར་ཕྲེང་འགྲེལ་པ་ཡང་སྔར་
6-4-49a


དང་འདྲའོ། །འོན་ཀྱང་རྒྱུད་ཉིད་ལས། ཁྱབ་དང་འཛིན་པ་ཉིད་དང་ནི། །འགྲོ་དང་དེ་བཞིན་ལྡོག་ལ་སོགས། །ཚིགས་རྣམས་ཀུན་ཏུ་ཁྱབ་པའི་ཕྱིར། །ཁྱབ་བྱ་ཅེས་ནི་བྱ་བར་བཤད། །ཅེས་གསུངས་པ་ལྟར་ནི་བྱ་བ་ཀུན་ལ་འཇུག་པའོ། །རླུང་འདི་སྔར་བཤད་པའི་
ཁམས་ཀྱི་དཀྱིལ་འཁོར་བཞི་ཆར་ལ་ཁྱབ་པའི་རླུང་སྟེ། མི་འབྱུང་ཞིང་ཁྱབ་པའི་འོད་ཟེར་ཅན་ནི་རྣམ་སྣང་སྟེ། ནམ་མཁའ་དང་མཉམ་པའི་ངོ་བོ་ཉིད་དོ་ཞེས་སྤྱོད་བསྡུས་ལས་གསུངས་སོ། །སྤྱོད་བསྡུས་ལས། ཁམས་ཀུན་ཡང་དག་འབྱུང་བ་ནི། །ཞེས་པ་ལ་རྒྱུད་ལས། ཁམས་
ཀུན་ལས་ནི་ཡང་དག་འབྱུང་ཞེས་བསྒྱུར་བ་ལྟར་འགྲེལ་པས་ཀྱང་མེ་ལ་སོགས་པའི་ཁམས་བཞི་ལ་བརྟེན་ནས་འབྱུང་བ་ལ་བཤད་དོ། །རྟེན་དང་བརྟེན་པར་བཟུང་བ་ནི་ཞེས་པ་ལ་རྟེན་དང་བརྟེན་པའི་འཛིན་པ་སྟེ། །ཞེས་བཏོན་ནས་རྟེན་ལ་བརྟེན་པའི་རླུང་བཞི་པོ་འཛིན་པའི་ཁྱབ་
བྱེད་ལ་བཤད་དོ། །འཆི་བ་ཞེས་པའི་དོན་རྟག་ཏུ་དེའི་ལས་མེད་པས་འཆི་བའི་དུས་སུ་ཕྱིར་འབྱུང་བ་ཉིད་དེའི་བྱ་བའི་ཞེས་འཆད་དོ། །དེ་ལྟར་འཆི་བའི་དུས་སུ་ཕྱིར་མི་འབྱུང་བ་ནི་མི་འབྱུང་ཞིང་ཞེས་པའི་དོན་དུ་སྣང་བས་ཁམས་བཞི་ལ་ཁྱབ་པ་ནི་དེ་རྣམས་སྣ་སྒོར་རྒྱུ་བའི་ཚེ་ཁྱབ་
པའི་ཚུལ་གྱིས་རྒྱུ་བ་མིན་གྱི་ནང་ན་གནས་པའི་ཁམས་བཞི་ལ་ཁྱབ་པའོ། །སྤྱོད་བསྡུས་ལས། རླུང་བཅུ་པོ་འབྱུང་བ་དང་བརྔུབས་པར་འགྱུར་ཞེས་པ་དང་མི་འགལ་ཏེ། འཆི་བའི་དུས་སུ་འབྱུང་རྔུབ་ཏུ་འགྱུར་བ་ལ་དགོངས་པའི་ཕྱིར་རོ། །དེས་ན་མན་སྙེར་རླུང་ཉིས་བརྒྱ་ཉི་ཤུ་རྩ་ལྔ་
ལ་རྩ་སོ་གཉིས་ཀྱིས་བགོས་པའི་ཚེ། བདུད་བྲལ་མའི་ཐོབ་སྐལ་ལ་རླུང་བདུན་བྱུང་ཞིང་ལྷག་མ་རླུང་གཅིག་ཡོད་པ་དེའི་ཕྱེད་ཀྱང་དེར་རྒྱུ་ལ། ཞག་གཅིག་ལ་དེ་འདྲ་གོ་དྲུག་ཡོད་པ་བསྡོམས་པས་རླུང་བདུན་བརྒྱ་དང་ཉི་ཤུ་བདུད་བྲལ་མ་ནས་རྒྱུ་བ་ནི་འཆི་རླུང་ཁྱབ་བྱེད་ཀྱི་རླུང་དུ་
6-4-49b


བཤད་པ་ནི་འཐད་པར་མ་མཐོང་ངོ་། །རྩ་གསུམ་པོ་གང་ནས་དཀྱིལ་འཁོར་བཞིའི་རླུང་རྒྱུ་བ་བཤད་རྒྱུད་རྣམས་ནས་གསལ་བར་མེད་ཀྱང་སྲོག་ཐུར་གཉིས་རོ་རྐྱང་གཉིས་ལ་རྒྱུ་བར་མངོན་ཏེ། རྒྱུད་རྡོར་ཕྲེང་ལས། སྟེང་འོག་ཡང་དག་བརྟེན་ནས་ནི། །སྲོག་དང་ཐུར་སེལ་རྒྱུ་བར་བྱེད། །དེ་གཉིས་
ཁོ་ན་རྟེན་བཅས་པའི། །རླུང་གཉིས་སུ་ནི་གསལ་བར་གསུངས། །སྐུ་དང་གསུང་གི་སྙིང་པོ་གཉིས། །ལ་ལ་ན་དང་ར་ས་ན། །ཞེས་དང་། རྣམ་པར་རྟོག་པའི་རླུང་གཉིས་ནི། །དེ་ནས་རྣམ་པར་བཅད་ནས་འགྲོ ། རྣམ་རྟོག་མེད་པའི་རླུང་ཆེན་པོ། །སྐུ་གསུངས་རྡོ་རྗེ་བཅད་ནས་ནི། །རྣམ་རྟོག་མེད་པ་བདེ་བ
སྟེར། །ཞེས་སྲོག་ཐུར་སྟེང་འོག་གི་རྩ་ལ་བརྟེན་ནས་རྒྱུ་བ་ནི་རྟོག་པའི་རླུང་དང་སྐུ་དང་གསུང་གི་རླུང་བཅད་པ་ན་རྣམ་རྟོག་གི་རླུང་གཅོད་པ་དང་། དེ་གཉིས་ཀྱང་རོ་རྐྱང་གི་རླུང་ལ་གསུངས་པས་སྲོག་ཐུར་གཉིས་དེ་གཉིས་ནས་རྒྱུ་བར་ཤེས་སོ། །འགྲེལ་པས་ཀྱང་རྩ་གཉིས་ཀྱི་རྒྱུ་བ་སྲོག་དང་
ཐུར་སེལ་གྱི་བདག་ཉིད་ཅན་ཞེས་བཤད་དོ། །རྒྱུ་ཚུལ་ནི་དེ་གཉིས་རེ་རེ་རྒྱུ་བའི་ཚེ་ཡང་རོ་རྐྱང་གཉིས་ཀ་ནས་རྒྱུ་བར་མངོན་ཏེ། སྣ་བུག་གཉིས་ཀ་ནས་རྒྱུ་བར་བཤད་པའི་ཕྱིར་རོ། །ཨ་བ་དྷཱུ་ཏཱིའི་རྩ་མདུད་སྙིང་ག་ན་གནས་པ་བཅད་པའི་རྗེས་སུ་རྩ་དེའི་ནང་ཁོ་ནར་གནས་པར་བཤད་ཅིང་། 
ལེའུ་དྲུག་པར་སྙིང་གའི་རྩ་མདུད་ཀྱིས་བསྡམས་པས་དེའི་ཐད་དུ་སྲོག་རླུང་འོག་དང་ཐུར་སེལ་སྟེང་དུ་འགྲོ་མི་ནུས་པར་གསུངས་པས། སྙིང་གའི་འཁོར་ལོའི་དབུས་ཀྱི་དབུ་མ་ནས་དེ་གཉིས་འགྲོ་འོང་བྱེད་པ་ནི་འཆི་བའི་སྐབས་དང་རྡོར་བཟླས་ཀྱིས་རྩ་མདུད་དེ་བཀྲོལ་བ་མ་གཏོགས་པར་
བྱ་མི་ནུས་སོ། །གྱེན་རྒྱུ་དང་མཉམ་གནས་ནི་རོ་རྐྱང་རེ་རེ་བ་ལ་རིམ་པ་བཞིན་དུ་རྒྱུ་བར་མངོན་ནོ། །སྲོག་འཛིན་ཕྲ་བ་སྙིང་གའི་རྩ་མདུད་ཀྱིས་ནང་ན་གནས་ཀྱང་སྲོག་འཛིན་ད་ལྟ་འགྲོ་འོང་བྱེད་པ་ནི་སྙིང་གའི་རྩ་མདུད་ཀྱི་གོང་ན་གནས་ཤིང་ཐུར་སེལ་སྙིང་གའི་རྩ་མདུད་མན་ཆད་ཀྱི་རྩ་
6-4-50a


ལ་གནས་པ་ལ་དགོངས་ནས། སྟེང་འོག་བརྟེན་ནས་རྒྱུ་ཞེས་གསུངས་ཀྱི་སྲོག་སྟེང་དུ་བརྒྱུས་ནས་འོག་ཏུ་མི་རྒྱུ་བ་དང་ཐུར་སེལ་ཐུར་དུ་བརྒྱུས་ནས་སྟེང་དུ་མི་རྒྱུ་བ་མིན་ནོ། །སྣ་རྩེ་གསུམ་གཏན་ལ་དབབ་པའི་ལེའུའི་འགྲེལ་བ་ལས། སྣའི་སྒོ་ལས་བྱུང་
བཞེས་པ་གཉིས་ཡོད་པའི་དང་པོ་སྟེང་གི་སྣ་སྒོ་ལ་འཆད་པ་ནི་སྤྱོད་བསྡུས་མ་ངེས་པར་སྣང་ལ། གཡས་པ་ནས་འབྱུང་བའི་ཁམས་ཞེས་སོགས་ཀྱི་ཁམས་རྣམས་རླུང་ལ་འཆད་པ་དང་། སྣ་གཡས་པ་ནས་བྱུང་བ་གྱེན་རྒྱུ་དང་གཡོན་པ་ནས་འབྱུང་བ་མཉམ་
གནས་ལ་འཆར་པ་ནི་སྤྱིར་ལེགས་ཀྱང་ལེའུ་བཅུ་གཉིས་པའི་རང་གི་བཤད་པ་དང་མི་མཐུན་ནོ། །དལ་ཞིང་རྒྱུ་བ་མེད་པའི་དོན་སྟེང་དུ་རྒྱུ་བ་མེད་པ་ལ་འཆད་པ་ཡང་སྤྱོད་བསྡུས་མ་ངེས་པའོ། །སྤྱོད་བསྡུས་ལས་ཁམས་ཀྱི་དཀྱིལ་འཁོར་རེ་རེ་ཡང་འོད་ཟེར་
ལྔ་པ་ཅན་དུ་གསུངས་ལ་དཀྱིལ་འཁོར་གཅིག་ཀྱང་ཁམས་བཞི་ལ་ཁྱབ་པར་གསུངས་ལ། །འོད་ཁ་ཅིག་གཡས་པ་ནས་འབྱུང་ཞེས་སོགས་སྣ་བུག་གཅིག་གི་གཡས་གཡོན་སོགས་ཡིན་ཞེས་པ་སྤྱོད་བསྡུས་དང་འགལ་བས་མི་འཐད་ཀྱང་། ལཀྵྨཱི་དང་
ཨ་ལ་མ་ཀ་ཀ་ལ་ཤས་སྣས་སྣ་བུག་རེ་རེའི་འབྱུང་བ་བཞིའི་རླུང་ཡང་དེའི་གཡས་དང་གཡོན་དང་དབུས་ནས་རྒྱུ་བར་བཤད་པ་ལེགས་སོ། །འདུས་པའི་བཤད་རྒྱུད་རྣམས་ནས་སྟེང་འོག་ལ་སོགས་པའི་རྒྱུ་ཚུལ་མི་གསལ་བ་དང་། སཾ་བྷུ་ཊ་ལས་མེ་གྱེན་དང་
རླུང་གསེགས་དང་ས་དྲང་པོར་དང་ཆུ་འོག་ཏུ་རྒྱུ་བར་བཤད་དོ། །དེ་ལྟ་ན་འཕགས་པས་ནི་རྡོར་ཕྲེང་གི་ལེའུ་བཅུ་གཉིས་པ་ནས་དྲངས་ལ། འཕགས་པ་ལྷས་ནི་སྣ་རྩེ་གསུམ་གཏན་ལ་དབབ་པའི་ལེའུ་ནས་དྲངས་ཏེ་དོན་འདྲའོ། །གསུམ་པ་ནི།
6-4-50b


སྔར་བཤད་པ་ལྟར་རླུང་གི་དེ་ཁོ་ན་ཉིད་གསལ་བར་བཤད་པ་འདི་ནི་ཡེ་ཤེས་ལྔའི་ངོ་བོ་ཉིད་ཡིན་ཏེ། རླུང་ལྔ་དེ་བཞིན་གཤེགས་པ་ལྔ་དང་སྦྱར་བ་ལས་དཔགས་ཏེ་ཤེས་བར་བྱའོ། །བཞི་པ་ནི། དེ་འདྲ་བའི་རླུང་གི་རྣལ་འབྱོར་འདི་ནི་རྩ་རླུང་གི་དེ་ཁོ་ན་ཉིད་
སྟོན་པའི་ལུང་དང་བྲལ་བའི་རྟོག་གེ་པ་ཡིས་མི་ཤེས་སོ། །དེར་མ་ཟད་རྣལ་འབྱོར་པ་བྱིས་པ་སྟེ་ལས་དང་པོ་བསྐྱེད་རིམ་པའི་ཡང་སྤྱོད་ཡུལ་མིན་ནོ། །འདིས་བསྐྱེད་རིམ་པས་ཐོས་བསམ་གྱི་སྒོ་ནས་མི་ཤེས་པར་སྟོན་པ་མ་ཡིན་གྱི་ཇི་སྲིད་དུ་བསྐྱེད་
པའི་རིམ་པ་མཐར་ཕྱིན་ནས་རྫོགས་པའི་རིམ་པ་ལ་ཞུགས་པ་དེ་སྲིད་དུ་རྣལ་འབྱོར་འདི་མཚན་ཉིད་ཚང་བར་རྒྱུད་ལ་མི་སྐྱེ་བའི་དོན་ཏོ། །དེ་ལྟར་རྒྱུད་འདིས་རྩ་རྒྱུད་ཀྱི་དོན་གསལ་བར་འཆད་པར་མ་ཟད་ལྷ་མོ་བཞིས་ཞུས་ལས་ཡེ་ཤེས་ལྔའི་ངོ་བོ་ཉིད་དུ་བཤད་
པ་དང་། རྒྱུད་ཕྱི་མ་ལས་ཡེ་ཤེས་ལྔ་དང་འབྱུང་བ་ལྔའི་ངོ་བོ་ཉིད་ཅེས་སོ་སོར་མ་ཕྱེད་བར་སྤྱིར་གསུངས་པ་རྣམས་སོ་སོར་ལེགས་པར་ཕྱེ་ནས་འཆད་པས་གདོང་གི་སྣ་རྩེར་འོད་ཀྱི་ཐིག་ལེ་རླུང་འོད་ཟེར་ལྔ་བསྒོ་མ་ཚུལ་གསལ་བར་སྟོན་ནོ། །གཞན་
ཡང་རྒྱུད་ཕྱི་མ་ལས་གསང་བའི་སྣ་རྩེར་རྫས་ཀྱི་ཐིག་ལེ་བསྒོམ་པ་མདོ་ཙམ་དུ་བཤད་པ་ཡང་རྒྱུད་འདིའི་ཐིག་ལེ་གསུམ་དང་སྣ་རྩེ་གསུམ་གྱི་ལེའུ་ནས་གསལ་བར་སྟོན་ལ། ཁྱད་པར་སྙིང་གའི་མི་ཤིགས་པའི་ཐིག་ལེར་རླུང་རྣམས་སྡུད་ལུགས་ནི་
རྒྱུད་འདི་ཉིད་ཀྱི་སྐབས་དུ་མ་ཞིག་ནས་རྩལ་དུ་བཏོན་ནས་འཆད་པས་རྡོ་རྗེ་བཟླས་པའི་གནད་མཐའ་དག་པར་ཤེས་འདོད་ན་བཤད་པའི་རྒྱུད་འདིའི་རྗེས་སུ་འབྲངས་ནས་བླ་མའི་ཞལ་ལས་ཤེས་པར་གྱིས་ཤིག །རླུང་གི་དེ་ཁོ་ན་ཉིད་བཤད་ཟིན་ཏོ། །
6-4-51a


གཉིས་པ་ལ་གཉིས། མདོར་བསྟན་པ། རྒྱས་པར་བཤད་པའོ། །དང་པོ་ནི། རླུང་གི་དེ་ཉིད་བཤད་ཟིན་ནས་སྔགས་ཀྱི་དེ་ཉིད་འཆད་པ་སྐབས་སུ་བབས་པས། ད་ནི་སྔགས་ཀྱི་དེ་ཁོ་ན་ཉིད་མདོར་བསྟན་པ་སྟེ་མི་གསལ་བའི་ཚིག་འདུས་
པའི་རྩ་བའི་རྒྱུད་ལ་འཇུག་པར་བྱ་སྟེ། དེ་ཡང་ལེའུ་བཅུ་པ་ལས་གསུང་སོ་ཞེས་སྦྱར་རོ། །གང་ན་སྔགས་བསྡུས་པ་ཨོཾ་ཨཱ་ཧཱུཾ་ཞེས་པ་འདི་གསུངས་སོ། །འདི་གསུམ་སྔགས་ཀུན་འདུས་པར་འགྲོ་ཚུལ་ནི། སྦྱོད་བསྡུས་ལས། དེ་ལ་སྦྲུལ་ལ་སོགས་
པའི་སྔགས་རྣམས་ནི་ཨཱ་ལི་ཀཱ་ལི་ལས་ཡང་དག་པར་བྱུང་བ་རྣམས་སོ། །དེ་རྣམས་ཀྱི་དེ་ཁོ་ན་ཉིད་ནི་མི་ཤིགས་པ་ལས་བྱུང་བའི་ཡི་གེ་གསུམ་སྟེ། གང་གི་ཕྱིར་སྔགས་ཐམས་ཅད་ནི་བུད་མེད་དང་། སྐྱེས་པ་དང་། མ་ནིང་གི་ངོ་བོ་ཉིད་མན་ངག་ཇི་ལྟར་
ཐོབ་པས་ཡི་གེ་གསུམ་ལ་རབ་ཏུ་འཇུག་གོ། །དེས་ན་ཡི་གེ་གསུམ་ནི་སྔགས་ཐམས་ཅད་ཀྱི་བདག་པོའི། །ཞེས་སྤྲུལ་ལ་སོགས་པའི་སྔགས་ཐམས་ཅད་ནི། བུད་མེད་དང་སྐྱེས་པ་དང་མ་ནིང་གི་ངོ་བོ་ཉིད་ཀྱིས་ཡི་གེ་གསུམ་ལ་འཇུག་པ་ནི་སྔགས་རྣམས་
བསྡུས་པའི་དོན་ཏོ། །མན་ངག་ཇི་ལྟར་ཐོབ་པས་ཞེས་པ་ནི་སྔགས་རྣམས་དེ་གསུམ་ལ་འཇུག་པའི་ཚུལ་གྱི་མན་ངག་ཇི་ལྟ་བ་བཞིན་དུ་ཐོབ་པ་སྟེ་ཤེས་པས་དེར་སྡུད་ཅེས་པའོ། །དེའང་སྤྱོད་བསྡུས་ལས། ཨཱ་ལི་ཀཱ་ལི་རྣམས་ཀྱིས་བུད་མེད་དང་སྐྱེས་
པ་དང་མ་ནིང་གི་ཚུལ་གྱིས་ཡི་གེ་གསུམ་པ་བསྐྱེད་ལ། །ཞེས་འབྱུང་བ་ཙམ་མ་གཏོགས་པ་འཕགས་དང་འཕགས་པ་ལྷ་དང་ཀླུ་བྱང་དང་ཤཱཀྱ་བཤེས་གཉེན་དང་ཟླ་བ་གྲགས་པ་ལྔ་པོ་གང་གི་གཞུང་དུའང་དབྱངས་གསལ་གྱི་སྔགས་ཀྱིས་བུད་མེད་
6-4-51b


ལ་སོགས་པའི་ཚུལ་གྱིས་ཡི་གེ་གསུམ་བསྐྱེད་ལུགས་གསལ་བར་མ་བྱུང་ངོ་། །འདི་ལ་ཁ་ཆེའི་མཁས་པ་ལཀྵྨཱིས་བུད་མེད་ལ་སོགས་པའི་རྟགས་སྒྲ་པ་ལ་སོགས་པས་བྱས་པ་ནི་རྟགས་འཁྲུལ་པ་ཅན་སླུ་བ་ཡིན་པས་དེ་འདིར་མི་འཛིན་པས། འདིར་ནི་ཁྱབ་
པར་བྱ་བ་ལ་ཐབས་དང་ཁྱབ་པར་བྱེད་པ་ལ་ཤེས་རབ་ཏུ་འཇོག་པ་ལས་གཞན་པའི་སྐྱེས་པ་དང་བུད་མེད་ཀྱི་རྟགས་མེད་དོ། །དེའི་ཕྱིར་ཆོས་ཉིད་ནི་ཁྱབ་པར་བྱེད་པས་ཤེས་རབ་དང་། ཆོས་ཅན་ནི་ཁྱབ་པར་བྱ་བས་ཐབས་ཡིན་གྱི། ཐབས་ཀྱིས་ཤེས་རབ་ལ་ཁྱབ་
པར་བྱེད་པ་མ་ཡིན་ཏེ། ཐབས་དེ་ནི་ཤེས་རབ་དེས་བཙལ་བར་བྱ་བར་ཡིན་པའི་ཕྱིར་རོ། །དེ་ལྟར་ན་ཨཱ་ལི་ནི་ཀཱ་ལི་ལ་ཁྱབ་པར་བྱེད་པས་ཤེས་རབ་ཀྱི་ངོ་བོ་ཡིན་པས་བུད་མེད་ཅེས་བྱ་ལ། ཀཱ་ལི་ནི་ཁྱབ་པར་བྱ་བས་ཐབས་ཀྱི་ངོ་བོ་ཡིན་པས་སྐྱེས་པ་ཞེས་བྱ་ཞིང་། 
ཡ་ར་ལ་ཝ་བཞི་ནི་སྣོད་ཀྱི་རང་བཞིན་ཏེ། དེའི་ཕྱིར་བུད་མེད་དང་སྐྱེས་པ་གཉིས་གང་ཡང་མིན་པས་མ་ནིང་ཞེས་བྱའོ། །དེ་ལ་ཨ་ནས་བརྩམས་ཏེ་ཚེག་དྲག་གི་བར་དུ་བསྡུས་ན་གནས་པའི་དབྱངས་ཀུན་བསྡུས་པ་ཡིན་པས་ཨ་ནི་བུད་མེད་དོ། །ཀ་ནས་བརྩམས་
ནས་ཧའི་བར་དུ་གོ་ལྡོག་པའི་རིམ་པས་བསྡུས་ན་ཧཱུཾ་ནི་སྐྱེས་པའོ། །ཡ་ར་ལ་ཝའི་ཐ་མ་ཡི་གེ་ཨ་དང་མཚམས་སྦྱར་ཞིང་དེ་རྣམས་ཀྱང་སྣ་ལས་འབྱུང་བའི་ཕྱིར། རྗེས་སུ་འབྱུང་བའི་དབྱངས་ལ་ཨོཾ་ཞེས་པ་ནི་མ་ནིང་ངོ་། །ཞེས་དབྱངས་གསལ་གྱི་སྔགས་
རྣམས་ཀྱིས་སྐྱེས་པ་བུད་མེད་མ་ནིང་གི་ཚུལ་གྱིས་ཡི་གེ་གསུམ་བསྐྱེད་ཚུལ་དེ་ལྟར་འཆད་དོ། །ཡི་གེ་གསུམ་པོ་དེ་ནི་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་རྣམ་སྣང་གསུང་འོད་དཔག་མེད་ཐུགས་མི་བསྐྱོད་པ་གསུམ་གྱི་གསང་བ་སྟེ་སྙིང་
6-4-52a


པོ་ཡིན་ལ། དེས་སྔགས་ཏེ་ལྷ་ཐམས་ཅད་ཀྱི་སྙིང་པོ་སྟེ་ཐུགས་ཀུན་ཏུ་བསྐུལ་བ་སྟེ་སད་པར་བྱེད་ཅིང་དགོངས་པར་བྱེད་དོ། །མཆོག་ཏུ་གསང་བ་ནི་སྣོད་མིན་ལའོ། །གང་གིས་གསུངས་ན། རྡོ་རྗེ་འཆང་ཉིད་ཀྱི་ཚིག་གི་ལམ་སྟེ་ཞལ་ནས་ངེས་པར་
བརྗོད་པ་སྟེ་གསུངས་སོ། །ཉིད་ཀྱི་སྐུ་གསུང་ཐུགས་ཀྱི་རྡོ་རྗེ་ལས་ཞེས་པ་ནི་སྐུ་དང་ཐུགས་ལས་ཀྱང་གསང་བའི་གསུང་གིས་སོ་ཞེས་ལཀྵྨིས་འཆད་དོ། །འོན་ཀྱང་ཞལ་ནས་གསུངས་པ་དེ་ཉིད་སྐུ་གསུང་ཐུགས་རྡོ་རྗེ་ལས་བྱུང་བ་ཡིན་པས་མི་འགལ་ཏེ། 
སྤྱོད་བསྡུས་ལས། དེ་ལ་སྐུ་རྡོ་རྗེར་གྱུར་ནས་རྐན་དང་མཆུ་སྦྱར་བ་དང་ལྕེའི་ཚོགས་པར་གྱུར་པ་ལས་གསུང་རྡོ་རྗེ་ལ་འཇུག་པར་འགྱུར་རོ། །ཐུགས་རྡོ་རྗེ་ནི་དེ་ལ་སྐུལ་བར་བྱེད་པ་ཡིན་ཏེ། །ཞེས་གསུངས་བ་བཞིན་ནོ། །རྡོ་རྗེའི་ཚིག་འདིས་རིམ་པ་
གཉིས་ཀྱི་རྣལ་འབྱོར་པས་སྐུ་གསུང་ཐུགས་ཀྱི་སྙིང་པོ་གསུམ་གྱིས་རྒྱལ་བ་རྣམས་ཀྱི་ཐུགས་སྐུལ་བར་བྱེད་པ་གཉིས་གསུངས་པའི་ཕྱི་མ་འདིར་འཆད་པའོ། །ལེའུ་བཅུ་གསུམ་པ་ལས་གསུངས་པའི་སྔགས་ཀྱི་དེ་ཉིད་ནི་དོན་ཞེས་པ་རྐང་པ་བཞིའོ། །དེ་ལ་
དོན་ནི་རླུང་གསུམ་མོ། །རྟོགས་པ་ནི་དེ་ཡི་གེ་གསུམ་དུ་རྟོགས་པའོ། །བཟླས་པ་ནི་དེ་གཉིས་དབྱེར་མེད་དུ་བགྲང་བ་སྟེ་དེ་ནི་རྡོ་རྗེའི་བཟླས་པར་བཤད་དོ། །དེ་ཡང་དུས་ཡི་གེ་གསུམ་དང་སངས་རྒྱས་ལྔའི་ངོ་བོར་བཤད་པའི་རླུང་ལྔ་དབྱེར་མི་ཕྱེད་པར་བརྟགས་པ་དང་
རླུང་སྔགས་ཐམས་ཅད་ངོ་བོ་ཉིད་མེད་པར་རྟོགས་པ་བཟང་པོ་ཡིས་བཟླས་པའོ། །སངས་རྒྱས་ཀྱིས་ཞེས་པའི་དོན་ནི་སངས་རྒྱས་སུ་ཞེས་པའོ། །ལཀྵྨཱིས་རླུང་གསུམ་གྱི་དོན་རྟོགས་ནས་སྔགས་དང་རླུང་དང་ལྷ་ལ་སོགས་པ་གཉིས་སུ་མེད་པར་བྱེད་
6-4-52b


པའི་རང་བཞིན་དུ་དུས་གསུམ་གྱི་སངས་རྒྱས་ཀྱིས་བརྟགས་པ་སྟེ་ཡོངས་སུ་ཤེས་པའི་བཟླས་པ་ནི་རྡོ་རྗེའི་བཟླས་པར་བཤད་ལ། རྟེན་འབྱུང་ཡིན་པས་གང་ཟག་དང་ཆོས་ཀྱི་བདག་གི་ངོ་བོ་ཉིད་མེད་པའི་རང་བཞིན་ཡིན་པས་དེའི་སྒོ་ནས་བཟླས་པ་ཞི་བ་སོགས་ཀྱི་
ལས་བསྒྲུབས་པས་བཟང་པོའི་ཞེས་འཆད་དོ། །རྩ་རྒྱུད་ཀྱི་ལེའུ་བདུན་པ་ལས་ཀྱང་གསུངས་པ་ནི། སློང་མོ་ཞེས་པ་བཞིའོ། །བིཀྵ་ཞེས་པ་སློང་མོ་ཡིན་ལ་དེ་ལ་བི་ན་ནི་ཐ་དད་དང་། ཨཀྵ་ར་ཞེས་པ་ཡི་གེ་སྟེ། ཡི་གེ་དང་རླུང་ཐ་དད་དུ་ཟློ་བ་ནི་སློང་མོ་ཟ་བའོ། །དེ་ལྟ་
བུ་དེ་མི་བྱེད་པ་ནི་སློང་མོ་ཟ་ཞིང་མི་ཟླ་ཞེས་པ་གཉིས་ཀྱི་དོན་ནོ། །དེ་ནས་གཉིས་ཀྱི་དོན་ནི་ཐ་མི་དད་དུ་ཟློ་བའི་ཚེའང་འདོད་ཡོན་གྱི་རང་བཞིན་ཤེས་པས་ལོངས་སྤྱད་ཅིང་། སྔགས་རྡོ་རྗེ་བཟླས་པའི་ཡན་ལག་ལྷའི་རྣལ་འབྱོར་མ་ཉམས་པར་བྱས་ལ་བཟླ་ཞེས་
པའོ། །དེ་ལྟར་ལྟ་ཐམས་ཅད་ཀྱི་ཐུགས་བསྐུལ་བའི་ཡི་གེ་གསུམ་གྱི་བཟླས་པ་དང་། ངོ་བོ་ཉིད་མེད་བཟང་པོ་ཡིས་དུས་གསུམ་སངས་རྒྱས་ཀྱིས་བརྟགས་པའི་དོན་རྟོགས་པའི་བཟླས་པ་ནི་རྡོ་རྗེའི་བཟླས་པར་བཤད་པ་དང་། བསླང་བ་ལ་ཆགས་པ་དད་
སློང་མོའི་ཟས་ཟ་ཞིང་ཟློ་བ་མི་བྱ་ཞེས་གསུངས་པ་རྣམས་ཀྱི་ངེས་དོན་གྱི་སྔགས་ཀྱི་དེ་ཉིད་རྟོགས་པར་བྱ་བའི་ཕྱིར་བཤད་བྱར་བཀོད་པའོ། །གཉིས་པ་ལ་བཞི། དགོངས་པ་ལུང་སྟོན་གྱིས་ངེས་པར་བསྟན་ཞིང་སོ་སོར་ངེས་པར་བསྟན་པ། རྒྱུད་ཕྱི་མས་
ནང་གི་དུས་གསལ་བར་བྱེད་པ། སླར་ཡང་དགོངས་པ་ལུང་སྟོན་གྱིས་ཕྲ་མོའི་རྣལ་འབྱོར་གསལ་བར་བྱས་པ། གཉིས་མེད་རྣམ་རྒྱལ་གྱིས་ཀྱང་སྔགས་ཀྱི་དེ་ཉིད་བཤད་པའི་ཚུལ་ལོ། །གཉིས་པ་ནི། དེ་པ་ཞེས་པ་ནས་མཉམ་བཟླས་ཞེས་བྱ་
6-4-53a


བའི་མདོར་བསྟན་པའི་ཚིག་བཞིའི་དོན་བཤད་རྒྱུད་རྣམས་ཀྱིས་རིམ་པ་བཞིན་འཆད་ལ། ཐོག་མར་རྩ་རྒྱུད་ཀྱི་དོན་མདོ་ཙམ་དུ་བསྟན་པའི་ངེས་པར་བསྟན་པ་དང་དེ་ནས་དེ་རྣམས་ཞིབ་ཏུ་ཕྱེ་ནས་བསྟན་པའི་སོ་སོར་ངེས་པར་
བསྟན་པ་ནི། འདུས་པའི་བཤད་རྒྱུད་རྩ་རྒྱུད་ཀྱི་དགོངས་པ་གསལ་བར་འཆད་པས་དེའི་དོན་ལུང་སྟོན་པ་ཞེས་བྱ་བ་དེར་གསུངས་པ་དེ་ལ་འཇུག་པར་བྱ་སྟེ་ཞེས་མཚམས་སྦྱར་རོ། །འདི་ལ་གཉིས། སྡུད་པ་པོས་ཞུས་པ་དང་། སྟོན་པ་པོས་
དེའི་ལན་བསྟན་པའོ། །དང་པོ་ལ་གཉིས། ཞུ་བ་དངོས་དང་། ཞུ་དགོས་པའི་རྒྱུ་མཚན་ནོ། །དང་པོ་ནི། དེས་ན་སླར་ཡང་གསལ་ལོ་ཞེས་སྦྱར་རོ། །གང་ལ་ན་དཔལ་ལྡན་རྣམ་པར་སྣང་མཛད་ཆེན་པོ་ཁྱབ་བདག་རྡོ་རྗེ་འཆང་ལ་ནིའོ། །གང་གིས་ན་ཕྱག་
ན་རྡོ་རྗེས་སོ། །ཅི་ཞིག་གསོལ་ན། སེམས་ཅན་ཐམས་ཅད་བསྐྱེད་པ་པོར་གྱུར་བའི་སྣ་ཚོགས་པའི་གཟུགས་ཅན་ཏེ་རྣམ་པ་ཅན་གྱི་སེམས་འདི་ནི་བསྟན་དུ་གསོལ་ཞེས་སྦྱར་བའི། །སེམས་ཇི་འདྲ་ཞེ་ན། རང་བཞིན་གྱིས་གྲུབ་པ་མེད་ཀྱང་དེ་ལ་
བརྟེན་པ་ལས་སྲིད་པ་ཞེས་བྱ་བའི་འཁོར་བསྐྱེ་བའོ། །འགྱུར་རྙིང་ལས། དེ་བས་དངོས་པོ་མེད་ཀྱང་གྱུར། །དངོས་པོ་དག་ཏུ་རབ་ཏུ་གྲགས། །ཞེས་འབྱུང་ལ། དེ་དག་གི་དོན་ནི་ལཀྵྨཱིས། རྐང་པ་སྔ་མ་གཉིས་ཀྱིས་སེམས་སྣ་ཚོགས་པའི་གཟུགས་
སུ་འབྱུང་བར་བསྟན་པས་རྣམ་པར་བཅས་པའི་སེམས་ཙམ་པའི་ལུགས་བསྟན་ནས་རྐང་པ་གསུམ་པས་སེམས་ལ་རྣམ་པར་ཤེས་པའི་དངོས་པོ་སྟེ་རང་བཞིན་མེད་དེ་ཕྱི་རོལ་གྱི་དོན་མེད་པས་རྣམ་པ་རྣམས་བརྫུན་པར་གྲུབ་ལ་དེ་
6-4-53b


དང་ཐ་མི་དད་པ་དེ་བས་ནའོ། །ཞེས་ལུགས་སྔ་མ་སེལ་བར་བྱེད་དོ། །རིག་པར་བྱེད་པས་ན་སེམས་སོ་ཞེས་གསུངས་པའང་ཀུན་རྫོབ་པའི་དངོས་པོ་དག་ཏུ་གྲགས་པ་ཡིན་གྱི་དོན་དམ་པར་མིན་ནོ། །དེས་ནི་རང་བཞིན་མེད་པ་ཁོ་ནའི་གྲུབ་མཐའ་བཞག་ནས། དོན་
དམ་པའི་བྱང་ཆུབ་ཀྱི་སེམས་ནམ་མཁའ་དང་མཉམ་པ་འོད་གསལ་བའི་རང་བཞིན་ལེགས་པར་བསྟན་དུ་གསོལ། ཇི་མཛད་ནས་ཤེ་ན་རྗེས་སུ་མྱོང་མཛད་པ་སྟེ་སྟོན་པ་ཉིད་ཀྱིས་མངོན་སུམ་དུ་མཛད་ནས་བསྟན་དུ་གསོལ་ལོ། །ཅིའི་དོན་དུ་ན། འགྲོ་བའི་དོན་ནི་
མཛད་པ་སྟེ་མ་འོངས་པའི་སེམས་ཅན་གྱི་དོན་དུའོ་ཞེས་འཆད་དོ། །སེམས་འདི་ནི་བསྟན་དུ་གསོལ་ཞེས་ཞུ་བའི་དོན་ནི་ནམ་མཁའ་དང་མཉམ་པ་སྟེ་འདྲ་བའི་གསལ་གྱི་བྱང་ཆུབ་ཀྱི་སེམས་ལེགས་པར་ཏེ་ཕྱིན་ཅི་མ་ལོག་པར་རྗེས་སུ་མྱོང་བར་མཛད་པའི་ཐབས་
གང་ཡིན་པ་དེ་སྟོན་ཅིག་ཅེས་པའི་དོན་ཏོ། །གང་གིས་ན་འགྲོ་བའི་དོན་ནི་མཛད་པ་པོས་སོ། །གང་ལ་སྐྱེ་བོ་མཆོག་ལ་སྟེ་རིན་པོ་ཆེ་ལྟ་བུའི་གང་ཟག་ལའོ། །རང་བཞིན་མེད་ཀྱང་དེ་ལས་སྲིད་པ་སྐྱེ་ཞེས་པ་ནི་དེ་མི་འགལ་བའི་ཚུལ་འདྲི་བ་ཡིན་གྱི་རང་བཞིན་
མེད་ཀྱང་བྱ་བྱེད་མི་འགལ་བའི་སེམས་ཀྱི་དེ་ཁོ་ན་ཉིད་རྟོགས་པའི་ཐབས་འདྲི་བར་འདོད་ནས་དེ་སྐད་སྨྲས་པའོ། །གཉིས་པ་ནི། དེ་འདྲ་བ་དེ་དྲི་དགོས་པའི་རྒྱུ་མཚན་ནི་མ་འོངས་པ་ན་རིམ་པ་དང་པོའི་སྒྲུབ་ཐབས་ཀྱི་ཆོ་ག་ཙམ་ཞིག་ནི་ཤེས་ནས་རྒྱུད་ཀྱི་ངེས་
པའི་དོན་ལ་རྒྱབ་ཀྱིས་ཕྱོགས་པ་རྣམས། འདི་ལྟར་བདག་ནི་རྡོ་རྗེ་སློབ་དཔོན་ནོ། །བདག་གིས་ཇི་སྐད་བསྟན་པའི་ཆོས་འདི་ཉིད་ཡིན་གྱི་འདི་ལས་གཞན་ནི་མིན་ནོ་ཞེས་སློབ་མ་ལ་སྨྲས་ནས་དེ་ཁོ་ན་ཉིད་རྟོགས་སུ་མི་འཇུག་པས་བྱིས་པ་རྣམས་
6-4-54a


འཇིག་པ་སྟེ་ཉམས་པར་བྱེད་དོ། །དེས་ནི་དགོངས་པས་བཤད་པའི་བྱང་ཆུབ་ཀྱི་སེམས་འོད་གསལ་མངོན་དུ་འགྱུར་བའི་ཐབས་ནི་དོན་ཇི་ལྟ་བ་བཞིན་དུ་མི་རྟོགས་པའི་ཚུལ་ནི། སྤྱོད་བསྡུས་ལས། སྔགས་ཀྱི་དེ་ཁོ་ན་ཉིད་ཅེས་བྱ་བ་གང་
དེ་ཁོ་ན་ཉིད་བསྡུས་པ་ལ་སོགས་པའི་རྩ་བའི་རྒྱུད་དང་། རྒྱུད་ཕྱི་མ་ལས་སྔགས་ཙམ་གསུངས་ཀྱི་སྔགས་བཏུ་བ་ནི་མ་བསྟན་ནོ། །བཤད་པའི་རྒྱུད་ལས་ནི། སྔགས་བཏུ་བ་དང་། སྔགས་ཀྱི་བརྡ་དང་། སྔགས་ཀྱི་དོན་དང་། སྔགས་ཀྱི་དེ་ཁོ་ན་ཉིད་
བཅོམ་ལྡན་འདས་ཀྱིས་བདེན་པ་ཁོ་ནར་གསུངས་སོ། །དེས་ན་བཤད་པའི་རྒྱུད་མ་རྟོགས་ཤིང་ཕྱི་རོལ་གྱི་གསང་སྔགས་ལ་མངོན་པར་ཞེན་པ་རྣམས་ཀྱིས་ཤེས་པར་མི་འགྱུར་ཏེ། །ཞེས་དགོངས་པ་ལུང་སྟོན་གྱིས་བཤད་པ་ལྟར་མ་རྟོགས་ན། 
བཟླས་པར་བྱ་བའི་སྔགས་ཐམས་ཅད་ངག་དང་ཡིད་ཀྱིས་ཟློ་བའི་ཕྱི་རོལ་གྱི་སྔགས་སུ་འཛིན་པ་ལ་གསུངས་སོ། །དེ་ལྟར་ན་སེམས་ཅན་བསྐྱེད་པའི་རྒྱུ་སེམས་བསྟན་དུ་གསོལ་ཞེས་པ་དེ། འཇིག་རྟེན་ཐམས་ཅད་གང་གི་འཕྲུལ་དུ་སོང་བའི་
རླུང་དང་སེམས་གཉིས་དབྱེར་མི་ཕྱེད་པའི་བྱང་ཆུབ་ཀྱི་སེམས་རྡོར་བཟླས་སུ་འགྲོ་བའི་ཚུལ་བཤད་དུ་གསོལ་ཞེས་པར་འགྱུར་ཏེ། ཟ་ཧོར་གྱི་མཁས་པ་བཙུམ་མོ་ཅན་དང་མཐུན་ནོ། །དེ་ལྟར་སྦྱོར་ན་བྱང་ཆུབ་སེམས་ནི་མཁའ་མཉམ་པ། །ཞེས་
པ་གཉིས་སྟོན་པའི་བསྟོད་པར་སྦྱར་རོ། །གཉིས་པ་ལ་གསུམ། ལན་མདོར་བསྟན་པ་དང་། རྒྱས་པར་བཤད་པ་དང་། དོན་བསྡུས་ཏེ་རྡོར་བཟླས་སུ་འགྲོ་ཚུལ་བསྟན་པའོ། །དང་པོ་ནི། གསང་བདག་གིས་ཞུས་པའི་རྗེས་དེ་ནས། བདག་
6-4-54b


པོ་བཅོམ་ལྡན་འདས་རྣམ་པར་སྣང་མཛད་ཐུབ་པ་ཆེན་པོས་ཞུས་པ་ལེགས་སོ། །ཞེས་ལན་གསུམ་དུ་གསུང་བར་མཛད་ནས་ཕྱག་ན་རྡོ་རྗེ་ལ་འཆད་པའི་དེ་གསུངས་སོ། །རྣམ་པར་མི་རྟོག་པའི་དོན་ནི་རླུང་སེམས་དབྱེར་མེད་ཀྱི་བྱང་ཆུབ་ཀྱི་སེམས་སོ། །
དེ་ཉིད་ནི་རབ་ཏུ་ཕྱེ་ནས་བཤད་པར་བྱའོ། །དེའང་གང་ན་སོ་སོར་བརྗོད་པ་དང་། དམིགས་བཞེས་པ་དང་། བརྡ་དང་དོན་དམ་པའོ། །དེ་ལ་སོ་སོར་བརྗོད་པ་མི་ཐམས་ཅད་ཀྱི་ངག་ལ་ཐུན་མོང་དུ་ཡོད་པའི་ཨཱ་ལི་ཀཱ་ལི་སྔགས་བཏུ་བའི་གཞིར་གྱུར་པའོ། །
སྤྱོད་བསྡུས་ལས། སྔགས་བཏུ་བ་དང་ཞེས་གསུངས་པ་དེ་འདི་ལ་བྱ་དགོས་པས་ལཀྵྨཱིས་དེ་ལྟར་བཤད་པ་ལེགས་སོ། །འདི་ལ་འགྱུར་ཅིག་ལས། ཚིག་གིས་བརྗོད་པ་ཞེས་འབྱུང་ངོ་། །དམིགས་པར་བཤད་པ་རྣམ་སྣང་ལ་སོགས་པའི་སངས་རྒྱས་
ཏེ་རྗོད་བྱེད་ཀྱི་སྒོ་ནས་བརྗོད་བྱའི་དོན་གང་དམིགས་པར་འགྱུར་པ་དེ་དམིགས་པ་ཡིན་ལ། ཡི་གེ་གསུམ་ལ་སོགས་པ་རྡོ་རྗེ་གསུམ་ལ་སོགས་པའི་ལྷ་རྟོགས་པར་བྱེད་པས་དེ་ནི་སྔགས་ཀྱི་དོན་དུ་ལཀྵྨཱིས་འཆད་དེ། སྤྱོད་བསྡུས་ལས། སྔགས་
ཀྱི་དོན་ཞེས་གསུངས་པ་དེ་འདི་ལ་བྱ་དགོས་ཤིང་དེ་དང་མཐུན་པས་ལེགས་སོ། །བརྡ་ནི་སྔགས་ཀྱི་བརྡའམ་མིང་དེ་ཉིད་དུ་བཤད་ཅེས་སྔགས་ཀྱི་མིང་སྦྲུལ་ལ་སོགས་པའོ། །སྔགས་ཀྱི་དོན་དམ་པ་སྟེ་དེ་ཁོ་ན་ཉིད་ནི་དེ་བཞིན་ཉིད་དོ། །གཉིས་པ་
ལ་གཉིས། སྔགས་ཀྱི་རྩ་བ་ཨ་ཐུང་གི་ཆེ་བ་དང་། སྔགས་བཞི་བཤད་པའོ། །དང་པོ་ནི། དབྱངས་གསལ་ཐམས་ཅད་བསྐྱེད་པའམ་ཡང་ན་དེ་ལས་སྔོ་བའི་དང་པོ་མེད་པས་དང་པོའང་ཡིན་ལ། ཡི་གེ་ཐམས་ཅད་ཨ་ལ་ཞུགས་པས་གཅིག་
6-4-55a


ཀྱང་ཡིན་པས་ན། དང་པོ་གཉིས་སྟེ་ཨ་ཐུང་ངོ་། །དགུ་ནི་དབྱངས་ལ་རིང་ཐུང་གི་ཡི་གེ་བརྒྱད་ཚན་གཉིས་སུ་ཕྱེ་བ་དང་། གསལ་བྱེད་ལ་ཀ་ཙ་ཊ་ཏ་བའི་སྡེ་ཚན་ལྔ་དང་། མཐར་གནས་ཀྱི་སྡེ་ཚན་ཡ་སྡེ་དང་། དྲོད་ཀྱི་ཡི་གེ་ཤའི་སྡེ་ཚན་ནོ། །
དེའི་དབུས་ན་གནས་པ་ནི་ཨ་ཐུང་སྟེ་དེ་མེད་ན་དེ་རྣམས་ལ་སྲོག་མེད་པས་བརྗོད་མི་ནུས་པའི་ཕྱིར་རོ། །གང་ཞིག་སྡེ་ཚན་དགུ་དང་ཨ་ཡིག་སྟེ་བཅུ་ཡིས་མ་བཅིངས་པའི་ཨ་ཡིག་གིས་མཚོན་པའི་འོད་གསལ་དེ་ནི་འཁོར་བའི་བག་ཆགས་ཀྱིས་བཅིངས་
པ་མེད་པ་ཞེས་བྱ་སྟེ། དེ་ཤེས་པའི་རྣལ་འབྱོར་བ་དེ་ཡིས་ནི་མཆོག་གི་གནས་དབྱངས་དང་པོའི་རང་བཞིན་གྱིས་བཏུ་བའི་ངག་གིས་སྤྲོས་པ་ཤེས་པ་དང་། ཡང་མཆོག་གི་གནས་མི་འཇིག་པ་དང་མི་འགྱུར་བཤེས་སོ། །དེ་ཉིད་རྒྱས་པར་འཆད་པ་
ནི་དབྱངས་ཞེས་སོགས་ཏེ་དབྱངས་ནི་བཅུ་དྲུག་དང་། གསལ་བྱའམ་གསལ་བྱེད་ནི་ཀ་ནས་ཉའི་བར་ཡང་ཡི་གེ་ནི་ཡ་ར་ལ་ཝ་སྟེ་མ་ནིང་གི་ཡི་གེ་བཞིའོ། །གྲངས་དགུའི་རྗེས་སུ་འཇུག་པ་ནི་སྔར་བཤད་པ་ལྟར་རེ། །དེ་རྣམས་ཕན་ཚུན་དུ་སྦྱོར་བ་
རྣམས་ཨས་བཅིངས་པའི་རང་བཞིན་དུ་གང་གིས་ཤེས་པ་དེ་ནི་འགྲོ་བའི་བླ་མ་སྟེ་སློབ་དཔོན་དུ་འགྱུར་རོ། །ཞེས་ལཀྵྨཱིས་བཤད་དོ། །བདག་གིས་ནི་འདི་ལྟར་མཐོང་སྟེ་དབྱངས་བཅུ་དྲུག་གི་དང་པོའང་ཡིན་ལ་ཡི་གེ་གཅིག་ཀྱང་ཡིན་པས་ན་དང་
པོ་གཅིག་ནི་ཨ་ཐུང་ངོ་། །དེ་ནི་དགུའི་དབུས་གནས་པ་དང་བཅུ་ཡིས་མ་བཅིངས་པ་ནི་སྔར་བཞིན་ཏེ། །ཡི་གེ་དེས་ཡི་གེ་གཞན་ཐམས་ཅད་འཆིང་ཞིང་ཁོ་ཉིད་རང་གཞན་གང་གིས་ཀྱང་མ་བཅིངས་ཞེས་པའོ། །ཨ་ཐུང་དགུའི་དབུས་ན་
6-4-55b


གནས་ཞེས་པའི་དགུ་འཆད་པ་ནི། དབྱངས་དང་ཞེས་པ་ནས་གྲངས་དགུ་ཞེས་པའོ། །དགུའི་དབུས་ན་གནས་པ་འཆད་པ་ནི་རྗེས་སུ་འཇུག་པ་ཞེས་པའོ། །དབྱངས་གསལ་དང་ཡི་གེ་སོ་སོར་བྱེད་མི་དགོས་སོ། །ཡི་གེ་དང་ཡི་གེ་རང་གཞན་གང་གིས་ཀྱང་
མ་བཅིངས་པ་ནི་སྔར་བཤད་ལ། དེས་གཞན་རྣམས་འཆིང་བ་ནི་ཨས་བཅིངས་ཕན་ཚུན་ཡང་དག་སྦྱོར་ཞེས་པས་འཆད་དེ། དབྱངས་གསལ་རྣམས་ཕན་ཚུན་སྦྱར་ཏེ་ཚོགས་ནས་བསྟན་བཅོས་ཆེན་པོའི་བར་དུ་གྲུབ་པ་ཐམས་ཅད་ཨ་ཡིས་བཅིངས་
ཞེས་པའི་དོན་ཡིན་པས་ཁ་ཅིག་གིས་ཕན་ཚུན་སྦྱོར་བས་མ་བཅིངས་པ་ཞེས་བསྒྱུར་བ་ནི་ཨ་ཐུང་དགག་ཚིག་ཏུ་བྱས་པའི་འཁྲུལ་པ་ཡིན་ནོ། །དེ་ཤེས་པ་ནི་མཆོག་གི་གནས། །ཞེས་པ་ནི། གང་གིས་ཤེས་ཏེ་འགྲོ་བའི་བླ་མ། །ཞེས་པས་འཆད་དེ། 
དེ་འདྲའི་ཨ་ཐུང་གིས་ཤེས་པ་དེ་ནི་མཆོག་གི་གནས་ཞེས་པའམ་བླ་མ་སྟེ་གོང་མའི་གནས་ཞེས་པའི་དོན་ནོ། །གལ་ཏེ་འདིར་ཨ་ཐུར་ངག་ཚིག་ཐམས་ཅད་ཀྱི་སྲོག་ཏུ་ཞུགས་ནས་གཞན་འཆིང་ཞིང་ཁོའི་སྲོག་ཏུ་ཡི་གེ་གཞན་འཇུག་མི་དགོས་
པ་ཤེས་པ་ལ་དེ་འདྲ་བའི་བསྔགས་པ་བྱེད་པ་མི་རིགས་ཏེ། དེ་ཙམ་ནི་བྱཱ་ཀ་ར་ཎ་པ་རྣམས་ཀྱིས་ཀྱང་ཤེས་པས་ཕྱི་རོལ་པ་དང་ཐུན་མོང་བའི་ཤེས་བྱ་དམན་པ་ཡིན་པའི་ཕྱིར་རོ། །གཞན་ཡང་འདིར་སྔགས་བཏུ་བ་སོགས་ཐམས་ཅད་ནང་ལ་སྦྱར་
ནས་སྔགས་ཀྱི་དེ་ཁོ་ན་ཉིད་འཆད་བའི་སྐབས་སུ་ཕྱི་རོལ་གྱི་རྣམ་གཞག་འདི་འདྲ་འཆད་པར་མི་རིགས་ཏེ། བཟླས་བྱའི་སྔགས་རྣམས་ཕྱི་རོལ་གྱི་སྔགས་ཙམ་དུ་འཛིན་པ་ལྡོག་པའི་སྐབས་ཡིན་པའི་ཕྱིར་རོ་ཞེ་ན། རྟོག་པ་དང་ལྡན་པ་ལ་འདི་འདྲའི་
6-4-56a


དོགས་པ་སྐྱེ་བ་ལེགས་པས་དེའི་ལན་བཤད་པར་བྱའོ། །འདིར་བཤད་རྒྱུད་ལས་ཨ་ཐུང་སྔགས་ཀུན་གྱི་རྩ་བར་བཤད་པ་ཙམ་ཞིག་འཕགས་པས་དྲངས་ཀྱི་དེའི་བཤད་པ་མ་མཛད་དོ། །འཕགས་པ་ལྷས་དང་པོ་གཅིག་ནི་
ཞེས་སོགས་དྲངས་པ་ལ་གཞན་ལ་ཚིག་འགྲེལ་མ་མཛད་པར། ཐུང་དུ་མ་ལུས་ངག་ཏུ་འགྱུར། །ཞེས་པའི་དོན་དྲིས་ལན་གྱིས་རྒྱ་ཆེར་གཏན་ལ་ཕབ་སྟེ། དེ་ནི་ཨ་ཐུང་གི་གནས་མཐར་ཐུག་པ་སྟོན་པས་དེ་ཤེས་དགོས་སོ། །དེ་ཡང་སྤྱོད་བསྡུས་
ལས། འདི་ནས་གསུང་རབ་འཆད་པ་དག་ནི་བྱཱ་ཀ་ར་ཎའི་ཚིག་སྔོན་དུ་བྱས་ནས་སྒྲའི་དོན་ཙམ་འབའ་ཞིག་གི་རྗེས་སུ་འབྲངས་ཀྱི། ཡང་ཡི་གེས་བརྗོད་པ་གང་དུ་གང་གི་ཕྱིར་ཇི་ལྟར་རབ་ཏུ་འཇུག་པ་ཤེས་པ་ནི་མ་ཡིན་ནོ། །ཡི་གེའི་དེ་ཁོ་ན་
ཉིད་ཇི་ལྟ་བ་ཉིད་ནི་མི་ཤེས་ཏེ། སངས་རྒྱས་རྣམས་ཀྱི་སྤྱོད་ཡུལ་ཡིན་པའི་ཕྱིར་རོ། །བསྟན་པའི་རིམ་གྱིས་དེ་ཁྱོད་ཀྱིས་ཁོང་དུ་མ་ཆུད་པའི་བྱ་ཡིས། ཉོན་ཅིག་ཅེས་ཐུང་དུ་མ་ལུས་པའི་ངག་ཏུ་འགྱུར་བའི་འགྱུར་ཚུལ་དྲིས་པའི་ལན་དུ་གསུངས
སོ། །དེ་ལ་གསུང་རབ་འཆད་པ་ནི། བཤད་རྒྱུད་ཀྱིས་བཤད་པ་ལྟར་དུ་ཨ་ཐུང་གི་དེ་ཁོ་ན་ཉིད་ཁོང་དུ་མ་ཆུད་པའི་རང་སྟེ་ཐམས་ཅད་ཡིན་ཏེ། རྣལ་འབྱོར་བླ་མེད་ལ་ཞུགས་ཀྱང་བཤད་རྒྱུད་ཀྱི་དགོངས་པའི་དོན་མི་ཤེས་པ་རྣམས་ཀྱིས་ཀྱང
འདིའི་དོན་མི་ཤེས་པར་གསུངས་ན་དེ་ལས་འོག་མའི་གསུང་རབ་འཆད་པ་རྣམས་ཀྱིས་ལྟ་ཅི་སྨོས་པའི་ཕྱིར་རོ། །དེ་དག་གིས་ཇི་ཙམ་ཞིག་ཤེས་ལ་ཇི་ཞིག་མི་ཤེས་སྙམ་ན། སྒྲའི་གཞུང་ལ་བརྟེན་ནས་དབྱངས་གསལ་དང་ཨ་ཐུང་གི་སྒྲའི་
6-4-56b


དོན་ཙམ་འགའ་ཞིག་ཤེས་ཀྱི། ཡི་གེ་ཨ་ཐུང་གི་དེ་ཁོ་ན་ཉིད་ཇི་བཞིན་དུ་མི་ཤེས་སོ། །དེ་ཡང་ཨ་ཐུང་གི་ཡི་གེ་བརྗོད་པའི་དོན་ཡི་གེ་གང་དུ་འཇུག་པ་སོགས་མི་ཤེས་པའོ། །མི་ཤེས་པའི་རྒྱུ་མཚན་ནི་སངས་རྒྱས་ཀྱི་སྤྱོད་ཡུལ་འོག་མ་པ་རྣམས་
ལ་སྦས་པའི་དོན་ཡིན་པའི་ཕྱིར་རོ། །དེ་ལྟར་གཞན་གྱིས་མི་ཤེས་པ་ཤེས་པར་བྱ་བའི་ཕྱིར་འོག་ནས་འཆད་པའི་རིམ་གྱིས་ཡི་གེའི་དེ་ཁོ་ན་ཉིད་དེ་ཁོང་དུ་ཆུད་པར་བྱའོ་ཞེས་གསུངས་སོ། །འོག་ནས་བཤད་པའི་རིམ་པ་ནི། མ་ལུས་ངག་ཅེས་པའི་
ངག་གམ་སྒྲ་ནི་དབྱངས་གསལ་གྱི་ཡི་གེ་ཞེ་དགུའོ། །དེ་མ་ལུས་པ་ནི་དབྱངས་གསལ་ཐམས་ཅད་བསྡུས་པ་དང་སོ་སོ་བ་མཐའ་དག་དང་དེ་གཉིས་སོ་སོ་ཡི་གེ་དང་ཐིག་ལེ་དང་ཚིག་དྲག་དང་། ཀུན་ཕན་དང་སྐད་ཀྱི་དབྱིངས་དང་རྣམ་དབྱེ་དང་རྐྱེན་ལ་སོགས་
པ་ནས་བཤད་པའི་མཐར་ཐུག་པའོ། །དེ་དག་ནི་བྱཱ་ཀ་ར་ཎ་ཞེས་པའི་མིང་གི་བརྡས་བཤད་པས་ཤེས་སོ། །དེ་བས་ན་ཚིག་དང་ངག་ནས་བསྟན་བཅོས་ཆེན་པོའི་བར་དུ་གྲུབ་ནས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་རྫོགས་པར་བྱེད་
དོ། །ལང་ཀར་གཤེགས་པ་ལས། མར་མེ་ལ་བརྟེན་ནས་མུན་ཁུང་དུ་ནོར་བལྟ་བ་བཞིན་དུ་ཚིག་གི་རྣམ་པར་རྟོག་པའི་མར་མེས་ཀྱང་རྣམ་རྟོག་དང་བྲལ་བའི་སོ་སོ་རང་གིས་རིག་པའི་ཡུལ་ལ་འཇུག་པར་གསུངས་སོ། །དེ་ལྟ་བུའི་ངག་ཚིག་ཏུ་གཏོགས་
པའི་ཡི་གེ་རྣམས་ཀྱི་དོན་སོ་སོར་རྣམ་པར་ཤེས་པ་ནི་ཨ་ཐུང་གི་ཡི་གེའི་མཐུ་ཡིན་ཏེ། དེ་དང་མི་ལྡན་ན་ཀ་ལ་སོགས་པ་རྣམས་ཚིག་ཏུ་མི་འགྱུར་བའི་ཕྱིར་ཏེ། མཐའ་ཅན་ཡིན་པའི་ཕྱིར་རོ། །འདི་ལ་ཆག་གིས། ཧ་མཐའ་ཡིན་པའི་ཕྱིར་རོ།
6-4-57a


ཞེས་བསྒྱུར་རོ། །དེ་དག་གིས་ནི་ཨ་ཐུང་ངག་མ་ལུས་པའི་ཁོང་ན་གནས་པ་བཤད་པ་དང་པོ་གཅིག་ནི་དགུ་དབུས་ན་ཞེས་སོགས་རྐང་པ་བརྒྱད་ཀྱི་དངོས་ཟིན་གྱི་དངོས་ཟིན་གྱི་དོན་བཤད་ལ་དེའང་སྒྲ་པ་ཐུན་མོང་བའི་ཤེས་བྱར་བསྟན་ནོ། །དེ་ནས་ཨ་
ཐུང་གི་དེ་ཁོན་ཉིད་འཆད་པ་ལ། མཚན་བརྗོད་ལས། །ཨ་ནི་ཡིག་འབྲུ་ཀུན་གྱི་མཆོག་ཅེས་གསུངས་པའི་རྐང་པ་དྲུག་དང་། བསམ་གཏན་མ་ལུས་པའི་སྒོའི་ས་བོན་གྱི་ཚིག །ཡི་གེ་ཨ་ནི་གདོད་མ་ནས་མ་སྐྱེས་པའི་ཕྱིར་ཆོས་ཐམས་ཅད་ཀྱི་སྒོའོ་
ཞེས་པ་དང་། ཨ་དེ་ལྷན་ཅིག་སྐྱེས་པའི་ཡི་གེ་ཡིན་པར་ཡང་གསུངས་ཏེ་ཞེས་པའི་ཤེས་བྱེད་དུ། །རྡོ་རྗེ་དཀྱིལ་འཁོར་རྒྱན་ཞེས་བྱ་བའི་རྒྱུད་ལས། སྙིང་གི་དབུས་ན་མི་ཤིགས་པ། །འབར་ཞིང་མར་མེ་དག་དང་མཚུངས། །མི་འགྱུར་མཆོག་ཏུ་ཕྲ་བ་
སྟེ། །ཨ་ནི་གཙོ་བོ་དམ་པའོ། །ཞེས་པས་ཨ་གསལ་བར་སྟོན་པར་གསུངས་ཤིང་། དེ་ནས་ལང་གཤེགས་ལས། བྱང་ཆུབ་སེམས་དཔའ་དོན་ལ་རྟོན་དགོས་ཀྱི་ཚིག་ལ་རྟོན་པར་མི་བྱའོ། །ཚིག་ལ་རྟོན་ན་ནི་རང་གཞན་གཉིས་ཀ་དོན་དམ་
ལས་ཉམས་པར་བྱེད་དོ། །ལ་ལས་སོར་མོའི་རྩེ་མོས་གཞན་ལ་དོན་གཅིག་སྟོན་པ་ན་དེས་མཚོན་པར་བྱ་བའི་དོན་ལ་མི་ལྟ་བར་མཚོན་བྱེད་སོར་མོའི་རྩེ་མོ་ཁོ་ན་ལ་བལྟ་བ་བཞིན་དུ་སྒྲ་ཇི་བཞིན་པར་ཞེན་པའང་དེ་དང་འདྲ་བས་དོན་འདོད་པས་
དེ་སྤང་བར་བྱའོ། །ཞེས་པ་དྲངས་སོ། །ལུང་དེ་འདིར་སྦྱོར་ཚུལ་ནི་ཨ་ཐུང་ངག་མ་ལུས་པའི་ཁོང་དུ་ཞུགས་པ་ཙམ་ཤེས་པར་བྱེད་ཀྱི་ཨའི་དེ་ཁོ་ན་ཉིད་མི་འཚོལ་བ་ནི་སྔར་གྱི་དཔེ་དེ་དང་འདྲ་བས་ཡི་གེ་དེའི་དེ་ཉིད་བཙལ་བར་བྱའོ། །དེའི་དོན་
6-4-57b


གང་ཡིན་ན། འདིར་སྔགས་ཀྱི་རྩ་བར་གསུངས་པའི་ཨ་ཐུང་ནི་སྙིང་གའི་འཁོར་ལོའི་དབུས་ཨ་བ་དྷཱུ་ཏཱིའི་ནང་གི་མི་ཤིགས་པའི་ཐིག་ལེའོ། །དེའང་མི་འགྱུར་བ་དང་མཆོག་དང་ཕྲ་བས་ཨ་ནི་གཙོ་བོ་དམ་པའོ། །ཨ་ནི་དབྱངས་གསལ་གྱི་ཡིག་འབྲུ་
ཀུན་གྱི་མཆོག་དང་དོན་ཆེན་པོ་ཅན་དུ་གསུངས་པའང་དེ་ལ་ཟེར་ལ། ཡི་གེ་དམ་པ་ཡིན་ཤེས་པའང་མི་འགྱུར་བ་དང་མཆོག་གི་དོན་ཡིན་ཏེ། ཡི་གེའི་སྐད་དོད་ཨ་ཀྵ་ར་ནི་འགྱུར་མེད་དང་། དམ་པའི་སྐད་དོད་པ་ར་མ་ནི་དམ་པ་དང་མཆོག་གཉིས་
ཀ་ལ་འཇུ་གཔའི་ཕྱིར་རོ། །ཁོང་ནས་འབྱུང་བ་སྐྱེ་བ་མེད། །ཅེས་པ་ལ་ཆག་གིས་སྲོག་ཆེན་པོ་ནི་ཡི་གེ་མེད། །ཅེས་སྒྱུར་བས་མི་ཤིགས་པའི་ཐིག་ལའི་རླུང་མཆོག་ཡིན་པ་དང་ཡི་གེ་དང་ཡི་གེ་མེད་པ་ནི་ཡིག་འབྲུའི་རྣམ་པར་མེད་པའོ། །
ཚིག་ཏུ་བརྗོད་པ་སྤངས་པའང་ངག་གང་གི་རྣམ་པར་རྟོག་པའི་ཡུལ་མིན་པའོ། །བརྗོད་པ་ཀུན་གྱི་རྒྱུ་དང་ཚིག་ཀུན་གསལ་བར་བྱེད་པ་ནི་དེ་རླུང་རྣམས་ཀྱི་རྩ་བའི་རྒྱུ་ཡིན་པས་དེ་ལ་བརྟེན་ནས་འབྱུང་བའི་རླུང་གིས་ངག་ཚིག་བསྐྱེད་པའི་ཕྱིར་རོ། །ཨ་
ནི་མ་སྐྱེས་ཞེས་པའི་དོན་ནི་འོད་གསལ་གྱི་དོན་ཨའི་དོན་དུ་སྟོན་པ་ཡིན་ལ་དེ་ཡང་སྙིང་གའི་མི་ཤིགས་པའི་ཨ་ཡིག་གི་དོན་མངོན་དུ་གྱུར་ན་དེ་ཁོ་ན་ཉིད་ཀྱི་རྟོགས་པ་ལ་བཤད་ཀྱི། སྤྱིར་སྐྱེ་མེད་སྟོང་ཉིད་ཙམ་ཞིག་སྟོན་པ་མིན་ཏེ། དེ་
ཙམ་ནི་ཕ་རོལ་ཏུ་ཕྱིན་པའི་ཐེག་པ་དང་ཐུན་མོང་བ་ཡིན་པས། དེ་ཤེས་པ་བཤད་རྒྱུད་ལ་རག་ལས་པ་མི་འཐད་པའི་ཕྱིར་རོ། །དེས་ན་ཨ་ཞེས་བྱ་བ་ནི་ཞེས་དྲངས་པའང་རྒྱུད་རྣམས་ནས་འབྱུང་བ་དྲངས་པ་ཡིན་གྱི་མདོ་ནས་འབྱུང་བ་མིན་ནོ། །
6-4-58a


དེའི་ཕྱིར་ཨ་ཡིག་གི་དེ་ཁོ་ན་ཉིད་ཀྱི་དོན་རྣལ་འབྱོར་བླ་མེད་ལ་ཞུགས་པ་མ་གཏོགས་པས་མི་ཤེས་པར་བཤད་པ་དང་མི་འགལ་ལོ། །དེ་ལྟར་སྔགས་ཀྱི་རྩ་བ་ཨ་ཐུང་མི་ཤིགས་པའི་ཐིག་ལེ་ལ་བཤད་པའི་གནད་ཀྱིས་དབྱངས་
གསལ་གྱི་ཡི་གེའི་སྔགས་རྣམས་ཀྱང་ཕྱིའི་ཡི་གེ་མིན་གྱི་རླུང་ལ་བྱའོ། །དེ་ལྟར་ན་ངག་གི་སྤྲོས་པ་སྐྱེད་པའི་རླུང་རྣམས་གང་དུ་འཇུག་པའི་གནས་ནི་མི་ཤིགས་པའི་ཐིག་ལེ་ཡིན་པར་ཤེས་ཏེ། སྤྱོད་བསྡུས་ལས། རླུང་གི་དེ་ཉིད་སྟོན་པའི་
སྐབས་སུ་རླུང་བཅུ་པོ་མི་ཤིགས་པ་ཐོབ་ནས་དངོས་པོ་མེད་པར་འགྱུར་གསུངས་པའི་ཕྱིར་དང་། ཡི་གེ་གསུམ་གྱི་བྱ་བ་སྟོན་པའི་སྐབས་སུའང་དེ་ལྟར་ལུས་ལ་གནས་པའི་གནས་སྐབས་སུ་ཐམས་ཅད་བྱས་ཏེ་མཐར་མི་ཤིགས་པར་
ཞུགས་ནས་ཞེས་གསུངས་པའི་ཕྱིར་རོ། །དེ་ཤེས་ན་གང་གི་ཕྱིར་འཇུག་པའང་ཤེས་ཏེ་མི་ཤིགས་པར་ཞུགས་ནས་དངོས་པོ་མེད་པར་འགྱུར་པར་གསུངས་པའི་དངོས་པོ་མེད་པ་ནི་འོད་གསལ་ཡིན་པས། འོད་གསལ་མངོན་དུ་བྱ་བའི་
ཕྱིར་དུ་འཇུག་གོ། །དེ་ཤེས་ན་ཇི་ལྟར་འཇུག་པའི་འཇུག་རིམ་ཡང་ཤེས་ཏེ། ས་ཆུ་ལ་ཐིམ་པ་སོགས་ཀྱི་ཐིམ་རིམ་གྱིས་འོད་གསལ་དུ་འཇུག་པར་གསུངས་པའི་ཕྱིར་རོ། །རིམ་པ་དེས་རླུང་དང་ཀུན་རྟོག་རྣམས་མི་ཤིགས་པའི་ཐིག་ལེར་
སྡུད་པའི་སྡུད་བྱེད་ནི་རྡོ་རྗེའི་བཟླས་པ་ཡིན་པས་ཨ་ཐུང་སྔགས་ཀྱི་རྩ་བར་གསུངས་པའི་གནད་ཤེས་པ་དེ། འགྲོ་བ་ཀུན་གྱིས་བཀུར་པའི་གནས་མཆོག་ཏུ་གསུངས་པ་ནི་དེ་ལྟར་ཡིན་པར་ཤེས་པར་གྱིས་ཤིག །ཐུང་ངུ་མ་ལུས་ངག་
6-4-58b


ཏུ་འགྱུར་བ་དྲིས་པའི་ལན་གྱི་དོན་ནི་རླུང་གི་དེ་ཉིད་ལྡང་འཇུག་གནས་གསུམ་དང་སྔགས་ཀྱི་དེ་ཉིད་ཡི་གེ་གསུམ་དང་སྦྱོར་བའི་ཚེ། སྒྲའི་དེ་ཉིད་ནས་མཁའ་དང་འདྲ་བའི་སྟོང་པར་ཤེས་ནས་ཟློ་བ་ལ་འཆད་པ་རྣམས་ཀྱིས་ནི། སྔགས་ཀྱི་དེ་ཉིད་ཀྱི་
མཐར་ཐུག་པ་ཨ་ཐུང་སྔགས་ཀྱི་རྩ་བར་གསུངས་པའི་དོན་མ་རྟོགས་པ་ཡིན་ནོ། །རྒྱུད་ཕྱི་མ་ལས། སྙིང་གར་བསམས་ནས་ནི། སྲོག་ནི་ཐིག་ལེར་གྱུར་པར་བཞག །ཅེས་པའི་དོན་སྒྲོན་གསལ་ལས། སྙིང་གའི་པདྨར་ཨ་ཐུང་བསམས་ལ་
མི་ཤིགས་པའི་ཐིག་ལེར་གཏོགས་པར་དགོད། །ཅེས་གསུངས་པ་དང་། །རྡོར་ཕྲེང་ལས། རྫས་ཀྱི་ཐིག་ལེ་ཁོང་ཆུད་པ། །ཐིག་ལེ་གཉིས་ཏེ་སྔགས་དང་རླུང་། །སྔགས་ཀྱི་ཐིག་ལེ་དེ་ཉིད་མཆོག །ཐིག་ལེ་གཉིས་ནི་འོད་དང་རྫས། །ཞེས་རྫས་ཀྱི་
ཐིག་ལེ་གང་གི་ཁོངས་སུ་འདུ་བའི་རླུང་སྔགས་ཀྱི་ཐིག་ལེ་གཉིས་ཀྱི་ནང་ནས། སྔགས་ཀྱི་ཐིག་ལེ་མཆོག་ཏུ་གསུངས་པ་རྣམས་ཀྱང་དགོངས་པ་ལུང་སྟོན་དང་དགོངས་པ་གཅིག་གོ། །འོ་ན་དང་པོ་གཅིག་ན་ཞེས་སོགས་ལ་མཚོན་བྱེད་དཔེའི་ཨ་ཐུང་
གི་བཤད་པ་སྔར་ལྟར་ཡིན་ན་མཚོན་བྱ་དོན་གྱི་ཨ་ཐུང་ལ་བཤད་ན་ཇི་ལྟར་སྙམ་ན། དང་པོ་ནི་ལུས་ཆགས་པའི་དང་པོར་བྱུང་བའོ། །གཅིག་ནི་སྲོག་འཇིན་ཕྲ་བ་ལྷན་སྐྱེས་ཀྱི་རླུང་སེམས་སོ། །དགུ་ནི་རྩ་བའི་རླུང་ལྷག་མ་བཞི་དང་ཡན་ལག་
གི་རླུང་ལྔའོ། །དེའི་དབུས་ཞེས་པ་ནི་དེ་ཀུན་གྱི་རྩ་བར་གནས་པའོ། །བཅུ་ཡིས་མ་བཅིངས་པ་ནི་སྲོག་འཛིན་རགས་པ་དང་བཅུ་ཡིས་དེ་ལ་དབང་མ་བྱས་པའོ། །དབྱངས་གསལ་གྱི་ཡི་གེ་རྣམས་ནི་རླུང་དང་རང་བཞིན་རྣམས་སོ། །དེའི་རྗེས་
6-4-59a


སུ་འགྲོ་བ་དང་དེ་རྣམས་ཨས་བཅིངས་པ་ནི་དེ་རྣམས་ཀྱི་རྩ་བར་གནས་པ་སྟེ། དགོངས་པ་ལུང་སྟོན་ལས། ཇི་སྲིད་འཇིག་རྟེན་བཏགས་པ་དང་། །དེ་བཞིན་བཏགས་པ་སྣ་ཚོགས་རྣམས། །རྣམ་རྟོག་བྱང་ཆུབ་སེམས་ཞེས་པའི། 
རླུང་ལས་རྟག་ཏུ་འབྱུང་བ་ཡིན། །བདེ་སྡུག་ལ་སོགས་ཆོས་རྣམས་ཀྱི། །ས་བོན་ལྟ་བུར་བཤད་པ་ཡིན། །ཞེས་སོ། །གཉིས་པ་ལ་བཞི། སྔགས་བཏུ་བ། སྔགས་ཀྱི་དོན། སྔགས་ཀྱི་བརྡ། སྔགས་ཀྱི་དེ་ཁོ་ན་ཉིད་དོ། །དང་པོ་ནི། འབྱུང་བའི་
མཐའ་ནི་ཡི་གེ་ཧ་སྟེ། འབྱུང་བ་དང་དྲོ་བའི་སྡེ་ཚན་གཉིས་ཀའི་མཐའ་ལ་འབྱུང་བའི་མཐའ་ཞེས་པར་གྱི་མི་མངོན་པའོ། །ཆ་ལ་སོགས་པ་ནི་ཨའོ། །འདི་ལ་ཆག་གིས་ཆའི་དང་པོ་ཞེས་བསྒྱུར་བ་ལེགས་ཏེ་སོགས་ཀྱི་སྐད་དོད་དང་པོ་ལའང་འགྲོ་
ཞིང་དབྱངས་ཀྱི་དང་པོ་འདི་འཐུ་བ་ཡིན་བའི་ཕྱིར་རོ། །དེས་ན་ཆ་ནི་དབྱངས་ཡིན་ལ་དེའི་དང་པོ་ཞེས་པར་འགྱུར་བས་ལཀྵྨཱིས་ཆ་ལ་སོགས་པ་ཨ་ལ་བཤད་དོ། །བཅུ་དྲུག་པ་ནི་དབྱངས་ཐ་མ་ཨ་ཚེག་དྲག་ཅན་ནོ། །དེ་གཉིས་མཚམས་སྦྱར་ན་ཨ་
ཚེག་དྲག་ཅན་རིང་པོའོ། །ལྔ་པ་ལྔ་ནི་ཀ་ནས་མའི་བར་ཉེར་ལྔ་ཡིན་ལ་དེའི་ཐ་མ་ནི་མ་ཡིན་ནོ། །མ་ཡིག་དེ་རྗེས་སུ་ང་རོར་བྱས་ནས་ཧ་ཡིག་དང་སྦྱར་རོ། །བཞི་ནི་གསུམ་དུ་ཞེས་པ་ནི་བཞི་གསུམ་བཅུ་གཉིས་ཡིན་ལ་ངེས་པར་སྦྱར་ཞེས་
པའི་སྦྱར་བའི་དོན་ནི་ལྷན་ཅིག་པ་ཡིན་པས་བཅུ་གཉིས་པོ་དེ་གང་དང་ལྷན་ཅིག་པ་ནི་བཅུ་གསུམ་པའི་དབྱངས་ཡིག་ཨོའོ། །དེའང་ཡི་གེ་ཨཾ་བཅས་ཞེས་པའི་དོན་ཐིག་ལེ་དང་ལྡན་པར་བྱའོ། །འདི་ལ་ཆག་གིས་རྗེས་སུ་དབྱངས་བཅས་
6-4-59b


ཞེས་བསྒྱུར་བ་ལེགས་པས་ཨོ་ཡིག་རྗེས་སུ་ང་རོ་དང་བཅས་པས་ཨོཾ་མོ། །རིང་པོ་ནི་ཨུ་ཡིག་རིང་པོ་ཡིན་ལ་དེ་ཧ་ཡིག་དང་བཅས་པས་ཧཱུཾ་མོ། །དེ་ལྟར་བཏུས་ནས་ཉེ་བར་བསྡུ་བ་བཤད་པ་ནི་ཡོན་ཏན་ཞེས་སོགས་ཏེ། སྙིང་སྟོབས་དང་རྡུལ་དང་མུན་
པའི་ཡོན་ཏན་གསུམ་ནི་ཡི་གེ་གསུམ་སྟེ་སྙིང་སྟོབས་ལུས་ཏེ་རྡུལ་ནི་ངག །མུན་པ་སེམས་ཞེས་གསུངས་པ་ལྟར་རོ། །སྦྱོར་བ་ནི་དེ་གསུམ་འབྲེལ་བའོ། །ཕྱིས་ནས་མཚུངས་པ་ནི་དེ་གསུམ་ཕྱིས་པ་བཞིན་དུ་བྱ་བའོ། །དེའི་རིམ་པ་ནི་འདི་ཡིན་ཏེ་ཡི་གེ་
གསུམ་པོ་རེ་རེ་ལའང་ཡི་གེ་གསུམ་གསུམ་ཡོད་ལ། ཀུན་ལ་ཁྱབ་བྱེད་དུ་གནས་པ་ནི་ཡི་གེ་ཨའོ། །དེ་ལ་ཕྱག་འཚལ་བའི་ཡི་གེ་གསུམ་ནི་ཨ་དང་ཨོ་དང་མའོ། །འདི་འཐུ་བའི་དུས་སུ་ཨ་ཟུར་དུ་མ་བཏུས་ཀྱང་ཨོའི་ཁོང་ཡོད་པ་ལ་བསམ་
སོ། །ངག་གི་དབང་ཕྱུག་གི་གསུམ་ནི་ཨ་དང་། ཨ་དང་ཚེག་དྲག་གོ། སྤྲིན་སྒྲའི་གསུམ་ནི་མགོ་བོ་དང་སྲོག་མེད་པའི་ཧ་དང་ཞབས་སྐྱེད་དོ། །དེ་ལ་ཨོ་དང་རྗེ་སུ་ང་རོ་མ་ཡིག་གཉིས་གསུང་གི་ས་བོན་ལ་ཐིམ་པ་དང་། ངག་གི་དབང་ཕྱུག་གི་ཐིག་ལེ་གཉིས་
ཐུགས་ཀྱི་ཐིག་ལེ་ལ་ཐིམ་མོ། །ཞབས་སྐྱེད་ནི་ཧ་ལ་དང་ཧའང་ཐིག་ལེ་ལ་དང་ཐིག་ལེའང་མགོ་བོ་ལ་ཐིམ་སྟེ། མགོ་བོ་ནི་ཨ་ཡིག་གོ། །འདི་ནི་ཧའི་སྲོག་ཡིག་ལ་བསམས་སོ། །དེ་ལྟར་ཨ་བཞི་ལུས་པའི་སྐུའི་ཨ་ནི་གསུང་གི་ཨ་དང་། དེ་རང་གི་
ཚེག་དྲག་གི་ཨ་དང་དེ་ཐུགས་ཀྱི་ཨ་ལ་ཐིམ་ནས་ཨ་ཐུང་གཅིག་པུ་ལུས་སོ། །ཨ་ཐུང་དུ་དེ་ནི་ཡི་གེ་དང་ངག་ཚིག་ལ་སོགས་པའི་ངག་གི་སྤྲོས་པ་མ་ལུས་པའི་གཟུགས་སུ་འགྱུར་རོ། །ཡང་ན་ཕྱིས་པ་ནི་མི་མངོན་པ་ཙམ་སྟེ། །སྐུའི་ས་བོན་གསུང་
6-4-60a


ལ་དང་དེ་ཐུགས་ཀྱི་ས་བོན་ལ་ཐིམ། དེའི་ཞབས་སྐྱེད་ནི་ཧ་ལ་ཐིམ། ཧའི་སྲོག་གི་ཨ་བཏོན་ནས་སྲོག་མེད་ནི་མགོ་བོ་ལ་དང་དེ་ཐིག་ལེ་ལ་དང་ཐིག་ལེ་ཨ་ལ་ཐིམ་པར་བྱའོ། །ཨ་ཐུང་དེ་ཐམས་ཅད་བསྡུས་པས་དུ་མ་མིན་པ་ངག་ཐམས་
ཅད་འབྱུང་བས་གཅིག་མ་ཡིན་ནོ་ཞེས་ལཀྵྨིས་བཤད་དོ། །སྤྱོད་བསྡུས་སུ་ཡི་གེ་གསུམ་པོ་རེ་རེའང་ཡི་གེ་གསུམ་གསུམ་ལས་བྱུང་བར་གསུངས་པ་མ་གཏོགས་ཡི་གེ་གང་ཡིན་མི་གསལ་ལ། རྡོ་རྗེ་ཕྲེང་བའི་སྔགས་ཀྱི་དེ་ཁོ་ན་ཉིད་གསུངས་པའི་
ལེའུ་ལས། དབྱངས་དང་པོའི་ཡི་གེ་ཨ་དང་དབྱངས་དྲུག་པ་ཨུ་དང་། ཀ་ཙ་ཊ་ཏ་པའི་སྡེ་ཚན་ཐ་མའི་ཐ་མ་མ་ཡིག་དང་ལྡན་པར་བྱས་པས་ཨོཾ་དང་། དབྱངས་ཐོག་མའི་ཡི་གེ་ཨ་ཉིས་འགྱུར་དུ་བྱས་པ་དང་། ཨུཥྨ་ནའི་ཆ་དང་ལྡན་པ་སྟེ་ཡི་གེ་གསུམ་
ལས་ཨ་རིང་པོར་གསུངས་སོ། །ཨུཥྨ་ནའི་ཆ་ནི་འགྲེལ་པས་ཧ་སྲོག་མེད་ལ་བྱས་ནས་ཚེག་དྲག་གི་གནས་སུ་དེ་བཞག་པར་བཤད་དོ། །ཨུཥྨ་ནའི་མཐའི་ཆ་དང་། དབྱངས་དྲུག་པ་ཨུ་རིང་པོ་དག་མ་ཡིག་གསུམ་ལས་ཧཱུཾ་བཏུས་སོ། །འགྲེལ་པས་
ཨུཥྨ་ནའི་མཐའ་ཧ་ཡིག་དང་ཆ་ནི་སྟེང་གི་ཟླ་ཚེས་ལ་བྱས་སོ། །སྐུ་གསུང་ཐུགས་ཀྱི་སྙིང་པོ་བཤད་པའི་ལེའུ་ལས། ཨ་དང་ཨོ་དང་མ་གསུམ་ལས་ཨོཾ་བཏུས་པ་ལ་འགྲེལ་པས་ཨུ་ཡིག་བཏུས་སོ། །ཨ་ལ་ཨ་གཉིས་དང་ཧ་གསལ་བར་བཏུས་
ལ་ཧཱུཾ་ཡིག་ནི་སྔ་མ་དང་འདྲའོ། །དེ་ལྟར་དབྱངས་གསལ་ལས་ཡི་གེ་གསུམ་བཏུས་པས་དེ་ཉིད་བཤད་པ་ནི་ཡི་གེ་ཞེས་སོགས་ཏེ། དབྱངས་གསལ་གྱི་ཡི་གེ་གང་ཞིག་སྔར་བཤད་པ་དང་། ཡི་གེ་གང་ཞིག་ཞི་བ་ལ་སོགས་ལ་མངོན་པར་ཕྱོགས་
6-4-60b


པ་སྟེ་གཙོ་བོར་གྱུར་པ་ཡང་ལ་ཝ་དེ་རྣམས་ཐམས་ཅད་བུད་མེད་དང་སྐྱེས་པ་དང་མ་ནིང་གི་ངོ་བོར་ཤེས་པར་བྱའོ། །དེར་ཤེས་པར་བྱ་བར་མ་ཟད་སྐད་ཀྱི་ཁམས་ཏེ་བྱིངས་དང་སོགས་ཀྱིས་བསྡུས་པ་དང་བྱེད་ཚིག་དང་བྱེད་པ་པོ་ལ་སོགས་པ་ནས་བརྒྱད་ཁྲི་བཞི་སྟོང་གི་
བར་དུ། སྣ་ཚོགས་པའི་སྐད་ལ་སོགས་པའི་གཟུགས་སུ་རབ་ཏུ་བརྟགས་པ་ཡིན་ནོ། །ཡང་ན་ཁམས་གསུམ་དང་སོགས་པས་སྐུ་གསུམ་རྩ་གསུམ་ལ་སོགས་པའི་རང་བཞིན་དུ་བརྟགས་པ་ཡིན་ནོ། །དེ་གསུམ་གྱི་ལས་སྟོན་པ་ནི་འོག་དང་ཞེས་སོགས་ཏེ། ཨོཾ་
ནི་ནང་དུ་འཇུག་པས་འོག་ཏུ་འགྲོ་ལ། ཧཱུཾ་ནི་ཕྱིར་ལྡང་བས་སྟེང་དུ་འགྲོའོ། །བཅས་པ་ནི་མཉམ་པར་གནས་པ་སྟེ་ཨ་ཡིག་གོ། །འོ་ན་རང་བཞིན་གྱི་གནས་པའི་རླུང་ལ་འོག་དང་སྟེང་ལ་སོགས་པའི་དབྱེ་བ་ཅི་དགོས་ཤེ་ན། འཇུག་པ་སོགས་རང་བཞིན་གྱིས་གྲུབ་ཀྱང་
བྱས་པ་མི་ཤེས་པས། ཡན་ལག་མ་ཉམས་པ་ཉིད་དུ་ཤེས་ནས་བློ་ཡིས་ནི་རླུང་སྔགས་དབྱེར་མེད་པར་ངེས་པར་སྦྱར་ན་རྣལ་འབྱོར་པ་ལ་རང་བཞིན་གསལ་བར་བྱེད་དོ། །དེས་ན་མ་ཐོབ་པ་ཐོབ་པ་མིན་གྱི་མི་ཤེས་པ་ཤེས་པས་རྫོགས་རིམ་མོ་ཞེས་ལཀྵྨཱིས་
བཤད་དོ། །བརྗོད་པའི་སྔགས་ཏེ་སྔར་ལྟར་སྔགས་བཏུས་པ་འདི་ནི་དངོས་སྟེ་རང་བཞིན་མེད་པའི་ངོ་བོ་འོད་གསལ་ལས་བྱུང་བའོ། །འདིས་ནི་ཡི་གེ་གསུམ་གྱི་སྔགས་བཏུས་བ་དེ་སྔགས་བཏུ་གཞན་དང་མི་འདྲ་བར་སྟོན་ཏེ། འདི་ལྟར་སྔགས་བཏུ་གཞན་
ལྟར་ན་དབྱངས་གསལ་ལས་བཏུས་པའི་སྔགས་དེ་དག་གམ་ཡིད་ཀྱིས་ཟློ་བའི་སྔགས་ཡིན་ལ། །འདིར་ནི་འོད་གསལ་མི་ཤིགས་པའི་ཐིག་ལེ་ལས་འབྱུང་བའི་རླུང་གི་ལྡང་འཇུག་གནས་པ་གསུམ་གྱི་གདངས་ཡི་གེ་གསུམ་གྱི་གདངས་སུ་ཤར་བའི། །འོ་ན་
6-4-61a


དེ་ཙམ་ཞིག་བཤད་པས་ཆོག་མོད་ཡི་གེ་གསུམ་གྱི་སྔགས་བཏུ་བ་ཅི་ཞིག་དགོས་ཤེ་ན། བཟླས་བྱའི་སྔགས་ཐམས་ཅད་ཡི་གེ་གསུམ་དུ་འདུས་ཚུལ་བསྟན་པའི་སྒོ་ནས་འཐུ་བ་ཡིན་ལ། དེས་ནི་བཟླས་པས་སྔགས་ཇི་སྙེད་པ་ཞིག་
གསུངས་པ་ཐམས་ཅད་ཀྱིས་གང་བསྒྲུབ་པར་བྱ་བའི་དངོས་གྲུབ་ཐམས་ཅད་འགྲུབ་པར་སྟོན་པ་ཡིན་པས་སྔགས་བཏུབ་དགོས་སོ། །དེ་ལ་འགྱུར་ཁ་ཅིག་ལས། གང་གི་ཕྱིར་བུད་མེད་དང་སྐྱེས་པ་དང་མ་ནིང་གི་ངོ་བོ་ཉིད་ཀྱི་སྔགས་ཐམས་ཅད་མན་ངག་
ཇི་ལྟར་ཐོབ་པས་ཡི་གེ་གསུམ་ལ་རབ་ཏུ་འཇུག་གོ། །ཞེས་འབྱུང་བལྟར་ན། ཀཱ་ལི་རྣམས་སྐྱེས་པ་དང་། རྀ་རཱྀ་ལྀ་ལཱྀ་བཞི་མ་ནིང་དང་། དེ་དོར་བའི་དབྱངས་ལྷག་མ་བུད་མེད་དོ། །དེ་འདྲ་བའི་ངོ་བོར་གྱུར་བའི་སྤྲུལ་ལ་སོགས་པའི་སྔགས་ཐམས་ཅད་ཡི་
གེ་གསུམ་ལ་སྡུད་པའི་མན་ངག་ནི། སྔགས་རྣམས་གང་གིས་སྔགས་སུ་གྱུར་བའི་ལྷ་ནི་མཐའ་ཀྱང་བསྡུ་ན་རྡོ་རྗེ་གསུམ་དུ་འདུ་བས་དེ་དག་གིས་སྔགས་ཀྱང་རྡོ་རྗེ་གསུམ་གྱི་སྙིང་པོ་གསུམ་རུ་འདུ་སྟེ། རྩ་རྒྱུད་ལས། དེ་བཞིན་གཤེགས་པ་
ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྙིང་པོ་གསང་པ། སྔགས་ཐམས་ཅད་སྐུལ་བར་བྱེད་པ། །ཞེས་གསུངས་པ་བཞིན་ནོ། །ཡང་ན་སྔགས་རྣམས་ནི་ལྷ་སྤྱན་འདྲེན་པ་སྟེ་བོད་པ་དང་། བཞུགས་སུ་གསོལ་བ་སྟེ་བོས་ནས་བྱིན་གྱིས་རློབ་པ་
དང་། གཤེགས་སུ་གསོལ་བ་སྟེ་རང་རང་གི་ལས་ལ་བསྐུལ་བའི་སྔགས་གསུམ་དུ་འདུ་ཞིང་། དངོས་གྲུབ་སྟེར་བའི་ལྷའང་རིགས་ལྔ་རུ་འདུ་བས། འདིར་ཡང་རླུང་འོད་ཟེར་དབང་དུ་འདུས་ན་མཆོག་སྟེར་ཞིང་། དེའི་ཐབས་ཀྱང་ལྡང་འཇུག་
6-4-61b


གནས་གསུམ་གྱི་སྔགས་བགྲང་བ་ཉིད་ཡིན་པའི་ཕྱིར། སྔགས་ཐམས་ཅད་ཡི་གེ་གསུམ་དུ་འདུ་ཞིང་དེ་གསུམ་སྔགས་ཀུན་གྱི་བདག་པོར་བཤད་དོ། །གཉིས་པ་ནི། སྔར་སྔགས་བཏུ་བ་བཤད་ཟིན་ནས། སྔགས་ཀྱི་དོན་ནི་དེ་ལས་ཞེས་སོགས་ཀྱིས་
སྟོན་ཏེ། ཡི་གེ་གསུམ་པོ་དེ་ལས་སམ་དེ་ནི་ཡོངས་སུ་གྱུར་པས་ལྷའི་གཟུགས་སུ་ཉེ་བར་དམིགས་པ་གང་ཡིན་པ་དེ་ནི་སྔགས་ཀྱི་དོན་ཏོ། །ཡོངས་སུ་གྱུར་ལུགས་ནི། ཨོཾ་ཡིག་ཡོངས་སུ་གྱུར་པ་ལས་རྣམ་སྣང་བསྐྱེད་པ་སོགས་ལ་ལཀྵྨིས་འཆད་དོ། །དེ་ནི་བསྐྱེད་
རིམ་པའི་སྔགས་དོན་ཡིན་ཀྱང་འདིར་རྫོགས་རིམ་པའི་སྔགས་དོན་གཙོ་བོ་ཡིན་པས་དེ་ཙམ་གྱིས་མི་ཆོག་གོ། །དེས་ན་ཡི་གེ་གསུམ་གྱི་སྔགས་ནི་རླུང་ལྡང་འཇུག་གནས་གསུམ་ཡིན་ལ། དེ་ཡོངས་སུ་གྱུར་པ་ནི་ལྡང་འཇུག་དག་བྲལ་ནས་ཡེ་ཤེས་གསུམ་
དང་དབྱེར་མི་ཕྱེད་པར་གྱུར་བའི་རླུང་ངོ་། །དེ་ལས་ལྷའི་གཟུགས་སུ་དམིགས་པ་ནི་རླུང་སེམས་གཉིས་པོ་དེ་ལས་སྒྱུ་མའི་སྐུར་ལངས་ཏེ། བདག་བྱིན་བརླབས་ཀྱི་རིམ་པ་ལས། །རླུང་དང་ཡང་དག་ལྡན་པ་ཡི། །རྣམ་ཤེས་གསུམ་པོ་དེ་ཉིད་སླར། །རྣལ་འབྱོར་
པ་ཡི་ལུས་སུ་འབྱུང་། །སྒྱུ་མའི་ལུས་ཞེས་དེ་ལ་འཆད། །ཅེས་གསུངས་པ་ལྟར་རོ། །དེ་ལྟར་ན་སྔགས་ཀྱི་ཡི་གེ་རྣམས་ཀྱིས་ལྷའི་སྐུ་བསྐྱེད་པའི་སྒོ་བསམ་གྱིས་མི་ཁྱབ་པ་ཞིག་གསུངས་པའི་ཡི་གེ་ཐམས་ཅད་ཡི་གེ་གསུམ་དུ་འདུ་ཞིང་། དེ་གསུམ་
ཡང་རླུང་གསུམ་ཡིན་ལ་དེ་ཡོངས་སུ་རྒྱུར་པ་ལས་ལྷའི་སྐུ་བསྐྱེད་ལུགས་ནི་སྒྱུ་མའི་སྐུ་འགྲུབ་ཚུལ་འདི་ཉིད་དེ། དེ་ལྟར་བཤད་པ་རྣམས་ཀྱི་སྙིང་པོར་ཤེས་དགོས་སོ། །གསུམ་པ་ནི། སྔགས་ཀྱི་བརྡ་ནི་མིང་ཡིན་ལ་དེའང་ཇི་ལྟ་བུ་སྙམ་ན།
6-4-62a


དེ་ཉིད་གསུམ་གསུམ་གནས་པ་སྟེ་དེ་ཁོ་ན་ཉིད་གསུམ་གྱི་བརྡར་བྱས་པ་སྟེ་སྐུ་གསུང་ཐུགས་ཀྱི་དེ་ཉིད་དོ། རང་བཞིན་ནི་སྔགས་རྣམས་ཀྱི་རིགས་ཏེ། དེ་བཟླས་པ་ནི་ཡི་གེ་གསུམ་སྦྱར་བ་དང་མ་སྦྱར་བའི་མཚན་ཉིད་དེ་དེའང་བརྡ་ཡིན་
ནོ། །སྦྲུལ་ལ་སོགས་པའི་བརྡ་རྣམས་ནི་ཡི་གེ་གསུམ་ལ་རག་ལས་པས་སྔགས་ཀྱི་བརྡ་བསྟན་ཏོ། །ཞེས་ལཀྵྨཱིས་བཤད་དོ། །འདི་ལྟར་ཡིན་ཏེ་སྦྲུལ་ལ་སོགས་པའི་སྔགས་ཀྱི་བརྡ་རྣམས་ནི་བསྐྱེད་རིམ་པའི་བརྡ་ཡིན་ལ། འདིར་ནི་སྔགས་ཀྱི་
བརྡ་ཡིས་ཏེ་བརྡས་ནི་རླུང་གི་དེ་ཁོ་ན་ཉིད་ལྡང་འཇུག་གནས་གསུམ་དུ་གདོད་མ་ནས་གནས་པ་དེ་རང་བཞིན་གྱིས་བཟླས་པའི་མཚན་ཉིད་ཅན་དུ་ཤེས་པར་བྱའོ། །བཞི་པ་ནི། སྔར་བཤད་པ་ལྟར་ཨ་ཐུང་གི་ཡི་གེས་བཤད་པ་སྟེ་མཚོན་པའི་
ཡེ་ཤེས་ནི་སངས་རྒྱས་མི་བསྐྱོད་པའི་སྙིང་པོར་གྱུར་པ་སྔགས་ཀྱི་ཐིག་ལེ་ཡིན་ལ། དེ་ནི་སྔགས་ཀྱི་དེ་ཁོ་ན་ཉིད་ཡིན་ནོ། །མི་ཤིགས་པའི་ཐིག་ལེ་ལ་ཡེ་ཤེས་ཞེས་པ་ནི། རྒྱུད་རྡོར་ཕྲེང་ལས། སྙིང་གི་པདྨའི་སྦུབས་མཁའ་ལ། །ཡེ་ཤེས་རྡོ་རྗེ་
རྟག་ཏུ་བཞུགས། །ཞེས་དང་། སྲོག་གི་རླུང་ནི་མཆོག་ཡིན་ནོ། །སྟོང་ཉིད་ཡེ་ཤེས་མིང་ཅན་ཏེ། །ཞེས་དང་། སྙིང་གི་དབུས་གནས་བདེ་བའི་དངོས། །སངས་རྒྱས་ཉི་མ་གསལ་བའི་འོད། །ཅེས་ཀྱང་གསུངས་སོ། །སྤྱོད་བསྡུས་ལས། རང་བཞིན་བཟླས་
པའི་མཚན་ཉིད་དོ། །ཞེས་པའི་མཇུག་ཏུ། མིང་མེད་བརྗོད་དུ་མེད་པ་སྟེ། །བྱང་ཆུབ་སེམས་མཆོག་འདི་ཡིན་ནོ། །གསུམ་པོ་དེ་ཉིད་གཅིག་གྱུར་པ། །འགྲོ་བ་མེད་ཅིང་འོང་བ་མེད། །འགག་མེད་རབ་ཏུ་ཞི་བ་སྟེ། །རྟག་དང་ཆག་པ་རྣམ་སྤངས་པ། །དུས་
6-4-62b


གསུམ་མཁྱེན་པས་མ་བྱས་པའི། །རྟོག་པ་ནམ་མཁར་དབྱེར་མེད་མཚན། །འདི་ཉིད་ཁོ་ན་དོན་དམ་སྟེ། །སོ་སོར་རང་རིག་མཚན་ཉིད་དོ། །རྣལ་འབྱོར་རིག་པས་ཉལ་སོགས་དང་། །བྱ་བ་ཐམས་ཅད་ཉིད་དུ་ཡང་། །མིང་མེད་བརྗོད་དུ་མེད་པ་དང་། །དུས་གསུམ་
བཟླས་བ་རྟག་ཏུ་བཟླ། །གོས་དཀར་ལ་སོགས་བཟླས་བཤད་པ། །ཞེས་དྲངས་ནས་ཨ་ཡིག་ཅེས་པ་ནས་མ་ཉམས་བཟླས་པའི་བར་མ་དྲངས་སོ། །དེ་ལ་མིང་གིས་བརྗོད་པ་ཏེ་བཟླས་པར་བྱར་མེད་པའི་རྡོར་བཟླས་ཀྱི་རླུང་གི་འགྲོ་འོང་འདི་ནི་བྱང་ཆུབ་ཀྱི་
སེམས་ཀྱི་མཆོག་ཡིན་ནོ། །ཞེས་པས་སྔར་བྱང་ཆུབ་ཀྱི་སེམས་དྲིས་པའི་ལན་བསྟན་ནོ། །ལྡང་འཇུག་གནས་གསུམ་པོ་སྔར་བཤད་པ་དེ་ཉིད་མི་ཤིགས་པའི་ཐིག་ལེར་ཐིམ་ནས་གཅིག་ཏུ་གྱུར་པ་ན། འགྲོ་འོང་ལ་སོགས་པའི་སྤྲོས་པའི་མཐའ་དྲུག་
སྤངས་པའི་ནམ་མཁའ་སྟེ་སྟོང་པ་ཉིད་དུས་གསུམ་མཁྱེན་པའི་རྒྱལ་བ་རྣམས་ཀྱིས་ཀྱང་མ་བྱས་པ་དེ་དང་རྟོག་པ་སྟེ་བློ་གཉིས་དབྱེར་མེད་པར་རྗེས་སུ་ཞུགས་པ་འདི་ཁོ་ན་དོན་དམ་པ་སྔགས་ཀྱི་དེ་ཁོ་ན་ཉིད་དོ། །དེས་ན་རྡོ་རྗེ་བཟླས་པའི་རྣམ་འབྱོར་ཤེས་པས། 
འགྲོ་ཉལ་ལ་སོགས་པའི་སྤྱོད་ལམ་ཐམས་ཅད་དུ་ངག་གིས་བརྗོད་དུ་མེད་ཅིང་ལྡང་འཇུག་གནས་པའི་དུས་གསུམ་དང་ཡི་གེ་གསུམ་སོ་སོར་འཛིན་པ་ལས་འདས་པའི་རྡོ་རྗེའི་བཟླས་པ་རྟག་ཏུ་བཟླ་སྟེ། དེ་ནི་སྔགས་ཀྱི་དེ་ཁོ་ན་ཉིད་མངོན་དུ་འགྱུར་བའི་
ཐབས་ཡིན་པས་སོ། །སྔགས་ཀྱི་དེ་ཁོ་ན་ཉིད་གཞུང་འདི་དག་གིས་གསལ་བར་བསྟན་པ་དྲངས་པའོ། །གསུམ་པ་ལ་གཉིས། །རྒྱུད་ཀྱི་ཚིག་དོན་ཙམ་བཤད་པ་དང་། དེའི་མཐའ་བཅད་པའོ། །དང་པོ་ནི། ཧཱུཾ་ཡིག་གིས་སེམས་ཅན་ཏེ་འོད་ཟེར་ཕྱིར་ཡང་དག་པར་
6-4-63a


སྤྲོ་བར་བྱེད་དེ། དེས་སེམས་ཅན་རྣམས་སངས་རྒྱས་ཀྱི་གཟུགས་སུ་བྱས་པར་རབ་ཏུ་བརྟགས་པ་སྟེ་བསྒོམ་མོ། །ཨོཾ་ཡིག་གིས་ནི་སེམས་ཅན་སངས་རྒྱས་ཀྱི་གཟུགས་སུ་བྱས་པ་རྣམས་རང་ལ་ནང་དུ་ཡང་དག་པར་སྡུད་པ་དང་། ཡི་
གེ་ཨཱཿནི་གནས་སུ་གནས་པར་བྱེད་པ་ནི་བསྐྱེད་རིམ་པས་སྒོམ་ལ། །འདིར་ནི་ཨོཾ་གྱིས་རླུང་ནང་དུ་འཇུག་པ་ཉིད་དང་། ཨཱཿས་རླུང་ནང་དུ་གནས་པ་དང་། ཧཱུཾ་ཡིག་གིས་ཕྱིར་ལྡང་པའི་རིམ་པས་ཀྱང་སྔགས་ཏེ་རྡོར་བཟླས་ཀྱི་ཡན་ལག་མ་ཉམས་པར་བྱས་
པའི་ངང་ནས་བཟླ་བར་བྱའོ། །དེའང་ཤེས་རབ་ལྷ་མོ་བཞིའི་རླུང་དང་། ཐབས་མགོན་པོ་བཞིའི་རླུང་གི་གཞིར་གནས་པ་སྟེ་རླུང་དེ་གཉིས་གཞིར་བྱས་ལ་བྱའོ། ཡང་ན་ཡི་གེ་གསུམ་གྱིས་སྤྲོ་བསྡུ་དང་གནས་པར་བྱེད་པའི་སེམས་ཅན་ནི་རླུང་ལ་བྱ་
སྤྲོ་བསྡུ་དང་གནས་པར་བྱེད་ཚུལ་ནི་འཇུག་པ་སོགས་དང་སྦྱར་རོ། །ལཀྵྨཱིས་བསྐྱེད་རིམ་པ་ལ་སྤྲོ་བསྡུ་དང་གནས་པས་སངས་རྒྱས་ཀྱི་གཟུགས་རྫོགས་པར་བྱེད་ལ། རྫོགས་རིམ་པ་ལ་ནི་དེ་རྣམས་རང་བཞིན་གྱིས་གྲུབ་པས་སྔ་མ་དོན་མེད་པར་
སྟོན་པ་ནི་ཧཱུཾ་ཡིག་ཅེས་པ་བཞིའོ། །འཇུག་པ་ཞེས་སོགས་ཀྱིས་རྡོར་བཟླས་ཀྱི་བྱ་བའི་སྒོ་ནས་རང་བཞིན་སྟོན་ལ། ཤེས་རབ་ནི་ཨ་དང་ཐབས་ནི་ཧཱུཾ་དང་གཞི་ནི་ཨོཾ་ལ་འཆད་དོ། །གོས་དཀར་ཞེས་པ་གཉིས་ཀྱིས་ནི་ཤེས་རབ་ལྷ་མོ་རེ་རེའི་
རླུང་གི་གྲངས་ཉིས་བརྒྱ་ཉིས་ལྔ་ལྟ་བུ་སྟོན་ལ། བཞི་པོས་ཞེས་པ་གཉིས་ཀྱིས་ནི་དེ་བཞི་དྲིལ་བས་ཐབས་མགོན་པོ་རེའི་རླུང་གི་གྲངས་སྟོན་པའོ། །དགུ་བརྒྱ་དག་ཏུ་ཞེས་པ་ནས་ཉི་ཤུ་རྩ་བཞི་ཞེས་པས་ནི་ཞག་གཅིག་ལ་ཐུན་ཕྱེད་པ་ཉེར་བཞིར་
6-4-63b


སྟོན་ནོ། །རིམ་གྱིས་ནི་ཞེས་སོགས་ཀྱི་དོན་ནི་ཞག་གཅིག་གི་བཟླས་པའི་གྲངས་སྟོན་པའོ། །འདིའི་རྗེས་སུ། རྣལ་འབྱོར་བསྒོམ་པའི་བར་ཆད་ཅན། །ཞེས་སོགས་དགོངས་པ་ལུང་སྟོན་གྱི་ལུང་འོག་ཏུ་དྲངས་པ་དེ་རྣམས་འོད་རྒྱུར་སྣང་བ་ལ། བར་དུ་བཅད་ནས་
དྲངས་པ་ནི་རྒྱ་གར་གྱི་དཔེ་ཅུང་མ་དག་པ་ལས་བསྒྱུར་བར་མངོན་ནོ། །གཉིས་པ་ལ་གཉིས། རྡོར་བཟླས་བྱེད་པའི་རིམ་པ། རྡོར་བཟླས་བྱས་པས་གང་བསྒྲུབ་པའོ། །དང་པོ་ལ་གསུམ། རྡོར་བཟླས་བྱེད་པའི་གནས། རྡོར་བཟླས་བྱེད་པའི་སྤྱོད་ལམ། རྡོར་བཟླས་ཇི་ལྟར་
བྱ་བའི་ཚུལ་ལོ། །དང་པོ་ནི། རྡོ་རྗེ་ཕྲེང་བ་ལས། སྐྱེ་བོས་དབེན་པ་ལྷ་ཡི་གནས། །སྒྲ་ཡི་ཚེར་མ་རྣམས་དང་བྲལ། །སྐྱེ་བོའི་ཚོགས་ནི་མེད་པ་དང་། །གེགས་མེད་སྐལ་བཟང་ཉམས་དགའ་བ། །སྐྱེད་མོས་ཚལ་གཞི་བདེ་བ་ཆེ། །འདོད་པ་ལྔ་ལ་ལོངས་སྤྱོད་པས། །
སྔགས་ཀྱི་གཙོ་བོ་འགྲུབ་པར་འགྱུར། །ཞེས་གསུངས་སོ། །ལྷའི་གནས་ནི་ལྷའི་ཁང་པ་ལ་སོགས་པའོ། ཅ་ཅོའི་སྒྲ་དང་སྦྲུལ་དང་སྟག་ལ་སོགས་པའི་ཚེར་མ་དང་བྲལ་བ་དང་། གདུག་པ་ཅན་གྱི་འབྱུང་པོ་དང་གདོན་གྱི་བགེགས་མེད་པའོ། །གཉིས་པ་
ནི། དེ་ཉིད་ལས། འདིར་ནི་གཞན་ཡང་བཤད་ཀྱིས་ཉོན། །སྤྱོད་ལམ་བདེ་བ་ཆེན་པོའི་གནས། །གང་གིས་དངོས་གྲུབ་མཆོག་ཏུ་འགྱུར། །སྒྲུབ་པོ་བདེ་བའི་སྟན་འདུག་ནས། །མིག་གཉིས་སྣ་རྩེར་གཏད་བྱས་ནས། །ཕྲག་གོང་མཉམ་ལ་ལྕེ་རྐན་སྦྱར། །
སོ་དང་མཆུ་ནི་བདེ་བར་བཞག །དབུགས་ཀྱི་འབྱུང་རྡུབ་གློང་ནས་ནི། །ཅུང་ཟད་ཅུང་ཟད་རྩོལ་བྲལ་བས། །ཇི་ལྟ་བ་བཞིན་འབྱུང་རྡུ་བ་ནི། །སེམས་དཔའི་སྐྱིལ་ཀྲུང་ལེགས་གནས་པ། །ཞེས་གསུངས་སོ། །སྣ་ནི་ལྟེ་བའི་ཚད་དུ་གནས་ཞེས་འདོན་པ་ལྟར་ན་
6-4-64a


སྣའི་རྩེ་ནས་ལྟེ་བ་མཐོང་བའི་ཆེད་ཙམ་ལ་འཆད་དོ། །གསུམ་པ་ལ་གཉིས། དངོས་ཀྱི་དོན་དང་། དེ་ཡི་གེ་དང་སྦྱོར་ཚུལ་ལོ། །དང་པོ་ལ་གཉིས། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། རྡོ་རྗེ་ཕྲེང་བ་ལས། བགྲང་བྱ་དབུགས་ཀྱི་
དབྱེ་བ་ཡིས། །དེ་བཞིན་རླུང་ནི་དཔྱད་པར་བྱ། །གནས་ཀྱི་དབྱེ་བས་རྩ་རྣམས་ནི། །དུས་ཀྱི་དབྱེ་བའི་རྟོག་པ་དང་། །རླུང་རྣམས་ཀྱི་ནི་ལྡོག་པ་དང་། །རྟོག་པ་དང་བཅས་སྤངས་པ་སྟེ། །དེ་ལྟར་མདོར་བསྡུས་རྣམ་དྲུག་གིས། །འབྱུང་དང་འཇུག་པ་རྗེས་སུ་དྲན། །ཞེས་
རླུང་ལྡང་འཇུག་དྲན་པའི་རྣམ་པ་དྲུག་གིས་བྱ་བར་གསུངས་སོ། །དྲུག་ནི་རྐང་པ་དང་པོའི་མཐར་རླུང་ནི་དཔྱད་པར་བྱ་ཞེས་སྦྱར་ཏེ་ལྷག་ཆད་དང་འདྲེས་པའི་སྐྱོན་སྤངས་ནས། བགྲངས་བྱའི་དབུགས་ཀྱིས་གྲངས་ཉི་ཁྲི་ཆིག་སྟོང་དྲུག་བརྒྱར་བྱས་བའི་དབྱེ་བ་ཡིས་
རླུང་ལ་དཔྱོད་པར་བྱེད་པ་ནི་དང་པོ་བགྲང་བའོ། །བགྲང་ལུགས་སྐྱོན་གསུམ་དང་བྲལ་བ་དེ་བཞིན་དུ་ཐུན་སོ་སོ་ལ་རླུང་རྣམ་པར་དཔྱོད་པ་ནི་གཉིས་པ་རྗེས་སུ་འགྲོ་བའོ། །རླུང་སྐྱེ་བའི་གནས་རྩའི་དབྱེ་བས་རྩའི་འཁོར་ལོ་རྣམས་ནི་རྟོག་པ་དང་ཞེས་སྤྲལ་
ཏེ་གསུམ་པ་གནས་ལ་རྟོག་པའོ། །རྩ་ལ་བརྟེན་ནས་རླུང་བརྒྱ་རྩ་བརྒྱད་རྒྱུ་བའི་མཚན་ཉིད་དུས་སོ་སོའི་དབྱེ་བས་རྟོག་པར་བྱེད་པ་ནི་བཞི་པ་མཚན་ཉིད་ལ་རྟོག་པའོ། །ལས་དང་པོ་པའི་རྣལ་འབྱོར་གྱི་ངོ་བོས་རྣམ་རྟོག་བསྐྱེད་པའི་རླུང་ལྡོག་པར་རྩོམ་པ་
རིམ་གྱིས་ལྡོག་པ་ནི་ལྔ་པ་ལྡོག་པའོ། །རྟོག་བཅས་ཀྱི་རླུང་ལྡོག་ནས་གནས་པ་ནི་དྲུག་པ་ཡོངས་དག་གོ། །གཉིས་པ་ལ་དྲུག་ལས་དང་པོ་བགྲང་བ་ནི། དེ་ཉིད་ལས། ཐོག་མར་འབྱུང་དང་རྔུབ་པ་རྣམས། །ཉི་ཁྲི་དང་ནི་ཆིག་སྟོང་དང་། །དེ་བཞིན་གྲངས་ནི་བརྒྱ་
6-4-64b


ཕྲག་དྲུག །ཉིན་དང་མཚན་མོ་ངེས་པ་ནི། །ཇི་སྲིད་གྲངས་ནི་ཐོབ་པའི་གནས། །ཉིན་ཞག་ཉི་ཤུ་རྩ་བདུན་དུ། །གྲངས་ནི་རྗེས་སུ་སྦྱོར་བ་ཡིས། །གྲངས་ནི་རབ་ཏུ་བསྟན་པ་ཡིན། །ཞེས་གསུངས་སོ། འདིར་འགྲེལ་པས་མོས་པ་ལས་བྱུང་བའི་སྒྱུ་མའི་ལུས་སུ་
དམིགས་ནས་རྡོར་བཟླས་བྱེད་པ། སྒྱུ་མ་ལྟ་བུའི་ཏིང་ངེ་འཛིན་གྱིས། །ཞེས་འོག་ནས་གསུང་བའི་དོན་དུ་བཞེས་ཀྱང་། ལུས་དབེན་གྱི་གསང་ཆེན་རིགས་གཅིག་གི་ཏིང་ངེ་འཛིན་ལ་བརྟེན་ནས་བྱེད་པ་ལེགས་སོ། །དེ་ལྟར་ཉིན་མོ་ཁྲི་དང་བརྒྱད་བརྒྱ་དང་མཚན་མོ་
ཡང་དེ་བཞིན་དུ་ལུང་འབྱུང་འཇུག་གི་གྲངས་རབ་ཏུ་བརྟགས་པས་ཇི་སྲིད་གྲངས་དེ་ལ་ངེས་པ་ཐོབ་པའི་བར་དེ་སྲིད་དུ་བཟླ་སྟེ། དེའང་ཞག་ཉེར་བདུན་ནོ། །འདི་ནི་གཉིད་དང་བཟའ་བཏུང་བཅག་ནས་ཉིན་མཚན་བར་མ་ཆད་དུ་རྟོག་དགོས་ན་སྒྲུབ་མི་ནུས་ཤིང་། དེ་ལྟར་
མ་བྱས་ན་ཉི་ཁྲི་ཆིག་སྟོང་དྲུག་བརྒྱའི་གྲངས་ཐམས་ཅད་བརྟག་མི་ནུས་སོ། །དེའི་ཕྱིར་སྐབས་དེ་རྣམས་མ་གཏོགས་པའི་ཉིན་དང་མཚན་གྱི་ཆ་སོ་སོར་ཕྱེ་ནས་གྲངས་བརྟགས་པས་རགས་རྩིས་ལ་ངེས་པ་རྙེད་དུ་སྦྱོང་བའོ། །གཉིས་པ་རྗེས་སུ་འགྲོ་བ་
ནི། དེ་ཉིད་ལས། ཐུན་མཚམས་ཀྱི་ནི་རབ་དབྱེ་བས། །དེ་ནས་རྗེས་འགྲོའི་བཟླས་པ་ནི། །ཐུན་ཚོང་སོ་སོར་སྲོག་རྣམས་དང་། །སྲོག་དང་རྩོལ་བ་བརྟག་པ་སྟེ། །ཉིས་སྟོང་བདུན་བརྒྱའི་གྲངས་ཀྱིས་ནི། །ཡང་དག་པར་ནི་ངེས་གཟུང་བྱེད། །ཡོངས་སུ་དཔྱོད་པའི་
རྣམ་པ་ཡིས། །ཉིན་ཞག་ཉི་ཤུ་རྩ་བདུན་ལ། །འཁོར་ལོ་བཞི་ཡི་དབྱེ་བ་ཡིས། །ཉིན་དང་མཚན་དུ་ངེས་པར་ནི། །ཞེས་དེ་ལྟར་ཉིན་མཚན་གཉིས་སུ་ཕྱེ་བའི་རགས་པའི་གྲངས་ངེས་རྙེད་ནས། ཐུན་ཚོད་རེ་རེ་ལ་རླུང་ཉིས་སྟོང་བདུན་བརྒྱ་རེ་རྒྱུ་བའི་གྲངས་
6-4-65a


ཕྱིན་ཅི་མ་ལོག་པར་ངེས་པར་འཛིན་པར་བྱེད་དེ། ཞག་ཉེར་བདུན་གྱི་བར་དུ་མེ་ལ་སོགས་པའི་དཀྱིལ་འཁོར་བཞིའི་དབྱེ་བས་ཉིན་མཚན་གཉིས་ཀྱི་ཐུན་ཚོད་སོ་སོའི་རླུང་ཡོངས་སུ་དཔྱོད་པའི་རྣམ་པ་ཡིས་བགྲང་བར་བྱའོ། །འགྲེལ་
པའི་འགྱུར་ལས། ཐུན་ཚོད་རེ་རེར་སྲོག་དང་ནི། །རྩོལ་བ་ལ་ནི་བརྟག་པ་སྟེ། །ཞེས་འབྱུང་ངོ་། །འགྲེལ་པས་ཐུན་ཆོད་རེ་རེའི་ཚད་འཇིག་རྟེན་པ་ལ་གྲགས་པ་ལྟར་ཉིན་མཚན་གྱི་དབྱེ་བས་བརྒྱད་དམ། ཕལ་ཆེར་ཆུ་ཚོད་བརྒྱད་བརྒྱད་ལ་བྱས་ནས། རླུང་དགུ་
བརྒྱ་པ་གཅིག་ལ་འཇུག་ལྡང་གནས་གསུམ་གྱིས་བརྒྱུར་བས་བརྒྱ་ཕྲག་ཉེར་བདུན་དུ་བྱེད་པ་ཉིད་སྟོང་བདུན་བརྒྱའི་དོན་དུ་བཤད་དོ། །འདི་ནི་མི་འཐད་དེ། ཆུ་ཚོད་བརྒྱད་ཚན་རེའི་ཡུན་རླུང་དགུ་བརྒྱ་རེས་མི་རྫོགས་པར་ལྔར་བཤད་པའི་ཕྱིར་དང་། རླུང་
དགུ་རེའི་དུས་ཚད་ནི་དགོངས་པ་ལུང་སྟོན་ལས་ཐུན་ཕྱེད་རེར་གསུངས་པས། ཐུན་ཚོད་ཀྱི་ཚད་མིན་པའི་ཕྱིར་དང་། རླུང་དགུ་བརྒྱ་པོ་རེ་རེ་ལ་འབྱུང་འཇུག་གཉིས་གཉིས་ལས་མེད་པས་འཇུག་ལྡང་གནས་པ་གསུམ་གསུམ་གྱིས་བསྒྱུར་བ་མི་འཐད་
པའི་ཕྱིར་དང་། འདིར་རླུང་གི་གྲངས་རྣམས་ནི་འབྱུང་འཇུག་གཉིས་གཉིས་ལ་རེ་རེ་བརྩི་བའི་སྐབས་སུ་སྣང་བའི་ཕྱིར་ཏེ། ཉི་ཁྲི་ཆིག་སྟོང་དྲུག་བརྒྱ་བཞིན་ནོ། །དེས་ན་ཐུན་ཚོད་ནི་སྐབས་འདིར་ཉིན་ཞག་གཅིག་གི་བརྒྱད་ཆ་ཡིན་ལ། དེའི་ཡུན་ལ་
རླུང་ཉིས་སྟོང་བདུན་བརྒྱ་རེ་རྒྱུ་བ་གྲངས་བགྲང་བའོ། །གསུམ་པ་གནས་ཀྱི་དབྱེ་བ་ནི། དེ་ཉིད་ལས། དེ་ནས་གནས་པ་འབད་པ་ཡིས། །ཐ་དད་དུ་ནི་རབ་ཏུ་བརྟག །རྩ་ཡི་འཁོར་ལོ་རྒྱུ་བ་ཡིས། །འབྱུང་དང་རྔུབ་པ་ངེས་པར་ནི། །ངེས་པར་བཟུང་བའི་
6-4-65b


སྦྱོར་པ་ལས། །རྩ་ཡི་འཁོར་ལོ་དཔྱད་པར་བྱ། །དེ་ནི་འཁོར་ལོ་རྩ་དབྱེ་བས། །ཉིན་ཞག་ཉི་ཤུ་རྩ་བདུན་ལ། །ཞེས་སོ། །འགྲེལ་པས་འདི་སྔར་བཤད་པ་བཞིན་དུ་རྩ་འཁོར་དྲུག་པོ་རེ་རེ་ལ་རླུང་དགུ་དགུ་རྒྱུ་བ་ངེས་པར་བྱེད་པ་ལ་བཤད་ནས་བཞི་པ་རླུང་བརྒྱ་
རྩ་བརྒྱད་ཀྱིས་བསྐྱེད་པའི་རྣམ་རྟོག་གི་རྒྱུ་བ་ངེས་པར་བྱེད་པ་ལ་བཤད་དོ། །ཐུན་ཚོད་རེ་རེ་ལ་རླུང་ཇི་ཙམ་རྒྱུ་བ་ངེས་པའི་རྗེས་དེ་ནས། རླུང་སྐྱེ་བའི་གནས་རྩའི་འཁོར་ལོ་ལ་རླུང་རྒྱུ་བའི་ཚུལ་འབྱུང་རྔུབ་བགྲངས་ནས་ངེས་པར་བྱེད་དེ། དེའང་རྩ་འདབ་འདི་
ལས་རླུང་འདི་རྒྱུའོ་ཞེས་ངེས་པར་བཟུང་བ་ལས། སྔར་བཤད་པ་ལྟར་ལྟེ་བའི་རྩ་འདབ་བཞི་ལ་རླུང་རྒྱུ་བ་ནི་སྤྱི་བོའི་གཉིས་ལ་རྒྱུ་བ་སོགས་ངེས་པར་བྱེད་པ་ཡིན་པར་མཐོང་ངོ་། །སྔ་མ་གཉིས་ཕྱིའི་དུས་ཚོད་ལ་རླུང་གི་གྲངས་ངེས་པར་བྱེད་པས་
རགས་པའི་ཕྱིར། རླུང་དང་རྩའི་ཁ་དོག་གསལ་བར་མ་མཐོང་ཡང་ངེས་ནུས་ལ། འདི་ནི་རླུང་དང་རྩའི་ཁ་དོག་མཐོང་ནས་རྩ་སོ་སོའི་རྒྱུ་བ་སོ་སོར་ངེས་པར་བྱེད་པའོ། །འདི་ལའང་ཞག་ཉེར་བདུན་རེ་ལ་ཞེས་པ་དང་ཡོངས་སུ་དཔྱོད་ཅེས་པ་གཉིས་སྤྲེལ་ལོ། །
འདི་ལ་གནས་ཀྱི་དབྱེ་བས་རྟོག་པ་ཞེས་ཐ་སྙད་བྱས་ན་ལེགས་སོ། །བཞི་པ་མཚན་ཉིད་ལ་རྟོག་པའམ་དུས་ཀྱི་དབྱེ་བའི་རྟོག་པ་ནི། དེ་ཉིད་ལས། དེ་ནས་མཚན་ཉིད་ཡང་དག་ནི། །གནས་ཀྱི་དབྱེ་བས་བརྟག་པར་བྱ། །གནས་ནི་སོ་སོར་རྣམ་བརྟགས་རྣམས། །
བརྒྱ་དང་བརྒྱད་ནི་ལྷག་པར་རྒྱུ། །རྣམ་རྟོག་མེད་པ་སྦྱོར་བ་མཆོག །རྟོག་པ་སྤངས་པའི་བདག་ཉིད་ཅན། །དངོས་པོ་ཀུན་གྱི་རང་བཞིན་བདག །བརྒྱ་དང་བརྒྱད་ནི་ལྷག་པར་རྒྱུ། །འདི་ནི་ཡང་དག་རྣལ་འབྱོར་མཆོག །ཉིན་ཞག་ཉི་ཤུ་རྩ་བདུན་གྱིས། །མཚན་
6-4-66a


ཉིད་སྒོམ་པའི་རྣལ་འབྱོར་པ། །ཇི་ལྟར་གནས་པ་རབ་བསྒོམས་པས། །ཞེས་སོ། །རླུང་གི་གནས་རྩའི་འཁོར་ལོ་དྲུག་ནི་སོ་སོར་བརྟགས་ནས་དེ་རེ་རེ་ལ་སྔར་བཤད་པ་ལྟར་དགུ་དགུ་རྒྱུ་བའི་སྒོ་ནས་ཞག་གཅིག་ལ་བརྒྱད་ཀྱིས་ལྷག་པའི་བརྒྱ་
རྒྱུ་བ་ངེས་པར་བྱ་སྟེ། འདིའང་རྩ་དང་རླུང་ཁ་དོག་རྒྱུ་བ་གསལ་བར་མཐོང་ནས་མིན་ནོ། །རྣམ་རྟོག་མེད་པར་བྱེད་པའི་རླུང་གི་སྦྱོར་བ་སྟེ་རྣལ་འབྱོར་དེ་དག་གི་མཆོག་སྟེ་དངོས་པོ་ཀུན་གྱི་རང་བཞིན་འོད་གསལ་རྣམ་རྟོག་སྤངས་པའི་བདག་ཉིད་ཅན་དུ་འཇུག་
པའི་ཐབས་སོ། །བརྒྱད་ཀྱིས་ལྷག་པའི་རླུང་བརྒྱ་རྒྱུ་ངེས་པར་བྱེད་པའི་ཡང་དག་པའི་རྣལ་འབྱོར་འདི་ནི་མཆོག་གོ། །བསྒོམས་པས་རླུང་ངེས་པར་བྱེད་ཅེས་སྦྱར་རོ། །འགྲེལ་པས། རྣམ་རྟོག་བརྒྱ་རྩ་བརྒྱད་ངེས་པ་ལ་སྦྱོར་བ་ལྟར་ན་རྣམ་རྟོག་
མེད་པ་ནི་དོན་དམ་པར་ཉོན་མོངས་ཀྱིས་སྟོང་པའོ། །མཆོག་ནི་ནམ་མཁའ་དང་མཉམ་པའོ། །སྦྱོར་བ་ནི་དོན་དམ་པར་ཉེ་བར་ཞི་བའོ། །དེའི་ཕྱིར་རྣམ་རྟོག་སྤངས་པའོ། །དངོས་པོ་ཀུན་གྱི་རང་བཞིན་ཤེས་པ་ཉིད་དེ་དང་དེར་སྣང་བ་དང་། བརྒྱ་དང་
བརྒྱད་ནི་རྟོག་པ་རྣམས་ཡུལ་ལ་རྒྱབ་ཀྱིས་ཕྱོགས་པ་ལ་བཤད་དོ། །ལྔ་པ་རླུང་ལྡོག་པ་ནི། དེ་ཉིད་ལས། རྟོག་དང་བཅས་པའི་རྣམ་འབྱོར་པས། །དེ་ལས་རྣལ་འབྱོར་ལོག་ནས་ནི། །མི་རྟོག་པ་ཡི་རླུང་ཆེན་པོ། །རྩ་ཡི་འཁོར་ལོར་རྣམ་པར་
རྒྱུ། །དེ་ནས་ཉོན་མོངས་ཀུན་སྦྱོར་ལས། །ངེས་པ་ལས་ནི་དོན་དམ་པ། །ཉིན་ཞག་ཉི་ཤུ་རྩ་བདུན་ལ། །ལས་དང་པོ་ཡི་སྦྱོར་བ་ཡིས། །ལོག་པར་བློ་དང་ལྡན་པས་བསྒོམ། །ཞེས་སོ། །རྣལ་འབྱོར་བ་རྟོག་པ་བརྒྱ་རྩ་བརྒྱད་དང་བཅས་པ་
6-4-66b


དེ་ལས་ལོག་ནས་རྣམ་པར་མི་རྟོག་པའི་རླུང་ཆེན་པོ་རྩའི་འཁོར་ལོ་རྒྱུ་བ་དེ་ནས། ཉོན་མོངས་ཏེ་རྣམ་རྟོག་ཡུལ་དང་ཀུན་ཏུ་སྦྱོར་བ་ལས་ཟློག་པའི་དོན་དམ་པ་ངེས་པ་ལས་ནི་རྣམ་རྟོག་བསྐྱེད་པའི་རླུང་ལྡོག་པར་འགྱུར་རོ། །དེའི་ཕྱིར་རྡོར་བཟླས་མཐར་
ཕྱིན་པ་ལ་མོས་པའི་ལས་དང་པོ་པའི་སྦྱོར་བ་སྟེ་རྣལ་འབྱོར་གྱིས་ཞག་ཉེར་བདུན་ལ་རྣམ་རྟོག་བསྐྱེད་པའི་རླུང་ལོག་པར་བློ་དང་ལྡན་པས་བསྒོམ་པར་བྱའོ། །འདི་ནི་རླུང་ངམ་རྣམ་རྟོག་བརྒྱ་རྩ་བརྒྱད་ངེས་པའི་རྗེས་དེ་ནས་སྔར་བཞིན་རྡོ་རྗེའི་བཟླས་
པ་ཞག་ཉེར་བདུན་དུ་བྱས་པས། །རྣམ་རྟོག་བསྐྱེད་པའི་སྲོག་ཐུར་གྱི་རླུང་རྣམས་རིམ་གྱིས་དབུ་མར་འཇུག་པའོ། །དྲུག་པ་ཡོངས་དག་ནི། དེ་ཉིད་ལས། དེ་ནས་རྣམ་དག་དེ་དག་ཀྱང་། །ཡང་དག་རྣལ་འབྱོར་སྟོབས་ཀྱིས་ནི། །སྲོག་དང་རྩོལ་བའི་རྣམ་འབྱོར་
རྣམས། །ཀུན་ནས་རབ་ཏུ་སྤངས་ནས་ནི། །རླུང་གི་དེ་ཉིད་ཁོ་ནའི་རྒྱུ། །རྣལ་འབྱོར་མཆོག་ནི་བསྒོམ་པར་བྱ། །གཉིས་མེད་མཆོག་གི་རྣལ་འབྱོར་གྱིས། །ཉིན་ཞག་ཉི་ཤུ་རྩ་བདུན་ལ། །རླུང་གི་དེ་ཁོ་ན་ཉིད་རྟེན། །གཡེང་བའི་སེམས་ནི་དག་བར་འགྱུར། 
ཞེས་སོ། །རླུང་ལྡོག་པའི་རྗེས་དེ་ནས་རྣམ་དག་བསྒོམ་པར་བྱའོ། །ཇི་ལྟར་ཞེ་ན། སྲོག་དང་རྩོལ་བ་སྟེ་རླུང་འབྱུང་འཇུག་བགྲང་བའི་རྣལ་འབྱོར་རྣམས་རབ་ཏུ་སྤངས་ནས་ཡང་དག་པའི་རྣལ་འབྱོར་གྱི་སྟོབས་ཀྱིས་རྣལ་འབྱོར་དྲུག་གི་ནང་ནས་
མཆོག་ཏུ་གྱུར་པ་ཡོངས་དག་གི་རྣལ་འབྱོར་བསྒོམ་པར་བྱའོ། །དེ་ནི་རླུང་གི་དེ་ཁོ་ན་ཉིད་མཐར་ཐུག་པ་འོད་གསལ་གྱི་རླུང་ལ་རླུང་གཞན་དང་རྣམ་རྟོག་རྣམས་སྡུད་པའི་རྒྱུ་སྟེ་གཉིས་སུ་མེད་པའི་རྣལ་འབྱོར་མཆོག་ཡོངས་དག་གི་རྣལ་འབྱོར་
6-4-67a


གྱིས་ཞག་ཉེར་བདུན་གྱི་བར་ལ་བསྒོམ་མོ། །དེས་ནི་ཕྱི་རོལ་ཏུ་གཡེང་བའི་རླུང་དང་ཀུན་རྟོག་རྣམས་དག་པར་འགྱུར་རོ། །འདི་ནི་སྔ་མ་ལྔས་རླུང་ཐམས་ཅད་དབུ་མར་ཚུད་པའི་རྗེས་སུ་འབྱུང་འཇུག་མི་བགྲང་བར་སྙིང་གའི་མི་ཤིགས་
པའི་ཐིག་ལེ་ཨ་ཡིག་ལ། རླུང་རྣམས་བསྡུས་ནས་དེར་སེམས་གཏད་དེ་བསྒོམས་པས་རླུང་ཀུན་རྟོག་རྣམས་ཞི་བར་བྱེད་པས། ཡོངས་དག་ཅེས་བྱའོ། །མདོར་ན་རྡོར་བཟླས་འདི་ལ་ཐོག་མར་རླུང་དབུ་མར་འཇུག་པ་ཞིག་དང་། ཚུད་པའི་རྗེས་སུ་སྙིང་
གའི་མི་ཤིགས་པ་ལ་དེ་རྣམས་སྡུད་པ་ཞིག་དང་གཉིས་ཤེས་དགོས་ཏེ། བཙུད་པའི་དགོངས་པ་ནི་དེ་ཡིན་པའི་ཕྱིར་རོ། །འགྲེལ་པས་དེ་དག་ཅེས་པ་རླུང་དེ་རྣམས་ཞེས་དང་། རྣལ་འབྱོར་གྱི་སྟོབས་དང་དངོས་པོ་མེད་པ་བསྒོམ་པའམ་ཡི་གེ་གསུམ་
བསྒོམ་པ་དང་། སྲོག་དང་རྩོལ་བའི་རྣམ་རྟོག་རྣམས་ཞེས་བཏོན་ནས་ཟག་བཅས་ལ་ཕྱོགས་བ་ལས་ལོག་ནས་ཟག་མེད་ཀྱི་དགེ་བ་བསྒོམས་པས་སླར་མི་སྐྱེ་བར་བཀག་པ་ནི་ཀུན་ནས་སྤངས་པའི་དོན་དུ་འཆད་མོད་ཀྱང་། རྡོར་བཟླས་བསྒོམ་
པའི་ཚུལ་བཤད་རྒྱུད་ཀྱིས་རྒྱས་པར་བཀྲལ་བ་ལ་དྲུག་ལས་མ་བྱུང་ལ། འདི་དྲུག་གི་ནང་དུ་རླུང་དབུ་མར་བཙུད་པའི་རྗེས་སུ་མི་ཤིགས་པ་ལ་སྡུད་པའི་རྣལ་འབྱོར་གཅིག་མེད་ན་གཞན་ནས་ཀྱང་མི་རྙེད་ལ། རྣལ་རྟོག་གི་རླུང་ལོག་ནས་
མི་རྟོག་པའི་རྩའི་འཁོར་ལོར་རྒྱུ་བའི་རྗེས་ལ་འདི་ལྟར་བསྒོམ་དགོས་ཞེས་པའི་སྒོམ་ཚུལ་ཡང་འཆད་པར་འགྱུར་བས་མི་འཐད་དོ། །སྒྲོན་གསལ་ལས། སྲོག་རྩོལ་གྱི་སྐབས་སུ་སྙིང་གར་ཨ་ཐུང་བསམས་ནས་སྲོག་ནི་ཐིག་ལེར་
6-4-67b


གྱུར་པར་བཞག་ཅེས་པའི་དོན་མི་ཤིགས་པའི་ཐིག་ལེར་སྲོག་སྟེ་རླུང་རྣམས་སྡུད་པར་བཤད་པའི་དོན་ཡང་འདི་ཡིན་ནོ། །དེས་ན་འགྱུར་ཡང་སྲོག་དང་རྩོལ་བའི་རྣལ་འབྱོར་རྣམས། ཀུན་ནས་རབ་ཏུ་སྤངས་ནས། །ཞེས་བསྒྱུར་བ་ཉིད་ལེགས་སོ། །རྡོ་རྗེ་
ཕྲེང་བའི་སྐབས་མང་པོར་སྔགས་ཀྱི་དེ་ཉིད་དམ་རྡོ་རྗེ་བཟླས་པ་ཟླ་བ་དྲུག་བྱ་བར་གསུངས་པའི་ཟླ་བ་རེ་རེ་ལ་ཇི་ལྟར་བྱ་བའི་ཚུལ་དང་རླུང་གི་ཉམས་མྱོང་ཇི་ལྟར་སྐྱེ་བའི་རིམ་པ་ནི་སྔར་བཤད་པ་དེ་བཞིན་དུ་རིག་པར་བྱ་ཡི། བཤད་པའི་རྒྱུད་ཀྱིས་ལེགས་པར་
གཏན་ལ་ཕབ་པ་འདི་འདྲ་བའི་རྣམ་གཞག་མ་ངེས་པར་རྡོར་བཟླས་ཀྱི་སྒོམ་ཚུལ་མ་བཤད་པ་གཞན་ལ་མན་ངག་ཏུ་བྱེད་པས་ནི། བློ་གྲོས་ཆེན་པོ་བཤད་པའི་རྒྱུད་ལ་དྲིས་པ་རྣམས་མགུ་བར་མི་ནུས་ཏེ། བཤད་པའི་རྒྱུད་ཀྱི་རྗེས་འབྲངས་ནས། །བླ་མའི་ཞལ་
ལས་རྟོགས་པར་བྱ། །ཞེས་གསུངས་བའི་དོན་མ་རྙེད་པའི་ཕྱིར་རོ། །གཉིས་པ་ནི། རྡོ་རྗེ་བཟླས་པའི་རིམ་པ་ལས། རྩ་རྒྱུད་ཀྱིས་སྔགས་ཐམས་ཅད་བསྡུས་པ་ཡི་གེ་གསུམ་དུ་གསུངས་པ་དེ་སྔགས་ཀྱི་དེ་ཁོ་ན་ཉིད་ཡིན་པ་དང་། དེའང་དགོངས་པ་ལུང་སྟོན་གྱིས་
བཤད་པར་གསུངས་ལ། དགོངས་པ་ལུང་སྟོན་གྱིས་རླུང་ལྡང་འཇུག་གནས་གསུམ་ཡི་གེ་གསུམ་གྱི་ངོ་བོར་ཟློ་བར་གསུངས་སོ། །རྡོ་རྗེ་ཕྲེང་བ་ལས་དངོས་ཟིན་ལ་རླུང་ལ་ལྡང་འཇུག་གཉིས་གཏོགས་པ་གནས་པ་ཟུར་དུ་མ་བཤད་ཅིང་། དེ་གཉིས་ཀྱང་
ལེའུ་དྲུག་པ་ལས། ཧཱུཾ་ཧོ༔ གཉིས་དང་སྦྱར་ནས་ཟློ་བ་དང་། དེ་ལ་སྔགས་ཀྱི་དེ་ཉིད་དུ་གསུངས་སོ། །ལེའུ་བཅོ་ལྔ་བ་ལས་ནི། སྔར་བཤད་པ་ལྟར་ཡི་གེ་གསུམ་གྱི་སྔགས་བཏུས་ཤིང་། དེའང་ཡི་གེ་གསུམ་ཙམ་འདོན་པའི་ཆེད་མིན་གྱི་རླུང་གི་དེ་ཉིད་ལ་
6-4-68a


མཁས་པར་བྱ་བ་དང་། དེའང་ཟླ་བ་དྲུག་ཏུ་བཟླས་པས་འགྲུབ་པར་གསུངས་ཏེ། སྔགས་ཀྱི་དེ་ཁོ་ན་ཉིད་གསུངས་པའི་ལེའུ་དེ་ཉིད་ལས། སྐུ་གསུང་ཐུགས་ཀྱི་རྡོ་རྗེ་རྣམས། །སྔགས་ནི་གསུམ་གྱིས་བཟླས་བརྗོད་བྱ། །དེ་ཡིས་མྱུར་དུ་དངོས་
གྲུབ་འགྱུར། །རླུང་གི་དེ་ཉིད་ཕ་རོལ་ཕྱིན། །ཞེས་དང་། དེ་ཉིད་ཀུན་གྱི་དོན་བསྡུས་པ། །སྙིང་གའི་པདྨ་མཆོག་ཏུ་གསལ། །ཟླ་དྲུག་བཟླས་པས་འགྲུབ་པར་ནི། །འགྱུར་ཏེ་གཞན་དུ་མ་ཡིན་ནོ། །ཞེས་གསུངས་སོ། །དེ་ན་ལྡང་འཇུག་གནས་པ་གསུམ་རེ་རེ་
དང་ཡི་གེ་གསུམ་རེ་རེ་ནས་སྦྱོར་བ་མི་གསལ་ཡང་། དགོངས་པ་ནི་དེ་ལྟར་ཡིན་ཏེ། འཕགས་པ་ལྷས། དཀྱིལ་འཁོར་བཞི་པོ་འདི་དག་ནི། །མཉམ་པར་བཞག་པས་རྟག་ཏུ་ཟློས། །ཞེས་རྡོར་ཕྲེང་ལས་གསུངས་པའི་དོན་བཀྲལ་བ་ན། རླུང་ལྡང་
འཇུག་གནས་གསུམ་ཡི་གེ་གསུམ་དང་སྦྱར་ན་ཟློ་བའི་དོན་དུ་བཤད་པའི་ཕྱིར་རོ། །ལཀྵྨཱི་དང་ཨ་ལམ་ཀ་ཀ་ལ་ཤས་གསང་བའི་པདྨར་འགྲོ་འོང་སྟོན། །ཞེས་པའི་སྐབས་སུ་འགྲོ་བ་དང་མི་འགྲོ་བ་དང་འོང་བ་ཞེས་བྱ་རྒྱུ་ལ་འགྲོ་འོང་ཞེས་པར་
གྱི་ཚིག་མི་མངོན་པར་བྱས་པའོ་ཞེས་འཆད་དོ། །གཞན་ཡང་རྡོར་ཕྲེང་ལས། རྡོར་བཟླས་ཀྱི་སྐབས་སུ་ཡི་གེ་ཧ་ཟློ་བ་དང་། ཧཱུཾ་ཡིག་ཟློ་བར་གསུངས་པའི་སྔ་མ་ནི་རླུང་ཉིད་ལ་བྱེད་པར་སྔར་བཤད་ཟིན་ལ། ཕྱི་མ་ཡང་སྔགས་ཀྱི་དེ་ཉིད་ཀྱི་ཕྱོགས་
གཅིག་གི་མཚོན་བྱེད་ཡིན་པར་བཤད་ཟིན་ཏོ། །འོ་ན་རྣལ་འབྱོར་པས་ཞག་གཅིག་ལ་ཉི་ཁྲི་ཆིག་སྟོང་དྲུང་བརྒྱ་བཟླ་བར་ནི་བཤད་ལ། དེ་ནི་རླུང་འབྱུང་འཇུག་གཉིས་གཉིས་ལ་རེ་རེར་བྱས་པའི་གྲངས་ཡིན་ལ། དེ་གཉིས་ལས་མ་གཏོགས་པའི་
6-4-68b


གནས་པའི་དུས་མེད་པའི་ཕྱིར་ཨ་དང་གནས་པ་སྦྱར་ནས་ཇི་ལྟར་བཟླ་སྙམ་ན། བོད་ཀྱི་བླ་མ་སྔོན་དུས་པ་རྣམས། ལྡང་འཇུག་གཉིས་ཀྱི་བར་དུ་ཅུང་ཟད་གནས་པ་རེ་བྱས་ལ་ཨ་དང་སྦྱར་གསུང་ངོ་། །དེ་ལ་ཕྱིས་ཀྱི་བླ་མ་ཁ་ཅིག་ན་རེ། དེ་ལྟ་ན་རང་ག་བའི་བཟླས་
པ་བཤད་པ་དང་འགལ་ཞིང་ཞག་གཅིག་ལ་ཉི་ཁྲི་ཆིག་སྟོང་དྲུག་བརྒྱར་བཤད་པ་མ་ཚང་བའི་སྐྱོན་དུ་འགྱུར་བས། ཆེད་དུ་འཛིན་པ་མི་བྱ་བར་བཟླ་ཞེས་འདོད་དོ། འདི་ལའང་བརྒལ་བ་དེ་ཉིད་དུ་ད་དུང་འཇུག་པས་དེའི་ལན་ད་དུང་སྨྲ་དགོས་ཤིང་། དེ་ལྟར་ན་རང་གར་
རྒྱུ་བ་ལ་ལྡང་འཇུག་གཉིས་མ་གཏོགས་པའི་གནས་པ་མེད་པས་ཨ་ཡིག་གནས་པ་དང་སྦྱོར་བའི་རླུང་གི་གནས་པ་དེ་སྨྲ་དགོས་སོ། །གལ་ཏེ་རླུང་རྔུབ་པ་རྫོགས་ནས་སྣ་བུག་ཏུ་ཕྱིར་མ་བྱུང་བའི་བར་སྐབས་ཡོད་པས་དེའོ་སྙམ་ན། ནང་དུ་འཇུག་པ་རྫོགས་མ་
ཐག་ཕྱིར་རྒྱུ་བའི་མགོ་ཟུག་པས་དེ་གཉིས་ལ་ནི་བར་སྐབས་མེད་ལ། ནང་ནས་སྣ་བུག་ཏུ་མ་སླེབ་པའི་བར་ལ་གནས་པར་བྱེད་ན། སྣ་བུག་ནས་ནང་དུ་ཞུགས་མ་ཐག་ནས་རང་གནས་སུ་མི་སླེབ་པར་ཡང་གནས་པར་བྱ་དགོས་པས་འགྲོ་འོང་ལ་གནས་པའི་
མིང་བཏགས་པ་ཙམ་མོ། །དེས་ན་ཞག་གཅིག་ལ་ཉི་ཁྲི་ཆིག་སྟོང་དྲུག་བརྒྱར་བཤད་པ་ནི། རླུང་འགྲོ་འོང་གཉིས་མ་གཏོགས་པ་གནས་པ་ཟུར་དུ་མ་བྱས་པའི་ལུགས་ཡིན་ལ། རང་ག་བར་འཇུག་པའི་བཟླས་པའང་དེ་ཉིད་ཡིན་ནོ། །ཡི་གེ་གསུམ་དང་སྦྱོར་
བའི་ཚེ་ནི་ཨོཾ་དང་ཧཱུཾ་ལས་ལོགས་སུ་ཨ་ཡོད་པ་བཞིན་དུ་འཇུག་ལྡང་གཉིས་ལས་ལོགས་སུ་གནས་པ་བྱ་དགོས་པས་ནང་དུ་རྔུབས་ཟིན་པའི་དེ་མ་ཐག་ཏུ་ནང་དུ་གནས་པ་རེ་ཆེད་དུ་བྱས་ནས་ཕྱིར་ལྡང་བ་ཧཱུཾ་དང་སྦྱར་རོ། །དེ་ཙམ་གྱིས་རང་ག་བའི་
6-4-69a


བཟླས་པར་བཤད་པ་དང་འགལ་ན། ཡི་གེ་གསུམ་དང་སྦྱོར་བའང་རང་བཞིན་པའི་རླུང་ལ་མེད་པས་དེའང་དེ་དང་འགལ་བས་རྡོར་བཟླས་མ་ཡིན་པར་འགྱུར་རོ། །གཉིས་པ་ལ་གསུམ། སྙིང་གའི་རྩ་མདུད་རྡོར་བཟླས་ཀྱིས་འགྲོལ་བར་བསྟན་
པ། དེ་ཉིད་རྩ་མདུད་གྲོལ་བ་གཞན་ལས་མཆོག་ཡིན་ཚུལ། རྡོ་རྗེ་བཟླས་པ་གཅིག་ཏུ་གསུངས་པའི་རྒྱུ་མཚན་ནོ། །དང་པོ་ནི། རྒྱུད་རྡོར་ཕྲེང་གི་ལེའུ་དྲུག་པ་ལས། སྔགས་ཀྱི་དེ་ཉིད་ཀྱིས་དེ་འབྱེད། །རྣལ་འབྱོར་མདུད་པ་བཀྲོལ་ནས་ནི། །རླུང་གི་དེ་
ཉིད་རིག་པ་དེ། །ཁྱད་པར་དབྱེ་བའི་སྦྱོར་བ་ཡིས། །སྦྱོར་བ་དེ་ཡང་མི་རིགས་གོ། །ཞེས་སྔགས་ཀྱི་དེ་ཉིད་རྡོར་བཟླས་ཀྱིས་རྩ་མདུད་འབྱེད་ཅིང་དེའང་གཞན་གྱིས་མི་རིག་པས་རྟོགས་དཀའ་བ་དང་དོན་དེ་རྣལ་འབྱོར་མའི་དྲིན་གྱིས་ཞལ་ནས་ཞལ་དུ་
བརྒྱུད་པར་གསུངས་སོ། །དེ་ནས་གསང་བདག་གིས། ཐིག་ལེའི་དབྱེ་བ་རིགས་བཅས་པས། །གང་ཤེས་མྱུར་དུ་རྣལ་འབྱོར་མཆོག །སྦྱོར་བས་མདུད་པ་འབྱེད་པར་བྱེད། །ཁམས་གསུམ་པ་ཡི་འགྲོ་བ་འདི། །མྱུར་དུ་དངོས་གྲུབ་མཆོག་ཏུ་འགྲོ ། །ཞེས་
ཐིག་ལེའི་དབྱེ་བ་རིགས་པ་དང་བཅས་པ་གང་གིས་ཤེས་པས་རྩ་མདུད་ཕྱེ་ནས་དངོས་གྲུབ་མཆོག་ཏུ་མྱུར་དུ་འགྲོ་བ་བསྟན་དུ་གསོལ་ཞེས་ཞུས་པའི་ལན་དུ། སྙིང་གི་པདྨའི་སྦུབས་མཁའ་ལ། །ཞེས་སོགས་སྔར་དྲངས་པ་ལྟར་གསུངས་ཏེ་སྙིང་
གའི་དབུས་ཀྱི་རྩ་མདུད་ཀྱི་དབུ་མའི་སྦུབས་ན་མི་ཤིགས་པའི་ཐིག་ལེ་ཡོད་པ་དང་། རྩ་དེའང་འབྱེད་དཀའ་བའི་མདུད་པ་གསུམ་གྱིས་དཀྲིས་ནས་ཡོད་པ་དང་། མདུད་པ་དེས་སྲོག་ཐུར་གཉིས་དེ་ནས་འགྲོ་བའི་གོ་སྐབས་བཀག་པས་ཡན་མན་དུ་
6-4-69b


རྒྱུ་མི་ནུས་པར་གསུངས་ཤིང་། ཡང་རྣམ་ཤེས་ཀྱི་ཤིང་རྟའི་རླུང་བག་ཆགས་ཀྱིས་བསླད་པས་འཁོར་བར་འཁྱམས་པས་དེ་བཟློག་པའི་ཕྱིར་ཐིག་ལེའི་དབྱེ་བ་སྟེ་སྔགས་ཀྱི་དེ་ཉིད་བསྒོམ་པ་ལ་འབད་པར་གྱིས་ཤིག་ཅེས་གསུངས་ནས། མ་རིག་གཞན་
གྱིས་མི་ཤེས་པ། །དབུས་ཀྱི་མདུད་པ་དེ་ཡང་ནི། །དེ་ཕྱེ་ན་ནི་དངོས་གྲུབ་འགྱུར། །ཞེས་གསུངས་ཤིང་། དེ་ནས་མར་འདོད་པས་ཆུ་སྲུབ་པ་དང་། རྒྱ་མཚོའི་ཕ་མཐའི་ས་ལ་འགྲོ་བར་འདོད་པས་ལམ་རྒྱུས་མི་འདྲ་བར་འགྲོ་བ་ནི་དཀའ་བ་སྤྱོད་པ་ཙམ་དུ་ཟད་ཀྱིས་
འདོད་པའི་འབྲས་བུ་མེད་པ་བཞིན་དུ། མན་ངག་དང་བྲལ་བའི་སྒྲུབ་པ་པོས་འབད་ཀྱང་། འདོད་པའི་འབྲས་བུ་མེད་པས་དཀའ་བ་ཆེར་བྱེད་པ་ཙམ་དུ་ཟད་དོ། །དེས་ན་རྣལ་འབྱོར་མའི་ཞལ་དང་བླ་མའི་ཞལ་ནས་བརྒྱུད་པའི་མན་ངག་བསླབ་བོ་ཞེས་གསུངས་
པ་ན། གསང་བདག་གིས་གདམས་ངག་དེ་གསུང་བར་ཞུས་སོ། །དེའི་ལན་དུ་སྐལ་མེད་ཀྱི་བསམ་པའི་དབང་གིས་རྒྱུད་ཀུན་ཏུ་སྦས་ནས་གང་དུའང་གསལ་བར་མ་བྱས་པ་བཤད་པར་བྱའོ་ཞེས་གསུངས་ནས་ཧཱུཾ་དང་ཧོཿ་ཡི་རྡོར་བཟླས་བཤད་དོ། །
འདི་ནི་མཚོན་པ་ཙམ་སྟེ་ཡི་གེ་གསུམ་གྱི་རྡོར་བཟླས་ཀྱང་དེ་དང་འདྲའོ། །དེ་གཉིས་ཀྱི་མིང་ལ་སྒྲ་དང་ཐིག་ལེ་ཞེས་གསུངས་པའི་དོན་འགྲེལ་པས་སྙིང་གའི་མདུད་པའི་སྟེང་དུ་སྒྲ་སྟེ་ཧཱུཾ་དང་སྨིན་མཚམས་ཀྱི་དབུས་སུ་ཐིག་ལེ་སྟེ་ཧོཿབསྒོམ་པ་དང་དང་
པོར་ལྡང་འཇུག་གི་རླུང་གཉིས་ལ་ཧཱུཾ་དང་ཨོཾ་གྱི་སྒོ་ནས་སེམས་བཟུང་། དེ་ནས་དབུ་མ་ནས་རྒྱུ་བའི་རླུང་ང་དྲུག་རྐང་བཅས་ལ་སེམས་བཞག་པའི་རྗེས་ལ་ཨ་ཡིག་ལ་བཞག་གོ། །དེའང་ཚེག་དྲག་གཉིས་ལ་མོས་པས་སོ། །དེ་གཉིས་ཀྱང་ཧཱུཾ་ཧོཿགཉིས་
6-4-70a


ལ་མོས་པར་བྱའོ། །ཡི་གེ་གསུམ་པོ་དེ་ཉིད་ལ་ཞུགས་ཏེ་ཧཱུཾ་ཡིག་ཀྱང་ཆ་ཤས་སུ་བརྟགས་པས་ཐིག་ལེ་སྨིན་མའི་དབུས་སུ་གནས་པ་ལ་རླུང་གི་ངོ་བོས་བསྡུ་བར་བྱའོ་ཞེས་པ་མན་ངག་ཏུ་འཆད་དོ། །དེ་ལྟར་ན་རླུང་དབུ་མར་ཞུགས་
པའི་སྤྱི་ཙམ་མིན་གྱི་དབུ་མའི་བྱེ་བྲག་ཁྱད་པར་ཅན་དགྲོལ་དཀའ་བའི་སྙིང་གའི་རྩ་མདུད་བཀྲོལ་ནས་དེའི་གནས་སུ་རླུང་རྣམས་འཇུག་དགོས་ཤིང་། དེ་ནི་རྡོར་བཟླས་སྔགས་ཀྱི་དེ་ཉིད་གཅིག་པུས་བྱེད་པར་གསུངས་སོ། །གཉིས་པ་ལ་གཉིས། རྡོ་རྗེ་
གསུམ་གྱི་ཡི་གེའི་དོན་བཤད་པའི་སྒོ་ནས་རླུང་དབུ་མར་འཇུག་པ་བསྟན་པ་དང་། དེ་གསུམ་གྱི་ནང་ནས་གཙོ་བོ་གང་ཡིན་ངོས་བཟུང་བའོ། །དང་པོ་ནི། རྒྱུད་རྡོར་ཕྲེང་གི་སྐུ་གསུང་ཐུགས་ཀྱི་སྙིང་པོ་བཤད་པའི་ལེའུ་ལས། དང་པོ་ཨོཾ་ཡིག་གི་དོན་
བཤད་པའི་སྐབས་སུ། ཨོཾ་ནི་སྐུ་ཡི་རྡོ་རྗེ་ཡི། །སྙིང་པོ་རུ་ཡི་ཡང་དག་བཤད། །ཡི་གེ་ཨ་ཡིག་ནི་ཡི་གེ་ཨོཾ། །ཡི་གེ་མ་ཞེས་བྱ་བ་གསུམ། །ཞེས་ཨོཾ་གྱི་ཡི་གེ་གསུམ་ངོས་བཟུང་སྟེ་འགྲེལ་པར་ཨོཾ་ཡིག་མེད་པར་ཨུ་ཡིག་ཡོད་པ་ནི་ལེའུ་བཅོ་ལྔ་པ་དང་
མཐུན་ནོ། །དེ་ལ་ཨ་ཡིག་གི་དོན་ནི་དེ་ཉིད་ལས། ཨ་ནི་ཆོས་འཁོར་པདྨར་གནས། །རླུང་གི་འཁོར་ལོ་ལ་ནི་ཁྱབ། །འདི་ཉིད་ཁོ་ན་རླུང་ཆེན་པོ། །སྲོག་ཅེས་བྱ་བ་ཐམས་ཅད་གསུངས། །ཞེས་པའི་དོན་ནི་སྙིང་ག་ནས་སྨིན་དབུས་ཀྱི་རླུང་གི་འཁོར་ལོའི་
བར་ལ་ཁྱབ་པའི་སྲོག་འཛིན་གྱི་རླུང་སྟེ། དེས་རླུང་ཐམས་ཅད་བསྡུས་ཞེས་འགྲེལ་པར་འབྱུང་ངོ་། །ཨུ་ཡིག་གི་དོན་ནི་དེ་ཉིད་ལས། །ཨོཾ་ནི་ལོངས་སྤྱོད་འཁོར་ལོར་གནས། །མེ་དང་ཉི་མ་འདྲ་བ་ཡི། །མགྲིན་པའི་མཐར་གནས་སྤྱི་གཙུག་མཐར་
6-4-70b


ཁྱབ་པ་གཟི་བརྗིད་ཀྱི་ནི་ལུས། །ཞེས་གསུངས་སོ། །འགྲེལ་པར་ཨུ་ནི་ཞེས་འབྱུང་བས་ཨུ་ཡིག་གི་དོན་ནི་མགྲིན་པ་ལོངས་སྤྱོད་ཀྱི་འཁོར་ལོ་ལས་སྤྱི་གཙུག་བདེ་ཆེན་གྱི་འཁོར་ལོའི་བར་དུ་ཁྱབ་པར་གནས་པ། མེ་དང་ཉི་མའི་འོད་དང་མཚུངས་པའོ། །གཟི་བརྗིད་
ཀྱི་ལུས་ནི་འབར་བའི་ངོ་བོའོ། །འདིས་མགྲིན་པའི་འོད་ཟེར་དམར་པོའི་ངོ་བོ་ཉིད་ཀྱི་གྱེན་རྒྱུའི་རླུང་ཨུ་ཡིག་གི་དོན་དུ་བསྟན་ནོ། །མ་ཡིག་གི་དོན་ནི། བདེ་ཆེན་འཁོར་ལོ་ཞེས་བྱར་གནས། །ཡི་གེ་མ་ནི་ཐིག་ལེ་ཙམ། །མཐོ་བའི་ཚད་ནི་སོར་བཅུ་གཉིས། །རྒྱལ་
པོ་གཙུག་ཏོར་གནས་ནས་གནས། །ཞེས་སོ། །དེ་ལ་སྨིན་མཚམས་ནས་ཡར་ལ་སོར་བཅུ་གཉིས་སུ་མཐོ་བའི་ཚད་གཙུག་ཏོར་གྱི་གནས་ན་གནས་པའི་ཐིག་ལེ་མ་ཡིག་གི་དོན་ནོ། །རྐང་པ་ཐ་མ་ལ་འགྲེལ་པས་བརྒལ་བར་བྱས་ནས་སྟེང་དུ་གནས་ཞེས་འབྱུང་
ངོ་། །ཧཱུཾ་ཡིག་གི་སྐབས་སུ། དེ་དག་གཅིག་གྱུར་སྙིང་ག་ལ། །ཐུགས་ཀྱི་ས་བོན་དུ་ནི་བརྗོད། །ཅེས་གསུངས་ནས་གཞན་གཉིས་ལ་དེའི་དོད་རེ་མ་གསུངས་ཀྱང་། དེ་ལ་དཔགས་ནས་གོ་ནུས་པས། འདིར་ཡང་དེ་དག་གཅིག་གྱུར་སྤྱི་བོ་ལ། །སྐུ་ཡི་ས་བོན་དུ་ནི་
བརྗོད། །ཅེས་སྦྱར་རོ། །དེ་ལྟར་བྱས་ན་སྤྱི་བོ་བདེ་ཆེན་གྱི་འཁོར་ལོའི་ལྟེ་བར་རང་གནས་ཀྱི་ཐིག་ལེ་དང་སྲོག་འཛིན་དང་གྱེན་རྒྱུ་དང་གསུམ་གཅིག་ཏུ་བསྡུས་པ་ནི་སྐུ་རྡོ་རྗེའི་ཡི་གེ་ཨོཾ་གྱི་དོན་ནོ། །ཨཱཿཡིག་ལ་ཨ་གཉིས་དང་ཧ་དང་གསུམ་ཡོད་པའི་
ཨ་ཡིག་སྔ་མའི་དོན་སྔར་དང་འདྲ་སྟེ། ཡི་གེ་ཨ་ནི་སྔར་བཤད་ཟིན། །སྲོག་གི་རླུང་ནི་མཆོག་ཡིན་ནོ། །ཞེས་གསུངས་སོ། །ཨ་ནི་ཆོས་འཁོར་པདྨ་ལས། །མགྲིན་པར་ཡི་གེ་ཨ་ཉིས་འགྱུར། །ཞེས་པ་ནི་སྲོག་རླུང་སྙིང་གའི་པདྨ་ལས་བྱུང་ནས་མགྲིན་
6-4-71a


པ་དང་གཉིས་ཀ་ལ་ཁྱབ་པར་བྱེད་པས། ཨ་ཡི་ཉིས་འགྱུར་གྱི་ཨཱ་རིང་པོ་སྟེ་ཨ་ཡིག་གཉིས་ཀའི་དོན་གཅིག་ཏུ་བྱས་བས་ཨ་རིང་པོར་སོང་བའོ། །སྲོག་ཉིད་དང་ནི་ཐུར་སེལ་བ། །ཡི་གེ་ཧ་ཡིས་ཀུན་ནས་ནི། །མགྲིན་པའི་དབུས་ན་གནས་པ་
བཅིངས། །ཞེས་པ་ནི། གསུང་གི་རྡོ་རྗེའི་ཡི་གེ་གསུམ་པ་ཧ་ཡིག་གིས་ཀུན་ནས་བསྟན་པའི་དོན་ཐུར་སེལ་གྱི་རླུང་ངོ་། །ཡི་གེ་གསུམ་གྱི་དོན་གཅིག་ཏུ་གྱུར་པ་ནི་མགྲིན་པ་ལོངས་སྤྱོད་ཀྱི་འཁོར་ལོའི་ལྟེ་བར་ཨཱཿཡིག་ཡིན་པས། མགྲིན་པའི་འཁོར་ལོའི་དབུས་ན་
གནས་པ་གྱེན་རྒྱུ་དང་སྲོག་ཐུར་གཉིས་དང་གསུམ་པོ་གནས་དེར་བཅིངས་པ་སྟེ་གཅིག་ཏུ་བྱས་པ་ནི་གསུང་རྡོ་རྗེའི་ཡི་གེ་ཨཱཿཡིག་གི་དོན་དུ་ཤེས་པར་བྱའོ། །ཧཱུཾ་ཡིག་ལ་ཧ་དང་ཨུ་དང་མ་གསུམ་ཡོད་པའི་ཧ་ནི། ཧ་ནི་ཐུར་སེལ་མིང་ཅན་རླུང་། །བཤད་སྒོ་
གསང་བའི་དབུས་ན་གནས། །ཞེས་གསུངས་ཏེ་བཤད་སྒོ་ནས་གསང་གནས་ཀྱི་པདྨའི་དབུས་བར་དུ་གནས་པའི་ཐུར་སེལ་ནི་ཧ་ཡིག་གི་དོན་ནོ། །ཡི་གེ་ཨུ་ནི་སྟེང་འགྲོའི་རླུང་། །མགྲིན་པའི་པདྨའི་དབུས་ན་གནས། །ཞེས་པ་ནི། མགྲིན་པའི་པདྨའི་དབུས་ན་
གནས་པའི་སྟེང་འགྲོ་སྟེ་གྱེན་རྒྱུའི་རླུང་ནི་ཨུ་ཡིག་གི་དོན་ནོ། །ཡི་གེ་མ་ནི་སྲོག་རླུང་ཡིན། །དཔྲལ་བར་རླུང་གི་འཁོར་ལོ་ལ། །ཞེས་པ་ནི་སྨིན་མཚམས་རླུང་གི་འཁོར་ལོའི་བར་དུ་ཁྱབ་པའི་སྲོག་འཛིན་གྱི་རླུང་ནི་མ་ཡིག་གི་དོན་ནོ། །དེས་ན་དེ་དག་གཅིག་གྱུར་
ཞེས་སོགས་གསུངས་ཏེ། སྲོག་ཐུར་གཉིས་དང་གྱེན་རྒྱུ་གསུམ་སྙིང་གའི་པདྨའི་ལྟེ་བར་གཅིག་ཏུ་གྱུར་པ་ནི་ཐུགས་རྡོ་རྗེའི་ཡི་གེ་ཧཱུཾ་ཡིག་གི་དོན་ནོ། །དེ་དག་གིས་ནི་ཡི་གེ་གསུམ་འདུས་པ་ལས་ཨོཾ་ཡིག་སོགས་གསུམ་དུ་གྱུར་ནས་གནས་གསུམ་ན་
6-4-71b


གནས་པའི་ངེས་དོན་གྱི་བཤད་པ་བྱས་པས་འཁོར་ལོ་གསུམ་གྱི་ལྟེ་བའི་དབུ་མའི་ནང་དུ་སྲོག་ཐུར་དང་གྱེན་རྒྱུའི་རླུང་རྣམས་ཚུད་པ་རྡོ་རྗེ་གསུམ་གྱི་ཡིག་དོན་དུ་བཤད་དེ། འཁོར་ལོ་གསུམ་གྱི་དབུས་ཀྱི་རྩ་མདུད་གསུམ་གྲོལ་བའི་གནས་སུ་རླུང་རྣམས་ཚུད་པ་ཡི་
གེ་གསུམ་གྱི་དོན་དུ་བསྟན་པའོ། །གཉིས་པ་ལ་གཉིས། སྙིང་གའི་དབུས་ན་རླུང་གསུམ་སྦྱོར་བ་གཙོ་བོ་ཡིན་པའི་ཚུལ་དངོས་དང་། རླུང་འགོག་པའི་ཐབས་བཤད་པའོ། །དང་པོ་ནི། དེ་ནས་གསང་བདག་གིས། །རྡོ་རྗེ་གསུམ་གྱི་ཡིག་དོན་དང་། །གནས་ཀྱི་དབྱེ་བ་
རྟོགས་ལགས་ན། །འདི་རྣམས་དབུས་ན་བདག་པོ་གང་། །ཇི་ལྟ་བུ་ཞིག་གཙོ་བོར་གསུངས། །ཞེས་རྡོ་རྗེ་གསུམ་གྱི་ཡི་གེའི་དོན་རླུང་རྣམས་གཅིག་ཏུ་སྦྱོར་བ་གསུམ་དང་། གང་དུ་སྦྱོར་བའི་གནས་སྤྱི་བོ་ལ་སོགས་པ་གསུམ་རྟོགས་ལགས་ན། གསུམ་པོ་འདི་རྣམས་ཀྱི་
དབུས་ན་སྟེ་ནང་ནས་བདག་པོ་གང་ཡིན། ཇི་འདྲ་ཞིག་གཙོ་བོར་བཞེད་ཅེས་དྲིས་སོ། །དེའི་ལན་དུ། གསང་བ་མཆོག་ཏུ་གསང་བ་ཡི། །སྦས་པའི་དོན་ནི་ཁྱོད་འདྲི་བ། །རྒྱུད་རྣམས་ཀུན་ཏུ་མ་གསུངས་པ། །རབ་ཏུ་བཤད་ཀྱིས་མཉན་པར་གྱིས། །ཞེས་གསུངས་ཏེ། 
སྙིང་མགྲིན་སྤྱི་བོའི་འཁོར་ལོ་གསུམ་གྱི་དབུས་ཀྱི་རྩ་མདུད་གྲོལ་བའི་གནས་སུ་སྲོག་ཐུར་ལ་སོགས་པའི་རླུང་རྣམས་བསྲེས་པ་འདི་གསུམ་གྱི་ནང་ནས་གནད་འདི་ཆེ་ཞེས་པ་ནི་གསང་བ་ལས་ཀྱང་ཆེས་གསང་བ་རྒྱུད་གཞན་དུ་སྦས་པ་ཡིན་པས་དེ་བཤད་
དོ། །ཞེས་གསུངས་ཏེ། འདིའི་དོན་ལ་ངེས་པ་རྙེད་དགོས་སོ། །དེ་ནས་ཐུགས་ཀྱི་ས་བོན་བདག་པོ་སྟེ། །ཀུན་གྱི་ནང་ནས་རྣམ་རྟོག་མེད། །གང་ཕྱིར་གཙོ་བོ་གཞན་རྣམས་ནི། །འགྲིབ་དང་དེ་བཞིན་འཕྲོག་པར་བྱེད། །ཅེས་གསུངས་ཏེ། གསུམ་པོ་ཀུན་གྱི་
6-4-72a


ནང་ནས་ཐུགས་ཀྱི་ས་བོན་གྱི་དོན་སྙིང་གའི་རྩ་མདུད་གྲོལ་བའི་ནང་དུ་རླུང་གསུམ་གཅིག་ཏུ་བྱེད་པ་ནི་བདག་པོ་སྟེ། །ཞེས་པ་ནི་དྲི་བ་སྔ་མའི་ལན་ནོ། །དེ་ཉིད་གཙོ་བོ་ཡིན་ནོ་ཞེས་པ་ནི་ཕྱི་མའི་ལན་ནོ། །དེའི་རྒྱུ་མཚན་གང་གི་ཕྱིར་ན། གནས་
སྙིང་གའི་མདུད་བགྲོལ་བའི་གནས་སུ་རླུང་གཅིག་ཏུ་བྱེད་པ་དེ་རྣམ་པར་རྟོག་པ་དང་རྣམ་རྟོག་བསྐྱེད་པའི་རླུང་ཐམས་ཅད་མེད་པ་སྟེ་གཅོད་པར་བྱེད་པའི་ཕྱིར་ཏེ། རྣམ་རྟོག་མེད་པ་ལས་གཞན་རྣམ་རྟོག་དང་དེའི་རླུང་རྣམས་ནི་དེས་འགྲིབ་པར་བྱེད་པ་དང་
འཕྲོག་པར་བྱེད་པའི་ཕྱིར་རོ། །དེ་ནི་དྲི་བའི་སྐབས་སུ་བདག་པོ་གང་ཡིན་གཙོ་བོར་ཇི་འདྲ་ཞིག་གསུངས་ཞེས་དྲིས་པའི་ལན་དང་སྦྱར་བ་ཡིན་ནོ། །ཡང་ན་གཙོ་བོ་གཞན་ནི་ཐུགས་རྡོ་རྗེ་ལས་གཞན་པ་སྐུ་རྡོ་རྗེ་དང་གསུང་རྡོ་རྗེ་སྟེ། དེ་གཉིས་ཀྱི་གནས་
སུ་གྱུར་པའི་སྤྱི་བོ་དང་མགྲིན་པའི་རྩ་མདུད་རྣམས་ཐུགས་རྡོ་རྗེའི་རྩ་མདུད་གྲོལ་བ་དེས་འཇིག་པར་བྱེད་པ་ནི་རིམ་པ་བཞིན་དུ་འགྲིབ་པ་དང་འཕྲོག་པར་བྱེད་པའི་དོན་དུ་སྦྱར་རོ། །འགྲེལ་པས། ཡི་གེ་གསུམ་གྱི་ནང་ནས་ཧཱུཾ་ཡིག་གཙོ་བོ་ཡིན་ཏེ། ཆོས་
ཐམས་ཅད་ནི་སེམས་ལ་རག་ལས་པའི་ཕྱིར་རོ། །ཀུན་གྱི་ནང་ནས་ཞེས་པའི་དོན་ཀུན་བྱང་གི་གནས་སྐབས་གཉིས་པོ་ཐམས་ཅད་ལ་རྣམ་རྟོག་གིས་སེམས་ཀྱི་རང་བཞིན་ལ་གོས་པ་མེད་པ་དང་། གང་གི་ཕྱིར་ཏེ་ལུས་ངག་དང་སེམས་ཀྱི་ས་བོན་གང་
ལས་བྱུང་བའི་རྣམ་རྟོག་བརྒྱ་རྩ་བརྒྱད་འགྲིབ་པ་དང་རླུང་རྣམས་འཕྲོག་པར་བྱེད་པ་ནི། རང་བཞིན་ཡོངས་སུ་ཤེས་ནས་སྤང་བར་འཆད་དེ། ཡི་གེ་གསུམ་གྱི་དོན་སྔར་བཤད་པ་གསལ་པོར་མ་མཁྱེན་ཞིང་། སྙིང་གའི་དབུ་མའི་གནད་གཏན་
6-4-72b


མ་རྟོགས་པར་སྣང་ངོ་། །དེ་ལྟར་རྒྱུ་མཚན་དེས་ནི་སྤྱི་བོ་དང་མགྲིན་པའི་དབུས་ཀྱི་ཨ་བ་དྷཱུ་ཏཱིའི་ནང་དུ་རླུང་འཇུག་ནུས་ཀྱང་སྙིང་གའི་རྩ་མདུད་འཇིག་མི་ནུས་པས་རྣམ་རྟོག་ཀུན་གཅོད་མི་ནུས་པར་བསྟན་ནོ། །དེ་ནས། རྣམ་པར་རྟོག་པའི་རླུང་གཉིས་ནི། །ལུས་
ཀུན་ལ་ནི་ཁྱབ་པར་བྱེད། །སྣ་ཡི་བུ་ག་ལས་ནི་རྒྱུ། །ལུས་ལ་རྟག་ཏུ་འབྱུང་བར་བྱེད། །འགྲོ་བ་དྲུག་གི་འཁོར་ལོའི་ལམ། །གང་གི་སྟོབས་ཀྱིས་ཁྱབ་པར་བྱེད། །ཅེས་གསུངས་པ་ནི། གཅོད་བྱ་རྣམ་རྟོག་གི་རླུང་བསྟན་པར་བཞེད་ནས་བཤད་པ་ཡིན་ཏེ་རླུང་
གཉིས་ནི་སྲོག་དང་ཐུར་སེལ་ལོ། །ལྷག་མ་ནི་གོ་སླའོ། །དེ་ནས། གསུམ་པ་རྣལ་འབྱོར་པ་ཡིས་རྟོགས། །རྣམ་རྟོག་མེད་པ་རྨད་བྱུང་ཆེ། །རླུང་རྣམས་ཐམས་ཅད་འགོག་པས་ན། །སྐྱེ་བ་དེ་ཉིད་རྟོགས་པའོ། །ཞེས་གསུངས་ཏེ། གསུམ་པ་ནི་ཐུགས་
རྡོ་རྗེའི་ཡིག་དོན་སྙིང་གའི་རྩ་མདུད་གྲོལ་བའི་གནས་སུ་རླུང་བཅུག་པའོ། །རྟོགས་པ་ནི་རྣལ་འབྱོར་པ་ལ་དེ་མངོན་དུ་འགྱུར་པའོ། །དེའི་ཚེ་རྣམ་རྟོག་མེད་པ་རྨད་དུ་བྱུང་བ་སྟེ་ངོ་མཚར་བའི་ལྷན་ཅིག་སྐྱེས་པའི་ཡེ་ཤེས་སྐྱེ་ཞེས་སྦྱར་རོ། །དེ་ཉིད་རྟོགས་
པ་ནི་རྨད་བྱུང་གི་དོན་ནོ། །རྒྱུ་མཚན་ནི་རླུང་དང་རྣམ་རྟོག་ཐམས་ཅད་འགོག་པ་སྟེ་མི་ཤིགས་པ་ལ་སྡུད་ནུས་པའི་ཕྱིར་རོ། །འདི་ནི་སྔར་ཐུགས་ཀྱི་ས་བོན་བདག་པོར་བཤད་པའི་རྒྱུ་མཚན་གསལ་དུ་བཏང་བ་ཡིན་ནོ། །གཉིས་པ་ལ་གསུམ། ཐབས་
དངོས་དང་། ཐབས་ལས་བྱུང་བའི་འབྲས་བུ་དང་། དེའི་རྟགས་བཤད་པའོ། །དང་པོ་ནི། དེ་ནས། རླུང་ནི་ཐམས་ཅད་འགོག་པས་ན། །ཡང་དག་རིགས་པ་བདག་གིས་བཤད། །ཅེས་འབྱུང་སྟེ་འགྲེལ་པ་ལས། རླུང་ནི་ཐམས་ཅད་འགོག་པ་ཡང་།
6-4-73a


ཞེས་འབྱུང་བ་ལེགས་སོ། །དོན་ནི་རླུང་ཐམས་ཅད་འགོག་པའི་རིགས་པ་སྟེ་ཐབས་ཀྱང་བདག་གིས་བཤད་དོ་ཞེས་པ་སྟེ། སྙིང་གའི་རྩ་མདུད་བཀྲོལ་ནས་དབུ་མར་རླུང་འགོག་པའི་ཐབས་འཆད་པའོ། །དེ་ནས་སྤྲུལ་པ་ཆོས་ཀྱི་འཁོར་
ལོའི་དབུས། །འདིར་ནི་པདྨ་གཉིས་སུ་གསུངས། །དྲུག་ཅུ་རྩ་བཞི་བརྒྱད་འདབ་གཉིས། །སྟེང་དང་འོག་ཏུ་ཁ་བལྟས་བཞིན། །ཞེས་གསུངས་ཏེ་རེ་བཞིའི་འདབ་མ་ནི་སྤྲུལ་བའི་འཁོར་ལོ་ལ་ཡིན་ལ། བརྒྱད་ཀྱི་འདབ་མ་ནི་ཆོས་ཀྱི་འཁོར་ལོ་ལ་སྟེ་དེ་ལྟར་
གཉིས་སོ། །རྐང་པ་བཞི་པ་ལ་འགྲེལ་པས་དེ་དག་ཟ་མ་ཏོག་བཞིན་གནས་ཞེས་འབྱུང་བ་ལེགས་ལ། དེའི་དོན་ནི་སྙིང་གའི་པདྨ་ཁ་ཐུར་བལྟ་དང་། ལྟེ་བའི་པདྨ་ཁ་སྟེང་དུ་བལྟ་བར་སཾ་བྷུ་ཊ་ལས་བཤད་པ་ལྟར་གནས་པས་ཟ་མ་ཏོག་ཁ་སྦྱོར་དང་འདྲ་བར་
གནས་པའོ། །སྟེང་འོག་ཡང་དག་བརྟེན་ནས་ནི། །སྲོག་དང་ཐུར་སེལ་རྒྱུ་བར་བྱེད། །དེ་གཉིས་ཁོ་ན་རྟོག་བཅས་པའི། །རླུང་གཉིས་སུ་ནི་གསལ་བར་གསུངས། །སྐུ་དང་གསུང་གི་སྙིང་པོ་གཉིས། །ལ་ལ་ན་དང་ར་ས་ན། །ཨ་བ་དྷཱུ་ཏཱི་མཆོག་གི་རྩ། །ཞེས་
གསུངས་ཏེ། གཞན་སླ་ལ་འགྲེལ་པས་སྲོག་ཐུར་གཉིས་སྐུ་དང་གསུང་གི་སྙིང་པོར་བཤད་པ་ནི། འདི་ཉིད་ལས། ལ་ལ་ན་དང་ར་ས་ན། ཨ་བ་དྷཱུ་ཏཱི་ཞེས་བྱའི་མིང་། །སྐུ་གསུང་ཐུགས་ཀྱི་རང་བཞིན་དང་། །ཞེས་ལ་ལ་ནི་སྐུ་དང་ར་ས་ན་གསུང་དུ་
བཤད་པ་དང་མི་མཐུན་པས། རྩ་གཉིས་དང་སྐུ་གསུང་གཉིས་སྦྱོར་བ་ཡིན་གྱི་རླུང་གཉིས་དང་སྦྱོར་བ་མིན་ནོ། །དེ་ནས། དེ་གཉིས་དབུ་མ་མཆོག་གི་མཆོག །རྣམ་རྟོག་མེད་པའི་རླུང་གང་ཡིན། །རྟག་ཏུ་རྒྱུ་ཞིང་ཀུན་ལ་ཁྱབ། །རྣལ་འབྱོར་གང་ཐོབ་
6-4-73b


རྟག་ཏུ་ནི། །སེམས་ཅན་དོན་བྱེད་ནུས་པར་འགྱུར། །རླུང་གི་རང་བཞིན་བྱེ་བྲག་ནི། །བརྒྱ་དང་བརྒྱད་ལས་གང་རྒྱལ་བ། །དུས་ཀུན་ཏུ་ནི་རྒྱལ་ནས་གནས། །རྣལ་འབྱོར་བྱིས་པས་མི་ཤེས་པ། །སྐད་ཅིག་གཅིག་མངོན་རྫོགས་བྱང་ཆུབ། །དེ་ཡིས་ཐོབ་པར་རྒྱུད་
འདིར་གསུངས། །དེ་ནི་གང་ཚེ་སྐད་ཅིག་འཐོབ། །དེ་ནི་སྐད་ཅིག་མཆོག་ཏུ་གསུངས། །དེ་ཡང་ཇི་ལྟར་ཐོབ་པར་བྱེད། །དེ་ལ་རིགས་པ་རུ་ནི་བརྗོད། །ཐོག་མ་རྣལ་འབྱོར་པ་ཆེན་པོ། །བློ་བཟང་གིས་ནི་ཞི་གནས་བསྒོམ། །བསྐྱེད་པའི་རིམ་པའི་སྦྱོར་བ་ཡིས། །
ཁྲོ་བོའི་ཕྱག་རྒྱ་བྱས་ནས་ཀྱང་། །དབང་པོ་ཡི་ནི་སྒོ་དགུ་ལ། །ཐམས་ཅད་དུ་ནི་ཀུན་སྡོམ་པ། །ཧཱུཾ་བཟླས་པ་ནི་མཚུངས་མེད་བྱ། །མཆོག་ཏུ་རྒྱུན་མི་འཆད་པར་ནི། །ཟླ་བ་དྲུག་ཏུ་བྱས་ནས་ཀྱང་། །དེ་རྗེས་སྐད་ཅིག་དེ་ལ་ཐོབ། །ཅེས་གསུངས་ཏེ་འོད་གསལ་
མངོན་པར་བྱང་ཆུབ་པ་དེ་རྩ་དབུ་མར་རླུང་ཆུད་པས་འཐོབ་པ་དང་། །དེ་ལ་ཐོག་མར་བསྐྱེད་རིམ་མཐར་བྱུང་ནས་དེ་ནས་རྡོ་རྗེ་བཟླས་པ་ཟླ་བ་དྲུག་བྱས་པས་འཐོབ་པར་བསྟན་ཏེ། སྔར་རླུང་འགོག་པའི་ཐབས་བཤད་ཅེས་པའི་ཐབས་ནི་འདིའོ། །དེ་
དག་གི་དོན་སྔར་ཡང་བཤད་ཟིན་ཏོ། །དེ་ནས། གང་ཕྱིར་དེ་ནི་བཟླས་བྱས་ན། །སྙིང་གའི་པདྨའང་སྟེང་བལྟས་འཇིག །དེ་ནས་གསང་བའི་པདྨ་ཡི། །ཁ་སྦྱོར་བ་ནི་བྱེ་ནས་ཀྱང་། །རྣམ་པར་རྟོག་པའི་རླུང་གཉིས་ནི། །དེ་ནས་རྣམ་པར་བཅད་ནས་
འགྲོ། །ཞེས་གསུངས་ཏེ། ཟླ་བ་དྲུག་ཏུ་རྡོར་བཟླས་རྒྱུན་མི་འཆད་དུ་བྱས་པའི་རྗེས་ལ་མངོན་པར་བྱང་ཆུབ་པ་འོད་གསལ་འཐོབ་པའི་ཚུལ། གང་ཕྱིར་ཏེ་འདི་ལྟར་རྡོར་བཟླས་དེ་བཟླས་པར་བྱས་ན། དེའི་མཐར་སྙིང་གའི་པདྨའི་རྩ་མདུད་འཇིག་
6-4-74a


གོ། །དེར་མ་ཟད་ཁ་སྟེང་དུ་བལྟས་པའི་སྤྲུལ་བའི་འཁོར་ལོའི་རྩ་མདུད་ཀྱང་འཇིག་གོ། །དེ་ནས་གསང་གནས་ཀྱི་པདྨའི་རྩ་མདུད་ཀྱི་ཁ་སྦྱོར་བའང་བྱེ་ནས་འགྲོའོ། །དེའི་ཚེ་རྣམ་པར་རྟོག་པའི་རླུང་སྲོག་ཐུར་གཉིས་རྩ་གཞན་ལ་རྒྱུ་བ་
རྣམ་པར་བཅད་ནས་དབུ་མར་འགྲོའོ། །འགྲེལ་པར་སྙིང་གའི་པདྨའི་སྟེང་བལྟས་འགྲོ ། །ཞེས་བཏོན་ནས་ཟ་མ་ཏོག་ལྟ་བུ་དེའི་ཁ་བྱེ་བས་སྟེང་ཕྱོགས་སུ་འགྲོ་བས་ཏེ་ཁ་གབ་བྱེ་བར་འགྱུར་རོ། །དེ་ནས་གསང་བའི་པདྨ་སྤྲུལ་བའི་འཁོར་ལོ་བྱེ་བ་སྟེ་ཟ་
མ་ཏོག་བཅིངས་པ་ལྟ་བ་དེ་བཟློག་པ་ལ་འཆད་དེ། ཁ་སྦྱོར་བྱེ་བའི་དོན་སྔར་བཤད་པའི་ཟ་མ་ཏོག་ལྟར་གནས་པའི་ཁ་སྦྱོར་དེ་བྱེ་བ་ལ་འདོད་དོ། །དེ་ནི་སྟེང་འོག་ཏུ་བལྟ་པ་ཙམ་ཡིན་གྱི་རྩ་འཁོར་གཉིས་ཁ་སྦྱོར་དུ་ཡོད་པ་མིན་པས་འདིར་ནི་མདུད་པ་འཇིག་པ་
ཡིན་ཏེ། རྒྱུད་ཀྱི་སྐབས་མང་པོར་རྡོར་བཟླས་ཀྱིས་མདུད་པ་འབྱེད་པ་དང་མདུད་པ་འཇིག་པ་དང་མདུད་པ་འཇོམས་པར་གསུངས་པའི་ཕྱིར་རོ། །རྒྱུད་འདིར་རྩ་འཁོར་དྲུག་བཤད་པའི་ནང་དུ་གསང་གནས་ཀྱི་རྩ་འཁོར་ལ་བཤད་ཀྱང་། ལྐོག་མ་སྙིང་ག་ལྟེ་བ་
དང་། །གསང་བའི་པདྨར་འགྲོ་འོང་སྟོན། །ཞེས་པའི་སྐབས་སུ་ལྟེ་བ་ལས་ལོགས་སུ་གསང་གནས་ཀྱི་པདྨའང་འཁོར་ལོ་བཤད་པས་སྙིང་གའི་པདྨའང་སྟེང་བལྟས་འཇིག །ཅེས་འདོན་པ་ལྟར་ལེགས་སོ། །དེས་ན་སྙིང་གའི་པདྨ་དང་སྟེང་བལྟས་སོ་སོར་
བྱས་ལ་འགྲོ་ཞེས་མི་བྱ་བར་འཇིག་པའི་དོན་དུ་བཤད་དོ། །སྙིང་གའི་རྩ་མདུད་ཞིག་པས་ལྟེ་བ་དང་གསང་བའི་རྩ་མདུད་འཇིག་པར་འདིར་བསྟན་ལ། ལོངས་སྤྱོད་དང་བདེ་ཆེན་གྱི་འཁོར་ལོའི་རྩ་མདུད་འཇིག་པར་སྔར་བཤད་ཅིང་སྨིན་མཚམས་ཀྱི་རྩ་
6-4-74b


མདུད་འཇིག་པར་འཆད་པར་འགྱུར་པས། སྙིང་གའི་རྩ་མདུད་གྲོལ་པའི་མཐུས་རྩ་མདུད་གཞན་ཐམས་ཅད་འགྲོལ་བར་བསྟན་ནོ། །རྒྱུད་འདིར་སྙིང་ག་ལ་རྩ་མདུད་བཤད་པ་མ་གཏོགས་པ་གཞན་རྣམས་དེ་བཞིན་དུ་མི་གསལ་ཡང་། དེ་དག་ལ་རྩ་མདུད་མི་བཞེད་པ་མིན་
ཏེ། གསང་པའི་པདྨ་ཡི། །ཁ་སྦྱོར་བ་ནི་བྱེ་ནས་ཀྱང་། །ཞེས་གསུངས་པའི་ཁ་སྦྱོར་ནི་རྩ་མདུད་ཡིན་ལ། ཀྱང་གི་དོན་ནི་དེའང་བྱེ་ཞེས་པའི་དོན་ཡིན་པས། སྟེང་བལྟས་འཇིག །ཅེས་པར་ཁ་སྦྱོར་ཞིག་པ་ཡིན་པས། ལྟེ་བ་དང་གསང་གནས་ལའང་རྩ་མདུད་ཡོད་པར་
བསྟན་ནོ། །དེས་ན་འཁོར་ལོ་གཞན་ལའང་རྩ་མདུད་ཡོད་པར་དཔག་ནུས་སོ། །སྟེང་དང་འོག་ཏུ་ཁྱབ་པ་ཉིད། །སོ་སོར་ལུ་གུ་རྒྱུད་ཚུལ་དུ། །རྩ་རྣམས་ཀུན་ལ་ཁྱབ་ནས་ནི། །ཞེས་སྔར་དྲངས་པ་འདིས་ཀྱང་རྩ་གསུམ་ལུ་གུ་རྒྱུད་ཀྱི་ཚུལ་དུ་སྟེང་འོག་ཏུ་ཁྱབ་པར་གསུངས་
ཏེ། ལུ་གུ་རྒྱུད་ནི་ལྕགས་སྒྲོག་གི་རྣམ་གྲངས་ཡིན་པས་རོ་རྐྱང་གཉིས་ཀྱིས་ཨ་བ་དྷཱུ་ཏཱི་ལ་འཁྱུད་པའི་རྩ་མདུད་སྟོན་པའོ། །གཉིས་པ་ནི། དེ་ནས། རྣམ་རྟོག་མེད་པའི་རླུང་ཆེན་པོ། །སྐུ་གསུང་རྡོ་རྗེ་བཅད་ནས་ནི། །རྣམ་རྟོག་མེད་པ་བདེ་བ་སྟེར། །སྔགས་ཀྱི་དེ་ཉིད་ཀྱིས་
ནི་འཐོབ། །ཨ་བ་དྷཱུ་ཏཱིའི་རྒྱུན་ལ་གནས། །སྨིན་དབུས་རླུང་གིས་ཕྱེ་བྱས་ནས། །དེ་ཐོབ་ཐོབ་བྱས་དགའ་བ་ནི། །རྒྱུན་དུ་འཆར་ཞིང་མི་ཟད་པ། །ཆགས་སོགས་བྲལ་ཞིང་ཞི་བ་དང་། །རང་རིག་བདེ་བ་ཆེན་པོ་ཡི། །ཞེས་སྐུ་དང་གསུང་གི་རྡོ་རྗེའི་རྩ་གཉིས་ལ་རྒྱུ་བའི་
རྣམ་རྟོག་གི་རླུང་གཉིས་བཅད་ནས། མི་རྟོག་པའི་རླུང་ཆེན་པོ་དབུ་མར་ཞུགས་པས་རྣམ་རྟོག་མེད་པའི་བདེ་བ་ཆེན་པོ་སྟེར་བ་ནི། སྔགས་ཀྱི་དེ་ཁོ་ན་ཉིད་རྡོར་བཟླས་ཀྱིས་ཐོབ་པར་བྱེད་པར་གསུངས་སོ། །སྨིན་མའི་དབུས་ཀྱི་རླུང་གི་འཁོར་ལོའི་རྩ་མདུད་དབུ་མར་
6-4-75a


ཞུགས་པའི་རླུང་གིས་ཕྱེ་ནས་ཨ་བ་དྷཱུ་ཏཱི་གཅིག་པུའི་རྒྱུན་ཏེ་ལམ་ལ་རླུང་གནས་པར་འགྱུར་རོ། །དེ་ཐོབ་པ་ན་ཐོབ་པ་དེས་བྱས་པ་སྟེ་དེས་བསྐྱེད་པའི་དགའ་བའམ་བདེ་བ་ཆེན་པོ་ནི་རྒྱུན་དུ་འཆར་ཞིང་མི་ཟད་པ་འབྱུང་ཞེས་པས་བདེ་བ་སྐྱེས་པ་དེ་
བརྟན་པར་གསུངས་སོ། །ཆགས་སོགས་ནི་རྒྱུད་འདིའི་ལེའུ་གསུམ་པར་བཤད་པའི་དུག་གསུམ་ལ་སོགས་པའི་རྟོག་པ་བརྒྱ་རྩ་བརྒྱད་དེ། །དེ་རྣམས་ཞི་བ་དང་རྣལ་འབྱོར་པ་རང་གིས་རིག་གི་གཞན་གྱིས་མི་རིག་པའི་བདེ་བ་ཆེན་པོ་ལྷན་ཅིག་སྐྱེས་པའི་དགའ་
བ་འཆར་རོ། །རྡོར་བཟླས་ཀྱིས་རླུང་དབུ་མར་བཅུག་པས་བདེ་བ་ཆེན་པོ་སྐྱེ་བའི་བདེ་བ་ནི། སྤྱི་བོའི་བྱང་ཆུབ་ཀྱི་སེམས་ཞུ་བའི་བདེ་བ་ཡིན་ལ། དེ་འཇུ་བ་ལ་ལྟེ་བའི་གཏུམ་མོའི་མེ་འབར་དགོས་པས་རླུང་དབུ་མར་ཞུགས་པས་མེ་སྦོར་ལུགས་ཇི་ལྟར་ཡིན་
སྙམ་ན། འདི་ནི་གནད་ཤིན་ཏུ་ཆེ་སྟེ། འདི་མ་ཤེས་ན་རྡོར་བཟླས་ཀྱིས་དགའ་བ་བཞི་ཞེས་པའམ་སྟོང་བ་བཞིའི་ཡེ་ཤེས་བསྐྱེད་ཚུལ་མི་ཤེས་པས། རྡོར་བཟླས་ཀྱིས་སེམས་དབེན་གྱི་ཡེ་ཤེས་བསྐྱེད་པའི་གོ་རིམ་ལ་ངེས་པ་མི་རྙེད་དེ། །དེའི་ཕྱིར་
ཐོག་མར་རྡར་བཟླས་ཀྱིས་གཏུམ་མོ་སྦོར་བ་དང་དེས་ཀུན་རྟོག་ཐམས་ཅད་འཇོམས་པར་བཤད་པ་ནི། རྡོར་ཕྲེང་ལས། གང་ཕྱིར་མཁའ་འགྲོ་རྣམས་སྡུད་པ། །དེ་ཕྱིར་བསྡུས་པའི་མཁའ་འགྲོར་བརྗོད། །ལྟེ་བའི་དབུས་ན་རྟག་བཞུགས་པ། །ཉི་མ་
སྟོང་དང་མཚུངས་པའོ། །ཡེ་ཤེས་ཆེན་པོའི་མེ་འབྱུང་བས། །ཀུན་རྟོག་ཐམས་ཅད་འཇོམས་པར་བྱེད། །འཆར་བས་ཕུང་པོའི་རྣམ་རྟོག་ནི། །བསྲེག་བྱས་བར་ཆད་མེད་པའི་ལུས། །དེ་རྗེས་ཁམས་ཀྱི་རྣམ་རྟོག་ནི། །བསྡུས་ནས་སླར་ཡང་རང་
6-4-75b


བཞིན་གྱིས། །གཟུང་དང་འཛིན་པའི་རྣམ་རྟོག་ནི། །དེ་རྗེས་དེ་ན་སླར་ཡང་སྡུད། །དེ་ལྟར་གང་ལ་ཕྱེ་ལེབ་བཞིན། །འཆིང་བ་ཐམས་ཅད་སྲེག་པར་བྱེད། །རླུང་གི་དེ་ཉིད་མངོན་སྦྱོར་བས། །སྔགས་ཀྱི་དེ་ཉིད་རིག་པ་ཡིས། །རྣམ་པར་རྟོག་པ་ཙམ་ཡང་ནི། །བསྲེག་
པ་ཙམ་དུ་ཐེ་ཚོམ་མེད། །ཅེས་གསུངས་པ་ལྟར་རོ། །དེ་ལ་རྐང་པ་དང་པོ་བཞིས་ལྟེ་བ་ན་གནས་པའི་གཏུམ་མོའི་ངོ་བོ་བསྟན་ཏོ། །དེ་ནས་གཉིས་ཀྱིས་དེ་འབར་བས་རྣམ་རྟོག་འཇོམས་པ་སྤྱིར་བསྟན་ལ། དེ་ནས་གཉིས་དང་ཕྱེད་དང་གཉིས་དང་ཕྱེད་གསུམ་གྱིས་
རིམ་པ་བཞིན་དུ་ཕུང་པོ་དང་ཁམས་དང་གཟུང་འཛིན་གྱི་རྣམ་རྟོག་སྦུད་པར་གསུངས་སོ། །བར་ཆད་མེད་པ་ནི་ཡང་དང་ཡང་དུའམ་རྒྱུན་དུའི་དོན་ཡིན་ལ་ལུས་ནི་ལུས་ལ་བསྲེགས་ཞེས་པའོ། །འགྲེལ་པས་ཕུང་པོ་ནི་སངས་རྒྱས་ལྔའི་ས་བོན་དང་། །ཁམས་ནི་
ཡུམ་བཞིའི་ས་བོན་དང་། གཟུང་འཛིན་ནི་སྤྲུལ་པ་དང་ལོངས་སྤྱོད་ཀྱི་འཁོར་ལོར་གནས་པའི་རྣམ་རྟོག་གམ། ཡང་ན་རྩ་གཡོན་པ་དང་གཡས་པ་ལ་བཀོད་པའི་ཡི་གེའོ། །ཞེས་འཆད་དོ། །དེ་ལྟར་ཞེས་པ་གཉིས་ནི་རྣམ་རྟོག་བསྲེག་པའི་དཔེ་དོན་སྦྱོར་བའོ། །
དེ་ནས་གཉིས་ཀྱིས་ནི་གཏུམ་མོ་སྦར་ནས་རྣམ་རྟོག་བསྲེག་པ་རླུང་གི་དེ་ཉིད་ལྡང་འཇུག་གནས་པ་དང་། སྔགས་ཀྱི་དེ་ཉིད་ཡི་གེ་གསུམ་སྦྱོར་བ་རིག་པ་ཡིས་བྱེད་པར་བཤད་དེ། དེས་ནི་རྣམ་རྟོག་ཕྲ་བ་ཡང་སྲེག་པར་ཐེ་ཚོམ་མེད་པར་གསུངས་སོ། །འགྲེལ་
པར་སྔགས་ཀྱི་གཟུགས་ཀྱི་རིམ་པ་ཡིས། །ཞེས་བཏོན་ནས་བསྐྱེད་རིམ་སྒོམ་པ་སྔོན་དུ་འགྲོ་བ་ལ་བཤད་དེ། རྒྱ་གར་གྱི་དཔེ་ལ་མི་འདྲ་བ་མང་པོ་ཡོད་པར་མངོན་ཡང་། འགྱུར་སྔ་མ་ལྟར་ལེགས་སོ། །ཡང་དེ་ཉིད་ལས། རླུང་གི་དེ་ཉིད་ཡང་དག་བརྟེན། །
6-4-76a


ཡི་གེ་ཧཱུཾ་གིས་བསྐུལ་ནས་ནི། །མེ་ཡི་འཁོར་ལོ་རབ་སད་བྱེད། །ཅེས་རླུང་གི་དེ་ཁོ་ན་ཉིད་ལ་བརྟེན་པའི་སྔགས་ཀྱི་དེ་ཁོ་ན་ཉིད་ཀྱིས་བསྐུལ་ནས་མེའི་འཁོར་ལོ་སྟེ་གཏུམ་མོ་རབ་ཏུ་སད་པར་བྱེད་པར་གསུངས་ཏེ། ཧཱུཾ་ཡིག་ནི་མཚོན་པ་
ཙམ་མོ། །སྤྱིར་ལྟེ་བའི་གཏུམ་མོ་སྦར་ནས་བྱང་སེམས་བཞུགས་པའི་མཐུས་རྣམ་རྟོག་སྤོང་བར་བྱེད་པ་ལ། ལུས་ལ་གནད་དུ་བསྣུན་པའི་རྫོགས་རིམ་ཁུངས་ཐུབ་ཐམས་ཅད་མཐུན་ཡང་། གཏུམ་མོ་སྦོར་ལུགས་ལ་མི་འདྲ་བ་མང་པོ་གསུངས་ཏེ། ཁ་ཅིག་
ལས་འབར་འཛག་གི་དམིགས་པ་བསྒོམས་ནས་བྱེད། ཁ་ཅིག་ལས་བུམ་པ་ཅན་བསྒོམས་ནས་བྱེད། ཁ་ཅིག་ལས་ལུས་ཀྱི་གནད་རྣམས་སུ་ཡི་གེ་དང་ཐིག་ལེ་བསྒོམས་ནས་བྱེད་པ་སོགས་བཤད་པའི་གནད་ཀྱིས། རྒྱུད་སོ་སོ་དང་དེའི་དགོངས་
འགྲེལ་སོ་སོས་གང་རྩལ་དུ་བཏོན་ནས་འཆད་པ་མི་འདྲ་བ་མང་པོ་ཡོད་པ་ལས། མགོན་པོ་ཀླུ་སྒྲུབ་ཀྱིས་གཞན་རྣམས་མ་བཤད་པར་རླུང་གི་རྣལ་འབྱོར་རྡོ་རྗེའི་བཟླས་པ་ཉིད་ལ་རྩལ་དུ་བཏོན་ནས་འཆད་པས་འདི་ཉིད་ཀྱིས་གཏུམ་མོ་སྦར་ནས་བྱང་
སེམས་བཞུས་ཏེ་དགའ་བ་བཞི་དང་སྟོང་པ་བཞི་ཞེས་བཤད་པའི་ཡེ་ཤེས་རྣམས་བསྐྱེད་ནས་འོད་གསལ་དུ་འཇུག་ཚུལ་སྟོན་པ་ཡིན་ནོ། །དེས་ན་གདམས་ངག་དེར་དངོས་སུ་འབར་འཛག་གི་དམིགས་པ་མ་བཤད་ཀྱང་མཐར་གཏུམ་མོ་འབར་ནས་
བྱང་སེམས་བཞུ་བ་ལ་འཇུག་པ་ཡིན་པས། འབར་འཛག་གི་དམིགས་པ་ཡོད་པ་རྣམས་ཀྱི་ལྟར་ན་གཏུམ་མོ་ལམ་དུ་བྱེད་ལ། མ་བཤད་པ་རྣམས་ཀྱི་ལྟར་ན་གཏུམ་མོ་ལམ་དུ་བྱེད་པ་མིན་ནོ་སྙམ་ན་མི་བཟུང་སྟེ། བདེ་བ་ཆེན་པོའི་ཡེ་ཤེས་བསྐྱེད་
6-4-76b


ནས་བདེ་སྟོང་དབྱེར་མེད་དུ་སྦྱར་ཏེ་ལམ་བགྲོད་པར་མཐུན་ཞིང་། དེའི་བདེ་བ་ནི་བྱང་སེམས་ཞུ་བའི་བདེ་བ་ཡིན་ལ། དེ་ཞུ་བ་ནི་གཏུམ་མོ་འབར་བ་ཁོ་ནས་སྒྲུབ་པའི་ཕྱིར་རོ། །དེ་ནི་གཏུམ་མོའི་མེ་གང་གིས་སྦོར་བ་བཤད་པར་བྱ་སྟེ། སཾ་བྷུ་ཊ་དང་རྡོ་རྗེ་
མཁའ་འགྲོ་ལས། ལས་ཀྱི་རླུང་གིས་བསྐུལ་བ་ཡིས། །ལྟེ་བའི་དཀྱིལ་འཁོར་དུ་ནི་འབར། །ཞེས་རླུང་གིས་གཏུམ་མོ་སྦོར་བར་གསུངས་སོ། །དེ་ཡང་ཞལ་ལུང་ལས། གསང་གནས་ཀྱི་རླུང་གཡོས་པས་མེ་སྦོར་བར་གསུངས་སོ། །གཏུམ་མོ་ཐོག་མར་
འབར་བའི་གནས་ནི་ལྟེ་བར་ཨ་ཐུང་དང་། སུམ་མདོར་གནས་པའི་ཀྵ་ཡིག་ཚངས་པའི་མེར་གསུངས་པས་དེ་ནས་འབར་བ་ཡིན་གྱིས་གནས་གཞན་ནས་མིན་པས་གསང་གནས་ཀྱི་རླུང་གིས་སྦོར་བར་བཤད་དོ། །དེ་ཡང་དབུ་མ་ནས་རྒྱུ་བ་གཅིག་ཡིན་ཏེ། །
རྡོར་ཕྲེང་ལས། དབུས་སུ་རླུང་རྒྱུ་བ། མེ་སད་བྱེད་པར་ཤེས་པར་བྱ། །ཞེས་དབུ་མ་ནས་རྒྱུ་བའི་རླུང་གིས་གཏུམ་མོའི་མེ་སད་པར་བྱེད་པར་གསུངས་སོ། །ལས་ཀྱི་རླུང་གིས་བསྐུལ་བ་ཡིས། །ཞེས་པའི་དོན་མན་སྙེར་ལས་ཀྱིས་བསྐུལ་བའི་རླུང་གིས་
ཞེས་པར་བཀྲལ་ཞིང་། བསྐུལ་བའི་ལས་ཀྱང་དབང་པོ་གཉིས་སྦྱོར་བའི་བྱ་བའི་ལས་དང་། བསྒོམ་པའི་བྱ་བའི་ལས་གཉིས་ལ་བཤད་པ་ལྟར་ལེགས་སོ། །དེ་ལ་དབང་པོ་གཉིས་སྦྱོར་གྱིས་ལས་ཀྱིས་མེ་སད་བྱེད་ཀྱི་རླུང་བསྐུལ་ལུགས་དང་། 
དེས་སྦར་བའི་མེས་རྩ་གནས་ནས་ཁམས་བཞུ་ཚུལ་དང་། དེ་ལ་བརྟེན་ནས་བདེ་བ་སྐྱེ་ལུགས་ནི་རྡོར་ཕྲེང་ལས་འདུས་པ་ཞེས་པའི་ཚིག་གི་དོན་གསུངས་པའི་གནས་ནས། དབའ་བོ་རྣལ་འབྱོར་མ་སྦྱོར་བ། །གང་ཚེ་གསང་བའི་རྩ་གཉིས་ནི། །ཡང་
6-4-77a


དག་སྦྱར་བས་རེག་གྱུར་བ། །དེ་ཚེ་ནམ་མཁར་རྣམ་རྒྱས་ཉིད། །ནམ་མཁའ་ལས་ནི་སྐྱེས་བའི་རླུང་། །དེ་ཡིས་མེ་ནི་རབ་ཏུ་འབར། །རྩ་ནི་སྟོང་ཕྲག་བདུན་ཅུ་གཉིས། །རྩ་རྣམས་རབ་སད་མེ་དེ་ཡིས། །བདེ་བ་ཀུན་གྱི་གོ་འཕང་མཆོག །བདེ་བ་ཆེན་པོ་བྱང་ཆུབ་
སེམས། །རྣམ་པ་ཞུ་ནས་རྩར་གནས་པ། །རྡོར་གསུམ་རང་བཞིན་གཅིག་གྱུར་ཕྱིར། །ཁམས་རྣམས་རོ་གཅིག་གྱུར་པ་དང་། །ཕུང་པོ་རྣམས་ནི་ཡོངས་ཟད་དང་། །ངལ་བསོ་བ་ལས་རླུང་རྣམས་ནི། །དགའ་བ་རྣམས་ནི་ཡང་དག་སྐྱེ། །ཞེས་གསུངས་སོ། །དེ་ལ་
ཡབ་ཀྱི་གསང་གནས་ཀྱི་རྩ་ཨ་བ་དྷཱུ་ཏཱིའི་མར་སྣ་དང་། ཡུམ་གྱི་གསང་གནས་ཀྱི་རྩ་མཁའ་འགྲོ་གདོང་གི་མར་སྣ་གཉིས་ཕྲད་པའི་ཚེ། རྩ་དེ་གཉིས་ཀྱི་ཁོང་སྟོང་གི་ནམ་མཁའ་རྒྱས་པར་འགྱུར་རོ། །རྩ་སྦུབས་ཀྱི་ནམ་མཁའ་རྒྱས་པ་དེ་ལས་ནི་དེའི་ནང་དུ་རླུང་
གསར་དུ་སྐྱེ་བར་འགྱུར་ཏེ། དེ་ནི་མེ་སད་ཀྱི་རླུང་དབང་པོ་གཉིས་སྦྱོར་གྱི་བྱ་བས་བསྐུལ་བ་སྟེ་ལྷག་མ་ནི་གོ་སླའོ། །འགྲེལ་པས། རྣལ་འབྱོར་མའི་ལྟེ་བའི་དབུས་ཀྱི་ཨ་ཡིག་གི་དབྱུག་པ་བཅག་པས་དེའི་ནམ་མཁའ་རྒྱས་པ་ལ་འཆད་དེ། དོན་དུ་མ་མཐོང་
ངོ་། །འོ་ན་ལས་དང་པོས་བསྐུལ་ཚུལ་དེ་ལྟ་ཡིན་ན། བསྒོམས་པའི་ལས་ཀྱིས་བསྐུལ་ཚུལ་ཇི་ལྟར་ཞེ་ན། རྡོར་བཟླས་ལ་སོགས་པའི་རླུང་བསྒོམ་པ་ལ་སོགས་པའི་བྱ་བས་ཀྱང་ཨ་བ་དྷཱུ་ཏཱིའི་ནང་དུ་རླུང་ཞུགས་པར་བྱས་པས་རྩ་དེའི་ནམ་མཁའ་རྒྱས་པར་
འགྱུར་ལ། དེ་ལས་མེ་སད་བྱེད་ཀྱི་རླུང་སྐྱེ་ཞིང་དེས་ནི་མེ་སྦོར་ལ་དེས་ཀྱང་ཁམས་ཞུ་བར་བྱེད་དོ། །འདི་ལ་གཞུང་གཞན་ལས་མེ་གཏུམ་མོ་འབར་བས་ཁམས་ཞུ་བ་ལ་བརྟེན་ནས་དགའ་བ་བཞི་སྐྱེ་བའི་རིམ་པའི་སྒོ་ནས་ལྷན་སྐྱེས་ལེགས་པར་ངོས་
6-4-77b


ཟིན་པར་བྱས་ནས། དེ་ཉིད་ཀྱི་རྒྱུན་སྐྱོང་བ་ཉིད་ཀྱིས་ལམ་བགྲོད་པ་ཙམ་ཞིག་འཆད་ལ། འཕགས་པ་ཡབ་སྲས་ཀྱི་གཞུང་ལས་ནི་གཏུམ་མོ་འབར་བ་ལ་བརྟེན་ནས་བྱང་སེམས་བཞུས་པའི་མཐུས་ས་ཆུ་ལ་ཐིམ་པ་ལ་སོགས་པའི་ཐིམ་རིམ་གྱི་སྒོ་ནས་
སྟོང་པ་གསུམ་གྱི་ཡེ་ཤེས་བསྐྱེད་ནས་འོད་གསལ་དུ་འཇུག་ཚུལ་གཙོ་བོ་འཆད་པས། སྟོན་ཚུལ་ཅུང་མི་འདྲ་སྟེ། འདིའི་རྒྱུ་མཚན་གནད་ཆེ་བས་ལེགས་པར་ཤེས་པར་བྱའོ། །གསུམ་པ་ནི། རྒྱུད་རྡོར་ཕྲེང་ལས། འདིར་ནི་རྒྱུ་མཚན་བཤད་པར་བྱ། །
སྔགས་གྲུབ་པ་ཡི་རྣལ་འབྱོར་བས། །འདར་དང་རྡུལ་དང་བ་སྦུ་ལངས། །རྟག་ཏུ་དགའ་བའི་བསམ་པ་དང་། །གདོང་ནི་ཟངས་མདོག་ཡིད་དུ་འོང་། །ཀུན་གྱིས་མཐོང་ན་དགའ་བ་དང་། །གྲང་ལྷག་ཆད་པ་ལ་སོགས་དང་། །འཇིག་རྟེན་ཆོས་དང་དེ་བཞིན་
གཞན། །རྣལ་འབྱོར་སྔགས་ཀྱི་དེ་ཉིད་ནི། །གནོད་པ་ཉིད་དུ་མི་འགྱུར་རོ། །ཞེས་སོ། །སྔར་རང་རིག་བདེ་བ་ཆེན་པོ་ཡི། །ཞེས་བཤད་པ་དེའི་རྒྱུ་མཚན་ཏེ་རྟགས་འདིར་ནི་བཤད་པར་བྱ་ཞེས་བྱའོ། །སྔགས་གྲུབ་པ་ནི་རྡོར་བཟླས་མཐར་ཕྱིན་པའོ། །གདོང་ནི་
བྱད་བཞིན་ནོ། །ཟངས་མདོག་ནི་ཟངས་དང་འདྲ་བར་འབར་བའོ། །གྲང་བ་དང་ལྷག་པར་ཚ་བ་ལ་སོགས་པ་དང་། འཇིག་རྟེན་ཆོས་བརྒྱད་དང་། དེ་ལས་གཞན་པའི་རྗེས་སུ་ཆགས་པ་དང་ཁོང་ཁྲོ་བའི་རྒྱུ་རྣམས་ཀྱིས་ཀྱང་སྔགས་ཀྱི་དེ་ཉིད་བསྒོམ་པ་ལ་
གནོད་པར་མི་འགྱུར་རོ། །འདི་ནི་སྤྱོད་བསྡུས་ལས་ཀྱང་རྒྱས་པར་གསུངས་སོ། །གཉིས་པ་ནི། རླུང་དགུ་བརྒྱ་རེ་ལ་ལྷ་མོ་བཞིའི་རླུང་གི་སྦྱོར་བ་བཞིར་བྱེད་པའི་ནང་གི་བདག་ཉིད་ཀྱི་དུས་འདི་ཉིད་གསལ་བར་བྱེད་པ་ནི་འདུས་པའི་རྒྱུད་ཕྱི་མར་གསུངས་
6-4-78a


སོ་ཞེས་བྱའོ། །ཇི་ལྟར་ཞེ་ན། རིག་པ་རིག་མ་གཉིས་རྣམ་གྲངས་པར་མང་དུ་བཤད་པས་རིག་པ་སྟེ་ཤེས་རབ་ལྷ་མོའི་ཆོ་ག་སྟེ་རླུང་གི་སྦྱོར་བ་འདི་ཡིས་ནི་ཐུན་ཏེ་མེ་ལ་སོགས་པའི་དཀྱིལ་འཁོར་བཞིར་རབ་ཏུ་སྦྱོར་བ་ལས། སྔགས་
ཏེ་རྡོར་བཟླས་ཀྱི་ཡན་ལག་མ་ཉམས་པའི་ངང་ནས་སྔགས་ཏེ་བཟླས་པར་བྱའོ། །བཟླས་ཚུལ་ནི་ཡི་གེ་གསུམ་གྱི་གྲངས་ཀྱི་རླུང་གསུམ་མཚོན་པར་བྱ་བ་སྟེ་དེའི་ངོ་བོར་ཤེས་པར་བྱས་ལ་བཟླའོ། །ལཀྵྨཱིས། སྟོང་པ་བཞི་གང་གིས་རིག་པར་འགྱུར་བ་
ནི་རིག་པ་སྟེ་གོས་དཀར་མོ་ལ་སོགས་པའོ། །དེ་རྣམས་གང་དུ་སྦྱོར་བ་ནི་དེའི་ཆོ་ག་སྟེ་དཀྱིལ་འཁོར་བཞིའོ། །དེ་རྣམས་ཀྱི་འཇུག་པ་ལ་སོགས་པའི་རིམ་པས་སྔགས་ཡི་གེ་གསུམ་བཟླ་བར་བྱའོ། །དེ་བཞིན་དུ་ཐུན་མཚམས་བཞི་ནི་དཀྱིལ་འཁོར་
བཞི་ཁོ་ན་སྟེ། དེ་རྣམས་ཀྱི་སྦྱོར་བ་ནི་སྣ་གཡས་པ་ལ་སོགས་པའི་དབྱེ་བས་འོད་ཟེར་འབྱུང་བའི་རིམ་པ་སྟེ་དེ་ལའོ། །ཡང་ན་ཐུན་མཚམས་བཞི་ནི་ཉིན་མཚན་གྱི་ནང་གི་དུས་ཀྱི་རིམ་པ་ལའོ། །ཇི་ལྟར་བཟླས་ན་མཚོན་བྱ་བྱེད་གྲངས་རྣམས་
ཀྱིས། །ཞེས་ཏེ་མཚོན་པར་བྱ་བ་ནི་ཁ་དོག་དམར་པོ་ལ་སོགས་པའི་འོད་ཟེར་རོ། །མཚོན་པར་བྱེད་པ་ནི་འཇུག་པ་ལ་སོགས་པའོ། །གྲངས་ནི་ཉིས་བརྒྱ་ཉེར་ལྔ་སོགས་སོ། །ཞེས་འཆད་དོ། །ཚིགས་བཅད་འདི་ད་ལྟ་འགྱུར་བའི་རྒྱུད་ཕྱི་མ་ལ་མི་
སྣང་ཞིང་། ནཱ་རོ་པས་ཀྱང་དེའི་འགྲེལ་པར་མ་བཤད་ཀྱང་། རྒྱུད་ལ་ཆད་པར་གསལ་ལོ། །གསུམ་པ་ནི། རྡོར་བཟླས་བསྒོམ་པའི་རྣལ་འབྱོར་པས་རྡོ་རྗེ་བཟླས་པ་བར་ཆད་ཅན་ཏེ་བར་ཆད་དུ་གྱུར་པའི་ཕྱི་རོལ་ངག་དང་ཡིད་ཀྱི་བཟླས་པར་སྤང་བར་བྱའོ། །
6-4-78b


སྔགས་དོན་ཞེས་པ་ལཀྵྨཱིས། སྔགས་ཀྱི་བཟླས་པ་ནི་རྡོ་རྗེ་ཅན་མངོན་དུ་བྱ་བའི་ཕྱིར་ཡིན་ལ། གལ་ཏེ་རྣལ་འབྱོར་པ་དེ་ཉིད་རྡོ་རྗེ་ཅན་གྱི་བདག་ཉིད་དུ་གྱུར་ན་རྡོ་རྗེའི་བཟླས་པའི་རང་བཞིན་གྱི་རྣལ་འབྱོར་པ་དེས་ཇི་ལྟར་ཟློས་པ་སྟེ་བཟླ་བར་བྱ་བ་མ་ཡིན་
ནོ། །བསྐྱེད་རིམ་པས་སྤངས་ན་ནི་དམ་ཚིག་ཉམས་པར་འགྱུར་རོ། །དེའི་དཔེ་བསྟན་པ་ནི་གླང་པོ་ཆེ་སྟོར་བ་འཚོལ་བ་པོས་གླང་པོ་དེ་རྙེད་ན་དེའི་རྗེས་མི་འཚོལ་ལོ། །དེ་བཞིན་དུ་སྔགས་ཀྱི་ལུས་རྡོ་རྗེ་འཆང་ཆེན་པོར་གྱུར་བ་དེ་ཡིས། །གཞན་དག་
གི་བཟླས་པ་སོགས་འཚོལ་བར་བྱེད་པ་མ་ཡིན་ནོ་ཞེས་འཆད་དོ། །འདི་ལྟར་རྟོགས་ཏེ་སྔགས་དོན་ནི་སྔགས་ཀྱི་དེ་ཁོ་ན་ཉིད་དེ། དེ་ཡང་བཅོམ་ལྡན་འདས་རྡོ་རྗེ་ཅན་ཏེ་རྡོ་རྗེ་འཆང་གི་སྐུ་གསུང་ཐུགས་རྡོ་རྗེའི་བདག་ཉིད་ཡི་གེ་གསུམ་རླུང་གསུམ་གྱི་ངོ་
བོར་བཟློས་པའོ། །དེ་རྙེད་ནས་ཕྱི་རོལ་གྱི་སྔགས་ཇི་ལྟར་ཟློ་བ་རིགས་ཏེ་མི་རིགས་སོ། །དེའི་དཔེ་ནི། གླང་པོ་ཞེས་པ་གཉིས་སོ། །དེ་དང་དོན་སྦྱོར་པ་ནི་སྔར་བཤད་པའི་སྔགས་ཀྱི་ལུས་རང་ཉིད་ལ་མངོན་དུ་གྱུར་ནས་ཡོད་པ་དེ་བཞག་ནས་ངག་གི་
བཟླས་པ་སོགས་ཚོལ་པར་བྱེད་དམ་སྟེ་མི་བྱེད་དོ། །གཞན་ཡང་རྡོ་རྗེ་འཛིན་པ་གང་ཞིག་རླུང་གི་སྦྱོར་བ་སྟེ་རྣལ་འབྱོར་གསུམ་ཤེས་པ་དང་ལྡན་པའི་མིས་ནི། ལྷ་སྤྱན་དྲང་བ་སྟེ་བོད་པ་དང་། ལས་སྒྲུབ་པ་ལ་གཤེགས་སུ་གསོལ་པ་སྟེ་བསྐུལ་བ་དང་། 
དེ་བཞིན་དུ་རང་གནས་སུ་བཞུགས་སུ་གསོལ་བ་བྱེད་པ་ཡང་བཟླས་པ་འདིས་འགྲུབ་སྟེ། རླུང་ནང་དུ་འཇུག་པ་ཡིས་ནི་སྤྱན་དྲང་བ་དང་། མྱུར་བ་སྟེ་ཕྱིར་ལྡང་བ་ཡིས་ནི་གཤེགས་སུ་གསོལ་བ་དང་། ལྡང་འཇུག་གཉིས་ཀ་མིན་པ་ནང་དུ་གནས་པ་
6-4-79a


ཡིས་བཞུགས་སུ་གསོལ་བར་བྱེད་པའི་ཕྱིར་རོ། །དབུགས་མེད་དངོས་གྲུབ་བླ་མེད་པའོ། །ཞེས་པ་འདོན་པ་ལྟར་ན་ལཀྵྨཱིས་འབྱུང་འཇུག་གི་དབུགས་ལ་སོགས་པ་དང་བྲལ་བའི་མ་ནིང་གི་བཟླས་པས་དངོས་གྲུབ་མཆོག་འགྲུབ་པར་བཤད་
ལ། སྣ་ཚོགས་གནས་པས་དངོས་གྲུབ་མཆོག །ཅེས་པ་ལྟར་ན་འབྱུང་འཇུག་ཚོགས་པ་དེ་ཉེ་བར་གནས་ནང་དུ་གནས་ན་དངོས་གྲུབ་མཆོག་འགྲུབ་བོ་ཞེས་བྱའོ། །འབྱུང་བ་ནི་རླུང་ཕྱིར་ལྡང་བའོ། །རྣམ་སྡུད་ནི་ནང་དུ་རྔུབ་པའོ། །གཉིས་ཀ་མིན་པ་ནི་
གནས་པའོ། །སྔགས་སྦྱོར་བ་ནི་རླུང་ཡི་གེ་གསུམ་གྱི་ངོ་བོ་ཟློས་པའོ། །རྣ་བར་བརྗོད་ཅེས་པ་ལ་རླུང་ཞེས་ཁྱད་པར་སྨོས་པ་ནི་གསང་བར་བྱ་བའི་དོན་ནོ། །རླུང་སྔགས་སྦྱོར་ཚུལ་ཇི་ལྟར་ཞེ་ན། དེས་རྣལ་འབྱོར་གྱི་དབང་ཕྱུག་རྫོགས་རིམ་པའི་གསང་
བ་སྟེ་ནང་གི་ཡི་གེ་གསུམ་རླུང་དང་སྦྱོར་བ་བཤད་པར་བྱའོ་ཞེས་སྦྱར་རོ། །དེའང་རྡོ་རྗེ་འཆང་སྒྲུབ་པའི་ཐབས་ཀྱི་དམ་པ་སྟེ་མཆོག་རྣལ་འབྱོར་ཏིང་ངེ་འཛིན་གྱི་འབྲས་བུ་དངོས་གྲུབ་སྟེར་བའོ། །དེ་ཉིད་བཤད་པ་ནི་སྔགས་གང་ཞིག་ལ་བསམས་པ་
ཙམ་གྱིས་ནི་སྔགས་ཟློ་བའི་རྣལ་འབྱོར་ཅན་དེ་རྣལ་འབྱོར་བ་ལ་མཆོག་སྟེར་བར་འགྱུར་བའོ། །ཙམ་གྱི་སྒྲས་ཕྱིའི་ཡི་གེ་ལ་བལྟོས་བ་གཅོད་དོ། །སྔགས་ཕལ་ཆེ་བའི་དང་པོར་སྦྱོར་བས་ན་དང་པོའི་ཡི་གེ་ཨོཾ་མོ། །དེའི་སྦྱོར་བ་ན་རྣལ་འབྱོར་གྱིས་
རྟག་ཏུ་དབུགས་ནི་རྔུབ་པར་བྱ་ཞེས་གསུངས་ཏེ། དབུགས་རྔུབ་པ་ན་ཨོཾ་ཡིག་གི་གདངས་ཀྱིས་རྔུབ་པའོ། །ཀཱ་ལིའི་སྡེ་ཚན་བརྒྱད་པ་ནི་ཤ་ཥ་ས་ཧའོ། །དེའི་མཐའ་ནི་ཧའོ། །ཡི་གེ་ཨུ་ནི་ཐིག་ལེར་བཅས་པ་ས་ཧ་དེ་དང་ལྡན་པར་བྱས་པས་ཧཱུཾ་ངོ་། །
6-4-79b


དེས་ནི་རྣལ་འབྱོར་པས་དབུགས་གཏོང་བར་བྱེད་དོ། །དེ་ལྟ་བུ་འདི་ནི་ཅི་དགའ་བའི་བཟླས་པ་སྟེ་ལྷུན་གྱིས་གྲུབ་པའི་བཟླས་པར་བཤད་དེ་དེ་གཉིས་ཀྱིས་རླུང་གནས་པ་ཨའི་རང་བཞིན་དུ་བྱེད་པའང་མཚོན་ནོ། །འདི་ལ་ལཀྵྨཱིས། གསང་བའི་ཡི་གེ་གང་
ཞིག་མགྲིན་པ་དང་། །སྙིང་ག་དང་ལྟེ་བ་དང་གསང་གནས་སུ་བསམས་པ་སྟེ་དྲན་པ་ཙམ་གྱིས་རྣལ་འབྱོར་བ་རྣམས་ཀྱིས། སེམས་ཅན་ལ་མཆོག་སྟེ་འདོད་པའི་དོན་སྟེར་བར་འགྱུར་རོ། །དེ་བཤད་པ་ནི་ལྟེ་བར་རྩིབས་བརྒྱད་པའི་ཆོས་ཀྱི་འཁོར་ལོའི་
དབུས་སུ་མར་མེ་ལྟར་འབར་བའི་ཡི་གེ་དབྱངས་ཀྱི་དང་པོ་ཨའི་སྦྱོར་བ་སྟེ། དེ་ལ་རྩེ་གཅིག་པའི་ཏིང་ངེ་འཛིན་གྱིས་དབུགས་ཏེ་དབྱངས་གསལ་གྱི་རང་བཞིན་གྱི་སངས་རྒྱས་རྣམས་སྡུད་པའི་ཡི་གེ་གསུམ་རྟག་ཏུ་སྤྲོ་བར་བྱའོ། །རྟག་ཏུ་དབུགས་ནི་སྤྲོས་
པ་ཡིས། །ཞེས་འདོན་ནོ། །སྔགས་ཀྱི་རང་བཞིན་ནི་འོད་གསལ་གྱི་ཨ་ཡིག་དེ་ལས་འབྱུང་ཞིང་དེར་ཐིམ་པ་སྟེ་ནམ་མཁའ་ལ་སྤྲིན་བཞིན་ནོ། །དེ་ལས་མེ་སྟག་གི་ཚུལ་དུ་ཡི་གེ་གསུམ་བྱུང་སྟེ་སྐུ་དང་གསུང་གཉིས་ཐུགས་ལ་བསྡུས་ནས་གསང་
བའི་ཡི་གེ་དཀྱིལ་འཁོར་བཞི་ལ་མོས་པར་བྱའོ། །དེ་ལ་ཧ་མགོ་མེད་ནི་སྙིང་ག་དང་། མགོ་བོ་ནི་མགྲིན་པ་དང་། སྒྲ་ནི་ཨུ་སྟེ་ལྟེ་བ་དང་། སྒྲའི་མཐའ་ནི་ཐིག་ལེ་གསང་བའི་པདྨ་གནས་སོ། །དེའི་དང་པོ་ནི་རླུང་ལྡང་བ་དང་། གཉིས་པ་ནི་རླུང་གནས་པ་དང་། 
གསུམ་པ་ནི་རླུང་ནང་དུ་འཇུག་པ་དང་། བཞི་པ་དེ་ཐམས་ཅད་བསྡུས་པ་དབུགས་དང་བྲལ་བ་བསྟན་ཏེ། གསང་བའི་ཡི་གེ་གཅིག་པུས་ལྡང་བ་སོགས་དང་། འོད་གསལ་གྱི་བར་གྱི་ཏིང་ངེ་འཛིན་བསྟན་ཏོ། །ལྷ་མོ་བཞིས་ཞུས་ལས། མགོ་མེད་
6-4-80a


སྙིང་གའི་པདྨར་གནས། །ཁ་ཡི་པདྨར་མགོ་བོ་གནས། །ལྟེ་བའི་པདྨར་སྒྲ་གནས་ཏེ། །སྒྲ་མཐའ་གསང་བའི་པདྨ་ལའོ། །འགྲོ་དང་འོང་བར་བྱེད་པ་འདི། །ཐིག་ལེའི་རྣལ་འབྱོར་རབ་ཏུ་འཇུག །ཅེས་གསུངས་པའི་ཕྱིར་རོ། །དེ་
ཉིད་བཏུ་བ་ནི། བརྒྱད་བའི་མཐའ་ཞེས་པ་གཉིས་ཏེ། ཡི་གེ་འདི་ཉིད་ཀྱིས་འཇུག་ལྡང་གནས་པ་གསུམ་རྣལ་འབྱོར་པས་བྱེད་པ་ནི། ཅི་དགའ་བ་སྟེ་མོས་པའི་དབང་གིས་བཟླས་པར་བཤད་དེ། དེ་ལྟ་ན་ལྡང་བའི་རླུང་ཁོ་ནས་བཟླས་ཀྱི་གཞན་གཉིས་མ་
ཡིན་ནོ་ཞེ་ན། ཉིན་མཚན་གྱི་རླུང་རྣམས་རླུང་གསུམ་ལས་མི་འདའ་ལ། དེ་ལ་རྣལ་འབྱོར་པའི་མོས་པའི་དབང་གིས་ཡི་གེ་གཅིག་ལ་དམིགས་ནས་བྱེད་ན་ཡི་གེ་གཞན་མི་དགོས་ཏེ་དེའི་ཕྱིར་ཅི་དགའ་བའི་བཟླས་པར་བཤད་དོ། །ཡང་ན་ཧཱུཾ་ཡིག་
གཅིག་པུ་ལའང་ཆ་བྱེ་བ་ལ་དམིགས་ནས་འཇུག་པ་སོགས་བྱེད་པས་གྲངས་ལ་འགལ་བ་མེད་དོ་ཞེས་འཆད་དོ། །འདི་ལ་རྒྱ་དཔེ་ལ་རྟག་ཏུ་དབུགས་ནི་རྔུབ་པར་བྱེད། །ཅེས་པ་དང་། རྟག་ཏུ་དབུགས་ནི་སྤྲོ་པར་བྱེད། །ཅེས་པ་གཉིས་ཀ་ཡོད་པར་སྣང་
ནའང་། །གཉིས་ཀ་མིན་དང་སྔགས་སྦྱོར་བ། །ཞེས་གསུངས་བའི་དོན་འཆད་པར་སྣང་ལ། དེ་ནི་རྡོ་རྗེ་གསུམ་གྱི་སྔགས་དང་སྦྱོར་བར་རྣམ་གཞག་རིམ་པ་ལས་གསལ་བས། དང་པོའི་ཡི་གེ་ཨོཾ་ཀྱཻ་རྡོར་ལས་སྔགས་ཐམས་ཅད་ཀྱི་དང་པོ་དང་ཞེས་
གསུངས་པ་ལྟར་བྱས་ནས། རྟག་ཏུ་དབུགས་ནི་རྔུབ་པར་བྱེད། །ཞེས་གསུངས་པ་བཞིན་དུ་བྱས་ན་ལེགས་པ་འདྲའོ། །ཉིན་ཞག་གཅིག་གི་བཟླས་པའི་གྲངས་ནི་ཁྲི་ཕྲག་གཉིས་དང་ཞེས་པ་བཞིའོ། །ལཀྵྨཱིས་གསང་བའི་དགོངས་པ་སྟེ་དགོངས་
6-4-80b


པ་ལུང་སྟོན་པའི་རྒྱུད་དེ་རུ་ཕྲ་མོའི་རྣལ་འབྱོར་ཏེ་རླུང་སྔགས་ཀྱི་དེ་ཁོ་ན་ཉིད་ཀྱི་བདག་ཉིད་གསང་བའི་ཡི་གེ་སྟོན་པས་བཤད་དོ། །དེ་ལ་སྔགས་ཀྱི་སྐུ་ལ་སེམས་པ་སོགས་ཀྱི་བསམ་གཏན་དང་ཁ་ཏོན་ཏེ་ངག་གི་བཟླས་པ་མེད་མོད་ཀྱང་། ཕྲ་མོའི་རྣལ་འབྱོར་
རང་བཞིན་གྱིས་གྲུབ་པའི་ཕྱིར་བཟླས་པར་བཤད་པ་ཡིན་ནོ། །ཞེས་བཤད་དོ། །ཡང་ན་གསང་བའི་ཡི་གེའི་བཟླས་པ་དེ་འདུས་པ་འདིར་གསུངས་པའི་ཕྲ་མོའི་རྣལ་འབྱོར་གྱི་དོན་ཡིན་པར་གསང་བའི་ཡི་གེའི་དགོངས་པ་ལུང་སྟོན་པའི་བཤད་རྒྱུད་
ཀྱིས་བཤད་པ་ཡིན་ནོ། །ཀློག་དང་ཁ་ཏོན་མེད་མོད་ཀྱི། །ཞེས་ཀྱང་འབྱུང་པ་ལྟར་ན་གོ་སླ་ལ། ཀློག་དང་བསམ་གཏན་ཞེས་འདོན་པ་ལྟར་ན་ཀློག་པ་ནི་ངག་ཏུ་བཏོན་པའི་བཟླས་པའོ། །བསམ་གཏན་ནི་ཡིད་ལ་སྔགས་བཟླས་པའོ། །རྡོར་བཟླས་ནི་རླུང་གི་
གདངས་ལ་དམིགས་ནས་ཡི་གེ་གསུམ་གྱི་གདངས་སུ་ཟློ་བ་ཡིན་པས་ཡི་གེ་གསུམ་ཙམ་ལ་དམིགས་ནས་ཡིད་བཟླས་བྱེད་པ་དང་མི་འདྲའོ། །འདུས་པའི་བཤད་རྒྱུད་དགོངས་པ་ལུང་སྟོན་གྱིས་རླུང་གསུམ་སྔགས་གསུམ་དང་དབྱེར་མི་ཕྱེད་པར་
བཟླ་བར་གསུངས་པ་འདི་ཉིད་ཀྱིས། རྩ་རྒྱུད་ཀྱིས་ལྷ་ཐམས་ཅད་ཀྱི་ཐུགས་རྒྱུད་བསྐུལ་ནས་ཟློས་པ་པོ་ལ་དགོངས་པར་བྱེད་པའི་སྙིང་པོ་གསུམ་གྱི་སྔགས་བསྡུས་པར་གསུངས་པ་དེ་འཆད་པར་གསུངས་པས། བཟླས་བྱའི་སྔགས་ཐམས་ཅད་ཡི་
གེ་གསུམ་དུ་འདུ་བ་དང་། དེ་ཟློ་བའི་བཟླས་པའི་མཐར་ཐུག་རྡོར་བཟླས་ཡིན་པ་དང་། དེའི་རྒྱུ་མཚན་གྱིས་ལྷ་ཐམས་ཅད་ཀྱི་ཐུགས་བསྐུལ་པའི་མཆོག་ཀྱང་དེ་ཉིད་དུ་ཤེས་སོ། །ལྷ་ཐམས་ཅད་ཀྱི་སྔགས་ཀྱི་བཟླས་པའི་གྲངས་རྫོགས་པར་བྱེད་
6-4-81a


པ་ནི་འདི་མིན་པ་ལ་མེད་པས་སྔགས་རྣམས་ཀྱིས་ལས་འདི་དང་འདི་འགྲུབ་པར་གསུངས་པ་ཐམས་ཅད་ཀྱང་འདི་ཉིད་ཀྱིས་འགྲུབ་པ་ལ་ངེས་རྙེད་པ་དགོས་སོ། །འདི་ཉིད་རྡོ་རྗེའི་བཟླས་པར་གསུངས་པས་དོན་རྟོགས་པའི་ཞེས་པ་བཞིའི་
དོན་ཀྱང་འདིར་གོ་ནུས་ལ། རྒྱུད་འདིར་རླུང་སྔགས་ཐ་དད་དུ་བཟུང་ནས་ཟློ་བ་སློང་མོ་ཟ་ཞིང་ཟློས་པར་བཤད་པ་ཡིན་པས་དེ་མི་བྱ་ཞེས་གསུངས་པས་སློང་མོ་ཞེས་པ་བཞིའང་གོ་བར་ནུས་སོ། །བསྐྱེད་རིམ་ལས་འདས་པ་དང་། ལུས་དབེན་ཡེ་ཤེས་ཀྱི་རང་
བཞིན་ཡིན་པས་གཟུགས་མེད་པའི་ཕྱིར་བཟླས་པ་འདིའི་རྟེན་ནི་སྒྱུ་མ་ལྟ་བུའི་ཏིང་ངེ་འཛིན་གྱིས་རང་བཞིན་གྱི་སྐུ་དང་། རྡོ་རྗེ་བཟླས་པས། གཉིས་མེད་རྣམ་རྒྱལ་ནས་འཆད་པ་བཞིན་གྱི་ཆོ་གས། ཡང་དང་ཡང་དུ་བརྟན་ཅིང་གོམས་པར་བྱས་པས་ཞི་
སོགས་ཀྱི་ལས་ཐམས་ཅད་བསྒྲུབ་པར་བྱའོ་ཞེས་ལཀྵྨཱིས་བཤད་དོ། །ཆོ་ག་ཇི་བཞིན་བརྟེན་བྱ་ཞིང་། །ཞེས་འདོན་ཏོ། །རྡོར་བཟླས་ཀྱི་རྟེན་ནི་ལུས་དབེན་རིགས་གཅིག་པའི་ཏིང་ངེ་འཛིན་དུ་བྱ་དགོས་ལ། དེ་ལ་བརྟེན་ནས་རྡོ་རྗེ་བཟླས་པ་འདི་ཡིས་ནི་བསྙེན་
པ་སྟེ་རྡོ་རྗེ་བཟླས་པ་སྔར་བཤད་པའི་ཆོ་ག་བཞིན་དུ་བྱས་ཏེ་ཆོས་ཐམས་ཅད་སྒྱུ་མ་ལྟ་བུར་ཤེས་པའི་ཏིང་ངེ་འཛིན་དང་ལྡན་པས་ཞི་སོགས་ཀྱི་ལས་ཐམས་ཅད་བསྒྲུབ་པར་བྱའོ་ཞེས་བཤད་དེ། །དགོངས་པ་ལུང་སྟོན་ལས། མཁས་པས་སྒྱུ་མ་
མིག་འཕྲུལ་བཞིན། །འགྲོ་བ་ཁམས་གསུམ་པོ་ལ་བྱ། །ཞེས་རྡོར་བཟླས་ཀྱི་སྐབས་སུ་གསུངས་པའི་ཕྱིར་རོ། །བཞི་པ་ནི། རྩ་རྒྱུད་དུ་གསུངས་པའི་སྔགས་ཀྱི་དེ་ཉིད་རྡོར་བཟླས་ཀྱིས་མཆོག་སྒྲུབ་པར་གསུངས་པ་འདིའང་གཉིས་མེད་རྣམ་རྒྱལ་
6-4-81b


ཞེས་པའི་རྣལ་འབྱོར་ཆེན་པོའི་རྒྱུད་དུ་གསུངས་སོ། །ཞེས་རྡོར་བཟླས་ཀྱི་སྐབས་སུ་གསུངས་སོ། །ཡེ་ཤེས་གསུམ་བསྐྱེད་པའི་ཐབས་གཞན་གང་དང་ཡང་མཉམ་པ་སྟེ་མཚུངས་པ་མེད་པའི་སྔགས་རྡོར་བཟླས་ནི་བཟླས་ནས་ཡེ་ཤེས་གསུམ་གྱི་སྒྲུབ་
པའི་བདག་ཉིད་ཅན་གྱི་རྣལ་འབྱོར་པས་དངོས་གྲུབ་མཆོག་བསྒྲུབ་པར་བྱ་སྟེ། དེ་ཡིས་ཟླ་བ་གཅིག་གིས་ནི་འཇིག་རྟེན་གསུམ་གྱི་བདག་ཉིད་རྡོ་རྗེ་འཆང་འགྲུབ་པར་གདོན་མི་ཟའོ། །ལཀྵྨཱིས་ཡི་གེ་གསུམ་བཟླས་ནས་འཁོར་ལོ་བཞིན་དུ་ཉིན་དང་མཆན་དུ་
རྒྱུ་བར་ཤེས་ནས་སྒྲུབ་པའི་བདག་ཉིད་རྣལ་འབྱོར་པས་འོད་གསལ་བའི་བདག་ཉིད་མ་ནིང་གི་བཟླས་པས་བསྒྲུབ་པར་བྱའོ། །ཞེས་སྔར་ཆོ་ག་ཞེས་པའི་དོན་བསྟན་ཏོ། །དེའི་ཕན་ཡོན་ནི་ཟླ་བ་གཅིག་གིས་ཁམས་གསུམ་པའི་སེམས་ཅན་ཡུལ་དུ་
བྱས་པའི་ལས་ཚོགས་རྣམས་འབད་པ་མེད་པས་འགྲུབ་ཅེས་འཆད་དོ། །སྒྲོན་གསལ་ལས་ཟླ་བ་གཅིག་གིས་འགྲུབ་པར་གསུངས་པ་རྣམས་ལ། པཀྵ་ཞེས་པ་ཟླ་བ་གཅིག་གམ་ཕྱོགས་གཉིས་དང་ལྡན་པ་ལ་ཟེར་བས་ཀུན་རྫོབ་དང་དོན་དམ་པའི་ཕྱོགས་གཉིས་
གཅིག་ཏུ་གྱུར་པའི་ཟུང་གིས་མཆོག་འགྲུབ་པ་ལ་འཆད་པ་ལྟར་འདིར་ཡང་སྦྱར་རོ། །རླུང་གི་བཞོན་པ་ཅན་གྱི་རྣམ་ཤེས་ལས་བྱུང་བའི་སྔགས་འབུམ་ཕྲག་དྲུག་ལྡན་བཟླས་ན་ཟླ་བ་ཉ་ལ་འགྲུབ་པ་སྟེ་རྡོ་རྗེ་བཟླས་པ་མཐར་ཐུག་པར་འགྱུར་རོ། །གང་གི་ཚེ་ཞེ་ན། དྲུག་
པ་རྡོ་རྗེ་སེམས་དཔར་ཕྱག་བྱས་པ་སྟེ་དེ་ཡིད་ལ་དམིགས་ནས་བཟླས་པའི་ཚེའོ། །དེའང་ཞག་ལྔ་ལྔ་ལ་ཉི་ཁྲི་ཆིག་སྟོང་དྲུག་བརྒྱ་རེ་བྱས་པས་བསྡོམས་ན་སྟོང་ཕྲག་བརྒྱད་དང་འབུམ་ཕྲག་གཅིག་ཡིན་མོད་ཀྱང་གྲངས་མང་ཉུང་དུ་འགྱུར་བ་བཀག་ནས་འབུམ་
6-4-82a


ཕྲག་གཅིག་ཏུ་བྱས་པས་ཟླ་བ་གཅིག་ལ་དྲུག་འབུམ་མོ། །འབུམ་ཕྲག་དང་པོ་ནས་དྲུག་པའི་བར་རེ་རེ་ལ་རྣམ་སྣང་ལ་སོགས་པའི་འཁོར་ལོ་སྒྱུར་བ་དྲུག་གི་བཟླས་པ་བྱས་པས་ཐ་མར་རིགས་དྲུག་པ་རྡོ་རྗེ་སེམས་དཔའི་བཟླས་པའོ་ཞེས་ཟླ་བ་
གཅིག་གིས་འགྲུབ་པའི་གྲངས་བཤད་དོ་ཞེས་ལཀྵྨཱིས་བཤད་དོ། །ཁ་ཅིག་གིས་རྣམ་ཤེས་ཏེ་འོད་གསལ་བྱུང་བའི་སྔགས་ནི་རླུང་ངོ་། །འབུམ་ཕྲག་དྲུག་ནི་གྲངས་ཏེ་རླུང་ལྔ་དང་འོད་གསལ་ལོ། །དེ་དྲུག་དང་ལྡན་པའི་རྡོར་བཟླས་བྱས་ཀྱང་། 
རྡོ་རྗེ་སེམས་དཔར་རང་གིས་རང་གི་ཡེ་ཤེས་མཐོང་བའི་ཕྱག་བྱས་ན་ཟླ་བ་ཉ་བ་དང་འདྲ་བའི་རྟོགས་པ་རྫོགས་པར་འགྱུར་རོ། །ཞེས་འཆད་མོད་ཀྱང་འགྲིག་པར་མི་སྣང་ངོ་། །འདི་རྡོར་ཕྲེང་དང་བསྟུན་ན། ཟླ་བ་དྲུག་གི་ཐ་མའི་རྡོར་བཟླས་རགས་པའི་རྩིས་
དྲུག་འབུམ་བྱས། དེར་མ་ཟད་དེ་བྱས་ནས་ཀྱང་སྟེ་བྱས་པའི་འོག་ཏུ་རྡོ་རྗེ་སྟོང་པ་གསུམ་སེམས་དཔའ་དེ་གསུམ་མཉམ་པར་སྦྱོར་བའི་ཉེར་ཐོབ་ཀྱི་སྒོ་ནས་ཡུལ་ཡུལ་ཅན་ཐ་མི་དད་ཀྱི་ཕྱག་བྱས་ན་རྡོ་རྗེ་སེམས་དཔའ་སྒྱུ་མའི་སྐུ་དེ་འགྲུབ་པར་འགྱུར་རོ། །
ཡུལ་ཅན་ནི་ཟླ་བ་ཕྱེད་ཀྱིས་ཞེས་པའམ། ཆུ་ནང་དུ་ཤར་བའི་ཟླ་བ་ཉ་གང་བ་ལྟ་བུའི་ཡན་ལག་དང་ཉིང་ལག་ཐམས་ཅད་རྫོགས་པའི་སྐུ་འགྲུབ་པོ། །རྡོར་བཟླས་བསྒོམ་པ་དེ་ལ་བརྟུལ་ཞུགས་ཏེ་སྦྱངས་པའི་ཡི་དམ་བཤད་པ་མེད་དེ། འདོད་ཡོན་ལམ་དུ་
བྱེད་པ་དང་དེ་འགལ་བའི་ཕྱིར་རོ། །བཟླས་པའི་གྲངས་ཀྱི་རྟེན་ཕྲེང་བའི་དབྱེ་བ་རྣམས་མི་དགོས་ཏེ། རྟག་ཏུ་རྒྱུ་བའི་སྲོག་རྩོལ་ཉིད་དེའི་ཕྲེང་བ་ཡིན་པས་སོ། །ཕྱིའི་སྔགས་བཟླས་པའང་མི་དགོས་པ་ནི་དེ་དང་འདྲའོ། །སྣ་རྩེར་བལྟ་བའི་སྒོ་ནས་རྟོག་པ་དགག་
6-4-82b


པ་དང་སྐྱིལ་ཀྲུང་བཅིང་བ་སོགས་མི་དགོས་ཏེ། དཀྱིལ་འཁོར་བཞི་ཤར་བའི་དུས་ཀྱི་འོད་ཀྱི་ཐིག་ལེ་ལ་སེམས་གཏད་པས་ཆོག་པའི་ཕྱིར་རོ། །བྲིས་སྐུ་དང་ཟླ་བ་སོགས་ལ་སེམས་གཟུང་མི་དགོས་ཏེ། དེ་ཁོ་ན་ཉིད་ལ་རྟག་ཏུ་གནས་པའི་ཕྱིར་རོ། །སྦྱིན་སྲེག་
གི་ལས་མི་དགོས་ཏེ་ངག་གི་རྣམ་རྟོག་གི་བུད་ཤིང་རྡོར་བཟླས་ཀྱི་མེས་བསྲེག་པའོ། །དེ་བཞིན་དུ་མཆོད་གཏོར་དང་རབ་གནས་སོགས་གཞན་རྣམས་མི་དགོས་ཏེ། ནང་གི་སྒོ་ནས་དེ་ཐམས་ཅད་འགྲུབ་པའི་ཕྱིར་རོ་ཞེས་ལཀྵྨཱིས་འཆད་དོ། །གཅིག་ནས་གཅིག་
ཏུ་ལྡོག་པར་འགྱུར། །ཞེས་འདོན་པ་ལྟར་ན་སྔ་མ་ཞིག་མི་དགོས་པས་ཕྱི་མ་འདི་མི་དགོས་ཞེས་རིམ་པ་སྟོན་པའོ། །ནང་གི་སྒོ་ནས་འགྲུབ་ཚུལ་ནི། །རྡོར་བཟླས་འབྱོངས་པའི་རྣལ་འབྱོར་བ་ཞི་སོགས་ཀྱི་དངོས་གྲུབ་འདོད་པས་ནི། རང་ངམ་གཞན་གྱི་དོན་གྱི་
གང་ཅིའང་རུང་བ་བྱ་བ་སྟེ་བྱེད་པ་ནི། ཡའི་དོན་རླུང་གི་རླུང་དང་། རའི་དོན་མེའི་རླུང་དང་སོགས་ཀྱིས་བསྡུས་པ་ལའི་དོན་སའི་རླུང་དང་། ཝའི་དོན་ཆུའི་རླུང་གི་བཟླས་པ་ཡིས་འགྲོ་བའི་དོན་ཞི་སོགས་ཀྱི་དངོས་གྲུབ་བསྒྲུབ་པ་ལ་འཇུག་པར་བྱའོ། །དེ་ཉིད་
འཆད་པ་ནི། མེ་དང་རླུང་དང་དབང་ཆེན་ས་དང་ཆུའི་རླུང་སྟེ་རླུང་བཞི་པོ་སོ་སོའི་དཀྱིལ་འཁོར་དུ་ཐུན་ནི་ཕྱེད་ཕྱེད་དེ་རླུང་དགུ་བརྒྱ་པ་ཕྲག་རེ་རྒྱུ་བའི་དུས་སུ་ནི། རིམ་པ་བཞིན་གཙོ་བོའི་ལས་རེ་དང་གཙོ་བོ་མ་ཡིན་པའི་ལས་གཅིག་སྟེ་གཉིས་གཉིས་གནས་
པར་འགྱུར་རོ། །དཔེར་ན་མེ་རླུང་གི་དབུས་སུ་དབང་གི་ལས་གཙོ་བོ་དང་གཞན་གསུམ་ཕལ་པར་འགྲུབ་པ་བཞིན་ནོ། །ལཀྵྨཱིས་ལས་གཉིས་གཉིས་ཏེ་བཞི་ཞེས་འཆད་མོད་ཀྱང་། དེ་ནི་གཉིས་ཀ་བསྡུས་པའི་ཟློས་སྒྲ་ཡིན་པས་ཡི་གེའི་དོན་ནི་
6-4-83a


གཙོ་ཕལ་གཉིས་གཉིས་སུ་ཨ་བྷ་ཡཱ་ཀ་རས་འཆད་པ་བཞིན་ཡིན་ནོ། །འདིས་ལས་བསྒྲུབ་ཚུལ་ཞིབ་ཏུ་མ་བཤད་ཀྱང་ཅུང་ཟད་བཤད་ན། ལས་བཞི་པོ་གང་ལ་ཡང་སྔགས་མི་འདྲ་བ་མང་པོ་མི་དགོས་ཏེ་ཡི་གེ་གསུམ་འབའ་ཞིག་
དང་། ལྷའི་ཁ་དོག་ཀྱང་མང་པོ་མི་དགོས་ཏེ་ལུས་དབེན་གྱི་རིགས་གཅིག་གི་རྣལ་འབྱོར་ཁོ་ན་དང་། ཕྱིའི་དུས་དང་ཁ་ལྟ་ཕྱོགས་དང་འདུག་སྟངས་དང་། སྦྱིན་སྲེག་དང་འཕྲུལ་འཁོར་སོགས་ལ་མི་བལྟོས་པར་ནང་ཁོ་ནས་འགྲུབ་པའོ། །མཆོད་པ་དང་
བཟླས་པ་གཉིས་ནི་ཕྱིའིའོ། །བསམ་གཏན་ལ་བརྩོན་པ་ནི་རྡོར་བཟླས་ཀྱི་རྣལ་འབྱོར་ལ་འགྲུས་པའོ། །གཞན་གསུམ་འདིར་བཤད་པ་ནི་སྔར་དེ་རྣམས་མི་དགོས་ཞེས་བསྟན་པ་ལ། དགོངས་པ་གཏན་མེད་དམ་སྙམ་པ་ཟློག་པའི་ཕྱིར་ཡིན་ནོ། །སྔགས་
པས་ཞེས་པ་བཞི་ནི་སྔར་བཤད་པ་ལྟར་ཤེས་ནས་རྡོར་བཟླས་ལ་གནས་པས་ནི་འགྲོ་བའི་ནང་ན་བྱིས་པ་བཞིན་དུ་སྟོད་སྨད་ཀྱིས་མི་འགྱུར་བར་སྤྱོད་ཅེས་པའོ། །འགྲོ་ནང་ཞེས་པ་ལ་ལཀྵྨཱིས་བཤད་པས་འགྲོ་ན་དང་འགྲོ་བ་ཞེས་པ་མི་བདེའོ། །དེ་
ནས་ཞེས་པ་གཉིས་ནི་དེ་ལྟར་རྣམ་པར་མི་རྟོག་པའི་ཆོས་ཅན་གྱིས་སྔགས་རྣམས་འགྲུབ་ཅེས་པ་སྟེ། མི་རྟོག་ཆོས་ཅན་གྱི་གསང་སྔགས་རྣམས་ནི་འགྲུབ་པར་འགྱུར། །ཞེས་པའི་དོན་དུ་ལཀྵྨཱིས་བཀྲལ་ལོ། །སྔགས་ཀྱི་དེ་ཉིད་ཅེས་པ་བཞི་ནི་སྔགས་
ཀྱི་དེ་ཉིད་ནི་རླུང་སྔགས་གཉིས་ཀའིའོ། །གསལ་བ་ནི་དེ་དང་རྡོར་བཟླས་གཉིས་རྩ་རྒྱུད་དང་རྒྱུད་ཕྱི་མ་དང་བཤད་རྒྱུད་ཀྱི་རྗེས་སུ་འབྲངས་ནས་ཕྱེ་བ་ལ་ལཀྵྨཱིས་འཆད་པ་ནི་གཞུང་འདི་གཉིས་མེད་རྣམ་རྒྱལ་ནས་དྲངས་པའི་ལུགས་སུ་སྣང་བས་མི་བདེའོ། །
6-4-83b


དེས་ནི་འདི་ཉིད་ནས་སྔར་བཤད་པ་ལྟར་ཕྱེ་བའོ། །གསུང་གི་རྡོ་རྗེ་རབ་ཏུ་བསྒྲུབ་པ་ནི་མི་ཕྱེད་པའི་ངག་དབེན་བསྒྲུབ་པའོ། །ཡེ་ཤེས་གསུམ་གྱི་དབྱེ་བས་དག་དབེན་འདི་ཉིད་སེམས་ཙམ་ལ་སྦྱར་བྱ་སྟེ། རླུང་སྔགས་ཀྱི་དེ་ཉིད་ནི་རླུང་གི་གཞོན་པ་ཅན་གྱི་རྣམ་ཤེས་
ཡིན་ལ། རིམ་པས་འདིས་ངག་སྦྱོང་ལ་རིམ་པ་གཉིས་པས་སྣང་བ་རྒྱུར་གྱུར་པའི་རང་བཞིན་ཕྲ་མོ་སྦྱོང་བ་ནི་འདི་གཉིས་ཀྱི་ཁྱད་པར་རོ་ཞེས་ལཀྵྨཱིས་བཤད་དོ། །འོན་ཀྱང་སེམས་ཙམ་ནི་སེམས་དབེན་ནོ། །དེ་ལ་ངེས་པར་སྦྱོར་བ་ནི་རྡོར་བཟླས་ཀྱི་རིམ་པ་འདིས་
སོ། །ཇི་ལྟར་སྦྱོར་ན་ཡེ་ཤེས་གསུམ་གྱི་དབྱེ་བས་ཏེ་དེ་གསུམ་རིམ་ཅན་དུ་བསྐྱེད་པའི་སྒོ་ནས་སོ། །བསྐྱེད་ཚུལ་ནི་སྔར་བཤད་ཟིན་ཏོ། །ཞེས་གསུངས་སོ་ཞེས་པ་ནི་དེ་རྣམས་ཐམས་ཅད་རྒྱུད་དེ་ནས་དྲངས་པར་སྟོན་པའོ། །གསུམ་པ་གདམས་པ་བཤད་
པའི་སྣོད་ཀྱི་ཁྱད་པར་ནི། བླ་མ་ལ་བརྙས་ཞེས་པ་བཞིས་རྡོར་བཟླས་ཀྱི་རིམ་པ་སྦྱིན་དུ་མི་རུང་བའི་གང་ཟག་སྟོན་ཏེ། བླ་མ་ལ་བརྙས་པ་དང་སྒྱུ་ཅན་ནི་བསམ་པ་དྲང་པོར་མི་སྟོན་པ་དང་། དད་པ་མེད་པ་ནི་བླ་མ་ལ་སེམས་དང་བ་མེད་པའོ། །ལཀྵྨཱིས་བླ་མ་ལ་
ཞེས་སྡང་བ་ལ་བཤད་དོ། །སྔགས་ཀྱིས་རློམ་པ་ནི་སྔགས་ཙམ་ཤེས་ནས་རློམ་པའི་ང་རྒྱལ་ཅན་ལ་བཤད་དེ་ཕྱིའི་སྔགས་དང་དེ་ལས་སྒྲུབ་ལུགས་ཙམ་ཤེས་ནས་རློམ་པ་ཆེ་བའོ། །གླེགས་བམ་མཐོང་བས་ཁེངས་པ་ནི་རང་གིས་གླེགས་
བམ་བཀླགས་ནས་བདག་ལ་ཐོས་པ་སོགས་མི་དགོས་ཞེས་ཁེངས་པ་ལ་འཆད་ཀྱང་། བླ་མའི་མན་ངག་མེད་པར་གླེགས་བམ་ལ་བལྟས་ནས་གོ་བ་བྱུང་ནས་སེམས་ཁེངས་པའོ། །དད་པ་མེད་པ་ནི་ཆོས་ལ་མི་དགའ་བ་ལ་བཤད་དེ་ཡིད་ཆེས་པའི་དད་པ་
6-4-84a


མེད་པའོ། །དབང་བསྐུར་དམན་པ་ནི་རིག་པའི་དབང་ཙམ་ཐོབ་པའོ་ཞེས་ཟེར་རོ། །གཏམ་གྱི་རིམ་པ་ནི་རྡོ་རྗེ་བཟླས་པའི་རིམ་པའི་གཏམ་ཙམ་ཡང་དེ་ལ་མི་བྱ་བའི་དོན་ཏོ། །གང་ཞིག་ཅེས་པ་བཞིས་མན་ངག་འདི་སྦྱིན་པའི་སྣོད་སྟོན་ཏེ། བླ་མ་ལ་
གུས་པ་ནི་བརྙས་པའི་གཉེན་པོའོ། །དད་པ་ནི་དེ་ལ་སེམས་ཤིན་ཏུ་དང་བ་སྟེ་དང་བ་མེད་པའི་གཉེན་པོའོ། །མོས་པའི་དབང་གིས་བླ་མའི་བསྙེན་བཀུར་ལ་ནི་རྟག་ཏུ་སྟེ་རྒྱུན་དུ་བརྩོན་པའམ། ཆག་འགྱུར་ལས། ལེགས་ཉན་ཞེས་པ་ལྟར་ན་བཀའ་མི་
གཅོག་པའོ། །གདམས་ངག་ཐོས་པ་མི་བརྗེད་པར་འཛིན་པ་ལ་བླ་མས་བཀའ་དྲིན་སྦྱིན་པར་བྱ་བ་ལ་བརྟག་མི་དགོས་ཀྱི་རིམ་པའི་དོན་མྱུར་དུ་བསྟན་པར་བྱའོ་ཞེས་ལཀྵྨཱིས་བཤད་དོ། །ཆག་འགྱུར་ལས། ཐོས་པ་འཛིན་ལ་བླ་མ་དམ་པ་ཡིས། །དེ་ལ་བླ་མའི་དྲིན་
སྦྱིན་འདི་མི་བརྟག །ཅེས་འབྱུང་ངོ་། །ཐོས་པ་འཛིན་པ་ནི་མང་དུ་ཐོས་པ་དང་ལྡན་པ་ལ་བྱས་ན་ལེགས་སོ། །བཞི་པ་གདམས་པ་རྙེད་པའི་ཕན་ཡོན་ནི། །རི་དབང་ཞེས་པ་བཞིས་སྟོན་ཏེ། སྤྱོད་བསྡུས་ལས་ལུང་འདི་བར་དོར་འཚང་རྒྱ་བ་ལ་དྲངས་ཏེ། འོན་ཀྱང་རྡོར་
བཟླས་ཀྱི་རིམ་པ་ལྟ་བུའི་ཕན་པའི་ལུང་ཐོབ་པ་སྟེ་གདམས་ངག་རྙེད་ནས། དེ་དང་རྗེས་སུ་མཐུན་པའི་ཕན་ཡོན་འབྱུང་ངོ་། །གསུམ་པ་མཇུག་གི་དོན་ནི། རྡོ་རྗེ་བཟླས་པའི་རིམ་པ་ཞེས་སོགས་སོ། །འདི་ལ་གཞུང་གི་ཚད་རྒྱ་གར་གྱི་ཤློ་ཀ་བརྒྱ་ཡོད་དོ། །མདོར་
བྱས་ལས། རྡོ་རྗེ་ཕྲེང་བ་དཔལ་མཆོག་སྲུབ་ཤིང་གིས། །གསང་འདུས་སྦས་ཆུའི་རྒྱ་མཚོ་བསྲུབས་པ་ལས། །སྒྲུབ་པའི་ཡན་ལག་བདུད་རྩི་གང་ཐོབ་དེས། །འཇིག་རྟེན་མཐའ་དག་འཆི་མེད་ཉེར་ཐོབ་ཤོག །ཅེས་གསུངས་པ་དེ་ནི་རྡོ་རྗེ་བཟླས་པའི་རིམ་པའི་རྣམ་བཤད་འདིར་ཡང་སྦྱར་བར་བྱའོ། །
6-4-84b


empty page
6-5-1a


༄༅། །དགོངས་པ་བླ་ན་མེད་པའི་རིམ་པའི་ཟིན་བྲིས།
6-5-1b


༄༅༅། །རྗེ་བཙུན་དམ་པ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་རྣམས་ཀྱི་ཞབས་ལ་དུས་ཐམས་ཅད་དུ་གུས་པས་ཕྱག་འཚལ་ལོ། །རྒྱལ་བ་ཐམས་ཅད་ཀྱི་མཁྱེན་པའི་ཡེ་ཤེས་ཐམས་
ཅད་གཅིག་ཏུ་བསྡུས་པའི་ངོ་བོ་བཅོམ་ལྡན་འདས་འཇམ་པའི་དབྱངས་དང་། །དབང་ཕྱུག་བརྒྱད་དང་ལྡན་པའི་རྡོ་རྗེ་འཆང་ཆེན་པོ་མགོན་པོ་ཀླུ་སྒྲུབ་ཡབ་སྲས་ཀྱི་ཞབས་ལ་གུས་པ་ཆེན་པོས་སྐྱབས་སུ་མཆིའོ། །མན་ངག་
གི་མཐར་ཐུག་དགོངས་པ་བླ་ན་མེད་པའི་རིམ་པ་ལ་གསུམ། མཚན་གྱི་དོན། གཞུང་གི་དོན། མཇུག་གི་དོན་ནོ། །དང་པོ་ནི། ཨ་ནུ་ཏྟ་ར་ནི་བླ་ན་མེད་པའོ། །སནྡྷི་ནི་དགོངས་པའོ། །ཨི་ཏི་ནི་ཞེས་བྱ་བའོ། །ཨ་པ་ར་ནི་
གཞན་ནོ། ནཱ་མ་ནི་མིང་ངོ་། སརྦ་བི་ཤུདྡྷནི་ཐམས་ཅད་རྣམ་པར་དག་པའོ། །ཀྲ་མ་ནི་རིམ་པའོ། །དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ་ཙཱ་བས་བཀོད་པའོ། །གཉིས་པ་ལ་བཞི། རྩོམ་པ་ལ་འཇུག་པའི་
ཡན་ལག །ཡན་ལག་ཅན་གྱི་གདམས་པ་དངོས། གདམས་པ་བཤད་པའི་སྣོད་ཀྱིས་ཁྱད་པར། འཆད་པ་པོའི་གང་ཟག་གི་ཁྱད་པར་རོ། །དང་པོ་ལ་གསུམ། ཕྱག་འཚལ་བ་དང་། དེ་ཉིད་ངེས་དོན་དུ་བསྒྲུབ་པ་
6-5-2a


དང་། རྩོམ་པར་དམ་བཅའ་བའོ། །དང་པོ་ནི། །ཕྱག་འཚལ་འདུད་ཅིང་ཕྱག་འཚལ་འདུད། །ཕྱག་འཚལ་ཕྱག་འཚལ་ཕྱག་འཚལ་འདུད། །ཇི་ལྟར་བསྟོད་ཅིང་ཕྱག་འཚལ་བ། །ཞེས་ཕྱག་འཚལ་བའི་
ཚིག་དྲུག་གསུངས་པའི་དང་པོ་ནི། རྡོ་རྗ་འཆང་ཆེན་པོ་ཁྱོད་ལ་ཕྱག་འཚལ་ཞེས་པའོ། །དེ་ནས་ལྔས་ནི་རྣམ་སྣང་ལ་སོགས་པ་ལྔའི་རང་བཞིན་རྡོ་རྗེ་འཆང་དེ་ཉིད་ལ་ཕྱག་འཚལ་བསྟོན་ནོ། །ཇི་ལྟར་བསྟོད་ཅེས་པ་ནི་ཕྱག་འཚལ་བ་
དེ་ཉིད་བསྟོད་པ་ལས་མ་འདས་པར་སྟོན་པའི་དོན་དུ་ལཀྵྨཱིས་བཤད་དོ། །ངག་འགྱུར་ལས། ཁྱོད་ལ་ཕྱག་འཚལ་ཁྱོད་ལ་འདུད། །ཁྱོད་ལ་ཕྱག་འཚལ་ཕྱག་འཚལ་བདུད། །ཇི་བཞིན་བསྟོད་ཅིང་ཁྱོད་ལ་འདུད། །ཅེས་ཕྱག་
འཚལ་བ་གསུམ་དག་འདུད་པ་གསུམ་སྟེ་དྲུག་ཏུ་བསྒྱུར་ལ་སྔ་མ་ལྟར་ན་ཕྱག་འཚལ་དྲུག་དང་བདུད་གསུམ་བྱུང་ངོ་། །ཕྱག་འཚལ་བ་དང་འདུད་པ་དོན་གཅིག་ལ། ཕྱག་འཚལ་བ་དྲུག་ཏུ་བྱེད་པར་སྣང་བས་འགྱུར་ཕྱི་
མ་ལེགས་པར་མངོན་ནོ། །དེ་ཁོ་ན་ཉིད་ཇི་ལྟ་བ་དེ་བཞིན་དུ་ཞུགས་པའི་བསྟོད་པ་ཡིན་ནོ། །ཞེས་པས་ཕྱག་འཚལ་བ་དང་བསྟོད་པ་གཉིས་འདིར་དོན་གཅིག་ཏུ་བསྟན་པའི་སྒོ་ནས་ཕྱག་འཚལ་བའི་འཚལ་ཚུལ་སྟོན་
6-5-2b


པ་ཡིན་ནོ། །གཉིས་པ་ནི། དོན་དམ་པར་ན་གང་ལ་བསྟོད་པ་དང་ཕྱག་འཚལ་བའི་ཡུལ་དང་། གང་གིས་བསྟོད་པ་དང་ཕྱག་འཚལ་བ་པོའི་རྟེན་དང་ཇི་ལྟར་དུ་བསྟོད་ཅིག་ཕྱག་འཚལ་བའི་ཚུལ་གསུམ་མ་གྲུབ་ལ་དེའི་ཕྱིར་ངེས་དོན་གྱི་ཕྱག་འཚལ་བ་ནི་འཁོར་གསུམ་
མི་དམིགས་པ་ཡིན་པའི་ཕྱིར། རྣལ་འབྱོར་པ་རང་གིས་རང་གི་ཡང་དག་པ་སྟེ་དེ་ཁོ་ན་ཉིད་ཇི་ལྟར་བ་བཞིན་མཐོང་བའི་ཡེ་ཤེས་གང་ཡིན་པ་དེ་ནི་སྐབས་འདིར་ཕྱག་གི་མཆོག་ཡིན་པའི་ཕྱིར། རྩོམ་པ་པོས་ཀྱང་དེ་ལྟ་བུའི་ཕྱག་མཛད་ཅེས་པའི་དོན་ནོ། །དེའི་
དཔེ་ནི་ཇི་ལྟར་ཆུ་ལ་ཞེས་པ་གཉིས་ཏེ། འཁོར་གསུམ་གྱི་གཉིས་སྣང་ཕྲ་མོ་ཡང་དག་པའི་དོན་ཏོ། །ཆག་འགྱུར་ལས། རང་གིས་རང་གི་ཡང་དག་མཐོང་། །ཡེ་ཤེས་གང་ཡིན་འདིར་ཕྱག་ཡིན། །ཞེས་བསྒྱུར་བ་ལྟར་བདེའོ། །རང་གིས་རང་གི་ཡེ་ཤེས་
ནི། །ལེགས་མཐོང་གང་ཡིན་འདིར་ཕྱག་ཡིན། །ཞེས་བསྒྱུར་བའི་དོན་ལ། ལཀྵྨཱིས་རང་རིག་པ་ནི་ཡེ་ཤེས་སུམ་གྲུབ་པས་ཡེ་ཤེས་མེད་པ་ཉིད་དུ་བཤད་དེ། ཡེ་ཤེས་ནི་ཛྙཱ་ན་སྟེ། དེ་ལ་ཛྙཱ་ནི་རྟོགས་པའི་དོན་དང་། ན་ནི་བཀག་པའི་དོན་ནོ། །དེས་ནི་
རྣལ་འབྱོར་སྤྱོད་པའི་ཕྱོགས་བཞི་བཀག་གོ་ཞེས་འཆད་དེ། རང་གིས་རང་ཤེས་པ་ཛྙཱའི་དོན་ཡིན་ལ། དེ་ནས་བཀག་པས་རང་གིས་རང་རིག་པ་མེད་ཅེས་པར་སོང་སྙམ་དུ་བསམས་སོ། སྒྲོན་གསལ་ལས། ཛྙཱ་ནི་རྟོགས་པ་དང་། ན་ནི་དགག་
ཚིག་ཏུ་བྱས་ནས་རྟོགས་པ་དང་བྲ་བ་ཛྙཱ་ནའི་དོན་དུ་བཤད་དོ། རྒྱ་དཔེ་ལ་ཡང་། འགྱུར་གཉིས་ཀ་ལྟར་ཡོད་པར་སྣང་ལ། ཕྱི་མ་ལྟར་ཡོད་ན་རང་གིས་རང་གི་ཡེ་ཤེས་མཐོང་བའི་དོན་ཡེ་ཤེས་ཀྱི་དེ་ཁོ་ན་ཉིད་ཡེ་ཤེས་མཐོང་བའི་དོན་དུ་བཤད་
6-5-3a


དགོས་ཀྱི། །རང་རིག་བཀག་པའི་དོན་དུ་བྱས་ན་གཞུང་ལ་མི་འགྲིག་གོ། །གང་ཟག་གང་གིས་ཕྱག་མཛད་པ་ནི་འཆད་པར་འགྱུར་ལ། དགོས་པ་ནི་སྔར་དང་འདྲའོ། རྡོ་རྗེ་བཟླས་པའི་རིམ་པར་གསུངས་པ་ལྟར། རྣལ་འབྱོར་རྒྱུད་ཀྱི་རྗེས་འབྲངས་
ནས། །སེམས་དམིགས་རིམ་པ་བཤད་པར་བྱ། །ཞེས་པ་དོན་ལ་ཐོབ་མོད་ཀྱང་། འདིར་མ་མཛད་པ་ནི་སྔ་མ་ལ་དཔགས་ནས་གོ་བར་ནུས་ཏེ། །དཔལ་ལྡན་འདུས་པའི་རྒྱུད་དུ་ནི། །ཞེས་སོགས་ཀྱི་གསུང་ལས་སོ། །གསུམ་པ་ནི། འོན་ཀྱང་ཀུན་མཁྱེན་མ་ཐོབ་
པར། །དེ་ནི་ཉེ་བར་དམིགས་མི་གྱུར། །མུན་ནག་རབ་རིབ་ཀྱིས་ཁེངས་པ། །དྲིན་གྱིས་སྣང་བ་ཐོབ་པར་འགྱུར། །ཞེས་པ་ལ་ལཀྵྨཱིས། ཆོས་སྐུ་རང་བཞིན་གྱིས་གྲུབ་ན་བསྒོམ་ཅི་དགོས་ཤེ་ན། འོན་ཀྱང་སྟེ་ཆོས་སྐུ་རང་བཞིན་གྱིས་གྲུབ་པ་ཁྱེད་བདེན་མོད་ཀྱང་། 
ཀུན་མཁྱེན་ཏེ་རྡོ་རྗེ་སློབ་དཔོན་ལ་མན་ངག་མ་ཐོབ་པར་དེ་ཁོ་ན་ཉིད་དེ་ན་མངོན་སུམ་དུ་ཉེ་བར་དམིགས་པར་མི་འགྱུར་ཏེ། །དེའི་རང་བཞིན་མི་ཤེས་པའི་ཕྱིར་རོ། །དཔེར་ན་མུན་ནག་གིས་ཁེངས་པའི་ཁང་པར་ཁང་བདག་གི་མར་མེའི་དྲིན་གྱིས་དེའི་བུམ་
པ་སོགས་མཐོང་བ་དེ་བཞིན་དུ། བླ་མའི་དྲིན་གྱིས་དེ་ཁོ་ན་ཉིད་སྔར་མི་གསལ་བ་ཕྱིད་གསལ་བར་འགྱུར་གྱི་དེས་བསྐྱེད་པ་ནི་མིན་པས་བསྒོམ་པར་རིགས་སོ་ཞེས་འཆད་དོ། །དེའི་ལྟར་ན་སྔ་མའི་རྩོད་པའོ། །ཆག་འགྱུར་ལས། གང་ཡང་ཀུན་མཁྱེན་
རྟོགས་མིན་པས། །དེ་ནི་ཉེ་བར་དམིགས་མི་འགྱུར། །མུན་ནག་རབ་རིབ་ཀྱིས་ཁེངས་པ། །དྲིན་གྱིས་སྣང་བ་ཐོབ་པར་བྱ། །ཞེས་འབྱུང་ངོ་། །འདི་ནི་སྤྱོད་བསྡུས་ལས་སེམས་དབེན་ལ་སློབ་འདོད་པས་ཇི་ལྟར་བསླབ་པར་བྱ་བ་དྲིས་པའི་ལན་དུ། དེ་བཞིན་
6-5-3b


གཤེགས་པ་ཐམས་ཅད་ཀྱི་ཡང་དག་པར་བསྟན་པ་ལས་ཁ་ཕྱིར་ཕྱོགས་པའི་ཡུལ་མིན་པ། ཤིན་ཏུ་ཟབ་པ་མཆོག་ཏུ་རྟོགས་པར་དཀའ་བས་སངས་རྒྱས་རྣམས་ཀྱི་སྤྱོད་ཡུལ་དྲིས་པ་ལེགས་སོ། །དགེ་བའི་བཤེས་གཉེན་མཉེས་པར་བྱས་ནས་རང་གི་སེམས་
ཀྱི་ངོ་བོ་ཉིད་བཙལ་བར་བྱའོ། །ཞེས་གསུངས་པ་དག་མཐུན་པར་བཤད་ན་ལེགས་སོ། །དེ་ལ་སྔར་གིས་རང་གི་ཞེས་པའི་སྐབས་སུ་རང་གི་སེམས་ཀྱི་ཡང་དག་པའི་དོན་ཆུ་ལ་ཆུ་བཞག་པ་བཞིན་དུ་མཐོང་བར་གསུངས་པ་དེ་ཇི་ལྟར་ཡིན་སྙམ་ན། སེམས་ཀྱི་
དེ་ཁོ་ན་ཉིད་གང་ཡང་ཀུན་མཁྱེན་སངས་རྒྱས་རྟོགས་པ་སྟེ་ཐོབ་པ་རྣམས་ཀྱི་ནམ་ངག །རྗེས་སུ་འབྲངས་པ་མིན་པར་གཞན་གྱིས་ཉེ་བར་དམིགས་པར་མི་འགྱུར་པ་དེ་ནི། གཞན་ལ་མ་རིག་པའི་མུན་ནག་གིས་བསྒྲིབས་ནས་ཤེས་པར་མི་འགྱུར་བས། བླ་
མའི་དྲིན་གྱིས་མུན་པ་དེ་སེལ་བའི་སྣང་བ་ཐོབ་པར་བྱའོ། །ཞེས་བཤད་པར་དམ་བཅས་པའོ། །དེ་ལྟར་སྦྱོར་ན་བརྩམ་པར་དམ་བཅའ་རུ་བྱའོ། །གཉིས་པ་ལ་གཉིས། མདོར་བསྟན་པ་དང་། རྒྱས་པར་བཤད་དོ། །དང་པོ་ནི། རྡོ་རྗེ་བཟླས་པའི་རིམ་
པར། རྡོ་རྗེ་བཟླས་གནས་རྣལ་འབྱོར་པ། །སེམས་ལ་དམིགས་པ་ཐོག་པར་འགྱུར། །ཞེས་པའི་སེམས་དམིགས་སམ་སེམས་དབེན་གྱི་ཡེ་ཤེས་དེ་གང་ཞེས་པ་དང་། ཡང་རིམ་པ་དང་པོར། ཡེ་ཤེས་གསུམ་གྱི་དབྱེ་བ་ཡིས། །སེམས་ཙམ་ལ་ནི་
ངེས་པར་སྦྱར། །ཞེས་པའི་ཡེ་ཤེས་གསུམ་གྱི་དབྱེ་བ་དེ་གང་ཞེ་ན། དང་པོ་སྟོང་པ་དང་། གཉིས་པ་ཤིན་ཏུ་སྟོང་པ་དང་། གསུམ་པ་སྟོང་པ་ཆེན་པོ་དང་། བཞི་པ་ཐམས་ཅད་སྟོང་པ་སྟེ་བཞིའོ། །དེ་བཞིའི་བྱེ་བྲག་སྟེ་མི་འདྲ་བའི་ཁྱད་པར་ནི་རྒྱུ་དང་འབྲས་
6-5-4a


བུའི་སྒོ་ནས་ཤེས་པར་བྱའོ། །དང་པོར་སྐྱེ་བའི་སྟོང་བ་ནི་ཤེས་རབ་དང་། །དེ་ལས་སྐྱེས་པའི་ཤིན་ཏུ་སྟོང་པ་ནི་ཐབས་ཡིན་ལ། དེ་གཉིས་མཉམ་པར་སྦྱོར་བ་ལས་སྐྱེ་བའི་སྟོང་ཆེན་ནི་ཉེར་ཐོབ་རྫོགས་པའོ། །མཉམ་པར་སྦྱོར་ཚུལ་ནི། 
ཤེས་རབ་ཆགས་བྲལ་དང་ཐབས་ཆགས་པ་གཉིས་ཆགས་པ་ཡོད་མེད་གཉིས་སུ་འཆད་པ་ཡིན་ལ། ཉེར་ཐོབ་ནི་ཆགས་པ་བར་མ་ཡིན་པས་ཧ་ཆང་ཆགས་པ་དང་བྲལ་བ་དང་། ཧ་ཅང་ཆགས་པའི་མུ་གཉིས་སྤངས་ནས་ཆ་མཉམ་དུ་གནས་པའོ། །
ཉེར་ཐོབ་རྫོགས་པ་ལས་ནི་དེ་ལས་ཐམས་ཅད་སྟོང་པ་འོད་གསལ་ཀྱི་སེམས་སྐྱེའོ། །དེ་ལྟར་སྟོང་པ་བཞི་རྒྱུ་འབྲས་ཀྱི་རིམ་པའི་སྒོ་ནས་རྣམ་པར་དག་པ་འོད་གསལ་དུ་འགྱུར་བ་ནི། སྟོང་པ་གསུམ་མཉམ་པར་སྦྱོར་བའི་ཉེར་ལས་འོད་གསལ་ཀྱི་
གོ་འཕང་བླ་ན་མེད་པ་ཐོབ་པར་འགྱུར་བ་ཡིན་ནོ། །སྟོང་པ་གསུམ་མཉམ་པར་སྦྱོར་བ་ལ་ནི་རྣམ་ཤེས་གསུམ་མཉམ་པར་སྦྱོར་བ་ཞེས་ཀྱང་བྱའོ། །རིམ་པ་དང་པོར་རྩ་རྒྱུད་དུ་མདོར་བསྟན་པ་དང་། དེ་བཤད་རྒྱུད་ཀྱིས་རྒྱས་པར་བཤད་པའི་ཚུལ་གཉིས་
གསུངས་པ་ལྟར། རིམ་པ་འདི་ལའང་དེ་ལྟར་འཆད་དམ་མི་འཆད་སྙམ་ན། རིམ་པ་ཕྱི་མ་བཞི་ལ་དེ་ལྟར་གསལ་བར་མ་བཤད་ཀྱང་ཤེས་པར་ནུས་ཏེ། རྩ་རྒྱུད་ཀྱི་ལེའུ་དྲུག་པ་ལས། སེམས་ལ་དམིགས་པ་བདག་མེད་པ། །ཞེས་སོགས་ཀྱིས་མདོ་
ཙམ་དུ་མི་གསལ་བར་བསྟན་ལ། དེ་བཤད་པའི་རྒྱུད་གང་གིས་འཆད་པ་ནི་སྤྱོད་བསྡུས་ལས། དཔལ་ཡེ་ཤེས་རྡོ་རྗེ་ཀུན་ལས་བཏུས་པ་ལ་སོགས་པ་བཤད་པའི་རྒྱུད་ཀྱི་རྗེས་སུ་འབྲངས་ནས་རྣམ་པར་ཤེས་པ་གསུམ་གྱི་རང་བཞིན་གྱི་སྣང་བ་
6-5-4b


རྟོག་པར་བྱའོ། །ཞེས་གསུངས་ཏེ། ཀུན་ལས་བཏུས་ལས་གསུངས་པ་སྤྱོད་བསྡུས་སུ་དྲངས་པ་ནི་སྔར་དྲགས་ཟིན་ཏེ། །སོགས་ཀྱི་སྒྲས་བསྡུས་པ་རྡོ་རྗེ་ཕྲེང་བར་བཤད་པ་དང་། །གཉིས་མེད་རྣམ་རྒྱལ་ལས་ཀྱང་གསུངས་ཏེ་ལྔར་དྲངས་སོ། །རྣམ་ཤེས་གསུམ་
གྱི་རང་བཞིན་གྱི་སྣང་བ་ནི་སྤྱོད་བསྡུས་ལས། རྒྱུད་དེའི་རྗེས་སུ་འབྲངས་ནས་རྣམ་པར་ཤེས་པ་གསུམ་གྱི་ཡང་དག་པ་ཇི་ལྟ་བ་ཡོངས་སུ་ཤེས་པར་བྱའོ། །ཞེས་གསུངས་པ་ལྟར་ཡིན་གྱི་རང་བཞིན་བརྒྱད་ཅུ་ལ་རང་བཞིན་དུ་མི་བྱའོ། །གཉིས་པ་ནི། འདིར་སྤྱོད་
བསྡུས་ལས། རང་གི་སེམས་ཀྱི་ངོ་བོ་ཉིད་རྟོགས་པར་བྱ་དགོས་པའི་རྒྱུན་མཚན་དང་། སེམས་དེའི་ངང་ཚུལ་མདོར་ཇི་ལྟར་གསུངས་པ་དང་། དེའི་རང་བཞིན་རྣལ་འབྱོར་ཆེན་པོའི་རྒྱུད་ལ་བརྟེན་ནས་རྟོགས་པར་བྱ་དགོས་པ་དང་། རྒྱུད་ཀྱི་དོན་སེམས་
གསུམ་དང་རང་བཞིན་རྣམས་བཤད་པ་དང་། དེ་ཇི་བཞིན་དུ་ཤེས་པའི་ཕན་ཡོན་དང་། མ་ཤེས་པའི་ཉེས་དམིགས་བསྟན་པ་སྟེ་དྲུག་གིས་འཆད་དོ། །དེ་ལ་དང་པོ་ནི། དེ་ཉིད་བསྡུས་པ་ལས་རིགས་ཀྱི་བུ་མཉམ་པར་བཞག་པས་རང་གི་སེམས་སོ་སོར་
རྟོགས་ཤིག །ཅེས་པ་དང་། རྣམ་སྣང་མངོན་བྱང་ལས། བྱང་ཆུབ་ནི་རང་གི་སེམས་ཡང་དག་པ་ཇི་ལྟ་བ་བཞིན་དུ་ཤེས་པའོ། །ཞེས་པ་དང་། སྡེ་སྣོད་གསུམ་གྱི་ཚུལ་ལས་ཀྱང་། །གདུལ་དཀའ་བའི་སེམས་བཏུལ་ན་བདུད་ཀྱི་འཆིང་བ་ལས་གྲོལ་
བར་གསུངས་པས། རང་གི་སེམས་ཀྱི་དེ་ཁོ་ན་ཉིད་ཇི་ལྟ་བུ་ཞིག་ཡིན་པ་བཙལ་བར་བྱ་དགོས་སོ། །འདི་དག་གིས་ནི་རྒྱ་གར་བ་དང་བོད་ཁ་ཅིག་སེམས་དབེན་གྱི་ཡེ་ཤེས་ནི་ཆོས་ཅན་སེམས་ཀྱི་ངང་ཚུལ་རིག་པ་ཡིན་གྱི་ཆོས་ཉིད་ནི་མིན་ཏེ། གཞན་
6-5-5a


དུ་ན་འོག་གསལ་དང་ཁྱད་མེད་པར་འགྱུར་རོ། །ཞེས་འཆད་པ་བཀག་པ་ཡིན་ཏེ། ལུང་བར་པས་ནི་སེམས་ཀྱི་དེ་ཁོ་ན་ཉིད་རིག་པ་ལ་གསལ་བར་བཤད་ཅིང་། ལུང་དང་པོས་ཀྱང་། བྱང་སེམས་དོན་གྲུབ་མི་གཡོ་བའི་ཏིང་
ངེ་འཛིན་ལས་བསླང་བ་ལ་སེམས་ཀྱི་ཆོས་ཉིད་མངོན་སུམ་དུ་བྱེད་པའི་ཕྱིར་བསྐུལ་བ་ཡིན་པའི་ཕྱིར་དང་། ལུང་གསུམ་པའི་དོན་ཀྱང་སེམས་ཀྱི་གནས་ལུགས་མ་རྟོགས་ན་བདུད་ཀྱི་འཆིང་བ་བཅད་མི་ནུས་པའི་ཕྱིར་རོ། །སེམས་དབེན་གྱི་སྐབས་སུ་
ནི་སེམས་ཀྱི་ཆོས་ཉིད་རྟོགས་ཀྱང་མངོན་དུ་མ་གྱུར་ལ། འོད་གསལ་ཀྱི་སྐབས་སུ་ནི་མངོན་དུ་གྱུར་པ་ཡིན་པས་ཟློས་པར་མི་འགྱུར་རོ། །དེས་ན་སྒྱུ་མ་ལྟ་བུའི་ཏིང་ངེ་འཛིན་མངོན་སུམ་དུ་བྱ་བར་འདོད་པས་རྣམ་གཡེང་དང་སྒྲིབ་པ་ལྔ་པོ་སྤངས་ཏེ་
བཤད་རྒྱུད་ཀྱི་རྗེས་སུ་འབྲངས་ནས་རྣམ་ཤེས་གསུམ་གྱི་རང་བཞིན་རྟོགས་པར་བྱའོ། །གཉིས་པ་ནི། སེམས་དེའི་ངང་ཚུལ་ཕ་རོལ་ཏུ་ཕྱིན་པའི་ཐེག་པ་ནས་གསུངས་ཚུལ་ལ་གཉིས་ལས། དང་པོ་ལང་གཤེགས་ནས་གསུངས་ཚུལ་ནི། བྱང་
སེམས་ཆེན་པོས་རང་གི་སེམས་སྣང་བ་གཟུང་འཛིན་གྱི་རྣམ་རྟོག །སངས་རྒྱས་ཀྱི་སྤྱོད་ཡུལ་ཤེས་པར་འདོད་པས་འདུ་འཛི་དང་གཉིད་ལ་སོགས་པའི་སྒྲིབ་པ་སྤང་བར་བྱའོ། །ཞེས་གསུངས་ཏེ། ཚིག་དང་པོས་ཆོས་ཅན་གྱི་སེམས་དང་། སངས་
རྒྱས་ཀྱི་སྤྱོད་ཡུལ་ཞེས་པས་དེའི་ཆོས་ཉིད་བསྟན་ཏོ། །དེ་ནས་རྣམ་ཤེས་གསུམ་ནི་དངོས་པོ་ཐམས་ཅད་ཀྱི་རྒྱུར་གྱུར་པས་མདོར་བསྟན་ནས། འདི་ལྟ་སྟེ་ནས་འཇིགས་པ་སྟེ་ཞེས་པའི་བར་གྱིས་རྒྱས་པར་བཤད་ལ། མདོར་ན་ཁམས་གསུམ་
6-5-5b


པའི་དབང་པོའི་སྤྱོད་ཡུལ་རྣམས་ནི་རྣམ་པར་ཤེས་པའོ་ཞེས་པས་དོན་བསྡུས་ཏེ་རྣམ་ཤེས་གསུམ་དངོས་པོ་ཐམས་ཅད་ཀྱི་རྒྱུར་གྱུར་པའི་དོན་ཡིན་གྱི་ཁམས་གསུམ་ཐམས་ཅད་རྣམ་ཤེས་སུ་སྟོན་པ་མིན་ནོ། །བཟང་སྐྱོང་གིས་ཞུས་པ་ལས་གསུངས་
ཚུལ་ནི། རྣམ་ཤེས་ལུས་ཀྱི་འཁྲུལ་འཁོར་གྱི་རྟེན་སྣ་ཚོགས་ལ་བརྟེན་ནས་འཇུག་པ་དང་། དེས་ལུས་ལེན་པས་བྱེད་པ་པོ་དང་། དེ་ཉིད་ཆོས་ཀྱི་དབྱིངས་ཀྱི་རང་བཞིན་ཅན་ཡིན་པས་མི་ཟད་པ་དང་། སྔོན་གྱི་གནས་དྲན་པས་བློ་ཕུན་སུམ་ཚོགས་པ་དང་། ཉི་
འོད་དྲི་བཟང་ངན་ལ་འབབ་ཀྱང་དྲི་དེས་གོས་པ་མེད་ཅིང་ངན་པ་པོར་ཏེ་མི་འགྲོ་བ་བཞིན་དུ། རྣམ་ཤེས་ཀྱང་ཁྱི་དང་ཕག་ལ་སོགས་པའི་སྐྱེ་བ་འཛིན་ཀྱང་དེའི་སྐྱོན་གྱིས་མ་གོས་པར་གསུངས་སོ། །དེ་ནས་སྨན་ཆེན་གྱི་རྣམ་ཤེས་ལུས་ལས་འཕོས་པའི་རང་
བཞིན་ཞུས་པའི་ལན་དུ། ཨ་མྲ་ལ་སོགས་པའི་ས་བོན་ལ་རོ་གང་ཡོད་པ་དེ་འབྲས་བུ་ལ་འཕོ་བ་བཞིན་དུ། ས་བོན་ལྟ་བུའི་རྣམ་ཤེས་ཀྱང་འབྲས་བུ་དང་འདྲ་བའི་འགྲོ་བ་གང་དུ་འཕོ་བ་དེར་ལས་གཉིས་དང་ཚོར་བ་དང་དྲན་པ་ཡང་འཕོའོ་ཞེས་གསུངས་སོ། །དེ་
ལྟར་ན་རྣམ་ཤེས་ནི་ཁ་དོག་དང་དབྱིབས་དང་མཚན་མ་དང་བདག་ཉིད་མེད་པ། རང་རིག་པ་ཙམ་དུ་བཀའ་སྩལ་ལོ་ཞེས་ལྷས་གསུངས་ཏེ། རང་རིག་པ་ཙམ་ཞེས་པའི་ཙམ་གྱི་སྒྲས་ནི། རྣམ་ཤེས་ཀྱི་དབང་གིས་འབྱུང་བ་མ་གཏོགས་པ་སྣོད་བཅུད་གུད་དུ་སྒྲུབ་
པ་གཅོད་དོ། །བདག་ཉིད་མེད་པ་ནི་རང་བཞིན་མེད་པའོ། །དེ་མདོ་དེ་གཉིས་ཀྱིས་བསྟན་ཚུལ་ནི། རྟེན་འབྲེལ་གྱི་སྒོ་ནས་བསྟན་པའོ། །འགྱུར་རྙིང་ལས། གཞན་ཡང་ཞེས་འབྱུང་ཡང་། འགྱུར་ཡང་ཞེས་འབྱུང་ཡང་། །འགྱུར་གསར་ལས་དེ་ལྟ་ནའང་ཞེས་པ་ལེགས་ཏེ། ཕར་ཕྱིན་གྱི་
6-5-6a


མདོ་ལས་སེམས་རང་བཞིན་མེད་པ་བཤད་ཀྱང་། །རྣལ་འབྱོར་ཆེན་པོའི་རྒྱུད་ལ་མ་ཞུགས་བར་དུ་རང་གི་སེམས་ཀྱི་ཡང་དག་པ་ཇི་ལྟ་བ་བཞིན་ཤེས་མི་ནུས་པར་བཤད་དེ། སེམས་ཀྱི་ཡང་དག་པ་མངོན་དུ་གྱུར་པ་
ཙམ་ལ་དེ་མི་དགོས་ཀྱང་ཆོས་ཀྱི་སྐུ་མངོན་དུ་གྱུར་པ་ལ་ཟེར་བ་ཡིན་ནོ། །ཡང་ན་སྒྱུ་ལུས་མངོན་དུ་བྱེད་ནུས་པའི་སེམས་དབེན་གྱིས་རང་གི་སེམས་ཀྱི་དེ་ཉིད་རྟོགས་པ་ལ་བྱའོ། །འདིས་ནི་རྒྱུད་སྡེ་འོག་མ་པ་དག་ཕར་ཕྱིན་རྐྱང་པས་འཚང་རྒྱ་མི་ནུས་
པར་སྟོན་ཏོ། །རྒྱུད་དེ་ལས་རྡོ་རྗེའི་ཚིག་བཤད་པ་ཞེས་པ་ན་ཀུན་ལས་བཏུས་ལས་འདུས་པའི་རྡོ་རྗེའི་ཚིགས་བཤད་པའོ། །གསུམ་པ་ལ་གསུམ། སྣང་བ་བཤད་པ། རང་བཞིན་བཤད་པ། དེ་ལ་རྩོད་པ་སྤང་བའོ། །དང་པོ་ལ་གཉིས། རྣམ་ཤེས་
གསུམ་གྱི་མིང་གི་རྣམ་གྲངས་དང་། སྟོང་པ་གསུམ་གྱི་ཡེ་ཤེས་བསྟན་པའོ། །དང་པོ་ནི། སྟོན་པས་ཐབས་དང་ཤེས་རབ་ཅེས་པའི་གསུང་གསལ་བའི་ཐ་སྙད་འདི་ནི། དགོངས་པའི་གསུང་གིས་མ་ནིང་གི་ཚིག་གི་བརྡ་མི་གསལ་བ་སྟེ། 
ཉེ་བར་ཐོབ་པའི་ཡེ་ཤེས་ཀྱང་ངོ་། །ཞེས་ཆག་གིས་བསྒྱུར་ཏེ། ཤེས་རབ་དང་ཐབས་ཞེས་བུད་མེད་དང་སྐྱེས་པའི་བརྡས་གསལ་བར་གསུངས་པའི་ཤུགས་ཀྱིས་མ་ནིང་གི་བརྡ་མི་གསལ་བ་ཡང་འཕངས་པའི་དོན་ནོ། །མིང་གི་རྣམ་གྲངས་འདི་
གསུམ་སྔགས་ནས་ཡིན་ནོ། །འདིར་འགྱུར་རྙིང་ལས་འབྱུང་བ་མི་ལེགས་པར་སྣང་ངོ་། །ཐེག་པ་ཐུན་མོང་བ་ལ་གྲགས་པའི་རྣམ་གྲངས་ནི་སེམས་ཡིད་རྣམ་ཤེས་གསུམ་དང་། ཀུན་བརྟགས་གཞན་དབང་ཡོངས་གྲུབ་གསུམ་དང་། ཆགས་
6-5-6b


སྡང་གཏི་མུག་གསུམ་དང་། ངོ་བོ་ཉིད་གསུམ་ལ་སོགས་པའོ། །མིང་འདི་དག་ཕར་ཕྱིན་དུའང་གྲགས་པས་ཐུན་མོང་ཞེས་བྱའི་མིང་འདི་རྣམས་སྣང་མཆེད་ཐོག་གསུམ་ལ་འཇུག་པ་ཐུན་མོང་བར་སྟོན་པ་མིན་ནོ། །ངོ་བོ་ཉིད་གསུམ་ནི་སྣང་བ་སྟོན་པ་
གཉིས་ཀའི་ངོ་བོ་ཉིད་གསུམ་ཡིན་ནམ་བརྟག་གོ། །རྡོ་རྗེ་ཐེག་པར་བཤད་པའི་མིང་གི་རྣམ་གྲངས་ནི། སྣང་མཆེད་ཐོབ་གསུམ་དང་། སྟོང་པ་གསུམ་དང་། སེམས་སེམས་བྱུང་མ་རིག་པ་དང་། ཆགས་པ་ཆགས་བྲལ་བར་མའོ། །དེ་ལ་སེམས་
ཡིད་རྣམ་ཤེས་གསུམ་དང་སྟོང་པ་གསུམ་དང་སེམས་སེམས་བྱུང་མ་རིག་པ་གསུམ་དང་གཞན་དབང་ཀུན་བརྟགས་ཡོངས་གྲུབ་གསུམ་དང་། ཆགས་སྡང་གཏི་མུག་གསུམ་དང་། ཆགས་བྲལ་ཆགས་པ་བར་མ་གསུམ་དང་། སྣང་མཆེད་ཐོབ་གསུམ་
རིམ་པ་བཞིན་དུ་སྦྱར་རོ། །འཆི་བའི་འོད་གསལ་མྱོང་བའི་སེམས་ནི་འཆི་སེམས་ཡིན་ལ། །དེའི་སྔ་རོལ་ཏུ་སྣང་མཆེད་ཐོབ་གསུམ་འོང་ཞིང་། དེ་གསུམ་ལ་སེམས་ཡིད་རྣམ་ཤེས་ཀྱི་ཐ་སྙད་འདོགས་པས་སེམས་ཡིད་རྣམ་ཤེས་གསུམ་གྱི་སེམས་
ཀུན་གཞི་ལ་བྱས་ནས་དེ་ཁོ་ན་འཆི་སེམས་སུ་འདོད་པ་དང་མི་མཐུན་ནོ། །དེ་རྣམས་ཕལ་མོ་ཆེ་དེ་གསུམ་ལ་ཐ་སྙད་དེ་དག་འཇུག་པའི་རྒྱུ་མཚན་ཕྱོགས་རེ་ཡོད་པའི་སྒོ་ནས་ཀུན་བརྟགས་སོགས་སུ་བཤད་པ་ཡིན་གྱི་མིང་དེ་དག་གི་དོན་ཐམས་ཅད་དེ་གསུམ་
ཡིན་པར་སྟོན་པ་མིན་ནོ། །གཉིས་པ་ནི། དེ་ནི་སྟོང་པ་གསུམ་གྱི་རང་གི་མཚན་ཉིད་སོ་སོ་རང་གིས་རིག་པར་བྱ་བའི་ངོ་བོ་ནི་ངག་གི་སྒོ་ལ་བརྟེན་ནས་བསྟན་པར་བྱ་སྟེ། སྟོན་པས་སེམས་ནི་ཁ་དོག་དང་དབྱིབས་མེད་པ་ནམ་མཁའི་མཚན་ཉིད་ཅན་ནོ། །ཞེས་པ་
6-5-7a


དང་། སྣང་བའི་མཚན་ཉིད་དང་རྗེས་སུ་མྱོང་བའི་མཚན་ཉིད་ཀྱིས་སོ་སོར་རྟོགས་པར་བྱའོ། །ཞེས་གསུངས་པའི་དང་པོ་སྟོན་པ་ལ་སྣང་བའི་མཚན་ཉིད་ནི། རྣམ་པ་མེད་པའི་རང་བཞིན་ལུས་དང་ངག་མེད་པ་སྟེ། སྟོན་གྱི་ནམ་མཁའ་དྲི་མ་
མེད་པ་ལ་ཟླ་བའི་འོད་ཟེར་གྱིས་ཁྱབ་པ་བཞིན་དུ། གསལ་བའི་རང་བཞིན་གྱི་རྣམ་པར་དངོས་པོ་མ་ལུས་པ་རྣམས་དམིགས་པས་སྣང་བའོ། །འདི་ནི་དོན་དམ་བྱང་ཆུབ་ཀྱི་སེམས་ཤེས་རབ་ཀྱི་སེམས་ཤེས་རབ་ཀྱི་རང་བཞིན་སྟོན་པ་དང་པོ་སྟེ། །ཨཾ་ཞེས་པ་ངག་གི་སྒོ་ལ་བརྟེན་
པའི་ས་བོན་བརྟན་པར་བྱེད་པའི་རྒྱུ། མོས་པ་ཆུང་བས་དགོངས་ཏེ་གསུངས་པ་མི་རྟོགས་པས་ཟླ་བའི་གཟུགས་སུ་དམིགས་པར་བྱེད་ཅིང་། པདྨའམ་བུད་མེད་དམ་གཡོན་པའམ་མཚན་མོའི་མིང་ངམ། འཇམ་པའི་ངོ་བོར་སེམས་ཀྱི་ཀུན་རྫོབ་ཀྱི་
གཟུགས་གསལ་བའོ། །སྣང་བ་མཆེད་པའི་མཚན་ཉིད་ནི། དེ་ཡང་གཟུང་འཛིན་དང་བྲལ་བ་རྣམ་པ་མེད་པའི་རང་བཞིན་ལུས་དང་ངག་མེད་པ་སྟེ། སྟོན་ཀའི་ནམ་མཁའ་ལ་ཉི་འོད་ཀྱིས་ཁྱབ་པ་བཞིན་དུ། ཤིན་ཏུ་གསལ་ཞིང་དྲི་མ་མེད་པའི་ངོ་བོ་ཉིད་
དངོས་པོ་མ་ལུས་པ་དམིགས་པ། བྱང་ཆུབ་ཀྱིས་སེམས་ཀུན་ཏུ་བཟང་པོ་རིམ་པ་གཉིས་པ་ཤིན་ཏུ་སྟོང་པའི་མཚན་ཉིད་ཅན། ཨཱཿ ཞེས་པ་ངག་གི་སྒོ་ལ་བརྟེན་པའི་ས་བོན་བརྟན་པར་བྱེད་པའི་རྒྱུ་སྟེ། མོས་པ་ཆུང་བས་དགོངས་ཏེ་གསུངས་པ་
རྟོགས་པས། ཉི་མ་ལ་བརྟེན་ནས་དམིགས་པར་བྱེད་ཅིང་། རྡོ་རྗེ་རྩེ་པའམ། རིན་པོ་ཆེའམ། ཉིན་མོའམ། སྐྱེས་པའི་གཟུགས་སམ། གཡས་པ་ཞེས་པ་དང་། རྩུབ་པའི་རྣམ་པ་ནི་སེམས་ལས་བྱུང་བའི་ཀུན་རྫོབ་ཀྱི་གཟུགས་སོ། །
6-5-7b


སྣང་བ་ཉེར་ཐོབ་ཀྱི་མཚན་ཉིད་ནི། དེ་བཞིན་དུ་ནམ་མཁའི་མཚན་ཉིད་དངོས་པོ་མེད་པའི་གཟུགས་ཅན། །ལུས་དང་ངག་མེད་པ་སྟེ། མཚམས་ཀྱི་སྨག་ལ་བབ་པའི་ནམ་མཁའ་བཞིན་དུ་ཕྲ་བཞིན་བདག་མེད་པ། སྲོག་དང་རྩོལ་བ་མི་རྒྱུ་བས་རྒྱུ་བ་མེད་པ། སེམས་
མེད་པ་མི་གཡོ་བ་ངག་གི་ས་བོན་ལ་བརྟེན་ནས་གནས་པའི་སྒོ་ཡོངས་སུ་གྲུབ་པ་འདི་ནི་ཉེར་ཐོབ་མ་རིག་པའི་མཚན་ཉིད་ཅན་སྟོང་པ་ཆེན་པོའོ། །དེ་ལ་དངོས་པོ་མེད་པའི་གཟུགས་ཅན་ནི་ཆག་གིས་རྣམ་པ་མེད་པའི་རང་བཞིན་དུ་བསྒྱུར་བ་ལེགས་ལ། 
གསུམ་ག་ལ་དེ་གཉིས་ལྟར་གསུངས་པ་ནི། བར་པ་ལ་གཟུང་འཛིན་དང་བྲལ་བ་ཞེས་གསུངས་པའི་དོན་ཏེ་གཉིས་སྣང་རགས་པའི་རྣམ་པ་དང་བྲལ་བའོ། །ལུས་ངག་མེད་པ་གསུམ་ག་ལ་གསུངས་པ་ནི། ཡེ་ཤེས་དེའི་དོན་དེ་གཉིས་ཀྱི་སྣང་བ་མེད་
པའོ། །ནམ་མཁའི་མཚན་ཉིད་ཅེས་པ་ནི། གསུམ་ག་ཟླ་འོད་དང་ཉི་འོད་དང་སྨག་གིས་ཁྱབ་པའི་ནམ་མཁའ་བཞི་ན་དུ་སྣང་བའོ། དངོས་པོ་མ་ལུས་པ་དམིགས་པ་ཞེས་པ་ནི་ཡུལ་དུ་གང་སྣང་ཐམས་ཅད་སྔ་མ་བཞིན་དུ་སྣང་བའོ། །འདི་གསུམ་གདོན་དམ་
བྱང་ཆུབ་ཀྱིས་སེམས་ཀྱི་ངོ་བོར་སྐྱེ་བའི་དུས་སུ་རླུང་རང་བཞིན་ལ་ཐིམ་ནས་རང་བཞིན་ལོག་པའི་རྗེས་སུ་སྐྱེ་བས་སྣ་བུག་ནས་སྲོག་རྩོལ་རྒྱུ་བ་མེད་ཀྱང་གསུམ་པ་ལ་ཁྱད་པར་དུ་སྨོན་པ་ནི་དེ་གསུམ་གྱི་ནང་ནས་ཀྱང་རླུང་གི་གཡོ་བ་ཕྲ་རུ་སོང་བ་ལ་དགོངས་
སོ། །གསུམ་པ་ལ་ཆག་གི། ངག་གི་ས་བོན་ཨ་ལ་བརྟེན་པའི་སྒོ་ཡོངས་སུ་གྲུབ། །ཅེས་བསྒྱུར་ལ། དེ་གསུམ་གྱི་ངག་གི་སྒོ་ལ་བརྟེན་པ་ནི་ངག་གི་སྒོ་ནས་བརྗོད་པའི་ཡི་གེ་གསུམ་མོ། །དེའི་ས་བོན་ནི་རྒྱུ་སྟེ་རླུང་ངོ་། །དེ་བརྟན་པར་བྱེད་པའི་རྒྱུ་ནི་ཡེ་
6-5-8a


ཤེས་དེ་དག་གི་སྒོ་ནས་རླུང་ཀུན་ནས་གཡོ་བ་འགོག་པའོ། །མོས་པ་ཆུང་བ་ནི་བློའི་མཐུ་ཆུང་བ་ལས་དང་པོ་པའི་རྣལ་འབྱོར་བ་བསྐྱེད་རིམ་པའོ། །དགོངས་ཏེ་གསུངས་པ་ནི་སྒྲ་འགལ་བ་ཟླ་ཉི་ལ་སོགས་པའི་སྒོ་ནས་ཡེ་ཤེས་
གསུམ་བརྗོད་པའོ། །དེས་དེ་མི་རྟོགས་པ་ནི་ལུང་ལ་བརྟེན་ནས་མི་ཤེས་པ་མིན་གྱི་མངོན་དུ་བྱེད་མི་ནུས་པའོ། །དེས་ཟླ་བ་སོགས་ལ་དེ་དག་ཏུ་མོས་ནས་བསྒོམས་པས་མཐར་ཡེ་ཤེས་རྣམ་མངོན་དུ་བྱེད་ནུས་པར་འགྱུར་པའོ། །ཀུན་རྫོབ་ཀྱི་གཟུགས་
ཞེས་པ་ནི་ཟླ་ཉི་ལ་སོགས་པའི་དོན་རྣམས་སྣང་བ་རྣམས་ཀྱི་ཀུན་རྫོབ་པའི་ངང་ཚུལ་དུ་སྟོན་པ་མིན་ཏེ། སྔར་ནམ་མཁའ་གསུམ་བཞིན་དུ་བཤད་པ་ནི་སྣང་བ་གསུམ་གྱི་དོན་དམ་པའི་ངང་ཚུལ་ཡིན་པས་དེ་ལས་རྣམ་པར་དབྱེ་བའི་ཕྱིར་དུའོ། །འདི་ནི་
གཙོ་བོ་རྡོར་བཟླས་མཐར་ཕྱིན་པའི་འོག་ཏུ་ཡེ་ཤེས་གསུམ་གྱི་སྐྱེ་ཚུལ་ཡིན་ཏེ། འཆི་བ་ལ་སོགས་པའི་གཞི་དུས་སུ་ཡང་འདི་དང་རྗེས་སུ་མཐུན་པ་སྐྱེའོ། །གཉིས་པ་ནི། ཡེ་ཤེས་རེ་རེ་འབྱུང་བ་ལ་རང་བཞིན་བྱུང་བ་རྣམ་པར་གཞག་པར་བྱ་སྟེ་
ཞེས་གསུངས་པའི་ཡེ་ཤེས་ནི་སྔར་བཤད་པ་དེ་རྣམས་མིན་གྱི་སྤྱིར་སྣང་བ་གསུམ་གྱི་ཡེ་ཤེས་ཞེས་པའམ་ཤེས་པ་ལ་བྱའོ། །དེ་ལ་ཤེས་རབ་ཀྱི་ཡེ་ཤེས་རང་བཞིན་ཆགས་བྲལ་གསུམ་དང་། ཡིད་ཀྱི་འགྲོ་འོང་གཅིག་དང་། མྱ་ངན་གསུམ་
དང་། ཞི་བ་དང་རྣམ་པར་རྟོག་པ་གཉིས་དང་། འཇིགས་པ་གསུམ་དང་། ཉི་བར་ལེན་པ་དང་མི་ཤེས་པ་གཉིས་དང་། ཚོར་བ་གསུམ་དང་། བཀྲེས་སྐོམ་དང་རིག་པའི་བྱ་བྱེད་ལས་གསུམ་དང་། སོ་སོར་རྟོག་པ་དང་ངོ་ཚ་ཤེས་པ་དང་སྙིང་རྗེ་
6-5-8b


དང་བརྩེ་བ་གསུམ་དང་། དགོས་པ་དང་སྡུད་པའམ་སོགས་པ་དང་ཕྲག་དོག་གོ། །དེ་ཡུལ་ཡིད་འོང་མི་འོང་བར་མ་གསུམ་དུ་ངེས་པ། དེ་གསུམ་ལ་དམིགས་ནས་འདོད་པའི་རྣམ་པ་ཅན་དང་། མི་འདོད་པའི་རྣམ་པ་ཅན་དང་། དེ་གཉིས་ཀའང་མེད་པར་
བཏང་སྙོམས་པའི་རྣམ་པ་ཅན་དུ་འཇུག་པའི་རྟོག་པའང་གསུམ་དུ་ངེས་སོ། །དེའི་རྒྱུ་རྟོག་མེད་ཀྱི་སྣང་བའང་ཡུལ་གསུམ་ལ་དམིགས་པ་གསུམ་མོ། །དེའང་ཡུལ་ལ་འདོད་ཆགས་ལོག་པའི་སྒོ་ནས་ནི་དང་པོ་གསུམ་མོ། །ཡུལ་ལ་འཇུག་ཚུལ་གྱི་སྒོ་ནས་ནི་
འགྲོ་བ་སྤྲོ་བ་དང་འོང་བ་སྡུད་པའོ། །སེམས་ཁྲལ་གྱི་སྒོ་ནས་ནི་མྱ་ངན་གསུམ་མོ། ཞི་བ་ནི་དགའ་བ་ཞི་བའོ། རྣམ་པར་རྟོག་པ་ནི་མི་འདོད་པའི་རྣམ་པར་རྟོག་པའོ། །མི་འདོད་པ་སྐྱེད་པའི་སྒོ་ནི་འཇིགས་པ་གསུམ་མོ། སྲེད་པ་གསུམ་ནི་དགའ་བའི་རྣམ་པ་
ཅན་མིན་གྱི་ཡུལ་དེ་ལ་གདུང་བ་ལ་སྲེད་པ་ཞེས་བཏགས་པས་འོག་མའི་འདོད་ཆགས་གསུམ་དང་མི་དྲའོ། །ཉི་བར་ལེན་པ་ནི་གནོད་པའི་བསམ་པ་ལོག་པའོ། །མི་དགེ་བའམ་མི་ཤེས་པ་ནི་དེ་ལ་དམིགས་ནས་མི་འདོད་པར་ལྟ་བའོ། །ཚོར་བ་གསུམ་ནི་གདུང་
བའི་ཚོར་བའོ། །རིག་པ་པོ་ལ་སོགས་པའང་ཡིད་དུ་མི་འོང་བའི་དབང་དུ་བྱས་པ་ལ་རྟོག་པའོ། །ངོ་ཚ་ཤེས་པ་ན་ངོ་ཚ་ནས་མི་འདོད་པའོ། །སོ་སོར་རྟོག་པ་ནི་ཁོན་འཛིན་ཡང་ཡང་དྲན་པའོ། སྙིང་རྗེ་ནི་དེས་ཡིད་མི་བདེ་བ་བསྐྱེད་པའོ། བརྩེ་བ་གསུམ་ནི་ཉམ་
ཐག་པའི་རྣམ་པ་ཅན་ནོ། །སྡུད་པ་ནི་ཡུལ་ལས་ཕྱིར་ཕྱོགས་པའོ། །སེར་སྣ་ཞེས་བསྒྱུར་ཡང་ཕྲག་དོག་ཏུ་བསྒྱུར་བ་ལེགས་སོ། །འདིས་བཞི་བཅུ་དང་བདུན་ལ་ཡང་རིགས་པ་སྦྱར་རོ། །རང་བཞིན་བརྒྱད་ཅུ་པོ་ལ་ཉིན་མཚན་གྱི་ཕྱེ་ན་བརྒྱ་དྲུག་ཅུ་སྟེ་སྒོང་སྐྱེས་
6-5-9a


ལ་སོགས་པས་ཀྱང་སྤྱོད་དོ། །དེ་ནས་རང་བཞིན་བརྒྱད་ཅུ་རང་གཞན་གྱི་རྒྱུད་ལ་རྒྱུ་བ་ངེས་ན། ལུང་གིས་ཇི་ལྟར་བཤད་པ་བསྟན་དུ་གསོལ། །ཞེས་པའི་ལན་དུ། འདུས་པ་ཕྱི་མའི་སྔགས་ཀྱི་ངེས་ཚིག་དྲངས་སོ། །སྔར་དྲངས་པ་ལྟར་ཡེ་ཤེས་
རྡོ་རྗེ་ཀུན་ལས་བཏུས་སུ་གསལ་བར་སྣང་མོད་ཀྱང་། རྒྱུད་ཕྱི་མ་དྲངས་པ་ནི། སྔགས་ཀྱི་ངེས་ཚིག་ཡིད་སྐྱོབ་ཀྱི་ཡིད་དེ་དབང་པོ་དྲུག་དང་ཡུལ་དྲུག་གི་རྐྱེན་གྱི་བྱུང་བའི་ཡིད་ལ་གསུངས་པས་ཡིད་དེ་ཚོགས་དྲུག་གི་ཤེས་པ་ལ་གསལ་བར་བཤད་ཅིང་། དེ་དྲུག་
གི་གང་སྐྱབས་པའི་ཡིད་ཡིན་པའི་ཕྱིར་གང་ལས་སྐྱོབ་པའི་ཡིད་དུ་དགོས་སོ། །ཡང་ན་སྔགས་ཀྱི་སྤྱོད་པ་བྱས་ནས་ཡིད་སྐྱོབ་པའི་སྐབས་སུ་གསུངས་པས་རང་བཞིན་ལ་གོ་ནུས་ཏེ། སྤྱོད་པའི་དགོས་པ་ནི་ཀུན་རྟོག་གཅོད་པའི་ཆེད་ཡིན་པའི་ཕྱིར་རོ། །རང་བཞིན་
བརྒྱད་ཅུ་ལས། ཉོན་མོངས་པ་དགུ་བཅུ་རྩ་བརྒྱད་འབྱུང་བ་ནི་མཛོད་ནས་བཤད་པ་ལྟར་མཐོང་སྤང་གྱ་བརྒྱད་དང་། སྒོམ་སྤང་བཅུར་བཤད་པའོ། །ལྟ་ངན་རེ་གཉིས་སོགས་འབྱུང་པ་མི་ཚགས་པའི་དྲ་བ་ལས་གསུངས་པ་ལྟར་རོ། །གསུམ་པ་ལ་གཉིས། རྩོད་
པ་དང་། དེའི་ལན་ནོ། །དང་པོ་ནི། སྟོང་པའི་ཡེ་ཤེས་ནི་ཟླ་བའི་སྣང་བ་ལྟ་བུ་སྟོང་པ་ཙམ་མོ། །ཞེས་སོགས་ཀྱིས་བསྟན་ཏེ་སྔར་དྲངས་ཟིན་ཏོ། །གོང་དུ་ཡེ་ཤེས་གསུམ་གྱི་ངོས་འཛིན་ནམ་མཁའ་ལྟ་བུར་གསུངས་པ་དང་དེ་དག་ལས་རང་བཞིན་གྱི་རྟོག་པ་རྣམས་
འབྱུང་བར་བཤད་པ་གཉིས་ལ་འགལ་བ་འཛིན་པའོ། །མེལ་ཚེ་བྱེད་ཅེས་པ་ནི་སྦྲོ་བར་བྱེད་ཅེས་པ་དང་སེམས་པ་མེད་པར་བྱེད་ཅེས་པ་ནི་སྡུད་པར་བྱེད་པ་འདྲི་བའོ། །དེའི་ལན་ནི། །ནམ་མཁའ་ལྟ་བུ་ཡིན་ཀྱང་སྣང་བ་དང་བཅས་པ་ཡིན་པས་གཡོ་བྱེད་ཀྱི་རླུང་
6-5-9b


དང་བཅས་པའོ། །དེས་ན་རླུང་གིས་རིམ་གྱིས་གཡོས་བ་ལ་བརྟེན་ནས་རྟོག་པ་རྣམས་འབྱུང་ངོ་ཞེས་པའོ། །རྣམ་ཤེས་ནི་གཟུགས་སུ་མ་གྲུབ་ལ། ནང་གི་རླུང་ཕྲ་བའང་གཡོས་པའི་བྱ་བ་ཙམ་གྱི་གཟུགས་ཤིན་ཏུ་ཕྲ་བ་མ་གཏོགས་པ་གཟུགས་སུ་མེད་པས་ཤེས་
པ་དང་འདྲེས་ནས་བྱ་བ་ཐམས་ཅད་རྫོགས་པར་བྱེད་དོ། །དེའི་ཤེས་བྱེད་དུ་རང་རིག་ཙམ་ཞིག་སོགས་དྲངས་སོ། །དེའི་རྐང་པ་དང་པོ་གཉིས་ནི་ཕྱོགས་སྔའི་རྟགས་སོ། །འོན་ཀྱང་ཞེས་པ་ནི་ཁྱབ་པ་མེད་པར་སྟོན་ཏེ། །དེ་ལ་དབྱེ་བ་ཡོད་ཅེས་པ་ནི་གསུམ་དུ་བཤད་
ཅེས་པའི་བར་གྱིས་སོ། །དབྱེ་བ་ཡོད་ཚུལ་ནི། ཉིན་མཚན་དང་མཚམས་ཀྱིས་ཏེ་གཉིས་སྣང་དང་བཅས་པར་རོ། །དེས་ན་གཡོ་བྱེད་ཀྱི་རླུང་ཡོད་པ་ནི། དེའི་གཞི་ནི་ཞེས་སོགས་ཀྱི་སྟོན་ཏེ་སེམས་དེའི་བཞོན་པར་གྱུར་པས་རྟེན་ནི་བཞིའོ། །རླུང་རྣམས་ཞེས་པ་ནས་
དམིགས་པར་འགྱུར་ཞེས་པའི་བར་གྱིས་ནི་སྣང་བ་རླུང་གིས་བསྐྱོད་ནས་ཡུལ་ལ་འཇུག་ཚུལ་སྟོན་ནོ། །གང་ཚེ་ནས་དེ་དང་དེ་རྗེས་སྤྱོད་ཅེས་པའི་བར་གྱིས་ནི་དེ་ལས་རང་བཞིན་འབྱུང་ཚུལ་སྟོན་ཏོ། །འོ་ན་སྣང་བ་གསུམ་རྗེས་དཔག་གིས་དཔོག་པར་གསུངས་པ་ཅི་ཡིན་
སྙམ་ན། སྣང་བས་རང་བཞིན་མ་སྐྱེད་པའི་སྐབས་དེ་ངེས་དཀའ་བས་ཕལ་ཆེ་བ་ལ་དགོངས་ཀྱི་མངོན་དུ་མི་འགྱུར་བ་མིན་ཏེ་དཔེས་ཤེས་སོ། །ཤེས་པ་ལ་རླུང་འཇུག་པ་ལས་སྐད་ཅིག་ཐང་ཅིག་སོགས་ཀྱི་ཚད་ཙམ་དུ་སྣང་བ་གཡོ་ལ། དེ་ནས་དེ་རྣམས་ཀྱི་
ཚད་དུ་རང་བཞིན་རྣམས་མྱོང་བར་འགྱུར་རོ། །སེམས་པའམ་དྲན་པ་མེད་པ་ན་མ་རིག་པ་སྟེ་དེ་ལ་ཐུག་གི་བར་དུ་སྡུད་པ་ནི་རླུང་དང་རྟོག་པ་ཐིམ་པའི་རིམ་པས་སོ། །ཕན་ཡོན་དང་ཉེས་དམིགས་ནི་གོ་སླའོ། །གཉིས་པ་ལ་ལྔ། སྣང་བ་དང་རང་བཞིན་གཏན་ལ་དབབ་
6-5-10a


པ་དང་། སྟོང་པ་བཞི་ལས་ལྷའི་སྐུ་སྐྱེད་ཚུལ་དང་། འོད་གསལ་ལྷན་ཅིག་སྐྱེད་པའི་ཡེ་ཤེས་དང་། །ལམ་འདིས་འགྲོད་པའི་སའི་རྣམ་གཞག་དང་། རྟོག་པ་དང་བོགས་འདོན་པའི་སྤྱོད་པ་བྱ་བའོ། །དང་པོ་ལ་བཞི། སྣང་བ་གསུམ་
དང་རང་བཞིན་གྱི་མཚན་ཉིད་བསྟན་པ་དང་། སྟོང་པ་གསུམ་གྱི་ཡེ་ཤེས་སྐྱེད་ཚུལ་དང་། དེ་ལ་བརྟེན་ནས་རང་བཞིན་རྣམས་འོད་གསལ་དུ་འཇུག་ཚུལ་དང་། དེ་ལྟར་མ་ཤེས་པ་དང་ཤེས་པའི་སྐྱོན་ཡོན་བསྟན་པའོ། དང་པོ་ལ་གསུམ་སྣང་བ་
དང་དེའི་རང་བཞིན་བསྟན་པ་དང་། དེ་གཉིས་འབྱུང་བའི་དུས་ཚོད། སྣང་བ་ལས་རང་བཞིན་སྐྱེ་བ་མི་འགལ་བའི་ཚུལ་ལོ། དང་པོ་ལ་གསུམ། སྣང་བ་དང་དེའི་རང་བཞིན། སྣང་བ་མཆེད་པ་དང་དེའི་རང་བཞིན། སྣང་བ་ཉེར་ཐོབ་དང་དེའི་རང་བཞིན་ནོ། །
དང་པོ་ལ་གསུམ་སྣང་བའི་ངོ་བོ་དང་། རང་བཞིན་གྱི་དབྱེ་བ་དང་། ཀུན་རྫོབ་པའི་སྣང་བ་ལས་དེ་རྣམས་འབྱུང་བར་བསྟན་པའོ། །དང་པོ་ནི། སྣང་བར་བྱེད་པས་སྣང་བ་སྟེ་འཇུག་ཤེས་དང་པོ་དང་། །ཡིད་དགའ་བར་སྣང་བས་སྣང་བའི་ཡེ་ཤེས་ཀྱང་
སྣང་བའོ། །སྟོང་པ་ནི་རང་བཞིན་སོ་གསུམ་མི་དམིགས་པའི་ཕྱིར་རོ། །ཤེས་རབ་ནི་དེ་ཉིད་ཁྱད་པར་གྱི་ཡེ་ཤེས་ཡིན་པའི་ཕྱིར་རོ། །སེམས་ནི་དེ་ཉིད་ཡུལ་ཐམས་ཅད་རྟོགས་པས་སོ། །གཞན་དབང་ནི་སྔགས་དང་ཕྱག་རྒྱའི་རྒྱུ་རྐྱེན་ལས་བྱུང་བའི་
ཕྱིར་རོ། །ཞེས་ལཀྵྨཱིས་བཤད་དོ། །གཉིས་པ་ནི། །དེ་ཡི་རང་བཞིན་འཕྲོག་གསལ་བ། །ཞེས་པ་ནི། རང་བཞིན་སུམ་ཙུ་རྩ་གསུམ་གང་། །ལུས་ཅན་རྣམས་ཀྱི་རང་རིག་བྱ། །ཞེས་པའི་བར་གྱིས་སྟོན་ཏེ། །རྟགས་ལ་མ་བརྟེན་པར་མྱོང་
6-5-10b


སྟོབས་ཀྱིས་ངེས་པས་ན་རང་གིས་རིག་པར་བྱའོ། །འདིའི་འགྲེལ་པར་ཤིན་ཏུ་ཚོར་བའི་སྐད་ཅིག་དང་། །ཞེས་དང་། དོགས་དང་བསམ་པ་ཉིད་དང་ནི། །ཞེས་བསྒྱུར་རོ། །གསུམ་པ་ནི། རྣམ་གྲངས་ཀྱི་སྒོ་ནས་སྔགས་ཀྱི་རིམ་པ་ལ་བརྟེན་ཏེ། སྣང་
པའི་ཡེ་ཤེས་འབྱུང་བ་སྟོན་པར་བྱེད་དེ། རང་བཞིན་འདི་རྣམས་ཀུན་རྫོབ་ཀྱི་གཟུགས་གསལ་པོ་ལ་བརྟེན་ཏེ། སྤྱི་བོ་ནས་བྱང་ཆུབ་ཀྱི་སེམས་ཀྱི་ཟླ་བ་ཤར་ཞིང་འཛག་པས་མཚན་མོའོ། །ཤེས་རབ་ཀྱི་རང་བཞིན་ཡིན་པས་བུད་མེད་དོ། །དམན་པའི་བདེ་བ་
དམིགས་པས་འཇམ་པོའོ། །རྩ་གཡོན་པའི་རླུང་ལ་ཞོན་པའི་རྣམ་ཤེས་ལས་འབྱུང་བས་གཡོན་པའོ། །བྱང་ཆུབ་ཀྱི་སེམས་ཀྱི་ཟླ་བའི་དཀྱིལ་འཁོར་འབྱུང་བས་ཟླ་བས་ཟླ་བའི་དཀྱིལ་འཁོར་རོ། །པདྨས་མཚོན་པའི་ཤེས་རབ་ཀྱི་རང་བཞིན་ཡིན་པས་པདྨའོ། །ལས་
དང་པོ་པས་ཇི་ལྟ་བ་བཞིན་མི་རྟོགས་པས་ཟླའི་སྟེང་དུ་ཨཾ་བཀོད་ནས་བསྒོམས་ན་ཟླ་འོད་དང་འདྲ་བའི་སྣང་བའི་ཡེ་ཤེས་འཆར་རོ། །རྫོགས་རིམ་པས་ནི་སྔར་བཤད་པའི་རྩིབས་བརྒྱད་པའི་འཁོར་ལོ་ཁོ་ན་འདབ་བརྒྱད་དང་། དེར་གནས་པའི་བྱང་ཆུབ་
ཀྱི་སེམས་ཟླ་བ་སྟེ། དེར་ཡང་རྩའི་གཟུགས་སུ་ཨཾ་རང་བཞིན་གྱིས་གྲུབ་པ་ལས་འོད་ཟེར་སྤྲོས་ཏེ་ཨོཾ་ཡིག་གིས་འཇུག་པའི་རླུང་བཀུག་ནས་བཅུག་ལ་རང་བཞིན་དང་བཅས་པའི་འཇུག་ཤེས་དག་ན་ཟླ་འོག་དང་འདྲ་བའི་སྣང་བའི་ཡེ་ཤེས་འཆར་རོ་ཞེས་འཆད་དེ། 
བསྟན་པར་བྱ་བ་ཞེས་པ་གཉིས་ཀྱིས་བསྟན་པར་འདོད་དོ། །སྣང་བའི་ཡེ་ཤེས་ཡང་དག་འབྱུང་། །ཞེས་པའི་དོན་ནི་རང་བཞིན་སོ་གསུམ་དེ་ལས་བྱུང་བའི་དོན་དུ་སྣང་གི་ཡེ་ཤེས་དང་པོ་སྔགས་ཀྱི་རིམ་པ་ལས་བྱུང་བའི་དོན་མིན་ལ། སྤྱོད་སྡུས་ལས།
6-5-11a


མཚན་མོ་ལ་སོགས་པ་རྣས་སྣང་བའི་མིང་དུ་གསུངས་པ་དང་མི་མཐུན་ནོ། །འགྱུར་ཡང་ཆག་གིས་སྣང་བའི་ཡེ་ཤེས་ལས་བྱུང་བ། །ཞེས་པ་ལེགས་སོ། །དེས་ན་མཚན་མོ་ནི་མཚམས་ཀྱི་སྨག་གིས་མུན་པ་མཐུག་པོ་སངས་
ནས་སྐྱ་རེང་གི་འོད་ཀྱིས་མ་སླེབ་པའི་བར་གྱི་ཟླ་འོད་ཕོག་པའི་ནམ་མཁའ་དང་འདྲ་བས་མཚན་མོ་དང་། གཡོན་པ་ཤེས་རབ་ཏུ་བཤད་པས་གཡོན་པ་དང་། ཤེས་རབ་ཀྱི་ངོ་བོ་ཡིན་པས་བུད་མེད་དང་། ཞན་པའི་རྣམ་པ་ཅན་ཡིན་པས་འཇམ་པོ་དང་། ཟླ་
བར་མོས་པར་བྱེད་པ་དང་ཟླ་འོད་དང་འདྲ་བས་ཟླ་དཀྱིལ་དང་། པདྨར་མོས་པས་པདྨ་ཞེས་བྱའོ། །ཡི་གེའི་དབང་དུ་བྱས་ན་ཨ་ཡིག་ཐིག་ལེ་ཅན་དུ་མོས་པས་དེར་བཤད་དོ། །བཤད་མ་ཐག་པའི་སྔགས་རིམ་དང་། མན་ངག་གཞན་ལས་སྙིང་ཁར་འཁོར་
ལོ་ལ་ཡི་གེ་བཀོད་པ་ཡང་འཕགས་སྐོར་གྱི་ཁུངས་ཐུབ་ལྔའི་གཞུང་ལས་མི་འབྱུང་ངོ་། །གཉིས་པ་ལ་གསུམ། སྣང་བ་མཆེད་པའི་ངོ་བོ་དེའི་རང་བཞིན་གྱི་དབྱེ་བ། ཀུན་རྫོབ་པའི་མཆེད་པ་ལས་དེ་རྣམས་འབྱུང་བར་བསྟན་པའོ། །དང་པོ་ནི། ལཀྵྨཱིས་སྔ་
མ་ལས་ཡིད་དགའ་བ་ལྷག་པས་སྣང་བ་མཆེད་པ་དང་། རང་བཞིན་བཞི་བཅུ་མི་དམིགས་པས་ཤིན་ཏུ་སྟོང་པ་དང་། ཉོན་ཡིད་འགྲོ་བའི་རྒྱུ་ཡིན་པས་ཐབས་སམ། ཡང་ན་རྩ་གཡས་ལ་གནས་པའི་རྣམ་ཤེས་ལས་འབྱུང་བས་ཐབས་དང་། ནང་
གི་བདག་ཉིད་ཡིན་པས་དོན་ལས་མི་སྐྱེ་བའི་ཕྱིར་ཀུན་བརྟགས་དང་། བདག་ཏུ་ལྟ་བ་ལ་སོགས་པའི་སེམས་བྱུང་བཞིའི་རང་བཞིན་ཡིན་པས་སེམས་བྱུང་ངོ་ཞེས་འཆད་དོ། །གཉིས་པ་ནི། ཆགས་དང་ཞེན་པ་དེ་བཞིན་དགའ། །ཞེས་པ་ནས། རང་
6-5-11b


བཞིན་བཞི་བཅུ་གང་ཡིན་པ། །ཤིན་ཏུ་སྟོང་པའི་སྐད་ཅིག་སྟེ། །ཞེས་པའི་བར་གྱིས་གསུངས་སོ། །ཆགས་འགྱུར་ལས། རང་བཞིན་བཞི་བཅུའི་སྐད་ཅི་རྣམས། །ཤིན་ཏུ་སྟོང་པ་ལས་སྐྱེས་ཏེ། །ཞེས་འབྱུང་ངོ་། །གསུམ་པ་ནི། ཉིན་མོ་ཞེས་སོགས་ཏེ་སྔ་མ་
ལ་དཔགས་ནས་ཤེས་པར་བྱའོ། །ལཀྵྨཱིས་འདིར་ཡང་རང་བཞིན་རྣམས་ཉིན་མོ་ལ་སོགས་པའི་མིག་གིས་བཤད་ཅིང་། ལས་དང་པོ་པས་ཉི་མ་ལ་གནས་པའི་ཨཱཿ་ཡིག་སྒོམ་པ་དང་། རྫོགས་རིམ་པས་ཉི་ཟླས་མཚན་པའི་ཆོས་འཁོར་གྱི་དབུས་སུ་ཨཱཿཡིག་
ལས་འོད་ཟེར་སྤྲོས་པའི་གནས་པའི་རླུང་གི་ངོ་བོ་ཨཱཿ་ཡིག་བཀུག་ནས་བཅུག་པས་ཉོན་ཡིད་འཁོར་བཅས་ལྡོག་པས། ཉི་འོད་དང་འདྲ་བའི་མཆེད་པའི་ཡེ་ཤེས་སྐྱེ་བར་འཆད་མོད་ཀྱང་། མི་འཐད་པར་བཤད་ཟིན་ཏོ། །གསུམ་པ་ནི། ལཀྵྨཱིས་ཀུན་གཞི་ལྡོག་
པས་སྟོང་ཆེན་དང་ཤེས་རབ་དང་ཐབས་ཀྱི་ཡེ་ཤེས་ནུབ་པའི་བརྒྱལ་བ་ལྟ་བུ་ཡིན་པས་སྣང་བ་ཐོབ་པ་དང་། དེའི་འོག་ཏུ་འོད་གསལ་འཆར་བས་འོད་གསལ་དང་ཉེ་བར་རམ་དེའི་གམ་ན་ཐོབ་པས་ཉེར་དང་། ཡེ་ཤེས་སྔ་མ་གཉིས་ནུབ་པས་ཡོངས་གྲུབ་སྟེ། །སྔ་
མ་དང་ནི་རྟག་ཏུ་བྲལ། །དེ་ནི་ཡོངས་སུ་གྲུབ་པར་བརྗོད། །ཅེས་འབྱུང་ངོ་། །ཞེས་འཆད་དོ། །ལུང་དེ་ནི་སུམ་ཅུ་པར་སྔ་མ་ཀུན་བརྟགས་ཀྱི་གཞན་དབང་སྟོང་པའི་སྟོང་པ་ཡོངས་གྲུབ་ཏུ་འཆད་པ་ཡིན་པས། འདིར་འབྲེལ་རྒྱུ་མེད་ལ། སྣང་བ་གསུམ་འཇུག་ཤེས་དང་
ཉོན་ཡིད་དང་ཀུན་གཞིར་འཆད་ཅིང་། སྟོང་པ་གསུམ་དེ་གསུམ་གྱི་སྟོང་པར་འདིས་བཤད་པ་ནི། སྣང་བ་གསུམ་ཡིད་རྣམ་ཤེས་གསུམ་དུ་བཤད་པ་ལ་བརྟེན་པར་སྣང་ཡང་ལེགས་པར་མ་མཐོང་ངོ་། །ཐིག་ལེ་གཉིས་ཀྱིས་བརྒྱན་པ་ཡི། །ཆ་ཉིད་
6-5-12a


དུ་ཡང་ཤེས་པར་བྱ། །ཞེས་ཡི་གེ་དེ་ཡེ་ཤེས་ཀྱི་མིང་གི་རྣམ་གྲངས་སུ་བཤད་པས་སྔགས་ཀྱི་རིམ་པ་ལ་སྦྱར་པ་མི་འགྲིག་གོ། །གཉིས་པ་ནི། ཆགས་པ་བར་མའི་སྐད་ཅིག་དང་། །ཞེས་པ་ནས། མ་རིག་པ་ཡི་སྐད་ཅིག་བདུན། །ཕྲ་
མོའི་རྣལ་འབྱོར་པས་ཤེས་བྱ། །ཞེས་པའི་བར་གྱིས་གསུངས་སོ། །མ་རིག་པའི་སྐད་ཅིག་ནི་དེའི་རང་བཞིན་ནོ། །གསུམ་པ་ནི། ས་བོན་ཐིག་ལེར་ལྡན་མིན་ལ། །རླུང་གི་སྒོ་ནས་འབྱུང་བ་མིན། །གང་ཞིག་སྣང་བ་ཐོབ་པ་དེ། །ཡོངས་སུ་རྫོགས་པའི་མཚན་ཉིད་དོ། །ཞེས་
གསུངས་ཏེ། །ས་བོན་ནི་ཨའོ། །ཐིག་ལེ་ལྡན་པ་ནི་རྗེས་སུ་ང་རོར་ལྡན་པ་དང་ཚེག་དྲག་ཏུ་ལྡན་པ་སྔར་བཤད་པ་གཉིས་སོ། །དེ་མིན་པ་ནི། ཨ་ཡིག་རྐྱང་པའོ། །རླུང་གི་སྒོ་ནི་སྣ་བུག་གོ། །དེ་ནས་འབྱུང་བ་མིན་པ་ནི་འདིའི་སྲོག་རྩོལ་མི་རྒྱུ་བར་བཤད་པའོ། །གསུམ་
པ་ལ་གསུམ། ཉེར་ཐོབ་ཀྱི་ངོ་བ་དང་། རང་བཞིན་གྱི་དབྱེ་བ་དང་། ཉེར་ཐོབ་ཀྱི་དོན་བཤད་པའོ། །གང་ཞིག་ཅེས་པས་ནི་སྣང་བ་ཉེར་ཐོབ་ཀྱི་དོན་སྣང་བ་ཡོངས་སུ་རྫོགས་པ་ལ་བཤད་པས་སྣང་བ་ནི་སྣང་བ་ཐོག་མར་ཐོབ་པ་དང་། མཆེད་པ་ནི་སྣང་བ་བར་དུ་འཕེལ་
བ་དང་། ཉེར་ཐོབ་ནི་ཐ་མར་ཡོངས་སུ་རྫོགས་པར་བསྟན་ཏེ་སྣང་བ་ནི་སྔར་བཤད་པ་བཞིན་ནམ་མཁའ་ལྟ་བུར་སྣང་བའོ། །རྫོགས་པའི་དོན་སྣང་བ་དག་པ་ནི་འོད་གསལ་ཀྱི་སྐབས་ཡིན་པས། འདིར་ནི་ནམ་མཁའ་ལྟར་སྣང་བ་དེ་ཤིན་ཏུ་ཕྲ་བར་སོང་སྟེ་མི་རྟོག་པ་འཐུག་པར་སྟོན་
ནོ། །དེ་ན་ལམ་གྱིས་ཡེ་ཤེས་གསུམ་བསྐྱེད་པ་དང་འཆི་བ་དང་བརྒྱལ་བའི་སྐབས་ཀྱི་སྣང་བ་གསུམ་ཡིན་པས་སྣང་བ་གསུམ་པོ་ཐམས་ཅད་ཀྱི་མིན་ནོ། །འདིར་རྣམ་གྲངས་ལྷག་མ་སྐྱེས་པ་དང་བུད་མེད་ལ་བལྟོས་པའི་མ་ནིང་དང་ཉིན་མཚན་ལ་བལྟོས་པའི་ཐུན་མཚམས་
6-5-12b


དང་། གཡས་གཡོན་ལ་བལྟོས་པས་དབུས་དང་། འཇམ་རྩུབ་ལ་བལྟོས་པའི་བར་མ་དང་། ཐབས་ཤེས་ལ་བལྟོས་པའི་དེ་གཉིས་འདྲེས་པ་དང་། གདན་དང་ཕྱག་མཚན་ལ་བལྟོས་པའི་དེ་གཉིས་འདྲེས་པ་རྣམས་ཀྱང་ཤེས་པར་བྱའོ། །གཉིས་པ་ནི། རང་བཞིན་ཞེས་སོགས་
ཏེ། རང་བཞིན་ཕྲ་མོ་བརྒྱ་དྲུག་ཅུ་པོ་འདི་རྣམས་ནི་རླུང་ལ་ཞོན་པ་ཞེས་པ་ལྟར་ན་རྣམ་ཤེས་དང་རླུང་གི་གཞོན་པའི་རྒྱུ་ཡིས་ཞེས་པ་ལྟར་ན་རླུང་གི་དབང་གིས་ཉིན་མཚན་ལ་འབྱུང་ངོ་། །དེའི་ཚེ་ཡུན་ཚད་ཇི་ཙམ་ལ་འབྱུང་ན། སྐད་ཅིག་སོགས་ཏེ་དེ་ལྔ་རེ་རེའི་ཡུན་ཚད་ཙམ་
དུ་འབྱུང་བ་མཚོན་པར་བྱའོ། །ལཀྵྨཱིས་དེ་ལྟར་མི་ཤེས་ན་དུས་གང་ལ་རང་བཞིན་ཚན་པ་གསུམ་གང་འཆར་མི་ཤེས་པས་འཚོལ་པར་འགྱུར་རོ། །དེས་ན་ཐབས་གང་གིས་རང་བཞིན་གང་མི་སྣང་བར་བྱ་སྙམ་དུ་ཐེ་ཚོམ་ཟ་བས་ནམ་ཡང་འོད་གསལ་ལ་འཇུག་པར་མི་འགྱུར་
བ་དང་། མཚོན་པར་ཡང་ཡིད་མ་གཏད་པ་དང་བསྐྱེད་རིམ་པས་ཡིད་གཏད་ཀྱང་མི་ཤེས་པས་ཕྲ་བར་གསུངས་པར་འཆད་དོ། །སྤྱོད་བསྡུས་ལས་སྣང་བ་གསུམ་ཡང་རླུང་གིས་གཡོས་པ་ན་སྐད་ཅིག་སོགས་ཀྱི་ཡུན་ཚད་དུ་འཇུག་པར་བཤད་པས་གཉིས་ཀ་མཚོན་དགོས་
སོ། །བཤད་རྒྱུད་རྡོར་ཕྲེང་ལས། རླུང་མཚོན་པ་ཆུ་ཚོད་དྲུག་ཅུ་ནས་སྐད་ཅིག་སོགས་ཀྱི་བར་དུ་བྱས་ནས་དེ་ནས་འོག་གསལ་དུ་འཇུག་པར་བཤད་དོ། །གསུམ་པ་ནི། །ལཀྵྨཱིས་རང་བཞིན་མེད་པ་ལ་ཡེ་ཤེས་དང་རྣམ་ཤེས་ཀྱི་དབྱེ་བ་ཇི་ལྟར་བྱེད་སྙམ་པ་ལ། རང་རིག་ཅེས་
སོགས་གསུངས་ཏེ། རྐང་པ་དང་པོས་རྣལ་འབྱོར་སྤྱོད་པའི་དབུ་མའི་ཕྱོགས་བཞག་ལ། དེ་དང་རྣལ་འབྱོར་སྤྱོད་པའི་ཁྱད་པར་ནི་རྐང་པ་གཉིས་པས་བསྟན་ཏེ། མཚན་ཉིད་ནི་སྐྱེ་གནས་འཇིག་པ་སྟེ་དེ་རྣམས་མེད་པའོ། །འོན་ཀྱང་ཀུན་རྫོབ་ཏུ་དབྱེ་བ་ཡོད་པ་ནི་དེའི་དབྱེ་བ་
6-5-13a


ཡོད་དེ་ཞེས་སོགས་ཀྱི་སྟོན་པར་བཤད་དོ། །འདི་ནི་སྤྱོད་བས་དུས་ལྟར་བཤད་དགོས་ལ། དེའང་རྐང་པ་དང་པོ་གཉིས་ཀྱི་ཡེ་ཤེས་གསུམ་ནི་ནམ་མཁའ་བཞིན་དུ་མཚན་ཉིད་དེ་གཟུང་འཛིན་གྱི་རྣམ་པ་མེད་
པའོ། །རང་རིག་ཙམ་ཞེས་པའི་ཙམ་གྱི་སྒྲས་ཀྱང་དེ་གཅོད་དོ། རང་རིག་ནི་རྣལ་འབྱོར་བ་རང་རང་གིས་རིག་པར་བྱ་བའོ། །ཡེ་ཤེས་གསུམ་གྱི་ངོ་བོ་དེ་ལྟར་གནས་ན་ཡེ་ཤེས་གསུམ་ལས་རང་བཞིན་གྱི་ཀུན་རྟོག་སྐྱེ་བ་མི་འཐད་དོ་སྙམ་པ་སྟེ། འདི་ནི་ལམ་དུས་
ལ་རྩོད་ན་དེ་འདྲ་བའི་སེམས་དབེན་གྱི་ཡེ་ཤེས་སྐྱེས་ཀྱང་སླར་ཡང་རང་བཞིན་གྱི་ཀུན་རྟོག་ད་དུང་སྐྱེ་བས་དེའི་འགལ་བ་སྤོང་དགོས་ལ། གཞི་དུས་ལ་རྩོད་ན་འཆི་བའི་ཚེ་སེམས་ཅན་རྣམས་ལ་སྟོང་པ་གསུམ་དེ་ལྟར་སྐྱེ་ན་དེ་རྣམས་ལས་ཀུན་རྟོག་སྐྱེ་བ་མི་འཐད་སྙམ་
པའོ། །འོན་ཀྱང་ནི་སྟོང་པ་གསུམ་དེ་ལྟར་སྐྱེའང་དེ་རྣམས་ལས་ཀུན་རྟོག་སྐྱེ་བ་མི་འགལ་ཞེས་པའོ། །དེ་སྟོན་པ་ནི་དེའི་དབྱེ་བ་ཡོད་དེ་ཞེས་པ་ནི་ཡེ་ཤེས་གསུམ་དུ་དབྱེར་ཡོད་ཅེས་པ་མིན་གྱི་གཉིས་སྣང་གི་དབྱེ་བ་ཡོད་པའི་དོན་ཏེ། །སྤྱོད་བསྡུས་ལས་འོན་
ཀྱང་སྣང་བ་དང་བཅས་པ་ཡིན་ལ་ཞེས་པའི་དོན་ནོ། །དེ་ནི་ཉིན་མོ་ཞེས་སོགས་ཀྱིས་སྟོན་ཏེ་ཉིན་མོ་ལ་སོགས་པ་གསུམ་གྱི་སྣང་བ་བཞིན་དུ་དབྱེར་ཡོད་པའོ། །གཉིས་སྣང་དང་བཅས་པ་དེ་ནི་རླུང་གིས་གཡོ་བ་ཡིན་པས་དེའི་གཞི་ནི་བརྗོད་པར་བྱ་ཞེས་སོགས་
གསུངས་སོ། །དེ་ཡང་སྡུད་རིམ་གྱི་ཚེ་མིན་གྱི་སྐྱེ་རིམ་གྱི་ཚེ་ནའོ། །དེ་ལྟར་རླུང་གིས་རིམ་གྱིས་གཡོས་པ་ན་གཟུང་འཛིན་གྱི་རྣམ་པ་མེད་པའི་ནམ་མཁའ་ལྟ་བུ་དེ་ཡི་གནས་སྐབས་དོར་ནས། སྣང་བ་གཞན་གསུམ་གྱི་ངོ་བོར་སྐྱེ་ལ་དེ་ལས་རང་བཞིན་རྣམས་
6-5-13b


སྐྱེ་བས་འགལ་བ་མེད་དོ། །མདོར་ན་སྟོང་པ་གསུམ་ནམ་མཁའ་ལྟ་བུའི་གནས་སྐབས་དེ་མ་དོར་ན་དེ་ལས་དངོས་སུ་ཀུན་རྟོག་སྐྱེ་བ་འགལ་ཡང་། དེ་རྣམས་རླུང་གིས་རིམ་གྱིས་བསྐྱོད་ནས་སྣང་བ་གཞན་གསུམ་བསྐྱེད་པས་སྣང་བ་གསུམ་ལས་ཀུན་རྟོག་སྐྱེ་བ་མི་འགལ་བའི་
དོན་ཏོ། །དེ་ལྟར་མ་བྱས་ན་སྟོང་པ་གསུམ་གྱི་ཡེ་ཤེས་ནམ་མཁའ་ལྟ་བུའི་སྔོན་རོལ་ཏུ་ཀུན་རྟོག་གཡོ་བའི་རླུང་ཐིམ་པར་གསུངས་ཀུན་རྟོག་གཡོ་བའི་རླུང་སྔ་རོལ་ཏུ་མ་སོང་བར་ཀུན་སྐྱེ་བའི་སྐྱོན་ཡོད་པས་འགལ་བ་སྤོང་མི་ནུས་སོ། །སྣང་བ་གཞན་གསུམ་སྐྱེ་བ་ནི་རླུང་རྣམས་
ཞེས་པ་ནས་དམིགས་པར་བྱེད་ཅེས་པའི་བར་གྱིས་གསུངས་ཏེ། དབང་པོའི་ལམ་ཞེས་པ་ནི་དབང་པོ་སྒོ་ལྔ་ཁོ་ན་མིན་གྱི་ཡིད་དབང་ཡང་གཟུང་དགོས་སོ། །དེ་ནས་དེ་ལས་རང་བཞིན་སྐྱེས་ཚུལ་ནི། གང་ཚེ་ནས་འབྱུང་ཞེས་པའི་བར་གྱིས་བསྟན་ཏེ། འདིར་ཆག་གིས། ངེས་
དང་མ་ངེས་སོ་སོར་འབྱུང་། །ཞེས་བསྒྱུར་བ་ལེགས་པས་ངེས་པ་ནི་རྣམ་ཤེས་གསུམ་པོ་རང་རང་གི་རང་བཞིན་ཚན་པ་གསུམ་པོའོ། མ་ངེས་པ་ནི་སྣང་བ་ལས་ཀྱང་རང་བཞིན་བཞི་བཅུ་དང་བདུན་གྱི་ཆ་འབྱུང་བའོ། །རླུང་ནི་ཤེས་པའི་རྐང་པ་གཉིས་ནི་རང་བཞིན་གཡོ་བྱེད་ཀྱི་
རླུང་གང་ན་གནས་པ་དེ་དང་དེའི་རྗེས་སུ་རང་བཞིན་རྣམས་སྐྱེ་ཞེས་པའོ། །ཇི་སྲིད་རླུང་ནི་མི་རྒྱུ་དང་། །སྣང་བ་མི་གཡོར་མ་གྱུར་པ། །ཞེས་འདོན་པ་ལྟར་ན་ཇི་སྲིད་དུ་རླུང་མི་འབྱུང་བར་མ་གྱུར་ན་དེ་སྲིད་དུ་རང་བཞིན་གྱི་སྣང་བ་མི་གཡོ་བར་མ་གྱུར་བ་སྟེ་བརྟན་པར་མི་འགྱུར་
རོ། །དགག་པའི་སྒྲ་ནི་བྱ་རོག་གི་མིན་བཞིན་དུ་ཚིག་རྐང་གཉིས་དང་སྦྱར་བར་བྱའོ་ཞེས་ལཀྵྨཱིས་བཤད་དེ། །དེའི་ལྟར་ན་ཚིག་རྐང་གོང་མ་གཉིས་དང་སྦྱར་རོ། །ཆག་གིས། ཇི་སྲིད་རླུང་ནི་རྒྱུ་བ་ཡིས། །སྣང་བ་མི་གཡོར་མ་གྱུར་ཞིང་། སྣང་བ་གཉིས་ཀྱི་རྒྱུར་གྱུར་ཞིང་། །
6-5-14a


བདག་ཉིད་ངོ་བོ་རྣམ་རྟོག་པ། །གཉིས་ཀའི་ཡན་ལག་ཅན་ཉིད་གང་། །སྣང་བ་ཉེ་བར་ཐོབ་པར་འགྱུར། །ཞེས་བསྒྱུར་བ་ལྟར་ན། ཇི་སྲིད་ཅེས་པའི་ཟླས་དྲངས་པའི་དེ་སྲིད་ཅེས་པའང་འདོན་དགོས་ལ། དེའང་མ་གྱུར་ཞེས་པའི་
མཐར་རོ། །དེ་ལྟར་ན་ཇི་སྲིད་དེ་གང་ནས་བརྩམས་ནས་རྣམ་ཤེས་ཀྱི་བཞོན་པའི་རླུང་ནི་རྒྱུ་བ་སྟེ་གཡོ་བ་ཡིས། ནམ་མཁའ་ལྟ་བུའི་སྣང་བ་གསུམ་མི་གཡོ་བར་མ་གྱུར་པ་སྟེ་གཡོས་པར་གྱུར་པ་དེ་ནས་བཟུང་སྟེ། ཀུན་རྟོག་དངོས་སུ་སྐྱེ་བའི་ཤེས་རབ་དང་
ཐབས་ཀྱི་སྣང་བ་གཉིས་ཀྱི་རྒྱུར་འགྱུར་རོ། །སུ་ཞིག་ཅེ་ན། རླུང་གིས་བསྐྱོད་པས་གཡོས་ཞེས་པའི་སྣང་བ་སྟེ་སྔར་བཤད་པའི་ནམ་མཁའ་ལྟ་བུའི་སྣང་བ་གསུམ་མོ། །དེ་ལྟར་གྱུར་པས་སྣང་བ་དང་པོ་གཉིས་དང་སྣང་བ་ཉེ་བར་ཐོབ་པ་འབྱུང་བར་འགྱུར་
རོ། །དེ་རྣམས་ཀྱང་ཇི་ལྟ་བུ་སྙམ་ན། བདག་ཉིད་དེ་རླུང་གི་རང་གི་ངོ་བོ་རྣམ་པར་རྟོག་པ་སྟེ་རྣམ་རྟོག་ལྡན་པ་དེ་གཉིས་ཀའི་ཡན་ལག་སྟེ་རྒྱུར་གྱུར་པ་ཅན་གང་ཡིན་པ་སྟེ་ཀུན་རྟོག་གི་རླུང་དང་ཀུན་རྟོག་གཉིས་སྐྱེད་པའོ། །ལཀྵྨཱིས། སྣང་བ་གཉིས་ནི་རྒྱུར་
གྱུར་པས། །བདག་གི་དངོས་པོ་རྣམ་པར་བརྟགས། །ཇི་ལྟར་སྣང་བ་ཐོབ་པ་ལྟར། །གཉིས་ཀའི་ཡན་ལག་ཉིད་དུ་འགྱུར། །ཞེས་བཏོན་ནས། སྔགས་དང་ཕྱག་རྒྱའི་རིམ་པ་གཉིས་ལས་བྱུང་བའི་སྣང་བའི་ཡེ་ཤེས་གཉིས་ནི་རྒྱུར་གྱུར་པས་ཏེ་གང་ལ་དེ་
གཉིས་ཡོད་པ་དེ་ནི་བདག་གི་དངོས་པོར་རྣམ་པར་བརྟགས་པ་སྟེ་ཉེར་ཐོབ་བོ། །འདི་ཉིད་ཐབས་ཤེས་ཀྱི་ཡེ་ཤེས་གཉིས་ཀ་འདྲེས་པས་གཉིས་ཀའི་ཡན་ལག་ཏུ་འགྱུར་ཏེ། །དཔེན་ན་ས་ཕྱོགས་གཅིག་ལ་ཆུའི་རྒྱུན་གཉིས་འདྲེས་པ་ལྟ་བུའོ་ཞེས་འཆད་དོ། །
6-5-14b


གཉིས་པ་ནི། སྒྱུ་མ་ཞེས་པ་ནས། རྣལ་འབྱོར་པས་མཚོན་བྱ་ཞེས་གསུངས་ཏེ། །རྐང་པ་དང་པོ་བཞིས་ཡེ་ཤེས་གསུམ་གྱི་དབྱེ་བ་བུད་མེད་ལས་མཚོན་དགོས་པ་དང་། དེ་ནས་བཞིས་མིང་གི་དབྱེ་བས་ཡེ་ཤེས་གསུམ་བསྟན་ཞིང་བུད་མེད་ལས་མཚོན་ཚུལ་གསལ་
བར་སྟོན་ནོ། །དེ་ནས་རྐང་པ་དྲུག་གིས་ཕྱིའི་མཉམ་སྦྱོར་ནི་ནང་གི་ཐབས་ཤེས་མཉམ་པར་སྦྱོར་བའི་ཆེད་དང་། ཕྱི་ནང་གི་མཉམ་སྦྱོར་གཉིས་ཀས་ཉེར་ཐོབ་བསྐྱེད་པར་བཤད་དེ། །ཡེ་ཤེས་གསུམ་གྱི་དབྱེ་བ་མཚོན་ཚུལ་བཤད་པའོ། །དེ་ནས་རྐང་པ་བཞིས་དབང་པོ་
གཉིས་སྦྱོར་གྱི་བྱ་བ་རྒྱུན་ལྡན་དུ་མེད་ཀྱང་། ལན་ཅིག་མཚོན་པས་ཀྱང་འགྲུབ་པའི་ཚུལ་སྟོན་ནོ། །དེ་ནས་བཞིས། སྔར་ཕྱག་རྒྱ་ལས་མཚོན་པའི་དོན་དེ་ཉིད་རྒྱུན་ལྡན་དུ་བསྒོམས་པས་དེ་ཁོ་ན་ཉིད་མཚོན་པར་བྱ་བར་བསྟན་ཏོ། །ལས་ཀྱི་ཕྱག་རྒྱ་ལས་ཡེ་ཤེས་མཚོན་
ནས་དེའི་དོན་སྒོམ་པར་བྱེད་པའི་ཡེ་ཤེས་གསུམ་མཚོན་པ་དེ་དབང་དུས་སུ་ཡིན་ནམ་ལམ་དུས་སུ་ཡིན། དང་པོ་ལྟར་ན་རིམ་པ་གསུམ་པ་ལས། བསྐྱེད་པའི་རིམ་པའི་རྗེས་སུ་འབྲང་བས་དབང་བསྐུར་བ་ཐོབ་ཅིང་། རྒྱུད་རྣམ་པ་བཞིའི་དགོངས་པ་ཤེས་པ། ལུས་དང་
ངག་དང་ཡིད་རྣམ་པར་དབེན་པའི་ཐོས་པ་འཛིན་པ། །ཞེས་དེ་འདྲ་བ་དེས་སྒྱུ་ལུས་ཀྱི་གདམས་ངག་གི་དོན་དུ་གསང་དབང་ཞུ་བར་གསུངས་པས། སེམས་དབེན་སྒོམ་པ་ལ་དབང་གསུམ་པ་ཐོབ་དགོས་ན། སྒྱུ་ལུས་ཀྱི་གདམས་ངག་ཉན་པའི་དུས་སུ་གསང་དབང་
བསྐུར་མི་དགོས་པར་འགྱུར་བ་དང་། །འོད་གསལ་གྱི་གདམས་ངག་ཉན་པའི་སྐབས་སུའང་དབང་གསུམ་པ་བསྐུར་མི་དགོས་པ་ལས། དེ་བསྐུར་བར་རིམ་པ་བཞི་པར་བཤད་པའི་ཕྱིར་རོ། །གཞན་ཡང་ལམ་མ་བསྒོམས་པའི་གོང་དུ་དབང་རྒྱུན་གཅིག་ལ་བཞི་
6-5-15a


ཀ་བསྐུར་ནས་ཡེ་ཤེས་གསུམ་མཚོན་ན། མཚམས་དེ་ནས་སེམས་དབེན་བསྒོམས་པས་ཆོག་པར་འགྱུར་ལ། །དེ་འདོད་སྤྱོད་བསྡུས་ལས་ངག་དབེན་ལ་ལོབས་པའི་རྗེས་སུ་སེམས་དབེན་ལ་སློབ་པའི་གོ་རིམ་ངེས་པ་བཤད་པ་
དང་འགལ་ལོ། །མི་ཆོག་ན་དེའི་རྒྱུ་མཚན་སྨྲ་དགོས་ན་རྙེད་པའང་མིན་ནོ། །ཡང་འདི་སྔར་ཕྱག་རྒྱ་དགའ་བ་བཞི་མཚོན་ཟིན་པ་ཞིག་ཡིན་ན་ནི། ལན་ཅིག་ཙམ་ཞིག་མྱོང་བས་ཀྱང་། །ཞེས་གསུངས་པ་མི་རིགས་ལ། མིན་ན་ནི་དང་པོ་སྦྱོར་བའི་སྐབས་སུ་དངོས་
དང་ཡེ་ཤེས་ཀྱི་ཕྱག་རྒྱ་གདམ་ང་ཅན་དུ་གསུངས་པས་དེར་དངོས་ལས་མཚོན་ན་རྩོད་པ་སྔ་མ་བཞིན་འཇུག་པར་འགྱུར་རོ། །འདི་ནི་ལམ་དུས་སུ་ཡིན་པར་འདོད་པ་ལ་ཡང་ཀླན་ཀའོ། །དེས་ན་འདི་དག་གི་དོན་བཤད་པར་གྱིས་ཤིག་ཅེ་ན། དེ་ལ་རིམ་པ་གསུམ་བསྐྱེད་
པའི་རིམ་པའི་རྗེས་སུ་འབྲང་བས་དབང་ཐོབ་པ་དབེན་པ་གསུམ་གྱི་ཐོས་པ་འཛིན་ཅིང་དེས་སྒྱུ་ལུས་ཀྱི་གདམས་ངག་གི་དོན་དུ་གསང་དབང་ཞུ་བར་གསུངས་པས། སེམས་དབེན་བསྒོམ་པ་དེས་གསང་དབང་མ་ཐོབ་པར་མི་འགྱུར་ཏེ། གཞན་དུ་ན་ཕྲེང་བ་དང་ཆུ་ལ་
སོགས་པའི་དབང་དགུ་དང་བཅས་པའི་གསང་དབང་བསྐུར་བར་དེར་གསུངས་པས། ཐུན་མོང་གི་དབང་དགུའང་མ་ཐོབ་པར་འགྱུར་བ་དང་། །འོད་གསལ་གྱི་གདམས་ངག་ཞུ་བའི་ཚེའང་། བླ་མས་ཕྱག་རྒྱ་དང་སྦྱར་བ་ལས་བྱུང་བའི་བྱང་ཆུབ་ཀྱིས་སེམས་བུམ་པ་
ལ་སོགས་པར་བཞག་པར་གསུངས་པ་དེ་གསང་དབང་བསྐུར་བའི་ཆེད་ཡིན་པས། དེའི་སྔ་རོལ་སྒྱུ་ལུས་ཀྱི་དུས་སུ་གསང་དབང་མ་ཐོབ་པར་འགྱུར་རོ། །བསྐྱེད་རིམ་གྱི་སྣོད་དུ་སྒྲུབ་པའི་བུམ་དབང་ལས་མ་ཐོབ་ན། རྫོགས་རིམ་བཤད་དུ་མི་རུང་བས་
6-5-15b


ངག་དབེན་དང་སེམས་དབེན་གྱི་ཐོས་པ་འཛིན་པར་མི་འགྱུར་བས། དེ་གཉིས་ཀྱི་སྔོན་དུ་གསང་དབང་ངེས་པར་འགྲོ་དགོས་སོ། །འོ་ན་བསྐྱེད་པའི་རིམ་པའི་རྗེས་སུ་འབྲང་བས་དབང་བསྐུར་བ་ཐོབ་ཅིང་ཞེས་གསུངས་པ་ཅི་ཡིན་སྙམ་ན། དེ་ནི་བསྐྱེད་རིམ་གྱི་སྣོད་རུང་དུ་
སྒྲུབ་པའི་དབང་ཐོབ་སྟེ་བསྐྱེད་རིམ་ལ་བསླབས་ནས་དབེན་པ་གསུམ་གྱི་མན་ངག་ལ་བསླབ་པ་ཞིག་གིས་སྒྱུ་ལུས་ཀྱི་གདམས་ངག་གི་དོན་དུ་གསོལ་བ་གདབ་པར་གསུངས་པའོ། །སྤྱོད་བསྡུས་ལས་འོད་གསལ་གྱི་སྐབས་སུ་ཡང་ཐུན་མོང་གི་དབང་དགུ་
བསྐུར་བར་གསུངས་ཏེ། གསང་དབང་ལ་ཐུན་མོང་གི་དབང་དགུ་དང་བཅས་པའི་གསང་དབང་བསྐུར་ནས་ཞེས་པ་དང་། དབང་གསུམ་པ་ལ་གསང་དབང་དང་ཐུན་མོང་གི་དབང་དགུ་དང་བཅས་པར་གསུངས་པ་ནི། །བུམ་དབང་སྔོན་དུ་མ་སོང་བའི་གསང་དབང་
དང་། དེ་གཉིས་ཀ་སྔོན་དུ་མ་སོང་བའི་དབང་གསུམ་པ་བསྐུར་དུ་མི་རུང་བའི་དོན་ཡིན་ནོ། །འོད་གསལ་ལ་རིམ་པ་བཞི་པར་དབང་གསུམ་པ་ཟུར་ཙམ་ལས་མི་གསལ་ཡང་། སྤྱོད་བསྡུས་སུ་སློབ་མ་ལ་ཕྱག་རྒྱ་གཏད་པར་གསུངས་པས་དེ་ལའང་གསང་དབང་
ཙམ་དུ་འདོད་པ་མི་འཐད་དོ། །དེ་ལྟར་ན་སེམས་དབེན་བསྒོམས་པ་ལ་སྔོན་དུ་དབང་གསུམ་པ་བསྐུར་མི་དགོས་པས་དབང་གི་དུས་མིན་པས་ལམ་གྱི་དུས་སོ། །དེའང་བསྐྱེད་རིམ་གྱི་དུས་སུ་ཡང་ཕྱིའི་ཕྱག་རྒྱ་ལས་དགའ་བ་རྣམས་མཚོན་པ་ཡོད་ཀྱང་། འདིར་ནི་ཡེ་
ཤེས་གསུམ་མཚོན་པའི་ནང་གི་རྐྱེན་རྡོར་བཟླས་འབྱོངས་པའི་ཚེ། ཕྱིའི་རྐྱེན་ལས་མཚོན་པ་ཡིན་པས་སྔ་མ་དང་ཁྱད་པར་ཤིན་ཏུ་ཆེའོ། །དེའི་ཕྱིར་ལམ་བསྒོམ་པའི་སྔ་རོལ་ནས་དབང་ཚང་བར་བསྐུར་བའི་ཚེ་དབང་གསུམ་པ་དངོས་དབང་དུ་བསྐུར་ནའང་།
6-5-16a


དགའ་བ་རྣམས་སྐྱེད་མོད་ཀྱང་སེམས་དབེན་གྱི་ཡེ་ཤེས་མིན་པས་དེ་བསྒོམས་པས་ཆོག་ཀྱང་། དབེན་པ་གཉིས་ཀྱི་གོ་རིམ་འཁྲུགས་པའི་སྐྱོན་མེད་དོ། །འོ་ན་ཕྱག་རྒྱ་ལ་བརྟེན་ནས་དགའ་བ་བཞི་སྐྱེ་བར་གཞུང་དུ་མ་ནས་བཤད་ལ། 
དགའ་བ་བཞིའང་སྣང་མཆེད་ཐོབ་གསུམ་དང་འོད་གསལ་ཡིན་པར་ཕྱག་རྒྱ་ཆེན་པོ་ཐིག་ལེ་ལས་བཤད་པས། འདིར་ཡེ་ཤེས་མཚོན་པར་བཤད་ནས་སྟོང་པ་བཞི་པའི་ཡེ་ཤེས་མཚོན་པར་མ་བཤད་པ་མི་འཐད་དོ་སྙམ་ན། ཐོག་མར་དབང་གི་དུས་སུ་ཕྱག་
རྒྱ་ལས་དགའ་བ་བཞི་སྐྱེ་བར་གསུངས་པའི་ལྷན་སྐྱེས་ཀྱི་འོད་གསལ་ནི། མཚོན་བྱེད་དཔེའི་ལྷན་སྐྱེས་དང་འོད་གསལ་ཡིན་ལ། འདིར་སྐྱེ་བར་མ་བཤད་པ་ནི་མཚོན་བྱ་དོན་གྱི་ལྷན་སྐྱེས་དང་འོད་གསལ་ལ་དགོངས་པས་སྐྱོན་མེད་དོ། གལ་ཏེ་དགའ་བ་
བཞི་དང་སྟོང་པ་བཞིའི་ཡེ་ཤེས་དོན་གཅིག་ན། ཀྱེེ་རྡོ་རྗེ་ལས། ཆགས་པ་མཆོག་དགའ་དང་། ཆགས་བྲལ་ཁྱད་དགའ་དང་། དབུས་མ་དགའ་བ་ལ་བཤད་ཅིང་། འདིར་ཆགས་བྲལ་སྟོང་པ་དང་པོ་དང་། ཆགས་པ་སྟོང་པ་གཉིས་པ་དང་། དབུས་མ་སྟོང་
པ་གསུམ་པ་ལ་བཤད་པ་ཇི་ལྟར་ཡིན་ཞེ་ན། གཞན་དུ་དགའ་བ་གསུམ་པ་ཆགས་བྲལ་དུ་བཤད་པ་ནི། །དེའི་དུས་སུ་བདེ་བ་དོན་གཉེར་གྱི་ཆགས་པ་ལོག་པ་ལ་ཡིན་ཏེ་དགའ་བྲལ་ཞེས་པའི་དོན་ཡང་དེ་ཉིད་དོ། དེའི་ཕྱིར་མཆོག་དགའ་ལས་བདེ་བ་ཆེར་
སོང་བས་ཁྱད་པར་གྱི་དགའ་བ་ཞེས་གསུངས་ལ། དགའ་བ་དོན་གཉེར་གྱི་སྲེད་པ་ལོག་པས་དགའ་བྲལ་ཞེས་ཀྱང་བཤད་པ་འཐད་དོ། །དེ་ལྟ་མ་ཡིན་ན་དགའ་བྲལ་གྱི་དགའ་བ་ཞེས་པ་འགལ་བའི་ཚིག་ཏུ་འགྱུར་རོ། །ཀྱཻ་རྡོ་རྗེ་ལས། གསུམ་པ་འདོད་ཆགས་
6-5-16b


འཇིག་པ་སྟེ། །ཞེས་གསུངས་པའི་དོན་ཡང་དེ་ཡིན་ཏེ། དེ་ནི་སྟོང་པ་གསུམ་པ་ལ་ཡང་ཚང་ངོ་། །འདིར་སྟོང་པ་དང་པོ་ཆགས་བྲལ་དུ་བཤད་པ་ནི་བདེ་བ་དམན་པ་ལ་དགག་སྒྲ་སྦྱར་བ་ཡིན་གྱི་དགའ་བ་དོན་གཉེར་གྱི་ཆགས་པ་ལོག་པ་མིན་ནོ། །ཆགས་བྲལ་གཉིས་
གསུངས་པའི་ཆགས་པ་བྲལ་ལུགས་མི་འདའོ། །གཞན་དུ། །དབུས་མ་དགའ་བ་ཙམ་ཉིད་དེ། །ཞེས་དགའ་བ་དང་པོ་དབུས་མར་བཤད་པ་ནི། ཤཱནྟི་པ་གསུངས་པ་ལྟར་མི་འོལ་ལེ་བ་ལས་མེད་པ་ལ་མི་འབྲིང་ཞེས་ཟེར་བ་ལྟར། དགའ་བཞན་པའི་མིང་ཡིན་ལ། 
འདིར་སྟོང་པ་གསུམ་པ་དབུས་མར་འཆད་པ་ན་ཐབས་དང་ཤེས་རབ་གཉིས་ཆ་སྙོམས་པའི་དོན་ནོ། །འོ་ན་འདིར་སྟོང་པ་གསུམ་ལས་མི་མཚོན་པར་བཤད་པ་རྣམས་ལ། དཔེའི་ལྷན་སྐྱེས་གང་དུ་སྡུད་སྙམ་ན། ཉེར་ཐོབ་ལ་སྟོད་སྨད་གཉིས་སུ་བྱས་ནས་སྟོད་ཁྱད་
དགའ་དང་སྨད་ལྷན་སྐྱེས་སུ་བྱའོ། ཉེར་ཐོབ་རྟོག་པའི་རྒྱུ་བ་ཕལ་མོ་ཆེ་འགགས་པའི་དྲན་མེད་དུ་སོང་བ་ཁོ་ན་བྱེད་ན། སེམས་དབེན་གྱི་སྐབས་སུའང་དེ་སངས་པའི་རྗེས་སུ་ནམ་མཁའ་སྤྲིན་མེད་པ་འདྲ་བའི་འོད་གསལ་ཆ་མཐུན་པ་འཆར་བ་དེ་ལུགས་ལྡོག་
གི་འཆར་མིན་གྱི་ལུགས་འབྱུང་གི་རིམ་པ་ཡིན་པས། སྣང་མཆེད་གཉིས་སུ་མི་འདུ་ཞིང་སྟོང་པ་གསུམ་ལས་མི་བྱེད་པའི་ཚེ་དེ་འོད་གསལ་མིན་པས་སྟོང་པ་བཞི་གང་ཡང་མིན་པར་འགྱུར་ན་དེ་ཡང་མི་རིགས་པས། སྣང་བ་ཉེར་ཐོབ་ཏུ་སྡུད་དེ་ད་དུང་འཆད་
པར་འགྱུར་རོ། །ལུགས་ལྡོག་གི་དགའ་བ་བཞི་སྐྱེ་བའི་གནས་ནི། བཤད་རྒྱུད་རྡོར་ཕྲེང་ལས། སྤྲུལ་པའི་འཁོར་ལོར་དགའ་བ་དང་། །མཆོག་དགའ་ཆོས་ཀྱི་འཁོར་ལོར་གནས། །ལོངས་སྤྱོད་བྲལ་བའི་དགའ་བ་དང་། །ལྷན་ཅིག་སྐྱེས་དང་བདེ་བ་ཆེ། །ལུགས་
6-5-17a


ལྡོག་རིམ་པ་ཞེས་ནི་གསུངས། །ཞེས་གསུངས་ཏེ། །ཞེས་གསུངས་ཏེ། །རྡོ་རྗེའི་རྩེ་ནས་ལྟེ་བའི་འཁོར་ལོར་མ་སླེབ་ཚུན་ཆད་དུ་དགའ་བ་སྐྱེ་སྟེ། །དེ་བཞིན་དུ་གཞན་གསུམ་ལ་ཡང་སྦྱར་རོ། །ལུགས་འབྱུང་གི་དགའ་བ་བཞི་སྐྱེ་ཚུལ་ཡང་དེ་ཉིད་ལས། 
དེ་རྗེས་ལུགས་འབྱུང་བཤད་བྱ་སྟེ། །བདེ་ཅེན་འཁོར་ལོར་སྤྱི་བོ་ལ། །དེ་ནི་དགའ་བར་བཤད་པ་ཡིན། །ལོངས་སྤྱོད་འཁོར་ལོར་མཆོག་དགའ་དང་། །བྲལ་དགའ་ཆོས་ཀྱི་འཁོར་ལོར་གནས། །སྤྱལ་པའི་འཁོར་ལོར་ལྷན་ཅིག་སྐྱེས། །དགའ་བ་ཉམས་སུ་མྱོང་
བར་བྱེད། །ཅེས་གསུངས་ཏེ། སྤྱི་གཙུག་ནས་མགྲིན་པར་མ་སླེབ་པར་དུ་དགའ་བ་སྐྱེ་སྟེ། གཞན་གསུམ་ལའང་དེ་བཞིན་དུ་སྦྱར་རོ། །དགའ་བ་བཞི་པོ་དེ་ཉིད་སྐད་ཅིག་བཞི་དང་སྦྱོར་བའང་། དེ་ཉིད་ལས། བལྟ་དང་འགུགས་དང་དེ་བཞིན་བརྡ། །ཁ་ལ་ཙུམྦྷ་བྱེད་
པ་ཡི། །དགའ་བ་ཉམས་སུ་མྱོང་བར་བྱེད། །རྣམ་པ་སྣ་ཚོགས་མཚན་ཉིད་དོ། །རྣལ་འབྱོར་རྣལ་འབྱོར་མ་མཆོག་ཏུ། །དེ་བཞིན་སྐྲ་ལ་འཛིན་པ་དང་། །རྡོ་རྗེ་པདྨར་བཞག་ནས་ནི། །ཉམས་མྱོང་སྐབས་ནི་སྐད་ཅིག་མཆོག །རྣམ་སྨིན་སྐད་ཅིག་ཅེས་བྱ་ཉིད། །དེ་
ཉིད་རྒྱུན་ནི་རྣམ་པར་ཤེས། །ལྟེ་བའི་དབུས་ན་རབ་གསལ་ནས། །གཏུམ་མོ་ཡང་ནི་རྣམ་རྟོག་འཇོམས། །བདེ་བ་ཆེན་པོའི་འཁོར་ལོ་ཆེ། །མཆོག་གི་ཆ་ནི་ཞུ་བར་བྱེད། །བྲལ་དགའ་ཉམས་སུ་མྱོང་བ་ན། །རྣམ་འཇོམས་སྐད་ཅིག་མཚན་ཉིད་དོ། །དེ་ལས་རོ་
གཅིག་མཚན་ཉིད་ནི། །རྩ་ནི་གཅིག་གི་རྒྱུད་ལ་བརྟེན་པོའི་གོ་འཕང་ཞི། །ལྷན་ཅིག་སྐྱེས་པའི་མཚན་ཉིད་ནི། །བདེ་བ་མཚན་ཉིད་བྲལ་སྐད་ཅིག །གསུངས་པ་མཆོག་ཏུ་རྨད་དུ་བྱུང་། །ཞེས་གསུངས་ཏེ། །རྣམ་འཇོམས་ནི་རྣམ་པར་ཉེད་པའོ། །
6-5-17b


ལུགས་ལྡོག་གི་དགའ་བ་བཞི་དང་སྐད་ཅིག་བཞི་སྦྱོར་བ་ཡང་དེ་ཉིད་ལས། རླུང་གི་དེ་ཉིད་སྔོན་སོང་ནས། །དེ་ཉིད་སྟེང་དུ་རྒྱུ་བར་ནི། །རྣལ་འབྱོར་པས་ནི་སྒྲུབ་པར་བྱེད། །དེ་ལས་སྤྲུལ་པའི་འཁོར་ལོར་ནི། །དགའ་བ་ཞེས་བྱར་རྣམ་པར་ཤེས། །བདེ་བ་ཀུན་གྱི་ཀུན་ནས་རྟེན། །
རྣམ་པ་སྣ་ཚོགས་སྐད་ཀྱིས་གསུངས། །སྟོང་ཉིད་ཀུན་གྱི་གཞི་ཡི་མཆོག །ཆོས་ཀྱི་འཁོར་ལོ་དེ་ལས་སྟེང་། །རྣལ་འབྱོར་པ་ཡི་སྒྲུབ་བྱ་བ། །ཉམས་སུ་མྱོང་བ་མཆོག་དགའ་སྟེ། །རྣམ་སྨིན་སྐད་ཅིག་མཚན་ཉིད་དོ། །ལོངས་སྤྱོད་འཁོར་ལོ་དེ་ལས་ནི། །སྟེང་དུ་བྱེད་
པའི་སྐད་ཅིག་མ། །ཉམས་མྱོང་བྲལ་བའི་དགའ་བ་ནི། །རྣམ་འཇོམས་སྐད་ཅིག་མཚན་ཉིད་དོ། །བདེ་བ་ཆེན་པོའི་འཁོར་ལོ་ཆེ། །དེ་ཐོབ་མཚན་ཉིད་སྐད་ཅིག་མ། །ལྷན་ཅིག་སྐྱེས་དགའ་ཉམས་མྱོང་བ། །མཚན་ཉིད་དང་བྲལ་སྐད་ཅིག་གོ། །ཞེས་གསུངས་སོ། །དེ་ནི་རྣལ་
འབྱོར་མའི་རྒྱུད་ཐམས་ཅད་དང་ཐུན་མོང་བ་ཡིན་ལ། འཕགས་སྐོར་གྱི་བཤད་པ་རྣམས་ནས་སྟོང་པ་བཞི་སྐྱེ་ཚུལ་རྩ་འཁོར་གྱི་གནས་ཀྱིས་མ་བཞག་པར། །ནང་གི་རླུང་དང་རང་བཞིན་གྱི་རྟོག་པ་རྣམས་ཐིམ་པས་སེམས་སྟོང་པ་དང་། དེ་སེམས་བྱུང་ལ་ཐིམ་པས་
ཤིན་ཏུ་སྟོང་པ་དང་། དེ་མ་རིག་པ་ལ་ཐིམ་པས་སྟོང་པ་ཆེན་པོ་དང་། དེ་འོད་གསལ་དུ་ཐིམ་པས་འོད་གསལ་སྐྱེ་བར་གསུངས་པས། སྔ་མ་ལས་སྐྱེ་དཀའ་བ་ཡིན་ནོ། །དེ་ལྟར་ཕྱིའི་ཕྱག་རྒྱ་ལ་བརྟེན་ནས་སེམས་དབེན་གྱི་ཡེ་ཤེས་བསྐྱེད་པའི་ཐབས་འདི་ནི། །
རྒྱུད་ཕྱི་མར། །གོང་བུའི་གཟུགས་ཀྱིས་ཕྱུང་ནས་ནི། །སྣ་ཡི་རྩེ་མོར་རབ་ཏུ་བརྟག །ཅེས་གསུངས་པའི་དོན་སྒྲོན་གསལ་ལས། རང་གི་གསང་བའི་རྡོ་རྗེའི་བུ་ག་ལས་ཕྱུང་ནས་ཕྱག་རྒྱའི་པདྨའི་སྣ་རྩེར་ཐིག་ལེའི་གཟུགས་སུ་བསྒོམ་པར་བཤད་པ་དེ་དང་སྦྱར་ན་
6-5-18a


ལེགས་ཏེ། །རྡོ་རྗེ་ཕྲེང་བར། གསང་བའི་སྣ་རྩེར་རྫས་ཀྱི་ཐིག་ལེ་བསྒོམ་པའི་སྐབས་སུ། རྩ་རྣམས་ཀུན་ཏུ་དབབ་པ་དང་། །བྱང་ཆུབ་སེམས་ནི་བརྟན་བྱས་པ། །རྡོ་རྗེའི་རྩེ་དང་པདྨའི་རྩེར་རླུང་གིས་བཟུང་བའི་སྐད་ཅིག་ལ། །ཨོཾ་གྱི་
ཡི་གེའི་སྦྱོར་བ་དང་། །སུ་ཀྵིམ་སྔགས་ཀྱི་སྦྱོར་བ་ཡིས། །རྣལ་འབྱོར་མཆོག་གིས་ཐོབ་པར་བྱེད། །ཅེས་གསུངས་པ་དང་མཐུན་པའི་ཕྱིར་རོ། །བྱང་ཆུབ་ཀྱི་སེམས་བརྟན་པར་བྱས་པ་ནི། ཐབས་འོག་མ་གཉིས་ཀྱིས་བྱས་པའོ། །དང་པོ་ནི་རླུང་གིས་བཟུང་
བ་སྟེ་སྲོག་དང་རྩོལ་བ་མཉམ་པར་སྦྱོར་བ་དང་ཧཱུཾ་ཕཊ་འགོད་པར་ཡང་གསུངས་སོ། །གཉིས་པ་ནི་འགྲེལ་པའི་འགྱུར་ལས། རྐན་ལ་ཡི་གེའི་སྦྱོར་བ་དང་། ཀྵྨིཾ་སྔགས་ཀྱི་སྦྱོར་བ་ཡིས། །ཞེས་འབྱུང་ལ། རྐན་ནི་ཆོས་འབྱུང་གི་དབུས་སུ་ཤིན་ཏུ་རིང་བའི་
རྩའི་ངོ་བོ་དང་། དེ་ལ་རྡེབས་པའི་སྦྱོར་བ་ནི་ཤིན་ཏུ་དམ་པར་བརྡབས་པ་དང་། །སྔགས་དེ་རྡོ་རྗེའི་རྩེར་བསྒོམ་པར་འགྲེལ་པས་བཤད་དེ། །དེའི་ལྟར་ན། རྐན་ལ་རྡེབས་པའི་སྦྱོར་བ་དང་། །ཞེས་པ་ཐོབ་བོ། །དེ་ལྟར་ན་སྣ་རྩེར་གོང་བུའི་གཟུགས་ཀྱིས་
བསྒོམ་པ་ནི་སྔར་བཤད་པ་བཞིན་དུ་རྩ་ཕྲད་པའི་ནང་དུ་འཛིན་པའོ། །ལཀྵྨཱིས་ནི། འདིའི་ཡེ་ཤེས་གསུམ་མཚོན་པ་དབང་གི་སྐབས་ལ་སྦྱོར་ཞིང་། ཇི་སྐད་བཤད་པའི་བྱ་བ་ནི་གདན་བཞིར་བཤད་པའི་བྱེད་པ་ལ་སྦྱོར་རོ། །ཡེ་ཤེས་གཉིས་མཉམ་པར་
སྦྱོར་བ་དངོས་ནི་ཉེར་ཐོབ་ཡིན་པས། ཡེ་ཤེས་གཉིས་སྔ་ཕྱིར་འབྲེལ་བར་བསྐྱེད་པ་དང་། ཇི་སྐད་བཤད་པའི་དབང་པོ་གཉིས་སྦྱོར་གྱི་བྱ་བའམ་བྱེད་པས། ཉེར་ཐོབ་ཐོབ་པར་བྱ་བའི་དོན་ནོ། །ཀུན་རྫོབ་ཏུ་ཞེས་པ་ནི་ཆུ་སྐྱེས་དང་རྡོ་རྗེའི་དོན་དོན་དམ་
6-5-18b


པ་མིན་གྱི་ཀུན་རྫོབ་པའོ་ཞེས་པའི་དོན་ཏེ། སྟེང་གི་སྣ་ལ་ཀུན་རྫོབ་པའི་སྣ་རྩེར་ཞེས་བཤད་པ་ལྟར་རོ། །རྣལ་འབྱོར་སྟོབས་ནི་ཡེ་ཤེས་ཀྱི་ཕྱག་རྒྱ་ལ་བརྟེན་པའི་རྣལ་འབྱོར་རོ། །རབ་དབྱེ་ནི་སྣང་བ་གསུམ་དང་རང་བཞིན་བརྒྱད་ཅུའི་དབྱེ་བའོ། །དེ་ཤེས་པར་བྱེད་པ་ནི་ཕྱག་རྒྱ་
ལ་བརྟེན་ནས་སོ། །ཡེ་ཤེས་འཇུག་པ་ནི་ཡེ་ཤེས་གསུམ་རིམ་གྱིས་འཇུག་པའོ། །རང་བཞིན་དེ་ཉིད་ནི་དེ་ཁོ་ན་ཉིད་ཀྱི་དོན་ཡེ་ཤེས་གསུམ་གྱིས་མཚོན་པར་བྱེད་པ་ལ་བྱའི་རང་བཞིན་བརྒྱད་ཅུ་ལ་མི་བྱའོ། །གསུམ་པ་ནི། ཇི་ལྟར་ཞེས་སོགས་ཏེ། རང་བཞིན་རྣམས་
ཐིམ་པའི་རིམ་གྱིས་འོད་གསལ་དུ་གཞུག་པའི་དོན་ཏོ། །བཞི་པ་ནི། དེ་རྣམས་ཞེས་པ་ནས་གྲོལ་བར་འགྱུར་ཞེས་པའི་བར་ཏེ་གོ་བར་ཟད་དོ། །གཉིས་པ་ལ་གཉིས། །བསྐྱེད་རིམ་པས་སྟོང་པ་གསུམ་ལས་ལྷའི་སྐུ་བསྐྱེད་ཚུལ་དང་། རྫོགས་རིམ་པས་སྟོང་པ་བཞི་
ལས་ལྷའི་སྐུ་བསྐྱེད་ཚུལ་ལོ། །དང་པོ་ནི། ཤེས་རབ་ཅེས་སོགས་ཏེ། བསྐྱེས་རིམ་པས་ཟླ་བ་བསྒོམ་པ་ནི་ཤེས་རབ་སྟེ་སྣང་བ་དང་། རྡོ་རྗེ་སོགས་བསྒོམས་པ་ནི་ཐབས་དང་། དེ་རྣམས་མཉམ་པར་སྦྱོར་པ་ནི་ཉེར་ཐོབ་ཀྱི་མཚོན་བྱེད་དང་། དེ་ལས་ལྷའི་གཟུགས་འབྱུང་
བ་འདིའི་མཚོན་བྱེད་ཡིན་ཞེས་པ་མ་གསུངས་ཀྱང་། སྒྱུ་མའི་སྐུའི་མཚོན་བྱེད་དོ། །དེ་ལ་ཕྱག་རྒྱ་བཞིས་རྒྱས་བཏབ་པ་ནི་སྐུ་གསུང་ཐུགས་དང་ཏིང་ངེ་འཛིན་སེམས་དཔའི་ཕྱག་རྒྱ་བཞིའམ། ཡང་ན་ལྷ་མོ་བཞིས་རྒྱས་བཏབ་པའམ་བསྐོར་བའོ་ཞེས་ལཀྵྨཱིས་བཤད་
ཀྱང་། སྐུ་གསུང་ཐུགས་འཕྲིན་ལས་བཞི་ལ་བྱའོ། །འདུས་པ་ལ་སོགས་པའི་རྒྱུད་ནས་བཤད་པ་བཞིན་དུ་དེ་ལྟར་བསྒོམ་པ་ནི་ལས་དང་པོ་པའོ། །འདི་འཕགས་ལུགས་པ་རང་ལ་ཟླ་བ་གདན་དུ་བྱེད་ཅིང་ཕྱག་མཚན་དང་འདྲེས་པ་མི་བྱེད་ཀྱང་དེ་དང་འདུས་པ་
6-5-19a


ལ་བྱའོ་རྒྱུད་གཞན་ལ་ནི་མངོན་བྱང་ལྔས་བསྐྱེད་པ་ལ་འདི་ལྟར་དུ་གསལ་ལོ། །འདི་སྐབས་འདིར་བཤད་པ་ནི་བསྐྱེད་རིམ་པས་དེ་ལྟར་བསྒོམ་པ་དེ་སེམས་དབེན་གྱི་ཡེ་ཤེས་བསྐྱེད་ནས་སྒྱུ་མའི་སྐུ་སྒྲུབ་པའི་རྒྱུད་སྨིན་བྱེད་དུ་བསྟན་
པའི་ཕྱིར་རོ། །དེ་ལྟར་མོས་ནས་བྱ་དགོས་པའི་དབང་དུ་བྱས་ནས་སྟོང་པ་གསུམ་ལས་ལྷའི་སྐུ་བསྐྱེད་པ་ཞེས་བྱས་ཀྱི་དངོས་སུ་ནི་མིན་ནོ། །གཉིས་པ་ནི། ད་ནི་ཞེས་པ་ནས་སྤྱོད་ཡུལ་མིན་གྱི་བར་གྱིས་སྣང་བ་གསུམ་དག་པའི་ཐམས་ཅད་སྟོང་པ་འོད་གསལ་
ལས་དང་། འོད་གསལ་ཞེས་པ་ནས་དེ་ནས་འགྱུར། །ཞེས་པའི་བར་གྱིས་ནི་དེ་ལས་ཟུང་འཇུག་གི་སྐུ་བསྒྲུབ་ཚུལ་བསྟན་ཏེ། །གསུམ་པ་ལ་བཞི། ཕར་ཕྱིན་གྱི་ཐེག་པའི་མཐར་ཡང་འོད་གསལ་གྱི་ལམ་ལ་བལྟོས་དགོས་པ་དང་། འོད་གསལ་གྱི་དེ་ཉིད་
རྙེད་པའི་གང་ཟག་གིས་ཀྱང་འཚང་རྒྱ་ནུས་པ་དང་། འོད་གསལ་གྱི་དེ་ཉིད་གསུང་རབ་ལས་གསུངས་ཚུལ་དང་། དེ་ཉིད་དེ་དང་མི་ལྡན་ན་གཞན་གྱིས་འཚང་རྒྱ་མི་ནུས་པར་བསྟན་པའོ། །དང་པོ་ནི། འོད་གསལ་མངོན་དུ་བྱས་ནས་འཚངས་རྒྱ་བར་བསྟན་
པ་དེ་བཞིན་དུ་ཕ་རོལ་ཏུ་ཕྱིར་པའི་ལམ་གྱི་མཐར་ཡང་དེ་ལ་བརྟེན་ནས་འཚང་རྒྱ་བ་བཤད་པར་བྱའོ། །ཐེག་ཆེན་གྱི་མདོ་རྒྱ་ཆེར་རོལ་པར་ཞེས་པ་ནི་ནཻ་རཉྫ་ནའི་ཆུ་འགྲམ་དུ་མི་གཡོ་བའི་བསམ་གཏན་ལ་བཞུགས་པ་དེ་ནས་བཤད་པར་སྟོན་གྱི་འོད་གསལ་ལ་
བརྟེན་ནས་འཚང་རྒྱ་ཚུལ་དེར་བསྟན་ཞེས་པ་ནི་མིན་ནོ། །ཤཱཀྱ་ཐུབ་པས་ཞེས་པ་ནི་སངས་རྒྱས་པའི་སྔོན་རོལ་ནས་མཚན་དེ་ལྟར་བཏགས་སོ། །སྟོང་པ་ཆེན་པོས་འཚངས་རྒྱ་བར་དགོངས་ཞེས་པ་ནི་དེའི་དུས་ཀྱི་མི་གཡོ་བའི་བསམ་གཏན་ལ་སྔགས་ཀྱི་འོད་
6-5-19b


གསལ་མིན་པས་སྟོང་ཆེན་ཞེས་ཟེར་གྱི་མདོ་དེར་སྟོང་ཆེན་དུ་བཤད་པའང་མིན་ལ། །སྟོང་ཆེན་གང་ཡིན་ཐམས་ཅད་དེ་ཁོ་ན་ཉིད་མངོན་དུ་མ་གྱུར་པ་ལའང་མི་གཟུང་ངོ་། །དེ་ལྟར་ཆུ་བོ་དེའི་འགྲམ་དུ་མི་གཡོ་བའི་བསམ་གཏན་གྱིས་འཚང་རྒྱ་བར་བྱའོ་སྙམ་དུ་དགོངས་ནས་
བཞུགས་པ་རྒྱ་ཆེར་རོལ་པ་ལས་བསྟན་གྱི། །སངས་རྒྱས་རྣམས་བྱོན་ནས་བསྐུལ་བ་མདོ་དེར་གསུངས་པ་མིན་ནོ། །དེ་ནས་ནམ་མཁའ་གང་བའི་རྒྱལ་བ་རྣམས་ཀྱིས་སེ་གོལ་གཏོགས་ཏེ་སད་པར་བྱས་ནས་གསུངས་གཅིག་གིས་གསུངས་པ་ནི། དེ་ཉིད་བསྡུས་པའི་རྒྱུད་ནས་
འབྱུང་ངོ་། །བསམ་གཏན་འདི་ནི་རྣམ་དག་མིན། །ཞེས་པ་ནི། བག་ཆགས་ཕྲ་མོ་དག་བྱེད་མིན། །ཞེས་པའི་དོན་ཡིན་གྱི་ལམ་མ་ནོར་བ་མིན་ཞེས་པ་མིན་ནོ། །དེའི་ཕྱིར་འདི་ཁོ་ནས་མཐར་ཐུག་ཐོབ་བྱེད་ཀྱང་མིན་ནོ། །དེས་ན་ནམ་མཁའི་ངོས་ལྟར་མཆོག་ཏུ་གྱུར་པའི་འོད་
གསལ་ལ་དམིགས་ཤིག །དེ་ལྟར་ན། འོད་གསལ་བའི་གནས་ཐོབ་ནས། རབ་དགའི་གཟུགས་སུ་སྐྱེ་བར་འགྱུར། །དེ་ཚེ་རབ་དགའ་རྡོ་རྗེའི་སྐུ། །ཀུན་གྱི་དབང་ཕྱུག་ཐོབ་པར་འགྱུར། །ཞེས་དབྱངས་གཅིག་གིས་བསྐུལ་ཏེ། རབ་དགའི་གཟུགས་ན་ཟུང་འཇུག་གི་སྐུའོ། །ཀུན་
གྱི་དབང་ཕྱུག་ནི་དབང་ཕྱུག་བརྒྱད་ལྡན་གྱི་གོ་འཕང་ངོ་། །སྤྱོད་བསྡུས་ལས་ཀྱང་རིམ་པ་འདི་ཉིད་ཀྱིས་དཔལ་བཅོམ་ལྡན་འདས་ཤཱཀྱ་སེང་གེ་ལ་དེ་བཞིན་གཤེགས་པ་ཐམས་ཅད་ཀྱིས་སེ་གོལ་གྱི་སྒྲས་བསྐུལ་བར་གྱུར་པས་མི་གཡོ་བའི་ཏིང་ངེ་འཛིན་ལས་བཞེངས་ཏེ། 
བྱང་ཆུབ་ཤིང་དྲུང་དུ་བཞུགས་ཏེ་མཚན་ཕྱེད་ཀྱི་དུས་སུ་འོད་གསལ་མངོན་སུམ་དུ་མཛད་ནས། སྒྱུ་མ་ལྟ་བུའི་ཏིང་ངེ་འཛིན་གྱིས་བཞེངས་ནས་གདུལ་བྱ་རྣམས་ལ་ཆོས་ཀྱི་འཁོར་ལོ་རབ་ཏུ་བསྐོར་བ་ཡིན་ནོ་ཞེས་གསུངས་སོ། །འདིས་ཀྱང་བསྐུལ་ས་ཤཱཀྱ་ཐུབ་པ་ལ་
6-5-20a


གསུངས་པས་རིམ་པ་གཉིས་པ་དང་དགོངས་པ་གཅིག་པས་བྱང་ཆུབ་ཀྱི་ཤིང་དྲུང་ཡང་རྡོ་རྗེ་གདན་གྱི་བྱང་ཆུབ་ཤིང་དྲུང་ཡིན་ནོ། །འདི་ལ་ཀོ་ས་ལའི་རྒྱན་ལས་རྣམ་སྨིན་གྱི་ལུས་ནཻ་རཉྫནའི་ཆུ་འགྲམ་དུ་བཞག་ནས་ཡིད་ཀྱི་ལུས་ཀྱིས་
འོག་མིན་དུ་ཕྱིན་ནས་མངོན་བྱང་ལྔ་བསྒོམས་ཏེ་རྒྱ་བར་བཤད་པ་ལྟར་ཡང་མི་འདོད་ལ། དེ་ཉིད་སྣང་བར་ཤཱཀ་ཐུབ་པ་བསྐལ་པ་མང་པོའི་སྔོན་ནས་སངས་རྒྱས་པར་གསུངས་པས་ལུགས་དེ་དེ་དང་འགལ་བས་རྣལ་བྱོར་རྒྱུད་ནས་སངས་རྒྱས་རྣམས་ཀྱིས་
བསྐུལ་བའི་བྱང་སེམས་དོན་སྒྲུབ་ནི་འོག་མིན་གྱི་ལྷའི་རྟེན་ཅན་པ་དང་། །འོག་མིན་གྱི་བྱང་ཆུབ་ཤིང་དྲུང་དུ་སངས་རྒྱས་པར་འདོད་པ་ལྟར་ཡང་མི་འདོད་དོ། །ཤཱཀ་ཐུབ་འདོད་ཁམས་སུ་འཚང་རྒྱ་བའི་ཚུལ་སྟོན་པ་ཙམ་ཡིན་གྱི་དེའི་སྔོན་ནས་སངས་རྒྱས་པ་ཡིན་མོད་ཀྱང་། 
འདོད་ཁམས་སུ་འཚང་རྒྱ་བའི་ཚུལ་བསྟན་པའི་ཚེའང་སྔར་ལྟར་བསྐུལ་བའི་ཚུལ་བསྟན་པ་མི་འགལ་ལ། དེས་ཀྱང་ཕར་ཕྱིན་གྱི་ཐེག་པའི་ལམ་གྱི་མཐར་སྔགས་ཀྱི་འོད་གསལ་གྱི་ལམ་ལ་བརྟེན་ནས་འཚང་རྒྱ་དགོས་པར་སྟོན་པས། འོག་མིན་དུ་འཚང་རྒྱ་བ་
ལའང་དེ་ལྟར་དགོས་སོ། །འདི་ལ་ནི་སྔགས་ཀྱི་ལམ་གཞན་མི་དགོས་ཀྱི་དབང་གསུམ་པ་དང་བཞི་པ་བསྐུར་བ་ལ་བརྟེན་ནས་ནམ་ཕྱེད་ཀྱི་དུས་སུ་འོད་གསལ་མཚོན་པར་བྱས་ནས་ཐོ་རངས་སངས་རྒྱས་པ་ཡིན་ནོ། །ཕར་ཕྱིན་གྱི་ཐེག་པ་པས་མཐར་སྔགས་ལ་འཇུག་པའི་
མཚམས་ནི་འདིར་བཤད་པ་ལྟར་ས་བཅུ་པ་སྲིད་པ་ཐ་མ་པའི་སྐབས་དང་། འཇུག་ཚུལ་ཡང་རང་གི་ལམ་དོར་ནས་ཞུགས་པ་མིན་གྱི་རང་གི་ལམ་ལ་སྣོན་པ་ཅུང་ཟད་བཏབ་པ་དང་། ལམ་ཡང་གསང་དབང་དང་དེ་མན་ཆད་ཀྱི་ལམ་དང་དབང་བསྐུར་མིན་གྱི་
6-5-20b


དབང་གསུམ་པ་དང་བཞི་པ་བསྐུར་བ་དང་། །དུས་ཀྱང་དེར་ནམ་ཕྱེད་ཞུགས་པའི་ཐོ་རངས་སངས་རྒྱས་པ་ཡིན་པས་དུས་རིང་པོ་མི་དགོས་སོ། །ལམ་གཞན་གྱི་དོད་ལ་ནི་ཕར་ཕྱིན་གྱི་ཐེག་པས་རྒྱུན་མཐའ་བར་དུ་འགྲོད་པའི་ལམ་དེས་བྱས་པ་ཡིན་ནོ། །རྩེ་མོར་གྲངས་མེད་
གསུམ་གྱིས་སའི་མཐར་ཕྱིན་ནས་མངོན་བྱང་ལྔ་བསྒོམས་ཏེ་སངས་རྒྱས་པར་གསུངས་པའང་འདི་ལ་དགོངས་སོ། །དེ་སྐད་སྨྲ་དེ་གསན་ནས་ནི། །ཞེས་པ་ནས་འོད་གསལ་བ་ནི་རྣམ་དག་འཆང་། །ཞེས་པའི་བར་གྱི་ཏིང་ངེ་འཛིན་སྔ་མ་བཏང་ནས་འོད་གསལ་བསྒོམས་
པས་འོད་གསལ་ཐོབ་པར་བསྟན་ཏོ། །དེ་ནས་ཆུ་ཟླ་སྨིག་རྒྱུ་ལ་སོགས་པ། །ཞེས་པ་ནས། དེས་ནི་བདུད་རྣམས་འཇོམས་པར་མཛད་ཅེས་པའི་བར་གྱིས་འོད་གསལ་ལ་བརྟེན་ནས་ཟུང་འཇུག་གི་སྐུ་གྲུབ་སྟེ་བྱང་ཆུབ་ཀྱི་ཤིང་དྲུང་དུ་བདུད་འཇོམས་པར་མཛད་པར་
བསྟན་ནོ། །དེ་ནས་ཤཱཀྱའི་མགོན་པོས་ཡང་དག་པའི། །ཞེས་པ་ནས། དེ་ཉིད་འདིར་ནི་རབ་སྟོན་མཛད། །ཅེས་པའི་བར་གྱིས་སངས་རྒྱས་ནས་དེ་ཉིད་དེ་གཞན་ལ་སྟོན་པར་གསུངས་སོ། །དེ་ཉིད་ཡེ་ཤེས་ཞེས་གསུངས་པས། མངོན་རྫོགས་བྱང་ཆུབ་བསྟན་པ་ཡིན། 
ཞེས་པས་ནི། བསྟན་པའི་དེ་ཉིད་ཅེས་པ་དེ་འོད་གསལ་བསྟན་པ་ཡིན་པར་བཤད་དོ། །གཉིས་པ་ནི། མཚམས་མེད་པ་ཞེས་གསུངས་ཏེ། མཚམས་མེད་བྱས་པ་དང་བསོད་ནམས་ཀྱི་བསགས་པ་དམན་པས་ཀྱང་། བླ་མའི་དྲིན་གྱིས་དེ་ཁོ་ན་ཉིད་ཐོབ་ན་འཚང་
རྒྱའོ། །ཆག་གིས་ཡིད་བཞིན་ནོར་དང་འདྲ་བ་མཆོག །ཅེས་བསྒྱུར་རོ། །གསུམ་པ་ནི། འདོད་ཆགས་མིན་ཞིང་། །ཞེས་གསུངས་ཏེ། སྣང་མཆེད་ཐོབ་གསུམ་སྤངས་པའི་འོད་གསལ་ལོ། །སྟོང་པ་མ་ཡིན་ཞེས་སོགས་ནི། །རྣམ་པར་ཤེས་པ་རྣམས་སམ་རང་བཞིན་
6-5-21a


རྣམས་ཞེས་པས་བཤད་པར་ལཀྵྨཱིས་སོ། །སངས་རྒྱས་ཐམས་ཅད་མཉམ་སྦྱོར་ལ། །འདི་ཉིད་ལྟར་ནི་རབ་སྟོན་ཏོ། །ཡེ་ཤེས་གསུམ་བྲལ་དེ་ཉིད་གང་། །དགོངས་པ་ཡིས་ནི་གསུངས་པ་ཡིན། །ཞེས་གསུངས་ཏེ། སངས་རྒྱས་ཐམས་
ཅད་ཀྱི་རྒྱུད་ལས་སྣང་བ་སོགས་དང་བྲལ་བའི་ཡེ་ཤེས་དགོངས་པའི་ངག་གིས་རྒྱལ་བས་གསུངས་ཏེ། དེའང་འདི་ཉིད་དེ་གཞན་ནི་མ་ཡིན་ནོ། །དེ་ནི་གསང་བ་མཆོག་གིས་དགྱེས་པ་ན། །ཐམས་ཅད་བདག་ཉིད་རྟག་ཏུ་གནས། །སངས་རྒྱས་ཀུན་དངོས་སེམས་
དཔའ་སྟེ། །རྡོ་རྗེ་སེམས་དཔའ་བདེ་བ་མཆོག །ཅེས་གསུངས་པའོ། །དེའི་དགོངས་བཤད་ཀྱི་དོན་ནི་གསང་བ་དང་མཆོག་དང་དགྱེས་པ་གསུམ་སྣང་མཆེད་ཐོབ་གསུམ་དང་། དེ་རུ་གནས་པ་ལ་ཨ་བྱིན་པས་མི་གནས་པར་ཤེས་པར་བྱའོ། །ཐམས་ཅད་བདག་
ཉིད་ནི་རང་གི་ངོ་བོ་སྟེ་རྟག་ཏུ་གནས་པ་ནི་རྗེས་སུ་འཇུག་པའོ། །སངས་རྒྱས་ཀུན་ནི་ཕུང་པོ་ལྔའོ། །དེའི་ངོ་བོ་ནི་དེ་རྣམས་ལ་ཁྱབ་པར་བྱེད་པའོ། །སེམས་དཔའ་ནི་སྣོད་ཀྱི་འཇིག་རྟེན་ཏེ་དེའི་རང་བཞིན་ཡིན་པས་སེམས་དཔའོ། །མི་ཕྱེད་པས་རྡོ་རྗེ་དང་རྟག་ཏུ་གནས་
པས་སེམས་དཔའང་ཡིན་ཏེ་ཆོས་ཀྱི་སྐུའོ། །བདེ་བ་མཆོག་ནི་འོད་གསལ་གྱི་དེ་ཉིད་དོ་ཞེས་ལཀྵྨཱིས་བཤད་དོ། །དེ་ཉིད་དཔལ་ལྡན་འདུས་པར་ནི་ཞེས་པ་བཞི་ནི་ལེའུ་གཉིས་པ་ལས་རིགས་དྲུག་གི་བྱང་ཆུབ་ཀྱི་སེམས་རེ་རེ་གསུངས་པས་ཀྱང་འོད་གསལ་
བསྟན་ཞེས་པའོ། །དེར་ཚིགས་བཅད་དང་པོ་ཚུལ་བཞིས་བཤད་ཀྱང་དེའི་སྦས་དོན་དང་མཐར་ཐུག་གིས་དེ་ཁོ་ན་ཉིད་བསྟན་ལ། ལྷག་མ་ལྔས་དགོངས་མིན་གྱིས་དེ་ཁོ་ན་ཉིད་བསྟན་པར་ལཀྵྨཱིས་སོ། །འདོད་ཆགས་ལ་སོགས་ཞེས་པ་བཞིས་ནི་དཔལ་
6-5-21b


མཆོག་ལས་གསུངས་པ་དེ་དེ་བཞིན་གཤེགས་པ་རྣམས་ཀྱི་ཐམས་ཅད་སྟོང་པ་བསྟན་ཞེས་པའོ། །སྣ་ཚོགས་མདོ་དང་རྒྱུད་རྣམས་སུ། །ཞེས་པ་ནས། གཞན་འདིར་མངོན་པར་བརྗོད་པ་མིན་ཞེས་པས་ནི། མདོ་རྒྱུད་ཀུན་ཏུ་དེ་ཁོ་ན་ཉེད་བསྟན་པ་ཐམས་
ཅད་འོད་གསལ་བཏན་པར་གསུངས་སོ། ཆོས་ཀྱི་ཕུང་པོ་ཞེས་པ་བཞིས་ནི་ཐམས་ཅད་སྟོང་པ་སྙིང་པོ་ལས་ཀྱང་ཆེས་སྙིང་པོར་གསུངས་ཞེས་བསྟན་ཏོ། །ཁ་ཅིག་སྙིང་པོ་བསྐྱེད་རིམ་དང་དེ་ལས་སྙིང་པོ་རྡོར་བཟླས་དང་། །དེ་ལས་ཀྱང་མཆོག་ནི་རིམ་པ་
གཉིས་པའམ་རིམ་པ་བཞི་བའི་དེ་ཉིད་ལ་འཆད་པ་ནི་མི་རིགས་ཏེ། ཆོས་ཕུང་བརྒྱད་ཁྲི་བཞི་སྟོང་ལས་དེ་ལྟར་གསུངས་པའི་དོན་ཡིན་ལ། དེ་རང་ཉིད་ཀྱང་ཉན་ཐོས་ཀྱི་ཐེག་པའི་སྡེ་སྣོད་དུ་འདོད་པའི་ཕྱིར་རོ། །ཐེག་ཆེན་གྱི་ཆོས་ཕུང་དགུ་ཁྲི་དང་སྔགས་ཀྱི་
འབུམ་ཡིན་ཞེས་ཟེར་རོ། །གལ་ཏེ་འོད་གསལ་མདོ་རྒྱུད་ཐམས་ཅད་ཀྱི་དེ་ཁོ་ན་ཉིད་སྟོན་པས་བསྟན་ན། དེ་ཉིད་སྔགས་ཀྱི་རྫོགས་རིམ་མཐར་ཐུག་ཡིན་པ་དང་། མདོ་སྡེ་དང་ཐུན་མོང་བའི་དོན་ཡིན་པས་སྤྱི་དོན་དུ་འགྱུར་གྱི་མཐར་ཐུག་གི་དོན་དུ་མི་འགྱུར་བ་
དང་། ཐེག་པ་གཞན་དང་རྒྱུད་སྡེ་འོག་མར་མ་བསྟན་པར་གསུངས་པ་དང་འགལ་བར་འགྱུར་རོ་ཞེ་ན། འདིར་བཤད་པའི་འོད་གསལ་དང་རྣལ་འབྱོར་མའི་རྒྱུད་ཀྱི་སྐོར་ནས་གསུངས་པའི་ལྷན་ཅིག་སྐྱེས་པའི་དགའ་བ་གཉིས་ནི་དོན་གཅིག་ལ། དེའང་གསུངས་རབ་
ཀྱི་སྙིང་པོ་ཤེས་བྱའི་གཤིས་མཐར་ཐུག་པའི་སྟོང་ཉིད་དང་། ཡུལ་ཅན་བདེ་བ་ཆེན་པོ་གཉིས་དབྱེར་མེད་པར་བཞུགས་པའི་ཡེ་ཤེས་སོ། །དེའི་ཕྱིར་ཕར་ཕྱིན་གྱི་ཐེག་པ་དང་། རྒྱུད་སྡེ་འོག་མ་ལས་བདེ་བ་ཆེན་པོ་དེ་མི་སྟོན་པས་འོད་གསལ་ལྷན་ཅིག་སྐྱེས་པ་
6-5-22a


དེ་དག་ཏུ་མ་བསྟན་ཀྱང་། ཡུལ་སྟོང་པ་ཉིད་རྟོག་པའི་ཤེས་རབ་ལམ་གྱི་སྙིང་པོར་གསུངས་པས་དེ་ལ་དགོངས་ནས་དེ་ལྟར་གསུངས་པས་སྐྱོན་མེད་དོ། །མདོར་ན་ཤེས་བྱའི་མཐར་ཐུག་སྟོང་པ་ཉིད་གསུང་རབ་ཀུན་ཏུ་བཤད་ཀྱང་དེ་
རྟོག་པའི་ཡུལ་ཅན་གྱི་མཐར་ཐུག་བདེ་བ་ཆེན་པོ་སྔགས་བླ་མེད་ལས་གཞན་དུ་མ་གསུངས་ཤིང་དེ་གཉིས་སྦྱར་བའི་ལམ་དེ་ཐབས་དང་ཤེས་རབ་ཀྱི་ཕྱོགས་ཀུན་ཚང་བའི་ལམ་གསུང་རབ་ཐམས་ཅད་ཀྱི་སྙིང་པོ་བསྡུས་པའི་འགག་སྡོམ་མཐར་ཐུག་པ་ཡིན་
པས་དེ་ལ་ཤིན་ཏུ་བསྔགས་པ་མཛད་པ་ཡིན་ནོ། །དེ་ལྟར་བསྔགས་པའི་གཙོ་བོ་ནི་དོན་གྱི་ལྷན་སྐྱེས་ཀྱི་འོད་གསལ་ཡིན་མོད་ཀྱང་དཔེའི་ལྷན་སྐྱེས་ཀྱང་དེའི་རྒྱུ་ཐུན་མོང་མ་ཡིན་པ་ཡིན་པས་མང་དུ་བསྔགས་པ་ཡིན་ནོ། བཞི་པ་ནི། རལ་པ་གཅེར་བུ་མགོ་རེག་
གམ། །ཅོད་པ་ན་འདུས་པའི་འཇུག་པ་སྤང་། །ཞེས་སོགས་ཀྱིས་འོད་གསལ་གྱི་དེ་ཉིད་མེད་ན་བརྟུལ་ཞུགས་དེ་རྣམས་བཟུང་ནས་འབད་ཀྱང་གྲོལ་བ་མི་འཐོབ་ཅེས་བསྟན་ནོ། །རལ་པ་གཅིག་ནི་རིག་པའི་བརྟུལ་ཞུགས་པའོ། །གཅེར་བུ་ནི་སྤྱོད་པའི་བརྟུལ་ཞུགས་པའོ། །
མགོ་རེག་ནི་དགེ་སློང་དང་དགེ་ཚུལ་ལ་སོགས་པའོ། །ཅོད་པན་ནི་བསླབ་པ་ལྔ་ལ་གནས་པའི་དགེ་བསྙེན་གྱིའོ། །འདུས་པ་སྤོང་འཇུག་ནི་ཚེམ་བུ་པའི་རྣལ་འབྱོར་པའོ། །ཞེས་ལཀྵྨཱིས་བཤད་དོ། གསུམ་པ་ནི། དང་པོ་ལས་ཀྱི་བྱོར་བ་ཡིས། །ས་བརྒྱད་པ་ནི་ཐོབ་པར་
འགྱུར། །སྣང་བ་གསུམ་པོ་མཐོང་བ་དག །ས་བཅུ་པ་ལ་རབ་ཏུ་གནས། །ཞེས་པའི་དང་པོ་གཉིས་ཀྱིས་ནི་བསྐྱེད་རིམ་གྱིས་ས་བརྒྱད་པ་ཐོབ་པ་དང་། དེ་ནས་གཉིས་ཀྱིས་སེམས་དབེན་གྱིས་ས་བཅུ་པ་ལ་གནས་པར་བཤད་དོ། །དེ་ནས། མངོན་པར་
6-5-22b


བྱང་ཆུབ་ལེགས་ཐོབ་ནས། །དག་པའི་གནས་ནི་ཉེ་བར་རྟོགས། །ཕྱིར་མི་ལྡོག་པ་སྐྱེ་བ་འདིར། །སངས་རྒྱས་ཞིང་དུ་ཐམས་ཅད་མཁྱེན། །ཞེས་གསུངས་སོ། །སྤྱོད་བསྡུས་ལས་ཀྱང་ས་བརྒྱད་པ་དང་བཅུ་པ་འཐོབ་ཚུལ་དེ་ཁོ་ན་བཞིན་དུ་གསུངས་ཏེ། ས་གཞན་འཐོབ་
ཚུལ་གསལ་བར་མ་གསུངས་སོ། །དེ་ལ་འདུས་པ་རྩ་བཤད་ཀྱི་རྒྱུད་རྣམས་གཞན་ནས་ས་ཡི་རིམ་པ་གསལ་བར་མ་གསུངས་ལ་བཤད་རྒྱུད་རྡོ་རྗེ་ཕྲེང་བ་ལས། བུམ་དབང་ལ་བཅུ་གཅིག་ཏུ་བྱས་ཏེ་དབང་གོང་མ་གསུམ་དང་བཅས་པས་བཅུ་བཞི་ལ་དབང་བསྐུར་
རེ་རེ་ས་རེའོ། །ཞེས་དབང་རེ་རེ་དང་ས་རེ་རེ་སྦྱར་བས་ས་བཅུ་བཞིར་གསུངས་པ་མ་གཏོགས་པ་སའི་མིང་དང་དོན་གང་ཡང་མ་གསུངས་སོ། །དགོངས་པ་ལུང་སྟོན་ལས། སངས་རྒྱས་རྣམས་ཀྱིས་གང་བརྟེན་པ། སར་གྱུར་དེ་ནི་བཅུ་གསུམ་པ། །ཞེས་གསུངས་
པ་ཙམ་མ་གཏོགས་པས་ཡི་མིང་དོན་དང་། །གང་ནས་བརྩམས་པའི་བཅུ་གསུམ་པ་ཡིན་པའི་ཚུལ་མ་བཤད་ལ་ལུང་དེ་སྒྲོན་གསལ་ལས་འོད་གསལ་གྱི་ལུང་དུ་དྲངས་སོ། །གཞུང་འདི་དང་སྤྱོད་བསྡུས་གཉིས་སུའང་ལྔར་ལྟར་གསུངས་པ་ཙམ་མ་གཏོགས་
པ་སའི་མིང་དོན་དང་། གང་ནས་བཟུང་སྟེ་འཇོག་པ་སོགས་མི་གསལ་བས་འདིའི་རྗེས་འབྲང་རྣམས་ཀྱང་འདོད་པ་དུ་མ་ཞིག་གྱུར་ཏོ། །འདི་ལྟར་སྤྱོད་བསྡུས་ཀྱི་འགྲེལ་པ་དང་། རིམ་ལྔའི་འགྲེལ་པ་ཁ་ཅིག་ཏུ་མོས་སྤྱོད་ཀྱིས་སྦྱོར་ལམ་བཞི་གསུམ་བཅུ་གཉིས་
ལས་བཅུ་གཉིས་སུ་བྱས་ཏེ། དེའི་ལྟར་ན་ས་དང་པོ་ནི་དྲོད་ཆུང་ངུ་ཡིན་པས་དེ་ནས་སའི་ཐོག་མ་འཛིན་ས་དང་པོ་རབ་ཏུ་དགའ་བ་ས་བཅུ་གསུམ་པར་བྱེད་པར་མངོན་ནོ། །རིམ་ལྔའི་འགྲེལ་པ་མང་པོས་ནི་ས་རབ་ཏུ་དགའ་བ་སོགས་ཀྱི་གྲངས་ལ་བཤད་དོ། །
6-5-23a


སྔགས་ཀྱི་གཞུང་རྣམས་ནས་གནས་ལ་སོགས་པ་བཅུ་གཉིས་ས་བཅུ་གཉིས་སུ་བཤད་པ་སོགས་ལ་རབ་དགའ་སོགས་བཅུ་གཅིག་དང་མོས་སྤྱོད་ཀྱི་ས་དང་བཅུ་གཉིས་བཤད་པ་མང་བས་སའི་གྲངས་ནི་ཕ་རོལ་ཏུ་ཕྱིན་
པའི་ཐེག་པ་ལ་གྲགས་པ་ལྟར་འཐད་དོ། །ས་ལྷག་མ་ཇི་ལྟར་སྦྱོར་བ་ལཀྵྨཱིས། རྡོར་བཟླས་ཀྱིས་ས་དགུ་པ་འཐོབ་པ་ནི་ཤུགས་ཀྱིས་བསྟན་ལ། སྒྱུ་ལུས་ནི་སེམས་དབེན་གྱི་རྗེས་ཐོབ་ཡིན་པས་རྣམ་བཅས་རྣམ་མེད་ཀྱི་དབྱེ་བ་ཡོད་ཀྱང་ས་ཡི་དབྱེ་བ་
མེད་པས་དེ་གཉིས་ཀས་ས་བཅུ་པ་དང་། འོད་གསལ་མཉམ་གཞག་དང་ཟུང་འཇུག་དེའི་རྗེས་ཐོབ་ཡིན་པས་དེ་གཉིས་ཀ་ས་བཅུ་གཅིག་ཀུན་ཏུ་འོད་འཐོབ་བོ། །དེ་ཉིད་ལས་དང་པོ་པའི་ས་ལ་བལྟོས་ནས་ས་བཅུ་གཉིས་པ་ཡིན་ནོ། །ཞེས་འཆད་དོ། །
དབང་བསྐུར་རེ་རེར་བཤད་པའི་དོན་ལ་ཨ་ལམ་ཀ་ཀ་ལ་ཤས། སློབ་དཔོན་དང་གསང་དབང་གཉིས་ཀྱིས་ས་བརྒྱད་དང་། ཤེས་རབ་ཡེ་ཤེས་ཀྱིས་དགུ་པ་དང་། བཞི་པའི་དཔེས་བཅུ་པ་དང་། དོན་གྱིས་བཅུ་གཅིག་པ་སྟེ་མོས་སྤྱོད་ཀྱིས་ལ་བལྟོས་ནས་
བཅུ་གཉིས་པའོ། །ཕྱག་རྒྱ་ཆེན་པོ་མངོན་དུ་བྱེད་པས་ནི་བཅུ་གསུམ་པའོ། །ཡང་ན་སློབ་དཔོན་གྱི་དབང་གིས་ས་བརྒྱད་པ་དང་། གསང་དབང་གི་རྡོ་རྗེ་བཟླས་པ་ལ་བརྟེན་ནས་ས་དགུ་པ་དང་། ཤེས་རབ་ཡེ་ཤེས་ཀྱི་དབང་གི་སེམས་དབེན་གྱིས་ས་བཅུ་པ་སྟེ་
རང་བྱིན་རླབས་ཀྱང་དེ་ཉིད་དོ། །དབང་བཞི་པའི་མངོན་པར་བྱང་ཆུབ་རིམ་པས་བཅུ་གཅིག་པ་སྟེ་མོས་སྤྱོད་ཀྱིས་དང་བཅས་པས་བཅུ་གཉིས་པའོ། །ཟུང་འཇུག་གི་རིམ་པ་ས་བཅུ་གསུམ་པའོ། །ཞེས་འཆད་དོ། །དེ་ནི་ས་བཅུ་བཞི་དགོས་པ་ལ་བཅུ་གསུམ་
6-5-23b


ལས་མ་བྱུང་བ་དང་། བུམ་དབང་བཅུ་གཅིག་རེ་རེ་དང་སྦྱར་རྒྱུ་ལ་ས་བརྒྱད་ལས་མ་བྱུང་བས་རྒྱུད་དང་མི་མཐུན་པའི་བཤད་པའོ། །དེས་ན་འཕགས་སྐོར་ལྔའི་གཞུང་ནས་སའི་སྤྱི་གྲངས་ཇི་ལྟར་བྱེད་མི་གསལ་ཡང་། བཤད་རྒྱུད་རྡོར་ཕྲེང་ནས་གསུངས་པ་ལྟར་བཅུ་
བཞིར་བྱ་སྟེ། དགོངས་པ་ལུང་སྟོན་ལས་འོད་གསལ་བཅུ་གསུམ་པར་གསུངས་པས་ཀྱང་ཟུང་འཇུག་བཅུ་བཞི་པར་གོའོ། །སྔར་ལྟར་སའི་གྲངས་གཞུང་གཉིས་སུ་སྨོས་པའི་ཤུགས་ཀྱིས་ནི་རྡོར་བཟླས་ཀྱིས་ས་དགུ་བ་དང་། སྒྱུ་ལུས་ཀྱི་ས་བཅུ་གཅིག་པ་དང་། 
འོད་གསལ་གི་ས་བཅུ་གཉིས་པ་དང་། ཟུང་འཇུག་གིས་ས་བཅུ་གསུམ་པ་འཐོབ་པར་བསྟན་ལ། དེ་ཉིད་མོས་ཀྱི་ས་ལ་བལྟོས་ནས་བཅུ་བཞི་པའོ། །གལ་ཏེ་ཕར་ཕྱིན་གྱི་ཐེག་པའི་སའི་གྲངས་ནི་མོས་སྤྱོད་ཀྱི་ས་དང་བཅས་པའི་བཅུ་གཉིས་སམ། ལས་དང་
པོ་པའི་ས་བསྣན་ན་བཅུ་གསུམ་ལས་མེད་པ་ལ་བཅུ་བཞིར་ཇི་ལྟར་བྱེད་སྙམ་ན། མངོན་བརྗོད་བླ་མར། རབ་དགའ་སོགས་བཅུ་དང་། དེ་ནས་དཔེ་མེད་པའི་ས་དང་། ཡེ་ཤེས་ལྡན་གྱི་ས་དང་། རྡོ་རྗེའི་ས་སྟེ་བཅུ་གསུམ་བཤད་པ་ལ། མན་ངག་སྙེ་མར་ས་བཅུ་པ་
ལ་བཅུ་པ་ཐོབ་མ་ཐག་པ་དང་། ཁྱད་པར་གྱི་ལམ་དང་། བར་ཆད་མེད་པའི་ལམ་གསུམ་དུ་ཕྱེ་ནས་ཕྱི་མ་གཉིས་དཔེ་མེད་དང་ཡེ་ཤེས་ལྡན་གྱི་སར་བཤད་པ་ལྟར། འདིར་ཡང་ས་བཅུ་པ་ལ་གསུམ་དུ་བྱས་ནས་སེམས་དབེན་དང་སྒྱུ་ལུས་དང་འོད་གསལ་
གསུམ་དང་སྦྱར་རོ། །འོ་ན་ལམ་དེ་དག་ས་དེ་རྣམས་དང་སྦྱོར་བའི་ཚུལ་ཇི་ལྟར་ཡིན་སྙམ་ན། འདི་ལ་ཁ་ཅིག་ལམ་དེ་དང་དེ་རྣམས་མཐར་ཕྱིན་པ་ན་ས་དེ་དང་དེ་དག་དངོས་འཐོབ་པས་སྒྲ་ཇི་བཞིན་པའི་སྦྱོར་ཚུལ་བྱེད་དོ། །དེ་ནི་མི་འཐད་དེ། སྦྱོད་བསྡུས་
6-5-24a


ལས། སྒྱུ་མ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་པ་རྣམས་ཀྱིས་ཀྱང་སྲིད་དུ་དོན་དམ་པའི་བདེན་པ་མངོན་པར་རྟོགས་པ་ཐོབ་པ་མ་ཡིན་པ་དེ་སྲིད་དུ་ཕྱིར་མི་ལྡོག་པར་མི་འགྱུར་རོ། །ཅིའི་ཕྱིར་ཞེ་ན། སྣང་བ་གསུམ་
རྣམ་པར་མ་དག་པའོ། །ཇི་སྲིད་དུ་རྣམ་པར་ཤེས་པའི་ཀུན་ཏུ་རྟོག་པ་དེ་སྲིད་དུ་ནི་ཉོན་མོངས་པའི་བག་ཆགས་ཀྱི་རྒྱུན་ནོ། །ཉོན་མོངས་པའི་བག་ཆགས་ཀྱི་རྒྱུན་ལས་ཡང་སྲིད་པའོ། །ཞེས་སྒྱུ་ལུས་ཐོབ་ཀྱང་འོད་གསལ་མ་ཐོབ་ན་ཉོན་མོངས་ཀྱི་དབང་གིས་འཁོར་
བར་ལྡོག་པར་གསུངས་པའི་ཕྱིར་དང་། ས་བཅུ་པ་ཆོས་ཀྱི་སྤྲིན་ཐོབ་ན་འཁོར་བར་ལས་ཉོན་གྱི་དབང་གིས་སྐྱེ་མི་སྲིད་པའི་ཕྱིར་རོ། །རིགས་པ་དེས་ནི་བསྐྱེད་རིམ་དང་རྡོར་བཟླས་དང་སེམས་དབེན་མཐར་ཕྱིན་པས་ས་བརྒྱད་པ་མི་གཡོ་བ་སོགས་གསུམ་ཐོབ་པ་མི་
འཐད་པར་ཡང་ཤེས་པར་བྱའོ། །ཡང་ཁ་ཅིག་གིས་ས་དེ་རྣམས་དངོས་སུ་ཐོབ་པ་མིན་གྱི་ས་དེ་དག་དང་སྔགས་ཀྱི་ལམ་དེ་རྣམས་རྫོགས་པའི་སངས་རྒྱས་སུ་བགྲོད་པའི་ལམ་གྱི་ནུས་པ་མཚུངས་པའི་སྒོ་ནས་དེ་དག་ཐོབ་པར་བཞག་པ་ཡིན་ནོ། །ཞེས་
པའང་མི་འཐད་དེ། །སྔགས་ཀྱི་ལམ་དེ་དག་གང་གི་དབང་དུ་བྱས་པའི་གདུལ་བྱའི་གཙོ་བོ་རིན་པོ་ཆེ་ལྟ་བུ་ནི་བསྐྱེད་རིམ་ལ་འཇུག་པ་ནས་ཚེ་དེ་ལ་སངས་རྒྱས་མངོན་དུ་བྱེད་ནུས་ཀྱི། ཕར་ཕྱིན་གྱི་ཐེག་པར་ནི་ས་བཅུ་པས་ཀྱང་སྐྱེ་བ་གཅིག་གིས་ཐོགས་ན་ཚེ་གཅིག་
ལ་སངས་རྒྱས་མངོན་དུ་བྱེད་མི་ནུས་པའི་ཕྱིར་ས་བཅུ་པ་སྲིད་པ་ཐ་མ་པ་ཁོ་ན་དང་ནུས་པ་བསྟན་ནས་འཇོག་དགོས་པར་འགྱུར་རོ། །འོ་ན་ཇི་ལྟར་ཡིན་སྙམ་ན། འདི་ནི་དབང་བསྐུར་རེ་རེ་ས་རེ་རེ་དང་སྦྱར་བ་དང་། ཡང་གཞུང་གཞན་ལས་སྦྱོར་བ་ཚོགས་བསགས་
6-5-24b


ཚོགས་ལམ་དང་། ཡེ་ཤེས་ཀྱི་ཚོགས་སྒོམ་པ་ནས་བར་སྲིད་ཀྱི་ཡི་གེ་མ་ཞུགས་ཚུན་ཆད་སྦྱོར་ལམ་དང་། ཞུགས་ནས་འབྲལ་བུ་རྡོ་རྗེ་འཛིན་པ་མ་རྫོགས་ཀྱི་བར་མཐོང་སྒོམ་དང་། དེ་རྫོགས་ནས་མི་སློབ་ལམ་དུ་བཞག་པ་དང་། ཡང་ཏིང་ངེ་འཛིན་གསུམ་སྐུ་གསུམ་
དང་མཐོང་སྒོམ་མི་སློབ་ལམ་གསུམ་དང་སྦྱར་བ་དང་། ལྷག་མོས་འོད་གསལ་དུ་སྡུད་པ་ཆོས་སྐུ་དང་། དང་པོའི་མགོན་པོ་སྐྱེད་པ་ལོངས་སྐུ་དང་། སྤྲུལ་སྐུར་བསྒྱུར་པ་སྤྲུལ་སྐུ་དང་སྦྱར་བ་དང་། དེ་བཞིན་དུ་གནས་ལ་སོགས་པ་བཅུ་གཉིས་ས་བཅུ་གཉིས་དང་
སྦྱོར་བ་རྣམས་དང་སྦྱོར་ལུགས་འདྲ་བ་ཡིན་ཏེ། དེ་དག་དང་སྦྱོར་བའི་ཆོས་མཐུན་ཁྱད་པར་ཅན་རེ་ཡོད་པས་དེ་ལ་དགོངས་ནས་ཡིན་ནོ། །འོ་ན་འདིར་ཆོས་མཐུན་ཁྱད་པར་ཅན་ཇི་ལྟ་བུ་ཡོད་སྙམ་ན། ས་རབ་ཏུ་དགའ་བ་ནས་བརྒྱད་པ་མི་གཡོ་བའི་བར་དུ་བསྐྱེད་པས་
ཞིང་རྣམ་པར་དག་པ་ལ་དབང་བའི་ཏིང་ངེ་འཛིན་ཐོབ་པ་བཞིན་དུ། བསྐྱེད་རིམ་གྱི་ཐོག་མ་ནས་བརྩམས་ཏེ་ཕྲ་ཐིག་མཐར་ཕྱིན་ཕྱིན་གྱི་བར་དུ་རྒྱུད་ལ་བསྐྱེད་པས། སྣོད་བཅུད་ལ་ཐ་མལ་གྱི་སྣང་ཞེན་ལོག་ནས་སྣོད་ཐམས་ཅད་གཞལ་ཡས་ཁང་དང་བཅུད་ཐམས་
ཅད་ལྷ་ཕོ་མོའི་རྣམ་པར་སྣང་པའི་ཏིང་ངེ་འཛིན་བརྟན་པོ་རྙེད་པའི་ཕྱིར་ས་བརྒྱད་པ་ཐོབ་པ་དང་འདྲ་བས་དེ་ཐོབ་པར་གསུངས་སོ། །ཡང་ས་དགུ་པར་སོ་སོ་ཡང་དག་པར་རིག་པ་བཞི་ཐོབ་པས་ཆོས་སྟོན་པའི་ཡེ་ཤེས་ལ་དབང་ཐོབ་པ་བཞིན་དུ་རྡོ་རྗེ་བཟླས་པ་མཐར་
ཕྱིན་པ་ན་ངག་གི་རྩ་བའི་རླུང་དབང་དུ་འདུས་ནས་ངག་རྣམ་པར་དག་པར་འགྱུར་བས་དེ་ཐོབ་པ་ནས་དགུ་པ་ཐོབ་པར་གསུངས་སོ། །ས་བཅུ་པ་ཐོབ་མ་ཐག་པ་ནས་ལུས་ངན་པའི་རྒྱུའི་ལས་ཀྱི་བག་ཆགས་དམན་པ་ཐམས་ཅད་ཀྱང་བཟང་པོར་བསྒྱུར་བ་ལ་དབང་ཐོབ་
6-5-25a


པ་བཞིན་དུ་སེམས་དབེན་རྫོགས་པ་ན་འགྲོ་བ་ངན་པའི་རྒྱུར་གྱུར་པའི་རླུང་སེམས་གཉིས་སྒྱུ་མ་ལྟ་བུའི་རྡོ་རྗེ་སེམས་དཔའི་སྐུར་བསྒྱུར་ནུས་པས་དེ་ཐོབ་པ་ན་ས་བཅུ་པ་ཐོབ་པར་གསུངས་སོ། །ས་བཅུ་པའི་ཁྱད་པར་གྱི་ལམ་ལ་
གནས་པ་སྐྱེ་བ་གཅིག་གིས་ཐོགས་པ་དེས་ལུས་དེ་ཙམ་ཞིག་དོར་བས་འཚང་རྒྱ་བ་བཞིན་དུ། རླུང་སེམས་ཙམ་ལས་གྲུབ་པའི་རྡོ་རྗེ་འཆང་གི་རྣམ་པ་ཅན་གྱི་སྐུ་གྲུབ་པ་དེས་ཀྱང་རང་གི་རྣམ་སྨིན་གྱི་ལུས་དེ་དོར་བ་ཙམ་གྱིས་ཟུང་འཇུག་གི་སྐུར་འཚང་
རྒྱ་བས་དེ་ཐོབ་པ་ལ་ས་བཅུ་པ་སྐྱེ་བ་གཅིག་གིས་ཐོགས་པའི་ས་ཐོབ་པ་ཞེས་བྱའོ། །ས་བཅུ་པའི་བར་ཆད་མེད་ལམ་ལ་གནས་པ་དེས་རང་གི་ཕྱི་ལོགས་དེ་མ་ཐག་ཏུ་མཚང་རྒྱ་བ་བཞིན་དུ་འོད་གསལ་དུ་ཞུགས་པ་དེས་ཀྱང་རང་གི་དེ་མ་ཐག་ཏུ་ལུགས་
ལྡོག་གི་སྣང་བ་རླུང་དང་བཅས་པ་ལས་ཟུང་འཇུག་གི་སྐུར་འགྱུར་བས། དེ་ཐོབ་པ་ལ་ས་བཅུ་པའི་བར་ཆད་མེད་ལམ་གྱི་ས་ཐོབ་པར་གསུངས་སོ། །རྒྱུན་མཐའི་ཕྱི་ལོགས་སུ་སངས་རྒྱས་པ་དེས་མི་སློབ་པའི་ལམ་ཐོབ་པ་བཞིན་དུ། །ཟུང་འཇུག་གི་སྐུ་
གྲུབ་པ་དེས་ཀྱང་། ཟུང་འཇུག་ཏིང་ངེ་འཛིན་ལ་གནས་ནས། སླར་ཞིང་གང་ལའང་མི་སློབ་བོ། །ཞེས་གསུངས་པ་བཞིན་དུ། །ལམ་གྱི་རིམ་པ་ལ་གསར་དུ་བསླབ་ཏུ་མེད་པའི་གོ་འཕང་ཐོབ་ནས་ཡོངས་སུ་རྫོགས་པའི་རྣལ་འབྱོར་པར་གྱུར་པས། དེ་ཐོབ་
པ་ལ་སངས་རྒྱས་ཀྱིས་ཀུན་ཏུ་འོང་ཐོབ་པ་ཞེས་གསུངས་སོ། །མངོན་རྫོགས་བྱང་ཆུབ་ནི་འོད་གསལ་ལོ། དག་པའི་གནས་ཐོབ་པ་ལ། གཙང་མའི་གནས་སུ་ཉེ་བར་འགྲོ། །ཞེས་བཤད་ཀྱང་། སྔ་མ་ལེགས་ཏེ་ཉོན་མོངས་དག་པའི་གནས་ཏེ་རྒྱུའོ། །ཕྱིར་
6-5-25b


མི་ལྡོག་པ་ནི་དེ་ཐོབ་ནས་འཁོར་བར་མི་ལྡོག་པའོ། །སྐྱེ་བ་འདིར་ཐམས་ཅད་མཁྱེན་པ་ཐོབ་པ་ནི་སྲིད་པ་ཐམ་པར་སྟོན་ནོ། །བཞི་པ་ནི། ཆོས་ཀྱི་འབྱུང་གནས་ནས་འདིར་སློབ་བོ། །ཞེས་པའི་བར་གྱིས་སྟོན་ཏེ། ཆོས་འབྱུང་ནི་སྟོབས་ལ་སོགས་པའི་ཡོན་ཏན་གྱི་ཆོས་འབྱུང་བ་སྟེ་
མངོན་པར་བྱང་ཆུབ་པ་འོད་གསལ་ལོ། །དེ་ལ་བརྟེན་ནས་ཆགས་སོགས་ཀྱི་རིམ་པ་རྒྱ་ཆེན་པོས་ཆོས་ཀྱི་དབྱིངས་མངོན་པར་བྱང་ཆུབ་པ་སྟེ་རྟོགས་པར་བྱེད་དོ། ཡོ་བྱད་ཇི་ལྟར་རྙེད་པའི་སྤྱོད་པ་བྱེད་པ་པོས། མངོན་པར་རྟོགས་པར་གང་གྱུར་པ་དེ་ལ་བླ་ན་མེད་པར་མངོན་པར་བྱང་ཆུབ་པའི
སྤྱོད་པ་སྤྲོས་བཅས་ལ་སོགས་པ་གསུམ་གྱིས་འདིར་སློབ་བོ། དེ་ནས་གཟོད་ནས་ཞེས་པ་བཞིས་སྤྱོད་པ་མི་དགོས་པར་རྩོད་དེ་དེ་བཞིན་ཉིད་གདོད་ནས་གྲུབ་པའི་དོན་རྟོག་མེད་ནི་རྟོག་པའི་ཀུན་སྤྱོད་ལས་མི་འབྱུང་ངོ་སྙམ་པའོ། །འདིར་གདོད་ནས་གྲུབ་པའི་རང་བཞིན་ཅན། ངོ་བོ་ཉིད་ཀྱིས་
དེ་གྲུབ་ན། །བསླབ་པའི་སྦྱོར་བས་ཅི་ཞིག་བྱ། །རྟོག་ལས་དེ་བཞིན་ཉིད་མི་སྐྱེ། །ཞེས་བསྒྱུར་བ་ལེགས་སོ། །དེ་ནས་གང་ཞིག་ཅེས་པ་བཞིས་སྤྱོད་པ་མི་བྱེད་ན་ཡེ་ཤེས་མི་འཕེལ་བས་འཕེལ་བའི་དོན་དུ་སློབ་པར་བསྟན་ནོ། །དེ་ནས་རང་བཞིན་སྣང་བའི་ཞེས་པ་བཞིས་སྤྱོད་པ་ལ་བསླབས་
ན་བྱང་ཆུབ་མྱུར་བར་བཤད་དེ། འདིའི་རྐང་པ་གསུམ་པ་དང་དང་པོ་གཉིས་ཀྱིས་འོད་གསལ་ཐོབ་ནས་སྤྱོད་པ་བྱེད་པར་བཤད་ཅིང་། རྡོ་རྗེ་ཕྲེང་བར་རང་བཞིན་སྣང་བའི་དབྱེ་བ་ཤེས་ནས་སྤྱོད་པ་བྱ་བར་གསུངས་པའི་དགོངས་པའང་བཤད་དོ། །ཇི་ལྟར་ཞེས་པ་བཞིས་སྤྱོད་པ་མ་
སྤྱད་ན་བྱང་ཆུབ་མི་འཐོབ་པ་དཔེ་དང་བཅས་པ་གསུངས་སོ། །གསུམ་པ་ལ་སྣོད་མིན་ནི་གང་ཞིག་ཅེས་པ་ཚིགས་སུ་བཅད་པ་གཉིས་ཀྱིས་སྟོན་ཏེ། རྐང་པ་བཞི་པ་ནི། ཆག་གིས། ཀུན་མཁྱེན་ཡང་དག་ཐོབ་མི་འགྱུར། །ཞེས་སེམས་དམན་པ་ཞེས་བསྒྱུར་བ་ལེགས་
6-5-26a


སོ། །དེ་ལྟར་རང་བཞིན་ངན་གྱུར་ཞེས་པ་བཞིས་ནི་དེ་དྲུག་དུ་མི་གཞག་པར་བསྟན་ནོ། །སྣོད་དུ་གྱུར་པ་ནི་ཡོན་ཏན་མཆོག་ལྡན་ཞེས་པ་བཞིས་བསྟན་ཏོ། །བཞི་པ་ལ་རྒྱུད་
མང་དུ་ཐོས་ཀྱང་དེ་ཁོ་ན་ཉིད་ཀྱི་མན་ངག་མ་ཐོབ་ན་འཆད་པར་མི་འོས་པ་ནི་རྒྱུད་ནི་ཞེས་པ་བཞིས་བསྟན་ནོ། འདིར་འགྱུར་རྙིང་ལེགས་སོ། མན་ངག་ཐོབ་ཀྱང་མང་དུ་ཐོས་པ་མེད་ནའང་འཆད་པ་པོར་མི་འོས་པ་ནི། གཞན་ཡང་། སྐལ་བ་དང་ལྡན་གྱུར་ཞིང་དེ་ཉིད་
མན་ངག་ཐོབ། གང་ཡང་བློ་གྲོས་བླུན་ཞིང་དོན་གྱི་སྦྱོར་ལ་ནུས་པ་མེད། །གཞན་ཕན་བྱ་བའི་བློ་ཡིས་སྟོན་པ་ལ་ནི་རབ་འཇུག་པ། ཚིགས་གི་ཡོན་ཏན་རྣམ་པར་དམན་པ་དེ་ཡང་བརྙས་པར་འགྱུར། །ཞེས་པས་བསྟན་ཏེ་འདི་ལཀྵྨཱིའི་འགྲེལ་པར་མ་བྱུང་ངོ་། རྒྱུད་མང་དུ་
ཐོས་པ་དང་དེ་ཁོ་ན་ཉིད་ཀྱི་མན་ངག་ཐོབ་ནས་མན་ངག་སྟོན་པར་འོས་པ་ནི་རྒྱུད་ནི་ཞེས་པ་བཞིས་བསྟན་ཏོ། །གནས་དྲུག་ཤེས་པ་ན་མཐའ་དྲུག་གི་སྒོ་ནས་རྒྱུད་བཤད་ནུས་པ་ལ་བཤད་དོ། །གསུམ་པ་ནི། འཕགས་པ་རྡོ་རྗེ་ཅན་གྱི་དྲིན་གྱིས་རྒྱུད་རྣམས་
མང་པོ་ཐོས། །ཞེས་པ་བཞེས་ཇི་ལྟར་བརྩམས་པ་དང་། རྩོམ་པ་པོ་དང་། དེའི་དགེ་བ་བསྔོ་བ་བསྟན་ཏོ། །འཕགས་པ་རྡོ་རྗེ་ཅན་གྱི་དྲིན་ནི་རྨི་ལམ་དུ་རྡོ་རྗེ་འཆང་ཆེན་པོས་རྗེས་སུ་བཟུང་པའི་དྲིན་གྱིས་ཞེས་དང་། ཤཱཀྱ་བཤེས་གཉེན་ནི། སློབ་དཔོན་གྱི་རབ་བྱུང་
གི་མཚན་ཡིན་ལ། དངོས་གྲུབ་ཀྱི་མཚན་ནི་ཀླུ་སྒྲུབ་ཅེས་པའོ། ཚེས་རང་ལུགས་དང་། གཞན་དག་སློབ་དཔོན་ཉིད་ཀྱི་སློབ་མ་ཤཱཀྱ་བཤེས་གཉེན་ཏེ། སློབ་དཔོན་ཉིད་ཀྱིས་མཛད་པའི་རབ་ཏུ་བྱེད་པ་ལ་སློབ་མའི་མིང་འཇོག་པ་ནི་ཤིན་ཏུ་དགྱེས་པའི་ཕྱིར་རོ། །
6-5-26b


དེའི་ལུགས་ལྟར་ན་འཕགས་པ་རྡོ་རྗེ་ཅན་ནི་ཀླུ་སྒྲུབ་བོ་ཞེས་གཞན་ལུགས་འཆད་དོ། །འདི་ལ་རྒྱ་གར་ཡང་ཨ་བྷ་ཡཱ་ཀ་ར་ལ་སོགས་པ་མང་པོས་ནི། འཕགས་པའི་སློབ་མ་ཤཱཀྱ་བཤེས་གཉེན་གྱིས་མཛད་པར་བཞེད་ལ། ལཀྵྨཱི་ལ་སོགས་པ་འགའ་ཞིག་གིས་
ནི། སློབ་དཔོན་ཉིད་ཀྱིས་མཛད་ཟེར་རོ། །འདི་ལྟར་དུ་གོ་མངོན་པར་བྱང་ཆུབ་པའི་རིམ་པ་ལས། བཞི་པ་མངོན་རྫོགས་བྱང་ཆུབ་པའི། །རིམ་པ་འདི་ནི་བདག་གིས་བཤད། །ཅེས་གསུངས་ཤིང་། ཟུང་འཇུག་གི་རིམ་པ་ལས་ཀྱང་། མཆོག་གྱུར་རིམ་པ་ལྔ་པོ་
ནི། །ཞེས་གསུངས་པས། སློབ་དཔོན་ཉིད་ཀྱིས་རིམ་པ་ལྔ་མཛད་པ་ཡིན་ནོ། །བསྡུས་པའི་རིམ་པ་མདོར་བྱས་ལ་རིམ་པ་གཅིག་དང་། རྫོགས་རིམ་ལ་རིམ་པ་བཞི་ཡིན་པས་འོད་གསལ་རིམ་པ་བཞི་པ་དང་། རིམ་པ་ལྔ་མཛད་པ་ཡིན་ནི་སྙམ་ན། དེ་ནི་མ་ཡིན་ཏེ། 
རྡོ་རྗེ་བཟླས་པ་དང་། བདག་བྱིན་རླབས་དང་། མངོན་པར་བྱང་ཆུབ་པའི་རིམ་པ་གསུམ་ལ་བརྩམས་པའི་དགེ་རྩ་བསྔོ་བ་མ་མཛད་པར་ཟུང་འཇུག་རྫོགས་པའི་མཐར། མཆོག་གྱུར་རིམ་པ་ལྔ་པོ་ནི། །བཤད་ལས་བསོད་ནམས་གང་ཐོབ་པས། །ཟུང་དུ་འཇུག་པའི་ཏིང་ངེ་
འཛིན། །འདི་ཡིས་འཇིག་རྟེན་རོལ་བར་ཤོག །ཅེས་རིམ་པ་ལྔ་ཀ་བརྩམས་པའི་དགེ་བ་བསྔོ་བ་རིམ་པ་ཐ་མར་མཛད་ལ། མདོར་བྱས་ལས་དགེ་རྩ་བསྔོ་བ་མཛད་པའི་ཕྱིར་རོ། །དེས་ན་རྫོགས་རིམ་རིམ་པ་ལྔ་མཛད་པར་གསལ་ལོ། འོ་ན་རིམ་པ་གཉིས་པའི་མཇུག་ཏུ་
བརྩམས་པའི་དགེ་རྩ་བསྔོ་བ་མཛད་པས་དེ་སློབ་དཔོན་གྱིས་མཛད་པ་མ་ཡིན་ལ། དེ་མིན་པའི་རྫོགས་རིམ་གྱི་རིམ་པ་གཞན་ཡང་སློབ་དཔོན་གྱིས་མ་མཛད་པས། རྫོགས་རིམ་གྱི་རིམ་པ་ལྔ་ཇི་ལྟར་འཐད་སྙམ་ན་སྔར་བཤད་པའི་རྒྱུ་མཚན་དང་། སྤྱོད་བསྡུས་སུ་རིམ་
6-5-27a


པ་གཉིས་པ་ནས་ལུང་ལན་གཉིས་དྲངས་པས་དགོངས་པ་བླ་མེད་པའི་རིམ་པ་འདི་འཕགས་པས་མཛད་པ་ཡིན་ནོ། །འོན་ཀྱང་འདི་ལ་བསྔོ་བ་ཟུང་དུ་མཛད་པ་དང་། འཕགས་པའི་དྲིན་གྱིས་རྒྱུད་དུ་ཐོས་ཤཱཀྱ་བཤེས་གཉེན་གྱིས་བརྩམས་
པར་གསུངས་པས་འཕགས་པས་མཛད་པའི་གཤམ་ལ་ཤཱཀྱ་བཤེས་གཉེན་གྱི་མཛད་པ་ཞིག་བཏགས་ནས་གཞུང་ཟུར་དུ་མ་བྱས་པ་ཞིག་ཡིན་པར་སྣང་ངོ་། །འོ་ན་དེ་གཉིས་ཀྱི་མཚམས་སོ་སོར་གཟུང་ནུས་སམ་མི་ནུས་ཤེ་ན། ཞིབ་ཏུ་དཔྱད་ན་སོ་སོར་གཟུང་
ནུས་པར་མངོན་ཏེ། སྲིད་པའི་གཟེབ་ལས་གྲོལ་བར་འགྱུར། །ཞེས་པ་ཡན་ཆད་ཀྱིས་སྣང་བ་གསུམ་དང་། རང་བཞིན་གཏན་ལ་འབེབས་པ་དང་། སྟོང་པ་གསུམ་གྱི་ཡེ་ཤེས་བསྐྱེད་ཚུལ་དང་། དེ་མ་རྟོགས་པའི་ཉེས་དམིགས་དང་། རྟོགས་པའི་ཕན་ཡོན་རྣམས་
བསྟན་འདུག་ལ། དེ་ཙམ་གྱིས་གནད་རྣམས་རྫོགས་ནས་སྣང་བས་དེ་ཡན་ཆད་སློབ་དཔོན་གྱིས་མཛད་པར་མངོན་ནོ། །དེ་ནས་བསྐྱེད་རིམ་པས་སྣང་མཆེད་ཐོབ་གསུམ་ལ་ཟླ་བ་རྡོ་རྗེ་སོགས་སུ་མོས་ནས་ལྷ་བསྐྱེད་ཚུལ་དང་། རྫོགས་རིམ་པས་སྟོང་པ་
བཞིའི་མཐར་ལུགས་ལྡོག་གི་སྣང་བ་གསུམ་ལ་ལྷའི་སྐུ་བསྐྱེད་ཚུལ་བསྟན་པ་མན་ཆད་ཤཱཀྱ་བཤེས་གཉེན་གྱིས་མཛད་པར་མངོན་ཏེ། སློབ་དཔོན་གྱིས་ནི་རྫོགས་པས་འོད་གསལ་ཀྱི་མཐར་ལྷའི་སྐུ་བསྐྱེད་ཚུལ་རིམ་པ་བཞི་པར། ཇི་ལྟར་ཆུ་ཀླུང་དང་བ་ལ། 
ཞེས་སོགས་ཀྱིས་བཤད་པའི་ཕྱིར་དང་། འདས་པ་དང་ནི་མ་འོངས་དང་། །ཞེས་སོགས་སྔར་རིམ་པ་དང་པོར་བཤད་ཟིན་པའི་ཕྱིར་རོ། མདོར་ན། སློབ་དཔོན་གྱི་ཡིན་ན་རིམ་པ་གཉིས་པ་འདིར་འོད་གསལ་རྒྱས་པར་སྟོན་པར་མ་རིས་ཏེ། རང་གི་སྐབས་དོར་
6-5-27b


ནས་སྐབས་གཞན་དུ་བཤད་པའི་ཕྱིར་རོ། །ཤཱཀྱ་བཤེས་གཉེན་གྱི་ཡིན་ན་མདོར་བསྟན་གྱི་སྐབས་སུ་སྟོང་པ་བཞི་པ་བྱུང་བས་དེ་རྒྱས་པར་འཆད་པར་སྦྱར་ན་འགྲིགས་གོ། །བླ་ན་མེད་པའི་དགོངས་པ་ཞེས་བྱ་བའི་དགོངས་པ་ནི་རྟོགས་པའི་དོན་ནོ། བླ་ན་མེད་པ་ནི་སེམས་དབེན་གྱི་
དེ་ཁོ་ན་ཉིད་རྟོག་པ་དེ་ལམ་གཞན་ལས་ཕུལ་དུ་བྱུང་བའོ། །འདི་ནི་སློབ་དཔོན་གྱིས་བཏགས་པའི་མིང་དུ་མངོན་ཏེ་སྤྱོད་བསྡུས་ལས། དེ་བཞིན་དུ་སྨོས་པའོ། །ཐམས་ཅད་ནི་སྣང་བ་གསུམ་དང་། རང་བཞིན་རྣམས་སོ། རྣམ་པར་དག་པ་ནི་འོད་གསལ་ཏེ་འདི་ནི་སློབ་
དཔོན་ཤཱཀྱ་བཤེས་གཉེན་གྱིས་བཏགས་པའི་མིང་དུ་མངོན་ནོ། །དགོངས་པ་བླ་མེད་པའི་རིམ་པ་བཤད་ཟིན་ཏོ།། །།མངྒ་ལཾ། །
6-6-1a


༄༅། །མན་ངག་གི་མཐར་ཐུག་བདག་བྱིན་རླབས་བཞུགས། །
6-6-1b


༄༅༅། རྗེ་བཙུན་དམ་པ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་རྣམས་ཀྱི་ཞབས་ལ་དུས་ཐམས་ཅད་དུ་གུས་པས་ཕྱག་འཚལ་ལོ། །རྒྱལ་བ་ཐམས་ཅད་ཀྱི་མཁྱེན་པའི་ཡེ་ཤེས་ཐམས་ཅད་
གཅིག་ཏུ་བསྡུས་པའི་ངོ་བོ་བཅོམ་ལྡན་འདས་འཇམ་པའི་དབྱངས་དང་། དབང་ཕྱུག་བརྒྱད་དང་ལྡན་པའི་རྡོ་རྗེ་འཆང་ཆེན་པོ་མགོན་པོ་ཀླུ་སྒྲུབ་ཡབ་སྲས་ཀྱི་ཞབས་ལ་གུས་པ་ཆེན་པོས་སྐྱབས་སུ་མཆིའོ། །མན་ངག་གི་མཐར་
ཐུག་རང་བྱིན་གྱིས་བརླབ་པའི་རིམ་པ་ལ་གསུམ། མཚན་གྱི་དོན། གཞུང་གི་དོན་ནོ། །དང་པོ་ནི། སྭ་ནི་རང་ངོ་། །ཨོཾ་དྷིཥྛ་ན་ནི་བྱིན་གྱིས་བརླབ་པའོ། ཀྲ་མ་ནི་རིམ་པའོ། །འདི་ལ་ལཀྵྨཱིས། བདག་ནི་འོད་
གསལ་ཏེ་དངོས་པོ་ཐམས་ཅད་ཀྱི་རང་བཞིན་ཡིན་པས་སོ། །དེ་ལས་སྒྱུ་མའི་སྐུ་གང་དུ་འཛིན་པ་ནི་བདག་ལ་བྱིན་གྱིས་བརླབ་པའོ། །ཡང་ན་བདག་ནི་རྡོ་རྗེ་འཆང་ལ་སོགས་པའི་སྐུའོ། །དེ་ཉིད་ལ་བྱིན་གྱིས་བརླབ་པ་ན་སྒྱུ་མ་
ལ་སོགས་པའི་དཔེ་དང་སྦྱར་བའོ། །ཞེས་འཆད་དེ། སྔ་མ་ལྟར་ན་བདག་ལ་ནི་བདག་ལས་ཞེས་པ་དང་། བྱིན་གྱིས་བརླབ་པ་ནི་དེས་བསྐྱེད་པའི་དོན་ཡིན་ལ། ཕྱི་མ་ལྟར་ན་བདག་ལ་སྒྱུ་མའི་དཔེ་དོན་སྦྱར་བའི་དོན་ཏོ། །རྒྱུད་གཞན་
6-6-2a


ལས་ཀྱང་བདག་བྱིན་གྱིས་བརླབ་པ་ཞེས་མང་དུ་འབྱུང་ལ་དེའི་དོན་ཡང་མང་དུ་ཡོད་ནའང་འདིར་ནི་བདག་ཅེས་པ་ན་ངའོ་སྙམ་པའི་ཐ་སྙད་འདོགས་པའི་གདགས་གཞིར་གྱུར་པའི་ལུས་སམ་སྐུའོ། །དེ་ལ་བྱིན་
གྱིས་བརླབ་པ་ནི་ཡེ་ཤེས་ཙམ་གྱིས་སྒྱུ་མ་ལྟ་བུའི་ལྷའི་སྐུར་བསྐྱེད་པ་ཡིན་ཏེ། སྤྱོད་བསྡུས་ལས། རང་བྱིན་གྱིས་བརླབ་པའི་མན་ངག་ཡེ་ཤེས་ཙམ་གྱིས་ཡིད་ཀྱི་རང་བཞིན་གྱི་ལྷའི་སྐུ་རྫོགས་པར་འགྱུར་བ། །ཞེས་གསུངས་
པའི་ཕྱིར་རོ། །གཉིས་པ་ལ་བཞི། །རྩོམ་པ་ལ་འཇུག་པའི་ཡན་ལག །ཡན་ལག་ཅན་གྱི་གདམས་པ་དངོས། དེ་སྟོན་པའི་བླ་མ་མཉེས་པར་བྱ་བ། མན་ངག་གི་སྣོད་དང་སྣོད་མིན་པའི་ཁྱད་པར་བསྟན་པའོ། །དང་པོ་ལ་གཉིས། 
མཆོད་པར་བརྗོད་པ་དང་། བརྩམ་པར་དམ་བཅའ་བའོ། །དང་པོ་ནི། ཕྱག་འཚལ་བ་ན་བདུད་པ་སྟེ་ཁྱད་པར་གྱི་གཞིའོ། །གང་ལ་ན། རྡོ་རྗེ་འཆང་ཆེན་པོ་རྡོ་རྗེ་འཆང་ལའོ། །དེའང་རྡོ་རྗེ་ཅན་རྣམས་ཀུན་གྱི་གཙོ། །ཞེས་འདོན་པ་ལྟར་
ན། རྡོ་རྗེ་ཅན་ཀུན་ནི་དེ་བཞིན་གཤེགས་པ་ལྔའོ། །དེ་རྣམས་ཀྱི་གཙོ་བོ་ནི་དྲུག་པའོ། །རྡོ་རྗེ་སེམས་དཔའ་དང་པོའི་གཙོ། །ཞེས་པ་ལྟར་ན། དང་པོའི་མགོན་པོ་རྡོ་རྗེ་སེམས་དཔའོ། །གཉིས་པ་ནི། ཏེ་ནི་ལྷག་མ་འདྲེན་པ་སྟེ་ཕྱག་འཚལ་
6-6-2b


ནས་བདག་གིས་བཤད་པར་བྱའོ། །ཞེས་སྦྱར་རོ། །གང་ན་རང་བྱིན་གྱིས་བརླབ་པའི་རིམ་པའོ། །ཀུན་སློང་གང་གིས་ན། བརྩེ་བས་ཞེས་ཏེ། རིམ་པ་འདི་ལ་བརྩེ་བ་ཁོ་ན་རྩ་བའི་རྒྱུ་ཡིན་ཏེ། གཞན་དུ་ན་སེམས་དམིགས་ཀྱི་རིམ་པ་ལ་ཞུགས་པས་སླར་ཡང་ལྷའི་
སྐུ་འཛིན་པ་དགོས་པ་མེད་པའི་ཕྱིར་རོ། །དགོས་པ་ནི། སེམས་ཅན་གྱི་དོན་དང་ཆད་པའི་ཕྱོགས་སྤང་བ་དང་། སྔོན་གྱི་སྨོན་ལམ་འབྲས་བུ་དང་ལྡན་པ་སྟེ། དེ་ནི་བརྩེ་བས་བཤད་དོ་ཞེས་ཟེར་རོ། །དེ་ནི་འགྲིགས་པར་མི་སྣང་སྟེ། འདི་ནི་རིམ་པ་འདི་བཤད་པའི་
ཀུན་སློང་ཡིན་གྱི་སྒྱུ་མའི་སྐུར་ལྡང་བའི་ཀུན་སློང་མིན་པའི་ཕྱིར་དང་། སེམས་དམིགས་ཙམ་གྱིས་གྲོལ་བ་མི་ཐོབ་པས་རང་དོན་ལའང་སྒྱུ་མའི་སྐུ་བསྒྲུབ་དགོས་པའི་ཕྱིར་རོ། །གཉིས་པ་ལ་གཉིས། མན་ངག་གི་སྣོད་རུང་དུ་བྱ་བ་དང་། དེ་ལ་མན་ངག་བཤད་
པའོ། །དང་པོ་ལ་གཉིས། མཚན་ཉིད་དང་ལྡན་པའི་སློབ་མས་བླ་མ་མཉེས་པར་བྱ་བ་དང་། མཉེས་པ་ལ་ཡོན་ཕུལ་ཏེ་དབང་སྐུར་བ་ཞུ་པའོ། །དང་པོ་ནི། མཉེས་པར་བྱ་ཞེས་དྲང་ངོ་། །གང་ན་རྡོ་རྗེ་བླ་མའོ། །གང་གིས་ན་མཚན་ཉིད་དང་ལྡན་པའི་སློབ་མས་
སོ། །མཚན་ཉིད་དང་ལྡན་པ་ནི་ཁྱད་པར་བཞི་དང་ལྡན་པ་སྟེ། དང་པོ་ཁོ་ནར་རིམ་པ་དང་པོ་ལ་བསླབས་པའི་ཁྱད་པར་ནི། བསྐྱེད་པའི་རིམ་པའི་རྗེས་སུ་འབྲངས་ནས་དབང་བསྐུར་བ་ཐོབ་ཅིང་ཞེས་པས་སྟོན་ཏེ་དབང་བསྐུར་ཐོབ་ནས་བསྐྱེད་རིམ་གྱི་རྗེས་སུ་འབྲངས་པ་
སྟེ་རྗེས་སུ་ཞུགས་ཞེས་པའི་དོན་ཏོ། རྒྱུད་མང་དུ་ཐོས་པའི་ཁྱད་པར་ནི། བྱ་བའི་རྒྱུད་ལ་སོགས་པའི་རྒྱུད་སྡེ་རྣམ་པ་བཞིའི་དགོངས་པ་ཤེས་པ་ཞེས་པས་སྟོན་ཏོ། །འདིས་ནི་དབང་རྫོགས་པར་ཐོབ་པ་སྔོན་དུ་བཏང་བར་བསྟན་ནོ། །དབེན་པ་གསུམ་ལ་བསླབས་
6-6-3a


པའི་ཁྱད་པར་ནི། ལུས་དང་ངག་དང་ཡིད་རྣམ་པར་དབེན་པའི་ཐོས་པ་འཛིན་པ་ཞེས་པས་བསྟན་ཏེ། དེ་གསུམ་གྱི་མན་ངག་ཐོབ་ནས་དེའི་དོན་འཛིན་པའོ། །ཐུན་མོང་མ་ཡིན་པའི་བདེན་པ་གཉིས་ཀྱི་གདམས་ངག་ལ་མི་ཕྱེད་པའི་དད་པ་
དང་ལྡན་པའི་ཁྱད་པར་ནི། བདེན་པ་གཉིས་ལ་ལྷག་པར་མོས་པས་བསྟན་ནོ། །གཉིས་པ་ནི། དེ་ནས་དེ་མ་ཐག་ཏུ་སྟེ་མྱུར་དུ་རིམ་པ་འདིའི་གདམས་ངག་ཐོབ་པར་བྱ་བའི་ཆེད་དུ། རིང་ནས་མཉེས་པར་བྱས་པའི་བླ་མ་ལ་ཚོགས་འཁོར་གྱི་མཆོད་པ་ཆེན་པོ་བྱས་
ཏེ། ལོ་བཅུ་དྲུག་མ་ཕུལ་ནས་བསྟོད་པ་འདིས་བསྟོད་པར་བྱའོ་ཞེས་སྦྱར་རོ། །དེ་ཡང་འཕྲེང་བ་ནས་རྗེས་གནང་གི་བར་གྱི་དབང་དགུ་དང་བཅས་པའི་གསང་དབང་ཐོབ་པ་དེ་ནས་བྱའོ། །དེ་དག་གི་དོན་ནི་བཤད་ཟིན་ཏོ། །ཡོན་ཕུལ་བ་ནི་གསང་དབང་གི་དོན་དུའོ། །
ལཀྵྨཱིས་གསང་བ་ལ་གསུམ་ལས་ངག་གི་གསང་བ་ནི་བྱང་ཆུབ་ཀྱི་སེམས་ལ་སྤྱོད་པ་དང་། ཡིད་ཀྱི་གསང་བ་ནི་ཤེས་རབ་ཀྱི་དབང་བསྐུར་བ་དང་། ཡེ་ཤེས་ཀྱི་གསང་བ་ནི་ཤེས་རབ་ཡེ་ཤེས་ཀྱི་དབང་བསྐུར་བའོ། །དེ་ལྟར་དབང་བཞི་བསྐུར་བ་ལ་རིམ་པ་འདི་
བསྟན་གྱི་གཞན་ལ་མིན་ནོ་ཞེས་འཆད་ཀྱང་། འཕགས་པའི་དགོངས་པ་ནི་རྒྱུད་ཕྱི་མའི་འགྲེལ་པ་ལས། དབང་གོང་མ་གཉིས་མ་བསྐུར་ཡང་གསང་དབང་བསྐུར་བ་ལ་བདག་བྱིན་རླབས་སྦྱིན་པར་བྱ་བར་བཤད་པ་ལྟར་ཡིན་ན། །གཉིས་པ་ལ་གསུམ། 
སློབ་མས་བསྟོད་ཅིང་གསོལ་བ་གདབ་པ། སློབ་དཔོན་གྱིས་མན་ངག་བསྟན་པ། མན་ངག་ཐོབ་པ་དང་མ་ཐོབ་པའི་སྐྱོན་ཡོན་བསྟན་པའོ། །དང་པོ་ལ་གཉིས་ལས་བསྟོད་པ་ནི། །ཁོང་སྟོང་ཁྱོད་ཀྱི་སྐུ་ལ་མེད། །ཅེས་སོགས་ཚིགས་བཅད་ལྔ་སྟེ་རྣམ་
6-6-3b


སྣང་དང་འོད་དཔག་མེད་དང་རིན་འབྱུང་དང་དོན་ཡོད་གྲུབ་པ་དང་མི་བསྐྱོད་པ་ལྔའི་སྒོ་ནས་བསྟོད་པར་འཆད་དོ། །སྣ་ཚོགས་མིན་ལ་སྙོམས་འཇུག་པ། །ཞེས་བསྒྱུར་བས་འོད་གསལ་དུ་འཇུག་པའོ། །གསོལ་བ་གདབ་པ་ནི། ཀུན་མཁྱེན་ཡེ་ཤེས་ཕུང་པོ་ཅན། 
ཞེས་པ་ནས། འགྲོ་བའི་བླ་མ་བཀའ་དྲིན་མཛོད། །ཅེས་པའི་བར་ཚིགས་བཅད་གཉིས་སོ། །གཉིས་པ་ལ་བཞི། རིམ་པ་འདི་བླ་མ་ཁོ་ན་ལས་རྙེད་དགོས་པ། བླ་མ་ལས་བཙལ་དགོས་པའི་རྒྱུ་མཚན། །འོད་གསལ་གྱི་སྔོན་དུ་རིམ་པ་འདི་སྟོན་དགོས་པ་དང་། 
བདག་བྱིན་རླབས་ཀྱི་རིམ་པ་ཉིད་བཤད་པའོ། །དང་པོ་ནི། དེ་ལྟར་འཇིགས་མེད་གསོལ་འདེབས་པའོ། །ཞེས་པ་ནས། དེ་ནི་ཐོབ་འགྱུར་གཞན་གྱིས་མིན། །ཞེས་པའི་བར་གྱིས་སྟོན་ནོ། །གཉིས་པ་ནི། རང་བྱིན་བརླབ་པའི་རིམ་པ་ནི། །ཞེས་པ་བཞིས། རང་བྱིན་རླབས་
མ་རྙེད་ན་འཚང་རྒྱ་བའི་ཕྱིར་དུ་ངལ་བ་བྱས་པ་དོན་མེད་པ་དང་། དེ་ནས། རང་བྱིན་བརླབ་པའི་རིམ་ཐོབ་པ། །ཞེས་པ་བཞིས་རང་བྱིན་རླབས་ཐོབ་ཚེ་དེ་ཉིད་ལ་འཚང་རྒྱ་བར་གསུངས་ཏེ། རྒྱུ་མཚན་དེས་ན་དེའི་མན་ངག་ངེས་པར་བླ་མ་ལས་བཅལ་བར་བྱའོ། །
ཕར་ཕྱིན་གྱི་ཐེག་པས་ཀྱང་མཐར་དག་པའི་སྒྱུ་མའི་སྐུ་སྒྲུབ་དགོས་པས་སྒྱུ་མའི་སྐུ་མ་རྙེད་ན་མདོ་སྡེ་སོགས་ལ་སློབ་པའི་ངལ་བ་དོན་མེད་པར་གསུངས་པ་ཡིན་ནོ། །གསུམ་པ་ནི་རང་བྱིན་བརླབ་པའི་ཏིང་འཛིན་དང་། །ཞེས་པ་བཞིས་དེ་དང་འོད་གསལ་
གཉིས་བདེན་གཉིས་དང་། དེའང་རྒྱུ་འབྲས་སུ་བསྟན་ནོ། །དེ་ནས་བཞིས་རིམ་པ་འདིས་འོད་གསལ་ཐོབ་དགོས་པས་སྔོན་དུ་འདི་བསྟན་དགོས་པར་བསྟན་ཏེ། འོང་གསལ་དུ་འཇུག་པ་ལ་འདི་སྔོན་དུ་ཐོབ་དགོས་ཞེས་པའོ། །བཞི་པ་ནི། འགྲོ་ཀུན་རང་དབང་
6-6-4a


མེད་པ་སྟེ། །ཞེས་པ་བཞིས་གཞི་དུས་ཀྱི་འོད་གསལ་ལས་གཞི་དུས་ཀྱི་སྒྱུ་ལུས་འགྲུབ་ཚུལ་སྟོན་ཏེ། ལམ་དུས་ཀྱི་སྒྱུ་མའི་སྐུ་སྒྲུབ་བ་པ་ནི་སྦྱང་གཞི་ཇི་ལྟ་བ་བཞིན་དུ་བསྒྲུབ་དགོས་པས་དེའི་ཡན་ལག་ཏུ་སྟོན་པའོ། །འགྲོ་བ་ཀུན་འཆི་
བའི་འོད་གསལ་གྱི་གཞན་དབང་ཅན་ཡིན་པས་རང་དབང་དུ་མི་འབྱུང་ལ། དེའང་ཤི་བའི་འོད་གསལ་ལས་བར་དོའི་གྲུབ་པའོ་སེམས་གང་གིས་ནི་ཞེས་པ་བཞིས་ཐབས་དང་བྲལ་བ་ལ་དེ་འཁོར་བའི་བར་དོ་རང་དགའ་བར་འགྱུར་ལ་ཐབས་དང་ལྡན་ན་སྒྱུ་
མའི་སྐུར་འགྱུར་བར་སྟོན་ནོ། །སྐྱེ་ཤི་གཅིག་ནས་གཅིག་ཏུ་བརྒྱུད་དེ་འཁོར་བའི་སེམས་ཅན་ནི་སེམས་དང་རླུང་ཙམ་གྱི་གཟུགས་ཏེ། རང་བཞིན་ལ་གཞག་གི་དེ་ལས་ལོགས་ན་སྐྱེ་ཤི་བྱེད་མཁན་མེད་པར་སྟོན་པ་ནི། འདིར་ནི་ཞེས་པ་བཞིའོ། །སེམས་ཀྱི་
རང་བཞིན་རྣམ་གནས་པ། །ཉིད་ནི་འཁོར་བར་ཤེས་པར་བྱ། །ཞེས་སྦྱར་རོ། །སེམས་རླུང་གི་སྦྱོར་བ་སྟེ་གཡོ་བའི་བྱ་བས་གཡོས་པ་མེད་པར་རང་བཞིན་གྱི་རྟོག་པ་རྣམས་མི་སྐྱེ་ལ། རླུང་སེམས་ལས་སྐྱེས་པའི་རྟོག་པས་ཉོན་མོངས་དང་ལས་བསགས་ཏེ་
འཁོར་བ་ནི། །རླུང་གི་སྦྱོར་བ་ཞེས་པ་བཞིའོ། །འཁོར་བའི་ངང་ཚུལ་དེ་ལྟར་གནས་པ་དེ་ཐབས་མཁས་པ་ལ་སྒྱུ་མའི་སྐུར་འགྱུར་ཚུལ་ནི། རླུང་དང་ཡང་དག་ལྡན་པ་ཡི། །ཞེས་པ་བཞིས་སྟོན་ཏེ། །སྔར་བཤད་པ་ལྟར་སེམས་དབེན་སྟོང་པ་གསུམ་གྱི་ཡེ་
ཤེས་བསྐྱེད་པའི་མཐར་ལུགས་ལྡོག་གི་སྣང་བ་གསུམ་རླུང་དང་ལྡན་པ་དེ། རྣལ་འབྱོར་པས་གསར་དུ་ཐོབ་པའི་ལུས་སུ་འབྱུང་བ་ལ་ནི་སྒྱུ་མའི་ལུས་སམ་སྒྱུ་མའི་སྐུ་ཞེས་བརྗོད་དོ། །སླར་ཡང་ཞེས་པ་ནི་རྣལ་འབྱོར་པ་དེ་ཚེ་སྔ་མར་ཤི་བའི་འོད་གསལ་
6-6-4b


ལས་རྣམ་ཤེས་གསུམ་རླུང་དང་བཅས་པ་ལས་གྲུབ་པའི་ལུས་ཤིག་སྔར་ཐོབ་པར་མ་ཟད་ཅེས་པའི་དོན་ནོ། །སེམས་དབེན་ཐོབ་པའི་རྣལ་འབྱོར་པས་ངའོ་སྙམ་དུ་ཐ་སྙད་འདོགས་པའི་གདགས་གཞིར་གྱུར་པའི་རང་གི་ལུས་རླུང་སེམས་ཙམ་ལ་བསྒྲུབ་པ་དེ་བས་ན། 
འདི་ལྟར་འགྲོ་བ་ཀུན་སྒྱུ་མ་ལྟ་བུར་བླ་ན་མེད་པའི་རྡོ་རྗེ་ཐེག་པ་འདིར་བཤད་དེ། །ཞེས་སེམས་ཅན་རྣམས་སྒྱུ་མ་བཞིན་དུ་ཐེག་པ་འདིར་གསུངས་པའི་ཐུན་མོང་མ་ཡིན་པའི་སྒྱུ་མའི་དོན་ནི་འགྲོ་བ་རྣམས་རླུང་སེམས་ཀྱི་ལུས་སུ་སྟོན་པ་འདི་ཡིན་ཞེས་པའོ། །སྒྱུ་མ་ལྟ་བུའི་
ཏིང་ངེ་འཛིན་གྲུབ་པས་ནི་འགྲོ་བ་ཐམས་ཅད་རང་གིས་ཐོབ་པའི་སྒྱུ་བའི་ལུས་དེ་དང་འདྲ་བར་ཡང་མཐོང་ངོ་། །རིམ་ལྔའི་འགྲེལ་བྱེད་ཀུན་གྱིས་རང་བཞིན་མེད་བཞིན་དུ་སྣང་བ་སྐབས་འདིའི་སྒྱུ་མའི་དོན་དུ་བཤད་པས་ནི་འདིར་བཤད་པའི་སྒྱུ་ལུས་ཀྱི་དོན་གཏན་ནས་མི་
རྙེད་པས། སྤྱོད་བསྡུས་སུའང་ཕར་ཕྱིན་གྱི་ཐེག་པའི་སྒྱུ་མ་དང་། བསྐྱེད་རིམ་པས་ལྷའི་སྒྱུ་མ་ལྟ་བུར་བལྟ་བ་རྣམས་ཀྱིས་བདག་ལ་བྱིན་གྱིས་བརླབ་པའི་དོན་མི་ཤེས་པར་གསུངས་སོ། །དེས་ན་སྤྱིར་འགྲོ་བ་ཐམས་ཅད་རླུང་སེམས་ཙམ་ལས་གྲུབ་པའི་སྒྱུ་མའི་
ལུས་ཅན་དང་། ཁྱད་པར་དུ་རྣལ་འབྱོར་པས་ཏིང་ངེ་འཛིན་གྱི་སྟོབས་ཀྱིས་རླུང་སེམས་ཙམ་ལས་གྲུབ་པའི་རང་གི་ལུས་སྒྱུ་མའི་སྐུར་སྒྲུབ་ལུགས་ཤེས་པ་ནི་གནད་ཀྱི་དོན་དུ་སྣང་ངོ་། །འོ་ན་འབྱུང་བ་དང་འབྱུང་འགྱུར་རགས་པའི་ལུས་ཅན་གྱི་ལུས་འདི་རྣམས་རླུང་
སེམས་ཙམ་ལས་གྲུབ་ཅེས་པ་ཇི་ལྟར་ཡིན་ཞེ་ན། བཤད་པར་བྱ་སྟེ། འདི་ལ་སེམས་ཅན་གྱི་ལུས་རྣམས་རླུང་སེམས་ལས་གྲུབ་བའོ་ཞེས་པའི་ལུས་ནི་སེམས་ཅན་གྱི་ལུས་གང་ཡིན་ཐམས་ཅད་ལ་མི་ཟེར་གྱི་སེམས་ཅན་རྣམས་ཀྱི་གཉུག་མའི་ལུས་སོ། །
6-6-5a


དེ་ཡང་མེའི་ཚ་བ་དང་ཆུའི་གཤེར་བ་ནི་དེ་དག་གི་གཉུག་མའི་མཚན་ཉིད་དམ་ཐ་སྙད་པའི་རང་བཞིན་ཞེས་བརྗོད་པ་ལྟར། སེམས་ཅན་རྣམས་ཀྱི་གཉུག་མའི་ལུས་ནི་རླུང་སེམས་ཙམ་ཞིག་ཡིན་གྱི་རང་དགའ་བའི་ལུས་མིན་ནོ། །འདིའང་
ཕྱི་རོལ་གྱི་དོན་བཀག་ནས་སྒྲུབ་པ་མིན་ཏེ། གཟུགས་དང་སེམས་གཉིས་བདེན་པ་གཉིས་སུ་ཡོང་མེད་མཚུངས་པས་ཁྱད་པར་དབྱེ་མི་ནུས་པའི་ཕྱིར་རོ། །འོན་ཀྱང་གཟུགས་རགས་པའི་ལུས་ནི་གཟུགས་མེད་ཁམས་སུ་མེད་ཀྱང་དེའི་སེམས་ཅན་ལ་ལུས་
གཞག་དགོས་པས་འཁྲུལ་བའི་ཕྱིར་གཉུག་མའི་ལུས་མིན་ནོ། །གཟུགས་ཅན་གྱི་ཁམས་ནའང་། བྱང་བཞིན་དང་རྐང་ལག་ལ་སོགས་པའི་རྣམ་པ་ཅན་གྱི་ལུས་ཀྱང་། མེར་མེར་པོ་ལ་སོགས་པའི་སྐབས་སུ་མེད་ཀྱང་། དེར་སེམས་ཅན་གྱི་ལུས་ཡོད་
པས་སེམས་ཅན་གྱི་གཉུག་མའི་ལུས་མིན་ཏེ། །འབྱུང་བ་རགས་པའི་ལུས་གཞན་ཡང་བར་སྲིད་ལ་སོགས་པའི་སྐབས་སུ་མེད་པས་གཉུག་མའི་ལུས་མིན་པར་ཤེས་པར་བྱའོ། །དེས་ན་འབྱུང་བ་འབྱུང་འགྱུར་གྱི་ལུས་དང་འགྲོ་བ་སོ་སོའི་ལུས་དང་རྒན་
གཞོན་ལ་སོགས་པའི་ལུས་ནི་ཆུའི་ཚ་བ་ལྟར་རེས་འགའ་བ་ཡིན་གྱི་གཉུག་མ་བ་མིན་པས་གནས་སྐབས་སུའང་འབྲལ་རུང་ཡིན་ལ། རླུང་སེམས་གྱི་ལུས་ནི་ཆུའི་གཤེར་བ་ལྟར་དུས་ནམ་ཡང་སེམས་ཅན་གྱི་ལུས་ལ་མི་འཁྲུལ་བས་གཉུག་མའི་
ལུས་སོ། །ཤེས་པ་དང་ངོ་བོ་དབྱེར་མེད་དུ་འཇུག་པའི་རླུང་ཤིན་ཏུ་ཕྲ་བ་ནི་མར་ལ་མར་བཞག་པ་བཞིན་དུ་ཤེས་པ་དང་འདྲེར་རུང་བར་སྤྱོད་བསྡུས་ལས་གསུངས་པས། གཟུགས་མེད་ནའང་ཡོད་དེ། དགོངས་པ་ལུང་སྟོན་དང་རྡོ་རྗེ་ཕྲེང་བར་ཁམས་གསུམ་
6-6-5b


གྱི་འགྲོ་བ་ཐམས་ཅད་རླུང་སེམས་ཀྱི་བདག་ཉིད་དུ་ལན་དུ་མར་གསུངས་པའི་ཕྱིར་རོ། །དེ་ནི་དབང་པོའི་གཟུགས་ཀྱང་མིན་ལ་དབང་པོ་ལྔའི་སྤྱོད་ཡུལ་དུའང་མི་སྣང་ཞིང་། ཡིད་རང་དགའ་བའི་ཡུལ་དུ་གཟུགས་སུ་སྣང་བའང་མིན་པས་གཟུགས་མེད་ཁམས་
གཟུགས་ཀྱི་འདུ་ཤེས་ལས་འདས་པར་གསུངས་པ་དང་མི་འགལ་ལོ། །གལ་ཏེ་རླུང་དེ་རྣམ་ཤེས་གཡོས་པའི་བྱ་བ་བྱེད་པ་ཙམ་ལ་ཟེར་ན་ནི་སེམས་བྱུང་སེམས་པ་ལ་རླུང་གི་མིང་གིས་འདོགས་པར་ཟད་པས་རླུང་མིན་ལ་དེ་མ་གཏོགས་པའི་རླུང་ཞིག་
ཡིན་ན་ནི་མཚན་ཉིད་བརྗོད་དགོས་སོ་ཞེ་ན། རྡོར་བཟླས་དང་སེམས་དབེན་མཐར་ཕྱིན་པའི་རྣལ་འབྱོར་པས་འོད་ཟེར་ལྔའི་རྣམ་པ་ཅན་དུ་མཐོང་བས་ན་སེམས་བྱུང་སེམས་པ་ལས་མཚན་ཉིད་ཐ་དད་ལ། སྣ་བུག་གི་སྒོ་ནས་རྒྱུ་བ་སོགས་ཀྱི་རགས་པའི་རླུང་
ཐམས་ཅད་དང་བྲལ་བ་འོད་གསལ་གྱི་རླུང་ཞེས་གསུངས་པའོ། །དབང་ཤེས་ཀྱང་རླུང་དང་འདྲེས་ནས་འཇུག་མོད་ཀྱང་། སེམས་ཅན་གྱི་གཉུག་མའི་ལུས་སུ་བཤད་པའི་སེམས་ནི་ཡིད་ཀྱི་ཤེས་པ་ཉིད་ཡིན་ཏེ། དབང་ཤེས་ནི་གཉིད་འཐུག་ལ་སོགས་
པའི་སྐབས་དུ་མར་ལོག་ཀྱང་སེམས་ཅན་གྱི་ལུས་མི་ལྡོག་པས། གཟུགས་ཅན་རགས་པའི་ལུས་དང་འདྲའོ། །དེས་ན་འབྱུང་བ་ཤིན་ཏུ་རགས་པའི་ལུས་དང་ལྡན་པའི་སྐབས་སུའང་སེམས་ཅན་དེའི་གཉུག་མའི་ལུས་ནི་རླུང་དང་ཡིད་ཀྱི་ཤེས་པ་
དབྱེར་མེད་དུ་འཇུག་པའི་རླུང་སེམས་ཙམ་ཡིན་ལ། དེ་དང་རགས་པའི་ལུས་གཉིས་རྟེན་བརྟེན་པའི་འབྲེལ་པའང་གནས་སྐབས་འགའ་ཞིག་ཙམ་ཡིན་གྱི་གཞུགས་པ་མིན་ནོ། གཞན་ཡང་རྣམ་ཤེས་གཞན་གྱི་གྲོང་དུ་འཇུག་པའི་ནུས་པ་ཐོབ་པས་
6-6-6a


ཏིང་ངེ་འཛིན་ཙམ་གྱི་སྟོབས་ཀྱིས་དེ་གཉིས་ཀྱི་རྟེན་དང་བརྟེན་པའི་འབྲེལ་པ་གཞིག་ནུས་ལ། བསད་གསོ་ནུས་པའི་རྣལ་འབྱོར་པས་ཀྱང་དེ་གཉིས་ཏིང་ངེ་འཛིན་གྱི་སྟོབས་ཀྱིས་དབྲལ་བར་ནུས་ཀྱང་རླུང་སེམས་ཙམ་གྱི་ལུས་ནི་མི་
ལྡོག་གོ། །སེམས་དབེན་མཐར་ཕྱིན་པའི་རྣལ་འབྱོར་པས་ཀྱང་། རྣམ་སྨིན་གྱི་ལུས་དང་སེམས་གཉིས་རྟེན་དང་བརྟེན་པར་སྔོན་གྱི་ལས་ཀྱི་འཕངས་པའི་འབྲེལ་པ་རགས་པ་ཏིང་ངེ་འཛིན་གྱི་སྟོབས་ཀྱིས་འགོག་ནུས་ཏེ། འཆི་བའི་དུས་ཀྱི་ཐིམ་རིམ་བཞིན་
དུ་ས་ཆུ་ལ་ཐིབ་པ་སོགས་ཀྱི་ཐིམ་རིམ་གྱི་སྒོ་ནས་སྟོང་པ་གསུམ་མངོན་དུ་བྱེད་ནུས་པའི་ཕྱིར་དང་། ད་ལྟར་ཐིམ་པའི་རིམ་པ་ནི་རྣམ་ཤེས་ཀྱི་རྟེན་བྱེད་པའི་ནུས་པ་རགས་པ་ལྡོག་པ་ཡིན་པའི་ཕྱིར་རོ། །དེའི་ཕྱིར་བའི་འོད་གསལ་གྱི་མཐར་རྣམ་སྨིན་གྱི་
ལུས་ལས་ལོགས་སུ་བར་དོའི་ལུས་འགྲུབ་པ་བཞིན་དུ། སྟོང་པ་གསུམ་གྱི་མཐར་རྣམ་སྨིན་གྱི་ལུས་ལས་ལོགས་སུ་རླུང་སེམས་ཙམ་ལས་གྲུབ་པའི་སྒྱུ་མའི་སྐུ་འགྲུབ་པ་ཡིན་ནོ། གལ་ཏེ་འབད་པ་དེ་དག་གིས་སེམས་ཅན་རྣམས་ཀྱི་གཉུག་མའི་
ལུས་རླུང་སེམས་ཙམ་ལས་གྲུབ་ཏུ་ཆུག་ཀྱང་དེ་ལ་སྒྱུ་མ་ཞེས་ཟེར་བའི་སྒྱུ་མ་དང་འདྲ་བའི་འདྲ་ལུགས་གང་ཡིན་ཟེར་ན། དེ་ལ་རང་བཞིན་གྱིས་གྲུབ་པས་སྟོང་བཞིན་དུ་དེར་སྣང་བའི་ལྷ་སྐུ་སྒྱུ་མ་ལྟ་བུའི་དོན་ལ་ངེས་པ་བརྟན་པ་ནི། རིམ་པ་དང་པོའི་སྐབས་
རྙེད་ཟིན་པས་འདིར་ཡང་དེ་གཞིར་བཞག་ཏུ་ཡོད་མོད་ཀྱང་སྒྱུ་ལུས་ཀྱི་སྒྱུ་མའི་དོན་མིན་ནོ། །འོ་ན་གང་ཞེ་ན། སྒྱུ་མའི་སྐུའི་ཞལ་ཕྱག་ལ་སོགས་པ་ཐོགས་བཅས་ཀྱི་ལུས་སུ་མ་གྲུབ་བཞིན་དུ། ཐོགས་བཅས་ཀྱི་ལུས་སུ་གྲུབ་པ་ལྟར་སྣང་བའི་
6-6-6b


རླུང་སེམས་ཙམ་གྱི་ལུས་ཡིན་པས་སྒྱུ་མའི་ལུས་ཞེས་བྱའོ། །ད་ལྟ་རགས་པའི་གཟུགས་སེམས་ཀྱི་ལུས་དང་ལྡན་མོད་ཀྱང་། བློས་གཉུག་མའི་ལུས་ཀྱི་ཕྱོགས་བཟུང་ནས་འགྲོ་བ་ཐམས་ཅད་དེའི་ངོ་བོར་བལྟ་ཞིང་། དེའང་རླུང་འོད་ཟེར་ལྔ་ལས་གྲུབ་པའི་
འཇའ་ཚོན་ལྟ་བུའི་རྡོ་རྗེ་འཆང་གི་སྐུར་བལྟ་བའོ། །ཡིད་ལ་བྱེད་ཚུལ་གཏམ་ཙམ་ཡང་རྙེད་དཀའ་བའི་དོན་འདི་སྒྱུ་མ་གྲུབ་ཀྱང་འདིའི་གདམས་ངག་ཕྱིན་ཅི་མ་ལོག་པ་རྙེད་ན། ད་ལྟ་ནས་གོམས་པས་ནམ་ཞིག་ན་སྒྱུ་མའི་སྐུ་འཇའ་ལུས་རྡོ་རྗེ་སེམས་དཔའི་གོ་འཕང་
འགྲུབ་པའི་བག་ཆགས་ཐུན་མོང་མ་ཡིན་པ་འཇོག་བྱེད་དུ་སྣང་བས། ཤིན་ཏུ་ངོ་མཚར་བའི་གནས་སོ། །ཡིད་ལ་བྱེད་ཚུལ་འདི་ཉིད་རྣལ་འབྱོར་མའི་རྒྱུད་ནས་ལྷན་སྐྱེས་ཀྱི་དགའ་བ་སྐྱེས་པའི་འོག་ཏུ་གང་སྣང་ཐམས་ཅད་ལ་རོ་མཉམ་གྱི་དེ་ཉིད་བསྒོམ་པར་གསུངས་
པ་དག་སྤྲེལ་ཤེས་ན་ཆེས་ཤིན་ཏུ་ངོ་མཚར་བའི་གནས་སོ། །གང་ལ་ལྷན་ཅིག་སྐྱེས་པའི་བདེ་བ་ཆེ། །སྐྱེས་པ་དེ་ཡི་སྐུ་ལ་ཕྱག་འཚལ་ཏེ། གང་ལ་སྒྱུ་མ་ལྟ་བུའི་ཏིང་ངེ་འཛིན། །སྐྱེས་པ་དེ་ལ་སྙིང་ནས་སྐྱབས་སུ་མཆི། །སྤྱོད་པ་བསྡུས་པ་དཔལ་མཆོག་སྲུབ་ཤིང་
གིས། །རིམ་གསུམ་སྦས་ཆུའི་རྒྱ་མཚོ་བསྲུག་པ་ལས། །བྱུང་བའི་གདམས་ངག་བདུད་རྩིའི་བུམ་པ་འདིས། །འཇིགས་རྟེན་མཐའ་དག་འཆི་མེད་ཉེར་ཐོབ་ཤོག །གཟུགས་དང་ཞེས་པ་ནས། ཐམས་ཅད་སྒྱུ་མ་ལས་གཞན་མིན། །ཞེས་པའི་བར་གྱིས་ནི། །ཕུང་
པོ་ལྔ་དང་ཁམས་བཞི་དང་། །དབང་པོ་དང་ཡུལ་རྣམས་སྒྱུ་མ་ལས་གཞན་མིན་པར་བསྟན་ཏོ། །འདིར་འགྱུར་རྙིང་ལས། ཤེས་པ་ལྔ་པོ་འདི་དག་སྟེ། །ཕྱི་དང་ནང་དུ་རྣམ་ཕྱེ་བ། །ཞེས་བསྒྱུར་བ་ལེགས་སོ། ཤེས་པ་ལྔ་ནི་དབང་ཤེས་ལྔ་ལ་བྱ་བའམ་ཡང་ན་ཡེ་
6-6-7a


ཤེས་ལྔ་ཞེས་པ་ལྟར་རོ། །སྔར་རླུང་སེམས་གཉིས་རྣལ་འབྱོར་པའི་ལུས་སུ་བྱུང་བ་ལ་སྒྱུ་མའི་སྐུར་བསྟན་ཞིང་། དེ་རྒྱུ་མཚན་དུ་བྱས་ནས་འགྲོ་བ་ཀུན་སྒྱུ་མ་ལྟ་བུར་ཐེག་པ་འདིར་གསུངས་སོ་ཞེས་བཤད་པས། བཅུད་ཀྱི་འཇིག་རྟེན་གྱི་དབང་
དུ་བྱས་ན་དེ་རྣམས་ཀྱི་གཉུག་མའི་ལུས་རླུང་སེམས་ཙམ་ཞིག་ཡིན་པ་སྒྱུ་མའི་ལུས་ཀྱི་དོན་དུ་བྱ་ལ། སྣོད་བཅུད་ཐུན་མོང་བའི་དབང་དུ་བྱས་ན་རླུང་སེམས་གཉིས་ཙམ་གྱི་རྣམ་འཕྲུལ་དུ་གྱུར་པ་སྒྱུ་མའི་དོན་དུ་བྱའོ། །མེ་ལོང་ནང་གི་ཞེས་པ་གཉིས་ཀྱིས་སྒྱུ་མའི་སྐུའི་
ཡན་ལག་དང་ཉིང་ལག་རྣམས་ཡོངས་སུ་རྫོགས་པ་སོགས་དཔེ་དེས་ཤེས་པར་བྱེད་ལ། དེ་ནས་གཅིག་གིས་ནི་སྐུ་དེའི་ཁ་དོག་རྣམས་འཇའ་བཞིན་དུ་དང་། དེ་ནས་གཅིག་གིས་ནི་སྐུ་དེའི་སྣང་བ་གདུལ་བྱ་ལ་གང་འདུལ་གྱིས་སྟོན་པ་ཆུའི་ཟླ་བ་བཞིན་དུ་བསྟན་ཏེ་
དཔེའི་གཙོ་བོ་གསུམ་མོ། །དཔེ་དང་པོ་རྒྱས་པར་འཆད་པ་ནི། །མེ་ལོང་དྲི་མ་མེད་པ་ལ། །ཞེས་པ་བརྒྱད་ཀྱིས་ནི། རྡོ་རྗེ་འཆང་གི་སྐུའི་གཟུགས་བརྙན་མེ་ལོང་ལ་ཤར་བ་སློབ་མ་ལ་བསྟན་ནས་དེའི་སྟེང་ནས་རང་བྱིན་གྱིས་བརླབ་པ་ངེས་པར་བྱེད་པའོ། འདི་ལ་ཆག་
གིས། དངོས་དང་དངོས་མིན་ལས་གྲོལ་བའི། །རྡོ་རྗེ་སེམས་དཔའ་ལེགས་བྲིས་པ། །རྣམ་པ་ཀུན་གྱི་མཆོག་ལྡན་ཞིང་། སྐུ་ནི་ལྟ་བས་མི་ངོམས་པའི། །གཟུགས་བརྙན་གསལ་བར་སྣང་བ་ནི། །སློབ་མ་བཟང་པོ་དེ་ལ་བསྟན། །ཞེས་བསྒྱུར་བ་བདེའོ། །རྐང་པ་དང་པོས་
སྐུ་དེ་རྟག་ཆད་གཉིས་ལས་གྲོལ་བ་དང་། གསུམ་པས་མཚན་གྱི་ཆ་ཐམས་ཅད་རྫོགས་པ་ཤེས་པར་བྱེད་དེ། ཤ་དང་རུས་པ་སོགས་མེད་པའང་ཤེས་པར་བྱའོ། །སྐུ་འདི་དཔེ་གཞན་གྱིས་ངེས་པར་བྱེད་པ་ལའང་ཆུ་ཟླ་ཤར་བའི་སར་ཁྲིད་ནས་སྟོན་པ་དང་། འཇའ་
6-6-7b


ཤར་བའི་སར་ཁྲིད་ནས་སྟོན་མི་དགོས་ཀྱི་བླ་མས་དེ་དག་དཔེར་བཞག་ནས་ཚིག་གིས་བཤད་པས་ཆོག་པ་བཞིན་དུ། གཟུགས་བརྙན་གྱི་དཔེས་སྟོན་པ་ལའང་སྤྱོད་བསྡུས་ལས། ཇི་ལྟར་རས་རིས་མེ་ལོང་གི་ནང་དུ་ཉེ་བར་སྣང་བ་བཞིན་དུ། །ཞེས་གསུངས་པ་ལྟར་འཆད་
པའི་ཚེ་དཔེ་དོན་སྦྱོར་བ་ཙམ་ཡིན་གྱི། བྲིས་སྐུའི་གཟུགས་བརྙན་མེ་ལོང་ལ་ཤར་བ་མཐོང་བའི་སར་བཞག་པ་ལ་བལྟས་ནས་མ་བསྒོམས་ན་འདིའི་གདམས་ངག་ཆད་པའི་སྐྱོན་མེད་དོ། །གང་ཟག་ཁ་ཅིག་ལ་དེ་ལྟར་མ་བྱས་ན་རྡོ་རྗེ་འཆང་གི་སྐུ་བསྒོམ་པ་མི་གསལ་བས་དེ་
གསལ་བའི་ཕྱིར་དུ་དེ་ལྟར་བསྒོམ་པ་ཡིན་ནའང་། གཞུང་གི་ལུགས་ཀྱིས་བསྐྱེད་རིམ་ཕྲ་ཐིག་གི་རྣལ་འབྱོར་མཐར་ཕྱིན་ནས་དབེན་གསུམ་འབྱོངས་པ་ཞིག་གིས་མན་ངག་འདི་བསྒོམ་པ་ཡིན་པས། །དེ་ལ་ནི་ལྷ་སྐུ་ཆེ་ཆུང་གང་བསྒོམ་ཡང་མི་གསལ་བའང་མེད་ལ། ལྷ་སྐུ་
སྣང་ལ་རང་བཞིན་མེད་པ་ཙམ་ནི་རིམ་པ་དང་པོ་ནས་རྙེད་ཟིན་པས་དེ་སྟོན་པ་མིན་ནོ། འདི་ཡང་སྒྱུ་ལུས་ཀྱི་གནད་ཐུན་མོང་མ་ཡིན་པ་མ་རྙེད་པའི་སྐྱོན་ནི། །འགྲེལ་པ་རྣམས་ནས་ཀྱང་དཔེ་དོན་སྦྱོར་བ་ཙམ་གྱི་དོན་དུ་བཤད་པས་དཔེ་གཞན་རྣམས་དང་འདྲའོ། །དེ་ནས་སྒྱུ་མར་
བསྟན་པའི་མཚན་ཉིད་ཀྱིས། འདི་ཉིད་ངེས་པར་མཚོན་པ་སྟེ། །ཀུན་རྫོབ་བདེན་པ་སྒྱུ་མ་ཉིད། །ལོངས་སྤྱོད་རྫོགས་པའི་སྐུ་ཡང་དེ། །དེ་ཉིད་དྲི་ཟའི་སེམས་ཅན་གྱུར། །རྡོ་རྗེའི་སྐུ་ཡང་དེ་ཉིད་ཡིན། །ཞེས་གསུངས་ཏེ། སྒྱུ་མ་དང་གཟུགས་བརྙན་ལ་སོགས་པའི་དཔེ་དུ་
མས་མཚོན་པའི་སྒྱུ་མའི་སྐུ་ནི། སྣང་མཆེད་ཐོབ་གསུམ་གྱི་ཡེ་ཤེས་ཀྱི་མཐར་རླུང་སེམས་ཙམ་ལས་རྡོ་རྗེ་འཆང་གི་སྐུར་བསྐྱེད་པ་འདི་ཉིད་ཡིན་ལ། དེ་ལ་ནི་སྐབས་འདིར་ཀུན་རྫོབ་ཀྱི་བདེན་པ་དང་། ལོངས་སྐུ་དང་བར་དོའི་སེམས་ཅན་དང་རྡོ་རྗེའི་སྐུ་ཞེས་
6-6-8a


པའི་རྣམ་གྲངས་ཀྱིས་གསུངས་པ་ཡིན་ནོ། །འདི་ནི་སེམས་དབེན་དང་འོད་གསལ་གྱི་རྫོགས་རིམ་གྱིས་འཆི་བའི་རིམ་པ་བཞིན་དུ་སྤྲོས་པ་སྡུད་པའི་རིམ་པ་ཤེས་ན། དེ་གཉིས་ཀྱི་མཐར་རླུང་སེམས་ཙམ་གྱི་སྐུར་ལངས་པ་དེ་བར་དོ་ཇི་ལྟ་
བ་བཞིན་དུ་འདུག་སྙམ་དུ་ཤེས་ནས་དེ་ལ་དྲི་ཟའི་སེམས་ཅན་ཟེར་བའི་རྒྱུ་མཚན་ཤེས་ལ། འཆི་བ་ཆོས་སྐུར་འཆར་བ་ཤེས་པའི་རྒྱུ་མཚན་གྱིས་སྐུ་དེ་ལ་ལོངས་སྐུར་བཤད་པའི་དོན་ཡང་ཤེས་ཤིང་། འཆི་རིམ་བཞིན་དུ་སྤྲོས་པ་བསྡུས་པའི་འོད་
གསལ་དོན་དམ་དུ་ཤེས་པས་སྐུ་དེ་ཀུན་རྫོབ་ཀྱི་བདེན་པར་ཡང་ཤེས་ནས། བདེན་གཉིས་དབྱེར་མེད་དུ་སྦྱོར་བའི་སྦྱོར་རྒྱུ་གཉིས་ཀྱང་ཤེས་པ་ཡིན་ནོ། རྡོ་རྗེའི་སྐུ་ནི་གང་ཐོབ་ན་ནམ་མཁའ་ཇི་སྲིད་བར་སྐུའི་རིགས་འདྲ་མི་འཆད་པར་བཞུགས་པའི་དོན་ཏེ། 
མ་དག་པའི་སྒྱུ་མ་ལ་ནི་རྗེས་མཐུན་པའི་མཚན་ཉིད་ཚང་ལ། དག་པའི་སྒྱུ་མའི་སྐུ་ཐོབ་ནས་ནི་མཚན་ཉིད་དེ་ཀུན་ཚང་བ་ཡིན་ནོ། །ད་ལྟའི་གང་ཟག་ལ་རྨི་ལམ་གྱི་དཔེས་སྒྱུ་ལུས་ཀྱི་གནད་ངེས་པར་བྱེད་པ་ནི་སྤྱོད་བསྡུས་ལས་གསུངས་ལ། །དེ་མ་
ཤེས་ན་འཕགས་སྐོར་གྱི་གཞུང་གང་དུའང་དེ་བཞིན་དུ་གསལ་བར་བཤད་པ་མེད་པས། སྒྱུ་ལུས་ཀྱི་གནད་མི་རྙེད་པས་དེའི་དོན་གདོན་མི་ཟ་བར་བཙལ་བར་བྱའོ། །རྡོ་རྗེ་སེམས་དཔའ་རང་ཉིད་དེ། །ཞེས་པ་དྲུག་གིས་ནི། གཙོ་བོར་སྒྱུ་ལུས་ཐོབ་པའི་གང་
ཟག་གིས་རང་ཉིད་རྡོ་རྗེ་སེམས་དཔར་བལྟ་བ་དང་དེ་ཉིད་བསྒྲུབ་ཅིང་དེ་ཉིད་མཆོད་པར་བསྟན་ལ། དེ་མ་ཐོབ་པས་ཀྱང་སླར་དེ་དང་རྗེས་སུ་མཐུན་པའི་མོས་པ་བྱ་བའང་ཤེས་པར་བྱའོ། །དེ་ནས་སྔགས་དང་ཞེས་པ་བཞིས་སྔགས་དང་ཕྱག་རྒྱ་དང་དཀྱིལ་
6-6-8b


འཁོར་དང་སྦྱིན་སྲེག་དང་གཏོར་མའི་བྱ་བ་ཐམས་ཅད་སྒྱུ་མ་བཞིན་དུ་བྱ་བར་གསུངས་པའང་གཙོ་བོའི་དོན་སྔར་བཤད་པ་བཞིན་ཡིན་ལ། བསྐྱེད་རིམ་པས་དེ་དག་བྱེད་པའང་འདིས་སྟོན་དུ་རུང་བས་དེ་ལ་སྦྱོར་ན་སྤྱི་དོན་གྱི་སྒྱུ་མ་དང་སྦྱར་རོ། །སེམས་དབེན་མན་ཆད་ཀྱི་
རྫོགས་རིམ་པ་ལ་ནི་སྒྱུ་ལུས་ཀྱི་གོ་བ་ཙམ་གྱི་ཡིད་བྱེད་དང་སྦྱར་ཏེ། འོག་མ་རྣམས་ལའང་ཤེས་པར་བྱའོ། །ཞི་བ་དང་ནི་ཞེས་པ་བཞིས་ཞི་རྒྱས་སོགས་ཀྱི་ལས་བསྒྲུབ་པ་རྣམས་འཇའ་ཚོན་བཞིན་དུ་བྱ་བར་གསུངས་སོ། །དེ་ནས། སྒེག་སོགས་ཞེས་པ་བཞིས་ཉམས་
དགུ་དང་གླུ་དང་རོལ་མོ་དང་གར་ལ་སོགས་པ་དང་འདོད་པའི་སྒྱུ་རྩལ་རེ་བཞི་སོགས་ལ་འཇུག་པའང་ཆུ་ཟླ་བཞིན་དུ་བྱ་བར་བསྟན་ཏོ། །དེ་ནས་གཟུགས་ལ་སོགས་པ་ཞེས་པ་བཞིས་དབང་པོ་ཡུལ་ལ་འཇུག་པ་ཐམས་ཅད་སྒྱུ་མ་བཞིན་དུ་བརྟག་པར་གསུངས་ཏེ། 
དེ་ལྟར་དཔེ་སོ་སོར་སྦྱར་བའང་ངེས་པ་མིན་གྱི་ཕན་ཚུན་མཚོན་པའི་དོན་ནོ། །དེ་ནས་འདིར་ནི་ཞེས་པ་བཞིས་གང་དམིགས་པ་ཐམས་ཅད་སྒྱུ་མ་བཞིན་དུ་ལྟ་བར་གསུངས་པ་དང་། དེ་ནས་གང་གིས་ཞེས་པ་བཞིས་དེ་ལྟར་བལྟ་བ་གཙོ་བོ་ཡིན་པར་གསུངས་ཞེས་
གསུངས་ཏེ། དེ་ནི་རྡོ་རྗེ་མཁའ་འགྲོ་གསུངས་སོ། །མཐོང་བ་ཉིད་དང་ཞེས་པ་བཞིས་དེ་ཁོ་ནར་དམིགས་པ་མེད་པ་དང་། ཀུན་རྫོབ་ཏུ་སྒྱུ་མ་ལྟ་བུར་དམིགས་པར་གསུངས་ཞེས་བཤད་དོ། །འདི་ཐམས་ཅད་ལ་དབུ་མ་དང་ཐུན་མོང་བའི་སྒྱུ་མའི་དོན་ཡིད་ལ་
བྱེད་པ་ནི་གཞིར་བཞག་ཏུ་གོ་བར་བྱའོ། དབང་པོ་གང་དང་གང་ལམ་འགྱུར། །འགྲོ་བ་དེ་དེའི་རང་བཞིན་དུ། །མཉམ་པར་མ་བཞག་སྦྱོར་བ་ཡིས། །སངས་རྒྱས་ཀུན་དང་མཉམ་པར་སྦྱོར། །ཞེས་གསུངས་ཏེ། མཐོང་ཐོས་ལ་སོགས་པའི་གང་ཤར་ཐམས་
6-6-9a


ཅད་སྒྱུ་མ་བཞིན་དུ་བལྟ་བར་སྔར་གསུངས་མོད་ཀྱང་། འདི་ནི་རླུང་སེམས་ཙམ་གྱི་ལུས་དང་། རླུང་སེམས་ཙམ་གྱི་རྣམ་འཕྲུལ་དུ་ཤེས་པར་བྱས་པ་དེ་ཉིད་སངས་རྒྱས་ཀུན་གྱི་བདག་ཉིད་རྡོ་རྗེ་འཆང་དང་མཉམ་པར་སྦྱོར་བ་སྟེ་དེ་གཉིས་དབྱེར་
མི་ཕྱེད་པའི་སྐུར་བལྟ་བའོ། །མཉམ་པར་མ་བཞག་སྦྱོར་བ་ཡིས། །ཞེས་པ་འདི་ལ་མི་མཉམ་བཞག་པའི་རྣལ་འབྱོར་གྱིས་ཞེས་རྒྱུད་གཞན་གསུངས་ཤིང་། དེའི་དོན་བདེ་སྟོང་དབྱེར་མེད་ཀྱི་བྱང་ཆུབ་ཀྱིས་སེམས་ནི་མི་མཉམ་པ་ཡིན་ལ། དེ་ལ་བཞག་པ་ནི་ཐམས་
ཅད་དེར་མོས་པ་ལ་བཤད་པའང་ཡོད་པས། མཉམ་པར་མ་བཞག་པ་རྗེས་ཐོབ་ཙམ་ལ་བཤད་དགོས་པའི་ངེས་པ་མེད་དོ། །རྣལ་འབྱོར་མ་བཞི་ཞལ་སྦྱོར་བའི་རྒྱུད་ལས་ཀྱང་། གང་གང་དབང་པོའི་ལམ་ཉིད་དུ། །འགྱུར་བ་དེ་དེ་རང་བཞིན་གྱིས། །འདོད་པ་ཀུན་
ལ་ལོངས་སྤྱོད་པས། །སངས་རྒྱས་ཀུན་གྱི་རང་བཞིན་འཐོབ། །ཅེས་ཀྱང་གསུངས་སོ། །ཀུན་ཏུ་ནི་ཁྱིམ་མམ་དགོན་པ་རུའོ། །ཀུན་ནས་ནི་ཕྱོགས་ཐམས་ཅད་དུའོ། །ཐམས་ཅད་ནི་འཇིག་རྟེན་གསུམ་གྱི་རང་བཞིན་ནོ། །བདག་ཉིད་ནི་བདུན་རང་གིས་སོ། །རྟག་ཏུ་ནི་
དུས་ཐམས་ཅད་དུའོ། །རྣམ་པ་ཀུན་ནི་འདིར་མ་བཤད་པ་ཀུན་གྱི་རང་བཞིན་ནོ། །སངས་རྒྱས་ཀུན་བདག་ནི་ཕུང་པོ་ལྔའི་རང་བཞིན་སངས་རྒྱས་ཀྱི་ངོ་བོ་སྒྱུ་མ་ལྟ་བུ་མཐོང་བ་ཡིན་ནོ། །དེ་ཇི་ལྟ་བུ་ཡིན་ན། དངོས་གྲུབ་ནི་ཅིག་ཅར་རམ་གོ་ལྡོག་པའི་རིམ་པས་
འགྲུབ་ཀྱི་རྣལ་འབྱོར་བཞི་ལ་སོགས་པའི་རིམ་པས་མིན་ཞེས་ལཀྵྨཱིས་བཤད་དེ། །གཞུག་ཡང་ཀུན་ཏུ་ཀུན་ནས་ཐམས་ཅད་དང་། །བདག་ཉིད་རྟག་ཏུ་རྣམ་པ་ཀུན། །སངས་རྒྱས་ཀུན་བདག་དངོས་གྲུབ་ནི། །རང་ཉིད་ཀྱིས་ནི་དེ་མཐོང་འགྱུར། །ཞེས་འདོན་ནོ། །སྒྱུ་
6-6-9b


ལུས་ཐོབ་པའི་ཕན་ཡོན་ནི། །གཙོ་བོ་ཞེས་པ་བཞིས་གཤེགས་བཞུགས་ཀྱི་གནས་དང་ཟས་གོས་སོགས་ནམ་མཁའ་ལས་རྙེད་པ་དང་། སྐད་ཅིག་གིས་རྙེད་པར་བསྟན་པར་བསྟན་ཏེ། ནམ་མཁའ་ལས་ཞེས་པ་འོད་གསལ་ལས་རྙེད་པ་དང་། ནམ་མཁའ་མཛོད་ཀྱི་ཏིང་ངེ་འཛིན་གྱིས་
རྙེད་པའི་བཤད་པ་གཉིས་ལཀྵྨཱིས་སོ། །སྲིད་པ་ཞེས་པ་བཞིའི་དང་པོ་ནི་རང་བཞིའི་དང་པོ་ནི་རང་བཞིན་དང་སྣང་བའི་མཚན་ཉིད་ཅན་གྱི་འཁོར་བའི་རང་བཞིན་ཤེས་པ་དང་། འགྲོ་ན་རབ་མཆོག་སྟོན་པར་འགྱུར་གྱི་དོན་ནི་འགྲོ་བའི་ནང་ན་རབ་མཆོག་ཏུ་གྱུར་པ་ཁྱབ་འཇུག་དང་ལྷ་ཆེན་
པོ་སོགས་ཀྱི་སྟོན་པར་འགྱུར་བར་ལཀྵྨཱིས་བཤད་ལ། ཆག་གིས། རབ་མཆོག་འགྲོ་ལ་སྟོན་པར་འགྱུར། །ཞེས་བསྒྱུར་རོ། །ཇི་ལྟར་ཞེས་པ་བཞིས་སྟོན་པ་བཞིན་དུ་གཞན་ཕན་ལ་འཇུག་པར་བཤད་དེ། སྣ་ཚོགས་ཡེ་ཤེས་རྗེས་སུ་སྡུད་པ་ནི་སྣང་བའི་
ཡེ་ཤེས་སྒྱུ་ལུས་ཀྱིས་སྡུད་པ་ལ་འཆད་དོ། །རྡོ་རྗེ་སེམས་དཔའ་ཞེས་པ་བཞིས་བསྒྲུབ་པར་མི་བྱ་བ་ཅི་ཡང་མེད་པ་དང་། བདེ་ཆེན་ཕྱག་རྒྱ་ཆེན་པོ་འགྲུབ་པར་གསུངས་ཏེ། བདེ་ཆེན་གསལ་བར་བྱེད་པའི་ཕྱག་རྒྱ་ཁམས་གསུམ་གྱི་བུད་མེད་དུ་དབང་དུ་
འགྱུར་བ་ལ་འཆད་དོ། །ལས་དང་ཞེས་པ་བཞིས་ནི་ལས་ཉོན་དང་ལུས་དང་བྱེད་པ་པོ་དང་ལས་ཀྱི་འབྲས་བུ་ཐམས་ཅད་སྨིག་རྒྱུ་སོགས་དང་མཚུངས་པར་བསྟན་ཏེ། དོན་བསྡུས་པའོ། །སྒྱུ་མ་ལྟ་བུ་མ་རྙེད་པའི་སྐྱོན་ནི། འདི་འདྲའི་ཏིང་འཛིན་མ་ཤེས་པས། །ཞེས་
པ་ནས། དེ་དག་སྒྱུ་མའི་རྣམ་འཕྲུལ་ལོ། །ཞེས་པས་བསྟན་ནོ། །ཐ་མ་ནི་ཆག་གིས། དེ་རྣམས་སྒྱུ་མའི་སྨན་གྱི་འཚོ། །ཞེས་བསྒྱུར་རོ། །ལྟ་བ་ངན་པའི་ནད་བསྐྱེད་ཚུལ་ནི། བདག་བྱིན་བརླབ་ཞེས་པ་བཞིས་བསྟན་ཏོ། །རྟག་པར་ལྟ་བའི་དབང་གིས་ཕྱིར་
6-6-10a


ལྡོག་པ་ནི། ཐེག་པ་ཐུན་མོང་བའི་སྒྱུ་མ་མ་ཤེས་པའི་སྐྱོན་ཡང་ཡིན་ལ། གཞན་ཡང་དེ་མ་ཤེས་ན་འཁོར་བའི་བག་ཆགས་མ་ལུས་སྦྱོང་མི་ནུས་པས་རྟག་པར་ལྟ་བས་འཁོར་བ་ལ་གནས་པ་ཞེས་པའི་ཐ་སྙད་བྱའོ། ཆད་ལྷའི་དབང་གིས་ཕྱིར་
ལྡོག་པ་ནི། འདི་མ་ཤེས་ན་གཟུགས་ཀྱི་སྐུ་མཐར་ཐུག་འགྲུབ་པས། ཞི་བའི་མཐར་ལྟུང་བས་གཟུགས་སྐུ་ཆད་པའི་སྐྱོན་ནོ། །གསུམ་པ་ནི། མཆོད་པ་ཞེས་པ་བཞིའི་སྔ་མ་གཉིས་ཀྱིས་མཆོད་ཚུལ་དང་། ཕྱི་མ་གཉིས་ཀྱི་དེའི་ཕན་ཡོན་བསྟན་ནོ། །དེ་ནས་
བཞིས་བླ་མ་མཆོད་པས་མ་བྱས་པའི་བསོད་ནམས་དང་། དཀའ་ཐུབ་མེད་ཅེས་བསྟན་ནོ། །དེ་ཉིད་མི་ཟད་ཅེས་པ་བཞིས་ཤིན་ཏུ་ཆུང་བ་ནས་ཤིན་ཏུ་ཆེ་བའི་ཟང་ཟིང་ཐམས་ཅད་ཀྱིས་མཆོད་པར་བསྟན་ཏོ། །སློབ་དཔོན་གྱིས་ནི་ཞེས་པ་བཞིས་སློབ་མ་ལ་སློབ་དཔོན་
དྲིན་ཆེ་ཚུལ་སྟོན་ནོ། །བཞི་པ་ལ་གཉིས་ལས། སྣོད་མིན་ནི། གང་ཞིག་ཅེས་པ་བཞིས་བསྟན་ཏེ། ང་རྒྱལ་ཆེ་བ། ལམ་གྱི་རིམ་པ་ཡང་དག་པ་རྣམས་སུན་འབྱིན་པ། དེ་ཁོ་ན་ཉིད་ཀྱི་ཆོས་ལ་མི་གུས་པ་ལ་མི་བསྟན་ཞེས་པའོ། །སྣོད་དུ་རུང་བ་ནི། བླ་མ་ལ་གུས། 
ཞེས་པ་བཞིས་གསུངས་ཏེ། བླ་མ་ལ་གུས་པ་རྫུན་སྤངས་པ། རྣམ་པར་མཁས་པ་ནི་བློ་གྲོས་ཆེ་བའོ། །རྣམ་པར་དབེན་ཞིང་ཞེས་བསྒྱུར་བ་ལྟར་ན་ཉེས་སྤྱོད་རགས་པས་དབེན་པའོ། །རྒྱུད་གཅིག་པ་ནི། བརྟན་པའོ། །ལན་ཅིག་ཐོས་པ་ཇི་སྲིད་འཚོའི་བར་དུ་མི་བརྗོད་
པ་ལ་ཁ་ཅིག་གིས་བཤད་དོ། །ཁས་བླངས་པའི་དམ་ཚིག་དང་སྤྱོད་པ་རྣམས་བསྲུང་བ་ལ་བསྟན་པར་བྱས་ན་འབྲས་བུ་དང་ལྡན་ནོ། །གསུམ་པ་མཇུག་གི་དོན་ནི། བདག་བྱིན་གྱིས་བརླབ་པ་ཞེས་སོགས་ཀྱིས་གསུངས་ཏེ་ཡོངས་སུ་གྲུབ་པའོ། བདག་བྱིན་གྱིས་བརླབ་པའི་རིམ་པ་བཤད་ཟིན་ཏོ།། །།སརྦ་མངྒ་ལཾ་
6-6-10b


empty page
6-7-1a


༄༅། །མན་ངག་གི་མཐར་ཐུག་མངོན་པར་བྱང་ཆུབ་པའི་རིམ་པའི་བཤད་པ་རྗེས་མཛད་པ་བཞུགས་སོ། །
6-7-1b


རྗེ་བཙུན་དམ་པ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་རྣམས་ཀྱི་ཞབས་ལ་དུས་ཐམས་ཅད་དུ་གུས་པས་ཕྱག་འཚལ་ལོ། །རྒྱལ་བ་ཐམས་ཅད་ཀྱི་མཁྱེན་པའི་ཡེ་ཤེས་ཐམས་ཅད་
གཅིག་ཏུ་བསྡུས་པའི་ངོ་བོ་བཅོམ་ལྡན་འདས་འཇམ་པའི་དབྱངས་དང་། དབང་ཕྱུག་བརྒྱད་དང་ལྡན་པའི་རྡོ་རྗེ་འཆང་ཆེན་པོ་མགོན་པོ་ཀླུ་སྒྲུབ་ཡབ་སྲས་ཀྱི་ཞབས་ལ་གུས་པ་ཆེན་པོས་སྐྱབས་སུ་མཆིའོ། །མན་ངག་མཐར་
ཐུག་མངོན་པར་བྱང་ཆུབ་པའི་རིམ་པ་ལ་གསུམ། མཚན་གྱི་དོན། གཞུང་གི་དོན། འཇུག་གི་དོན་ནོ། །དང་པོ་ནི། ཨ་བྷི་ནི་མངོན་པར་རོ། སཾ་ནི་རྫོགས་པའོ། བོ་དྷི་ནི་བྱང་ཆུབ་པའོ། །ཀྲ་མ་ནི་རིམ་པའོ། །དེ་ལ་མངོན་པར་ནི་
མངོན་དུ་གྱུར་པ་དང་། རྫོགས་པ་ནི་མ་ལུས་པའམ་ཡང་དག་པ་དང་། བྱང་ཆུབ་པ་ནི་རྟོགས་པའོ། །གཉིས་པ་ལ་གཉིས། རྩོམ་པ་ལ་འཇུག་པའི་ཡན་ལག །ཡན་ལག་ཅན་གྱི་གདམས་པའོ། །དང་པོ་ལ་གཉིས། ཕྱག་
འཚལ་བ་དང་། བརྩམ་པར་དམ་བཅའ་བའོ། །དང་པོ་ནི། ཐམས་ཅད་སྟོང་པ་འོད་གསལ་བའི་དེ་ཉིད་ཕྱིན་ཅི་མ་ལོག་པར་སྟོན་པ་པོ། རྡོ་རྗེ་སེམས་དཔའ་ལ་ཕྱག་འཚལ་ལོ། །ཞེས་གཞུང་འདིའི་སྐབས་དང་མཐུན་པར་
6-7-2a


མཆོད་པར་བརྗོད། །གཉིས་པ་ནི། ཏེ་ཞེས་ལྷག་མ་འདྲེན་པས་ཕྱག་བཙལ་ནས་མངོན་པར་བྱང་ཆུབ་པའི་རིམ་པ་འདི་བདག་གིས་བཤད་པར་བྱའོ། །ཞེས་བརྩམ་པར་དམ་བཅས་སོ། །བཞི་པ་ནི། 
རྡོར་བཟླས་དང་། དགོངས་པ་བླ་ན་མེད་པ་དང་། བདག་བྱིན་བརླབ་ཀྱི་རིམ་པ་གསུམ་ལ་བལྟོས་པའོ། །གཉིས་པ་ལ་བཞི། མན་ངག་གི་སྣོད་དུ་བྱ་བ་དང་། མན་ངག་སྦྱིན་པ་དང་། མན་ངག་གི་ཡོན་དབུལ་བ་དང་། མན་ངག་སྒོམ་པར་
གདམས་པའོ། །དང་པོ་ལ་གསུམ། བླ་མ་མཉེས་པར་བྱེད་པ་དང་། བླ་མ་ལ་དབང་གི་ཡོན་དབུལ་བ་དང་། བླ་མས་དབང་བསྐུར་བའོ། །དང་པོ་ནི། འདི་ནི་ཞེས་པ་བཞིས་གདུལ་བྱ་ལ་བཀའ་དྲིན་གྱིས་སྐྱོབ་པ་ལ་བལྟོས་ཏེ་རྡོ་རྗེ་འཆང་
ལས་བླ་མ་ལྷག་པར་བསྟན་ནོ། རྒྱུ་མཚན་དེས་ན་གཉིས་པར་བྱ་དགོས་པ་ནི་དེ་ནི་ཞེས་པ་བཞིས་བསྟན་ནོ། །གཉིས་པ་ནི། ཅི་འབྱོར་པ་ཞེས་པ་བཞིས་ལེགས་པར་བརླབས་པའི་ཕྱག་རྒྱ་དབུལ་བ་དང་། ཚོགས་ཀྱི་དཀྱིལ་འཁོར་གྱི་
དབུས་སུ་ཚོགས་འཁོར་གྱི་ཆོ་ག་བཞིན་དུ་མཆོད་པར་བསྟན་ནོ། །གསུམ་པ་ནི། དེ་ནས་འདོད་ཡོན་ལྔ་སྤྱོད་པས། །ཆེན་པོའི་རྣལ་འབྱོར་པ་མཉེས་ཤིང་། །སྙོམས་པར་འཇུག་པའི་ཆོ་ག་ཡིས། །སྣང་བ་དག་ནི་བསྐྱེད་བར་བྱ། །ཞེས་ཆག་
6-7-2b


གིས་བསྒྱུར་བ་ལྟར་བདེའོ། །ལཀྵྨཱིས་འགྲེལ་པར་སྙོམས་པར་འཇུག་པའི་ཆོ་ག་ནི། སྣང་བ་དག་ནི་སྐྱེད་དུས་བྱས། །ཞེས་འབྱུང་ཞིང་སྣང་བ་སྐྱེད་པའི་དུས་མཚན་མོ་རྩོམ་པའི་དུས་སུ་སྙོམས་པར་འཇུག་པར་བྱའོ། །ཞེས་བཤད་དོ། །གཞུང་གཞན་ལས་གསང་དབང་བསྐུར་བའི་
ཚེ་སྔོན་དུ་བླ་མ་རིག་མ་དང་སྙོམས་པར་ཞུགས་ཏེ་ལྷན་ཅིག་སྐྱེས་པའི་ཡེ་ཤེས་བརྟན་པར་བྱས་ནས་སློབ་མ་ལ་དབང་བསྐུར་བར་གསུངས་པ་དེ་དང་འདྲ་བར་བྱས་ན་ལེགས་སོ། །དེ་ནས་བྱང་ཆུབ་སེམས་ནི་རབ་འབད་པས། །ཀ་ལ་ཤ་སོགས་དག་ཏུ་བཞག །
སློབ་མ་རང་ལ་བླ་མ་ཡིས། །བརྩེ་བས་ནམ་ཕྱེད་དུས་དབང་བསྐུར་ཞེས་གསུངས་ཏེ། རང་ཞེས་པས་གཞན་གྱིས་དབང་སྐུར་བ་མིན་གྱི་བླ་མ་དེ་ཉིད་ཀྱིས་བསྐུར་བ་དང་། སོགས་ཀྱིས་ཐོད་པ་སོགས་སུ་སྤྲོས་པ་དང་། ནམ་ཕྱེད་ནི་དེའི་དུས་སུ་སྲོག་རྩོལ་ཅིག་ཅར་དུ་རྒྱུ་
བས་འོད་གསལ་དང་མཐུན་པ་དང་། འདིས་གསང་དབང་བསྟན་ལ། དབང་བསྐུར་ཡང་དག་ནས་ནི། །ཞེས་པས་དབང་གསུམ་པ་ཐོབ་པར་ལཀྵྨཱིས་བཤད་དོ། །ཆག་གིས། སློབ་མ་བཟང་ལ་ཞེས་དང་བུམ་པའི་དང་པོར་ངེས་བཞག་ལ། །ཞེས་བསྒྱུར་བའི་ཕྱི་མ་ནི་སོགས་
ཀྱི་སྐད་དོད་དང་པོར་བསྒྱུར་བ་ཡིན་ཀྱང་མི་འཐད་དེ། སྤྱོད་བསྡུས་ལས། དེ་ནས་སློབ་དཔོན་མཉམ་གཞག་པས། །བྱང་ཆུབ་སེམས་ནི་དབབ་པར་བྱ། །བུམ་པའམ་ཡང་ན་དུང་ཆོས་སུ། །བྱང་ཆུབ་སེམས་ནི་གཞག་པར་བྱ། །ཞེས་གསུངས་ཤིང་རང་ཉིད་ཀྱིས་
ཀྱང་དེ་ལྟར་བསྒྱུར་བའི་ཕྱིར་རོ། །གསང་དབང་ལ་བྱང་སེམས་ཕྱུང་ནས་དུང་ཆོས་སུ་བཞག་སྟེ་དྲི་ཞིམ་པའི་ཆུ་དང་སྦྱར་ནས་སློབ་མ་ལྟེར་བ་ནི། འཕགས་པ་ཡབ་སྲས་ཀྱི་དགོངས་པ་ཡིན་ལ། སྒྲོན་གསལ་ལས་ཀྱང་། དེ་ལྟར་བཤད་ནས་ཟླ་གསང་ཐིག་ལེའི་
6-7-3a


ཁུངས་དྲངས་སོ། །རྒྱུད་ཕྱི་མའི་འགྲེལ་པར་གསང་དབང་བསྐུར་ཚུལ་གཉིས་སུ་བྱས་པའི་དང་པོ་ནི་སྔ་མ་ལྟར་དང་། ཕྱི་མ་ནི་རྡོ་རྗེ་ནས་བྱང་སེམས་ཕྱུང་བ་ཉིད་སློབ་མའི་ཁར་སྟེར་བ་མཆོག་གི་གསང་དབང་དུ་བཤད་དོ། །གསང་བ་གྲུབ་པར་
ཡང་། །ཁྲག་དང་ཁུ་བ་རྣམ་བསྲེས་པ། །སློབ་དཔོན་མཆོག་གིས་མཆོད་པའི་ཕྱིར། །མི་ཡི་ཐོད་པར་བླུག་ནས་ནི། །བཤང་གཅི་རྡོ་རྗེ་ཆུར་ལྡན་པ། །དེ་ནས་སློབ་མ་བཀུག་བྱས་ལ། །སངས་རྒྱས་ཀུན་གྱིས་བྱིན་བརླབས་ནས། །གཉུག་མའི་ཕྱག་རྒྱ་དང་བཅས་པས། །
དམ་ཚིག་དེ་ན་སྦྱིན་པར་བྱ། །ཞེས་གསུངས་ལ། སྤྱོད་བསྡུས་ལས། བྱང་ཆུབ་སེམས་ནི་གཞག་པར་བྱ། །ཞེས་པའི་མཇུག་ཏུ། །དེ་ནས་སློབ་མ་དེ་བོས་ཏེ། སངས་རྒྱས་ཀུན་གྱིས་བྱིན་བརླབས་པ། །གཉུག་མའི་ཕྱག་རྒྱར་ལྡན་པ་ཡི། །དམ་ཚིག་དེ་ནི་བསྟན་པར་
བྱ། །ཞེས་གསུངས་པའི་རྐང་པ་བཞི་ནི་གསང་བ་གྲུབ་པ་བཀོད་པར་སྣང་ངོ་། །སྤྱོད་བསྡུས་འགྱུར་རྙིང་ལས། སངས་རྒྱས་ཀུན་གྱིས་བྱིན་བརླབས་ལ། །རྒྱལ་བའི་ཕྱག་རྒྱར་བཅས་པ་ཡི། །དམ་ཚིག་དག་ནི་བསྟན་པར་བྱ། །ཞེས་འབྱུང་ཞིང་། དཔེ་ཁ་ཅིག་
ལས། རང་གི་ཕྱག་རྒྱར་བཅས་པ་ཡི། །ཞེས་འབྱུང་ཡང་། རྐང་པ་གཉིས་པ་དང་གསུམ་པ་འགྱུར་སྔ་མ་ལྟར་ལེགས་ལ། བཞི་པ་ནི་གསང་བ་གྲུབ་པ་ལྟར་ལེགས་སོ། །སློབ་མ་དེ་བོས་ཞེས་པ་དང་། སློབ་མ་བཀུག་ཅེས་པ་གཉིས་ཀྱི་དོན་འདྲའོ། །བྱིན་གྱི་
བརླབས་པ་ནི་ཕྱག་རྒྱ་ལ་བྱ་སྟེ། ཕྱག་རྒྱའི་གནས་ལྔར་རིགས་ལྔ་བཀོད་ནས་བྱིན་གྱིས་བརླབ་པར་གསུངས་པའོ། །དམ་ཚིག་དེ་ནི་ཞེས་པ་ནི་གསང་བའི་རྫས་དཀར་དམར་གཉིས་བདུད་རྩི་ལྷག་མ་གསུམ་དང་བསྲེས་པ་ཡིན་ལ། དེ་ཡབ་ཡུམ་གཉིས་ཀས་
6-7-3b


སློབ་མ་ལ་སྟེར་བ་ནི་བཅས་པས་ཞེས་པའི་དོན་ནོ། །དམ་ཚིག་དག་ནི་སྦྱིན་པར་བྱ། །ཞེས་པའི་མཇུག་ཏུ་སྤྱོད་བསྡུས་ལས། རྡོ་རྗེ་ཅན་ནི་གཉིས་པ་ཡིས། །དབང་བསྐུར་བ་ནི་སྦྱིན་པར་བྱ། །བཀྲ་ཤིས་སྒྲ་ནི་བསྒྲགས་པ་དང་། །རོལ་མོའི་སྒྲ་སྐད་སྣ་ཚོགས་ཀྱིས། །
ཁམས་གསུམ་པ་ཡི་དབང་བསྐུར་བས། །སློབ་མ་བདུད་ཅིང་ཐལ་སྦྱར་བ། །དེར་ནི་རབ་ཏུ་བསྐུར་བ་ཡིས། །རྗེས་སུ་གནང་བ་དེ་ནས་སྦྱིན། །ཞེས་གསུངས་པའང་གསང་བ་གྲུབ་པ་བཀོད་པ་ཡིན་ལ། གསང་བ་གྲུབ་པར་དམ་ཚིག་དེ་ནི་བྱིན་པར་བྱ་ཞེས་པའི་
མཇུག་ཏུ། དངོས་གྲུབ་ཀུན་གྱི་གནས་གྱུར་ཅིང་། །སངས་རྒྱས་བྱིན་བརླབས་ལས་འགྱུར་བ། །རྡོ་རྗེ་སློབ་དཔོན་དེ་ཉིད་རིག །ཆོ་གས་དེ་ལྟར་གཏད་བྱས་ནས། །རང་གི་ཕྱག་རྒྱ་དམ་ཚིག་ནི། །བཟང་ལྡན་རྒྱུད་ལས་གསུངས་པ་ཉིད། །ཤིན་ཏུ་བཞིན་བཟང་མིག་
ཡངས་མ། རྟག་ཏུ་བྱང་ཆུབ་སེམས་ལ་དགའ། །མཱ་མ་ཀཱི་ལྟར་ཡོངས་དག་པ། །རབ་དགའ་བག་ཆགས་རྣམས་སྤངས་མ། །འདི་ནི་ཡང་དག་མཆོད་བྱས་ནས། །སྔོན་བཞིན་སྤྱོད་པའི་སློབ་མ་ནི། །རྡོ་རྗེ་འཛིན་པ་གཉིས་པ་ལ། །བཀྲ་ཤིས་བརྗོད་པའི་ཚིག་གིས་ནི། །
དབྱངས་ནི་རྣམ་པ་སྣ་ཚོགས་དང་། །རྔ་ཡབ་རྒྱལ་མཚན་གདུགས་ལ་སོགས། །འཕྲེང་བ་ཙནྡན་ལ་སོགས་མཆོད། །ཕྱག་རྒྱའི་དབང་བསྐུར་རིན་ཆེན་གྱི། །དམ་ཚིག་ལ་གནས་བསྟན་པར་བྱ། །ཁམས་གསུམ་པ་ཡི་དབང་བསྐུར་ནས། །སློབ་མིས་ཐལ་
མོ་སྦྱར་བྱས་པ། །དེ་ལ་རྗེས་གནང་སྦྱིན་བྱས་ཏེ། །རྒྱུད་ལས་ཇི་སྐད་གསུངས་པ་བཞིན། །ཕྱོགས་ཀྱི་འཁོར་ལོར་གང་འདོད་པ། །ཆོས་ཀྱི་འཁོར་ལོ་བསྐོར་བར་གྱིས། །ཞེས་གསུངས་སོ། །རྡོ་རྗེ་ཅན་ནི་གཉིས་པ་ཡིས། །ཞེས་པ་ནི། དཔེ་མ་དག་པ་ལས་བསྒྱུར་
6-7-4a


བར་གསལ་ཏེ། སློབ་མ་རྡོ་རྗེ་ཅན་གཉིས་པ་ལ་ཕྱག་རྒྱ་གཏད་ནས་དབང་བསྐུར་བའི་དོན་དུ་སྣང་བའི་ཕྱིར་རོ། །དབང་བསྐུར་བ་ནི་སྦྱིན་པར་བྱ། །ཞེས་པའང་ཕྱག་རྒྱའི་དབང་བསྐུར་རིན་ཆེན་གྱི། །དམ་ཚིག་ལ་གནས་བསྟན་པར་བྱ། 
ཞེས་པའི་དོན་དུ་སྣང་ཞིང་། བཀྲ་ཤིས་སྒྲ་ནི་ཞེས་སོགས་ཀྱི་གོ་རིམ་ཀྱང་གསང་བ་གྲུབ་པ་ལྟར་བྱའོ། །ཁམས་གསུམ་པ་ཡི་དབང་བསྐུར་ནས། །ཞེས་པ་གསུམ་ཡང་གསང་བགྲུབ་པ་ལྟར་བྱ་ལ། །དེར་ནི་རབ་ཏུ་བསྐུར་བ་ཡིས། །ཞེས་པ་ལ་སྤྱོད་བསྡུས་
ཀྱི་དཔེ་ཁ་ཅིག་ལས། རྒྱུད་ལས་རབ་ཏུ་གསུངས་པ་ཡིས། །ཞེས་འབྱུང་བ་ནི། གསང་བ་གྲུབ་པར། རྒྱུད་ལས་ཇི་སྐད་གསུངས་པ་བཞིན། །ཞེས་པའི་དོན་ནོ། དེས་ན་ཁམས་གསུམ་པའི་མངའ་བདག་ཏུ་དབང་བསྐུར་བ་ནི་སྐབས་འདིར་དབང་གསུམ་པ་
ཡིན་ལ། དེ་ལ་རྗེས་གནང་སྦྱིན་པ་ནི་ཚོས་བཤད་པའི་རྗེས་གནང་ལ་གསུངས་འདུག་པས། སཾ་པུ་ཊ་ནས་དབང་བཞི་པའི་མཐར་རྗེས་གནང་སྟེར་བར་གསུངས་པ་དེ་དང་འདྲ་བས་གསུམ་པའི་རྗེས་ལ་བཞི་པ་བསྐུར་བའང་མཚོན་ནོ། རྗེས་སུ་གནང་
བ་དེ་ནས་སྦྱིན་ཞེས་པའི་མཇུག་ཏུ་སྤྱོད་བསྡུས་ལས། ཕྲེང་བ་ཆུ་དང་རྫོགས་སངས་རྒྱས། །རྡོ་རྗེ་དྲིལ་བུ་མེ་ལོང་དང་། །མིང་དང་སློབ་དཔོན་རྗེས་གནང་སྟེ། དབང་བསྐུར་རིམ་པ་འདི་ཡིན་ནོ། །ཞེས་གསུངས་པ་ནི། ཕྲེང་བ་ནས་སློབ་དཔོན་གྱི་དབང་གི་
བར་སྔོན་དུ་འགྲོ་བའི་གསང་དབང་བསྐུར་བའི་འོག་ཏུ་དབང་གསུམ་པ་དང་བཞི་པ་བསྐུར་ནས་མཐར་རྗེས་གནང་སྟེར་བའི་དོན་ནོ། །འཕགས་པས་བྱང་ཆུབ་ཀྱི་སེམས་ཕྱུང་ནས་དུང་ཆོས་སོགས་སུ་བཞག་པ་ཙམ་མ་གཏོགས་པ། དེས་གསང་
6-7-4b


དབང་བསྐུར་ཚུལ་དང་། དབང་གསུམ་པ་མ་བཤད་པ་དེ་སྤྱོད་བསྡུས་ཀྱིས་གསང་བ་གྲུབ་པ་ནས་འབྱུང་བ་བཞིན་དུ་ཁ་བཀང་བར་འདུག་པ་འདི་མ་རྟོགས་པས། ཁ་ཅིག་རིམ་ལྔ་དང་སྤྱོད་བསྡུས་ལས་འོད་གསལ་གྱི་གདམས་ངག་སྟོན་པ་ལའང་གསང་དབང་མ་གཏོགས་
པ་དབང་གསུམ་པ་བསྐུར་བ་མེད་ཅེས་ཟེར་རོ། །དབང་བསྐུར་རིམ་པ་འདི་ཡིན་ནོ། །ཞེས་པའི་འཇུག་ཏུ་སྤྱོད་བསྡུས་ལས། །མངོན་རྫོགས་བྱང་ཆུབ་མཚན་ཉིད་ནི། བླ་མ་བརྒྱུད་རིམ་ལས་འདོས་པ། །གང་ཚེ་མན་ངག་གཞི་ཐོབ་པ། དེ་ནས་དེ་ལ་སྦྱིན་པར་བྱ། །ཞེས་གསུངས་
ཏེ། སྔར་ལྟར་འོད་གསལ་གྱི་མན་ངག་སྟོན་པའི་གཞི་དབང་གསུམ་པ་ཐོབ་པ་དེ་ལ་དེའི་མན་ངག་སྦྱིན་པར་བྱ་ཞེས་པའི་དོན་ནོ། །འོ་ན་སྤྱོད་བསྡུས་ལས་དེ་ལྟར་གསུངས་པའི་རྗེས་སུ་ཕྱི་ནང་གི་བྱང་ཆུབ་པ་གཉིས་ཀྱི་སྒོ་ནས་མངོན་དུ་བྱ་རྒྱུའི་ཐམས་ཅད་སྟོང་པ་དང་དེ་
མངོན་དུ་བྱེད་པའི་རིམ་པའམ་ཐབས་བསམ་གཏན་གཉིས་བསྟོན་ཞིང་། །དེའི་མིང་གི་རྣམ་གྲངས་བཤད་པའི་མཐར་སློབ་མས་ངོ་མཚར་བའི་ཆེད་བརྗོད་བྱེད་པའི་འོག་ཏུ། དེ་ནས་རྡོ་རྗེ་སློབ་དཔོན་གྱིས་སློབ་དཔོན་གཉིས་པ་ལྟ་བུར་བལྟས་ནས། དངོས་པོ་ཐམས་
ཅད་དང་བྲལ་བ་ནས། སྟོང་པ་ཉིད་ཀྱི་རང་བཞིན་ནོ། སྟོང་པ་ཉིད་ཀྱི་རང་བཞིན་ནོ། །ཞེས་བྱ་བའི་ཚིགས་སུ་བཅད་པ་བརྗོད་ཅིང་། གཉིས་སུ་མེད་པར་དམིགས་ཏེ་ཤེས་རབ་ཡེ་ཤེས་ཀྱི་དབང་བསྐུར་བ་སྦྱིན་པར་བྱའོ། །ཞེས་འོད་གསལ་གྱི་གདམས་ངག་བསྟན་པའི་རྗེས་སུ་ཤེས་རབ་ཡེ་ཤེས་
ཀྱི་དབང་བསྐུར་བར་གསུངས་པ་འདི་ཇི་ལྟར་ཡིན་ཞེ་ན། སྤྱོད་བསྡུས་འགྱུར་རྙིང་ལས། ཤེས་རབ་དང་ཡེ་ཤེས་ཀྱི་དབང་བསྐུར་བ་ཞེས་གསུངས་པ་ལ། བོད་ཁ་ཅིག་ར་གི་མ་ལག་ཏུ་གཏད་པ་ཤེས་རབ་ཀྱི་དབང་དང་། དེ་དང་སྙོམས་པར་ཞུགས་པ་ཡེ་ཤེས་
6-7-5a


ཀྱི་དབང་དུ་འདོད་པ་དང་། རྒྱ་གར་བ་ཁ་ཅིག་དབང་གསུམ་པ་ཤེས་རབ་དང་བཞི་པ་ཡེ་ཤེས་ཀྱི་དབང་དུ་འདོད་པ་ལ་རྩོད་པ་སྔ་མ་འཇུག་པས་ལན་བརྗོད་དགོས་སོ། །བོད་ཀྱི་བླ་མ་ཁ་ཅིག་སྔར་འོད་གསལ་བསྟན་པ་ནི་ཚིག་གིས་བསྟན་པ་ཡིན་
ལ། འདིར་ནི་ཕྱག་རྒྱ་ལ་བརྟེན་ནས་ཉམས་མྱོང་སྐྱེ་བ་ཡིན་ཞེས་ཟེར་མོད་ཀྱང་། དབང་གསུམ་པ་ཕྱག་རྒྱ་ལ་བརྟེན་ནས་འོད་གསལ་སྟོན་པའི་སྔོན་དུ་བསྐུར་བ་སྔར་ལྟར་གསུངས་པས་མི་འཐད་དོ། །འོ་ན་གང་ཡིན་སྙམ་ན། རིམ་པ་འདི་ཉིད་དུ་འཆད་པར་འགྱུར་
བ་ལས་ཀྱང་། བྱང་ཆུབ་སེམས་ནི་ཞེས་སོགས་དང་། དངོས་པོ་ཐམས་ཅད་དང་བྲལ་བ་ཞེས་སོགས་ཀྱིས་བྱང་ཆུབ་ཀྱི་སེམས་དོན་དམ་པ་བླ་མ་ལས་ལེན་པར་གསུངས་ལ། དེ་ཉིད་ཚིག་ཕྱི་མ་རྣམས་ཀྱིས་སྟོན་པར་སྤྱོད་བསྡུས་ལས་གསུངས་པས། ཤེར་རབ་
ཡེ་ཤེས་ཀྱི་དབང་ལ་དཔེ་དོན་གཉིས་སུ་ཡོད་པའི་དོན་གྱི་ལྷན་སྐྱེས་དོན་དམ་བྱང་ཆུབ་ཀྱི་སེམས་ཀྱི་དབང་སློབ་མས་ལེན་པ་ལ་སློབ་དཔོན་གྱིས་བསྐུར་བའོ། །བཤད་རྒྱུད་རྡོར་ཕྲེང་ལས་ཀྱང་། བཅུ་གསུམ་པ་ནི་ཡང་དག་སྦྱོར། །བཅུ་བཞི་པ་ནི་དོན་དམ་སྟེ། 
ཞེས་བཅུ་གསུམ་པ་དབང་གསུམ་པ་ནི་ཕྱག་རྒྱ་དང་སྦྱོར་བ་ལས་་བྱུང་བའི་ཡེ་ཤེས་དང་། བཅུ་བཞི་པ་དབང་བཞི་པ་ནི་དོན་དམ་གྱི་ལྷན་སྐྱེས་ལ་བཤད་དོ། །དེ་ལྟར་ན་དངོས་པོ་ཐམས་ཅད་དང་བྲལ་བ་ཞེས་སོགས་སློབ་དཔོན་གྱིས་བརྗོད་པ་ནི་དེའི་དོན་བཤད་ནས་དོན་གྱི་
ལྷན་སྐྱེས་ཀྱི་གོ་བ་སྐྱེད་པའོ། །གཉིས་སུ་མེད་པར་དམིགས་ཏེ་ཞེས་པ་ན་བདེ་སྟོང་དབྱེར་མེད་ཙམ་མིན་གྱི་གཉིས་སུ་མེད་པའི་ཡེ་ཤེས་ཟུང་འཇུག་ལ་ངོ་སྤྲོ་པའོ། །སླར་ཡང་ཞེས་པ་ནི་སྔར་དཔེའི་ཤེས་རབ་ཡེ་ཤེས་བསྐུར་བའི་དུས་སུའང་བདེ་སྟོང་དབྱེར་མེད་ཀྱི་
6-7-5b


ལྷན་སྐྱེས་བསྐྱེད་པ་ཡིན་ལ། དེ་ལའང་དོན་དམ་པ་བྱང་ཆུབ་ཀྱི་སེམས་ཞེས་པའི་ཐ་སྙད་བྱེད་དེ། སེམས་དབེན་གྱི་ཡེ་ཤེས་གསུམ་ལ་དོན་དམ་བྱང་ཆུབ་ཀྱི་སེམས་ཞེས་གསུངས་པ་བཞིན་ནོ། །དེས་ན་དེ་ལ་བལྟོས་ནས་གསུངས་སོ། །སྤྱོད་བསྡུས་ལས། དབང་གསུམ་པ་
བསྐུར་བ་ལ་འོད་གསལ་གྱི་སྐོར་བཤད་པའི་འོག་ཏུ་བཞི་པ་བསྐུར་བ་ལྟར་བཤད་ཅིང་། རིམ་པ་འདིར་ཡང་འོད་གསལ་གྱི་གདམས་པ་བཞི་དང་། དེ་ལས་སྒྱུ་མའི་སྐུར་བཞེངས་པའི་ཚུལ་བཤད་ཟིན་པའི་འོག་ཏུ་དོན་དམ་བྱང་ཆུབ་ཀྱི་སེམས་ཀྱི་དབང་བསྐུར་བར་བཤད་
པ་ནི། བཤད་པའི་རིམ་པ་ཙམ་ཡིན་གྱི་ལག་ལེན་གྱི་རིམ་པ་ནི་དབང་གསུམ་པ་བསྐུར་བའི་མཇུག་ཐེགས་ཉིད་དུ་དབང་བཞི་པ་བསྐུར་བ་ཡིན་ནོ། །དེ་ལྷ་མ་ཡིན་ན་དབང་བཞི་པ་མ་བསྐུར་བའི་སྔ་རོལ་ཏུ་ཆུ་ལས་ཉ་ལྡང་བའི་ཚུལ་དུ་ཟུང་འཇུག་གི་སྐུར་བཞེངས་པའི་ཚུལ་
བཤད་པའི་སྐྱོན་ཡོད་དོ། །གཉིས་པ་ལ་གཉིས། སློབ་མས་མཆོད་བསྟོད་གསོལ་བ་གདབ་པ་དང་། །སློབ་དཔོན་གྱིས་མན་ངག་ཇི་ལྟ་བ་བཞིན་བཤད་པའོ། །དང་པོ་ལ་གཉིས། མཆོད་ཅིང་བསྟོད་པ་དང་། གསལ་བ་གདབ་པའོ། །དང་པོ་ནི། དབང་བསྐུར་ཡང་དང་ཐོབ་
ནས་ནི། །ཞེས་པ་ནས་མཉེས་པར་བྱ་ཞེས་པའི་བར་གྱིས་མཚམས་སྦྱར་བས། ཁམས་གསུམ་ལས་ནི་རྣམ་གྲོལ་ཞིང་ཞེས་པ་ནས། །ནམ་མཁའ་མཉམ་པའི་ཐུག་མངའ་བ། །དམིགས་མེད་ཁྱོད་ལ་ཕྱག་འཚལ་ལོ། །ཞེས་པའི་ཚིག་བཅད་བཞིས་བསྟོད་པ་
བསྟན་ཏོ། ལས་དང་ཞེས་པ་བཞིས་སྐུ་རྡོ་རྗེ་དང་། ཕུང་པོ་ཞེས་པ་བཞིས་གསུང་རྡོ་རྗེ་དང་། ཇི་ལྟར་ཞེས་པ་བཞིས་ཐུགས་རྡོ་རྗེའི་སྒོ་ནས་བསྟོད་པར་ལཀྵྨཱིས་བཤད་དེ་དེའི་འགྲེལ་པར། །རྣམ་བརྟགས་མེད་ཅིང་ཞེས་པ་བཞི་མེད་དོ། གཉིས་པ་ནི། ཐམས་
6-7-6a


ཅད་སྟོང་པ་རང་བཞིན་ཅན། །མངོན་རྫོགས་བྱང་ཆུབ་ལྟ་འདོད་པའི། །སློབ་མས་ཐལ་སྦྱར་བསྟོད་ནས་ནི། །སླར་ཡང་བླ་མ་བསྐུར་བར་བྱ། །ཞེས་མཚམས་སྦྱར་རོ། །དེ་ནས་ལས་དང་སྐྱེ་ལས་ཞེས་པ་ཚིགས་བཅད་གསུམ་གྱིས་བསྟོད་དེ། 
མགོན་པོ་ཆེན་པོ་དང་སློབ་དཔོན་ཆེན་པོ་དང་རྡོ་རྗེ་ཆེན་པོ་གསུམ་གྱིས་ནི་རྡོ་རྗེ་གསུམ་གྱི་རང་བཞིན་དུ་ཤེས་པར་བྱའོ། །ཞེས་འཆད་དོ། །གཉིས་པ་ལ་བཞི། །འོད་གསལ་གྱི་གདམས་ངག་བཞི་བསྟན་པ། འོད་གསལ་དུ་ཞུགས་ཀྱང་སེམས་ཅན་གྱི་དོན་འགྲུབ་པའི་
ཚུལ། བྱ་བ་ཐམས་ཅད་འོད་གསལ་གྱི་གཞི་ལ་གནས་ནས་བྱ་བ་དང་། དོན་དམ་བྱང་ཆུབ་ཀྱི་སེམས་ཀྱི་དབང་བླང་བའོ། །དང་པོ་ལ་གསུམ། མངོན་དུ་བྱ་རྒྱུའི་འོད་གསལ་གཉིས་དང་། འོད་གསལ་གྱི་དེ་ཉིད་ཐོབ་པའི་ཕན་ཡོན་དང་། འོད་གསལ་མངོན་དུ་བྱེད་
པའི་བསམ་གཏན་གཉིས་བསྟན་པའོ། །ཕྱིའི་མངོན་པར་བྱང་ཆུབ་པ་དང་། ནང་གི་མངོན་པར་བྱང་ཆུབ་པའོ། །དང་པོ་ནི། དེ་ལྟར་ཞེས་པ་བཞིས་མཚམས་སྦྱར་ནས། མཚན་མོ་ཞེས་སོགས་གསུངས་སོ། །འདིའི་ཕྱིའི་མངོན་པར་བྱང་ཆུབ་པ་
ནི་ཕྱིའི་ཕྱག་རྒྱ་ལ་བརྟེན་ནས་བྱང་ཆུབ་པ་སྟེ། སྤྱི་གཙུག་ནས་བྱང་སེམས་འཛགས་པའི་དུས་སུ་བདེ་བ་མྱོང་བ་ནི་མཚན་མོ་སྣང་བའི་ཆའོ། །བྱང་ཆུབ་ཀྱི་སེམས་ཀྱིས་ཡན་ལག་ཐམས་ཅད་ཀྱི་ཚིགས་ཁྱབ་པའི་དུས་སུ་དགའ་བ་ཉམས་སུ་མྱོང་བ་ནི་སྣང་བ་
མཆེད་པ་སྟེ་གསལ་བ་ཉི་མའི་འོད་ཟེར་གྱི་སྣང་བ་དང་འདྲ་བའི་ཉིན་མོའི་རང་བཞིན་དུ་ཤེས་པར་བྱའོ། །དེའི་རྗེས་ལ་རྡོ་རྗེའི་རྩི་བའམ་དབུས་སུ་ཕྱིན་པ་ན་སྣང་བ་ཉེར་ཐོབ་ཀྱི་དགའ་བ་བྱུང་བ་ནི་ཉིན་མཚན་ལས་འདས་པའི་མུན་པས་བརྒྱལ་བ་ལྟ་བུའོ། །སྐད་ཅིག་
6-7-6b


མ་གསུམ་པོ་དེའང་རང་རང་གི་བག་ལ་ཉལ་གྱི་རང་བཞིན་གྱི་རང་བཞིན་རྣམས་ཀྱིས་འགྲོ་བ་སྟེ་དེ་དང་ལྷན་ཅིག་གནས་པའོ། །རྡོ་རྗེ་ནོར་བུའི་ནང་ན་གནས་པའི་ཚེ་ནི་མཚན་མོ་ལ་སོགས་པའི་སྒྲས་བསྟན་པའི་ཡེ་ཤེས་གསུམ་དང་བྲལ་བ། བྱང་ཆུབ་ཀྱི་རང་བཞིན་གྱི་སྐད་ཅིག་ནི་རྣལ་
འབྱོར་པའི་ཡེ་ཤེས་ཀྱིས་རྟོགས་པར་བྱ་བའི་ཡུལ་བླ་མའི་ཞལ་ན་ས་ཐོབ་ཅིང་བསྒོམ་པར་བྱ་བའི་འོད་གསལ་ལོ། །དེ་ཉིད་རྒྱས་པར་འཆད་པ་ནི་མཚན་མོ་ཞེས་པ་གསུམ་སྟེ་རང་བཞིན་དང་སྣང་བའི་ཉོན་མོངས་མེད་པའི་སྐད་ཅིག་མ་དེར་ནི་སློབ་དཔོན་གྱིས་སློབ་མ་
ལ་ཡང་དག་པའི་མཐའ་དེ་བཞིན་ཉིད་བཤད་པར་བྱའོ། །སྐད་ཅིག་མ་དེ་ནི་མཚན་མོ་དང་ཉིན་མོ་དང་མཚམས་ཀྱི་ངོ་བོ་སྣང་བ་གསུམ་པ་དང་བྲལ་བའི་འོད་གསལ་སྔ་དྲོའི་མཚམས་སོ། །རིམ་པ་འདིས་ཕྱིའི་མངོན་པར་བྱང་ཆུབ་པའི་རིམ་པ་ཤེས་པར་བྱའོ། །ཞེས་ལཀྵྨཱིས་
འཆད་དོ། །གཉིས་པ་ནི། ནང་གི་བདེ་བ་རྟོག་བྲལ་སངས་རྒྱས་བྱང་ཆུབ་སྐད་ཅིག་གིས་ཐོབ་པར་འགྱུར། །ཞེས་གསུངས་ཏེ་ནང་གི་སངས་རྒྱས་བྱང་ཆུབ་ནི་འོད་གསལ་བའི་སྐད་ཅིག་དག་གིས་ཐོབ་པར་འགྱུར། །དེའང་ཉོན་མོངས་པའི་རྙོག་པ་དང་བྲལ་བའི་བདེ་
བ་ཆེན་པོའོ། །ནང་གི་བྱང་ཆུབ་ཅེས་པའོ་ནི་ཡེ་ཤེས་ཀྱི་ཕྱག་རྒྱའི་རིམ་པའམ་མཚན་མ་ལྷའི་གོ་རིམ་གྱིས་ཕྱག་རྒྱ་ཆེན་པོའི་རིམ་པའོ་ཞེས་ལཀྵྨཱིས་བཤད་དོ། །རྗེ་འགོས་ཀྱི་བཞེད་པས་ཉིན་མོ་ལ་སོགས་པ་ཕྱིའི་དཔེའི་སྒོ་ནས་འོད་གསལ་ངེས་པར་བྱེད་པ་ནི་
ཕྱིའི་མངོན་བྱང་དང་། ནང་གི་རྟགས་ཀྱི་སྒོ་ནས་ངེས་པར་བྱེད་པ་ནི་ནང་གི་མངོན་བྱང་དུ་བཞེད་དོ། །འདིར་སྤྱོད་བསྡུས་ལས། དེ་ལ་དང་པོ་ཕྱིའི་བསྟན་པར་བྱ་སྟེ། ཐོ་རངས་ཀྱི་ཐུན་མཚམས་ནི་མ་རིག་པ་མུན་པའི་སྣང་བ་ནས། ཇི་སྲིད་ཉི་མ་གསལ་བར་མ་གྱུར་
6-7-7a


པ་སྟེ་དེ་ལ་འོད་གསལ་བ་དྲི་མ་མེད་པའི་རྣམ་པ་གསལ་ཞིང་། ལུས་དང་ངག་དང་ཡིད་དང་བྲལ་བ་ཐམས་ཅད་སྟོང་པའི་མཚན་ཉིད་ཅན་ནོ། །ཉི་མ་ཤར་བ་ལ་སྣང་བ་མཆེད་པའོ། །ཉི་མ་ནུབ་པའི་ཐུན་མཚམས་སུ་མ་རིགས་པའོ། །ཟླ་བ་ཤར་བ་ལ་
སྣང་བའོ། །དེ་ལྟར་སྟོང་པ་ཉིད་རྣམ་པ་བཞིའི་ཕྱི་རོལ་ངེས་པར་བསྟན་པ་བཤད་ནས། ད་ནི་ནང་གི་མངོན་པར་བྱང་ཆུབ་པ་སོ་སོ་རང་གིས་རིག་པར་བྱ་བའི་མཚན་ཉིད་རིམ་པ་འདིས་བསྟན་པར་བྱ་སྟེ། དེ་ལ་རིམ་པ་འདིའོ། །དང་པོ་སྨིག་རྒྱུ་ལྟ་བུ་ལ་འོད་ཟེར་ལྔའི་ཚོགས་དང་
ལྡན་པར་མཐོང་ངོ་། །གཉིས་པ་ནི། སྣང་བ་སྟེ་ཟླ་བའི་འོད་ཟེར་ལྟ་བུའོ། །གསུམ་པ་ནི། སྣང་བ་མཆེད་པ་སྟེ་ཉི་མའི་འོད་ཟེར་ལྟ་བུའོ། །བཞི་པ་ནི། སྣང་བ་ཐོབ་པ་སྟེ་མུན་པ་ལྟ་བུའོ། །དེ་ནས་མུན་པ་དང་བྲལ་པའི་སྐད་ཅིག་ལ་འོད་གསལ་བ་སྟེ། ཤིན་ཏུ་གསལ་བ་རྟག་ཏུ་སྣང་
བའི་མཚན་ཉིད་ཅན་དོན་དམ་པའི་བདེན་པའི་རང་གི་མཚན་ཉིད་ཡེ་ཤེས་ཀྱི་མིག་གིས་མཐོང་ངོ་། །ཞེས་ཕྱི་ནང་གི་མངོན་བྱང་གི་ཁྱད་པར་གསུངས་ཏེ། མངོན་པར་བྱང་ཆུབ་པའི་རིམ་པར་ནང་གི་མངོན་བྱང་མི་གསལ་བ་གསལ་བར་མཛད་པའོ། །ལུང་དེ་དག་གིས་ཐོ་
རངས་ལ་སོགས་པ་བཞི་ལ་ཡེ་ཤེས་དེ་དག་སྐྱེ་བར་སྟོན་པ་མིན་ཏེ། ལུགས་བཟློག་དང་ལུགས་མཐུན་གཉིས་གང་གིའང་སྐྱེ་རིམ་དང་མི་མཐུན་པས་སོ། །ཕྱིའི་ཞག་གཅིག་ལ་དུམ་བུ་བཞིར་བྱས་ནས་དེ་བཞི་སྟོང་པ་བཞིར་སྟོན་པའང་མིན་ཏེ། ཐོ་རངས་ཀྱི་དུས་
མཚམས་ལུས་ངག་ཡིད་གསུམ་དང་བྲལ་བར་བཤད་པ་མི་འགྲིག་པའི་ཕྱིར་དང་། དེ་ནི་བྱང་ཆུབ་སྐད་ཅིག་ཡིན་པར་བླ་མ་མཆོག་བཤད་རྣལ་འབྱོར་པ་ཉིད་ཡུལ། ཞེ་བཤད་པའི་མཚན་ཉིད་ཐོ་རངས་ཀྱི་ཐུན་ལ་མ་ཚང་བའི་ཕྱིར་རོ། །འོ་ན་ཐོ་རངས་ལ་སོགས་
6-7-7b


པ་བཞི་པོ་དེ་སྟོང་པ་བཞིའི་དཔེར་བཤད་པ་ཡང་གཞུང་གཉིས་ལས་མི་འཇུག་པས་སྟོང་པ་བཞི་དུས་མཚམས་བཞིར་བཤད་པ་ཇི་ལྟར་ཡིན་སྙམ་ན། །འདི་ནི་སྟོང་པ་བཞི་ཕྱི་རོལ་གྱི་དཔེའི་སྒོ་ནས་ངེས་པར་བྱེད་པ་དང་། ནང་གི་རྣལ་འབྱོར་བའི་ཏིང་ངེ་འཛིན་ལ་འཆར་ཚུལ་
གྱི་རྟགས་ཀྱི་སྒོ་ནས་ངེས་པར་བྱེད་པ་ལ། ཕྱི་དང་ནང་གི་མངོན་པར་བྱང་ཆུབ་པ་ཞེས་གསུངས་པས་ངེས་བྱའི་དོན་འོད་གསལ་ལ་ཕྱི་ནང་གཉིས་ཡོད་པའང་མིན་ལ། དབང་དུས་ཀྱི་སྟོང་པ་བཞི་ངོས་པའང་མིན་ཏེ། དབང་གསུམ་པ་ལ་བརྟེན་ནས་དགའ་བ་བཞི་བསྐྱེད་
ཟིན་པའི་འོག་ཏུ་འོད་གསལ་སྟོན་པའི་ཕྱིར་གསོལ་བ་བཏབ་ལ་དེའི་མན་ངག་སྟོན་པ་ཡིན་པའི་ཕྱིར་དང་། དབང་གསུམ་པ་བསྐུར་བ་ནི་འདིའི་གདམས་ངག་འཆད་པའི་སྔོན་འགྲོ་ཡིན་པའི་ཕྱིར་རོ། །དེས་ན་ཕྱིའི་མངོན་བྱང་གི་སྟོང་པ་བཞི་དབང་གསུམ་པ་ལ་བརྟེན་
ནས་སྐྱེས་པའི་ཡེ་ཤེས་ལ་འཆད་པ་མི་འཐད་དོ། །ཕྱིའི་དུས་བཞི་དཔེ་དོན་དུ་སྦྱོར་བ་གཞུང་གཉིས་ལས་སྐབས་འདིར་མ་བཤད་ཀྱང་། སྤྱོད་བསྡུས་ལས་དུས་ཚིགས་གཞན་གསུམ་གྱི་དུས་ཀྱི་ཉི་འོད་དང་ཟླ་འོད་དང་སྨག་གི་མུན་པས་ཁྱབ་པའི་
ནམ་མཁའ་དང་སྟོང་པ་གསུམ་དཔེ་དོན་དུ་སྦྱོར་བ་སེམས་དབེན་གྱི་སྐབས་སུ་བཤད་ལ། དེས་ཐོ་རངས་ཀྱི་དུས་དང་སྟོང་པ་བཞི་པ་དཔེ་དོན་དུ་སྦྱོར་བ་ཤེས་པར་ནུས་སོ། །དེས་ན་མཚན་མོ་སྣང་བའི་ཆ་སྟེ་གསལ་བ་ཉི་མའི་ཟེར་འགྱེད་སྣང་བ་མཆེད་པ་ཡིན། མཚམས་
ནི་སྣང་བ་ཐོབ་པ་རང་གི་རང་བཞིན་རྣམས་ཀྱིས་ལན་ཅིག་མིན་པར་འགྲོ། །ཞེས་པས་དུས་ཚིགས་གསུམ་དང་སྣང་བ་གསུམ་སྦྱར་ལ། མཚན་མིན་ཉིན་པར་མ་ཡིན་མཚམས་མ་ཡིན། །ཞེས་སོགས་ཀྱིས་ནི་སྟོང་པ་བཞི་པ་དང་ཐོ་རངས་སྦྱར་བ་ཡིན་ཏེ།
6-7-8a


མཚན་མོའི་མུན་པ་མ་ལུས་འདས་ཤིང་མཚམས་ཀྱི་སྣང་བ་གང་དུ་འདས་པ་དང་། ཇི་སྲིད་ཉི་མ་མ་ཤར་སྐད་ཅིག །ཅེས་གསུངས་པའི་ཕྱིར་རོ། །དེ་ལ་མཚམས་ཀྱི་སྣང་བ་ནི་ཉི་འོད་ནུབ་པའི་མཐའ་ནས་མཚོན་མོའི་ཐུན་གཉིས་པ་ལ་མ་
སློབ་པའི་བར་མཚམས་ཀྱི་མུན་པ་སྟེ། སྣང་མུན་གཉིས་ཀྱི་སྣང་བ་མིན་གི་དབང་པོ་ལ་སྣང་བ་ཙམ་མོ། །མཚན་མོའི་མུན་ནག་ནི་ཐུན་གཉིས་པ་ནས་ཐོ་རངས་ཀྱི་ཐུན་ལ་མ་སླེབ་ཚུན་ཆད་ཀྱི་མུན་པའོ། །དེ་གཉིས་གང་དུ་ཟད་ནས་ཉི་འོད་ཀྱི་སྣང་བས་མ་
སླེབ་པའི་བར་ནི་ཐོ་རངས་ཀྱི་ཐུན་ཡིན་ལ། དེ་ན་སྤྱོད་བསྡུད་ལས་ཐོ་རངས་ཀྱི་དུས་ངོས་བཟུང་བ་དང་དོན་གཅིག་གོ། །དེ་ལྟ་ན་ཉི་འོད་ཐོག་མར་སླེབས་ནས་མ་ནུབ་ཀྱི་བར་དང་དེ་ནུབ་ནས་སྨག་འཐུག་པོ་མ་སངས་ཀྱི་བར་དང་། དེ་སངས་ཏེ་ཟླ་འོད་ཤར་ནས་དེ་མ་ནུབ་
ཀྱི་བར་དུ་ནམ་མཁའ་དྲི་མ་མེད་པ་དེ་ཉི་འོད་དང་ཟླ་འོད་སྨག་གི་མུན་པས་ནོན་པའི་དབང་གིས་ནམ་མཁའི་རང་མདོག་ཇི་ལྟ་བ་བཞིན་མི་འཆར་བ་དང་འདྲ་བ་སྟོང་པ་གསུམ་གྱི་དུས་སུ་སེམས་ཀྱི་སྟོང་ཉིད་ཀྱི་ངང་ཚུལ་ཇི་ལྟ་བ་བཞིན་མི་འཆར་ལ། སྔར་བཤད་པ་ལྟར་
གྱི་ཐོ་རངས་ཀྱི་དུས་མཚམས་ལ་སྣང་བ་གསུམ་པོ་ཟད་པས་ནམ་མཁའ་གཡའ་དག་གི་རང་མདོག་ཇི་ལྟ་བ་བཞིན་དུ་འཆར་བ་བཞིན་དུ། སྣང་བ་གསུམ་དག་པའི་མཐར་ཅད་སྟོང་པའི་སྐད་ཅིག་དྲི་མ་མེད་པ་ལའང་སེམས་ཀྱི་དེ་ཁོ་ན་ཉིད་ཇི་ལྟ་བ་བཞིན་འཆར་
བར་འགྱུར་རོ། །ཕྱིའི་དཔེས་མཚོན་པ་དེ་བཞིན་དུ་ནང་དུའང་འཆར་བའི་ཚུལ་ངེས་པར་བྱེད་པ་ནི་ནང་གིའོ། །དེ་འབྱུང་བའི་རིམ་པ་ནི་དང་པོར་སྨིག་རྒྱུ་ལྟ་བུ་ལ་འོད་ཟེར་ལྔའི་ཚོགས་དང་ལྡན་པར་མཐོང་ཞེས་གསུངས་ནས། དུ་བ་དང་མཁའ་སྣང་དང་། མར་མེ་དང་སྤྲིན་
6-7-8b


མེད་པའི་ནམ་མཁའ་ལྟར་སྣང་བའི་རྟགས་བཞི་ལས་མ་བཤད་ཀྱང་། །རྒྱུད་ཕྱི་མ་ལས་འོད་གསལ་དུ་འཇུག་པའི་རྟགས་ལྔ་གསུངས་པས་རྟགས་གཞན་ཡང་དགོས་སོ། །དེའང་སྒྲོན་གསལ་ལས། ས་ཆུ་ལ་ཐིམ་པ་དང་། ཆུ་མེ་ལ་ཐིམ་པ་དང་། མེ་རླུང་ལ་ཐིམ་པ་དང་། རླུང་
ཀུན་ཏུ་སྣང་བ་གསུམ་དུ་སོང་བ་དང་། རང་བཞིན་རྣམས་ཀུན་ཏུ་སྣང་བ་ལ་ཐིམ་པས་རྟགས་ལྔ་འབྱུང་བར་བཤད་དོ། །དེ་ལ་རླུང་སྣང་བ་གསུམ་དུ་སོང་བ་ནི་རང་བཞིན་གཡོ་བྱེད་ཀྱི་རླུང་ལོག་ནས་སྣང་བའི་རླུང་ཙམ་དུ་སོང་བའོ། །དེ་ནས་རང་བཞིན་སྣང་བ་ལ་ཐིམ་པ་ནི། 
རང་བཞིན་བརྒྱད་ཅུའི་རྟོག་པ་ལོག་ནས་སྣང་བའི་ཡེ་ཤེས་ཙམ་དུ་སོང་བའོ། །སྤྲིན་མེད་པའི་ནམ་མཁའ་ནི་ནམ་མཁའ་གཡའ་དག་པ་བཞིན་དུ་སྣང་བའི་དཔེ་ཡིན་ལ། སྣང་བ་གསུམ་གའི་དུས་སུའང་ནམ་མཁའ་གཡའ་དག་བཞིན་དུ་སྣང་བར་འདྲའང་ཟླ་འོད་ལ་སོགས་
པ་གསུམ་གྱིས་ཁྱབ་པའི་ནམ་མཁའ་གཡའ་དག་བཞིན་དུ་སྣང་བས་ན། རྟགས་དེ་འོད་གསལ་ལ་སྦྱོར་མི་དགོས་སོ། །དེའི་ཕྱིར་རྟགས་ལྔ་ག་འོད་གསལ་སྔོན་དུ་འགྱུར་བའི་རྟགས་སུ་བྱའོ། །དེ་ལྟར་ན་ཟླ་བའི་འོད་ཟེར་ལྟར་སྣང་བའི་ཡེ་ཤེས་སྐྱེས་པའི་སྔོན་དུ་
རྟགས་བཞི་འཆར་བ་ཡིན་ལ། དེ་བཞི་སྤྱོད་བསྡུས་སུ་སྨིག་རྒྱུ་ལྟ་བུ་ལ་ཞེས་པས་གཅིག་ཏུ་བསྡུས་ནས་གསུངས་སོ། །འདི་ལྟར་སྨིག་རྒྱུ་ཞེས་པས་ནི་ས་ཆུ་ལ་ཐིམ་པའི་རྟགས་དཀར་སྔོའི་ཟེར་དང་ལྡན་པར་མཐོང་ངོ་། །ཆུ་མེ་ལ་ཐིམ་པ་ན་སྔོ་སྐྱ་དུ་བ་ལྟ་
བུའི་འོད་ཟེར་དང་ལྡན་པར་མཐོང་ངོ་། །མེ་རླུང་ལ་ཐིམ་པ་ན་སྲིན་བུ་མེ་ཁྱེར་ལྟ་བུར་དམར་པོའི་འོད་ཟེར་དང་ལྡན་པར་མཐོང་ངོ་། །རླུང་ཐིམ་པ་ན་མར་མེ་ལྟར་དམར་སེར་གྱི་འོད་ཟེར་དང་ལྡན་པར་མཐོང་ངོ་། །རྟགས་དང་པོ་གཉིས་ཀྱི་སྐབས་སུ་ནག་པོའི་འོད་ཟེར་
6-7-9a


ཡང་མཐོང་བས་ཟེར་ལྔའོ། །དེ་ནས་རང་བཞིན་ཐིམ་པའི་དུས་སུ་ཐོག་མར་ཟླ་འོད་ཀྱིས་ཁྱབ་པའི་ནམ་མཁའ་ལྟར་མཐོང་ལ། སྣང་བའི་སེམས་མཆེད་པའི་སེམས་བྱུང་ལ་ཐིམ་པ་ན་ཉི་འོད་ཀྱིས་ཁྱབ་པའི་ནམ་མཁའ་བཞིན་དང་། མཆེད་པ་
ཉེར་ཐོབ་མ་རིག་པ་ལ་ཐིམ་པའི་ཚེ། སྨག་འཐུག་པོས་ཁྱབ་པའི་ནམ་མཁའ་སྤྲིན་མེད་བཞིན་དུ་སྣང་བ་འབྱུང་ངོ་། །ས་ཆུ་ལ་ཐིམ་པ་སོགས་རྗེས་མཐུན་པ་ནི་བཞི་དུས་ཀྱི་ཕོ་མོ་སྦྱོར་བ་དང་གཉིད་དུ་འགྲོ་བའི་དུས་དང་བརྒྱལ་བ་ལ་སོགས་པའི་སྐབས་དང་། ལམ་
དུས་སུ་ཐོག་མར་དབང་གསུམ་པ་བསྐུར་བ་དང་། རྡོར་བཟླས་མན་ཆད་དུའང་འབྱུང་མོད་ཀྱང་། །མཚན་ཉིད་པ་ནི། གཞི་དུས་ཀྱི་འཆི་བའི་དུས་དང་། ལམ་དུས་སུ་སེམས་དབེན་ནས་བརྩམས་ཏེ་འབྱུང་བ་ཡིན་ནོ། །ས་ཆུ་ལ་ཐིམ་ཞེས་སོགས་ལ་འཇམ་དཔལ་
ཞལ་ལུང་ལས། ཕྱིན་ཅི་ལོག་ནི་ལྡོག་འགྱུར་ཏེ། །ཞེས་སོགས་ཀྱི་ས་ལོག་པ་དང་ཆུ་ལོག་པ་སོགས་ཀྱི་ཐ་སྙད་ཀྱང་མཛད་ལ། དེའི་དོན་རང་གི་ལུས་ཀྱི་སའི་ཁམས་ཀྱིས་རྣམ་ཤེས་ཀྱི་རྟེན་བྱེད་པའི་ནུས་པ་ལོག་ནས་དེས་རྣམ་ཤེས་ཀྱི་རྟེན་བྱེད་པའི་ནུས་པ་ཆུ་ལ་
འཕོས་པ་ལ་ས་ཆུ་ལ་ཐིམ་པ་ཞེས་གསུངས་ཏེ། མེ་རླུང་ལ་ཐིམ་པའི་བར་དུའང་དེ་བཞིན་ནོ། །རྣམ་གཞག་རིམ་པར་ས་ཐིམ་པ་དང་། ཆུ་ཐིམ་པ་སོགས་ཀྱི་ཐ་སྙད་ཀྱང་གསུངས་སོ། རླུང་ཐིམ་ཞེས་པའི་རླུང་ནི་ལུས་ཀྱི་རླུང་ནི་ལུས་ཀྱི་རླུང་གང་ཡིན་ལ་མི་བྱེད་ཀྱི་སྣ་བུག་དང་
མིག་ལ་སོགས་པའི་སྒོར་རྒྱུ་བའི་རླུང་རང་བཞིན་གྱི་རྟོག་པ་དངོས་སུ་གཡོ་བར་བྱེད་པ་རྣམས་ཀྱིས་རྣམ་ཤེས་ཀྱི་བཞོན་པ་བྱེད་པའི་ནུས་པ་ལོག་ནས་སྣང་བ་གསུམ་གྱི་བཞོན་པའི་རླུང་ཤིང་ཏུ་ཕྲ་བ་ལ་དེའི་ནུས་པ་འཕོས་པས་རླུང་སྣང་བ་ལ་ཐིམ་ཞེས་པའམ་
6-7-9b


དེར་སོང་ཞེས་གསུངས་སོ། །དེ་ལྟར་རྒྱུ་ལོག་པས་འབྲས་བུ་རྣམ་ཤེས་ཀྱི་རྟོག་པ་རྣམས་རེ་ཞིག་ལོག་པ་ནི་རང་བཞིན་ཐིམ་པ་ཡིན་ལ། རང་བཞིན་སྣང་བ་ལ་ཐིམ་པ་ནི། རང་བཞིན་གྱི་རྟོག་པས་ཡུལ་འཛིན་པའི་ནུས་པ་དེར་སོང་བའོ། །སྟོང་པ་བཞི་སྔ་མ་ཕྱི་མ་ལ་ཐིམ་
པའང་དེས་ཤེས་པར་བྱའོ། །ལུས་ཀྱི་ལ་སོགས་པ་དང་རྣམ་ཤེས་ཀྱི་རྟེན་དང་བརྟེན་པའི་འབྲེལ་པ་ལྡོག་པ་ནི་སྔོན་གྱི་ལས་ཉོན་གྱིས་འཕངས་པའི་འབྲེལ་པ་ཡིན་གྱི་རྣམ་སྨིན་གྱི་ལུས་དེ་ལ་སེམས་སྤྱིར་བརྟེན་པ་ཙམ་ནི་མིན་ལ། །དེའང་འབྲེལ་པ་རགས་པ་ལྡོག་
པ་སེམས་དབེན་ནས་ཡོད་པ། །ཕྲ་བ་འགོག་པ་ནི་འོད་གསལ་གྱི་སྐབས་འདི་ནས་འོང་ངོ་། །སྔོན་ལས་ཀྱི་སྟོབས་ཀྱིས་འཕངས་པའི་རྟེན་དང་བརྟེན་པའི་འབྲེལ་པ་ཕྲ་བ་བཀག་ཀྱང་། རྣལ་འབྱོར་པ་དེའི་རྣམ་སྨིན་གྱི་ལུས་ལ་སེམས་བརྟེན་པ་ཙམ་མི་འགལ་ལོ། །ཐབས་
གང་གིས་ཐིམ་པར་བྱེད་པ་ལ་ཕྱིའི་རྐྱེན་ཕྱག་དང་ནང་གི་རྐྱེན་རྡོར་བཟླས་དང་སེམས་དབེན་བསྒོམ་པའི་ཐབས་ནི་དེ་དག་གི་སྐབས་སུ་བཤད་ཟིན་ལ། རིམ་པ་འདིར་བཤད་པའི་ཐབས་ནི་འཆད་པར་འགྱུར་རོ། །དེ་ཁོ་ན་ཉིད་གྲུབ་པར་མིག་ལ་སོགས་པའི་དབང་པོ་
རྣམས་ཐིམ་པའི་དོན་རང་རང་གི་ཡུལ་ལ་འཇུག་པའི་བྱ་བ་བྱེད་པ་ལོག་པ་ལ་བཤད་ཅིང་། རྣམ་གཞག་རིམ་པར་ཡང་དེ་དག་ཐིམ་པ་ན་རང་གི་ཡུལ་ལ་མི་འཇུག་པར་གསུངས་བས་ས་ཆུ་ལ་ཐིམ་པ་སོགས་ཀྱི་དོན་ཡང་སྔར་བཤད་པ་བཞིན་དུ་ཤེས་པར་བྱའོ། །
འདིར་སྔ་མ་རྣམས་སྐུ་གསུང་ཐུགས་ཀྱི་རྡོ་རྗེའི་སེམས་དཔའ་གསུམ་ཐིམ་པའི་སྒོ་ནས་རྟགས་དང་རྟགས་ཅན་གྱི་རིམ་པ་སྤྱོད་བསྡུས་དང་མཐུན་པར་འཆད་ཅིང་། །དེ་དང་སྒྲོན་གསལ་གཉིས་མི་མཐུན་པར་འདོད་མོད་ཀྱང་མི་མཐུན་པར་མ་མཐོང་ངོ་། །ཕྱི་ནང་གི་
6-7-10a


དཔེ་དང་རྟགས་ཀྱི་རིམ་པའི་སྒོ་ནས་ངེས་པར་བྱས་པའི་འོད་གསལ་དེ་ཉིད་ཀྱི་ཁྱད་པར་སྟོན་པ་ནི། ཐ་མར་འབྱུང་དང་ཞེས་པ་བཞིས་ཐོག་མཐའ་བར་གསུམ་དུ་འབྱུང་མི་འབྱུང་གཉིས་ཀ་གསུངས་ཏེ། ཐོག་མཐའ་བར་གསུམ་ནི་སྣང་བ་
གསུམ་ཡིན་ལ། དེ་གསུམ་དག་པས་ན་མི་འབྱུང་བ་དང་ཁྱབ་བྱེད་ཀྱི་དངོས་གནས་འབྱུང་བར་ལཀྵྨཱིས་བཤད་དོ། །ཀྱཻ་རྡོར་ལས། ཡང་ན་ཀུན་གྱི་རྣམ་པར་སྤངས། །ཡང་ན་ཐམས་ཅད་བདག་ཉིད་གནས། །ཞེས་གསུངས་པ་དང་དོན་འདར་བས་ལེགས་པ་ཡིན་ནོ། །
དབུས་མིན་འབྱུང་ཞེས་པ་ནི་དབུས་སུ་མི་འབྱུང་བའོ། །མཐའ་མེད་འབྱུང་བ་མཐར་མི་འབྱུང་ཞེས་པའི་དོན་ཡིན་ཏེ་འགྱུར་གསར་བདེའོ། །དེ་ནས་གང་ལ་འགྲོ་བ་དང་ནི་ཞེས་པ་བཞིའི་དང་པོ་གཉིས་ནི་འགྲོ་འོང་ལྡང་འཇུག་ཡིན་ལ། ནིའི་སྒྲས་གནས་པ་བསྟན་
ཞིང་དེ་མེད་པར་བསྟན་པས་རྡོར་བཟླས་ལས་ཁྱད་པར་དུ་བྱེད། དེ་བཞིན་དུ་གཉིས་པས་རང་བཞིན་ཟད་པ་དང་སེམས་དབེན་གྱི་ཡེ་ཤེས་འཕེལ་བ་མེད་ཅེས་སེམས་དབེན་དང་། གསུམ་པས་ནི་དངོས་པོ་ཀུན་རྫོབ་པ་དང་དངོས་མེད་སྒྱུ་མ་སྟེ་དེ་གཉིས་
བཀག་པས་སྒྱུ་ལུས་ལས་ཁྱད་པར་དུ་བསྟན་ནོ། བག་ཆགས་དང་བཅས་པའི་རང་བཞིན་ཐིམ་པས་ངོ་མཚར་དང་། ཞི་བའི་བདག་ཉིད་ཡིན་པས་ངོ་མཚར་མིན་པ་དང་། གནས་པ་ནི་སྐྱེ་བ་དང་མྱུར་འགྲོ་ནི་འཇིག་པ་སྟེ་དེ་དག་མེད་པའོ་ཞེས་ལཀྵྨཱིས་གསུང་
ཡང་། གཉིས་ཚན་ལྔ་པོའི་སྤྲོས་པ་ཐམས་ཅད་ཀྱི་སྟོང་པ་ལ་བྱའོ། །དེ་ནས་གང་ཞིག་ཡོད་དང་ཞེས་པ་བཞི་ལ་རང་བཞིན་རྣམས་མེད་པས་ཡོད་པ་དང་བྲལ། འོད་གསལ་ཆོས་ཉིད་ཀྱི་རང་བཞིན་ཡིན་པས་མེད་པ་དང་བྲལ། འོད་གསལ་ལ་ཀུན་
6-7-10b


བྱང་མི་དམིགས་པས་བསོད་ནམས་དང་སྡིག་པའི་གཟུགས་མོན་པ་དང་དེ་གཉིས་ཀའི་ངོ་བོར་མེད་པས་བསོད་ནམས་སྡིག་གི་བདག་མིན་ཞེས་འཆད་དོ། །དང་པོ་གཉིས་ཀྱིས་ཡོད་མེད་ཀྱི་སྤྲོས་པའི་ཐ་སྙད་དང་བྲལ་བ་དང་། དེ་ནས་གཉིས་ཀྱིས་ལས་གཉིས་ཀྱི་འབྲས་བུའི་ངོ་བོར་
མེད་པ་དང་། དེ་ནས་གཉིས་ཀྱིས་ལས་གཉིས་ཀྱི་བདག་ཉིད་དུ་མེད་པར་བསྟན་ཏེ། འཁོར་བ་རྒྱུ་འབྲས་ཀུན་གྱིས་མ་གོས་པའོ། །གཉིས་པ་ན་དེ་ལྟའི་དེ་ཉིད་ཐོབ་པའི་རྣལ་འབྱོར་པ། །ཞེས་སོགས་ཚིགས་བཅད་གསུམ་གྱིས་འོད་གསལ་ཐོབ་པའི་རྣལ་འབྱོར་པའི་བསྔགས་
པ་སྟོན་ནོ། །གསུམ་པ་ནི། མན་ངག་ཐོབ་པ་ཞེས་གསུངས་ཏེ། སྤྱོད་བསྡུས་ལས་དེ་ལྟར་ཐམས་ཅད་སྟོང་པ་མངོན་དུ་བྱས་ནས་རིམ་པ་འདིས་བསམ་གཏན་རྣམ་པ་གཉིས་ལ་དམིགས་པར་བྱེད་དོ། །ཞེས་གསུངས་པའི་ཚིག་དང་པོའི་དོན་ནི་མན་ངག་ཐོབ་པའི་རྗེས་ཐོབ་ལ་
ཞེས་པའི་དོན་ཡིན་པས་ཐམས་ཅད་སྟོང་པའི་གདམས་ངག་ཐོབ་པ་ལ་དེ་མངོན་དུ་བྱས་ཞེས་བཏགས་པའོ། །སློབ་མས་རྣལ་འབྱོར་རྣམ་པ་གཉིས་བསླབ་པ་ནི་འོད་གསལ་མངོན་དུ་བྱེད་པའི་ཐབས་བསམ་གཏན་གཉིས་ཡིན་པས། འདིར་དབང་གསུམ་པ་བསྐུར་ནད་འོད་
གསལ་མངོན་དུ་བྱེད་པར་སྨྲ་བ་མིན་ནོ། །རིལ་འཛིན་ནི་མགོ་བོ་ཞེས་པ་བཞིས་སྟོན་ཏེ། །ལྟེ་བར་རྩིབས་བརྒྱད་པའི་འཁོར་ལོའི་དབུས་སུ་གནས་པའི་དབྱངས་དང་པོ་ལས་འཕྲོས་པའི་འོད་ཀྱིས་རྐང་པ་ནས་མགོ་བོའི་བར་དུ་བསྲེག་པ་དང་། སླར་ཡང་ལོག་ནས་སྙིང་
གའི་བར་དུ་མི་སྣང་བར་བྱས་པ་ལ་ལཀྵྨཱིས་འཆད་དོ། །མགོ་བོ་ནས་ནི་རྐང་པའི་བར། །ཞེས་པས་ནི་བསྡུ་བར་བྱ་བའི་ལུས་ཀྱི་ཡས་མས་ཀྱི་མཐའ་བསྟན་ལ། ཇི་སྲིད་སྙིང་གར་ཕྱིན་གྱི་བར། །ཞེས་པ་ནི། མགོ་ནས་སྙིང་ག་དང་། རྐང་པ་ནས་སྙིང་གར་སྡུད་པའི་ཚུལ་གྱིས་
6-7-11a


ཡང་དག་མཐའ་ལ་འཇུག་པར་བཤད་ན། སའི་དངོས་གཞིར་བཤད་པའི་འཆི་རིམ་དང་མཐུན་ནོ། །རིལ་པོ་དང་རྗེས་གཞིག་གཉིས་ནི་དུས་ཀྱི་དབང་དུ་བྱས་པ་ཡིན་པས་དུས་གཅིག་དང་དུས་རིམ་གྱི་སྒོ་ནས་རང་ཙམ་དང་རང་གཞན་གཉིས་
ཀ་སྡུད་པའོ། །རྗེས་གཞིག་ནི། མི་རྒྱུ་བ་དང་ཞེས་པ་བཞི་སྟེ། ཐོག་མར་སྣོད་བཅུད་གཞན་འོད་གསལ་དུ་བསྡུས་པའི་རྗེས་སུ་རང་འོད་གསལ་དུ་འཇུག་པའོ། །འོ་ན་སྤྱོད་བསྡུས་ལས་ཆུ་བོའི་ལྟེང་ཀའི་ཆུ་ལ་ཐིགས་པ་གཅིག་ཐིམ་པ་བཞིན་དུ་རིམ་གྱིས་རྗེས་སུ་གཞིག་
པར་གསུངས་པ་ཇི་ལྟར་ཡིན་སྙམ་ན། གང་གཞིག་པར་བྱ་དེ་ནང་ནས་ཕྱི་ལ་རིམ་པ་བཞིན་འཇིག་པའི་དོན་ཡིན་པས་སྐྱོན་མེད་དོ། །དབུགས་ཀྱི་རླུང་ནི་ཞེས་སོགས་ཀྱིས་ན་རིལ་འཛིན་ཚུལ་སྟོན་ཏེ་སྤྱོད་བསྡུས་ལས་རིལ་འཛིན་གྱི་སྡུད་ཚུལ་དེ་ལྟར་
གསུངས་པའི་ཕྱིར་ཏེ། འདི་ནི་གང་གཞིག་བྱ་དེ་མཐའ་ནས་ནང་དུ་སྡུད་པའི་རིམ་པའོ། །བསམ་གཏན་གཉིས་ཀྱིས་སྡུད་པའི་ཐབས་ནི། །ལཀྵྨཱིས་འཁོར་ལོའི་དབུས་ཀྱི་ཨ་ཡིག་གི་འོད་ཟེར་གྱིས་སྡུད་པར་བཤད་ལ། འཇམ་དཔལ་ཞལ་ལུང་ལས་སྙིང་གའི་ས་བོན་
གྱི་འོད་ཀྱིས་སྡུད་པར་བཤད་པ་ལྟར་འདིར་ཡང་བྱའོ། །དེའང་དམ་ཚིག་སེམས་དཔའ་ཡེ་ཤེས་སེམས་དཔའ་ལ་དང་། ཡེ་ཤེས་སེམས་དཔའ་ཏིང་ངེ་འཛིན་སེམས་དཔའ་ལ་སྡུད་ཅིང་དེ་རིམ་གྱིས་འོད་གསལ་དུ་སྡུད་པ་ཡིན་ལ། དེ་ནི་མཐར་སྙིང་ག་རུ་བསྡུས་
ནས་འོད་གསལ་དུ་འཇུག་པ་ཡིན་པས་སྙིང་གའི་གནད་ལེགས་པར་ཤེས་ན་འདི་འདྲ་བའི་གདམས་པ་རྣམས་ལ་ངེས་བརྙེད་པ་ཡིན་ནོ། །གཞུང་གཞན་ནས་རྗེས་གཞིག་གཅིག་པུ་བཤད་ལ། འདིར་ནི་གཉིས་གསུངས་པ་གདམ་ང་ཅན་ཡིན་པས་གཉིས་ཀ་ལ་
6-7-11b


སློབ་པའོ། །འདིར་འཆི་རིམ་བཞིན་དུ་སྤྲོས་པ་སྡུད་པའི་ཐབས་དང་པོ་ནི་རྡོ་རྗེའི་བཟླས་པ་ཡིན་ལ། དེ་ནས་ཕྱག་རྒྱ་ལས་ཡེ་ཤེས་གསུམ་མཚོན་པའང་ཕྱིའི་ཐབས་དང་། མཚོན་པའི་ཡེ་ཤེས་ལ་གོམས་པར་བྱེད་པས་ཀྱང་རླུང་དབུ་མར་སྡུད་པས་སྤྲོས་པ་སྡུད་པའི་ཐབས་སོ། །དེ་རྣམས་
སྔོན་དུ་འབྱོངས་པའི་རྒྱུ་མཚན་གྱིས་སྐབས་འདིར་ནི། བསམ་གཏན་གཉིས་ཀྱི་དམིགས་པ་ཉིད་ཀྱིས་ཡང་དང་ཡང་དུ་བསྡུད་པ་གོམས་པར་བྱེད་པའོ། །དེ་ལྟར་གོམས་པ་ལས་ས་ཆུ་ལ་ཐིམ་པ་སོགས་ཀྱི་རྟགས་རྣམས་འཆར་རོ། །འོད་གསལ་ལྷན་ཅིག་སྐྱེས་པའི་ཡེ་ཤེས་ལ་
བསྔགས་པ་དང་། དེ་ཉིད་ལ་གཙོ་བོར་གོམས་པར་བྱ་དགོས་པའི་ཚུལ་རྣམས་གཞུང་གཞན་ནས་མང་དུ་བཤད་ཀྱང་། ས་ཆུ་ལ་ཐིམ་པ་སོགས་གྱི་ཐིམ་རིམ་གྱི་སྒོ་ནས་སྤྲོས་པ་བསྡུས་ཏེ་འོད་གསལ་དུ་འཇུག་པ་དང་། དེའི་སྔ་རོལ་གྱི་རྟགས་འཆར་ཚུལ་དང་། ཕྱིའི་དཔེས་ངེས་
པར་བྱ་ཚུལ་དང་། སྣང་བ་གསུམ་དག་དགོས་ལུགས་དང་། དེ་ལྟར་སྡུད་པའི་ཐབས་རྩ་བ་རྡོར་བཟླས་ཀྱི་གནད་རྣམས་རྫོགས་ཤིང་གསལ་བ་དང་། ཐིམ་རིམ་གྱི་སྒོ་ནས་སྟོད་པ་གསུམ་ལ་ཞུགས་པའི་མཐར་སྒྱུ་མའི་སྐུ་སྒྲུབ་ལུགས་དང་། སྟོང་པ་བཞི་པའི་མཐར་ཟུང་འཇུག་
གི་སྐུ་སྒྲུབ་ལུགས་ནི། །འཕགས་སྐོར་གྱི་གཞུང་ལས་གཞན་དུ་ཆེས་ཆེར་མི་གསལ་བས། ལུགས་མཆོག་ཏུ་གྱུར་པ་འདི་ཤེས་པ་ལ་རག་ལས་པ་ཡིན་ནོ། །འགྲོ་དང་ཞེས་པ་བཞིས་ནི་བསམ་གཏན་ནམ་རྣལ་འབྱོར་དེ་ཉིད་འགྲོ་འཆག་སོགས་ཀྱི་སྐབས་སུའང་བྱ་བར་
བསྟན་ནོ། གཉིས་པ་ནི། རང་བཞིན་བཅས་འོད་དེ་དང་དེ། །ཞེས་པ་བཞིས་ནི་འོད་གསལ་ལས་ལྡང་ཚུལ་སྒྱུ་ལུས་དང་འདྲ་བར་སེམས་ཅན་གྱི་དོན་དུ་ལྡང་བར་བྱ་བར་བསྟན་ལ། ཇི་ལྟར་ཆུ་ཀླུང་ཞེས་པ་བཞིས་ནི་འོད་གསལ་ལས་ལྡང་བའི་དཔེ་བསྟན་ཏོ། །རིགས་ལྔའི་
6-7-12a


སངས་རྒྱས་བལྟོས་པ་ཞེས་པ་ནི། དེ་ལས་ལངས་པའི་སྐུའི་དབྱེ་བ་བསྟན་ཏོ། །འོ་ན་འདི་ཟུང་འཇུག་གི་སྐབས་སུ་བཤད་པར་བྱ་རྒྱུ་མ་ཡིན་ནམ་སྐབས་འདིར་འཆད་པ་ཇི་ལྟར་རིགས་ཤེ་ན། བདེན་མོད་ཀྱང་། འདིར་འོག་གསལ་ཀྱི་
མཉམ་རྗེས་གཉིས་ཀ་འཆད་པ་ཡིན་ལ། །དེ་ལ་འོད་གསལ་ལས་ལྡང་ཚུལ་ཤེས་དགོས་པས་དེའི་ཕྱིར་དུ་བསྟན་ནོ། །སྤྱོད་བསྡུས་ལས་མཉམ་གཞག་གི་འོད་གསལ་ནི་བཤད་ལ། སྐབས་འདིར་ལྡང་ཚུལ་མ་བཤད་པར་ཟུང་འཇུག་གི་སྐབས་སུ་བཤད་
པ་ཡིན་ནོ། །གསུམ་པ་ནི། ཕྱག་རྒྱ་འཆིང་བར་བྱེད་པའམ། །ཞེས་པ་བཞིས་ཕྱག་རྒྱ་འཆིང་ཞིང་སྔགས་ཟློ་བ་དང་། གང་དེ་ལས་གཞན་པའི་ལས་ཚོགས་ཐམས་ཅད་ཀྱང་། ཐམས་ཅད་སྟོང་པའི་ཏིང་ངེ་འཛིན་ལ་གནས་ནས་བྱེད་པར་བསྟན་ཏེ། འོད་གསལ་
ལས་ལངས་པ་དེས་བྱེད་ཚུལ་ལོ། །ཐམས་ཅད་ཟ་ཞིང་ཀུན་ལ་ལྟ། །ཞེས་པ་བཞིས་ནི་འོད་གསལ་གྱི་ཏིང་ངེ་འཛིན་ལ་གནས་པ་དེས་ཐམས་ཅད་ཟ་བ་སོགས་སུ་བསྟན་ཏོ། །ཐམས་ཅད་བྱེད་པ་ནི་འཇིག་རྟེན་དང་འགལ་མི་འགལ་གྱི་སྤྱོད་པ་ཐམས་ཅད་དོ། །མཚན་
མ་ཀུན་ནི་མགོ་རེག་ལ་སོགས་པ་ལ་འཆད་དོ། །ཐམས་ཅད་སྟོང་པའི་ཡེ་ཤེས་ལ་གནས་པ་ཉིད་ཀྱི་དངོས་གྲུབ་ཐམས་ཅད་འགྲུབ་བོ། །འདི་ནི་རྣལ་འབྱོར་མའི་རྒྱུད་ནས། ལྷན་ཅིག་སྐྱེས་པའི་ཡེ་ཤེས་ལ་གནས་པས་དེ་ལྟར་འགྲུབ་པར་གསུངས་པ་དང་པོར་
གཅིག་གོ། །འཕགས་སྐོར་ལྔའི་གཞུང་རྣམས་སུ་འབར་འཛག་གིས་བསྒྲུབས་པའི་ལྷན་ཅིག་སྐྱེས་པའི་བདེ་བའི་ཕྱོགས་མང་དུ་མ་བཤད་པར་འོད་གསལ་ཀྱི་ཐ་སྙད་ཀྱིས་བཤད་པ་ལ་ལུགས་འདིར་ནི་གཞུང་ནས་བཤད་པ་ལྟར་བདེ་བ་གཙོ་བོར་ལམ་དུ་བྱེད་
6-7-12b


པ་མ་ཡིན་ནོ་སྙམ་དུ་མི་གཟུང་སྟེ། སྔར་བཤད་པ་ལྟར་རླུང་གི་དེ་ཉིད་རྡོར་བཟླས་ཀྱིས་གཏུམ་མོའི་མེ་སད་པར་བྱེད་ཅིང་དེ་ལས་བྱང་ཆུབ་ཀྱི་སེམས་ཞུ་བའི་བདེ་བས་ལམ་འགྲོད་པར་རྡོ་རྗེ་ཕྲེང་བ་ལས་གསུངས་པའི་ཕྱིར་དང་། དཔལ་མགོན་པོ་བདེ་བ་ཆེན་པོས་ཀྱང་། ལྷན་
ཅིག་སྐྱེས་པའི་བདེ་སྟོང་དབྱེར་མེད་ཀྱི་ལམ་དེ་ཉིད་མངོན་པར་བྱང་ཆུབ་པའི་ལམ་ཡིན་པ་འདུས་པའི་དོན་དུ་ཤིན་ཏུ་རྒྱས་པར་གསང་བ་གྲུབ་པ་ལས་བཀྲལ་བའི་ཕྱིར་དང་། དེ་ཉིད་ལ་འཕགས་པ་ལྷས་ཀྱང་ཚད་མར་མཛད་པར་སྣང་བའི་ཕྱིར་རོ། །བཞི་པ་ནི། བྱང་ཆུབ་
སེམས་ནི་དོན་དམ་ཞེས་བྱ་བ། །སྐལ་བཟང་སློབ་མ་བཟང་པོ་མན་ངག་ཐོབ། །ཐལ་མོ་སྦྱར་ནས་མེ་ཏོག་འཛིན་པ་ཡིས། །བླ་མ་ལས་ནི་སླར་ཡང་བླང་བར་བྱ། །དེ་ནས་མངོན་པོ་ཀུན་དང་རྣམ་བྲལ་ཞེས་པ་ནས། སྟོང་པ་ཉིད་ཀྱི་རང་བཞིན་ནོ། །ཞེས་གསུངས་ཏེ་ཕྱི་མ་འདི་
འདུས་པའི་ལེའུ་གཉིས་པ་ལས་བྱུང་བའི་བྱང་ཆུབ་ཀྱི་སེམས་སྟོན་པའོ། །འདིའི་དོན་ནི་ལཀྵྨཱིས་བླ་མས་ཚིག་བཅད་དེ་བརྗོད་པའི་རྗེས་ཟློས་བྱས་ནས། བྱང་ཆུབ་ཀྱི་སེམས་འདི་ལྟ་བུ་བདག་གིས་གཟུང་བར་བྱའོ། །ཞེས་བརྗོད་ནས། དོན་དམ་པའི་བྱང་ཆུབ་ཀྱི་
སེམས་འཛིན་པར་བཤད་ཅིང་། བོད་ཀྱི་བླ་མ་ཁ་ཅིག་ཚིགས་བཅད་འདི་བླ་མས་བརྗོད་ནས་སློབ་མ་ལ་ཕྱག་རྒྱ་གཏད་པ་ཤེས་རབ་ཀྱི་དབང་དུ་འདོད་དོ། །རང་གི་ལུགས་ནི་སྤྱོད་བསྡུས་དང་བསྟུན་ནས་བརྗོད་ཟིན་ཏོ། །གསུམ་པ་ནི། དེ་ནས་རྗེས་སུ་མཐུན་པའི་ཡོན། 
ཞེས་པ་ཚིགས་བཅད་གཉིས་ཀྱིས་ཡོན་དབུལ་བ་བསྟན་ཏེ། སྤྱིན་པ་དང་སྦྱིན་པ་ཆེན་པོ་དང་། ཤིན་ཏུ་བའི་སྦྱིན་པ་གསུམ་མོ། །བཞི་པ་ནི། སློབ་དཔོན་ལས་ནི་དྲིན་ཐོབ་ཅེས་པ་རྐང་པ་བཞི་སྟེ། དང་པོ་གསུམ་གྱིས་དེ་ཁོ་ན་ཉིད་ཀྱི་མན་ངག་བླ་མ་ལས་ཐོབ་པ་དེ་
6-7-13a


བསྒོམས་པ་དང་། བཞི་པས་དེ་ལྟར་བསྒོམས་པའི་ཕན་ཡོན་བསྟན་ཏོ། །གསུམ་པ་འཇུག་གི་དོན་ནི། །མངོན་པར་བྱང་ཆུབ་པའི་རིམ་པ་ཞེས་སོགས་ཀྱིས་བསྟན་ནོ། །འདི་ནི་གཙོ་ཆེར་བཤད་རྒྱུད་རྡོ་རྗེ་ཕྲེང་བ་ལ་བརྟན་ནས་མཛད་པའོ།། །།མངྒལཾ། །
6-7-13b


empty page
6-8-1a


༄༅། །རིམ་ལྔ་བསྡུས་པའི་ཟིན་བྲིས། །
6-8-1b


༄༅༅། བླ་མ་རྗེ་བཙུམ་རྣམས་ལ་ཕྱག་འཚལ་ལོ། །དེ་ལ་སྤྱིར་མར་པ་ལྷོ་བྲག་པས་རྗེ་ནཱ་རོ་པའི་དྲུང་དུ། ལན་མང་དུ་བྱོན་ནས་གདམས་ངག་རྒྱ་ཚར་ཞུས་ལ། ཁྱད་པར་བར་པ་བྱོན་པའི་ཚེ་གདམས་ངག་
ཁྱད་པར་ཅན་བཞི་གནང་སྟེ། ཀྱཻ་རྡོ་རྗེ་ལ་བརྟེན་ནས་སྟོང་ཉིད་སྤར་ཟིན་གྱི་གདམས་ངག་བྱ་བ་གཏུམ་མོ་བསྒོམ་པའི་གདམས་དང་དང་། མཧཱ་མ་ཡའི་རྒྱུད་ལ་བརྟེན་ནས་རླུང་ཁ་སྦྱར་བསྒོམ་པའི་མན་ངག་བྱ་བ་ཐིག་ལེ་དཀར་དམར་
བསྒོམ་པའི་ཐབས་དང་། གདན་བཞིའི་རྒྱུད་ལ་བརྟེན་ནས་འཕོ་བ་གྲོང་འཇུག་གི་གདམས་ངག་དང་། དཔལ་གསང་བ་འདུས་པ་ལ་བརྟེན་ནས་རིམ་ལྔ་གདན་རྫོགས་ཀྱི་ཁྲིད་རྣམས་སོ། །དེ་ལ་ཕྱི་མའི་དོན་གཏན་ལ་འབེབས་པ་རྗེ་ནཱ་རོ་པས་
མཛད་པའི་རྡོ་རྗེའི་ཚིག་སྦྲམ་རིམ་པ་ལྔ་བསྡུས་གསལ་བ་ཞེས་བྱ་བ་འདི་ཡིན་ནོ། །འདི་ལ་གཉིས་ཏེ། གདམས་ངག་གི་ཆེ་བ་དང་། གདམས་པ་དངོས་སོ། །དང་པོ་ནི་སངས་རྒྱས་ཀུན་གྱི་གསང་བ་ཆེ། །རིམ་པ་ལྔ་ལ་གནས་པ་པོ། །
ཞེས་ཏེ། དུས་གསུམ་གྱི་སངས་རྒྱས་ཀུན་གྱི་བགྲོད་པ་གཅིག་པའི་ལམ་གསང་བ་བས་ཀྱང་ཆེས་གསང་བ་འཆད་པར་འགྱུར་བའི་རིམ་པ་ལྔ་པོ་འདི་ཉིད་ཡིན་ནོ། །གཉིས་པ་ལ་གཞི་ལམ་འབྲས་གསུམ་མདོར་བསྟན་པ་དང་། རྒྱས་
6-8-2a


པར་བཤད་པའོ། །དང་པོ་ནི། དངོས་པོའི་གནས་ལུགས་ལམ་དང་ནི། །འབྲས་བུ་སྐྱེ་བའི་རིམ་པའོ། །གཞི་རྡོ་རྗེ་ལུས་ཀྱི་ཆགས་ཚུལ་དང་། དེ་ལ་བརྟེན་པའི་སེམས་ཀྱི་ཆགས་ཚུལ་གཏན་ལ་དབབ་པ་
དང་། ལུས་ལ་གནད་དུ་བསྣུན་པ་ལ་བརྟེན་ནས་ལམ་ཇི་ལྟར་བགྲོད་པའི་རིམ་པ་དང་། འབྲས་བུ་ཟུང་འཇུག་གི་བར་དུ་ཇི་ལྟར་སྐྱེ་བའི་རིམ་པ་རྣམས་སོ། །གཉིས་པ་ལ་གཞི་ལུས་སེམས་ཀྱི་གནས་ཚུལ་དང་། ལམ་བགྲོད་པའི་རིམ་པ་དང་། འབྲས་
བུ་སྐྱེ་བའི་ཚུལ་ལོ། །དང་པོ་ལ། ལུས་སེམས་སོ་སོ་བའི་གནས་ལུགས་དང་། ཐུན་མོང་བའི་གནས་ལུགས་དང་། ལུས་ཀྱི་གནས་ལུགས་བྱེ་བྲག་ཏུ་བཤད་པའོ། །དང་པོ་ནི། དངོས་པོའི་གནས་ལུགས་གཉིས་ཡིན་ཏེ། །སེམས་དང་
ལུས་ཀྱི་གནས་ཐབས་ལས། །རགས་དང་ཕྲ་དང་ཤིན་ཏུ་ཕྲ། །ཞེས་པ་སོ་སོར་སྦྱར་ཏེ། ལུས་ཀྱི་གནས་ལུགས་རགས་པ་རྟེན་བརྟེན་པའི་ལྷ་སྐུར་འཆར་བའི་གཞི་ལུས་ཀྱི་ཕུང་ཁམས་སྐྱེ་མཆེད་ཙམ་དང་། ཕྲ་བ་རྩ་ཇི་ལྟར་སྐྱེ་བའི་གོ་
རིམ་དང་། གྲངས་ངེས་དང་། གནས་ཚུལ་དང་། དེའི་ནང་ནས་རླུང་ཇི་ལྟར་རྒྱུ་བའི་ཚུལ་དང་། དེ་ལ་བརྟེན་ནས་ཐིག་ལེ་དཀར་དམར་གྱི་འདུ་འཕྲོད་བྱེད་ཚུལ་སོགས་སོ། །ཤིན་དུ་ཕྲ་བ་ནི། སེམས་དང་འབྲལ་དུ་མི་རུང་བའི་འོད་གསལ་ཀྱི་
6-8-2b


རླུང་ཤིན་ཏུ་ཕྲ་བའོ། །སེམས་ཀྱི་གནས་ལུགས་རགས་པ་ནི། །རང་བཞིན་བརྒྱད་ཅུའི་རྣམ་པར་རྟོག་པ་རྣམས་དང་། ཕྲ་བ་ནི་གཞི་དུས་ཀྱི་སྣང་བ་གསུམ་དང་། ཤིན་ཏུ་ཕྲ་བ་ནི་གཞིའི་འོད་གསལ་ལོ། །ཡང་ན་བསྲེ་བ་དྲུག་གི་སྐབས་སུ་བཤད་པ་ལྟར་རྣམ་སྨིན་གྱི་ལུས་
དེ་ལྟར་གྱི་ཚེ་འདིའི་ལུས་དང་བག་ཆགས་ཀྱི་ལུས་རྨི་ལམ་གྱི་དུས་ཀྱི་དང་། ཡིད་ཀྱི་ལུས་བར་དོའི་ལུས་རྣམས་ལ་རགས་པ་དང་། ཕྲ་བ་དང་ཤིན་ཏུ་ཕྲ་བར་བྱས་ནས་ལུས་རྟེན་གྱི་དབང་གིས་དེ་ལ་བརྟེན་པའི་སེམས་གསུམ་གྱི་ཕྲ་རགས་ཀྱང་དབྱེ་བར་བྱའོ། །
གཉིས་པ་ནི། ཐུན་མོང་དབྱེར་མེད་རིམ་ཤེས་བྱ། །ཞེས་ཏེ། ཐ་མལ་པ་ནས་སངས་རྒྱས་ཀྱི་བར་དུ་འབྲལ་དུ་མི་རུང་བའི་རླུང་སེམས་ཕྲ་བའི་མཐར་ཐུག་པའོ། །གསུམ་པ་ལ་ལུས་ཀྱི་འཁོར་ལོ་བཞིའི་ཆགས་ཚུལ་བཤད་པ་དང་། གཙོ་བོ་སྙིང་གའི་འཁོར་
ལོ་བྱེ་བྲག་ཏུ་བཤད་པ་དང་། ལུས་ཀྱི་ཆགས་ཚུལ་ཤེས་པའི་ཕན་ཡོན་ནོ། །དང་པོ་ནི། གཉིད་དང་རྨི་ལམ་སྙོམས་འཇུག་པ། །ཐ་མལ་ལུས་དང་རྣམ་པ་བཞི། །འཁོར་ལོ་བཞི་ཡི་བདག་གཉིད་ཀྱི། །རྩ་དང་ཐིག་ལེ་སེམས་ཤེས་པས། །ལུས་དང་དུས་རླུང་ཡུལ་
གྱི་ནི། །གནས་ནི་བཞི་རུ་ཤེས་པར་བྱ། །ཞེས་ཏེ། །དེ་ལ་སྤྱིར་ལུས་ཀྱི་གནད་གང་དུ་རྩོ་འཁོར་ལོ་ཇི་ལྟར་གནས་པ་དང་། ཐིག་ལེ་དང་དེ་ལ་བརྟེན་པའི་སེམས་དུས་ནམ་གྱི་ཚེ་འཁོར་ལོ་གང་དུ་གནས་པའི་ཚུལ་ཤེས་པར་བྱས་སྟེ། རྨི་ལམ་མ་བྱུང་གོང་གི་
གཉིད་ཀྱི་དུས་སུ་སེམས་ཀྱི་རྟེན་དུ་འགྱུར་པའི་ཐིག་ལེ་སྙིང་གའི་འཁོར་ལོའི་ལྟེ་བར་གནས་ལ། རྨི་ལམ་གྱི་དུས་སུ་ཐིག་ལེ་དེ་མགྲིན་པའི་འཁོར་ལོའི་ལྟེ་བ་དང་། ཕོ་མོ་སྙོམས་འཇུག་བྱེད་པའི་དུས་སུ་བདེ་ཆེན་གྱི་འཁོར་ལོའི་ལྟེ་བ་དང་། དེ་ལས་གཞན་
6-8-3a


པའི་ལུས་ཐ་མལ་པའི་དུས་སུ་སྤྲུལ་པའི་འཁོར་ལོའི་ལྟེ་བར་གནས་སོ། །གཉིས་པ་ནི། དྲན་པ་སྣ་ཚོགས་རྟོག་པ་རྣམས། །སེམས་ལས་ཡང་དག་བྱུང་བས་ན། །རྣམ་ཤེས་སྲོག་ནི་འདུ་བའི་རྟེན། །སྙིང་གར་སྔགས་ཀྱི་འཁོར་
ལོ་བསྒོམ། །ཞེས་ཏེ། འཁོར་ལོ་བཞི་པོ་དེ་དག་ལས་ཀྱང་སྙིང་གའི་འཁོར་ལོའི་ལྟེ་བ་ཉིད་གཙོ་བོ་ཡིན་པས་དེའི་དབུས་སུ་མི་ཤིགས་པའི་ཐིག་ལེ་དང་། འདབ་མ་རྣམས་ལ་དབྱངས་གསལ་ཀྱི་ཡི་གེ་གསལ་བཏབ་ནས་བསྒོམ་པར་བྱ་སྟེ། གནས་དེ་
ཉིད་སྲོག་དེ་རླུང་དང་སེམས་གཉིས་ཐོག་མར་ཉིད་མཚམས་སྦྱོར་བའི་དུས་འདུ་བ་དང་། མཐར་འཆི་བའི་ཚེ་ཡང་གནས་དེ་ནས་ལུས་འདོར་བའི་ཕྱིར་རོ། །དེ་ལྟ་བུའི་རྟེན་ཡིན་པས་གཙོ་པོར་གནས་དེར་བསྒོམ་དགོས་པའི་རྒྱུ་མཚན་ནི། །སྙིང་གའི་
མི་ཤིགས་པའི་འཁོར་ལོ་ལ་བརྟེན་ནས་རླུང་གི་སེམས་གསུམ་རིམ་གྱིས་གཡོ་བ་ལ་བརྟེན་ནས་ཡུལ་སྣ་ཚོགས་དྲན་པའི་རང་བཞིན་བརྒྱད་ཅུའི་རྟོག་པ་རྣམས་འབྱུང་ལ། དེ་ལ་བསྟེན་ནས་འཁོར་བར་འཁོར་བར་འགྱུར་བས་སོ། །དེ་ལ་ཁ་ཅིག་གིས། །
འཁོར་ལོ་བཞི་པོའི་འདབ་མ་ལ་མི་ཕྱེད་མ་ལ་སོགས་པའི་རྩ་སུམ་ཅུ་རྩ་གཉིས་ཀྱི་བརྒྱད་བརྒྱད་སྦྱར་ནས་འཁོར་ལོ་རེ་ལ་རྩ་འདབ་བརྒྱད་བརྒྱད་ལས་མེད་ལ་འདབ་མ་དྲུག་ཅུ་རྩ་བཞི་སོགས་བཤད་པ་ནི། འདབ་མའི་ཀྱོག་བགྲངས་པ་ཡིན་ཏེ། དེའང་
ལྟེ་བའི་རྩ་འདབ་རེ་རེ་ལ་ཀྱོག་བརྒྱད་བརྒྱད་དང་། མགྲིན་པའི་ལ་གཉིས་གཉིས་དང་། །སྤྱི་བོའི་ལ་བཞི་བཞི་ཡོད་པ་ཡིན་ནོ། །ཞེས་ཟེར་བ་ནི་རྣམ་པ་ཐམས་ཅད་དུ་བྱར་མི་རུང་སྟེ། །རོ་རྐྱང་དབུ་མ་གསུམ་ཡང་རྩ་སོ་གཉིས་ཀྱི་གྲངས་སུ་གཏོགས་
6-8-3b


ལ། དེ་དག་འདབ་མར་བྱས་ན་འདབ་མ་གང་ལ་བརྟེན་པའི་གཞི་མེད་པར་འགྱུར་བས་སོ། །ཡང་མ་རྒྱུད་ཀྱི་ལུགས་ལ་སྤྲུལ་བའི་འཁོར་ལོ་གཙོ་བོ་ཡིན་ལ། ཕ་རྒྱུད་པའི་ལུགས་ལ་སྙིང་གའི་འཁོར་ལོ་གཙོ་བོ་ཡིན་ནོ། །ཞེས་ཟེར་བའང་ངེས་པ་མེད་
དེ། ལུས་ཐོག་མར་ཆགས་པའི་གཞི་སོ་སོར་འདོད་པ་ལ་བྱེད་ན་རྣམ་པ་ཐམས་ཅད་དུ་མི་རུང་ལ། ཐོག་མར་ལུས་ལ་གནད་དུ་བསྣུན་པའི་རྣལ་འབྱོར་བསྒོམ་པ་ལ་བྱེད་ནའང་ངེས་པ་མེད་དེ། །ནག་པོ་སྤྱོད་པའི་རིམ་པ་བཞི་པ་དང་། དྲིལ་བུ་པའི་རིམ་པ་ལྔ་
དང་། ཀུ་ཀུ་རི་པའི་མ་ཧཱ་མ་ཡའི་གདམས་ངག་རྣམས་སུ་སྙིང་གའི་འཁོར་ལོ་གཙོ་བོར་མཛད་པ་དང་། དུས་འཁོར་ནས་ལྟེ་བ་ལ་བཤད་པ་ནི་སྲོག་ཐུར་བསྲེ་བ་ལ་ཤེས་འདོད་ཞུགས་ནས་དེ་བསྲེ་བའི་གནས་ནི་ལྟེ་བ་ན་ཡོད་པས་ཡིན་ལ། ཌོམ་བི་ཧེ་རུ་ཀ་
ཡབ་སྲས་ཀྱིས། །ལྟེ་བའི་འཁོར་ལོ་ལ་མཛད་པ་ནི་གཏུམ་མི་ལ་རྩལ་དུ་འདོན་བཞེས་པ་ཡིན་ནོ། །གསང་བ་འདུས་པའི་ལུགས་གཉིས་ཀས་སྙིང་ག་གཙོ་བོར་བཞེད་པར་འདྲའོ། །གསུམ་པ་ནི། གཞི་ལམ་འབྲས་བུ་རབ་ཤེས་པས། །ལུས་དབེན་སྔགས་
དང་སེམས་གསུམ་གྱི། །སྒྱུ་མ་མངོན་པར་བྱང་ཆུབ་པས། །ཟུང་འཇུག་རིམ་པ་ཤེས་པར་འགྱུར། །ཞེས་ཏེ། གཞི་རྡོ་རྗེ་ལུས་ཀྱི་གནས་ལུགས་ལེགས་པར་ཤེས་ནས་དེའི་གཅོ་བོ་སྙིང་གའི་མི་ཤིགས་པའི་ཐིག་ལེ་ལ་བརྟེན་ནས་རྡོ་རྗེའི་བཟླས་པ་བྱས་
པས་ཁམས་རགས་པ་རྣམས་ཕྲ་བ་ལ་ཐིམ་རླུང་ཡང་རགས་པ་སེམས་གསུམ་ལ་ཐིམ་ཞིང་། སྣང་བ་འོད་གསལ་དུ་སྡུད་པའི་སེམས་དབེན་གྱི་རྟོགས་པ་སྐྱེ་ཚུལ་དང་དེ་ལས་སྟོང་པ་གསུམ་ལུགས་ལྡོག་ཏུ་ཤར་བའི་མཐར་སྒྱུ་མའི་སྐུ་འགྲུབ་ཚུལ་དང་།
6-8-4a


སྒྱུ་མ་ལ་བརྟེན་ནས་འོད་གསལ་མངོན་དུ་བྱེད་པའི་ཚུལ་དང་། ལུགས་ལྡོག་ཏུ་ཤར་བའི་སྟོང་པ་བཞིའི་མཐར་ཟུང་འཇུག་ཏུ་ལྡང་བའི་རིམ་པ་རྣམས་ཕྱིན་ཅི་མ་ལོག་པར་ཤེས་པར་འགྱུར་རོ། །གཉིས་པ་ལམ་འགྲོད་པའི་རིམ་པ་ལ། སྙིང་
གར་འཁོར་ལོ་བསྒོམ་པ་དང་། དེ་ལ་ཡི་གེ་ཇི་ལྟར་དགོད་པ་དང་། བཀོད་ནས་རྡོ་རྗེའི་བཟླས་པ་བྱ་བའོ། །དང་པོ་ནི། སྔགས་ཀྱི་ཞེས་པའི་རྐང་པ་བཞི་སྟེ། སྙིང་ག་ཆོས་ཀྱི་འཁོར་ལོའི་ལྟེ་བ་ལ་བརྟེན་པའི་འདབ་མ་བརྒྱད་པའི་ཕྱི་དང་ནང་དང་གསལ་བའི་ཚུལ་གྱིས་
སུམ་རིམ་དུ་བསམས་ཏེ། པད་འདབ་བྲིས་པ་ལྟ་བུ་མ་ཡིན་གྱི། །རྩའི་འདབ་མ་སྦུབས་ཅན་ནོ། །གཉིས་པ་ནི། ཕྱི་རིམ་ཞེས་པ་རྐང་པ་བརྒྱད་དེ། རྩ་འདབ་བརྒྱད་པ་སུམ་རིམ་ཡོད་པའི་འདབ་མ་ཕྱི་མའི་ཤར་གྱི་རྩ་སྦུབས་ཀྱི་ནང་དུ་ཡི་གེ་བསྒྲིགས་པའི་ཚུལ་གྱིས་
ཨ་ཨཱ་དང་། ལྷོའི་རྩ་འདབ་ལ་ཨི་ཨཱི་དང་། ནུབ་ཏུ་ཨུ་ཨཱུ་དང་། བྱང་དུ་ཨེ་ཨཻ་དང་། །ཤར་ལྷོར་ཨོ། ལྷོ་ནུབ་ཏུ་ཨཽ། ནུབ་བྱང་དུ་ཨཾ། བྱང་ཤར་དུ་ཨཿ ཡི་གེ་ཐམས་ཅད་ཁ་དོག་དཀར་པོ་ཐིག་ལེས་བརྒྱན་པ་བསམ་མོ། །འདབ་མ་བར་པའི་ཤར་དུ་ཀའི་
སྡེ་ཚན་གྱི་ཡི་གེ་ལྔ། དེ་བཞིན་དུ་ལྷོར་ཙ་སྡེ། ནུབ་ཏུ་ཊ་སྡེ། བྱང་དུ་ཏ་སྡེ། ཤར་ལྷོར་པ་སྡེ། ལྷོ་ནུབ་ཏུ་མཐར་གནས་ཀྱི་ཡི་གེ་བཞི། ནུབ་བྱང་དུ་དྲོ་བའི་ཡི་གེ་བཞི། བྱང་ཤར་དུ་པ་མཆུ་ཅན་དང་། ལྕེ་རྩ་ཅན་ནམ། ཡང་ན་ཀླ་བླ་ཤླ་རྣམས་བཀོད་པར་བྱའོ། །
ཡི་གེ་ཐམས་ཅད་ཁ་དོག་དམར་པོ་ཐིག་ལེས་བརྒྱན་པའོ། །འདབ་མ་ནང་མའི་ཤར་དུ་རྀ། ལྷོར་རཱྀ། ནུབ་ཏུ་ལྀ། བྱང་དུ་ལཱྀ། ཁ་དོག་ནག་པོ་ཐིག་ལེས་བརྒྱན་པ་དང་། རིམ་པ་གསུམ་གའི་ཡི་གེ་ཐམས་ཅད། བ་མོ་འཛག་པའི་རྣམ་པ་ཅན་དུ་བསམ་མོ། །
6-8-4b


གསལ་བྱེད་ཕྱི་རིམ་ལ་འགོད་པ་མི་འཐད་དེ། །ཡི་གེ་སུམ་རིམ་དུ་བཀོད་པ་ནི། སྣང་མཆེད་ཐོབ་གསུམ་གྱི་ལམ་སྐྱེ་བ་ལ་ཕན་དགོས་ལ། དབྱངས་ཡིག་གིས་ཤེས་རབ་སྣང་བ་མཚོན་པས་ཕྱི་རིམ་དུ་འཐད་པའི་ཕྱིར་རོ། །ཁ་ཅིག་དང་པོར་རྡོར་བཟླས་བྱས་ནས་དེའི་
རྗེས་སུ་ཡི་གེ་འགོད་པའང་མི་འཐད་དེ། །ཡི་གེ་བཀོད་ནས་དེའི་ནང་ནས་རྡོར་བཟླས་བྱ་དགོས་པ་ཡིན་ནོ། །སྙིང་གའི་ལྟེ་བའི་དབུས་སུ་ཐིག་ལེ་ཕྱེད་མན་ཆད་དམར་ཞིང་སྟོད་དཀར་པ་ཡུངས་ཀར་གྱི་འབྲུ་ཚོད་ཙམ་བསམས་ནས། དེའི་ནང་དུ་སྤུས་བྲིས་པ་ལྟ་བུའི་ཨ་ཐུང་
ཁ་དོག་ནག་པོ་འོད་ཟེར་ལྔའི་བདག་ཉིད་ཅན་བསམ་པར་བྱ་སྟེ། །དེས་ནི་ཕྲ་བའི་རླུང་སེམས་མཚོན་ལ། ཐིག་ལེས་ནི་རླུང་ནི་རླུང་སེམས་ཐོག་མར་གང་དུ་འཇུག་པའི་རྟེན་མཚོན་པ་ཡིན་ནོ། །འཁོར་ལོ་དེ་དག་གི་ནང་ནས་ཀྱང་སྙིང་གའི་འཁོར་ལོ་གཙོ་བོ་ཡིན་པའི་རྒྱུ་མཚན་
ནི་གཞི་སྐྱེ་ཤི་བར་དོ་གསུམ་འབྲས་བུ་སྐུ་གསུམ་དང་ཇི་ལྟ་བ་བཞིན་དུ་སྦྱར་ནས་བསྐྱེད་རྫོགས་གཉིས་ཀའི་སྐབས་སུ་བསྒོམ་པ་འདི་ཡབ་སྲས་ལྔ་གའི་བཞེད་པ་ལམ་གྱི་རྐང་གི་ཙོ་བོ་ཡིན་པར་ཤེས་པར་བྱ་བ་དང་། དེ་ལྟར་ཤེས་ནས་སྙིང་གའི་འཁོར་ལོ་
གཙོ་བོར་འགྱུར་བའི་ཚུལ་ལོ། །དང་པོ་ནི། རིམ་ལྔ་ལས། ཀུན་རྫོབ་བདེན་པ་སྒྱུ་མ་ཉིད། །ལོངས་སྤྱོད་རྫོགས་པའི་སྐུ་ཡང་དེ། །དེ་ཉིད་དྲི་ཟའི་སེམས་ཅན་གྱུར། །ཞེས་ཐ་མལ་པ་ལ་བར་དོ་འབྱུང་བའི་དོད་ལ་རྣལ་འབྱོར་པ་ལ་ལོངས་སྤྱོད་རྫོགས་པའི་སྐུ་འབྱུང་
བར་གསུངས་པ་དང་། སྤྱོད་བསྡུས་སུའང་རྨི་ལམ་གྱི་དཔེས་སྒྱུ་ལུས་མཚོན་པར་བྱས་ནས་གསུངས་པ་དང་། རྣམ་གཞག་རིམ་པར་ཡང་། བར་དོ་ལོངས་སྐུ་དང་སྦྱར་ནས་གསུངས་པའི་གནད་ཀྱིས་དེའི་གོང་གི་འཆི་བ་ཆོས་སྐུ་དང་སྦྱོར་བ་དང་། འོག་གི་སྐྱེ་བ་
6-8-5a


སྤྲུལ་སྐུ་དང་སྦྱོར་བར་ཤུགས་ཀྱིས་ཤེས་པ་དང་། མདོར་བྱས་སུ། །ལྷག་མོས་འོད་གསལ་དུ་འཇུག་པའི་སྐབས་སུ། མྱ་ངན་འདས་བཅས་ཀུན་སྟོང་དང་། །ཆོས་ཀྱི་སྐུར་ཡང་བཤད་པ་ཡིན། །ཞེས་འཆི་བ་ཆོས་སྐུ་དང་སྦྱར་
ནས་གསུངས་ཤིང་། དང་པོའི་མགོན་པོ་བར་དོ་དང་སྦྱར་ནས་སྐྱེ་བ་ལེན་པའི་དོད་དེ་ཉིད་སྤྲུལ་སྐུར་བསྒྱུར་བར་གསུངས་པའི་ཕྱིར་དང་། སྤྱོད་བསྡུས་སུའང་། ཇི་ལྟར་ཕྱོགས་བཅུར་བཞུགས་པའི་རྒྱལ་དབང་པོ། །དེ་ཡི་སྐུ་ལ་རྐང་རུས་ཤ་མེད་ཀྱང་། །སེམས་
ཅན་ཕན་ཕྱིར་ཁམས་ལ་འཇུག་མཛད་ཅིང་། སྤྲུལ་པའི་སྐུ་ཡི་བྱ་བ་མཛད་པ་ཡིན། །ཞེས་སྐྱེ་བ་སྤྲུལ་སྐུ་དང་སྦྱར་ནས་གསུངས་པའི་ཕྱིར་དང་། རྒྱས་པར་རྣམ་གཞག་རིམ་པ་ལས་འཆི་བ་དང་བར་དོ་ཆོས་ལོངས་གཉིས་དང་། སྐྱེ་བ་སྤྲུལ་སྐུ་དང་
སྦྱར་ནས་གསུངས་སོ། །བླ་མ་སྔ་མ་ཁ་ཅིག་གི་གདམས་ངག་ལས། སྐྱེ་ཤི་བར་དོ་གསུམ་སྐུ་གསུམ་དུ་བྱེད་པའི་ཐ་སྙད་སྣང་ཡང་འཆི་བ་ཆོས་སྐུར་བྱེད་པའི་ཚེ་འཆི་བ་མཚན་ཉིད་པ་ཞིག་གཞིར་བཞག་གི་དབང་དུ་མཛད་པ་ནི་ལམ་གྱི་རྐང་སྟོར་བ་ཡིན་
ཏེ། གདུལ་བྱའི་གཙོ་བོ་ནི་རིམ་པོ་ཆེ་ལྟ་བུའི་གང་ཟག་ཚེ་དེ་ལ་འཚང་རྒྱ་བའི་དབང་དུ་བྱས་པ་ཡིན་ལ། དེས་ནི་འཆི་བ་མཚན་ཉིད་པ་མ་བྱུང་བའི་གོང་དུ་སྐྱེ་ཤི་བར་དོ་གསུམ་དང་རྣམ་པ་འདྲ་བའི་སྐུ་གསུམ་གྱི་གོ་འཕང་མངོན་དུ་བྱེད་པའི་ཕྱིར་རོ། །དེས་ན། 
དམ་ཚིག་ཁུ་བྱུང་ཆོ་ག་བཞིན། །འབྲས་བུ་འདོད་པས་བཏུང་བར་བྱ། །དེ་བཞིན་གཤེགས་པའི་ཚོགས་བསད་ན། །དངོས་གྲུབ་རབ་མཆོག་ཐོབ་པར་འགྱུར། །ཞེས་སོགས་ཀྱི་དོན། །ལེ་ལོ་ཅན་བར་དོར་འཚང་རྒྱ་བ་ཁོ་ན་ལ་སྦྱོར་བ་ནི། །ཕྱིན་ཅི་ལོག་ཏུ་
6-8-5b


ཤེས་པར་བྱའོ། །དེས་ན་སྦྱང་གཞི་ཟག་གཅིག་གི་རྒྱུད་ཀྱི་སྐྱེ་ཤི་བར་དོ་ཚན་པ་གཅིག་སྦྱོང་བ་ལ་བསྐྱེས་རྫོགས་གཉིས་ཀའི་སྐབས་སུ་སྦྱང་གཞི་གསུམ་དང་། འབྲས་བུའི་སྐུ་གསུམ་དང་། རྣམ་པ་རྗེས་སུ་མཐུན་པའི་ལམ་བསྒོམ་པར་བྱ་སྟེ། དེ་ལ་
དང་པོར་བསྐྱེད་རིམ་གྱི་སྐབས་སུ། དངོས་པོ་མེད་པས་བསྒོམ་པ་མེད། །ཅེས་པ་ནི། ཚིགས་བཅད་འདི་ཡིས་རྒྱུ་མི་རྒྱུའི་བདག་ཉིད་ཅན་རྣམས་སྟོང་པར་བསྒོམ། །ཞེས་གསུངས་པ་ལྟར། །སྲུང་འཁོར་འོད་གསལ་དུ་སྡུད་པའི་དུས་སུ་བཅུད་ཀྱང་སྟོང་པར་
བསྒོམ་དགོས་མོད་ཀྱི། །གཙོ་བོ་ནི་སྣོད་ཞིག་པ་དང་ཆོས་མཐུན་བསྒོམ་པ་ཡིན་ནོ། །དེ་ནས་རྟེན་གཞལ་ཡས་ཁང་བསྒོམ་པ་ནི། །སྣོད་ཆགས་པ་དང་ཆོས་མཐུན་པར་བསྒོམ་པ་ཡིན་ལ། དེ་ནས་བཅུད་ཆགས་པའི་ཐོག་མ་བསྐལ་པ་དང་པོའི་མི་བརྫུས་
ཏེ་སྐྱེས་པ་དང་ཆོས་མཐུན་པར་ལྷག་མོས་ཀྱི་ལྷ་བསྒོམ་པ་ཡིན་ནོ། །དེ་ནས་བསྐལ་པ་དང་པོའི་མི་རིམ་གྱིས་ཤི་བ་དང་ཆོས་མཐུན་པར་ལྷག་མོས་འོད་གསལ་དུ་སྡུད་པ་ནི། སྦྱང་གཞི་ལ་བལྟོས་ཏེ་འཆི་བ་དང་། འབྲས་བུ་ལ་བལྟོས་ཏེ་ཆོས་སྐུ་དང་
རྗེས་སུ་མཐུན་པར་བསྒོམ་པ་ཡིན་ལ། དེའང་སྔར་དྲངས་པའི་དམ་ཚིག་ཁུ་བྱུང་ཆོ་ག་བཞིན་ཞེས་སོགས་སོ། །མདོ་བསྲེ་ལས། ཕུང་སོགས་འོད་གསལ་དུ་བསྡུས་པའི་སྐབས་ལ་སྦྱར་བ་དང་། སྤྱོད་བསྡུས་སུ་སྤྱོད་པ་ལ་སྦྱར་ཞིང་། སྒྲོན་གསལ་
དུ། ལེ་ལོ་ཅན་བར་དོར་འཚང་རྒྱ་བ་དང་། རྣམ་གཞག་རིམ་པར། ཕུང་སོགས་དོན་དམ་པའི་དཀྱིལ་འཁོར་དུ་བཞུགས་པ་ལ་སྦྱར་བས་ཀུན་ལ་སྦྱར་དུ་རུང་བ་ཡིན་ནོ། །ལྷག་མོས་ཀྱི་སྐབས་འདིར་ནི་རྣལ་འབྱོར་པའི་ཕུང་སོགས་དང་། ལྷ་གཉིས་ཀ་
6-8-6a


འོད་གསལ་དུ་འཇུག་རྒྱུ་ཡིན་པས་ལྷ་འོད་གསལ་དུ་སྡུད་པའི་དུས་སུ་རང་གི་ཕུང་སོགས་འོད་གསལ་དུ་ཞུགས་པའི་དོན་ལེགས་པར་དྲན་པར་བྱས་སྟེ། འདི་ནི་རིམ་པ་གཉིས་པའི་སྐབས་ཀྱི་སྒྱུ་ལུས་དང་ཟུང་འཇུག་མངོན་དུ་བྱེད་
པའི་གོང་དུ་སྟོང་པ་གསུམ་དང་། གཞིའི་ཡེ་ཤེས་བསྒོམ་པའི་དུས་སུ་ས་ཆུ་ལ་ཐིམ་པ་སོགས་ཀྱི་རྫོགས་རིམ་སྐྱེ་བའི་རྒྱུད་སྨིན་བྱེད་ཡིན་པའི་ཕྱིར་རོ། །སྐབས་འདིར་ཕུང་སོགས་ལྔ་རིམ་གྱི་ཐིམ་པར་བཤད་པ་དང༌། རིམ་པ་གཉིས་པའི་
སྐབས་སུ་ས་ཆུ་ལ་ཐིམ་པ་སོགས་བཤད་པ་ནི། །རྣམ་སྣང་དང་། རིན་འབྱུང་དང་། འོད་དཔག་མེད་དང་། དོན་ཡོད་གྲུབ་པ་དང་། མི་བསྐྱོད་པའི་རིགས་སུ་གཏོགས་པའི་བསྒོམ་རྒྱུ་རྣམས་རིན་པ་བཞིན་དུ་ས་དང་ཆུ་དང་མེ་དང་རླུང་དང་རྣམ་ཤེས་ཀྱི་ཁམས་
ལྔར་འདུས་པར་གསུངས་པས་ཕུང་སོགས་ལྷ་སོ་གཉིས་སུ་བསྒོམས་པས་ནི་ཁམས་ལྔ་སྦྱངས་ནས་དེ་དག་འོད་གསལ་དུ་རིམ་གྱིས་འཇུག་པའི་དོན་ནོ། །འོད་གསལ་དུ་བཅུག་པ་དེ་བརྟན་པར་བྱ་བའི་དོན་དུ་སྔགས་བརྗོད་པར་ཡང་གསུངས་ཤིང་། 
རྣམ་གཞག་རིམ་པར། ཨོཾ་ཞེས་པ་ནི་གཅིག་དང་ལྡན། །ཞེས་པ་ནས། རུག་པ་ཨ་ཧཾ་ཞེས་སུ་བརྗོད། །ཅེས་པའི་བར་རྐང་པ་དྲུག་གིས་སྔགས་ཚན་པ་དྲུག་ཏུ་བཅད་ལ། དེ་ལྟར་དེ་བཞིན་གཤེགས་པ་དྲུག །སྐྱེ་བོ་མཆོག་ལ་བསྟན་པ་ཡིན། །
ཞེས་པས་ནི། དྲུག་པོ་དེ་རིགས་དྲུག་ཡིན་པར་བསྟན་ཞིང་། སྔར་བཤད་པ་ལྟར་དང་པོ་ལྔས་རིགས་ལྔ་འོད་གསལ་དུ་ཞུགས་པར་བསྟན་པ་ལ། དྲུག་པ་ནི། འོད་གསལ་དུ་ཞུགས་པ་དེ་ཉིད། རྡོ་རྗེ་འཆང་དུ་ང་རྒྱལ་བྱ་བ་དང་། དྲུག་པའང་འོད་
6-8-6b


གསལ་དུ་འཇུག་རྒྱུར་ཡང་གཟུང་སྟེ། གཙོ་བོ་རྡོ་རྗེ་འཆང་འོད་གསལ་དུ་གཞུག་པར་བྱ་བ་ཡིན་པའི་ཕྱིར་རོ། །གཙོ་བོ་འོད་གསལ་དུ་འཇུག་པའི་ཚེ། མགོ་བོ་ནས་ནི་རྐང་པའི་བར། །ཇི་སྲིད་སྙིང་གར་ཕྱིན་གྱི་བར། །ཞེས་གསུངས་པ་ལྟར། གཙོ་བོ་རྡོ་རྗེ་འཆང་
གི་ཞབས་ནས་རིམ་གྱིས་ཐུགས་ཀའི་བར་འོད་གསལ་དུ་བསྡུས། །དེ་ནས་དབུ་ནས་འོད་གསལ་དུ་བསྡུས་ནས་མཐར་ཐུག་གི་བར་དུ་བསྡུས་པར་བསམ་སྟེ། སྦྱང་གཞི་ཐ་མལ་པ་འཆི་བའི་ཚེ་ལུས་ཀྱི་སྟོད་སྨད་ནས་དྲོད་བསྡུས་ནས་ཐ་མར་སྙིང་ག་ནས་འཆི་
འཕོ་བའི་ཕྱིར་དང་། བསྐྱེད་རྫོགས་གཉིས་ཀའི་སྐབས་སུ། འོད་གསལ་དུ་འཇུག་པ་དེ་དང་རྗེས་སུ་མཐུན་པར་བསྒོམ་པ་ཡིན་པའི་ཕྱིར་རོ། །འོད་གསལ་ཀྱི་ངང་ནས་མངོན་བྱང་ལྔའི་སྒོ་ནས་དང་པོའི་མགོན་པོ་བསྒོམ་པ་དང་། དེ་སྤྲུལ་སྐུར་བསྒྱུར་བ་ནི་
བར་དོ་དང་། སྐྱེ་བ་དང་ཆོས་མཐུན་པར་བསྒོམ་པ་ཡིན་ནོ། །ཕྱག་རྒྱ་འདུ་བྱ་བའི་སྐབས་སུ་མདོ་བསྲེ་ལས། ཇི་ལྟར་བཅོམ་ལྡན་འདས་ཀྱི་བྱང་ཆུབ་ཀྱི་གོ་འཕང་ནི་འདོད་ཆགས་ལས་སྐྱེ་བ་རབ་ཏུ་བསྟན་པའི་ཕྱིར། ལེའུ་དང་པོར་འདོད་ཆགས་ཆེན་པོའི་
ཚུལ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པར་མཛད་པ་དེ་བཞིན་དུ་བསྐྱེད་བཞིན་པ་ལ་གནས་པས་ཀྱང་དང་པོར་སྦྱོར་བ་བྱ་སྟེ། །ཞེས་གསུངས་པའི་བྱང་ཆུབ་ཀྱི་གོ་འཕང་ནི་སྔར་བཤད་པ་ལྟར། སྐྱེ་ཤི་བར་དོ་གསུམ་དང་ཆོས་མཐུན་པར་བསྒོམས་
པའི་འབྲས་བུ་སྐུ་གསུམ་ཡིན་ལ། དེ་འདོད་ཆགས་ལས་སྐྱེ་བར་བསྟན་པའི་དོན་ནི། ས་ཆུ་སོགས་རིམ་གྱིས་ཐིམ་ནས་འོད་གསལ་དུ་འཇུག་པ་ལ་རྫོགས་རིམ་གྱི་སྐབས་སུ་ཕྱིའི་རྐྱེན་ཕྱག་རྒྱ་དང་ནང་གི་རྐྱེན་རླུང་གཉིས་ཡོད་པས་དེའི་རྒྱུད་སྨིན་པར་བྱེད་པ་
6-8-7a


ལ་བསྐྱེད་རིམ་པས་ཀྱང་ཕྱག་རྒྱ་འདུས་བྱས་ནས་མཁའ་གསང་བྱིན་གྱིས་བརླབ་པ་སོགས་བསྒོམ་དགོས་པར་གསུངས་པ་ཡིན་ནོ། །ཕྱི་ནང་གི་རྐྱེན་གཉིས་ནི་ལེའུ་དང་པོའི་གཟུངས་དཀྱིལ་སྤྲུལ་པའི་སྐབས་སུ། དགོངས་པ་ལུང་
སྟོན་ལས། དེ་ནས་དེ་བཞིན་གཤེགས་ཀུན་དང་། །དེ་བཞིན་བྱང་ཆུབ་སེམས་དཔའ་རྣམས། །དེ་བཞིན་གཤེགས་པའི་བདག་པོ་དེ། བརྙེས་པའི་ཕྱིར་ནི་ཞུགས་པར་གྱུར། །སྲོག་དང་ཐུར་སེལ་གྱེན་རྒྱུ་དང་། །ཁྱབ་དང་མཉམ་གནས་ཞེས་བཤད་
དང་། །ཀླུ་དང་རུས་སྦལ་རྩངས་པ་དང་། ལྷ་སྦྱིན་དང་ནི་གཞུ་ལས་རྒྱལ། །དེ་དག་བདག་གཟུགས་བུད་མེད་དུ། །སླར་ཡང་སྤྲུལ་པར་མཛད་པ་ཡིན། །ཞེས་ལེའུ་དང་པོ་ལས་དེ་བཞིན་གཤེགས་པ་རྡོ་རྗེ་རྣམ་པར་སྣང་མཛད་ཆེན་པོ་འདོད་
ཆགས་ཆེན་པའི་ཚུལ་གྱི་ཏིང་ངེ་འཛིན་ལ་སྙོམས་པར་ཞུགས་ནས་སྔར་སྤྲུལ་པའི་དེ་བཞིན་གཤེགས་པ་ཐམས་ཅད་ཉིད་ཀྱི་སྐུ་ལ་ཞུགས་པར་མཛད་ནས་སླར་ཡང་བུད་མེད་ཀྱི་གཟུགས་སུ་སྤྲུལ་ནས་སྐུ་ལ་བྱུང་བར་གྱུར་ཏེ། གཤེགས་
མ་བཞི་དང་། རྡོ་རྗེ་མ་ལྔ་སྟེ། དགུ་བྱུང་བའི་ལྷ་མོ་དགུ་རླུང་དགུ་དང་སྦྱར་བར་མཛད་པའི་དོན་ནི། །ལྷ་མོའི་གཟུགས་སུ་སྤྲུལ་བ་ན་སེམས་དབེན་གྱི་རྟོགས་པ་བསྐྱེད་པ་ལ་སོགས་པའི་ཕྱིའི་རྐྱེན་སྟོན་པ་ཡིན་ལ། དེ་དག་རླུང་དང་སྦྱར་བ་ནི་
རྡོར་བཟླས་ལ་བརྟེན་ནས་ནང་གི་རྐྱེན་རླུང་ལས་རུང་དུ་བྱེད་པའི་ཐབས་སྟོན་པ་ཡིན་ནོ། །གཉིས་པ་སྙིང་གའི་འཁོར་ལོ་གཙོ་བོར་གྱུར་པའི་ཚུལ་ནི། འཆི་བའི་དུས་ཀྱི་ཕུང་སོགས་རིམ་གྱིས་བསྡུས་ནས་འཆི་བའི་འོད་གསལ་མངོན་དུ་བྱ་
6-8-7b


སྟེ། མཐར་ལུས་འདོར་ས་སྙིང་ག་དང་། ཐོག་མར་རྣམ་ཤེས་གང་དུ་འཇུག་པའང་སྙིང་ག་ཡིན་ལ། དེ་དང་རྗེས་སུ་མཐུན་པར་རྣལ་འབྱོར་པས་ལམ་དུས་ཀྱི་སྟོང་པ་བཞིའི་ཡེ་ཤེས་མངོན་དུ་བྱེད་པ་ཡིན་ལ། དེ་མངོན་དུ་བྱེད་པའི་རྐྱེན་གྱི་གཙོ་
བོ་ཡང་ཕྱིའི་ཕྱག་རྒྱ་ལ་བརྟེན་པ་དང་། ནང་གི་རླུང་ལས་རུང་དུ་བྱེད་པ་གཉིས་སོ། །ཕྱི་མ་ནི་རྡོ་རྗེའི་བཟླས་པ་ཉིད་ཀྱི་སྒོ་ནས་ཡིན་ལ་དེ་ནི་སྙིང་གའི་མི་ཤིགས་པའི་ཐིག་ལེ་ལ་བརྟེན་ནས་བྱེད་པ་ཡིན་ཏེ་འཆད་པར་འགྱུར་རོ། །དེ་ལ་བླ་མ་སྔ་མ་ཁ་
ཅིག་གིས་འབྱུང་འཇུག་ལ་བརྟེན་པའི་རྡོར་བཟླས་རྟགས་ལྔ་ཤར་གྱི་བར་དུ་བྱས་ནས་ཧཱུཾ་གིས་འོག་རླུང་སྙིང་གའི་ཐིག་ལེ་ལ་ཡར་ཐེན། ཨོཾ་གྱིས་སྟེང་རླུང་མར་བསྣན་ནས་སྙིང་གའི་ལྟེ་བར་རླུང་ཁ་སྦྱོར་བསྒོམ་པ་རྡོར་བཟླས་དངོས་དང་། སྔ་མ་དེའི་ཡན་
ལག་ཙམ་དུ་འདོད་པ་ནི་ཀླུ་སྒྲུབ་ཡབ་སྲས་ཀྱི་དགོངས་པ་མ་ཡིན་ཏེ། མིང་རྡོར་བཟླས་སུ་བཏགས་ཀྱང་དོན་བུམ་པ་ཅན་དུ་སོང་བས་རྡོར་བཟླས་གཅིག་པུས་སེམས་དབེན་གྱི་རྟོག་པ་བསྐྱེད་ནུས་པས་དེ་མཚན་ཉིད་ཚང་བར་བསྒོམས་ན་བུམ་པ་ཅན་
དང་། ལུས་ཀྱིས་ཚིགས་ལ་བརྟེན་ནས་དགའ་བཞིའི་དགོས་པ་བསྐྱེད་པའི་ཚུལ་ལ་སོགས་པ་རྣམས་བྱ་མི་དགོས་པར་རྩ་རྒྱུད་དང་། བཤད་རྒྱུད་རྡོ་རྗེ་ཕྲེང་བ་རྣམས་སུ་རྒྱས་པར་གསུངས་པའི་ཕྱིར་རོ། །སེམས་དབེན་གྱི་རྟོགས་པ་བསྐྱེད་པའི་ཚུལ་
ཡང་དང་པོར་རྡོར་བཟླས་འབྱུང་འཇུག་ལ་བརྟེན་པ་ཉི་ཤུ་རྩ་ཤས་རེ་ཙམ་བྱས་ནས་དེའི་རྗེས་སུ་སྔར་བཤད་པའི་རྩ་འདབ་ཐ་མ་ཡི་གེ་དང་བཅས་པ་ལ་རླུང་ཁ་སྦྱར་བྱས་ནས་སེམས་བཟུང་སྟེ་སྣང་བའི་ཡེ་ཤེས་བསྐྱེད་པ་དང་། ཡང་འབྱུང་འཇུག་
6-8-8a


སྔོན་དུ་བཏང་ནས་རྩ་འདབ་པར་པ་ཡི་གེ་དང་བཅས་པ་ལ་སེམས་བཟུང་ནས་མཆེད་པའི་ཡེ་ཤེས་བསྐྱེད་ཚུལ་སོགས་མཛད་ཀྱང་ཁ་སྦྱར་བསྒོམ་པ་མིན་ནོ། །ཡང་རྗེ་འགོས་ཀྱིས། འཁོར་ལོའི་ལྟེ་ཨཾ་ཡིག་དང་། 
ཨ་ཚེག་དྲག་ཅན་དང་། ཨ་ཐུང་ལ་བརྟེན་ནས་རིམ་པ་བཞིན་དུ་སེམས་གསུམ་གྱི་རྟོགས་པ་བསྐྱེད་པའི་ཚུལ་དང་། རིམ་ལྔའི་འགྲེལ་པ་ནོར་བུའི་ཕྲེང་བ་དང་། ཁ་ཆེ་ལཀྵྨཱིས་མཛད་པ་དང་། རྩ་རྒྱུད་ཀྱི་བཤད་པ་ཟུང་འཇུག་གསལ་པ་དང་། 
བཤད་རྒྱུད་རྡོ་རྗེ་འཕྲེང་བའི་འགྲེལ་པ་མཛད་པ་ཨ་ལམ་ཀ་ཀ་ལ་ཤ་རྣམས་ཀྱིས་ལྟེ་བར་ཐོག་མར་རྩ་འཁོར་འདབ་མ་བརྒྱད་པ་བསྒོམས་ནས་སེམས་དབེན་གྱི་རྟོགས་པ་བསྐྱེད་ཚུལ་ཅུང་ཟད་བཤད་ཀྱང་གསལ་ཞིང་མཐའ་ཆོད་པར་མ་
བཤད་དོ། །དེས་ན་སེམས་དབེན་གྱི་རྟོགས་པ་བསྐྱེད་པའི་ནང་གི་རྐྱེན་གྱི་གཙོ་བོར་རྡོར་བཟླས་ཉིད་ཡིན་པས་དེ་ལ་སྙིང་གར་སྔགས་ཀྱི་འཁོར་ལོ་བསྒོམ་པ་དང་། དེ་ལ་བརྟེན་ནས་རྡོར་བཟླས་བྱེད་པའི་ཚུལ་གཉིས་ཀྱིས་ཤེས་པར་བྱའོ། །དང་
པོ་ནི། རྩ་གསལ་འདེབས་པའམ་མ་བཏབ་ཀྱང་རུང་། སྙིང་གའི་འཁོར་ལོའི་རྩ་འདབ་སུམ་རིམ་ཡི་གེ་དང་བཅས་པ་གསལ་བཏབ་ཅིང་། དེ་ཙམ་མི་གསལ་ན་སྙིང་གའི་འཁོར་ལོའི་ལྟེ་བ་ལུས་ཀྱི་གནད་གང་ན་ཡོད་པ་དེའི་ས་ཚིགས་མ་
འཚོལ་བར་ཤེས་པར་བྱས་ལ། དེའི་ནང་དུ་མི་ཤིགས་པའི་ཐིག་ལེ་སྔར་བཤད་པ་ལྟར་བསྒོམ་མོ། །གཉིས་པ་ལ། རྡོར་བཟླས་དངོས་དང་། དེ་ལ་བརྟེན་ནས་སེམས་དབེན་གྱི་རྟོགས་པ་ཇི་ལྟར་སྐྱེ་བའི་ཚུལ་ལོ། །དང་པོ་ནི། རྩ་རྒྱུད་ལས།
6-8-8b


རིན་ཆེན་ཁ་དོག་སྣ་ལྔ་པ། །ཡུངས་ཀར་གྱི་ནི་འབྲུ་ཚོད་ཙམ། །སྣ་ཡི་རྩེ་མོར་ནན་ཏན་དུ། །རྣལ་འབྱོར་གྱིས་ནི་རྟག་ཏུ་བསྒོམ། །རིན་ཆེན་རྟེན་པར་གྱུར་ནས་སྤྲོ། །མ་བརྟན་པར་དུ་ཡོང་མི་སྤྲོ། །སངས་རྒྱས་འབར་བ་འདྲ་བའི་འོད། །མཆོག་རབ་སྤྲིན་
རྣམས་སྤྲོ་བར་བྱ། །ཞེས་གསུངས་པ་ལ་ཡིག་དོན་ནི་སྤྱི་དོན་དུ་འདུས་བར་དགོངས་ནས་བཤད་པ་ལོགས་སུ་མ་མཛད་ལ། སྤྱི་དོན་ལ། བསྐྱེད་རིམ་པའི་གདོང་གི་སྣ་རྩེར་ཕྱག་མཚན་ཕྲ་མོ་བསྒོམ་པའི་རྣལ་འབྱོར་བཤད་ལ། སྦས་དོན་ལ། 
གསང་གནས་ཀྱི་སྣ་རྩེར་ཐིག་ལེ་ཕྲ་མོ་བསྒོམ་པའི་འདོད་ཆགས་ཆོས་སྦས་བཤད་ཅིང་མཐར་ཐུག་གི་བཤད་པ་ལ་རྡོ་རྗེའི་བཟླས་པ་བྱེད་ཚུལ་བཤད་དོ། དེ་ལ་བླ་མ་སྔ་མ་དག །རྡོར་བཟླས་མཐར་ཐུག་ཏུ་བཞག་པ་མེད་པས་སེམས་དབེན་
བསྐྱེད་པའི་གོང་གི་རྡོར་བཟླས་མ་ཡིན་གྱི་ཟུང་འཇུག་ཐོབ་ནས་ལས་ཚོགས་སྒྲུབ་པའི་སྐབས་ཀྱི་རྡོར་བཟླས་ཡིན་ལ། །མཐར་ཐུག་ཏུ་བཤད་པ་ནི། །བཟླས་པ་བྱེད་པ་པོའི་ཟུང་འཇུག་གི་སྐུ་ལ་དགོངས་སོ་ཞེས་གསུང་ཡང་། སྐབས་འདི། སེམས་
དབེན་གྱི་རྒྱུན་གྱུར་པའི་རྡོར་བཟླས་བྱེད་ཚུལ་ཕྱིན་ཅི་མ་ལོག་པར་བསྟན་པ་ལ་འཆད་མ་ཤེས་ན་རྡོར་བཟླས་ཀྱི་གནད་མཐའ་དག་ཉམས་པར་འགྱུར་རོ། །མཐར་ཐུག་ཏུ་བཤད་པ་ནི། དེའི་འབྲས་བུ་འོད་གསལ་ལེགས་པར་བསྒྲུབ་པ་ལ་དགོངས་
སོ། །དེས་ན་རྒྱུད་དེའི་འགྲེལ་པར། རིན་པོ་ཆེ་ནི། རླུང་ཁ་དོག་ལྔ་དེ་བཞིན་གཤེགས་པའི་བདག་ཉིད་ཅན་སྙིང་གའི་མི་ཤིགས་པའི་ཐིག་ལེ་སྟེ། རིན་པོ་ཆེ་སངས་རྒྱས་འབྲས་བུར་ཡོད་པས་འབྲས་བུའི་མིང་གི་རྒྱུ་བསྟན་པ་ཡིན་ལ། ཡུངས་
6-8-9a


ཀར་གྱི་འབྲུ་ཚོད་ཙམ་ནི། ཐིག་ལེའི་གཟུངས་ཅན་དེ་ཐིག་ལེ་དཀར་དམར་ཁ་སྦྱར་བའི་དབུས་ན་ཨ་ཐུང་གནས་པའོ། །སྣའི་རྩེ་མོ་ནི། །སྙིང་གའི་པདྨའི་ལྟེ་བའོ། །ནན་ཏན་ཞེན་པའང་འབད་པས་འཇུག་གནས་ལྡང་
གསུམ་གྱི་རྣལ་འབྱོར་གྱིས་རྟག་པར་ཉིན་མཚན་དུ་བསྒོམ་པར་བྱའོ། །བརྟན་པར་གྱུར་ནས་སྤྲོ་བ་ནི། །སྤྱི་དོན་དང་སྦས་དོན་གྱི་སྐབས་སུ་དང་པོར་བརྟན་པ་ཐོབ་ནས་དེའི་རྗེས་སུ་སྤྲོ་བསྡུ་ལ་སློབ་ལ་བཤད་ཀྱང་། འདིར་ནི་བརྟན་པ་ནི་མི་
ཤིགས་པའི་ཐིག་ལེ་ཡིན་ལ། དེ་ལས་འོད་ཟེར་སྣ་ལྔའི་རླུང་སྤྲོ་བསྡུ་བྱེད་པ་ཡིན་ནོ། །བརྟན་པར་མ་གྱུར་ཞེས་པ་ནི། མི་ཤིགས་པའི་ཐིག་ལེའི་དེ་ཁོ་ན་ཉིད་ལེགས་པར་ཁོང་དུ་ཆུད་པར་རྡོར་བཟླས་འདི་བྱའི་བརྟན་པ་ཁོང་དུ་ཆུད་པར་མ་གྱུར་
པས་བྱས་ཀྱང་འབྲས་བུ་ཆུང་པར་བསྟན་ནོ། །སྤྲོ་བའི་ཚུལ་ནི། སངས་རྒྱས་འབར་བ་ནི་འོད་ཟེར་རྣམ་པ་ལྔའོ། །དེ་དང་འདྲ་བའི་འོད་ནི་དཀྱིལ་འཁོར་བཞི་སྟེ། གཡས་པ་ནས་འབྱུང་བའི་པདྨ་མགོན་པོའི་རྒྱུ་བ་སོགས་སོ། །དེ་དག་གི་དོན་
མདོར་བསྡུ་ན། དང་པོར་པདྨ་མགོན་པོའི་རྒྱུ་བ་ལྟ་བུ་ལ་རྡོར་བཟླས་བྱེད་པའི་ཚེ་ཨོཾ་གྱི་རང་སྒྲ་ཅན་དུ་ནང་དུ་འཇུག་པའི་ཚེ་སྙིང་གའི་མི་ཤིགས་པའི་ཐིག་ལེ་ཕུག་ནས་དེའི་ནང་དུ་ཞུགས་པར་བསམ་ཞིང་། དེ་རྫོགས་པ་དང་ཨའི་སྒྲ་གྲགས་
པར་བསམ་ཞིང་། ཐིག་ལེ་དེ་ཉིད་ལ་དམིགས་ནས་སེམས་ཅུང་ཟད་རེ་གཟུང་ངོ་། །ཕྱིར་འབྱུང་བའི་ཚེ་ཐིག་ལེ་དེ་ཉིད་ཀྱི་ནང་ནས་ཧཱུཾ་གི་རང་སྒྲ་ཅན་དུ་འབྱུང་བར་བསམས་ནས་རྡོར་བཟླས་བྱའོ། །ཡང་སྔར་དྲངས་པ་ལྟར་ལེའུ་གསུམ་པ་ནས།
6-8-9b


ནམ་མཁའི་དབྱིངས་ཀྱི་དབུས་གནས་པར། །ཟླ་བའི་དཀྱིལ་འཁོར་བྲི་བར་བྱ། །གསལ་བའི་དཀྱིལ་འཁོར་དབུས་གནས་པར། །འཁོར་ལོའི་དཀྱིལ་འཁོར་བསྒོམ་པར་བྱ། །ཞེས་སོགས་ལ། དྲང་ངེས་ཀྱི་བཤད་པ་གཉིས་བྱས་ནས། དྲང་དོན་ལ་
བསྐྱེད་རིམ་གྱི་མངོན་བྱང་ལྔས་དང་པོའི་མགོན་པོ་བསྐྱེད་པ་ལ་སྦྱར་ནས་ནམ་མཁའི་དབྱིངས་ནི་ལྷག་མོས་འོད་གསལ་དུ་བསྡུས་པ་དང་། དེར་ཟླ་བ་ལས་བྱང་ཆུབ་པ་དང་། ཟླ་བའི་སྟེང་དུ་ཕྱག་མཚན་ལས་བྱང་ཆུབ་པ་ནི། རྣམ་སྣང་ལ་འཁོར་ལོ་བསྒོམ་པ་སོགས་
རིགས་ལྔ་ཀའི་དང་པོའི་མགོན་པོ་བསྐྱེད་ཚུལ་བསྟན་ནོ། །དེ་ཉིད་ངེས་དོན་གྱི་བཤད་པའི་ཚེ་ནམ་མཁའི་དབྱིངས་ནི་སྙིང་གའི་ལྟེ་བའི་ཁོང་སྟོང་དང་། དེའི་དབུས་སུ་གནས་པའི་ཟླ་བའི་དཀྱིལ་འཁོར་ནི་མི་ཤིགས་པའི་ཐིག་ལེ་བྲི་བར་བྱ་བ་ནི་ཤེས་པར་བྱའོ། །མི་
ཤིགས་པ་དེ་ལས་བྱུང་བའི་འཁོར་ལོའི་དཀྱིལ་འཁོར་ནི་ཆུ་ཀླུང་དཀར་པོ་མི་བསྐྱོད་པའི་རྒྱུ་བའོ། །དེ་བཞིན་དུ་མགོན་པོ་གཞན་གསུམ་གྱི་རྒྱུ་བ་ལ་ཡང་དངོས་སུ་སྦྱར་ནས་མི་ཤིགས་པའི་ཐིག་ལེ་ཉིད་ལས་ལྡང་བ་ནི་འཇུག་པའི་རིམ་པས་རྡོར་བཟླས་བྱའོ། །
གཉིས་པ་ནི། སེམས་དབེན་གྱི་རྟོགས་པ་སྐྱེད་པ་ལ་ཁམས་རགས་པ་ཕྲ་བ་ལ་ཐིམ། ཕྲ་བ་རླུང་ཡང་ནམ་མཁའ་ལ་འཇའ་ཡལ་བ་ལྟར་རྣམ་ཤེས་ལ་ཐིམ་པའི་རྣམ་པ་ཅན་དུ་བསྒོམ་དགོས་པ་མ་ཡིན་ནམ། སྙིང་གའི་མི་ཤིགས་པའི་ཐིག་ལེ་ལ་དཀྱིལ་
འཁོར་བཞིའི་རླུང་འཇུག་ལྡང་བྱེད་པའི་ཚུལ་ལེགས་པར་ཁོང་དུ་ཆུད་ནས་རྡོར་བཟླས་བྱས་པ་ཙམ་གྱིས་སེམས་དབེན་གྱི་རྟོག་པ་དངོས་སུ་སྐྱེད་པ་ལ་ཇི་ལྟར་ཕན་སྙན་ན། བཤད་པར་བྱ་སྟེ། བཤད་རྒྱུད་རྡོ་རྗེ་འཕྲེང་བའི་ལེའུ་དྲུག་པ་ནས། དེ་ནས་
6-8-10a


གཞན་ཡང་བཤད་ཀྱིས་ཉོན། །ཐིག་ལེའི་དབྱེ་བ་བླ་ན་མེད། །འཇིག་རྟེན་ཐིག་ལེའི་དབྱེས་དབེན་ན། །འཁོར་བར་ཡང་དང་ཡང་དུ་འཁོར། །ཞེས་རྡོར་བཟླས་བྱེད་པའི་གཞི་ཐིག་ལེ་གསུམ་གྱི་དབྱེ་བ་དང་། གཙོ་བོ་མི་ཤིགས་པའི་
ཐིག་ལེ་མ་ཤེས་པའི་ཉེས་དམིགས་འཁོར་བར་འཁོར་བར་བསྟན་ནས། མཛོད་སྤུའི་དབུས་ན་གནས་པ་ནི། །ཐིག་ལེ་རླུང་དུ་ཡང་དག་བཤད། །སྔགས་ཀྱི་དེ་ཉིད་ཀྱིས་དེ་འབྱེད། །རྣལ་འབྱོར་མདུད་པ་བཀྲོལ་ནས་ནི། །རླུང་གི་དེ་ཉིད་རིག་པ་དེ། །ཁྱད་པར་
དབྱེ་བའི་སྦྱོར་བ་ཡིས། །སྦྱོར་བ་དེ་ཡང་མི་རིག་གོ། །ཞེས་རྩ་མདུད་འབྱེད་པའི་ཐབས་མི་ཤེས་པས་འཁོར་ལ། དེ་གང་གིས་འབྱེད་ན། སྔགས་ཀྱི་དེ་ཉིད་རྡོར་བཟླས་ཀྱིས་འབྱེད་པར་བསྟན་ནོ། །རླུང་སྔགས་ཀྱི་དེ་ཁོ་ན་ཉིད་ཤེས་པའི་ཕན་ཡོན་ནི། ཐིག་
ལེའི་དབྱེ་བ་རིགས་བཅས་པ། །གང་ཤེས་མྱུར་དུ་རྣལ་འབྱོ་མཆོག །སྦྱོར་བས་མདུད་པ་འབྱེད་པར་བྱེད། །ཁམས་གསུམ་པ་ཡི་འགྲོ་བ་འདི། །མྱུར་དུ་དངོས་གྲུབ་མཆོག་ཏུ་འགྲོ། །ཞེས་ཐིག་ལེའི་དབྱེ་བ་རིག་པས་ཏེ། ཐབས་དང་བཅས་པ་གོམས་
པས་རྩ་མདུད་འབྱེད་ཅིང་དེ་ལས་ཐར་པ་ཐོབ་པར་འགྱུར་བས། རྩ་མདུད་ཀྱི་གཙོ་བོ་གང་ན་ཡོད་པ་དང་། གང་གིས་འབྱེད་པའི་ཚུལ་ལ་སོགས་པ་རྡོ་རྗེ་འཆང་གིས་ཕྱག་ན་རྡོ་རྗེ་ལ་གསུངས་པ་ནི། སྙིང་གི་པདྨའི་སྦུབས་མཁའ་ལ། །ཡེ་ཤེས་རྡོ་རྗེ་རྟག་ཏུ་
བཞུགས། །སྟེང་འོག་ཡང་དག་བརྟེན་ནས་ནི། །སྲོག་དང་ཐུར་སེལ་རླུང་ཆེན་གནས། །དེ་ཡང་དབྱེ་བ་དཀའ་བ་ཡི། །དབུས་སུ་མདུད་པ་གསུམ་གྱིས་དཀྲིས། །དེ་ཡིས་ཐུར་སེལ་བཅོམ་བྱས་པས། །སྟེང་དུ་འགྲོ་བ་ཐོབ་མི་བྱེད། །དེས་བཅོམ་སླར་
6-8-10b


ཡང་རྣམ་ལྔར་རྒྱུ། །སྲོག་དང་ཐུར་སེལ་གྱེན་རྒྱུ་དང་། ཁྱབ་བྱེད་དང་ནི་མཉམ་གནས་ཉིད། །རྩེ་མོ་ལྔ་ལས་རྒྱུ་བ་ནི། །རྩ་ལྔ་ལ་ནི་ཡང་དག་བརྟེན། །རྒྱས་དང་རྣམ་པར་རྒྱས་པ་དང་། །མྱོང་དང་ལྟུང་དང་མཛའ་བོ་སྟེ། །དེ་དག་རྩ་ནི་ལྔར་ཤེས་བྱ། །རྡོ་རྗེ་འོག་
ཏུ་གསལ་བར་ཁྱབ། །ཅེས་སྙིང་གི་པདྨའི་སྦུབས་སྙིང་གའི་འཁོར་ལོའི་ལྟེ་བའི་ནང་གི་ཁོང་སྟོང་ཅུང་ཟད་ཡོད་པའོ། །ཡེ་ཤེས་རྡོ་རྗེ་ནི། མི་ཤིགས་པའི་ཐིག་ལེའོ། །དེར་རོ་རྐྱང་གཉིས་ཀྱི་མདུད་པ་གསུམ་གསུམ་གྱིས་དཀྲིས་ནས་སྲོག་རླུང་དབུ་མའི་ནང་
ནས་ཐུར་ལ་འགྲོ་བ་དང་། ཐུར་སེལ་དེའི་ནང་ནས་གྱེན་དུ་འགྲོ་བའི་བྱ་བ་བཅོམ་ནས། །བདུད་པ་དེའི་སྟོད་སྨད་དུ་རྡོ་རྗེའི་རྭ་ལྟ་བུ་རྩ་ལྔ་ལྔ་ཡོད་པའི་ནང་ནས་རླུང་རྣམས་རྒྱུ་བ་ཡིན་ནོ། །མདུད་པ་དེ་ལ་མིང་དུ་མ་རིག་པའི་མདུད་པ་ཞེས་བྱའོ། །མདོར་བསྡུས་ན། 
འཁོར་བ་བསྐྱེད་པའི་རྒྱུའི་གཙོ་བོ་གང་ཟག་དང་ཆོས་ཀྱི་བདག་འཛིན་ནི། །སྔགས་དང་ཕ་རོལ་ཏུ་ཕྱིན་པའི་ཐེག་པ་གཉིས་ཀས་ཐུན་མོང་དུ་ཤེས་པར་བྱ་བ་ཡིན་ལ། འཁོར་བསྐྱེད་པའི་ལྷན་ཅིག་བྱེད་རྐྱེན་གྱི་གཙོ་བོ་རང་བཞིན་བརྒྱད་ཅུའི་རྟོག་པ་གཡོ་
བར་བྱེད་པའི་རླུང་ནི་སྐབས་འདིར་ཤེས་པ་བྱ་བ་ཡིན་ནོ། །རླུང་སེམས་ཀྱི་རང་གནས་ནི། དང་པོ་འཇུག་པ་དང་མཐར་སྡུད་པའི་སྙིང་ག་ཉིད་ཡིན་ལ། དེ་ཡང་རྩ་མདུད་ཀྱིས་བཅིངས་པའི་དབང་གིས་རང་གནས་སུ་སྙེགས་མ་བྱུང་བར་རོ་རྐྱང་ལ་སོགས་
པའི་སྒོ་རྣམས་ནས་བརྒྱུས་ནས་རང་བཞིན་གྱི་རྟོག་པ་རྣམས་བསྐྱེད་དེ། འཁོར་བར་འཁོར་ལ། སྔར་བཤད་པ་ལྟར་རྡོ་རྗེའི་བཟླས་པ་ལ་གོམས་པས་དབྱེ་བར་དཀའ་བའི་སྙིང་གའི་རྩ་མདུད་ཕྱེད་ནས་རླུང་ཐམས་ཅད་རང་གནས་སུ་ཐིམ་ཞིང་རང་བཞིན་
6-8-11a


གཡོ་བའི་རླུང་རྣམས་ཀྱང་ཉེ་བར་ཞི་ནས་སེམས་ཀུན་རྫོབ་པའི་མ་བཅོས་པའི་ངོ་བོ་སྟོང་པ་བཞི་རིམ་གྱིས་མངོན་དུ་འགྱུར་བས་རྡོ་རྗེའི་བཟླས་པ་ལ་བརྟེན་ནས་སེམས་དབེན་སྐྱེ་བའི་གོ་རིམ་ལེགས་པར་གྲུབ་པ་ཡིན་ནོ། །དེས་ན་
སྔར་བཤད་པ་ལྟ་བུའི་རྡོ་རྗེའི་བཟླས་པ་ཤེས་ན་བུམ་པ་ཅན་ལ་སོགས་པ་བསྒོམ་མི་དགོས་ཏེ། །རྡོ་རྗེ་ཕྲེང་བར། ཕྲེང་བ་མི་དགོས་བསྒོམ་མི་དགོས། །བྱ་བ་མི་དགོས་དགག་མི་དགོས། །སྔགས་ཀྱི་དེ་ཉིད་གཅིག་པུ་ཡིས། །ཡང་དག་རྫོགས་པའི་
སངས་རྒྱས་འཐོབ། །ཅེས་གསུངས་ཤིང་། །དེ་བཞིན་དུ་ཕྱག་རྒྱ་བཞིའི་དབྱེ་བ་དང་། འཁོར་ལོ་བཞིའི་དབྱེ་བས་དགའ་བ་བཞི་འབྱེད་པ་སོགས་ཀྱང་འདིར་མི་དགོས་ཏེ། །ཕྱག་རྒྱ་ཆེན་པོའི་གོ་འཕང་གསལ། སྔགས་ཀྱི་དེ་ཉིད་གཅིག་པུས་འཐོབ། །
ཅེས་གསུངས་སོ། །སྔགས་ཀྱི་དེ་ཉིད་ནི་རྡོ་རྗེའི་བཟླས་པ་སྟེ། དེ་ན་ཤེས་པར་སྔགས་བསྒྲུབ་པ་ནི་རྒྱ་མཚོའི་ཕ་རོལ་འགྲོ་འདོད་པའི་མིས་ལམ་མི་འདྲི་བ་དང་། ཆུ་བསྲུབས་པ་ལས་མར་མི་འབྱུང་བ་ལྟར་གསུངས་སོ། །སྙིང་གར་སྔགས་ཀྱི་
འཁོར་ལོ་བསྒོམ་པའི་ཚུལ། བླ་མ་སྔ་མ་རྣམས་དེ་ལྟར་བཞེས་ལ། མར་ལུགས་པ་རྣམས་ཀྱི་གདམས་ངག་གི་རྩ་བ་རིམ་ལྔ་བསྡུས་གསལ་བའི་དགོངས་པ་འདི་ལྟར་སེམས་ཏེ། །ཡི་གེ་ཀ་ནས་ཧ་ཡི་བར། །ཀྵ་ནི་སྤངས་པ་བཞི་བཅས་པ། །ཞེས་
འབྱུང་བས། ཀྵ་སྤངས་པའི་གསལ་བྱེད་སོ་གསུམ་ལ་སྣ་ལྡན་གྱི་ཡི་གེ་ལྔ་ཡོད་དེ། ང་ཉ་ན་ཎ་མའོ། །དེ་ལ་མ་ནི། །བཅུ་གཉིས་ཡི་གེ་ཐིག་ལེར་བཅས། །ཞེས་འབྱུང་བའི་དབྱངས་བཅུ་གཉིས་ཀྱི་ཐིག་ལེའི་ཐོབ་སྐལ་ལ་བཏགས་ནས་གསལ་
6-8-11b


བྱེད་སོ་གཉིས་པོ་སྙིང་གའི་རྩ་འདབ་པར་པ་བརྒྱད་པོ་རེ་རེའི་ནང་དུ་བཞི་བཞི་འགོད་དེ། །བྱང་ཤར་གྱི་རྩ་འདབ་ལ་སྔར་བཤད་པའི་སྦས་པའི་ཡི་གེ་བཞིར་ཐ་སྙད་བྱས་པ་དང་། །ལྕེ་རྩ་ཅན་གྱི་ཡི་གེ་དོར་ནས་སྣ་ལྡན་གྱི་ཡི་གེ་ལྷག་མ་བཞི་བཀོད་ལ་ལྷག་མ་རྣམས་
སྔར་ལྟར་དགོད་དོ། །རྡོར་བཟླས་བྱེད་པའི་ཚེ་སྙིང་གའི་མི་ཤིགས་པའི་ཐིག་ལེའི་དབུས་ནས་ཕུག་སྟེ་ཐུར་སེལ་གྱི་གནས་སོགས་ནས་འགྲོ་འོང་བྱས་ཀྱང་འགལ་བ་ཆེར་མེད་མོད་ཀྱི་འོན་ཀྱང་མགོན་པོ་བཞི་ཀའི་རླུང་མི་ཤིགས་པའི་ཐིག་ལེ་ཉིད་ནས་སྤྲོ་བ་
དང་བསྡུ་བ་བྱ་ཞིང་། རླུང་ཤིན་ཏུ་རྩུབ་པོས་ཐིག་ལེ་འབུགས་པ་ལྟ་བུ་མ་ཡིན་པར་རླུང་ལྷོད་ཅིང་དལ་བུས་ནང་དུ་བུས་ནང་དུ་བཅུག་པའི་ཚེའང་བྱེ་མ་ལ་ཆུ་ལྟར་མི་ཤིགས་པའི་ཐིག་ལེ་ལ་ཐིམ་པར་བསམ་ཞིང་། ཕྱིར་འབྱུང་བའི་ཚེའང་དལ་བུས་བྱུང་བར་བསམས་ན་
གེགས་ཉུང་ཞིང་། །འབྱུང་འཇུག་གཉིས་ཡུན་ཚད་མཉམ་པར་བྱས་ནས་གནས་པ་དེ་ལས་ཅུང་ཟད་རིང་བར་ཐིག་ལེ་ཉིད་ལ་སེམས་བཟུང་ངོ་། ལུས་ཀྱི་གནད་རྣམས་ཀྱང་ཧ་ཅང་གྲིམས་པ་ཧ་ཅང་ལྷོད་པ་མ་ཡིན་པར་རན་པར་བྱའོ། །རླུང་འདུ་ཕུལ་ཆེ་ན་དབུས་
ཀྱི་ཐིག་ལེ་ཉིད་ལ་ཐུན་མཚམས་ཀྱི་སྐབས་སུ་ཡང་སེམས་བཟུང་ལ། །འདུ་ཕུལ་ཆུང་བ་རྣམས་ཀྱིས་རྩ་འདབ་ཀྱི་ཡི་གེ་རྣམས་ལ་རིམ་གྱིས་ཐུན་མཚམས་ཀྱི་སྐབས་སུ་སེམས་བཟུང་སྟེ། དང་པོར་ཕྱིན་རིམ་གྱི་ཨ་ལ་སེམས་བཟུང་དེ་ནས་ཨི་ལ་སེམས་
འཛིན་པ་ལྟ་བུའོ། །རྩ་འཁོར་རྣམས་ཀྱི་ནང་ནས་སྙིང་གའི་རྩ་འཁོར་དང་དེའི་ལྟེ་བའི་མི་ཤིགས་པའི་ཐིག་ལེ་ལ་བརྟེན་ནས་རྡོར་བཟླས་ནས་བྱེད་པའི་གཙོ་བོར་འགྱུར་བའི་ཚུལ་ནི། །རྡོ་རྗེ་ཕྲེང་བའི་ལེའུ་ཉེར་གཅིག་པ་ལས་ཀྱང་གསུངས་ཏེ། །དེ་ཡང་རྡོ་རྗེ་གསུམ་
6-8-12a


གྱི་ཡིག་དོན་བཤད་པ་དང་། དེ་གསུམ་གྱི་ནང་ནས་གཙོ་བོ་གང་ཡིན་དྲིས་ལན་གྱིས་རྒྱས་པར་གཏན་ལ་ཕབ་པ་དང་གཉིས་ཀྱིས་ཤེས་པར་བྱའོ། །དང་པོ་ནི། །ཨོཾ་ནི་སྐུ་ཡི་རྡོ་རྗེ་ཡི། །སྙིང་པོ་རྒྱུ་ནི་ཡང་དག་བཤད། །ཡི་གེ་ཨ་
ནི་ཡི་གེ་ཨོ། །ཡི་གེ་མ་ཞེས་བྱ་བ་གསུམ། ཨ་ནི་ཆོས་འཁོར་པདྨར་གནས། །རླུང་གི་འཁོར་ལོ་ལ་ནི་ཁྱབ། །འདི་ཉིད་ཁོ་ནར་རླུང་ཆེན་པོ། །སྲོག་ཅེས་བྱ་བ་ཐམས་ཅད་གསུངས། །ཞེས་དང་། ཨོ་ནི་ལོངས་སྤྱོད་འཁོར་ལོར་གནས། །མེ་དང་ཉི་མ་
འདྲ་བ་ཡི། །མགྲིན་པའི་མཐར་གནས་སྤྱི་གཙུག་མཐར། ཁྱབ་པ་གཟི་བརྗིད་ཀྱི་ནི་ལུས། །ཞེས་དང་། ཡི་གེ་མ་ནི་ཐིག་ལེ་ཙམ། །མཐོ་བའི་ཚད་ནི་སོར་བཅུ་གཉིས། རྒྱལཔོའི་གཙུག་ཏོར་གནས་ན་གནས། །ཞེས་གསུངས་ཏེ། ཨོཾ་ལ་ཨ་དང་ཨོ་དང་
མ་གསུམ་བཏུས་ཀྱང་ཨོ་ནི་ཡི་གེ་མ་དང་པར་མངོན་པས་ཨུ་ཐུ་བར་བྱའོ། །དེ་ལ་ཡི་གེ་གསུམ་བསྡོམས་ནས་ཨོཾ་དུ་འགྱུར་བ་ཙམ་སྒྲ་པ་ནམས་ཀྱིས་ཀྱང་ཤེས་ཀྱང་དེས་མཚོན་དོན་མི་ཤེས་པས་དེས་ན་ཡི་གེ་ཨ་ནི་སྙིང་གའི་པདྨའི་ལྟེ་བར་གནས་
པའི་སྲོག་རླུང་ཡིན་ན། རླུང་གི་འཁོར་ལོ་ལ་ཁྱབ་པ་ནི། དེ་ནས་བཟུང་སྟེ་སྨིན་དབུས་རླུང་གི་འཁོར་ལོ་འདབ་མ་དྲུག་པའི་ལྟེ་བར་གནས་པའི་བར་གྱི་སྲོག་རླུང་མཚོན་པ་ཡིན་ནོ། །ཨུ་ནི་ལོངས་སྤྱོད་ཀྱི་འཁོར་ལོའི་ལྟེ་བར་གནས་པའི་གྱེན་རྒྱའི་རླུང་ཡིན་
ལ། །དེ་ཡང་དེ་ནས་བཟུང་སྟེ་སྤྱི་གཙུག་གི་མཐའ་མན་ཆད་ཀྱི་བར་ན་གནས་པ་མཚོན་དོན་ཏེ་ཉི་མ་དང་ཟླ་བའི་འོད་དང་འདྲ་བར་ཁ་དོག་དམར་པོ་གཟོ་བརྗིད་འབར་པའོ། །མ་ནི་བདེ་ཆེན་ཀྱི་འཁོར་ལོའི་ལྟེ་བ་ན་གནས་པའི་ཐིག་ལེ་དཀར་པོ་སྟེ། །ཨ་
6-8-12b


དང་ཨུ་མཚམས་སྦྱར་བས་ཨོར་འགྱུར་ལ་དེ་ལ་མ་རྗེས་སུ་ང་རོར་བཅས་པའི་ཨོཾ་གྱིས་སྤྱི་བོ་བདེ་ཆེན་གྱི་འཁོར་ལོ་སྲོག་དང་གྱེན་རྒྱུའི་རླུང་ཐིག་ལེ་དང་གཅིག་ཏུ་འཆིངས་པ་མཚོན་པ་ཡིན་ནོ། །གསུང་རྡོ་རྗེའི་ཡིག་དོན་ནི། །ཡི་གེ་ཨ་ནི་ཡེ་ཤེས་ཆེ། །གསུང་གི་རྡོ་རྗེའི་
སྙིང་པོ་མཆོག །ཨ་གཉིས་དང་ནི་ཡི་གེ་མཆོག །རིང་པོར་བྱས་ཏེ་དབྱེ་བ་གསུམ། །ཞེས་དང་། ཨ་ནི་ཆོས་འཁོར་པདྨ་ལས། །མགྲིན་པར་ཡི་གེ་ཨ་ཉིས་འགྱུར། །སྲོག་ཡིག་དང་ནི་ཐུར་སེལ་བ། །ཡི་གེ་ཧ་ཡིས་ཀུན་ནས་ནི། །མགྲིན་པའི་དབུས་ན་གནས་པ་
བཅིངས། །ཞེས་གསུངས་པ་ཨ་གཉིས་དང་ཧ་གསུམ་བཏུས་ཏེ་ཨ་དང་པོས་ནི་སྙིང་གའི་སྲོག་རླུང་མི་ཤིགས་པ་མཚོན་ལ་ཨ་གཉིས་པས་དེ་ནས་བཟུང་སྟེ་རླུང་ཙམ་ཞིག་མགྲིན་པའི་བར་དུ་གནས་པ་མཚོན། །ཡི་གེ་ཧས་སྲོག་རླུང་ལོངས་སྤྱོད་ཀྱི་
འཁོར་ལོའི་ལྟེ་བར་མཆིངས་པ་མཚོན་པས་ཨས་ནི་ལོངས་སྤྱོད་ཀྱི་འཁོར་ལོའི་ལྟེ་བར་རླུང་འཆིངས་པ་མཚན་ནོ། །ཐུགས་རྡོ་རྗེའི་ཡིག་དོན་ནི། །ཧ་དང་དེ་བཞིན་ཡི་གེ་ཨུ། །དེ་བཞིན་ཡི་གེ་མ་དང་གསུམ། །ཞེས་དང་། ཧ་ནི་ཐུར་སེལ་མིང་ཅན་
རླུང་། །བཤད་སྒོ་གསང་བའི་དབུས་ན་གནས། །ཡི་གེ་ཨུ་ན་སྟེང་འགྲོ་རླུང་། །མགྲིན་པའི་པདྨའི་དབུས་ན་གནས། །ཡི་གེ་མ་ནི་སྲོག་རླུང་ཡིན། །དཔྲལ་བར་རླུང་གི་འཁོར་ལོ་ལ། །དེ་དག་གཅིག་གྱུར་སྙིང་ག་ལས། །ཐུགས་ཀྱི་ས་བོན་དུ་ནི་བརྗོད། །
ཅེས་གསུངས་པ་ལ། ཡི་གེ་གསུམ་གྱི་ཧ་ནི་འདོམས་ན་གནས་པའི་ཐུར་སེལ་ཡི་རླུང་དང་། ཨུ་ནི་གྱེན་རྒྱུ་དང་། མ་ནི་སྲོག་རླུང་སྟེ་དེ་དག་བསྡོམ་པས་ནི་སྲོག་ཐུར་སྙིང་གའི་ལྟེ་བར་འདྲེས་པ་མཚོན་ནོ། །གཉིས་པ་ལ་ཕྱག་ན་རྡོ་རྗེས། །རྡོ་རྗེ་
6-8-13a


འཆང་ལ་ཞུས་པ་ནི། རྡོ་རྗེ་གསུམ་གྱི་ཡིག་དོན་དང་། །གནས་ཀྱི་དབྱེ་བ་རྟོག་ལགས་ན། །འདི་རྣམས་དབུས་ན་བདག་པོ་གང་། །ཇི་ལྟར་བུ་ཞིག་གཙོ་བོར་གསུངས། །ཞེས་རླུང་འཆིངས་པ་ཚན་པ་གསུམ་གསུངས་པའི་
གཙོ་བོ་གང་ཡིན་ཞེས་པའོ། །ལན་ལ། སྙིང་གའི་མི་ཤིགས་པའི་རླུང་གཙོ་བོ་ཡིན་པའི་རྒྱུ་མཚན་མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། རྒྱུད་གཞན་གང་དུ་ཡང་མ་གསུངས་པ་འདིར་བཤད་པར་བྱ་བས་ཉོན་ཅིག་ཅེས་བསྐུལ་
ནས། ཐུགས་ཀྱི་ས་བོན་བདག་པོ་སྟེ། །ཀུན་གྱི་ནང་ནས་རྣམ་རྟོག་མེད། །གང་ཕྱིར་གཙོ་བོ་གཞན་རྣམས་ནི། །འགྲིབ་དང་དེ་བཞིན་འཕྲོགས་པར་བྱེད། །ཅེས་ཏེ། །དེ་དག་གི་ནང་ནས་སྙིང་གར་སྲོག་ཐུར་འདྲེས་པ་གཙོ་བོ་ཡིན་ཏེ། །སྔར་བཤད་པ་ལྟར་མི་
ཤིགས་པའི་ཐིག་ལེ་ལ་བརྟེན་ནས་རྡོར་བཟླས་བྱ་སྟེ། སྙིང་གའི་རྩ་མདུད་གྲོལ་བ་ན་རྣམ་རྟོག་ཐམས་ཅད་འཇོམས་པའི་ཕྱིར་དང་། རྩ་མདུད་གཞན་རྣམས་ཀྱང་འགྲིབ་པ་འཕྲོགས་པ་སྟེ་གྲོལ་བར་འགྱུར་བའི་ཕྱིར་རོ། །གཉིས་པ་ལ། འཁོར་བར་
རྐྱེན་གང་གིས་འཁོར་བ་དང་། རིགས་པའམ་ཐབས་གང་གྲོལ་བའོ། །དང་པོ་ནི། །རྣམ་པར་རྟོག་པའི་རླུང་གཉིས་ནི། །ལུས་ཀུན་ལ་ནི་ཁྱབ་པར་བྱེད། །སྣ་ཡི་བུ་ག་ལས་ནི་རྒྱུ། །ལུས་ལ་རྟག་ཏུ་འབྱུང་བར་བྱེད། །འགྲོ་བ་དྲུག་གི་འཁོར་བའི་ལམ། །
ཞེས་ཏེ། །སྙིང་གའི་རྩ་མདུད་མ་ཕྱེད་པའི་དབང་གིས་རྟོག་པའི་རླུང་སྲོག་ཐུར་གཉིས་སྙིང་གའི་དབུ་མའི་ནང་དུ་འདྲེ་མ་ནུས་པར་སྟེང་འོག་གི་རྩ་སྒོ་མཐའ་ཡས་བ་ནས་བརྒྱུས་ནས་རང་བཞིན་བརྒྱད་ཅུའི་རྟོག་པ་གཡོས་ཏེ། །དེས་ལས་བསགས་
6-8-13b


ནས་འགྲོ་བ་རིགས་དྲུག་གི་འཁོར་བར་འཁོར་བ་ཡིན་ནོ། །གཉིས་པ་ལ། རིགས་པ་མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། གསུམ་པ་རྣལ་འབྱོར་པ་ཡིས་རྟོགས། །རྣམ་རྟོག་མེད་པར་རྨད་བྱུང་ཆེ། །རླུང་རྣམས་ཐམས་ཅད་འགོག་པས་ན། །སྐྱེ་
བ་དེ་ཉིད་རྟོགས་པའོ། །ཞེས་ཏེ། གསུམ་པ་ཐུགས་རྡོ་རྗེའི་མཚོན་དོན་རྟོག་པའི་རྣལ་འབྱོར་པས་རྡོར་བཟླས་བྱས་པས་རྨད་དུ་བྱུང་ཞིང་རྟོག་པ་འཇོམས་པར་བྱེད་པའི་རྣལ་འབྱོར་སྐྱེའོ། །གང་གིས་ན་རླུང་གི་དེ་ཉིད་རྟོགས་པས་སོ། །གང་ན་སྙིང་གའི་དབུ་
མའི་ནང་དུ་སྲོག་ཐུར་བསྲེ་བར་བྱེད་པའོ། །གཉིས་པ་ལ། རླུང་འགོག་པའི་རིགས་པའམ། །ཐབས་རྒྱས་པར་བཤད་པ་དང་། ལམ་གྱི་གོ་རིམ་དང་། རྩ་མདུད་གྲོལ་པའི་རྟགས་སོ། །དང་པོ་ནི། སྤྲུལ་པ་ཆོས་ཀྱི་འཁོར་ལོའི་དབུས། །འདིར་ནི་པདྨ་གཉིས་
སུ་གསུངས། །དྲུག་ཅུ་རྩ་བཞི་བརྒྱད་འདབ་གཉིས། །སྟེང་དང་འོག་དུ་ཁ་བལྟས་བཞིན། །སྟེང་འོག་ཡང་དག་བརྟེན་ནས་ནི། །སྲོག་དང་ཐུར་སེལ་རྒྱུ་བར་བྱེད། །དེ་འདྲ་ཁོ་ན་རྟོག་བཅས་པས། རླུང་གཉིས་སུ་ནི་གསལ་བར་གསུངས། །སྐུ་དང་གསུང་གི་སྙིང་
པོ་སྟེ། །ལཱ་ལ་ན་དང་རཱ་ས་ན། །ཨ་བ་དྷཱུ་ཏཱི་མཆོག་གི་རྩ། །དེ་འདྲ་དབུས་མ་མཆོག་གི་མཆོག །རྣམ་རྟོག་མེད་པའི་རླུང་གང་ཡིན། །རྟག་ཏུ་རྒྱུ་ཞིང་ཀུན་ལ་ཁྱབ། །རྣལ་འབྱོར་གང་འཐོབ་རྟག་ཏུ་ནི། །སེམས་ཅན་དོན་བྱེད་ནུས་པར་འགྱུར། །རླུང་གི་རང་བཞིན་
བྱེ་བྲག་ནི། །བརྒྱ་དང་བརྒྱད་ལས་གང་རྒྱལ་བ། །དུས་ཀུན་ཏུ་ནི་རྒྱལ་ནས་གནས། །རྣལ་འབྱོར་བྱིས་པ་མི་ཤེས་པ། །སྐད་ཅིག་གཅིག་མངོན་རྫོགས་བྱང་ཆུབ། །དེ་ཡིས་ཐོབ་པར་རྒྱུད་འདིར་གསུངས། །དེ་ནི་གང་ཚེ་སྐད་ཅིག་འཐོབ། །དེ་ནི་སྐད་ཅིག་
6-8-14a


མཆོག་ཏུ་གསུངས། །དེ་ཡང་ཇི་ལྟར་འཐོབ་པར་བྱེད། །དེ་ལ་རིགས་པ་རུ་ནི་བརྗོད། །ཅེས་གསུངས་ཏེ། །ལྟེ་བའི་རྩ་འདབ་དྲུག་ཅུ་རྩ་བཞི་དང་སྙིང་ག་ཆོས་འཁོར་གྱི་རྩ་འདབ་བརྒྱད་པ་གཉིས་སྟེང་དང་འོག་ཏུ་ཁ་བལྟས་པ་སྟེ། །ཟ་
མ་ཏོག་བཞིན་ཏུ་འོག་མ་ཁ་གྱེན་ལྟ་དང་གོང་མཐུར་ལྟར་གནས་པའོ། །སྙིང་གའི་རྩ་མདུད་དེའི་དབང་གིས་སྲོག་ཐུར་གཉིས་ཀྱང་དེའི་སྟེང་འོག་གི་རྩ་རྣམས་ལ་བརྟེན་ནས་རྒྱུ་ཞིང་རང་བཞིན་གཡོ་བར་བྱེད་པས་དེ་གཉིས་ལ་རྟོག་བཅས་ཀྱི་རླུང་ཞེས་བྱའོ། །སྐུ་
དང་གསུངས་རྩ་རོ་རྐྱང་གཉིས་ཀྱི་ཐུགས་ཀྱི་རྩ་དབུ་མ་གཙོ་བོ་ཡིན་ལ་དེའི་ནང་དུ་རྣམ་རྟོག་གཅོད་པར་བྱེད་པའི་འོད་གསལ་གྱི་རླུང་རྟག་ཏུ་རྒྱུ་བ་སྟེ་གནས་པར་བྱེད་ལ། རྡོར་བཟླས་ཀྱི་རྣལ་འབྱོར་གྱིས་སྙིང་གའི་རྩ་མདུད་བཤིག་ནས་འོད་གསལ་མངོན་
དུ་འགྱུར་ཏེ། །རག་གཞན་གྱི་དོན་གཉིས་འགྲུབ་པར་འགྱུར་བ་དང་། འཁོར་ལོ་དྲུག་གི་རྩ་ནང་དུ་མཚན་ཕྱེད་ནས་ཉིན་ཕྱེད་དང་། དེ་ནས་མཚན་ཕྱེད་ཀྱི་བར་དུ་རླུང་དགུ་དགུ་རྒྱུ་བའི་དབྱེ་བས་ཕྱེ་བའི་རླུང་བརྒྱ་རྩ་བརྒྱད་ལས་རྒྱལ་བ་སྟེ་སྙིང་གའི་དབུ་མའི་ནང་དུ་
བསྡུས་ནས་གནས་ཤིང་སྐད་ཅིག་དེ་ཉིད་ལ་གཞི་དུས་ཀྱི་འོད་གསལ་མངོན་དུ་འགྱུར་རོ། །གཉིས་པ་ནི། །ཐོག་མར་རྣལ་འབྱོར་པ་ཆེན་པོ། །བློ་བཟང་གིས་ནི་ཞི་གནས་བསྒོམས། །བསྐྱེད་པའི་རིམ་པའི་སྦྱོར་བ་ཡིས། །ཁྲོ་བོའི་ཕྱག་རྒྱ་བྱས་ནས་ཀྱང་། །
དབང་པོ་ཡི་ནི་སྒོ་དགུ་ལ། །ཐམས་ཅད་དུ་ནི་ཀུན་བསྡོམས་པ། །ཧཱུཾ་བཟླས་པ་ནི་མཚུངས་མེད་བྱ། །མཆོག་ཏུ་རྒྱུན་མི་འཆད་པར་ནི། །ཟླ་བ་དྲུག་ཏུ་བྱས་ནས་ཀྱང་། །དེ་རྗེས་སྐད་ཅིག་དེ་ལ་ཐོབ། །གང་ཕྱིར་དེ་ནི་བཟླས་བྱས་ནས། །སྙིང་གའི་པདྨའང་
6-8-14b


སྟེང་བལྟས་འཇིག །དེ་ནས་གསང་བའི་པདྨ་ཡི། །ཁ་སྦྱོར་བ་ནི་བྱེ་ནས་ཀྱང་། །རྣམ་པར་རྟོག་པའི་རླུང་གཉིས་ནི། །དེ་རྣམས་རྣམ་པར་བཅད་ནས་འགྲོ། །ཞེས་གསུངས་ཏེ། རྟོག་པ་དེ་དག་བསྐྱེད་པའི་གོ་རིམ་ནི་ཐོག་མར་རྣལ་འབྱོར་པས་ཞི་གནས་ཏེ་བསྐྱེད་
པའི་རིམ་པ་ལེགས་པར་མཐར་ཕྱིན་པར་བྱས་པའི་ཁྲོ་བོའི་ཕྱག་རྒྱའམ་འབར་བའི་ཕྱག་རྒྱས་ཐ་མལ་པའི་སྣང་ཞེན་ལེགས་པར་བསྲེགས་ནས་དེ་ནས་རྫོགས་པའི་རིམ་པ་བསྒོམ་པར་བྱས་ཏེ། །ལུས་རྣམ་པར་དབེན་པ་མཐར་ཕྱིན་པར་བྱས་ནས་དབང་པོའི་སྒོ་
ཀུན་ཏུ་རྒྱུ་བའི་རླུང་བཅད་ནས་སྙིང་གའི་དབུ་མའི་ནང་དུ་གཞུག་པར་བྱ་བའི་ཕྱིར་དུ་སྔར་བཤད་པར་ལྟར་རྡོ་རྗེའི་བཟླས་པ་ཟླ་བ་དྲུག་ཏུ་བྱ་ལ་དེ་བྱས་ནས་སྙིང་གའི་པདྨའི་རྩ་མདུད་ཀྱང་འཇིག་པར་འགྱུར་བ་ཁ་སྟེང་དུ་བལྟས་པའི་སྤྲུལ་པའི་འཁོར་ལོའི་རྩ་མདུད་
ཀྱང་འཇིག་ཅིང་གསང་བའི་པདྨའི་རྩ་མདུད་དང་སྨིན་དབུས་རླུང་གི་འཁོར་ལོའི་རྩ་མདུད་སོགས་བྱེ་ནས་རྣམ་པར་རྟོག་པའི་རླུང་སྲོག་ཐུར་གཉིས་རོ་རྐྱང་ནས་རྒྱུ་བ་བཅད་ནས་རང་གི་གནས་སྙིང་གའི་དབུ་མའི་ནང་དུ་འདུ་བར་འགྱུར་ལ། དེ་འདུས་པར་རང་བཞིན་
བརྒྱད་ཅུའི་རྟོག་པ་དང་བྲལ་ནས་སྟོང་པ་བཞིའི་རྣལ་འབྱོར་སྐྱེ་བར་འགྱུར་བ་ཡིན་ནོ། །གསུམ་པ་ནི། རྩ་མདུད་གྲོལ་ནས་རྣལ་འབྱོར་པ་དེ་ལ་ལུས་འདར་བ་དང་རྡུལ་དང་བ་སྤུ་ལངས་པ་དང་རྟག་ཏུ་དགའ་བའི་བསམ་པ་དང་། གདོང་ཟངས་ཀྱི་མདོག་ལྟ་བུ་དང་། 
ཀུན་གྱིས་མཐོང་ན་དགའ་བ་དང་། བཀྲེས་སྐོམ་གྲང་དྲོ་ལ་སོགས་པའི་རེག་པས་མི་གནོད་པ་དང་འཇིག་རྟེན་གྱི་ཆོས་བརྒྱད་ཀྱིས་མི་གོས་པ་ལ་སོགས་པའི་རྟགས་རྣམས་འབྱུང་བར་འགྱུར་རོ། །དེ་ལ་ལུས་དབེན་མཐར་ཕྱིན་པའི་གང་ཟག་དེས་རྡོར་བཟླས
6-8-15a


བྱེད་པའི་ཡུན་ཚད་ཟླ་བ་དྲུག་བྱས་ནས་དེའི་སྐབས་སུ་ཉམས་མྱོང་མི་འདྲ་བ་དྲུག་བཤད་རྒྱུད་རྡོ་རྗེ་ཕྲེང་བ་ལས་གསུངས་ཏེ། དེ་ལ་མདོར་བསྟན་པ་ནི། །བགྲང་བ་ཡི་ནི་སྦྱོར་བ་ཡིས། །བསྒོམ་བྱ་རྣལ་འབྱོར་མཆོག་གིས་རྟོགས། །
བགྲང་བ་དབུགས་ཀྱི་དབྱེ་བ་ཡིས། །དེ་བཞིན་རླུང་ནི་སྤྱད་པར་བྱ། །གནས་ཀྱི་དབྱེ་བ་རྩ་རྣམས་ནི། །དུས་ཀྱི་དབྱེ་བའི་རྟོག་པ་དང་། རླུང་རྣམས་ཀྱི་ནི་ལྡོག་པ་དང་། །རྟོག་པ་དང་བཅས་སྤངས་པ་སྟེ། །དེ་ལྟར་མདོར་བསྡུས་རྣམ་དྲུག་གིས། །འབྱུང་དང་འཇུག་
པར་རྗེས་སུ་དྲན། །ཞེས་གསུངས་ཏེ། ཆོས་མངོན་པ་ལས། དབུགས་འབྱུང་དབུགས་རྔུབ་ལ་དམིགས་ནས། །བགྲང་དང་རྗེས་འགྲོ་བཟླས་པ་དང་། །བསྒྱུར་མ་དང་ནི་རྟོག་པ་དང་། །ཡོངས་བརྟགས་རྣམ་པ་དྲུག་ཏུ་འདོད། །ཅེས་གསུངས་པ་དང་ཆ་
འདྲ་བར་རྣམ་པ་དྲུག་ཏུ་གསུངས་ཏེ། གྲངས་ཀྱི་དབྱེ་བ་ཆ་སྙོམས་པ་དང་རླུང་གི་གནས་ཀྱི་ངེས་པ་དང་། མཚན་ཉིད་ཀྱི་ངེས་པ་དང་། རླུང་ལྡོག་པའི་དུས་དང་། ཡོངས་སུ་དག་པའི་བཟླས་པ་དྲུག་ཏུ་གསུངས་ཏེ། གྲངས་ལ་ཡང་ཉི་ཁྲི་ཆིག་སྟོང་དྲུག་
བརྒྱའི་ངེས་པ་དང་། ཐུན་བརྒྱད་ལ་ཉིས་སྟོང་བདུན་བརྒྱ་རེ་ཆ་སྙོམས་པར་རྒྱུ་བའི་ངེས་པའོ། །རྒྱས་པར་བཤད་པ་ལ་དྲུག་གི་དང་པོ་ཉིན་ཞག་གཅིག་ལ་འབྱུང་འཇུག་བསྡོམས་པ་ལ་རེ་རེར་བྱས་པའི་ཉི་ཁྲི་ཆིག་སྟོང་དྲུག་བརྒྱ་ཆ་སྙོམས་པར་རྒྱུ་
བའི་ངེས་པ་ནི། །ཐོག་མར་འབྱུང་དང་རྔུབ་པ་རྣམས། །ཉི་ཁྲི་དང་ནི་ཆིག་སྟོང་དང་། །དེ་བཞིན་གྲངས་ནི་བརྒྱ་ཕྲག་དྲུག །ཉིན་མོ་མཚན་མོར་ངེས་པ་ནི། །ཇི་སྲིད་གྲངས་ནི་ཐོབ་པའི་གནས། །ཉིན་ཞག་ཉི་ཤུ་རྩ་བདུན་དུ། །གྲངས་ནི་རྗེས་སུ་
6-8-15b


སྦྱར་བ་ཡིས། །གྲངས་ནི་རབ་ཏུ་བརྟགས་པ་ཡིན། །ཞེས་གསུངས་ཏེ། སྔར་བཤད་པ་ལྟར་རྡོར་བཟླས་བྱས་པའི་མཐུས་ལུས་ཀྱི་འབྱུང་བ་ལེགས་པར་ཆ་བསྙོམས་ནས་ཉིན་མཚན་མཉམ་པའི་དབང་དུ་བྱས་ན་ཉིན་པར་རླུང་ཁྲི་བརྒྱད་སྟོང་དང་། མཚན་མོ་ཡང་དེ་
ཙམ་རེ་རྒྱུ་བ་ཉིན་མཚན་ཆ་སྙོམས་པ་དང་། སྔར་རེས་འགའ་ཞག་གཅིག་ལ་ཉི་ཁྲི་ཆིག་སྟོང་དྲུག་བརྒྱ་རྒྱུ་ཡང་དུས་ཀུན་ཏུ་མ་ངེས་ལ་འདི་ནས་ནམ་ལངས་ནས་ནམ་ལངས་ཀྱི་བར་ལ་ངེས་པར་གྲངས་དེ་ཙམ་རེ་རྒྱུ་བའི་སྒོ་ནས་ལུས་ཆ་སྙོམས་པའི་ལག་རྗེས་
འཇོག་པ་ཡིན་ཏེ། དུས་འཁོར་ལས། བཙས་ནས་རིང་པོར་མ་ལོན་པ་ནས་རྩ་གཉིས་གཉིས་སྐེམས་པར་འགྱུར་བར་བཤད་པ་སོགས་ཀྱང་སྐབས་འདི་ནས་སོར་ཆུད་པར་འགྱུར་བ་ལྟ་བུའོ། །དེ་ལ་སྤྱིར་ལུས་ལ་གནད་དུ་བསྣུན་པའི་སྒོ་ནས་ཏིང་ངེ་འཛིན་སྐྱེ་བ་
མཆོག་ཏུ་འགྱུར་བའི་ཚུལ་འོག་མ་རྣམས་ལའང་ཡོད་དེ། ཐུན་མོང་བའི་ཞི་གསན་ཀྱི་སྐབས་སུ། །དང་པོར་སེམས་ཤིན་སྦྱང་སྐྱེ་ལ། །དེ་ནས་ལུས་སིན་སྦྱངས་སྐྱེ་སྟེ། །དེར་ནི་ཞི་གནས་མཚན་ཉིད་པ་སྐྱེ་པ་དང་རྗེས་སུ་མཐུན་པའི་རླུང་ལས་རུང་སྐྱེས་ནས་ཞི་གནས་
འགྲུབ་པར་འགྱུར་བ་ཡིན་ནོ། །དེ་བཞིན་དུ་རྒྱུད་སྡེ་འོག་མ་གསུམ་གྱི་སྐབས་སུའང་རླུང་ལས་རུང་དུ་བྱས་པའི་སྒོ་ནས་ཏིང་ངེ་འཛིན་ཁྱད་པར་ཅན་སྐྱེ་བ་དང་། བསྐྱེད་རིམ་གྱི་སྐབས་སུ་ཡང་། ཕྲ་མོའི་རྣམ་འབྱོར་བརྟན་པར་བསྒོམས་པས་རླུང་ལས་རུང་སྐྱེས་
ནས་ཏིང་ངེ་འཛིན་ཁྱད་པར་ཅན་སྐྱེ་ལ། །རྫོགས་རིམ་གྱི་སྐབས་སུ་ནི་ལུས་ལ་གནད་དུ་བསྣུན་པའི་སྒོ་ནས་ངེས་པར་ལམ་སྒྲུབ་དགོས་པ་ཡིན་ནོ། །གཉིས་པ་ཐུན་ཚོད་བརྒྱད་ཀྱི་སྒོ་ནས་རླུང་གི་གྲངས་ཀྱི་ངེས་པ་ནི། ཐུན་མཚམས་ཀྱི་ནི་རབ་དབྱེ་བས། །དེ་ནས་རྗེས་
6-8-16a


འགྲོ་བཟླས་པ་ནི། །ཐུན་ཚོད་སོ་སོར་སྲོག་རྣམས་དང་། །སྲོག་དང་རྩོལ་བ་བརྟག་པ་སྟེ། །ཉིས་སྟོང་བདུན་བརྒྱའི་གྲངས་ཀྱིས་ནི། །ཡང་དག་པར་ནི་ངེས་བཟུང་བྱེད། །ཡོངས་སུ་གཅོད་པའི་རྣམ་པ་ཡིས། །ཉིན་ཞག་ཉི་ཤུ་རྩ་བདུན་
ལ། །ཞེས་གསུངས་ཏེ། །དྲུག་ཀ་ཞག་ཉེར་བདུན་རེས་བྱེད་པར་འདྲ་ལ། །སྐབས་འདིར་ཡང་། །རྡོར་བཟླས་བྱས་པས་ཉིན་ཞག་གཅིག་ལ་ཐུན་ཚོད་བརྒྱད་དུ་བྱས་པའི་ཐུན་རེ་ལ་ཉིས་སྟོང་བདུན་བརྒྱ་རེ་ཆ་སྙོམས་པར་རྒྱུ་བའི་ལག་རྗེས་འཇོག་པ་ཡིན་ཏེ། །སྔར་
ནི་དེ་ལྟ་བུའི་ངེས་པ་མེད་པར་རེས་འཇོག་ཏུ་རྒྱུ་བ་ཡིན་ནོ། །འགྲེལ་པས་པདྨ་མགོན་པོའི་རྒྱུ་བ་ལྟ་བུ་གཅིག་ལ་དགུ་བརྒྱ་པ་ཕྲག་གཅིག་ཡོད་ལ་དེ་ལ་འབྱུང་འཇུག་གནས་གསུམ་དུ་ཕྱེ་བས་ཉིས་སྟོང་བདུན་བརྒྱ་ཡིན་ནོ། །ཞེས་ཟེར་བ་ན་དོན་མ་ཡིན་ཏེ། དེ་ནི་ཞག་
གཅིག་ལ་ཐུན་ཕྱེད་པ་ཉེར་བཞིར་ཕྱེ་བའི་དབང་དུ་བྱས་ལ། །འདིར་ནི་ཐུན་བརྒྱད་དུ་བྱས་ནས་དེའི་ཐུན་རེ་ལ་ཉིས་སྟོང་བརྒྱ་རེ་རྒྱུ་བར་གསུངས་པའི་ཕྱིར་རོ། །གསུམ་པ་རླུང་རྒྱུ་བའི་གནས་ཀྱི་ངོ་བོ་ཇི་ལྟ་བཞིན་དུ་རྟོགས་པའི་ཉམས་མྱོང་སྐྱེ་ཚུལ་ནི། འཁོར་
ལོ་བཞི་ཡི་དབྱེ་བ་ཡིས། །ཉིན་དང་མཚན་དུ་ངེས་པར་ནི། །དེ་ནས་གནས་པ་འབད་པ་ཡིས། །ཐ་དད་དུ་ནི་རབ་ཏུ་བརྟག །རྩ་ཡི་འཁོར་ལོ་རྒྱུ་བ་ཡིས། །འབྱུང་དང་རྔུབ་པ་ངེས་པར་ནི། །ངེས་པར་གཟུང་བའི་སྦྱོར་བ་ལས། རྩ་ཡི་འཁོར་ལོ་སྤྱད་པར་བྱ། །དེ་ནི་
འཁོར་ལོ་རྩ་དབྱེ་བས། །ཉིན་ཞག་ཉི་ཤུ་རྩ་བདུན་ལ། །ཞེས་གསུངས་ཏེ། །ཞག་ཉེར་བདུན་གསུམ་པའི་སྐབས་སུ་རླུང་རྒྱུ་བའི་གནས་རྩའི་འཁོལ་ལོ་རྣམས་ཀྱི་འདབ་མ་དང་སྐྱེད་པ་དང་རྩ་མདུད་ཇི་ལྟར་ཡོད་པ་རྣམས་མྱོང་པའི་རྣམ་པས་ཇི་ལྟ་བ་བཞིན་
6-8-16b


དུ་རྟོགས་པའོ། །བཞི་པ་རླུང་རང་གི་མཚན་ཉིད་ཇི་ལྟ་བ་བཞིན་དུ་རྟོགས་པའི་རྟོགས་པ་སྐྱེད་ཚུལ་ནི། །དེ་ནས་མཚན་ཉིད་ཡང་དག་ནི། །གནས་ཀྱི་དབྱེ་བས་བརྟག་པར་བྱ། །གནས་ནི་སོ་སོར་རྣམ་བརྟགས་རྣམས། །བརྒྱད་དང་བརྒྱད་ནི་ལྷག་པར་རྒྱུ། །
རྣམ་རྟོག་མེད་པ་སྦྱོར་བ་མཆོག །རྟོག་པ་སྤངས་པའི་བདག་ཉིད་ཅན། །དངོས་པོ་ཀུན་གྱི་རང་བཞིན་བདག །བརྒྱ་དང་བརྒྱད་ནི་ལྷག་པར་རྒྱུ། །འདི་ནི་ཡང་དག་རྣལ་འབྱོར་མཆོག །ཉིན་ཞག་ཉི་ཤུ་རྩ་བདུན་གྱིས། །མཚན་ཉིད་བསྒོམས་པའི་རྣལ་
འབྱོར་བ། །ཇི་ལྟར་གནས་པ་རབ་བསྒོམས་པས། །ཞེས་གསུངས་ཏེ། ཞག་ཉེར་བདུན་པ་བཞི་པའི་སྐབས་སུ། འཁོར་ལོ་བཞི་དང་སྨིན་དབུས་རླུང་གི་ཁོར་ལོ་འདབ་མ་དྲུག་པ་དང་། མགྲིན་པའི་འོག་གི་མེའི་འཁོར་ལོ་འདབ་མ་གསུམ་པ་དང་དྲུག་པོ་རེ་
རེ་མཚན་ཕྱེད་ཕྱེད་ནས་ཉིན་ཕྱེད་ཀྱི་བར་དུ་རླུང་དགུ་དགུ་བརྒྱུས་པས་དགུ་དྲུག་ལྔ་བཅུ་རྩ་བཞི་དང་། དེ་བཞིན་དུ་ཉིན་ཕྱེད་ནས་མཚན་ཕྱེད་ཀྱི་བར་ཡང་རྒྱུ་བའི་སྒོ་ནས་ཕྱེ་བའི་རླུང་གི་མཚན་ཉིད་ཇི་ལྟ་བ་བཞིན་དུ་མཐོང་བ་སྟེ། སྔར་རང་ག་བའི་དུས་སུ་
རྩ་དང་རླུང་གི་ཁ་དོག་སོགས་མཐོང་བ་ལྟ་བུར་སྣང་བ་ནི་ཉམས་ཙམ་ཡིན་གྱི་མྱོང་བའི་རྣམ་པས་ཇི་ལྟ་བ་བཞིན་དུ་མཐོང་བ་མ་ཡིན་ནོ། །ལྔ་པ་རླུང་ལྡོག་པའི་དུས་ནི། རྟོག་པ་བཅས་བདག་རྣལ་འབྱོར་པས། །དེ་ལ་རྣལ་འབྱོར་ལོག་ནས་ནི། །མི་རྟོག་
པ་ཡི་རླུང་ཆེན་པོ། །རྩ་ཡི་འཁོར་ལོར་རྣམ་པར་རྒྱུ། །དེ་ཐོབ་ནས་ནི་ལོག་པ་དང་། །དེ་ནས་ཉོན་མོངས་ཀུན་སྦྱོར་ལས། །ངེས་པ་ལས་ནི་དོན་དམ་པ། །ཉིན་ཞག་ཉི་ཤུ་རྩ་བདུན་ལ། །ལས་དང་པོ་ཡི་སྦྱོར་བ་ཡིས། །ལོག་པར་བློ་དང་ལྡན་པས་
6-8-17a


བསྒོམ། །ཞེས་གསུངས་ཏེ། །ཞག་ཉེར་བདུན་ལྔ་པའི་སྐབས་སུ། རྩ་གཞན་རྣམས་ནས་རླུང་རྒྱུ་བ་ལྡོག་པའི་མགོ་རྩོམ་ཞིང་དབུ་མའི་ནང་དུ་འཇུག་པར་བྱེད་པའོ། །དེ་ཡང་གཙོ་བོ་སྙིང་གའི་མདུད་ཀྱི་ནང་དུ་འཇུག་རྩོམ་པས་ཏེ། །འདི་
ནི་རླུང་ལྡོག་པའི་དུས་ཁྱད་པར་ཅན་ནོ། །མ་རྒྱུད་སོགས་ནས་བཤད་པ་ལྟར་གཏུམ་མོ་བསྒོམས་པས་དགའ་བཞིའི་རྟོགས་པ་བསྐྱེད་པའི་ཚུལ་དང་སྐབས་འདིར་ཡང་སེམས་དབེན་གྱི་རྟོགས་པ་སྐྱེས་པའི་གོང་དུ་སྙིང་གའི་མི་ཤིགས་པའི་ཐིག་ལེ་ལ་སེམས་
གཟུང་བའི་སྟོབས་ཀྱིས་རླུང་དབུ་མར་བསྡུས་ཏེ་རྟགས་ལྔ་ཤར་ནས་སེམས་དབེན་དང་རྣམ་པ་འདྲ་བའི་རྟོགས་པ་སྐྱེས་ཀྱང་སེམས་དབེན་དུ་མི་བཟུང་སྟེ། སེམས་དབེན་ནི་ངེས་པར་སྙིང་གའི་རྩ་མདུད་གྲོལ་ནས་དེར་རླུང་ཐིམ་པ་ལ་བལྟོས་པའི་ཕྱིར་རོ། །དེས་
ན་འདིའི་སྐབས་ཀྱི་སྟོང་པ་བཞི་ལ་དགའ་བཞིས་ཁྱབ་ཀྱང་དགའ་བཞི་ལ་འདིས་མ་ཁྱབ་བོ། །དྲུག་པ་ཡོངས་སུ་དག་པའི་བཟླས་པ་ནི། དེ་ནས་རྣམ་དག་དེ་དག་ཀྱང་། །ཡང་དག་རྣལ་འབྱོར་སྟོབས་ཀྱིས་ནི། །སྲོག་དང་རྩོལ་བའི་རྣལ་འབྱོར་རྣམས། །ཀུན་ནས་རབ་
ཏུ་སྤངས་ནས་ནི། །རླུང་གི་དེ་ཉིད་ཁོ་ནའི་རྒྱུ། །རྣལ་འབྱོར་མཆོག་ནི་བསྒོམ་པར་བྱ། །གཉིས་མེད་མཆོག་གི་རྣལ་འབྱོར་གྱིས། །ཉིན་ཞག་ཉི་ཤུ་རྩ་བདུན་ལ། །ཞེས་གསུངས་ཏེ། ཞག་ཉེར་བདུན་པ་དྲུག་པའི་སྐབས་སུ་སྙིང་གའི་རྩ་མདུད་གྲོལ་ནས་རླུང་ཐམས་ཅད་
དེར་འདུས་ནས་ས་ཆུ་ལ་ཐིམ་པ་སོགས་ཀྱི་རྟགས་རྣམས་སྐྱེས་ཏེ། སེམས་དབེན་གྱི་རྟོགས་པ་སྐྱེ་བར་འགྱུར་རོ། །ཞག་ཉེར་བདུན་པ་དྲུག་པ་འདིའི་སྐབས་སུ་རྡོར་བཟླས་མ་བྱས་ཀྱང་སྔར་མདོར་བསྟན་གྱི་སྐབས་སུ་རྣམ་པ་དྲུག་གིས་འབྱུང་འཇུག་བྱེད་པར་
6-8-17b


བཤད་པ་དང་མི་འགལ་ཏེ། །དེ་ནི་ཐ་མ་དང་བཅས་པའི་དུས་དང་པོ་ལྔའི་སྐབས་སུ་རྡོར་བཟླས་བྱེད་པས་རྣམ་པ་དྲུག་ཅེས་སྨོས་སོ། །རྩ་མདུད་གྲོལ་ནས་མི་ཤིགས་པའི་ཐིག་ལེ་དཀར་དམར་ཡང་ཁ་བྱེ་བར་འགྱུར་རོ། །དེ་ལ་རྡོར་བཟླས་བྱས་པའི་མཐར་རླུང་
སྡུད་པའི་རིམ་པ་ཤེས་དགོས་ཏེ། ལེའུ་གསུམ་པའི་ཕྲ་མོའི་རྣལ་འབྱོར་སྟོན་པའི་ཐད་དུ་སྒྲོན་གསལ་ལོ་ཆེན་གྱིས་བསྒྱུར་བའི་དག་པ་དང་པ་ཚབ་ཀྱིས་བསྒྱུར་བ་ལས། །འཇུག་པ་དང་གནས་པ་དང་ལྡང་བ་དང་སྡུད་པའི་རྣལ་འབྱོར་ཞེས་བཞིར་གསུངས་པའི་
སྡུད་པར་བཤད་པ་དང་། དེ་བཞིན་དུ་ལེའུ་དྲུག་པ་དང་རྒྱུད་ཕྱི་མའི་སྲོག་ནི་ཐིག་ལེར་གྱུར་པར་བཞག །ཅེས་པའི་འགྲེལ་པ་སྒྲོན་གསལ་རྣམས་ཀྱི་དགོངས་པ་དང་ཁྱད་པར་རླུང་སྡུད་པའི་རིམ་པ་ལྷ་མོ་བཞིས་ཞུས་ལས་གསུངས་པ་ངེས་པར་ཤེས་
དགོས་སོ། །ཡང་ན་དཔལ་ནཱ་རོ་པས་མཛད་པའི་རིམ་ལྔ་བསྡུས་པ་གསལ་བའི་དོན་ཚན་སོ་སོར་གཅོད་ཚུལ་འདི་ལྟར་ཤེས་པར་བྱ་སྟེ། གདམས་པའི་ཆེ་བ་དང་། གདམས་པ་དངོས་སོ། །དང་པོ་ལ། །སངས་རྒྱས་ཀུན་གྱི་གསང་བ་ཆེ། །རིམ་པ་ལྔ་ལ་
གནས་པ་པོ། །ཞེས་པའི་རྐང་པ་གཉིས་ཀྱི་མདོར་བསྟན་ནས་དེའི་རྒྱས་བཤད་འོག་ནས་བྱང་ཆུབ་སེམས་ལྡན་བླ་མ་དང་། །ཞེས་པ་ནས། མཆོག་ཐོབ་སྐུས་ནི་གཞན་དོན་བྱེད། །ཅེས་པའི་བར་དང་། ཡི་གེའི་དོན་དང་སྤྱི་ཡི་དོན། །ཞེས་པ་ནས། སྟན་
ཅིག་སྟེང་དུ་སྦྱར་ཏེ་བཤད། །ཅེས་པའི་བར་རྣམས་ཀྱིས་འཆད་དོ། །དེ་ཡང་ཡེ་ཤེས་རྡོ་རྗེ་ཀུན་ལས་བཏུས་པའི་དགོངས་པ་སྒྲོན་གསལ་དུ་བཤད་པ་ལྟར་དཔལ་གསང་བ་འདུས་པ་མདོ་སྡེ་དང་། རྒྱུད་སྡེ་ཀུན་གྱི་སྣོད་དང་རྩ་བར་བསྒྲུབས་པའི་སྒོ་ནས་
6-8-18a


ཆེ་བ་འཆད་དེ། །དེའང་དེ་དག་ཀུན་རྒྱུད་འདིར་འདུས་པར་སྟོན་པ་ཡིན་ལ། བསྡུས་ཚུལ་བླ་མ་སྔ་མ་ཁ་ཅི་ཕྱིའི་ནང་དུ་གསང་བ་འདུས་པ་ལ་འཆད་པ་ནི་མི་འཐད་དེ། །མདོ་རྒྱུད་དེ་དག་གིས་བརྗོད་པའི་དོན་གྱི་གསང་བ་ཀུན་
རྒྱུད་འདིར་བརྗོད་བྱར་སྟོན་པ་མིན་ནོ། །དེས་ན་འདིར་བསྟན་པའི་རིམ་གཉིས་ཀྱི་ལམ་དང་། རྫོགས་རིམ་གྱི་ཡང་ལམ་རིམ་པ་ལྔ་པོས་གཞན་ནས་བསྟན་པའི་ལམ་གྱི་དགོས་པ་མཐའ་དག་ལྷག་དང་བཅས་པ་སྒྲུབ་པ་ནི་འདུས་པའི་དོན་ཡིན་ཏེ། འཆད་
པར་འགྱུར་རོ། །དཔེན་ན་ཉན་ཐོས་ཀྱི་ལམ་གྱི་བྱེད་པ་ཉོན་སྒྲིབ་ཟད་པར་སྔོ་བ་སོགས་ལམ་འདིས་ལྷག་དང་བཅས་པ་འགྲུབ་པ་བཞིན་ནོ། །སྦྱོར་བ་ཡན་ལག་དྲུག་ལམ་རིམ་པ་ལྔར་འདུས་པའི་ཚུལ་ལ་བླ་མ་སྔ་མ་ཁ་ཅིག །གཞན་ལུགས་འགོག་པ་
དང་། རང་ལུགས་འཇོག་པའི་ཚུལ་འདི་ལྟར་མཛད། །སློབ་དཔོན་ཨ་བྷ་ཡཱས་སོར་སྡུད་དང་། བསམ་གཏན་བསྐྱེད་རིམ་དུ་བསྡུས་པ་མི་འཐད་དེ། །རྒྱུད་ཕྱི་མ་ལས། ཐུན་མོང་མཆོག་གི་དབྱེ་བ་ཡིས། །བསྙེན་པ་རྣམ་པ་གཉིས་སུ་འདོད། །ཐུན་མོང་བ་
ན་རྡོ་རྗེ་བཞི། །མཆོག་ནི་ཡན་ལག་དྲུག་གིས་སོ། །ཞེས་བསྐྱེད་རིམ་ཐུན་མོང་གི་དངོས་གྲུབ་སྒྲུབ་བྱེད་དང་། སྦྱོར་བ་ཡན་ལག་དྲུག་མཆོག་སྒྲུབ་བྱེད་དུ་སོ་སོར་བཤད་པའི་ཕྱིར། སོར་སྡུད་སྤྱོད་པ་དང་། བསམ་གཏན་ལུས་དབེན་
ལ་སྦྱོར་བ་ཡང་མི་འཐད་དེ། རྫོགས་རིམ་གྱི་སྤྱོད་པ་ལམ་མཐོན་པོའི་སྐབས་སུ་བྱེད་པ་ཡིན་པས་ཐོག་མར་འཆད་པ་མི་འཐད་ལ། །རྒྱུད་ཕྱི་མ་ལས། ཤེས་དང་ཤེས་བྱ་བྱུང་ཟད་པའི། །རང་སེམས་ལྔ་པར་ཤེས་པར་བྱ། །ཞེས་བསམ་གཏན་གྱི་
6-8-18b


སྐབས་སུ་བཤད་པའི་ཡོན་ཏན་དེ་དག་ལུས་དབེན་ལ་མེད་པས་སོ། །སྒྲོན་གསལ་གྱི་དོན་བསྡུས་ཀྱི་འགྲེལ་པ་མཛད་པ་པོ་ཀུ་མཱ་ར་རཱ་ཛས། །སོར་བསམ་གཉིས་སེམས་དབེན་དང་། དོན་གཅིག་ཏུ་བྱེད་པ་ཡང་མི་འཐད་དེ། །སྒྱུ་ལུས་དང་། །དོན་གཅིག་ཏུ་
འཆད་པར་འགྱུར་རོ། །དེས་ན་དུས་འཁོར་ནས་བཤད་པའི་སྦྱོར་བ་ཡན་ལག་དྲུག་དང་། རྒྱུད་ཕྱི་མ་ནས་བཤད་པ་གཉིས་དོན་གཅིག་ཅིང་དེ་དང་འཕགས་པ་ཡབ་སྲས་ཀྱི་བཞེད་པའི་རིམ་པ་ལྔ་པོ་དོན་གཅིག་ཡིན་ཏེ། །དུས་འཁོར་ནས་སོར་བསམ་ལ་
ཀུན་རྫོབ་བདེན་པ་ཞེས་པ་དང་། བདག་བྱིན་གྱི་བརླབ་པ་ཞེས་བཤད་ཅིང་། །སློབ་དཔོན་འཕགས་པས་སྒྱུ་ལུས་ལ་མིང་དེ་ལྟར་བཤད་པ་གཉིས་དོན་གཅིག་ཅིང་སྲོག་རྩོལ་དང་ངག་དབེན་གཉིས་དང་། འཛིན་པ་དང་འོད་གསལ་གཉིས་དང་། ཏིང་
ངེ་འཛིན་དང་ཟུང་འཇུག་གཉིས་དོན་གཅིག་ལ། རྗེས་དྲན་ཁ་ཕྱིར་བལྟས་བསྡུས་པའི་སྟོང་གཟུགས་ལྷ་སྐུར་ཤར་བ་དང་། ནང་བལྟས་བསྡུས་པའི་དགལ་བཞིའི་རྟོགས་པ་སྐྱེ་བའི་ཚུལ་གཉིས་ཡོད་པའི་ཕྱི་མ་སེམས་དབེན་དང་དོན་གཅིག་པ་ཡིན་
གསུངས་ངོ་། །དེ་ལ་དཔྱད་པར་བྱས་སྟེ། །རྒྱུད་ཕྱི་མའི་ཚིག་གིས་མཆོག་དང་ཐུན་མོང་གི་དངོས་གྲུབ་བསྒྲུབ་པའི་ལམ་གཉིས་སོ་སོར་བཤད་ཀྱང་། །འགལ་བར་ཡང་མ་བཤད་པས་སློབ་དཔོན་ཨ་བྷ་ཡཱ་ལ་གནོད་བྱེད་དུ་མི་འགྱུར་ལ། །སོར་བསམ་བསྐྱེད་
རིམ་དུ་སྡུད་པའི་ཚུལ་འཇམ་དཔལ་ཞལ་ལུང་ལས་ཀྱང་གསུངས་པས་ཕྱོགས་དེ་ནས་བཤད་པ་ཡང་རྒྱུད་ཀྱི་དོན་དུ་ངེས་པར་འགྲོ་སྟེ། །རྡོ་རྗེའི་ཚིག་རེ་རེས་ཀྱང་དོན་མི་འདྲ་བ་མཐའ་ཡས་པ་སྟོན་ལ། །ཤིང་རྟ་ཆེན་པོ་རྣམས་ཀྱིས་ཀྱང་གདུལ་བྱའི་
6-8-19a


བསམ་པ་ལ་བལྟོས་ནས་དོན་གྱི་ཕྱོགས་རེ་རྩལ་དུ་བཏོན་ནས་འཆད་པ་ཡིན་གྱི། །དོན་དེ་ཙམ་དུ་ཟད་པ་ན་མིན་ནོ། །གླན་ལ་བརྗོད་པའི་གནོད་བྱེད་དེའང་མི་འཐད་དེ། །སྐྱེ་བའི་རིམ་པ་དང་། བཤད་པའི་རིམ་པ་གཅིག་ཏུ་
ཁས་མ་བླངས་པའི་ཕྱིར་དང་། དེ་ལྟ་ན་རང་ཉིད་ལ་ཡང་གནོད་པ་དུ་མ་འབབ་པར་འགྱུར་རོ། །ཡང་གཉིས་སྣང་མཐའ་དག་ཟད་པ་ནི་རང་ཉིད་སོར་བསམ་དང་དོན་གཅིག་ཏུ་ཞལ་བཞེས་པའི་སྒྱུ་ལུས་ཀྱི་སྐབས་ནའང་མེད་པའི་ཕྱིར་དང་། གཉིས་
སྣང་རགས་པ་ལོག་པ་ནི་ལུས་དབེན་གྱི་དུས་སུའང་འབྱུང་བས་གནོད་བྱེད་དུ་མི་འགྱུར་རོ། །ལུགས་གསུམ་པ་ལ་གནོད་བྱེད་པའི་རྒྱུ་མཚན་དེའང་མི་འཐད་དེ། འཆད་པར་འགྱུར་རོ། །འཕགས་ལུགས་དང་སེམས་འགྲེལ་གྱི་སྦྱོར་བ་ཡན་
ལག་དྲུག་དོན་གཅིག་ཏུ་འདོད་པའང་མི་འཐད་དེ། རྒྱུད་ཕྱི་མ་ལས། །དབང་པོ་བཅུ་པོ་རྣམས་ཀྱིས་ཀྱང་། །རང་གི་འཇུག་གནས་ཐམས་ཅད་དུ། །འདོད་པ་སོ་སོར་སྡུད་པས་ན། །སོ་སོར་སྡུད་པས་ཞེས་བཤད་དོ། །ཞེས་འབྱུང་བའི་སོར་སྡུད་ཀྱི་དོན་
སློབ་དཔོན་ཟླ་བ་གྲགས་པས། དབང་པོ་ཡུལ་ལ་འཇུག་རེས་ཀྱིས་ལྷན་ཅིག་སྐྱེས་པའི་བདེ་བ་ཉིད་གཟུགས་སོགས་ཀྱི་རྣམ་པར་ཤར་བ་ཤེས་པར་བྱས་ནས་དབང་པོ་ཡུལ་འཛིན་པ་ལ་འཇུག་པས་ཡང་དང་ཡང་དུ་ལེན་པ་སོར་སྡུད་དུ་བཤད་
ལ། དུས་འཁོར་འགྲེལ་པ་ལས། གཟུགས་སོགས་ཐ་མལ་པ་ལ་འཇུག་པ་སྤངས་ནས་སྟོང་གཟུགས་ལ་འཇུག་པ་སོར་སྤོང་གི་དོན་དུ་བཤད་པའི་ཕྱིར་དང་། སྒྱུ་ལུས་ཀྱང་དོན་གཅིག་ཏུ་འདོད་པའང་མི་འཐད་དེ། །སོར་བསམ་སྲོག་རྩོལ་གྱི་རྒྱུ་
6-8-19b


ཡིན་ཞིང་སྒྱུ་ལུས་སྲོག་རྩོལ་རྡོ་རྗེའི་བཟླས་པ་མཐར་ཕྱིན་ནས་འབྱུང་ཞིང་རང་ཉིད་ཀྱིས་ཀྱང་དེ་ལྟར་ཞལ་གྱིས་བཞེས་པ་དང་འགལ་བ་དང་། སྒྱུ་ལུས་ཀྱི་རྒྱུར་གྱུར་བས་སེམས་དབེན་རྗེས་དྲན་གྱི་སྐབས་སུ་རང་ཉིད་ཀྱིས་བཞག་པ་དང་འགལ་བ་དང་། སྒྱུ་ལུས་
རླུང་སེམས་ཙམ་གྱིས་བསྒྲུབས་པའི་སྐུ་ཡིན་ཞིང་སོར་བསམ་གྱི་སྐབས་སུ་རླུང་གི་རྣལ་འབྱོར་དེ་ཙམ་དུ་མི་བསྒོམ་པས་དོན་གཅིག་ཏུ་འདོད་པ་མི་འཐད་དོ། །ལུགས་དེ་གཉིས་ཀྱི་སྲོག་རྩོལ་དང་རྡོར་བཟླས་དོན་གཅིག་ཏུ་འདོད་པའང་མི་འཐད་དེ། །དུས་འཁོར་
ལས། བུམ་པ་ཅན་གཙོ་བོར་བཤད་ལ། འཕགས་སྐོར་གྱི་ཁུངས་ཐུབ་ནས་སྣ་རྩེ་གསུམ་དུ་ཐིག་ལེ་གསུམ་བསྒོམ་པའི་སྐབས་ཀྱི་སྲོག་རྩོལ་མ་གཏོགས་བུམ་པ་ཅན་བཤད་པ་མེད་པའི་ཕྱིར་རོ། །འཛིན་པ་དང་འོད་གསལ་ཡང་དོན་མི་གཅིག་སྟེ། །སྔ་མ་
ནི་སྲོག་རྩོལ་གྱི་རླུང་དབུ་མར་ཆུད་པར་བྱས་པ་དེ་ཉིད་དབུ་མར་འཛིན་ཅིང་སྟོང་ཉིད་མངོན་སུམ་དུ་མ་རྟོགས་པའི་དུས་སུ་འབྱུང་བ་ཡིན་ལ་ཕྱི་མ་ནི་སྟོང་ཉིད་མངོན་སུམ་དུ་རྟོགས་པ་ཡིན་པས་སོ། །དེས་ན་རྒྱུད་ཕྱི་མའི་སྦྱོར་བ་ཡན་ལག་དྲུག་དང་ལམ་རིམ་པ་ལྔ་
དོན་གཅིག་ཏུ་སློབ་དཔོན་ཟླ་བ་གྲགས་པ་བཞེད་དེ། དེ་ཡང་སོར་བསམ་དང་། ལུས་དབེན་དོན་གཅིག་པ་ཡིན་ཏེ་ལུས་རྣམ་པར་དབེན་པའི་ལྷན་ཅིག་སྐྱེས་པའི་བདེ་བ་ཉིད་སྣང་བ་མ་བསྒྱུར་བར་ཐ་མལ་པའི་རྣམ་པར་ཤར་བ་སོར་སྡུད་དང་། ལྷའི་རྣམ་པར་
ཤར་བ་བསམ་གཏན་ཡིན་པས་སོ། །རྡོར་བཟླས་བྱེད་བྲག་དང་སྲོག་རྩོལ་སྤྱི་ཡིན་ཞིང་རྒྱུད་ཕྱི་མ་ནས་བཤད་པའི་སྲོག་རྩོལ་དོན་གཅིག་ལ། འཛིན་པ་དང་འོད་གསལ་ཡང་དོན་གཅིག་གོ། །སེམས་དབེན་འོད་གསལ་མངོན་དུ་འགྱུར་བའི་རྟགས་བསྟན་པས་
6-8-20a


ཤེས་པ་མ་གཏོགས་རྒྱུད་ཕྱི་མས་དངོས་སུམ་བསྡུས་ཤིང་རྗེས་དྲན་འོད་གསལ་ལ་ལས་ལུགས་ལྡོག་ཏུ་ཤར་བའི་སྟོང་པ་གསུམ་ཡིན་པས་ཟུང་འཇུག་ཏུ་འདུས་ཤིང་ཏིང་ངེ་འཛིན་ཟུང་འཇུག་དང་དོན་གཅིག་ལ་སྒྱུ་ལུས་ཟུང་
འཇུག་དང་མཚན་ཉིད་མཚུངས་པས་གོ་ནུས་པར་དགོངས་ནས་རྒྱུད་ཕྱི་མས་དངོས་སུ་མ་བསྡུས་སོ། །དེས་ན་ལམ་རིམ་པ་ལྔར་དུས་འཁོར་ནས་བཤད་པའི་སྦྱོར་བ་ཡན་ལག་དྲུག་འདུས་པར་བཤད་པ་ན་སྔར་བཤད་པ་ལྟར་ལམ་དེ་དག་གི་བྱེད་པ་
འདུས་པའི་དོན་ཡིན་ཏེ། །འདི་ལྟར་སོར་བསམ་དབུ་མའི་ལམ་སྦྱོང་བྱེད་དུ་དེ་ནས་བཤད་ལ། དེ་ཡང་སོར་སྡུད་རྟགས་བཅུ་གཅིག་སྒྲུབ་བྱེད་དང་། བསམ་གཏན་བརྟན་བྱེད་ཡིན་པས་རྟགས་བཅུ་གཅིག་རྫོགས་ནས་སྲོག་རྩོལ་བསྒོམ་པ་ལ་འཇུག་པ་ཡིན་
གྱི་སྟོང་གཟུགས་ལ་མི་ཚེ་འདྲིལ་བ་ན་རྒྱུད་ཀྱི་དོན་ལོག་པར་བཟུང་བའོ། །སྲོག་རྩོལ་གྱིས་རླུང་དབུ་མར་འཇུག་པར་བྱེད་ཅིང་འཛིན་པས་དེར་འཛིན་པར་བྱེད་པ་ཡིན་ལ། ལུས་དབེན་དང་ངག་དབེན་གཉིས་ཀྱིས་དེ་དག་གི་བྱེད་ལས་ལྷག་དང་བཅས་པ་བསྒྲུབ་པ་
ཡིན་ཏེ། །ལུས་དབེན་གྱིས་ཐམས་ཅད་བདེ་བའི་རོར་ཤར་བར་བསྒོམས་པས་རྟོགས་པ་ནང་དུ་སྡུད་ཅིང་དབང་པོའི་སྒོ་རྣམས་དང་གཡས་གཡོན་ནས་རླུང་རྒྱུ་བ་འགོག་པའི་རྩོམ་པར་བྱེད་ལ། རྡོར་བཟླས་ཀྱིས་སྙིང་གའི་རྩ་འདུད་བཤིག་ནས་རླུང་ཐམས་ཅད་
དེར་བསྡུས་ཏེ་སྟོང་པ་བཞིའི་ཡེ་ཤེས་སྐྱེད་པར་བྱེད་པ་ཡིན་ལ། འཕགས་ལུགས་ཀྱི་སྟོང་པ་བཞིའི་སྔོན་དུ་དུས་འཁོར་ནས་སྲོག་རྩོལ་དང་འཛིན་པའི་ཡན་ལག་གིས་བསྒྲུབ་པར་བཤད་པའི་དགའ་བཞིའི་རྟོགས་པ་ཡང་དེ་དང་མཚན་ཉིད་མཚུངས་པ་
6-8-20b


སྐྱེ་བས་སོ། །སློབ་དཔོན་ནག་པོ་པས་བཤད་པའི་རིམ་པ་བཞི་འདུས་པ་ནི་ཚུལ་ལ། རིམ་པ་བཞི་ནི་ཤེས་བྱེད་རྒྱུད་ཀྱི་རིམ་པ་དང་། སྔགས་ཀྱི་རིམ་པ་དང་། གསང་བའི་རིམ་པའོ། །དང་པོ་ནི། ལུས་སེམས་ཀྱི་ཆགས་ཚུལ་གཏན་ལ་
འབེབས་པ་ཡིན་ལ། གཉིས་པ་ནི་ལུས་ལ་གནད་དུ་བསྣུན་པའི་རྣལ་འབྱོར་འཁོར་ལོ་བཞིར་སྔགས་ཀྱི་འཁོར་ལོ་བསྒོམ་ཚུལ་སོགས་དང་། གསུམ་པ་ནི། དེ་ལ་བརྟེན་ནས་དགའ་བཞིའི་རྟོགས་པ་སྐྱེ་བའི་ཚུལ་དང་། བཞི་པ་ནི། འབྲས་བུ་མངོན་དུ་འགྱུར་བའི་
ཚུལ་ཏེ། དེ་དག་ཀྱང་བཤད་རྒྱུད་རྡོ་རྗེ་ཕྲེང་བ་ནས་རྡོ་རྗེ་ལུས་ཀྱི་མཚན་ཉིད་བཤད་པ་སོགས་སུ་འདུས་སོ། །ཕྱག་རྒྱ་བཞི་ཡང་འདིར་འདུས་ཏེ། ལས་ཀྱི་ཕྱག་རྒྱ་གྲགས་པའི་བུད་མེད་དང་། དམ་ཚིག་གི་ཕྱག་རྒྱ་བསྒོམས་པའི་ལྷ་མོ་དང་། ཆོས་ཀྱི་ཕྱག་རྒྱ་སྔགས་
འཁོར་བསྒོམ་པ་སོགས་དང་། ཕྱག་རྒྱ་ཆེན་པོ་ལྷའི་སྐུ་བསྒོམ་པ་སོགས་ཏེ། འདུས་ཚུལ་གོ་སླའོ། །དབང་བཞིའི་ལམ་འདུས་པའི་ཚུལ་ནི། བུམ་དབང་གི་ལམ་བསྐྱེད་རིམ་ཏེ། །དེ་ནི་རིམ་པ་དང་པོར་བླ་མེད་ཀྱི་རྒྱུད་ཀུན་ནས་བཤད་པའི་བསྐྱེད་རིམ་གྱི་བྱེད་ལས་
མཐའ་དག་འདུས་ལ། གསང་དབང་གི་ལམ་དབེན་གསུམ་སྒྱུ་ལུས་དང་བཅས་པ་དང་། དབང་གསུམ་པའི་ལམ་འོད་གསལ་དང་། བཞི་པའི་ལམ་ཟུང་འཇུག་ཏུ་རྒྱུད་གཞན་ནས་བཤད་པའི་དབང་བཞིའི་ལམ་མཐའ་དག་གི་དགོངས་པ་ཡང་འདུས་སོ། །བུམ་
དབང་སྤྲུལ་སྐུ་སྒྲུབ་བྱེད་དང་། གསང་དབང་གིས་ལོངས་སྐུ་དང་། གསུམ་པས་ཆོས་སྐུ་དང་། བཞི་པས་བདེ་བ་ཆེན་པོའི་སྐུ་སྒྲུབ་ཚུལ་སོགས་ཀྱང་འདིར་འདུས་ལ། མངོན་བྱང་ལྔ་ལས་བསྐྱེད་པའི་ཚུལ་དང་། བྱང་ཆུབ་ཕྱོགས་ཆོས་མདོ་དོན་ནི། ཡིག་
6-8-21a


དོན་དང་སྤྱི་དོན་གཉིས་དང་། སྣང་བ་སེམས་ཀྱི་སྦས་པ་འདོད་ཆགས་ཆོས་ཀྱི་སྦས་པ། །ཀུན་རྫོབ་སྒྱུ་མའི་སྦས་པ་སྟེ་སྦས་པ་གསུམ་དང་མཐར་ཐུག་དང་བཅས་པ་སྟེ་མདོར་ན་སྒྲ་སྣ་ཚོགས་ཀྱིས་བསྟན་པའི་ལམ་གྱི་བྱེད་
ལས་མཐའ་དག་འདུས་པའི་དོན་ནོ། །མ་རྒྱུད་ནས་བཤད་པའི་གཏུམ་མོའི་རྣལ་འབྱོར་བསྒོམས་པས་ལྷན་ཅིག་སྐྱེས་པའི་བདེ་བ་བསྐྱེད་ཚུལ་དང་། རྨི་ལམ་དང་སྒྱུ་མ་གཅིག་ཏུ་སྦྱོང་བའི་ཚུལ་དང་། བར་དོ་གསུམ་བསྲེ་ཚུལ་དང་། གདན་བཞི་ནས་
བཤད་པའི་འཕོ་བ་དང་། གྲོང་འཇུག་གི་ཡན་ལག་རྣམས་ཀྱང་འདིར་འདུས་སོ། །དེ་ལྟར་ན་འདུ་བའི་གཞི་གསང་བ་འདུས་པ་འདིར་མདོ་རྒྱུད་མཐའ་དག་གི་དོན་འདུས་པའི་འབྲས་བུ་ནི་བརྩོན་འགྲུས་ཅན་གྱིས་ཚེ་འདི་ཉིད་ལ་འོད་གསལ་ཐོབ་ནས་འཚང་རྒྱ་ལ།
ལེ་ལོ་ཅན་གྱི་འཆི་ཁར་འོད་གསལ་ཐོབ་ནས་འཚང་རྒྱ་བ་དང་། ཐ་མས་བར་དོར་འོད་གསལ་ཐོབ་ནས་འཚང་རྒྱ་ཞིང་གཞན་གྱི་དོན་བྱེད་པའོ། །གང་ཟག་དེ་དག་གི་ལམ་ཁྱེར་ནི་ཡི་གེའི་དོན་དང་ཞེས་སོགས་ཀྱི་སྟོན་ཏེ། །མཐར་སྐྱེ་ཤི་བར་དོ་གསུམ་སྐུ་
གསུམ་དུ་ལམ་དུ་ཁྱེར་བ་དང་། དེ་ལྟར་ཉིན་ཞག་གཅིག་ལའང་གཉིད་ཀྱི་སྐབས་ཀྱི་སྟོང་པ་བཞི་བསྒོམ་པ་ཆོས་སྐུ་ལམ་བྱེད་དང་། དེ་ལས་རྨི་ལམ་གྱི་ལུས་ལྷའི་སྐུར་ལྡང་བ་ལོངས་སྐུ་ལམ་བྱེད་དང་། དེ་ནས་གཉིད་སད་ནས་ད་དུང་དེའི་ཤུགས་མ་
ཡལ་བའི་བར་སྤྲུལ་སྐུ་ལམ་བྱེད་སོགས་སོ། །གཉིས་པ་གདམས་པ་དངོས་ལ་མདོར་བསྟན་པ་ནི། དངོས་པོའི་གནས་ལུགས་ཞེས་པའི་རྐང་པ་གཉིས་སོ། །རྒྱས་པར་བཤད་པ་ལ། གཞི་དངོས་པོའི་གནས་ལུགས་དང་། །ལམ་བགྲོད་བའི་རིམ་པ་དང་།
6-8-21b


འབྲས་བུ་མངོན་དུ་བྱེད་པའི་ཚུལ་ལོ། །དང་པོ་ལ་གསུམ་གྱི་དང་པོ་ལུས་སེམས་སོ་སོ་བའི་གནས་ལུགས་ནི། དངོས་པོའི་གནས་ལུགས་གཉིས་ཡིན་ཞེས་པའི་རྐང་པ་གསུམ་སྟེ། བཤད་པ་སྔ་མ་ལྟར་རོ། །གཉིས་པ་ཐུན་མོང་བའི་གནས་ལུགས་ནི། ཐུན་
མོང་དབྱེར་མེད་རིམ་ཤེས་བྱ། །ཞེས་པས་ཏེ། སེམས་ཕྲ་བ་གཞི་དུས་ཀྱི་སྟོང་པ་བཞི་དང་། ལུས་ཕྲ་བ་དེའི་བཞོན་པ་རླུང་ངོ་། །གསུམ་པ་ལུས་ཀྱི་གནས་བྱེ་བྲག་ཏུ་བཤད་པ་ནི། གཉིད་དང་ཞེས་པའི་རྐང་པ་དྲུག་སྟེ། བཤད་པ་སྔ་མ་ལྟར་རོ། །
གནད་བཞི་ནི་འཁྲུལ་འཁོར་གྱི་གཞི་ལུས་ཀྱི་གནད་དང་། ཡེ་ཤེས་སྐྱེ་བ་དུས་ཀྱི་གནད་དང་། འཇུག་ལྡོག་ངེས་པར་རླུང་གི་གནད་དང་། དམིགས་པ་ཡུལ་གྱི་གནད་རྣམས་སོ། །མར་ལུགས་པ་སྔ་མ་ཁ་ཅིག་གིས། བསྒོམ་པ་ཡུལ་གྱི་གནད་ཤེས་པར་བྱ་
བའི་ཕྱིར་དུ་ལུས་དངོས་པོའི་གནས་ཐབས་དང་། བསྒོམ་རྒྱུ་དོན་གྱི་གནད་ཤེས་པར་བྱ་བའི་ཕྱིར་སེམས་དངོས་པོའི་གནས་ཐབས་གཉིས་སུ་བསྡུས་པ་ནི། ལུས་ལ་གནད་དུ་བསྣུན་པས་སེམས་ལ་བདེ་བ་སྐྱེས་ཏེ། །དེས་སྟོང་པ་ཡུལ་དུ་བྱས་པའི་བདེ་སྟོང་སྦྱོར་
བའི་དོན་འཆད་འདོད་པར་གསལ་ལོ། །དེ་ལ་སྤྱིར་སྔགས་མཚན་ཉིད་གཉིས་ཀས་གཏན་ལ་དབབ་རྒྱུའི་འཁོར་བའི་རྒྱུའི་གཙོ་བོ་ངོས་བཟུང་ནས་དེ་འཇུག་ལྡོག་པའི་ཚུལ་དང་། སྔགས་ཀྱི་ཐེག་པར་ཐུན་མོང་མ་ཡིན་པར་གཏན་ལ་འབེབས་པའི་འཁོར་བ་
བསྐྱེད་པའི་ལྷན་ཅིག་བྱེད་རྐྱེན་གྱི་གཙོ་བོ་གཞི་དུས་ཀྱི་རང་བཞིན་གཡོ་བྱེད་ཀྱི་རླུང་ངོ་ཤེས་པར་བྱས་ནས་དང་པོར་ལུས་ཕྲ་བ་འོད་གསལ་གྱི་བཞོན་པའི་རླུང་དང་། སེམས་ཕྲ་བ་འོད་གསལ་དང་། དེ་ལས་རླུང་ཆེ་འབྲིང་ཆུང་གསུམ་དུ་གཡོས་པས་སྣང་
6-8-22a


མཆེད་ཐོབ་གསུམ་སྐྱེ་ཚུལ་དང་། དེ་ལས་རང་བཞིན་བརྒྱད་ཅུའི་རྟོག་པ་སྐྱེས་ནས་དེས་ལས་བསགས་ཏེ་འཁོར་བར་འཁོར་ཚུལ་དང་། དེ་དག་ལྡོག་པ་ལ་ལུས་ལ་གནད་དུ་བསྣུན་ནས་རླུང་ལས་རུང་དུ་བྱེད་དགོས་པའི་ཚུལ་མཐའ་ཆོད་
པར་ཤེས་པར་བྱས་ནས་དེའི་རྗེས་སུ་ལུས་ལ་གནད་དུ་བསྣུན་པའི་འཁོར་ལོ་བཞིའི་དབྱེ་བ་སོགས་ལ་འཇུག་པར་བྱའི་སྔ་མ་མ་རྟོགས་པར་ཕྱི་མ་ལ་འཇུག་བློ་བྱས་ཀྱང་སྔགས་ཀྱི་ཐུན་མོང་མ་ཡིན་པའི་གནད་མི་རྟོགས་སོ། །གཉིས་པ་ལམ་བགྲོད་
པའི་རིམ་པ་ལ། ལུས་ལ་གནད་དུ་བསྣུན་པའི་གནོད་དམ་པ་སྙིང་ག་ཡིན་པར་བསྟན་པ་དང་། དེ་ལ་གནད་དུ་བསྣུན་པའི་རིམ་པའོ། །དང་པོ་ལ་དངོས་དང་། གཞི་ལམ་འབྲས་གསུམ་ཤེས་པའི་ཕན་ཡོན་ནོ། །དང་པོ་ནི། དྲན་པ་སྣ་ཚོགས་ཞེས་
པའི་རྐང་པ་བཞི་དང་། གཉིས་པ་ན་གཞི་ལམ་ཞེས་པའི་རྐང་པ་བཞིའོ། །གཉིས་པ་དེ་ལ་གནད་དུ་བསྣུན་པའི་རིམ་པ་ལ། རྡོར་བཟླས་བྱེད་པའི་རྟེན་སྙིང་གར་སྔགས་ཀྱི་འཁོར་ལོ་བསྒོམ་པ་དང་། དེ་ལ་བརྟེན་ནས་རྡོར་བཟླས་བྱེད་པའི་ཚུལ་དང་། བྱས་
ནས་ཉམས་མྱོང་སྐྱེ་བའི་རིམ་པའོ། །དང་པོ་ལ། རྟེན་ཕྱི་ནང་གསལ་བའི་པད་འདབ་སུམ་རིམ་གྱི་བསམ་གཏན་དང་། བརྟེན་པ་དེར་དབྱངས་གསལ་གྱི་ཡི་གེ་འགོད་པའི་རིམ་པའོ། །དང་པོ་ནི། སྔགས་ཀྱི་ཡི་གེའི་འཁོར་ལོ་ནི། ཞེས་སོགས་ཏེ། འདིར་ཚན་
པ་གསུམ་དུ་བསྟན་པ་དང་། འོག་ཏུ་དབྱངས་ནི་ཕྱི་རིམ་ཞེས་སོགས་བསྟན་པ་མི་ཟློས་ཏེ། འདིར་ནི་དབྱངས་གསལ་གྱི་ཡི་གེ་སུམ་རིམ་དུ་འགོད་དགོས་པ་དང་། སྙིང་གའི་དབུས་སུ་མི་ཤིགས་པའི་ཐིག་ལེ་བཀོད་ནས་དེ་ལས་མགོན་པོ་བཞིའི་ཆང་
6-8-22b


སྤྲོ་བསྡུ་བྱེད་པའི་རྡོར་བཟླས་བསྟན་ལ་འོག་ཏུ་ཡི་གེ་ལ་དམིགས་ནས་བསྒོམ་པས་རླུང་སྡུད་པའི་རིམ་པ་ལས་སེམས་གསུམ་གྱི་རྟོགས་པ་སྐྱེ་ཚུལ་བསྟན་པ་ཡིན་ནོ། །ཐ་མལ་རྣམ་རྟོག་བག་ཆགས་ནི་རྟོག་པའང་ཡིན་ལ་བག་ཆགས་ཀྱང་ཡིན་པས་
རྣམ་རྟོག་བག་ཆགས་ཏེ། རང་བཞིན་གྱི་རྟོག་པ་རྣམས་སོ། །དེ་ཉིད་ཡི་གེའི་རྣམ་པར་ཤར་བ་བསྒོམས་པས་མཐར་ཡི་གེའི་གཟུགས་དག་པས་རང་བཞིན་གྱི་རྟོག་པ་རྣམས་ཀྱང་དག་པར་འགྱུར་ལ། དེ་ནས་གཡོ་བྱེད་རླུང་དག་པས་ཕྲ་བའི་རླུང་སེམས་
ལས་གྲུབ་པའི་སྒྱུ་ལུས་དང་། རིམ་པ་ཕྱི་མ་གསུམ་ཐོབ་པར་འགྱུར་རོ། །རྣམ་ཤེས་ནི་ཀུན་རྫོབ་བདེན་པ་ཡིན་ལ། །ཡེ་ཤེས་ནི་དོན་དམ་པའི་བདེན་པ་སྟེ། །བདེན་གཉིས་སྦྱོར་བའི་ཟུང་འཇུག་ཐོབ་ནས་ལས་ཚོགས་མཐའ་དག་འགྲུབ་པར་འགྱུར་
བའོ། །རྟགས་རྣམས་ཞེས་སོགས་ཀྱིས་འོད་གསལ་མངོན་དུ་འགྱུར་བའི་རྟགས་འཆར་ཚུལ་སྟོན་ཏེ། །དེ་དག་ཀྱང་འཆར་དུས་དང་། རྫོགས་དུས་གཉིས་གཉིས་སུ་ཤེས་པར་བྱའོ། །གཉིས་པ་ནི། ནམ་ཁའི་དཀྱིལ་འཁོར་ཞེས་སོགས་ཏེ། སྙིང་གར་
པདྨ་དམར་པོ་འདབ་མ་བརྒྱད་པ་བསམས་ལ་དེའི་དབུས་སུ་ནམ་ཁའི་དཀྱིལ་འཁོར་ཏེ་འོད་གསལ་ལས་བྱུང་བའི་གསལ་བའི་དཀྱིལ་འཁོར་མི་ཤིགས་པའི་ཐིག་ལེ་ཡུངས་ཀར་གྱི་འབྲུ་ཚོད་ཙམ་ཐིག་ལེ་དཀར་དམར་ཁ་སྦྱར་གྱི་དབུས་ན་ཨ་ཐུང་ཤད་
ཀྱི་རྣམ་པ་ལྟ་བུ་ཁ་དོག་ནག་པོ་བསྒོམས་ལ་འདབ་མ་བར་མ་ལ་གསལ་བྱེད་སོ་བཞི་ཐ་མ་སྤངས་པ་དང་། མ་ཡིག་དབྱངས་བཅུ་གཉིས་ཀྱི་ཐིག་ལེར་བཀོད་པས་གསལ་བྱེད་སོ་གཉིས་ཡོད་ལ། དེ་དག་ཤར་གྱི་བད་འདབ་ལ་ཀའི་སྡེ་ཚན་གྱི་ཡི་གེ་
6-8-23a


དང་པོ་བཞི་དང་། དེ་ནས་བརྩམས་ཏེ་རིམ་པ་བཞིན་དུ་ཕྱོགས་མཚམས་ཀྱི་འདབ་མ་རྣམས་ལ་ཙ་སྡེ་དང་། ཊ་སྡེ་དང་། ཏ་སྡེ་དང་། པ་སྡེ་དང་། མ་ཡིག་མ་གཏོགས་པའི་སྡེ་པ་དང་པོ་བཞིའི་མཐར་བྱུང་བའི་སྣ་ལྡན་གྱི་ཡི་གེ་བཞི་
དང་། མཐར་གནས་དང་། དྲོ་བའི་ཡི་གེ་སྟེ་འདབ་མ་རེ་ལ་ཡི་གེ་བཞི་བཞི་འགོད་དོ། །བཞི་བཅས་ཞེས་པ་ནི་སྣ་ལྡན་གྱི་ཡི་གེ་དང་པོ་བཞིའོ། །འདབ་མ་ཕྱི་རིམ་ལ་ཤར་ནས་བརྩམས་ཏེ་ཕྱོགས་བཞིར་ཨ་རིང་ཐུང་དང་། ཨི་རིང་
ཐུང་དང་། ཨུ་རིང་ཐུང་དང་། ཡི་གེ་གཉིས་གཉིས་བཀོད་ནས་ཤར་ལྷོ་ནས་བརྩམས་ཏེ་མཚམས་བཞིར་ཨོ་རིང་ཐུང་། ཨཾ་ཨཿ་སྟེ་ཡི་གེ་རེ་རེ་འགོད་དོ། །འདབ་མ་ནང་མའི་ཤར་ནས་བརྩམས་ཏེ་ཕྱོགས་བཞིར་རིམ་པ་བཞིན་དུ་རྀ་རཱྀ་ལྀ་ལཱྀ་བཞི་
བཀོད་ནས་ཡི་གེ་ཕྱི་མ་ཁ་དོག་དཀར་པོ་དང་། བར་མ་དམར་པོ་དང༌། ནང་མ་ནག་པོར་བསམས་ཏེ་དེ་དག་ལ་སེམས་བཟུང་ནས་བསྒོམས་པས། རླུང་སྡུད་པའི་རིམ་པ་གསུམ་ལས་དཀར་ལམ་དང་། དམར་ལམ་དང་། ནག་ལམ་དང་སེམས་གསུམ་
སྐྱེ་མི་དགོས་པ་ཡོད་ལ། ཡི་གེ་ཐམས་ཅད་ཀྱང་བ་མོ་འཛག་པ་ལྟ་བུ་དང་། བདེ་བའི་ངོ་བོར་བསམ་ཞིང་ཡི་གེ་རྣམས་ཀྱང་རིམ་གྱིས་བཟུང་ནས་མཐར་སྙིང་གའི་མི་ཤིགས་པ་ལ་སེམས་བཟུང་ངོ་། །རིམ་པ་ལྔ་ལྡན་ནི་ཡི་གེ་རིམ་པ་གསུམ་དང་། 
དབུས་ཀྱི་ཨ་ཐུང་དང་། ཐིག་ལེ་ཁ་སྦྱར་གཅིག་ཏུ་བྱས་པ་རྣམས་སོ། །ཨེ་ཝཾ་ནི་སྐབས་འདིར་ཕ་མ་གཉིས་ལས་ཐོབ་པའི་སྙིང་གའི་དབུས་ཀྱི་མི་ཤིགས་པའི་ཐིག་ལེ་དཀར་དམར་གཉིས་ཡིན་ལ་མཐར་འཆི་བའི་ཚེའང་ཕུང་སོགས་ཕྲ་རགས་རྣམས་
6-8-23b


དེ་ལ་ཐིམ་ནས་འཆི་འཕོ་བ་ཐོག་མར་སྐྱེ་བའི་ཚེའང་དེར་བར་དོའི་རྣམ་ཤེས་ཞུགས་ནས་དེ་ལས་རིམ་གྱིས་ཕུང་སོགས་འགྲུབ་པ་དང་། རྡོར་བཟླས་བྱེད་པའི་ཚེའང་དེ་ཉིད་ལས་རླུང་སྤྲོ་བསྡུ་བྱེད་པས་སྡུས་ཅིང་སྤྲོ་བར་མཛད་པ་ཞེས་སོ། །མཉམ་པ་ཉིད་དུ་སེམས་བསྡམས་ཏེ། །
ཞེས་སོགས་ནི་སེམས་གཞན་དུ་འཕྲོ་བ་བསྡམས་ནས་འཁོར་ལོའི་ལྟེ་བའི་ཐིག་ལེ་ལ་སེམས་རོ་མཉམ་དུ་འདྲེས་པར་མོས་ནས་མཉམ་པར་བཞག་པ་ལས་མཐར་རོ་མཉམ་པར་མཐོང་བའི་ཉེར་ཐོབ་ཀྱི་ཡེ་ཤེས་སྐྱེས་ནས་དེ་ལས་འོད་གསལ་མངོན་དུ་འགྱུར་བའི་རིམ་
པ་རྣམས་འབྱུང་ངོ་། །མར་ལུགས་པའི་བླ་མ་སྔ་མ་རྣམས་ཀྱིས་རྡོར་བཟླས་ཀྱི་སྔོན་དུ་སྔགས་འཁོར་འགོད་པ་དང་མི་འགོད་པའི་ཚུལ་གཉིས་བཤད་ཅིང་། ཁ་ཅིག་གིས་རྡོར་བཟླས་ཀྱི་སྐབས་སུ་མི་ཤིགས་པའི་ཐིག་ལེའང་མ་བཀོད་པ་ནི་ལུས་ལ་གནད་དུ་བསྣུན་པའི་
རྣལ་འབྱོར་དུ་མི་འགྱུར་ཏེ། །ཕ་རོལ་ཕྱིན་པའི་ཐེག་པ་ནས་བཤད་པའི་དབུགས་འབྱུང་རྔུབ་བགྲང་བ་དང་ཁྱད་པར་མེད་པར་འགྱུར་བས་སོ། །དེས་ན་མ་རྒྱུད་ནས་བཤད་པའི་བུམ་པ་ཅན་བསྒོམས་པ་དང་། བྱ་རྒྱུད་བསམ་གཏན་ཕྱི་མ་ནས་བཤད་པའི་རླུང་ཁ་སྦྱོར་
བསྒོམས་པ་རྣམས་ལེགས་པར་ཕྱེད་པར་བྱ་ཞིང་མངོན་པ་ནས་བཤད་པའི་འབྱུང་འཇུག་བགྲང་བ་དང་རྡོར་བཟླས་གཉིས་ཀྱང་ལེགས་པར་ཕྱེད་པར་བྱའོ། །དེ་བཞིན་དུ་ཤིན་སྦྱངས་སོགས་ཀྱི་བདེ་བ་དང་། ཞུ་བདེའི་བདེ་བའང་མ་འདྲེས་པ་ལ་འབད་པར་བྱའོ། །
གཉིས་པ་དེ་ལ་བརྟེན་ནས་རྡོར་བཟླས་བྱེད་པའི་ཚུལ་ནི། །སརྦ་མངྒ་ལཾ་།། །།
6-9-1a


༄༅། །རྗེ་བཙུན་ཚོང་ཁ་པ་ཆེན་པོའི་བཀའ་འབུམ་ལས་རྣལ་འབྱོར་བཞི་རིམ་བཞུགས་སོ། །
6-9-1b


༄༅ ན་མོ་བཛྲ་བྷཻ་ར་ཝཱ་ཡ། གྲུབ་ཐོབ་ཀྱི་འཁོར་ལོས་སྒྱུར་བའི་མཐུ་སྟོབས་ལ་མངའ་བརྙེས་པ། གྲུབ་ཆེན་དཔལ་འཛིན་གྱི་རྣལ་འབྱོར་བཞིའི་དེ་ཁོ་ན་ཉིད་ཅེས་བྱ་བ་ལས། རྣལ་འབྱོར་རྣམ་པ་
བཞིར་བཤད་དེ། དབྱིབས་དང་སྔགས་དང་དམ་ཚིག་དང་། རྣམ་དག་ཡེ་ཤེས་ཞེས་བྱ་བས། །སྲིད་པའི་འཆིང་བ་ལས་གྲོལ་འགྱུར། །ཞེས་གསུངས་སོ། །དང་པོ་ནི། དེ་ཉིད་ལས། རིམ་པའམ་ཡང་ན་ཅི་ཅར་དུ། །
སངས་རྒྱས་རྗེས་དྲན་བསྒོམ་པར་བྱ། །གོང་བུར་གནས་པའི་བདག་གིར་གནས། །ལུས་འདི་གཤིན་རྗེ་དཔའ་བོའོ། །འདི་ནི་བེམ་པོ་མ་ཡིན་ལ། །བདེན་མིན་བརྫུན་པ་མ་ཡིན་ནོ། །ཐ་
མལ་མ་ཡིན་ཡེ་ཤེས་སྐུ། །དྭངས་ཤིང་གསལ་ལ་རྙོག་པ་མེད། །ཕུན་ཚོགས་ཡོན་ཏན་ཀུན་ཡིན་ཏེ། །འདི་ནི་བདག་ལས་ཐ་དད་མིན། །སྤངས་ཤིང་བསྣན་དུ་ཅུད་ཟད་མེད། །མ་འཁྲུལ་བླ་མའི་བཀའ་དྲིན་གྱིས། །གདོད་
ནས་གྲུབ་པ་ཞེས་བྱ་སྟེ། །ལུས་ཅན་ཀུན་གྱིས་དེ་མཐོང་དང་གང་གིས་ཐོས་དང་དྲན་ཙམ་གྱིས། །བསམ་པ་རྫོགས་མཛད་ཟུང་འཇུག་སྐུ། །ཞེས་དང་། སྒྱུ་མ་ལྟ་བུའི་ཏིང་འཛིན་གྱིས། །རྨི་ལམ་ཇི་བཞིན་
6-9-2a


གོམས་པར་བྱེད། །བར་མའི་སྲིད་པ་རབ་སྦྱོར་བས། །བདེ་གཤེགས་པ་ཡི་དངོས་གྲུབ་ཐོབ། །དབྱིབས་ཀྱི་རིམ་པའི་རྣལ་འབྱོར་རོ། །ཞེས་དང་། གཉིས་པ་ནི། ལུས་ཅན་ཀུན་གྱི་སྟོན་གྱུར་པས། །
རླུང་ཞེས་བྱ་བས་ལས་ཀུན་བྱེད། །འདི་ནི་རྣམ་ཤེས་བཞོན་པ་སྟེ། །སྲིད་དང་རྣམ་གྲོལ་ཐོབ་བྱེད་པའི། །ཞེས་དང་། དག་པའི་སྦྱོར་བས་དག་བྱ་སྟེ། །དགུག་པའི་སྦྱོར་བས་དགུག་པར་བྱ། །ཞེ་བ་ཡིས་ནི་ཞི་བ་ཉིད། 
རེངས་པའི་སྦྱོར་བས་མི་གཡོ་བའོ། །ཞེས་དང་། སྨིག་རྒྱུ་དུ་བ་ལ་སོགས་ལྔ། །སྐད་ཅིག་གིས་ནི་འཆར་བར་འགྱུར། །ཞེས་དང་། རླུང་གིས་གཡོ་བ་འཁོར་བ་སྟེ། །མི་གཡོ་བས་ནི་མྱ་ངན་ལས། །སྙིང་གི་ཆུ་སྐྱེས་
དབུས་སོན་པས། །མི་གནས་མྱ་ངན་འདས་པ་ཐོབ། །རྣལ་འབྱོར་པས་ནི་མཉམ་པར་བཞག །ནང་པར་བྱ་རོག་མི་གྲག་པར། །འཇུག་གནས་འབྱུང་བའི་རླུང་གང་ཡིན། །སྟོང་ཕྲག་གཅིག་ཏུ་བགྲང་བར་བྱ། །སྒྲུབ་པོས་
སྒྲ་དང་བྲལ་བར་ནི། །འབུམ་ཕྲག་གཅིག་གིས་རྫོགས་པ་ན། །ཚེ་ཟད་པ་ཡང་ལོ་ལྔ་རུ། །འཚོ་བ་འདི་ལ་ཐེ་ཚོམ་མེད། །སྙིང་གི་ཧཱུཾ་ཡིག་དཀར་པོ་ལས། །ཡུལ་སོགས་དམིགས་པས་མི་ཕྱེད་པས། །རླུང་གི་སྦྱོར་བ་
6-9-2b


སྒོམ་བྱེད་ན། །མངོན་པར་ཤེས་པ་ལྔ་ཐོབ་འགྱུར། །ཞེས་དང་སྐབས་འདིར། །རྣམ་ཤེས་གོང་དུ་འཕོ་བ་ནི། །འཆི་བའི་དུས་ལ་བབས་པའི་ཚེ། །བུ་ག་རྣམས་སུ་སོན་པ་ཡི། །ཡི་གེ་སེམས་ཀྱིས་དགུག་པར་བྱ། །ཞེས་སོགས་སཾ་པུ་
ཊ་དང་། གསུང་ཇི་ལྟ་བ་བཞིན་དུ་རྒྱས་པར་གསུངས་སོ། །གསུམ་པ་ནི། ཤེས་རབ་ཐབས་ཀྱི་ཕྱག་རྒྱ་ལས། །བླ་མའི་མན་ངག་རིམ་པ་ཡིས། །སྲིད་པའི་སྡུག་བསྔལ་གཞོན་འདོད་པས། །མི་འགྱུར་བདེ་བ་བསྒོམ་པར་བྱ། །རྣལ་འབྱོར་མ་ཡི་
མཚན་ཉིད་ནི། །རིགས་ནི་རྣམ་པ་བཞི་རུ་བཤད། །ཙ་རྩི་ཀ་ནི་པདྨ་ཅན། །ཕག་མོ་གླང་པོ་ཅན་དུ་འགྱུར། །རྡོ་རྗེ་དབྱངས་ཅན་དུང་ཅན་མ། །གོ་རཱི་རི་མོ་ཅན་ཡིན་ཏེ། །རིགས་ནི་བཞི་ཡི་མཚན་ཉིད་རྣམས། །མཁས་པས་དེ་ལྟར་ཤེས་པར་བྱ། །པདྨ་ཅན་
གྱི་མཚན་ཉིད་ནི། །བཞིན་ནི་ཀུན་ནས་ཟླུམ་པ་སྟེ། །སྣ་ནི་ཛ་བའི་མེ་ཏོག་མཚུངས། །རུས་སྦལ་རྒྱབ་འདྲ་སེན་མོ་དམར། །ནུ་མ་མཁྲེགས་ཤིང་འཇམ་པ་སྟེ། །རྐང་མཐིལ་མཉམ་གནས་བྲང་ཡང་མཛེས། །བ་སྤུ་འཁྱིལ་ཞིང་དང་བའི་སྐད། །རི་མོ་
གསུམ་ཅན་ཆུ་སྐྱེས་མཆོག །པདྨའི་དྲི་ལྡན་གླང་ཆེན་འགྲོས། །པདྨའི་འདབ་ལྟར་རེག་ན་འཇམ། །པདྨའི་བྱེད་པས་སྟོན་བྱ་སྟེ། །པདྨ་ཅན་གྱི་དངོས་གྲུབ་འགྱུར། །གླང་པོ་ཅན་ཞེས་བྱ་བ་ནི། །སྣ་གཡོན་གཡས་སུ་འཁྱིལ་བ་དང་། །འདོད་པས་མྱོས་ཤིང་
འདོད་པར་སྲེད། །ཆང་གི་དྲི་ལྡན་བྱིན་པ་སྦོམ། །ལུས་ནི་སྦོམ་ལ་མི་སྲུན་བ། །བཞད་ཀྱི་གདངས་ཅན་ང་རོ་ཆེ། །གླུ་དང་རོལ་མོ་ལ་དགའ་བ། །བྱེད་པ་བཅིངས་པའི་སྦྱོར་བ་ཡིས། །གླང་པོ་ཅན་གྱི་མཆོག་སྒྲུབ་བྱེད། །དུང་ཅན་མ་ནི་ཞེས་བྱ་བའི། །
6-9-3a


ཧ་ཅང་སྐེམ་མིན་སྦོམ་པོ་མིན། །སྐྲ་རིང་སྣ་ཡང་ཅུང་ཟད་རིང་། །རྒྱུ་མ་ན་ར་ཀ་འབྲས་ལྟར། །ཞོ་དང་འོ་མའི་ཚོགས་ལ་དགའ། །བྱ་རོག་སྐད་ཅན་མི་ཡི་བུ། །བ་གླང་ལྕེ་ལྟར་རྩུབ་པ་སྟེ། །གྷཱ་ཧ་རི་ཏིའི་བཅིང་བས་བཅིངས། །
རི་མོ་ཅན་ཡང་བཤད་པར་བྱ། །ཤིན་ཏུ་ཁྲོ་ཞིང་ངོ་ཚ་སྤངས། །རྟག་ཏུ་རྩོད་པ་ལ་དགའ་ཞིང་། །ལུས་ཐུང་དེ་ཡི་བྲང་ཡང་མཛེས། །ས་ལིའི་འབྲས་ལྟར་ནུ་མ་ཟབ། །བྱིན་པ་ཕྲ་ཞིང་རྐང་ལག་ཉལ། །གསུས་པ་སྦོམ་ཞིང་མཆུ་ཡང་འཕྱང་། །
ཤ་ཡི་དྲི་ལྡན་ཕུག་རོན་སྐད། །དེ་ནི་རི་མོ་ཅན་ཞེས་བྱ། །བི་ལ་ཐ་ཡིས་བཅིང་པ་ཡིས། །རི་མོ་ཅན་གྱི་དངོས་གྲུབ་འགྱུར། །བཅུ་དྲུག་ལོན་མ་སྐལ་བཟང་མ། །གཟུགས་བཟང་ལང་ཚོ་ཕུན་སུམ་ཚོགས། །དང་པོ་ལེགས་པར་སྦྱང་བ་དང་། །
དབང་བསྐུར་ནས་ནི་བསྒྲུབས་པ་ཙ། །སྐུ་གསུང་ཐུགས་དང་རྡོ་རྗེ་ནི། །དཔྲལ་བ་ལ་སོགས་རྣམས་ལ་དགོད། །སྭཱ་ཧཱ་གསང་བ་གཙུག་ཏོར་དུའོ། །དེ་ནས་པདྨ་རྡོ་རྗེ་སྦྱར། །ཨཿཡིག་ཟེའུ་འབྲུར་རབ་
ཏུ་བརྟག །ཧཱུཾ་གིས་རྡོ་རྗེ་རྩེ་ལྔ་པའི། །ནོར་བུ་ཨོཾ་ལས་བྱུང་བ་ལ། །ཕཊ་ཀྱིས་སྒོ་ལ་རབ་ཏུ་བརྟག །དེ་ལྟར་རྡོ་རྗེ་པདྨར་བཅས། །བྷ་གར་ལིངྒ་བཞག་ནས་ནི། །བྱང་ཆུབ་སེམས་ནི་སྤྲོ་མི་བྱ། །རྣལ་འབྱོར་པས་ནི་ཧཱུཾ་ཕཊ་བསམ། །བྷ་གར་རྡོ་
རྗེ་འཛིན་པར་བྱེད། །ཁམས་གསུམ་པོ་ནི་མ་ལུས་པ། །སངས་རྒྱས་ངོ་བོར་བསྒོམ་པར་བྱ། །རྒྱུ་མཐུན་ལ་སོགས་རབ་དབྱེ་ནས། །ཤིན་ཏུ་རྣལ་འབྱོར་བསྒོམ་པར་བྱ། །རྡོ་རྗེ་དབྱིངས་ཀྱི་དབང་ཕྱུག་མའི། །རྩ་ནི་ཉེ་བར་བཙལ་བྱ་སྟེ། །
6-9-3b


བྱེད་པ་བཅིངས་པའི་སྦྱོར་བ་ཡིས། །རྣལ་འབྱོར་པས་ནི་ཇི་སྲིད་དུ། །བྱང་སེམས་འབྱིན་པར་མི་བྱེད་པ། །གང་ཚེ་ཆུ་ཡི་རི་མོ་ལྟར། །དེ་ཚེ་འཐོབ་འགྱུར་རྒྱུན་མི་འཆད། །དགའ་བ་ལས་སྐྱེས་བདེ་གཞན་ཅི། །དངོས་གྲུབ་ཀུན་གྱི་གཏེར་
གྱུར་པའི། །བྱང་ཆུབ་སེམས་ནི་ལྷུང་གྱུར་ན། །ཕུང་པོ་རྣམ་ཤེས་བརྒྱལ་བ་ལ། །མ་སྨད་དངོས་གྲུབ་ག་ལ་ཡོད། །མཁའ་ཁམས་རྡོ་རྗེའི་ཀུན་སྦྱོར་དང་། །རེར་བཅས་ཀྱི་ནི་རྨད་བྱུང་ཆེ། །བདེ་བ་སྐྱེད་པར་བྱེད་པ་གང་། །དེ་ནི་མཆོག་དགའ་བྱེད་པ་པོ། །
དགའ་བྲལ་གྱི་ནི་དབུས་དག་ཏུ། །མཚོན་པ་དེ་ན་བསྟན་པར་བྱ། །པདྨའི་ནམ་མཁར་རྡོ་རྗེ་ཡི། །ལྟེ་བས་མནན་པའི་གནས་དག་ཏུ། །རྡོ་རྗེ་སྐྱིལ་ཀྲུང་དག་གིས་སེམས། །ནོར་བུའི་ནང་དུ་སོན་བལྟ་ཞིང་། །ཡེ་ཤེས་སྦྱོར་བ་གང་ཡིན་པ། །ཡེ་ཤེས་
ངོ་བོ་ཞེས་བྱ་སྟེ། །ཆགས་པ་མ་ཡིན་ཆགས་བྲལ་མིན། །དབུ་མར་དམིགས་པར་མི་འགྱུར་རོ། །གང་ཚེ་རྣལ་འབྱོར་ཡེ་ཤེས་མཐོང་། །བདེ་ལ་གནས་བྱ་འགྱུར་མི་བྱ། །ཐུན་ནམ་ཡང་ན་ཉིན་གཅིག་གམ། །ཟླ་ཕྱེད་ཟླ་བ་ལོ་དང་ནི། །བསྐལ་པ་
བསྐལ་པ་སྟོང་དུ་ཡང་། །ཡེ་ཤེས་མངོན་སྦྱོར་གྱིས་གནས་བྱ། །བྱིན་གྱིས་རློབ་པའི་སྦྱོར་བ་སྟེ། །འདི་ནི་ཤིན་ཏུ་རྣལ་འབྱོར་རོ། །ཞེས་གསུངས་སོ། །བཞི་པ་ནི། །མཁའ་འགྲོའི་ཕོ་བྲང་ཆུ་སྐྱེས་དབུས། །ཐབས་དང་ཤེས་རབ་སྦྱོར་བ་ཡི། །
ཁམས་གསུམ་རྒྱུ་དང་མི་རྒྱུའི་དོན། །རྣལ་འབྱོར་ཆེན་པོས་ངལ་བསོ་བྱས། །ལྟེ་བའི་དབུས་སོན་དཔའ་བོ་ལས། །སྤྲོ་དང་སྡུད་པའི་སྦྱོར་བ་ཡིས། །ཇི་ལྟ་དབུགས་རླུང་མེ་ལོང་ལ། །ཇི་ལྟར་ཐིམ་པར་བལྟ་བར་བྱ། །ལྟེ་བའི་ཆུ་སྐྱེས་
6-9-4a


པདྨོའི་དབུས། །ཡུངས་ཀར་ཙམ་དུ་བརྟན་བྱས་ནས། །འོད་གསལ་ཡེ་ཤེས་ཉིད་དུ་འགྱུར། །རྟག་པ་མ་ཡིན་ཆད་པ་མིན། །བདག་མིན་གཞན་ཡང་མ་ཡིན་ལ། །སྲིད་མིན་མྱ་ངན་འདས་པ་མིན། །ཐོག་
མ་དབུས་མཐའ་རྣམ་པར་སྤངས། །འོད་གསལ་བ་ལས་དེ་བསམས་ན། །དེ་ལས་རྡོ་རྗེ་འཛིན་པར་འགྱུར། །ཞེས་སོ། །རྣལ་འབྱོར་བཞིའི་རྒྱུ་འབྲས་ཀྱི་རིམ་པ་ལས་ཟུང་འཇུག་འགྲུབ་ལུགས་ནི། །རྣལ་འབྱོར་བཞིའི་རིམ་པ་ལས། གང་སྐྱེས་
ཡེ་ཤེས་སེམས་དཔའ་ཆེ། །ཐབས་དང་ཤེས་རབ་རང་གི་དངོས། །མེ་ལོང་ནང་གི་གཟུགས་བརྙན་བཞིན། །འཇིག་རྟེན་ཁྱབ་ཅིང་གསལ་བར་སྣང་། །མི་འགྱུར་མཆོག་གི་བདེ་བ་ཆེ། །སྟོང་པ་སྙིང་རྗེ་དབྱེར་མེད་པ། །ཕུན་སུམ་ཚོགས་པའི་
འབྱུང་གནས་ཆེ། །ཡེ་ཤེས་ཆེན་པོ་འགྲུབ་འགྱུར་རོ། །ཞེས་གསུངས་སོ། གཉིས་པ་ཐུན་མོང་མ་ཡིན་པ་སྔགས་ཀྱི་སྤྱོད་པ་ལ་སློབ་པའི་རིམ་པ་ལ། ལམ་སྒོམ་པ་སྣོད་རུང་དུ་སྒྲུབ་པ་དང་། ལམ་བསྒོམ་པ་དངོས། དང་པོ་ལ། 
གང་གིས་སྣོད་རུང་དུ་སྒྲུབ་པར་བྱེད་པ་སློབ་དཔོན་གྱི་མཚན་ཉིད་དང་། གང་སྣོད་རུང་དུ་བྱ་བ་སློབ་མའི་མཚན་ཉིད། དེས་ཇི་ལྟར་སྣོད་རུང་དུ་བྱེད་པའི་ཚུལ་ལོ། །དང་པོ་ནི། རབ་འབྲིང་ཐ་མ་གསུམ་ལས། ཐ་མ་ཡང་དབང་ཐོབ་ཅིང་
དམ་ཚིག་དང་སྡོམ་པ་ལ་གནས་པ། བསྐྱེད་རིམ་ཚིག་སྤྱི་ལ་མ་ལས་བར་དོན་སྤྱི་ལེགས་པར་ཤར་བ། སྔགས་ཀྱི་བསྙེན་ཚང་བཞི་འབུམ་སོགས་དང་། དེའི་བཅུ་ཆའི་སྦྱིན་སྲེག་བྱས་པ། དཀྱིལ་འཁོར་ཆོ་ག་རག་ལས་པ་
6-9-4b


ལ་མཁས་པའོ། །སྦྱིན་སྲེག་ཡོངས་རྫོགས་བཅུ་ཆ་མ་གྲུབ་ནའང་། མར་ཁུ་ལྡུགས་ཐེབས་རེ་དང་། །ཡམ་ཤིང་རེ་ལ་རེ་རེར་བགྲངས་པས་འགྲུབ་གསུངས། གཉིས་པ་ལ་ཡང་། ཐ་མ་བླ་མ་དང་དམ་ཚིག་དང་སྡོམ་པ་འཛིན་ནུས་
པའོ། །གསུམ་ལ། དབང་བསྐུར་ནས་རྒྱུད་སྨིན་པར་བྱ་བ་དང་། རྒྱུད་སྨིན་ནས་དམ་ཚིག་དང་སྡོམ་པ་དག་པར་བྱབའོ། །དང་པོ་ལ། སྔགས་ཀྱི་ཐེག་པའི་སྒོར་འཇུག་པ་ལ་དབང་བསྐུར་ཐོབ་དགོས་པར་བསྟན་པ། །རྒྱུད་སྡེ་སོ་སོའི་དབང་གི་
ཁྱད་པར། དཀྱིལ་འཁོར་དུ་འཇུག་ཅིང་དབང་བསྐུར་ཐོབ་ཚུལ། དེའི་ཚེ་དམ་ཚིག་དང་སྡོམ་པ་ཇི་ལྟར་ཐོབ་པའོ། །དང་པོ་ནི། བྱ་སྤྱོད་སོགས་ཀྱི་སྔགས་མཚན་ཉིད་ཐེག་པར་དྲངས་པ་ཡོད་མོད། དེ་ལ་དབང་མི་དགོས་པ་ནི། ལྷ་སྒོམ་པ་དང་
མ་འབྲེལ་བས་སོ། །དེས་ལྷ་སྒོམ་པ་དང་འབྲེལ་བའི་སྔགས་བཟླ་བ་ལ་ནི་ངེས་པར་དབང་ཐོབ་དགོས་ལ། སྔགས་གཞན་ལ་ངེས་པ་མེད་པས་ན། རྡོ་རྗེ་ཐེག་པའི་སྒོར་འཇུག་པ་ལ་དབང་བསྐུར་ངེས་པར་ཐོབ་དགོས་སོ། །གཉིས་པ་ནི། །
བྱ་རྒྱུད་ལ་ཆུ་དབང་དང་ཅོད་པན་གྱི་དབང་ཡོད་ཅིང་། །གོང་མ་མེད་ལ། སྤྱོད་རྒྱུད་དེའི་སྟེང་དུ་རྡོ་རྗེ་དང་དྲིལ་བུ་དང་མིང་གི་དབང་ངོ་། །རྣལ་འབྱོར་རྒྱུད་ལ་དེ་དང་རྡོ་རྗེ་སློབ་དཔོན་གྱི་དབང་ངོ་། །དེ་ལ་མིང་ཕྱག་རྒྱའི་དབང་ཞེས་འབྱུང་ལ། བུམ་དབང་
ཞེས་ནི་མི་འབྱུང་ངོ་། །བླ་མེད་ལ་དབང་བཞི་ཡོངས་སུ་རྫོགས་པའོ། །གསུམ་པ་ལ་དཀྱིལ་འཁོར་དུ་གཞུག་པ་དང་། དབང་བསྐུར་བ་གཉིས་ལས། རྒྱུད་སྡེ་གཞན་གསུམ་ལ་ནི། དཀྱིལ་འཁོར་དུ་གཞུག་པ་ཙམ་བྱ། དབང་བསྐུར་དུ་
6-9-5a


མི་རུང་བའི་གདུལ་བྱ་མི་འབྱུང་ལ། རྣལ་འབྱོར་གྱི་རྒྱུད་ལ་ནི། རྒྱུད་མ་སྨིན་པ་དང་། སྨིན་པའི་དབང་གཉིས་ལས། །དང་པོ་ནི། དཀྱིལ་དུ་གཞུག་པ་ཙམ་བྱར་རུང་གིས། དབང་བསྐུར་དུ་མི་རུང་ངོ་། །དེ་ཡང་
དཀྱིལ་འཁོར་དུ་གཞུག་ཅིང་མཐོང་ན་ཞེས་འབྱུང་བས། གཞུག་མཐོང་ལ་ཕྱི་ནང་གཉིས་ལས། ཕྱི་གཞུག་ཕྱི་མཐོང་ནི། ལྷ་ངོ་སྤྲོད་པ་ཙམ་ཡིན་པས། དེ་ཙམ་རུང་ལ། ནང་གཞུག་ནང་མཐོང་ནི། ཡེ་ཤེས་པ་འབེབས་པ་ཡིན་པས་དེ་ཕན་
ཆད་མི་རུང་ངོ་། །སྨིན་པ་ལ་ཡང་། ཐུན་མོང་མ་ཡིན་པའི་སྡོམ་པ་འཛིན་ནུས་པ་དང་། མི་ནུས་པ་གཉིས་ལས། ཕྱི་མ་ལ་ནི་ཐུན་མོང་བའི་སྡོམ་པ་འཛིན་དུ་བཅུག་ནས། །སློབ་མའི་དབང་བསྐུར་ལ། །འདི་ཡང་ལྷ་སྒོམ། སྔགས་བཟླས་
རྒྱུད་ཉན་པ་སོགས་ལ་དབང་གིས། གཞན་ལ་དབང་བསྐུར་བ་སོགས་ལ་མི་དབང་ངོ་། །དང་པོ་ལ་ནི་རྡོ་རྗེ་སློབ་དཔོན་གྱི་དབང་ཡང་བསྐུར་རོ། །བཞི་པ་ལ་སྒོམ་པ་ཐོབ་པའི་དུས་དང་། དབང་བསྐུར་བའི་ཚུལ་ལོ། །གཞན་དབང་བསྐུར་མ་ཐོབ་བར་དུ་སྡོམ་པ་
འཛིན་དུ་བཅུག་ན་ཡང་། །མི་སྐྱེ་བར་འདོད་པ་མི་རིགས་ཏེ། སྟ་གོན་དང་དངོས་གཞི་གང་རུང་གི་དུས་སུ་སྡོམ་པ་འཛིན་དུ་བཅུག་པ་དེ་ཐོབ་པས། སྡོམ་པ་སྐྱེ་བ་དང་དབང་བསྐུར་གྱི་ཆོ་ག་རྫོགས་པ་ལ་བལྟོས་གཏན་མི་དགོས་སོ། །རྒྱུད་སྡེ་འོག་མ་གཉིས་ལ་
ཐུན་མོང་མ་ཡིན་པའི་སྡོམ་པ་ཡིད་མེད་དཔྱད་པར་བྱ་ཞིང་། གོང་མ་གཉིས་ལ་རིགས་ལྔའི་སྡོམ་པ་འབའ་ཞིག་ཡོད་ལ། མཚན་ཉིད་ཐེག་པ་དང་ཐུན་མོང་བའི་བྱང་ཆུབ་སེམས་དཔའི་སྡོམ་པ་ནི་ཀུན་གྱིས་གཟུང་དགོས་ཤིང་། །སོ་ཐར་སྡོམ་པའི་སྣོད་རུང་
6-9-5b


ཡིན་ན་དེ་ཡང་ངེས་པར་བླང་དགོས་སོ། །རྒྱུད་སྡེ་འོག་མའི་དབང་བསྐུར་མ་ཐོབ་ན་གོང་མའི་ཐོབ་ཀྱང་འོག་མའི་དབང་བསྐུར་བྱར་མི་རུང་ཞིང་། དེའི་རྒྱུད་ཉན་པ་དང་ལུང་ཐོབ་ན། རྗེས་གནང་དང་འཆད་པ་སོགས་ན་རུང་ངོ་། །འོག་མ་ཐོབ་ཀྱང་
གོང་མ་མ་ཐོབ་ན་དེའི་རྒྱུད་བལྟ་བ་དང་ཉན་པ་སོགས་ཀྱང་མི་རུང་ན་དབང་བསྐུར་བལྟ་ཅི་སྨོས། དབང་གང་སྔོན་དུ་མ་སོང་ན། རྗེས་གནང་ཙམ་ལེན་དུ་མི་རུང་ན། དབང་བྱར་མི་རུང་བ་ཡང་དེ་དང་འདྲའོ། །གཉིས་པ་རྒྱུད་སྨིན་ནས་
དམ་ཚིག་དང་སྡོམ་པ་དག་པར་བྱ་བ་ལ། །དངོས་གྲུབ་ཐམས་ཅད་འབྱུང་བའི་རྩ་བ་དགེ་བའི་བཤེས་གཉེན་བསྟེན་ཚུལ་དང་། དངོས་གྲུབ་ཐམས་ཅད་འཕྲོག་པའི་རྒྱུ་དམ་ཚིག་ཉམས་པ་སྤང་པའོ། །དང་པོ་ནི། བླ་མ་ལྔ་བཅུ་པ་ལས་ཤེས་
པར་བྱ་ཞིང་། །གཉིས་པ་ལ་རྒྱུད་སྡེ་གཞན་ནས་བཤད་པའི་དམ་ཚིག་དང་སྡོམ་པར་བྱ་བའི་ཚུལ་དང་། བླ་མེད་ནས་བཤད་པའི་ཚུལ་གཉིས་སོ། །དང་པོ་ནི། སྤྱིར་སྡོམ་པ་གོང་མ་གཉིས་རྩ་བའི་ལྟུང་བས་ཉམས་ན་སླར་ལེན་པ་མ་གཏོགས་
གསོ་བའི་ཐབས་གཞན་མེད་ལ། དེ་ཡང་དམ་ཚིག་དང་སྡོམ་པ་མི་ཉམས་པར་སྲུང་བར་བྱེད་པ་ལ་ཡང་། །མ་བསྲུངས་པའི་ཉེས་དམིགས་དང་། །བསྲུངས་པའི་ཕན་ཡོན་བསམ་དགོས་པས་ཉེས་དམིགས་ནི། ཛྙཱ་ན་བོ་དྷིས་འཕགས་པ་
ཐམས་ཅད་སྤངས་པ་རང་ལ་འཁུ་བ་དངོས་གྲུབ་ཐམས་ཅད་ལས་རྒྱབ་ཀྱིས་ཕྱོགས་པ་གཡོ་ཅན་ཤིང་རུལ་ལྟ་བུ། ཞེས་སོགས་གསུངས་ལ། གཞན་དག་ལས་ཀྱང་བསྐལ་པ་གྲངས་མེད་གསུམ་དུ་སྤྱི་ཚུགས་སུ་མནར་མེད་དུ་སྡོད་ཅིང་
6-9-6a


བསྐལ་པ་འཇིག་པ་ན་ཡང་དམྱལ་བ་གཞན་དུ་འཕོ་ཞིང་། །སྡོམ་པ་ཉམས་པའི་གང་ཟག་གིས་མཆོད་པ་ཕུལ་ཀྱང་མཆོད་ཡུལ་མི་འབྱོན་ཅིང་། །མཆོད་གཏོར་མི་བཞེས་པ་དང་། །དམྱལ་བ་གཞན་གྱི་སྡུག་
བསྔལ་བསྡོམས་ཀྱང་དེའི་སྡུག་བསྔལ་བྱེ་བའི་ཆར་ཡང་མི་ཕོད་པ་སོགས་སོ། །ཕན་ཡོན་ནི། །མཆོག་གི་དངོས་གྲུབ་ཚེ་འདི་དང་ཕྱི་མ་དང་བར་དོ་དང་། གསང་སྔགས་ལ་འཇུག་པ་ལས་གསུམ་ཚུན་དང་། །དུས་འཁོར་དང་རྡོ་རྗེ་རྩེ་མོ་ལ་
བདུན་དང་། །བི་བྷཱུ་ཏི་ཙ་ནྡྲས། མ་བསྒོམས་པ་ཡང་ལྟུང་མེད་ན། །སྐྱེ་བ་བཅུ་དྲུག་དག་ན་ཐོབ། །སོགས་སོ། །དམ་ཚིག་དང་སྡོམ་པ་དག་པར་བྱེད་པ་ལ་མི་མཐུན་པའི་ཕྱོགས་རྩ་བའི་ལྟུང་བ་ངོ་ཤེས་དགོས་པས། དེ་ལ་བྱ་སྤྱོད་གཉིས་
ལ་བླ་མ་གཞན་དག་ན་རེ། །སྤྱོད་པའི་རྒྱུད་ནི་བཞིར་ངེས་ཏེ། །ཇོ་བོས་མཛད་པར་གྲགས་པའི་དམ་ཚིག་བསྡུས་པར། རྩ་བའི་ལྟུང་བ་མང་པོ་བཤད་པའི་བཅུ་བཞིའི་ཚན་པ་ཟུར་པ་བཤད་པ་འདི་ལ་དགོངས་སྲིད་པ་དང་། རྣམ་སྣང་
མངོན་བྱང་ལས། མི་དགེ་བ་བཅུའི་ལས་ཀྱི་ལམ་གྱིས་སྡོམ་པ་ཉམས་པ་དང་། རྩ་བ་ནས་སྤྱོད་པ་དང་། བྱང་ཆུབ་སེམས་དཔའ་ཁྱིམ་པས་བུ་དང་ཆུང་མ་བཅས་བཞིན་དུ་ལྟུང་བར་མི་འགྱུར་བ་བཤད་དུ་གསོལ། ཞེས་འབྱུང་
བས། མི་དགེ་བ་བཅུ་དང་བྱང་ཆུབ་སེམས་གཏོང་སོགས་བཞི་སྟེ་བཅུ་བཞིར་ངེས་ལ། བྱ་རྒྱུད་ནི་ཕལ་ཆེར་སུམ་ཅུ་ཡིན་ཏེ། །དམ་ཚིག་བསྡུས་པའི་སུམ་ཅུའི་བཅུ་ཚན་པ་ཟུར་པ་འབྱུང་བ་དང་། ལེགས་གྲུབ་ཀྱི་རྒྱུད་ལས་ཀྱང་འབྱུང་
6-9-6b


ཞེས་གསུང་ངོ་། །དེ་ནི་ཚིག་དོན་གཉིས་ཀའི་སྒོ་ནས་རྣམ་སྣང་མངོན་བྱང་གི་དགོངས་པར་མི་རུང་སྟེ། །དགེ་བཅུའི་རང་བཞིན་གྱི་སྡོམ་པ་ཞེས་འབྱུང་གིས། །མི་དགེ་བ་ཞེས་པ་ཚིག་མ་དག་པའི་ཕྱིར་དྲི་བའི་སྐབས་ཡིན་གྱི། །ལན་གྱི་
སྐབས་མིན་པའི་ཕྱིར་དང་། དེའི་ལན་དུ་བྱང་ཆུབ་སེམས་གཏོང་སོགས་བཞི་ཁོ་ན་སྡོམ་པ་རྩོད་མེད་དུ་གསུངས་པའི་ཕྱིར། མི་དགེ་བ་བཅུ་རྩ་ལྟུང་ཡིན་ན་དྲི་བ་གཉིས་པའི་སྐབས་སུ། དགེ་བསྙེན་གྱི་བསླབ་པའི་གཞི་རྩ་བ་གཅིག་དང་། 
ལོགས་ལྟ་ལྔ་པོ་སྤོང་བ་ལ་གནས་པའི་བྱང་ཆུབ་སེམས་དཔའ་ལ་ལས་ལམ་ཁ་ཅིག་གནང་བར་བཤད་པར་མི་རིགས་པར་འགྱུར་ཏེ། དེས་ན་སྡོམ་པ་གང་གི་ལུགས་ལ་ཡང་རང་རང་གི་རྩ་ལྟུང་གནང་བའི་སྐབས་མི་སྲིད་པའི་ཕྱིར། དེས་ན་སྤྱོད་རྒྱུད་ལ་
ནི་བཞིར་ངེས་ཤིང་། བྱ་རྒྱུད་ལ་ཡང་བླ་མ་རྗེ་བཙུན་པས་གསུངས་པ་ལྟར་བཞི་པོར་ཕལ་ཆེར་ངེས་སམ་བརྟག་དགོས་ལ། དམ་ཚིག་བསྡུས་པ་ནི་ཇོ་བོས་མཛད་མ་མཛད་ཐེ་ཚོམ་ཟ་ཞིང་འགལ་བ་མཐོང་བས་ཤེས་བྱེད་དུ་མི་རུང་ངོ་། །རྣལ་འབྱོར་
རྒྱུད་ལ་རྩ་ལྟུང་བཅུ་བཞིར་ངེས་ལ། དེའི་ངོས་འཛིན་ཁ་ཅིག་རིགས་ལྔའི་སྡོམ་ཚིག་ནས་དཀོན་མཆོག་གསུམ་རྡོ་རྗེ་དྲིལ་བུ་སློབ་དཔོན་དུ་གཟུང་བ་གསུམ། སྦྱིན་པ་རྣམ་བཞི། ཕྱི་ནང་གསང་གསུམ། མཆོད་པ་འབུལ་བ་དང་བཅུ་བཞིའི་ལྡོག་
ཕྱོགས་
ལས་འཛིན་པ་སོགས་བྱུང་ཡང་། དོན་ནི་དཔལ་མཆོག་ནས་བཤད་པའི་བྱང་ཆུབ་སེམས་འདོར་དང་། མཚན་མ་ལ་སྨོད་པ་དང་། ཆོས་ལ་སྨོད་པ་དང་། དཀའ་ཐུབ་ཀྱིས་གདུང་བ་དང་། རྡོ་རྗེ་དྲིལ་བུ་ཕྱག་རྒྱ་སྤོང་བ་གསུམ་དང་། སློབ་
6-9-7a


དཔོན་ལ་སྨོད་པ་སྟེ་བརྒྱད། རྩེ་མོ་ནས་དཀོན་མཆོག་གསུམ་ལ་དད་པ་གཏོང་བ་ལ་བཤད། །སྒྱུ་འཕྲུལ་དྲ་བ་ནས། རྡོ་རྗེ་ཆོས་ལ་གཤེ་པ་དང་། གདུག་ལ་བྱམས་པ་དང་། སེམས་ཅན་ལ་བྱམས་པ་སྤོང་བ་ལ་
བཤད། དེ་ཉིད་བསྡུད་པ་ལས་བཤད་པའི་གསང་སྒྲོགས་དང་། བདེ་གཤེགས་བཀའ་ལས་འདས་པ་སྟེ་བཅུ་བཞི་པོ་ཡིན་ལ། ཡང་བླ་མེད་ཀྱི་རྩ་ལྟུང་བཅུ་ནས། དང་པོ་བརྒྱད་དང་། བཅུ་པ་ན་ཐུན་མོང་མ་ཡིན་པ། ལྔ་ནི་སྐྱབས་འགྲོ་འདོར་
བ་དང་། རྡོ་རྗེ་དྲིལ་བུ་ཕྱག་རྒྱ་གསུམ་འདོར་བ་དང་། མཚན་མ་སྨོད་པ་དང་ལྔའོ། །གཉིས་པ་ལ་ལྟུང་བ་བསྐྱེད་པའི་རྟེན་ངོས་གཟུང་བ་དང་། ལྟུང་བའི་རིགས་བསྡུ་བའོ། །དང་པོ་ནི། བླ་མེད་ཀྱི་དབང་བསྐུར་སྡོམ་པ་ཐོབ་ལ་མ་ཉམས་པ་བསམ་
པ་རང་བཞིན་དུ་གནས་པའོ། །གཉིས་པ་ལ་ཕམ་པའི་སྡེ་ཚན་དང་། སྦོམ་པོའི་སྡེ་ཚན་ནམ། རྩ་བ་དང་ཡན་ལག་གི་ཉེས་པ་གཉིས་སོ། །དང་པོ་ལ། གཞུང་གི་མཚན་དོན་དང་། མཚན་ཅན་གྱི་གཞུང་བཤད་པའོ། །གཉིས་པ་ལ། 
བཤད་པ་ལ་འཇུག་པའི་བྱ་བ་དང་། བཤད་པ་ཉིད་ཉེ་བར་འགོད་པ་དང་། བཤད་པ་མཐར་ཕྱིན་པའི་བྱ་བའོ། །དང་པོ་ལ། མཆོད་བརྗོད་དང་། བརྩམ་པར་དམ་བཅའ་བ་གཉིས་སོ། །དང་པོ་ནི། ཀུན་ནས་དང་བའི་ཡུལ་ལ་དུས་ཀུན་ཏུ་
དང་ཞེས་ཟེར་ཏེ་དང་བརྟགས་སོ། །ཞབས་ཀྱི་པདྨོར་འདུད་པ་ནི། དངོས་སུ་མེད་ཀྱང་གུས་པས་འདུད་དོ། །གཉིས་པ་ནི། བརྗོད་བྱ་དང་རང་བཟོའི་ཉེས་པ་སྤང་པ་དང་། དགོས་པ་རྣམས་ཀྱིས་ཤེས་པར་བྱའོ། །གཉིས་པ་བཤད་པ་
6-9-7b


ཉིད་ཉེ་བར་འགོད་པ་ལ། རྩ་བའི་ལྟུང་བས་མི་གོས་པར་བྱེད་པའི་ཐབས་དང་། གོས་ན་ཕྱིར་འཆོས་པར་བྱེད་པའི་ཐབས་གཉིས་སོ། །དང་པོ་ལ། རྩ་བའི་ལྟུང་བ་ངོས་གཟུང་བ་དང་། དེ་ལ་བསྲུང་འདོད་བསྐྱེད་པ་དང་། བསྲུང་ཚུལ་
དངོས་སོ། །དང་པོ་ལ་བཅུ་ཡོད་པའི་དང་པོ་ལ། དངོས་དང་། ཕྱོགས་མཐུན་གཉིས་སོ། །དང་པོ་ལ། ལྟུང་བའི་མིང་འདོགས་དང་། ལྟུང་བར་འགྱུར་བའི་ཚུལ་གཉིས་སོ། །དང་པོ་ནི། གཤིན་རྗེའི་གཤེད་དམར་གྱི་རྒྱུད་ལེའུ་བཅོ་བརྒྱད་པ་
དང་། གུར་གྱི་ལེའུ་བཅོ་ལྔ་པ་ནས་སྨད་པའི་རྩ་ལྟུང་ཞེས་དང་། དུས་འཁོར་ནས་ཐུགས་དཀྲུགས་པའི་རྩ་ལྟུང་དང་། འདིར་བརྙེས་པ། །ཞེས་སོགས་སོ། །གཉིས་པ་ལ་གཞན་ལུགས་འགོད་པ་དང་། འཐད་ཕྱོགས་རྣམ་པར་བཞག་པའོ། །
དང་པོ་ནི། རྒྱ་ཆེར་འགྲེལ་ནས་གསུངས་པ་སོགས་དང་། དཱ་རི་ཀ་བས་ཡན་ལག་དྲུག་རྣམ་པར་བཞག་པ་སྟེ། །བླ་མ་དམ་པར་ཤེས་པ། མི་དགྱེས་པར་ཤེས་པ། ཉོན་མོངས་པས་ཀུན་ནས་བསླངས་ནས་བྱས་པ། རང་དོན་མིན་པར་ཉེས་པ་
བྱེད་པ་པོ་སློབ་མའི་དོན་དུ་བསམས་ནས། །སློབ་མས་ཉེས་པ་བྱེད་པ་ལ་མི་དགྱེས་པའོ། །བླ་མ་མི་དགྱེས་པ་ལ་མི་དགྱེས་པར་ཤེས་པ་ནི། མི་དགྱེས་ཀྱང་བླ་ཡི་སྙམ་པ་དགོས་ཀྱི་དེ་ལྟར་ཤེས་ཀྱང་། ཉོན་མོངས་ཤེས་ཆེན་པོས་ཟིལ་
གྱིས་མནན་ནས་དབང་མེད་ལ་ནི་རྩ་བའི་ལྟུང་བ་མེད་དོ། །རང་དོན་ལྷུར་ལེན་ཀྱང་གཞན་དོན་དང་འདྲེས་ན་རྩ་བའི་ལྟུང་བ་མེད་པས་གཞན་དོན་མ་ཡིན་ཅེས་ཟུར་དུ་སྨོས་སོ། །སླར་སྦྱང་བསམ་པ་ནི། འགྱོད་པ་ཙམ་གྱིས་མི་ཆོག་གི
6-9-8a


དེ་མ་ཐག་ཏུ་བཤགས་པ་བྱེད་འདོད་དོ། །གཉིས་པ་ལ། གང་ལ་བརྟེན་ནས་ལྟུང་བར་འགྱུར་བའི་ཡུལ། དེ་ལ་བརྟེན་ནས་ལྟུང་བར་འགྱུར་ཚུལ། དེའི་རྒྱུ་མཚན་ནོ། །དང་པོ་ལ། སློབ་དཔོན་གྱི་མཚན་ཉིད། དབྱེར་
དོགས་བཅོད་དོ། །དང་པོ་ནི། གསང་སྔགས་རྡོ་རྗེ་ཐེག་པ་དང་སྦྲེལ་བའི་སྒོ་ནས་སློབ་དཔོན་དུ་སོང་བའོ། །གཉིས་པ་ནི། དབང་བསྐུར། རྒྱུད་བཤད། མན་ངག་སྦྱིན་པ་དང་གསུམ་མོ། །གསུམ་པ་ལ་རྒྱུད་ལ་བརྟེན་པ་དང་། གྲངས་ལ་བརྟེན་
པ། ཚད་ལ་བརྟེན་པའི་དོགས་གཅོད་དོ། །དང་པོ་ནི། སློབ་དཔོན་ཏེ། བླ་མེད་ཀྱི་སྒོ་ནས་སྦྲེལ་བ་ཁོ་ན་ཡན་ལག་ཏུ་དགོས་སམ། ཞེ་ན། མི་དགོས་ཏེ། །རྒྱུད་སྡེ་བཞི་པོ་གང་རུང་ཞིག་འབྲེལ་བས་ཀྱང་འགྱུར་རོ། །གཉིས་པ་ནི། །གསུམ་ལྡན་དགོས་
སམ་སྙམ། ཞེ་ན། རྒྱུད་བཤད་པ་གཅིག་པུས་ཀྱང་འགྱུར་རོ། །གསུམ་པ་ནི། རྒྱུད་རྫོགས་པར་བཤད་པ་ལ་སོགས་པ་དགོས་སམ། ཞེ་ན། མི་དགོས་ཏེ། སྤྱིར་སློབ་དཔོན་གྱི་དབྱེ་བ། དམ་ཆོས་ལག་པར་སྦྱིན་པ་དང་། འཆད་བྱེད་མན་ངག་
སྟོན་པ་དང་། དབང་བསྐུར་བ་དང་ལས་བྱེད་པའོ། །ཞེས་གསུངས་པ་དེ་ལ་རྒྱུད་ཚིག་རེ་ཙམ་འཆད་པ་དང་། ཀློག་པ་སྦྱིན་པ་དང་། ལྷ་བསྒོམ་པ་སྣ་རེ་ཙམ་གྱི་མན་ངག་སྦྱིན་པ་དང་། རིག་པའི་དབང་ཙམ་བསྐུར་བ་དང་། ལས་བྱེད་པ་བྲིས་ཐིག་སྣ་རེ་
དང་། ཕྱག་རྒྱ་སྣ་རེ་ཙམ་བསླབས་པས་ཀྱང་འགྱུར་རོ། །གཉིས་པ་ནི། དེ་ལ་ཅི་ཞིག་བྱས་པས་རྩ་བའི་ལྟུང་བར་འགྱུར། ཞེ་ན། མ་གུས་པ་དང་། སྨད་པ་དང་། བརྙས་པའོ། །དེའི་ཚད་ནི། སྒོ་གསུམ་གུས་པའི་སྒོ་ནས་བསྙེན་བཀུར་བའི་ཞིང་གོང་
6-9-8b


མར་འཛིན་པའི་ཁུར་པོར་བའོ། །གསུམ་པ་རྒྱུ་མཚན་ནི། དངོས་གྲུབ་ཐམས་ཅད་རྡོ་རྗེ་སློབ་དཔོན་གྱི་རྗེས་སུ་འབྲང་བར་གསུངས་པ་དེ་བས་ན་སྟེ་དེའི་ཕྱིར་རོ། །གལ་ཏེ་སྔར་གསང་སྔགས་དང་འབྲེལ་བའི་སློབ་དཔོན་གང་ཡང་རུང་བ་རྩ་བའི་ལྟུང་བའི་ཡུལ་དུ་
བསྟན་པས་དེ་དག་ཀུན་ལས་དངོས་གྲུབ་ཐོབ་པའི་ངེས་པ་མེད་པའི་ཕྱིར། རྒྱུ་མཚན་མི་རིགས་པ་དང་། སློབ་དཔོན་ཤཱནྟི་པ་སོགས་ཀྱི་དབང་བསྐུར་ཐོབ་པ་ཉིད་རྡོ་རྗེ་སློབ་དཔོན་དུ་གསུངས་ཤིང་། བླ་མ་ལྔ་བཅུ་པ་ལས་སློབ་དཔོན་གྱི་མཚན་ཉིད་བརྟན་ཅིང་
དུལ་བ་སོགས་བཅུ་བཞིར་གསུངས་པ་དང་འགལ། ཞེ་ན། དབང་ཐོབ་པ་གཙོ་བོར་དགོངས་པ་དང་། མཚན་ཉིད་ཡོངས་སུ་མ་རྫོགས་ན་ཁ་ན་མ་ཐོབ་ལྕི་བ་ཡིན་གྱི། རྩ་ལྟུང་དུ་འགྱུར་མི་འགྱུར་གྱི་ཁྱད་པར་མེད་དོ། །ཡུལ་གྱི་སྟེང་ནས་ངེས་པར་མེད་ཀྱང་
སྐྱོན་མི་སེམས་ཡོན་ཏན་འབའ་ཞིག་སེམས་པ་སོགས་བླ་མ་བསྟེན་ཚུལ་ལེགས་ན། བླ་མ་གང་ཡང་རུང་བ་ལས་ཀྱང་དངོས་གྲུབ་འབྱུང་བས་སློབ་དཔོན་ཀུན་གྱི་སྟེང་དུ་རྒྱུ་མཚན་དེ་མ་གྲུབ་པའི་ཉེས་པ་མེད་དོ། །གཉིས་པ་ཕྱོགས་མཐུན་ནི། སྤྱིར་ཆོས་སྨྲ་ཙམ་
དང་། ཁྱད་པར་མཚན་ཉིད་ཐེག་པའི་སྒོ་ནས་འབྲེལ་བའི་སློབ་དཔོན་སོགས་ལ་བརྙས་ན་ཡང་བཤགས་བྱའི་ཉེས་པར་འགྱུར་བས་སྔ་མ་འདག་ངེས་སུ་སྦྱངས་ཤིང་། ཕྱི་མ་འཕྲོ་ཆད་ངེས་སུ་བསྡམ་པར་བྱའོ། །གཉིས་པ་ལ། དངོས་དང་། ཕྱོགས་
མཐུན་ནོ། །དང་པོ་ལ། མིང་འདོགས་དང་། ལྟུང་བར་འགྱུར་ཚུལ་ལོ། །དང་པོ་ནི། དུས་འཁོར་ནས་བླ་མའི་བཀའ་བཅག་པ་ཞེས་དང་། གཞན་རྣམས་ལས་བདེ་གཤེགས་བཀའ་ལས་འདས་ཞེས་འབྱུང་ངོ་། །གཉིས་པ་ལ་དུས་འཁོར་གྱི་
6-9-9a


འགྲེལ་པར་དཱ་རི་ཀ་པས་སྔར་བཤད་པ་ལྟར། ཡན་ལག་དྲུག་ལས་གཉིས་པའི་ཐད་དུ་བཀའ་བཅག་པ་ཞེས་སོགས། སྔགས་སྤྱིའི་དབང་དུ་བྱས་ན། བདེ་བར་གཤེགས་པའི་བཀའ་ཡིན་པ། དེ་ལ་དེར་ཤེས་བཞིན་དུ་ལོག་པར་
རང་ཉིད་ཀྱིས་སྤྱོད་ཅིང་གཞན་ལ་སྟོན་པ། ཁྱད་དུ་གསོད་པ། སླར་སྦྱང་བའི་བསམ་པ་མེད་པ་སྟེ། མདོར་ན་བཀའ་ཚིག་དོན་གང་རུང་ཡིན་པ་ལ། དེར་ཤེས་ཤིང་ཁྱད་དུ་གསོད་ཅིང་། སླར་སྦྱང་བའི་བསམ་པ་མེད་པའོ། །དེའི་དུས་སུ་བཀར་
མ་གྲགས་ཀྱང་། སྔར་གྱི་འདུ་བྱེད་མ་ཉམས་ན་ཡང་ངོ་། །གཉིས་པ་ཕྱོགས་མཐུན་ནི། དགོངས་འགྲེལ་གྱི་བསྟན་བཅོས་སོགས་སོ། །གསུམ་པ་ལ་ཡང་དངོས་དང་། ཕྱོགས་མཐུན་ནོ། །དང་པོ་ལ་ལྟུང་བའི་མིང་འདོགས་དང་། འགྱུར་
ཚུལ་ལོ། །དང་པོ་ནི། སྤུན་ལ་ཁྲོས་པ་དང་། ཁྲོས་ནས་བསྒོ་བ་བཅག་ཅེས་སོགས་སོ། །གཉིས་པ་ལ་གཉིས་ལས། ལུགས་འགོད་པ་ནི། རྒྱ་ཆེར་འགྲེལ་སོགས་ཏེ། དཱ་རི་ཀ་པས། གྲོགས་དམ་པ་ཡིན་པ། དེར་ཤེས་པ། དེས་
བསྒོ་བ་བཅག་པ། དེ་ཡང་ཁྲོས་ནས་བཅག་པ། རང་དོན་ལྷུར་ལེན་པ། གཞན་དོན་མ་ཡིན་པ། སླར་སྦྱང་བའི་བསམ་པ་མེད་པ། རྡོ་རྗེ་སྤུན་སྡོམ་ལྡན་ཡིན་པ་རྣམས་སོ། །གཉིས་པ་འཐད་ཕྱོགས་ནི། བླ་མ་གཅིག་དང་དབང་བསྐུར་གཅིག་
གིས་འབྲེལ་བའི་རྡོ་རྗེ་སྤུན་ཡིན་པ་ལ། ཁྲོས་ནས་དེའི་སྐྱོན་བརྗོད་ཅིང་། དེས་གོ་བ། དེ་ཡང་སྡོམ་ལྡན་ཡིན་པ། སླར་སྦྱང་བའི་བསམ་པ་མེད་པ། །རྡོ་རྗེ་སྤུན་དུ་ཤེས་པའམ། ཐེ་ཚོམ་ཟ་བའོ། །གཉིས་པ་ལ་ཕྱོགས་མཐུན་ནི། སྡོམ་པ་དང་
6-9-9b


མི་ལྡན་པའི་རྡོ་རྗེ་སྤུན་ལ་ནི། ཡན་ལག་མ་ཚང་བའི་བཤགས་བྱ་དང་། མཚན་ཉིད་ཐེག་པ་ཁོ་ནའི་སྒོ་ནས་འབྲེལ་ཡང་ཕྱོགས་མཐུན་ནོ། །བཞི་པ་ལ་གཉིས། མིང་འདོགས་དང་། རྩ་ལྟུང་དུ་འགྱུར་ཚུལ་ལོ། །དང་པོ་ནི། ཀུན་མཐུན་ཅིང་། 
གཉིས་པ་ལ། ལུགས་འགོད་པ་སྔར་ལྟར་དང་། ངཱ་རི་ཀ་པས། སེམས་ཅན་གང་ཡང་རུང་བ་ཞིག་ལ་ཁྲོས་པས་ཞག་གཅིག་གི་ཁོངས་སུ་དེ་ལ་བྱམས་པ་མཚམས་སྦྱོར་བ་མ་ནུས་ན། བྱམས་པ་སྤོང་བར་འགྱུར་ཞེས་གསུངས་སོ། །
འཐད་ཕྱོགས་ནི། སེམས་ཅན་གང་རུང་ཞིག་ལ་བདེ་བ་དང་བྲལ་བར་གྱུར་ཅིག་སྙམ་པའ། །འདིའི་དོན་ནམ་ཡང་ངས་མི་བྱེད་སྙམ་པའི་བློ་དེ་སྐྱེས་མ་ཐག་ཏུ་རྩ་ལྟུང་དུ་འགྱུར་རོ། །ཕྱོགས་མཐུན་ནི། ཤིན་ཏུ་སྡུག་ཅིང་ཉོན་མོངས་པ་ལ་
ཕན་འདོགས་ནུས་བཞིན་དུ་ཡལ་བར་འདོར་བ་དང་། ཚད་མེད་སྒོམ་པ་ལ་མི་སློབ་པའོ། །ལྔ་པ་ལ་དངོས་དང་། ཕྱོགས་མཐུན་ནོ། །དང་པོ་ནི། མིང་འདོགས་ཕལ་ཆེར་མཐུན་ནོ། །གཉིས་པ་འགྱུར་ཚུལ་ལོ། ལུགས་བཀོད་པ་ནི། རྒྱ་ཆེར་འགྲེལ་སོགས་
ཏེ། དཱ་རི་ཀ་པས་མི་འགྱུར་བའི་རང་བཞིན་ཤེས་པ། འགྱུར་བའི་བདེ་བ་དང་དུ་ལེན་འདོད་ཅིང་། དབང་པོ་ལས་ཐོན་པ། ལེགས་པར་འཛིན་པ། གསལ་བར་ཡོད་པ། འགྱོད་པ་མེད་པ། གསང་དབང་སོགས་གསུམ་གྱི་དོན་མ་ཡིན་པ་དང་ལྔ། འཐད་པའི་ཕྱོགས་
ནི། ཀུན་ཏུ་འདོར་བ་ཡན་ལག་སྔ་མ་ལྟར་ཚང་བ་དང་། སྨོན་སེམས་ཀྱི་ངོ་བོ་འདོར་བ་དང་། སེམས་ཅན་ལ་གཡོ་སྒྱུས་སྤྱོད་པ་ཡང་ཆུ་ཚོད་དྲུག་ཅུ་འདས་ན་འགྱུར་རོ། །ཕྱོགས་མཐུན་ནི། དེ་ལས་གཞན་པའི་བསླབ་བྱ་ལ་གཡེལ་བའོ། །དྲུག་པ་ལ་གཉིས་
6-9-10a


ཀྱི། །དངོས་ལ་མིང་འདོགས་དང་། འགྱུར་ཚུལ་ལོ། །དང་པོ་ཕ་ཆེར་འདྲ་ལ། གཉིས་པ་ལུགས་བཀོད་ལྟར་ཡིན་ལ། དཱ་རི་ཀ་པས། སྔགས་པ་དབྱེར་མེད་པའི་ཕ་རོལ་ཏུ་ཕྱིན་པ་ཡི་ལ། །ཞེས་སྡང་ལ་གནས་ནས་སྐྱོན་
སྨྲས་པ། གཞན་འདུལ་བའི་དོན་མ་ཡིན་པ། དེ་ལ་ལེགས་པར་འཛིན་པ། འགྱོད་པ་མེད་པ་དང་ལྔའོ། །འཐད་ཕྱོགས་ནི། ཉན་ཐོས་ཐེག་པ་སོགས་དང་། དམ་པའི་ཆོས་སྤོང་བ་དང་། ཕར་ཕྱིན་ཐེག་ཆེན་ལ་ཞེ་སྡང་གིས་སྨོན་པ་ནི་ཀུན་གྱི་
ལུགས་ལ་འགྱུར་ཞིང་། ཅི་འཕྲོས་ནི། སྔགས་དང་ཕར་ཕྱིན་ཐེག་པ་ལ་འདུན་པའི་གང་ཟག་གི་འདུན་པ་དེ། དགོས་པ་ཁྱད་པར་ཅན་མེད་པར་ལོག་པར་འདོད་ནས་སྐྱོན་བརྗོད་ན། འདུན་པ་མ་ལོག་ཀྱང་འགྱུར་བ་ཤེས་པར་བྱའོ། །ཕྱོགས་མཐུན་
ནོ། ཉོན་མོངས་པས་ཀུན་ནས་བསླངས་ནས་མུ་སྟེགས་ཀྱི་གྲུབ་མཐའ་ལ་སྨད་ནའང་ཉེས་བྱས་སུ་འགྱུར་ཞིང་། ཉན་ཐོས་ཀྱི་ཐེག་པ་ལ་ཐེག་ཆེན་ལ་བལྟོས་མེད་དུ་དམན་པའི་སྐྱོན་བརྗོད་ན། ཡན་ལག་མ་ཚང་བའི་བཤགས་བྱར་འགྱུར་རོ། །
བདུན་པ་ལ་དངོས་དང་། ཕྱོགས་མཐུན་ནོ། །དང་པོ་ལ། །མིང་འདོགས་དང་། ལྷུང་བར་འགྱུར་ཚུལ་ལོ། །དང་པོ་ནི། དེ་ཉིད་སྐལ་མེད་སྒྲོགས། ཞེས་དང་། མ་སྨིན་པ་ལ་གསང་བསྒྲོགས། །ཞེས་སོགས། གཉིས་པ་ལ་ལུགས་འགོད་པ་ནི། 
སྔར་ལྟར་རོ། དཱ་ར་ཀི་པས། གསང་བ་བསྒྲགས་ན་མ་དང་བ་སྐྱེ་བ་ལ་དབང་ཐོབ་མ་ཐོབ་གཉིས་སུ་ངེས་པས། མ་ཐོབ་པ་ལ་དབང་དང་འབྲེལ་བའི་བསྐྱེད་རྫོགས་ཀྱི་ཆ་ཤས་གང་རུང་ཞིག་བསྒྲགས་ནས་ཕ་རོལ་མ་དད་པ་སྐྱེས་ན་དངོས་གཞིར་
6-9-10b


འགྱུར་ལ། སྤྱི་འགྲོ་ཡང་དེ་ཁོ་ན་ལྟར་ཡིན་ལ། དབང་ཐོབ་པ་ལ་ནི། དགོངས་པ་ཁྱད་པར་མེད་པར་གསང་ཆེན་བདེ་བ་ཆེན་པོར་བསྒྲགས་པ་ཁོ་ན་ལས་འབྱུང་བར་བཞེད་ཅིང་། དེ་མ་ཡིན་པ་བསྒྲགས་ན་ཡན་ལག་མ་ཚང་བའི་བཤགས་བྱར་བཞེད་དོ། །
ཕྱོགས་མཐུན་ནོ། །གསང་བའི་རྫས་གཞལ་ཡས་ཁང་བསྟན་པ་སོགས་དང་། སྣོད་མིན་ལ་མཚན་ཉིད་ཐེག་པ་བསྟན་པ་སོགས་སོ། །བརྒྱད་པ་ལ་ཡང་། དངོས་པོ་དང་། ཕྱོགས་མཐུན་ནོ། །དང་པོ་ལ། མིང་འདོགས་དང་། ལྟུང་བར་འགྱུར་
ཚུལ་ལོ། །དང་པོ་ནི། ཉོན་མོངས་ཤིང་ལྟུང་བ་ཞེས་དང་། སྨོད་པ་ཞེས་སོགས་སོ། །གཉིས་པ་ནི། ལུགས་འགོད་སྔར་ལྟར་རོ། །དཱ་རི་ཀ་པས། ཕུང་པོ་ལྔའི་རང་བཞིན་དུ་ཤེས་པ་དེ་དཀའ་ཐུབ་ཀྱིས་གདུངས་པ་ལ་མེད་པར་ཤེས་པ་ལ། 
བདག་ཉིད་གསོད་པར་བརྩམས་ན་སེམས་བསྐྱེད་མ་ཐག་ཏུ་རྩ་ལྟུང་དུ་འགྱུར་ཞིང་། གདུང་བར་བྱེད་ན་ནམ་བྱས་པ་དེའི་ཚེ་འགྱུར་བར་བཞེད་ལ། ལྷའི་རང་བཞིན་དུ་ཤེས་པ་ནི། དེ་ལྟར་གསང་སྔགས་ལས་བཤད་པ་གོ་ཙམ་མོ། །གདུང་
བ་ནི། ཟས་གཅོད་པ་སོགས་སོ། །ནག་པོ་པས་ཆེད་དུ་བསམས་ཏེ་ཟས་གཅོག་པ་སོགས་ཀྱི་ལྟུང་བར་བྱེད་པ་དང་། ཤཱནྟི་པས། རྒྱུད་དོན་གྱི་གནད་མ་གོ་བ་ན། བདག་སྣོད་དུ་མི་རུང་བའོ། །སྙམ་ནས་ཞུམ་ཞིང་སྨོད་པ་དང་། སྡོམ་འབྱུང་
འགྲེལ་པར་ཕུང་པོ་ལྔ་ནི། མི་གཙང་ཞིང་སྡུག་བསྔལ་བ་ཡིན་པས། དེ་ལས་ལོག་པར་གཙང་བ་དང་། བདེ་བའི་སངས་རྒྱས་ཀྱི་རང་བཞིན་དུ་སྒོམ་དུ་མི་རུང་ཞེས་སྨོད་པ་ལ་བཞེད་དོ། །དགུ་པ་ལ། དངོས་དང་། ཕྱོགས་མཐུན་ནོ། །
6-9-11a


གཉིས་པ་འོག་ཏུ་འཆད་ཅིང་། དང་པོ་ལ་མིང་འདོགས་དང་། འགྱུར་ཚུལ་ལོ། །དང་པོ་ནི། ཆོས་རྣམས་སུན་དབྱུང་ཞེས་སོགས་དང་། རང་བཞིན་དག་པ་སོམ་ཉི་ཟ་བ་སོགས་སོ། །གཉིས་པ་ནི་རང་བཞིན་སྟོང་པ་ཉིད་ལ་
སོམ་ཉི་ཟ་བས་ཏེ་ཡིད་མ་ཆེས་པ་དེ་རྒྱུ་མཚན་དུ་བྱས་ནས་འདོར་ཞིང་། སྤྲོས་བཅས་ཀྱི་ཆོས་དང་དུ་ལེན་པའོ། །བཅུ་པ་ལ། དངོས་དང་། ཕྱོགས་མཐུན་ནོ། །གཉིས་པ་འོག་ཏུ་འཆད་ཅིང་། དང་པོ་ལ། མིང་འདོགས་ནི། །གདུག་ལ་བྱམས་
པ་སོགས་སོ། འབྱུང་ཚུལ་ནི། དཱ་རི་ཀ་པས། རྒྱུའི་བྱམས་པ་ཞེས་པས་ཏེ། དམ་ཚིག་སོགས་ཀྱི་གཙོ་བོ་གཞན་ངོར་བསྲུང་བ་ལྟར་བྱེད་ལ། ལྐོག་ཏུ་མི་དགེ་བ་བྱེད་ཅིང་མི་འཛེམས་པ་ལ་མཛད་ལ། སྤྱིར་ནི། གདུག་པའི་ཚད་བསྟན་པ་འཇིག་
ཅིང་བླ་མ་དཀོན་མཆོག་གསུམ་གྱི་དགྲ་བྱེད་པ་ལ་ལུས་ངག་གིས་ཕན་འདོགས་ཤིང་འགྲོགས་འདྲིས་བྱེད་པའོ། །སྦྱོར་བས་སྤོང་བ་ཡིན་གྱི། བསམ་པས་བྱམས་པ་སྤངས་ན་རྩ་ལྟུང་དུ་འགྱུར་རོ། །བཅུ་གཅིག་པ་ལ། དངོས་དང་། 
ཕྱོགས་མཐུན་ནོ། །དང་པོ་ལ། མིང་འདོགས་དང་། འགྱུར་ཚུལ་ལོ། །དང་པོ་ནི། ཆོས་ལ་ཚད་གཟུང་དང་། ཚད་གཞག་མི་བྱ་སྟེ། །ཞེས་སོགས་སོ། །གཉིས་པ་ལ། ལུགས་འགོད་པ་དང་། འཐད་ཕྱོགས་སོ། །དང་པོ་ནི། སྟོང་
པ་ལ་བདེན་པར་འཛིན་པ་སོགས་དང་། དཱ་རི་ཀ་པས། དེ་ཁོ་ན་ཉིད་དང་དབྱེར་མེད་པའི་བདེ་བ་ཆེན་པོའི་གདམས་ངག་སྦྱིན་པ་ན། གཞན་འདུལ་བའི་དོན་མིན་པར་རྟོག་པ་བྱས་ནས་དང་དུ་ལེན་པ་ལ་བཞེད་དོ། །གཉིས་པ་འཐད་
6-9-11b


ཕྱོགས་ནི། ཆོས་བདག་མེད་པའི་ལྟ་བ་རྙེད་ནས་ལྟ་བ་ལ་མི་སྦྱོར་བར་མཚན་བཅས་ཀྱིས་ཉིན་ཞག་འདས་ན་འགྱུར་རོ། །དེ་ཡང་ཞག་གཅིག་གི་ནང་དུ་ལན་ཅིག་དྲན་པས་ཆོ་ག་ལ། ལྟ་བ་མ་རྙེད་ན་རྩ་ལྟུང་འདི་མི་འབྱུང་ངོ་། །གཉིས་པ་ཕྱོགས་མཐུན་
ནི། ལྟ་བ་རྙེད་ན་ཆོས་སྤྱོད་གཞན་རྣམས་ལྟ་བས་རྒྱས་མི་འདེབས་པ་དང་། གང་ཟག་གི་བདག་མེད་པའི་ལྟ་བ་ཙམ་རྙེད་ནས་མི་སྐྱོང་བ་སོགས་སོ། །བཅུ་གཉིས་པ་ལ། དངོས་དང་། ཕྱོགས་མཐུན་ནོ། །དངོས་ལ་མིང་འདོགས་དང་། འགྱུར་
ཚུལ་ལོ། །དང་པོ་ནི། སེམས་ཅན་བསླུ་བ་དང་ལྡན་པ་ཞེས་སོགས་སོ། །གཉིས་པ་ལ། ལུགས་འགོད་པ་ནི། རྒྱ་ཆེར་འགྲེལ་སོགས་སོ། །དཱ་རི་ཀ་པས། རྣལ་འབྱོར་པ་ཐེག་པ་གསུམ་གྱིས་བསྡུས་པའི་ཞི་ལྷག་གི་རྣལ་འབྱོར་དང་ལྡན་པའི་ངང་ཚུལ་
ཅན་ལ། ཕྲག་དོག་གིས་སྐྱོན་བརྗོད་པ་དེའམ། སེམས་དཔའ་གཞན་གང་རུང་ལ་གོ་བར་བྱས་པ་ལ་བཞེད་དོ། །གཉིས་པ་འཐད་ཕྱོགས་ནི། སྔ་མ་དེ་དང་རྣལ་འབྱོར་པ་དེ་ལ་དད་པའི་སེམས་ཅན་གྱིས་དད་པ། དགོས་པ་ཁྱད་པར་ཅན་མེད་པར་
སུན་དབྱུང་བའི་ཆེད་དུ་དད་ཡུལ་གྱི་སྐྱོན་བརྗོད་པས། དད་པ་མ་ལོག་ཀྱང་། དད་པ་པོས་གོ་བ་ཙམ་གྱིས་འགྱུར་རོ། །གཉིས་པ་ཕྱོགས་མཐུན་ནི། མ་དད་པའི་ངོར་བརྗོད་པ་དང་། དད་པ་སུན་དབྱུང་འདོད་མེད་ཀྱང་། རང་བཞིན་ངག་འཁྱལ་
པས་བརྗོད་པ་སོགས་སོ། །བཅུ་གསུམ་པ་ནི། དངོས་དང་། ཕྱོགས་མཐུན་གཉིས་ཀྱིས་རིག་པར་བྱའོ། །དང་པོ་ལ་གཉིས་ལས། དང་པོ་ནི། ཇི་ལྟར་རྙེད་པའི་དམ་ཚིག་བསྟེན་པ་སོགས་སོ། །གཉིས་པ་ནི་དཔའ་བོའི་སྟོན་མོའམ། ཚོགས་
6-9-12a


ཀྱི་འཁོར་ལོའི་དུས་སུ་དེར་དགོས་པའི་བཟའ་བཏུང་གི་རྫས་ཁྱད་པར་ཅན། དམ་ཚིག་ཅན་གྱིས་བསྟབས་པ་ན་དང་དུ་མི་ལེན་པའོ། །གཉིས་པ་འཐད་ཕྱོགས་ནི། བྱིན་གྱིས་མ་བརླབས་པའི་རྫས་དང་དུ་མ་བླངས་པ་སོགས་སོ། །
བཅུ་བཞི་པ་ལ། དངོས་དང་། ཕྱོགས་མཐུན་ནོ། །དང་པོ་ལ། མིང་འདོགས་ནི། ཕྱག་རྒྱ་ལ་སྨད་པ་སོགས་སོ། །འགྱུར་ཚུལ་དགོས་པ་ཁྱད་པར་ཅན་མེད་པར་བུད་མེད་ཙམ་ལ་སྨོད་པའོ། །གཉིས་པ་ཕྱོགས་མཐུན་ནི། གཞན་ལ་སྨད་པའོ། །བཅུ་པོའི་བསྡུ་བ་ནི་
རང་ལ་ཆོས་སྟོན་པའི་བླ་མ་ལ་དམིགས་ནས་ལོག་པར་བསྒྲུབ་པ་དང་ཆོས་སྒྲུབ་པའི་གྲོགས་དང་། ཉམས་སུ་བླངས་པའི་ཆོས་ལ་དམིགས་ནས། ལོག་པར་སྒྲུབ་པ་དང་གསུམ་དུ་འདུས་ཏེ། ཁ་ན་མ་ཐོ་བའི་སྒོ་གང་ཆགས་པ་ལ་བཅས་པ་སྟེ། དེ་ཡང་
དཀོན་མཆོག་གསུམ་ལ་དམིགས་ནས་ལོག་པར་སྒྲུབ་པར་འདུས་སོ། །དང་པོ་ནི། རྩ་ལྟུང་དང་པོའོ། །གཉིས་པ་ནི། ཡང་དག་པའི་གྲོགས་ལ་ལོག་པར་སྒྲུབ་པ་དང་། ཕྱིན་ཅི་ལོག་གི་གྲོགས་ལ་མཛའ་བར་བྱེད་པ་གཉིས་སུ་ངེས་ལ། དེ་ལ་དང་པོ་
ནི། གསུམ་པ་དང་བཅུ་གཉིས་པའོ། །གཉིས་པ་ནི། བཅུ་པའོ། །གསུམ་པ་ནི་ལུང་གི་ཆོས་དང་། སྒྲུབ་པའི་ཆོས་ལ་དམིགས་པར་འདུས་ལ། དང་པོ་ལ། རང་བཟོས་ཆོས་ལ་ཁྱད་པར་དུ་གསོད་པ་དང་། ཐེག་པ་གསུམ་གྱི་ཆོས་སྨོད་པ་དང་། བསྒྲག་
བྱ་མིན་པའི་གསང་ཆོས་བསྒྲགས་པའི་དབང་དུ་བྱས་པ། གཉིས་པ་དྲུག་པ་བདུན་པའོ། །གཉིས་པ་བསྒྲུབ་པའི་ཆོས་ལ་དམིགས་པ་ལ། ལམ་གྱི་རྟེན་དང་། ངོ་བོ་དང་། ཡན་ལག་ལ་དམིགས་པར་འདུས་ལ། དང་པོ་ནི། གཙོ་བོ་སེམས་ལ་
6-9-12b


བསྐྱེད་པ་ཡིན་པས། དེ་ལ་ཆེད་དུ་བྱ་བ་གང་གི་དོན་དུ་སེམས་བསྐྱེད་པའི་སེམས་ཅན་དང་། རང་གི་ངོ་བོ་དམིགས་པའི་དབང་དུ་བྱས་པ། བཞི་པ་དང་ལྔ་པའོ། །ལམ་གྱི་ངོ་བོ་བསྐྱེད་རྫོགས་གཉིས་སུ་འདུས་པས། དང་པོ་ལ་དམིགས་ནས་ལོག་
པར་སྒྲུབ་པ་བརྒྱད་པ་དང་། གཉིས་པ་ལ་བདེ་སྟོང་གཉིས་སུ་ངེས་པས། སྟོང་པ་ལ་དམིགས་ནས་ལོག་པར་སྒྲུབ་པ་དང་། དགུ་པ་དང་བཅུ་གཅིག་པའི་ཆེད། བདེ་བ་ལ་དམིགས་པ་ཡང་བཅུ་གཅིག་པའི་ཆེད་དོ། །གསུམ་པ་ལམ་གྱི་ཡན་ལག་ལ་
ལམ་སྒྲུབ་པའི་གཞི་དང་། གྲོགས་སོ། །དང་པོ་ལ་དམིགས་ནས་ལོག་སྒྲུབ་བཅུ་གསུམ་པ་དང་། གཉིས་པ་ལ་དམིགས་པ་བཅུ་བཞི་པའོ། །གཉིས་པ་བསྲུང་འདོད་བསྐྱེད་པ་ནི། ཕན་ཡོན་དང་ཉེས་དམིགས་སེམས་པ་སྟེ། སྔགས་པས་ཞེས་
པ་རྐང་པ་དྲུག་གིས་སྟོན་ཏེ། ཕན་ཡོན་གསང་སྔགས་བླ་ན་མེད་པའི་དབང་ཐོབ་ཅིང་། དམ་ཚིག་དང་སྡོམ་པ་དང་ལྡན་པའི་སྔགས་པ་དམ་ཚིག་བཅུ་བཞི་པོ་འདི་དག་མི་ཉམས་པར་བསྲུང་ཞིང་ཉམས་པ་སྤངས་ན་ནི། ཐུན་མོང་གི་དངོས་གྲུབ་ཞི་རྒྱས་
དབང་དྲག་གི་ལས་འགྲུབ་པ་དང་། མིག་སྨན་རིལ་བུའི་དངོས་གྲུབ་སོགས་དང་། ཐུན་མོང་མ་ཡིན་པའི་དངོས་གྲུབ་ཕྱག་རྒྱ་ཆེན་པོའི་གོ་འཕང་བརྙེས་ཤིང་ཐོབ་པར་འགྱུར་རོ། །ཉེས་དམིགས་ནི། བཅུ་བཞི་པོ་དེ་དག་ཚུལ་བཞིན་དུ་གསུངས་པ་ལས་
གཞན་དུ་ཁས་བླངས་པ་ཡིན་པར་བཏང་སྟེ། མ་བསྲུང་ན་དམ་ཚིག་ཉམས་པར་འགྱུར་ཏེ། །ཉམས་པ་དེ་ཉིད་འདུད་དང་སྲིན་པོ་སོགས་ཀྱིས་བཟུངས་ནས། ཚེ་འདིར་ནད་དང་། སྲོག་འཕྲོག་པ་སོགས། མི་འདོད་པ་དཔག་ཏུ་མེད་པ་སྐྱེད་པར་
6-9-13a


འགྱུར་ཞིང་། སྡུག་བསྔལ་སྣ་ཚོགས་མྱོང་བར་འགྱུར་ལ། ཤི་མ་ཐག་མགོ་འཐུར་དུ་བལྟས་ཏེ་དམྱལ་བར་སྐྱེ་བར་འགྱུར་རོ། །གསུམ་པ་བསྲུང་ཚུལ་དངོས་ནི། དེ་བས་ཞེས་པ་རྐང་པ་གཉིས་ཏེ། བསྲུང་ན་ཕན་ཡོན་དཔག་ཏུ་
མེད་ཅིང་། མ་བསྲུང་ན་ཉེས་པ་ཐམས་ཅད་འབྱུང་བདེ་བས་ཉེས་པའི་སྒོ་ཐམས་ཅད་ཕྱིན་ཅི་ལོག་གི་ང་རྒྱལ་བཅོམས་ནས་བདག་ཉིད་དྲན་པ་དང་ཤེས་བཞིན་དང་། བག་ཡོད་ཉེ་བར་བཞག་ནས། བསྒྲིམས་ཏེ་བསྲུང་བའི་ཚུལ་ཤེས་པར་བྱའོ། །
གཉིས་པ་ཉམས་ན་ཕྱིར་བཅོས་པའི་ཐབས་ནི། མཉམ་པར་ཞེས་སོགས་རྐང་པ་གཉིས་སོ། །གལ་ཏེ་རྩ་བའི་ལྟུང་བ་བྱུང་སྟེ་ཉམས་ན། ཡིད་ཕྱིར་མ་ཡེངས་པར་རྩེ་གཅིག་ཏུ་མཉམ་པར་བཞག་པས། བླ་མ་ལ་གུས་པ་ཅི་ཡོད་སྤྲུགས་
ནས། མཆོད་འབུལ་རྒྱ་ཆེན་པོ་བྱས་ལ། སྐྱབས་འགྲོ་ནས་བརྩམས་ཏེ། ཐུན་མོང་མ་ཡིན་པ་སྔགས་ཀྱི་སྡོམ་པ་བདག་ལེགས་སུ་འདོད་ཅིང་། ཕན་པར་འདོད་པའི་སྔགས་པས་འབད་པ་ཆེན་པོའི་སྒོ་ནས་གཟུང་བར་བྱའོ། །གསུམ་པ་
བཤད་པ་མཐར་ཕྱིན་པའི་བྱ་བ་ནི། རྡོ་རྗེ་ཞེས་སོགས་སོ། །རྡོ་རྗེ་ཐེག་པ་གསང་སྔགས་ཀྱི་ཐེག་པ་ཙམ་ལ་འཇུག་ཀྱང་། འདིར་ནི་བླ་ན་མེད་པའོ། །ད་ནི་དེ་རྣམས་ལ་སེམས་བསྲུང་བའི་ཚུལ་བརྗོད་པར་བྱའོ། །དེ་རིགས་བསྡུ་པའི་སྐབས་
ནས་འབྱུང་བ་བཞིན་གྱི་ལྟུང་བ་འབྱུང་བའི་ཡུལ་རྣམས་དྲན་པར་བྱས་ལ། རྩ་ལྟུང་དང་པོ་ལས་སེམས་བསྲུང་བའི་ཚུལ་ནི། གུས་པ་བསྒྲུབ་པ་དང་། མཉེས་པ་བསྒྲུབ་པ་དང་། བཀའ་བསྒྲུབ་པ་དང་གསུམ། དང་པོ་ལ་སྐྱོན་མི་རྟོག་པ་དང་།
6-9-13b


ཡོན་ཏན་ཅན་དུ་འཛིན་པའི་བློ་བསྐྱེད་པ་གཉིས། དང་པོ་ལ་སྐྱོན་དུ་རྟོག་འདོད་ཀྱི་བློ་དགག་པ་དང་། སྐྱོན་ཅན་དུ་འཛིན་པའི་བློ་སྐྱེས་ན་དང་དུ་མི་ལེན་པར་གཉེན་པོ་བསྟེན་ནས་དགག་པའོ། །གཉིས་པ་ནི། མ་མཐའ་ཁོ་ན་ཉིད་ལ་
ཡོན་ཏན་དུ་བཟུང་བས་ཅི་ཞིག་བྱ་དོན་མེད་དོ་སྙམ་པ་ཙམ་ནས་དགག་གོ། །གཉིས་པ་ནི། བསམ་པས་མཉེས་པ་བསྒྲུབ་པའི་ཁུར་མ་དོར་བ་དང་། སྦྱོར་བས་མཉེས་པ་བསྒྲུབ་པ་ནུས་བཞིན་ཡལ་བར་འདོར་བ་དགག་པ་དང་། ཆོས་
དང་མི་ལྡན་པའམ། ཆོས་དང་མི་ལྡན་པའམ། བསྒྲུབ་པར་མི་ནུས་པ་ཡིན་ན། མྱུར་དུ་བཤད་སྦྱང་བྱ་བ་ལ་འབད་པར་བྱའོ། །བཀའ་བསྒྲུབ་པ་ལ་ཡང་དེ་བཞིན་དུ་རིག་པར་བྱའོ། །འདི་རྣམས་ཀྱི་མན་ངག་ནི། འདི་ཡིན་ཏེ། དེ་བཞིན་གཤེགས་པ་ཐམས་ཅད་བླ་
མ་ལ་རག་ལས་པ་དང་། དེ་ཡང་ཡོན་ཏན་དུ་བཟུང་བ་དང་། སྐྱོན་ཅན་དུ་རྟོག་པའི་བློ་འདོར་བ་དང་། མཉེས་པ་བསྒྲུབ་པ་དང་། བཀའ་བཞིན་བསྒྲུབ་པ་ལ་དངོས་གྲུབ་འབྱུང་ལ། ལོག་པས་ནི། རྒུད་པ་འཕེལ་བས། བདག་ལེགས་སུ་
འདོད་པ་དེ་དག་གིས་གོང་དུ་སྨོས་པའི་ཕན་ཡོན་དང་། ཉེས་དམིགས་བསམས་ལ་ཆོས་ཀྱིས་འབྲེལ་བའི་དགེ་བའི་བཤེས་གཉེན་རྣམས་ལ་གོང་དུ་སྨོན་པའི་སེམས་བསྲུག་ཚུལ་ལ་འབད་པར་བྱའོ། །འདི་ལ་འབད་ན་ལྟུང་བ་
དང་པོ་ཁེགས་སོ། །ཆོས་ལ་རང་བཟོ་དང་། ཁྱད་གསོད་བྱེད་འདོད་བཀག་ན། ཉེས་པ་གཉིས་པ་ཁེགས་སོ། །ཆོས་སྨྲ་བ་ཙམ་ལ་སྐྱོན་བརྗོད་འདོད་དང་། རྡོ་རྗེ་སྤུན་གྱི་ཆོས་ལྡན་གྱི་བགོ་བ་རང་ལ་ཆེད་དུ་གཏད་པ་གཅོད་འདོད་དང་། སྐྱོན་
6-9-14a


བརྗོད་འདོད་དང་། ཕ་རོལ་པོ་གང་ཡང་རུང་བ་ལ་ཁྲོ་བ་བཀག་ན། །ལྟུང་བ་གསུམ་པ་དང་། བཞི་པའི་ཕྱེད་ཁེགས་སོ། །ཆོས་དང་ཆོས་སྨྲ་བའི་གང་ཟག་ལ་སྐྱོན་རྗོད་འདོད་དང་། དེ་ལ་དང་པོ་ནས་མི་མོས་པ་མེད་
པའམ། །མོས་པའི་གང་ཟག་གིས་མོས་པ་མགོ་ནས་མི་དགའ་བར་བྱ་འདོད་བཀག་ན། བཅུ་གཉིས་པ་དང་དྲུག་པ་ཁེགས་སོ། །བླ་མ་ལ་གནོད་པ་བྱེད་པ་སོགས་ཕྱིན་ཅི་ལོག་གི་གྲོགས་ལ་མཛའ་བཤེས་བྱེད་འདོད་བཀག་ན། བཅུ་པ་ཁེགས་སོ། །
ཕ་རོལ་པོ་སེམས་ཅན་གང་ཡང་རུང་བ་ལ་གཏན་ཕན་མི་འདོགས་སྙམ་པ་བཀག་ན། བཞི་པའི་ཕྱེད་ཁེགས་སོ། །དགོས་པ་ཁྱད་པར་ཀུནྡ་ལུས་ལས་འབྱིན་འདོད་དང་། སངས་རྒྱས་ཐོབ་པར་མི་བྱའོ་སྙམ་པ་བཀག་ན། 
ལྔ་པ་ཁེགས་སོ། །སྣོད་དུ་མ་གྱུར་པའི་སེམས་ཅན་ལ་གོང་དུ་སྨོས་པའི་གསང་བ་བསྒྲགས་འདོད་བཀག་ན་བདུན་པ་ཁེགས་སོ། བདག་ལུས་གསང་སྔགས་སྦྱོར་མི་ནུས་སྙམ་པའི་ཞུམ་པ་དང་། རྒྱུ་མཚན་འགའ་ཞིག་གིས་ཕུང་པོ་
ལྷར་བསྒོམ་པ་མི་འཐད་སྙམ་པ་དང་། དགོས་པ་ཁྱད་པར་ཅན་མེད་པར་ལུས་གདུང་བར་བྱེད་འདོད་བཀག་ན། བརྒྱད་པ་ཁེགས་སོ། །སྟོང་ཉིད་སྤངས་ནས་སྤྲོས་བཅས་དང་དུ་ལེན་འདོད་བཀག་ན། དགུ་པ་ཁེགས་སོ། ཆོས་དང་གང་ཟག་
གི་བདག་མེད་པ་གང་རུང་གི་ལྟ་བ་རྙེད་པའི་གང་ཟག་གིས། དགེ་སྦྱོར་གྱི་ཐོག་མཐའ་དེས་རྒྱས་འདེབས་པ་དང་། བདེ་བ་ཆེན་པོའི་མན་ངག་བསྟན་པ་དང་དུ་བླངས་ན། བཅུ་གཅིག་པ་ཁེགས་སོ། །དབུ་མར་སོགས། དགོས་པ་ཁྱད་པར་ཅན་ཡོད་པའི་
6-9-14b


སྐབས་སུ། །དེ་དང་འབྲེལ་བའི་དམ་ཚིག་གི་རྫས་གཞན་གྱིས་བསྟེན་ན། ལེན་པ་སོགས་ཀྱི་སྒོ་ནས་ཚུལ་བཞིན་བསྟེན་ན། བཅུ་གསུམ་པ་ཁེགས་སོ། །ཕ་རོལ་པོ་གང་ཡང་རུང་བ་ལ་སྐྱོན་བརྗོད་བཀག་ན། བཅུ་བཞི་པ་ཕྱོགས་མཐུན་
དང་བཅས་པ་ཁེགས་སོ།། །།འདིར་འབད་ངལ་བས་དགེ་བ་གང་བསྒྲུབས་དེས། །ཚེ་རབས་ཀུན་ཏུ་རྗེ་བཙུམ་བླ་མ་ཡི། །གསང་གི་འོད་ཀྱིས་བློ་གྲོས་སྨིན་བྱས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །དེ་མ་ཐོབ་ཀྱི་གནས་
སྐབས་ཐམས་ཅད་དུ། །ལུས་ཅན་ཀུན་མཁྱེན་བསྒྲུབ་པ་ལམ་གྱི་མཆོག །བླ་མེད་རྡོར་རྗེ་ཐེག་པའི་སྒོར་ཞུགས་ནས། །བསླབ་གཞི་བཅས་པ་མིག་བཅས་པ་མིག་བཞིན་བསྲུང་བར་ཤོག། །།
6-10-1a


༄༅། །རྣལ་འབྱོར་བཞིའི་རིམ་པའི་ཊཱི་ཀྐ་བཞུགས་སོ། །
6-10-1b


༄༅། །ན་མོ་བཛྲ་བྷཻ་ར་ཝཱ་ཡ། རྣལ་འབྱོར་རྣམ་པ་བཞིར་བཤད་དེ། །ཞེས་པའི་ཚིག་རྐང་གཅིག་ལ། དང་པོ་དབྱིབས་ཀྱི་རྣལ་འབྱོར་ནི། འདི་ཉིད་ལས། རིམ་པའམ་ཡང་ན་ཅིག་ཅར་དུ། །སངས་
རྒྱས་རྗེས་དྲན་བསྒོམ་བྱ་སྟེ། །དེ་ལ་རང་ཉིད་སངས་རྒྱས་དངོས་ཡིན་སྙམ་པའི་ང་རྒྱལ་བཟུང་བའི་སྒོ་ནས་སངས་རྒྱས་རྗེས་དྲན་བསྒོམ་པ་ལ་མངོན་བྱང་ལྔ་ལས་རིམ་གྱིས་བསྒྲུབས་པའི་བསྐྱེད་རིམ་པའི་སྐུ་དང་རླུང་སེམས་
ཙམ་ལས་ཅིག་ཅར་དུ་གྲུབ་པའི་སྐུ་གཉིས་ལས་འདིར་ཕྱི་མ་ཡིན། ཤིན་ཏུ་ཕྲ་བའི་རླུང་སེམས་གཉིས་གོང་བུ་སྟེ་ངོ་བོ་གཅིག་ཏུ་འདྲེས་པར་གནས་པའི་བདག་ཉིད་ཀྱི་ལུས་འདི་གཤིན་རྗེ་གཤེད་ཀྱི་སྐུར་བཞེངས་པའོ། །
སྒྱུ་མའི་སྐུ་འདི་ནི་བེམས་པོ་མ་ཡིན་པ་ཤ་ཁྲག་གདོས་བཅས་ཀྱང་མ་ཡིན་ནོ། །ཤ་ཁྲག་གི་ལུས་ལྟ་བུར་སྣང་ཡང་དེ་རྣམས་མ་འདྲེས་པས་རྙོག་པ་མེད། ཕུན་ཚོགས་ཡོན་ཏན་མཚན་དཔེ་ཀུན་གྱིས་བརྒྱན་པ་ཡིན། །
སྒྱུ་མའི་སྐུ་འདི་བདག་ཏུ་ཐ་སྙད་འདོགས་པའི་ངར་འཛིན་ལྷན་སྐྱེས་ཀྱི་དམིགས་ཡུལ་ངའི་གདགས་གཞི་མཐར་ཐུག་པ་ཤིན་ཏུ་ཕྲ་བའི་གཉུག་མའི་ལུས་ལས་ངོ་བོ་ཐ་དད་མིན་ནོ། །འཁོར་བ་ཐོག་མེད་ནས་འདིའི་བར་རིགས་
བརྒྱུད་སྐད་ཅིག་ཀྱང་བར་མ་ཆད་པའི་རིགས་པའི་རིགས་འདྲ་ཅུང་ཟད་ཀྱང་སྤང་དུ་མེད། དེ་ཉིད་མཚན་དཔེས་སྤྲས་པའི་སྒྱུ་མའི་སྐུར་བཞེངས་པའི་མཚན་དཔེའི་རིགས་འདྲ་དེ་ལས་གཞན་པ་གཟུགས་སྐུའི་རིགས་འདྲའི་རྒྱུར་བསྟན་དུ་
6-10-2a


མེད་དོ། །ཤིན་ཏུ་ཕྲ་བའི་གཉུག་མའི་ལུས་དེ་ཇི་ཙམ་ནས་གྲུབ་ཅེ་ན། གདོད་མ་ནས་གྲུབ་པ་ཡིན་ནོ། །དེ་ཉིད་རྒྱུད་དོན་ལ་མི་འཁྲུལ་བའི་བླ་མའི་བཀའ་དྲིན་ལས་སྒྱུ་མའི་སྐུར་འགྱུར་བ་ཡིན་ནོ། །
ལུས་ཅན་ཞེས་པའི་རྐང་པ་གསུམ་ནི་སྒྱུ་མའི་སྐུའི་ཁྱད་ཆོས་སོ། །སྒྱུ་མའི་སྐུ་དེ་ལ་སྒྱུ་མ་ལྟ་བུའི་ཏིང་ངེ་འཛིན་ཟེར་རོ། །རྨི་ལམ་ཇི་བཞིན་གོམས་པར་བྱེད། ཅེས་པ་འདིས་རྨི་ལམ་གྱི་ལུས་དང་སྒྱུ་མའི་སྐུ་དང་བར་དོ་གསུམ་
བསྲེ་བའང་དོན་གྱིས་བསྟན་ནོ། །རྨི་ལམ་གྱི་ལུས་ཞེས་པ་རྨི་ལམ་གྱི་ཀ་བ་བུམ་པ་ལྟ་བུ་གང་ཡིན་མ་ཡིན་གྱི། །རྨི་ལམ་གྱི་ལུས་ཁྱད་པར་བ་ཞིག་ངོས་ཟིན་དགོས་སོ། །དེ་གང་ཡིན་པའི་རྨི་ལམ་གྱི་སྐབས་ཀྱི་ངར་འཛིན་གྱིས་
དམིགས་ཡུལ་ངའི་གདགས་གཞི་རླུང་སེམས་ཙམ་ལས་གྲུབ་པའི་ལུས་རྨི་ལམ་གྱི་ཡུལ་དུ་ང་བྱ་བ་འདི་དང་འདི་བྱེད་སྙམ་དུ་རྩོལ་མེད་དུ་རང་གི་ངག་གིས་འཇུག་པའི་དུས་དེ་ཡིན་ནོ། །དེ་ལྟ་བུའི་ལུས་དེ་ཡིད་ངོ་ན་ཤ་
རུས་ཀྱིས་ལུས་བཞིན་དུ་དངོས་གནས་ལ་བྱ་བ་བྱེད་པའི་ལུས་སུ་སྣང་ཡང་། དངོས་གནས་ལ་ཤ་རུས་ཀྱི་ལུས་བཞིན་བྱ་བ་བྱེད་མི་ནུས་སོ། །དེ་བཞིན་དུ་སྒྱུ་ལུས་རྗེས་མཐུན་པའི་སྐུའང་དཔེའི་འོད་གསལ་གྱ་མཐར་
འཕེན་པའི་དབང་གིས་རྡོ་རྗེ་འཆང་གི་སྐུར་བཞེངས་པ་ན། ཡིད་ངོར་ཡེ་ཤེས་ཀྱི་མཚན་ཉིད་པ་ལྟ་བུར་སྣང་ཡང་དངོས་གནས་ལ་ཡེ་ཤེས་ཀྱི་སྐུ་མཚན་ཉིད་པར་གནས་པ་མིན་ནོ། །འོ་ན་བསྐྱེ་བ་རིམ་པའི་
6-10-2b


སྐུ་དང་ཁྱད་པར་ཅི་ཡོད་ཅེ་ན། །བསྐྱེད་རིམ་པའི་སྐུ་ནི་ང་དེ་དང་དེའི་སྐུ་ཡིན་ནོ་སྙམ་པའི་དྲན་པའི་འཛིན་སྟངས་མ་ཤོར་གྱི་བར་དུ་ཡིད་ངོར་སྐུ་དེ་དང་དེར་སྣང་བ་ཡིན་གྱི་འཛིན་སྟངས་ཤོར་ནས་མི་སྣང་ངོ་། །འདི་ནི་ལུགས་ལྡོག་གི་མཐར་རང་
བཞིན་བརྒྱད་ཅུའི་རྟོག་པ་མ་ཤར་གྱི་བར་དུ་རང་གི་ངག་གིས་སྣང་བ་ཡིན་ཏེ། །དཔེར་ན་རྨི་ལམ་གྱི་ལུས་བཞིན་སྦྱོར་རོ། །གང་དང་སྦྱོར་ན་ཤིན་ཏུ་ཕྲ་བའི་གཉུག་ལུས་དང་། ཇི་ལྟར་སྦྱོར་ན་གཉུག་ལུས་དེ་བར་དོའི་སྲིད་པ་དང་ཆོས་
མཐུན་པར་ཚེ་འདིར་མཚན་དཔེས་བརྒྱན་པའི་སྒྱུ་མའི་སྐུ་རབ་ཏུ་སྦྱོར་ནུས་ན་ཚེ་འདི་ལ་རྡོ་རྗེ་འཆང་ཐོབ་པའོ། །འདིར་བསྟན་པ་བཤད་པའི་རིམ་པ་ཡིན་གྱི། ཉམས་སུ་ལེན་པའི་རིམ་པ་ལས་རྣམ་དག་ཡེ་ཤེས་པ་འོད་གསལ་གྱི་ཡེ་ཤེས་
ཡིན་ལ། །དེ་ལ་དཔེའི་འོད་གསལ་གྱི་ཡེ་ཤེས་དང་དོན་གྱི་འོད་གསལ་གྱི་ཡེ་ཤེས་གཉིས་ཀ་ཡོད་པས་དེས་ན་སྒྱུ་ལུས་ཀྱི་དངོས་རྒྱུར་འོད་གསལ་གྱི་ཡེ་ཤེས་འགྲོ་དགོས་ལ། དེའི་རྒྱུར་སྔགས་ཀྱི་རྣལ་འབྱོར་ཞེས་པ་རྡོ་རྗེའི་བཟླས་པ་ནང་གི་རྒྱུར་འགྲོ་
དགོས་ཕྱིའི་རྐྱེན་དམ་ཚིག་གི་རྣལ་འབྱོར་ཞེས་པ་ཕྱག་རྒྱ་སྲོག་རྩོལ་དགོས་སོ། །གཉིས་པ་སྔགས་ཀྱི་རྣལ་འབྱོར་ནི། ལུས་ཅན་ཀུན་གྱི་རླུང་ལ་སྲོག་ཅེས་ཟེར་བས་རླུང་ཞེས་བྱ་བས་རྣམ་ཤེས་ཐམས་ཅད་ཀྱི་བཞོན་པ་བྱས་ཏེ། བྱེད་ཚུལ་གྱི་ཐབས་ཀྱིས་
མ་ཟིན་པ་ན་སྲིད་པ་དང་། ཟིན་པ་ན་རྣམ་གྲོལ་ཐོབ་པར་བྱེད་དོ། །ཐབས་ཇི་ལྟ་བུས་ཤེ་ན། དག་པས་སྦྱོར་བ་དག་བྱ་སྟེ། ཞེས་སོགས་ཚིག་རྐང་བཞི་པོ་རླུང་བུམ་པ་ཅན་ལའང་ཅུང་ཟད་སྦྱར་དུ་རུང་ཡང་དོན་གྱི་གཙོ་བོ་ནི་རྡོར་བཟླས་ལ་སྦྱོར་ཏེ། །དེའི་སྦྱོར་
6-10-3a


ཚུལ་ནི། དགུག་པ་སྟེ་རླུང་ནང་དུ་ཞུགས་པའི་སྦྱོར་བས་ནང་དུ་ཞུགས་པ་དང་། རླུང་གི་རྒྱུ་བ་ཞི་བའི་སྦྱོར་བ་ཡིས་ནི་རླུང་ཞི་བ་སྟེ་ནང་དུ་གནས་པ་དང་། རེངས་པའི་སྦྱོར་བས་མི་གཡོ་བ་སྟེ་ནང་དུ་ཐིམ་པ་དང་། རླུང་ཐིམ་པའི་
སྐད་ཅིག་ལ་རྟགས་ལྔ་འཆར་རོ། །སྲིད་དང་རྣམ་གྲོལ་ཐོབ་པའི་རྒྱས་བཤད་ནི། རླུང་གི་གཡོ་བ་དེ་རོ་རྐྱང་ནས་བརྒྱུས་པས་ལས་བསགས་ཏེ་འཁོར་བར་འགྱུར། མི་གཡོ་བ་མན་ངག་གིས་དབུ་མར་ཐིམ་པ་རྣམ་གྲོལ་མི་གནས་པའི་མྱ་ངན་ལས་འདས་
པ་ཐོབ་པར་འགྱུར། ཐིམ་པ་ནི་སྙིང་གའི་ཆུ་སྐྱེས་ཏེ་ཨ་བ་དྷཱུ་ཏཱིའི་དབུས། དེའང་རྣལ་འབྱོར་པས་རྩེ་གཅིག་ཏུ་མཉམ་པར་བཞག་པ་ལས་དུས་ནི་ཐོ་རངས་ནས་སོ། །བྱེད་ཚུལ་འཇུག་གནས་ལྡང་གསུམ་གསང་འདུས་ནས་གསུངས་པ་བཞིན་ནོ། །
གནས་སྐབས་ཀྱི་ཕན་ཡོན་གོ་སླ། འདི་ལ་སྔགས་ཀྱི་རྣལ་འབྱོར་ཞེས་གསུངས་པས་རླུང་སྔགས་དབྱེར་མེད་དུ་སྦྱོར་བ་དོན་གྱིས་ཐོབ་བོ། །ཐིམ་པའི་དམིགས་ཡུལ་ནི་སྙིང་གའི་དྷཱུ་ཏཱིའི་དབུས་སུ་ཧཱུཾ་དཀར་པོ་ཡུངས་ཀར་སྦོམ་པོ་ཙམ་ལ་སོགས་
པའི་ཡན་ལག་གི་རླུང་གི་རྡོར་བཟླས་ཀྱིས་མྱང་འདས་ཐོབ་པར་མ་ཟད་མངོན་པར་ཤེས་པ་ལྔའང་འཐོབ་བོ། །སྐབས་འདིར་འཕོ་བ་གསུངས་པས་ནི་རྒྱུད་ནས་བཤད་པ་ལྟར་གྱི་འཕོ་བ་ལ་སྙིང་ཁའི་མི་ཤིགས་པའི་ཐིག་ལེ་ལ་རླུང་ཞུགས་གནས་
ཐིམ་གསུམ་མཐར་ཕྱིན་པ་དགོས་པར་ཤེས་པའི་ཆེད་ཡིན་ནོ། །ཁམས་གསུམ་པོ་ནི་སྒྲུབ་པ་པོ་རང་དང་རིག་མའི་ལུས་ངག་ཡིད་གསུམ་མ་ལུས་པའོ། །སངས་རྒྱས་ངོ་བོར་བསྒོམ་པར་བྱ། །ཞེས་པ་ནི་རིག་མ་དང་སྒྲུབ་པ་པོ་རང་གི་ལུས་ངག་
6-10-3b


ཡིད་གསུམ་སྐུ་གསུང་ཐུགས་རྡོ་རྗེ་གསུམ་གྱི་ངོ་བོ་བསྒོམ་པའི་རྒྱུ་མཐུན་ལ་སོགས་རབ་དབྱེ་ནི་དགའ་བ་བཞིའོ། གང་ཚེ་ཆུ་ཡི་རི་མོ་ལྟར་ཞེས་པ་ནི། ཆུའི་རི་མོ་སྐད་ཅིག་རེ་རེ་ལ་ཞིག་ནས་མི་གནས་པ་ལྟར། དེའི་ཚེ་རླུང་རྣམས་རོ་རྐྱང་ནས་རྒྱུ་བའི་གཡོ་
བ་སྐད་ཅིག་རེ་རེ་ཞིང་བཀག་སྟེ། དབུ་མའི་ནང་དུ་གནས་པ། དེའི་ཚེ་བདེ་ཆེན་ལྷན་སྐྱེས་ཐོབ་པར་འགྱུར་ཞིང་། རྒྱུན་མི་འཆད་དོ། །དེ་དུས་དགའ་བ་ལས་སྐྱེས་པའི་བདེ་བ་གཞན་ཅི་ཞིག་སྐྱེས། བྱང་ཆུབ་སེམས་ནི་ལྟུང་གྱུར་ནས། །རྣམ་པར་ཤེས་པའི་ཕུང་པོ་བརྒྱལ་
བ་སྟེ། དྲན་པ་ཉམས་པ་ལ། མ་སྨད་དངོས་གྲུབ་ག་ལ་ཡོད། །མཁའ་ཁམས་ནི་རྡོ་རྗེ་དབྱིངས་ཀྱི་དབང་ཕྱུག་མའི་རྩ་ནང་གི་སྦུབས་ཡིན་ལ། རྡོ་རྗེ་ནི་ནོར་བུའི་མར་སྣའི་དབུ་མ་དེ་གཉིས་མཉམ་པར་སྦྱོར་བའོ། །དེ་ལྟ་བུའི་རིག་པ་དང་བཅས་པའི་རྨད་དུ་བྱུང་བ་ལས། བདེ་
བ་སྐྱེད་པར་བྱེད་པ་གང་ཡིན་པ་དེ་ནི་མཆོག་དགའ་དང་། དེའི་བྱེད་པ་པོ་སྟེ་དགའ་བ་དང་དགའ་བྲལ་དང་མཆོག་དགའ་དང་དགའ་བྲལ་གྱི་ནི་དབུས་སུ་སྐྱེས་པའི་དགའ་བའི་དེ་ནི་བརྟན་པ་སྟེ། དེ་ལ་གཞག་པར་བྱའོ། །དེ་ནས་དགའ་བ་བཞིའི་རིམ་པ་ལ་དང་པོ་དགའ་བ། 
གཉིས་པ་མཆོག་དགའ། གསུམ་པ་ལྷན་སྐྱེས་ཀྱི་དགའ་བ། བཞི་པ་དགའ་བྲལ་གྱི་དགའ་བའོ། །དགའ་བྲལ་གྱི་དགའ་བ་ཞེས་པ་ནི། སྔགས་ཀྱི་ལྷན་ཅིག་སྐྱེས་པའི་དགའ་བ་མྱོང་བ་དེ་ཕྱིས་སླར་དྲན་པ་ལ་ཟེར་རོ། པདྨའི་ནམ་མཁའི་ལྟེ་བ་ནི་རྡོ་རྗེ་དབྱིངས་ཀྱི་
དབང་ཕྱུག་མའི་རྩ་བུ་གའོ། །རྡོ་རྗེའི་ལྟེ་བ་ནི་ནོར་བུའི་དབུ་མའི་མར་ཝའི་བུ་གའོ། །མནན་པ་ནི། རྡོ་རྗེ་དབྱིངས་ཀྱི་དབང་ཕྱུག་མའི་རྩ་ནོར་བུའི་དྷཱུ་ཏཱིའི་མར་སྣའི་ནང་དུ་བཅུག་ཅིང་བཅིངས་པ། རྡོ་རྗེ་སྐྱིལ་ཀྲུང་དག་གི་ཞེས་པ་ནི་རོ་རྐྱང་གི་རླུང་དབུ་མའི་ནང་དུ་ཞུགས་
6-10-4a


གནས་བྱས་པའོ། དེ་དུས་རང་གི་སེམས་ནོར་བུའི་དྷཱུ་ཏཱིའི་ནང་དུ་གནས་ཤིང་སོན་པར་བལྟའོ། །ཡུལ་སྟོང་པ་ཉིད་དང་ཡུལ་ཅན་བདེ་བ་ཆེན་པོའི་ཡེ་ཤེས་གང་ཡིན་པ་དེ་ནི་ལྷན་ཅིག་སྐྱེས་པའི་ཡེ་ཤེས་ཀྱི་ངོ་བོ་ཞེས་བྱ་བ་སྟེ། དེ་ནི་
ཆགས་པ་སྣང་བ་མ་ཡིན། ཆགས་བྲལ་མཆེད་པ་མ་ཡིན། ཉེར་ཐོབ་དབུ་མར་དམིགས་པར་མི་འགྱུར་རོ། །ལྷན་སྐྱེས་ཀྱི་ཡེ་ཤེས་དེ་ལ་ཐུན་ཞེས་པ་ནས་བསྐལ་པ་སྟོང་དུ་ཡང་མཉམ་པར་འཇོག་པའི་མངོན་པར་སྦྱོར་བས་གནས་པར་བྱའོ། །བཞི་པ་ནི། ལྟེ་བ་
སྤྲུལ་པའི་རྩ་འཁོར་ལ་མཁའ་འགྲོའི་ཕོ་བྲང་ཞེས་ཟེར་ཏེ། རྩ་འཁོར་དེའི་དབུས་ན་ངེས་དོན་གྱི་མཁའ་འགྲོ་མ་དང་ཤར་མ་དང་གཏུམ་མོ་རྡུལ་གྱི་མེ་ཡོད་པས་དེར་བདེ་ཆེན་འདྲེན་པའོ། །ཆུ་སྐྱེས་དབུས་ཞེས་པ་དེའི་རྩ་འདབ་ཀྱི་དབུས་སུའོ། །དེས་ན་ལྟེ་བའི་
དབུས་སོན་ཞེས་པ་ལྟེ་བ་སྤྲུལ་པའི་རྩ་འཁོར་གྱི་ཧཱུ་ཏཱིའི་དབུས་སུ། དཔའ་བོ་སྟེ་གཤིན་རྗེ་གཤེད་ཞལ་གཅིག་ཕྱག་གཉིས་པ་ཡབ་ཡུམ་མཚོན་གང་པ་ཐབས་དང་ཤེས་རབ་ཏུ་སྙོམས་པར་འཇུག་པའི་སྦྱོར་མཚམས་ནས་འཕྲོས་པའི་འོད་ཟེར་ཁམས་
གསུམ་རྒྱུ་བ་སེམས་ཅན་གྱི་འཇིག་རྟེན་དང་མི་རྒྱུ་བ་སྣོད་ཀྱི་འཇིག་རྟེན་ལ་སྤྲོ་བ་དང་སྡུད་པའི་སྦྱོར་བ་ཡིས་རྣལ་འབྱོར་བ་ཡིས་རྣལ་འབྱོར་ཆེན་པོ་ལྷན་ཅིག་སྐྱེས་པའི་ཡེ་ཤེས་ཀྱི་ངོ་བོ་རང་ལ་བསོ་བྱའོ། །སྡུད་ཚུལ་ཇི་ལྟ་བུ་ཞེ་ན། མེ་ལོང་ལ་ཧས་བཏབ་པ་མཐའ་ནས་རིམ་
གྱིས་སྡུད་པ་ལྟར། སྣོད་བཅུད་ཐམས་ཅད་ཕྱིའི་དུར་ཁྲོད་ལ། དེ་གཞལ་ཡས་ཁང་ལ། དེ་གཙོ་བོ་ལ། དེ་རྩ་འཁོར་གྱི་གཙོ་བོ་ཡབ་ཡུམ་ལ། དེ་རྣམས་གང་དུ་སྡུད་པའི་གནས་ནི་ལྟེ་བའི་ཆུ་སྐྱེས་པདྨའི་དབུས་ཧཱུཾ་ཡིག་དཀར་པོ་ཡུངས་ཀར་ཙམ་ལ་
6-10-4b


སེམས་བརྟན་པར་བྱའོ། །དེ་ལས་འོད་གསལ་ལྷན་ཅིག་སྐྱེས་པའི་ཡེ་ཤེས་འཆར་བར་འགྱུར་རོ། །ལྷན་ཅིག་སྐྱེས་པའི་ཡེ་ཤེས་དེའི་ངེས་ངོ་ནས་རྟག་ཆད་བདག་གཞན་སྲིད་པ་མྱང་འདས་ཐོག་མཐའ་དབུས་རྣམས་སྤངས་པ་སྟེ། །ཡོད་པ་མ་ཡིན་ནོ། །འོད་
གསལ་ལྷན་ཅིག་སྐྱེས་པའི་ཡེ་ཤེས་དེ་ལས་རྡོ་རྗེ་འཛིན་པ་སྔར་བཤད་པའི་སྒྱུ་མའི་སྐུ་འགྲུབ་པར་འགྱུར་རོ། །རྣལ་འབྱོར་བཞིའི་རིམ་པ་ལས། འོད་གསལ་ལྷན་ཅིག་སྐྱེས་པའི་ཡེ་ཤེས་གང་སྐྱེས་པར་གྱུར་པ་ལས། ཡེ་ཤེས་ཕྱག་རྒྱ་ཆེན་པོ་སྒྱུ་མའི་
སྐུ་འཐོབ་ལ། དེ་ནི་ཐབས་དང་ཤེས་རབ་ཀྱི་རང་བཞིན། དེ་བཞིན་གཤེགས་པ་དེ་ཉིད་ངའོ་སྙམ་པའི་ང་རྒྱལ་འཇོག་པའི་གཞིར་བརྟེན་པའོ། །དེ་ན་མེ་ལོང་ནང་གི་གཟུགས་བརྙན་བཞིན་ཡན་ལག་ཐམས་ཅད་དུས་གཅིག་ཏུ་རྫོགས་པ་འོད་ཀྱིས་སྟོང་
གསུམ་འཇིག་རྟེན་ཁྱབ་ཅིང་གསལ་བར་སྣང་། བདེ་བ་ཆེན་པོ་དག་སྟོང་པ་གཉིས་སྟོང་ཉིད་སྙིང་རྗེ་དབྱེར་མེད་དུ་གནས་སོ། །དེས་ནི་དབང་ཕྱུག་བརྒྱད་ལ་སོགས་པའི་ཕུན་སུམ་ཚོགས་པའི་འབྱུང་གནས་ཀྱི་ཡེ་ཤེས་ཆེན་པོ་འགྲུབ་པར་འགྱུར་
རོ།། །།སརྦ་མངྒལཾ།། །།
6-11-1a


༄༅། །འདུས་པའི་དཀའ་གནད་ཀྱི་ཟིན་བྲིས་བཞུགས། །
6-11-1b


༄༅༅། །དཔལ་རྡོ་རྗེ་སེམས་དཔའ་ལ་ཕྱག་འཆལ་ལོ། །འཕགས་པའི་གཏམ་ལས་དཔལ་ལྡན་འདུས་པའི་དོན། །རྒྱལ་བས་རྒྱས་བཏབ་བར་མ་གྱུར་ན། །རྡོ་རྗེ་ཐེག་པའི་གནད་
དོན་རྙེད་མི་འགྱུར། །དེ་ཕྱིར་ཀླུ་སྒྲུབ་གདམས་པ་གཅེས་པར་བཟུང་། །འདི་ལ་ཆེས་དཀའི་གནས་ནི་གཉིས་སུ་མཐོང་། །ལམ་འདིའི་ཐུན་མོང་མིན་པའི་ཐོབ་བྱ་དང་། །ལམ་དེ་ཕྱག་རྒྱ་ལ་ནི་བལྟོས་པའོ། །ཇི་
སྲིད་དང་པོ་ངེས་པར་མ་གྱུར་པ། །དེ་སྲིད་དུ་ནི་ལམ་བཟང་རྟོག་མི་འགྱུར། །གང་ཚེ་དང་པོ་ཚུལ་བཞིན་ངེས་གྱུར་ན། །དེ་ཚེ་ལམ་དེ་བདེ་བླག་རྟོགས་པར་འགྱུར། །དེ་ནས་རིམ་གཉིས་ལམ་དུ་འཇུག་པ་ལ། །
ཐུན་མོང་མིན་པའི་ངེས་པ་རྙེད་འགྱུར་ཞིང་། །དེ་ལ་རྡོ་རྗེའི་ཐེག་ལ་གུས་པ་དང་། དགའ་དང་སྤྲོ་བ་རྒྱ་ཆེན་སྐྱེས་པ་ཡིས། བླ་མེད་ཐེག་པའི་རིགས་ཀྱི་ནུས་པ་ནི། །ཡང་དང་ཡང་དུ་ཡོངས་སུ་རྒྱས་པར་
བྱེད། །དེ་ཕྱིར་བློ་ལྡན་ལམ་འདིར་གུས་པ་ཁྱེད། །རྩ་བ་བོར་ནས་ཡལ་ག་མ་འཚོལ་བར། །ཐུན་མོང་མིན་པའི་བསྒྲུབ་བྱ་གུས་པས་ཚོལ། །དེ་ཡང་ཀླུ་སྒྲུབ་ལུགས་ལས་གཞན་དུ་མིན། །ཕྱག་རྒྱ་
མཆོག་དང་ཀུན་ཏུ་འདུས་གྱུར་ཏེ། །རྡོ་རྗེ་པདྨ་སྦྱོར་བའི་སྙོམས་འཇུག་གིས། །བདེ་བ་ཆེན་པོའི་རང་བཞིན་མ་བཙལ་ན། །ལམ་བཟང་མྱུར་བའི་མཐར་ཐུག་གང་ལས་ཡིན། །དེ་ཕྱིར་སྟོང་པ་བཞི་ཡི་
6-11-2a


ཏིང་ངེ་འཛིན། །ཕྱག་རྒྱ་བཟང་མོའི་རྗེས་སུ་འགྲོ་ལྡོག་པར། །རྣམ་དག་རིགས་པས་བསྒྲུབ་པར་མ་ནུས་ན། །ཕོ་ཉའི་ལམ་ལ་དགའ་བ་དགའ་བ་ཙམ། །འདོད་ཡོན་ལམ་བྱེད་ལམ་
འདིའི་ཁྱད་ཆོས་ཏེ། །དེ་ཡི་གཙོ་བོ་རེག་བྱ་དེ་ཡི་ཡང་། ཕུལ་དུ་བྱུང་བ་ཆོས་འབྱུང་རེག་བྱ་སྟེ། །དེས་བསྐྱེད་བདེ་བ་ལམ་བྱེད་ལམ་གྱི་ཕུལ། །ཚུལ་དེ་ལམ་དུ་བྱེད་པའི་རྟེན་དང་དུས། །ཡུལ་གྱི་ཁྱད་པར་མཐའ་
དག་མ་ཚོགས་པར། །དབང་པོ་གཉིས་ཀྱི་བདེ་ལ་གཙོར་འཛིན་པ། །ཀྱེ་མ་ངན་འགྲོའི་མེ་ཆེན་བུད་ཤིང་ངོ་། །གང་ཞིག་ཐུན་མོང་ལམ་གྱིས་རྒྱུད་སྦྱངས་ཤིང་། །དབང་གི་ལེགས་སྨིན་སྡོམ་པ་ཡོངས་སུ་དག །དྲན་པ་
གཅིག་པའི་རྣལ་འབྱོར་མཐར་ཕྱིན་ཅིང་། །རྡོ་རྗེ་གསུམ་གྱི་ཏིང་འཛིན་རྙེད་པ་དེས། །སྒྱུ་མ་འོད་གསལ་བདེན་པ་གཉིས་ཀྱི་ལམ། །ཆོས་དང་གཟུགས་སྐུ་གཉིས་ནི་མཐོང་ཆོས་ལ། །མངོན་དུ་འགྱུར་བའི་ཉེ་རྒྱུར་འཇུག་པ་ན། །
ཕྱག་རྒྱ་བཟང་ལས་བདེ་ཆེན་མཚོན་པར་བྱ། །རྡོ་རྗེ་ཐེག་པའི་ཐོབ་པར་བྱ་བ་དང་། མྱུར་དུ་ཐོབ་པའི་ཉེ་རྒྱུ་ཕྱག་རྒྱའི་གནད། །གང་ཞིག་ངེས་ན་རྒྱུད་ཀྱི་སྙིང་པོའི་དོན། །མཐའ་དག་ངེས་པའི་དཀའ་གནས་འདིར་གཟུང་ངོ་། །རྣལ་འབྱོར་
བླ་ན་མེད་པའི་ཐུན་མོང་མིན་པའི་གནད་ཐམས་ཅད་ངེས་པའི་རྒྱུ། ཐུན་མོང་མིན་པའི་འབྲས་བུ་ངེས་པར་བྱ་བ་དང་། དེར་བགྲོད་པ་ཕྱག་རྒྱ་དང་འདུས་པ་ལ་ལྟོས་པའི་རྒྱུ་མཚན་ངེས་པར་བྱ་དགོས་སོ། །ཞེས་དཀའ་བའི་གནས་བསྟན་
6-11-2b


པའོ། །རྗེ་རིན་པོ་ཆེ་ཉིད་ཀྱི་དགའ་ལྡན་དུ་བར་སྐབས་སུ་གསུངས་པའོ།། །།མངྒ་ལཾ།། །།
6-12-1a


༄༅། །རྒྱལ་བས་བྱིན་དང་ཤཱནྟི་པའི་གསང་འདུས་ཀྱི་འགྲེལ་པ་དང་འདུལ་བ་བྱིན་གྱི་སྒྱུ་འཕྲུལ་དཀྱིལ་ཆོག་གི་ཟིན་བྲི་བཞུགས་སོ།། །།
6-12-1b


༄༅༅། །རྒྱལ་བས་བྱིན་གྱིས་མཛད་པའི་གསང་འདུས་ལེའུ་དང་པོའི་འགྲེལ་པར། དེའི་ཕྱིར་ཐམས་ཅད་དུ་བྱང་ཆུབ་དོན་དུ་གཉེར་བར་འདོད་པ་རྣམས་ཀྱིས། ཐབས་དང་ཤེས་རབ་ཀྱི་བདག་ཉིད་བདེ་བ་
ཆེན་པོའི་ངོ་བོ་བསྐྱེད་པ་དེས་བཅོམ་ལྡན་འདས་ཀྱི་བདག་ཉིད་རྡོ་རྗེ་འཛིན་པའི་ངོ་བོར་འགྱུར་རོ། །དེ་སྐད་དུའང་བཅོ་བརྒྱད་པ་ལས། དཔལ་ལྡན་སངས་རྒྱས་ཀུན་གྱི་བདག །རྡོ་རྗེ་འཆང་བ་ཆེན་པོའི་གནས། །སངས་རྒྱས་ཀུན་གྱི་
ཐབས་བྱུང་བ། །དེ་ནི་ཆོས་རྣམས་ཆོས་ཉིད་དོ། །ཞེས་གསུངས་སོ། །རྡོ་རྗེ་རྩེ་མོ་ལས་ཀྱང་། གང་ཞིག་སངས་རྒྱས་ཡེ་ཤེས་ཀུན། །བྱང་ཆུབ་སེམས་ཀྱིས་བསྟན་པ་གང་། །དེ་འདིར་རྡོ་རྗེ་འཛིན་རྒྱལ་པོ། །དེ་བཞིན་ཉིད་ཀྱང་
མི་འགྱུར་བ། །ཞེས་གསུངས་སོ། དེའི་ཕྱིར་ཕ་རོལ་ཏུ་པ་ཕྱིན་ཚུལ་གྱིས་ཀྱང་། །བརྒྱུད་ནས་བྱང་ཆུབ་སྒྲུབ་པར་བྱེད་པ་རྡོ་རྗེ་འཛིན་པའི་ངོ་བོའི་སྒྲུབ་ཐབས་འདིར་འཇུག་པར་ཤེས་པར་བྱའོ། །བྱ་བ་དང་སྤྱོད་པའི་རྒྱུད་ལས་
ཀྱང་། བདེ་བ་བསྒྲུབ་པར་བྱ་བ་ཡིན། དེ་ལ་རིག་པ་འཛིན་པ་ལ་སོགས་པའི་དངོས་གྲུབ་བསྒྲུབ་པ་པ་ཉེ་བར་བསྟན་པའི་ཕྱིར་རོ། །འོ་ན་ཀྱང་དེ་ནི་སྒྲོ་བཏགས་པ་ལས་བྱུང་བ་ཡིན་པའི་ཕྱིར། དུས་རིང་པོར་གནས་པ་མ་
ཡིན་ནོ། །འདི་ལྟར་ཕྱི་རོལ་ཏུ་མངོན་པར་ཞེན་པས་བསླད་པའི་ཡིད་ཀྱིས་སྐུ་ལ་སོགས་པའི་ལྷའི་སྟོབས་ཀྱིས་དངོས་གྲུབ་རྫོགས་ནས་བདེ་བར་འགྱུར་རོ། །རྣལ་འབྱོར་གྱི་རྒྱུད་ལས་ཀྱང་ཁྱད་པར་ཡིད་འདི་ཡིན་ཏེ།
6-12-2a


དེའི་རྣལ་འབྱོར་པ་རྣམས་རང་གི་ལྷའི་རྣལ་འབྱོར་སྔོན་དུ་སོང་བའི་བྲིས་སྐུ་ལ་སོགས་པ་ལ་དམིགས་ནས། འདྲི་བའི་དངོས་གྲུབ་སྒྲུབ་པར་བྱེད་དོ། །དེ་སྐད་དུའང་། དཔལ་མཆོག་དང་པོ་ལས། 
རས་ལ་བཅོམ་ལྡན་འདས་ཕྱག་ན་རྡོ་རྗེ་སྙེམས་པའི་ཚུལ་དུ་སྦྲིས་ཏེ། དེའི་མདུན་དུ་ཕྱག་རྒྱ་ཆེན་པོ་ལ་གནས་ནས། འབུམ་བཟླས་ཏེ་ཟླ་བ་ཉ་ལ་འབུམ་གྱིས་རྡོ་རྗེ་སེམས་དཔའ་ཉིད་འཐོབ་པར་འགྱུར་རོ། །ཞེས་བྱ་བ་ལ་སོགས་
པ་གསུངས་སོ། །རྣལ་འབྱོར་བླ་མར་ཡང་དམ་པའི་བདེ་བ་བསྒྲུབ་པར་བྱ་བར་འདོད་དོ། །འོན་ཀྱང་འདིར་དེའི་གཙོ་བོ་དངོས་སུ་མ་བཤད་དོ། །དཔལ་གསང་བ་འདུས་པ་འདིར་ནི་སྒྲུབ་པར་བྱེད་ནུས་པ་ཐབས་དང་ཤེས་རབ་གཉིས་
སུ་མེད་པའི་རྣལ་འབྱོར་གྱི་མན་ངག་ལས། མཆོག་གི་སྐྱེས་བུའི་དོན་ལ་མཁོ་བ་ཟག་པ་མེད་པའི་རང་བཞིན་རྡོ་རྗེ་འཛིན་པ་ཆེན་པོ་ཉིད་རྫོགས་པའི་ཕྱིར། ཐུན་མོང་མ་ཡིན་པའི་རྒྱུའི་གཙོ་བོ་ཉེ་བར་བསྟན་པ་འདི་ནི་བླ་ན་མེད་
པའོ། །ཇི་ལྟར་རྗེས་སུ་བསྒྲུབ་པར་ནུས་པར་འགྱུར་ཞེ་ན། བརྗོད་པར་བྱ་སྟེ་རང་གི་ཡུལ་ལ་ཉེ་བར་ལོངས་སྤྱོད་པ་ལེགས་པར་གོམས་པ་དང་། ཇི་ལྟར་འདོད་པ་བཞིན་དུ་སྤྱོད་པ་རྣམས་ལ་ནི་འདིར་མ་བཀག་སྟེ། སྔགས་
ལ་སོགས་པས་ལེགས་པར་སྦྱངས་པའི་དུག་ལ་ཉེ་བར་ལོངས་སྤྱོད་པ་བཞིན་ཕན་པའི་འབྲས་བུ་སྐྱེད་པར་བྱེད་པའི་ཕྱིར་རོ། །དེ་སྐད་དུའང་བདུན་པ་ལས། དཀའ་ཐུབ་སྡོམ་པ་མི་བཟང་པས། །བསྟེན་ཀྱང་འགྲུབ་པར་
6-12-2b


མི་འགྱུར་ཏེ། །འདོད་པའི་ལོངས་སྤྱོད་ཐམས་ཅད་ལ། །བརྟེན་ན་མྱུར་དུ་འགྲུབ་པར་འགྱུར། །ཞེས་གསུངས་སོ། །སྙིམ་པའི་མེ་ཏོག་གི་ལེའུ་དགུ་པ་ལས། དོན་དམ་པའང་རྣམ་པ་གསུམ་སྟེ། དེ་བཞིན་ཉིད་ནི་དོན་དམ་པའོ། །སྒྲུབ་པ་དོན་དམ་པ་ནི་ཡང་
དག་པའི་ཡེ་ཤེས་སོ། །ཐོབ་པར་བྱ་བ་དོན་དམ་པ་ནི་མྱ་ངན་ལས་འདས་པ་སྟེ། ཇི་སྐད་དུ་དབུས་དང་མཐའ་རྣམ་པར་འབྱེད་པ་ལས། བརྟག་པ་དང་ནི་ཤེས་པ་དང་། །དེ་བཞིན་བརྗོད་པ་རགས་པ་ཡིན། །ཞེས་བྱ་བ་དང་། དོན་དང་ཐོབ་དང་སྒྲུབ་པ་དང་། །
དོན་དམ་རྣམ་པ་གསུམ་དུ་འདོད། །ཅེས་བཤད་པ་ལྟ་བུའོ། །དེ་ལ་རྡོ་རྗེའི་དམ་ཚིག་འདི་དང་། དེ་ལས་གཞན་པའི་སྔགས་ཐམས་ཅད་ནི་བརྗོད་པའི་ཀུན་རྫོབ་ཡིན་ཏེ་ཡང་དག་པ་ལ་སོ་སོར་པའི་བདག་ཉིད་ཅན་ཉིད་ཡིན་པའི་ཕྱིར་རོ། །ཡང་དག་
པ་ལ་སོ་སོར་རྟོག་པའང་རྣམ་པར་རྟོག་པ་མ་ཡིན་ཞིང་། རྣམ་པར་མི་རྟོག་པའང་མ་ཡིན་ནོ། །ཅིའི་ཕྱིར་རྣམ་པར་རྟོག་པ་མ་ཡིན་ཞེ་ན། རྣམ་པར་མི་རྟོག་པ་སྐྱེ་བ་དང་རྗེས་སུ་མཐུན་པ་ཉིད་ཀྱི་ཕྱིར་རོ། །ཅིའི་ཕྱིར་རྣམ་པར་མི་རྟོག་པ་མ་ཡིན་ཞེ་ན། །
ཡང་དག་པའི་དོན་ལ་རྣམ་པར་རྟོག་པའི་ཕྱིར་རོ། །རྣམ་པར་མི་རྟོག་པ་ཉིད་ལས་ཀྱང་རྣམ་པར་མི་རྟོག་པ་སྐྱེ་བ་མ་ཡིན་ཏེ། བྱིས་པ་རྣམས་ལ་དེ་མེད་པའི་ཕྱིར་རོ། །ཐ་མལ་བའི་རྣམ་པར་རྟོག་པ་ལས་ཀྱང་སྐྱེ་བ་མ་ཡིན་ཏེ། དེ་ནི་དེའི་གཉེན་པོ་
ཉིད་ཡིན་པའི་ཕྱིར་རོ། །འོན་ཀྱང་ཡང་དག་པའི་དོན་ཉིད་ལ་མཉམ་པར་འཇོག་པའི་ཡིད་ཀྱིས་སོ་སོར་རྟོག་པ་རྣམས་དེ་སྒོམ་པའི་རྗེས་སུ་འགྲོ་བས་འབད་རྩོལ་མེད་པར་ཆོས་ཀྱི་དབྱིངས་སྤྲོས་པ་མེད་པ་ལ་སེམས་མཉམ་པར་བཞག་པར་འགྱུར་
6-12-3a


རོ། །སྤྲོས་པ་མེད་པ་དེ་ལ་རྣམ་པར་མི་རྟོག་པའི་ཡེ་ཤེས་ཞེས་བྱའོ། །དེ་སྐད་དུའང་རྣམ་པར་མི་རྟོག་པར་འཇུག་པའི་གཟུངས་ལས། དེའང་ཡང་དག་པར་སྦྱོར་བ་དེ་དང་བསྟེན་པས་རྗེས་སུ་འགྲོའོ། །བསྒོམ་པས་རྗེས་སུ་འགྲོའོ། །མང་
དུ་བྱས་པས་རྗེས་སུ་འགྲོའོ། །ཡང་དག་པའི་ཡིད་ལ་བྱེད་པས་རྗེས་སུ་འགྲོ་བས་ན་མངོན་པར་འདུ་བྱེད་པ་མེད་ཅིང་ལྷུན་གྱིས་གྲུབ་པས་རྣམ་པར་མི་རྟོག་པའི་དབྱིངས་ལ་རེག་སྟེ་ཞེས་གསུངས་པ་དང་། ཚད་མ་རྣམ་པར་ངེས་པ་ལས་ཀྱང་། བསམ་པའི་རང་བཞིན་
ཅན་ཉིད་ཀྱི་ཤེས་རབ་ལ་གོམས་པར་བྱས་ན་དོན་དམ་པའི་ཡེ་ཤེས་འཁྲུལ་པས་དབེན་པ། དྲི་མ་མེད་པ། འཇིག་པ་མེད་པ་མངོན་སུམ་དུ་བྱེད་པར་འགྱུར་རོ་ཞེས་བཤད་དོ། །དེ་བས་ན་བཅོམ་ལྡན་འདས་ཀྱིས་གསུངས་པའི་ཡང་དག་པ་ལ་སོ་སོར་རྟོག་པ་
ཉིད་ཀྱིས་རྣམ་པར་མི་རྟོག་པ་བྱང་ཆུབ་རྟོགས་པར་འདོད་པ་རྣམས་ཀྱིས་བསྟེན་པར་བྱའོ་ཞེས་བྱ་བ་ན་གྲུབ་པའི་མཐའ་ཡིན་ནོ། །ཞེས་སོ། །ལེའུ་བཅོ་བརྒྱད་པ་ལས། གཉིས་ནི་རྣལ་འབྱོར་རྣམ་པ་གཉིས་སོ། །དེ་ལྟར་རང་གི་ལྷ་ལ་སོགས་པ་ཡོངས་སུ་གྱུར་པ་
ལས། ཉིན་རེ་བཞིན་ཡོངས་སུ་བསྐྱེད་པ་ནི་བསྐྱེད་པ་སྟེ། དེ་ལ་གནས་པ་ན་བསྐྱེད་པའོ། །རྫོགས་པ་ནི་ཀུན་ཏུ་སྤྱོད་པ་སྟེ། ཐབས་གསུམ་གྱིས་འབྲས་བུ་རྟོག་ནས། ཐབས་གོང་མ་བཞི་པའི་སྒོམ་པ་བརྟན་པོར་གྱུར་པས་དངོས་པོ་ཐམས་ཅད་ལ་ཅི་རིགས་
པར་སྐྱེས་ཤིང་རྫོགས་པར་སྐད་ཅིག་རེ་རེ་ཞིང་མཐོང་བར་འགྱུར་བ་ཀུན་ཏུ་སྤྱོད་པའི་དོན་ནི་རྫོགས་པའོ། །རྫོགས་པ་དེ་ཉིད་ལས་དང་པོ་བས་ཀྱང་། །ལྷག་པར་མོས་པས་དམིགས་པ་ནི་རྫོགས་པའི་རིམ་པའོ། །དེ་ལྟར་རིམ་པ་གཉིས་ལ་བརྟེན་ནས་བཤད་
6-12-3b


པ་ཡིན་གྱི། རིམ་པ་གཅིག་གིས་ནི་མ་ཡིན་ནོ་ཞེས་སོ། །ཡང་ལེའུ་བཅོ་བརྒྱད་པ་ལས། ཉེ་བར་བསྒྲུབ་པས་ནི་རྣམ་པར་མི་རྟོག་པའི་དབྱིངས་སུ་འཇུག་གོ། །སྒྲུབ་པས་ནི་དེ་ཉིད་རྣམ་པར་དག་པའི་མཐར་ཐུག་པའི་བྱང་ཆུབ་སེམས་དཔར་རོ། །སྒྲུབ་པ་ཆེན་པོས་
ནི་དེ་བཞིན་གཤེགས་པར་རོ། །དེ་སྐད་དུའང་། དེ་ལྟར་བྱེ་བྲག་རྟོགས་བྱས་ནས། །དངོས་གྲུབ་མཆོག་ནི་བསྒྲུབ་པར་བྱ། །གཞན་དུ་བསྐལ་པ་སྟོང་དུ་ནི། །སངས་རྒྱས་སྐྱོབ་པ་རྣམས་ཀྱིས་ཀྱང་། །དངོས་གྲུབ་མཆོག་ནི་ཞི་བ་དག །འགྲུབ་པ་འབྱུང་བར་མི་འགྱུར་རོ། །
ཞེས་གསུངས་སོ། །དེ་བས་ན་བསྙེན་པ་ལ་སོགས་པའི་ཐབས་མ་ལུས་པས་རིམ་གྱིས་བྱང་ཆུབ་ཐོབ་པར་འགྱུར་རོ་ཞེས་བྱ་བ་འདི་ནི་གནས་པ་ཡིན་ནོ། །རྣལ་འབྱོར་རྡོ་རྗེ་ཅན་ཀུན་གྱི། །བཀའ་ནི་ཇི་ལྟར་བསྒོ་བ་བགྱི། །ཞེས་ཞུས་པའི་རིམ་པའི་དོན་དང་། ཁ་བསྐང་
བའི་དོན་དེའི་ལན་ནི། ལས་དང་ཞེས་བྱ་བ་ལ་སོགས་པ་གསུངས་པ་ལ། དྲག་ཤུལ་གྱི་ལས་དང་རྗེས་སུ་མཐུན་པ་གང་གིས་སྦྱོར་བའི་ལེའུ་བཅུ་གསུམ་པ་ལས་གསུངས་ཏེ། ཞེས་དང་། གལ་ཏེ་འདི་ལྟར་རེ་ཞིག་སངས་རྒྱས་ཉིད་སྒྲུབ་པ་ཆེན་པོ་ཉིད་ཀྱིས་ཐོབ་
པར་འགྱུར་ན། དེ་ཉིད་ཀྱིས་ཆོག་མོད་གཞན་གསུམ་པོས་ཅི་ཞིག་བྱ་ཞེ་ན། བྱང་ཆུབ་སེམས་དཔའ་རྣམས་སངས་རྒྱས་ཀྱི་ས་ལ་འཇུག་པའི་ཆེད་ཀྱི་སྦྱོར་བ་གང་ཡིན་པ་དེ་ཉིད་ཀྱིས་ཆོག་ན། མོས་པས་སྤྱོད་པའི་ས་ལ་སོགས་པས་བཅུར་གཏོགས་པའི་
སྦྱོར་བ་གཞན་གྱིས་ཅི་ཞིག་བྱ་ཞེས་ཅིའི་ཕྱིར་མི་འདོད། ཡང་ན་ས་སྔ་མར་གཏོགས་པའི་སྦྱོར་བ་མེད་པར་སྦྱོར་བ་ཕྱི་མ་ཕྱི་མར་བྱེད་པར་ནུས་པ་མ་ཡིན་ཏེ། རིམ་པ་ནི་ངེས་པའི་ཕྱིར་རོ། །བྱེད་པ་འདི་གང་ཡིན་པ་དེ་ཉིད་ནི་མ་ཡིན་ནོ། །འོ་ན་ཅི་ཞིག་ཡིན་
6-12-4a


ཞེ་ན། དེའི་གཟུགས་བརྙན་ཙམ་ཡིན་ཏེ། དེའི་གཟུགས་བརྙན་ནི་དེའི་བྱ་བ་བྱེད་པ་མ་ཡིན་ནོ། །དེ་བས་དེ་རྣམས་འབྲས་བུ་མེད་པ་མ་ཡིན་ནོ་སྙམ་ན། དེ་བཞིན་དུ་བསྙེན་པ་ལ་སོགས་པ་ལའང་སྔ་མ་སྔ་མ་མེད་པར་ཉེ་བར་སྒྲུབ་པ་
ལ་སོགས་པ་མི་བྱེད་པ་གང་ཡིན་པ་ནི་གཟུགས་བརྙན་ཙམ་ཡིན་གྱི་དེ་ཉིད་ནི་མ་ཡིན་པ་དེ་ལྟར་ན། དེ་ལས་འབྲས་བུ་འགྲུབ་པ་མ་ཡིན་ནོ། །དེ་བས་ན་གཅིག་ཀྱང་དོན་བྱེད་པ་མ་ཡིན་ནོ། །འོ་ན་ཇི་ལྟར་ན་སྒྲུབ་པ་ཆེན་པོ་ལས་སངས་རྒྱས་ཉིད་དུ་འགྱུར་རོ་ཞེས་
བརྗོད་ཅེ་ན། གསུམ་པོ་དག་ལས་རིམ་གྱིས་རྟོགས་པའི་ས་ལ་གནས་པ་དེས་མཐར་ཐུག་པ་ཐོབ་པར་བྱེད་པའི་ཕྱིར་རོ། ཡིད་ཀྱིས་ཆོས་གང་དག་གོམས་པས་བོགས་ཕྱིན་པར་གྱུར་པ་དེ་དག་ཤིན་ཏུ་གོམས་པར་བྱས་པ་ན། རབ་ཀྱི་མཐར་ཐུག་པ་ཐོབ་པར་
འགྱུར་པ་སྲིད་དེ། བྲམ་ཟེ་གཙང་མར་སྤྱོད་པ་རྣམས་ཐོད་པ་ཅན་ལ་དགའ་བ་བཞིན་ནོ། །བདག་ཅག་ལྟ་བུའི་སྙིང་རྗེ་དང་ཤེས་རབ་ལ་སོགས་པའང་དེ་ལྟ་བུར་གྱུར་པའོ་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །དེ་བས་ན་འདི་ནི་རང་གི་རྒྱུད་དང་རིགས་
མཐུན་པ་རྣམས་ལ་སྙིང་རྗེ་ལ་སོགས་པ་རབ་ཀྱི་མཐར་ཐུག་པ་སྲིད་པར་རྗེས་སུ་དཔོག་པ་ཡིན་ཏེ། དེ་ཉིད་ཀྱིས་དེ་རྣམས་སངས་རྒྱས་ཀྱི་ཆོས་རྣམས་དང་བྱང་ཆུབ་ཏུ་འགྱུར་བ་སྲིད་པའང་རྗེས་སུ་དཔག་གོ། །འགྱུར་བ་དེའང་ཉན་ཐོས་དང་། ཕ་རོལ་ཏུ་ཕྱིན་པའི་
སྡུག་བསྔལ་དང་། དཀའ་ཐུབ་ཀྱི་རྣམ་པ་ཐམས་ཅད་ཀྱི་ཕ་རོལ་ཏུ་ཕྱིན་པ་རྣམས་གོམས་པར་བྱས། བསྐལ་པ་གྲངས་མེད་པ་གསུམ་དུ་བསྒྲུབས་པས་སོ། །རྣལ་འབྱོར་གྱི་རྒྱུད་ཀྱིས་ནི་སྔགས་དང་ཕྱག་རྒྱ་ལ་སོགས་པའི་ཐབས་དཔག་ཏུ་མེད་པས།
6-12-4b


སྔགས་ཀྱི་ལྷ་རྣམས་ཀྱིས་བྱིན་གྱིས་བརླབ་བདེ་བ་དང་། བདེ་བར་སྤྱོད་པས་རིང་པོ་མི་ཐོགས་པར་ཚེ་འདི་ཉིད་ལ་རབ་ཏུ་དགའ་བའི་ས་ཐོབ་ནས་ཚེ་བཅུ་དྲུག་གིས་འཚང་རྒྱ་བར་འགྱུར་བ་ཉིད་དོ། །གསང་བ་འདུས་པ་ནི་རྒྱུད་རྣམས་ཀྱི་བླ་མའི་བླ་མ་སྟེ། ཚེ་འདི་ཉིད་ལ་
བྱང་ཆུབ་ཐོབ་པར་འགྱུར་བའི་ཐབས་ཀྱི་ཕུལ་དུ་ཕྱིན་པ་ཡིན་པར་གསུངས་ཏེ། འདི་ལྟར་འདིར་སྔགས་ཀྱི་ལྷ་ཐམས་ཅད་ཀྱིས་བྱིན་གྱིས་བརླབ་པར་འགྱུར་བའི་རྒྱུར་ཡན་ལག་དྲུག་གི་ཏིང་ངེ་འཛིན་དབང་དུ་བྱེད་དོ། །ཞེས་སོ། །སྒྱུ་འཕྲུལ་ཆེན་མོའི་དཀྱིལ་ཆོག་
འདུལ་བ་བྱིན་གྱིས་མཛད་པ་ལས། རྡོ་རྗེ་འཆང་གི་རྣམ་པའི་སེམས་འདི་འདྲ་བ་གཟུང་བ་དང་། འཛིན་པའི་རྣམ་པ་དང་བྲལ་བའི་ལུས་དང་ངག་གི་རང་བཞིན་གྱིས་ལས་གང་ཅིའང་རུང་བ་དེ་དག་ནི། ཕྱག་རྒྱ་དང་སྔགས་ཀྱི་རྣམ་པ་ཡིན་ནོ། །ཞེས་དེ་བཞིན་གཤེགས་
པ་རྣམས་ཀྱི་གསུངས་སོ། །གཟུང་བ་ལ་སོགས་པའི་རྣམ་པ་དང་བྲལ་བ་ཉིད་ཀྱང་། དེའི་དུས་ན་དེ་ལ་སྣང་བ་མེད་པའི་ཕྱིར་རོ། །འདི་ལྟར་གང་སྣང་བ་དེ་ཁོ་ན་ཡང་དག་པའི་ཐ་སྙད་ཀྱི་ལམ་ལ་འཇུག་པ་ཡིན་ནོ། །ཇི་ལྟར་སེམས་ཡོངས་སུ་གསལ་བའི་ངོ་བོ་བདེ་བར་
མྱོང་བ་དེའི་དུས་ན་སྡུག་བསྔལ་ནི་མ་ཡིན་ལ། རྣམ་པར་རིག་བྱེད་ཀྱང་ཐམས་ཅད་དུ་སྣང་བ་ཡིན་ནོ། །འདི་ལྟར་ཡང་བེམ་པོ་རང་གསལ་བ་ཉིད་ཡིན་ན། བེམ་པོ་ཉིད་དུ་མི་རིགས་པའི་ཕྱིར་རོ། །ལོག་པ་ཡིན་ནའང་གསལ་བ་མི་དམིགས་པའི་ཕྱིར་ཏེ། དེའི་དུས་
ན་རང་གསལ་བ་བཞིན་མགོན་པོའི་རྣམ་པ་བདེ་བ་ཆེན་པོའི་ངོ་བོ་དེ། རྣལ་འབྱོར་མ་ལ་སོགས་པའི་གཟུགས་སུ་སྣང་བ་མ་གཏོགས་པ་གསལ་བའི་ངོ་བོ་གཞན་སྣང་བ་ནི་མེད་གལ་ཏེ་ཀ་བའི་གསལ་བ་བཞིན་དུ་རྣལ་འབྱོར་མ་རྣམས་ཀྱི་སྣང་བའང་ཡིན་ནོ་ཞེ་
6-12-5a


ན། འདི་ནི་ཐ་དད་པ་མེད་ཀྱང་མཐོང་སྟེ་ནམ་མཁའི་རང་བཞིན་ལྟ་བུའོ། །གཞན་ཡ་དུས་མཉམ་པ་ནའང་ཅིག་ཅར་དམིགས་པའི་ཕྱིར། གཡས་གཡོན་གྱི་རྭ་ལྟ་བུ་ཡིན་ན་ཅི་གང་གི་གཟུང་བའི་འཛིན་པ་ཡིན། དུས་ཐ་དད་པ་
ནའང་གཅིག་སྣང་བཞིན་པ་ན་གཞན་མི་དམིགས་པའི་ཕྱིར་ནའང་གཟུང་བ་དང་འཛིན་པའི་དངོས་པོ་མེད་དོ། །མགུ་བ་དང་ཡིད་སད་པ་ལ་སོགས་པ་ནང་གི་རྣམ་པ་ཡིན་ལ་བདེ་བ་ལ་སོགས་པའི་ངོ་བོ་དང་སྔོན་པོ་ལ་སོགས་པ་ནི་ཕྱི་རོལ་གྱི་གཟུང་བ་ཡིན་
ནོ། །ཞེས་སོ། །བརྗོད་པར་བྱ་བ་ནི་མ་ཡིན་ཏེ། མངོན་སུམ་གྱིས་ཕྱི་རོལ་དང་དང་ནང་གི་ཡིན་ནོ། །ཞེས་བྱ་བར་ནི་མི་ནུས་ཏེ། མངོན་སུམ་ནི་རྣམ་པར་རྟོག་པ་མེད་པའི་ཕྱིར་རོ། །དེའི་རྗེས་ལས་ཐོབ་པའི་རྣམ་པར་རྟོག་པའི་ཡུལ་དངོས་པོ་མེད་པ་ཡིན་པའི་
ཕྱིར་རོ། །རྗེས་སུ་དཔག་པ་ལའང་ཁྱབ་པ་མ་གྲུབ་བོ། །དེ་བས་ན་ལྔའི་བདག་ཉིད་ཀྱི་དཀྱིལ་འཁོར་ལོའི་ཡེ་ཤེས་དེ་ནི་གཅིག་ཉིད་དང་དུ་མ་ཉིད་དང་། ཐ་དད་པ་དང་། ཐ་མི་དད་པ་དང་། དངོས་པོ་དང་། དངོས་པོ་མེད་པ་ལ་སོགས་པའི་ཀུན་ཏུ་
རྟོག་པ་མ་ལུས་པས་སྟོངས་པའི་ཕྱིར། རྣམ་པར་རྟོག་པ་མེད་པ་གཟུང་བ་ལ་སོགས་པའི་རྣམ་པ་དང་བྲལ་བ་གསང་བའི་ངོ་བོ་ཡིན་ནོ། །བདེ་བའི་བདག་ཉིད་ཀྱི་རྒྱུ་ལས་སྐྱེས་པའི་ཕྱིར་བདེ་བའི་རང་བཞིན་གཉིས་མེད་པར་སྣང་བ་ཉམས་སུ་མྱོང་བཞིན་པ་
བདག་དང་བདག་གིར་འཛིན་པའི་མཚན་ཉིད་འཁོར་བ་དང་འགལ་བ་ཡོངས་སུ་ཉམས་པ་མེད་པའི་ཆོས་ཡིན་ཏེ། འཚེ་བ་མེད་པ་ཡང་དག་པའི་དོན་གྱི་རང་བཞིན་ཡིན་པའི་ཕྱིར། བློ་དེའི་ཕྱོགས་སུ་འཛིན་པས་ན་མངོན་སུམ་དུ་བྱ་བ་ཡིན་ནོ། །འགལ་
6-12-5b


བའང་གང་དང་ལྷན་ཅིག་ཙམ་ཡང་དམིགས་པ་དེ་ནི་ཤིན་ཏུ་གོམས་པའི་དབང་གི་གཉེན་པོས་རང་གི་མི་མཐུན་པ་རྩད་ནས་འབྱིན་པ་ཁོ་ན་ཡིན་ནོ། །གང་ཡང་ཤིན་ཏུ་གོམས་པ་དེ་བསྒོམས་པའི་སྟོབས་ཀྱིས་གསལ་བར་ཉེ་བར་འགྲོ་སྟེ། འདོད་པ་དང་མྱ་ངན་ལ་སོགས་
པར་ཁྱབ་པ་གྲུབ་ཅིང་རང་བཞིན་གྱི་མི་མཐུན་ཕྱོགས་པ་ཐ་མལ་པའི་ང་རྒྱལ་དང་། ཐ་མལ་པའི་རྣམ་པར་རྟོག་པ་དག་རྩད་ནས་གདོན་པར་གྲུབ་པ་ཡིན་ནོ། །རྣམ་པ་མེད་པའི་ཤེས་པ་ནི་རྨི་ལམ་དུའང་ཉམས་སུ་མྱོང་བ་མ་གྲུབ་པའི་ཕྱིར། འགའི་ཡང་གཉེན་པོ་ཉིད་མ་
ཡིན་ནོ། ཕ་རོལ་ཏུ་ཕྱིན་པའི་ཚུལ་གྱིས་ལྟ་བ་ལའང་སྒྱུ་མ་ལྟ་བུ་བདག་མེད་པའི་ལྟ་བ་དང་ལྡན་ནའང་སྦྱིན་པ་ལ་སོགས་པ་ཐ་མལ་པའི་རྣམ་པར་རྟོག་པའི་གཉེན་པོ་ཡིན་མོད་ཀྱི། དེ་ལྟ་ནའང་ཐ་མལ་པའི་རྣམ་པར་མི་འགྱུར་ལ། ཐ་མལ་པའི་རྣམ་པར་རྟོག་པ་དང་
ཐ་མལ་པའི་རྣམ་པ་གཉིས་ཀ་ནི་སྤང་བར་བྱ་བ་ཡིན་ནོ། །གལ་ཏེ་སྦྱིན་པ་ལ་སོགས་པ་ལས་ལོངས་སྦྱོད་ཆེན་པོ་ལ་སོགས་པ་ཉིད་དང་། སྦྱིན་པ་ལ་སོགས་པའི་རྣམ་པར་སྨིན་པའི་འབྲས་བུ་ལས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་། དཔེ་བྱད་
བཟང་པོ་བརྒྱད་ཅུའི་བདག་ཉིད་ཀྱི་སྐུ་འགྲུབ་པར་འགྱུར་བ་ཡིན་ནོ་ཞེ་ན། དེ་དག་ནི་མངོན་སུམ་དང་རྗེས་སུ་དཔག་པ་དག་གི་ལས་དང་དེ་དག་གི་འབྲས་བུ་ཉེ་བར་ལོངས་སྤྱོད་པའི་མཚན་ཉིད་འདི་ཡིན་ནོ། །དེ་དག་གིས་ནི་སྐྱེས་བུ་ཆེན་པོའི་མཚན་འདི་དག་ཡིན་ནོ་
ཞེས་འགྲུབ་པ་མ་ཡིན་ནོ། །ཡང་སྒོམ་པའི་སྟོབས་ཀྱིས་ནི་དུས་མཉམ་པར་ཡོ་བྱད་ཕུན་སུམ་ཚོགས་པ་ཐམས་ཅད་ལ་དམིགས་པའི་མཚན་དང་དཔེ་བྱད་འབར་བའི་སྐུ་ལ་དམིགས་པ་དང་ཡང་དག་པར་རིག་པ་ཙམ་གྱིས་ངོ་བོ་དཀྱིལ་འཁོར་གྱི་འཁོར་
6-12-6a


ལོའི་རྣམ་པར་སེམས་གསལ་བར་སྣང་བ་ཉིད་ཉེ་བར་འགྲོ་བ་ཅན་ཅི་སྟེ་མི་འགྲུབ། དོན་འདི་ནི་བླ་མའི་ཞལ་སྔ་ནས་ཀྱང་གསུངས་ཏེ། གཟུགས་སྐུ་ཆོས་ཀྱི་སྐུ་ཡིན་སྒོམ་བྱེད་པ། །ཀྭ་ཡི་ངེས་པར་བྱང་ཆུབ་ཐོབ་པ་ཡིན། །ཆོས་
སྐུ་རྒྱལ་བའི་བསམ་གཏན་གྱིས་མཐོབ་ན། །གཟུགས་ཀྱི་སྐུ་ལ་ཅི་སྟེ་སྒོམ་མི་བྱེད། །གལ་ཏེ། གཟུགས་སྐུ་བསོད་ནམས་ཚོགས་ཀྱིས་འཐོབ་ན་ཡང་། །དེ་ནི་ཡུན་རིང་དུས་གཞན་དམན་པ་སྟེ། །འབྲས་བུའི་ཁྱད་པར་རྒྱུ་ཡི་ཁྱད་པར་ལས། །སྐུ་གསུམ་
དུས་མཉམ་པར་ནི་སྣང་བ་ཡིན། །ཞེས་སོ། །ཡང་ན་བདག་གི་གཟུགས་གང་དག་འཛིན་པར་ལྷག་པར་སྒྲོ་བཏགས་པ་ལ་སོགས་པའི་རྒྱུ་དེ་དག་ལས་སྦྱིན་པ་ལ་སོགས་པས་འབྱུང་བ་ནི་དེ་ཁོ་ན་ཉིད་དུ་བདག་མེད་པ་དག་ལན་པ་ཡིན་མོད་ཀྱི་དེ་ལྟ་ནའང་སྲིད་
པའི་སྡུག་བསྔལ་དང་ལྷན་ཅིག་འགལ་བ་མེད་དེ། གང་གི་ཕྱིར་འདིར་སྦྱིན་པ་ལ་སོགས་པ་ཡོད་ཀྱང་། །དེ་ཐ་མལ་པའི་རང་གི་ངོ་བོ་ལས་བྱུང་བ་སྲིད་པའི་སྡུག་བསྔལ་བཟློག་པར་མི་འགྱུར་རོ། །དགོངས་པ་ནི་འདི་ཡིན་ཏེ། རེ་ཞིག་སེམས་ཅན་དུ་ལྟ་བས་སྦྱིན་
པ་ལ་སོགས་པ་ནི་ཐ་མལ་པའི་རྣམ་པར་རྟོག་པ་སྲིད་པའི་སྡུག་བསྔལ་དང་འགལ་བར་མི་འགྱུར་ཏེ། །བདག་མེད་པའི་ལྟ་བ་དང་ལྡན་ཡང་སྦྱིན་པ་ལ་སོགས་པ་དང་དངོས་སུ་འགལ་བ་མེད་ལ། བདག་མེད་པའི་ལྟ་བ་ཁོ་ན་དང་ནི་དངོས་སུ་འགལ་བ་ཡིན་
ནོ། །དེ་ལྟར་ཡང་སངས་རྒྱས་ཡེ་ཤེས་ཀྱི་ཞལ་སྔ་ནས། ཐ་མལ་པ་ཡི་རང་གི་གཟུགས་ཀྱི་ནི། །བདག་མེད་ལྡན་ཡང་སྦྱིན་པ་ལ་སོགས་པས། །འགལ་བ་དག་ནི་ཡོད་མིན་གང་གི་ཕྱིར། །འདི་ནི་བདེན་ཡང་དེར་ནི་བཟློག་མི་འགྱུར། །ཞེས་གསུངས་སོ། །
6-12-6b


མཆོག་ཏུ་དགའ་བ་བདེ་བའི་རྒྱུར་ནི་མི་འགྱུར་ཏེ། བཏང་སྙོམས་ཀྱི་རང་བཞིན་ཡིན་པའི་ཕྱིར་རོ། །དཀའ་བ་བརྒྱ་ཕྲག་གིས་བསྟེན་ཅིང་འཁྲུག་པ་རྫོགས་པའི་བྱང་ཆུབ་ཀྱང་བསྐལ་པ་མི་ཉུང་བས་ཐོབ་པར་བྱ་བ་ཡིན་ཏེ། དེས་ན་ཕ་རོལ་ཏུ་ཕྱིན་པའི་ཚུལ་ནི་སྐྱེས་བུ་མཆོག་གི་
དོན་གྱི་ལམ་གྱི་རྒྱུ་ལེགས་པ་མ་ཡིན་ནོ། །དཀྱིལ་འཁོར་གྱི་འཁོར་ལོའི་རྣམ་པའི་སེམས་འདི་ནི་དངོས་པོ་ཁོ་ནར་འཁོར་བའི་སྡུག་བསྔལ་མ་ལུས་པ་དང་འགལ་བ་མཆོག་ཏུ་དགའ་བ་བདེ་བ་ཚོགས་མེད་ཅིང་བདེ་བའི་ཐབས་མྱུར་བས་ན་རྒྱུ་ཡིན་ཏེ། འདི་ཁོ་ན་ལམ་གྱི་
བདེ་བ་ཡིན་པར་རིགས་པའི་ཕྱིར་ན་རྟོག་པ་དང་ལྡན་པས་སྟོན་པར་བྱ་བ་ཡིན་ནོ། །གལ་ཏེ་འོ་ན་དེ་ལྟ་ན་ནི་སྦྱིན་པ་ལ་སོགས་པ་འབྲས་བུ་མེད་པ་ཉིད་ཡིན་ནོ་ཞེ་ན། དེ་ནི་དཀའ་བས་བསྟན་པར་བྱ་སྟེ། འགྲོ་བའི་དོན་བྱ་བ་ཁོ་ན་དགོངས་པའོ་འདི་ལྟར་ཡང་དང་པོ་ཁོ་ནར་འགྲོ་
བའི་སྡུག་བསྔལ་ཉེ་བར་ཞི་བར་བྱ་བའི་དོན་དུ། འགྲོ་བ་སྡུག་བསྔལ་བར་གྱུར་པ་ལ་ལྟ་བས་བྱང་ཆུབ་ཀྱི་སེམས་སྨོན་པ་དང་འཇུག་པའི་མིང་ཅན་རྣམ་པ་གཉིས་བསྐྱེད་པའི་སྙིང་རྗེ་ཁོ་ནས་རྒྱུ་མེད་པར་མཆོག་ཏུ་མཉེས་གཤིན་པ་དག་གིས་འཇུག་པ་ནི་རང་གི་དགོས་
པ་མ་ཡིན་ནོ། དེས་ཏིང་ངེ་འཛིན་གྱི་གནས་སྐབས་ན་སྤྲོ་བ་དང་བསྡུ་བའི་ཚུལ་གྱིས་བྱེད་ཅིང་ཏིང་ངེ་འཛིན་ལས་ལངས་པ་ན་ཆོས་དང་ཟང་ཟིང་ལ་སོགས་པ་དམིགས་པ་མེད་པའི་སྦྱོར་བ་བྱེད་པ་ལ་སོགས་པའི་གནས་སྐབས་ན་ཡིད་བཞིན་གྱི་ནོར་བུའི་ཚུལ་གྱིས་སྦྱིན་
པ་ལ་སོགས་པ་སེམས་ཅན་གྱི་དོན་བྱེད་པ་ནི་དགོས་པ་གཙོ་བོ་ཡིན་ཏེ། དེ་བཞིན་གཤེགས་པ་ཉིད་ནི་ཞར་ལ་འབྱུང་བ་ཡིན་ནོ། །ཇི་སྲིད་ཐ་དད་པར་ཞེན་པ་འཁོར་བར་ཞེན་པ་དེ་སྲིད་དུ་དགེ་བ་བཅུའི་ལས་ཀྱི་ལམ་དང་དེའི་ཅིག་ཤོག་སྤང་བ་དང་དཀྱིལ་འཁོར་ལ་
6-12-7a


སོགས་པ་བྱ་བ་དང་མཆོད་རྟེན་ལ་ཕྱག་བྱ་བ་དང་། མཆོད་རྟེན་གྱི་ལས་ལ་སོགས་པ་ལ་ངེས་པར་ནན་ཏན་དུ་བྱའོ། །གཞན་ཡང་རིགས་པ་དང་ལྡན་པའི་ཕྱིར་དང་སྐྱེས་བུའི་དོན་གཙོ་བོ་བསླུ་བ་མེད་པར་བཅོམ་ལྡན་འདས་ཀྱིས་གསུངས་པ་
དང་འབྲེལ་བའི་ཕྱིར་རོ། །དེ་བཞིན་དུ་རྒྱན་ལས་ཀྱང་། གལ་ཏེ་གཉིས་མེད་ལ་བརྟེན་ནས། །འཇིག་རྟེན་ཕ་རོལ་ཟློག་བྱེད་ན། །འདི་ལའང་གྱིས་ཤིག་མིན་ཞེ་ན། །འདི་ཞེས་བྱ་བ་ཉིད་གནས་སོ། །གལ་ཏེ་གཉིས་མེད་ཀྱིས་མགུ་ཀྱིས་མགུ་ཡོད། །ཐམས་ཅད་དུ་ནི་གྲོལ་བར་
འགྱུར། །ཐ་སྙད་དུ་ནི་འཇུག་ཅེ་ན། །འཇིག་རྟེན་ཕ་རོལ་ཀྱང་སོམས་ཤིག །ཅེས་གསུངས་སོ། །བླ་མའི་ཞལ་ལྔ་ནས་ཀྱང༌། ཇི་སྲིད་དུ་ནི་ཐ་སྙད་ཡོད། །སྡིག་པ་སྤང་ཞིང་བསོད་ཉམས་ཚོགས་བསག་གྱིས་ཞེས་གསུངས་སོ། །དེ་ནས་ཏིང་ངེ་འཛིན་དེ་ལས་
ལངས་ལ་རང་དང་གཞན་ཧེ་རུ་ཀའི་རྣམ་པ་ལྟ་བུར་སེམས་ཤིང་། གཡེལ་བ་མེད་པའི་ཡིད་ཀྱིས་བསོད་ནམས་མཉན་པ་དང་བཤད་པ་ལ་སོགས་པ་བྱའོ་ཞེས་སོ།། །།འདི་ཡང་རྗེ་ཉིད་ཀྱིས་ཟིན་བྲིས་སུ་གནང་བའོ།། སརྦ་མངྒལཾ།། །།
6-12-7b


empty page
6-13-1a


༄༅། །ཁྲོ་བཅུའི་ཟིན་བྲིས་བཞུགས་སོ། །
6-13-1b


༄༅༅། །ཁྲོ་བཅུ་བསྒོམ་དབུས་ཀྱི་ཧཱུཾ་མཛད་ཞུ་བ་ལས་ཆོས་འབྱུང་བསྒོམ་པར་གཉིས་མེད་རྡོ་རྗེས་བཤད། དཀྱིལ་ཆོག་ལས་རྡོ་རྗེ་སེམས་ལས་བྱུང་བར་བཤད་དོ། །བདུད་རྩི་འོད་དང་། མཚོ་སྐྱེས་ཀྱི་མངོན་
རྟོགས་དང་། འཁྲུལ་སྤང་དང་། ཡན་ལག་དྲུག་པ་ལས་གང་ལས་བསྐྱེད་པ་མ་བཤད་དོ། །ཆོས་འབྱུང་ནི་དཀར་པོར་བཤད། དེར་སྣ་ཚོགས་པདྨ་དང་། དེའི་ལྟེ་བར་སྣ་ཚོགས་རྡོ་རྗེའོ། །པདྨ་བསྒོམ་པ་སློབ་དཔོན་འདིའི་གཞུང་
རྣམས་སུ་མ་བྱུང་ཡང་། །ཡན་ལག་མེད་པའི་རྡོ་རྗེ་དང་། འཁྲུལ་སྤོང་དང་། གཉིས་མེད་རྡོ་རྗེའི་སྒྲུབ་ཐབས་ལས་འབྱུང་བ་ལྟར་བྱའོ། །སྣ་ཚོགས་རྡོ་རྗེའི་ལྟེ་བར་འབྱུང་བ་བསྒོམ་པ་ལ། ས་ནས་རིམ་པ་བཞིན་བསྒོམ་པར་བདུད་རྩི་
འོད་དང་མཚོ་སྐྱེས་དང་། ཤཱནྟི་པས་བཤད་ཀྱང་། འདིར་རླུང་ནས་རིམ་པ་བཞིན་དུ་བྱེད་དེ། །ཡན་ལག་མེད་པའི་རྡོ་རྗེས་ཀྱང་བཤད་དོ། ནམ་མཁའི་དབྱིངས་ཀྱི་དབུས་གནས་པར། །རྡོ་རྗེའི་དཀྱིལ་འཁོར་བསྒོམ་
པར་བྱ། །རྡོ་རྗེའི་དཀྱིལ་འཁོར་དབུས་གནས་པར། །འོད་ཀྱི་དཀྱིལ་འཁོར་བསྒོམ་པར་བྱ། །མེ་ཡི་དཀྱིལ་འཁོར་དབུས་གནས་པར། །ཡང་ནི་ཆུ་ནི་བསྒོམ་པར་བྱ། །ཆུ་ཡི་དཀྱིལ་འཁོར་དབུས་གནས་པར། །བརྟུལ་ཞུགས་ཅན་
གྱིས་དབང་ཆེན་བསྒོམ། །ཞེས་གསུངས་པའི་དོན་ནོ། །སའི་སྟེང་དུ་འཁོར་ལོ་བསྒོམ་པ་ཡན་ལག་མེད་པ་དང་། ཌོཾ་བྷ་བ་དང་། མཚོ་སྐྱེས་སོགས་ཀྱིས་མ་གསུངས་ཀྱང་། །ཡན་ལག་དྲུག་པ་ལས་བཤད་པ་ལྟར་བྱ་དགོས་ཏེ།
6-13-2a


གུར་ལས། །རྣམ་པར་སྣང་མཛད་རྒྱལ་པོ་ཆེ། །སྤྲོ་བ་དང་ནི་བསྡུ་བའི་ལུས། །ཆོས་ཀྱི་དབྱིངས་ཀྱི་ཡེ་གེས་བསྐྱེད། །དེས་ནི་སངས་རྒྱལ་གནས་དགོས་བྱ། །ཞེས་གསུངས་པས་རྣམ་སྣང་བསྐྱེད་པའོ། །
ཡང་ན་འཁོར་ལོ་བསྐྱེད་པར་བྱའོ། །གུར་ལས། དབང་ཆེན་དཀྱིལ་འཁོར་སྟེང་དུ་ནི། །བདག་ཉིད་ཀྱང་ནི་བསྒོམ་པར་བྱ། །བྷྲཱུཾ་ལས་གནས་ནི་བསམས་ནས་སུ། །ཞེས་གསུངས་པའི་དོན་ནི། ཡན་ལག་དྲུག་པ་ལས། བྷཱུཾ་ལས་
འཁོར་ལོའི་སྟེང་དུ་བདག །བར་མ་སྐྱེ་བའི་བསམ་གཏན་བྱ། །ཞེས་བཤད་པ་ལྟར་ཀུ་མུ་ཊི་ལས་ཀྱང་འབྱུང་བ་ལྟར་བྱའོ། །བདག་ཉིད་བསྒོམ་པར་བྱ། ཞེས་གསུངས་པའི་དོན་ནི། ཡན་ལག་མེད་པའི་རྡོ་རྗེས་དེའི་སྟེང་དུ་
རྣམ་པར་ཤེས་པ་སྒྱུ་མ་ལྟ་བུ་ཉིད་དུ་བཏགས་པའོ། །ཞེས་དང་། མཚོ་སྐྱེས་ཀྱི་སྒྲུབ་ཐབས་ལས། དེའི་སྟེང་དུ་རྣམ་པར་ཤེས་པ་གནས་པར་བལྟའོ། །ཞེས་དང་། བདུད་རྩི་འོད་ལས་རླུང་གི་དཀྱིལ་འཁོར་ནང་གནས་པར། །བདག་ཀྱང་བསམ་
པར་བྱ་བ་སྟེ། །ཨེ་ཝཾ་ཉིད་དུ་བདག་དང་ནི། །འདྲེས་པར་གྱུར་པ་འཁོར་ལོ་ཡིན། །ཞེས་སོ། །འདིའི་དོན་ལ་བོད་ཀྱི་སྔ་མ་ཁ་ཅིག་ཧོ་ཡིག་གཉིས་ཀྱི་བར་དུ་ཚུད་པའི་ཡི་གེ་གསུམ་པར་སྣང་ལ་ཡོད་པ། འབྱུང་བཞི་འཁོར་དང་བཅས་པ་ལ་ཞུགས་
པར་འདོད། ཁ་ཅིག་སྔར་སྟོང་པ་ལས་ལྡང་བའི་དུས་སུ། །ནམ་མཁའ་ནཱ་དའམ། །ཧཱུཾ་མམ། ཡི་གེ་ལྔ་བཞག་པ་ལས་ཐིག་ལེ་དཀར་པོ་གཅིག་ཆད་ནས་འཁོར་ལོའི་ལྟེ་བར་ཞུགས་པ་ལ་འདོད་དོ། །ཤཱནྟི་པས་སྒོམ་པ་པོ་ཡང་དེའི་ཚེ་འཇིག་
6-13-2b


རྟེན་ལས་འདས་པའི་ཡེ་ཤེས་ཁྱབ་པར་བྱེད་པ་དེ་ཉིད་ཁོ་ནས་གནས་སོ། །ཞེས་སྔར་སྟོང་ཉིད་བསྒོམ་པའི་སེམས་དེ་ཉིད་ཀྱིས་སྒོམ་པ་པོ་དང་། དེས་བསྒོམ་པའི་འབྱུང་བཞི་ལ་ཁྱབ་པར་བྱེད་པའི་དོན་དུ་བཤད་དོ། །ཨ་བ་དྷཱུ་ཏཱི་པ་གཉིས་མེད་རྡོ་རྗེའི་སྒྲུབ་
ཐབས་ལས། སྣ་ཚོགས་རྡོ་རྗེ་ལ་རྟེན་འབྲེལ་ལས་སྐྱེས་པའི་སེམས་ཙམ་འབྱུང་བ་ཆེན་པོ་ཞུ་བ་ལས། ཞེས་སྔར་གྱི་འབྱུང་བཞིའང་སེམས་ཙམ་དུ་བསྒོམ་པ་ལ་བཤད་དོ། །བཤད་རྒྱུད་ཀྱི་དགོངས་པ་ནི། འབྱུང་བཞི་དང་གཞལ་ཡས་ཁང་བསྐྱེད་པ་
རྣམས་རང་གི་སེམས་སྒྱུ་མ་ཙམ་གྱི་ངོ་བོ་ཤེས་པའི་ཕྱིར་ཡིན་ལ། དེས་ན་གཞལ་ཡས་ཁང་གདན་བཅས་བསྐྱེད་ཟིན་པའི་ཕོ་བྲང་དེ་ངའོ་སྙམ་དུ་ང་རྒྱལ་འཇོག་པར་གསུངས་སོ། །དེའང་སྔར་གྱི་སྟོང་ཉིད་བསྒོམ་པ་འཆི་སྲིད་ཀྱི་འོད་གསལ་དང་འདྲ་ལ། དེ་ལས་
ལྡར་བ་ནས་བཟུང་སྟེ། །ཡི་གེ་ལྔ་ཡུམ་གྱི་མངལ་དུ་ཞུགས་གསུངས་ནས་མ་ཞུ་ཚུན། བར་དོའི་སྐབས་དང་སྦྱར་དགོས་པས། འབྱུང་བཞི་འཁོར་ལོ་དང་བཅས་པ་བསྐྱེད་པ་རང་གི་རྣམ་ཤེས་ཀྱི་ངོ་བོར་སྟོན་པ་ན། ཤེས་པ་དེ་བར་དོའི་རྣམ་ཤེས་དང་སྦྱར་དགོས་པས།
སྲིད་པ་བར་མ་བསམ་པར་བྱ། །ཞེས་གསུངས་ཀྱི། དེར་ཡི་གེ་ལྔ་འཇུག་པ་མིན་ནོ། །བདག་གི་རྣམ་ཤེས་ཨེ་ཝཾ་ཉིད་དུ་འདྲེས་པར་མི་ཐུབ་ཟླ་བའི་བདག་མེད་མའི་སྒྲུབ་ཐབས་ལས་ཀྱང་བཤད་པའི་དོན་ནི། ཨེ་ནི་རྟེན་ཆོས་འབྱུང་དང་། ཝོ་ནི་བརྟེན་པ་གཞན་ལྔ་
ཡིན་ལ། སྔ་མ་དེར་ཕྱི་མ་ལྔ་དང་རང་གི་རྣམ་ཤེས་འདྲེས་པའི་དོན་ནོ། །གུར་ལས་སྔར་དྲངས་པ་ལྟར་བྷཱུཾ་ལས་རྣམ་སྣང་བསྐྱེད་ནས། དེ་ལས་གཞལ་ཡས་ཁང་བསྐྱེད་པར་གསུངས་པས། དེ་དང་བྷཱུཾ་ལས་སམ། བྷཱུཾ་ལས་འཁོར་ལོ་བསྐྱེད་པ་ལས་བསྐྱེད་
6-13-3a


པ་རྣམས་རྒྱས་བསྡུས་སོ། །གཞལ་ཡས་ཁང་ནི་སྤྱི་དང་འདྲ་ལ་དུར་ཁྲོད་དང་བཅས་པའོ། །ནང་དུ་པཾ་ལས་པདྨ་འདབ་བརྒྱད་བསྐྱེད་དེ། །འདི་ཡན་ལག་མེད་པས་སྣ་ཚོགས་པདྨར་བཤད། གཉིས་མེད་རྡོ་རྗེས་དམར་པོར་བཤད་ཀྱང་སྔ་མ་ལྟར་
བྱའོ། །པདྨའི་ལྟེ་བར་ཚངས་པ་སོགས་བཞིའོ། །འདི་བཞི་བདུད་བཞིར་འཇོག་ཚུལ་ནི། ཆངས་པ་ཕུང་པོའི། དབང་པོ་ལྷའི་བུའི། ཉེ་དབང་ཁྱབ་འཇུག་ཉོན་མོངས་པའི། དྲག་པོ་དབང་ཕྱུག་འཆི་བདག་གི་འདུད་དུ་གཉིས་མེད་རྡོ་རྗེས་བཤད་དོ། །ཡན་ལག་མེད་པས།
བདུད་བཞི་རྣམས་ནི་ཐམས་ཅད་ཀྱི། །སྙིང་ལ་ཉི་མའི་དཀྱིལ་འཁོར་རོ། །ཞེས་གསུངས་ལ། ཡན་ལག་དྲུག་པ་ལས། ཉི་མའི་དཀྱིལ་འཁོར་ལ་གནས་པ། །བདུད་བཞི་ཡིས་ནི་རྣམ་པར་བརྒྱན། །ཞེས་པ་ལྟར་ན་ཉི་མའི་སྟེང་དུ་བདུད་ཀྱི་གདན་ནོ། །ཀུ་མུ་ཊི་ལས། 
བདུད་བཞི་ཡིན་ནི་རྣམ་པར་མནན། །ཞེས་ཀྱང་འབྱུང་ངོ་། །གཉིས་མེད་རྡོ་རྗེས་སྔ་མ་བཞིན་བྱས་སོ། གདན་དབུས་མའི་སྟེང་དུ་དབྱངས་གསལ་འགོད་པ་ལ། ཉིས་འགྱུར་དུ་བྱེད་མི་བྱེད་བདུད་རྩི་འོད་དང་། ཡན་ལག་དྲུག་པ་དང་། ཕྱི་མའི་ལེའུ་ལྔ་པའི་འགྲེལ་
པ་ལས་མི་གསལ་ཡང་། བརྟག་པ་དང་པོའི་ལེའུ་བརྒྱད་པའི་ཀུ་མུ་ཊི་ལས། རྗེས་སུ་མཐུན་མི་མཐུན་གཉིས་གཉིས་བྱ་བར་བཤད་ལ། གསལ་བྱེད་བཞི་བཅུ་ལ་གང་སྣོན་མ་བཤད་དོ། །ཡན་ལག་མེད་པ་དང་། གཉིས་མེད་རྡོ་རྗེས་ཀྱང་། དེ་ལྟར་
བཤད་ཅིང་། སྔ་མས་ཀྵ་སྤངས་པའི་གསལ་བྱེད་སོ་གསུམ་ལ། དྷ་ད་བྷ་ཡ་ར་ལ་ཝ་སྟེ་བདུན་སྣོན་ནོ། །ཕྱི་མས་གསལ་བྱེད་སོ་བཞིའི་སྟེང་དུ། དྷ་ད་ཌྷ་ཡ་ལ་དྲུག་བསྣན་ནོ། །མན་སྙེ་ལས། སོ་བཞིའི་སྟེང་དུ། ཌ་དྷ་ཡ་ར་ལ་ཝ་དྲུག་སྣོན་
6-13-3b


ནོ། །དེའང་དབྱངས་དཀར་པོ་དང་། གསལ་བྱེད་དམར་པོ་དང་། དབྱངས་ནང་དང་གསལ་བྱེད་ཕྱི་རུ་འགོད་པར་དཔལ་འབྲས་རྡོ་རྗེ་དང་། དབྱངས་འོག་དང་གསལ་བྱེད་སྟེང་དུ་འགོད་པར་སྨན་ཞབས་ཀྱིས་བཤད་དོ། །དང་པོའི་ལེའུ་བརྒྱད་པ་ལས། ཕྱི་ནས་བདུད་
ལས་རྒྱལ་བས་མནན་ཞེས་གསུངས་པ་དང་མཐུན་ནོ། །དང་པོ་དབྱངས་ཡིག་ལས་ཟླ་བ་བསྐྱེད་པའི་འོག་ཏུ། །དེའི་སྟེང་དུ་གསལ་བྱེད་བཀོད་པ་ལས་དཀྱིལ་འཁོར་གཉིས་པ་བསྐྱེད་པའང་བཤད་དོ། ཟླ་ཉིའི་བར་དུ་ཧཱུཾ་དང་ཨཾ་ལས་གྲི་གུག་དང་ཐོད་པ་ལ་ས་བོན་
གྱིས་མཚན་པ། མཚོ་སྐྱེས་དང་ཤཱནྟི་པ་སོགས་མང་པོས་བཤད་ལ་ཡན་ལག་དྲུག་པར་ཐོད་པ་དང་རྡོ་རྗེ་དང་། ཕྱི་མའི་ལེའུ་ལྔ་བའི་ཀུ་མུ་ཊི་ལས། རིགས་བདག་དང་ཐོད་པ་ཞེས་བཤད་དོ། །བོད་ཀྱི་བླ་མ་སྔ་མ་འགའ་ཞིག་ཧཱུཾ་ལས་སྣ་ཚོགས་རྡོ་རྗེས་
མཚན་པའི་ཐོད་པ་ལ་བཞེད་དེ། ཡན་ལག་མེད་པས། སྣ་ཚོགས་རྡོ་རྗེ་དང་ཐོད་པ་དང་གྲི་གུག་གསུམ་བཤད་པ་དང་མཐུན་པ་འདྲའོ། །ཟླ་ཉི་ས་བོན་རྣམས་གཅིག་ཏུ་འདྲེས་པ་ལས་ཡབ་ཡུམ་གྱི་སྐུ་རྫོགས་པར་བྱའོ། །དེའང་ཟླ་བ་མེ་ལོང་ལྟ་བུ་དང་། ཉི་མ་
མཉམ་ཉིད་དང་། ས་བོན་དང་ཕྱག་མཚན་སོ་སོར་རྟོག་པ་དང་། གཅིག་ཏུ་འདྲེས་པ་བྱ་བ་ནན་ཏན་དང་། སྐུ་རྫོགས་པ་ཆོས་དབྱིངས་ཡེ་ཤེས་ཏེ། དང་པོའི་ལེའུ་བརྒྱད་པ་ལས། ཟླ་བ་མེ་ལོང་ཡེ་ཤེས་ལྡན། །བདུན་གྱི་བདུན་པ་མཉམ་ཉིད་ལྡན། །རང་
ལྷའི་ས་བོན་ཕྱག་མཚན་ནི། །སོ་སོར་རྟོག་པར་བརྗོད་པར་བྱ། །ཐམས་ཅད་གཅིག་གྱུར་ནན་ཏན་ཉིད། རྫོགས་པ་ཆོས་དབྱིངས་དག་པ་སྟེ། །མཁས་པས་ཆོ་ག་གསུངས་པ་ཡིས། །རྣམ་པ་ལྔ་པོ་བསྒོམ་པ་ཉིད། །ཅེས་དང་། ཁ་སྦྱོར་ལས་ཀྱང་ངོ་། །
6-13-4a


དཀྱིལ་འཁོར་གཉིས་པ་ཟླ་བར་བྱེད་པ་གཞུང་མང་པོ་ལས་འབྱུང་སྟེ། བདེ་མཆོག་དང་ཡེ་ཤེས་ཞབས་ལུགས་ཀྱི་འདུས་བ་དང་། དཔལ་འཛིན་གྱི་གཞུང་དུའོ། །ཟླ་བ་གཉིས་པ་ནི་དམར་པོར་བཤད་དོ། །ཟླ་བ་གཉིས་ནི་ཁ་སྦྱོར་གྱི་བདེ་
མཆོག་གི་སྐབས་སུ་བཤད་དེ། སྡོམ་འབྱུང་གིའང་དགོངས་པའོ། །བྱ་བ་ནན་ཏན་གྱི་སྐབས་སུ་འོད་ཟེར་སྤྲོས་ནས་སེམས་ཅན་གྱི་རྒྱུད་སྦྱངས་སླར་སྡུད་པ་འདི་ལའང་མང་པོས་མཛད་པ་ལྟར་ལེགས་སོ། །རྒྱུ་རྡོ་རྗེ་འཛིན་པའི་ཁ་དོག་ནི། ཕྱི་མའི་ལེའུ་ལྔ་པ་
ལས། ཁ་དོག་ནག་པོ་འཇིགས་པ་པོ། ཞེས་གསུངས་པ་ལྟར། །ཡན་ལག་མེད་པ། མཚོ་སྐྱེས། །ཤཱནྟི་པ་སོགས་དུ་མ་ཞིག་གིས་མཛད་ལ། དཀར་པོར་མི་ཐུབ་ཟླ་བ་དང་། དཔལ་འཛིན་གཉིས་ཀྱིས་མཛད་དོ། །འདིར་དེ་བཞིན་དུ་བྱེད་པའི་ལུགས་
ཀྱིས། རྩ་ཞལ་དཀར། །གཡས་སྔོ། ཞལ་ལྷག་མའི་ཁ་དོག་དང་། ཞལ་ཕྱག་དང་ཞབས་ཀྱི་གྲངས་ལ་སོགས་པ་དང་། ཡུམ་ནི་འདྲ་བར་བྱའོ། །འདིར་ཏིང་ངེ་འཛིན་གསུམ་གྱི་དབང་དུ་བྱས་ན། རྒྱུའི་ཡབ་ཡུམ་རྫོགས་པ་དང་པོ་སྦྱོར་བར་གཉིས་
མེད་རྡོ་རྗེས་བཤད་དོ། །དེ་ནས་མཁའ་གསང་བྱིན་གྱིས་བརླབས་ཏེ་སྙོམས་པར་ཞུགས་པའི་དགའ་བའི་སྒྲས་སྤྱན་དྲངས་པ། ཞུ་བའི་ཐིག་ལེ་ལས་ས་བོན་བརྒྱ་དང་། དེ་ལས་ལྷ་མི་བརྒྱད་ཡུམ་གྱི་པདྨར་བསྐྱེད་ལ་དབྱུང་སྟེ།  ཀུ་མུ་ཊི་ལས། 
ས་བོན་བརྒྱད་ཀྱིས་ལྷ་མོ་དབྱུང་ཞེས་པ་ལྟར་ལེགས་པས། ཡན་ལག་དྲུག་པ་ལས། ལྷ་མོའི་ས་བོན་དབྱུང་བའོ། །ཞེས་པ་འགྱུར་གྱིས་མ་ཐོན་པའོ། །སརྦ་མངྒ་ལཾ།། །།
6-13-4b


empty page
6-14-1a


༄༅། །ལྷག་པ་ཡི་ནི་ལྷ་གཅིག་ཉིད་ཅེས་པའི་དོན་བཤད་པ་བཞུགས་སོ། །
6-14-1b


༄༅༅། །རྡོ་རྗེ་མཁའ་འགྲོའི་འགྲེལ་པ་ལས། ལྷག་པ་ཡི་ནི་ལྷ་གཅིག་ཉིད་ཅེས་བྱ་བ་ལ། ལུས་ལ་ལྷག་པའི་བྱིན་གྱིས་རློབ་པས་ན། ལྷག་པ་ཡིན་ལ། ཎའི་རང་གི་རྐྱེན་ཅན་དུ་བྱས་
པ་གསལ་ཞིང་རིག་པ་དང་སྤྲུལ་པ་རྒྱས་པར་བྱེད་པས་ན་ལྷ་སྟེ། ཞལ་དང་ཕྱ་ལ་སོགས་པའི་རྣམ་པར་བྱུང་བ་ཀུན་རྫོབ་ཀྱི་བདེན་པར་ཤེས་པར་བྱའོ། །གཅིག་ཉིད་ཅེས་བྱ་བ་ནི། ཆོས་ཀྱི་དབྱིངས་རང་
བཞིན་དོན་དམ་པའི་བདེན་པ་སྟེ། དེ་ལྟར་ན་ཀུན་རྫོབ་དང་དོན་དམ་པ་དབྱེར་མེད་པའི་རང་བཞིན། དེ་བཞིན་གཤེགས་པ་ཐམས་ཅད་ཀྱི་བླ་མར་གྱུར་པས་ལྷག་པའི་དོན་ཉིད་དུ་བལྟ་བར་བྱའོ། །ཞེས་དང་། 
བདག་ཉིད་ཁོ་ན་སྟོང་པ་ཉིད་དང་སྙིང་རྗེ་དབྱེར་མེད་པའི་བྱང་ཆུབ་ཀྱིས་རང་བཞིན་གྱི་ལྷའི་གཟུངས་སུ་རྫོགས་པར་བྱའོ། །ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་བྱང་ཆུབ་སེམས་སྔོན་དུ་འགྲོ་བའི་ལྷའི་གཟུགས་
བསྒོམ་པར་བསྟན་ཏོ། །ཞེས་དང་། འདི་ཡིས་ནི་ཞེས་བྱ་བ་བསྟན་མ་ཐག་པའི་ཕྱག་རྒྱ་འདིས་སོ། །ཕྱག་དང་ཞལ་ལ་སོགས་པའི་ཀུན་རྫོབ་ཀྱི་ཕྱག་རྒྱ་དང་མཉམ་པར་སྦྱོར་བ་གང་ལ་ཡོད་པ་དེ་ལ་དེ་སྐད་ཅེས་
བྱའོ། །རྣལ་འབྱོར་པ་དེས་ཅེ་ཞིག་བྱ་ཞེ་ན། ས་གསུམ་མ་ལུས་པར་བཟའ་བར་བྱ་ཞེས་བྱ་བ་སྟེ། སྐུ་ལ་སོགས་པའི་ཐ་མལ་པའི་གཟུགས་བཟློག་པར་བྱ་ཞེས་བྱ་བའི་དོན་ཏོ། སྟོང་པ་ཉིད་ཀྱི་བསམ་གཏན་
6-14-2a


འབའ་ཞིག་གིས་ཇི་ལྟར་ཡང་བྱང་ཆུབ་འགྲུབ་པ་མེད་པར་བསྟན་པའི་ཕྱིར། གཞན་དུ་ཞེས་བྱ་བ་ལ་སོགས་པ་གསུངས་ཏེ། གཞན་དུ་ཞེས་བྱ་བ་ནི། སྟོང་པ་ཉིད་འབའ་ཞིག་གིས་སོ། །སྦྱོར་བ་
མ་ཚང་བ་ཞེས་བྱ་བ་ནི་སྣང་བ་ལས་འདས་པའོ། །འདའ་ཞེས་བྱ་བ་ནི་བདག་གི་དོན་ཙམ་ཡང་མེད་པར་མྱང་ངན་ལས་འདས་པའོ། །ཇི་ལྟ་བུ་ཞེ་ན། མར་མེ་ལྟ་བུ་སྟེ། ཇི་ལྟར་མར་མེ་མར་གྱི་རྒྱུན་གྱིས་ནམ་མཁའི་ངོས་སུ་
གསལ་ཞིང་འབར་བ་ལས། གང་གི་ཚེ་མར་གྱི་རྒྱུན་ཟད་པ་དེའི་ཚེ། །དེ་ཉིད་དུ་ཟད་ཅིང་གཏུགས་པར་གྱུར་པས། བདག་ཉིད་ཀྱང་མི་སྣང་ན་གཞན་སྣང་བར་བྱེད་པ་ལྟ་ཅི་སྨོས། དེ་བཞིན་དུ་སྟོང་པ་ཉིད་འབའ་ཞིག་གི་ཏིང་
ངེ་འཛིན་ཡང་བལྟ་བར་བྱའོ། །ཞེས་དང་། ཡང་ན་སྐད་ཅིག་ཙམ་གྱི་རི་རབ་ཀྱི་རྩེ་མོར་རྡོ་རྗེ་རིན་པོ་ཆེ་བརྩེགས་པའི་ཁང་བུར་བདག་ཉིད་བཅོམ་ལྡན་འདས་རྡོ་རྗེ་སེམས་དཔར་བསྐྱེད་པའི་རིམ་པས་བསྒོམ་པར་བྱའོ། །ཅི་དེའང་
རང་བཞིན་གྱིས་གྲུབ་པ་ཞིག་གམ། །འོན་ཏེ་མ་ཡིན་ཞེ་ན། འདིར་དེ་དག་རང་གི་སེམས་རྣམས་པར་དག་པ་ཉིད་ཀྱི་སྣང་བ་ཡིན་པས། འོ་མ་ལ་མར་ལྟར་གྲུབ་པ་བསྒྲུབ་པར་བྱའི། ཆུ་ལ་མར་ལྟར་མ་གྲུབ་པ་ནི་འགྲུབ་པར་
མི་འགྱུར་རོ། །དེའང་ཆུའི་རྙོག་པ་ནོར་བུས་སྦྱང་བ་ལྟར། བསྐྱེད་པའི་རིམ་པས་བདག་ཉིད་སྔོན་དུ་སྦྱང་ནས་རྫོགས་པར་བྱ་སྟེ། རང་བཞིན་གྱིས་རྣམ་པར་དག་པར་ཡིན་པའི་ཕྱིར་རོ། གཞན་དུ་སྦྱང་བ་མ་བྱས་ནའང་
6-14-2b


འཁོར་བ་ཉིད་ཡིན་པས་རྣམ་པར་དག་པའི་འབྲས་བུ་སྤྲུལ་པར་མི་ནུས་ལ། རང་བཞིན་གྱིས་མ་དག་པའང་ཆོས་འགལ་བའི་ཕྱིར་མ་ཡིན་ནོ། །རྒྱུ་དང་འབྲས་བུ་ནི་རྗེས་སུ་མཐུན་པ་ཉིད་ཀྱིས་ནི། དག་པས་རྣམ་པར་དག་པ་བསྒྲུབ་པར་བྱའོ། །ཞེས་
མན་ངག་ལས་ཤེས་པར་བྱའོ། །རྗེས་སུ་མཐུན་པའང་རྗེས་སུ་བྱེད་པ་ཡིན་ཏེ། རྒྱུའང་འབྲུས་བུར་འདོད་པ་དང་རྗེས་སུ་མཐུན་པ་ཡིན་ན། ས་ལུའི་མྱུ་གུ་ལས་ས་ལུའི་ས་བོན་གདོན་མི་ཟ་བར་བསྐྱེད་ནུས་ཀྱི། གཞན་དུ་ཀོ་ཏྲ་བའི་མྱུ་གུ་ལ་ས་ལུའི་
ས་བོན་ལྟར་ནུས་པ་ཡོད་པ་མ་ཡིན་ནོ། །འབྲས་བུའང་རྒུར་འདོད་པ་དང་རྗེས་སུ་མཐུན་སྐྱེ་བར་འགྱུར་གྱིས། གཞན་དུ་དེ་དག་ཧ་ཅང་ཐལ་ཆེས་པར་འགྱུར་རོ། །དེ་ལྟར་ན་འོ་མའི་ཡོན་ཏན་དཀར་པ་ལྟར་རྣམ་པ་གྲུབ་པ་དེ་དག་ཡང་དང་ཡང་གོམས་པས་
གློ་བུར་བའི་དྲི་མ་བཟློག་སྟེ། གཉུག་མ་དེ་ཉིད་གསལ་བར་གྱུར་པར་དགོངས་སོ།། །།མངྒ་ལཾ།། །།
6-15-1a


༄༅། །དཔལ་གསང་བ་འདུས་པའི་དཀྱིལ་འཁོར་གྱི་ཆོ་གའི་ངག་འདོན་ལྷན་ཐབས་བཞུགས་སོ། །
6-15-1b


༄༅༅། །བླ་མ་དམ་པ་རྣམས་ལ་ཕྱག་འཚལ་ལོ། །དཔལ་གསང་བ་འདུས་པའི་དཀྱིལ་འཁོར་གྱི་ཆོ་གའི་ངག་འདོན་གྱི་ལྷན་ཐབས་ནི། མི་མངོན་པ་ལས་སློང་བའི་སྐབས་སུ། ཡིད་ཀྱི་རོལ་པ་
དྲི་མེད་ཟླ་འདྲས་བསྒྲུབས་ཞེས་པ་ནས། སེམས་ནི་བྱང་ཆུབ་དམ་པར་བསྐྱེད་པར་བགྱི། །ཞེས་པའི་བར་བརྗོད། ཤཱུ་ནྱ་ཏཱས་སྟོང་པར་སྦྱངས། སྟོང་པའི་ངང་ལས། སྣ་ཚོགས་པདྨ་དང་ཉི་མའི་སྟེང་དུ་ཧཱུཾ་ལས་རྡོ་
རྗེ། དེ་ཡོངས་སུ་གྱུར་པ་ལས་རང་ཉིད་རྡོ་རྗེ་འཆང་སྔོན་པོ་རྡོ་རྗེ་སེམས་དཔའི་དབུ་རྒྱན་ཅན་སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་རྡོ་རྗེ་འཁོར་ལོ་པདྨ་གཡོན་དྲིལ་བུ་རིན་ཆེན་རལ་གྲི་འཛིན་པ། དབུ་སྐྲ་
རལ་པའི་ཐོར་ཚུགས་ཅན་མཚན་བཟང་པོ་སོ་གཉིས་དང་དཔེ་བྱད་བཟང་པོ་བརྒྱད་ཅུས་བརྒྱན་པ། རེག་བྱ་རྡོ་རྗེ་མ་སྔོན་མོ་མི་བསྐྱོད་པའི་དབུ་རྒྱན་ཅན་ཅེས་པ་ནས། འོད་ཀྱི་དཀྱིལ་འཁོར་གྱིས་བསྐོར་བའི་དབུས་
ན་ཡབ་སེམས་དཔའི་སྐྱིལ་མོ་ཀྲུང་གིས་བཞུགས་པ། དེའི་སྤྱི་བོར་ཨོཾ་མགྲིན་པར་ཨཱཿཐུགས་ཀར་ཧཱུཾ་ཐུགས་ཀའི་ཧཱུཾ་ལས་འོད་ཟེར་འཕྲོས་པས། བསྒོམས་པ་དང་འདྲ་བའི་ཡེ་ཤེས་སེམས་དཔའ་སྤྱན་
དྲངས་ཛཿ ཧཱུཾ་བཾ་ཧོཿ་གཉིས་སུ་མེད་པར་གྱུར། ནང་མཆོད་དང་ཉེར་སྤྱོད་སྒྲུབ་ཐབས་ལྟར་བྱིན་གྱིས་བརླབས་ལ། ཨོཾ་སརྦ་ཏ་ཐཱ་ག་ཏ་ཨརྒྷཾ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཤྲི་ཡེ་ཨཱཿ་ཧཱུཾ་གིས་མཆོད་
6-15-2a


ཡིན་དང་། དེ་བཞིན་དུ་ཞབས་བསིལ་ནས་རོལ་མོའི་བར་གྱིས་མཆོད་ལ། བཛྲ་དྷྲི་ཀ་ཨོཾ་ཨཱཿ་ཧཱུཾ་ཞེས་ནང་མཆོད་དབུལ། དུས་གསུམ་རྡོ་རྗེའི་ཐུགས་ཡིན་སྲིད་དང་མཐར་
གྱུར་གང་། ཞི་ཞིང་སྒྲིབ་མེད་དག་པ་ནམ་མཁའི་ངོ་བོ་ཉིད། །སངས་རྒྱས་རྣམ་བརྒྱས་བྱང་ཆུབ་དབང་ཕྱུག་རྡོ་རྗེ་ཅན། །དེ་ལ་ལུས་ངག་ཡིད་ཀྱིས་རྟག་ཏུ་ཕྱག་འཚལ་ལོ། །ཞེས་པས་བསྟོད། རང་གི་ཐུགས་
ཀའི་ཧཱུཾ་གི་འོད་ཟེར་གྱིས་ཞིང་སྐྱོང་འཁོར་བཅས་སྤྱན་དྲངས། མཆོད་གཏོར་སྒྲུབ་ཐབས་ལྟར་བྱིན་གྱིས་བརླབས་ལ། ཨོཾ་ཨ་ཀཱ་རོལ་སྔགས་ལན་གསུམ་བརྗོད་དེ་ཕུལ་ནས། ཨོཾ་ཨཱཿ་ཀྵེ་ཏྲ་པཱ་ལ་ས་པ་
རི་ཝཱ་ར་ཨརྒྷཾ་བྲ་ཏྟི་ཙྩ་ཧཱུཾ་སྭཱ་ཧཱ་ཞེས་མཆོད་ཡིན་དང་། དེ་བཞིན་དུ་ཞབས་བསིལ་ནས་རོལ་མོའི་བར་གྱིས་མཆོད་ནས། ཨོཾ་ཀྵི་ཏྲ་པཱ་ལ་ས་པ་རི་ཝཱ་ར་ཨོཾ་ཨཱཿཧཱུཾ་ཞེས་ནང་མཆོད་ཕུལ་ནས། གང་དག་
འདིར་གནས་སོགས་ལན་གསུམ་བརྗོད། ཞིང་སྐྱོང་འཁོར་བཅས་རང་གནས་སུ་གཤེགས་པར་གྱུར། གནང་བ་ནོད་ཚུལ་ནོ། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་
མི་བསྐྱོད་པའི་དཀྱིལ་འཁོར་སྤྱན་དྲངས། ཆུ་གཉིས་ནས་རོལ་མོའི་བར་སྔར་རྡོ་རྗེ་འཆང་གི་སྐབས་བཞིན་ཕུལ། བདག་གིས་དཔལ་གསང་བ་འདུས་པའི་དཀྱིལ་འཁོར་གྱི་ཆོ་ག་འགྱིད་པ་གེགས་མེད་པར་
6-15-2b


འགྲུབ་པར་མཛད་དུ་གསོལ། །རིག་པ་འཛིན་པ་ཅི་དགའ་བར་གྱིས་ཤིག་ཅེས་གནང་བ་བྱིན་པར་གྱུར་བྷཱུ་ཁཾ་ས་གཞི་ས་གཞི་ཞེས་པ་འོག་མ་གཉིས་ལའང་སྦྱར། ནམ་མཁའི་རང་བཞིན་སྟོང་པ་ཉིད་དུ་གྱུར། ཅེས་དང་། ཨོཾ་ཨཱཿ་ཞེས་སོགས་ཀྱི་རྗེས་སུ་རྡོ་རྗེ་གསུམ་གྱིས་སའི་ཉེས་སྐྱོན་ཐམས་
ཅད་སྤྱངས་ཤིང་བསྲུངས་པར་གྱུར་ཅེས་དང་། བལྟ་བའི་ཚེ་ཤར་དུ་བལྟས་ནས་གཡོན་བརྐྱངས་བྱས་ལ་ལག་པ་གཉིས་ཐུགས་ཀར་རྡོར་དྲིལ་བཟུངས་ནས་བསྣོལ་ལ། བཛྲ་སཏྭ་ཟློས་ཤིང་མེ་མཚམས་
སུ་བལྟས་ཏེ་གཡོན་དུ་མེ་མཚམས་མཐོང་གི་བར་དུ་ལུས་གཅུ་ཞིང་སླར་ཡང་གཡས་སུ་དེ་ལྟར་བྱས་ལ། སྣ་ཚོགས་པའི་ཆོས་ཐམས་ཅད་སྟོང་པ་ཉིད་དང་རོ་གཅིག་པའི་རང་བཞིན་ཅན་དུ་གྱུར་ཅེས་དང་། སྒྲུབ་ཐབས་བསྒོམ་ཚུལ་ནི། སྔོན་འགྲོའི་
གཏོར་མ་མཆོད་བསྟོད་གྱི་བར་ཡན་ཆད་བསྒོམ་མོ། །སྤྲོ་བ་བསྐྱོད་པའི་རྗེས་སུ་གནང་བ་ནོད་པའི་སྐབས་བཞིན་སྤྱན་དྲངས་ལ། མཆོད་ཡོན་གྱི་རྗེས་སུ་མེ་ཏོག་ནས་རོལ་མོའི་བར་སྔར་བཞིན་ཕུལ་ནས། ལྷ་སོ་གཉིས་ཀྱི་མཚན་སྔགས་ལ་ཨོཾ་
ཨཱཿཧཱུཾབཏགས་ལ་ནང་མཆོད་དབུལ། བདག་ཉིད་ཀྱི་ལྕེ་ཧཱུཾ་ལས་བྱུང་བའི་རྡོ་རྗེར་གྱུར། མ་ལུས་ཕྱོགས་ན་ཞེས་སོགས། གསོལ་གདབ་ཀྱི་ཚེ་མཆོད་པ་བྱིན་གྱིས་བརླབས། ཆུ་གཉིས་ནས་རོལ་མོའི་བར་སྔར་རྡོ་རྗེ་འཆང་གི་སྐབས་བཞིན་ཕུལ་ལ། བཛྲ་དྷྲིཀ་ཨོཾ་ཨཱཿཧཱུཾ་ཞེས་ནང་མཆོད་ཕུལ་ལ། མི་བསྐྱོད་རྡོ་རྗེ་
ཞེས་པ་ནས་གསང་བའི་དབྱངས་ལ་བྱག་འཚལ་ལོ་ཞེས་པའི་བར་རྣམས་སྒོ་བཞིའི་སློབ་དཔོན་གྱིས་ཕྱོགས་གཅིག་ཏུ་བྱ་ཞིང་། དེ་མས་ཤར་གྱི་སློབ་དཔོན་འགྲངས་ཏེ་
6-15-3a


མཎྜལ་ཕུལ་ནས་རང་ཉིད་སྐད་ཅིག་རྣམ་སྣང་དཀར་པོ་དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་འཁོར་ལོ་རྡོ་རྗེ་པདྨ་དཀར་པོ་གཡོན་དྲིལ་བུ་རིན་ཆེན་རལ་གྲི་འཛིན་པ། ནམ་མཁར་གནས་པའི་དེ་
བཞིན་གཤེགས་པ་རྣམས་དང་ལྷན་ཅིག་ཏུ་གསོལ་བ་གདབ་པ་ནི། དེ་བཞིན་གཤེགས་པ་ཀུན་ཞི་བ་ཞེས་པའི་ཤོ་ལ་ཀ་གཅིག་གིས་གསོལ་བ་གདབ། དེ་བཞིན་དུ་ལྷོ་ནུབ་བྱང་གི་སློབ་དཔོན་རྣམས་ཀྱིས་རིམ་པ་བཞིན། རང་ཉིད་རིན་འབྱུང་
དུ་གསལ་གདབ་པ་སོགས་སྔར་བཞིན་བྱས་ལ་གསོལ་བ་གདབ་པ་སོ་སོ་དང་། ཤོ་ལོ་ཀ་ཐ་མ་ཀུན་གྱིས་ཐུན་མོང་དུ་བྱ། ཕྱག་འཚལ་བའི་ཚེ་གཞི་བཅའ་སྔོན་དུ་བཏང་ནས་མཉམ་པའི་རྐང་སྟབས་བྱས་ལ་ཕྱག་བྱའོ། །སེམས་ཅན་མ་རིག་
པའི་མུན་པས་བསྒྲིབས་ཤིང་བདུད་ཀྱི་དབང་དུ་སོང་བ་རྣམས་ཀྱི་བདུད་བསལ་བའི་ཕྱིར་དུ། རང་ཉིད་གཙོ་བ་ལས་བྱེ་བའི་ཞེ་སྡང་རྡོ་རྗེ་གཉིས་པ་འཁོར་ཁྲོ་བོའི་ཚོགས་དཔག་ཏུ་མེད་པས་བསྐོར་བའི་མིག་གཡས་པ་མ་ལས་ཉི་མ་གཡོན་པ་ཊ་ལས་
ཟླ་བ་མིག་འབྲས་ཧཱུཾ་ལས་དུས་མཐའི་མེ་ལྟར་འབར་བ་ལས། ཁྲོ་བོའི་རྡོ་རྗེ་ཕྱོགས་བཅུར་སྤྲོས་པས་བགེགས་ཐམས་ཅད་བཅོམ་པར་གྱུར། ཀྲོ་དྷཱ་ཌ་ཐི་ཧཱི། དེ་ནས་བལྟས་ཏེ་གཡོན་བརྐྱངས་བྱས་ལ། གཡོན་དྲིལ་བུ་སྙིང་གར་བཟུངས། གཡས་བརྐྱང་ཏེ་
རྡོ་རྗེ་དང་བཅས་པའི་སྡིགས་མཛུབ་བརྐྱངས་ནས་མེ་མཚམས་སུ་བལྟས་ནས་ལུས་གཡོན་དུ་མེ་མཚམས་མཐོང་གི་བར་དུ་གཅུ་ཞིང་། ལག་པ་གཡས་གཡོན་ཕྱོགས་སུ་ཁྱེར་རོ། །སླར་ཡང་གཡོན་སྔར་བཞིན་བརྐྱངས་ལ་གཡས་
6-15-3b


སྙིང་གར་བཞག་སྟེ་གཡས་སུ་སྔར་བཞིན་གཅུའོ། །དབང་ལྡན་ནས་ཁ་ནང་དུ་ཕྱོགས་ཏེ་བཀའ་བསྒོ་ལན་གསུམ་བྱས་པའི་རྗེས་སུ་ཁྲོ་བོའི་ཚོགས་དཔག་ཏུ་མེད་པ་འཕྲོས་བགེགས་ཐམས་ཅད་བསྐྲད་པར་གྱུར། ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲ་
ཎཱཾ། ན་མོ་བཛྲ་ཀྲོ་དྷཱ་ཡ། མཧཱ་དཾ་ཥྚོཊ་ཀཊ་བྷཻ་ར་ཝཱ་ཡ། ཨཱ་སི་མུ་ས་ལཱ། པ་ར་ཤུ་པཱ་ཤ་ཧ་སྟཱ་ཡ། ཨོཾ་བཛྲ་ཨ་མྲྀ་ཊ་ཀུཎྜ་ལི། ཁ་ཁ་ཁཱ་ཧི་ཁཱ་ཧི། ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫ་གརྫ། བི་སྥོ་ཊཱ་ཡ་བི་སྥོ་ཊཱ་
ཡ། སརྦ་བི་གྷྣན་བི་ནཱ་ཡ་ཀ་ནཱན། མཧཱ་ག་ཎ་པ་ཏི། ཛཱི་བི་ཏ་ཨནྟ་ཀ་རཱ་ཡ་སྭཱཧཱ། ཞེས་པ་བགེགས་མཐར་བྱེད་ཀྱི་ཕྲེང་སྔགས་བཟླས་ནས། དཀྱིལ་འཁོར་གྱིས་གཞི་ཡང་དབང་ཆེན་གྱི་གསེར་གྱི་ས་གཞི་ལ་ཐུག་གི་བར་དུ་ཧཱུཾ་ལས་བྱུང་བའི་
རྡོ་རྗེའི་རང་བཞིན་དུ་གྱུར་ཅེས་དང་། ཁ་སྦྱོར་གྱི་ཚེ་སློབ་དཔོན་ནང་ནས་ཁ་ཕྱིར་བལྟས་ལ་བྱའོ། །བདག་བསྐྱེད་ཅེས་པའི་བསྒྲུབ་ཚུལ་ནི། ཤཱུ་ནྱ་ཏཱས་སྟོང་པར་གྱུར། སྟོང་པའི་ངག་ལས་ཧཱུཾ་ལས་བྱུང་བའི་ཉི་མའི་དཀྱིལ་འཁོར་གྱི་སྟེང་དུ་
ཧཱུཾ་ལས་རྡོ་རྗེ་དེ་ཡོངས་སུ་གྱུར་པ་ལས། རང་ཉིད་ཞེ་སྡང་རྡོ་རྗེ་སྐུ་མདོག་མཐིང་ནག་ཅེས་པ་ནས་འོད་དམར་པོ་འབར་ཞིང་འཁྲུག་པའི་དབུས་ན་ཡབ་རྡོ་རྗེའི་སྐྱིལ་མོ་ཀྲུང་གིས་བཞུགས་པར་གྱུར། དེའི་ཐུགས་ཀར་སྣ་ཚོགས་པདྨ་དང་ཟླ་བའི་
གདན་ལ་ཡེ་ཤེས་སེམས་དཔའ་སྐུ་མདོག་དམར་པོ་ཞེས་པ་ནས། ཏིང་ངེ་འཛིན་སེམས་དཔའ་ཧཱུཾ་ཡིག་མཐིང་ག །དེའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་
6-15-4a


གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ཛཿཧཱུཾ་བཾ་ཧོཿགཉིས་སུ་མེད་པར་གྱུར། རང་གི་རིགས་བདག་ཡབ་ཡུམ་གྱི་བྱང་ཆུབ་ཀྱི་སེམས་ཀྱིས་དབང་བསྐུར། ཕྱོགས་བཅུ་རྣམས་སུ་སྣ་ཚོགས་
པདྨ་དང་ཉི་མའི་གདན་རེ་རེ། ཡབ་ཡུམ་སྙོམས་པར་ཞུགས་པའི་ཐུགས་ཀའི་ཏིང་ངེ་འཛིན་སེམས་དཔའི་འོད་ཟེར་གྱིས་ཁྲོ་བོ་བཅུ་སྤྱན་དྲངས་ཞལ་ནས་ཞུགས། རྡོ་རྗེའི་ལམ་ནས་ཡུམ་གྱི་པདྨར་ཞུ་བའི་ཐིག་ལེ་བཅུ་ཧཱུཾ་རིང་པོ་བཅུར་གྱུར་པ་
ནི། གཤིན་རྗེའི་གཤེད་ནག་པོ་རྣམ་སྣང་གི་དབུ་རྒྱན་ཅན་ཅེས་པ་ནས་རང་གི་ཐུགས་ཀར་དྲངས། ཡ་མཱནྟ་ཀྲིཏ་ཐུགས་ཀ་ནས་ཕྱིར་ཕྱུང་ཤར་གྱི་གདན་ལ་གཡོན་བརྐྱངས་ཀྱིས་འཁོད། དེ་བཞིན་དུ་གནོད་མཛེས་ཀྱི་བར་ཕྱུང་ལ། ཁྲོ་
བོ་བཅུ་པོ་ཐམས་ཅད་ཀྱང་ཞེས་པ་ནས་བཞུགས་པར་གྱུར་ཅེས་དང་། མཆོད་པ་བྱིན་གྱིས་བརླབས་ཏེ། ཨོཾ་ཨཱཿབཛྲ་མཧཱ་ཀྲོ་དྷ་རཱ་ཛཱ་ས་པ་རི་ཝཱ་ར་ཨརྒྷཾ་པྲ་ཏཱི་ཙྪ་ཧཱུཾ་སྭཱ་ཧཱ་ཞེས་དང་། དེ་བཞིན་དུ་ཞབས་བསིལ་ནས་རོལ་མོའི་བར་
གྱིས་མཆོད་ལ། ཨོཾ་བཛྲ་མཧཱ་ཀྲོ་དྷ་རཱ་ཛཱ་ས་པ་རི་ཝཱ་ར་ཨོཾ་ཨཱཿ ཧཱུཾཞེས་ནང་མཆོད་དབུལ། གཙོ་བོ་ལ་མི་བསྐྱོད་རྡོ་རྗེ་ཞེས་སོགས་ཤོ་ལོ་ཀ་གཅིག་དང་ཁྲོ་བོ་བཅུ་ལ་གཏི་མུག་ཉེས་པ་འདོད་ཆགས་རྡོ་རྗེ་ཆོས་བཅས་གང་ཞེས་སོགས་ཀྱིས་བསྟོད། ཕུར་བུ་བསྒྲུབ་
ཚུལ་ནི་ཨོཾ་ཨཱཿ་བི་གྷྣན་ཏ་ཀྲིཏ་ཧཱུཾ་ཞེས་པས་ཕུར་བུ་རྣམས་བསངས། ཤཱུ་ནྱ་ཏཱས་ཕུར་བུ་རྣམས་སྟོང་པ་ཉིད་དུ་གྱུར་སྟོང་པའི་ངང་ལས་ཧཱུཾ་བཅུ་ལས་སྣ་ཚོགས་རྡོ་རྗེ་བཅུ། དེ་རྣམས་ཡོགས་སུ་གྱུར་
6-15-4b


པ་ལས་ཁྲོ་བོ་རྡོ་རྗེ་ཕུར་བུ་སྟོད་བདུད་རྩི་འཁྱིལ་པ་སྔོན་པོ་སྔོ་དཀར་དམར་བའི་ཞལ་གསུམ་ཞེས་པ་ནས། ལྟེ་བ་མན་ཆད་མདུང་རྩེ་གཅིག་པའི་དབྱིངས་ཅན་གྱི་ཕུར་བུ་མེ་དཔུང་རབ་ཏུ་འབར་བ་བཅུར་གྱུར། དེ་རྣམས་ཀྱི་སྤྱི་བོར་ཨོཾ་མགྲིན་པར་ཨཱཿ
ཐུགས་ཀར་ཧཱུཾ་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས་ཛཿ་ཧཱུཾ་བཾ་ཧཾཿ་གཉིས་སུ་མེད་པར་གྱུར། རང་གི་རིགས་བདག་དོན་གྲུབ་ཡབ་ཡུམ་གྱི་བྱང་ཆུབ་ཀྱི་སེམས་ཀྱིས་
དབང་བསྐུར། ཐོ་བ་བསངས་ལ་ཤཱུ་ནྱ་ཏཱས་རྡོ་རྗེའི་ཐོ་བ་སྟོང་པ་ཉིད་དུ་གྱུར་སྟོང་པའི་ངང་ལས་ཧཱུཾ་ལས་རྡོ་རྗེ་དེ་ཡོངས་སུ་གྱུར་པ་ལས། རྡོ་རྗེའི་ཐོ་བ་མེ་རབ་ཏུ་འབར་བར་གྱུར། མཆོད་པ་ཁྲོ་བཅུ་ལྟར་ཕུལ་ལ། རྡོ་རྗེ་བདུད་རྩི་རྒྱལ་པོ་ཆེ། །རྡོ་རྗེ་ཕུར་བུ་
རབ་ཏུ་འབར། །མེ་སྟག་འབར་བ་འདྲ་བ་ཡི། །ཕྱོགས་བཅུའི་དཀྱིལ་འཁོར་གདབ་པར་མཛོད། །ཅེས་བསྟོད། གནོད་མཛེས་ལ་བཀའ་བསྒོ་བའི་ཚེ་ལངས་ཏེ། ཨོཾ་སུཾ་བྷ་ནི་སུཾ་བྷ་ཧཱུཾ་ཕཊ་ཅེས་སོགས་སྔགས་ཚན་བཞི་ཕྱོགས་བཞིར་བརྗོད་ཅིང་
སེ་གོལ་གདབ། གྷ་གྷ་ཞེས་སོགས་ཀྱིས་ཕུར་བུ་བཙུགས་ལ་མུངྒ་རས་བརྡུངས་པའི་རྗེས་སུ་གནོད་མཛེས་ཀྱི་ཕྱག་མཚན་རྡོ་རྗེ་ལྕགས་ཀྱུ་དེ་རྡོ་རྗེ་ཐོ་བ་མེ་རབ་ཏུ་འབར་བར་གྱུར་པས། དབང་ལྡན་ནས་བརྩམས་ཏེ་རིམ་པ་བཞིན་དུ་ཕུར་བུ་
རྣམས་ཀྱི་སྤྱི་བོ་ནས་བརྡུངས་པས་ཞེས་སོགས་དང་། ཁྲོ་བོ་དང་ཕུར་བུ་ལས་རྡོ་རྗེའི་མེ་འོད་རབ་ཏུ་འབར་བ་ཕྱོགས་བཅུར་འཕྲོས་པས་བགེགས་ལྷག་མ་རྣམས་ཀྱང་རིང་དུ་བྲོས་པ་དང་སྟེང་འོག་དང་ཁོར་ཡུག་ཆེན་པོའི་བར་དུ་འགྲོ་བ་རྣམས། ཞེས་པ་
6-15-5a


ནས་བགེགས་དང་བྲལ་བར་གྱུར་ཅེས་དང་། སེམས་ཅན་ཐམས་ཅད་ལ་བདེ་བ་སྒྲུབ་པ་ལྷུར་ལེན་པའི་བསམ་པས་བདག་གིས་བླ་ན་མེད་པའི་བྱང་ཆུབ་བསྒྲུབ་པར་བྱའོ། །བདག་ལ་དངོས་གྲུབ་མཆོག་
སྩལ་ལགས་ཞེས་སོགས་བརྗོད་ནས་ཁྲོ་བོ་བཅུ་རང་བཞིན་གྱི་གནས་སུ་གཤེགས་པར་གྱུར། ལས་ཐིག་བསྐྱེད་པའི་ཚེ་སྔར་ལྷའི་རྣལ་འབྱོར་བསྒོམས་པའི་ཆོ་གའི་རྒྱུན་གཅིག་ཡིན་ན་རང་ཉིད་ཞེ་སྡང་རྡོ་རྗེར་གསལ་གདབ་མིན་ན་ཞེ་
སྡང་རྡོ་རྗེ་ཆོ་ག་གསུམ་གྱིས་བསྐྱེད། གནས་གསུམ་བྱིན་གྱིས་བརླབས་ཡེ་ཤེས་པ་གཞུག །དབང་བསྐུར་མཆོད་པའི་བར་རྣམས་བྱ་སྟེ་འོག་གི་སྐ་གཞན་དུ་ཡང་དེ་ལྟར་ཤེས་པར་བྱའོ། །ལས་ཐིག་བསངས་སྦྱངས་ལ་སྟོང་པའི་
ངང་ལས་ཧཱུཾ་ལས་སྣ་ཚོགས་རྡོ་རྗེ་དེ་ཡོངས་སུ་གྱུར་པ་ལས་བདུད་རྩི་འཁྱིལ་བ་སྔོན་པོ་ཞེས་པ་ནས་དགྲ་སྟ་འཛིན་པ། དེའི་སྤྱི་བོར་ཨོཾ་མགྲིན་པར་ཨཱཿ ཐུགས་ཀར་ཧཱུཾ། དེ་ནས་ཡེ་ཤེས་པ་སྤྱན་དྲང་བ་ནས་དབང་བསྐུར་བའི་བར་སྔར་
ཕུར་བུའི་སྐབས་བཞིན་བྱའོ། །མཆོད་པ་བསངས་སྦྱངས་ལ། ཨོཾ་ཨཱཿ་བི་གྷྣན་ཏ་ཀྲིཏ་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ་ཞེས་སོགས་ཀྱིས་ཆུ་གཉིས་ནས་རོལ་མོའི་བར་དང་། ནང་མཆོད་ཀྱིས་མཆོད། རྡོ་རྗེ་བདུད་རྩི་ཁྲོ་བོ་ཆེ། །འོད་ཟེར་འཕྲོ་བ་
རབ་ཏུ་འཁྲུག །དྲག་པོའི་འཁོར་ལོ་རབ་འབར་འདྲ། །འཇིགས་པ་དག་ཀྱང་འཇིགས་པར་བྱེད། །ཅེས་པས་བསྟོད། མིག་གཉིས་མ་དང་ཊ་ལས་ཉི་མ་དང་ཟླ་བ་སེར་པོར་གྱུར་ཅེས་དང་བཛྲ་ཌིཥྟི་མ་ཊ། མཆོད་བསྐྱེད་ཅེས་པའི་མཆོད་
6-15-5b


པ་ནི། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་མི་བསྐྱོད་པའི་དཀྱིལ་འཁོར་སྤྱན་དྲངས། ཞབས་བསིལ་དོར་བའི་མཆོད་ཡོན་ནས་རོལ་མོའི་བར་གྱིས་སྔར་རྡོ་རྗེ་འཆང་གི་སྐབས་ལྟར་མཆོད། མི་བསྐྱོད་
རྡོ་རྗེ་ཞེས་སོགས་ཚིགས་བཅད་གཅིག་གིས་བསྟོད། བསྐྱེད་ཅེས་པ་ནི། སློབ་མ་སྐད་ཅིག་གིས་རྣམ་སྣང་དཀར་པོ་དཀར་ནག་དམར་བའི་ཞེས་པ་ན། རལ་གྲི་འཛིན་པ་ཞེས་དང་། ཕྱོགས་ཐམས་ཅ་རང་བཞིན་མེད་པར་མཉམ་པ་ཉིད་དོ། །བདག་དང་སློབ་མའི་མིག་གཉིས་ཛཿ་ཛཿ་ལས་ཉི་མ་དང་ཟླ་བ་འོད་ཟེར་
སེར་པོ་ཅན་དུ་གྱུར། ཚངས་ཐིག་དང་པོ་བཏབ་པའི་རྗེས་སུ་རྐང་མཐིལ་གཉི་སུ་ཧཱུཾ་ཧཱུཾ་ལས་རྡོ་རྗེ་འབར་བཞེས་དང་། སྒོ་དབྱེ་ཞེས་པ་ནི། མིག་གཉིས་ཧིཿཧིཿ་ལས་
ཉི་མ་དང་ཟླ་བ་སེར་པོ་ཅན་གྱི་ལྷའི་སྐུ་སྒྱུ་མ་ལྟ་བུར་གྱུར་ཅེས་བརྗོད་ཅིང་དཀྱིལ་འཁོར་གྱི་ནང་ནས་ཤར་དུ་ཕྱོགས་ཏེ་གཡོན་བརྐྱངས་བྱས་ལ། ལག་པ་རྡོ་རྗེ་ཁུ་ཚུར་གཉིས་དཀུར་བཀན་ཏེ་བཞག་ལ་ཁྲོ་བོའི་ལྟ་བས་བལྟས་ཏེ་ཧིཿ་ཧིཿ
ཞེས་བརྗོད་ཅིང་། གཡོན་དང་གཡས་སུ་འགྱིང་བ་རེ་བྱས་ལ་ཧིཿཧིཿ་ཞེས་ཤར་གྱི་སྒོ་དབྱེ། སྒོ་གཞན་གསུམ་ཡང་དེ་ལྟར་བྱའོ། །ཕུར་བུ་བསངས་སྦྱངས་ལ་ཧཱུཾ་ལས་བྱུང་བའི་སེང་ལྡང་གི་ཕུར་བུ་སྟེང་རྡོ་རྗེ་རྩེ་ལྔ་པ་འོག་རྡོ་རྗེ་རྩེ་
གཅིག་པའི་རྣམ་པ་ཅན་དུ་གྱུར་ཅེས་དང་། གཏོར་མ་སྒྲུབ་ཐབས་བཞིན་བྱིན་གྱིས་བརླབས་ལ་ཨོཾ་ཨཱཿ བི་གྷཱན་ཏ་ཀྲིཏ་ཧཱུཾ་སརྦ་དུ་ཥྚན་ཅེས་སོགས་ལན་གསུམ་གྱིས་ཕུལ་ནས། ཆུ་གཉིས་རོལ་མོའི་བར་ནང་མཆོད་དང་བཅས་
6-15-6a


པ་སྔར་བཞིན་མཆོད་ནས། བདག་ལ་དངོས་གྲུབ་མཆོག་སྩོལ་ལགས་ཞེས་སོགས་ཀྱིས་ཐིག་སྐུད་ཀྱི་ཡེ་ཤེས་པ་གཤེགས་དམ་ཚིག་པ་རང་ལ་ཐིམ་པར་གྱུར་ཅེས་བརྗོད། སའི་ལྷ་མོའི་སྐབས་སུ་དགུག་གདབ་
སོགས་ནི། རང་ཉིད་ཞེ་སྡང་རྡོ་རྗེར་གསལ་བའི་ཐུགས་ཀའི་ཧཱུཾ་གི་འོད་ཟེར་གྱིས་སྦྱིན་དྲངས་པའི་གནོད་མཛེས་སྔོན་པོ་མི་བསྐྱོན་པའི་ཞེས་པ་ནས་རལ་གྲི་འཛིན་པ་མདུན་དུ་འདུག་སྟེ་བཀའ་ནོད་པ་ལ། ཨོཾ་སུཾ་བྷ་ནི་ཞེས་སོགས། ཕྱོགས་
མཚམས་རྣམས་སུ་ཧཱུཾ་རིང་པོ་ལས་གྲུབ་པའི་ཁྲོན་པ་འབྲུབ་ཁུང་གི་རྣམ་པ་ཅན་རྣམས་སུ་བཅུག་པར་གྱུར། རང་གི་ཐུགས་ཀའི་ཧཱུཾ་ལས་སྤྲོས་པའི་ཁྲོ་བོ་རྡོ་རྗེ་ཕུར་བུ་སྟོད་བདུད་རྩི་འཁྱིལ་པ་སྔོན་པོ་དོན་གྲུབ་ཀྱི་དབུ་རྒྱན་ཞེས་པ་ནས་གནོད་མཛེད་ཀྱི་ཕྱག་མཚན་རྡོ་
རྗེ་ལྕགས་ཀྱུ་དེ་རྡོ་རྗེ་ཐོ་བ་མེ་འབར་བར་གྱུར་པས་དབང་ལྡན་ནས་བརྩམས་ཏེ་རིམ་པ་བཞིན་ཕུར་བུའི་སྤྱི་བོ་ནས་བརྡུངས་པས་ཞེས་སོགས་དང་། གནོད་མཛེས་རང་བཞིན་གྱི་གནས་སུ་གཤེགས། ཊཱ་ཀྐི་ཧཱུཾ་ཛཿཕྱི་རོལ་
ཏུ་ལྕགས་ཀྱི་རྡོ་རྗེའི་ར་བ་ཞེས་པ་ནས་ཡེ་ཤེས་ཀྱི་མེ་རབ་ཏུ་འཕྲོ་བ་དང་། དཀྱིལ་འཁོར་གྱི་ས་གཞི་ཡང་རྡོ་རྗེའི་ས་གཞིར་གྱུར། སའི་ལྷ་མོ་བསྐྱེད་པའི་ཚེ་དཀྱིལ་འཁོར་གྱི་དབུས་སུ་བཾ་ལས་རླུང་བའི་སའི་ལྷ་མོ་སེར་མོ་ཞེས་པ་དང་། གསེར་
གྱི་བུམ་པ་བསྣམས་པ་པདྨའི་གདན་ལ་བཞུགས་པ་ཞེས་སོགས་དང་། བདག་ཉིད་ཀྱི་ལག་པ་གཡས་བར་སོགས། རྡོ་རྗེ་དང་བཅས་པའི་སོར་མོའི་རྩེ་མོ་ས་ལ་བསྣུན་པའི་སྒྲ་དང་བསྲེས་ཞེས་པའི་སྐབས་སུ་འདྲེས་ནས་ཞེས་པ་ནས་སྩོལ་ཅིག་ཅེས་གསུང་བར་
6-15-6b


གྱུར་ཅེས་དང་། གསོལ་གདབ་ཀྱི་སྐབས་སུ་དཀྱིལ་འཁོར་བྲི་ཞེས་གསོལ་བ་བཏབ་པས་དེ་ལྟར་གྱིས་ཤིག་ཅེས་པ་ནས་གནས་པར་གྱུར་ཅེས་དང་། བསྡམས་ཞེས་པའི་སྐབས་སུ་རྡོ་རྗེ་བསྡམས་པ་ལས་ཞེས་པ་ནས་བྱས་པར་གྱུར་ཅེས་པ་དང་། 
ལྷ་ལྷག་གནས་ཀྱི་སྐབས་སུ་ལྷའི་རྣལ་འབྱོར་ནི། སྔོན་འགྲོའི་གཏོར་མ་ནས་དང་པོ་སྦྱོར་བ་བསྒོམ་པའི་རྗེས་ལ་མཆོད་བསྟོད་བྱས་པས་བསྡུས་པའམ། ཡང་ན་དཀྱིལ་འཁོར་རྒྱལ་མཆོག་གི་མཐར་མཆོད་བསྟོད་བྱས་པས་རྒྱས་པ་བྱའོ། །རྟེན་བསྐྱེད་
ཚུལ་ནི་ཨོཾ་ཨཱཿབི་གྷྣཱན་ཏ་ཀྲིཏ་ཧཱུཾ་གིས་བསངས་ལ། དངོས་པོ་མེད་པས་སྒོམ་པ་མེད་ཅེས་སོགས་ནས་བྱང་ཕྱོགས་པ་རྣམས་ལ་སྣ་ཚོགས་རྡོ་རྗེའི་གདན་ཅེས་དང་། བརྟེན་པ་བསྐྱེད་ཚུལ་ནི། གདན་དེ་རྣམས་ཀྱི་སྟེང་དུ་ཧཱུཾ་ཁཾ་ནས་ཧཱུཾ་བཅུར་གྱུར། 
དེ་རྣས་ཡོངས་སུ་གྱུར་པ་ལས་རྡོ་རྗེ་གཉིས་ཞེས་པ་ནས་རྡོ་རྗེས་མཚན་པའི་དབྱུག་པ་སྔོན་པོ་དང་ནག་པོ་རྡོ་རྗེ་དང་རྡོ་རྗེ་དེ་རྣམས་ཡོངས་སུ་གྱུར་པ་ལས། ལྷ་སུམ་ཅུ་སོ་གཉིས་སུ་གྱུར་པ་ནི། གདན་དབུས་མའི་སྟེང་དུ་ཞེ་སྡང་རྡོ་རྗེ་སྐུ་མདོག་
མཐིང་ནག་མི་བསྐྱོད་པའི་དབུ་རྒྱན་ཅན་གཡས་རྡོ་རྗེ་རྩེ་དགུ་པ ཅེས་པ་ནས་གནོད་མཛེས་ཀྱི་བར་སྒྲུབ་ཐབས་བཞིན་བསྐྱེད་ལ། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་བསྒོམས་པའི་དཀྱིལ་འཁོར་ནམ་མཁར་བཏེག་པ་སྤྱན་དྲངས་ཛཿ་ཧཱུཾ་བཾ་
ཧོཿ་དམ་ཚིག་པའི་རྟེན་དང་བརྟེན་པའི་དཀྱིལ་འཁོར་ལ་ཡེ་ཤེས་པའི་རྟེན་དང་བརྟེན་པའི་དཀྱིལ་འཁོར་དབྱེར་མེད་དུ་ཐིམ་པར་གྱུར། ལྷ་སོ་སོའི་རིགས་བདག་ཞལ་གཅིག་ཕྱག་གཉིས་པ་ཡབ་ཡུམ་གྱིས་བྱང་ཆུབ་ཀྱི་སེམས་ཀྱི་
6-15-7a


ཆུ་རྒྱུན་གྱིས་ལྷ་སོ་སོ་ལ་དབང་བསྐུར་ཅེས་བརྗོད། ཨོཾ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱི་ཙྪ་ཧཱུཾ་སྭཱ་ཧཱ་སོགས་ཀྱིས་ཆུ་བཞི་ཐུན་མོང་དུ་དབུལ། ལྷ་ཡི་མེ་ཏོག་དམ་པ་འདིས་སོགས་ཀྱི་རྗེས་སུ་ལྷ་རེ་རེའི་མཚན་སྔགས་ཀྱི་རྗེས་སུ་མཆོད་སྔགས་རེ་རེ་སྦྱར་བའི་ཉེར་སྤྱོད་ཕྱག་རྒྱའི་རྣམ་པ་སྔོན་པ་སོགས་ཞེས་སོགས་འདོད་ཡོན་ལྔ་ཐུན་མོང་ནང་མཆོད་བསྟོད་པ། བུམ་པ་ལྷ་གནས་ལ་མགུལ་ཆིངས་སྐུད་ཅེས་པའི་སྐུད་པ་ནི་སྲད་བུ་དཀར་པོ་ཐ་དད་བདུན་གྱིས་བཅིང་བར་བྱའོ། །བསྐྱེད་པའི་ཚེ་བཾ་བཾ་ལས་བྱུང་བའི་རིན་པོ་
ཆེའི་བུམ་པ་དཀར་པོ་ལྟོ་བ་ཆེ་བ་མགྲིན་པ་རིང་བ་མཆུ་འཕྱང་བ་ལ་
སོགས་པའི་མཚན་ཉིད་ཐམས་ཅད་དང་ལྡན་པར་གྱུར། ཨོཾ་ཏཱ་པྟེ་ཞེས་པ་ནས་སྭཱ་ཧཱ་ལྷའི་ཆུ་བོ་གངྒཱ་དང་བུམ་པའི་ཆུ་གཉིས་དབྱེར་མེད་པར་གྱུར། རྣམ་
རྒྱལ་བུམ་པའི་ནང་དུ་སྣ་ཚོགས་པདྨའི་གདན་སུམ་ཅུ་རྩ་གཅིག་ཅེས་སོགས་ལྷ་སྟ་གོན་གྱི་སྐབས་ལྟར་ཞེས་སྡང་རྡོ་རྗེ་ནས་གནོད་མཛེས་ཀྱི་བར་རྣམས་ཆོ་ག་གསུམ་གྱིས་བསྐྱེད་ལ། བུམ་པའི་མཚན་མ་ལྔའི་གནས་སུ་ཐུན་མོང་གི་
གདན་སྣ་ཚོགས་པདྨ་རེ་རེ་ཐུན་མོང་མིན་པའི་གདན་ཉི་མ་དང་ཟླ་བ་དང་རིན་པོ་ཆེ་དང་པདྨ་དམར་པོ་དང་སྣ་ཚོགས་རྡོ་རྗེ་དེ་རྣམས་ཀྱི་སྟེང་དུ་ཧཱུཾ་ཨོཾ་སྭཱ་ཨཱཿ ཧཱ་རྣམས་ཡོངས་སུ་གྱུར་བ་ལས། རྡོ་རྗེ་འཁོར་ལོ་རིན་པོ་ཆེ། པདྨ་དམར་
པོ་སྣ་ཚོགས་རྡོ་རྗེ་དེ་རྣམས་ཡོངས་སུ་གྱུར་པ་ལས། དེ་བཞིན་གཤེགས་པ་ལྔར་གྱུར་པ་ནི། ཞེ་སྡང་རྡོ་རྗེ་སྐུ་མདོག་མཐིང་ནག་ཅེས་རྡོ་རྗེ་རྩེ་དགུ་པ་པ་ནས་རྡོ་རྗེའི་སྐྱིལ་མོ་ཀྲུང་གིས་བཞུགས་པ་ཞེས་བརྗོད་ལ་ཡུམ་མེད་
6-15-7b


པ་བསྐྱེད། རྣམ་ནང་དཀར་པོ་ཞེས་པ་ནས་དོན་གྲུབ་ལྗང་གུ་ཞེས་པའི་བར་རྣམས་བསྐྱེད་ལ། ལས་བུམ་གྱི་ནང་དང་མཚན་མའི་གནས་སུ་སྣ་ཚོགས་པདྨ་དང་ཉི་མའི་གདན་རེ་རེ་དེ་གཉིས་ཀྱི་སྟེང་དུ་ཧཱུཾ་ཧཱུཾ་ལས་སྣ་ཚོགས་རྡོ་རྗེ་གཉིས། དེ་གཉིས་
ཡོངས་སུ་གྱུར་པ་ལས་བགེགས་མཐར་བྱེད་གཉིས་སུ་གྱུར་པ་ནི། སྐུ་མདོག་སྔོན་པོ་དོན་གྲུབ་ཀྱི་དབུ་རྒྱན་ཅན་ཅེས་པ་ནས་དགྲ་སྟ་འཛིན་པ་རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱི་ཡེ་ཤེས་ཀྱི་འཁོར་ལོའི་ལྷ་
སུམ་ཅུ་རྩ་གསུམ་དང་། མཚན་མའི་ལྷའི་ཡེ་ཤེས་པ་རྣམས་སྤྱན་དྲངས། སྔར་རྡོ་རྗེ་འཆང་གི་སྐབས་ལྟར་ཆུ་གཉིས་ནས་རོལ་མོའི་བར་གྱིས་མཆོད་ལ། ཛཿ་ཧཱུཾ་བཾ་ཧོཿཡེ་ཤེས་པའི་འཁོར་ལོའི་ལྷ་སུམ་ཙུ་རྩ་གསུམ་དང་མཚན་མའི་ལྷའི་
ཡེ་ཤེས་པ་རྣམས་རང་རང་གི་དམ་ཚིག་པ་དང་གཉིས་སུ་མེད་པར་གྱུར། སྔ་མ་ལྟར་དབང་བསྐུར། ཨོཾ་སརྦ་ཏ་ཐཱ་ག་ཏ་ཨརྒྷཾ་པྲ་ཏཱི་ཙྪ་ཧཱུཾ་སོགས་ཀྱིས་མཆོད། བཟླས་པའི་ཚེ་བསྒྲུབ་གྲོགས་ཀྱི་པད་ཀོར་བྱས་ནས་རྡོ་རྗེའི་ཕྲེང་བ་གཏད་ལ། སློབ་དཔོན་གྱིས་ཀྱང་པད་ཀོར་བྱས་ཏེ་བླངས་ལ་དུང་ཆོས་
ཀྱི་བཟླས་པའི་མཐར་ཡེ་ཤེས་ཀྱི་བདུད་རྩི་ཞེས་པ་ནས་རང་བཞིན་དུ་གྱུར་ཅེས་དང་། བཟླས་བྱའི་སྔགས་ཀྱིས་བསྐོར་བའི་གཙོ་བོ་ཡབ་ཡུམ་གྱི་ཐུགས་ཀའི་ཧཱུཾ་དང་ཁཾ་ལས་ལྷའི་
ཚོགས་འཕྲོས་འགྲོ་བའི་དོན་བྱས་སླར་འདུས་ཏེ་ཐུགས་ཀའི་ཧཱུཾ་དང་ཁཾ་ལ་ཐིམ་པའི་སྤྲོ་བ་དང་བསྡུ་བའི་མཛད་པ་ཅན་དུ་གྱུར་ཅེས་གཙོ་བོའི་བཟླས་པ་བྱ། དེ་བཞིན་དུ་ལས་བུམ་གྱི་བཟླས་པའི་བར་ལ་སྦྱོར་རོ། ། མཆོད་ཡོན་མེ་ཏོག་ཕུལ་
6-15-8a


ཏེ། བུམ་པ་རྣམས་སྤོས་ཀྱིས་བདུག་པ་སོགས་དང་། ཇི་ལྟར་དཀྱིལ་འཁོར་གྱི་བྱ་བ་མ་ཟིན་གྱི་བར་དུ་བགེགས་རྣམ་པར་བཟློག་པའི་འཕྲིན་ལས་མཛོད་ཅིག །གཏོར་མ་སྒྲུབ་ཐབས་ལྟར་བྱིན་གྱིས་བརླབས་ལ། ལྷ་རྣམས་ཀྱི་ལྗགས་ཧཱུཾ་བྱུང་བའི་
རྡོ་རྗེ་རྩེ་གཅིག་པ་དམར་པོ་འོད་ཀྱི་སྦུ་གུ་ཅན་དུ་གྱུར་ཅེས་དང་། ཆུ་བཞི་ནས་ཀུ་རུ་སྭཱ་ཧཱ་ཞེས་པའི་བར་སྒྲུབ་ཐབས་ནས་འབྱུང་བ་ལྟར་ཕུལ་བའི་རྗེས་སུ། ཞལ་བསིལ་ནས་རོལ་མོའི་བར་དང་ནང་མཆོད་ཀྱིས་མཆོད་པ་རྣམས་ཀྱང་སྒྲུབ་ཐབས་
ལྟར་བྱའོ། ། མི་བསྐྱོད་རྡོ་རྗེ་སོགས་དང་། རྡོ་རྗེ་བདུད་རྩི་ཁྲོ་བོ་ཆེ་སོགས་ཀྱིས་བསྟོད་པའི་རྗེས་སུ་ལྷ་རྣམས་ཆགས་པ་ཆེན་པོའི་མེས་ཞུ་ནས་ཞེས་པ་ནས་རོ་གཅིག་ཏུ་འགྱུར། མཚན་མའི་ལྷ་རྣམས་ཀྱང་ཞུས་ནས་ལྷ་རང་རང་གི་ས་བོན་ནམ་ཕྱག་མཚན་གྱི་རྣམ་པར་གྱུར་ཅེས་དང་། ལྷ་ལ་གསོལ་བ་གདབ་པའི་
ཚེ་སྤྱན་དྲངས་མི་དགོས་ལ། སྤྲོ་བ་བསྐྱེད་པའི་རྗེས་སུ་སྔ་བཞིན་མཆོད་པ་ཕུལ་ལ། སྙན་མནན་པ་སོགས་སྔར་བཞིན་བྱས་པའི་རྗེས་སུ་བདག་ཉིད་ཀྱི་ལྕེ་ཧཱུཾ་ལས་བྱུང་བའི་རྡོ་རྗེར་གྱུར་
ནས། སྟ་གོན་གྱི་ལྷ་དང་ནམ་མཁར་གནས་པའི་དེ་བཞིན་གཤེགས་པ་རྣམས་ལ་གསོལ་བ་གདམ་པ་ནི། ཐུགས་རྗེ་ཡི་ནི་ཞེས་པ་ནས་མཛད་པར་འོས། ཞེས་གསོལ་བ་བཏབ་པས་དགྱེས་བཞིན་དུ་སྣང་བ་བྱིན་པར་གྱུར་ཅེས་དང་། སློབ་
མ་སྟ་གོན་གྱི་སྐབས་སུ་སློབ་མའི་གནས་གསུམ་བྱིན་གྱི་བརླབས་པའི་རྗེས་སུ་མེ་ཏོག་འབུལ་བའི་ཚེ་པུཥྤཾ་པྲ་ཏཱི་ཙྪ་ཧཱུཾ་ཞེས་སོགས་ཀྱི་སྔགས་བརྗོད། ། འདེགས་པའི་ཕྱག་རྒྱ་བྱས་ལ། སྟ་གོན་གྱི་དཀྱིལ་འཁོར་ནམ་མཁའ་ལ་བཞུགས་པར་གྱུར། དེ་ལ་དེ་ནུབ་ནས་
6-15-8b


མཆོད་པ་མ་ཆད་པ་བྱ། ནང་པར་སྔ་པོར་ལངས་ཏེ་མཆོད་པ་དང་། ཚོམ་བུ་མཐའ་ནས་བསྡུ་བ་སོགས་བྱས་ལ། རང་ཉིད་སྒྲུབ་ཐབས་རྫོགས་པའམ་ཞེ་སྡང་རྡོ་རྗེར་ཆོ་ག་གསུམ་གྱིས་བསྐྱེད་པ་གང་རུང་གིས་ཡེ་ཐིག་འདུ་བྱ་བ་ནི། ཡེ་ཐིག་གི་སྡོམས་ནི། བསྐོར་བསྒྱུར་གཉིས་བསྐྱེད་
བཏང་བཟུང་ལྟ། །གསོལ་གདབ་དགུག་སྒྲིལ་བྱུག་བཀོད་བཞག །མཆོད་བསྲུང་མིག་གཏོར་བཟླས་མཛེས་མཆོད། །ཕྱོགས་མིག་བཏང་བཟུང་ནམ་མཁར་གདབ། །ལྟ་ཞེས་པ་ནི་ནམ་མཁར་བཞུགས་སུ་གསོལ་བའི་ཞེས་པ་ནས་འོད་ཟེར་ལྔའི་
རང་བཞིན་ཅན་དུ་གྱུར་ཅེས་དང་། དགུག་ཅེས་པ་ལ་འབར་བའི་ལྟ་སྟངས་ཞེས་པ་ནས་སོ་སོ་ལ་ཐིམ་པར་གྱུར་ཅེས་དང་། བཀོད་ཅེས་པ་ནི། ཐིག་སྐུད་ཀྱི་ནང་གི་མཐའ་གཉིས་དང་དབུས་སུ་ཨོཾ་ཨཱཿཧཱུཾ་གིས་མཚོན་པར་གྱུར་ཅེས་དང་། 
ནམ་མཁར་གདབ་ཅེས་པ་ལ་ཐིག་གི་སྒྲས་སེམས་ཅན་དོན་དུ་ཞེས་པ་ནས་ཐིག་སྐུད་ལ་ཐིམ་པར་གྱུར་ཅེས་དང་། ས་ལ་གདབ་པའི་ཚེ་ངོ་བོ་ཡེ་ཤེས་ལ་ཞེས་པ་ནས་ཐིམ་པར་གྱུར་ཞེས་བརྗོད་དོ། །གཏོར་མ་ནི་ཨོཾ་ཨཱཿ་བཛྲ་དྷྲིཀ་ཧཱུཾ་ཛི་
ན་ཛིཀ་ཅེས་པ་ནས་ཀུ་རུ་སྭཱ་ཧཱ་ཞེས་པའི་བར་གྱིས་ཕུལ་ལ། ཆུ་གཉིས་ནས་ནང་ཀྱི་བར་གྱིས་མཆོད། གཤེགས་པའི་ཚེ་བདག་ལ་དངོས་གྲུབ་མཆོག་སྩལ་སོགས། ནམ་མཁར་བཞུགས་པའི་རྒྱལ་པ་རྣམས་ཀྱི་ཐུགས་ཀར་ཡེ་ཤེས་
ཀྱི་ཐིག་སྐུད་ཅེས་པ་ནས་གཤེགས་ཤིང་དམ་ཚིག་པ་རང་ལ་ཐིམ་པར་གྱུར་ཅེས་བརྗོད་དོ། །ཚོན་བྱིན་གྱིས་བརླབ་པ་ནི་ཚོན་སོ་སོ་ལ་ཧཱུཾ་ལ་སོགས་པའི་ས་བོན་སོ་སོ་བྲིས་ལ་ལྷ་བསྐྱེད་དོ། །དགུག་པ་ནི། འབར་བའི་ལྟ་སྟངས་
6-15-9a


ལྕགས་ཀྱུ་ལྟ་བུས་ནམ་མཁར་གནས་པའི་རིགས་ལྔའི་ཐུགས་ཀར་ཧཱུཾ་ཨོཾ་སྭཱ་ཨཱཿཧཱ་ལས་གྲུབ་པའི་ཡེ་ཤེས་ཀྱི་ཚོན་བཀུག་ནས་དམ་ཚིག་པ་སོ་སོ་དང་རོ་གཅིག་ཏུ་གྱུར་རྡུལ་ཚོན་སྔོན་པོ་ཧཱུཾ་ལས་མི་བསྐྱོད་པ་
ཞེས་པ་ནས་དོན་གྲུབ་ཀྱི་ངོ་བོར་གྱུར། ནམ་མཁར་བཞུགས་སུ་གསོལ་བའི་དེ་བཞིན་གཤེགས་པ་ལྔའི་ཐུགས་ཀར་ཧཱུཾ་ཨོཾ་སྭཱ་ཨཱཿ་ཧཱ་ལས་གྲུབ་པའི་ཡེ་ཤེས་ཀྱི་ཚོན་འོད་ཟེར་གྱི་རང་བཞིན་ཅན་དུ་གནས་པ་དང་། རང་གི་མིག་གཉིས་ཛཿ་ཛཿལས་ཞེས་པ་ནི་ཤི་ཛ། 
ཅེས་དང་། མིག་གཉིས་ཧིཿ་ཧིཿ ལ་སོགས། རྡུལ་ཚོན་རྣམས་ལ་ཡང་ཧེ་ཡིག་གིས་མཚོན་པར་གྱུར། མཆོད་ཅེས་པ་ནི། མེ་ཏོག་ནས་རོལ་མོའི་བར་རྣམས་སྔར་རྡོ་རྗེ་འཆང་གི་སྐབས་བཞིན་ཕུལ། བྲིས་ཟིན་པ་ན་མཆོད་གཏོར་ཡེ་ཐིག་གི་སྐབས་ལྟར་ཕུལ་ནས་ཡེ་ཤེས་ཡེ་ཤེས་ཀྱི་ཚོན་ཅེས་པ་ནས་ཡེ་ཐིག་བཞིན་པ་ནམ་མཁའི་དེ་བཞིན་གཤེགས་པ་ལྔའི་
ཐུགས་ཀར་གཤེགས་པར་གྱུར། དཀྱིལ་འཁོར་བསྒྲུབ་པའི་སྐབས་སུ་གདན་དེ་རྣམས་ཀྱི་སྟེང་དུ་ཞེས་པ་
ནས་ཨོཾ་ཨཱཿ་ཧཱུཾ་ཧཱུཾ་བཅུར་གྱུར། དེ་རྣམས་ཡོངས་སུ་གྱུར་པ་ལས་རྡོ་རྗེ་འཁོར་ལོ་རིན་པོ་ཆེ། པདྨ། རལ་གྲོ ། སྤྱན་རྡོ་རྗེ་པདྨ། ཨུཏྤལ། མེ་ལོང་། པི་ཝང་། དྲིའི་དུང་ཆོས། རོའི་སྣོད། ཀླུ་ཤིང་གི་མེ་ཏོག་སྡོང་བུ་དང་བཅས་
པ་འཁོར་ལོས་མཚན་པ། འཁོར་ལོ། རིན་པོ་ཆེ་གཉིས། པདྨ་གཉིས། རལ་གྲི་གཉིས། ཐོ་བ་རྡོ་རྗེས་མཚན་པའི་དབྱུག་པ། པདྨ། སྣ་ཚོགས་རྡོ་རྗེ། རལ་གྲི། ཞགས་པ། རལ་གྲི་དང་། རལ་གྲི། གཙུག་ཏོར་གྱི་མཚན་
6-15-9b


མ། ཞགས་པ། དེ་རྣམས་ཡོངས་སུ་གྱུར་པ་ལས་རིམ་གྱིས་ལྷ་སུམ་ཅུ་སོ་གཅིག་ཏུ་གྱུར་པ་ནི། ཞེས་དང་། ཡུམ་བསྐྱེད་པའི་ཚེ་རང་གི་ཐུགས་ཀ་ནས་རང་རིགས་ཀྱི་རིག་མ་ཕྱུང་ལ་སྟོང་པར་གྱུར། སྟོང་པའི་ངང་ལས་ཨོཾ་ཨཱཿཁཾ་ཧཱུཾ་ལས་གོས་ཁ་དོག་སྣ་ཚོགས་པ་དེ་ཡོངས་སུ་གྱུར་པ་ལས་
ཞེས་དང་། ཨོཾ་ཞེས་ནས་ཛཿཛཿཛཿའོག་མིན་ནས་སྤྱན་དྲངས་པའི་དེ་བཞིན་གཤེགས་པ་རྣམས་དམ་ཚིག་པ་རྣམས་དང་གཉིས་སུ་མེད་པ་གྱུར། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་
ཀྱུའི་རྣམ་པ་ཅན་གྱིས་ནམ་མཁར་བཏེགས་པའི་ལྷ་སྟ་གོན་གྱི་དཀྱིལ་འཁོར་སྤྱན་དྲངས། གོང་ལྟར་འདོད་ཡོན་ལྔས་མཆོད། ཛཿཧཱུཾ་བཾ་ཧོ་རང་རང་སོ་སོའི་དམ་ཚིག་པ་དང་གཉིས་སུ་མེད་པར་གྱུར། ཅེས་བརྗོད་དོ། །མདུན་བསྐྱེད་བསྒྲུབ་ཚུལ་
གཞན་བསམ་གཏན་གྱི་སྒྲུབ་མཆོད་ཀྱི་སྐབས་ལྟར་ཤེས་པར་བྱའོ། །མཆོད་པ། ཨོཾ་ཨཱཿབཛྲ་དྷྲིཀ་བཛྲ་སཏཱ་སྤཪྴ་བཛྲ་སོགས་ཀྱི་གཙོ་བོ་ཡབ་ཡུམ་རིགས་བདག་དེ་བཞིན་གཤེགས་པ་བཞི་ལ་སྡེ་ཚན་གཅིག །ལྷ་མོ་བརྒྱད། བྱང་སེམས་བརྒྱད། ཁྲོ་བོ་བཅུ་རྣམས་ལ་སྡེ་ཚན་རེ་རེ་ལ་ཆུ་བཞི་མཆོད་པའི་ང་རྒྱལ་ཡན་རེ་རེ། ཐུན་མོང་དུ་ན་བཟའ་རྒྱན་གདུགས་བུམ་པ་ང་རྒྱལ་བསྐོར་བ་སྟོད་པ་གཉིས་རྒྱུན་བཤགས་སྡོམ་གཟུང་གཉིས་བཟླས་གཏོར་སོགས་བྱའོ། ། ཕྱི་རོལ་པའི་གཏོར་མའི་སྐབས་སུ། རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱི་ཁྲོ་བོ་བཅུ་དང་ཕྱོགས་སྐྱོང་བཅོ་ལྔ་འཁོར་དང་བཅས་པ་
སྤྱན་དྲངས་ཏེ། ཕྱི་ནང་གི་ཕྱོགས་མཚམས་རྣམས་
སུ་གནས་པ་ན། ནང་གི་ཤར་དུ་གཤིན་རྗེའི་གཤེད་ནག་པོ་ཞེས་པ་ནས་འོག་ཏུ་
6-15-10a


གནོད་མཛེས་ཞེས་སོགས་དང་། ཕྱིའི་ཤར་དུ་རྡོ་རྗེ་མཚོན་ཆ་སེར་པོ་ཞེས་པ་ནས་ཡིག་བརྒྱ་བརྗོད་པའི་བར་རྣམས་སྒྲུབ་ཐབས་བཞིན་བྱས་ལ། ཁྱད་པར་ནི་ཉེར་སྤྱོད་འབུལ་བའི་ཚེ་ཨོཾཨཱཿབཛྲ་མཧཱ་ཀྲོ་དྷ་རཱ་ཛཱ་
ས་པ་རི་ཝཱ་ར་བུཥྤཾ་པྲ་ཏཱི་ཙྪ་ཞེས་སོགས་ཀྱིས་ནང་མཆོད་དང་བཅས་པ་དབུལ་ལོ། །ཇི་སྲིད་དུ་དཀྱིལ་འཁོར་གྱི་བྱ་བ་རྣམས་མ་རྫོགས་པ་དེ་སྲིད་དུ་བགེགས་རྣམ་པར་བཟློག་པའི་ཕྲིན་ལས་མཛོད་ཅིག་ཅེས་གསོལ་བ་གདབ། ཁྲོ་བོ་སོགས་
སུ་བཀོད་ནས་ཉི་མ་གཞན་ལ་གཏོར་མ་འབུལ་བའི་ཚེ་ཁྲོ་བོ་སོགས་སྤྱན་དྲང་མི་དགོས་པས། ཕྱི་ནང་གི་ཕྱོགས་མཚམས་རྣམས་སུ་འཁོད་ནས། གསལ་གདབ་བོ། །ཕྱི་རོལ་པའི་གཏོར་མ་ཕུལ་ནས་ནང་དུ་སླེབས་པ་དང་། རང་ཉིད་སྐད་ཅིག་
གིས་ཧཱུཾ་མཛད་སྔོན་པོ་ཞལ་གཅིག་ཕྱག་གཉིས་ཧཱུཾ་མཛད་ཀྱི་ཕྱག་རྒྱ་འཆིང་བ་གཡོན་བརྐྱངས་པའི་སྟབས་ཀྱིས་བཞུགས་པ་རྡོ་རྗེ་ཤུགས་ཀྱི་འཇུག་པས་དཀྱིལ་འཁོར་གྱི་ནང་དུ་ཞུགས་པར་གྱུར། སྐོར་བ་བྱེད་པའི་ཚེ་ཨོཾ་སུཾ་བྷ་ནི་ཞེས་
པ་ནས་བིདྱཱ་རཱ་ཛཱ་ཧཱུཾ་ཧཱུཾ་པཊ་པཊ་ཅེས་པའི་བར་བརྗོད་དེ་ཤར་སྒོ་ནས། ཨོཾ་མཆོག་ཏུ་བདེ་བའི་སེམས་ནི་རོལ་པར་ལྡན། །སྒེག་པའི་ཕྱག་གིས་མཅོམ་ལྡན་འདས་ལ་འདུད། །ཛཿཧཱུཾ་བཾ་ཧོཿ་ཧི་ཧི་ཧི་ཧི་ཧི། མགོན་པ་སྙིམ་པའི་མེ་ཏོག་
བཞེས་སུ་གསོལ། །ཅེས་པས་མེ་ཏོག་ཕུལ། ཕྱག་འཚལ་བའི་ཆེ་པྲ་ན་མ་མི་སོགས་བརྗོད། བདག་དང་སེམས་ཅན་ཐམས་ཅད་ལ་དངོས་གྲུབ་ཀྱི་བཀའ་དྲིན་སྩོལ་ཅིག ། དཀྱིལ་འཁོར་དུ་འཇུག་པའི་སྐབས་ཀྱི་ཆས་འཇུག་ཟིན་པའི་འོག་
6-15-10b


ཏུ་རང་ཉིད་རྣམ་སྣང་དཀར་པོ་ཞེས་པ་ནས་རལ་གྲི་འཛིན་པ་དེའི་ཐུགས་ཀར་རྡོ་རྗེ་ལ་གནས་པའི་ཉི་མའི་སྟེང་དུ་ཧཱུཾ་ནག་པོ་ཞེས་སོགས་དང་། ཡི་གེ་གསུམ་གྱི་འོད་ཟེར་གྱིས་ཞེས་སོགས། སངས་རྒྱས་བྱང་ཆུབ་ཡིད་ཀྱིས་བཟུང་ཞེས་ཐུན་མོང་གི་སྡོམ་པ་བཟུངས་པའི་རྗེས་སུ་སངས་རྒྱས་
དང་བྱང་ཆུབ་སེམས་དཔའ་ཐམས་ཅད་ཅེས་ནས་མྱ་ངན་འདས་ལ་འགོད་ཅེས་པའི་བར་གྱིས་ཐུན་མོང་མིན་པའི་སྡོམ་པ་བཟུངས། སེམས་བསྐྱེད་པའི་ཚེ་སེམས་ཅན་ཐམས་ཅད་ཀྱི་དོན་དུ་ཞེས་པ་
ནས་སྨོན་པའི་སེམས་ཀུན་རྫོབ་པ་དེ་ཉིད་སྙིང་གར་ཟླ་བའི་དཀྱིལ་འཁོར་ཡོངས་སུ་རྗོགས་པའི་རྣམ་པར་གྱུར་ཅེས་དང་། ཆོས་ཐམས་ཅད་ཅེས་པ་ནས་རང་གི་སེམས་རོ་གཅིག་ཏུ་གྱུར་པའི་དོན་དམ་པའི་བྱང་ཆུབ་ཀྱི་སེམས་ཟླ་བའི་སྟེང་དུ་རྡོ་
རྗེ་དཀར་པོ་རྩེ་ལྔ་པའི་རྣམ་པ་ཅན་དུ་གྱུར་ཅེས་སོགས་དང་། ཤར་སྒོ་ནས་ཕྱག་འཚལ་བའི་ཚེ་རང་ཡི་དམ། སློབ་མ་མི་བསྐྱོད་པར་གྱུར་ཨོཾ་ཞེས་སོགས་དང་། ཕྱག་ཟིན་པའི་རྗེས་སུ་དེ་བཞིན་གཤེགས་པ་ཐམས་ཅད་ལ་མཆོད་པ་དང་
ཕྱག་ཅེས་པ་ནས་བྱིན་གྱིས་རློབས་ཤིག་ཤར་སྒོ་ནས་གསོལ་བ་གདབ་པས་རྒྱལ་བ་ཐམས་ཅད་ལ་མཆོད་པ་དང་བསྙེན་བཀུར་བའི་ནུས་པ་ཅན་དུ་བྱིན་གྱིས་བརླབས་པར་གྱུར་ཅེས་དང་། དེ་བཞིན་དུ་ཕྱག་གཞན་རྣམས་ཀྱི་སྐབས་
སུ་ཡང་ཇི་ལྟར་རིགས་པར་བྱའོ། །ཡེ་ཤེས་དབབ་པའི་ཚེ་སློབ་མ་མངོན་བྱང་ལྔས་བསྐྱེད་ཚུལ་ནི། ཤཱུ་ནྱ་ཏཱས་སྟོང་པར་གྱུར། སྟོང་པའི་ངང་ལས་ཨོཾ་ལས་བྱུང་བའི་ཟླ་བའི་དཀྱིལ་འཁོར་གྱི་སྟེང་དུ། ཨཱཿ་ལས་བྱང་བའི་པདྨ་
6-15-11a


དམར་པོ་ཨཱཿས་མཚན་པ་དེ་ཡོངས་སུ་གྱུར་པ་ལས་འོད་དཔག་མེད་དམར་པོ་མི་བསྐྱོད་པའི་དབུ་རྒྱན་ཅན་ཅེས་པ་ནས་གཡོན་གཉིས་རིན་པོ་ཆེ་དང་རལ་གྲི་འཛིན་པ། གཡོན་བརྐྱངས་ཀྱི་སྟོབས་ཀྱིས་བཞུགས་པ་
དེའི་སྤྱི་བོར་ཧ་ཞེས་སོགས་དང་། རྡོ་རྗེ་གསུམ་ལུས་ཀྱི་ནང་དུ་ཐིམ་པས་སྤྱི་བོ་ནས་རྐང་མཐིལ་གྱི་བར་ཁོང་སྟོང་དུ་གྱུར། རྐང་པའི་འོག་ཏུ་ཡཾ་ལས་ཞེས་པ་ནས་ལུས་ཐམས་ཅད་སྦྱངས་ནས་ཡེ་ཤེས་སེམས་དཔའི་ངོ་བོ་རང་གི་རྣམ་པར་
ཤེས་པ་འོད་གསལ་དུ་ཞུགས། འོད་གསལ་གྱི་ངང་ལས་རང་ཉིད་འོད་དཔག་མེད་ཡི་གེ་གསུམ་དང་བཅས་པར་བཞེངས་པའི་སྙིང་གར་ཧཱུཾ་ལས་རྡོ་རྗེ་སེམས་དཔའ་སྔོན་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་རང་
འདྲ་བའི་ཡུམ་རེག་བྱ་རྡོ་རྗེ་མ་ལ་འཁྱུད་པ། མགྲིན་པར་ཨཱཿལས་འོད་དཔག་མེད་དམར་པོ་ཞལ་གཅིག་ཕྱག་གཉིས་ཀྱིས་པདྨ་དང་དྲིལ་བུ་འཛིན་པས་རང་འདྲ་བའི་ཡུམ་གོས་དཀར་མོ་ལ་འཁྱུད་པ་ཞེས་དང་། ཛྷཻའི་འོད་ཟེར་གྱིས་བསྐུལ་
པས་ཞེས་པ་ནས་ལུས་གང་བར་གྱུར། འདི་ཁྱོད་དམ་ཚིག་རྡོ་རྗེ་སྟེ་ཞེས་པ་དང་། སྤོགས་ཆོག་གི་ཚེ་རྡོ་རྗེ་འཆང་མངོན་བྱང་ལྔས་བསྐྱེད་ཚུལ་ནི། ཤཱུ་ནྱ་ཏཱས་སྟོང་པར་གྱུར། སྟོང་པའི་ངང་ལས་ཨོཾ་ལས་བྱུང་བའི་ཟླ་བའི་དཀྱིལ་འཁོར་གྱི་སྟེང་
དུ་ཨོཾ་ཨཱཿ་ཧཱུཾ་གི་ཡི་གེ་གསུམ་ཡོངས་སུ་གྱུར་པ་ལས་རྡོ་རྗེ་ཨོཾ་ཨཱཿ་ཧཱུཾ་གིས་མཚན་པ། དེ་ཡོངས་སུ་གྱུར་པ་ལས་རྡོ་རྗེ་འཆང་སྔོན་པོ་སྔོ་དཀར་དམར་བའི་ཞལ་གསུམ་ཞེས་པ་ནས། གཡོན་དྲིལ་བུ་རིན་ཆེན་རལ་གྲི་འཛིན་པ་དེ་ཡོངས་སུ་
6-15-11b


གྱུར་པ་ལས་ཞེ་སྡང་རྡོ་རྗེ་སྐུ་མདོག་མཐིང་ནག་ཅེས་པ་ནས་འོད་དམར་པོ་འབར་ཞིང་འཁྲུག་པའི་དབུས་ན་རྡོ་རྗེའི་སྐྱིལ་མོ་ཀྲུང་གིས་བཞུགས་པ། དེའི་ཐུགས་ཀར་ཧཱུཾ་ལས་རྡོ་རྗེ་སེམས་དཔའ་སྔོན་པོ་ཞེས་པ་ནས། སྤྱི་བོར་ཧ་ལས་རྣམ་སྣང་དཀར་པོ་
ཞལ་གཅིག་ཕྱག་གཉིས་ཀྱི་འཁོར་ལོ་དང་དྲིལ་བུ་ཛིན་པས་རང་འདྲ་བའི་ཡུམ་སྤྱན་མ་ལ་འཁྱུད་པ། ཡན་ལག་ཐམས་ཅད་ཨཱཿ་དམར་པོ་འོད་ཟེར་དང་བཅས་པ། དེའི་འོད་ཟེར་གྱིས་ཞེ་སྡང་རྡོ་རྗེའི་རྡོ་རྗེ་གསུམ་གྱི་ཡེ་ཤེས་ཆེན་པོ་བསྐུལ་
པས་ཞེས་པ་ནས། འོད་ཟེར་ཆར་ལྟར་འབབ་པར་གྱུར་ཨཱ་བེ་ཤ་ཞེས་སོགས་དང་། ཡེ་ཤེས་ཕབ་པ་གཤེགས་པའི་རྗེས་སུ་སྤྱི་བོར་ཨོཾ་མགྲིན་པར་ཨཱཿཐུགས་ཀར་ཧཱུཾ་ཞེས་དང་ལས་ཐམས་ཅད་པ་བརྗོད། བདག་འཇུག་གི་ཚེ་ཨོཾ་བཛྲ་ཨཱ་བེ་
ཤ་ཞེས་སོགས་ཀྱི་རྗེས་སུ་ཡིག་བརྒྱ་བརྗོད་དོ། །སྔར་གྱི་ཞེ་སྡང་རྡོ་རྗེ་ཡུམ་མེད་པ་བསྐྱེད་དོ། མེ་ཏོག་དོར་བའི་སྔ་རོལ་ཏུ་ལུས་དཀྱིལ་འགོད་པའི་ཚེ་རྣམ་སྣང་དཀར་པོ་མི་བསྐྱོད་པའི་དབུ་རྒྱན་ཅན་ཅེས་པ་ནས་གཡོན་དྲིལ་བུ་རིན་ཆེན་རལ་གྲི་
འཛིན་པ་ཞེས་པ་ནས། དེའི་ཐུགས་ཀར་ཧཱུཾ་མི་བསྐྱོན་པ་སྤྱི་བོར་ཨོཾ་ལས་རྣམ་སྣང་ཞེས་པ་ནས་རྐང་མཐིལ་གཉིས་སུ་ཧཱུཾ་ལས་གནོད་མཛེས་རྒྱལ་པོ་མི་བསྐྱོད་པ་ནས་གནོད་མཛེས་ཀྱི་བར་གྱི་ལྷ་རྣམས་རང་གི་ཕུང་པོ་དང་ཁམས་དང་
དབང་པོ་དང་ཡུལ་དང་ཡན་ལག་རྣམས་དང་དབྱེར་མེད་པར་གྱུར་ཅེས་དང་། མེ་ཏོག་དོར་བའི་ཚེ་རང་ཉིད་དཀྱིལ་འཁོར་གྱི་ནང་དུ་ཞུགས་གཙོ་བོ་འཁོར་བཅས་ཀྱི་མདུན་ན་གནས་པར་གྱུར་ཏིཥྛ་བཛྲ་ཞེས་སོགས་དང་། དཀྱིལ་འཁོར་སྟོན་པའི་
6-15-12a


ཚེ་སྒོམ་སྤང་གོ་ས་བོན་སྤངས་པས་དྲ་བ་དང་། མངོན་གྱུར་སྤངས་པས་དྲ་བ་ཕྱེད་པ་ཞེས་དང་། བརྟེན་པ་ལྷ་སྟོན་པའི་ཚེ་དབུས་སུ་ཞེ་སྡང་རྡོ་རྗེ་ཤར་དུ་རྣམ་སྣང་ཞེས་པ་ནས་འོག་ཏུ་གནོད་མཛེས་རྒྱལ་པོ་ཞེས་དང་། ལུས་དཀྱིལ་
སྟོན་ཚེ་ཕུང་པོ་ལྔའི་རང་བཞིན་དུ་ཞེས་པ་ནས་གཤིན་རྗེའི་དགྲ་སོགས་བསྟན་པར་བྱ་ཞེས་པའི་བར་བརྗོད། དབང་གི་དངོས་གཞིའི་སྐབས་སུ་ནང་དབང་བསྐུར་བའི་ཚེ་རང་ཉིད་བདག་འཇུག་ལེན་པ་ཡིན་ན། བསངས་པའི་རྗེས་སུ་བླ་མ་དང་གཙོ་བོ་
ཐ་མི་དད་པའི་ཐུགས་ཀའི་ཧཱུཾ་འོད་ཟེར་གྱིས་རང་ཉིད་དྲངས་པ་ཞལ་ནས་ཞུགས། སྐྱའི་དབྱིབས་བརྒྱུད་རྡོ་རྗེའི་ལམ་ནས་ཡུམ་གྱི་པདྨར་འཐོན་པ་སྐད་ཅིག་གིས་སྟོང་པར་གྱུར། སྟོང་པའི་ངང་ལས་ཧཱུཾ་ལས་རྡོ་རྗེ་ཧཱུཾ་གིས་མཚན་པ་དེ་ཡོངས་སུ་གྱུར་
པ་ལས་མི་བསྐྱོད་པ་མཐིང་ནག་ནག་དཀར་དམར་བའི་ཞལ་གསུམ་ཞེས་པ་ནས། གཡོན་དྲིལ་བུ་རིན་ཆེན་རལ་གྲི་འཛིན་པ། མཱ་མ་ཀཱི་སྔོན་མོ་ཞལ་གསུམ་ཞེས་པ་ནས་གཡོན་དྲིལ་བུ་རིན་ཆེན་རལ་གྲི་འཛིན་པས་འཁྱུད་པ། བླ་མ་དང་གཙོ་
བོ་ཐ་མི་དད་པའི་ཐུགས་ཀའི་ཧཱུཾ་གི་འོད་ཟེར་གྱིས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས་གཉིས་སུ་མེད་པར་གྱུར། བླ་མ་དང་གཙོ་བོ་ཐ་མི་དད་པའི་ཐུགས་ཀའི་ཧཱུཾ་གི་འོད་ཟེར་གྱིས་ཕྱོགས་བཅུ་ན་བཞུགས་པའི་རྒྱལ་བ་ཡབ་ཡུམ་མདུན་གྱི་སོགས། ཞེས་པ་
ནས་སྤྱན་དྲངས། ཨོཾ་སརྦ་ཏ་ཐཱ་ག་ཏ་ཨརྒྷཾ་ཞེས་སོགས་དང་། འདི་དང་དབང་དངོས་གཞིའི་སྐབས་ཀྱི་འོག་ནས་འབྱུང་བའི་མཆོད་པ་རྣམས་སྔར་རྡོ་རྗེ་འཆང་གི་མཆོད་པའི་སྐབས་བཞིན་ཆུ་
6-15-12b


གཉིས་ནས་རོལ་མོའི་བར་དབུལ་ལོ། །སྩལ་དུ་གསོལ་ནམ་མཁའི་རྒྱལ་བ་ཡབ་ཡུམ་རྣམས་ཞེས་པ་ནས་རྡོ་རྗེའི་ལམ་ནས་བྱུང་བའི་བྱང་ཆུབ་ཀྱི་སེམས་རང་མི་བསྐྱོད་པར་བྱ་པ་ལ་དབང་བསྐུར་ཏེ། ཡུམ་གྱི་པདྨ་ནས་ཕྱུང་དཀྱིལ་འཁོར་གྱི་
ཤར་དུ་ཁྲུས་དཀྱིལ་གྲུ་བཞི་སྒོ་བཞི་པ་ཕྱི་ནས་རིམ་པ་བཞིན་དཀར་དམར་ནག་པའི་རྩིག་པ་རིམ་པ་གསུམ་དང་ལྡན་པ་འཕར་མ་གཉིས་དང་ལྡན་པའི་དབུས་སུ་སྣ་ཚོགས་པདྨ་འདབ་མ་བརྒྱད་པའི་དབུས་སུ་རྡོ་རྗེ་ནག་པོ་ཤར་དུ་འཁོར་ལོ་དཀར་
པོ། ལྷོར་རིན་ཆེན་སེར་པོ་ནུབ་ཏུ་པདྨ་དམར་པོ་བྱང་དུ་རལ་གྲི་ལྗང་གུས་མཚན་པ། དེའི་སྟེང་དུ་ཤིང་སྟན་ལ་གནས་པའི་སྣ་ཚོགས་པདྨའི་སྟེང་དུ་འཁོད་པར་གྱུར། དབང་རྫས་བུམ་ཆུ་བསྐྱེད་པའི་སྐབས་སུ་ཨོཾ་ཨཱཿ བི་གྷྣཱན་ཏ་ཀྲིཏ་ཧཱུཾ། ཨོཾ་
ཤཱུ་ནྱ་ཏཱ་ཛྙ་ན་བཛྲ་སྭ་བྷཱ་ཝ་ཨཱ་ཏྨ་ཀོ྅ཧཾ་བུམ་ཆུ་སྟོང་པ་ཉིད་དུ་གྱུར། སྟོང་པའི་ངང་ལས་ཧཱུཾ་ལས་རྡོ་རྗེ་ཧཱུཾ་གིས་མཚན་པ་ཞེས་སྔར་བཞིན་བསྐྱེད་ལ། ཁྱད་པར་འདིར་ཡབ་ཡུམ་གཉིས་རིགས་བདག་དང་བཅས་པ་བསྐྱེད་དོ། རིག་པའི་
དབང་འོག་མ་རྣམས་ཀྱི་སྐབས་སུའང་དེ་ལྟར་ཤེས་པར་བྱའོ། །བླ་མ་དང་ཐ་མི་དད་པའི་གཙོ་བོ་ཡབ་ཡུམ་སྙོམས་པར་ཞུགས་པའི་བྱང་ཆུབ་ཀྱི་སེམས་ཀྱི་འོད་ཟེར་གྱིས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། 
གཉིས་སུ་མེད་པར་གྱུར། རང་གི་རིགས་བདག་ཡབ་ཡུམ་གྱི་བྱང་ཆུབ་ཀྱི་སེམས་ཀྱིས་དབང་བསྐུར་ཅེས་དང་། མཆོད་པའི་རྗེས་སུ་མི་བསྐྱོད་པ་ཡབ་ཡུམ་ཞུ་བ་ལས་བྱུང་བའི་ཆུར་གྱུར། བླ་མ་དང་ཐ་མི་དང་པའི་གཙོ་བོ་ཡབ་ཡུམ་སྙོམས་
6-15-13a


པར་ཞུགས་པའི་བྱང་ཆུབ་ཀྱི་སེམས་ཀྱི་འོད་ཟེར་གྱིས་རྒྱལ་བ་ཡབ་ཡུམ་འཁོར་བཅས་ཐམས་ཅད་རང་ལ་དབང་བསྐུར་ཕྱིར་དུ་བསྐུལ་ཏེ། སྤྱན་དྲངས་པ་རྣམས་ནམ་མཁར་འཁོད་ནས་བསྒྲུབ་པའི་དཀྱིལ་འཁོར་པ་རྣམས་
ཀྱིས་དབང་བསྐུར་བའི་དགོངས་པ་མཛད་ཅེས་པ་ནས་ཕྱོགས་མཚམས་སུ་འཁོར་ནས་བགེགས་བསྐུད་པར་གྱུར་ཅེས་དང་། ཨོཾ་ཨཱཿཞེས་པ་ནས་སུར་ཏ་སྟྭཾ་ཨ་ཧཾ་ཞེས་དབང་བསྐུར་བས་ཞེས་སོགས་དང་། དབང་ལྷ་བསྟིམས་པའི་སྐབས། བླ་
མ་དང་གཙོ་བོ་ཐ་མི་དད་པའི་ཐུགས་ཀའི་ཧཱུཾ་གི་འོད་ཟེར་གྱིས་ཞེས་པ་ནས་རང་གི་བ་སྤུའི་སྒོ་ནས་ཐིམ་པར་གྱུར་ཅེས་དང་། ཆུ་དབང་གི་དགེ་པའི་རྗེས་སུ་བརྒྱན་ཅིང་གླུ་བླང་བ་དང་བསྐོར་བ་རྣམས་བྱའོ། །འདི་ལས་གཞན་རྣམས་ཀྱི་སྐབས་སུ་བརྒྱན་
ཅིང་གླུ་བླང་བསོགས་མི་དགོས། རིག་པའི་དབང་ཐ་མ་བཞིའི་ནང་དབང་བསྐུར་བའི་རྗེས་སུ་ཡུམ་གྱི་པདྨ་ནས་ཕྱུང་རང་གནས་སུ་འཁོད་པར་གྱུར་ཅེས་དང་། རིག་པའི་དབང་འོག་མ་རྣམས་ཀྱི་སྐབས་སུ་ཤེས་པ་རྣམས་མ་བརྗོད་ཀྱང་ཆོག་པས་
ཕྱོགས་མཚམས་སུ་འཁོད་ནས་བགེགས་བསྐྲད་པར་གྱུར། དབང་བསྐུར་རྡོ་རྗེ་ཆེན་པོ་སྟེ་ཞེས་སོགས་དང་། ཤིས་བརྗོད་ནས། དབུ་རྒྱན་གྱི་དབང་གི་ཚེ་བཀྲ་ཤིས་གང་ཞིག་མ་ལུས་རིན་ཆེན་རིགས་དང་ལྡན་ཅེས་སོགས་རང་རང་གི་ཕྱོགས་ཀྱི་
ཚིགས་བཅད་རེ་རེ་བརྗོད། ས་བོན་ཏྲཾ་ཧྲཱིཿཨཱཿལས་བྱུང་བའི་དྲིལ་བུ་སྟོང་པ་ཉིད་དུ་གྱུར། སྟོང་པའི་ངང་ལས་ཁཾ་ལ་སོགས། འོག་མ་རྣམས་ལའང་དབང་རྫས་ཀྱི་ཡེ་ཤེས་པ་དང་། དབང་ལྷ་བསྐྱེད་པ་བུམ་དབང་བཞིན། འོག་མ་རྣམས་ཀྱི་བུམ་ཆུའི་སྔགས་ཀྱི་མཐའི་སྭཱ་ཧཱ་མེད་པར་ཧཱུཾ་གི་གོང་དུ་
6-15-13b


ཨཱཿ་བཅུ་ནས་ཨོཾ་གྱི་འོག་ཏུ་ནི་དཀྱིལ་ཆོག་བཞིན་མི་འདུག་གོ། ཁྱད་པར་དབུ་རྒྱན་གྱི་དབང་གི་སྐབས་སུ་ཕྱོགས་མཚམས་སུ་འཁོད་ནས་བགེགས་བསྐྲད་པར་གྱུར། ཨོཾ་བཛྲ་དྷཱ་ཏཱི་ཞེས་སོགས་དང་། དབང་རྫས་དབུ་རྒྱན་བསྐྱེད་པའི་ཚེ་ཡུམ་མཱ་མ་ཀཱི་སྔོན་མོ་
རིན་འབྱུང་གི་དབུ་རྒྱན་ཅན་ཅེས་པ་ནས་གཡས་ནོར་བུ་འཁོར་ལོ་ཨུཏྤལ་ལ་སྔོ་དམར་ཞེས་དང་། རིག་པའི་དབང་འོག་མ་རྣམས་ཀྱི་དག་པ་བརྗོད་པའི་ཚེ། དེ་ལྟར་བུམ་དབང་དགུ་ལས་རིན་ཆེན་འབྱུང་ལྡན་ཅོད་པན་གྱི་དབང་ཐོབ་ཅེས་སོགས་སྦྱར་
རོ། ། རང་གི་མིན་གཉིས་སུ་ཡི་གེ་བྲཾ་རེ་རེ་། མིག་ཕྱེ་བའི་རྗེས་སུ་རབ་རིབ་རྒྱལ་བ་རྣམས་ཀྱིས་བསལ། །མ་རིག་པའི་ཞེས་པ་ནས་ཕྱེ་བར་གྱུར་ཅེས་དང་། ཨ་ལས་བྱུང་བའི་མེ་ལོང་དུ་གྱུར། སློབ་དཔོན་གྱི་དབང་ལ། ཕྱག་མཚན་གྱི་དབང་བསྐུར་བའི་ཚེ་རང་དང་འཁོར་ལོ་རྣམ་སྣང་དུ་གྱུར། རྣམ་པར་སྣང་མཛད་ཞུ་བ་
ལས་བྱུང་བའི་འཁོར་ལོ་སེམས་ཅན་ཀུན་ལ་ཞེས་དང་། དྷརྨ་ཙ་ཀྲ་ཞེས་བརྗོད་དེ་དབང་བསྐུར་བས་དེ་བཞིན་གཤེགས་པའི་རིགས་ཀྱི་འཁོར་ལོ་བསྐོར་བའི་འཁོར་ལོ་བསྒྱུར་རྒྱལ་དུ་ 
བར་དབང་བསྐུར་ཞེས་དང་། གཞན་གསུམ་ལའང་དེས་རིགས་བསྒྲེས་ལ་ཤེས་པར་བྱའོ། །དེ་བཞིན་གཤེགས་པའི་རིགས་པའི་རིམ་པ་ལྟར་རིན་པོ་ཆེའི་རིགས་དང་། པདྨའི་རིགས་དང་། ལས་ཀྱི་རིགས་དང་ཞེས་པས་
བརྗེའོ། །ཡུམ་བར་གྱུར་གྱི་མཁའ་གསང་བསྐྱེད་པའི་སྐབས་སུ་ཧཱུཾ་ལས་རྡོ་རྗེ་ཧཱུཾ་གིས་མཚན་པ་དེ་ཡོངས་སུ་གྱུར་པ་ལས་རྡོ་རྗེ་འཆང་དཀར་པོ་ཞལ་གཅིག་ཕྱག་གཉིས་ཀྱིས་རྡོ་རྗེ་དང་དྲིལ་བུ་འཛིན་པ། རྡོ་རྗེ་དབྱིངས་ཀྱི་དབང་ཕྱུག་མ་དཀར་
6-15-14a


མོ་རྡོ་རྗེ་དང་དྲིལ་བུ་འཛིན་པ་ལ་འཁྱུད་པ་ཞེས་དང་། པདྨ་ནས་ཕྱུང་སྟེ་དཀྱིལ་འཁོར་གྱི་ཤར་དུ་ཁྲུས་ཀྱི་དཀྱིལ་འཁོར་གྲུ་བཞི་ཞེས་པ་ནས་བྱང་དུ་རལ་གྲི་ལྗང་གུས་མཚན་པ་ལ་གནས་པའི། །སེངྒེའི་ཁྲིའི་སྟེང་དུ་སྣ་ཚོགས་པདྨ་དང་ཟླ་བའི་གདན་ལ་
འཁོད་ཅེས་དང་། རྡོ་རྗེའི་དམ་ཚིག་སྦྱིན་པའི་སྐབས་སུ་སྟོང་པ་ཉིད་དང་དབྱེར་མེད་པའི་ཞེས་པ་ནས་དེ་དྲན་པའི་དོན་དུ་རྡོ་རྗེ་འཛིན་པར་བྱེད་པའི་རྡོ་རྗེའི་དེ་ཁོ་ན་ཉིད་ཀྱི་སྒོ་ནས་ཟུངས་ཤིག་ཅེས་དང་། དྲིལ་བུའི་དམ་ཚིག་གི་སྐབས་སུ་ཆོས་ཐམས་ཅད་རང་བཞིན་མེད་པའི་སྒྲ་དྲིལ་
བུས་སྒྲོགས་པར་སེམས་པའི་སྒོ་ནས་དྲིལ་བུ་འཛིན་པར་བྱེད་པའི་དྲིལ་བུའི་དེ་ཁོ་ན་ཉིད་ཀྱི་སྒོ་ནས་ཟུངས་ཤིག་ཅེས་དང་། ཕྱག་རྒྱའི་དམ་ཚིག་གི་སྐབས་སུ་རྡོ་རྗེ་སེམས་དཔའི་རྣལ་འབྱོར་དང་ལྡན་པས་ཡེ་ཤེས་ཀྱི་ཕྱག་རྒྱ་འདུ་བྱས་ནས་ཞེས་པ་ནས་དངོས་གྲུབ་ཐམས་
ཅད་བསྒྲུབ་པར་བྱའོ། ཞེས་པ་དང་། ཆུ་དབང་བསྐུར་བའི་ཚེ་བླ་མ་དང་གཙོ་བོ་ཐ་མི་དད་པའི་ཐུགས་ཀའི་ཏིང་ངེ་འཛིན་སེམས་དཔའི་འོད་ཟེར་གྱིས་དབང་གི་ལྷ་རྣམས་སྤྱན་དྲངས་ཏེ་རང་གི་སྙིང་ག་ལ་སོགས་པའི་གནས་རྣམས་སུ་འཁོད་པ་ནི། སྙིང་གར་མི་བསྐྱོད་
པ་སྤྱི་བོར་རྣམ་སྣང་ཞེས་པ་ནས་རྐང་མཐིལ་གཉིས་སུ་གནོད་མཛེས་རྒྱལ་པོ། མི་བསྐྱོད་པ་ནས་གནོད་མཛེས་ཀྱི་བར་གྱི་ལྷ་རྣམས་རང་གི་ཕུང་པོ་དང་ཁམས་དང་། དབང་པོ་དང་ཡུལ་དང་ཡན་ལག་རྣམས་དང་དབྱེར་མེད་པར་གྱུར་ཅེས་དང་། སྔགས
ཀྱི་དབང་བསྐུར་བའི་ཀྶ་སུ་རང་ཞེ་སྡང་རྡོ་རྗེ་སེམས་དཔའ་སུམ་རྩེགས་ཅན་དུ་གྱུར། བླ་མ་དང་གཙོ་བོ་ཐ་མི་དད་པ་ཞེ་སྡང་རྡོ་རྗེར་གྱུར་པའི་ཐུགས་ཀར་སྣ་ཚོགས་པདྨ་དང་ཟླ་བའི་གདན་ལ་ཡེ་ཤེས་སེམས་དཔའ་སྐུ་མདོག་དམར་པོ་ཞེས་པ་ནས་རྡོ་
6-15-14b


རྗེ་སྔོན་པོའི་ལྟེ་བའི་ནང་དུ་ཏིང་ངེ་འཛིན་སེམས་དཔའི་ཧཱུཾ་ཡིག་སྔོན་པོའི་མཐར། ། འདིར་ཧཱུཾ་སོགས་ས་བོན་ལྔ་ཀ་འདུག །ཨོཾ་ཞེས་པ་ནས་སྭཱ་ཧཱ་རྣམས་གཡས་སྐོར་དུ་གནས་པར་གྱུར་ཅེས་དང་། རྗེས་ཟློས་ལན་གསུམ་བྱས་པའི་རྗེས་སུ་སྔགས་ཀྱི་འཕྲེང་བ་བླ་མའི་ཐུགས་ཀ་ནས་བརྒྱུད་ཅེས་པ་ནས་
མཐའ་སྐོར་ན་གནས་པར་གྱུར་ཅེས་དང་། ཕྲེང་སོགས་བླང་བའི་སྐབས་སུ་རང་ཉིད་རྣམ་སྣང་དུ་གྱུར་ཕྲེང་པ་ལ་སོགས་ཞེས་དང་། རྡོ་རྗེ་བརྟུལ་ཞུགས་ཀྱི་སྐབས་སུ་རང་ཉིད་མི་བསྐྱོད་པར་གྱུར་ཧཱུཾ་ལས་བྱུང་བའི་རྡོ་རྗེ་འདི་དེ་ཞེས་དང་། 
གསང་དབང་ལ་གཉིས་བསྐྱེད་ཅེས་སོགས་ཀྱི་སྐབས་སུ་རང་རྣམ་སྣང་དཀར་པོ་དཀར་ནག་བའི་ཞལ་གསུམ་ཞེས་པ་ནས་རལ་གྲི་འཛིན་པར་གྱུར། བླ་མ་དང་གཙོ་བོ་ཐ་མི་དད་པ་ཞེ་སྡང་རྡོ་རྗེ་སེམས་དཔའ་སུམ་བརྩེགས་ཅན་དུ་གྱུར། ཤཱུ་ནྱ་ཏཱས་རིག་མ་
སྟོང་པར་གྱུར། སྟོང་པའི་ངང་ཁོ་ལས་རྡོ་རྗེ་དེ་ཡོངས་སུ་གྱུར་པ་ལས། རེག་བྱ་རྡོ་རྗེ་མ་སྔོན་མོ་མི་བསྐྱོད་པའི་དབུ་རྒྱན་ཅན་ཅེས་པ་ནས་འདོད་པའི་ཡོན་ཏན་ལྔའི་དགའ་བས་རོལ་པ། དེའི་སྤྱི་གཙུག་ནས་སྐྲ་མཚམས་ཀྱི་བར་དུ་ཨོཾ་དཀར་པོ་ལས་
རྣམ་སྣང་དཀར་པོ་ཞེས་པ་ནས་ལྟེ་བ་ནས་བརླའི་རྩ་བའི་བར་དུ་ཧཱ་ལྗང་གུ་ལས་དོན་གྲུབ་ཅེས་སོགས་དང་། ཡབ་ཀྱི་གསང་གནས་མི་དམིགས་པའི་ངང་ལས་ཞེས་པ་ནས་ལས་ལ་གནས་པའི་བར་སྒྲུབ་ཐབས་བཞིན་བྱས་ལ། ཁྱད་པར་ནི། མི་
བསྐྱོད་པར་གྱུར་ཧཱུཾ་སྙོམས་པར་འཇུག་པའི་ལས་ལ་གནས་པར་བྱས་པའི་སྦྱོར་མཚམས་ནས་འཕྲོས་པའི་འོད་ཟེར་གྱི་ཞེས་པ་ནས། བླ་མ་དང་གཙོ་བོ་ཐ་མི་དད་པའི་སྐུའི་དཀྱིལ་འཁོར་ལ་གནས་པ་རྣམས་གཙོ་བོའི་ཐུགས་ཀར་བསྡུས་པ་
6-15-15a


ཆགས་པ་ཆེན་པོའི་མེས་ཞུ་སྟེ་ཞེས་པ་ནས་ལྷ་རྣམས་ཞུ་བའི་ཐིག་ལེར་གྱུར་ཅེས་དང་། གསང་རྫས་ལྕེ་ཐོག་ཏུ་བཞག་པའི་ཚེ་སངས་རྒྱས་ཐམས་ཅད་ཞུ་བ་འདུས་པའི་ངོ་བོས་རང་གི་ལུས་ལ་ཞེས་པ་ནས། མི་གཡོ་
བའི་བསམ་པས་མྱངས་ཨ་ཧོ་མཧཱ་སུ་ཁ་ཞེས་པ་དང་། གསང་དབང་ཙམ་གྱི་རྫས་བསྒྲུབ་པའི་སྐབས་སུ་ཨོཾ་ཨཱཿཧཱུཾ་ཞེས་བརྗོད་ལ་སྒྲུབ་ཐབས་ནས་འབྱུང་བའི་གཏོར་མ་ལྟར་བྱིན་གྱིས་བརླབས། འདིའི་སྐབས་ཀྱི་ཤིས་བརྗོད་སློབ་མ་ལ་བྱེད་པ་ཡིན་ནོ། །
གསང་དབང་ཙམ་བསྐུར་ཟིན་པའི་འོག་ཏུ་བླ་མ་ཡབ་ཡུམ་གྱི་བྱང་སེམས་དཀར་དམར་མྱངས་པས་བདེ་བ་སྐྱེས་པ་རང་བདེ་བ་དེས་སྟོང་པ་ངེས་པའི་བདེ་སྟོང་དབྱེར་མེད་དུ་སྦྱར་བ་དེ་གསང་བའི་དབང་གི་ངོ་བོ་ཡིན་ལ། དེའི་མཐུས་རང་ལྷར་བསྒོམས་པའི་
ལྷ་སྐུ་སྒྱུ་མ་དང་། འཇའ་ཚོན་བཞིན་དུ་འཆར་ཞིང་། ད་ལྟ་ལྷའི་སྐུ་འཇའ་ཚོན་དང་། སྒྱུ་མ་བཞིན་དུ་སྣང་བ་འདི་དང་འདྲ་བའི་སྒྱུ་མའི་སྐུ་བགྲུབ་པར་འགྱུར་རོ། །ཞེས་བརྗོད་དོ། །གཞན་ལ་དབང་བསྐུར་བའི་ཚེ་དེ་ལྟར་བླ་མ་ཡབ་ཡུམ་གྱི་བྱང་སེམས་དཀར་
དམར་ལྕེས་མྱངས་པ་རྩའི་སྤུབས་རྣམས་སུ་ཕྱིན་པ་ན་ཞེས་པ་ནས། ལྷ་སྐུ་སྒྱུ་མ་དང་འཇའ་ཚོན་ལྟ་བུར་ངེས་དགོས་པས་ཁྱེད་ཀྱིས་ལུས་ལ་གནས་དུ་བསྣུན་པའི་གདམས་ངག་གིས་རླུང་ཤིན་ཏུ་དུལ་བར་སྦྱངས་པ་ན་ཞེས་པའི་བར་དང་། དེའི་མཐུས་ཞེས་
པ་ན་འགྲུབ་པར་འགྱུར་རོ། །ཞེས་བརྗོད་དོ། །ཤེས་རབ་ཡེ་ཤེས་ཀྱི་དབང་ལ་རིག་མ་གཏད་པའི་སྐབས་སུ་བྱིན་གྱིས་བརླབ་པ་ནི། གསང་དབང་གི་སྐབས་ལྟར་སྟོང་པར་སྦྱངས་ནས་གནས་ལྔར་རིགས་ལྔ་བསྐྱེད་པའི་བར་སྔར་བཞིན་བྱའོ། །རིག་མ་
6-15-15b


ལ་མཆོད་པའི་རྗེས་སུ་ཤིས་བརྗོད་ནི། རང་རྡོ་རྗེ་འཛིན་པ་གཉིས་པ་དང་རིག་མ་ལ་གསུངས་དང་རྒྱལ་མཚན་དང་རྔ་ཡབ་དང་ཕྲེང་བ་དང་ཙམ་དན་ལ་སོགས་པས་མཆོད་ཅིང་རོལ་མོའི་སྒྲ་སྐད་སྣ་ཚོགས་པ་དང་བཀྲ་ཤིས་ཀྱི་དབྱངས་ཀྱི་ཤིས་པ་བརྗོད་པར་གྱུར། བཀྲ་ཤིས་གང་ཞིག་ཅེས་སོགས་བརྗོད་དོ། །རིག་མ་དང་སློབ་མ་ལ་མེ་ཏོག་དོར། དེ་ནས་རིག་མ་དེས་དཔའ་བོ་བུ་ནི་ཞེས་སོགས་འདྲི་བ་ལ། ཁུ་ཁྲག་ལ་སོགས་ཞེས་བརྗོད་པས་རིག་མ་དེ་དགྱེས་ནས་སྐྲ་གྲོལ་གོས་དང་བྲལ་བར་བྱས་ནས་རང་གི་ཆུ་སྐྱེས་ཕྱེ་ནས་གསལ་བར་སྟོན་ཅིང་ཨེ་མ་སོགས་སློབ་མ་
བསྐྱེད་ཅེས་པའི་སྐབས་སུ་རང་ཞེ་སྡང་རྡོ་རྗེ་མཐིང་ནག་
མི་བསྐྱོད་པའི་དབུ་རྒྱན་ཅན་ཅེས་པ་ནས་རལ་གྲི་འཛིན་པ་ཞེས་སོགས་དང་། དེའི་སྤྱི་བོར་ཨོཾ་མགྲིན་པར་ཨཱཿ་ཐུགས་ཀར་ཧཱུཾ་ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས་གཉིས་མེད་པར་
གྱུར། རང་གི་རིགས་བདག་ཡབ་ཡུམ་གྱི་བྱང་ཆུབ་ཀྱི་སེམས་ཀྱིས་དབང་བསྐུར་ཅེས་དང་། རྡོ་རྗེ་པདྨ་སྔར་བཞིན་འདུ་བྱས་པའི་རྗེས་སུ་རང་ཉིད་རིན་འབྱུང་དུ་གྱུར། ཨོཾ་སརྦ་ཏ་ཐཱ་ག་ཏ་ཞེས་སོགས་ནས་རང་ཉིད་མི་བསྐྱོད་པར་གྱུར་ཧཱུཾ་སྙོམས་པར་འཇུག་པའི་ལས་ལ་
གནས་པར་བྱས་པས་མཆོག་ཏུ་དགའ་བའི་བདེ་བ་ཐོབ་པར་གྱུར། རང་དང་བླ་མ་དང་གཙོ་བོ་ཐ་མི་དད་པ་དང་རང་གི་ཐུགས་ཀའི་ཧཱུཾ་གི་འོད་ཟེར་གྱི་སྤྱན་དྲངས་པའི་རྒྱལ་བ་ཡབ་ཡུམ་རང་གི་ལུས་ལ་ཐིམ། །བྱང་ཆུབ་ཀྱི་སེམས་རྡོ་རྗེའི་རྩ་བར་སླེབས་ན་སྣང་བ། རྡོ་
རྗེའི་དབུས་སུ་སླེབས་པ་ན་མཆོད་པ། ནོར་བུའི་དབུས་སླེབས་པ་ན་ཉེར་ཐོབ། ནོར་བུའི་རྩེ་མོར་སླེབས་པ་ན་ལྷན་ཅིག་སྐྱེས་པའི་དགའ་བ་མངོན་དུ་བྱས་ཞེས་དང་། དགྱེས་བརྗོད་ཅེས་པའི་སྐབས་སུ་དེ་ནས་ལྷ་མོ་དེ་དགྱེས་ནས་བྷ་ཛ་བྷཀྵ་ཞེས་གསུང་ཞིང་
6-15-16a


རྐང་པ་གཡོན་པ་བདག་གི་མགོ་ལ་བཞག་ནས། དེ་རིང་ཞེས་པ་ནས་བུ་ཡི་སྤྱོད་ཅེས་དང་། དག་པ་བརྗོད་པའི་སྐབས་སུ་ཁྱོད་ཀྱིས་དཀྱིལ་འཁོར་བཞི་ལས་བྷ་གའི་དཀྱིལ་འཁོར་དུ་ཞེས་སོགས་དང་། དབང་བཞི་པ་ལ་དབང་དོན་ངོ་སྤྲོད་
ཚུལ་ནི། དབང་གསུམ་པ་ཐོབ་པའི་སྐབས་སུ་རང་དང་རིག་མ་གཉིས་ཀྱི་ལུས་ཞེས་པ་ནས་དེ་ནི་ཐོབ་བྱ་དོན་གྱི་དབང་བཞི་པ་ཡིན་ནོ། །དངོས་པོ་ཐམས་ཅད་དང་བྲལ་བ་ཞེས་སོགས་ཀྱི་ཚིགས་བཅད་བརྗོད་དོ། །གཞན་དབང་བསྐུར་བའི་ཚེ་འདིར་དབང་བཞི་པ་
བསྐུར་བ་ནི། འདིའི་བར་ཐམས་ཅད་ལ་མཐའ་བརྗོད་ཅིང་དོན་བཤད་དོ། །དག་པ་བརྗོད་པའི་ཚེ་ཁྱོད་ཀྱིས་དཀྱིལ་འཁོར་བཞི་ལས་དོན་དམ་བྱང་ཆུབ་ཀྱི་དཀྱིལ་འཁོར་དུ་ཞེས་དང་། དེ་ནས་དབང་བཞི་རྫོགས་པར་ཐོབ་པའི་ཡོན་དུ་མཎྜལ་དབུལ་ལོ། དབང་བཞི་པའི་སྡོམས་ནི། ཡོན་དབུལ་གསོལ་གདབ་སློབ་མ་ལ། །ཤེས་
རབ་ཡེ་ཤེས་དཔེར་བྱས་ནས། །མཐར་ཐུག་ཟུང་འཇུག་འབྲས་བུའི་དབང་། །ངེས་པར་བྱས་ལ་དགའ་དག་པ་སྦྱིན། །མཇུག་གི་ཆོ་ག་ལ། །མཆོད་པའི་སྐབས་སུ་ཆུ་བཞི་ཉེར་སྤྱོད་ལྔ་རོལ་མོ་དང་བཅས་པ་འདོད་
ཡོན་ལྔ་ནང་མཆོད་རྣམས་དབུལ་ཞིང་། མི་བསྐྱོད་རྡོ་རྗེ་ཞེས་སོགས་དང་། གང་ཞིག་གཟུགས་དང་ཞེས་སོགས་ཀྱིས་བསྟོད། ཕྱོགས་ཀྱི་མཆོད་གཏོར་ཅེས་པ་ནི། སྔར་ཕྱོགས་མཚམས་སུ་བཀོད་པའི་ཁྲོ་བོ་བཅུ་ཕྱོགས་སྐྱོང་དང་བཅས་པ་ལ། སྔར་
རོལ་གྱི་གཏོར་མའི་སྐབས་སུ་བཤད་པའི་ཆོ་གས་མཆོད་གཏོར་དབུལ་ལོ། །ཡང་ན་མཆོད་པ་ནི། ས་ཆོག་གི་སྐབས་ཀྱི་ཕུར་བུ་བསྒྲུབ་པའི་རྗེས་ལྟར་ནང་གི་མཆོད་པ་གཉིས་དབུལ་ལོ། ནང་དུ་ཕྱག་འཚལ་བའི་ཚེ་་པྲ་ན་མ་མི་སོགས་བརྗོད།
6-15-16b


གཙོ་བོ་ལ་ཆུ་གཉིས་ནས་ཉེར་སྤྱོད་ལྔ་རོལ་མོ་དང་བཅས་པའི་བར་སྔར་རྡོ་རྗེ་འཆང་གི་སྐབས་བཞིན་དབུལ་ལོ། །དེ་ནས་དགེ་བ་བསྔོ་བས་ཏེ་སྨོན་ལམ་བཏབ། གཤེགས་གསོལ་གྱི་སྐབས་སུ་ཡེ་ཤེས་པ་གཤེགས་ཞེས་ནས་དམ་ཚིག་པ་རྣམས་རང་གི་
སྙིང་ག་ལ་སོགས་པའི་གནས་རྣམས་སུ་འཁོད་པ་ནི། སྙིང་གར་མི་བསྐྱོད་པ་སྤྱི་བོར་རྣམ་སྣང་ཞེས་པ་ནས་རྐང་མཐིལ་གཉིས་སུ་གནོད་མཛེས་རྒྱལ་པོ་མི་བསྐྱོད་པ་ནས་གནོད་མཛེས་ཀྱི་བར་ཞེས་སོགས་སྔར་མེ་ཏོག་དོར་བའི་ལུས་དཀྱིལ་གྱི་སྐབས་བཞིན་
བརྗོད་དོ། །རང་ཡབ་ཡུམ་སྙོམས་པར་ཞུགས་ཞེས་པ་ནས་སྣོད་ཐམས་ཅད་གཞལ་ཡས་ཁང་དུ་གྱུར་ཅེས་དང་། རྡུལ་ཚོན་ཁྱེར་བའི་བུམ་ཆུས་ཁང་པ་སོགས་བསང་གཏོར་བྱས་ནས་ཤིས་བརྗོད་བྱའོ། །ཕུར་བུ་བསྐྲུས་པའི་ཚེ་བགེགས་རྣམས་སོས་
ཏེ་སངས་རྒྱས་པར་གྱུར་ཅེས་དང་། ཕུར་བུའི་ལྷ་གཤེགས་པའི་ཚེ་བདག་གྲུབ་མཆོག་སྩོལ་ལགས་ཞེས་སོགས་བརྗོད། ཕུར་བུ་སོ་སོའི་གནས་སུ་བཞག་པའི་རྗེས་སུ་ཕྱོགས་མཚམས་སུ་བཀོད་པའི་ཁྲོ་བོ་བཅུ་དང་ཕྱོགས་སྐྱོང་འཁོར་
བཅས་ལ་མཆོད་གཏོར་སྔར་ལྟར་ཕུལ་ལ། ཁྲོ་བོ་རང་ལ་བསྡུ་ན་ཨོཾ་ཡེ་ག་ཤུདྡྷ་སོགས་བརྗོད་དོ། །སྦྱིན་སྲེག་མཆོད་བསྟོད་མཆོད་གཏོར་བྱ། །ཕྱག་མཆོད་སྨོན་ལམ་བསྐོར་དང་བཞི། །བཟོད་གསོལ་གསོལ་གདབ་གཤེགས་གསོལ་བསྡུ། །ཚོན་
བསྡུ་ཆུར་དོར་གཏོར་ཤིས་བརྗོད། །དབྱུང་བཀྲུ་དགང་གཤེགས་བཞག་བསང་བཞག །གཏོར་མཆོད་བསྡུ་དང་གཤེགས་སུ་གསོལ། །མཇུག་ཆོག་སྡོམས་སུ་བསྡུས་པའོ། །བླ་མ་དང་གཙོ་བོ་ཐ་མི་དད་པའི་ཐུགས་ཀའི་ཧཱུཾ་གི་འོད་ཟེར་གྱིས་རང་
6-15-17a


ཉིད་དྲངས་པ་ཞལ་ནས་ཞུགས་ཞེས་སོགས་ཀྱི་ཚིག་ཅི་རིགས་རང་ཉིད་བདག་འཇུག་ལེན་པའི་དབང་དུ་བྱས་པ་ཡིན་པས། གཞན་ལ་དབང་བསྐུར་བའི་ཚེ་རང་དང་གཙོ་བོ་ཐ་མི་དད་པའི་ཐུགས་ཧཱུཾ་གི་འོད་ཟེར་གྱིས། སློབ་མ་དྲངས་
ལ་ཞེས་སོགས་ཇི་ལྟར་རིགས་པར་བསྒྱུར་རོ། །མངྒ་ལཾ། །བྷ་ཝནྟུ།། །། ༈ ཤར་ཙོང་ཁ་པ་ཐམས་ཅད་མཁྱེན་པ་ཆོས་ཀྱི་རྗེ་སློབ་དཔོན་རིམ་པོ་ཆེ་བློ་བཟང་གྲགས་པའི་དཔལ་ཞེས་འཇིག་རྟེན་ན་ཉི་ཟླ་ལྟར་གྲངས་པ་དེའི་ཞལ་སྔ་ནས་ཀྱི་གསུང་བགྲོས་
ཇི་ལྟ་བ་བཞིན། འདུལ་བ་པའི་མིང་ཅན་གྲགས་པ་རྒྱལ་མཚན་གྱིས་འབྲོག་རི་བོ་དགེ་ལྡན་རྣམ་པར་རྒྱལ་བའི་གླིང་དུ་བྲིས་པའོ། །སརྦ་མངྒ་ལཾ།། །།
6-15-17b


empty page
6-16-1a


༄༅། །གསང་པ་འདུས་པའི་ཡིག་ཆུང་ཉེར་གཅིག་སོགས་བཞུགས་སོ། །
6-16-1b


༄༅༅། །ཟབ་མོ་རྡོ་རྗེའི་རྣལ་འབྱོར་ལ་འཇུག་པའི་ལམ་བསྟན་པ་ཞེས་བྱ་བ། རྗེ་བཙུན་བླ་མ་རྡོ་རྗེ་འཆང་གི་ཞབས་ཀྱི་པདྨོ་ལ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །དམིགས་
མེད་ཐུགས་རྗེས་བསྐྱོད་པའི་རྣམ་རོལ་གྱིས། །མ་ནོར་རྒྱལ་བའི་ལམ་བཟང་གསལ་མཛད་པ། རྣལ་འབྱོར་དབང་ཕྱུག་རྗེ་བཙུན་བླ་མ་ཡི། །ཞབས་ཀྱི་པདྨོར་སྤྱི་བོས་ཕྱག་བགྱིད་དོ། །རྡོ་རྗེ་འཆང་གི་ཐུགས་བཅུད་
མཐར་ཐུག་པ། །བླ་མའི་ཞལ་གྱི་གདམས་པ་གནད་ཀྱི་མཆོག །སྔོན་མེད་ཡི་གེར་བྲིས་ལ་མཁའ་འགྲོ་ཡིས། །བུ་ལྟར་བརྩེར་དགོངས་བྱིན་གྱིས་བརླབ་ཏུ་གསོལ། །དེ་ཡང་བདག་ཅག་གི་བླ་མ་རྗེ་བཙུན་རིན་པོ་ཆེ་
འདི་ནི། ཆེས་དཔག་པར་དཀའ་བའི་བློ་གྲོས་ཀྱི་སྟོབས་ཀྱིས། མདོ་རྒྱུད་ཐམས་ཅད་ལ་དྲི་མ་མེད་པའི་རིགས་པས་ལེགས་པར་དཔྱད་ཅིང་། ཕྲ་ཞིང་ཆེས་ཞིབ་པར་ཚད་མ་གསུམ་གྱིས་སྒྲོ་འདོགས་ལྷག་མ་མེད་
པར་བཅད་པ་དང་། འཇམ་པའི་དབྱངས་ཀྱིས་མངོན་སུམ་དུ་དབང་བསྐུར་ཞིང་། ཟབ་པ་དང་རྒྱ་ཆེ་བའི་ཆོས་ཀྱི་སྒོ་མཐའ་ཡས་པ་ཉིན་རེ་བཞིན་དུ་གསན་པས་འཁྲུལ་བའི་དྲི་མ་མ་ལུས་པར་སྤངས་པ་དང་། ས་ར་ཧ་དང་
6-16-2a


ཀླུ་སྒྲུབ་དང་ཤ་ཝ་རི་དང་ལཱུ་ཨི་པ་ལ་སོགས་པའི་གྲུབ་པའི་དབང་ཕྱུག་རྣམས་ཀྱིས་མངོན་སུམ་དུ་བྱིན་གྱིས་བརླབས་ཤིང་། ཞིང་སྐྱོང་གི་མཁའ་འགྲོ་མ་སྤྲིན་ལྟར་དབང་དུ་འདུས་པས་ཕྱི་ནང་གི་
རྟེན་འབྲེལ་མ་ལུས་པར་འགྲིག་པ་དང་། ལྷན་ཅིག་སྐྱེས་པའི་ཡེ་ཤེས་མངོན་དུ་མཛད་པས་རྡོ་རྗེའི་རྣལ་འབྱོར་ཡན་ལག་དང་བཅས་པ་ལ་ཉམས་མྱོང་ཚད་མས་ཐེ་ཚོམ་མ་ལུས་པར་སྤངས་པ་དང་། དཀྱིལ་འཁོར་གྱི་
བདག་པོ་ཉིད་ཀྱིས་ཨ་ཏི་ཤ་འདས་ནས་བོད་དུ་རྡོ་རྗེ་ཐེག་པའི་ལམ་གྱི་གནད་མ་ལུས་པ་རྟོགས་པ་གཞན་མ་བྱུང་བས། ད་ཁྱོད་ཀྱིས་འདིའི་བདག་པོ་གྱིས་ཤིག་ཅེས། རྡོ་རྗེ་ཐེག་པའི་བསྟན་པ་གཏད་པས་རང་ཉིད་ཆོས་ཀྱི་རྒྱལ་
པོར་གྱུར་ཏེ་ཁྱད་པར་ལྔ་དང་ལྡན་པ་ཡིན་ལ། རྗེ་འདིས་རང་ཉིད་ལམ་གང་ནས་རྡོ་རྗེ་འཆང་གི་སར་གཤེགས་ཤིང་གདུལ་བྱ་སྐལ་བ་དང་ལྡན་པ་དག་ཀྱང་ལམ་དེ་ནས་འཁྲིད་པར་མཛད་པའི་སྲོལ་ཐུན་མོང་མ་ཡིན་པའི་གཙོ་
བོ་ནི། རྒྱལ་བའི་གསུང་རབ་ཐམས་ཅད་ཀྱི་མཐར་ཐུག་པའི་ཡང་རྩེ་དཔལ་གསང་བ་འདུས་པ་དང་། མ་རྒྱུད་ཐམས་ཅད་ཀྱི་གཙོ་བོ་དང་སྙིང་པོར་གྱུར་པ་བྱིན་རླབས་ཀྱི་གཏེར་དཔལ་འཁོར་ལོ་སྡོམ་པ་གཉིས་ཡིན་ནོ། །
6-16-2b


སྒོ་གཉིས་པོ་འདི་རེ་རེས་ཀྱང་དངོས་གྲུབ་རྣམ་གཉིས་བདེ་བླག་ཏུ་སྦྱིན་མོད་ཀྱིས། རྗེ་བླ་མའི་བཞེད་པ་གཉིས་ཀ་ཟུང་འབྲེལ་དུ་ཉམས་སུ་བླངས་ན་བསྐྱེད་རྫོགས་གཉིས་ཀའི་སྐབས་སུ་མཆོག་ཏུ་གལ་ཆེ་བའི་གནད་ཁྱད་པར་ཅན་ཡོད་པས་ཅི་ནས་
ཀྱང་ཟུང་འབྲེལ་དུ་ཉམས་སུ་ལེན་པ་ཡིན་ནོ། །དེ་ལ་རྗེ་རིན་པོ་ཆེ་འདི་ཉིད་ཀྱི་གསུང་གི་མན་ངག་གི་གནང་ལ་ཤིན་ཏུ་མཁས་ཤིང་། རང་ཉིད་ལམ་སྲོལ་མ་ཉམས་པར་སྒྲུབ་པ་སྙིང་པོར་བྱེད་པའི་བླ་མས་ལམ་འདིའི་སྒོ་ནས་སློབ་མ་ཇི་ལྟར་བཀྲི་
བ་དང་། སློབ་མས་ཚུལ་ཇི་ལྟར་འཇུག་པར་བྱ་སྙམ་ན། སློབ་མ་ནི་ཐེག་པ་ཐུན་མོང་གི་ལམ་གྱི་རིམ་པས་རྒྱུད་སྦྱངས་པས་ཚེ་འདི་ལ་མ་ཆགས་ཤིང་། བྱང་ཆུབ་དོན་གཉེར་གྱི་བསམ་པ་ལ་མྱོང་བ་སྣ་ཟིན་སྐྱེས་པ། སྟོང་པ་ཉིད་ཀྱི་ལྟ་བ་ལ་ངེས་
པ་རྙེད་ཅིང་། ཟབ་མོ་རྡོ་རྗེ་ཐེག་པ་ལ་མོས་པ་ཡོད་པ་སྟེ། དེ་ཡང་གསང་སྔགས་ཤེས་ལོ་ཟེར་བ་དང་། དབང་དང་། ཁྲིད་བརྒྱུད་ལ་སོགས་པ་ཐོབ་བོ་ཞེས་མིང་ཙམ་དོན་དུ་གཉེར་བ་མིན་པ་ཞིག་དགོས་ཏེ། དེ་འདྲ་བ་ནི་ཡུན་ཐུང་ལ་ཐོབ་རྒྱ་ཆེ་བ་
ཞིག་དགོས་པས། མང་དུ་ཉན་ཀྱང་ཅིའང་མི་ཤེས་པ་ཞིག་འོང་ཞིང་། དེས་མི་ཤེས་བཞིན་དུ་སློབ་མ་སྡུད་པ་གཙོ་བོར་བྱས་ནས་བཤད་པས། ཆོས་གང་ཟབ་བ་ཐམས་ཅད་ཅལ་ཅོལ་དུ་སོང་ནས་དར་བ་ཙམ་གྱིས་བསྟན་པ་ལ་གནོད་
པ་ཞིག་འོང་བ་ཡིན། རྟོག་གེ་དང་ཕྱིའི་བཤད་ཆོས་ལ་ཧ་ཅང་གཙོ་བོར་མི་འཛིན་པ་ཞིག་གལ་ཆེ་སྟེ། དེ་ལ་གཙོ་བོར་ཞེན་པ་དེས། གལ་ཆུང་སྔགས་ལ་བྱས་ནས་ཉ་པའི་ལག་ཏུ་ནོར་བུ་རིན་པོ་ཆེ་ཤོར་བ་འདྲ་བ་ཞིག་འོང་། ཁྱད་པར་དེ་
6-16-3a


འདྲ་བ་དེས་སྐྱེས་བུ་གང་མང་བ་དང་སྣོད་དུ་མི་རུང་བའི་མདུན་དུ་བསྐྱེད་རྫོགས་ཀྱི་གནད་ཟབ་མོ་ཐམས་ཅད་གང་ཤེས་བགྲོ་གླེང་དུ་ཁྱེར་ནས། གསང་སྔགས་དང་སྐུ་གསུམ་གྱི་རྩོད་པ་ལ་གསང་སྒྲོག་འོང་མི་འོང་གི་ཁྱད་པར་བློ་
ཡུལ་ན་ཅི་ཡང་མེད་པ་ཞིག་འོང་བས། གསང་སྔགས་འདྲེ་ལ་གཏད་པ་འདྲ་བ་ཞིག་འོང་། །གཞན་ཡང་རྟོག་གེ་དང་ཕྱིའི་ཐོས་པས་དྲེགས་ཤིང་ང་རྒྱལ་དེ་ལ་གཙོ་བོར་ཞེན་པ་ནི་ལན་ཅིག་སྔགས་ལ་ཞུགས་ཀྱང་ཡུན་རིང་དུ་དོན་དུ་གཉེར་བའི་སྐལ་བ་
མེད་པས། གདམས་པ་རྫོགས་པར་མ་ཐོབ་ཀྱང་ཁྱད་དུ་བསད་ནས་འགྲོ། ཆོས་ཐམས་ཅད་ལ་རགས་པ་རྩེ་བཏོགས་ར་རྩྭ་ཟ་བ་འདྲ་བ་ཞིག་མིན་པ། གདམས་ངག་གི་གནད་ཕྲ་མོ་ནས་རྩད་གཅོད་མི་ཤེས། གང་ཤེས་སྨྲ་བ་ལ་དགའ་བ་ལྷུར་
ལེན་གྱིས་ཉམས་སུ་ལེན་མི་ཤེས། ང་རྒྱལ་གྱིས་བླ་མ་བསྟེན་མི་མཁས་པ་དམ་ཚིག་ལ་ཅི་ཡང་མི་སེམས་པ་ཞིག་འོང་བ་ཡིན། །དེ་ལ་དགོངས་ནས། རྒྱུད་རྡོ་རྗེ་མཁའ་འགྲོ་ལས། ཁྲོ་དང་བཅས་ཤིང་རྟོག་གེར་གུས། །ན་སོ་དག་ནི་ཡོལ་བ་དང་། །
གང་ཡང་དགེ་སློང་དངོས་གནས་དང་། །ཞེན་དང་ཆགས་པས་བཅིངས་པ་ལ། །རིན་ཐང་མེད་པའི་རིན་ཆེན་ནི། །དེ་ལ་བཤད་པར་མི་བྱའོ། །ཞེས་དང་། དེའི་འགྲེལ་པར། ཁྲོ་དང་བཅས་ཞེས་བྱ་བ་ནི། སྤྲོ་ཐུང་བ་དང་གནོད་པར་སེམས་པ་སྟེ། བྱས་
པ་དྲིན་དུ་མི་གཟོ་བའོ། །རྟོག་གེར་གུས་ཞེས་བྱ་བ་ནི། ཚད་མའི་བསྟན་བཅོས་ལ་གུས་པའམ། འཇིག་རྟེན་པའི་བསྟན་བཅོས་དོན་དུ་གཉེར་བའོ། །ན་སོ་དག་ནི་ཡོལ་བ་དང་། །ཞེས་བྱ་བ་ནི། ལུས་རྙིང་པ་སྟེ་ཁུ་བ་འཛིན་མི་ནུས་པའོ། །ཞེན་
6-16-3b


དང་ཆགས་པས་བཅིངས་པ་ལ། །ཞེས་པའི་ཞེན་པ་ནི་སེར་སྣ་ཆེ་བའོ། །ཆགས་པས་བཅིངས་པ་ནི། མ་ནིང་སྟེ་དེ་དག་ལ་བསྟན་པར་མི་བྱའོ། །ཞེས་གསུངས་ཏེ། དེ་ཡང་སྡུགས་ལ་མོས་པ་དང་། འདུན་པ་ཤུགས་དྲག་ཅིང་ཁེངས་པ་ཆུང་བའི་
སྟེང་དུ་ཚད་མ་དང་། རིགས་པ་ལ་མཁས་པ་ནི་མཆོག་ཏུ་སྟོན་པ་ཡིན་གྱི་སྐྱོན་ག་ལ་ཡིན། རྟོག་གེ་དང་ཕྱིའི་ཐོས་པས་སེམས་ཕྲོགས་ཤིང་སྔགས་ལ་གཙོ་བོར་མི་འཛིན་པ་སྣོད་མིན་པར་བསྟན་པ་ཡིན་ལ། རྒན་པོ་སྣོད་དུ་མི་རུང་བར་བསྟན་
པ་ནི། ལམ་འདི་ཉམས་སུ་ལེན་པ་ལ་ལུས་ཀྱི་ཁུ་བའི་ནུས་པ་མ་ཟད་པ་གལ་ཆེ་བར་སྟོན་ཏེ། འདི་ཤིན་ཏུ་གནད་ཆེའོ། །དེས་ན་གཞོན་དུས་ཐོས་པ་བྱས་ནས་རྒས་སོང་བ་དང་ཉམས་ལེན་བྱེད་དོ། །ཞེས་ཟེར་བ་ནི་ལམ་འདིའི་དགག་བྱའི་གཙོ་
བོ་ཡིན་ནོ། །གང་ཡང་དགེ་སློང་དངོས་གནས་ལ་ཞེས་པ་ལ། འགྲེལ་པར་དངོས་སུ་བཤད་པ་མ་བྱུང་ཡང་གསང་དབང་དངོས་དབང་དུ་བསྐུར་བ་ལྟ་བུ་ལ་ནི་རིན་པོ་ཆེ་ལྟ་བུའི་གང་ཟག་མཆོག་འགའ་ཞིག་ལ་དགེ་སློང་ཡིན་ཡང་དང་པོ་ནས་དངོས་
དབང་བསྐུར་བའི་སྐབས་ཡོད་ཀྱི། དེ་མ་གཏོགས་པའི་ནུས་པ་མ་ཐོབ་པའི་དགེ་སློང་ལ་གསང་དབང་སོགས་དངོས་དབང་དུ་བསྐུར་མི་རུང་ཞེས་པའི་དོན་ཡིན་གྱི། སྤྱིར་དགེ་སློང་སྔགས་བླ་མེད་ཀྱི་ལམ་སྟོན་པའི་སྣོད་དུ་མི་རུང་ཞེས་སྟོན་པ་མིན་
ཏེ། སྔགས་ཀྱི་གདུལ་བྱ་ལ་སོ་ཐར་གྱི་སྡོམ་པ་མཆོག་དང་ལྡན་པ་རྟེན་མཆོག་ཏུ་དུས་འཁོར་སོགས་རྒྱུད་སྡེ་དུ་མ་ནས་གསུངས་སོ། །གཞན་ཡང་བླ་མ་ལྔ་བཅུ་པ་སོགས་ནས་བཤད་པའི་མཚན་ཉིད་དང་ལྡན་པའི་སློབ་མ་མདུན་དུ་འོངས་ཏེ་
6-16-4a


ལམ་འདིའི་ཆ་ལག་དང་བཅས་པ་ཡོངས་སུ་རྫོགས་པའི་བཀའ་དྲིན་ཞུ་བའི་གསོལ་བ་འདེབས་པར་བྱེད་ན། དེ་ལ་རིགས་གཉིས་ཏེ་གོ་བ་ཡོངས་སུ་རྫོགས་པ་དོན་དུ་གཉེར་བ་དང་། མྱོང་བ་སྐྱེས་ནས་བསྐྱེད་རྫོགས་ཀྱི་
ལམ་སྣ་ཟིན་པ་དོན་དུ་གཉེར་བའོ། །དང་པོ་ནི། ཐོག་མར་བླ་མ་ལྔ་བཅུ་པ་རྩ་ལྟུང་དང་སྦོམ་པོའི་བསྲུང་མཚམས་ལེགས་པར་ཤེས་ཀྱི་བར་དུ་ཚིག་བཟུང་བཤད་པ་ཉན་ནས། སྔར་དབང་མ་ཐོབ་པའམ་ཐོབ་ཀྱང་དམ་ཚིག་གསོ་བའི་ཕྱིར་དུ་
བཞི་ཡོངས་སུ་རྫོགས་པ་དབང་དོན་འཕྲོད་ངེས་པ་གོ་རིམས་མ་འཚོལ་བར་བླང་བར་བྱ་སྟེ། དེ་ཡང་རྡུལ་ཚོན་ནམ་རས་བྲིས་ཀྱི་དཀྱིལ་འཁོར་དུ་དབང་བསྐུར་བ་སྔོན་དུ་མ་སོང་བར། ལུས་དཀྱིལ་གྱི་དབང་མི་བསྐུར་ན། བུམ་དབང་མ་
བསྐུར་བ་ལ་དབང་གོང་མ་བསྐུར་བ་ལྟ་ཅི་སྨོས། དབང་ཐོབ་ནས་དམ་ཚིག་དང་སྡོམ་པ་ལ་ཐུན་དྲུག་གི་སྡོམ་སེམས་མ་ཆག་ཅིང་། ཕྱིར་བཅོས་དང་བསྲུང་སྡོམ་ལ་འབད་པའི་ངང་ནས། བློ་མཆོག་གིས་གསང་སྔགས་ལམ་རིམ་དང་། 
བློ་ཞན་པས་ཁོ་བོས་སྦྱར་བའི་རྒྱུད་སྡེ་སྤྱིའི་རྣམ་གཞག་རྣམས་ལེགས་པར་ཉན་ཅིང་སྦྱངས་ནས་སྔགས་དང་ཕར་ཕྱིན་གྱི་ལམ་གྱི་ཁྱད་པར་རྒྱུད་སྡེ་བཞི་དང་། ཕ་རྒྱུད་མ་རྒྱུད་ཀྱི་ལམ་གྱི་ཁྱད་པར། སྨིན་བྱེད་དབང་དང་ལམ་རིམ་པ་
གཉིས། ས་ལམ་དང་། སྤྱོད་པ་བྱེད་ཚུལ། ཉོན་མོངས་ལམ་དུ་བྱེད་ཚུལ་དང་། འབྲས་བུ་མངོན་དུ་འགྱུར་ཚུལ་སོགས་ཀྱི་སྔགས་སྤྱིའི་རྣམ་གཞག་རགས་པ་ལེགས་པར་ཆགས་པ་ཞིག་བྱ། དེ་མེད་ན་སྔགས་ལ་མོས་པ་
6-16-4b


སྐད་བྱས་ཀྱང་། གཞན་གྱིས་གཡམ་ལ་རྒྱུགས་ཤིག་མིན་པ་སྔགས་ཟབ་མི་ཟབ་ཀྱི་རྣམ་དབྱེ་ལྟ་ཅི་སྨོས། མུན་རྡོ་འཕེན་པ་དང་འདྲ་བ་ཞིག་འོང་བ་ཡིན་ནོ། །དེ་ནས་ཐོག་མར་གསང་འདུས་དང་། དེ་ནས་བདེ་མཆོག་གི་སྒྲུབ་ཐབས་དཀྱིལ་ཆོག་
ཐིག་སྦྱིན་སྲེག་སོགས་ཆ་ལག་དང་བཅས་པ་ལ་ཞིབ་པར་སྦྱངས། དེ་ཡང་གསང་འདུས་ལ་སྔོན་དུ་གོ་བ་ཆགས་ན་གཞན་རྣམས་ལ་གོ་བ་འབད་མེད་དུ་འཆགས། དེ་ལས་བཟློག་ན་དེ་ཙམ་དུ་ཕན་ཆུང་བར་ཡོད་པས། སྔོན་ལ་འདུས་པ་ལ་ཁྲིད་པ་ཡིན། 
དེས་འདུས་པའི་བསྐྱེད་རིམ་ལ་བླ་མས་མཛད་པའི་རྣམ་གཞག་རིམ་པའི་ཊཱི་ཀྐ་དང་། ཁོ་བོས་སྦྱར་བའི་བསྐྱེད་རིམ་གྱི་རྣམ་བཤད་རྒྱས་པ་སོགས་ཞིབ་པར་ཉན་ཅིང་སྦྱངས་ནས། ཀུན་གྱི་གཞི་མ་བསྐྱེད་རིམ་ལ་སྦྱང་གཞི་སྦྱོང་བྱེད་དང་། འབྲས་
བུའི་ཆོས་མཐུན། རྫོགས་རིམ་གང་གི་སྨིན་བྱེད་དུ་གང་འགྱུར་བ་སོགས་ཀྱི་གོ་བ་ལེགས་པར་ཆགས་པ་ཞིག་བྱས། དེ་ནས་བསྐྱེད་རིམ་ལ་སེམས་འཛིན་ཚུལ་གོ་བ་ལེགས་པར་ལོངས་པའི་བསྐྱེད་རིམ་གྱི་ཁྲིད་བྱ། དེ་ནས་གདན་རྫོགས་ཀྱི་ཁྲིད་སླ་
ཆོས་སུ་མ་སོང་བར་ལེགས་པར་ཁྲིད་ནས་བསྒོམ་ཚུལ་རགས་པ་ཤེས་ཤིང་། བསྐྱེད་ཚུལ་གྱིས་ཕྱོགས་མཐོང་ཡོད་པ་རིམ་ལྔ་སྤྱི་དང་སོ་སོའི་གོ་བ་རགས་པ་ལེགས་པར་ཆགས་པ་ཞིག་ཁྲིད་ཀྱི་སྐབས་སུ་འོང་དགོས་པས། ད་མ་བྱུང་བར་
དུ་ཆོས་དང་ཟང་ཟིང་གི་འབྲེལ་པ་གཞན་ཅུང་ཟད་མེད་པར་འབུར་ལ་བཏབ་ནས་ཁྲིད་དགོས་པ་ཡིན། དེ་ཡང་ལུས་དབེན་གྱི་ཕྲ་མོ་བསྒོམ་པ་དང་རྡོར་བཟླས་གཉིས་ལ་དམིགས་པ་རེ་རེ་ལ་མ་མཐའ་ཟླ་བ་ཕྱེད་རེའམ། རིང་ན་ཁྲིད་དཀྱུས་མ་ལའང་
6-16-5a


དམིགས་པ་རེ་ལ་ཞག་ཉེར་གཅིག་ཙམ་འཇོག་པ་མཛད། དེ་ནས་མི་ཤིགས་པ་བསྒོམ་པ་དང་། རྨི་ལམ་གྱི་སྐོར་རྣམས་རིང་བར་འཇོག །གཞན་རྣམས་དུས་སྐབས་དང་སྦྱོར། དེ་ལྟར་འཁྲིད་རྫོགས་ནས་ངེས་པར་རིམ་ལྔ་
གསལ་སྒྲོན་གསུང་བ་ཕྱག་ལེན་ཡིན་ཅིང་། མི་ཉན་ཀ་མེད་དུ་ཡོད་པས་ལེགས་པར་ཉན་ཅིང་། ཞིབ་ཏུ་ལྟ་བ་དང་སེམས་པ་སོགས་ཀྱི་སྒོ་ནས་འདུས་པའི་ལམ་གྱི་གོ་བ་ལེགས་པར་ཆགས་པ་ཞིག་བྱ། དེ་ཡང་འདུས་པའི་བསྐྱེད་རྫོགས་ཀྱི་གོ་བ་
ལེགས་པར་ཆགས་པའི་སྒོ་ནས་སྟོང་པ་བཞི་ལས་སྒྱུ་མའི་སྐུ་བསྒྲུབ་ཚུལ་ལེགས་པར་ཤེས་པ་ཞིག་དང་། དེའང་འོད་གསལ་གྱིས་སྦྱངས་པས་ཟུང་འཇུག་གི་སྐུ་བསྒྲུབ་ཚུལ་མཐའ་ཆོད་པར་མ་ཤེས་ན། ཚེ་གཅིག་ལ་སངས་རྒྱས་བསྒྲུབ་པའི་
ཚུལ་ཇི་ལྟར་བྱེད་པའི་ལམ་གྱི་ཕྱོགས་མཐོང་ཙམ་ཡང་འོང་ས་མེད་པས། འདི་ལ་སྦྱང་བ་གལ་ཆེ་བ་ཡིན། དེ་ནས་བློ་གྲོས་ཀྱིས་ལྕོགས་པ་ཙམ་ཡོད་ན། ངེས་པར་འདུས་པའི་རྒྱུད་ལ་གོ་བ་ཆགས་ངེས་པ་སྦྱངས་ཤིང་། དེ་ནས་བདེ་མཆོག་གི་
སྒྲུབ་ཐབས་ཀྱི་རྣམ་བཤད་ཆེན་མོ་རྗེ་བླ་མ་ཉིད་ཀྱིས་མཛད་པ་ལེགས་པར་ཉན་ནས། བསྐྱེད་རིམ་གྱི་གོ་བ་ཆགས་པ་དང་བསྐྱེད་རིམ་གྱི་ཁྲིད་བྱེད། དེ་ནས་ལོ་དྲིལ་གྱི་ཁྲིད་རྗེ་ཉིད་ཀྱིས་མཛད་པ་དང་། ནག་པོ་པའི་རྫོགས་རིམ་གྱི་དཔྱིད་ཐིག་ལ་
ཡི་གེ་མཛད་པ་མེད་ནའང་། རྗེ་ཉིད་ལ་ལེགས་པར་ཐོབ་པའི་གསུང་གི་སྟེང་ནས་བདེ་མཆོག་གི་རྗོགས་རིམ་སོ་སོའི་གྲུབ་ཆེན་གྱི་དགོངས་པ་ལྟར་སྐྱོང་ཚུལ་དང་། གོ་བའི་རྣམ་གཞག་ལེགས་པར་ཆགས་ཀྱི་བར་དུ་ཁྲིད་བྱ། དེ་ནས་བདེ་
6-16-5b


མཆོག་གི་རྒྱུད་ལ་ལེགས་པར་སྦྱངས། དེ་ཡང་བསྐྱེད་རྫོགས་ལ་སྔོན་དུ་གོ་བ་མ་ཆགས་ན་རྒྱུད་ཚར་ཇི་ཙམ་ཉན་ཡང་ཡམ་མེ་བ་ཞིག་ལས་འོངས་མེད་པས་གོ་རིམས་ཀྱི་ཕྱག་བཞེས་དེ་ཡེ་མ་འཆོལ་བ་དགོས་ཤིང་། རྫོགས་རིམ་གྱི་ཁྲིད་ཐམས་
ཅད་ལ་ཚོགས་འཁོར་རྒྱས་པ་དང་། གདན་རྫོགས་ཀྱི་སྐབས་སུ་ཁྲིད་ཀྱི་འགོ་འཛུགས་པ་ན་བླ་མ་ལ་མཆོད་པ་རྒྱས་པར་བཤམ། བྱིན་གྱིས་བརླབས་ཏེ། བླ་མ་རྡོ་རྗེ་འཆང་དུ་བསྐྱེད་པ་ལ་མཆོད་ཅིང་བསྟོད་དེ་གཏོར་མ་དང་མཎྜལ་རྒྱས་པར་ཕུལ་
ནས་གསོལ་བ་གདབ་པ་དང་། སྒྱུ་ལུས་དང་འོད་གསལ་གྱི་དམིགས་པ་ལ་སློབ་པ་ནའང་དེ་ལྟར་བྱས་ཏེ། རིམ་ལྔ་ནས་འབྱུང་བའི་སྒྱུ་ལུས་དང་འོད་གསལ་གྱི་རང་རང་གི་ཐུན་མོང་མིན་པའི་བསྟོད་པ་གསོལ་གདབ་དང་བཅས་པ་བྱེད་པ་དང་། འདུས་
པའི་རྒྱུད་ཀྱི་ཆོས་ཀྱི་ཐོག་མཐའ་གཉིས་སུ་ཇི་ལྟར་བྱ་བའི་ཆོ་ག་རྗེ་ཉིད་ཀྱིས་ཡི་གེ་ལོགས་སུ་མཛད་པ་ལྟར་བྱེད་པ་དང་། རྒྱུད་མཆོད་ཀྱི་ཚོགས་འཁོར་རྒྱས་པ་དང་། བདེ་མཆོག་གི་རྒྱུད་ཀྱི་ཐོག་མར་མཆོད་པ་གསོལ་གདབ་ཀྱི་བར་དུ་ཚོགས་འཁོར་
རྒྱས་པ་དང་། མཐར་གཏང་རག་གི་མཆོད་གཏོར་དང་བསྟོད་པ་སོགས་རྒྱས་པར་བྱེད་པའི་ཕྱག་ལེན་རྣམས་སླ་ཆོས་དང་ཕྱི་གཤོལ་ཏུ་ཡེ་མ་ལུས་པ་གལ་ཆེ་བ་ཡིན། བདེ་མཆོག་གི་རྒྱུད་ཀྱི་སྐབས་སུ་སྔགས་བཏུ་བྱེད་ན་ཚོགས་འཁོར་ཁྱད་པར་ཅན་
བྱས་ནས་སྔགས་བཏུའི་རྗེས་གནང་དང་སྤེལ་ནས་མཛད་པ་ཕྱག་ལེན་ཡིན། གལ་ཆེ་བ་རང་ལ་མིན་པ་རྒྱུད་གསུང་རེས་ཀྱིས་མི་མཛད། དྲིལ་བུ་རིམ་ལྔའི་བླ་མ་སྔ་མའི་ཕྱག་བཞེས་ཀྱི་བྱིན་རླབས་དེ་ཡང་གལ་ཆེ་བ་ལ་མཛད། དེ་དག་གིས་འདུས་པ་
6-16-6a


དང་བདེ་མཆོག་གི་ལམ་གྱི་སློབ་མ་ཇི་ལྟར་བཀྲི་བའི་ཚུལ་དཀྱུས་མ་དེ་བརྗོད་པ་ཡིན་ནོ། །ད་ནི་སློབ་མ་ཚེ་འདི་ལ་ལྟོས་པ་མེད་པར་སྒྲུབ་པ་སྙིང་པོར་བྱས་ཏེ། བསྐྱེད་རྫོགས་ཀྱི་ལམ་སྣ་ཟིན་པ་དོན་དུ་གཉེར་བ་ཞིག་བླ་
མས་ཇི་ལྟར་བཀྲི་བའི་ཚུལ་བརྗོད་པར་བྱ་སྟེ། དེ་ཡང་བློ་ནུས་ཆེ་ཆུང་གི་རྒྱུད་ལ་སྦྱངས་པ་བྱེད་མི་བྱེད་སྐབས་དང་སྦྱར་བ་མ་གཏོགས་སྔར་བཤད་པའི་རིམ་པ་ཇི་ལྟ་བ་བཞིན་དུ་སྔོན་དུ་བཏང་ན་ལེགས། དེ་ནས་བླ་མས་རིམ་གཉིས་ཀྱི་ཉམས་
ལེན་ཐམས་ཅད་ལ་ཁྲིད་དུ་བྱས་ནས་དམིགས་པ་ཐམས་ཅད་ལ་རང་རང་གི་མྱོང་བ་སྣ་ཟིན་རེ་མ་སྐྱེས་ཀྱི་བར་དུ། མ་སྐྱེས་པ་བསྐྱེད་ཚུལ། སྐྱེས་པ་བོགས་འབྱིན་ཚུལ། གེགས་སེལ་ཚུལ་སོགས་མན་ངག་གི་གནད་ལ་མཁས་པས་ལེགས་
པར་འཁྲིད་པ་ཡིན་ནོ། །དམར་ཁྲིད་ཅེས་པ་སྨན་པའི་སློབ་དཔོན་གྱིས་སློབ་མ་ལ་མིའི་རོ་ཁ་ཕྱེ་ནས་དོན་ལྔ་སྣོད་དྲུག་གི་ཆགས་ཚུལ་སོགས་རེ་རེ་ནས་དངོས་སུ་བསྟན་ནས་ཁྲིད་པ་ལྟར་འདི་ལྟར་བསྒོམས་ན་འདི་བཞིན་འབྱུང་ངོ་ཞེས་པའི་ལུང་སྟོན་པ་
ཙམ་མིན་པར། དངོས་སུ་མ་སྐྱེས་ཀྱི་བར་དུ་བླ་མས་ལག་ཁྲིད་བྱས་ནས་ཁྲིད་པ་ལ་ཟེར་བ་ཡིན། དེ་ཡང་སྒྲུབ་པ་སྙིང་པོར་བྱས་ནས་ཚེ་འདིར་རྟོགས་པ་སྐྱེ་བར་འདོད་ན། བླ་མའི་བསྟེན་ཚུལ་སོགས་ལ་ད་ལྟ་ཉམས་ལེན་བྱ་རྒྱུ་གལ་ཆེ་བའི་གནད་
མང་དུ་ཡོད་པས། དེ་རྣམས་ཁོ་བོས་ཡིག་ཆུང་དུ་བཀོད་པ་ལྟར་ཤེས་པར་བྱས་ནས་ལག་ལེན་ལ་སྦྱོར་བ་གལ་ཆེ་བ་ཡིན། དེ་ནས་དམ་ཚིག་གི་སྐོར་ལ། དམ་ཚིག་གི་རྡོ་རྗེའི་བསྒོམ་བཟླས་དང་། རྡོ་རྗེ་མཁའ་འགྲོའི་སྦྱིན་སྲེག་སོགས་རྗེ་
6-16-6b


ཉིད་ཀྱིས་རྩ་ལྟུང་གི་རྣམ་བཤད་དུ་དེ་རྣམས་བྱའོ་ཞེས་གསུངས་པ་ལས་དངོས་སུ་བཀོད་པ་དང་། གཞན་ཡང་ཞལ་ལས་བྱུང་བའི་གནད་ཆེ་བ་ཁ་ཡར་ཡོད་པ་རྣམས་ད་ལྟ་ནར་མ་དང་། སྐབས་སུ་ལག་ལེན་ལ་སྦྱོར་བ་མི་རུང་བ་ཡིན་པས་ཡི་གེར་ལོགས་
སུ་བཀོད་པ་ལྟར་ཤེས་པར་བྱས་ནས། འཕྲལ་དུ་ལག་ལེན་ལ་སྦྱར་བར་བྱའོ། །དེ་ནས་ལམ་བསྐྱེད་རྫོགས་གང་ཉམས་སུ་ལེན་ཀྱང་ཐོག་མར་ལྟ་བ་མཐར་ཐུག་པ་དེ་ལེགས་པར་ངེས་ནས། སྐྱོང་ཚུལ་གྱི་གནད་ལ་མཁས་པ་ཞིག་དགོས་ཏེ། དེ་མེད་ན་
བསྐྱེད་རྫོགས་གང་ཉམས་སུ་བླངས་ཀྱང་ཐབས་རྐྱང་པའི་ཉམས་ལེན་དུ་སོང་ནས། ཐབས་ཤེས་ཟུང་འབྲེལ་གྱི་ཉམས་ལེན་ཆ་ཙམ་ཞིག་ཀྱང་མི་འབྱུང་ཞིང་། བསྐྱེད་རྫོགས་གང་ལ་ཡང་འཁོར་བའི་རྩ་བ་གཅོད་པའི་གཉེན་པོ་གཏན་ནས་མ་འདྲེས་པ་ཞིག་
འོང་བས། ཐོག་མར་ལྟ་བ་ཚོལ་བ་དང་། དེ་ཡང་ཐོག་མར་དབུ་ཚད་ཀྱི་རིགས་པ་ལ་སྦྱངས་པ་ཡིན་ན་ཅུང་ཟད་ཁྲིད་སླ་ཡང་། མ་སྦྱངས་པ་ལ་ལྟ་བའི་ངེས་པ་འདྲེན་ཚུལ་ཇི་ལྟར་བྱ་བ་དང་། ལྟ་བ་གོང་ནས་བླ་མེད་དང་ཕར་ཕྱིན་གྱི་ཐེག་པའི་ལྟ་བ་སྐྱོང་ཚུལ་
ཡེ་མི་འདྲ་ཞིང་། ཞི་ལྷག་གི་གོ་རིམས་དང་ལྟ་བ་བསྐྱངས་པའི་བྱེད་ལས་སོགས་ལ་ཁྱད་པར་ཤིན་ཏུ་ཆེ་བ་དང་། རྫོགས་རིམ་དང་ཕར་ཕྱིན་གྱི་ཐེག་པ་བ་ལ་སྟོང་ཉིད་མངོན་སུམ་དུ་རྟོགས་པ་མྱུར་བུལ་གྱི་ཁྱད་པར། ཉི་ཟླའི་འགྲོས་དང་། བ་ལང་གི་འགྲོས་
ལས་ཀྱང་ཤིན་ཏུ་ཆེ་བ་ཡོད་པའི་ཚུལ་དང་། དེ་ལྟར་འོང་བའི་རྒྱུ་མཚན་གྱིས་གནད་ཤིན་ཏུ་ཟབ་པ་དང་། དེའི་རྒྱུ་མཚན་གྱིས་མཚམས་མེད་པ་ལྔ་ག་དང་། མི་དགེ་བ་བཅུ་ཆེན་པོའི་ཆེན་པོ་རྣམས་གྲངས་ཚང་བ་དང་། ཆོས་སྤོང་བ་དང་། དགེ་
6-16-7a


སློང་གི་ཕམ་པ་བཞི་ཆར་སྤྱོད་པ་རྣམས་ཀྱང་ལམ་འདིས་ཚེ་འདི་ཉིད་ལ་འཚང་རྒྱ་བའི་གནད་ལ་སོགས་པ་མང་པོ་ཞིག་ཤེས་དགོས་པ་ཡིན། དེ་དག་ལྟ་བའི་ཡི་གེར་ཤེས་པར་བྱའོ། །དེ་ནས་བསྐྱེད་རིམ་ལ་བརྟན་པ་རྗེས་མཐུན་
པ་ཐོབ་ནས་བསྒོམས་ན་རྫོགས་རིམ་ཀྱང་རྗེས་མཐུན་པ་ཙམ་སྐྱེ་ལ། བསྐྱེད་རིམ་མཐར་ཕྱིན་ནས་བསྒོམས་ན། རྫོགས་རིམ་ཀྱང་རྒྱུད་སྡེ་དང་གྲུབ་ཆེན་གྱིས་བཤད་པ་ཇི་འདྲ་བའི་མཚན་ཉིད་ཚང་བ་སྐྱེ་བ་ཡིན་ཅིང་། རྒྱུད་དང་གྲུབ་ཆེན་གྱིས་བཤད་པའི་
རྫོགས་རིམ་རྗེས་མཐུན་པ་ཙམ་སྐྱེས་ནའང་། བོད་ལ་རྫོགས་རིམ་འགངས་ཆེན་བསྐྱེད་པར་གྲགས་པ་ཕལ་ཆེ་བའི་རྟོགས་པས་བསྐྲུན་པར་མི་ནུས་ཤིང་སྐྱེ་བ་གཏན་གྱི་མདུན་མ་གྲུབ་པ་ཡིན་ནོ། །གང་ལྟར་ཡང་རྫོགས་རིམ་གྱི་སྔོན་དུ་བསྐྱེད་རིམ་
ལ་མྱོང་བ་སྣ་ཟིན་མ་སྐྱེས་བར་དུ་སྦྱོང་བ་གནད་ཤིན་ཏུ་ཆེ་བ་ཡིན། དེ་ཡང་བསྐྱེད་རིམ་ལ་གསལ་སྣང་དང་ང་རྒྱལ་བརྟན་པོ་བསྒྲུབ་ཚུལ་རགས་པ་ཙམ་ཞིག །རྗེ་ཉིད་ཀྱི་གསུང་རབ་རྣམས་ལས་བསྟན་མོད་ཀྱི། རེ་རེ་ནས་རིམ་ཅན་དུ་འཁྲིད་ཚུལ་ཞིབ་
པར་ངེས་པ་དང་། དེ་དག་གི་སྐབས་སུ་བློའི་རིགས་སོ་སོ་ལ་བལྟོས་པའི་འཁྲིད་ཚུལ་མི་འདྲ་བ་དགོས་པ་རྣམས་ཞིབ་ཏུ་ངེས་དགོས་པར་ཡོད་པས་བསྐྱེད་རིམ་གྱི་ཡི་གེར་བལྟ་བར་བྱའོ། །བསྐྱེད་རྫོགས་གང་གི་སྐབས་སུ་ཏིང་ངེ་འཛིན་རྣལ་མ་སྐྱེ་བའི་
གེགས་ཀྱི་གཙོ་བོ་ནི་བྱིང་རྒོད་གཉིས་ཡིན་པས། འདི་གཅོད་པའི་ཚུལ་ལ་གཞུང་ཆེན་མོ་རྣམས་ནས་འབྱུང་བའི་བྱིང་རྒོད་ཀྱི་གཉེན་པོ་དང་དྲན་ཤེས་བསྟེན་ཚུལ་སོགས་ཀྱི་འགལ་སྤོང་གི་རྣམ་གཞག་རྒྱས་པ་ལམ་རིམ་དུ་རྗེ་ཉིད་ཀྱིས་རྒྱས་པར་
6-16-7b


གསུངས་པ་ལྟར་བསྐྱེད་རིམ་སོགས་ཀྱི་སྐབས་སུ་ཡང་ཤེས་པར་བྱས་ནས་བྱིང་རྒོད་གཅོད་པ་ཡིན་མོད། འོན་ཀྱང་བྱིང་རྒོད་ཤིན་ཏུ་ཤས་ཆེ་བ་ལ་ཐོག་མར་བྱིང་རྒོད་བཙན་ཐབས་སུ་གཅོད་པའི་མན་ངག་ཟབ་མོ་དང་། བྱིང་རྒོད་སྐྱེ་བའི་རྒྱུ་དང་སྤྱོད་ལམ་
སྤོང་ཚུལ་སོགས་ཤིན་ཏུ་གལ་ཆེ་བའི་མན་ངག་དག་ལོགས་སུ་ཤེས་པར་བྱ་དགོས་སོ། །ལུས་ལ་གནད་དུ་བསྣུན་ནས་རྫོགས་པའི་རིམ་པ་བསྒོམ་པ་ལ་ནི་ལུས་ཀྱི་བྱེད་བཅིངས་དང་། འཁྲུལ་འཁོར་དང་། སྤྱོད་ལམ་ལ་སོགས་པའི་གནད་ཞིབ་པར་
ངེས་ནས། ལག་ལེན་ལ་གདབ་པ་གལ་ཆེ་བ་ཡིན་པས་དེ་དག་གི་རྣམ་པར་བཞག་པ་ཡང་ལུས་ཀྱི་བྱེད་བཅིངས་བསྟན་པ་ལས་ཤེས་པར་བྱའོ། །ཁྱད་པར་དུ་ཡང་ལུས་ལ་གནད་དུ་བསྣུན་པ་ལས་ལྷག་གི་སྐྱེས་པའི་ཡེ་ཤེས་བསྒྲུབ་པར་འདོད་པ་
དག་གིས་ཐོག་མར་གང་ལ་གནད་དུ་བསྣུན་པའི་གཞི་གནས་པ་རྩ། གཡོ་བ་རླུང་། བཀོད་པ་བྱང་ཆུབ་ཀྱི་སེམས་རྣམས་ཀྱི་དང་པོར་གྲུབ་ཚུལ། དེ་ལྟར་རྩ་ཕྲ་རིགས་རྣམས་ལུས་ཀྱི་གནས་གང་ན་ཚུལ་ཇི་ལྟར་གནས་པ། རླུང་རྣམས་གནས་
གང་དུ་གནས་ནས་དུས་གང་གི་ཚེ་གང་ནས་གང་དུ་ཇི་ལྟར་རྒྱུ་ཞིང་ལས་གང་བྱེད་པ། ཁམས་དཀར་དམར་གཙོ་བོ་དང་ཕལ་བའི་ཁྱད་པར་དེ་དག་གནས་གང་ན་གནས་ཤིང་འཕེལ་འགྲིབ་སོགས་ཇི་ལྟར་བྱེད་པའི་རྣམ་གཞག་རྣམས་བླུན་པོའི་
རང་བཟོས་མ་བསླད་ཅིང་། རྒྱུད་དང་གྲུབ་ཆེན་གྱི་དགོངས་པ་ཇི་ལྟ་བ་བཞིན་དུ་བླ་མའི་མན་ངག་གིས་ལེགས་པར་ཐག་ཆོད་ངེས་སུ་གོ་བ་ཞིག་མེད་མི་རུང་ཡིན་ལ་དེ་ཡང་རྗེ་ཉིད་ཀྱིས་རྡོ་རྗེ་ཐེག་པའི་ལམ་གྱི་རིམ་པར་རྩ་བའི་རྣམ་གཞག་
6-16-8a


རགས་པ་ཙམ་ཞིག་མཛད་ཀྱང་། གཞན་གསུང་རབ་གང་དུ་ཡང་དངོས་སུ་ཞིབ་པར་མཛད་པ་མེད་ཅིང་། ཞལ་ལས་ཞིབ་ཏུ་གསུངས་པ་རྣམས་ལེགས་པར་ངེས་དགོས་པ་ཡོད་ཅིང་། རླུང་གི་རྣམ་གཞག་ཞིབ་པར་རིམ་ལྔ་
གསལ་སྒྲོན་དུ་གསུངས་མོད་ཀྱི། གསུང་རབ་བརླིང་བས་བློ་ཞན་པ་ཁ་ཅིག་གིས་ཅུང་ཟད་རྟོགས་དཀའ་བ་ཁ་ཅིག་དང་། ད་དུང་ཞིབ་ཆ་ངེས་དགོས་པ་ཅུང་ཟད་ཡོད་ལ། ཁམས་དཀར་དམར་གྱི་རྣམ་གཞག་ནི་རྫོགས་རིམ་གྱི་ཡི་གེ་རྣམས་སུ་ཅི་རིགས་གསུངས་
མོད་ཀྱི། ད་དུང་ཁྱད་པར་ངེས་དགོས་པའང་མང་པོ་ཞིག་ཡོད་ཀྱི། དེ་ལ་བརྟེན་ནས་སྙིང་གར་སེམས་དཔའ་སུམ་བརྩེགས་བྱེད་པའི་གནད་དང་སྤྱི་བོ། །མགྲིན་པ། སྙིང་ག་གསུམ་དུ་སྐུ་གསུང་ཐུགས་ཀྱི་རྡོ་རྗེ་གསུམ་འགོད་པའི་གནད་ལ་སོགས་པ་ཆེས་ཟབ་མོ་
མང་པོ་ཞིག་ཤེས་དགོས་པ་ཡོད་དེ། དེ་དག་ནི་གནས་པ་རྩའི་གསལ་བྱེད་གཡོ་བ་རླུང་གི་གསལ་བྱེད། བཀོད་པ་བྱང་ཆུབ་ཀྱི་སེམས་ཀྱི་གསལ་བྱེད་རྣམས་ལས་ཞིབ་པར་ངེས་པར་བྱའོ། །དེ་ལྟར་ཤེས་པ་ཙམ་གྱིས་ཕན་ཐོགས་ཤིང་། མ་ཤེས་ན་ཉམས་
ལེན་གྱི་གཙོ་བོ་དག་མི་རྙེད་པའི་གནས་དེ་དག་ལེགས་པར་ཤེས་དགོས་པ་སྔོན་དུ་བཏང་ནས་དེའི་རྗེས་སུ་ལུས་ལ་གནད་དུ་བསྣུན་པའི་རྣལ་འབྱོར་ཟབ་མོ་སྒོམ་པ་ལུས་ལ་གནད་དུ་བསྣུན་ཞེས་པའི་དོན་ནི། ལུས་ཀྱི་གནད་ཆེ་སར་དམིགས་པས་བསྣུན་ནས་
བསྒོམ་པ་ལ་ཟེར་བ་ཡིན་ཅིང་། དེ་ཡང་རྩའི་གནད་གང་ན་གནད་ཆེ་བ་གང་ཡོད་དེ་དག་ལ་གནད་དུ་བསྣུན་ཚུལ་ཇི་ལྟར་བྱས་ན་ཡོན་ཏན་གང་སྐྱེས། གནད་དུ་བསྣུན་ནས་བསྒོམས་པས་རྒྱུད་ལ་ཐོག་མ་དང་བར་དང་། ཐ་མར་གང་སྐྱེ་བའི་རིམ་པ་ཇི་ལྟར་འབྱུང་།
6-16-8b


དེ་ཡང་རླུང་འདུ་མི་འདུ། འདུ་ལུགས་ལེགས་ཉེས་འདོད་པ་བཞིན་དུ་འདུ་བའི་ཕྱི་ནང་གི་རྟགས། འདུ་བའི་ཚུལ་ཇི་ལྟར་བྱེད། འདུ་ལུགས་ལེགས་པ་ལ་ཡོན་ཏན་སྐྱེ་ཚུལ། ཉེས་པ་ལ་སྐྱོན་སྐྱེ་ཚུལ། དེ་དག་ལ་བོགས་འདོན་དང་གེགས་སེལ་ཇི་ལྟར་བྱ་ཚུལ། ཁྱད་
པར་རླུང་ཨ་ཝ་དྷཱུ་ཏཱིར་འདུས་པ་ལས་གཏུམ་མོ་འབར་ཚུལ་ཁྱད་པར་ཅན་དང་། ཁྱད་པར་ཅན་མིན་པའི་རྣམ་དབྱེ་དེ་ལས་ཁམས་འཇུ་བ་ཁྱད་པར་ཅན་དང་ཁྱད་པར་ཅན་མིན་པ་ཇི་ལྟར་འབྱུང་བ། ཡས་བབས་དང་མས་བརྟན་གྱི་དགའ་བའི་རིམ་པ་མང་པོ་དང་། ཁྱད་པར་
ཡས་བབས་ཀྱི་དགའ་བཞི་ཐོག་མར་འདྲེན་ནུས་པའི་མཚམས་ནས་མས་བརྟན་རང་གི་ངང་གིས་འདྲེན་མི་ཐུབ་པས། དང་པོར་ཆེད་དུ་བསྟད་ནས་མས་བརྟན་བསྐྱེད་དགོས་ཤིང་། དེ་བྱང་བ་དང་རང་གིས་ངང་གིས་འདྲེན་ཐུབ་པས་ཐོག་མར་ཆེད་དུ་བསྟད་ནས་མས་བརྟན་
བསྐྱེད་པའི་མན་ངག་དང་། ཕ་རྒྱུད་མ་རྒྱུད་ཀྱི་མན་ངག་སོ་སོ་ལས་བསྐྱེད་པའི་དགའ་བཞིའི་ཁྱད་པར་ཤིན་ཏུ་ཆེ་བ་སོགས་ཀྱི་གོ་བ་ཙམ་མིན་པར་རིམ་ལྔའི་མན་ངག་ལས་སྙིང་གར་སྟོང་པ་བཞི་འཆར་ནུས་པའི་མཚམས་ནས་མ་རྒྱུད་ཀྱི་དགའ་བཞི་དེའང་ཇི་ལྟར་
འདོད་པ་བཞིན་འདྲེན་ནུས་སོ་ཞེས་རྗེ་རིན་པོ་ཆེས་མཛད་པའི་རྫོགས་རིམ་གྱི་ཡི་གེ་ལས་གསུངས་པ་ལྟར་ལག་ལེན་ལ་སྦྱོར་ཚུར་གྱི་མན་ངག་གི་གནད་དང་། དེ་དག་གི་སྐབས་སུ་རླུང་གི་གེགས་བྱུང་ན་སྔར་བཞིན་དུ་མན་ངག་བསྒོམས་པ་ལས་རླུང་ལ་སོགས་
པའི་གེགས་ཆེན་པོར་སོང་བ་ཞིག་མདུན་དུ་འོངས་ནས་མན་ངག་ལ་དོན་གཉེར་སྐྱེས་པ་རང་གིས་ཁྲིད་དགོས་པ་བྱུང་ན་རང་རེའི་དམིགས་པ་སྐྱོང་ཚུལ་ལ་གེགས་ཆེན་པོ་མི་འབྱུང་ངོ་བྱས་པས་མི་ཆོག་གི ། སྔར་གེགས་ཆེན་པོ་བྱུང་ཟིན་མ་ཐོན་པ་དེ་སྟོན་ནས་
6-16-9a


འཁྲིད་དགོས་པས་གེགས་སེལ་ཚུལ་ལ་ཤིན་ཏུ་མཁས་དགོས་ཏེ། རྗེ་ཉིད་ཀྱི་དྲུང་དུའང་གཞན་དུ་གེགས་ཆེན་པོར་གྱུར་པ་མན་ངག་བསྟན་པ་ཙམ་གྱིས་གྲོལ་བ་མང་དུ་བྱུང་ངོ་། །དེ་ལྟར་གོ་བ་ཚོལ་ལུགས་མ་ནོར་བ་ཙམ་གྱིས་མི་ཆོག་
གི ། ཚེ་འདིར་ལམ་རྒྱུད་ལ་སྐྱེ་བའི་བློ་རྩེ་གཏོད་ན་ནི། དམིགས་པ་ཕྲ་རགས་བསྒོམ་ཚུལ་བོགས་འདོན་གེགས་སེལ་དང་བཅས་པ་ཐམས་ཅད་ལག་ལེན་ལ་འགེལ་བ་ན་ཐེ་ཚོམ་མི་སྐྱེ་བའི་ལེགས་པར་བྱང་བ་ཞིག་དགོས་སོ། །དེ་བས་ན་རྗེ་ཉིད་ཀྱི་གསུང་
རབ་མང་ལ་གོ་བ་འཚོལ་ལུགས་མཐའ་དག་པ་གསུངས་མོད་ཀྱི། ལག་ལེན་ལ་སྦྱོར་ཚུལ་ཕྲ་ཞིབ་འགའ་ཞིག་དང་ཟབ་མོའི་གནད་མང་པོ་ཞིག་ཞལ་ལས་རག་ལས་པར་བྱས་ཏེ་དངོས་སུ་ཡི་གེར་མ་བཀོད་པ་མང་པོ་ཞིག་ཡོད་དེ། དེ་ལྟ་ནའང་བདག་གིས་
བརྗེད་པས་འཇིགས་ཏེ། བླ་མ་ལ་གསོལ་བ་བཏབ་ནས་ཡིག་ཆུང་ཐོར་བུ་བྲིས་པ་ལ། མ་རྒྱུད་ནས་འབྱུང་བ་རྣམས་ཀྱི་རྫོགས་རིམ་གང་ལ་རྩལ་དུ་འདོན་པའི་གནད་ལུས་ཀྱི་གསང་གནས་དང་། ལྟེ་བར་གཏུམ་མོ་ལ་གནད་དུ་བསྣུན་པས་དགའ་བཞི་ཡས་
བབས་དང་མས་བརྟན་ཇི་ལྟར་བསྐྱེད་པ་ལ་གནད་ཆེ་བའི་ཡི་གེ་འདུས་པའི་རྫོགས་རིམ་ལ་གཙོ་བོར་སྙིང་གར་གནད་དུ་བསྣུན་པ་ལས་སྟོང་པ་བཞི་བསྐྱེད་དེ། དེའི་མཐར་སྒྱུ་མའི་སྐུར་ལྡང་བ་ལ་རྡོ་རྗེའི་བཟླས་པའི་གནད་ཀྱི་ཡིག་ཆུང་། སེམས་དབེན་དང་
སྒྱུ་ལུས་ཀྱི་གནད་ཀྱི་ཡིག་ཆུང་། རླུང་གི་འདུ་རྟགས་ལེགས་ཉེས་དང་འདུས་པ་ལས་ཉམས་མྱོང་སྐྱེ་བའི་རིམ་པ་སོགས་བསྟན་པའི་གནད་ཀྱི་ཡིག་ཆུང་། སྒྱུ་ལུས་ཀྱི་གདམས་ངག་གི་ཡན་ལག་བསྲེ་བའི་སྐོར་ལ་གཉིད་འོད་གསལ་དང་བསྲེ་བ། རྨི་
6-16-9b


ལམ་སྒྱུ་ལུས་དང་བསྲེ་བ། སད་པ་སྤྲུལ་སྐུ་དང་བསྲེ་བ་གསུམ་རླུང་སྟོབས་དང་འདུན་པའི་སྟོབས་ཀྱི་བསྲེ་བ་གང་བྱེད་ཀྱང་མཆོག་ཏུ་གཅེས་ཤིང་། གདན་རྫོགས་ཀྱི་ཁྲིད་ཡིག་དང་རིམ་ལྔ་གསལ་སྒྲོན་གཉིས་ཀར་རྨི་ལམ་རླུང་དང་འདུན་པའི་སྟོབས་ཀྱིས་འཛིན་པ་
གཉིས་ཀ་ལ་རྨི་ལམ་གྱི་ལུས་སྒྱུ་མའི་སྐུར་ལྡང་ལུགས་ཁྱད་པར་ཅན་ཞིག་སྣང་མོད་བླ་མས་ཞིབ་ཏུ་བསྟན་པར་བྱ་སྟེ། དེ་ནི་རྨི་ལམ་གྱི་གདམས་ངག་གི་ཡང་སྙིང་པོ་ཡིན་ལ། ཁྱད་པར་དུ་རྨི་ལམ་ལ་བརྟེན་ནས་བར་དོ་སྒྱུ་མ་ཟིན་པའི་ཐབས་བླ་ན་མེད་པ་ཡིན་
ནོ། །ཞེས་དང་གདན་རྫོགས་ཀྱི་ཁྲིད་ཡིག་ལས་བསྲེ་བ་གསུམ་གྱི་རྣམ་གཞག་ལ་ད་དུང་བླ་མས་ཞིབ་ཏུ་བཤད་དགོས་པ་འགའ་ཞིག་ཡོད་དོ་ཞེས་སོགས་ཀྱི་གདམས་ངག་ཟབ་མོ་ཞལ་ཤེས་དགོས་པའི་ཁུངས་བསྟན་པ་ཙམ་མཛད་པ་དེ་བརྗེད་ཐོ་ལྟ་བུར་བྲིས་
པ་ཤིན་ཏུ་གཅེས་པ་བསྲེ་བའི་ཡིག་ཆུང་གཙོ་བོར་མ་རྒྱུད་ནས་གསུངས་པ་འཕོ་བའི་སྐོར་ལ། རྗེ་ཉིད་ཀྱིས་མཛད་པའི་འཕོ་བའི་ཡི་གེ་ན་ཅུང་མི་གསལ་ཞིང་། ཞལ་ལས་བྱུང་བའི་དམིགས་པའི་གདང་ཅུང་ཟད་དག་བྲིས་པ་འཕོ་བའི་ཡིག་ཆུང་དེ་ཐམས་
ཅད་སྐབས་སུ་ཉེ་བར་མཁོ་བ་རླུང་གི་གེགས་སེལ་བ་དང་། ཐིག་ལེའི་གེགས་སེལ་བ་སྟེ་གེགས་སེལ་གྱི་ཡིག་ཆུང་གཉིས། རྣམ་གསུམ་རིགས་དབྱེའི་ཡིག་ཆུང་། སྔགས་བླ་མེད་ལ་ལམ་རིམ་གང་གི་སྐབས་སུའང་མཆོག་ཏུ་བསྔགས་པ་ཕྱག་རྒྱའི་ལམ་
ཡིན་ལ་རྗེ་ཉིད་ཀྱིས་ཕྱག་རྒྱ་སྲོག་རྩོལ་དུ་འགྲོ་བའི་གནད་ཆེ་བ་ཡང་ཡང་གསུངས་པ། དེའི་གནད་རྣམས་ཞིབ་པར་བྲིས་པ། ཕྱག་རྒྱ་བཞིའི་ལམ་གསལ་བར་བྱེད་པའི་ཡིག་ཆུང་དེ་དག་གི་སྐབས་སུ་ཅི་རིགས་པར་ཉེ་བར་མཁོ་བའི་ཐོར་བུ་ཅི་རིགས་ཡི་
6-16-10a


གེར་བྲིས་པའི་ཡིག་ཆུང་སྟེ། དེ་ལྟར་བཀོད་པའི་ཡིག་ཆུང་ཐོར་བུ་དག་ལས་བསྟན་པ་ཐོག་མར་བླ་མ་བསྟེན་ཚུལ་དང་དམ་ཚིག་དང་སྡོམ་པ་དག་པར་བྱེད་ཚུལ་ལ་ཉམས་འོག་ཏུ་ཚུད་པའི་ལག་ལེན་བྱེད་པ་གཞིར་བྱས། 
ལྟ་བ་སྐྱོང་ཚུལ་གྱི་གནད་ལ་མཁས་པས་བསྐྱེད་རིམ་རྫོགས་རིམ་ལ་ལེགས་པར་འཁྲིད། མན་ངག་འདི་དག་གང་དང་གང་དུ་སྦྱོར་དགོས་པ་དེ་དང་དེར་སྦྱར་ཏེ་བོགས་འདོན་ཅིང་གེགས་བསལ་ནས་འཁྲིད་པས་ངེས་པར་ལམ་སྣ་ཟིན་པར་འགྱུར་བ་གདོན་
མི་ཟ་བ་ཡིན་ནོ། །དེ་ཡང་བོད་ལ་གྲགས་པའི་གདམས་ངག་ཇི་ལྟར་ཟབ་པ་དག་ལ་ཡང་ཉམས་ལེན་གྱི་གནད་རྒྱུད་སྡེ་དང་གྲུབ་ཆེན་གྱི་གཞུང་དང་བསྟུན་ནས་ལེགས་པར་དཔྱད་ན་ཕྱིན་ཅི་ལོག་ཏུ་སོང་བ་དང་། གནད་འཕྱུགས་པ་རང་མང་། ལྷག་པར་ཞུ་བདེ་
ལྷན་ཅིག་སྐྱེས་པའི་ཡེ་ཤེས་བསྐྱེད་པའི་གདམས་ངག་ལ་གོ་བ་ཆགས་པ་དང་། སྒྱུ་ལུས་དང་འོད་གསལ་ལས་ཟུང་འཇུག་གི་སྐུ་བསྒྲུབ་པའི་གོ་བ་ཕྱོགས་མཐོང་ཙམ་ཆགས་པ་ཡང་ཉུང་པའི་ཚོད་དུ་འདུག །དེའི་གནད་ཀྱིས་སྒྲུབ་པ་སྙིང་པོར་བྱེད་པ་ཇི་
འདྲ་ཞིག་ལ་ཡང་རྒྱུད་སྡེ་དང་མཐུན་པའི་ཉམས་རྟོགས་ཁྱད་པར་ཅན་སྐྱེས་པ་བོད་འདིར་ཤིན་ཏུ་ཉུང་། རང་རེའི་རྗེ་རིན་པོ་ཆེའི་གདམས་པའི་གནད་ཐམས་ཅད་ལེགས་པར་ཤེས་ཤིང་། ལམ་སྤྱིའི་གོ་བ་ལེགས་པར་ཆགས་པ་ཞིག་གིས་ཚེ་
འདི་ལ་བལྟོས་པ་མེད་པར་ཁ་བཤད་དང་རྣམ་གཡེང་གིས་ཡིད་མ་ཕྲོགས་པར་བྱས་ཏེ། སྔོན་གྱི་བླ་མ་མིད་ལ་དང་རྒོད་ཚང་པ་ལ་སོགས་པའི་མང་པོ་ཞིག་གི་ཕྱེད་ཙམ་གྱི་སྒྲུབ་པ་སྙིང་པོར་བྱས་ན་རྒྱུད་སྡེ་དང་མཐུན་པའི་ལམ་རྒྱུད་ལ་སྐྱེས་པ།
6-16-10b


རྒྱ་གར་གྱི་གྲུབ་ཆེན་འདྲ་བ་འོང་བ་ལ་ཐེ་ཚོམ་མེད་པ་ཡིན། དེ་ལྟར་མན་ངག་གི་ཡིག་ཆུང་ཉི་ཤུ་འཇུག་པའི་ལམ་ལ་བསྟན་པའི་དཀར་ཆག་ཡིག་ཆུང་ཉེར་གཅིག་པོ་འདི་ནི་བདག་ཉིད་ཉམས་ལེན་ལ་སྒྲུབ་པ་སྙིང་པོར་བྱེད་འདོད་པའི་ཡིད་ཀྱི་རེ་བ་ཕྱི་ནང་གི་བར་
དུ་གཅོད་པས་མ་བཅད་ན། ཉེ་བར་མཁོ་བའི་གཙོ་བོ་དག་བརྗེད་པས་འཇིགས་པ་དང་། སྐལ་བ་དང་ལྡན་པ་སྒྲུབ་པ་ལྷུར་ལེན་པར་འདོད་པ་ཙམ་བྱུང་སྲིད་ནའང་འཁྲིད་ཚུལ་ཞིབ་ཏུ་ངེས་པས་ཕན་གདགས་པ་དང་། ཁོ་བོ་ཅག་དུས་ཀྱི་ཕོ་ཉས་ཁྲིད་པར་གྱུར་ན། 
རྗེ་རིན་པོ་ཆེའི་གསུང་ངག་རྡོ་རྗེ་འཆང་གི་ཞལ་གྱི་བདུད་རྩི་འདི་དག་གངས་རིའི་ཁྲོད་དུ་ལྷག་མ་མེད་པར་འགྱུར་དུ་དོགས་པས་འཇིགས་ཤིང་མན་ངག་གི་གནད་དང་གོ་བ་འཚོལ་ལུགས་ཀྱི་ཆེས་གནད་ཟབ་པ་ཞལ་ལས་ཤེས་པར་བྱ་བ་མང་དུ་ཡོད་པ་དག་ཁོ་
བོས་དུས་ཕྱིས་རྗེ་ཉིད་ཀྱི་ཞབས་དྲུང་དུ་སླར་ཡང་སྙིང་ནས་གསོལ་བ་བཏབ་ཅིང་གསེར་གྱི་མཎྜལ་ཚོགས་ཀྱི་འཁོར་ལོ་ལ་སོགས་ལ་འབད་ཅིང་ཐུགས་བརྩེ་བ་ཆེན་པོས་ཉེ་བར་གཟིགས་ནས་ཟླ་བ་བཅུའི་རིང་ལ། ཉིན་མོ་རྒྱུད་སྡེ་དང་གཞུང་ཆེན་པོ་
རྣམས་ཀྱི་བཤད་པ་དང་མཚན་རེ་ཞིང་བསྐྱེད་རྫོགས་ཀྱི་མན་ངག་གི་གནད་རྒྱུན་མ་ཆད་པར་སྩལ་བ་དག་ཡིད་ལ་གཅགས་པར་བགྱིས་ཤིང་། ཁྱད་པར་ཞལ་ལས་ཤེས་པར་བྱ་བའི་གནད་ཞིབ་ཅིང་མང་བར་གསུངས་པ་དག་ཟུར་ཕྲ་མོ་ཙམ་ཡང་
མ་ཉམས་པར་དུས་དེ་ཉིད་ནས་ལོ་དྲུག་གི་བར་ཡང་ཡང་ཡིད་ལ་ཤར་བ་དང་སེམས་པས་མ་བརྗེད་པར་བྱས་ནས། ལོ་བདུན་པ་ལ་བབ་པ་ན་རྗེ་ཉིད་ལ་གསོལ་བ་མང་དུ་བཏབ་ཅིང་མཁའ་འགྲོ་ཆོས་སྐྱོང་ལ་མཆོད་གཏོར་ཕུལ་ནས་གསོལ་བ་
6-16-11a


བཏབ་སྟེ་དཔལ་རི་བོ་མདངས་ཅན་གྱི་དགོན་པར་རྡོ་རྗེ་འཛིན་པ་དགེ་ལེགས་དཔལ་བཟང་པོས་ཡི་གེར་བྲིས་པ་ཡིན་ནོ། །ཞལ་ལས་ཤེས་པར་བྱ་བའི་གནད་འདི་དག་རྗེ་ཉིད་ཀྱིས་བཀའ་རྒྱས་དམ་དུ་བཏབ་པས་སྙིང་ནས་སྒྲུབ་པ་
སྙིང་པོར་བྱེད་པའི་སྐལ་ལྡན་གསང་བདེ་གཉིས་ཀྱི་བསྐྱེད་རྫོགས་ཀྱི་གཞུང་ཁྲིད་རྗེ་ཉིད་ཀྱི་ཁྲིད་ཡིག་སྟེང་ནས་ལེགས་པར་ཐོབ་པ། བཤད་པ་ཙམ་ལ་སྙིང་པོར་འཛིན་པ་མིན་པ་ནན་གྱིས་དོན་དུ་གཉེར་ཞིང་གུས་པས་གསོལ་བ་འདེབས་པ་དག་མིན་པ་ལ་
བསྟན་པར་མི་བྱའོ། །དེའི་ཕྱིར་ལྷག་པའི་ཆོས་སྲུང་དག་གིས་ཆོས་འདིའི་བྱ་ར་མ་གཡེལ་བར་མཛོད་ཅིག །ཟབ་མོ་རྡོ་རྗེའི་རྣལ་འབྱོར་ལ་འཇུག་པའི་ལམ་བསྟན་པ་ཞེས་བྱ་བ་དཀར་ཆག་ཐོའི་ཡིག་ཆུང་། ས་མ་ཡ་མུ་ཁ། འདིས་ཀྱང་བསྟན་
པ་རིན་པོ་ཆེ་རྒྱས་པར་བྱེད་ནུས་པར་གྱུར་ཅིག །རབ་འབྱམས་རྒྱལ་བ་ཀུན་གྱི་ཐུགས་ཀྱི་བཅུད། །དྲི་མེད་མཁའ་འགྲོ་བྱེ་བའི་གསང་བའི་མཛོད། །རྩ་བཤད་ཤིན་ཏུ་སྦྱོར་བའི་རྣལ་འབྱོར་མཆོག །
གྲུབ་ཆེན་ཙོང་ཁ་པ་ཡི་མན་ངག་བརྗོད། །དེའང་དམ་ཚིག་དང་སྡོམ་པ་ལས་མི་འདའ་བའི་ཐབས་བཤད་པར་བྱ་བ་ལ་གཉིས་ལས། དམ་ཚིག་རྡོ་རྗེའི་བཟླས་པའི་གནད་དང་། ཟ་བྱེད་མཁའ་འགྲོའི་སྦྱིན་སྲེག་གི་སྒོ་ནས་སོ། །དང་པོ་ནི། རང་ཡི་
དམ་དུ་གསལ་བའི་ཐུགས་ཀར་སྣ་ཚོགས་པདྨ་དང་ཟླ་བའི་དཀྱིལ་འཁོར་གྱི་སྟེང་དུ། ཧ་ལས་རལ་གྲིའི་ཆང་ཟུངས་ལ་ཧས་མཚན་པ་དེ་ཡོངས་སུ་གྱུར་པ་ལས། དམ་ཚིག་གི་རྡོ་རྗེ་སྐུ་མདོག་ལྗང་གུ་ལྗང་ནག་དཀར་བའི་ཞལ་གསུམ་ཕྱག་དྲུག་གི་
6-16-11b


དང་པོ་གཉིས་ཀྱིས་རང་འདྲའི་ཡུམ་ལ་འཁྱུད་ཅིང་། ལྷག་མ་གཡས་གཉིས་རྡོ་རྗེ་དང་རལ་གྲི ། གཡོན་གཉིས་དྲིལ་བུ་དང་པདྨ་འཛིན་པ་ཡབ་ཡུམ་གཉིས་ཀའང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ་དེའི་སྤྱི་བོར་ཨོཾ། མགྲིན་པར་ཨཱཿཐུགས་ཀར་ཧཱུཾ། 
ཐུགས་ཀའི་ཧཱུཾ་ལས་འོད་ཟེར་འཕྲོས་པས་རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ཛཿཧཱུཾ་བཾ་ཧོཿགཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་པས། རིགས་ལྔ་འཁོར་དང་བཅས་པ་སྤྱན་
དྲངས། མཆོད་པས་མཆོད། དེ་བཞིན་གཤེགས་པ་རྣམས་ཀྱིས་འདི་ལ་མངོན་པར་དབང་བསྐུར་དུ་གསོལ་ཞེས་གསོལ་བ་བཏབ་པས། དེ་རྣམས་ཀྱིས་ཡེ་ཤེས་ཀྱི་བདུད་རྩིས་གང་བའི་བུམ་པས། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་
ཡེ་ཧཱུཾ། །ཞེས་རང་གི་སྤྱི་བོ་ནས་དབང་བསྐུར་བས། དམ་ཚིག་རྡོ་རྗེའི་ལུས་ཐམས་ཅད་གང་། བདེ་བ་ཆེན་པོ་མྱོང་། དྲི་མ་ཐམས་ཅད་དག །ཆུ་ལྷག་མ་སྤྱི་བོར་གནས་པ་ཡོངས་སུ་གྱུར་པ་ལས་ཡབ་ལ་མི་བསྐྱོད་པ་དང་ཡུམ་ལ་དོན་གྲུབ་ཀྱིས་
དབུ་བརྒྱན། དེའི་ཐུགས་ཀར་ཟླ་བའི་སྣ་ཚོགས་རྡོ་རྗེའི་ལྟེ་བར་ཧ་ལྗང་གུའི་བདུད་རྩིའི་རྒྱུན་ཕྲ་མོ་འཛག་པ་དེའི་མཐར། ཨོཾ་ཨཱཿཔྲཛྙཱ་དྷྲྀ་ཀ་ཧ་ཧཱུཾ་ཞེས་པས་བསྐོར་བར་དམིགས་ལ་བདུད་རྩིའི་རྒྱུན་དེ་སྣ་ཚོགས་རྡོ་རྗེའི་རྭའི་བུ་ག་ནས་རིམ་གྱིས་
བྱུང་ནས་ལུས་ཐམས་ཅད་གང་། ཟག་མེད་ཀྱི་བདེ་བ་མྱོང་བས་དམ་ཚིག་ཉམས་པ་ཐམས་ཅད་བ་སྤུའི་བུ་ག་ནས་ནག་ཉིལ་ཉིལ་ཐོན་པར་བསམས་ལ། ངག་ཏུ་གོང་གི་སྔགས་དེ་བཟླ། བཟླས་པ་ཚར་བ་དང་། བདག་ནི་མི་ཤེས་རྨོངས་པ་ཡིས།
6-16-12a


ཞེས་སོགས་བྱའོ། །གཉིས་པ་རྡོ་རྗེ་མཁའ་འགྲོའི་སྦྱིན་སྲེག་བྱ་ཚུལ་ནི། རང་གི་མདུན་དུ་མེ་རྡོག་པོ་དུ་བ་མེད་པ་སྣོད་དུ་བཞག་ལ། ཨོཾ་ཨཱཿབིགྷྣཱཾ་ཏ་ཀྀ་ཏ་ཧཱུཾ། །ཞེས་སོགས་རང་གི་སྔགས་ཀྱིས་བསངས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་
སྭ་བྷཱ་ཝ་ཨཱ་ཏྨ་ཀོ྅ཧཾ། སྟོང་པར་གྱུར། སྟོང་པའི་ངང་ལས་ཡེ་ཤེས་ཀྱི་མེ་དམར་པོ་གྲུ་གསུམ་པ་རབ་ཏུ་འབར་བར་གྱུར། དེའི་དབུས་སུ་སྣ་ཚོགས་པདྨ་དང་ཉི་མའི་སྟེང་དུ་ཧཱུཾ་མཐིང་ནག་དེ་ཡོངས་སུ་གྱུར་པ་ལས་ཟ་བྱེད་རྡོ་རྗེ་མཁའ་འགྲོ་སྐུ་
མདོག་མཐིང་ནག་ཞལ་གཅིག་ཕྱག་གཉིས་ཀྱིས་ཧཱུཾ་མཛད་ཀྱི་ཕྱག་རྒྱ་འཆིང་བས་རྡོ་རྗེ་དང་དྲིལ་བུ་འཛིན་པ། དབུ་སྐྲ་ཁམ་སེར་གྱེན་དུ་བརྫེས་པ། ཞལ་རབ་ཏུ་གདངས་པ་ལྟོ་བ་འཕྱང་བ་ཡན་ལག་རགས་པ་གཡས་བརྐྱང་གིས་བཞུགས་པ། དེའི་སྤྱི་
བོར་ཨོཾ་མགྲིན་པར་ཨཱཿཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས། རང་བཞིན་གྱི་གནས་ནས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ཨོཾ་བཛྲ་ཌཱ་ཀས་པ་རི་ཝཱ་ར་ཨརྒྷཾ་པྲ་ཏཱི་ཙྪ་ཧཱུཾ་སྭཱ་ཧཱ། །ཞེས་སོགས་ཀྱིས་
མཆོད། ཛཿཧཱུཾ་བཾ་ཧོཿགཉིས་སུ་མེད་པར་གྱུར། སླར་ཡང་ཐུགས་ཀའི་ཧཱུཾ་ལས་འོད་ཟེར་འཕྲོས་པས་དབང་གི་ལྷ་རྣམས་སྤྱན་དྲངས། ཨོཾ་པཉྩ་ཀཱུ་ལ་ས་པ་རི་ཝཱ་ར་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ། །ཞེས་སོགས་ཀྱིས་མཆོད། དེ་བཞིན་གཤེགས་
པ་རྣམས་ཀྱིས་འདི་ལ་མངོན་པར་དབང་བསྐུར་དུ་གསོལ་ཞེས་གསོལ་བ་བཏབ་པས། དེ་རྣམས་ཀྱིས་བདུད་རྩིས་གང་བའི་བུམ་པ་ཐོགས་ཏེ། ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཨཱཿཧཱུཾ། །ཞེས་དབང་བསྐུར་བས་ལུས་
6-16-12b


ཐམས་ཅད་གང་། ཆུའི་ལྷག་མ་སྤྱི་གཙུག་ཏུ་འཁྱིལ་བ་ཡོངས་སུ་གྱུར་པ་ལས་མི་བསྐྱོད་པས་དབུ་བརྒྱན་པར་གྱུར། ཨོཾ་བཛྲ་ཌཱ་ཀ་ཞེས་སོགས་ཀྱིས་མཆོད། ཨོཾ་ཨཱཿཧཱུཾ་གིས་ནང་མཆོད་ཕུལ། དེ་ནས་གསང་གནས་སུ་ཡཾ་ལས་རླུང་གི་
དཀྱིལ་འཁོར་སྔོན་པོ་གཞུ་ལྟ་བུ་དང་། ལྟེ་བར་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་པ་བསྒོམ། སྙིང་གར་ཡི་གེ་པཾ་ནག་པོ་དེ་ལས་འོད་ཟེར་ནག་པོ་ལྕགས་ཀྱུ་ལྟ་བུས་ལུས་ཀྱི་སྟོད་སྨད་ཐམས་ཅད་ཁྱབ་པར་འཕྲོས་པས། རང་གི་སྡིག་
སྒྲིབ་དང་དམ་ཚིག་ཉམས་ཆགས་ཐམས་ཅད་འོད་ཟེར་ནག་པོའི་རྣམ་པར་བསྡུས་ནས་པཾ་ལ་ཐིམ་པ་དང་མཉམ་དུ་གསང་གནས་ཀྱི་རླུང་གཡོས་ལྟེ་བའི་མེ་སྦར་བས། པཾ་དེ་ནག་ན་ར་ར་མགྲིན་པ་ནས་ཡར་བརྒྱུད་དེ། སྣའི་རྩེར་སླེབ་པ་ན་
སྡིག་པ་རྭ་ཆེན་གྱི་གཟུགས་སུ་གྱུར་པ་རླུང་ཕྱིར་རྒྱུ་བ་དང་མཉམ་དུ་ཐོན་ནས། སྣའི་སྒོར་སྣོད་ཀྱི་ནང་དུ་ཏིལ་ཇི་ཙམ་འདོད་པ་བཟུང་ལ། དེ་རྣམས་དང་དབྱེར་མེད་དུ་གྱུར་པར་བསམ། རླུང་ཕྱིར་བུས་ལག་པ་གཉིས་ཀྱིས་མཐེབ་སྲིན་སྦྱར་བའི་
ཏིལ་མེ་ལ་བསྲེག་ཅིང་། ཨོཾ་བཛྲ་ཌཱ་ཀ་ཁ་ཁ་ཁཱ་ཧཾ་ཁཱ་ཧི། སརྦ་པཱ་པཾ་ད་ཧ་ན་བྷཾ་སྨིཾ་ཀུ་རུ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། །ཞེས་ཏིལ་མེར་དོར་བའི་གྲངས་དང་མཉམ་པར་བརྗོད། དེ་ནས་སྔར་བཞིན་མཆོད་ནས། ཡིག་བརྒྱ་འདོན། མ་རྙེད་ཡོངས་སུ་
མ་ཤེས་བརྗོད། ཡེ་ཤེས་པ་རང་བཞིན་གྱི་གནས་སུ་གཤེགས། དམ་ཚིག་པ་མེ་འབར་བའི་རྣམ་པར་གྱུར། མེ་མ་འདས་ཀྱི་བར་དུ་མི་རེག་ཅིང་། ཤི་བ་དང་ཐལ་བ་འགོམ་ལམ་མི་འཆོར་བའི་ས་ཕྱོགས་སམ་ཆུར་དོར་བར་བྱའོ། །རྗེ་རིན་པོ་
6-16-13a


ཆེ་ཤར་ཙོང་ཁ་པའི་ཞལ་གདམས་ཐུན་མོང་མིན་པའི་ཟབ་ཆོས་བླ་ན་མེད་པ་རྗེ་ཉིད་ཀྱིས་གསུངས་པ་བཞིན་ཡི་གེར་བཀོད་པའོ། །མཁས་གྲུབ་རྗེའི་ཟིན་བྲིས། །བཞི་པ་ལྟ་བའི་
ཡིག་ཆུང་ལ་གསུམ། ཞི་གནས་དང་། ལྷག་མཐོང་དང་། ཞི་ལྷག་ཟུང་འབྲེལ་ལོ། །དང་པོ་ལ། ཞི་གནས་ཀྱི་སྐབས་སུ་བྱིང་རྒོད་བཙན་ཐབས་སུ་གཅོད་པའི་མན་ངག་ནི། ཚུལ་གནས་གྲུ་རྫིངས་རིག་པའི་སྐྱ་བ་འཛིན། །དེད་དཔོན་བཤེས་
གཉེན་མཆོག་གི་ཞབས་བཏུད་ནས། །ཉིད་ཀྱི་ཐུགས་བཅུད་ཞལ་གྱི་གདམས་པ་མཆོག །ལེགས་པར་བཀོད་ལ་སྲུང་མས་གྲོགས་མཛོད་ཅིག །དེ་ལ་ཞི་གནས་ཀྱི་མཚན་ཉིད་དང་། རྒྱུ་ཚོགས་བསྟེན་པའི་རིམ་པ་ལ་སོགས་པ་རྣམས་མཐའ་
དག་པར་བྱང་ཆུབ་ལམ་གྱི་རིམ་པར་ཤེས་པར་བྱ་ལ། འདིར་ནི་དེ་དག་གི་སྐབས་སུ་མེད་དུ་མི་རུང་བའི་ཞལ་ཤེས་དག་བྲི་བར་བྱའོ། །དེ་ཡང་ཞི་ལྷག་གི་སྐབས་སུ་བྱིང་རྒོད་གཅོད་པ་ཤིན་ཏུ་གལ་ཆེ་བས། བྱིང་རྒོད་བཙན་ཐབས་སུ་སེལ་ཚུལ་ནི། 
བྱིང་རྒོད་ཤས་ཆུང་ཞིང་ལན་རེ་ཙམ་ལས་མི་འབྱུང་ན། སྐབས་གཞན་ནས་འབྱུང་བ་ལྟར་དྲན་ཤེས་བསྟེན་ཚུལ་ལ་མཁས་པས་སེལ་ལ། བྱིང་རྒོད་ཤིན་ཏུ་ཤས་ཆེ་ཞིང་ཡང་ཡང་འབྱུང་བ་ལ་ནི་འདི་ལྟར་བྱིང་བ་དང་རྨུགས་པ་ཡང་ཡང་བྱུང་ན། 
རང་གི་སེམས་དང་ནམ་མཁའ་སྟོང་གསལ་གཉིས་དབྱེར་མེད་དུ་བསྲེས་ནས་སེམས་གཟུང་བ་དང་། སེམས་གསལ་ལ་དྭངས་ཤིང་དམིགས་པ་ལ་འདོད་པ་བཞིན་དུ་གནས་པ་གཉིས་འོང་བ་ཡིན་ནོ། །རྒོད་པ་ནི་རླུང་སྦྱོར་བྱས་ཏེ་ནང་དུ་བཟུང་བས་
6-16-13b


སེམས་ཀྱང་གནས་ཤིང་། རིག་པ་དྭངས་སྙིགས་ཕྱེད་པ་འོང་བ་ཡིན་ནོ། །བྱིང་རྒོད་བཙན་ཐབས་སུ་གཅོད་པའི་ཞལ་ཤེས་སོ། །གང་ལ་འཇོག་པའི་དམིགས་པ་དང་། ཇི་ལྟར་འཇོག་པའི་ཚུལ་དང་། དམིགས་པ་བསྒོམས་པས་མྱོང་བ་སྐྱེ་ཚུལ་དང་། 
བྱིང་རྒོད་ཕྲ་རགས་ཀྱི་དབྱེ་བ་དང་། ཁྱད་པར་རྣམ་ཤེས་པར་བྱ་དགོས་སོ། །གཉིས་པ་ལྷག་མཐོང་ལ་གནད་བཞི་དང་། ཚད་མ་བཞི་ལྡན་དུ་སྐྱོང་ཚུལ་ནི། ཐོག་མར་དགག་བྱ་དེའི་ཚད་འཆར་ཚུལ་ནི། ཐོག་མར་བློ་ལྷན་སྐྱེས་ལ་ང་ཙམ་
དེ་ཇི་ལྟར་འཆར་བ་བལྟ། དེ་དེས་ནས་ང་ཙམ་དེ་ངའོ་སྙམ་པའི་བློ་ལ་ཇི་ལྟར་སྣང་བ་བལྟ། སྣང་ཚུལ་དེས་ནས་ངའོ་སྙམ་པའི་བློ་འདིས་ང་དེ་ཇི་ལྟར་བཟུང་བ་བྱེད་པ་དེ་ལ་ཡང་སྔོན་ལ་སྣང་བའི་འཆར་ཚུལ་དང་། དེ་ནས་ཞེན་པའི་འཆར་ཚུལ་གཉིས་
ལ་རིམ་པ་བཞིན་ཐ་དད་དུ་གཉེན་པོ་བསྟེན་དགོས་སོ། །ལྟ་ཚུལ་ཡང་ངའོ་སྙམ་པའི་བློ་མ་ཤོར་བར་བྱས་ནས། བློ་གཞན་ཞིག་གིས་ཟུར་ནས་བལྟ་དགོས་པ་ཡིན་ཏེ། དེ་ལྟར་བལྟས་པ་ན་ཐོག་མར་ཕུང་པོ་འཆར་བ་དང་མི་འཆར་བ་གཉིས་དང་། 
འཆར་བ་ལ་ཡང་ང་དེ་ཕུང་པོའི་དཀྱིལ་ན་གནས་པ་འཆར་བ་དང་། ཕུང་པོ་ལས་གཞན་དུ་འཆར་བ་དང་། མི་འཆར་བ་ལ་ཡང་ཅི་མེད་ཀྱི་སྟོང་སང་ངེ་བ་ལྟ་བུ་དང་། ཁ་དོག་དང་གཟུགས་ཀྱི་རྣམ་པ་ལྟ་བུ་འཆར་བ་ནི་འཆར་ཚུལ་རྣམ་དག་མིན་ནོ། །དེས་
ན་བློ་ལྷན་སྐྱེས་འདི་ལ་ང་དེ་ཡུལ་གང་ལ་ཡང་བལྟོས་པ་མེད་པ་འདྲ་བའི་རང་ངོས་ནས་ལྷང་ངེ་བ་ཅིག་འཆར་ལ། དེ་ཉིད་ཐ་སྙད་ཧྲང་ངེ་བ་དང་། ཕོབ་ཕོབ་པ་དང་། ནུས་ལྷང་ངེ་བ་དང་། ལམ་མེ་དང་། གང་ལ་སྦྱར་ཡང་འཆར་བ་འདྲ་བ་ཞིག་འོང་
6-16-14a


ངོ་། །སྣང་བ་དེ་ཡང་ཡུན་ཐུང་བས་བྲང་ཙམ་རེ་མི་འཆར་རོ། །དེ་ཡང་བློ་དེ་དང་མཉམ་དུ་སྔོན་ནས་གྲུབ་གྲུབ་པ་ཅིག་དྲན་པ་ལྟར་དུ་འཆར་རོ། །འཆར་ཚུལ་དེ་ལ་ཡང་ཕུང་པོ་དང་གཅིག་དང་ཐ་དད་གཉིས་ཀའི་འཆར་ཚུལ་འབྱུང་ངོ་། །
དེ་ཡང་ང་ན་ཞེས་པ་དང་། ངའི་ལག་པ་ན་ཞེས་པ་ལྟ་བུའོ། །ལྷན་སྐྱེས་ཀྱི་སྣང་བ་དེ་མདོར་བར་ང་བྱ་བ་བྱེད་དོ། །ཞེས་པ་ལྟ་བུའི་ངར་ཞེན་པ་ཡིན་ནོ། །ངའོ་སྙམ་པའི་བློ་ནི། ང་འགྲོ་ང་སྡོད་སྙམ་པ་རྣམས་སོ། །དེ་ལྟར་འཆར་ཚུལ་ངེས་ནས་དེ་ལྟར་གྲུབ་ན་
ཕུང་པོ་དང་གཅིག་དང་ཐ་དད་དང་གང་རུང་ལས་མི་འདའ་བའི་ཚུལ་དང་། གཅིག་དང་ཐ་དད་གཉིས་ཀ་ལ་གནོད་པ་འོང་བའི་ཚུལ་བསམ་པ་སྟེ། ང་སྣང་བ་དེ་ལྟར་གྲུབ་པ་མི་འདུག་པར་ལྷང་གིས་ངེས་པ་ན། ངེས་ཤེས་ལྷང་ལྷང་བ་བར་མ་ཆད་དུ་སྐྱོང་བ་
ནི་སྐྱོང་ཚུལ་གྱི་གནད་དམ་པའོ། །དེའི་ཚེ་ཡང་དགག་བྱ་གསར་དུ་གསལ་བཏབ་ནས་དེ་ལྟར་དུ་མེད་མོད་སྙམ་དུ་བྱེད་པ་མིན་ཏེ། དང་པོར་དགག་བྱ་གསལ་བཏབ་ནས། དེ་ལྟར་མེད་པར་ངེས་པ་ལྷང་གིས་སྐྱེས་པའི་མེད་དགག་དེ་ཉིད་ལ་རྩེ་གཅིག་ཏུ་འཇོག་
པའོ། །དེ་ལ་གནད་བཞིར་བྱས་ནས། དང་པོ་དགག་བྱ་ངེས་པ། གཉིས་པ་ཁྱབ་པ་ངེས་པ། གསུམ་པ་ཆོས་ངེས་པ། བཞི་པ་བསྒྲུབ་བྱ་ངེས་པ་དང་བཞི་ཡིན་ལ། ཚད་མ་བཞིར་བྱས་ན། དགག་བྱའི་འཆར་ཚུལ་ངེས་པའི་ཚད་མ། གཅིག་དང་ཐ་
དད་གང་རུང་ངེས་པའི་ཚད་མ། གཅིག་ཏུ་མ་གྲུབ་པར་ངེས་པའི་ཚད་མ། ཐ་དད་དུ་མ་གྲུབ་པར་ངེས་པའི་ཚད་མ་དང་བཞིའོ། །དེ་ལ་བོགས་འདོན་པ་ནི། མཉམ་རྗེས་ཀྱི་སྐྱོང་ཚུལ་གཉིས་ལ་མཁས་པས་འདོན་པ་ཡིན། གེགས་སེལ་ལ་གནད་
6-16-14b


དང་པོའི་ཚད་མ་ངེས་མི་འབྱུང་ཡང་། བདག་ཆད་ཀྱིས་དོགས་པའི་འཇིགས་པ་ནི། རྗེས་ཐོབ་ཀྱི་སྣང་བ་སྐྱོན་མེད་འདི་གས་སེལ་ནུས་སོ། །སྟོང་ཉིད་རྒྱད་ཆད་དུ་བསྒོམས་ན་བདེན་གྲུབ་གྱི་རྟག་ལྟ་བསྒོམས་པར་འགྱུར་བས་བློ་དང་བསྲེས་ནས་དབྱེར་མེད་
དུ་བསྒོམ་མོ། །ང་ཡི་བའི་འཆར་ཚུལ་ནི། ང་ཡིའོ་སྙམ་དུ་བློ་སྤྱི་འདིའི་འཆར་ཚུལ་ང་ཡིའོ་སྙམ་དུ་བསམས་ན། བློ་དེ་དང་མཉམ་དུ་ལིང་ཆད་དུ་ཆར་ཆར་བ་འདྲ་བ་ཞིག་འཆར་ལ། དེ་ཉིད་སྣང་བ་ལྟར་དུ་གྲུབ་ན་མིག་རྣ་སོགས་དང་གཅིག་དང་ཐ་དད་གང་རུང་
དུ་གྲུབ་པར་ངེས་ལ། གཅིག་ཏུ་གྲུབ་ན་ཐ་དད་གཏན་མེད་དུ་འགྱུར་བས། མིག་གིས་ཀྱང་སྒྲ་ཐོས་པར་འགྱུར་བ་དང་། རྣ་བས་ཀྱང་གཟུགས་མཐོང་བ་སོགས་སུ་འགྱུར་རོ། །ཐ་དད་དུ་གྲུབ་ན་ངའི་སྙམ་པའི་བློ་དེ་ཉིད་ཀྱིས་ཡུལ་ལ་ལོངས་སྤྱོད་པ་དང་། ང་ཡི་
བ་རྣམས་ཀྱི་བདེ་བ་བསྒྲུབ་བྱ་མིན་པར་འགྱུར་བས་དེ་ལྟར་ངེས་པ་དྲངས་ནས་སྐྱོང་ཚུལ་སྔར་ལྟར་བྱེད་པ་ཡིན་ནོ། །དེ་ནས་ཤེས་པའི་འཆར་ཚུལ་ལ་བལྟས་ཏེ། དེ་ལ་ཡུལ་རང་དབང་དུ་སྤྱོད་པ་འདྲ་བའི་ཚུགས་ཐུབ་ཏུ་འཆར་རོ། །དེའི་ངེས་པ་འདྲེན་ཚུལ་
དང་། སྐྱོང་ཚུལ། མཉམ་རྗེས་སོགས་ཐམས་ཅད་སྔར་དང་འདྲའོ། །དེ་ནས་རང་རྒྱུད་ཀྱིས་བསྡུས་པའི་ཕུང་པོའི་སྟེང་དུ་གཏན་ལ་ཕབ་སྟེ་བསྒོམ་མོ། །དེ་ནས་གང་ཟག་གཞན་དང་། རྒྱུད་ཀྱིས་མ་བསྡུས་པའི་ཆོས་ཐམས་ཅད་ཀྱི་སྟེང་དུ་བསྒོམ་མོ། །
དེའི་འཆར་ཚུལ་ནི། ཀ་བ་ལྟ་བུ་དེ་སྔར་ནས་གྲུབ་གྲུབ་པ་འདྲ་བ་བརྟན་ཚུགས་པའི་རྣམ་པར་འཆར་རོ། །ཐ་སྙད་དུ་ཡོད་པར་བཤད་པ་ནི་མིང་ཙམ་ཞིག་ཡོད་པ་ཡིན་ལ། རིགས་པས་མེད་པར་བསྒྲུབ་པ་ནི། བློ་མ་རིག་པས་ཡུལ་རྣམས་རང་
6-16-15a


དབང་དུ་བཟུང་བ་ལྟར་དུ་མེད་པར་བསྒྲུབ་པ་ཡིན་ནོ། །ཙོང་ཁ་པ་ཡི་རིང་ལུགས་གསལ་མཛད་ཆོས་ཀྱི་རྗེ། །མཁས་གྲུབ་ལེགས་བཤད་འོད་དཀར་རྒྱས་པ་དེས། །གང་གི་བློ་མུན་བསལ་བའི་མཐུས་བྱུང་བ། །ཞལ་ཤེས་གནད་ཀྱི་ཐེམས་
ཡིག་བྲིས་པ་འདིས། །འགྲོ་བའི་སྙིང་གི་མུན་པ་སེལ་གྱུར་ཅིག །འདི་གཉིས་གཅུང་ཆོས་རྒྱལ་བའི་ཟིན་བྲིས། གསུམ་པ་ཞི་ལྷག་ཟུང་འབྲེལ་གྱི་སྐབས་འདིར། དབུ་མའི་ལྟ་བ་བསྒོམ་ཚུལ་ལ་ལྔ་སྟེ། ཐེག་པ་གཞན་གྱི་ཡུལ་ཅན་ཁྱད་པར་ཅན་གྱི་དེ་ཁོ་
ན་ཉིད་བསྒོམ་ཚུལ། དེ་ཁོ་ན་ཉིད་མངོན་སུམ་དུ་རྟོགས་ནས་བསྒོམ་ཚུལ། ཞི་གནས་དངོས་ལ་བརྟེན་ནས་ལྷག་མཐོང་དངོས་བསྒོམ་ཚུལ། ཞི་གནས་རྗེས་མཐུན་པ་ལ་བརྟེན་ནས་ལྷག་མཐོང་རྗེས་མཐུན་པ་བསྒོམ་ཚུལ། ལས་དང་པོ་པས་ལྟ་བ་ལ་
མྱོང་བ་འདོན་པའི་བསྒོམ་ཚུལ་ལོ། །དང་པོ་ནི། ལུགས་འདི་ཁོ་ན་ཉིད་ལ་མཉམ་པར་འཇོག་པའི་ཚེ། དཔྱད་བསྒོམ་འཇོག་པའི་ཞར་ལ་ངེས་པའི་ལྟ་བ་འཛིན་སྟངས་ལ་མ་འཇོག་ཅིག །གཉིས་པའི་ཚེ། དཔྱད་དོན་ངེས་པའི་ཚེ་ཡུལ་ཡུལ་ཅན་
གཉིས་རོ་གཅིག་ཏུ་ངེས་ཀྱང་། ཆོས་ཉིད་ཀྱི་སྣང་ཆ་ཡུལ་དུ་མ་བྱེད་ཅིག གསུམ་པའི་ཚེ། དཔྱད་དོན་ངེས་པ་དང་ལྷན་ཅིག་ཏུ་ཤིན་སྦྱངས་གཉིས་ཐོབ་པས་གནས་པ་འདྲེན་ཅིང་། གནས་པའི་ངང་ནས་སོ་སོར་དཔྱོད་ནུས་པས་མཉམ་གཞག་ན་
གནས་པ་དང་། ཇི་ལྟ་བའི་དོན་སོ་སོར་འབྱེད་པའི་ཤེས་རབ་གཉིས་ཟུང་འབྲེལ་དུ་ཡོད་པ་ཆ་སོ་སོར་ཕྱེད་པར་མཛོད་ཅིག །བཞི་པའི་ཚེ། དཔྱད་དོན་ངེས་པ་ན་གནས་ཆ་འདྲེན་པ་ཞི་གནས་སུ་གྲུབ་པའི་མཐུ་ཡིན་ཀྱང་། དེ་གཙོ་བོར་མི་འཛིན་པར་
6-16-15b


ཡང་དང་ཡང་དུ་དཔྱད་ནས་དཔྱད་དོན་ལ་ངེས་ཤེས་དང་། དཔྱད་མཐར་འཇོག་པ་གཉིས་མཉམ་པོར་བསྒྲུབ་པ་མཛོད་ཅིག །ལྔ་པའི་ཚེ། མྱོང་བ་ཐོན་པའི་རིག་ཤེས་ཀྱི་ངེས་ངོར་ཡོངས་གཅོད་ཀྱི་ངེས་པ་དགག་པར་གྱིས་ཤིག །འདི་མཁས་གྲུབ་
རྗེའི་ཟིན་བྲིས།  ལྔ་པ་བསྐྱེད་རིམ་གྱི་ཁྲིད་ཡིག་ནི། རྡོ་རྗེ་འཆང་དབང་གང་དེའི་བརྩེ་བ་ཡིས། །རོལ་བའི་བཤེས་གཉེན་ཚུལ་བཟུང་ཐེག་མཆོག་མགོན། །རྗེ་བཙུན་བླ་མའི་ཞབས་ལ་མགོས་ཕྱག་འཚལ། །བརྩེ་བའི་ཐུགས་ཀྱིས་རྟག་
པར་གཟིགས་སུ་གསོལ། །དེ་ལ་འདིར་ལམ་རིམ་པ་གཉིས་ཚུལ་བཞིན་དུ་ཉམས་སུ་ལེན་པའི་གང་ཟག་གིས་དམིགས་པ་ཡིད་ལ་བྱེད་པའི་གནད་མན་ངག་ཏུ་བཤད་པར་བྱའོ། །དེ་ལ་ཐོག་མར་སྔོན་འགྲོ་གཏོར་མའི་གནད་ནི། རང་ཞེ་སྡང་རྡོ་རྗེར་
བསྐྱེད་ནས་མདུན་དུ་ཐོད་པ་ཡངས་ཤིང་རྒྱ་ཆེ་བ་ཞིག་གི་ནང་དུ་ཤ་ལྔ་བདུད་རྩི་ལྔར་བྱིན་གྱིས་བརླབས་ཏེ་ཟག་པ་མེད་པའི་ཡེ་ཤེས་ཀྱི་བདུད་རྩིར་བསམས་ནས། ཕྱོགས་སྐྱོང་འཁོར་དང་བཅས་པ་རང་གི་ཕྱོགས་མཚམས་སུ་བཀུག་སྟེ། རང་
གི་ཐུགས་ཀ་ནས་མཆོད་པའི་ལྷ་མོ་ཐོད་པ་ཐོགས་པ་དཔག་ཏུ་མེད་པ་སྤྲོས་ཏེ། རང་གི་མདུན་གྱི་བདུད་རྩི་དེ་ནས་ཐོད་པས་བཅུས་ཏེ་སོ་སོར་མདུན་དུ་མཆོད་པས་ལྗགས་འོད་ཀྱི་སྦུ་གུས་དྲངས་ཏེ་བཞེས་པར་བསམ་མོ། །དཀྱིལ་འཁོར་
པའི་ལྷ་ལ་འབུལ་བའང་དམིགས་པ་འདྲ་བ་ལ། ཁྱད་པར་རང་གི་མདུན་དུ་ལྷ་ཚོགས་གསལ་འདེབས་པ་ཡིན་ནོ། །སྲུང་འཁོར་གྱི་གནད་ནི། གཅོད་པའི་འཁོར་ལོ་རྩིབས་ཐམས་ཅད་སྤུ་གྲིའི་སོ་ལྟར་རྣོ་བ། ཉི་གདན་ལ་ཅུང་
6-16-16a


ཟད་མ་རེག་པར་མགྱོགས་པར་འཁོར་བ། དེའི་དབུས་སུ་གཞལ་ཡས་ཁང་བསྒོམས་ན་ཤིན་ཏུ་ལེགས་ཤིང་། གཏོར་མགྲོན་བསྐྱེད་པའི་སྐབས་ཀྱི་རིག་པ་སྦྱར་ན་ཡང་ཐོབ་པ་ཡིན་ནོ། །དེ་ཡང་སྲུང་འཁོར་གྲུབ་
ཙམ་ནས་འབྲུབ་ཁུང་དང་ཕུར་བུ་སོགས་ཀྱང་གསལ་བཏབ། གནས་གསུམ་གྱི་ཡི་གེ་གསུམ་ལས་རྡོ་རྗེ་དཀར་དམར་མཐིང་གསུམ་བྱུང་བས་ལུས་རྡོ་རྗེའི་རང་བཞིན་དུ་བསྒོམ་མོ། །སྒོ་གསུམ་བྱིན་རླབས་དང་སེམས་དཔའ་གསུམ་བརྩེགས་ཀྱི་
ཚེ་སྔ་ཕྱིར་ཐུགས་ཀར་ཧཱུཾ་ཡིག་གཉིས་བྱུང་ཡང་། ཐ་དད་དུ་མོས་པ་མ་གཏོགས་ཧཱུཾ་ཡིག་གཅིག་གིས་ཆོག་པ་ཡིན་ནོ། །ཡུལ་ཅན་བདེ་བས་སྟོང་པ་བསྒོམས་པའི་གནད་ནི། བསྐྱེད་རིམ་གྱི་སྐབས་སུ་གཙོ་བོར་ཡིད་བདེ་ཡིན་
པས་དེས་སྟོང་པ་སྔར་ངེས་ཟིན་དེ་ལ་རྩེ་གཅིག་ཏུ་འཇོག་པའོ། །དེ་ལ་གཉིས་སྣང་གི་བར་དུ་ཆོད་ན་སྡུད་རིམ་གྱི་དམིགས་པ་བྱས་ནས་སྔར་ལྟར་འཇོག་པ་ཡིན་ནོ། །དེ་ལ་ང་རྒྱལ་འཇོག་པའི་གནད་ནི། ཐ་མལ་གྱི་ཕུང་པོ་དང་ང་གཉིས་ངའོ་
སྙམ་པའི་བློས་མིང་དོན་གཅིག་ཏུ་བཟུང་ནས་ཞེན་པས་འཁོར་བར་འཁོར་བ་ལྟར། ཡུལ་སྟོང་པ་ཉིད་ལ་གདགས་གཞིར་བྱས་ནས་བཏགས་ཆོས་སུ་མིང་དོན་གཅིག་ཏུ་བཟུང་བས་བདེན་འཛིན་སྤངས་ནས་ཆོས་སྐུའི་རྒྱུར་འགྱུར་བ་ཡིན་ནོ། །
གཟུང་རྣམ་ལྷར་འཆར་ཚུལ་གྱི་གནད་ནི། གཟུང་རྒྱུ་ནི་ཡུལ་སྟོང་བ་ཉིད་དང་། གཟུང་གཞི་ནི་སྟོང་ཉིད་རྟོགས་པའི་ཤེས་རབ་བོ། །རྣམ་པ་ལྷར་འཆར་ཚུལ་ནི། ངོ་བོ་བདེ་སྟོང་དབྱེར་མེད་ཀྱི་ཡེ་ཤེས་ཉིད་ཡིན་པ་ལ། རྣམ་པ་ལྷ་
6-16-16b


དང་གཞལ་ཡས་ཁང་དུ་གྲུབ་པར་བསྒོམ་པའོ། །ལྷག་མོས་ལུས་ལ་བསྡུས་ནས་དེ་ལྟར་ཐིམ་པར་བསྒོམ་པ་ནི། དེ་གནས་དེ་ཉིད་དུ་ཕར་ལུས་ཀྱི་ནང་དུ་ཐིམ་པར་བསྒོམ་པ་དང་། འཆི་བའི་ཚེ་ལྟ་བུ་ནི་ཆོས་སྐུར་ཐིམ་པར་བསམ་པའོ། །དང་
པོའི་མགོན་པོ་རང་ཉིད་མི་བསྐྱོད་པ་ལ་འཇུག་པ་ནི་གོ་ས་མ་འཕོས་པར་དབུས་ཀྱི་གདན་ལ་གནས་པའི་ངང་ནས་འཇུག་པ་ཡིན་ལ། དེ་ནས་སྐུ་དེ་རྟེན་དང་བརྟེན་པའི་དཀྱིལ་འཁོར་དུ་བསྐྱེད་པ་ན། ལུས་ཀྱི་ཆ་ཤས་དེ་དང་དེར་གྱུར་པ་ལས་བསྐྱེད་པར་མོས་པ་མ་
གཏོགས། རྣམ་པ་བསྡུས་ནས་དེར་གྱུར་པར་བསམ་པ་མིན་ནོ། །ལུས་ཀྱི་གནས་རྣམས་སུ་ལྷ་བསྒོམ་པ་ཡང་གོ་ས་གཅིག་ཏུ་ལྷ་མང་པོ་བསྒོམ་པ་འཆར་དཀའ་ན། གསང་འདུས་འཇམ་རྡོར་ནས་གསུངས་པ་ལྟར་གནས་ཐ་དད་དུ་བསྒོམས་ཀྱང་རུང་ངོ་། །རིགས་
བདག་ཡབ་ཡུམ་ལས་བདུད་རྩིའི་རྒྱུན་བབས་པས། སེམས་དཔའ་གསུམ་ཚིམ་ཞིང་ཡིད་བདེ་དཔག་ཏུ་མེད་པ་སྐྱེས་པར་ཡང་ཡང་བསམ་པ་གནད་ཆེའོ། །རིག་མ་འབྱིན་པའི་གནད་ནི། ཐོག་མར་སྙིང་ག་ནས་སྨེ་ཤ་ཅན་སོགས་པ་རང་རིགས་
ཀྱི་མི་མོའི་རྣམ་པ་ཅན་ཡིད་ལ་གཅགས་པའི་བུ་མོའི་རྣམ་པ་ཅན་ཞིག་ཕྱུང་སྟེ། དེ་ཉིད་བསངས་སྦྱངས་ནས་རེག་བྱ་རྡོ་རྗེ་མར་བསྐྱེད་པའི། །ཕཊ་ཡིག་གི་གནད་ནི། དབུ་ཅན་གྱི་ཕཊ་ཡིག་ཁ་དོག་སེར་པོ་ལྟ་བུའི་མགོ་ནང་དུ་བལྟ་བ་འོད་ཀྱི་
རྣམ་པར་བསྒོམ་མོ། །དེ་ནས་ཕཊ་ངག་ཏུ་བརྗོད་པ་དང་མཉམ་དུ་སྤྱི་བོ་ནས་བྱང་སེམས་བབ་པ་དང་། ཕྱིར་འཕོ་བ་དགག་པ་དང་། དམིགས་པ་ཡུམ་གྱི་པདྨར་འབེབས་པ་དང་བྱ་བ་གསུམ་བྱེད་དོ། །དང་པོ་སྦྱོར་བ་ལས་མི་བྱེད་ན་ཡུམ་གྱི་པདྨའམ།
6-16-17a


རྡོ་རྗེའི་རྩེ་གང་རུང་དུ་ཐིག་ལེ་ཕབ་པ་ལས་ལྷ་སྤྲོས་ནས་མཛད་པ་མཛད་པ་སྦྱར་དགོས་སོ། །རྡོ་རྗེ་དང་པདྨའི་ནང་འོད་ཟེར་ལྔས་གང་བར་བསྒོམ་པ་ནི། རྭ་དབུས་མའི་ཨོཾ་ཡིག་དེ་ལས་འོད་ཟེར་ལྔ་བྱུང་སྟེ། ལུས་ཀྱི་རྩ་ཐམས་
ཅད་དང་པདྨའི་ནང་གང་བར་བསྒོམ་པ་ཡིན་ནོ། །ཨོཾ་ཡིག་ནི་རྭ་དབུས་མའི་སྦོམ་གྱི་ཆའི་དབུས་སུ་འགོད་ལ། ཕཊ་ཡིག་ནི་རྭ་དབུས་མའི་རྩེར་འགོད་པ་ཡིན་ནོ། །ང་རྒྱལ་འཇོག་པའི་གནད་ནི། བདེ་སྟོང་དབྱེར་མེད་ལ་སྔར་ལྟར་ང་རྒྱལ་
བཞག་ནས་དེ་ཉིད་ལ་རང་ཉིད་རྡོ་རྗེ་འཆང་དངོས་ཡིན་པ་དང་། དཀྱིལ་འཁོར་ཐམས་ཅད་དེའི་རྣམ་འཕྲུལ་དུ་བལྟས་ཏེ་ཐ་མི་དད་དུ་བཟུང་ངོ་། །གསལ་སྣང་འདོན་པའི་གནད་ནི། རྟེན་དང་བརྟེན་པའི་དཀྱིལ་འཁོར་ཐམས་ཅད་ལམ་གྱིས་གསལ་
བཏབ་ནས་ཤེས་པ་སྤྱི་དེ་ལ་བཟུང་སྟེ་ཆ་ཤས་ཕྲ་མོ་གཅིག་གིས་རེ་རེ་ནས་གསལ་སྣང་འདོན་པ་ཡིན་ནོ། །ཕྲ་མོའི་གནད་ནི། རང་གི་རྡོ་རྗེའི་ཁའི་ཕཊ་ཡིག་དེ་ཉི་གདན་དུ་གྱུར་ཏེ། དེའི་སྟེང་དུ་ཐིག་ལེ་སྔོན་པོ་ཡུངས་འབྲུ་ཙམ་ཞིག་ཕྱུང་སྟེ་ཕབ་
ནས་བསྒོམ་པ་དང་། མཐར་ཐིག་ལེ་ཡར་དྲངས་ཉི་གདན་ཕཊ་དུ་བསྒྱུར་རོ། །དེའི་སྟེང་གི་སྣ་རྩེར་ཡང་ཉི་གདན་ལ་རྡོ་རྗེ་སྔོན་པོ་ནས་འབྲུ་ཙམ་དང་། དེ་བརྟན་པ་ན་དེ་ལས་གཅིག་དང་། དེ་ནས་དེའི་རྩེ་ལས་གཅིག་སྟེ་ཇེ་མང་དུ་བཏང་། མཐར་སྙིང་
གར་བསྡུའོ། །དེ་དག་ནི་དམིགས་པ་ཡིད་ལ་བྱེད་པའི་གནད་བསྐྱེད་རིམ་གྱི་སྐབས་སུ་མེད་དུ་མི་རུང་བའི་ཞལ་ཤེས་དག་ཡིན་ནོ། །ད་དུང་ལུས་དཀྱིལ་སྒོམ་པ་སོགས་ཞིབ་ཆ་བླ་མའི་ཞལ་ལ་བལྟོས་སོ། །ས་མ་ཡ་ཁ་ཐམ། །
6-16-17b


བླ་མ་དམ་པ་རྣམས་ལ་ཕྱག་འཚལ་ལོ། །དྲུག་པ་རྫོགས་རིམ་གྱི་ཁྲིད་ཡིག་ལ་གཉིས། སྦྱི་དང་གསལ་བའི་དབྱེ་བའོ། །དང་པོ་ལ་གསུམ། དམིགས་རིམ། ལག་རྗེས། ཉེར་མཁོ་བསྟན་པའོ། །དང་པོ་ནི། རྫོགས་རིམ་གྱི་གནད་
ཅུང་ཟད་ཅིག་བརྗོད་ན། བདེ་བ་ཆེན་པོའི་ལམ་གྱི་གཞི་ཡིན་ལ། དེ་རྫོགས་རིམ་ནས་བསྒྲུབ་པ་ཡིན་པ་ལ། དེ་བསྒྲུབ་པའི་ཐབས་འདིར་ཕྲ་མོ་ལས་མ་བཤད་ཀྱང་མ་རྒྱུད་ཀྱི་གཏུམ་མོ་ཡང་བསྒོམས་ན་ཁྱད་པར་དུ་འགྱུར་བ་ཡིན་ནོ། །
སྲོག་རྩོལ་གསུམ་གྱི་སྐབས་སུ་སེམས་དཔའ་གསུམ་བརྩེགས་བསྒོམ་དགོས་པས། དེའི་བྱེད་ཚུལ་ནི། རང་ཉིད་དམ་ཚིག་སེམས་དཔའ་རྡོ་རྗེ་འཆང་དུ་སྐད་ཅིག་གིས་ལངས་པའི་སྙིང་གའི་རྩ་མདུད་ཀྱི་དབུས་སུ་དྷཱུ་ཏཱིའི་ནང་གི་མི་ཤིགས་
པའི་ཐིག་ལེའི་དབུས་སུ་ཡེ་ཤེས་སེམས་དཔའ་སྐུ་མདོག་དཀར་པོ་འོད་ཀྱི་རང་བཞིན་ཅན་ཤིན་ཏུ་ཕྲ་བ་དང་། དེའི་ཐུགས་ཀར་ཏིང་ངེ་འཛིན་སེམས་དཔའ་ཨ་ཐུང་ཤད་ཀྱི་རྣམ་པ་ཅན་ངོ་བོ་རླུང་སེམས་ཀྱི་རང་བཞིན་ཁ་དོག་སྔོན་པོ་ཞིག་བསྒོམས་ནས། 
དེ་ལས་འབྱུང་འཇུག་བྱེད་པའི་རྡོ་རྗེ་བཟླས་པ་དང་། དེ་ཉིད་ལ་སེམས་འཛིན་པའི་སྔགས་འཁོར་བསྒོམ་པ་རྣམས་བྱེད་པ་ཡིན་ནོ། །མཐར་ཡང་རིལ་འཛིན་དང་རྗེས་གཞིག་གི་རིམ་པའི་དམིགས་པའི་སྡུད་རིམ་ར་དང་སྦྲེལ་ན་ལེགས་སོ། །བསྐྱེད་རིམ་
ནི་རྫོགས་རིམ་གྱི་སྨིན་བྱེད་དུ་བསྒོམ་པ་ཡིན་པས། ལུས་དབེན་ནས་བཟུང་སྟེ་ཟུང་འཇུག་གི་བར་ཐམས་ཅད་དུ་རང་རྡོ་རྗེ་འཆང་དུ་ལངས་པ་ན། རྟེན་དང་བརྟེན་པའི་དཀྱིལ་འཁོར་ཐམས་ཅད་ཡོངས་རྫོགས་སུ་ལྡང་དགོས་པ་ཡིན་ནོ། །ཕྱག་
6-16-18a


རྒྱ་ལ་བརྟེན་ནས་རླུང་དབུ་མར་འཇུག་པའི་སྲོག་རྩོལ་ནི། ཕྱག་རྒྱའི་མཚན་ཉིད་དང་ལྡན་པ་ལ་སྙོམས་པར་འཇུག་བཞིན་པའི་ཚེ། དྷཱུ་ཏཱིའི་མར་སྣར་དམིགས་པ་གཏད་པས། ཡབ་ཡུམ་གཉིས་ཀྱི་རླུང་དང་བྱང་སེམས་
འདུས་པ་རྣམས་ཀྱི་དྷཱུ་ཏཱིའི་མས་སྣ་ཕྱེ་ནས་བཙན་ཐབས་སུ་དབུ་མའི་ནང་དུ་འཇུག་པ་ཡིན་ནོ། །དེ་ཉིད་སྙིང་གར་དམིགས་པ་གཏད་དེ་སྡུད་རིམ་དང་སྦྲགས་ན་འོད་གསལ་སྐྱེ་བའི་ཐབས་ཀྱང་མཆོག་ཏུ་འགྱུར་བ་ཡིན་ནོ། །གཉིད་ཀྱི་སྐབས་སུ་དེ་ལྟར་བྱས་ན་
ཡང་འོད་གསལ་བཙན་ཐབས་སུ་འཛིན་པའི་གདམས་པ་མཆོག་ཡིན་ནོ། །ཁྱབ་བྱེད་ཀྱི་རླུང་འདི་རླུང་གཞན་ལས་བསྡུ་དཀའ་ཞིང་། འདི་རྫོགས་པར་མ་ཐིམ་ན་སེམས་དབེན་གྱི་འོད་གསལ་མཚན་ཉིད་པ་མི་འབྱུང་བས། རླུང་ཅུང་ཟད་སྡུད་ནུས་པ་ནས་
འདིའི་སྡུད་རིམ་རེ་ཡང་ངེས་པར་བྱེད་དགོས་སོ། །ལུས་དབེན་རྗེས་མཐུན་པ་ཐོབ་ནས་རིལ་འཛིན་དང་རྗེས་གཞིག་གི་དམིགས་པའི་སྡུད་རིམ་རེ་དང་སྦྲགས་ནས་ཉམས་སུ་བླངས་ན་རླུང་འདུ་བ་སླ་བ་དང་གཉིད་དུ་འགྲོ་བའི་གནད་ཡོད་དོ། །རྡོར་
བཟླས་ཀྱི་གནད་ནི། འཁོར་ལོའི་སྡུད་རིམ་རེ་བྱས་ཏེ་མི་ཤིགས་པ་ལ་སྡུད། མི་ཤིགས་པ་ཡེ་ཤེས་སེམས་དཔའ་ལ་སྡུད། ཡེ་ཤེས་སེམས་དཔའ་ཨ་ཐུང་ལ་བསྡུས་ཏེ་རྩེ་གཅིག་ཏུ་དེ་ཉིད་ལ་སེམས་བཟུང་བཞིན་དུ་ཡི་གེ་གསུམ་གྱི་རྡོར་བཟླས་
བྱེད་པ་ཐུན་མོང་མ་ཡིན་པའི་གནད་དོ། །སྡུད་རིམ་དེ་ལྟ་བུ་དང་ཕྱག་རྒྱལ་བརྟེན་པ་གཉིས་ཚོགས་ཀྱི་སེམས་དབེན་བསྐྱེད་པ་ནི་སེམས་དབེན་གྱི་གདམས་པའོ། །སེམས་དབེན་རྗེས་མཐུན་པ་ཐོབ་ནས་སྒྱུ་མའི་སྐུར་ལྡང་ཚུལ་གྱི་གནད་
6-16-18b


ཁྱད་པར་ཅན་ནི། འོད་གསལ་ལས་ལྡང་བ་ན། སྙིང་གའི་ཁམས་དཀར་དམར་གྱི་དབུས་ཀྱི་ཡེ་ཤེས་སེམས་དཔའ་སྐུ་མདོག་དཀར་པོ་རྡོ་རྗེ་འཆང་གི་རྣམ་པ་ཅན་དེ་ཉིད་ལ་སེམས་ཁྲིག་གིས་གཏད་དེ་ཐིག་ལེ་འོག་མ་གདན་དང་སྟེང་མ་གོས་ཀྱི་རྣམ་པར་བྱས་ནས་
ལུས་འདི་ལས་ཕྱི་རོལ་ཏུ་འཕེན་པའི་དབང་གིས་སྐད་ཅིག་ཙམ་གྱིས་གྲུབ་པ་ཡིན་ནོ། །སླར་ཡང་ལུས་ལ་འཇུག་པ་ན་སྔར་གྱི་ཡེ་ཤེས་སེམས་དཔའི་ཚུལ་གྱིས་སྙིང་གར་འཇུག་པ་ཡིན་ནོ། །གནད་ཁྱད་པར་ཅན་གྱི་ཞལ་ཤེས་སོ། །འདི་ལྟར་འཇུག་
པ་དང་བར་དོའི་བསྲེ་བའི་སྐྱེ་བ་སྤྲུལ་སྐུ་དང་བསྲེ་བ་ནི། ཕ་མའི་ཁུ་ཁྲག་དང་། གཉིད་ཀྱི་སྐབས་སུ་རྨི་ལམ་གྱི་ལུས་ཁྱད་པར་བ་ཕུང་པོ་རྙིང་པ་ལ་འཇུག་པ་རྣམས་སྤྲུལ་སྐུ་དང་བསྲེ་བ་ཡིན་པས། སྐྱེ་གནས་ཀྱི་ཁུ་ཁྲག་དང་རང་གི་ཕུང་པོ་མི་བསྐྱོད་པར་བསྐྱེད་
ནས་སྤྲུལ་སྐུ་བཟུང་བའི་བསམ་པས་འཇུག་དགོས་པ་ཡིན་ལ། རྡོ་རྗེ་འཆང་དུ་བསྐྱེད་པ་མིན་ནོ། །དེ་ལྟར་ལངས་པའི་སྒྱུ་ལུས་རྡོ་རྗེ་འཆང་གི་སྐུ་དེ་ནི། སྐུ་མདོག་དཀར་པོ་འོང་བ་ཡིན་ཏེ་སྐུ་དེའི་སྒྲུབ་གཞི་སྲོག་འཛིན་ཀྱི་རླུང་ཤིན་ཏུ་ཕྲ་བ་དེ་ཁ་དོག་དཀར་པོར་ཡོད་
པ་ཡིན་ནོ། །དོན་གྱི་འོད་གསལ་ཐོག་མ་སྔོན་དུ་བྱེད་པའི་མཚམས་ནི། སྐུ་གསུང་ཐུགས་ཀྱི་སེམས་དཔའ་གསུམ་བརྩེགས་བྱས་པའི་མ་དག་པའི་སྒྱུ་ལུས་དེ་དག་ནས་ཡེ་ཤེས་སེམས་དཔའ་དང་ཏིང་ངེ་འཛིན་སེམས་དཔའི་ནཱ་ད་ཡང་འོད་གསལ་དུ་དག་པ་
ན་ཐོབ་པ་ཡིན་ནོ། །འཕོ་བ་ནི་གཙོ་བོར་མ་རྒྱུད་ནས་འབྱུང་ཡང་། ཕ་རྒྱུད་ལའང་ལམ་གྱི་ཡན་ལག་ཏུ་ངེས་པར་དགོས་པས། དེའི་དམིགས་པའི་གནད་ནི་སྔགས་འཁོར་རྒྱས་བསྡུས་སོགས་གང་བྱེད་ཀྱང་འདི་དགོས་ཏེ། དམིགས་པ་བཟུང་
6-16-19a


བ་ན་སྙིང་གའི་ཡི་གེ་རྣམས་གྱེན་དུ་བསྒྱུར་བ་དང་། སྙིང་གའི་རྩ་འཁོར་ཡང་ཐུར་མ་ལ་སོགས་པས་རྒྱུ་མ་སོགས་ཀྱི་ཕྱི་ནང་བསྒྱུར་བ་ལྟར་དུ་དབུ་མའི་ནང་ནས་གྱེན་ལ་བསྒྱུར་ཏེ། དེའི་རྩེར་ཡི་གེ་དེ་རྣམས་དེད་པའི་རྣམ་པར་
བསྒོམ། སླར་ཡང་ཕྱིར་བསྒྱུར་ཏེ་སྔར་ལྟར་འཇོག་པ་དེ་གནད་དམ་པའོ། །དེ་ལྟར་བྱས་པས་རྩ་རྣམས་མཉེན་པོར་སོང་སྟེ་སྦྱངས་པ་མཐར་ཕྱིན་པ་ན། དངོས་སུ་དེ་ལྟར་ནུས་པ་འབྱུང་ངོ་། །སྟོང་ཉིད་བསྒོམ་པའི་གནད་
ནི། བྱང་ཆུབ་ཀྱི་སེམས་བཅོས་མ་མིན་པ་ཞིག་བསྐྱེད་དེ། དེ་ནས་རིག་པས་ལེགས་པར་དཔྱོད་ལྟ་བ་ཕུ་ཐག་ཆོད་པ་དེ་ལ་ངེས་པ་དྲངས་ནས་ཡུན་རིང་དུ་མཉམ་པར་བཞག་པ་དེ་ལ་ལུས་ལ་གནད་དུ་བསྣུན་པའི་ཐབས་བསྒོམས་པས། རྫོགས་རིམ་
གྱི་བདེ་བ་མ་མཐའ་ཞིག་རྙེད་པ་ནས་སྔར་ལྟར་དཔྱད་པ་མི་བྱེད་པར་སྔར་གྱི་ངེས་ཤེས་ཤུགས་དྲག་དེ་དྲན་པར་བྱས་ཏེ་སེམས་བདེ་བའི་ངོ་བོར་སོང་བ་དེས་རྩེ་གཅིག་ཏུ་རང་བཞིན་མེད་པའི་དོན་དེ་ལ་མཉམ་པར་བཞག་པས་སྟོང་པ་ཉིད་ལ་བོགས་ཐོན་ནས་
སྔར་ལས་ཀྱང་ངེས་པ་ཤུགས་ཆེ་བ་དང་། བདག་འཛིན་གྱི་གཉེན་པོར་ནུས་པ་མཐུ་ཅན་དུ་སོང་ནས་གཉིས་སྣང་ལྡོག་པ་ཡིན་ནོ། །དེས་ན་ལམ་འདི་ལ་ཐོག་མར་འཁོར་བ་མཐའ་དག་ལ་གཏིང་ནས་ཞེན་པ་ལོག་སྟེ། འཁོར་བའི་ཕུན་ཚོགས་ཇི་འདྲ་བ་ཞིག་ལ་ཡང་
བཙོན་དོང་ལྟར་དུ་མཐོང་བའི་ངེས་འབྱུང་གི་བསམ་པ་དྲག་པོ་ཞིག་དང་། དེ་ཡང་རང་ཉིད་གཅིག་པུའི་ཕྱིར་མ་ཡིན་པར་སེམས་ཅན་ཐམས་ཅད་སྡུག་བསྔལ་དུ་མས་མནར་བ་ལ། སྙིང་ཐག་པ་ནས་མ་བཟོད་པས་དེ་ཉིད་འདོན་པ་ལ་སྐད་ཅིག་ཀྱང་ཡེངས་ལོང་
6-16-19b


མེད་པར་རིངས་པའི་བློ་བཅོས་མིན་ཞིག་དགོས་པ་ཡིན་ནོ། །དེའི་ཕྱིར་ཐོག་མར་གང་ཁས་བླངས་པའི་བསྲུང་སྡོམ་ལ་འབད་ནས་དམ་ཚིག་དང་སྡོམ་པ་རྣམ་པར་དག་པ་ཞིག་བྱ། དེ་ནས་བྱང་ཆུབ་ཀྱི་སེམས་བཅོས་མིན་ཞིག་མེད་ན་ཐེག་པ་ཆེན་པོའི་ལམ་དུ་མི་འགྱུར་
བས་དེ་ལ་འབད་པར་བྱའོ། །བདག་མེད་ཀྱི་ལྟ་བ་རྣམ་དག་ཅིག་མེད་ན་འཁོར་བ་ལས་ཀྱང་མི་ཐར་བས་སྟོང་ཉིད་ཀྱི་ལྟ་བ་ཕུ་ཐག་ཆོད་པ་ཞིག་བྱ། དེ་ལྟར་བྱས་ཏེ་ཐབས་ཟབ་མོ་འདི་ལྟ་བུའི་ལམ་དང་སྦྲགས་ནས་ལུས་ལོངས་སྤྱོད་ལ་ལྟོས་པ་མེད་པར་བརྩོན་པ་ཆེན་པོས་
ཆུ་བོའི་རྒྱུན་བཞིན་དུ་ཉམས་སུ་བླངས་ན་འཁོར་བའི་སྡུག་བསྔལ་གྱི་ཆུ་བོ་ཆེན་པོ་བསྐམས་ཏེ་རང་གཞན་གྱི་དོན་ལྷུན་གྲུབ་ཏུ་འབྱུང་བའི་གོ་འཕང་ཡང་མྱུར་དུ་འགྲུབ་པར་གདོན་མི་ཟ་བ་ཡིན་ནོ། །འདི་དག་ནི་ལམ་གྱི་འགག་སྡོམ་ཆེ་བ་རྣམས་ཀྱི་དམིགས་པའི་གནད་འགའ་
ཞིག་བསྡུས་པའི་མན་ངག་ཐུན་མོང་མིན་པའི་ཞལ་ཤེས་མེད་མི་རུང་བའི་སྲོག་དག་ཡིན་ནོ། །རྣམ་འདྲེན་སྐུ་བཞིའི་གོ་འཕང་མཆོག་བརྙེས་ནས། །གདུལ་བྱའི་བློ་མུན་མ་ལུས་སེམས་མཛད་པ། །ཆོས་ཀྱི་རྒྱལ་པོ་མཁས་གྲུབ་དགེ་ལེགས་དཔལ། །གང་དེའི་གསུང་
ངག་བདུད་རྩིས་ལུས་འཚོ་བ། །དད་པའི་དབང་པོས་སྐལ་བཟང་སྐྱེ་བོའི་དོར། །ཞལ་ཤེས་གདམས་པ་མ་ནོར་ཚང་བར་བྲིས། །དེས་ནི་གནས་གསུམ་མཁའ་འགྲོའི་ཚོགས་རྣམས་ཀྱིས། །གཡེལ་བ་མེད་པར་རྗེས་སུ་འཛིན་གྱུར་ཅིག །འདི་གཉིས་ཆོས་རྗེ་བསོ་བའི་
ཟིན་བྲིས་ཡིན། སྲོག་ཐུར་ཕྲ་བ་བསྲེ་ཚུལ་སོགས་གནད་རྣམས་བླ་མའི་ཞལ་ལས་ཤེས།། ༺༈༻ །།གཉིས་པ་དེའི་ལག་རྗེས་རླུང་གི་འདུ་རྟགས་ལེགས་ཉེས་དང་། འདུས་པ་ལས་ཉམས་མྱོང་སྐྱེ་བའི་རིམ་པ་བསྟན་པའི་གནད་ཀྱི་ཡིག་ཆུང་ནི།
6-16-20a


རྗེ་བཙུན་བླ་མ་རྣམས་ལ་ཕྱག་འཚལ་ལོ། །འདིར་ལུས་དབེན་གྱི་སྐབས་སུ་འཛག་གེགས་བྱུང་ན། དྷཱུ་ཏཱིའི་མར་སྣར་དམིགས་པ་གཏད་ནས། དྷཱུ་ཏཱིའི་དབུས་སུ་དམིགས་པ་སྤོ། དེས་མ་སེལ་ན་གསང་བའི་རྩེར་སྤོ། དེས་ཀྱང་མ་སེལ་ན་
ལྟེ་བའི་རྩར་སྤོ་བ་དང་ལུས་དབེན་གྱི་ཕྲ་ཐིག་བསྒོམ་པའི་སྨིན་བྱེད་དུ་བསྐྱེད་རིམ་པའི་ཕྲ་ཐིག་བསྒོམ་པ་ཡིན་གསུང་ངོ་། །ངག་དབེན་གྱི་སྐབས་སུ་རྣལ་འབྱོར་པས་ཁྱབ་བྱེད་ཀྱི་རླུང་ལ་ཡང་རྡོར་བཟླས་བྱེད་པས། ཁྱབ་བྱེད་ཀྱི་རླུང་འདུ་བར་བྱ་བའི་ཆེད་ཡིན་ཅིང་། 
འདུས་པའི་ལུས་དབེན་དང་ངག་དབེན་གྱི་དོད། མ་རྒྱུད་པའི་གཏུམ་མོའི་རྣལ་འབྱོར་ཡིན། དེ་ཡང་ཕྱིའི་གཏུམ་མོ་ཤ་ལྤགས་ཀྱི་བར་དང་། རོ་མའི་ནང་ནས་ནང་གི་གཏུམ་མོ། །རྩ་གཞན་རྣམས་ཀྱི་ནང་ནས་གསང་བའི་གཏུམ་མོ་དྷཱུ་ཏཱིའི་ནང་ནས་འབར་བ་
བཞིན་དཀར་ཆ་ཡང་ཕྱི་ཤ་ལྤགས་ཀྱི་བར་དང་། རྐྱང་མ་ནས་ནང་རྩ་གཞན་རྣམས་ནས་གསང་བ་དྷཱུ་ཏཱིའི་ནང་ནས་འབབ་པ་ཡིན་གསུངས་སོ། །སེམས་དབེན་གྱི་སྐབས་སུ་སེམས་དབེན་རྫོགས་པར་སྐྱེ་བ་ངེས་པར་སྤྱོད་པ་ལ་བལྟོས་པའི་དགོས་པ་ཁྱབ་བྱེད་
ཀྱི་རླུང་བསྡུས་པ་ཡིན། འདུས་པའི་སེམས་དབེན་གྱི་དོད་མ་རྒྱུད་ལ་དགའ་བཞི་བསྐྱེད་པ་ཡིན་པས། འདི་ལ་ཞལ་ཤེས་མང་པོ་ཡོད་གསུང་། ཕྱིའི་ཕྱག་རྒྱ་ལོ་གྲངས་བཅུ་གཉིས་ལ་ལ་བསྔགས་པ་དེ་དུས་གཏུམ་མོ་ཕལ་པ་མ་ཉམས་པའི་རྒྱུ་མཚན་
གྱིས་ཡིན། སྤྱོད་པ་ལ་བརྟེན་ནས་ཁྱབ་བྱེད་ཀྱི་རླུང་སྡུད་པའི་རྒྱུ་མཚན། དེའི་རྐྱེན་གྱིས་བདེ་བ་ཁྱད་པར་ཅན་བསྐྱེད། དེས་རླུང་སེམས་འཇུག་པ་གཅིག་པའི་གནད་ཀྱིས་རླུང་སེམས་མ་ལུས་པར་འདུ་བ་ཡིན་གསུང་། དེ་ཡང་ལུས་དབེན་དང་ངག་དབེན་
6-16-20b


གྱི་སྐབས་སུ་སྒོམ་སྟོབས་ཀྱིས་སྐྱེ་བས། དེ་ལ་ངེས་པར་བལྟོས་མི་དགོས། བརྟན་པ་བྱུང་ན་ཤིན་ཏུ་སྟོབས་ཆེ་ཞིང་། འདིའི་དགོས་པ་རྫོགས་རིམ་གྱི་རྟོགས་པ་སྔར་མེད་གསར་དུ་སྐྱེ་བའི་ཕྱིར་ཡིན། སེམས་དབེན་དང་སྒྱུ་ལུས་སུ་བརྟེན་པའི་དགོས་པ། 
རྟོགས་པ་གོང་ནས་གོང་དུ་འགྱུར་བའི་ཕྱིར་ཡིན། དེའི་གོང་འོད་ཟུང་དུ་བརྟེན་པའི་དགོས་པ། སྤང་བྱ་སྤོང་བ་ལ་ནུས་པ་མཐུན་ཅན་དུ་བྱེད་པའི་ཕྱིར་ཡིན་གསུང་ངོ་། །ཡང་ལུས་དབེན་གྱི་ཕྲ་ཐིག་གི་སྐབས་སུ་བདེ་བ་ཁོ་ན་འདྲེན་པ་ཡིན། དེ་ལ་བརྟེན་ནས་སྟོང་
ཉིད་ངེས་ཟིན་དྲན་པར་བྱས་ནས་སྦྱོར། རིག་པས་དཔྱད་པ་མི་བྱེད། བྱས་ན་སླར་ཡང་རྟོག་པའི་སྤྲོ་བསྡུ་ལས་རླུང་ལངས་ནས་གེགས་སུ་འགྲོ་བ་ཡིན་གསུང་ངོ་། །གསུམ་པ་དེ་དག་གི་སྐབས་སུ་ཅི་རིགས་པར་ཉེ་བར་མཁོ་བའི་ཐོར་བུ་ཅི་རིགས་ཡི་
གེར་བྲིས་པའི་ཡིག་ཆུང་ནི། ཡང་ལུས་དབེན་གྱི་སྐབས་སུ། ཕྲ་མོ་ལ་དམིགས་པ་ཐུན་འཁྱོངས་པ་བརྟན་པོ་བྱུང་ཀྱང་། རླུང་འགག་ཏུ་མ་འདོད་པ་སོགས་བྱུང་བའི་ཞལ་ཤེས་ནི། ལུས་ཀྱི་རྩ་སྟོང་ཕྲག་བདུན་ཅུ་པོ་སོག་སྦུབས་ལྟར་གྱུར་པ་དམིགས་
རྟེན་ལ་ཟུག་པའི་ནང་ནས་རླུང་རྣམས་ཐིམ་པར་བསྒོམ། འདིས་གེགས་སེལ་ཞིང་བོགས་འདོན་པ་ཡིན། འདི་དམིགས་པ་གཏོད་པའི་གནས་གཞན་ལ་ཡང་གེགས་བྱུང་ན། དམིགས་པ་འདི་ག་བྱེད་གསུང་ངོ་། །ཡས་བབས་མས་བརྟན་གྱི་དགའ་བཞིའི་
སྐབས་སུ། མར་བརྟན་གྱི་ལྷན་སྐྱེས་མཚན་ཉིད་རྫོགས་པ་སྤྱི་བོར་བརྟན་པ་ལ་ནི། རླུང་གི་དེ་ཉིད་སྔོན་དུ་སོང་བས་སྙིང་གའི་རྩ་མདུད་སོགས་མ་ལུས་པར་གྲོལ་བའི་མཚམས་ནས་རྣལ་འབྱོར་བས་འབད་པ་མེད་པར་ཡུད་ཙམ་གྱིས་བྱེད་ནུས་གསུང་
6-16-21a


ངོ་། །ཡས་བབས་ཀྱི་དགའ་བ་སྐྱེ་བ་ལ། རྩ་མདུད་མ་གྲོལ་ཡང་གཏུམ་མོའི་མེས་བཞུས་ནས་དགའ་བཞི་སྐྱེ་བ་ཡིན། དཔེར་ན་རྫའི་གཤམ་གས་པའི་ནང་དུ་མར་འཁྱགས་པ་ཡོད་པ་འོག་ནས་མེ་སྦར་བས་ཞུ་ནས་འཛག་
པ་བཞིན་ནོ། །ཞེས་གསུང་ངོ་། །བསྐྱེད་རིམ་པའི་ལྷའི་ང་རྒྱལ་འཇོག་པའི་ང་དེ་ཐ་སྙད་པའི་ང་ཙམ་དེ་ཡིན་གསུང་ངོ་། །བསྐྱེད་རིམ་པའི་བཟླས་པའི་སྐབས་སུ་ཏིང་ངེ་འཛིན་སེམས་དཔའ་ལ་ང་རྒྱལ་འཇོག་པ་ཡིན་གསུང་ངོ་། །གཉིད་འཐུག་པོའི་སྐབས་
སུ་འོད་གསལ་འཆར་བའི་ཐབས་ནི་སྙིང་གར་རང་གི་ལུས་སེམས་འོད་ཀྱི་ཕུང་པོར་བསྒོམ་པ་ཡིན་གསུང་། གཉིད་དང་བསྲེ་བའི་སྐབས་སུ་གཞི་དུས་ཀྱི་གཉིད་ཀྱི་སྟོང་པ་བཞི་དང་། རྨི་ལམ་གྱི་ལུས་དང་། རྨི་ལམ་གྱི་སྐབས་ཀྱི་རྣམ་སྨིན་གྱི་
ལུས་སོགས་ནི་རིམ་པ་བཞིན་གཞི་དུས་ཀྱི་ཆོས་སྐུ། ལོངས་སྐུ། སྤྲུལ་སྐུ་གསུམ་ཡིན། གཉིད་ཀྱི་སྟོང་པ་འོད་གསལ་གྱི་ངོ་བོར་ཤར་བ་དང་། དེའི་མཚམས་ནས་རྡོ་རྗེ་འཆང་དུ་ལངས་པ་དང་། དེ་རྣམ་སྨིན་གྱི་ལུས་ལ་བསམས་བཞིན་དུ་
ཞུགས་པ་རྣམས་ནི་རིམ་པ་བཞིན་དུ་གཉིད་ཀྱི་སྐབས་སུ་ལམ་དུས་ཀྱི་ཆོས་སྐུ། ལོངས་སྐུ། སྤྲུལ་སྐུ་གསུམ་ཡིན་ནོ། །གཉིད་འཐུག་གི་མཐར་རྡོ་རྗེ་འཆང་གི་སྐུར་ལངས་པའི་རྨི་ལམ་གྱི་ལུས་དེ་རྨི་ལམ་གྱི་སྐབས་ཀྱི་ལོངས་སྐུར་བྱས་པ་འདི་
ལ་གཉིས་ཡོད་ཀྱང་། རྨི་ལམ་རླུང་སྟོབས་ཀྱིས་ཟིན་པ་ལྟ་བུའི་ནུས་པ་མཐུ་ཅན་དུ་སོང་བས་ནི། རྨི་ལམ་གྱི་ལུས་དང་རྣམ་སྨིན་གྱི་ལུས་གཉིས་སོ་སོར་སྣང་བ་འབྱུང་ལ། དེའི་གོང་དུ་དེ་གཉིས་སོ་སོར་མི་སྣང་ཡང་། རྨི་ལམ་གྱི་ལུས་རྡོ་
6-16-21b


རྗེ་འཆང་གི་སྐུར་ལངས་པ་འབྱུང་ངོ་། །དེ་བཞིན་དུ་རྨི་ལམ་གྱི་སྤྲུལ་སྐུ་ཡང་གཉིས་ཡོད་ཅིང་། དེ་ངོས་ཟིན་པ་ཞལ་གྱི་གདམས་པ་མེད་ན་ཅུང་དཀའ་ཡང་། འདིར་རྨི་ལམ་གྱི་སྐབས་སམ་སད་པར་ཤེས་པའི་སྐབས་གཉིས་ཀྱང་གང་ཡིན་ཡང་རུང་སྟེ། རྨི་
ལམ་གྱི་ལུས་རང་དགའ་བའི་སྣང་བ་ནི་འཆར་བར་འདོད་པས་མཚམས་དེར་སྤྲུལ་སྐུ་རྡོ་རྗེ་འཆང་དུ་བསྒྱུར་བའོ། །སྤྲུལ་སྐུ་དེ་ཡང་ལུས་གཉིས་སོ་སོར་སྣང་བའི་གང་ཟག་ཡིན་ན། བསྐྱེད་རིམ་གྱི་སྐབས་སུ་ལོངས་སྐུ་སྤྲུལ་སྐུ་ལ་ཞུགས་པར་གསུངས་
པ་བཞིན་དུ་བྱས་པས་ཆོག་ཅིང་། དེའི་སྤྲུལ་སྐུ་ནི་དམ་ཚིག་སེམས་དཔའི་དོད་དང་། ལོངས་སྐུ་ནི་ཡེ་ཤེས་སེམས་དཔའི་དོད་ལྟར་བྱས་པས་ཁྱབ་བོ། །གཉིས་པ་གསལ་བའི་དབྱེ་བ་ལ་གསུམ། རྡོར་བཟླས། སེམས་དབེན། སྒྱུ་ལུས་ཀྱི་ཡིག་ཆུང་
ངོ་། །དང་པོ་ལ་གཉིས། རྡོར་བཟླས་ཀྱི་ངོ་བོ་དང་། དེའི་ཁྱད་པར་རོ། །དང་པོ་ནི། བླ་མ་རྡོ་རྗེ་འཆང་ལ་ན་མོ། །རྡོར་བཟླས་ཀྱི་གནད་གསལ་བར་དྲིལ་ན། དཔེར་ན་གཞལ་ཡས་ཁང་པའི་རྒྱ་མཐོངས་ནས་རླུང་བྱུང་ནས་དྲི་མགོ་ལ་ཕོག་པ་ལྟར་མི་
ཤིགས་པའི་ཐིག་ལེ་ལ་ང་རྒྱལ་འཕོས་ཏེ། རང་དང་ཐིག་ལེ་གཉིས་སུ་མི་སྣང་བར་སླར་ཡང་བློ་ཐིག་ལེ་རྣམས་ལྷན་ཅིག་ཏུ་བསྐྱེད་པ་སྟེ། སྙིང་གའི་རྩ་འཁོར་གྱི་དབུས་སུ་རྩ་དེ་དག་དཀར་པོ་འོད་དང་བཅས་པ་ཞིག་དམིགས་ལ། དེ་ཐིག་ལེའི་རྣམ་པར་
གནས་པ་ལ་རླུང་རྣམས་དབུ་མའི་ཡར་སྣ་སོག་སྦུབས་ཀྱི་འཕྲོ་འདྲ་བ་ནས་ཞུགས་པས་ཡས་མར་འོད་ཀྱི་རྣམ་པར་འབྱུང་། རང་ཐིག་ལེར་གནས་པ་ལ་ཐིམ། ཅུང་ཟད་གནས་ནས་དབུ་མ་ནས་ཡར་མཛོད་སྤུའི་བར་སོང་བར་བསྒོམ། ཐིག་ལེ་གསལ་
6-16-22a


ཞིང་བརྟན་པའི་ངང་ནས་ལྡང་འཇུག་གནས་གསུམ་གྱི་རླུང་གི་རང་སྒྲ་དེ། ཨོཾ་ཨཱཿཧཱུཾ་གསུམ་གྱི་སྒྲར་གྲགས་པ་ལ་རང་ཐིག་ལེའི་རྣམ་པར་གནས་པས་ཡིད་གཏད་ནས་ཉན་པའི་ཚུལ་དུ་བསྒོམ་པ་ཡིན་ཏེ། དཔེར་ན་ཕྱི་རོལ་
ནས་རླུང་བུ་ག་སོགས་ལ་ཕོག་པ་ན་སིང་ཟེར་བའི་སྒྲ་བྱུང་ཡང་། དེ་རང་གིས་བརྗོད་པའི་རྣམ་པ་མི་འབྱུང་ཞིང་། ཉན་ཤེས་ཀྱིས་ཚོར་བའི་རྣམ་པ་ཡིན་པ་བཞིན་ནོ་གསུང་ངོ་། །ལྡང་འཇུག་གནས་པ་རྣམས་ཀྱི་ཚེ་བདེ་བའི་རྣམ་པ་དང་། དངོས་པོ་མེད་
པའི་ཚུལ་དུ་བྱ་ཞེས་ཞལ་ཤེས་སོ། །གཉིས་པ་རྡོར་བཟླས་དེའི་ཁྱད་པར་ལ་གཉིས། སྙིང་གའི་རྩ་མདུད་འབྱེད་པའི་རྡོར་བཟླས་དང་། སྲོག་ཐུར་བསྲེ་བའི་རྡོར་བཟླས་སོ། །དང་པོ་ནི། རྡོ་རྗེའི་བཟླས་པས་སྙིང་གའི་རྩ་མདུད་འབྱེད་པའི་མན་ངག་ཁྱད་པར་
བ་ནི། སྟེང་རླུང་ཨོཾ་གྱི་གདངས་ཀྱིས་ནང་དུ་འཇུག་པ་ན། སྙིང་གའི་རྩ་འཁོར་གྱི་དབུས་ཀྱི་མི་ཤིགས་པའི་ཐིག་ལེ་དེ་མར་ལ་བུད་པ་ཞིག་བྱས་ཏེ། དེར་ཨཱཿའི་གདངས་ཀྱིས་གནས་ཤིང་། ཧཱུཾ་གི་གདངས་ཀྱིས་ཕྱིར་འབྱུང་བ་དང་དུས་མཉམ་དུ་
སྔར་གྱི་གནས་སུ་ཐིག་ལེ་དེ་ཉིད་འབྱུང་བའི་དམིགས་པ་བྱའོ། །མན་ངག་འདི་རྨི་ལམ་འཛིན་པའི་སྐབས་སུའང་བྱའོ། །གཉིས་པ་ལ་གཉིས། སྙིང་གར་སྲོག་ཐུར་རགས་པ་བསྲེ་བའི་རྡོར་བཟླས་དང་། གནས་གཞན་དུ་སྲོག་ཐུར་རགས་པ་བསྲེ་
བའི་རྡོར་བཟླས་སོ། །དང་པོ་ནི། སྟེང་འོག་གི་སྣ་སྒོ་གཉིས་ནས་རླུང་ནང་དུ་འཇུག་པ་དང་དུས་མཉམ་དུ་སྙིང་གར་གནས་པ་དམིགས་རྟེན་ལ་སིམ་པའི་ཚུལ་གྱི་དུས་མཉམ་ཕྱིར་འགྲོ་བ་ཡང་དུས་གཅིག་ལ་གྱེས་པ་ཡིན་གསུང་། ཐུགས་རྡོ་རྗེའི་ཧཱུཾ་
6-16-22b


ལ་གནས་པ་བྱས་ན་ཚེ་རིང་བའི་རྟེན་འབྲེལ་ཡོད་གསུང་། གཉིས་པ་ནི། དེ་བཞིན་དུ་སྟེང་རླུང་སྣ་བུག་ནས་ཨོཾ་གྱི་གདངས་དང་། འོག་རླུང་ཡང་འོག་སྒོ་གཉིས་ནས་ཨོཾ་གྱི་གདངས་ཀྱིས་གསང་གནས་བར་དུ་དུས་མཉམ་དུ་འཇུག་ཅིང་། གསང་གནས་ཀྱི་རྩ་
འཁོར་གྱི་དབུས་སུ་ཨཱཿའི་གདངས་ཀྱིས་དུས་མཉམ་དུ་གནས་པ་དང་། ཕྱིར་འབྱུང་བ་ན་ཧཱུཾ་གི་གདངས་ཀྱིས་དུས་མཉམ་དུ་འོག་གི་སྒོ་གཉིས་ནས་ཕྱིར་འབྱུང་བ་དུས་མཉམ་རྡོར་བཟླས་བྱའོ། །དེ་བཞིན་དུ་ལྟེ་བ་མགྲིན་པ་སྤྱི་བོ་རྣམས་སུ་བྱ་སྟེ། གནས་
གཞན་དུ་སྲོག་ཐུར་བསྲེ་བའི་ཞལ་གྱི་གདམས་པའོ། །མན་ངག་འདིའི་རྡོར་བཟླས་ཡང་། རྩ་འཁོར་གཞན་གྱི་དབུས་སུ་རང་རང་གི་ཐིག་ལེ་ལ་དམིགས་ནས་བྱའོ། །མཁས་གྲུབ་རྗེའི་ཟིན་བྲིས་ཡིན།  གཉིས་པ་སེམས་དབེན་ལ་གཉིས། སེམས་
དབེན་རྗེས་མཐུན་པའི་སྐབས་སུ་དྲན་པ་སུམ་ལྡན་དུ་བྱ་བ་དང་། སེམས་དབེན་མཚན་ཉིད་པའི་སྐབས་སུ་དྲན་པ་སུམ་ལྡན་དུ་སྐྱོང་ཚུལ་ལོ། །དང་པོ་ནི། ཕྲ་ཐིག་དང་རྡོར་བཟླས་ཀྱི་རླུང་འདུས་ཀྱང་སྟོང་པ་བཞི་གོ་རིམས་ངེས་མེད་དུ་འཆར་
ན་ཅུང་ཕན་ཆུང་བས། དེ་མི་འཁྲུལ་བར་བྱ་བ་ནི། རྟགས་བཞི་དང་སྟོང་པ་བཞི་འཆར་བའི་གོ་རིམས་མཁས་པར་བྱས་ནས། སྣང་བ་ཤར་བ་ན་འདི་སྣང་བ་ཡིན། འདིའི་སྔོན་དུ་ས་ཆུ་ལ་ཐིམ་པ་ལ་སོགས་པའི་རྟགས་རྣམས་སོང་བ་ཡིན། སྣང་བ་
འདི་འགགས་པའི་རྗེས་སུ་སྣང་བ་མཆེད་པ་འཆར་བ་ཡིན་སྙམ་དུ་ཡིད་ལ་ངེས་པར་བྱའོ། །དེས་གཞན་གསུམ་ལའང་རིགས་འགྲེའོ། །འདི་ནི་སྟོང་པ་བཞི་མི་འཁྲུལ་བར་བྱ་བའི་ཐབས་སོ། །འདི་ལ་སྐུ་མཆེད་གཉིས་ཀྱིས་ཟིན་བྲིས་གཉིས་གནང་ཡང་།
6-16-23a


ཕྱི་མ་གསལ་ལ་རྒྱས་པ་ལྟར་བཀོད་དོ། །གཉིས་པ་སེམས་དབེན་མཚན་ཉིད་པ་ལ་གཉིས། སྣང་མཆེད་ཐོབ་གསུམ་དཔེའི་འོད་གསལ་དང་བཅས་པའི་སྐབས་སུ། དྲན་པ་སུམ་ལྡན་དུ་བྱ་བའི་ཚུལ་དང་། འོད་གསལ་
ལས་སྒྱུ་མའི་སྐུར་ལྡང་བའི་དུས་མཚམས་བསྟན་པའོ། །དང་པོ་ནི། རྡོ་རྗེའི་ལུས་ལ་གནད་དུ་བསྣུན་པ་ལས། དང་པོར་སྨིག་རྒྱུ་ལྟ་བུ། དེ་ནས་དུ་བ་ལྟ་བུ། དེ་ནས་སྲིན་བུ་མེ་ཁྱེར་ལྟ་བུ། དེ་ནས་མར་མེ་འབར་བ་ལྟ་བུའི་ཉམས་འཆར་ཞིང་། དེའི་
རྗེས་སུ་སྟོན་གྱི་ནམ་མཁའ་གཡའ་དག་པ་ལ་ཟླ་བའི་འོད་ཀྱིས་ཁྱབ་པ་ལྟ་བུའི་སྣང་བའི་ཡེ་ཤེས་འཆར་ལ། དེའི་དུས་སུ་འདི་ནི་སྣང་བའི་ཡེ་ཤེས་སོ་སྙམ་དུ་དྲན་པ་དང་། འདིའི་སྔོན་དུ་མར་མེ་ལྟ་བུ་སོང་བ་ཡིན་སྙམ་དྲན་པ་དང་། འདིའི་རྗེས་སུ་
མཆེད་པའི་ཡེ་ཤེས་སྟོན་གྱི་ནམ་མཁའ་གཡའ་དག་པ་ལ་ཉི་འོད་ཀྱིས་ཁྱབ་པ་ལྟ་བུ་འབྱུང་སྙམ་དུ་དྲན་པ་གསུམ་དང་ལྡན་པར་བྱ་ཞིང་། དེ་བཞིན་དུ་མཆེད་པའི་ཡེ་ཤེས་ཤར་བའི་ཚེ། འདི་ནི་མཆེད་པའི་ཡེ་ཤེས་སོ་སྙམ་དུ་དྲན་པ་དང་། དེའི་
གོང་དུ་སྣང་བའི་ཡེ་ཤེས་སོང་བ་ལས་བྱུང་བའོ་སྙམ་དུ་དྲན་པ་དང་། དེའི་རྗེས་སུ་ཉེར་ཐོབ་ནམ་མཁའ་གཡའ་དག་པ་ལ་མཚམས་ཀྱི་མུན་པས་ཁྱབ་པ་ལྟ་བུ་འབྱུང་ངོ་སྙམ་དུ་དྲན་པའི་དྲན་པ་གསུམ་དང་ལྡན་པར་བྱ་ཞིང་། དེ་བཞིན་དུ་ཉེར་ཐོབ་
ཤར་བའི་ཚེ་ནམ་མཁའ་ཉེར་ཐོབ་དུས་སུ་ངེས་མི་ནུས་ཀྱང་། ཉེར་ཐོབ་ཀྱི་སྟོད་སྨད་གཉིས་སུ་འདི་ནི་ཉེར་ཐོབ་བོ་སྙམ་དུ་དྲན་པ་དང་། འདི་ནི་སྣང་བ་མ་ཆེད་པའི་ཡེ་ཤེས་སྔོན་དུ་སོང་བ་ལས་འབྱུང་བའོ་སྙམ་དུ་དྲན་པ་དང་། འདིའི་རྗེས་སུ་སྟོན་གྱི་
6-16-23b


ནམ་མཁའ་གཡའ་དག་པ་སློད་བྱེད་ཀྱི་རྐྱེན་གསུམ་དང་བྲལ་བའི་འོད་གསལ་འབྱུང་ངོ་སྙམ་དུ་དྲན་པའི་དྲན་པ་གསུམ་དང་ལྡན་པར་བྱ་ཞིང་། དེ་བཞིན་དུ་འོད་གསལ་ཤར་བའི་ཚེ་འདི་འོད་གསལ་ལོ་སྙམ་དུ་དྲན་པ་དང་། འདི་ནི་ཉེར་ཐོབ་སྔོན་དུ་སོང་བ་ལས་བྱུང་བའོ་
སྙམ་དུ་དྲན་པ་དང་། འདིའི་རྗེས་སུ་སྒྱུ་ལུས་འགྲུབ་བོ་སྙམ་དུ་དྲན་པའི་དྲན་པ་གསུམ་དང་ལྡན་པར་བྱའོ། །གཉིས་པ་ནི། འོད་གསལ་ཤར་བའི་ཚེ་སྟོན་གྱི་ནམ་མཁའ་གཡའ་དག་ལ་ཟླ་འོད་དང་། ཉི་འོད་དང་། མཚམས་ཀྱི་མུན་པ་དང་བཅས་པའི་སློད་བྱེད་
ཀྱི་རྐྱེན་གསུམ་དང་བྲལ་བའི་ནམ་མཁའི་རང་མདོག་ཇི་ལྟ་བ་བཞིན་དུ་ཐོན་པའི་སྟོང་སང་ངེ་བ་གཡོ་མེད་དུ་གནས་པ་ཞིག་འོང་ཞིང་། དེའི་རང་ནས་འདིར་ཕྲ་ཐིག་ཙམ་གྱི་ཅུང་ཟད་གཡོ་བ་ཞིག་འོང་བས། དེ་འབྱུང་བའི་ཚེ་འོད་གསལ་ལས་ལྡང་བར་རྩོམ་པ་ཡིན་
པས་མཚམས་དེ་ནས་སྒྱུ་མའི་སྐུར་ལྡང་བར་བྱའོ། །སྣང་མཆེད་ཐོབ་གསུམ་གྱི་ཞལ་གདམས་ཆེས་ཤིན་ཏུ་ཟབ་པའི་བརྗེད་བྱང་། མཁས་གྲུབ་རྗེས་མཛད་པའོ། །གསུམ་པ་ལ་གཉིས། སྒྱུ་ལུས་དངོས་དང་། དེ་དང་འབྲེལ་བའི་གདམས་པའོ། །དང་པོ་ལ་གཉིས། སྒྱུ་ལུས་
ཀྱི་མཚུངས་ལྡན་ལྔ་དང་། ཁྱད་པར་ལྔ་ལྡན་ནོ། །དང་པོ་ནི། གཉིད་ཀྱི་འབྱུང་བ་ཐིམ་རིམ་རྣམས་ཀྱི་གཉིད་ཀྱི་འོད་གསལ་ལས་རྨི་ལམ་གྱི་ལུས་སུ་ལངས་པ་དང་། དེའང་རླུང་སེམས་ཙམ་ལས་གྲུབ་པ་དང་། དེར་ང་རྒྱལ་འཕོས་པ་དང་། ལུས་རགས་པ་
ལས་གོ་ས་ལོགས་སུ་བྱེ་བ་དང་། སླར་ཡང་ལུས་རགས་པ་ལ་འཇུག་པ་ལྟར་རིམ་པ་བཞིན་ལམ་དུས་ཀྱི་འབྱུང་བ་ཐིམ་རིམ་རྣམས་ཀྱི་དཔེའི་འོད་གསལ་ལས་སྒྱུ་ལུས་སུ་ལངས་པ་དང་། དེའང་རླུང་སེམས་ཙམ་ལས་གྲུབ་པ་དང་། དེ་རང་རྒྱལ་འཕོས་
6-16-24a


པ་དང་། ལུས་རགས་པ་ལས་གོ་ས་ལོགས་སུ་བྱེ་བ་དང་། སླར་ཡང་ལུས་རགས་པ་ལ་འཇུག་པ་དང་ཆོས་མཚུངས་པ་ཡིན་གསུང་ངོ་། །གཉིས་པ་ནི། གང་ནས་ལྡང་བ་གནས་ཀྱི་ཁྱད་པར། རྩ་འཁོར་གྱི་དབུས་དྷཱུ་ཏཱིའི་ནང་
ནས་དང་། དེའི་ཡང་ནང་ཐིག་ལེ་དཀར་དམར་གའུ་ཁ་སྦྱར་བ་འདྲ་བའི་ནང་ནས་ལྡང་། གང་ལས་ལྡང་བ་རྒྱུའི་ཁྱད་པར། ཐིག་ལེའི་ནང་གི་སྲོག་རླུང་ཤིན་ཏུ་ཕྲ་བ་དང་། རྣམ་ཤེས་ཤིན་ཏུ་ཕྲ་བ་ལས་ལྡང་། ཐོག་མེད་ནས་ཀྱི་ཐིག་ལེ་ཤིན་ཏུ་ཕྲ་བ་ཡང་ཡོད་
གསུང་། གང་གིས་ལྡང་བ་རྟེན་གྱི་ཁྱད་པར། སྒྱུ་མའི་སྐུར་ངེས་པར་ལྡང་བར་བྱའོ་སྙམ་པའི་འཕེན་པ་དྲག་པོས་ལྡང་། གང་གི་ཚེ་ལྡང་བ་དུས་ཀྱི་ཁྱད་པར། ཀུན་རྟོག་གཡོ་བའི་རླུང་དང་སེམས་སྣང་བ་གསུམ་རིམ་གྱིས་ཐིམ་པའི་དཔེའི་འོད་གསལ་ལ་ཇི་
ཙམ་གནས་གྱི་བར་བཞག་པའི་མཐར་ལྡང་བར་རྩོམ་པ་ནི། དཔེར་ན་གཞོང་པ་ལ་སོགས་པ་ཆུས་བཀང་བ་ན། རླུང་མ་ལངས་པར་མེར་རེ་སྡོད་ལ། རླུང་ཅུང་ཟད་ལངས་པ་དང་ཐ་མ་ནས་ཟེད་ཟེད་དམ་བན་བུན་བྱུང་ན་ལྡང་བར་རྩོམ་པ་བཞིན་དཔེའི་འོད་
གསལ་ལས་ལྡང་བར་རྩོམ་པའོ། །དེས་སྒྱུ་མའི་སྐུ་ལས་ལྡང་བར་རྩོམ་པ་ཡང་རིགས་འགྲེ་གསུང་ངོ་། །གང་གི་ངོ་བོར་ལྡང་བ་འབྲས་བུའི་ཁྱད་པར། དང་པོའི་མགོན་པོ་སྐུ་མདོག་དཀར་པོ་མཚན་དཔེས་བརྒྱན་པ། ཐུགས་བདེ་སྟོང་གཉིས་སུ་མེད་པའི་
ངོ་བོར་ལྡང་བ་ཡིན་ཞེས་རྗེ་བཙུན་ཙོང་ཁ་པ་ཆེན་པོ་གསུང་ངོ་། །ཞར་ལ་གཞན་ནས་འབྱུང་བའི་སྟོང་གཟུགས་ཀྱི་སྐུ་ངེས་པ་ལྔ་ལྡན་སོགས་ཤེས་དགོས་སོ། །གཉིས་པ་ལ་གཉིས། ཐུན་མོང་དང་ཐུན་མོང་མ་ཡིན་པའོ། །དང་པོ་ནི། སྒྱུ་ལུས་སྐབས་
6-16-24b


ཤིན་ཏུ་གཅེས་པའི་གདམས་པ་སེམས་དཔའ་གསུམ་བརྩེགས་སུ་བྱ་བ་ལ། གཞི་དུས་ཀྱི་སེམས་དཔའ་གསུམ་བརྩེགས། ལམ་དུས་ཀྱི་སེམས་དཔའ་གསུམ་བརྩེགས། འབྲས་དུས་ཀྱི་སེམས་དཔའ་གསུམ་བརྩེགས་ཏེ་གསུམ་ཚན་གསུམ་དུ་ཡོད་དོ། །
གཞི་དུས་ཀྱི་སེམས་དཔའ་གསུམ་བརྩེགས་ནི། ད་ལྟར་གྱི་ལུས་རགས་པ་འདི་དམ་ཚིག་སེམས་དཔའ། དེའི་སྙིང་གའི་དང་པོར་ཆགས་པའི་ཐིག་ལེ་དཀར་དམར་ནི་ཡེ་ཤེས་སེམས་དཔའ། དེའི་ནང་གི་སྲོག་འཛིན་ཤིན་ཏུ་ཕྲ་བ་ནི་ཏིང་ངེ་འཛིན་སེམས་དཔའ། 
ཤིན་ཏུ་ཕྲ་བའི་སེམས་དེའི་བཞོན་པ་དང་བཅས་པ་ནི་སྒྱུ་ལུས་ཀྱི་སྒྲུབ་གཞི་ཡིན་ནོ། །ལམ་དུས་ལ་བསྐྱེད་རིམ་དང་རྫོགས་རིམ་གཉིས་ལས་བསྐྱེད་རིམ་ནི་གོ་སླ་ལ། རྫོགས་རིམ་ནི་སྟོང་པ་བཞིའི་མཐར་ཤིན་ཏུ་ཕྲ་བའི་རླུང་སེམས་ལས། སྒྱུ་ལུས་དངོས་
སམ་རྗེས་མཐུན་པར་ལངས་ནས་སླར་ཡང་ཕུང་པོ་རྙིང་པའི་སྙིང་གར་ཞུགས་པ་ནི་ཡེ་ཤེས་སེམས་དཔའ། དེ་ལྟར་ལྡང་བ་དང་ཞུགས་པར་བྱེད་པའི་སེམས་ནི་ཏིང་ངེ་འཛིན་སེམས་དཔའ། དམ་ཚིག་སེམས་དཔའ་ནི་སྔར་བཞིན་ནོ། །འབྲས་དུས་ཀྱི་སེམས་
དཔའ་གསུམ་བརྩེགས་ནི། དོན་གྱི་འོད་གསལ་གྱི་མཐར་རླུང་སེམས་ཙམ་ལས་ཁ་སྦྱོར་ཡན་ལག་བདུན་ལྡན་གྱི་སྐུར་བཞེངས་པ་དེས། མཆོག་གི་སྤྲུལ་སྐུ་ལ་སོགས་པ་གཟུགས་རགས་པ་བཟུང་བའམ་གཞན་དོན་དུ་འགྱུར་བར་གཟིགས་ནས་སླར་
ཡང་ཕུང་པོ་རྙིང་བའི་ཐུགས་ཀར་ཡེ་ཤེས་སེམས་དཔའི་རྣམ་པར་ཞུགས་པ་ནི་ཡེ་ཤེས་སེམས་དཔའ། དེའི་ལྷན་སྐྱེས་ཀྱི་ཡེ་ཤེས་ནི་ཏིང་ངེ་འཛིན་སེམས་དཔའ། སྤྲུལ་སྐུ་གསར་པའི་ཕུང་པོ་རྙིང་པ་ནི་དམ་ཚིག་སེམས་དཔའ། གྲུབ་ཆེན་ས་ར་
6-16-25a


ཧ་ནི་ཕུང་པོ་རྙིང་པ་ལ་ཞུགས་པ་ཡིན་གསུང་། འདི་རྣམས་ལ་སྐུ་མཆེད་གཉིས་ཀྱིས་ཟིན་བྲིས་གཉིས་སྣང་ཡང་། གནད་རྣམས་ཕྱི་མ་གསལ་ལ་རྒྱས་པར་སྣང་བས་བཀོད་པ་ཡིན་ནོ། །གཉིས་པ་ཐུན་མོང་མ་
ཡིན་པའི་སེམས་དཔའ་དགུ་བརྩེགས་ཀྱི་གནད་རྣམས་བླ་མའི་ཞལ་གྱི་དཀྱིལ་འཁོར་འབའ་ཞིག་ལས་ཤེས་དགོས་སོ། །གཉིས་པ་ལ་བསྟན་བཤད་གཉིས་ལས། དང་པོ་ནི། རྨི་ལམ་བཙན་ཐབས་སུ་འཛིན་པའི་མན་ངག་ནི། རྨི་ལམ་འཛིན་
པའི་འདུན་པ་ལེགས་པར་སྦྱངས་པའི་མཚམས་ནས་གཉིད་ལོག་པའི་ཚེ། གྲོགས་རྨི་ལམ་འཛིན་པའི་ཚོད་ལ་མཁས་པ་ཞིག་གིས་རྨི་ལམ་ཡིན་ནོ། །རྨི་ལམ་ལ་རྨི་ལམ་དུ་ངོ་ཤེས་པར་གྱིས་ལ། དགེ་སྦྱོར་འདི་ལྟ་བུ་གྱིས་ཤིག་ཅེས་རྣ་ཁུང་དུ་
དང་པོར་སྒྲ་ཆུང་དུ་སྒྲོག །གཉིད་མི་སད་པའི་གདེང་རྙེད་པའི་མཚམས་ནས་ཅུང་ཆེ་བར་སྒྲོག །དེ་ཐོས་པས་རྐྱེན་བྱས་ནས་རྨི་ལམ་ངོ་ཤེས། དེ་ལྟར་ངོ་ཤེས་ནས་ཉིན་པར་གང་ལ་བྱང་བའི་དགེ་སྦྱོར་རྣམས་སྐྱོང་། དང་པོ་མ་གོམས་བར་དུ་
གཉིད་མྱུར་དུ་སད་འོང་བས། དེ་ལ་ནི་སྙིང་གའམ་ནོར་བུའི་དབུས་སུ་ཐིག་ལེ་ནག་པོ་སྲན་མ་ཙམ་ཞིག་ལ་སེམས་བཟུང་། ཡང་སྔར་བཞིན་དགེ་སྦྱོར་སྐྱོང་། ཁྱད་པར་རྨི་ལམ་ལོངས་སྐུར་ལྡང་བ་ལ་བསླབ་པར་བྱའོ། །དེ་ལྟར་བྱས་པས་རྨི་ལམ་
མྱུར་དུ་ཟིན་པ་དང་། སད་འབྱམས་གཅོད་པའི་གདམས་པ་གཉིས་སྣང་ངོ་། །གསང་འདུས་མར་ལུགས་ཀྱི་གདམས་ངག་གི་སྙིང་པོ་བླ་ན་མེད་པ་འདིའི་གནད་རྣམས་ཞིབ་ཏུ་ད་དུང་བླ་མའི་ཞལ་ལས་ཤེས་དགོས་ཤིང་། ལག་ལེན་ནི་གྲོགས་ཁྱད་
6-16-25b


པར་ཅན་ལ་བལྟོས་དགོས་སོ། །གཉིས་པ་རྒྱས་པར་བཤད་པ་ལ་གཉིས། རྨི་ལམ་མི་འཁྲུལ་བའི་ཐབས་ལ་རླུང་བྱང་བའི་གནད་ནི། བསྲེ་བའི་སྐབས་སུ་གཉིད་དང་རྨི་ལམ་རླུང་སྟོབས་ཀྱིས་ཟིན་ན་རང་སྟོབས་ཆེ་ཞིང་། རྨི་ལམ་རྣམས་ཕལ་ཆེར་
འཁྲུལ་མེད་འོང་བའི་རྒྱུ་མཚན། སད་དུས་སུ་སྙིང་གའི་སྡུད་རིམ་ལེགས་པར་སྦྱངས་ནས་རླུང་འདུས་པ་དང་། གཉིད་དུས་དང་རྨི་ལམ་གྱི་དུས་སྙིང་གར་རླུང་ལེགས་པར་འདུས་པའི་དུས་སུ་ལྐོག་གྱུར་གཏན་ལ་ཕེབས་པའི་བག་ཆགས་རྣམས་ཀྱང་
འདུས་པའི་གནད་ཀྱིས་ཡིན་གསུང་ངོ་། །གདན་རྫོགས་དང་ཆོས་དྲུག་གི་ཁྲིད་ཡིག་ཏུ་གནད་གཞན་འགའ་ཞིག་ལ་བརྟེན་ནས་རྨི་ལམ་མི་འཁྲུལ་བར་བྱ་བའི་ཐབས་ཁྱད་པར་ཅན་ཞིག་ཀྱང་ཡོད་པར་སྣང་ངོ་ཞེས་གསུངས་པ་ནི་ཞལ་ལས་ཤེས་དགོས་
སོ། །གཉིད་ཀྱི་འོད་གསལ་དང་རྨི་ལམ་རླུང་སྟོབས་ཀྱིས་ཟིན་ན། འཆི་བའི་འོད་གསལ་དང་བར་དོ་རླུང་སྟོབས་ཀྱིས་ཟིན་པས་ཁྱབ། དེ་བཞིན་དུ་གཉིད་ཀྱི་འོད་གསལ་དང་རྨི་ལམ་འདུན་པས་ཟིན་ན། འཆི་བའི་འོད་གསལ་དང་བར་དོ་འདུན་པས་
ཟིན་པས་ཁྱབ་ཅིང་། སྨིག་རྒྱུ་སོགས་ཀྱི་རྟགས་རྣམས་ངེས་པར་འཁྲུལ་མེད་འཆར་ན་རླུང་སྟོབས་ཀྱིས་གཉིད་ཀྱི་འོད་གསལ་སོགས་ཟིན་པས་ཁྱབ་པ་ཡིན་པས་རྨི་ལམ་གྱི་བསྲེ་བ་འདི་དག་བར་དོ་དང་བསྲེ་བའི་ཚོད་འཛིན་འཁྲུལ་མེད་ཡིན་གསུང་ངོ་། །
དེའི་ཐབས་ཀྱང་ཞག་འགའ་གཉིད་བཅག་ནས་ཉིན་པར་སྙིང་གའི་སྡུད་རིམ་ལ་སྦྱངས། མཚན་མོ་གཉིད་ལོག་ཁར་སྙིང་གའི་སྡུད་རིམ་དང་། རྡོར་བཟླས་དང་། བསམ་གཏན་གཉིས་ཀྱི་སྡུད་རིམ་གྱིས་གཉིད་དུ་བཏང་བས་ལན་ཅིག་ལ་མི་འཆར་ཡང་།
6-16-26a


ཐེངས་གཉིས་གསུམ་བྱས་པས་ངེས་པར་རྟགས་འཆར་རོ་གསུང་ངོ་། །རྨི་ལམ་འདུན་པས་ཟིན་ནས་རླུང་སྟོབས་ཀྱིས་ཟིན་པའི་མན་ངག་ནི། རྨི་ལམ་འདུན་པས་ཟིན་པ་དང་སྙིང་གའི་སྡུད་རིམ་རྡོར་བཟླས་སོགས་བྱས་པས། གཉིད་ཀྱི་
འོད་གསལ་སོགས་རླུང་སྟོབས་ཀྱིས་ཟིན་པས་ཐབས་མཁས་ཁྱད་པར་ཅན་ཡིན་ནོ་གསུང་ངོ་། །གཉིད་དང་རྨི་ལམ་ཟིན་དུས་ཀྱི་གཉིད་ཀྱི་འོད་གསལ་ལ་ཇི་ཙམ་གནས་ཀྱི་བར་བཞག །དེ་ལས་ལྡང་བར་རྩོམ་པ་ན་འཕེན་པ་བཏང་ནས་ལོངས་སྐུར་ལྡང་། 
དེ་ལས་སད་པར་རྩོམ་པ་ན་སྙིང་གའི་སྡུད་རིམ་སོགས་བྱས་ནས་གཉིད་ཀྱི་འོད་གསལ་དུ་གཏོང་བ་འཁོར་མར་བྱེད་པ་ནི། གཉིད་དང་རྨི་ལམ་གྱི་དགེ་སྦྱོར་གྱི་གཙོ་བོ་ཡིན་གསུང་། སྤྲུལ་སྐུ་དང་བསྲེ་བའི་སྐབས་སུ་རླུང་སྟོབས་ཀྱིས་བར་དོ་ལོངས་སྐུ་ཟིན་པ་ལ་
མི་དགོས་ཀྱང་། འདུན་པས་བར་དོ་ཟིན་པའི་དུས་སུ་འཕོ་བ་དགོས་པ་ཡིན་གསུང་། དེའི་མན་ངག་ནི། གཞན་རྣམས་མི་དགོས། བར་དོའི་ལུས་དེ་བསམ་གཏན་གཉིས་ཀྱིས་འོང་གསལ་དུ་བཅུག་ནས། རྣམ་ཤེས་བཞོན་པ་དང་བཅས་པ་དེ་མཁའ་སྤྱོད་
འོག་མིན་སོགས་སྔགས་སྤྱོད་པའི་ལུས་རྟེན་ཁྱད་པར་ཅན་དུ་འཕོ་བའི་གསུང་ངོ་། །རྨི་ལམ་རླུང་དང་འདུན་པ་གང་གིས་ཟིན་ཀྱང་། ལོངས་སྐུ་དེ་ལས་ལྡང་བར་རྩོམ་པ་ན། འཕེན་པ་བཏང་ནས་རྣམ་སྨིན་གྱི་ལུས་སྤྲུལ་སྐུ་མི་བསྐྱོད་པ་སོགས་སུ་ལྡང་
བར་བྱེད་ཅིང་། དེ་ལས་ཕྲ་བ་ནི་རྨི་ལམ་གྱི་ལོངས་སྐུ་ལས་རྨི་ལམ་གྱི་ལུས་རང་དགའ་བར་ལྡང་བར་རྩོམ་པ་ན། འཕེན་པ་བཏང་ནས་སྤྲུལ་སྐུ་མི་བསྐྱོད་པའམ་རྡོ་རྗེ་འཆང་དུ་ལྡང་། དེ་ལས་ལྡང་བར་རྩོམ་པ་ན་འཕེན་པ་བཏང་ནས་རླུང་སྟོབས་ཀྱིས་
6-16-26b


ཟིན་ན། རྣམ་སྨིན་གྱི་ལུས་དང་རྨི་ལམ་གཉིས་པོ་སོ་སོར་སྣང་བས། རྣམ་སྨིན་གྱི་ལུས་སྤྲུལ་སྐུ་མི་བསྐྱོད་པའམ་རྡོ་རྗེ་འཆང་སོགས་ཀྱི་ཐུགས་ཀར་ཡེ་ཤེས་སེམས་དཔའི་ཚུལ་གྱིས་འཇུག་པ་ཡིན་གསུང་ངོ་། །རྗེ་
བཙུན་དམ་པ་རྣམས་ལ་ཕྱག་འཚལ་ལོ། །སད་དུས་ཀྱི་འོད་གསལ་དང་། གཉིད་དུས་ཀྱི་འོད་གསལ་དང་། འཆི་དུས་ཀྱི་འོད་གསལ་ལས་སྒྱུ་མའི་སྐུར་ལྡང་བའི་ཚེ་ཤིན་ཏུ་ཕྲ་བའི་རླུང་སེམས་དེ་རྣམ་སྨིན་གྱི་ཕུང་པོ་རྙིང་པ་འདི་ལས་ལོགས་སུ་བྱེ་
སྟེ། གསང་འདུས་ཀྱི་སྐབས་སུ་དང་པོའི་མགོན་པོའི་སྐུར་ལྡང་བར་བྱ་སྟེ། དེས་མཚོན་ནས་རྡོ་རྗེ་འཇིགས་བྱེད་སོགས་ལའང་དེ་དག་རང་རང་གི་སྐབས་ཀྱི་རིམ་པ་བཞིན་བར་དོ་ལོངས་སྐུར་འཁྱེར་བའི་ལམ་ཁྱེར་ཡིན་ཞིང་། འདིར་ཡང་སྒྱུ་ལུས་ལོངས་སྐུར་ལྡང་བ་
ཡིན་པའི་ཕྱིར་རོ། །འོད་གསལ་ལས་སྒྱུ་མའི་སྐུར་ལྡང་བའི་ཚེ་རྣམ་སྨིན་གྱི་ལུས་ལས་གོ་ས་ལོགས་སུ་བྱེད་ནས་ལྡང་བ་དང་། ཆུ་ལས་ཉ་ལྡང་བའི་ཚུལ་གཉིས་གསུངས་ཀྱང་སྔ་མ་གདམས་ངག་གི་མཆོག་ཡིན་ལ། དེ་ཡང་རྣམ་སྨིན་གྱི་ལུས་ལས་ལོགས་
སུ་བྱེ་ནས་ལོངས་སྐུར་ལྡང་ཞིང་། ལོངས་སྐུ་དེ་ཡང་རྣམ་སྨིན་གྱི་ཕུང་པོ་ལ་ཚུར་འཇུག་པ་ནི་སྤྲུལ་སྐུར་ལྡང་བ་ཡིན་ནོ། ། འདི་རྣམས་མཁས་གྲུབ་རྗེའི་ཟིན་བྲིས་ཡིན།  དེ་ལྟར་རྫོགས་རིམ་གྱི་སྤྱིའི་ཡིག་ཆུང་གསུམ། སོ་སོའི་
ཡིག་ཆུང་གསུམ་སྟེ་དྲུག་གིས་བཅུ་གཅིག་པའི་བར་དུ་བརྗོད་ནས། བཅུ་གཉིས་པ་སྒྱུ་ལུས་ཀྱི་ཡན་ལག་བསྲེ་བའི་ཡིག་ཆུང་ལ་གཉིས། བསྲེ་བ་དགུའི་རྣམ་གཞག་དག་ཤིན་ཏུ་གཅེས་པའི་གདམས་ངག་ཟབ་མོའི་ཞལ་ཤེས་རྣམས་ཞིབ་ཏུ་བཤད་པའོ། །
6-16-27a


དང་པོ་ལ་གཉིས། སྐུ་གསུམ་དུས་གསུམ་དང་སྦྱར་བ་དང་། དུས་གསུམ་སྐུ་གསུམ་དང་སྦྱར་བའོ། །དང་པོ་ནི། བཅོམ་ལྡན་འདས་ཁྱབ་བདག་རྡོ་རྗེ་འཆང་ཆེན་པོ་ལ་ཕྱག་འཚལ་ལོ། །བསྲེ་བའི་གདམས་ངག་ལ། ལམ་དུས་ཀྱི་སྐུ་གསུམ་
དང་བསྲེ་བ་ལ་གསུམ་སྟེ། འདི་ལྟར་ལམ་དུས་ཀྱི་ཆོས་སྐུ་དང་བསྲེ་བ་དང་། ལམ་དུས་ཀྱི་ལོངས་སྐུ་དང་བསྲེ་བ་དང་། ལམ་དུས་ཀྱི་སྤྲུལ་སྐུ་དང་བསྲེ་བའོ། །དང་པོ་ལ་གསུམ། གཉིད་སད་དུས་ཆོས་སྐུ་དང་བསྲེ་བ་དང་། གཉིད་ཀྱི་དུས་ཆོས་སྐུ་དང་བསྲེ་བ། 
འཆི་བའི་དུས་སུ་ཆོས་སྐུ་དང་བསྲེ་བའོ། །དང་པོ་ནི། དང་པོར་ལུས་ཀྱི་གནད་ཆེ་སར་གནད་དུ་བསྣུན་པ་ལ་བརྟེན་ནས་སྟོང་པ་བཞི་བསྐྱེད་པའི་འོད་གསལ་སྟོང་པ་བཞི་པ་ཤར་བའི་དུས་ན་ལྟ་ཐོག་ཏུ་བཞག་ནས་བསྒོམ་པ་ཡིན་ལ། གནད་དུ་བསྣུན་པ་ལ་ཡང་སྒོ་
གསུམ་སྟེ། འོག་སྒོར་ནོར་བུའི་དབུས་སམ། ནོར་བུའི་སྣ་རྩེ་དྷཱུ་ཏཱིའི་མར་སྣར་རྫས་ཀྱི་ཐིག་ལེ་ཕྲ་མོ་བསྒོམས་པ་ལ་བརྟེན་ནས་དེ་བརྟན་པའི་མཐར་རོ་རྐྱང་གི་རླུང་དྷཱུ་ཏཱིར་ཞུགས་ཤིང་ཐིམ་པ་ལ་བརྟེན་ནས། སྨིག་རྒྱུ་ལ་སོགས་པའི་རྟགས་བཞི་པོ་སྔོན་དུ་
འཆར་ཞིང་། དེའི་འོག་ཏུ་སྟོང་པ་དང་། ཤིན་ཏུ་སྟོང་པ་དང་། སྟོང་པ་ཆེན་པོ་ཞེས་བྱ་བ། མིང་གཞན་སྣང་བ་དང་། མཆེད་པ་དང་། ཉེར་ཐོབ་ཅེས་བྱ་བ་གསུམ་ཤར་བའི་མཐར། ཐམས་ཅད་སྟོང་བ་ཞེས་བྱ་བའི་འོད་གསལ་ཆེན་པོ་ཤར་བ་ནི་སྒོ་དང་
པོའོ། །གཞན་ཡང་སྙིང་གའི་སྣ་རྩེར་མི་ཤིགས་པའི་སྔགས་ཀྱི་ཐིག་ལེ་བསྒོམས་པ་ལ་བརྟེན་ནས། དེ་བརྟན་པའི་མཐར་རོ་རྐྱང་གི་རླུང་དྷཱུ་ཏཱིར་ཞུགས་ཤིང་ཐིམ་པ་ལ་བརྟེན་ནས། སྨིག་རྒྱུ་ལ་སོགས་པའི་རྟགས་བཞི་པོ་སྔོན་དུ་འཆར་ཞིང་། དེའི་
6-16-27b


འོག་ཏུ་སྟོང་པ་དང་། ཤིན་ཏུ་སྟོང་པ་དང་། སྟོང་པ་ཆེན་པོ་ཞེས་བྱ། མིང་གཞན་སྣང་བ་དང་། མཆེད་པ་དང་། ཉེར་ཐོབ་ཅེས་བྱ་བ་གསུམ་ཤར་བའི་མཐར། ཐམས་ཅད་སྟོང་པ་ཞེས་བྱ་བའི་འོད་གསལ་ཆེན་པོ་ཤར་བ་ནི་སྒོ་གཉིས་པའོ། །ཡང་གདོང་གི་སྣ་རྩེར་
འོད་ཀྱི་ཐིག་ལེ་ཞེས་བྱ་བ་རླུང་འོད་ཟེར་ལྔ་པ་སྣ་བུག་ནས་རྒྱུ་བའམ་འཇུག་ལྡང་གནས་གསུམ་མ་བཅོས་པ་རྡོ་རྗེ་གསུམ་གྱི་རང་གདངས་སུ་ཤར་བར་བསྒོམ་ཞིང་། དེ་ཡང་དྷཱུ་ཏཱི་ནས་བྱེད་པར་མོས་པའི་རྡོ་རྗེའི་བཟླས་པ་བསྒོམས་པའི་མཐར། རོ་རྐྱང་གི་རླུང་དྷཱུ་ཏཱིར་
ཞུགས་ཤིང་ཐིམ་པ་ལ་བརྟེན་ནས། དང་པོ་སྨིག་རྒྱུ་ལྟ་བུ་དང་། གཉིས་པ་དུ་བ་ལྟ་བུ་དང་། གསུམ་པ་མེ་ཁྱེར་ལྟ་བུ་དང་། བཞི་པ་མར་མེ་འབར་བ་ལྟ་བུའི་ཉམས་འབྱུང་སྟེ། རིམ་པ་བཞིན་ས་ཆུ་ལ་ཐིམ་པ་དང་། ཆུ་མེ་ལ་ཐིམ་པ་དང་། མེ་རླུང་ལ་ཐིམ་
པ་དང་། རླུང་རྣམ་ཤེས་ཀྱི་སྣང་བ་དང་པོ་ལ་ཐིམ་པ་ལས་འབྱུང་ངོ་། །དེ་ནས་སྟོང་པ་དང་པོའི་དུས་སུ་སྣང་བ་གཞན་གང་ཡང་མི་འཆར་བར་ཡུལ་དུ་གང་སྣང་ཐམས་ཅད་མཚན་མོའི་ནམ་མཁའ་དྲི་མ་མེད་པ་ལ་ཟླ་བའི་འོད་ཟེར་གྱིས་ཁྱབ་པ་ལྟ་བུའི་དཀར་ལམ་
གྱི་སྣང་བ་འབྱུང་། དེ་ནས་སྣང་བ་དེ་ཡང་རིམ་གྱིས་བསྡུས་ནས། སྣང་བ་གཞན་གང་ཡང་མི་འཆར་བར་ཡུལ་དུ་གང་སྣང་ཐམས་ཅད་མཚན་མོའི་ནམ་མཁའ་དྲི་མ་མེད་པ་ལ་ཉི་མའི་འོད་ཟེར་གྱིས་ཁྱབ་པ་ལྟ་བུའི་དམར་ལམ་གྱི་སྣང་བ་འབྱུང་། དེ་ནས་སྣང་
བ་དེ་ཡང་རིམ་གྱིས་བསྡུས་ནས། སྣང་བ་གཞན་གང་ཡང་མི་འཆར་བར་ཡུལ་དུ་གང་སྣང་ཐམས་ཅད་མཚན་མོ་སྲོད་ཀྱི་ནམ་མཁའ་དྲི་མ་མེད་པ་ལ་མཚམས་ཀྱི་སྨག་གིས་ཁྱབ་པ་ལྟ་བུའི་ནག་ལམ་གྱི་སྣང་བ་འབྱུང་། དེའི་སྟོད་སྨད་ལ་དྲན་པ་མི་ཉམས་
6-16-28a


ཤིང་། བར་དུ་རླུང་ཐིམ་པའི་མཐུས་དྲན་པ་ཆེས་ཉམས་པ་འབྱུང་ངོ་། །དེ་ནས་སྣང་བ་དེ་ཡང་རིམ་གྱིས་བསྡུས་ནས་མཚན་མོ་ཐོ་རངས་ཀྱི་ནམ་མཁའ་ཟླ་ཉིའི་སྨག་གི་འོད་དང་བྲལ་བའི་ནམ་མཁའི་རང་མདོག་ཇི་ལྟ་བ་བཞིན་དུ་འོད་
གསལ་མཐའ་དབུས་མེད་པ་ཤིན་ཏུ་དྭངས་པའི་ཉམས་འཆར་རོ། །དེ་དག་གི་བཤད་པ་རྣམས་ཀྱི་སྔ་མ་རྣམས་ལའང་ཤེས་པར་བྱའོ། །དེ་ནི་སྒོ་གསུམ་པའོ། །གཉིས་པ་གཉིད་ཀྱི་དུས་ཆོས་སྐུ་དང་བསྲེ་བའི་ཚུལ་ནི། 
གོང་གི་སྒོ་གསུམ་པོ་གང་རུང་ཞིག་གིས་སྟོང་པ་བཞི་དྲང་ནུས་པའི་མཚམས་ནས། མཚན་མོ་གཉིད་དུ་འགྲོ་ཁར་སྙིང་གར་མི་ཤིགས་པའི་ཐིག་ལེ་བསྒོམ་པ་དང་། རྡོ་རྗེ་བཟླས་པ་གཉིས་པོ་གང་རུང་ཉམས་སུ་བླངས་པ་ལ་བརྟེན་ནས་སྔར་བཤད་པའི་
རྟགས་བཞི་དང་སྟོང་པ་བཞི་འཆར་ཞིང་། དེའི་མཐར་འོད་གསལ་ཤར་བའི་དུས་སུ་ལྟ་ཐོག་ཏུ་བཞག་ནས་བསྒོམ་པ་ཡིན་ཏེ། སྤྱིར་གཞི་དུས་ལ་གཉིད་དུ་འགྲོ་བའི་དུས་སུ་རླུང་སྙིང་གར་རང་ཤུགས་ཀྱིས་འདུས་པ་ལ་བརྟེན་ནས། སྟོང་པ་བཞི་འོད་
གསལ་སྤྱི་ཙམ་པ་ཞིག་འཆར་བ་ཡོད་ལ། དེ་ཤེས་ནས་གཉིད་ཀྱི་འོད་གསལ་འཛིན་པའི་མན་ངག་ཉམས་སུ་བླངས་ན། སྟོང་པ་བཞི་འཆར་བའི་གནད་ཡོད། དེ་ཡང་གཉིད་ཀྱི་དུས་སུ་རྨི་ལམ་མི་འཆར་བ་དང་། ཤར་བའི་དུས་གཉིས་ལས། རྨི་ལམ་
མི་འཆར་བའི་དུས་སུ་གཉིད་ཀྱི་འོད་གསལ་འཛིན་པ་ཡིན་ལ། དེ་གཉིད་དུ་སོང་བའི་ཐུན་སྟོད་ཀྱི་སྐབས་ཡིན་ནོ། །གསུམ་པ་ནི། འཆི་བའི་དུས་སུ་འཆར་བའི་འོད་གསལ་ཆོས་སྐུ་དང་བསྲེ་བའི་ཚུལ་ནི། དེ་ལྟར་གྱི་དུས་སུ་གཉིད་སད་དུས་དང་
6-16-28b


གཉིད་ཀྱི་དུས་སུ་སྔར་བཤད་པ་བཞིན་དུ་འོད་གསལ་ཆོས་སྐུ་དང་བསྲེ་བ་ཞིག་གིས་འཆི་བའི་དུས་སུ་ས་ཆུ་ལ་ཐིམ་པ་སོགས་ཀྱི་རྟགས་དང་པོ་ཤར་བའི་དུས་སུ་སྙིང་གར་མི་ཤིགས་པའི་ཐིག་ལེ་བསྒོམ་པ་དང་། སྙིང་གའི་དྷཱུ་ཏཱིའི་དབུས་ནས་རླུང་ལྡང་འཇུག་
གནས་གསུམ་གྱི་རྡོ་རྗེའི་བཟླས་པ་བྱས་ན། གཞི་དུས་ཀྱི་འཆི་བའི་དུས་སུ་སྙིང་གར་རླུང་རང་ཤུགས་ཀྱིས་འདུ་བ་ཡོད་པའི་གནད་ཀྱིས་སྔར་བཤད་པའི་རྟགས་རྣམས་དང་། སྟོང་པ་བཞི་སྔར་བཤད་པ་བཞིན་དུ་འཆར་ལ། དེ་ལ་འཆི་བའི་ཚེ་སྟོང་པ་བཞི་
རང་ཤུགས་ཀྱིས་འཆར་བའི་འོད་གསལ་ནི་མའི་འོད་གསལ་ཡིན་ལ། སྔར་གཉིད་སད་པ་དང་། གཉིད་དུས་སུ་བསྒོམས་པའི་འོད་གསལ་ནི་བུའི་འོད་གསལ་ཡིན་ཅིང་། དེ་གཉིས་ལས་འཆི་བའི་འོད་གསལ་གྱི་དུས་སུ་འདྲེས་པ་ལ་འོད་གསལ་མ་བུ་
འདྲེས་ཞེས་ཟེར་བ་ཡིན་ནོ། །གཉིས་པ་ལམ་དུས་ཀྱི་ལོངས་སྐུ་དང་བསྲེ་བ་ལ་གསུམ་སྟེ། གཉིད་སད་དུས་ཀྱི་སྒྱུ་མའི་ལོངས་སྐུ་དང་བསྲེ་བ། གཉིད་ཀྱི་དུས་སུ་རྨི་ལམ་ཤར་བའི་རྨི་ལམ་གྱི་སྒྱུ་ལུས་ལོངས་སྐུ་དང་བསྲེ་བ། འཆི་བ་འོད་གསལ་གྱི་མཐར་
བར་དོ་དངོས་སམ་བར་དོ་རྗེས་མཐུན་པའི་སྒྱུ་ལུས་ལོངས་སྐུ་དང་བསྲེ་བའོ། །དང་པོ་ནི། སྔར་བཤད་པའི་སྒོ་གང་རུང་ཞིག་གི་འོད་གསལ་གྱི་ཏིང་ངེ་འཛིན་སྐྱེས་པའི་རྗེས་ལ་འབད་པ་བསྐྱེད་ནས་འོད་གསལ་ལ་ཇི་ཙམ་གནས་སུ་མཉམ་པར་འཇོག །སྔར་
རླུང་ཐིམ་པ་སླར་ལངས་པའི་མཐུས་ཏིང་ངེ་འཛིན་དེ་ལས་ལྡང་བར་རྩོམ་པའི་ཚེ། དེའི་མཐར་དང་པོའི་མགོན་པོ་ཡབ་ཡུམ་གྱི་སྐུར་ལྡང་བར་བྱའོ་སྙམ་པའི་འཕེན་པ་བཏང་ནས་ཆུ་དྲངས་པ་ལས་ཉ་ལྡང་བའི་ཚུལ་དུ་འོད་གསལ་གྱི་ངང་ལས་སྐུ་དེར་དཀྲོང་
6-16-29a


གིས་ལངས་ཏེ། སྒྱུ་མའི་སྐུ་དེ་ལ་སེམས་བཟུང་ཇི་ཙམ་གནས་ཀྱི་བར་མཉམ་པར་འཇོག་པའོ། །གཉིས་པ་གཉིད་ཀྱི་དུས་སུ་རྨི་ལམ་ཤར་བའི་ཚེ་རྨི་ལམ་གྱི་སྒྱུ་ལུས་དང་བསྲེ་བ་ནི་སྔར་བཤད་པ་ལྟར་གྱི་གཉིད་ཀྱི་འོད་
གསལ་ཤར་བའི་ཚེ། འབད་ནས་ཇི་ཙམ་གནས་སུ་མཉམ་པར་བཞག །སྔར་རླུང་ཐིམ་པ་ལས་ལངས་པའི་མཐུས་ཏིང་ངེ་འཛིན་དེ་ལས་ལྡང་བར་རྩོམ་པའི་ཚེ། དེའི་ཚེ་རྨི་ལམ་ཕལ་པ་གཞན་དུ་མ་ཤོར་བར་དང་པོའི་མགོན་པོ་ཡབ་ཡུམ་གྱི་སྐུར་ལྡང་བར་
བྱའོ་སྙམ་པའི་འཕེན་པ་བཏང་ནས། ཆུ་དྭངས་པ་ལས་ཉ་ལྡང་བའི་ཚུལ་དུ་འོད་གསལ་གྱི་ངང་ལས་སྐུ་དེར་དཀྲོང་གིས་ལངས་ཏེ། སྒྱུ་མའི་སྐུ་དེ་ལ་སེམས་གཟུང་ལ་ཇི་སྲིད་གནས་ཀྱི་བར་ལ་མཉམ་པར་འཇོག་པའོ། །གསུམ་པ་འཆི་བ་འོད་གསལ་གྱི་མཐར་
བར་དོ་དངོས་སམ་བར་དོ་རྗེས་མཐུན་པའི་སྒྱུ་ལུས་ལོངས་སྐུ་དང་བསྲེ་བ་ནི། སྔར་བཤད་པ་ལྟར་གྱི་འཆི་བའི་དུས་སུ་འོད་གསལ་མ་བུ་བསྲེས་ནས་འབད་དེ་འོད་གསལ་ལ་ཇི་ཙམ་གནས་ཀྱི་བར་ལ་མཉམ་པར་འཇོག་པའོ། །སྔར་རླུང་ཐིམ་པ་སླར་ལངས་པའི་
མཐུས་ཏིང་ངེ་འཛིན་དེ་ལས་ལྡང་བར་རྩོམ་པའི་ཚེ། དེའི་མཐར་བར་དོ་ཕལ་པའི་ལུས་སུ་མི་ལྡང་བར་དང་པོའི་མགོན་པོ་ཡབ་ཡུམ་གྱི་སྐུར་ལྡང་བར་བྱའོ་སྙམ་དུ་འཕེན་པ་བཏང་ནས། ཆུ་དྭངས་པ་ལས་ཉ་ལྡང་བའི་ཚུལ་དུ་འོད་གསལ་གྱི་ངང་ནས་སྐུ་དེར་དཀྲོང་གིས་
ལྡང་ངོ་། །སྒྱུ་མའི་སྐུ་དེ་ལ་སེམས་གཟུང་སྟེ་ཇི་ཙམ་གནས་ཀྱི་བར་དུ་མཉམ་པར་འཇོག་པའོ། །འདི་ལ་གཉིས་ཡོད་དེ། སྒྱུ་མའི་ལོངས་སྐུ་སྒོམ་པ་ཙམ་མིན་པར་གཞན་ལ་བར་དོ་འགྲུབ་པའི་སྐབས་སུ་རང་གི་ལུས་དོན་སྟེང་ནས་སྔར་བཤད་པའི་སྒྱུ་མའི་སྐུར་
6-16-29b


བསྐྱེད་པ་ཡིན་ན། བར་དོར་མཆོག་འགྲུབ་པ་ཡིན་ནོ། །དེ་ལྟར་མ་ནུས་པར་བར་དོ་རང་དགའ་བའི་ལུས་བླངས་པ་ཡིན་ཀྱང་། ཡིད་ཀྱི་དོར་བར་དོའི་ལུས་ཐ་མལ་པའི་སྣང་བ་རེ་ཞིག་མི་འཆར་བར་དང་པོའི་མགོན་པོ་ཡབ་ཡུམ་དུ་ཤར་བའི་ལོངས་སྐུའི་བསྲེ་བ་བྱུང་ནའང་ཁྱད་
ཤིན་ཏུ་ཆེ་བ་ཡིན་ནོ། །གསུམ་པ་ལམ་དུས་ཀྱི་སྤྲུལ་སྐུ་དང་བསྲེ་བ་ལ་གསུམ་ལས་དང་པོ་གཉིད་སད་པའི་དུས་སུ་ལམ་དུས་ཀྱི་སྤྲུལ་སྐུ་དང་བསྲེ་བ་ནི། སྔར་བཤད་པ་ལྟར་གཉིད་སད་དུས་ཀྱི་འོད་གསལ་གྱི་ངང་ལས་སྒྱུ་མའི་སྐུར་རྣམ་སྨིན་གྱི་ལུས་ལས་ལོགས་སུ་བྱེ་སྟེ། 
སྒྱུ་མའི་ཏིང་ངེ་འཛིན་བསྒོམས་པའི་མཐར་རྣམ་སྨིན་གྱི་ཕུང་པོ་འདི་ལ་ཞུགས་ཏེ། རྣམ་སྨིན་གྱི་ཕུང་པོ་མི་བསྐྱོད་པར་གསལ་བའི་ཐུགས་ཀར་ཡེ་ཤེས་སེམས་དཔའི་ཚུལ་གྱིས་གནས་པའོ། །འདི་ནི་འབྲས་བུའི་ལོངས་སྐུས་མ་དག་པའི་སེམས་ཅན་གྱི་མིག་ལམ་
དུ་མ་གྱུར་པ་དེའི་མཐུས། སྒྱུ་འཕྲུལ་ཆེན་མོ་ལྟ་བུའི་མངལ་དུ་ལུས་རགས་པའི་སྐྱེ་བ་བཟུང་ནས་སྤྲུལ་བའི་སྐུ་དེ་སེམས་ཅན་མ་དག་པས་ཀྱང་མཐོང་བ་དང་འདྲ་བར་ལམ་དུས་ཀྱི་སྒྱུ་མའི་ལོངས་སྐུ་སེམས་ཅན་གཞན་གྱི་ཤའི་མིག་གིས་མི་མཐོང་བ་དེ་རགས་པའི་
ལུས་སུ་ཞུགས་ནས། དེས་བཟུང་བའི་མི་བསྐྱོད་པར་སྣང་བའི་རགས་པའི་ལུས་ཤའི་མིག་གི་ཡུལ་དུ་གྱུར་པ་ལ་སྤྲུལ་སྐུ་ཞེས་ཐ་སྙད་དུ་བཏགས་པ་དང་། ཡང་སྒྱུ་མའི་ལོངས་སྐུ་དེས་རགས་པའི་སྐུ་སེམས་ཅན་གཞན་གྱི་ཤའི་མིག་གིས་མཐོང་བར་
སྤྲུལ་པ་ལ་སྤྲུལ་སྐུ་ཞེས་ཐ་སྙད་བྱེད་པའོ། །གཉིས་པ་གཉིད་དུ་སོང་བའི་རྨི་ལམ་འཆར་བའི་འདུས་སུ་རྨི་ལམ་སྤྲུལ་སྐུ་དང་བསྲེ་བའི་ཚུལ་ནི། སྔར་བཤད་པ་བཞིན་གཉིད་ཀྱི་འོད་གསལ་གྱི་ངང་ནས་ལོངས་སྐུར་ལངས་ཏེ། སྒྱུ་མ་ལྟ་བུའི་ཏིང་ངེ་འཛིན་
6-16-30a


བསྒོམས་པའི་མཐར་སྔར་གྱི་རྣམ་སྨིན་གྱི་ལུས་ལ་ཞུགས་ཏེ་སྙིང་གར་ཡེ་ཤེས་སེམས་དཔའི་ཚུལ་གྱིས་གནས་པ་དང་། ལོངས་སྐུ་དེ་རགས་པའི་སྤྲུལ་སྐུར་སྤྲུལ་པ་ནི་སྤྲུལ་སྐུ་དང་བསྲེ་བ་ཞེས་བྱ་བ་དེའི་གོ་དོན་སྔར་བཤད་པ་ལྟར་རོ། །
གསུམ་པ་འཆི་བ་འོད་གསལ་གྱི་མཐར་སྤྲུལ་སྐུ་དང་བསྲེ་བའི་ཚུལ་ནི། འཆི་བའི་འོད་གསལ་སྔར་ལྟར་བསྒོམས་པ་ཞིག་གིས་འཆི་བའི་འོད་གསལ་གྱི་མཐར་ལོངས་སྐུར་ལངས། སྒྱུ་མ་ལྟ་བུའི་ཏིང་ངེ་འཛིན་བསྒོམས་པའི་རྗེས་སུ་གང་འདོད་པའི་སྐྱེ་གནས་ཁྱད་
པར་ཅན་དུ་སྐྱེ་བའི་འཕེན་པ་བཏང་ནས། སྐྱེ་གནས་གང་ཡིན་པ་དེར་བར་དོར་ཤི་བའི་སྟོང་པ་བཞི་སྔར་བསྒོམས་པའི་ལམ་དང་བསྲེས་ནས་སྐྱེ་བ་ལེན་པ་ལ་སྤྲུལ་སྐུ་དང་བསྲེ་བ་ཞེས་བྱ་སྟེ། དེའི་དོན་ཡང་གོང་ལྟར་རོ། །དེ་ལྟར་སྔར་བཤད་པ་ལྟར་གྱི་རླུང་གི་ནུས་
པ་ཐོབ་ན་ཤིན་ཏུ་ལེགས་པས་དེ་ལྟར་བྱ་ལ། དེ་ལྟ་བུ་མ་ཐོབ་ནའང་དེ་ལྟར་གྱི་དུས་སུ་འཆི་བའི་དུས་ཀྱི་རྟགས་བཞི་དང་སྟོང་པ་བཞི་འཆར་བ་རྣམས་ཡིད་ལ་དྲན་པ་བྱ་སྟེ། ཡང་ཡང་བསྒོམ་པར་བྱ་ཞིང་། འོད་གསལ་གྱི་མཐར་བར་དོ་འགྲུབ་པའི་དུས་སུ་བར་དོ་
ལོངས་སྐུར་ལྡང་བ་སོགས་ཡང་དང་ཡང་དུ་བསྒོམ་པར་བྱ་ཞིང་། ད་གཟོད་འཆི་བའི་དུས་ཀྱི་ཚེ་རྟགས་བཞི་དང་། སྟོང་པ་བཞི་འཆར་བ་རྣམས་ངོས་ཟིན་པ་ལ་སོགས་པ་ཁྱད་པར་ཤིན་ཏུ་ཆེ་བར་མངོན་ནོ། །འདི་ནི་བསྲེ་བའི་མན་ངག་གི་གནད་བསྡུས་པའི་
ཡིག་ཆུང་མཁས་གྲུབ་རྗེས་ཟིན་བྲིས་མཛད་པའོ། །གཉིས་པ་ནི། རྗེ་བཙུན་བླ་མ་རྣམས་ལ་ཕྱག་འཚལ་ལོ། །འདིར་བསྲེ་བ་དགུའི་གདམས་པ་སྟོན་པར་བྱེད་པ་ལ་དོན་གསུམ་སྟེ། སང་དུས་སུ་སྐུ་གསུམ་དང་བསྲེ་བ།
6-16-30b


གཉིད་དུས་སུ་སྐུ་གསུམ་དང་བསྲེ་བ། འཆི་དུས་སུ་སྐུ་གསུམ་དང་བསྲེ་བའོ། །དང་པོ་ལ་གསུམ། སད་དུས་ཀྱི་འོད་གསལ་ཆོས་སྐུ་དང་བསྲེ་བ། སད་དུས་ཀྱི་སྒྱུ་ལུས་ལོངས་སྐུ་དང་བསྲེ་བ། སད་དུས་ཀྱི་ལོངས་སྐུ་ལས་ལངས་པ་སྤྲུལ་སྐུ་དང་བསྲེ་བའོ། །དང་
པོ་ནི། རྡོ་རྗེའི་ལུས་ལ་གནད་དུ་བསྣུན་པ་ལ་བརྟེན་ནས། རླུང་སྙིང་གའི་དྷཱུ་ཏཱིར་ཞུགས་གནས་ཐིམ་གསུམ་བྱས་པ་ལས། སྨིག་རྒྱུ་དང་དུ་བ་ལ་སོགས་པའི་རྟགས་རྣམས་འཆར་ཞིང་། དེའི་རྗེས་སུ་སྣང་བ་མཆེད་པ་ཉེར་ཐོབ་འོད་གསལ་རྣམས་འཆར་ལ། 
དེ་རྣམས་ཀྱི་དུས་སུ་ལྟ་བ་དྲན་པར་བྱེད་ཅིང་། ཁྱད་པར་འོད་གསལ་གྱི་དུས་སུ་བདེ་སྟོང་དབྱེར་མེད་སྦྱར་ནས་སྒོམ་པར་བྱེད་པ་ནི། སད་དུས་ཀྱི་འོད་གསལ་ཆོས་སྐུ་དང་བསྲེ་བར་བྱེད་པ་ཡིན་ནོ། །གཉིས་པ་ནི། གོང་དུ་བཤད་པ་ལྟར་གྱི་འོད་གསལ་ཆོས་སྐུ་
དང་བསྲེས་པ་དེ་ལས་ལྡང་བར་རྩོམ་པ་ན། ཤིན་ཏུ་ཕྲ་བའི་རླུང་སེམས་ལས་གྲུབ་པའི་སྒྱུ་ལུས་དེ་རྣམ་སྨིན་གྱི་ཕུང་པོ་རྙིང་པ་ལས་གོ་ས་ལོགས་སུ་བྱེ་སྟེ། གསང་འདུས་ཀྱི་སྐབས་སུ་ཡིན་ན། ལོངས་སྐུ་དང་པོའི་མགོན་པོ་འཇའ་ཚོན་ལྟ་བུའི་སྐུར་སྐད་
ཅིག་གིས་ལྡང་བ་ནི་སང་དུས་ཀྱི་སྒྱུ་མ་ལོངས་སྐུ་དང་བསྲེ་བ་ཡིན་ནོ། །གསུམ་པ་ནི། གོང་དུ་བཤད་པ་ལྟར་གྱི་སྒྱུ་མའི་སྐུ་ལས་ལྡང་བར་རྩོམ་པ་ན། རྣམ་སྨིན་གྱི་ལུས་འདི་སྤྲུལ་སྐུ་རྡོ་རྗེ་སེམས་དཔའི་སྐུར་ལྡང་བ་གོང་དུ་བཤད་པ་ལྟར་གྱི་ཤིན་ཏུ་
ཕྲ་བའི་རླུང་སེམས་ཙམ་ལས་གྲུབ་པའི་ལོངས་སྐུ་དེ་སྤྲུལ་སྐུའི་ཐུགས་ཀར་ཡེ་ཤེས་སེམས་དཔའི་ཚུལ་གྱིས་བཞུགས་པའི་སྤྲུལ་སྐུར་ལྡང་བ་ནི། སད་དུས་ཀྱི་སྤྲུལ་སྐུ་དང་བསྲེ་བ་སྟེ་དེ་ལྟར་ན་སང་དུས་ཀྱི་བསྲེ་བ་སྐོར་གསུམ་མོ། །གཉིས་པ་
6-16-31a


གཉིད་དུས་ཀྱི་བསྲེ་བ་ལ་གསུམ། གཉིད་ཀྱི་འོད་གསལ་ཆོས་སྐུ་དང་བསྲེ་བ། རྨི་ལམ་ལོངས་སྐུ་དང་བསྲེ་བ། སད་པ་སྤྲུལ་སྐུ་དང་བསྲེ་བའོ། །དང་པོ་ནི། སད་དུས་ཀྱི་སྙིང་གར་ཞུགས་གནས་ཐིམ་གསུམ་བྱེད་པ་ལ་གོམས་
པའི་གང་ཟག་གིས་གཉིད་དུ་འགྲོ་ཁར་རླུང་སྡུད་པའི་དམིགས་པ་བྱས་པས་གཉིད་དུ་འགྲོ་བའི་ཚེ་ཡན་ལག་གི་རླུང་རྣམས་རང་ཤུགས་ཀྱིས་སྙིང་གར་འདུ་བས་འདུ་ཚ་བས་གཞན་ལས་ཆེ་བ་ཞིག་འོང་ཞིང་། དེའི་སྟོབས་ཀྱིས་གཉིད་དུ་འགྲོ་བ་ན་སྣང་མཆེན་
ཐོབ་གསུམ་འོད་གསལ་དང་བཅས་པ་ཡོངས་སུ་རྫོགས་པར་འཆར་ལ། དེ་དག་གི་འོད་གསལ་གྱི་དུས་སུ་སྟོང་ཉིད་ཀྱི་ལྟ་བ་དྲན་པར་བྱས་ནས་དེའི་འོད་གསལ་ལ་ཅི་ཙམ་གནས་ཀྱི་བར་འཇོག་པ་ནི། གཉིད་ཀྱི་འོད་གསལ་ཆོས་སྐུ་དང་བསྲེ་བའོ། །གཉིས་
པ་ནི། གོང་དུ་བཤད་པ་ལྟར་གྱི་གཉིད་ཀྱི་འོད་གསལ་ལས་ལྡང་བར་རྩོམ་པ་ན་རྨི་ལམ་འཆར་བས་དེའི་དུས་སུ་རྨི་ལམ་གྱི་ལུས་དེ་རྣམ་སྨིན་གྱི་ལུས་ལས་ལོགས་སུ་བྱེ་སྟེ། ལོངས་སྐུ་དང་པོའི་མགོན་པོ་འཇའ་ཚོན་ལྟ་བུའི་སྐུར་སྐད་ཅིག་གིས་ལངས་ཏེ། 
ཇི་ཙམ་གནས་ཀྱི་བར་སྒྱུ་མ་ལྟ་བུའི་ཏིང་ངེ་འཛིན་ལ་མཉམ་པར་འཇོག་པ་ནི་རྨི་ལམ་ལོངས་སྐུ་དང་བསྲེ་བའོ། །གསུམ་པ་ནི། གོང་དུ་བཤད་པ་ལྟར་གྱི་སྒྱུ་མ་ལྟ་བུའི་ཏིང་ངེ་འཛིན་ལས་ལྡང་པར་རྩོམ་པ་ན། རྣམ་སྨིན་གྱི་ལུས་སྤྲུལ་སྐུ་རྡོ་རྗེ་སེམས་དཔའ་དང་
རྡོ་རྗེ་འཆང་གང་རུང་གི་སྐུར་བསྒོམས་ལ། དེའི་ཐུགས་ཀར་རྨི་ལམ་གྱི་ལོངས་སྐུ་དེ་ཡེ་ཤེས་སེམས་དཔའི་ཚུལ་གྱིས་བཞུགས་པར་བསྒོམས་པའི་སྤྲུལ་སྐུར་ལྡང་བ་ནི། སད་པ་སྤྲུལ་སྐུ་དང་བསྲེ་བའོ། །དེ་ལྟར་གཉིད་དུས་ཀྱི་བསྲེ་བ་སྐོར་གསུམ་མོ། །
6-16-31b


གསུམ་པ་འཆི་བའི་དུས་སུ་སྐུ་གསུམ་དང་བསྲེ་བ་ལ་གསུམ། འཆི་བའི་འོད་གསལ་ཆོས་སྐུ་དང་བསྲེ་བ། བར་དོ་ལོངས་སྐུ་དང་བསྲེ་བ། སྐྱེ་བ་སྤྲུལ་སྐུ་དང་བསྲེ་བའོ། །དང་པོ་ནི། འཛམ་བུ་གླིང་པའི་མི་ཁམས་དྲུག་ལྡན་ཞིག་རིམ་གྱིས་འཆི་བའི་ཚེ་སྙིང་གར་རང་
ཤུགས་ཀྱིས་རླུང་རྣམས་འདུ་བའི་སྟོབས་ཀྱིས་སྣང་མཆེད་ཐོབ་གསུམ་འོད་གསལ་དང་བཅས་པ་ཡོངས་སུ་རྫོགས་པར་འཆར་ཞིང་། དུས་དེར་འཆར་བའི་འོད་གསལ་ནི་མའི་འོད་གསལ་ཡིན་ལ། སྙིང་ག་ལ་སོགས་པའི་གནས་རྣམས་སུ་གནད་དུ་བསྣུན་པ་ལ་
བརྟེན་ནས་སྣང་མཆེད་ཐོབ་གསུམ་འོད་གསལ་དང་བཅས་པ་ཤར་བ་ནི་བུའི་འོད་གསལ་ཡིན་ཅིང་། འཆི་བའི་ཚེ་རླུང་སྡུད་པར་རྩོམ་པ་ན་སྙིང་གའི་སྡུད་རིམ་ལེགས་པར་བསྒོམས་ཏེ་འོད་གསལ་མ་བུ་ལེགས་པར་བསྲེ་བའི་འོད་གསལ་ཤར་བའི་ཚེ་ལྟ་ཐོག་ཏུ་
ལེགས་པར་བཞག་སྟེ། དེའི་འོད་གསལ་ཇི་ཙམ་གནས་གནས་ཀྱི་བར་དུ་མཉམ་པར་འཇོག་པ་ནི། འཆི་བའི་འོད་གསལ་ཆོས་སྐུ་དང་བསྲེ་བའོ། །གཉིས་པ་ནི། གོང་དུ་བཤད་པ་ལྟར་གྱི་འཆི་བའི་འོད་གསལ་དེ་ལས་ལངས་ནས་བར་དོ་འཆར་བར་རྩོམ་པ་
ན། བར་དོའི་ལུས་དེ་ཤིན་ཏུ་ཕྲ་བའི་རླུང་སེམས་ཙམ་ལས་གྲུབ་པའི་ལོངས་སྐུ་དང་པོའི་མགོན་པོའམ་རྡོ་རྗེ་འཆང་གང་རུང་གི་སྐུ་འཇའ་ཚོན་ལྟ་བུའི་སྐུར་ལྡང་བར་བྱའོ། །འདི་ཐ་མལ་པ་ལ་བར་དོ་རང་དགའ་བ་འོང་བའི་དོད་ལ་སྒྱུ་མའི་ལོངས་སྤྱོད་རྫོགས་
སྐུར་ལྡང་བ་ཡིན་པས། འདི་ནི་བར་དོ་ལོངས་སྐུ་དང་བསྲེ་བ་ཡིན་ནོ། །གསུམ་པ་ནི། མངལ་དུ་སྐྱེ་བ་ལེན་པར་རྩོམ་པ་ན་སྐྱེ་བ་ལེན་རྒྱུའི་རྣམ་སྨིན་གྱི་ལུས་སྤྲུལ་སྐུ་རྡོ་རྗེ་སེམས་དཔའི་སྐུར་བསྒོམས་པའི་དབུས་སུ་ཤིན་ཏུ་ཕྲ་བའི་རླུང་སེམས་
6-16-32a


ཙམ་ལས་གྲུབ་པའི་ལོངས་སྐུ་དེ་ཉིད་བཞུགས་པར་བསྒོམ་སྟེ། སྐྱེ་གནས་སུ་སྐྱེ་བ་ལེན་པ་ནི་སྐྱེ་བ་སྤྲུལ་སྐུ་དང་བསྲེ་བ་ཡིན་ཏེ། དེ་ལྟར་འཆི་བའི་དུས་ཀྱི་བསྲེ་བ་སྐོར་གསུམ་མོ། །དེ་ལྟར་བསྲེ་བ་རྣམས་ཀྱི་སྐབས་སུ་ལོངས་
སྐུ་དང་པོའི་མགོན་པོར་ལྡང་བའི་དགོས་པ་ནི། བསྐྱེད་རིམ་གྱི་སྐབས་ཀྱི་བར་དོའི་སྦྱོང་བྱེད་བར་དོ་ལོངས་སྐུར་འཁྱེར་བའི་ལམ་ཁྱེར་དང་པོའི་མགོན་པོ་ཡིན་ནོ། །བསྐྱེད་རིམ་གྱི་སྐབས་ཀྱི་སྐྱེ་བ་སྤྲུལ་སྐུར་འཁྱེར་བའི་ལམ་ཁྱེར་དང་། སྐྱེ་བ་སྦྱོང་བྱེད་
སྤྲུལ་སྐུ་རྡོར་སེམས་ཡིན་པས་སྤྲུལ་སྐུ་དང་བསྲེ་བའི་རྡོ་རྗེ་སེམས་དཔའི་སྐུར་ལྡང་དགོས་པའི་རྒྱུ་མཚན་དེ་ལྟར་ཡིན་པར་ཤེས་པར་བྱའོ། །བསྲེ་བ་སྐོར་དགུའི་གདམས་པ་འདི། །དམ་ཚིག་སྡོམ་པ་ལྡན་པ་ཡི། །སྐལ་ལྡན་སློབ་མ་མ་གཏོགས་པ། །
དེ་ལས་གཞན་དུ་ཅུང་ཟད་ཙམ། །བསྟན་ཅིང་སྦྱིན་པར་བྱ་བ་མིན། །དེ་བས་སྙིང་ལྟར་གཅེས་པར་བཟུང་། །དེ་ལྟར་བསྲེ་བ་སྐོར་དགུའི་གདམས་པའི་ཡིག་ཆུང་གསལ་བར་མཁས་གྲུབ་རྗེས་འཛད་པའོ། ། གཉིས་པ་ཤིན་ཏུ་གཅེས་
པའི་གདམས་ངག་ཟབ་མོ་ཞལ་བཞེས་རྣམས་ཞིབ་ཏུ་བཤད་པ་ལ་གཉིས། རྒྱས་པར་བཤད་པ་དང་། དེའི་དོན་བསྡུས་པའོ། །དང་པོ་ནི། རྒྱལ་བ་ཁྱབ་བདག་རྡོ་རྗེ་འཆང་ཆེན་པོ་དང་དབྱེར་མ་མཆིས་པའི་དཔལ་ལྡན་བླ་མ་དམ་པའི་ཞབས་ལ་གུས་པ་
ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་ཆེན་པོས་དུས་ཐམས་ཅད་དུ་རྗེས་སུ་བཟུང་དུ་གསོལ། རྡོ་རྗེ་འཆང་དབང་ཐུགས་ཀྱི་བང་མཛོད་ལས། །མངོན་པར་དབང་བསྐུར་དཔལ་ལྡན་བླ་མའི་ཞབས། །སྙིང་ནས་འདུད་དོ་ཐུགས་རྗེའི་
6-16-32b


ལྕགས་ཀྱུ་ཡིས། །བདག་དང་དམ་ཚིག་ལྡན་པའི་སློབ་མ་རྣམས། །འཇིགས་རུང་འཁོར་བའི་བཙོན་ར་ལས་བསྒྲལ་ནས། །བདེ་ཆེན་ཐར་པའི་གནས་སུ་དྲང་དུ་གསོལ། །འདིར་རྒྱུད་སྡེ་བླ་ན་མེད་པའི་དགོངས་པའི་གནད་མཐར་ཐུག་པ། རྡོ་རྗེ་འཆང་ཆེན་པོའི་
ཐུགས་ཀྱི་བཅུད་ཕྱུང་བ། གྲུབ་ཆེན་རྣམས་ཀྱི་ཉེ་ལམ། རྣལ་འབྱོར་པའི་བློའི་གདེང་འཆའ་ས། བསྲེ་བ་སྐོར་གསུམ་གྱི་གདམས་ངག །དཔལ་ལྡན་བླ་མ་དམ་པའི་ཞལ་གྱི་བདུད་རྩི་ཉམས་ཀྱིས་དོགས་ནས་གནད་བསྒྲིལ་ནས་བརྗོད་པར་བྱ་སྟེ། དེ་ཡང་ཚེ་
འདིའི་ལུས་འགྲུབ་པ་ན་བར་དོའི་ཤིན་ཏུ་ཕྲ་བའི་རླུང་སེམས་དེ་ཉིད་ཕ་མའི་ཁུ་ཁྲག་གི་དྭངས་མ་གཉིས་ཀྱི་དབུས་སུ་འཇུག་ཅིང་། དེ་ནས་ཁུ་ཁྲག་གི་དྭངས་མ་གཉིས་ཀྱི་དབུས་ན་ཤིན་ཏུ་ཕྲ་བའི་རླུང་སེམས་བཅུག་པ་དེ་སྙིང་གའི་དབུ་མའི་ནང་དུ་བཅུག་ནས་
སྙིང་གའི་རྩ་འཁོར་ཆགས་ཤིང་། དེ་ནས་རྩ་ཡར་མར་དུ་གྱེས་པའི་ནང་ནས་རྒྱུ་བའི་རླུང་རགས་པ་རྣམས་དང་། དེ་ལ་ཞོན་པའི་རང་བཞིན་བརྒྱད་ཅུའི་རྟོག་པ་རགས་པ་རྣམས་སྐྱེ་ལ། དེའི་ཚེ་ཤིན་ཏུ་ཕྲ་བའི་རླུང་སེམས་ཀྱིས་བྱ་བ་མི་བྱེད་ཅིང་། འཆི་བའི་
ཚེ་སའི་ཁམས་ཐིམ་པ་ན་སྨིག་རྒྱུ་ལྟ་བུའི་སྣང་བ་འཆར། དེའི་རྗེས་སུ་ཆུའི་ཁམས་ཐིམ་པ་ན་དུ་བ་ལྟ་བུའི་སྣང་བ་འཆར། དེའི་རྗེས་སུ་མེའི་ཁམས་ཐིམ་པ་ན་སྲིན་བུ་མེ་ཁྱེར་ལྟ་བུའི་སྣང་བ་འཆར། དེའི་རྗེས་སུ་རླུང་རགས་པ་ཐིམ་འགྲོ་བ་ན་མར་མེ་
འབར་བ་ལྟ་བུའི་སྣང་བ་འཆར། དེའི་རྗེས་སུ་རང་བཞིན་གྱི་རྟོག་པའི་བཞོན་པར་གྱུར་པའི་རླུང་རགས་པ་འདི་དབུ་མའི་ནང་དུ་ཐིམ་པ་ན། ཁ་དང་སྣ་བུག་ནས་རྒྱུ་བ་འགགས་འགྲོ་ཞིང་། ཕྱི་དབུགས་ཆད་པ་ཞེས་ཟེར། དེའི་ཚེ་མིག་གིས་གཟུགས་མི་
6-16-33a


མཐོང་། རྣ་བས་སྒྲ་མི་ཐོས། སྣས་དྲི་མི་ཚོར། ལྕེས་རོ་མི་མྱོང་། ལུས་ཀྱིས་རེག་བྱ་མི་ཚོར་ཞིང་། ཡིད་ངོར་སྟོན་གྱི་ནམ་མཁའ་གཡའ་དག་པ་ལྟ་བུའི་སྟོང་སང་ལ་ཟླ་འོད་ཀྱིས་ཁྱབ་པ་ལྟ་བུའི་དཀར་ལམ་གྱི་སྣང་བ་འཆར། དེ་
ལ་སྣང་བ་ཞེས་ཟེར། དེའི་རྗེས་སུ་སྟོན་གྱི་ནམ་མཁའ་གཡའ་དག་པ་ལྟ་བུའི་སྟོང་སང་ལ། ཉི་མའི་འོད་ཀྱིས་ཁྱབ་པ་ལྟ་བུའི་དམར་ལམ་གྱི་སྣང་བ་འཆར། དེ་ལ་མཆེད་པ་ཞེས་ཟེར། དེའི་རྗེས་སུ་སྟོན་གྱི་ནམ་མཁའ་གཡའ་དག་པ་ལྟ་བུའི་སྟོང་སང་ལ། 
མཚམས་ཀྱི་མུན་པས་ཁྱབ་པ་ལྟ་བུའི་ནག་ལམ་གྱི་སྣང་བ་འཆར་བ་དེ་ཉིད་ཉེར་ཐོབ་ཀྱི་སྟོད་ཡིན། དེ་ནས་བརྒྱལ་བ་ལྟ་བུའི་དྲན་མེད་དུ་སོང་བ་དེ་ཉིད་ཉེར་ཐོབ་ཀྱི་སྨད་ཡིན། སྣང་བ་མཆེད་པ་ཉེར་ཐོབ་གསུམ་གའི་སྐབས་སུ་རྟོག་པ་གཞན་ཕྱི་རོལ་
གྱི་ཡུལ་གང་ལ་ཡང་མི་འཕྲོ་བ་ཞིག་འོང་། དེའི་རྗེས་སུ་བརྒྱལ་བ་ལྟ་བུའི་ངང་ནས་དྲན་པ་རྙེད་པ་ན། སྟོན་གྱི་ནམ་མཁའ་གཡའ་དག་པ་ལྟ་བུའི་སྟོང་སང་འབའ་ཞིག་མ་གཏོགས་གཞན་གང་གིའང་སྣང་བ་ནུབ་པ་ཞིག་འོང་བ་དེ་ལ་འཆི་བ་འོད་
གསལ་ཞེས་ཟེར། དེ་ལ་ཐ་མལ་བའི་མི་རྣམས་ཞག་གསུམ་གྱི་བར་དུ་གནས་དེ་ནས་རྟགས་འོང་། ལུས་ནད་ཀྱིས་ལེགས་པར་མནར་ནས་ཟུངས་ཟད་དྲགས་པ་ལ་ཞག་དུ་མ་སོང་ཡང་དྲི་མ་འོང་བ་མ་གཏོགས་ཁམས་དཀར་དམར་གྱི་རྟགས་
མི་ཡོང་བ་ཡང་སྲིད། རྣལ་འབྱོར་པས་འོད་གསལ་ལ་ཇི་ཙམ་འཇོག་ནུས་ཀྱི་བར་དུ་ཆོས་སྐུ་དང་བསྲེས་ནས་འཇོག་པ་ལ། རྟོགས་པ་མཐོ་དམའི་དབང་གིས་འཇོག་པའི་ཞག་གྲངས་མང་ཉུང་སྣ་ཚོགས་འབྱུང་། དེ་ནས་ཐ་མལ་པ་འཆི་བ་འོད་
6-16-33b


གསལ་གྱི་སྟོང་སང་ལ་གནས་པ་དེ་ལས། སེམས་ཅུང་ཟད་གཡོ་བར་རྩོམ་པ་ན་ཤིན་ཏུ་ཕྲ་བའི་རླུང་སེམས་དེ་ཉིད་སྙིང་གའི་ཁམས་དཀར་དམར་གྱི་དབུས་ནས་ཐོན་ནས་ལུས་འདི་བོར་ཏེ། བར་དོའི་ལུས་སུ་གྲུབ་པ་ཡིན། དེ་དང་དུས་མཉམ་དུ་སྙིང་གའི་
ཁམས་དཀར་པོ་ཐུར་དུ་བབས་ནས་རྟགས་ཀྱི་རྩེར་ཕྱིར་འབྱུང་། ཁམས་དམར་པོ་གྱེན་དུ་སོང་ནས་སྟེང་གི་སྣ་སྒོ་ནས་ཕྱིར་འབྱུང་། དེའི་ཚེ་ཤིན་ཏུ་ཕྲ་བའི་རླུང་སེམས་དེ་བར་དོའི་ལུས་སུ་གྲུབ་པ་དང་། དུས་མཉམ་དུ་དང་པོ་ཉེར་ཐོབ་ཀྱི་སྣང་བ་ནག་ལམ་པ་དེ་
འཆར། དེའི་རྗེས་སུ་མཆེད་པའི་སྣང་བ་དམར་ལམ་པ་དེ་འཆར། དེའི་རྗེས་སུ་སྣང་བ་དཀར་ལམ་པ་དེ་འཆར། དེའི་རྗེས་སུ་རྟོག་པ་རགས་པ་གཡོས་ནས་བར་དོའི་གནས་སྐབས་ཀྱི་ཡུལ་སྣ་ཚོགས་ཀྱི་སྣང་བ་ཤར་ནས་ཡིད་དུ་འོང་མི་འོང་གི་ཆགས་སྡང་
གི་རྟོག་པ་སྣ་ཚོགས་འབྱུང་། དེ་ནས་དྲི་དང་སྐྱེ་གནས་འཚོལ་བ་ལ་རྒྱུག་ཅིང་། དེའི་ཚེ་ཕ་མ་ཉལ་པོ་བྱེད་པ་མཐོང་ནས། ཕོར་སྐྱེ་བ་ཡིན་ན་མ་ལ་ཆགས་པའི་དབང་གིས་འཁྱུད་པའི་སྣང་བ་འབྱུང་། མོར་སྐྱེ་བ་ཡིན་ན་ཕ་ལ་ཆགས་པའི་དབང་གིས་
འཁྱུད་པའི་སྣང་བ་འབྱུང་ཞིང་། འཁྱུད་པ་ན་ལས་ཀྱི་དབང་གིས་ཕ་མའི་ལུས་མི་མངོན་པར་མཚན་མ་ཙམ་ཞིག་མཐོང་ལ། དེ་ལ་ཞེ་སྡང་སྐྱེས་པས་འཆི་རྐྱེན་བྱས་ནས་བར་དོ་ཤི་བའི་སྣང་མཆེད་ཐོབ་གསུམ་འོད་གསལ་དང་བཅས་པ་སྔར་ལུས་རགས་
པ་འདི་འདོར་བའི་སྐབས་སུ་འབྱུང་ཚུལ་བཤད་པ་རྣམས་དང་འདྲ་བ་ལ་དེ་ལས་ཡུན་ཐུང་བ་རེ་འཆར། བར་དོ་ཤི་བའི་འོད་གསལ་དེ་ལས་སེམས་གཞན་དུ་འཕྲོ་བ་དང་དུས་མཉམ་དུ་ཤིན་ཏུ་ཕྲ་བའི་རླུང་སེམས་དེ་ཕ་མའི་ཁུ་ཁྲག་གི་དྭངས་མ་གཉིས་
6-16-34a


ཀྱི་དབུས་སུ་ཞུགས་པའི་ཚེ་ཡིད་དོར་ཉེར་ཐོབ་ཀྱི་སྣང་བ་འཆར། དེ་ནས་སེམས་ཅུང་ཟད་རགས་སུ་སོང་ནས་མཆེད་པའི་སྣང་བ་འཆར། དེ་ནས་སེམས་ཅུང་ཟད་རགས་སུ་སོང་ནས་སྣང་བའི་སྐབས་ཀྱི་དཀར་ལམ་འཆར། དེ་ནས་
ཁུ་ཁྲག་ཕལ་པ་རྣམས་ལས་རྩ་ཁམས་རྣམས་འགྲུབ་པ་དང་། རང་བཞིན་བརྒྱད་ཅུའི་རྟོག་པ་སྐྱེ་ཚུལ་སྔར་བཤད་པ་ལྟར་ཡིན་ནོ། །དེ་ལྟར་གཞི་དུས་ཀྱི་སྣང་མཆེད་ཐོབ་གསུམ་འོད་གསལ་དང་བཅས་པ་འབྱུང་ཚུལ་དང་། བར་དོ་འགྲུབ་ཚུལ། སྐྱེ་བ་
ལེན་ཚུལ་རྣམས་ལེགས་པར་མ་གོ་ན་བསྲེ་བའི་གཞི་གཏོར་བས་ཅུང་ཟད་ཅིག་ཞིབ་པར་བརྗོད་དོ། །ལམ་དུས་ཀྱི་སྣང་མཆེད་ཐོབ་གསུམ་འོད་གསལ་དང་བཅས་པ་འབྱུང་ཚུལ་ནི། འདིར་རྫོགས་རིམ་གྱི་དམིགས་པ་ཕལ་ཆེར་རླུང་དབུ་མར་ཞུགས་
གནས་ཐིམ་གསུམ་བྱས་པ་ལ་བརྟེན་ནས་སྣང་མཆེད་ཐོབ་གསུམ་འོད་གསལ་དང་བཅས་པ་བསྐྱེད་པ་དང་། དེ་ལ་བརྟེན་ནས་སྒྱུ་ལུས་དང་། སྐབས་གཞན་དུ་སྟོང་གཟུགས་ཀྱི་སྐུ་བསྒྲུབ་པའི་ཕྱིར་ཡིན་ལ། རླུང་དབུ་མར་འཇུག་པའི་ཐབས་ལ་ཕྱིའི་
རྐྱེན་ལས་ཀྱི་ཕྱག་རྒྱ་ལ་བརྟེན་ནས་འཇུག་པ་དང་། ནང་གི་རྐྱེན་རང་གི་ལུས་ལ་དམིགས་པའི་གནད་དུ་བསྣུན་པ་ལས་འཇུག་པའི་ཐབས་གཉིས་ལས། ལས་ཀྱི་ཕྱག་རྒྱ་ལ་བརྟེན་ནས་འཇུག་པའི་ཚུལ་ལ་ཕྱག་རྒྱའི་མཚན་ཉིད་བརྟག་ཐབས། དེ་འཁོར་
བ་ལ་ཞེན་པ་ལོག་ནས་ཐར་པ་ཐོབ་འདོད་ཀྱི་བློ་བཅོས་མ་མ་ཡིན་པ་བསྐྱེད་དེ། བྱམས་སྙིང་རྗེ་བྱང་ཆུབ་ཀྱི་སེམས་བསྐྱེད། དབང་བསྐུར་དམ་ཚིག་དང་ལྡན་པ་ལ་གདམས་ངག་གི་གནད་རྣམས་ལེགས་པར་བསླབས་ནས། བསྟེན་པའི་ཐབས་
6-16-34b


སྲོག་རྩོལ་དུ་འགྱུར་བའི་གདམས་ངག་གི་གནད་རྣམས་ལེགས་པར་ཤེས་ན་ལམ་བགྲོད་པའི་ཐབས་མཆོག་ཏུ་གྱུར་པ་ཡིན་ཀྱང་། གནད་ཅུང་ཟད་འཕྱུགས་ཤིང་། ཡན་ལག་མ་ཚང་ན་ཐར་མེད་ཀྱི་དམྱལ་བར་འཕེན་པས། གདམས་ངག་གི་གནད་ཡིག་
ཆུང་ལོགས་སུ་བཀོད་པ་ལས་ཤེས་དགོས་སོ། །རང་གི་ལུས་ལ་དམིགས་པའི་གནད་དུ་བསྣུན་པ་ལ་བརྟེན་ནས་རླུང་དབུ་མར་འཇུག་པའི་ཐབས་ལ། རྨི་ལམ་རྨི་ལམ་དུ་ངོ་ཤེས་པའི་མན་ངག་གིས་རླུང་དབུ་མར་བཅུག་ནས་འོད་གསལ་འཛིན་པའི་ཐབས་རྗེ་
ཉིད་ཀྱི་ཁྲིད་ཡིག་ཏུ་གསལ་བར་བཀོད་པའི་སྙིང་གའི་སྔགས་འཁོར་གསུམ་གསལ་བཏབ་ནས་སྡུད་རིམ་བསྒོམ་པ་དང་། རིལ་འཛིན་དང་རྗེས་གཞིག་གི་བསམ་གཏན་སྒོམ་ཚུལ་ཙམ་མིན་པའི་བཙན་ཐབས་སུ་རླུང་སེམས་དབུ་མར་སྡུད་པའི་མན་ངག་ཚོགས་
ཆུང་ལ་འགྲུབ་སླ་བའི་ཞལ་ཤེས་གཞན་ཡང་ཡོད་དོ། །ཉིན་པར་དམིགས་པས་གནད་དུ་བསྣུན་ནས་རླུང་དབུ་མར་འཇུག་ཐབས་རྒྱས་པར་རྗེ་ཉིད་ཀྱི་ཁྲིད་ཡིག་རྣམས་ནས་གསལ་བ་ལྟར་རྩ་དབུ་མའི་ཡར་སྣ་མར་སྣ་གཉིས་གཉིས་དང་། དབུ་མ་ལ་རོ་རྐྱང་གི་
མདུད་པས་བསྡམས་པའི་མཚམས་ནས་རྩ་འདབ་གྱེས་པའི་རྩ་འཁོར་གཙོ་བོ་དྲུག་སྟེ། དེ་ཡང་སྤྱི་བོ། མགྲིན་པ། སྙིང་ག །ལྟེ་བ། གསང་གནས། ནོར་བུའི་དབུས་ཀྱི་རྩ་འཁོར་རྣམས་སོ། །དེ་དག་གི་ལྟེ་བ་རྣམས་སུ་དམིགས་པ་ལེགས་པར་གཏད་པས་སེམས་ལེགས་པར་
ཟིན་པ་ན། རླུང་སེམས་འཇུག་པ་གཅིག་པས་དོར་རླུང་འདུས་ནས་ཐིམ་པ་ལ་བརྟེན་ནས། སྨིག་རྒྱུ། དུ་བ། མཁའ་སྣང་། མེ་ཁྱེར། མར་མེ་འབར་བ། སྣང་མཆེད་ཐོབ་གསུམ་འོད་གསལ་དང་བཅས་པ་སྔར་འཆི་
6-16-35a


དུས་སུ་འབྱུང་བར་བཤད་པ་རྣམས་དང་། གསལ་མི་གསལ་སོགས་ཇི་ལྟ་བ་བཞིན་འདྲ་བ་དང་པོ་ཉིད་ནས་མི་འབྱུང་ཡང་དེ་རྣམས་འཆི་དུས་ཀྱི་དེ་རྣམས་དང་རྣམ་པ་འདྲ་བ་ཙམ་དང་། སྨིག་རྒྱུ་ནས་འོད་གསལ་གྱི་བར་གོ་རིམས་
འདྲ་བ་འབྱུང་ལ། རླུང་དབུ་མར་འཇུག་པ་ཡང་ཡང་བསྒོམས་པས་རླུང་དབུ་མར་འདུ་བ་དང་། ཐིམ་པ་ཕུལ་ཇེ་ཆེར་སོང་བ་ཙམ་གྱིས་རྟོག་པ་རགས་པ་འགགས་པའང་ཕུལ་ཇེ་ཆེར་སོང་ནས་རྫོགས་རིམ་གྱི་རྟོགས་པ་མཐོན་པོར་སོང་བའི་ཚེ། སྙིང་གའི་རྩ་མདུད་
མ་ལུས་པ་གྲོལ་བའི་མཚམས་ནས། ཕྱག་རྒྱ་ལ་བརྟེན་པ་དང་། བསམ་གཏན་གཉིས་བསྒོམས་པས། སྣང་བ། མཆེད་པ། ཉེར་ཐོབ། འོད་གསལ་རྣམས་སྔར་བཤད་པའི་འཆི་དུས་ཀྱི་ཇི་ལྟ་བ་བཞིན་འབྱུང་ལ། དེ་ཙམ་ནས་ལས་ཀྱི་ཕྱག་རྒྱ་ལ་མ་
བརྟེན་ན་ཚེ་འདིར་འཆི་དུས་ཀྱི་འོད་གསལ་དང་རྣམ་པ་ཇི་ལྟ་བ་བཞིན་མཚུངས་པ་མི་འབྱུང་ངོ་། །རླུང་དབུ་མར་ཐིམ་པའི་སྣང་མཆེད་ཐོབ་གསུམ་འོད་གསལ་རྣམས་ཇི་ཙམ་སྟོབས་ཆེ་བ་ཙམ་གྱིས་དེ་ཆོས་སྐུ་དང་བསྲེ་བའི་བདེ་སྟོང་གི་ཡེ་ཤེས་སྟོབས་ཆེ། 
སྣང་མཆེད་ཐོབ་གསུམ་འོད་གསལ་རྣམས་གཞི་ལམ་གྱི་སྐབས་སུ་འབྱུང་ཚུལ་ལེགས་པར་མ་གོ་ན་བསྲེ་བའི་གཞི་གཏོར་ནས་ཤེས་མི་ནུས་པས། རྗེ་ཡབ་སྲས་ཀྱི་གསུང་རབ་ན་རྒྱས་པར་ཡོད་པ་རྣམས་ཉུང་ངུར་དྲིལ། གསུང་རབ་ན་མི་གསལ་བའི་
ཚུལ་གྱིས་རྟོགས་དཀའ་བར་ཡོད་པ་རྣམས་གསལ་བར་སྟོན་ནས་གཞི་ལམ་གྱི་རྣམ་གཞག་གལ་ཆེ་བ་རྣམས་རྟོགས་སླ་བར་བརྗོད་པ་ཡིན་ནོ། །དེ་ལྟར་གཞི་ལམ་གྱི་སྐབས་ཀྱི་སྣང་མཆེད་ཐོབ་གསུམ་འོད་གསལ་སོགས་ཤར་བ་ན་སྐུ་གསུམ་དང་
6-16-35b


བསྲེ་བའི་ཚུལ་བརྗོད་པར་བྱས་ཏེ། དེ་ཡང་བསྡུས་ན་ཆོས་སྐུ་དང་བསྲེ་བ། ལོངས་སྐུ་དང་བསྲེ་བ། སྤྲུལ་སྐུ་དང་བསྲེ་བ་གསུམ་དུ་འདུས་པས་བསྲེ་བ་གསུམ་ཞེས་ཟེར། སོ་སོར་ཕྱེ་ན་འཆི་རྟགས་མ་ཤར་གོང་གི་ཚེ་འདིའི་ཉིན་པར་གྱི་ལམ་དུས་སུ་སྐུ་
གསུམ་དང་བསྲེ་བ་གསུམ། གཉིད་ཀྱི་གནས་སྐབས་སུ་སྐུ་གསུམ་དང་བསྲེ་བ་གསུམ། དེ་ལྟར་གོམས་པ་ལ་བརྟེན་ནས་འཆི་དུས་སུ་སྐུ་གསུམ་དང་བསྲེ་བ་གསུམ་རྣམས་སུ་འགྱུར་བས་བསྲེ་བ་དགུའི་གདམས་པ་ཞེས་ཀྱང་བྱའོ། །དང་པོ་ལ་ལམ་དུས་ཀྱི་སྐུ་
གསུམ་དང་བསྲེ་བའི་ཚུལ་ནི། གོང་དུ་བཤད་པའི་ཐབས་རྣམས་ལ་བརྟེན་ནས་རླུང་དབུ་མར་འཇུག་ནུས་པའི་གང་ཟག་གིས་ཕྱི་ལས་ཀྱི་ཕྱག་རྒྱ་ལ་བརྟེན་པའམ་རྨི་ལམ་ཟིན་ནས་འོད་གསལ་བཙན་ཐབས་སུ་འཛིན་པའི་གདམས་པའམ། ཉིན་པར་རྩ་དབུ་
མའི་གནས་རྣམས་སུ་དམིགས་པ་གཏོད་པའི་གདམས་པ་རྣམས་གང་ཡང་རུང་བ་ཉམས་སུ་བླངས་པས་རླུང་དབུ་མར་ཞུགས་གནས་ཐིམ་གསུམ་བྱས་པ་ན། སྔར་བཤད་པ་ལྟར་སྣང་མཆེད་ཐོབ་གསུམ་འོད་གསལ་དང་བཅས་པ་འཆར་ཞིང་། དེ་དང་དུས་
མཉམ་དུ་རླུང་དབུ་མའི་ནང་དུ་ཞུགས་པའི་དྲོད་འབར་བའི་སྟོབས་ཀྱིས་སྤྱི་བོ་ནས་བྱང་སེམས་དཀར་པོ་ཞུ་བ་དབུ་མའི་ནང་ནས་བབས་པ་ན་སེམས་བདེ་བའི་ངོ་བོར་མར་གྱིས་འགྲོ་བས། དེས་སྔར་ནས་ལྟ་བ་ཕུ་ཐག་ཆོད་པ་བཙལ་བ་དེའི་སྟེང་དུ་འཇོག་གོ། །
དེ་འཇོག་ཚུལ་ལ་ཁ་ཅིག་བདེ་བའི་ངོ་བོ་ལ་ཆེར་བལྟས་པས་གང་དུའང་བཟུང་དུ་མེད་པར་སོང་བ་ན། དེའི་སྟེང་དུ་འཇོག་པ་ཡིན་ཟེར་བ་དང་། དེ་ལྟར་བྱས་པས་བདེ་བ་ལ་ཞེན་པ་ཁེགས་ཀྱི་མ་བྱས་ན། ཞེན་པ་སྐྱེ་ཟེར་བ་ནི་བླ་མེད་ཀྱི་ལམ་གྱི་བདེ་སྟོང་
6-16-36a


སྦྱར་བའི་གནད་མ་གོ་བའི་ཕྱིན་ཅི་ལོག་ཡིན་པས་མི་རུང་སྟེ། བདེ་བ་རང་ཡལ་ལ་གཏོང་བ་ཡིན་ན་དང་པོ་ནས་བདེ་བ་ལ་འབད་པས་བསྒྲུབ་དོན་མེད་ཅིང་། བདེ་བ་ལ་ཞེན་པ་སྐྱེ་ཟེར་བ་ཡང་བདེ་སྟོང་སྦྱོར་ཚུལ་གྱི་གནད་མ་རྟོགས་
པའི་རྟགས་ཡིན་ནོ། །དེས་ན་ཕྱི་ནང་གི་རྟགས་ལ་བརྟེན་ནས་ཡིད་ཀྱི་ཤེས་པ་བདེ་བའི་ངོ་བོར་མེར་སོང་བ་དེས་ཆོས་ཐམས་ཅད་ཡུལ་སྟེང་ནས་གྲུབ་རྒྱུ་རྡུལ་ཙམ་ཡང་མེད་སྙམ་དུ་འཛིན་པ་ཡིན་ལ། དེ་ལྟར་བྱས་པ་ན་བདེ་བ་ཇི་ཙམ་སྟོབས་ཆེ་བ་ཙམ་གྱིས་
ཡུལ་གཞན་ལ་རྟོག་པ་འཕྲོ་བ་ཁེགས་ནས། ལྟ་བའི་འཛིན་སྟངས་དེ་འབའ་ཞིག་གི་ངང་དུ་ལྷོད་འགྲོ་བས་བདེ་བ་ཇི་ཙམ་སྟོབས་ཆེ་བ་ཙམ་གྱིས་སྟོང་ཉིད་རྟོགས་པའི་འཛིན་སྟངས་སྟོབས་ཆེར་འགྲོ་བ་ཡིན་གྱི་ཞེན་པ་སྐྱེ་བ་མིན་པས་བློས་ཞིབ་པར་ལེགས་
པར་རྟོགས་ནས་ལྟ་བ་རྣམ་དག་དང་སྦྱར་བའི་བསྒོམ་ཚུལ་ཤེས་ན་འདི་འབའ་ཞིག་གིས་གདོན་མི་ཟ་བར་འཁོར་བ་ལས་གྲོལ་བར་འགྱུར་ལ། རླུང་དབུ་མར་ཞུགས་པའི་ཞུ་བདེ་སྐྱེས་ཀྱང་སྟོང་ཉིད་ཀྱི་ལྟ་བ་རྣམ་དག་མེད་པའམ། ཡོད་ཀྱང་བདེ་སྟོང་སྦྱོར་
མི་ཤེས་ན་དོན་དུ་འགྱུར་དཀའ་ཞིང་། ལྟ་བ་ལོག་པ་དང་སྦྱར་ན་ངན་འགྲོར་འཁྲིད་དོ། །དེས་ན་ཆོས་སྐུ་དང་བསྲེ་ཞེས་པ་ཡང་བདེ་སྟོང་གི་ཐུགས་གཉིས་སྣང་སྤྲོས་པའི་སྣང་བ་མ་ལུས་པ་འགགས་ནས་བདེ་སྟོང་གི་ཡེ་ཤེས་ཀྱི་ངོ་བོར་གནས་པ་དེ་ལ་
ཆོས་སྐུ་ཞེས་ཟེར་བ་ཡིན་པས། འདིར་ཡང་སྔགས་ཀྱི་ཐབས་རྣམས་ལ་བརྟེན་ནས་གཉིས་སྣང་གི་རྟོག་པ་རགས་པ་རྣམས་འགགས་ནས་སེམས་བདེ་སྟོང་གི་ངོ་བོར་གནས་པ་དེ་ཆོས་སྐུ་དང་རྣམ་པ་མཐུན་པ་ཡིན་པས། དེ་ལྟར་མཉམ་པར་
6-16-36b


བཞག་པ་ལ་ཆོས་སྐུ་དང་བསྲེ་བ་ཞེས་བཤད་པ་ཡིན་ནོ། །དེ་ལྟར་གོ་བ་ལེགས་པར་དམིགས་ཕྱེད་པར་བྱས་ནས། ཉམས་སུ་ལེན་ཚུལ་གྱི་དམིགས་པ་དྲིལ་ནས་བསྟན་ན། ཐོག་མར་བླ་མའི་རྣལ་འབྱོར་བསྒོམས་ནས་བདག་གི་ལམ་གྱི་རྟོགས་པ་སྐུ་
གསུམ་དང་བསྲེ་ནུས་པར་བྱིན་གྱིས་རློབ་ཏུ་གསོལ། །ཞེས་སྙིང་ཐག་པ་ནས་གསོལ་བ་དྲག་པོ་བཏབ། དེའི་རྗེས་སུ་དམིགས་པ་ལ་བཞག་པས་རླུང་འདུ་བ་དང་། ཐིམ་པའི་རྟགས་རྣམས་འབྱུང་བ་ངོས་ཟིན་པར་བྱེད་དགོས་སྙམ་པའི་འཕེན་པ་ཞིག་བཏང་
ནས་ལས་ཀྱི་ཕྱག་རྒྱ་ལ་བརྟེན་པའམ། རྨི་ལམ་གྱི་སྐབས་ཀྱི་འོད་གསལ་བཙན་ཐབས་སུ་འཛིན་པའི་གདམས་ངག་ཉིན་པར་རྩ་དབུ་མའི་ནང་གི་གནས་ཐམས་ཅད་དུ་དམིགས་པ་གཏོད་པ་སོགས་ཀྱི་ཐབས་གང་ཡང་རུང་བ་ལ་བརྟེན་ནས་རླུང་དབུ་མར་ཞུགས་
པའི་རྟགས་མཉམ་རྒྱུ་ངེས་ཅན་དང་། གནས་པའི་རྟགས་སྣ་བུག་གི་རྒྱུ་བ་ཆད་པ་དང་། ལྟོ་བ་མི་འགུལ་བར་སྣང་བ་སོགས་དེ་མ་ཐག་འདྲེན་ནུས་པས་ཐིམ་པའི་རྟགས་ནི་སྨིག་རྒྱུ་ནས་འོད་གསལ་གྱི་བར་རྣམས་རིམ་པ་བཞིན་ཤར་བ་ན་རྟགས་རྣམས་ངོ་
ཤེས་ཤིང་། དྲན་པ་མ་ཉམས་པར་བྱས་ནས་བདེ་སྟོང་གི་ངང་ལ་མཉམ་པར་བཞག །དེའི་མཐར་རྡོ་རྗེ་འཆང་གི་སྐུར་ལྡང་དགོས་སྙམ་པའི་འཕེན་པ་བཏང་ནས། དེའི་རྗེས་སུ་སྨིག་རྒྱུ་སོགས་ཤར་བ་ན་ས་རླུང་སོགས་ཐིམ་པའི་རྟགས་སུ་ངོ་ཤེས་
པར་བྱས་ནས་བདེ་སྟོང་གི་ངང་དུ་འཇོག །ཁྱད་པར་དུ་སྣང་མཆེད་ཐོབ་གསུམ་གྱི་སྣང་བ་སྔར་བཤད་པ་ལྟར་བཤད་པ་ལྟར་ཤར་པ་ན་ངོ་ཤེས་པར་བྱས་ཏེ། འདི་སྣང་བ་ཡིན། འདིའི་རྗེས་སུ་མཆེད་པ་འཆར། དེ་ངོ་ཤེས་པར་བྱས་ནས་བདེ་སྟོང་ལ་འཇོག །
6-16-37a


སྙམ་པ་བྱས་ནས་དེའི་རྗེས་སུ་ཡིད་ཀྱི་ཤེས་པ་དབུ་མའི་ནང་ནས་ཁམས་དཀར་པོ་འབབ་པའི་བདེ་བའི་ངོ་བོར་མེར་སོང་ཡོད་པས། ཆོས་ཐམས་ཅད་རང་ངོས་ནས་གྲུབ་པ་རྡུལ་ཙམ་ཡང་མེད་སྙམ་པའི་ངང་དུ་ལྷང་ངེ་བཞག་ནས་ཆོས་
སྐུའི་ངོ་བོར་སོང་སྙམ་པ་བྱས་ནས་རྩེ་གཅིག་ཏུ་འཇོག །དེའི་རྗེས་སུ་མཆེད་པ་ཤར་བ་ནའང་དྲན་པ་བསྟེན་ཚུལ་རིགས་འགྲེ ། བསྲེ་ཚུལ་སྔར་ལྟར་དང་འདྲ། ཁྱད་པར་ཉེར་ཐོབ་ཀྱི་ནག་ལམ་གྱི་སྣང་བ་ཤར་བ་ན་འདིའི་རྗེས་སུ་དྲན་མེད་དུ་བརྒྱལ་བ་འབྱུང་
བས། དེ་སངས་ནས་འོད་གསལ་ཤར་བ་ན་ཅིས་ཀྱང་ངོ་ཤེས་པར་བྱས་ཏེ། ཆོས་སྐུ་དང་བསྲེ་དགོས་སྙམ་པའི་འདུན་པ་བཏང་ནས་ཉེར་ཐོབ་ཀྱི་དྲན་མེད་དེ་སངས་ནས་འོད་གསལ་གྱི་སྣང་བ་སྟོན་གྱི་ནམ་མཁའ་གཡའ་དག་ལྟ་བུའི་སྟོང་སང་འབའ་ཞིག་
གི་སྣང་བ་ཤར་བ་འབྱུང་བ་ན། སྔར་ཤེས་པ་བདེ་བའི་ངོ་བོར་གྱུར་པ་དེས་ལྟ་བ་དྲན་པའི་འཛིན་སྟངས་ལྷང་ངེ་བ་དེ་ལ་འཇོག་པ་དང་། ཆོས་སྐུའི་ངོ་བོར་སོང་སྙམ་པའི་བློ་ཤུགས་ཅན་བྱས་ནས་ཇི་ཙམ་འཇོག་ནུས་ཀྱི་བར་ལ་འཇོག །དེ་ལས་སེམས་
ཅུང་ཟད་གཡོ་བར་རྩོམ་པ་ན་སྙིང་གའི་མི་ཤིགས་པའི་ཐིག་ལེ་ལ་སེམས་ཁྲིག་གེ་གཏད་པས་ཤིན་ཏུ་ཕྲ་བའི་རླུང་སེམས་དེ་སྙིང་གའི་ཁམས་དཀར་དམར་གྱི་ཐིགས་ལེ་དེ་ཁ་གཤག་བྱེ་བའི་ནང་ནས་ཕྱི་རོལ་ཏུ་རྒྱངས་ཏེ་འཐོན། རྡོ་རྗེ་འཆང་གི་སྐུར་ལམ་
སྟེ་གྲུབ་པར་བསྒོམ་ཞིང་། དེའི་ཚེ་དངོས་གནས་ལ་རྡོ་རྗེ་འཆང་གི་སྐུར་མ་སོང་ཡང་རང་གི་ཡིད་ངོར་རྡོ་རྗེ་འཆང་གི་སྐུའི་རྣམ་པར་ཤར་བ་དེ་ལ་ཇི་ཙམ་འཇོག་ནུས་ཀྱི་བར་ལ་འཇོག་པ་ནི། ལམ་དུས་ཀྱི་སྒྱུ་ལུས་རྗེས་མཐུན་པ་ལོངས་སྐུ་དང་བསྲེ་བ་ཞེས་
6-16-37b


བྱའོ། །རང་རྡོ་རྗེ་འཆང་གི་སྐུའི་རྣམ་པར་གནས་པ་དེ་ལས་སླར་རང་གི་ལུས་རགས་པ་འདི་རྡོ་རྗེ་འཆང་གི་སྐུར་བསྒོམས་ནས། དེ་ལ་རང་ཡེ་ཤེས་སེམས་དཔའི་ཚུལ་གྱིས་འཇུག་པ་ནི། རྡོ་རྗེ་འཆང་ཆེན་པོས་གདུལ་བྱའི་དོན་དུ་ཁམས་རགས་པའི་ལུས་བཟུང་ནས། 
སྤྲུལ་སྐུ་ཤཱཀྱ་ཐུབ་པ་ལ་སོགས་པའི་སྐུའི་རྣམ་པར་བསྟན་པ་དང་རྣམ་པ་མཐུན་པས་སྤྲུལ་སྐུ་དང་བསྲེ་བ་ཞེས་བྱའོ། །རླུང་དབུ་མར་ཞུགས་པ་ནས་བསྲེ་ཚུལ་འདི་ལྟར་འབད་ནས་རྩེ་གཅིག་ཏུ་གོམས་པར་བྱས་པ་དང་། ཁྱད་པར་སྙིང་གར་གནད་དུ་བསྣུན་པ་
སོགས་ཀྱི་སྙིང་གའི་རྩ་མདུད་མ་ལུས་པར་གྲོལ་བ་ན། ཕྱག་རྒྱ་ལ་བརྟེན་པའི་རླུང་དབུ་མར་འདུས་པ་རྣམས་སྙིང་གར་ཐིམ་པའི་ཕུལ་ཆེ་ཆུང་དང་། གཉིས་སྣང་རགས་པ་འགགས་པའི་སྟོབས་ཆེ་ཆུང་འཆི་བ་འོད་གསལ་དང་ཁྱད་པར་ཅུང་ཟད་ཀྱང་མེད་པ་ལ་
སེམས་ཞུ་བ་དེའི་ངོ་བོར་སྐྱེས་པ་འབྱུང་སྟེ། དེའི་ཚེ་སྔར་ལྟར་བདེ་སྟོང་གི་ཏིང་ངེ་འཛིན་ལ་འཇོག་པའི་ཆོས་སྐུ་དང་བསྲེ་བ་ནི་སེམས་དབེན་གྱི་དཔེའི་འོད་གསལ་མཐར་ཕྱིན་པ་ཞེས་བྱ་ཞིང་། དེ་ལྟ་བུའི་འོད་གསལ་ཐོབ་ནས་དེ་ལས་སེམས་གཡོ་བར་རྩོམ་པ་
ན། སྔར་ལྟར་རྡོ་རྗེ་འཆང་གི་སྐུར་ལངས་ནས་ཤིན་ཏུ་ཕྲ་བའི་རླུང་སེམས་དེ་ཉིད་དངོས་གནས་ལ་རྡོ་རྗེ་འཆང་གི་སྐུ་འགྲུབ་པ་འབྱུང་སྟེ། དཔེར་ན་འཆི་བ་འོད་གསལ་གྱི་མཐར་ཤིན་ཏུ་ཕྲ་བའི་རླུང་སེམས་དེ་ཉིད་བར་དེའི་ལུས་སུ་དངོས་གནས་ལ་གྲུབ་པ་
བཞིན་ནོ། །དེ་ལྟར་རྡོ་རྗེ་འཆང་གི་སྐུ་དངོས་གནས་ལ་གྲུབ་པ་དེ་ལ་མ་དག་པའི་སྒྱུ་མའི་ལུས་ཞེས་བྱ་ཞིང་། དེ་ལྟར་རྡོ་རྗེ་འཆང་གི་སྐུའི་རྣམ་པར་གྲུབ་པ་དེས་རང་གི་ལུས་འདི་རྡོ་རྗེ་འཆང་གི་སྐུར་
6-16-38a


བསྒོམས་ནས་དེའི་སྙིང་གར་ཡེ་ཤེས་སེམས་དཔའི་ཚུལ་གྱིས་བཞུགས་པ་ནི་སྤྲུལ་སྐུ་དང་བསྲེ་བ་ཡིན་ནོ། །ཉིན་པར་ལམ་དུས་ཀྱི་སྐུ་གསུམ་དང་བསྲེ་བའི་ཚུལ་བཤད་ཟིན་ནས་གཉིད་ཆོས་སྐུ་དང་བསྲེ་བ། རྨི་ལམ་ལོངས་
སྐུ་དང་བསྲེ་བ། སད་པ་སྤྲུལ་སྐུ་དང་བསྲེ་བ་གསུམ། དང་པོ་གཉིད་ཆོས་སྐུ་དང་བསྲེ་བ་ནི། རླུང་དབུ་མར་འཇུག་པའི་གང་ཟག་གིས་གཉིད་དུ་འགྲོ་བའི་ཚེ་སྙིང་གའི་དབུས་ཀྱི་མི་ཤིགས་པའི་ཐིག་ལེ་ལ་དམིགས་པ་གཏད་པས་གཉིད་དུ་འགྲོ་བ་དང་
མཉམ་དུ་སྙིང་གའི་རྩ་དབུ་མའི་ནང་དུ་རླུང་འདུ་ཕུལ་སྔར་བས་ཆེ་བ་འབྱུང་བས་སྣང་མཆེད་ཐོབ་གསུམ་འོད་གསལ་དང་བཅས་པ་སྔར་བཞིན་དུ་ཤར་བ་ན། ཆོས་སྐུ་དང་བསྲེ་བའི་ཚུལ་སྔར་བཞིན་དུ་བྱས་ལ། གཉིད་ཀྱི་འོད་གསལ་གྱི་ངང་ནས་རྨི་
ལམ་འཆར་བ་རྩོམ་པ་ན་སྙིང་གའི་དབུས་ནས་ཤིན་ཏུ་ཕྲ་བའི་རླུང་སེམས་དེ་ཉིད་རྡོ་རྗེ་འཆང་གི་སྐུར་ལྡང་བའི་ཚུལ་སྔར་བཞིན་བྱས་པ་ནི་རྨི་ལམ་ལོངས་སྐུ་དང་བསྲེ་བ་ཞེས་བྱའོ། །རླུང་དབུ་མར་འཇུག་མི་ནུས་པའི་གང་ཟག་གིས་ནི་འདུན་པའི་སྟོབས་
ཀྱིས་ལེགས་པར་དྲན་པ་བསྟེན་ནས་གཉིད་ཀྱི་འོད་གསལ་མཚན་ཉིད་ཚང་བ་འཛིན་མི་ནུས་ཀྱང་། སྨིག་རྒྱུ་ནས་སྣང་མཆེད་ཐོབ་གསུམ་གྱི་བར་གྱི་སྣང་བ་འདྲ་རུང་། གོ་རིམས་འཆོལ་བ་ཐོ་རེ་བ་དང་། རྨི་ལམ་མེད་པའི་གསལ་ལེ་བ་དང་། མཐར་
གཉིད་སད་རྒྱུ་ཡོད་པ་དེ་ལྟ་བུ་ལ་ཡུན་རེ་འགའ་གནས་ནུས་པ་འབྱུང་སྟེ། རླུང་དབུ་མར་ཞུགས་པའི་སྣང་མཆེད་ཐོབ་གསུམ་འོད་གསལ་དང་བཅས་པ་མི་འདྲ་བས། དེ་དག་གི་སྐབས་སུ་དབུ་མ་ནས་ཁམས་དཀར་པོ་འབབ་པའི་བདེ་བ་མི་འབྱུང་ལ།
6-16-38b


དཔེར་ན་རླུང་དབུ་མར་ཞུགས་པ་ལྟ་བུའི་བདེ་སྟོང་སྦྱོར་རྒྱུ་མི་འོང་ནའང་འདུན་པའི་སྟོབས་ཀྱིས་འོད་གསལ་འཛིན་པ་ལ་ཤར་བའི་སྣང་བ་དེ་དག་གི་སྐབས་སུའང་སྟོང་པ་ཉིད་ཀྱི་ལྟ་བ་ལ་གཞག་པར་བྱའོ། །དེ་འདུན་པའི་སྟོབས་ཀྱིས་འཛིན་པ་དེས་གཉིད་ཀྱི་འོད་
གསལ་ལས་རྨི་ལམ་གྱི་ལུས་རྡོ་རྗེ་འཆང་གི་སྐུར་ལྡང་མི་ནུས་པས། རྨི་ལམ་ཤར་བ་ན་རྨི་ལམ་དུ་ངོ་ཤེས་ནས་རྡོ་རྗེ་འཆང་གི་སྐུར་བསྒོམ་པ་ནི། འདུན་པའི་སྟོབས་ཀྱིས་རྨི་ལམ་ལོངས་སྐུ་དང་བསྲེ་བ་ཡིན་ནོ། །རྨི་ལམ་གྱི་ལུས་རྡོ་རྗེ་འཆང་གི་སྐུར་
འོད་གསལ་གྱི་ངང་ལས་ལངས་པ་དང་། རྨི་ལམ་ཟིན་ནས་རྡོ་རྗེ་འཆང་གི་སྐུར་འོད་གསལ་གྱི་ངང་ལས་ལངས་པ་དང་། རྨི་ལམ་ཟིན་ནས་རྡོ་རྗེ་འཆང་གི་སྐུར་བསྒོམ་པ་གཉིས་ཀས་གཉིད་སད་ཡོང་ན། རང་གི་ལུས་འདི་རྡོ་རྗེ་འཆང་གི་སྐུར་བསྒོམས་
ནས་དེ་ལ་རང་ཡེ་ཤེས་སེམས་དཔའི་ཚུལ་གྱིས་ཞུགས་པར་བསྒོམ་པ་ནི་སད་པ་སྤྲུལ་སྐུ་དང་བསྲེ་བ་ཞེས་བྱའོ། །གཞི་དུས་ཀྱི་སྐྱེ་ཤི་བར་དོ་གསུམ་སྐུ་གསུམ་དང་བསྲེ་བ་ལ་འཆི་བ་ཆོས་སྐུར་བསྲེ་བ། བར་དོ་ལོངས་སྐུར་བསྲེ་བ། སྐྱེ་བ་སྤྲུལ་སྐུར་
བསྲེ་བ་གསུམ། འདི་དག་གི་ཉམས་སུ་ལེན་ཚུལ་ནི། ཚེ་འདིའི་ནོར་ལོངས་སྤྱོད་ཐམས་ཅད་དགེ་ཕྱོགས་སུ་བཏང་། འཁོར་གཡོག་ཉེ་འབྲེལ་ཐམས་ཅད་ལ་འདི་རྣམས་ཐམས་ཅད་སྐྱེ་བ་སྔོན་མ་ནས་འགྲོགས་ཡོངས་པ་མིན། སྐྱེ་བ་སྔོན་མའི་ཉེ་
འབྲེལ་ལོངས་སྤྱོད་སོགས་འདི་ལས་ལྷག་པ་ཡོད་དེ། ཐམས་ཅད་བཞག་ནས་རང་གཅིག་པུར་འོང་དགོས་བྱུང་། དེར་མ་ཟད་ཚེ་རབས་ཐམས་ཅད་དུ་ལུས་ལོངས་སྤྱོད་ཉེ་འབྲེལ་ཐམས་ཅད་བཞག་ཕྱིན། བདག་གཅིག་པུར་མ་ཟད་སེམས་ཅན་
6-16-39a


ཐམས་ཅད་དེ་འདྲ་ཤ་སྟག་ཡིན་པས། ཉེ་འབྲེལ་འཁོར་གཡོག་འདི་རྣམས་ཐམས་ཅད་ཁོ་རང་རྣམས་ཀྱང་རང་དབང་མེད་པར་འགྱེས་དགོས། འདི་རྣམས་ལ་ཞེན་ཆགས་བྱེད་པའི་དོན་མེད་སྙམ་པ་བྱས་ནས་ཚེ་འདིའི་ཕྱོགས་ལ་ཞེན་
ཆགས་མེད་པར་བྱས། འདི་ལྟར་རང་དབང་མེད་པར་སྐྱེ་རྒ་ན་འཆིའི་སྡུག་བསྔལ་འདི་ཐམས་ཅད་ཡུལ་སྟེང་ནས་གྲུབ་པ་གང་ཡང་མེད་པ་ལ། ཡུལ་སྟེང་ནས་གྲུབ་པར་བཟུང་ནས་ཞེན་ཆགས་བྱས་པ་འདིས་ལན་འདུག་པས་གཉིས་སྣང་རགས་པ་འགགས་
པའི་སྣང་མཆེད་ཐོབ་གསུམ་འོད་གསལ་དང་བཅས་པ་ཤར་བ་ན། བདེ་སྟོང་གཉིས་སུ་མེད་པའི་ཆོས་སྐུའི་ངང་དུ་བསྲེ་བར་བྱའོ་སྙམ་དུ་འདུན་པ་དྲག་པོ་བཏང་ནས་གསང་སྔགས་ཀྱི་དམ་ཚིག་དང་འགལ་བའི་ཉེས་པ་བྱས་པ་རྣམས་ལ་འགྱོད་པ་དྲག་པོ་
བསྐྱེད་དེ། བླ་མེད་ཀྱི་དབང་མཚན་ཉིད་ཚང་བ་གཞན་ལ་ཞུ་བའམ་རང་གིས་བདག་འཇུག་བླངས་པས་སྔགས་ཀྱི་སྡོམ་ལྡན་དུ་བྱས་ཏེ། བླ་མའི་རྣལ་འབྱོར་བསྒོམས་ནས་བདག་གིས་འཆི་བ་འོད་གསལ་ཆོས་སྐུ་དང་བསྲེ་ནུས་པར་བྱིན་གྱིས་བརླབ་ཏུ་
གསོལ། བར་དོ་ལོངས་སྐུ་དང་བསྲེ་ནུས་པར་བྱིན་གྱི་བརླབ་ཏུ་གསོལ། སྐྱེ་བ་སྤྲུལ་སྐུ་དང་བསྲེ་ནུས་པར་བྱིན་གྱིས་བརླབ་ཏུ་གསོལ་སྙམ་པའི་གསོལ་བ་དྲག་ཏུ་བཏབ། དེ་ནས་རང་ཡི་དམ་གང་ཡིན་གྱི་ང་རྒྱལ་བརྟན་པ་དང་དམིགས་པ་གསལ་བར་
བྱས་ཏེ། སྨིག་རྒྱུ་ནས་འོད་གསལ་གྱི་བར་རིམ་པ་བཞིན་དུ་ཤར་བ་ན་ངོ་ཤེས་པར་བྱས་ཏེ། བདེ་སྟོང་གི་ཡེ་ཤེས་ལ་རྩེ་གཅིག་ཏུ་མཉམ་པར་འཇོག་ཅིང་། ཁྱད་པར་སྣང་མཆེད་ཐོབ་གསུམ་འོད་གསལ་དང་བཅས་པ་ཤར་བ་ན་སྟོང་ཉིད་ཀྱི་ལྟ་བ་
6-16-39b


རྣམ་དག་གི་སྟེང་དུ་བཞག་ནས་ཆོས་སྐུའི་ངོ་བོར་སོང་སྙམ་པའི་འཛིན་སྟངས་དྲག་པོ་བྱས་ནས་རྩེ་གཅིག་ཏུ་འཇོག་པ་སོགས་སྔར་ལྟར་བྱེད་པ་ཡིན། འཆི་བ་ཆོས་སྐུ་དང་བསྲེ་བའི་ཚུལ་ཡིན་ནོ། །དེ་ཡང་བསྲེ་མཁན་གྱི་རྣལ་འབྱོར་པ་ཚེ་འདིའི་སྔར་ནས་སྙིང་གའི་
རྩ་མདུད་ལྷག་མ་མ་ལུས་པར་གྲོལ་ནས་སྤྱོད་པ་མ་གྲུབ་པ་དང་། དེ་ཙམ་མ་ཐོབ་ཀྱང་ངག་དབེན་མན་ཆད་ཀྱི་རླུང་དབུ་མར་ཐིམ་པའི་རྟགས་རྣམས་རྫོགས་པ་ནས་ལུས་དབེན་ཐོག་མར་གྲུབ་པ་ཡན་ཆད་དང་། འཆི་བའི་སྔོན་དུ་རླུང་དབུ་མར་གཏན་ནས་
འཇུག་མ་ཐུབ་ཀྱང་མན་ངག་ལ་མཁས་ཤིང་ཡིད་ལ་གཅགས་པའི་གང་ཟག་གསུམ་ཡོད་ལ། གསུམ་པོ་དེ་བར་དོ་ལོངས་སྐུར་ལྡང་ཚུལ་མི་འདྲ་བ་གསུམ་འབྱུང་སྟེ། གང་ཟག་དང་པོ་དེས་འཆི་བ་འོད་གསལ། དཔེའི་འོད་གསལ་གྱི་ངོ་བོར་བསྐྱེད་ནུས་
པས་དེ་ལས་ལྡང་བ་ཤིན་ཏུ་ཕྲ་བའི་རླུང་སེམས་དེ་ལས་བར་དོ་འབྱུང་བའི་དོད་ལ་རྡོ་རྗེ་འཆང་གི་སྐུར་དངོས་གནས་ལ་ལངས་ནས་དེའི་རྟེན་ལ་སངས་རྒྱ་བ་ཡིན་ནོ། །གང་ཟག་གཉིས་པ་དེས་འཆི་བ་འོད་གསལ་བདེ་སྟོང་གི་ཏིང་ངེ་འཛིན་ཁྱད་པར་ཅན་གྱི་ངོ་བོར་
བསྐྱེད་ནས། དེ་ལས་ལྡང་བ་ན་ཤིན་ཏུ་ཕྲ་བའི་རླུང་སེམས་དངོས་གནས་ལ་རྡོ་རྗེ་འཆང་གི་སྐུར་མ་སོང་ཡང་རང་གི་ཡིད་ངོར་རྡོ་རྗེ་འཆང་གི་སྐུའི་རྣམ་པར་ཁྲིག་སྟེ་ལངས་པའི་སྣང་བ་འབྱུང་ངོ་། །གང་ཟག་གསུམ་པས་འཆི་བ་འོད་གསལ་གྱི་ཚེ་སྟོང་ཉིད་
ཀྱི་ལྟ་བ་རྣམ་དག་ལ་འཇོག་ནུས་ཀྱང་། དེ་ལྟར་ལྡང་བ་ན་རྡོ་རྗེ་འཆང་གི་སྐུར་རང་གི་སྣང་ངོར་ཡང་ལྡང་མི་ནུས་པར་བར་དོ་རང་དགའ་བའི་ལུས་སུ་གྲུབ་ནས། བར་དོ་ལ་བར་དོར་ངོ་ཤེས་པ་ན་བར་དོའི་ལུས་དེ་རྡོ་རྗེ་འཆང་གི་སྐུར་སྒོམ་པ་ཡིན་ལ། དེ་དག་ནི་
6-16-40a


གང་ཟག་དེ་རྣམས་ཀྱིས་བར་དོ་ལོངས་སྐུ་དང་བསྲེ་བ་ཡིན་ནོ། །དེས་ན་ཡིད་ངོར་རྡོ་རྗེ་འཆང་གི་སྐུར་ལངས་པའི་གང་ཟག་དེ་དང་། བར་དོ་ངོ་ཤེས་ནས་རྡོ་རྗེ་འཆང་གི་སྐུར་བསྒོམ་པ་གཉིས་ཀྱིས་བར་དོའི་སྣང་བ་ཐམས་ཅད་ངོ་བོ་བདེ་
སྟོང་གི་ཡེ་ཤེས་ལ་རྣམ་པ་རྡོ་རྗེ་འཆང་གི་རྣམ་པར་ཤར་བའི་ལྷའི་ངོ་བོར་བསྒོམས་ནས་སྐྱེ་གནས་སོགས་ཐམས་ཅད་ལ་ཆགས་སྡང་ཞེན་པ་བཀག་སྟེ་གང་དུ་སྐྱེ་བ་ལེན་པའི་མངལ་དེ་གཞལ་ཡས་ཁང་དང་། དེར་མི་བསྐྱོད་པ་ནམ་མཁའི་ཁམས་གང་བ་
འདུས་ནས་གཅིག་ཏུ་འདྲེས་པའི་དབུས་སུ་བཞུགས་པར་མོས་ནས་སྐྱེ་གནས་སུ་ཞུགས། བར་དོ་འཆི་བའི་སྣང་མཆེད་ཐོབ་གསུམ་འོད་གསལ་དང་བཅས་པ་ཤར་བ་ན། སྔར་ལྟར་ཆོས་སྐུ་དང་བསྲེ་ཞིང་དེ་ལས་ལུགས་ལྡོག་གི་སྣང་མཆེད་ཐོབ་གསུམ་
འོད་གསལ་དང་བཅས་པ་འཆར་བར་རྩོམ་པ་ན་མངལ་དུ་ཞུགས་ཟིན་པས། དེའི་ཚེ་སྤྲུལ་སྐུ་རྡོར་སེམས་ཀྱི་རྣམ་པར་ལངས་ཏེ་ལྷའི་ང་རྒྱལ་གྱིས་གནས་པ་ནི་སྐྱེ་བ་སྤྲུལ་སྐུ་དང་བསྲེ་བ་ཞེས་བྱའོ། །དེ་ཡང་ཚེ་འདིར་རླུང་དབུ་མར་བཅུག་ནས་ཆོས་སྐུ་དང་བསྲེ་
ནུས་པའི་གང་ཟག་གིས་འཆི་བ་འོད་གསལ་ལས་བར་དོར་རྡོ་རྗེ་འཆང་གི་སྐུར་ཡིད་ངོར་ལངས་ཏེ། རང་འདོད་ན་མཁའ་སྤྱོད་ལ་སོགས་པའི་གནས་སུ་འཕོ་བར་ནུས་ལ། སྔར་བཤད་པ་ལྟར་སྐྱེ་བ་སྤྲུལ་སྐུ་དང་བསྲེ་བའི་གདམས་ངག་གི་མིའི་སྐྱེ་གནས་
སུ་འཇུག་ནའང་སྔགས་འགྲུབ་པའི་རྟེན་ཁྱད་པར་ཅན་དུ་གདོན་མི་ཟ་བར་སྐྱེས་ནས་ཚེ་འདི་ལ་ལམ་གྱི་རྟོགས་པ་ཁྱད་པར་ཅན་བསྐྱེད་དེ། དེ་ནས་སྐྱེ་བ་མང་པོར་མི་ཐོགས་པར་རྡོ་རྗེ་འཆང་གི་གོ་འཕང་ཐོབ་བོ། །ཚེ་འདིར་རླུང་དབུ་མར་ཞུགས་པའི་རྟགས་
6-16-40b


མ་ཐོབ་ཀྱང་སྐྱེ་ཤི་བར་དོ་གསུམ་དང་། སྐུ་གསུམ་བསྲེ་ཚུལ་གྱི་གོ་བ་ལེགས་པར་ཆགས་ནས་འཆི་ཁར་དམ་ཚིག་དང་སྡོམ་པ་སོར་བཅུག་སྟེ། བླ་མའི་མན་ངག་གི་སྒོ་ནས་འདུན་པས་བསྲེ་བའི་གང་ཟག་སྔར་བཤད་པའི་ཐ་མ་ངེས་ཀྱང་འདུན་པའི་སྟོབས་
ཀྱིས་སྔར་བཞིན་བསྲེས་པས་སྔགས་འགྲུབ་པའི་རྟེན་དུ་སྐྱེས་ཏེ། སྔགས་ཀྱི་ལམ་མ་ནོར་བར་སྟོན་པའི་བཤེས་གཉེན་དང་ཕྲད་ནས་གདམས་ངག་ཕྱིན་ཅི་མ་ལོག་པར་ཐོབ་སྟེ་རྟོགས་པ་ཁྱད་པར་ཅན་བསྐྱེད་པས། དེ་ནས་ངན་སོང་དུ་སྐྱེ་བ་མི་སྲིད་པར་
སྐྱེ་བ་ཐམས་ཅད་དུ་སྔགས་འགྲུབ་པའི་རྟེན་འབའ་ཞིག་ཏུ་སྐྱེ་ལ། དེ་ཡང་སྐྱེ་བ་སྔ་མ་ལས་ཕྱི་མ་ཕྱི་མ་རྟོགས་པ་གོང་ནས་གོང་དུ་འགྱུར་བའི་སྒོ་ནས་མྱུར་དུ་སངས་རྒྱ་བར་གདོན་མི་ཟའོ། །གལ་ཏེ་གདམས་ངག་དང་ལྡན་པའི་གང་ཟག་ལ་སྣང་མཆེད་ཐོབ་
གསུམ་རིམ་གྱིས་འབྱུང་བ་མིན་པའི་གཡང་དུ་ལྷུང་བ་སོགས་གློ་བུར་དུ་འཆི་དགོས་པ་བྱུང་ན། ཚེ་འདི་ལ་ཞེན་ཆགས་རྦད་བཅད་ནས་སྣང་བ་འདི་ཐམས་ཅད་ཡུལ་སྟེང་ནས་གྲུབ་རྒྱུ་རྡུལ་ཙམ་མེད་སྙམ་པའི་ལྟ་བའི་སྟེང་དུ་བཞག་བར་དོ་གྲུབ་པའི་ཚེ་བསྲེ་ཚུལ་སྔར་
ལྟར་བྱེད། དེ་ལྟར་བྱས་པས་གདོན་མི་ཟ་བར་ངན་འགྲོ་ལས་ཐར་རོ། །དེ་ལྟར་བདག་གི་དད་པའི་ལྕགས་ཀྱུ་ཡིས། །དཔལ་ལྡན་བླ་མའི་ཐུགས་ཀྱི་བང་མཛོད་ལས། །མན་ངག་ཡིད་བཞིན་ནོར་བུའི་ཚོགས་བླངས་ཏེ། །བརྩོན་པས་ཉམས་པ་མེད་པའི་བྱི་དོར་བྱས། །
སྐལ་བཟང་ཐེག་པ་མཆོག་གི་རིགས་ལྡན་ཞིང་། །རྣམ་དཔྱོད་དམ་ཚིག་ལྡན་པའི་སློབ་མ་ཡིས། །མཆོག་ཏུ་དད་པའི་གསུང་གིས་བསྐུལ་བའི་དོར། །རྡོ་རྗེ་འཛིན་པ་ཆོས་ཀྱི་རྒྱལ་མཚན་གྱིས། །ལྷག་བསམ་དག་པའི་སེམས་ཀྱིས་སྦྱར་བ་ལ། གནས་གསུམ་
6-16-41a


མཁའ་འགྲོའི་ཚོགས་རྣམས་བཟོད་པར་མཛོད། །རབ་དཀར་དགེ་བའི་མཐུ་ཡིས་འགྲོ་བ་ཀུན། །སྐྱེ་ཤི་བར་དོའི་གཡང་ས་ལས་གྲོལ་ནས། །རྣམ་མཁྱེན་ཐར་པའི་ཁང་བཟང་ཉམས་དགའ་བར། །ཟག་མེད་བདེ་བའི་དཔལ་ལ་སྤྱོད་
པར་ཤོག །འདི་ཆོས་རྗེ་བསོ་བའི་ཟིན་བྲིས་སོ། ། གཉིས་པ་ནི། རྒྱལ་བ་ཁྱབ་བདག་རྡོ་རྗེ་འཆང་དང་དབྱེར་མ་མཆིས་པའི་དཔལ་ལྡན་བླ་མ་དམ་པའི་ཞབས་ལ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །བརྩེ་བ་
ཆེན་པོས་འབྲལ་བ་མེད་པར་རྗེས་སུ་བཟུང་དུ་གསོལ། རྒྱུད་སྡེ་བླ་ན་མེད་པའི་ཟབ་པའི་གནད་མཐར་ཐུག་པ་བསྲེ་བའི་མན་ངག་གི་གནད་ཞིབ་པར་གཞན་དུ་བརྗོད་པ་ནི། རྗེ་བཙུན་ཙོང་ཁ་པ་ཡབ་སྲས་ཀྱི་གསུང་རབ་ཀྱི་དགོངས་པའི་གནད་དྲིལ་བ་
ཞལ་གྱི་མན་ངག་གིས་ལེགས་པར་བརྒྱན་ཏེ་གསལ་བར་བརྗོད་པ་ཡིན་པས། དེར་བཤད་པ་ལྟར་གཞི་ལམ་གྱི་སྐབས་ཀྱི་སྣང་མཆེད་ཐོབ་གསུམ་འོད་གསལ་དང་བཅས་པ་འཆར་ཚུལ་དང་། གཞི་དུས་ཀྱི་བར་དོ་དང་སྐྱེ་བ་ལེན་ཚུལ་ལ་སོགས་
པ་གཞིའི་གོ་བ་ལེགས་པར་ཆགས་པའི་གང་ཟག་ལ་ཉམས་སུ་ལེན་ཚུལ་གྱི་གནད་འགག་དྲིལ་བ་ལག་ཏུ་བླང་བདེ་བར་བརྗོད་ན། གཞི་དུས་ཀྱི་སྐུ་གསུམ་དང་བསྲེ་བ། ལམ་དུས་ཀྱི་སྐུ་གསུམ་དང་བསྲེ་བ། གཉིད་དུས་ཀྱི་སྐུ་གསུམ་དང་བསྲེ་བ། 
ཐམས་ཅད་ཀྱང་རླུང་སྟོབས་ཀྱིས་བསྲེ་བ། འདུན་པའི་སྟོབས་ཀྱིས་བསྲེ་བ་གཉིས་སུ་འདུས་ཤིང་། དང་པོ་རླུང་སྟོབས་ཀྱིས་བསྲེ་བའི་ཚུལ་ནི། རླུང་དབུ་མར་འཇུག་ནུས་པའི་གང་ཟག་གི་རླུང་དབུ་མར་ཞུགས་གནས་ཐིམ་གསུམ་བྱས་པ་ལ་བརྟེན་ནས་
6-16-41b


སྣང་མཆེད་ཐོབ་གསུམ་འོད་གསལ་དང་བཅས་པ་ཤར་བའི་ཚེ་དབུ་མའི་ནང་དུ་རླུང་ཞུགས་པའི་དྲོད་འབར་བའི་སྟོབས་ཀྱིས་ཁམས་དཀར་པོ་ཞུ་བ་དབུ་མའི་ནང་ནས་འབབ་པས་སེམས་བདེ་བའི་ངོ་བོར་མེར་སོང་བ་དེས། ཆོས་ཐམས་ཅད་རང་ངོས་ནས་
གྲུབ་པ་རྡུལ་ཙམ་ཡང་མེད་པའི་སྟོང་པ་ཉིད་ཡིན་སྙམ་དུ་བློ་ཐག་རྦད་བཅད་པའི་འཛིན་སྟངས་ལྷང་ངེ་བ་དེ་ལ་བཞག་ནས་ཆོས་སྐུའི་ངོ་བོར་སོང་སྙམ་པ་བྱེད། ཁྱད་པར་འོད་གསལ་གྱི་སྐབས་སུ་བདེ་སྟོང་གི་ངང་དུ་འཇོག་ཅི་ཐུབ་བྱེད་པ་ཆོས་སྐུ་དང་བསྲེ་
བ་ཡིན་ནོ། །དེ་ནས་འོད་གསལ་ལས་སེམས་གཡོ་བར་རྩོམ་པ་ན་སྙིང་གའི་མི་ཤིགས་པའི་ཐིག་ལེ་ལ་སེམས་གཏད་པས་རང་གི་སེམས་དང་ཤིན་ཏུ་ཕྲ་བའི་རླུང་སེམས་གཉིས་འཁྲུག་སྟེ་འདྲེས་པ་དང་སྙིང་གའི་ཁམས་དཀར་དམར་གྱི་ཐིག་ལེ་དེ་
ཁ་གཤག་སྟེ་བྱེ་བའི་ནང་ནས། ཤིན་ཏུ་ཕྲ་བའི་རླུང་སེམས་དེ་བརྒྱད་སྟེ་ཐོན་ནས་རང་གི་ལུས་འདི་ལས་ཕྱི་རོལ་ཏུ་རྡོ་རྗེ་འཆང་གི་སྐུར་ལངས་པར་བསྒོམ་པ་ནི་ལོངས་སྐུ་དང་བསྲེ་བ་ཡིན་ལ། དེ་ཡང་རླུང་ཐིམ་པའི་འོད་གསལ་ཐོབ་ཙམ་ནས་རྡོ་རྗེ་འཆང་གི་
སྐུར་དངོས་གནས་ལ་ལྡང་མི་ནུས་ཀྱང་ཡིད་ངོར་ལྡང་བ་ཡིན། དེ་ལྟར་རྩེ་གཅིག་ཏུ་གོམས་པར་བྱས་པས་ཚེ་འདིར་སེམས་དབེན་གྱི་དཔེའི་འོད་གསལ་རྫོགས་པར་ཐོབ་པའི་རྣལ་འབྱོར་པ་དེས་སྔར་ལྟར་བསྲེས་པས་རྡོ་རྗེ་འཆང་གི་སྐུར་དངོས་གནས་ལ་
ལྡང་ནུས་ལ། བར་དོར་མཆོག་འགྲུབ་པའི་གང་ཟག་གིས་ཀྱང་འཆི་བ་འོད་གསལ་དཔེའི་འོད་གསལ་གྱི་ངོ་བོར་གྲུབ་ནས། དེའི་མཐར་རྡོ་རྗེ་འཆང་གི་སྐུར་ལྡང་ལུགས་སྔར་ལྟར་བྱས་པས་བར་དོ་གྲུབ་པའི་དོད་ལ་རྡོ་རྗེ་འཆང་གི་སྐུ་འགྲུབ་སྟེ་དེའི་རྒྱུན་ལ་
6-16-42a


སངས་རྒྱ་བ་ཡིན་ནོ། །སྔར་གྱི་ཡིད་ངོར་རྡོ་རྗེ་འཆང་གི་སྐུར་ལངས་པ་དེས་ཀྱང་སྔར་རང་གི་ཕུང་པོ་འདི་རྡོ་རྗེ་འཆང་གི་སྐུར་བསྒོམ་ནས་དེ་ལས་ཡེ་ཤེས་སེམས་དཔའི་ཚུལ་གྱིས་འཇུག་པ་ནི་སྤྲུལ་སྐུ་དང་བསྲེ་བ་ཡིན་ནོ། །
གཞི་ལམ་ཐམས་ཅད་ཀྱི་སྐབས་སུ་རླུང་དབུ་མར་འཇུག་ནུས་པའི་གང་ཟག་གིས་བསྲེ་ཚུལ་འདི་ཁོ་ནར་ངེས་ལ། གཉིད་ཀྱི་སྐབས་སུ་བསྲེ་བ་ཡང་གཉིད་དུ་འགྲོ་བའི་ཚེ་སྙིང་གར་དམིགས་པ་གཏད་པ་དེའི་ཚེ་དབང་ཤེས་ལྔའི་བཞོན་པའི་རླུང་རྣམས་སྙིང་
གའི་རྩ་འདབ་ཀྱི་ནང་དུ་གཉིད་ཀྱི་རྐྱེན་གྱིས་རང་ཤུགས་ཀྱིས་འདུ་བའི་གནད་ཀྱིས་རླུང་དབུ་མར་འདུ་ཕུལ་ཉིན་པར་ལས་ཆེ་བ་ཞིག་འོང་བས། སྣང་མཆེད་ཐོབ་གསུམ་འོད་གསལ་དང་བཅས་པ་ཉིན་པར་ལས་གསལ་བར་འཆར་ཞིང་། དེའི་ཚེ་ཆོས་སྐུ་དང་བསྲེ་
བ་སྔར་ལྟར་བྱེད་ལ། གཉིད་ཀྱི་འོད་གསལ་ལས་སེམས་གཡོས་ནས་རྨི་ལམ་འཆར་བར་རྩོམ་པ་ན། རྨི་ལམ་གྱི་ལུས་རྡོ་རྗེ་འཆང་གི་སྐུར་ལྡང་པའི་ཚུལ་དང་། དེ་ནས་རང་གི་ལུས་ལ་འཇུག་ཚུལ་སྔར་ལྟར་བྱེད་པ་ཡིན་ནོ། །རླུང་དབུ་མར་འཇུག་མི་
ནུས་པའི་གང་ཟག་གིས་འདུན་པའི་སྟོབས་ཀྱིས་བསྲེ་བ་ལ། གཉིད་ཀྱི་སྐབས་སུ་བསྲེ་ཚུལ་དང་། འཆི་བའི་ཚེ་བསྲེ་ཚུལ་གཉིས། དང་པོ་ནི། རླུང་དབུ་མར་འཇུག་མི་ནུས་པའི་གང་ཟག་གིས་འདུན་པའི་སྟོབས་ཀྱིས་གཉིད་ཀྱི་འོད་གསལ་འཛིན་
འདོད་པས་གཉིད་དུ་འགྲོ་བའི་ཚེ། སྣང་མཆེད་ཐོབ་གསུམ་འོད་གསལ་དང་བཅས་པ་འབྱུང་བ་ཅིས་ཀྱང་ཐིམ་པར་བྱེད་དགོས་སྙམ་པའི་འདུན་པ་ཉིན་པར་གྱི་སྐབས་སུ་ཡང་ཡང་དྲག་པོ་གཏང་ནས། གཉིད་ལ་འགྲོ་ཁར་བླ་མའི་རྣལ་འབྱོར་བསྒོམས་
6-16-42b


ལ། བདག་གིས་གཉིད་ཀྱི་འོད་གསལ་འཛིན་ནུས་པར་བྱིན་གྱིས་བརླབ་ཏུ་གསོལ་སྙམ་པའི་གསོལ་འདེབས་དྲག་པོ་བཏབ་སྟེ། སྣང་མཆེད་ཐོབ་གསུམ་སོགས་བྱུང་བར་རིག་པར་བྱེད་དགོས་སྙམ་པའི་དྲན་པ་ལེགས་པར་བསྟེན་ནས་ཉལ་བས། སྨིག་རྒྱུ་
ནས་འོད་གསལ་གྱི་བར་རྫོགས་པའི་གོ་རིམས་མ་འཕྱུགས་པ་མི་འཆར་ཡང་། སྨིག་རྒྱུ། དུ་བ། མཁའ་སྣང་། མར་མེ། ཉི་ཟླ་སོགས་ཀྱི་སྣང་བ་རླུང་དྷཱུ་ཏཱིར་ཐིམ་པ་ལ་བརྟེན་ནས་འབྱུང་བའི་སྣང་བ་དང་འདྲ་རུང་བ་གོ་རིམས་འཆོལ་བ་སྣ་ཚོགས་
འཆར་བ་སྲིད་ལ། དེའི་ཚེ་སྟོང་པ་ཉིད་ཀྱི་ལྟ་བ་རྣམ་དག་གི་སྟེང་དུ་སྔར་ལྟར་འཇོག་པ་ནི་ཆོས་སྐུ་དང་བསྲེ་བ་ཡིན་ནོ། །རྨི་ལམ་འདུན་པའི་སྟོབས་ཀྱིས་བསྲེ་བའི་ཚུལ་ནི། ཉིན་པར་གཉིད་དུ་འགྲོ་ཁ་ཡན་ཆད་ད་ལྟའི་སྣང་བ་འདི་ཐམས་ཅད་རྨི་ལམ་
ཡིན། ངས་རྨི་ལམ་ལ་རྨི་ལམ་དུ་ངོ་ཤེས་པར་བྱེད་དགོས་སྙམ་པའི་དྲན་པ་རྒྱུན་དུ་བསྟེན་པས་རྨི་ལམ་ཤར་བ་ན། རྨི་ལམ་དུ་ངོ་ཤེས་པར་འབྱུང་ལ། དེའི་རྨི་ལམ་གྱི་ལུས་རྡོ་རྗེ་འཆང་དུ་བསྒོམ་པ་ནི། རྨི་ལམ་འདུན་པའི་སྟོབས་ཀྱིས་ལོངས་
སྐུ་དང་བསྲེ་བ་ཡིན་ལ། དེའི་ཚེ་རླུང་དབུ་མར་སྡུད་པའི་གདམས་ངག་བསྒོམ་པ་ནི། རྨི་ལམ་གྱི་དགེ་སྦྱོར་གྱི་གཙོ་བོ་ཡིན་ལ། དེ་ལྟ་བུའི་གདམས་ངག་མི་ཤེས་ན་སྟོང་ཉིད་ཀྱི་ལྟ་བ་རྣམ་དག་གི་སྟེང་དུ་འཇོག་པ་ནི། འོག་མ་རྣམས་དང་ཐུན་མོང་
པ་ཡིན་ནོ། །དེ་ནས་གཉིད་སད་པར་རྩོམ་པ་ན་རང་གི་ལུས་འདི་རྡོ་རྗེ་འཆང་གི་སྐུར་བསྒོམ་པ་ནས། དེ་ལ་ཡེ་ཤེས་སེམས་དཔའི་ཚུལ་གྱིས་ཞུགས་པར་བསྒོམས་ནས་ལྡང་བ་ནི་སད་པ་སྤྲུལ་སྐུ་དང་བསྲེ་བ་ཡིན་ནོ། །འཆི་བའི་ཚེ་འདུན་པའི་སྟོབས་ཀྱིས་
6-16-43a


བསྲེ་ཚུལ་ནི། ཚེ་འདིར་རླུང་དབུ་མར་འཇུག་པའི་ནུས་པ་མ་ཐོབ་ཀྱང་འཆི་བའི་ཚེ་སྨིག་རྒྱུ་ནས་འོད་གསལ་གྱི་བར་འབྱུང་ཚུལ་རྣམས་ལེགས་པར་ངེས་ནས། ཡང་ཡང་ཡིད་ལ་བྱས་པའི་གོམས་པ་ཤུགས་ཅན་ཡོད་པའི་གང་
ཟག་གིས་འཆི་བར་ཐག་ཆོད་པ་ན། ལོངས་སྤྱོད་ཐམས་ཅད་དགེ་ཕྱོགས་སུ་བཏང་། ལུས་དང་ཉེ་འབྲེལ་སོགས་ཚེ་འདིའི་སྣང་བ་གང་ལ་ཡང་ཞེན་ཆགས་མེད་པར་བྱས། དབང་མཚན་ཉིད་དང་ལྡན་པས་སྔགས་སྡོམ་སོར་ཆུད། བླ་མའི་རྣལ་འབྱོར་
བསྒོམས་ནས་གསོལ་བ་དྲག་པོ་བཏབ། དེ་ནས་སྔར་བླ་མས་ཕོག་པའི་གདམས་ངག་གི་དམིགས་པ་ཡིད་ལ་གསལ་བཏབ། རང་ལྷར་བསྒོམས་ནས་སྨིག་རྒྱུ། དུ་བ། མཁའ་སྣང་། མེ་ཁྱེར། མར་མེ་འབར་བ། སྣང་མཆེད་ཐོབ་གསུམ་འོད་
གསལ་དང་བཅས་པའི་སྣང་བ་རིམ་གྱིས་ཤར་བ་ན། ཆོས་སྐུ་དང་བསྲེ་པའི་ཚུལ་སྔར་བཤད་པ་ལྟར་བྱས་ནས་རྩེ་གཅིག་ཏུ་འཇོག་པ་ནི། འདུན་པའི་སྟོབས་ཀྱིས་ཆོས་སྐུ་དང་བསྲེ་བ་ཡིན་ནོ། །དེ་ཡང་སྤྱིར་འཆི་བ་ཆོས་སྐུ་དང་བསྲེ་བའི་གདམས་
ངག་རྣམ་པ་གསུམ་སྟེ། ཚེ་འདིར་སྔར་ནས་སྙིང་གའི་རྩ་མདུད་ལྷག་མ་མ་ལུས་པར་གྲོལ་ནས་སྤྱོད་པ་མ་གྲུབ་པ་དང་དེ་ཙམ་གྱི་རྟོག་པ་མ་ཐོབ་ཀྱང་ངག་དབེན་མན་ཆད་ཀྱི་རླུང་དབུ་མར་ཐིམ་པའི་རྟགས་རྣམས་གྲུབ་པ་དང་། འཆི་བའི་སྔོན་དུ་རླུང་
དབུ་མར་གཏན་ནས་འཇུག་མ་ཐུབ་པའི་གང་ཟག་གསུམ་ཡོད་པ་ལས། གསུམ་པོ་དེས་བར་དོ་ལོངས་སྐུར་ལྡང་ཚུལ་མི་འདྲ་བ་གསུམ་འབྱུང་སྟེ། གང་ཟག་དང་པོ་དེས་འཆི་བ་འོད་གསལ་དཔེའི་འོད་གསལ་དུ་བསྐྱེད་ནུས་པས་དེ་ལས་ལྡང་པ་ན།
6-16-43b


ཤིན་ཏུ་ཕྲ་བའི་རླུང་སེམས་དེ་ལས་བར་དོ་འབྱུང་བའི་དོད་ལ་རྡོ་རྗེ་འཆང་གི་སྐུར་དངོས་གནས་ལ་ལངས་ནས། དེའི་རྒྱུན་ལ་སངས་རྒྱ་བ་ཡིན་ནོ། །གང་ཟག་གཉིས་པ་དེས་འཆི་བ་འོད་གསལ་བདེ་སྟོང་གི་ཏིང་ངེ་འཛིན་ཁྱད་པར་ཅན་གྱི་ངོ་བོར་བསྐྱེད་ནས། 
དེ་ལས་ལྡང་བ་ན་ཤིན་ཏུ་ཕྲ་བའི་རླུང་སེམས་དངོས་གནས་ལ་རྡོ་རྗེ་འཆང་གི་སྐུར་མ་གྲུབ་ཀྱང་། རང་གི་ཡིད་ངོར་རྡོ་རྗེ་འཆང་གི་སྐུའི་རྣམ་པར་ཁྲིག་སྟེ་ལངས་པའི་སྣང་པ་འབྱུང་ངོ་། །གང་ཟག་གསུམ་པས་འཆི་བའི་འོད་གསལ་གྱི་ཚེ་སྟོང་ཉིད་ཀྱི་ལྟ་བ་
རྣམ་དག་ལ་འཇོག་ནུས་ཀྱང་། དེ་ལྟར་ལྡང་པ་ན་རྡོ་རྗེ་འཆང་གི་སྐུར་རང་ལ་སྣང་བའི་ལྡང་ཚུལ་ཀྱང་མི་ནུས་པས། བར་དོ་རང་དགའ་བའི་ལུས་གྲུབ་ནས་བར་དོ་ལ་བར་དོར་ངོ་ཤེས་པ་ན། བར་དོའི་ལུས་འདི་རྡོ་རྗེ་འཆང་གི་སྐུར་བསྒོམ་པ་ཡིན་ལ། དེ་དག་
ནི་གང་ཟག་དེ་རྣམས་ཀྱི་བར་དོ་ལོངས་སྐུ་དང་བསྲེ་བ་ཡིན་ནོ། །དེ་ནས་ཡིད་ངོར་རྡོ་རྗེ་འཆང་གི་སྐུར་ལངས་པ་དང་། བར་དོ་ངོ་ཤེས་ནས་རྡོ་རྗེ་འཆང་གི་སྐུར་བསྒོམ་པ་གཉིས་ཀྱིས་བར་དོའི་སྣང་བ་ཐམས་ཅད་བདེ་སྟོང་གི་ཡེ་ཤེས་ལ་རྣམ་པ་རྡོ་རྗེ་འཆང་
གི་རྣམ་པར་ཤར་པའི་ལྷའི་ངོ་བོར་བསྒོམས་ནས། སྐྱེ་གནས་སོགས་ཐམས་ཅད་ལ་ཆགས་སྡང་དང་ཞེན་པ་བཀག་སྟེ། གང་དུ་སྐྱེ་བའི་ཕ་མ་རྡོ་རྗེ་འཆང་ཡབ་ཡུམ་དུ་བསྒོམས་ནས་དེ་ལ་རང་ཡེ་ཤེས་སེམས་དཔའི་ཚུལ་དུ་འཇུག་པ་ནི་སྐྱེ་བ་སྤྲུལ་སྐུ་
དང་བསྲེ་བ་ཞེས་བྱའོ། །དེ་ལྟར་ཚེ་འདིར་རླུང་དབུ་མར་བཅུག་ནས་ཆོས་སྐུ་དང་བསྲེ་ནུས་པའི་གང་ཟག་གིས་འཆི་བ་འོད་གསལ་ལས་བར་དོར་རྡོ་རྗེ་འཆང་གི་སྐུར་ཡིད་ངོར་ལངས་ཏེ། རང་འདོད་ན་མཁའ་སྤྱོད་ལ་སོགས་པའི་གནས་སུ་འཕོ་བར་ནུས་ལ།
6-16-44a


སྔར་བཤད་པ་ལྟར་སྐྱེ་བ་སྤྲུལ་སྐུ་དང་བསྲེ་བའི་གདམས་ངག་གིས་མིའི་སྐྱེ་གནས་སུ་འཇུག་ནའང་སྔགས་བསྒྲུབ་པའི་རྟེན་ཁྱད་པར་ཅན་དུ་གདོན་མི་ཟ་བར་
སྐྱེས་ནས་ཚེ་དེ་ལ་ལམ་གྱི་རྟོགས་པ་ཁྱད་པར་ཅན་བསྐྱེད་དེ། དེ་ནས་སྐྱེ་བ་མང་པོ་མི་ཐོགས་པར་རྡོ་རྗེ་འཆང་གི་གོ་འཕང་ཐོབ་བོ། །ཚེ་འདིར་རླུང་དབུ་མར་ཞུགས་པའི་རྟོགས་པ་མ་ཐོབ་ཀྱང་། སྐྱེ་ཤི་བར་དོ་གསུམ་སྐུ་གསུམ་དང་བསྲེ་ཚུལ་གྱི་གོ་བ་
ལེགས་པར་ཆགས་ནས། འཆི་ཁར་དམ་ཚིག་དང་སྡོམ་པ་སོར་བཅུག་སྟེ་བླ་མའི་མན་ངག་གི་སྒོ་ནས་འདུན་པའི་བསྲེ་བའི་གདམས་ངག་སྔར་བཤད་པའི་ཐ་མ་དེས་ཀྱང་འདུན་པའི་སྟོབས་ཀྱིས་སྔར་བཞིན་བསྲེས་པས། སྔགས་གྲུབ་པའི་རྟེན་དུ་
སྐྱེས་ཏེ་སྔགས་ཀྱི་ལམ་མ་ནོར་བར་སྟོན་པའི་བཤེས་གཉེན་དང་ཕྲད་ནས་གདམས་ངག་ཕྱིན་ཅི་མ་ལོག་པ་ཐོབ་སྟེ་རྟོགས་པ་ཁྱད་པར་ཅན་བསྐྱེད་པས། དེ་ནས་ངན་སོང་དུ་འགྲོ་བ་མི་སྲིད་པའི་ཕྱིར། སྐྱེ་བ་ཐམས་ཅད་དུ་སྔགས་གྲུབ་པའི་རྟེན་
འབའ་ཞིག་ཏུ་སྐྱེ་ལ། དེ་ཡང་སྐྱེ་བ་སྔ་མ་སྔ་མ་ལས་ཕྱི་མ་ཕྱི་མ་རྟོགས་པ་གོང་ནས་གོང་དུ་འགྱུར་པའི་སྒོ་ནས་མྱུར་དུ་སངས་རྒྱ་བར་གདོན་མི་ཟའོ། །གལ་ཏེ་གདམས་ངག་དང་ལྡན་པའི་གང་ཟག་ལ་སྣང་མཆེད་ཐོབ་གསུམ་སོགས་རིམ་གྱིས་
འབྱུང་བ་མིན་པའི་གཡང་དུ་ལྷུང་བ་སོགས་ཀྱིས་གློ་བུར་དུ་འཆི་དགོས་པ་བྱུང་ན། ཚེ་འདི་ལ་སྲེད་པ་རྦད་བཅད་ནས་སྣང་བ་འདི་ཐམས་ཅད་ཡུལ་སྟེང་ནས་གྲུབ་རྒྱུ་མེད་སྙམ་པའི་བདག་མེད་པའི་སྟེང་དུ་བཞག་ནས་བར་དོ་གྲུབ་པའི་ཚེ་བསྲེ་ཚུལ་སྔར་
6-16-44b


ལྟར་བྱེད་དེ་ལྟར་བྱས་པས་གདོན་མི་ཟ་བར་ངན་འགྲོ་ལས་ཐར་རོ། །དེ་ལྟར་བདག་གི་དད་པའི་ལྕགས་ཀྱུ་ཡིས། །དཔལ་ལྡན་བླ་མའི་ཐུགས་ཀྱི་བང་མཛོད་ལས། །མན་ངག་ཡིད་བཞིན་ནོར་བུའི་ཚོགས་བླངས་ཏེ། །བརྩོན་པས་ཉམས་
པ་མེད་པའི་བྱི་དོར་བྱས། །སྐལ་བཟང་ཐེག་པ་མཆོག་གི་རིགས་ལྡན་ཞིང་། །རྣམ་དཔྱོད་དམ་ཚིག་ལྡན་པའི་སློབ་མ་ཡིས། །མཆོག་ཏུ་དད་པའི་གསུང་གིས་བསྐུལ་བའི་ངོར། །རྡོ་རྗེ་འཛིན་པ་ཆོས་ཀྱི་རྒྱལ་མཚན་གྱིས། །ལྷག་བསམ་དག་པའི་
སེམས་ཀྱིས་སྦྱར་བ་ལ། །གནས་གསུམ་མཁའ་འགྲོའི་ཚོགས་ཀྱིས་བཟོད་པར་མཛོད། །རབ་དཀར་དགེ་བའི་མཐུ་ཡིས་འགྲོ་བ་ཀུན། །སྐྱེ་ཤི་བར་དོའི་གཡང་ས་ལས་གྲོལ་ནས། །རྣམ་མཁྱེན་ཐར་པའི་ཁང་བཟང་ཉམས་དགའ་བར། །ཟག་
མེད་བདེ་བའི་དཔལ་ལ་སྤྱོད་པར་ཤོག །རྗེ་བཙུན་མར་པ་ལྷོ་བྲག་པའི་གདམས་པ་བསྲེ་འཕོའི་གདམས་པའི་གནད་མ་ལུས་པ། རྗེ་བཙུན་འཇམ་དཔལ་དབྱངས་དང་གྲུབ་ཆེན་གྱིས་བྱིན་གྱིས་བརླབས་པ་ལ་བརྟེན་ནས། རྗེ་བཙུན་ཙོང་ཁ་
པས་རྙེད་པའི་ཚུལ་གསང་བའི་རྣམ་པར་ཐར་པ་ནས་འབྱུང་ནའང་རྗེ་ཡབ་སྲས་རྣམས་ཀྱི་གསུང་རབ་རྣམས་སུ་བཤད་པ་རྒྱས་པར་བཀོད་པ་ལ་བརྟེན་ནས་གོ་བའི་སྤྱི་ལེགས་པར་ཆགས་ཐུབ་པ་ཡོད་མོད། །ཉམས་ལེན་ལ་དྲིལ་བའི་ཚེ་གདམས་
ངག་གི་གནད་ཞིབ་ཆ་ཞལ་ལས་ཤེས་དགོས་པ་རྣམས་གསལ་བར་སྟོན་ཏེ། བསྲེ་བའི་ཚུལ་བདག་གིས་རྒྱས་པར་བཀོད་པ་ལས། སླར་ཡང་ལག་ཏུ་བླང་བའི་ཕྱིར་ཉུང་ངུར་བསྡུས་ནས་སྦྱར་བའི་དགེ་བས། བདག་དང་དམ་ཚིག་ལྡན་
6-16-45a


པའི་སློབ་མའི་ཚོགས་རྣམས་སྐྱེ་བ་འདིའི་འོག་རོལ་ཏུ་མཁའ་སྤྱོད་དང་། རིག་པ་འཛིན་པའི་སྐྱེ་གནས་སུ་སྐྱེ་བར་གྱུར་ཅིག །སམ་ཡ་མུ་ཁཾ། འདིས་ཀྱང་བསྟན་པ་རྒྱས་པར་གྱུར་ཅིག །འདི་ཡང་ཆོས་རྗེ་
བ་སོ་བའི་ཟིན་བྲིས་སོ། །  བཅུ་གསུམ་པ་འཕོ་བའི་ཡིག་ཆུང་ལ་གཉིས། རྩ་བ་དང་ཡན་ལག་གོ། །དང་པོ་ནི། རྗེ་བཙུན་དམ་པ་རྣམས་ལ་ཕྱག་འཚལ་ལོ། །འཕོ་བའི་རྣལ་འབྱོར་གྱི་ཡི་གེ་བཀོད་པའི་སྐབས་སུ་
སྙིང་ག་ཆོས་ཀྱི་འཁོར་ལོའི་དབུས་ཀྱི་དྷཱུ་ཏཱིའི་ནང་དུ་སྲོག་འཛིན་གྱི་རླུང་གི་ངོ་བོ་རླུང་གི་དཀྱིལ་འཁོར་གཞུ་བདུངས་པ་ལྟ་བུ་ཐུར་དུ་ལྟ་བའི་དཀྱིལ་ནས་རང་གི་རྣམ་ཤེས་ཀྱི་ངོ་བོ་ཧཱུཾ་ཡིག་མགོ་ཐུར་དུ་ལྟ་བ། ཧཱུཾ་གི་ཀླད་ཀོར་གྱི་འོག་ཏུ་རྣམ་ཤེས་ཀྱི་
བཞོན་པར་གྱུར་པའི་རླུང་མཚོན་བྱེད་ཡུཾ་ཡིག་གཉིས་མགོ་ཐུར་དུ་བསྟན་ཏེ་གཤིབས་པའི་ཡུཾ་གྱི་ཞབས་ཀྱུ་གཉིས་ཀྱི་བར་དུ་ཧཱུཾ་ཡིག་ཀླད་ཀོར་ཆུད་ཙམ་བྱེད་ཅིང་། ཡུཾ་གཉིས་པོ་དེའི་བར་དུ་ཧཱུཾ་ཡིག་མགོ་ཐུར་དུ་བལྟ་བ་ཆུད་པར་བྱེད། ཧཱུཾ་ཡིག་གི་
ཞབས་ཀྱུའི་སྟེང་དུ་རྣམ་ཤེས་ཀྱི་བཞོན་པའི་རླུང་གི་ངོ་བོ་ཡུཾ་ཡིག་གཉིས་མགོ་ཐུར་དུ་ལྟ་བའི་ཡུཾ་གཉིས་ཀྱི་ཀླད་ཀོར་གྱི་བར་དུ་ཧཱུཾ་གི་ཞབས་ཀྱུ་ཆུད་ཙམ་བྱེད་ཅིང་། ཡུཾ་གཉིས་པོ་དེའི་བར་དུ་ཀ་ཡིག་མགོ་ཐུར་དུ་ལྟ་བ་ཆུད་པར་བྱེད་དོ། །དེ་
ལྟར་བྱས་པས་འཕོ་ཁྲིད་ཆེན་མོ་དང་། རྗེ་བཙུན་ཙོང་ཁ་པ་ཆེན་པོའི་བསྲེ་འཕོའི་མན་ངག་དང་། མན་ངག་སྙེ་མ་རྣམས་དང་མི་འགལ་ཞིང་། དགོངས་པ་གཅིག་པའི་ངེས་པ་བདེ་བླག་ཏུ་སྟེར་བར་འགྱུར་ཞིང་། འཕོ་ཁྲིད་ཆེན་མོའི་སྐབས་དང་།
6-16-45b


མན་ངག་སྙེ་མར་ཡུཾ་གྱི་བར་དུ་ཧཾ་བཀོད་ཅེས་པའི་དོན་ཡང་ཁོང་དུ་ཆུད་པར་འགྱུར་རོ། །འཕོ་བའི་སྐབས་ཀྱི་ཡབ་ཡུམ་གཉིས་ཀ་མགོ་གྱེན་ལྟ་བྱེད་པའི་དོན་ཧཱུཾ་ཡིག་གི་མགོ་ཕྱོགས་ལ་སྟེང་དུ་བྱས་ནས་དེ་ལྟར་བྱ་ལ། གྱེན་དུ་ལྟ་ཞེས་གསུངས་
པ་ཡིན་ཅིང་། ཧཱུཾ་དང་མགོ་བོ་ལྟ་ཕྱོགས་མི་འདྲ་བ་མིན་ནོ། །སྲོག་འཛིན་གྱི་རླུང་མཚོན་བྱེད་ཀྱི་དཀྱིལ་འཁོར་གཞུ་བདུངས་པ་ལྟ་བུའི་དབུས་སུ་བསྒོམ་ཞེས་པའི་དོན་ཤེལ་དྭངས་པའི་ཕྲེང་བའི་དཀྱིལ་ནས་ཡར་ཕྲེང་ཐག་ཡོད་པ་ལྟར་བསྒོམ་པ་
མན་ངག་ཡིན་ནོ། །སྙིང་གར་ཡི་གེ་ལྔ་ཞེས་དངོས་སུ་གསུངས་ཤིང་། འདིར་ཡི་གེ་བདུན་དུ་བྱེད་པ་མི་འགལ་ཏེ། སྟེང་གི་ཡུཾ་གཉིས་པོ་ངོ་བོ་གཅིག་དང་། འོག་གི་ཡུཾ་གཉིས་པོ་ངོ་བོ་གཅིག་པས་སྐྱོན་མེད་དོ། །མན་ངག་འདི་དང་མི་ལྡན་པར། །
འཕོ་བའི་ཉམས་ལེན་བྱེད་པ་ཀུན། །སྨིག་རྒྱུའི་ཆུ་ལ་འཐུང་དང་མཚུངས། །དེ་བས་འདི་ལ་གཅེས་པར་བཟུང་། །འཕོ་བའི་མན་ངག་ཤིན་ཏུ་གཅེས་པའི་ཡིག་ཆུང་མཁས་གྲུབ་རྗེས་ཟིན་བྲིས་མཛད་པ་བཀའ་རྒྱ་དམ་པར་ཡོད་དོ། །  གཉིས་
པ་དེའི་ཡན་ལག་རྒྱས་པར་བཤད་པ་ནི། དྲུག་པ་རྡོ་རྗེ་འཆང་གི་ངོ་བོ་རྗེ་བཙུན་བླ་མ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པའི་ཞབས་ལ་ཕྱག་འཚལ་ལོ། །བརྩེ་བ་ཆེན་པོས་དུས་ཐམས་ཅད་དུ་བཟུང་དུ་གསོལ། འཕོ་བ་བསྡུས་ཏེ་ཉམས་
སུ་བླང་ཚུལ་ནི། ད་ལྟ་ནས་སྒོམ་པར་བྱེད་ཚུལ་དང་། དུས་ཐ་མར་ལས་ལ་སྦྱོར་ཚུལ་གཉིས། དང་པོ་ནི། རང་ཡི་དམ་ལྷ་གང་ཡིན་དུ་བསྒོམ། ལུས་ཀྱི་དབུས་དྲང་པོ་ནས་རྩ་དབུ་མ་ཐལ་མར་སྟེང་འོག་ཏུ་ཡོད་པའི་སྙིང་གའི་རྩ་འཁོར་གྱི་དྷཱུ་ཏཱིའི་
6-16-46a


ནང་ན་རང་གི་རྣམ་ཤེས་ཀྱི་ངོ་བོ་ཧཱུཾ་ཡིག་སྔོན་པོ་མགོ་ཐུར་དུ་བལྟས་པ། དེའི་མགོ་བོའི་འོག་ཏུ་ཡུཾ་ཡིག་སྔོན་པོ་མགོ་ཐུར་དུ་བལྟས་པ་གཉིས་ཀྱི་མཇུག་མའི་ཧཱུཾ་ཡིག་མགོ་བོ་གཡས་གཡོན་ནས་བརྟེན་པ། དེའི་འོག་ཏུ་ཀ་ཡིག་
སྔོན་པོ་མགོ་ཐུར་དུ་བལྟས་པའི་མཇུག་མ་ཡུཾ་ཡིག་གཉིས་ཀྱིས་མཇུག་མས་གཡས་གཡོན་ནས་བརྟེན་པ། ཧཱུཾ་གི་ཞབས་ཀྱུའི་སྟེང་དུའང་ཡུཾ་ཡིག་སྔོན་པོ་མགོ་ཐུར་དུ་བལྟས་པ་གཉིས་ཀྱིས་ཧཱུཾ་གི་ཞབས་ཀྱུའི་གཡས་གཡོན་ནས་བརྟེན་པ། དེའི་སྟེང་དུ་
ཧཾ་ཡིག་སྔོན་པོ་མགོ་ཐུར་དུ་བལྟས་པའི་མགོ་བོ་ཡུཾ་ཡིག་གཉིས་ཀྱི་མཇུག་མས་གཡས་གཡོན་ནས་བརྟེན་པ་གསལ་བཏབ། རང་གི་ཤེས་པ་དབུས་ཀྱི་ཧཱུཾ་ཡིག་དང་དབྱེར་མེད་དུ་བྱས་ནས་སྤྱི་བོ་ཚངས་བུག་གི་བར་གྱི་དབུ་མའི་ནང་མར་མེ་བཏེག་པ་
བཞིན་གསལ་སིང་ངེ་མཐོང་བར་མོས། ཚངས་བུག་གི་ནང་ན་ཧཾ་ཡིག་དཀར་པོ་མགོ་ཐུར་དུ་བལྟས་པས་བཀག་པར་བསྒོམ། དེ་ནས་རླུང་ཕྱིར་འགྲོ་བ་ན་སྙིང་གའི་ཡི་གེ་ཐམས་ཅད་མགོ་གྱེན་དུ་ལྟ་བ་དང་མཉམ་དུ་སྔར་གྱི་ཡི་གེ་བརྩེགས་པའི་རིམ་
པ་དེ་འགྱུར་ནས་སྔར་འོག་ན་གནས་པའི་ཀ་ཡིག་སྔོན་དུ་འགྲོ ། དེའི་རྗེས་སུ་འོག་གི་ཡུཾ་ཡིག་གཉིས། དེའི་རྗེས་སུ་དབུས་ཀྱི་ཧཱུཾ། དེའི་རྗེས་སུ་སྟེང་གི་ཡུཾ་ཡིག་གཉིས། དེའི་རྗེས་སུ་སྟེང་གི་ཧཾ་ཡིག་གཉིས་འགྲོ་བའི་ཚུལ་གྱིས་རླུང་གིས་བདས་ནས་
ཚངས་བུག་གི་ཧཾ་ཡིག་ལ་རེག་པ་ཙམ་དུ་ཐལ་མར་འགྲོ་བར་བསྒོམ། རླུང་ནང་དུ་འཇུག་པ་ན་ཡི་གེ་རྣམས་མགོ་མཇུག་བསྒྱུར་ནས་སྔར་སྙིང་གར་གནས་པའི་རིམ་པ་བཞིན་དུ་བྱས་ཏེ། རླུང་གིས་ཐུར་དུ་བདས་ནས་སྙིང་གའི་རྩ་འཁོར་གྱི་དབུས་སུ་འོངས།
6-16-46b


དེ་ལྟར་འབྱུང་འཇུག་དང་བསྟུན་ནས་སྟེང་འོག་ཏུ་འགྲོ་འོང་བྱེད་པ་བར་མ་ཆད་པ་ཅི་ཙམ་ནུས་ནུས་ཀྱི་བར་བསྒོམ། སྤྱི་གཙུག་ཟ་བ་དང་འཁྲིག་པ་སོགས་བྱུང་ན་ལེགས་པོ་འབྱོངས་པ་ཡིན་པས། ནུས་པ་མི་ཉམས་ཤིང་བརྟན་པ་ཐོབ་པའི་ཕྱིར་དེ་
ནས་ཀྱང་རྒྱུན་ལྡན་དུ་བསྒོམ་དགོས་སོ། །གོང་གི་ཡི་གེ་རྣམས་ཚང་བར་བསྒོམ་མ་ནུས་ན་སྙིང་གའི་དབུས་སུ་ཧཱུཾ་ཡིག་གཅིག་པུ་བསྒོམ། དེ་དང་ཤེས་པ་བསྲེས་ནས་སྔར་ལྟར་སྦྱོར་བ་ཡིན་ནོ། །ལས་ལ་སྦྱོར་བ་ནི། དུས་ལ་བབ་པའི་ཚེ་ལུས་ལོངས་
སྤྱོད་ལ་ཆགས་ཞེན་སྤངས། སྤྱི་གཙུག་གི་ཧཱུཾ་ཡིག་གསལ། སྤྱི་བོར་བླ་མ་རྡོ་རྗེ་འཆང་གི་རྣམ་པ་ཅན་དུ་བསྒོམ། གསོལ་བ་དྲག་ཏུ་བཏབ། རང་གི་ཤེས་པ་ཧཱུཾ་དང་བསྲེས། ཧིག་ཉེར་གཅིག་བརྗོད་པ་དང་ཤེས་པ་ཧཱུཾ་དང་བསྲེས་པ་དེ་དབུ་མའི་ནང་
ནས་གྱེན་དུ་སོང་སྟེ། ཚངས་བུག་སྐར་ཁུང་ཁ་བྱེ་བ་འདྲ་བ་དེ་ནས་ཐལ་མར་ཐོན་ཏེ་བླ་མའི་ཐུགས་ཀར་ཐིམ་པས། ཆོས་སྐུའི་ངང་དུ་དབྱེར་མེད་དུ་འདྲེས་པར་བསྒོམ། དེ་ལྟར་བྱས་པས་མཁའ་སྤྱོད་ལ་སོགས་པའི་གནས་སུ་འགྲོ་བར་གདོན་མི་
ཟའོ། །བློ་མཆོག་ཏུ་གྱུར་པས་ནི་རིགས་དྲུག་གི་གནས་སོ་སོར་འཕོ་བའི་སྒོ་དགུར་ཡི་གེ་བཀོད་ནས། འགོག་པའི་རྣལ་འབྱོར་གྱིས་སྒོ་དེ་དག་ནས་རྒྱུ་བའི་རླུང་རེངས་པར་བྱེད་པ་དང་། ལྟེ་བར་བུམ་པ་ཅན་གྱི་རྣལ་འབྱོར་གྱིས་རླུང་དྷཱུ་ཏཱིར་འཇུག་པ་ལ་
འབད་ནས། དེའི་རྗེས་སུ་ལྟེ་བའི་བུམ་པ་ཅན་གྱི་རླུང་དྷཱུ་ཏཱིར་ཞུགས་པའི་ལྷན་སྐྱེས་ཀྱི་ཡེ་ཤེས་དེ་ལས་ལྡང་བར་རྩོམ་པ་ན། དྷཱུ་ཏཱིའི་དབུས་ཀྱི་གཏུམ་མོའི་མེ་ཤིན་ཏུ་ཕྲ་ཞིང་རྣོ་བ་གྱེན་དུ་སོང་སྟེ། སྙིང་གའི་དྷཱུ་ཏཱིའི་ནང་གི་ཡི་གེ་རྣམས་ལ་
6-16-47a


ཕོག་པས་ཡི་གེ་རྣམས་སྔར་བཤད་པ་བཞིན་མགོ་གྱེན་དུ་ལྡོག་པ་དང་མཉམ་དུ་སྙིང་གའི་རྩ་འདབ་རྣམས་གདུགས་ཁ་སྤུབ་པ་ལྟ་བུའི་དབྱིབས་སུ་ཡོད་པ་དེ་གྱེན་དུ་ལྡོག་ནས། གདུགས་ཁ་གྱེན་དུ་བསྟན་པ་ལྟ་བུར་
བསྒོམ་ཞིང་། ཡི་གེ་རྣམས་ཐུར་དུ་བབས་ཏེ་སྙིང་གར་སླེབ་མ་ཐག་སྔར་བཞིན་རྩ་འདབ་ཁ་ཐུར་ལྟས་སུ་སོང་བར་བསྒོམ་པ་ཡིན་ནོ། །སྒོ་དགུའི་ཡི་གེ་འགོད་ཚུལ་ཁྲིད་ཡིག་ཆེན་མོ་གསེར་གྱི་སྒོ་འབྱེད་དུ་མཛད་པ་ལྟར་ཡིན་ཅིང་། ཆོས་རྗེ་ཤཱཀ་
ཡེས་པ་ལ་གནང་བའི་ཡིག་ཆུང་དུ་སྟེང་འོག་ཏུ་ཡུཾ་ཡིག་རེ་རེ་ལས་མ་གསུངས་ཤིང་། ཡི་གེ་འགའ་ཞིག་མགོ་གྱེན་བསྟན་དང་། ཁ་དོག་དཀར་པོར་མཛད་ཀྱང་ཕྱིས་ཁྲིད་ཡིག་ཆེན་མོར་སྔར་བཞིན་དུ་མཛད་པ། མཁས་གྲུབ་ཐམས་ཅད་མཁྱེན་པ་
ནས་བརྒྱུད་པ་དང་། ཇོ་གདན་བསོད་ནམས་ལྷུན་གྲུབ་ནས་བརྒྱུད་པ་གཉིས་ཀ་ཡིག་ཆུང་བདུན་དང་། འགོད་ཚུལ་སྔར་ལྟར་མཛད་པ་ཡིན་ཅིང་། ཡིག་ཆར་མི་གསལ་བ་བླ་མས་བསྟན་དགོས་པའི་ཞལ་ཤེས་ནི་རྩ་འཁོར་ལྡོག་པ་དང་། ཡི་གེ་ལྡོག་
པའི་ཚུལ་ཡིན་ལ། རྩ་འཁོར་ལྡོག་པའི་ཚུལ་ནི། གདུགས་ཕྱི་ནང་བསྒྱུར་བ་བཞིན་བླ་འོག་བསྒྱུར་བ་མིན་གྱིས། དམིགས་པ་སྔར་བཞིན་བྱས་པ་ན་རྩ་འཁོར་གྱི་ལྟེ་བ་ལ་འོག་ནས་འོང་བའི་རླུང་འཕོག་པའི་ཤུགས་ཀྱིས་དར་གྱི་ཤམ་བུ་གྱེན་དུ་བཏེག་
པ་བཞིན་བསྒོམ་པ་ཡིན་ལ། འཆི་བའི་དུས་སུའང་སྙིང་གར་རླུང་འདུས་པ་ན་རྩ་འདབ་གྱེན་ལ་ཕྱོགས་ཚུལ་དེ་བཞིན་དུ་འོང་བ་ཡིན་ནོ། །ཡི་གེ་ལྡོག་པའི་ཚུལ་ནི། དབྱུག་པ་མགོ་མཇུག་བསྒྱུར་བ་ལྟར་སོང་བར་བསྒོམ་པ་དང་། ཁ་ཅིག་ཐང་སྐུའི་
6-16-47b


ཞལ་ཁེབས་བསྒྲིལ་བ་ལྟར་འོག་ནས་རིམ་པ་བཞིན་བསྒྲིལ་ནས། སྟེང་འོག་བསྒྱུར་བར་བསྒོམ་པ་རྣམས་ནི་དོན་མ་གོ་བར་བློས་བཏགས་ཀྱིས་ཚོད་འཇོག་པ་ཡིན་པས་མི་རུང་ངོ་། །དེས་ན་ཡི་གེ་དེ་དག་གི་ཕྱི་རོལ་ཏུ་རླུང་ཕོག་པས་ཞྭ་རླུང་གིས་ཁྱེར་བ་ལྟར་སོང་
བ་མ་ཡིན་གྱི། དྷཱུ་ཏཱིའི་ནང་ནས་གྱེན་དུ་འོངས་པའི་རླུང་དེ་ཡི་གེ་དེ་དག་གི་ནང་དུ་ཞུགས་པས་རེ་རེ་ཞིང་ཕྱི་ནང་ལོག་སྟེ་རླུང་དང་ལྷན་ཅིག་ཏུ་སྟེང་དུ་སོང་བས། དར་གྱི་སྦུ་གུའི་ནང་དུ་དབྱུག་པ་བརྫངས་ནས་ཕྱི་ནང་ལོག་པ་ན་འོག་ན་གང་ཡོད་པ་དེ་དབྱུག་པའི་རྩེ་ལ་
བླངས་ཏེ་སྟེང་དུ་འོང་ལ། སྔར་སྟེང་ན་གང་ཡོད་པ་དེ་དག་འོག་མར་འགྱུར་བ་བཞིན་ནོ། །དེ་བཞིན་དུ་འོག་ཏུ་འཇུག་པ་ནའང་རླུང་སྣ་བུག་ནས་ནང་དུ་འཇུག་པ་ནའང་། རླུང་གིས་ཀ་ཡིག་གི་རྩེ་ནས་སྔར་བཞིན་ལྡོག་པས་ཀ་ཡིག་ཕྱི་ནང་ལོག་པ་བཞིན་མགོ་
ཐུར་དུ་བསྟན་ནས་རླུང་གིས་རྩེ་ལ་སྔོན་དུ་ཁྱེར་ཏེ། གཞན་རྣམས་རེ་རེ་ནས་ལྡོག་པས་སྙིང་གར་བཀོད་པའི་རིམ་པ་བཞིན་བྱས་ནས་སྙིང་གར་སླེབ་པ་ན་དེའི་ཤུགས་ཀྱིས་རྩ་འདབ་རྣམས་ཀྱང་ཁ་ཐུར་དུ་ལྟ་བ་ཡིན་ནོ། །བླ་མའི་མན་ངག་ལས་ཤེས་དགོས་
པ་འདི་རྣམས་མ་གཏོགས་ཡིག་ཆར་གསལ་བ་ཁོ་ན་ཡིན་གྱི། འདི་དག་ལས་གཞན་པའི་མན་ངག་གཞན་གྱི་འཁྲིད་ལུགས་སྣ་རེ་ཙམ་མཐོང་བ་དང་ཐོས་པ་འདིར་བསྲེ་བ་དང་། ཕོ་ཚོད་ཀྱིས་སྦྱར་བའི་ཡི་གེ་མང་དུ་བྱས་ནས་རྗེ་ཙོང་ཁ་པའི་ཞལ་
ཤེས་ཡིན་ནོ་ཞེས་སྨྲ་བ་ནི། རྙེད་པ་དང་བཀུར་སྟི་སྒྲུབ་པའི་ཕྱིར་ལུགས་མི་མཐུན་པ་རྣམས་གཅིག་ཏུ་བསྲེས་པས། འཆོལ་མའི་བུ་ལྟ་བུའི་གདམས་ངག་གིས་གཞན་རྣམས་སླུ་བར་བྱེད་པ་ཡིན་པས། བློ་གྲོས་དང་ལྡན་པ་ཡང་དག་པའི་
6-16-48a


ལམ་དོན་དུ་གཉེར་བ་རྣམས་ཀྱིས་རིང་དུ་དོར་ཏེ་ལམ་བཟང་པོ་ལ་འཇུག་པར་བྱའོ། །མན་ངག་ཡིད་བཞིན་ནོར་བུ་འདི། །དད་པའི་རྒྱལ་མཚན་རྩེར་བཀོད་པས། །རྡོ་རྗེའི་ཚེ་ལ་དབང་ཐོབ་ནས། །བསམ་བཞིན་དག་
པའི་གནས་བགྲོད་ཤོག །གཅུང་ཆོས་རྒྱལ་པའི་ཟིན་བྲིས་སོ། ། བཅུ་བཞི་པ་བོགས་འདོན་ལ་མདོར་བསྟན་རྒྱས་བཤད་གཉིས་ལས། དང་པོ་ནི། རྗེ་བཙུན་བླ་མ་རྡོ་རྗེ་འཆང་དང་དབྱེར་མ་མཆིས་པ་དང་དཔའ་
བོ་མཁའ་འགྲོའི་ཚོགས་ལ་ཕྱག་འཚལ་ལོ། །དངོས་གྲུབ་རྒྱ་འཚོ་འདུ་བར་མཛོད། ལུས་དབེན་གྱི་སྐབས་སུ་དམིགས་རྟེན་གསལ་བོ་བྱུང་ཡང་། རླུང་ཇི་ལྟ་བ་བཞིན་འདུ་མ་འདོད་ན་རྩའི་སྦུབས་ཐམས་ཅད་ནས་རླུང་སྤོས་རེང་གི་དུད་པའི་རྣམ་པ་ཅན། 
སྟོང་སྨད་ཐམས་ཅད་ནས་དམིགས་པས་བཀུག་སྟེ། དམིགས་རྟེན་ལ་ཐིམ་པ་ཡང་ཡང་བྱས་པས་མྱུར་དུ་གནས་དེར་འདུས་ནས་རྟགས་རྣམས་འཆར་བའི་རླུང་གི་བོགས་འདོན་ཁྱད་པར་བ་ཡིན་ནོ། །ལུས་དབེན་སོགས་གང་གི་སྐབས་སུའང་སེམས་
རྨུགས་པ་དང་བྱིང་བ་སོགས་བྱུང་ན་རྩའི་ནང་ཐམས་ཅད་དང་ཁྱད་པར་དབུ་མའི་ནང་དུ་སྒྲོན་མེ་ཤིན་ཏུ་གསལ་བའི་འོད་ཀྱིས་ཁྱབ་པ་ལྟ་བུར་འཚེར་ཞིང་དྭངས་པ་བསྒོམ་པར་བྱའོ། །འདི་གསལ་བའི་བོགས་འདོན་ཡིན་ནོ། །དམིགས་པ་གསལ་ཡང་
བདེ་ཉམས་ཆུང་ན་རྩའི་ནང་ཐམས་ཅད་བྱང་སེམས་སྐར་མ་ཤར་བ་ལྟ་བུས་གང་བ། བདེ་བ་ཆེན་པོའི་ངོ་བོར་ཞུ་བ་རྣམས་དབུ་མ་ལ་ཕྱོགས་པར་རྒྱུག་པ། ཁྱད་པར་སྤྱི་བོའི་ཧཾ་ཞུ་བ་དགའ་བཞིའི་རིམ་པས་འོངས་པ་དང་འགྲོགས་ཏེ་ནོར་བུའི་རྩེར་སླེབས་
6-16-48b


པས། ལྷན་ཅིག་སྐྱེས་པའི་དགའ་བ་མྱོང་བར་བསམ་པ་ནི་རླུང་འདུ་ཞིང་བདེ་བའི་བོགས་འདོན་པ་ཡིན་ནོ། །གཉིས་པ་ནི། གཤེད་སྐོར་སོགས་རྫོགས་རིམ་གཞན་གྱི་སྐབས་སུའང་། དམིགས་རྟེན་ཐིག་ལེ་སོགས་གསལ་བཏབ་ནས་དེའི་རྗེས་སུ་སེམས་
ཐིག་ལེ་ལ་ཐིམ་པའི་ཚུལ་གྱིས་བཅུག་ནས། འཛིན་པའི་ཚུལ་ལ་མཁས་པར་བྱས་ཏེ་རྩེ་གཅིག་ཏུ་བསྒོམས་པས་རྟགས་བཞི་དང་སྟོང་པ་བཞི་འཆར་ཞིང་དེ་དང་དུས་མཉམ་དུ་དགའ་བ་བཞི་ཡང་འདི་དག་གི་སྐབས་སུ་སྟོབས་ཆེ་བར་འབྱུང་མོད། འོན་
ཀྱང་དམིགས་པ་གསལ་ཉམས་ཆུང་བ་དང་། བདེ་བ་ཤས་ཆུང་བ་བོགས་འདོན་པའི་ཞལ་ཤེས་ནི། རང་ཡི་དམ་དུ་གསལ་བཏབ་པའི་ལྟེ་བ་དང་། གསང་གནས་སོགས་སུ་དམིགས་པ་གཏོད་པ་དང་། ཕྲ་མོ་བསྒོམ་པ་སོགས་རང་རང་གི་དམིགས་རྟེན་
འོད་ཟེར་འཕྲོ་བ་འཚེར་བ་མེ་འབར་ལ་ཁད་པའི་རྣམ་པར་བསྒོམས་ལ། དེ་ནས་ཡུམ་གྱི་དྷཱུ་ཏཱིའི་ནང་ནས་རླུང་ཤིན་ཏུ་ཕྲ་བ་རྟ་རྔ་ལྟ་བུ་ཞིག་སྔོ་ཁྱུག་སྟེ་བྱུང་བས་དམིགས་རྟེན་ལ་འཕོག་པས། དམིགས་རྟེན་དེ་ལས་མེ་ལྕེ་ཕྲ་མོ་ཤིན་ཏུ་འཚེར་བ་ཞིག་
འཐོན་པའི་འོད་ཟེར་དྷཱུ་ཏཱིའི་ནང་ནས་ཡར་སོང་བས། ལུས་ཀྱི་ནང་དྷཱུ་ཏཱིའི་རྩ་འཁོར་ཐམས་ཅད་དང་དེ་ལས་གྱེས་པའི་རྩ་སོ་སོའི་ནང་ཐམས་ཅད་མུན་ཁུང་དུ་མར་མེ་བཏེག་པ་བཞིན་དུ་གསལ་བར་བསྒོམས་པས། དམིགས་པ་ཤིན་ཏུ་གསལ་ཉམས་
ཆེ་བར་འགྱུར། བདེ་བ་ཆེན་པོ་བསྐྱེད་པའི་བོགས་འདོན་ནི་གཞན་སྔར་ལྟར་འདྲ་བ་ལ་ཡུམ་གྱི་གསང་གནས་ནས་རླུང་གོང་ལྟར་བྱུང་ནས། རང་གང་དུ་དམིགས་པ་གཏད་པའི་ཐིག་ལེ་དང་ཡི་གེ་སོགས་མེ་འབར་ལ་ཁད་པ་ཤིན་ཏུ་འཚེར་བ་དེ་ལ་ཕོག་
6-16-49a


ནས། དེ་ལས་མེ་ལྕེ་ཕྲ་མོ་ཤིན་ཏུ་རྣོ་བ་ཞིག་རྦད་ཆད་ནས་དབུ་མའི་ནང་ནས་ཡར་སོང་བའི་འོད་ཀྱིས་རྩ་སྦུབས་ཐམས་ཅད་གསལ་བའི་ནང་བྱིན་པོ་ནས་ཐིག་ལེ་དཀར་པོ་སྲན་མ་ཙམ་དང་། ཡུངས་ཀར་ཙམ་གནས་པ་ཐམས་
ཅད་ནས་སྐར་མ་དང་ཟླ་བ་ཤར་བ་བཞིན་སོང་སྟེ་མཐོང་བས་བདེ་མེར་བྱུང་བར་བསམས་ཤིང་། མེ་ཕྲ་མོ་དེ་སྐར་མདའ་འཕངས་པ་བཞིན་དུ་དབུ་མའི་ནང་ནས་གྱེན་དུ་སོང་སྟེ་སྤྱི་བོའི་རྩ་འཁོར་གྱི་དབུས་ཧཾ་ཡིག་དཀར་པོ་བྱང་ཆུབ་ཀྱི་སེམས་ཀྱི་རང་
བཞིན་མགོ་ཐུར་དུ་ལྟ་བ་དེ་ལ་ཕོག་པས། འོ་རྐྱལ་ཕུག་པ་བཞིན་དེའི་ནང་དུ་ཐིམ་སོང་ནས་ཧཾ་ཡིག་ལས་ཀྱང་བྱང་སེམས་དཀར་པོ་ཤ་ར་ར་ར་བབས་པས། དམིགས་རྟེན་ཤིན་ཏུ་འཚེར་བ་དེ་ལ་ཕོག་པས་བདེ་མེར་བྱུང་བ་དང་། མེའི་སྟེང་ན་མར་གྱི་
ཐིག་པ་ལྷུང་བ་བཞིན་དུ་སླར་མེ་འབར་བའི་སྟེང་དུ་བྱང་སེམས་བབ་པས་བདེ་བ་མི་བཟོད་པ་འདྲ་བ་སྐྱེས་པར་བསྒོམ་ཞིང་། འཛག་པའི་གེགས་བྱུང་གི་དོགས་པ་མེད་ན་འདི་ལྟར་ཡང་ཡང་བསྒོམ་པ་དང་། དམིགས་རྟེན་རྣམས་ཀྱང་བྱང་སེམས་
འཛག་ལ་ཁད་པའི་རྣམ་པར་བསྒོམ། །རྗེ་རིན་པོ་ཆེའི་ཞལ་གྱི་གདམས་པ་མཁས་གྲུབ་རྗེས་ཟིན་བྲིས་མཛད་པའོ། ། བཅོ་ལྔ་པ་གེགས་སེལ་ལ་གཉིས། རླུང་གི་གེགས་སེལ། ཐིག་ལེའི་གེགས་སེལ་བའོ། །དང་པོ་ལ་
གསུམ། ལུས་དབེན་གྱི་གེགས་སེལ། ངག་དབེན་གྱི་གེགས་སེལ། དབེན་གསུམ་བསྐྱེད་རིམ་དང་བཅས་པའི་གེགས་སེལ་ལོ། །དང་པོ་ནི། རྗེ་བཙུན་བླ་མ་དམ་པ་རྡོ་རྗེ་འཆང་དང་དབྱེར་མ་མཆིས་པ་དང་། དཔའ་བོ་མཁའ་འགྲོའི་ཚིགས་ལ་
6-16-49b


ཕྱག་འཚལ་ལོ། །དངོས་གྲུབ་རྒྱ་མཚོ་འདུ་བར་མཛོད། ལུས་དབེན་གྱི་སྐབས་སུ་དམིགས་པ་གསལ་བོ་བྱུང་ནའང་རླུང་ཇི་བཞིན་འདུ་མ་འདོད་ན། གསང་གནས། ལྟེ་བ། སྙིང་ག །མགྲིན་པ། སྤྱི་བོའི་རྩ་འདབ་རྣམས་དབུ་མ་ལ་ཟུག་པའི་ནང་ནས་
རླུང་རྣམས་ན་བུན་རྒྱུག་པ་ལྟར་བསྡུས་ནས་འོག་སྒོའི་ཕྲ་མོ་ལ་ཐིམ་ཞིང་། དྷཱུ་ཏཱིའི་མར་སྣ་ནས་ཀྱང་རོ་རྐྱང་གི་ནང་ནས་ཀྱང་དེ་ལྟར་བྱུང་སྟེ་ཐིམ་པས། རྡོ་ཚན་ལ་ཁ་བ་བབས་པ་ལྟར་སིབ་སིབ་ཐིམ་པའི་མོས་པ་ཡང་ཡང་བྱས་པས་མྱུར་དུ་གནས་དེར་
འདུས་ནས་རྟགས་རྣམས་འཆར་བས། འདིའི་བོགས་འདོན་ཅིང་གེགས་སེལ་བར་ཡང་འགྲོ ། དེ་ལྟར་བསྒོམས་པས་རླུང་འདུས་ཀྱང་ལུས་ཀྱི་གནས་གང་ཡང་རུང་བར་ནད་བསྐྱེད་ན། གང་ན་ས་དེ་ནས་ནད་ཁ་དོག་སྔོ་དམར་གྱི་རྣམ་པ་ཅན། རླུང་དང་ལྷན་
ཅིག་ཏུ་བཀུག་སྟེ། དམིགས་རྟེན་ལ་ཐིམ་པར་བྱས་ན་ནད་སེལ་ཞིང་རླུང་འདུ་སླ་རུ་འགྲོ ། རླུང་ཕྱིར་ཐོན་པའི་རྣམ་པ་བྱུང་བ་དང་། ནད་བསྐྱེད་པ་ཀུན་ལ་བསྐྱར་བཞིན་བྱ། རླུང་ནང་དུ་འཇུག་པའི་རྟགས་བྱུང་ན་སྦྱོར་བ་འཇམ་ལ་དམིགས་པ་རྣོ་བར་བྱས་
ལ་སྐྱོང་། རླུང་བགས་མཚམས་སུ་ཞུགས་ཏེ་ཁོལ་བུར་སྐྲངས་ནས་ན་ན། གང་ན་ས་དེར་བདེ་བའི་ངོ་བོར་ལྟ་བ་དང་། གྲོགས་གཅིག་དང་རང་གཉིས་ཀས་ན་ས་དེར་སེམས་གཟུང་ལ་གཉིས་ཀས་རླུང་དུས་མཉམ་དུ་བཟུང་ལ་གྲོགས་ཀྱིས་ན་ས་དེར་ཉེད། 
རླུང་མི་ཐུབ་ན་དུས་མཉམ་དུ་བཏང་ངོ་། །གཉིས་པ་ནི། སྙིང་གའི་ཟུག་དེ་སྲོག་འཛིན་སྙིང་གར་རེངས་པ་ཤས་ཆེ་བས། གོ་ལྡོག་པའི་སྦྱོར་བ་ཞེས་བྱ་བ་སྙིང་མགོ་ཐུར་དུ་བསྟན་ནས་ཡོད་པ་དེ་བསམ་པས་གྱེན་དུ་བསླངས་ལ། སྙིང་པདྨ་ཁ་བྱེ་
6-16-50a


བ་ལྟར་གཤག་གིས་གྱེས་པར་བསམས་ལ། ཆུ་སེར་དང་རླུང་ཐོན་པར་བསམ། དེ་ནས་ཤེས་པ་མི་བཞུར་བར་ཆ་ལེ་བཞག་དེས་སེལ། དེས་མ་ཞི་ན་བསྲེག་པའི་སྦྱོར་བ་བྱ་བ་སྟེ། ལྟེ་བར་གཏུམ་མོའི་ཡེ་ཤེས་ཀྱི་མེ་
སྦར་ཏེ། དེ་ཡང་ཆེ་བ་ཚ་བ་བསྲེག་པའི་རྣམ་པ་འབར་བ་དེས་ལུས་ཐམས་ཅད་གང་སྟེ་སྙིང་ཐལ་བར་བུན་གྱིས་ཚིག་པར་བསམས་ལ། ཐུན་ཅི་རིགས་པར་བཞག་པས་ཞིའོ། །དེས་མ་སེལ་ན་སྙིང་ཕྱུང་ཞིང་སྦ་བའི་སྦྱོར་བ་བྱ་སྟེ། སྙིང་སྲོག་རྩ་དང་
བཅས་པ་དམར་རྩར་གྱིས་ཕྱུང་ནས་ནམ་མཁའི་མཐར་བསྒྱུར་བའམ། ས་འོག་རིམ་པ་དགུའི་འོག་ཏུ་སྦ་བར་བསམས་པས་ངེས་པར་འཕྲལ་དུ་ཞིའོ། །ཨོལ་སྟོང་ན་བ་དེ་གྱེན་རྒྱུ་མགྲིན་པར་རེངས་པ་ཤས་ཆེ་བས་གཙོ་བོ་གསུམ་གྱི་སྦྱོར་བ་བྱ་སྟེ། མགྲིན་
པ་ཉི་མར་བསྟན་ལ་གང་ན་བའི་ཐད་དེར་ལག་པ་མེའམ་ཉི་མ་ལ་བསྲོས་ལ་དེས་མནན་ཟིན་དལ་གྱིས་བཅག །དེས་སྐྲངས་པོ་དངོས་སུ་ཞི་བ་དང་། དྲོད་མ་སྐྱེས་པ་དང་། ཆུ་སེར་མ་གཡོས་པ་སྟེ། ཚད་དེ་གསུམ་ལས་འདས་ན་སྐྱོན་དུ་འགྱུར་རོ། །དེས་
ཞིའོ། །ཕོ་བ་རླུང་གིས་ཁེངས་པ་ལྟ་བུ་མ་བདེ་བ་ཡོད་ན་མཉམ་གནས་ལྟེ་བར་རེངས་པ་ཤས་ཆེ་བས་དེ་བསལ་བ་ནི། ཤིང་རིང་གི་རྟ་ལ་བསྐྱོན་པར་བྱ་སྟེ། རྩིག་པ་གཉིས་ཀྱི་བར་དུ་ཤིང་རིང་པོ་ལྡེམ་པ་ཞིག་བཏང་ལ། དེ་ལ་རས་སམ་སྣམ་བུ་
ཞིག་གིས་དཀྲིས་ཏེ། གསུས་པ་ལྷན་གྱིས་གླན་ཏེ་རྐང་ལག་བཞི་ཐངས་ཀྱིས་བརྒྱངས་ལ་དྲག་ཏུ་ཕར་བསྟན་ཚུར་བསྟན་བྱ་ཞིང་། གསུས་པ་ཤིང་གིས་མཉེ། དེ་ནས་གསུས་པ་ལ་དྲིལ་བ་ཡང་ཡང་བྱ། དེ་གཉིས་སྤེལ་མར་བྱ། རླུང་ཁ་ནང་
6-16-50b


ནས་སྒྲ་བཅས་སུ་བཏང་བའམ་ཤུགས་བསྐྱེད་དེ་བཏང་བས་ཐུན་གསུམ་མམ་ཕྱེད་གཉིས་ཀྱིས་རྐྱེན་ལས་གྲོལ་ལོ། །དེའི་ཚེ་ཁ་ནས་ལྦུ་བའམ་སྣ་ནས་ཆུ་སྔོན་པོ་ཞིག་འབྱུང་བའམ་མ་བྱུང་ཡང་ཞིའོ། །རོ་སྟོད་སྦོས་པ་དེ་ལ་ལུས་གཅེར་གྱི་སྦྱོར་བ་ཞེས་པ་ཙོག་
པུར་ལག་པ་གཉིས་ཀྱིས་འཁྱུད་དེ་ན་བའི་ཕྱོགས་འོག་ཏུ་བཅུག་སྟེ་སྦྲིད་བེར་གྱིས་བཏང་། དེ་ནས་འོག་རླུང་བསྐུམ། དེ་ནས་སྟེང་རླུང་མནན་ལ་ཁ་སྦྱར། དེ་ནས་ཡང་ལུས་སྔར་ལྟར་བྱས་ནས་མིན་པ་ངོས་འོག་ཏུ་བཅུག་ནས་རླུང་ཁ་སྦྱར། དེ་ལྟར་རེ་མོས་
བྱས་པས་ཞིའོ། །གསུམ་པ་ནི། རྗེ་བཙུན་བླ་མ་དམ་པ་རྣམས་ལ་ཕྱག་འཚལ་ལོ། །དམིགས་པ་བསྒོམ་པའི་སྐབས་སུ་མཁྲིས་པ་ལ་སོགས་པའི་ཚ་བའི་སྐྱོན་གྱིས་མགོ་བོ་ན་བར་གྱུར་ན། རང་གི་ཐོད་པའི་ནང་དུ་ཟླ་བའི་དཀྱིལ་
འཁོར་དཀར་པོ་བསིལ་བའི་རང་བཞིན་ཅན། དེའི་འོག་ཕྱོགས་ཀྱི་དབུས་སུ་ཨོཾ་ཡིག་དཀར་པོ་མགོ་ཐུར་དུ་བལྟ་བ་འོད་ཟེར་དཀར་པོ་དང་བདུད་རྩིའི་རྒྱུན་དཀར་པོ་བསིལ་བའི་རང་བཞིན་བབས་པ་དེ་ལས་འོད་ཟེར་དང་བདུད་རྩིའི་རྒྱུན་དཀར་པོ་འཕྲོས་པས། 
རང་གི་ལུས་ཀྱི་ནང་ཐམས་ཅད་གང་སྟེ་འདི་རྣམས་ཀྱི་བསིལ་སངས་ཀྱིས་སོང་བ་དང་བདུད་རྩིའི་རྒྱུན་རྣམས་ཀྱི་ལུས་བདེ་མེར་ཏེ་སོང་བར་བསྒོམ་མོ། །དེ་ལྟར་བསྒོམས་པས་མགོ་བོ་ན་བ་ལ་སོགས་པའི་གེགས་རྣམས་སེལ་ཞིང་། ལུས་ལ་བདེ་
བ་སྐྱེ་བའི་གེགས་སེལ་བ་དང་། དམིགས་པ་སོགས་ལ་བོགས་ཐོན་པ་དུས་མཉམ་དུ་འབྱུང་ངོ་། །ཡང་འོག་སྒོའི་ཕྲ་ཐིག་དང་སྙིང་གར་མ་ཤིགས་པ་ལ་སོགས་པ་བསྒོམ་པའི་སྐབས་སུ་སྟོད་སྨད་དུ་རླུང་ལ་སོགས་པའི་རྐྱེན་གྱིས་ནད་གཟེར་
6-16-51a


དྲག་པོའི་ནད་བྱུང་ན། གང་ན་བ་དེ་ཉིད་ནས་རླུང་དང་སྡོངས་ཏེ་སྤོས་རེང་གི་དུད་པ་བཞིན་སྔོ་ཕྱུར་གྱིས་བྱུང་ནས་འོག་སྒོའི་ཕྲ་ཐིག་བསྒོམ་པའི་སྐབས་ཡིན་ན་འོག་སྒོའི་ཕྲ་མོ་ལ་ཐིམ། མི་ཤིགས་པའི་ཐིག་ལེ་བསྒོམ་པའི་
སྐབས་ཡིན་ན་མི་ཤིགས་པའི་ཐིག་ལེ་ལ་ཡང་ཡང་ཐིམ་པ་བསམ་པར་བྱ་ཞིང་། གང་ན་བའི་གནས་དེར་བདེ་བའི་རང་བཞིན་དུ་མེར་གྱིས་སོང་བར་བསྒོམ་མོ། །ལུས་ཀྱི་སྟོད་སྨད་གང་དུ་ཟུག་གཟེར་གློ་བུར་དུ་བྱུང་ཡང་འདི་ལྟར་ལན་མང་དུ་བསྒོམས་
པས་གེགས་སེལ་ཞིང་དམིགས་པ་བོགས་ཐོན་པར་འགྱུར་རོ། །རྫོགས་རིམ་གྱི་རླུང་སྡུད་པའི་སྐབས་སུ་གེགས་སེལ་ཚུལ་འདི་ལྟར་བྱས་ན་གེགས་སེལ་དང་དམིགས་པ་སོགས་ལ་བོགས་ཐོན་པ་མཉམ་དུ་འབྱུང་ངོ་། །དེ་བཞིན་མིན་པར་
རྫོགས་རིམ་གྱི་རླུང་སྡུད་པའི་གེགས་སེལ་རོ་སྟོད་ན་བ་དང་མགོ་བོ་ན་བ་སོགས་བྱུང་བའི་ཚེ། མགོ་བོར་སྟོད་ཁྲོལ་ཚགས་ལྟ་བུར་བསྒོམས་ནས་ནད་རྣམས་རྣག་ཁྲག་གི་རྣམ་པར་ཕྱིར་ལ་ཐོན་པར་བསྒོམ་པ་ནི། ནད་ཞི་ཐུབ་པ་ཙམ་བྱུང་ཡང་
སྔར་རླུང་ནང་དུ་འབད་པས་བསྡུས་པ་རྣམས་ཕྱིར་ལ་ཐོན་པར་འགྲོ་བས། དུས་ཕྱིས་རླུང་སྡུད་པ་ཤིན་ཏུ་དཀའ་བར་སོང་ནས་རླུང་མི་ཐུབ་པ་དེ་ལྟ་བུའི་གེགས་སེལ་ནི་སྤང་བར་བྱའོ། །ཡང་རྫོགས་རིམ་བསྒོམ་པའི་སྐབས་སུ་རླུང་འདུ་མ་ཐུབ་པར་
མགོ་བོ་གཟེར་ལ་འཁྱིམ་པ་ལ་སོགས་པའི་ནད་བྱུང་བ་དང་། བརྒྱལ་བ་པོག་པ་ལ་སོགས་རླུང་ལ་བརྟེན་པའི་གེགས་མང་པོ་འབྱུང་བས་དེ་རྣམས་སེལ་བའི་ཐབས་ནི། རླུང་མཉམ་རྒྱུ་ནང་དུ་ངེས་ཅན་དུ་སོང་བའི་སྐབས་སུ་ལྟེ་བར་རླུང་ཞིག་
6-16-51b


གཟུང་ནས་མགྲིན་པར་བཙན་ཐབས་སུ་བརྒྱག་པ་ལག་ལེན་བཞིན་དུ་བྱེད་པ་ལན་འགའ་ཟུང་བྱས་པས། གོང་དུ་བཤད་པ་ལྟར་གྱི་གེགས་རྣམས་སེལ་བར་འགྱུར་ཞིང་། རླུང་ནང་དུ་འདུས་པའི་རྟགས་ཀྱི་མཐོང་སྣང་མང་པོ་འབྱུང་བར་སྣང་ངོ་། །ཕྲ་མོ་བསྒོམ་
པའི་སྐབས་སུ་ཆུ་འགགས་པ་ལ་སོགས་པའི་ནད་བྱུང་ན་འོག་སྒོའི་རྡོར་བཟླས་བྱའོ། །དེ་བཞིན་དུ་བྱས་པས་གེགས་སེལ་ཞིང་དམིགས་པ་བོགས་ཐོན་པར་འགྱུར། གཉིས་པ་ཐིག་ལེའི་གེགས་སེལ་ལ་གཉིས། ཐུན་མོང་དང་ཐུན་མོང་མ་ཡིན་པའོ། །
དང་པོ་ནི། བྱང་སེམས་འཛག་པ་བཙན་ཐབས་སུ་འགོག་པ་ནི། རྐང་པ་གཡོན་པའི་རྟིང་པས་རྡོ་རྗེའི་རྩ་བ་བསྡམས་ཤེས་པ་སྤྱི་བོའི་ཧཾ་ལ་གཏད། མིག་དང་ལྕེ་གྱེན་ལ་ལོག །རྒྱུ་མ་སྒལ་ཚིགས་ལ་སྦྱར། ལག་པ་གཉིས་སྙིང་གར་བསྣོལ། ཡན་
ལག་གི་སོར་མོ་བསྐུམ། ངག་ཏུ་ཧཱུཾ་རིང་པོ་རྔུབ་པའི་ཚུལ་དུ་དྲག་ཏུ་བརྗོད། ཡང་གཅིག་ལ་སྟེང་རླུང་དྲག་ཏུ་མནན། འོག་རླུང་གློད་ལ་བཞག །དཔེར་ན་རིལ་བ་ཞབས་ཟགས་ཅན་བཞིན་ནོ་གསུང་། རྨི་ལམ་དུ་འཛག་པ་ནི། ཉིན་པར་སྲོག་ལ་བབ་
ཀྱང་བྱང་སེམས་མི་འཚོར་བར་བྱ་སྙམ་པའི་འཕེན་པ་གལ་ཆེ་གསུང་། ཁྱད་པར་ཉལ་ཁའི་འཕེན་པ་དང་། རྡོ་རྗེ་རྐྱེན་དང་མི་འཕྲད་པར་བྱའོ། །མཚོར་བར་འཇིག་པ་ལ་ནི། བྱ་སྤྱོད་ནས་བཤད་པའི་སྲུང་སྐུད་ཀྱི་ཐབས་ཀྱིས་ཀྱང་ཐུབ་གསུང་ངོ་། །
འདི་ལ་སྐུ་མཆེད་གཉིས་ཀྱི་ཟིན་བྲིས་སྣང་ཡང་ཕྱི་མ་ལྟར་བཀོད་པ་ཡིན། གཉིས་པ་ཐུན་མོང་མ་ཡིན་པའི་གེགས་སེལ་རྫོགས་རིམ་གྱི་ཁྲིད་ཡིག་ཆུང་བའི་མགོན་ཡོད་དོ། ། བཅུ་དྲུག་པ་རྣམ་གསུམ་རིགས་
6-16-52a


དབྱེའི་ཡིག་ཆུང་ལ། བསྡུས་རྒྱས་གཉིས་ལས། དང་པོ་ནི། རྗེ་བཙུན་དམ་པ་རྣམས་ལ་ཕྱག་འཚལ་ལོ། །རྣམ་གསུམ་རིགས་དབྱེའི་གདམས་པ་ནི། བསྒོམས་པས་ལྷ་རང་གི་ཞལ་མཐོང་བ་དང་། རྩ་ནང་དུ་རླུང་ཞུགས་ནས་ལྷ་
མཐོང་བ་དང་། གདོན་གྱིས་སྤྲུལ་ནས་ལྷའི་གཟུགས་མཐོང་བ་དང་། རིགས་གསུམ་འབྱུང་བས་གང་ཡིན་བརྟག་པ་ནི། ལུས་གནད་རྡོ་རྗེའི་སྐྱིལ་ཀྲུང་ལག་པ་མཉམ་གཞག་སོགས་རྣམ་སྣང་གི་ཆོས་བདུན་ལེགས་པར་བྱས་ཏེ། སྨིན་མཚམས་ཀྱི་
ཁྲོ་བོའི་སྤྱན་དབུས་མ་ཡོད་པ། དབུ་མའི་ཡར་སྣའི་བུག་པའི་ཐད་དུ་མིག་གཉིས་གྱེན་དུ་ལྟ་སྟངས་གཅིག་ཏུ་དྲིལ་ཏེ་དེ་གཉིས་ཀྱི་ཐད་ནས་ལྷ་མཐོང་བ་དེ་ལ་བལྟས་པས། དོན་གྱི་ལྷ་ཡིན་ན་རང་གི་ལྷ་དེ་ལ་ཆེ་ཆེར་བལྟས་པས་ཇེ་གསལ་དུ་
འགྲོ་ལ། རྩ་རླུང་ལ་བརྟེན་ནས་ལྷ་མཐོང་བ་ཡིན་ན་བལྟས་པས་བལྟས་པ་དེ་ག་རང་དུ་གནས་ཏེ་འགྱུར་ལྡོག་མི་ཐོངས་པ་ཞིག་འོང་། གདོན་གྱིས་སྤྲུལ་བའི་ལྷ་གཟུགས་ཡིན་ན་བལྟས་པ་དང་གཏད་མེད་དུ་ཡལ་ནས་འགྲོ་བ་ཡིན། ། འདི་མཁས་
གྲུབ་རྗེའི་ཟིན་བྲིས་ཡིན། ། གཉིས་པ་རྒྱས་པ་ནི། ལམ་བསྒོམ་པ་ཐམས་ཅད་ཀྱི་སྐབས་སུ་རང་རྒྱུད་ལ་ལྷས་བྱིན་གྱིས་བརླབ་པ་དང་། བསྒོམ་པའི་ཉམས་སྣང་དང་། གེགས་ཀྱི་བར་ཆད་ཀྱི་མཚན་མ་གསུམ་
གྱི་རིགས་འདི་ལྟར་དབྱེ་བར་བྱ་སྟེ། ལྷ་བསྒོམ་པ་དང་བཟླས་པ་ལ་སོགས་པའི་སྐབས་སུ་དེ་བཞིན་གཤེགས་པའི་སྐུ་གསུང་ཐུགས་ཀྱི་མཚན་མ་ལ་སོགས་པ་བྱུང་ན། རྩ་ཨ་ཝ་དྷཱུ་ཏཱིའི་ཡར་སྣ་རང་གི་སྨིན་མཚམས་ཀྱི་དཀྱིལ་དབུས་
6-16-52b


ཁྲོ་བོ་རྣམས་ཀྱི་སྤྱན་དབུས་མ་འོང་ས་དེར་རག་དུང་གི་ཁ་ལྟར་གདངས་པ་ལ། མིག་གཉིས་དྲིལ་ཏེ་དྷཱུ་ཏཱིའི་ཡར་སྣ་ནས་མཚན་མ་གང་ཡིན་པ་དེ་ལ་བལྟས་པ་དང་། དམིགས་པ་བསྒོམས་པའི་སྟོབས་ཀྱི་ཉམས་ཡིན་ན་སྔར་ལས་ཤིན་ཏུ་གསལ་ཞིང་
སྣུམ་ལ་འོད་དང་ལྡན་པར་འགྱུར་རོ། །དེ་ལ་མ་ཆགས་པར་སྒྱུ་མ་ལྟ་བུར་རྒྱས་བཏབ་ལ་སྒོམ། འོད་ཟེར་སྣ་ལྔ་འཕྲོ་ཞིང་སྔར་ལྟར་དུ་གནས་ན་ལྷས་རང་རྒྱུད་བྱིན་གྱིས་རློབ་པའི་རྟགས་ཡིན་པས་རྡོ་རྗེ་བཏུ་བའི་སྔགས་དང་ཕྱག་རྒྱས་སྐུ་དེ་རང་ལ་
བསྟིམ་ཞིང་གསོལ་བ་བཏབ། དེ་ལ་བལྟས་པས་སྐུ་རྫོགས་པའི་མཚན་མ་མེ་འོད་ཉམས་ཤིང་སྔར་གྱི་དེ་ཡལ་ནས་འགྲོ་བར་སྣང་ན་བགེགས་ཀྱི་བར་ཆད་ཀྱི་མཚན་མ་ཡིན་པས་སྲུང་འཁོར་ཐུན་མོང་བ་དང་ཐུན་མོང་མ་ཡིན་པ་བསྒོམ་ཞིང་། 
མཚམས་དམ་དུ་བཅད་ལ་ཆོས་སྐྱོང་ལ་གཏོར་མ་ཕུལ། བསྐང་བཤགས་མང་དུ་བྱས་ལ། དགེ་སྦྱོར་སྔར་ལས་ཀྱང་འཇུར་དུ་གཏོང་བ་ཡིན་ནོ། །སླར་ཡང་ཡང་ཡང་འོང་ན་སྔར་ལྟར་བྱས་ལ་བལྟས་པས་ཡལ་འགྲོ་བའི་འགོ་རྩོམ་པ་ན། རང་
གི་སྙིང་ག་ནས་ཁྲོ་བོ་གཤིན་རྗེ་གཤེད་འཇིག་རྟེན་གསུམ་ཟ་བར་ནུས་པ་སྐུ་ལས་མེ་འོད་འཕྲོ་བའི་གྲི་གུག་དང་ཐོད་པ་འཛིན་པ་དུ་མ་སྤྲོས་ཏེ་ཆར་བབས་པ་བཞིན་དུ་དེ་ལ་བསྟིམ་པས་བྱ་སྒྲོ་མེས་ཚིག་པ་ལྟར་བསྲེགས་པར་བསམས་ལ་ཚར་
བཅད། ཁྲོ་བོ་རྣམས་རང་ལ་བཏུ། སྔར་ལྟར་སྲུང་འཁོར་བསྒོམ་ཞིང་དགེ་སྦྱོར་ལ་དྲིལ་བར་བྱའོ། །དགེ་སྦྱོར་གང་གི་སྐབས་སུའང་མེད་དུ་མི་རུང་བའི་ཞལ་གྱི་གདམས་པའོ། །སྐུ་མཆེད་གཉིས་ཀྱི་ཟིན་བྲིས་གཉིས་སྣང་ཡང་ཕྱི་མ་གསལ་
6-16-53a


ལ་རྒྱས་པར་སྣང་བས་བཀོད་དོ། །མཚན་མ་སྔོན་མ་གཉིས་ཀྱི་ངོས་འཛིན་ལ་སྔ་ཕྱི་མི་འདྲ་བར་སྣང་ཡང་ཕྱི་མ་བཙན་ནོ། ། བཅུ་བདུན་པ་ཕྱག་རྒྱ་སྲོག་རྩོལ་ལ་ལྔ། རྣལ་འབྱོར་བཞི་རིམ་ནས་གསུངས་
ཚུལ། གསང་འདུས་རྒྱུད་འགྲེལ་ནས་གསུངས་ཚུལ། རྡོ་རྗེ་གུར་ནས་གསུངས་ཚུལ། བླ་མའི་མན་ངག་གིས་བསྟན་ཚུལ། དོན་བསྡུས་ཏེ་ཉམས་སུ་བླངས་པའོ། །དང་པོ་ནི། བླ་མ་རྡོ་རྗེ་འཆང་གི་ཞབས་ལ་གུས་པར་ཕྱག་འཚལ་ལོ། །འདིར་
རྒྱུད་སྡེ་ནས་ལན་ཅིག་མ་ཡིན་པར་གསུངས་པས་ཕྱག་རྒྱ་སྲོག་རྩོལ་གྱི་གནད་མཐར་ཐུག་པ། རྗེ་བཙུན་བླ་མའི་མན་ངག་ཐུན་མོང་མ་ཡིན་པ་གསང་བ་ལས་ཀྱང་ཆེས་གསང་བའི་གནད་རྣམས་བརྗེད་བྱང་དུ་བྲི་བར་འཚལ་ན། བླ་མ་དང་ཡི་དམ་མཁའ་
འགྲོ་ཆོས་སྐྱོང་རྣམས་ཀྱིས་གནང་བ་མཛད་ནས་བདེ་བ་མཆོག་གི་དངོས་གྲུབ་སྩལ་དུ་གསོལ། དེ་ཡང་ལས་རྒྱ་ལ་བརྟེན་པའི་དགོས་པ་ནི། དེ་བསྟེན་པས་སྲོག་དབུ་མར་ཞུགས་ནས་ཡས་བབས་དང་མས་བརྟན་གྱི་དགའ་བ་སྐྱེད་པའི་ཆེད་ཡིན་ནོ། །
དེས་ན་ཐབས་ཀྱི་མཆོག་འདི་བཤད་པ་ལ་གསུམ། ལས་རྒྱའི་མཚན་ཉིད་དང་སྲོག་རྩོལ་དུ་གཏོང་བའི་མན་ངག་དངོས། ཐབས་དེ་ལ་བརྟེན་ནས་དགའ་བཞི་བསྐྱེད་ཅིང་དེས་བདེ་སྟོང་སྦྱོར་ཚུལ་ལོ། །དང་པོ་ནི། རྣལ་འབྱོར་བཞིའི་རིམ་པར་གསུངས་
པའི་པདྨ་ཅན་ལ་སོགས་པའི་དོན་ནི། རྩའི་དབྱིབས་མི་འདྲ་བ་བཞིའི་སྒོ་ནས་བརྟག་པ་ཡིན་ལ། དེ་ཡང་དྷཱུ་ཏཱིའི་མར་སྣའི་དབང་དུ་བྱས་པ་ཡིན་ཅིང་། དེ་རྣམས་ཇི་བཞིན་ཡོད་པ་ནི་ཡར་སྣ་ཀུན་རྫོབ་ཀྱི་སྣ་སོགས་ཀྱིས་མཚོར་བར་བྱེད་དོ། །དེས་ན་
6-16-53b


གླང་པོ་ཅན་གྱི་རྩའི་མར་སྣ་ནི་རྩའི་སྣ་གཡོན་ནས་ཅུང་ཟད་གཡས་སུ་འཁྱིལ་བའི་རྣམ་པར་ཡོད་ལ། དེའི་རྟགས་རྩ་དེའི་ཡར་སྣ་ཕྱོགས་ཀྱིས་བུད་མེད་དེའི་སྣ་གཡས་སུ་འཁྱིལ་བའི་རྣམ་པ་ཅན་སོགས་ལས་རྒྱ་དེ་གླང་པོ་ཅན་གྱི་རིགས་སུ་གཏོགས་པ་ཡིན་ནོ། །
དུང་ཅན་མ་ནི་དུང་དཀར་གྱི་ཁ་ལྟ་བུར་འཁྱིལ་ཞིང་སྦུབ་ལ་རིང་བ་སོགས་ཤིག་ཡོད་པས་དེའི་རྟགས་ལ་རྩའི་ཡར་སྣ་ཕྱོགས་ཀྱི་སྐྲ་དང་སྣ་ཡང་རིང་བ་སོགས་ལས་དུང་ཅན་མའི་རིགས་སུ་གཏོགས་པ་ཡིན་པར་ཤེས་པར་བྱའོ། །རི་དྭགས་ཅན་མ་ནི་རྩ་དེའི་མར་
སྣ་རི་དྭགས་གླ་བའི་ལྟེ་བ་འདྲ་བ་ཁ་བཙུམ་ཞིང་བཅིངས་པའི་གོར་བུའི་རྣམ་པ་ཅན་དུ་ཡོད་པས་རྩ་དེའི་ཁ་ཤིན་ཏུ་འཚོལ་དཀའ་བས་དེ་ནི་རྣལ་འབྱོར་བའི་སེན་མོས་བཙལ་དགོས་པ་སོགས་གསུངས་སོ། །མར་སྣ་དེའི་རྟགས་ལ་ཡར་སྣའི་ཕྱོགས་ཀྱི་སྣ་ལ་རི་མོ་ཡོད་
ལ། དེར་མ་ཟད་ལུས་གཞན་ལས་སྦོམ་པ་སོགས་ཡིན་ནོ། །པདྨ་ཅན་གྱི་མར་སྣ་མེ་ཏོག་པདྨའི་དབྱིབས་ཅན་ཡོད་པས། རྩ་དེའི་ཁ་ཤིན་ཏུ་བཙལ་སླ་ཞིང་འབྱེད་པར་སླ་བས། ཕྱག་རྒྱ་མཆོག་ཏུ་གསུངས་པ་ཡིན་ནོ། །དེའི་རྩ་དེ་མར་སྣ་དེ་ལྟར་ཡོད་པས། 
ཡར་སྣའི་ཕྱོགས་དེ་ལ་ནི་ཛ་བའི་མེ་ཏོག་ལྟ་བུར་གསུངས་པ་ཡིན་ནོ། །དེ་ལྟར་ཕྱག་རྒྱ་བཞིའི་རྩ་ལ་མི་འདྲ་བ་དེ་ལྟར་ཡོད་པའི་སྒོ་ནས། པདྨ་ཅན་སོགས་སུ་བཞག་པའི་དོན་ནི། རང་གི་བླ་མ་ཁོ་ནའི་མན་ངག་ཡིན་པས་རང་ཁོ་ནའི་སྙིང་ལ་བཅང་རྒྱུ་ཡིན་
གསུང་། དེའི་རྒྱུ་མཚན་ཆགས་ལམ་ལ་ཤིན་ཏུ་མཁས་པར་གྲགས་པའི་བོད་ཀྱི་བླ་མ་ཐམས་ཅད་ཀྱིས་རྒྱུད་ནས་གསུངས་པའི་ཕྱག་རྒྱའི་རིགས་བཞིའི་ཁྱད་པར་ནི། སྣ་གཡོན་ནས་གཡས་སུ་འཁྱིལ་བ་དང་། །ཞེས་སོགས་ཀྱི་རྩའི་དབྱིབས་ལ་བརྟན་
6-16-54a


པའི་དོན་ལ་བློ་ཁ་མ་ཕྱོགས་ཤིང་རྩ་ལ་མི་འདྲ་བ་བཞི་ཡོད་པའི་གནད་མ་རྟོགས་པ་ཤ་སྟག་ཡིན་པས། ཕྱོགས་འདི་ལ་ཁ་ཕོ་ཇི་ལྟར་ཆེ་ཡང་མཁས་པས་བཞད་གད་ཀྱི་གནས་འབའ་ཞིག་ཡིན་གསུང་ངོ་། །གཉིས་པ་སྲོག་རྩོལ་
དུ་གཏོང་བའི་ཐབས་དངོས་ནི། རྡོ་རྗེ་དབྱིངས་ཀྱི་དབང་ཕྱུག་མའི། །རྩ་ནི་ཉེ་བར་བཙལ་བྱས་ཏེ། །བྱེད་པ་བཅིངས་པའི་སྦྱོར་བ་ཡིས། །ཞེས་པས་བསྟན་ལ། དེའི་རྡོ་རྗེ་དབྱིངས་ཀྱི་དབང་ཕྱུག་མའི་རྩ་ནི་བུད་མེད་ཀྱི་དྷཱུ་ཏཱི་ཡིན་ལ། ཉེ་བར་བཙལ་ཞེས་པ་ནི། 
རྣལ་འབྱོར་པས་རྩ་དེའི་མར་སྣ་བཙལ་བར་བྱས་ལ། དེ་ཡང་བྱ་རོག་གདོང་ཞེས་པ་ནི་འཇིག་རྟེན་པ་ལ་བྱ་ལེར་གྲགས་པ་དེ་ལ་ཟེར་ཞིང་། དབུ་མའི་མར་སྣའི་རྩ་དེ་འདིའི་དབུས་ནས་འབྱུང་ངོ་། །དེ་ལ་སྐྱེས་པའི་དྷཱུ་ཏཱི་སྦོམ་ཞིང་ཐུང་བར་གནས་པས་ནོར་བུ་
ལས་ཕྱིར་ནར་ནས་འོང་བ་མི་སྲིད་ལ། བུད་མེད་ཀྱི་དྷཱུ་ཏཱི་ཕྲ་ཞིང་རིང་བས་བྱ་རོག་གདོང་ལས་ཕྱིར་ནར་ནས་འོང་བའི་སྐབས་ཡོད་པས། སྙོམས་འཇུག་གི་ཚེ་བུད་མེད་ཀྱི་རྩ་དེ་རྣལ་འབྱོར་པའི་རྩའི་མར་སྣའི་ནང་དུ་འཇུག་པས་སྦྱོར་བ་བྱེད་པ་ཡིན་ནོ། །དེའི་
ཕྱིར་དུ་ཕྱག་རྒྱའི་དྷཱུ་ཏཱིའི་རིགས་མི་འདྲ་བ་བཞིའི་གནས་ཚུལ་ཤེས་ནས་ཚོལ་བ་དང་། ཁ་འབྱེད་པའི་མན་ངག་གི་ཡེ་ཤེས་ཀྱི་རྩ་སད་པར་བྱ། དེ་ནས་ཕྱག་རྒྱའི་རྩ་དེ་རང་གི་རྩའི་ནང་དུ་བཅུག་ནས་བྱེད་པ་དམ་དུ་བཅིངས་པའི་སྦྱོར་བ་བྱ། དེ་ལྟར་
བྱས་པས་ཕྱག་རྒྱའི་རྩ་ནང་ནས་རླུང་འབྱུང་སྟེ། རང་གི་རྩའི་ནང་དུ་སླེབས་པ་ན་སྙོམས་འཇུག་གི་བདེ་བ་ལ་སོགས་པས་གང་བས་ཀྱང་ལྷག་པའི་བདེ་བ་སྐྱེ་ལ། རླུང་དེ་རང་གི་དྷཱུ་ཏཱིའི་ནང་བརྒྱུད་པས་རང་གི་ཐུར་སེལ་གྱི་རླུང་གྱེན་དུ་ལྡོག་སྟེ། ཕྱག་
6-16-54b


རྒྱའི་རླུང་དེས་སྣ་འདྲེན་བྱས་ནས་དབུ་མར་ཞུགས་ཤིང་བརྒྱུས་པས་ཁྲག་འབར་ནས། སྤི་བོའི་ཧཾ་ཡིག་ཞུ་ཞིང་བྱང་སེམས་དྷཱུ་ཏཱིའི་མར་སྣར་སླེབས་པ་ན་ཕྱག་རྒྱའི་ཡང་ཁུ་བ་བཞུ་ནས་དྷཱུ་ཏཱིའི་ལམ་ནས་བྱུང་བ་རང་གི་རྩའི་ནང་དུ་ཕྲད་པ་ན། ཐབས་ཤེས་ཟུང་
དུ་འབྲེལ་བའི་གནད་ཀྱིས་སྔ་མའི་བདེ་བ་བས་ཀྱང་ཆེས་ཆེ་བ་ཞིག་འབྱུང་ཞིང་། དེ་ནས་མན་ངག་གིས་གྱེན་ནུ་ལྡོག་པའི་སྦྱོར་བ་བྱས་བས་ཐིག་ལེ་དེ་ལྟེ་བར་སླེབས་པ་ན་རྒྱུ་མཐུན་གྱི་ཚུལ་གྱི་དགའ་བ། སྙིང་གར་སླེབས་པ་ན་རྣམ་སྨིན་གྱི་ཚུལ་གྱི་མཆོག་
དགའ། མགྲིན་པར་སླེབས་པ་ན་སྐྱེས་བུ་བྱེད་པའི་ཚུལ་གྱི་ཁྱད་དགའ། གཙུག་ཏོར་དུ་སླེབས་པ་ན་དྲི་མ་དང་བྲལ་བའི་ཚུལ་གྱི་ལྷན་སྐྱེས་ཀྱི་དགའ་བ་དེ་ཤིན་ཏུ་རྣལ་འབྱོར་བསྒོམ་པར་བྱའོ། །གསུམ་པ་བདེ་སྟོང་སྦྱོར་ཚུལ་ནི། བདེ་བ་དེ་འདྲ་བས་ཡས་
བབས་དང་མས་བརྟན་གྱི་དགའ་བ་བཞི་སྐྱེས་པའི་ཚེ། དབུ་མའི་ལྟ་བ་མཐར་ཐུག་པ་དང་སྦྱར་ནས་བསྐྱངས་པས་སྲིད་པའི་སྡུག་བསྔལ་བཅོམ་པར་བྱེད་དོ། །གཞན་ཡང་རྡོ་རྗེའི་ལྟེ་བར་པདྨ་གནས་པ་དང་། སྐྱིལ་ཀྲུང་ཞེས་པའི་དོན་ཡང་ཡུམ་གྱི་རྩའི་
མར་སྣ་ནང་དུ་བཅུག་པའི་ངེས་དོན་གྱི་རྡོ་རྗེའི་སྐྱིལ་ཀྲུང་གཡས་གཡོན་གཉིས་ཀྱི་རོ་རྐྱང་གི་རླུང་དབུ་མའི་ནང་དུ་ཞུགས་པ་འབྱུང་ཞིང་། དེའི་ཚེ་རྣལ་འབྱོར་པས་སེམས་ནོར་བུའི་ནང་གི་དྷཱུ་ཏཱིའི་ནང་དུ་སོན་པ་ལས་ཡེ་ཤེས་ཀྱི་ངོ་བོ་ལྷན་སྐྱེས་འབྱུང་ངོ་། །དེ་
དག་དགའ་བ་གཞན་གསུམ་ཡང་ཡིན་ནོ། །ཡང་པདྨ་ཅན་གྱི་བགྲོད་ཚུལ་ནི། པདྨའི་བྱེད་པ་ཞེས་པ་ཕལ་པ་ལྟར་སྟེང་ནས་བགྲོད་པའོ། །གླང་པོ་ཅན་གྱི་བགྲོད་ཚུལ་ནི། དུད་འགྲོ་ལྟར་རྒྱབ་ནས་བགྲོད་པའོ། །དུང་ཅན་མའི་བགྲོད་ཚུལ་ནི། གྷ་ཧ་ར་
6-16-55a


ཏིའི་སྦྱོར་བ་ཞེས་བྱ་བ། རྐང་པ་གཉིས་ཕྲག་པ་ལ་བཀལ་ཏེ་འོག་ནས་བགྲོད་པའོ། །རི་མོ་ཅན་གྱི་བགྲོད་ཚུལ་ནི། བི་ལ་སའི་བཅིངས་པ་ཞེས་བྱ་བ་རྡོ་རྗེ་སེམས་དཔའ་ལྟར་སྐྱིལ་ཀྲུང་བྱས་ལ་བགྲོད་པར་བྱའོ། །རྟགས་ཀྱི་
རྩེ་གཉིས་མི་འབྲལ་བར་བྱེད་པ་ནི་ཤིན་ཏུ་གལ་ཆེ་ལ། དེ་ནི་ཤིན་ཏུ་རྣལ་འབྱོར་བས་ལག་པས་བྱེད་དགོས་པར་རྒྱུད་ལས་བཤད་དོ། ། རྗེ་བཙུན་ཁ་བ་ཆེན་པོའི་ཞལ་གྱི་གདམས་པའོ། ། གཉིས་པ་ནི། ཁམས་གསུམ་
དག་གི་ལམ་མཆོག་ན། །བུད་མེད་ཇི་སྙེད་ཡོད་པ་རྣམས། །ཆོ་ག་བཞིན་དུ་སྤྱད་པར་བྱ། །གསུང་གི་རྡོ་རྗེ་མི་སྨོད་དོ། །ཞེས་པའི་སྐབས་སུ་ངག་གི་རོ་འཛིན་གྱི་བྱ་བས་བསྐྱོད་ལ་ཞེས་རྩ་གསུམ་པོ་དེ་ལྕེས་བསྐྱོད་པར་གསུངས་ལ། གླུས་བསྐུལ་
བ་ལས་བཞེངས་པའི་སྐབས་སུ་རྩ་སྤུབས་གསུམ་སོར་མོ་གསུམ་གྱིས་བསྐྱོད་ཅིང་ཞེས་སོར་མོས་བསྐྱོད་པ་དང་གཉིས་བཤད་དོ། །འདི་ལ་རྡོ་རྗེ་མཁའ་འགྲོ་ལས། ཆགས་པ་སྲ་བ་དང་རྒན་པ་སོགས་ལ་ནི། སོར་མོ་རིང་པོ་གསུམ་སྦྲུལ་
མགོ་ལྟར་བྱས་ནས་དྲུད་པར་བྱ་བ་དང་། གཞོན་ཅིང་ཆགས་པ་མཉེན་པ་རྣམས་ལ་ནི་འོད་དང་ལྡན་པའི་བྱང་ཆུབ་ཀྱི་སེམས་འབབ་པའི་རྩར་རྡོ་རྗེའི་ཐུར་མས་ཕུག་སྟེ་བསྐྱོད་པར་གསུངས་སོ། །ཡུལ་སོ་སོར་མཛད་པ་ནི་སོར་མོའི་བྱེད་པ་ལ་
དགོངས་སོ། །དཀྱིལ་ཆོག་རྡོ་རྗེ་ཕྲེང་བ་ལས། མཛུབ་མོ་དང་ལྕེའི་རྩེ་མོ་ལ་ཡི་གེ་ཧཱིཿདམར་པོ་བཀོད་པས་རྩ་བསྐུལ་བར་བཤད་པ་ལྟར་ན། ཡུལ་གཅིག་ལ་སོར་མོ་དང་ལྕེ་རྩེ་གཉིས་ཀས་བསྐུལ་བ་ནི་སོར་མོ་གཅིག་གི་ཁྱད་པར་
6-16-55b


རོ། །དུས་ཇི་ཙམ་དུ་བསྐུལ་བ་ནི། པ་ཚབ་ཀྱི་འགྱུར་ལས། རོ་འཛིན་བྱ་བ་དག་གིས་མ་ཕྱིན་གྱི་བར་དུ་བསྐྱོད་པར་བྱ་ཞིང་ཞེས་འབྱུང་བ་ལྟར་ན། ཧྲཱིཿས་ཡུམ་གྱི་དབུ་མའི་མར་སྣ་བྱེ་ནས་བདུད་རྩི་འཛག་པ་མ་བྱུང་གི་བར་དུའོ། །རྡོ་རྗེ་
མཁའ་འགྲོ་ལས། ཡུམ་ལས་སིད་ཅེས་པའི་སྔགས་མ་བྱུང་གི་བར་དུ་དྲུད་པར་གསུངས་ལ། དེ་ནི་ཡུམ་དེས་ཆེད་དུ་བྱས་ནས་སྔགས་དེ་བཏོན་པ་མིན་པར་རང་ཤུགས་ཀྱིས་སྔགས་དེ་ཟློས་པ་འབྱུང་ངོ་། །དེ་ཡང་རྡོ་རྗེ་མཁའ་འགྲོ་ལས། དེ་ལྟར་སྒྲུབ་
པ་པོས་ཡང་དང་ཡང་དུ་བསྐུལ་བའི་སྙིང་འདར་བ་དང་། དགའ་བས་མྱོས་ཤིང་བྱང་སེམས་ཀྱི་རྒྱུན་ཕྲ་མོ་འཛག་ལ། ངོ་ཚ་བ་ལ་སོགས་པ་དང་བྲལ་ཏེ། བ་སྤུ་ལངས་ཤིང་ཤིན་ཏུ་ཆགས་པས་བལྟ་ཞིང་འཁྱུད་པ་དང་ནུ་མ་བར་འགྱུར་ཞིང་སིད་ཅིས་ཟེར་
བ་དང་། །ཞེས་གསུངས་པ་ལྟར་ཡིན་ལ། དེ་རྣམས་ནི་སོར་མོ་དང་ལྕེས་བསྐུལ་བའི་རྩ་ཁ་བྱེ་བའི་རྟགས་ཡིན་ནོ། །སེམས་ཀྱི་རྡུལ་ཕྲ་མོའི་ཆུ་ནི་བྱང་ཆུབ་ཀྱི་སེམས་ཀུནྡ་ལྟ་བུའི་ཆུའོ། །གསུམ་པ་ནི། རྡོ་རྗེ་གུར་ལས་ཀྱང་། རྡོ་རྗེ་སོར་མོའི་རབ་སྦྱོར་གྱིས། །
རྡོ་རྗེའི་ས་གཞི་རབ་བསྐུལ་ཏེ། །རྡོ་རྗེ་སེམས་སུ་རབ་ཕྱུང་ལ། །རྡོ་རྗེའི་ལྕེ་ཡིས་བཟའ་བར་བྱ། །ཕྱི་ནང་དེ་ཡི་བདེ་ལྡན་དུ། །རྡོ་རྗེ་སེམས་དཔའ་རབ་བཅུག་སྟེ། །རྡོ་རྗེ་བཅིངས་པའི་སྦྱོར་བ་ཡིས། རྡོ་རྗེ་མཆོད་པ་རབ་ཏུ་བརྩམ། །ཞེས་གསུངས་ཏེ། རྡོ་རྗེ་ས་གཞི་ནི་
གསང་གནས་ཀྱི་རྡོ་རྗེའི་རྟེན་ཡུམ་གྱི་པདྨའོ། །རྡོ་རྗེ་སེམས་སུ་ཞེས་པ་ནི་ཀུནྡ་ལྟ་བུའོ། །ཕྱི་ནས་ཞེས་པ་ནི་རྩ་སད་པར་བྱས་པའི་རྗེས་སུའོ། །རྡོ་རྗེ་སེམས་དཔའ་ཞེས་པ་མཱ་མ་ཀཱིའི་གསང་བའམ་གསང་བའི་རྡོ་རྗེའོ། །རྡོ་རྗེ་བཅིངས་པ་ནི་རྩ་གཉིས་མི་
6-16-56a


འབྲལ་བར་བཅིངས་པའོ། །འདོད་པའི་བསྟན་བཅོས་རྣམས་ལས་པདྨ་ཅན་དང་དུང་ཅན་མ་ལ་སོགས་པའི་བུད་མེད་ཀྱི་མཚན་ཉིད་སྟོན་པར་ཡོད་པར་སྣང་ནའང་། མན་ངག་འདི་ནི་དེ་དག་ཏུ་གཏན་མེད་པར་ཤེས་པར་བྱའོ། །འདི་
མཐའ་གཅོད་ནས་གདན་དྲངས་པ་ཡིན་ནོ། །བཞི་པ་ནི། བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །དེ་ལ་འདིར་ཕྱི་རོལ་གྱི་ཕྱག་རྒྱ་དང་སྙོམས་པར་ཞུགས་པས། སྲོག་རྩོལ་དུ་འགྲོ་བའི་ཚུལ་ཞེས་པ་ད་ལྟར་གྱི་
གང་ཟག་ལ་དངོས་སུ་མེ་དགོས་པ་ཤས་ཆེ་ཡང་དེའི་གོ་བ་ཆགས་ན་བསྐྱེད་རིམ་སྒོམ་པ་སོགས་ཀྱི་སྐབས་སུ་ཡེ་རྒྱ་ལ་བརྟེན་པ་ལ་ཕན་ཡོན་ཆེ་བས་ཉེ་བར་མཁོ་བ་ཡིན་ནོ། །དེ་ཡང་སྤྱིར་བླ་མེད་ཀྱི་རྒྱུད་སྡེ་རྣམས་ནས་ལས་རྒྱལ་ལོ་གྲངས་བཅུ་གཉིས་མ་
ནས་སུམ་ཅུ་མའི་བར་གསུངས་པ་ནི། དེ་གཉིས་ལས་རྒན་པ་དང་གཞོན་པས་རང་གི་རྩ་སད་པར་བྱེད་མི་ནུས་སམ། ནུས་ཀྱང་ཐབས་ཀྱི་རྩ་སད་པའི་རྐྱེན་དུ་འགྲོ་མི་ནུས་པའི་སྒོ་ནས་སྤང་དགོས་པ་ཡིན་ཅིང་། འདི་ལ་རྣལ་འབྱོར་མ་ཏིང་ངེ་འཛིན་ཁྱད་པར་ཅན་རྒྱུད་
ལ་མངའ་བ་སོགས་ནི་མ་ངེས་སོ། །འོ་ན་རྩ་སད་ཐབས་ཇི་ལྟར་བྱ་སྙམ་ན་དེ་ནི་རྣལ་འབྱོར་པ་ཁྱད་པར་ཅན་ལས་རྒྱ་དང་སྙོམས་པར་འཇུག་པའི་ཚེ། མཛུབ་མོ་དང་ལྕེ་ལ་ཡི་གེ་འགོད་པ་སོགས་ཀྱི་སྦྱོར་བ་གཞན་ནས་གསུངས་པ་ལྟར་བྱའོ། །དེ་ལྟར་རྩ་དབུ་མ་
སད་བའི་ཕྱག་རྒྱའི་ཐབས་དང་སྙོམས་པར་འཇུག་པ་ན། ཕྱག་རྒྱའི་རྩ་སད་པའི་རྐྱེན་དེས་ཐབས་ཀྱི་རྩ་ཨ་ཝ་དྷཱུ་ཏཱི་སད་པར་འགྱུར་ལ། དེ་སད་ན་རོ་རྐྱང་གཉིས་ཁ་ཟུམ་འགྲོ་བ་ཆོས་ཉིད་ཡིན་ཅིང་། དབུ་མ་སད་པའི་ནང་དུ་ཐུར་སེལ་ཞུགས། དེས་
6-16-56b


གཏུམ་མོ་སྦར་བ་སོགས་ཀྱི་རྐྱེན་གྱིས་ལྷན་སྐྱེས་འཆར་རོ། །འདི་ནི་རྒྱུད་དོན་ཡིན་པར་ད་ལྟ་ཉམས་བཟང་བས་གང་ཟག་འགའ་ཞིག་གི་ཡེ་རྒྱ་ལ་བརྟེན་པའི་ཚེ་ཐོག་མར་ཡུམ་གྱི་རྩ་ནས་ཚུར་བྱུང་ནས་རང་གི་རྡོ་རྗེའི་བུ་གར་ཞུགས་པ་སྙམ་བྱེད་པ་འབྱུང་བར་སྣང་
བས་ཀྱང་ཤེས་སོ་གསུང་། དེས་ནི་ཡབ་ཡུམ་གྱི་སྣ་རྩེ་གཉིས་ཕྲད་མཚམས་སུ་ཐིག་ལེ་ཕྲ་མོ་བསྒོམ་པ་ཡང་སྣ་རྩེ་གཉིས་སད་པའི་ཆེད་དུ་ཡིན་ནོ། །འོ་ན་ལས་རྒྱ་ལ་བརྟེན་པ་སྙིང་གའི་སྡུད་རིམ་དུ་འགྲོ་ཚུལ་ཇི་ལྟར་ཡིན་ཞེ་ན། དེ་ནི་རིལ་འཛིན་དང་རྗེས་གཞིག་གི་
བསམ་གཏན་གཉིས་གཉིས་དང་། སྙིང་གའི་སྡུད་རིམ་གྱི་དམིགས་པ་དང་། རྡོར་བཟླས་དང་། གསང་བའི་སྣ་རྩེར་རྫས་ཀྱི་ཐིག་ལེའི་སྲོག་རྩོལ་དང་། སྙིང་གར་སྡུད་རིམ་རྣམས་སྐབས་དེར་བྱེད་པའི་སྟོབས་ཀྱིས་ཡིན་ནོ། །རྗེ་བཙུན་ཙོང་ཁ་པ་ཆེན་པོའི་ཞལ་གྱི་གདམས་པ། 
མཁས་གྲུབ་རྗེས་ཟིན་བྲིས་མཛད་པའོ། ། ལྔ་པ་ནི། རྗེ་བཙུན་བླ་མ་དམ་པ་རྣམས་ལ་ཕྱག་འཚལ་ལོ། །ཕྱག་རྒྱ་སྲོག་རྩོལ་དུ་འགྲོ་བའི་གདམས་པ་ནི། རིག་མཚན་ཉིད་དང་ལྡན་པ་བཙལ་ལ། དེའི་རྗེས་སུ་རྡོ་རྗེ་དབྱིངས་ཀྱི་
དབང་ཕྱུག་མའི་རྩ་ཚོལ་བ་ལ་རང་གི་མཛུབ་མོ་ལ་ཧྲཱིཿབཀོད་ནས་རྩ་མཉེད་ཅིང་བཙལ་ཏེ་རྙེད་པ་ན་བདེ་བ་སྐྱེ་ཞིང་རྩ་ཕྱིར་དོན་ནས་རིང་དུ་འགྲོ་བ་དང་འགྲེང་ནས་འོང་ལ། ཁ་ནས་སིད་ཀྱི་སྒྲ་བྱུང་བ་དང་། ལྕེ་རྩེས་རྩ་དེ་བཙལ་ཞིང་བསྐུལ་བ་ན་རྩ་དེའི་ཁ་བྱེ་འོང་
ལ། དེ་ནས་སྙོམས་པར་འཇུག་ཅིང་། རྡོ་རྗེ་དབྱིངས་ཀྱི་དབང་ཕྱུག་མའི་རྩ་དེ་རང་གི་ནོར་བུའི་ནང་ན་རྩ་དབུ་མའི་མར་སྣ་ཡོད་པས། དེའི་རྩེ་དང་། རྡོ་རྗེ་དབྱིངས་ཀྱི་དབང་ཕྱུག་མའི་རྩའི་རྩེ་གཉིས་ཕྲོད་པར་བྱ་སྟེ། རྩ་དེའི་རྩེ་མོ་ནོར་བུའི་དབུས་ཀྱི་རྩ་འཁོར་གྱི་
6-16-57a


དྷཱུ་ཏཱིའི་ནང་ན་ཞུགས་པས། རང་གི་དབུ་མའི་མར་སྣ་ཁ་བྱེ་ནས་དབུ་མར་རླུང་ཞུགས་པས་རོ་རྐྱང་གི་རྩ་གཉིས་སུ་རླུང་རྒྱུ་བ་འགགས་ཏེ་ལྷན་ཅིག་སྐྱེས་པའི་ཡེ་ཤེས་རང་དང་། ཕྱག་རྒྱ་གཉིས་ཀྱི་རྒྱུད་ལ་སྐྱེ་བར་འགྱུར་རོ། །ཕྱག་རྒྱ་སྲོག་
རྩོལ་དུ་འགྲོ་བའི་ཞལ་གདམས་སོ། །ད་དུང་ཕྱག་རྒྱའི་མཚན་ཉིད་དབྱེ་བ། བརྟག་ཐབས། བརྟེན་ཚུལ། བརྟེན་པ་ལས་ཡེ་ཤེས་སྐྱེ་ཚུལ། བདེ་སྟོང་སྦྱོར་ཚུལ། བོགས་འདོན་དུ་འགྱུར་ཚུལ་སོགས་བླ་མའི་ཞལ་ལས་ཤེས་དགོས་སོ། །ལུས་ལ་གནད་དུ་
བསྣུན་ནས་རྫོགས་པའི་རིམ་པ་བསྒོམ་པ་ལ་ནི། ལུས་ཀྱི་བྱེད་བཅིངས་དང་། འཁྲུལ་འཁོར་དང་། སྤྱོད་ལམ་ལ་སོགས་པའི་གནད་ཞིབ་པར་ངེས་ནས་ལུས་ཀྱི་བྱེད་བཅིངས་བསྟན་པ་ལས་ཤེས་པར་བྱ་ཞིང་སྐབས་འདིར་སྦྱར་བར་བྱའོ། །འདིར་མ་རྒྱུད་
ཐམས་ཅད་ཀྱི་གཙོ་བོ་བདེ་དགྱེས་གཉིས་ཀྱི་རྫོགས་རིམ་གྲུབ་ཆེན་ནག་པོ་སྤྱོད་པས་བཀྲལ་པའི་དཔྱིད་ཀྱི་ཐིག་ལེ་ལ་གཉིས། རྡོ་རྗེའི་ལུས་ཀྱི་གནས་ཚུལ། དེ་ལ་གནད་དུ་བསྣུན་ནས་རྫོགས་རིམ་བསྒོམ་པའི་ཚུལ་ལོ། །དང་པོ་ལ་གསུམ། གནས་
པ་རྩའི་གསལ་བྱེད། གཡོ་བ་རླུང་གི་གསལ་བྱེད། བཀོད་པ་བྱང་ཆུབ་ཀྱི་སེམས་ཀྱི་གསལ་བྱེད་དོ། །དང་པོ་ནི། བླ་མ་རྣམས་ལ་ཕྱག་འཚལ་ལོ། །དེ་ལ་འདིར་རྫོགས་རིམ་དུ་འཇོག་པར་བྱེད་པ་ལ། སྟོང་ཉིད་ཙམ་གྱིས་འཇོག་མི་ནུས་
ཏེ། སྟོང་ཉིད་རྟོགས་པ་ཐེག་དམན་ལ་ཡང་ཡོད་པའི་ཕྱིར་རོ། །སྟོང་ཉིད་དང་ལྷའི་རྣལ་འབྱོར་ཡོད་པ་ཙམ་གྱིས་ཀྱང་རྫོགས་རིམ་དུ་འཇོག་མི་ནུས་ཏེ། དེ་ནི་རྒྱུད་སྡེ་འོག་མ་གསུམ་ལའང་ཡོད་པའི་ཕྱིར་རོ། །དེ་གཉིས་ཀྱི་སྟེང་དུ་རླུང་གི་རྣལ་འབྱོར་
6-16-57b


བསྣན་པས་ཀྱང་དེར་འཇོག་མི་ནུས་ཏེ། སྟོང་པ་དང་ལྷའི་རྣལ་འབྱོར་རླུང་གི་རྣལ་འབྱོར་དང་གསུམ་ག་རྒྱུད་སྡེ་འོག་མ་གསུམ་ལ་ཡོད་པའི་ཕྱིར་རོ། །དེས་ན་འདིར་ལུས་ལ་གནད་དུ་བསྣུན་པའི་བོགས་འདོན་པའི་སྟོང་ཉིད་རྟོགས་པ་རྫོགས་རིམ་དུ་འདོད་པ་
ཡིན་ལ། དེ་ལ་ལུས་ཀྱི་གནད་རྩ་དང་རླུང་དང་ཐིག་ལེ་རྣམས་ཀྱི་གནས་ཚུལ་ཤེས་དགོས་པས། ཐོག་མར་རྩའི་གནས་ཚུལ་ཅུང་ཟད་བརྗོད་པར་བྱ་སྟེ། དེ་ལ་མཚན་ཉིད་ཐེག་པ་ནས་དགའ་བོ་མངལ་འཇུག་གི་མདོར། ལུས་ཀྱི་གཡས་གཡོན་གཉིས། 
མདུན་རྒྱབ་གཉིས་ཏེ་བཞིར་རྩ་ཉི་ཁྲི་ཉི་ཁྲི་སྟེ། ལུས་ལ་རྩ་བརྒྱད་ཁྲི་ཡོད་པར་བཤད་ལ། སྔགས་ཀྱི་ཐེག་པ་ནས་ལུས་ལ་རྩ་བདུན་ཁྲི་ཉིས་སྟོང་ཡོད་པར་བཤད། དེ་དག་གི་ནང་ནས་ཀྱང་རྩ་བརྒྱ་ཉི་ཤུ་ནི་རྩའི་གཙོ་བོ་ཡིན་ཏེ། རླུང་དང་རྣམ་པར་ཤེས་
པའི་རྟེན་བྱེད་པའི་ཕྱིར་རོ། །དེའི་ནང་ནས་རྩ་ཉི་ཤུ་རྩ་བཞི་ནི་གཙོ་བོ་ཡིན་ཏེ། སྐྲ་དང་སེན་མོ་སོ་ལ་སོགས་པའི་རྒྱུ་བྱེད་པའི་ཕྱིར། དེ་ལ་བརྒྱ་ཉི་ཤུ་ནི་སྤྱི་བོའི་རྩ་འདབ་སོ་གཉིས། མགྲིན་པའི་བཅུ་དྲུག །སྙིང་གར་བརྒྱད། ལྟེ་བའི་དྲུག་ཅུ་རྩ་བཞི་
རྣམས་ཡིན་ནོ། །ཉེར་བཞི་ནི་འོག་ནས་འཆད་པའི་སྙིང་གའི་རྩ་འདབ་བརྒྱད་ལ་གསུམ་གསུམ་དུ་གྱེས་བའི་སྐུ་གསུང་ཐུགས་ཀྱི་རྩ་བརྒྱད་གསུམ་ཉི་ཤུ་རྩ་བཞི་པོ་དེ་ཡིན་ནོ། །དེ་ལ་ཡང་རོ་རྐྱང་དབུ་མ་གསུམ་གཙོ་བོ་ཡིན་ཏེ། རྩ་གཞན་རྣམས་དེ་ལས་སྐྱེ་
དགོས་པའི་ཕྱིར་རོ། །དེ་ལ་མངལ་དུ་དང་པོར་ཆགས་པའི་ཚེ་སྙིང་གའི་ལྟེ་བ་ལ་རོ་རྐྱང་དབུ་མ་གསུམ། ཤར་དང་ལྷོའི་རྩ་འདབ་མ་གཉིས་ལ་རིམ་པ་ལྟར་གསུམ་སྐོར་མ་དང་འདོད་མ་སྟེ་ལྔ་དུས་མཉམ་དུ་ཆགས་སོ། །དེ་ནས་ནུབ་ཏུ་ཁྱིམ་མ། བྱང་དུ་གཏུམ་
6-16-58a


མོ་དབུ་མ་དང་ལྷན་ཅིག་ཏུ་བདུད་བྲལ་མ་སྟེ་གསུམ་ཆགས་སོ། །སྟིང་གར་དང་པོར་ཆགས་པའི་རྩ་བརྒྱད་ནི་དེ་རྣམས་ཡིན་ནོ། །ཕྱོགས་ཀྱི་རྩ་བཞི་ནི། རོ་རྐྱང་གཉིས་དབུ་མ་ལ་ནང་དུ་བུག་པ་བརྟོལ་བའི་ཚུལ་གྱི་རྩ་བ་ཟུག་ནས་ཡོད་
དོ། །དེ་ཡང་མཚམས་ཀྱི་རྩ་བཞི་ནི་ཕྱོགས་ཀྱི་རྩ་བཞི་ལས་གྱེས་པ་ཡིན་ལ། དེ་ཡང་དཔེར་བརྗོད་ན་ཤར་གྱི་གསུམ་སྐོར་མ་ལས་ཤར་ལྷོ་མཚམས་ཀྱི་རྩ་དེ་གྱེས་པ་ཡིན་ལ། མཚམས་ཀྱི་རྩ་གཞན་གསུམ་ནི་རིམ་པ་ལྟར་ལྷོའི་འདོད་མ་དང་། ནུབ་ཀྱི་
ཁྱིམ་མ། བྱང་གི་གཏུམ་མོ་གསུམ་ལས་གྱེས་པ་ཡིན་ནོ། །དེས་ན་སྙིང་གའི་རྩ་འདབ་བརྒྱད་ནི། གསུམ་སྐོར་མ་སོགས་ཕྱོགས་ཀྱི་རྩ་འདབ་བཞི་དང་། དེ་ལས་གྱེས་པའི་མཚམས་ཀྱི་རྩ་བཞི་སྟེ་བརྒྱད་པོ་དེ་ཡིན་པས། སྙིང་གར་དང་པོར་ཆགས་པའི་
རྩ་བརྒྱད་དང་མི་གཅིག་གོ། །རྩ་བརྒྱད་པོ་དེ་ལས་སྐུ་གསུང་ཐུགས་ཀྱི་རྩ་འདབ་གསུམ་གསུམ་གྱེས་པས་བརྒྱད་གསུམ་ཉི་ཤུ་རྩ་བཞི་ཡིན་ནོ། །ཉེར་བཞི་པོ་དེའི་སྟེང་དུ་སྙིང་གར་དང་པོར་ཆགས་པའི་རྩ་བརྒྱད་བསྣན་པས་དེ་ལ་བྱང་སེམས་འབབ་པའི་
རྩ་སོ་གཉིས་ཞེས་ཐ་སྙད་བྱེད་པ་ཡིན་ནོ། །ཉེར་བཞི་པོ་དེ་ལ་གསུམ་གསུམ་དུ་གྱེས་པའི་བདུན་ཅུ་རྩ་གཉིས་སུ་འགྱུར་བ་ཡིན་ནོ། །དེ་ཡང་སྐུ་གསུང་ཐུགས་སམ་ཐིམ་པ་དང་། ལོངས་སྤྱོད་དང་། བདག་པོ་གསུམ་གྱི་སྒོ་ནས་འབྱེད་པ་ཡིན་ནོ། །བདུན་
ཅུ་རྩ་གཉིས་པོ་དེ་ལ་རེ་རེ་ལས་སྟོང་སྟོང་དུ་གྱེས་པས་རྩ་སྟོང་ཕྲག་བདུན་ཅུ་རྩ་གཉིས་འོང་བ་ཡིན་ནོ། དེ་ཡང་རོ་རྐྱང་དབུ་མ་གསུམ་གྱི་གནས་ཚུལ་ཅུང་ཟད་བརྗོད་ན། རོ་རྐྱང་གཉིས་ཀྱིས་དབུ་མ་ལ་ལྕགས་སྒྲོག་གི་ཚུལ་དུ་འཁྱུད་ནས་ཡོད་ལ།
6-16-58b


དེ་ཡང་དབུ་མ་དབུས་ན་ཡོད་ཅིང་། དེའི་ནང་ནས་མུན་པ་དང་ཁུ་ཁྲག་དང་རླུང་འབྱུང་བས་ན་སྙིང་སྟོབས་རྡུལ་མུན་གསུམ་གྱི་ནང་ནས་མུན་པའི་རྩ་དང་། སྐྱེས་པ་བུད་མེད་མ་ནིང་གསུམ་ལས་མ་ནིང་གི་རྩ་དང་། ཉི་ཟླ་སྒྲ་གཅན་གསུམ་གྱི་ནང་ནས་སྒྲ་གཅན་གྱི་རྩ་ཞེས་
བྱའོ། །དབུ་མའི་གཡས་ན་རོ་མ་གནས་ཤིང་། དེའི་ནང་ནས་ཁུ་བ་ཅུང་ཟད་དང་འདྲེས་པའི་ཁྲག་ཤས་ཆེར་འབབ་བོ། །དེའི་ཁ་ནི་སྟེང་གི་ཕྱོགས་ན་ཡོད་དེ་སྟེང་འོག་གཉིས་ཀ་ལ་བུག་པ་ཡོད་པ་ལ། སྟེང་གི་ཕྱོགས་ཁོ་ན་ལ་ཁ་ཡོད་ཟེར་བའི་རྒྱུ་མཚན་ནི། 
ཁྲག་ཕྱིར་འཕེན་པ་དང་ནང་དུ་སྡུད་པའི་བྱ་བ་སྟེང་ཕྱོགས་ཀྱི་མགྲིན་པ་ནས་བྱེད་ཅིང་། འོག་གི་བུ་ག་ནས་མི་བྱེད་པས་དེའི་དོན་ཡིན་ནོ། །རྐྱང་མ་ནི་དབུ་མའི་གཡོན་ན་ཡོད་ཅིང་། ཁྲག་དང་ཅུང་ཟད་འདྲེས་པའི་ཁུ་བ་ཤས་ཆེར་འབབ་བོ། །དེ་ལ་ཟླ་བ་དང་། 
སྐྱེས་པ་དང་། སྙིང་སྟོབས་དང་། ཐབས་ཀྱི་རྩ་ཞེས་བྱ་སྟེ། ཁུ་བ་གཙོ་བོར་འབབ་པའི་ཆ་ནས་ཡིན་པ་འདྲའོ། །རོ་མ་ལ་ཉི་མ་དང་བུད་མེད་དང་། རྡུལ་དང་། ཤེས་རབ་ཀྱི་རྩ་ཞེས་བྱ་སྟེ། ཁྲག་གཙོ་བོར་འབབ་པའི་སྒོ་ནས་ཡིན་པ་འདྲའོ། །དེ་ལ་རོ་རྐྱང་དབུ་
མ་གསུམ་ནི་སྤྱི་བོ་ནས་སུམ་མདོའི་བར་དུ་ཡོད་ལ། དེ་ནས་གསུམ་དུ་གྱེས་ཏེ་རོ་རྐྱང་དབུ་མ་གསུམ་གྱི་ཚན་གཅིག་རྐང་མཐིལ་བར་དུ་འགྲོ་ལ། ཚན་གཅིག་ནོར་བུའི་རྩེའི་བར་དུ་འགྲོ་བས་རྐང་པ་གཉིས་དང་ནོར་བུ་གསུམ་ག་ལ་རྩ་གསུམ་ཡོད་པ་
འདྲ་བ་ཡིན་ནོ། །རྐྱང་མའི་སྟེང་འོག་གཉིས་ཀ་ལ་བུག་པ་ཡོད་པ་འདྲ་བ་ལ་ལྟེ་བ་ཁོ་ན་ལ་ཁ་ཡོད་ཅེས་པ་ནི་ཁུ་བ་ཕྱིར་འཕེན་པ་དང་། ནང་དུ་འཛིན་པ་གཉིས་ཀ་ལྟེ་བ་ནས་བྱེད་པས་དེའི་ཆ་ནས་ཡིན་ནོ། །དེ་ཡང་ལྟེ་བ་ཡན་ཆད་ཀྱི་དབང་དུ་བྱས་པ་
6-16-59a


ཡིན་ལ། ལྟེ་བ་མན་ཆད་དུ་རྐྱང་མ་དབུས་སུ་ཡོད་ཅིང་དྲི་ཆེན་འབབ་ལ། དབུ་མ་གཡོན་ན་ཡོད་ཅིང་ཁུ་བ་འབབ། རོ་མ་གཡས་ན་ཡོད་ཅིང་གཅི་བ་འབབ། སྡོམ་འབྱུང་ལས། རོ་སྡོམ་འབྱུང་བའི་ལམ་དུ་བཤད། རྐྱང་མ་
འཇུག་པའི་ལམ་དུ་བཤད་པ་ནི་ཤེས་པའི་ཡུལ་འཛིན་པའི་དུས་སུ་རོ་མའི་ནང་ནས་རླུང་དང་བསྡོངས་ནས་ཕྱིར་དོན་ཏེ་ཡུལ་འཛིན་ཅིང་། ཡུལ་ཟིན་ནས་རླུང་དང་ལྷན་ཅིག་ཏུ་རྐྱང་མའི་ནང་ནས་འཇུག་པ་ཡིན་ནོ། །རྩ་འཁོར་བཞིར་བྱང་སེམས་འབབ་པའི་
ཆ་ནས་དགའ་བ་བཞིའམ། བཅུ་དྲུག་ཏུ་འགྱུར་ཚུལ་ནི། གཏུམ་མོ་བསྒོམ་པས་དམར་ཆ་འཕེལ་ཏེ་བྱང་སེམས་ཞུ་བ་སྤྱི་བོ་ནས་འབབ་པ་ནས་བཟུང་སྟེ། མགྲིན་པར་སླེབ་སླེབ་ཀྱི་བར་ལ་དགའ་བ་བཞིའི་ནང་ནས་དགའ་བ་དང་། དགའ་བ་དེ་ལ་
ཡང་དགའ་བའི་དགའ་བ་དང་། དགའ་བའི་མཆོག་དགའ་དང་། དགའ་བའི་ཁྱད་པར་གྱི་དགའ་བ་དང་། དགའ་བའི་ལྷན་སྐྱེས་ཀྱི་དགའ་བ་ཡོད་པས་དེ་དག་ཀྱང་སྐྱེའོ། །དེ་བཞིན་དུ་བྱང་སེམས་མགྲིན་པ་ནས་འབབ་པ་ནས་བཟུང་སྟེ་སྙིང་གར་སླེབ་
སླེབ་ཀྱི་བར་ནི། དགའ་བའི་ནང་ནས་མཆོག་དགའ་དང་། དེ་ལ་ཡང་དགའ་བ་བཞི་ཡོད་པས་དེ་དག་ཀྱང་སྐྱེའོ། །སྙིང་ག་ནས་འབབ་པ་ནས་བཟུང་སྟེ་ལྟེ་བར་སླེབ་སླེབ་ཀྱི་བར་ནི། ཁྱད་པར་གྱི་དགའ་བ་དང་། དེ་ལ་ཡང་དགའ་བ་བཞི་ཡོད་པ་
རྣམས་སྐྱེའོ། །ལྟེ་བ་ནས་འབབ་པ་ནས་བཟུང་སྟེ། ནོར་བུའི་རྩེར་སླེབ་སླེབ་ཀྱི་བར་ནི། ལྷན་སྐྱེས་ཀྱི་དགའ་བ་དང་། དེ་ལ་ཡང་དགའ་བ་བཞི་ཡོད་པ་རྣམས་སྐྱེའོ། །དེ་ཡང་གྲགས་ཚོད་ལ་རྩ་འཁོར་བཞིར་གྲགས་ཤིང་། ཞིབ་ཏུ་བྱས་ན་རྩ་
6-16-59b


འཁོར་བདུན་ཡོད་དེ། དེ་ཡང་བཞི་པོ་དེའི་སྟེང་དུ་གཙུག་ཏོར་ན་རྩ་འདབ་བཞི། གསང་གནས་ལ་རྩ་འདབ་སོ་གཉིས། ནོར་བུའི་དབུས་ན་རྩ་འདབ་བརྒྱད་ཡོད་པའི་རྩ་འཁོར་གསུམ་སྟེ་བདུན་ནོ། །འཁོར་ལོ་དེ་དག་གི་ལྟེ་བ་ལ་རོ་རྐྱང་གཉིས་གང་རུང་གཅིག་གིས་སྟེང་
དང་། གཅིག་གིས་འོག་ནས་འཁྱུད་ཡོད་ཅིང་། དེ་ཡང་དེ་གཉིས་ཀྱི་བར་ན་དེ་གཉིས་ཀྱིས་མ་སླེབས་པའི་སྟོང་པ་ཅུང་ཟད་རེ་ཡོད་དེ། དེ་ཡང་སྙིང་གའི་དབུ་མའི་ནང་ན་རྣམ་ཤེས་དང་ལྷན་ཅིག་ཏུ་སྐྱེས་པའི་རླུང་ཡོད་ལ། དེ་ལ་ཡེ་ཤེས་ཀྱི་རླུང་མི་ཤིགས་པའི་
ཐིག་ལེ་ཞེས་ཀྱང་ཟེར་རོ། །ཁུ་ཁྲག་གཉིས་ཀྱང་ཡོད་ཅིང་། དེ་ལ་རྩ་མ་དུད་ཀྱི་ཐད་ཀྱི་དབུ་མའི་ནང་ན་ཡོད་དོ། །ལུས་ཟུངས་བཅུ་དྲུག་གི་ནང་ནས་ཁུ་ཁྲག་གཙོ་བོ་ཡིན་ཅིང་གཞན་རྣམས་དེའི་རྣམ་འགྱུར་ཡིན་ལ། དེ་ཡང་དང་པོར་མངལ་དུ་ཆགས་དུས་ཁུ་ཁྲག་སྙིང་
ག་ན་ཡོད་ལ། དེ་ནས་ཁུ་བ་སྟེང་གི་ཕྱོགས་སུ་སོང་སྟེ་གཙོ་བོར་སྤྱི་བོ་ན་གནས། དེ་ཡང་ནམ་དགོས་པ་ན་སྐྱེ་བ་ཡིན་གྱི། སྣོད་དུ་ཆུ་བླུག་པའི་ཚུལ་གྱིས་ཡོད་པ་མིན་ནོ། །ཁྲག་འོག་ཏུ་སོང་སྟེ་གཙོ་བོར་ལྟེ་བར་གནས་ལ་གཏུམ་མོ་འབར་བ་དང་ཐིག་ལེ་འཛག་པའི་
དམིགས་པ་ལྟེ་བ་སོགས་ལ་གཏོད་པའི་རྒྱུ་མཚན་དེ་ཡིན་ནོ། །རྩ་དེ་དག་ཏུ་བྱང་སེམས་དཀར་དམར་དང་རླུང་ཇི་ལྟར་རྒྱུ་བའི་ཚུལ་ནི། རྩ་སྟོང་ཕྲག་བདུན་ཅུ་རྩ་གཉིས་པོ་དེ་ལ། སྟོང་ཕྲག་ཉེར་བཞི་ཚན་པ་གསུམ་དུ་ཡོད་ལ། དེའི་ཚན་གཅིག་ནས་ཁུ་བ། ཚན་
གཅིག་ནས་ཁྲག །ཚན་གཅིག་ནས་རླུང་འབབ་པས་རྩ་སྟོང་ཕྲག་བདུན་ཅུ་རྩ་གཉིས་ལས་ཁུ་ཁྲག་རླུང་གསུམ་འབབ་ཚུལ་དེ་ཡིན་ནོ། །ཡང་དེའི་གྱེས་གཞིའི་རྩ་བདུན་ཅུ་རྩ་གཉིས་ལ་ཡང་རྩ་ཉེར་བཞི་ཚན་པ་གསུམ་ཡོད་པས། གསུམ་པོ་དེ་ལ་ཡང་ཁུ་
6-16-60a


ཁྲག་རླུང་གསུམ་འབབ་ཚུལ་སྔ་མ་དང་འདྲ་ལ། བདུན་ཅུ་རྩ་གཉིས་པོ་དེའི་གྱེས་གཞིའི་རྩ་ཉེར་བཞི་པོ་དེ་ལ་ཡང་བརྒྱད་ཚན་གསུམ་ཡོད་པས་གསུམ་པོ་དེ་ལ་ཡང་ཁུ་ཁྲག་རླུང་གསུམ་གྱི་འབབ་ཚུལ་སྔ་མ་དང་འདྲའོ། །རྩ་ཉེར་བཞི་པོ་དེའི་
གྱེས་གཞིའི་སྙིང་གའི་རྩེ་འདབ་བརྒྱད་ལ་ནི། བཤང་གཅི་གཉིས། ཁུ་ཁྲག་གཉིས། བད་ཀན་ཏེ་བདུད་རྩི་ལྔ་འབབ་བོ། །བརྒྱད་པོའི་གྱེས་གཞི་རོ་རྐྱང་དབུ་མ་གསུམ་ཡིན་ལ། དེ་དག་གི་འབབ་ཚུལ་ནི་སྔར་བཤད་ཟིན་ཏོ། །རྩ་རྣམས་བསྡུས་ན་སྟོང་ཕྲག་བདུན་
ཅུ་རྩ་གཉིས་པོ་དེ་རྩ་བདུན་ཅུ་རྩ་གཉིས་སུ་འདུ་ལ། དེ་ཡང་ཉེར་བཞིར་འདུའོ། །དེ་སྙིང་གའི་རྩ་འདབ་བརྒྱད་དུ་འདུ། བརྒྱད་པོ་དེའང་རོ་རྐྱང་དབུ་མ་གསུམ་དུ་འདུའོ། །རོ་རྐྱང་གཉིས་ཀྱང་དབུ་མར་འདུ་བ་ཡིན་ནོ། །ཡང་གྱེས་ཚུལ་ནི་གོང་ལྟར་རོ། །ལྷ་གཙོ་བོ་ལས་
སྤྲོ་བསྡུ་བྱེད་ཚུལ་ནི། སྙིང་གའི་རྩ་དང་རླུང་ལས་ཕྱོགས་ཀྱི་རྩ་དང་རླུང་རྣམས་སྤྲོ་བསྡུ་བྱེད་པ་དེ་ལ་དཔེ་བྱས་བསྒོམ་པ་ཡིན་ནོ། །ཡང་སྙིང་གའི་རྩ་ཞེས་པ་ནི་སྲོག་རྩ་ཡིན་ལ། རྩ་དེ་ཡང་སྒལ་ཚིགས་ཀྱི་ནང་ཙམ་ན་སྒལ་ཚིགས་ལ་བརྟེན་ནས་གནས་པ་ཡིན་ནོ། །དེ་
ལ་རོ་རྐྱང་དབུ་མ་གསུམ་བརྟེན་ནས་ཡོད་དེ། དེའི་མགོ་བོ་གྲུ་གསུམ་དུ་ཡོད་ལ། མགྲིན་པར་གཞོན་ནུ་མའི་ནུ་མ་འདྲ་བ་དང་། སྙིང་གར་བ་ཡི་མིག་འདྲ་བ་དང་། ལྟེ་བར་པདྨ་འདྲ་བ་དང་། གསང་གནས་ན་རྡོ་རྗེ་འདྲ་བ་དང་། ནོར་བུའི་རྩེ་ན་ཟར་མའི་མེ་ཏོག་དང་དའི་ཕྱིར་
དབྱིབས་འདྲའོ། །དེས་ན་རྩ་དང་རླུང་གང་ཡིན་ཀྱང་སྙིང་ག་ན་ཡོད་དེ་ཞེས་པ་ནི་ནུ་མ་གཉིས་ཀྱི་བར་གྱི་ཐད་དྲང་སྒལ་ཚིགས་ཀྱི་ནང་ཙམ་ན་ཡོད་པ་ལ་གོ་དགོས་སོ། །སྔར་བཤད་པའི་བྱང་སེམས་འབབ་པའི་རྩ་སོ་གཉིས་པོ་དེ་སྤྱི་བོའི་རྩ་འདབ་མིན་ཏེ། དེའི་ནང་
6-16-60b


ན་སྙིང་གའི་རྩ་འདབ་བརྒྱད་འདུག་པའི་ཕྱིར། སོ་གཉིས་པོ་དེ་བདེ་མཆོག་གི་ལྷ་མོ་དང་སྦྱར་ན་རོ་རྐྱང་དབུ་མ་གསུམ་ནི་རྡོ་རྗེ་ཕག་མོ་དང་། སྐུ་གསུང་ཐུགས་ཀྱི་རྩ་ཉེར་བཞི་ནི་འཁོར་ལོ་གསུམ་གྱི་ལྷ་མོ་ཉེར་བཞི་དང་། གསུམ་སྐོར་མ་སོགས་ཕྱོགས་ཀྱི་རྩ་ནི་ས་ཆུ་
མེ་རླུང་འབྱུང་བའི་རྩ་ཡིན་པས། བདེ་ཆེན་འཁོར་ལོའི་ལྷ་མོ་བཞི་དང་སྦྱོར་བ་ཡིན་ལ། སྒོ་མཚམས་མ་བརྒྱད་ལ་རྩ་དང་སྦྱོར་རྒྱུ་མེད་པ་འདྲ་གསུང་། སྙིང་གའི་དབུ་མའི་ནང་གི་ཧཱུཾ་རིང་པོ་ནི་བདེ་མཆོག་དང་། སྐུ་གསུང་ཐུགས་ཀྱི་རྩ་ཉེར་བཞིའི་ནང་གི་ཁམས་
ཉེར་བཞི་ནི། འཁོར་ལོ་གསུམ་གྱི་དཔའ་བོ་ཉེར་བཞི་དང་སྦྱོར་རོ། །དེ་ཡང་བདུད་བྲལ་མ་ལས་འཆི་བའི་དུས་མ་གཏོགས་གཞི་དུས་སུ་བྱང་སེམས་མི་འབབ་པས་དེ་ལྷ་དང་མི་སྦྱོར་རོ། །དེ་ལ་བདུད་ཟེར་བའི་རྒྱུ་མཚན་ནི་རང་གཞན་གཉིས་ཀར་བྱང་སེམས་འབབ་
པ་འགོག་པའོ། །དེ་ཡང་གཞི་དུས་སུ་སེམས་ཅན་ཐ་མལ་པ་ལ་འཆི་དུས་སུ་མ་གཏོགས་དེའི་ནང་ནས་བྱང་སེམས་མི་འབབ་ཀྱང་ལམ་དུས་ས་མཐོན་པོར་སོང་བའི་ཚེ་འཆི་བའི་གོང་ནས་ཀྱང་དེའི་ནང་ནས་བྱང་སེམས་འབབ་པའོ། །རྩ་སོ་གཉིས་ཀྱི་ཚེ་བདུད་
བྲལ་མ་མ་གཏོགས་སོ་གཅིག་པོ་དེ་བདག་མེད་མ་ལྷ་མོ་བཅོ་ལྔ་དང་ཡང་སྦྱོར་བ་ཡིན་ཏེ། གཙོ་བོ་ལ་རྩ་གསུམ། འཁོར་བཅུ་བཞི་ལ་རྩ་གཉིས་གཉིས་ཏེ་དེས་སོ་གཅིག་ཐིམ་མོ། །ལྷ་མོ་དེ་དག་བསྐྱེད་པའི་ཡི་གེ་ནི། ཨཱཿཚེག་དྲག་ཅན་མ་གཏོགས་
པའི་དབྱངས་ལྷག་མ་བཅོ་ལྔ་ཡིན་ནོ། །རླུང་དང་གཏུམ་མོའི་རྣལ་འབྱོར་ལ་བརྟེན་ནས་ལྟེ་བའི་ཁྲག་དང་། སྤྱི་བོའི་བྱང་སེམས་ཡར་མར་དུ་འགྲོ་བ་སྲིད་ཀྱི་སྙིང་གའི་རྩ་མདུད་ཀྱི་དབུ་མའི་ནང་གི་བྱང་སེམས་དཀར་དམར་གཉིས་དང་། ལྷན་སྐྱེས་ཀྱི་རླུང་
6-16-61a


རྣམས་འཆི་བའི་ཚེ་མ་གཏོགས་འཕོ་འཇུག་མི་བྱེད་པ་ཡིན་ནོ། །རྫོགས་རིམ་གྱི་རྟོགས་པ་རྣལ་མ་ཞིག་རྒྱུད་ལ་སྐྱེ་བར་འདོད་ན་དེ་ལ་འཆི་བའི་དུས་ཀྱི་རླུང་གི་འབྱུང་བསྡུད་རིམ་ཤེས་དགོས་སོ། །དེ་ལ་བསྐྱེད་རིམ་ཤེས་དགོས་
པས། དེ་ནི་ཐམས་ཅད་སྟོང་པ་སྟེ་འཆི་བའི་འོད་གསལ་ལས། སྟོང་པ་ཉེར་ཐོབ་དྲི་ཟ་བར་སྲིད་སྐྱེ་བའི་སེམས་འབྱུང་། དེ་ལས་ཐབས་མཆེད་པ་སྟེ། བར་དོ་དྲི་དང་གནས་ལ་འདོད་པའི་སེམས་འབྱུང་། དེ་ལས་ཤེས་རབ་སྣང་བ་སྟེ། མངལ་དུ་
སྐྱེ་བ་འཛིན་པའི་སེམས་འབྱུང་། དེ་ནས་མངལ་དུ་ཉིད་མཚམས་སྦྱར་མ་ཐག་འབྱུང་བ་བཞི་ག་ཡོད་མོད། འོན་ཀྱང་འབྱུང་བ་རགས་པ་སྐྱེ་བའི་དབང་དུ་བྱས་ན། དང་པོ་རླུང་མེ་ཆུ་ས་རྣམས་རིམ་པ་ལྟར་འབྱུང་ཞིང་། དེའི་རྗེས་ནས་གཟུགས་
སོགས་ཕུང་པོ་རྣམས་དང་། མིག་སོགས་སྐྱེ་མཆོད་རྣམས་འབྱུང་ལ། དེ་ནས་རང་བཞིན་བརྒྱད་ཅུའི་རྟོག་པ་རྣམས་འབྱུང་ངོ་། །དེ་ལ་ཉིན་མཚན་གྱི་དབྱེ་བ་གཉིས་ཀྱིས་ཕྱེ་བས་བརྒྱ་དྲུག་ཅུ་ཡིན་ནོ། །སྡུད་རིམ་དུས་སུ་ས་ཆུ་ལ་ཐིམ། ཆུ་མེ་ལ་ཐིམ། 
མེ་རླུང་ལ་ཐིམ། རླུང་སེམས་ལ་ཐིམ། སེམས་སྣང་བ་ལ། དེ་མཆེད་པ་ལ། དེ་ཉེར་ཐོབ་ལ། དེ་ཐམས་ཅད་སྟོང་པ་འོད་གསལ་ལ་ཐིམ། དེ་ནི་འཆི་བའི་འོད་གསལ་ལམ། འཆི་བ་དངོས་ཡིན་ནོ། །དེ་ཡང་ས་ཆུ་ལ་ཐིམ་ཞེས་བརྗོད་ཀྱང་ས་
ཁམས་ཡེ་མེད་དུ་སོང་བ་ནི་མིན་ལ། སས་ཤེས་པའི་རྟེན་མི་བྱེད་པ་ལས་ཆུ་ལ་ཐིམ་ཞེས་བརྗོད་པ་ཡིན་ནོ། །ཆུ་མེ་ལ་ཐིམ་ཚུལ་སོགས་ཀྱང་དེ་དང་འདྲའོ། །རླུང་རྣམ་ཤེས་ལ་ཐིམ་ཞེས་པ་སྣ་སྒོར་རྒྱུ་བའི་རླུང་རགས་པས་ཤེས་པའི་རྟེན་མི་བྱེད་
6-16-61b


པའམ། ཡང་ན་རླུང་རགས་པ་དེ་སྙིང་གའི་རྩ་མདུད་ཀྱི་དབུས་ཀྱི་དྷཱུ་ཏཱིའི་ནང་གི་ལྷན་སྐྱེས་ཀྱི་རླུང་ཕྲ་བ་ལ་ཐིམ་པའོ། །དེའི་དུས་ན་རླུང་རགས་པས་ཤེས་པའི་རྟེན་མི་བྱེད་ཀྱང་ལྷན་སྐྱེས་ཀྱི་རླུང་ཕྲ་མོས་ཤེས་པའི་རྟེན་བྱེད་པ་ཡིན་ནོ། །རླུང་ཕྲ་བ་གཅིག་པུས་
ཤེས་པའི་རྟེན་བྱེད་ཀྱི་རགས་པས་མི་བྱེད་པའི་དུས་ནི། རླུང་སེམས་སྣང་བ་ལ་ཐིམ་ནས་སྟོང་ཆེན་འོད་གསལ་ལ་ཐིམ་པའི་བར་དུའོ། །དེ་ནས་འོད་གསལ་ལམ་འཆི་བའི་འོད་གསལ་ལས་སྟོང་ཆེན་ཉེར་ཐོབ་དྲི་ཟའི་སེམས་བར་དོ་སོགས་འབྱུང་བ་སྔར་
དང་འདྲའོ། །དེས་ན་གཞི་དུས་སུ་རྩ་དང་རླུང་དང་འབྱུང་བ་རྣམས་དང་པོར་ཆགས་དང་པོར་ཆགས་པ་སྙིང་ག་ནས་ཆགས་ལ། མཐར་སྡུད་པ་ཡང་སྙིང་གར་སྡུད་པ་དང་འདྲ་བར་ལམ་བསྐྱེད་རིམ་གྱི་སྐབས་སུ་སྙིང་གའི་ཏིང་ངེ་འཛིན་སེམས་དཔའ་ལ་སྤྲོ་བསྡུ་མང་དུ་བྱས་
ཏེ་བསྒོམས་པས། རྫོགས་རིམ་གྱི་སྐབས་སུ་འཆི་དུས་ཀྱི་འབྱུང་བ་སྡུད་པ་དགུག་མི་དགོས་པར་དེའི་གོང་དུ་ཏིང་ངེ་འཛིན་གྱི་མཐུས་འབྱུང་བ་རྣམས་རིམ་གྱིས་བསྡུས་ནས་གཉིས་སྣང་དང་བྲལ་བའི་འོད་གསལ་སྐྱེ་བ་ཡིན་ནོ། །དེས་བླ་མེད་ཀྱི་རྒྱུད་སྡེ་དུ་
མ་ནས་བསྐྱེད་རིམ་གྱི་སྐབས་སུ་གཞི་དུས་ཀྱི་སྐྱེ་ཤི་བར་དོ་གསུམ་དང་སྦྱར་ནས་བསྒོམ་དགོས་པ་མང་དུ་གསུངས་པ་ཡང་། རྫོགས་རིམ་གྱི་སྐབས་སུ་བོགས་འདོན་ཚུལ་གཞན་དང་ཡེ་མི་འདྲ་བ་ལ་དགོངས་པ་ཡིན་ནོ། །ཡང་རྩ་རླུང་ཐིག་ལེ་མང་
དུ་གསུངས་པའི་དགོས་པ་ནི། འཆི་བའི་ཚེ་ལྟ་བའི་དམར་ཆ་ཡར་འགྲོ ། སྤྱི་བོའི་དཀར་ཆ་མར་འོངས་པའི་འདུ་འཕྲོད་ལ་བརྟེན་ནས་གཉིས་སྣང་དང་བྲལ་བའི་འོད་གསལ་མངོན་དུ་འགྱུར་ལ། དེ་ཡང་གཉིས་སྣང་འགགས་པ་ཙམ་ལ་འོད་གསལ་
6-16-62a


དུ་བཏགས་པ་ཡིན་གྱི། མཚན་ཉིད་པ་ནི་མིན་ནོ། །དེ་དང་འདྲ་བར་ལམ་དུས་སུ་རླུང་དང་ལྟེ་བའི་གཏུམ་མོའི་རྣལ་འབྱོར་ལ་བརྟེན་ནས་དམར་པོ་དང་། དཀར་པོའི་འདུ་འཕྲོད་བྱེད་པ་ཡོད་ཅིང་། འདུ་འཕྲོད་བྱུང་དུས་གཉིས་
སྣང་རགས་པ་འགགས་པས་དེའི་དུས་སུ་སྟོང་ཉིད་ཀྱི་ངེས་ཤེས་གསལ་བཏབ་ནས་གཞན་དང་མི་འདྲ་བའི་སྟོང་ཉིད་རྟོགས་པ་ལ་བོགས་འོང་བས་དེ་ལ་དགོངས་ནས་བཤད་པ་ཡིན་ནོ། །རྩ་ཉེར་བཞི་དང་། བདུན་ཅུ་རྩ་གཉིས་དང་། སྟོང་ཕྲག་བདུན་
ཅུ་རྩ་གཉིས་ལ་སྐུ་གསུང་ཐུགས་སམ། ལུས་ངག་ཡིད་གསུམ་ལ་སོགས་པ་གསུམ་གསུམ་དུ་འབྱེད་པ་དང་། གསུམ་དུ་གྲངས་ངེས་པ་ནི་རྩ་དེ་དག་གི་ནང་ནས་འབབ་པའི་རྫས་ལ་བྱང་སེམས་དཀར་དམར་གཉིས་དང་རླུང་གསུམ་དུ་ངེས་པས་དེའི་གནད་ཡིན་
ནོ། །གཞི་དུས་སུ་རྩ་དང་རླུང་ཆགས་པའི་རིམ་པའམ། སེམས་ཅན་སྐྱེ་བའི་རིམ་པ་དང་མཐུན་པར་བསྐྱེད་རིམ་གྱི་སྐབས་སུ་ལྷ་སྐུ་བསྒོམས་པས། རྫོགས་རིམ་གྱི་སྐབས་སུ་ཏིང་ངེ་འཛིན་གྱི་མཐུས་འབྱུང་བ་བསྡུས་ནས་གཉིས་སྣང་དང་བྲལ་བའི་འོད་
གསལ་ལ་མཉམ་པར་བཞག་པའི་རྗེས་སུ་དེ་ལས་ལངས་མ་ཐག་ཁོ་ནར་འཇའ་ལུས་ལས་གྲུབ་པའི་ལྷ་སྐུར་ལྡང་བ་ཡིན་ལ། དེ་ནི་འབྲས་དུས་ཀྱི་གཟུགས་སྐུ་གཉིས་ཀྱི་ཉེར་ལེན་གྱི་རྒྱུ་བྱེད་དོ། །དེས་ན་བསྐྱེད་རིམ་གྱི་སྐབས་ཁོ་ནར་ལྷའི་
སྐུ་བསྒོམ་ལ། རྫོགས་རིམ་གྱི་སྐབས་སུ་ལྷ་སྐུ་ཡེ་མི་སྒོམ་ན་རྫོགས་རིམ་གྱི་སྐབས་སུ་གཟུགས་སྐུ་གཉིས་ཀྱི་ཐུན་མོང་མིན་པའི་ཉེར་ལེན་གྱི་རྒྱུ་མེད་པར་ཐལ་བའི་སྐྱོན་ཡོད་པས་སྐབས་དེར་ཡང་ལྷ་སྐུ་ངེས་པར་བསྒོམ་དགོས་སོ། །རླུང་
6-16-62b


ཆགས་ཚུལ་ནི། མངལ་དུ་ཉིད་མཚམས་སྦྱར་ནས་སྙིང་གའི་རྩ་མདུད་ཆགས་པའི་ཚེ་དེའི་ནང་གི་ལྷན་སྐྱེས་ཀྱི་རླུང་ལས་སྣ་སྒོར་རྒྱུ་བའི་སྲོག་འཛིན་གྱི་རླུང་སྐྱེ་ལ། རླུང་དེ་གཉིས་ཀའང་སྲོག་འཛིན་གྱི་རླུང་ཡིན་ནོ། །དེའི་ཚེ་སེམས་ཅན་གྱི་ལུས་ཉའི་རྣམ་
པ་ལྟ་བུར་ཡོད་པར། རྒྱུད་རྡོ་རྗེ་འཕྲེང་བར་བཤད། དེ་ཡང་མངལ་དུ་ཞུགས་པའི་ཟླ་བ་དང་པོའི་དུས་ཀྱི་སྐྱེ་ཚུལ་ཡིན་ནོ། །ཟླ་བ་གཉིས་པའི་ཚེ་སྲོག་འཛིན་གྱི་རླུང་ལས་ཐུར་སེལ་གྱི་རླུང་སྐྱེ་ལ། སྲོག་འཛིན་གྱི་རྩ་བའི་གནས་ནི་སྙིང་ག་ཡིན་ཅིང་། ཐུར་
སེལ་གྱི་རྩ་བའི་གནས་ནི་གསང་གནས་ཡིན་ནོ། །དེའི་ཚེ་ལག་པ་གཉིས་རྐང་པ་གཉིས་ཏེ་བཞི་མགོ་དང་བཅས་པའི་འབུར་བུ་ལྔ་དོད་པས་ལུས་རུས་སྦལ་གྱི་རྣམ་པ་ལྟ་བུ་ཡོད་དོ། །ཟླ་བ་གསུམ་པ་ལ་ཐུར་སེལ་གྱི་རླུང་ལས་མཉམ་གནས་ཀྱི་
རླུང་སྐྱེ་ལ། དེའི་རྩ་བའི་གནས་ནི་ལྟེ་བ་ཡིན་ནོ། །དེའི་ཡན་ལག་ལྔ་ཚང་བ་ལ་ཅུང་ཟད་རྒུར་པོར་ཡོད་པས་ཕག་རྒོད་ཀྱི་རྣམ་པ་ལྟ་བུར་ཡོད་དོ། །ཟླ་བ་བཞི་པ་ལ་མཉམ་གནས་ཀྱི་རླུང་ལས་གྱེན་རྒྱུའི་རླུང་སྐྱེ་ལ། དེའི་རྩ་བའི་གནས་ནི་མགྲིན་
པ་ཡིན་ནོ། །དེའི་ཚེ་སྟོང་ཅུང་ཟད་རྒྱས་པ་སེང་གེའི་རྣམ་པར་ཡོད་དོ། །ཟླ་བ་ལྔ་པ་ལ་གྱེན་རྒྱུའི་རླུང་ལས་ཁྱབ་བྱེད་ཀྱི་རླུང་སྐྱེ་ལ། དེའི་རྩ་བའི་གནས་ནི་ཚིགས་ཆེན་བཅུ་གཉིས་ཡིན་ནོ། །ཟླ་བ་དྲུག་པ་ལ་མིག་གི་སྒོར་འབྱུང་བའི་རླུང་ཀླུ་ཞེས་
བྱ་བ་སྐྱེ་ལ་འབྱུང་བས་སྐྱེ། ཟླ་བ་བདུན་པ་ལ་རྣ་བའི་སྒོར་འབྱུང་བའི་རླུང་རུས་སྦལ་དང་། འབྱུང་བ་ཆུ་སྐྱེ། ཟླ་བ་བརྒྱད་པ་ལ་སྣའི་སྒོར་རྒྱུ་བའི་རླུང་རྩངས་པ་དང་། འབྱུང་བ་མེ་སྐྱེ། ཟླ་བ་དགུ་པ་ལ་ལྕེ་ལ་རྒྱུ་བའི་རླུང་ལྷ་སྦྱིན་དང་འབྱུང་བ་རླུང་སྐྱེ།
6-16-63a


ཟླ་བ་བཅུ་པ་ལ་ལུས་ལ་རྒྱུ་བའི་རླུང་གཞུ་ལས་རྒྱལ་དང་འབྱུང་བ་ནམ་མཁའི་ཁམས་ཏེ། ལུས་ཀྱི་བུག་པ་དང་སྦུབས་རྣམས་འབྱུང་། ཡན་ལག་གི་རླུང་ལྔ་པོ་དེ་དག་གཙོ་ཆེར་སྲོག་འཛིན་གྱི་རླུང་ཡིན་ལ། རླུང་གཞན་བཞི་པོ་
དེ་དག་ཀྱང་དབང་པོའི་སྒོ་རྣམས་ལ་རྒྱུ་བ་སྲིད་དོ། །སྲོག་འཛིན་གྱིས་ཆེ་གནས་པ་དང་། སྣ་སྒོ་ལ་རྒྱུ་བའི་ལས་བྱེད་ལ། ཐུར་སེལ་གྱིས་བཤད་གཅི་ཐུར་དུ་འདྲེན་པའི་བྱ་བ་བྱེད། མཉམ་གནས་ཀྱིས་ཟས་ཀྱི་དྭངས་མ་མ་ལུས་པ་ལུས་ལ་འགྲེམ་
པའི་བྱ་བ་བྱེད། དྭངས་སྙིགས་འབྱེད་མཁན་ནི་ལྟེ་བའི་གཏུམ་མོའི་མེས་བྱེད། གྱེན་རྒྱུས་ཟས་ལ་མྱང་བ་དང་སྨྲ་བ་སོགས་དང་རླུང་གཞན་རྣམས་གྱེན་དུ་འགྲོ་བའི་བྱ་བ་བྱེད་དོ། །ཁྱབ་བྱེད་ཀྱིས་ལུས་ཀྱི་ནང་གི་རླུང་གཞན་རྣམས་ལ་ཁྱབ་པ་དང་། འགྲོ་བ་
སོགས་ཀྱི་བྱ་བ་བྱེད་དོ། །ཐུར་སེལ། སྲོག་འཛིན། གྱེན་རྒྱུ། མཉམ་གནས་བཞི་ནི་རིམ་པ་བཞིན་ས་ཆུ་མེ་རླུང་བཞི་དང་། རྡོ་རྗེ་མགོན་གོ་རིན་ཆེན་མགོན་པོ། །པདྨ་མགོན་པོ། །ལས་ཀྱི་མགོན་པོ་བཞིའི་རླུང་ཡིན་ལ། དེ་ཡང་མགོན་པོ་རེ་རེའི་རླུང་
རྒྱུ་བ་ན། དགུ་བརྒྱ་པ་ཕྲག་རེ་རེ་རྒྱུ་ལ། དེ་ལ་འབྱུང་བ་ཆེ་ཆུང་གི་དབང་དུ་བྱས་ན་འབྱུང་བ་ཆེ་བའི་རླུང་ཡིན་ལ། དེ་ལ་ཉིས་བརྒྱ་ཉེར་ལྔ་པ་ཚན་པ་བཞིར་བྱས་ལ། ཚན་པ་རེ་རེ་ལ་གོས་དཀར་མོ་ལ་སོགས་པ་ལྷ་མོ་བཞིའི་རླུང་ཡིན་ཅིང་། ལྷ་མོའི་རླུང་
ལ་འབྱུང་ཆུང་གི་རླུང་ཟེར། དེས་ན་མགོན་པོ་རེ་རེའི་རླུང་རྒྱུ་བ་ན། ལྷ་མོ་བཞི་བཞིའི་རླུང་རྒྱུ་བས་འབྱུང་བ་ཆེ་བའི་རླུང་རེ་རེ་རྒྱུ་བ་ན། འབྱུང་བ་ཆུང་བའི་རླུང་བཞི་བཞི་རྒྱུ་བ་ཡིན་ནོ། །མགོན་པོ་བཞིའི་རླུང་གི་ཁྱད་པར་ནི། པདྨ་མགོན་པའི་རླུང་རྒྱུ་བའི་ཚེ་
6-16-63b


ཡང་ཁ་དོག་རྣམ་པ་ལྔའི་རླུང་རྒྱུ་ལ། དེའི་ཚེ་དམར་པོས་གཞན་བཞི་ལ་ཁྱབ་པར་རྒྱུ་བ་ཡིན་ནོ། །དེ་བཞིན་དུ་རིན་ཆེན་མགོན་པོ། །རྡོ་རྗེ་མགོན་པོ། ལས་ཀྱི་མགོན་པོ་རྣམས་ལ་ཡང་། སེར་པོ་དང་། དཀར་པོ་དང་། ལྗང་གུ་རྣམས་གཙོ་ཆེ་ཞིང་། གཞན་
ཕལ་པའི་ཚུལ་གྱིས་རྒྱུ་བ་ཡིན་ནོ། །དེ་ཡང་ལྷ་མོ་བཞིའི་རླུང་རྒྱུ་བའི་ཚུལ་ནི། མེ་གོས་དཀར་མོའི་རླུང་རྒྱུ་བའི་ཚེ་ནི། སྣ་བུག་གཡས་པ་ལྟ་བུའི་དབང་དུ་བྱས་ན། དམར་པོ་དབུས། གཡོན་པ་ལྗང་གུ ། འོག་ལ་དཀར་པོ། སེར་པོ་སྟེང་དང་། 
སྔོན་པོ་གཡས་ལ་རྒྱུ་བ་ཡིན་ནོ། །དེས་མཚོན་ནས་མེའི་རླུང་རྒྱུ་བའི་ཚེ་ལྗང་གུ་དབུས་དང་། མེའི་ས་རྒྱུ་བའི་ཚེ་སེར་པོ་དབུས་དང་། མེའི་ཆུ་རྒྱུ་བའི་ཚེ་དཀར་པོ་དབུས་སུ་རྒྱུ་བ་ཡིན་ནོ། །ཡང་མགོན་པོ་བཞིའི་རླུང་རྒྱུ་བའི་ཚེ་སྣ་བུག་གཡས་པ་ལྟ་བུ་ཞིག་
གི་གཡས་གཡོན་ལ་རྒྱུ་ཞེས་བླ་མ་ཁ་ཅིག་གསུང་བ་མི་འཐད་པས། པདྨ་མགོན་པོ་ལྟ་བུ་སྣ་བུག་གཡས་ཁོ་ན་དང་། ལས་ཀྱི་མགོན་པོ་གཡོན་ཁོ་ན་དང་། རིན་ཆེན་མགོན་པོ་གཉིས་ཀ་ནས་དྲག་ཏུ་རྒྱུ་ཞིང་། རྡོ་རྗེ་མགོན་པོ་གཉིས་ཀ་ནས་དལ་བར་
རྒྱུ་བ་ཡིན་ནོ། །དེ་ལ་གསང་བ་འདུས་པའི་ལུགས་ཀྱི་ཉིན་ཞག་ཕྲུགས་གཅིག་ལ་ཐུན་བཅུ་གཉིས། ཐུན་ཕྱེད་པ་ཉེར་བཞི། ཐུན་ཕྱེད་པ་རེ་རེ་ལ་མགོན་པོ་རེ་རེའི་རླུང་དགུ་བརྒྱ་པ་ཕྲག་རེ་རེ་རྒྱུ་ལ། དགུ་བརྒྱ་པ་རེ་རེ་ལ་ལྷ་མོ་བཞི་བཞིའི་རླུང་རྒྱུ་བ་དེ་
འབྱུང་ཆེན་གྱི་དཀྱིལ་འཁོར་ཉེར་བཞི། དེ་རེ་རེ་ལ་འབྱུང་ཆུང་གི་དཀྱིལ་འཁོར་བཞི་བཞིར་ཕྱེ་བས་འབྱུང་ཆུང་གི་དཀྱིལ་འཁོར་དགུ་བཅུ་རྩ་དྲུག་རྒྱུ་བ་ཡིན་ནོ། །འདི་བའི་ལུགས་ཀྱི་འཕོ་བ་ཉེར་བཞིར་བྱེད་པ་ཡིན་ཏེ། འཕོ་བའི་དོན་ནི་སྣ་བུག་
6-16-64a


གཡས་ནས་གཡོན་དུ་འཕོ་བ་ལྟ་བུ་མིན་ལ། འདི་ནི་དགུ་བརྒྱ་པ་རེ་རེ་སོང་བ་ན་འཕོ་འཇུག་བྱེད་པའི་ཕྱིར་རོ། །དབུགས་ཉི་ཁྲི་ཆིག་སྟོང་དྲུག་བརྒྱ་རྒྱུ་བ་ནི་མགོན་པོ་བཞིའི་རླུང་ཁོ་ན་ཡིན་ལ། ཁྱབ་བྱེད་ཀྱི་རླུང་ནི་འཆི་ཚེ་མ་
གཏོགས་མི་རྒྱུ་ཞིང་། དེའི་ཚེ་ཡང་ཅི་ཙམ་རྒྱུ་བའི་ངེས་པ་མི་སྣང་ཞིང་། མན་ངག་སྙེ་མ་ལས། རྒྱ་གར་བའི་བླ་མ་སྔར་བས་རྣམས་ཀྱི་མན་ངག་ལས། ལྷ་མོ་གཅིག་གིས་རླུང་ཉིས་བརྒྱ་ཉེར་ལྔ་རྩ་སོ་གཉིས་ནས་འབབ་པའི་ཚེ། བདུད་བྲལ་མའི་ནང་
ནས་དབུགས་བདུན་བརྒྱ་ལྷག་ཙམ་ཞིག་འབབ་པར་བཤད་ལ། དེ་ལྟར་བདུད་བྲལ་མའི་ནང་དུ་འཆི་བའི་གོང་ནས་རླུང་འབབ་པ་དང་། ཁྱབ་བྱེད་ཀྱི་རླུང་འཆི་བའི་གོང་ནས་རྒྱུ་བ་འདྲ་བ་ཞིག་འབྱུང་ལ། འོན་ཀྱང་མན་ངག་དེ་ཡིད་ཆེས་པའི་གནས་སུ་
ཁས་ལེན་པའི་ངེས་པ་མི་སྣང་ངོ་། །ཁྱབ་བྱེད་ཀྱི་རླུང་ནི་འབྱུང་བ་ནམ་མཁའི་རླུང་ཡིན་ལ། ས་རླུང་དང་། ཆུ་རླུང་དང་། མེ་རླུང་དང་། རླུང་གི་རླུང་རྣམས་རྒྱུ་བའི་ཚུལ་ནི། རིམ་པ་ལྟར་ཐང་ཀ་དང་། འོག་དང་། སྟེང་དང་། གྱེན་སོགས་ལ་རྒྱུ་
བ་ཡིན་ནོ། །མ་རྒྱུད་ནས་གསུངས་པའི་རྩ་འདབ་ནས་རྒྱུ་ཚུལ་ནི། ཕྱིའི་དབང་དུ་བྱས་ན་ཉིན་ཞག་གཅིག་ལ་དབྱུ་གུ་དྲུག་ཅུ་རེ་བཞི་ཡོད་ལ། དེ་དང་མཐུན་པར་གང་ཟག་གཅིག་ལ་ཉིན་ཞག་གཅིག་ལ་ལྟེ་བའི་འདབ་མ་ནས་དབྱུ་གུ་དྲུག་ཅུ་རེ་བཞིའི་
རླུང་རྒྱུ་ལ། དབྱུ་གུ་རེ་ལ་རླུང་སུམ་བརྒྱ་སུམ་ཅུ་སོ་ཕྱེད་དང་བརྒྱད་བརྒྱད་ཡོད་དེ། ཡང་ཉིན་ཞག་གཅིག་ལ་ཆུ་ཚོད་སོ་གཉིས་ཡོད་ལ། དེ་དང་མཐུན་པར་ཆུ་ཚོད་སོ་གཉིས་ཀྱི་རླུང་སྤྱི་བོའི་རྩ་འདབ་ལ་རྒྱུ་ལ། ཆུ་ཚོད་རེ་ལ་རླུང་དྲུག་བརྒྱ་དང་བདུན་
6-16-64b


ཅུ་རྩ་ལྔ་ཡོད་དོ། །ཡང་ཉིན་ཞག་གཅིག་ལ་འཕོ་བ་བཅུ་དྲུག་ཡོད་པ་དང་མཐུན་པར་འཕོ་བ་བཅུ་དྲུག་གི་རླུང་མགྲིན་པའི་རྩ་འདབ་ནས་རྒྱུ་ལ། འཕོ་བ་རེ་རེའི་རླུང་ལ་སྟོང་དང་ཕྱེད་དང་བཞི་བརྒྱ་རེ་ཡོད་ཅིང་། ཡང་ཉིན་ཞག་གཅིག་ལ་ཐུན་ཚོད་བརྒྱད་ཡོད་པ་དང་
མཐུན་པར་སྙིང་གའི་རྩ་འདབ་ནས་ཐུན་ཚོད་བརྒྱད་ཀྱི་རླུང་རྒྱུ་ལ། ཐུན་ཚོད་རེ་རེ་ལ་རླུང་ཉིས་སྟོང་བདུན་བརྒྱ་རེ་ཡོད་ལ། འདི་དག་ཀྱང་གང་ཟག་གཅིག་གི་ཉིན་ཞག་གཅིག་གི་རླུང་ཉི་ཁྲི་ཆིག་སྟོང་དྲུག་བརྒྱ་རྒྱུ་བའི་ཚུལ་ཡིན་ཅིང་། དེ་ཡང་འཁོར་ལོ་བཞི་པོ་
རེ་རེ་ནས་ཉི་ཁྲི་ཆིག་སྟོང་དྲུག་བརྒྱ་སྔ་ཕྱི་མ་ཡིན་པར་དུས་མཉམ་དུ་རྒྱུ་བ་ཡིན་ནོ། །དེ་ཡང་ལྟེ་བའི་འདབ་མ་གཉིས་ནས་རླུང་རྒྱུ་བ་རྫོགས་པའི་ཚེ། སྤྱི་བོའི་འདབ་མ་གཅིག་ནས་གཉིས་ལ་འཕོ། སྤྱི་བོའི་འདབ་མ་གཉིས་ནས་རྒྱུ་བ་རྫོགས་པའི་ཚེ་
མགྲིན་པའི་འདབ་མ་གཅིག་ནས་གཉིས་པར་འཕོ་ལ། མགྲིན་པའི་འདབ་མ་གཉིས་ནས་རྒྱུ་བ་རྫོགས་པའི་ཚེ་སྙིང་གའི་འདབ་མ་གཅིག་ནས་གཉིས་པར་འཕོ་བ་ཡིན་ནོ། །དེ་ལྟར་རྩ་རླུང་ཐིག་ལེ་བཤད་པའི་དགོས་པ་ནི། དེ་དག་གི་གནས་ཚུལ་ཐིངས་
ནས་དེ་ལ་གནད་དུ་བསྣུན་པས་སྟོང་པ་དང་བདེ་བ་དབྱེར་མེད་པའི་རྫོགས་རིམ་གྱི་རྟོགས་པ་སྐྱེ་བའི་དགོས་པ་ཡོད་ལ། སྟོང་པ་ནི་ཡུལ་ལ་བྱེད་པ་དང་ཡུལ་ཅན་ལ་བྱེད་པ་གཉིས་ལས། འདི་ནི་ཤཱནྟི་པས་བཤད་པ་ལྟར་ཡུལ་བདག་མེད་པ་ལྟ་
བུ་ཡིན་ལ། བདེ་བ་དེ་ལ་རྣམ་པ་མང་དུ་ཡོད་དེ། མཚན་ཉིད་ཐེག་པ་ནས་བཤད་པའི་ལུས་སེམས་ཤིན་སྦྱངས་ཀྱི་བདེ་བ་དང་། དབུགས་བགྲངས་པ་ལ་བརྟེན་ནས་སྐྱེས་པའི་ཞི་གནས་ཀྱི་བདེ་བ་དང་། རྒྱུད་སྡེ་འོག་མ་ནས་བཤད་པའི་སྲོག་བཀག་
6-16-65a


པའི་རླུང་སྦྱོར་གྱི་བདེ་བ་རྣམས་ནི་འདིར་དོན་དུ་གཉེར་བྱ་མ་ཡིན་ལ། འོ་ན་གང་ཡིན་སྙམ་ན། དགའ་བ་བཞིའི་ནང་ནས་ལྷན་སྐྱེས་ཀྱི་དགའ་བ་ཡིན་ལ། དེ་ཡང་རླུང་ལ་རྡོར་བཟླས་དང་། གཏུམ་མོའི་མེ་དམིགས་བྱས་པའི་
སྟོབས་ཀྱིས་ལྟེ་བར་དམར་ཆ་འཕེལ་ནས་སྤྱི་བོའི་བྱང་སེམས་ཞུ་སྟེ། ལུས་ཤེས་ཀྱི་འཁོར་དུ་ཚོར་བ་བདེ་བ་སྐྱེ་ལ། དེས་དེ་མ་ཐག་རྐྱེན་བྱས་ནས་ཡིད་ལ་དགའ་པའི་བདེ་བ་སྐྱེ་ལ། དགའ་བ་དེས་སྟོང་ཉིད་ཡུལ་དུ་བྱས་ཤིང་བཟུང་ནས་དེ་དང་
སྟོང་ཉིད་གཉིས་ནི་ནམ་མཁའ་ལ་ནམ་མཁའ་ལྟ་བུར་སྦྱོར་བའི་ཚེ། བདེ་སྟོང་དབྱེར་མེད་པའི་ཟུང་དུ་འཇུག་པའི་རྫོགས་རིམ་ཞེས་བྱའོ། །ཡང་སྔགས་ཀྱི་སྐབས་སུ་སྟོང་པ་དང་སྙིང་རྗེ་དབྱེར་མེད་ཅེས་བཤད་པའི་སྟོང་པ་ནི་ཆོས་སྐུའི་ཉེར་
ལེན་གྱི་རྒྱུར་གྱུར་པའི་སྟོང་ཉིད་རྟོགས་པའི་ཤེས་རབ་ཡིན་ལ། སྙིང་རྗེ་ནི་སེམས་ཅན་སྡུག་བསྔལ་དང་བྲལ་ན་སྙམ་པའི་སྙིང་རྗེ་ཁོ་ན་ལ་མི་བྱེད་ཀྱི། གཟུགས་སྐུའི་ཉེར་ལེན་གྱི་རྒྱུར་གྱུར་པའི་ཐབས་སྙིང་རྗེ་ཡིན་ནོ། །དེས་ན་སེམས་ཀྱི་
རྟེན་ཐིག་ལེ་ཡིན་པས་རྗེ་མར་པ་ནས་བརྒྱུད་པ་རྣམས་ལ་ཉིན་ཞག་གཅིག་ལ་གཉིད་དུ་སོང་མ་སོང་གཉིས་སུ་ངེས་ལ། གཉིད་དུ་སོང་བ་ལ་རྨི་ལམ་ཡོད་མེད་གཉིས་ལས། རྨི་ལམ་མེད་པའི་གཉིད་འཐུག་གི་དུས་སུ་སེམས་ཀྱི་རྟེན་བྱང་སེམས་དཀར་
དམར་སྙིང་ག་ན་གནས་པས་སྙིང་གར་སེམས་འཛིན་ལ། རྨི་ལམ་རྨིས་པའི་དུས་སུ་དེ་གཉིས་མགྲིན་པར་གནས་པས་མགྲིན་པར་སེམས་འཛིན་ལ། གཉིད་དུ་མ་སོང་བའི་དུས་སུ་ལྟེ་བར་གནས་པས་དེར་སེམས་འཛིན་ལ། ཕོ་མོ་སྦྱོར་བ་བྱེད་པའི་
6-16-65b


ཚེ་དེ་གཉིས་སྤྱི་བོ་ན་གནས་ཞེས་བརྗོད་དོ། །དུས་འཁོར་བའི་ལུགས་ལ་དང་པོ་གཉིས་སྔ་མ་དང་འདྲ་ལ། ཕྱི་མ་གཉིས་ལྡོག་སྟེ་བཤད་དོ། །གཉིས་པ་ལ་གཉིས། རྫོགས་རིམ་སྤྱིའི་རྣམ་གཞག་མདོ་ཙམ་དུ་བསྟན་པ་དང་། སྐབས་སུ་བབ་པའི་དམིགས་
པ་ངོས་བཟུང་བའོ། །དང་པོ་ནི། སྤྱིར་སྔགས་ཀྱི་ལུགས་ལ་རབ་ཚེ་འདི་དང་། འབྲིང་བར་དོ། ཐ་མ་སྐྱེ་བ་བརྒྱུད་ནས་འཚང་རྒྱ་བ་གསུམ་ལས། དང་པོ་ནི་གསང་འདུས་འཕགས་ལུགས་པ་དང་བསྟུན་ན་དང་པོར་སེམས་བསྐྱེད་བྱང་སེམས་ཀྱི་སྡོམ་པ་
བཟུང་ནས་སྤྱོད་པ་ཕར་ཕྱིན་དྲུག་ལ་བསླབ་པ་སོགས་ལམ་ཐུན་མོང་བས་རྒྱུད་ལེགས་པར་སྦྱངས་ནས། དེས་དབང་བསྐུར་བ་མཚན་ཉིད་དང་ལྡན་པ་ཐོབ་པར་བྱས་ཏེ། རྩ་ལྟུང་དང་སྦོམ་པོ་སོགས་ཀྱི་དམ་ཚིག་དང་སྡོམ་པ་དག་པས་རྒྱུད་དག་པར་བྱས། དེ་
ནས་ཕྲ་ཐིག་གི་བར་བསྐྱེད་རིམ་བརྟན་པར་བྱས། དེ་ནས་རྡོ་རྗེ་གསུམ་གྱི་རྫོགས་རིམ་རྣམས་རྒྱུད་ནས་བཤད་པ་བཞིན་ཐོབ་པར་བྱས་ལ། དེ་ནས་རླུང་སེམས་ཤིན་ཏུ་ཕྲ་བ་ལ་བརྟེན་ནས་སྒྱུ་ལུས་རྡོ་རྗེ་འཆང་གི་སྐུར་ལངས་ཏེ། འོད་གསལ་མངོན་དུ་
བྱས་ལ་སློབ་པ་དང་མི་སློབ་པའི་ཟུང་འཇུག་མངོན་དུ་བྱེད་དོ། །གཉིས་པ་ནི། སེམས་དབེན་ལ་གསུམ་ལས། སེམས་སྣང་བའི་ཡེ་ཤེས་མན་ཆད་ཀྱི་བསྐྱེད་རྫོགས་ཀྱི་ཡོན་ཏན་རྣམས་མཚན་ཉིད་དང་ལྡན་པ་རྣམས་ཐོབ་དགོས་ལ། སྣང་བ་
ཉེར་ཐོབ་གཉིས་མ་ཐོབ་དགོས་ཤིང་། སྣང་བ་མཆེད་པ་ནི་ཐོབ་མ་ཐོབ་གང་ཡིན་ཀྱང་དེའི་ཚེ་སྤྱོད་པ་བྱེད་པའི་མཐུན་རྐྱེན་མ་འཛོམ་པའམ་ཡང་ཞིང་ལས་སོགས་ཀྱི་བྲེལ་བའི་དབང་གིས་སྤྱོད་པ་བྱེད་རྒྱུ་མ་བྱུང་བར་འཆི་བའི་ཚེ་དེས་སྤྱོད་པའི་དོད་
6-16-66a


ཐུབ་པར་བྱེད་པ་ནི། འདིར་དཔེ་ཁ་ཅིག་ལས། ནཱ་དའི་གནད་ཀྱིས་འཆི་བའི་གོང་དུ་ཏིང་ངེ་འཛིན་གྱི་མཐུས་འབྱུང་བ་སྡུད་མི་ཐུབ་ལ། དེ་མ་ཐུབ་ན་སྣང་བ་ཉེར་ཐོབ་ཀྱི་ཡེ་ཤེས་མངོན་དུ་མི་འགྱུར་བས། དེ་འཆི་ཁར་མངོན་
དུ་འགྱུར་བའི་ཆེད་དུ་འཆི་ཁར་འབྱུང་བ་སྡུད་པའི་ཚེ་མན་ངག་ནས་བཤད་པའི་འབྱུང་བ་སྡུད་ལུགས་ཀྱི་དམིགས་པ་རྣམས་བསྐྱངས་པས་ཤི་ཟིན་པའི་ཚོད་ཙམ་ན་སྣང་བ་ཉེར་ཐོབ་མངོན་དུ་བྱེད་ཅིང་། བར་དོར་སྐྱེས་པའི་ཚོད་ཙམ་ན་སྒྱུ་ལུས་
ཐོབ་ཅིང་། དེ་ནས་རྟེན་དེ་ལ་འོད་གསལ་ཟུང་འཇུག་མངོན་དུ་བྱེད་དོ། །ཞེས་འབྱུང་ངོ་། །འབྱུང་བ་སྡུད་པའི་ཚེ་མན་ངག་གི་འོད་གསལ་མངོན་དུ་བྱས་ལ། དེའི་མཐར་ལོངས་སྐུར་ལངས་དེའི་འོད་གསལ་དང་ཟུང་འཇུག་མངོན་དུ་བྱེད་དོ། །
གསུམ་པ་ནི། ཚེ་འདི་ལ་བླ་མེད་ཀྱི་དཀྱིལ་འཁོར་གང་ཡང་རུང་བར་དབང་བསྐུར་མཚན་ཉིད་དང་ལྡན་པ་ཐོབ་པས། དམ་ཚིག་དང་སྡོམ་པ་དག་པར་བྱས་པ་ཅིག་ངེས་པར་ཡན་ལག་ཏུ་དགོས་ལ། བསྐྱེད་རིམ་དང་ལུས་དབེན་རྣམས་རྒྱུད་
ལ་སྐྱེས་མ་སྐྱེས་གང་ཡིན་ཀྱང་རུང་སྐྱེ་བ་བཅུ་དྲུག་ཚུན་ལ་འཚང་རྒྱ་བ་ཡིན་ནོ། །འདི་ལ་སེམས་དབེན་གྱི་རྟོག་པ་སྟོང་པ་གསུམ་གང་ཡང་མ་སྐྱེས་པ་དགོས་ཏེ། སྐྱེས་ན་འདི་ལ་འཚང་རྒྱ་བའམ་ཡང་ན་བར་དོར་འཚང་རྒྱ་བའི་ཕྱིར་རོ། །
ཡང་རྗེ་མར་པ་ནས་བརྒྱུད་པ་རྣམས་ཀྱི་ལུགས་ལ་བསྐྱེད་རིམ་བརྟན་པ་གཞིར་བཞག་ནས་རླུང་གཏུམ་མོ་སྤྱོད་པ་གསུམ་མཐར་ཕྱིན་ན་ཚེ་འདི་ལ་འཚང་རྒྱ། དེ་ལྟར་མ་ནུས་ན་ད་གཟོད་འཆི་བའི་འོད་གསལ་ཟིན་པའི་དོན་དུ་ད་ལྟ་གཉིད་
6-16-66b


འཐུག་དང་གཉིད་ཀྱི་སྟོང་པ་བསྲེས་ནས་བསྒོམ། དེ་ལེགས་པོ་ཞིག་བྱུང་ན་ད་གཟོད་འཆི་ཙ་ན་ཐ་མལ་གྱི་འཆི་བ་རང་དགའ་བར་མི་འགྲོ་བར། འོད་གསལ་བཟུང་ནས་འཆི་བ་ཆོས་སྐུར་འཁྱེར་ཐུབ་ལ། ད་གཟོད་བར་དོ་ཟིན་པའི་དོན་དུ་ད་ལྟ་དང་པོར་རྨི་ལམ་
གྱི་མན་ངག་ལ་སྦྱངས་ནས་རྨི་ལམ་བཟུང་ལ། དེ་ཟིན་པའི་ཚེ་བར་དོའི་མན་ངག་དང་བསྲེས་ནས་བསྒོམས་པས། ད་གཟོད་བར་དོ་ཟིན་ཏེ་སྦྱངས་པས་ཐ་མལ་གྱི་བར་དོ་རང་དགའ་བར་མི་འཆོར་བར་ལོངས་སྐུར་འཁྱེར་ཤེས། དེ་དུས་ཕན་ཐོགས་
པ་ཡིན་ནོ། །ད་ལྟ་བསྐྱེད་རིམ་ལ་སྦྱངས་ན་བར་དོའི་སྣང་བ་ཐམས་ཅད་ལྷ་སྐུར་འཆར་ཞིང་། དེའི་གནད་ཀྱིས་ཆགས་སྡང་ཁེགས་ནས་མངལ་སྐྱེས་ལྟ་བུའི་སྐྱེ་སྒོ་ཁེགས་ནས། སྐྱེ་གནས་སུ་སྐྱེ་བ་མི་ལེན་པར། བར་དོའི་རྟེན་དེ་ལ་ལམ་ལྷག་མ་
རྣམས་བསྒོམས་ཏེ་འཚང་རྒྱ་བ་ཡིན་ལ། བར་དོར་འཚང་རྒྱ་མི་ནུས་པར་སྐྱེ་གནས་གང་ཡང་རུང་བ་ཞིག་ཏུ་སྐྱེ་བ་བརྒྱུད་ནས་འཚང་རྒྱ་དགོས་པ་དེ་ནི་འཕོ་བ་དང་གྲོང་འཇུག་གི་གདམས་ངག་སྒོམ་པ་ཡིན་ལ། འདི་ནི་རྒྱུད་ཀྱེེ་རྡོ་རྗེ་སོགས་ཀྱི་
དགོངས་པ་ཡིན་གསུང་ངོ་། །འདི་ནི་གདམས་ངག་ལེགས་པོ་ཕན་ཆེ་བ་ཞིག་སྣང་ངོ་། །འོན་ཀྱང་བར་དོར་སྣང་བ་ལྷ་སྐུར་ཤར་བས་མངལ་སྐྱེས་ཁེགས་སླ་ཆུག་ཀྱང་། སྐྱེ་གནས་གཞན་གསུམ་ཨེ་ཁེགས་ཡིན་གསུང་ངོ་། །དེ་ཡང་རྣལ་འབྱོར་
བླ་མེད་ཀྱི་རྫོགས་རིམ་གྱི་གནད་དམ་གཙོ་བོ་ནི། སྤྱི་བོའི་བྱང་སེམས་འབབ་པ་ལས་བྱུང་བའི་ལྷན་སྐྱེས་ཀྱི་དགའ་བ་དང་། སྟོང་ཉིད་དབྱེར་མེད་ཀྱི་ཏིང་ངེ་འཛིན་ཡིན་པར་བྲམ་ཟེ་ཆེན་པོ་ས་ར་ཧ་ལ་སོགས་པའི་རྒྱ་གར་གྱི་མཁས་གྲུབ་
6-16-67a


ཁུངས་མ་ཐམས་ཅད་ཞལ་མཐུན་ལ། སྤྱི་བོའི་བྱང་སེམས་ཞུ་བའི་ཐབས་སུ་རླུང་སྦྱོར་དང་མེ་དམིགས་སོགས་མང་པོ་ཞིག་གསུངས་ཀྱང་། དེ་ཐམས་ཅད་གཏུམ་མོར་འདུ་བ་ཡིན་ནོ། །དེ་ཡང་སྦྱོར་དྲུག་གི་ལུགས་ཀྱི་ནི། སོར་
བསམ་གཉིས་ཀྱིས་རྩ་དབུ་མའི་ལམ་སྦྱངས་ནས། སྲོག་རྩོལ་གྱི་རླུང་དབུ་མར་འཇུག་ཅིང་འཛིན་པས་ཆུད་པ་དེ་བརྟེན་པར་བྱེད་ལ། རྗེས་དྲན་གྱི་དུས་སུ་རླུང་གི་མཐུས་སྤྱི་པོའི་བྱང་སེམས་ཞུ་ནས་མི་འགྱུར་བའི་བདེ་བ་སྐྱེ་ལ། དེ་ནམ་སྐྱེས་པ་ནས་ཏིང་
ངེ་འཛིན་གྱི་ཡན་ལག་ཐོབ་པ་ཡིན་ལ། དེ་ནས་མི་འགྱུར་བའི་བདེ་བ་ཉི་ཁྲི་ཆིག་སྟོང་དྲུག་བརྒྱ་རྫོགས་མ་ཐག་ཏུ་འཚང་རྒྱ་བ་ཡིན་ནོ། །གསང་འདུས་འཕགས་ལུགས་པའི་ལུགས་ནི། ངག་དབེན་རྡོར་བཟླས་མཐར་ཕྱིན་པའི་སྟོབས་ཀྱིས་སྤྱི་བོའི་
བྱང་སེམས་ཞུ་ནས་ལྷན་སྐྱེས་ཀྱི་དགའ་བ་སྐྱེ་ལ། དགའ་བ་དེས་སྟོང་ཉིད་ཡུལ་དུ་བཟུང་བ་ལ། བདེ་སྟོང་དབྱེར་མེད་ཟེར་བ་མ་གཏོགས་སྟོང་པ་ལ་བདེ་བས་རྒྱས་བཏབ་པ་དང་། བདེ་བ་ལ་སྟོང་པས་རྒྱས་བཏབ་པ་ལྟ་བུའི་བདེ་སྟོང་དབྱེར་མེད་ཀྱི་དོན་མིན་
ནོ། །དེ་ལ་ལྷན་སྐྱེས་ཀྱི་བདེ་བ་སྐྱེ་བ་ལ་སྤྱི་བོའི་བྱང་སེམས་ཞུ་དགོས་པས་ཐིག་ལེ་དཀར་པོ་ཞུ་རྒྱུ་ཡིན་ལ། དེ་བཞུ་བ་ལ་ལྟེ་བའི་དམར་ཆ་འབར་དགོས་ཏེ། དེ་ཡང་རླུང་གིས་སྦར་དགོས་ཏེ་ཐིག་ལེ་དཀར་དམར་དང་རླུང་གནས་པའི་གཞི་ནི་རྩ་ཡིན་པས། རྫོགས་
རིམ་གྱི་སྐབས་སུ་རྩ་རླུང་ཐིག་ལེ་རྣམས་ཞིབ་པར་འཆད་པའི་རྒྱུ་མཚན་དེ་ཡིན་ནོ། །དེ་ཡང་དབུ་མ་མི་བསྐྱོད་པའི་རྩ་ཡིན་པས་ཁ་དོག་སྔོན་པོར་ཡོད་ལ། རོ་མ་འོད་དཔག་མེད་ཀྱི་རྩ་ཡིན་པས་ཁ་དོག་དམར་པོ་དང་། རྐྱང་མ་རྣམ་སྣང་གི་རྩ་ཡིན་པས་དཀར་པོ། །
6-16-67b


དེ་ཡང་སྤྱིར་བཏང་ངོ་། །དམིགས་བསལ་ལ་གཏུམ་མོ་འབར་བའི་ཚེ་ན་གང་དུ་འབར་བའི་རྩ་རྣམས་ཏིལ་མར་གྱི་མར་མེའི་མདོག་ལྟ་བུར་ཡོད་དོ། །དེ་ཡང་སྙིང་ཁའི་རྩ་མདུང་ཀྱི་ནང་གི་རྩ་དབུ་མའི་འོག་ཕྱོགས་ཀྱི་བུ་ག་ནི་ཁ་བྱེ་བ་ཆུ་ཤིང་གི་མེ་ཏོག་ལྟ་བུ་ཞིག་ཡོད་
དོ། །རྩ་མདུད་ཀྱི་ནང་གི་རྩ་དབུ་མའི་ནང་གི་ཧཱུཾ་ནི་ཁྱེད་པར་ལྔ་དང་ལྡན་པ་ཡིན་ཏེ། མི་མཐུན་པའི་རྟོག་པ་འཇོམས་པའི་དཔའ་བོ། །འདོད་པ་སྒྲུབ་པ་ལ་གཞན་གྱིས་མི་ཤིགས་པ་དང་། གཏུམ་མོ་ལ་བརྟེན་ནས་བདེ་བ་སྐྱེ་བས་ས་བོན་དང་། བྱང་སེམས་འཛག་པ་དང་། 
ཚད་ཡུངས་འབྲུ་ཙམ་ཡོད་པ་ཡིན་ནོ། །བདག་མེད་མ་དེ་ཨ་ཐུང་ནི། རྒོད་མ་ཁའི་མེ་ཞེས་བརྗོད་ཀྱང་གླིང་བཞི་པོ་རང་རང་གི་ལྷོ་ཕྱོགས་ཀྱི་ལྕགས་རི་ནག་པོའི་འོག་གི་མེས་ཆུ་སྐེམ་པ་དང་འདྲ་བར་ལྟེ་བའི་དམར་ཆ་འབར་བ་ནས་སྤྱི་བོའི་བྱང་སེམས་ཞུ་བའི་ལྷན་
སྐྱེས་ཀྱི་དགའ་བ་སྐྱེས་པའི་ཚེ་གཟུང་འཛིན་གྱི་རྣམ་རྟོག་གཅོད་པ་ཡིན་ནོ། །ལྟེ་བ་སོགས་སུ་ཨ་ཐུང་སོགས་བསྒོམ་པའི་རྒྱུ་མཚན་ནི། ནཱ་རོ་པཎ་ཆེན་གྱི་སློབ་མ་ཁ་ཅིག །སྤྱི་བོ་ནས་བྱང་སེམས་འབབ་པའི་ཚེ། དེ་ནས་འབབ་པའི་བྱང་སེམས་ལ་ཆ་བཞིར་
བགོས་པའི་ཆ་གཅིག་མགྲིན་པར་འབབ་པའི་ཚེ་བསྐམས་ཤིང་མགྲིན་པར་ཆ་གསུམ་ཡོད་པས། དེ་དང་བསྟུན་ནས་མགྲིན་པའི་ཨོཾ་ལ་རིང་ཆ་གསུམ་འགྱུར་དང་། སྙིང་གར་འབབ་པའི་ཚེ་ན་ཆ་གསུམ་དུ་བགོས་པའི་ཆ་གཅིག་བསྐམས་
པས་སྙིང་ཁའི་ཧཱུཾ་ལ་རིང་ཆ་གཉིས་དང་ལྡན་པ་དང་། ལྟེ་བར་སླེབས་པའི་ཚེ་ན་ཆ་གཉིས་པོའི་ཆ་གཅིག་བསྐམས་པས་ལྟེ་བའི་ཨ་ལ་རིང་ཆ་མི་འོང་བའི་རྒྱུ་མཚན་དེ་ཡིན་ནོ་གསུང་ངོ་། །སློབ་དཔོན་ཨ་བྷ་ཡས་ནང་
6-16-68a


གི་སྒྲ་འདོན་ལུགས་ལ་བརྟགས་ནས་བྱེད་དོ། །གསང་གནས་ནས་རླུང་སྟོད་ལ་འགྲོ་བའི་ཚེ་ལྟེ་བར་སླེབས་པ་ན་ཨ་ཐུང་གི་སྒྲ་སྒྲོག་པ་དང་། སྙིང་གར་སླེབས་པ་ན་ཧཱུཾ་རིང་ཆ་གཉིས་ཀྱི་སྒྲ་སྒྲོག་པ་དང་། མགྲིན་པར་སླེབས་པ་ན་ཨོཾ་
ལ་རིང་ཆ་གསུམ་དང་ལྡན་པའི་སྒྲ་སྒྲོག་པས་དེའི་ཆ་ནས་ལྟེ་བར་ཨ་ཐུང་། སྙིང་གར་ཧཱུཾ་རིང་པོ། །མགྲིན་པར་ཨོཾ་རིང་ཆ་གསུམ་དང་ལྡན་པར་བསྟན་པའི་དོན་དེ་ཡིན་ནོ། །མདོར་བསྡུ་ན་སྨད་ནས་སོང་བའི་རླུང་དེ་ལྟེ་བར་ཨ་ཐུང་གི་ཡུན་དང་། སྙིང་གར་ཧཱུཾ་གི་
སྒྲ་སྒྲོག་པའི་ཚེ་ཨ་ཐུང་ཉིས་འགྱུར་གྱི་ཡུན་དང་། མགྲིན་པར་ཨོཾ་གྱི་སྒྲ་སྒྲོག་དུས་ཨ་ཐུང་གསུམ་འགྱུར་གྱི་ཡུན་ཡོད་པས་ཧཱུཾ་ལ་རིང་ཆ་གཉིས་དང་། ཨོཾ་ལ་རིང་ཆ་གསུམ་ཡོད་དོ། །གཉིས་པ་སྐབས་སུ་བབ་པའི་དམིགས་པ་ངོས་བཟུང་བ་ནི། 
བསྐྱེད་རིམ་མཐར་ཕྱིན་ནས་རྫོགས་རིམ་བསྒོམ་པ་དང་། ཐུན་བཞིའི་ཚེ་ན་གསུམ་ལ་བསྐྱེད་རིམ་གཅིག་ལ་རྫོགས་རིམ་བསྒོམ་པ་དང་། བསྐྱེད་རིམ་ཐུན་བཞིར་བསྒོམས་པའི་ཐུན་རེ་རེའི་མཐར། རྫོགས་རིམ་སྒོམ་པ་དང་གསུམ་ལས། འདིར་ཐ་མའི་
ལུགས་ཡིན་ལ། དེ་ཡང་དང་པོར་ལྷ་གང་ཡིན་གྱི་མངོན་རྟོགས་བསྒོམས་ནས། དེ་རྗེས་བླ་མའི་རྣལ་འབྱོར་བསྒོམ་ཞིང་། བླ་མ་ལ་གསོལ་བ་བརྒྱ་རྩ་ཙམ་རེ་འདེབས་ལ། དེ་ནས་སྤྱི་གཙུག་ནས་ལྟེ་བའི་བར་གྱི་རྩ་གསུམ་པོའི་གནས་ཚུལ་དང་ཁ་
དོག་རྣམས་གསལ་འདེབས་ཤིང་། ལྟེ་བ་ན་རྩ་དམར་པོ་འདབ་མ་བརྒྱད་པ་གདུགས་ཁ་གྱེན་དུ་བསྟན་པ་ལྟ་བུ། སྙིང་ག་ན་རྩ་དཀར་པོ་འདབ་མ་བརྒྱད་པ་གདུགས་ཁ་སྦུབ་པ་ལྟ་བུ། མགྲིན་པ་ན་རྩ་དམར་པོ་འདབ་མ་བཅུ་དྲུག་པ་གདུགས་ཁ་གྱེན་ལ་
6-16-68b


བསྟན་པ་ལྟ་བུ། སྤྱི་བོ་ན་ཁ་དོག་སྣ་ཚོགས་པའི་རྩ་འདབ་སོ་གཉིས་པ་གདུགས་ཁ་སྤུབ་པ་ལྟ་བུ་གསལ་བཏབ་ནས། ལྟེ་བའི་རྩ་མདུད་ནང་དུ་ཟླ་བའི་གདན་སྟེང་དུ་ཨ་དམར་པོ་མགོ་གྱེན་ལ་ལྟ་བ། སྙིང་གའི་རྩ་མདུད་ནང་དུ་ཟླ་བའི་སྟེང་དུ་ཧཱུཾ་སྔོན་པོ་མགོ་ཐུར་
དུ་བསྟན་པ། མགྲིན་པའི་རྩ་མདུད་ནད་དུ་ཟླ་བའི་སྟེང་དུ་ཨོཾ་དམར་པ་མགོ་གྱིན་དུ་བསྟན་པ། སྤྱི་བོའི་རྩ་འདབ་ནང་དུ་ཟླ་བའི་སྟེང་དུ་ཧ་དཀར་པོ་མགོ་ཐུར་དུ་བསྟན་པ་རྣམས་བསྒོམས་ལ། གཙོ་ཆེར་ལྟེ་བའི་ཨ་ཐུང་ལ་སེམས་འཛིན་པ་ཡིན་ནོ། །ཡི་གེ་གཞན་
གསུམ་ལ་ཡང་སེམས་ཅུང་ཟད་རེ་འཛིན་ནོ། །གོང་གི་རྩའི་ཁ་དོག་བཤད་པ་དེ་རྣམས་འདབ་མ་རྣམས་ཀྱི་ཁ་དོག་ཡིན་ནོ། །ཡང་བསྒོམས་པའི་ཚེ་རྩ་མདུད་ཅུང་ཟད་གྲོལ་བའམ། ལྷོད་དེ་སོང་བར་བསམས་ནས་རྩ་མདུད་དེ་དག་གི་ནང་དུ་ཡི་གེ་དེ་དག་བསྒོམ་
པ་ཡིན་ནོ། །རྩ་འཁོར་བཞི་པོ་དེ་དག་ཀྱང་བསྡུ་ན་རོ་རྐྱང་དབུ་མ་གསུམ་དུ་འདུ། རྩ་འཁོར་གྱི་ཡི་གེ་བཞི་པོ་ཡང་བསྡུ་ན། ཨེ་ཝཾ་གྱི་ཡེ་གེ་གཉིས་སུ་འདུ་ལ། དེ་ཡང་ཨེ་ལ་ཡི་གེ་གཉིས་ལས། ཐབས་ཀྱི་རྩ་ནི་སྤྱི་བོའི་རྩ། ཤེས་རབ་ཀྱི་རྩ་ནི་ལྟེ་བའི་རྩ་
འཁོར་ཡིན་ཅིང་། དེ་གཉིས་ཀྱང་དབྱིབས་གྲུ་གསུམ་གྱི་རྣམ་པར་ཡོད་དོ། །ཝཾ་གྱི་རྩ་ལ་གཉིས་ལས། ཐབས་ཀྱི་རྩ་ནི་མགྲིན་པའི་རྩ་ཤེས་རབ་ཀྱི་རྩ་ནི་སྙིང་གའི་རྩ་འཁོར་ཡིན་ལ། དེ་གཉིས་ཀྱི་དབྱིབས་ཀྱང་གདུགས་ལྟར་ཡོད་དོ། །རྩ་འདབ་དེ་དག་ལ་ཡི་
གེ་འགོད་ཚུལ་ནི། རྒྱས་པར་བློས་མི་ལྕོགས་ན་གོང་དུ་བཤད་པ་ལྟར་གྱི་རྩ་འཁོར་བཞི་པོ་དེའི་ལྟེ་བ་ལ་ཡི་གེ་བཞི་འགོད་ལ། རྒྱས་པ་བློས་ལྕོགས་ན་ལྟེ་བའི་རྩ་འདབ་བརྒྱད་ལ་སྡེ་ཚན་བརྒྱད་ཀྱི་ཡི་གེ་རྣམས་འགོད་པ་ཡིན་ཏེ། སྤྱིར་ལྟེ་བ་ལ་རྩ་མདུད་
6-16-69a


ཀྱི་ཕྱི་རོལ་ལ་རྩ་འདབ་བཞི་དང་། དེའི་ཕྱི་རོལ་ཏུ་འདབ་མ་བརྒྱད། དེའི་ཕྱི་རོལ་ཏུ་དུས་འཁོར་བའི་ལུགས་ཀྱི་འདབ་མ་བཅུ་གཉིས། རྒྱུད་གཞན་གྱི་ལུགས་ལ་འདབ་མ་བཅུ་དྲུག །དེའི་ཕྱི་རོལ་ཏུ་འདབ་མ་རེ་བཞི་རྣམས་ཡོད་
པ་ལས། འདབ་མ་གཞན་དང་རོ་རྐྱང་གཉིས་བཏང་སྙོམས་སུ་བཞག་ལ། བར་མ་འདབ་མ་བརྒྱད་བྱས་ལ་བརྒྱད་པོ་དེ་དག་ཐམས་ཅད་ཀྱང་རྩ་དབུ་མ་ལ་ཟུག་པར་བསྒོམས་ལ། འདབ་མ་རྣམས་ལ་ཡི་གེ་འགོད་པའི་ཚེ་སྐབས་གང་དུ་ཡང་གཡས་
སྐོར་དང་། ཕྱོགས་ཀྱི་དང་པོ་ཤར་དང་། མཚམས་ཀྱི་དང་བོ་བྱང་ཤར་ནས་བྱེད་པའི་སྐབས་འདིར་ཤེས་དགོས་ཤིང་། དེ་ཡང་ཕྱོགས་ཀྱི་ཡི་གེ་རྣམས་སྔོན་དང་། མཚམས་ཀྱི་ཡི་གེ་རྣམས་རྟིང་ལ་འགོད་དགོས་ལ། དེ་ཡང་ལྟེ་བའི་ཤར་ལྷོ། 
ནུབ་བྱང་བཞི་ལ་རིམ་པ་བཞིན་ནོ། །ཨའི་སྡེ་ཚན་དབྱངས་ཡིག་བཅུ་དྲུག་དང་། ཀ་སྡེ་དང་། ཙ་སྡེ་དང་། ཊ་སྡེ་རྣམས་བཀོད་ནས། བྱང་ཤར། ཤར་ལྷོ། ལྷོ་ནུབ། ནུབ་བྱང་སྟེ། མཚམས་བཞིར་རིམ་པ་བཞིན་དུ། ཏ་སྡེ་དང་། པ་སྡེ་
དང་། ཡ་སྡེ་དང་ཤ་སྡེ་རྣམས་བཀོད་དོ། །སྡེ་ཚན་དེ་རྣམས་ཞིབ་པར་བཀོད་མི་ནུས་ན་ཕྱོགས་བཞི་དང་མཚམས་བཞི་ལ་རིམ་པ་ལྟར། ཨ་ཀ་ཙ་ཊ་རྣམས་དང་། ཏ་པ་ཡ་ཤ་སྟེ་བརྒྱད་འགོད་དོ། །སྙིང་གའི་རྩ་འདབ་ཀྱི་ཕྱོགས་བཞི་དང་། མཚོན་
བཞི་ལ་རིམ་པ་ལྟར་ཨ་ཨི་ཨུ་ཨེ་རྣམས་དང་། ཡ་ར་ལ་ཝ་སྟེ་ཐུང་ངུ་བརྒྱད་འགོད་དོ། །མགྲིན་པའི་རྩ་འདབ་བཅུ་དྲུག་ལ་སྙིང་གའི་ཡི་གེ་བརྒྱད་པོ་རིང་ཆ་ཅན། ཤར་ནས་བརྩམས་ཏེ་ཕྱོགས་བཞི་དང་། མཚམས་བཞི་ལ་རིམ་པ་ལྟར་
6-16-69b


འགོད་ཅིང་། དེ་ཡང་དང་པོར་ཤར་གྱི་འདབ་མ་ལ་འགོད། ལྷག་མ་རྣམས་རྩ་རེ་རེ་བར་སྐབས་སུ་བཞག་ནས་འགོད་དོ། །སྤྱི་བོའི་རྩ་འདབ་སོ་གཉིས་ལ་དབྱངས་ཡིག་བཅུ་དྲུག་འགོད། དེ་ཡང་ཤར་ལ་ཨ་ཐུང་བཀོད་ནས་དེ་ནས་རྩ་ལྷག་མ་རྣམས་
རྩ་རེ་རེ་བར་སྐབས་སུ་བཞག་ནས་འགོད་པ་སྔར་དང་འདྲའོ། །འདབ་མའི་རྩ་རྣམས་ཀྱི་ཡི་གེའི་ཁ་དོག་ནི། རང་རང་གི་ལྟེ་བའི་ཡི་གེའི་ཁ་དོག་དང་འདྲ་ཞིང་། ཡི་གེ་ཐམས་ཅད་ཀྱང་ཟླ་ཕྱེད་ཐིག་ལེ་ནཱ་ད་དང་བཅས་པ་ཡིན་ལ། དེ་དག་ཀྱང་བ་མོ་ལྟ་
བུའི་བདུད་རྩི་འཛག་པའི་རྣམ་པ་ཅན་སྒོམ་དགོས་པ་ཡིན་ནོ། །རྩ་མདུད་རྣམས་ཀྱི་ཡི་གེ་བསྒོམས་པའི་དགོས་པ་ནི་རྩ་མདུད་འགྲོལ་བའི་ཆེད་ཡིན་ཅིང་། འདབ་མའི་ཡི་གེ་བསྒོམས་པའི་དགོས་པ་ནི། འདབ་མའི་རླུང་སེམས་དབུ་མར་འདུ་བའི་དགོས་
པ་ཡོད་དོ། །གསལ་བྱེད་ཀྱི་ཡི་གེ་རྣམས་འགོད་པའི་དུས་སུ་ཀྵ་ཡིག་འགོད། མགོ་ཕྲེང་ལྔ་བཅུའི་དག་པ་སྦྱོར་བའི་ཚེ་ཀྵ་དང་བཅས་པའི་གསལ་བྱེད་སོ་བཞི་དང་། དབྱངས་བཅུ་དྲུག་དང་སྦྱོར་བ་ཡིན་ནོ། །རྩ་ནང་ནས་དབྱངས་རྣམས་ཁ་གྱེན་ལྟ་གསལ་
བྱེད་རྣམས་ཐུར་ལྟར་བཤད་པ་ནི། རོ་རྐྱང་དབུ་མ་གསུམ་གྱི་ནང་གི་ཡི་གེ་ཡིན་གྱི་འདབ་མའི་ཡི་གེ་མིན་ནོ། །འདབ་མ་རྣམས་ལ་ཡི་གེ་འགོད་ཚུལ་ནི། ཤར་གྱི་འདབ་མ་ལྟ་བུའི་དབང་དུ་བྱས་ན་ཤར་གྱི་འདབ་མའི་ཕྱིའི་ཕྱོགས་ནས་རིམ་པ་ལྟར་
ཡོད་དོ། །དེའི་ཕྱིའི་ཐ་མ་ན་ཨ་ཡོད་ལ། དེའི་མདུན་ཨཱཿརིང་ཆ་ཅན་ཡོད་ཅིང་། དེས་དབྱངས་ཀྱི་ཡི་གེ་གཞན་རྣམས་ལའང་ཡོད་ཚུལ་རིགས་འགྲེ་ལ། འདབ་མ་གཞན་རྣམས་ལ་ཀ་སྡེ་སོགས་སྡེ་ཚན་གཞན་གྱི་ཡི་གེ་རྣམས་ཀྱང་ཕྱི་ནས་ནང་
6-16-70a


ཕྱོགས་ལ་རིམ་པ་ལྟར་འགོད་པ་ཡིན་ནོ། །དེ་ཡང་ཡི་གེ་ལངས་པའི་རྣམ་པ་ཅན་གདོང་ལྟེ་བའི་ཡི་གེ་ལ་བསྟན་པའི་ཚུལ་གྱིས་འགོད་དགོས་སོ། །འདབ་མའི་ཡི་གེ་རྣམས་ལ་ཟླ་གདན་མ་བཤད་པས་མི་དགོས་ཤིང་། ཡི་
གེ་རྣམས་གཙོ་ཆེ་ཆུང་མ་གཏོགས་པ་དབྱངས་གསལ་འདྲེས་མ་ཡིན་ལ། དབྱངས་རྣམས་ཟླ་ཕྱེད་ཐིག་ལེ་རྣམས་གསལ་བྱེད་ཡིན་ནོ། །དེ་ཡང་ལྟེ་བའི་ཡི་གེ་རྣམས་ཀྱི་དབང་དུ་བྱས་ན་དབུས་ཀྱི་ཨཾ་ནི་དབྱངས་ཤས་ཆེ་ཞིང་གསལ་བྱེད་ཤས་ཆུང་། 
ཤར་གྱི་འདབ་མའི་ཡི་གེ་མ་གཏོགས་ཕྱོགས་ཀྱི་ཡི་གེ་རྣམས་ལ་དབྱངས་ཡིག་མེད་པས། འདབ་མ་རྣམས་དབྱངས་ཤས་ཆུང་ཞིང་གསལ་བྱེད་ཤས་ཆེའོ། །སྙིང་གའི་རྩ་མདུད་ཀྱི་དབུས་ཀྱི་ཧཱུཾ་ཡིག་ནི་གསལ་བྱེད་ཤས་ཆེ་ལ། མགྲིན་པའི་རྩ་
འདབ་ཀྱི་དབུས་ཀྱི་ཨོཾ་ཡིག་ནི་དབྱངས་ཤས་ཆེ་ཞིང་། དེ་གཉིས་ཀྱི་འདབ་མའི་ཡི་གེ་རྣམས་ནི་དབྱངས་གསལ་ཆ་མཉམ་པའོ། །སྤྱི་བོའི་རྩ་མདུད་ཀྱི་དབུས་ཀྱི་ཡི་གེ་ཧཾ་ནི་གསལ་བྱེད་ཤས་ཆེ། དེའི་འདབ་མའི་ཡི་གེ་རྣམས་ནི་དབྱངས་ཤས་ཆེ་
བ་ཡིན་ནོ། །དེ་ཡང་དབྱངས་རྣམས་ཀྱིས་བྱང་སེམས་དཀར་པོ་དང་། གསལ་བྱེད་རྣམས་ཀྱིས་བྱང་སེམས་དམར་པོ་མཚོན་ནོ། །འདབ་མའི་ཡི་གེ་རྣམས་གསལ་གདབ་ནས་དེ་ལ་སེམས་ཟིན་ནི་ལེགས་ལ། མ་ཟིན་ཀྱང་འཁོར་ལོ་བཞིའི་
དབུས་ཀྱི་ཡི་གེ་བཞི་པོ་ཤིན་ཏུ་ཕྲ་བ་ཡུངས་ཀར་འབྲིང་བོའི་ཚད་ཙམ་ལ་སེམས་ཟིན་ནས་གནས་ཆ་ཅུང་ཟད་རྙེད་ན་དེས་ཆོག་པས། དེ་རྙེད་རྙེད་དུ་བསྒོམས་ལ་ཡི་གེ་ལ་གསལ་སྣང་ཤར་བ་ན་དམིགས་པ་སྤོ་རན་གསུང་། དེ་རྙེད་ན་ཐིག་ལེ་
6-16-70b


ལ་དམིགས་པ་སྤོ་དགོས་པ་ཡིན་ནོ། །ཡི་གེ་ཕྲ་མོ་སྒོམ་པ་ནི་ཐིག་ལེའི་དམིགས་རྟེན་རྙེད་པའི་ཆེད་ཡིན་པའི་ཕྱིར་རོ། །ཐིག་ལེ་ལ་སེམས་ཟིན་པའི་དུས་སུ་འདི་ལྟར་བྱ་སྟེ། སྔར་གྱི་དམིགས་པ་རྣམས་རིམ་པ་ལྟར་གསལ་བཏབ་ལ། དེ་ནས་
སུམ་མདོ་ནས་ལས་ཀྱི་རླུང་གཡོས་པས་ལྟེ་བའི་ཨཾ་ལས་མེ་སྦར་ཏེ་སྦྱི་བོའི་འཁོར་ལོའི་བར་དུ་རྩ་དབུ་མའི་ནང་ན་ཡར་སོང་སྟེ། མེའི་འོད་ཀྱིས་སྤྱི་བོའི་རྩ་འདབ་ཀྱི་ཡི་གེ་རྣམས་ཞུ་ནས་འཁོར་ལོའི་ལྟེ་བར་འདུས་ཤིང་ཧཾ་ཡིག་ཞུ་ནས་ཐིག་ལེར་
གྱུར་པ་དེ་རིམ་གྱིས་མགྲིན་པར་བབས་ཏེ། དེའི་འོད་ཀྱིས་མགྲིན་པའི་ཡི་གེ་རྣམས་ཞུ་ནས་ཐིག་ལེ་དེ་ཉིད་ལ་ཐིམ་པ་ཡང་མགྲིན་པ་ནས་བབས་ཏེ་སྙིང་གར་སླེབས་པ་ན། དེའི་འོད་ཀྱིས་སྙིང་གའི་ཡི་གེ་རྣམས་ཞུ་ནས་ཐིག་ལེ་དེ་ཉིད་ལ་ཐིམ། 
ཡང་སྙིང་གནས་བབས་ཏེ་ལྟེ་བར་སླེབས་པ་ན་དེའི་འོད་ཀྱིས་ལྟེ་བའི་ཡི་གེ་རྣམས་ཞུ་ནས་ཐིག་ལེ་དེ་ཉིད་ལ་ཐིམ་པར་བསམས་ལ། དམིགས་པ་འཛིན་པའི་ཚེ་ཐིག་ལེ་དེ་ཉིད་སེམས་དང་ཐིག་ལེ་རླུང་གསུམ་འདུས་པ་ཡིན་སྙམ་པའི་མོས་པ་སྔོན་
དུ་བཏང་ཞིང་། བདེ་སྟོང་དབྱེར་མེད་དེའི་ངོ་བོ་ཡིན་སྙམ་དུ་བསམས་ནས་ལྟེ་བའི་རྩ་མདུད་ནང་དུ་ཐིག་ལེ་དཀར་ལ་དམར་བའི་མདངས་ཆགས་པ་ཡུངས་ཀར་འབྲིང་པོའི་ཆེད་ཙམ་ཁོ་ན་ལ་སེམས་འཛིན་ནོ། །དམིགས་རྟེན་འཆར་ཕྱིན་ཆད་ཡུངས་
ཀར་འབྲིང་པོའི་ཚད་ཙམ་ཁོ་ན་ལ་སེམས་འཛིན་གྱི་དེ་ལས་ཆེ་བ་དང་ཆུང་བ་གང་ལ་ཡང་མི་འཛིན་ནོ། །དམིགས་རྟེན་ཕྲ་མོ་འཆར་མ་ཐུབ་ན་གང་ཐུབ་ལ་སེམས་འཛིན་ནོ། །དམིགས་རྟེན་ཕྲ་མོ་ཤར་ནས་དེ་ལ་སེམས་ཅུང་ཟད་ཟིན་པའི་ཚེ་དམིགས་
6-16-71a


པ་འདི་མནན་ནས་བསྒོམ་པ་ཡིན་ནོ། །དེ་ཡང་རང་གི་སེམས་ཐིག་ལེ་ཕྲ་མོ་དེའི་ནང་དུ་ཐིམ་པའི་མོས་པ་བྱས་ནས་ཐིག་ལེ་དེ་ཉིད་ལ་སེམས་འཛིན། དེ་ལྟར་བསྒོམས་པས་རང་གིས་མས་དང་ཐིག་ལེ་གཉིས་ཀྱི་བར་ན་གཉིས་སྣང་ཕྲ་
མོ་ཙམ་ཡང་མེད་པར་ཐིག་ལེ་ལ་ཐིམ་པའི་ཉམས་སྣང་ཤར་བའི་ཚེ། ཐིག་ལེ་ལ་དམིགས་པའི་དགོས་པ་གྲུབ་པས་དམིགས་པ་སྤོ་རན་པ་ཡིན་ནོ། །ཡང་དེའི་དུས་སུ་དམིགས་པ་གོང་མ་རྣམས་བསྒོམས་པས་སེམས་ཐིག་ལེ་ལ་ཐིམ་པའི་ཉམས་མ་ཤར་
ཡང་། གོང་གི་དམིགས་པ་རྣམས་བསྒོམས་པའི་རྗེས་སུ་ཐིག་ལེ་ལ་སེམས་འཛིན་པའི་དུས་ཀྱི་སུམ་གཉིས་སམ། བྱེད་ཙམ་དུ་ཐུན་རེ་རེ་ལྟར་རླུང་ལ་དམིགས་ནས་བསྒོམ་པ་ཡིན་ཏེ། དེའི་སྒོམ་ཚུལ་ནི། རང་གི་གཞོགས་གཡས་གཡོན་དང་། སྟེང་འོག་
གི་རླུང་རྣམས་ལྟེ་བའི་འོག་གི་སུམ་མདོར་བསྡུས་ནས་འདུས་མ་ཐག་ཏུ་རླུང་དེ་རྣམས་དབུ་མའི་ནང་དུ་སླེབས་ཙམ་ནས་མེ་ལོང་ལ་ཧས་བཏབ་པ་ལྟར་ཡལ་བའི་དམིགས་པ་ཡང་ཡང་བྱེད་དོ། །དེ་ལྟར་བསྒོམས་པའི་དགོས་པ་ནི། རྩ་ལམ་སྦྱོང་བ་དང་། རླུང་
ལ་བརྟེན་པའི་གེགས་རྣམས་མི་འབྱུང་ཞིང་། མཉམ་པར་བཞག་པའི་དུས་སུ་སྣ་བུག་ཏུ་རྒྱུ་བའི་རླུང་འདི་དག་འགགས་ནས་འགྲོ་ཞིང་། །དེའི་འགགས་ཚུལ་ནི། དང་པོ་ཏིང་ངེ་འཛིན་ལ་མཉམ་པར་བཞག་པའི་ཚེ་དབུགས་གཉིས་གསུམ་རྒྱུ་བའི་ཡུན་ཙམ་དུ་
སྣ་སྒོར་མི་རྒྱུ་བ་ཡིན་ལ། དེ་ནས་གོམས་པ་ཇེ་ཆེར་སོང་ནས་རླུང་སྣ་སྒོར་མི་རྒྱུ་བའི་ཡུན་དེ་རིང་དུ་རིང་དུ་སོང་ནས་ད་གཟོད་སྔ་དྲོ་རེ་ཙམ་སྣ་སྒོར་མི་རྒྱུ་བ་འབྱུང་ངོ་། །དེ་ཡང་དང་པོར་རླུང་འགགས་པའི་ཚེ་སྣ་བུག་གི་རླུང་ལོག་ནས་རླུང་གིས་གྲོད་པ་གང་བའི་
6-16-71b


སྣང་བ་འབྱུང་ལ། དེ་ནས་གྲོད་པ་གང་བའི་སྣང་བ་ལོག་ནས་སྣ་སྒོར་རླུང་རྒྱུ་ན་རླུང་འགགས་ཚུལ་རྣལ་མ་མིན་ལ། གྲོད་པའི་ནང་གི་རླུང་དེ་མེ་ལོང་ལ་ཧས་བཏབ་པ་ལྟར་ཡལ་ནས་རླུང་སྣ་སྒོར་མི་རྒྱུ་ན་རླུང་དབུ་མར་ཆུད་པ་ཡིན་ལ། རླུང་དེ་ཡང་རྩ་བའི་རླུང་ལྔའི་ནང་ནས་
ཐུར་སེལ་གྱི་རླུང་ཡིན་ནོ། །དེ་ནས་གསར་རྙིང་གཉིས་ཡོད་པའི་རྙིང་པ་རྣམས་ཡལ་ནས་འགྲོ་བས་རྩ་དབུ་མའི་ནང་དུ་མི་འགྲོ་ཞིང་། རླུང་སྣ་སྒོར་རྒྱུ་བ་ལོག་པ་དང་། ལྟེ་བའི་འོག་གི་རྩ་དབུ་མའི་སྦུབས་ཁ་བྱེ་བ་དུས་མཉམ་དུ་འོང་ཞིང་། རྩ་ཁ་བྱེ་བ་དེའི་ནང་ནས་ཐུར་
སེལ་གྱི་རླུང་གསར་པ་སྐྱེས་ནས་དེས་ལྟེ་བའི་མེ་སྦར་ནས་མེ་དེས་སྤྱི་བོའི་བྱང་སེམས་ཞུ་བ་ཡིན་ནོ། །རླུང་དེའི་དབྱིབས་ནི་གཞུའི་དབྱིབས་ལྟར་ཡོད། དེ་ལྟར་རྩ་དང་རླུང་དང་ཐིག་ལེའི་བཤད་པ་མང་དུ་བྱས་ཀྱང་མཐར་གཏུགས་པ་ནི་ཏིང་ངེ་འཛིན་གྱི་མཐུས་སྟེང་གི་
སྣ་སྒོར་རྒྱུ་བའི་རླུང་ལོག་ནས། དེ་མ་ཐག་ཏུ་ལྟེ་བའི་འོག་གི་རྩ་དབུ་མའི་ཁ་བྱེ་ནས་དེའི་ནང་ནས་རླུང་གསར་པ་སྐྱེས་ཏེ། རྩ་དབུ་མའི་རླུང་དེས་རྩ་དབུ་མའི་ནང་གི་ལྟེ་བའི་མེ་སྦར་བའམ། ལྟེ་བའི་ཁྲག་འཕེལ་ནས་སྤྱི་གཙུག་བར་དུ་སོང་བས་རྩ་དབུ་མའི་ནང་གི་
སྤྱི་བོའི་བྱང་སེམས་ཞུ་ནས་འཁོར་ལོའི་གནས་རྣམས་སུ་བབ་པ་རིམ་པ་ལྟར་དགའ་བཞིའི་རྟོག་པ་རྒྱུད་རྣམས་ནས་བཤད་པ་བཞིན་སྐྱེ་བ་ཡིན་པས། རྩ་གཞན་གྱི་ནང་གི་ཁྲག་འཕེལ་བས་རྩ་གཞན་གྱི་བྱང་སེམས་ཞུ་བའི་བདེ་བ་སྐྱེ་བ་ཡོད་མོད། འདིར་
ནི་གཙོ་བོར་རྩ་དབུ་མའི་ནང་གི་རླུང་གིས་མེ་སྦར། དེས་སྤྱི་བོའི་བྱང་སེམས་ཞུ་དགོས་པ་ཡིན་ནོ། །དེས་ན་རྒྱུད་ཕལ་ཆེར་སྣ་སྒོའི་རླུང་རྒྱུ་བ་ལོག་མ་ཐག་ཏུ་རྩ་དབུ་མའི་ནང་དུ་རླུང་སོང་ནས་དེས་མེ་སྦར་བ་ཡན་མཐུན་ལ། སྣ་སྒོར་རླུང་རྒྱུ་བ་ལོག་པའི་ཐབས་
6-16-72a


སུ་དུས་འཁོར་བས་བུམ་པ་ཅན་བསྒོམ། གསང་འདུས་པས་རྡོར་བཟླས་བྱེད། བདེ་དགྱེས་པས་གཙོ་བོར་ཡི་གེ་དང་ཐིག་ལེ་དང་མེ་ལ་སེམས་འཛིན་པ་སོགས་གོང་དུ་བཤད་པ་འདི་རྣམས་བྱེད་དོ། །སྣ་སྒོའི་རླུང་རྒྱུ་བ་ལོག་ནས་གོང་དུ་
བཤད་པའི་རླུང་འགགས་པའི་མཐུས། རྡོ་རྗེའི་ནང་གི་དབུ་མ་ཞར་བ་དེ་ཁ་བྱེ་སྦུབས་ཅན་དུ་བྱས། དེའི་ནང་ནས་སྐྱེས་པའི་ཐུར་སེལ་གྱི་རླུང་གསར་བ་སུམ་མདོར་སོང་སྟེ། ཀྵ་ཡིག་གིས་མཚོན་པའི་མེ་དང་འདྲེས་ཐིམ་སྟེ་བསྐུལ་བས་བྱང་སེམས་ཞུ་
ནས་ཡས་བབས་དང་མས་བརྟན་གྱི་དགའ་བཞི་དམིགས་ཕྱེད་པར་བྱས་ནས་སྐྱོང་དགོས་པ་ཡིན་ནོ། །སྣ་སྒོའི་རླུང་རྒྱུ་བ་ལོག་པ་ནི། རྩ་དབུ་མའི་ནང་དུ་རླུང་སོང་ནས་ལྟེ་བའི་མེ་འབར་བའི་རྟགས་ཡིན་ལ། སྣ་སྒོར་རླུང་རྒྱུ་བའི་ཚེ་ལྟེ་བའི་མེ་འབར་བའི་འཕྲོ་
ཆོད་པའི་རྟགས་ཡིན་ནོ། །དེ་ནས་དམིགས་པ་སྔ་མ་རྣམས་བསྟན་པ་འདི་ལྟར་བསྒོམ་པར་བྱ་སྟེ། གོང་གི་དམིགས་པ་ཐུན་རེ་རེ་ལ་མ་ཆག་པར་བསྐྱངས་པའི་ངང་ནས་དམིགས་པ་དེ་དག་གི་མཐུས་སྣ་སྒོར་རླུང་རྒྱུ་བ་འགགས་པའི་མོས་པ་བྱས་ལ། སུམ་མདོ་
ནས་རྩ་དབུ་མའི་ནང་གི་རླུང་གཡོས་པའི་མཐུས་ཤེལ་གྱི་ཀོང་བུའི་ནང་ནས་མར་མེ་ཕྲ་མོ་འབར་བ་ལྟར་ཐིག་ལེ་ལས་མེའམ་འོད་ཟེར་གྱི་རེ་ཁ་ཕྲ་མོ་ཁ་དོག་དམར་སེར། རེག་བྱ་ཤིན་ཏུ་ཚ་བ་ལ་ཚད་སོར་གཉིས་ནས་བཞིའི་བར་གང་མོས་བྱས་ལ། མེ་
ཁྱད་པར་དེ་ལྟ་བུ་དང་ལྡན་པ་སྐྱེས་པའི་དམིགས་པ་བྱས་ཏེ། སྔར་གྱི་ཐིག་ལེ་མེ་དང་བཅས་པ་ལ་སེམས་འཛིན་པ་ཡིན་ནོ། །དེ་ཅུང་ཟད་བརྟན་པ་ན་ལྟེ་བའི་མེ་ཕྲ་མོ་དེ་སྤྱི་བོའི་བར་དུ་སོང་བའི་དམིགས་པ་བྱས་ལ། མེ་དེས་སྤྱི་བོའི་བྱང་སེམས་བཞུ་ནས་
6-16-72b


རྩ་དབུ་མའི་ནང་རྩ་འཁོར་རྣམས་ཀྱི་ལྟེ་བར་རིམ་པ་ལྟར་བབས་ནས། ལྟེ་བའི་རྩ་འཁོར་གྱི་དབུས་ཀྱི་སྔར་གྱི་ཐིག་ལེ་ལ་ཐིམ་པའི་མོས་པ་བྱས་ནས། ཡང་སྔར་གྱི་ཐིག་ལེ་མེ་དང་བཅས་པ་ལ་སེམས་འཛིན་ནོ། །དེ་ཅུང་ཟད་བརྟན་པ་ན་ཡར་འགྲོ་བའི་མེ་དེ་ཅུང་
ཟད་སྦོམ་དུ་སོང་བའི་དམིགས་པ་བྱེད་དོ། །ཡང་དེའི་སྐབས་སུ་མར་མེ་གཅིག་གིས་མཛོད་དུ་མ་སྣང་བར་བྱེད་པ་ལྟར། ལྟེ་བའི་མེ་དེ་རྩ་འཁོར་རྣམས་ཀྱི་ལྟེ་བར་སོང་བའི་ཚེ་དེའི་འོད་ཀྱིས་རྩ་འདབ་རྣམས་ཀྱི་ནང་གསལ་བའི་དམིགས་པ་བྱེད་ཅིང་། བློས་ལྕོགས་
ན་རྩ་སྟོང་ཕྲག་བདུན་ཅུ་རྩ་གཉིས་པོ་ཐམས་ཅད་མེའི་འོད་ཀྱིས་གསལ་བར་བྱས་པའི་དམིགས་པ་ཡང་དང་ཡང་དུ་བསྒོམ་མོ། །དེ་ལྟར་བསྒོམས་པ་ན་ཉམས་སྣང་ལ་བརྟེན་ནས་ལྐོག་གྱུར་ཅི་རིགས་ལུང་བསྟན་ཐུབ་པ་འབྱུང་ལ། འོད་ཀྱང་མངོན་ཤེས་མིན་
གསུང་། དེ་ནས་དམིགས་པ་དེ་དག་བརྟན་པ་ན་འདི་ལྟར་བསྒོམ་པར་བྱ་སྟེ། རང་གི་ལྟེ་བའི་མེ་དེ་ཡར་ལ་སྤྱི་བོའི་བར་ལ་སོང་། དེ་ནས་སྨིན་མཚམས་བར་དུ་འོངས་ནས་འབྱུང་བའི་ལམ་རང་གི་སྣ་བུག་གཡས་པ་ནས་ཐོན་ཏེ། ཕྱོགས་བཅུའི་བྱང་
སེམས་དང་ཉན་རང་དང་སེམས་ཅན་ཐམས་ཅད་ལ་ཕོག་པས་དེ་ཐམས་ཅད་ཀྱང་སངས་རྒྱས་སུ་གྱུར་པའི་མོས་པ་བྱས་ལ། དེ་ནས་དེ་རྣམས་དང་སྔར་སངས་རྒྱས་ཟིན་པའི་སངས་རྒྱས་རྣམས་ཀྱི་སྣ་བུག་གཡོན་པ་དེ་ནས་མེ་དེ་སོང་བས་སྨིན་མཚམས་
ནས་སྤྱི་བོའི་བར་དུ་སླེབས་ནས། དེ་ནས་མགྲིན་པ་དང་། སྙིང་ག་དང་། ལྟེ་བར་སོང་སྟེ་ལྟེ་བའི་ཐིག་ལེ་དཀར་པོ་དྲངས་ཏེ་སྤྱི་བོའི་བར་དུ་ཡར་བྱུང་། དེ་ནས་མར་སྨིན་མཚམས་བར་དུ་འོངས་ནས་སྣ་བུག་གཡས་ནས་ཐོན་ཏེ། རང་གི་འཇུག་པའི་ལམ་སྣ་
6-16-73a


བུག་གཡོན་ནས་ཞུགས། སྨིན་མཚམས་ནས་སྤྱི་བོའི་བར་དུ་སོང་སྟེ། དེ་ནས་མར་ལྟེ་བའི་བར་དུ་བབས་པས་སྔར་མེས་གདུངས་པའི་ཚ་བ་གསོས་ཏེ། སྔར་གྱི་རྩ་མདུད་ཀྱི་ཐིག་ལེ་ལ་ཐིམ་པའི་མོས་པ་ཡང་ཡང་
བྱས་ལ། ཡང་སྔར་གྱི་ཐིག་ལེ་མེ་དང་བཅས་པ་ལ་སེམས་འཛིན་ནོ། །མདོར་ན་གོང་དུ་བཤད་པའི་དམིགས་པ་ཟིན་པའི་རྟགས་དེ་དག་བྱུང་ན་རབ་ལ། མ་བྱུང་ནའང་དམིགས་པ་སྔ་མ་ཅུང་ཟད་བརྟན་པ་ན་དམིགས་པ་རྟིང་མ་ལ་ཕོག་ལ། དམིགས་པ་
དེ་རྣམས་འདྲིལ་བའི་ཚེ་རང་རང་གི་རྟགས་མ་རྫོགས་ཀྱི་བར་དུ་རྒྱུན་བསྲིངས་ནས་ཉི་མ་རེ་རེ་བཞིན་བསྐྱེད་རིམ་ཐུན་བཞིའི་མཐའ་ལ་བསྒོམ་པ་ཡིན་ནོ། །དེ་ལྟར་བསྒོམས་པས་ལྟེ་བའི་མེ་འབར་ཏེ། སྤྱི་བོའི་བྱང་སེམས་ཞུ་བ་གོམས་པ་རབ་ཏུ་
གྱུར་པའི་ཚེ་སྤྱི་བོའི་བྱང་སེམས་ཞུ་བ་དེ་ཉིད་ཀྱིས་ལྟེ་བའི་མེ་འབར་བའི་རྐྱེན་བྱེད་པས། དེ་ནས་མེ་དམིགས་སོགས་ལ་བལྟོས་མི་དགོས་པར་འབར་འཛག་འཁོར་སྡོམ་འབྱུང་བ་ཡིན་ནོ། །སྤྱི་བོའི་བྱང་སེམས་ཆུ་ཁམས་ཡིན་པས་ལྟེ་བའི་མེ་
དང་གཉིས་གཅིག་གིས་གཅིག་འཕེལ་བའི་གྲོགས་བྱེད་པ་མི་འཐང་དམ་སྙམ་ན། ལྟེ་བའི་མེ་ཟེར་ཀྱང་ངོ་བོ་ཁྲག་ཡིན་པས་ལྟེ་བའི་དམར་ཆོས་གཙོ་བོར་དྲོད་བསྐྱེད་ཅིང་། སྤྱི་བོའི་དཀར་ཆས་གཙོ་བོར་བདེ་བ་བསྐྱེད་ལ་ཆུ་ཁམས་
གཅིག་གིས་གཅིག་གི་གྲོགས་བྱེད་པ་ལ་འགལ་བ་མེད་དོ། །དེ་ནས་སྤྱི་བོའི་བྱང་སེམས་ལྟེ་བར་སླེབ་པའི་ཚེ་བསིལ་བར་འགྱུར་ཞེས་བཤད་ཀྱང་། བསིལ་བའི་དོན་དྲོད་ཆུང་དུ་སོང་བ་ལ་བྱེད་ན་དོན་འགངས་ཆེན་འཕྱུགས་པས་དེ་ལ་མི་བྱ་བར་བསིལ་
6-16-73b


བའི་དོན། སྤྱི་བོའི་བྱང་སེམས་ཀྱིས་ལྟེ་བའི་མེ་ཚིམ་པ་ལ་བྱའོ། །དམིགས་པ་དེ་དག་བསྒོམས་པའི་འབྲས་བུ་དགའ་བཞི་ངོས་བཟུང་བ་ལ་གཉིས་ལས། རང་བཞིན་བརྒྱད་ཅུའི་རྟོག་པ་འགགས་རིམ་དང་བསྟུན་ནས་དགའ་བཞི་ངོས་
འཛིན་པ་ནི། རྫོགས་རིམ་གྱི་ཡང་རེ་མཐོར་སླེབ་པའི་དགའ་བཞི་ངོས་འཛིན་ཚུལ་ཡིན་པས་རེ་ཞིག་འདིར་མི་འཆད་ལ། དེ་ན་འདིར་གནས་ཀྱི་སྒོ་ནས་དགའ་བཞི་ངོས་འཛིན་པ་ཡིན་ཏེ། དེ་ཡང་བུམ་ཅན་དང་རྡོར་བཟླས་དང་ཐིག་ལེའི་རྣལ་འབྱོར་མེ་དམིགས་
དང་བཅས་པ་གང་རུང་གི་མཐུས་རླུང་སྣ་སྒོར་རྒྱུ་བ་ལོག་ཅིང་། ལུས་ཀྱི་ནང་གང་བ་ལྟ་བུར་སྣང་བའི་ནང་གི་རླུང་མེ་ལོང་ལ་ཧས་བཏབ་པ་བཞིན་དུ་ཡལ་ཏེ་འགགས་པའི་མཐུས། སུམ་མདོའི་རླུང་གིས་ལྟེ་བའི་མེ་སྦར་ཞེས་སྤྱིར་བཏང་ལ་རགས་པ་ཙམ་
བརྗོད་ཀྱང་། ཞིབ་ཏུ་བཤད་པའི་རླུང་དེ་འགགས་པའི་མཐུས་རྡོ་རྗེའི་ནང་གི་རྩ་དབུ་མ་ཞར་བ་ཁ་བྱེ་ནས་སྦུབས་ཅན་དུ་བྱས་ལ། དེའི་ནང་ནས་སྐྱེས་པའི་ཐུར་སེལ་གྱི་རླུང་གསར་པ་སུམ་མདོར་སོང་སྟེ། ཀྵ་ཡིག་གིས་མཚོན་པའི་མེ་སྤར་ཏེ། དེ་དུས་སུ་
རླུང་དེ་དང་མེ་འདྲེས་པ་ལ་ཐིམ་ཞེས་བཤད་དོ། །དེ་ནས་སུམ་མདོའི་མེ་དེས་ལྟེ་བའི་ཨཾ་ཡིག་གིས་མཚོན་པའི་མེ་སྦར་ནས་མེ་ལྕེ་སྤྱི་བོའི་བར་དུ་སོང་སྟེ་སྤྱི་བོའི་བྱང་སེམས་ཞུ་ནས་དཀར་ཆས་མགྲིན་པའི་འཁོར་ལོའི་དབུས་སུ་སླེབ་པའི་བར་གྱི་དགའ་
བ་ནི། དགའ་བ་བཞིའི་ནང་ནས་དགའ་བ་སྐྱེས་པ་ཡིན་ནོ། །དེ་ནས་མགྲིན་པའི་རྩ་འཁོར་གྱི་དབུས་ཀྱི་ལྟེ་བའི་འོག་ཙམ་ནས་བཟུང་སྟེ། སྙིང་གའི་རྩ་འཁོར་གྱི་དབུས་སུ་དཀར་ཆས་སླེབ་པའི་བར་ནི་མཆོག་དགའ་སྐྱེ་དུས་ཡིན་ནོ། །སྙིང་གའི་རྩ་འཁོར་གྱི་
6-16-74a


དབུས་ཀྱི་ལྟེ་བའི་འོག་ཙམ་ནས་བཟུང་སྟེ། ལྟེ་བའི་འཁོར་ལོའི་དབུས་སུ་དཀར་ཆས་སླེབ་པའི་བར་ལ་ཁྱད་པར་གྱི་དགའ་བ་སྐྱེའོ། །ལྟེ་བའི་འཁོར་ལོའི་དབུས་ཀྱི་འོག་ཙམ་ནས་བཟུང་སྟེ། རྡོ་རྗེ་ནོར་བུའི་དབུས་སུ་སླེབས་ཏེ་
ཕྱིར་མ་འཕོས་ཀྱི་བར་ལ་ལྷན་སྐྱེས་ཀྱི་དགའ་བ་སྐྱེའོ། །ཟླ་བ་ལ་དཀར་ཆ་འཕེལ་བ་ཆ་བཅོ་ལྔ། དཀར་ཆ་རྫོགས་ནས་ནག་ཆ་ལ་མ་སླེབ་ཀྱི་བར་གྱི་ཆ་གཅིག་དང་བཅས་པས་ཆ་བཅུ་དྲུག་ཡོད་པ་དང་མཐུན་པར་སྤྱི་བོ་ནས་ནོར་བུའི་རྩེ་མོའི་བར་གྱི་
བྱང་སེམས་དཀར་པོ་ཆ་བཅུ་དྲུག་ཡོད་པས། བཅུ་དྲུག་པོ་དེ་ལ་བརྟེན་པའི་དགའ་བའམ་བདེ་བ་ཡང་ཆ་བཅུ་དྲུག་ཡོད་དོ། །ཆ་བཅུ་དྲུག་ཡོད་ཚུལ་ནི་སྤྱི་བོ་ནས་མགྲིན་པའི་བར་ལ་ཆ་མཉམ་བཞིར་བགོས་ནས་སྟེང་ནས་རིམ་པ་ལྟར་བཞི་ཆ་
རེའི་དུས་སུ་དགའ་བའི་དགའ་བ་སྐྱེ་བ་ལ་སོགས་པ་འོག་མ་རྣམས་ལ་ཡང་ཆ་བགོ་ཚུལ་དང་། དགའ་བ་གཞན་གསུམ་གྱི་སྐྱེ་ཆུ་ལ་ཡང་དེས་རིགས་འགྲེའོ། །ཡང་ཉི་མས་ཁྱིམ་བཅུ་གཉིས་བགྲོད་པ་དང་མཐུན་པར་སྤྱི་བོ་ནས་མགྲིན་པའི་བར་དང་། 
མགྲིན་པ་ནས་སྙིང་གའི་བར་དང་། སྙིང་ག་ནས་ལྟེ་བའི་བར་དང་། ལྟེ་བ་ནས་ནོར་བུའི་རྩེ་མོའི་བར་དེ་དག་ལ་ཆ་གསུམ་གསུམ་དུ་བགོས་ནས་གནས་བཅུ་གཉིས་པོ་དེ་དག་ཏུ་རིམ་པ་ལྟར་དམར་ཆས་སླེབས་པ་ན། དམར་ཆ་བཅུ་གཉིས་ལ་བརྟེན་
པའི་བདེ་བའམ་དགའ་བ་བཅུ་གཉིས་སྐྱེའོ། །དགའ་བ་བཅུ་དྲུག་དང་དགའ་བ་བཅུ་གཉིས་ཀྱི་ཁྱད་པར་རྣམས་ཉམས་མྱོང་གི་སྟེང་ནས་ཕྱེད་པ་དགོས་གསུང་། ཡས་བབས་ཀྱི་དགའ་བའི་སྐབས་སུ་སྤྱི་བོའི་བྱང་སེམས་དཀར་པོ་ནར་མར་འཛག་
6-16-74b


པའི་ངེས་པ་མེད་ཀྱང་སྤྱི་བོ་ནས་འོངས་པའི་བྱང་སེམས་དེས་ཞོར་ལ་རྩ་ནང་གི་བྱང་སེམས་གཞན་རྣམས་ཀྱང་དྲངས་ནས་འབབ་པས་གནས་འོག་མར་སླེབ་ཀྱིན་དགའ་བདེ་ཆེར་འགྲོ་བ་ཡིན་ནོ། །མས་བརྟན་གྱི་དགའ་བའི་
སྐབས་སུ་གནས་འོག་མ་ནས་གོང་མར་སླེབ་ཀྱིན་དགའ་བདེ་ཆེར་འགྲོ་བ་ཡིན་ལ། དེ་ཡང་ལྷན་སྐྱེས་ཀྱི་དགའ་བ་ལ་དགའ་བ་བཞིར་ཕྱེ་བའི་དགའ་བ་ནི་འོག་མ་ནས་རིམ་པ་ལྟར་ནོར་བུའི་རྩེ་མོ་ནས་ཡར་འོངས་ནས་ལྟེ་བར་སླེབ་པའི་ཚེ་ལྷན་སྐྱེས་ཀྱི་
དགའ་བའི་དགའ་བ་དང་། དེས་སྙིང་གར་སླེབ་པའི་ཚེ་ལྷན་སྐྱེས་ཀྱི་དགའ་བའི་མཆོག་དགའ་དང་། དེས་མགྲིན་པར་སླེབ་པའི་ཚེ་ལྷན་སྐྱེས་ཀྱི་དགའ་བའི་ཁྱད་དགའ་དང་། དེ་ནས་སྤྱི་བོའི་འཁོར་ལོའི་དབུས་སུ་སླེབ་པའི་ཚེ་ལྷན་སྐྱེས་ཀྱི་དགའ་བའི་ལྷན་
ཅིག་སྐྱེས་དགའ་སྐྱེའོ། །དེ་ནས་མས་བརྟན་ལ་ལྷན་སྐྱེས་མ་གཏོགས་པའི་དགའ་བ་མི་སྲིད་ཅིང་། ཡས་བབས་ལས་གཞན་པའི་དམིགས་པ་ཟུར་གཅིག་གིས་མས་བརྟན་གྱི་དགའ་བ་སྐྱེ་དགོས་སོ། །རླུང་སྦྱོར་འཁྲུལ་འཁོར་སོགས་མ་བྱས་ཀྱང་
མེའི་དམིགས་པ་བྱས་པ་ཉིད་ཀྱིས་རྩ་སྦྱོང་ནུས་པས་གེགས་མི་འབྱུང་བ་ཡིན་ནོ། །རླུང་བུམ་པ་ཅན་བསྒོམ་པ་སོགས་མ་བྱས་ཀྱང་ཐིག་ལེ་ལ་སེམས་ཟིན་ནས་སྟེང་འོག་གི་སྣ་སྒོ་ལ་རྒྱུ་བའི་རླུང་འགགས་པའི་མཐུས་ཐིག་ལེ་འཛག་མེད་དུ་
འཆིང་ནུས་པ་ཡིན་ཅིང་། གོང་གི་དམིགས་པ་དེ་རྣམས་བདེ་མཆོག་དང་ཀྱེེ་རྡོར་གྱི་མངོན་རྟོགས་དང་སྦྲེལ་ནས་བསྒོམས་ན་བོགས་ཆེ་བ་ཡིན་ནོ། །དགའ་བ་བཞིའི་ནང་ནས་ལྷན་སྐྱེས་ཀྱི་དགའ་བ་སྐྱེས་པའི་ཚེ་དེ་དང་སྟོང་ཉིད་སྦྱར་ནས་བསྒོམ་པ་
6-16-75a


ཡིན་ཅིང་། ལྷན་སྐྱེས་དེ་ཡང་ཡས་བབས་ཀྱི་སྐབས་སུ་གནས་དམའ་བ་ཙམ་གྱིས་བདེ་བ་ཆེ་ཞིང་། མས་བརྟན་གྱི་སྐབས་སུ་གནས་མཐོ་བ་ཙམ་གྱིས་དགའ་བདེ་ཆེར་འགྲོ་བས་སྟོང་ཉིད་སྒོམ་དུས་དང་ལྷན་སྐྱེས་དུས་གོ་
བས་དམིགས་ཕྱེད་པོ་བྱས་ནས་སྐྱོང་དགོས་པ་ཡིན་ནོ། །རླུང་འགགས་དུས་སུ་དབུ་མར་འདུ་བའི་བཤད་པ་ཡང་གྲུབ་ཆེན་འགའ་རེས་བྱས་པ་ཡོད་པས་འདབ་མའི་ནང་གི་ལས་རླུང་རྣམས་དབུ་མར་སོང་བའི་ཚེ། དབུ་མའི་ནང་དུ་སླེབས་ཙམ་ནས་ཡལ་
བའི་དམིགས་པ་བྱས་ནས་ཀྱང་འགལ་བ་མེད་ཅིང་། ཡང་དབུ་མའི་ཕྱི་རོལ་ཏུ་འགགས་པ་བྱས་པའི་ལུགས་ཀྱང་ཡོད་པས་དེ་གཉིས་གང་མོས་ཀྱིས་ཆོག་གསུང་ངོ་། །འདི་ནི་ཕག་ལོའི་དགུན་ནས་སྣེལ་པས་བཏེག་ནས་སེར་ཆོས་སྡིངས་སུ་བཞུགས་
དུས། བླ་མ་རིན་པོ་ཆེ་བློ་བཟང་གྲགས་པའི་ཞལ་སྔ་ནས། མ་རྒྱུད་ཀྱི་རྫོགས་རིམ་དཔྱིད་ཐིག་འདི་འཁོར་བརྒྱ་ཙམ་ལ་གནང་དུས་མི་བསྐྱོད་རྡོ་རྗེས་ཟིན་བྲིས་སུ་བཀོད་པ་ཡིན་ནོ། །དེ་ལྟར་དཀར་ཆག་ཐོའི་ཡིག་ཆུང་། 
དམ་ཚིག་རྡོ་རྗེ། རྡོ་རྗེ་མཁའ་འགྲོ ། ལྟ་བའི་ཡིག་ཆུང་། བསྐྱེད་རིམ་གྱི་ཡིག་ཆུང་། རྫོགས་རིམ་ལ་དམིགས་རིམ། ལག་རྗེས་ཉེར་མཁོ་སྤྱིའི་ཡིག་ཆུང་གསུམ། རྡོར་བཟླས། སེམས་དབེན། སྒྱུ་ལུས་ཏེ། སོ་སོའི་ཡིག་ཆུང་གསུམ་སྟེ་
བཅུ་གཅིག །བསྲེ་འཕོ་གཉིས། བོགས་འདོན་དང་གེགས་སེལ་གཉིས། རྣམ་གསུམ་རབ་དབྱེ་དང་། ཕྱག་རྒྱ་སྲོག་རྩོལ་ཏེ་བཅུ་བདུན། དེའི་སྟེང་དུ་གསལ་བྱེད་གསུམ་དང་ཉི་ཤུ། མ་རྒྱུད་ཀྱི་རྫོགས་རིམ། གཏུམ་མོ་ལ་བརྟེན་ནས་དགའ་བཞི་
6-16-75b


འདྲེན་ཚུལ་སོགས་ལ་གནང་ཆེ་བའི་ཡིག་ཆུང་སྟེ་དེ་ལྟར་ཉི་ཤུ་རྩ་གཅིག་གོ། །མ་རྒྱུད་ཡང་ན་རྫོགས་རིམ་གྱི་ཡིག་ཆུང་གསལ་བྱེད་གསུམ་གྱི་ནང་དུ་བསྡུས་ནས་རྫོགས་རིམ་གྱི་སྔོན་འགྲོ། ལུས་ཀྱི་བྱེད་བཅིངས་བརྟེན་པའི་ཡིག་ཆུང་། བོགས་
འདོན་གེགས་སེལ་ནང་དུ་བསྡུས་ནས་གེགས་སེལ་ལ་རླུང་གི་གེགས་སེལ། ཐིག་ལེའི་གེགས་སེལ་གཉིས་སུ་བྱས་ནས་ཉེར་གཅིག་ཏུ་བྱེད་པ་ཡང་ཡོད་དོ། །ལུས་དཀྱིལ་གྱི་ཡིག་ཆུང་སོགས་བསྐྱེད་རིམ་གྱི་ཉེར་
མཁོ་འགའ་ནི། ཐོག་མར་བསྐྱེད་རིམ་པའི་གོ་བ་རགས་པ་ཙམ་ཞིག་ནི་འདི་ཡིན་ལ། དེ་ལ་སྟོང་ཉིད་བསྒོམ་ཚུལ། ཆོས་སྐུ་ལ་ང་རྒྱལ་འཇོག་ཚུལ། སྟོང་པའི་ངང་ནས་ལྷ་སྐུ་བསྒོམ་ཚུལ། ལྷ་ལ་ང་རྒྱལ་འཇོག་ཚུལ་དང་བཞི་ལས། དང་པོ་ནི། ལྟ་
ཁྲིད་ལྟར་གྱི་རིག་པ་རྒྱས་པ་མི་བྱེད་པར་རྟགས་གང་ཡང་རུང་བ་ཙམ་ཞིག་ལ་བརྟེན་ནས་སྟོང་ཉིད་ལ་ངེས་པ་ཤུགས་དྲག་འདྲེན་པར་བྱེད་དགོས་ཤིང་། འཛིན་སྟངས་ཀྱི་ཤེད་ཆུང་དུ་སོང་ན་དཔྱད་པ་ཕྲ་མོ་ལ་བརྟེན་ནས་བློའི་ཤུགས་དྲག་པོ་འདྲེན་
པར་བྱའོ། །དངོས་པོ་མེད་པས་ཞེས་སོགས་ཀྱི་ཡིག་དོན་དང་སྤྱི་དོན་དྲན་པ་ཤིན་ཏུ་གལ་ཆེ། གཉིས་པ་ནི། ཡུལ་སྟོང་པ་ཉིད་དང་ཡུལ་ཅན་ཡེ་ཤེས་གཉིས་གཉིས་སྣང་ཕྲ་མོས་ཀྱང་བར་མ་ཆོད་པར་ཆུ་ལ་ཆུ་བཞག་པ་བཞིན་དུ་སོང་བའི་
མོས་པ་རྩེ་གཅིག་ཏུ་བྱེད་པ་ཡིན་ཅིང་། འདི་འདྲ་བའི་མོས་པ་ཡིད་བྱེད་ཀྱི་ཆོས་སྐུ་ནི་རྫོགས་རིམ་གྱི་སྐབས་སུ་ཆོས་སྐུའི་རྟོགས་པ་སྐྱེ་བའི་དགེ་རྩ་སྨིན་བྱེད་དུ་འགྲོ་ཚུལ་ལའང་ཤེས་པར་བྱའོ། །གསུམ་པ་ནི། སྟོང་པའི་ངང་ལས་ཞེས་པའི་གོ་དོན་
6-16-76a


ནི། གོང་གི་དམིགས་པ་མ་ཤོར་བའི་ངང་ནས་ལྷའི་སྐུར་ལངས་དགོས་པ་ཡིན་ནོ། །དཔེར་ན་ཤེལ་གོང་ཤིན་ཏུ་དྭངས་པ་ལ་རས་ཁ་དོག་སྣ་ཚོགས་པས་ཉེ་བ་ན། ཤེལ་དེའི་དྭངས་ཆ་མ་ཤོར་བའི་ངང་ནས་རས་དེའི་
གཟུགས་སྣ་ཚོགས་པ་ཤེལ་དེའི་ནང་དུ་འཆར་བ་བཞིན་དུ་རང་གི་སེམས་སྟོང་ཉིད་དང་གཉིས་སྣང་ཕྲ་མོས་ཀྱང་མཆོད་པར་སོང་སྙམ་པའི་འཛིན་སྟངས་ཤུགས་དྲག་དེ་མ་ཤོར་བའི་ངང་ནས། རང་ཉིད་ཞལ་གསུམ་ཕྱག་དྲུག་པའི་རྣམ་པ་ཅན་
གྱི་ལྷའི་སྐུར་བསྒོམ་དགོས་སོ། །བཞི་པའི་གནད་ནི། བྱིང་རྒོད་ཀྱི་དབང་དུ་མ་སོང་བ་ལ་འབད་སྙམ་པའི་འཕེན་པ་དྲག་པོ་གཏོང་བ་མ་གཏོགས་པའི་དམིགས་པའི་སྐབས་སུ་ཡང་དང་ཡང་དུ་བྱིང་རྒོད་ཀྱི་དབང་དུ་སོང་མ་སོང་རྟོག་པ་དང་། རྟགས་
ལ་བརྟེན་པའི་དཔྱད་པ་མང་དུ་མི་བྱའོ། །དེ་ལྟར་བྱས་ནས་སེམས་གཞན་དུ་མི་ཡན་ཅིང་། སྐབས་འདིར་ཞི་གནས་བསྒྲུབ་པར་བྱའོ། །རིག་པའི་དཔྱད་པ་ཅུང་ཟད་བྱེད་པ་ན་ཡང་ལྷའི་ཞལ་ཕྱག་རྒྱན་ལ་སོགས་པ་ལ་བྱེད་པ་ཡིན་ནོ། །ཆོས་ཐམས་
ཅད་རང་བཞིན་གྱིས་མེད་པའི་དམ་བཅའ་ངེས་པའི་ངེས་ཤེས་ཤུགས་དྲག་གི་ངང་ནས་ལྷའི་སྐུར་གསལ་བ་གཉིས་ཚོགས་སུ་དགོས་པ་ནི། ཟབ་གསལ་གཉིས་མེད་བསྒོམས་པ་བཞིན་ནོ། །གཉིས་སུ་མེད་པའི་དོན་ངོ་བོ་ཐ་དད་དུ་མེད་པ་ཡིན་
ནོ། །བྱིང་བ་དང་རྨུགས་པ་གཉིས་མི་གཅིག་པའི་སེམས་བྱུང་སོ་སོ་བ་ཡིན། རྨུགས་པ་ནི་གཏི་མུག་གི་ཆར་གཏོགས་པའི་སེམས་བྱུང་རྒྱ་ཡན་པོ་ལས་སུ་མི་རུང་བ་ཡིན་ལ། བྱིང་བ་ནི་དམིགས་པ་མི་གསལ་བའི་འཛིན་སྟངས་ཅན་
6-16-76b


དྭངས་ཆ་ཡོད་པ་ཙམ་གྱིས་མི་ཕན་ནོ། །རྒོད་པ་ནི་ཡུལ་ཡིད་འོང་སོགས་ལ་འཕྲོ་ཞིང་རྒྱུག་པར་བྱེད་པའི་འདོད་ཆགས་ཀྱི་ཆར་གཏོགས་པའི་སེམས་བྱུང་ངོ་། །འཕྲོ་བ་ནི་དམིགས་པའི་ཡུལ་དེ་ལས་གཞན་པའི་ཡུལ་ལ་འཕྲོ་བའི་སེམས་བྱུང་སྟེ་
ཕྱི་མ་གཉིས་ཀྱང་སོ་སོ་བ་ཡིན་ནོ། །དྲན་པ་ནི་དམིགས་པ་གང་ཡིན་དེ་ལ་སེམས་མ་ཡེངས་པར་རྩེ་གཅིག་ཏུ་འཛིན་པའི་མཚན་ཉིད་ཅན་ཡིན་ཅིང་། ཤེས་བཞིན་ནི་དམིགས་པའི་ཚེ་བྱིང་རྒོད་གང་རུང་སྐྱེས་མ་ཐག་ཏུ་ངོ་ཤེས་པར་བྱེད་པའི་
སེམས་བྱུང་ངོ་། །ལྷག་མོས་ལུས་ལ་སྡུད་པའི་ཚེ་རང་གི་ཐུགས་ཀའི་ཧཱུཾ་སྔོན་པོའི་འོད་ཟེར་ལྕགས་ཀྱུའི་རྣམ་པ་ཅན་གྱིས་ལུས་ཀྱི་མདུན་རྒྱབ་ཐམས་ཅད་ལས་ཅིག་ཅར་དུ་འཕྲོས་པས། རྣམ་སྣང་ནས་གནོད་མཛེས་ཀྱི་བར་གྱི་ལྷ་རྣམས་
སྤྱན་དྲངས་ནས་ལུས་ཀྱི་གནས་དེ་དང་དེར་དབང་པོ་ལ་སོགས་པ་དང་ངོ་བོ་དབྱེར་མེད་དུ་མོས་པར་བྱའོ། །ལྷག་མོས་འོད་གསལ་དུ་སྡུད་པའི་ཚེ་རྣམ་སྣང་ནས་གཙོ་བོའི་བར་རྣམས་བདེ་སྟོང་དབྱེར་མེད་ཀྱི་ངོ་བོར་གཉིས་སྣང་ཕྲ་མོས་ཀྱང་བར་
མ་ཆོད་པར་ཐིམ་པའི་མོས་པ་ཤུགས་དྲག་དགོས་སོ། །དེ་ནས་ཤཱུ་ནྱ་ཏཱའི་སྐབས་སུ་རིག་པས་དཔྱད་པ་མི་བྱེད་པར་གང་སྣང་ཆོས་སྐུ་ལ་ང་རྒྱལ་བཞག་པའི་ངང་ནས། གདན་དབུས་མའི་སྟེང་དུ་ཧཱུཾ་ལས་ཉི་མའི་དཀྱིལ་འཁོར་སོགས་
བསྐྱེད་ཅིང་། རྡོ་རྗེ་རྩེ་ལྔ་པའི་ལྟེ་བའི་ནང་དུ་ཨོཾ་དཀར་པོ། །ཨཱཿདམར་པོ། །ཧཱུཾ་སྔོན་པོ་གསུམ་སྟེང་ནས་སྟེང་དུ་བརྩེགས་པ་ཡིན་ནོ། །དེ་ལས་དང་པོའི་མགོན་པོར་ལྡང་བའི་ཚེ་ངས་སེམས་ཅན་གྱི་དོན་དུ་ལོངས་སྤྱོད་རྫོགས་པའི་
6-16-77a


སྐུར་ལྡང་བར་བྱའོ་སྙམ་པའི་འཕེན་པ་དྲག་པོ་གཏང་བར་བྱའོ། །སྤྲུལ་སྐུ་རྡོར་སེམས་སུ་ལྡང་བའི་ཚེ་ངས་སེམས་ཅན་གྱི་དོན་དུ་ཁམས་རགས་པའི་སྤྲུལ་སྐུ་གཟུང་བར་བྱའོ་སྙམ་པའི་འཕེན་པ་དྲག་པོ་དགོས་སོ། །ལུས་དཀྱིལ་
གྱི་གཙོ་བོ་མི་བསྐྱོད་པ་ཡིན་པས་གཙོ་བོ་དང་ཁྲོ་བོ་བཅུ་ལ་སྣ་ཚོགས་པདྨ་དང་ཉི་མའི་གདན་ལྷ་གཞན་རྣམས་ལ་ཡང་སྣ་ཚོགས་པདྨ་གོང་དུ་བཤད་པ་ལྟར་ལྷ་རང་རང་གི་གདན་བསྐྱེད་དགོས་སོ། །སྤྱི་གཙུག་ནས་སྐྲ་མཚམས་ཀྱི་མ་མཐའ་ཡན་ལ་
རྣམ་སྣང་བསྐྱེད་དགོས་པས། ཐོད་པའི་དབུས་སྤྱི་བོ་བདེ་ཆེན་འཁོར་ལོ་ཡོད་པའི་གནས་དེར་རྣམ་སྣང་བསྒོམ་པ་ཡིན་ཅིང་། རྩ་འཁོར་གྱི་ནང་དུ་བསྒོམ་པ་ནི་མ་ཡིན་ནོ། །དེ་ལྟ་བུའི་གནས་སུ་རྣམ་སྣང་བསྒོམས་པས་ནི། རྫོགས་རིམ་གྱི་སྨིན་བྱེད་
ཁྱད་པར་ཅན་དུ་འགྲོ་བ་ཡིན་པས་ཚུལ་འདི་གཞན་ལའང་ཤེས་པར་བྱའོ། །མགྲིན་པའི་གནས་དྲང་པོ་ན་རྩ་འཁོར་ཡོད་ཅིང་། དེའི་ཐད་དུ་འོད་དཔག་མེད་དང་། བྱང་ཁོག་གི་དབུས་སྙིང་གའི་ཐད་ཅུང་ཟད་རྒྱབ་ཕྱོགས་ལ་ཉེ་བ་ན་མི་བསྐྱོད་པ་དང་། སྙིང་
གའི་མ་མཐའི་དབུས་ཅུང་ཟད་རྒྱབ་ལ་ཉེ་བར་རིན་འབྱུང་། ཚང་ར་དང་བརླ་གཉིས་ཀྱི་དབུས་ཀྱི་སུམ་མདོ་གྲུ་གསུམ་གྱི་གནས་སུ་དོན་གྲུབ་རིན་འབྱུང་གི་མདུན་ཕྱོགས་སུ་སྤྱན་མ། མི་བསྐྱོད་པ་དང་འོད་དཔག་མེད་གཉིས་ཀྱི་མདུན་ཕྱོགས་སུ་མཱ་མ་ཀཱི་དང་
གོས་དཀར་མོ་གཉིས་བསྐྱེད། སྨིན་མཚམས་ཀྱི་ཐད་ཀྱི་ཐོད་པའི་ནང་དུ་རླུང་གི་རྩ་འདབ་ཡོད་པས་དེར་སྒྲོལ་མ་རྣམ་སྣང་ལས་ཅུང་ཟད་མཐོ་བར་བྱེད་དགོས་སོ། །རིགས་ལྔའི་སྐུ་ནི་ལྷ་གཞན་རྣམས་ཀྱི་སྐུ་ལས་ཅུང་ཟད་ཆེ་བ་དགོས་སོ། །ལྷ་ཞི་བ་རྣམས་
6-16-77b


ལས་འོད་ཟེར་རྣམ་པ་ལྔ་འཕྲོ་བ་དང་། ཁྲོ་བོ་བཅུ་ལས་འོད་ཟེར་མེ་འོད་ལྟ་བུ་སྟོང་གསུམ་ཁྱབ་པར་འཕྲོ་བ་རྣམས་ཀྱང་ཟེར་བ་འདུག་པ་དང་། སྤྲུལ་སྐུ་རྡོར་སེམས་ཀྱི་སྐུ་ལས་འོད་ཟེར་ཐོགས་རྡུགས་མེད་པར་འཕྲོ་བར་བསམ། མིག་འབྲས་གཉིས་ཀྱི་དབུས་སུ་ས་
སྙིང་དང་གཟུགས་རྡོ་རྗེ་མ་ཕྱག་དང་པོ་གཉིས་ཡབ་ལ་འཁྱུད་པ། མེ་ལོང་དམར་པོ་ངོས་གཉིས་པ་སྟོང་གསུམ་ཐམས་ཅད་འཆར་ཐུབ་པ་ལྟ་བུ་དང་། རྣ་བ་གཉིས་ཀྱི་རྩ་བར་ཕྱག་རྡོར་དང་སྒྲ་རྡོ་རྗེ་མ་པི་ཝཾ་སྔོན་པོ་འཛིན་པ། དེའི་སྒྲ་ཕྲ་མོ་ཙམ་གྱིས་ཀྱང་སྟོང་གསུམ་
ཐམས་ཅད་ཁྱབ་པར་བྱེད་ནུས་པ་སྙམ་བྱེད་པ་རང་གི་ཡིད་ལ་བདེ་བ་དཔག་ཏུ་མེད་པ་སྟེར་བར་བྱེད་པ་དང་། སྐྱེད་བྱེད་ཀྱི་ལྷ་རྣམས་ཡིད་ལ་དྲན་པ་ཙམ་གྱིས་དགའ་བ་བསམ་གྱིས་མི་ཁྱབ་པ་བསྐྱེད་པར་བསམ། རང་ཉིད་ཁ་ཤར་ལ་བལྟས་པའི་ཚེ་རྣ་བ་གཡས་
ཀྱི་ཕྱག་རྡོར་ཁ་ལྷོ་དང་། གཡོན་པའི་ཕྱག་རྡོར་ཞལ་བྱང་ལ་གཟིགས་སོ། །སྣ་བུག་གཉིས་ཀྱི་ནང་དུ་ནམ་སྙིང་དང་དྲི་རྡོ་རྗེ་མ། ལྕེ་གཡས་གཡོན་གཉིས་ཀྱི་དབུས་ཡར་མར་གཉིས་ཀྱི་ནང་ནས་ཅུང་ཟད་རྩེ་ཕྱོགས་ལ་ཉེ་བར་འཇིག་རྟེན་དབང་ཕྱུག་དང་རོ་རྡོ་རྗེ་མ་
སྒོམ་ཞིང་། དེ་ཡང་རླུང་རྒྱུ་བའི་རྩའི་གོང་དེར་སྒོམ་ཞིང་། གཞན་ལ་ཡང་ཅི་རིགས་སུ་ཤེས་དགོས་སོ། །འཇམ་དབྱངས་མཱ་མ་ཀཱིའི་སྟེང་དང་། ཡེ་ཤེས་སེམས་དཔའ་མི་བསྐྱོད་པའི་སྟེང་ངམ་དེའི་རྒྱབ་ཏུའམ་འཇམ་དབྱངས་ཀྱི་སྟེང་ཙམ་དུ་བསྒོམས་ཀྱང་རུང་། 
དེའི་ཐུགས་ཀའི་ཏིང་ངེ་འཛིན་སེམས་དཔའ་ནི་ཧཱུཾ་ཡིག་སྔོན་པོ་སྤུས་བྲིས་པ་ལྟ་བུ་ཤིན་ཏུ་ཕྲ་བ་འོད་ཟེར་འཕྲོ་བ་དང་། སྟོང་ཉིད་ངེས་པའི་འཛིན་སྟངས་ཅན་དུ་རང་གི་སེམས་འདྲེས་པ་ལྟར་དུ་ཅི་ནུས་སུ་སྦྱང་བ་གལ་ཆེ། རྡོ་རྗེ་ནོར་བུའི་དབུས་རྩ་མདུད་ཡོད་པའི་
6-16-78a


གོང་དེར་སྒྲིབ་སེལ་དང་རེག་བྱ་རྡོ་རྗེ་མ་བསྒོམ། རྡོ་རྗེའི་བུག་པ་ཕྱོགས་ལ་ཉེ་བར་རེག་བྱ་རྡོ་རྗེ་མ་བསྒོམས་པས་རྡོ་རྗེའི་སྒོར་ཞེས་བཏགས་པ་ཡིན་པས་རྣ་བ་སོགས་ལ་ཤེས་པར་བྱའོ། །རྡོ་རྗེའི་རྩ་བར་བདུད་རྩི་འཁྱིལ་བ་དང་། 
རྣམ་སྣང་གི་སྟེང་དུ་བྱམས་པ། དེའི་སྟེང་གཙུག་ཏོར་གྱི་ནང་དུ་འཁོར་ལོ་སྒྱུར་རྒྱལ་ཞལ་རྒྱབ་ལ་གཟིགས་ཤིང་ནམ་མཁའ་ལ་གཟིགས་པ་མེ་འོད་རབ་ཏུ་འབར་བ་འཕྲོ་བར་བསམས་ན་སྟེང་གདོན་གྱིས་མི་ཚུགས་པའི་དགོས་པ་ཡོད་དོ། །གནོད་
མཛེས་སོགས་ལའང་ཤེས་དགོས་སོ། །རྟ་མགྲིན་ཁའི་སྒོར་བསྒོམ་པར་གསུངས་པ་དོན་ལ་གནས་ལ་ལྕེའི་རྩ་བར་བསྒོམ་པ་ཡིན་ནོ། །ཚིགས་སུམ་བརྒྱ་དང་དྲུག་ཅུ་ལ་ཀུན་བཟང་དེ་སྙེད་བསྒོམ་ཞིང་། ཐ་མལ་གྱི་ཚིགས་འདི་ཡོངས་སུ་གྱུར་བ་ལས་
ལྷ་དང་བསྒོམ། ལག་པ་གཡས་ལ་གཤིན་རྗེ་གཤེད། སེན་མོ་ལ་ཡར་དབུ་བསྟན་པར་བསྒོམ་ཞིང་། གཡོན་ལའང་དེས་མཚུངས་སོ། །དཔུང་བ་གཡས་པའི་ཚིགས་ཀྱི་ཚུན་ནས་ནང་ཙམ་དུ་མི་གཡོ་བ་ཞལ་མདུན་ལ་ལྟ་བ། གཡོན་ལའང་དེས་
མཚུངས་སོ། །པུས་མོ་གཡས་ལ་དབྱུག་སྔོན་ཅན་དབུ་ཡར་ལྟ། ཞལ་མདུན་ལྟ། གཡོན་ལའང་དེས་མཚུངས་སོ། །རྐང་མཐིལ་གཉིས་སུ་གནོད་མཛེས་སྐུ་སྐྱིལ་ཀྲུང་བྱས་པའི་དབུ་ལོང་བུ་ཕྱོགས་ལ་བལྟའོ། །སྤྱི་བོར་ཨོཾ་དཀར་པོ་ལས་འོད་
ཟེར་དཔག་ཏུ་མེད་པ་རྣམས་འཕྲོས་པས། སྤྱན་མའི་ཚོགས་ནམ་མཁའ་གང་བ་སྤྲོས་པས། རྣམ་སྣང་གི་ཚོགས་སྤྱན་མ་དང་སྙོམས་པར་སྦྱོར་བའི་མདུན་ན་གནས་པ། རྡོ་རྗེའི་གུར་དང་། བླ་བྲེའི་འོག་ཐོག་གི་སྟེང་དུ་སྤྱན་དྲངས་ཏེ། དེ་རྣམས་
6-16-78b


སྙོམས་པར་ཞུགས་པའི་འོད་ཟེར་སྔོན་པོ་སོགས་བྱའོ། །གཞན་ལའང་མཚུངས་སོ། །རྡོ་ཁབ་ལེན། མགྲོན་བུ་བུ་མ། སྦྲང་སྨྱོན་ལ་སྦྱར་ནས་སྤྱི་བོར་བླུག་ན་འཕོ་བའི་མན་ངག་ཤིན་ཏུ་ཟབ་པ་ཡིན་ཟེར་བའང་འདུག །ཏིང་ངེ་འཛིན་སེམས་དཔའ་ནི་དཔེ་
དོན་གྱི་འོད་གསལ་གཉིས་ཀྱི་ངེས་དོན། ཡེ་ཤེས་སེམས་དཔའ་ནི་དག་མ་དག་གི་སྒྱུ་མའི་སྐུའི་ངེས་དོན་དང་། དམ་ཚིག་སེམས་དཔའ་ནི་སྤྲུལ་སྐུའི་མཚོན་དོན་ནོ། །དེ་ནས་རིག་མ་འདུ་བྱ་བ་དང་། ལྷ་འགོད་པ་སོགས་ནི་སྔར་དང་མཚུངས་སོ། །རལ་པ་
ཕྱེད་བཅིངས་སུ་བྱས་པ་ནི་སྐྲའི་ཕྱེད་ནས་བསྡུས་ཏེ་ལྕོག་བུ་བྱ་ཞིང་། དེ་ལྷག་རྒྱབ་ལ་འཕྱང་བའོ། །གཙོ་བོས་གཙུག་ཏོར་བཅིངས་པའི་དོན་ནི། ཕྲོག་ཞུ་ཚན་པ་གསུམ་བཅིངས་པའི་ཕྲོག་ཞུའི་རིན་པོ་ཆེའི་རྒྱན་རེ་རེས་ཀྱང་འོད་ཀྱིས་འཇིག་རྟེན་གྱི་
ཁམས་མཐའ་དག་སྣང་བར་བྱེད་ནུས་པར་བསམ། རྡོ་རྗེ་དང་པདྨ་འདུ་བྱ་བ་ནི། ཧཱུཾ་ལས་རྡོ་རྗེ་རྩེ་ལྔ་པ་ཨོཾ་རིང་པོས་མཚན་པ་ཡིན་ལ། རྭ་དབུས་མ་ནི་ནོར་བུ་ཡིན་ནོ། །ཨོཾ་དེའི་ཁ་དོག་དཀར་པོ་ནི། བྱང་ཆུབ་ཀྱི་སེམས་དཀར་པོ་དེ་མཚོན། མགོ་ནོར་
བུག་པའི་ཕྱོགས་སུ་བསྟན་པ་ནི། བྱང་སེམས་ཐུར་དུ་བབ་པ་དེ་མཚོན། པདྨའི་དབྱིབས་ནི་ཕྱལ་ཕྱལ་དུ་མི་བྱེད་པར་སྤུག་པོ་ཡིན། ཟེའུ་འབྲུ་ལ་ཨཱཿབསྒོམ་བྱ་ལ་བྱེད་དོ། །ཨཱཿནི་མགོ་ནང་དུ་བལྟའོ། །ཨཱཿཚེག་དྲག་ཅན་དམར་པོས་
ནི་ཡུམ་གྱིར་ཀྟ་དམར་པོས་དེ་མཚོན་ཅིང་། པདྨའི་འདབ་མ་རྣམས་ནི་འབྲེལ་བ་ཡིན་ནོ། །རིན་འབྱུང་གི་ང་རྒྱལ་དུ་འཕོས་ཏེ་དངོས་ཀྱི་རིག་མས་བྱ་བ་ཇི་ལྟར་བྱེད་པ་ལྟར་མ་མཆུ་འཇིབ་པ། འོ་བྱེད་པ། དམ་དུ་འཁྱུད་པ་དང་། གཙོ་བོའི་སྤྱན་
6-16-79a


སྣ་རྩེ་ལ་ཕབ་སྟེ། ཡུམ་གྱི་འཛུམ་པའི་ཉམས་དང་། སྤྱན་ཟུར་གྱིས་བལྟ་བ་ལ་གཟིགས་པ་དང་། གཙོ་བོའི་གཡས་ཞལ་གྱིས་ཡུམ་གྱི་གཡོན་ཞལ་ལ་བལྟ་བ་དང་། གཡོན་ཞལ་གྱིས་གཡས་ཞལ་ལ་བལྟ་བ་ལ་
སོགས་ཆགས་པའི་ཉམས་ལ་བརྟན་ནས་བྱང་སེམས་མ་ཞུ་བར་ཡང་སྙོམས་འཇུག་གི་སྔོན་དུ་སྟོང་ཉིད་ཀྱི་འཛིན་སྟངས་ཀྱི་ངང་ནས་བདེ་བ་དཔག་མེད་བསྐྱེད་པའི་མོས་པ་བྱས་ནས་རིང་དུ་སྦྱངས་ན། སྐབས་འདིར་ཡང་བདེ་སྟོང་གི་ཉམས་ཆེན་
པོ་བསྐྱེད་པ་ཡོད་དོ། །དེ་ནས་ང་རྒྱལ་འཕོས་ཏེ་ཧཱུཾ་རིང་པོ་གླུ་རུ་བརྗོད་པར་བྱའོ། །ཧཱུཾ་ནི་བདེ་བ་ཆེན་པོའི་ཡེ་ཤེས་ཀྱི་མཚོན་དོན་ཡིན་པས་ངག་ཏུ་བརྗོད་པའི་དགོས་པ་ཡང་སྐབས་འདིར་བདེ་བ་ཆེན་པོའི་ཡེ་ཤེས་བསྐྱེད་པར་བྱའོ་སྙམ་དུ་དྲན་པའི་
ཆེད་ཡིན་ལ། སྙོམས་འཇུག་གི་ཚེ་ཆོས་གསུམ་གྱི་སྒོ་ནས་བྱེད་དགོས་ཏེ། རང་དང་རིག་མ་ལྷར་གསལ་བ་དང་། སྙོམས་འཇུག་འདི་ལྟ་བུ་ཐབས་དམ་པའོ་སྙམ་པ་དང་། བདེ་བ་ཆེན་པོ་ལྷན་ཅིག་སྐྱེས་པའི་ཡེ་ཤེས་རྒྱུན་དུ་བསྐྱེད་པར་བྱའོ་
སྙམ་པའི་སྒོ་ནས་བྱེད་དགོས་ཏེ། དེ་ཡང་ཧཱུཾ་རྡོ་རྗེ་ལ་བཀོད་པ་མེད་ཀྱང་ངག་ཏུ་བརྗོད་པ་དང་། རྡོ་རྗེ་ཧཱུཾ་ལས་བསྐྱེད་པའི་སྒོ་ནས་ཐུགས་རྡོ་རྗེ་མཚོན། ཨོཾ་གྱིས་སྐུ་རྡོ་རྗེ། ཨཱཿས་གསུང་རྡོ་རྗེ་མཚོན་པས་སྐུ་གསུང་ཐུགས་ཀྱི་རྡོ་རྗེ་གསུམ་དབྱེར་མི་
ཕྱེད་པ་མཚོན་ནོ། །རྡོ་རྗེ་དང་པདྨ་ཕན་ཚུན་བསྲུབ་པའི་བྱ་བ་བྱེད་པའི་ཚེ་ཧཱུཾ་ངག་ཏུ་བརྗོད་པ་ཡིན། དོན་གྲུབ་ཀྱི་ང་རྒྱལ་དུ་འཕོས་ནས་རྡོ་རྗེའི་བུག་ཕཊ་སེར་པོས་བཀག་པའི་དམིགས་པ་བྱ། དེ་ཡང་ཁམས་ཕྱིར་འཕོ་བ་ནི་ཐུར་སེལ་གྱི་རླུང་གི་
6-16-79b


བྱེད་པ་ཡིན་ལ། ཐུར་སེལ་གྱི་རླུང་ཕྱིར་འཕོ་བ་ནང་དུ་འགོག་ཅིང་རེངས་པར་བྱེད་པ་ལ། ཕཊ་སེར་པོ་མགོ་ནང་དུ་བསྟན་པ་བསྒོམས་པ་ལ་རྟེན་འབྲེལ་ཁྱད་པར་ཅན་ཡོད་པ་ཡིན་ནོ། །དེ་ཡང་རྫོགས་རིམ་གྱི་སྐབས་མ་གཏོགས་འདིར་རླུང་ལ་དམིགས་
ནས་མི་སྒོམ་པར་དེ་མཚོན་བྱེད་ཀྱི་ཕཊ་སེར་པོ་བསྒོམ་པ་ཡིན། མཚོན་པའི་རྒྱུ་མཚན་ཡང་ཐུར་སེལ་གྱི་རང་མདོག་སེར་པོ་དང་། ས་དེ་ཁམས་བཞིའི་ནང་ནས་སེར་པོ་ཡིན་པའི་སྒོ་ནས་བསྟན་པས་ནི་ཐུར་སེལ་གྱི་རླུང་ནང་དུ་རེངས་པར་བྱེད་པ་མཚོན་
ནོ། །རྟེན་འབྲེལ་དེ་རྣམས་ལ་བརྟེན་ནས་ཁམས་ཕྱིར་མི་འཕོ་བར་ནང་དུ་འཛིན་ནུས་པ་ཡིན་ཏེ། དེ་སྐྱེད་པར་བྱེད་པའི་རླུང་གི་ནུས་པ་ནང་དུ་རེངས་པའི་ཕྱིར་རོ། །བུ་ག་ཕཊ་ཀྱིས་འགོག་མི་འགོག་གི་དུས་གཉིས་ལས། མི་འགོག་པའི་དུས་ནི་ལྷའི་གསལ་
སྣང་བརྟན་པོ་བྱུང་བའི་ཚེ་ལས་རྒྱ་དང་ཡེ་རྒྱ་གང་ཡིན་ཀྱང་སྙོམས་འཇུག་གི་ཚེ་ན་རང་གི་རིག་མའི་དྲོད་དང་པདྨའི་རྩ་གཉིས་ཀྱི་མར་སྣ་ཕྲད་པའི་དམིགས་པ་བྱས་པ་ལ་བརྟེན་ནས། ནང་དུ་སིམ་པའི་རྣམ་པ་ཅན་གྱི་བདེ་བ་དཔག་ཏུ་མེད་པ་སྐྱེས་པའི་མོས་
པ་བྱས་པ་ལ་བརྟེན་ནས་ཁམས་ཞུ་ནས་བབ་པ་ནོར་བུའི་རྩེར་སླེབ་པ་ཕྲད་པའི་ཚེ་མི་འགོག་གོ། །བདེ་བ་སྐྱེས་པའི་ཚེ་སྟོང་ཉིད་ངེས་པའི་འཛིན་སྟངས་ཤུགས་དྲག་ངང་ནས་བདེ་སྟོང་དབྱེར་མེད་དུ་སྦྱར། ལྟ་བ་རིང་དུ་བསྒོམ། དེ་ནས་གོང་བཞིན་དུ་བདེ་
སྟོང་དབྱེར་མེད་ཀྱི་ངང་ནས་རྟེན་དང་བརྟེན་པའི་དཀྱིལ་འཁོར་གསལ་བཏབ་ལ། ཐམས་ཅད་དབྱེར་མི་ཕྱེད་པའི་ངོ་བོར་མོས་བ་ཤུགས་དྲག་བྱེད་པ་བསྐྱེད་རིམ་པའི་བདེ་སྟོང་སྦྱོར་ལུགས་ཁྱད་པར་ཅན་ཡིན་ནོ། །བསྐྱེད་རིམ་གྱི་སྐབས་སུ་ཡབ་ཡུམ་
6-16-80a


གྱི་རྡོ་རྗེ་དང་པདྨའི་ནང་འོད་ཟེར་ལྔས་གང་བར་བསྒོམ་པ་ནི། དོན་ལ་རྫོགས་རིམ་གྱི་སྐབས་སུ་ཡབ་ཡུམ་གྱི་དྷཱུ་ཏཱིའི་ལམ་ནས་རླུང་འོད་ཟེར་ལྔ་བསྒོམ་པ་ནི་ཐིག་ལེ་གོང་བུའི་གཟུགས་སུ་གྱུར་ནས་གསང་གནས་སུ་འབབ་པའི་
སྨིན་བྱེད་ཁྱད་པར་ཅན་དུ་འགྱུར་རོ། །སྒྲོན་གསལ་ལས། རླུང་ཐིག་ལེར་འགྱུར་ཞེས་གསུངས་པ་ལྟར་མཐོན་པོ་ཞིག་ནས་ཡིན་པ་འདུག་གོ། །ལུས་དཀྱིལ་གྱི་ཡིག་ཆུང་མན་ཆད་འདི་ཡིག་ཆུང་ཉེར་གཅིག་གི་ནང་དུ་གཞན་ནས་ཁ་བཀང་སྟེ་འདིར་
ཕྱོགས་གཅིག་ཏུ་བྲིས་པ་ཡིན་ནོ། །མངྒ་ལཾ། །
6-16-80b


empty page